Наградаос - даноосызлы Ӵапак Выль ар азьын Удмурт Республикаысь пӧртэм предприятиосысь ужасьёс кун наградаос басьтӥзы. Россилэн Президентэзлэн оскем муртэз В. Балакин, Кун Кенешлэн но Правительстволэн Тӧрооссы А. Волков но Н. Ганза Россия Федерацилэн Президентэзлэн нимыныз "За заслуги перед Отечеством" орденлэсь 2-тӥ степенё медальзэ, Эшъяськон орден, дано ним сётъязы. Нош Россиысь Наукаосъя Академилэн Урал люкетысьтыз Прикладной механикая институтлэн директорез Алексей Липанов кык награда басьтӥз. Наука но техника удысын бадӟымесь азинсконъёсыз понна, Россиысь Правительство 1998- тӥ арлы премизэ сётӥз, нош трос аръёс ӵоже ужамез но калык кусыпъёсты юнматэмез понна Эшъяськон орденэн пусъемын. А. АНДРИЯНОВ. Сюресъёс вольытэсь мед луозы Шаугетыса сылӥсь нюлэс дуре интыяськемын Пичи Пурга ёросысь Пуро (Байситово) гурт. Тунсыко инкуазьлы луыса ик, дыр, отысь потэмын крезьгурчи но, кылбурчи но, миссионер но - оглом пӧртэм удысъёсын дано луэм адямиос. Шумпоттэ соиз: калыкез отын тупаса, огкылысь улэ. Пуро гуртэз туж ик бадӟым уд шуы. Дас классъем школазы ӧвӧлысь, пиналъёс вазен артысь Аксакшур гуртэ дышетскыны ветлылӥзы. Дас одӥг иськемез кӧня лёгано луылӥзы соос! Со кузь сюресъёс ик Иван Машевез вуттӥзы, дыр, бадӟым спортэ но. Элькунысьтымы пӧртэм интыосын капчи атлетикая ӵошатсконъёсын Иванлэн нырысетӥ инты трос пол басьтылэмез котькинлы тодмо ини. Пияшлэн чырткем бызьылэмез сӥ-данлы луиз. Табере Пуроын укмыс классъем школа усьтӥзы. Иван Михайлович отын нылпиосты мугорзэс кыдатыны дышетэ. Озьыен, солэн спортэн эшъяськемез юнме ӧз луы... Алигес Иванлы куамын арес тырмиз. Трос-а со, ӧжыт-а? Та лыдпусэз данъямон юбилей но уд шуы на. Но калыкез паймытӥз со. Аксакшур администрацилэн тӧроезлэн Валерий Иванович Тихоновлэн кичӧлтэмез улсын Иванлэн вордӥськем нуналэзлы сӥзем туж бадӟым ужрад ортчиз. Спортэз дас аресысен витьтон вить аресозь яратӥсьёс Пуроысен Аксакшурозь дас одӥг иськеме бызизы. Та пуро марафонэ витьтонлэсь ятыр куноос пыриськизы. Соос лыктэмын вал мукет ёросъёсысь но сьӧр гуртъёсысь но. Куноос пӧлын вал Завьялысь спортъя мастер Василий Григорьев, Можга ёросысь шаплы спортсменъёс. Марафонын вормисьёслы данъян грамотаос но синпель кузьымъёс сётъязы. Ӝӧк сьӧрын, Аксакшур клубысь сцена вылын востэм, мукетъёсызлэсь номырин висъяськисьтэм, зӥбыт удмурт пияш пуке (нырысьсэ мон сое адӟисько). Залысь тросэз со шоры синмаськыса но вожъяськыса учко, дыр. Кыӵе пияшлэн азинсконъёс басьтэмез уз поты. Уката ик - спортын. Иванлы тӥни сыӵе быгатонлык ачиз инмар сётэм, луоз. Нырысь-валысь Иван школаын, ёросъёсын ортчылӥсь ӵошатсконъёсын огъёзъёссэ азьпалтылӥз, собере элькунысь гурт шудонъёсын спортъя мастеръёсты но кандидатъёсты вормылӥз. Со ортчем сюресъёслэн пытьыоссы туннэ син азьын: кӧня медальёс, грамотаос, синпель кузьымъёс... Кызьы уз шумпоты анай сюлэм: курадӟыса будэтэм пиезлэн собыдӟа вормонъёсыз! Валерий Иванович ачиз но спортэн эшъяське бере (со Челябинскысь спортъя институтэз йылпумъяз), Иванлэсь быгатонлыксэ шӧдыса, солы нимысьтыз саклык висъяны кутскиз. Та паймымон праздникез но Валерий Иванович ас мылкыдызъя ортчытыны малпаз: калык мед тодоз, мед адӟоз, соослэн но сыӵе данъяськымон адямиоссы вань шуыса. Евгений Иванович Архипов, ёрос администрацилэсь ужъёссэ радъясь, та пиослэн физкультуралы азьвыл дышетӥсьсы, шуиз: "Гурт калык тау карыны кулэ, соослэн ваньзэ синйылтыны быгатӥсь кивалтӥсьсы вань шуыса. Тихонов ке ӧй луысал, Машевлэсь куамын арес тырмонзэ нокин ӧй тодысал. Ӵемысь-а адӟод таӵе аспӧртэм ужрадъёсты? Уд. Котьмарлы но мылкыд кулэ". Иванлэн классэн кивалтӥсез В.П.Кучуганова но чебер кылъёсын гинэ вераз пияшлэн будэм сюресэз сярысь. Пичи Пурга ёрос администрацилэн тӧроезлэн воштӥсез В.И.Панфилова ивортӥз Иван Машевлэсь тусбуйзэ ёросысь Данъян книгае пыртон сярысь. Со книгае Аксакшурысь одӥгез спортсмен шедиз ини. Со - Павел Збитнев, дуатлонъя тужгес кужмоез спортсмен. Со "Дружба" эштосын дурись луыса ужа. Иванлы трос шуныт кылъёс, кузьымъёс, ненег пальпотонъёс, азьланяз бадӟымесь вормонъёс сӥземын вал. Куамын арес - сяськаян вакыт гинэ ай. Спортсмензэс данъяса, Пуро школаысь дышетӥсьёс нимысьтыз концерт дасяллям. Озьы ик асьсэлэсь кырӟаны- вераны быгатэмзэс возьматӥзы Аксакшурысь самодеятельносте ветлӥсь артистъёс но. Шумпотоно: улонамы адямилэсь мылкыдзэ ӝутыны быгатӥсьёс вань на. Та аспӧртэм праздникез ортчытыны юрттӥз ужбергатӥсь П.В.Ӵушъялов. Озьыен, адями ачиз сярысь гинэ уг сюлмаськы, вӧзысь муртэзлэн но сюлэмаз пичи ке но шуныт тылгизьы кенжытыны тырше. Любовь Тихонова. Удмурт Республикаысь Кун Кенешлэн ПОСТАНОВЛЕНИЕЗ Удмурт Республикаысь Кун Кенешлэн Президиумез ивортэ: Удмурт Республикаысь Кун Кенешлэсь кыкетӥ созывезлэсь тямысэтӥ сессизэ люкано 2000-тӥ арын 8-тӥ феврале 10 часысен ӵукна. Удмурт Республикаысь Кун Кенешлэн Тӧроез А.А.Волков. Ижевск, 1999-тӥ арын 29-тӥ декабре. � 98-ИИ. *** Сессиын эскерыны чакламын "Уджмурт Республикаын муниципальной служба сярысь" Законэ воштонъёс но ватсанъёс пыртон сярысь" Законлэн но Кун Кенешлэн "Удмурт Республикаысь инкуазез утёнъя внебюджетной фонд сярысь" постановлениезлэн инъетъёссы но мукет ужпумъёс. Мар быгатӥ - лэсьтӥ 2000-тӥ аре выжон азьын Россилэн Президентэз Борис Ельцин ваньместы паймытӥз аспӧртэм вамышеныз. Кызьы дунъяло со "кузьымез" адямиос? Таӵе юанэн вазиськи куд- огезлы. Гульнара Мустахимова, дышетӥсь: - Инмарлы тау. Аня Афанасьева, студентка: - Шонер лэсьтӥз. Тазалыкез но лябгес ни ук. Арлыдыз но бадӟым ини. Люба Шкляева, медсестра: - Молодец! Туж умой лад-лад визьмо вераськиз. Янгышъёссэ валаса, лэся, простить карыны куриз. Ас интыяз оскымон адями кельтӥз. Виталий Караваев, рабочий: Ельцинэз сыӵе-таӵе шуиськомы вал. Чеберен лыктӥз, ӟечен кошкиз. Слава Мальцев, военной пенсионер: - Туж кужмо, зол вамыш лэсьтӥз. Лэсьтэм ужъёсыз понна солы йыркуръяськисько ке но вал, табере со сярысь малпанъёсме воштӥ. Тӥни таӵе ӟеч малпанъёсын адямиос пумитазы Б. Ельцинлэсь ужысьтыз кошкемзэ. Азьпалан - нош ик йырез поромытӥсь быръён. Кин луоз президент? Путин?.. Юалляськиз Светлана ЯКОВЛЕВА. Удмурт Республикаысь бюджетэ тыриськонъёсъя 1999-тӥ арын воштонъёс ортчытон сярысь Удмурт Республикаысь Правительстовлэн ПОСТАНОВЛЕНИЕЗ Россия Федерацилэн Кивалтэтэзлэсь 1999-тӥ арын 3-тӥ сентябре кутэм "Организациослэсь федеральной бюджетэ вытъёсъя но тыриськонъёсъя пунэмен басьтэмъёссэс берыктонъя, озьы ик ватсаса пеняос но штрафъёс тыронъя 1999-тӥ арын радлыкез кӧня ке воштон но солы дыр тупатон сярысь" 1002 номеро постановленизэ быдэсъяса, Удмурт Республикаысь Правительство пуктэ: 1. Организациослэсь, предприятиослэсь бюджетэ вытъёсъя но тыриськонъёсъя пунэмен басьтэмъёссэс берыктонъя, озьы ик ватсаса пеняос но штрафъёс тыронъя радлыкез воштон ортчытӥське, Россия Федерациысь Кивалтэтлэн 1999-тӥ арын 3-тӥ сентябре кутэм 1002 номеро постановлениеныз юнматэм радлыкез лыдэ басьтыса. 2. Удмурт Республикалэн бюджетаз пунэмъёсты тыронъя радлыкез воштонъя куриськонъёс вытъя ёзъёсын кутӥсько 2000-тӥ арын 1-тӥ январёзь. 3. Удмурт Республикаысь Коньдон ужпумъёсъя министерстволы организациослэсь бюджетэ вытъёсъя но тыриськонъёсъя пунэмен басьтэмъёссэс берыктонъя, озьы ик ватсаса пеняос но штрафъёс тыронъя радлыкез воштон сярысь дурбасьтыса вазиськон (ходатайство) сётъяны лэзёно но юридической лицоосын пунэм тыронъёсъя тупатэм дыр пумысен кенешоно. 4. Удмурт Республикаысь Коньдон ужпумъёсъя министерстволэн нимысьтыз вазиськонэз вань ке, юридической лицоослэн бюджетэ гинэ одно тыриськонъёссыя радлыкез воштон сярысь решение куто Россия Федерациысь Вытъёсъя но тыриськонъёсъя министерстволэн Удмурт Республикаысь ёросъёсысь но городъёсысь инспекциосыз, выт тырисьлэсь пусйиськон интызэ чакласа. 5. Удмурт Республикаысь Коньдон ужпумъёсъя министерстволы, тыриськон радлыкез воштонъя дурбасьтыса вазиськон сётъякуз, Россия Федерациысь Вытъёсъя но тыриськонъёсъя министерстволэн ёросъёсысь но городъёсысь инспекциосызлы, элькун бюджетэ юридической лицоослэсь вытъёсъя но тыриськонъёсъя пунэмъёссэс берыктонъя, озьы ик ватсаса пеняос но штрафъёс тыронъя чаклам дырез воштон пумыен решение кутыкузы, тыриськонлэсь быдӟалазэ тупатоно, пунэмлэсь люкетсэ воштӥськонъёс ортчытозь тырыны луонлык сётыса, элькун ваньбуретэ пунэм тырисьлэсь интыяз кыллись но интыяз кыллисьтэм котырзэ (имуществозэ) сётон амалэз кутыса. 6. Юридической лицоослэн огдыре пӧртэм интыосысь бюджетъёсы тыриськонъёссыя воштонъёс ортчытыку, решение куто: Россия Федерациысь Вытъёсъя но тыриськонъёсъя министерстволэн ёросъёсысь но городъёсысь но Ижевскысь инспекциоссы, организацилэн федеральной бюджетэ вытъёсъя но тыриськонъёсъя пунэмез толэзьлэн 1-тӥ нуналэзлы сётэм куриськонъя 5 миллион манетлэсь ӧжыт ке; Россия Федерациысь Вытъёсъя но тыриськонъёсъя министерстволэн Удмурт Элькунысь Управлениезлэн комиссиез, организацилэн федеральной бюджетэ вытъёсъя но тыриськонъёсъя пунэмез толэзьлэн 1-тӥ нуналэзлы сётэм куриськонъя 5 миллион манетысен 20 милллионозь ке; Россия Федерациысь Вытъёсъя но тыриськонъёсъя министерстволэн комиссиез, организацилэн федеральной бюджетэ вытъёсъя но тыриськонъёсъя пунэмез толэзьлэн 1-тӥ нуналэзлы сётэм куриськонъя 20 миллион манет но солэсь тросгес ке. 7. Удмурт Республикаысь ёросъёслэн но городъёслэн администрацоиссылы та выллем ик решениос кутыны ӵектоно, интыысь бюджетъёсы тыронъёсъя но октонъёсъя воштонъёс ортчытыку. Удмурт Республикаысь Правительстволэн тӧроез Н.А.Ганза. Быдэс машина книгаосме кузьмало... Лыдӟисьёс туж ярато Ижысь В. Азин нимо библиотекаез. Татчы ветло нылпиос но, егитъёс но, пересьёс но: книгаосын узыр угось та юрт. Ужасьёссы но шаплыесь, чебересь: калыкез котьку шуныт пумитало. Ма, собере татын ялан возьматъяло суредасьёслэсь выль ужъёссэс. Коридоръёссы ноку бушесь уг луо, туж ӵем ортчыло пӧртэм пумиськонъёс, ӝытъёс. Книгаос но ас мылкыдыдъя котькыӵезэ шедьтод. Лыдӟисьёс асьсэос зырмыто ӝажыосты. Секыт вакытмес шӧдыса, вылды, дасоосын, сюосын книгаоссэс кузьмало библиотекалы. Ай эшшо кыӵеесьёссэ! Туж шер пумиськылӥсьёссэ но, зарни дун сылӥсьёссэ но. Библиотекаез кылдытэм дырысен алигес 65 ар тырмиз. Татчы люкаськылӥзы лыдӟисьёс. Национальной библиотекаысь эшъёс, журналистъёс, писательёс, Ижысь Октябрь ёросысь культура удысэн кивалтӥсьёс, "Удмурт кенеше" но "Дэменэ" огазеяськемъёс, шаерчиос. Кузьымлы ваиллям чарак книгаос. Выль ӝажыос пуктытэк уз луы ни, дыр, соослы. Нош одӥгез, тямыстон куинь аресъем лыдӟись-шаерчи, султӥз но шуэ: - Яратоноосы мынам! Буш киын лыктэм эн кожалэ. Мынам кузьым песьтэре тэронтэм. Удмурт шаермылы сӥзем книгаосме быдэс автомашина тыр кузьмало тӥледлы. Мед лыдӟозы ваньмыз!.. Кичабонъёсын гудыртӥз зал. Шаерчи (нимзэ юромо уг вераськы - таӵе дуно кузьымез, оло, музонъёсызлэн но таосты азьпалтыса басьтэмзы потоз) озьы ик кыл сётӥз лыдӟисьёсты удмурт писательёслэн куатьтонлэсь ятыр туспуктэмъёсынызы тодматыны. - Тӥни озьы калык биниське В. Азин нимо библиотека котыре. Мон но татчы ӵем вуылӥсько. Алигес кӧня ке книгаос кузьмай. Ватсаны кулэ: татын тыршисьёс устоесь кусыпъёс тупатӥзы ини кыдёкысь Венгриысь Татабанья городын улӥсьёсын но. Библиотекалэн кивалтӥсезлы Н. П. Учановалы алигес сётэмын "Удмурт Республикаысь культура удысын дано ужась" ним. Грамотаен пусъемын шаплы тыршисьсы Т. М. Лямина. К. ЛОМАГИН. Пичи Пурга ёросысь Гужношур гуртысь анаймы Феофанова Евдокия Аркадьевна 7-тӥ январе вордӥськем нуналзэ но атаенымы Феофанов Владимир Елизаровичен кузпалъяськемзэ пусъе. Сӥзиськом соослы юн тазалык, капчи мылкыд но шумпотон-пальпотон. Алик, Геннадий но Лилия. Шӧкыч Любовь Тихонова Потос Чиньыям потос потӥз. Лулсэрез кужекъяса ик позыръя. Умме усьыны быгатытэк, киме нуныез сямен веттаса но, нялтас маялляса но солань-талань ветлӥсько, нокызьы уг буйга. Кузпалы юромо висись киылы шуыса ыльнянь но чырсатӥз, райцентрысь аптекае но кыӵе ке эмъюмлы ветлӥз. Котьмар пон - уг ортчы, коть чиньыдэ ӵогыса кушты. Уйбыт синлысъёсме ваче йӧттылытэк, тӧло-жобо куазьлэсь кышкатэк, шунды ӟардыку ик сюрес вылэ потӥ. Нокыӵе чидан ӧвӧл бере, городэ шонтоно кариськи. Городысь лыктӥсь автобусэз кема витёно, но со нуназе котырын гинэ ай кошке. Кин тодэ, оло нош воксё гуртэ пыратэк кошкоз. Мар со ми кадьёсты бичалоз, кыдёкысь лыктӥсь автобуслы выгода ведь кулэ. Озьы но тазьы малпаськыса мынонъям вӧзтӥм ширтыса оло "Вольво", оло "Мерседес" машина шуак азьпалам дугдӥз. "Тямыстон пон,- шуэ пуконзэ возьматыса,- городозь нуо". Капчи тыныд, ойдо, мын, сюресэд вольыт, тодысалыд ке, кызьы со тямыстонэд ужась калык кие вуэ. Уен-нуналэн пӧсятозь ужа. Вамыш бӧрсьы вамыш, иськем бӧрсьы иськем. Вуттӥзы ведь пыдъёсы городэ. Чидамлы соос. Кема утчано луиськиз хирургической отделениез, город пумысь нюлэс куше интыяськемын вылэм. Вот сёто адямиос, курортын кожало, лэся, асьсэды, чылкыт омырын шокало, гань-гань поръяло, нош асьсэос, пе, висисьёс, эшшо огкадь гожмо халатъёс дӥсяллям. Кӧйзэс голято. Вот вӧзысьтымы Ками Лизоклы оскисько, со висеменыз губыр луиз ини, бамаз ӵужпыръем тӧдьы кись кисьтэмын, кожалод. Озьы но адямилы уг оско, азьтэмъяськыса кыллеменыз, пе, ӵужектӥз ини. Куасалтӥз ке астэ, брат, со висёнэд, озьы уд кырӟа ни. Ой, чиньые-е... Лыктэм нуналам ик врач доры пырыны ӧй быгаты. Со, пе, совещание кошкем. Адями, висёнлы чидатэк, лулзэ улэпкын сётыны дась, нош соос совещаниостӥ ветло. Кунокаын дорын кадь кӧлод-а, тылэз кысозы но стройысь солдат сямен вырӟылыны дӥсьтытэк валес вылад кыллёд. Берыкъяськыны но кепыр ваисько, койказы ӟукыр! вазе, педло потатэк но ёрмисько - тыл ӝуатонлэсь йыромисько. Уйбыт чиньыме лӥятыса потӥ, чида, мусое, чида, нуные, шуисько, нош со эшшо ӧчгес кужекъяны кутске. Шунды ӝужамез возьмаса ӧй улы ни, ӵужмуртлы тау кари но, чай но, пе, юытэк кошкод-а шуэмезлы, висись чиньыелэн киыныз гинэ шонтӥ. Ульчае потыса, эркын шокчи но пырак больницаозь пыдын вамыштӥ. Сокемысь вуи ини, нош татын больницаез ик пась ӧвӧл али. Ой, лул пыжетъёс. Часовой сямен больница котыртӥ вамышъясько. Ой, кема-а та возьмаськонэд, лулыд потоз, ява, оло, минутэд но час пала кыстӥське. Нырысь вуи бере, врач доры мон ик первой пыри ини. Вандоно, пе, та кылез, сотэк уз ортчы, шуэ врач. Мыным коть али ик, ӝӧк вылаз ик вандыса мед куштоз кадь. Жалез но сомында ни солэн. Мар курадӟон сётӥз ини мыным, кыль. Тӧдьы халатэн йӧнатӥсе гожъяз, гожъяз, гожъяз но мын, пе, сояз кабинетэ, отчы мынӥсько - мукетаз келяло. Озьы нош ик нунал ортчиз. Та потосэз басьтон понна коньдон кулэ луоз, шуизы. Кӧня-марзэ юаса ӧй улы, соглаш кариськи - вандылӥзы. Нылпи ваем муртлы кадь (уг тодӥськы, кыӵе соос луо) капчи мыным кылиз. Ульчаын кезьыт тол, нош мон котыртӥ бубылиос лобало, мушъёс гужето, пӧртэм бурдоос ас сяменызы кырӟало. Выжыкыл! Ӵуказеяз коньдонлэн дуныз зуркатӥз монэ. Перчаткаос, пе, ваёно, эмъюмъёслы, шприцъёслы, марлилы, бинтлы, ваталы, олокыӵе но анти-септиоссылы нимысьтыз дун тыроно. Операция понна, спирт понна... (пельме ӵоксай, пеймыт гуэ кадь уси, номыре ӧй кылы ни, бубылиос но дорысьтым кошкизы). Йырсазьме ик, оло, ыштылӥ. Лыдъям-чотамзэс йылаз-пумозяз ӧй кылы бере, артысь кыллись юлтошелэсь юасько: "Кӧня мынэсьтым куризы". Вить но ӝыны. Мар карод, кытчы пырод, куро бере, сётоно. Сьӧрам кызё-куамыно сяна ӧвӧл, со но сюрес дунлы гинэ шуыса басьтэмын вал. Ярам, кузпалы ӵуказеяз ик эскерыны лыктэм, озьы но озьы, шуисько, сомында уксё кулэ луоз. Кузпалылэн чилясь синъёсаз пачыл-пачыл шумпотон синкылиос кылдӥзы. Ӟичылэн быжыз сямен киосыз бордам но маялскыны вутскизы. Кема та ватосмес возим ини. Песяе милемын люкиськыкуз, синпельлы шуыса, кельтӥз вал сое. Трос пол ӵуж чилясь копейкаос гочатъязы. Бӧрысь ми соосты бумага коньдон карим. Трос гинэ отысь потӥз. Весь машина басьтом шуим, адямилэн кадь нылпиосмылы син мальдымон корка пуктон сярысь кенешылӥм, огмы но ӧм вырӟе. Арысь аре коньдонлэн дуныз усиз. Уксё вайыны косэмелы малы сокем шумпотӥз кузпалы - ӧй вала. Соку ик живо-два вуттӥз. Я, табере, шуэ, мон но адями радэ потӥсько ни, лэся. Ялан машина сярысь малпаса улонмылы туннэ пум мед луоз. "Пум ик луоз, мусое",- жалезлы чидатэк учкисько кузпалы шоры. Ватосмес машина басьтыны кури кожа, мискинь. Сомында ватыса возем поннамы улон ведь интыяз уг сылы (асме юн-юн карыны турттӥсько). Чиньы бордысь кыӵе ке ӧвӧлтэм кылен валлин со коньдонэз, пересьёслэсь кельтэм синпельзэс, врачъёс кие куштӥськиз. Ачим но янгыш - кык-куинь нунал талэсь азьвыл дунтэмгес, пе, операциосмес лэсьтылӥмы. Нош мон весь, оло, дугдоз-а шуыса дорын возьмаса пукисько. Ой, сюлмы-кӧты, веськантэм дыр-дауре. Табере нуналлы быдэ кузпалы монэ кылыныз пыже. Висён но тынад калыклэсь пӧртэм, ванед-буред но чиньы пыртӥд кошке. Музъемез-а ӵабъяса бӧрдом, гадьме-а кесяса кесяськом, нуналлы быдэ, пыд йылам султыкум ик, огпӧртэм шиетӥсь кылъёсыныз туйылэ, сюлэмез пӧсь венен бышкылэ. Нош мон амалтэк уйвӧтам но чиньыме адӟисько, висьса ке но мед луоз вылэм ас бордам ик - чидан чигымтэ ук, мон но чидасал. Пӧртмаськом, ыммес усьтом... Ижын улӥсь уноез удмуртъёс гуртъёсын вордӥськемын-будэмын. Соос ӵемысь тодазы ваё гуртын улэмзэс, мӧзмо отын шулдыръяськемзылэсь. Соин ик тямыстонэтӥ аръёслэн пумазы кутски асьме калыкмылэсь сямъёссэ-йылолъёссэ городын выжыятыны. Пӧртмаськонэз туэ дас ньылетӥзэ ортчытом ини. Сое ми "Инвожо" ансамблен трос аръёс ӵоже сцена вылын но пуктылӥм. Удмуртъёс ар ӵоже кык пол пӧртмаськылӥзы. Нырысь ик - сӥзьыл, луд ужъёс бере, чебер дӥсяськыса. Толалтэ - вожо нуналъёсы, шушань дӥсяськыса, шайтанъёсты, сьӧд муртъёсты улляса-кышкатыса. Ми али эшъёсынымы одӥг пол пӧртмаськиськом - Ымусьтон нуналъёсы. Отчы кыкезлэсь ик йылолъёслэсь сямъёссэс пыртыса. Нырысь аръёсаз тросгес ветлылӥм тодмо удмурт адямиос дортӥ. Нош али, дырмы луэ ке, пыраськом вань ӧтчасьёс доры. Удмурт культурая дэменлык но ужрадъёсамы сюлмысь пыриське. Уката ик - солэн кивалтӥсез Альберт Алексеевич Разин. Нош "Удмурт дунне" газетлэн валтӥсь редакторез Алексей Петрович Шкляев милемын солэсь но кема эшлаське ини. Со доры пыратэк ноку ум кылиське. Соизлы паймоно: городын улӥсь мукет выжыосысь адямиос удмуртъёс шоры кырыжгес учко ке но, милесьтым ураметӥ кырӟаса-эктыса ветлэммес шумпотыса пумитало, асьсэос но пӧламы шулдыръясько, уноез доразы но пыраны ӧтё. Милям ӧтисьёсмы уно бере, тодмотэмъёс доры ӵемысь ум пыраське. Туэ пӧртмаськыны потомы 7-тӥ толшоре (январе), нуназе бере дас вить часын, мон дорысен. Ижлэн урамъёсаз нош ик вӧлмытомы удмурт шӧмез. Дасялэ милемлы шулдыр мылкыддэс, сюмыкен сюкась, тэркыен кутэмнянь.... Н. ВОЗИСОВ. Пайдаё пумиськонъёс Толсур толэзе ми доры вуылӥзы шаерысьтымы тодмо учёнойёс Зоя Витальевна Суворова, Галина Аркадьевна Никитина, Кузьма Иванович Куликов. Соос вакчи дыр куспын трос калыкен пумиськылӥзы, трос юанъёслы валэктон сётӥзы. Вуылӥзы Галина Аркадьевна Никитиналэн вордӥськем гуртаз - Мазьгие но. Сюлмысьтымы тау кариськом куноосмылы. Ф. УСКОВА. "Песьтэрзы" бадӟым вылэм "Пурга кизилиос", алнаш "ошмес синъёс", дэбес "байгурезьёс" сьӧры кыстӥськыса, ёросысьтызы кыланы-бураны мылкыдоосты огазеяны малпазы якшур-бодьяос но. Нош кинлы та ужез осконо? Дэмлазы Мукши школаысь удмурт кылъя но литературая дышетӥсьлы Надежда Кирилловна Гильманшиналы. Со уго та удысын тэтэ карись ӧвӧл ни, Удмурт университетын литературно-творческой кружоке ветлӥз, кылем тулыс аслэсьтыз кылбур сборниксэ поттӥз. Нырысь ик ёрос газетсылэн редакцияз люкаськылӥзы, газет жанръёсын, гожъяськон амалъёсын тодматскизы. Кыкетӥ занятизэс ортчытыны малпазы "Удмурт дунне" газетлэн редакцияз. "Песьтэразы" трос гинэ гожъямъёссэс ваиллям Мукшиысь Лариса Белых, Настя Васильева, Ирина Гаврилова, Оксана Гильманшина, Ст. Зятцыысь Маша Лукина, Як.- Бодья школаысь Саша Вахрушев но мукетъёсыз. Ольга Александровна Лукина, Ст. Зятцыысь дышетӥсь, ачиз но кылбуръёс гожъя вылэм, печатланы ярамонэсь пӧрмиллям. Пиналъёслэсь нырысь чуръёссэс эскеризы, газет уж сярысь мадизы "Удмурт дуннеын" ужасьёс Татьяна Чернова, Людмила Медведева, Лия Малых, Зинаида Рябинина но мукетъёсыз. Соос доры тодматскыны васькизы "ӟечбуръёс" но. Нош собере пиналъёс адӟизы на кызьы поттӥське газет, ветлӥзы типографие. Т. НИКОЛАЕВА. Гожтӥськон-2000 Газетмес тросгес лыдӟо алнашъёс Шуг-секытъёс шоры учкытэк, асьмеос нош ик ӵош. 2000-тӥ арын "Удмурт дунне" газет эшъёссэ трослы ӧз ышты. Кылем арын 1-тӥ январьлы почта пыр гожтӥськиз ке вал 13565 мурт, туэ та лыдпус люкаськиз 12040-озь, нош ваньмыз 12500 пала луиз. Ар кутскиз гинэ ай, озьыен, гожтӥськыны луонлыкъёс азьпалан вань на. Та Выль ар праздник нуналъёсы шумпотымон ивор верам потэ алнашъёслы. Газетмылы туэ тужгес но трос гожтӥськиллям та районын, озьыен, мотопомпа шудытэмын луоз соос пӧлын. Нош вормисе потэм почтальонъёс сярысь ивор берлогес тодмо луоз. Лотереяен шудытонъёс ортчозы ини праздник нуналъёс ортчем бере. Кызьы со радъямын луоз, соиз сярысь азьло номеръёсын пыр-поч валэктӥмы ни вал. Л. МАЛЫХ. Тазалык Ой, ШУ... Калыкын шуэн кисаль пӧзьто, шунянь пыжо. Нош калык медицинаын кызьы-о кутӥське меда, кыӵе висёнъёслэсь юрттэ со? Кызьы дасяло со эмъюмъёсыз? Мынам кылэме вань, шу давлениез будэтэ шуыса, озьы-а со? Е. ОРЛОВ. Алнаш район, Серп гурт. Зэм но, шуэн ческыт сиёнъёс пӧрам сяна, сое куто на эмъяськонэ но. Ас кожаз шу туж кузял, соин ик компот, варення пӧзьто, паросъёс дасяло. Шуэз умой бичаны кынтылэм бере, солэн кузялэз быре. Шу узыр сахарен, С витаминэн, валериановой кислотаен. Со огъя тазалыкез юнматыны, лулсэръёсты буйгатыны юрттэ, сюлэмез юнгес жугиськытэ. Зэм, вирзӥбетэз со уг ӝуты, уськытэ. Юо, емышъёссэ парыса. Сулзэ пукетыса юыны ӵекто, мултэс зол вир кошкыку, нуны ваем бере. Со понна 4 пуньы пыргытэм сулэз, 200 миллилитр 70 процентъем спиртэн суралтыса, 10 нунал пеймыт интыын пукетоно. Юоно нуналаз 2 пол 1 пуньыен. Нош чечыен парыса шу туж усто эмъюм луэ кынмаку, кызыку, куараез ыштыку (1 пуньы шуэз 1 литр вуын пӧзьтоно, 3 пуньы чечы ватсано, кӧня ке пукетоно). Со сяна, шу вуэн зыраса карсэз, угриосты быдтыны луэ. Наталь Тодматскон сэрег Аб.326. Удмурт воргорон, 31/171, гороскопея Стрелец, улӥсько но ужасько гуртын. Кышнояськылымтэ. Яратӥсько эктыны-кырӟаны, газет-журнал лыдӟыны, чорыгасько, куасэн бызьылӥсько. Нокыӵе гурт ужъёслэсь уг палэнскиськы, улӥсько нэнэеным ӵош, вань машинае, мотоциклэ. Тодматскысал 26-327 пол аресъем лякыт сямо удмурт нылашен. Аб.327. Удмурт пияш, 25/180, гороскопея Скорпион. Улӥсько гуртын, ужасько фермаын, тамакен но винаен уг эшъяськиськы, лякыт сямо, яратӥсько инкуазез. Тодматскысал ас ёзо удмурт нылашен, возьмало фотографиен гожтэт. Аб.328. Удмурт пиосмурт, 45/172, веськрес мугоро, учкымон тусбуё, гороскопея Овен, дышетскемея строитель. Улӥсько гуртын анаен-атаен ӵош, вань хозяйствомы. Тодматскысал монэ валась, лякыт сямо 38-45 аресъем удмурт нылкышноен. Пумит ӧвӧл одӥг-кык нылпиезлы. Аб.329. Удмурт пияш, 25/165/63, веськрес мугоро, вылӥ образованиен, дышетӥсь. Лякыт сямо, тамак уг кыскиськы, винаен уг эшъяськиськы. Яратӥсько лыдӟиськыны, трос выльзэ тодыны. Тодматскысал веськрес мугоро 19-25 аресъем нылмуртэн. Фотодэс берыкто. Аб.330. Удмурт пияш, 24/170, гороскопея Весы, кышнояськылымтэ. Улӥсько но ужасько гуртын, тамак уг кыскиськы, винаен уг эшъяськиськы, сямы лякыт. Тодматскысал 18-25 аресъем нылмуртэн, пумит ӧвӧл одӥг-кык нылпиезлы. Аб.331. Удмурт пияш, 21/168, гороскопея Козерог, улӥсько но ужасько гуртын. Яратӥсько ужаны, пиналъёсты. Семья кылдытон вылысь тодматскысал 19-21 аресъем лякыт сямо нылмуртэн. Редакцилэсь: Лыдӟисьёсмылэсь ялонъёссэс тодматскон сэреге сётӥськомы, дун басьтытэк. Нимзэс, кытысь луэмзэс газет пыр ум шараяське, ваньмызлэн адресъёссы редакциын. Ялон сётӥсен тодматскыны мылкыд карисьёслы ивортӥськом: адресъёсты ми нокинлы ум келяське. Абонентлэсь номерзэ пусйыса, редакцие гожтэт ыстэ. Нош кинлы ке сӥзем гожтэттэс маркаен чылкыт конвертэ понэ - ыстомы кулэ адресъя. Татын вордскиз, татын ик яраз Сюмси ёросысь Вылынгуртын ӧжыт ӧвӧл кибашлыесь, ужез яратӥсь, котьма ласянь синмаськымон луись адямиос. Соос пӧлысь кудӥз-огез мӧйымыса туссэс ыштогес, юыны но кутско, корка котырзэс но куашкан калэ вутто. Валентин Соколов сярысь озьы вераны уг луы. Со пенсие потыса но кема колхозын тыршиз на. Егит дыръяз жадёнэз валатэк тыршиз вордӥськем гуртаз. Ужаны дышемын вал уго. Пичиысен апаеныз но куинь вынъёсыныз сирота кылизы. Дядиез фронтын быриз, мемиез вазь кулӥз. Валентин Васильевич вань вынъёссэ пыд йылазы султытӥз. Семья кылдытэмез бере, пиналъёссэ но ужез яратыны-валаны дышетӥз. Ваньмыз сямен соос, институтъёсты-техникумъёсты йылпумъяса, табере ас удысазы синмаськымон ужало. Кисаль Валяез, озьы нимало гуртын, котькыӵе ужез быгатыса лэсьтэмез понна, колхозын туж гажазы. Со тросгес тыршиз техника бордын, уката ик кема - шофёр луыса. Ёрос калык Валентин Васильевиез бырйылӥз Удмурт АССР-ысь Вылӥ Советэ депутатэ но, кӧня ке пол со вал райсоветлэн но депутатэз. Вылынгуртысь гажано адями пусъемын уно орденъёсын, медальёсын, али но быгатэмезъя юрттэ колхозэзлы, бускельёсызлы, ӝикыт возе ас хозяйствозэ. Н. ВОЗИСОВ. Ужысь ветеран В. Соколов. Суредэз Л. ПРОЗОРОВЛЭН. ТАЗАЛЫК Гуртын ӧжытгес кызо Наука но техника удысъя 1999-тӥ ар понна Удмурт Республикалэсь Кун премизэ басьтӥз "Нылпиослэсь шокан ёзвиоссэс эмъянъя, висёнэз дыраз тодманъя но алонъя азинлыко амалъёс но соосты улонэ пыӵатон уж бордын тыршем тодосчиослэн но врачъёслэн коллективзы. Дас куать ар ӵоже соослэн валче ужамзы вормонэ вуттӥз: шокан ёзвиосынызы курадӟыса кулӥсь нылпиослэн лыдзы 24,4 процентысь 16,1 процентозь кулэсмиз. Нош стенозирующей ларинготрахеитэн кулон учыръёс берло вить арзэ чик уг луыло ни. Нылпиос пӧлын висьылон учыръёс но 2,7 поллы кулэсмизы. Валамон, таӵе азинсконъёс капчиен уг сётӥсько - солы трос визь но, коньдон но кулэ. Укмыс врачъёс но тодосчиос трос пӧртэм эскеронъёс ортчытъяса, валазы нылпиослэн шокан ёзвиоссылэсь висён мугзэс. Со пумысен туннэ вераськиськом республикаысьтымы нылпи врачъёслэн ассоциацизылэн президентэныз профессорен И. Г. Гришкинэн. - Иван Георгиевич, тӥ асьтэлэн докторской ужады нырысьсэ эскериды кырсь омырлэсь нылпиослэн тыоссы вылын шӧдскемзэ, ӵошатӥды гуртын но городын улӥсь пиналъёслэсь тазалыксэс. - Бен, та ласянь бадӟым уж нуэмын. Али ватонэз ӧвӧл ни, тазалык тросаз учыръёсы лябӟе кырсь омырлэсь. Шӧдскымон ляб вордӥсько тазалыклы кышкытлык ваись производствоын ужасьёслэн нылпиоссы. Гуртын югдур умойгес. - Висён учыръёсты лыдъяло висисьёслэн вазиськемысьтызы. Оло, гуртоос шергес врач доры мыно, ас кожазы эмъяськыны выро? - Соиз но вань. Адямиос уг сюлмасько асьсэлэн, нылпиоссылэн тазалыксы сярысь. Асьмеос дышымтэ тазалыкмес дунъяны, соин ик пыэдэз, кызонэз висёнэн ик ум лыдъяське, нош куддыр со пыэд пыд йылысь погыртэ. - Азьвыл ты висёнъёсын трос кулон учыръёс луыло вал, али со лыдпус шӧдскымон кулэсмиз. Кызьы? - Со бордын аръёсын ужамын. Ньыльдон ар ӵоже ужатозям оломае но адӟиськиз, кудӥз ки вылын ик кулылӥз. Кудзэ бурмытыса лэзиськод кадь, кӧня ке улыса, нош "Скороен" вутто - лызэктэмын, шоканэз пытсаськемын. Куддыр котыр ласянь выльысен лул сётылӥм, шокчытылӥм кадь. Мон валай, ты висёнъёсты комплексэн эмъяно - педиатр, пульмонолог, аллерголог валче ужаны кулэ. Со понна кулэ шокан ёзвиосынызы курадӟись нылпиослы юрттэт сётон служба. Ижевск городыс Тазалыкез утёнъя управленилэн кивалтӥсезлэн М. Ушнурцевлэн но 7-тӥ медсанчастьысь валтӥсь врачлэн Ю. М. Герберлэн кичӧлтэмезъя сыӵе служба усьтэмын вал. Али отын эмъясько быдэс республикаысьтымы висись нылпиос. Жаляса верано луисько, кулон учыръёстэк чылкак уг луы ай. - Иван Георгиевич, сюлмаськытэ бронхиальной астмаен висись нылпиослэн лыдзы. - Сыӵе нылпиос трос. 1998-тӥ арын бронхиальной астмаен 2808 пинал висиз. Республикаямы кутэмын "Бронхиальной астма. Эмъян но алон" программа. Ми соя ужаськом, бадӟым саклык висъяськом астмалэсь алямзэ алонлы. - Сое алыны луэ шат? - Тросаз учыръёсы астмаозь асьмеды асьмеос вуттӥськом. Нырысь пыэдэз, ньылон висёнъёсты аналтӥськом, собере, аллергия но ас кожаз ортчоз кожаськом. Со вакытэ нош мугорысьтымы висёнъёслы пумитъяськись кужыммы (иммунитетмы) лябӟе но лябӟе, шокан ёзвиосмы уродмо. - Тросаз учыръёсы адямиез чаль эмъян дырыз дыръя висёнэз шараям, шонер тодман бордысь потэ. - Бен, ӵапак со бордын ужаз Елена Вениаминовна Стерхова. Со нырысьсэ поттӥз шокан ёзвиослэсь висёнзэс вазь шараянъя алгоритм. Соя ваньмаз сямен учыръёсы диагнозъёс зэмало, нош висён мугез тодыса, пиналэз чальгес но умойгес бурмытыны луэ. Со сяна, висисез койкаын эскерон но вить нуналлы кулэсме, трос коньдон шараяське. Нылпиослэсь ты висёнъёссэс алон выль ӟеч амалъёсты уже кутыса араз укмыс миллионлэсь ятыр коньдон шыръяны луэ. Нош кӧня шыръяське, пиналэз пичи дыръяз бурмытыса, азьланяз со чик ӧз висьылы ни ке? - Огез ужды сӥземын вал финн-угор калыкъёслэн пиналъёссылэсь шокан висёнъёссэс эскеронлы. Мар шараяськиз? - Валамон, мукет финн-угоръёсын ӵошатыса, асьмеос тужгес но кырсь улосын улӥськом. Шокан ёзвиосынызы ӧжытгес курадӟо эстонъёс, венгръёс, финнъёс. Финнъёс сярысь нимысьтыз вераны кулэ. Соос тазалыксэс юнматонлы, сое утёнлы туж бадӟым саклык висъяло, сюлмаськеммыя японъёсын огкадесьгес. Учке ай, кыӵе чылкыт соос уло! Нош асьмеос тазалыкмес государстволы оским - виси ке, больничной тырозы, ӧлексы луи ке - пенсия сётозы... Адями ачиз сярысь ачиз сюлмаськыны кулэ, тазалык - со дунъянтэм ваньбур. З. Рябинина. Нырысь интыын - адями сярысь сюлмаськон Выль ӵужон выль сямен ӵуже, шуо калыкын. Берлоез быръем Правительствомы но ужаны тырше аслыз тупась амалъёсъя. Валтӥсь интые со пуктэ адями сярысь сюлмаськонэз. Калык тае валаз-а, ӧз но-а - но данакез семьяос ас вылазы шӧдо ни. Ма лэсьтыны вуиз ӝыны ар куспын Н. А. Ганзалэн кабинетэз но ма чакламын матысь дырлы? Со пумысен вераськиськом Удмурт Правительстволэн Тӧроезлэн воштӥсеныз В. Е. ШУДЕГОВЕН. Социальной удыс понна уго ӵапак со кыл кутэ. - Виктор Евграфович, тӥледлы шедиз огез тужгес но секытэз ныпъет - калыкез улонын утён но солы юрттэт сётон, пенсиос, пособиос понна кыл кутон. Ортчем дыр ӵоже кыӵе йылпумъянъёс лэсьтыны луоз ни? - Нырысь ик мон пусйысал Правительстволэсь бюджетэз узырмытон бордын юн-юн ужамзэ. Со бордысен кутскиз пенсиосты дыраз тырон, нылпи пособиосты радъян борды басьтӥськон, калыклы уждун сётъян но мукетыз. Ортчем арын трос ӟеч уж лэсьтэмын. Кылсярысь, шаерамы пуктэмын 8 выль школа. Йылаз-пумаз вуттэмын выль онкологической диспансерлэн нырысетӥ блокез. Шумпоттӥсь кузьым басьтӥзы Глазов районын улӥсьёс - татын ӝутэмын больницалэн хирургической корпусэз, нош Ижевскын - кыкетӥ нылпи поликлиника. Сюлэм висёнэн курадӟисьёс понна ужа ни диагностикая выль центр, Воткинск городын усьтэмын тубдиспансер. Нимысьтыз ужрадъёс нуисько СПИД-эн нюръяськонъя юнматэм программая. Огъя вераса, 2000-тӥ арын калыклэсь тазалыксэ юнматон удыслы бюджетын нимысьтыз саклык висъямын. Тае ас вылазы шӧдыны кулэ егитъёс но, ардыоос но. Пусъё на: таяз арлы юнматэм бюджетлэн 60 процентэз ужалоз социальной удыс вылэ, ӵошатон понна - Москваын та лыдпус 40 процент. - Озьыен, каньылгес шокчозы ни дышетӥсьёс но? - Озьы медло. Социальной удыс - со адями понна ужась удыс. Мукет сямен вераса, дунне вылэ вордскем дырысеныз берпуметӥ нуналозяз котькудӥз шӧдыны кулэ государстволэсь со понна сюлмаськемзэ, оскымон киоссэ. Социальной удыс огазея тазалыкез утён но калыкез дышетон ужпумъёсты, культураез но спортэз, инмарлы осконэз но общественной организациосын ужанэз, арлыдоос, ӧлексыос но будӥсь пиналъёс сярысь сюлмаськонэз. Ватонэз ӧвӧл: макем юн луоз республикамылэн экономикаез, сокем ӟеч юрттэт вуоз социальной удысэ. Соку дыраз басьтомы уждун, пособиос но пенсиос. - Шуг-секытъёстэк уг луы - соос тырмыт вал кылем арын но. Нош ма пусйымонэз кылиз на меда? - Культура удысын ужасьёс пӧлысь 160 мурт пусъемын вал пӧртэм орденъёсын, медальёсын, грамотаосын но дано нимъёсын. Национальной библиотекалы сётэмын Удмурт Республикаысь Кун Кенешлэн премиез, нош Национальной театрысь коллектив пыртэмын Данъян пул вылэ. Спорт удысын но басьтэмын выль вормонъёс. Биатлонъя Европалэн чемпионатэз но ортчиз асьме дорын. Ваньмыз со шумпоттэ, азьланезлы выль кужым но оскон пыӵатэ. Вуись ар но узыр луоз пӧртэм пумиськонъёсын но юбилейёсын. Туэ республикамы пусъёз кунлык басьтэмез дырысен 80 ар тырмонэз, нош 9 Мае пусъём фашистской Германиез вормем дырысен 55 ар тырмон нуналэз. Эшшо одӥг бадӟым юбилей - П. И. Чайковский вордскем дырысен туэ тырме 160 ар. Данъяськоно но шумпотоно: таиз ар ЮНЕСКО-ен ялэмын Культуралэн ареныз. - Кыӵе ужпумъёс пуксё Правительство азе 2000-тӥ арын? - Валтӥсез луоз начар кылем семьяослы нимаз-нимаз юрттэт сётон. Асьмелэн со ӵем дыръя кошке музон интые. Та статьяя висъямын 1 миллион манет, чакламын нырысьёсыз пӧлын юрттыны огназы улӥсь 65 ареслэсь мӧйы пенсионеръёслы но ӧлексы нылпиослы. Пусйыны кулэ таизэ но. Али шаерамы усьтэмын но ужа 8 интернат-класс гуртъёсысь быгатонлыко пиналъёс понна. Данакез соос пӧлысь - удмуртъёс. Соосты дышетонэз но возёнэз ас вылаз басьтӥз бюджет. Туэ нимысьтыз коньдон чакламын озьы ик гурт школаосы компьютеръёс басьтыны. Мон сямен, со туж умой ини. - Виктор Евграфович, асьмеос быдэс арнязэ улӥськом ини выль арын. Таин валче, ма сӥзьысалды газет лыдӟисьёсмылы? - Ваньзэ ӟечсэ гинэ. Асьмелэн калыкмы ужась, чидась сямо, дышемын котькыӵе шуг- секытэз дэмен вормыны. Азьланяз но мед уломы ог-огенымы тупаса, ог-огмылы юрттыса, ог-огмес гажаса. Котькуд семьяе мед пыроз шумпотон но яратон, ӵуказе нуналлы оскон. Мон оскисько, 2000-тӥ ар улонмес одно ик умой пала воштоз шуыса. - Тау. Л. МЕДВЕДЕВА. Вормо кужмоосыз Декабрлэн пумаз столицаямы ортчизы "Ижевская винтовка" приз басьтон понна ӵошатсконъёс. Соос куамын одӥгетӥзэ ортчизы. Татчы котьку пырисько кужмоосыз биатлонистъёс. Нырысьсэ 1969-тӥ арын вормиз вал Санкт-Петербургысь олимпийской чемпион Николай Пузанов. Со басьтӥз машина лэсьтӥсьёслэсь кузьым. Мукет араз сыӵе ӵошатскон вал Сарапулын. Вормисе потӥз татысь электрогенераторной заводысь спортъя мастер Геннадий Чеботарев. Берло вормисьёсы потылӥзы тодмо спортсменъёс - Виктор Маматов (Новосибирск), Геннадий Ковалев (Чита), Николай Круглов (Ниж.Новгород), Анатолий Алябьев (Ленинград), Владимир Аликин (Пермь), Сергей Чепиков (Свердловск), Валерий Медведцев, Алексей Кобелев (кыкез ик Ижысь). Таяз ӵошатсконъёсын асьме спортсменъёслы ӧз удалты. Но азьпалан бадӟымесь ӵошатсконъёс витё. Отын асьсэды возьматозы Алексей Кобелев но мукетъёсыз. Нош Алексей пыртэмын странаысьтымы биатлонитстъёслэн сборной командаязы. Г.Васильев. ТАЗАЛЫК Вордсконо нуныен адӟиськон Ӝыны даур ӵоже ультразвук юрттӥз сюрсъёсын лыдъямон улонъёсты утьыны. Дан солы! Но берло дыре врачъёс сюлмаськыны кутскизы кӧтысь нунылэн тазалыкез понна. Соин ик вуоно анайёсты ало секытэн дыръязы ультразвукез ортчыны кык поллэсь трос. Тужгес чакласькыны кулэ нырысетӥ куинь толэзьёсаз. Нуны возьмакуз кышномурт шуген ветлэ ке, ультразвук пыр ортчытэк нокызьы уг луы - та паймымон арбери шарая висёнъёсты, соосты дырыз дыръя алыны юрттэ. Кык малпан Н. дас ар ужа ни ультразвукен. Со эскере нуны возьмась нылкышноосты. Мар малпа специалист ультразвуклэн умой но урод палъёсыз сярысь. - Валамон мугъёсъя, ниммес шараяме уг луы. Специалист сямен, мон шуыны кулэ: УЗИ эскериськись адямилы нокыӵе изъян уг вайы, соин ик секытэн нылкышноос кык пол ке но сое одно ортчыны кулэ, шуген ветлӥсьёсыз - ӵемгес. Но кема аръёс ӵоже ужаса, мынам кылдӥз на мукет малпанэ но. Секытэн нылкышноосты УЗИ-ен эскерыны-чакланы луонлык кылдэм бере, акушеръёс капчияк шокчиськизы - вуж амалъёслэсь палэнскыса но йырзэс трос тӥятэк, нылкышноез экран пыр учко но тодо, кызьы будэ нуны, быгатоз-а со ачиз вордӥськыны яке вандылыса басьтоно луоз. Кылсярысь, нуны вамен кылле. Соку операцитэк нокызьы уз луы. Ультразвук озьы ик возьматэ нунылэсь изъянъёссэ, кышкыт висёнъёссэ. Но... Аппаратэн ужа адями, соин ик тросэз потэ солэн тодэм-валамез бордысь: кызьы со учкоз, кызьы валэктоз. Специалист но янгышаны быгатэ - куддыр ӧвӧлтэмзэ вань каре: я кыӵе ке висён вань кадь потэ, я маиз ке уг тырмы. Валамон, ваньмыз со уг зэма, нылпи таза, чебер вордӥське, нош егит анай кӧня куректэ, нунызэ вордытозь. Со шӧдӥськытэк уг кыльы кӧтысьтыз нунылэн тазалыкез вылын. УЗИ - тазалык понна чылкак "сьӧлыктэм" ӧй шуысал мон. Ужан нунал пумын туж жадёно, йыр висе. Специалистъёс юнме перчаткиосын уг ужало ук - резина киосты ультразвуклэсь уте. Зэм, кышномуртъёс аппарат вӧзын кема уг уло, озьы ке но... УЗИ-лэн мугорлы кышкытлыкез сярысь рос-прос эскеронъёс ортчытымтэ на. Малпасько, соос уз но луэ - та амал фирмаослы бадӟым пайда вайыны быгатэ уго. Кылсярысь, али тросэз узыръёс вордсконо пиналзылэсь "фотозэ" пуктыто ни, яке солэн кӧтын будэмез сярысь быдэс видеофильм лэсьто. Анай луыны дасяськись кышномуртъёслы кӧня ке ӵектон. Секытомемдэс тодон понна одно УЗИ кулэ ӧвӧл - али котькуд аптекаын тестъёс вузасько. Нош толэзь-кык ортчыса, йылэмдэс асьтэос но шӧдоды, врачъёс но вералозы. Нуныдэс утьыны малпаськоды ке, куинь толэзёзь УЗИ-ен эн эскериське. Со бере но, ныл яке пи луонозэ тодон понна гинэё ӵем эн ветлэ. УЗИ изъян уг вайы шуо ке но, мултэс чакласькем уз люкеты. Аръёс но адямиос Карпат кышно Очерк Ӟучомись Отогуртын ульча тыр чузъяське удмурт сямен вераськем. Ма, Глаз котырын удмуртъёс ас кылзылэсь возьдасько вал ук. Нош таиз нылкышно базарын сӥль дэмла, кожалод. Кытын ке Киевын яке Харьковын. - Кыӵе сыӵе хохлушкады вань тӥляд? - амалтэк юано кариськи. Клуб азе люкаськем кенакъёс ӧжытак абдраса валэктӥзы: - Бен, вань милям хохлушкамы. Карпатка яке Карпат кышно нимаськомы. х х х Нырысетӥ космонавтлэсь инбаме ӝутскемзэ Баженов Коли уг тоды ни. Ӵапак со аре вордскиз гинэ ай. Самолётлэн штурвалэз дорозь ӧз вуы. Глазысь техучилище бере тракторист луиз. 1980-тӥ-1982-тӥ аръёсы Байкал палан кунгожмес утиз но дораз бертӥз. Вуоно араз Киров нимо колхозэ вуизы шабашникъёс - вить-а, куать-а кузя воргоронъёс. Одӥг нылзы-пӧрасьсы вань. Ӟуч сямен мыдланьгес бӧтьырто. Тодмо луиз: соос Украинаысь, Карпат сьӧрысь. Коля жальмалляз Анна Микуляк шоры. Нырысь-валысь абдралляз. Ма, Союзын котькытын ужась киос кулэ кадь, нош Ужгород котырын уж ӧвӧл, пе. Городзылэн нимыз ик ужен герӟаськемын ук. Вылаз ик, шабашникъёс шоры учкылӥзы озьыгес: соос - кузь коньдонэз уйылӥсьёс. Нош таос - огшоры адямиос. Гурт калыкен ӵошатыса, тросгес ужало киынызы. Шергес кылзэс шеро но шергес чаркае учкыло. Куараоссы зын вуэн тупатытэк но зыч- зычесь. Колхозысь комсомол секретарь Баженов Коля оломар но юа Анналэсь. Карпатысь егитъёс пӧлын трос-а комсомолецъёс? Ужлы ёрмисьёс вань ке, малы та сярысь уг гожъяло газетъёс? Кызьы-озьы мамаез но тятяез сое лэзизы шабашникъёс сьӧры? Анна копак сирота вылэм. Мемейзэ уг тоды ни. Со кулыку, Анналы куинь арес вал. Тятяез писпу улэ пачкаса бырыку - дас ньыль. Кык нылъёсты быдэ вуттӥллям ни мемейзылэн сузэрез но тятязылэн мемеез. Анна но юалляське Колялэсь. Ма со сыӵе нянь? Кызьы удмуртъёс верало ложка шуонэз? Малы сыӵе матынэсь дай но вай кылъёс? Егитъёслэсь пумиськылэмзэс Отогуртын сокем ик умоен ӧз лыдъялэ. Огез ӵыжы-выжызы Колялы меӵак ӵогиз: - Сое кышно ваид ке, дорад пыдме но уг лёга. - Маин бен Анна мукетъёсызлэсь уродгес? - Котьма шу, но тодымтэ адями со. Бератаз гуртэ вуиз комсомоллэн Глазов райкомезлэн нырысетӥ секретарез. Колхозысь комсомолецъёслэсь йырзэс меӵак алӥз "идейной янгыш" лэсьтэмлэсь. Баженов номырзэ уг вала. Кыӵе идейной янгыш? Асьме партия интернационализм шуонлы пумит шат? Комсомоллэн правоез вань-а яратонэ пыриськыны? Котьма ке но, 1984-тӥ арын Баженов Коля но Микуляк Анна ӵош улыны ӧдъязы. Кык нылпи вордӥзы. Пыризы колхозлэн корказ. Воргорон ужаз механизаторын. Кышномурт - скал кыскисьын. х х х Колялэн Рита апаез бызиз Глаз районысь ик Абагуртэ. Озьы ик скал кыскиз. Шудэз вылымтэ. 1990-тӥ арын картэныз ӵош быриз. Саша пизы сизьыметӥ классын вал. Катя нылзы - нырысетӥын. Пичи Салтыковъёс улыны ӧдъязы Баженовъёсын ӵош. Пичиесь но - сокем пичиесь ӧвӧл ни. Коля дядязэс тятя шуыны ӧз дыше. Аня тётязэс но меми уг нимало. Ма, шонерзэ верано ке, Баженовъёс соослы сюрбубы но сюрмумы ӧвӧл - утись-вордӥсьёс (опекунъёс) гинэ. Озьы ке но, Анна но Коля Баженовъёс понна Салтыковъёс - асьсэ нылпиос кадь. Пиналъёссы сярысь мадьыны ӧдъяло ке, уд вала: асьсэлэсь-а верало, вордоссэ-а. Дӥськутсыя пӧртэмзэс уд адӟы. Йырсиоссы гинэ мукетэсь: Баженовъёс - сьӧдэсь, Салтыковъёс - гордэсь. Саша Салтыков чаляк султӥз пыд йылаз. Николай Баженовлэсь куке-соку пырпотэм техучилищезэ йылпумъяз, шофёр но механизатор луиз. Глазысь огаз лэсьтӥськон организациын ужа. Огъя улонниын (общежитиын) комнатаез вань. Квартиралы черодэ пуктэмын. Катя Салтыкова котыр калыкез копак абдратэ. Матысь гуртъёсын тужгес ӟечез школа - кызь иськемын, Коӵышын. Тӥни отчы ик кошкиз, компьютерен ужаны дышон вылысь. Директор верамъя, таӵе визьмо макеосты со ноку ӧз тодылы. Урокъёсын нылаш дышетэ немец кылэз, ас понназ - англиез. Ветлӥз районысь пинал биологъёслэн олимпиадаязы. Хорын кырӟа. Гармошкаен шудэ. Али тодматске баянэн. Пыралэ ай Отогуртысь клубе. Данаксэ борддоръёсты яркыт суредъёсын чеберъяз Катя. Шуг-а будэтыны кык семьяысь нылпиосты? Капчи ӧвӧл. Районысь администрацилэн калыкез дышетон люкетаз куро: Салтыковъёслы вуись пенсиез кызьы быдтэмды сярысь ивор лэсьтоно толэзьлы быдэ. Ма, бадӟым семьяын кинэ ке ого-кыкто карыны луэ шат? Бен, Баженов Николай вунэтӥз ни колхозын ку берлозэ уждун басьтэмзэ. Ярам, клубын гармонистъёслэсь кружоксэс нуэ но музон ужъёсты быдэсъя. Аннаез озьы ик фермаысь кошкиз но клубе выжиз. Культура зӥбемын шуо ке но, татын коньдон ӵемгес сётъяло. Котьма ке но, нуналмысь улон-вылонысь шортъёсты герӟаны капчи ӧвӧл. Катязы али улэ Коӵышысь тодмозы дорын. Со понна Баженовъёс огпол коньдон келязы вал. Тодмооссы алӥллям: озьы эн каре, пе. Нылпи вордэм понна 1996-тӥ-1997-тӥ аръёсы кунлэн (государстволэн) Баженовъёслы тыронэз люкаськиз 6 сюрс манетлэсь ятыр. Ужпумез эскеризы администрациысь калыкез дышетон люкет но, республикаысьтымы Коньдон ужпумъёсъя министерство но, Правительство но. Истец шуон, Баженов, судъёстӥ трос ветлыны уг ваньмы. Сыӵегес ик югдуре сюремын, вылды, ответчик но - министерство: адямизэ судэ уг лэзьы. Тӥни малы Николай гожтӥз курон: милесьтым ужмес судын учкелэ митэк. Ачиз верамъя, воргорон сокем уг ёрмы. Нош басьтымтэ коньдонзэ Катя вылэ сберкнижкае понысал ке, со мултэс луысал шат? Нылашлэн переводчике мынэмез потэ. Нош дышетскон дуно усе. х х х Баженовъёслэн трос виро бадӟым семьяязы нуналмысь кутӥськись кыл - удмурт кыл. Нош музон кылэз тодон - мултэс ӧвӧл. Алексей ШКЛЯЕВ. Быдӟым Вормонлы - 55 ар Соослэн нимъёссы - нырысетӥ номеро приказын Асьме палась кыкезлэн ик та командиръёслэн нимъёссы пыртэмын Юго-Западной фронтлэн нимысьтыз данэ потэм воинъёссэ пусъён сярысь 1941-тӥ арын 5-тӥ ноябре поттэм нырысетӥ номеро приказаз. Якшур-Бодья ёросысь кызь вить аресъем лейтенантлы Степан Фёдорович Гусевлы, танковой взводлэн командирезлы, сётэмын вал вылӥ награда - Ленин орден. Нош кызь аресъем лейтенантлы Николай Григорьевич Вторыхлы, нырысетӥ стрелковой роталэн командирезлы - Горд Знамя орден. Вторых но армие мынэмын вал Якшур-Бодья ёросысь ик Лумпово лесопунктысь. Война пыр ортчем Гусев лейтенантлэн таиз орденэз сизьымез пӧлысь вал нырысетӥез. Гусев армие кошкиз Якшур-Бодьяысь педтехникумез йылпумъяса, нырысетӥ арзэ дышетыны кутскиз вал. Со шедиз Орёлысь танковой училищее но, сое йылпумъяса, нырысетӥ нуналъёсаз ик оже пыриськиз. Украиналэн шоркарез Киев тушмон киын вал ини. Городлэн шунды пуксён палаз ожмаськись частьёсмы котыртэме сюризы. Со кульчоысь потыны быгатылӥзы на пичиен- пичиен гинэ. Донбасс но Кавказ пала урдӥськем немецъёслы пумит ожмаськонэ пыриськизы выль но выль кужымъёс. Гудерианлэн танковой но моторизованной дивизиосыз дыртӥзы Штеповка черкогурт пала мынӥсь сюрес вылтӥ. Тушмонлы пумитъяськись частьёсмы ӧжыт кылемын ни вал. Соослэсь фронтсэс тӥяса, немецъёс Вашловка черкогурт вылэ урдскизы. Немецъёслэн азьмынӥсь танкъёссы шонерак ыбылӥзы ни асьме подразделениосмес. Озьы кышкыт учыр кылдытӥзы. Но берлогес фашистъёс шӧдтэк шорысь планзэс воштӥзы, кӧнязэ ке ӝуась танкъёссэс кельтыса, соос чигназы. Азьлань ӧз ни мынэ, интыосысенызы гинэ ыбылӥзы асьме позициосмес. Бригадаямы, танкъёсмы кык поллы ӧжытгес ке но вал, соос сюрес вылысен ик оже пыриськизы. Кутскиз пӧсь ожмаськон. Отын вормисе потӥзы асьмелэн танкистъёсмы. Кема ик ӧз ортчы, немецъёс выльысь ожалскизы асьмелэнъёс вылэ. Соос Штеповкалэн шунды пуксён палаз сылӥсь частьёсмылэн мышказы потыны ӧдъязы. Селое пырем пехотаез ыбылыса, танкъёсмы асьме солдатъёсмылы чигнаны луонлык кылдытӥзы. Шундыё шуныт нунал вал соку. Немецъёслэн танк колонназы кыдёкысен адӟиське. Танкистъёсмы соосыз шонерак ыбылӥзы, немецъёслэн колонназы кир-пазь луиз, машинаоссы сюрес урдсы кожизы, куд-огез гоманы ӧдъяз. Танкистъёсмы нош азьлань но азьлань мыно. Фашистъёс, ӝуась машинаосысьтызы потылыса, кытчы сюрем отчы пегӟо. Мироновцы гуртысен немецъёс юнматскыны вуизы но асьме танкистъёсмес азьлане ӧз ни лэзе. Соку оглюкетэз танкъёс Штеповкаез котыртӥзы но, фашистъёс чигнано луизы. Та оже пыриськизы мотострелковой но кавалерийской частьёсмы но. Секыт ожъёс вал та черкогурт понна. Со олокӧня пол киысь кие выжылӥз. Танковой, мотострелковой но кавалерийской частьёсмы Штеповкаез басьтӥзы, немецъёс пумитъяськыны ӧз ни быгатэ. Та нуналлэсь азьвыл гинэ зориз вал, фашистъёслэн тросэз машинаоссы дэрие могӟылӥзы, нош асьмелэнъёсыз азьлане вырӟизы. Кӧня ке нунал куспын гинэ частьёсмы Полтава музъем вылысь троссэ гуртъёсмес мозмытӥзы но уно трофейёс басьтӥзы. "Штеповка дорын ожъёс Юго-Западной фронтын секыт югдур вакытэ боецъёсмылы но командиръёсмылы ӧжыт ке но шумпотон но ваизы", гожтӥз аслаз тодэ ваёнъёсаз маршал Баграмян. Та вылӥ верам ожмаськонэ пыриськем асьме командиръёслэн наградалы ӵектон бумагаосазы тазьы гожтэмын: "Мотострелковой батальонысь роталэн командирез лейтенант Н. Г. Вторых 1941-тӥ арын 22-тӥ сентябре Липовка дорын ротаеныз оже кык пол пыриськылӥз, витьтон пала фашистъёсыз, куинь станковой пулемётъёссэс но одӥгзэ орудизэс быдтӥз. Сӧсырмемез бере но госпитале эмъяськыны мыныны пумит луиз. 28-тӥ сентябрьысен 1-тӥ октябрёзь Штеповкаез мозмытон дыръя фашистъёсын ожмаськонэ улонзэ жалятэк пыриськиз. 29-тӥ сентябре уин атакаын ротаеныз тушмонлэн мышказ кыдёке потыны быгатӥз но быдтӥз тушмонлэсь 4 пулемётсэ, 2 орудизэ, 2 миномётсэ но 30 пала солдатъёссэ. 1-тӥ октябре, Штеповкаез мозмытыку, Вторых подразделениеныз быгатыса кивалтӥз, тушмонлэн кужмо ыбылэм улсаз но азьлань мынӥз, фашистъёсыз чигнатӥз, быдтӥз 55 солдатсэ, 3 станковой пулемётсэ, 4 миномётсэ но басьтӥз 20 машиназэ". "Танковой взводлэн командирез лейтенант С. Ф. Гусев 18-тӥ сентябре Ивашки дорын куинь пол атакае пыриськылӥз. Соку со тушмонлэсь атакаоссэ пазьгылыса, пехотинецъёсмылы чигнаны луонлык кылдытӥз. 26-тӥ сентябре со танковой ротаеныз ӵош пыриськиз Полтавской областьысь Одаревное но Бабрак гуртъёсты мозмытонэ. Танкъёслэн азинлыко ожмаськеменызы, нимысьтыз ик Гусевлэн взводысьтыз экипажъёслэн, басьтэмын вал 30 мотоцикл, одӥг орудие, пазьгемын вал немецъёслэн велосипедной ротазы. Ожмаськон лудэ тушмон кельтӥз кызь пала бырем солдатъёссэ. 29-тӥ сентябре Бармацкое гуртэз басьтыку, Гусевлэн взводэз юрттӥз пехотинецъёсмылы азьлане мыныны. Чигнан сярысь приказ вуэм бере, тушмонлэн ыбылэм улсаз Гусев одӥгзэ тӥяськем танкмес поттыны быгатӥз. Танк шорысь немецъёс олокӧня пол йӧттӥзы ке но, со ас ужзэ лэсьтӥз. Собере утиз на чигнась пехотинецъёсмес но. Ож лудысь со танкеныз ваньмызлэсь берло потӥз". В. ГОЛУБЕВ. Пӧртмаськом! Удмурт лулчеберлыкъя дэменлыкысь адямиос лулысь-сюлмысь утё вашкала сямъёсмес. Одӥгез тужгес йӧноез йылол - пӧртмаськон. Ӵапак та вакытэ гуртъёсын ортчо солы сӥзем шулдыръяськонъёс: маскара дӥсяськем адямиос коркась корка пыраса ветло но бускельёссылы, бӧлякъёссылы шудбур, тазалык, ваньбур сӥзё. Гурт калыклэсь бере уг кылё городын улӥсьёс но. Удмурт лулчеберлыкъя дэменлык кичӧлтэмъя, вуоно кӧснуналэ, 15-тӥ толшоре (январе), шаерысьтымы культурая училищелэн юртаз луоз пӧртмаськонлы сӥзем шулдыртӥськон. Татчы пыриськыны мылкыд карисьёс пӧртмаськонэ мед лыктозы, тунсыко дӥсяськыса. Вуэмъёсты шулдыртозы Ижысь "Октябрь" культура дворецысь "Бускельёс", культурая училищеысь "Ингур", мукет ансамбльёс. Шулдыртӥськон кутскоз нуназе бере куинь часын. Дэменлыкысь адямиос ӧтё татчы вашкалаеныз лулысь-сюлмысь тунсыкъяськись вань удмуртъёсты. Мишши Сеспель, Чуваш кылбурчи Мон кулӥ ке... Мон кулӥ ке - ватэ Меӵ гурезь йылэ, Шай вылам тӥ мерттэ Векчи бадь гинэ. Шай вылысен мед адскоз Мусо шаере, Син азям мед вӧлдӥськоз Йӧн Шубашкаре. Мон кыллё... Та даурмы Ӝог гинэ ортчоз Улонэн ӵош чуваш кыл Сяськаё пурӟоз. Мусоясь чуваш кылмы Егитъёсын ӵош Шудбурен шумпоттыны Вырӟылоз ай нош. Чирдытоз на чуваш кыл Ӵыж выль кырӟанъёс, Туж визьмо выль книгаос Чуваш кыл поттоз. Трос дано кылбурчиос Выльысь вордскозы, Дор палме шуныт чурен Туж данъялозы. Нош мар ке муген кылзэ ке Калык вунэтоз, Ас дорзэ но шаерзэ ке Гажамысь дугдоз, Шайвылме соку быдэс мед Кыйбоды согоз, Мед сьӧд му монэ ньылоз но - Мед нимы вуноз! Март, 1921 Шубашкар. *** Берпум нянь юдэсэ, берпуметӥез. Берпум гылэтэн казанэ. Ӟар пиньёссэ горыса возьматэ Кӧттырмостэм вуоно кулонэ. Берпум нянь юдэсэ... Берпуметӥез. 30 октябрь, 1921 Киев. Берыктӥз Алла Кузнецова. Удмуртиысен - Халхин-Голозь Кезьыт тол нуналэ Юкаменск ёросысь Зянкино гуртысь покчи классъёсын ужась дышетӥсьлэн Антонина Сергеевна Дряхловалэн монэ ас доразы ӧтемез ӧжытак паймытӥз но, малпаськонэ но уськытӥз. Мар мон мадём покчи нылъёс но пиос азьын, кылзӥськозы-а монэ? Сюлмаськеме юнме луэм, мынэсьтым верамме пиналъёс сак кылзӥзы. Со сяна, пӧртэм юанъёс но сётъязы. Кылсярысь, оже ветлэмъёс пӧлысь кинэн нырысь ик пумиськи. Паймоно кадь, но нырысь тодматскем эше вал Юкаменск ёросысь Папанево гуртысь Михаил Семенович Сысоев. Со ас службазэ ортчытӥз Владивосток дорысь Хасан ты котырысь артиллерийской полкын. - 1938-тӥ арын Япониысь солдатъёс асьмелэнъёс вылэ урдскизы, - шуиз соку М. С. Сысоев. - Кык арня ӵоже ожмаськимы, бадӟым ыштонъёс адӟимы ке но, вормимы. 11-тӥ мае 1939-тӥ арын Япония нош урдскиз бускельёсыз вылэ. Таяз учыре пичигес Халхин-Гол шур кузя Монголия вылэ. Малпаллям вылэм Улан-Батор городэз, отӥяз Забайкальеез но Дальний Востокез киултыны. Вормонлы осконъёссы бадӟымесь вылэм ке но, югыт шунды тылсиос соослы ӧз пиштэ. Г. К. Жуковлэн быгатыса кивалтэмез асьмелы вормон ваиз. Михаил Семеновичлэн та выллем но трос мукет веранъёсыз пель сьӧрам ялан чузъясько на. Халхин-Гол шур дурын Михаил Сысоевен ӵош ожмаськиллям на Красногорск ёросысь Григорий Злобин, Шаркан ёросысь Прокопий Вахрушев, Балезино ёросысь Афанасий Третьяков но трос мукетъёсыз. Со нуналэ Юкаменск ёросысь пиналъёс доры ветлэмме ӧй жаля. Шумпотӥ, будӥсь нылъёс но пиос шоры учкыса, соослэн асьме ожгарчиосынымы тунсыкъяськеменызы. В. ПОЗДЕЕВ. ФЕСТИВАЛЬ БЕРЕ Утча, кут кизилидэ Кылем арлэн пумаз Ижевскын ортчиз удмурт, бигер но ӟуч эстрадая фестиваль. Кинлы ке со гудыртэм-чилектэм кадь потӥз, дыр. Но гудыри кытӥяз уг вайы зорез. Тазьыгес шуыны луоз та конкурс пумысен но. Та фестивале мыноно кариськи, ӵошатыны малпай, кызьы ветлэ калык ас артистъёсызлэн концертъёсазы, кыӵегес дунъет сётэ кырӟасьёсызлы, маин пӧртэмгес удмурт кырӟасьёс. Нырысь ик, мыным туж яраз сценалэн пуштросэз. Зэмос тупа отын эстрада кырӟанъёсыз быдэстыны - уин инмысь кизилиос пиштэм кадь адӟиське. Нош кыӵе усто лэсьтэ ас ужзэ, кырӟанлэн ритмезъя пӧртэм буёло тыл сётӥсь техника. Но малы ке укыр мултэс ӵын поттылӥзы. Со тужгес шӧдӥськиз кадь удмуртъёслэназ концертын. Нырысь-валысь ас быгатонлыксэс возьматӥзы ӟуч ансамбльёс. Учкисьёслэн шорлыдъем арессы дас тямыс котырын вал. Ӧйтӧд, оло концерт учкыны лыктӥллям, оло муг шедиз татын шӧмаськыны сурен. Ай концертэз нуись йӧн-йӧн ялӥз: - Быръелэ асьтэлы кельшымон ансамбльдэс но пусъелэ пырон билетады. Потыкуды сое урнае куштоды. Ӧйтӧд, шӧмо йырын шонер-а меда быръёд... Малы ке та концертын учкисез шер-тур гинэ вал, нош кырӟасез - сюанчиос мында. Та нуналэ ик бигер усточиос но кырӟазы. Соос асьсэды гажало бере, концертсэс но нуизы лад-лад асьсэ кылын. Одӥг ӟуч кырӟась но соос пӧлын ӧй вал. Татын паймоно кадь луиз: султыса учкон вылысь, инты утчатэк ӧз луы. Ӧтемъёслы дан луиз пыд йылын учкон. Бигеръёслэн вал тодмо кырӟасьёссы но, али кутскисьёсыз но. Сцена вылын туж ӝикыт возё асьсэдыз. Но, фонограммаосыз сурамен, куд-ог артистъёслы ӵыжектоно луиз. Уноез кырӟасьёссы фестивале пыриськытэк кылиллям. Та пумысен тани мар вераз одӥгез егит ныл, Айгуль Сабрекова: - Ортчытоно ке, мед пыриськозы вань мылкыд карисьёс. Одӥг нунал гинэ висъяно ӧвӧл талы. Куд-огъёсыз палэнэ кылё, оло, кужмоосыз, яратоноосыз. Собере ӵемгес но ортчытъяно таӵе фестивальёсыз. Назиба Мухаметзянова, врач-терапевт, шуиз: - Яраз эктонъя "Гузель" ансамбль. Кырӟасьёс пӧлысь - Тансылу Байрамгулова. Отӥосыз - ӧзгес. Эстрадной кырӟан, мон сямен, шулдыр луыны кулэ кадь, мар ке туж мӧзмытэсьсэ кырӟало. Пенсионерка (нимтулзэ ӧз вера): - Уггес кельшы. Кырӟанлэсь кылъёссэ шуг валаны. Кызьы малпаськоды? Удмурт дӥсяськем ныллэн йыраз ӟуч кокошник понӥм ке, кельшоз-а? Уз. Тазьыгес луиз удмурт люкетэныз. Кутсконаз ик "Италмасысь" эктӥсьёс поръязы но, кырӟаны потӥзы ӟуч конкурсантъёс. Ма, паймод огласянь: вал ук ӟуч люкетэз нимысьтыз, малы отчы пыртӥллямтэ? Юалляськыса ӧм ветлэ ни, кинлы кин кельшиз, угось тужгес золъёсыз, юнъёсыз, пе, туннэ кырӟалозы шуизы. Нош куд-огъёссэ нырысьсэ адӟиськом ке, соос но-а "кизилиос" пӧлы пыро ни? "Кизили" шуо ке, мынам син азям пуксе Алла Пугачева, кызьы сое уг лэзё сцена вылысь... Нош куд-ог кырӟасьёсмес малы уг ӧтьыло таӵе ужрадъёсы (азьвыл таӵегес фестиваль вал Глазовын), яке соослы асьсэлы куриськоно-а? Шуом, "Усе, усе, усе тӧдьы лымы"... "Бен вал ук, бен вал ук"... Нош учкись возьма вылэм... Валамон, татын но вожмаськон, кинэ ке палэнтыны тыршон вань. Котькыӵе удыслэн уго аслаз политикаез. Кӧня ке кыл кырӟанъёс ласянь. Татын кин ке оло, споре но пыроз, но малпанъёсме шараятэк кельтэме уг пот. Басьтом одӥгзэ кырӟасез. Мон малпай вал ини, со Алла Пугачевалэсь берыктыса кырӟа шуыса. Озьы ик кутске : "Понимаешь, все еще будет"... Собере выже кыӵе ке валантэм гуре. Со сюлэме уг кыльы... Вал мукетъёсызлэн но ӟуч манер кырӟанъёссы. Нош огъя нимаське удмурт эстрада! Отысь-татысь басьтэм гуръёсын кырӟан кылдытыса, сцена вылэ пото. Нош учкись лыктэ ук лӧптыса-бурдъяськыса, кыӵе ке но осконэн. Озьы тӥни кытӥяз пилиськем тусь дуре кыле. Кизилиен но шудыны уг яра, дыр. Кизили со туп ӧвӧл. Басьтом нош ик Алла Пугачеваез, Филипп Киркоровез, София Ротаруэз но мукетъёссэ. Нокинлэн ымыз уз усьтӥськы соос кизилиос ӧвӧл шуыны. Малы ке шуоно, соос нокинэ пародировать уг каро. Огез но кыӵе ке валантэм кырӟан уг кырӟа. Ог-огзылэсь пӧртэмлыкенызы висъясько. Котькудӥзлэн аслаз куараез, ас чеберез-тусбуез. Не то ӟуч, не то удмурт шӧмо кырӟанъёсын ум узырме, дыр. Яке воксё ум быдтэ-а удмурт кырӟанлэсь национальной тусбуйзэ? *** 18-тӥ декабре "Металлург" культура дворецын ик та фестивальлэн йылпумъян люкетэз вал. Жаляса верано луэ, со эшшо но мӧзмытгес ортчиз. Учкисез но ӧжытгес вал ини. Кырӟан бӧрсьы кырӟан. Нош зал изе кадь. Соин вазиськоно кожай артэ пукись кышномуртлы. Со вылэм "Металлург" санаторийын ужась Л. Михайлова: - Ой, тани кырӟазы Надежда Уткина, Светлана Ермакова, Татьяна Ишматова... но ваньзылэн огкадьгес кырӟанъёссы... Тӥни малы сыӵе чус пуке вылэм зал... Йӧн-йӧн бигер воргорон потӥз но соку гинэ шӧдӥськиз концертлэн шӧмыз. Вань вылэм, вань кинэ кылзӥськыны. Зал юн кичабонъёсын эшшо но эшшо курылӥз сое кырӟаны. Куд-ог учкисьёслэн малпамзыя, солы кулэ вал Гран- при сётыны. Бигер шуизы, дыр. Бен, бен, пӧртэм нациос куспын ӵошатскон ортчиз ук. Монэн соглаш ӧвӧл ке, соку котькуд нация пӧлысь быръёно вал вал ке сыӵезэ, устозэ. Собере, малы конкурсантъёс плюсовкаен кырӟало (азьвыл ик плёнка вылэ гожтэмын кырӟанзы)? Луэ шат озьы но конкурсэ пыриськыны? Вылаз ик, усточиос пӧлы пырыны? Таиз ини валантэм. Соин ик малпан кылдэ: куд-ог эшъёс огазеяськыса асьсэлы фестиваль ортчытӥзы шуыса. Нош кин кылдытэ конкуренция, жаль, уг шедё фестивальёсы. Я, йырдэс уллань эн лэзе, кин ӧз пыриськы яке фестивальлэн йылпумъяназ ӧз шедь, учкисьёс тӥледыз ярато ук. Нош Ю. Кузьминаез конкурсантка кожаллям. Со куно интыын гинэ вал. Малпасько, азьланяз но луозы ай таӵе фестивальёс. Но сое шудонлы пӧрмытоно ӧй вал. Собере огпол ке но мед возьматысалзы вылэм асьсэды ноку но эстрадая конкурсэ пыриськылымтэ кырӟасьёс. Л. СОСНОВА. Узыр ик та музъеммы... Алигес Вуж Монья школаын ортчизы удмурт кыллы, литературалы, калыклэн историезлы но культураезлы сӥзем нуналъёс. Чузъяськизы удмурт гуръёс, кылбуръёс. Борддоръёсты улӟытӥзы шаермылы сӥзем суредъёс. Палэнэ ӧз кыльы ёросмылэн юбилеез но. Шуркынмон толэзе 70 ар тырмиз. Ортчем вамышъёсыз, ужысь но ожысь ветеранъёс, паймымон адямиос сярысь тодэмзэс пиналъёс возьматӥзы викторинаын. Аспӧртэмлыко ортчиз кылбур веранъя конкурс. Чузъяськизы Пурга музъеммы вылын вордӥськем 20 пала кылбурчиосмылэн чуръёссы. Пиналъёс паймыса кылзӥськизы Эрик Батуев журналист сярысь. Кытын ай, пе, ваньмызлы со сямен МГУ-ын дышетскыны, Чечняе, Италие но мукет интыосы вуылыны, А.Кашпировскиен, пӧртэм политической деятельёсын пумиськылыны, "Мы" передачалэн куноез, "Московский комсомолецлэн" корреспондентэз луыны, кылбуръёсыныд книга поттыны. "Эх! Тросгес мед луозы вылэм ёросамы со вылем пиос", - лулӟылӥзы куд-огез. Адӟем карымон журналистъёсмы но тырмыт гинэ вылэм. Данъяськыса кылзоно В.Ивашкинлэсь, Н.Степановалэсь, С.Карповлэсь но мукетъёсызлэсь передачаоссэс. Фольклор фестивальмы но тунсыко ортчиз. Котькуд класс возьматӥз эктыны, кырӟаны быгатэмзэ, калык кылосэз тодэмзэ. Выльысь улӟизы вашка шудонъёс, йылолъёс, калык кырӟанъёс, исаськонъёс. Пиналъёс трос гинэ выльзэ, азьвыл тодымтэзэ асьсэлы усьтӥзы. Удмуртъёслэсь гырыны-кизьыны потонзэс возьматӥзы 7-тӥ классын дышетскисьёс. Нимысьтыз радлыкъя ортчылэм та йылол. Уго няньлэсь дуноез номыр ӧвӧл. Музъемзэс утизы, котькуд кесегзэ вить чиньызэс сямен тодӥзы, кытӥ мур гыроно, кытӥ герыез ӝутоно. Музъемлэсь басьтэмед ке потэ, ачид но сёт, шуылӥзы. Гужем, сӥзьыл, тол йылолъёс ваньмыз герӟаськемын гырыны-кизьыны потон сям-нергеен. Сӥзьыл тау карылӥзы инмаръёссылы удалтэм няньзы понна, нош толалтэ но тулыс асьсэды дасяллязы вуоно тулыс ужзылы. Ӟечезлы оскон, инкуазез утён, улэп муртлы сямен солы вазиськон, ог- огедлы умой лэсьтыны тыршон кузёяськылӥзы вашкала сямъёсын, йылолъёсын... Бадӟым классын дышетскись пиналъёслы вунонтэм кылиз, дыр, гуртысьтымы крезьгурчиосын, кылбур гожъясьёсын пумиськон. Пукон ӝытамы выльысь сюлэмез вырӟытӥзы Августа Васильевалэн (Семеновалэн) кырӟанъёсыз. Со тодматӥз кылбуръёсыныз, аслаз гожъяськон амалъёсыныз. Асьсэлэн быгатэменызы паймытӥзы внеклассной ужъёсты радъясь Л.К.Апышева, культура юртын ужась Н.Т.Федорова но А.В.Никитин. Шумпоттӥзы А.Н.Моисеев но солэн нылыз Ирина. Соос но кырӟанъёссэс кузьмазы. Палэнэ ӧз кыле школаысь пинал гожъясьёсмы: Н.Яковлева, О.Устинова, Л.Михайлова, сузэръёс Ирина но Оля Ефремоваос. Яратоно кырӟанзэс но гитараен шудыса кырӟазы В.Александров но Ю.Моисеев. Ужрад бере самой тунсыкоез вите вылэм - асьмеды адӟимы телевизор экран вылысь. Директормылэн А.Ф.Архиповлэн сюлмаськеменыз видеокамераен. Выль телевизорлы, видеокамералы, фотоаппаратлы пиналъёс пумтэм шумпотэмын. "Тау тӥледы, Александр Федорович!" - шуизы кадь шумпотэм синъёс. Ми, удмурт кылъя но литературая дышетӥсьёс, ог-огмы доры куное - уроке вуылӥмы. Н.М.Архиповалэн, Н.П.Демьяновалэн урокъёссылы вылӥ дунъет сётӥз школаысь завуч И.Г.Тепина. Тыршыса ужаллям суредаськонъя дышетӥсьмылэн С.Н. Филимоновлэн пиналъёсыз. Усто пӧрмиллям С.Никитинлэн, О.Алексеевалэн, М.Крыловалэн суредъёссы. Тӥни озьы ортчизы ужгурен, сюлмаськонъёсын но шумпотонэн тырмем нуналъёс. котькудӥз маке но выльзэ, тунсыкозэ басьтӥз аслыз та ужрадъёсысь. М.Никитина, Пичи Пурга ёросысь Вуж Монья школаысь дышетӥсь. Уӵыосын тырмиз шурсьӧр Крезьгурез Пантелей Кузнецовлэн Кылъёсыз Елена Виноградовалэн 1. Уӵыосын тырмиз ини шурсьӧр, туннэ соос но чылкак лӧптэмын, Туннэ ни пичия шаплы вуӧр, вож вукуаръёс пушто сумед вылын. 2. Марлы мыным со вукуаръёс, сумед? Италмасъёс уг пуштыло отын. Мон ӵуж сяська ноку уг кузьма, мед, озьы ке но, поэт солы ӵуж вын. 3. Озьы ке но, дунне солы тэгыз, уӵы гинэ мед кырӟалоз эркын. Озьы ке но, тырме солэн гадьыз, тым ты вылэ усё синвуосыз. 4. Огпол гинэ, арлы огпол гинэ уӵыосын тырме быдэс шурсьӧр. Вож вукуаръёс вылын ӵашетылэ: я пичия, я паськыта вуӧр... Возьматӥськом огсыр ужась предприятиосты Ческыт сиён-юон потто Шаерамы таӵе предприятиос чиньыен лыдъямон. Данакезлы тодмо, дыр, Кизнерысь крахмало-паточной завод. Берло дыре со луиз акциосын "Карконд" огазеяськон. Нош ним сётэмын кыӵе продукция поттэмез вылысь (кар - картофка но конд - кондитерской изделие). Кизнер пряникъёсты котькытын шумпотыса басьто. Сое предприятие дас пумо поттэ. Озьы ик лэсьтэ печення, вермишель, кисель, уксус, юзмытӥсь юонъёс, крахмал но пызь. Пряникъёсыз но печенняез кошко Ижевске, Сарапулэ, Воткинске но Можгае. Отын асьсэлэн но пищекомбинатъёссы вань ке но, кизнеръёслэн ческыт сиёнзы магазин ӝажыосын уг вужмы. Республикалэн шоркараз огазеяськонлэн кык фирменной магазинэз вань ни. Кизнеръёслэсь продукцизэс озьы ик басьто бускельёсмы - Татарстан, Киров но Пермь областьёс. Доразы вуо Екатеринбургысь, Башкортостанысь басьяськисьёс. Со уго интыяськемын чугун сюрес вылын. "Каркондлэн" крахмалэзлы но кулэяськисьёс йыло. Миым тани куинь вагон келязы Новосибирске. Куронъёс вуо Уралысь но бускель улосвылъёсысь. Кызьы бен кизнеръёс арез йылпумъязы? Умой. Ар ӵоже 10,5 миллион манет тыр сиён-юон поттӥзы. Кылем арын та дырен ӵошатыса, туэ продукция поттонзэс 38,5 процентлы будэтӥзы но 500 сюрс манетлэсь уно пайда басьтӥзы. Вань продукцизы пӧлысь 70 процентлэсь ятырзэ пряникъёс потто. Дуныз но бадӟым ӧвӧл, одӥг килограммез шорлыдын 15 манет усе. Предприятиен дас витетӥ арзэ кивалтэ ни Геннадий Акберов. Со ялан утчаське, маке но выльзэ пыӵатэ. Кылсярысь, ӝоген поттыны кутскозы "Лукум" но ирис. Оборудование пуктэмын ни. Огдыре кукуруза палочкаос лэсьтылӥзы (1998-тӥ арын 3 тонна лэсьтӥзы), но уксёзы ӧвӧлэн дугдӥзы вал. Али нош ик малпало та ужзэс азинтыны. Москваысь, пе, пыргытэм кукуруза кеньыр басьтом. Бен, рыноке выжон нокинлы каньылэн уг сётӥськы. Али кизнеръёс огсыр ужало, пайда басьто ке но, шуг-секытъёссы бырымтэ. Геннадий Акберович пӧсекъяса ик маде: - Огазеяськонэз пачкато выт тырон но бартер амалэн ужан. Соин ик асьмелы выльдӥськыны уксё уг тырмы, нош бюджетэ улэп коньдон сётӥськом. "Каркондэз" бадӟым огазеяськон уд шуы. Али отын 114 мурт ужа, нош картофка басьтон вакытэ 15-20 адями ватсаса куто. Толэзяз шорлыдын 900 манет уждун басьто. Коллективын туж тупаса, огкылысь ужало. Данакез 10-20 ар ӵоже тыршо ни. Кизнерысь кондитеръёслэн данзы пумен будэ. Уженызы тодматскыса, син шоры йӧтэ котыр чылкытлык, агрегатъёс огсыр бергало, контейнер кузя васько пряникъёс но печенняос. Котькудӥз ас ужзэ чупрес быдэсъя. Ваньмыз сямен кышномуртъёс. Соослы капчи ӧвӧл, быдэс смена ӵоже пыд йылазы ужало, 30 минутлы гинэ нуназеяны дугдыло. Кондитеръёс вань сюлэмзэс сётыса тыршо. Соин, вылды, продукцизы но ческыт пӧрме. "Каркондын", зэмзэ но, ас ужзэс яратӥсь, гажась адямиос тыршо. Тани печення лэсьтонын синмаськымон ужало Зинаида Редькина, Гульсира Фасихова но пыжиськись Людмила Ильина. Сиён-юонъёслэсь ӟечлыксэс вис карытэк син азязы возё лабораториысь технолог Надежда Попова но цехлэн мастерез Татьяна Маева. Данакмы асьмеос, пряник яке печення басьтыкумы, шӧмыз но дуныз шоры гинэ учкиськомы. Нош кин соосты дася, кыӵе ӟечлыксы, концентратъёсын-а, экстрактъёсын-а - соиз сярысь ум малпаське. Но со бордын но пӧраськисьёс тыршо, соосты лэсьтонъя нимаз ГОСТ тупатэмын. Сиён-юонлэсь ӟечлыксэ нимысьтыз лабораториын эскеро. Уго та вакытэ калыклэн куронъёсыз бадӟымесь. Ӧз кельшы ке, уз басьты. Озьы производство но куашканы быгатоз. Мукет ласянь, котькуд толэзе санэпидемстанция чакланы ветлэ. Тодӥськоды на, дыр, ар-кык талэсь азьло гордалэс пряникез калык тужгес но басьтэ вал. Чебересь уго, шӧмыз но ческытгес. Одӥг но ӝыны ар сыӵе югдур улӥз. Нош табере адямиос отын буёлэз вань, шуо. Зэм но, химиез вал. "Малинкаез" ӧжытгес басьяны кутскемзы бере, мукет пряникъёсын ужано луиз. Кызьы шуиз лабораториысь технолог Надежда Попова, химия ласянь возьматонзыя продукцизы ӧжыт гинэ уг тупа экспортлы. Сиён-юонлэн ӟечлыкез комбинатын ужасьёслэсь гинэ уг поты. Сырьё но пӧртэм луэ. Туртто вал концентратъёсын ужаны, но асьсэлэсь басьяськисьёссэс ыштыны курдазы. Соин зэмос экстрактъёсын гинэ выро. Кисальлы дасесь экстрактъёс Москва улосвылысь ваё. Азьвыл пряникъёсты Кукморысь вайылӥзы. Соослэн дунтэмесь вал. Бӧрысь валазы: Кизнерын дуногес ке но, ческытгес. Али комбинатын нимысьтыз пряникъёс поттон бордын ужало. Вылтуссы но шӧмзы адямиослы туж кельше. Вераны кулэ, одӥг нунал куспын татын одӥг тонна пряник потто. Одӥг смена ӵоже одӥг но ӝыны тонна печення дасяло. Дасязы А. АНДРИЯНОВ, Г. РОМАНОВ, В. КАМАШЕВ (фото). Коньдон ужпумъёсъя министерстволы - 65 Николай Мирошкин: "Уксёен кузёяськыны быгатоно... " Республикаямы Николай Петровичез тодӥсьтэмез трос ӧвӧл, дыр. Со быдэс улонзэ герӟаз Коньдон ужпумъёсъя министерствоен. Чувашиысь коньдон ужпумъёсъя техникумез йылпумъямез бере ужаны ысто Удмуртие. Егит специалист луэ Воткинск городын выт бичанъя участковой инспектор. Одӥг ар ужамез бере Николаез басьто армие. Ньыль ар служить каре Уй пал флотын. Собере выльысь берытске Удмуртие, Ува районын ужа. Нош 1964-тӥ арын сое басьто Коньдон ужпумъёсъя министерствое. Кызьы шуо, татын вань тубатъёстӥ ортчиз - вал ревизор, отделлэн кивалтӥсез, валтӥсь бухгалтер, нош али луэ коньдон ужпумъёсъя министрлэн нырысетӥ воштӥсез. Николай Петрович сярысь вераку, нокызьы кельтыны уг яра Ангола Республикаын ужамзэ. 1979-тӥ - 1981-тӥ аръёсы со вал СССР-ысь Коньдон ужпумъёсъя министерстволэн советникез. Собере Николай Мирошкинэз кельто вал Москвае министерствое. Но со меӵак шуиз: "Удмуртиез номырин уг вошты". Туннэ республикаысьтымы Коньдон ужпумъёсъя министерстволы тырме 65 ар. Соин валче Николай Петровичен пумиськылӥз газетлэн корреспондентэз Геннадий РОМАНОВ. - Николай Петрович, ойдолэ вераськонмес мытом тани мар бордысен. Кызьы вордскиз тӥляд удысты? - Туннэ, 12-тӥ январе, Удмурт Республикаысь коньдонъя нырысетӥ ёзъёс кылдытэм дырысен 65 ар тырме. Та дыр ӵоже кызьы ке странаын, озьы ик Удмуртиын бадӟымесь воштӥськонъёс луизы. Республика кужмо шаерлы пӧрмиз. Ӝог азинскизы промышленность, гурт хозяйство но культура. Совето власть дыръя ӝутскизы выль удысъёс - машина лэсьтон, му вӧй кыскон, азинскиз андан ӵыжатон, сиён-юон поттон но музонэз. Но луиз озьы, коньдонъя удыс кылдытон сярысь указ бергес кутэмын вал. Нырысь (1920-тӥ арын 4-тӥ ноябре) вордскиз Вотской Автономной область. 1921-тӥ арын 15- тӥ феврале кылдытэмын вал Коньдонъя областной отдел. Нырысетӥ бюджетъёс туж секытэн быдэсъяськизы. Дыр куриз выль экономической политикае выжыны но манетэз юнматыны. Удмуртилэн нырысетӥ бюджетаз (1922-тӥ-1923-тӥ аръёс) пыре вал областной бюджет, Ижевсклэн но уездъёслэн бюджетъёссы. Доход люкетэз 352700 манет вал, расход люкетэз - 300100 манет. Союзной бюджетысь областьлы висъязы 70600 манет, нош 1924-тӥ-1925-тӥ аръёсы сыӵе юрттэт 964,1 сюрс манетозь вуиз. Экономика юнмамъя, Москва пумен тросгес уксё сётъяз. Коньдон висъяське вал калык хозяйствоез азинтыны, дышетонэз но тазалык утёнэз кужмоятыны. Областной бюджетлэн нырысетӥ кивалтӥсез вал Прокопий Павлович Ефимов. Берло со ик луиз нарком но та интыын ужаз 1935-тӥ-1937-тӥ аръёсы. 1935-тӥ арын 12-тӥ январе УАССР-ысь ЦИК-лэн И созывезлэн нырысетӥ сессиез постановление кутӥз. Соя областной финансовой отдел воштэмын вал Удмурт Республикаысь Коньдон ужпумъёсъя наркоматлы. - Кыӵе ужъёсын бен выриз наркомат? - Солы оскемын вал доход но расход люкетэз, бюджетъя статистической материалъёс дасяны, наркоматъёслэсь но учреждениослэсь коньдонъя сметаоссэс эскерыны, кун бюджетлы инъет лэсьтыны, предприятиослэсь но учреждениослэсь отчётъёссэс чакланы но мукет. 1936-тӥ арын Наркоматын 60 мурт ужаз (44 воргорон, 16 кышномурт). Солэн 7 секторез вал, нош 1939-тӥ арын 7 отдел кылдытэмын. Индустриализациез но коллективизациез ортчытэмен, та удыс но ялан вошъяськиз. 1933-тӥ-1937-тӥ аръёсы калык хозяйствоез азинтыны 54,3 миллион манет коньдон висъямын. Наркомез П. П. Ефимовез мукет уже выжтэмзы бере, комиссариатэз оскизы Степан Александрович Александровлы (Нижегородской губерниын вордскемын). Со 1943-тӥ арозь ужаз, собере сое сыӵе уже ик Красноярске келязы. Солэн интыяз пуктӥзы воштӥсьсэ Николай Маркович Перевощиковез. Со 1946-тӥ арозь кивалтӥз. Соку ик Наркоматэз Удмурт Республикаысь Коньдон ужпумъёсъя министерстволы пӧрмытӥзы. Вылӥ Кенешлэн Президиумез сыӵе указ поттӥз 1946-тӥ арын 28-тӥ мартэ. Пусйыны кулэ, 1940-тӥ арын, 1937-тӥ арен ӵошатыса, бюджетын кун доход кык пол будӥз но 98,1 миллион манет луиз. Война кутскем бере Наркомфинысь данакез ужасьёс ожмаськыны кошкизы. Соос пӧлын - Невоструев, Меньков, Заболотский, Князев, Веретенников, Полстовалов, Сметанин но мукетъёсыз. Та вакытэ но бюджетэ коньдон вуэ вал. 1945-тӥ арын, 1940-тӥ арын сярысь, 9,8 миллион манетлы уногес уксё пыртэмын. Басьтӥсько вал военной, гурт но интыысь выт, мукет октонъёс но кун займъёс. Война бере калык вань кужымзэ сётӥз куашкам хозяйствоез ӝутыны. Быдтэмын вал военной выт. 1946-тӥ-1959-тӥ аръёсы коньдонъя министр вал Михаил Васильевич Сандаков. Сое воштӥз Фёдор Фёдорович Корепанов - коньдон ужпумъёсты туж ӟеч валась адями. Со дыре министерство ялан выльдӥськиз, 8 отдел усьтэмын. 1969-тӥ арын кылдӥз министерстволэн коллегиез (7 муртлэсь). - Николай Петрович, нош кызьы ужады 70-тӥ-80-тӥ аръёсы? - 1970-тӥ арын пенсие кошкиз Ф. Ф. Корепанов. Интыяз пукто Фёдор Егорович Андреевез. Со вить ар ужаз. Москва та дыр ӵоже 2,6 миллиард манет коньдон висъяз, яке 7-тӥ но 8-тӥ пятилеткаосы мында. Соку умой быдэсъяськиз социальной программа: будӥзы уждун, пенсиос, стипендиос но мукет пособиос. Трос ӝутскизы улон коркаос. 1975-тӥ-1990-тӥ аръёсы удысэн кивалтӥз Николай Григорьевич Пушин. Азьло со Госбанклэн Удмурт контораяз ужаз. Та вакытэ улонэ пыӵатэмын социально- экономической азинсконъя программа. Нош 1980-тӥ аръёсы кутскиз калык хозяйствоез выльдон. Со каньылэн ӧз мыны. Капчи ӧй вал Коньдон ужпумъёсъя министерстволы но. Та удыс но выльдӥськиз. Отысь поттэмын вал Налогъёсъя инспекция но контрольно- ревизионной управление. 1990-тӥ-1993-тӥ аръёсы коньдонъя министр вал Равиль Каримов, нош 1995-тӥ арозь - Владимир Агашин. Собере министр луэ Владимир Бельтюков. Министерство трос лэсьтэ рынокен экономикае выжон вакытэз капчиятон понна. Производство кулэсме, выт тырон сюбега. Озьы ке но, удыс возиське. - Нош мар верасалды туннэ ужасьёсты сярысь? - Удысамы али 485 мурт ужа. Со пӧлысь 75 процентэз вылӥ квалификациен, 25 процентэз - шоро-куспо квалификациен. Министерствоын ужаса, уноез басьто вылӥ образование. Али 91 адями дышетске. Дорамы ужзэс яратӥсь специалистъёс тыршо. Тани 32-36 ар министерствоын ужазы Александра Фёдоровна Мыльникова, Юлия Степановна Ерёмина, Алексей Данилович Чичкин, 25-27 ар - Юлия Андреевна Коротаева, Людмила Александровна Перепелова но трос мукетъёсыз. Нош Фёдор Семенович Бухтулов 38 ар тыршиз, со пӧлысь 26 ар вал министрлэн нырысетӥ воштӥсез. Николай Григорьевич Пушин пусъемын "Знак Почёта" орденэн но уно грамотаосын. Министерстволэн 34 ожысь но ужысь ветеранъёсыз. Соосты одӥгзэ но ум вунэтӥське. Берло дыре дорамы трос выль ужасьёс лыктӥзы. Соос мылысь-кыдысь тыршо. Нимысьтыз пусйымонъёс пӧлын - Ф. М. Рафиков, Г. Б. Полетаева, М. А. Стерхова, Г. В. Золотарева, Л. А. Сизова, Т. П. Дудырева, Н. П. Чикишева но музонэз. - Туэлы кун бюджет кутэмын, нош мае пусйысалды ортчемез сярысь? - 2000-тӥ ар - со выль вакыт. Ортчемез дышетэ бюджет кусыпъёсты умоятыны. Нош 1999-тӥ арлы бюджет, 1998-тӥ арен ӵошатыса, умойгес быдэстэмын. Ӟечгес луиз экономика ласянь югдур, уката ик - му вӧй поттонъя. Быдтэмын дефицит шуон, ватсаса 764 миллион манет пыртэмын. Бюджет чотыр тыршисьёслы уждун сётыны 1221,5 миллион манет висъямын, яке расходъёс пӧлысь 19,5 процентэз. Коньдонтэк улон ӧвӧл. Соин кузёяськыны быгатоно. Уксёез валаса кутӥськод ке, пайдаез соку ик адӟиське. Сое ми кылем арын но ас выламы шӧдӥм. - Николай Петрович, пинал дыръяды кин луыны малпаськоды вал? - Гурт ужез яратылӥ. Но гурт хозяйствоя дышетскон заведениос матын луымтэен, коньдон ужпумёсъя техникуме пыри. - Семьяяды кин коньдонъя министр? - Кышное, валамон ни. - Кыӵе яратоно сиёнды? Кызьы шутэтскиськоды? - Кельшо бигер сиёнъёс, уката ик балиш. Толалтэ куасэн бызьылӥсько, азьло капчи атлетикаен выри, гужем сад-бакчаям ужасько. НАТАЛЬ "Нуны - 2000" Пичи эте кузьым вите Укмыс толэзь пала возьмамы та шумпотымон иворез. Осконъёсмы юнме вылӥллямтэ. "Удмурт дунне" газетлэн возем нуныез вордӥськиз Выль арлэн 35-тӥ минутаз. Пичи этелэн анай-атаез - егит кузпалъёс. Никитинъёс уло Шаркан районысь Мувыр гуртын, нылпизы вордӥськиз Ижевскысь 7-тӥ роддомын, кыске со куинь но ӝыны килограмм, быдӟалаез 51 сантиметр. Кызьы ивортӥз Шаркан районысь загсэн кивалтӥсь Вера Николаевна Райкова, "Удмурт дунне" газет гожтэмын пичи этелеэн атаез вылэ. Нылпи коляскаез утыны мылкыд карисьёс сярысь мукет ивортонъёс редакцие ӧз вуэ. Л.Малых. Пӧртмаськом! Удмурт лулчеберлыкъя дэменлыкысь адямиос лулысь-сюлмысь утё вашкала сямъёсмес. Одӥгез тужгес йӧноез йылол - пӧртмаськон. Ӵапак та вакытэ гуртъёсын ортчо солы сӥзем шулдыръяськонъёс: маскара дӥсяськем адямиос коркась корка пыраса ветло но бускельёссылы, бӧлякъёссылы шудбур, тазалык, ваньбур сӥзё. Гурт калыклэсь бере уг кылё городын улӥсьёс но. Удмурт лулчеберлыкъя дэменлык кичӧлтэмъя, вуоно кӧснуналэ, 15-тӥ толшоре (январе), шаерысьтымы культурая училищелэн юртаз луоз пӧртмаськонлы сӥзем шулдыртӥськон. Татчы пыриськыны мылкыд карисьёс пӧртмаськонэ мед лыктозы, тунсыко дӥсяськыса. Вуэмъёсты шулдыртозы Ижысь "Октябрь" культура дворецысь "Бускельёс", культурая училищеысь "Ингур", мукет ансамбльёс. Шулдыртӥськон кутскоз нуназе бере куинь часын. Дэменлыкысь адямиос ӧтё татчы вашкалаеныз лулысь-сюлмысь тунсыкъяськись вань удмуртъёсты. Скрипка но, баян н кызисько ни соослэсь Вит ар но ӝыны талэсь азьло Ижевскысь удмурт нылпиос пӧлысь крезьгурез тужгес шӧдӥсьёссэ люказы одӥг классэ. Нырысь-валысь соос Восточной посёлокысь школа- интернатын дышетскизы. Нош Широкий переулокын республикаысьтымы пинал усточиослы искусствоосъя школа-интернат усьтӥськем бере, татчы выжизы. Капчи ӧй вал та пиналъёслы нырысь вамышъёссэс лэсьтыны. Городлэн пӧртэм палъёсысьтыз ветлоно луылӥзы, интернат условиослы дышоно, школаын лумбыт улоно, дышетсконо вал. Тужгес секытэз вормемын, шуыны луэ. Та класс табере - 27-тӥ школалэн данъяськонэз, школа-интернатын но син шоры йӧтымонэз. ӟеч дышетскем сяна, усто шудыны дышизы ни фортепианоен, баянэн, балалайкаен но мукетыныз. Куд-огез калык инструментъёсъя оркестрын шудо, хорын кырӟало. Нимысьтыз висъяськись пиналъёс пӧлысь пусйыны луэ Настя Чгодинаез. Надежда Викторовна Митрофановалэн дышетскисез, со аслаз скрипкаеныз солистка луыса пыриськылӥз "Ингур" капеллалэн концертъёсаз но. Скрипкаен шудо Настя Ягодина (паллянысез) но Таня Соприна, баянэн - Алеша Чекин. Та пиналъёс али 7-тӥ классын дышетско ни. Туспуктэмъёсыз В. Камашевлэн. Удмурт Республикаысь Правительстволэн 1999-тӥ арын 24-тӥ мае кутэм "Удмурт Республикалэн улосвылаз промышленность удысысь но юртъер котырысь куштӥськем кортэз, дуно но сьӧд металлъёсты вузан-басьтонъя, нуон-ваёнъя, интыянъя эскерон ужез кужмоятонъя ватсаса ужрадъёс сярысь" 471 номеро постановленияз воштонъёс но ватсанъёс пыртон сярысь Удмурт Республикаысь Правительстволэн постановлениез Ижевск город. 1999-тӥ арын 14-тӥ декабре. � 1202. Удмурт Республикалэсь 1999-тӥ арын 19-тӥ октябре кутэм "Республикалэн улосвылаз дуно но сьӧд кортэз люкан-басьтонъя, вузанъя но соослэсь маке выльзэ дасянъя лицензия сётъясь ёзэз пусъёнъя радлык сярысь" 108-ИИ номеро Законзэ, Удмурт Республикаысь Кун Кенешлэсь 1999-тӥ арын 20-тӥ октябре кутэм "Удмурт Республикалэн улосвылаз дуно но сьӧд коръёсты вузан-басьтонэз радъян сярысь" 114-ИИ номеро постановленизэ лыдэ басьтыса, Удмурт Республикаысь Правительство пуктэ: 1. Удмурт Республикаысь Правительстволэн 1999-тӥ арын 24-тӥ мае кутэм 471 номеро постановленияз таӵе воштонъёс но ватсанъёс пыртоно: а) постановленилэсь нимзэ тазьы верано: "Удмурт Республикалэн улосвылаз куштӥськем сьӧд но дуно металлъёсты люкан-басьтонъя, вузанъя но соослэсь выль арбериос дасянъя эскерон ужез кужмоятонын ватсаса ужрадъёс сярысь"; б) постановленилэсь 1-тӥ пунктсэ тазьы лыдӟоно: "1. Удмурт Республиклэн улосвылаз куштӥськем сьӧд но дуно кортэз вузан-басьтонъя пунктъёс усьтон но соослэсь ужзэс радъян сярысь правилоос юнматоно"; в) постановленилэсь 2-тӥ пунктсэ кужымзэ ыштэмен лыдъяно; г) 3-тӥ пунктлэсь 1-тӥ абзацсэ тазьы лыдӟоно: "Удмурт Республикаысь Югдурез утёнъя министерстволы ялан эскерыса возёно республика улосвылын куштӥськем сьӧд но дуно кортэз вузан-басьтонъя пунктъёсты усьтон но соослэсь ужзэс радъян правилоосты чакламез"; д) постановленилэн 4-тӥ пунктаз "Удмурт Республикаысь Котырысь инкуазез утёнъя комитетэн" гожтэмез тазьы воштоно: "Удмурт Республикаысь Котырысь инкуазез утёнъя комитетэн, Промышленностья но транспортъя министерствоен"; "куштӥськем сьӧд но дуно кортъёсты басьтон-вузанэз радъясь" гожтэм интые, тазьы верано: "куштӥськем сьӧд но дуно кортъёсты басьтонэз, вузанэз но соослэсь маке выльзэ дасян-поттонэз радъясь"; е) постановленилэсь 5-тӥ пунктсэ тазьы лыдӟоно: "5. Удмурт Республикалэн улосвылаз интыяськем Горький чугун сюреслэн Ижевскысь ёзэзлы, Горький чугун сюреслэн Киров ёзэзлэн но Свердловск чугун сюреслэн Пермь ёзэзлэн станциоссылы, "Удмуртавтотранс" ГУП-лы, граждан авиацилэн Урал управлениезлэн Ижевскысь огазеям авиаотрядэзлы, Сарапулысь но Камбаркаысь портъёслы, республикалэн улосвылысьтыз пристаньёслы, Транспортно-экспедиционной нуон-ваёнъя управленилы куштӥськем сьӧд но дуно кортъёсты республикамылэн палэназ поттыны лэзёно, груз келясьлэн вань ке Удмурт Республикаысь Промышелнностья но транспортъя министерстволэн лэзён кагазэз, нош Удмурт Республикаысь Югдурез утёнъя министерство кортлэн кытысь вуэмезлы дунъет сётыны кулэ"; ж) постановленилэн 6-тӥ пунктысьтыз "куштӥськем сьӧд но дуно кортъёсты нуон- ваёнъя, вузан-басьтонъя, интыянъя праволы" гожтэмез тазьы воштоно: "куштӥськем сьӧд но дуно кортэз люканы, вузаны, солэсь маке выльзэ дасяны"; з) 7-тӥ пунктэз тазьы лыдӟоно: "7. Иворъёсты вӧлмытон ёзъёслы, организациослэсь но нимаз ужбергатӥсьёслэсь ялонъёссэс печатлаку, куштӥськем сьӧд но дуно кортъёсты люканы, вузаны но соослэсь выль арбериос дасяны лэзись лицензизылэсь номерзэ но сое сётӥсь ёзлэсь нимзэ пусъёно"; и) 9-тӥ пунктэз тазьы лыдӟоно: "9. Та постановленилэсь быдэсъяськемзэ эскерыны осконо Удмурт Республикаысь Промышленностья но транспортъя министерстволы"; 2. Юнматоно нимысьтыз ужбергатӥсьёс шуыса пусйымтэ нимаз адямиослэсь басьтыны лэзем сьӧд но дуно корт тӥрлыкъёслэсь переченьзэс. 3. Постановление кужыме пыре, сое печатлам дырысен 15 нунал ортчыса. Удмурт Республикаысь Правительстволэн Тӧроез Н. А. Ганза. Та переченья нимаз адямиослэсь басьтыны лэземын таӵе арбериос но трлыкъёс: 1. Сиён-юон посуда но пӧраськон тӥрлыкъёс (пуньы, вилка, кастрюля, таба но мукет). 2. Электроприборъёс (вуриськон но мисьтаськон машина, утюг, сӥль коран машина но мукет). 3. Бакчаын ужан тӥрлыкъёс (лопата, мажес, кукчо но мукет). 4. Лэсьтӥськон арбериос (дрель, портон, тӥр, струг, молот, бычкы, кис, стамеска но мукет). 5. Бензо-но электробычкыос (документъёссы вань ке 6. Авто-но мототехника(документъёссы вань ке), велосипедъёс но соослы котыръёс (насос, домкрат но мукет). 7. Сиён-юон тырон-возён тӥрлык (консерва банка, пиво посуда но мукет). 8. Кизер макеосты возён посуда (ведра, таз но мукет). 9. Гардинаос, ошетъёс, пуктэтъёс. 10. Мебельлы, ӧслы, укнолы кулэ луись тӥрлыкъёс (кутон, шпингалет но мукет). 11. Мебель (ӝӧк, пукон, кровать). 12. Гур тӥрлыкъёс. 13. Тунгонъёс. 14. Нуллӥськон пичи уробоос. 15. Пичи кузьымъёс-сувениръёс. Ӝоггес но дунтэмгес Ижевскын усьтӥськиз книгаосты вӧлмытонъя "Терра-интеллект" клуб. Со луэ Россиысь таӵе ик нимо клублэн ёзэз. Клуб огазея миллион но ӝынылэсь уно адямиез. Огазеяськон кылдытэмын, выль потэм книгаосты лыдӟись доры ӝоггес но дунтэмгес вуттон вылысь. Клубе вазиськоно таӵе адресъя: 426057, Ижевск, а/я 3820. В. РОГАЛЕВ. Газетлы 30 ар Ижевскын куамынэтӥ арзэ ини потэ "Голос строителя" газет. Солэн нырысетӥ редакторез вал Юрий Дроздов, кивалтӥз 10 ар. Газетэз поттэ городысьтымы лэсьтӥськонъя одӥгез бадӟымез предприятие 17-тӥ управление. В. РОГАЛЕВ. Пенсионеръёслы огдырлы коньдон юрттэт сётон сярысь Россия Федерацилэн Президентэзлэн Указэз Вузъёслы но услугаослы дунъёс будэмен но Россия Федерациын улӥсь пенсионеръёслы юрттон вылысь пуктӥсько: 1. 2000-тӥ арын январе огдырлы ватсаса 50 манет сётоно пенсионеръёслы, кинъёслы пенсия тупатэмын 2000-тӥ арын 31-тӥ январёзь Россия Федерацилэсь "Россия Федерациын кун пенсиос сярысь" Законзэ лыдэ басьтыса. 2. Уждун вӧзы ёрос (районной) коэффициент басьтӥсьёслы, огдырлы уксёен юрттонэз тупатоно, ёрос коэффициентлэсь быдӟалазэ лыдэ басьтыса. Россия Федерацилэн законэзъя огдыре кык пенсия басьтӥсьёслы ватсаса юрттэт одӥг пол гинэ сётоно. 3. Огдырлы ватсаса юрттэт сётӥське пенсиослы висъям коньдон чотын. Россия Федерацилэн Президентэз Б. Ельцин. Москва, Кремль 1999-тӥ арын 27-тӥ декабре. � 1709. Дыраз лэсьтэм вамыш Россиын улӥсьёс, ма, быдэс дунне но, али ке но валаны туртто на Выль арлы туж паймымон "кузьымез" - Президентлэсь кошкемзэ. Мар малпа та пумысен "Удмурт кенеш" огазеяськонлэн тӧроез, Кун Кенешлэн депутатэз Валентин Тубылов? Тани ма со вераз газетмылы: - Ельцин кошкиз. Кошкиз историе. Пыраклы. Со шонер лэсьтӥз, уго шӧдӥз, бадӟым странаен кивалтыны кужымез но, тазалыкез но ӧвӧл ни шуыса. Берло вераськемез трос калыклэн сюлмаз йӧтӥз. Мон сямен, Россиын улӥсьёс дась табере уно сьӧлыкъёссэ но вунэтыны. Адямиосты шумпоттӥзы солэн кылъёсыз: сюрес сётоно егитъёслы, соослы люкетыны уг яра ни. Кун Думае быръён дыръя Удмуртиысь калыкъёс возьматӥзы "Единство" ("Медведь") огазеяськонлы дурбасьтэмзэс, солы оскемзэс. Вылӥ кивалтӥсьёсмы уен-нуналэн "Отечество" понна ужазы ке но, адямиос куаразэс ас сяменызы сётӥзы. Со вера асьме бырйисьёслэн малпаськыны но азьпал улонзэс адӟыны быгатэмзы сярысь. - "Удмурт кенеш" кызьы ке пыриськоз-а Россилы Президент быръёнэ? - Ми партия ӧвӧл ке но, политикалэсь палэнэ кыльыны нокызьы но ум быгатӥське. Та ужпумез эскером матысь дыре ик исполкомын яке Пичи кенешын. Быръем муртъёс мед вералозы асьсэлэсь малпанъёссэс. Но милемыз юнгес сюлмаськытэ Удмуртилы кивалтӥсь быръён. Сыӵе дыр вуиз ке, "Удмурт кенеш" аслэсьтыз кылзэ юн-юн вералоз но кудӥз ке кандидат понна ужанэ вань активистъёссэ кыскыны тыршоз. - Валентин Кузьмич, пумиським бере, юам потэ на Выль ар мылкыдды сярысь. Кытын ортчытӥды туэ нырысетӥ нуналдэс? - Дышем сямъя - ас дорам. Выль ар уе котьку ми ик люкаськиськом семьяенымы, кенешиськом ортчемез сярысь, малпаськиськом вуоноез пумысен. Туэ но озьы карим. Таиз толэзь быдэсак сямен тырмытэмын праздникъёсын. Азьпалан Вуж Выль ар. Журналистъёслэн но шулдыръяськон мугзы вань. Тае лыдэ басьтыса ӟечкыласько "Удмурт дуннеын" ужасьёсты но вань лыдӟисьёсты, республикаямы улӥсьёсты, палэнысь ӵыжы- выжыосмес кутскем Выль арен. Мед со котькудӥзлы ваёз тазалык, шумпотон, ӵуказе нуналлы оскон! Весь шуисько, туннэ но озьы ик верасько: ӵош луим ке, огкылысь ужам ке, улонмес асьмеос умоятыны быгатом. И. Кричев. Ӝог ӝуатскиз. Ӝог кысоз?.. - О-о-от веть, а! Ӝыны ар талэсь азьло юасалзы ке со сярысь, кин меда мар вераны быгатысал? Нош туннэ... Туннэ тодмо ни, Быдӟым Россиен тулысысен Путин кивалтыны кутскоз шуыса. Али ик ини со кузёяське. Кызьы уд паймы та улонлы! - юлтошелэн ымыз нокызьы но уг ворсаськы. Маде но маде. Пенсие потэм муртлэн мукет сюлмаськонэз ӧвӧл ни, шӧдске, быдэсак выемын со политикае. - Кылзы ай, котьма шу но, Кремльын визьмо ик адямиос люкаськемын, брат! Быгатӥзы ук кӧня ке толэзь куспын Путинлэсь данзэ инмозь ӝутыны. Ваньзэ лыдъязы-чотазы, пересьмем кузёзэс шутэтскыны келязы, со интые мукетсэ лусйизы, - тодмоелэн мылкыдыз тулыс вылтӥ кырем тыметысь уртчись ву кадь куашетэ. Гожъяськон уж вылэ чӧлскыса, вераськонмес уретӥ. Трубкаме понӥ гинэ, нош ик жингыртӥсь луиз. Звьяловоысь лыдӟисьмы но Путин пумысен юалляське. Коридоре потӥ. Отын но ченгешо вуоно президент пумысен. Зэм но, кин со Путин? Вордскиз 1952-тӥ арын 7-тӥ октябре Ленинградын. 1975-тӥ арын йылпумъяз отысь кун университетлэсь юридической факультетсэ. Ӟеч тодэ немец кылэз. Кышнояськемын, кык нылпиосыз. Университет бере Путинэз ыстӥзы кышкытлыклэсь утиськонъя кун ёзъёсы. 1990-тӥ арозь СССР-ысь КГБ-лэн Нырысетӥ валтӥсь управленияз (внешней разведка) ужаз. Кӧня ке ар ӵоже вал ГДР-ын, кивалтӥз Лейпцигысь Советско-германской эшъяськонъя юртэн. Выльдӥськон вакытэ берытске Россие, луэ Ленсоветлэн тӧроезлэн Анатолий Собчаклэн (юрфакысь дышетӥсезлэн) индылӥсез (советникез). Борис Ельцинэз Президентэ быръён нуналысен кивалтэ Санкт-Петербургысь мэрилэн кунсьӧр кусыпъёсъя комитетэныз. Бӧрысь вал "кыкетӥ" столицаысь правительстволэн кивалтӥсезлэн воштӥсез. 1995-тӥ арын луиз "Наш дом - Россия" движенилэн улосысь ёзэзлэн кивалтӥсез. 1996-тӥ арын Анатолий Собчакез Санкт-Петербурглы йыре ӧз быръе. Озьы со бадӟым политикалэсь амалтэк палэнсконо луэ. Нош отӥяз воксё Париже пегӟе. Газетъёслэн гожъямзыя, соку Путинлы кизэ мыче Президентлэн ужъёсыныз кивалтӥсь (кызьы сое пышкылыса шуо: Кремльлэн завхозэз) Павел Бородин. Озьы Владимир Владимирович Москвае вуэ, Бородинлы воштӥсь луэ. 1997-тӥ арын Путинэз юнмато Президентлэн администрациезлэн кивалтӥсезлы воштӥсе. Солы оско отысь эскеронъя управлениез. Ӝоген луэ администрацилэн кивалтӥсезлэн нырысетӥ воштӥсез. 1998-тӥ арын 25-тӥ июле Путинэз пуктӥзы Россиысь ФСБ-лы (азьло КГБ-лы) кивалтӥсе. 1999-тӥ арын 29-тӥ мартэ юнматӥзы Безопасностья Советлы секретаре. 1999-тӥ арын 9-тӥ августэ Борис Ельцин Правительстволэн тӧроез луыса куинь толэзь но ужамтэ Сергей Степашинэз Тӧдьы юртысь палэнтӥз. Со интыез сётӥз Путинлы. Кун Думалэн чылкак паймем депутатъёсыз ченгешыса-мар туж ик ӧз улэ ни - бадӟым кивалтӥсе пуктыны соглаш кариськизы. Озьы 16-тӥ августысен Владимир Владимирович луэ Россия Федерациысь Правительстволэн тӧроез. Нош кылем арлэн берпуметӥ нуналысеныз быдэсъя Президентлэсь ужзэ. Нырысетӥ вамышъёсыз пӧлысь пусйыны луоз Михаил Касьяновез, коньдон ужпумъёсъя министрез, аслыз нырысетӥ воштӥсе пуктэмзэ, Сергей Шойгуез вылэгес ӝутэмзэ, пӧртэм партиослэн но огазеяськонъёслэн азьветлӥсьёсынызы огкыл шедьтыны тыршемзэ. Тӥни сыӵе сюресэз ортчиз Владимир Путин - Кремльысь тужгес но дано кабинетэ туж ӝог вуэм адями. Кизили ӝог ӝутаскиз. Кема-а со ворекъялоз?.. Маин ас бордаз кыскиз но кыске Владимир Путин? Малы со шоры оскыса учко кызьы ке огшоры адямиос, озьы ик олигарх шуонъёс, "выль ӟучъёс"? Кызьы быгатӥз Путин властьлэсь партизэ кылдытыны но сое азьпала поттыны? Та пумысен ми гожъялом на. Ӧтиськом Тӥледыз но та вераськонэ пыриськыны. Иван Лебедев. Дышетылӥз, визьнодалляз... 2000-тӥ арын 13-тӥ январе 85 арес тырмысал Василий Евдокимович Садовниковлы. Но жаляса верано луэ: со, пенсиын одӥг нунал но шутэтскыны вуытэк, улонысь кызь вить ар талэсь азьло кошкиз. Вордскиз со туж шулдыр Удмурт Туймыйыл гуртысь куанер крестьян семьяын. Быдӟым Октябрь революцилэсь азьло соос фамилитэк улӥзы. Нош революция бере, кузёзы сад будэтыны яратэмен, соослы Садовников фамилия сётӥзы. Отӥяз та семьяын трос нылпи вордскиз. Соос пӧлын ик - Удмуртиысь дано артист но драматург Василий Евдокимович Садовников. Солэн апаез, Татьяна Евдокимовна, улэп на. Мынам тӳж бадӟым тау кареме потэ солы, монэ, вордос пизэ, будэтэмез но улонэ сюрес возьматэмез понна. Татьяна Евдокимовналы миым 95 арес тырмиз. Василий Садовников, ас гуртысьтыз ик начальной школаез йылпумъяса, 1927-тӥ арын дышетскыны пыриз Можгалась педагогической техникуме. Сое йылпумъяса, аслаз гуртаз ик дышетӥз. Нош 1934-тӥ арлэн пумаз ужаны кутскиз Алнашысь колхоз театрын. Соку мыным куинь арес гинэ ке но вал, ӵужмуртэ ми дорын квартираын улыкуз адӟиз, кызьы будэтӥзы вордос пизэс Татьяна Евдокимовна Садовникова но Андрей Семёнович Краснов. Мынам сюратае Быдӟым Отечественной войнаын быриз. Ижевске ремесленной училищее лыктэме бере, ӵем ветлылӥ Василий Евдокимовичлэн Красной ульчае интыяськем пичи гинэ квартираяз. Со, кышноеныз но нылпиосыныз отпусказы лымшор пала шутэтскыны ветлылыкузы, та квартираез мыным оскылӥз. Соку мон малы ке яратӥсько вал солэн библиотекаысьтыз книгаосты но журналъёсты лыдӟыны. Ки улам кытӥяз сюрылӥзы ӵужмуртэлэн гожъямъёсыз но. Соку мон малпай: быгато-а аслэсьтым малпанъёсме со кадь ик гожъяны? Тӥни озьы "Советской Удмуртия" газетэ 1948-тӥ арын нырысьсэ гожтӥ "Лыктэлэ ми доры" корреспонденциме. Сое поттӥз та газетысь промышленной отделлэн кивалтӥсез Степан Семёнович Иванов. Аслам гожтэтам ӧти гуртъёсысь нылпиосыз заводъёсын ужаны. Войнаен сэрен уг тырмо вал угось соку предприятиосын ужасьёс. Со дырысен шаерысьтымы газетэн кусыпме уг ыштӥськы ни. Василий Евдокимович Садовниковез лыдъясько нырысь дышетӥсеным но улонэ сюрес возьматӥсеным. Со монэ пыкылӥз, Удмурт пединститутлэсь историяя факультетсэ йылпумъяса, "Советской Удмуртия" газетэ ужаны лыктэме понна. Ведь соку, заводын сярысь, мон ӧжытгес уждун басьтылӥ. Нош гонораръёс рабкоръёслы тросгес сёто вал, редакциын ужасьёслы сярысь. Газетын куинь ар ужаме бере, куинь ар тырши на Обллитын цензор луыса. Ваньмыз со юрттӥз пероме лэчытгес карыны, улонэз мургес валаны. В. ЧЕРНОВ. Тылскем доры кадь Грах ёросысь Благодатное чуваш гуртэ ас выжыоссы тылскем доры кадь кыстӥсько. Татчы вуыло Ижысь, Шубашкарысь (Чебоксарыысь) куноос но. Чувашъёслэн шоркаразы кылдытэм общественной культурной центрлы (ЧОКЦ-лы) толэзь талэсь азьвыл дас ар тырмиз. Солэсь премиоссэ сётыны чаклазы Удмурт шаерын чуваш культураез вӧлмытон бордын тужгес сюлмо ужасьёслы но. Тани Галина Петровна Вочканова, Грахын улӥсь, ас вордскем палъёсаз ортчытъяськись ужрадъёс сярысь котьку ивортылэ ЧОКЦ-лэн "Вучак" ("Очаг") газетаз. Со понна нылкышнолы сётӥзы та огазеяськонлэсь Талвир нимо премизэ. Удмурт суредась, архитектор Касим Галиханов пыриськылӥз чуашъёслэн пӧртэм ужрадъёсазы,. ас ужъёсыныз чебермалляз соослэсь книгаоссэс-журналъёссэс. Таин валче Касим Шарифьянович пусъемын Альберт Канаш нимо премиен. Та адямиослы премиос ЧОКЦ-лэн нимыныз сётӥз Удмурт ёзэзлэн кивалтӥсез Анатолий Иголкин. Ужрад ортчиз Выль ар азьын Благодатнойысь клубын. Со нуналэ вань гурт калык люкаськиз чеберъям вож кыз котыре. Эшшо одӥг бадӟым мугез вал на та шулдыръяськонлэн: чуваш калыклэн дано пиезлэн ӟырдыт куараё кылбурчилэн Мишши Сеспельлэн вордскемез дырысен 100 ар тырмиз. Егитъёс сцена вылын возьматӥзы солэн улэмезлы сӥзем суредъёс, лыдӟизы кылбуръёссэ но. Т.Николаева. Завьялын бадӟым пумиськон Завьял ёросын бадӟым саклык висъяло волейболэз вӧлмытонлы. Дас куинетӥ арзэ ини ДЮСШ дася вуоно спортсменъёсты. Таяз кӧс нуналэ Завьяловоын кутске спортлэн та удысэзлы сӥзем бадӟым праздник. Сое усьтозы ёросысь но Ижевскысь 6 номеро ДЮСШ-ысь пинал волейболистъёс. Собере пумиськозы Удмурт Республикаысь Правительстволэн но мэрилэн командаоссы. Бӧрысь шудонэз азьланьтозы Завьялысь но Можгаысь воргоронъёслэн огазеям командаоссы. Гуртысь нырысьсэ аренае потозы Россиысь нырысетӥ лигаысь кужмоосыз волейболэн шудӥсьёс. Кужымзэс эскерозы Ижевскысь "Динамо - ИжГТУ" но Сыктывкарысь "Динамо - Вычегда". Н. ИВАНОВ. Асьме журналистъёс - нырысетӥ интыын Финляндиысь Калыкез дышетонъя министерство Россиысь финн-угор калыкъёслы нимысьтыз программая юрттэт сётэ. Та ласянь чакламын М. А. Кфстрен нимо обществолэн премиосыз, стипендиосыз но. Тани кылем арын ортчиз финн-угор дуннеысь радио- но тележурналистъёс куспын конкурс. Отчы пыриськиз пӧртэм республикаосысь 54 мурт, со пӧлысь 18-эз - Удмуртиысь. Алигес шумпотымон ивор вуиз: 3000 финн марка премия сётэмын Удмурт радиоысь иворъёсын "Визыл" программа понна. Сое дасясь журналистъёс Иван Аркашев кивалтэм улсын тыршо иворъёсын сузьетсы пыр республикалэсь улонзэ паськыт но мур возьматыны. Тележурналистъёс пӧлын нырысетӥ премиез - 5000 финн марка - утӥз Удмурт телевидениысь редактор Валерий Сидоров. Сое озьы дунъязы туж кулэ луись программа дасямез понна: удмурт гуртъёсы потаса лэсьтэм передачаосыз туала куронъёслы тупало, улонлэсь зэмлыксэ умой возьмато, сюлэме пыро, мылкыдэз ӝуто. Конкурсэ пыриськемъёслы дунъет сётӥзы Финляндиысь тодмо научной ужасьёс Ильдико Лехтинен (премияя комиссилэн тӧроез), Урпо Венто, Улла-Майя Кулонен, Тапани Салминен, Паула Кокконен но мукетъёсыз. Т. НИКОЛАЕВА. Тодмотэм тодмо адямиос Кин тӥ, Президентлэн адямиез? Тросэз-а лыдӟисьёсмы тодо меда, асьме шаерын, странамылэн мукет ёзъёсаз сямен ик, Россилэн Президентэзлэн оскем адямиез яке, ӟуч сямен вераса, Полномочной представителез вань шуыса? Ма тодӥсез но рос-прос вераны уз быгаты, дыр, малы со кулэ, мар со ужа, кыӵе ужпумъёсты быдэсъя. Соин ик ми туннэ тӥледды тодматоно кариським Россилэн Президентэзлэн Удмуртиысь Полпредэныз Виктор Васильевич БАЛАКИНЭН. - Нырысь ик вералэ вал, Виктор Васильевич, кызьы тӥ луиды Президентлэн Удмуртиын адямиез? - Ачим но валаса ӧй вуы кадь. Со вал 1997-тӥ арын. Мон соку ужай Ижевсклэн мэрезлэн воштӥсез луыса. Ӧтизы Москвае, Президентлэн Администрацияз. Огшап юалляськизы, кенешизы но тани та ужез ӵектӥзы. Ог-кык нунал малпаськыны сётэ, шуисько. Малпаськеме бере соглаш кариськи. - Озьы ик Полпред луиды? - Ма, ӧй угось! Шуизы: берты, пе, дорад, ужа, кулэ луид ке - ивортом. Мон валай, москваос мон сярысь пыр-почгес тодыны тыршозы, мукетъёсыныз ӵошатозы шуыса. Басьтӥзы ке, ярам, малпасько, ӧз ке, ӝоже уг усьы, уже урод ӧвӧл. 16-тӥ апреле Москваысь жингыртӥзы: бумага, пе, гожтэмын, ӟечкыласьком: тон - Полпред. - Нош вал-а тӥ сяна кандидатъёс? - Вал. Но мынам соосты вераме уг поты, шонер монэ валалэ. - Малы бен сыӵе должность кулэ луиз, Виктор Васильевич? Властьлэн тубатаз мултэс, кулэтэм ёзэт ӧвӧл-а со? - Эн малпалэ аслэсьтым должностьме утьыны турттӥсько шуыса, но мон сямен, асьме государствоын, властьын со кулэ ёз. Озьы ке ӧй луысал, малы сое малпасалзы? Областьёс но республикаос бадӟым кужым басьтэмзы бере (тодӥськоды на-а: "басьтэ со мында суверенитет, ма мында ньылыны быгатоды"). Та ёз кулэ луиз. Вылаз ик, интыосысь куд-огез кивалтӥсьёс асьсэды эксэен но инмарен лыдъяны ӧдъязы, федерацилэсь Конституцизэ но законъёссэ кылымтэ-адӟымтэ улэ кариськыны кутскизы. - Озьыен, Полпред - со Президентлэн, Москвалэн возьмаськисез выллем луэ? - Ну, мон озьы меӵак ӧй верасал. Синмыз но пельыз, шуыны луоз ик, со но одӥг ласянь гинэ. Валамон мед луоз шуыса, сэртто-пертчо, кыӵе ужпумъёсты ми быдэсъяны кулэ. Нырысь ик, Москвае ялан ивортӥськом, мар луэ Удмуртиын пусйымонэз, со ялан син азяз возьыны мед быгатоз республикаысь огъя югдурез шуыса. Сотэк нокыӵе шонер решение но кутылыны уг луы угось. Жаляса верано луэ, котьку ик ӟечез сярысь гинэ ивортоно уг луы. Я инкуазь эрказъяське, я калык хозяйствоын шуг-секытъёс кылдо, я интыысь властьёс федеральной законъёсты тӥяло. Кылсярысь, тросэз ӧз вунэтэ на, луоз, Кун Кенешлэсь но Ижевсклэн мэриезлэсь интыысь кивалтонэз пӧртэм валаменызы сэрен ваче пумит вуонзэс. Ми соку быгатэммыя юрттӥмы югдурез сэрттыны-пертчыны но тупатыны. Малпано ӧвӧл, ми чакласькыса но чагиськыса гинэ улыны кулэ шуыса. Ми тыршиськомы югдурез огсыр возён понна, интыысь властез янгыш, умойтэм вамышъёслэсь утён понна. Мон адӟисько ке кыӵе ке тырмымтэосты, меӵак верасько со сярысь соизлы яке таизлы кивалтӥсьлы, янгышсэ тупатыны курисько, кытӥяз туж чурыт но. Озьы ик быгатӥсько прокуратурае но Минъюстэ вазиськыны. - Нош тӥледын соглаш уг ке луо? - Луылэ озьы но, улон - со улон. Но мон аслам синмаськемея, вормытъяськемея уг ужаськы ук. Мон понна вылӥ кужым, вылӥ кузё - закон но страналэн кулэяськонъёсыз. Данакез кивалтӥсьёс сое валало, уката но берло дыре, уг ачимъясько, уг ваменъясько. - Неужто зӥбон яке тэльмырон, акыльтымон курон учыръёс ӧвӧл? - Берло дыре шергес ке но, луыло ик. Уката но вылӥ кивалтон уже кинэ ке ӵектон дыръя. Нялтас вераса, со милям одӥгез удысмы. Федеральной ёзъёс интыысь ёзъёсазы кивалтӥсь юнмато, интыысь властьлэсь но милесьтым малпанмес лыдэ басьтыса. Мон адямиез кыӵе ке должностьлы тупамтэен лыдъяй ке, сое уз юнматэ. Нош татысь кивалтӥсьёс одно ик сое кыскыны-поттыны туртто, олокызьы но мынэсьтым малпанме воштыны тыршо. Но мон со адямилы синмаськымтэеным гинэ пумит уг луиськы ук, со сярысь мон мар ке но умойтэмзэ тодӥсько, сое ик верасько дурбасьтӥсьёсызлы. Ог-огмес валантэм учыръёс одӥг-ог луыло ке но, пырак ваче пумит ум вуиське. Ваньмы валаськом угось, одӥг ужен, одӥг сюлмаськонэн улӥськом шуыса. Ог-огдэ гажатэк, ог-огеныд лыдъяськытэк улӥд ке, номыр уз пӧрмы. - Тани тӥ верады кивалтӥсьёсты быръён но юнматон сярысь. Озьыен, тӥ бордысь но потэ, кинъёс, кыӵе адямиос кивалто Удмуртиен? - Матысь но уг. Республикаен кивалтон - со республикалэн аслаз гинэ ужез. Полпред пыриське федеральной органъёслэн интыысь ёзъёссылы гинэ кивалтӥсь юнматонэ. Шуом, республикаысь прокурорез, югдурез утёнъя министрез, УФСБ-лэсь, вытъёсъя полицилэсь яке банкротствоя агентстволэсь кивалтӥсьёссэс но мукетсэ. - Быдэсъяно ужпумъёсты пӧлын верады Москвае иворъёсты сётонэз но. Нош асьтэос кытысь, кызьы ивор люкаськоды? Со сяна, интыысь кивалтӥсьёслэн ваньзэ ик шарае поттэмзы уг поты, дыр? - Номыре но лушкемзэ кема ватыса уд возьы, одно ик шарае потоз. Собере ми но ватскыса ум улӥське ук, ялан калык пӧлын. Со сяна, милемлы нуналлы быдэ сямен ивор сёто нимысьтыз ёзъёс - МВД, УФСБ, прокуратура, вытъёсъя полиция но инспекция, военкомат но мукетыз. Трос тунсыкозэ шедьтыны луэ газетъёсысь, телевидение но радио пыр. - Калыкен но пумиськылӥськоды, луоз? - Одно ик, кызьы сотэк. Учыраз бере, лыдӟисьёстылы нимысьтыз вазиськеме потэ: кыӵе ке шугъяськонды, куронды вань ке, лыктэ ми доры, кер эн потэ. Ми пукиськомы Пушкинской ульчаын Правительстволэн юртаз кыкетӥ этажын. - Валамон, тӥ огнады уд ужаське. Кин тӥледлы юрттэ? - Полпредлэн аппаратэз бадӟым ӧвӧл, вить адями гинэ. Юртмы но, машинамы но асьмелэн ӧвӧл, созэ но, тазэ но Правительстволэсь кутӥськом, дун тырыса. Уждунъёсмы но ушъяськымон ӧвӧл, малы ке-а егитъёс дорамы уг лыкто. Нош мар асьмелэнэз вань - со связь. Со милям тужгес но туалаез, оскымонэз. Москваен котьку но котькызьы герӟаськыны быгатӥськом. - Президентэн но? - Президентэн но, кулэ луиз ке. Та дырозь сыӵе кулэяськон ӧз кылдылы. Мон ужан кусып возисько Президентлэн представительёсызлэсь ужзэс радъянъя управлениен. Кулэ, дыръяз герӟаськыны быгатӥсько Администрациезлэн кивалтӥсеныз яке солэн воштӥсьёсыныз. Г. ТИХОНОВ. Россиысь Прокуратуралы - 278 ар Гажано эшъёс! 2000-тӥ арын 12-тӥ январе Россилысь Прокуратура пусъе 278 ар тырмонзэ. 1722-тӥ арын Пётр И эксэйлэн указэзъя Россилэн Сенатаз нырысьсэ юнматэмын вал генерал-прокурорлэн должностез. Со дырысен Россиын кылдӥз выль удыс - прокуратура. Прокурорлэн ужез сярысь Пётр И тазьы шуиз: "Та чин асьмелэн синмы луэ". Прокуратура, законъёслэсь быдэсъяськемзэс эскерись ёз, Россия кунлэн азинскон сюрес вылаз вань вакытъёсты ортчиз. Кык дауръёс политикаын, экономикаын но социальной улонын мынӥсь бадӟым воштӥськонъёс вискын прокуратура азе нырысь ик таӵе валтӥсь быдэстоно ужпумъёс пукто: адямилэсь но гражданинлэсь, государстволэсь но обществолэсь эрикъёссэс но правооссэс утён, йыружъёсын нюръяськонэз законъёс вылэ пыкиськыса нуон, экономикаын реформаослы сюрес усьтон. Оскисько, ужзылы вань кужымзэс сётыса тыршись прокуроръёс соос азязы пуктэм ужъёсты вормозы. Законъёсты улонэ пыӵатонын прокуратураын тросэз ужасьёс возьмато кышкасьтэм, дӥсьтӥсь луэмзэс, ас ужзэс ӟеч тодэм-валамзэс но со дыре ик адямилыко луэмзэс. Тросэз соос пӧлысь пусъемын вылӥ кун наградаосын но почёт нимъёсын. Йыружъёсын нюръяськонын трос юртто Удмурт Республикалэн Кун Кенешез, Правительствоез, аскоже кивалтон ёзъёс, предприятиослэн но огазеяськонъёслэн кивалтӥсьёссы. Сыӵе юрттэт прокуроръёслы оскон сётэ азьланяз но валче ужаса республикаямы законлыкез но правопорядокез юнматыны. Сюлмысьтым ӟечкыласько ветеранъёсты, прокуратураысь вань ужасьёсты та празлдникенызы. Оскисько, азьланяз но тӥ адзем карымон тыршоды асьме Атыкай музъеммы - быдӟым Россимы понна. Вань ӟечсэ но умойзэ гинэ сӥзисько воргоронъёслы, тужгес но соослэн кузпалъёссылы но анайёссылы: соослэн ненег пельпумъёссы вылэ усе асьме секыт ужмылэн курадӟонъёсыз. Ваньдылы сӥзисько юн тазалык, выль вормонъёс, шудо но ваньбуро улон. Удмурт Республикалэн прокурорез В. М. Походин. Александр Волков кошкиз Москвае Кун Кенешлэн Тӧроез Александр Волков валлян Мордовилэн столицаяз Саранскын вал. Со пыриськиз республикалэн кылдэмез дырысен 70 ар тырмонлы сӥзем сӥё-дано ужрадъёсы. Отысен Кун Кенешлэн Тӧроез кошкиз Москвае. Россилэн Президентэзлэсь ужзэ быдэсъясь Владимир Путинлэн но Москваысь но Быдэс Россиысь Патриархлэн Алексийлэн ӧтемзыя, со пыриськоз Христослэн вордскемез дырысен 2000 ар тырмонэз пусъёнэ. Москваын Александр Волков пӧртэм министерствоослэн но ведомствоослэн кивалтӥсьёсынызы но Россилэн Кун Думаяз быръем выль депутатъёсын пумиськыны чакла. Удмурт Республикаысь Кун Кенешлэн пресс-службаез. АДЯМИЛЭН ЧЕБЕРЕЗ Куректонэн пӧлэсмем нюжаос Сӥзьыл. Каньылля гинэ усе нырысетӥ лымы. Музъем син азьын шобырске тӧдьы шобретэн. Котыр юг-юг, син ик мальдэ. Та сӥзьыл Витя понна ноку вунонтэм кылиз. Со вал кызь куать ар талэсь азьло. Витяез армие келяны быдэс гурт люкаськиз: пересез но, пиналэз но. Можгаын трактористэ дышетскемез бере сокем трос ужаса ке но ӧз вуы, гурезь-пудгаос егит механизаторзэс гурт пумозь келяса мынӥзы. Люкиськон азязы Витялэн анаез пизэ тып-тып ӟыгыртӥз, чупаз но шуиз: - Я, пие, умой служить кар... Но Витялы кема служить карыны ӧз кылды, вынъёсыз-сузэрез атайтэк-анайтэк кылизы. Озьы сое армиын службалэсь мозмытӥзы, дораз лэзизы. Майыгтэк кенер уг сылы, шуэ калык. Котькуд семьялэн аслаз зол-зол майыгез мед луоз. Горшковъёслэн семьяязы сыӵе майыг луиз бадӟымез Витя пизы. Туж секыт вал соку солы: уен-нуналэн ужаз (колхозын но клубын). Секыт ке но вал, дырлэсь, аръёслэсь ортчемзэс со ӧз шӧды. Вынъёссэ, сузэрзэ дышетӥз, пыд йылазы вуттӥз. Бадӟымез кышнояськиз, сузэрез бызиз. Пичи вынзэ армие басьтӥзы, агаез кадь ик пограничник луиз. Трос пол тау карон гожтэтъёсын пусйылӥзы. Шумпотэ Витя выныз понна. Сюлмаськемез-тыршемез ӟечен берытске. Аслым служить карыны ӧз кылды бере, выны понна но, пе, ужаны кулэ. Чебер верам кылъёс гинэ ӧвӧл со. - колхозын со устоосыз пӧлысь устоез егит механизатор. Котькыӵе ужез сёт, бервылзэ учкыса ветлонэз ӧвӧл. Адями ужен чебер. Туж шонер верамын. Нош Витялэн ужез синмаськымон. Обязательствозэ ялан мултэсэн быдэсъя. Выль азинсконъёс басьтэмез понна, со пусъемын "Социалистической ӵошатсконын вормис" куинь знакъёсын, ВДНХ-лэн кык бронза медальёсыныз, "Зарни шеп" знакен. "Удмуртиысь устоез егит тракторист" дано ним сётӥзы. Та востэм егит пи шоры учкыса, ноку уд малпа, сомында ӟеч ужъёс лэсьтӥз, собыдӟа куректонэз чидаз шуыса. Витялэн аслаз семьяез вань ни. Куинь пиосыз будо. Одӥг гужем колхозлы КСК-100 силос октон комбайн висъязы. Хозяйствоысь кивалтӥсьёс но специалистъёс сое кинлы сётыны паймизы. Гуртын мултэс механизаторъёс ӧвӧл. Витялэсь но нимзэ поттылӥзы. Нош тракторзэ кинлы, пе, осконо. Шуг-секытысь потыны юрттӥзы Горшковъёс ик. Витя нокин юрттытэк выль техникаен тодматскиз, ачиз бичаз но ужатыса эскериз. Нош тракторлэн руль сьӧраз пуксиз Валерий выныз. Быдэс гужем Витя жалем сиён дасяз, татын но вормисе потӥз, районысь вань эшъёссэ азьпалтӥз. Кин лулысь-сюлмысь тырше, сое ужезъя данъяло, калык сое гажа, солы юн оске. Витялы оскизы пудо сиён будэтӥсь звеноен кивалтыны. Дояркаос огкылысь тау каро Витялы но солэн эшъёсызлы. Соос, пе, милемлы тырмыт жалем сиён дасяло. Витя вазь ӵукна ужаз вамыштэ но шумпотэ гуртэзлэн воштӥськемезлы, гурт калыкезлэн умой улэмезлы. Ӵемысь шуылӥз: "Звеноысьтым ваньмыз выль юртъер пуктӥз ке, аслым но ӝуто". Котькуд адями аслэсьтыз шудзэ ас сяменыз шедьтэ. Одӥгезлы со капчиен сётӥське, нош мукетызлы - секытэн. Бен, шуд инмысь уг усьы. Со понна нуналмысь нюръяськоно, ужез яратоно, шуг-секытъёслэсь кышкано ӧвӧл. Ӵапак озьы лэсьтӥз Витя но. Шедьтӥз ни вал аслэсьтыз шудзэ. Гуртын со гажано адями. Ньыльдон куинь аресаз луиз зэмос воргорон: быдэ вуизы куинь пиосыз, бакчазэ шулдыртэ садэз, лэсьтыны кутскиз юртъер. Но одӥг арня ӵукна туж секыт кайгу вуиз ми доры: Витя йырсазьзэ ыштӥз, пери шуккиз (4-5 арзэ давлениен курадӟиз). Куинь толэзь кулонэн-улон вискын улӥз. Врачъёс но ӧз оске улэп кылёнэзлы. Куинь толэзь куспын куинь пол ӧтчазы доразы. Юнматске, уз ни чида, кулоз" - шуылӥзы. Но мон ялан оски умоезлы. Уен-нуналэн ӧй изьылы: лэсьтӥм ваньзэ, ма быгатӥм. Тодам ваисько ке со нуналъёсты, юзыр-кезьыр луисько. Ӧз, ӧз кулы Витя, ӧз сётскы эзельлы. Но быдэс мугорыз парализовать каремын вал: вераськемез уг луы, вырӟылытэк кылле, синмыз гинэ мӧзмыт учке шоре. Куинь толэзь бере алфавитъя вераськыны кутским. Кулэ буква шоры синмыныз возьматэ но. быдэс кылъёс, предложениос кылдытӥськом. Озьы куать толэзь ортчиз. Кизэ, пыдзэ выретыны кутскиз, туж шуген ке но - вераське (ачим гинэ валасько). Йырсазьыз пыд йылаз ветлыкуз кадь ик луиз. Соин но солы эшшо секы кылльыны. Куинетӥ арзэ ни вырӟылэмез уг луы. Озьы ке но, оске на султонэзлы. Витя шорам учке, учке, синзэ но уг вошъя. Кемалась, туж кемалась ни ваче мылысь- кыдысь вераськеммы. Нош кыӵе потэ артэ пуксьыса вань улон-вылон сюресмес тодэ ваем. Вал ук шулдыр нуналъёсмы но. Нош ми ӧмгес валалэ кадь, соос ноку уз ортче кожам, лэся, кулэезъя дунъяны, шумпотыны ӧм быгаэ. Нош кыӵе луоз ни азьпал улонэ Витятэк, малпаны ик уг тодӥськы. Адямиослэсь чиданлыксэс, адямилыко луэмзэс эскерон понна, лэся, инмар соос вылэ пӧртэм шуг-секытъёс, курадӟонъёс лэзе. Ӧз, ӧз ышты Витя адямилэсь дано нимзэ. Кин но, кыӵе но дэмланъёс ӧз сётъя ни. Палэнысен чаклад ке, котькудӥз сюлэм нюжаоссэ мынам куректонэным огинэ пӧлэстэ, малпалод. Но вань гуртамы кас сюлэмо адямиос но. Соослэсь вераськемзэс кылӥськод но малпаськод, кызьы музъем чида соосты. Нош куд-огез, Витялы юрттон понна, ас улонзылэсь кыӵе ке люкетсэ но сётыны дась. Газетты пыр бадӟым тау кареме потэ ӵыжы-выжыосылы, дышетӥсьёслы, пудо сиён дасясь звенолы но гуртоосылы, кудъёсыз юрттӥзы Витялы. Музъемозь ик йыбырттӥсько тӥледлы. Ӟеч ужды ӟечен ик мед берытскоз. Вӧзад сыӵе адямиос вань ке, улэм потыны кутске. С. ГОРШКОВА. Вавож ёрос Гурезь-Пудга гурт. Ӟечкыласьком Россиысь печатьлэн нуналэныз! Россилэн историяз 13-тӥ январь вунонтэм луыса кылиз - ӵапак та нуналэ 1703-тӥ арын Россиын нырысьсэ потӥз "Ведомости о военных и новых делах достойных знания и памяти" газет. Со дырысен кутскиз иворъёсты вӧлмытон ёзъёслэн азинскон сюрессы. Россиысь печать азьын нырысь интыын сылӥзы вакытлэсь аспӧртэмлыкъёссэ, ужась калыклэсь улонзэ зэмлыко возьматон, туннэ нуналлы сӥзем лэчыт ужъёс гожъян, адямиослы дыраз шонер иворъёс вуттон. Удмуртиысь иворъёс вӧлмытон ёзъёс котьку адӟем карылӥзы но али но азинто, утё Россиысь журналистикаен кылдытэм ӟеч кутсконъёсты, сямъёсты, йылолъёсты. Шаерамы улӥсьёс пӧлы вӧлмыто вордскем музъемдэ, ас калыктэ гажан мылкыд. Удмуртиын туннэ потэ 250 пӧртэм газет-журнал. Котькудӥзлэн аслаз пуштросэз, улонлы дунъет сётонэз, лыдӟисез, но огъя соос возьмато республикаямы улӥсь калыклэсь сюлмаськонъёссэ, азинсконзэ, вормонъёссэ. Оскиськом, азьланьын но газет-журналъёс, нокыӵе шуг-секытъёс шоры учкытэк, лыдӟисьёссэс шумпоттозы лэчыт ужъёсынызы, выль иворъёсын. Сӥзиськом тӥледлы, гажано эшъёс, тазалык, шуд, кадыкмылэсь улонзэ умоятонын бадӟым азинсконъёс. Праздникен тӥледыз! Россиысь печатьлэн нуналэныз! Удмурт Республикаысь Кун Кенеш. Удмурт Республикаысь Правительство. "Гожтӥськон - 2000" Кытын кӧня газет лыдӟо � Районъёс 01.01.1999 01.01.2000 1. Алнаш 1870 1780 2. Балезино 705 617 3. Вавож 433 367 4. Воткинск 79 81 5. Глазов 176 160 6. Грахово 245 222 7. Дэбес 1488 462 8. Завьялово 724 736 9. Игра 855 767 10. Ижевск 176 139 11. Каракулино 3 2 12. Камбарка 5 6 13. Кез 431 338 14. Кизнер 339 314 15. Киясово 428 397 16. Красногорск 24 21 17. Пичи Пурга 1867 1580 18. Можга 1327 1228 19. Сарапул 32 30 20. Селта 190 232 21. Сюмси 28 34 22. Ува 228 361 23. Шаркан 1543 1600 24. Юкаменск 84 61 25. Як.-Бодья 331 236 26. Яр 92 82 27. Кунгожсьӧр 201 187 28. Информпечать 54 49 Ваньмыз: 13565 12089 2000-тӥ арын 1-тӥ январез "Удмурт дунне" газет таӵе лыдпусъёсын пумитаз. Кӧня ке мурт гожтӥськемын на Пичи Пурга, Воткинск, Шаркан редакциос пыр, озьы ик "Удмурт дунне" газетлэн редакцияз. Ваньмыз та гожтӥськемъёс пыриськозы лотереяен шудонэ, кузьым - ошпи. Гожтӥськемъёслэсь лыдзэс чакласа, та нуналъёсы кылдытомы ёросъёсъя но ёросъёсысь почта ёзъёсъя нимысьтыз округъёс. Лотерея шудонлэн радъяськемез сярысь лыдӟисьёслы азьланяз ивортылом. Л. МАЛЫХ. Кӧня йӧл кыскиськом 10-тӥ январьлы Районъёс Йӧл кыскемын Пудолэн йырыз 2000 1999 2000 1999 1. Вавож 7,8 7,3 5260 5123 2. Можга 7,8 7,9 9308 9271 3. Ува 7,7 7,7 7894 7501 4. Игра 7,3 7,3 4022 3801 5. Воткинск 7,0 7,1 6305 6544 6. Завьялово 6,9 6,1 7079 7932 7. Алнаш 6,4 6,0 6513 6423 8. Балезино 6,4 5,8 8633 8758 9. Глазов 6,2 6,3 7445 7507 10. Пичи Пурга 6,1 6,4 6786 6836 11. Шаркан 5,2 6,0 6143 6093 12. Дэбес 5,1 5,3 4761 4971 13. Грахово 5,1 4,8 3040 3289 14. Кез 4,8 4,6 5573 5950 15. Як.-Бодья 4,5 4,7 2451 2392 16. Сарапул 4,4 3,8 7697 8203 17. Юкаменск 4,3 4,6 5105 5031 18. Кизнер 4,0 4,8 4090 4217 19. Селта 3,7 5,2 3852 3629 20. Яр 3,1 3,2 5180 5987 21. Красногорск 3,1 3,8 3767 3938 22. Киясово 3,1 3,9 4546 4654 23. Камбарка 3,0 3,7 723 747 24. Каракулино 2,9 2,6 3607 4104 25. Сюмси 2,2 2,9 1825 1955 Республикая 5,6 5,6 132175 135426 ТАЗАЛЫК Анай-атайёслы школа Яратон ке ӧвӧл. Висён - со котьку куректон, нош пинал ке висе - кык полэс. Кыӵе чебер, таза вордӥськиз вал кадь нуны, нош кӧня ке дыр ортчыса, со ӵакмиз. Мугормылы улон кужым асьмеос басьтӥськом сиёнысь, омырысь. Нош лулмылы? Луллы, сюлэмлы яратон кулэ. Сюлэм ненег будос кадь, яратон ке уг тырмы - куасьме, быре. Уката ик сое шӧдо нылпиос. Озьы кылдытэмын Инкуазен: анай-атай понна котькуд пинал яратымон, дуно луыны кулэ. Но ватонэз ӧвӧл, али ваньмыз уг быгаты асьсэлэсь нунызэс яратыны, утялтыны, соос понна сьӧлыктэм лул мултэс луэ. Соин ик сыӵе пинал пичиысен ассэ нокинлы кулэтэмен лыдъяны кутске, котьмалэсь кышка, ӵем висьылэ, керӟег луэ. Пиналлэн пуш вӧсез шӧдӥськытэк уг кыльы солэн огъя тазалыкез вылын: ӵем йырыз висьылэ, шокантӥез пытсаськылэ, кулыса усьылэ, могаса вераськыны кутске. Куд-ог дыръя юнме шорысь я синсӧнъёсыз, суй-пыдыз коска. Пичи дыръя пинал пуш пумитъяськемзэ вераны уг быгаты на, соин ик курадӟе мугорыз: покчи шӧдытэк уин "уялля", могаса вераське... Дас кык арес бере нылпилэн асваланэз кылдэ ни. та арлыдэ пиналлэн пумитъяськемез шӧдӥське сямаз, ассэ кызьы воземез. Со ӵем керӟегъяське, лек луэ, пӧяське, лушкаськыны, тамак кыскыны кутске, дорысьтыз кошкылэ. Озьы ик курадӟе мугор но. Та вакытэ тросэзлэн пиналъёслэн йырзы висе, нейродермит, кӧтпуш яра басьтэ. Анай- атайёс, мӧйыос пиналэз зӥбыса возё ке, со бӧрдӥсь яке чалмыт, ваньзэ пушказ возись луэ. Сизьым-дас аресъем пиналъёсъя синучконын сямен адӟиське мӧйыослэн мылкыдзы, малпанъёссы. Соос ваньзэ шӧдо. Шуом, анай туж кышка висись нылпиезлэн тазалыкез понна. Пинал, сое шӧдыса, ачиз но кышканы кутске. Соин висёнэз уката секытоме. Али туж трос пиналъёс диатезэн, карсэн (экземаен) курадӟо. Малы шуоды? Шӧдӥськытэк уг кыль уго анайлэн керӟегъяськемез, ӵем куатаськылэмез яке йыркуръяськемез. Тани одӥг семьяын укмыс толэзьем пиналлэсь мугорзэ быдэсак карс басьтӥз анай-атаез люкиськемзы бере. Малы бен асьмеос ум быгатӥське нылпимылы тырмыт яратон сётыны? Нырысь ик, улыны быгатымтэысьтымы. Асьмеос туж лекесь, вожъяськисесь - ум быгатӥське шумпотыны. Асьмеды ке уг ярато, ваньзэ адӟонтэм кариськом. Кыкетӥез. Уж пӧлы выйыса, пиналмес шер адӟылӥськом - я пересьёслы, бадӟымгес пиналъёсмылы утялтыны кельтӥськом, ветлыны дышемез бере ик яслие сётӥськом. Куинь арес тырмытозяз пиналэз анаезлэсь люкылыны уг яра. Куддыр анай-атайёс паймо - мар солы уг тырмы: ческыт сиён но, шудон но ӵем басьяськом, со сыӵе ик керӟег. Малпаське ӧжыт - кузьмаськоды-а тӥ нылпидылы тырмыт яратон. И. Мокрушина, врач-психотерапевт. Журналистъёсын пумиськонъёс Николай Хохлов: "Тэтэ карисьёсмы вань на" Ортчиз 1999-тӥ ар. Республикамы сое урод ӧз йылпумъя. Пичиесь ке но, вормонъёс вань промышленной предприятиослэн ужазы, транспорт, связь, нюлэс хозяйство но куд-ог музон удысъёсын. Со но мукет ужпумъёс сярысь рос-прос вераськон мынӥз кылем вторнике журналистъёслэн пумиськоназы. Сое ортчытӥз Правительстволэн Тӧроезлэн воштӥсез Николай Хохлов. - Каллен будӥськом ке но, лэчытэсь ужпумъёс трос на - веранзэ кутскиз Николай Иванович. Тэтэ карись предприятиосмы ляб кулэсмо. Соос пӧлын вань бадӟымъёсыз но, шоро-куспоосыз но, пичиосыз но. Югдур ялан уг умоя на автомобильёс но мотоциклъёс поттонын. Собере Николай Хохлов бадӟым инты висъяз транспортэн герӟаськем ужпумъёслы. Тани 75 процентэз автотранспорт пӧсьтэмын, куашкан калэ вуэмын, шуыны луоз. Нуналлы быдэ 400 автобус сюрес вылэ потэ ке, сюэз автопарке ӝыныё пыре. Техникаез выльдыны уксё уг шедьы. Нош чехъёслэсь автобусъёссэс но трамвайёссэс басьтыны палэнысь юрттэт (инвестициос) кулэ. Умоен пусйыны кулэ акциосын "Редуктор" огазеяськонлэсь кичӧлтонзэ - автобусъёсты но троллейбусъёсты тупатъяны кутскемзэ. Со уж ӟечен берытске. Огъя вераса, кылем арез 60 процентэз промышленной предприятиос пайдаен быдтӥзы. Тужгес умой ужазы химической, нефтехимической, машиностроительной удысъёс, андан ӵыжатӥсьёс, нюлэс хозяйствоын тыршисьёс но мукетъёсыз. Шаерысьтымы портъёс пыд йылазы мырдэм сыло, тужгес но Камбаркаысь. Со кӧня ке поттэ на песок но кӧльы (ПГС) гинэ. Югдурез умоятон вылысь, туэ сое Сарапулысь портэм огазеяны чаклало. Правительство экономикаез юнматонын нимысьтыз саклык висъя нюлэс предприятиослэсь ужзэс умоятонлы, нюлэсэз ӟеч кутонлы (мур переработка лэсьтонлы). Та удысын азинлыко тыршо "Увадрев" огазеяськон, Можгаысь лесокомбинат, "Крсная звезда", "Ижмебель" но музонэз. Николай Ивановичлэн ивортэмезъя, Правительство ӟеч мебель лэсьтӥсьёслы котьку юрттоз. Тани "Увадрев" АО но Москваысь "Фронда" фирма ӵош ужанъя тупанкыл гожтӥзы ни. Уваос офисъёслы усто мебель поттозы. Соослы али 12-14 миллион манет юрттэт висъяны чаклаське. Озьы "Увадрев" туэ ик кык пол тросгес продукция поттоз. Бадӟымесь ужпумъёс сыло акциосын "Ижмаш" огазеяськон азьын. Будэтоно мотоцикл поттонэз. Та ласянь пусйымонэз вань. Туэ "Ижмото" выль мотоциклъёс, мопедъёс но велосипедъёс поттыны чакла. Оглом туэ быдэн 30 сюрс автомашинаос но мотоциклъёс лэсьтыны кулэ. Но автозаводлы пыд йылаз султыны кык пол трос машинаос бичано. Туннэ котькуд удысын югдур умой ни шуыны ым уг усьтӥськы. Данак предприятиосын уждунъя тыронъёссы туж трос. Таӵе югдур герӟаськемын федеральной бюджетысь кун заказ понна уксё вуымтэен. Нош со сю миллионъёсын лыдъяське. Г. РОМАНОВ. Кун Дума: нырысетӥ ожмаськон азьын Вуоно вторнике Кун Думалэн куинетӥ ӧтчамаз быръем депутатъёс люкаськозы нырысетӥ кенешоназы. Сое радъян понна кылдытэмын ни 18 муртлэсь ужась группа. Заседаниез усьтоз мӧйыез депутат Егор Лигачев (ӧд вунэтэ на-а куке но Политбюрое пырись сыӵе муртэ?) Со кыл сётоз Центризбиркомлэн тӧроезлы Александр Вешняковлы. Шараямын луоз депутатъёслэн огъя списоксы. Та дырлы уго куд-ог эшъёсъя югдур пумозяз тодмо ӧвӧл на. Думае быръем кӧняяз ке депутатъёс отын ужаны яке мылкыд уг каро, яке уг быгато. Кылсярысь, "Единстволэн" азьветлӥсез Сергей Шойгу правителтьствое ик кыле. Мандатсэс мукетъёсызлы сёто "Отечество - вся Россия" огазеяськонлэн лидеръёсыз Юрий Лужков но Владимир Яковлев. Нырысетӥ заседаниын быръёзы лыдъясь комиссия, регламентъя комиссия, секретариат но мукет ёзъёс. Но котьмалэсь бадӟымез ужпум, валамон ни - Тӧро быръён. Туннэ вераськон мынэ та уже тупась вить-куать мурт сярысь. Коммунистъёс нырысь ӵекто вал Виктор Зоркальцевез но Иван Мельниковез. Нош табере малпанзэс воштӥзы. Думалэн азьло кивалтӥсез Геннадий Селезнев Москва областьлы губернатор луыны ӧз быгаты. Соин, вылды, КПРФ али дэмла спикере Селезневез ик кельтыны. ЛДПР отчы ӵектэ кузёзэ - Владимир Жириновскиез. СПС (Союз правых сил) потыны турттэ Павел Крашенинниковен. Но со дыре ик возьматэ "Яблоко" фракцилэн валтӥсьёсыз пӧлы пырись Сергей Степашинлы дурбасьтэмзэ. "Единство" ("Медведь") мылкыдзэ умой-умой ӧз шарая на. "Отечество" турттэ вал Евгений Примаковез ӵектыны. Но таизлэн аслаз малпанэз сыӵе дэмланлы уг тупа кадь. Кызьы пусъё политологъёс, Кун думалы кивалтӥсьлэн нимыз меӵак потоз "Единстволы", озьы ик Владимир Путинлы оскись депутатъёс бордысь "Российская газеталэн" гожтэмезъя, вераськон ӝутскыны быгатоз Александр Шохин пумысен но. Тодмо демократ спикерлэн нырысетӥ воштӥсез луыса ужамын ни. Нош таяз учыре депутатэ быръемын ас кожаз, али нокыӵе партиен герӟаськемын ӧвӧл.Думалы кивалтӥсь юнматыса, депутатъёс ваньзы комитетъёс кылдытон, соослы тӧро быръён борды. Таиз но уж капчиен уз сётскы. Уго парламентлэн улӥ палатаяз быръмын уно дано но тодмо адямиос - азьло премьеръёс, министръёс, узыръёс, генералъёс. Котькудзылэн соослэн кивалтэмзы потэ угось. Нош кыӵе мылкыдын уло асьме Удмуртилэсь быръем муртъёс? Шуг вераны. Куаразэс уг сёто. Маке тодӥмы ке, соку ик ивортыны тыршом. И.Кричев. Удмуртиысь Правительстволы - 65 Автономной областез Удмурт АССР-лы пӧрмытэм бере, ВЦИК-лэн 1934-тӥ арын 28-тӥ декабре кутэм постановлениезъя Советъёслэн областной съездзылэн полномочиосыз сётэмын вал Советъёслэн нырысетӥ республиканской съездзылы. Со ортчиз 1935-тӥ арын 12-тӥ январе. Съездъёс вискын власть сётӥськиз УАССР-ысь Центральной Исполнительной Комитетлы (ЦИК УАССР). ЦИК кивалтӥсь орган луыса юнматылӥз правительствоез но наркоматъёсты, эскерылӥз соослэсь ужамзэс. 1935-тӥ арын 12-тӥ январе Центральной Исполнительной Комитетлэн нырысетӥ ӧтчамезлэн нырысетӥ сессияз кылдытэмын вал нырысетӥез правительство - УАССР-ысь Калык Комиссаръёслэн Советсы (СНК УАССР). Со республикаысьтымы властьлэн самой вылӥ органэз луиз но кыл кутыны быгатӥз УАССР-ысь ЦИК но РСФСР-ысь СНК азьын. УАССР-ысь Калык Комиссаръёслэн Советсылы нырысетӥ кивалтӥсе быръемын вал Григорий Алексеевич Иванов, солы воштӥсе - Степан Алексеевич Александров но Василий Петрович Вотинцев. Кылдытэмын вал таӵе калык комиссариатъёс - интыысь промышленностья, гурт удысъя, коньдон ужпумъёсъя, калыкез дышетонъя, коммунальной хозяйствоя, интыын вузкаронъя, юстицияя, социальной юрттэт сётонъя, тазалыкез утёнъя, планъя кун комиссия. Совнаркомлэн аппаратаз пыро вал ужъёсъя управляющий, канцелярилэн начальникез, протоколъёсъя люкетлэн кивалтӥсез но промышленностья, гурт удысъя, лэсьтӥськонъя но транспортъя консультантъёс. Совнаркомлэн нырысетӥ тӧроез Григорий Алексеевич Иванов вордскиз 1897-тӥ арын али Балезино ёросысь Шолоково гуртысь удмурт крестьян семьяын. 1917-тӥ арын Глазовысь гимназиез йылпумъяса дышетскыны пыре Казаньысь университетлэн эмъянъя факультетаз. Коньдонэз тырмымтэен, дышетсконзэ ӧз йылпумъя. Берытскиз Глазове, сое юнматӥзы уездысь исполкомлы секретаре. 1922-тӥ арын ысто Казаньысь гурт удысъя институтэ. Бӧрысь пӧртэм интыосын ужаз. 1931-тӥ арын юнматэмын облисполкомлы председателе, отын тыршиз, совнарком кылдытозь. 1937-тӥ арын янгыше уськытэмын вал правоцентристской контрреволюционной организацие пыриськемез понна. Уральской военной округлэн военной трибуналэзлэн пуктэмезъя 1941-тӥ арын зэмлыке поттэмын. Бӧрысь Удмуртиын но солэн палэназ пӧртэм кивалтон ужъёсын тыршиз. 1937-тӥ арын Удмурт АССР-лэсь Конституцизэ кутэм бере совнарком кыл кутыны кутскиз УАССР-ысь Верховной Советлэн Президиумез азьын. Кылдӥзы нюлэс но сиён-юон промышленностья комиссариатъёс, лэсьтӥськон материалъёс поттон промышленностья, искусствоя но сюресъёсын кивалтонъя управлениос, СССР-лэн Удмурт АССР-я заготовкаосъя наркоматэз. 1938-тӥ арын совнаркомлы кивалтӥсе юнматэмын вал Андрей Витальевич Тронин. 1946-тӥ арын 28-тӥ мартэ совнарком пӧрмытэмын Удмурт АССР-ысь Министръёслэн Советсылы. Соин кивалтӥзы: 1948-тӥ-1952-тӥ аръёсы - Павел Николаевич Никитин, 1952-тӥ-1959-тӥ аръёсы - Петр Петрович Сысоев, 1959-тӥ-1967-тӥ аръёсы - Степан Андриянович Ефремов, 1967-тӥ- 1978-тӥ аръёсы - Аркадий Терентьевич Марков, 1978-тӥ-1987-тӥ аръёсы Юрий Петрович Кудяшев, 1988-тӥ-1990-тӥ аръёсы - Геннадий Николаевич Дмитриев, 1990-тӥ-1993-тӥ аръёсы - Николай Ефимович Миронов, 1993-тӥ- 1995-тӥ аръёсы - Александр Александрович Волков. 1995-тӥ арын кылдытэмын Удмурт Республикалэн Правительствоез. Соин кивалтӥз но Председатель луыса 1999-тӥ арозь ужаз Павел Николаевич Вершинин. Али Удмурт Республикаысь Правительствоен кивалтэ Николай Алексеевич Ганза. Отчы со быръемын 1999-тӥ арын Удмурт Республикаысь Кун Кенешлэн нырысетӥ сессияз. Шер перодэ, юлтоше! Россилэн одӥгез етӥзэз эксэез Петр И кылдытӥз нырысетӥ газет. Со дырысен ӝоген 200 ар тырмоз ни. Шонерзэ вераса, та учырез асьме странаын вазен тодазы туж ик ӧз возе, Печатьлэсь нуналзэ "Правда" газетлэн вордскеменыз герӟаллязы. Нош берло аръёсы Россиысь журналистъёс асьсэлэсь праздниксэс 13-тӥ январе пусъё. Эксэйлэсь ӟеч ужзэ буре вайыса, сыӵе Указ поттӥз Борис Ельцин. Тӥни озьы гожъясь эшъёслы шулдыръяськыны ватсаса муг шедиз. Кызьы улэ туннэ Россиысь пресса? Мон малпасько, солэсь кужымзэ адямиос зол шӧдӥзы Кун Думае быръён дыръя. Шуг вераны, кӧня процент кузьмаз, шуом, Сергей Доренко "Единстволы" яке кӧня сюрс куара талаз со "Отечестволэсь". Озьы ке но, ОРТ-лэн бырйисьлэсь мылкыдзэ зӥбемез юн адӟиськиз. Бен, журналистъёс берло вакытэ уг кепырало сьӧд амалъёслэсь - соослы яке соос сьӧрын сылӥсь эшъёслы ярасьтэм муртъёс вылэ пож ву ведраосын кисьтӥське. Тани али нош ӧдъяське быръёнлы дасяськон. Таяз учыре но пресса, валамон ни, чалмыт уз улы. Нош кыӵе югдур Удмуртиын? Кылемез ар пресса ласянь пусйымон вал. Асьме дорын ортчиз "Быдэс Россия-99" бадӟым фестиваль. 300 пала валтӥсь журналистъёс, уно куноос кӧня ке нунал ӵоже кенешизы ивор вӧлмытӥсь ёзъёс азьын та дыре сылӥсь ужпумъёс сярысь. Удмуртиысь гожъясьёс-верасьёс отын асьсэдыз умоен возьматӥзы. "Удмурт дунне" но вормисьёс пӧлы шедиз. Редакцимылы сётӥзы нимысьтыз диплом но Египетэ путёвка. Кызьы ивортӥз Россиысь Госкомпечатьлэн Удмурт Республикая управлениысьтыз валтӥсь специалист Нина Никитина, та вакытлы асьме элькунын 304 редакция пусъемын. Соос пӧлын - 22 журнал, 174 газет, 13 мукет изданиос, 4 ивор вӧлмытӥсь агентство, 38 телевидение, 51 радио. Нина Васильевналэн верамезъя, али гинэ лыдэ басьтэмын "Пенсия и жизнь" газет. Сое поттоз "Юрттон" огазеяськон. Воткинскысь администрацилэн егитъёсын ужанъя отделэз кылдытӥз "Новое поколение" газет. Ижысь "Купол" огазеяськон поттыны кутске "Наш городок", "Добрые вести" но "Айболит" изданиосты. Берло толэзьёсы эфирын интызэ шедьтӥз воргоронъёслы "Адам" радио. Куараез юнма "Перекресток" газетлэн. Тазэ поттонэ мылысь-кыдысь пырисько нефтяникъёс. Ог дас вить-кызь ар талэсь азьло республикаысь журналистъёс ог- огзэс ваньзы тодо вал. Уго соос соку ог куинь сю мурт сяна ӧй вал. Нош али? Котькудаз "ассэ гажась" предприятиын, учреждениын одно ик пресс-служба яке пресс-секретарь возёно кожало, кыӵе ке но издание "пияны" туртто. Пресс-конференцие яке брифинге лыктӥськод но котьку синйылтылӥськод выль, тодмотэм ымныръёсты. Ог ласянь умой, дыр, со. Мукет ласянь - ӧйтӧд. Уго дас сизьым аресъем егит нылъёс, асьсэды кизили кожаса, кема малпаськытэк куддыр кутско соизлы яке таизлы адямилы, учырлы дунъет сётыны, политикъёсты, кивалтӥсьёсты, партиосты ваче пумит пуктыны. Сыӵе янгышъёс бӧрысь быдэс журналистикалы но шуккет сёто, пресса сярысь малпанэз калык пӧлын уродмыто. Ми, "Удмурт дунне" газетын ужасьёс, республикаысьтымы одӥгзэ мӧйызэ изданиез поттӥсьёс, сокем ик ум дыртӥське нырмес тӧлъя карыны, арлы быдэ сямен "буёлмес" вошъяны. Ми понна тужгес кулэез - лыдӟисьлэсь мылкыдзэ лыдэ басьтон. Нош со милям зӥб-зӥб, олань-талань шонаськонэз уг яраты. Соин ик Россиысь прессалэн нуналаз но ми нырысь ик ӟечкыласьком лыдӟисьмес, солы тау кариськом. Та аре газетмес басьтэ 12500 мурт. Редакция понна со шумпотымон лыдпус. Шуг- секытъёс шоры учкытэк, адямиос газетмылы оскемзэс возьмато. Ӟечкыласьком журналистъёсты но. Ваньзэ. Мӧйызэ но егитсэ. Гуртысьсэ но городысьсэ. "Гордзэ" но "бурзэ". Праздникен, гожъясь юлтоше! Ойдолэ уртче кариськыса шером перомес! Мед юрттоз со та улонмес ӧжыт ке но умоятыны. И.Лебедев. Политика Ортчемез малы ке дышетоз меда? Тодмо немецкой философ Гегель, историлэсь улон-вылонын интызэ вераса, тазьы шуиз вал: "История нокинэ номырлы уг дышеты". Та веранэз мон амалтэк тодам ваисько али, Россиысь Кун Думае быръёнъёс ортчем бере но Президент быръён азьын. Визьмы тырмоз меда таяз учыре шонер сюрес бырйыны, зэмлыкез ческыт пӧяськон пӧлысь тодманы? Малы асьмеос сокем ӝог котькинлы оскиськом но туж ӝог вунэтӥськом вӧсь каремзы, ултӥямзы сярысь? Телеэкранэз но адӟиськом инмар интыын. Нош ик янгышаськом! Телевидение ужа кузёез вылэ, коньдон поттон вылысь, котькыӵе амалэз кутэ - уг кепыра. Тӥни ма сярысь мынам потэ вал вераськеме Удмурт шаерын улӥсь клыкен. Нырысь ик, кинэ быръём Россилы президентэ? Путинэз! Шуозы тросэз. Нош малы одно ик сое? Кутском Чечня бордысен. 1996-тӥ арын президент бырйыку сямен ик, со нош ик потэ валтӥсь интые. Туалаез политической власть, азьвылэз кадь, вань кужмыныз ӝабырскоз самой та ужпум борды. Соку Чечня но Россия куспын пыӵатыны выризы тупан кылэ вуонэз, али Путинлэн нимыз герӟаськоз вормонэн. 1996-тӥ арын чакламын ке вал котькыӵе амалэн Ельцинэз ас интыяз кельтыны, али самой та амалэн ик ужало Путинэз президентэз пуктон вылысь. Я, вормом асьмеос Чечняез, пиосмес отын быдтыса. Нош отӥяз мар каром? Мукет сямен учкыса туж ик-а кулэ меда Кремльлы та вормон? Чечняын ожмаськонэз дугдытон кивалтӥсьёс понна пайда уз вайы, кунгож сьӧрысь "эшъёсмы" уз но сётэ. Сослы яра Россиез ялан кышкатыса, зӥбыса возьыны. Вань мукетыз но - ож вылэ капчи ук сьӧлыкъёстэ "ошылыны". Кин тодэ, кӧня коньдон куштэмын вал нырысетӥ чечен войнае? 1996-тӥ арын Чечняез ӝутонэ гинэ висъямын 1 миллиард доллар. Кытчы со пыриз? Тодмо огез гинэ - та коньдон чиптэм-чаптэм ышиз-быриз. Тӥни малы туала кивалтӥсьёсмы юн кырмыса возё "чечен картаез", вань кужымзэс сёто Путинлэсь данзэ ӝутон но нимзэ данъян вылысь. Табере соолэн гинэ визьмыныз но быгатонлыкеныз герӟало Дагестанын но Чечняын тупаса улонэз. Нош шонерзэ ке верано, мар понна солы табыдӟа дан лыктӥз ай? Оло, дуннеез паймытӥз ни экономикаез ӝутэменыз яке калыклэсь улон-вылонзэ умоятэменыз? Туала кивалтӥсьёсмы туж валса куто психологиез, калыклэсь йырвизьзэ суран амалъёсты. Со вылэ ужа бадӟым коньдон, ивор вӧлмытӥсь ёзъёс. Калык, кылтэм-ымтэм пудо уллё музэн, чик малпаськытэк, ассэ ачиз дасям кенере пыртэ. Озьы ик мынӥськом быръёнъёсы но. Асьмелы валантэм, валаммы но уг поты: кин понна куарамес сётӥськом, кыӵе кыӵесэ йырмес донгиськом. Нош Кремль мыло-кыдо ужа аслыз тупась адями вылэ. Али ик тодмо ук: Путин узыръёсты но лушкаськисьёсты уз иса, ваньзэ лэсьтоз, соосты утён понна. Тӥни малы сокем юн данъяло та адямиез телевидение но газетъёс. Ӵапак Путин вылэ ужаз "Единство" ("Медведь") огазеяськон. Кремльлы калык кулэ ӧвӧл, со улэ ас малпанъёсыныз. Соин ик туннэ меӵак юан сётэме потэ 1996-тӥ арын Ельцин пала дурбасьтэм муртъёслы: "Али коть тӥ валады-а ини кин кие соку странамес сётӥды?" Нош кин 19 декабре йырзэ урдыса вамыштӥз "Медведь" сьӧры? Тӥ малпады-а нылпиостылэн нылпиоссы сярысь? Гажано калыке, ку меда тон визьмаськод но ас йырыныд улыны кутскод. Ку меда валатскод, Ельцин но Путин - кыксы но одӥг пуртыысь шуыса. Соинтэк-а ог-огзэс соос сокем гажало, люкиськыны кематэк уз ӵыдэ на. Гожтэмме йылпумъяме потэ Римысь тодмо ораторлэн Цицеронлэн кылъёсыныз. Историез со улонлэн дышетӥсез шуиз вал. Та визьмо верамез асьме понна урок мед луысал, уката но быръёнъёслыв дасяськон вакытэ. Иван Образцов, история наукаосъя кандидат, доцент. Удмурт Правительствоысь иворъёс Премьер йылпумъянъёс лэсьтӥз Туэ ар понна нырысетӥзэ, 10-тӥ январе, Правительствоысь управлениослэн, секретариатъёслэн, аппаратлэн отделъёсызлэн кивалтӥсьёсынызы кенеш ортчиз. Николай Ганза Федерацияя Советлэн заседаниезлэн ужамез сярысь ивортӥз. Отын Россия Федерацилы Президент быръён дыр тупатэмын. Озьы ик кивалтӥсь аппаратлэн кылем арын ужамезлы йылпумъянъёс лэсьтӥз. Со куд-ог тырмымтэосты пусйиз, кылсярысь, республикаысьтымы городъёсы но ёросъёсы ужен ветлыку куриз со ужрадлы ӟечгес дасяськыны. Премьер пыкылӥз аппаратысь куд-огезлэн ужзэс урод быдэсъямзы пумысен. Собере Николай Ганза Правительстволэн ужан программаезлэсь инъетсэ эшшо умойгес эскерыны куриз. Пуктэмын туэлы быдэстоно ужпумъёс. Выль дунъёс тупатэмын Со нуналэ ик Правительстволэн Президиумезлэн заседаниез ортчиз. Эскеремын котырысь инкуазез кырсёмытэм понна тыронъёсты будэтон сярысь ужпум. Сыӵе тыронъёс Россия Федерациын тупатэмын 1992-тӥ арын. Соку, кылсярысь, одӥг тонна углеродлэсь окисьсэ омыре лэзем понна тыроно вал одӥг копейка. Азьланяз дунъёс воштӥськизы. Кылем арын солы дун тупатэмын вал 60 копейка. Удмуртиысь предприятиос со дунэз тыро вал ини. 2000-тӥ арын дун тупатэмын 80 копейка. Гуртлы юрттэт Кылем арын гужем сильтӧл бадӟым изъян ваиз Пичи Пурга ёросысь "Юж Пурга" гурт хозяйстволэн фермаезлы. Республикалэн бюджетысьтыз хозяйстволы тупатъян ужъёслы висъямын 50 сюрс манет. Дано нуналъёс сярысь Президиумлэн заседанияз эскеремын туэ Удмуртиын тужгес дано нуналъёсты пусъён сярысь ужпум. Отчы пыртэмын Выль ар, Ымусьтон (Рождество), Нылкышноослэн калык куспо нуналзы, Тулыслы но ужлы сӥзем праздник, Вормон нунал, Пиналъёсты утёнъя калык куспо нунал, "Гербер", Тодон-валанлы но Мӧйыослы сӥзем нуналъёс, Удмуртимылэн кунлыкезлэн нуналэз (80 ар), республикаысьтымы гуртъёсысь спортсменъёслэсь гужем но тол шудонъёссэс ортчытон, биатлонъя "Ижевская винтовка" приз понна Россилэн ӵошатсконъёсыз. Соосты ортчытыны коньдон висъяськоз республикалэн бюджетысьтыз. Правительстволэн Президиумезлэн кенешаз эскеремын мукет ужпумъёс но. Удмурт Республикаысь Правительстволэн пресс-службаез. Гажано редакция! Шумпотыса ӟечкыласько тӥледыз Россиысь Печатьлэн нуналэныз! Оскисько, тӥляд газетты котьку дыраз но шонер, со дыре ик визьмо, зэмлыко но дӥсьтыса возьматоз улон учыръёсты. Тӥляд эшлыко семьядылы сӥзисько тупаса, ог-огдэс валаса но ог-огдылы юрттыса ужан кусыпъёс. Тазалык но шудбур, шуд но яратон тӥледлы! Вань ужасьёстылы но газеттылы азинсконъёс сӥзисько. А. Солуянов, Россия Федерациысь Кун Думалэн депутатэз. Советской Союзлэн Геройёсызлы, Россия Федерацилэн Геройёсызлы но Слава орденлэн куиненыз ик степеньёсыныз пусъемъёслы - 1941тӥ-1945-тӥ аръёсы Быдӟым Отечественной войнае ветлэмъёслы улон-вылонын юрттонъя ватсаса ужрадъёс кутон сярысь Россия Федерацилэн Президентэзлэн Указэз Быдӟым Отечественной войнаын Вормонлы 55 ар тырмонэн валче но Советской Союзлэн Геройёсызлы, Россия Федерацилэн Геройёсызлы но Слава орденлэн куиненыз ик степеньёсыныз пусъемъёслы - 1941-тӥ-1945-тӥ аръёсы Быдӟым Отечественной войнае ветлэмъёслы улон-вылонын юрттон понна пуктӥсько: 1. Советской Союзлэн Геройёсызлы, Россия Федерацилэн Геройёсызлы но Слава орденлэн куиненыз ик степеньёсыныз пусъемъёслы - 1941-тӥ-1945-тӥ аръёсы Быдӟым Отечественной войнае ветлэмъёслы, кинъёс басьто кун пенсия, 2000-тӥ арын 1-тӥ январьысен радъяно вань улытозязылы толэзьлы быдэ ватсаса коньдон тыронэз, солэн быдӟалаез тупа 10 поллы йылэтэм пичи пенсилы, нош Советской Союзлэн Героез яке Россия Федерацилэн Героез нимъёсын кӧня ке пол пусъемъёс ватсаса эшшо одӥг пол басьто на тамында коньдон. 2. Вань улытозязылы толэзьлы быдэ ватсаса сётӥськись коньдон тыриське Россия Федерацилэн бюджетысьтыз. 3. Та Указ кужыме пыре сое печатлам дырысен. Россия Федерацилэн Президентэз Б. Ельцин. Москва, Кремль, 1999-тӥ арын 27-тӥ декабре. � 1708. Одӥг липет улын Юкаменск ёросысь Ертем гуртын кылем арлэн пумазгес покчи классъёсын дышетскисьёс понна выль школа усьтӥськиз. Бадӟым юрттэт сётӥзы гурт администрация, ёросысь кивалтӥсьёс. Палэнэ ӧз кыле анай-атайёс. Соос но школаез дасянын уно гинэ ужазы. Озьы огъя кужымен секыт вакытэ но гуртэз выльдыны луэ вылэм. Табере, школа сяна, одӥг липет улэ интыяськизы гурт администрация, хозяйстволэн правлениез но пудо эмъянъя участок. Л. ИПАТОВА. НАТАЛЬ Дуннеын кузёяське вожан Людалэн сюанэз туж шулдыр ортчиз. Та ӝытэ вань эшъёсыз вожъяськизы, дыр, тӧдьы юсь кадь пӧрмем нылашлы. Ма, кызьы уд вожъяськы? Гуртысь ныл городэ бызе. Я, карт луонэз кыӵе ке пурысь ӵӧж ке луысал. Сергей - тузӥ, учкымон пияш. Кызьы шуо, инмар солы визьзэ но, чеберзэ но жалямтэ. Со понна лушкемен лулӟылӥсьёсыз но бекчее сылалтымон мында, дыр. Нош Сергей бырйиз востэм, мукет нылъёслэсь номырин висъяськисьтэм Людаез. Сюанзы бере ик гурт кузя кыл вӧлмиз: тодэмез вань, пе, Людалэн: Сергейлэсь йырзэ берыктэм. Кӧня ке дыр ортчыса, ымысь ыме, пельысь пеле кылӥськиз выль ивор: котькуд юбоен вожа, пе, Сергей кышнозэ. Нылмуртлэн табере вордскем гуртэз кузя ортчемез ик уг луы ни. Анаез доры куное бертэм Люда шоры гурт кышноос кыӵе ке ведӥн шоры кадь учко. Картэз вожаса жугылэмысь шымырам мугорыз пыр потӥсь, сӥсъясь учкемзылэсь эшшо но золгес шымырске кадь. Нылкышнолэн мышкыз ышыса вуэ-а, уг-а, кенакъёс куспазы сипыртыны кутско: - Ачиз янгыш, ачиз! Кызьы озьы пиосмуртэз сьӧд кужымен ас палад карод?! Урод дауртэмез быдэсак пӧрмымтэ, лэся, соин, пе, картэз жугыса возе. Нош люкиськыны сьӧд периос уг сёто, дыр. - Акыльтӥ ини. Оскиськоды-а, акыльтӥ! - бӧрдыса сямен вера Люда, - семьяын нуналлы быдэ жугиськонъёс, керетонъёс. Татчы, анайлэн бурд улаз, сюлэмме буйгатыны, мугорме мыжыкъёслэсь ялкарытыны бертӥсько. Нош мар монэ возьма? Супыльтонъёс, гуртоослэн лек учкылэмзы... Татысь котьку лулме ранӟытыса кошкисько. Урод кылъёс воксё виё кадь монэ. Анае но мыным ма ӵектыны ёрме. Ярам коть, уг пыкылы. Тодэ ук, нокыӵе тунан- пеллян быгатонлыкъёсы ӧвӧл. Сергеен куспамы сыӵе бадӟым яратон вал ук! Лул-шоканэз пытсась яратон! Нош ма кылиз солэсь? Эгыр, сьӧд эгыр... Яратонмы шуак гомӟиз, кӧня ке ӝуаз но озьы ик шуак быриз. Ӧм быгатэ ми яратон тылпумес золгес аратыны. Уг валаськы малы - но ӧм быгатэ. Нош Сергейлэсь йырзэ берыктон пумысен ке... Кылэм-адӟеме ик ӧвӧл, кызьы та ужен выро. Тодэме вань ке, кусыпъёсмы таӵеесь луысалзы шат? Тазьы улытозь, чик бызьытэк умойгес луысал, дыр. Нылъёс вожъяськизы: городын, пе, улод. Малы мыным город, куке татын мынэсьтым лул-сюлэмме сюпсьыса возё? Нырысь толэзьёссэ Сергеен туж умой улӥмы. Огпол но керетэммы ӧй вал. Собере оломар луиз соин - вожась писэй но тӥни. Я, мар ке пумысен вожанэз ке луысал. Паллянэ одӥг вамыш но ӧй лэсьтылы на. Нош со кинэн ке вераськемме адӟе ке, дусымед шуэ. Ӵош дышетскем эшъёсыным ӟечбуръяськеме гинэ но уг луы - соку ик пурӟе. Школаысь эшъёсыным фотоосме но юдэсэн-кесэген кесяз. Нырысь пал шорам кесяське гинэ вал - али кизэ но ӵем вуттылэ ини. Тау, анаез палам пыриське, но Сергей солэсь верамзэ чик пеляз уг поны. Уже потаны уг лэзьы. Тон, пе, ужаны уд ветлӥськы, дусымъёсыныд пумиськылыны муг гинэ со. Дорысь нокытчы потатэк улӥ ке но, Сергей кинэн вожаны шедьтоз, дыр. Тросэз эшъёсы паймо: кызьы, пе, чидаськод? Син котырысь, мугорысь лыз-вожэктэмъёсы уг ик бырыло уго. Пие понна чидасько. Пимес Сергей туж яратэ. Монэн но Алёшикен артэ кык пӧртэм воргоронъёс уло кадь. Огез соос пӧлысь - изьвер, мукетыз - мусо, лякыт, яратӥсь атай. Алёшикме атайтэк кельтэме уг поты. Мон ачим анаен гинэ будэмын. Тодӥсько макем секыт со, шорад мирошка шуыса чиньыенызы возьмато ке. Бен кошкыны бурдъяськи ке но, Сергей уз лэзьы милемыз. Нош пегӟи ке, кызьы со ачиз шуэ, милемыз дунне пыдсысь но шедьтоз: соку, пе, мыным эшшо но урод луоз. Нош огнам кошкыны, Алёшикме, ас лул-вирме татчы кельтыны, мон уг быгаты. Анайтэк будэм пинал - со ӧлексы пинал выллем. Нылпилы одно ик анай но атай но кулэ. Пие понна мон котьмае но чиданы дась. Я, жуге ке жуге, ӵок ини. Огез гинэ сюлмаськытэ: огпол Алёшик азьын кизэ вуттӥз. Пиелы одӥг арес гинэ ке но, со ваньзэ вала ни ук. Нош азьланяз таӵеез трос пол луоз на, дыр. Пиналмы медаз адӟы вал йӧнтэмъяськонмес. Мон али лултэм ни. Мугоры гинэ вань на, котькыӵе ултӥямлы чидась мугоры. Тодӥсько на, пичи дыръям анае бубылиосты кутылыны уг лэзьы вал: со, пе, кулэмъёслэн лулъёссы лобало. Но ми соосты кырматэк ум чидаське вал - туж чебересь ук! Собере бубылиос, шуген ке но, омыре ӝутско. Тӥни мынам но бубыли-лулы вань буёлэз бырытозь погмамын. Уг лу ини солэн поръямез. Чик уг маласькы вал, адями ваньзэ тае чиданы быгатоз шуыса. Ас вылам вуиз но, губырскыса ке но, нуисько та улон ныпъетэз. Инмарлэн гожтэмез сыӵе, дыр. Люда сямен ик уно адямиос ас гумыразы вожанэн пумиськыло. Троссэ семьяосты та нумыр портыса возе. Вожало картъёс, кышноос. Та черлы сётӥсько нылпиос но, анай- атайёссы мукет сузэр-вынзылы тросгес саклык висъяло ке, яке эшъёссы соосты мукет нылъёсын-пиосын вошто. Людаен Сергеен учыр - со ини эсэпезлэсь ортчем вожан. Валаны уг луы Сергейлэсь таӵе сьӧсь выремзэ. Шуг вераны, шонер-а лэсьтэ Люда. Кин ке, оло, валалоз сое, кин ке тышкаськоз: тазьы курадӟыса улыны вордскем лул шат со? Та кузпалъёслы визь- кенешен юрттэм потэ, но огзы но соос кинлэсь ке верамзэ пелязы уг поно, ас тодэм- валамзыя уло. Люда чида Алёшикез понна. Сергей, кузё луэмзэ валаса, ас кужымзэ шӧдыса, эшшо но урме кадь. Вожан котькудмы пушкын пуке, дыр. Сотэк уг луы, вылды, одӥг яратон но. Но огаз семьяын со золгес шӧдӥське, мукетаз - лябгес. Куд-ог адямиос та мылкыдзэс зӥбыны быгато. Нош огъя чаклано ке, нырысетӥ вожась мурт вал Инмар. Тодады вае Ветхой Заветэз, Кый Еваез ас палаз берыктӥз но, Инмар ассэ пӧямен лыдъяз. Вожаменыз ик со улляз адямиосты райысь. Еваен лэсьтэм вамыш пумысен религия кышноослы вожпотэмысь ӧз дугды. Ветхой Заветысь "Экклизиастын" шуэмын: "Кышномурт- кулонлэн эшез, со кулонэ вуттӥсь вотэс выллем, солэн сюлмыз - кыӵес, нош киосыз - кортнэтъёс. Кин Инмарез яратэ, со пега нылкышнолэсь, нош сьӧлыко адями солэн вотэсаз сюре". Религия малпамъя, вожан потэмын кышномуртлэн, Сатаналэн юрттӥсезлэн, алдаськись но оскыны луонтэмысьтыз. Евалэн пиез Каин вие ас агай-вынзэ Авелез. Вожаса вие, малы ке шуоно, Авелез со Инмарлэн яратоно пиеныз лыдъя. Озьыен, адямилэн историез кутске вожаса лэсьтэм йыружысен. Нош Римлэн историез усьтӥське Ремез виён учырен. Вие сое Ромул агаез, озьы ик вожаса. Та бордысен Римлэн историез гинэ ӧвӧл, быдэсак туала цивилизацилэн историез кутске. Ма бен, калык веран-мадёнъёсты чаклано ке, кылдэм дырысеныз дуннеын вожан кузёяське. Инмар адямиез ачизъя кылдытэм бере, вожан но кузьмам солы. Нош макем вожасесь тӥ? Тае тододы, тестъя эскерыса. Дасяз сое Швейцариысь психотерапевт, сексолог Уилли Пасини. 1. Комнатае пырон азьын простыньёс кыллё. Соосты: а) миськоно б) утюгано в) куасьтоно. 2. Вожан крезьгур луысал ке, кыӵе стиль солы тупасал: а) рок б) ламбада в) вальс. 3. Эшты кӧня ке нуналлы буш квартирадэс куре. Тӥ малпаськоды: а) со выль туган шедьтэм б) кышноеныз керетэм в) квартираяз - ремонт. 4. Горд вакчи юбкаен нылаш эктонъяз шарфсэ уськытэ. Тӥ малпаськоды: а) со шулдыръяське б) кинэ ке ас палаз берыктыны выре. в) со ас югдаз усемын. 5. Балэ тӥ туганэныды дӥсялоды костюмъёс: а) ЪВИИИ-тӥ даурысь байёслэсь б) Шунды ӝужан палась султанлэсь но адамискалэсь в) вашкала дырысь пастухлэсь но пастушкалэсь. 6. Ма кузьмсалды яратондылы? а) тандем б) ву ултӥ уян дӥсь в) палатка. 7. Нырысетӥ яратонды: а) со вал лушкем яратон. б) тӥ али но соин ӵош в) уд ни тодӥське. 8. Тӥляд уг поты кузпалэныды ӵош мынэмды: а) ужъя командировкае б) костюмен дӥсяськыса балэ в) курортэ, санаторие. 9. Кыӵе выжыысь пуны тӥледлы тужгес кельше? а) далматин б) дог в) такса. 10. Тӥляд сюрес вылады - чупаськисьёс. Тӥ: а) возьмалоды, ку соос чупаськемысь дугдозы. б) соосты донгыса ик сюрестэс азьланьтоды. в) соосын вераськыны кутскоды, тодматскоды. 11. Кызьы малпаськоды, ваньзэ валаны луэ: а) учкемъя б) вешамъя в) мынектэмъя. 12. Вожакуды тӥ быгатоды: а) яратондылэн кисыысьтыз утчаськыны б) лушкемен эскерыса возёды в) ваньзэ валэктыны косоды. Нош табере учке, кыӵе валэктонъёс уногес люкады. А-ос тросгес ке, тӥ туж чакласькись. Мукет сямен учкемзэ шӧдыса яке кулэтэм верам кылъёссэ кылыса соку ик куалектӥськоды. Но тӥ поннады куректӥськоды. Ваньмыз умой дыръя но вожан кый кусыпъёстэс люкыны быгатоз. Но ӝоген тупалоды. Таӵе вожанэз пайдаё шуыны луоз: озьы тӥ ог-огдылы кулэдэс валаськоды. Б-ос тросгес ке, тӥ туж вожась адями. Котьку но котькытын тӥледлы адӟисько кузпалдылэн дусымъёсыз. Ӵемысь вожаменыды семья куспады сурым поттӥськоды. Тырше асьтэдыз кутыны. В-ос тросгес ке, тӥ туж зол оскиськоды ог-огдылы. Вожанэз уд ик тодӥське, шуыны луоз. Та вера быдэ вуэмды сярысь, визьмын малпаськыны быгатӥськоды но асьтэды укыр юн яратӥськоды. Тӥляд йырады ик уг тэры, тӥледыз мукетыныз воштыны быгатозы шуыса. Асьтэлы туж эн оске. Е.Китова. Удмурт кун универститетын дышетскись. Х А Л В А 2,5 ст.жареных семечек, 2 ст.жареной муки, 1,5 ст.сахара, 0,5 ст.молока, 3 ст.ложки подсолнечного масла. Семечки два раза пропустить через мясорубку, третий раз пропустить вместе с мукой. Молоко вскипятить вместе с сахаром. Горячим сиропом залить массу, добавить масло и пусть остывает. "Фольклорысен Фолкнерозь" - Даниил Александрович "ньыль" но "вить" гинэ пуктылӥз, озьыен, со студентэз ужатыны быгатэ вал, - тазьы ас сяменыз дунъет сётыса вераз кузпалыз сярысь Роза Ивановна Яшина. Тодмо удмурт кылбурчиез, тодосчиез буре ваён ӝыт ортчиз Удмурт кун университетын 23-тӥ декабре. Сое дасяз но нуиз Д. Яшинлэн дышетэм нылыз, удмурт фольклоръя тодосчи Галина Шушакова. "Котькуд дышетскон аре, - шуиз со, - студентъёслы лекциосме мон кутскисько Даниил Александровичез буре ваён бордысен". Трос тодэменыз, лач-лач мадеменыз лякыт сямыныз Д. Яшин трос студентъёслэсь йырзэс наука пала берыктӥз. Та пумиськонын но солы тау карыса вераськизы Анна Зуева, Виктор Шибанов но мукетъёсыз. - Ми Гогольлэн шинельысьтыз потӥм шуэм сямен, тросэз туала гожъясьёсмы но вераны быгатозы, ми Даниил Яшинлэн кружокысьтыз потӥм шуыса, - ас малпанзэ усьтӥз Анна Сергеевна. Со борды итӥськизы 70-тӥ аръёсы литературно-творческой кружоке ветлэмъёс Людмила Кутянова но Татьяна Чернова. Людмила Дмитриевна, кылсярысь, вераз, Н. Байтеряковлы сӥзем курсовой ужзэ Д. Яшинлэн кивалтэмез улсын дипломной дорозь вуттӥз, со кылбурчилэсь аспӧртэмлыксэ туж умой валаны юрттӥз шуыса. Даниил Яшин удмурт литературая кафедралэн нырысетӥ кивалтӥсез вал. Солэсь ужзэ азьланьтӥзы Александр Шкляев но Василий Ванюшев. Таос кыксы но тодэ ваёнъёссэс веразы, кылбуръёссэс, шаржъёссэс лыдӟизы. "Фольклорысен со Фолкнерозь дышетылӥз студентъёсыз", - шуиз А. Шкляев бадӟым эшез сярысь. Та ӝытэ адӟыны луиз, ма пӧрмыто туалаосыз студентъёс. Лиза Ложкина туж умой гожтэм удмурт пиос сярысь юмореска, Андрей Клементьев, Андрей Федоров но мукетъёсыз "Быкова но Катков сямен" кырӟаны, эктыны-тэтчаны быгато, Марина Леонтьева эшъёсыныз умой сценка дасяллям. Т. НИКОЛАЕВА. НАТАЛЬ 23-тӥ феврале потэм "Наталь" бамын ялӥмы вал "Чигымтэ чидан" конкурс сярысь. Ваньмызлы ик лыдӟисьёсмылы, кин ыстӥз аслэсьтыз ужъёссэ, бадӟым тау карем потэ. Устооссэ гожтэмъёсты газет баме вуттӥм, туннэ печатласьком берпуметӥ ужез. Табере соос пӧлысь быръёно куиньзэ тужгес но пусйымонооссэ. Малпаськом, одӥгзэ кузьымез лыдӟисьёслэн нимынызы сётыны луысал. Гожтэ яке жингыртэ, кинлэн гожтэмез сюлэмдэс тужгес но бугыртӥз. Жингыртыны луоз таӵе телефон номеръёсъя: 21-37-14, 44-41-00. Ӵектонъёстэс вераны одӥг арня дыр висъяськом. Тодады вайытӥськом на "Чигымтэ чидан" конкурсэ печатлам ужъёсын. 1. "Тӧдьы кызьпу вож куаро но...", Т.Фролова, 23-тӥ февраль. 2. "Кен шуыны ым уг пыры", Ю.Данилова, 23-тӥ март. 3. "Пал бурдо шумпотон", Л.Рябова, 23-тӥ март. 4. "Кудпала бергаськод, улон питран", Г.Савина, 29-тӥ апрель. 5. "Нуналлэн кыӵеез шунды ӝужаку ик тодмо", Л.Никитина, 20-тӥ май. 6. "Инмар косэ, дыр, пие понна улыны", А.Кузнецова, 30-тӥ сентябрь. 7. "Аныкай", И.Самигулова, 2-тӥ декабрь. 8. "Куноын но котьку уг утялто", А.Никитина, 21-тӥ декабрь. 9. "Кирос понэмедлэсь азьло - малпаськы", В.Дорофеева, 23-тӥ декабрь. 10. "Яраты Алинаез мон понна но", Г.Савина, 24-тӥ декабрь. Сюлмыз жугиськоз на дугдылытэк... Можгала вуыса, таяз учыре копак музон дуннее сюри кадь. Милемлы, удмурт литературалы сӥзем нуналъёсы лыктэм писательёслы, ялӥзы: - Нырысь ик пыралом ёрос кивалтэтысь культура отделамы. - Ма, со Бадӟым юртазы вал ук. - Табере библиотекаын ни, - валэктэ пумитасьмы. Пу юртысьтызы шуныт, югыт библиотеказэс ӟеч тодӥсько. Ужасьёссэс но. Соос пыр кӧня ке пол ини лыдӟисьёсын пумиськылыны ветлылӥ. Нош таяз учыре милемды нуо воксё мукет пала. - Умотэм ум мынӥське-а? - юасько артысь шелэсь. - Ум. Тани вуиськом ни... Юг-юг, чылкак выль юртэ пыртӥзы. Николай Байтеряков нимо библиотекае. Омырез но татын пачылмемын кадь тодмо, дано ылбурчимылэн мылкыдыныз. Ӧс азьысен ик йырысьтымы изьыосмес ури-бери басьтӥмы... Библиотекалэн кивадтӥсез Т.В.Соколова вакчияк тодматӥз ужасьёсыныз, лыдӟиськон залэныз, пӧртэм комнатаосынызы. Кыкетӥ этажысен шуак пумиським кадь асэныз Николай Байтеряковен. Тани со - чылкак улэп! Суредась Владимир Кашин ӟеч быгатэм кылбурчилэсь тужгес етӥз, задор, гурлась, уӵы кадь кырӟась вакытсэ возьматыны. Йӧн- йӧн пуке поэт, сюлэмаз выль чуръёссэ кисьматыса выллем. тани-тани со бур кизэ ӝутоз но... - Уз ни, - сюлэмлы валэктэ визь. - Кинолентаосысь, радиоысь сяна, уд адӟылы ни, уд кылы ни улэп тусбуйзэ, куаразэ. Та малпанэз шонертыса музэн, милемлы ялӥзы: - Али школаосы пумиськонъёсы ӝогак ветлоды но, нуназеям бере дэмен усьтомы Николай Семеновичлэсь музейзэ. Вунонтэм нунал можгаос понна... - Ми понна но! - ватсазы писательёс. Музеез усьтонэн валче ик, дыр, гожъяськисьёслэн табыдӟа делегацизы лыктэмын. Тямыч кузя! Егор Загребин, Леонид Емельянов, Анатолий Уваров, Петр Захаров, анатолий Григорьев, Владимир Емельянов, Анатолий Комаров но мон. Татын ик - туж гажано адямиос: поэтлэн кузпалыз, Мария Степановна но нылыз Елизавета Николаевна, Лялиысь выныз Никита Семенович, городысь культура удысысь кивалтӥсьёс, журналистъёс, лыдӟисьёс. Ӧсэз огвакытлы "подъясь" горд лента тани вандэмын. Команатае пыро кылбурчилэн матысь ӵыжы-выжыосыз, писательёс, музон куноос, лыдӟисьёс. Ӝажыосы лач-лач тыремын Николай Байтеряковлэн книгаосыз, куд-ог туспуктэмъёсыз; артэ ик - пӧртэм арбериосыз. Сюлэм нокызьы уг оскы, кылбурчи вӧзамы ӧвӧл ни шуыса. Синъёс дышемзыя утчало сое калык пӧлысь... Татысь котькудӥз арбери йӧтскылыны дӥсьтонтэм дуно. Кылбурчилэн кузпалыз, Мария Степановна, ваем егит дырысьтызы туспуктэмъёссэс но. Татын ик огъя семьязы но адӟиське. Вунэтэмын ӧвӧл ож вакытысь аръёс но. Тани кылбурчимы гимнастеркаен, музон азьынгес - шинелен. Валамон ини: музейын бадӟым инты басьтэ Николй Семеновичлэн кылбуретэз, поэзиез. Вордскем палъёссэ, калыксэ, улонэз данъяло вань чуръёсыз. Нырысетӥ книгаосыныз артэ ик - ӟуч кылэ берыктэмъёсыз. Поэтлэсь малпанъёссэ трослы паськытатэ, муромытэ прозаез. Куд-ог книгаосыз ӧжытак вунын но ӧдъяло вал ини. Татысь адӟыса, соосты выльыс кие кутэм, мур малпаськыса лыдӟем потэ. Кӧня ке гожъямъёсыз "Советской Удмуртиын" печатласькизы, мон юрттэмъя но. Иже вуылыкуз, редакцие пыратэк уг кошкылы вал кадь со. Зэм, кылбуръёссэ кытӥяз ысъялляз гожтэтъёсын яке нялтас лыктӥсь мурт сьӧры. Шумпотӥсько: нош ик одӥгезлы дано литератормылы сӥзем музей усьтӥськиз. Бадӟым тау со понна можгаослы. Оскисько: отӥяз выль музей пумен паськыталоз - ӟоскыт луоз солы одӥг комнатаын. Н.Байтеряковлэн кылбуретэз сярысь гожъям вань материалъёсыз гинэ ке но татчы люкад, ӝажыос тыр люкаськозы соос! Нош пӧртэм дано адямиосын уртче шуккем туспуктэмъёсыз ке ватсад на - артысь комнатае но уз тэре. Музеен тодмаськемзы бере, поэтлэн ӵыжы-выжыосыз, писаетльёсыз, мукет ӧтем куноос люкаськылӥзы на нимаз залэ. Отын пыр-поч кенешизы Николай Семенович Байтеряковен герӟаськем вань материалъёсыз огинэ люкан сярысь. Оскисько: уноез писательёс но асьсэлэн ӝӧкъёсысьтызы материалъёссэс матысь дыре ваёзы татчы. Кылсярысь, выль музеез одно ик узырмытоно туспуктэмъёсын. Мария Степановналэн верамезъя, доразы туж трос на ай фотооссы. Владимир Емельянов кыл сётӥз поэтлэсь ваньзэ сямен кылбуръёссэ ӟуч кылэ рос-прос берыктыны. Озьыен, та книга но ас интызэ шедьтоз ай музейын. Н.Байтеряковлэн трос гожъямъёсыз берыктэмын пӧртэм-пӧртэм кылъёсы. Эсьмаса, мадьяр (венгер) кылэ но. Соосыз ваньзэ шедьтоно одно ик. Мон ӵектӥ выль музеез Н.С.Байтеряковлэн Пичи Пургалан улэмез но ужамез сярысь тодэ ваёнъёсын одно ик узырмытыны. Партилэн райкомаз ужакуз, кӧня ке пол пыралляй кабинетаз. Шуныт пумиталляз котьку. Нош кыӵе мылкыдын улӥз со Пичи Пургалан, кыӵе малпанъёсыз вал, кыӵе выль чуръёс соку кылдытӥз? Вераны шуг ини. Сое адӟисьёсын ӝоггес кенешоно, ӵош тыршем эшъёсызлэсь юалляськоно. Кылем, дыр, туспуктэмъёсыз но. Али жалясько ини: малы ӧй дӥсьиты литературамы пумысен рос-прос юалляськыны? Мон вуылӥ угось дораз мукетгес сюлмаськонъёсын. Редакциысь культура, литература ёзэтэн кема кивалтӥ бере, мукет эшъёсын ӵош Николай Семеновичен вуылоно луиз Москвае но, Тулае но, музон интыосы но. Гожъялляме вань со сярысь. Туспуктэмъёсыз но кылемын кадь. Оло, маиз ке сюроз выль музейлы? Ӝож: газетмылэн но архивез редакциын ӧвӧл ни. Туж усто луысал, выль музее Николай Семеновичлэн вӧзаз ӝужам пушъетъёслэсь - егит литераторъёслэсь но - гожъямъёссэс, тусбуйёссэс люкасал ке. Со ведь кивалтӥз татысь литобъединениен но. можга педучилищеын но городысь, гуртъёсысь школаосын дышетскыса, куамын вить пала писательёс будэмын! Оло, Ижкармы но та ласянь бере кыле? Ваньмызлэсь со литераторъёслэсь тодэ ваёнъссэс люкад ке, макем узырмозы ӝажыос! Нялтас вераме потэ мукетыз сярысь но. Али Варзи-Ятчи гуртын сылэ на Николай Байтеряковлэн вордскем, будэм коркаез. Отын улэ одӥг арлыдо ӵыжы-выжызы. Кезьыт толъёсы мырдэм шунтэ на тодмо юртэз. Медаз, медаз таркаськы вал поэтлэн будэм карез. Варзи-Ятчие олокытысь но адямиос эмъяськыны вуыло ук. Кыӵе тунсыко потысал соослы, тодмо курортын аспӧртэм музей-сэрег ке усьтысал. Малпаськоно, дыр, та пумысен. Ляб ке эстӥськод, кезьыит вакытъёсы корка пумен нюла, бусомылэ, чаль сисьммыны кутске. Н.С.Байтеряковлэн корказ улӥсь муртлы интыысь кузёос эстӥськонэн коть ӟечгес мед юрттысалзы. Нош литературалы сӥзем нуналъёслы вакчияк йылпумъян ке лэсьтоно, соос Можгалан пайдаё ортчизы, шуысал. Писательёс пумиськылӥзы, лулысь-сюлмысь кенешылӥзы школаосын дышетскисьёсын, педколледжысь но медучилищеысь егитъёсын, городысь удмурт но ӟуч литературалы, кыллы дышетӥсьёсын. Куд-огмес интыысь радио пыр но вераськыны куризы. Туж яраз городысь музеязы но нуллэмзы. Азьвыл "Дубитель" заводлэсь конторазэ выльдыса, туж бадӟым, ӟеч музей усьтӥллям. Нуналмысь узырме ини таиз но. Тазьы ик ӟеч ке ужазы, Ижысьсэ валтӥсь музеймес но ай, оло, азьпалтозы. Удмурт писательёс, тужгес но Анатолий Комаров, трос дуно книгаос кузьмазы татысь эшъёслы. Куд-огез соос туж кемалась поттэмын ни, ӧд ке утьы - матысь аръёсы чиптэм-чаптэм ышозы. Капчи мылкыдын бертӥмы дорамы: асьсэлэсь культуразэ, историзэс, дано адямиоссэс можгаос но утё. Одӥг гинэ ӵектонэ вань на: ас вакытаз можга педтехникумез кылдытӥз асьмелэн туж дано, быдӟым пимы Трофим Борисов. Дышетӥсьёсты дасясь колледжлы одно ик солэсь нимзэ сётоно вылэм. Таӵе ӵектонъёс пумен трос кылӥськыло ини. Алигес удмурт культурая "Дэмен" огазеяськонлэн бадӟым кенешаз люкаськылэм делегатъёс но - соос куинь сю сизьымодон пала вал - таӵе куронэз огкылысь умоен лыдъязы. Мар люкетэ на ӟеч малпанэз быдэстыны - уггес валаськы. Зэм, Калыкез дышетонъя министерство усто гожтэт вуиз "Дэменэ" та нуналъёсы. Иське, ужлы интыысьтыз вырӟыны кулэ. Кирилл Ломагин. НАТАЛЬ "Чигымтэ чидан" конкурсэ Сизьым полэс чиданэз, тямыс полэс осконэз Толалтэ бӧрсьысь бӧрсе праздник нуналъёс луо: Выль ар, Инмарлэн вордскем нуналэз, Вуж Выль ар... Ӵапак быдӟым праздник нуналэ, 1926-тӥ арын 7-тӥ тошоре Бемыж ёросысь (али Кизнер ёрос) удмурт Бемыж гуртын Красновъёслэн семьяязы нылзы вордӥськиз. Макем шумпотӥзы кузпалъёс. Вал ини соослэн Веня пизы, табере тани инмар кема возьмам ныл кузьмаз. Нылзылы Саня ним сётӥзы, ӟучъёс шуэмъя - Александра. Нуналэз воштэ уй, нош арез - ар. Красновъёслэн семьяязы вордӥсько на мукет нылпиос но. Азьлань улонэз уг луы тодыны, мар вите тонэ: шумпотон яке куректон? Краснов Васька но ӧз тоды азьлань улонзэ, ӧз но малпа, яратон кузпалзэ сьӧд кыль погыртоз шуыса. Пиосмурт векчи нылпиосын огназ кыле... Озьы та семьяе кыкетӥ анай лыктэ, удмуртъёслэн шуэмзыя - сюранай. Сюр кылыз ик валан сётэ, кыкетӥ анай уз вошты аслэсьтыд вордэм анайдэ. Туж шерез, дыр, соос пӧлысь мурт нылпиосты мусояса будэтэ. Та семьяын но озьыгес луиз. Анайзэс ыштэм нылпиос секыт уж но урод кыл вылын будӥзы. Озьы ке но, Саня апай (гуртын сое озьы шуо) сюранаез сярысь ӟеч кылъёсын гинэ вера. Ӝог ортче пичи дыр, сое воштэ егитэ потон. Вуэ эшъяськон, синмаськон но нырысьсэ яратон вакыт. Санялэн сюлэмаз но шӧдтэк шорысь каръяське яратон. Синмаське со Ванялы, кыз кадь веськрес, чебер ӟуч пилы. Гажанэз пукон вылэ пуксьыку гинэ нылмурт Ваняен огӝужда луэ вылэм. Ваня но лапег мусо нылэз синйылтэ. Озьы кык яратӥсь сюлэмъёс огазеясько, выль семья кылдыто. Собере огзы бӧрсьы огзы нылпиос вордӥсько - ньыль пи но кык ныл. Война бере огазеяськем кузпалъёслы туж секыт вал уыны, нылпиосты будэтыны, пыд йылазы султытыны. Кызьы шуо калыкын, адями чиданы вордӥськемын. Огзэс-огзы юн гажамзы но яратэмзы юрттэ кузпалъёслы ваньзэ вормыны. Аръёс ортчо, нылпиос будо. Ньылетӥ пизэс келязы ни кузпалъёс армие, нош куинез бадӟымъёсыз лобӟизы ни атай юртысьтызы. Юрт котырысь секыт уж Саняпайлэн пельпум вылаз усе. Кузпалызлэн ӝушез висьыса улэмен, тазалыкез арысь аре лябӟыны кутскиз. Ӝужыт, таза мугоро вал бере, тросэз ӧз оскылэ солэн висемезлы, муртлэн пӧськыеныз мурт уг висьы уго. Ваня туж яратылӥз нылпиосты. Лавкае мыныса, кисы тросаз конфет-пряник басьтоз но урамтӥ пичиослы люкылоз вылэм, номырин ӧз возьматылы висемзэ. Нош со куспын чер ас ужзэ лэсьтэ. Ванялы Ижын операция лэсьто, но тӧдьы халатэн адямиос эзелез ӧз ворме ни. Ваня пыраклы люкиськиз югыт дуннеен. Саняпай понна соку шунды ик кысӥз кадь. 50 арес... Кын куртчон вакытэн лыдъя сое калык. Зол яратӥсь сюлэмъёс, пе, одно люкисько. Ваняен Саня но ог-огзэс туж юн яратӥзы. Бӧрдӥз Саняпай, азьланьзэ но малпаз. Но, кызьы шуо, адямилэн сизьым полэс чиданэз но тямыс полэс осконэз луыны кулэ. Одӥгез адями кулыса, мукетызлэн улонэз уг дугды. Саняпайлэн но улонэз каллен ас ӧраз пырыны кутскиз. Солэн юртаз огез бӧрсьы мукетыз сюан гуръёс чузъяськизы. Семья кылдытӥзы пиосыз, бызизы ни нылъёсыз. Сюан ке ортче, семья но йылэ. Шуо, нылпилэн нылпиез, пе, аслад сярысь но мусо. Озьы ик Саняпай но туж яратӥз нылпиосызлэсь нылпиоссэ, нош тужгес но мусо потӥзы Яша пиезлэн Марина но Галина нылъёсыз. Таосыныз уго со уй но нунал огазьын вал, уй но нунал соос котырын бергаз. Нылпиос ик юрттӥзы Саняпайлы сюлэм яразэ буйгатыны. Сизьым ар ортчиз ини кузпалзэ ватэм дырысен. Малпамтэ шорысь, тол куазен гудыртэм кадь, шулдыр гужем нуналэ Саняпайлэн сюлэм вылаз номырин вормонтэм кайгу усе. Чик малпамтэ шорысь кулэ пичиез Яша пиез. Кызь куать аресказ нюлэскысь кыз улэ пачка, врачъёс юрттыны бере кылё... Секытэз вормыны дышем кышномурт тазэ но кайгуэз чидаз. Пиезлэн кык нылъёсыз кылё (бадӟымезлы ньыль арес, пичиезлы - сизьым толэзь). Ӝыны ар ортчыса, Валя кенэз бертэ вордӥськем Алнаш ёросаз, мурт ёросын огназлы секыт, пе, луоз. Озьы Саняпай нылпи будэтэм юртаз дымбыр огназ кыле. Нокин уг тоды, кыӵе зол со мӧзмиз нылъёсызлэсь. Уй но нунал улон азьзэ малпа, уго огназ улыны моӵез уз тырмы ни. Нош ӧвӧлтэм ӟигарзэ быдтыны нош ик муг шеде. Огзы бӧрсьы огзы улонысь кошко агай-вынъёсыз Веня но Яша. Азьланяз улыны паймем бераз Саняпай, Бемыжысь юртсэ вузаса, Кизнере кошке (отын уло нылыз но пиез). Туж секытэн сётӥськиз та вамыш кышномуртлы. Макем ӝож вал вордӥськем, гольык пыд бызьылэм музъемлэсь, нылпи будэтэм юртлэсь люкиськыны. Но мар карод - нош ик чидано, нош ик кытысь ке аслыд оскон кужым шедьтоно. Улон интыез воштыса но адӟонлэсь уд пегӟы вылэм, со тон сьӧрысь одӥг вись но уг кыльы. Саняпаез Кизнерын но секыт адӟон витем. Нылыз дорын кӧлыкуз, юртэз ӝуам. Тыллэсь пегӟыны быгатытэк, Миша пиез ӝокам. Мар чиданэз чидаз Саняпай та кык полэс адӟонлэсь, тодэ ачиз но инмар гинэ. Бӧрдыса уродмизы синъёсыз, лябӟиз тазалыкез. Нош таин адӟонэз пумаз вуиз-а? Ӧз. Улонысь куспетӥ кошке бадӟым нылызлэн картэз, Саняпайлэн яратоно эмеспиез Витя. Таиз но кайгу огназ ӧз лыкты, Витя бӧрсьы ик шӧдтэк шорысь кулӥз Саняпайлэн кенэз Зоя, Миша пиезлэн кузпалыз. Мар улон бен та? Малы инмар одӥг адямилы сомында адӟон но куректон сётэ, нош со дыре ик чиданлык? Соинтэк-а та пичи гинэ кышномурт чидаз чидантэм кайгуэз. Гожъянме йылпумъяса вераме потэ, мон гожъяй аслам яратоно песянае сярысь. Ӵапак та чидась Саняпайлэн Яша пиезлэн нылыз луисько мон. Тросэз секытлы чидатэк асьсэды быдто, алама сюрес вылэ кожо, нош мынам песянае, сизьым полэс чиданэз чидаса, тямыс полэс осконэн улӥз. Тау кареме потэ солы кайгу-адӟонъёссэ вормемез понна, милемыз, нылпиоссэ, яратэмез понна. Солэн вӧсяськемез, азьланезлы осконэз милемлы кужым мед сётоз та секыт дауре асьмелэсь шудмес шедьтыны. Галина Савина, Удмурт кун университетысь студентка. "Салават" люка эшъёссэ Матысь нуналъёсы Ижысь кыказ школаын усьтӥськозы башкир кылэз дышетонъя классъёс. 20 нылпиослэн анай-атайёссы отчы пиналъёссэс гожтыны мылкыд каризы ни. Таӵе кичӧлтонэн потӥз "Салават" центр. Сое умоен лыдъяз Удмурт Республикаысь Калыкез дышетонъя министерство. Нимысьтыз классъёс усьтон - "Салаватлэн" уно ужъёсыз пӧлысь огез гинэ. Элькунысьтымы башкиръёслэн центрзы кемалась ӧз кылды ай - сое пусъён сярысь свидетельство кылем арын гинэ сётэмын. Озьы ке но, пусйымон вамышъёс вань ини. Ортчытэмын огъя ӧтчам. Удмуртиысь куинь делегат пыриськиз Быдэс дуннеысь башкиръёслэн Уфаын ортчем курултаязы. Вераськемын Башкир университетэн. Отын арлы быдэ кутыны дась асьме дорысь егитъёсты. "Салаватлэн" кивалтӥсьёсыз малпасько азьланьын вузъёсы пырыны дасянъя курс радъян сярысь но. - Ижевскын гинэ ог вить сюрс башкир улэ, - вера "Салават" центрлэн тӧроез Дильфар Хасанов. - Ми тыршом соосты огазеяны, калыкмылэсь мылкыдзэ ӟеч ужъёсы ӧръяны. Сӥзём башкиръёслы вольыт сюрес, Удмуртиын улӥсь калыкъёс пӧлын соослэн куаразы уката юнгес мед чузъяськоз. О. МАРКОВ. БЫДӞЫМ ВОРМОНЛЫ - 55 АР Тушмон танкъёс ӧз ортче Туэ 12-тӥ январе Советской Союзлэн Героезлы Анатолий Архипович Поповлы тырмысал 75 арес. Со вордӥськиз 1925-тӥ арын 12-тӥ январе Юкаменск ёросысь Митрошата гуртын. 1943-тӥ арлэн кутсконаз Глазовысь ФЗО-ын дышетскисьлэн дӥсеныз ик Анатолий Попов пуксиз вагонэ. Пизэ армие анаез гинэ келяз. Со дырысен Митрошаты гуртэ Фекла Алексеевналы вуылыны кутскизы куинь сэрего солдат гожтэтъёс. Соос вакчиесь гинэ вал. Мар сярысь бен гожъялляз солдат? "Ожмаськиськом, тушмонэз музъеммы вылысь улляськом... Нуналлы быдэ лек ожъёсы пыриськиськом... Ваньдылы ик салам верасько. Монэ возьмалэ. Туж возьмалэ..." 1944-тӥ арын октябре асьме частьёсмы Венгриысен Тисса шур дуре потӥзы. Артиллеристъёс орудизэс паром вылэ интыязы, отчы ик ящикъёсын снарядъёссэс но тыризы. Ӝог бызись шур паромез уллане нуэ, боецъёс ваньзы сямен полысъёс борды кутскизы. Вӧзазы ик, ву юбо ӝутылыса, тушмон снарядъёс пуштыло. Поповлэн расчётэз шур вамен дыраз потӥз. Шур сьӧры выжем частьёсмы вылэ соку ик тушмон танкъёс лыктыны кутскизы. Бӧрсязы радэн-радэн пехотазы но ӝутске. Тушмон танкъёс ӧз потэ шур дуре, кышкасьтэм артиллеристъёс соосты дугдытӥзы, чигнатӥзы. Тани кызьы гожтӥз та ож сярысь батареялэн командирез капитан Бессонов. "27-тӥ октябре Попов сержантлэн орудиезлы пумит вить танкъёс но кык бронетранспортёръёсын пехота ӝутскиз. кужымъёс огкадесь ӧй вал ке но, Попов юн сылӥз. Кык час ӵоже ожмаськонын со куиньзэ танкез но одӥгзэ бронетранспортёрез ӝуатӥз но 40 мында гитлеровецъёсыз быдтӥз". Кыкетӥ нуналаз немецъёс нош ик контратакае потӥзы. табере пехота бӧрсьы ик самоходной орудиос лыктӥзы. Дугдылыса-дугдылыса соос асьме пала ыбылӥзы но артиллеримес быдтыны тыршизы. Но кибашлы наводчиклы Поповлы шуг ӧй вал та бадӟым орудиез быдтыны. Кӧня ке снаряд ыбыса, со огзэ самоходной орудиез гомӟытӥз. Соку артиллеристъёс вӧзын ик тушмон снарядъёс пуштылыны кутскизы. Расчётысь куинез боецъёс сӧсырмизы, соос пӧлын ик вал орудилэн командирез но. Попов табере ачиз ик наводчик но, командир но. Батареялэн командирез немецъёслэсь орудизэс пазьгыны косӥз. Сак кариськиз Попов сержант, азьпала учке, утча шоразы ыбылӥсь тушмон орудиез. Усто наводчиклы шугъяськоно ӧз луы тушмонэз шедьтыны. Чалмиз нырысетӥез тушмон орудие, ӝоген пазьгемын вал мукетыз но. "28-тӥ октябре тушмон выльысь контратакае ӝутскиз. Та ожын сержант, Попов сӧсырмем командирез интые султыса, ачиз ик наводчик но луыса, немецъёслэсь самоходной установказэс ӝуатӥз, кык противотанковой орудизэс но кык пулемётъёссэс, кызь мурт мында солдатъёссэс быдтӥз", нош ик лыдӟиськомы батареялэн командирезлэн гожтэмысьтыз. Асод город понна ожаськонын Поповлэн расчётэз пехотаен ӵош ик городэ пыриз. Артиллеристъёс доры стрелковой командирлэн связноез вуиз. Поповлэсь комбат куриз тушмон пулемётъёсыз быдтыны. Артиллеристъёс быдэстӥзы комбатлэсь куронзэ но ротаослы сюресэз сузязы. Батареялэн командирезлэн гожъямысьтыз лыдӟиськомы: "7-тӥ декабре сержант Попов аслаз расчётэныз Асод город понна ожмаськись стрелковой подразделениосын ӵош мынӥз но городэ пыриз. Городын ожмаськон дыръя расчёт тушмонлэсь орудизэ, кыксэ пулемётсэ но кыксэ миномёт расчётъёссэ пазьгиз. Городэз басьтэм бере ик тушмон конратакае выжиз, Поповлэн расчётэз берпуметӥзэ снарядэз бырытозь ик ожмаськиз. Нош снарядъёссы бырем бере артиллеристъёс пехотинецъёсын ӵош тушмонэн ваче ожмаськонэ пыриськизы. Сержант Попов автоматэныз ньыльзэ гитлеровецъёсыз быдтӥз но кыксэ пленэ басьтӥз". Тӥни сыӵе документ гожтӥз Попов сержантлэн командирез, сое вылӥ наградалы ӵектыса. Немецъёс Будапештын котыртэме сюрем частьёссэс мозмытыны малпазы. Та понна люказы выльёссэ дивизиоссэс. Частьёсмылэн позициоссы вылэ танкъёс тулкымен-тулкымен лыктӥзы. Но артиллеристъёсмы соосты дугдытӥзы. Та ожъёс дыръя орудилэн командирез сержант Попов секыт сӧсырмиз. Госпитальысен ик со тодӥз ни Будапештэз мозмытэм понна Москваын салют сётэм сярысь. Вормон нуналэз но со госпитальын эмъяськыса пумитаз. 1945-тӥ арын гужем Анатолий Попов Митрошаты гуртаз бертӥз мылазяз Зарни Кизилиен, Ленин, куинетӥ степенё Слава но Горд Кизили орденъёсын. Войнаын секыт сӧсырмем муртлы кема улыны ӧз кылды, 1958-тӥ арын со кулӥз. Берло аръёссэ со улӥз но ужаз Ижевскын. В. ГОЛУБЕВ. "Чигымтэ чидан" конкурсэ Зорен сураськем синву Чидан... Вань меда солэн пумыз? Кӧня меда луэ чиданы? Зоре... Ведра дурын кисьтэ, шуо таӵе дыръя. Ураметӥ вамышъя пинал кышномурт. Бам вылтӥз нокытчы тэрытэк ваське зорен ӵош сураськем синву. Секыт. Та кышномурт ӵемысь тазьы вамышъя урам кузя. Кытчы мынэмзэ ачиз но уг тоды: вамышъя но вамышъя. Школаын дышетскыкуз верасалзы ке, тазьы улоз шуыса, ӧз оскысал. Сыӵе вакытэ угось умоезлы гинэ осконо. 8-тӥ классын дышетскыкуз, нылаш анайтэк кылиз. Малы анаез улонысь кошкиз, нокин уг тоды. Валя али малпаса вала ини, секыт вал солы. Агайёсыз но апаез гуртын ӧз улэ. Валя кылиз атаеныз. Соиз юылӥз, гуртаз но ӧз кӧлалля. Бӧрдыса но кызьы ортчизы толэзьёс. 8-тӥ классэз быдтыса, Валя Можга педучилищее мынӥз. Секыт вал одӥг стипендия вылын дышетскыны. Атаез ӧз юрттылы, вань уксёзэ юыса быдтылӥз. Нылаш, уксёез ӧвӧл дыръя, сютэм улӥз. Куддыр тубатэтӥ вамышъяны ӟигарыз ик уг луы вал, пересь мурт сямен дугдылыса тубалляз. Тол куазен гуртаз бертыса, корказ пырыны ӧз быгатылы. Капка ӵогамын. Бакчаетӥ кускозяз лымыетӥ пыралляз мукет ӧстӥ. Коркан кезьыт, кырсь, сиён ӧвӧл, атаез юыса изе. Но Валя чидаз. Весь малпалляз: дышетскыны кулэ. Азьлань шудо улонэзлы оскылӥз. Ортчиз ньыль ар. Валя табере ачиз анай ини, будо нылыз но пиез. Шудо улон сярысь малпанэз ӧз быдэсмы нылашлэн. Картэз юэ. Бызиз яратытэк. Одӥг яратонэз вал, люкиськизы. Тани кӧня ар ини улэ яратонтэм адямиен. Картэз юэ, жугиське, керетэ. Мунчо бере но пегамез вань Валялэн: кот йырсиез кынмыса йӧ луэ, пыдъёсыз номыре но уг шӧдо ни. Кеносын, сигын картэзлэсь буйгамзэ возьмаса улэ. Ӵемысь тодаз лыктылэ табере анаез. Тазьы ик улыса акыльтӥз, дыр, солы. Валялэн но ӵемысь потэ ини кулэмез. Нылпиосыз но уг возё ни кадь сое. Бездӥзы шудлы оскись синъёсыз. Нош одӥг пол синйылтӥз та чебер веськрес мугоро кышномуртэз гуртысьтызы ик воргорон. Семьяё воргорон. Синйылтӥз но... яратӥз. Кӧня пол Валя ассэ возьыны выриз, со воргоронэз алӥз: "Уг яра!" Нош сюлэмез косод шат? Валя нырысьсэ шӧдӥз кышномурт луэмзэ, нырысьсэ валаз, лэся: яратэ. Кызьы табере улоно? Валялэн миндэрез но куасьмыса уг вуылы кадь. Ох, улон! Малы меда кудӥзлы инмар дурыныз шуд кисьтэ, но Валялы пырыен но уг усьы. Е. ВЛАДИМИРОВА. Ас интызэ ӝог шедьтӥз Валентин Адъякимовез шаерамы тодӥсьтэмез ӧвӧл, дыр. Со быдэс улонзэ сӥзиз гуртын вузкаронлы. Куамын арлэсь кема кивалтӥз Ува райпоен. Соку татысь коллектив Удмуртпотребсоюзын но, республикаямы но одӥгез устоез, ӟеч ужасез вал. Кооператоръёс ваньмызлы адӟем карымон тыршизы но котькытынлэсь умойгес лэсьтӥськизы. Котькуд колхозын но совхозын ӝутскизы чебересь вузкарон центръёс. Районын ӵем ортчылӥзы кенешъёс, семинаръёс но музон ужрадъёс. Отын туж трос вал Валентин Кононовичлэн тыршемез-сюлмаськемез. Со трос пол пусйылэмын правительстволэн наградаосыныз - орденъёсын но медальёсын, "Россиысь потребкооперациысь дано ужась" ним сётэмын. Дыр уг витьы. Улон даур ӝог лобе. Пенсие потыса но Валентин Кононович райпоен кивалтӥз на. Нош кык ар талэсь азьло Уваын выль уж усьтӥз. Сарапулысь ликёро-водочной заводлэн директорезлы Федор Иванович Фисенколы ӵектӥз посёлокын ЛВЗ- лэсь ёззэ кылдытыны. Уваысь выль ёз ас интызэ ӝог шедьтӥз. Татчы сюрес чаляк лёгизы шаерысьтымы пӧртэм районъёсысь ужбергатӥсьёс. Паймонэз ӧвӧл, Увае лыкто бускель Пермь, Екатеринбург областьёсысь но. Тӥни соин ик ЛВЗ-лэн ёзэз толэзьысь толэзе арлы быдэ планзэ мултэсэн быдэсъя. Бадӟым-а бен та ёз? Ӧвӧл. Возьмаськисьёсын, тырись-ӝоктӥсьёсын ӵош 9 мурт ужа. Складын ужъёсты валаса радъя Валентина Селезнева. Солэн опытэз тырмыт. Ужамын райпоын, 5 ар ӵоже "Ветеран" магазинлэн директорез вал. Бухгалтерзы Валентина Сметанина. Со ас ужзэ ӟеч тодэ, заготконтораын бухгалтерын ужамын. Кыӵе амалэн бен филиал тырше? Ваньмыз лэсьтӥське огкылъёсъя. Туэ гинэ со 30-лэсь уно огкылъёс гожтӥз ни. Оглом вераса, Уваысь ёз берло дыре аракы вузанзэ 3-4 пол йылэтӥз ни. Солэн складаз 60-65 пумо продукциез (водкаез но винаез), 4,8 литръем бутылкаысен 0,1 литрозь. - Россиын водка 600 ар талэсь азьло тодмо ни, - шуэ Валентин Кононович. - Нош Сарапулысь ликёро-водочной завод республикаямы одӥгез вашкала предприятие луэ. 2003- тӥ арын солы 100 ар тырмоз. Соин ик татысь вина пӧзьтӥсьёс ӟеч продукция потто, тужгес но синмаськымон водказы. Калык сое яратыса басьтэ. Сарапулъёс Глазовысь эшъёсынызы вожмаськыса кадь ужало. Тани Ижын та кык заводлэн фирменной магазинъёсызлэн лыдзы ялан будэ. Сарапулысь аракы пӧзьтӥсьёс шоркарын 12 магазин но 4 склад возё. Бере уг кылё глазовъёс но. Нош басьяськись ачиз тодоз ни, кудаз мыноно, мае быръёно. Г. РОМАНОВ. Валентина Селезнева. Валентин Адъякимов. Туспуктэмъёсыз В. Камашевлэн. Кӧшкемыт кыль - Чернобыль 1986-тӥ арын 26-тӥ апреле Чернобыль атом электростанция пуштӥз. Нош 22-тӥ мае Асия Бареевна Нигматуллина отчы вуиз ни. Улонысьтыз сизьым арзэ со пуштэм бервылэз утялтонлы сӥзиз. Кӧня тазалыксэ ыштӥз, кӧня радиация басьтӥз - лыдъянтэм. - Мон Чернобыле сиён пӧзьтӥсь луыса ужаны мынӥ. Профессиея - техник-технолог. Отчы вуыса, производствоен кивалтыны ӵектӥзы. Сиськон интыос бушам техучилищеосын но мукет юртъёсын радъямы. Пиосмуртъёсын артэ нырысь юрт пушъёсты радиацилэсь чылкытатылӥмы. Вань атом станциосысь бригадаос вуо вал. Группаос люкаса, сиськонниос усьямы. - Тӥ отчы кӧня кузя кошкиды? - Со вакытэ улӥсько вал Донецкын, отысь келязы. Ӧтиллям дас кык адямиез, нош мынӥмы куинь кузя гинэ. Соос пӧлысь мон огнам кыли. Пуштэм интые вуэммы бере ик эшъёсме берлань доразы лэзизы. Бадӟым радиация басьтыса, соос висьыны кутскизы но ужамзы ӧйлась ни. Ваньзэ чакласькыса лэсьтоно вал. Ветлыку гинэ но юн эскериськоно луылӥз. Куинь толэзь ӵоже татын командировка чотын ужай. Собере малпай: пуштэмлэн эпицентраз сюри бере, малы-о татчы выль муртъёсты вайыны кулэ на? Нош ик Чернобыль пала куриськи. Та ик мынам валтӥсь ужан интые луиз. - Секыт-а вал? - Ой, мар веранэз. Туж секыт. Нуналаз дас тямыс час ужаськомы вал. - Тазалыкты вылын шӧдӥськиз-а? - Кышномурт луэмелы соку ик шӧдӥськиз. Нуналаз сомында час ужаны чиданы кулэ. Зонае вуим-а, ӧм-а - радиация басьтӥм. Висёнъёсы 1987-тӥ арысен кутскизы. Али кыкетӥ группаен инвалид луисько. Тросэз висьыса ужазы. Мон но озьы ик. Нылы Удмурт университетэз быдтӥз, собере бызиз. Монэ дораз Ижевске ӧтиз. Славутич городын мыным одӥг комнатаен квартира сётӥзы, отын улӥ. Бӧрысь нылы доры выжи. - Аръёс ортчо. Али уд жаляське-а, выльысь отчы мыныны мылкыд кариды шуыса? - Уг. Чернобыль пала дасоосын, сюосын юн тазалыко адямиосты лэзё вал. Ваньмыз ик пӧртэм висёнъёс кутылӥзы. Нош мон доза басьтӥ ни бере, малпасько, малы интыям висисьтэм адямиез лэзёд на меда? Выль лыктӥсьёсыз уг тодо, мар возьма та "сьӧд" улосвылын. Адямиосты кужмысь лэзьязы. Азьло кызьы вал: кулэ - мын, уске, партиысь уллялом, ужан интыысьтыд куштом. - Тӥледыз но озьы ик лэзизы-а? - Ӧз-ӧз. Ачим мынӥ. Малпай, куинь арнялы шуыса. Сиськоннимылэн кивалтӥсез ивортӥз, ми пӧлысь нокин но уз мыны шуыса. Солы шуисько: "Малы ваньмыз понна кыл кутӥськод?" Тынад, пе, нылыдлы 12 арес, мукетызлэн шахтаын картэз быриз, куинетӥез - кӧто, кинэ лэзёд? Мон ветло, шуисько. Озьы кошки. Нылме мынам эшъёсы учкизы. Куинь арняе сизьым ар кыстӥськиз. Выль ар азьын Асия Бареевналы Россия Федерацилэн Президентэзлэн Указэзъя "За спасение погибавших" медаль сётӥзы. Адямиослэсь улонзэс утьыкуз, кышкасьтэм луэмез понна данъязы. Трос-а со? Ӧвӧл, туж ичи. Чернобыле та кышномурт кадь данак адямиос ветлӥзы. Атомлэсь пуштэм бервылзэ чылкытатыса, данакез быризы, сӧсыр кылизы. Государство пӧртэм законъёс, постановлениос кутӥз. Быдэсъясько-а соос? Радиация басьтэм адямиос шоры куддыр ум но учкиське. Асьсэос но чернобылецъёс правооссэс утён сярысь тырмыт уг сюлмасько. Вераськиз А. АНДРИЯНОВ. Туспуктэмез В. КАМАШЕВЛЭН. Шӧкыч Та дыре Россиын 30 процентлэсь уноез адямиос туж куанер уло. Реформаос ортчытон аръёсы чутрак кулэсмиз сӥль, йӧл, чорыг но мукет сиён-юонъёсты вузан. Зэм, али магазинъёс котьмаин узыресь. Но дунъёс укыр "куртчылӥсько"... - Песянай, басьты шоколад! - Кошком, пиёке, татысь. Пенсие 20 кило картофкалы сяна уз тырмы. ШӦКЫЧ Валэктонъёс Автомобиль - 15 ошпиез вузаса басьтэм арбери. Азьтэм - берпалыз гинэ солэн кылемын на ке, возьдаськисько вераны, кинлы со табере кулэ на. Барак - шонергес луысал "бардак" шуыса, нош ӟучъёс возьдаськиллям. Бускель - кенер сьӧрын яке мукет галактикаын улӥсь мурт. Вал - вашкала дыре автомобильлэн но, тракторлэн но нимзы. Варягъёс - асьмелэн трос вуо ягын улэм вашкала выжыосмы (учке финн но карел музъемез). Викингъёс (герм., кыл) - ву корольёс (пиратъёс). Эн суралэ Варягъёсын. Вобла - сур понна куасьмем чорыг. Государство - калыкъёсты зӥбыса возён машина. Демократия - государстволэн синпӧет мышкыз. Дуринчи - тигрлэсь но лекгес нымы-кибы. Дыр - таяз дуннеын улонлэн мертэтэз (сояз дуннеын со нокинлы но кулэ ӧвӧл ни). Дунне (пространство) - Ньютонлэн верамезъя, со куинь мертэтэн (кузьдалаё, пасьталаё, ӝуждалаё) лэсьтэм буш. Энштейн валэктыны кутскем бере, сое табере нокин но валаны уг быгаты ни. Калашников - автоматэн ӵош вордскем адями. Камбала - Кам шурысь адӟылымтэ чорыг. Туж жаль, сиыны кельшоно вылэм. Коӵыш - тигрлэн востэм ӵужодӥгез. Оболтус - кин со "обол" уг тодӥськы, но тусызъя, малпасько, ӟуч сямен вераське шуыса. Пенсионер - пень сион вылэ кылем мурт. Пӧйшурась - инкуазь дуннеез пыӵалэн яратӥсь адями. Президент - кулон азяз кузёяськись мурт. Азьвыл сое генсек шуо вал. Слякоть - меря но весь выжыосмылэн "сылмыса кот" шуэмзы. Телескоп - галактикаысь бускельёсмес учкон пась. Уром - адями, кудӥз тӥледды туж умой тодэ ке но, озьы но гажа. Уӵы - консерваториын дышетскем ӟольгыри (Армян радиолэн валэктэмезъя). Шӧкыч - укыр бадӟым будэм дуринчи (газетмылэн огез бамез но). Ыж гон - азьвыл дыре лавсанэз воштӥсь эзь. Яратон - адямилэн вераны луонтэм бадӟым маиз ке, кудзэ та дырозь тодосчиос но ӧз быгатэ на пыр-поч валэктыны, ма со сыӵе шуыса. Валэктӥз Альмакей Ади. Кун Кенеш ивортэ Кызьы ивортӥм вал ини, Кун Кенешлэн Тӧроез Александр Волков 11-тӥ январе пыриськиз Христослэн вордскем дырысен 2000 ар тырмонлы сӥзем сӥё-дано ужрадэ. Со ортчиз Москваын. Соку ик Александр Волков пумиськылӥз Россиысь Правительстволэн Тӧроезлэн нырысетӥ воштӥсеныз Михаил Касьяновен, Пенсиосъя фондлэн кивалтӥсеныз Михаил Зурабовен, Россиысь шор банклэн кивоштӥсеныз Виктор Геращенкоен, вытъёсъя но тыриськонъёсъя министрен Александр Починокен но Беларусь Республикалэн Россиысь посолэныз Владимир Григорьевен. Та пумиськонъёс дыръя вераськон мынӥз Удмуртиысь обороная промышленностьын ужасьёслы Россия Федерацилэсь пунэм тыронъёссэ берыктон пумысен. Нимысьтыз ужпум ӝутэмын вал акциосын "Ижмаш" огазеяськон сярысь. Та ужпумъя Россиысь Правительство нимысьтыз Постановление дася. Александр Волков оскемзэ вераз, автопроизводстволэсь буян цехсэ выльдыны-тупатъяны Япониысь матысь дыре кредит вуоз шуыса. Удмурт Республикаысь Кун Кенешлэн пресс-службаез. "Нош роза куашказ, куараез шуккиськыса..." Удмуртиысь композиторъёс пӧлысь одӥгез яркытэз - Николай Шабалин. Сое шӧдыны луиз алигес, Выль ар азьын, Крезьгуръя училищеын ортчем авторской концертын но. Крезьгурчилэн творческой ӝытэз но шуыны луоз сое, малы ке шуоно, татын ӝытбыт чузъяськизы камерной крезьгурлы но калык инструментъёслы гожтэм произведениосыз. Крезьгурчиез кырӟанъёсызъя гинэ дунъяськом ке, асьмеос со шоры туж сюбег учкиськом. Зэм, Н. Шабалинлэн трос гинэ ини кырӟанъёсыз, уката ик - пӧртэм спектакльёслы гожтэмъёсыз. Но со композиторлэн творчествоезлэн пал дурыз гинэ. Быдэсак шуыны ум быгатӥське, но кӧня ке со усьтӥськиз та концертаз - ачиз сцена вылэ огпол гинэ потаз ке но, произведениоссэ быдэстӥзы солистъёс, коллективъёс. Крезьгурчи сярысь мадиз, солэсь аспӧртэмлыксэ валаны юрттӥз музыковед Юрий Толкач. - Николай Шабалинлэн котыр ласянь кисьтаськись крезьгуро талантэз Казаньысь консерваториын дышетскыкуз ик усьтӥськиз,- пусйиз со.- Тани выжыкыл мадёсъёсъя фортепианолы пьесаосыз кемалась ке но гожтэмын, соос огшоры иллюстрациос гинэ уг луо - пуштросэнызы бордазы кыско "Карабас-Барабас" но, "Оловянный солдатик" но, "Снежинка" но. Авторлэсь скрипкалы сонатазэ кылзӥсь доры вуттӥз тодмо усточи Наиля Вахитова, баянлы гожтэм гурзэ кисьтӥз Сергей Полянский. Паймытӥз баянъёслэн но аккордеонъёслэн "Гармония" оркестрзы. Сергей Русскихлэн кивалтэмез улсын соослэн крезьгурзы ваче шуккиськыса кошке, кытӥяз органлэн шудэмезлы но укша. Нырысьсэ та ӝытэ чузъяськиз Н. Шабалинлэн "Андалузские баллады" произведениез. Роялен шудӥз ачиз автор, кырӟазы Виктор Николаев но Лариса Пивоварова. Испан кылбурчилэн Федерико Гарсия Лоркалэн малпанъёсыз но та калыклэн фольклор гуръёсыз, композиторлэн мылкыдыныз пӧлэстӥськыса, мур философской пуштросъем мадёнлы пӧрмо, сыӵеесь луо произведенилэн ньылез ик люкетъёсыз: "Толэзь но кулон", "Зарезь серекъя", "Куаратэм вузон", "Люкиськон". Нош пумаз - "роза куашказ, куараез шуккиськыса..." Таӵе устолыкез ас куараосыныз узырмытыса усьтӥз калык инструментъёсъя "Зарни крезь" камерной оркестр. Сергей Кунгуров кивалтэм улсын со быдэстӥз авторлэсь консерваториын дышетскыкуз гожтэм сюитаысьтыз люкетъёссэ. Татын ик чузъяськиз Н. Шабалинлэн огез устоез ужез - "Вакхические песни" вокальной циклэз. А. Пушкинлэн кылбуръёсыз озьы кутэмын: асьме син азьтӥ ортче поэтлэн быдэс улонэз. Сое аслаз чебер куараеныз ворекъятэ шаерысьтымы калык артист Николай Копысов. Вылӥ быгатонлыкеныз учкисьёсты но олокытчы вылэ ӝутӥз кадь Анатолий Щербаковлэн Гостелерадиоысь Академической хоровой капеллаез. Улонысь вазь кошкем крезьгурчилы Юрий Болденковлы сӥзьыса, чигиськымон векчи но мукет турлы куараосын ӧръяськиз С. Есенинлэн кылъёсызъя "Отцвела моя белая липа" романсэз. Дэбес ёросысь гуртъёстӥ калык гуръёсты гожъяса ветлыкузы, Николай Михайловичез паймытӥзы вал мӧйы кышномуртлэн кылъёстэм кырӟанъёсыз. Соосты ас сяменыз выльдыса- чылкытатыса гожтӥз хорлы произведение. Капелла та крезьгурез синмаськымон быдэстӥз, фольклорысь басьтэм кырӟанлы кыкетӥ улон сётыса. Одӥгез жаль: таӵе бадӟым лул узырлык пичи залъёсын пытсаськыса улэ. Тужгес быгатӥсь, вылӥ дышетскем адямиослэсь крезьгуро дуннезэс валаны, векчи сиоссы борды сюлэмын йӧтӥськыны ваньмызлы кылдымтэ. Т. ПЕТРОВА. СПОРТ Матысь дыре Тол куазь шаерысь спортсменъёслэсь мылкыдзэс ӟырдатэ гинэ. Та нуналъёсы ӵошатсконъёс вылэ ӵошатсконъёс чакламын. Таяз шутэтскон нуналъёсы кужымзэс мерталозы Удмуртиысь кужмоосыз куасэн бызьылӥсьёс. Нош толэзьлэн пумаз лымы сюрес вылэ султозы школаын дышетскисьёс. Со вакытэ ик "визьзэс сыналозы" шахматистъёс. таосыз нюръяськозы республикалэн чемпионэз луон понна. 25-тӥ-30-тӥ январе Ижевске люкаськозы егит биатлонистъёс - "Россилэн олипиадая осконъёсыз". Нош таиз ужрад азьвыл чакламтэ вал. Сое радъянэ ачиз инкуазь пыриськиз. Москва котырын лымы ӧвӧлэн биатлонъя Россилэн Кубокез понна ӵошатскон асьме дорын ортчоз. Старт сётэмын луоз 19-тӥ январе. Маиз-маиз но, лымымы асьмелэн тырмыт. М. КУЗЬМИН. Удмурт Республикалэн 2000-тӥ арын улон-вылонын но экономика удысъёсын азинсконъя программаез сярысь Удмурт Республикалэн ЗАКОНЭЗ 1-тӥ ёзэт. Юнматоно Удмурт Республикалэн 2000-тӥ арын улон-вылонын но экономика удысъёсын азинсконъя программазэ. 2-тӥ ёзэт. Та Закон кужыме пыре сое печатлам дырысен. Удмурт Республикаысь Кун Кенешлэн Тӧроезлэн нырысетӥ воштӥсез П.Н.Вершинин. Устоосыз пусъемын Йылпумъянъёс лэсьтэмын элькунысьтымы радиожурналистъёслэн ветеранъёс сярысь материалъёссыя конкурссылы. Вормисен лыдъямын Вячеслав Михайлов, Светлана Мальцева, Снежана Панкова (Ижевск), Анита Васиуллина (Красногорск), Татьяна Дегтярева (Юкаменск), Любовь Корепанова (Балезино) но Нурсиля Файзуллина (Можга). Ӟечкыласьком! О. Марков. Шӧкыч Бечеос Сценка Нырысетӥ Бече. Ок-ок-ок, секыт ик та магазинэ ветлыны, кыдёкын. Шутэтскон понна чай ке но юо ай (укное учке). Кин со сыӵе ортче? Бечее, лэся, ук?! Чай юыны ӧтёно. Бече, бече, пыра мон доры но. Айда пыр, пуксьы. Кытчы озь ветлӥд? Кыкетӥ Бече. Ӟечбер, бече. Магазинэ ветлӥ ай. Нырысетӥ Бече. Ӟеч, ӟеч... Маиз бен вань ни магазинын? Айда тать пыр, ӝӧк сьӧры. Чай юом. Кыкетӥ Бече. Соку ик-а ӝӧк сьӧры мыном ни? Магазинын бен котьмар но вань но... апельсин но, мандарин но, лимон но, яблок но... Нырысетӥ Бече. Ой, та бече, сыӵе сиёнъёсты гинэ-а учкыса улӥськод? Кыкетӥ Бече. Бен, учки, учки но номырзэ ӧй кельыштыры. Тани книга басьтӥ. "Богатые тоже плачут" нимаське. Нырысетӥ Бече. Эшшо ке книгазэ-а лыдӟемед потӥз на? Мон кинозэ учкыса жади. Весь бӧрдӥ соосын ӵош, бӧрдӥ, бӧрдӥ но одӥг но ӧй узырмы. Тань та юбкае сяна дӥсе но вылам ӧвӧл ни. Ю, бече, ю. Вай эшшо но лэзём на. Чай со - ву со. Кыкетӥ Бече. Юисько, бече, юисько. Нош мон "Дикая Розаез" учкыны яратӥсько. Нырысетӥ Бече. Фу... Мон сое визьтэм Роза гинэ шуисько. Нош мон толон городэ магазинэ ветлӥ. Марзы гинэ ӧвӧл?!. Мунёос Барби но Томик, лимонлэсь лэсьтэм пыдкук "Лимонти" нимаське. Нош тужгес но мыным кельшиз англобес. Кыкетӥ Бече. Англобес?.. Мар бен со сыӵе? Нырысетӥ Бече. Соус со, соус, бече. Ю, ятэ, ю. Чае ческыт. Мон магазинысь ӵемысь басьтылӥсько тушо мае ке, "Распутин" нимаське. Тани чаям но сое понӥ. Соин ик сыӵе ческыт. Кыкетӥ Бече. Зэм шу? Нош мон марзэ уг валаськы, юисько гинэ ческыт шуыса. Нырысетӥ Бече. Ю-ю, бече. Мон тани ӵемысь "Рояль" но басьтылӥсько. Тани та гуртын улӥсьёс но ӵемысь, пе, со "Роялен" шудыло. Кыкетӥ Бече. Талантъёс! Нырысетӥ Бече. Талантъёс ке, талантъёс но...Трактористъёс но шофёръёс, шудэмзы бере, кык юбо вискытӥ потыкузы, пе, котьку но шораз сылӥсь юбо шоры ендырыло... Ю, бече, ю. Кыкетӥ Бече. Юисько, бече, юисько. Туж ческыт. Куиньметӥ чашазэ юисько ни. Нырысетӥ Бече. Хм... Куиньметӥзэ, пе. Витетӥзэ юэ ни но... Сакыр но кык пол ватсай ни... Кыкетӥ Бече. Осто, бече, бен чаед-а, мар-а, жаль потӥз? Нырысетӥ Бече. Жаль но потоз. "Распутинэн" лэсьтэмын ук. Кыкетӥ Бече. Нош ачид тизьнал минням пыракуд парсьлы шуыса пӧзьтэм шыдме кык тусьты сиид ук. Нырысетӥ Бече. Парсьлы шуиськод но ачид но монэн ӵош сиид ук. Кыкетӥ Бече. Мон пуньыме гинэ веттылӥ. Уг ветлы ни. Кошко. Нырысетӥ Бече. Сыл ай, бече. Ум керетэ со понна но. Айда клубе мыном. Концерт, пе, лыктэм туннэ. Можот, Лёня Голубковзы но сьӧразы вань. Сапег но шуба сётэ, шуо. Мыным со туж яра. Кыкетӥ Бече. Мыным но со кельше. Ойдо, мыном. (Кырӟаса кошко): Ойдо, бече, бечеяськом, Параен кофта вуром. Параен туган кутом но, Одӥг пала ик бызём... Пумыз. Галина ЛАРИОНОВА. Глазов. Шундыпиос шумпотто Ижевскысь 112 номеро "Шунды" нылпи садын трос адӟем карымонэз. "Вуюись" программая дышетскем сяна, соос мыло-кыдо дышето удмурт кылэз но, тодмастко калык культураен, искусствоен. Валлян татчы конференцие люкаськылӥзы городъёсысь но районъёсысь удмурт нылпи садъёсысь методистъёс. Шаерысьтымы школае мынытозь дышетон югдурен тодматӥз Калыкез дышетонъя министр Л. Захарова, солэн воштӥсез Г. Васильева. Трос тунсыкозэ веразы, усто ӵектонъёс сётӥзы дошкольной управлениысь, дышетӥсьёслэсь тодон-валанзэс будэтонъя институтысь адямиос. Куноосты чылкыт удмурт кылын вераськыны, аспӧртэм малпаськыны быгатэменызы паймытӥзы нылпи садэ берпуметӥ арзэ ветлӥсь нылпиос. Дышетӥсьсы г. Корнеева туж тунсыко урок дасям. Со сяна, куноос мукет нылпиос доры но вуылӥзы, синмаськизы удмурт шӧмын чеберъям группаослы но шумприч удмурт покчиослы. З. Кириллова. Ӝӧк вылысь энциклопедия "Италмас" поэмаез кылдытӥсь кылбурчи Михаил Петрович Петров туж сюлмаськылӥз покчиосмес визьмо будэтон сярысь. Зэм, со вие нылпиос понна нокыӵе нимысьтыз журнал ӧй вал. Нош али "Кизилилы" кыӵе шумпотысал Михаил Петрович!.. Солэн одӥг номерысьтыз адӟиськомы трос тунсыко ужъёсты. Син шоры нырысь ик йӧтэ искусствоосъя Якшур-Бодья нылпи школаысь Алёна Кудряшовалэн усто суредэз. Шӧдӥське мур малпаськыны быгатэмез. Дас укмысэтӥ бамын сётэмын мадиськонъёс. Та номерын ик - выль кырӟан, кроссчайнворд. Пинал гожъясь Альбина Ефимова данъяське ӵужанаеныз. Нош Ирина Мазитова кылбураз суреда ӵук шундыез. "Кизили" палэнэ уг кельты сюрес вылын ветлонъя куронъёсты тодонэз но: али ӵапак мынэ "Сюрес, светофор но мон" конкурс.Туж мыло-кыдоесь вольыт кылын гожтэм "Ваменэс луд кечъёс", "Вераськись бакча", "Маскара сяртчы" выжыкылъёс. Сыӵеесь ик - "Лёгам сяськаос", "Гочатӥсь кияръёс" веросъёс. Лыдӟымон, быгатыса гожтэмын Людмила Христолюбовалэн "Ӝукен нянь" ужез. Эмъясь Александр Ураков висёнъёслэсь утиськонъя дэмланъёс сётэ. Дас аресъем Мария Шемякина суред дасям. Кылбурчи Алексей Ельцов гожтэм Георгий Архипович Архипов сярысь. Автор вылӥ дунъя тодмо поэтэз, журналистэз, тодосчиез, ас калыкез сярысь зол-зол сюлмаськись адямиез. Мон нош юасал: "Вань меда али пӧламы ӟеч ужъёсыныз висъяськись таӵе ик адями?". Журналлэн та номераз печатламын куинь кылбурез - "Кузьыли", "Писэй" но "Пуны". Журналын данак Алнаш, Пичи Пурга, Можга, Шаркан, Ува, Якшур-Бодья, Глаз ёросъёсысь, Ижысь школаосын дышетскись пиналъёслэн ужъёссы. Вань Башкортостанысь, Татарстанысь, Киров улосысь нылпиослэн гожтэтъёссы. Пӧртэм удысъёслы сӥзем ужъёсыныз узыр та номер. Татын ик лыдъяськонъёс, визькылъёс. Ӝӧк вылысь энциклопедилы укша "Кизили" журналлэн таиз номерез. Вань лыдӟисьёс сое киязы мед кутылысалзы. Журналлы 2000-тӥ арлы гожтӥськымтэос одно ик мед гожтӥськозы: бер ӧвӧл на. Г. КИРИЛЛОВ. Данъяно! Драмая удмурт кун театр шумпоттӥз выль уженыз - нырысьсэ возьматӥз Куӟебай Гердлы сӥзем пьесая спектакль. Мынам чакламея, спектакльлэн нырысетӥ люкетаз Куӟебай Герд мӧзмытгес адӟиське. Тужгес но кулэ солэсь туж усто кырӟась луэмзэ возьматыны. Вань ук аслаз кылъёсызъя гожтэм кырӟанъёсыз но. Кылбуръёсызлэсь но мӧзмыса пуки. Ӧй-а луысал ог ньыльзэ-витьсэ ке но бырйыны? Мед жингыртысалзы, мед чузъяськысалзы быдэс зал тыр. Будӥсь пиналъёсты жалямзэ, визьмамзэ, эшъяськыны дышетэмзэ но кыӵе ке пичи тодметъёс пыр, оло, возьматоно вылэм. Мукет выжыосты гажамез,тодосчи луэмез но кӧня ке гинэ адӟиське. Спектакльлэн кыкетӥ люкетаз Куӟебай Гердэз инме ӝуто. Ӝутыны кулэ. Но дан инмын-а улэ? Уг кадь. Асьмеос гинэ данъяськомы ке, со инмозь ӝутӥське. Солэн сомында ӟеч ужъёсыз - соосты та пьесаын муромытыса возьматоно. Адӟиськомы-а та спектакльын Куӟебай Гердлэсь англи кылын вераськемзэ? Возьматэ-а пьеса анай кыл бордын ужамзэ? Гуртъёсын Куӟебай Герд сярысь ичи тодо. Со сярысь книгаос но ӧжыт пото. "Удмурт кенеш" дэмла та спектаклез котькуд удмурт гуртын возьматыны. Озьы бере, кулэ на вылэм кӧня ке ватсанъёс. Яркыт возьматоно таӵе кужмо, нокинэн вормонтэм адямилэсь ужъёссэ. Куӟебай Гердлэсь нимзэ кемалась сётоно вал ини Ижысь одӥгезлы ульчалы. Со сяна, одӥгезлы районлы но. Вавож ёросысь газет но таӵе йӧно пизэ данъянлэсь палэнэ медаз кыльы вылэм. Г. КИРИЛЛОВ. Сандыр - Сандыр, Мар сыӵе йырыд Калыклэсь пӧртэм паськыт? - Толон бырйим депутат. Туж бадӟым лэсьтӥм ужрад. Уйбыт пуким юыса, Нош туннэ макмыр веська. Васькай, али, лавкае Сю грамлы вал коньдонэ, Бӧрысь "долыге" пыри, Чипей Васялэсь кури. Собере шедиз Петыр, Бутылка басьтӥз тапыр... Йыр пушкын кока гондыр, Берпалан висе тыбыр. - Сандыр, Кинэ-о бырйид? Тодӥськод-а на ачид? Ма-а, бырйи-ай сыӵезэ, Кудӥз мӧйыгес адске. Кема уз лу ужанэз Пенсие потоз ӝоггес, Оло, матысь дыръёсы Ачим но сюро отчы. Сандырмы сыӵе сямо: Юэмын политик со, Сазь дыръяз кылзэ ньылэ Чорыг музэн чус улэ. Сандырлы оскон ӧжыт. Юисьтэм ӧвӧл возьыт. Депутат ке луоно Ваньзэ сюлмысь лэсьтоно. Даур ӵоже Сарапулысь радиозавод - Россиын радиоаппаратура лэсьтонъя одӥгез вашкала предприятие. Со кылдытэмын 1900-тӥ арын Петербургын. 1918-тӥ-1941-тӥ аръёсы ужаз Москваын. Быдӟым ож вакытэ предприятиез Сарапулэ выжтӥзы. 1968-тӥ арозь завод пӧртэм радиоаппаратура кылдытъяз. Бӧрысь кутскиз автомобильёслы приёмникъёс поттыны. "Урал" нимо магнитолаосты машинаен ворттылӥсьёс али но шумпотыса басьто. В. ВАСИЛЬЕВ. Гурт улон Осконэн уло Завьял ёросысь "Троицкое" крестьян (фермер) хозяйстволы туэ дас ар тырмоз. Пичигес коллективен кивалтэ Игорь Вениаминович Булдаков. Талэсь азьвыл со кивалтӥз "Урал" колхозэн. Дышетскемезъя - инженер. Булдаков котыраз люказ музъемез гажась, техникаез тодӥсь-валась, азьланез сярысь сюлмаськись адямиосты. И. В. Булдаков сярысь котьку ӟечсэ гинэ кылод. Тани, кылсярысь, Люк гурт администрацилэн тӧроез Б. М. Вахрушев пусъе фермер хозяйстволэн кивалтӥсезлэсь гуртысь калык сярысь сюлмаськемзэ. Со юрттэ пенсие потэмъёслы, сӧсыръёслы. Быгатэмезъя коньдон висъя черкез выльдонлы. Мыным кылдӥз та хозяйствое вуылыны. Котькытын шӧдӥське сюлмаськись киослэн бервылзы. Ужъёсты татын радызъя нуо. Шӧдӥ, татын "мултэс" адямиос но вань шуыса. Пӧлазы пенсионер Г. М. Ветчанин. Сое мон тодӥсько азьвыл "Урал" колхозын механик но гаражлэн кивалтӥсез луыса ужамезъя. Али Геннадий Михайлович тодон-валанзэ, быгатонлыксэ сётэ фермеръёс дорын. - Игорь Вениаминович куриз тракторъёсты дасяны,- вера со.- Мон соглаш луи, соку ик егитоми кадь. Хозяйствоын ваньмыз ас интыяз пуктэмын. Документъёсысь нокыӵе шекъёсты уд шедьты. Дыраз тыриське государстволы коньдон. Котькудӥз адями ас интыяз тырше. Бухгалтер-экономистлэсь ужзэ быгатыса нуэ Альбина Евгеньевна Сысоева. Солэн кузпалыз Евгений Ильич - агроном. Хозяйствоын будэто ю тысь, картофка, трос аръем турынъёс. Музъемзы 160 гектар. Кутӥське со туж ӝикыт. Техниказы тырмыт. Ужъёссы пусйымон пудо вордон удысын но. Ортчем арын котькуд скаллэсь 3500 килограммлэсь уно йӧл кыскемын. Со дыре ик артысь "Урал" СПК-ын йӧлзы 2000 килограмм котыр усе. Фермеръёс пудозылэсь лыдзэ берло дыре кык но ӝыны поллы будэтӥзы. Мар бен, "Троицкое" хозяйство шуг-секытъёслы ӧз сётскы. Солэн кивалтӥсез И. В. Булдаков азьланезлы осконэн улэ. Оско солы фермеръёс но. Н. ИВАНОВ. Ыж ку пушкы ватскем кион Куд-ог йылолъёс сярысь Соизлы пайми: Сирпогуртам (Вязовкае) берлозэ бертакум, отысь ӧй адӟы ни дыдыкъёсты. Кема малпаськи: малы озьы луиз? Тодӥсько на: пичи дыръям кӧня гурлало вал соос липет улын, кыӵе лобало вал, фыр-р! гинэ карыса. Анай шуылӥз: "Та дыдыкъёс гурлало ке, сюлэмын капчи луэ, куректон-кайгу небӟе". Табере гуртамы дыдыкъёс ӧвӧл ни. Туж вылӥетӥ лобӟыса кошко соос, васькыны уг ни быгато: сьӧд кужымъёс музъем вылын кузёясько. Соос уно сюрс дыдыкъёсты быдтӥзы, химикатъёс пазяса. Та тылобурдоос, пе, трос ю тысез сиё, нокыӵе пайдазы ӧвӧл. Пӧяськон гинэ со. Тӥ юри учкелэ ай, сакгес кариськыса, мае кокчало дыдыкъёс лымы улысь потэм нӧд пӧлысь тулыс? Отын нокыӵе тысез, нянь пырыез ӧвӧл - соос кокчало адямилы кышкытлык ваись макеосты. Зэмос туно ас вылаз басьтэ висись муртлэсь курадӟонзэ. Озьы ик дыдыкъёс но ас вылазы кыско адямилы кышкытлык ваись сулепъёсты но пырыосты. Соос - инмарлэн юрттӥсьёсыз. Соин ик мон Дыдыкъёсты ас поннам кемалась ини бадӟым букваен гожъясько. Тунаськисьёс, муртлэсь висёнзэ ас вылазы басьтыса, сое вормыны быгатытэк, куддыръя дырызлэсь вазь быро. Озьы ик дыдыкъёс но ас эзельзэс шедьтытэк кошко. Дыдыкез адӟыса, соин мон одно ик ӟечъяськисько, ас поннам вань шумпотонме но куректонме верасько. Со ваньзэ кылэ, отын ик юрттэ. Мон дыши ини дыдык кыллы - оломар но вера выросъёсыныз, малпаськыны гинэ кулэ. Пушкысьтыды сьӧд кужымдэс поттэмды потэ ке, одно ик учкелэ дыдыклэн синмаз. Асьмеос дышемын малпаны: ведӥнъёс - туж шушесь адямиос. Озьы ӧвӧл со. Тӥледыз веднаны быгатоз огшоры яке чебер адями но. Малы ке шуоно, ведӥнъёс олокыӵе но тус басьтыны быгато. Тани, шуом, тӥ сюрес кузя мынӥськоды, нош пумитады кин ке лыктэ. Тӥ доры вуон азяз сумказэ яке мукет арберизэ киысьтыз кияз вошъя. Валамон, суйыз жадиз, луоз. Нош кин тодэ: оло, веднаське, тӥледыз мукет сюресэ кожытыны медэ? Мултэс уз луы, ас пушкады тазьы вераса: "Остэ, инмаре, юриське ке, аслыз мед луоз та юриськемез". Туж чакласькись луоно мукет ласянь но. Тӥ ураметӥ мынӥськоды. Сюрес вылын дуно арбери кылле. Тӥ сое басьтыны медӥськоды вал, нош кызьы ке озьы луиз - арбери кияды ӧз сюры. Яке - киысьтыды усиз. Тӥ сое берен эн ни басьтэлэ. Инмар тӥледды алэ: со - кышкыт арбери. Тӥ соин уд узырме. Шуом, гожтэт гожтыны пуксиды. Ручкадэс кутӥськоды вал, но со ӧз сюры. Яке - киысьтыды усиз. Озьыен, инмар шуэ: али гожъяськыны уг яра, мукет уже выжоно. Кыӵе ке уж лэсьтэмды бере гинэ ручкады борды басьтӥськелэ. Пӧрмиз ке, соку ини гожъяськелэ. Пастаез бырымтэ ручкады гожъямысь дугдӥз ке, мукет ручка эн утчалэ, дугдэлэ гожъяськемысь - та ужды борды мукет уж быдэстэмды бере берытскоды. Тӥ лыдӟиськыны медӥськоды вал, нош усьтэм книгады лап гинэ ворсаськиз яке усиз. Озьыен, али мукет ужен выроно. Тӥ кин ке доры лыктӥськоды вал. Ӧссэ усьтыны шуыса, кидэс мычиды. Но киды ӧс кал борды малы ке ӧз йӧты. Соку ик валатскелэ: инмар тӥледыз али татчы пырыны уг лэзьы. Пыриды ке, умойтэм учыре сюроды - берытскелэ но кошкелэ. Азьпалады пислэг, ӟольгыри яке мукет тылобурдо пуксиз. Дугдэлэ, ӟечъяськелэ, возьмалэ. Со матысь писпуэ ке пуксиз, инмар та тылобурдо пыр писпу доры ӧте: тӥледлы пушкады люкаськем сьӧд кужымъёслэсь мозмытсконо. Дыртытэк гинэ лыктэлэ со писпу доры, йӧтскелэ бордаз, вешалэ, ӟечъяськелэ соин. Котырын нокин ӧвӧл яке нокинлэсь уд возьдаськиське ке, ӟыгыртэлэ писпуэз. Со тӥлесьтыд сьӧд кужымдэс басьтоз, тӧдьы кужымзэ сётоз. Шуом, тӥледыз коллективады ваньзы сямен "йыръё", чик ӧвӧлтэм понна но тӥ борды мертчисько, кин ке лушкемен урод уж лэсьтэ - сое погыльто тӥ вылэ. Тӥлесьтыд верам кылъёстэс юри мыдланьто. Шӧдытэк кылиськоды кесяськыны кутскемдэс. Муртъёс озьы спектакль шудо, тӥледыз юри ӟырдато. Малы ке шуоно, адями ӟырда ке, солэн трос кужымез потыны кутске. Вирсюпсисьёслы со ик кулэ - тӥлесьтыд кужымдэс соос ошмес вуэз кадь юо. Тӥ висьыны усиськоды. Та понна но соос пыкылыны кутско, тӥляд номыр мытэмды уг ни луы. Тӥледлы я ужысьтыды кошконо луэ, я олома сярысь малпаськыны кутсконо. Луэ озьы но. Коллективады одӥг адями тӥ пала дурбасьтыны кутске. Но ӧжыт ӧвӧл сыӵе учыръёс но: оло, со кионъёс пӧлысь ик одӥгез вылаз ыж ку дӥсяса лыктэ, тӥледлы олокыӵе но буйгатӥсь кылъёс вера. Тӥледыз олокызьы но ушъя. Мазэ-созэ валатэк, тӥ солы оскиськоды. Малпаськоды: со тӥляд зэмос уромды. Нош та адями тӥлесьтыд вань лушкем малпанъёстэс тодыны тырше. Вакчияк вераса, тӥ ньылӥды курике понэм синпӧетэз. "Уромды" пумен кузёяськыны кутске тӥледын. Компьютер вирус сярысь тӥляд кылэмды вань. Сьӧд луло адямиос, туж кескич программа кылдытыса, сое компьютере лэзё. Таиз ваньзэ сура яке куашкатэ. Музъемлэн но сыӵе ик компьютер шуонэз вань, тодосчиос сое ноосфера шуо. Сьӧд кужымъёс отчы чуртнасько но соизлэн яке таизлэн адямилэн йырвизьмаз мертчисько, сое яке шузимыто, яке пумитъяськон сямзэ ӵушыло. Тӥлесьтыд визьдэс визнанэ дэмӟытон понна, кас сюлэмъёс пӧртэм лыдпусъёсты тӥ азьын верало: кӧняен, шуом чорыг, сапег, корка басьтӥз, кӧня висъетэз, кӧня кузя уло отын... Вераськонзы, палэнысен кылзӥськыса, огшоры супыльтэм гинэ кадь. Нош сакгес ке луоно... Асьмеос тодӥськом: одӥг кыллэн пуштросэз ӵем дыръя олокӧня луэ. Кылсярысь, пуктыны. Куноез ӝӧк сьӧры пукто, лушкаськисез - тюрьмае. Сак кылзӥды ке, валалоды: та кылъёсты ӟеч мылкыдо адями одӥг куараен вера, кас сюлэм - мукет куараен. Котьку но сак луыны косэмея малпано ӧвӧл, котькуд адями шоры тушмон шоры сямен учконо шуыса. Адями йӧспӧртэм вераське яке выре ке, соку гинэ шуоно: "Остэ, югыт инмаре, юриське ке, ас вылаз мед усёз!.." Федор Пукроков. Дышетӥсен артэ пинал дыр но шулдыргес Вань сыӵе секыт уж - нылпиосты будэтон. Котькӧня дышетскы солы - номыр уз пӧрмы, нылпиез уд ке валаськы сюлмыныд. Соин ик дышетӥсьлэсь ужзэ бырйись быгатыны кулэ мурт нылпи понна нырысь ик анай яке атай луыны. Дышетӥсь ужа туж дуно арбериен - адямиен. Мар пӧрмоз солэсь, луоз-а со визьмо, быгатӥсь но шудо, тросэз потэ дышетӥсь бордысь. Глазов ёросысь Гылёгуртысь дышетӥсьёслы Елена Анатольевна Поповалы но Елена Александровна Семёновалы, вань дышетӥсьёслы сямен ик, туэ ужаны капчи уг йӧты. Удмурт кылъя дышетӥсьёслы, оло, уката но секыт. Та палан будӥсь удмурт нылпиос пичи дырысенызы ик ӟуч кылын вераськыны дышетско. Удмурт семьяосын но пумен ӧжытгес но ӧжытгес басьтыны кутско вордскем кылын потӥсь газет-журналъёсты но книгаосты. Озьы ке но, номыр шоры учкытэк, та кык дышетӥсьёс гуртысь нылпиослы удмурт кылэз, удмурт культураез пыӵатыны выро. Таяз дышетскон арын Елена Анатольевна 7-тӥ-9-тӥ классъёсын дышетскись нылпиосын ужа. "Пиналъёс удмурт книгаосты лыдӟо ке но, туж шугъясько солэсь пуштроссэ ас кылынызы вераны,- шуэ дышетӥсь.- Соин ик ронолэн пусъемезъя, удмурт литературая урокъёсын пиналъёслы лэземын ас валамзэс ӟуч кылын вераны". Елена Александровна, удмурт кылъя но литературая дышетэм сяна, классын ортчисьтэм ужрадъёсты радъясь луэ на. Соос пыр дышетӥсь нылпиослы удмурт шаерен данъяськон мылкыд пыӵатэ. Гылёгуртысь дышетӥсьёслэн тыршемзы шӧдӥськытэк уг кыльы: дас куинетӥ арзэ ини школаын дышетскисьёс предметъёсъя олимпиадаосын азьмынӥсь интыос басьтыло. Но туж сюлмаськытэ нылпиослэн ӧжыт вордӥськемзы. Туэ татысь школае нырысетӥ классэ кык нылпи гинэ дышетскыны мынӥз. Глазов ёросысь мукет гурт школаосын но югдур сыӵегес ик, соин ик выль дышетскон арын ёросъя 37 дышетӥсь мултэс луиз. Озьы ке но, одӥг нылпи но дышетскытэк, дышетӥсьлэн юрттэмезтэк аслыз улон сюрес бырйыны уз быгаты. Та ужпумез валаса ик ужало Гылёгурт школаысь дышетӥсьёс. Т. БАННИКОВА. * Удмурт кылъя но литературая дышетӥсьёс Е. А. ПОПОВА НО Е. А. СЕМЁНОВА (паллянысен буре). Туспуктэмез В. КАМАШЕВЛЭН. Гердлэн вордскем нуналаз Куӟебай Герд. Солэн вордскемез дырысен толшоре, 14-тӥ январе, 102 ар тырме. маин сое пумитаськомы ту.? Кызьы тодӥськом, Гердлэн 100 аръем юбилеенызы валче пусъем ужрадъёс пӧысь куд-огез быдэстытэк кылизы на. Уката ик со шӧдӥське дано нимылэсь нимзэ синпелетъёсын юнматон ласянь. Тани, шуом, Ижевскысь Шор площадьын солы памятник-монумент ӝутон весь бус пӧлын кадь лэйкаса улэ. Озьы ик та площадьлы Гердлэсь нимзэ сётон но. Но тани одӥг вамыш лэсьтэмын. 14-тӥ январе Ижевскысь Сивков урамысь 173-тӥ юрт борды (али отын кибашлыослэн центрзы) юнматэмын луоз Куӟебай Гердлэн тусбуеныз горельеф. Та юртын, Совнарпартшколаын, со ужаз 1930-тӥ-1932-тӥ аръёсы. Скульптор Анатолий Аникин тыршиз, ужез оскымон но чеберлыко мед луоз шуыса. Та нуналэ ик (синпелетэз 14 часысен усьтэм бере) Удмурт театрын луозы Гердлы сӥзем лыдӟонъёс. Ӝыт артистъёс возьматозы "Кикы нош силе но силе" спектакльзэс. Т. ПЕТРОВА. ӦТИСЬКОМ МАЛПАСЬКЫНЫ Анайлэн нуналэз Анайлэсь нуналзэ шаерамы куинетӥзэ пусйизы ини. Одӥг тодмо нылкышно монэ но берлояз праздник шуоназы ӧтиз, кык ӧтён билет, пе, сётӥзы. Мыноно кариськи. Ижевскысь Дзержинский нимо клубын ортчиз со ужрад. Валай, городын улӥсьёс понна радъямын вал со. Лыктэмъёс пӧлысь мӧйы анайёсты ӧй адӟы, егит нылъёс но егит анайёс гинэ вал кадь. Малы гожтоно кариськи та ортчем праздник сярысь. Неужто быдэс городын уно нылпи вордэм но вордӥсь анайёс чик ӧвӧл? Вань, дыр. Вань ке - потты но пукты вал со анайёсты сцена вылэ, мед верасалзы нылпиоссэс быдэстэмзы сярысь. Война бере, оло, алилэсь но секыт вал, тужгес но 1946-тӥ-1948-тӥ аръёсы. Уксёед луыса но басьтыны уг луы вал магазинысь вуз, ваньмыз карточкаен. Озьы ке но, алиен ӵошатыса, пиналъёс уно вордскизы. Та вакытэ "Анай нунал" шуон праздник анаез исам кадь потэ мыным, анай нимез ултӥям кадь. Газетъёсын но туж уно гожъяло пинал ваёно нылкышноос лябесь, пе, нуныос ӧлексыесь вордско. Малы? Быдэ вуэм егит пиос но нылъёс семья кылдытыны уг дӥсьто. Кызьы, маин сюдоз-вордоз семьязэ, нылпизэ ужаны быгатӥсь адями ужтэк пуке бере. Мон солы но паймисько али, кызьы дӥсьто на егитъёс пинал вайыны. Та малпамме верано кариськи одӥг тодмоелэн, со мон кадь ик песянай, телефон пыр бӧрдыса верамез бере. - Сумкаям кӧня ке печення но конфет, кык сю грамм пала колбаса поныса, пичи внучкаеным адскыны мынӥ, - шуэ. - Саламме ӝӧк вылазы тыри. Внучкае колбасаез нырысь зынъяса возиз кияз, собере чепылляса ишканы кутскиз. Чик куртчылытэк, нянь пырыез кадь тыре ымаз. Та суредэз адӟыса, куараен бӧрдыны кутски. Кемалась сиымтэ вылэм колбасаез. Туннэ нунал понна нянь басьтыны но коньдонзы вылымтэ, аслам но пенсие, няньлы гинэ кельтэмын вал. Бен кыӵе анайлэн шулдыръяськон празднике мынэмез потоз, сютэм пиналыз сиён курыса бӧрдэ ке? Маин сиён басьтод, ужаса поттэм коньдондэ но басьтыны уг луы бере, нылпи пособиез но уг адӟыло. Та праздникын гинэ тодӥ мон, нылкышно огазеяськон вань шуыса. Кӧня мурт отын, кытчы люкасько, кинъёс соос - чик уг тодӥськы. Оло, мон но маин ке соин юрттыны быгатысал кудӥзлы ке уно нылпиё анайлы. Мон ачим но трос нылпиё анай. Табере трос пол песянай ини. Ортчем аръёсыз тодэ вайыса, куддыръя кӧты но ӝож луэ. Мынам вань улытозям кӧты тырымон сиськеме ӧвӧл. Весь нылпиослы мед тырмоз, соослы будоно, визь- нод люкано, мон чидало, шуылӥ. Мыным нокин нокытысь юрттэт ӧз сёты, кызьы быгатӥмы, озьы ик юрттӥмы ваньзылы вылӥ образование басьтыны. Мон ужан вакытэ кык-куинь азьын ужаны уг лэзё вал, луонлык вань дыръя но. Бадӟым пие студент дыръя, сое стороже садике интыяй. Ужаны ачим ветлӥ. Нылме нош выж миськыны интыяй. Ӵукна уже мынытозям, выж миськыны ветлӥ. Ваньмыз нылпиосы семьяосын. Соос мукет вакытэ улӥзы, дышетскон, эмъяськон понна дун тыроно ӧй вал. Табере нылпиосылэн нылпиоссы понна сюлмаськыса ӟигар быре ини: кызьы дышетскозы, кызьы уж шедьтозы дышетсконзэс быдтыса. Али уноез кивалтӥсьёс, депутат луыны турттӥсьёс коммунистъёсты янгыше уськытыны выро. Вал, дыр, соос пӧлын но котькыӵеез. Но со вакытэ милям ӧсъёсмы ӧз ӵогаськылэ, уйлы усьтэм укноосын кӧлаллямы. Али огшоры, шоро-куспо улӥсьёс гинэ но корт ӧсъёс, корт решёткаос сьӧрын кышкаса уло - лушкаськисьёс, адями виылӥсьёс эркын юмшало. Сюроз на меда асьме вакытлы улонмес ӧжыт ке но каньылгес карыны тыршись, визьмо но аслыз оскись адями. А.Иванова. "Удмурт дунне" газетэз 1941-тӥ арысен яратӥсь но лыдӟись чинтэм но сантэм огшоры удмурт нылкышно. "Ӟечбур, Шаркан!" Бен, ӝоген та кылъёсты асьмеос кылом Шаркан черко гуртын. Отын 25- тӥ-27-тӥ феврале ортчозы республикаысьтымы гурт спортсменъёслэн 6- тӥез тол шудонъёссы. Быдэс шаерысьтымы шаплыосыз лыктозы отчы. Шарканъёс кунооссэс пумитаны дась, сыӵе йылпумъянъёс лэсьтӥз сое радъясь комитет. Ӵошатсконъёс ортчозы азьвылъёсыз кадь ик. Вылез со: табере ёросъёслэн кивалтӥсьёссы ыбылӥськем сяна, куас вылэ но султозы. Шарканын куасэн бызьылон сюрес ас сяменыз туж аспӧртэмлыко. Со ортче нюко-гопо, нюлэсо интыостӥ. Шулдыресь интыос. Уноез спортсменъёс трассаез кылем арын эскеризы ни "Удмурт дунне" газетлэн кубокез понна ӵошатсконын. Туэ но тол шудонъёсын ӵош газетмылэн призъёсыз понна нюръяськон мыноз отын ик. Таяз учыре соос ортчозы ни 48-тӥзэ. Кылем арын азвесь кубокмес нуизы играос. Кыкетӥ интыез басьтӥз Шарканысь команда, куинетӥ интые потӥз Можга ёрос. Нош туэ кин? Н.Байтеряков. Удмурт Республикаысь Правительстволэн РАСПОРЯЖЕНИЕЗ Удмурт Элькунэ Россия Федерацилэн мукет улосъёсысьтыз аракы трос вуэмен, сое кытын поттэмлы но солэн ӟечлыкезлы дунъет сётӥсь документтэк вузан учыръёс паськыт вӧлмемен, 1999-тӥ арын аракыен усыкмыса элькунысьтымы 60 адями кулэмен валче, "Этил спирт, аракы но спирт продукция поттонэз но вузан-басьтонэз кун ласянь чакласа возён сярысь" 171-ФЗ номеро Федеральной Законлэн 12-тӥ ёзэтысьтыз 4-тӥ пунктсэ лыдэ басьтыса (1999-тӥ арын 7-тӥ январе кутэм 18-ФЗ номеро Федеральной Законын гожтэмъя), аракыез вузаны алонъя нимысьтыз ужрадъёс кутоно: 1. Огдырлы, 2000-тӥ арын 1-тӥ апрелёзь, калык пӧлын аракыен усыкмыса кулон учыръёслэсь мугзэс тодон понна, Удмурт Элькун улосвылэ ваемысь дугдытоно Россия Федерацилэн мукет регионъёсаз но СНГ-е пырись странаосын поттэм аракыез, тужгес вылӥ ӟечлыкен спиртлэсь дасям "Люкс" аракыез вератэк. 2. Суменак (оптовой) но розницае вузкарись предприятиослэн кивалтӥсьёссылы та распоряжениез печатлам дырысен 5 нунал куспын Россия Федерацилэн мукет улосъёсысьтыз ваем но ӟечлыксэ эскерем, вузатэк кылем аракыез лыдъяно-чотано. Та сярысь актъёсты Удмурт Республикаысь Вузкаронъя но бытовой юрттэт сётонъя министерствое сётоно. Инвентаризацияя актын пусъем кылемзэ аракыез вузаны лэзёно Удмурт Республикаысь Вузкаронъя но бытовой юрттэт сётонъя министерствое актъёсты сётэм дырысен толэзь куспын. 3. Удмурт Республикаысь Тазалыкез утёнъя министерстволы, чылкытлыкез но тазалыкез утёнъя, висён вӧлмонэз эскеронъя республикаысь кун центрлы аракылэсь усыкмыса кулон учыръёслэсь мугзэс сэрттоно-пертчоно. Удмурт Республикаысь Вузкаронъя но бытовой юрттэт сётонъя министерстволы Стандартизацияя, метрологияя но сертификацияя удмурт центрен ӵош аракылэсь ӟечлыксэ эскронэз кужмоятонъя дэмланъёс дасяно но соосты Удмурт Республикаысь Правительствое сётоно. 4. Удмурт Республикаысь Вузкаронъя но бытовой юрттэт сётонъя министерстволы, Югдурез утёнъя министерстволы, Вытъя полицилэн федеральной службаезлэн Удмурт Республикаысь управлениезлы, Россия Федерациысь Вытъёсъя но тыриськонъёсъя министерстволэн Удмурт Республикаысь управлениезлы эскероно суменак но розницае вузкарись предприятиослэсь, огъя сиськонъя предприятиослэсь аракы продукциен вузкарон удысын законодательствоез чакламзэс. 5. Удмурт Республикаысь аракы поттӥсь предприятиослэн кивалтӥсьёссылы продукцизэс розницае вузанъя но огъя сиськон интыосы вуттонъя огкылъёсты ӟеч быдэсъяно. 6. Удмурт Республикаысь Югдурез утёнъя министерстволы, элькун улосвылэ Россия Федерацилэн мукет улосъёсысьтыз но СНГ-е пырись странаосысь аракыез ваёнъя эскерон ужез кужмоятон вылысь, ватсаса ужрадъёс кутоно. 7. Распоряжение кужыме пыре сое иворъёсты вӧлмытон ёзъёсын печатлам дырысен. 8. Та распоряженилэсь быдэсъяськемзэ эскероз Удмурт Республикаысь Правительстволэн Тӧроезлэн воштӥсез С.В.Чикуров. Удмурт Республикаысь Правительстволэн Тӧроез Н.А.Ганза. Ижевск город, 1999-тӥ арын 16-тӥ декабре. � 466-р. Азьмынӥсь дышетӥсьёс - Москваын 14-тӥ январе Москваын Кремль дворецын ортчоз Россиысь дышетӥсьёслэн бадӟым кенешсы. Дышетон удыс азьын та вакытэ туж трос ужпумъёс сыло. Кыӵе инты дышетонын висъяськыны кулэ нациослэн кылзылы, историзылы, культуразылы? Кызьы выжоно 12 аръем дышетскон программа вылэ? Оло солэн кулэлыкез но ӧвӧл? Та ужпумъёсты сэрттытэк, туала школа выль дауре выжыны ик дась ӧвӧл. Дышетӥсьёслэн ажрадазы пыриськозы Россиысь дышетонъя министр В. Филиппов но калыкез улон-вылонын утенъя министр В. Матвиенко. Москваын ужалоз Удмуртиысь дышетӥсьёслэн делегациез но. Соин кивалто Правительстволэн Тӧроезлэн воштӥсез В. Шудегов но Калыкез дышетонъя министр Л. Захарова. Т. МИРОНОВА. Куӟебай Гердлэн вордскемез дырысен туннэ тырме 102 ар 39 ар улонэзлэсь 5,5 арзэ Куӟебай Герд ортчытӥз пытсэт сьӧрын. "Союз освобождения финских народов" (СОФИН) организация кылдытӥз шуыса, сое янгыше уськыто но ыбыны приговор яло. Куинь толэзь пуке смертникъёслэн камераязы. А.М.Горький сюлмаськемен, та решение воштэмын вал дас арлы Соловкиысь лагере келянэн. 1936-тӥ арлэн пумаз лагерез тюрьмалы пӧрмытӥзы. Йодпромын ужась Герд мукетъёсыныз ӵош чидантэм гур ыме кадь шедизы. 1937-тӥ арын 1-тӥ ноябре удмурт калыклэсь дано, бадӟым пизэ ыбо... Соловкиысь шормучъёс ас пушказы вато юнме шорысь куарадӟытэмъёслэсь секыт ӝуштэмзэс, викышъямзэс. Со сярысь вера ас тодэ ваёнъёсаз Куӟебай Гердлэн вынмуртэз Юрий Андреевич ЧАЙНИКОВ. СЕКИР-ГУРЕЗЬЛЭН ПЫДВЫЖЫЯЗ 1989-тӥ арын инвожо толэзе мыным вуылыны кылдӥз Карелиысь Соловки шормуӵъёсы, 1923-тӥ-1940-тӥ аръёсы репрессиос дыръя татын быремъёсты буре ваён вылысь. 6-тӥ июне, ӧжыт берегес кыльыса, Нижневартовск-Свердловск- Архангельск омыр сюрес кузя, собере Соловкиозь вуи самолётэн. Соловкиысь музейын милемыз кема возьмам куноосыз кадь пумитазы, татын ужась Александра Сошина сюлмаськиз кӧлан инты ласянь. Гостиницаын интыос ӧй вал ни бере, милемыз нуизы Кремле, кельяосы (азьвыл камераосы). Сергей Щегольковен ми шедим одӥг бадӟым комнатае. Кызьы тодмо луиз, милемын артэ камераын пукем вылэм Дмитрий Лихачев академик. Куазь соку удалтӥз. Шунытэсь, шундыё нуналъёс, тӧдьы уйёс вал. Валаны но ӧз луылы, ку быре нунал, ку кутске уй. Изьыны трос ӧз луы - пумиськонъёс, тодматсконъёс... Тодматски Соловкиысь монастырьын ужасьёсын, матысь тодмоос кадь луизы 30-тӥ аръёсы татын пукемъёс Константин Гурский, Лев Мартюхин, Сергей Щегольков но Ефим Лагутин. Соловкиын пукемъёслэн ӵыжы-выжыоссы но трос вал. Москваысь делегацилэн йырыз - П.А.Флоренскийлэн (узниклэн) внукез В.В.Флоренский, наукаосъя доктор, Губкин нимо институтысь дышетӥсь. Ленинградысь делегациен кивалтӥз татысь мемориаллэн кузёез Вениамин Иофе, Украинаысь - Раиса Скалий, "Литературной газетазы" ужась. Татын ик вал Карелиысь мемориаллэн кивалтӥсез Иван Чухин но. Ӝыт, вуэм берамы ик, интыысь клубын ортчиз районысь кивалтӥсьёсын, музейысь ужасьёсын но посёлокысь улӥсьёсын пумиськон. Вераськизы азьвыл узникъёс но, соос пӧлын - Лариса Крушельницкая. Та кышномуртлэн выжыысьтыз дас муртэ репрессиосын быдтӥллям. Вакчи дыр куспын милям потӥз тросгес адӟеммы, тодэммы, шутэтскон сярысь ик вунэтылӥм. Сергей Щегольковен ми пырамы Преображенской но Троицкой соборъёсы. Монастырьысь сиськоннилы (трапезнойлы) паймим: татысь туж бадӟым зал возиське куать метр зӧкта юбоен - архитектура ласянь туж йӧспӧртэм лэсьтэм маке та. Кремль пушкытӥ но солэн котыртӥз калгон сяменымы Сергей Васильевич мадиз Соловкины улэмзы, ужамзы сярысь. Со татчы шедем туж пиналысен, 17 арес дыръяз, 58-тӥ статьяя. Верамысьтыз таӵе суредэз син азе пуктӥ. Кӧсыт, восьтэт зключённойёс ӵукна бӧрсьысь бӧрсе пото лагерьысь начальстволы возьматскыны. Таосыз ог дышем сямен кезьыт йӧ пыры кадь уськыто: - Здравствуйте! - Здра-а-а... - заключённойёслэн мылпотытэкгес ваземзы кылӥське. - Х... на! Соловки не слышат! Здравствуйте! - Здра-а-а!.. - золгес кесько ни пумитазы. - Соловки не слышат! - лек куара чузъяське, собере - куинь этажъем ораськон (мат). Тани начальство ортче радэн султэмъёс азьтӥ. Кутско соизлэн яке таизлэн ымныразы васькытъяны. Собере ужан интыос люкыло. Лагерьын ужасьёслы ӵемысь кык-куинь час гинэ изьыны кылдылӥз. Адямиез сантэманлэн-мыскыллянлэн пумыз ӧй вал. - Здесь власть Соловецкая, а не Советская! Та выллем кылъёс кортӵоген кадь шуккемын вал йырвизьёсы. Соосты кылылӥзы котькуд нунал, ӝыт но, ӵук но. Трапезное пыреммы бере, мон Сергей Васильевичлы верай, татын быдэс батальонэз сюдыны луоно шуыса. - Ӧвӧл, татын нокин ӧз сиськылы, - шуиз со. Котькудӥз ас пайзэ басьтылӥз но кошкылӥз. Нянез соку ик, мынон сяменызы, быдтылӥзы, шыдэз, куддыръя нумыръёсын ке но, озьы ик юылӥзы. Мар бен карод, голод не тётка, шуо ӟучъёс. Сиськон тэркы интыын вал сюй мискаос, консерва банкаос - кинлы мар шедем... Сергей Васильевичлы удалтэм: со ужам электростанциын мотористын. Висьыны усьыса туж куректэм, интытэк кылёз ни шуыса. Больницалэн укноетӥз (возьматӥз сое) адӟылэм, кызьы конвоиръёс валэн лыкто но бадӟым ящикъёсы кулэмъёсты тырыса нуо. Тыро вылэм радэн-радэн. Мукетсэ радэз - улӥяз кыллисьёслы йырчукин. Тач-тач, тросгес тэрытыны вырыса. Шӧйёс но уд шуы - лысьӧмъёс, адямиослэсь лы но ку гинэ кылемын. Урдлыослэн тӥяськемзы ик, пе, кылӥське вал. - Тодӥськод-а, Юра, - тазьы вазьылӥз со мыным, - нокыӵе жалян ӧй вал. Нокыӵе кариськытэк кадь ваньмыз лэсьтӥськиз. Адями котьмалы дыше, лэся. Мон верай: талы туж ик уг паймиськы, армиын дыръям сое шӧдӥ. - Уин сменаын ужакум, - веранзэ азьланьтӥз Сергей Васильевич, - адӟылӥ, кызьы ӵукна ӟардон азьын кудӟем конвоиръёс мисьтӥськылӥзы мунчоын. Маке но ӵаш, юр-яр поттылиӟы, гор серекъяллязы. Лушкем кылзӥськыны кышкыт. Но мон тодӥсько вал: озьы соос сьӧлыкъёссэс "миськылӥзы", адямиосты ыбылэм бере. Нош ыбыны нуылӥзы Секир-гурезе тубтӥсь сюрес кузя, бадӟым охранаен, пуныосын. Уробоын - пулемётъёс. Одӥг вамыш коть паллянэ яке буре кожиськод ке, пегӟыны малпамен лыдъяськылӥз. Кин ке вутскылӥз ке тэльысь губилы яке узы-борылы мыкырскыны, сютэм кӧтсэ буйгатон понна, интыяз ик ыбыса куштылӥзы, нокыӵе алытэк, пӧйшурез сямен. Ыбемъёсты выйтылӥзы нюръёсын, тыосын. Соин ик та палась улӥсьёс али ке но татӥысь чорыгез кутылыны уг дӥсьто. Соослэсь юалляськыськыса, маке пыр-почгес тодыны ми ӧм быгатэ. Одӥг пол кыӵе ке кышномурт милемыз горшокысь йӧлэн куноятыны медэ вал. - Юэлэ, пожалуйста, али кыскемын. Мынам картэ лагерьын конвоир вал... Ми Сергей Васильевичен "тау" шуимы, но юыны пумит луим. Малпамы: та кышномуртлэсь сюлэмзэ али но пычей кадь портыса возе, шӧдске, кузпалызлэн сьӧд-кырсь ужез. Инвожолэн 7-тӥ нуналэз. Автобус каллен гинэ, ассэ вормытэк тубе Секир-гурезе. Лысо но куаро писпуос: пужымъёс, кызьпуос, палэзьпуос. Кӧня ке тыослэн чагырак пиштэмзы адӟиськиз ни. Вистэм-вожтэм татын кудымульы, ягмульы Сергей Васильевич верамъя, та удалтэм губиез- емышез бичаны уг лэзё вылэм, сӥзьыл нимысьтыз приказ ялытэк. Ӧд кылзӥськы - ӟечсэ эн витьы. Секир-гурезьлэн самой вылӥяз - 1862-тӥ арын пуктэм Вознесение черк. Шауларов архитекторлэн проектэзъя лэсьтэм маке, тямыс сэрего, куинь ярусэн, шорвадьсаз кезьыт черк, вылӥяз - барабан-колокольня, самой йылӥяз - маяклэн пияла фонарез. Гурезьлэн выжыысеныз храмлэн вылӥ точкаез дорозь - ог сю метр. Черк та дырозь ас тусыныз кылемын. Колоннаос вискытӥ азьшоры пырыса адӟиське кык метр ӝуждалае юнматэм пуӵ. Янгыше усемъёсты та пуӵ вылэ пуктылӥзы, "атасэз" сямен кӧня ке часлы. Жадьыса, уммез лыктыса усе ке, мукет сямен, курадӟытыны кутскылӥзы. Шуом, куштылӥзы гуэ комакъёслы сиыны, ыбылӥзы яке кор борды керттылыса куштылӥзы тубат вӧзысь меӵ баметӥ. Гурезь выжыын шӧйзэс сутылӥзы. Лев Николаевич Мартюхин вералляз, кызьы Саватеев бамысен со адӟылӥз Секирка выжыысь тылскемъёсты. Адямиосыз курадӟытыса, палачъёслэн кизы лычсузьылӥз. Укно янакъёс вылэ трос кылемын карандашен гожъямъёс. Соосъя Соловкиысь музейын ужасьёс шедьтӥзы быремъёслэсь трос ӵыжы-выжыоссэс. Секиркаын, лыдъямзыя, виемын трос сюр заключённойёс. Та гурезь вал кышкатон инты но. Ю. И. Чирков "А было всё так" книгаяз гожтэ, Вознесение черкын со ыбемзэс возьмаса улӥз шуыса. Олокызьы гинэ улэп кылем. Татчы сюремъёслы сюрес одӥг вал уго. Нош кыӵе чебер, паськыт усьтӥське та ӝужыт гурезь йылысен дунне, адӟиське быдэс шормуӵ: вож-вож нюлэсъёс, чагыр тыос... Татын вань "учкон интыез" но. Максим Горький но татысен учкиз, дыр, Соловки шоры... Юасько Михаил Игнатьевич Онищенколэсь, парторглэсь, кытысь луысал сьӧре сюй басьтыны. - Котькытысь но басьтэмды луоз. Та гурезь вӧсямын, - шуиз со. Сузэреным Розаен (Роза Андреевна Кувшиноваен - ред.) целлофан пуйые сюй тыриськом. Раиса Скалий кыказ тыре. Юасько, малы. Со шуэ: Тарас Шевченколэн но репрессие сюрем трос адямиослэн шайгу вылазы пазяны кулэ. Секыт, зӥбем мылкыдын люкиським Секиркаен... Дас одӥг часлы вуоно вал музейысь "Соловецкие лагеря особого назначения" выставкае. Надвратной черк азьысь площадьын - митинг. Верасько музейын ужасьёс, кивалтӥсьёс. Раиса Скалий украин дэремен, музейлэн директорезлы сётэ сылалэн бадӟым-бадӟым нянь. Лентаез вандо. Ми каллен пыриськом музее. Экспозициез интыяллям бараклы кельшись, пичигес, ӝомо-югдо интые. Быдэс борддор кузя - социализмлэсь йыгмыт вамышен азьлань мынэмзэ возьматӥсь фотоос: физкультурникъёслэн парадзы, демонстрациос, бадӟым стройкаос, заводъёс. Сталинлэн, Ягодалэн, Горькийлэн бадӟымесь туспуктэмъёссы. Отӥязгес - ӝажыос, пытсэтын пукемъёслэн тусбуйёссы. Тани со! - Куӟебай Герд. Со вӧзын - Олег Волков. Книгаоссы но таослэн артэ, одӥг стеллаж вылын. Академикъёс, профессоръёс, священнослужительёс... Нош тани воксё еж пияш. Со Сергей Щегольков. Чебер, капчи мылкыдо. Сергей Васильевич вераз, та снимокез пытсэтэ сюремезлэсь азьло гинэ лэсьтэмын вылэм. Ӵынам борддоръёсын лозунгъёс: "Железной рукой загоним человечество к счастью", "Соловки не наказывают, Соловки исправляют", "От станции Социализм до станции Коммунизм ведет состав испытанный машинист локомотива революции товарищ Сталин". Барак шорын - радэн носилкаос. Шедьтэм гожтэтъёс, кудъёсыз ноку но уз вуэ ни возьмасьёссы доры. Оломар быдӟа вить сэрего кизили, сыномемын, колокольняысь татчы вуттэмын. Кык кутонэн бычкы (пила). Тюрьма укноысь васькытэм решётка. Ваньмыз та вужеръёс кылдытэ, пеймытэ пачкатэ, зӥбе кадь... Вестибюльын - Соловкиысь тодосчилэн Юрий Бродскийлэн слайдъёсыз, туспуктэмъёсыз, пейзажъёсыз. Ӝыт, 5 час. "Буре ваён аллеяез" усьтон, митинг. Быремъёс пумысен бадӟым панихида ортчытӥз Ленинградысь отец Александр. Аллея вӧзысь урамлы сётӥзы тодмо ӟуч учёнойлэсь, философлэсь, богословлэсь Павел Александрович Флоренскийлэсь нимзэ. Вуоно памятник интые понӥзы бадӟым гранит из. Соос шобыртӥзы сяськаосын, ӝуатӥзы сюсьтылъёс. Ӝыт столовойын вал на быремъёсты буре ваён. Тодэ ваёнъёс, лулӟылонъёс. 8-тӥ июне вырӟим кошкыны. Туспуктэмъёсмес, адресъёсмес кельтӥм. Ӟеч лу, Соловки - пумйылтэм курадӟонэз, ӝуштэмез кылэм-адӟем музъем. Шур мында кисьтэм вирен, синкылиосын пыӵам музъм. Юнме шорысь курадӟытэмъёслэн лулъёссы уг сёто асьмелы та музъем вылын капчи шоканы. Со сьӧлыкъёс номырин ӵушонтэм. *** Соловкиын вал азьвыл конвоиръёслэн группазы но, 10-12 мурт. Дӥсяськемын бездэм Х.Б.формаен. Кирза сапегъёсын, галифе штанэн, гимнастёркаен. Соосын нокин ӧз вераськылы. Асьсэос но - шоро-куспо мугоро, дӥнь кадесь ай, бамъёссы но чабкымон - нимаз возиськизы. Кисьтон дыръя пукизы артысь ӝӧк сьӧрын, соос но юизы быремъёслэн "сопал дуннеын ӟеч улонзы понна". Вань тусбуенызы возьматӥзы кадь: "Эн вунэты. Ми улэпесь ай". Быдӟым оже ветлэмъёслы сямен ик, соослы сётэмын льготаос, орденъёс, медальёс. Тросэз ай лыдъяло асьсэды Родиналэн патриотэныз, малы ке шуоно, "калыклэсь тушмонъёссэ" быдтылӥзы. Шӧдӥське, та йырвандӥсьёс гожтэт пыр кусып возё на - вераськиллям конвоиръёслэн формаенызы дӥсяськыны: адӟе, пе, кыӵе ми огкылысь, тупамын... Уг малпаськы, соос Соловкие кайгырыны-ӧпкельыны лыктӥзы шуыса. Панихидаосысь соосты адӟыны ӧз луы. Ӧй вал соос Секир- гурезьын но, вуоно памятниклэн инъетэз дорын но. Юрий Чайников. * Куӟебай Герд. С.Виноградовлэн суредэз. * Ю.А.Чайников Соловкиын. * Кырыжам писпу сьӧрын - Секир-гурезь. Киясаысь иворто Дельтоплан лэсьтӥз план Кылем арын Киясово ёросысь куд-ог хозяйствоос юосты жуг-жаглэсь но нымы- кибыослэсь утизы авиацилэн юрттэмезъя. Отын, кытын "ужазы" дельтопланъёс, ю-нянь 4-5 центнерлы уногес люкаськиз. Сыӵе бусыосын жуг-жаг ӧжытгес потӥз. Ю тысез шертонлы но уногес кужым быдтэмын. "Дельтоплан лэсьтӥз план", - шуо "Киясовское" но "Яжбахтинское" эштосъёсысь агрономъёс. Пилорама вӧзы автомобиль Валля арын Киясовоысь лесничестволэн ӟеч ужамез пусъемын вал кунгож сьӧрын поттэм пичи пилорамаен. Нош ортчем арын киясаос эшшо но умойгес тыршизы. Соос Удмуртиын куинетӥ интые потӥзы. Лесничестволы кузьмамын УАЗ автомобиль. Вить сузэръёслэн ньыль орденъёссы Куке-соку "Колос" эштослэн Калашур фермаяз огдыре вить Никонова сузэръёс ужазы. Ӟеч тыршемзэс возьмато соослэн 4 орденъёссы, 3 медальёссы, ВДНХ-лэн кӧня ке свидетельствоосыз. Али Анфиса, Акулина, Татьяна, Ольга но Людмила апайёссэс воштӥзы покчиосыз Никоновъёс. Ужа удмурт класс Киясовоысь школалы тырме ини 130 ар. Та дыр ӵоже татын нырысьсэ усьтӥськиз удмурт кылэз дышетонъя класс. Со ужа нырысетӥ классын дышетскисьёслэн анай-атайёссылэн куремзыя. 150 ар руль сьӧрын Карамас-Пельгаысь Андрияновъёслэн семьяязы ваньмыз сямен водительёс луо. Ньыльдон ар ӵоже шофёр луыса тыршиз атайзы Андрей Алексеевич. Право со басьтӥз вал, уй пал Кореяын война мыныку. Водитель луизы солэн куинь пиосыз, эмеспиез. Огъя ужам дырзы соослэн 150 ар лыдъяське ини. Вуж сямъёс берытско Огвакытэ ёросын ортчыло вал информацилы сӥзем нуналъёс. Собере соосты кулэ ӧз каре ни. Улон возьматӥз, таӵе ужрадъёс борды берытскыны кулэ шуыса. Табере толэзяз одӥг пол ёросысь кивалтӥсьёс но специалистъёс потало ужась коллективъёс доры. Та ужлэсь ӧз палэнскы районысь егитъёсын ужанъя отдел но. Комсомол азьло радъя вал пӧртэм конкурсъёс, ӵошатсконъёс. Кылем арын ӵошатскон ортчытэмын егит комбайнеръёс но водительёс пӧлын. Вормисьёс пусъемын коньдон премиосын. Табере таӵе ужрад ортчытыны куро фермаос. Но кичӧлтон сётӥсь уг шедьы на. Г. Парфенов. Самара - Россилэн кыкетӥ шорсюлмыз "Удмурт дунне" газетлэн корреспондентэз Людмила Медведева кылем арня куспын вуылӥз Краснознамённой Приволжской военной округе. Солэн штабез интыяськемын Самара (Куйбышев) городын. Журналистъёс пумиськылӥзы военной округлэн командующиеныз генерал-полковникен А.И.Сергеевен но солэн воштӥсьёсыныз, вуылӥзы Сталинлэн бункераз. Россиысь печатьлэн нуналэныз валче армилэсь улон-вылонзэ возьматӥсь журналистъёс пусъемын синпель кузьымъёсын. Кыӵе со, туала армия? Кыӵе мылкыдын уло но службазэс нуо офицеръёс? Ма тужгес но шугъяськытэ соосты туннэ нуналын? Та юанъёслы валэктон шедьтыны вырим армилэн шорсюлмаз - Волга дуре интыяськем военной округлэн штабаз. И. Краснознамённой Приволжской... 1. Ортчем сюресэз Кутсконаз ик пусъём: стратегия ласянь Самаралэсь ӟечез инты штаблы ӧвӧл. Татын огинэ вуо вань сюресъёс, соос ке быризы, утёз Волга. Со пыр шедьыны луэ зарезе но музон улосвылъёсы. Юнме шорысь шат Быдӟым Отечественной война аръёсы самой та город Москва бере СССР-лэн кыкетӥ столицаез луиз но вань кышкытлыкез ас вылаз басьтӥз. Со сярысь веранмес берлолыгес кельтыса, али вакчияк тодматском туала Приволжской военной округлэн ортчем сюресэныз, уго тросэз пиосмы службазэс нуо самой татын, огаз вашкала но данэ потэм округын. Кылдӥз со 1884-тӥ арын 10-тӥ августэ царской армиын реформа ортчытон (1862- 1867) аръёсы. Соку нимаськиз Казанской военной округ шуыса, интыяськемын вал Волга но Урал котырысь 12 губерниын но областьёсын. 1918-тӥ арозь КазВО-е пыризы Казанской, Пермской, Вятской, Симбирской, Пензенской, Самарской, Саратовской, Астраханской, Оренбургской, Уфимской губерниос, Уральской но Тургатской областьёс. Округлэн вал 98 гарнизонэз, личной составез лыдъяськиз 789 сюрс. Нырысетӥ мировой война дыръя Казанской военной округ чотын тырмытэмын вал ожмаськись кужым, солдатъёсты дасян но дышетон мынӥз 79 запасной пехотной полкъёсын. 1917-тӥ арын революция вормем бере Россиысь Выли военной советлэн кивалтӥсез вуж ӟуч армилэн генштабысьтыз генерал-майор М.Д.Бонч- Бруевич кылдытэ Российской республикаез военной округъёслы люкылонъя проект. Та документъя луыны кулэ вал 6 военной округ, соос пӧлысь огез - Приволжской, штабез Казаньысь выжоз Самарае. Кутэм решениез Советской Правительство юнматэ 1918-тӥ арын 25-тӥ мартэ. Приволжской военной округез мукет интые воштэмлэсь мугзэ генерал М.Д.Бонч-Бруевич тазьы валэктӥз: "Быдӟым шур котыре пуксем калыкен но ю-нянен узыр губерниос, озьы ик Сибирь но Туркестан возьыны быгатозы егит Республикалэсь вань кунгожъёссэ". Решение кутыку, санэ басьтэмын вал чугун сюресъёс но. ПриВо интыяське валтӥсь магистральёс вылэ: Москва-Ташкент, Харьков- Челябинск-Владивосток, Симферополь-(Ростов-на-Дону)-Екатеринбург. 20- тӥ-30-тӥ аръёсы Куйбышеве (Самарае) пукто Госуправленилэсь центрзэ - котыр ласянь ӟеч ватэм, кужмо ужась телеграфной, телефонной но радиосвязь самой та узел пыр Быдӟым Отечественной война аръёсы Кремль кусып возиз Куйбышеве эвакуацие потэм правительственной учреждениосын но РККЛ-лэн Генеральной штабезлэн управлениеныз, партилэн Центральной комитетэныз. 1927-тӥ арын Самараын ик кылдытэмын вал самолётъёслы пуксьылон базаос. Граждан ож аръёсы округлэн центрез кык пол выжылӥз Казане, собере нош ик берытскылӥз Самарае, малы ке шуоно, татысен гинэ умой-умой кивалтыны луэ вал Средней Азиын ожмаськись Туркестанской округен. Приволжской военной округлэн управлениез 1920-1921-тӥ аръёсы ("Заволжский военный округ") быдэсак ас вылаз басьтӥз Турк фронтэз страналэн центреныз огазеян "выжез", со дыре ик 1932-тӥ арозь нюръяськиз басмачъёслы пумит, мыло-кыдо пыриськиз выль улон лэсьтонэ. Приволжской военной округе революцилэсь азьвыл сямен ик 1918-тӥ арысен выжизы Урал котырысь улосвылъёс. 1922-тӥ арын 20-тӥ мае, Приуральской военной округез быдтэмен валче, ПриВо борды огазеясько Вятской (Кировской) область, Уфимской губерния но Башкирской АССР. 1923-тӥ арын 24-тӥ январе - Западно-Сибирской военной округ быремен - Пермской, Екатеринбургской, Челябинской но Тюменской губерниос. Ваньмыз та регионъёс ПриВо борды юнматэмын вал 1935-тӥ арозь, Уральской военной округ кылдытозь, отчы выжизы Свердловской, Челябинской областьёс но Башкирия. Нош 1941-тӥ арын Южно-Уральской военной округлы сётэмын Чкаловской (Оренбургской) область. 1958-тӥ арын 25-тӥ январе Юж-УрВО расформировать каремын вал, таин валче Башкирия но Оренбурской область выльысь берытско Приволжской военной округе, нош 1989-тӥ арын 1-тӥ сентябре Москва косэмъя быдто Уральской военной округез. Отчы пырись 5 областьёс но кык республикаос (Удмуртия но) шедё Приволжской военной округе. Куинь ар ортчыса, 1992-тӥ арын 1-тӥ октябре Б.Н.Ельцинлэн приказэзъя нош ик кылдэ Уральской военной округ, солы берыкто Челябинской, Свердловской но Курганской областьёсты, бӧрысьгес юнмато Тюменской областез. Вашкалазэ тодэ ваёно ке, Казанской (Приволжской) военной округе пыро вал Волга кузя пуксем вань регионъёс, Казахстанэн артэ сылӥсьёсыз но. 1864-тӥ-1918-тӥ аръёсы - ПриВО-е пыртэмын Астраханской но Царицынской губерниос, Уральской но Тургайской областьёс; 1918-тӥ-1921-тӥ аръёсы - Астраханской но Царицынской губерниос, Уральской казачьей войскоослэн областьсы; 1935-тӥ арысен - Сталинградской край (Астраханской округен); 1942-тӥ-1943-тӥ аръёсы - Сталинградской область (Астраханский округтэк) ожъёс мынэмен валче. Казанской (Приволжской) военной округлэн штабез интыяськылӥз таӵе городъёсы: 1. Казань - 10.08.1864 - 20.05.1918 2. Самара - 20.05.1918 - 27.07.1918 3. Казань - 27.07.1918 - 7.09.1918 4. Н.Новгород - 7.09.1918 - 8.11.1918 5. Казань - 8.11.1918 - 2.10.1921 6. Самара (Куйбышев) - 2.10.1921 - 7.07.1941 7. Ульяновск - 7.07.1941 - 4.12.1941 8. Саратов - 4.12.1941 - 7.11.1943 9. Куйбышев (Самара) - 7.11.1943 - туннэ нуналозь. Туала вакытэ Приволжской военной округ Россилэн Вооружённой кужымъёсаз огез валтӥсез луэ. Солэн солдатъёсыз но офицеръёсыз тупаса улонэз утизы но утё Приднестровьеын, Таджикистанын, Южной Осетиын, Грузиын но Абхазиын, Босниын но Герцеговинаын, Косовоын, Анголаын, Северной Кавказын. Округлэн войскоосыз интыяськемын Башкортостанын, Марий Элын, Мордовиын, Татарстанын, Удмуртиын, Чувашиын, Кировской, Оренбургской, Пензенской, Пермской, Самарской, Саратовской но Ульяновской областьёсын - Россилэн 13 улосвылъёсаз. 2. "Чагыр каскаос" татын кыдало Соос азе пуктэмын одӥг ужпум - утёно тупаса улонэз, кысоно войналэсь тылӝузэ. Приказъя кышкатэк вамышто дуннелэн саой секыт, вирен наштаськем интыосаз, юртто шуге-леке шедем калыкъёслы. Приволжской военной округлэн солдатъёсыз берло 7 ар ӵоже вуылӥзы 5 государствое но законэн юнматымтэ 3 улосвылъёсы. "Пӧсь" точкаосын ожмаськизы 27-тӥ гвардейской мотострелковой но 201-тӥ мотострелковой дивизиос, 3 парашютно-десантной батальонъёс но округлэн авиациезлэн личной составез. Ваньмыз - 20 сюрслэсь ятыр воинъёс. "Чагыр каскаосты" нимысьтыз дышетон радъямын 27-тӥ гв.мотострелковой дивизилэн Тоцкысь полигоназ. Татын но США-ысь Канзас штатын нырысьсэ ортчизы "Миротворец-9" но "Миротворец-95" нимаськись российско-американской учениос. Отчы пыриськизы Россиысь но США-ысь сухопутной войскоосысь дивизиослэн штабъёссы но подразделениоссы. "Чагыр каскаос" дышетско ожмаськыны, киязы пыӵал кутыса, созэ яке тазэ калыкез утьыны. Жаляса верано, туэ арлэн кутсконэзлы соос пӧлысь 33 мурт быремын, 102-ез сӧсырмыны шедемын. Та сьӧд лыдпусъёс ялан йыло. Молдавия. Приднестровье. 1992-тӥ арын 21-тӥ июле кутэм международной соглашениосты быдэсъяса, 27-тӥ мотострелковой дивизия 4 ар ӵрже татысь югдурез тупатон бордын ужаз. 9 сюрслэсь ятыр офицеръёс, прапорщикъёс, солдатъёс но сержантъёс уен-нуналэн службазэс нуизы. Соосын таламын 250 пала пыӵал тирлык, утялтэмын ог 2,5 сюрс мина, снарядъёс но музон пуштытӥсь арбериос. Тужгес но трос тау карон кылъёс вуизы Бендерын, Дубоссорын улӥсьёслэсь. Умой служить каремзы понна ПриВО-ысь 435 военнослужащийцёс пусъемын парвительственной наградаосын, 111 мурт - боевой орденэн. Южной Осетия. Приволжской военной округысь воинъёс татысь калыкез утёнэ пыриськизы 1992-тӥ арын октябрь толэзьысен 1993-тӥ арын май толэзёзь. Соосын таламын ог сюрс ёрос пыӵал тӥрлык. Азязы пуктэм боевой заданиез умой быдэстэмзы понна государственной наградаен пусъемын 27 мурт, соос пӧлысь 17-ез - боевой орденэн. Абхазия. 1995-тӥ ар, май. Грузинско-абхазской конфликтэз кысонэ Тоцкысь ыстэмын 7000 боецъёс. Таджикистан. 1992-тӥ ар, сентябрь-ноябрь. Тупаса улонэз утёнъя операцие пыриське гвардейской парашютно-десантной бригадалэн личной составез. 2 оперативной отрядъёс (400 мурт) А.Чернецкий подполковник кивалтэм улсын утё Средней Азиысь валтӥсь гидроэнергетической объктэз - Нурекской ГЭС-эз. Озьы ик соослы сётэмын приказ возьманы но эвакуацилы дасяны Таджикистанысь США-лэсь посольствозэ, бадӟым промышленной предприятиосты но правительственной зданиосты. Татчы весяклы шуыса келямын 201-тӥ мотострелковой дивизия. Югославия. 1996-тӥ ар. Приволжской военной округлы косэмын юрттыны Боснилы но Герцеговиналы ООН-лэн Кышкытлыклэсь утиськонъя Советэзлэн 743 номеро резолюциезъя. ПриВО-лэн отдельной автомобильной ротаез (командирез майор В.Баранов) пусъемын Европаысь НАТО-лэн командованиеныз, нош куинез военнослужащийёс - "За выполнение миротворческой миссии" медален. "Чагыр каскаос" понна солэсь вылӥ наградаез ООН-лэн ӧвӧл ни. Та нуналъёсы Косовоын службазэ нуэ ПриВО-лэн отдельной паращютно- десантной батальонэз. 3. Армиын чечыен уг сюдо Чечыен гинэ уг, нянь понна но командующийлы трос гинэ йыбыртъяно луэ. Кызьы туала Россия сюдэ аслэсьтыз армизэ, туж яркыт адске Приволжской военной округъя. Лыдпусъёс шонересь, журналистъёс понна соосты нимысьтыз дасяз округлэн пресс-службаез. 11-тӥ январьлы сётэм информацилэн нырысетӥ чуръёсаз ик гожтэмын: "Сиён-юонэн, дӥськутэн но техникалы эстӥськонэн югдур секыт. 1999-тӥ арын Приволжской военной округлы военнослужащийёсты сюдыны висъяны кулэ вал 625,1 миллион манет. Обороная министерство та лыдпусэз кулэстӥз 523,3 миллионозь, нош округе вуиз 433,4 миллионэз, мукет сямен вераса, 69,3 процентэз". Тырмиз-а та коньдон солдатъёсты но офицеръёсты кӧттырмон сюдыны? Валамон ини, ӧз. Приволжской округез сюдыны суткаяз гинэ кулэ 1,7 миллион манет. Тӥни малы армия кураськыса ветлэ. Тау крестьян калыклы, колхозъёслэн председательёссылы, предприятиослэн директоръёссылы. Соос ПриВО-лы пунэмен висъязы ни 429,7 миллион манетлы сиён-юон. Нянь, картофка, сӥль, кеньыр но мукетыз понна дуныз берыктымтэ на. Кин тодэ, ку со вуоз колхоз кассаосы но предприятиосы. Оло, Россилэн выль кивалтӥсез армия шоры мукет сяменгес учкыны кутскоз? Самара солы оске, офицеръёс - уггес, малы ке шуоно, соослы но прапорщикъёслы государство ӧз сёты на 329,7 миллионлы сиён-юон паёксэс. Озьыен, соослэн семьяоссы тыро-пыдо уг сисько. Таӵе югдуре шедемын пиналъёс но - суворовской военной училищеосын но кадетской корпусъёсын дышетскисьёс. Ваньмыныз оградэ шедемын лётчикъёс, боевой дежурство нуись расчётъёс но сменаос. Техникалы эстӥськон сярысь ке верано, 1999-тӥ арын чакламлэн 30 процентэз гинэ вуиз. Таин валче, туж секыт югдур кылдэмын боевой подготовкаез, боевой дежурствоез радызъя нуонын, лётчикъёсты дышетонын, стратегической авиациез уже кутонын. Амалтэк туннэ нуналэз ӵошатод война кутскон арен, июнь толэзен. Соку кӧняез самолётъёсмы инме ӧз ӝутске, эстӥськонлы ёрмыса. Озьы ик пыраклы интыязы "кынмизы" танковой бригадаос, тушмонлы шуккет сётыны быгатытэк. Эстӥськонтэк техника уз вырӟы, со пичи пиналлы но тодмо. Дӥськут сярысь. Таизъя округлэн пунэмаськонъёсыз 4,2 миллион манет. 1993-тӥ арын выль формае выжон туннэ но пумаз-йылаз вуттымтэ на. Кызьы дӥся Москва странамес утисьёсты? 1997-тӥ арын Приволжской округ чакламлэсь 22 процентсэ басьтӥз, 1998-тӥ арын - 15, 1999-тӥ арын - 2-11 процентсэ. 2000-тӥ арлы военной дӥськут воксё но чакламтэ. Таин валче армиын кутоно луэ ни "113" вещевой имуществоез, сотэк солдатъёс кылёзы пыдкутчантэк но военной дӥськуттэк, огкылын вераса, гольык. Эшшо одӥг лыдпус. Кылем арын округлэн кулэяськонъёсызлы висъям коньдон вуиз 28,8 процентэз. Со но уг возьматы-а армиез юри малпаса быдтонэз? Огез егит офицер юнме шорысь ӧз, дыр, вера сюлэмез вандӥсь кылъёссэ: "Советской Армия, ӟуч армия, зэмен но, вормыны луонтэм кужмо но данлыко (легендарной) вал, сое нокин но ӧз куасалты, пыдес вылаз ӧз уськыты, сое вузазы". Уждун сярысь. Таиз ласянь кылем арлэн пумаз веоннослужащийёс мырдэм-мырдэм капчияк шокчизы: декабрь толэзь понна соослы коньдон тыризы ни Выль ар азьын ик. Но гражданской ужасьёс ноябрь понна туннэ ке но уждунзэс ӧз адӟе на. Государство ласянь ПриВО-лы тыронъёс ог 2 миллиард манетлы люкаськемын. Ку со вуоз армие, нокин уз вера. Асьмелэн солдатъёсмы, командиръёсмы ваньзэ чидалозы но чидало, угось ваньзы соос потэмын огшоры калык пӧлысь. Туала армиын кивалтӥсьёслэн пиоссы ӧвӧл. Командующиен пумиськон Таӵе шуд котькуд журналистлы уг усьы: ми, Волга но Урал котырысь 13 улосвылысь вуэм гожъяськисьёс, пукиськом Приволжьеысь военной округлэн штабаз. Интыяськемын со городлэн шораз, юрт бордын нокыӵе тодметэз ӧвӧл. Пушказ пырыса но соку ик кытчы шедемдэ уд вала. Округлэсь шорсюлэмзэ шӧдӥськод командующийлэн ужан кабинетаз гинэ. Ӝӧк вылын сылэ Кремлен меӵак герӟась телефон, со вӧзын - управлениея пульт но эшшо ке телефон аппаратъёс. Соос пыр командующий кӧня ке секунд куспын "вуэ" тужгес но ӟырдыт интыосы: Дагестанэ, Чечняе, кылзэ берло часъёс ӵоже кылдэм югдурез. Та вакытэ А.И.Сергеевлэн воштӥсьёсыз отын командировкаын. Нялтас верало на, самой та кабинетын Быдӟым Отечественной война аръёсы ужаз Михаил Иванович Калинин. Округлэн командующиез туннэ но пуке солэн ӝӧк сьӧраз, воштӥз креслозэ гинэ. Кабинетэн артэ лэсьтэм балконэз шунтӥзы, Анатолий Ипатович отчы вож сэрег кылдытӥз - пӧртэм пумо будосъёс мерттӥз. Данъяськыса милемлы возьматӥз емышен тырмытэм лимонзэ. Командировкаосы потакуз, со одно ик сьӧраз пичияк кузьым вае - коркан будӥсь сад. Кытысь, шуоды, генерал-полковниклэн сыӵе сюлэм висёнэз но сюлэм буйгатонэз, туала кылын вераса, хоббиез? Валэктонэз туж огшоры - вордскемын но будэмын Анатолий Ипатович Сергеев Сибирьысь огаз пичигес гуртын, бадӟым крестьян семьяын. Выжыязы со - огназ военной, рядовойысен кутскыса будӥз генералозь, солы оскемын Россиысь огез бадӟымез военной округ. Куинь ар ӵоже ожмаськиз Афганистанын, кык ар кивалтӥз Приднестровьеысь 14-тӥ армиен. Огъя вераса, пельпум кизилиоссэ "Арбат подразделениын", Москваысь шуныт кабинетъёсын пукыса ӧз люка, соос "ӝуатскизы", трос сюрс иськемез пыдын лёгаса, солдатъёсын артэ ожлэсь курыт ӵынзэ ӵоксузьымон веръяса, гарнизонысь горнизонэ семьяеныз ветлыса. Генералэз генералэн уд ӵошаты. Сергеевез граждан дӥсен адӟыса, ноку но уд малпа, со генерал-полковник шуыса. Шоро-куспо мугоръем, пальпотӥсь тусбуё воргорон тросгес кельше либыт сямо, ужзэ, пиналъёсты яратӥсь арлыдо дышетӥсьлы. Оло, озьы ик луыны но кулэ, малы ке шуоно, армия - егитъёс понна со туж бадӟым школа. Нош полководецез отын зэмос дышетӥсь ке, озьыен, странамылэн ӵуказе нуналэз понна шугъяськыны мугез ӧвӧл. Но асьмеос шугъяськиськом. Малы? Солэн нимыз - Чечня, Северной Кавказ. Военной татын янгыш ӧвӧл. Та "ӝукез пӧзьтыны" кутскизы политикъёс, Кремльлэн туала кузёосыз. Соосын валлин кӧняетӥ арзэ ини кисьтӥське адями вир, быдэс армимы пыриське нокинэн ялымтэ ожмаськонэ. Волга Кавказлэсь кыдёкын, озьы ке но, Приволжьеысь военной округ кемалась пӧрмиз ни фронтэн артэ сылӥсь зоналы. Штабысь офицеръёслэн вераськемзыя, мылкыдзы соослэн начар: ас калыкедлы пумит пыӵал ӝутыны секыт, быдэс нациез тушмон карен артэ пуктыны уг яра. Таиз - огласянь. Нош мукет ласянь - армимы асьмелэн сотэк но жуммемын ни дугдылытэк ортчись реформаен но личной составзэ кулэстонэн. Зэмен но, амалтэк юалод: маин Россия ожмаськыны дасяське? Ма кылиз на быдӟым Советской Армилэсь? Командующий сярысь ке верано, А.И.Сергеев секыт мылкыдзэ уг возьматы, со оске Кавказын югдур тупатскемлы, Чечняез пӧртэм пумо гыжкалъёслэсь 26-тӥ мартозь сузянлы. Кыӵе та вормонлэн дуныз луоз? Кӧня пиоссэ ыштоз Россия, кӧнязэ - Приволжьеысь военной округ - али нокин уз вера. Но генерал-полковник шуиз: - Январе-феврале гурезьёсын нап бус вӧлске. Соин ик ожмаськыны секыт луоз, уката но авиацилы. Инмысен уд тодма: кытын асьмелэнъёс, кытын боевикъёс, кин вылэ усёзы снарядъёс но бомбаос. Чечняын югдурез эскерыса возё 27-тӥ но 506-тӥ мотострелковой полкъёс: нимысьтыз медицинской отряд, авиаторъёс, тупатъян- лэсьтӥськон ужъёсты нуонъя батальон. Генерал-полковник А.И.Сергеев верамъя, боевикъёслэсь мозмытэм районъёсын соку ик кылдо комендатураос, кыкез Приволжьеысь округ киын ни. Ар йылпумъяськытозь, соос куатёзь вуозы. - Кыӵе ужпум пуктэмын комендатура азе? Нырысь ик, калыклэсь улон- вылонзэ радъян, тулыс кизёнэз ортчытон, виноград бусыосты утялтон, школаосты усьтон. Комендатураос пыр ик мыноз коньдонэн юрттон, пособиосты, пенсиосты тырон. Боевикъёс пӧлын ожмасько кунгож сьӧрысь вуэмъёс. Соин ик вань луонозэ лэсьтоно, соослэсь пыран-потан сюресъёссэс ворсан понна. Озьы гинэ герезе люкаськем бандаосты быдтыны луоз. Асьмелэн историямы таӵе югдур вал ини 1956-тӥ арын Западной Украинаын. Советской Армия отын вормиз. Кавказын но, мон малпамъя, мартлэн пумозяз ожъёс чалмыны кулэ. Чечен калык быдэс Россия Федерациен ӵош пыриськоз Президент быръёнэ. Генерал-полковник журналистъёслы вазиськиз: - Солдатъёслэн анай-атайёссы медам сюлмаське, ми ваньзэ пиосты Чечняе келяськом шуыса. Мон эшшо огпол пусйисько на: "пӧсь точкае" котькудӥз воин мыныны быгатэ ас мылкыд каремезъя ӝыны ар служить каремез бере гинэ, нокинэ но кужмысь уг ысто. Таин ӵош верало мукетсэ но: куд-ог анайёс, пизы понна мултэс сюлмаськыса, сое лушкаса сямен палэнто воинской службазэ нуонлэсь. Армиысь пегӟемъёс понна кутэмын нимысьтыз закон, со быдэсъяське. Дезертиръёслы сюрес одӥг - пытсэт улэ шедён. Командующий вераз округлэн ыштонъёсыз сярысь но. 2000-тӥ ар кутскытозь бырыны шедиз 62 мурт. Соос пӧлын Башкириысь - 4, Татарстанысь - 6, Саратов областьысь, Марий Элысь но Чувашиысь - 3, Оренбург областьысь - 13, Пермь областьысь - 5, Удмуртиысь - 4, огез ивортэк ышемын. - Мон умоен пусйысал Мордовиез, - шуиз А.И.Сергеев. - Отысь армие вуо таза, ӟеч дасям призывникъёс. Тӥни малы соос пӧлын быремъёс но ӧвӧл. Оренбург но Татарстан висъясько чылкак мукет ласянь. Верало одӥг учырез гинэ. Оренбургысь вуэм 9 боецъёс пырак передовойын тылскем дуре шутэтскыны пуксё. Боевикъёс, куинь мина лэзьыса, соосты ваньзэсты интыязы ик быдто. Асьмелэн пиосмы малы ке но туж ярато каскаен ветлыны, бронежилет нуллыны. Снайперлы со ик кулэ. Тӥни кытысь но потэ солдатъёсты ыштон. Чечня сярысь вераськонмес йылпумъяса пусъё на: татын воинской службазэс нуисьёс пӧлысь котькудӥз ньылетӥез боец - Приволжье военной округысь. Со сяна, ПриВО-лы оскемын быдэсак Средней Азия. Отысь югдур понна нимысьтыз кыл кутэ генерал-полковник А.И.Сергеев. Россилэн туала кивалтӥсьёсыз калыкез оскыто, асьме вылэ нокин но войнаен уз урдскы ни шуыса. Соин ик син шорамы качало армиез, огез бӧрсьы мукетыз быро воинской подразделениос, пумен "кека" солэн улэп кужымез. Зэм ик-а меда азьвыл кужмо но вормыны луонтэм СССР табере нокинлы кулэ ӧвӧл ни? Командующийлэн та югдурлы аслаз дунъетэз: - 27-тӥ мотострелковой дивизия улэ нырысетӥ номеро боевой готовностен приказъя. Мон уг вераськы туннэ ик кинэн ке ожмаськыны кылдоз шуыса, дуннеын югдур сокем умой ӧвӧл ке но. Россиез бугыръяны турттӥсьёс вань - тае уд ваты. Карта вылысь туннэ уд шедьты ни Югославиез, со быдтэмын, пазьгемын, шуыны луоз. Нош историез тодэ ваёно ке, асьмеос та странаен фашистъёслы пумит ожмаськонын союзникъёс вал. НАТО-лэн блокез таяз учыре вормиз, Россия палэнэ кылиз. НАТО пумен матэ но матэ вуэ асьме границаосмы пала, ум вунэтэ: азьвыл СССР-лэн узырлыкъёсыз али но куд-огзэ юн гочато на. Тӥни малы саклыкмес, йырсазьмес ыштыны уг яра. Та ласянь мынам пуъеме потэ Россия Федерациысь Кун Думалэн кыкетӥ созывезлэсь ужамзэ. Депутатъёс сюлмаськемен, соос пӧлын - 15 генералъёс, офицеръёс но прапорщикъёс кылем ар понна уждунзэс дыраз басьтӥзы. Пумиськонэз йылпумъяса, военной округлэн командующиез валэктонъёс сётӥз журналистъёслэн юанъёссылы. Кылсярысь, кыӵе дунъет со сётэ Татарстанысь президентлэн призывникъёссэс Чечняе лэзёнтэм вылысь указ кутылэмез шоры? - Та ужпумъя Шаймиевен кенешим, ӵошен пуксьыса. Вуим огъя кылэ, сётэм указэз пӧсекъяса кутэмын вал шуыса. Верало мугзэ но: Дагестанын бырыны шедизы Татарстанысь сокугес гинэ вуэм пиос. Соос басьтэмын вал огшоры службае, ожъёсы ӧз пыриське. Северо-Кавказской округе призыв мынэ законъя, музон округъёсы сямен ик. - Центральной Россиысь отчы келямъёс вань-а? - Вань. Москваысь но, Ленинградысь но призыв мынэ, нокин палэнэ уг кыльы. Сибирьысь, Уралысь, Байкал сьӧрысь округъёслэн подразделениоссы но Кавказысь югдурез тупатонэ пырисько. Ӧжытгес шедё Дальний Восток округысь: соослэн сюрессы дуно усе. - Кыӵе югдур кылдэмын Приволжье округын берло призыв бере? - Сётэм наряд быдэстэмын 100 процентлы, но 47 мурт ӧз тырмы МВД-лэн войскоосаз - берло дыре вуоно солдат азе татын пукто чурыт куронъёс. Службалэсь палэнскыны вырон уыръёс ӵемгес пумисько Саратов областьын но Татарстанын. Умой ласянь висъясько Мордовия, Марий Эл, Чувашия, Самара но Пенза областьёс, Удмуртия. Нимысьтыз пусъеме потэ Башкортостанэз. Та республикая призыв ортчытонъя арлы быдэ самой бадӟым наряд вуэ - 7 сюрс адями. Со котьку дыраз быдэсме. Тазалык ласянь ке учконо, татын но башкир пиос нырысетӥ интые пото. - Службалэсь пегасьёс кыӵе ке наказание нуо-а? - Котькудӥз вылэ ӝутӥське уголовной уж, законъя кылзэ юаськом. Армилэсь котькӧня ватскы, 27 аресозь гулбечын пукыны уд чида. Сыӵеосын выро ФСБ но МВД. Азьланяз призывен армия уз выры ни, та уж быдэсак выжоз интыосысь администрациос вылэ. - Москва - трос миллионъем город, нош пиосты армие келянъя Башкирилэсь трослы бере кыле. Кызьы валэктоды та югдурез? - Бадӟым городъёсын шер пумиталод трос пиналъем семьяез, уката но - Москваын. Нош Башкириын, музон республикаосын но, бадӟым семьяос вань гинэ. Нырысетӥ мугзэ мон тазьы валэктысал. Кыкетӥ мугез: ватонэз ӧвӧл, туала армия нош ик луиз рабоче-крестьянской. Кивалтӥсьёслэн пиоссы, огшоры бригадирлэн гинэ но, ми доры уг шедё ни. Азьвыл аръёсы ог 40 процентэз призывникъёс вуылӥзы Узбекистанысь, Киргизиысь. Али соос нимазы люкиськемын бере, отысь кужым вылэ осконэз ӧвӧл. Пусйыны кулэ, генерал-полковникен А.И.Сергеевен пумиськон пайдаё, ӟеч мылкыдын ортчиз. Анатолий Ипатович журналистъёслы сюлмысьтыз тау карон кылъёссэ вераз но дэмлаз мылкыд карисьёсызлы Чечняе командировкае мыныны. Та чуръёсты гожтыкум, телефон пыр герӟаськылӥ Приволжьеысь военной округлэн пресс-службаеныз. Отысь ивортӥзы: спецрейсэн лобись самолётын прессалы висъямын сизьым инты. Сюрес вылэ соос пото туннэ, 20-тӥ январе. Озьыен, командующий сётэм кылзэ быдэстӥз. Отчы ветлэм эшъёсмылэсь возьмалом "пӧсь" репортажъёссэс. Нош газетмылэн вуоно номераз лыдӟисьёсмес тодматом Самарае война вакытэ пуктэм одӥг туж секретной объектэн - Сталинлэн бункереныз. 48 ар ӵоже со сярысь шара вераны лэземын ӧй вал. ИИИ. Сталинлэн бункераз Туала Самара - ялан егитомись чебер город. Солэн паськыт ульчаосыз дасо иськемен кыстӥсько Волга шур валлин. Ужа метро. Городын улӥсез - 1 миллион 300 адями. Дунъёс сярысь ке верано, соос татын, Ижевскен ӵошатыса, котьмалы вылӥынгес. Уждунзы но, асьме сярысь, шӧдскымон бадӟымгес. Но улон- вылон быдэс Россиын али огкадь: одӥгъёсыз узырмо, мукетъёсыз начармо. Та ласянь пӧртэм ӧвӧл Самар но. Городын улӥсьёс уг жаляло Куйбышев нимын люкиськемзэс: Самаралы соос вордскемзы дырысен дышемын. Вашкала городлэн данэз тужгес но будӥз СССР понна самой секыт вакытэ - Быдӟым Отечественной война аръёсы. Соку Волга дуре выжизы странамылэн вань кивалтӥсьёсыз. Дасямын вал инты Иосиф Виссарионович Сталинлы но. Туннэ ке но нокин но шара уз вера: вуылӥз-а Сталин Куйбышеве яке ӧз-а? Одӥг документын но та сярысь гожъямтэ. Вань архивъёсы ӧсъёс но уго усьтымтэ на. Ма сярысь соос вералозы азьланяз, улыса-вылыса адӟом. Нош туннэ ойдолэ экскурсоводэн, отставкаысь офицерен Вячеслав Иванович Харламовен ӵош пыралом городлэн самой пыдло интыям "ватосаз" - Сталинлэн бункераз. Шор площадьын сылӥсь Культурая но искусствоя академилэн вить этажъем юртэз мукетъёсызлэсь номырин уг висъяськы. Но кӧня ке ар талэсь азьло азбар палласянь шуккем пул городэз паймытӥз. Ӝыны даур пала уго, нош шонергес ке верано, 48 ар ӵоже, та объект сярысь нокин но шара вераськыны ӧз дӥсьтылы: тодӥсез шып улӥз, тодӥсьтэмезлэн йыраз но ӧз лыктылы, музъем улын эшшо 12 этажъем "быжыз" вань на шуыса. 1941-тӥ ар, октябрь. Фашистъёс тани-тани басьтозы Москваез. Югдур туж кышкыт но секыт. 15-тӥ октябре СССР-ысь Обороная государственной комитет кутэ постановление страналэсь шорсюлэмзэ Куйбышев городэ выжтон сярысь. Та документ пусъемын нимысьтыз пусэн: "Сверхсекретно. Особой важности". Вакчи дыр куспын Москваысь эвакуировать каремын вал Советской Союзлэн ваньмыз сямен кивалтӥсьёсыз. Куйбышеве ужаны выжиз Коммунистической партилэн Центральной комитетэз, Верховной Советлэн Президиумез, НКВД-лэн Центральной аппаратэз, Совнарком, иностранной посольствоос но миссиос. Возьмазы Сталинлэсь вуэмзэ. Солэн ставкаезлы ужам инты дасямын вал туала академилэн (война дыръя культурая институтлэн) кыкетӥ этажаз. Татын ик вылӥ этажъёсаз ужаз КПСС-лэн Центральной Комитетэз. Воздушной тревога дыръя соос васькысалзы бункере. Кыӵе кужымен, ку но кызьы лэсьтэмын вал та ватскон инты? Кутскон сётэмын 1942-тӥ арын феврале. Москваысь Куйбышеве вуэ 600 муртъем нимысьтыз отряд - метро лэсьтӥсьёс пӧлысь самой умойёсыз специалистъёс но рабочийёс. Котькудӥз "витетӥ выжыозяз" эскеремын НКВД-ен. Арлыдзыя - 35-40 арес. Суткаяз быдэн 16-18 час ужазы 37 метръем музъеме пыризы лопатаен, киркаен, ломен сюез но изэз копаса. Та объектэз быдэстыны кулэ луиз 9 толэзь дыр каторга музэн, уен- нуналэн, югыт дуннез адӟылытэк, музъемез гудон. Котькудӥз кыл сётӥз вань улытозяз шып улыны, НКВД-ын быдэстэм ужзы сярысь пыраклы вунэтыны. Туннэ шара вераны луэ ни таӵе лыдпусъёсты: поттэмын 27 сюрс кубометр сюй, кисьтэмын 10 сюрс тонна бетон-монолит, букерез юнматонэ кутэмын 5 сюрс тонна корт но чугун конструкциос. Туннэ ке но тодмо ӧвӧл, кытчы поттэмын сомында сюй. Туж лушкемен, калык синлэсь ватыса лэсьтэм вылӥ секретной объект матысь ульчаосын улӥсьёслы но ассэ номырин ӧз шарая. Специалистъёс тае валэкто аслыз гинэ тупась военной технологиен. Нокин но уз вера: кӧня миллион яке миллиард манетлы усиз та бункер асьме странамы понна. Экскурсовод вера музон лыдпусэз: вождьмылэн пыдлось музъем улысь ужан интыез асьме понна нырысьсэ усьтӥськиз 1990-тӥ арын октябрь толэзе, ӵапак 48 ар ортчыса. Нырысетӥ экскурсия ортчиз 1991-тӥ арын 27-тӥ мае. Азькыл верамын. Вамыштӥськом экскурсовод сьӧры музъем улэ нуись пумтэм-йылтэм тубатъёс кузя: 12 этаж - уллане, сомында ик - выллане. Лифт вань ке но, учкисьёс-ветлӥсьёс понна со чакламтэ. Винтовой амалэн лэсьтэм тубат 6 метр пасьталаем шурф кузя вуттэ музъем вылысь 14 метръем мурдалае интыяськем технической этаже. Татын - бункерлэн сюлэмыз: электроэнергия сётонъя станция, юон ву, кислородэн тырмытэм баллонъёс, акумуляторной комплекс но мукетыз. Паллян киын - ӧс. Со сьӧрын бункерысь потон одӥг гинэ запасной сюрес. Та юртысь со вуттоз 70 метрлы палэнэ. Технической этажысь сюбег тубатъёс кузя нош ик васькиськом улляне, 20 метръем мурдалае. Татын интыяськемын ужан кабинетъёс, котькудӥз пусъемын номерен. Югыт. Омыр тырмыт. Кабинетъёс али пӧрмытэмын граждан обороная дышетон классъёслы. Борддоръёсын юнматэмын архивысь поттэм секретной документъёсын стендъёс. Соосъя тодыны луэ: ма быдӟа кышкытлык кылдӥз вал 1941-тӥ арын сӥзьыл Москва но быдэс странамы понна. Сталинэн гожтэм приказъёс, телеграммаос, постановлениос... Огезлэсь огез секыт, шимес иворъёс. 15-тӥ октябрь 1941-тӥ ар. Обороная государственной комитетлэн срочной постановлениез. 1. Иностранной посольствоосты но миссиосты Куйбышеве выжтон понна кыл кутэ Молотов. 2. Мынон-ветлон сюресъёсъя нарком Каганович кыл кутэ поездъёсты висъян понна. 3. Внутренней ужъёсъя нарком Берия кыл кутэ иностранной посолъёс но соослэн ваньбурзы понна. 1941-тӥ ар, 17-тӥ октябрь. Куйбышеве вуо нырысетӥосыз 20 посольствоос. 1942-тӥ арын таосыз борды ватсасько эшшо кыкез - дипломатической кусыпъёс тупатэм бере вуо Канадалэн но Австралилэн посолъёсыз. Ваньзы соос интыясько городлэн шор плащаденыз артэ сылӥсь юртъёсы. Верховной Советлэн Президиумез Калинин кивалтэм улсын ужа офицеръёслэн юртазы. Калинин бере ӵуказеяз нуналэ Куйбышев дасяськиз пумитаны Сталинэз... Кӧня ке вис карыса тодматскиськом вылӥ верам постановленилэн 4-тӥ пунктэныз. Ӵужектыны вуэм бумага вылысь чуръёс милемды но, война бере вордскем муртъёсты, токен шуккем кадь сюлэм пыртӥ пото. Сталинлэн приказаз гожтэмын: "Москваез тушмонлы кельтоно луиз ке, ӝегатскытэк пуштытоно эвакуация улэ шедисьтэм вань объектъёсты, озьы ик быдэсак куашкатоно электрооборудованиез но метрополитенэз, кельтоно коммуникациез но ву сётонэз гинэ. Приказэз быдэстэм понна кыл кутозы Щербаков но Берия. Обороная госкомитетлэн председателез Сталин". Тау советской калыклы, советской армилы, партилы: соосын валлин та приказ быдэсмытэк кылиз. Тушмон дугдытэмын вал Москва дорысь 16 иськемын. Нимысьтыз вералом на историмылэн эшшо одӥг нуналэз сярысь. Туала политологъёс кин кызьы быгатэм тышкасько Сталинэз 1941-тӥ арын 7-тӥ ноябре Москваын Красной площадьын военной парад ортчытэмез понна. Со борды туннэ ватсалом на эшшо кык городэз: Воронежез но Куйбышевез. Татын но Быдӟым Октябрь революцилэсь 24 ар тырмонзэ пусйизы военной парадэн. Та сярысь вера архиве кылем фотохроника. Борддоре юнматэм стендъёс усьто ортчем сюресмылэсь троссэ "тӧдьы виштыоссэ", та дырозь ватыса возем документъёсты. Соосты музейёсысь уд шедьты, нош татын, Сталинлэн бункераз - ӵапак интыез. 1941-тӥ арын 19-тӥ октябре Куйбышеве вуэ Воронежысь эвакуировать карем авиационнной завод. Вакчи дыр куспын фронтлы со сётӥз ни 2 самолёт. 1941-тӥ арын 23-тӥ декабре авиазаводлэн директорезлы И.В.Сталинлэсь вуэ лек кылъёсын пыкылӥсь телеграмма: "Вы подводите страну, выпуская в сутки 1-2 самолёта. Это насмешка над Красной Армией. Самолёты ИЛ-62 необходимы стране как воздух, как хлеб. Если 18-й завод думает отбрехаться - ошибается. Он понесёт суровую кару. Прошу не выводить из терпения Правительство, побольше выпускать самолётов. Предупреждаю последний раз. Сталин". Асьмеос тодӥськом, Главнокомандующий сётэм кылзэ пумозяз быдэсъяз. Пӧртэм амалэн. Соин ик секыт ӧвӧл, дыр, син азе пуктыны, кыӵе мылкыдзы вал со вакытэ самолёт поттӥсьёслэн. Пиналэз но, пересез но пуктэмын вал станок дуре. Завод ужаз уен-нуналэн, пичи но вис карытэк. Чидаз кортлэсь дурем станок, чидаз со сьӧрын сылӥсь адями. Ар ортчыса, 18-тӥ авиазавод суткаяз 26 самолёт поттыны кутскиз. 1943-тӥ арын заводлэн кивалтӥсезлы нош ик вуэ правительственной телеграмма. Таяз учыре Сталин вера тау карон кылъёссэ. Пусъём на: войналэн нырысетӥ толэзьёсаз ик Куйбышеве эвакуировать каремын вал Украинаысь но Белоруссиысь ог 200 предприятие, со пӧлын - 2 авиационной завод. Ужаны мобилизовать каремын матысь областьёсысь калык. Татчы, СССР-лэн кыкетӥ шорсюлмаз, улыны но ужаны выжизы тодмо творческой коллективъёс, писательёс, композиторъёс, артистъёс. 1941- тӥ арын 6-тӥ ноябре, кылсярысь, Лениградысь драмая театр, симфонической оркестр вуиз, 27-тӥ декабре Куйбышев пумитаз Дмитрий Шостаковичез. Татын, Волга дурысь городын со йылпумъя блокадае шедем Ленинградлы сӥзем сизьыметӥ симфонизэ. Нырысьсэ со чузъяськиз 1942-тӥ арын 5-тӥ мартэ татын ик, Культура дворецын (али - Операя но балетъя театр). Куйбышеве выжемын вал Москваысь Бадӟым театр но. Озьыен, пушкаос гудыръяку но муза чалмыт ӧз улы. Фашистъёс Москваез ӧз басьтэ, Куйбышев вылэ одӥг бомба но ӧз куштэ. Со понна тау карыны кулэ омырез утисьёслы. Советской Союзлэсь кыкетӥ столицазэ зол возьмазы. ПВО-лэн кужымъёсыз котырак 200 иськеме интыямын вал, отчы кыскизы 340 сюрс муртэ - артэ улосвылъёсын улӥсь калыкез. Историен герӟаськем документъёс бордысь люкиськыса, ми нош ик васькиськом бункерлэн меӵ тубатъёсыз кузя. Читыр-чутыр нуись падӟа вуттэ 34 метръем мурдалаысь кабинетъёсы. Тани со - Иосиф Виссарионович Сталинлэн музъем пыдсын ужаны дасям кабинетэз. Бетонлэсь-монолитлэсь кисьтэм 4 метр зӧкталаем борддоръёсты нокыӵе кужым но куашкатыны уз вормы, ву но уз шедьы. Пыриськом солэн ужан но шутэтскон кабинетаз. Быдӟалаез 30 квадратной метр, ӝуждалаез - 4,5 метр. Борддоръёс кыскемын чагыр басмаен, потолокез тӧдьмамын, выжез паркетэн вӧлдэмын. Кабинетлэн пыдсаз - ӝӧк но пукон, палэнынгес - диван, 6 ӧсэз. Соос пӧлысь кыкез гинэ ужало, ньылез - пӧяськон, имитация. Ваньмыз лэсьтэмын озьы, кызьы куриз Сталин. Та кабинетлы пумит коридорлэн паллян палаз интыяськемын Обороная государственной комитетлэсь заседаниоссэ ортчытъянъя зал. Таиз бадӟым: 6 метр пасьталаез, 12 метр кузьдалаез. Сталинлэн ӝӧкез борды пуктэмын кузь ӝӧк. Со сяна, бур палась сэрегын сылэ вождьлэн личной секретарезлэн Поскребышевлэн ӝӧкез, паллян палан - связья дежурной офицерлэн но Сталинлэн телохранителезлэн интыез. Борддор валлин пуктэмын на эшшо одӥг кузь ӝӧк - таиз чакламын стенографистъёслы. Соос ГКО-лэн членъёсызлы мышкин пукыны кулэ вал: медам тодэ, кивалтӥсьёс пӧлысь кин кенешонын пуке но кин ма сярысь вераське. Гожъяськисьёслы берыкъяськыны лэземын ӧй вал, котькуд янгыш понна кыл кутылӥзы война вакытлэн куронъёсызъя. Таиз но кабинет югыт, номыр мултэсэз ӧвӧл. Пырон ӧс вадьсын ик боддорын интыямын В.И.Ленинлэн, Карл Маркслэн, Фридрих Энгельслэн портретъёссы. Нош Сталин аслаз ужан кабинетаз син азяз интыяны косӥз яратоно полководецъёсызлэсь тусбуйзэс - Кутузовлэсь но Суворовлэсь портретъёссэс. Соос туннэ но исамтэ. Нош бункерын тамында ар ӵоже одӥг пол гинэ воштэмын борддор шобретэз, тӧдьмамын потолокез. Связь, югыт но шуныт сётон исатэк кельтэмын - соос пыраклы шуыса ӟеч лэсьтэмын. Урод ужамлэн бервылыз соку кӧшкемыт луысал: татчы вуылӥзы Берия, Молотов но куд-ог мукет тодмо адямиос. Верало на: бункерын сиён-юонэн складъёс, кӧлан валесъёс ӧвӧл, со чакламын вал ужаны гинэ. Самой секыт вакыт адями татысь потатэк улыны чидасал 5 сутка ӵоже. Малпамын химической атакалэсь утиськон но. Букере васькон зӧк корт ӧс автомат амалэн ужа. Газэз шӧдыса, ачиз ворсаське. Нимысьтыз устройствоос пыр насосъёс татчы шедем газэз пушказы кыско, со дыре ик ас кожазы усьтӥсько кислородэн тырмытэм баллонъёс. Ваньмыз со трос пол эскеремын, эскериське али но, граждан обороная учениос дыръя. Тӥни сыӵе со, Куйбышев городлэн пыдлось музъем пушкысь "ватосэз". Ми вуылӥм 34 метрозь, со улын эшшо куинь метр мурдалаын - насосъёс но музон технической люкетэз. Ваньмыз со, эшшо огпол вералом на, лэсьтэмын укмыс толэзь куспын 600 муртъем нимысьтыз кылдытэм отрядэн. Кыӵе чиданэз соос чидазы, кыӵе каторга пыр потӥзы - история та ласянь шып улэ. Экскурсовод верамъя, 1997-тӥ арын Куйбышеве вуылӥз на Ростов оластьысь Шахты городысь бадӟым арлыдо воргорон, букерез лэсьтӥсьёс пӧлысь огез. Куинь нунал ӵоже улытозяз, синвуосыз ӧз куасьмылэ, со нокызьы но уг оскы, та объект шараямын ни шуыса. Ужамзылы одӥг кылын дунъет сётӥз: каторга. Со борды ма меда ватсалод на? Меӵ сюрес кузя тубиськом вылӥе, ортчоно 188 тубатэз. Лифт чалмыт сылэ. Шӧдӥсько омыр тырмымтэез. Мышкамы ворсаське бункере нуись секыт корт ӧс. Потӥм культурая академилэн коридораз, отысен - Фрунзе ураме, Самаралэн валтӥсь площадяз. Людмила Медведева. Самара-Ижевск. * Сталинлэн ужан интыез но ТКО-лэсь заседаниоссэ ортчытъянъя кабинет. Вунонтэм нунал 2000-тӥ арын 17-тӥ январь республикаын улӥсьёс понна вунонтэм кылёз - та нуналэ лэсьтыны кутскозы Ижысь циркез. 17-тӥ январе 12 часын со интыын, кытын сизьымдон арлэсь кема сылӥз нырысь пулэсь, собере кирпичлэсь пуктэм цирк, понэмын луоз выль юртэз ӝутыны нырысетӥ из. Та сӥё-дано ужрадэ пыриськозы Кун Кенешлэн Тӧроез Александр Волков, Правительстволэн Тӧроез Николай Ганза, городысь но республикаысь мукет кивалтӥсьёс. Выль циркез ӝутоз Россия Федерациысь Правительстволэн Лэсьтӥськонъя 607 номеро нимысьтыз управлениез. Удмурт Республикаысь Кун Кенешлэн пресс-службаез. ЖУРНАЛИСТЪЁСЫН ПУМИСЬКОНЪЁС Выль арлы выль осконъёс Йырин-чукин берланьскем улонмы, оло, пыд йылаз султыны шӧта ни? Малы озьы шуисько-а? Удмурт Республикаысь Кун Кенеш но Правительство калык шоры очки пыр учкемысь дугдӥзы, лэся, озьыен, адямилэн сюлмаськонъёсыз но син шоры йӧтымонэсь луизы. Сыӵе малпанэ вуи Кун Кенешысь Калыкез улон-вылонын утёнъя, ужъя, тазалыкез но инкуазез утёнъя ялан ужась комиссилэн кивалтӥсез Наталья Харина журналистъёсын пумиськем бере. Солэн верамезъя, таяз арлы кутэм бюджетын калыкез улон-вылонын утёнлы шӧдскымон саклык висъямын. Басьтом нылпи пособиосты тыронэз ик. Кун Кенешын эскероно ужпумъёс пӧлын берло дыре со тужгес но секытэз вал. Мар бен возьма нылпиё семьяосты таяз арын? 1997-тӥ ар понна декабрь пумын нылпи пособие тыремын вал 23 процентэз. Та арлы чаклам пособие тыриськыны кулэ ваньмызлы нылпиё семьяослы, категориослы люкытэк. Правительство оскытэ, 1997-тӥ арлы пунэм тыронъёс ваньмыз сётэмын луозы. 1998-тӥ ар понна нырысетӥ категорие пырись семьяослы нылпи пособие декабрь пумын тыремын ни вал 69,8 процентэз. 2000-тӥ арын таизъя но тыронъёс йылпумъямын луозы. Со сяна, бюджетэ пыртэмын нырысетӥ категрорие пырись семьяослы туэ арлы нылпи пособиез толэзьлы быдэ тырон. Нош 1999-тӥ арлы пунэм тыронъёс кельтэмын 2001-тӥ арлы. Калыкез улон-вылонын утёнъя министерство но ёрос администрациос та ужпумъёсты ялан чакласа возьыны кулэ. Азьло аръёсын ӵошатыса, бюджетын тросгес коньдон висъямын тазалыкез утёнлы, калык пӧлын валэктон уж нуонлы. Нимысьтыз программа кутэмын СПИД-эн нюръяськонъя. Артысь Урал регионъёсын - Свердловскын, Челябинскын, Башкортостанын - та чер паськыт вӧлмемын ни. 80 процентэз висисьёс - наркоманъёс, 20-24 аресъем егитъёс. ВИЧ-ен но СПИД-эн нюръяськонлы, калык пӧлын валэктон уж нуонлы бюджетын 3 миллион манет висъяськоз. Тазалыксэ умоятонъя таяз арын капчигес шокчоз ужасьтэм калык - нылпиос, пенсионеръёс, инвалидъёс. Шаерамы вань улӥсьёс пӧлын соос 50 процент пала люкасько. Ужасьтэмъёслэсь тазалыксэс утёнлы кылем арын быдэн 4 манет усиз ке, туннэлы бюджетын чакламын быдэн 100 манет коньдон. Обязательной медицинской страхованиея республикалы бюджетысь висъяськоз 70 миллион манет. Вань ёросъёслы одӥг кадь луонлыкъёс сётӥськозы. Наталья Алексеевналэн верамезъя, калыклэсь тазалыксэ утёнэз юн чакласа но эскерыса возьыны кулэ шаерысьтымы вылӥ кивалтон ёзъёс, озьы ик ёрос администрациос. Таяз арын нимысьтыз саклык висъяськоз нылпиослы. Шаерамы 50 процентэз пала вордӥськем нуныос анай йӧлтэк будо. Нош анай йӧлэз воштӥсь тужгес но ӟечез сиён сылэ 72 манет пала. Соин ик аресозь нылпиослы сиён висъяны бюджетын 5 миллион манет чакламын. Нош школаын дышетскись пиналъёсты сюдыны 10 миллион манет висъямын. Нылпиослэсь гужем шутэтсконзэс радъяны но тазалыксэс юнматыны озьы ик нимысьтыз коньдон висъяськоз. Азьланьын эскероно но быдэстоно ужпумъёс пӧлын - ветеранъёслы сад- бакчаосы дунтэк ветлонэз радъян. Кызьы учкозы ни та шоры интыысь администрациос но Правительство. Кемалась вераськон мынэ нимаз-нимаз адямиослы юрттэт сётон сярысь, та ужпумез но йылаз-пумаз вуттоно. Туннэ нуналлы шаерамы секыт югдур кыдэмын ужтэк кылемъёсын. Та ужпумез но интыысьтыз вырӟытыны кулэ. Государство юрттоз шуыса, адямиос дасезлы гинэ кизэс мычыса медаз улэ. Та ласянь мар но со азьланезлы чакламын ни. Тани фермер хозяйствоослы, сад-бакча возисьёслы выт тыронъя льготаос сётӥськозы. Наталья Харина умоен пусйиз Кун Кенешлэн Тӧроезлэсь Александр Волковлэсь социальной ужпумъёслы саклык висъямзэ. Берло дыре трос потанъёс вал нылпи ваён юртъёсы, интернат юртъёсы. Со пайдатэм ӧз кыльы. Ижевскысь 7 номеро нылпи ваён юртлы дуно аппаратура висъямын. Анайлэн но нылпилэн тазалыкез туннэ нырысетӥ интыын луыны кулэ. Л.Малых. Кырӟа, Мефодьевна! Ӧвӧл, дыр, дунне вылын ас понназ кырӟасьтэм адями. Зэм, пӧламы ичигес кырӟась мылкыдзэс калык пушкы ӧръяны быгатӥсьёс. Алефтина Мефодьевна Корепанова кырӟа калык понна. Кема аръёс ӵоже ини тырше со Драмая удмурт кун театрын. Вал дыръёс - спектакльёсын шудылӥз пӧртэм рольёс, кылдытылӥз сюлэме пыӵамон образъёс. Зэм, ачиз нокыӵе вузэз ӧз йылпумъя. Нош сцена вылын ужан мылкыдыз бадӟым. Яратон но гажан вань улонзэ берыкто мукет ӧре. Секыт луоз солы, одӥг пол лёгем сюресэз куке-соку пытсаськиз ке. Ужан куспаз ик Мефодьевна ныр улаз турлы гуръёс нукыртылэ. Синмаськыны кутскиськод, театр дӥсеныз адӟыку. Соку чылкак воштӥське со: выросъёсыз но, вераськонъёсыз но, улон шоры учконъёсыз но мукет луо. "Кикы нош силе но силе" спектакле басьтӥзы солэсь "Яратэ!" кырӟанзэ (соин драма йылпумъяське). Та кырӟан калыкез огазеяськыны ӧте.Тырмоз ас поннад улыны: озьы асьмеды вормозы. Аслаз верамезъя, Мефодьевна туж яратэ вордскем музъемзэ. Зэм, кырӟасез куд-ог дыръя уг валало. Тужгес ик - нырысетӥ вамышъёссэ лэсьтыкуз, кырӟасьёслэн радазы султыкуз. Нош зол адямиез, со ас кужымезлы оске ке, нокыӵе сьӧд кужымъёс уз вормелэ. Бен, улонын пумиськыло котькыӵе шуг-секытъёс. Соин валче артистлэн мылкыдыз но пӧртэм луылэ. Нош Алефтина Мефодьевна таӵе югдурысь но шедьтэ аспӧртэмлыко чеберлыкез. Мефодьевна, тон зэмос артистка! Гажа но яраты та дано нимдэ! Зэм, ачим та адямиен кемалась ик тодмо ӧвӧл ай. Нош сюлэмы шуэ кадь: "Та чебер апаез тон, эке, далайгес тодӥськод ни..." Ваче вераськылыкумы, ми котькыӵе ужъюгдур пумысь кенешылӥськом. Ӵемысь - искусство сярысь. Кышномурт сюлэм куддыр бӧрдылэ пӧрмымтэ яратон пумысь. Таӵе мылкыд шӧдӥськылэ куд-ог кырӟанъёсаз но. Зэм верало, дыр: "Адями вордӥське огназ, инмар азьын кыл но кутэ огназ". Тодам вайылӥсько Мефодьевналэсь одӥг тунсыко верамзэ: "Уйзэ урод кӧлэме бере, ӵукна, уже лыктыса, эшъёсылы соку ик верасько: туннэ монэ эн исалэ, монэн трос эн вераськелэ: мылкыды урод", Ма, зэмос артистка Алефтина Мефодьевна. Улонын но ӵапак сыӵе со. Вылаз ик, туж лякыт. Спектакльлы кыӵе ке дӥсь курыку (театрын вылдӥсья цехлэн кивалтӥсез луэ), бырйыны одно ик кыксэ-куиньзэ сётоз. Курондэ котьку быдэстоз. Мед ӝуатскоз шаермы вадьсын эшшо одӥг туж яркыт, ноку кысӥсьтэм кизили. Мед шедьтоз улонын аслэсьтыз гинэ интызэ. Кырӟа, Мефодьевна! Иван Селюгин, Драмая удмурт кун театрысь актёр. Январь: тодмо нимъёс но нуналъёс 1. 165 ар талэсь азьвыл (1835) Сарапулын усьтӥськиз публичной библиотека (бӧрысь Н. К. Крупская нимо шор библиотека). - 65 ар талэсь азьвыл (1935) Сарапулын усьтӥськиз драмая кун театр. Художник- постановщике юнматэмын В. М. Назаренко. 1-6. - 70 ар талэсь азьвыл (1930) Ижевскын ортчиз революционной писательёслэн Всеудмуртской ассоциацизылэн И-тӥ конференциез. Солэн ужаз пыриськиз венгер писатель Матэ Залка. 2. 80 ар талэсь азьвыл (1920) ортчиз Ижевскысь партийной луисьтэм нылкышноослэн И- тӥ конференцизы. - 50 ар талэсь азьвыл (1950) РСФСР-ысь Верховной Советлэн Президиумезлэн Указэзъя Глазов город пыртэмын республиканской подчинениен городъёс пӧлы. 7. Михаил Харитонович Тутынинлэн вордскемез дырысен 90 ар тырмиз (1910-1978), скульпторлы, УАССР-ысь искусство удысысь дано ужасьлы, РСФСР-ысь художествоя фондлэн Удмурт ёзэзлэн правлениезлэн азьвыл кивалтӥсезлы. Вордскемын Воткинск городын. Тутынин тодмо луиз П. И. Чайковскийлы, В. Г. Короленколы сӥзем ужъёсызъя. 8. 70 ар талэсь азьвыл (1930) потӥз "Дась лу!" нылпи газетлэн (али "Ӟечбур!") нырысетӥ номерез. Пионеръёслэсь газетсэс кылдытон бордын ужазы удмурт интеллигенцилэн устоосыз адямиосыз - Куӟебай Герд, Кедра Митрей, Трофим Архипов (газетлэн нырысетӥ редакторез). 10. Советской Союзлэн Героезлэн Михаил Иванович Гасниковлэн вордскемез дырысен 80 ар тырмиз (1920-1990). Вордскемын Можга ёросысь Ломеслуд гуртын. Дано ним сётэмын Нарев шур (Польша) дурын батальонэныз быгатыса кивалтэмез понна. - 55 арес тырмысал (1945-1998) Юрий Васильевич Болденковлы, Удмуртиысь композиторлы. 12. Петр Николаевич Перевощиковлы 100 арес тырмысал (1900-1965), учёнойлы- лингвистлы, филология наукаосъя нырысетӥ удмурт докторлы, профессорлы, калык куспо финно-угор огазеяськонлэн (Хельсинки) членэзлы. Вордскемын Кез ёросысь Трифоново гуртын. - Советской Союзлэн Героезлы Анатолий Архипович Поповлы вордскемез дырысен 75 арес тырмысал (1925-1958). Вордскемын Юкаменск ёросысь Митрошата гуртын. Дано ним сётэмын Тисса шур дурын ожын кышкасьтэм луэмез понна. - 65 ар талэсь азьвыл (1935) усьтӥськиз УАССР-ысь Советъёслэн И-тӥ съезды, соку ик быръемын УАССР-ысь Центральной Исполнительной Комитет (1935-1938). 13. Василий Евдокимович Садовниковлэн вордскемез дырысен 85 арес тырмысал (1915- 1975), удмурт драматурглы, писательлы, журналистлы, актёрлы. Вордскемын Алнаш ёросысь Удмурт Туймыйыл гуртын. Со тодмо луэ "Тыло вӧсь" драмаезъя, "Туганай но Зара", "Пӧртмаськись туш", "Меӵ ярдурын" но мукет пьесаосызъя. - 55 ар талэсь азьвыл (1945) УАССР-ысь Совнаркомлэн но ВКП(б)-лэн Удмурт обкомезлэн бюроезлэн ӵош постановленизыя республикаысьтымы колхозникъёслэн- фронтовикъёслэн пиналъёссылы 18 колхоз нылпи юртъёс усьтон сярысь кичӧлтонзы умоен лыдъямын. 15. Василий Никитич Зоновлы вордскемез дырысен 75 арес тырмиз (1925), педагогика наукаосъя кандидатлы. Вордскемын Завьялово селоын. - 30 ар талэсь азьвыл (1970) Союзын кутскиз калыкез гожъян (перепись). Солэн йылпумъянъёсызъя Удмуртиын соку 1 миллион 418 сюрс калык улӥз, со пӧлысь 809 сюрсэз (57 %) городъёсын, 609 сюрсэз (43 %) - гуртъёсын. 16. Иван Георгиевич Гришкинлы вордскемез дырысен 65 арес тырмиз (1935), медицина наукаосъя докторлы (педиатр), Ижевскысь медициная кун академиысь профессорлы, Удмуртиысь дано врачлы. Вордскемын Алнаш ёросысь Асан гуртын. 17. Владислав Николаевич Тупченколы вордскемез дырысен 65 арес тырмиз, графиклы, Удмуртиысь Художникъёслэн огазеяськоназы ужасьлы. 18. 60 арес тырме Петр Низамиевич Шараевлы (1940), медицина наукаосъя докторлы (биохимик), Ижевскысь медициная кун академиысь профессорлы, Удмуртиысь наука удысысь дано ужасьлы. - 15 ар талэсь азьвыл (1985) СССР-ысь Калык хозяйстволэсь азинсконъёссэ возьматон выставкаын (ВДНХ) усьтӥськиз "Ижмаш" производственной огазеяськон - машинаос лэсьтонъя азьмынӥсь предприятие" адӟытон. Странаысьтымы калык хозяйствоын предприятилэн интыез сярысь верало таӵе лыдпусъёс: СССР-ын котькудӥз 7-тӥез легковой автомобиль но котькудӥз 3-тӥез мотоцикл поттэмын Удмуртиысь машина лэсьтӥсьёсын. 20. Николай Семёнович Новожиловлы вордскемез дырысен 70 арес тырме (1930), композиторлы, Удмуртиысь культура удысысь дано ужасьлы. 21. 75 ар талэсь азьвыл (1925) Дэбес ёросын кылдытэмын "Муравейник" сельхозкоммуна (бӧрысь - Ленин нимо колхоз). 24. Иван Никонорович Ситниковлы вордскемез дырысен 145 ар тырме, художниклы, ас понназ дышетскем скульпторлы. Ситников - пыӵал тӥрлык поттӥсь Иж заводэз кылдытӥсьлы А. Ф. Дерябинлы сӥзем памятниклэн авторез. 27. Алексей Сергеевич Мироновлэн вордскемез дырысен 95 ар тырме (1905-1931), удмурт прозаиклы, журналистлы. Вордскемын Балезино ёросысь Вӧёгурт гуртын. - 40 ар талэсь азьло Глазовын Чупчи вамен кортлэсь но бетонлэсь выж лэсьтыны кутскемен валче, УАССР-ысь Министръёслэн Советсы городысь соборез куашкатон сярысь ужпум кутӥз. Е. УШАКОВА. Ялон! "Ингур" радио ялэ солэн ужез сярысь тямыс гуръем кылбурлы конкурс. Устоосыз пусъемын луозы синпель кузьымъёсын но кырӟанлы пӧрмытыса чузъяськылозы "Ингур" радио пыр. Ужъёсты ыстоно 100-тӥ февралёзь таӵе адресъя: Ижевск город, Коммунаръёслэн ульчазы, 216 номеро юрт, "Ингур" радио, "Конкурсэ" яке жингыртоно 510-593, 512-512 телефонъёсъя. Вазиськом узыр муртъёслы та ужрадмес ортчытонэ пыриськыны. Юрттэт сётӥсьёслы "Ингур" радиоын "Тӥляд куремдыя" передачаын дунтэк дыр висъяськоз. "Инугр" радио. Мед ӝутскоз гожъясьлэн данэз Удмуртиысь Писательёслэн огазеяськонзылэн правлениез 11-тӥ январе туэ ар понна нырысетӥ кенешонзэ ортчытӥз. Отчы пыриськизы, правленилэн членъёсыз сяна, мукет писательёс но, кудъёсыз герӟаськемын эскероно ужпумъёсын. Нырысь ик, "Память Удмуртии" програмаез быдэсъянэ писательёсты пыриськыны ӧтьыса вераськизы кенешонэ ӧтемъёс - национальной бибилотекаын ужасьёс. Г. Г. Калинина но Е. А. Косолапова. Правительстволэн фондъёсты азинтонэ висъям коньдонэз иназ мед мыноз, шуизы соос, ми басьтӥськом писательёслэсь рукописъёссэс но мукет дуно докумнтъёссэс ас дорамы утьыны. Гонораръя фондэн кивалтэ Национальной библиотекалэн директорез Н. М. Собина. Вераськон потӥз "Писатели Удмуртии" справочникез кыкетӥзэ поттонэн ӝегатскон пумысен: кыӵе ватсэтъёс кулэ луозы на татчы - шуом, луэ-а татчы пыртыны И. Ломберский, В. Исенеков, Н. Перевалов, Л. Князев кадь писательёсты, кудъёсыз герӟаськемын асьме шаерен? Дэмламын: А. Шкляев, З. Богомолова, А. Зуева но мукетъёсыз узыр тодон-валанэнызы мед юрттозы та справочникез ӝоггес поттыны. Уваысь санаториен огкыл гожтэмын. Кык толэзьлы огпол кык мурт шутэтскон нуналъёсы татын улоз но выступлениос лэсьтоз. Нырысь ик мылкыд каремзэс веразы З. Богомолова но А. Зуева. "Удмуртия" издательстволэн складъёсаз 500 сюрс манет тыр книгаос кыллё вал. Али солэн ӝыныез гинэ кылиз на. Та сярысь ивортӥз валтӥсь редактор В. Ившин. Эскеремын та аре быдэстоно ужпумъёс. Соос пӧлын - Удмуртиын издательской уж пумысен тэкшерон (дискуссия), удмурт письменностьлы 225 ар тырмемен валче асьме литературалэсь, книгалэсь данзэ ӝутон пумысен научно-практической конференциос. Луозы удмурт писательёсмылэн юбилейёссылы сӥзем ӝытъёс, нырысез ик - 27-тӥ январе, Семен Перевощиковлэн. Писательёслэн кенешоназы озьы ик эскеремын гожъямъёсмес Ульфат Бадретдиновез, Рашит Хайдаровез, Василий Глушковез, Виктор Татариновез но Андрей Самсоновез Россиысь Писательёслэн огазеяськоназы кутон ужпум. Т. Николаева. П. Н. Перевощиков профессорлэн вордскемез дырысен - 100 ар Нырысетӥосыз пӧлысь П. Н. Перевощиков - удмуртъёс пӧлын нырысетӥез филология наукаосъя доктор, профессор. Со кутскон сётӥз но пыр-поч эскериз удмурт кылтодон удыслэн синтаксисэзлэсь трос люкетъёссэ: кыл тэчетъёсты, отглагольгой но деепричастной оборотъёсты, пӧртэм типъем кушето веранъёсты прямой но косвенной речен предложениосты. Удмурт интеллигенцилэн кыкетӥ поколениезлэн одӥгез сӥё-дано тодосчиез луыса, со трослы азинтӥз удмурт кылтодон наукаез, огъя удмурт культураез. П. Н. Перевощиков вордӥськиз 1900-тӥ арын 12-тӥ январе азьло Вятка губернилэн Глаз уездысьтыз Кез волостьысь Трифоново удмурт гуртын крестьян семьяын. Революцилэсь азьло удмуртъёслы дышетскыны луонлыкъёс ӧй вал ке но, П. Н. Перевощиков быгатӥз духовной семинариез йылпумъяны, собере дышетӥсь луыса ужаз. Кенешо власть аръёсы со нырысь дышетӥз шор ёзо школаын, бӧрысьгес - Глазов педтехникумын. 1928-тӥ арын дышетскыны пыре Ленинградысь Герцен нимо пединститутэ. Татысь филология факультетэз йылпумъяса, 1931-тӥ-1937-тӥ аръёсы со удмурт но ӟуч кылъёсъя лекциос лыдӟе Удмурт пединститутын, мединститутын, вылӥ коммунистической сельскхозяйственной школаын, Вылӥ технической курсъёсын. 1937-тӥ арысен 1965-тӥ арозь П. Н. Перевощиков вис карытэк ужаз ни Удмурт научно- исследовательской иснитутын, нырысь научной ужась вал, собере кема дыр ӵоже кылъя секторен кивалтӥз. Институтын ужакуз, со 33 пумо пӧртэм научной ужъёс гожтӥз. Сос пӧлысь витез нимысьтыз книгаосын поттэмын. Тани таӵеосыз: "Сложноподчиненные предложения" (1939), "К совершенствованию переводческой письменности" (1940), "Деепричастия и деепричастные конструкции в удмуртском языке" (1959), "Роль русского языка в развитии культуры удмуртского народа" (1963), "Словосочетания в удмуртском языке" (1980). 1930-тӥ-1940-тӥ аръёсы П. Н. Перевощиков трос ужаз ӟучысь удмурт кылэ берыктонэз умоятон но удмурт нимкылъёсты радъян бордын. Та пумысен со трос дэмланъёс но ӵектонъёс сётъяз книга-газет поттонниосын ужасьёслы. Удмурт кылын паськыт вӧлмемын пӧртэм типъем огшоры но кушето люкетъёсын веранъёс (предложениос). Соос кылтодос удысын нокинэн но умой-умой эскеремын ӧй вал на. П. Н. Перевощиков соосты тупен-тупен эскерыса висъя таӵе кушето веранъёсты: подлежащей но сказуемой, определение, дополнение но обстоятельство луись придаточной веранъёсты. Таос пӧлысь берпумез 8 пумоесь, пе, луо. Нимысьтыз эскере на пӧртэм отглагольной оборотъёсын веранъёсты но. "Шуыса, бере, дыръя герӟетъёсын пӧрмем веранъёс но соослэн функцизы" ужез вал солэн кандидат диссертациезлэн темаез. Сое гожтӥз но утиз 1946 арын. Удмурт кылтодос удысын тужгес бадӟым инты басьтэ П. Н. Перевощиковлэн "Удмурт кылын деепричастиос но деепричастной консрукциос" ужез. Таӵе вал солэн доктор диссертациез. Сое утиз 1959-тӥ арын. Отын тупен-тупен эскеремын деепричастиослэн грамматической значениоссы, соосыз пӧрмытӥсь кылӥтэтъёслэн вашкала вылтуссы. Жаляса верано луэ одӥгзэ гинэ: П. Н. Перевощиков малы ке эскерытэк палэнэн кельтэм - мен, - мысь, -мъя кылӥтэтъёсын пӧрмем каронкылъёсын (глаголъёсын) оборотъёсын. Тодосчи трос ужаз удмурт кылысь кыл тэчетъёсты эскерон бордын. Соос печатламын "Туала удмурт грамматика. Простой предложенилэн синтаксисэз" (1970) книгаын. Нош кын тэчетъёслэсь пӧртэм вераськон люкетъёсын герӟаськемзэс но соослэсь грамматика ласянь пуштроссэс возьматонлы сӥзем статьяосыз печатламын ӧй вал. Сое нимысьтыз книгаен поттӥзы ни кылтодон наукаосъя кандидатъёс В. М. Вахрушев но Р. И. Яшина, авторлэн вордскемез дырысен 80 арес тырмонэзлы сӥзьыса. П. Н. Перевощиков пыр-поч сэрттӥз-пертчиз удмурт но ӟуч калыкъёслэсь ог-огенызы кусып воземзэс, ӟуч кылысь удмуртаз пырем асэстэм кылъёсты, ӟуч кыллэн кабызъя пӧрмытэм кушето веранъёсты, тужгес ик кудӥз, кин, малы ке шуоно, ку, кытын герӟетъёсын пӧрмем кушето веранъёсты. Авторлэн малпамезъя, сыӵе веранъёслэн удмурт кылэ пыӵамзы бадӟымесь луонлыкъёс кылдытӥз паськыт но мур валан сётӥсь малпанъёсты чылкыт удмурт кылын вераны. Куддыръя уже кутӥсько, шуэ автор, ӟуч кылысь асэстэм что, чтобы, потому что герӟетъёс - тае со возьматэ, пӧртэм предложениосты уже кутыса. П. Н. Перевощиков ваньзэ тае умоен ке но лыдъя, ми малпаськом, со удмурт кыллэн азинсконэз уг луы, малы ке шуоно, сыӵе предложениос удмурт кыллэн синтаксисэзлэсь удмурт шӧмзэ сӧро, ӵошатэ: "Куасьмымтэ турынэз зуродэ тырыны уг яра, потому что зуродын со пӧсяны кутске но сисьме". Удмурт кылъя секторлэн кивалтӥсез луыса, П. Н. Перевощиков трос ужаз огъя (коллективен) научной ужъёс кылдытон удысын. Кылсярысь, солэн кивалтэм улсаз поттэмын вал "Удмурт-ӟуч" (1948), "Ӟуч-удмурт" (1956), орфографияя (1959) кыллюкамъёс, кык пол выльдыса но тупатъяса печатламын шонер гожъяськон но знакъёс пуктылон правилоос (1957, 1959), кылдытэмын, удмурт научной грамматика (1962). Отысь трос люкетъёссэ со ачиз гожтӥз, кылсярысь, прилагательноез, глаголэз, существительнойлэсь кинлэнзэ возьматӥсь категоризэ, пӧртэм типъем кыл сочетаниосты. Солэн гожтэм ужъёсыз али но асьсэлэсь научной кулэлыксэс ӧз ыштэ на. Ваньмыз сямен соос пыртэмын вылӥ дышетсконниосысь программаосы, соосты асьсэлэн ужазы куто студентъёс, дышетӥсьёс, научной ужасьёс. П. Н. Перевощиков трос пол научной докладъёс лэсьтылӥз финно-угроведъёслэн всесоюзной научной конференциосазы, кудъёсыз ортчылӥзы Ленинградын, Москваын, Тартуын, Петрозаводскын. Одӥгзэ сыӵе конференциез со ачиз дасяз но ортчытӥз Ижевскын (1952). Со сяна, Д. В. Бубрих профессорен радъям "Финно-угроведение" журналлэсь одӥгзэ номерзэ поттӥз Ижевскын (1948). Удмурт кылчиос пӧлысь со нырысьсэ ӟеч кусыпъёс тупатӥз СССР-ысь Наукаосъя Академилэн Кылтодонъя институтэзлэн финн-угор кылъёсъя сектореныз но отысь Б. А. Серебренников академиен, К. Е. Майтинская, В. И. Лыткин профессоръёсын. Тодосчилэн ужан радлыкез, ассэ возьыны быгатэмез, огъя культураез егит кылчиослы адӟем карымон вал. Уж дураз со одно ик ӵукна 8 часлы вуылӥз, 11 часысен 13 часозь нуназеялляз, собере 17 часозь кабинетысьтыз потатэк ас ужзэ лэсьтэ вал. Собере ини, институтлэн актовой залаз потыса, рояль сьӧры пуксёз но "Поръялоз, поръялоз" но мукет удмурт кырӟанъёсты кырӟалоз вал. Бадӟымесь люкаськемъёсын, ӧтчамъёсын со туж чебер но вольыт кылын вераськылӥз. П. Н. Перевощиков улонысь кошкиз, 66 аресаз мыныкуз, 1966-тӥ арын. 5-тӥ коньывуонэ Удмурт кылтодон наука понна со бадӟым ыштон вал. Итартив, Удмурт кылъя но сое дышетон методикая кафедралэн кивалтӥсез, филология наукаосъя доктор, профессор. П. Н. Перевощиков кузпалэныз медицина удысысь профессорен А. И. Перевощиковаен. Мэр ортчем арлы уг ӝожтӥськы Кылем пятницае Ижевсклэн мэрез Анатолий Салтыков журналистъёсын пресс-конференция ортчытӥз. Со толлояз гинэ Москваысь берытскиз вал но соин ик веранзэ мытӥз отчы ветлэмез бордысен. 12 январе "Президент-отеле" люкаськылӥз Россилы Президентэ кандидат ӵектонъя кичӧлтӥсь группа. Отчы пыриськизы странаысьтымы тодмо политикъёс, кивалтӥсьёс, ужбергатӥсьёс, наука но культура удысын ужасьёс, озьы ик 18 губернатор но 13 мэр. Соос Президентэ кандидатэ огкылысь ӵектӥзы В.В.Путинэз. Люкаськемъёс озьы ик бырйизы интыосын калык пӧлын кинюртэмъёсты бичанъя уполномоченнойёсты. Удмуртиын та ужен кивалтыны оскемын Кун Кенешлэн депутатэзлы Виктор Хорошавцевлы. Аслэсьтыз малпанъёссэ шарае поттыса, Анатолий Иванович шуиз: - Мон Россиын демократиез азинтон, улонэз оскымон, огсыр карон но законъёсты чаклан пумысен осконъёсме герӟасько В.Путинлэн нимыныз. Со государствоез юнматыны тырше, со дыре ик интыысь аскивалтонэз но гажа. Собере городлэн тӧроез пыр-почгес мадиз кылем арын шоркарлэн азинскемез но туэлы пусъем ужпумъёс сярысь. Йылпумъянъёс рос-прос эскеремын ӧвӧл на ке но, огъя суред шумпоттэ. Кылсярысь, городлэн бюджетэз чалкамлэсь 300 миллион манетлэсь трослы йылӥз. 60 процентлы кулэсмиз ужлы ёрмисьёслэн лыдзы. Уждунлы ватсаса 45 миллион манет висъяны удалтӥз. Шӧдскымон кулэстэмын вал дышетӥсьёслы уждунъя пунэме кылён. Кылем арын быдэстэмын но вуонояз азинтэмын луозы ваньбурез ӝикыт кутонъя но шыръянъя ужрадъёс. Таяз арын тужгес но бадӟым саклык висъяськоз городлэсь хозяйствозэ юнматонлы. Правительстволэн Тӧроеныз Н.Ганзаен вераськемын ини общественной транспортэз уртче азинтон сярысь. Со сяна, сюресъёсъя фонд 70 миллион манет висъялоз городысь сюресъёсты выльдонлы. Общественной транспорт 60 процентэз сюрес дун чотын возиськоз, 40 процентэз - город бюджет чотын. Кыкетӥез тужгес сюлэмшугъяськытӥсь удыс - калыкез улон-вылонын утён. Кызьы шуиз А.Салтыков, та удысэз миым кадь ик кельтыны тыршоно, нош куд-ог ласянь кужмоятоно но. Кылсярысь, эмъюмез дунтэк но пичиятэм дунын сётонэз, пу висъянэз. Котькыӵе юрттэт сётонэз котыр ласянь чакласа лэсьтоно, зэмзэ но ёрмисьёсызлы гинэ. Пумиськонэз йылпумъяса, шоркарлэн кузёез ивортӥз, городэн кивалтонэз пайдаёгес карон вылысь, сое выль сямен радъян ӝоген йылпумъяськоз шуыса. Со озьы ик сюлмысьтыз ӟечкылаз люкаськемъёсты Россиысь прессалэн ортчем нуналэныз. Г.Тихонов. Уг вуны Воложкаысь юрт Иж шурлэн тыметэ усён азяз меӵ ярдурын сылэ артысь коркаослэсь номырин висъяськисьтэм юрт: быдӟалаезъя но, ӝуждалаезъя но, огъя вылтусызъя но. Ульчае кык огшоры укноос учко. Азбараз пырон капкае каллен гинэ йыггеты - со ӝогак усьтӥськоз. Тонэ, киоссэ паськыт вӧлъяса, лыктэмедлы шумпотыса пумиталоз таза мугоро, шоро-куспо арлыдо, пальпотӥсь кышномурт. Кыдёке чузъяськись зӧк куараеныз одно ик юалоз: автобусэн-а лыктӥд, пароходэн-а?.. Жадид-а, ӧд-а - уз тунсыкъяськы: пыштурынэн парем чай юыны кунултыса нуоз. Трос дасо аръёс ӵоже тӥни сыӵе вал Воложка посёлокысь уноезлы тодмо дачалэн кузёез Клавдия Кузьминична Гаврилова - Драмая удмурт кун театрысь калык артистка. Мынам син азям со пыраклы кылиз "Кезьыт ошмесысь" Сьӧд Сандӥ тусо, трос мукет рольёсты ас сямызъя туж яркыт шудӥз ке но. Миым Клавдия Кузьминичналы вордскемез дырысен укмыстон арес тырмысал. Та юбилей дыръя калыкмы сое гажаса тодаз ваиз. Клавдия Кузьминичнаез ӵыжы-выжыосызлэсь но эшъёсызлэсь кызьы ке улонын, озьы ик искусство удысын но люкыны уг луы. Ог-огенызы юн герӟаськемын соос. Тани кӧнязэ ке "пертчыны" оскалто ай. ... Куатьтонэтӥ аръёсысь одӥгаз гужеме Игнатий Гавриловичлэн (Клавдия Кузьминичналэн кузпалыз вал) со ӧтемезъя, мон Воложкае вуи куткаб быдӟаесь юшъёсты кутылыны. Ульчаетӥ вамышъякум, кыдёкысен ик адӟисько: Гавриловъёслэн капказы азьын погонэн адями сылэ. Матаз вуыкум, чиньыосыныз ымзэ ӵоктаны кутскиз: эн куареты, кылзыны эн люкеты - кинъёс ке отын юн тышкасько, йыгаськемме уг кыло... Жугиськыны медаз кутскелэ вал... Мазэ-созэ валаса, эн сюлэмшугъяськы, шуи солы. Ачим, шыръёсты возьмась коӵыш сямен, капка борды зӥбтӥськи. Кылзӥсько. Чузъяське пиосмурт куара: "Мон тонэ алӥсько: калык азьын вылтӥяськон сямдэ кушты... Бригадир - мон, тон мынам кузпалы гинэ... Рядовой ужась шуиське..." Егит нылкышно куара: "Ачид, - нош бригадир, вылтӥяськиськод: туннэ - мон азьын, ӵуказе - ваньмыз азьын..." Пересь кышномурт куара: "Дорын кыкты ик сэзесь... Ужан удысъёсады сыӵеесь мед луысалды вылэм..." Вераськисьёсты тодмай: ваньзы - Гавриловъёс. Нырысез - Василий Гаврилович, Драмая удмурт кун театрысь артист; мукетыз - солэн кузпалыз, Мария Васильевна, театрысь ик артистка; куинетӥез - Клавдия Кузьминична, дачалэн хозяйкаез... Пальпотэмме адӟыса, погонъёсын адями нырысь-валысь дол-дол паймиз вал. Нош артистъёс репетиция ортчыто шуыса верамме кылыса, монэн ӵош серекъяны ӧдъяз но валэктӥз: мон, татчы алигес гинэ юнматэм участковой милиционер, кинзэ-созэ тодыны ӧй вуы на. Тодматскон вылысь монэн ӵош пырем адямилы котькинлэсь юн шумпотӥз Игнатий Гаврилович. "Кыдёкысь бригадаын" инсценировкаям, пе, мон табере милиционерлэсь рользэ пырто на. Выль куноен вераськон ӝӧк сьӧрын, самовар азьын азинскиз. Клавдия Кузьминичналэн пыштурынэн чаез, мар но со мукетыз, котьку сямен, дась вылэм ини. Нош мон, утялскем интые, Иж шур дуре чорыганы васьки. Куткаб быдӟаез шедиз ке, пӧй, Клавдия Кузьминичналы пирог пӧраны сёто. ... Вормон нунал праздник азьын Воложкае, Гавриловъёс доры, вуиз Клавдия Кузьминичналэн люконтэм эшез, ачиз кадь ик калык артистка Васса Кирилловна Виноградова - ӝужыт, веськрес мугоро, сьӧд синкаӵо, шоро-куспо арлыдо кышномурт. Кузё кышно соин артэ лапеггес, нош мугорын тазагес адӟиське. Кӧня пол мон соосты тани тазьы, артэ сылыкузы, сцена вылысен адӟылӥ. Вылтуссыя гинэ ӧвӧл, куараоссыя но юн пӧртэмесь... Нош ӵош кырӟаны кутско ке!.. Кык ошмес синъёс, одӥг ӧре вылӥысен кисьтӥськыса кадь, азвесь выллем жингырто, ваньзэ ас сьӧраз нуись тудвулы пӧрмо. Огдышемъя пумиськемзылы быдэ та дуэтысь нылкышноос сюэтӥзэ, сюрсэтӥзэ яке солэсь но трос пол ини быдэсто "Гожтэт" кырӟанзэс. "Кыдёкын-а, матын-а тон - ялан тонэ утчасько. Минутлы но часлы быдэ тонэ, мусо, малпасько..." Сюлэм пушкын шунтэм сыӵе кылъёсын гожтэт ыстэм вылэм Клавдия Кузьминичналы фронтын ожмаськись кузпалыз, Игнатий Гаврилович. Калык солэсь гожтэтсэ кырӟанлы пӧрмытэм. Вормон нунал праздник дыръя со выльысь чузъяськоз. Кемалась дырысен тодмо эшъёс, выльысь пумисько ке, ортчемзэ одно ик тодазы ваё. Бен, Клава но Васса ӵошен кырӟаны кутскизы егит дыръязы ик, войналэсь азьло. Куамынэтӥ аръёсы ини соослэн, драматической театрысь артистъёслэн, мылкыдэз бурдъясь но синкыльиез поттӥсь кырӟанъёссы, сцена вылысен гинэ ӧвӧл, радио пыр но граммофон пластинкаос вылысь чузъяськыны ӧдъязы. Ӵапак куатьтон ар талэсь азьло, 1939-тӥ арын, Васса Виноградовалэн но Клавдия Гавриловалэн дуэтсы вормисьёс пӧлы потӥз эстрадаысь кибашлыослэн Горький но Москва городъёсын ортчем Всероссийской конкурсазы. Отысен быдэс странае сюрес усьтӥськиз удмурт калыклэн "Шунды но ӝужа но...", "Паськыт, паськыт...", "Уӵы меда", "Пуксьы, туганэ..." яратоно кырӟанъёсызлы. Верам потэ на тани мае: улонын ӵем уг пумиськыло сыӵе учыръёс - драматической искусство удысысь валтӥсь артистъёс валтӥсь луо музыкальнояз но. ... Гавриловъёслэн дачаязы мон трос пол пумиськылӥ усто кырӟанъёс кылдытӥсен Николай Егорович Шкляевен. Ас валэктэмезъя, со отын чылкыт омырен но шока, йырвиымзэ но тӧлатэ, сюлэмзэ но буйгатэ. 1950-тӥ арын, Гавриловъёсын тодматскытэк, вордскысал меда солэн быгатыса гожтэм "Мон витё тонэ гинэ" нырысетӥ кырӟанэз... Игнатий Гаврилович кутскись композиторлы кылбурзэ "оскалтыны" сётӥз, нош Клавдия Кузьминична соку вордскем гурзэ "шӧмъяз". Яраз солы но, мукетъёсызлы но... Отӥяз кыкетӥзэ, куинетӥзэ, куамынэтӥзэ вамышъёсты лэсьтыны Колялы юрттӥз ини бурдъяськем мылкыд. Бурдъёс юнмало, кыдёкегес но вылэгес лобаны ӧтё... Коля Шкляев тодматске зэмос композиторен Николай Греховодовен. 1953-тӥ арын соос ӵош гожто Игнатий Гавриловлэн "Азин" пьесаезъя дасяськись спектакльлы крезьгур. Отӥяз Николай Егорович мукетъёсызлы но драматургъёслы произведениоссэс "лулъяны" юрттэ. Уг вунэты дуно йырвизь сётӥсьсэ - Игнатий Гавриловичез но. Солэн "Жингрес сӥзьыл" комедиезлы (сое юн быгатыса шудылӥз Клавдия Кузьминична) но Николай Шкляевлэн мылкыдэз лӧпкытӥсь гуръёсызлы учкисьёс али ке но кужмо кичабо. ... Маскаръяськыны яратӥсь Клавдия Кузьминична маин ке но одно ик паймытоз вал вань кунооссэ. Таяз учыре мон быдэс семьяен кунояй Гавриловъёс дорын: кузпалэным но кык нылъёсыным. Ми но мукетъёсыз лыктэмъёс пукиськом ӝӧк сьӧрын. Кухняысь кияз бадӟым пироген потэ куноятӥсьмы но валэктэ: тани Игнатий Гавриловичлэн но Леонид Никандровичлэн кутымтэ чорыгенызы пыжи табыдӟа растегай... Удалтымтэ чорыгасьёсын ӵош ваньзы серекъяло... Нылпиос понна но солэн нимысьтыз репертуарез вань. Паймымон усто "пыӵкылэ" Рина Зелёнаяез, Агния Бартолэсь но Багай Аркашлэсь пичиослы гожтэм кылбуръёссэс лыдӟыса. Со куспын ик шуэ: ивортӥсько тӥледлы: али кылэмды - репетиция гинэ. Вераськонэ мынам луоз ӵуказе Воложкаысь пионерлагерьын. Леонид Данилов, Удмурт Элькунысь дано журналист. Дан тыныд, Куӟебай! Дас ньылетӥ толшоре сю кык ар тырмиз удмурт калыклэн быдӟымлэсь быдӟым пиез - Куӟебай Герд (Кузьма Павлович Чайников) - вордӥськем дырысен. Ижысь Вадим Сивков ульча вадьсын кемалась ӧз чузъяськылэ ни, дыр, такем ӟырдыт кылъёс - дас ньылетӥ толшоре шаерысьтымы вань азьмынӥсь удмуртъёс люкаськылӥзы татчы Кузьма Павлович Чайниковез сӥланы-бурланы: азьвыл совпартшколалэн юртэз борды (али - Калык киужъёсъя корка) юнматэмын буре ваён пул. Кузьма Павлович Чайников ужаз татын 1930-тӥ-1932-тӥ аръёсы, ас пушказ быдэсак ньылӥсь тодмотэм эзель дуннее пыраклы кошконэз азьын... Ульчае огдырлы пуктэм пыдъет вылысен чузъясько адямиез гажаны ӧтись кылъёс. Вань вераськисьёс выльысь но выльысь пусъё Куӟебай Гердлэсь вылӥ адямилыко, юн визьбуро, зол ужаны быгатӥсь луэмзэ... ...Огдырлы ялӥське вис. Вань лыктэмъёс, огшап чалмыт сылыса, сюлмысь буре ваё быдӟымлэсь быдӟым удмуртэз. Вуиз тужгес дырекъятӥсь вакыт. Азьвыл совпартшколалэн юртэз, али - Калык киужъёсъя корка борды юнматэм горельеф вылысь (та ужез быдэстӥз скульптор Анатолий Аникин) шобрет паналтӥське (буре ваён пулэз усьтыны шуд усиз Кузьма Павлович Чайниковлэн вынмуртэзлы Юрий Андреевич Чайниковлы, "Удмурт кенеш" огазеяськонлэн тӧроезлы Валентин Кузьмич Тубыловлы, Куӟебай Гердэз выльысь лулъясьлы, тодмо кылчилы, кылтодон наукаосъя докторлы, профессорлы Фома Кузьмич Ермаковлы, тодмо критиклы, литературоведлы Зоя Алексеевна Богомоловалы). Люкаськем калык азьын усьтӥськеКуӟебай Гердлэн туж мусо, туж сайкыт, азьпала сэзь-сэзь учкись ымнырыз. Кыӵе йӧно тон, Куӟебай! Кыӵе ӟырдыт тон, Герд! Эх, ӧз кылды тыныд ас музъемед вылын улыны... Калык киужъёсъя корка борды юнматэм горельеф вылэ лулысь-сюлмысь гожтэмын: та юртын 1930-тӥ-1932-тӥ аръёсы ужаз Куӟебай Герд. Нош ик дырекъято та кылъёс... Нош ик чузъясько кадь сюлэммылы кемалась дуно кылъёс. Лыктэм адямиос каллен-каллен матэкто Кузьма Павлович Чайниковлэн мусо тусбуез вадьсы. Сое буре вайыса, ас понназы огшап чалмыт сыло. Нош горельеф выжые выдо но выдо бадӟым йыро льӧль герберъёс... Дан тыныд, Куӟебай!.. Удмурт калыклэсь быдӟым пизэ сӥланы-бурланы лыктэм калык люкиськыны быгатытэк сылэ сюлэмызлы тужгес дуно адями вадьсын. Нош ульчаын выльысь но выльысь пезьгыт чузъясько Куӟебай Гердлэн кужмо луыны, ӟечезлы оскыны ӧтись кылъёсыз: Ми гыриськом, кизиськом! Араны егит муртъёс лыктозы. Уз лёгалэ, аралозы, Луд тыр чумолё пуктозы... Соин ик Ми гыриськом, кизиськом! Елена Виноградова. Владимир Камашевлэн туспуктэмъёсыз. Быдӟым Вормонлы - 55 ар Гуртазы бертӥзы солдатъёс Туэ 14-тӥ январе вордскемез дырысен 85 арес тырмысал ни Иван Фёдорович Очеевлы, нош солэн гуртысьтыз ик эшез Василий Ермолаевич Гызин пусйысал 99 арес тырмонзэ. Соос вордскизы Сарапул уездысь Бураново волостьысь Улын Кечёво гуртын (али Пичи Пурга ёросэ пыре). Кыкназы ик сюлмысьтызы тыршизы вордскем музъем вылазы. Нош секытэсь ожъёс мыныку, пыӵалэн утизы атыкай музъемзэс. Вормон нуналозь ожмаськизы соос. Василий Гызинэн мон нырысьсэ пумиськылӥ Улын Кечёво гуртын 1975-тӥ арын сӥзьыл. Нош Иван Очеевен адскылӥ кылем арын май толэзе, Пичи Пургаын улӥсь Василий пиезлэн улон интыяз. Иван Фёдорович тодаз ваиз ортчем аръёссэ. Улын Кечёвоысь пияш юн эшъяськиз ас гуртысьтыз ик Василий Гызинэн. Со Семён Будённыйлэн Нырысетӥ армияз кавалерист вылэм. Иван Очеев оже пыриськиз ӟырт кезьыт 1940-тӥ аре, Финляндиен война мыныку. Нюръяськиз Маннергеймлэсь линизэ басьтон ожын. Собере эшъёс Быдӟым Отечественной войнае кошкизы. "1941-тӥ арын 7-тӥ июне монэ 45 нуналъем сборъёсы, Шольяе, басьтӥзы. Вить нунал ортчыса, лагерьмы вадьсытӥ самолёт поръяз но пакет куштӥз. Самолёт Свердловскысь вал, дыр. Собере милемыз ӝегатскытэк Сарапулэ нуизы но шунды пуксён пала келязы. Куд-огез эшъёсы улоназы берпуметӥзэ ортчизы Кечёво но Агрыз пыр. 19-тӥ июне эшелонмы вуиз Витебск доры",- тодаз вае 58 ар тылэсь азьвыл ортчем нуналъёс сярысь И. Ф. Очеев. Нюлэсъёсын но тыосын узыр шаерын соку куазь чебер сылӥз. И. В. Сталинлэн косэмезъя, Советской правительстволэн 1941-тӥ арын 14-тӥ июне вазиськонэз Германия но СССР куспын тупаса улон сярысь гожтэм огкыл быдэсъяськоз шуыса, оскон кылдытӥз. Удмуртиын кылдытэм 98-тӥ стрелковой дивизиысь боецъёс но командиръёс фашист Германиен война кутскем сярысь тодӥзы 22-тӥ июне нуназе. Ӵуказеяз соос марш-бросок лэсьтӥзы но секыт оже пыриськизы. "Гитлеровецъёс урдскизы автоматъёсын но танкъёсын, омырын сьӧд кырныжъёс кадь поръяло самолётьёс,- секытэн тодаз вае со нуналъёсты Иван Фёдорович. Гордармеецъёслэн киязы винтовкаос гинэ, воксё ӧй вал зенитной артиллеримы. Тушмон ӝиптыны кутскиз. Западной Двинаысен шунды ӝужан пала чигнано луим". Очеев котыртэме шеде но пленэ сюре. Пегӟе. Нош Василий Гызин ожмаське тодмотэм Шолья станциын кылдытэм 357-тӥ стрелковой дивизиын. Кам котырысь вуэм соединение оже нырысьсэ пыриське Ржев дорысен. Кема нюръяськоно луиз Великие Луки город понна. "Улэп на-а меда эше Иван Очеев?" - ӵемысь малпалляз Василий Гызин. Соку И. Ф. Очеевлэн гуртоосыз но ӧз тодылэ солдатлэн ож сюресэз сярысь. Нош Иван Фёдорович соку Витебск палан кивалтӥз Чкалов нимо партизан отрядэн. Белоруссиез фашистъёслэсь мозмытонын партизанъёс трос ӟечсэ лэсьтӥзы. Командирзы Очеев быгатыса кивалтӥз ожъёсын. Со котьку но котькыӵе куазен сэзь но ӟеч мылкыдо возиськиз. Ож сюресъёсыз сярысь Иван Фёдорович гожъяз аслаз "Эхо войны над рельсами" документальной книгаяз. Витьтон вить ар талэсь азьло 1944-тӥ арын 23-тӥ июне кутскиз Белоруссиез мозмытонъя одӥгез бадӟымез "Багратион" операция. Отын кышкасьтэм луэмзэс возьматӥзы Удмурт шаерын кылдэм 357-тӥ дивизиысь воинъёс но. Соос пӧлын ожмаськиз Василий Гызин. Ӝоген мозмытэмын вал вашкала Полоцк город. Вераны кулэ: ӵапак Полоцк уездын вордскиз дано начдив Владимир Азин. Полоцк дорысь Обель посёлок понна ожмаськонын старшой лейтенант И. Ф. Очеев сӧсырмыны шеде. Августэ со вордскем палъёсаз бертэ. Нош 1945-тӥ арын толалтэ офицерез Очеевез выльысь армие басьто. Солдат сюресъёс И. Ф. Очеевез но В. Е. Гызинэз вуттӥзы Советской Союзлэн Маршалэзлэн Г. К. Жуковлэн кивалтоно 1-тӥ Белорусской фронтаз. Тодмо полководецлэн войскоосыз, тушмонэз пазяса, азьлань мынӥзы фашистской рейхлэн пузкараз - Берлинэ. "Мон кынмылӥ нюлэсъёсын но нюръёсын, ыштылӥ эшъёсме, Атыкай музъеме понна вирме кисьтӥ, но каргам тушмонэз вормонлы осконме ноку ӧй ыштылы. "Берлин" но "Вормон" кылъёслэн пуштроссы мыным одӥг кадесь вал",- мур малпаськыса вераз Горд Знамя но Отечественной война орденъёслэн кавалерзы Иван Фёдорович. Куашкатэм Берлинэ пырон азьын гвардеец Иван Очеев нош ик сӧсырме. Германиез вормем сярысь иворез со тодӥз ини госпитальысен. Василий Гызин но Иван Очеев гуртазы вуизы орденъёсын но медальёсын. Бертӥзы, Вормон вайыса. Василий Ермолаевич пул пились луыса ужаз, Иван Фёдорович локомотивлэн машинистэз вал. Кыкназы но кибашлы адямиос. "Мынам атае кулӥз 1977-тӥ арын, но усто плотниклэсь Василий Ермолаевичлэсь ӟеч ужъёссэ уг вунэто", - вера пиез Василий. Ма карод, улон - со улон. Аръёс ортчо. Арлыдъёс но асьсэлэсь ужзэс лэсьто. Пумен ӧжытгес но ӧжытгес кылё ожысь но ужысь ветеранъёсмы. Озьы ке но, Родинамес утисьёслэн нимтулъёссы весяклы вунонтэм кылёзы книгаосын, памятникъёсын но обелискъёсын. Виктор ПОЗДЕЕВ, отставкаысь капитан. Туспуктэм вылын: И. Ф. ОЧЕЕВ. Ӧсъёссэ усьтӥз гимназия Та нуналъёсы Красногорск черкогуртын бадӟым но шумпотымон ужрад ортчиз. Туэ 14-тӥ январе, ӧсъёссэ усьтӥз чебер, ӵыжак выль усто школа-гимназия. Отын 704 пуксён интыез. Таӵе ӟеч выль юрт пуктӥзы Глазовысь "Чепца" акционер огазеяськонысь лэсьтӥськисьёс. Нош заказчикез но коньдон висъясез вал Удмурт Правительствоысь Капитальной лэсьтӥськонъя управление. Школа-гимназиез усьтонэ ветлӥзы Правительстволэн Тӧроез Николай Ганза, калыкез дышетонъя министрлэн воштӥсез Галина Васильева но музон кивалтӥсьёс. Та ужрадэ озьы ик пыриськизы АО-ысь лэсьтӥськисьёс. Люкаськемъёс выль школаен пыр-поч тодматскизы, ӟучлыкез умоен лыдъямын. Районысь но черкуогуртысь улӥсьёслы, дышетӥсьёслы но дышетскисьёслы туэ понна со бадӟым кузьым луиз. Устоосыз пӧлысь устоосыз лэсьтӥськкисьёс Почёт грамотаосын пусъемын. Г. Романов. ШАХМАТ Огазеяз гуртоосты Кылем арын ноябрь толэзе республикаямы кылдытэмын гуртъёсысь шахматэн шудӥсьёслэн огазеяськонзы (федерацизы). сыӵе огазеяськон дас вить ар талэсь азьло вал ини, но кыӵе ке мугъёсын со быриз. Малы выльысь кылдытэмын та огазеяськон? Та юанлы валэктон сётӥз солэн али кивалтӥсез Виктор Михайлович Кельмурзин: - Гуртын улӥсьёс, мӧйыез но, покчиез но, туж тунсыкъясько шахматэн. Трос интыосын ужало кружокъёс. Егитъёс отчы шумпотыса ветло. Но отын басьтэм тодон-валанъёссэс азинтыны соослэн луонлыкъёссы ӧвӧл, нокинэн кужымзэс мертаны. Уго республикаын ортчись ӵошатсконъёсы гуртоос шер гинэ вуыло. Олокыӵе но мугъёс шедьтыса, соосты палэнто бадӟым шудонъёслэсь. Тани, кылсярысь, спортъя кун комитет арлы быдэ ортчытъя элькунамы шахматэн шудонъя нырысетӥ интые потон понна ӵошатсконъёс. Ортчизы соос миым но. Гуртъёсысь спортсменъёс отчы нош ик ӧз шеде. Нош гуртоос пӧлын ӧжыт ӧвӧл адӟем карымон, кужмо шахматистъёс, одно ик соос пӧлын вормисьёс луысалзы. Маин ке пӧртэмесь шат гуртысь егитъёс городын улӥсьёсызлэсь? Соослы луонлыкъёс гинэ кылдытоно асьсэды возьматыны. Тӥни сыӵе муген ик выльысь "улӟытэмын" гуртъёсысь шахматэз яратӥсьёслэн огазеяськонзы. Со юрттоз гуртоослы бадӟым спортэ сюрес лёгыны. Выль кылдытэм огазеяськон нырысь нуналъёсысен ик мылысь-кыдысь басьтӥськиз уж борды. Бырйизы кенеш, кылдытӥзы воргоронъёслэсь, нылкышноослэсь но егитъёслэсь комиссиоссэс. Соосын кивалтыны оскемын Завьял ёросысь Пирогово гуртысь шахматъя тренерлы Геннадий Казанцевлы, та ёросысь ик Первомайский Посёлокысь Любовь Созоновалы но Воткинск ёросысь Июльское черкогуртысь Алексей Воротовлы. Ӵош кенешыса тыршеменызы уноез ёросъёсын ужало ини шахматэн шудонъя кружокъёс, ортчыло ӵошатсконъёс, люкамын нылкышноослэн, егит пиослэн но нылъёслэн командаоссы. Табере соос дась Россиын ортчись пӧртэм ӵошатсконъёсы пыриськыны. Вакчи дыр куспын радъяны быгатӥзы бадӟым ӵошатсконъёсты. Дышетскись пиналъёс пӧлын республикаын нырысь инты понна ӵошатсконъёсы гуртъёсысь гинэ куатьтонлэсь ятыр пиналъёс пыриськизы. Нош 3- тӥ-7-тӥ январе Завьял ёросысь Первомайский посёлокын ортчизы шахматэн шудонъя "Тод каникулъёс - ӟечбур ЪЪИ даур!" ӵошатсконъёс. Отын кужымзэс мертазы Игра, Ува, Завьял, Глазов, Шаркан, р, Воткинск но Якшур-Бодья ёросъ1сысь шахматэн шудӥсьёс. Нырысетӥ разрядэн спортсменъёс пӧлын вормиз Ува ёросысь Гачик Вувуникян, кыкетӥ разрядъя ӵошатсконъёсын - Шаркан ёросысь Кыква шор ёзо школаысь Юрий Знаев, куинетӥ разрядъя ӵошатсконъёсын - Первомайский посёлокысь шор ёзо школаысь Денис Кутлин, ньылетӥ разрядэн спортсменъёс пӧлын - Воткиснк ёросысь Июльское шор ёзо школаысь Александр Киселев. Нылкышноос пӧлын котькинлэсь усто шудӥзы шахматъя тренер Любовь Созонова (Завьял ёрос), физикалы но математикалы дышетӥсь Лия Вершинина (Яр ёрос) но шахматэн шудонъя тренер Евгения Меньшикова (Шаркан ёрос). Нош пенсионеръёс пӧлын кужмоосыз луизы Перовмайский посёлокысь А. Д. Конев но И. В. Зверев. Вормисьёслы кузьмазы "зарни" медальёс, дипломъёс, грамотаос, синпель кузьымъёс. Вуоно ӵошатсконъёс ортчозы "Тӧдьы ладья" приз понна 28-тӥ-30-тӥ январе Ижевскын. Отын кужымзэс мерталозы вань ёросъёсысь вормисе потэмъёс. Е. НИКОЛАЕВА. Егитъёс - азьмынӥсьёс Алнаш ёросысь администрацилэн егитъёсын ужанъя отделэз куинетӥ арзэ ни аспӧртэмлыко ужрад радъя. Пӧртэм удысын тыршись азьмынӥсьёслэсь туспуктэмзэс интыяло Данъян пул вылэ. Ортчем арын отчы пыртэмын Алнаш общепитысь кондитер Галина Мусихина, "Большевик" колхозысь егитъёсын ужанъя специалист, председательлэн воштӥсез Вячеслав Плотников, "Колос" колхозысь азьмынӥсь комбайнер Михаил Чирков, Удмурт Туймыйыл школаысь 10- тӥ классын дышетскись Нина Антонова, "Молодая гвардия" колхозысь парсь сюдӥсь Елена Орлова но капчи атлетикая ёрослэн чемпионэз, Алнаш шор ёзо школа-колледжын дышетскись Сергей Кедров. Б. Сергеев. Йӧ вылэ султонэн Паймымон ик возиське туэ январь толэзед. Куд-ог нуналъёсы куазь 0 градус котырын улӥз. Умой-умой куртчылӥськись кезьытъёс ӧй вал на. Синоптикъёслэн верамзыя, толшоре лымы нормаен чаклам пала усиз. Омырлэн температураез но нормалы тупа. Мар бен, ӝыныез тол ортчиз ни. Туннэ нуналлы нуналлэн кузьдалаез 36 минутлы йылӥз. Февраль кутскытозяз со будоз 49 минутлы. Нош ӵуказе асьмеос пусъём йӧ вылэ султонэз. Ӟучъёс сое Керещение шуыса. Со нуналэ куазь кӧс но кезьыт возиськиз ке, гужем кӧс луоз, нош пилемо но лымы усиз ке, ю-нянь удалтоз. Нуназе котырын пилемъёс лыз ке, озьы ик юос удалтозы. Б. Никитин. Россиысь дано суредась луоз 12-тӥ январе Москваын Суредасьлэн юртаз усьтӥськиз Удмурт шаерын вордӥськем но будэм усточилэн Григорий Чайниковлэн ужъёсыныз адӟытон. Татчы ваемын аспал эшмылэн тужгес ӟеч ужъёсыз - соос возьмато суредасьлэсь ас удысаз дас ар ӵоже тыршемзэ. Григорий Чайниковлэсь вылӥ быгатонлыксэ дунъясьёс, Москваысь валтӥсь художникъёс, суредасьлэн аспал эшъёсыз, тодмоосыз пусйизы усточилэн ужъёсызлэсь аспӧртэмлыко, зэмлыко луэмзэс, синмаськизы удмурт инкуазьлы. Григорий Чайниковлэсь устолыксэ вылӥ дунъязы дышетӥсьёсыз но - академикъёс агай- вынъёс Сергей но Алексей Ткачёвъёс. Россиысь Суредасьёслэн огазеяськонзылэн тӧроез Ю. М. Сидоров адӟытонэ люкаськем калыклы ивортӥз Григорий Чайниковлы "Россиысь дано суредась" вылӥ ним сётон сярысь сюлмаськемез. Удмурт шаерын вордӥськем но будэм адямиез озьы ик сюлмысьтыз ӟечкылаз Удмурт Элькунысь Кун Кенешлэн Тӧроез Александр Волков. Пусйымон соиз: выль ужъёссэ Григорий Чайников сӥзиз аслаз песянаезлы - огшоры удмурт кышномуртлы. В. Стерхов. НАТАЛЬ ОЛО ОСКОД, ОЛО УД Каргаськон Лобӟыса ортчем дас укмыс тол-гужемъёс Анатолиез юн сэстӥллям. Восьмем, ымныраз лыдтэм кисыриос, вожпыръем синъёсыз - мӧзмылэс. Пуксёнэн артэ шутэтске "куинетӥ пыдыз" - сусыпулэсь лэсьтэм пыкъяськон боды. - Ижкарысь экстрасенс доры ветлӥ ай, - ивортӥз со. - Дугдытэк висисько. Кӧня бергай ни больницаостӥ, пересьёсын ӵектэм кыӵе гинэ турын-куарез ӧй юылы. Пайдаез уг шӧдӥськы. Нош висён черъёсы - сяська керттэт кадь, быдэс тугоко. Ваньмыз анаелэн каргиськеменыз сэрен, - секытак лулскиз эше. - Э-э, малы-о мадёнэз на? Ачид тодӥськод. Анатолий кузпалзэ яратыса, лул-сюлмысь гажаса басьтӥз вал. Пиезлэн та вамышез ӧз кельшы анаезлы гинэ. Мугзэ гуртоосыз ӟеч тодо вал. Егит дыръяз нылкышнолэн ӟырдыт "романэз" вылэм выль кенэзлэн атаеныз. Кудо-туклячи кариськемез потымтэен ик, вылды, кензэ но кунэрес пумитаз. Улыны кутскемзы бере ни, мугтэк шорысь но керетон ӝутылӥз. Таӵе сантэманэз ӧз чидалэ егитъёс, мукет квартирае улыны выжизы. Огпол Анатолийлы анаез лекак вераз: - Улонын шудо уд луы, каргай мон тонэ кылзӥськымтэед понна. Нош анайлэн каргемез музэ уз усьы, одно ик, сьӧд адӟонлы берытскыса, пыд азяд лэзиськоз. Таӵе ивортон бере ик егит воргоронлэн улон-вылонэз йырчукинскыса кошкиз. Юртъеразы тылпу ӝутскыса, вылазы дӥськутэн гинэ кылизы. Ярам ай, со аръёсы улон интыен шуг-секыт ӧй вал, выль юртэ улыны выжизы. Нош адӟон сьӧразы ик калъяськиз, лэся. Вуоно араз вуэ выйыса быриз кык аресъем пизы. Анатолий ачиз но висьыны кутскиз, бератаз солы кыкетӥ группа сётӥзы. Кемалась ӧвӧл, кузпалэзлэсь бур пал мугорзэ пери шуккиз. Азьвыл черкын ужасьёс гинэ вералозы вал: "каргам адямиез азьпал вите кышкыт черъёс, визьдэ ыштонъёс, астэ ачид быдтонъёс. Соослы инмарлэсь ӟечсэ курыса вӧсяськыны, черкын ӧпкельыны кулэ. Сотэк соослэн выжызы ик ӵушемын луоз югыт дунне вылысь. Та кылъёс борды берло аръёсы итӥськизы тодосчиос-учёнойёс но. Трос пол кылэме вань, мӧйыос покчиослэн шаянтэмзы понна шуо: "Ой, йырыд быдтымон! Йырдэ коӵо-куака мед кесясал". Но мукет та выллем веранъёс. Соку тодэ но уг усьы каргаськон сярысь. Малы-о курданэз огшоры кылъёслэсь? Тӧлъя-буръя кошкозы ай, кыл со мина ӧвӧл, уз пушты. Улон возьматэмъя, кыл но "пуштэ" вылэм. Солэн адскисьтэм кужымез, адямилэсь лул-вирсэрзэ, визьзэ туга, азьпалан улонлы выжызэ кельтонлы сюрес пытса. Таӵе югдурез эскеризы Россиысь Наукаосъя академиын ужасьёс (та сярысь рос-прос гожъямы вал 1996 арын "Семья" еженедельникын). Учёнойёс лэсьтӥзы аппарат, кудӥз адями кылэз берыктылӥз ивор сётыны быгатылӥсь электромагнитной тулкымъёслы. Эскерон ужъёс ортчытэмын вал будосъёсын. Тодосчиос юри тышкаськылӥзы выжыяськыны, ӝутскыны кутскем будосъёсты. Сыӵе "каргамъёс" ваньзы но пашмылӥзы, висьыны ӧдъяллязы. Урод кыл сослэсь улонзэс куспетӥ карылӥз. Мон, оло, газет пыр гожтыны но ӧй дӥсьтысал студент дырысь та эше сярысь. Но монэ курдатэ, таӵе "каргам" семьяослэн лыдзы уг-а буды али бугырес улон аръёсы? Пӧртэм пумо печатласькись газет-журналъёс ичи уг гожъяло семья кусыпъёслэн тӥяськемзы, пазяськемзы сярысь. Азьвыл вӧсь возись, инмарез буре ваись пересь анай-атайёсмы дыръя таӵе югдуръёс трослы ичи вылӥллям. Н. ТУРИН. Лыдӟись вера малпанзэ Иворъёсты сӥсъятэк уд вала Россиысь прессалэн ортчем нуналэныз валче куд-ог малпанъёсме вераме потэ иворъёсты вӧлмытӥсь ёзъёслэн ужамзы сярысь. Мон сямен, телевидение но газетъёс дуннеысь иворъёсты калыклы мыдланьтыса вутто, узыр кузёослы но бадӟым политикъёслы гинэ соосты кельшытыны сюлмасько. Тани Л. Рохлин генералэз вием пумысен но тыро-пыдо валэктонъёс сётэмын ӧй вал, ялан одӥг пумо гинэ ивортылӥзы: сое, пе, кышноез вииз. Нош озьы-а меда со? Лев Рохлин кышкатэк курлалляз Россилэсь Президентсэ, возьытсэс ыштэм чиновникъёсты но генералъёсты. 1998-тӥ арын аслаз подъездаз виемын вал Кун Думалэн депутатэз Г. Старовойтова. Журналистъёсты кӧяса-вӧяса, демократъёс йыружез коммунистъёс вылэ погыльтыны выризы. Зэмлык калыклэсь нош ик ватэмын вал. Демократъёс ялан ушъясько калыклы но журналистъёслы шара мылкыдзэс вераны эрик сётэмзы пумысен. Зэм, Россия Федерацилэн берло Конституцияз со сярысь гожтэмын. Но кинъёс понна меда со эрик ялэмын? Шонерзэ верано ке, зэмзэ ик, мукет сямен малпаськисьёсты туэ пытсэт сьӧры уг ни пукто, цензура но ӧвӧл ни шуо. Но зэмлыкез калыклы вуттонтэм вылысь, туала вакытэ трос мукет амалъёс малпамын ни. Капиталистъёслэн кунъёсазы сямен ик Россиысь пресса но выль узыръёслэн Гусинскийлэн, Березовскийлэн, Черномырдинлэн, Потанинлэн но мукет буржуйёслэн киулазы сюремын. Нош соослы пумит луись партиослэн но адямиослэн прессаез ас палазы кыскыны коньдонзы ӧвӧл. Кун газетъёс но телеканалъёс сярысь ке верано, туннэ соос меӵак быдэсъяло демократъёслэсь куронъёссэс. Огвакыт вал таӵе программаос: "Горд квадрат", "Выль студия", "Ваче син" ("Один на один"). Но соослэсь ужамзэс дугдытӥзы. Кышказы, лэся, калыклы шонер иворъёс вуозы шуыса. Озьыен, вераны луоз шат, Россиысь прессалы быдэсак эрик сётэмын шуыса? Озьы ик юри палдурес возьматӥське Беларусь Республикаысь югдур. Экран пыр ӵем гинэ возьматыло отысь кузь черодъёсты, урамъёсын жугиськонъёсты. Озьы Россиын улӥсьёслы вераны туртто: учке ай кыӵе урод уло белорусъёс. Огшоры калык оске но, вылды. Нош та учыръёс сярысь мургес малпаськоно ке, югдурез воксё мукет сямен валэктыны луэ. Беларусьын уждун дыраз тыро, дунъёс уг будо, соин ик дунтэм сиён-юон но мукет вузъёс басьтыны черодъёс но луыло. Нош кыӵе черодъёс али луыны быгатозы Россиын!? Калык коньдонтэк улэ, магазинъёсысь дуно вузъёсты кызьы басьтод. Мынам малпамея, Россиын улӥсьёслы кемалась дышетскыны кулэ ни зэмлыкез гожтэм чуръёс вискысь яке сӥсъям иворъёс пӧлысь утчаны. С. Воронцов. Алнаш ёрос, Асан совхоз-техникум. Иворъёсты вӧлмытон ёзъёслэн кивалтӥсьёссылы Удмурт Республикаысь Быръёнъя комиссия валэктэ, "Россия Федерацилы Президент быръён сярысь" Федеральной законлэн 48-тӥ ёзэтысьтыз 4-тӥ люкетсэ лыдэ басьтыса, улосъёсысь но интыысь иворъёс вӧлмытон ёзъёс, кудъёсыз мылкыд каризы Россилы Президент быръёнъя валэктон уж нуыны, Удмурт Республикаысь Быръёнъя комиссилы 2000- тӥ арын 29 январёзь ивортыны кулэ пусъем кандидатъёслы эфирын но печатьын инты сётыны дась луэмзы но со понна дунъёслэн быдӟалазы сярысь. Иворъёс вӧлмытӥсь ёзъёс, кудъёсыз та куронэз ӧз быдэстэ, "Россия Федерацилы Президент быръён сярысь" Федеральной законлэн 48-тӥ ёзэтысьтыз 7-тӥ люкетэз вылэ чӧлскыса уг быгато быръёнъёсъя валэктон уж нуонэ пыриськыны. *** Удмурт Республикаысь Быръёнъя комиссия "Россия Федерацилы Президент быръён сярысь" Федеральной законлэн 47-тӥ ёзэтысьтыз 4-тӥ люкетэз вылэ чӧлскыса, печатла иворъёсты вӧлмытон ёзъёслэсь списоксэс: 1. "Удмуртия" кун телерадиокомпания 2. "Удмуртская правда" газет 3. "Удмурт дунне" газет 4. "Известия Удмуртской Республики" газет 5. "Янарыш" газет 6. "Иднакар" газет 7. "Воткинские вести" газет, Воткинск город 8. "Алнашский колхозник" газет, Алнаш село 9. "Вперед" газет, Балезино посёлок 10. "Авангард" газет, Вавож село 11. "Сельская новь" газет, Грах село 12. "Новый путь" газет, Дэбес село 13. "Пригородные вести" газет, Завьял село 14. "Светлый путь" газет, Игра посёлок 15. "Камская новь" Камбарка город 16. "Звезда" газет, Кез посёлок 17. "Новая жизнь" газет, Кизнер посёлок 18. "Знамя труда" газет, Киясово село 19. "Победа" газет, Красногорье село 20. "Маяк" газет, Пичи Пурга село 21. "Октябрь" газет, Селта село 22. "Знамя" газет, Сюмси село 23. "Увинская газета" газет, Ува посёлок 24. "Вестник" газет, Шаркан село 25. "Знамя Октября" газет , Юкаменск село 26. "Рассвет" газет, Якшур-Бодья село 27. "Сельская правда" газет, Яр посёлок 28. Глазов радио 29. Сарапул радио 30. Можга радио 31. Яр радио 32.Якшур-Бодья радио Иворъёсты вӧлмытӥсь ёзъёслэсь списоксэ ӵектӥз Удмурт Республикаысь Печатья но иворъёсъя министерство. Удмурт Республикаысь Быръёнъя комиссия. Кутскон сётэмын Пудо вордон удысын сиён-юон поттонэз будэтон но отын тыршисьёслэсь ужзэс умоятон вылысь Красногорск ёросысь хозяйстсвоос но фермаос куспын конкурс ялэмын. Солы кутскон сётэмын 10-тӥ январе. Озьыен азьпалан уно сюлмаськонъёс луозы. М. ИВАНОВ. Дарт "Шундыысь" - иворъёс Тол пумиськонъёс 12-тӥ январе "Шунды" дэменлык "калык куспо" КВН ортчытӥз. Отчы пыриськизы удмурт, еврей, немец, азербайджан егитъёс. Визьпогъёс тазэ пумиськонзэс сӥзизы ас калыксылэн Выль арез пумитан сямъёсызлы но йылолъёсызлы. Учкисьёслы тужгес тунсыко потӥз еврейёслэн маскаръяськемзы. Но та шулдыръяськонын егитъёс мултэс трос юон сярысь вераськизы - та кыль пӧртэм выжыё калыкъёсты огкадь шугъяськытэ, шӧдске. *** 14-тӥ-16-тӥ январе "Дзержинец" лагере люкаськылӥз "Шундыкарлэн" тол сменаез. Отчы люкаськылӥзы районъёсысь усточи пиналъёс - азьветлӥсь шундыпиос. Соос культурология, этнология, философия, психология, кыл тодон удысъёсъя тодон-валанъёс басьтӥзы, ог-огзылэн выль ужъёсынызы тодматскизы, азьланяз быдэстоно ужпумъёс сярысь кенешизы. Пиналъёс возьмамтэ шорысь нош ик эшъёсынызы но яратоно дышетӥсьёсынызы пумиськизы (таӵе смена берло кык арзэ ӧз ортчылы ни вал), кужмо кичабонъёсын пумитазы Егитъёсын ужанъя кун комитетлэсь кивалтӥсьсэ Андрей Гальцинэз. *** Али дэменлык дасяське феврале ортчоно Йылпумъянъёслы но быръёнъёслы сӥзем конференцилы. Выльысь эскере Уставзэ. "Шундылэн" азьветлӥсезлэн Татьяна Прокопьевалэн верамезъя, отчы трос воштонъёс пыртыны кулэ. Кибашлыослэн ужъёссы Котырамы кибашлы адямиос ӧжыт ӧвӧл. Ӵапак сыӵеосты огазеяны юрттӥз Ува ёросысь Кыйлуд шор школа. Ас киосынызы лэсьтэм мебельзэс возьматӥзы дышетӥсьёс, селоын улӥсьёс, бадӟым классъёсын дышетскисьёс. Соос лэсьтӥллям кӧлан гарнитур но, ӝӧк- пуконъёс но, табуреткаос но, мукет арбериос но. Адӟытонэ ветлӥзы мукет гуртъёсысь, Ижевскысь адямиос. Кибашлыослы, выль арбериос лэсьтыны курыса, уно вазиськонъёс вал. Н. Петров. Виталий АГБАЕВ Шӧг но, кузьыт но - одӥг Учыръёс Мемей Ӟольгыри, пе, гужемозь турттыса, кикыпи будэтэ. Ӧйтӧд, ӧйтӧд. Огпол но адӟеме ӧвӧл. Вот адямиосын со выллем учыръёс луыло. Коть канжаськыса гаӵоло мед пограло - тазэ ас синъёсыным адӟи. Одӥг йӧно пиосмурт сӥё-дано арлыдзэ пусъе. Калык сокем трос ке но ӧвӧл, одӥг адями уг тырмы кадь. Ваньмыз ӝӧк сьӧрын, нош кин ке ӧвӧл но - тӥни. Люкаськем калык шырыт кылъёссэ уг жаля. Пальпотыса саламъёссэс кузьмало. Кузёос но шуныт мылкыдзэс вӧлак усьто. Сиён уно пӧртэм: кӧё, вӧё, сугым. Юонэз-курытэз, юзматӥсез, капчиятӥсез. Кызьы гинэ тае ӝӧк чида. Музон комнатаын крезьгур жингыртэ. Шулдыръяськы - кӧня мылыд потэ. Си-ю - кӧтад кӧня тэре. Ӝикытлыктэ гинэ чакла, сабырлыктэ эн ышты. Со дыре ик сад-бакчаын ужась пересь кышномурт куссэ шонертӥз. Шунды пуксёнэз чакласа, сюрес пала учкалтӥз. Уг-а лыкты пиез? Солэн, шуэ, вордӥськем нуналыз. Кызьы, мар, пӧй, такема улэ. Оло, пе, актомобилез тӥяськиз. Ӝомал возъяськем бере, мемей кӧтсэ еж емышъёсын алдаз. Жадем ёзвиоссэ басылатыса, изьыны выдӥз. Нош син азьысьтыз уг ышы дуно пиезлэн тусбуез. Тани сое кадырласа люкаськем калыкен тодмато. Сӥлы карыса, ӝӧк сьӧры тӧро пуконэ пукто кадь... Ваньмыз со - быдэсмымтэ малпан. Мемеез сад-бакчаысь сӥзьыл емышъёсты утялтэм бере гинэ ваизы. Бен, ӟольгыри но куддыръя кикыпи вордоз вылэм. Адӟонлэсь уд пегӟы Кылем гужем губи трос вал - коть лопаткаен мыч. Сыӵе вакытэ дорын пукем уг поты, тэль ялан бордаз кыске. Губиосты тодӥсь муртлы со ик кулэ, вылды. Эн гинэ азьтэмъяськы. Час куспын кудыед тырмоз. Нош тэльын омыр кыӵе - усыкмод. Котькуд писпу, нёжал, нялмыт инты маиныз ке но тунсыко: синъёсты палёмытэ, мылкыдэз эмъя, сюлэмез небӟытэ. Ветлы, юмша тэлетӥ, кӧня мылыд потэ. Окты, бича губиез, кудӥз сылалтыны, кудӥз пӧзьтыны яра. Инкуазьлэн узырлыкез ваньмызлы тырме, чеберлыкез бордаз кыске. Уж бере нюке васькано кариськи. Рейсовой автобусэн нюлэскы ке - бер ини. Кузь нюкын но губиос пӧртэм ӧвӧл, дыр. Нош утчась мурт шедьтэ, шуо. Огпол ветлӥ, кык пол... Пумен яраз та нюк: угось одӥг пол но буш ӧй на берты. Отӥ-татӥ утчаськонъя, тылскем бервылэ ӝими. Дораз кыскемын Америкаысь бадяр. Сисьмыса пограм, вылды. Палэнынгес - бадӟым корт тусьты, миска, кутэто таба. Малы ке буш соос. Котыраз улдӥ-малдӥ дӥськут пазямын. Нош тылскемлэн бур палаз, ог-кык вамыш кемын - тол пальто но солдат шинельёс. Чебер шыргубилы мыкырски но, дӥсь вырыны ӧдъяз. Музъем улысь кадь, "амбаллэн" ымнырыз шараяськиз. Бам чоколёосыз вӧш пасьтаесь. Тамаша. Витьымтэ шорысь кылтэм-ымтэм кадь луи. Шымырай, луоз. Бӧрысь ини губи вылэ чӧлски. Татын, пӧй, трос соос. Нош со: "Бича но - дуй, не стой!" Кӧня ке губи октыса, дорысьтыз шупчи. Гурезь бамалэ гинэ туби - куакъёс пушкын - ӝожомем адями. Синвуаськемын. Азяз "шкалик" посудаез. Бен со милям юртамы улэ ук. Тодмо кышномурт. Вӧзаз ик, турын-куар пӧлын, вӧлэм боды чалыш бышкалтэмын. Нокыӵе ӧй кариськы. Ӟечъяськи но ас сюрестӥм вамыштӥ. Берло ивор кылӥськиз: со кышномурт городысь кошкем. Кытчызэ - тодӥсь ӧвӧл. Квартиразэ вузам но гылӟем. Сӥзьыл. Одӥг шутэтскон нуналэ ветлоно кариськи кузь нюке. Писпуос гольык кылемын. Ӵуж но горд куаръёс музъемез шобырто. Улос чал-чал. Тунсыко потӥз: васькано кариськи кузь нюкысь шур дуре. Отын но чус- чус. "Амбаллэн" интыяз ма но со лошъяське на. Дӥсьёс но мискаос ӧвӧл. Кезьыт матэктэмен, теплотрассае интыяськиз, дыр: корка сигъёс но мурӝолъёс тунгонамын уго. Нош тол куазь чепылляськытэк уг чида. Ветлонъям бамалэ, кышномуртлэн пукем интыяз вуи. Отын но мӧзмыт суред: вырйыл малы ке висъяське, туж тупа шайгулы. Абдрай. Мугортӥм кузьылиос ветлыны кутскизы кадь. Кирос интые, вамен кылле бышкалтэм боды. Гужем турын-куар пӧлысь вырйыл уг висъяськы вал. Табере тани ваньмыз син азьын. Шуэрак луыса берытски но - мышкам "амбал" сылэ. Тон мар, пе, зынъяськись пуны кадь калгиськод. Так гинэ, шуисько. Юмшасько. Нош со ӧз-а пештырскы: "Возьмато мон тыныд - юмшасько. Ачид та гуэн артэ кыллёд". Э, вордэм мемие! Э, провор дядие! Сётэлэ кужымдэс пегӟыны". Вамыштӥ гинэ - ӧчкарем кадь, ӧй-а волегӟы? Пыд азяз сачак! зоньтӥськи. Курдаку сюресэз ум чаклаське ни. Ну и гындӥз со монэ, ну и вешаз. Урдлыосы али ке но лосырто на. Ярам коть, шоканы йӧндырисько. Инмарлэн гожтэмез сыӵе, дыр: адями улытозяз шудлэсь но уг палэнскы, адӟонлэсь но уг пегӟы. Шоккес Митырка Губи утчало - нюлэсэз кечат-вамат кокчало. Вашкала дырысь висён со. Пӧртэм губиез кие кутод - ваньзэ кудые уд поны. Куд-огез тузӥ будос бича, нош мукетыз йӧн гинэ утча. Сыӵеос пӧлын моторъяське быжтэм атас выллем Митырка. Уно пол ветлӥз со нюлэскы: только вот беда - ялан буш берта. Малызэ ачиз тодэ, вылды. Бертыкуз пасяське, дыр, куды. Губи мыкыръяськемез яратэ, нош Митыркалэн ньылон гочатэ. Ланьырске но - полуштопсэ бушатэ. Кызьы сотэк? А то, пе, губиосты уг тодма. Синъёсыз буёлъёсты сурало-пожало, лэся. Дальтоник. Берло дыре ивор кылӥськиз: кышноез тышкаськемысь, пе, Митырка куткулон губиосты бичам. Синъёсыз, вылды, алмашизы. Пӧзьтыса оскалтэм но, кӧтыз чутыртэм. Али ке но, пе, мискиньлэн кизерен-напен уртче. Мар карод? Одӥг шунды шоры учкиськом - огкадь ум мынӥськелэ. Котьмар шуэлэ - янгышез тупатыны луэ. Алдаськон но мылпотон адямиез юмоке вутто. Вот кытын беда! "Умой" - О, дуно эше, ӟеч но бур! Кыӵе шокаськом ини? - Эн но юа, братоке. Улӥськом-вылӥськом, пень кудыысь зарни утчаськом. - Зэм шу? Шедьтӥд-а бен? - Ӧйгес на. Уйвӧтъёсам шедьтӥсько. Соинтэк-а "Сонник" книгаме сурыкмытӥ? Ачид бон, кыӵе-мар лулӟылӥськод? - Вики-ваки шокаськом. Ву юиськом, нянь сииськом, кытӥяз сылал пызьнаськом - кӧт тыре, дунне кайгу быре, куректон вунэ. Соиз понна но инмарлы тау шуисько. - Кытын ужаськод? - ПМК-ын (Пока мать кормит). Со мынам фронтовичка. - Укыр вылӥе тубымтэед. Мон но гортопын пӧсясько. Бен, ӵукнаысен ӝытозь (город топчу). Эшъёс пумиськемзэс пусйыны малпало вал. Только кыксылэн ик кисыосазы тӧл шула. Берло ини асьсэ блок кылдытыны кенешизы. Со, пе, нимаськоз "УМОЙ". Ӟуч сямен ке - миськы, нош удмурт сямен ке - Ужасьтэм Мурт Озэп Йӧнтэм. Жингыртэ. Выись мурт, шуо, куро борды но кырмиськыса, ярдуре потоз. Нош азьтэм, пе, пӧяськон амал утчалоз. Пӧяськись - со ик алдаськись; алдаськись - со ик пӧртмаськись (мошенник); пӧртмаськись - со ик лушкаськись. Тӥни вот! Оскы сыӵе блок нергеослы. Туганъяськон Вот та дунне! А? Улэмъя улэм потэ, сиемъя сием потэ, яратэмъя эшшо яратэм потэ. Мон шуисько, зӧк кисыё пиосмуртъёсыз. Зэм верало калыкын: чорыглы - ву -, сяртчылы - музъем, емышлы - турын. Нош мон кадь тузӥ кышномуртлы зӧк кисыё воргорон кулэ. Шонерзэ вераса, аслам но картэ палэнысен номыре ӧвӧл. Йӧно, чебер адӟиське. Только мар каром сульдэр кадь мугорыныз? Мудор шоры сямен вӧсяськом шат? Ялан медъяськыса ужа. Уксёез ке быре, буш ӟенеликъёсты бича. Пумаз вуыса, выльысь сад-бакчае кошке. Кинлы корка, кинлы мунчо пуктэ. Шат мон сое чиданы кулэ? Уг, уг быгатӥськы. Мон тузӥ кышномурт. Кылем арын гинэ пусйи витьтон аресме. Пие аслаз семьяеныз улэ. Мед ойдо. Нылы кунгож сьӧртӥ ветлэ. Умойлы. Нош мон, пукись курег сямен, кудыын пуком-а? Чалдон. Эшшо ке картэ ик монэ пыкылэ: малы, пе, пӧсь сиёнэ ӧвӧл. Малы, шуэ, дэремме уд миськиськы. Тунсыко книга шедиз бере, мон янгыш шат? Медаз гожъялэ вал. Телевизор дорын пукемысь но пыкылэ. Басьтэмын бере, сое учконо, дыр. Тужгес ик сексуальной киноос монэ усыкмыто. Мон ведь тузӥ кышномурт. Ярам ай, инмар шудзэ сётэ: ӧвӧл-ӧвӧл но, нылы но Италиысь берта. Отын со - кабаре шуоназы эктӥсь. Валтӥсез, лэся. Уксёез ёмыртэ ке ёмыртэ. Мыным нимысьтыз квартира но басьтӥз ни. Эшшо вуӵырто: дышетскыны кулэ. Мар толкез? Визьмо адямиос ик (дышетӥсьёс, врачъёс) забастовкае потало. Уждунзы вылэ ӝожтӥсько. Вот мынам нылы, дышетскемез вылӥын ке но ӧвӧл, уксёез жильдэ. Аслаз етӥз мугорыныз данъяськыны быгатэ. Мукетъёсыз солы дунъет сёто. Чалдон. Мусо нылы ик индылӥз. Ӵапак чипы курегез дышетэм кадь. Коньдон мычиз но шуэ: "Ветлы ай тон, мамулька, одӥг ӝытлы ке но..." Арлыдылэсь кепырай ке но - мынӥ. Пиосмуртъёс нош, пиосмуртъёс? Огезлэсь пӧртэм мукетыз: кӧтсы - барабан, кукъёссы - чиндыр-вандыр, мугорзы - сюмори, чыртызы - саник ныд, йырзы - мушко. Выжыкылысь пӧртмаськисьёс но - тӥни. Но соос коньдоно. Пиртэш интыоссы тырмыт ке но, яратытэк уг луы. Чалдон. Матэктӥз дорам каляга кадь пилеш йыр. Мыньпотэ, отӥ-татӥ маялтэ. "Инмаре, - малпасько, - мынам но куд-ог интыосы пиосмуртъёсыз зубекъято на вылэм". Улонлэн куронэз сыӵе, дыр. Солы но йӧскадь луиз, мынам но пинал вакытэ берытскиз. Табере ужатэк но улэме луоз. Чалдон. Огпол, кык пол, куинетӥяз... Янгышай. Каляга йырлэн кышноез кырмиз. Зараза, пе, монэ. Тонэн валлин, шуэ, йӧнатскытэк ӧвӧл. Кытысь, марысь тодэм картэныз кушласькемме? Ачиз шат ымзэ ваяк усьтӥз? Ӧйтӧд. Конечно, мон быдӟияськыны дышемын ӧвӧл, соку ик ӟеч кылме ляконо кожай: "Сьӧд чемоданэ аслам, кинлы мылы потэ, солы ик сётӥсько". Берло мар луиз - малпаны кышкыт. Нырысь ик - ымныр посуда сӧриськиз, кыкетӥез - йырсиос лӧпказы, вылаз ик, кужмысь йӧнатӥзы на. Табере дуно картэ но дорысьтым кӧчиз. А мар карод? Сяртчылы - музъем, емышлы - турын, адямилы - яратон. Нош мон кадь тузӥ кышномуртлы одно ик пульдэм кисыё пиосмурт кулэ. Сиемъя сием потэ: сӥльзэ но, тыкмачсэ но, картошсэ но... Улон та. Картошка Кыз но беризь - маин пу ӧвӧл, кирень но картошка - маин сиён ӧвӧл. Кылем сӥзьыл, зорыса улэмен, картошез бергес октӥзы. Куазь ӧжыт гинэ шундыё кариське - калык соку ик бакчаяз потэ. Мудӥськись шыръёс сямен, гызмыль выро. А то, пе, кыкетӥ нянь сисьмоз: зор угось кулэ дыръяз ӧй вал. Кулэтэм вакытаз ведра дурысь кадь кисьтӥз. Кин кызьы быгатэ - бакчаяз озьы ик тырше. Уно нылпиё семьялы со "оп" шуытозь, нош мукетъёсызлы... Губырске пересь кышномурт, мыкырске пересь пиосмурт. "Ох" но "ах" шуыса окто картошказэс. Окто но пумен куссэс шонеръяло. Лушкемак учыртыло ыбес пала: уг-а берто юрттӥсьёссы - нылыз но пиез? Нош ыбес бакча бырытозь ӧз усьтӥськы. Куазь векчи пужнӥськыку, пиосмурт мешокен но пыртаны дауртӥз. Санэ ӧз басьты висемзэ. Вунэтӥз, дыр, операция бере шуыса. Кожаз, вылды: пинал дырхъяз кадь провор на. Утьыны тыршиз картошез: медаз сисьмы. Берло ыбес доры ик зоньтӥськиз: зӥбиз сое тыбырысьтыз мешокез. Пересь кышномурт юрттыны дауртӥз на, но бер вал ини. Операция бервылыз выльысь усьтӥськиз. Бер сӥзьыл, пудоосты вандон вакытэ, бертӥзы нылыз но пиез. Малпало вал, дыр, сӥль юдэс шедёз шуыса. Но соосты пумитаз, дыл огназ сылӥсь беризь кадь, азбар шораз губырскем анайзы. Гид ӧсъёс усьтэмын, пудоос вузамын. Анай сюлэм, шум потӥз ке но, ымдуръёссэ куртчиз. Быльырам синкылиосыз бам кузяз ӧръяськизы. - Яратоно сиёнэ - картошка. Атайдылэн пыртам картошез. - Что ты говоришь? - куалектӥз нылыз. - Куака лобаса котькытчы вуэ - ӵана уг луы. Тон но, нылы, удмурт сямо ик кыль вал. Киостэ гадь вылад кечат-вамат тырыса ке но вӧсяськид, уз ни юртты. Егитъёс уногес сюлмасько асьсэ сярысь. Нош пересьёс - ӧвӧллэсь вань. Шуг-секытъёс дыръя гинэ тодэ ваиськом. Юрттозы ай, пӧй. Бен, ӟеч нылпи - коркалы ваньбур (картошка), нош "лобӟем" пи но ныл - юртъерлы тӧлбер (кирень). Оло нош, анай-атайёслэн янгышсы со? А? Чидан Муртлы урод лэсьтытозь, чиданэз ачид чида, шуо. Зэм, дыр, со. Тодӥсько сыӵе адямиез. Мугорын но, вылтусын но ваньмыз кадь ик - огшоры. Ветлэмез но, вераськемез но - асьме калык пӧлысь. Удмуртэн но, ӟучен но, бигерен но валаса вераське. Вылтӥяськон сямыз ӧвӧл. Йылпумъямын ке но вылӥ дышетсконниез. Сюлэмен гинэ ужано ӧвӧл, йырын но улоно. Сыӵе муртъёсты ӟег нянь кадь небыт, шуо, лэся. Бен, нуналэн нунал уг тупа, адями - адямиен. Чиданэз вормыса, тупаны тырше. Одӥг нуналэ пиосмуртлы ӧз удалты: зырен шуккем кадь луиз - витьымтэ шорысь кышноез висьыны усиз. Больницае выдтоно луиз. Со нуналэ ик пиез янгышаз. Автомобиленыз "шайбае" мырӟиськиз. Номыр ик ӧз луы, вот тыриськонлэсь уд палэнскы. Вылаз ик, "Жигулез" паньгам ныр кадь куажгаз. Ӝыт пал нылыз синвуаськыса вуиз на. Картэныз керетэ, лэся. Люкисько гинэ каре. Ӝомал возъяськем бере, гуртысь вуиз апаез. Тазалыкез со выллем: тӧл пельтӥз ке, погралоз. Юрттэт куре. Картопез, пе, октоно вал. Кӧня ке дыр ортчыса, бускелез вуиз на. Капитоныч юртты, пе. Пиелы, шуэ, счётчик пуктӥллям. Беда. Сюлворем вылысь сюлворе. Капитоныч мур лулӟыса гырпумъяськиз, малпанъёсаз выиз. Вормытъяськись нылыз кӧтысьтыз нунызэ тодаз ваиз, лэся. Мыкыръяськеме, пе, уз луы. Ӧлексы я мар вордскоз, шуэ. Кин тодэ. Ӟечезлы вольыт сюрес сӥзёно. Ашкынэм пиез но ужез вылэ чӧлскиз. Кивалтӥсьмы, пе, укыр лек. Ужысьтым пешто. Соиз но озьы: ужтэк кылён - сютэм улон. Нош бускельтэк кызьы? Чыры-пыры понна но со дӥне мынӥськод ук. Эшшо апаедлы кысык вакытэ ӧд ке юртты? Бен со аслад ук, одӥг бекчеын суралтэмын. Нош кузпал? Со гын сапег ӧвӧл: пыдысь но уд кушты, йыре но уд чуртна. Капитоныч берпум уксёзэ бускелезлы сётӥз. Матысь муртэд ӟечтэ кык полэскын берыктоз. Нош умоез умоен ик берытске. Кузпалыз понна больницае ветлыны пунэмаз. Эмъюм но али коньдон вылын возиське. Пунэмам бӧрсьы эшшо пунэмаз на. Апаезлы картошказэ октоно - ужысьтыз куриськытэк ӧйлась. Арня ӵоже Капитоныч какалмиз. Ӵукна вазь ик - гуртэ, бер ӝыт - больницае, бӧрысь дорын ма но со пӧрано. Вылаз ик, пиез шаянъяське на. "Шайба" понна, пе, мыным но счётчик пуктозы. "Жигулез" но, шуэ, тупатоно. Та кайгыронэз бускелез ас вылаз басьтӥз. Тожо пунэмаськыса, дыр. Вань шуг-секытэз вормиз Капитоныч. Берло ачиз койкае выдӥз. Бен, чидан кулэ каре быгатэмез. Чидан ик бакомытэ тазалыкез. Вадимлэн ӧпкелемез Улӥд-вылӥд ке, кулытозяд шокалод. Ей богу. Мар но уг луы та кышноосын. Вик-вак лулӟылӥд ке, марымтэк но... кылёд. Ей богу. Тазэ пиосмурт йырыным верасько. Ас вылам оскалтӥ. Зэмзэ шараяны ым уггес усьтӥськы, но тӧлъя-буръя улӥсь кышноос мон вылэ сьӧд ӵанаос кадь омырскизы. Ей богу. Котькуд адямилэн пинал дырыз луэ. Нош пинал дыр гома яратонэн. Синмаськон вакыт - льӧмпу сяська: йырез поромытэ, мылкыдэз усыкмытэ. Ветлӥськод - йыромем така выллем, юмшаськод - гидэз тодӥсьтэм пороз кадь. Отын но, татын но - мак сяськаос. Ваньзы огдыре кык ымын чупано кадесь. Но соос йӧнъяськыны мастак. Кызьы, пе, сотэк. Ошмесысь вуэз но шуак-дуак уд юы. Пиньёслы - аб-аб. Татын но озьы ик. Бордазы йӧтскыны уг луы, возьмало кузьым яке салам. Ей богу. Одӥг дусымелы асьсэ бакчаысь ик шуньялтызэс саламлы сётӥ. Шум-а бен ӧз поты? Тысямедлы быдэ, пӧй, монэ тодад вай. Аслад кадь потыса си. Ӵуказеяз мар луиз? Мунё кадь дусымелэсь пӧсь кылъёссэ сюлмам понӥ. Ӧй кылзысал, но пельёсы пасесь вал. Тон кадь зырымесен йырин, пе, ӝыны бакчае семичка модосъёс гинэ кылемын. Тӥни вот. Мон бӧрсьы эшшо пыраллям на, лэся. Нош ним-данэз - мыным. "Эк-кой", - лулӟи поннам. Нырысетӥ дусыме мукет пиен кушласькиз. Бускель гуртысь вал. Берло солы ик бызиз. Ей богу, сюаназы ветлӥ на. Юон дыръя арганчи почётын. Шулдыртӥ ке шулдыртӥ... Ворттӥсь чуньыез шуак уд дугдыты, гомась сюлэмез вуэн уд кысы. Нош тугантэк улон - уйжомон. Дусымъяськытэк ӧйлась. Таиз но гӧгӧрсин кадь чебер. Коть нош кут но... али ик - сельсоветэ. Шӧдӥсько: таизлэн но йыр урдон сямыз вань. Озьыен, буйгатоно. Э-э, мар ке луэм - лу! Быдэс керттэт сяська кузьмай. Саламе, пӧй, дунтэмгес, но со понна ачид та сяськаос кадь: чебер, муспотон, вольыт. Капка азьысен люкиськыкумы, шуныт кылъёсме ӧй жаля: "Зарни уйвӧтад та сяськаосты сямен ик монэ адӟыны мед кылдоз". Ей богу, озьы ик шуи. Ӵуказеяз пумиськимы но, со монэ сульпам губи, пе. Шуям сяськаосыным ымнырам сализ. Му пыр вияны дась вал - чидатски. Сяськаос уго соослэн палисадникысьтызы. Нош ик, вайяськыса лобись туриос кадь, люкиськытэк ӧйлась. Сюаназы кадырлы юмшай. Сиён-юон дыръя арганчи нырысетӥ интыын. Ачим изисько, чиньыосы бирдыос вылтӥ шаплы бызьыло. Ӟеч лу, шаян вакыт! Ӟечбур, быдэ вуон - армия! Таиз зэмос школа. Йыг-йыг дышето шаерез утьыны. Малы ке милемыз Афганэ келязы. Вот татын ми тыро-пыдо воргоронъёс луимы. Ог-огдэ валан, гажан, юрттон вире пыӵаз. Сыӵе мылкыдын ик ӧм валалэ котыртэме шедеммес. Вистэм- вожтэм лобало шузи пуляос. Отын но татын пуштыло базака выллем снарядъёс. Рация сузмемын. "Ӟеч луэ, эшъёс..." - берпум кылмес гожтыса, кагазэз интыямы гильза пушкы. Изъёсын ватӥмы. Пленэ сётсконтэм вылысь кельтӥмы асьмелы быдэн пуля. Син азе пуксизы вань тодмо муртъёс, гажано нылъёс. Кудъёсыз кӧло картъёсын артэ, нош милям - берпум шокаммы. Оло, инмар курадӟонмес шӧдӥз - ӵапак вуизы асьме вертолётъёс. Со вал милям кыкетӥ вордскем нуналмы. Вурӟизы, кышъязы ке но врачъёс, доре бертӥмы. Бертӥмы нылъёсты яратыны. Ей богу. Быдэ вуэмъя, шаян дыр малпанъёс воштӥсько. Улонлэсь берпумзэ валаса учкиськод дунне шоры. Табере синмаськи уй палась нылашлы. Ул но шумпот, яраты кышнодэ, утялты нылпиостэ. Котькудӥз уго аслэсьтыз интызэ яратэ. Ей богу. Шулдыръяськон дыръя, пе, ӟольгыри но мусур веръя. Учырез сыӵе тупаз. Гербер. Люкаськемын элькунысь вань ёросъёсысь азьмынӥсь муртъёс. Возь вылэз шобыртӥллям, кожалод, чебер бурдо бубылиос. Муш бакчаын выллем, гуж-ж! вазе: кытын арган, кытын кырӟан, кытын мар... Йӧно гинэ вамышъяса, ӝук пӧзьтонзы доры мынӥсько. Куара кылӥськиз: шалашмы, пе, бадӟым, кожаса кошкы. Учкисько - нырысетӥ дусыме. Аслам кадь ик, кисыриосыз вань ини. Э-э, кутскиз ук улэм-вылэмзэ жильдыны. Уӵы сямен чирдэ. Картэз, лэся, кемалась ик ӧвӧл, "оп" карем. Курытэныз эшласькыса, тормозъёсыз ужамысь дугдӥллям. Вуж тодмоос, шуэ, выль туганъёслэсь умойгес. Ей богу, кызьы кариськыны уг вала. Мыным но инёк ӧз луы-а? Вирсэръёс золскизы, мугорын валантэм кужым дыа. "Ну, - малпасько поннам, - огпол сьӧлыкай ке, ишан уз луы". Кыдёке ик ӧм палэнскелэ, нош ик ӟазырес куара: "Ӟеч муртъёслы милям капка котьку пась". Кыкетӥ дусыме вылэм. Тожо азьмынӥсьёс радын ветлэ, лэся. Кутскиз сьӧраз ваеменыз утялтыны. Ымыз чик уг ворсаськы: тӧлъя ӟукыртӥсь ӟезьы кадь, супыль поттэ. Картэныз вот... Макмыр дыръяз гын сапеген васькытэм но, соиз лулзэ инмарлы сётэм. Табере, шуэ, эркын тылобурдо. Коть туннэ ик, пе, дорам лыкты. Ей богу. Озьы-тазьы лӧптылэмзы керетонлы пӧрмиз. Мон мынекъяны ӧдъяй. Ах тон, пе, эшшо серекъяськод. Кутскизы монэ лӧдыны: дэрем ӵажыртӥз, е бычы пертчиськиз, штани куашказ. Коть "караул!" кесяськы. Кышномуртъёс пиосмуртэ эриктэмало. Кызьы но озьы пыд йылам султӥ но трусикме кык киосыным кутыса пегӟисько. Кукъёсы ик музъеме уг йӧто кадь. Мырдэм палэнски адӟонлэсь. Вот, шайтан, кышноос-дусымъёс! Быдтӥзы, суразы улон радэз. Табере родной кышное монэ мултэс каре. Ей богу, мон понна со ачиз мудор интыын вал. Зэм со: улытозь - улоно, кулытозь - кышноез яратоно. Россилы Президент быръёмы, нош Удмуртилы? Кун Кенеше нош ик люкаськылӥз Удмурт Республикалэн Конституцияз ватсанъёс но воштонъёс бордын ужась комиссия. Таяз учыре солэн ужез герӟаськемын вал республикамылы президент быръён ужпумен. Кызьы тодмо ини: 1999-тӥ арын 19-тӥ декабре ортчем юалляськонын 51 процентэз бырйисьёс мылкыдзэс веразы республикамылэсь кивалтӥсьсэ "Президент" ниман сярысь. Соин ик табере со сярысь Конституцие ватсанъёс пыртоно. Тӥни соин валче комиссия эскериз Конституцилэсь 10 но 116 ёзэтъёссэ (статьяоссэ), ӵапак соос герӟаськемын кун властьлэсь ёзъёссэ кылдытон ужпумен. Вераськон лэчыт гинэ пӧрмиз. Комиссилэн секретарез К. Глухов Конституцилэн кык ёзэтъёсыз сярысь валэктон сётэм бере, ас мылкыдъёссэс веразы А. Волков, П. Вершинин, А. Салтыков, Т. Одиянков, В. Хорошавцев, В. Тубылов. Кыӵе луыны кулэ Удмуртиын кун власть? Пыро-а отчы Правительство но ас коже кивалтон ёз? Меӵак та ужпумъёс сэрен 1996-тӥ арын Удмуртиын валамтэос кылдӥзы вал Кун Кенеш, Правительство но Ижысь мэрия куспын. Кылдэм югдурез соку Россиысь Конституцияя суд эскериз. Кема кенешемзы бере комиссиысь юристъёс но депутатъёс 10-тӥ статьяез тазьы гожтыны ӵектӥзы. Удмурт Конституцилэн 10-тӥ ёзэтаз таӵе ватсан пыртоно: "Кун властез Удмурт Республикаын быдэсъяло: Кун Кенеш, Президент, Правительство, Конституцияя суд но мировой судьяос. Удмурт Республикаын озьы ик кылдытыны луэ кун властьлэсь мукет ёзъёссэ но. Соослэсь кылдон но ужан радлыксэс юнматэ Кун Кенеш, федеральной закон вылэ пыкъяськыса". Борис Ельцинлэн дырызлэсь вазь Президентысь кошкемез табере мултэс шуг-секытъёс кылдытӥз Удмуртилэн Конституциез бордын ужанлы. Россилы выль президент быръён ортчоз 2000-тӥ арын 26-тӥ мартэ. Со дырозь Удмуртилэн Конституцияз вань воштонъёс (соос 80 пала) пыртыны уз ни луы. Озьы ке но, валтӥсь ужпумез - Удмуртилы Президент быръён сярысь ужпумез - быдэстоно. Кыӵе табере со понна сюресъёс вань? Нырысетӥ сюрес: та ужпумез эскероно Кун Кенешлэн сессияз. Сое ортчытыны учкемын вуоно арняын, 24-тӥ январе. 100 депутат пӧлысь 75-ез мылкыдзэс веразы ке Удмуртилы президент быръён сярысь, соин та уж йылпумъяськоз. Нош тросэз депутатъёс президент быръёнлы пумит ке луизы, соку референдум ортчытоно - таиз ини кыкетӥ сюрес. Озьыен, 2000 арын Удмуртия, Конституцияз воштонъёс пыртыса, вылӥ кивалтон ёзэз (конституционной строез) чутрак мукет ӧртӥ нуыны малпа. Кыӵе соку луоз улон радлыкмы? Чувашиын, Башкортостанын яке Татарстанын кадь-а? Та пумысен комиссилэн адямиез но Правительстволэн Тӧроез Н. Ганза буйгатӥз. Республикаен кивалтон амалъёс ваньмыз, пе, тупен-тупен эскеремын ни. Шуом, законъёсты быдэсъясь власть (исполнительной) Президент яке Правительство киын возиськыны кулэ? Оло, кыксылы ик со ужез осконо? Кӧня адями кутоно луоз Президентлэсь администрацизэ кылдытон понна, кӧня солы коньдон кулэ луоз? Огъя вераса, вань та ужпумъёсты табере эскерыны но кыӵе решениос кутыны кулэ кун Кенешысь депутатъёс. Озьыен, возьмалом ни азьвыл чакламтэ сессилэсь ужаны кутскемзэ. Т. БАННИКОВА. ДАРТ "Мисс-Россия" - бускельмы 13-тӥ январе "Мисс-Россия" конкурс ортчиз. Россилэн пӧртэм улосвылъёсысьтыз ньыльдон сизьым чеберайёс пыриськизы конкурсэ. Удмуртиез возьматӥз Олеся Щепина. Национальной костюмъёслы конкурс бере со дас тужгес чеберъёсыз пӧлы сюриз. Вераны кулэ, Олеся та конкурсын тужгес пиналэз вал - солы 15 арес. Нош "Мисс-Россия" луиз бускельмы - Казаньысь Анна Круглова. Вице-миссъёс - Москваысь Светлана Горева но Пермьысь Мария Долгих. Учкиськод ке, корона асьме пала но матэктэ ни кадь. Дарт Ма кароно, Марина? Ӝӧк вылын кык гожтэт. Ыстэмын соос Кун Кенешлэн одӥгезлы депутатлы. (Нимзэ ум поттылэ. Ужпум со бордын ӧвӧл). Тани нырысетӥез. Ӟечбуресь, гажано... Гожтэ Тӥледлы Оля, 10-тӥ классэ ветлӥсь нылаш. Мон дышетӥсько удмурт кылэз. Мынам вань анае но атае. Соос туж умоесь, милям шулдыр но шудо семьямы. Но анай-атае ӧжыт уксё басьто. Гужемзэ уждун чик ӧз сётъялэ, шуыны луоз. Соин ик милям пунэм тыронъёсмы трос люкаськизы. Тани тол вуиз ни, нош мынам дӥськутэ ӧвӧл. Вазиськисько Тӥледлы, оскыса, шуба басьтыны юрттоды шуыса. Мон Тӥледыз туж курисько - юрттэ мыным, пожалуйста. Ӟеч луэ! Азьло ик тау карисько. Конверт вылэ адресме ӧй гожты, малы ке шуоно, та гожтэтэ сярысь нокинлы но вераме уг поты. Ольга. Нош тани кыкетӥез. Гажано ...! Мон дышетскисько 11-тӥ классын. Вазиськисько Тӥлесьтыд юрттэт курыса. Ӝоген школаез йылпумъяло. Мон азьын - секыт ужпум. Дышетскем потэ, но ваньмыз али дунын лэсьтӥське. Мылкыд карисько УдГУ-э пырыны. Уен-нуналэн пукисько, но та улонмы посёлокысь нылпиослы вузэ пырыны уг сёты. Малы меда? Мынам но тодон-валанэ вань ук. Мон тыршисько, дышетскисько... Остэ, инмаре, макем секыт асьме странаын. Мон тыршо дышетскыны. ..., юрттэ мыным, пожалуйста. Кинлы оскод на, Тӥледлы сяна. Неужто асьме дуннеын зэмлык ӧвӧл. Юрттэ "пичи адямилы" будыны. Гажаса - Марина. Тӥни сыӵе вазиськонъёс. Мар шуод соос пумысен? Одӥгезлы ныллы шуба кулэ луэм. Мукетыз туж тырше студент луыны. Умой-а со, куке адямиос депутатсылы вазисько олокыӵе но куронэн? Кулэ-а депутат (законъёс бордын ужаны быръем мурт) бырйисьёсызлэн нылпиоссылы тол дӥськут утчаса бызьылыны? Вань кулэяськисьёсызлы-а со шуба басьтыны кулэ? Яке гожтэтэн вазиськемъёсызлы гинэ-а? Нош ыстэм шубалэн гонэз яке буёлэз ӧз кельшы ке, кулэ-а депутат сое мукетыныз воштыны? Нош кин ке вордскем нуналэзлы чорыг мызь куриз ке? Сыӵе дыръя депутат быгатэ-а вазиськонэз кылымтэ- адӟымтэ улсы кельтыны? Нош ма кароно Маринаен? Кызьы меда таизлы юрттоно? Со кӧня ке пол гожтэ, дышетскыны мылысь-кыдысь тырше шуыса. Малы ке оскыны уг луы. Мукет сямен кызьы валэктод меда янгышъёссэ? Вылысьтыз вылаз ук соос. "Вырости", "социалогия", "не ужели" но озьы азьлань. Ярам, пичигес луысал ке. Нош нылаш школаез йылпумъя ни ук! Я. котькудӥз аслыз сюрес ачиз быръе. Котькудӥз быгатэ коть ООН-э вазиськыны. Но кулэ меда отчы, шуом, бускеледлы ӝожтӥськыса гожтыны? Ойдолэ уртче кенешом депутатлэн асьме улонын интыез сярысь. Витиськом та пумысен верамъёстэс. О. МАРКОВ. Россия Федерацилэн Кун наградаосыныз пусъён сярысь Россия Федерацилэн Президентэзлэн Указэз Ужын вылӥ азинсконъёсыз, калык куспын эшъяськонэз но ӵош ужанэз юнматонын пайдаё тыршемез понна пусъёно: "За заслуги перед Отечеством" орденлэн ИИ степенё медаленыз Ельцова Людмила Андреевнаез - "Глазовский" аракы поттон завод кун предприятиысь ужасез, Удмурт Республика. Сиён-юон поттон удысын вормонъёс басьтэмез но кема аръёс ӵоже сюлмысь тыршемез понна "Россия Федерациысь сиён-юон поттон удысысь дано ужась" сӥлы карон ним сётоно: Брыляков Анатолий Михайловичлы - "Глазовский" аракы поттон завод кун предприятиысь слесарь-наладчиклы, Удмурт Республика. Россия Федерацилэн Президентэз Б. ЕЛЬЦИН. Москва, Кремль. 1999-тӥ арын 30-тӥ декабре. � 1771. Россия Федерацилэн кун наградаосын пусъён сярысь Россия Федерацилэн Президентэзлэн Указэз Нылпиосты дышетон удысын вормонъёс басьтэмез но кема аръёс ӵоже сюлмысь тыршемез понна "Россия Федерациысь дано дышетӥсь" сӥлы карон ним сётоно: Ситникова Тамара Егоровналы - Удмурт Республикаысь Ува ёрос администрациысь дышетон люкетэн кивалтӥсьлы. Шудтэм учыре шедем адмиосты утьыку кышкасьтэм луэмез понна пусъёно: "За спасение погибавших" медален Соболев Константин Михайловичез - акциосын "Удмуртнефть" огазеяськонысь грузчик- стропальщикез, Удмурт Республика. Россия Федерацилэн Президентэз Б. Ельцин. Москва, Кремль. 1999-тӥ ар 22-тӥ декабре. � 1699. Россия Федерацилэн Кун наградаосыныз пусъён сярысь Россия Федерацилэн Президентэзлэн Указэз Кун азьын вормонъёсыз, ужын вылӥ азинсконъёсыз но калыкъёс куспын эшъяськонэз но ӵош ужанэз юнматонын пайдаё тыршемез понна пусъёно: "За заслуги перед Отечеством" орденлэн ИВ степенё медаленыз Фомичев Сергей Мироновичез - акциосын "Телекоммуникационные сети связи Удмуртской Республики" огазеяськонлэсь валтӥсь директорзэ. Связь удысын вормонъёс басьтэмез но кема аръёс ӵоже сюлмысь тыршемез понна "Россия Федерациысь связь удысысь дано ужась" сӥлы карон ним сётоно: Горбунов Александр Ивановичлы - Сарапулысь огазеям электросвязьлэн Каракулиноысь ёзэзлэн кивалтӥсезлы. Вузкарон удысын вормонъёс басьтэмзы но кема аръёс ӵоже сюлмысь тыршемзы понна "Россия Федерациысь вузкарон удысысь дано ужась" сӥлы карон ним сётоно: Вылегжанина Татьяна Ефимовналы - Удмурт Республикаысь Алнаш ёрос потребобществолэн кенешезлэн кивалтӥсезлы, Залялиев Ильдус Ханифулловичлы - Удмурт Республикаысь Ижевск потребобществолэн кенешезлэн кивалтӥсезлы. Лэсьтӥськон удысын вормонъёс басьтэмез но трос аръёс ӵоже сюлмысь тыршемез понна "Россия Федерациысь дано лэсьтӥськись" сӥлы карон ним сётоно: Прасолов Алексей Михайловичлы - Лэсьтӥськонъя 18 номеро управленилэн кивалтӥсезлы, Удмурт Республика. Россия Федерацилэн Президентэз Б. Ельцин. Москва, Кремль. 1999-тӥ арын 27-тӥ декабре. � 1716. ЖУРНАЛИСТЪЁСЫН ПУМИСЬКОНЪЁС "Единство" - со Путин ӧвӧл на", - шуиз журналистъёслы та политической огазеяськонлэн Удмуртиысь ёзэзлэн огдырлы тупатэм кивалтӥсез Виктор Хорошавцев. Та ужлэсь соали палэнскыны малпа, но "Единствоысь" ("Медведьысь") уг поты. - Москва ласянь мон юнматэмын Владимир Путинэз Россилы Президентэ кандидатэ дасянъя инициативной группае, - шуиз В.Г.Хорошавцев. - Татчы пыро Татарстанлэн президентэз Шаймиев, Чубайс но музон тодмо нимъёс, соос быръемын котькуд регионысь. Ваньмыз 197 мурт. 110 адями, соос пӧлын мон но, юнматэмын Удмурт Республикая уполномоченное. Путин понна люканы кулэ 30-35 сюрс подпись. "Единстволэн" бадӟым осконэз, вуоно быръёнъёсын та кандидатура тырмыт куара люканы быгатоз шуыса. 23-тӥ январе республикаямы ортчоз та огазеяськонэ пыремъёслэн кенешсы, отын соос асьсэлы выль кивалтӥсь быръёзы. Конференцие чакламъя вуыны кулэ ог 800 делегат, солэн ужаз пыриськозы Кун Думалэн выль быръем депутатъёсыз но. Пусъём на, "Медведь" кылем быръёнъёсын асьме республикаын вормисе ке но потӥз, Удмуртилэсь представителез Кун Думаын ӧвӧл. Журналистъёс В.Г.Хорошавцевлы вазиськизы пӧртэм юанъёсын. Огез соос пӧлысь "Единствоез" но Путинлэсь нимзэс огазеяса валан. Ватонэз ӧвӧл, тросэз адямиос самой та адямилы синмаськыса куаразэс сётӥзы вал вылӥ верам огазеяськон понна. Та юанлы пумит Хорошавцев шуиз: - "Единство" - со Путин ӧвӧл на, нош Путин - "Единство" ӧвӧл. Зэм, премьер дыръяз со милемлы дурбасьтэмзэ возьматӥз. Но ми - быдэсак со палан. - Кин кивалтэ Москваын та огазеяськонлэн штабеныз? - Кивалтӥсез ӧвӧл на, воштӥсьёсыз вань. Матысь дыре солэсь нимзэ тодом, дыр. - Политикалэн аренаяз ӧй ке потысал туала кандидатлэн фамилиез, кинэ тӥ бырйысалды Россилы Президентэ? - Евгений Примаковез. Мӧйы ке но, та кивалтӥсьлэн туж бадӟым улон но ужан опытэз. Л.Медведева. ДАРТ Мынам песятае Мынам тятяе Федоров Парамон Федорович вордскемын 1927-тӥ арын. Армие басьтӥллям 1944-тӥ арын. 7 ар отын служить карем со. Оломае но адӟоно луэм. Тятя милемлы олокыӵе но учыръёс вералля. Тани одӥгез. Ӵош служить карись эшъёсыныз мынэ вылэм со кыӵе ке но уже. Шедьтӥллям бадӟым снаряд. Сое, пуштытыны нуыкузы, тятя канжаськыса усьыса кылем. Нош эшъёсыз снарядэз командирзы доры вуттӥллям но солы ӝутыса возьматыкузы вормытэк уськытӥллям. Снаряд пуштэм. Озьы сизьым адями бырем. Канжаськыса кылеменыз тятяе кулонлэсь утиськем. Куддыр улонын канжаськылонъёс но туж кулэ шуо. Озьы ик вань. Лена Федорова, 10 класс. Бобья-Уча школа. Пичи Пурга ёрос. Дарт "Мынам гуртэ кызь одӥгетӥ дауре" Одӥг даурысь мукет дауре выжон малпаськонэ уськытэ, кыӵе ке оскон но кылдэ: оло, вылез даур ӟечгес улон ваёз? Кияса ёросысь Вуж-Салья шор-ёзо школаысь ӟуч кылъя но литературая дышетӥсь урокъёсаз нылпиос азе но таӵе юанъёс пуктэ. Тани 7-тӥ классын дышетскисьёс гожтӥзы "Мынам гуртэ кызь одӥгетӥ дауре" сочинение. Кыкеныз ужен тӥледды но тодматӥськом. "Мынам гуртэ кызь одӥгетӥ дауре" Малпасько: кызь одӥгетӥ дауре милям гуртмы трослы воштӥськоз. Нырысь ик, вужез нылпи сад интые пуктозы выльзэ. нылпиос туж шумпотозы. Та ужрадлы сӥзьыса, воспитательёс праздник ортчытозы. Кыкетӥез. Учёнойёс малпалозы юонлы пумит эмъюм. Гуртысьтымы вань юисьёс соку йӧназ атайёс луозы, асьсэлэн улонэнызы кузёяськозы. Куинетӥез. Уз луэ ни лушкаськисьёс, малы ке шуоно, ваньмыз тырмыт луоз. Магазинын вузъёс дунтэмалозы, уждун но дыраз сётъялозы. Гурт шорын луоз бадӟым зверинец. Отын улозы кузётэм лулосъёс (животнойёс). Кинлэн мылыз потэ, соосты асьсэ доры басьтыны быгатозы. Макем умой улон луысал гуртамы, та малпанъёс быдэсмысалзы ке. Ваньмыз ке ӧвӧл, кӧняез ке коть. Геннадий Самакеев. *** Ваньмы умой улыны кутскомы, дыр. Анай-атайёсмы котькуд толэзе басьтозы уждун, нылпи компенсация, песянай-песятайёслы пенсия тырозы. Магазинъёсын вузъёс дунтэмесь луозы. Гуртамы сюресъёс туж уродэсь, зоро сӥзьыл куазен пыдын но дэрие выёд. Кызь одӥгетӥ дауре гуртамы асфальт сюресъёс луозы, соослэн урдсазы будозы писпуос. Нош гуртлэн шораз ик сылоз спортзалэн вӧл-вӧл культура юрт. Вань мылкыд карисьёс ӝытъёсы отын шутэтскозы, спортэн вырозы. Магазинъёсын уз вузалэ кудӟытӥсь юонъёс. Вань мылкыд карисьёс ужалозы, котькуд коркан луоз газ. Гуртамы выль школа пуктозы. Со быдэсак луоз пиялалэсь, бадӟым спортзалэн но бассейнэн, классъёс вӧл-вӧлэсь но югытэсь. Ужалозы пӧртэм кружокъёс, котькуд дышетскись бырйысал сюлэмызлы кельшисьсэ. Огъя вераса, адямиос луозы лякыт сямоесь, визьмоесь, ужасесь но чебересь. Снежана Лесова. Удмурт Республикаысь Кун Кенеше быръёнъя 73 номеро Дэбес ёрос округъя ватсаса депутат быръён сярысь ивортон Удмурт Республикаысь Кун Кенеше быръёнъя 73 номеро Дэбес ёрос округъя депутат С. К. Смирнова ужзэ дырызлэсь вазь быдэсъямысь дугдэмен, Удмурт Республикаысь Быръёнъя комиссилэн 2000-тӥ арын 11-тӥ январе юнматэм 120.3 номеро постановлениеныз чакламын та округын туэ 26-тӥ мартэ ватсаса быръёнъёс ортчытыны. Удмурт Республикаысь Кун Кенеше 73 номеро Дэбес ёрос округъя ватсаса депутат быръёнъя округъёсысь комиссилэсь полномочиоссэ быдэсъялоз Дэбес ёросысь быръёнъя комиссия. Быръёнъёс азьын валтӥсь ужрадъёсты ортчытон дыр: - депутатэ кандидатъёсты ӵектон, гожтӥськемъёс люкан мыноз быръёнъя 73 номеро Дэбес ёрос округлэсь гожъёссэ (схемазэ) газетъёсын печатлам нуналысен туэ 24-тӥ февралёзь; - депутатэ кандидатъёсты пусъён понна документъёсты ёросысь быръёнъя комиссие вуттоно туэ 24-тӥ февралёзь, 24.00 часлэсь бере кыльытэк; - депутатэ кандидатъёсты пусъёно туэ 29-тӥ февралёзь; - валэктон уж нуоно пусъем нуналысен туэ 24-тӥ мартозь, 24.00 часлэсь бере кыльытэк; - улосвылъёсысь быръёнъя комиссиосын дырызлэсь вазь куара сётон мыноз туэ 11-тӥ мартысен 22-тӥ мартозь. - участокъёсысь быръёнъя комиссиосын дырызлэсь вазь куара сётон мыноз туэ 23-тӥ мартысен 25-тӥ мартозь. Удмурт Республикаысь Быръёнъя комиссия. *** Удмурт Республикаысь Кун Кенеше депутатъёсты быръёнъёсъя округъёслэн гожъёссы (юнматэмын Удмурт Республикалэн 1999-тӥ арын 28-тӥ январе 721-1 номеро Законэныз). Быръёнъя 73 номеро Дэбес ёрос округ (центрез - Дэбес черкогурт, ёрос администрацилэн юртэз, бырйисьёслэн лыдзы - 12.379). Округе пыро: Дэбес ёросысь вань гуртъёс но Шаркан ёросысь Кыква, Сюрсовай, Сурон, Вортча сельсоветъёсысь гуртъёс. 2000-тӥ ар Тодмо дауръёс, аръёс, нуналъёс 1100 ар талэсь азьвыл (9-тӥ даур) Шунды ӝужанысь славянъёс Днепр шур но Ильмень ты котырын аспӧртэм кун кылдытӥзы. 1055 ар талэсь азьвыл (945-тӥ-969-тӥ аръёс) Киевын кивалтыны кутскиз князь кышно Ольга (картсэ Игорь князез тушмонъёсыз вием бере). 1035 ар талэсь азьвыл (965-тӥ) Святослав князь пазьгиз Улӥ Волгаысь Хазар кунэз, эскерыны ӧдъяз Волга - Каспий вузкарон сюресэз. 1020 ар талэсь азьвыл (980-тӥ - 1015-тӥ) Киевын кивалтӥз Владимир И Святославич. Киевын вашкала (языческой) инмаръёсын пантеон юнматэмын. 1015 ар талэсь азьвыл (985-тӥ) Владимир князь ожен урдскиз Волга дурысь болгаръёс (бигеръёс) вылэ. 1010 ар талэсь азьвыл (990-тӥ) Киевын лэсьтэмын Успенье черк. 990 ар талэсь азьвыл (1010-тӥ) Кылдытэмын "Повесть временных лет" летопись. 985 ар талэсь азьвыл (1015-тӥ) Владимир И-лэн пиосыз ожмаськыны кутскизы быдӟым князьлэн интыез понна. 970 ар талэсь азьвыл (1030-тӥ-1035-тӥ) Черниговын лэсьто Спасо-Преображенье соборез. 955 ар талэсь азьвыл (1045-тӥ-1050-тӥ) Новгородын лэсьтӥзы София соборез. 950 ар талэсь азьло (1050-тӥ ар котырын) Иларион монах гожтӥз "Слово о законе и благодати" ужзэ. - Огъя черклэсь палэнскем мурт (отшельник) Антоний Киевын усьтӥз Печёра черк. 875 ар талэсь азьвыл (1125-тӥ-1132-тӥ) Киевын кивалтӥз Мстислав Владимирович. - Ростов-Суздаль музъем вылын кивалтыны кутскиз Юрий Владимирович (Долгорукий). 865 ар талэсь азьвыл (1135-тӥ-1136-тӥ) Новгородын бугыръяськон пуромиз. Кенеш пуктэмъя Всеволод Мстиславович князез уллязы. Кылдӥз "бояръёслэн республиказы". 845 ар талэсь азьвыл (1155-тӥ-1157-тӥ) Киевын кивалтӥз Юрий Долгорукий. - Князь Андрей Юрьевич (Боголюбский) Киевысь кошкиз Ростов-Суздаль музъем вылэ. 830 ар талэсь азьвыл (1170-тӥ) Суздальёс новгородъёсын ожмаськизы но пезьдэт басьтӥзы. 815 ар талэсь азьвыл (1185-тӥ) Новгород-Северскойысь князь Игорь Святославич половецъёс вылэ урдскиз но пезьдэт басьтӥз. Со вылысь гожтэмын "Слово о полку Игореве". 810 ар талэсь азьвыл (1190-тӥ) Новгород немецъёсын гожтӥз вузкарон сярысь огкылъёс (договоръёс). 770 ар талэсь азьвыл (1230-тӥ-1243-тӥ) Новгородын кивалтӥз Степан Твердиславич - Владимирлы дурбасьтӥсь. 760 ар талэсь азьвыл (1240-тӥ - 1241-тӥ) Ливон орденысь ожгарчиос (рыцарьёс) киултӥзы Изборскез, Псковез, Копорьеез. - Сентябре-декабре Батыйлэн ожгарчиосыз Киевез котыртӥзы но басьтӥзы. Кылдӥз Зарни Орда нимо кун. - 15-тӥ июле пуромиз Нева дурын ожмаськон. Александр Ярославич (Невский) князьлэн ожгарчиосыз пазьгизы Биргер шведлэсь войскооссэ. 750 ар талэсь азьвыл (1250-тӥ) Монгол-бигеръёс Русьысь калыкез лыдъязы, выт (налог) басьтонэз умойгес радъян вылысь. 715 ар талэсь азьвыл (1285-тӥ-1318-тӥ) Тверьын кивалтӥз Михаил Ярославич. 685 ар талэсь азьвыл (1315-тӥ) Тверьысь князь Михаил Ярославич Тверскийлэн но Ордалэн ожгарчиоссы Новгород вылэ урдскизы но сое возьмасьёсты Торжок дорын пазьгизы. 675 ар талэсь азьвыл (1325-тӥ) Тверьысь князь Дмитрий Тверский Ордаысен вииз князез Юрий Московскиез. Ордаысь хан Узбек косэмъя Дмитрий Тверскиез ассэ быдтӥзы. - Москваын кивалтыны кутскиз Иван И Данилович Калита. 660 ар талэсь азьвыл (1340-тӥ-1353-тӥ) Сергий Радонежский лэсьтӥз Троице-Сергиев монастырез. 625 ар талэсь азьвыл (1375-тӥ) Князь Дмитрий Иванович урдскиз Тверь вылэ. Тверь куштӥськиз Владимирен кузёяськыны турттонлэсь. 620 ар талэсь азьвыл (1380-тӥ) 8-тӥ сентябре пуромиз Куликово бусыын ожмаськон. Дмитрий Иванович (Донской) кивалтэм улсын ӟуч ожгарчиос пазьгизы Ордаысь Мамайлэсь войскозэ. 605 ар талэсь азьвыл (1395-тӥ) Тимурлэн (Тамерланлэн) ожгарчиосыз пазьгизы Зарни Ордаез, тарказы Русьлэсь музъемъёссэ, куашкатӥзы Елецез. - Владимирысь инмар мумылэн мудорез нуэмын Москвае. - Смоленск сюриз Литва улэ. 600 ар талэсь азьвыл (1400-тӥ-1425-тӥ) Тверьын кивалтӥз князь Иван Михайлович. - Коми музъемъёс огазеямын Москва борды. - Андрей Рублёв суреданы кутскиз Троице-Сергиев монастырьысь Троицкой соборлы "Троица" мудорез. 590 ар талэсь азьвыл (1410-тӥ) - 15-тӥ июле Польшаысь, Литваысь но Русьысь ожгарчиос пазьгизы Тевтон орденлэсь рыцарьёссэ. 580 ар талэсь азьвыл (1420-тӥ) Новгородын коньдон дурыны кутскизы. 575 ар талэсь азьвыл (1425-тӥ) Москваын кивалтыны кутскиз Василий ИИ Васильевич (Тёмный). - Москва княжествоын вожвылъяськон пуромиз. - Тверьын кивалтыны кутскиз Борис Александрович. 560 ар талэсь азьвыл (1440-тӥ) Литва эрик сётӥз Псковлы. 550 ар талэсь азьвыл (1450-тӥ) Москваын кивалтон понна нюръяськонын Дмитрий Шемякалы пезьдэт сётэмын (кулӥз 1453- тӥ арын). - Крестьянъёсты алӥзы улон интызэс вошъяны. 545 ар талэсь азьвыл (1455-тӥ) Ордаысь ожгарчиос Саид Ахмат кивалтэм улсын Русь вылэ урдскизы но Коломна дорын Москвалэсь пезьдэт басьтӥзы. Саид Ахмат пегӟиз Литвае. 530 ар талэсь азьвыл (1470-тӥ) Новгородэ вуизы жидъяськись еретикъёс, соос Христосэз инмарен ӧз лыдъялэ. 525 ар талэсь азьвыл (1475-тӥ-1479-тӥ) Москваысь Кремльын излэсь лэсьто Успенье соборез (архитекторез Аристотель Фиорованти). 520 ар талэсь азьвыл (1480-тӥ) Хан Ахмат урдскиз Москва вылэ. Ордалэн но Русьлэн ожгарчиоссы сылӥзы Угра шур дурын. Ахмат чигназ. Ӟуч кун мозмиз Ордалэн зӥбетэз улысь. 515 ар талэсь азьвыл (1485-тӥ-1489-тӥ) Италиысь масьтёръёс лэсьтӥзы Москваысь Крмльлэсь кирпич борддоръёссэ но башняоссэ. 510 ар талэсь азьвыл (1490-тӥ) Черклэн собораз (кенешаз) умойтэмен лыдъязы жидъяськись еретикъёсты. 500 ар талэсь азьвыл (1500-тӥ) Кылдытэмын Владимирысь князьёс сярысь мадён. Со валэктӥз: кивалтӥсь выжы (Рюриковичъёс) потэмын Римысь император Август бордысь. 495 ар талэсь азьвыл (1505-тӥ-1533-тӥ) Кивалтӥз Василий ИИИ. - Алаиз Новый пуктэ Кремльысь Архангел соборез но юнматэм борддоръёсты. 490 ар талэсь азьвыл (1510-тӥ) Псков огазеямын Москва борды. - Псковысь Елеазар монастырьысь монах Филофей быдӟым князьлы Василий ИИ-лы гожтэт ыстӥз но Москваез куинетӥ Римен лыдъяны дэмлаз. 465 ар талэсь азьвыл (1535-тӥ) Ӟуч кунын йылпумъямын коньдон поттон ёзнэтэз (системаез) кылдытон. 450 ар талэсь азьвыл (1550-тӥ) Печатламын Иван ИВ-лэн судебникез. - Кылдытэмын стрелецъёслэн войскозы. 445 ар талэсь азьвыл (1555-тӥ) Англиын кылдытэмын Москваен (Ӟуч кунэн) вузкарон компания. - Сибирьысь хан ассэ лыдъяз Москва улэ сюремен. - Выльдэмын интыын кивалтон но выт (налог) басьтонэн кивалтон. - Москваысь Горд карлудын (Красной площадьын) лэсьтыны кутскемын Покров собор - Василий Блаженныйлэн храмез. 420 ар талэсь азьло (1580-тӥ) Январе черклэн соборез (кенешез) пуктӥз музъемен кузёяськонзэ пичиятыны. 410 ар талэсь азьвыл (1590-тӥ-1593-тӥ) Мынэ Швециен тылож (война). Ӟуч кунлы берыктэмын Иван-город, Ям, Копорье. 395 ар талэсь азьвыл (1605-тӥ-1606-тӥ) Игнатий вал патриарх. 390 ар талэсь азьвыл (1610-тӥ) Речь Посполитаысь (Польшаысь) Сигизмунд ИИИ королен огкыл гожтэмын ӟуч престолэ солэсь Владислав пизэ пуктон сярысь. - Сизьым бояръёс кузёясько Мстиславский князь кивалтэм улсын. - Сентябре Польшаысь ожгарчиос пыризы Москвае. 370 ар талэсь азьвыл (1630-тӥ-1632-тӥ) Выльдэмын ожмаськон удысэз радъян. Кылдытэмын музон музъемъёсысь адямиослэсь полкъёс. 365 ар талэсь азьвыл (1635-тӥ-1638-тӥ) Россилэн лымшораз пуктылэмын крепостьёс. 360 ар талэсь азьвыл (1640-тӥ-1659-тӥ) Иосиф вал патриарх. 355 ар талэсь азьвыл (1645-тӥ-1676-тӥ) Алексей Михайлович эксэй вал. 350 ар талэсь азьвыл (1650-тӥ) Пуромизы Псковын но Новгородын бугыръяськонъёс. - Москваын кылдытэмын черкын воштӥськонъёс ортчытон понна кружок. 330 ар талэсь азьвыл (1670-тӥ-1671-тӥ) С. Т. Разин кивалтэм улсын пуроме крестьянъёслэсь но казакъёслэн бугыръяськонзы. Степан Разин виемын 1671-тӥ арын 26-тӥ мае. 310 ар талэсь азьвыл (1690-тӥ-1700-тӥ) Адриан вал патриарх. 305 ар талэсь азьвыл (1695-тӥ) Петр И Азов вылэ урдскиз (1696-тӥ арын сое басьтӥз). 300 ар талэсь азьвыл (1700-тӥ) 1-тӥ январе Аръёсты выль сямен лыдъяны кутскемын ("Юлиан календарь"). - 13-тӥ июле Константинопольын гожтэмын Турциен тупан сярысь огкыл. - Россия ожмаськиз Швециен. - Кулӥз патриарх Андриан. Стефан Яворский юнматэмын митрополитэ. 295 ар талэсь азьвыл (1705-тӥ-1706-тӥ) Эксэйлэн туш но ӟуч дӥськут нуллыны алӥсь указэз потэм бере, Астраханьын улӥсьёс бугыръяськизы, бордазы огазеяськизы стрелецъёс. Соосты зӥбиз Б. П. Шереметев. - 1705-тӥ -1711-тӥ аръёсы бугыръяськизы башкиръёс. 290 ар талэсь азьвыл (1710-тӥ) Шведъёс улысь басьтэмын Рига, Ревель, Выборг. - Ортчытэмын калыкез выт басьтонъя гожъян. - Швециысен Турцие пегӟем король Карл ИИ лӧпкытэмъя, Турция ожен урдскиз Россия вылэ. 280 ар талэсь азьвыл (1720-тӥ) 28-тӥ июне ӟуч флот Гренгам шормуӵ дорын вормиз Швецилэсь эскадразэ. - 1720-тӥ-1737-тӥ аръёсы В. Н. Татищев кылдытэ Россилэсь вашкала дырысен историзэ. 275 ар талэсь азьвыл (1725-тӥ) 28-тӥ январе кулӥз Петр И. Кузёяськон понна нюръяськизы Меншиковлы но Долгорукийлы дурбасьтӥсьёс. Меншиков юрттэмъя, Екатерина И луиз эксэй. Со кивалтӥз 1727-тӥ арозь. - Июле Петр И-лэн Анна нылыз бызиз Карл Фридрих герцоглы. - В. Беринг кивалтӥз Камчаткае нырысьсэ мынонэн. 270 ар талэсь азьвыл (1730-тӥ) Январе ӟуч престолэ пуктэмын кулэм Курляндский герцоглэн кышноез, Иван В эксэйлэн нылыз Анна Ивановна. Со кивалтӥз 1740-тӥ арозь. Биронлы дурбасьтӥсьёс Долгорукийёсты кузёяськонысь палэнтӥзы. - Россия кие выжиз Казахстанлэн уй палыз. 265 ар талэсь азьвыл (1735-тӥ-1739-тӥ) Мынӥзы Россия но Турция куспын ожмаськонъёс. 260 ар талэсь азьвыл (1740-тӥ) 17-тӥ октябре кулӥз Анна Ивановна. Престолэ пуктэмын Иван ИВ Антонович, 1740-тӥ арын ик 2-тӥ августэ вордскем маке. Солэсь ужзэ быдэсъясе (регентэ) юнматэмын Бирон. - 8-тӥ ноябре Бирон сэрпалтэмын. Регент каремын Анна Леопольдовна. 250 ар талэсь азьвыл (1750-тӥ) Украиналы гетманэ пуктэмын граф К. Г. Разумовский. 240 ар талэсь азьвыл (1760-тӥ) 28-тӥ сентябре ӟуч ожгарчиос басьтӥзы Берлинэз. 235 ар талэсь азьвыл (1765-тӥ) Поттэмын помещикъёслы крестьянъёссэс Сибире келяны право сётон сярысь указ. 230 ар талэсь азьвыл (1770-тӥ) 26-тӥ июле Турциен ожмаськонын ӟуч флот вормон басьтӥз Чесма дорын. Июле П. А. Румянцев кивалтэм улсын ӟуч ожгарчиос вормон басьтӥзы Ларга но Кагум дорын. Декабре ӟуч ожгарчиос басьтӥзы Аккерманэз но Бухарестэз. 225 ар талэсь азьвыл (1775-тӥ) 10-тӥ январе Е. И. Пугачёв Москваын виемын. - Печатламын Россия империысь губерниосын кивалтонъя валэктон. Россия люкемын 51 губернилы. 210 ар талэсь азьвыл (1790-тӥ) - Мартэ ӟуч ожгарчиос Финляндиын ожмаськонын кӧня ке пол пезьдэт басьязы. - 8-тӥ мартэ Россия но Швеция тупанкыл (мир) гожтӥзы. - 28-тӥ августэ Ф.Ф.Ушаков кивалтэм улсын ӟуч флон Турцилэсь флотсэ вормиз Тендра дорын. - Екатерина ИИ юнматӥз революция пуромем Франциысь вань ӟучъёсты доразы берыктон сярысь указ. - 11-тӥ декабре А.В.Суворов кивалтэм улсын ӟуч ожгарчиос басьтӥзы Измаилэз. 205 ар талэсь азьвыл (1795-тӥ) 13-тӥ октябре Россия, Австрия но Пруссия Петербургын юнматӥзы Польшаез куинетӥзэ люкон сярысь конвенция. Россие выжизы Литва, Курляндия, Западной Белоруссия но Западной Украина. 195 ар талэсь азьвыл (1805-тӥ) - Усьтӥськиз Харьковысь университет. - Москваын кылдӥз инкуазез эскеронъя огазеяськон. - Карабах но Ширван огазеямын Россиен. - Россия пыриськиз Францилы пумит войнае. - 20-тӥ ноябре Россилэн но Австрилэн ожгарчиоссы Аустерлиц дорын ожмаськонын французъёслэсь пезьдэт басьтӥзы. - Аляскаын но Калифорниын ӟуч фортъёс лэсьтыны кутскемын. 190 ар талэсь азьвыл (1810-тӥ) 1-тӥ январе Россиын кылдытэмын Кун кенеш. - Абхазия огазеямын Россиен. 185 ар талэсь азьвыл (1815-тӥ) Россиын лэсьтэмын нырысетӥ пароход. - Июне Венаын конгрессын гожтэмын йылпумъян документъёс. Варшава герцогство люкемын Россия, Австрия но Пруссия куспын. - 14-тӥ (26-тӥ) сентябре ӟуч эксэй Александр И, Австрилэн эксэез Франц И но Пруссилэн королез Фридрих Вильгельм ИИИ гожтӥзы Священный союз кылдытон сярысь акт (берлогес таос борды огазеяськизы Европаысь ваньмыз сямен монархиос). - 8-тӥ (20-тӥ) ноябре Парижын гожтэмын тупан сярысь огкыл (договор), соя Франциын 5 ар ӵоже улыны кулэ вормисьёс (огкыл кужымзэ ыштӥз вазьгес, 1818-тӥ арын). - 27-тӥ ноябре экцэй Александр И Польшалы кузьмаз конституция. 180 ар талэсь азьвыл (1820-тӥ) Семеновской полкын бугыръяськон (восстание) пуромиз. 175 ар талэсь азьвыл (1825-тӥ) Россиын кивалтыны кутскиз эксэй Николай И (кузёяськиз 30 ар - 1855-тӥ арозь). - 14-тӥ декабре бугырскиз Петербургысь декабристъёслэн огазеяськонзы. - 29-тӥ декабре бугырскиз Черниговысь полк. 170 ар талэсь азьвыл (1830-тӥ) Польшаын бугыръяськон куромиз. - Холера вӧлмемен гомӟизы бугыръяськонъёс. - Москваын ужаны кутскиз А.И.Герценлэн но Н.П.Огаревлэн кружоксы (1834-тӥ арозь). - Москваын ужаны кутскиз Н.В.Станкевичлэн кружокез (1837-тӥ арозь). 165 ар талэсь азьвыл (1835-тӥ) - Кутэмын фабрикаосъя нырысетӥ закон. - Кутэмын университетъёсъя выль устав. Соослэн эриксы пичиятэмын. 160 ар талэсь азьвыл (1840-тӥ) Кунысь крестьянъёс бугыръяськизы картошкаен сэрен. - Воштэмын Литвалэн статусэз, отысь губерниосын кутӥськыны кутскизы Россиысь огъя а ар талэсь азьвыл (1845-тӥ) Петербургын ужаны кутскиз М.В.Петрашевскийлэн социализмез эскеронъя кружокез (1849-тӥ арозь). - Киевын ужаны кутскиз политикая лушкем организация - Кириллэн но Мефодийлэн обществозы, со нюръяськиз крестьянъёсты мозмытон но славянъёсты огазеян понна. 145 ар талэсь азьвыл (1855-тӥ) Россиын кивалтыны кутскиз эксэй Александр ИИ (1881-тӥ арозь). 16-тӥ ноябре ӟуч ожгарчиос Н.Н.Муравьев кивалтэм улсын басьтӥзы Кавказ сьӧрысь Карс карез. 140 ар талэсь азьвыл (1860-тӥ) Кылдытэмын Россиысь кун банк. - Инъямын Владивосток. - 2-тӥ ноябре Пекинын гожтэмын Россия но Китай куспын огкыл (трактат). Россилы сётэмын Уссури край. Ӟуч вузчиослы сюрес усьтэмын Пекинэ, Ургае, Кантонэ, Кашгаре. 135 ар талэсь азьвыл (1865-тӥ) Кутэмын печать сярысь огдырлы куронъёс (правилоос). - Одессаын инъямын университет. 130 ар талэсь азьвыл (1870-тӥ) 22-тӥ апреле вордскиз В.И.Ленин. - 19-тӥ октябре мукет кунъёсын ужанъя министр А.М.Горчаков лэсьтӥз Парижын 1856- тӥ арын гожтэм тупан сярысь огкыллэсь куштӥськем сярысь циркуляр, Россиез Сьӧд зарезь вылын табере ӧз шымыртэ ни. - Н.М.Пржевальский радъяз Азие экспедиция. 125 ар талэсь азьвыл (1875-тӥ) 25-тӥ апреле Петербургын гожтэмын Япониен огкыл. Соя Сахалин шормуӵ сётӥське Россилы, нош Курилысь 18 шормуӵъёс - Японилы. 120 ар талэсь азьвыл (1880-тӥ) 5-тӥ феврале Зимний дворецын С.Н.Халтурин радъяз пуштонэз, Александр ИИ эксэез виён вылысь. 115 ар талэсь азьвыл (1885-тӥ) Орехово-Зуевоысь Морозовлэн фабрикаяз улӟиз бугыръяськон. - Кылдытэмын дворянъёслэн музъемъя банксы. - Июне кутэмын кышноосты но пиналъёсты уин ужатыны лэзёнтэм сярысь закон. - 29-тӥ августэ Англия но Россия юнматӥзы Россия но Афганистан вискысь кунгож сярысь протокол. 105 ар талэсь азьвыл (1895-тӥ) Марксистъёслэн Петербургысь кружокъёссы огазеяськизы В.И.Ленинлэн союзаз. 100 ар талэсь азьвыл (1900-тӥ) Россия пыриськиз Китайын бугыръяськонъёсты зӥбонэ. 20-ТӤ ДАУР. Январь 95 ар талэсь азьвыл (1905-тӥ) 3-тӥ январе Петербургын Путилов заводын бугыръяськон пуромиз. 9-тӥ январь - виро арня нунал. Солдатъёс ыбылӥзы эксэй доры куронъёсын мынӥсь калык шоры. Кутскиз нырысетӥ ӟуч революция. 80 ар талэсь азьвыл (1920-тӥ) 4-тӥ январе А.В.Колчак вылӥ властез сётӥз А.И.Деникинлы. Январе Горд Армия тӧдьыослы пумит наступление выжиз. 70 ар талэсь азьвыл (1930-тӥ) 1-тӥ январе ВКП(б)-лэн шор (центральной) комитетэз кутӥз колхозъёс кылдытонэз ӝогомытон сярысь постановление. 30-тӥ январе ВКП(б)-лэн шор комитетэз кутӥз кулак хозяйствоосты быдтон сярысь постановление. Со сюрес усьтӥз ваньбурез таланлы но адямиосты калыктэм интыосы келянлы. 65 ар талэсь азьвыл (1935-тӥ) 5-тӥ январе кутскиз "Москваысь центр" шуон организацие пырисьёсты судъян. Соосты янгыше уськытӥзы С.М.Кировез виыны дасяськемзы понна. 55 ар талэсь азьвыл (1945-тӥ) Патриарх луиз Алексий (кивалтӥз 1970-тӥ арозь). 17-тӥ январе асьмелэн но Польшалэн ожгарчиоссы мозмытӥзы Варшаваез. 20-тӥ январе СССР, Англия но США гожтӥзы Венгриен тупанкыл. Январе пуромиз Германиен Висла но Одер дорын ожмаськон. 50 ар талэсь азьвыл (1950-тӥ) 12-тӥ январе выльысь виылыны лэземын "шпионъёсты, вузаськисьёсты но диверсантъёсты". 45 ар талэсь азьвыл (1955-тӥ) 25-тӥ январе СССР-ысь Вылӥ Советлэн Президиумез кутӥз Совето Союз но Германия куспын война югдурез быдтон сярысь указ. 35 ар талэсь азьвыл (1965-тӥ) Январе воштэмын инмарлы оскисьёсты суд ласянь кыл кутытон сярысь актъёс. 30 ар талэсь азьвыл (1970-тӥ) 15-тӥ январе лыдъямын СССР-ысь калык - 241 миллион 700 сюрс пала. 20-тӥ январь ялэмын СССР-лэн Европа люкетыз электрокужым сётонъя огъя сӧзнэт (система) кылдытэм сярысь. 10 ар талэсь азьвыл (1990-тӥ) Январе Л.И.Абалкин но Г.А.Явлинский нимаз группаослы люкиськыса ужаны кутскизы рынокен экономикалы проектъёс бордын. - Бакуын армянъёс вылэ урдскылӥзы. Бакуэ пыртэмын СССР-ысь МВД-лэн ожгарчиосыз. Коммунистъёсты кивалтонысь палэнтэм бере, Армения но Азербайджан куспын югдур лэчытомиз. - Кылдытэмын "Демократическая Россия" быръёнъя блок. - Чехословакиен но Венгриен гожтэмын СССР-лэсь ожгарчиоссэ со кунъёсысь поттон сярысь огкыл. 5 ар талэсь азьвыл (1995-тӥ) 1-тӥ январе Россиысь ожгарчиос урдскизы Грозный вылэ. 20-ТӤ ДАУР. Февраль 95 ар талэсь азьвыл (1905-тӥ) 4-тӥ феврале эсер И.Каляев вииз быдӟым князез Сергей Александровичез. 18-тӥ феврале ялэмын порядок тупатон сярысь вылӥ манифест. Правительство ялӥз законъёс кылдытонэ калык пӧлысь быръем муртъёсты кыскон сярысь. 25-тӥ феврале ӟуч ожгарчиос Мукден дорын пезьдэт басьтӥзы. 80 ар талэсь азьвыл (1920) 2-тӥ феврале Тартуын гожтэмын Эстониен тупанкыл. 60 ар талэсь азьвыл (1940-тӥ) 11-тӥ феврале гожтэмын Германиен вузаронъя огкыл. Соя Германие вузъёс келян будӥз. Феврале Горд армия тӥяз финнъёслэсь "Маннергейм гож" шуонзэс, отӥяз басьтӥз Выборгез. 55 ар талэсь азьвыл (1945-тӥ) 4-тӥ феврале Крымысь Ялтае люкаськизы СССР-лэн, Англилэн но США-лэн кивалтӥсьёссы. Соос кенешизы Германиез пазьгон но люкон сярысь, ООН-эз кылдытон сярысь, Европалы эрик сётон сярысь. 13-тӥ феврале мозмытэмын Будапешт. 50 ар талэсь азьвыл (1950-тӥ) 14-тӥ феврале гожтэмын Китаен эшъяськон но ог-огедлы юрттон сярысь огкыл. 45 ар талэсь азьвыл (1955-тӥ) 8-тӥ феврале Г.М.Маленков куштэмын СССР-ысь Министръёслэн Советсылэн тӧроысьтыз. Со интые юнматэмын Н.А.Булганин. 10 ар талэсь азьвыл (1990-тӥ) Феврале Варшавской договорлэн военной организациез быдтэмын. Политика Ужалоз-а, уз-а? Выль быръем Кун Дума нырысетӥ кенешоназ 18-тӥ январе люкаськылӥз. Солэсь ужзэ меӵак эфир пыр возьматӥз Россиысь телевидение. Нырысь-валысь мылкыд кылдӥз вал депутатъёс ӝот-ӝот ужалозы но асьсэлы тӧро кема курадӟытэк быръёзы шуыса. Уго таиз юан Думалэн нырысетӥ ужан нуналаз валтӥсь интыын сылӥз. Но меӵак эфирез учкыса, мылкыд сӧриськиз. Регламентэз кутыса но депутатъёс асьсэос сое трос пол тӥяллязы. Нырысь ужазы комитетъёслэн лыдзы но соосты фракциосъя но группаосъя люкылон бордын. Тужгес тусыкоез ӝыт пал кутскиз. Думалы тӧрое фракциос асьсэлэсь адямиоссэс ӵектӥзы. КПРФ - Геннадий Селезнёвез, "Отечество" - Евгений Примаковез, СПС - тросэзлы тодмотэм Виктор Похмелкинэз, "Яблоко" - Сергей Степашинэз. "Единство", ЛДПР, Регионы России но "Народный депутат" группаос нокинлэсь нимзэ ӧз вералэ. Нырысь вераськиз Селезнёв. Таиз ваньмызлы тодмо. Солы данакез депутатъёс дурбасьтыны соглаш вал. Собере, мукет ӵектэм муртъёсын ӵошатыса, Селезнёв президентлэн командаезлы тужгес но ярасез. Аслаз лякыт сямыныз, быдэсъясь властьлы политика ласянь ляб пумитъяськеменыз, мукетъёссэ бераз кельтэ. Эшшо ке Примаков но Степашин кивалтэмын Россилэн Правительсвоеныз. Нош Похмелкин ассэ кызьы возёз, тодмо ӧвӧл на. Ваньмыз кутскиз Евгений Максимович бордысен. Ассэ куара сётонысь куштыны куриз. Мон, пе, тазьы уг ужа. Выль Думалэн ужан манерез ик ӧз кельшы-а меда Примаковлы? Ӧйтӧд. Оло, мукет но мугез вал. Котькудӥзлэн правоез вань ассэ кытчы ке ӵектыны яке палэнтыны. Соиз озьы. Но таяз учыре юри спектакль дасямын вал: нырысь Примаковез ӵекто: собере соиз быдэс страна азьын тӧро луыны пумит кариське. Нош асмьеос, бырйисьёс, учкиськом: "О-о, кыӵе таид зол сётӥз. Шонер веть лэсьтӥз!" Мукет малпан но кылдэ. Примаков валаз, тырмыт куара уз люка шуыса. Нош политикъёс пӧлысь калык сое тужгес но гажа бере, тӧро ӧз луы ке, юн возьыт потоз ук. Примаков бӧрсьы Думаен кивалтӥсь луыны пумит луизы Похмелкин но, Степашин но. Селезнев огназ кылиз. думаын огыр-бугыр луиз. Ог люкетэзлы ӧз кельшы, Геннадий Николаевичлы пар ӧвӧл шуыса. Мукетъёсыз пумит луизы шара куара сётонлы. Но депутатъёс уно куараен асьсэос решение кутӥзы вал, тӧроез шара быръёзы шуыса. "Отечество" сыӵе вамышез демократиез тӥян шуиз. Озьыен, куаразэс шара сётыны кышказы. Та блокысь депутатъёс тӧро быръёнэ пыриськыны пумит луизы. Озьы ик кенешысь султыса кошкизы "Яблоко", СПС фракциосы, "Регионы России" группае пырись депутатъёс. 410 мурт пӧлысь ужаны 294-ез гинэ кылизы на. Выль Кун Думаысь котькудӥз куинетӥез сямен депутат нырысетӥ нуналаз ик вормытъяськемзэ возьматӥз. Ньыль ар ӵоже ик сыӵе югдур уз кыстӥськы-а? Кызьы со берытскоз Россилы? ОВР но КПРФ быръён дыръя одӥг палангес вал. Нош табере? Мон Евгений Максимовичез туж гажасько вал. Со туж кескич, визьмо дипломат. Но Кун Думаын сыӵе вамыш лэсьтэмез бере, малпанэ воштӥськиз. Кыӵе тӥляд? Алексей Андриянов. Бырйы Дарт "Удмурт дунне", "Мылысь-кыдысь"... Тодэме потэ, туала кырӟасьёс пӧлысь кинэ калык тужгес но яратэ меда? Мыным туж кельше Любовь Быкова. Е. ПЕТУХОВА. 17 арес. "Ингур" радиолэн верамезъя, берло толэзьёссэ кылзӥсьёс ӵемгес курылӥзы таӵе кырӟанъёсты: Нимаз кырӟасьёс 1. Валентина Пудова - "Гажанэ" 2. Пантелей Кузнецов - "Ортчись аръёс" 3. Надежда Уткина - "Яратэ, уг яраты" 4. Любовь Васильева - "Лобӟы, лобӟы, ӟазеге" 5. Михаил Ворончихин - "Яратон сяська" 6. Любовь Быкова - "Выль арен". Группаос 1. "Айкай" - "Эктон гуръёс" 2. "Шулдыр ӝыт" - "Ӟеч луэ" 3. "Италмас" - "Ум люкиське" 4. "Зарни шеп" - "Куно пумитан" 5. "Марӟан" - "Серекъятӥд тон монэ" 6. "Катанчи" - А. Ураськин "Куддыръя". Нош ми, егит лыдӟисьёсмы, лэсьтӥм асьмелэсь хит-парадмес. Кырӟасьёсты сяна тодэммы потӥз на тужгес тунсыко газет-журналэз, передачаез но журналистэз. Таяз толэзе Россиысь пресса аслэсьтыз нуналзэ пусйиз бере, ӵапак дырыз со сярысь тодыны. 70 муртлэсь юалляськыса (юалляськемъёс пӧлын тросгес 17 аресъем егитъёс), тани кызьы радъяськизы нимъёс. Кырӟась 1. Надежда Уткина 2. Любовь Быкова 3. Валентина Пудова Артист 1. Геннадий Бекманов 2. Алексей Ложкин 3. Вероника Садаева Газет-журнал 1. "Удмурт дунне" 2. "Инвожо" 3. "Ӟечбур!" Теле-радиопередача 1. "Мылысь-кыдысь" 2. "Эзь" 3. "Ибырвесь" Журналист 1. Валерий Сидоров 2. Георгий Грязев 3. Алексей Шкляев. Тӥляд яратоно кырӟасьёсты ӧз шедьы милям хитамы? Гожтэ яке жингыртэ редакцие - оло, вуоно толэзе со нырысь чуре шедёз. Возьмалом, дыртэ. Удыс пайда сётэ Алнаш ёросысь Варзи-Ятчи черкогуртысь парсь вордон комплекс одӥгъёсыз бадӟымъёсыз пӧлы пыре вал. Куке-соку отын 400-лэсь уно пудо вордӥзы. Но котьмалы дунъёс чутрак будэмен, парсьёсты арысь аре кулэстӥзы. Валлян арын соос 900 йыр лыдъясько вал. Но миым лыдзэс одӥг но ӝыны поллы будэтӥзы. Али мумы парсьёс 135 лыдъясько. Кылем арын соослэсь 2037 парсьпи басьтэмын. Комплекс сӥльзэ Сарапулысь но Ижевскысь комбинатъёсы келя. Отысь 80-100 сюрс манет "улэп" коньдон вутто. Парсь сюдӥсьёс толэзяз 400 манетлэсь уно уждун басьто. Сёто сое ӝегатонъёстэк. Хозяйство азьланяз пудолэсь лыдзэ йылэтыны чакла. Б.Смирнов. ДАРТ Урод дышетскыны возьдаськоно Тудвулэн шаугетыса кошкемез кадь, ӝог ортчо аръёс. Али гинэ нырысьсэ китӥм кутыса анае школае нуиз. Дас ар ортчиз ини со дырысен, дасэтӥ арзэ пукисько парта сьӧрын. Ноку но уз вуны нырысетӥ дышетӥсе - Муканова Зинаида Васильевна. Со лыдӟиськон- гожъяськон мылкыд пыӵатӥз, улонэз яратыны дышетӥз. Ньылетӥ классэ вамыштӥмы Байтерег школае. Шуныт пумитаз милемды Галина Михайловна Лобанова. Со ик луиз классэнымы кивалтӥсь. Куатетӥ арзэ ветлӥсько ини та школае, куать иськемез лёгаса, озьы но, люкиськем уг поты ни школаен, дышетӥсьёсын, эшъёсын. Шедьтод на меда кытысь ке та шулдыр школа улонэз? Таӵе ик мусо эшъёсты? Луоз на меда азьланьын таӵе ик визьмо но сюлмаськись дышетӥсе? Сайкыт тусбуё, жингрес куараё - со котьку ик ми сярысь сюлмаське, юрттыны тырше. Анаймы музэн вератэк но вала мылкыдэз. Милемын ӵош куректэ алама отметкаосмылы. Быгатэ со милемыз серекъятыны но, мылкыдэз ӝутыны но. Котькыӵе ужрадэ бурдъяса, милемды вормисе поттэ. Кулэ дыръяз Галина Михайловна тышкаськыны но быгатэ. Алама отметкаос басьтыку но солэсь кепырано. Туж шумпотӥсько классысьтымы пиосмы понна но. Соос шаплыесь ке но, пӧлазы йыртэмасьёсыз ӧвӧл. Мынам малпамея, татын но Галина Михайловналэн ӟечез вань, дыр. Котькудӥзлы ик возьыт луыны кулэ сыӵе дышетӥсез ӝоже но возьытэ уськытыны. Физика, алгебра но геометрия - тужгес секыт предметъёс. Но Галина Михайловна предметсэ туж умой валэктыны быгатэ. Сыӵе дышетӥсь сюремысь ми туж шумпотӥськом. Толшоре Галина Михайловна вордӥськем нуналзэ пусйиз. Ӟечкыласьком но кема аръёс ӵоже жадёнэз валатэк ужаны, капчи мылкыдо улыны сӥзиськом. Л.Синицына. Алнаш ёрос, Байтерег школа. Гучыкен-гучыкен Удмурт шаермы минерал вуосын узыр шуыса, котькинлы ик тодмо ни. Кылем арлэн пумаз Ижевскын ортчиз вуосты возьматонъя но эскеронъя конкурс. Солы дунъет сётӥз нимысьтыз комиссия. Отчы пыриськидмурт Республикаысь вузкаронъя инспекциын, госсанэпиднадзорын, Взкаронъя но В узырлыкъёсъя министерствоосын, Госнадзорын ужасьёс. Пӧртэм пумо минерал вузэс ваиллям Кезысь, Уваысь но Можгаысь пищекомбинатъёс, Уваысь "Бахус" огазеяськон, Варзи-Ятчиысьрорт. Уваос возьматӥзы кык пумоомиссия вылӥ дунъет сётӥз "Увинская" нимоезлы мынэ пуш висёнъёсты эмъяны. Н.Сергеев. ДАРТ Усточиос, азьветлӥсьёс Кияса ёросысь Вуж Салья шор ёзо школаысь нылпиос "Родники" огазеяськонэ пыро. Азьло аръёсы татын вань ужъёссэс радъяло вал шудон пыр. ("Игра - дело серьёзное"). Туэ дышетскон арлы школа басьтӥськиз нылпиослы экологияя мургес тодон- валанъёс сётыны, экология ужпумъёс пыр ӟеч сямъёс пыӵатыны. Пионеръёслэн огазеяськонзы но та борды басьтӥськиз. Школаын пӧртэм ужрадъёс, конкурсъёс, шудонъёс инкуазен герӟамын. Котькуд класслэн вань аслаз бордгазетэз. Нош огъя бордгазет поттыны быръемын школаысь усто дышетскисьёс, азьветлӥсьёс. Оля Петрова (6-тӥ класс), Алена Полякова (8-тӥ класс), Миша Барышев (7-тӥ класс), Света Аляшева (7-тӥ класс) вожатоенызы Светлана Федоровна Даниловаен бордгазет лэсьто. Туспуктэмез В. Камашевлэн. Школа но улон Школатэк гурт быроз Ог куамын ар талэсь азьло Чукыр-бекыр школае 12 гуртысь пиналъёс ветло вал. 500 пала люкаськылӥзы. 90 муртлы интернатсы но вал. Котырысь гуртъёсы школаос усьтӥськылэмъя, дышетскисьёслэн лыдзы пумен кулэсмиз. 21 ар школалэн директорез луыса ужа Галина Николаевна Чернова. 1962-тӥ арын, Можгаысь педучилищеез йылпумъямез бере, сое Кизнер ёросэ ысто. Соку Чукыр-бекырын 8 классъем гинэ школазы вал. 1971-тӥ арын шор ёзо каризы... Школалэн кык юртэз. Одӥгаз дышетско, мукетыз буш сылэ. Вужмиз. Соос, кыксы но огвыллемесьгес ини, гурт пушкын сьӧд куакаос кадь адско. Бушез - азьвыл священниклэн коркаез. Черкез но артэ сылэм. Поплэн нимызъя черкогуртэз Васильево нимало - нош удмуртъёс огдышемъя Чукыр-бекыр шуо. Совето власть дыръя вӧсясьлэсь корказэ школа каризы. Али со бекыраны кутскиз ни. Мукетсэ юртэз 1965-тӥ арын выльдӥзы. Директор верамъя, поплэсь корказэ школа котырын буш кылёз шуыса уг сэртто. Дасо аръёс талэсь азьвыл школаез пуэн эсто вал ай. Одӥг толлы гинэ 300 кубометр пала пу дасяллязы. Кык но ӝыны гектар музъемзы вань. Бакча сиён будэтыса, дышетскисьёсты ик сюдыны яра. Но техниказы одӥг но ӧвӧл. Кинэн вераськыны быгато - со ик лыктыса ужа. 1994-тӥ арын Кизнер ёросысь Васильево черкогуртысь шор ёзо школа 100 ар тырмонзэ пусйиз. Нош куинь ар ортчыса, татчы 9 класс гинэ кельтӥзы на. Туэ школаын 40 пинал дышетске. Дышетӥсьёссы 11 кузя. Ӝыныезлэсь ятырезлэн вылӥ дышетскемзы вань. Но куинез гинэ соос пӧлысь асьсэлэсь предметсэс нуо. Отӥосыз мукет удысъёсысь лыктэмын. Кылсярысь, агроном биологиялы но химиялы дышетэ. Класслы быдэ - 6-8 адями. Кызьы шуиз Галина Николаевна, азьпалан школаез пытсан сярысь ужпум пуктӥськоз, дыр. Но районын али буйгатыса уло - школаез ворсаны ум сётэ, пе. Туэ сётэм кыллы но оскыны шуг. Мӧйы дышетӥсьлэн малпамезъя, школаез ворсазы ке, гурт но быроз. Но али сьӧрлось гуртъёсын школа огазеясь инты луэ. Культуралэн шор сюлмыз но татын ик. Туэ нырысетӥ классэ 6-7 адями лыктоз. Вуоно аръёсы но озьы ик луоз. Азьло кызьы вал? Гуртын 5-6 пинал вань ке, одно ик школа усьтылӥзы. Правительстволы кулэ вал дышетскем адямиос. Директор верамъя, секытэз со: куд-огез ӝыны уждунэн ужало. Берло аръёсы дышетон пособие басьтыны дышетӥсьёслы уксё уг висъяло. Кружок нуэмзы понна номыр уг басьто. Ярам ай, пиналъёс ӧжытэн книгаослы уг ёрмо. Выльёссэ басьтыны анай-атайёслэн ӟигарзы ӧй тырмысал. Директор жаляса тодаз вае азьло аръёсты: дышетӥсьёс соку вань кужымзэс ужзылы сӥзё вал. Нош табере котькудӥзлэн аслаз хозяйствоез, семьядэ кызьы ке но вордоно ук. Али ваньмызлы эрик сётэмын. Одӥг ласянь со умой. Аслэсьтыд творчестводэ котькызьы пумаз-йылаз вуттыны луонлык кылдытэмын. Мукет ласянь ке басьтоно - урод. Психологиезъя адями дась ӧвӧл на эрикез уже кутыны. Со ялан возьма, кин вылӥысен вералоз, "улӥе" васькытоз. Дышетӥсьёслэн сюлэмшугъяськонзы одӥг - пиналъёс дышетскыны аналско. 40 дышетскисьёс пӧлысь ӝыныез гинэ "ньыль" но "вить" басьяло. Кытын пиналъёслэн тодэм-валамзы ляб, отын анай-атаёссы нылпиоссэс рос-прос уг эскеро. Государстволы али но, бӧрысь но визьмо адямиос кулэ луозы. Котькыӵе наука дышетэм вылэ пыкъяське. Адямиос лыдӟиськыны, гожъяськыны, малпаськыны ӧз быгатэ ке, кызьы космосэ лобан корабльёс лэсьтом на? Кин ужалоз? Правительстволы нырысь ик саклык висъяны кулэ дышетон удыслы. Россилэн императорез Пётр И выльдӥськонзэ дышетскон бордысен кутскиз. Ленин сюлмаськиз калыклэсь синзэ усьтон понна. Асьмелэн пичи шаерамы Куӟебай Герд удмурт калыксэ сайкатыны турттӥз. Нош табере?.. - Школа туала улон-вылонын пуктэмын сыӵе интые, - вера Галина Николаевна, - ӝоген йӧн-йӧн специалистъёсты но дасяны ум быгатэ. Туннэ ми пиналъёсты гуртын улыны но ужаны гинэ дышетском на. Сыӵе политика нуиське Россиысь Правительство ласянь. А. Андриянов. Туспуктэмъёсыз В. Камашевлэн. Васильево черкогуртысь шор ёзо школалэн юртэз. Галина Николаевна Чернова пиналъёсын. Правительствоысь иворъёс Правительствоын ортчиз городъёсысь но ёросъёсысь администрацослэн кивалтӥсьёсынызы кенеш. Коньдон ужпумъёсъя министр Владимир Бельтюков йылпумъянъёс лэсьтӥз 1999-тӥ арлы бюджетъя. Озьы ик вераськон мынӥз туэ арын городъёслэн но ёросъёслэн бюджетэз быдэстонъя кусыпъёссы сярысь. Та удысын югдур азьло кадьгес ик кылемын: ёросъёслэн поттэм коньдонысьтызы 40 процентэз мыноз бюджет удысын тыршисьёслы уждун тырыны. Министръёсты но администрациослэсь кивалтӥсьёссэ туж сюлэмшугъяськытэ Россиысь Правительстволэн бюджет чотын улӥсьёслы уждунъя пунэмъёсты 15-тӥ апрелёзь тырон сярысь куронэз. Владимир Бельтюков куриз та ужпумез быдэстон борды ӝегатскытэк басьтӥськыны. Кенешлэн пумаз Правительстволэн Тӧроез Николай Ганза но Владимир Бельтюков люкаськемъёслэн юанъёссылы валэктон сётӥзы. Та нуналэ ик йылпумъянъёс лэсьтэмын городъёслэн но ёросъёслэн граждан обороная ужамзылы. Та ужпумъя ивортон лэсьтӥз Правительствоысь Граждан оборона ужпумъёсъя но кышкыт учыръёслэсь утиськонъя комитетлэн кивалтӥсез Тамази Габричидзе. Отын ужасьёс кенеше люкаськемъёсты тодматӥзы та удысын кутӥськись тунсыко арбериосын но та арлы ужрадъёс чаклазы. Удмурт Республикаысь Правительстволэн пресс-службаез. Россия Федерацилы Президент быръёнэз ортчытыны Удмурт Республикалэн улосвылаз кылдытӥськись быръёнъя комиссиос Удмурт Республикаысь Быръёнъя комиссия "Россия Федерациысь Федеральной собранилэн Кун Думаяз депутатъёсты быръён сярысь" Федеральной Законлэн 14-тӥ ёзэтэз вылэ чӧлскыса но республикалэн улосвылаз автоматизацияя "Выборы" ГАС комплекслэсь ужамзэ лыдэ басьтыса, ужпум кутӥз Россия Федерацилы президент быръёнэз ортчытыны Удмурт Республикалэн улосвылаз быръёнъя таӵе комиссиос кылдытыны: - Индустриальной ёросысь быръёнъя комиссия; - Ленин ёросысь быръёнъя комиссия; - Октябрь ёросысь быръёнъя комиссия; - Первомай ёросысь быръёнъя комиссия; - Устинов ёросысь быръёнъя комиссия; - Воткинск городысь быръёнъя комиссия; - Глазов городысь быръёнъя комиссия; - Можга городысь быръёнъя комиссия; - Сарапул городысь быръёнъя комиссия; - Алнаш ёросысь быръёнъя комиссия; - Балезино ёросысь быръёнъя комиссия; - Вавож ёросысь быръёнъя комиссия; - Воткинск ёросысь быръёнъя комиссия; - Глазов ёросысь быръёнъя комиссия; - Грах ёросысь быръёнъя комиссия; - Дэбес ёросысь быръёнъя комиссия; - Завьял ёросысь быръёнъя комиссия; - Игра ёросысь быръёнъя комиссия; - Камбарка ёросысь быръёнъя комиссия; - Каракулино ёросысь быръёнъя комиссия; - Кез ёросысь быръёнъя комиссия; - Кизнер ёросысь быръёнъя комиссия; - Киясово ёросысь быръёнъя комиссия; - Красногорск ёросысь быръёнъя комиссия; - Пичи Пурга ёросысь быръёнъя комиссия; - Можга ёросысь быръёнъя комиссия; - Сарапул ёросысь быръёнъя комиссия; - Селта ёросысь быръёнъя комиссия; - Сюмси ёросысь быръёнъякомиссия; - Ува ёросысь быръёнъя комиссия; - Шаркан ёросысь быръёнъя комиссия; - Юкаменск ёросысь быръёнъя комиссия; - Якшур-Бодья ёросысь быръёнъя комиссия; - Яр ёросысь быръёнъя комиссия. Удмурт Республикаысь Быръёнъя комиссия. Депутатлэсь кузьым Сарапул ёросысь Уральский посёлокысь школа-колледжлы Выль ар азьын бадӟым кузьым лэсьтӥз Удмурт Республикаысь Кун Кенешлэн депутатэз, "Удмуртнефтепродукт" акционер огазеяськонлэн исполнительной директорез Андрей Шутов. Пиналъёслы со сётӥз Т-25 трактор. Школаын бадӟым уж нуо гурт ужъёслы дышетонлы. Музъемзы 200 гектар лыдъяське. Андрей Васильевич озьы ик бусы ужъёс вакытэ эстӥськонэн но вӧйёсын юрттыны кыл сётӥз на. Б.Никитин. Тӧдьы губи но, колӟотурын но Юкаменск черкогуртысь 2 номеро магазинын сиён-юонъёсын сяна вузкаро куасьтэм губиен но эмъюмлы мынӥсь турынъёсын. Соосты гужем дасязы райполэн заготконтораяз ужасьёс. Татын тыршисьёс вуззэс нуллӥзы ни Ижевскын ортчем ярмаркае. Тужгес но яратыса басьтӥзы куасьтэм тӧдьы губизэс. Будосъёс пӧлысь басьтыны луэ палэзьтурынэз (пижма), сюлэмтурынэз (пустырник), колӟотурынэз (тысячелистник), виртурынэз (зверобой), кузял потэз. Вераны кулэ: вузъёссы татын аптекаын сярысь дунтэмгес. Н.Борисов. Дуно кузьым Выль арен ӟечкыласа, профессор Фома Кузьмич Ермаков кузьмаз мыным чылкак али гинэ потэм книгазэ. "Пурга писательёс" нимаське со. Пичи Пурга ёросын дас ньыль гожъясь вордскемын но будэмын. Со пӧлысь куатез - Тылогурт пиос. Та кузьымлы кыӵе шумпотӥ мон: сюлэмылы укыр матын уго та книга. Усьтӥсько но - нырысь ик адӟисько малпаськыса пукись гажано кузпалме. Татын ик - пичи агаймылэн пиез, Микол. Солэн нимъёсыз пӧртэм луэмен, ужъёсыз улэ Никвлад гожтӥське. Али со тодмо удмурт писатель но драматург ни, шаерысьтымы Писательёслэн огазеяськонзылэн кивалтӥсезлэн юрттӥсез, туж тунсыко веросъёс, повестьёс, пьесаос гожъя. Татын ик - кузпалылэн вынъёсыз Володя но Андрей. Володямы туж визьмо но лякыт вал (вордскемын 1947-тӥ арын). Зэм, кызь тямыс аресэз гинэ но тырмытозь ӧз улы. Озьы ке но, солэн кылбуръёсыз удмурт поэзиын асьсэлэсь интызэс шедьтӥзы. Ог дасо мында кылбурез кырӟан луиз. Мукетыз, Андрей выныз, дас ареслы егитгес. Таизлэн гожъяськон мылкыдыз витьтон арес тырмон котыраз ини ӧръяськиз. Пичи лыдӟисьёс понна пӧртэм тунсыко книгаосыз потылыны шӧтазы, нош лирической кыбуръёсыз кырӟанъёс луылӥзы. Ма, гожъяськон мылкыдыз азьлогес ик шӧдӥське ни вал - этезэ но, монэ но вордскем нуналъёсамы кылбуро открыткаен ӟечкыланы лыктылӥз. Нош Саша пимылэн сюанэз бере кылдӥз быдэс республикаямы тодмо луэм "Сюан-вальс" кылбурез-кырӟанэз. Семен Карпович Карпов, ӵужодӥгмы - озьы ик усто поэт. Пӧртэм журналъёсын-газетъёсын, сборникъёсын печатласькем сяна, солэн нимаз кык книгаез потэмын ни. Кылбуръёсыз укыр сюлме пыӵамонэсь. Кызь ньыль ар ӵоже ужа ни со "Удмуртия" кун телерадиокомпаниын литературая но чеберлыкъя редактор луыса. Тужгес егитэз сузэрмылэн пиез Владимир Борисович Возняков. Вордскемын 1961-тӥ арын. Али, калык верамъя, ӵапак кын корт куртчон дырыз. Вордскемын нош со 31-тӥ июле - ӵапак та нуналэ улонысь кошкиз Семон ӵужмуртэз. Со туж куректӥз-бӧрдӥз. Ӵужмуртэзлэн сюрестӥз йыгмыт вамышъяны инмарез мед юрттоз ни. Володя, кылбуръёс гожъям сяна, ачиз ик кылдытъя крезьгур. Ачиз ик гитаразэ кутыса кырӟа. Кивалтэ со али "Ӟечбур!" газетлэн редакциеныз. Тылогуртысь ӵыжы-выжы пиосмы 1956-тӥ арын, мон Семен Александровичен ӵош Самсоновъёс доры лыктыку, гольык пыд бызьылӥсь пичи пиос на вал. Нош Володя чик но ӧй вал на. Милям нылпиосынымы эшъяськыса ини пичи маке котькытчы вуылӥз. Ма, Тылоын но весь валче шудылӥзы. Книга дышетӥсьёс понна поттэмын. Автор уже кызьыгес кутон ласянь валэктонъёс но сётэ. Ӝожомыса верано луэ: укыр пичи лыдыз - чылкак вить сю книга гинэ. Озьы ке но, дасямзылы бадӟым тау карисько. М.Самсонова. Сессиос но референдум Туэ 18-тӥ январе Удмурт Республикаысь Кун Кенешлэн Президиумезлэн заседаниез ортчиз. Солэн кутсконэз азьын Правительстволэн кивалтӥсез Николай Ганза, Россия Федерациысь Кышкыт учыръёслэсь утиськонъя министерстволэн косэмезъя, Кун Кенешлэн Председателезлы Александр Волковлы сётӥз ООН-лэсь "Алон, утён, юрттон" медальзэ. Со пусъемын Дагестан Республикалы гуманитарной юрттэт сётонэ пыриськемез понна. МЧС-лэн наградаез сётэмын "Ижмаш" акционер огазеяськонлэн генеральной директорезлы Владимир Городецкийлы, со басьтӥз "За заслуги" данъян пус. Президиум Удмурт Республикаысь Кун Кенешлэсь тямысэтӥ (азьвыл чакламтэ) сессизэ туэ 24-тӥ январе люкан сярысь постановление кутӥз. Со ортчытӥськоз Госсоветысь 55 депутатлэн кичӧлтэмезъя. Соос, Удмурт Республикалэн Конституциезлэн 10-тӥ ёзэтэзлэн 1-тӥ люкетаз воштон пыртон вылысь, Удмурт Республикаын референдум ортчытыны ӵекто. Президиум та воштон пумысен Удмурт Республикаын референдум ортчытон сярысь малпанъёссэ кылзӥз экспертъя комиссилэсь. Экспертъя комиссия Удмурт Республикалэн Конституциысьтыз 10-тӥ ёзэтлэсь 1-тӥ люкетсэ таӵе кылъёсын воштыны ӵектэ: "Удмурт Республикаын кун властез быдэсъяло Удмурт Республикаысь Кун Кенеш, Удмурт Республикалэн Президентэз, Удмурт Республикаысь Правительство, Удмурт Республикаысь Конституцияя суд, Удмурт Республикаысь судьяос. Удмурт Республикаын кун властья мукет органъёс но кылдытӥськыны быгатозы. Соосты кылдытон но соослэн ужан радлыксы быдэсъясько, Удмурт Республикалэн законъёсызъя но федерацилэсь законъёссэ лыдэ басьтыса". Удмурт Республикаын референдум ортчытон сярысь ужпум сяна, азьвыл чакламтэ сессиын эскеремын луозы на "Удмурт Республикаын референдум сярысь" Удмурт Республикалэн Законаз воштонъёс но ватсанъёс пыртон сярысь но "Удмурт Республикалэн Конституциезлэн 116-тӥ ёзэтаз воштонъёс пыртон сярысь" Законлы инъетъёс. Президиумлэн заседанияз Госсоветлэн 8-тӥ феврале ортчоно 9-тӥ сессияз эскероно ужан радлыкез юнматэмын. Отын кылзыны чакламын Удмурт Республикаысь Правительстволэсь 1999-тӥ арын ужамез сярысь отчётсэ. Озьы ик Правительстволэн ужезлы дунъет но сётӥськоз. 9-тӥ сесссилэн повесткаяз озьы ик пыртэмын Удмурт Республикаын югдур сярысь Удмурт Республикаысь Кун Кенешлэн Тӧроезлэн докладэз но. Кун Кенешлэн Президиумез умоен лыдъяз Правительстволэсь Сарапул ёросысь администрацилы бюджетысь коньдонэн юрттон сярысь ӵектонзэ. Одӥг миллион манет ссуда висъяськоз ёросысь хозяйствоосын сюро таза пудолэсь висён бервылзэ быдтыны. Озьы ик эскеремын мукет ужпумъёс но. Заседаниез нуиз Удмурт Республикаысь Кун Кенешлэн Тӧроез Александр Волков. Удмурт Республикаысь Кун Кенешлэн пресс-службаез. Светлана Смирнова: "Син азям пуктӥсько бырйисьме..." Валля нунал тодэ вайытӥз ог дасо ар талэсь азьло луэм учыръёсты. Тодӥськоды на-а, кызьы асьмеос лумбыт сямен пукылӥм телевизор азьын, выльдӥськон вакытысь калык депутатъёслэсь ӧтчамъёссэс но отын шара вераськемзэс кылзыса? Россиысь телевидение 18-тӥ январе, малпасько, аслэсьтыз сяна, мукет каналъёсты яратӥсьёсты но бордаз кыскиз: котькинлэн меӵак адӟемез потӥз уго толэзь талэсь азьло быръем муртъёслэсь ужаны кутскемзэс. Учким, ӟырдам, малпам... Кин ке шумпотӥз, вылды, кин ке йыр бордаз кырмиськиз. Нош кыӵе мылкыдын ортчытӥзы та нуналэз Москваысь Охотной рядысь сӥё-дано юртлэн бадӟымаз залаз ужам адямиос - асьсэос депутатъёс? Та юанлы валэктон шедьтон вылысь, толон ӵукна газетлэн корреспондентэз И. Лебедев телефон пыр герӟаськиз Кун Думалэн депутатэныз Светлана Смирноваен. - Светлана Константиновна, Удмуртиын улӥсьёс шугъясько тӥ понна. Тодэм потэ мылкыддэс, кин пала кариськемдэс но мукетсэ. - Нырысетӥез ужан нунал секыт вал. Жаль, депутатъёс ӧз быгатэ асьсэдыз вормыны но, огъя кариськыса, пайдаё уж борды басьтӥськыны. Мынам малпамея, залысь потэм эшъёслы кулэ ӧй вал озьы карыны. Мед соос кыльысалзы асьсэ мылкыдынызы ик, но мукет депутатъёсын ӵош заседаниысь кошкон данзэс ӧз йылэты кадь. Озьы луиз, дыр, кужымзылы оскымтэен. Мон но быгатысал ук потыны. Уго, уг ватӥськы, 19-тӥ декабре куараме сётӥ "Отечество - Вся Россия" понна. Пумиськонъёс дыръя бырйисьёслы но дэмлай ОВР пала кариськыны. Озьы ке но, толон тазьы малпай: Удмуртиын куаразэс сётэм бырйисьёс пӧлысь ог сизьымдон процентэз возьматӥзы "Единстволы", КПРФ-лы, Жириновскийлы дурбасьтэмзэс, нош куинез но та фракциос Геннадий Селезнёвлы оско, озьыен, мон уг быгатӥськы бырйиселэсь мылкыдзэ лыдэ басьтытэк кельтыны. Соин ик мукет эшъёсын ӵош куараме сётӥ Геннадий Николаевич понна. Азьланез сярысь ке верано, туж оскисько, Думалэн ужез умой ӧръяськоз шуыса. Явлинский но, мукетъёсыз но буйгалозы, огъя уж борды кутскозы. - Кызьы мон верай, тӥ пыриды "Народный депутат" группае. Кӧня ке вералэ та огазеяськон сярысь. - Группае пыремын 58 депутат. Ваньмыз соос одӥг мандатэк округъя быръемын. Кивалтӥсьмы - Геннадий Райков, со Тюменьысь. Вань мукет но тодмо адямиос, юн сямо эшъёс. - Нош тӥледлы асьтэлы кыӵе ке кивалтон уж уг ӵекто-а? - Вераськон вань. Оло, дэмлалозы комитетлэн тӧроезлы воштӥсе. Но таиз азьпалан ай. Газет пыр вань бырйисьёслы ӟеч мылкыд сӥзисько. Шумпотон дыръям но, шуг-секытэн пумиськыкум но мон нырысь ик тӥледыз син азям пуктӥсько. Дарт Мон сыӵе ӧвӧл! Студентлэн дневникысьтыз 14.02. Толон дискотекае ветлӥ. Дӥсьме нылъёс чебер шуизы. Соос уг тодо, мон та кофтаме вуж гамашез кесяса керттӥ. 16.02. Азьлань улонэ сярысь малпаськыны кутскисько ке, йырсиосы ик пежырско. Кытын мон ужало? Дышетӥсьёс ӝыны арен уждун уг басьто, журналистъёс - сютэм кулонтэм вылысь гинэ... Я, шудэ ке луиз, оло, одӥг-кык сюрс басьто. Но со коньдонэн квартира ноку уд басьты. Толэзяз быдэн сюрс кельтылӥд ке но, укмыс-дас ар люкано луоз. Со дырозь нош коньдон дунтэмалоз. Ваньмыз шуо сомында куронъёсыд бере, узырзэ карт утча. 20.02. Мар дунтэмгес туала арын: нуны ваён-а, аборт лэсьтон-а? Пиосмурттэк улон котьмалэсь но дунтэм. Нош анай-атайёсы весь ёрто: малы уд бызиськы. Нылпи ваи ке, соослы куштыса кельтом-а? 21.02. Акыльтӥз ини монэн ӵош улӥсь нылаш. Адӟем уг поты! Диета вылын пукисько шуэ но, конфетэз уг бырылы. Коньдонэ ӧвӧл шуэ но, кулэтэм чыры-пыры арбериосты бича. Мон доры куное лыктэм пиосын уг ик вераськы, валес вылын кылльыса, яратон сярысь романъёсты лыдӟе. Собере дневниказ гожтэ: "Малы со доры пиос ветло, малы синмасько солы. Мынам пыдъёсы солэнлэсь чебересь ук! Гожъя но, мон мед лыдӟо шуыса, гожтэмзэ нимысьтыз укно вылэ кельтэ. Сиеме уг поты, шуэ но, кошкеме бере туе. Азям номыр уродзэ уг вера, нош бӧрсям шып уг пукы, дыр. Кытысь ке но лыдӟи, котырад ачид кадь адямиос люкасько, пе. Ӧвӧл, мон сыӵе ӧвӧл! 28.02. Та пиосъёсын бырод! Визьтэмесь. Таиз но тани кышно утчаса ветлэ. Кудӟемын, ымдуръёсыз пель дорозяз. "Мон марым... отысь Галяез али марым..." Вератозяз ботинкаоссэ кылиз но валес вылам выдӥз. Уг кошкы, тон мынам кышное луод, шуэ. Бускельме юрттыны кури, ас дораз поттӥз. Дӥсьёссэ кутыса кошкиз. Куанер нош кышнотэк кылиз. Вождэ эн вай, но тыныд мон ӧй бызьысал. 29.02. Серекъямысьтым бускеле дорам бызьыса потӥз. Вераме уг луы, мырдэм чидасько: "Отчы батарея вылэ ыж гон носкиоссэ куасьткыны понэм вылэм". Сыӵе сюлмо пиез улляськем. М. ЗАМЯТИНА. Дарт Тури Люба Васильевалэсь университетысь "Чипчирган" ансамбльын кырӟамзэ ӟеч тодӥсько ке но, эстрадае потэмез шуакгес луиз. Дышетскыкуз укыр востэм улэмез, висъяськыны тыршымтэез-а, мар-а сокем паймытӥз. Нош кылбур одӥг-ог гожъялля ни вал. Общежитиын гитараен но шудылӥз, синмаськылӥз Августа Семёновалэн кырӟанъёсызлы. Озьы ке но, чебер кырӟанъёсыз вордскытозь, трос гинэ дыр ортчиз. Городын улысал ке, оло, озьы но ӧй луысал. Нош егит дышетӥсь гуртэ интыяськиз. Отын, кузь сӥзьыл ӝытъёсы, акылес зор укное шакыръям улсын, кисьтӥськизы сюлэмысьтыз чуръёс, крезьгурен бурдъяськыса куриськизы кыре. Огезлэсь, кыкезлэсь сюлэмзэ вырӟытӥзы соос: "Та мон сярысь гожтэмын ук!" Ӟеч кылзэс кылыса, Люба дӥсьтӥсьгес луиз, сцена вылэ потыса кырӟаны кутскиз. Нырысь Кечолаз, собере - Пургалан. Етӥз адямиос соку ик синйылтӥзы - ёросысь культура юртысь ужась Владимир Гущин фонограмма лэсьтыны ӵектӥз, районысь нефтяникъёс чебер костюм вурыны юрттӥзы. Люба зэмос артист музэн ӵемгес концертъёсы потаны ӧдъяз, радиое гожтӥськиз. Ӝоген кырӟанъёсыз "Ингурын" нуналлы быдэ сямен чузъяськыны кутскизы - калык тужгес яратӥз "Лобӟы, лобӟы, ӟазеге" кырӟанзэ. Кылем арын ортчем "Камали" фестивальын но учкисьёс сое туж шуныт пумитазы. - Только тазьы ветлыса, пиналъёсылы саклыке уг тырмы ни, соос мынам туэ 11-тӥын дышетско,- сюлмаське Любовь Анатольевна. - Одӥг пол кытчы ке автобусэн ветлыкумы, классысьтымы пияше шуэ: "Кырӟалэ ай милемлы, ато ялан сцена вылысен гинэ адӟиськом". Ой, возьдаськи. Ма, та сыӵе ик ук! Котькинэ - пичизэ но, бадӟымзэ но огкадь гажаны быгатэменыз паймытъяз со монэ дышетскыкумы но. Оскоды оло уд, огпол но кылэме ӧвӧл лек верамзэ, кинэ ке курламзэ. - Адямиез тырмымтэосыз шоры учкытэк валаны тыршоно, секыт вакытэ юрттоно. Нош асьмеос, мылкыдмы ке ӧвӧл, муртэ но шудтэм кариськом,- шуэ Люба. Эшелэн кырӟанъёсаз али тросгес мӧзмон но ыштон (малы ке сыӵе дыръя пӧрмо но уго соос). Но мон оскисько, ӝоген Люба бадӟым шудэз сярысь но тӥледлы шулдыр кырӟаса вералоз. Тулыспал толэзе со выль кенлэсь дэремзэ дӥсялоз. Ог-огдэ гажаса но яратыса- кырӟаса улон сӥзём Любалы но Михаиллы. З. РЯБИНИНА. "Камали" фестивальын туж кельшиз Любовь Васильевалэн "Лобӟы, лобӟы, ӟазеге" кырӟанэз. Уд быгатэ-а кылъёссэ печатланы? Л. Широбокова. Ижевск. Лобӟы, лобӟ, ӟазеге Тодӥсько мон - кошкиськод, Адӟисько мон - пегӟиськод. Мон уг возьы кутыса, Жильыен думылыса. Вить поллы чеберзэгес, Куать поллы шаплызэгес Тон шедьтод, мон тодӥсько, Тон шедьтод, мон оскисько. Кык вылэ кык ватсаса, Йыр уг жадьы лыдъяса. Син шорад нош учкыса, Трос уд пӧя малпаса. Луд ӟазег тури ӧвӧл - Тон мыным кулэ ӧвӧл. Усьты, вӧлъя бурдъёстэ, Лобӟы, лобӟы, ӟазеге. Усьты, вӧлъя бурдъёстэ, Лобӟы вылэ, кыдёке, Утча тон возь выл турын, Со уг буды ми дорын. Дӥг-одӥгзэ утчаса, Тон жадид, дыр, ветлыса. Но шедьтод-а, паймисько, Вераны мон шугмисько. Пумиськом, дыр, пумиськом, Ваче кымес шуккиськом. Тон кошкод ас сюрестӥд, Мон лобӟо ас сюрестӥм. Луд ӟазег тури ӧвӧл - Тон мыным кулэ ӧвӧл. Усьты, вӧлъя бурдъёстэ, Лобӟы, лобӟы, ӟазеге. Гуръёслы уг тырмы "сиён" "Ижсталь" огазеяськон кемалась данъяське ӟечлыко анданэныз но адӟем карымон ужасьёсыныз. Рыноке выжемен, тыло профессиен мастеръёс шуг-секытъёсын нюръясько, выль заказчикъёс утчало. Кылем ар ӵоже кӧнялы ке будӥз рабочийёслэн уждунзы. 2000-тӥ арын но уждунзэс йылэтозы. Ог дасо ар талэсь азьло сямен, мартен но электрогуръёс али ваньмыз уг ужало. Соин но завод шока шуэм потэ. Уг тырмы куштӥськем корт, гурлы "сиён" эстӥськон. Озьы ке но, предприятие выльдӥське. 23 номеро цехын пичи тоннаем гур лэсьтӥзы. Али татын бадӟым уж нуо секыт маосты ке ӝутъясь оборудованиез тупатъянъя. 37 номеро цехысь известез сутон участоке пуктӥзы "Бурлак" портальной кран. Та ужез быдэстыны бадӟым юрттэт сётӥзы 83 номеро цехысь, 76 но 59 номеро отделъёсысь специалистъёс. 40 метрлэсь ӝужыт кран ог сю тонна кыске. Со сяна, механикъёс цехъёсын секыт ужъёсты капчиятонъя мукет ужъёсты быдэсъяло. В.Чернов. Дарт Асьсэлы оско Дышетскон ар ӧз йылпумъяськы на, нош 11-тӥ классын дышетскисьёслэн али ик пӧсь вакытсы ни - соос малпасько, школазэс ӟеч йылпумъяса, институтъёсы, техникумъёсы пырыны, уже интыяськыны. Асьсэлэн малпанъёссы сярысь верало Башкириысь кӧня ке дышетскисьёс: А. Оксана. - Мон малпасько дышетсконме Удмурт университетысь биолого-химической факультетын азьланьтыны. Та удыс ас бордаз кыске тунсыко луэменыз. Туж яратӥсько адямиез эскерись наукаосты. Университетэ пырон понна али вань кужымме поныса дышетскисько. Б. Юля. - Мон малпасько филологической факультетэ пырыны. Туж яратӥсько литературая сочинениос гожъяны. В. Руслан. - Туж жаль пото висись адямиос. Сюлмы вӧсь луэ, куке врачъёс соослы юрттыны уг быгато. Соин но, дыр, врач луэме потэ. М. Снежана. - Физкультурая дышетӥсь луэме потэ. Чайковскийысь институтэ пырыны тыршо. Н. Лёня. - Уг тодӥськы на кытын дышетсконме азьланьтыны. Мынам арганчи но, физкультураен дышетӥсь но луэме потэ. М. Андрей. - Дышетсконме азьланьтэме потэ Нефтекамскысь педучилищеын. Пичи классъёсысь пиналъёсты дышетэме потэ. Покчиос туж мусоесь: номыре но уг валало, али гинэ улыны кутско. Соослы пыд йылазы султыны юрттӥсь кулэ. Ч. Виктор. - Малпасько гуртам ик кыльыны. Шедьто-а уж, уг-а - уг тодӥськы. Шумпотымон, егитъёслэн дышетскыны мылкыдзы вань. Секыт улон шоры учкытэк, анай- атайёссылэн коньдонзылы оскытэк, соос дышетскыны тыршо, азьпал улонзы сярысь сюлмасько. Малпанъёсты мед быдэсмозы, егит эшъёсы! В. МУХАМЕТШИНА, Удмурт университетысь студентка. Шутэтскон сэрег Кроссворд Паллянысен буре: 1. Ӵог. 3. Мисьтаськон арбери. 4. "Бӧрӟытӥсь" бакча сиён. 6. С витаминэн узыр емыш. 8. Нымы-кибы. 10. Картошкаен, помидорен одӥг выжыысь будос. 11. Вылӥ дышетсконниез йылпумъяса, удысэзъя дышетсконзэ азинтӥсь мурт. 12. Бесермян кышнолэн йыркерттэтэз.13. "Удмурт дунне" газетысь бам. 14. Йырйиськись. 15. Секталаез мертан арбери. 16. Пызь, ю тысь возён инты. 17. Мунё, туп, машина... (одӥг кылын). Вылӥысен улӥе: 1. Бакчаын ужан тӥрлык. 2. Даур кыллы синоним. 4. Кузьым. 5. Пичи пӧйшур. 7. Кырӟан жанр. 9. Лулсэр системалэн валтӥсь ёзэз. 13. Выль кенлэн пирданэз. 14. Векчи чорыг. 15. Удмурт кылын потӥсь журнал. 16. Куро зурод. Дасяз И. Лукина. Кӧня сылэ эмъяськон? Асьме шаере но вуо кышкыт но паласькись висёнъёс - грипп, ОРЗ... Улӥын сётӥськом соослы пумит нюръяськыны мынӥсь эмъюмъёсты но соослэсь шоро-куспо дунъёссэс: Амиксин (10 таблетка) - 900 манет Ампициллин (10 таблетка) - 10 манет 40 копейка Дибазол (10 таблетка) - 1 манет 25 копейка Ремантадин (20 таблетка) - 27-32 манет Рибомунил (12 таблетка) - 234 манет Афлубин (50 миллилитр) - 253 манет Сандра (40 таблетка) - 20 манет 70 копейка Бруснивир (1 упаковка) - 20 манет Элеутерококк (40 миллитр) - 19 манет 35 копейка Календула (1 флакон) - 8 манет Пиносол (1 флакон) - 26 манет Сугон (килоез) - 10 манет Чеснок (1 йыр) - 3 манет. Кылбурчиез данъязы Грах ёрос котьку данъяське отын улэм но ужам писательёсын - Роман Валишинэн, Даниил Майоровен, Айво Ивиен, Ашальчи Окиен... Соос пӧлысь одӥгезлы, Д. А. Майоровлы, вордскемез дырысен 110 ар тырмиз. "Родина" колхозын ялан буре ваё дано нимзэс. Соин валче отын алигес бадӟым ужрад ортчиз. Люкаськемъёсты ӟечкылазы колхозлэн кузёез М. А. Крестьянинов но ёрос Кенешлэн кивалтӥсез Ю. К. Рожин. Вылӥ Эграысь музеен кивалтэ Л. Г. Макарова. Со пусъемын Д. А. Майоров нимо нырысетӥ премиен. Кыкетӥ премия сётэмын удмурт кыллы но литературалы дышетӥсьлы С. П. Городсковлы. Н. Никитин. ШӦКЫЧ Россиысь Правительство гуртэз азинтонлы 2000-тӥ арлы бюджетысь 7,1 миллиард манет висъяны чакла. Та лыдпус РФ-лэсь Президентсэ возёнлы чакламлэсь но ӧжытгес, солы сётӥськоз 9 миллиард манет. Валэктэ юрист Сэрегез нуэ адвокат Лилия Шкляева Нимтулме воштоно вал Мыным кызь арес. Алигес тодӥ: паспортам атай нимы (отчествое) умойтэм гожтэмын. Сое воштэме уз луы-а? Наталья М. Юанлы валэктон сётэ "Гражданской югдуръя актъёс сярысь" Россия Федерацилэн Законэз. Отысь 58-тӥ ёзэт (статья) ивортэ: дас ньыль ареслэсь бадӟым адямиослэн правозы вань фамиллязэс, нимзэс но (яке) атай нимзэс воштыны. Та ужез лэсьтоно вордскем яке улоно интыын. "Кун пошлина сярысь" Законлэн 4-тӥ ёзэтэз валэктэ: нимтулэз воштыку тыроно толэзьем самой пичи уждун мында коньдон - 83 манет 49 копейка. Мон вордски Сибирьын. Удмуртие улыны лыктыкум ыштӥ вордскем сярысь свидетелсьтвоме. Нош со мыным кулэ. Сокеме ветлыны коньдонэ ӧвӧл. Ма кароно? Н. Кузнецов. Вордскем интыдэс тодӥськоды бере, ЗАГС-лэн отысь ёзаз вазиськелэ, юрттэт курыса. Гожтэтады шонерак пусъелэ тае: вордскем интыдэс но дырдэс, анай-атайдылэсь фамилляоссэс, нимъёссэс, атай нимъёссэс. "Гражданской югдуръя актъёс сярысь" Россия Федерацилэн Законысьтыз 9-тӥ ёзэт куре сыӵе дыръя тӥледлы кыкетӥ свидетельство ыстыны. Зэм, таӵе гожтэтэн ӵош тӥ вордскем иинтыысьтыды ЗАГС-э келяны кулэ кун пошлина тыремды сярысь квитанция. Со толэзьем самой пичи уждунлэн 50 процентэз мында. Мар люкетэ бракез пусйыны? Нош мае лыдъяло умойтэм бракен? А. Гомеранцева. Семья сярысь кодексын вань 14-тӥ ёзэт. Со валэктэ: брак лэсьтыны (сое пусйыны) люкето таӵе мугъёс: брак лэсьтыны малпась муртлэн мукет бракез вань, брак лэсьтӥсьёс матысь ӵыжы-выжыос луо, брак лэсьтыны малпасьёс пӧлысь огез тазалыкезъя уг вала ма каремзэ. Ёз, суд умойтэмен (фиктивной) лыдъя, брак лэсьтэмын ке семья кылдытонтэм вылысь. Озьы ик кузпалъёс уг возё ке семья кусыпъёс: огъя хозяйство уг нуо, ӵош уг уло, нылпиоссы сярысь уг сюлмасько. "Нуны-2000" Пиналмиськом! Выль ар нуналэ вордӥськем нырысетӥ нунылы сӥзем нылпи коляска дась ни сюрес вылэ потыны. "Удмурт дунне" газетэз лыдӟисьёслы сыӵе кузьым лэсьтӥз "Воткинский завод" Вузкарон юрт. Кин бен луоз нырысетӥез? Газет лыдӟисьлы ивортылӥм ни, Шаркан ёросысь Мувыр гуртысь егит кузпалъёслэн Елена но Леонид Никитинъёслэн пизы вордӥськиз 00 час 35 минутэ. Ёрос загсысь вуизы на мукет ивортонъёс но. Кияса ёросысь Вуж Салья гуртысь Светлана но Геннадий Дмитриевъёслэн 6 час 10 минутэ вордӥськиз куинетӥ нылпизы - Анюта нылзы. Кӧнялы ке гинэ бере кылиз Можга ёросысь Пазял гуртысь пичи эте. Валентина но Юрий Кремлевъёслэн кыкетӥ нылпизы вордӥськиз 8 час 45 минутэ. Озьыен, коляска поглянъёс Шаркан пала ик кожо ни. Но палэнэ кельтэм уг поты мукетъёссэ но Выль ар нылпиосты, соос озьы ик "Удмурт дунне" газетлэн возем нуныосыз луозы. Таоссэ но пусъёмы синпель кузьымъёсын. 1-тӥ январе кык пичи нуныослы узырмиз Сарапул. Сыӵе мвортон ыстӥз городысь загсэн кивалтӥсь Т. А. Пантюхина. 1 час 30 минутэ Наталья Овчинниковалэн вордӥськиз Яна нылыз. Нош Эльвира Бабиковалэн Саша пиез вордӥськиз 18 час 55 минутэ. Таосыз анайёс "Удмурт дунне" газетэз уг лыдӟо, нош ми соосты озьы ик сюлмысьтымы ӟечкыласьком. Л. МАЛЫХ. Лыдӟись вера малпанзэ "Гондырлэн" кужымезлы осконо ӧвӧл Удмурт газетэнымы мон эшласьки 1952-тӥ арысен, яке 47 ар талэсь азьвыл. Мар сярысь но мон ӧй гожъя та ортчем аръёсы. Соку ваньмы умоесь, сайкытэсь малпанъёсын улӥськомы на вал. Нош 1990-тӥ аре улонмы инмар ӵашъем кадь чутрак мукет пала берытскиз. Соин ик укмыс аръёс пала газетамы ӧй ни гожъя. Нош тани али выльысь гожтоно луисько: ортчем быръёнъёс нош ик гыбдась сюлэмэ тыл понӥзы. Удмурт шаерын улӥсьёс, пе, уноез куаразэс сётӥллям "Единство" ("Гондыр") огазеяськонлы. Со туж бадӟым янгыш луэ, мон сямен. Мынам тодэмея, 1990-тӥ арысен кӧня быръёнъёс вал ини, ваньмыз бере ик гуртъёсын улӥсьёс но ужасьёс йырберзэс кормало, кызьы, пе, тазьы нош ик янгышаськеммы. Гырпумзэс куртчыны выро, но уг луы ини. Али но озьы ик уз лу меда? "Единство" огазеяськонэ пыро туж узыр но вылӥ кивалтӥсьёс. Таосыд Путин-премьерлэн шудэмезъя экто но кырӟало. Нош кин со сыӵе Путин? Со али укша тылобурдо пузысь потэм тютюлы, кудӥзлэн мамыкез вань ини, нош бурдыз ӧвӧл. Али Премьер ужа, Кремльын пукем кузёезлэн косэмезъя. Нош со кузёлэн (Б. Ельцинлэн) дас ар кивалтэмез дыръя азьвыл калык бырон калэн вуиз. Владимир Путин Россиысь калыклы ватытэк вераз, солэн правительствоез укмыстонэтӥ аръёсы чаклам сюресъя ужалоз шуыса. Арысь аре промышленность но гурт хозяйство начарме, куашка, калыклэн улонэз секытоме, улон дуноя, кускерттонэз нуналлы, арнялы, толэзьлы, арлы быдэ золгес керттоно луэ. Та реформаос шуон дыре милям городамы гинэ но кӧня миллиард манетлы ыштонъёс адӟемын. Коммунистъёс кивалтон дыръя мар но лэсьтэмын ӧй вал, ваньзэ вераса уд быдты. Нош али, 90-тӥ аръёсы, лэсьтыса вуттымтэ объектъёс куашкало. Кожиль гурт доры кирпич шуккон завод лэсьтыса быдэстымтэ, сое лэсьтонэ кутэм коньдон копейка но пайда сётытэк юнме быремын, сюрес лэсьтӥсь военной частьёс кошкем бере, казармаос, баракъёс, мастерскойёс, гаражъёс, ангаръёс музъем вылысь чиптэм-чаптэм ышизы. Чепца шутэтскон юрт но уг ни ужа, ТЭЦ-2 но куашкан калэ вуэмын, трубаез но борддоръёсыз сяна. номыриз но ӧвӧл ини. Милям Глазов карамы ог дасо аръёс вокзал доры автобусъёс уг но ветло, уг но дугдыло. Куинь этажъем нянь пыжон завод лэсьтӥзы вал коммунистъёс кивалтон дыръя, нош али со куашкатэмын, тӧл шула этажъёсын, завод сузме, куашка. Ваньмыз та вылӥ верам тырмымтэос ортчизы Глазов городысь администрацилэн йырыз А. П. Горяинов кивалтэм улсын, нош табере со "ӟеч" ужамез понна республикамылэн огаз вылӥ должностяз юнматэмын. Мынам малпамея, али В. Путин но улонамы номыре выльзэ уз пыӵаты. Али со Президентлэсь ужзэ быдэсъя бере, калыклы "пыриськыны" турттоз. Тани али со пенсиез дырыз дыръя сётъяны выре, сое йылэтыны но йӧндыртэ. Нош Президентэ быръёнъёс ортчем бере, выльысь дунъёс но уз будэ меда. Тужгес но мон абдрасько, малы гуртын улӥсьёс "Единство" понна куараоссэс сётӥллям шуыса. Совето власть дыръя, улэм-ужамзэс гуртын улӥсьёс вунэтӥллям ни, лэся. Соку луд вылэ кӧня минеральной сылалъёс, удобрениос поттылӥськизы, колхоз мастерскойёсын уно тракторъёс, комбайнъёс, автомобильёс сылӥзы. Фермаосысь тыл кысэмез но музъем эгыр, газ, керосин, бензин но солярка ӧвӧлэз уйвӧтын но адӟыны уг луы вал. Пиналъёсты дышетыны келян дыръя уксё кулэ шуыса асьмеос ӧм но тодылэ, эмъяськыны мынӥськом вал больницае, бордамы коньдон басьтытэк, туж ичи дунын шутэтскылӥмы санаторийёсын, курортъёсын. Та вылӥ верам улонэз Удмуртиын улӥсьёс ӝог вунэтӥллям шӧдске. Вань умоез вылэ сяласькыса, Думае быръёнъёс дыре куаразэс сётӥллям соос понна, кудъёсыз чыртыямы понэм петляез арысь аре кужмогес кекато. Гожтэтэ бадӟым луиз, малпанъёс уно, сюлэм бӧрдэ, кӧт куректэ асьме удмурт калыкмылэн быръёнъёсын пӧяськемез, янгышамез понна. Ӝоген вуозы Россилы Президент быръёнъёс, нош ик парламентэ (Кун Думае) быръёнъёсы кадь пӧяськонъёс медаз луэ вал. Г. Лекомцев, Глазов городысь пенсионер. Шӧкыч Уждун, раб но колоша Эх, Шӧкыч уром, Шӧкыч уром! Мар луиз та улонэн? Номырзэ ум валаське ни. Ялан оскыса улӥм выль быръёнъёслы. Соос ортчо, депутатъёс воштӥсько, кивалтӥсьёс нош соосыз ик пуко. Нош милям номыр уг воштӥськы. Тани ужасьёсмы уждунзэс толэзьёсын уг басьто ни. Кивалтӥсьмылы Усков Валентин Семёновичлы гожтэт ыстӥ вал. Табере леспромхозын ужасьёслы кӧня ке манетэн тыро ик. Но кивалтӥсьёсмы асьсэос уждунэн уг обидё, лэся. Леспромхозмы али ачиз пӧртэм вузъёс поттэ. Нош огшоры ужасьёс чылкак сютэм но дӥсьтэк-куттэк уло, шуыны луоз. Революция ортчем бере кадь. Тани коммунальной предприятиын, канализация бордын тыршисьёслы спецовка висъяны кулэ. Уг сёто. Ӧвӧл шуныт дӥсь, ӧвӧл гын сапег, ӧвӧл колоша. Уноез рабочийёсмы гриппен висьыса но ужало. Мукет ужасьёс ӧвӧл. Дӥсь басьты вал но, коньдон ӧвӧл. Эмъяськон понна но дун куро. "Лечиться" кариськыны уксёмы ӧвӧл. Ялан-а, мар-а ыммес пытсаса улыны кулэ ми? Ыштэм уждунмы понна начальникъёслэсь юрт котырзэс, ваньбурзэс талано. Одӥг-кыксэ озьы каризы ке, оло, кин но со визьмаськысал, вылды. Ведь раб чотын улон акыльтӥз ни... Игра леспромхозын, ЗДС-ын но коммунальной предприятиын ужасьёс. Чуръёс, чуръёс.. Удмурт кылэз дунын но уд шедьты Туж шумпотӥсько, азьвыл аръёсын вордскем ныллэн данэз шӧдскымон будӥз. Зол шӧдӥське со концертъёсын. Азьвыл удмурт кырӟасьёс чиньыен лыдъямон вал, али кӧня егитъёсыз гинэ! Кыӵе чебер, сюлэме пырымон кырӟанъёс гожъяло Ганьков но Бекманов. Туж потэ соосты арганэн шудыса кырӟаме, но нокытысь нотаосын сборникъёссэс уг шедьтӥськы. Ма, али магазинъёсын чик удмурт книгаосын уг вузкаро ни, шӧдске. "Удмурт дунне" но киоскъёсын уг адӟиськы, нош бигер газет кылле. Ю. Шкляев. Ижевск. Удалтӥз ке удалтӥз Кылем гужем удалтэм бакча сиён будэтӥзы Ува ёросысь Киби-Жикъя шор ёзо школаын дышетскисьёс. Тужгес но шумпоттӥз кубистазы. Со вить тонна пала люкаськиз. Пиналъёсын быгатыса ужа дышетӥсьсы, дышетскемезъя агроном О. В. Воложкин. Кубистазэс школа килозэ 2 манетэн вуза. Вань "Подарок", "Колобок", но "Слава" сортъёс. С. Семенов. Удмурт Республикаысь Кун Кенешлэсь тямысэтӥ (азьло чакламтэ) сессизэ люкан сярысь Удмурт Республикаысь Кун Кенешлэн Президентэзлэн постановлениез Удмурт Республикаысь Кун Кенешлэн Президиумез пуктэ: Удмурт Республикаысь Кун Кенешлэсь тямысэтӥ (азьло чакламтэ) сессизэ люкано 2000- тӥ арын 24-тӥ январе 10 часэ Ижевск городын. Удмурт Республикаысь Кун Кенешлэн Тӧроез А. А. Волков. Ижевск город, 2000-тӥ арын 18-тӥ январе. � 101-ИИ. Сессиын эскерыны чакламын таӵе ужпумъёс: "Удмурт Республикалэн "Удмурт Республикаын референдум сярысь" Законаз воштонъёс но ватсанъёс пыртон сярысь" Удмурт Республикалэн Законэзлы инъет сярысь. - "Удмурт Республикалэн Конституциезлэн 116-тӥ ёзэтаз тупатъянъёс пыртон сярысь" Удмурт Республикалэн законэзлы инъет сярысь. - Удмурт Республикалэн Конституциезлэн 10-тӥ ёзэтысьтыз 1-тӥ люкетаз тупатъянёс пыртон пумысен Удмурт Республикаын референдум ортчытон сярысь. - "Удмурт Республикалэн "Удмурт Республикаын интыосын аскивалтон ёзъёсы депутатъёсты быръён сярысь" Законэзлэн 71-тӥ ёзэтаз воштонъёс пыртон сярысь" Удмурт Республикалэн законэзлы инъет сярысь. 56 ар ортчыса Алигес Красногорск ёросын улӥсь Галина Павловна Малыхлы "За отвагу" медален пусъён сярысь удостовреение сётэмын. Солэн атаезлы, Павел Двитриевич Сиговлы, та медалез сётыны кулэ вылэм 1943-тӥ арын. Герой доры награда вуиз 56 ар ортчыса гинэ. Ветеран ачиз но ӧз тодылы, со медален пусъемын шуыса. Ожысь ветеран Павел Дмитриевич улонысь алигес кошкиз. Н. Петров. Цирк луоз, куинь ар ортчыса Цирк ке вань, городлэн улонэз шулдыргес. Ижевскын улӥсьёс та ласянь дасо арзэ ини шудтэмесь, шуыны луэ. Берло аръёсы вордскем пиналъёс уг тодо цирклэсь ворекъясь тылъёссэ но, лӧпкытӥсь крезьгурзэ но. Отысь-татысь лыктэм циркачъёс гинэ тодэ вайытыло, таӵе икусство вань шуыса. Эшшо зоопаркъёс юртто на экзотической шуон пӧйшуръёсын тодмасткыны. Даурлэн кутсконаз берытсконо ке... Нырысетӥез, Коромысловлэн циркез, пуктэмын вылэм 1913-тӥ аре, но граждан ож дыръя ӝуаны шедем. 1926-тӥ арын Сенной базар вӧзын ӝутскем вылез пу цирк. 1500 пуконэн зал шунтӥське вылэм гуръёсын, югдытӥськем керосин лампаосын. Кин но вуылымтэ татчы: Поддубный-батыр, Кио-иллюзионист, Лазаренко-тэтчась, Дуров-дрессировщик... Быдӟым ож кутскон азьын таиз цирк интые нош ик выльзэ пуктыны ӧдъязы. Война люкетӥз... Озьы ке но, номыр шоры учкытэк, 1850 интыем - табереяз ини кирпичлэсь - цирк быдэстэмын вал. 1943-тӥ арын 28-тӥ ноябре со ӧсъёссэ усьтӥз. Таиз но арена ас вакытаз кинэ гинэ ӧз адӟылы. Нош тужгес тодмо луиз Ижевскысь цирк Иван Кудрявцевен, солэн Гоша гондыреныз (та пӧйшур город ураметӥ но мотоциклэн ворттылӥз). Тылпу потон кышкытлыкен сэрен, одӥг-ог ёзъёсыз куашканы кутскемен, циркмы ворсаськиз. Зэм, дасо арзэ адямиос со вӧзтӥ лулӟыса гинэ ортчылӥзы. Собере та интыез бетон борддорен котыртӥзы но... циркез пуштытӥзы. Со вал кылем арлэн пумаз. Нош тани алигес котыртэме уно калык люкаськиз. Выль цирк луоз! Солэн нырысетӥ блокезлэн инъетэз (фундаментэз) борды гожтэмын: "17-тӥ январе 2000-тӥ арын цирклэсь выль юртсэ лэсьтыны кутскемын". Нош борд пушкы тач-тач пытсазы нимысьтыз капсулаез. Отын - вуоно дауръёсысь улӥсьёслы вазиськон. Соя тодозы, кыӵе сюресэз ортчиз Ижевскысь цирк, макем шумпотон вайылӥз со калыклы, кыӵе осконэн ӝутӥське вылез юрт... Нош оскон вань, цирк куинь ар куспын быдэстэмын луоз шуыса. Федеральной бюджетысь со понна туэлы кондон висъямын ни. Объектэз син азяз возе Кун Кенешлэн Тӧроез Александр Волков. Спонсор кариськыса юртто "Удмуртнефть", "Белкамнефть", "Удмуртторф", "Аспэк", "Ижевскысь электромеханикая завод", "Воткинскысь завод" но мукет огазеяськонъёс. Циркез ӝутыны оскемын лэсьтӥськонъя 7 но 17 номеро управлениослы. Али соос огазеясько таӵе нимын: Россия Федерациысь Правительстволэн нимысьтыз лэсьтӥськонъя федеральной службаез - "6 номеро территориысь нимысьтыз лэсьтӥськонъя управление" (кивалтӥсез А. П. Курбатов). ... Тракторъёс, экскаваторъёс гурето, бугыръяло ини сюез. Нош площадка шорын - калык, цирклэсь инъетсэ вӧся Ижевск-Удмурт Епархилэн кивалтӥсь Архиереез Николай Архиепископ. Ӟеч мылкыд каронэн-сӥзёнэн вазисько Кун Кенешлэн Тӧроез А. Волков но Правительстволэн Тӧроез Н. Ганза. Кыӵе луоз вуоноез цирк? Та юанлы валэктӥз культурая министрлэн лэсьтӥськонъя воштӥсез Л. М. Масловская: - Та комплексын учкон залэз азьвыл кадьгес ик луоз. Вестибюль, гардероб йылын - актёръёслы улон инты. Куинетӥ корпусын - пӧртэм ужасьёслы, пӧйшуръёслы интыос. Луоз татын музей но. Нош пиналъёс понна ужалоз циркъя школа-студия. Таӵе дэмлан сётӥз, Ижевске вуылыкуз, Росгосцирклэн кивалтӥсез Людмила Петровна Яирова. Т. ПЕТРОВА. ШӦКЫЧ Чорыгамысь бертыку Тылъёс кысо но ӝуатско выльысь, Я адӟисько, я уг укно синъёс. Онтон бертэ шулдыр чорыгамысь, Дораз мырдэм нуо жадем пыдъёс. Вуэ ни кадь, ярам, ӧвӧл адӟись, Али ведь, тодӥзы ке, зол йӧтоз. Оло изе, оло нош чик уг изь Лул-гажанэз, сое вите, луоз. Шунды понна, пумитаны потэм, Пальпотыса сылэ корка азьын. Кияз нош малы ке исьнер кутэм, Сюрес ӵужӥз, дыр, картэзлы озьы. "Ой, мусое", - Онтон шып ланьырскиз, Ӝутӥськыны ӧз тырмы кужымез. Нош сазь дыръяз сыӵе чырткем-етӥз, Огназ ӝутэ, ворме зӧк пужымез. Педлон юмша-калге йыромем тӧл, Шуба улэ пыре кезьыт омыр. Кудӟем йырлы со нокыӵе ӧвӧл, Ӵукна гинэ шат сайкатоз макмыр. Лул-гажанэз потэ корка азе, Картэз ӧз берт, кытын на, пе, кӧлон. Ӟыгырскыса кыллё уин куазен Лымы мунё но чорыгась Онтон. С. Перевощиков. ШӦКЫЧ Быръёнъёс вискын Туала такмак Гондыркарын - юондыр: Быръёнын вормиз Гондыр. Гондырлэн пиез Кайгу Кинлы-о гудэ шайгу? Чебермам, данъям гуэ Медам усь вал дауре! Прокуратура йылпумъянъёс лэсьтӥз Удмурт Республикалэн Прокуратураяз ортчиз паськытатэм коллегия. Со сӥземын вал прокуратураослэн кылем арын ужамзылы йылпумъянъёслы. Кызьы кенешын пусъемын вал, югдур республикаын азьвыл сямен ик сюлэмшугъяськытэ. Йыружъёслэн огъя лыдзы, нырысь ик ваньбур таланэн, асэстонэн, лушканэн герӟаськемъёсыз чотын будӥз 14,8 процентлы. Уголовной кыл кутон улэ кыскемын 18 сюрс пала адямиос. Котькуд куинетӥез йыруж лэсьтэмын, кӧня ке мурт огазеяськыса, яке азьвыл суд улэ шедьылэмъёсын, ӝыныез - нокытын ужасьтэмъёсын. 30 процентлы йылӥз быдэ вуымтэосын лэсьтэм йыружъёслэн лыдзы. Ялан паськытгес вӧлмо наркотикъёсты вузан-басьтон, экономика, ужбергатон но банк удысъёсын йыртэман, выт тыронъя законъёсты тӥян. Зэм, прокуроръёс но ӧжыт ӧз лэсьтэ правоез утись ёзъёслэсь ужзэс огазеян но ӧръян понна, законъёсты быдэсъянэз чаклан понна. Прокуратураысь следовательёс сэрттӥзы-пертчизы 1300 уголовной уж, со пӧлысь 1200-ез судъёсы келямын. Шарае поттэмын 400 адями виись. Со сяна, прокуроръёс воштӥзы уголовной ужъёсты законэз чаклатэк пытсан но дугдытн сярысь 2 сюрс решениез. Гражданъёсты арестовать карон но ӝегатон табере чакласькысагес ортче. Прокуроръёс 1000-лэсь трос пол пумит луэмзэс веразы (протест ялӥзы) законэз тӥяса кутэм правовой актъёслы. Та ласянь тужгес но сьӧлыкало интыысь аскивалтэтъёслэн кивалтӥсьёссы. Ар ӵоже судъёсы келямын пособиос, уждун, ыштонъёсты берыктон пумысен 2,5 сюрс исковой заявление. Вераськон мынэ 14,7 миллион манет тырон-берыктон сярысь. Арбитражной судъёсы келямын 145 манет тыр ваньбурен герӟаськем 105 курон-косон. Ар ӵоже сэрттэмын гражданъёслэн 17 сюрс куронъёссы но ӝожтӥськонъёссы. Кенешез йылпумъяса, вераськиз элькунлэн прокурорез В.М.Походин. Люкаськемъёсты со куриз тужгес но бадӟым саклык висъяны экономикаен, бюджет коньдонэн, выт тыронэн герӟаськем законъёсты тӥянэн но кузьмаськонэн (коррупциен) нюръяськонлы, озьы ик "Российской Федерацилэсь Президентсэ быръён сярысь" Законлэсь быдэсъяськемзэ эскеронлы. Коллегилэн ужаз пыриськизы Удмурт Элькунысь Кун Кенешлэн, Кивалтэтлэн но правоез утись ёзъёслэн кивалтӥсьёссы. Г.Корепанов. Шӧкыч "Ошмес" куасьмиз-а? Али нокин но уз вера ни, дыр, ку но кӧняетӥ арын Ижевскысь Ленин ульчаын усьтӥськиз вал "Ошмес" кафе. Отын пӧраллязы асьме калыклэсь сиён-юонъёссэ. Удмурт кылын нимам учреждениос соку шоркарамы туж ӧжыт вал. Кема гинэ "Ошмесмы" огназ "бызиз". Собере кылдӥзы "Зангари", "Югдон", "Азвесь", "Италмас"... Ӵапак нимъёсты вошъян вакытэ, мукетъёсызлэсь адӟем карыса, вылды, Красноармейской ульчаысь "Промстройбанк" но "выльдӥськыны" малпаз. Отысь кивалтӥсьёс городысь улӥсьёслы телевизор пыр вазиськизы, чебер ним шедьтыны курыса. Вормисьлы ӵектӥзы пӧртэм буёло телевизор. Ватсамын на вал, вылез нимыз туж вакчи но удмурт "шӧмо" мед луоз шуыса. Гажано Шӧкыче, мон но шумпотыса пыриськи ялэм тэкшероназы. Ӵектӥ ниманы "Осконбанк". Конвертэ интыяса, контораязы нуи. Мар луоз - лу! Тау шуизы. Учком, пе... Конкурсэз йылпумъян нуналэ телевизор азьын шокатэк кадь пукисько... Нош конкурсъя нырысь инты басьтэм нимез лыдӟыкуз, дикторлэн лулыз ӧз сузь. Тани со ним: "Евроазиатский банк экономического развития". Вакчияк вераса - "ЕАБЭР". Учкисько но долак паймисько: куремзыя вакчи малпам ним биньгозы кузьда пӧрмем, кытын луэмзэ мын но утча: яке Европаын, яке Азиын со... Дуно кузьым - телевизор приз та банкын ужась адями кие кылиз... Озьыен, гажано Шӧкыче, мон уг валаськы: малы палэнысь адямиослы вазиськемын вал конкурс? Ойдо, эн куректы юнме, гажано дурбасьтӥсе. Мынам "Осконэ" чиптэм-чаптэм ӧз быр. "ЕАБЭР" сое кузьмам (дунын яке дунтэк - уг тодӥськы) тодмо страховой компаниезлы. Нош соиз "Осконме" малы ке но асэстэм - "Аскон" карем: сыӵе кылэз табере удмуртысьтыз но, нокыӵе мукет словарьысь но уд шедьты ни. Ас нимысьтыз удмурт "шӧмзэ" малы ке но сурано кариськем мукетыз но туж бадӟым кун вузкарон учреждение. Со Карл Маркс ульчаын сылэ. Солэн кымес вылаз уй но нунал югдытӥське "Аксион" йыръян. Ортчем дыръёсы отын мотозаводлэн столовоез вал. Соин йыръянысьтыз "сион" люкетсэ валэктыны луоно ик кадь. Нош вузкарон юртлэн пушказ пырыса, воксё абдраськод - маиз гинэ отын ӧвӧл - лэсьтӥськон материал, ӝӧкъёс- пуконъёс, дӥськут, телевизоръёс, тусьты-пуньыос... "Сиён" вузъёс сокем трос ик ӧвӧл. Нош "сиён" азьысь "Ак"-сэ утчаса но уд шедьты... Мар-о со сыӵе - нокин уз валэкты. "Аксион" кылэз утчаны кутски словарьёсысь. Ӧй шедьты. Солы тупасез гинэ вань кадь - "аксиома". Юан пус ке пуктоно, удмурт кыллы укшаны кутске: "Ак сиом-а?" Нош кыӵе со "ак" нимаськись сиён? Шат тон, гажано Шӧкыче, юрттод мыным но "Аксионэ" пырасьёслы сое валэктыны? Англичанъёслэн вераськоназы удмуртъёслэн сямен ик "ӟ" но, "ӵ" но, чурыт и но кылӥсько. Сое санэ басьтыса, шара лыдӟы ай, Шӧкыче, Пушкинской ульчаысь магазинлэн ӧс вадьсаз гожтыса юнматэм "Сити" нимзэ. Зарезьёс сьӧрысь пунэмаса ваем нимез вераны мынам кылы уг берытскы... Верай мон та сярысь магазинысь вузкарисьёслэн кузёзылы - со пельпумъёсыныз выретыса вазиз: "Америкаын со самой тодмо урам". Нош мон озьы валэктонлы пумит вази: удмурт кылын, пӧй, со самой зын маке... Чеберске удмурт кунлэн шорсюлэмыз Ижевск. Улон коркаослэн "гулбечъёсазы" кыӵеесь гинэ вузкарон интыос уг кылдыло! Нош маин соос вузкаро? Йыръянъёссыя нокызьы уд вала, пушказы пыратэк. Кызьы ке нимъёссы, озьы ик ӝажыос вылысь мар но созы кунгож сьӧрысь вайылэмын, нош дунъёссы вӧлдэтысь басьтылэмын. Я, ӵок ини... Нош таяз учыре "ӵок ини" шуэме уг пот...Кемалась тодмо эшеным, трос дыр ортчем бере пумиськыса, Ленин ульчаетӥ вамыштӥм. Тани со тодмо юрт. Пурысь интые тӧдьы буёло луэмезлы синъёс шумпото: Выль ар азьын тӥни озьы "Ошмесмы" эшшо но чылкытомем! Ӧс доры гинэ вуим - йыр вадьсын мар ке но йыггетыны ӧдъяз. Учкиськом но адӟиськом: кык воргоронъёс юрт сэреге туж бадӟым "е" буква юнмато. Палэнэ кожыса лыдӟиськом: "Кафе". "Нош "Ошмес" кыллы инты-а, мар-а ӧз шедь?" - юаськом воргоронъёслэсь. "Кузёос мае сётӥзы, сое ик ошиськом",- ивортӥзы соос. - Нош кузёос кытын? - Буфетын вузкарись гинэ татын, мукетъёссэ нуназе тылын утчаса но уд шедьтэ. Буфетысь егит кышномурт милемлы ивортӥз: калыклы сиён-юонъёс дасянъя трестын, пе, "Ошмес" кылэз ӵабъязы, малызэ, пе, уг тодӥськы... Гажано Шӧкыче, ачид пумиськы вал соосын, золгес лека вал ошмесо удмурт музъемлэсь нимзэ сэрпалтэмзы понна! Выль 2000-тӥ ар азьын Иж карлы кузьым, дыр, со? Леонид ДАНИЛОВ. Огсыр ужа Селта ёросысь Вуж Монья гуртысь колбаса лэсьтон цех азьвыл толэзьлы быдэ сизьым тонна сӥльлэсь сиён поттэ вал. Солы дунъёс будэмен валче, берло дыре одӥг но ӝыны тоннаозь гинэ дасяны кутскизы. Потто укмыс пумо колбаса. Мценской но брянской сортсэ али гинэ лэсьтыны кутскизы ай. Сиён поттон кулэсмиз ке но, цех огсыр ужа. Сӥльлы ёрмонъёс уг луо. П.Николаев. Кутсконэз мытэмын Алнаш районысь Асаново совхоз-техникумын ортчиз ёросысь арганчиослэн "Шуд, арганэ!" конкурссы. Сое кӧняетӥ арзэ радъя "Юность" культура юртлэн директорез, Удмурт Республикаысь культура удысын дано ужась Валерий Гоголев. Та ужрад бордысен районын кутскиз Быдӟым Вормонлы 55 ар тырмонэн валче "Салют Победы" фестиваль. С.Петров. ШӦКЫЧ Голосоватьтэм потэ Ӟечбур, Леким кудо! Гожтӥсько тыныд кудӟемъёсты сазьтӥськытон интыысен - одӥг кылын вераса, медвытрезвительысь. Эн паймы, гожъяме курег ӵабъям кадь шуыса. Мон татын толло нуналысен. Туж бадӟым куронэн тон доры: гуртысьтыд мыным вай ыштан но куфайка, эшшо бур пыдам колоша. Кин тодэ, кӧня улоно луоз на татын? Дӥсе ӧвӧл, уго юыса пограсько ке, ачид тодӥськод, соку ик кылиськисько. Мельтонъёс трусик коже шедьтӥллям. Шуисько соослы ӵуказе, пӧй, выборе мыноно, уг тодӥськы, кин понна голосовать кароно. Вот и юи... Соослы, бен, мар, ужась кулэ луэм, лэся, вот и кутыло мон кадьёсты. Леким кудо! Мотри, туннэ гожтэтме басьтӥд ке, соку ик лык, олокӧня нунал возёзы, незнай. Юазы, кӧняетӥ нуналзэ, пе, юиськод ни. Витетӥзэ, шуисько, дугдылыса, ма, уин изисько ук, нош мон, пӧй, кӧня нунал татын улом на? Кизилиё погонъёсын сылӥсез шуиз: шутэтскы ни, пе, витёйзэ. Леким кудо! Жаля монэ: семейной трусик коже ветлӥсько уже. Со но маке быдӟа. Монэ адӟо ке, "пугало" гинэ шуо. Кышное сое вуриз вал, кема мед чидалоз шуыса, сюбегзэ, пе, ӝог кесясько. Витисько, ӝоггес лык. Кынмеменым солань-талань бызьылӥсько ке, шлангзэс усьто но вуэн пылато, ӝоггес, пе, сазёмод. Нош тон кин понна голосовать карод? Может, выборе лэзёзы монэ? Лыктӥд ке, сьӧрад ик кошко. Леким, сиёндэ но вай, ява, кин тодэ, витёй но возёзы соос, визьзы тырмоз. Дӥсь курисько но, уг сёто, татын, пе, пансионат ӧвӧл, нылъёс уг адӟо, маин лыктӥд, соин ик кошкод. Кышноелы эн иворты, а то пуны музэн утыса улоз. А татысь потӥ ке , солы тон дорын кунояй шуо. Квашня гуртысь Матвей. Парзи черкогурт, Глазов ёрос. Кечтака ӟазег Кечтакамылэн кӧт улаз зӧк-зӧк... ну, асьтэос тодӥськоды, маиз отын вань. Кечмес кыски, йӧлзэ сӥсъяй, нош пичи пие кобы кутэм но кечтака котыртӥ ветлэ. Кыскыны турттэ. "Мама, лёлёзэ мам-мам кальысал", - шуэ. Мон шусько: "Ӧвӧл ук солэн лёлёез, пие". Нош со: "Солэн нёнёез вань". Кызьы меда солы валэктоно, малпасько. Со нош ик кечтакамес ёртэ. Мон солы верай, солэн, ный, нёнёкез ӧвӧл, пузъёсыз. "Иське, - шуэ пие, - пуззэ гагаг уле понёнё". Ну, малпасько, таид поноз, дыр, уд но шӧды. Уго сыӵе шаян со милям. Мукет выжы пудо-живот поттоз но тӥни. Шуом, кечтакаӟазег. Айы ӟазегез но угось кудые пуктылэмез вань ни. Соиз кема потатэк отын пукиз. Пиелэсь лабыртэмзэ кылзӥськыса пуке, оло, ӟазег кылын вераське со милям. Ой, мае но уд адӟы ай солэсь... Атасысь Дарья Курегова, яке Чебершурысь почта Галя. Еостэс эн куштэ Берло дыре водительёс пӧлын киысь-кие ветло одӥг документысь чуръёс. Отын шуэмын: "Россиысь МВД-лэн но Минюстлэн 9-ИИ-31-98 номеро приказэзъя 1998-тӥ арын июне сюресъёс вылын ветлон правилое воштон пыртэмын. Вераськон мынэ транспортэн ветлыку кышкытлыклэсь утиськон еэн бырттӥськонлэсь куштӥськон сярысь. Озьыен, водитель но пассажиръёс асьсэос тодо ку но кытын бырттӥськыны кулэ соослы. ГИБДД-ын ужасьёслэн еэн бырттӥськыны курыса косонзы законлы уг тупа. МВД-лы та приказэз валэктыны курыса валэктон ужез кужмоятыны кулэ. Со бумагалы ке осконо, со, пе, печатламын "Российская юстиция" журналлэн 1998-тӥ арын июнь толэзе потэм номераз. Та пумысен ми вазиським Удмурт Республикаысь югдурез утёнъя министерствоысь ГИБДД-лэн управлениысьтыз начальниклэн воштӥсезлы, милициысь полковниклы В.П.Афанасьевлы. Кызьы валэктӥз Валентин Петрович, Россия Федерациын сюресъёс вылтӥ ветлон правилоосты нокин воштыны уг быгаты - МВД но, Минюст но. Али кутӥськись куронъёс Россия Федерациысь Министръёслэн Советэнызы - Правительствоен юнматэмын 1993-тӥ арын 23-тӥ октябре, постановленилэн номерез - 1090. Озьыен, кышкытлыклэсь утиськон еостэс золгес бырттылэ. Та вакытэ сюресъёс вылын йӧвалег, лымы букосъёс. Н.Байтеряков. Тодматскон сэрег Аб. 336. Удмурт воргорон, 33 арес, улӥсько гуртын анай-атаен ӵош, нокыӵе ужлэсь уг кышкаськы. Тодматскысал ужез яратӥсь 22-30 аресъем удмурт нылмуртэн. Возьмало туспктэмен гожтэт. Аб. 337. Удмурт пияш, дышетске 11-тӥ классын. Тодматскысал визьмо, умой дышетскись 16-17 аресъем удмурт нылашен. Аб. 338. Ӟуч пияш, 18/180, улэ Свердловск областьысь городын. Тодмасткысал 15-18 аресъем удмурт яке ӟуч нылашен, ужез яратӥсь медло. Гожтоно ӟуч сямен. (Ялонэз потаз ни - Аб. � 309.). Аб. 339 Удмурт пияш, 25 арес, уг юы, уг кыскы, ужась. Тодматскысал 18-24 аресъем удмурт нылашен. Вите фотографиен гожтэт. Редакцилэсь: Лыдӟисьёсмылэсь ялонъёссэс тодматскон сэреге сётӥськомы, дун басьтытэк. Нимзэс, кытысь луэмзэс газет пыр ум шараяське, ваньмызлэн адресъёссы редакциын. Ялон сётӥсен тодматскыны мылкыд карисьёслы ивортӥськом: адресъёсты ми нокинлы ум келяське. Абонентлэсь номерзэ пусйыса, редакцие гожтэт ыстэ. Нош кинлы ке сӥзем гожтэттэс маркаен чылкыт конвертэ понэ - ыстомы кулэ адресъя. "Я+Я" Та служба пыр тодматскыны мылкыд карисьёс, гожтэттэс "Удмурт дунне" газетэ эн келялэ. Ыстоно таӵе адресъя: 427630, Удмурт Республика, с. Юкаменское, а/я 10, "СЗ" аб. �... Гожтэтады одно ик понэ маркаен буш конверт, сотэк тӥледлы вазиськись уз луы. "Я+Я" служба ужа ке но Юкаменскын, гожтэтъёс отчы вуо быдэс республикаысьтымы, озьы ик Россиысь но солэн палэнысьтыз. Юрттэт сёто дунтэк. Воргоронъёс Аб. 501. 31/175/68, удмурт, гороскопея Стрелец, механизатор, кышнояськылымтэ, лякыт сямо, вазиськись. Яратӥсько чорыганы, пӧйшураны. Улӥсько анай-атаен ӵош, улыны лыктоно мон доры. Тодматскысал 22-30 аресъем веськрес мугоро нылмуртэн, пумит ӧвӧл одӥг нылпиезлы. Аб. 526. Тодмасткысал 18-23 аресъем веськрес мугоро нылмуртэн, пумит ӧвӧл одӥг нылпиезлы. Ачим сярысь: 27/169/59, гороскопея Кый-Скорпион, ужез яратӥсь. Улӥсько селоын анай-атаен ӵош. Аб. 527. 33/169/65, гороскопея Близнец, йылпумъямын шор ёзо школаез. Ужасько, нокыӵе ужлэсь уг кышкаськы. Улӥсько гуртын анаен ӵош. Нылкышноос Аб. 0550. 24/150, синмаськымон удмурт нылаш, дышетскеме средне-специальной, ужасько школаын, будэ 5 аресъем нылы. Улӥсько селоын анай-атаен ӵош, вань аслам квартирае но. Вазиськись сямо, яратӥсько пӧраськыны, керттӥськыны, гурт котырын берганы. Тодмасткысал 24-27 аресъем, 160-170 см ӝуждалаен, средне-специальной яке вылӥ образованиен пиосмуртэн. Пытсэт сьӧрын пукемын медаз луы, коньдонлы ёрмисьтэм но "паллянэ" кожасьтэм. Аб. 0600. 38 /155/53, гороскопея Ошак-Скорпион, удмурт, дышетскемын вуриськисе, ужасько пудо вордон удысын, люкиськемын. Нылылы 16 арес, пиелы 11 арес. Яратӥсько лыдӟиськыны, вуриськыны, пужыятскыны, нокыӵе ужлэсь уг палэнскиськы. суд йырсиё. Пумит ӧвӧл улон интыме воштыны. Тодматскысал 38-50 аресъем воргоронэн, 155 (сантиметрлэсь ӝужыт медло, лякыт сямо, ужась, пытсэт сьӧрын пукылымтэ. Аб. 0593. 19/167/49, гороскопея Обезъян-Чорыг. Улӥсько анай-атаен ӵош райцентрын. Вазиськись, яратӥсько лыдӟиськыны, керттӥськыны, пӧраськыны. Учкымон тусбуё, мертчан йырсиё, курень синмо. Тодматскысал 19-25 аресъем веськрес мугоро пияшен, ужез яратӥсь медло, дышетскемез средне-специальной, пытсэт сьӧрын пукылымтэ. Тодмалод-а, уд-а? Смирнова, Тубылов, Пудова ӝутӥзы лыдӟисьмылэсь мылкыдзэ Ӧм, чик но ӧм малпалэ, Выль ар номере сётэм конкурсмы лыдӟисьёсмылэсь мылкыдзэс сокем бугыртоз шуыса. 31-тӥ декабре ик ини ялэм телефонмы жингыртыны ӧдъяз. Шаркан ёросысь Кельдыш гуртысь Александр Пантелеевич Вахрушев городын улӥсьёсты но азьпалтыса дыртэм Иже вазиськыны! Вот, пе, озьы но озьы, ваньзэ тодмай: Смирнова, Тубылов, Пудова. Ӟечкыласьком газетмылэсь эшсэ вормонэн! Кызьы сӥзим вал, солы келямын луоз та учырлы дасям фотоальбомъёсмы пӧлысь устоез. Огъя малпаммыя, Александр Пантелеевичлы Валентина Пудоваез тодманы юрттӥз, вылды, огпалась луэмзы. Калык артистка уго Кельдышлы матысь Петухи гуртын вордскемын-будэмын. Нырысетӥез бӧрысьгес ик редакцие жингыртӥз тросэзлы тодмо Роза Ивановна Яшина. Куинетӥ луиз Пичи Пургалась Нина Ивановна Шутова (адрессэ тодон вылысь, таизэ куриськом редакцие вазиськыны). Малпаськом, соослы но мултэс уз луы редакцилэн синпель кузьымез. Отӥяз ми чылкак паймим. 31-тӥ декабре но, туэ нырысетӥ ужан нуналъёсы но телефонъёсмы дугдылытэк гурлазы. Ижысь гинэ ӧвӧл, быдэс республикаысь лыдӟисьёсмы ивортыны тыршизы тодмам муртъёслэсь нимъёссэс. 6-тӥ январе вуизы нырысетӥ гожтэтъёс но. Отӥяз соослэн лыдзы шӧдскымон йылӥз. Тупатэм дыр ортчиз ни ке но, гожэтъёс весь лыкто на. Ми кема малпаським, ма кароно та адямиосын: кузьым сётъяно ке ваньмызлы, укыр трос люкаське, чик но лыдэ басьтоно ӧвӧл ни ке, эшлыко кусыпъёсты утеммы потэ. Таӵе мылкыдэ вуим: шонер ивор сётэм муртъёслэсь нимзэс газетын печатлано. Озьы ике кариськом. Тани соос: Е.И.Камашева (Завьялово), Е.В.Шестерникова (Дэбес, Легомувыр), Л.И.Кузьмина (Алнаш, Писеево), Н.А.Ильина (Шаркан), Т.И.Золотарева (Ижевск), В.Д.Александрова (Пичи Пурга, Вуж Монья), Е.М.Ложкина (Шаркан, Дырдашур), А.К.Моторина (Завьялово, Вуж Казмас), Я.Р.Зыкин (Ува, Нылга), И.В.Константинова (Дэбес, Зар.-Медла), Л.Н.Прокопьева (Сарапул, Уральский), А.А.Токарев (Можга, Бадӟымсурд), В.Л.Григорьева, А.С.Никитина, М.М.Кузьмина (Шаркан, Зюзино), Н.К.Иванова (Можга, Лудзи-Шудзи), В.Р.Михеева (Завьялово, Хохряки), С.С.Вахрушева но Л.М.Ивановалэн семьяез (Шаркан, Кельдыш), С.Арасланова (Селта, Гопгурт), С.М.Куклина (Шаркан, Таклё), Р.А.Бывальцева (Дэбес), Г.П.Бектышева (Пичи Пурга, Капустино), А.Петрова (Алнаш, Вуж Шудья), М.Ф.Тимофеева (Киясово, Вужгурт), В.В.Васильев (Яр, Кузьмино), Л.А.Тронина (Дэбес, Уйвай), В.Е.Павлова (Можга, Бадӟым Сибы), М.Сычугова но Е.Юферева (Балезино, Ново- Волково) но мукетъёсыз. Кӧня ке муртлэсь фамилиоссэ телефон пыр умой кылыны ӧз луы. Кинлэн ке гожтэтэз праздник нуналъёсы, оло, дорамы ӧз но вуы. Соин ик шонер ивортыса вылысь но фамилиды списоке ӧз шедьы ке, вождэс эн вае. Конкурс пумысен гожтэтъёсты но иворъёсты редакциын ужасьёсты туж шумпоттӥзы. Редакцие 200 муртлэсь трос вазиськиз. Ай тросэз быдэс семьяен пукиллям, дано адямиослэсь пинал дыр фотооссэс тодманы тыршыса. Тани Зюзиноысь Ивановъёс сизьым кузя люкаськиллям. Мылкыдмес бурдъя соиз но: газетэ ивор ыстӥзы республикамылэн пӧртэм-пӧртэм сэрегъёсысьтыз лыдӟисьёсмы. Шумпоттӥзы сарапулъёс. Отын газетмес трос уг басьто ке но, "Удмурт дуннеез" ярато, шӧдске. Дорамы гожтэт келязы кызьы ке арлыдоос, озьы ик пиналъёс. Тани Киясово ёросысь Карамас-Пельга гуртысь Е.П.Зиновьева кӧт ӝожзэ но пусъе. Газетмес, пе, весь басьтылӥ. Нош та арлы гожтӥськыны быгатымтэ. Тӥни кызьы берытскиз та улонмы! 28-тӥ январе лыдӟисьмылы 80 арес тырме. Ӟечкыласьком, Елена Петровна, юбилееныды! Шуг- секытъёслы эн сётске, ӟеч мылкыддэс эн ыштэ. 80 арес тырмоз туэ Красногорскысь дышетӥсьлы В.И.Поторочиналы но, уно вакыт ӵоже школаын ужам муртлы. Тӥледлы но умойзэ гинэ сӥзем потэ, Вера Иосифовна! Фотоосысь эшъёсты шонер тодыны быгатэм Шаркан ёросысь Кельдыш гуртысь 4-тӥ классын дышетскись Анжелика Вахрушева. Шумпотӥськом. Солэн ик бӧлякез Наталья Трефилова, Валентина Майорова (Пашур-Вишур), Мария Малых (Вортча) 7-тӥ классэ ветло. Таосыз но шонер валэктон ыстӥзы. Тросэз эшъёс газетэ нырысьсэ гожтӥллям. Нырысетӥ вамыш лэсьтӥды? Туж умой. Витиськом выль иворъёстэс. Ваньмызлы, кин шонер тодӥз фотое пуктэм адямиослэсь нимтулзэс, редакция сётоз туэлы но вуоно арлы борддор календарь. Со буёлэн поттэмын, отчы Михаил Егоровлэн Гербер праздник дыръя лэсьтэм чебер фотоез печатламын. Кызьы сое басьтыны луоно? Дэмлан таӵе: яке тӥ асьтэос (тодмоосты, эшъёсты, бускельёсты) пыралоды редакцие, яке март толэзе ми календарьёсты келяны тыршом ёрос газетъёслэн редакциосазы, соку отысь басьтыны быгатоды. Эшшо огпол ваньдэс ӟечкылам потэ на шонер валэктон сётэменыды, озьы ик - Выль арен, Выль даурен! Кӧня ке мыдлань валэктонъёс сярысь. Таосызлэн лыдзы уката но трос. Но со понна ик йыртӥян малпамын ук! Ойдолэ куд-ог йылпумъян лэсьтом. Оло фотоез вӧжогес дыръям лэсьтэмын, оло ассэ сое ӟечгес тодо, но ваньмыз сямен лыдӟисьёсмы тодмаллям Валентин Тубыловез (одӥг мурт гинэ солэсь тусбуйзэ Павел Вершининэн сурам). Шуггес югдур луиз нылъёсын. Светлана Смирновалэн пинал дыр тусбуез куд-ог эшъёслы син азязы пуктэм Нина Образцоваез, Антонина Лисинаез, Тамара Тихоноваез, Милитина Гавриловаез... Кык мурт отысь адӟем "Айкайлэсь" кивалтӥсьсэ Евгений Серебренниковез. Но уно дасо муртлэсь йырзэ сурам куинетӥ фото. Валентина Пудовалэн ныл дыръяз лэсьтэм туспуктэмез тросэз понна зэмос йыртӥянлы пӧрмиз. Кинэ гинэ отысь адӟиллямтэ газетмес лыдӟисьёс? Кожалод, шаерысьтымы вань учкымон кышномуртъёслэсь чеберзэс синйылтыны луэ та нылашлэн фотоысьтыз. Дасо пала эшъёс "тодмаллям" Светлана Смирноваез, со котыр ик - Роза Яшинаез но Милитина Гавриловаез, вить муртлы потэм, фотоын Антонина Лисина возьматэмын шуыса. Озьы ик "шараямын" Зоя Степнова (нылкышно огазеяськонлэн тӧроез, "Сактонлэн" кивалтӥсез), Любовь Захарова но Светлана Андреева (министръёс), Галина Владыкина но Нина Бакишева (артисткаос), Галина Романова но Зоя Богомолова (писательёс), Раиса Куликова (журналист). Чебер ныллэн тусбуез озьы ик тодэ вайытэм Александра Перевощиковаез, Ашальчи Окиез, Татьяна Барамзинаез но музон дано нылкышноосты. Ма бен, малпаськомы, урод ӧвӧл, дыр, со, куке лыдӟись вазиське газетлэн куронэзлы, сюлмысь пыриське ялэм конкурсэ. Ужрад пӧрмиз. Кызьы гожтэ автормы Нина Ермокина (Пичи Пурга, Шор Кечол), "газеттэс басьтыса, уин иземе ик ӧз луы ни". Быръёнын Смирновалэн дурбасьтӥсез луыса ужай, Тубыловен Пургаын ӵем пумиськылыны кылдэ, Пудоваез чеберезъя тодмай, ивортэ Нина Анатольевна. Тӥни озьы, куд-огез йыртӥянэз соку ик "пилем", мукетыз кӧня ке сураськем. Ӵок. Котьмалэсь пусйымонэз - лыдӟисьлэн ужрадэ пыриськемез. Ваньдылы, ваньдылы тау кариськомы! Азьланьын но газетэн кусыптэс эн ыштэ. Ижысь лыдӟисьмы А.Б.Панкратов тазьы пусъе: Смирновалэсь адӟем карымон йӧнлыксэ, Тубыловлэсь мур визьзэ но опытсэ, Пудовалэсь синмаськытӥсь чеберзэ одӥг муртлы сётысал ке, солэсь кыӟе зол президент пӧрмысал... Оло, кытын ке но туннэ будэ ини сыӵе адями? Куд-ог гожтэтъёсты (отчы, валэктонъёс сяна, газетлы трос мылкыд каронъёс но пыртэмын) ми азьланезлы кельтӥм на. Соосты уже кутыны тыршом. Нош али ивортӥськом: мылкыддэс лыдэ басьтыса, выль дауре выжон аре редакция эшшо но юнгес сюлмаськоз малпаськытӥсь ужъёсты ӵемгес печатлан сярысь. Таза луэ! Иван Лебедев. Адӟиды ке, паймоды Али Кибашлыослэн киужъёсъя шор юртазы (декоративно-прикладной искусствоя центре) пырид ке, синъёсыд кытчы учкыны уз валалэ, куэм арбериос пӧлы йыромыса. 16 ёросысь киужлы усто нылкышноос возьмато татын ас быгатэмзэс. Тросэз ӵушконъёс, салфеткаос, ӝӧккышетъёс, басма кесэгъёс ӝуткаса куэмын. Чиль-вор адско ныпъетъёс, пичи сумкаос, шобыръёс, миндэр пуйыос. Ваньмыз пӧлын висъясько, туж яркытэсь адско Пичи Пурга ёросысь Вуж Монья гуртысь Юлия Трофимовна Фоминалэн ковёръёсыз. Та кышномуртлэсь киужъёссэ табере, асьме шаерын гинэ ӧвӧл, олокытын но тодо ни. Выставкаын нимаз инты басьто Игралась ваем куиськемъёс. Таос вылесь ӧвӧл ни, чуро-чуро пужыоссыя валаны луэ: та палъёслэн асьсэлэн мукетъёсыныз сурантэм кибервылзы. Егитъёсгес тыршо туала шӧмо, тусо-буё арбериос кылдытыны. Куэм суредъёс гобеленъёс, панноос огласянь возьмато удмурт пужыосыз, мукет ласянь - символикаез (Шунды-мумыез, кунпусэз). Нош кызьы, пе, нылкышно чидалоз аслаз куэм басмаезлэсь-дэраезлэсь дӥсь вурытэк. Озьы туж чебер пужыё, дӥсямон-нуллымон пӧрмиллям Вера Васильевалэн но Наталья Камашевалэн, Альбина Ядыгаровалэн но Надежда Сидоровалэн дэремъёссы. - Мон ачим ик пайми, кыӵе чебересь куыны луэ вылэм огшоры выжлёгетъёсты ик, отын тупаса кошко ке буёлэз но пужыез, - шуэ та юртысь научно-методической люкетэн кивалтӥсь Светлана Баталова . - Пыралэ, адӟоды - та выставкамы 7-тӥ февралёзь луоз ай. Нош апреле кибашлыосмылэсь бадӟым праздниксэс ортчытом, йылпумъянъёс лэсьтом. Т.Петрова. Гожтэтъёс пӧлысь одӥгез Асьсэдыз адӟем потэ Газеттэс кутыса, соку ик син азе йӧтӥзы туспуктэмъёс. Милям шуо: анаезлы яке атаезлы кесем-басьтэм кадь укша. Светлана Константиновна Смирнова но Валентин Кузьмич Тубылов асьсэлы кесем-басьтэм кадь тупало. Куинетӥзэ уг ке но тодмаськы, гжтоно кариськи, туж тодэме потэ уго. Туж умой луоз, таӵе тунсыко адямиослэн туспуктэмъёсынызы артэ газетэ тросгес соос сярысь гожъясалзы на ке. Кылсярысь, тани удмурт радиоез но нуналлы быдэ кылзӥськом но, ум тодӥське, кин отын ужа, лякыт куараоссэс гинэ пелямы понӥськом. Ӵукна султыку ик "Визыл" передача кутске, олокытысь но иворъёс вуо, передачазэс одно ик кырӟанэн йылпумъяло, лумбытлы мылкыдэз ӝуто, яке кытӥяз синкыли но потэ. Турын пӧлысь узы-боры бичаку, Шӧмзэ но веръяммы потэ. Кыдёкысь ез кузя куарадэс кылзыку, Тусбуйдэс но адӟеммы потэ. Тӥни сыӵе мынам мылкыд каронэ. Оло, лыдэ басьтоды? Ӟеч сӥзёнъёсын тӥ доры пенсионерка - Лидия Никоновна Тимкешева, Алнаш районысь Асаново техникумлэн посёлоказ улӥсь. П.С. Роза Ивановна Яшина сыӵе вылымтэ меда? Солэн кадь тусыз? Кионъёс "шымыртӥзы" Красногорск палан кионъёс эрказъяськыны кутскизы ни вал кылем сӥзьыл ик. Одӥгаз уе соос посёлокын пуныез кесязы. Но берлоез учыр гуртоосты кышкатӥз, шуыны луоз. Кирове нуись сюрес вылысь Бадӟым Чуваши но Селег гуртъёс вискын вал со учыр алигес. Отын пурысь хулиганъёс огшоры воргоронэз "шымыртыны" кутскиллям. Маин йылпумъяськысал сыӵе пумиськон, автомобиль ке ӧй потысал. Кык кионъёс 17 час котырын кӧбератэк калгизы Пивовары гуртысь ульчаетӥ но. Сое адӟись воргоронлэсь быземзэ секундомерен мертасалыд ке, дуннелэсь выль рекордзэ пусйыны луысал, дыр. Н. Сергеев. Тол шудонъёслы дасяськыса Толэзь но ӧз кыльы ни республикаысьтымы гурт спортсменъёслэн 6-тӥез тол шудонзы но "Удмурт дунне" газетлэн азвесь кубокез понна куас вылын ӵошатскон дырозь. Кызьы верамы ни вал, спортлы сӥзем бадӟым праздник 23-тӥ феврале усьтӥськоз Шаркан черкогуртын. Та нуналъёсы ёросъёсын мынэ кужмооссэ спортсменъёсты быръён. Кылем шутэтскон нуналъёсы сыӵе ужрад ортчиз Завьяловоын но. Спортлэн тямыс удысэзъя - куасэн бызьылонъя, шахматэн шудонъя, теннисъя, гиря ӝутъянъя, киын нюръяськонъя, пичи футболъя, ыбылӥськонъя но семьяос куспын нюръяськонъя - ӵошатскиз быдэс район. Командаос пӧлын нырысетӥ интые потӥзы Италмас гурт администрациысь спортсменъёс. Вераны кулэ: гурт администрациен но, командаен но кивалтэ калык куспо спортъя мастер Нина Парамонова. Та посёлокын ик улэ но тренер луыса ужа спортысь дано "кизили" Галина Кулакова. Кыкетӥ инты шедиз Завьялово селоын улӥсь спорстменъёслы, куинетӥе потӥзы изгуртъёс. Н. Иванов. Алексей Шкляев Сусыпу Верос Песятай висьыны усиз сӥзьыл. Кызыны шӧта ке, быдэс мугорыз дырекъя. Маин но ӧз эмъяськы - чечыен, эмезен, аракыен. Бератаз солы дэмлазы мунчоын сусыпу веникен мунчоын париськыны. Аргурт вӧзын, ӝыны иськемын, Эляй нимо бам вань. Отын сусыпуос будо. Эляе ик веник тӥяны быдэтскиз песятай. Кускерттон сьӧраз тӥр донгиз. - Мон но сьӧрад, - дыртӥз школаысь бертэм Борис. Куазь туннэ няськыт. Сӥзьыл кадь ик ӧвӧл. Гужем ӵоже ӟаректэм шунды омырезлы ӟырдатыны уг вормы ни. Нош тӧлэз эрказъяськыны уг лэзьы, кезьыт омырез Эляй выжые уг лэзьы. Висись песятай ӵем дугдылэ но лулӟылэ: - О-хо-хо, кӧня сусыпу будылоз вал вазен та бамалын. Нюлэс кадь ӵок-ӵок. - Сэре кытчы-о луиз, песятай? - Кызё ар талэсь азьвыл гыризы Эляез. Матысь нюрез кӧсатоно шуыса. - Малы? - выльысь нерад каре Борис. - Бусыез паськытатом, пе. Тросгес нянь люкалом, пе. Не бусыез, не нюрез табере. Сусыпуос но куасьмо. - Ма, сусыпу немырлы но уг яра ук, песятай, - аслэсьтыз каре пияш. - Солэсь корка уд лэсьты. Гурдэ но уд эсты. Песятай нош ик дугдӥз: - Сыл ай, пие. Шоканме уг шедьтӥськы. Гурдэ уд эсты, шукод? Инкуазез озьы дунъяны уг яра. Тон тодӥськод-а, сусыпу но кипарис вынъёс шуыса? - Мынам кипарисэз адӟеме но ӧвӧл. - Мон армиын Крымын вал, - лулзэ мырдэм шедьтӥз песятай. - Кипарис отын тол но гужем пушъе. Куазь шулдыр-а, жоб-а, кипарис котьку вож-вож. Борис котырак учкиз: - Кыз но котьку вож ук. Со яра корка корлы но, рамалы но. Нош сусыпу... - Дунне вылын котьма ас интыяз, пие. Кыз но, тополь но, сусыпу но. Одӥг кылбурчи гожтӥз: инбамын кизилиос ӝуатско бере, соос кинлы ке кулэ ук. Котькудӥз ас малпанъёсаз выиз. Чалмыт вамышъяса вуизы Эляе. Улӥяз куасьмем сусыпу модосъёс гинэ кылиллям на. Лек тылпу кузёяськем, кожалод. Песятай, ас кужымезлы оскытэк, вылды, выллане кема учкиз. - Тӥни, песятай, отын чебер сусыпу вань, - возьматӥз Борис. Нош песятай тубыны уг дырты. - Вай тӥрдэ. Мон ачим коралто но васькыто, - дыртытэ ерпечка. Песятай тӥрзэ мычиз: - Ме, пие, тае гуртэ ну. Мон татын витё тонэ. Лопатка вай. - Малы? - абдраз пияш. - Берло тодод. Огнад уд йыромы, дыр. Тӥни вамен ульча пырак татысен адске. Борис, тӥр кутыса, гурт пала бызиз. Песятай секыт шокаса тубиз пуштрес сусыпу дӥне. Куашкамтэ кӧжы пырыосты оген-оген бичаз но ымаз понӥз. Кема кушаса сылӥз. Котыр утчаськиз. Собере дугдӥз муысь алигес мычиськем сусыпу вӧзы. Ӵужектэм турын вылэ гаӵоло выдӥз. Одӥгзэ куасьмем модосэз пинь висказ донгиз. Инмысь тӧдьы пилемъёс шоры жальмаса кыллиз. Борис вуиз. Шок-пуль шока. Пуштрес сусыпу вӧзы дугдӥз. Огзэ ваез някыртыны выриз. - Тӥрме юнме кельтӥ, песятай. Лопатаен тае уд кора. Киын но уд тӥя - бышкаське. - Асьмеос ум но коралэ, ум но тӥялэ. Песятай бадӟым сусыпу дорысь палэнскиз. Пичи сусыпу модос котыртӥ лопатаен котырес гож суредаз. Мур шокаса, лопатазэ мычиз Борислы: - Омыр уг окмы, пие. Ме, ӝикытак гуд. Сусыпуэз муысь юн чакласа поттӥзы. Выжызэ песятай ныркышетэн бинялтӥз. - Тае асьмеос доре мерттом, о-о-а? - ятвылтӥз пияш. - Нош кытчы-о, песятай? Бакчае-а? Ульчаысь укно улэ-а? - Азбаре, пие. Пиёк оскытэкгес учкиз: - Нош ку ай татысь веник тӥялод, песятай? Ку уллялод висёндэ? - Мед гинэ выжыяськоз. Соку мон уг курадӟы ни. Сусыпуэз соос мерттӥзы азбар укно улэ. Шуныт сӥзьылэз воштӥз кезьыт тол. Песятайлэн лек кызонэз уката кужмояз. Со педло ӵем ик ӧз поталля ни. Нош Борис сусыпу доры ветлӥз нуналлы быдэ сямен. Одӥг уе, тачак лымы усем бере, модос вылысь вань тӧдьы шобретсэ курткиз. Сусыпулы сотэк но юзмыт, вылаз ик, кезьыт лымы сое кынтыны выре на. Мозмытоно! Толбыт пияш сусыпуэз возьмаз кезьыт лымылэсь. Бератаз вуиз тулыс. Кенер улысь мычиськизы нырысетӥ будосъёс. Мар та таӵе? Сусыпулэн вылӥ вайёсыз уг улӟо. Нырысь ӵужектӥзы, собере кӧс ньӧръёслы пӧрмизы. Борис бызиз корка пушкы: - Песятай, сусыпумы кӧсаны медэ. - Кӧсаны? - бездэм ымдуръёссэ мырдэм выретӥз пересь. - Куасьмыны-а, мар-а? - Бен, бен, куасьме кадь. - Юртты ай, пие. Песятай каллен дӥсяськиз. Боды вылэ пыкъяськыса, мырдэм потӥз азбаре. Дугдӥз сусыпу вӧзы. Кема сылӥз. - Тон, пие, та вылэ ву ӧд киська-а? - Ӧй. Тон ӧд косы ук. Мон сое толбыт туж чакласа вози. - Чакласа? Кызьы? - Вылысьтыз лымызэ курткылӥ. Медаз кынмы, пӧй. - Иське, сусыпуэз утьыны вырид кезьыт лымылэсь, - песятайлэн ӟаректэм ымныраз пальпотон мактал ӝужаз. - Нош тон тодӥськод-а: лымы шунтэ - уг кынты. - Кызьы шунтэ? - абдраз Борис. - Куасэн нискылаку усёно ке, кыӵе-о чонгырано. - Шонер, пие. Лымы улысь потӥськод ке, котмем интыостэ тӧл юн юзматэ. Нош ачиз лымы кезьыт ӧвӧл. Кезьыт, но котырысь омыр сярысь шунытгес. Природоведение урокын сое ӧз вералэ шат? - Ӧвӧл милям сыӵе урокмы, - лулскиз пияш. - Мар-о, та куасьмем модосмес ишкалтыса сэрпалтом-а? - Эн дырты, - алӥз песятай. - Озьыен, асьмеос тодӥм: писпулэсь лымы шобретсэ толалтэ сэзъяны уг яра. Тон сусыпуэз выжыозяз гольык ӧд кельтылы, дыр. Песятай мырдэм пыдесъяськиз, йырзэ модос выжы пала мыкыртӥз но зынъяськиз. Шумпотӥз: - Бырымтэ, бырымтэ модосмы! Нош зыныз кыӵе капчи! Борис но зынъяз. - Номырзэ уг шӧдӥськы, песятай. - Инкуазьлэсь зынзэ адями мӧйымыса гинэ вала, пие. - Ку ай татысь веник будоз, песятай? - Мыным веник кулэ ӧвӧл ни, пие. Мыным сусыпу зын но окме. Пересьлэн кызонэз пӧсьтыны медэ вал. Но со гадьзэ посыса буйгаз: - Табере сусыпу омырен мынам кӧты тыре. Песятай кулӥз сӥзьыл. Нош сусыпу пуш-пуш улӟиз. Тылпуэз кысыны... мотоциклэн Берло дыре малы ке тылпуослэн лыдзы чутрак будӥз. Сутско нюлэсъёс, пудо гидъёс, сад-бакчаос, нимаз коркаос... "Горд атасэз" кысыны ялан шуггес но шуггес луэ - я автомашинаослы эстӥськон ӧвӧл, я тылпу кысӥсьёс кыдёкын. Шуом, городын пожарнойёс тылпу потон интые шорлыдын 6 минутскын вуо но сое ог 15 минут куспын кысо. Гурт сярысь ке верано, солы 13 но 35 минут дыр кулэ. Асьтэос тодӥськоды, котькудӥз гурт али тылпу кысон техника басьтыны уг быгаты, дуно сылэ. Но таӵе учыре тӥледлы юрттоз дунтэм но пичигес гинэ техника. Со "Ижмаш- Мото" акционер огазеяськонлэн тылпу кысыны чаклам "Иж 6920-01" мотоциклэз. "Иж- Планета-5" мотоцикллэн инъетэз вылын дасям модельлэн кык тактэн, одӥг цилиндрен двигателез. Со часлы 70 иськем ӝоглыкозь ветлыны быгатэ. 60 иськем ӝоглыкен мыныку, 100 километрлы 8,4 литр эстӥськон кулэ каре. Машинаын 12 передачаез: 8-эз азьлань, 4-ез - берлань. Тылпу кысон оборудование пыро мотопомпа, сеткаен ву кыскон гумы, ву сётон гумы но мукетыз. Ву доры мотоциклэн мыныны луонлык ӧвӧл ке, мотопомпаез капчиен гинэ басьтыны луэ. Мотопомпаен ву басьтыны луэ кызьы ке шурысь, озьы ик тылпуэз кысонъя нимысьтыз чаклам гумыысь. Мотопомпаен часкын 50 кубометр ву сётыны луэ, вуэз со пызйыны быгатэ 15 метрозь. Помпалэн секталаез 73 кило. Быдӟалаез - 790х400х55 миллиметр. Мотопомпа ужа оскымон, механизмез туж огшоры, тупатъяны но лякыт. 02 ивортэ Алнаш палан Шайтангуртысь кык возьмаськисьёслы 5 часэ ӵукна ик ӧз удалты. Синмазы газэн пазьгыса, тодмотэм муртъёс фермаысь скалэз машинаен нуизы. Наручникъёсын кортнам возьмаськисьёс одӥг час ортчыса гинэ милицие ивортӥзы... Кыкез лушкаськисьёс кутэмын. Огез Ижысь 21 аресъем Ильшат Т. вылэм. Машиналэн кузёез но тодмо ни. Милиция мукет эшъёссэс утча... Скал гидаз берыктэмын. Байтэрек гуртысь пудо утись С. кӧттырымоназ вина юыны но тамак кыскыны малпаз. Магазинлэсь ӵогетъёссэ тӥяса, одӥг сюрс манет тыр вина но "Прима" кыскон поттӥз. Лушкам арбериосыз таламын. Ёросысь милиция кутӥз Набережные Челны городын улӥсь 60 аресъем Е. Выль ар со Улын Котныр гуртысь магазинэз бушатэм. Одӥг час гинэ кулэ луиз милицилы Можга пиез А. кырмон понна. Со Алнашысь "Дорожное" кафелэн кассаысьтыз уксё поттӥз. Тракторез качазы Кизнер ёросысь "Нива" эштослэн ЮМЗ тракторез "гольык" кыле вал ни. Гаражлэсь возьмаськисьсэ жугыса, куинь пиосмуртъёс ву насосэз но тракторез лэзён устройствоез качазы. Йыртэмасьёсты кема ӧз утчалэ: Киров палась "куноос" вылӥллям. Холодильник кулэ луэм Со понна пыриллям вылэм Сарапулысь одӥгаз квартирае 6-тӥ классын дышетскись Ч., 5- тӥ классысь Г. но 3-тӥ классын дышетскись П. Ӧсэтӥ холодильникез поттыкузы, соосты корка кузёлэн бускельёсыз адӟиллям. Пиосты милиция "ужан" интыязы ик кырмиз. Куиньназы но дышетскисьёс быдэ вуымтэосын ужанъя отделын учётын сыло. Тамак понна ыбизы Уйшор бере Воткинскысь "Махотин" лавкае кык егит пиос пыризы. Пистолетлы кельшись арбериен кышкатыса, вузкарись Р. уксёзэ куризы Пумит ваземез бӧрсьы, кышномуртлэн кияз ыбизы но одӥг "ЛМ" сигарет кутыса кошкизы. ГИБДД-ын ужасьёс йыртэмасьёсты ӝегатӥзы. Милиция пичи калибрен пистолетсэс утча. Курег пузэн шедиз Ижысь Орджоникидзе урамысен ГИБДД-лэн патрулез 25 аресъем Б. ӝегатӥзы. Со "Ижевская" тылобурдо вордон фабрикаысь 10 кассета курег пуз поттэм. Ачиз татын слесарь луыса ужа. МВД-лэн коллегиез Кылем арлы йылпумъянъёсъя МВД-лэн коллегиез ортчиз. Солэн ужаз пыриськизы Кун Кенешлэн Тӧроезлэн нырысетӥ воштӥсез П. Н. Вершинин, Правительстволэн Тӧроез Н. А. Ганза, Ижевсклэн вице-мэрез С. В.Протозанов. Доклад лэсьтӥз югдурез утёнъя министр В. Ф. Щербаков. Таӵе секыт вакытэ югдурез зол чакласа возён пумысен вераськиз Н. А. Ганза. МВД-лэн 1999-тӥ арын ужамезлы шоро-куспо дунъет сётӥзы. Озьы ик йылпумъянъёс лэсьтэмын милицилэн ёзъёсыз куспын ӵошатсконъёслы. Вормисьёслы синпель кузьым сётэмын. Удмурт Республикаысь МВД-лэн сводкаосызъя дасяз А. Андриянов. Ар ӵоже ортчылозы Кылемаз арняе Кун Кенешлэн юртаз люкаськылӥзы "Удмурт кенеш" огазеяськонлэн Ижысь ёзъёсысьтызы адямиос. Ог-огзылы дэмланъёс, ӵектонъёс сётъяса кенешизы соос ог- огедлы юрттон, валче ужан пумысь. Ӟеч мылкыд каронъёссэс, сизёнъёссэс веразы Илья Байметов, Ольга Шилова, Леонид Гонин, Елена Ботникова, Евгений Егоров, Роза Кириллова, мукет адямиос. "Удмурт кенеш" борды юнматэм лекторъёслэн огазеяськонзы (отын луоз ньыльдон адями) сярысь ивортӥз солэн кивалтӥсез Удмурт кун университетысь дышетӥсь Галина Шушакова. "Удмурт кенеш" огазеяськонлэн тӧроезлэн воштӥсез Нина Малых люкаськемъёсты тодматӥз ар ӵоже ортчытыны чаклам ужрадъёсын. Е. РОМАШОВА. Афганистан Чечнялы юрттоз Та нуналъёс ОРТ пыр витьымтэ ивор кылӥськиз: "Афганистанысь экстремистъёслэн "Талибан" огазеяськонзы Аслан Масхадовлэн правительствоезлы дурбасьтэмез сярысь ялӥз". Озьыен, талибъёс "эрико" Ичкерие дипломатъёссэс ыстыны туртто. ОРТ-ын соку ик ивортӥзы, Россиысь контрразвечикъёс та выллем малпанъёслы пум пуктозы шуыса. Кызьы тодмо, террористъёсын но наркотикен тырмытэм Афганистан куинь кунъёсын гинэ кусып возе: Пакистанэн, Саудовской Аравиен но Огазеям Араб Эмиратъёсын. Табере соос радэ Чечняез но пыртыны малпло. Озьы лымшор палан кыӵе ке бышкись кужым кылдыны выре. Валамон, "дипломатъёс" одно ик боевикъёслы пӧрмозы. Соку одӥген-кыкен талибъёс кунгож пыр "пыӵалозы". ФСБ-ын ужасьёс чурыт кылзэс веразы ке но, мар пӧрмоз солэсь - тодмо ӧвӧл. Тодӥськоды на, дыр, кык-куинь ар талэсь азьло талибъёс Таджикистанэз "мозмытом" шуизы вал. Армия, ФСБ соку но оскытӥзы вал: кунгож пытсамын луоз. Но сюрес сюриз. Отӥ данак талибъёс кунгожез выжизы. Берло ини солдатъёс "пасез" пытсазы. Кульчое сюрем экстремистъёс быдтэмын вал. Кӧня адями быремын, созэ санэ ӧз басьтэ. Сюлэмшугъяськытэ мукетыз: кызьы кунгожын "ӟубис кельтэм ӧс" кылдӥз? Таӵе ик югдур уз луы-а Чечняын? Кин тодэ. Тросэз шуозы: "Чечня - со Россилэн улосвылэз. Таджикистан - нимаз государство, аслаз армиез". Но таджик музъемез Россиысь солдатъёс но утё, пӧлазы Удмуртиысь пиос но вань. Гурезьёсын трос, дыр, чеченъёслы гинэ тодмо сюбег сюресъёс. Нош кӧня Аргун гурезь вис кадь интыос? Шуг вераны кытчыозь кыстӥськоз на чечен музъемез "чылкытатон". Армилэн кивалтӥсьёсыз оскыто, Грозныез басьтӥм ке, вормон вуоз. Амалтэк тодэ лыктэ Наполеон. Француз армия 1812-тӥ арын Москваез басьтӥз. Быриз-а Россия? Асьмеос ум тодӥське, Грозныйлэн палэназ кыӵе югдур. Соиз сярысь ивор вӧлмытӥсьёс уг верало. Тодо-а меда асьсэос военнойёс? Туннэ Афганистан Масхадовез бурд улаз басьтэ. Бордазы Пакистан, Саудовской Аравия, Огазеям Араб Эмиратъёс но Палестина итӥськозы на. Эшшо кин? Соиз сярысь нокин уг тоды. Табере США но аслэсьтыз интересъёссэ утьыны но утьыны выроз ни. Вунэтэ кадь, Россия со Югославия ӧвӧл шуыса. Котьма ке но, Россилэн вуоно президентэзлы мултэс кузьыт сиён шедёз кадь. А.Андриянов. Удмурт Республикаын референдуме поттыны ӵектэм дунъянъя комиссилэн йылпумъянэз сярысь Удмурт Республикаысь Кун Кенешлэн Президиумезлэн Постановлениез Удмурт Республикаысь Кун Кенешлэн Президиумез пуктэ: 1. Юнматоно Удмурт Республикаын референдуме поттыны ӵектэм ужпумез дунъянъя комиссилэсь йылпумъянзэ (улӥын сётэмын). Удмурт Республикаын калык пӧлын: Удмурт Республикаысь Кун Кенешлэн тямысэтӥ (азьло чакламтэ) сессияз эскероно референдуме поттыны ӵектэм ужпумез, таӵе юан пуктыса: "Умоен-а Тӥ лыдъяськоды Удмурт Республикалэн Конституциезлэн 10-тӥ ёзэтысьтыз 1- тӥ люкетаз таӵе воштон пыртонэз: "1. Удмурт Республикаын кун властез быдэсъяло Удмурт Республикаысь кун Кенеш, Удмурт Республикалэн Президентэз, Удмурт Республикаысь Правительство, Удмурт Республикаысь Конституцияя суд, Удмурт мировой судьяос. Удмурт Республикаын кун властья мукет ёзъёс но кылдытӥськыны быгатозы. Соосты кылдытон но ужатон радлык быдэсяъське Удмурт Республикалэн законъёсызъя но Россия Федерацилэсь законъёссэ лыдэ басьтыса". референдум ортчытон сярысь ужпумез эскероно Удмурт Республикаысь Кун Кенешлэн тямысэтӥ (азьло чакламтэ) сессияз. Удмурт Республикаысь Кун Кенешлэн Тӧроезлэн нырысетӥ воштӥсез П. Н. Вершинин. Ижевск город, 2000-тӥ арын 18-тӥ январе. � 106-ИИ. Вӧзамы - воз пыӵал тӥрлык Россиысь ФСБ-лэн республикаысь управленияз ивор вуиз йыружъёсын герӟаськем огазеяськонлэн ватыса пыӵал тӥрлык воземез сярысь. машина лэсьтӥсьёслэн посёлокысьтызы огаз квартираын утчаськон-эскерон ортчытэм бере, ивор зэмаз. Ватэм интыосысь шедьтэмын Макаровлэн кык пистолетэз, ТТ пистолет, Марголинлэн но ТТ пистолетъёс, револьвер, маузер, газэн ыбылӥсь пыӵал, пуштытӥсь арбериос, боеприпасьёс, уно пуртъёс, озьы ик героин но перветин наркотикъёс. Квартираяз пыӵал тӥрлык возись кузёлы пумит уголовной уж ӝутэмын. Мынэ следствие. Россия Федерациысь ФСВ-лэн Удмурт Республикая управлениезлэн пресс-службаез. Вераськон ӟырдыт мынэ Борис Ельцин сураз вань малпанъёсты. Россилы президент туэ тулыс ик бырйыны пусъемен валче, асьме депутатъёс табере амалтэк ӝогомытоно луо кутскем ужъёссэс. Вераськон мынэ асьме Конституциез выльдон но элькунмылы Кивалтӥсь быръёнэз радъян сярысь. Конституцилэсь валтӥсь ёзъёссэ воштон понна кулэ 75 депутатъёслэн огкылысь луэмзы. Осконтэм со. Югдурез тупатон вылысь, куд-ог эшъёс март пумын референдум ортчытыны дэмлало. Та ужпумъёсъя ӟырдыт вераськон ӧръяськиз толон Кун Кенешлэн тямысэтӥ азьло чакламтэ сессияз. Жанна Дворцова, Валентин Тубылов, Виталий Соловьев, Валерий Фридрих но мукетъёсыз томатӥзы асьсэ малпанъёсын. Нуназе депутатъёс фракциосъя люкиськыса ужазы. Вуоно номерын ми ивортом, маин йылпумъяськиз парламентын вераськон. И. ВАСИЛЬЕВ. "Ветеран - 2000" Ижевскын ортчиз шахматэн шудонъя "Ветеран-2000" ӵошатскон. Со дас нунал ӵоже мынӥз. "Ижпланета" клубын. Ньыльдон пала мӧйы адямиос эскеризы асьсэлэсь кужымзэс. Кыкетӥ арзэ ни чемпион ним басьтӥз физкультурая "Прометей" коллективысь спортъя мастер Владимир Федосеев. Со 9 луоноез пӧлысь 8 очко люказ. Солэсь ӝыны очколы гинэ бере кылиз одӥгез мӧйыез спортъя мастер Иоганн Вельтмандер. Быдэн куать очко люказы спортъя мастере кандидат Владимир Иванов, Александр Васюков но Юрий Мемехов. Воргоронъёсын артэ нюръяськизы нылкышноос но. Котькинлэсь усто шудӥз спортъя 6-тӥ школаысь директорлэн воштӥсез Валентина Гринченко (4 очко). Ижевскысь спортсменъёсын ӵошатскыны ветлӥз Можгаысь чемпион Рамзи Сайфуллин (3,5 очко). "Быдӟым Отечественной оже ветлэмлы" нимысьтыз приз сётэмын Юрий Акуловлы ("Ижсталь" спортклуб, 4 очко). Усто шудэмез понна пусъемын кыкетӥ разрядэн шахматист, национальной музейын ужась Владимир Новиков (5,5 очко). 28-тӥ-30-тӥ январе Удмуртиысь школаослэн нюръяськонзы ортчоз. И.Шахов. Азьланьтозы егитъёс Вуиз толлэн шорыз. Соин ӵош ик толалтэ праздникъёс но йылпумъяськизы. Табере кылиз на йӧ вылэ султон. Отӥяз вуозы тулысъёсыз. Удмурт культурая "Дэмен" огазеяськон тол праздникъёслы йылпумъян лэсьтӥз шаерысьтымы культурая училищелэн юртаз. Татчы лыктэм "Ӟардон", "Чебер апайёс", "Ожо-вожо", "Инвожо", "Инвугур" туж чебересь, туж мусоесь вылӥллям. Таӵе нимо фольклор ансамбльёсты "Дэмен" 15-тӥ толшоре огазе люказ ӵош шулдыръяськыны, пӧртмаськыны, тунаськыны, кырӟаны-эктыны, шудыны-вераськыны. Валамон ини: та коллективъёс удмурт сямъёсты-йылолъёсты умой тодо-валало. Котькудӥзлэн аслаз ымнырыз, яратоно кырӟанэз-эктонэз, сюресэз. Соин ик люкаськем калык ваньзэс шумпотыса пумитаз. Та ансамбльёсты, соослэн кивалтӥсьёссы сяна, туж синмаськымон каро отысь арганчиос-баянчиос. Соос - Евгений Медведев, Борис Боталов, Юрий Николаев, Михаил Журавлёв, Виталий Семёновых. Михаил Журавлёв но Юрий Николаев сярысь нимаз верам потэ. Огшоры калык пӧлысь потэм зарни пырыос асьме адямиез котьку шумпотто-шулдырто пӧртэм люкаськонъёсын, тодмо муртъёсмылэн юбилей ӝытъёсазы. Та синмаськымон эшъёсмес калыкамы тодӥсьтэмъёс али туж ӧжыт ини. "Инвожо" но "Ожо-вожо ансамбльёс (уката ик - нырысетӥез) вуылӥзы ни, шаерысьтымы сяна, палэнысь но тросаз удмурт гуртъёсы. Концерт ортчем бере но Михаил Журавлёв но Юрий Николаев капчи мылкыдын но жадёнэз валатэк шулдырто, эктыто, шумпотто лыктэм агайёсты-апайёсты, пиналъёсты но пересьёсты. Аслаз устолыкеныз сцена вылысен туж паймытӥз на Ижысь 49-тӥ школаысь 7-тӥ классын дышетскись Сергей Галкин. Та школаын ог тямыс ар удмурт пиналъёсты асьме фольклорез но киужъёсты яратыны дышетӥ мон. Соос пӧлын вал Серёжа но. Оло, со мынам урокъёсам уно тодон-валан ӧз басьты? Озьы ке но, соин данъяськисько. Пияшлэн мумы-бубыез но туж умоесь, огшоры удмуртъёс, асьсэ калыксэс сюлмысь яратӥсьёс. Пизы нош, городын будыса, вольыт вераське вордскем кылыныз, чебер кырӟа асьме кырӟанъёсты. Культурая училищее тросэз лыктэмын вал, маскара дӥсяськыса. Ваньмыз сямен соос басьтӥзы кузьымъёс. Концерт бере вал пӧртэм шудонъёс, эктонъёс, тунаськонъёс, тодматсконъёс, ӵошен чай юонъёс. Калык гуртаз капчи мылкыдын бертӥз. Таӵе пумиськонъёсты ӵемгес радъяны куриз. Праздниклы трос дырзэс, мылкыдзэс сётӥзы сое радъясьёс - Удмурт культурая "Дэмен" огазеяськонлэн кивалтӥсез Альберт Алексеевич Разин, удмурт культураез ӝутон сярысь ялан сюлмаськисьёс - библиотекаын ужась Надежда Кузьминична Пономарёва, культурая училищеысь дышетӥсь Надежда Семёновна Полякова, "Дэменлэн" Ижысь Индустриальной ёросысь кивалтӥсез Клавдия Николаевна Исупова, нылпи садын ужась Людмила Витальевна Бакулева. Людмила Витальевна пиналъёсты пичиысен ик дышетэ удмуртлыкез яратыны. Со "Дэменлэн" ужрадъёсаз кемалась уг пыриськы ай, но ассэ синмаськымон возьматӥз ини. Со ик та ӝытын концертэз но нуиз, котькыӵе удысын ассэ учкымон возьматӥз. Людмила Витальевна дышетске на. Удмурт кун университетын. Солэн вань улонэз азьпалан ай. Трос пайда мед сётоз на асьме калыкмылы. Тани таӵе адямиос ик арысь аре вуо асьме культураез ӝутон удысэ. Озьыен, уз вунэ сюрс аръёс талэсь азьло кылдэм сямъёсмы- йылолъёсмы, кырӟанъёсмы, эктонъёсмы, шудонъёсмы, инкуазез, ужез яратонмы. Ми, "ожо-вожоос", умой тодӥськомы "чебер апайёсты", "инвожоосты", "инвугуръёсты". Нош таяз ӝытэ эшлаським "ӟардонъёсын". Соослы синмаським. Н. ВОЗИСОВ. Владимир Камашевлэн туспуктэмъёсыз. 2000-тӥ ар Тодмо дауръёс, аръёс, нуналъёс 1100 ар талэсь азьвыл (9-тӥ даур) Шунды ӝужанысь славянъёс Днепр шур но Ильмень ты котырын аспӧртэм кун кылдытӥзы. 1055 ар талэсь азьвыл (945-тӥ-969-тӥ аръёс) Киевын кивалтыны кутскиз князь кышно Ольга (картсэ Игорь князез тушмонъёсыз вием бере). 1035 ар талэсь азьвыл (965-тӥ) Святослав князь пазьгиз Улӥ Волгаысь Хазар кунэз, эскерыны ӧдъяз Волга - Каспий вузкарон сюресэз. 1020 ар талэсь азьвыл (980-тӥ - 1015-тӥ) Киевын кивалтӥз Владимир И Святославич. Киевын вашкала (языческой) инмаръёсын пантеон юнматэмын. 1015 ар талэсь азьвыл (985-тӥ) Владимир князь ожен урдскиз Волга дурысь болгаръёс (бигеръёс) вылэ. 1010 ар талэсь азьвыл (990-тӥ) Киевын лэсьтэмын Успенье черк. 990 ар талэсь азьвыл (1010-тӥ) Кылдытэмын "Повесть временных лет" летопись. 985 ар талэсь азьвыл (1015-тӥ) Владимир И-лэн пиосыз ожмаськыны кутскизы быдӟым князьлэн интыез понна. 970 ар талэсь азьвыл (1030-тӥ-1035-тӥ) Черниговын лэсьто Спасо-Преображенье соборез. 955 ар талэсь азьвыл (1045-тӥ-1050-тӥ) Новгородын лэсьтӥзы София соборез. 950 ар талэсь азьло (1050-тӥ ар котырын) Иларион монах гожтӥз "Слово о законе и благодати" ужзэ. - Огъя черклэсь палэнскем мурт (отшельник) Антоний Киевын усьтӥз Печёра черк. 875 ар талэсь азьвыл (1125-тӥ-1132-тӥ) Киевын кивалтӥз Мстислав Владимирович. - Ростов-Суздаль музъем вылын кивалтыны кутскиз Юрий Владимирович (Долгорукий). 865 ар талэсь азьвыл (1135-тӥ-1136-тӥ) Новгородын бугыръяськон пуромиз. Кенеш пуктэмъя Всеволод Мстиславович князез уллязы. Кылдӥз "бояръёслэн республиказы". 845 ар талэсь азьвыл (1155-тӥ-1157-тӥ) Киевын кивалтӥз Юрий Долгорукий. - Князь Андрей Юрьевич (Боголюбский) Киевысь кошкиз Ростов-Суздаль музъем вылэ. 830 ар талэсь азьвыл (1170-тӥ) Суздальёс новгородъёсын ожмаськизы но пезьдэт басьтӥзы. 815 ар талэсь азьвыл (1185-тӥ) Новгород-Северскойысь князь Игорь Святославич половецъёс вылэ урдскиз но пезьдэт басьтӥз. Со вылысь гожтэмын "Слово о полку Игореве". 810 ар талэсь азьвыл (1190-тӥ) Новгород немецъёсын гожтӥз вузкарон сярысь огкылъёс (договоръёс). 770 ар талэсь азьвыл (1230-тӥ-1243-тӥ) Новгородын кивалтӥз Степан Твердиславич - Владимирлы дурбасьтӥсь. 760 ар талэсь азьвыл (1240-тӥ - 1241-тӥ) Ливон орденысь ожгарчиос (рыцарьёс) киултӥзы Изборскез, Псковез, Копорьеез. - Сентябре-декабре Батыйлэн ожгарчиосыз Киевез котыртӥзы но басьтӥзы. Кылдӥз Зарни Орда нимо кун. - 15-тӥ июле пуромиз Нева дурын ожмаськон. Александр Ярославич (Невский) князьлэн ожгарчиосыз пазьгизы Биргер шведлэсь войскооссэ. 750 ар талэсь азьвыл (1250-тӥ) Монгол-бигеръёс Русьысь калыкез лыдъязы, выт (налог) басьтонэз умойгес радъян вылысь. 715 ар талэсь азьвыл (1285-тӥ-1318-тӥ) Тверьын кивалтӥз Михаил Ярославич. 685 ар талэсь азьвыл (1315-тӥ) Тверьысь князь Михаил Ярославич Тверскийлэн но Ордалэн ожгарчиоссы Новгород вылэ урдскизы но сое возьмасьёсты Торжок дорын пазьгизы. 675 ар талэсь азьвыл (1325-тӥ) Тверьысь князь Дмитрий Тверский Ордаысен вииз князез Юрий Московскиез. Ордаысь хан Узбек косэмъя Дмитрий Тверскиез ассэ быдтӥзы. - Москваын кивалтыны кутскиз Иван И Данилович Калита. 660 ар талэсь азьвыл (1340-тӥ-1353-тӥ) Сергий Радонежский лэсьтӥз Троице-Сергиев монастырез. 625 ар талэсь азьвыл (1375-тӥ) Князь Дмитрий Иванович урдскиз Тверь вылэ. Тверь куштӥськиз Владимирен кузёяськыны турттонлэсь. 620 ар талэсь азьвыл (1380-тӥ) 8-тӥ сентябре пуромиз Куликово бусыын ожмаськон. Дмитрий Иванович (Донской) кивалтэм улсын ӟуч ожгарчиос пазьгизы Ордаысь Мамайлэсь войскозэ. 605 ар талэсь азьвыл (1395-тӥ) Тимурлэн (Тамерланлэн) ожгарчиосыз пазьгизы Зарни Ордаез, тарказы Русьлэсь музъемъёссэ, куашкатӥзы Елецез. - Владимирысь инмар мумылэн мудорез нуэмын Москвае. - Смоленск сюриз Литва улэ. 600 ар талэсь азьвыл (1400-тӥ-1425-тӥ) Тверьын кивалтӥз князь Иван Михайлович. - Коми музъемъёс огазеямын Москва борды. - Андрей Рублёв суреданы кутскиз Троице-Сергиев монастырьысь Троицкой соборлы "Троица" мудорез. 590 ар талэсь азьвыл (1410-тӥ) - 15-тӥ июле Польшаысь, Литваысь но Русьысь ожгарчиос пазьгизы Тевтон орденлэсь рыцарьёссэ. 580 ар талэсь азьвыл (1420-тӥ) Новгородын коньдон дурыны кутскизы. 575 ар талэсь азьвыл (1425-тӥ) Москваын кивалтыны кутскиз Василий ИИ Васильевич (Тёмный). - Москва княжествоын вожвылъяськон пуромиз. - Тверьын кивалтыны кутскиз Борис Александрович. 560 ар талэсь азьвыл (1440-тӥ) Литва эрик сётӥз Псковлы. 550 ар талэсь азьвыл (1450-тӥ) Москваын кивалтон понна нюръяськонын Дмитрий Шемякалы пезьдэт сётэмын (кулӥз 1453- тӥ арын). - Крестьянъёсты алӥзы улон интызэс вошъяны. 545 ар талэсь азьвыл (1455-тӥ) Ордаысь ожгарчиос Саид Ахмат кивалтэм улсын Русь вылэ урдскизы но Коломна дорын Москвалэсь пезьдэт басьтӥзы. Саид Ахмат пегӟиз Литвае. 530 ар талэсь азьвыл (1470-тӥ) Новгородэ вуизы жидъяськись еретикъёс, соос Христосэз инмарен ӧз лыдъялэ. 525 ар талэсь азьвыл (1475-тӥ-1479-тӥ) Москваысь Кремльын излэсь лэсьто Успенье соборез (архитекторез Аристотель Фиорованти). 520 ар талэсь азьвыл (1480-тӥ) Хан Ахмат урдскиз Москва вылэ. Ордалэн но Русьлэн ожгарчиоссы сылӥзы Угра шур дурын. Ахмат чигназ. Ӟуч кун мозмиз Ордалэн зӥбетэз улысь. 515 ар талэсь азьвыл (1485-тӥ-1489-тӥ) Италиысь масьтёръёс лэсьтӥзы Москваысь Крмльлэсь кирпич борддоръёссэ но башняоссэ. 510 ар талэсь азьвыл (1490-тӥ) Черклэн собораз (кенешаз) умойтэмен лыдъязы жидъяськись еретикъёсты. 500 ар талэсь азьвыл (1500-тӥ) Кылдытэмын Владимирысь князьёс сярысь мадён. Со валэктӥз: кивалтӥсь выжы (Рюриковичъёс) потэмын Римысь император Август бордысь. 495 ар талэсь азьвыл (1505-тӥ-1533-тӥ) Кивалтӥз Василий ИИИ. - Алаиз Новый пуктэ Кремльысь Архангел соборез но юнматэм борддоръёсты. 490 ар талэсь азьвыл (1510-тӥ) Псков огазеямын Москва борды. - Псковысь Елеазар монастырьысь монах Филофей быдӟым князьлы Василий ИИ-лы гожтэт ыстӥз но Москваез куинетӥ Римен лыдъяны дэмлаз. 465 ар талэсь азьвыл (1535-тӥ) Ӟуч кунын йылпумъямын коньдон поттон ёзнэтэз (системаез) кылдытон. 450 ар талэсь азьвыл (1550-тӥ) Печатламын Иван ИВ-лэн судебникез. - Кылдытэмын стрелецъёслэн войскозы. 445 ар талэсь азьвыл (1555-тӥ) Англиын кылдытэмын Москваен (Ӟуч кунэн) вузкарон компания. - Сибирьысь хан ассэ лыдъяз Москва улэ сюремен. - Выльдэмын интыын кивалтон но выт (налог) басьтонэн кивалтон. - Москваысь Горд карлудын (Красной площадьын) лэсьтыны кутскемын Покров собор - Василий Блаженныйлэн храмез. 420 ар талэсь азьло (1580-тӥ) Январе черклэн соборез (кенешез) пуктӥз музъемен кузёяськонзэ пичиятыны. 410 ар талэсь азьвыл (1590-тӥ-1593-тӥ) Мынэ Швециен тылож (война). Ӟуч кунлы берыктэмын Иван-город, Ям, Копорье. 395 ар талэсь азьвыл (1605-тӥ-1606-тӥ) Игнатий вал патриарх. 390 ар талэсь азьвыл (1610-тӥ) Речь Посполитаысь (Польшаысь) Сигизмунд ИИИ королен огкыл гожтэмын ӟуч престолэ солэсь Владислав пизэ пуктон сярысь. - Сизьым бояръёс кузёясько Мстиславский князь кивалтэм улсын. - Сентябре Польшаысь ожгарчиос пыризы Москвае. 370 ар талэсь азьвыл (1630-тӥ-1632-тӥ) Выльдэмын ожмаськон удысэз радъян. Кылдытэмын музон музъемъёсысь адямиослэсь полкъёс. 365 ар талэсь азьвыл (1635-тӥ-1638-тӥ) Россилэн лымшораз пуктылэмын крепостьёс. 360 ар талэсь азьвыл (1640-тӥ-1659-тӥ) Иосиф вал патриарх. 355 ар талэсь азьвыл (1645-тӥ-1676-тӥ) Алексей Михайлович эксэй вал. 350 ар талэсь азьвыл (1650-тӥ) Пуромизы Псковын но Новгородын бугыръяськонъёс. - Москваын кылдытэмын черкын воштӥськонъёс ортчытон понна кружок. 330 ар талэсь азьвыл (1670-тӥ-1671-тӥ) С. Т. Разин кивалтэм улсын пуроме крестьянъёслэсь но казакъёслэн бугыръяськонзы. Степан Разин виемын 1671-тӥ арын 26-тӥ мае. 310 ар талэсь азьвыл (1690-тӥ-1700-тӥ) Адриан вал патриарх. 305 ар талэсь азьвыл (1695-тӥ) Петр И Азов вылэ урдскиз (1696-тӥ арын сое басьтӥз). 300 ар талэсь азьвыл (1700-тӥ) 1-тӥ январе Аръёсты выль сямен лыдъяны кутскемын ("Юлиан календарь"). - 13-тӥ июле Константинопольын гожтэмын Турциен тупан сярысь огкыл. - Россия ожмаськиз Швециен. - Кулӥз патриарх Андриан. Стефан Яворский юнматэмын митрополитэ. 295 ар талэсь азьвыл (1705-тӥ-1706-тӥ) Эксэйлэн туш но ӟуч дӥськут нуллыны алӥсь указэз потэм бере, Астраханьын улӥсьёс бугыръяськизы, бордазы огазеяськизы стрелецъёс. Соосты зӥбиз Б. П. Шереметев. - 1705-тӥ -1711-тӥ аръёсы бугыръяськизы башкиръёс. 290 ар талэсь азьвыл (1710-тӥ) Шведъёс улысь басьтэмын Рига, Ревель, Выборг. - Ортчытэмын калыкез выт басьтонъя гожъян. - Швециысен Турцие пегӟем король Карл ИИ лӧпкытэмъя, Турция ожен урдскиз Россия вылэ. 280 ар талэсь азьвыл (1720-тӥ) 28-тӥ июне ӟуч флот Гренгам шормуӵ дорын вормиз Швецилэсь эскадразэ. - 1720-тӥ-1737-тӥ аръёсы В. Н. Татищев кылдытэ Россилэсь вашкала дырысен историзэ. 275 ар талэсь азьвыл (1725-тӥ) 28-тӥ январе кулӥз Петр И. Кузёяськон понна нюръяськизы Меншиковлы но Долгорукийлы дурбасьтӥсьёс. Меншиков юрттэмъя, Екатерина И луиз эксэй. Со кивалтӥз 1727-тӥ арозь. - Июле Петр И-лэн Анна нылыз бызиз Карл Фридрих герцоглы. - В. Беринг кивалтӥз Камчаткае нырысьсэ мынонэн. 270 ар талэсь азьвыл (1730-тӥ) Январе ӟуч престолэ пуктэмын кулэм Курляндский герцоглэн кышноез, Иван В эксэйлэн нылыз Анна Ивановна. Со кивалтӥз 1740-тӥ арозь. Биронлы дурбасьтӥсьёс Долгорукийёсты кузёяськонысь палэнтӥзы. - Россия кие выжиз Казахстанлэн уй палыз. 265 ар талэсь азьвыл (1735-тӥ-1739-тӥ) Мынӥзы Россия но Турция куспын ожмаськонъёс. 260 ар талэсь азьвыл (1740-тӥ) 17-тӥ октябре кулӥз Анна Ивановна. Престолэ пуктэмын Иван ИВ Антонович, 1740-тӥ арын ик 2-тӥ августэ вордскем маке. Солэсь ужзэ быдэсъясе (регентэ) юнматэмын Бирон. - 8-тӥ ноябре Бирон сэрпалтэмын. Регент каремын Анна Леопольдовна. 250 ар талэсь азьвыл (1750-тӥ) Украиналы гетманэ пуктэмын граф К. Г. Разумовский. 240 ар талэсь азьвыл (1760-тӥ) 28-тӥ сентябре ӟуч ожгарчиос басьтӥзы Берлинэз. 235 ар талэсь азьвыл (1765-тӥ) Поттэмын помещикъёслы крестьянъёссэс Сибире келяны право сётон сярысь указ. 230 ар талэсь азьвыл (1770-тӥ) 26-тӥ июле Турциен ожмаськонын ӟуч флот вормон басьтӥз Чесма дорын. Июле П. А. Румянцев кивалтэм улсын ӟуч ожгарчиос вормон басьтӥзы Ларга но Кагум дорын. Декабре ӟуч ожгарчиос басьтӥзы Аккерманэз но Бухарестэз. 225 ар талэсь азьвыл (1775-тӥ) 10-тӥ январе Е. И. Пугачёв Москваын виемын. - Печатламын Россия империысь губерниосын кивалтонъя валэктон. Россия люкемын 51 губернилы. 210 ар талэсь азьвыл (1790-тӥ) - Мартэ ӟуч ожгарчиос Финляндиын ожмаськонын кӧня ке пол пезьдэт басьязы. - 8-тӥ мартэ Россия но Швеция тупанкыл (мир) гожтӥзы. - 28-тӥ августэ Ф.Ф.Ушаков кивалтэм улсын ӟуч флон Турцилэсь флотсэ вормиз Тендра дорын. - Екатерина ИИ юнматӥз революция пуромем Франциысь вань ӟучъёсты доразы берыктон сярысь указ. - 11-тӥ декабре А.В.Суворов кивалтэм улсын ӟуч ожгарчиос басьтӥзы Измаилэз. 205 ар талэсь азьвыл (1795-тӥ) 13-тӥ октябре Россия, Австрия но Пруссия Петербургын юнматӥзы Польшаез куинетӥзэ люкон сярысь конвенция. Россие выжизы Литва, Курляндия, Западной Белоруссия но Западной Украина. 195 ар талэсь азьвыл (1805-тӥ) - Усьтӥськиз Харьковысь университет. - Москваын кылдӥз инкуазез эскеронъя огазеяськон. - Карабах но Ширван огазеямын Россиен. - Россия пыриськиз Францилы пумит войнае. - 20-тӥ ноябре Россилэн но Австрилэн ожгарчиоссы Аустерлиц дорын ожмаськонын французъёслэсь пезьдэт басьтӥзы. - Аляскаын но Калифорниын ӟуч фортъёс лэсьтыны кутскемын. 190 ар талэсь азьвыл (1810-тӥ) 1-тӥ январе Россиын кылдытэмын Кун кенеш. - Абхазия огазеямын Россиен. 185 ар талэсь азьвыл (1815-тӥ) Россиын лэсьтэмын нырысетӥ пароход. - Июне Венаын конгрессын гожтэмын йылпумъян документъёс. Варшава герцогство люкемын Россия, Австрия но Пруссия куспын. - 14-тӥ (26-тӥ) сентябре ӟуч эксэй Александр И, Австрилэн эксэез Франц И но Пруссилэн королез Фридрих Вильгельм ИИИ гожтӥзы Священный союз кылдытон сярысь акт (берлогес таос борды огазеяськизы Европаысь ваньмыз сямен монархиос). - 8-тӥ (20-тӥ) ноябре Парижын гожтэмын тупан сярысь огкыл (договор), соя Франциын 5 ар ӵоже улыны кулэ вормисьёс (огкыл кужымзэ ыштӥз вазьгес, 1818-тӥ арын). - 27-тӥ ноябре экцэй Александр И Польшалы кузьмаз конституция. 180 ар талэсь азьвыл (1820-тӥ) Семеновской полкын бугыръяськон (восстание) пуромиз. 175 ар талэсь азьвыл (1825-тӥ) Россиын кивалтыны кутскиз эксэй Николай И (кузёяськиз 30 ар - 1855-тӥ арозь). - 14-тӥ декабре бугырскиз Петербургысь декабристъёслэн огазеяськонзы. - 29-тӥ декабре бугырскиз Черниговысь полк. 170 ар талэсь азьвыл (1830-тӥ) Польшаын бугыръяськон куромиз. - Холера вӧлмемен гомӟизы бугыръяськонъёс. - Москваын ужаны кутскиз А.И.Герценлэн но Н.П.Огаревлэн кружоксы (1834-тӥ арозь). - Москваын ужаны кутскиз Н.В.Станкевичлэн кружокез (1837-тӥ арозь). 165 ар талэсь азьвыл (1835-тӥ) - Кутэмын фабрикаосъя нырысетӥ закон. - Кутэмын университетъёсъя выль устав. Соослэн эриксы пичиятэмын. 160 ар талэсь азьвыл (1840-тӥ) Кунысь крестьянъёс бугыръяськизы картошкаен сэрен. - Воштэмын Литвалэн статусэз, отысь губерниосын кутӥськыны кутскизы Россиысь огъя а ар талэсь азьвыл (1845-тӥ) Петербургын ужаны кутскиз М.В.Петрашевскийлэн социализмез эскеронъя кружокез (1849-тӥ арозь). - Киевын ужаны кутскиз политикая лушкем организация - Кириллэн но Мефодийлэн обществозы, со нюръяськиз крестьянъёсты мозмытон но славянъёсты огазеян понна. 145 ар талэсь азьвыл (1855-тӥ) Россиын кивалтыны кутскиз эксэй Александр ИИ (1881-тӥ арозь). 16-тӥ ноябре ӟуч ожгарчиос Н.Н.Муравьев кивалтэм улсын басьтӥзы Кавказ сьӧрысь Карс карез. 140 ар талэсь азьвыл (1860-тӥ) Кылдытэмын Россиысь кун банк. - Инъямын Владивосток. - 2-тӥ ноябре Пекинын гожтэмын Россия но Китай куспын огкыл (трактат). Россилы сётэмын Уссури край. Ӟуч вузчиослы сюрес усьтэмын Пекинэ, Ургае, Кантонэ, Кашгаре. 135 ар талэсь азьвыл (1865-тӥ) Кутэмын печать сярысь огдырлы куронъёс (правилоос). - Одессаын инъямын университет. 130 ар талэсь азьвыл (1870-тӥ) 22-тӥ апреле вордскиз В.И.Ленин. - 19-тӥ октябре мукет кунъёсын ужанъя министр А.М.Горчаков лэсьтӥз Парижын 1856- тӥ арын гожтэм тупан сярысь огкыллэсь куштӥськем сярысь циркуляр, Россиез Сьӧд зарезь вылын табере ӧз шымыртэ ни. - Н.М.Пржевальский радъяз Азие экспедиция. 125 ар талэсь азьвыл (1875-тӥ) 25-тӥ апреле Петербургын гожтэмын Япониен огкыл. Соя Сахалин шормуӵ сётӥське Россилы, нош Курилысь 18 шормуӵъёс - Японилы. 120 ар талэсь азьвыл (1880-тӥ) 5-тӥ феврале Зимний дворецын С.Н.Халтурин радъяз пуштонэз, Александр ИИ эксэез виён вылысь. 115 ар талэсь азьвыл (1885-тӥ) Орехово-Зуевоысь Морозовлэн фабрикаяз улӟиз бугыръяськон. - Кылдытэмын дворянъёслэн музъемъя банксы. - Июне кутэмын кышноосты но пиналъёсты уин ужатыны лэзёнтэм сярысь закон. - 29-тӥ августэ Англия но Россия юнматӥзы Россия но Афганистан вискысь кунгож сярысь протокол. 105 ар талэсь азьвыл (1895-тӥ) Марксистъёслэн Петербургысь кружокъёссы огазеяськизы В.И.Ленинлэн союзаз. 100 ар талэсь азьвыл (1900-тӥ) Россия пыриськиз Китайын бугыръяськонъёсты зӥбонэ. 20-ТӤ ДАУР. Январь 95 ар талэсь азьвыл (1905-тӥ) 3-тӥ январе Петербургын Путилов заводын бугыръяськон пуромиз. 9-тӥ январь - виро арня нунал. Солдатъёс ыбылӥзы эксэй доры куронъёсын мынӥсь калык шоры. Кутскиз нырысетӥ ӟуч революция. 80 ар талэсь азьвыл (1920-тӥ) 4-тӥ январе А.В.Колчак вылӥ властез сётӥз А.И.Деникинлы. Январе Горд Армия тӧдьыослы пумит наступление выжиз. 70 ар талэсь азьвыл (1930-тӥ) 1-тӥ январе ВКП(б)-лэн шор (центральной) комитетэз кутӥз колхозъёс кылдытонэз ӝогомытон сярысь постановление. 30-тӥ январе ВКП(б)-лэн шор комитетэз кутӥз кулак хозяйствоосты быдтон сярысь постановление. Со сюрес усьтӥз ваньбурез таланлы но адямиосты калыктэм интыосы келянлы. 65 ар талэсь азьвыл (1935-тӥ) 5-тӥ январе кутскиз "Москваысь центр" шуон организацие пырисьёсты судъян. Соосты янгыше уськытӥзы С.М.Кировез виыны дасяськемзы понна. 55 ар талэсь азьвыл (1945-тӥ) Патриарх луиз Алексий (кивалтӥз 1970-тӥ арозь). 17-тӥ январе асьмелэн но Польшалэн ожгарчиоссы мозмытӥзы Варшаваез. 20-тӥ январе СССР, Англия но США гожтӥзы Венгриен тупанкыл. Январе пуромиз Германиен Висла но Одер дорын ожмаськон. 50 ар талэсь азьвыл (1950-тӥ) 12-тӥ январе выльысь виылыны лэземын "шпионъёсты, вузаськисьёсты но диверсантъёсты". 45 ар талэсь азьвыл (1955-тӥ) 25-тӥ январе СССР-ысь Вылӥ Советлэн Президиумез кутӥз Совето Союз но Германия куспын война югдурез быдтон сярысь указ. 35 ар талэсь азьвыл (1965-тӥ) Январе воштэмын инмарлы оскисьёсты суд ласянь кыл кутытон сярысь актъёс. 30 ар талэсь азьвыл (1970-тӥ) 15-тӥ январе лыдъямын СССР-ысь калык - 241 миллион 700 сюрс пала. 20-тӥ январь ялэмын СССР-лэн Европа люкетыз электрокужым сётонъя огъя сӧзнэт (система) кылдытэм сярысь. 10 ар талэсь азьвыл (1990-тӥ) Январе Л.И.Абалкин но Г.А.Явлинский нимаз группаослы люкиськыса ужаны кутскизы рынокен экономикалы проектъёс бордын. - Бакуын армянъёс вылэ урдскылӥзы. Бакуэ пыртэмын СССР-ысь МВД-лэн ожгарчиосыз. Коммунистъёсты кивалтонысь палэнтэм бере, Армения но Азербайджан куспын югдур лэчытомиз. - Кылдытэмын "Демократическая Россия" быръёнъя блок. - Чехословакиен но Венгриен гожтэмын СССР-лэсь ожгарчиоссэ со кунъёсысь поттон сярысь огкыл. 5 ар талэсь азьвыл (1995-тӥ) 1-тӥ январе Россиысь ожгарчиос урдскизы Грозный вылэ. 20-ТӤ ДАУР. Февраль 95 ар талэсь азьвыл (1905-тӥ) 4-тӥ феврале эсер И.Каляев вииз быдӟым князез Сергей Александровичез. 18-тӥ феврале ялэмын порядок тупатон сярысь вылӥ манифест. Правительство ялӥз законъёс кылдытонэ калык пӧлысь быръем муртъёсты кыскон сярысь. 25-тӥ феврале ӟуч ожгарчиос Мукден дорын пезьдэт басьтӥзы. 80 ар талэсь азьвыл (1920) 2-тӥ феврале Тартуын гожтэмын Эстониен тупанкыл. 60 ар талэсь азьвыл (1940-тӥ) 11-тӥ феврале гожтэмын Германиен вузкаронъя огкыл. Соя Германие вузъёс келян будӥз. Феврале Горд Армия тӥяз финнъёслэсь "Маннергейм гож" шуонзэс, отӥяз басьтӥз Выборгез. 55 ар талэсь азьвыл (1945-тӥ) 4-тӥ феврале Крымысь Ялтае люкаськизы СССР-лэн, Англилэн но США-лэн кивалтӥсьёссы. Соос кенешизы Германиез пазьгон но люкон сярысь, ООН-эз кылдытон сярысь, Европалы эрик сётон сярысь. 13-тӥ феврале мозмытэмын Будапешт. 50 ар талэсь азьвыл (1950-тӥ) 14-тӥ феврале гожтэмын Китаен эшъяськон но ог-огедлы юрттон сярысь огкыл. 45 ар талэсь азьвыл (1955-тӥ) 8-тӥ феврале Г.М.Маленков куштэмын СССР-ысь Министръёслэн Советсылэн тӧроысьтыз. Со интые юнматэмын Н.А.Булганин. 10 ар талэсь азьвыл (1990-тӥ) Феврале Варшавской договорлэн военной организациез быдтэмын. Куалекъятэ тӧдьы сурет Вазен ай, СССР-ын улыкумы, вылӥ кивалтӥсьёсмы данъяськыса вералозы вал: Советской Союзын ӧвӧл проституция но, ӧвӧл наркомания но. Алкоголизм сярысь бен вераськон ӧй вал. Уго та висён вашкала Русьын ик мур выжызэ лэзиз вал ини. Табере сое порыны кужыммы уз ни тырмы, дыр. Зэм, 1985-тӥ арын КПСС-лэн Генеральной секретарез Михаил Горбачев юонэн кужмо нюръяськон ялӥз вал. Со ужрадлэн пайдаез кӧня ке шӧдӥськиз. Но со дыре ик туж каллен но лушкемен аляны кутскиз мукетыз уката но кышкыт висён - наркомания. Егитъёс нырысь оскалтылӥзы лябъёссэгес усыкмытӥсь ватсэтъёсты - маклэсь опиумез, пышлэсь марихуанаез, больницаосысь лушкемен басьтылӥзы пӧртэм эмъюмъёсты. Табере наркоманъёс "эмъясько" ни гашишен, героинэн. Соос асьме доры Афганистанысь вуо Таджикистан но Киргизия пыр. Со сярысь журналистъёслы ивортӥзы Удмурт Республикаысь югдурез утёнъя министерстволэн наркотикъёсты вӧлмытонэн нюръяськонъя отделлэн кивалтӥсез Анатолий Трушков, со отделын ик ужась Леонид Лазарев но та министерствоысь ик быдэ вуымтэосын ужанъя отделлэн начальникез Светлана Селева. Та кышкыт висён быдэс дуннеез кечат-вамат вотсаз ини. Со ӝокатӥз Россиез но, палэнэ ӧз кыльы Удмуртилэсь но. Наркомафия кужмогес но кышкытгес луиз ни пыӵал тӥрлыкен вузкаронлэсь но, шудонъёсъя (игорной) бизнеслэсь но. Йыружъёслэн лыдзы нуналмысь будэ, шуыны луоз. Кылем арын наркотикъёсты вӧлмытон учыръёсъя 1020 уж ӝутэмын. Таламын 166 кило усыкмытӥсь суретъёс, со пӧлысь 15-ез - героин. Республикаямы али та секыт висёнэн курадӟе 1312 адями, со пӧлысь 708-эз - нылкышно. Югдур шимес Ижевскын, тужгес но Устинов, Первомай, Индустриальной ёросъёсын. Шоркарамы миым пусъемын 575 йыруж. Йыружъёсъя Иж сьӧры "уисько" Глазов (127 йыруж), Сарапул (88), Воткинск (70), Камбарка (26), Можга (24). Зэм, наркомафиез озьы гинэ уд быдты, соин ялан война нуоно, вань сюресъёсты пытсано, шуо МВД-ын ужасьёс. Та ласянь бадӟым уж нуэ Россия Федерациысь ФСБ-лэн Удмурт Республикая управлениез. Берло дыре "данэ" потӥз Глазов. Тани кӧня ке лыдпусъёс но учыръёс. Кылем арын 17-тӥ мае уй пал столицаямы 6 кило 300 грамм героин таламын. Толэзь но уг ортчы, та городын ик эшшо 4 кило 850 грамм героин шедьтэмын. Сарапулын миым ӝегатэмын вал нылкышно. Со арбуз пушкы ватыса 282 грамм героин вае вылэм. Наркотикъёсын вузкарон пыр Россиын кӧня ке миллиард доллар берга. Кылсярысь, 1 граммез героин 600 манет сылэ. Йырез усыкмытон понна соин 20 пол бышкалтӥськыны луэ. Наркомафиен нюръяськон понна Удмурт Республикаысь Югдурез утёнъя министерствоын 1993-тӥ арын вить муртлэсь нимысьтыз отдел кылдытэмын вал. Али отын 74 мурт ужа. Тодӥсьёс верало, наркотик басьтыны али нокыӵе шугъяськонъёстэк луэ. Соин тужгес но уно вузкаро быдэ вуымтэос но трос нылпиё анайёс. Соос тодо уго, законъя пытсэт сьӧры уз келялэ шуыса. Наркотикъёсты вузан учыръёс шараямын ни республикаысьтымы вылӥ дышетскон заведениосын, техникумъёсын но училищеосын, школаосын. Быдэ вуымтэосын ужанъя инспекторъёсты туж сюлэмшугъяськыто дискотекаос. Та дыре лыдэ басьтэмын 35 покчи наркоманъёс. Быдэ вуымтэос пӧлын йыружъёсъя республикамы Россиын берысеныз 5-тӥ интыын мынэ. Ортчем арын соосын 2494 йыруж лэсьтэмын. Наркотик вузан учыръёс шараямын котькудаз 3-тӥ-4-тӥ школаын. Та ласянь тужгес но "данэ" потэмын Ижевск но Глазов. Таӵе учыръёс вал ни Пичи Пургаын, Играын, Балезиноын. Висись, оло, врач доры ачиз но мынысал. Но Ижевскын быдэ вуымтэосты эмъяны висъямын 1 нарколог гинэ. Коньдон ӧвӧлэн соизлэн но телефонэз вандэмын. Висёнысь (кызьы шуо наркоманъёс, ломкаысь) потон понна суткаяз 185 манет тыроно. Шуом, со потоз секыт югдурысь. Нош ӵуказеяз? Наркоманъёсын лэсьтэм йыружъёслэн лыдзы арысь аре будэ. Тани со лыдпусъёс: Аръёс Йыружъёслэн лыдзы 1995 237 1996 282 1997 579 1998 820 1999 1020 Бен, наркомания - секыт, туж секыт висён. Кытӥяз висисез эмъяны но уг луы ни. Нош Россиын адямиез наркотикен "кудӟытӥськемез" понна кыл кутытыны уг луы. Ӧвӧл на сыӵе закон. РФ-ын озьы кутэмын ӧвӧл на наркоманиен нюръяськонъя программа но. Кызьы веразы МВД-ын ужасьёс, солэн инъетэз, пе, дась ини. Но документъёс малы ке гызмыльто та ужен. Дыртыны кулэ. Сотэк кышкыт чер котькуд семьяе вуыны быгатоз. Н. БАЙТЕРЯКОВ. Вуз пусъемын лыдпусэн Шуом, тӥ базарысь басьтӥды кыӵе ке вуз. Вузкарисьёс сое ушъяло, со, пе, США-ын яке Европаысь кунъёсын поттэмын. Нош кызьы сое тодоно? Вузлэсь кытын потэмзэ капчиен тодыны луэ штрих-кодъя но вӧзысьтыз лыдпусъёсъя. Али кӧнязэ ке сётӥськом (пусъемын нырысетӥ кык лыдпусъёс): США, Канада 00,01,02,03,04,06 Франция 30,37 ФРГ 40,43 СНГ 46 Япония 49 Великобритания 50 Греция, Кипр 52 Люксембург, Бельгия 54 Дания 57 Польша 59 ЮАР 60 Финляндия 64 Норвегия 70 Израиль 72 Швеция 73 Швейцария 76 Италия 80, 83 Испания 84 Чехия 85 Турция, Югославия 86 Нидерланды 87 Австрия 90,91 Австралия 93 ЛЫДӞИСЬ ВЕРА МАЛПАНЗЭ Кузёезъя капкаез Озьы шуэ калык вашкала дырысен. Гужем семьяен ветлӥм Киеве кунояны. Трос улосвылъёсты ортчоно луиз. Кыӵе соос пӧртэмесь. Нырысь ик вераме потэ сюресъёс сярысь. Кытын кузё ас калыксы пӧлысь быръемын - отын сюрес но умой, бензин но дунтэм. Татарстан но Чувашия сярысь верасько. Кычак абдратӥз Орёл область - шӧдске, Егор Струевлэн киыз. Отын му вӧй ке но уг потто - бензин, нянь, бакча сиён, емыш но дунтэм. Асьме Удмурт шаермы шоро-куспоос пӧлы пыре, нош кӧня поттӥськом му вӧй, малы со умоен уг шӧдӥськы. Соин ик, удмурт калыке, малпаськы умой, кинэ президентэ бырйыны. Удмуртъёс пӧлын но вань ук валась но быгатӥсь кивалтӥсьёс: Тубылов, Вершинин, Смирнова но мукетъёсыз. Оскем потэ, асьме кузёмы капказэ ӟеч возёз, узырлыксэ тус-тас уз кары, калыксэ данъялоз. Ю.Шкляев. Ижевск. Ичи лыдъем - ӧвӧл бырем 1939-тӥ арын СССР-ысь Совнаркомлэн нимысьтыз постановлениеныз 134 ичи лыдъем калык (50 сюрс муртлэсь ӧжыт ке) быремен лыдъямын вал. Таос пӧлы шедизы Удмуртилэн уй палысьтыз бесерманъёс но. Озьы, Араб халифат, Алтай но Хазар каганатъёс, Хорезм эксэйлык, Кыпчак кун, Кам но Волга куспысь Булгария киултэм-кивалтэм улсын выжысоссэ утьыны быгатэм калык Совето власть аръёсы ӧвӧлтэм каремын вал. Но берло дасо аръёсы пичи калыкъёслэн мукетъёсыныз огкадь правоё луон понна нюръяськонзы кужмояз. Кылдытэмын вал бесерманъёслэн но национально-культурной огазеяськонзы. Бесерманъёслэн огазеяськонзылы алигес дас ар тырмиз. Соин валче Глазовысь "Октябрь" двореце люкаськылӥзы 300 пала та движение пыриськись адямиос. Ортчем аръёслы йылпумъянъёс лэсьтыса вераськиз огазеяськонлэн кивалтӥсез Валерьян Сабреков. Эскеризы огазеяськонзылэсь Уставзэ - сотэк уг луы уго азьлань мыныны, зэмос организациен лыдъяськыны. Эскерыса тодмо луиз: ӝыныезлэсь тросэз бесерманъёс - асьсэлэсь автономизэс кылдытон понна. Та малпанэз умоен лыдъяса но ӟечкыласа вераськизы "Удмурт кенеш" огазеяськонлэн тӧроез В. К. Тубылов, Нациосын ужанъя министрлэн воштӥсьёсыз Наталья Смирнова но Елизавета Петрова, Удмуртиысь чувашъёслэн огазеяськонэнызы (ЧОКЦ-лэн ёзэныз) кивалтӥсь Анатолий Иголкин. 300 экземплярен поттэмын "Бесермянская правда" (ӟуч кылын) газетлэн нырысетӥ номерез. Отын шуэмын: бесерман калыклэн историяз туж уно тугаськемез-ӟугаськемез - ваньзэ сое сэрттыны-пертчыны , зэмлыкез берыктыны кулэ. Т. НИКОЛАЕВА. Гурт улон "Мон музъем понна вордскемын" Илья Дьяконов Ижысь гурт удысъя кун академиын дышетскыкуз ик данакезлы шаплы луэменыз тодмо вал ни. Мылысь-кыдысь пыриськылӥз "Шунды" дэменлыклэн ужаз. Троссэ паймытъяз жингрес куараеныз. 1994-тӥ арын академиысь агрономияя факультетсэ йылпумъя но Кез ёросысь вордскем Тольён гуртаз бертэ. Соку Ильялы 21 арес гинэ вал ай... - Гуртэ вуэм бере ик, монэ, толло студентэз, "Прожектор" эштосам председателе бырйизы. Кез ёросын хозяйствос бадӟымесь ӧвӧл. Мынамаз но 70 пала ужасе вал. - Кивалтыны кутскыкуды, кыӵегес югдур вал эштосын? - Лекос урод но ӧй шуысал, лекос ӟеч но ӧй вал. Гурт калыкен ужан бордын секытэз но капчиез вань, уката но вордскем гуртад ке шедиськод. Калыкен ог-огмес валам, кылмы тупаз. Али но ӟеч мылкыдын пумиськылӥськом. Асме соин буйгатӥсько: пудо-животлэсь йырзэ ӧй кулэсты, продукция поттон ӧз усьы. Азьлане вамыштыны но тыршим. Лыктыкум 400 йыр пудомы вал, 500-озь вуттыны быгатӥм. Йӧл кысконмес 2 сюрсысь 2500-озь вуттӥм. Эштосысьтым кошконо луи, семьяеным валлин. Кезэ улыны выжи. Кык ар ёросын землестроительны ужай. Али кивалтӥсько "Мир" колхозэн. - Ужды мынэ-а? - Мар шуод? Туннэ нунал понна урод ум ужаське. Йӧл мималаез мында ик кыскиськом. Вераны кулэ соизэ, дыр, туэ пудо-животмылэсь лыдзэ йылтӥм. 550 йыр бадӟым сюро пудомы но 200 парсьёсмы. Куайытон сярысь ке верано, нунал ӵоже 500 грамм пала луэ. Фуражмы кулэсгес но тырмытом. Басьтоно уз луы. Концетратъёс но комбикорм гинэ басьтом. Етӥн будэтӥськом. 1998-тӥ арын солэсь пайда басьтӥмы. Нош миым, куазь кӧс улэмен, ӧжытгес октӥм. Туэ но кизьыны малпаськом. "Прожекторен" ӵошатыса, таиз колхоз бадӟымгес, ужасез ятыргес. Тыршиськом егитъёсты кутыны. Ортчем арез пайдаен йылпумъям. Техникамес кӧня ке выльдыны быгатӥм. - Тросаз гуртъёсын калыклэн ужан мылкыдыз урод, нош тӥляд? - Мон тазэ гинэ пусйысал. Удмуртъёс понна кӧт ӝож. Асьме шаерысь музъем вылын тужгес но начар уло удмуртъёс. Правительство ушъяське: ми быгатӥм возьыны, ми быгатӥм лэсьтыны, Пермь но Киров улосвылын Удмуртиен ӵошатыса уродгес, пе, уло. Но со ваньмыз возиське удмуртъёслэн чидамзы вылын гинэ, удмурт сям вылын. Мон озьы чакласько: кыӵе ке но вырӟон, ужаны ӝутскем мылкыд мед луоз. Государство ымнырыныз мед берытскоз гурт калык пала. Ваньмыз потэ музъем бордысь: гурт удыс-а, андан пӧзьтон-а яке космосэ лобан но. Тае валаса радъян политика гинэ гуртэз ӝутоз. Кин тодэ гурт удыслы , оло, пум но вуоз ни. Пудо гидъёс куашкало, таин валче Кезын тросэз пудо лымы улэ шедиз. Нокытчы пыртыны. Калыклэн мылкыдыз урод но урод луэ. - Вылӥ кивалтӥсь луысалды ке, кыӵе ужрадъёс кутысалды меда? - Кылем сӥзьыл Америкае вуылӥ. Соосын артэ асьмеос начарлэсь но начар адӟиськиськом. Малы Россиын такем урод улӥськом? Нырысь ик, быръёнъёс дыръя куара сётоно адямимы сярысь рос-прос ум тодӥське. Кинлы сюрем куарамес сётӥськом. Америкаын быръёно мурт пумысен ваньзэ ӧз тодэ ке, куаразэс уз сётэ. Улоназ пичи виштыез луиз ке, соку ик пумит султозы. Кыкетӥез. Калык туж трос юэ. Сыӵе малпан но кылдэ: юромо уг сектало-а меда Россиез? Кыкетӥез. Калык туж трос юэ. Сыӵе малпан но кылдэ: юромо уг сектало-а Россиез? Куинетӥез. Зол теневой экономикамы. Учке ай, кытысь адӟылӥмы районын, городын, котькуд сэрегын базаръёс мед ужалозы шуыса? Отчы кошке вань коньдон. Ужбергатӥсь налог тыре. Но со ичи ук. Ар куспын, шуом, сюрс манет выт тыроз, нош пайдаез, оло, сю пллы тросгес. Соин ик асьмеос коньдон но ум адӟиське. Отысь потэ лушкаськон но кузьмаськон. Одӥг кылын вераса, улэп кылён понна нюръяськон мынэ. - Гурт удысъя академиын дышетскыкуд, егитъёслэн дэменлыказы пыриськиськод вал. Али общественной ужен выриськод на-а? - Ёрос Кенешлэн депутатэз луисько. Со но общественной уж луэ кадь. Кун думае быръёнъёс дыръя Светлана Константиновна понна ужай. Шумпотӥсько, гуртын, удмурт семьяын будэм кышномурт вылӥ парламентмылэн депутатэз луиз шуыса. Кудӥз-соиз юан но сётэ Смирновалы: ньыль ар ортчыса бертоз на-а Удмуртие? Уз-а кыльы Москвае? Малы со бертыны кулэ? Мед улоз отын, мед будоз. Мон туж шумпотысал, сое Москвае ужаны кельтысалзы ке. Со - асьме калыклэн ымнырыз. Тросгес сыӵе адямиосты кивалтон удысэ лэзёно. - Асьтэлэн кыӵе ужан мылкыдды? - Пичи дырысен ик учкисько вал кызьы турын будэ, кызьы утялто пудо-животэз. Мон потэмын музъемысь. Соин но, дыр, ужме туж яратӥсько. Табере монэ музъем бордысь нокызьы уд ишкалты ни. Мыным кулэ ӧвӧл, шуом, трос уждун, коньдон. Гурт калык понна сюлмы висе. Ужась калыке ӟечгес улӥз ке - шумпото, оло, кык поллы тросгес. Аслам но улонэ калык радъя мед луоз. Узырмыны малпасал ке, быгатысал. Котькыӵе сюрес вань. Кытын ке вузкарыны, мукет организациын ужаны. Но мон музъем понна вордӥськемын. Валай: мон - ас интыям, отын - кытын кулэ луыны. Кызьы шуо ӟучъёс: "Где родился, там и пригодился". Гуртэз яратон гинэ, дыр, музъем борды сыӵе юн кыске. Илья Леонидович Дьяконов кадь музъемез яратӥсьёс тросгес луысалзы ке, оло, гурт удыс но ӝоггес улӟысал. А. Андриянов. Туспуктэмез В. Камашевлэн. Журналистъёсын пумиськонъёс "Мон референдум понна" Удмурт Республикалэн Конституциезлэн 10-тӥ ёзэтэзлэн 1-тӥ люкетаз но 116-тӥ ёзэтаз воштонъёс пыртон ужпумез нош но нош журналистъёслы валэктыны выриз Кун Кенешысь ялан ужась комиссилэн кивалтӥсез Ж. В. Дворцова. - Та статьяосты эскероно референдумын, озьы туж шонер луоз, - шуиз Ж. Дворцова. Троссэ сюлмаськытэ, кызьы радъяськоз Удмуртиын кун властьлэн структураез. Та ужпумез кылем арня куспын гинэ эскеризы Конституция бордын ужась комиссия, Кун Кенешлэн Президиумез. Малпанъёс пӧртэмесь. Со пумысен Жанна Витальевна ас мылкыдзэ тазьы вераз: - Вылӥ должностен адями республикаямы одно ик юнматэмын луоз. Со сяна, одно ик луоз Правительстволэн Тӧроез но. Россилэн Конституцияз но, мукетъёсаз законъёсын но номыр ӧвӧл верамын, вылӥ должностен адями огдыре ик Правительствоен но кивалтыны кулэ шуыса. Зэм, калык пӧлын сыӵе вераськонъёс вань. Меӵак но шуо: уг-а, пе, туртты Кун Кенешлэн Тӧроез ас аппаратэныз шуак Президент кариськыны. Ма, тазьы малпано ке, зэмзэ ик, выль президентлы (А. Волковлы) нимысьтыз аппарат кылдытоно уг луы ни, 40 мурт ужась адямиез вань ни, озьы оло республикалы но дунтэмгес усёз. Та выллем малпанъёсты Ж. Дворцова умойтэмен лыдъяз. Удмуртилы Президентэз калык быръёз, шуиз. Ялан ужась комиссилэн тӧроез журналистъёслы ивортӥз на, 2000-тӥ арын 26-тӥ мартэ Россилы Президент быръёнэн ӵош Удмуртиысь 13 номеро округын Кун Думае депутатэ кандидатъёсты выльысь быръён ортчоз шуыса. 1999-тӥ арын 19-тӥ декабре быръёнъёс дыръя та округысь бырйисьёс тросгес куараос сётӥзы, ӵектэм кандидатъёсъя "ваньзылы пумит" мылкыдзэс вераса. Т. БАННИКОВА. Маин тубалом? Ижевскысь 2380 лифт пӧлысь 219-эз уг ужа. 98-эз быдэсак воштыны вуэмын ни. Специалистъёслэн чакламзыя, туэ со лыдпус эшшо 44-лы йылоз на, 2001-тӥ арын - 76-лы. Троссэ лифтъёсты заводъёс эскерыса уло. Тани "Ижмаш" АО 63 лифтсэ кысыса возе, "Автозавод" - 5-сэ, "Аксион" - 12-сэ. Берло дыре коммунальникъёслэн хозяйствоязы трос лушкасько. Выль аре гинэ Октябрь ёросын лифтъёсты сузмытыса 37 сюрс манет тыр изъян лэсьтэмын. Улэмлы юрттэт Улон интылы дун понна Ижевскын 39 935 мурт компенсация басьтэ. Шорлыдын толэзьлы быдэ 52 манет. Адямиослэсь доходзэс 227 адресъя эскеризы. Озьы 34 интыын квартирантъёс шараямын, 26 семья аслэсьтыз доходъёссэ ватэм. Соослы компенсация сослы уз вуы ни. Люкмес вуын кадь Куд-ог юртъёсын толалтэ куазен но пӧсь вузы ӧвӧл. Ӵукна султэм бере ик йӧ кадь вуэн мисьтаськоно луэ. Шуныт сётӥсь трассаослэн тӥяськеменызы капитальной лэсьтӥськонэн сэрен трубаосты вошъямен 9 юртын пӧсь вутэк кылемын. Дасяз А. Андриянов. Кичӧлтон Ёрослы - 2000 газет! Шаркан ёросысь почтальонъёс пыриськизы 2000-тӥ арлы "Удмурт дунне" газетэз вӧлмытон конкурсэ. Ваньзэ-ӧвӧлзэ 1600 мында газет гожтэмын ке вал, со пӧлысь 1014 газет вӧлдытэмын почтальонъёс пыр. "Удмурт дунне" газетэз тужгес но трос вӧлмытӥзы: Людмила Васильевна Майорова - 111 (Ляльшур почта); Людмила Демьяновна Широбокова - 105 (Зар. Вишур почта) (та чырткем но сэзь кышномурт алигес гинэ воштӥз вал почтальонэз); Татьяна Васильевна Федотова - 100 (Кельдыш почта). Нош почта ёзъёсъя ке верано, тросгес газетэз вӧлмытӥзы: Мувыр - 162 (кивалтӥсез Т. М. Наговицына); Карсашур - 123 (кивалтӥсез Н. С. Перевозчикова); Зюзино - 124 (кивалтӥсез Н. Г. Артемьева). Кылем арен ӵошатоно ке, 2000-тӥ арлы газетлы гожтӥськон 57-лы будӥз. Озьы ке но, сюлэм уг буйга - Алнаш палъёсты сутыны ӧм быгатэ. Та ужрадэ пыриськыны лябгес мылкыд каримы-а, мар-а. Ваньмыз почтальонъёс но та уже тыро-пыдо ӧз кутске, почта ёзъёсысь кивалтӥсьёс но сюлэмъёссэс юн-юн та ужлы ӧз сётэ, лэся. Вуоно 2001-тӥ арлы, малпасько, редакция нош ик конкурс ялоз но кыӵе ке дуно кузьым висъялоз. Соин ик Шарканысь почтаын ужасьёслы газет пыр вазиськеме потэ таӵе куронэн: асьме кылын потӥсь газетмес кызьы ке но тросгес вӧлмытоно калык пӧлы, лыдӟисьёс мед яратозы удмурт кылын потӥсь газетмес, медаз вунэтэ вордскем кылзэс, мед быгатозы вольыт но чебер вераськыны-гожъяськыны. Та ужын азьлань вамыш лэсьтыны быгатозы почтальонъёс но. Ёросамы ужало 30 пала почтальонъёс. 2001-тӥ арлы гожтӥськон вакытэ соос азе пуктэмын луоз ужпум: 2000 мында газет. "Удмурт дунне" газетлы гожтӥськонэз 2000- озь вуттоно. Ваньмызлы почтальонъёслы юнматэмын луоз нимысьтыз лыдпус. Ёросысь почта ёзлэн кивалтӥсьёсыз эскерыса-чакласа быдэсъяськемзэ уж нуозы но , почтаын ужасьёслэсь кылзэс юалозы. Кин тросгес вӧлмытоз "Удмурт дунне" газетэз, сое ёросысь почта ёз дуно кузьымен пусъёз. Оскисько, Шарканысь почтальонъёс шонер валалозы верамме - пуктэм ужпумез быдэстозы - 2000 мында газет вӧлмытозы но редакцилэсь кузьымзэ басьтыны быгатозы. В. МУШИН, Шаркан ёросысь почта ёзлэн кивалтӥсез. Редакцилэсь: Малпаськом, шарканъёслэн таӵе ужрадзы мукет ёросъёсысь почтаын ужасьёсты но гочатоз. Туж умой луысал, Виктор Андреевичлэн та кичӧлтонэз быдэс шаерамы вӧлмысал ке, 2000-тӥ арез данэн келяса, вуоно даурез 2000 "Удмурт дунне" газетэн пумиталом. Журналистъёсын пумиськонъёс Чугун сюресэз куашкатыны уг яра Кинлы бен та удыс уг кельшы, кин сое куашкатыны малпа? Та огсыр ужась ёзэз пичи ёзъёслы люкон но куд-ог мукет лэчыт ужпумъёс сярысь журналистъёслы мадиз Горький чугун сюреслэн Ижысь люкетэзлэн тӧроез Клементий Роговоец. Кин ке малпаз меда, МВФ (Дуннеысь валютая фонд) Россиысь чугун сюрес сярысь сюлмаськоз шуыса? Нокин ӧз, дыр. Но туннэ суро-пожо улонмы ваньзэ мыддорин берыктӥз. Кураськеммес нокин умоен уг лыдъя. Соин ик МВФ асьмелы меӵак дэмла, МПС-тэс (чугун сюрестэс) пичи ёзъёслы люкылэ, ог-огзылэсь висъялэ, собере тӥледлы коньдон сётом. Сыӵе ик малпанзы Газпромъя. Тӥляд, пе, монополистъёсты трос, быдтоно соосты. Западысь но США-ысь эшъёсмылэн "юрттэмзыя", "Аэрофлотэз" куашкатӥм ни. Табере "эшъёсмылы" люкетэ чугун сюрес но Газпром. Я бен, МВФ дышемын быдэс дуннеын кузёяськыны-косъяськыны. Нош кыӵе югдур асьме калык хозяйствоын? Ӝыныезлэсь уноез чугун сюрес но техника вужмемын. Соин ик та удысэз азинтонэ трос уксё висъяно, сотэк государство но бырон калэ вуоз. Югдурез чакласа, туэ кык пол трос инвестициос (юрттэт) вуозы. Берло дыре чугун сюрес вылын нуон-ваён 4 поллы кулэсмиз. Соин ик та удысын зэмос выльдӥськон кулэ. Асьме отделениын кылем июле умойтэм уж нуиськиз. Чугун сюреслэсь транзитъя ёззэ люкыны малпазы. Клементий Антонович солы чутрак пумит луиз но директорезлэсь кивалтӥсьсэ ужысьтыз мозмытӥз. Таӵегес ик югдур кылдылӥз пригородной поездъёсъя. Куд-ог уловылъёсын солэсь куштӥськыны чаклазы. Нош Клементий Роговец пумит луиз, вань кужымзэ сётӥз интыысь чугун сюресэз азинтонлы. Со умоен берытске. Туэ чакла Ува-Кильмезь сюресэз выльдыны-тупатъяны. Солы юрттыны басьтӥське асьме Правительство. Берло куинь ар ӵоже чугун сюрес калыкез нуон-ваёнъя тарифъёссэ ӧз будэты. Со шумпотымон. Али поездэн ветлон самой дунтэм усе. Но кулэ выль локомотивъёс, вагонъёс но музонэз. Г. РОМАНОВ. Чыры-пыры - дуно ваньбур Республикаысьтымы кун библиотека дас ар талэсь азьло национальной статус басьтэмез бере бадӟым уж нуыны кутскиз удмурт культураез утён, азинтон ласянь. Таин валче кутэмын "Память Удмуртии" программа. Отын куинь ёзъёсыз: фондъёсыз выльдон, вужъёссэ утён но национальной библиография дасян. Шаерамы али 576 библиотека. Котькудӥзлэн ужамез син азьын возиське, лыдэ басьтӥсько лыдӟисьёслэн куронъёссы. Кыӵе произведениосты возьма лыдӟись асьме писательёслэсь - тае эскерыса лэсьтыны чакламын социальной заказъёс. "Память Удмуртии" - финн-угор республикаос пӧлын нырысетӥез таӵе программа. Сое быдэсъясьёс нырысетӥ ужпумен лыдъяло: бичано ваньзэ, мар гожтэмын-печатламын удмурт культурая, литераутрая. Номырлы сётоно ӧвӧл ышыны - оло, луоз на татчыозь тодымтэзэ но шараяны. Соин ик Национальной библиотекаын ужасьёс вазисько асьме писательёслы, дуно ваньбурзэс фондъёсы кузьманы яке вузаны курыса: та понна правительство ласянь висъямын 500 сюрс манет. - Тӥляд юрттэменыды, ми оскиськом, туж кулэ луись, дуно документъёс, туспуктэмъёс, рукописьёс шедьтом. Куд-ог вуж, вашкала книгаос ки улын пырдо ини. Соосты тупатъяны яке выльысь поттыны кулэ. Озьы ик чаклано луоз, кыӵеосыз чеберлыко произведениос кемалась ӧз ни печатласькылэ. Списокысьтымы кулэоссэ бырйыны юрттоды шуыса оскиськом. Удмуртиысь писательёслэн огазеяськонзылэн правлениезлэн кенешоназ Таӵе куронзэс веразы Национальной библиотекалэн директорезлэн воштӥсез ужасьёс Галина Гавриловна Калинина но комплектованиея отделысь валтӥсь библиотекарь Екатерина Алексеевна Косолапова. Документъёсты кутон, эскерон понна кылдытэмын луоз экспертъя кенеш. Татчы пырозы библиотекарьёс но, писательёс но. Вылӥ кивалтонни ласянь кенеше дэмламын Виктор Чулков, Кун Кенешысь пресс-службалэн кивалтӥсез, со луэ Россиысь Писательёслэн союззылэн членэз но. Та кенешонын писательёслэн правленизы экспертъя советэ дэмлаз на Алексей Ермолаевез. - Уг ке но поты библиотекалы кузьмамды яке вузамды, вазиське милемлы - ми юрттом тӥледлы дуно арбериостэс утьыны, - шуизы на бибилотекаын ужасьёс. Зэмзэ но, писатель улонысь ке кошке, кытчы пыро солэн рукописьёсыз, книгаосыз но мукет макеосыз? Озьы луиз, кылсярысь В.Романовен. Г.Архиповлэн но туж узыр коллекциез отчы-татчы кыскамын ни. Доразы утисько на Н.Байтеряковлэн, Г.Ходыревлэн ужам кибервылъёссы. Соосты музее, архиве яке библиотекае ик басьтон пумысен уж уг нуиськы, шуыны луэ. Собыдӟа ваньбурез семьяоссылэн так сётэмзы уг поты. Нош Культурая министерстволэн ёзъёсыз коньдонэн узыр ӧвӧл. Та муген ик, нялтас вералом, ас улон интыяз, квартираяз, кыллё Удмурт театрысь азьвыл валтӥсь художниклэн Г.Векшинлэн (солы 83 арес луоз ни) суредъёсыз, макетъёсыз, туспуктэмъёсыз но театръя пӧртэм литератураез. Национальной музейлэн ӧвӧл коньдонэз, нош театрлы соосты нокытчы карыны: ӧвӧл музеез но, уксёез но. Тазьы чыры-пырыен ик бадӟым ыштонъёс адӟе культурамы. Т.Петрова. Галина РОМАНОВА Тӧдьы луон понна (серемес сценка) Гуртысь корка пуш. Ӝок вылын сием-юэм бервыл. Выж вылын кык воргоронъёс кыллё. Одӥгез кӧй, вольыт ымныро, дуно костюмен, тӧдьы дэремен, галстукен. Мукетыз воргорон начар, огшоры дӥсен, ымнырыз мычемын ӧвӧл. Сайкало но выж вылысен ог-огзы шоры учко. Александр Павлович. Кин тон?! Онтон Коля. Мон Онтон Коля. Александр Павлович. Мар-о мон вӧзын кариськод? Онтон Коля. Кыллисько. Александр Павлович. Нош мон мар карисько? Онтон Коля. Кыллиськод. Александр Павлович (юрдыса). Тон вӧзын?! Кыллисько?! Фу! (Султэ, курткиське, дӥсьсэ тупатъя). Онтон Коля (султыса). Ма, вунэтӥд шат, толон быдэс улёен вуиды, мон доры пыриды. Сиён-юонэн, вож бумага коньдонэн... Александр Павлович. Малы?! Кытын мон?! Онтон Коля. Ӧркагуртын тон. Быръёнъёс матэкто, со пумысь вераськыны лыктӥды шуиды. Александр Павлович (йыр бордаз кутскыса). А-а, быръёнъёс, быръёнъёс... Ӧркагурт, Онтон Коля... Онтон Коля. Бен, бен, тодад ваид-а? Александр Павлович (Коляез ӟыгыртэ). О-о, быръёнъёс... Онтон Коля, Онтон Коля... Онтон Коля (ӟыгырскыса). Бен, бен, Онтон Коля. Александр Павлович. Нош юрттӥсьёсы кытын? Онтон Коля. Ма, толон гуртысьтымы егит нылъёсты ӧтьыны косӥд. Шулдыръяськизы но соосын кошкизы. Александр Павлович (йырзэ сэзъялтыса, тодаз вайыны турттыса). Нылъёс, нылъёс... Онтон Коля. Бен, бен, соосты тӥ ческыт винаосын, кампет-преникъёсын утялтӥды. Собере шыр гольык кылиськыны косӥды. Александр Павлович. Не может быть, тазэ куасалтӥд. Онтон Коля. Тыл понна, уг алдаськы! Александр Павлович. Нош мон малы татчы кыли? Онтон Коля. Монэн ӵош, кылмы тупаз. Александр Павлович. Нылъёс нош кытын? Онтон Коля. Шуисько ук, юрттӥсьёсыныды кошкизы. Александр Павлович. Шыр гольык? Онтон Коля. Ма, милям сыӵе ӟеч улонэ ӧз вуэ на. Гольыксэс возьматыны возьдасько на. Ӝок сьӧры пуксё. Быдэн чарка юо. Александр Павлович. Тон кыӵе-о блоке пыриськод? Онтон Коля. Блоке... блохе... блоха... Милям татын блохъёсмы... пыӵъёс ӧвӧл. Александр Павлович. Нош партие? Онтон Коля. Партия, партия... А-а, партия, соиз но ӧвӧл. Куке но вал. (Гадь бордаз мыжгыса.) Мон но отын вал! Кызьы шуо вал али сое? (Йырберзэ корма.) Ма, марым, али соослэн йырзы Зюганов кадь... Александр Павлович. А-а, компартия. Онтон Коля. Бен, бен, коммунистъёслэн радазы вал мон. (Вина лэзе.) Ойдо со понна юом. (Юо.) О-ох, улӥськиз!.. Вӧй вылын кадь... Порядок но вал! Соиз гарантия! Но вина юон, кышноосыз яратон... Таиз понна быдэс калык азьын улэпкын пыжылӥзы. Со понна кампет-преник, сӥль-вӧй пӧлын пылаським... Александр Павлович (паймыса). Неужели пыласькиды?! Чорыг мызь но, банан но, калач но сииды?! Онтон Коля (гадяз мыжгаса). Истинно верасько! Сиим!.. (Паймыса.) Тон бон соку кытын вал? Асьмеос огъёзъёс кадь но?.. Александр Павлович (йырзэ мыкыртыса, лулӟиськыса). Колымаын. Онтон Коля. Мар-о отын карид? Александр Павлович. Ужай, нюлэс корай. Онтон Коля (бордаз ӟыгырскыса). Иське, асьмеос одӥг выжыысь. Мон но весь ужасько, ужасько... Ойдо уж понна юом. Александр Павлович. Уг, уж понна уг юы. (Синкылиоссэ ӵушылэ.) Со сьӧд нюлэсэз тодам ваисько ке, вань пушкы бугырске. Онтон Коля. Уж понна юыны кулэ, Александр Павлович... Олексан кудо. Тазьы шуи ке, яралоз-а? Александр Павлович. Шу, яралоз. Онтон Коля. Кызьы шуо, кин уг ужа, со уг сиы. Уг но юы... Александр Павлович (чырты вадьсытӥз киыныз шонтыса). Мон татчыозям ужай ини, тырмоз! Онтон Коля. Э-э, озьы уг яра, Олексан кудо. Ужтэк шудэз уд адӟы... Кылзы ай, дорады чорыг мызь но, банан но, калач но ӧз вуылы бере, со Колыма шуонэд сокем-сокем кыдёкын шат, сьӧд-сьӧд нюлэс шорын? Александр Павлович. Бен, туж-туж кыдёкын, сьӧд-сьӧд нюлэс шорын. Онтон Коля. Калыкез но отын сьӧд, дыр, ого? Александр Павлович. Бен, сьӧд. Онтон Коля. Тон нош малы тӧдьы? Александр Павлович. Мон но сьӧд вал, табере тӧдьы луи. Онтон Коля. Кемалась-а собере тӧдьы луид? Александр Павлович. Перестройка кутскем бере. Онтон Коля (кисыриё, шунды шорын пыжем киоссэ Александр Павловичлэн киосыз вӧзы понэ). Учкы ай, учкы, мынам соос тынад вӧзын кыӵе сьӧд, шӧтэм адско. Александр Павлович. Ваньмызлы тӧдьы луыны кылдымтэ. Онтон Коля. Ойдо юом! Тӧдьы луон понна юом. Александр Павлович. Со понна юыны луоз. Тон али кыӵе блоке пыриськод, шуиськод ай? Онтон Коля. Блох но блох! Коӵыше но пуные но ӧвӧл бере, кыӵе-о пыӵъёсы мынам луозы?! Александр Павлович. Пыӵъёс сярысь уг вераськы мон, блок, блок сярысь. Кызьы сое тыныд валэктод ай? Мынам блоке вань. Ну, партия, иське. Отчы пыро мыным дурбасьтӥсьёс. Онтон Коля (киыныз шонаса). Ӧвӧл, ӧвӧл, нокыӵе партие мон уг пыры ни! Кулэ ӧвӧл ни! Александр Павлович. Со воксё мукет маке. Тон мон пала дурбасьтӥд ке, калыкез мыным дурбасьтыны косӥд ке, иське, мынам блокам пыриськод. Онтон Коля. Пыӵ сямен тон котырын бергано-тэтчано луоз-а? Нош куртчыны ке шедьтӥ? Александр Павлович. Пыӵ но пыӵ! Ачим мон тонэ куртчо!.. Тыныд мон котыртӥ чик бергано ӧвӧл, калыкен ужано луод. Мынам одӥгез юрттӥсе луод. Валад-а? Онтон Коля. Тынад юрттӥсед? Александр Павлович. Бен, мынам юрттӥсе. Вань уждэ куштыса, тыныд гуртъёстӥ ветлоно луоз. Адямиосты куаразэс мон понна сётыны куроно. Онтон Коля. Малы-о нош тыныд сомында куара? Александр Павлович. Тынад но киосыд тӧдьы луон понна. Онтон Коля (малпаське, вина лэзья). Ойдо ай юом. А то йыры маке пороме, кеньырзэ интыяз пуктоно. Александр Павлович. Пукты, пукты. Онтон Коля. Иське, тон мон понна сюласькиськод? Монэ но тӧдьы каремед потэ? Александр Павлович. Шонер валаськод. Онтон Коля (синкылияськыса). Тау, Олексан кудо! Кулытозям ӟечтэ уг вунэты. Шуккиськыса ӵош юо но ӟыгырскыса выж вылэ пограло. Александр Павлович (выж вылысен). Монэ бырйиды ке, быдэс гурттэс тӧдьы каро. Онтон Коля. Тӧдьы, тӧдьы, тӧдьы... Умме усё, соргето. Катанчи. Пӧлысьтымы адями ӟечгес валалоз "Удмурт дуннемылэн" бамысьтыз шедьтӥ туспуктэмъёсын "Тодмалод-а, уд-а?" люкетэз. Мон малпасько, та адямиос, зэм но, асьме калыкмылы тодмо луо. Ваньмыз ик - улонын но политикаын азьветлӥсьёсмы, соослы вань удмуртъёс музъемозь йыбырттыны кулэ. Валентин Кузьмич Тубылов, "Удмурт кенешлэн" тӧроез но Госсоветлэн депутаэзт - гажано, вань калыклэн дано адямиез, со туж йӧно, адӟем карымон но ӟеч, юн выжыё тыпыен ӵошатысал мон сое, сыӵе со мынам син азям. Роза Ивановна Яшина сярысь но (лыдӟисьмы куинетӥ фотоысь сое "тодмам" - Ред.) вераны кулэ ӧвӧл ни, дыр, сое тодӥсьтэмез ик ӧвӧл республикаямы, яркыт кизилиен со пыриз удмурт калыклэн историяз. Котькуд выступлениез вань ёз пыр потэ. Кышкасьтэм, ваньзэ шонер верась, зэмлыкез вераменыз калыклэсь синъёссэ усьтэ кадь со. Нош Светлана Константиновна Смирновалы туж бадӟым оскон азьланезлы. Таиз будӥсь выль депутатмы мед ик ужасал удмурт калык понна, медам ышты калыкезлэсь осконзэс. Со кылем арын вераз вал, Кун Кенеш кылъя закон бордын ужалоз, вань депутатъёсты, пе, азьло со проектэн тодматоно шуыса. Табере калыкмы чакласа улэ, возьма, ку парламентмы со уж борды кутскоз. Сюлэм вӧсь луэ, удмурт депутатъёсмылэн лыдзы арысь аре кулэсме но кулэсме шуыса. Калыкмылы со туж бадӟым ыштон. Депутатъёсмылы туж секыт, вылды, утьыны асьме сюлэмшугъяськонъёсмес. Ай бен соос пӧлын но ваньмыз меда асьме калык понна ужало? Табере депутатлы оскон ичигес ини, уго тодӥськомы, кыӵе кырсь амалэн куд-огез шедиз Госсоветэ. Мар карод?.. Котькытын али адямиез уте уксё, асьмелэн, удмуртъёслэн, кисымы начаргем, векчигем. Верам потэ элькунамы президент быръёнъя. Бадӟым шуг-секытъёс луозы, вылды, таяз но учыре. Удмурт калыкенымы зол ужаны кулэ, изьыса медам кыле вал. Калыкен ужано, валэктон уж нуоно, та удысын ӟучъёс но тросэз асьмемыз валалозы. Нырысетӥ президент луыны кулэ удмурт. Вань республикаосын кузё луо ас калыкысьтызы потэм муртъёс. Асьме элькунысь-а, сьӧрлось лыктэм адями-а сюлмысьтыз турттоз утьыны калыкмес, калыкмылэсь курадӟонзэ? Лек висёнэ усиськомы ини. Асьмеды сэрпалляло, погыртыло но, асьмеос нош султӥськомы, чидаськомы котькыӵе сильтӧлэз. Та ласянь асьмеос дӥсьтӥсьтэмесь на. Со бордын, мон малпасько, янгышмы. Та секыт вакытысь потон понна шедьтоно ӟеч амал. Ми Воткинск городамы быгатэммыя турттӥськомы калыкен ужаны. Ортчытъяськом городын пӧртэм пумиськонъёс, мукет ужрадъёс. Ми, воткаос, ужалом удмурт президент понна! Мэрмы В.Л.Фридрих туж вала калыкъёслэсь сюлэмвисёнзэс, ваньмыныз кыл шедьтэ вераськыны, быгатэмезъя юрттэ котькуд калыклэн огазеяськонэзлы. А.Вахрушева, Воткинскын улӥсь. Ӝегатӥзы героинэн Та нуналъёсы республикаысьтымы МВД-лэн наркотикъёсын нюръяськонъя нимысьтыз ёзаз ужасьёс ӝегатӥзы кызь одӥг аресъем Щ. Максимез. Солэсь шедьтӥзы 0,04 граммъем героинзэ. Та йыружъя ӝутэмын уголовной уж, мынэ следствие. Ӧтён Ожысь но ужысь ветеранъёслэн Ижевскысь кенешсы ӧте "Ветеран" клублэн пумиськоназ. Со ортчоз 27-тӥ январе 11 часэ Кун филармонилэн бадӟым залаз (Пушкинской урам, 245 номеро юрт). Ветеранъёс азьын вераськоз Удмурт Республикаысь прокурор Виктор Михайлович Походин. Ужрадэз шулдыртоз концерт. Пырыны луэ дун тырытэк. "Эктон корка" эшъёссэ люка Мылкыддэ ке потэ капчиятэмед, эктон пужыосыз потэ ке адӟемед, чебер эктыны потэ ке дышетскемед... Мукет калыкъёслэн эктонъёсынызы потэ ке тодматскемед... Выль эшъёс потэ ке шедьтэмед... Бен, бен - лыкты "Эктон корка"! Тани таяз но покчи арня ӝытэ сизьым часэ, со усьтэ ӧсъёссэ вань мылкыд карисьёслы. (Таяз ӧд ке быгатэ, эн куректэ: котькуд толэзьлэн берпум четверг нуналаз витё тӥледыз татын.) Нош вунэтӥды ке, эшшо огпол тодады вайытӥськом: "Эктон коркамы" эшъёссэ люка Егитъёслэн юртазы ("Редуктор" двореце). Таяз ӝытэ лыктэмъёсмы тодматскозы - эктонъёсын гинэ ӧвӧл - шудонъёсын но: удмурт, пор, мадьяр, карел но мукет калыкъёслэн шулдыръяськонэнызы. Витиськом гуртысь куноосмес но. Азьвылгес ми доры вуылӥзы ни вал Завьял ёросысь Пироггуртысь, Татарстанысь, Ципья гуртысь, Селта палась кырӟаны-эктыны быгатӥсьёс-усточиос. Котькудӥзлэсь кыӵе ке но выль эктон пужызэ синйылтӥм, асьсэос но ас тодэммылы дышетӥм. Нош кивалто "Эктон коркаен" туж задор, шаплы, визьмо егит эшъёсмы Андрей Прокопьев но Наталья Чиркова. Анастасия Петрова, "Эктон корка ветлӥсь. "Эшъёсы-аръёсы" "Пот пумитам", "Кыдёке мынэ поезд", "Ми озьы но тонэ яратом", "Юнме вождэ поттӥськод", "Яратон сяська", "Сяськаос", "Катерина..." Таӵе но мукет - ваньмыз 50 пала кырӟанъёсыз тодмо луизы ни Семен Перевощиковлэн. Солэн кылъёсызъя гуръёс кылдытӥзы Герман Корепанов, Николай Шкляев, Анатолий Сутягин, Михаил Оськин, Михаил Журавлев но мукетъёсыз. Кырӟанъёссэ улӟыто тодмо артистъёсмы Николай Вахрушев, Евгений Серебренников, Геннадий Кузнецов, Михаил Ворончихин, Светлана Смагина, Галина Платонова, Геннадий Бекманов... Таӵе бичам "тугокоез" тӥ адӟыны быгатоды Удмурт кун театрын 27-тӥ январе. Семен Перевощиковлы кылем арын гудырикошконэ, кызьы тодӥськом, тырмиз 70 арес. Нош нырысетӥ кылбуръёссэ поттэм дырысен 50 ар луэ ни. Со вал 1950-тӥ арын 26-тӥ мартэ: "Советской Удмуртия" газет быдэс бам печатлаз Удмурт пединститутысь литературно- творческой кружоке ветлӥсьёслэсь ужъёссэс. Мукетъёсыз пӧлын вал историко- филологической факультетысь И курсын дышетскисьлэн Семен Перевощиковлэн но кылбуръёсыз. Семен Андреевич со дырысен уно кылбур сборник поттӥз ни. Трос ужаз ӟуч кылысь удмуртэ берыктон бордын но (кылсярысь, Э. Хеминугэйлэсь "Старик и море" произведенизэ удмурт лыдӟись доры вуттӥз. Берлоез книгаез нимаське "Выльысь лыктӥ мон дорады". Ӝоген потоз "Эшъёсы-аръёсы" выль сборникез. Тазьы ик нимаськоз кылбурчилэн покчи арняе ортчоно ӝытэз но. Т. Николаева. Йӧно воргорон Сочи городлэн Адлер районаз военной комиссар луыса ужа туж гажано адями, удмурт гуртын вордӥськем мурт Алексей Минеевич Штыков. Солэн егит дырыз ортчиз Вавож районысь Лыстэм гуртысь бадӟым удмурт крестьян семьяын. Атаез, Миней Петрович, но анаез, Раиса Васильевна, туж ужась адямиос вал. Бадӟым семьяез утизы-вордӥзы. Бадӟымез пизы, Анатолий, ас гуртаз ик тракторист луыса ужаз но 1993-тӥ арын кулӥз. Кыкетӥез, Дмитрий, Б. Котьяын улэ но пӧртэм машинаосъя слесарь луэ. Куинетӥез пизы, Александр, механизатор. Ужа Какмож посёлокын, автобуслэн шофёрез луыса. Ньылетӥез пизы, Пётр, асьсэ гуртазы ик комбайнер. Нош сузэрзы, Любовь, Ува районысь Рябово торфопредприятиын складлэн кивалтӥсез луэ. Та бадӟым семьяын ик будӥз покчи вынзы, Алексей Минеевич. Начальной школаез аслаз гуртаз ик йылпумъямез бере дышетскиз Какмож посёлокысь школаын. Тямыс классэз быдэстэмез бере кылдӥз военной адями - офицер луон сярысь мылкыдыз. Сое уката золомытӥз атаез, Миней Петрович, Быдӟым Отечественной война пыр потэм мурт. Сӧсырмыны шедьылэмын ке но, котьку данъяськыса вералляз офицеръёс сярысь. Ваньзэ сое лыдэ басьтыса, Алексейлэн офицер луэмез потӥз. Нош колхозын туж куанер улӥзы. Семья бадӟым вал. Соин ик, Свердловскысь суворовской училищее пырон понна, сюрес вылэ билет басьтыны гинэ коньдон шедьтӥзы. Та дышетскон интыын егит, таза удмурт пиез умой пумитазы. Дышетскыны но со мыло-кыдо тыршиз. Соин ик училищеын гажазы. Кӧня ке дыр ортчыса, тодон-валанзэ будэтӥз Бакуысь военной командной училищеын. Алексей Минеевич шуныт инты ноку но ӧз утча. Лейтенант ним басьтэмез бере ик аслыз куриз тужгес йӧспӧртэм взводэз. Ваньмыныз солдатъёсыныз огъя кыл шедьтӥз но, взводэз азьмынӥсь радэ потӥз. Собере армия сюресэз 1975-тӥ арын вуттӥз сое Германиысь Гюстров городэ. Отын вал берыктӥсь но мотострелковой роталэн командирез. Нош 1981-тӥ арын январе сое воштӥзы Забайкальской военной округе батальонлэн штабезлы начальнике, командирлы юрттӥсе. Отысен Алексей Минеевичез 1982-тӥ арын ысто Москваысь М. В. Фрунзе нимо военной академие. Сое горд дипломен йылпумъяз но автомобильной но тракторной техникаез уже кутонъя инженер ним басьтӥз. Академиез быдэстыкуз, солэсь юазы: "Кытчы мынысалды?" Алексей Минеевич шуиз: "Странамы бадӟым, кытчы кулэ - отчы ик мыно". Озьы Алексей Минеевич 1985-тӥ арын шедиз Северо-Кавказской военной округе. Нырысь вал полклэн штабезлэн начальникез но полклэн командирезлэн юрттӥсез. Нош 1987-тӥ арын августэ Грозный городын полклэн командирез вал. Отын умой ужаны тыршиз, солдатъёсын огъя кыл шедьтылӥз. Озьы ик Чечняысь кивалтӥсьёсын но тупаса улыны тыршиз. Чечняын секыт югдур кылдэм бере, быдэс полксэ вань солдатъёсын, вань ожтӥрлыкен но машинаосын ӵош отысь поттыны быгатӥз, кивалтӥсьёс косэмъя. Со понна правительство орден сётӥз. Ас командирзэс али но шуныт кылъёсын тодазы ваё солдатъёсыз но командиръёсыз. 1992-тӥ арысь сентябрь толэзьысен Алексей Минеевич луиз Адлер районысь военной комиссариатлэн кивалтӥсез. Ас котыраз люказ ӟеч ужасьёсыз. Ваньмыз ик соос кулэ дыръяз кытчы кулэ, отчы ик мынозы. Нош та районын ужаны туж секыт. Малы ке шуоно, артэ ик, кунгож сьӧрын - Абхазия. Мукет палаз - Карачаево-Черкесия. Соос пыр пӧртэм йырвандӥсьёс ортчыло. Соин туж чакласькыса улоно. Со сяна, районысь гуртъёсын улӥсьёс - армянъёс но абхазъёс. Соослэн армие мыныны мылкыдзы сокем ик ӧвӧл. Соин ик пегало. Соин ик куддыръя военкомлы, Абхазиысь Гудаута но Гагра городъёсысь военкомъёсын ӵош ужаса, пегӟем егитъёсты берыктоно луэ. Нош ӵем дыръя соосын умой- умой вераськем ӟечгес юрттэ, мылкыдзэс ӝутэ, армие но мынонлэсь уг палэнско ни. Зэм, югдур уката секыт луиз соин: Ставрополь, Нальчик, Махачкала, Анапа, Минеральные Воды аэропортъёсын мукет кунъёсы лобаны лэземын ӧвӧл ни. Соин ик Адлерысь аэропорт пыр Турциен, мукет матысь кунъёсын кусып возё на. Соин ик отын ужасьёслы, милицилы, военкоматлы но администрацилы секыт уж кылдӥз на: вань тӥрлыкез, сюресчиосты эскерем сяна, эскерытэк уг луы на экипажъёсты но самолётъёсты. Озьы ик ваньмыз та службаос чакланы кулэ Псоу шур дурын сылӥсь кун пыр ортчисьёсты (куд-ог дыръя пырпотэ дас-дас кык сюрс адями, со сяна, машинаос - кыӵе бадӟым но секыт уж со, ваньзэ сое ортчытоно луэ, районысь вань кивалтӥсьёсын огъя кыл шедьтыса, ог-огедлы юрттыса). Алексей Минеевич сыӵе секыт уж дыръя но ас семьяез сярысь сюлмаськемысь ноку но уг дугдылы. Кузпалзэ, Надежда Михайловнаез, Какмож посёлокын дышетскыкуз ик синйылтӥз. Шудо семьялэн котькыӵе дырыз вал. Нылпиоссылэн вордӥськем интыоссы нош умой возьмато ортчем сюрессэс. Бадӟымез, Наташа нылзы, вордӥськиз Удмурт шаерын. Быземын Москвае, ужа "Газпромавиа" фирмаын. Кыкетӥез, Маша нылзы, вордскиз ГДР-ысь Гюстров городын. Улэ Адлерын. Куинетӥез, Оля нылзы, вордскиз Москваын. Дышетске дасэтӥ классын, улэ доразы. Нош тужгес покчиез - Иван пизы. 1999-тӥ арын 24-тӥ ноябре солы тырмиз куинь арес. Со сяна, утялто на Какможысь ӵыжы-выжызэс но. Алексей Минеевич но Надежда Михайловна ог-огзэс туж гажаса уло. Нылпиоссы но асьсэос кадь ик сабыресь, ӟеч дышетско, котькыӵе уж борды лулысь-сюлмысь басьтӥсько. Соослэсь адӟем каро эшъёссы но. Адлер городын тӥни озьы улэ но ужа удмурт адями, ньыльдон сизьым аресъем Алексей Минеевич Штыков. Зэм но, сое тодэм бере, туж умой валаськод ини: удмурт адями - ужаны яратӥсь. Шуныт но "вӧё" интыосты утчатэк, котькыӵе шуг-секытъёсты ортчоно луэ солы. Сыӵе ик - йӧно воргорон Алексей Минеевич Штыков. М. Ермакова, Сочиын улӥсь удмурт дышетӥсь. Алексей Минеевич Штыков Надежда кузпалэныз но Наташа нылыныз. 25 январе - Татьянаослэн нуналзы Та нуналэ христианъёс пусъё вань курадӟонъёсты чидам кышномуртлэсь Татьяналэсь нуналзэ. Сыӵе нимын нылкышно вань святойёс пӧлын одӥг гинэ. 25 январь озьы ик луэ на студентъёслэн нуналзы. 1755 -тӥ арын эксэй нылкышно Елизавета Петровна Москваын университет усьтон сярысь указ поттӥз. Вашкала аръёсы Москваысь студентъёс та нуналэз туж шулдыр пусйылӥзы. Егитъёслэн яратоно интызы вал "Эрмитаж" ресторан. Татын соос сиськылӥзы, юылӥзы. Мар ватонэз: олокыӵе керетон, жугиськон учыръёс но луылӥзы. Соин ик ресторанын ужасьёс но 25 январьлы зол дасяськылӥзы: ӝӧкъёс вылысь ӝӧккышетъёсты, сяськаосты утялтылӥзы, дуно посудаосты пыдлогес ватылӥзы. Студентъёс уйшорозь шулдыръяськылӥзы. Инкуазез эскерисьёс та нуналлы таӵе тодмет сёто: нунал шундыё ке луиз - тылобурдоос вазь вуозы, лымыяз ке - гужем зоро-кото луоз. Т.МИРОНОВА. НИКВЛАД САМСОНОВ Тодэ лыктэ... Таӵе адями со - Садовников Писатель Никвлад Самсонов али ужа тодэ ваёнъёсын выль книгаез бордын. Туннэ ӵектӥськом улонысь дырызлэсь вазь кошкем гожъясен Василий Садовниковен герӟаськем сюжетэз - таяз толэзе тодмо удмурт драматурглы 85 арес тырмысал. Василий Евдокимовичен мыным ньыль ар ӵоже валче ужаны шуд усиз. "Советской Удмуртия" газетлэн редакциысьтыз культура отделын ми соку ньыль кузя вал: Вениамин Никонорович Ившин газет баме вуттэ школа улон сярысь материалъёс, Роман Григорьевич Валишин - отделлэн тӧроез, милям тужгес матысез кивалтӥсьмы. Мон культура учреждениосъя материалъёс дасясько, Василий Евдокимович - "Шекычын". Калык кыстӥське вал та отделэ. Писательёс Садовников но Валишин аспӧртэмлыко творческой климат кылдытыны быгато вылэм. Аръёс ортчемъя гинэ сое рос-прос валаны кутскиськод. Со аръёсы гожъям дневникъёсы пӧлын бугыръяськи. Тани соос... Понедельник. Василий Евдокимович гань-гань лёгаське редакция коридоръёстӥ - угось "Шекычез" потӥз, планёркаын дежурной критик ушъяз. Ӧс доры чонь-чонь султоз но па-аль потыса сылоз. Мылкыдыз шукы кадь: гужем ӵукна ӝужась шунды но - тӥни. Со шоры учкыса, милям но Ившинэн мар ке но ӟеч вераммы потэ. Вениамин Никонорович, ручка пумзэ пель дораз карыса, Василий Евдокимович шоры шуныт мылкыдын учке: - Евдокимыч, ойдо ай, тамакалом, отделысь эшъёс ӵындыны лэзёзы ке, - ми Валишинэн таӵе пиосмурт висёнэн черламын ӧй вал на. Сое чакласа ик Ившин шорамы ӧжытак пыриськись мылкыдын учке: кызьы, пе, уд валаське, мӧйы писатель ук та асьмелэн, мылкыдзэ ӧжытак ке но шумпоттоно. Валишин, номыр но куаретытэк, интыысьтыз султэ но укноез вӧлак каре. - Ну, - вазе Ившин Садовниковлы, - Евдокимыч, толон нош ик "Меӵ яр дурындэ" учки на. Дурыстэм усто шудо. Уката ик Ядыгаровед синмаськымон пӧрмемын. "Ижмаш" культура дворецлэн калык театрысьтыз Семен Петров син шоры туж йӧтэ. Тынад Ядыгаровеныд... - Ившин кӧня ке малпаськись тусо луэ, ӵапак выль кылбурзэ лыдӟыны дасяськыкуз кадь: "Югыт дуннее, Ческыт музъеме!" Усто, Евдокимыч! Усто! Мон таӵезэ даурам но малпаны уг быгаты... Садовников егит поэтлэсь декламацизэ ымзэ усьтыса ик кылзэ, киысьтыз сигарет пумыз ик кысэм. Ымнырыз пичи муртлэн кадь шунамын. - Однако, Веня, - шуэ, - тынад кылыд тылыен маялтэм кадь, сюлэм вылтӥ, шунтэм вӧй выллем, небытак гылӟе... Писатель, гань-гань вамышъяса, ӝӧк сьӧраз пуксе... Вторник. Ӵукна уже лыктэмез бере ик Василий Евдокимович толло-туннэ потэм газетъёс пӧлын бугыръяське. Милемлы соин йырин ӧвӧл, со понна дор вань. Милемлы ӵукна чылкыт йырын секретариатэ куинь страница машинописной текст келяно. Кык сю чур шуо сое редакциын. Норма. Садовниковлэн со нормаез арняяз быдэс полоса - "Шекыч". - Слушай, - мон солэн паллян палысьтыз ӝӧк сьӧрын пукисько. - Вот тани Индонезиысь Калимантан шормуӵын адямиослэн пыдазы нокыӵе но пыдкутчан тыремзы овӧл. Паймод. Усто уло адямиос. Нош мон егит дыръям, тынад вордскем гуртад командировкае ветлыса, Яколич, гын сапег пыдэстэк кыли. Кызьы, шуиськод-а? Ма, кунокуа кышно кортгур вӧзаз куасьтыны шуыса пуктылэм. Нош соос ӵукнаозь эгырӟиллям. Куазь ӟырт кезьыт. Мар кароно? Ярам, бадӟым агаед, Семен Александрович, шуисько, сӥлы кариз. А то... Пумозяз вераса уг вутты - сотэк но валамон Василий Евдокимовичлэн вайыжъёссэ кудпала бералтэмез. Самой со кунокуа кышномуртлэн ӝикыттэм луэменыз сэрен ик табере мон Садовниковлэн ки улаз: авторлэсь редакцие ыстэм сатирической материалзэ художественной вылтусо кароно. - Тани, - ӝӧк вылам гожтэт лачмытак понэ писатель. - Тае туж тунсыко бергатыны луоно... Мур-мур лулскиськод но басьтӥськод ни. Кытчы кариськод на. Озьыен, ӵуказе, редакцие котькинлэсь вазь лыктыса, та бордын пуконо. Татэк но аслад ужед чыртыозяд тымиськемын ке но... Нош Валишинэн Ившин ми шоры йырзэс уг ик ӝутъяло: сокем сюлмоесь. Тодо угось, туннэ Садовников быдэс редакциын котькуд ужась вадьсын пиёк душес кадь поръя шуыса. Юрттӥсьёс кулэ Василий Евдокимовичлы. Соин ик туннэ ваньмыз солэсь кытчы ке но ватскыны тыршо. Тӥни ук Ившин но усьтыр-табыр машбюрое шулаз. Но... Садовников бере Садовников ини. Пыремез бере ик егит поэт котыртӥ гожеръя: - Марым, Венко, тани та пумысен ньыль чур туж зол пӧрмоно вылэм. Тынад, туллям кадь, интыяз луэ. Алдаськытэк верасько... Мар карод, ми, гожъяны соку гинэ кутскисьёс, солдат дӥськутэз али гинэ куштэмъёс, литератураез, оло нош вуоно кышноосмылэсь но золгес яратӥсьёс, дано писательлэн таӵе ӟеч кылъёсыз улын амалтэк бурдъяськиськом вал. Трос-а кулэ адямилы? Среда. Сямыз сыӵе: сое ӧс сьӧрысен ик тодмано. Туннэ Василий Евдокимович отделысь ӧсэз усьтэмезлэсь азьвыл бур пыдыныз ӵыже на ай. Озьыен, тодӥськом ини, сокем уг дырты. Но ӧс дорын пальпотыса уг сылы ни: вуоно "Шекычлы" материалъёсы огпол кизьнымон сяна люкамтэ на, пе. Озьы ке но, киоссэ ваче посэ. Шумпотыса: - Сельхозотделэ пырай. Ломагинэз кытки. Быгатӥ ведь. Ассэ заведующиез... Четверг. Василий Евдокимович отделысь отделэ шумприч бызьылэ: мынэсьтым материалъёсме бергатӥды-а, дасяды-а? Туннэ ӝыт пал редактор доры, пе, пыртоно. Я, ваньмыз дась кадь. Кабинет шорын пыдъёссэ паськыт вайяса сылэ. Кияз векчи папка. Папкаезлэн вылаз "Шекыч" гожтэмын. Отын - выль вордскем сатирической бам-полоса. Садовников нырысь ик кивалтӥсь шоры учке, собере ми пала берытске. Номыр но уг куареты. Синъёсыз тау! шуо. - Йыр ке йыр, пыд ке пыд! - редакторлэн кабинетаз шонтэ. Пятница. Туннэ "Шекычлэсь" вылтуссэ - макет шуо сое редакциын - лэсьтон нунал. Садовников нуназе бере векчи папкаеныз, бушам маин ке, секретариатысь потыса, яратоно отделаз вуэ. Самой со папказэ ӝӧк вылаз сале: - "Шекыч" вордскиз, пиос! Тау юрттэмды понна! Нош гонорарзэ редактор тыроз... Табере музъемозь ик йыбырттыса тау кариськом Василий Евдокимовичлы кыл бордын ужаны нодъямез понна, литератураын нырысь вамышъёс лэсьтыкумы, тэтэ карыны дышетэмез понна. Удмурт Элькунысь национальной театр январе таӵе спектакльёс возьматоз: 26 январе - А. Сидоров "Улӥськом-вылӥськом, шу..." Кык ёзэн драма 28 январе - А. Григорьев "Парсьпи но эмеспи" Кык ёзэн комедия 29 январе - С. Широбоков Н. Шкляев "Ой, чебер нылъёс" Кык ёзэн комедия. Спектакльёс кустко 18 часэ. Юалляськоно 78-79-81, 78-45-92 номеро телефонъёсъя. Удмурт Республикаысь Кун Кенешлэн укмысэтӥ сессиезлэн ужан радаз ватсаса ужпумъёс пыртон сярысь Удмурт Республикаысь Кун Кенешлэн Президиумез пуктэ: Удмурт Республикаысь Кун Кенешлы ӵектоно укмысэтӥ сессилэн ужан радаз ватсаса пыртыны таӵе ужпумъёсты: 1. Удмурт Республикаысь Правительстволэн 1999-тӥ арын ужамез сярысь ивортон. 2. "Удмурт Республикаысь Парвительстволэн 2000-тӥ арлы ужамезлы дунъет сётон сярысь" Удмурт Республикаысь Кун Кенешлэн Постановлениезлы инъет. 3. Удмурт Республикаын югдур сярысь Удмурт Республикаысь Кун Кенешлэн Тӧроезлэн докладэз. 4. Удмурт Республикаысь Кун Кенешлэн законъёс бордын ужанъя 2000-тӥ арлы планэз. 5. "Удмурт Республикаын калыкез уже интыян сярысь" Удмурт Республикалэн Законаз воштонъёс но ватсанъёс пыртон. Удмурт Республикаысь Кун Кенешлэн Тӧроез А.А.Волков. Ижевск город, 2000-тӥ арын 18-тӥ январе. � 103-ИИ. Журналистъёсын пумиськонъёс Тук-тук: приставез возьмаськоды-а? Нырысьсэ журналистъёсын пумиськылӥз Удмурт Республикаысь Юстицияя министерстволэн выль кивалтӥсез министр Вячеслав Сергеевич Осипов. Удмуртиысь Юстицияя министерстволы тырмиз 65 арес. Та министерстволэн ужан радыз сярысь выль положениез юнматэмын 1999-тӥ арын 5 августэ. Со дырысен министерстволэн быдэсъяно ужъёсыз кӧнялы ке воштӥськизы. Кылсярысь, табере та удыслэн бурд улаз пыртэмын исправительно-трудовой учреждениос. Республикаямы одӥг закон но уг поты, сое та министерствоын эскерытэк. Котькуд закон тупаны кулэ Удмуртилэн но Россилэн Конституциосызлы. Татын законъёс уг гожъяло, эскеро гинэ. Но куд-ог учыръёсы тазьы луылэ. Шуом, Россиын сыӵе закон ӧвӧл на, нош республикаын выль закон кылдэ. Министр верамъя, озьы, кылсярысь, луиз буёло металлъёсты бичанъя организациослэсь ужамзэс юн чакласа возён сярысь Удмуртиын нимысьтыз поттэм законэн. Юстицияя министерство солы пумит ӧз луы, угось лекос трос вал ини буёло металлэн герӟаськем йыружъёс. Выльдӥськон вакытэ туж трос кылдыны кутскизы калык огазеяськонъёс. Соослэсь ужамзэс лыдэ асьтэ но озьы ик чакласа возе Юстицияя министерство. Кылем арын лыдэ басьтэмын 230 калык огазеяськон но 83 вӧсьлыкен герӟаськем огазеяськон. Та ужез министерствоын ужасьёслы, зэмзэ ик, юн саклык кариськыса нуоно луэ, угось куд-ог организациос Юстицияя министрствоын лыдэ басьтӥськон понна олокыӵе но нимъёссы улэ ватскыны туртто, нош пуштроссыя соос адямилы урод лэсьтон сярысь чакламын. Озьы кылем арын ужаны лэземын ӧй вал удмурт-китай эшъяськонъя огазеяськон шуонлы. Юстицияя министерство меӵак кивалтэ нотариусъёслэн но адвокатъёслэн контораосынызы. Юстицияя министерстын ужасьёс пӧлын нимысьтыз висъясько судебной приставъёс. Азьланяз соосты тодманы луоз сьӧд басмалэсь вурем дӥсьсыя но. Та адямиос вылэ туж секыт ужъёс оскемын. Нырысь ик соос кыл куто, судъёсын юн дисциплина возён понна, мукет сямен вераса, судьяослэн, судебной уже пыриськем муртъёслэн улонзылы нокыӵе кышкытлыкъёс медам кылдэ. Кыкетӥез ужзы уката но секытгес: судебной приставъёс судлэсь решениоссэ быдэстыны юртто. Кылсярысь, судлэн тупатэмезъя янгыше уськытэм мурт ас тыронэзлэсь кызьы но озьы пегӟыны-палэнскыны ке выре, со доры судебной пристав лыктыны кулэ. Нош мар меда карыны кулэ судебной приставъёс таӵе учыръёсы, кудъёссэ ивортӥз министр. Солэн верамезъя, куд-ог предприятиослэн пунэм тыронъёссы миллионъёсын люкаськемын. Озьы, судлэн пуктэмезъя "Аксион" предприятие берыктыны кулэ 150 миллион манет. "Нефтемаш" 18 миллион, Гурт хозяйствоя но сиён-юон поттонъя министерство - 483 миллион манет. Данак тыронъёсыз озьы ик люкаськемын "Ижмаш" предприятилэн. Зэм, та предприятиослэсь ваньбурзэс таласа но соосты банкротэн ялыса, коньдонэз берыктыны луэ. Но та сюрестӥ мыноно ке, данак предприятиослэсь ужамзэс туннэ ик дугдытоно луоз. Нош мар отӥяз? Кызьы валамон, судлэсь решениоссэ быдэстон понна судебной приставъёс вылэ гинэ быдэсак чӧлскыны уг луы. Таӵе лыдпус: 1999-тӥ арын судъёс пыр предприятиослэсь 2 миллиард манет пала коньдон ке кысконо вал, басьтэмын 427 миллион манет гинэ. Озьы ке но, вань министерствоос пӧлысь таиз министерство огез узырез лыдъяське. Со возиське федеральной бюджет чотын. Со сяна, судъёслэн решениоссыя поттыны быгатэм коньдонлэн пичи люкетэз (7 процентэз) Юстицияя министерствое кыле. Со коньдонысь ик тупатӥське приставъёслэн уждунзы. Судлэн решениосыз ӵем дыръя ас кожазы уг быдэсъясько бере, судебной приставъёслы пӧсяса ик ужано луэ. Министр В. Осипов шараяз: ар ӵоже котькуд приставлэн киосыз пыр, шорлыдын вераса, 1250 уж ортче. Соин ик судлэн котькуд куинетӥ решениез йыла- пумаз быдэсмытэк кыле. Генерал званиен удмурт министр Вячеслав Сергеевич Осипов ас удысэз азьын сылӥсь ужпумъёсты вормыны дась. Мылкыдзэ журналистъёслэсь но ватыны ӧз туртты. Но шуиз: "Куке ымад учкыса кылзӥсько но ужамдэ ушъяло, оскыны кутскиськод. Но со луэ улӥе усёнлэн кутсконэз". Т. БАННИКОВА. БЫДӞЫМ ВОРМОНЛЫ - 55 АР Пыраклы курсантъёс 1942-тӥ арын майлэн кутсконаз, льӧмпу сяськаяськон вакытэ, военкоматъёсысь бумагаосын Воткинске шаерысьтымы егитъёс вуылыны кутскизы. Вокзалысен соосты пумиталлязы командиръёс. Собере соосты Ленинградысь пехотая 3-тӥ училищелэн казармаосаз келязы. Соос пӧлын вал дас укмыс аресъем егитъёс - Глазовысь Валентин Ившин, Пичи Пургаысь Григорий Кузнецов, Кез палась Леонид Ардашев но мукетъёсыз. Стройын сылӥсь пиос азьын вераськиз батальонзылэн командирзы капитан Лебединский. - Туннэ нуналысен тӥ луиды курсантъёс. Тӥ дышетскоды ожмаськон ужлы, дышетскоды ож бусыын солдатъёсын кивалтыны, дышетскоды тушмонэз вормыны. Нырысь ик луоды лейтенант, стрелковой взводэн кивалтоды. Котькудӥзлэн егит командирлэн армиын сюресэз озьы кутске, нош азьпала ке учконо, оло, тӥ пӧлын но вань вуоно генералъёсмы ... Капитан озьы вераз но могӟем кадь луиз. Строй азетӥ ик кӧня ке вамыш лэсьтӥз, малы ке йырысьтыз горд дуро картуззэ тупатӥз. Капитан та ӵышкем йыро егитъёслы уз вера кылем гужем Луга дорын пӧсь оже пыриськемез сярысь. Со тодэ, кызьы взводлэн командирезлы, солдатъёссэ ӝутыса, аслыз но азьпала потоно луэ, кызьы солы бырем солдатэзлэн окопаз султыса, сое воштыса, пулемётэныз тушмон шоры ыбылоно луылэ. Со кылылӥз ни вал взводлэн командирезлы атакае потылыны куинь пол гинэ кылдылэ шуыса. - Асьмелэн дырмы туж ӧжыт. Косӥсько но курисько мылысь-кыдысь дышетскыны. Нош ми, дышетӥсьёсты-командиръёсты, вакчи дыр куспын тыршом сётыны вань кулэзэ. Озьы кутскизы курсантъёслэн дышетскон нуналъёссы. Пурга пи Кузнецов гуртаз ыстылэм гожтэтъёсаз ивортылӥз: "Дышетскиськомы, ӵукна вить часысен кусткыса, ӝытазе куать часозь. Ялан бусыын. Дышетсконмы туж секыт..." Валамон ини, строен ветлэм но ыбылӥськем сяна, атакае ӝутскылыны, оборона возьыны дышетӥзы. Нош оборона возён со одно ик герӟаськемын луэ окопен. Вылаз ик, пӧсь куазен противогазэн но ужано луэ. Нош тревогаос ӵемысь луо. Уйёсы но, вазь ӵукна но дежурнойзылэн шӧдтэк шорысь сётэм командаез ӝутылӥз егит пиосыз валес вылысьтызы. Но дышетсконзы кема ӧз кыстӥськы. Куинь толэзь гинэ ортчиз но курсантъёс фронтлы кулэ луизы. Гужем шорын курсантъёсыз эшелонъёсын Кострома областьысь Буй городэ вуттӥзы. Соос отын кылдытӥськись 59-тӥ стрелковой бригадалэн 4-тӥ батальоназ пыризы. Соосыз ротаосъя люкылӥзы. Батальонысь разведчикъёслэн взводзылэн командирез лейтенант Кавешников строй азе потӥз но вазиськиз: - Кин мылкыд каре разведчик луыны? Стройысь кӧня ке мурт потӥз. Собере гинэ лейтенант ачиз бырйиз взводаз тупась курсантъёсыз. Озьы разведчикъёслэн взводазы сюризы удмурт пиос И.Н.Евдокимов, А.В.Смирнов, А.И.Груздев, Н.Я.Белослудцев, В.Ф.Галичанин, Л.А.Булдаков, В.М.Ившин, Г.А.Кузнецов, В.И.Корепанов но мукетъёсыз. Табере казармаын разведчикъёслэн стройзы гинэ сылэ ни. Кавешников лейтенант строй азетӥ солань-талань ортчиз, егит пиослэн ымныръёссы шоры учкиз. Чалмыт сыло егитъёс, стройын вераськыны-ӵашетыны но, вырӟылыны но уг яра уго. Отделениоссылэн командиръёссы гинэ соослэсь кык-куинь ареслы мӧйыгес, пӧлазы вань оже пыриськылэмъёсыз но, госпитале сюрылэмъёсыз но. Лейтенант паськыт езэ тупатъяз но бур киыныз портупеез борды кырмиськиз: - Эшъёс, курсантъёс, мон тӥледыз азьвыл сямен ик нимало, тӥ училищеын ӧвӧл ни ке но. Мон тӥледыз взводамы оскыса бырйи. Разведчик оскымон боец луыны кулэ, котькуд приказэз быдэстыны дась луоно. Асьмеос батальонмылэн, командирмылэн синъёсыз но пельёсыз. Мон али но шорады курсантъёс шуыса вазиськи, азьланяз но озьы ик луоз. Дышетсконды куспетӥ луиз, тӥ фронтлы кулэ луиды. Немец фашистъёс гужемлы чаклам ужзэс быдэстыны кутскизы. Соос кыстӥсько Волга дуре но нефтен узыр Кавказэ. Лек ожъёс пыр ортчыса, оло, ваньды ик уд ке но, оскеме потэ, тӥ пӧлын луозы лейтенантъёс но. Ож тылӝу пыр потыса йылпумъялоды дышетскондэс. Тӥни сыӵе вал лейтенантлэн мылкыдыз та нуналэ. Разведчикъёсыз азьын со мылкыдзэ быдэсак усьтыны, малпанъёссэ вераны тыршиз. Командир бере кӧня ке кылын вазиськиз на солэн юрттӥсез политрук Захаров. - Валтӥсь Главнокомандующиймылэн 227 номеро приказэз поттэмын немецъёслэн Волга дуре но Кавказэ ожалскеменызы валче. Приказын меӵак косэмын: "Одӥг вамышлы но ум чигналэ! Котькудзэ позицимес, асьме музъеммылэсь котькудзэ метрзэ утёме!" Озьы косэ Главнокомандующиймы. Буй городын кык арня сылыса, 59-тӥ стрелковой бригадаысь батальонъёс 14-тӥ августэ эшелонъёсы пуксизы. Соос станциос пыр вужерак-вужерак туж ӝог ортчылӥзы. Озьы ке но, кузь сюресэз ортчыны дас нунал кулэ луиз на. Батальонъёс Бузулук разъездэ вуизы. Татысен гинэ командиръёс но солдатъёс тодӥзы ни, соослы Кавказын оже пыриськоно луоз шуыса. Мукетаз нуналэ бригадаысь подразделениос пароходэ пуксизы но 29-тӥ августэ Махачкала городэ вуизы. Дагестанлэсь шоркарзэ утьыны дасям позициосы интыяськизы вал. Нош фронтын югдур нуналлы быдэ воштӥське. Тушмонлэн частьёсыз Терек шур вамен выжыны быгатӥзы. 9-тӥ сентябре армилэн кивалтӥсезлэн приказэзъя бригадалы косэмын вал Вознесенский но Малгобек вискысь гурезьёсты утьыны. Малгобек нефтен сокем ик узыр ӧй вал ке но, немец генералъёс сое одно ик ӝоггес басьтыны тыршизы. Вазь ӵукна асьме подраздлениосмес немецъёслэн артиллеризы но минометъёссы ыбылыны кутскизы. Озьы ке но, батальонъёс Нижний Курп азе потыны быгатӥзы но вырйылъёсын оборонае выжизы. Нуназе бере немецъёс выльысь трос танкъёссэс но пехотазэс оже пыртӥзы. Со дыре ик омырын вис крытэк гуретӥзы "юнкерсъёс" но "мессеръёс" но. Смолётъёс трос бомбаоссэс куштылӥзы оборона возисьёс вылэ. Нижний Курп азьысь ӵужектэм кукуруза бусыетӥ вӧлдӥськыса, гуретыса лыкто киросъёсын танкъёс. Артиллеримы оже пыриськиз. Дасо ёрос гомӟылэм танкъёссэс кельтыса, немецъёс берлань кошко ни вал но, ӧжыт улыса, выльысь берытскизы. Бӧрсязы пехота мынэ. Но немецъёслэн таиз но атаказы ӧз пӧрмы. Солдатъёсмы быдэс нунал возизы окопъёссэс. Огзэ вырйылэз гинэ тушмон басьтыны быгатӥз. 15-тӥ сентябре ньылетӥ батальонлы азьлань мыныны косэмын вал. Разведчикъёслы немецъёслэсь вырйылъёсы интыяськем кужымзэс, артиллеризылэсь позициоссэс тодоно вал. Сое быдэстыны Кавешников лейтенант кыкеныз отделениеныз мынӥз. Разведчикъёс ӟардон вакытэ батальоназы берытскизы, тушмонлэсь одӥгзэ пулемётсэ но ваизы. 18-тӥ сентябре нырысетӥ рота но автоматчикъёс вырйылэз немецъёс киулысь талазы, нош берлогес батальон мукетсэ но вырйылэз басьтӥз на. Батальонлэн командирез Лебединский капитан разведчикъёсыз та нуналъёсы тужгес чакласькыны куриз. Нош югдур кышкыт луэм бере, Кавешников лейтенантэз комбат доры ӧтиз но автоматчикъёсын ӵош оже пыриськыны косӥз. Вырйылэ тубись немецъёсыз разведчикъёс автоматъёсын пумитазы. Окопъёссы вӧзын ик пуштыло минаос. Нунал пӧсь. Разведчикъёс пилоткаосынызы ымныр вылысьтызы нюлмзэс ӵушылыса нош но нош автоматъёссы борды кырмисько. Та нуналэ соослэн но радъёссы шеромыны кутскизы, сӧсырмемъёс но вал, быремъёс но. Ожмаськон уен-нуналэн ӧз чалмылы. Солдатъёслы окопъёссэс мургес гудыны но шутэтскон интыос дасяны ӧз кылды, старшиназы сиён-юонэн вуылыны ӧз быгаты. Патронъёссы но гранатаоссы ӧжытгес кылизы. Таяз уе лейтенант Кавешников комбатлэн косэмезъя, ньлетӥ отделениез ыстӥз котыртэме сюрем роталэн командиреныз герӟаськыны но соослы отысь потыны юрттыны. Пеймыт уе Ившин, Кузнецов, Корепанов но командирзы Чушков сержант бӧрсьы ик чакласькыса-эскериськыса азьлань вамыштӥзы. Немецъёслэн люкаськем интыысьтызы кӧняез ке солдатъёсмы но командиръёсмы котыртэмысь поттэмын вал. Секытэсь ӧжъёс вал 25-тӥ-28-тӥ сентябре. Тушмон выльысь быгатӥз вырйылэз басьтыны, ньылетӥ батальонысь ротаос но котыртэме сюризы. Разведчикъёслэн возводзы та берло куинь нуналъёсы автоматчикъёсын ӵош немецъёслэсь уно атакаоссэс пазьгоно луиз. Окопаз ик усиз но секыт сӧсырмемъёс пӧлын вал командирзы лейтенант Кавешников но. Батальонлэн командирез Лебединский капитан но секыт сӧсырмиз, кӧняез ке разведчикъёс сое поттыны быгатӥзы. Кык арнялэсь кемагес кыстӥськиз Малгобек дорын лек ожмаськон. Немецъёс татчы уно ӝуась танкъёссэс но солдатъёссэс кельтӥзы. Котькуд вырйыл понна мынӥз ожмаськон. Озьы ожмаськизы 4-тӥ стрелковой батальонэ пырем курсантъёс но. Та ожъёсын батальон ыштӥз сизьымдон процент солдатъёсэ но командирзэ (та лыдпус басьтэмын архивын утиськись документысь). Разведчикъёслэн взводазы оже пыриськон азьын вал 45 мурт, нош котыртэмысь потыны быгатӥз дас одӥгез гинэ. Соос ваньзы ик, Глазовысь Валентин Ившин сяна, ивортэк быремен лыдъясько. Ившин Захаров младший политрукен ӵош котыртэмысь потыны быгатӥз ке но, Горячие Ключи станица дорын ожын со бырыны шедиз. Республикаысьтымы "Буре ваён" книгае пыртэмын Балезино ёросысь Леонид Булдаков, Игра ёросысь Василий Корепанов, Пичи Пурга черкогуртысь Григорий Кузнецов, Вавож ёросысь Василий Борисов, нош Кез ёросысь Николай Белослудцев но Дэбес ёросысь Всеволод Галичанин гожтэмын, соос 1942-тӥ арын 28-тӥ сентябре ивортэк быризы шуыса. Тодӥсь-верась ӧз луы, соос, окопазы сӧсыр луыса кылизы, котыртэмысь потыкузы-а быризы, оло нош пленэ-а сюризы. Но соослэн нимъёссы архивын утиськись документъёсын сӧсырмемъёсыз пӧлын но, быремъёсыз пӧлын но ӧвӧл. Малгобекез асьме частьёсмы возьыны ӧз быгатэ. Немецъёс татын бадӟым кужымзэс люказы, город вылэ самолётъёсынызы нуналлы быдэ бомбаос куштылӥзы. "Викинг" нимо СС дивизизэс татчы воштэмзы бере но город понна ожмаськон ӧз дугды. Город олокӧня пол киысь-кие шедьылӥз. Городын бадӟым тылпу вал. Сьӧд ӵын вӧлдӥськиз сутскем степь кузя, вырйылъёс но гурезьёс вадьсытӥ. Сӥзьыллэн нырысетӥ нуналъёсыз нефть поттон вышкаос но гомазы. Городлэн ульчаосыз быдэсак бушамын вал. Немецъёслы татын нефть кыскыны ӧз кылды . Алханчурт нёжалысь Нижний Курп дорын но котырысьтыз вырйыл бамъёсын ожъёсын быризы тросэз Ленинградысь пехотая училищеын 1942-тӥ арын дышетскыны кутскем курсантъёс. Лейтенант луыны ӧз кылды соослы, соос улонзэс Кавказ понна сётӥзы но озьы пыраклы курсантъёс луыса ик кылизы. В.Голубев. Николай НИКИФОРОВ Ватка тулкымъёс серемес верос Асьме калык серемпыр пусъе: "Вить арлы огпол ас кузпалэд но ӟеч визь-кенеш ӵектыны-сётыны быгатэ". Ма шуод, котькуд веранлэн но зэмлык тысез вань. Нош асьмеос сое куддыр тӧлбер пӧлысь синйылтыны, утчаны ум тыршиське, йӧнлы верамез но пель сьӧртӥ лэзьыны тыршиськом. Сыӵе югдур луиз туэ бускеленым Судай Борисэн но. Аръёс кельыт ужпилэн кошовка дӧдьыяз пуксьыса лашкинто, лэся. Кемалась-а ортчизы Борислэн но школаын дышетскем аръёсыз? Нош туэ ни Ӟаны школаысь ӧтён-гожтэт вуиз. Школаез кызь вить ар талэсь азьвыл йылпумъямъёс, пе, огазе люкасько. Эх, лӧптӥз ук Судай Борис! Ас дышетӥсьёссэ, ӵош дышетскем эшъёссэ малпаса, мыняса ветлэ. Ушъяськонэз, данъяськонэз вань гинэ угось. Улон сюрес вылтӥ бӧрсяз огшоры тузон катанчи ӝутыса гинэ ӧз ветлы. Куинь ар флотын службаын вал: старшой матрос, корабельной кох. Валамонгес верано ке, сиён пӧрась вал. Ас удысаз усточи луэм, дыр. Юнме шорысь шат погонъёсаз - лычкаосын, мӧляяз - пӧртэм гадьпусъёсын берытскиз гуртамы. Зэм, службазэ флотын ортчеменыз валче, юмоке шедьыны но тупаз. Отпуске шутэтскыны, гуртоосыныз, семьяеныз адскыны вуылыкуз, ӧжытак кудӟемез бере ушъяськыны шедьтӥз. Вутэк, пе, улыны уг быгатӥськы: лулы ӝока. Нош кыллы шӧртчи эшъёсыз серемпыр колодча шоры возьмато: "Тани ук - вӧзад ик ву". Судай Борис кӧбераса ӧз сылы. Балянлэн улвае кечырскемез сямен, колодча жильыез кырмиз но тур-р! гинэ уллане ширтӥз. Жомбыль-жомбыль шопыльтэ ву ӝутон ведраен огӵош. Эшъёсыз кышкатскизы ик - тур-пар гинэ берлань вылӥе ӝутӥзы. Службаез бере но колодчаын пыласькыны ӵектӥсьёс тырмыт луылӥзы. Нош Борислэн Николай Беляевлэн романысьтыз амфибия - вуын улӥсь адями - кариськемез ӧз поты ни. Чылкак мукет корабле пуксиз - ю-нянь октон комбайнэ. Уг, ымныр гордэктымон, возьытэ усьымон уг ужа Борис. Колхозысь кивалтӥсьёс со сярысь ушъян кылъёс гинэ верало. Ужаз сямен ик семья улоназ но азинлык. Сюанзэ дыраз шудӥз, куинь нылпиосыз быдэ вуо ни. Со-а шумпотон ӧвӧл? Лушкемен шараяно ке, Клава кузпалызлэн сямыз чечылэсь гинэ чырсатэмын уд шуы - сылалэз, курытэз но тырмыт гинэ. Борисэз мугтэк шорысь вожаны, йыркуръяськыны но масьтёр, ява! Кышномуртлэн сюлэм пуртыяз ӵемысь ӵаш-ш! вазе. Удмуртъёс огшоры гинэ уг пусъё, дыр: "Кышномуртлэн вожпотонэз пуртыез тылтэк быректытоз". Тани школаысь вуэм гожтэт понна гинэ но урмымоназ лекомиз Клава. - Мар-ось та секыт улон-вылон дыре сюрес вылэ уксё пазяса ветлод? Нылпиосмы ческыт конфетлэсь шӧмзэ но вунэтӥзы ни, аслым но тани ӝужыт кӧтермаё туфли басьтыны малпасько вал. - Сюрес кыдёкын ӧвӧл ук, Клава. Эшъёсыным адско, верасько но берто. Гумырелы вунонтэм луоз ук. Эсьмаса, пересьмеме бере но шумпотыса тодам ваё. - Уз удалты сюресэд, Борис. Ӵапак дас куинетӥ числое, шайтанлэн яратоно лыдпусаз, сюрес вылэ потыны тупа, - мукет паласен кутскыса утча кышномурт. - Э-э, - киыныз шонтэ Борис, - уг оскиськы мон со шузи-мази веранъёслы. Сьӧд коӵышлэсь, буш ведра карнанэн кышноослэсь но уг кӧбераськы. - Чыртыед гыз-з! карыны кутскиз, луоз. Яке вашкала дусымъёстэ-а утчаны лӧпшад? - Вот, кузь йырсиё шайтан! Вань тодэмед - вожан но курыт вуэн пыкылон. Ачид но школаысь эшъёсыныд пумиськонэ ветлӥд ук. Юыны, воргоронъёсын мынчыръяськыны ветлӥд, иське? - пӧсектӥз Судай Борис но. - Тон-н, шакшы лул! - моганы ик кутскиз Клава. - Монэ, чылкыт сюлэмо муртэ, эн сьӧлыка. Ваньзэ ас мертэтэныд мертаны тыршиськод. Ку-о адӟемед вань куреглэсь атасэз эриктэмамзэ? А-а?! - Ӧвӧл кадь. - То-то! Нош атас дас вить-кызь кышноез луыса но бускель курегъёс сьӧры бызьылэ на. - Мон атас ӧвӧл - адями. - Я, чалмытскы, ваментул! Тонэ вормод шат? Одно ик ас малпандэ быдэстытэк уд кыльы. Только, мотри, - азьчиньызэ сэзъяз Клава, - бертэмед бере вань дӥськуттэ эскеро-чаклало. Кышномурт йырси адӟиськиз, духи зын шӧдӥськиз ке, урдлыостэ гурсуранэн лыдъяло. - Уг, уг. Мон кышноос котырын уг берга. - Тодӥсько мон тонэ, айы пуныез. Мурт кышноослэн валесазы кӧласа, пилеш кылид ни. Бератаз Клава сётскиз ик: школаын ӵош дышетскем эшъёсын пумиськонэ котькуд нунал уг ветло ук. Кошкыны дасяськем Борислэн тодаз лекак усиз: фотоаппаратсэ вунэтэм! Корказ берытскыса, пырытэк амалыз ӧз луы ни. - Вот-вот, сюресэд уз удалты. Берытскыса пырид, - мыньпотэ Клава. - Кыл йылад пӧськы потон люкет! - бурсӥз воргорон. Дыртыса синучкон азе лыктӥз но, ас вужерезлы синзэ кыньыртыса, "Ӟечбур!" вазиз (сюрес вылэ потыку, берытскыса пырыны ке тупа, синучконэ учкыса, ӟечбуръяськыны косо. Нош выльысь потыкуд ни синучконлы ик "ӟеч лу!", пе, шуоно). Борис Кильмезь автобусэн Ватка шур вамен выжон доры каньылэн вутскиз. Нош паром, ӧчкарем кадь, сопал ярдурын ӝегатске на. Берпуметӥзэ выже бере, ӝегатскем машинаосты, сюресчиосты вите-возьма. Автобусысь калык но чылкыт омырен шоканы кыре потӥз. Ваньмыз, витён сямен, асьсэлы уж шедьтӥзы: пичиос но кышноос нюлэс дурысь узы-боры бичало, воргоронъёс картаен шудо, егитъёс шурлэн эктӥсь тулкымъёсаз жомбыль! потто ни. Куазь пӧсь но ӝокыт луэмен, Судай Борис но егитъёс сьӧры калъяськиз. Дӥськутсэ ярдуре кельтӥз но зылак гинэ зымиз. Соку ик тодаз усизы зарезьын пыласькемъёсыз. Чорыг музэн дауртэ со: уя, зымылэ, ву вылын, пыдъёссэ выретыса, гань-гань возиськыны тырше. Паромлэсь тапал ярдуре выжемзэ адӟыса, егитъёс вуысь ӝогак потӥзы но дӥсяськизы. Нош Борис ӧз дырты. Ай машинаос бушатозь-пырытозь, калык интыяськытозь, кӧня дыр ортчоз?! Шуныт, мусояськись тулкымъёс лычсузьымон вешало, ӟыгыръяло воргорон мугорез. Олокыӵе но муспотон нылъёс тодэ усё таӵе дыре. Пыласьконзэ йылпумъяса выллем, Судай Борис берпуметӥзэ зымыны малпаз. Эх, тодысал ке ма луонозэ! Адӟонэз ныртӥз кыскиз, лэся. Яке вуныл-а мылкыдзэ гочатӥз? Зымиз гинэ но, кукъёсыз кузя гылак вольтчиз трусикез. Котмыса резинкаез лябӟем, шӧдске. Воргорон, мазэ-созэ валаса, ыштоссэ утчаны кутскиз. Олокӧня пол зымылӥз ке но, пайдаез ӧз шӧдӥськы. Ву ас ужзэ лэсьтыны вутскем ни: визылэз кузя нуыса кошкем. Судай Борис, котькуд пиосмуртлы инмарен кузьмам арберизэ вуысь возьматонтэм интые султӥз но, юрттэт курыса, вань кужмысьтыз черекъяны кутскиз. Нош катерлэн двигатель куараеныз кин ке кылоз шат? Дӥськутсэ сётӥсь ӧз луы. Пыласькись воргоронэз огназэ кельтыса, чырмытак мукет ярдур пала гылӟыны кутскиз паром. Бугырес тулкымъёс лыктыса шуккиськизы Борислэн мугорыз борды. Вот тыныд пумиськон! Коть серекъя, коть бӧрд. Туннэ понна берпуметӥ паромлэн бӧрсяз кема учкыса сылӥз на Судай Борис. Бератаз номыр карыны ни вал. Ватка вамен уяса потыны ӧз дӥсьты. Ярдурысь дӥськутсэ дӥсяса, бускель гуртысь магазинэ пыриз но курыт ву басьтӥз. Ачиз кадь ик эш шедьтыса, сябась карыны кутскизы. Ваньзэ огӵош пусйизы соос: дас куинетӥ числоез но, школаын луымтэ пумиськонзэс но, ыштэм трусиксэ но. Дораз пыремен валче, макмырам ымнырзэ адӟыса, эх, пурӟиз ук, эх, пурӟиз Клаваез. Нош ыштэм трусикез сярысь кылэмез бере, киысьтыз миськыны кутэм кастрюлязэ ик картэз шоры зӥртӥз. Оскоз шат кышномурт сюлэм мусоясь тулкымъёс сярысь мадёслы? Судай Борис нажгам но паньырам кастрюлязэ кема тупатъяз ай лапас улаз. Синпельлы, тодэ ваёнлы яралоз ук. Каргурезь йылысен Сӥзьыл географияя дышетӥсьёс Шаркан ёросэ ветлӥзы, тодматскизы ёрослэн азинскем сюресэныз. Тужгес но паймытӥз татысь инкуазь. Экономикаез но интыез Шаркан ёрос интыяськемын Удмуртилэн шунды ӝужан палаз. Шаркан черкогурт Ижевсклэсь 90 иськемын. Райцентр Воткинскен но Ижевскен герӟаськемын асфаль сюресэн. Матысез чугун сюрес станция 35 иськемын, Воткинскын. Ёросын 22227 адями улэ, соос пӧлысь 81 процентэз - удмуртъёс (нош Шаркан администрацилэн лыдпусъёсызъя - 98 процентэз), 14,4 процентэз - ӟучъёс. Ёрос тодмо "Мишкинское" мувӧй поттон интыен. Озьы ик татын вань известняк, горд сюй, луо, векчи кӧльы. Ёрослэсь промышленностьсэ возьмато "Шаркан-трикотаж" АО (палэнысь ваем сырьёлэсь керттэм дӥськутъёс поттэ), "Лазурь" АО (етӥн бордын ужа), кирпич шуккон завод но "Сельхозлес" АО. Куинь банк АО ужа. Ёросын азинскемын гурт хозяйство. Валтӥсь удысъёсыз - сӥль но йӧл сётӥсь пудо вордон, ю тысь, картофка но етӥн будэтон. Ёросын 4148 интыен 29 шор ёзо школа, 225 койкаен, 3 больница поликлиника, 31 клуб но культура юрт, 2 искусствоосъя школа. Ужа 3 музей. Ёрослэн улонэз Ёрос администрацилэн тӧроез А.А.Прохоров, юри милемлы дырзэ висъяса, тани ма вераз: - Ёрос - инкуазья устоосыз пӧлысь одӥгез. Татын 144 сюрс гектар музъем, со пӧлысь 60 процентэз гыроно-кизёно муос, кылемез - нюлэсъёс, возьёс, пудо возьман интыос. Бюджетлэн 82 процентэз мынэ ёросысь промышленносте, 8-эз гурт хозяйствое. Со процентъёс чотын возисько лэсьтӥськонъя организациос, РТП, газокомпрессорной станция, вузкарон предприятиос, фермер хозяйствоос. Юрттэт сётонъя предприятиос ("Сельстрой", "Сельхозхимия") герӟаськемын гурт хозяйствоосын. Фермер хозяйствоос 70 пала. Ваньмыз соос интыяськемын пичи гуртъёсын. Соослы техника сётӥське. Устояз хозяйствоын туэ семинар ортчиз, отчы ветлӥз странаысьтымы валтӥсь фермер Башмачников. Колхозъёс 26, соос пӧлысь 16-ез арез пайдаё, азинлыко йылпумъязы. Шуг-секытъёс шоры учкытэк, гурт хозяйство ӝутскыны кутскиз. Куд-ог колхозъёсын уждун толэзьлы быдэ сётъяло. Вань ёзъёсты огазеяса ёросын агропромышленной концерн кылдытыны чакламын. Утьыны тыршиськом калыкез дышетон, тазалыкез утён, культура удысъёсты. Милям ёросамы корано нюлэсъёс 22,5 сюрс кубометр пала луозы. Кузёосыз - Воткинскысь, Дэбесысь лесхозъёс. Нюлэсэз суп-сап быдто, соин вузкаронъёс радъялляло ке но. Асьме дорын лесхоз кылдытыны али ум быгатӥське. Пӧртэм интыосысь чиновникъёс люкето. Та ужпумъя вуылӥм ини Москвае но - Россия Федерациысь Нюлэс хозяйствоя министерствое. 2001-тӥ арлы лесхоз кылдытом. Удмуртиысь Швейцария Ёросысь валтӥсь эколог В. А. Пчельников но УдГУ-ысь географияя факультетысь декан А. Г. Илларионов милемыз нуизы вуоно национальной паркез кылдытон интые. Удмуртиын со одӥг гинэ ай. Шаркан ёрослэсь та сэрегзэ американецъёс "Удмуртиысь Швейцария" шуизы. Парк туж ик бадӟым инты уз басьты. Но инкуазезъя со паймымон. Ньыльпыдъяськыса сямен ми меӵ но ӝужыт Каргурезь йылэ тубим. Син азямы усьтӥськиз туж чебер суред! Ми ӝыныё котыртэмын эшшо но ӝужытгес музъемен, кыдёкысен со кельше дауръёс ортчемъя куашкам гурезьёслы. Вулканлэн туж бадӟым кратерезлэн дураз сылӥськод кадь, нош одӥг ласянь сое шуръёс куашкатӥллям. Гурезь пумен лазегаса кошке, тубат лёгетъёсын выллем, кудъёсаз гуртъёс интыяськемын. Шаркан кыкетӥ лёгет вылэ пуксемын. 60 метр ӝужда Каргузеь (зарезь вылысен лыдъяса, солэн йылыз 285 метр ӝуждаын) йылысен кыдёкын сылӥсь черкогурт мырдэм гинэ адӟиське лыз-пурысь бус пыр. Яркыт шундыё нуналэ, пе, татысен Воткинскысь тымет но адӟиське, нош со - 50 иськемын. Бен, вуоз сыӵе дыр, татчы ветлозы туристъёс, художникъёс, кылбурчиос. Кызьы бен кылдӥз та паймымон музъем выл? Со герӟаськемын ог 30 милион ар талэсь азьло Ураллэн выльысь "улӟеменыз" (нош кылдӥз со 270 миллион ар талэсь азьло). Соин ӵош каллен-каллен ӝутскыны ӧдъязы котыр улосъёс но, мукет сямен вераса, Предуралье, кытын асьмеос улӥскьом. Ӝутскемысь дугдӥз 3-5 миллион ар талэсь азьло. Та дыр ӵоже (выльысь "улӟыны" кутскем дырысен) ӝутскем Предуральеез куашкатӥзы зоръёс но тулыс шунась лымы вуос. Асьмелы тодмотэм вашкала шуръёс муромыны но ӧръёссэс паськытатыны кутскизы, бадӟым шуръёслэн но зарезьёслэн (кытчы соос усё) вылъёсынызы огвадесын луыны тыршыса. Музъем выл ӝутскемъя, ву ӧръёс мургес луизы, соин ик юнгес гылтӥськизы горд сюй, луо но мукет породаос. Озьы кылдӥз тубато инты. Каргурезь улысь "кратер" - со 30 миллион ар ӵоже вашкал шуръёслэн ужамзылэн "емышез". Улослэсь вылтуссэ, шуръёс сяна, озьы ик воштылӥзы температуралэн вошъяськемез, зоръёс, лымы. Кылсярысь, лымшор но шунды пуксён палан гурезьёслэн но гурезь чуръёслэн бамалъёссы меӵгес, уй палаз - нялмытгес. Соин гурезь чуръёслэн вылзы пинё- пинё. Ледникъёс вакытэ (40 сюрс ар талэсь азьло) "пиньёс" вискын тап-тап лымы кыллиз. Нош шунытгес луыны кутскиз но, йӧ шунаны ӧдъяз. Вукыремъёс кылдытыса, кылем гурезь чуръёслэсь висъяса, шуръёс бызьыны кутскизы. Сое возьматэ Каргурезь но - нимаз сылӥсь гурезь. Музъем ваньбурлэн кылдэмез Удмуртилэн улосвылаз ледник ӧй вал. Но куазь шунытгес луэмен, бадӟымесь шуръёс кылдӥзы, соос вуосынызы гурезез гылтылӥзы. Соин ик валэктыны луэ, дыр, Шаркан ёросын сомында луо но векчи изъёс люкаськемез. Нош нефть но изваскаё сюй кылдэмын ини 230 миллион ар талэсь азьло, зарезьёс лызеган, шуныт дыръя, вашкала будосъёс но пӧйшуръёс тросэн бырон вакытэ. Шӧйёс сюризы Урал дорысь паськыт но мур улыг интые (соку сыӵеез но вал), луоен но горд сюен согиськизы. Кислород сюрытэк, соослэсь нефть пӧрмиз. Куалемъёслэсь известнякъёс кыдӥзы. Нимъёс сярысь Шарканлы 320 ар тырмонлы усьтэмын музей. Отысь методист Г. П. Стрелкова гуртлэн историез сярысь мадиз. Нимызъя кык пӧртэм веранъёс вань. Нырысетӥез - татӥ ортчем хан Шарухан, удмуртъёс Шарукан шуиллям, нош вакчигес - Шаркан. Кыкетӥез - нимыз кылдэмын "шалкан" (сяртчы) бигер кыл бордысь. Удмуртъёс сое быдэс бусы мерттылӥллям. Бигеръёс кузёяськысагес улӥллям бере, 1678-тӥ арын перепись дыръя "починок Шаркан" гожтэмын. Ёросысь пичи гуртъёс но ваньмыз сямен ик интыяськемын яке нюлэсо, яке гольык бамало меӵ гурезьёслэн выжыязы. Мыддорин (Титово) гурт ёросын тодмо луоё интыеныз. Татын вордскиз но будӥз калык кырӟась Григорий Титов. Солэн фамилиез ик гуртлэн кыкетӥ нимыз луиз, дыр. Пужьё гурт республикаын тодмо азьмынӥсь фермер хозяйствоен. Татын кема улэм кышномуртлэн А. П. Бронниковалэн верамезъя: "Вашкала дыръя кенеше ӧтчаллязы, укное пужыё бодыен кокаса, со бордысь ик нимыз". Шаркан ёрос Удмуртиысь тужгес чылкыт сэрег. Шуръёсын нефть ӧвӧл - инбамын ӵын уг уя. Шарканын вань вылӥ ӟечлык оборудованиен чылкытатӥсь сооружение. Му вӧй татын - куректон ӧвӧл, со кондон сётэ тазалыкез юнматонъя культурной комплекс - национальной парк - лэсьтыны но. В. Баймузин, Аксакшур шор ёзо школаысь географияя дышетӥсь. Тазалыкез утён Врачъёс трос. Висёнъёс но ичи ӧвӧл Шаерысьтымы тазалыкез утёнъя министр Сергей Шадрин 25-тӥ январе ӵукна пумиськиз журналистъёсын, нош собере 10 часэ Правительстволэн юртаз ужаны кутскиз Уралысь тазалыкез утёнъя огазеяськонлэн кенешез. Асьме республика сяна, отчы пыро Башкортостан, Пермь, Оренбург, Челябинск но Курган областьёс. Люкаськемъёс кык нунал кенешизы. Та ужрадэз усьтыса, Удмурт Правительстволэн Тӧроез Николай Ганза шуиз: - Таӵе кенешонъёс ноку пайдатэм уг ортчо. Пумиськонъёс юртто ог-огедлэсь ӟечсэ адӟыны но уже кутыны. Республикамы сярысь ке верано, миым 8 процентлы йылӥз промышленной вузъёс поттон. Гурт хозяйствоос азьло аръёсы кадь ик огсыр ужало. Берло 6 ар ӵоже туэлы нырысьсэ пичи дефицитэн (7 процент) кун бюджет кутӥм. Рынокен экономикае шуак потыны ум дыртӥське ке но, выльдӥськонъёс мыно. Куд-ог вамышъёс лэсьтӥсько ни эмъюм, медициналы ужан тӥрлык поттон удысын. Но со дыре ик тӥляд но, милям но лэчытэсь ужпумъёс трос на, соос огкадесь, шуыны луоз. Пумиськонын калыклэсь тазалыксэ утён ласянь кун гарантиос сярысь вераськиз Сергей Шадрин. Зэм, берло дыре та удыслы но секыт йӧтэ. Врачъёслэн лыдзыя Удмуртия Россиын 7-тӥ инты басьтэ ке но, берло 10 ар ӵоже калыкмы 25 сюрс муртлы кулэсмиз. 1994-тӥ- 1995-тӥ аръёсы данаклы ичи вордскизы нылпиос. Али югдур кӧня ке тупатске ни. Шаерамы, Росссиен ӵошатыса, 10-15 процентлы тросгес туберкулёзэн висисьёс. Сыӵегес ик югдур венерической, психической но музон висёнъёсъя. Тазалыкез утёнлы бюджетысь коньдон тырмыт уг висъяськы. Озьы ке но, республикаямы выль больницаос, поликлиникаос усьтӥсько. Берло дыре вуттэмын кык участковой больница, ӝог медицинской юрттэт сётонъя станция, пыктос висёнъёсты эмъянъя центрлэн нырысетӥ люкетэз. Шаерамы туберкулёзэн, СПИД-эн, диабетэн но музон висёнъёсын нюръяськонъя нимаз программаос кутэмын. Но жаляса верано луэ, соосты улонэ пыӵатыны чакламезлэсь 30-40 процент гинэ уксё висъяське. 6-7 процентэз медицинской юрттэт дунын сётӥське. Собере кенешын мукет ивортонъёс лэсьтэмын вал. Медициналы выль ужан тӥрлык возьматонъя нимысьтыз адӟытон ортчиз. Люкаськемъёслы со кельшиз. Куд-ог лыктэмъёс ӵектэм вузъёсты басьтыны но мылкыд каризы. Г.РОМАНОВ. Чонари вотэс медаз сьӧлта Куӟебай Герд удмурт культуралэн данъяськонэз, сяськаез, емышез луэ шуыса, валаны кутскимы ни кадь. Та быдӟым адямилэн ужам интыяз, Советской но Вадим Сивков нимо урамъёслэн сюрес вожазы сылӥсь корка борды, 14-тӥ толсуре шуккемын данъян пул. Люкаськемъёс уно ӟеч кылъёс веразы удмурт музъем вылын вордӥськем но будэм паймымон адями сярысь. Кызьы бен уд паймы, уд данъяськы сомында ӟеч ужъёс лэсьтэм адямиен! Ф. К. Ермаковлэн верамезъя, тамында ужан понна, огшоры адямилы улыны кулэ кык сю ар. Лыдпусъёсын гинэ вераса но валамон: Куӟебай Гердлэсь ужъёссэ улонэ пыӵатысалыд ке, асьмелэн культурамы, данмы но асваланмы унолы муромысалзы но паськыт вӧлмысалзы. Гажано эшъёс, асьтэос но чаклалэ ай: куамын укмыс аресозь улыса (со пӧлысь вить арзэ пытсэтын пукыса), кытчы но вуымтэ, мар но лэсьтымтэ та адями. Писательёслэсь огазеяськонзэс кылдытэм, кык нылпи юрт, национальной музей, Выль Мултанын педтехникум усьтэм, ньыль сю куамын сизьым кылбур, дас ньыль пьеса, роман, повестьёс, сю кызь сизьым научной уж, кык диссертация гожтэм, крезьгуръёс, гимнъёс, нылпиослы "Муш" журнал кылдытэм. Нош кӧня фольклорез (калык визез) люкам со! Мадиськонъёс, эктонъёс, сэбедъёс, йылолъёс... Кырӟанъёсыз гинэ куинь сюрс пала. Юан ачиз лыктэ: малы соос али но, быдэсак люкаса, калык пӧлы вуттэмын ӧвӧл? Зэм, унозэ пӧрмостэмъёс тус-тас каризы. Нош кылемзэ утиз но куать томен поттыны дасяз Ф. К. Ермаков. Издательствоын но печатламез возьмаса кыллиз ни со. Кивалтӥсьёс пӧлын удмуртъёс вань ук. Малы соос шып уло, кинлэсь ке кышкало шат? ЮНЕСКО но юрттэт ӵектыса вазиськиз кадь, Куӟебай Гердлэсь юбилейзэ пусйыны шуыса. Правительствомы уно коньдон но висъяз кадь. Нош малы та книгаос али но поттэмын ӧвӧл на? Адямиез данъяса, чебер кылъёс вераны быгатӥськом. Нош Куӟебай Гердлэсь лэсьтэм ужзэ санэ басьтонэн, утёнэн, калык доры вуттонэн Фома Кузьмич гинэ вырыны кулэ шат? Вераны кулэ: ас быгатэмезъя, валамезъя, Удмурт театрмы но Куӟебай Гердэз данъян борды басьтӥськиз ни. Тани шумпотыса мынӥ вал мон спектаклез учкыны. "Кикы силе но силе" нимаське со. Мынам малпамея, театр удмурт культураез пушласянь учкыны кулэ, удмурт культуралэсь пуштроссэ шараяны кулэ, тужгес но - улонзэ культуралы сӥзем муртэ возьматыкуз. Угось туж вылӥ культура гинэ Куӟебай Герд кадь удалтэм адямиез будэтыны быгатоз. Ӝожомыса верано луэ: режиссёр таӵе инъетэз шӧдымтэ. Удмуртъёсыз со возьматэм, чонари вотэсэн сьӧлтам, номыре но валасьтэм адямиос карыса, нош ассэ Гердэз удмурт Христослы пӧрмытэм. Валамон: режиссёр быгатэ символъёсын шудыны. Но татын удмурт шӧмыз чылкак ышемын. Татын уг тырмы удмуртлыкез валась но гажась режиссёр. Плакатлы укшась символъёс сяна, та спектакльын луыны кулэ на азьлань ӧтись, вылӥе ӝутӥсь поэзия. Артистъёсмы асьмелэн быгатӥсесь. Тани Куӟебай Гердлэсь рользэ шудӥсь Геннадий Бекманов юн мылкыдо, небыт сюлэмо, етӥз, бадӟымесь малпанъёсын улӥсь, быдэс улонзэ удмурт калыклы сётӥсь образ кылдытэм. Ролезлэн материалысьтыз вань пайдаё интызэ кыре поттэм, уката но пушйытыса возьматэм. Нош Гердлэн анаезлэн образэз мукет луыны кулэ. Адӟем потэ вылэм лякыт сямо, кырӟась-верась, кибашлы, тӧзӥсь (чидась), тунаськыны-пелляськыны но быгатӥсь удмурт кышномуртэ. Режиссёрлы кулэ вал йӧно кышномуртлэсь зэмос рользэ удмуртлыкез утёнын но улонэ пыӵатонын возьматыны. Шат пыӵасалзы Куӟебай Гердлы удмурт сям, кырӟанъёсыз яратон мылкыд, анаез кырӟась ке ӧй луысал - кык сюрслэсь уно кырӟанэз кутсконысенызы пумозяз тодэ вылэм ук со. Нош режиссёр та сярысь малпаськымтэ но шӧдске. Возьматоно вал Софья Никифоровналэсь дуннеез кутӥсь луэмзэ, куноез пумитаны но келяны быгатэмзэ, йылолъёсыз, сэбедъёсыз ӟеч тодэмзэ, кызьы гожтэ та сярысь солэн пиез. Зэмос удмурт быгатэ ӟеч мылкыдзэ кузьманы. Тужгес но - праздник дыръя, куно пыртакуз, солэн лулыз-сюлмыз быдэсак усьтӥське, мылкыдыз кырӟаса кисьтӥське. Нош удмурт понна кырӟан кыре потэм ӟан (лул) луэ ук! Удмуртэд пушкысьтыз узыр дуннезэ кырӟаса возьматэ. Котькуд учырлы тупатэмын нимысьтыз кырӟан. Культураез валась мурт, соосыз ваньзэ сюлэмыз пыртӥ поттыса, отын ик импровизация но лэсьтэ. Софья Никифоровналэн улон радыз быдэсак удмурт йылолъёсын герӟаськемын вылэм. Шонерзэ верано ке, котькудӥзлэн удмурт кышномуртлэн улонэз зэмос культураез утьыса ортче. Соин ик со гажано адями луэ. Йылолъёс пыр улонлэн зэмлыкез, чеберлыкез усьтӥське. Угось котькуд арбери, котькуд уж ог-огенызы йылолъёс пыр герӟаськемын. Адями но йылолъёс - одӥг чеберлыко дунне. Этнографлэн-художниклэн С. Н. Виноградовлэн чакламезъя, коркась гурен гинэ дас сизьым пала йылол герӟаськемын, ӝӧкен - кызьлэсь но уногес. Уката но тросгес потэмын соос шунды бордысь. Уен нунал-а, толэн гужем-а воштӥсько, толлэн шорыз-а, гужемлэн шорыз-а, уйшор-а, нуназе-а вуэ - котьмае чакласа улэмын культураез валась адями. Удмурт йылолъёс, удмурт кырӟанъёс сокем удалтэм адями карыса будэтӥзы Куӟебай Гердэз. Нош пыӵазы соос нырысь ик анаез пыр. Соин ик, культура пыр учкыса сяна, нокызьы но мукет сямен валаны уз луы Куӟебай Гердэз. Удмуртэд сомында чебересь кырӟанъёс кылдытэм ке, шумпотыкуз но, куректыкуз но, ужакуз но, шутэтскыкуз но кырӟатэк улыны уг быгаты ке, тае возьматоно вал ук спектакльын. Соку крезьгурчи но удмурт мед луысал. А. С. Вершинин режиссёр Удмурт театрын ужаны кутскем дырысен сцена вылысь удмурт кырӟанъёс но удмуртлыко образъёс тӧлӟизы. Солэн пуктэм спектакльёсаз геройёс керӟегъясько, пумтэм керето, черекъяло. Удмуртъёсын пумиськылымтэ адями таӵе спектаклез учкыса малпалоз, дыр: "Кыӵе шакшыесь та удмуртъёсыд". Тани режиссёр мыскылляса возьматэм туно-пеллёез. Нош Герд кырӟанъёслы сӥзем диссертацияз аслэсьтыз анайзэ данъяськыса быдэс ёрослы тодмо туно-пеллё вал шуэ. Озьыен, туно-пеллёез сантэман Гердлэсь анайзэ но ултӥянлы пӧрме ук! Берпуметӥез ӝожомытӥсь малпанэ. Удмурт кылэз улӟытонлы быдэс улонзэ сӥзиз Куӟебай Герд. Со понна ик быдтӥзы сое. Нош ассэ данъян вылысь дасям ужрад ӟуч кылын ортчиз: доклад лыдӟисьёсыз ӧз лэзе, пе, удмурт кылын вераськыны. Ачиз Герд, тае тодысал ке, мар меда шуысал?.. Зэм, люкаськемъёс пӧлын вал удмурт кылэз тодӥсьтэмъёс. Но соос понна театрын удмурт кылысь ӟуч кылэ берыктонэз радъяны луэ вал ук! Удмурт кылэз тодӥсьтэмъёс пелепононъёсын (наушникъёсын) кылзыны быгатысалзы. Оло, кивалтӥсьёсмы тае уг тодо? Тодо. Соку мар бордын ужпум?.. Вераськисьёс пусйизы, Куӟебай Гердэз рос-прос ум тодӥське на, ум валаське на, оло, кулэезъя ум но дунъяське на шуыса. Озьыен, зэмос удмурт адямимы азьын сьӧлыканмес пумен кулэстоно. РЕВО РАЗИН, социолог Удмурт кун университетысь дышетӥсь. Пичи Пурга ёросысь Курчум-Норья гуртысь Виктор Егоров одӥг ужлэсь но уг палэнскы. Ваньзэ тыро-пыдо лэсьтэ. Ачиз со шофёр луыса ужа "Юж-Пурга" эштосын. Толалтэ но, гужем кысык вакытэ но "валэзлы" шокчыны маза уг сёты. Эштосысь но сётэм ужзэс быдэстэ, гурт калыкезлы но юрттӥськыны вуэ. Туспуктэмез В.Камашевлэн. Кузьым вите кузёзэ Валлян тодмо луиз, Алнаш ёросысь лыдӟисьёслы (отын газетмес котькытынлэсь трос басьто) сӥзем кузьыммы Азамат но Чем-Куюк почта ёзъёсын гожтӥськем эшъёс пӧлысь кудӥзлы ке шедёз шуыса. 8-тӥ феврале Азаматысь культура юртын ортчоз лыдӟисьёсын пумиськон. Соку ини шараяськоз мотопомпалэн кузёез. Та ужрад сярысь пыр-почгес ивортом вуоно номерын. И.КРИЧЕВ. Елена Виноградова кылбураны кутскиз школаын дышетскыкуз ик. Нырысетӥ чуръёссэ сӥзиз вордскем шаерезлы, ас гуртэз котырысь чебер инкуазьлы, ӟеч адямиослы. "Удмурт дунне" газетын туннэ печатласькись чуръёсыз меӵак герӟаськемын туала улон-вылонэн. Соин ӵош ик гожъясьлэн сюлэмыз шумпотэ аспӧртэлыко удмурт улослы. Выль ивор вуттӥсь Тани мыньпотыса, дыртыса пыре издательствое милям автормы Леонид Петрович Емельянов. Нокызьы но солы 70 арес уд шуы. Чырткем сямыныз, капчи мылкыдыныз котькытчы вуэ. Гожъяськыны яратэ. Радиоын но газетъёсын ужаз бере, сотэк уг луы. Гожъяз веросъёс но повестьёс. Леонид Емельянов 1958-тӥ арын кутэмын Писательёслэн союзазы. "Мурт нимын" (1980) повестез - нырысетӥосыз пӧлысь тужгес но умоез. Со лэчыт сюжето детектив выллем. Лыдӟисьёслы тодмо "Сьӧд пилем но эркын тӧлъёс" (1990) документально-художественной повестез но. Автор татын яркыт возьматэм Удмурт обкомлэсь нырысетӥ удмурт секретарьзэ С. П. Барышниковез. Леонид Емельянов трос гожъяз тодмо Ф. Я. Фалалеев маршал сярысь но, книгаос поттӥз. "В строю крылатых" - кык изданиен печатласькиз, "Маршал сярысь веросъёсыз" потӥзы удмурт но ӟуч кылын. 30-тӥ аръёсы Удмуртиысь Писательёслэн союззылэсь правленизэ быдтэмзэс автор возьматэ "Сяськаяськись вайёсты тӥязы" очерказ. Та книгаосты гожтон понна, Емельянов трос лыдӟиськиз, пӧртэм архивъёсын бугыръяськиз. Нош кылем арын лыдӟисьёс кие вуиз "Кудпала берга дунне питран" повестез (нырысь со поттӥз пӧртэм аръёсы "Кенеш" журналын, печатланы дасяз тодмо писатель Генрих Перевощиков). Леонид Емельяновлэн та тужгес но бадӟым ужез луэ, трос аръёс ӵоже гожъяз сое. Автор повестяз возьматэ 60-тӥ-80-тӥ аръёсы огинтыын сылон, застой шуон вакытэз. Обществоямы кивалтӥсь партия аслаз ужаз кутӥз косъяськон, ултӥян, ачимъяськон (тоталитаризм) амалъёсты. Соос партилэн вань ёзъёсаз - обкомъёсы, райкомъёсы но пыӵазы. Автор книгазэ сӥзем агаезлы М. П. Емельяновлы. Беркылзэ гожтӥз тодмо литературовед А. Н. Уваров. Туж дуно луоз, малпасько, Леонид Петровичлэн Удмуртия сярысь энциклопедие гожъямез но. "Печать" люкетсэ быдэссэ сямен со дасяз. Вань улонзэ калыклы выль ивор вуттыны сюлмаськыса улэ бере, вуоно книгае но трос тунсыкозэ пыртӥз, вань газет-журналъёсын, радиоын но телевидениын ужась журналистъёс сярысь гожъяз. В. УРАЗАЕВА, "Удмуртия" издательствоысь редактор. Юан-веран Кытчы мыноно дышетскыны? Гожтэлэ вал кытчы мыноно технолог луон понна. Мон али луисько ИИ квалификациен повар. Но туж потэ дышетсконме азьланьтыны. Пичи Пурга ёросын улӥсь. Технологъёсты дасяло Ижевскысь кооперативной техникумын. Адресэз: Ижевск, Молодёжной урам, 109. Телефонъёсыз: 37-02-88, 37-92-88, 37-04-00, 37-02-77. Экзамен сётоно ӟуч кылъя (диктант). Мынам поварлы, пекарьлы дышетскеме потэ. Вань-а асьме республикаын сыӵе училищеос? Кыӵе экзаменъёс сётоно но кӧня ар дышетсконо? Г. Николаева. Алнаш ёрос Кузебаево гурт. Та ужъёслы тросаз училищеосын дышето. Дышетскыны луоз: 25 номеро училищеын. Адресэз: Ижевск, Ворошилов урам, 22. Телефонэз: 24-01-30. 11 класс бере дышетсконо 1 ар, 9 класс бере - 3 ар. Кулинарной исскуствоя лицей. Адресэз: Ижевск, Ленин урам, 46. Телефонэз: 78-27-38. 11 класс бере - 10 толэзь 9 класс бере - 2 ар. 31 номеро училище. Адресэз: Ижевск, Сабуров урам, 23. Телефонэз: 20-44-82. Дышетсконо 1 ар. Со сяна, пӧраськисьлы дышетскыны луэ на Можга городын (ПУ-12) но Воткинскын (ПУ- 10, ПУ-18). Дасяз Т. БАННИКОВА. Я визьзы уг окмы, я сямзы керӟег 1999-тӥ арын республикаысь судъёсын 90 пристав ужаз. Соос азе бадӟымесь куронъёс пуктэмен, Удмурт Республикаысь МВД-ен ӵош огкыл гожтэмын приставъёслэсь тазалыксэс нимысьтыз комиссиен эскерон сярысь. Комиссие ӵектэмын вал 234 адями. Со пӧлысь 56 мурт гинэ уже кутэмын. Отӥосыз тазалыксыя, визьзыя но сямъёссыя вылӥ куронъёслы тупамтэенызы уже кутэмын ӧвӧл. Кылсярысь, 21 муртлы улӥ дунъет сётэмын урод мылкыдо луэмзы понна. Уже кутэм приставъёс нимысьтыз дасясько на МВД-лэн дышетскон центраз Россиысь Юстицияя министерствоен тупатэм программая. Кылем арын отын 40 адями дышетскиз. Сыӵе дышетсконэз 1999-тӥ арын озьы ик ортчиз городъёсысь но районъёсысь 19 пристав. 2000-тӥ арын приставъёсты дасян азьланьтэмын луоз. Удмурт Республикаысь Юстицияя министерстволэн пресс-службаез. Кун Кенеш 26 мартэ - нош ик юалляськон Кылем понедельнике люкаськылӥз Удмурт Республикаысь Кун Кенешлэн азьвыл чакламтэ тямысэтӥ сессиез. Вань ужзэс палэнтыса, депутатъёс ӵош пуксьыса сэрттӥзы-пертчизы республикамылэн Конституцияз куд-ог воштонъёс пыртонъя ужпумез. Со герӟаськемын Удмуртиын кун властьлэсь структуразэ выльдонэн, мукет сямен вераса, Президент быръёнэн. 19-тӥ декабре калык пӧлын ортчытэм юалляськон возьматӥз: шаерамы улӥсьёс пӧлысь тросэз адямиос мылкыдзэс веразы президентэн улыны, оско, оло, соку, пе, калык радэ потыны сюрес усьтӥськоз. Бускель республикаос - Татарстан, Башкортостан, Марий Эл кемалась та амалэ выжизы, асьмеды котьма ласянь шӧдскымон азьпалтӥзы. Кин тодэ, Удмуртилы но ӵапак уг тырмы меда огинэ люкась кужмо власть? Со понна воштоно Конституцимылэсь 10-тӥ ёзэтысьтыз 1-тӥ люкетсэ но 116-тӥ ёзэтаз тупатонъёс пыртоно. Та пумысен депутатъёс пӧлын но тупамтэос кылдӥзы. Кылсярысь, Сергей Беркутов но Валерий Фридрих пумит луэмзэс веразы 116-тӥ ёзэтэз исан пумысен, соос куризы Конституцилэсь та интызэ азьвыл сямен ик кельтыны. Тужгес но юн споръяськон ӝутскиз президент быръён но Кун Кенешлэсь полномочиоссэ люкон ласянь. Малы ке но тросэз политикъёсмы туннэ ик шара верасько ни, Удмуртилэн нырысетӥ президентэз Александр Волков луоз шуыса. Таин валче но куд-ог депутатъёс куризы республикамес парламент амалэн кивалтонэ кельтыны. Таӵе мылкыдзэ, кылсярысь, вераз огез мӧйы депутатмы Виталий Соловьёв. - Мон уг валаськы, маин уг яра парламентэн республика? - шуиз со. - Кыӵе власть кулэ на Кун Кенешлы, экономикаын радлык тупатон понна? Туннэ тодмо ӧвӧл ай, кинэ быръём Россилы президентэ? Оло, президентъёсын шудон но интыосын быроз. Соин ик мон дэмласько 2005-тӥ арозь Удмуртиысь кивалтон ёзэз али кадь ик кельтыны. Коньдон но шыръяськоз, калыкез но юнме шорысь ум бугыръялэ. Ӝутэм ужпумъя асьсэлэсь малпанзэс но фракциослэсь мылкыдзэс озьы ик веразы депутатъёс Олег Кузьменко, Виктор Хорошавцев, Валентин Тубылов, Евгений Одиянков, Правительстволэн Тӧроез Николай Ганза но Кун Кенешлэн кивалтӥсез Александр Волков. А. А. Волков чутрак пумит луиз В. А. Соловьёвлэн дэмланэзлы: - Историез учконо ке, одӥг страна но, парламент амалэн ужаса шуг-секытысь ӧз поты на. Асьмелы быдэстоно калыклэсь верам кылзэ: кызьы со шуиз, озьы ик лэсьтоно. Нош Удмуртиын улӥсьёс тросэз мылкыд каризы республикалы президент бырйыны. Татарстан, Башкортостан сярысь мултэс трос вераськиськом, соосты ушъяськом ке, учке Марий Эл, Чувашия шоры. Чувашия улон коркаос пуктонъя быдэс Россиез азьпалтӥз, шуыны луоз ни. Асьмелы но кемалась дыр вуэмын умой-умой басьтӥськыны но улон радлыкмес ас киосынымы, ас кужыменымы тупатыны. Валентин Кузьмич Тубылов, "Удмурт кенеш" огазеяськонлэн тӧроез шуиз: - Удмуртъёслэн съездазы вераськон мынӥз Правительстволэн Тӧроез но Президент одӥг адями мед луоз. Малы асьмелы кулэ на куинетӥез кивалтон ёз? Та дэмлан тросэзлы залын пукисьёслы ӧз кельшы. Соос малпамъя, котькудӥз удыс ас командаеныз ужаны кулэ. Огкылэ вуон вылысь, вис ялэм бере, котькудӥз фракция нимаз люкиськыса кенешиз на. Ӝыт заседаниын сессия кутӥз решение "Удмурт Республикаын референдум ортчытон сярысь" Удмурт Республикалэн Законаз воштонъёс но ватсанъёс пыртон ласянь" Законэз юнматонъя. Озьы ик данакез депутатъёс куаразэс сётӥзы Удмурт Республикалэн Конституциезлэн 116-тӥ ёзэтаз воштонъёс пыртон ласянь законэз кутон понна но калык пӧлын референдум ортчытонъя. Юалляськон мыноз Конституцилэн И люкетысьтыз 10-тӥ ёзэтаз воштонъёс пыртон пумысен. Референдум ортчоз 26-тӥ мартэ, Россилы президент быръёнэн огнуналэ. Таяз ужрадэ республикалэн бюджетысьтыз висъямын луоз 713 сюрс 100 манет. Кун Кенешлэн вуоно сессиез табере ортчоз 8-тӥ феврале. Л. Медведева. Туспуктэмъёсыз В. Беломорскихлэн. Нюръяськозы 2-тӥ турын Россия Федерациысь наука но техника удысын Кун премиосъя Россия Федерациысь Президент бордын ужась комиссия ивортӥз туэ конкурслэсь кыкетӥ турзэ азьланьтон сярысь. Отын эскерозы 47 ужез. Со пӧлы пыртэмын Ижевскысь техникая кун университетысь Ю.А.Булаев, Г.В.Стрелков, Е.А.Белоусов, О.В.Могильников, Н.В.Робозеров, Е.И.Кременецкий, В.И.Рычков но Г.П.Тушнолобов. Та коллективез ӵектӥз нимысьтыз машиностроениея но металлургияя "Мотовилинские заводы" акционер огазеяськон. Конструкторъёслэн ужзы сӥземын асьме дорын потӥсь ачиз ветлӥсь стрелаен кранъёсты выльдонлы. Б.НИКИТИН. Мон кема уло на Мар шуод на: война - со война. Со уг бырйы - ӟуч-а тон, бигер-а, пор-а яке чечен- а? Нуналлы быдэ сямен пуля турна асьмелэнъёссэ но, "тушмонъёсты" но. Туэ 13-тӥ январе Сарапул ёросысь Сигаево гуртын улӥсьёс берпуметӥ сюрес вылэ келязы Алексей Корниловез. Солы вал кызь ньыль арес. Россилэн армиысьтыз младшой сержант ожмаськиз 506-тӥ полклэн нимысьтыз БМП-2-лэн командирез луыса. 7-тӥысен 8-тӥ январе выжон уе тушмон пуля солэн йыраз йӧтӥз. Алексей будӥз гуртысь дышетӥсьёслэн семьяязы. Умой пияш вал, эшъёсыз но туж яратылӥзы. "Анай, тон дышетӥсь, нош мон солдат. Уг чидаськы, уг быгатӥськы учкыны Чечняын мынӥсь война шоры. Ведь кӧня егит пиос быро ук отын", - озьы шуиз вал Алексей, кылем арын октябре контрактъя Чечняе кошкыкуз. Со талэсь азьло Чечняын вал ини. Отысь солдат сӧсырмыса, йырсазьзэ ыштыса бертӥз. Ӵыжы-выжыосыз юрттӥзы сӧсырмем бервылъёссэ бурмытыны. Сюлэмзэ гинэ номыр ӧз йӧнаты. Бырем эшъёссэ буре вайыса, гуртаз писпуос мерттыса кельтӥз... "Эшъёсы монэ гажало. Зэм, со понна аслыд но зэмос адями луоно. Тодӥсько, мон аслам интыям, - гожтӥз со одӥг гинэ ыстэм гожтэтаз, - мон понна эн сюлэмшугъяське, мон татын вуын чорыг выллем, татысь ӧй но кошкылы кадь. Мар кулэ, ваньмыз вань, маиз ӧвӧл - луоз на. Мон кема но шудо улыны малпасько..." Бен, Алексей, ӵыжы-выжыосыдлэн, эшъёсыдлэн яратӥсь сюлэмъёсазы тон кема улод на. Музъемед мамык мед луоз. И. Булдакова. (басьтэмын "Красное Прикамье" газетысь). Алексей Шкляев Ӵуж ӟазегпи Верос Гужем шорын кык арнялы гуртаны бертӥ ӵыжы-выжыосы дӥне. Ӵукна азбар шорын пудозы юр-яр каре. Нуназе чалмытгес. Скалъёс но ыжъёс гурезь бамалэ поттэмын. Парсьёс гид азбаре ворсамын. Ӟазегъёс шур дуре уллямын. Азбарысь тузон пӧлын курегъёс гинэ ӵабъясько. Пӧлазы мӧзмыт тусын сылэ ӟазегпи. Таиз малы тыметэ васькымтэ? Акае валэктэ: - Ӟазегпимес скал лёгиз. Чутэменыз нокытчы кошкыны уг быгаты. Ӝытазе пудоос берытскизы. Куӵо скалэз адӟыса, чут ӟазегпи азбарлэн мукет палаз ватскиз. Татысь тусь котырын ӟазег уллё гусъяське корам пушнерен. Сӧсыр эшсэс адӟыса, тютюпиос лабыр потто. Нунал ӵоже мӧзмиллям, вылды. Мар та таӵе? Тӧдьы мумы ӟазег ӟырдатэм корт музэн шиетэ, йырзэ кый кадь позыръя, чут ӟазегпилы вожзэ поттэ. Вӧзаз пурысь айы ӟазег бурдъёссэ лопыръя. Эсьмаса, пичи ӟазегпиос но мискинь эшсэс чепылляны выро. Ӧлексы ӟазегпи кырыж-конгыляк вамыштӥз пу артана пала. Пуклёкъёс улэ ватскиз но чалмытскиз. Акае шуэ: - Озь ведь шайтанъёс асьсэ юлтошсэс ик мырк каро. Скал улэ шедемез бере шур дуре ӧз васька но мурт луиз. - Нош мумиз солы уг дурбасьты шат? - Тӧдь ӟазег-а? Адӟид ук: ваньмызлэсь етӥз йӧнтэмъяське. Ӵуказеяз, лек тылобурдоос шуре васькем бере, чут ӟазегпи выльысь азбар шорын адскиз. Мынам сое жаляме потӥз. Нянен но тысен гочатыса, ас бордам дышетӥ. Эсьмаса, ву но юыны кружкаысь ӧдъяз. Табере солы индылоно, кышкыт сямзэ мед вунэтоз шуыса. Малы ӟазегпи курда? Чут бере, дунеез улӥысен адӟе, вылды. Скал но, мумы ӟазег но озьы кыӵе ке кӧшкемыт мокоос кадь пото. Ӟазегпиез ӟус вылэ ӝутӥ но сюдыны кутски. Табере со азбар шоры вылласянь учке. Тӥни курегъёс но, куркаос но кыдёке улӥе кылемын. Мар соослэсь кышканэз? Ӟазег уллё ӝытазе вуэм бере но чут тютюпиез ӟус вылын вози на. Собере музэ васькытӥ. Оске-а кужымезлы? Со чулькак ватскиз пу люк улэ. Ярам, отӥяз дышоз ай курдан сямзэ вормыны. Мукет нуналэ ӟазегпи ӧз лыкты дорам. Акае куректэ: - Пие уйшор котырын шудэмысь пырыку, чутмы сое шӧдэм но шумпотыса пумитаз потэм. Тон кожам, вылды. Пие тютюпимес лёгыны шедьтэм. Эшшо золгес чутэ табере. Уг ке удалты, уг удалты ни. Улэп кылёз меда? Ӟазегпиез артана улысь мырдэм поттӥ. Ӟустариен биньыса, кунулам пачкатӥ но нюке васькытӥ. Шуре лэзи. Бадӟым вуэз ноку адӟылымтэ маке вуиз кадь выжыкыл дуннее. Весяк мыкыртэм йырзэ урдӥз, бурдъёссэ вӧлъяз, тылыоссэ шонертӥз. Уямен уг тырмы, омыре ӝутскыны выре. Нош бурдъёсыз интыын мырк лыос гинэ ай. Сӥзьылозь но, гурт бурдоос кыр ӟазегъёслэн вожъяськон дорозь, быдэс даур на. Пичи тулкымъёс пӧлын кема жомбылляськиз. Сумед пӧлысь кыӵе ке ӟаныосты кутылӥз. Нюр вылысь бадьпуос пӧлысь уз поты ни кожай. Гуртэ монтэк тубыны кынарыз уз окмы. Нош со, ӟустариме возьматӥ гинэ но, ачиз тубиз киям. Нуналлы быдэ васькамы пыласькыны. Зэм, чут ӟазегпи кышкан сямзэ таки ӧз вормы. Азбарын озьы ик ватскыса улӥз. Городэ кошкыса, аслам ужъёсы пӧлы выи. Озьы ке но, дырын-дырын йырам шуккылӥз: улэ на-а меда чут ӟазегпие? Ноябре, кынтэм бере, гуртысь тодмоосы пыризы. Секыт пуйы мычизы. - Ме, акаед салам келяз. Учкисько: кынтэм ӟазег. Вӧзаз - пичияк гожтэт: "Нуные, утялтэм ӟазегпиед зэмос ӟазегозь будӥз. Аслыд ик яралоз тани". Со толалтэ мон ӟазег сӥль сиыны ӧй быгаты. Син азям весь адскизы чут тютюпилэн мыным оскись синъёсыз. Соос весь юало кадь: малы монэ вандӥзы? Кайгырисько. Ӟазегпиме пурт улэ пачкатыкузы, солэн берпуметӥ малпанэзэ таӵе вал, дыр: очкиен воргорон азбаре кемдысал ке, вӧсь карыны ӧй сётысал. Ненегесь ик ми, куд-ог туала пиосмуртъёс. Соин ик городэ ум пегӟиське меда? Дӥсьтыса но дӥсьтытэк Туэ январе 16 ар тырме Национальной библиотекаысь "Удмурт шаер" клублы. Кӧня тунсыко адямиосын пумиськонъёс вал ни татын. Нырысь ик клублэсь ужзэ радъяз Мария Михайловна Самсонова, собере кивалтӥз Надежда Николаевна Бочкарева. Берло аръёсы егит, сэзь мылкыдыныз та уж борды басьтӥськиз Надежда Пчеловодова. "Литература удысысь кунокуа" шуыны луоз соиныз яке таиныз гожъясен пумиськонэз. Кылем арлэн пумаз со Удмурт радиоын кема аръёс мынӥсь "Арня ӵукнаен" герӟаськемын вал. Кызьы, шуоды? Нырысь ик, клубе люкаськемъёс котырес ӝӧк сьӧрын чай юон куспын кылзӥзы "Арня ӵукналэн" али кузёезлэсь Ольга Ведровалэсь кылбурамзэ-мадемзэ. Солэн "Мон утчасько тонэ" сборникез-бичетэз пумысен малпанъёссэс веразы. Егит нылкышнолы сӥзизы кылбур дуннелэн ватосъёсаз золгес утчаськыны, аслаз малпам пужыосыныз юнгес паймытъяны. "Арня ӵукнаен" ӵукъёсы кема аръёс ӵоже шулдыртыса возиз Милитина Гаврилова. Сое тодӥсьтэмез ик ӧвӧл. Нош тросэз-а тодо меда, кылбур но гожъя шуыса? Дӥсьтыса но дӥсьтытэк, кылем арлэн пумаз со поттӥз "Кесэго-кесэго малпанъёс" кылбур бичетсэ. Ӵапак соин тодматскон, ас мылкыдзэс веран понна люкаськизы эшъёсыз толсурлэн 20-тӥ нуналаз. "Сёт, инмаре, со кышномуртлы сюрес вылын пыкъяськыны боды", - таӵе, жалясь мылкыдын гожтэмын кылбуръёсыз" (Е. Загребин). "Шуныт мылкыдыныз бордаз кыске... Дӥсьтӥсь луэмезлы синмаськисько, со герӟаськемын дӥсьтонтэменыз но" (В. Ившин). "Урод ке но вӧзад вераськисько, тынад кылъёсыныд бурдъяськисько" (А. Евсеева). "Книгадэс лыдӟыкум, анае син азям пуксиз" (И. Зорина). "Поэзия яке вань, яке ӧвӧл. Пиосмуртлэн яке кышномуртлэн гожъямезлы тупа шуыса учконо ӧвӧл. Та книга пӧрмем" (П. Чернов). Таӵе огъя дунъет - пӧртэм малпанъёсты огазеясь, йылпумъясь. Кылбурчиез бурдъясь, шумпоттӥсь. Нош авторлэн сыӵе ик нимо ӵош дышетскем эшез, Милитина Михайлова, ас малпанъёссэ гожтыса редакциямы ваиз. - "Кесэго-кесэго малпанъёс" - тазьы нимамын Милитина Васильевна Гавриловалэн кылбуръёсын сборникез. Пичигес ке но, чебер, сайкыт чагыр выло та книга ас бордаз кыске, кие куриське, "монэ лыдӟе но учке" шуэ кадь. Пӧртэм аръёсы гожтэмын кылбуръёсыз: я школаын дышетскыкуз, я педучилищеын, институтын, яке берло аръёсы ужакуз. Огшоры улонысь адӟем учыръёс бугырто пинал сюлэмез, кылдыто пӧртэм малпанъёс, куддыр серем пыр, исаса кадь, секыт но мӧзмыт мылкыдэз возьмато. Тани мынэсьтым сюлэмме ик вӧсь каро кылбурысь таӵе чуръёс: Ветлэ мумыды доры, Со луло дыръя. Со вите ук тӥледыз, Тӥ понна улэ. Укное учке - Ӧсъёссэ усьтэ. Со - вите... Ныл сюлэм, эшедлэсь мӧзмон но яратон - котькинлы таӵе мылкыд тодмо - со сярысь трос чуръёс гожтэмын. Нош М. Гаврилова ас сяменыз вера: Йӧтскид - Ӧй шӧды. Ӟырдай - Ӧд вала. Шуак кутскид Пельпум бордам! Шокчид - Быдтӥд лулме. Учкид - Сутӥд монэ... Ӧжытак пальпотыса, йырзэ вылэ ӝутыса, чигиськонзэ вормыны тыршыса кадь, нылаш вера: Ымдуръёсме вурид, Йырвизьёсме герӟад, Мылкыдъёсме чигид - Кызьы улом?.. Яке: Яратыны, кин яратэ тонэ, Вылэм лякыт. Яратыны, кин ке уг яраты тонэ, Секытлэсь секыт... Тросаз кылбуръёсаз мон асме адӟисько: мон сярысь кадь гожтэмын, мынам мылкыды кадь усьтэмын. Адями ужа но ужа, даур ортче, пенсие потон дыр но вуэ, соку туж ӝожмыт мылкыд кылдэ, астэ кулэтэмен лыдъяськод. Данэз-санэз ӧвӧл Пересь муртлэн, Тужгес - нылкышнолэн. Арлыд сэрен Кулэ уг лу ни со Аслаз калыкезлы... Кулэ ӧвӧл ни со Матысь но Кыдёкысь эшъёсызлы, Оло, семьяезлы... Таӵегес ик луэ "Эн лекатэ кышномуртэ" кылбурез. Таиз но, "Азьтэм" кылбурез, пырак мон сярысь кадь гожтэмын", - малпалозы, дыр, куд-огез. Сьӧрам нюштыр-р ветлэ Азьтэм, Монэ ялан каре серем. Со валесэ весь куриське, Ӝоггес пуктэ пукон вылэ, Вуттэ ӵемысь со ӝӧк сьӧры, Со сиыны косэ кӧйзэ. Туж быгылес вылэм Азьтэм - Шӧтэм туж кышномурт. Тон дӥсяськы, пе, тур но пар, Лу мон кадь ик азьтэм. Сьӧрам ветлэ но сюлворе Тоӵчы - нэ пукыны, Азьтэмъяськыны. "Кеч синъёс" кылбурез туж умой кырӟанлы пӧрмысал, дыр, чуръёс крезьгуре курисько: Ай, кезьыт на, кезьыт, Кынтылэ ӵукъёсы, Нош сяськаослэн Ӝутскиллям йыръёссы. Чебересь ик вылэм, Чебересь - крокусъёс, Нош мынам син азям - Кеч синъёс, Кеч синъёс, кеч синъёс - Син азям... Тӥни сыӵе мылкыды кылбуръёсыз пумысен. Нош ачиз сярысь ке... - 42 ар ӵоже ветлэ уж дураз - радиокомитетэ - веськыт мугоро, сайкыт чагыр синмо, ымнырыз котьку но пальпотӥсь... сӥлы, визьмо кышномурт. Со Милитина Васильевна Гаврилова-Решитько. Институтын дышетскыкуз ик диктор луыса ужа, собере трос аръёссэ - литературной передачаосъя редактор, бератаз - радиожурналист. Нош кӧня концертъёсты, пумиськонъёсты дася но нуэ. Сцена вылысь адӟиськод ке, сюлэм ик шуна, няська, тодӥськод: ӝыт умой ортчоз. Милитина Васильевна али но пӧртэм тунсыко адямиосын пумиськылэ, соослэсь ужамзэс, мылкыдзэс, азьпала учкемзэс но тыршемзэс пыр-поч мадьылэ радиопередачаосаз (со али ужа вакчи тулкымъёсын). 1995-тӥ аре "Удмуртия" издательствоын потӥз очеркъёсын нырысетӥ книгаез - "Ӵыдонтэм пумиськонъёс". Жаляса верано, тросэз та книгаысь усточиос улонысь кошкемын ни, нош соос сярысь мылысь-кыдысь лыдӟыса тодэ ваиськод, яркыт син азе пуксё Герман Афанасьевич Корепанов, Григорий Иванович Титов, Кузьма Алексеевич Ложкин, Клавдия Кузьминична Гаврилова но мукетъёсыз. Соин ик вераме потэ Милитина Васильевналы: - Эн возьы "шыкысад" мукет усточиос сярысь малпанъёстэ, тодонлыктэ. Гожты на "Выль ӵыдонтэм пумиськонъёс". Нош "Кесэго-кесэго" малпанъёс книгаез мед вуоз вылэм лыдӟисьёслэн киязы, библиотекаослэн ӝажыосазы. М. Михайлова. Журналистъ ёсын пумиськонъёс А. А. Волков: Ортчемез ар умой мылкыд кельтӥз Удмуртилэн миым ужамезлы Кун Кенешлэн Тӧроез оглом таӵе дунъет сётӥз. Сое асьмеос шӧдӥм ни промышленностьлэн вырӟемезъя, пенсиос тыронъя, пичиен ке но, уждунмес басьтэмъя. Нимаз предприятиосъя ке учконо, продукция поттонъя висъяськизы "Ижсталь", радиозавод, механической завод, выльдӥське машина поттон удыс. Умоесь кусыпъёсмы Москваен но. Кызьы пусйиз А. А. Волков, Удмурт Республикалэн кивалтӥсьёсыз котькыӵе ужпумъя отын юрттэт шедьто, огкылэ вуо. Январе гинэ куинь пумо тужгес но кулэ луись юанъёс сэрттэмын-пертчемын ни. Нырысетӥез соос пӧлысь - уждун тыронъя пунэмен люкаськемъёсты берыктон. Та пумысен Кун Кенешлэн кивалтӥсез пумиськылӥз Россиысь коньдон ужпумъёсъя министрен М. М. Касьяновен. Кызьы тодмо, бюджет чотын улӥсьёс ласянь тужгес но югдур секыт Ижевскын. Соин ик кылем арня вискын та юанэн ик Москвае вуылӥзы коньдон ужпумъёсъя министр В. В. Бельтюков но Ижевсклэн мэрез А. И. Салтыков. Кызьы шуиз А. А. Волков, туэ 1-тӥ апрелёзь бюджет удысъя уждун тыронэн республика "пунэмаськон гуысь" потыны кулэ. Со понна коньдон тырмыт висъяське. Кыкетӥез ужпум, кудӥз тужгес но шугъяськытэ республикалэсь кивалтӥсьёссэ, автозаводэз ужатон. Вераськон мынэ "Шкодаен" ӵош ужан пумысен но буёллы Япониысь кредитъёс басьтонъя. Кусыпъёс азинско кадь коньдон ласянь но. - "Орбита" машинаос озьы ик поттом, оло, алилэсь ятыргес но. Макем трос луоз продукцимы, сокем ӝоггес юнмалоз республикалэн бюджетэз. Куинетӥез ужпум, кудӥзъя асьмелы юрттыны быгатоз центр гинэ, оборонной промышленностьын уждун тыронъя радлыкез шедьтон. Пусйыны кулэ, татын но ӟеч пала воштӥськонъёс шӧдӥсько ни: куд-ог заводъёс пунэмен тыронъёссэс пичиен-пичиен пумаз- йылаз вутто. Шумпотымонэз вань пенсия басьтӥсьёс понна но: соос коньдонзэс дыраз, куд-ог интыосын ӧжытак вазьгес но басьтыны кутскизы. Кызьы пусйиз Александр Александрович, ваньмыз та уксё люкаське республикамылэн кужыменыз, Москваысь дотациос басьтэмысь дугдӥм. Али вераськон мынэ ни пенсилэсь быдӟалазэ 20 процентлы йылэтыны, азьвыл чакламъя, та лыдпус 15 процент гинэ вал. Республикамылэсь улон-вылонзэ умоятонын бадӟым юрттэт возьмаськом Кун Думае быръем эшъёсмылэсь, соос отын асьсэлэсь интызэс шедьтӥзы ни, шуыны луоз. Юрий Дмитриевич Маслюков, кылсярысь, кыл кутоз промышленностья комиссилэн ужез понна, Светлана Константиновна Смирнова выроз калык кусыпъёсты радъянъя ужпумъёсын. Удмуртия понна со туж умой ини. А. А. Волков нимысьтыз саклык висъяз 26-тӥ мартэ республикаямы улӥсьёс пӧлын ортчытоно референдумлы. Со оске: юалляськон дыръя Удмуртиысь калык пӧлысь данакез куаразэ сётоз Президентской республика понна. Озьы гинэ асьмеос бускель улосвылъёсын огкадьгес улыны но ужаны кутском, экономикамес ӝутом. Кун Кенешлэн Тӧроез валэктонъёс сётӥз журналистъёслэн пӧртэм юанъёссылы. Соосын пыр-почгес тодматом газетмылэн вуоно номераз. Л. Медведева. ГИППОКРАТ ДОРЫН - ХРИСТОС Глазовысь медициная училищеын Христослэн вордскемез дырысен 2000 ар тырмонлы сӥзем ужрад ортчиз. Вуоно эмъясьёс библиысь сюжетъёсъя сценкаос возьматӥзы. Соос азьын вераськиз священник но. С.ПЕТРОВ. Етӥнлы музей Юкаменскысь музей етӥн сэстон заводысь кивалтӥсьёсын ӵош уй пал буртчинлы сӥзем адӟытон усьтыны чакла. Со усьтӥськоз предприятилэн одӥгаз шутэтскон сэрегаз. Кӧня ке арбериос ваемын ни. Соосты куд-огзэ отчы вуттэм Константин Сысоев. Н.ЛЕВИН. Уд но оске Кылем арлэн берпуметӥ нуналаз Можгаысь комиссия 70 квартираен выль юртэз кутӥз. Отын улозы "Можгаысь лесокомбинат" акционер огазеяськонын ужасьёс. Юртэз ӝутыны кутскизы ни вал 1990-тӥ арын. Но Гайдарлэн коньдонэн шудонэз лэсьтӥськонэз куспетӥ кариз. Соку, 1994-тӥ арын, комбинатысь директоръёслэн советсы лэсьтӥськонэз азьланьтыны ӵектӥз вуоно улӥсьёслэн коньдонзы чотын. Уксё люкан кык ар кыстӥськиз. Черодын сылӥсьёс пӧлысь талы соглаш луиз 16 адями гинэ. Но бӧрысь ваньмыз ас интыяз пуксиз. Ар кутсконын выль улӥсьёс выль корка пырон лэсьтӥзы ни. С.НИКОЛАЕВ. Кеньырлы но мед яралоз Тулыс бусы ужъёс кутскытозь, дыр вань на ай. Нош Можга ёросысь агрономъёс али ик малпасько ни, кыӵе культураосты кизёно шуыса. Йыдыез ке басьтоно, басьтоно сыӵе сортсэ, со мед яралоз пудоез но сюдыны, кеньыр но поттыны. Сортъёсты вӧлмытонъя участокын ужасьёс та ласянь дэмлало "биос-1" но "раушан" пумооссэ. Та сорт йыдыос асьме палан асьсэды котыр ласянь умоен возьматӥзы ни. Б.НИКИТИН. Удмурт Республикалэн улосвылаз тамакен вузкарон Радлык сярысь Удмурт Республикаысь Правительстволэн Постановлениез Ижевск город 1999-тӥ арын 27 декабре. � 1278. Тамакен вузкаронэз радъян вылысь, Удмурт Республикаысь Правительство пуктэ: 1. Удмурт Республикалэн улосвылаз тамакез вузанъя Радлык юнматоно. 2. Постановлениез уже кутоно сое иворъёс вӧлмытон ёзъёсын печатлам дырысен. Удмурт Республикаысь Правительстволэн Тӧроез Н. А. Ганза. Та постановлениен юнматэм Радлыкъя: - тамакез тросэн вузаны лэземын суменак вузкарись предприятиосысь но нимысьтыз складъёсысь, кытын тамакез возьыны но вузаны луонлыкъёссы вань; - тамакез розницае вузаны яра, норма луись документъёсты лыдэ басьтыса но кыӵе вузъёсын артэ луэмзэ чакласа, вузкаронъя предприятиосын но огъя сиськон интыосын, павильонъёсын, киоскъёсын, "Купава", "Тонар" выллем автоприцепъёсын, вагон- ресторанъёсын, контрольно-кассовой машинаосты уже кутыса, интыысь аскивалтонъя ёзъёсын лэзем интыосын. Контрольно-кассовой машинаостэк вузкарыны быгато автолавкаосын (гуртын улӥсьёслы) но Удмурт Республикаысь Правительстволэн 1999-тӥ арын 21-тӥ июне кутэм 551 номеро но 1999-тӥ арын 23-тӥ августэ юнматэм 806 номеро постановлениосаз пусъем вузкаронъя предприятиосын; - вузкарись басьяськисьслы валэктонъёс сётыны кулэ тамаклэн нимыз но дуныз, маркаез яке товар пусэз, кысконэз поттӥсь но кытын интыяськемез (страназэ вераса), тамаклэн тазалыклы изъян ваемез, Россия Федерацилэн улосвылаз потэм вузъёслы норма луэмзэ верась яке технической документэз (ТУ, ГОСТ), сертификация но куронъёслы тупась знакен пусъем сярысь, кунгож сьӧрысь ваем кысконъёлы - ӟуч кылэ берыктэм ивортонъя; - нимаз ужбергатӥсьёслэн луыны кулэ вытъя ёзын пусъем доходъёсъя тетрадьзы; - тамакез суменак вузаны уг яра гаражъёсын, улон интыосын но сое возьыны, вузаны чакламтэ мукет интыосын; - розницае вузаны уг яра: интыысь аскивалтонъя ёзъёсын лэзьымтэ интыосын, палаткаосын, лотокъёсын, киысь, огне-оген, 18 арес тырмымтэослы, усьтэм, погмам, котмем, наштаськем вылбинетэн (упаковка), куронъёслы тупамзэ возьматӥсь сертификаттэк, тупатэм тусо маркатэк лэсьтэм, басьтӥськисьлы валэктонтэк, нимысьтыз маркаен пусйымтэ (2000-тӥ арын 1-тӥ майысен), ӟуч кылэ берыктымтэ ивортонтэк (кунгож сьӧрысь ваем кысконъёслы), вузэз эскерем (таможенной) но вузэз келям сярысь документъёстэк, та Радлыкез тӥяса; - та Радлыкез тӥямез понна, вузкарись кыл кутэ та дыре быдэсъяськись законъя. Заводлы - 100 ар Радиоаппаратура лэсьтонын Сарапулысь радиозавод Россиын одӥгез валтӥсь предприятие луэ. Кылдытэмын со 1900-тӥ арын Петербургын. Нош 1918-тӥ-1941-тӥ аръёсы завод ужаз Москваын. Быдӟым Отечественной война кутскон азьын радиоаппаратура дасясь предприятие выжтэмын Сарапулэ. Война бере татын поттӥзы "Кама" радиолаос, 1963-тӥ арын - "Космос", собере "Рубин" но "Орлёнок" радиоприёмникъёс. Соосты тросэн басьтылӥзы кунгож сьӧры но. 1968-тӥ арысен радиозавод пайдаё тырше автошинаослы аппаратура дасян но поттон бордын. "Урал" приёмникъёс туж вылӥ дунъясько, вылтуссыя но луонлыкъёссыя тупало басьяськисьёслэн куронъёссылы. Сю ар ӵоже завод поттӥз ини вылӥ маркаен уно миллион приёмникъёс. В. Рогалев. "Удмурт Республикаын интыын аскивалтонъя ёзъёсы депутатъёсты быръён сярысь" Удмурт Республикалэн Законэзлэн 71-тӥ ёзэтаз воштонъёс пыртон сярысь Удмурт Республикалэн Законэз 1-тӥ ёзэт. "Удмурт Республикаын интыын аскивалтонъя ёзъёсы депутатъёсты быръён сярысь" Удмурт Республикалэн Законэзлэн 71-тӥ ёзэтысьтыз 1-тӥ люкетысь кыкетӥ предложениез тазьы лыдӟоно: "Быръёнъёсты кыкетӥзэ ортчытыны луэ, нырысьёсыз быръёнъёс ортчем нуналысен куать толэзьлэсь бере кыльытэк яке быръёнъёсты ортчымтэен лыдъям нуналысен куать толэзьлы бере кыльытэк". 2-тӥ ёзэт. Та Закон кужыме пыре сое печатлам нуналысен. Удмурт Республикаысь Кун Кенешлэн Тӧроез А. А. Волков. Ижевск город, 2000-тӥ арын 24-тӥ январе. � 141-ИИ. Кинъёс соос? Асьме удмурт эстрадаысь "кизилиосмы" ярам ай нимтулъёссэс псевдонимен уг вошто. Валентина Пудова ке, со Валентина Пудова ик. Мукетъёсыз но артистъёс асьсэ нимтулъёсынызы ветло. Нош ӟуч эстрадаын вань Алсу, Анка, Юлиан... Псевдонимъёссы уго соку ик пель шоры йӧто. Нош кинъёс бен соос паспортсыя? Азиза - Азиза Мухамедова Ирина Аллегрова - Инесса Климчук Алсу - Алсу Сафина Анастасия - Анастасия Минцковская Анка - Наталья Ступишина Алёна Апина - Елена Лёвочкина Надежда Бабкина - Надежда Заседателева Валерия - Алла Перфилова Анжелика Варум - Мария Варум Андрей Губин - Андрей Клементьев Господин Дадуда - Игорь Кезля Диана - Ирина Герёшина Лада Дэнс - Лада Волкова Лариса Долина - Лариса Мячинская Михаил Звездинский - Михаил Дейнекин Крис Кельми - Анатолий Калинкин Евгений Кемеровский - Евгений Яковлев Костя Кинчев - Константин Панфилов Наташа Королева - Наталья Порывай Сергей Лемох - Сергей Огурцов Лев Лещенко - Лев Лещев Линда - Светлана Гейман Александр Малинин - Александр Выгузов Стас Намин - Анастас Микоян Натали - Наталья Рудина Ника - Ирина Мальчина Органическая Леди - Светлана Кушнир Андрей Разин - Вадим Криворотов Маша Распутина - Алла Агеева София Ротару - Софья Ротарь Влад Сташевский - Вячеслав Твердахлебов Ксюша Стриж - Ксения Волынцева Богдан Титомир - Титоренко Олег Николай Харьковцев - Николай Трубач Вика Цыганова - Виктория Жукова Виктор Чайка - Виктор Сигал Юра Шатунов - Юрий Шатько Шура - Алесандр Медведев Юлиан - Юлиан Васин. Тунсыкъяськиз Н. Лялин. Удмурт Республикалэн Конституциезлэн 10-тӥ ёзэтысьтыз 1-тӥ люкетаз воштон пыртонъя Удмурт Республикаын референдум ортчытон сярысь Удмурт Республикаысь Кун Кенешлэн постановлениез Удмурт Республикаысь Кун Кенешлэн депутатъёсылэсь ӵектонзэс но Удмурт Республикаысь Кун Кенешлэн Президиуменыз дэмлам материалъёсты эскерыса, Удмурт Республикалэн "Удмурт Республикаын референдум сярысь" Законэзлэсь 15-тӥ ёзэтсэ лыдэ басьтыса, Удмурт Республикаысь Кун Кенеш пуктэ: Удмурт Республикаын 2000-тӥ арын 26-тӥ мартэ ортчытоно референдум, таӵе юан пуктыса: Умоен-а Тӥ лыдъяськоды Удмурт Республикалэн Конституциезлэн 10-тӥ ёзэтысьтыз 1-тӥ люкетаз таӵе воштон пыртонэз: 1. Удмурт Республикаын кун властез быдэсъяло Удмурт Республикаысь Кун Кенеш, Удмурт Республикалэн Президентэз, Удмурт Республикаысь Правительство, Удмурт Республикаысь Конституцияя суд, Удмурт Республикаысь мировой судьяос. Удмурт Республикаын кун властья мукет ёзъёс но кылдытӥськыны быгатозы. Соосты кылдытон но ужатон радлык быдэсъяське Удмурт Республикалэн законъёсызъя но Россия Федерациысь законъёсты лыдэ басьтыса". 2. Удмурт Республикаысь Быръёнъя комиссилэсь улосвылъёсысь но участокъёсысь комиссиослэн Удмурт Республикаын референдум ортчытонъя быдэстоно ужъёссы пумысен Россия Федерациысь быръёнъя шор комиссилы вазиськонзэ Россия Федерацилы Президент быръёнъя комиссиосын ӵош эскероно. Удмурт Республикаысь Кун Кенешлэн Тӧроез А. А. Волков. Ижевск город, 2000-тӥ арын 24-тӥ январе. � 142-ИИ. Котькуд нунал - зарни шунды Алнаш ёросысь Усо гуртын уло кузпалъёс Япаровъёс. Кузпалъёс Япаровъёс вань нылпиоссылы сётыны быгатӥзы вылӥ тодон-валан. Кужымзэс ӧз жалялэ соосыз пыд йылазы пуктонлы. Бадӟымез нылзы Мария шор ёзо Усо школалэн директорез. Кузпалыз но татын ик дышетэ. Кыкетӥ нылзы, Валентина - Можга ёросысь шор ёзо Бадӟым Сибы школаын биолог-химик. Кузпалыз но татын ик тырше. Куинетӥ нылзы Людмила вордӥськем гуртысьтыз ик шор ёзо школаын математик. Ньылетӥ нылзы Зинаида ветеринарияя Н.Э.Бауман нимо институтэз йылпумъса ужа Астрахань улосын. Пизы Виталий шор ёзо Алнаш школаын информатикалы но физикалы дышетэ. Япаровъёслэн вань нылпиоссылэн пиналъёссы будо ини. Ефрем Николаевичлы сизьымдон ар тырмон юбилее ваньзы бертазы. Ӟечкыланы вуылӥзы гуртысьтыз тодмоосыз, эшъёсыз, ӵыжы-выжыосыз но. Ваньмыз ик мылкыд каризы тазалыко кема улыны. Нылпиоссы тау каризы анай-атайзылы дышетыны быгатэмзы понна. Музъемозь ик йыбырттӥзы, таза, чебер, калыклы адӟем карымон вордэмзы понна. Сӥзизы шудбур, тазалык. 2001-тӥ арын Япаровъёс пусъёзы витьтон ар ӵош улэмзэс.Соос понна котькуд нунал мед ӝужалоз зарни шунды. А.ГРИГОРЬЕВ. Лыдӟелэ нылпиостылы Гондыр Верос Возь вылын нырысь ик унябей сяськаяськиз. Курень йыр вадьсын ӝужазы мамык пырыос. Йыр соосты индылӥз: - Тӥ, гонъёс, ӝоген мынэсьтым люкиськоды. Тӧл тӥледды кыдёке-кыдёке нуоз. Омыретӥ лобыкуды, уллане сак учкылэ. Курень виштыез адӟиды ке, отчы васькылэ. Жаг турынэн ӵакмымтэ му вылэ лэзькелэ. Со борды ӝабырскыны быгатӥды ке, тӥ пӧрмоды мон кадь унябей будослы. Огез гон юаз: - Нош кызьы ми омыре ӝутском? Кытысь милемды тӧл шедьтоз? - Выллане тубыны трос амалъёс вань. Мон вылэ тачак нымы-кибыос пуксьыло. Соос борды кырмиськелэ но - ӟеч луэ! Верамезъя ик пӧрмиз. Огаз шуныт нуналэ унябей вылэ муш пуксиз. Кузь нырзэ-гумызэ сяська пушкы донгиз но льӧль утчаны ӧдъяз. Гон кема малпаськытэк лякиськиз муш кук борды. Со сьӧры ӝутскиз огсыр гуретэмъя, улӥын возез воштӥз нюлэс, чильк-вальк воректӥз шур, чурен-чурен кылизы коркаос. Индылэм кылъёсты тодаз вайыса, гон ӝоген мозмытскиз муш бордысь. Капчияк шокчиз: со ас понназ но ӟеч лобаны пишмытэ вылэм. Табере утчано виштыез - муэз. Гон лобе но весь уллань учке. Тӥни отӥын, улӥын, нюлэс куш кенерамын. Радэн сыло пичи коркаос - муш чуркаос. Ыбес котырын адскиз курень вишты. Вырӟылэ. Гырем музъемлы уг укша. Киосыныз-пыдъёсыныз шонаське, котыраз тэбинись кибыосты улля. Лобӟыны выре, лэся, нош ӝутскемез уг луы. Кыӵе сыӵе йӧспӧртэм моко со? Гон кеськиз: - Тон гон, дыр? Моко ӧз вазьы. Муш бакчае пуӵ ултӥ пырыны выре. Гон выльысь черектӥз: - Гон, дыр, тон? Ньылпу йылын пукись коӵо быдэс улос тыр кыӵыртӥз: - Гондыр, гондыр! Уд адӟиськы шат ачид? Гон, дыр, - гондыр, - шыпыртӥз гон. Ӟазырес куараё коӵо сайкатӥз мушъёсты. Соос быдэс уллёен омырскизы гондыр шоры. Таиз бадӟым мыжыксэ супыльтӥсь коӵо шоры сэзъялтӥз но ури-бери лашкинтӥз нюлэскы. Гон лобӟиз курень муэз утчаны. Алексей Шкляев. Пётр СКОБЕЛЕВ Чимбик Верес Улэ-вылэ город вӧзысь эштосын, кема аръёс ӵоже Беларусь тракторен уй но нунал ужаса, Фрол. Со мултэс ӝужыт но, лапег но ӧвӧл, сое зӧк но начар но уд шуы, ымныр тусын артистлы уз мыны ке но, учконтэм уд шуы, тӧлам ымныраз задор мылкыд, тордос ӧвӧл ке но, чырты бераз уг киська, мултэс уг но шырыта, чурыт-курчемъёс пӧлы но уд пырты, ачиз пунэмен уг курылы бере, туж ик сётэмез уг поты, нӧдэм машинаез поттыны юрттытэк вӧзтӥз уз ортчы, ву курисьлы йӧл дэмлалоз, макмырен бускелёзы чарка мычоз, нош ӟеч выжы пуны таки уг уськыты, ачиз пӧйшурась но губиясь ке но, ялан сьӧраз ветлылӥз лусьтыр-ласьтыр пичи Дамкаез, но пересьмыса кулӥз. Огпол, городын улӥсьёслэн сад-бакчаоссы вӧзын гырыкуз, Фрол сюрес вылысь адӟиз кузёезтэк бызьылӥсь кучапиез: Зӧк кӧто, кырыж куко, сьӧд-тӧдьы гоно, ошиськылэм пелё. Лайка! О, кыӵе шедьтос! Ӧз лушка, озьыен, солэн луоз. Сюлмыз ик вырӟиз пӧйшурасьлэн. Кучапи солэн керттэм дэремез улын ни, Трактор, лыз ӵын кельтыса, гурт пала дыртӥз... Макем яратӥз, макем яратӥз Фрол кучапизэ! Ним сётӥз - Чимбик. Домблёк кучапилэсь пӧрмиз усто пӧйшурась айы лайка. Табере Фрол пунызэ нокыӵе коньдонэн уз вошты. Пуны юнгес яратэ сюдӥсьсэ. Чимбик котьку сямен Фрол сьӧры бызьылӥз, нош сое ӵемгес сюдэ Фроллэн Фрося кышноез. Бырйиськисьлы бырйиськемез кыле шуэмысьтызы, Фрол отӥ-татӥ утчалляськыса ӧз улы. Ачиз гуртлэн огпал пумаз улэ вал ке, кышно ваиз гуртлэн сопал пумысьтыз. Варматаеныз варманаез дорозь ӵап одӥг иськем мынон-ветлонэз. Со сюрес вылын, гуртлэн шораз пуктэмын эштослэн контора. Ӵап отын ужа бусы ужъёсты туж ик яратӥсьтэм чебер Фрося. Чеберысьтыз, вылды,гуртын берло дыре кыл вӧлмытыны ӧдъязы: бригадир, пе, Фрося котырын берга. Зэм, кутымтэ адямиез ворен уд лыдъя. Мукет ласянь ке - тӧлтэк писпу уг выры. Нош гурт супыльтонъёс - со шонер ужась барометр мактал. Пуны утӥз - кион сииз, озьы гинэ шу вал ни Фрол. Но та супыльтонъёс ӧз чалмылэ аръёс ӵоже. Буйгатскылӥз, Чимбикеныз ӵошен пӧйшуралляса. Адями кадь визьмо Чимбик кузёезлэсь вань вераськемзэ сак кылзылӥз, валалляз солэсь куректонзэ, буйгатэмез- верамез гинэ уг луы. Фролэн Фрося одӥг гинэ пи вордӥзы, со табере атаезлэсь быдэс йырлы ӝужыт ни, сӥль- вирыз гинэ кизергес на, зэм, лябгес дышетске, но атаезлы со куректон-а, вӧзаз улӥсь но юрттӥськись луоз, ойдо. Но тани гуртын нош ик супыльтонъёс вӧлмизы: калге ик кадь та возьыттэм Фрося. Нош Фрол, кильтыръяськыны яратӥсь кышноеныз пал кыл но вераськытэк, аслэсьтыз котырзэ кутӥз но эштослэн буш сылӥсь корказ выжиз. Акшан вакыт вуиз гинэ, эмеспиез доры, куинь литръем банкаен сур вайыса, варматаез лыктӥз. - Аслам вордэм нылылы мон уг дурбасьтӥськы, - ӟистыса пуконъязы шуиз со. - Фрося мыным номыр уг вера, танӥське. Юай мон солэсь, малы кыкетӥзэ нылпи уд вордӥськы шуыса. Валэктыса но утчай: внукмы Вова гинэ, одӥг пиед аслад юртад кузё кылёз, нош милям, Фрося сяна, нылпимы ӧй вал бере. кинэ кельтомы, эшшо одӥг ке но внук кулэ на вал. Тышкаськыса но эскери... Ужпум со бордын на, эмеспи... Кызьы валэктом ай? Фросялы та сярысь мон ноку но ӧй на вералля. Вашкалаосмылэсь, эмеспи, мыным зарни кылиз вал. Ичи ӧвӧл, тырмымон. Война дыръя гинэ няньлы кутылэммес тодӥсько. Советской власть дыръя узырмыны уг лэзё вал. Табере со зарниез вордыса возьыны кулэез ӧвӧл ни. Сётыны турттыса кема улӥсько... нылы шоры учкисько но воксё паймисько: эмъяськонние со сюлмыныз курадӟыса уг ветлы кадь потэ. Нылпиосты кык кузя ке луысал, огзэ аслым юртам кельтоно вылэм. Фрол - мултэссэ супыльтӥсьтэм пиосмурт; каллен сур юонъяз варматайзэ кылзэ но кылзэ, тодэ угось: вераськисез кылзыны быгатон - со зэмос пиосмуртлэн сямыз. Нош варматаезшур кадь ӧръя веранзэ: - Эмеспи, мон тон палан, тыныд дурбасьтӥсько. Воваез дышетоно ик вал, толыктэм ӧвӧл со, вашкалаосмылэн зарнизы солы мед кылёз, нош али сое кызьы кутон сярысь тыныд малпаськоно: пайдатэк, юнме тус-тас медаз луы. Бен, мон нылылы но сётысал, но ас вылаз кильтыръяськыны быдтоз. Вова механизаторе медаз кыльы, агрономе дышетоно сое. Мынам коркам мед кылёз вал, мынамез данаклы ӟечгес, лыстэм пужымлэсь ӝутэмын, быдэс даур сылоз на. - Я, коркаосын йырин ӧвӧл ай, варматай, - жадем но тузон пыӵам ымнырзэ кык киосыныз ик посыса вазиз Фрол. Ваньбур бордын гинэ ужпум ӧвӧл. Кусыпъёсмы шунытэсь мед луозы вал, мон эстӥськисьтэм коркан но толэз пырпотысал. Инмар понна. - Фрол кружкаысьтыз сурзэ юыса ик быдтӥз. - Та вакытэ маке номыр сярысь но малпаськеме уг поты, йыр пушкам буш мед кылёз. Озьы, кызьы буш сылӥз та корка. Шӧдтэк шорысь пуны нискетэм кылӥськиз. - Нёшто Чимбик монэ шедьтӥз? Фрол ӧсэз усьтӥз но пуныез корка пыртӥз. Чимбик, бер пыдъёсыз вылэ султыса, азь пыдъёссэ кузёезлэн гадь вылаз вуттӥз, ымнырзэ нюлыштӥз но гур вӧзы выдӥз. - Мынам кылэме вань, - Фрол, - коӵыш, пе, корка борды дыше, кузёез котькин медло, нош пуны - кузёез борды, котькытын со мед улоз. - Калыкын ваньмыз шонер чакламын. - Но, эмеспи, мынам возьматэме потэ вал со интыез, кытчы ватӥ зарниме. Ойдо, ветлом. Но, эшшо курисько, со зарниез пимес дышетонэ кут. - Варматай, со номырлы ярантэм дышетске но урод сямо будэ шат? - Асьмелэн гинэ улонэз валаммы калыке потыны туж ичи, эмеспи. Ватсаса дышетоно Воваез. Сыӵе дышетӥсь репетитор шуыса нимаське. Дышетӥсез но, кинэ шедем басьтоно ӧвӧл, устоосыз пӧлысь устозэ быръёно, со понна уксё тыроно. Озьы тросэз дасяло асьсэлэсь нылпиоссэс университетэ. Асьмелэн выжыямы одӥг мурт но ӧвӧл на ук, кин вылӥ образование басьтӥз. - Нош малы соку нылдэ ӧд дышеты? Музъем но пудо бордын ужаны солэн так но катез ӧвӧл. - Котькуд нылпилэн дышетскыны толкез уг тырмы, эмеспи. Йырыз ке уг ужа, йыр вылаз пис пильылыса визьмо уд кары. Тон люкиськыны малпад ке, мон пал кыл пумит уг вера. Но дышетоно нылпилэн анаез но, атаез но мед луоз вылэм. Люкиськон со нылпиосты мур куректонэ уськытэ. Песяен песятаез вань на ке, эшшо умой. - Шонер, варматай. - Шонер. Басьтом лайкадэ. Малы ке тон сое выль мотоциклэн но ӧд вошты. Та ӟеч выжы Чимбикеныд кӧня гондырез, кӧня кионэз но кӧня койыкез кутӥд ни. Кӧня лицензия октэмдэ тодӥськод на меда? Со выллем ик адями но. Нош татын пунылэн выжыез асьмеленлэсь вылӥынгес луыса кошкиз. Лайкадэ тон дышетылӥд, нош Воваез дышетэмед уг поты, вӧзад кельтон вылысь. Нош Воваез наукаослы дышетоно.Нош ма кароз асьмелэн коркаосынымы, ачиз мед тодоз: коть мед улоз, коть дача мед кароз, но ялан тодаз мед ваёз: вал солэн таӵе песятаез, вал солэн таӵе атез,нош со - Владимир Фролыч - соослэн ушъямон пизы... - Маке тон, варматай, вераськондэ ӧръяд озьы, будто ке тон берпум нуналъёстэ улӥськод? - Сюлмы висе, эмеспи. Нылыным сэрен но, нылы понна но... Шоканэ шугоме. Тӥни пуны - пуны гинэ, но оскымон эш. Кытчы мынэмдэ тодытэк, утчаз но шедьтӥз тонэ. Нош Фрося кытын? Нешто, контораын пукыса вылысь, уг тоды, кытын тон? Вождэ эн вай, эмеспи, но ӝокыт тынад татын. - Соку укноез усьтоно. - Укноез усьтыны шуг ӧвӧл, вуж рамаосыд ӧз ке куашкалэ. Но кузькукъёс норозы, уйзэ кӧлытэк потод. - Мон сотэк но умме уг усьы, дыр ай, варматай. Ачид валаськод: мылкыды мынам туннэ со выллем... Бӧрысь, варматай... Нош "бӧрысь" ӧз ни пӧрмы. Выль ӵукна Фрол понна кутскиз тазьы. Трос сур юэменыз, со вазь сайказ но кыре потано кариськиз. Корка ӧс ӟубис усьтӥськемын вал - лайка кошкем. Фрол сьӧросэ потаз ожоӟем азбаретӥ. Югдыны кутске гинэ ай. Кылӥськиз ӟезьылэн ӟукыртэмез - коркалэн зэмос кузёез ӧй вал бере, йӧскадь капка лэсьтӥсь луымтэ на. Учкиз Фрол пырись шоры - варманаез, малыке викышъяса ик бӧрдэ: Варатаез ӟардон азьын кулэм... Фрол уже ӧз поты, нуназеозь корос лэсьтӥз но, ачиз ик гылтыса, варматайзэ дӥсяз но коросэ интыяз. Шумпотон но куректон семьяосты юнматэ ке но, варматайзэ ватон кузпалъёсты ӧз матэкты. Пиезлы гинэ шуиз Фрол: - Вова, мынам тонэн рос-прос вераськонэ вань. Со куспын азбаре пыриз таза мугоро кышномурт, гуртысь фельдшер, со вераз, райбольницае жингыртӥз но, кулэм муртэ ватыны лэзизы шуыса. Фрол соку ик кылӥз варманаезлэсь но Фросялэсь вераськем куараоссэс. Атаез нылызлы гожтэт гожтыса, пе, кельтэм. Кышномуртъёслэн куаразы чалмиз. Азбарысь пиосмурт юаз, малы, пӧй, Фроллэн пуныез вазь ӵукнаысен я сопала, я тапала бызьылыса ветлэ. Фрол ма вераны ӧз тоды, нош Чимбик выльысь нискетыны кутскиз. Валаз кузёез: пуны ӧте сое кытчы ке но. Интыысьтыз султӥз. Лайка мынӥз капка доры, берлань учкиз, сое Фрол мед усьтоз шуыса. Бӧрсязы ведра карнанъёсын Фрося потӥз, картэзлэсь юаз: - Тон-а косӥд атайме мыным гожтэт гожтыны? - Кыӵе гожтэт? - юаз Фрол. - Тодымтэ улэ эн аналскы. - Соку возьматы. - Маке ӧвӧл-а? Малы дорысь кошкид, номыр вератэк? - Соиз мынам уже. Шонерзэ ке верано, акыльтӥз ни супыльтэмъёссэс кылзыны. Али-а со сярысь вераськоно? Пимы сярысь малпаськы вал, сокем визьмо пиез дышетоно, нош со асэрказ будэ. - Бадӟым ни со. - Трос тон валаськод, - Фрол кузпалэз дорысь палэнскиз но пуныез сьӧры вамыштӥз. Ачиз нош тодаз ваиз варматаезлэсь толон верамзэ, ӵош потыса учконо ик вылэм, кытчы ватэм со зарнизэ. Лайка кузёзэ азьлань но азьлань нуэ. Тани соос ортчизы ни жильыртӥсь ошмес дортӥ, кудзэ тупатъяз варматаез. Юзмыт кезьыт ву потэ ӝужыт тополь улысь. Фрол киоссэ коттӥз но ымнырзэ сазьтӥз. Чимбик огшаплы дугдӥз, векчи куараен нискетӥз но азьлане ӧтиз. Пудэн сюрес пумен быриз, лайка куасьмем кыз выжые дугдӥз но, Фрол шоры учкемез бере, азь пыдъёсыныз туж ӝог гудыны кутскиз - небыт сюй бер кукъёсыз ултӥ кыдёке пазяське. - Мар тон малпад таӵе, Чимбик? - юаз Фрол пуныезлэсь. Но лайка гудӥськемысь ӧз дугды, огшаплы гинэ дугдэ, музъемез зынъя, нырзэ сузя но вылысь дыртыса гудыны кутске. Тани утэмез кылӥськиз. Фрол воксё паймиз, отысь кыӵе ке ватосэз адӟыса. Лаптӥськиз, кизэ уллань лэзиз... пленкаен пияла банкаез выретӥз но кыре поттӥз. Мар та? Ӵуж пиштӥз банка пушкысь. - Зарни! Зарни манетъёс но чеберманъёс! Варматайлэн! Фрол котыр учкиз. Нокин ӧй вал. Ошмес дурын Фросялэн ведра пуктылэм куараосыз кылӥськизы. Литръем банкаез кисые уд чуртна, соин банкаысь зарни арбериосты со кисыосаз люкылӥз, буш банкаез берен гуэ куштӥз. Соку гинэ тодаз ваиз визьмо пунызэ. Чимбик сак учкыса пуке вал кузёезлэсь котькуд выроссэ. Ӧз, таяз учыре Фрол сое ӧз ӧтьы, ачиз дораз лыктӥз но, пыдесъяськыса, пунызэ ӝик-ӝик ӟыгыртӥз, чупаз: - Бадӟым тау, мынам визьмо Чимбике! Тон сюрес усьтӥд мынам пиелы Вовалы дышетскыны. Татчы ӧте вылэм монэ толон варматае... Лайка нискетэмысь дугдӥз.. Фрол кема улӥз, пунызэ ӟигыртыса, пыдъёсыз пумытозь. Тани со шуген султӥз, шонерскиз но дыртытэк потӥз пудэн сюрес вылэ. Пыриз эштос юртэ - аслаз выль улон интыяз, бӧрсяз пыртӥз Чимбикез но. Отын со вуж ӝӧк вылэ кисьтыса эскериз, кыӵе ваньбур кельтэм солы варматаез. Фроллэн ноку таӵе чебересь арбериосты адӟылэмез ӧй вал, синъёсыз ик палёмизы: ӵуж пиштӥсь пельугыос, манетъёс... Урамын, варматаезлэн корка вӧзысьтыз пумитаз пизэ: - Вова, мар кариськод? - Ӵужанай шуиз, кирос кулэ на, соин пуӵъёсты бырйисько. - Ачим лэсьто. Мыном кебитэ кортлэсь дуром. Юрттӥськод. Но нырысь корка пыра, Чимбиклы мискаен сиён потты. Ческытсэгес. Визьмо пуныез ӟеч сюдоно. Кебитын дурем кироссэс Фрол пиеныз ӝутыса ваизы, мыд-мыд палтӥз кутыса. Буямын гинэ ӧй на вал со. - Табере мон киросэз огнам пырто, нош тон доре берта но гаражысь ӝажы вылысь лыз буёлэз но кисточкаез вай, - косӥз Фрол пизэ. Сюрес вылысен асьмеос кенешимы тазьы: ӵужатаедлэн тонэ дышетон сярысь вераменыз тон соглаш луиськод. Озьы-а? - Озьы. - Кенешим. Буёл ваёд бере ветлод на историен но биологиен дышетӥсьёсыд доры. Ӧтёд соосты эштос коркам. Юалозы: малы? Шуод: атае тӥледыз репетиторе медъяны медэ, монэ ватсаса дышетон понна, со понна бадӟым уждун тыроз. - Валай, - шуиз Вова, паймыса... Ӵуказеяз Фроллэсь варматайзэ ватӥзы. Нырысь калык трос ӧй вал, нош музыка вуэм бере, быдэс гурт люкаськиз, машинаен вуттӥзы попез но. Адямиос паймизы: Фрол кышноез дорысь кошкем, нош сокем сюлмаське на кулэм варматаез сярысь. Кызьы озьы? Ватӥсьёслэсь одӥг вамышлы но кыльытэк, сьӧразы шып ветлӥз лайка. Фроллэн эштос корказ улыны лыктӥз Вова но. Нош Чимбик улӥз татын но, Фрося дорын но. Кузь кылзэ ошыса, отчы-татчы бызьылӥсь пуны шоры быдэс гурт калык паймыса учкылӥз. Калгиз-а кышноез, ӧз-а, сое тодон вылысь, Фрол, следовательёсты ӧз ӧтьылы. Со кутӥз но, турнанэн аран вискын отпуске потӥз. Гурт калык паймиз: малы? Фрол пу уг дася: варманаезлы но, кышноезлы но, аслыз но. Фрол - пизэ дышетэ. Со сярысь тросэз уг тодо но уг валало. Атай со уксёен пиезлы трос октӥськиз, нырысь - калькулятор гинэ, собере - компьютер, принтер, бадӟым готовальня. Пизэ дӥсяз-кутчаз. Басьяз энциклопедиос. Ӵош вуылӥзы театре но кинотеатре. Озьы ортчиз толэзь, табере Вова доры лыктоно ни вал математикая но ӟуч кылъя, но литературая дышетӥсь. Но луиз тани ма... Лайка ваиз Фросяез, кузь дэрем сӧзытӥз кыскыса. Фрол пумитаз таӵе кунозэ, пал кыл вератэк. - Мар-о, доре уд берытскиськы-а? - юаз Фрося. - Милемлы татын но урод ӧвӧл, - вазиз Фрол. Вова ошмес вулы кошкемын вал, со карнантэк гинэ кияз кутыса ву вайылӥз. Лайка кылле ӧс дорын, йырзэ ӝутыса. Кузёоссэ со кыксэс но туж яратэ. Но пуны нокызьы валаны уг быгаты, малы кузпалъёс нимазы улыны ӧдъязы. Соосын сэрен бызьылы табере солань-талань, шузи пуны сямен. - Фрол... - дӥсьтытэк вазиз Фрося. Собере куараез юнмаз. Мон ӧтисько тонэ. Тон уд берытскиськы бере, мыным кошконо-а мар-а? Кошко соку анае доры, аслэсьтым арбериосме нуыса. Коркаед буша. Мар-о, гурт калык азьын сереме усьыса, тӥ татын улоды, атай коркаед вань дыръя? Фрол лулӟиз гинэ. - Кытысь шедьтӥд сомында коньдон? Пиез сьӧраз ортчытӥд ни. Монэн вераськемез но уг поты. - Мон сое дышетӥсько. Дышето. Солэн йырыз ужа вылэм. Со визьмо вылэм, варматай кадь. Асьмемын, шузиосын, огпар ӧвӧл. Мед дышетскоз. Нош кытысь уксё? Со сярысь гожтэмын луыны кулэ варматаелэн тыныд кельтэм гожтэтаз. Фрося мур лулӟиз но ӧс пала вамыштӥз. Но лайка, интыысьтыз султыса, сокем зол куаразэ поттӥз, Фрося кышкаса, палэнэ тэтчоно луиз. Фрол но лулӟиз: - Чимбик, лэзь сое, мед бертоз... Пимы берытскиз ке, ӵошен кенешом, оло, доре но бертом... Тазалык Пеляд пон! Мынам пыэдэ дунтэмгес Пиналы пичигес дыръя врачез дорамы ӧти. Лыктӥз, учкиз, ОРЗ шуиз но оломар пӧртэм эмъюмъёс ӵектыны кутскиз: тани таӵе фирма таӵе эмъюм поттэ, котьмалэсь юрттэ, быдэссэ ке басьтэмды уг поты, кӧня ке капсулазэ но сёто. Туж дуно потӥз ке но, басьтӥ, умой ӧз поты. Мукетъят урод кӧламезлы ӝожтӥськи. Кутскиз ук нош Людмила Ивановнае оломар пӧртэм эмъюмъёссэ поттаны. Таиз турынлэсь конфет лэсьтэмын, таиз - эмезьлэсь сыскон. Мон шуисько, тӥ нылпи врач кадь ук, уд тодӥське-а куать толэзьем пиналъёс уг сыскисько на шуыса? Гордэктӥз, антигриппинлы рецепт сётӥз но кошкиз. Туннэ ке но уг ӟечбуръяськы на. Ӵок, со понна уг акыльты ни, пыэдэз но солэн дуно эмъюмъёсызтэк эмъяны дыши. Мукетыз учыр. Пыри аптекае. Азям сылӥсь кышномурт вузкарисьлы вазиське: - Пиналылы ӟырдамлэсь маке кулэ вал. Соиз "Панадол" поттӥз, медаз кыз, кизьны шуыса вӧзаз "Доктор Мал" но "Пиносол" но ӵектӥз. Сю манет тыр. Мон ӟырдамелэсь манет но кӧняен ке парацетамол, кызэмлэсь куинь манетэн мукалтин басьтӥ, бертыса сьӧд кушманлэсь вузэ чечыен суралтӥ. Оломалы со кышномуртлэсь ӧй юа: яке со эмъюмъёсты чик уг вала, яке кун сьӧрысьёссэ гинэ гажа, яке уксёез туж трос. Огласянь, умой, дыр, со - соин аптекаын ужась умой вераськиз, мыным "еще, еще... вить манет" гинэ шуиз. Кунгож сьӧрын лэсьтэм эмъюмъёсты курлан понна кылпум ӧй потты мон. Соос, зэмзэ но, синмаськымонэсь, кулэ документъёсын-маин. Но куддыр асьме эмъюмъёслэсь висъясько тусынызы но дунынызы гинэ. Соку малы уксё куянэз? Кылсярысь, 60 манетэн Аспирин УПСА-ез воштыны быгатэ манетъем ацетилсалициловой кислота (сое вуэн кизертыса юоно), панадолэз - парацетамол, баралгинэз - пенталгин, индометацинэз - ортофен, бромгексинэз - содаен термопсис, грудной элексир, солодколэн выжыезлэсь сироп, нышатырен анислэсь капли, альмагелез но маалоксэз - викаир, викалин, беллалгин, стрепсилсэз (ньылонэз эмъяны) - ингалипт, каметон, дуно супрадин, олиговит, дуовит, юникап поливитаминъёсты - компливит, ундевит, гексавит, декаливит... Огкылын вераса, асьтэос тодӥськоды, но врачты тӥледлы рецепт гожтыкуз эскере ай солэсь асьме аналогъёсты курыны - тӥ шоры учконэз но воштӥськоз (та мае но сое вала ук!), коньдондэс но шыръялоды. З. Рябинина. Ужа нылпиослэн парламентсы Нылпи парламентлэн сессиез ортчиз. Уг серекъяськы. Ваньмыз шонер. Удмурт Республикаын пиналъёслэн но депутатъёссы вань ни табере. Ньылетӥ арзэ ужало. Элькунысь Егитъёсын ужанъя кун комитет но нылпиослэн "Родники" дэменлыксы котькуд аре люкало шаерысьтымы усто дышетскисьёсты. Визьмооссэ, кыллы шаплыоссэ асьсэос ик дышетскисьёс быръё. Туэ покчи парламент ужаз "Дзержинец" лагерьын. Сессизы мытӥськиз республикамылэн валтӥсь залаз - Кун Кенешын. Покчи депутатъёс пумиськылӥзы Наукая, дышетонъя, культурая но егитъёсын ужан политикая ялан ужась комиссилэн кивалтӥсеныз А. Г. Красильниковен. Но пумиськонзы огшоры гинэ ӧй вал. Бадӟым эшъёссылэн кадь, зэмос сессия ортчытӥзы. Одӥг пӧртэмлыкез гинэ - таяз учыре республикамылэн гимнэз ӧз чузъяськы. Законъя ке учконо, парламентлэсь нырысетӥ кенешсэ самой мӧйы депутат усьтэ. Татын со вал Алексей Красильников. Соин ик нырысь вераськиз со. Кун Кенешлэн депутатэзлы таиз сессия туж шуныт потӥз. Та пумысен покчи эшъёсызлы но ивортытэк ӧз кыльы. Уго Кун Кенешлэн сессияз кичабонъёсты шер-шер гинэ кылод. Нош татын зал тыр чузъяськылӥзы. А. Г. Красильников ӵектӥз парламентлы тӧро бырйыны. Одӥг пумит но куать возиськисьёсты лыдэ басьтыса, тӧро луиз Дима Карнаухов. Со ик сессилэсь ужзэ но азьланьтӥз. Зэмос парламентын кадь регламент но кутӥзы. Пичиез "Волков" ассэ рос- прос возиз. Александр Александровичлэсь номырин ӧз висъяськы. Вӧзаз пукись Красильников гинэ куд-ог дыръя сессиез нуон пумысен тӧролэн пеляз валэктонъёс шыпыртылӥз. 60 пала покчи депутатъёс азе ньыль юан пуктэмын вал: нылпи парламентлэн быдэстоно ужпумъёсыз; Кун Кенеш кун властьлэн системаяз; дэменлыкъёслэн улонын интызы но пӧртэм ужпумъёс. Нырысетӥ юанъя вераськиз Надежда Веретенникова. Со тодматӥз нылпи парламентлэн уставеныз. Кыкетӥезъя кыл куриз Алексей Красильинков. кун Кенешлэн ужамез сярысь пӧртэм визьмо кылъёсын вераз. Тросэзлы дышетскисьёслы куд-ог кылъёс воксё валантэм вал, дыр. Бадӟым эшсылэн визьмо вераськемез бӧрсьы покчиос солы сыӵе ик визьмо юанъёс сётъязы. Кылсярысь, кызьы школаосын сюдозы начар семьяосысь пиналъёсты, кӧня гуртъёсын компьютер классъёссы ӧвӧл на, малы вуз-ёсын тросэз дышетскон интыос уксё тырыса луо но мукет. Куд-огезлы юанъёслы Алексей Геннадьевич валэктон сётыны ӧз быгаты. Юрттӥсьёсызлы тодыны косӥз. Куиньметӥ юанъя вераськиз Кун Кенешлэн Аппаратэзлэн общественно-политической анализъя отделэзлэн кивалтӥсез Л. П. Порцева. Вераськыны данакез мылкыд каризы. Покчиослэн малпанъёссэс но верамзы, трос тодэмзы но потэ вал. Но тӧро Д. Карнаухов регламентэз зол утиз. Собере юанъёсты но эскерыны вакчи дыр сётӥзы. Дышетскисьёслэн "бадӟым политикаен" шудэмзы шуныт мылкыд кельтӥз. Школа парта сьӧрысен ик соос шӧмъяло ни зэмос депутатъёслэсь улэмзэс. Но ог-огенызы ӵошатыса, нылпиослэн парламентсы пайдаёгес кадь. Нокыӵе ултӥянъёс, "сьӧдманъёс" ӧй вал. Бадӟым парламентъёслы учкем кароно, дыр, кызьы пичиос возисько, ужало. Сессилэн берпуметӥ юаназ покчи депутатъёсты тунсыко кузьым возьмаз. Котькудӥзлы Удмурт Республикалэсь Конституцизэ но кун тодметъёсын книга кузьмазы. Нылпи парламент рос-прос мед ужалоз но мед будоз шуыса, А. Г. Красильников соослы Кун Кенешлэсь ужан регламентсэ сётӥз на. Вуоно политикъёслы таӵе ужрадъёс но программаос зэмос школа луозы. Кин тодэ, нылпиослэн парламентысьтыз, оло, ваньмыз но зэмос депутат луозы на. А. АНДРИЯНОВ. Бумага витёз. Нош адями? Удмурт Республикаысь Юстицияя министерстволэн коллегиез ортчиз. Отын кылем арлы йылпумъянъёс лэсьтэмын. Юстицияя министр В. С. Осипов пусйиз, ортчем арын та удысын трос воштӥськонъёс вал шуыса: выльдэмын министерстволэн аппаратэз, юнматэмын выль кивалтӥсьёс. Соин ик министр ас докладаз бадӟым инты висъяз кадръёс бордын ужан ужпумъёслы. Верамын вал тырмымтэос сярысь но. Уно шекъёс шараямын приставъёслэн ужамзы пумысен. Кылсярысь, законъя присатвъёслы учкемын киязы вуэм бумагая куинь нунал куспын, уж борды кутскыны. Но ӵем дыръя озьы уг пӧрмы. Туж каллен ужало Селта, Яр районъёсысь но Ижевскысь Октябрь районысь приставъёс. Нош озьы правоез утись ёзъёслы калыклэн осконэз уг-а меда быры? Ӟечгес бергало Каракулино, Кизнер, Грахово, Можга ёросъёсысь приставъёс. Удмурт Республикаысь Юстицияя министерстволэн пресс-службаез. Журналистъёсын пумиськонъёс "Удмуртия президентэн улоз" Кызьы гожъям ни газетмылэн азьвыл номераз, Кун Кенешлэн Тӧроез Александр Волков журналистъёсын паськыт пумиськон ортычтӥз. Таӵе вераскьон арлэн кутсконаз нырысетӥез вал, соин но, дыр, часэн ӝыныен кыстӥськиз. АлександрАлександрович пыр-поч валэктон сётӥз котькуд юанлы. Нош соос трос гинэ люкаськемын: вуоно быръёнъёсъя но, референдумъя но, республикалэн экономикаезъя но музон ужпумъёсъя. - Александр Александрович, али пӧртэм вераськонъёс ветло Москваен, Владимир Путинэн "кезьытэсьгес" кусыпъёсмы сярысь. Кун Думае ортчем быръёнъёс бере зэмен-а Удмуртия ласянь солэн мылкыдыз воштӥськиз? - Мон озьы уг лыдъяськы. Кызьы верац ини, Москвае берлозэ ветлыкум мон пумиськылӥ солэн нырысетӥ воштӥсеныз Михаил Касьяновен. Ӝутэм ужпумъя огъя кылэ вуим. "Отечество" сярысь ке вераськон мынэ, та огазеяськон кинлэн ке косъяськонъёсызъя уг ужа, солэн аслаз программаез вань. Интыосын кылдэм ёзъёсы пырись адямиослы озьы ик котькудӥзлы эрик сёэмын кельшись кандидат яке политической блок понна куаразэ сётыны. Нялтас верало Юрий Лужков ласянь но. Россилы президент луон сярысь солэн малпанэз ӧвӧл. - Кызьы учкиськоды Россия Белоруссия огазеяськон шоры? - Туж умой. Соос борды ватсаськысал ке на Украина... Алигес Москваын мон пумиськылӥ Белоруссилэн посолэныз. Вераськон мынӥз Белоруссия Удмурт Республикалэсь делегацизэ ыстон пумысен. Асьмелэн вань ӵош ужан сярысь Огъя кылмы, со быдэсъяське, пайдаез но шӧдӥське. Мон гажасько белорус калыклэмь мылкыдзэ, тодон-валанзэ. Огъя вераса, та огазеяськон кутскон сётэ выль государстволы. - Удмуртия дасяське президентэн улыны. ма ӟечсэ со сётоз республикаез азинсконын, экономикаез юнматонын? - Мон учкисько та амалэ азьвылгес выжем улосвылъёс шоры, тодматским 13 республикалэн улон-вылонэныз. Огез но урод уг улы. Кужмо власть, азинскись промышленность, радлыкез утён - ваньмыз со потэ одӥг кузё бордысь. Нимысьтыз верало Карелия сярысь. Татын югдур музонгес - начаргес. Мон тае валэктӥсько одӥг гинэ муген - Правительстволэн Тӧроез но Президент татын - одӥг адями. Асьмелэн но сыӵе выллем дэмланъёс вал. Мон меӵак шуисько, та сюрес кузя асьмеос ум мынэ. Презиеднтэз но Правительствоез сураны уг яра. - Му вӧй поттонлэсь люкаськем коньдонлэн кыӵе люкетэз кыле республикалэн бюджетаз? - "Удмуртнефть" чотын шаермылэн казинояз вуэ 45 процентэз. Со умой ни. Пусъё на: экономикамы вылын одно ик шӧдӥськоз. - Александр Александрович, Удмуртия кыкетӥ арзэ курадӟе ни "Етӥн" целевой программаез Кыском-а татчы кунгож сьӧрысь инвестициосты? - Республикалэн социально-экономической азинсконаз "Етн" программалы нимысьтыз инты висъямын. Таяз арня вискын со ужпумъя бадӟым республиканской кенеш ортчытӥм, таӵе вераськон берлоез вал ог дасо арлэсь азьвыл, партия кивлатон вакытэ. Мон огзэ пусъё: етӥн будэтон республика понна пайдаен юерытскоз, экономика ласянь ке учконо, йӧл поттонлэсь со трослы дунтэмгес усе. Тодэ ваёно ке Удмуртилэсь историзэ, гурт удысын та культура улэ ог 60 процентэз гырон-кизён муос висъяськылӥзы, нош туннэ - 6 процент. Прдукцимес вань будэтэмзэ но вылӥ ӟечлыкозь вуттыны ум быгатӥське. Али вераськон мынэ ни етӥнэн ужанъя фабрика усьтон сярысь, мертчан куиськон шортлы мед тырмоз. Озьы ик нимысьтыз саклык висъялом пудо-живот куэз посонлы. Та ласянь адӟем карымон луэ Киров область. Шуба вуронъя отын куинь фабрика кылдытэмын ни, магазинъёссы котыр улосвылъёсын ужало, асьме дорын но. Удмуртия нош ик бере кыле. Кенешлын вераськон мынӥз удыс понна нимысьтыз адямиосты юнматон ласянь. - Пумиськонэз кутскыса, тӥ пусйиды, кылем ар Удмурт Республика понна оглом умой вал шуыса. Но со дыре ик шӧдскымон дунояз транспортын мынон-ветлон но мукетыз. Кызьы иае валэктоды? - Удмуртия бордысь ваньмыз уг поты, дунъёсты но одӥг нимаз басьтэм республикаын гинэ пачкатыса уд возьы. Ваньмыз герӟаськемын центрен. Дунъёсты но пуктэ Россилэн Президиумез. - мар вераны луоз "Восточный" совхоз ласянь? - Та юанэз сётыны кулэ Правительстволы. Малы кык-куинь толэзь ӵоже отын номыр уг лэсьтӥськы? Яке банкрот ялоно - та амалэн шуг-секытысь потыны капчигес ке, яке умой- умой юрттэт сётоно. Эскерон-чаклан ужъёс калык вылын ортчытъяны тырмоз ни. - Александр Александрович, тӥ оскиськоды-а, Удмуртия но президентэн улоз но ужалоз шуыса? - Оскисько. Л. МЕДВЕДЕВА. Чечняысь - Кам палъёсы Кавказ палась пегӟыса вуэм адямиослы малы ке юнгес ярам Каракулино ёрос. Алигес кӧня ке семьяос вуизы Чечняысь. Ёрос кенешлэн тӧроезлэн Э. А. Трефиловалэн верамезъя, соослы беженецслэсь статуссэс басьтэмзы бере коньдон висъяськыны кулэ, тужгес но секыт пыдкутчан но дӥськут ласянь. Соин ик чакламын калыклэсь мултэс арберизэ люкан радъяны. Али райсоветлэн президиумез куриськонъёсты эскере. В. ТАРАСОВ. Дано крезьгурчилы сӥзьыса Воткинсклэн администрациез, городысь историяя но культурая музей Восточно- Европейской университетэн ӵош пиналъёс но егитъёс пӧлын радъяло "Чайковскийлэн пинал дыр альбомез" адӟытон-конкурс. Озьы суредъёс пыр конкурсэ пыриськемъёс возьматыны кулэ П. И. Чайковскийлэсь узыр крезьгурзэ, солэсь улон но ужан сюрессэ. Ужъёсты быдэстыны луэ пӧртэм амалъёсты кутыса, озьы ик компьютер графикаез но. Конкурсэ пыриськыны быгато 5-ысен 17 аресозь. Выставка усьтӥськоз 7-тӥ мае, П. И. Чайковскийлэн вордскем нуналаз. Ужъёс возьамтӥськозы куинь интыын - историяя но культурая музейлэн выставкаос ортчытъян залаз, "Юбилейный" культура дворецын, П. И. Чайковскийлэн музей-усадьбаяз. Н. ПЕТРОВ. Татын "сяськаяське шыпыт" Воткинскысь историяя но культурая музейын усьтӥськиз городысь суредасьёслэн В. Сорокововлэн но Ф. Ведерниковлэн адӟытонзы. Нырысетӥез Воткинкскын кемалась улэ ни, кыкетӥез городэ алигес вуиз. Художникъёслэн ужъёссы ог-огзылы тупало, пуштроссыя но туж матынэсь. Выставказэс соос нималлям "Вдохновение" шуыса. Отын возьматӥсько инкуазь суредъёс, портретъёс. Н. СЕРГЕЕВ. Асьсэды асьсэос сюдо Унояз школаосын пиналъёсты ньӧмыз понна гинэ сюдылӥзы. Нош берло дыре дышетскон интыосын столовойёс трослы узырмизы. Тани Сарапул ёросысь Дулесово школаын сиськем понна толэзяз 25 манет гинэ тыроно. Яке нуназеям усе одӥг манет. Пиналъёс, оло, чылкак вунэто, бакча сиёнъёс но емышъёс асьсэ киосын будэтэмын шуыса. Азьло школалэн бакчаяз опытъёс гинэ ортчытъяло вал. Табере со бадӟым пайда сётэ ни. Вань бакча сиён но, потэ коньдон но. Лагуново школаын дышетскисьёслэн бакча сиёнзы но картофказы вузаны но кылиз на. Усть-Сарапулкаысь нылпиос 90 сюрс модос кубиста будэтӥзы но, сое вузаса, 3 сюрс манет барыш поттӥзы. Со сяна, бакчаязы мерттӥзы на емышо писпуос но узы-боры. - Ваньмыз сямен школаосын "Самообеспечение" программа быдэстэмын шуыны луоз, - шуэ ёросысь калыкез дышетонъя ёзлэн кивалтӥсез С. А. Зяпарова. Солэн верамезъя, пиналъёслэн но дышетӥсьёслэн бакчаын ужаса поттэм коньдонзы бадӟым пайда сётэ. Соин школаос уно арбериос басьтыны быгато, пӧртэм ужрадъёс ортчытъяло. Гуртысь дышетскисьёс, асьсэлэн бакчаязы ужам сяна, хозяйствоосын кенешыса, кушман будэтӥзы, эмъюмлы мынӥсь будосъёсты бичазы. Кылсярысь, Нечкиноысь пиналъёс куинь гектар вылын горд кушман будэтӥзы, Шевырьялово школаын дышетскисьёс 109 кило пушнер куасьтӥзы. Кигбаевоысь нылпиос скалъёсты но парсьёсты возьмазы. Юриноысь нылъёс хозяйстволэн куремезъя пӧзьы но халат вуризы. Ёросъёсысь гуртъёсты утялтӥзы экологияя отрядъёс. Тани Нечкиноысь Мария Заварзина гинэ 15 ошмесэз сузяз. Уральск школаысь пиналъёс быдэс гужем ӵоже эскеризы котырысь инкуазез кырсёмытон мугъёсты. Н. Карманов. Башкириысь удмуртъёслэн такмакъёссы Кутскоме ни, кутскоме ни Такмакъёсты кырӟаны. Кутскоме ни, кутскоме ни Та шудонэн шудыны. Машинаос ортчо, кошко. Малы тон уд пуксиськы? Мукетъёсыз вуно, быро. Малы тон уд вунӥськы? Машинае пуксиськод ке, Нуэ но нуэ вылэм. Пинал сюлме тыл ке пыре, Ӝуа но ӝуа вылэм. Бусы капкалэсь потӥм но, Погыраз но кылиз гой. Ум бӧлиське*, дыр, шуи вал Бӧлиським но кылим гой. Ӝужыт-ӝужыт гурезь йылэ Кыкнамы тубом али, Огмес-огмы яратыса, Огазьын улом али. Гурезь йылэ тубид-а но Чагыр сяська чигид-а, Со чигем чагыр сяська кадь Люкиськемдэ шӧдӥд-а? Машинае ӧй пуксьысал - Куаразэ яратӥсько. Мон тонэныд ӧй ветлысал, Кылыктэ** яратӥсько. Ӟичы ветлэ нюлэс кузя, Ческыт сиён утчаса. Пиос ветло гуртысь гуртэ, Чебер нылэз утчаса. Шиш тӥледлы кедра мульы, Музысь кӧмзэ утчалэ. Шиш тӥледлы Коньга нылъёс, Мукетъёссэ утчалэ. Тырмоз ини, тырмоз ини Такмакъёсты кырӟаны. Тырмоз ини, тырмоз ини Та шудонэн шудыны. ___________________ *Ум бӧлиське - ум люкиське. **Кылык - сям. Люказ А. НИКИТИН. Тазалык Юалэ - валэктом Ӟечбуресь "Удмурт дунне" газетын ужасьёс! Ар талэсь азьло гожъяды вал, Ижевскын ляб адӟисьёсты эмъянъя центр усьтӥськиз шуыса. Мон туж курадӟисько синъёсыным, операция но ӧз юртты. Синъёсы пумен кысо, газеттэс но лыдӟем потэ, олокызьы кариськод на. З. Брылова. Ижевск. Зэм но, та выллем ӟеч центръёс Россиын ӧвӧл ай. Асьме дорын со усьтӥськиз кылем арын. Отын ужало син эмъясь валтӥсь врачъёс. Ляб адӟонэз сяна, татын эмъяло мукет син висёнъёсты но: кыдёке адӟонэз (дальнозоркость), астичматизмез, син кырыжскемез но мукет. Маин висъяське центр мукетъёсызлэсь? Татын эмъяло туала выль амалъёсъя. Кылсярысь, компьютерен аутотренинг ортчыто; адӟон сӥез электроен ужато; буёлъёсты учкыса, кыдёкысь матэ адӟыны тыршыса, венен бышкыса эмъян но мукет. Синлэн арбериосты пӧртэм интыосысен матысен - кыдёке, кыдёкысен - матэ адӟыны шараяськымтэ быгатонлыкъёсыз (аккомодацилэн запасэз) вань ке, адӟонэз йӧнаклы тупатыны луэ. Кылсярысь, компьютерен 10 сеанс ортчытыса, синъёссы 1,0 лыдпусозь лэчытомо. Котькудӥз врач висисез котыр ласянь эскерыны тырше, малы ке шуоно, кыӵе ке мукет висёнэн йырин синъёс висё уго. Со сяна, тӥледлы татын тупась очки бырйыны юрттозы. Куд-огаз поликлинкаосын висисез рос-прос уг учко (отын компьютеръёссы но ӧвӧл), соин ик ӵемысь алдаськыса "миопия" диагноз пукто, тупасьтэм очки быръё. Бадӟым саклык висъяло центрын син висёнъёсты алонлы. Валэкто, кыӵе упражнениос, тренажёръёс, тазалыклы изъян вайытэк, синъёстэс умоятыны юрттозы. Но жаляса верано луиськом, Зинаида Кириллловна, центрамы бурмытонлы оскон ӧвӧл. "Солы умойгес луоз, операция лэсьтэм хирургез доры ик вазиськыса. Гожтэтэзъя валаны луэ, операция секытэн ортчемын", - шуиз центрлэн киватӥсез Людмила Конькова. Озьы ке но, ивортӥськом центрлэсь адрессэ: Ижевск город, Вормонлы 30 ар ульча, 9 номеро юрт. Врач доры шедён понна, гожтӥське азьло регистратураын 59-96-54 телефонъя. Центрын эскеро но эмъяло быдэс республикаысьтымы висисьёсты. Гожтӥськон-2000 Пумиськом Азаматын "Удмурт дунне" котьку тырше сётэм кылзэ возьыны. "Удмурт дунне" котьку тырше шара ужаны. "Удмурт дунне" котьку тырше калыклы матэгес луыны. Ми сӥзим вал газетмылы гожтӥськонэз тужгес но умой радъям ёрослы ӟеч кузьым. Табере дыр вуиз вераммес быдэстыны. Кызьы тодмо, азьло аръёсы сямен ик таяз учыре но азьпала потӥзы алнашъёс. Отын "Удмурт дуннелы" 1780 мурт гожтӥськиз. Кызьы табере соос пӧлысь шудозэ шедьтоно? Амал одӥг - лотерея. Кылем вторнике редакциын ужасьёс вуизы Алнаше, кылдытӥзы нимысьтыз комиссия, соос сяна, отчы пыризы ёросысь почта кусыпъёсъя гердлэн кивалтӥсез Владимир Сентябов, солэн воштӥсез Зоя Гурьянова, оператор Наталья Губкина, "Алнаш колхозник" газетын ужась Людмила Сурчакова. Дэмен кариськыса, районысь почта ёзъёсты округъёслы люким, котькудаз шорлыдын 150-200 гожтӥськисьмы мед шедёз шуыса тыршим. Лыдпусъёсын шаръёсты пуйые тырим но почтае пыремъёс пӧлысь одӥгзэ дорамы ӧтим. Кабинетэ кылиз егит воргорон. Алексей Афанасьев Ижын улэ, Алнаше ужъя вуэм. Солэн ки улаз шедиз 11 номеро шар. Учкиськом округъёсмес. Азамат но Чем-Куюк! Та гуртъёсысь почта ёзъёс пыр гожтӥськемын 182 мурт. Озьы тодмо луиз азьлане мынон сюресмы. Табере кыкетӥ вамыш лэсьтоно - газетмес та почтаос пыр басьтӥсьёс пӧлысь одӥгзэ быръёно. Кин со луоз? Кытчы кошкоз редакцилэн кузьымез - мотопомпа (тодӥсь муртъёслэн верамзыя, гуртын туж кулэ маке, соин вуэз кыскыны но, пызйыны но луэ)? Тазэ тодом ини ӝоген - 8-тӥ феврале 18 часэ Азаматысь культура юртын кутскоз "Удмурт дуннелэн" праздникез. Ваньмызлэн ик гожтӥськемъёсмылэн доставочной карточкаоссы (соос утисько почтаын) пуйые понэмын луозы. Школаын дышетскисьёс пӧлысь устоез (покчиос пӧлысь) поттоз шудозэ. Соку шараяськоз мотопомпалэн кузёез. Со сяна, шудытэмын луозы мукет кузьымъёс. Оскиськом, кыӵе ке приз малпалозы, вылды, гурт хозяйствоослэн кивалтӥсьёссы (шуом, мешок тысь яке пызь). Ужрадамы пыриськозы, дыр, Алнашысь ужбергатӥсьёс но. Сюрес но, ӧс но ваньмызлы усьтэмын. Уго макем тросгес эшъёс доразы пичильтык ке но кузьымен бертозы, сокем бадӟымгес луоз асьмелэн огъя шумпотонмы. Ӝытэз шулдыртозы гуртысь но райцентрысь артисъёс. Озьыен, пумиськом Азаматын? Бен! Ӵектонъёстэс витиськом 444-344 телефонъя. И. ЛЕБЕДЕВ. Суредась пальпотэ Суредазы Леонид Мельник, Вячеслав Шилов, Виктор Богорад. Валтӥсь суред Депутатъёс огзылэсь чебер мукетыз верасько, зарни гурезьёс сӥзё, нош Кун Думаын керетыса пуко но калыкез вунэто. (Газетъёсысь). Улонэз тазьы адӟе суредась Виктор Богорад. Тазалыкез утёнын вылез Эмъя шобрет Кин бен уг тоды вата шобретэз. Соин кӧланы шуныт. Нош Юкаменскысь "Урал" акционер огазеяськон (АО) эшшо азьлане вамыштӥз, ыж гон шобрет дасяны ӧдъяз. Маин бен со ӟеч? Ыж гонын но адямилэн йырсияз вань кератинэз. Со керӟегъяськон мылкыдлэсь (аллергилэсь) уте. Нош ыж гонысь ланолин ӝог бурмытэ яраосты, вандэм но лы чигиськем интыосты. Ыж гон ватсаса кужым сётэ, нылпиос ыж ку вылын пукыса, ӝоггес будо, висёнъёслы уг сётско, ичигес бӧрдэ. Нош мукет ласянь, ыж гон мускытлэсь 33 процентсэ бордаз кыске, огшоры басма (хлопок) - 8 процент, нош синтетика кабзэ уг басьты. Вылаз ик, ыж гонысь котэз ӝог тӧлӟе но шобрет котьку кӧс улэ. Соин ик таӵе шобрет улын кӧланы пайда гинэ сётэ. Со юрттэ кынмемлэсь, ты, лы висёнъёслэсь, радикулитлэсь. Ыж гон туж капчи. Отын 85 процент омырез но ватсаса шуныт сётэ. Тӥни сыӵе пайдаез ыж гон шобретлэн. Дуныз бадӟым ӧвӧл. Тел. 8-261-2-11-80, 2-13-89. Адресэз: Удмурт Республика, Юкаменск черкогурт, "Урал" акционер огазеяськон (АО). Адвокатлэн сэрегез Пенсие - дырызлэсь вазь Нылы ӧлексы (инвалид) вордскиз. Валля арын, 17 но ӝыны арес дыръяз - кулӥз. Быгатӥсько-а мон дырызлэсь вазь пенсие потыны? Л. ИВАНОВА. 1990-тӥ арын 20-тӥ ноябре кутэмын "Россия Федерациос сярысь" 340-1 номеро Закон. Отчы воштонъёс пыртэмын 1990-тӥ арын 17-тӥ июле. Законысь 11-тӥ ёзэт (статья) валэктэ: пенсие дырызлэсь вазь потыны быгато вить яке тросгес нылпи ваемъёс - тямыс аресозь вордэмъёс, озьы ик ӧлексы нылпизы тямыс аресозь вордэм анайёс - 50 арессэс тырмытэмъёс но ичизэ 15 ар ужамъёс. Кин кузёяськоз коркаен? Миым 17-тӥ апреле улӥз 1948-тӥ арын вордскем картэ Валерий Кузнецов. Соин улӥм 25 ар. Нылмы вань. Юртмы 1986-тӥ арысен картэ вылын вал, азьвылгес солэн анаез вылын. Тодмо луиз: юртъер картэ вылын, музъем - анаез вылын. Музъемъя документ гожтэмын 1992-тӥ арын. Технической инвентаризацияя бюрое 150 манет тыри ке но, районысь музъемъя комитет лэзьымтэен, юртъерез ас вылам гожтыны ӧй быгаты. 1928-тӥ арын вордскем анаймы пенсиын, мон - кыкетӥ группаен инвалид. Уз-а уллялэ монэ юртысьтым? Кызьы тыроно луоз налог? В. Кузнецова. Гожтэт кузь ке но, отын тросэз кулэ иворъёс шараямтэ. Озьыен, валэктон сётыны луоз огъя гинэ. Валентина Кузнецова но солэн картэзлэн анаез лыдъясько нырысетӥ черодысь кельтос басьтӥсьёс (наследникъёс). Валерий Кузнецовлэн завещаниез ӧвӧл ке, ваньбурлы соослэн кыксылэн ик правозы огкадь (Россия Федерациысь Граждан кодекслэн 532-тӥ ёзэтэз). Юртъер картты вылын луыса, 1992-тӥ арын музъемез солэн анаез вылэ гожтӥзы, дыр, таӵе муген: анайдылэн вал, вылды, юртлэн люкетэзлы яке музъемлы правоез. Тӥледлы кельтос (наследство) басьтон сярысь куронэн вазиськон улон интыдылы матысяз нотариальной конторае. Юртэз ас вылады гожтыкуды, тӥляд кылдоз со улысь музъемлы праводы. Соку тӥледды юртысьтыды судтэк нокин но улляны уз быгаты. Музъем понна выт (налог) тӥ тырыны кулэ вытъя инспекциысь вуэм бумагая, сомында, документъёсъя кӧня музъем лыдъяське тӥ вылын. Тӥлесьтыд правоостэс тӥян учыре судэ вазиськемды луоз. Зэм, со понна дун тыроно луоз. Ваньбур ласянь югдурдэс лыдэ басьтыса, суд быгатэ адямиез тыриськонлэсь мозмытыны, тыриськонзэ кулэстыны яке берлолы кельтыны. *** Адвокатэн рос-прос кенешыны луоз 25-33-70 телефон пыр. Тазалык Аръёс уз пересьмытэ Кыӵе луоз вуоно дауре медицина но фармацевтика? Шунды пуксён палась специалистъёслэн чакламзыя, медицина азьын кык валтӥсь ужпум сылоз: пыктосэз (ракез) эмъян но пересьмонэн нюръяськон. Кыӵе висёнъёс тужгес но трос адямиез быдтӥзы таиз даур пумын но кыӵеосыз кышкытлык кылдыто, выль даур кутскыку. Кулон учыръёслэн 10 ӵемгес пумиськылӥсь мугзы (1990-тӥ ар) 1.Шокан ёзъёсы инфекция сюрон. 2. Кӧтпуш инфекциос. 3. Шуген нуны ваён. 4. Мугорлэн висёнъёслы пумитъяськон кужымезлэн (иммунитетлэн) лябӟемез. 5. Сюлэм висёнъёс. 6. Инсульт. 7. Туберкулёз. 8. Пужы (корь). 9. Сюрес вылын шуккиськонъёс. 10. Выжыя паласькем висёнъёс. 2020-тӥ арын мар возьма 1. Сюлэм висёнъёс. 2. Мугор кужымлэн лябӟемез. 3. Сюрес вылын шуккиськонъёс. 4. Инсульт. 5. Ты висёнъёс. 6. Шокан ёъёсы инфекция сюрон. 7. Туберкулёз. 8. Ожын сӧсырмыса висёнъёс. 9. Кӧтпуш инфекциос. 10. СПИД. Америкаысь медикъёслэн та прогноззы юрттоз туала эмъюм поттон удыслэсь ужзэ радъяны. Огласянь, отын номыр секытэз ӧвӧл кадь: даур пумын эмъюм пыэдлэсь, тросгес поттӥзы ке, выль даур кутскыку потты сюлэм висёнъёслэсь. Но Европаысь пыктос висёнъёсты эскеронъя но эмъянъя институтысь Джуллано Ломбарто профессорлэн верамезъя, эмъюм поттӥсьёс лыдпус сьӧры уг уисько. Соос тросгес тыршозы висёнъёсты алон эмъюм поттыны. Но кызьы косод асьме кадьёсты тазалыкмы сярысь висеммылэсь азьло сюлмаськыны. Асьмеос дышемын уго врач доры яке аптекае мыныны пыд вылысьтымы погракумы гинэ. Со понна астэ ачид эскерон, приборъёс, тестъёс кылдытоно. Соку адями ӵемгес ачиз шоры учкылоз, матэктӥсь висёнэз шараяса, сое алыны быгатоз. Али дорын эскериськон тестъёс дасо пумо сяна уг лыдъясько на (тужгес тодмоосыз: секытомемез, ВИЧ- инфекциез, вирысь сахарлэсь кӧнязэ тодон но мукет). Но наука ог интыяз уг сылы. Али, кылсярысь, поттыны дасясько бадӟым вирзӥбетэн (давлениен) курадӟись муртъёслы клипсъёс, диабетэн висисьёслы часъёс но мукет. Клипс кузёезлы азьло ик вирзӥбетлэн тэтчаны дасяськемез сярысь ивортоз, нош часлэн пушказ одӥг нуналлы тырмымон инсулин поныны луэ. Со часысь ик будильник укол пуктон дырез возьматоз. "За рубежом". Воштӥсь бырйизы Валлян ортчиз Россиысь Кун Думалэн огъя кенешонэз. Депутатъёс азьланьтӥзы улӥ палаталы кивалтӥсь ёзъёс кылдытонэз. Соос возьматӥзы ӝог но валаса ужаны быгатэмзэс. Быдэс нуналлы чаклам ужпумъёсты 45 минут куспын эскеризы. Асьме понна шумпотымон соиз: Кун Думаысь национальностьёслэн ужъёссыя комитетлэн тӧроезлы воштӥсе быръемын Удмуртилэсь депутат Светлана Константиновна Смирнова. Со возьматэ, асьме егит адямилэсь быгатонлыксэ парламентъя эшъёсыз умой дунъяло шуыса. Ӟечкыласьком! Тодады вайытӥськом: кылем арняе мукетыз депутатмы Юрий Дмитриевич Маслюков быръемын вал Промышленностья, лэсьтӥськонъя но наука ласянь бадӟым юрттэтэз кулэ карись технологиосъя комитетлы кивалтӥсе. И.КРИЧЕВ. ШӦкыч Капыръясьлы сюрес одӥг Асьмеос но быдэс дуннеен ӵош выжим 2000-тӥ аре. Выжыны выжим, нош дуннелы тупась сюресэ кожыны ум дыртӥське. Ӵошатэлэ тани: мар луэ кунгож сьӧрын но кызьы кошке асьме шаерын. Няньын алмаз - лавкаын огназ Чагыр экранысь асьмеос ӵем адӟылӥськом Вунперталь городэз. Интыяськемын Германиын. Отысь нянь пыжись Генрих Миль кӧня ке газетэ сётӥз йӧспӧртэм ялон. Ыльняням, пе, уськытӥськем дуно алмазэн зундэсме. Кин шедьтӥз - берыктэ, со понна трос коньдон басьтоды. Мильлэн нянь пыжонниез (пекарняез) но магазинэз Вунпертальын тужгес даноез луиз. Тачакез адямиос басьяны кутскизы солэсь гинэ няньзэ. Но... Чаляк узырмем Миль эшезлы ушъяськытэк ӧз чида. Ялон сётыса маскаръяськи, пе. Та сярысь быдэс город тодӥз. Отын улӥсьёс огкылэ вуизы: алдаськисьлэсь няньзэ ум басьялэ. Солэн колдыосыз вузатэк вужмизы. Мильлэн магазиназ нокыӵе тунгон кулэ ӧвӧл - лушкаськись уз пыры из кадь турижез йырйыны. Ува ёросысь Удмурт Вишур гурт Германиысь Вунперталь город ӧвӧл. Озьы ке но, татын вань сиён-юонэн магазин. Тазэ уг возьмало телекамераос, электротунгонъёс но музон кескич макеос. Соин, вылды, лавка шоры синзэ уськытӥз азьвыл судэ шедьылэм воргорон. Уин ульчае огназ кылиз, ӧсэз бералтӥз но вузкаронние пыриз. Сюрс сю манет тыр ваньбурез капыртӥз. Мае, шуоды? Аракыез но сиён-юонэз. Тодмо ӧвӧл, сюриз-а воргоронлэн ки улаз вужмем туриж. Милициын ужасьёс тае ӧз ик юалэ. Соослэн сюлмаськонзы мукет. Кызьы та капыръясез чалякгес келяно судэ? Вить питранэн машина Одӥг питранэн велосипедэз синйылтэмды вань-а? Вазен сыӵе машинаен циркын тросэз ворттылӥзы. Дасо ар пала Ижын циркмы ӧвӧл ни бере, йӧспӧртэм велосипедэз но кемалась ни адӟылэм. Нош Америкаын соин арена вылтӥ гинэ уг ширъяло. Отын улӥсь В. Нильсон пал поглян вылын Америкаез ваменак ортчоно кариськиз. Со понна лэсьтытӥз кык но ӝыны метр ӝужда велосипед. Вашингтонысен Калифорниозь 5 сюрс 400 иськем. Та сюресэз Нильсон ортчиз 117 нуналскын. Америкаын котырак асфальт шуыса лыдэ басьтоно ке, солэн ӝоглыкез сокем бадӟым ӧвӧл кадь - нуналаз ог 50 иськем. Но эн вунэтэ: Нильсон ворттылӥз одӥг питрано велосипедэн. Кин тодэ, Глазовысь кибашлыос, оло, лэсьтыны выризы вить питранэн машина. Оло, малпазы соин Удмурт шаермес ваменак ортчыны. Соос пыразы "Созвездие" автокооперативысь огаз гараже. Кутӥзы вить поглян. Нялтас мултэс ӧз каре телевизорез, магнитофонэз, видеоплейерез но мукет арбериосты - ваньзэ 37 сюрс манет тыр. Кибашлыосты али милиция утча. Кин киын ивор... Кин киын ивор, со киын дунне. Озьы оскыто кадь компьютерен вырисьёс. Токиоысь университетын ужась профессор Кэн Сакамура дас витё ар талэсь азьвыл ик оскытъяз: - 2000-тӥ арозь ми сыӵе машина малпалом - тӥ ужысь бертытозь, со дасялоз ванна, шунтоз сиён, лэзёз телевизорез. Машинаен ворттылыкуды, тӥ уд чаклалэ светофорез. Автомобильысь компьютер горд тыл азьын зӥбоз тормозэз, вож тыл азьын - газэз. Со понна Токио дорысь Итихара улосын ми лэсьтом кызь одӥгетӥ даурлы тупась город. Вуиз 2000-тӥ ар. Кылдӥз-а Япониын выжыкыл город - туннэ тодмо ӧвӧл на. Тодмо мукетыз: Россиын но компьютер быдэсъя пӧртэм ужъёсты. Та чуръёсты со бичаз, газет баме интыяз, суредъёсын чеберъяз, "Удмурт дуннее" печатлаз. Зэм, лултэм машинаез кутыны луэ ӟеч но урод ужъёсы. Санкт-Петербургысь огез фирма быдэс дуннее ивор вӧлмытӥсь ёзнэтэн (системаен) кусып тупатӥз. Отчы со сётыны турттӥз Иж городын ваньбур поттон сярысь ивортонъёс. Ярам, вераськон мынысал ке сур яке сылал ву дасян пумысен. Нош петербургъёс вузаны выризы Россиез утёнэн герӟаськем иворъёсты. Ярам. Кышкытлыклэсь утиськонъя служба та ужрадэз куспетӥ кариз. *** Улон взьматэ: куд-огез умойтэм ужасьёс кырсь малпанзэс улонэ пыӵатыны уг вуо - пезьдэт басьто. Мукетъёсыз йыртэмало ке но, кыл кутонлэсь мозмыны быгато. Озьы ке но, мыдланьяськон азяз котькудӥз эшшо огпол мед малпасал на: нош сюриз ке? Соку вить питрано машина но уз вутты Америкае. Соку сюрес одӥг - ворсам автомобилен - пытсэт сьӧры. А. СИДОРОВ. Тазалык Эн "кизьнэ" кизьнонды вылэ Эпидемиологъёс верамъя, ӵапак та нуналъёсы грипп тужгес тросэн вӧлмоз. Луэ-а солэсь утиськыны? Вакцина пуктыны бер ни. Мар карын луоз на туннэ? Нырысь ик, тырше трос калыко интыосы потатэк. Грипп палаське уго кизьныку, кызыку, висись адямиосын вераськыку. Городъёсын утиськыны шуггес - транспортын пыэд медаз паласькы шуыса, адями уже ветлытэк, магазинэ потатэк уз улы. Соин ик та вакытлы тыршоно мугорлэсь висёнъёслы пумитъяськись кужымзэ (иммунитетсэ) ӝутыны. Ӵем висьылӥсь муртъёслы одно ик "Гексавит", "Ревит", "Декаливит", "Ундевит" но мукет поливитаминъёс юоно. Тазалыкез утьыны юртто элеутерококклэн, аралилэн но женьшеньлэн настойёссы. Грипп тросэн вӧлмыку, тужгес эскериськыны кулэ нылпиос, арлыдо адямиос, больницаын, магазинын, транспортын ужасьёс. Вируслы пумитъяськыны умой луэ ремантадин, арбидол, оксолин мазь, гаммаглобулин. Но та эмъюмъёсты юоно врач чаклам улсын. Та вакытэ уката ӟеч сиськыны (емыш, сугон, чеснок, мукет бакча сиёнъёс), физкультураен вырыны, юзмыт вуэн пыласькыны кулэ. Висёндэс алэмды ӧз ик луы ке (йырды висе, ӟырдаськоды, кызӥськоды, кизьнӥськоды, быдэс вылтырды висе), ӧтё врачез. Висьыны кутскемды бере ик эмъяськыны кутскиды ке, осложнениослэсь утиськоды. Мугорысьтыды токсинъёсты поттон понна, тросгес пӧсь чай, йӧл, минерал ву юэ. Грипплэсь эмъюм дасяны луоз гуртын но: тӧдьысяськаез, беризь сяськаез, виртурынэз, легезь мульыез, сьӧд палэзез, кызьпу, сутэр, узы куарез 1,5 пуньы басьтыса 1,5 стакан быректэм вуэн паре, 20 минут ӵоже шобыръяса возе, собере ляб тыл вылын 5 минут пӧзьтэ. Юоно чечыен сураса пӧсь дыръяз ик пичиен ӟузьылыса. Та парос ӟырдамлэсь но юрттэ. Кызонэз капчиятыны луоз лимон сокен. Со понна 1 лимонэз 10 минут ӵоже ляб тыл вылын пӧзьтэ. Ватсалэ 2 пуньы глицерин но чечы. Туж ческыт сироп пӧрмоз. Юоно 1 пуньыен нуналаз 3 пол арня ӵоже. Грипп дыръя ӧжыт ӟырдало ке, соку ик аспирин юыны тыршо. Эн дыртэ. Бадӟым температуралэсь вирус кышка. Сое уськытоно градусникысь узвесь 39 градуслэсь тросгес возьматӥз ке гинэ. Йыр висемлэсь юэ цитрамон, анальгин. 5-7 нунал ӵоже висёнды уг лэзьы ке, выльысь вазиське врачлы. Р. Кустарников, Республикаысьтымы инфекциосты эмъянъя валтӥсь врач. Кыӵе гинэ нимъёс уг малпало асьсэлы кырӟаны-эктыны яратӥсьёс. Тани Шаркан ёросысь Кельдыш гуртын ансамбльзэс нимазы "Жильыртӥсь ошмес". Сыӵе ик чебересь кырӟанъёс быръё, ас куараосынызы котыр гуртъёсыз шулдырто. В. КАМАШЕВЛЭН туспуктэмез. Юрттӥсьёс вуизы - ӧтчам ӧз люкаськы Кун Кенешысь "Единство" фракцилэн кивалтӥсьёсыз пумиськизы журналистъёсын. Татчы озьы ик ветлӥзы Россиысь Кун Думалэн депутатъёсыз Владимир Коптев-Дворников но Абдул-Вахед Ниязов. Та нуналэ угось ортчыны кулэ вал шаерысьтымы "Единстволэн" ӧтчмез. Но со ӧз луы. Малы ке шуоно, "Единстволэн" интыысь ёзъёсызлы бадӟым эрик сётӥське Озьы бере, трос дыр кулэ выль устав дасянлы но Юстицияя министерствоын пусйиськонлы. Люкаськемъёслы со сярысь ивортӥзы Кун Кенешысь "Единство" фракцилэн но Ижысь люкетэзлэн кивалтӥсьёссы Виктор Хорошавцев но Сергей Беркутов. Владимир Коптев-Дорниковез "Единство" движение куриз асьме республикаысь "Единстволы" юрттыны, Абдул-Вахед Ниязовез - Башкортостанэ. Г. РОМАНОВ. Юнгес чаклаське Та нуналъёсы Чечняын ожмаськон ялан пуроме. Валамон ини, боевикъёслэн сётскемзы уг поты, соос лекомемын. Шӧдо уго, ӝоген войналы пум вуоз шуыса. Соин валче кышкытлык кылдэ: чечен боевикъёс йыркурзэс кырсь ужъёсын возьматыны тыршозы. Та дыре Удмурт Республикаысь Граждан оборона ужпумъёсъя но кышкыт учыръёслэсь утиськонъя комитет калык пӧлын бадӟым валэктон уж нуэ. Калыклы косэмын "Удмурт Республикаын терроризм но соин нюръяськон амалъёс сярысь" постановлениез юн быдэсъяны. Эскерисько корка сигъёс, гулбечъёс, юн чакласа возёно уно калык люкаськон интыосты - школаосты, дышетскон но культура юртъёсты, мукет интыосты. Б. НИКИТИН. Вить чиньы кадь Анаймылэн шумпотонэз но шудэз - нылпиосыз. Вить пинал вордӥзы но будэтӥзы Евгения Георгиевна но Константин Степанович Степановъёс: куинь пи но кык ныл. Алнаш ёросысь Усо (Муважи) школаез йылпумъяса, котькудӥз аслэсьтыз шудзэ утчаны кошкиз. Анаймы милемыз весь дышетскыны косӥз. Пичиысен ик ужез яратыны дышетӥз. Котькуд адямилы ӟеч, лякыт луыны кулэ, шуылӥз. Школаын котькудмы "ньыльлы" но "витьлы" дышетским. Отӥяз вамыштӥмы асьмелэн быръем сюрестӥмы. Анаймылэн бадӟым пиез, Виталий, йылпумъяз Челябинскысь Вылӥ танковой командной училищеез. Офицер луиз. Службазэ ортчытӥз Белоруссиын, Германиын. Подполковникозь будӥз. Али Якшур-Бодьялан военком луыса ужа. Виталий Константиновичлэн быгатыса ужамез пусъемын медальёсын. Будэ кык пиез. Оло, соос но атайзылэн лёгем сюрестӥз мынозы? Кыкетӥ пиез, Лёня, йылпумъяз Ижысь гурт улонъя институтысь зооинженерной факультетэз. Дышетсконзэ йылпумъяса берытскиз вордскем гуртаз. "Кама" колхозын ужаз валтӥсь зоотехник луыса. Зэм, калыкезлы котьку капчияк вазиськись, визьмо, кужмо, йыг-йыг удмурт воргоронлы кема улыны ӧз кылды. 1995-тӥ арын секыт кайгу вуиз семьяямы - анаймы ыштӥз кыкетӥ пизэ. Нош колхоз, ёрос ыштӥзы яркыт пиштӥсь кизилизэс. Лёня агае та дунне вылэ кельтӥз кузпалзэ, анайзэ, кык пизэ но нылзэ, аслэсьтыз сайкытэсь малпанъёссэ. Газет пыр туннэ тау карон кылъёсмес вераммы потэ колхоз кивалтӥсьёслы, гуртысь калыкмылы со секыт вакытэ юрттэмзы понна. Бадӟым агаезлэн сюрестӥз ик мынэмез потэ вал Володя вынызлэн но. Малпа вал офицер луыны - Рязаньысь Вылӥ десантной училищее пырыны. Но Яр педучилищеез йылпумъяса удалтӥз службазэ Витебскысь воздушно-десантной дивизиын нуыны. Малпаськылӥз милициын ужан сярысь но. Йылпумъяз Елабугаысь школаез. Али улэ Ижевскын. Милициысь старшой лейтенант. Вуылӥз ини Чечняе но. Кузпалэныз ӵошен будэто одӥг пи. Евгения Георгиевналэн Лена нылызлэн артист луон мылкыдыз ноку ӧз кысылы. Нош дышетскиз Удмурт кун университетысь удмурт кылтодонъя факультетлэн удмурт люкетаз. Дэри (Завьял) ёросысь Подшивалово школаын ужаса, Иже вуиз. Бызиз, ныл но пи вордӥз. Али ужа "Удмурт кенеш" огазеяськонын секретарь-референт луыса. Туж яратэ удмурт калыксэ. Удмурт кылызлэсь палэнын туж мӧзме. Нош ас шаерзэ яратэмез но гажамез туннэ туж юрттэ солы. Нылпиосыз но чылкыт верасько кык кылын ик: удмурт но ӟуч. Со понна кыӵе шумпото песянайёссы! Анаймылэн берлоез нылпиез, Лида (табере - Лидия Константиновна) - пинь эмъясь. Улэ но ужа Якшур-Бодья ёросысь Порва гуртын. Будо нылыз но пиез. Туж шулдыр кырӟа сузэрмы. Ваньмон дыръяз, кияз арганзэ кутыса, шулдыр яке ӝожмыт гуръёссэ мытэ. "Котькинэ ӵошатӥсько, - шуэ, - асьме палась калыкен. Татын адямиос алнашъёс кадесь ӧвӧл". Бен, ми ваньмы ик яратӥськом кырӟаны-вераны, эктыны, шулдыръяськыны. Табере милям асьмелэн но нылпиосмы будо ини. Тынэсьтыд адӟем карыса будэтыны тыршиськом, анай. Бен, улонад котькыӵе дырыд вал ини! Одӥг вакытэ куиньнамы ӵош дышетскыны тупамы. Кыӵе секыт вал соку анай-атайлы милемыз дышетыны! Озьы ке но, дышетсконмес ӧм аналтэ. "Келяськыса но пумитаса, гумыре-дауре ортче ини", - шуылэ анаймы. Гуртын ум улӥське бере, туж мӧзме милесьтым. "Тани вить чиньые. Куртчисько ке, витез ик вӧсь луэ, - шуэ . - Озьы ик котькуддылэсь мӧзмисько пӧртэм сямен". Ми тонэ, анай, туж яратӥськом, гажаськом. Тыныд эшшо кема аръёслы тазалык но шудбур куриськом но сӥзиськом. Туж гажаса но яратыса - Лена нылыд, Елена Александрова. Аслэсьтыд кылдэ яратытэк Дас ар талэсь азьло кутэмын вал Удмурт Республикаысь национальной образованиез азинтонъя концепция. Мар лэсьтэмын та дыр ӵоже? Со сярысь Калыкез дышетонъя министерстволэн коллегиезлэн кенешаз вераз министрлэн воштӥсез Галина Васильева: - Та дыр ӵоже уката бадӟым саклык висъямын вал национальной школаос, нылпи садъёс усьтонлы. Али шаерамы 421 удмурт, 27 бигер, 10 пор школа. 30 удмурт класс усьтэмын Ижевскысь школаосын, кылдӥз Куӟебай Герд нимо удмурт гимназия, бигер национальной гимназия, "Шунды" удмурт нылпи сад. Со сяна эшшо 344 нылпи садын удмурт пиналъёс дышето анай кылзэс, тодматско культураен но искусствоен. Ижевскысь школаосын удмурт кылэз дышетэм пиналъёс со сярысь документ басьтӥзы ни. 18 процентэз пиналъёс выпускной сочинение анай кылынызы гожто. Алнаш но Кияса ёросысь нылпиослэн удмурт кылын гожтэм сочинениоссы кылем арын зарни медален пусъемын. Калыкез дышетонъя министерстволэн кичӧлтэмезъя университетын кылдытэмын нимысьтыз удмурт филологияя факультет. Вань мукет гуманитарной факультетъёсын но дышето удмурт культуралэсь историзэ. Ортчытъясько удмурт кылъя дышетӥсьёс но методистъёс понна научно-практической конференциос, кылдытъясько выль дышетон программаос... Концепция пумысен малпанъёссэс веразы ёросъёсысь администрациослэн но роноослэн кивалтӥсьёссы. Куд-огез чутрак пумит луо концепциысь "удмурт кылэн ваньмызлы тодматскыны кулэ" но со выллем веранъёслы, удмурт кылэз дышетӥсьёслы квотаос сётонлы но мукет. Вордскем кыллы дышетонэз культураен, мукет удысъёсын валче азинтоно, пе. Но со дыре ик ӵекто удмурт телепередачаосты, книга поттонэз кулэстыны. Интыяз, пе, кун сьӧрын потэмъёссэ берыкъяно. Жаль, пумитазы рос-прос валэктон сётыны асьмеос туннэ но ӧвӧл дышиськеммы на. Алнашъёс, шарканъёс гинэ шат. Соослэн нылпи садъёсазы ваньмыз пиналъёс удмурт кылэн тодматско. Одӥг бигер яке армян анай но ӧз юалэ на малы со кулэ шуыса. Концепциен рос-прос тодматскыны мынам луонлыке ӧй вал. Но огъя туж кельшиз. Программалэн авторез Зоя Суворова пиналэз дышетскись интыын гинэ уг адӟы - котькудӥзлэсь семьяеныз кусыпсэ, но азьпал улонзэ чакласа, солэсь психологизэ эскерыса, умойзэ гинэ сӥзьыса дышетыны ӵектэ. Одӥг гинэ ӵектонэ кылдӥз - концепциын чакламтэ вордскем кыллы дышетонын иворъёсты вӧлмытон ёзъёслэсь луонлыкъёссэс уже кутонэз. Ӵапак со ужез ик быдэсъяськом ук ми но нуналлы быдэ. З. Рябинина. Правительствоысь иворъёс Россия - Удмуртилы Правительство ужа федеральной ведомствоослэсь республикаысьтымы предприятиослы пунэм тыронъёссэс ӝоггес берыктон бордын. 1162 миллиард манет люкаськемын ини соос. Предприятиослы та коньдонэз берыктон республикалэн бюджетаз пыртоз 260 миллион манет. Сак луод - дыраз палэнтод Правительстволэн Тӧроез Николай Ганза кылем арня вискын кенеш ортчытӥз городъёсысь но ёросъёсысь администрациослэн кивалтӥсьёсыныз. Со сӥземын вал Правительстволэсь терроризмез алонъя ужрадъёс сярысь постановленизэ кызьы быдэсъямез эскеронлы. Кызьы пусйиз Николай Ганза, та документын чаклам ужрадъёс тросэз кулэезъя уг быдэсъясько, уката ик, улон юртъёсты утёнэн герӟаськемъёсыз. Уно тырмымтэос шараямын Сарапул, Воткинск городъёслэн но Можга ёрос администрациослэн ужазы. Ляб куронъёс пуктэмын школаослэн, больницаослэн, культурая учреждениослэн кивалтӥсьёссы азе. Тырмыт саклык уг висъяськы подвалъёсты, сигъёсты, машинаос дугдылон интыосты эскеронлы. Правительстволэсь терроризмез алонъя постановлениезлэсь кызьы быдэсъяськемзэ та нуналъёсы эскероз республикаысь прокуратура. Коньдон вуоз Москваысь Правительстволэн Тӧроез Николай Ганза тупанкыл гожтӥз Россиысь Коньдон ужпумъёсъя министерствоен. Та документын бадӟым инты висъямын бюджет удысын тыршисьёслы уждун тыронэз радъянлы. Быдэс республикая пунэм тыронъёс 165 миллион манет люкаськизы ни. Пумиськон дыръя огкылэ вуэмын Москваысь 100 миллион манет ссуда басьтон пумысен. Со пӧлысь ӝыныез январе ик вуыны кулэ, нош кылемез - нырысетӥ кварталэ. Нош республикалэн бюджетысьтыз та удыслы кошкоз вытъёс чотын вуэм коньдонлэн ньыльдон процентэз. Удмурт Республикаысь Правительстволэн пресс-службаез. Россия Федерацилы Президент быръён азьын ӝуткан материалъёсты "Удмурт дунне" газетын дунын печатлан сярысь "Удмурт дунне" газетлэн редакциез ивортэ: быръён азьын материалъёсты печатланы таӵе дун тупатоно - одӥг квадратной сантиметрез понна - 15 манет; телепрограммаен номерын - 25 манет; нырысетӥ баме печатлам понна - 25 манет. Юалляськыны луоз 21-63-75 но 44-43-44 телефонъёсъя. Владимир Путинлэсь тау карон "Удмуртторф", "Формация" кун предприятиослэн, акциосын "Удмуртнефть", "Удмуртская нефтяная компания", "Удмуртнефтебурение", "Удмуртагроснаб", "Удмуртия", "Ижмолоко" огазеяськонъёслэн кивалтӥсьёссылы тау карон гожтэтъёс вуизы Россия Федерацилэн Президентэзлэсь ужзэ быдэсъясьлэсь, Россия Федерациысь Правительстволэн Тӧроезлэсь В. В. Путинлэсь. Гожтэтъёсын со тау каремзэ вера та коллективъёслы секыт югдурын но пайдаё, вылӥ азинсконъёсын ужамзы, страналэсь казназэ "улэп" коньдонэн тырмытыны юрттэмзы понна. "Выль дауре вамыштыны дасяськыса, - верамын гожтэтын, - асьмеос оскыса учкиськом азьпал улонмы шоры, адӟиськом Россиез сяськаясь, узыр государствоен. Оскисько, Тӥляд коллективъёсты юрттыса, Родинамы дуннеысь азинскем странаос пӧлын дано интызэ шедьтоз шуыса". Удмурт Республикаысь Правительстволэн пресс-службаез. Юалэ - валэктом Лыдӟисьёслэн юанъёссылы валэкто Калыкез улон-вылонын утёнъя министерствоысь валтӥсь специалистъёс Кыӵе дырысен сётӥське нылпи пособие? - Ёросысьтымы райсобесын милемлы валэктӥзы, нылпи пособие тыриське документъёс сётэм дырысен. Ми со сярысь ӧм тодылэ, валэктӥсь но ӧй вал. Нылпиосмы вордӥськизы 1998-тӥ арын мае, нош документъёсмес сётӥмы - 1999-тӥ арын сентябре. Нылпи пособие милемлы сётӥськоз, пе, 1999-тӥ арын март толэзьысен гинэ. Шонер-а со? Кизнер ёросысь Вылӥ Бемыж гуртысь анайёс. - Россия Федерацилэн "Нылпи гражданъёслы кун пособиос тырон сярысь" законэзлэн 17-тӥ статьяезъя (1995-тӥ ар, 19-тӥ май, � 81) толэзьлы быдэ сётыны чаклам нылпи пособие тыриськыны кулэ пинал вордӥськем толэзьысен, 6 толэзьлэсь бер вазиськымтэ ке. Пиналлэн вордскем толэзьысеныз 6 толэзь ортчемын ни ке, пособие тыриське вазиськем толэзьысен 6 ортчем толэзьёслы гинэ. Та анайёс калыкез улон-вылонын утён ёзъёсы вазиськемын бере 1999-тӥ арын сентябрь толэзе гинэ, нылпи пособие тырыны соослы чакламын 1999-тӥ арын 1-тӥ мартысен, - вазиськем толэзьысен 6 ортчем толэзьёс понна. Л. Ившина, пособиосты тыронэз радъян ёзлэн кивалтӥсез. - Басьтыны быгато-а дунтэк пу? Мон Быдӟым Отечественной войнаысь кыкетӥ группаен инвалид. Сётӥськыны кулэ-а мыным дунтэк пу? Кытчы вазиськоно со понна? И. Зверев. Завьялово ёрос. - Россия Федерацилэн "Ветеранъёс сярысь" законэзлэн 14-тӥ статьяезъя, калыклы вузаны тупатэм нормаез чакласа, Быдӟым Отечественной войнаысь инвалидъёслы эстӥськон пу ӝыны дунын сётӥсьыны кулэ (50 процентлы дунтэматыса), озьы ик ӝыны дун тырыны кулэ пуэз вайыны висъям транспортлы. Дунтэмен эстӥськон пул басьтон пумысен вань юанъёсын вазиськоно улон интыысь сельсоветлэн администрацияз яке ёрос администрациысь калыкез улон-вылонын утён отделэ. И. Доровских, ветеранъёсын но арлыдоосын ужан ёзлэн валтӥсь специалистэз. Пенсилэн быдӟалаез пумысен - Нырысетӥ группаысь инвалидлэн кӧня луыны кулэ пенсиезлэн быдӟалаез? Кӧня манет коньдон тыриське нырысетӥ группаысь инвалидэз утялтэм понна? Г. Бусыгин. Алнаш ёрос. - 1995-тӥ арысен мон кыкетӥ группаысь инвалид. Пенсия тыро, огъя уждунме лыдэ басьтыса (25 ар стаже). Кылэме вань, нырысетӥ но кыкетӥ группаысь инвалидъёслы пенсия тыриське огъя уждунзылэн 75 процентэз мында, стаж шоры учкытэк. - Россия Федерацилэн "Россия Федерацилы кун пенсиос сярысь" законэзлэн 31-тӥ статьяезъя (1990-тӥ ар, 20-тӥ ноябрь, � 340-1) огъя висёнъёсын, шуккиськыса яке ужын басьтэм висёнэн йырин нырысетӥ но кыкетӥ группаысь инвалидъёслы пенсия тыриське уждунзылэн 75 процентэз мында. Инвалидъёслы, озьы ик арлыдъя пенсие потэмъёслы тупатэмын "потолок" (пенсилэн быдӟалаез ятырзэ уг буды), со ӵоша арлыдъя куинь тужгес пичи пенсилэн быдӟалаезлы. Огъя висёнъёсын нырысетӥ но кыкетӥ группаысь инвалидъёслэсь пенсизылэсь быдӟалазэ эскерыку, выль Законъя 1998-тӥ арын 1-тӥ февральысен лыдэ басьтӥське пенсионерлэн нимаз коэффициентэз. Со законъя, одӥг мында ужам стаж дыръя инвалидъёслэн пенсизылэн быдӟалаез арлыдъя сётӥськись пенсилэсь бадӟым луыны кулэ ӧвӧл. Нырысетӥ группаысь инвалидэз утялтэм понна 1999-тӥ арын 1-тӥ ноябрьысен сётӥське 124 манет 69 копейка - арлыдъя тужгес пичи быдӟалаез мында. - Мон пичи дырысен куинетӥ группаысь инвалид. Арлыдъя пенсие потыса, инвалид луэмысьтым пенсия сётэмысь дугдӥзы. Райсобесын шуизы, кык пенсия уг, пе, сётӥськы. Шонер-а лэсьтӥзы? А. Рожина. Грах ёос. - Россия Федерацилэн "Россия Федерациын кун пенсиос сярысь" законэзлэн 5-тӥ статьяезъя (1990-тӥ ар, 20-тӥ ноябрь, � 340-1) огвакытэ кык пенсия басьтыны быгатӥсь гражданъёслы сётӥськыны кулэ кудӥз ке одӥгез пенсия, адямилэн ас мылкыд каремезъя. Пенсионеръёслы пайдаёгес луэ арлыдъя пенсиез басьтыны. С. Адаева, пенсиосты тыронэз радъян ёзлэн кивалтӥсез. Удмурт Республикаысь Кун Кенеш, Правительство кайгыро Удмурт Республикаысь калык артист Вахрушев Николай Дмитриевич улонысь дырызлэсь вазь кошкемен валче но ӵыжы-выжыосызлы, матысь адямиосызлы мур куректэмзэс верало. Куное ветлӥз юрттон вылысь Грах ёросэ алигес вуылӥз республикаысьтымы лэсьтӥськонъя, архитектурая но жилищно- коммунальной хозяйствоя министр В. Ф. Загайнов. Ёросысь администрация сое ӧтьылӥз но ӵош кенешиз Лолошур-Возжи шор ёзо школаез но Ашальчи Оки нимо музей лэсьтонэз йылпумъян сярысь. Лэсьтӥськон удысъя кивалтӥсь озьы ик вуылӥз Бадӟым Ерыкса пор гуртэ. Отысь вуттымтэ административной юртэз чаклало мари культура центрлы пӧрмытыны. Юртэз туэ гужемлы, Семык пор праздниклы вуттыны малпало. П. Николаев. Лыдӟисьлэн малпанэз Куатаськись пиналъёс кадесь Куинетӥзэ быръем Кун Думалэсь нырысетӥ нуналаз ужамзэ телевизор пыр возьматэмез пумозяз учкыны кариськи. Нырысь-валысь малпан кылдӥз вал, таяз учыре депутатъёс азьвыл янгышъёссэс валалозы но уж борды умой-умой кутскозы шуыса. Но озьы ӧз луы. Кун Думалы тӧрое ӵектэмын вал ньыль кандидат. Соос пӧлысь куинез асьсэлэсь кандидатуразэс куштӥзы. Таиз ини чик валантэм: малы соос сыӵе вамыш лэсьтӥзы. Кылиз огназ Геннадий Селезнев. Нырысетӥосыз кандидатъёс валазы, дыр, тырмыт куара люканы уз быгатэ шуыса. Мынам сыӵе малпанэ. Куинь фракциысь ("Отечество", СПС, "Яблоко") депутатъёс, куатаськись пиналъёс сямен, султӥзы но залысь потӥзы, Кун Думалы тӧро быръёнэ ӧз пыриське ни. Озьы ик лэсьтӥзы "Российские регионы" группае пырись депутатъёс. Нялтас вераны кулэ на: талэсь азьлояз но быръем Думаын "яблочникъёс" ӵем куатаськылӥзы, али но сямзылэсь ӧз куштӥське. Таин валче тодам лыктӥз на НТВ-ысь Евгений Киселевлэн 23 январе потэм "Итоги" программаяз верамез. Со шуиз, куинь фракциос, пе, палэнтэмын вал пӧртэм комитетъёс кылдытонэ пыриськонлэсь. Таиз ини чылкак валантэм. Соосты нокин но залысь ӧз улля ук, асьсэос кошкизы. Сыӵе урод мылкыд кельтӥз Россиысь Кун Думалэн ужаны кутскемез. Г. ВАХРУШЕВ, Ижевскын улӥсь. "Можгасыр" юрттыны дась Со сярысь Алнаш ёросысь колхозъёслэн тӧроссылы ивортӥз "Можгасыр" АО-лэн валтӥсь директорез С. Н. Абрамов. Али котькытын гырон-кизёнлы дасясько. Техникалы воштос ёзъёс, эстӥськон октыны кулэ. Но ваньмызлэн уксёез уг тырмы. Алнашъёслы тулыс бусы ужъёсты радъяны "Можгасыр" 860 сюрс манет пала висъяны дась. Сётӥськоз со колхозъёслэн вуоно йӧлзэс акциосын огазеяськонлы вузан чотын. А. Андриянов. Бюджетэз кутозы Алнаш ёрослэн бюджетэз кутымтэ на. Та вакытэ сое ёрос Кенешлэн комиссиосыз эскеро. Депутатъёс котькудӥз ёзэтъя рос-прос ужало, кенешо. Одӥгзэ статьяез кулэсто, мукетсэ будэто. Валтӥсь коньдон документъёссэс Алнаш ёросысь депутатъёс 9- тӥ феврале эскерозы. А. Фролов. Удмурт Республикаысь кун властез выльдонлы коньдон висъян радлык сярысь Удмурт Республикаысь Кун Кенешлэн постановлениез "Россия Федерациысь улосъёсын кун властьлэсь закон кылдытӥсь (законодательной) но быдэсъясь (исполнительной) ёзъёсызлэсь ужзэс радъянъя огъя куронъёс сярысь" федеральной закон кулэ каре Удмурт Республикаысь кун властез выльдонэз. Соин герӟаськем ужпумъёсты сэрттон-пертчон вылысь, Удмурт Республикаысь Кун Кенеш пуктэ: Удмурт Республикаысь кун властез выльдонлы коньдон висъяно, республикалэн бюджетэз сярысь законэн кунэн кивалтонлы чаклам уксёез лыдэ басьтыса. Удмурт Республикаысь Кун Кенешлэн Тӧроез А. А. Волков. Алексей Шкляев Музъем кузё Очерк АЗЬКЫЛ Та мадёнме мон дасяны выри кызё ар. Бадӟымос романэз сямен шуод-а, мар-а. Уно пол вуылӥ Глазов районэ, Коӵыш но Понино (Полоста) гуртъёсы, пумиськылӥ Валерий Корепановен но сое тодӥсь муртъёсын, лыдӟылӥ Валерий Сергеевичлэсь кылбуръёссэ, кылзылӥ соосъя кылдытэм кырӟанъёсты. Гожъямелэсь пичи люкетъёссэ вӧлмытъяй "Советской Удмуртия|" но Удмурт радио пыр. Озьы ке но, весь малпалляй: адямилэсь сюлэмзэ, ужъёссэ, гурт калыксэ тыро-пыдо суреданы ӧй пишмыты. Ачиз Валерий Сергеевич со понна монэ ӧз пыкылы. Озьы ке но, со азьын мон удалтымтэ адями кадь потылӥ. Сьӧлыкме кулэстон вылысь, вылды, 80-тӥ аръёсы "Молот" журналысь эшъёслы дэмлай Валерий Сергеевичез редакцизылэн советаз пыртыны. Кылзӥськизы. Кӧня ке ар ӵоже Корепанов лыдъяськылӥз "Кенешез" дасясьёслэн юрттӥсьсы. Озьы курадӟемъёсме шӧдыса, вылды, Валерий Сергеевич 1999-тӥ арлэн пумаз мыным мур лулӟылыса сётӥз гуртэзлы сӥзем гожъямъёссэ. Пуксись шунды кадь гордэктыса басьтӥ соосты. Аслэсьтым но солэсь малпанъёсмес одӥг люке биняны выри. Кин таӵе пӧртэм нинъёслэсь кутам чуръёслэн авторзы - Шкляев яке Корепанов? Шуг вераны. Котьма ке но, лыдӟисьёслы соосты дэмлано кариськи. Корка нюняос но калык тушмонъёс Вашкала Сепычкарез интыяськемезъя ӵошетыны луоз кыӵе ке бадӟым карен Иж дурысь Иж карен, Волга дурысь Саратовен, Дунай дурысь Будапештэн. Малы ке шуоно, Сепычкар интыяськемын Сепыч шурлэн кыкнапалаз - та палаз но тупалаз. Коркаос - бур ярдурын, музъемъёс но кенерамъёс - палляназ. Отын, тупалан, - куро липетъёс улын - гуос. Гуосын, вышкыосын но лянэсъёсын - толлы дасям сиён-юон. Татчы дас кык улы (семья) лыктӥз Вуж Иднакарысь. Со вал 1699-тӥ арын. Вуж улонэз урод кариськом ке но, сепычкаръёс азьвыл сокем куанересь ӧй вал. Арысь аре трос ваньбур люказы. Сепыч вамен сое солань-талань выжтылыны секытгес но секытгес луиз. Одӥг выжыысь куать улы выжиз мукет азе, Юоншур но Парзи шуръёс котыре. Соос сьӧры кыстӥськизы Балян но Юбер выжыос. Мурт ӧз каре ӟучъёсты но - Суходоевъёсты, Харитоновъёсты, Антоновъёсты. Таоссэ пӧлазы кутылӥзы, одӥг курон пуктыса: музъемъёстэс асьтэос гыроды-утялтоды, нокинэ медъятэк. Бусыослэн нимъёссы ик аспӧртэмесь. Ӟуч вӧлэм, Выль пыртэм, Семейка, Ни черта нет. Нокин но уг тоды ни, кызьы но малы Сепычкар пӧрмиз Коӵышлы. Оло, лушкаськись коӵыш музэн, чаклатэк кыллись ваньбурез куд-огезлэн киултэмзы понна ке шат? Котьма шу, нош сыӵеос татын вал. Сермет-а, буко-а, вайыж-а чаклатэк кылле - коӵышъёс мултэс уг каро. Шӧртчиосыз кусып возьылӥзы артэ гуртысь бигеръёсын - вал лушкасьёсын. Гуртлэсь тужгес курдаллязы аракыен вузкарисьёс. Соослэсь коӵышъёс олокызьы но "выт" басьтыны выризы. Сыӵе сям возиськиз кӧня ке даур ӵоже. Туала вакытэ гинэ вунӥз ни. Коӵышъёс улэ сюронтэм понна, вузчиос Тат. Парзиысен Глзове ветлӥзы М. Пурга но Потапи пыртӥ кожалляса. Асьсэ адямиоссэс коӵышъёс оглом ӧз ултӥяллялэ. Но матысь бускельлэн узырлыкез шоры сук синмын учкисьлы юн йӧтылӥз. Пичи сьӧлыкез понна адями уй-нунал ӵоже черодтэк возьмаськиз тылпу кысон лапас вӧзын. Муэд кизьымтэ-а, кесэгед арамтэ-а - уз жалялэ: ваньзэ куштыса мын но чакла "горд атасэз". Бадӟым сьӧлык понна - бадӟым кыл. 1914-тӥ арын сыӵе аспӧртэм гурт судэ сюриз Баля Иван. Лушкаськемез понна юн тышказы но виизы. Вуоно араз мурт ыжъёсты капыртэмзы понна "калык судэ" (шонергес вераса - самосуд шуонэ) шедизы кузпалъёс. Соослэн чыртыосазы ошизы ыж куос. Мискиньёсты жугыса гурт кузя нуллӥзы. Соос котькуд юртъер азе дугдытӥзы но ваньбурзэс "басьтыны" тэльмыризы. Тани валче малпано ӧвӧл: коӵышъёс йыртэмаса гинэ улӥзы. Ужез татын юн ярато. Ӵыжы- выжыос коркаоссэс артэгес пуктылӥзы. Мунчооссэс - тымет дуре. Кеносъёс (чумъёс) улыно-вылыноесь. Корка котырысь вань чыры-пырыры арбериосты асьсэос лэсьтылӥзы. Улыос (семьяос) бадӟымесь вал - кызь но тросгес мурт. Кузёяськиз арлыдо воргорон. Ужасьёс тросгес медло шуыса, отын сюлмаськылӥзы пиоссэс вазьгес кышнояны, нылъёссэс бергес сётыны. Улон-вылон ноку капчи вылымтэ. 1901-тӥ арын тылпу ньылэм дас кык юртъерез. Соин ик оскылӥзы ӧвӧлтэм макеослы - вумуртлы, нюлэсмуртлы, корка нюнялы. Лыдъяллязы: отын но отын улэ кайгу ваись маке - кутӥсь. Сыӵе интыос: Солдат кыз, Уллапал выж дор, Апа проход, Ошмес вукырем. Нюлэсмурт тужгес йӧнтэмъяське, пе, Юоншур сикын но Бигер ыбес сьӧрын. Туала вакытэ но отӥе мынэмъёс йыромыло но копак музон пала вуо. Вал туно-пеллёос но. Чуй йӧнатылӥз турын-куарен, Естафий Сергей - шыпыртонэн. 1917-тӥ ар Коӵышез сокем ӧз вошты. Адямиос озьы ик единоен улӥзы. Кык-куинь улы люкаськыса басьязы аран, кутсан, тӧлӥськон машинаос. Сокем ӧз узырме ке но, сыӵеос ик берло сюризы кулакъёс пӧлы. Кин бен вӧсь каремын? Чылкак пӧртэм муртъёс. Харитонов Денислэн кык вукоез но медъяськыса ужасьёсыз вал. Нош Миша Иван сокем майбыр ӧз улы ке но, кудӟем дыръяз сереме уськытъяз куанеръёсты. Таосызлэн комитетсы пуктӥз: Иванэз кулак лыдъяно но палэнэ келяно. 1929-тӥ арын гуртын кылдӥз "Сепычкар" артель. Отчы пыризы сизьым улы, вуоно арозь - сю. Калык нырысь-валысь сюлмо тыршиз. Уката ик - тракторъёс вуыны кутскем бере. Отӥяз мылкыд сӥяз. Город гуртлы сокем ик уг юртты. Тыро-пыдо кузё уг сюры. 12 арскын воштӥськиз 14 председатель. Нырысетӥез, Левонь Егор, ӟенеликен эшъяськиз. Юрттӥсез, ассэ коммунист шуись Сеня Микол, скалзэ вузаса, пыӵал басьтӥз. Вань калык уен-нуналэн бусыын тырше, Микол нюлэскын пӧйшура. Ар ортчыса, соосты уллязы. Кема ӧз кивалты Семён Корепанов. Колхоз коньдонэн патефон басьтыса, одӥг юондырез но ӧз кельтылы. Ужзэ вунэтэмез понна, сое Патефон нимазы но кузёысь куштӥзы. 1936-тӥ арын нянь ӧз удалты. Данакез адямиос гуртысь кошкизы. Кузьма Загвозкин ужезлэсь ӧрзэ шедьтэ ни вал. Но кутскиз война. Сое оже нуизы. Председатель луиз Антонов Василий. Агроном чагиськиз со вылэ: дас кык рад картош октытэк кельтэмын. Антонов калык тушмон луыса сюриз пытсэт сьӧры. Война аръёсы колхоз уката шальтраз. Кыкез кивалтӥсьёс (малпалэ ай - кивалтӥсьёс) сютэм улыса кулӥзы. Пиналъёс кошкылӥзы ремесленной училищее. Укмыс улы вербовкаен мынӥзы Мурманск пала. Гуртэ кылизы 60 юртъер но пересьёс. Германиез вормем бере но югдур соку ик ӧз воштӥськы. Укмыс ар кивалтӥз Антонова Екатерина Ефимовна. Оглом трос кужымзэ сётӥз югдурез тупатонлы. Нош дышетскемез ичи вал бере, азьпала сокем кыдёке ӧз учкылы. Тӥни малы адямиос но ӟечезлы осконзэс ыштӥзы. Музон интыосын ӟечгес вал шат? Югдурез вылӥын но тодытэк ӧз улэ. 1953-тӥ арын сентябре компартилэн шор (центральной) комитетэз гуртлы сӥзиз пленумзэ. Отын пусъемын бадӟымесь ужрадъёс. Соос ваньзы улонэ ӧз пыӵалэ ке но, кыӵе ке пайда сётӥзы быдэс СССР-ын. Коӵыше вуизы радио, электротыл, телефон. Та вакытэ бадӟым улонэ вамыштӥзы война дыръя быдэ вуэм нылъёс но пиос. Ожмаськонэ соос ӧз сюре ни. Сютэм улыса будӥзы ке но, азьлане сэзь учкизы. (Кылемез вань на). Улон-вылон удыс улом-вылом, шуэ Удмурт Правительстволэн юртаз сояз арня вискын радъямын вал чебер киужъёсын аспӧртэмлыко выставка. Нагорнойысь, Синтекысь, Воткинскысь, Сарапулысь псхоневрологической интернатъёсысь, Глазовысь но Канифольныйысь нылпи интернатъёсысь, "ИРИСС" огазеяськонысь кибашлыослэн ужъёсынызы тодматскизы Калыкез улон-вылонын утёнъя министерстволэн паськытатэм коллегияз люкаськемъёс. Ужрадэ пыриськизы республикаысьтымы вылӥ кивалтӥсьёс, министерствоосын, ведомствоосын, комитетъёсын ужасьёс, ёрос администрациослэн кивалтӥсьёссы, калыкез улон-вылонын утён отделъёслэн кивалтӥсьёссы, та удысын ужась пӧртэм специалистъёс но мукет ӧтем адямиос. Шуге-леке шедемъёслэн киужъёссы вылысь но адӟиське ни, адямиослы юрттон ужез валаса но быгатыса радъяськод ке, солэн емышъёсыз шӧдскымон. Юнме-а шаерысьтымы интернат юртъёсын улӥсь куд-ог висисьёслэн киужъёссы вылӥ дунъямын вал. Куд-огез соос пӧлысь возьматэмын луозы Франциын, инвалидъёслэн ужъёсынызы радъям адӟытонын. Калыкез улон-вылонын утёнъя министерстволэн ужезлы со но бадӟым дунъет. Таяз паськытатэм коллегиын удыслэн 1999-тӥ арын кызьы ужамезлы йылпумъянъёс лэсьтэмын вал, озьы ик эскеремын 2000-тӥ арлы быдэстоно ужпумъёс. Калыкез улон-вылонын утёнъя министр С. И. Андреева пусйиз, кылем ар понна бадӟым вамыш лэсьтэмын пенсиосты дыраз тыронъя. Шорлыдын вераса, ар ӵоже пенсиослэн лыдзы 120 манетлы йылӥз - шоро-куспо пенсия 1-тӥ январьысен 519 манет тыр луиз. Но со шумпотымон ӧвӧл. Туннэ нуналлы улыны тырмымон тужгес пичи дунлэсь со кык поллы ӧжыт. Пенсиослэсь быдӟалазэс йылтыса но, нуналысь нуналэ йылӥсь дунъёс сьӧры уиськыны уг луы. Мукетыз шугъяськытӥсь ужпум - нылпи пособиосты тырон. Газетмылэн азьвыл номеръёсаз ивортылӥм ни вал: та ужпумлы Кун Кенеш но Правительство туэ нимысьтыз саклык висъялозы. 1997-тӥ-1998-тӥ аръёслы нылпиё семьяослы пунэм тыронъёсты ваньзэ сётыны чакламын, 2000-тӥ арлы но нылпи пособиос тужгес шугъяськись семьяослы тыремын луозы. Та ужез быдэстонын, озьы ик тужгес ёрмисьёсызлы нырысь ик юрттон понна нимысьтыз ужрадъёс кутӥськозы. Кылемез ар арлыдоослэн аренызы ялэмын вал. Солы сӥзьыса, пӧртэм ужрадъёс ортчизы. Ветеранъёслэн советэнызы ӵош шаерысьтымы вань ёросъёсын но городъёсын ортчытэмын ветеранъёслэсь улон югдурзэс эскерон уж. Шараямын, 4035 муртлы улон юртсэ тупатоно-выльдоно, 500-эзлы шугъяськисьёслы та вакытлы юрттэмын ни. Быдӟым Вормонлы 55 тырмонлы сӥзьыса, Калыкез улон-вылонын утёнъя мнистерство азе нош ик трос сюлмаськонъёс усё. Нырысь быдэстоно ужпумъёс пӧлын - сӥзьыл но тулыс ветеранъёс дунтэм дунын мед ветлыны быгатозы сад-бакчаосазы. Арысь аре йылэ инвалидъёслэн лыдзы. Туннэ нуналлы шаерамы соос 80 сюрс пала ни, 7 сюрсэз пӧлысьтызы 16 аресозь нылпиос. Кылем арын гинэ 10 сюрс мурт нырысьсэ лыдъямын вал инвалидэн, ваньмыз сямен соос ужано арлыдоесь. Шуге-леке сюремъёслы юрттон понна, туннэ нуналэ министерствоын бадӟым уж нуэ медико-социальной служба. Группа сётэм сяна, со юрттэ адямилы улонын ассэ шедьтыны: тазалыксэ юнматыны, быгатонлыкезъя уж шедьтыны. Шаерысьтымы куд-ог предприятиос инвалидъёслы ужан интыос висъяло. Озьы ар ӵоже 200 мурт интыямын вал. Нимысьтыз пусйыны кулэ "ИРИСС" огазеяськонэз. Ижевскын гинэ ӧвӧл, шаермылэн пӧртэм сэрегъёсаз усьтӥсько ни солэн ёзъёсыз. Инвалидъёсты пӧртэм ужъёслы дышетон ласянь но азьлане вамышъёс шӧдӥсько. Матысь дыръёсы Сарапулысь колледжын соос заочно-дистанционной дышетон амалъя вылӥ образование басьтыны быгатозы. Трос ужпумъёс кылдэмын интернат юртъёсты выльдонъя. Пунэм тыронъёс министерство вылэ арысь аре зӥбо, озьы ке но, выльдон-тупатъян, лэсьтӥськон ужъёс сояз арын но вал, туэлы но чакламын. Ужъёс йылтӥзы на, семья ужпумъёсты Калыкез улон-вылонын утёнъя мнистерстволы сётэмен. Азинлыко ужамзэс та ласянь пусйыны луоз Камбарка но Игра ёросъёслэсь. Шуг-секытъёс кылдыто пыдйылчие кылемъёс-бомжъёс. Пенсия но соослы тырыны ёрмоно, интернатъёсы но уд интыя. Соос понна нимысьтыз кӧлан юртъёс усьтон сярысь вераськон мынэ ни. Воткинскын нырысетӥ сыӵе юрт усьтэмын, отын 20 муртлы кӧлан инты чакламын. Пенсиосъя, нылпи пособиосъя, озьы ик улон-вылонын юрттэт сётон ужпумъёсъя Россилэн законодательствояз трос на валамтэос. Министерство аслэсьтыз кылзэ вера отчы воштонъёс пыртон ласянь но. Удмуртиысь Кун Думае быръем эшъёсынымы Смирноваен, Маслюковаен, Сапожниковен та ласянь одӥг кыл шедьтыса ужано. Калыкез улон-вылон утён удысын устооссэ ужасьёсты та нуналэ пусйизы Кун Кенешлэн, Правительстволэн но министерстволэн данъян грамотаосынызы. Л. МАЛЫХ. Ужась мурт чечыен нянь сие Ватонэз ӧвӧл, али тросэз дышетскись пиналъёс школаын лумбыт сютэм уло - столовойын сиськыны коньдон висъяны анай-атайёслэн луонлыксы ӧвӧл. Куд-огез сюлмо кивалтӥсьёс тыршо ик, кыӵе ке предприятиосын, колхозъёсын огкыл шедьтыса, школа бордын музъем возьыса, пиналъёсты дунтэмгес сюдыны. Югдурез оглом тупатон вылысь, Калыкез дышетонъя министерство кылем арын республикаысьтымы школаос пӧлын "аслэсьтыд кулэяськонъёстэ быдэсъяны быгатон" ("Самообеспечение") программая конкурс ялӥз. Ӵошатсконэ мыло-кыдо пыриськиз республикаысьтымы 22 район, Ижевск город но гурт удыслы дышетӥсь 10 профессиональной училище. Ар ӵоже школаос но училищеос 826,5 тонна картофка, 328,2 тонна бакча сиён, 874,9 тонна ю тысь, 3,4 тонна сӥль, 2,3 тонна йӧл, 4 центнер чечы поттыны быгатӥзы! Та лыдпусъёслы паймиз республикаысьтымы Правительстволэн Тӧроез Николай Ганза но. - Куд-ог колхозникъёслы пиналъёслэсь дышетскыны кулэ. Мон оскисько: кайта та лыдпусъёс уката йылозы. Правительство та конкурсэз азинтыны ватсаса коньдон висъялоз, - шуиз со. Нош вормисьёслы - Селта ёросысь Гогурт школалы но Сюмсиысь 34 номеро профессиональной училищелы ӵыжак выль МТЗ-82 трактор, диплом но та дашетсконниослэн кивалтӥсьёссылы коньдон премия кузьмаз. - Ми котьку сюлмо тыршиськом, нылпиосмылэн ӝӧквылзы тыро мед луоз шуыса, но ӵошатсконын одно вормисе потон сярысь ӧм ик малпаське, соин ик та быдӟа кузьым ми понна возьмамтэ шорысь луиз, - шуэ Гопгурт школалэн директорез Владимир Ямаев. - Табере ужъёсмы уката ӟеч мынозы. Техника ласянь бен школалы "Совет" гурт кооператив котьку юрттэ. Кивалтӥсез Виктор Полянских азьвыл ачиз школалэн директорез вал, али со Кун Кенешлэн депутатэз. Соин ик Виктор Андреевичлы валэктонэз ӧвӧл туала школалэсь сюлмаськонъёссэ. Та школае вуылӥды ке, столовоязы пыратэк эн кошке. Сыӵе ческыт котькуд ресторанын но уз сюдэ. Нош тодӥськоды-а, толэзяз кӧня тыр усе нылпиослэн сиськемзы? 15 манет. Соос гужемзэ азьтэмъяськыса уг уло уго. Школа сад-бакчаын, бусыын ужало. Картошка гинэ сизьым гектар вылын будэто. Нош кубиста кылем арын гектарысьтыз 547 центнер басьтӥзы. Удалтэ емышсы но. Кык ар ини чечыен чай юо. Школаын озьы ик вань пичигес ферма. Огкылын вераса, ваньмыз зэмос кузёослэн кадь. Асьсэлэн но кӧтсы тыр, мукетъёсызлы но тырме на. Мултэссэ вузаса коньдон потто. Кылем арын котькуд дышетскисьлы быдэн 2,5 сюрс манет пала пайда вуиз. Ма, кидыс но рассада вузаса гинэ соос 20 сюрс манет поттыны быгатӥзы. Туэ дышетӥсьёс кенешо усточи пиналъёслы стипендия сётъян сярысь. - Сомында ужатыса, пиналъёстэс уд жуммытӥське-а? - юасько Владимир Николаевичлэсь. - Малы ке ваньмыз озьы малпало. Гужем лагерез эскерыны соцстрахысь лыкто но пиналъёсты ужатыны уг яра шуо. Ми соосты ум ужатӥське, ужлы дышетӥськом - школазэс йылпумъякузы, соос ма но со карыны мед быгатозы. Пиналъёсты кужмысь ум кариське, луымтэзэ ум косӥське лэсьтыны, секыт ужез мӧйыос быдэсъяло. Ӟеч азинсконъёс басьтӥзы кылем арын та ёросысь ик Халды школа, Ува ёросысь Чекан школа но Кез ёросысь Пажман школа. Бакча сиён будэтэм, пудо вордэм сяна, Чеканысь школалэн пилорамаез, нянь пыжонниез но вань. Калыклы пул пильыса гинэ соос 150-200 сюрс манет потто, нянь пыжыса - 20 сюрслэсь уно. Нош Кварсаысь 14 номеро училищеын асьсэлэн сӥльзылэсь но йӧлзылэсь ӵынатэм сиёнъёс, сыр, вӧй, кузятэм лэсьто. Таӵе кивоштӥсьёсын асьмелы ӝоген нокыӵе кризисъёс но кышкыт уз луэ ни. З. Рябинина. Пумиськонъёс. Кыӵе луоз армия вуоно даурын? Со пумысен газетлэн корреспондентэз вераськиз Приволжьеысь военной округлэн командующиезлэн нырысетӥ воштӥсеныз генерал-лейтенантэн А. Майоровен. - Генерал-лейтенант эш, кыӵе йылпумъянъёс лэсьтыны луоз 1999-тӥ арын ортчем призывлы? - Нырысь ик, мон тодады вайытысал тани мае. 1999-тӥ арын армие шедем пиос - вуоно даурысь армилэн инъетэз. Озьыен, огшоры призыв тае шуыны уг луы. Берло ог дасо аръёсын ӵошатоно ке, ӟечлыкезъя воинской состав шӧдскымон будӥз, мон верасько дышетскемзы, тодон-валан басьтэмзы сярысь. Службалэсь палэнтыны сюлмаськиськом наркоманъёсты но юисьёсты. Армия кулэсме бере, калык тырме. Чурыт куронъёс пуктэмын военкоматъёс азе. Ватонэз ӧвӧл, отысен кутске военной дисциплина, сое тӥян но "дедовщина". Пиосты вӧсь карисьёс, адями быдтӥсьёс казармаосы шедьыны кулэ ӧвӧл. Сыӵеосты военкомат "сӥсъяны" кулэ. Та пумысен Уфаын ортчиз бадӟым кенешон - инструкторско-методической сбор. Башкириез юнме шорысь ӧм быръе. Егитъёсты воинской службае дасян бордын республика ӟеч ужа. Та удысэз син шораз возё Башкортостанлэн Президентэз, интыосысь администрациос. Соос мыло-кыдо юртто призывъя комиссиослы транспортэн, медицинской оборудованиен, висъяло ужан инты, сёто вылӥ квалификациен врачъёсты, психологъёсты, общественной организациослэсь представительёсты. Башкир пиос котькуд командир понна - зэмос шедьтос. Юнме шорысь та кылъёсты уг вераськы. Соос вакчи дыр куспын котькыӵе подразделениын ас интызэс шедьто, ӟеч специалист луо. Тӥни малы ПриВО борды юнматэм Федерациысь улосвылъёс ӧтемын вал Уфае. Отын эшшо огпол адӟим на, кызьы ужало призыв бордын Башкортостанлэн кивалтӥсьёсыз но президент Муртаза Рахимов. - Башкортостанын югдур умой, нош мукет интыосын? - Штабысь офицеръёс ваньмаз ик 13 регионын быдэс ар ӵоже нуизы эскерон-чаклан ужъёс. Соосын лэсьтэм йылпумъянъёс возьмато: Поволжье но Урал котырысь улосвылъёсын армие дасян арысь аре умоя. Школаосын "Основы безопасности жизнедеятельности" но "Основы военной службы" предметъёсты нуонэ юнматэмын азьвыл офицеръёс. Но таин ӵош вераны кулэ, 24 процентэз колледжъёс но школаос кылё на военной специалистъёстэк. Дышетӥсьёслэсь тодон-валанзэс будэтон бордын ужало военной комиссаръёс, нуисько нимысьтыз курсъёс но семинаръёс. Ваньмаз ик регионъёсын, кытын интыяськемын округмылэн подразделениосыз, военно-патриотической воспитаниея кутэмын нимысьтыз программаос. Та ласянь трос лэсьтӥз Кун Думалэн кыкетӥ созывез. Депутатъёс сюлмаськемен, умой пала воштӥське государство ласянь армия шоры учкон. Кылем арын гинэ усьтэмын 12 кадет класс. Оренбург, Самара но Пенза областьёсын кадет корпусъёс кемаласьгес ужало ни. Туэ выль школа юрт усьтӥськоз Чувашиысь Новочебоксарск городын. - Ма верасалды армие мынӥсь пиослэн тазалыксы сярысь? - Дышетон центръёс, воинской частьёс но военной ужлы дышетон заведениос пыр кылем ар ӵоже гинэ усьтэмын вал 84 военно-спортивной но военно-патриотической лагерьёс. Отын пиос армие мыныны ӟеч-ӟеч дасясько, сӥльвирзэс кыдато, мугорзэс юнмато. Ваньмаз сямен республикаосын но областьёсын ортчизы военно-спортивной шудонъёс но слётъёс. Отчы пыриськизы 20 сюрслэсь ятыр нылъёс но пиос. Жаляса верано, гуртын но городын будӥсь пиналъёсты пумен шергес но шергес пумиталод спортъя секциосысь но кружокъёсысь. Мугез одӥг - со коньдонэн герӟаськемын. Саратов областьысь Балаков городын, кылсярысь, огез но дунтэк ужась секция ӧвӧл ни. Та городысь ик РОСТО-лэн школаез, коммерция вылэ пыкъяськыса, Вооружённой кужымъёсмы понна нимысьтыз усьтӥз водительёсты дасянъя школа. Соку ик верало, область ласянь коньдонэн юрттэт татчы берпуметӥзэ вуиз 5 ар талэсь азьло. Уксёлы ёрмыса ик тросаз дышетон заведениосын уг ортчо полевой сборъёс, уг ужало военно-спортивной лагерьёс. Та вакытэ, шонерзэ верано ке, спортивно-технической обществоосты юнматонэ чакламезлэсь 25 процентэз гинэ коньдон вуэ. Ӵемысь сое но кулэезъя кутыны уг сюлмасько. - Генерал-лейтенант эш, армиын югдур тупатске шуиськом ке но, ПриВО-лэн штабаз ужась офицеръёс шугъяськемзэс верало призывникъёсмылэн тазалыксы пумысен но призывъя медицинской комиссиосын лэсьтэм янгышъёсъя. - Со шонер, пумиськыло котькыӵе учыръёс. Огзэ пусъё: призывъя комиссилэн суп-сап ужамез понна ыштонъёс нуоно луэ государство. Призывъя сётэм нарядэз быдэстон вылысь, куд-ог интыосын ваньзэ армие келяны дась: висисьёссэ но, ляб визьемъёссэ но, пытсэт сьӧры шедьылэмъёссэ но. Тӥни ма бордысен кутске военной дисциплиналэн куашканэз, ог-огдэ быдтон, вӧсь карон но мукетыз. Обороная министерство сыӵе солдатъёсты интыысь интые вошъя, эмъяны келя яке воксё служба нуонлэсь палэнтэ. Огез но со коньдон быдтытэк уг ортчы. 1999-тӥ арын, кылсярысь, тулыс призыв бере гинэ тазалыксы уродэн армиысь 60 мурт гуртазы келямын вал. Округысь учебной центре басьтыны тыршиськом кадь устоосыз пӧлысь устооссэ призывникъёсты, но татын но "пасьёс" кылдо. Одӥг толэзь но ӝыны служить каремзы бере, военной комиссариатъёсы берыктоно луиз 14 пиосты. Медкомиссиослэн урод ужаменызы сэрен, я отын, я татын шуге-леке вуон учыръёс кылдо. Та ласянь огзэ но регионэз нимаз-нимаз ӧй висъясал, малы ке шуоно, уггес тырмо на государство ласянь чурыт пуктэм куронъёс. Нош призывникъёс но призывез радъясьёс ӝегатскытэк витё альтернативной служба нуон сярысь законэз. Со улонэ пыӵаз ке, сюлмаськонъёсмы трослы кулэсмозы. Дасяз Людмила МЕДВЕДЕВА. Журналистъёсын пумиськонъёс Пыдэссэ адӟытэк - выёд. 12 ар дышетскон сюлмаськытэ Мар сярысь кенешизы Россиысь дышетӥсьёс Москвае люкаськылыса? Та ужпум котыртӥ вераськонзэ А. Г. Красильников, Кун Кенешысь Наукая, дышетонъя, культурая но егитъёсын ужан политикая комиссилэн кивалтӥсез. Зэмзэ ик, берло дас кык ар ӵоже дышетӥсьёс нырысьсэ таӵе бадӟым ужрадэ люкаськылӥзы. Эскерем ужпумъёс пӧлын валтӥсез вал 12 аръем программае выжон сярысь вераськон. Пумен быдэс дунне выже ини сомында аръёс ӵоже дышетсконэ. Соин ик улон асьмеды но косэ дышетскон сярысь законъёсмес воштыны. А. Красильников верамъя, туннэ 12 аръем программая ужало ни Молдавиын, Украинаын, Беларусьын, Узбекистанын, Прибалтикаын. Озьыен, малы асьмелы бере кылёно? Но ужпум со бордын гинэ ӧвӧл. Берло дыре школаосын данак выль предметъёс кылдӥзы. Вань тодон-валанэз йыре кельтон понна, пиналъёслы трос кужымзэс сётоно, кема урокъёслы дасяськоно, сыӵе дышетскон нырысь ик нылпиослэсь тазалыксэс шукке. Выль предметъёсты дышетыны ачиз улон косэ. Но со дыре ик али кулэстоно луэ мукет предметъёсты. Соин ик али школаосын туж шугъясько адӟо ӟуч кылъя, химияя, биологияя, физикая урокъёсын. Та шуг-секытъёсты палэнтыны луоз, дышетонэз 12 арлы нуйтыса. Кузь дышетсконэ выжонлэсь эшшо одӥг мугзэ А. Красильников тазьы валэктӥз: - Берло аръёсы тросаз школаосын нылпиослы туж ляб тодон-валан сёто. Соин ик вузэ пырон понна дышетскисьлы я репетитор шедьтоно, я дуно курсъёсы ветлоно, я вылӥ куронъёсын ужась школаын дышетсконо. 12 ар дышетскон программае выжыса, берло кык аръёссэ дышетскисьёсты меӵак вузэ пырыны дасялозы. Соку пиналъёс, нимысьтыз экзаменъёс сётытэк, институтэ пырыны быгатозы. Кузь дышетсконлэн ӟечез адӟиське кадь. Нош вань-а меда солэн умойтэм палыз? Вань. Нырысь ик солы пумитъясько гуртысь нылпиос. Кызьы шуиз А. Красильников, соос ӝоггес ужаны кутскон сярысь малпасько, тросэзлэн кема дышетскемзы уз поты. Нош мон тазьы но малпай: быдэс гуртлы яке кӧня ке гуртъёслы 12 ар дышетскыны одӥг- кык пинал гинэ ке мылкыд кариз, кин соосты дышетоз но кытчы соос тодон-валан басьтон понна ветлоно луозы? Юанъёс, юанъёс. Соос туж трос ай. Озьы ке но, 12 аръем дышетсконэ выжыны чакламын. Пумозяз та уж 2003-тӥ-2004-тӥ аръёсы быдэсъяськыны кулэ. Нош со дырозь выль программаос, учебникъёс дасяно, дышетӥсьёслэсь тодон-валанзэс муромытоно, мумы-бубыос пӧлын валэктон уж нуоно. Дышетон - со огез бере кылись удыс. Угось нылпиосты будэтон уг чида трос эскеронъёсты. Соин ик та удысэз быдэсак вырӟытон-выльдон понна, визь сяна, дӥсьтон но кулэ. Москваын ортчем кенешонын вераськон ӝутэмын вал коньдонэн герӟаськем ужпумъёс сярысь но. Кызьы шуиз Алексей Геннадьевич, отын таӵе малпанэ вуэмын: дышетӥсьёслы уждун федеральной бюджетысь висъяськоз, нош школаосты возён понна, кыл кутозы интыосысь ас коже кивалтон ёзъёс. Журналистъёсын пумиськонын ивортэмын вал комиссилэн декабрь-январь толэзьёсы ужамез сярысь но. А. Красильников ӟечен пусйиз нылпиос понна тол каникулъёсы радъям ужрадъёсты. Усто пӧрмем нылпи парламентлэн ужез. Гуртысь нылпиос понна туэ нимаз олимпиадаос радъямын вылэм. Отчы пыриськиллям 1000 пала гурт нылпиос. Тужгес но мур тодон-валанзэс возьматӥзы, пе, Ува, Можга, Сарапул районъёсысь нылпиос. Олимпиадаосын вормисе потэмъёс, шуиз А. Красильников, вузъёсы экзаменъёстэк кутэмын луозы. Таяз арын Кун Кенешлэн ялан ужась комиссиез ужаны малпа кык законлэсь инъетъёссэ дасян бордын. Огез герӟаськемын мурт нылпиосты будэтӥсь семьяосын, мукетыз - наукая но техникая удысэз азинтонэн. Со сяна, таяз арын чакламын постановление дасяны К. Герд нимо стипендиос тупатон сярысь. Т. БАННИКОВА. Дауръёс пыр Удмурт элькунмылэн премиезлэн лауреатэзлы, искусство удысысь сӥё-дано ужасьлы Валентин Белых художниклы ӝоген витьтон арес тырмоз. Вуоно юбилеезлы со дасяське ини, удмурт темалы сӥзем суредъёсыз бордын мылысь-кыдысь ужа. Бадӟым сузьетэ пырозы Пугачев, "Мултан уж" сярысь, "Удмурт батыръёс", "Удмуртъёсты чукынон" ужъёсыз. Туспуктэм вылын: Валентин Белых "Алангасарлэн вужерез" кинокартинаысь батырлэн дӥсеныз "Мултан ужлы" сӥзем суредэз азьын. Туспуктэмез Владимир БЕЛОМОРСКИХЛЭН. Февраль: тодмо нимъёс но нуналъёс 1. Россилэн нырысетӥ Президентэзлы Борис Николаевич Ельцинлы 69 арес тырме (1931). - 60 ар талэсь азьвыл (1935) Ижевск но Киров меӵак телеграф кусыпен герӟамын. 2. Россиысь воинъёсты данъян нунал. Та нуналэ асьме войскоос немец фашистъёсты Сталинград дорын пазьгизы (1943). 3. 80 ар тырме Советской Союзлэн Героезлэн Василий Григорьевич Шамшуринлэн вордскемез дырысен (1920-1942). Вордскемын Киясово ёросысь Малиново гуртын. Кышкасьтэм лётчик ӝуась самолётэныз тушмонлэн танкъёсыз но автомашинаосыз вылэ пуксиз. 4. 65 ар тырме удмурт кылбурчилэн, прозаиклэн, публицистлэн Григорий Данилович Даниловлэн вордскемез дырысен (1935-1989). Вордскиз Можга ёросысь Вильгуртын. 8. Россиысь наукалэн нуналэз. - Аэрофлотлэн нуналэз. 9. 55 ар талэсь азьвыл (1945) правительстволэн комиссиез Балезино-Ижевск чугун сюресэз уже кутон сярысь акт вылэ гожтӥськиз. Сое лэсьтыны кутскизы вал 1942-тӥ арын январе. 14. Валентиналэн нуналэз (яратӥсьёслэн нуналзы). 15. 80 ар талэсь азьвыл (1920) Сарапулын усьтӥськиз национальной кадръёсты дасянъя совпартшкола. - 11 ар талэсь азьвыл асьме войскоос Афганистанысь поттэмын вал. 55 ар талэсь азьвыл (1945) кылдытэмын "Удмуртгеология" предприятие. 19. 65 ар талэсь азьвыл (1935) операя но драмая Удмур кун театрын нырысьсэ удмурт кылын опера пуктэмын. Возьматэмын А. П. Бородинлэн "Князь Игорь" операезлэн кыкетӥ люкетэз. 20. 80 ар тырме пыӵал тӥрлык кылдытӥсь конструкторлэн, Ленинской премилэн лауреатэзлэн Евгений Федорович Драгуновлэн вордскемез дырысен (1920-1991). Со кылдытӥз снайпер винтовка, "Кедр" пистолет-пулемет. Вордскиз Ижевскын. 21. 75 ар тырме Советской Союзлэн Героезлы Вадим Александрович Сивковлы (1925- 1944). Пичи но егит дырыз ортчиз Сарапулын, Каракулиноын, Ижевскын. 14-тӥысен 15-тӥ мартэ выжон уе солэн танкез котыртэме шеде. Младшой лейтенант но Крестьянинов радист танксэс но асьсэды гранатаен пуштыто. 23. 75 ар тырме Советской Союзлэн Героезлы Виталий Андреевич Ульяновлы (1925). Война кутскон азьын ужаз Воткинскысь машиностроение заводын. Дано ним сётэмын, Днепр шур вамен выжыку, кышкасьтэм луэмзэ возьматэмез понна. - Атыкай музъеммес утисьёслэн нуналзы. - Ижевсклэн вордскем нуналэз (1918) 28. 75 ар талэсь азьвыл (1925) Ижевскын ортчиз ас шаердэ яратӥсьёслэсь (краеведъёслэсь) огазеяськонзэс кылдытонъя кенеш. Озьы кылдӥз удмурт шаерез эскеронъя научно-краеведческой огазеяськон. - 95 ар тырме В. Штейницлы (1905-1967), немец учёнойлы, финно-угроведлы. Со Берлинысь университетын кылдытэ дуннеын нырысь угрофин институт. В. Штейниц вылӥ дунъяз Куӟебай Гердлэсь творчествозэ. 60 арес тырме Александр Иванович Безносовлы (1940) гурт удыс наукаосъя кандидатлы, старшой научной ужасьлы, Удмурт Республикаысь гурт удысъя дано ужасьлы. Вордскиз Шаркан ёросысь Шегъянской починакын. Феврале 180 ар тырме Павел Матвеевич Обуховлы (1820-1869). Со Россиын нырысьсэ кылдытӥз пушкалы корт кисьтонъя удысэз. Вордскемын Воткинскын. Е. УШАКОВА. Сюрес лёго олимпиадае Удмурт шаермы поттэм ваньбуреныз гинэ узыр ӧвӧл. Со котьку данъяське чебер инкуазеныз но. Соинтэк-а арлэн котькыӵе вакытаз шоркарамы ортчыло бадӟымесь ӵошатсконъёс. Спортсменъёслы яраз Ижевскысь биатлонъя Александр Демидов нимо комплекс. Кылем арын отын ортчытэмын вал биатлонъя Европалэн чемпионатэз но. Нош кылем арня куспын асьме дорын ортчиз Поволжье но Урал улосъёсысь биатлонистъёслэн "Олимпиадалы осконэн" ӵошатсконзы. Отчы ветлӥз 17 команда. Нырысетӥ нуналаз пиос ыбылӥськыса 10 иськеме бызьылӥзы, нылъёс - 7 но ӝыны иськеме. Кызь укмысэтӥ январе нюръяськизы спринтеръёс. Арня нуналэ ортчизы эстафетаен ӵошатсконъёс. Огъя нюръяськонын нырысетӥ интые потӥз Ханты-Мансийскысь команда. Вераны кулэ: та улосын берло дыре биатлонлы бадӟым саклык висъяны кутскизы. Россиысь уноез спортсменъёс али отчы выжемын. Кыкетӥ интыез утӥзы Свердловск областьысь "ыбылӥськись" куасчиос. Куинетӥ интыын Удмуртилэн командаез. Нимаз спортсменъёсмы сярысь ке верано, нылъёс пӧлын висъяськиз Ольга Пронина. Со 7,5 иськеме бызьылонын 3-тӥ интые потӥз, 5 иськеме ӵошатсконын кыкетӥ интыез утӥз. Вить иськеме бызьылонын быдэн 5-тӥ интыосты басьтӥзы Ижевскысь Сергей Тарасов но Эдуард Атнабаев. Февральлэн кыкетӥ ӝыныяз асьме дорын ортчыны кулэ биатлонъя Удмуртилэн чемпионатэз. Н. Лялин. Сюрес лёго "Космосэ" Тол каникулъёс дыръя Москваын ортчиз "Космос" нимо конкурслэн финал люкетэз. Отчы ветлӥзы кызьы ке асьме странаысь, озьы ик мукет кунъёсысь дышетскись пиналъёс но. Ваньмыз 300 мурт. Кенешон-вераськон мынӥз Космосэз уже кутон, котырысь инкуазез утёнэн герӟаськем ужпумъёс сярысь. Асьсэлэсь рефератъёссэс быгатыса утизы Воткинскысь нылпиос. Соос витетӥ интые потӥзы. "Воткинский завод" кун производственной огазеяськонын ракета лэсьтонэз радъясь конструктор Н.А.Пилюгин сярысь усто доклад лэсьтӥз 1 номеро школаысь дышетскись Ирина Глухова. Спутникъёсын нюръяськонъя системаос кылдытон пумысен ивортон лэсьтӥзы 17 номеро школаысь Андрей Нетелев, Иван Бородулин но Максим Бусоргин. Рефератъёсты утён азинлыко йылпумъяськиз. Табере та пиналъёс дышетскыны ӧтемын Москваысь авиацияя институтлэн аэрокосмосъя факультетаз. С. ПЕТРОВ. Спорт юрттэ ужаны Улон-вылонмы уродмемен валче, данакез адямиос спорт сярысь вунэтӥзы кадь. Тани Грах ёросысь "Родина" эштосын трос гинэ вал спортсменъёссы. Нош али Вылын Играысь спортзалзылэн, кылсярысь, ӧсъёсыз, выжез ӧвӧл. Укно пиялаосыз пилиськылэмын. Таӵе ужпум сюлэмшугъяськытӥз депутатъёслэн ёрос кенешсылэсь кивалтӥсьсэ Ю. К. Рожинаез. Со пумиськылӥз Вылын Играысь гурт администрацилэн кивалтӥсеныз В. Н. Батыревен. Кенешсы пайдатэк ӧз ортчы. Егитъёс куасэн ӵошатскизы ни. Ортчытэмын тол сэзонэз усьтон. Юрттӥзы школалэн директорез но физкультурая дышетӥсь, вормисьёслы кузьымъёс басьтӥз эштос. Собере ортчизы ёрос ӵошатсконъёс. Отын 19 эграос пӧлысь уноез куасэн ӝог бызьылӥзы, турникын ӝутъяськизы, ыбылӥськизы но семейной эстафетае пыриськизы. Соос пӧлын: Валерий Печников, Виктор Леонтьев, Таня Батырева, Таня Ныркова, Иван Горшков но Крестьяниновъёслэн семьязы. Кужмоосыз физкультурникъёс табере мынозы республикаысьтымы гурт спортсменъёслэн 6- тӥ тол шудонъёсазы. "Санта-Барбара" берытскоз ӵукна Асьмеос малпамы ни вал, "Санта-Барбараен" пыраклы люкиським шуыса. Уго Россиысь телеканал кылем арын "акыляк" потымон телесериалэз возьматэмысь дугдӥз ни вал. Но та фильмез учкыны мылкыд карисьёс туж уно вылӥллям. Соос ялан жингыртылӥзы, гожъяллязы РТР-е. Мар бен, учкисьёс вормизы, шуыны луоз. Алигес басьтэмын выль 520 сериоез. Озьы ваньзэ-ӧвӧлзэ возьматӥськоз 2040 серия. Нош фильм возьматӥськоз со интыысен, кытысен со дугдытэмын вал. Киноез берыктозы азьвыл интыяз ик, Петербургын. Берлогес дубляж бордын ужазы вал Москваысь артистъёс. Но учкисьёслы тодмотэм, воштӥськем куараос ӧз кельше. Соин табере рольёсты "улӟытозы" Санкт-Петербургысь артистъёс ик. РТР канал "Санта- Барбараез" возьматоз ӵукна ужан нуналъёсы. (Басьтэмын "Российской газетысь"). "Святогорье - Форест" Бен, сыӵе нимын предприятие кылдытэмын Красногорск селоын. Алигес сое вӧсян ортчиз. РТП-лэн одӥгаз мастерскояз пулэсь вузъёс лэсьтонъя станокъёс пуктэмын. Соосты ваизы Беларусь Республикаысь. Татын дасяло но мукет кунъёсы келяло пулэсь арбериосты. Цехын али ог 20 мурт ужа. Азьланяз соослэн лыдзы йылоз. Н. Семенов. Тулыспал (февраль) Тулыспалэз тодамы ваиськом ке, син азямы пуксе мур лымыё, кезьыт но бурано куазь. Таӵе дыре сюресъёс лымы люкъёсын пеллямын, соос вамен машинаен яке валэн-дӧдьыен ортчыны туж секыт. Со понна ик сюречиос та толэзез сокем ик уг гажало. Тулыспалэ но Тол-Бабай кузёяське на. Пиналъёс но азьло сямен ик куасъёслэсь-дӧдьылэсь уг люкисько на. Феврале кезьыт куртчылӥське ке но, шуныт вуон дыр пумен шӧдӥське ни. Кылсярысь, югыт нуналъёс шӧдскымон кузьгес луо, шунды ялан вылӥегес ӝутске. Лулосъёслэн но выросъёссы воштӥськыны кутско. Мур но пеймыт интыосысь толалтэлы умме усем шалькко (налим) выже лазег но ӝог бызись вуо интыосы. Татысь изо-кӧльыо интыосты шедьтыса, мызьзэ лэзе. Уго татын векчи нылпиосызлы омыр тырмыт луоз, ву но чылкыт! Мур ву гуосысь лазеггес интыосы ӝутске шумйыр (голваль) но. Нош юш омыр тырмымтэен ӵемгес но ӵемгес вуылэ люкмесъёс пала - татын шоканы капчигес - омыр тырмыт. Нюлэсъёсын ӵемгес пыласькыны кутске пурысь юберлэн (сайкалэн) кесяськем куараез. Аслэсьтыз чеберзэ озьы ваньмызлы возьматыны турттэ кадь. Нош возьматыны маиз вань солэн - быдӟалаезъя ог 35 сантиметр, йыраз изьы выллем ӟускиез вань, мугорыз гордо- пурысё, бурдъёсыз лыз, тӧдьы но сьӧд буёлъёсын гожмамын. Та тылобурдо улэ беризь, тыпы, лысо-куаро писпуо нюлэсъёсын. Нош мае но уг сиы: гужем яратэ нымы-кибыосты, чонариосты, векчи тылобурдоослэсь пиоссэс но пузъёссэс, сӥзьыл яратэ пӧртэм емышъёсты-мульыосты, пушмульыез, нош толалтэ сизь но коньы выллем лусъя кускылиосты. Лымшор палась вуэ туж чебер тылобурдо - чалбер (свиристель). Вань на солэн мукет нимъёсыз но - чолдэр, пужйыр, чукойыр но мукет. Нырысьсэ чалбер асьме пала вуэ коньывуон яке шуркынмон толэзьёсы, собере со кӧче лымшор палагес, нош тулыспал берен вуэ. Асьме палан но кема уз улы - тулыс вуэмъя выжоз уй пала. Чалбер мугорын пурысь юберлэсь но бадӟымгес, яратэ палэзез, льӧмез, векчи улмоосты но мукет емышъёсты. Тулыспал толэзе дукъя улон интызэ воштэ - сюан ортчон интые матэгес кариське. Шуныт луиз ке со айы дукъяосын кендукъя (глухарка) понна юн нюръяськоз-ожмаськоз. Вормыны быгатӥз ке, тужгес но йӧноез кендукъя солэн нылпиосызлэн анаез луоз. Тулыспал гондырлэн нылпиосыз вордско. Ӵемгес соос 2 луо, нош куд-ог аре 3-4-ёзь вуо. Бадӟым гондырлэн нылпиосыз серемес пичиесь - писэйлэсь бадӟым ӧвӧл! Нош анайзылы таӵе пичи лул комокъёслэсь дуно но мусо нокин но ӧвӧл. Анайзы соосты нап но ческыт йӧлыныз сюдэ, соин ик пичи лулъёс туж шаплы будо. Гуысьтызы потыкузы соос шаплыесь но шумпричесь луо. Гуын улыкуз гондыр анай номыр уг сиы - солы тулысозь тырме кылем гужем-сӥзьыл люкам кӧез. Айы койыкъёс ветло сюръёстэк. Соос та йыр люкетлэсь мозмытско толшоре яке тулыспал толэзьлэн кутсконаз. Кионъёслэн сюан дырзы вуэ, вожомыса выллем соос огзы сьӧры огзы бызьылыса ветло, кужымзэс мертало-возьмато. Коньыос тэк улыны уг быгато, огенызы огзы шудо-жугисько. Соослэн но уга нылпи кылдытыны дырзы вуиз! Луд кечъёслэн таяз толэзе луо ини нылпиоссы. Соослэн анайзы та вакытэ пинал писпулэсь яке улмопулэсь сулзэ йырйыны тырше - соку йӧлзы, оло, ческытгес луэ. Тужгес но кезьыт луэ ке, пинал луд кечъёс ваньзы сямен быро. Нош луд кеч соин валче сокем ик уг кӧбера - ар куспын со эшшо кӧня ке нылпи ваёз на! Койыкъёслы секыт: лымы вылын юж кылдэ ке, соослэн ӝог бызьылэмзы уггес луы ни. Балянлы (рысь) но кионъёслы таӵе вакыт койык вылэ пӧйшураны капчигес луэ. Соослэсь секытлыксэс юж сӥ чида уга. Нош луд кечъёс юж вылтӥ капчиен тушмонъёссылэсь пегӟо. Тужгес но юн юж кылдоз нырысетӥ тулыс толэзе, нош тулыспалэ со кылдэ куд-ог нуналъёсы гинэ. Нымы-кибыос азьло сямен сайкатэк изё на. Трос-а соос та вакытэ? Одӥг инкуазь тодосчи корка котырысь пумиськисьёссэ гинэ лыдӟыны малпа но изъёс но коръёс улысь шедьтӥз ог 1000 пала пӧртэм нымы-кибыосты! Соос пӧлысь 918-эз вал кибыос но бӧчыос. Ваньмыз нымы-кибыос 105 пӧртэм йӧсъёсысь вылэм! Шуныт вуэмъя соос ваньзы сямен ик улӟозы но инказьлэсь улон-вылонзэ нош ик выльдозы! Писпуос толалтэ кадь ик воштӥськемзэс уг возьмато. Лулпу, пашпу но куд-ог бадьпу йӧсъёс кутско ини улӟыны. Кайта толэзе соос сяськаяны кутскозы ини. Лымы улын улӟыны кутско ини куд-ог турын-куаръёс. Нош та сярысь вераськомы азьланяз. Нош азьпалан - тулыс! В. ТУГАНАЕВ. УдГУ-ысь профессор. График приема граждан депутатами Государственного Совета Удмуртской Республики второго созыва Фамилия, имя, � Место приема граждан Дни и часы отчество депутата округа (адрес, контактный телефон) приема граждан Абросимов Геннадий Егорович 59 г. Сарапул, ул. Некрасова, 16-б, ПО "Радиотехника", тел. 3-79-33 Каждая пятница, с. 14.00 Авзалов Рустем Альбертович 7 г. Ижевск, школа � 24, музей Каждый четверг, с 16.00 Агашин Владимир Иванович 91 Сарапульский район, с. Сигаево, здание администрации района Третья пятница месяца с 14.00 Ануфриев Вячеслав Николаевич 26 г. Ижевск, ул. Свердлова, 26, тел. 51-17-22 Каждая вторая пятница месяца, с 16.00 до 19.00 Батанов Александр Сергеевич 41 г. Ижевск, ул. 40 лет Победы, 70, детская городская поликлиника � 8, каб. 201 Каждая третья среда месяца, с 19.00 до 21.00 Белоголовкин Данил Ефимович 30 г. Ижевск, ул. Ленина, 146, офис ОАО "Гарант" Каждая пятница, с 13.00 Беркутов Сергей Георгиевич 35 г. Ижевск, п. Старки, клуб Первый вторник месяца, с 16.00 до 17.00 г. Ижевск, школа � 34, тел. 48-35-41 Первый четверг месяца, с 16.00 до 17.00 Биганишвили Гиви Нестерович 34 г. Ижевск, ул. Ворошилова, 67-а, ЖКУ ДОАО "Ижмаш", каб. 16 Третий четверг месяца, с 16.00 Богомольный Евгений Исаакович 77 п. Игра, ДК "Нефтяник" тел. 3-36-31 Второй четверг месяца, с 16.00 Бодров Владимир Петрович 32 г. Ижевск, ул. Советская, 22, Первомайский дом детского творчества и семейного досуга, тел. 51-28-72 Третья пятница месяца, с 14.00 Боровик Юрий Иванович 100 г. Ижевск, ул. Советская, 30, АО "Удмуртэнерго", тел. 76-15-66 Последний понедельник месяца, с 16.00 до 18.00 п. Яр, Ярский участок Глазовских электрических сетей Вторая пятница месяца, с 15.00 до 17.00 Бузилов Валерий Викторович 80 г. Камбарка, краеведческий музей Последний вторник месяца, с 14.00 Бычков Юрий Федорович 44 г. Воткинск, ул. Орджоникидзе, 2, офис ООО СПФ "Мастер" (второй этаж) Второй и четвертый четверг месяца, с 18.00 до 20.00 Варламов Владимир Сергеевич 70 г. Воткинск, ул. Красноармейская, 43-а, здание администрации района, каб. 40, тел. 2-12-45, 2-15-15 Последняя пятница месяца, с 10.00 Вершинин Павел Николаевич 89 г. Можга, здание администрации района, каб. 415, тел. 3-38-05, 3-15-51 Последняя пятница месяца, с 10.00 до 13.00 Возисов Виталий Михайлович 94 с. Сюмси, здание администрации района тел. 2- 16-67 Каждая третья пятница месяца, с 10.00 до 13.00 Волков Александр Александрович 54 г. Глазов, школа � 14, тел. 4-12-92 Один раз в два месяца. Ворончихин Николай Вениаминович 82 п. Кез, здание администрации района, тел. 2-11-39 Последний четверг месяца, с 14.00 до 17.00 Галеев Азат Таисович 22 г. Ижевск, ул. Лихвинцева, 46, "Фондовый центр" Ежедневно, (кроме выходных), с 16.00 Галиахметов Раиль Ахсанович 8 г. Ижевск, пл. 50 лет Октября, Госсовет, каб. 709, тел. 75-38-16 Первая и третья пятница месяца, с 14.00 до 16.00 г. Ижевск, школа � 10, общественная приемная, тел. 30-74-88 Вторая и четвертая пятница месяца, с 14.00 до 16.00 Ганза Николай Алексеевич 53 г. Глазов, ул. К. Маркса, 17, ЖЭК � 5, кабинет начальника, тел. 4-73-75 Третья среда месяца, с 17.00 до 19.00 Горбунов Виктор Дмитриевич 62 г. Сарапул, ул. Азина, 102, ЗАО "Сарапульская кондитерская фабрика", конференц-зал, тел. 3-71-30 Первый вторник месяца, с 16.00 Городилов Сергей Аркадьевич 17 г. Ижевск, ул. Металлистов, 46, школа � 80 Второй и четвертый вторник месяца, с 15.00 до 19.00 Григорьев Михаил Алексеевич 90 Можгинский район, п. Пычас, здание поселковой администрации Последняя пятница месяца, с 14.00 Дворцова Жанна Витальевна 4 г. Ижевск, ул. Кирова, 172, административное здание ОАО "Редуктор", офис юридического агентства "Республика", тел. 22-09-55 Вторая и четвертая пятница месяца, с 14.30 до 17.30 Дементьева Валентина Владимировна 74 Завьяловский район, п. Совхозный, здание сельской администрации, тел. 33-21-43, 33-21-66 Первый вторник месяца, с 15.00 до 18.00 с. Завьялово, районная Дума, тел. 32-12-05, 32-21-88 Каждая пятница месяца, с 9.00 до 12.00 Долганов Николай Витальевич 87 с. Малая Пурга, административное здание дорожного управления Каждая пятница, с 15.00 до 18.00 Дудин Сергей Геннадьевич 47 г. Воткинск, ул. Волгоградская, 10 Каждый третий четверг месяца, с 16.00 до 19.00 Жебровский Валентин Витальевич 1 г. Ижевск, АО "Буммаш", кабинет генерального директора Каждая вторая пятница, месяца, с 16.00 Забродина Людмила Ивановна 13 г. Ижевск, ул. Крылова, 6, кинотеатр "Родина" Первый четверг месяца, с 16.00 до 18.00 г. Ижевск, Заречное шоссе, 73, домоуправление � 6 ОАО "Ижмаш" Второй четверг месяца, с 15.00 до 17.00 Зенин Владимир Николаевич 76 Завьяловский район, птицефабрика "Вараксино", здание администрации, тел. 53-42-00, 53-41-33 Второй и четвертый четверг месяца, с 10.00 до 17.00 Кайгородов Юрий Михайлович 83 Кезский район п. Чепца, п. Кузьма, п. Кабалуд, с. Кулига, п. Ключи, д. Степаненки, д. Ст. Гыя, с. Александрово, д. У. Зязьгор - здания сельских администраций Январь-сентябрь - в каждом из населенных пунктов соответственно, третий вторник месяца, с 10.00 Балезинский район ст. Люк, п. Андрейшур, п. Исаково - здания сельских администраций Октябрь, ноябрь, декабрь, в каждом из населённых пунктов соответственно, третий вторник месяца, с 10.00 п. Н. Волково, сельский дом культуры Ноябрь, третий вторник, с 14.00 Каримов Равиль Мухаметович 58 г. Можга, ул. Можгинская, 59, здание городской администрации, ком. 310 Вторая пятница третьего месяца квартала, с 14.00 до 16.00 Касимов Карим Фаттахуддинович 55 г. Глазов, ул. Юкаменская, 10, ОАО "Глазовский завод "Металлист", кабинет генерального директора, тел. 3-10-60 Каждый четверг, с 16.00 до 18.00 Касимов Энвиль Владимирович 67 п. Балезино, ул. Кирова, 2, здание районной администрации, тел. 2-21-55 Последний четверг месяца, с 10.00 до 16.00 Кацемон Владимир Иванович 99 с. Якшур-Бодья, районный Дом культуры, тел. 2- 18-05 Последняя пятница месяца, ш4.00 Кокорин Михаил Константинович 3 г. Ижевск, ул. 9 Января, 181, библиотека им. Наговицына Четвертая среда месяца, с 17.00 Кочетов Владислав Анатольевич 48 г. Воткинск, ул. Гагарина, 23, технический лицей � 2, корпус 2, каб. 206, тел. 6-50-07 Вторая и четвертая пятница месяца, с 14.00 до 18.00 Красильников Алексей Геннадьевич 23 г. Ижевск, ул. Холмогорова, 22, школа � 83, приемная директора Последняя среда месяца, с 17.00 до 19.00 Красноперов Геннадий Филиппович 38 г. Ижевск, ул. Т. Барамзиной, 60, опорный пункт � 4 Второй и четвертый четверг месяца, с 14.00 дӧ7.00 Кудинов Валентин Иванович 43 г. Воткинск, ул. Луначарского, 6, школа � 12 Один раз в месяц (с дополнительным объявлением о дате и времени по местному радио) п. Первомайский, здание поселковой администрации Один раз в квартал (с дополнительным объявлением) Кудрявцев Владимир Сергеевич 86 с. Красногорское, здание администрации района, тел. 2-17-51 Первая и третья пятница месяца, ш3.00 до 17.00 Юдинский сельсовет, здание сельской администрации Вторая пятница месяца, С 14.00 до 17.00 Кузьменко Олег Леонидович 81 с. Каракулино, ул. Прудовая, 2, тел. 2-12-77 Последняя пятница месяца, с 14.00 Кучерявенко Михаил Ильич 31 г. Ижевск, ул. Ленина, 4, МП "Ижевские городские электрические сети", кабинет директора, тел. 78-63-37 Каждая среда, с 15.00 Кушко Виктор Михайлович 27 г. Ижевск, ул. Промышленная, 8, профком ГП "Ижевский механический завод", тел. 76-10-33 Последняя пятница месяца, с 14.00 до 18.00 Лапин Анатолий Николаевич 45 г. Воткинск, ул. Ленина, 7, здание городской администрации, каб. 308 Каждый третий вторник месяца, с 16.00 до 18.00 Лопатин Александр Константинович 5 г. Ижевск, ул. Авангардная, 6-а, ДК "Спутник", тел. 43-40-70 Третий четверг месяца, с 14.00 до 16.00 Лошкарев Григорий Андронович 36 г. Ижевск, ул. Барышникова, 81, ЖЭУ � 6, тел. 21-07-97, 20-38-79 Последняя среда месяца, с 16.00 до 19.00 Любимов Виктор Николаевич 16 г. Ижевск, ул. Кирова, 172, офис юридического агентства "Республика", тел. 22-09-55 Каждая пятница, с 17.00 до 19.00 Малков Аркадий Трофимович 84 п. Кизнер, здание районного Совета депутатов, тел. 2-14-98 Третий четверг месяца, с 14.00 В трудовых коллективах Первый четверг месяца Малюк Михаил Семенович 65 г. Сарапул, 5-й Зеленый проезд, школа � 25, тел. 2- 64-92 Второй понедельник месяца, с 17.00 п. Дубровка, контора агрофирмы Третий понедельник месяца, с 17.00 г. Сарапул, п. Элеконд, 20 лет Победы, 5, тел. 9-93-84 Четвертый понедельник месяца, с 17.00 Марченко Анатолий Владимирович 72 Кизнерский район с. Бемыж, здание сельской администрации, тел. 3-11-20 Первая пятница месяца, (время по договоренности) с. Грахово, здание районной администрации Последняя пятница месяца, (время по договоренности) Моисеев Валерий Васильевич 15 г. Ижевск, ул. Школьная, 47-а, детско- юношеская спортивная школа, тел. 71-19-18 Последняя пятница месяца, с 14.00 Молчанов Александр Михайлович 20 г. Ижевск, ул. Советская, 10, кв. 5, тел. 51- 48-58 Последний четверг месяца, с 14.00 до 18.00 Молчанов Сергей Михайлович 6 г. Ижевск, ул. Кирова, 172, помещение профсоюзного комитета ОАО "Редуктор", тел. 43-02-10 Каждая пятница, с 14.00 до 16.00 Мохначев Владимир Александрович 56 г. Можга, Свердловский бульвар, 39, управление ОАО "Свет", тел. 3-30-30, 3-30-50 Каждая четвертая пятница, с 14.00 Наумов Игорь Юрьевич 37 г. Ижевск, ул. Петрова, 39-а, тел. 21-28-88, 20-37- 09 Последняя пятница месяца, с 17.00 до 19.00 Никитин Валерий Арсентьевич 75 Завьяловский район, д. Якшур, тел. 34-91-18 Каждая пятница, с 8.00 до 16.00 Образцова Нина Андреевна 66 с. Алнаши, ул. Комсомольская, 8, здание администрации района, тел. 2-13-56 Второй и последний понедельник месяца Одиянков Евгений Германович 29 г. Ижевск, ул. Ленина, 87, Республиканский клинический кардиологический диспансер, кабинет главного врача, тел. 75-26-00 Каждая пятница, с 16.00 до 18.00 Осколков Андрей Эдуардович 24 г. Ижевск, ул. Холмогорова, 19, клуб "Юниор" Каждый четверг, с 18.00 до 19.00 Перешеин Владимир Юрьевич 50 г. Глазов, Динамо-2, административное здание СПАО "Чус", кабинет генерального директора, тел. 70-19-41 Каждый второй и четвертый четверг месяца, с 16.00 Першин Александр Васильевич 52 г. Глазов, ул. Энгельса, 18, здание проектно- производственной фирмы "АРК", тел. 4-59-83 Последний четверг месяца, с 14.00 до 18.00 Подсевалов Владимир Анатольевич 97 с. Шаркан, ул. Ленина, 10, здание администрации района Последний четверг месяца, с 14.00 Прасолов Алексей Михайлович 61 г. Сарапул, ул. Пугачева, 76, школа � 23, тел. 3-48-47 Последняя суббота месяца, с 14.00 Роговец Климентий Михайлович 95 п. Ува, здание администрации района, третий этаж Последняя пятница месяца, с 14.00 Русских Виктор Ильич 11 г. Ижевск, ул. Оружейника Драгунова, 78-а, тел. 71- 35-66 Каждый четверг, с 16.00 Рыбаков Роберт Юсуфович 60 г. Сарапул, Красная площадь, 8, здание городской администрации, ком. 103, тел. 3-96-37 Вторая суббота месяца, с 11.00 до 15.00 Салтыков Анатолий Иванович 10 г. Ижевск, ул. Азина, 146, здание администрации Ленинского района, тел. 22-76-10 Первая пятница месяца, с 14.00 до 17.00 Светлов Сергей Вадимович 21 г. Ижевск, ДК "Металлург", ком. 69 Каждый четверг с 10.00 до 12.00 Семенов Игорь Николаевич 57 г. Можга, ул. Можгинская, 59, здание городской администрации, кабинет главы администрации Каждая пятница, с 14.00 Соболев Юрий Борисович 46 г. Воткинск, ул. Королева, 20-а, здание машиностроительного техникума, тел. 3-65-78 Третий четверг месяца, с 17.00 до 20.00 Сологуб Валерий Макарович 64 г. Сарапул, ул. Молодежная, 11-49, городская больница � 2 Первая и третья среда месяца, с 13.00 до 17.00 Соловьев Александр Васильевич 68 п. Балезино, здание Балезинского дорожного управления, тел. 2-25-53 Первая среда месяца, с 13.00 до 18.00 Соловьев Виталий Александрович 69 с. Вавож, здание администрации района, тел. 2- 13-73 Первая пятница месяца, с 10.00 Сорокин Николай Борисович 51 г. Глазов, ул. 2-я Набережная, 13, ЛВЗ "Глазовский", кабинет директора Последний четверг месяца, с 15.00 до 18.00 Степнова Зоя Ивановна 28 г. Ижевск, пер. Прасовский, 5, школа � 46 Первый понедельник месяца, с 15.00 до 19.00 Суркин Валерий Сергеевич 33 г. Ижевск, ул. 40 лет Победы, 60, здание администрации Устиновского района, второй этаж Второй вторник месяца, с 16.00 до 18.00 Сычев Николай Семенович 85 Киясовский район с. Ермолаево, здание сельской администрации, тел. 6-41-60 Июнь, октябрь, декабрь - второй четверг месяца, с 14.00 до 18.00 с. Киясово, здание районной администрации, тел. 2-27-50 Август, декабрь - второй четверг месяца, с 14.00 до 18.00 Малопургинский район д. Аксакшур, здание сельской администрации, тел. 6-33-49, 6- 33-21 Июль, ноябрь - второй четверг месяца, с 14.00 до 18.00 п. Кечево, здание сельской администрации, тел. 6-61-49 Сентябрь, январь - второй четверг месяца, с 14.00 до 18.00 Тарасенко Виктор Дмитриевич 9 г. Ижевск Школа � 12 Первый, третий четверг месяца, с 16.00 Школа � 17 Второй четверг месяца, с 16.00 Школа � 38 Четвертый четверг месяца, с 16.00 Тубылов Валентин Кузьмич 88 с. Малая Пурга, здание администрации района Последняя пятница месяца, с 8.00 Фридрих Валерий Леонидович 42 г. Воткинск, ул. Серова, 25, здание музыкального - педагогического колледжа Последний четверг месяца, с 16.00 до 18.00 Фролов Леонид Кириллович 49 Глазовский район, контора СПК "Кожильский! Четвертая пятница месяца, с 8.00 до 9.45 Глазовский район, контора ТП "Дзякино" Четвертая пятница месяца, с 10.00 до 12.00 г. Глазов, школа � 9 Четвертая пятница месяца, с 13.00 до 15.00 г. Глазов, КСК "Победа" Четвертая пятница месяца, с 16.00 до 18.00 г. Ижевск, пл. 50 лет Октября, Госсовет, каб. � 620 Первая, третья пятница месяца, с 14.00 до 18.00 Харина Наталья Алексеевна 2 г. Ижевск, ул. Дзержинского, 5, здание администрации Индустриального района, каб. 206, тел. 44-20-13 Второй четверг месяца, с 17.00 до 18.00 Ходырев Валерий Васильевич 14 г. Ижевск, Малиновая гора, опорный пункт � 14 Первый четверг месяца, с 16.00 г. Ижевск, Городок машиностроителей, 66, ЖЭУ � 9 ОАО "Ижмаш" Третий четверг месяца, с 16.00 Хорошавцев Виктор Геннадьевич 25 г. Ижевск, ул. Пушкинская, 177, школа � 68, тел. 51-08-90 Каждая вторая суббота месяца, с 11.00 Чувашов Николай Федорович 96 Увинский район, с. Нылга Первая пятница месяца, с 10.00 до 14.00 п. Ува, здание администрации района Первая пятница месяца, с 14.00 Чуршин Алексей Дмитриевич 39 г. Ижевск ул. 40 лет Победы, 70, детская городская поликлиника � 8, каб. 201 Первая среда месяца, с 15.00 до 18.00 г. Ижевск, ул. Труда, 1, поликлиника Автозавода, каб. 609 Третий четверг месяца, с 15.00 до 18.00 Шаляпин Александр Павлович 78 Якшур-Бодьинский район, ТОО "Старозятцинское", кабинет директора, тел. 2-12-85, 3-11-31 Первый четверг месяца, с 16.00 до 18.00 Шаргаев Сергей Николаевич 12 Месяц ЖРП-9 Заречное шоссе, 39 тел. 54- 96-55 Библиотека им. Маяковского Новостроительная, 28, тел. 71-03-61 с 16 часов май 31 июнь 19 июль 1 август 26 сентябрь 3 17 октябрь 7 21 ноябрь 11 24 декабрь 8 22 Шестаков Юрий Владимирович 19 г. Ижевск, ул. 50 лет Пионерии, 22, библиотека профкома ГУП ИЭМЗ "Купол", тел. 25-69-33 Третий четверг месяца, с 14.00 до 16.00 Широбокова Софья Эльфатовна 79 Игринский район, здания сельских администраций Вторая и четвертая пятница месяца Шутов Андрей Васильевич 92 г. Сарапул, ул. Азина, 181, "Сарапулмолоко", кабинет директора, и по графику в населенных пунктах округа Последняя пятница месяца, с 16.00 Юшков Николай Петрович 63 г. Сарапул, ул. Азина, 101, ЗАО "Сарапульский дрожжепивзавод", кабинет директора, тел. 2-30-75 Каждая вторая суббота месяца, с 10.00 до 13.00 ЮРИЙ МАСЛЮКОВ - УДМУРТИЫН Кызьы ивортӥм ни вал, асьме республикаысь Кун Думае депутатмы Юрий Дмитриевич Маслюков луиз Думаысь Промышленностья, лэсьтӥськонъя но наукаен герӟаськем технологиосъя комитетлэн тӧроез. Шумпотымон со. Малы ке шуоно, экономикамес уд юнматы, та туж кулэ удысъёсты - промышленностез, лэсьтӥськонэз но наукаез - ӝог азинтытэк. Вылаз ик, со люконтэм герӟаськемын ож тӥрлык поттонэз умоятонэн но оборонаез кужмоятонэн. Юрий Маслюков та нуналъёсы Удмуртие ветлӥз. Одӥгетӥ феврале со пумиськиз шаерысьтымы но Кун Кенешлэн ялан ужась комиссиосызлэн кивалтӥсьёсынызы. Кун Думаысь одӥгезлэн валтӥсь комитетлэн тӧроез луыса Юрий Дмитриевич, валамон, юрттыны быгатоз республикаысьтымы промышленностез йыг-йыг азинтыны но экономикамес юнматыны. Кун Думалэн кыкетӥ созывезлэн ужамез сярысь вераса, Юрий Маслюков пусйиз, Кун Думалы дасям вань законопроектъёсты кутыны уг яра. Малы ке шуоно, соос уз ужалэ. Нош промышленностез, лэсьтӥськонэз азинтонъя, предприятиослэсь тыронъёссэс пытсанъя но зачётъёсъя законопроектъёс ӧвӧл. Юрий Дмитриевич республикалэн кивалтӥсьёсыныз огкылысь ужаны кыл сётӥз. Нош соос депутатлы пӧртэм удысъёсты азинтонъя ӵектонъёс сётъяны кулэ. Берло соос Маслюковлэн но музон комитетъёсын эскеремын луозы. Кызьы бен кылдытэмын луоз Россиысь Промышленностья министерство? Та ужпумъя Юрий Маслюков кенешиз ни РФ-ысь Правительстволэн Тӧроеныз но Президентлэсь ужзэ быдэсъясен Владимир Путинэн. Юрий Дмитриевич таӵе удыс кылдытон понна. Мугез валамон, промышленной предприятиос но Россиысь мукет кивалтӥсь ёзъёслэсь висъямын кадь. Странаямы Промышленностья министерство кылдытонэз умоен лыдъяз Кун Кенешлэн "Промышленникъёс но ужбергатӥсьёс" фракциез. Депутатъёс-промышленникъёс Юрий Дмитриевичлы дэмлазы Кун Думаын но Кун Кенешын законъёсты дасянэз умоятон вылысь ужась группа кылдытыны. Со юрттысал Россиын но Удмурт Республикаын умоесь законопроектъёс кутыны. Группа промышленно-экономической, бюджетно-финансовой но социальной удысъёсъя ужасал. Юрий Дмитриевич озьы ик ӵектӥз законопроектъёсты дасянэз Кун Думаын но Кун Кенешын огъя нуыны, ӵошатыны отысьсэ но, татысьсэ но. Февральлэн пумаз Юрий Маслюков республикаямы эшшо вуыны чакла. Соин ик шаерысь кивалтӥсьёслы со вазиськиз, та дырлы кулэ ӵектонъёс дасяны курыса. Ю. Д. Маслюков со нуналэ ик вуылӥз "Воткинский завод" предприятие но Ижысь механической заводэ, пумиськылӥз отысь ужасьёсын, специалистъёсын но кивалтӥсьёсын. Г. ВАСИЛЬЕВ. КУН КЕНЕШЛЭН ПРЕЗИДИУМАЗ Та нуналъёсы Кун Кенешлэн Президиумезлэн кенешонэз ортчиз. Отын вить ужпум эскеремын вал. Валтӥсьёсыз пӧлын - Кун Кенешлэн таяз арын выль законъёс кылдытон бордын ужанъя планэз но соосты быдэстонъя программа. Президиуме быръем эшъёс вакчияк йылпумъян лэсьтӥзы кылем арын быдэстэм ужлы. Жаляса верано, чаклам планлэн 12 пунктэз озьы ик улонэ ӧз пыӵа. Соин ик Президиумлэн членъёсыз Г. Е. Абросимов, Ю. С. Питкевич но куд-ог мукетъёсыз ӵектӥзы пичигес план кутыны но пумозяз быдэстыны. Социальной политикая ялан ужась комиссилэн кивалтӥсез Н. А. Харина дэмлаз "сиён- юонъя корзинаез" выльысь кутскыса эскерыны. Асьме дорын со берлозэ юнматэмын вал вить ар талэсь азьло. Одӥг адямилы тужгес но кулэ луись сиён-юонэн тырмытэм корзина толэзяз соку "кыскиз" 154 манет. Кемалась дыр вуэмын ни тае выльысь кутскыса учкыны но калыкез утёнъя выль закон юнматыны. Депутат А. Т. Малков дэмлан сётӥз кадръёсты дасянъя программаез выльдыны но сое быдэстон борды умой-умой басьтӥськыны. Президиумлэн кенешаз люкаськемъёс огкылысь вазиськон кутӥзы Россилэн Президентэзлэсь ужзэ быдэсъясь В. В. Путинлы, Кун Думалэн Председателезлы Г. Н. Селезневлы но Федерация Кенешлэн Председателезлы Е. С. Строевлы эстӥськонлы, электрокужымлы, транспортын мынон-ветлонлы дунъёсты кулэстон сярысь. Президиум озьы ик ватсанъёс пыртӥз Кун Кенешлэн укмысэтӥ сессияз учкыны чаклам ужпумъёс пӧлы. Л. МЕДВЕДЕВА. Выль ужлы дышето Толшор толэзьлэн шорвадьсаз Красногорск ёросын 594 адями ужтэк кылемен лыдъяське вал. Россия Федерацилэн законодательствоезъя сыӵе адямиослы уж ӵектыны кулэ. Кулэ дыръяз дышетон но радъяське. Тани миым ёросысь 43 мурт выль ужлы дышетыны келямын вал. Соосты дышетӥзы столяре- плотнике, мебель лэсьтыны, водителе, электрогазосварщике, холодильщике, вузкарисе, бухгалтере, компьютерщике. Данакез соос - егитъёс, куатезлы ог ньыльдон арес котыр. Дышетскемъёс пӧлысь 33-ез ужало ни. Адямиез выль ужлы дышетон - туж кулэ ужпум, соин ёросысь кивалтӥсьёс сое син азязы возё. П .СКОБЕЛЕВ. Шахмат Нюръясько пиналъёс Москва дорысь Серпухов городын Россилэн пӧртэм городъёсысьтыз дас аресозь шахматистъёслэн ӵошатсконзы ортчиз. Усто нюръяськиз татын Ижевскысь 6 номеро нылпи спорт школаысь Ураллэн чемпионкаез Зоя Северюхина. 43 шахматист пӧлын 5-тӥ интыез утӥз, 9 луоноез пӧлысь 6 очко люказ. Табере солы сюрес усьтӥськиз вуоно арын Россилэн финалаз нюръяськыны. Нош Ижевскысь 9 аресъем Павел Карнаухов 9 пӧлысь 4 очко люказ. *** "Ижпланета" клубын куинь нунал ӵоже мынӥзы "Тӧдьы ладья" клублэн призэз понна шахматэн шудонъёс. Отчы пыриськиз Удмуртиысь 22 команда. Соку ик шӧдӥськиз Ижевскысь школаослэн кужмо луэмзы. Соос нырысетӥ куаь интыосты утӥзы. Турнирын кылем арын сямен ик вормиз 30 номеро школа. Татысь команда 45 луоноез пӧлысь 37 но ӝыны очко люказ. Куинь очколы бере кылиз 41-тӥ школа. Воткинскъёс люказы 24,5, сарапулъёс - 22,5, можгаос - 21,5 очко. Гуртъёсысь командаос пӧлын (соос 11 вал) быдэн 24 очко люказы Красногорск селоысь но Якшур-Бодья ёросысь Селычка посёлокысь шахма__тистъёс. Ватсаса шудонъёс ортчытэм бере 1-тӥ инты красногорскъёс киын, кыкетӥ луизы селычкаос, куинетӥ интые потӥзы Ува посёлокысь пиналъёс. Гуртъёсысь шахматистъёс пӧлын котьку азьпалан мыно вал Завьял ёросысь Первомайский посёлокысь пинал спортсменъёс. Таяз учыре соос Алнашросысь командаен 4-5-тӥ интыосты люкизы. И. Вельтмандер, судья. Кизилиослы - кизилиё сюрес Миым ик, дор палъёсам бертылыкум, "Зарни шеп" калык ансамблез кылдытэм дырысен кызь ар тырмемез пусйыкумы, куд-ог дышетӥсьёс, библиотекарьёс мынэсьтым юазы: " Фома Ермаков асьме писательёс сярысь книга поттэм. Адӟид-а ини? Лыдӟид-а?" - Ӧй на, - валэктӥ тодмоосылы, ӟеч иворез соослэсь бергес кылэменым сэрен ӵыжектыса. Сюлэмам соку ик кыӵе ке пычей каръяськиз кадь: сэрытгес тодматсконо профессорлэн-литература удысэз бугыръясь, дунъясь писательлэн выль уженыз. 24-тӥ толшоре Фома Кузьмич кузьмаз "Пурга писательёс" книгазэ. Бадӟым тау! Огӝытскын лыдӟи, ньылӥ сое. Паймисько но шумпотӥсько мӧйы тодосчимылэн сокем шаплы, пайдаё ужамезлы. Гожъяськон удысысь кӧня егит норедъёслы со литературамылэн огъя бадӟым убоез вылын куш-куш пушйыны юрттӥз ини! Институтысьтыз эшъёсыныз но Калыкез дышетонъя министерствоысь ӧнерчиосын ӵош кӧня дышетӥсьёслэсь будон сюресссэс югдытӥз, тодонъёссэс муромытӥз. Оглом басьтыса, "Пурга писательёс" книга кие кутымон пӧрмем. Кемалы чидалоз: юн выло, зӧк бумага вылэ печатламын. Автор дас ньыль писательлэсь гожъямъёссэ сэрттэ- пертче. Пичи Пурга ёросысь гожъяськисьёслэн песьтэръёссы туж узыресь: соос кылдытӥзы ни куинь роман, кызьлэсь ятыр повесть, нош веросъёссэс, очеркъёссэс, кылбуръёссэс, басняоссэс, кырӟанъёссэс, газетъёсы гожъямъёссэс, оло, ваньзэ бичаны но уд быгаты ни. Ф. К. Ермаков "йыромымтэ" соос пӧлы, котькудӥзлэн гожъямысьтыз шедьтэм уно зарни тысьсэ, адӟем тӧлберзэ-макнязэ но. Пасьтана гырыса кошкымтэ гожъям му вылтӥмы, мур копалтэм тужгес устооссэ гинэ кылбуръёсты, очеркъёсты, веросъёсты, повестьёсты. Соин котькуд авторъя огъя дунъетъёсыз, дэмланъёсыз ӝикыт пӧрмиллям, шуысал. Валамон ини: выль книгаын тужгес но бадӟым инты висъямын пурга литераторъёслэн "киросатайзылы" - Семён Самсоновлы. Со уго, батыр тыпы сямен, Тыло гуртаз гинэ ас вӧзаз будэтӥз на эшшо вить писателез! Озьы ик юрттӥз быдэс шаерысьтымы егитъёслы. Гожъямъёсыз но котькинлэсь ятыр, узыр. Нош Фома Кузьмич Ермаков та книгаяз котыр ласянь пыр-поч эскере ёросысьтымы музонъёсызлэсь но писательёслэсь ужъёссэс: Василий Михайловлэсь, Владимир Голубевлэсь, Анатолий Перевозчиковлэсь, Георгий Архиповлэсь, Виктор Ивашкинлэсь, Александр Титовлэсь, Любовь Тихоновалэсь, мынэсьтым. Ёросысьтымы уноез дышетӥсьёс асьсэ палась гожъясьёслэсь произведениоссэс пыртӥзы ни, дыр, школаоссылэн программаосазы. Табере тани выль книгая со программаосыз муромытыны, узырмытыны уката бадӟым сюрес усьтӥське. Фома Кузьмичлэн ӵапак та ласянь ужез дуно. Ма, книгаен тодматскыса, музон палъёсын но литературалы дышетӥсьёс программазэс выльдыны быгатозы. Шумпотӥсько: вордскем кылмес, литературамес азинтонын пургаос нош ик азьпал радын вамышъяло. Талэсь азьло асьсэ писательёссылэн ужъёссы сярысь пичильтык гинэ книга поттӥзы ай завьялъёс но. Нош таӵе книгаос туж но туж кулэ. Удмурт писательёс сярысь берлосьсэ справочникез поттэм дырысен ортчиз ини дас арлэсь ятыр. Со куспын улонамы туж трос воштӥськонъёс вал ни. Будӥзы, зэмос гожъясьёс радэ йыг-йыг султӥзы музонъёсыз егитъёс. Ма, союзэ азьвыл кутэмъёс но данак выль книгаоссэс поттӥзы. Собере справочникын со произведениос сярысь чылкак одӥг чур гинэ гожтэмын луэ. Отысь марзэ басьтоз дышетӥсь, уката ик - егит мурт? Озьыен, кужымез жаляно ӧвӧл нимаз- нимаз районъёсъя та выллемесь книгаос поттыны. Туж секыт ке та ужез,оло, быдэстыны луысал интыосысь типографиос пыр но? - Таӵегес ик книга дасямын ни алнаш писательёс сярысь, - шумпотэмзэ вера Фома Кузьмич. - Авторез - кылбурчи, усто дышетӥсь, тодмо писатель Иосиф Бобров. Соослэн авторъёссы уката тросгес луозы, вылды. Эграос (играос) но зол-зол басьтӥсько бадӟым но кулэ ужзэс йылпумъян борды. Нимысьтыз таӵегес сузьет кылдытоно вылэм Ватка но Калмез палась писательёс сярысь... Кылем арлэн пумаз ми кӧня ке писательёсын ӵош вуылӥм Можга городэ. Отын но ӟырдыт вераськон ӝутскиз асьсэ палась литераторъёссы сярысь нимысьтыз книга поттон пумысен. Татысь педучилищеын (али колледжын) гинэ дышетскыса, куамынлэсь ятыр писательёсмы бадӟым литературае вамыштӥллям уго! Али ӝужась авторъёссы но уно гинэ. Ма, собере вуныса медам кыле вылэм Кам сьӧрысь гожъясьёсмы, Дэбес, Кез палъёс. Оло, куд-ог ёросъёс (кыкез-куинез) огазеяськыса, асьсэ писательёссылэсь ужъёссэс сэрттыса-пертчыса, огазьын пичильтык книга поттозы. Нош пургаос сярысь ке верано, таяз книгае кызьы ке пырытэк кылем Илья Пельтемов. Мон сямен, та выллем сборникъёс дасяку, нимаз книгаос поттэм писательёсыз гинэ отчы пыртоно ӧвӧл. Уногес люкано али гожъясь егитъёсты но. Кылсярысь, милям Бодья-Пуро гуртысьтымы ик усточимы Татьяна Прокопьева быдэс песьтэр чебересь, аспӧртэмлыкоесь кылбуръёс печатлаз ни. Нимаз книгаен "Удмуртия" издательствоын поттытозь, туала секыт вакытэ уно аръёс ортчозы. Туж быдэ вуиз ини ёросысьтымы журналист Вячеслав Михайлов. Кылбуръёсыз но огвакытэ ӵем потазы. Ӝабыр-ӝабыр басьтӥськысал, одӥг удысаз ӝот-ӝот ужасал ке, пичильтык книга поттыны быгатысал ни. Озьы ик ярало мыным Сергей Сосновлэн кылбуръёсыз, кырӟанъёсыз. Вылаз ик, районамы чырмыт тыршо "Пурга кизилиос" студие ветлӥсьёс. Пӧлысьтызы тужгес шаплыоссэ, лэчыт визьмооссэ юнгес лӧпкытъяно. Будӥсь-тудӟись кужымзэс одӥг ӧретӥгес лэзьыны юрттоно, дыр, соослы. Тодэмея Никвлад Самсонов али отын юнгес юрттэ егит журналистъёсты дасяны. Озьыен, оло, та книгаын ик куд-ог писательёслэсь газетъёсы потэм нырысетӥ очеркъёссэс, репортажъёссэс, веросъёссэс эскероно вылэм. Сыӵеосыз трос С. Самсоновлэн но, мынам но, аслаз Н. Самсоновлэн но. Кирилл ЛОМАГИН. Нош ик нефть Красногорск ёросын алигес ортчиз туж бадӟым ужрад. Вал Чепца НГДУ-эз пусъён. Мар со сётоз? Малы сокем шумпото ёросын улӥсьёс? Шумпотымонэз вань. Нефть поттӥсьёс вытсэс (налогзэс) тырыны кулэ интыысь бюджетэ. "Сьӧд зарни" кыскисьёслы али сюрес кыско пырак нефтез портӥсьёс доры. Зэм ик, кызьы нефтез сьӧд зарни уд шуы, дуно эстӥськон, коньдон поттыса, ёрослэсь но, республикалэсь но экономиказэс юнматоз. П.0 НИКОЛАЕВ. Нылпи понна толэзьлы быдэ сётӥськись кун пособиосты 2000-тӥ арын тырон радлыкез юнматон сярысь Удмурт Республикаысь Правительстволэн постановлениез Ёрмись семьяосысь нылпиосты улон-вылонын утён понна, Удмурт Республикаысь Правительство пуктэ: 1. Удмурт Республикаысь калыкез улон-вылонын утёнъя министерстволы: 1.1. Нылпи понна толэзьлы быдэ сётӥськись кун пособиосты тыронэз радъяно, семьяысь котькуд адямилы огъя доходлэсь быдӟалазэ лыдэ басьтыса. 1.2. Кун пособиосты нырысь ик тыроно сыӵе семьяослы, кудъёсаз котькуд улӥсьлэн доходэз улыны-вылыны тырмымон коньдонлэн витьтон процентэз уг ке луы. 2. Нылпи понна толэзьлы быдэ сётӥськись кун пособиосты тыронъя черод юнматон вылысь, улыны-вылыны ичизэ кулэ луись коньдонлэсь быдӟалазэ 900 манет тупатоно. 3. Юнматоно семьяысь котькуд улӥсьлэсь доходзэ лыдъян-чотанъя радлыкез. 4. Та постановленилэсь быдэсъяськемзэ эскероз Удмурт Республикаысь Калыкез улон- вылонын утёнъя министр С. И. Андреева. Удмурт Республикаысь Правительстволэн Тӧроез Н. А. Ганза. Ижевск город, 2000-тӥ арын 19-тӥ январе. � 33. Тазьы улӥськом-вылӥськом Кылем арня пумын Удмурт Республикаысь югдурез утёнъя министерствоын журналистъёсын пумиськон ортчиз. Сое нуиз МВД-ысь министрлэн нырысетӥ воштӥсез, милициысь полковник Михаил Воробьев. Отын ортчем арын ужамлы йылпумъянъёс лэсьтэмын. Котькудӥз али ас вылаз шӧдэ, макем бадӟым инты басьтэ йыружъёсын нюръяськон. Правоосты утёнын тыршисьёс кылем сӥзьылысен кутскыса ужзэс нуо уен-нуналэн, ужано луо 12 час ӵоже. Зэм, югдур уката но уродме экономика но политика удысын улон огсыр ке уг мыны. Россиын али но юн шӧдӥське на 1988-тӥ арын августэ манетлэн куашкамез. Уноез соку куанеръёс радэ кылизы, нош вузъёслы дунъёс 124 процентозь йылӥзы. Уждун басьтонъя элькунмы Урал улосын берпуметӥ интыын мынэ, шуыны луоз, асьмелэсь бер ӧжытлы гинэ бере кыле на Курган область. Нош ужтэк кылемъёслэн лыдзыя асьмеос та улосын нырысетӥ интыез басьтӥськом. Сыӵе югдур шӧдӥськытэк уг кыльы йыружъёс ласянь. Вань пусъем йыружъёслэн лыдзы 14,8 процентлы йылӥз но 32,6 сюрсозь вуиз. Со шӧдӥськиз республикаысьтымы вань ёросъёсын сямен, Каракулино но Якшур-Бодья районъёсты гинэ вератэк, отын йыружъёс кӧнялы ке кулэсмизы. Кез районын югдур валлян арын кадь ик кылиз. Тужгес но соос йылӥзы Глазов (+47,1%), Дэбес (+48,1%), Камбарка (+61,5%) но Красногорье (+44,7%) ёросъёсын. Югдурез утёнъя министерство но солэн ёзъёсыз социально-экономической югдур шоры учкытэк тыршизы югдурез ас киязы но огсыр возьыны. Кылем арлэн нырысетӥ ӝыныяз йыружъёс 28 процентлы будӥзы ке вал, арлэн пумаз со лыдпус 14,8 процентозь вуиз (Россиын +16,3%). Миым 2,9 процентлы кулэсмизы секыт вӧсь карон учыръёс (565), 16,1 процентлы эриктэман (203), 2,5 поцентлы ваньбур талан (615), 24,4 процентлы юромо тыл понон (65), 5,7 процентлы эрказъяськон (1,8 сюрс). Азьло сямен ик тужгес бадӟым инты басьто секыт йыружъёслэн лыдзы - 62,9 процент яке 20,5 сюрс. Нош Сарапулын, Глазовын, Сарапул, Воткинск, Завьял, Камбарка, Каракулино но Ува ёросъёсын та лыдпус 65 процентлэсь но ортчиз. Адямиосты виён учыръёс пӧлысь 120-ез яке 31 процентэз лэсьтэмын семьяосын. Соос тужгес но трос пусъемын гуртъёсын - 83 (1,2%): Глазов ёросын 9, Можга ёросын - 7, Воткинск ёросын - 6, Пичи Пурга ёросын 5, Якшур-Бодья но Игра районъёсын виемын быдэн 4 мурт. Виён учыръёс шараямын 89,2 процентэз яке со будӥз 10 процентлы. Уноез йыружъёс пото мурт ваньбурез киултыны тыршонэн - 59,3 процент яке 19,3 сюрс. Кылем арын 11 толэзь ӵоже ваньбур лушкан будӥз 12,6 процентлы. Адямиез талан пусъемын республикаысьтымы кызяз городъёсын но ёросъёсын, тужгес но Индустриальной, Ленин, Устинов районъёсын, Сарапул городын. Милициын ужасьёс шедьтӥзы судлэсь но следствилэсь пегась 1458 адямиосты, шараязы азьвыл ышемен лыдъяськись 900-лэсь уно муртэ. Югдурез утёнъя ёзъёс ортчем арын тужгес юн саклык висъязы радъям йыружъёсты шараянлы. Ужзэс быгатыса нуэмен валче ик уно азинсконъёс но басьтэмын. Удмурт Республикаысь радъям йыружъёсын нюръяськонъя управлениын (УБОП) ужасьёс югдурез утёнъя ёзъёсын ӵош ӝегатӥзы 15 бандаосты, эскеризы 448 йыружез. Кыл кутоно луиз 283 мурт. Йырвандӥсьёслэсь уно пыӵал тӥрлык таламын - 4 автомат, 8 винтовка но карабин, 15 пӧйшуран пыӵал, 7,4 кило пуштытон но 26 пуштытон арбери. Удмуртиысь милицилэн тыршеменыз, озьы ик "Вихрь-Антитеррор" ужрад дыръя но, миым 5.639 пӧртэм пумо пыӵал тӥрлык таламын, со пӧлын Калашниковлэн 7 автоматэз, 15 винтовка но карабин, 4098 пистолет но револьвер, 1300 пӧйшуран пыӵал, ас киосыннызы лэсьтэм 70 ыбылӥсь арбери, газэн ыбылон 722 пистолет, со пӧлысь уноез тупатэмын пуляен ыбылыны, басьтэмын 1 миллион 23 сюрс 600 биртык патрон, 14 граната, 11 килолэсь уно пуштытон но 34 пуштытон арбери. Валамон ини, милицилэн озьы тыршемез уно адямиосты быронлэсь утиз. Вералом одӥг радъям группаез ӝегатон сярысь гинэ. "Ижмаш" акционер огазеяськонын тыршись бандалэсь таламын 35 пыӵал тӥрлык, 60 магазин но Калашниковлэн автоматэзлы 1 сюрс пала воштос ёзъёс, озьы ик ӝегатэмын уно боеприпассы. Югдурез утёнъя удысын ужасьёс трос ужало республикамылэн экономикаеныз герӟаськем йыружъёсын. Та удысъя нимысьтыз ёзэт (УБЭП) экономика удысын 1300 йыружъёсты (+5,7%) шараяз. Соос республикамылы туж бадӟым но шӧдскымон изъян вайыны быгатысалзы. Озьы ке но республикамылэн калык хозяйствоезлы но калыклы 116 миллион манетлэсь унолы изъян ваемын. Кылем арын та удысын 1200 уж эскеремын (+11,9%). Судъёсы ужъёс келямын 11,1 процентлы уногес (984). Озьы республикамылэн казнаяз 70 миллион манет берыктэмын. Трос лэсьтэмын кудӟытӥсь юонъёсты поттонэз но сое вузанэз эскерон ласянь. Та удысын шараямын 88 йыруж, 2900-лэсь уно протоколъёс гожтэмын, 1,1 миллион манетлэсь уно штраф тырытэмын. Озьы бюджетэ ватсаса 760 сюрс манет коньдон пыртэмын. Законэз тӥяса вузкаронысь таламын 168 сюрс литрлэсь уно аракы, со 5 миллион манетлэсь но ортче. Лушкемен спирт но аракы поттонъя шараямын но быдтэмын 15 цех. Шаерамы кужмоя наркотикъёсты лушкемен вузанэн нюръяськон. Та ласянь пусъемын 1 сюрслэсь уно (+10,9%) учыръёс. Лыдпусъёс верало, усыкмытӥсь суретъёс пумен тросгес вӧлмо шуыса. Соин ик УР-ысь МВД-лы но та ласянь уногес ужано луэ. Та ласянь нимысьтыз ужрадъёс кутэмын. Республикаямы "Мак" но Допинг" ужрадъёсты ортчытон дыръя таламын 16о килолэсь уно наркотик, со пӧлын 15,4 кило героин, 9,4 кило марихуана, 135 кило мак куро. Та ласянь 1999-тӥ арын 17 но ӝыны процентлы (937) уногес уголовной ужъёс ӝутэмын. Россиысь МВД-лэн куремезъя, нырысь ик милицилы трос ужано городъёсысь но мукет интыосысь ульчаосын, улон интыосын югдурез утён ласянь. Озьы уно калык люкаськон интыосын йыружъёслэн лыдзы пумен кулэсмыны ӧдъязы. Но соин ӵош 13-яз ёросъёсын ульчаосын йыружъёслэн лыдзы будэ, Ижевскысь Устинов но Ленин ёросъёсын со йылӥз 8 процентлы. Куатьтон процентлэсь уноез йыружъёс лэсьтӥсько шоркармылэн урамъёсаз - 1700 учыр. Та ласянь югдур ӧжытак умоя ке но, Удмуртия Россиысь мукет улосъёс пӧлын сокем ик ӟеч интыын уг мыны. Асьмеос сылӥськом, Москва, Санкт-Петербург городъёс, Мурманск но Пермь областьёс берын. Ульчаосын йыружъёсты палэнтонын бадӟым инты басьтыны кулэ валэктон уж нуон. Кылем арын милиция город но гурт ульчаосысь 152,1 сюрс юэмъёсты (+30,5) палэнтӥз, сазьтӥськыны келямын 85,7 сюрсэз (+31,6), асьсэды умойтэм воземзы понна ӝегатэмын 38,3 сюрс (+16,1%) мурт. Удмуртиын но, быдэс Россиын сямен ик, йыруж лэсьтӥсьёслэн лыдзы чутрак будэ быдэ вуымтэос пӧлын. Миым лэсьтэмын 2500 йыруж (+27,8%). Та ласянь тужгес но "данэ" потӥзы Глазов (14,8 %, будӥз 2 но ӝыны поллы), Сарапул (15,7% будӥз 2 поллы), Каракулино (14,8%) ёросъёс). Милициын ужасьёс быдэ вуымтэос пӧлын йыружъёсты алонъя, соос пӧлын юонэн но наркоманиен нюръяськонъя трос лэсьтэ. Ульчаосын ӝегатэмын 2654 юэмъёс (+11,8%), 41 быдэ вуымтэос ӝегатэмын наркотикен, "эшъяськемзы" понна. Нош 2390 (+35%) анай- атай яке мӧйы адями кыл кутоно луиз пиналъёссылэн юэмзы понна. Курытсэ вузамзы понна 343 вузкароись тыриськоно луиз. Азьвыл сямен ик уно йыружъёс лэсьтӥсько юэм йырын. Кылем арын кудӟыса лэсьтэм йыружъёс будӥзы 2,6 процентлы (6,6 сюрс). Тордонэн герӟаськемын 28,3 процентэз йыруж, нош Алнаш, Вавож, Грахово, Киясово, Красногорск но Сюмси ёросъёсын та лыдпус 40 процентлэсь но ортче. Юыса быдтэмын 237 мурт (+2,6%), юн сӧсыртэмын 342 адями (+7,5%), таламын 454-ез (+0,7%). Тужгес сюлэмшугъяськыто нокытын ужасьтэмъёсын лэсьтэм йыружъёс. Соос миым пусъемын 12700 пол (+26,5%). Улон интыосын, ульчаосын лушкаськон-талан учыръёсын нюръяськонын бадӟым оскон вневедомственной ваньбурез утёнъя управленилы. Али со возьма 4,1 сюрс (+4,4) объектъёсты, 7,4 сюрс квартираосты. Кылем арын гинэ улон интыоссэс утьыны сётӥзы 1800 кузёос (+46,2%) но 800 пала (+40,9) выль объектъёс. Та ёзын ужасьёс 1400-лэсь трос йыртэмасьёсты кырмизы, уно лушкаськон учыръёсты палэнтӥзы. Сюрес вылъёсын шудтэм учыръёсын нюръяськисьёс (ГИБДД) кылем арын, 1998-тӥ арен ӵошатыса, 3,8 процентлы ӧжытгес учыръёсты пусйизы. Озьы ке но, та лыдпус буйгатскыны уг лэзьы. Шудтэм учыръёс дыръя бырыны шедиз 280 адями (+3,3%) со пӧлысь 24-ез пиналъёс (+41,2%), 1900 мурт сӧсырмиз, котькудӥз куатетӥез шудтэм учыр лэсьтэмын юэм йырын. Вить сюрслэсь уно водительлэн правоез таламын. 1999-тӥ арын республикаямы 2,6 сюрс тылпу вал (+2,7%), со пӧлысь 915-ез (+2,1%) Ижевскын. Ог 70 процентэз тылпуос пото нимаз улон интыосын. Ярам, таин ӵош тылын адямиос ӧжытгес быризы 8,3 процентлы (132). Но со вакытэ ик вӧсь луон учыръёс 16,4 процентлы будӥзы (163). Тылпуос ӵемгес пото электроен ужась приборъёс тӥяськемен, тылын шудэмен, тамак кыскемен. Ортчем арын "горд атаслэсь" 20 миллион манетлы уногес (-7%) изъян адӟемын. Тылпу кысӥсьёс быронлэсь 241 адямиез но 631,5 мллион манетлы уногес калык ваньбурез утизы. Бен, Удмурт Республикаысь МВД-ын ужасьёс трос ӟечсэ лэсьто. Соос озьы ик ужзэс быдэсъяло "пӧсь" интыосын но, кылсярысь, Чечняын. Берло дыре 46 муртлы сётэмын Россия кунмылэн вылӥ данъян пусъёсыз, 9-эз басьтӥзы орден, 37-ез медаль. Тросэз нулло дано нимъёс. Кылем арын Удмуртиысь югдурез утёнъя удысэ лыктӥзы 561 мурт (-34%), кошкиз 924 адями (+14,1%), соос пӧлысь 95-ез мозмытэмын урод ужамзы понна. Милиция кун органын одӥгез валтӥсь кужым луэ. Со уте асьмелэсь правоосмес, тазалыкмес, эрикмес. Вераны кулэ: 1999-тӥ арын Удмурт Республикалэн улон-вылонэз сокем урод, шукрес ӧй вал. Ӧз шӧдӥськы экстремизм но терроризм, ӧй вал пӧртэм калыкъёс куспын ваче пумит луонъёс. Та ласянь трос лэсьтӥз МВД но. Милицилы бадӟым юрттэт сёто Удмурт Республикаысь Кун Кенешлэн Тӧроез А. А. Волков, Правительстволэн кивалтӥсез Н. А. Ганза, Кун Кенешысь депутатъёс, городъёсысь но ёросъёсысь администрациссылэн кивалтӥсьёссы. Югдурез утёнъя удысын ужасьёслы туала дыре йыружъёсын нюръяськон капчиен уг сётскы. Радъям йыружъёс но коррупция, наркобизнес, экономика удысын йыружъёс - ваньмыз со милицилэн бадӟым ужез. Калык мед шӧдоз солэсь кужымзэ, мед юрттоз данзэ ӝутыны, быгатэмезъя юрттэт но сётыны. Туэ 21-тӥ январе Россиысь МВД-лэн коллегиезлэн кенешез ортчиз. Ортчем арлы йылпумъянъёс лэсьтыса, РФ-ысь югдурез утёнъя министр В. Б. Рушайло республикаысьтымы МВД-лэн ужамезлы умой дунъет сётӥз. Нош министр, милициысь генерал-лейтенант В. Ф. Щербаков дуно кузьымен пусъемын. Вералом на: 26-тӥ январьысен Удмуртиысь милиция нош ик ужаны кутскиз нимысьтыз графикъя. Ужан нуналзы кыстӥське 12 час. Одӥгез сюлэмшугъяськытэ: милицилы уждун тырон ӝега, кӧня ке ар понна, басьтэмын ӧвӧл ни паёк шуон. Вылӥ кивалтӥсьёслы та югдурысь потон понна кыӵе ке амал шедьтоно ик вылэм. котьма ке но, монэ но, тӥледыз но милиция гинэ утёз. Н. БАЙТЕРЯКОВ. (Улӥын сётӥськом огъя югдурез возьматӥсь лыдпусъёсын таблицаосты. Тодматске, ӵошатэ, малпаське асьтэос, кызьы улӥськом асьмеос та вакытэ). Лыдэ басьтэмын таӵе йыружъёс: Йыружъёслэн аспӧртэмлыксы Пусъемын Ваньмыз Йылэмын (процентэн Ужрад кутэмын Ваньмыз Шараямын (процентэн) 1998 ар 1999 ар Огъя йыружъёслэн лыдзы 32574 +14,8 23431 71,5 71,9 Секыт йыружъёс 20504 +16,2 12347 58,2 59,5 Ульчаос но йыружъёс 2864 - 7,5 1844 61,4 61,9 Адями виён 388 +0,8 348 87,5 89,2 Секыт вӧсь карон 565 -2,9 492 83,187,2 Эриктэман 203 -16,1 196 94,7 93,3 Ваньбур талан 2204 +11,8 1269 58,7 56,2 Лушкаськон 15203 +21,1 8139 49,8 53,3 - Со пӧлын нимаз ваньбурез 12429 +17,9 6342 47,4 51,0 - улон интыысь 4085 +19,1 1757 38,7 43,8 - ТРАНСПОРТЫСЬ 561 -2,6 210 29,2 36,6 Транспортэз лушкан 318 -1,5 278 73,7 83,0 Пӧяськыса лушкаськон 960 +21,8 798 78,8 82,4 Юромо тыл понон 65 -24,4 36 53,7 48,6 Экономикая йыружъёс 1300 +5,7 1218 94,1 95,9 Кузьмаськон (взятка) 37 +23,3 22 Выт тыронэз ватон 139 +157 99 Пӧяськыса коньдон поттон 53 +29,3 16 21,7 30,2 Наркотикен герӟаськем йыружъёс 1020 +10,9 937 95,6 95,6 Нош кыӵе югдур асьме городъёсын но ёросъёсын? Лыдпусъёс возьмато: Ёросъёс но городъёс Ваньзэ йыружъёс пусъемын Кӧнялы будӥз яке кулэсмиз (процентэн) Шараямын (процентэн) Устинов 2424 +33 71,3 Индустриальной 2361 +19,3 69,9 Ленин 2793 +16,5 62,6 Октябрь 2921 +5,3 63,8 Первомай 2953 +12,4 62,7 Ижевск городъя 13458 +16,0 65,7 Воткинск ёрос 2940 +13,3 70,9 Воткинск 2326 +11,8 71,1 Глазов ёрос 603 +47,1 80,9 Глазов 2164 +1,5 71,4 Можга ёрос 999 -28,2 86,1 Можга 625 +20,7 86,9 Сарапул ёрос 724 +15,5 67,8 Сарапул 2709 +12,3 67,7 Алнаш 226 +1,3 84,2 Балезино 490 +1,7 74,0 Вавож 260 +4,8 92,8 Грахово 177 +3,5 86,0 Дэбес 270 +48,4 93,8 Завьялово 1593 +13,3 65,1 Игра 686 +7,7 86,4 Камбарка 570 +61,6 77,6 Республикалы тылпуос таӵе изъян ваизы: 1998 1999 % Ваньмыз тылпуос 2474 2540 +2,7 Со пӧлысь Ижевскын 896 915 +2,1 гуртъёсын 1088 1112 +2,2 Тылпуын быризы (адямиос) 144 132 -8,3 Со пӧлын нылпиос 10 8 -20,0 Сутскизы но сӧсырмизы 140 163 +16,4 Тылпуын быризы: - лэсьтӥськемъёс (юртъёс) 1039 998 -3,9 - пудо йыр 459 228 -2,0 поллы - ю тысь (тоннаен) 43 14 -3,1 поллы - пудо сиён (тоннаен) 1029 624 -39,4 - техника 97 76 -21,6 Верало ГИБДД-лэн лыдпусъёсыз Ваньмыз шудтэм учыръёс 1998 1999 % Быризы та мында адями 1747 1681 -3,8 271 280 +3,3 Соос пӧлын нылпиос 17 24 +41,2 Сӧсырмизы 1935 1898 -1,9 - нылпиос 267 256 -4,1 Водительёслэн янгышенызы 1291 1198 -7,2 Нимаз водительёсын сэрен 983 900 -8,4 Юыса ӝегатэмын 12174 13406 Со пӧлын нимаз транспорт возисьёс 10313 11738 +13,8 Шедьтэмын лушкам транспорт 1131 1046 -7,5 Удмуртиын тужгес ӵем пумиськыло таӵе шудтэм учыръёс: - пыдын мынӥсь-ветлӥсез лёган 817 824 +0,9 - ваче шуккиськон 420 357 -15,0 - бекмыльскон 292 270 -7,5 - велосипедистэз лёган 34 47 38,2 Россиын но котырысь улосъёсын югдур Улосвыл Ваньзэ йыружъёс пусъемын Будэмын яке кулэсмемын (процентэн) Шараямын (процентэн) Россия 3001748 +16,3 73,4 Удмуртия 32574 +14,8 71,9 Пермь область 94279 +25,6 63,3 Башкирия 46409 +18,3 86,2 Татарстан 72161 +36,2 71,4 Киров область 30745 +21,5 74,5 Курган область 42419 +29,5 64,4 Оренбург область 46649 +38,1 78,9 Улэмед ке потэ - уен-нунал ужа Гуртлэн улон-вылонэз - музъем но пудо-живот бордын. Арысь аре колхозын ю-нянь, сӥль-йӧл, бакча сиёнъёс будэто. Мар веранэз, крестьян семьяын быдэ вуэм адями пичи дырысеныз ик музъем ужлэсь ческытсэ-кузьытсэ тодэ ни. Берло кык арзэ гуртын улӥсьёсты куазь ӧз жаля. Ӵапак ю будон вакытэ зорытэк улӥз. Туэ 800 гектар муос вылын ю-нянь чик ӧз буды, арам луиз. Юромо кадь аран вакытэ куазь но сӧриське - ведра дурын кадь кисьтэ. Озьы одӥг гектарысь 8,5 центнер сяна ӧз кутсалэ. Пудоез возь вылэ поттытозь, фураж но уз трымы. Одӥг сюрс тонна пала басьтыны кулэ луоз. Ю ӧжытэн кизьыны кидыс но палэнысь вайытэк уз луы. Та вакытэ колхоз тӧролэн трос сюлмаськонэз. Пудолы тырмыт сиён утчано, тулыс бусы ужъёс матэкто ни - ӟечлыко кидыс шедьтоно. Пудо сиёнлы республикаын но бадӟым ёрмон кылдэмын. Тужгес но уй пал ёросъёсын. Нош со ваньмыз уксёен сылэ. Жаляса верано луэ, со колхозын ужасьлэн кисыяз шӧдӥськоз. Ярам ай эшшо ке турын тырмыт дасязы - 3 сюрс тонна. Собере 13 сюрс тонна силос тыризы на. Азьвыл арен ӵошатыса, кык поллы уногес. Таязэ угось кукуруза чебер вал. Колхозысь валтӥсь зоотехниклэн Анатолий Пчёлкинлэн верамезъя, одӥг йыр пудолы 14 центнер сиён дасямын. Нош толэз потыны 26 центнер кулэ. Специалистъёлэн сюлэмшугъяськонзы валамон: сомында пудо-животэз толйытыны кулэ ук. "Рассветын" 2700 йыр сюро таза пудозы, 1 сюрс пала парсьёссы, 81 вал вордо. Ёросын таӵеез ӧвӧл ни. Пусйыны кулэ, тросэз хозяйствоос, сиёнлы ёрмыса, пудо-животсэс вандылоно луо. Нош татын кулэстыны уг малпало. Уго выльысь со "ышем" йыръёсты будэтыны туж секыт. Быдтыны капчи, вань карыны шуг. Кысконо скалъёс сярысь ке верано, колхозын соос 950 пала лыдъясько. Ортчем арын скаллэсь быдэ 2500 литр ёрос йӧл басьтӥзы. Берпуметӥ куинь аръёссэ "Рассветысь" дояркаос 3 сюрс килограммлэсь ятыр йӧл кыскылӥзы вал ни. Татын азьветлӥсьёс луо Вужгуртысь Галина Андреева, Куӵосысь - Татьяна Орлова, Починкаысь - Нэля Юртаева. Сальяысь Нина Богданова но Галина анисимова котькуд скаллэсь быдэн 7-6,5 килограммен йӧл кыско. Нош гужем 15-лэсь но ортчылӥз. Котькуд гуртын скалъёс вань. Нош Юрмалаын ошпиосты будэто, колхозын соос 250 йыр. Кумырсаын 250 бызьылымтэ ветылъёсты возё. Куайытон сярысь ке верано, бадӟым сюро пудо нунал ӵоже 580 граммлы будэ, нош парсьёс - 400-лы. Пусйыны луоз Кумырсаысь Алевтина Прохороваез, Елена Краснопероваез, Починкаысь Александра Кушаковаез. Нош кунян вордон гидын кыӵе шулдыр. Али гинэ вордскем макеос пичи нуныос кадесь - мусоесь. Соосыз утялтӥсь кышномуртъёс гидэз чылкыт возё, нош кунянъёсты асьсэлэсь нылпиоссэс кадь учко. Ӵапак сыӵе кылъёс вераны луоз Сальяысь Нина Трофимовалэн но Раиса Ермаковалэн звенооссы пумысен. Соос киын кунянъёс нунал ӵоже одӥг килограммлэсь тросгес будо. Нимтулъёсты эшшо но трос вераны луысал. Угось ваньмыз ужало, тыршо. Котькудӥз колхозник аслэсьтыз ужзэ тодэ. Секыт улон вакытэ но, куке тыро-пыдо уждун уг басьты, ужаны мылкыдыз быре, озьы но гурт калык вань шуг-секытэз тыбыр вылаз нуыны чида на. Но кемалы на меда?.. Пудо-живот вордэмлэн пайдаез ӟеч выжы уськытэмысь но потэ. Та уж хозяйствоын азьвыл радъямын ӧй вал. Табере кыкетӥ арзэ ни валтӥсь зоотехник Анатолий Кузьмич радызъя зоотехнической учётсэ нуэ: кудӥз скал кӧня йӧл сётэ, ку кунян ваиз, кӧня кунянэз. Озьы ик кылдоз сюро таза пудолэн ӟеч выжыез но. Умой вакытэ колхозысь пудо гидъёсты соляркаен шунто вал. Нош табере пу вылэ кылизы. ГСМ-лы дунъёс будэмен валче, фермаын но азьвыл кадь шуныт ӧвӧл ни. Вылаз ик, пу но ыль на. Кызьы-о трос йӧл кыскод на? Азьло сюкасен но сектало вал. Табере солэсь куштӥськизы ни. Ярам эшшо валъёс вань на. Гидъёсы соосын сиён пыртало. - Дуннелэсь бере кылиськом, - шуэ валтӥсь зоотехник. - Котькытын компьютер вылэ выжо ни, нош Россиын выльысь вал вылэ потто. Цивилизация луоз-а со? * Скал кыскисьёс Нина Богданова но Галина Анисимова. * Кунянъёсты будэто Галина Охотникова но Зинаида Камашева. * Николай Зыков 14 ар ӵоже молокозаводын ужа ни. * Вуись "цивилизация". Чидан чигоз ни "Удмуртэнерго" кыкетӥзэ шуккет лэсьтӥз Пичи Пурга ёросысь "Юж-Пурга" эштослы. Электротылзэс куинь нунал кысыса возизы. Нырысетӥез учыр ӝыны ар талэсь азьло вал. Соку тыл ӧвӧлэн "юж-пургаос" вылӥ ӟечлыко ю кидыстэк кылизы. Со пумысен "Удмурт дуннне" гожъяз вал. Но "Удмуртэнерголы" аслаз интересъёсыз кулэгес, шӧдске. Гуртоос котькӧня ыштонъёс мед адӟозы, нош тыл понна пунэмзэс мед тырозы. Соослэн ведь кужымзы вань. Мылзы потӥз - тылэз кысӥзы, мылкыдзы умояз - ӝуатӥзы. Гуртын ужасьлэн но кужмыз вань, но со чида. Ӵуказе вань хозяйствоос гурт продукциез вузамысь дугдӥзы ке, мар луоз? Зэм, нырысь ик асьсэос гуртоос куашкалозы. Сьӧраз "Удмуртэнерго", мукет хозяйствоос сютэм кылёзы. Куинь нунал ӵоже "Юж-Пургаын" ньыль кунянзы кулӥз, одӥгез скалзы ошиськиз. Вить йыр пудо кӧня киловатт понна тырыны тырмысал? Малпаськизы-а со пумысен "Удмуртэнергоын"? Ма, соос уг но тодо, дыр, вож кунянъёслы нунылы кадь шуныт кулэ шуыса. Тужгес но толлэн шораз. Эштослэн "Удмуртэнерголы" 36 сюрс манет текущий тыриськонэз вал. 3-4 нунал возьманы ӧз чидалэ ёрос электросетьын ужасьёс. Тылэз "вандӥзы". Азьпалан таӵе шимес югдуре медам вуэ шуыса, эштос азьвыл люкаськем пунэмзэ но 17 сюрс манет ватсаса тыриз на. Нош кӧня пудоез со понна вандыны кулэ, кӧня ватсаса сӥль-йӧл вузано. Калыкын огшоры уг верало: ванезлы вань лыктэ. Кинлы ке но ужано, кинлы ке - сиёно... А. ФРОЛОВ. Ёросысь бадӟымез колхоз 60-тӥ аръёсы Совето власть пичи колхозъёсты бадӟыматъяны кутскиз. Кылдылӥзы гигантъёс... Кырыкмас сьӧрысь но ваньзэ гуртъёсты одӥг хозяйствое огазеязы. Юрмала черкогурт гинэ та палан ӟучез вал, со ик бадӟыматэм колхозлэн шорсюлмыз луиз. Татысь колхозлэсь ик нимзэ но кельтӥзы - "Рассвет". Туннэ нуналлы ке верано, колхоз одӥг пумысеныз мукет пумозяз 30 иськем пала кысктӥське. Со 4-тӥ но 6-тӥ бригадаослэн кусыпсы. Котькудӥз гурт нимаз бригада. "Рассветлэн" музъемез 11 045 гектар луэ. Со пӧлысь гыроно-кизёноез - 8600. Ужась адямиез 600 лыдъяське. Вераны кулэ, салья пал музъем ёросын начаръёсыз пӧлы пыре. Мушак гурт котырысь музъемлэсь гинэ ӧжыт умойгес. Колхозлэн музъем вылаз кык шор ёзо школаос интыяськемын - Сальяын но Юрмалаын. Берлояз вить пичи гуртъёсысь пиналъёс дышетскыны ветло, ньыль классозь гуртазы ик дышетско. Куинь начальной школа вань. Черкогуртэ интыяськемын участковой больница. Котькудаз гуртын клубзы вань. Список аффилированных лиц открытого акционерного общества "Ижевский хлебозавод � 2" по состоянию на 31.12.1999 г. Фамилия, имя, отчество (наименование) аффилированного лица Количество принадлежаших лицу именых обыкновенных акций Основание, по которому лицо является аффилированным 1. Глухов Иван Иванович 421 Генеральный директор - член Совета директоров 2. Саламатова Галина Михайловна 116 Член Совета директоров 3. Пиманов Сергей Дмитриевич 177 Член Совета директоров 4. Максютин Михаил Викторович 54 Член Совета директоров 5. Сполохова Нина Ивановна 11 Член Совета директоров 6. Васильев Михаил Васильевич 381 Член Правления 7. Кузнецов Игорь Михайлович 115 Член Правления 8. Потанина Елена Леонидовна 119 Член Правления 9. Клещевникова Елена Николаевна 20 Член Правления 10. Шевцова Анна Степановна 16 Член Правления 11. Ширманова Любовь Петровна 35 Член Правления 12. Телеш Валентина Владимировна 31 Член Правления 13. Трофимова Нина Яковлевна 31 Член Правления 14. Чиркова Нина Федоровна 31 Член Правления Государственный комитет Удмуртской Республики по собственности - 3778 обыкновенных акций Пакет акций закрепленных в государсвтенной собственности. И. И. Глухов. Шарканъёс витё ни... Тани-тани Шаркан палъёсы но бадӟым праздник вуоз. Туэ 25-тӥ - 27-тӥ феврале та шулдыр черкогуртын ортчозы республикаысьтымы гурт спортсменъёслэн 6-тӥ тол шудонъёссы. Соосты радъясьёс таӵе программа ӵектӥзы. 24-тӥ феврале 16 часозь вуыны кулэ делегациослэн кивалтӥсьёссы, ужа мандатъя комиссия. 25-тӥ феврале 14 часозь лыкто но интыясько ёросъёсысь спортъя делегациос. 15 часэ - кужымъя гимнастикая ӵошатскон (воргоронъёс но нылкышноос). 17 часэ - шудонъёсты сӥё-дано усьтон. 18 часэ - кужымъя гимнастикая ӵошатсконэз азьланьтон. 20 часэ - судьяослэн командаослэн кивалтӥсьёсынызы кенешсы. 26-тӥ феврале 9 часэ - винтовкаысь ыбылӥськонъёс (тол полиатлон). 10 часэ - ёросъёсысь кивалтӥсьёслэн куасэн бызьылонъёссы. 10 час 40 минутэ - кивалтӥсьёс пӧлын 2 иськеме бызьылӥсьёсты пусъён. Куасэн бызьылонъя ӵошатсконъёс 10 час 45 минутэ - воргоронъёс (ветеранъёс) - 5 иськеме, нылкышноос (ветеранъёс) - 3 иськеме. 11 час 20 минутэ - вормисе потэм ветеранъёсты пусъён. 11 час 30 минутэ - егит пиос - 10 иськеме, егит нылъёс - 5 иськеме. 12 час 10 минутэ - вормисе потэм егит пиосты но нылъёсты пусъён. 12 час 15 минутэ - воргоронъёс - 10 иськеме, нылкышноос - 5 иськеме. 13 час 05 минутэ - вормисе потэм воргоронъёсты но нылкышноосты пусъён. Тол полиатлон но спортивной семьяослэн ӵошатсконзы: 13 час 30 минутэ - пиналъёс - 2 иськеме. 14 часэ - атайёс, воргоронъёс - 5 иськеме, анайёс, нылкышноос - 3 иськеме (эрико амалэн). 14 часэ - ёросъёсысь кивалтӥсьёслэн винтовкаысь ыбылӥськонзы. 17 часэ - Удмурт Правительствоысь но ёросъёсысь кивалтӥсьёслэн огазеям командаоссылэн волейболэн шудонъя пумиськонзы. 18 часэ - судьяослэн командаослэн кивалтӥсьёсынызы кенешсы. 20 часэ - ӵошатсконъёслэн нырысетӥ нуналаз вормисе потэмъёсты пусъён. 27-тӥ феврале Куасэн бызьылонъя эстафетаос: 9 час 30 минутэ - спортивной семьяос - 1 х 2 х 3 иськеме. 10 час 10 минутэ - нылкышноос - 4 х 3 иськеме. 11 часэ - воргоронъёс - 4 х 5 иськеме. 13 час 30 минутэ - Тол шудонъёсты сӥё-дано ворсан. Гажано гурт спортсменъёс! Озьы тупаз: таяз тол шудонъёсын ӵош нюръяськон мыноз "Удмурт дунне" газетлэн азвесь кубокез понна но. Туэ со ортчытӥськоз ни 48- тӥзэ.Нош солы кутскон сётэмын вал ай 1952-тӥ арын. Озьыен, ӵошатсконъёсмылы ӝоген тырмоз ни ӝыны даур. Нош кубок шедёз тол шудонъёсын вормись ёрос командалы. Миым сое басьтӥзы вал Игра районысь куасэн бызьылӥсьёс. Мар бен, эшъёс, куас сюресъёс вылын пумиськытозь! Н. БАЙТЕРЯКОВ. Будӥсь кужым Алексей Камашевлы оскемын колхозысь тужгес бадӟым фермаен кивалтыны. Интыяськемын со Салья гуртэ. Татын кысконо скалъёссы гинэ ог 500 пала лыдъясько. Ачиз Лёня пичи дырысеныз пудо борды дышемын ни. Школа парта сьӧрын пукыкуз ай фермае нэнэезлы юрттӥськыны ветлэ вал. 1995-тӥ арын, школаез йылпумъяса, шофёрлы дышетскиз. Собере выльысь гуртаз бертӥз. Я учётчикез, я фермалэсь кивалтӥсьсэ вошъяса ужаз. Пудо-живот вордон удыс сярысь сюлмаськыса Асан совхозтехникуме зоотехниклы дышетскыны пыриз. Собере ини фермалы кивалтӥсе пуктӥзы. Та вакытэ скаллы быдэ 5 килограмм йӧл кыско. Егит кивалтӥсь ӝожтӥське, пудо сиёнын сахароза но патока уг тырмы, пе. Басьтыны ке, уксё ӧвӧл. Нош ватсаса со сиёнъёс ке луысалзы, йӧл кыскон но будысал. Эмъюм октон сярысь ӝоген вунэтозы ни, дыр. Гужемзэ колхозын турын бичаса, толалтэ пудоез соин сектало-эмъяло. Егит пилэн мылкыдыз урод ӧвӧл. Оске, секыт вакыт кема уз кыстӥськы. Соку йӧл-сӥль но данакгес луоз. Дас вить - со ӧжыт ӧвӧл Петр Григорьевич Петров 15 ар колхозэн кивалтэ ни. Со дыр куспын хозяйство будонэз но, бай улон вакытэз но, выльысь курадӟонэз но адӟыса вуиз ни. - Петр Григорьевич, 15 ар куспын кызьы колхозын улон воштӥськиз? - Огшоры юан ӧвӧл со... 80-тӥ аръёслэн шораз "Рассвет" колхоз ёросын лябез вал. Сводкаез но учкем ӧз поты соку. Вань удысъя улӥысеныз нырысетӥ интыын сылӥм. Ферма гидъёс ӝыныз куашкан калэ вуэмын, пулэсь вал соос. Юрмалаын школа вужмемын. Сюресъёс ӧвӧл. Скал кыскисьёс фермае болотной сапегъёсын ветлоно луылӥзы ини. Оглом, колхозмы Ленин нимо но "Киясовский" совхозъёслэсь ог кызь аръёслы бере кылемын вал ни. Куанер улӥм... Ваньзэ выльдыны-тупатыны, лэсьтыны кулэ вал. Вить ар кулэ луиз мукет хозяйствоос дорозь вуттӥськыны. Сюресъёс лэсьтӥм. Пу фермаосты воштӥзы кирпичлэсь ӝутэмъёсыз. Асьме кужымен тыршим, собере армянъёс но юрттӥськизы. Одӥг гужем укмыс лэсьтӥськись бригада вал. 90-тӥ аръёсы пайда вайыса ужамы ни. Миллионъёсын уксё поттӥм. Выльдӥськонэн валче 93-тӥ-94-тӥ аръёсы шугъяськонъёс кутскизы. Азьло араз 3-4 гид пуктыны быгатӥськом вал ке, али ар куспын мырдэм но кызьы одӥгзэ вуттӥськом. Азьло ке лэсьтӥськыса ӧм вуысалмы, мон уг тодӥськы, кызьы али улысалмы. Кема ик ӧвӧл ай, Юрмалае киирпичлэсь выль кык этажъем школа пуктӥм. Выриз соин депутатмы, соку "Удмуртнефтепродукт" АО-лэн валтӥсь директорез Н. С. Сычев. Вераны кулэ, колхоз юрттӥськытэк школа ӧз ӝутскысал. - Кыӵе сюресъёс поттӥзы колхозэз бай улонэ? - Нырысь ик, ужан югдур умояз. Кыкетӥез - пудо сиён дасян борды ӟеч-ӟеч басьтӥським: ӧжытгес ю-тысь, тросгес турынэн сюдыны кутским. Куинетӥез - кадръёсын ужан амалъёсты выльдӥм. Арлыдоос уж борды гижысь-пиньысь уг басьтӥсько вал ни: ужаськом - ярам, ум ужаське - тоже уз уллялэ. Озьы Салья школаын дышетскись нылъёслы вазиськи: "Лыктэ фермае, ужаны дышетом". Берпуметӥ классын дышетскыкузы, валтӥсь зоотехник соослы урокъёс нуиз быдэс ар ӵоже. Колхоз стипендия но тыриз. Школа бере нылъёс фермае лыктӥзы. Йӧл кыскон будыны кутскиз. Но выллань ӝутсконмы пыраклы вылымтэ. Ялан ужано будӥсь кадръёсын, умоятыны кулэ ужан югдурез. 90-тӥ-94-тӥ аръёсы колхоз вылӥын вал, собере лябомыны кутскиз. Реформаослэн емышсы пайдаё ӧз луы: адямилэн мылкыдыз быриз. - Нош специалистъёсты тырмо-а? - Тырмо. Али егит специалистъёсты кутӥм. Асан совхоз-техникум бере зоотехник луыса ужаны кутскиз Ирина Тарасова. Салья фермаен кивалтэ 22 аресъем Леонид Камашев. Куӵосысь егит пиез, Николай Залоговез, бригадире пуктӥм. - 90-тӥ аръёслэн кутсконаз бадӟымесь колхозъёс люкылӥськизы. Нош тӥ со сюрестӥ ӧд мынэ. - Вераськонъёс вал, люкиськом шуыса. Малпасько, люкысалзы ке колхозэз, кудӥз ке но умой улысал, кудӥз ке - алама. Нош калык огъя ужаз. Котькудӥз аслэсьтыз кужымзэ сётӥз колхозлы. Аламае кылиз ке, со-а янгыш? Тани Сальяе асфальт вуэмын ни, нош Кумырсае ку вуоз ай? Со янгыш ӧвӧл ук, кыдёке пуксемын шуыса. Огъя кужымен одӥг кадь улӥськом. Та быдӟа колхозэн трактор но басьтыны быгатӥськом, нош люкиським ке, сое но ум быгатэ ини. Лябез колхоз арысь аре уллане усёз, берло одӥг гектар музъемзэ но кизьыны уз быгатэ ни. Улон югдур одӥг кадь луысал ке, колхозэз люкыны но ярасал. Сюрес гинэ ӧвӧл. Мукетыз вань: клубъёс, пудо гидъёс, куд-огаз начальной школаос. Туж секыт та быдӟа колхозэз нуыны. Нош колхозниклы - коть отын, коть татын ужано. Кыӵе солы пӧртэмез? Тракторен бусыетӥ ворттылэ-а, саникен ветлэ-а - ужез уз воштӥськы. Удысъёсты специалистъёс нуо. Кенешъёсын юнме уг верало ук: колхозлэн экономикаез но умой улэмез 80 процентэз пала кивалтӥсьёс бордысь потэ. Колхозэз люкид ке, котькудаз специалистъёс кулэ. Соос уз тырме. - Та палась гуртъёсын али пуэн эстӥсько. Газ кыскон пумысен кыӵе ке ужрадъёс кутӥсько-а? - Газ ласянь трос вераськон вал депутатэн Н. Сычевен. Солэсь азьло ачим тросгес бызьылӥ. Милемын артэ бигеръёс уло. Сальялэсь 3 иськемын гинэ. Соос асьсэлы газ кыскизы, нош Юрмалалэсь 12 иськемын луэ. Валтӥсь директоренызы вераськи. Со шуиз, дася, пе, проект, уксё ласянь вазиськы Удмурт Республикаысь Правительствое. Шуиз, 12 иськеме гумыосты тырыны кема ӧвӧл, шуръёс но, гурезьёс но уг люкето. Пӧрмытӥды ке - лэсьтом. Бигеръёс быгато, нош удмуртъёслэн уг пӧрмы. Проект пумысен мынӥ ёрос администрацилэн тӧроез А. А. Шадрин доры. Собере быръёнъёс ортчизы, Шадрин интые Каримов пуксиз. Уж интыысьтыз ӧз вырӟы. Депутатмы Сычев юрттӥсько шуиз вал. Нош ик Кун Кенеше быръёнъёс тупазы. Малпанъёс воксё мукет сямен берытскизы. Газ кысконэн али нокыӵе но азинсконъёс уг адӟисько. 20-30 арзэ газ дорамы уз вуы на. - Таяз аре кыӵе воштӥськонъёс луозы колхозын? - Выль лэсьтӥськон уж борды кутскыны ум малпаське. Сальялась пудо вандон цехез вуттыны кулэ. Отысь ик вӧй поттон заводэз йылаз-пумаз лэсьтыса вуттоно. Лицензиез ӧвӧл на али. Сое басьтыса, уксёез пазяно ӧвӧл. Трос фураж басьтыны кулэ луоз. Кызьы ке но та арез ортчытоно. Колхоз огсыр ужа. Котькудӥз аслаз интыяз. Адями берпуметӥ нуналозяз кужымзэ музъемлы сётэ. Улэмед ке потэ - уен-нуналэн ужа, уждунызлэн быдӟалаез серемес ке но. Колхозын котькуд лэсьтӥськон, выль техника басьтон туэ колхозниклэн кисыяз шукке. Зэм, выльдӥськытэк уждун гинэ тырыса улӥд ке, нылпиосмылэн нылпиоссы кытын но маин ужалозы на? Петр Григорьевич Петров вераське колхозысь одӥгеныз усто водителен Владимир Раевен. Дипломен пусъемын Людмила Васильевна Чайникова - Можга ёросысь Тылойыл школаысь дышетӥсь. Дас сизьым ар куспын со татын директор но, завуч но вал. Оглом - пельпумъёсыз вылын - секыт ныпьет. Людмила Васильевна сюлмаськемен, школалы сиён-юон будэтыны дас гектар музъем сётӥзы, школа доры асфальт кыскизы. Со тыршемен ик стадионэ кулэ тӥрлык, видео- крезьгур аппаратура но басьтӥзы. Нош дышетонэз ӟеч, выль сямен радъяны быгатэмез понна, 1998-тӥ арын Людмила Васильевна Чайникова Всероссийской конкурслэн дипломеныз пусъемын. Владимир Беломорскихлэн гожтэмез но туспуктэмез. Данъяськымон нимъёс Республикаын котькинлы тодмо кырӟась Любовь Быкова. Вуж Салья гуртын со вордскиз, татысь школаез ик йылпумъяз. Починкаысь Наталья Михалина ВЛКСМ-лэн съездаз ветлӥз. Делегатэ сое бырйизы парсь вордон удысын бадӟымесь вормонъёс басьтэмез понна. Вуж Салья школалэн директорез луыса трос аръёс ӵоже ужаз РСФСР-ысь школалэн дано дышетӥсез Петр Иванович Баранов. Та вакытэ школаен кивалтэ солэн пиез - Юрий Петрович. Та школаын ик директор вал, собере Удмуртиысь калыкез дышетонъя министр луиз иван Петрович Тукаев. Надежда Витальевна Бочкарёва, ёрос Кенешлэн депутатэз Салья школаысь ӟуч кылъя но литературая дышетӥсь, кылбуръёс гожъя. Соослы крезьгуръёс малпа картэз, Владимир Леонидович, крезьгуръя дышетӥсь. Бочкарёвъёслэн кырӟанъёссы республикаын тросэзлы тодмо ни. Эн вунэтэ мӧйыосты Грах ёросысь ветеранъёслэн организацизы ортчем арын республикаямы радъям конкурсын вормисен лыдъямын но 2-тӥ степенё Дипломен пусъемын. Дипломъёс сётэмын первичной организациоссылы но: "Дружба" колхозлы но "Родина" эштослы. Грахъёс таӵе вормон басьтӥзы ни кыкетӥзэ. Угось ёросысь ветеранъёслэн Советсылэн кивалтӥсез С. И. Савина мӧйыос сярысь ялан сюлмаське, солэсь куронъёссэ быдэсъяны пумит уг луо ёросысь кивалтӥсьёс но. П. КУЗНЕЦОВ. "Техника луиз ке, улом ай..." Республикая техникаен югдурез оглом басьтӥськод ке, котькытын одӥг выллем. 50-80 процентэз вужмемын ни. Выльдыны номырин. Одӥгзэ кесяса, мукетсэ кышъяськод. "Рассветын" но пӧртэм ӧвӧл. Машинаос но тракторъёс 80 процентлэсь тросгес ужаны ярантэмесь, шуыны луоз. 12-15 ар ужам тракторъёс но вань. Нош колхозын 76 трактор лыдъяське. Одӥг куиньмосэз соос 4-тӥ бригадаын, Сальялан, ужало. Берло кык ар ӵоже колхоз ньыль гинэ "корт вал" басьтӥз... Ӟеч аръёс бере но бере кылё. Кыӵе ке уйвӧт кадь потэ на со дыр. Мынӥськод вал машина но трактор возён парке, нош отын батыръёс выллем рад гинэ "корт валъёс", мукет техника сылэ. Мылкыд ик ӝутскылӥз, таӵе кужымез адӟыса. Нош али парк ӝыныез буш. Кытын но отын тупатыны луонтэм техникалэн юдэсъёсыз костасько... Техника басьтон ласянь "Рассветын" 1991-тӥ арын ӟеч вакытъёс быризы. Соку колхоз ар куспын куать трактор басьтыны быгатӥз вал. Табере тӥяськемзэ но тупатыны луонлык ӧвӧл. Воштос ёзъёс котькытын вань, но дуно. Кытӥ-отӥ уксёен яке сӥлен воштыса, "корт валъёсты" улӟыто. Тросэз потэ тракторист но шофёр бордысь. Кызьы "эштэ" яратӥд, озьы ик со чидалоз. Таиз ласянь, колхозлэн валтӥсь инженерезлэн Семен Охотниковлэн верамезъя, техникаез умой возё Сальяысь, Вужгуртысь но Кумырсаысь механизаторъёс. Кылем гужем юэз 19 комбайн утялтӥз. Соос пӧлысь ньылез гинэ умоесь. Мукетъёсыз бордын комбайнёръёс олома но йыринто, бусыысь гинэ медам "пегӟе". Туэ колхозэ силос комбайн басьтыны малпало. Колхозын вань гинэ семьяенызы тракторен яке машинаен ужасьёс. Кылсярысь, Куӵосысь атаез но пиез Бурдинъёс, Вужгуртысь куинь вынъёс Александровъёс. Сальялась озьы ик куинь вынъёс Бочкаревъёс (таосызлэн атайзы пиоссэ вошъяса ужа на) пичи дырысенызы ик атайзы сьӧры ветлыса, тракторен ужаны дышетскизы. Сальяысь ик Николай Поляков К-700 тракторен ужа, нош пиез Алёша автомашинаез нуллэ. Кызьы шуиз валтӥсь инженер, калык ӟеч ужа, шуг-секытъёслэсь уг палэнскы. Машина- трактор гинэ мед, пе, луоз. Нош техника вань ке, гурт но улоз ай. Механизатор Петр ЗЫКОВ. Правительствоын ГЕРОИН - СО БЫРОН Социальной ужпумъёсъя комиссилэн заседанияз (кивалтӥсез Правительстволэн Тӧроезлэн воштӥсез В. Е. Шудегов) секыт вераськон мынӥз кышкыт висёнлэн шаерамы вӧлмемез сярысь. Тазалыкез утён удысын ужасьёс но МВД пумен юнгес но юнгес сюлмасько ӵуказе улонмы ласянь. Кызьы пусйиз Удмурт Республикаысь югдурез утёнъя министрлэн нырысетӥ воштӥсез М. А. Воробьев, наркотикъёсын вузкарон арысь аре кужмоя, рынокын со ас интызэ ӝог шедьтӥз. Адямиез шузимытӥсь турын-куар но эмъюмъёс тросгес шедё егитъёс кие. Самой сыӵеос пӧлын ялан ӵемгес пумиськылыны ӧдъязы СПИД-эн висисьёс. - 1999-тӥ арын наркотикъёсын сэрен республикамыя 1020 йыруж лэсьтэмын, со пӧлысь 460-эз тужгес но секытъёсыз радэ пыро, - шуиз Михаил Воробьев. - Валля арен ке ӵошатоно, та лыдпус 160-лы йылӥз. Но тужгес но кышкыт вакытэз кутскиз кылем тулыс - самой со дырысен наркотической веществоос пӧлын нырысетӥ интые потӥз героин, огез тужгес но кужмоез бырон ваись сурет. Врачъёс верамъя, со огпол гинэ мугоре шеде ке, нокин эмъяны уг быгаты ни. Котькӧня бызьылы диспансеръёстӥ - пайдаез уз лу. Туннэ нуналлы республикая ог кӧня ке сюрс мурт наркотикен выре ни. Эшшо одӥг лыдпус: соос пӧлысь котькудӥз ар ӵоже 15 адямиез бордаз кыске. Кин шеде соос кие? Быдэ вуымтэос но егитъёс, ӝыныезлэсь ятырез - 16-30 аресъемъёс. 2000-тӥ - 2001-тӥ аръёслы Удмурт Республикалэн Правительствоеныз кутэмын нимысьтыз программа, чакламын пӧртэм ужрадъёс. Соос пыр вань общественностен огкылысь басьтӥськыса гинэ будӥсь нылъёсмес но пиосмес быронлэсь утьыны быгатом. Али, шонерзэ ке верано, та йырвисён быдэсак усемын МВД вылэ. Ватонэз ӧвӧл, тросэз егитъёс улонысь кошкемын ни шузимытӥсь суретъёсын йырин, Ижевскын гинэ - 20 мурт. Ортчытэм юанъёс возьмато, 11-тӥ классын дышетскисьёс пӧлысь 24 процентэз веръязы ни кулон ваись тӧдьы порошокез но турынъёсты. Соосты чакласа возё врачъёс, наркологъёс. Наркобизнес азьвыл аръёсы городын гинэ вӧлме ке вал, али со вуиз ни районъёсы, гуртъёсы но. Туннэ нуналлы 8-аз районэ выжы лэзиз ни. СПИД ласянь ке верано, тужгес но кышкыт югдур кылдэмын Ижевскысь Ворошилов нимо ульчаын. Татысь общежитиосын улӥсьёс, школаын дышетскисьёс висёнзэс палало шприц пыр, ог-огзылы наркотикъёс пуктылыса, озьы ик - ӵош кӧласа. Кышкыт чер троссэ нылпиосмес, тодмоосмес, ӵыжы-выжыосмес дырызлэсь вазь сопал дуннее нуоз на. Кызьы шуизы комиссилэн кенешоназ люкаськемъёс, эпидемия кутскемын, со жалятэк турна ни сюрес вылаз сюрем 18-30 аресъемъёсты. Тырмоз-а кужыммы талы пумит султыны, огкылысь кутскыса нюръяськыны? Л. МЕДВЕДЕВА. Зарни вылын пукиськом, пе Химия суретъёсын пыӵал тӥрлык Камбарка но Кизнерын возиське шуыса, котькинлы тодмо ни. Кылсярысь, быдэс Россиысь вань люизит пӧлысь 30 процентэз интыямын Удмуртиын. Азьвыл аръёсы со сярысь огшоры калык ӧз но тодылы. Табере та пыӵал тӥрлыкез быдтон пумысен трос ужрадъёс, программаос кутэмын. Со уже пырисько мукет странаосысь тодосчиос но. Люизитэз быдтонъя нимысьтыз технологиос дасямын ни. Соос уж вылын но эскерыса утчамын. Но шаерамы улӥсьёс сое асьме дорын быдтонлы пумит луо. Та нуналъёсы республикаямы вуылӥз Россиысь Кышкытлыклэсь утиськонъя министерстволэн граждан обороная академиезлэн начальникезлэн нырысетӥ воштӥсез, техника наукаосъя доктор, академик, генерал-майор В. В. Батырев. Василий Васильевич ӵапак ачиз ужа химия пыӵал тӥрлыкъёсты, ядерной эстӥськонэн ужась ракетаослэсь двигательёссэс быдтон ужпум бордын. Та удысъя тодмо тодосчи но Удмурт Республикаысь граждан оборона ужпумъёсъя но кышкыт учыръёслэсь утиськонъя комитетын ужасьёс пумиськылӥзы Удмурт Правительстволэн Тӧроеныз Николай Ганзаен, ёросъёсысь но городъёсысь администрациослэн кивалтӥсьёсынызы, вылӥ дышетскон заведениослэн ректоръёсынызы, котырысь инкуазез утён, пыӵал тӥрлыкез быдтон удысын ужась специалистъёсын. Нимысьтыз вераськон вал Камбарка, Кизнер ёрос администрациослэн кивалтӥсьёсынызы, Воткинск городлэн мэреныз. Кызьы пусйиз генерал-майор, пыӵал тӥрлык быдтон ужпум бордын быдэс дуннеысь уно учёнойёс ужало. Дасямын ни адямилэн тазалыкезлы кышкытлык ваисьтэм технологиеос. В. В. Батырев асьме доры вуэм уно документъёсын. Со пусйиз: - Химия ож тӥрлыктэс нокин но палэнэ нуыса уз быдты. Со бордын асьтэос ик ужано луоды. Зэм, нырысь со понна зол-зол инъет дасяны кулэ. Адямилы но, котырысь инкуазьлы но со кышкытлык медаз кылдыты. Соин ик дыртыны кулэ ӧвӧл. Собере ведь тӥ "зарни" вылын пукиськоды, шуыны луоз. Люизитлэсь поттыны луэ туж дуно маке - мышьяк. Одӥг килоез со дуннеын сюрс долларъёсын дунъяське. Собере ватсаса ужан интыос но луозы. Нокыӵе кышкытлык уз вайы ракетаослэсь двигательёссэс быдтон но... Мар бен, Москваысь куно оскон кылдытӥз кадь. Табере асьсэ кылзэс мед вералозы учёнойёсмы, шаерамы улӥсь калыкъёсмы. Н. БАЙТЕРЯКОВ. Авантекст Салья палъёс Кияса ёрослэсь одӥг ньыльмоссэ басьто, дыр. Удмуртилэсь картазэ учкиськод ке, кияса музъемлэн лымшорыз луэ со. Нош кутско салья палъёс чебер, шулдыр Кырыкмас шур дорысен... Кинлэн та пала вуылэмез вань, тодо на, дыр, дэри вакытэ машинаен но, пыдын но ветлыны луонтэм сюресъёсты. Нош табере Вуж Салья гуртэ асфальт сюрес нуэ. Киясаысь мыныку, нырысь ик со гурт сюре. Собере пумиське Вужгурт яке Нӧднюк (ӟуч сямен - Нижняя Малая Салья), Починка яке Нӧднюк Починка (Верхняя Малая Салья). Соослэсь кыдёке ик интыяськемын ӧвӧл колхозлэн шор усадьбаез, Юрмала. Пыдлось гуртъёс - Куӵос (Кады-Салья) но Кумырса. Салья, Вужгурт, Починка но Куӵос - чылк-чылк удмурт гуртъёс. Кумырсаын поръёс уло. Юрмала ӟуч ке но лыдъяське, табере удмуртъёсын сураськемын ни. Ваньзы соос огазеяськемын одӥг "Рассвет" колхозэ... Туннэ тодматӥськомы Салья палъёсын но колхозлэн улэм-вылэменыз. Артэ вамышъялом Та сюрес кузя ортчи витьтонэтӥ аръёслэн пумазы - Удмурт шаерысьтымы егитъёслэн но студентъёслэн нырысетӥ фестивальзы вал соку. Монэ, шор ёзо Сюмси школаысь ӟеч дышетскисез но хорысь валтӥсь куараез, Иже ыстӥзы. Кыӵе ке муген автобусмы дугдылӥз Эгра ёросысь Шыкмет гурт вадьсы. Соку чылкыт, чебер Нязь шурын пыласькимы. Кин ке визнаськыса пукиз: та пичигес шур угось кисло-куслоен но чорыген тырмемын вал. Али сое тодэ гинэ ваёно на. Ӵапак та палан ик вордӥськем вылэм кылбурчи Семён Перевощиков (сое мон бӧрысьгес тодӥ). Нязь но Лоза шур, герӟало, шуыны луоз, ог-огзылы бускель луись Эгра но Якшур-Бодья ёросъёсты. Шыкметъёслэн лудъёссы артэ вал бодьяослэн арамаосынызы. Эграос но бодьяос чорыгазы но, мульы-губи но бичазы одӥг шур дурын, одӥн нюлэс кушын, одӥг возь вылын. Тӥни озьы - тодмо удмурт кылбурчиез Семен Андреевич Перевощиковез та бускель районъёс асьсэ адямиен лыдъяло. Нош вордӥськиз со Эгра ёросысь Шыхмет (Нязь-Ворцы) гуртын 1929-тӥ арын 30-тӥ августэ. Сое тодо но ярато ни вань удмуртъёс. Кылбуръёсыз печатласькыло ӟуч кылын, мукет калыкъёслэн кылъёсазы. Нош асьмелы со тужгес матынгес. Семен Андреевич сюлэсь трос кылбур гожтӥз. Туж тросэз крезьгурен чебермамын. Кылбурчилэсь кырӟанъёссэ али шумпотыса кырӟало трос ансамбльёс но удмуртлыкез яратӥсьёс. Семен Андреевич ачиз но удмурт кылэ берыктылӥз ӟучъёслэсь но мукет калыкъёслэсь ӟеч ужъёссэс. Зэм, ачиз кылбурчи Ижын кемалась ини улэ ке но, вордӥськем палъёсыз котьку бордазы кыско. Поэт кайгыре чорыго Нязь шурлэн кырсь луэмез борыё бамалъёс му вӧен наштаськем, лудъёс жаг турынэн пашмем пумысен. Якшур-Бодьялась шор ёзо школаез йылпумъяса, 1953-тӥ арын Семен Андреевич дышетскыны пыриз Удмурт пединститутлэн кылтодонъя факультетаз. Сое быдэстэмез бере ужаз институтын ик. Бӧрысь - "Советской Удмуртия" газетын, Удмурт радиоын, "Молот" ("Кенеш") но "Инвожо" журналъёсын. Ноку ӧз ыштылы кылбур гожъян мылкыдзэ. "Пот пумитам!" нырысетӥ книгаез 1962-тӥ арын печатласькиз. Со дырысен асьмеос ньыльдон ар пала ни шумпотыса кылзӥськом солэсь котькуд кылбурзэ. Семен Андреевич йыг-йыг, синмаськымон удмурт воргорон. Солы али но синмасько егит кышномуртъёс, ачиз но уг быгаты чебер апайёс шоры буш синмын учкыны - ваньзэс яратысал. Сизьымдон арессэ тырмытыса но гожъя но гожъя со яратон сярысь, чебер музъеммес, инкуазьмес данъя. Та секыт аръёсы кайгыре калыкмылэн курадӟемез пумысен. Кылбуръёсаз но со зол шӧдӥське. Сюлэмыз кырӟа но кырӟа. Секыт улонысь но со чебер виштыосты адӟе, тодэ калыкезлэсь шумпотонзэ, куректонзэ. Катанчи вылэ но юнме гожтэмын, ӧй вал: "Мон мынӥсько артэ тонэн, пумыз медаз луы сюреслэн...." кылъёс. Семен Андреевичез та секыт аръёс но уг куасалто. Ялан сэзь но капчи мылкыдо со. Оскисько: соин ӵош асьмеос уно пол пусйыломы на юбилейёссэ. 27-тӥ толшоре трос калык люкаськылӥз Семен Андреевич Перевощиковлэн витьтон ар ӵоже ини гожъяськемезлы сӥзем ӝытэ. Сцена вылэ потэмзэ ӟырдыт кичабонъёсын пумитазы. Дано ӝытэз синмаськымон, туж быгатыса нуизы удмурт писательёслэн кивалтӥсьсы Егор Загребин но Драмая удмурт кун театрысь актриса Наталья Ветрова-Тур. Уно медальёсын, данъян грамотаосын пусъем гожъясез тросэз ӟечкылазы. Соос пӧлын - Удмурт Элькунысь Культурая министерство, Драмая Удмурт кун театр, "Кенеш", "Инвожо", "Кизили", "Вордскем кыл" журналъёс, "Удмурт дунне", "Ӟечбур"" газетъёс, Удмурт радио. Тодмо кырӟасьёсмы Михаил Ворончихин, Галина Платонова, николай Вахрушев, Светлана Смагина, Сергей Соснов, Геннадий Бекманов, Владимир Возняков кырӟазы солэн кылъёсызъя гожтэм кырӟанъёсты. Светлана Любимова, Леонид Шадрин, Михаил Оськин, Зоя Богомолова, кирилл Ломагин, Татьяна Чернова, Пётр Захаров шуныт кылъёс веразы, лыдӟизы кылбуръёссэ. Зал тыр люкаськем калык зол кичабиз Эгралась, Якшур-Бодьялась, Дэри (Завьял) ёросысь Тяма гуртысь лыктэм артистъёслы. Нош пумиськонэз йылпумъяз Ижысь "Инвожо" ансамбль. Сое но отысь тодмо арганчиез Михаил Журавлёвез кема ӧз лэзе сцена вылысь. Ӟеч, тазалыко ул, Семён Андреевич. Витём тынэсьтыд выль кылбуръёстэ. Н. ВОЗИСОВ. Мударис Менладшинлэн туспуктэмъёсыз. Экономика Асьмемыз утёме асьмеос Кылем арняе Ижын ортчиз "Удмурт Республикалэсь экономикаын кулэяськонэёссэ утён понна" движенилэн исполкомезлэн паськытатэм кенешонэз. Отчы пыриськизы гурт хозяйствоослэн кивалтӥсьёссы, ужбергатӥсьёс, тодосчиос. Люкаськемъёс эскеризы кӧня ке ужпумъёсты. Соос пӧлын - исполкоме выль адямиосты быръён, радъясь (координационной) кенеш кыдытон, движенилэсь туэлы ужан программазэ дасян, вуоно референдум пумысен вераськон. Исполкоме табере 43 мурт пыре. 10 адями ужалоз радъясь кенешын. Таосыз пӧлысь котькудӥзлы сётэмын нимаз удыс. Шуом, ужбергатӥсь Александр Орлов коньдон ужпумъёсын выроз. "Ижмаш" АО-лэн валтӥсь директорезлэн воштӥсез Алексей Красных промышленностьысь предприятиосын кусып тупатон понна кыл кутоз. Граховоысь вал вордон заводлэн кивалтӥсез Геннадий Петров контрольно-ревизионной комиссилэсь ужзэ радъялоз. Пумиськон дыръя кенешемын движенилэсь ужзэ ивор вӧлмытӥсь ёзъёс пыр паськытгес возьматыны. Тае лыдэ басьтыса, "Удмурт дунне" газет заседаниын верамъёсын тодматскыны дэмла. Валентин Тубылов, "Удмурт кенеш" огазеяськонлэн тӧроез, Кун Кенешлэн депутатэз: - Движение кылдытонэз умоен лыдъясько. Таӵе вакытэ, куке экономика син азямы куашка, асьмеос палэнысен учкыса сылыны ум быгатӥське. Со сярысь вераськон мынӥз удмурт калыклэн ӧтчамаз но. Выль огазеяськонлэсь кужымзэ будэтон вылысь сюлмаськоно отчы уногес адямиосты кыскон сярысь. Со понна интыосын солэсь ёзъёссэ кылдытоно. Улон возьматэ уго, оген номыр но карыны уг луы шуыса. Уртче кариськыса быгатом югдурез воштыны. Малпаськомы март пумын бадӟым пумиськон радъяны, отчы ӧтём ини республикалэсь кивалтӥсьёссэ, тодматом соосыз асьме мылкыдъёсын. Нимысьтыз вераме потэ законъёс бордын ужан сярысь. Та ласянь ваньмылы ик чупресгес кариськоно, пӧртэм амалъёсты уже кутоно. Али Кун Кенешын гурт фракция гинэ но кылдытыны ӧз луы, городъёсын огазеяськытэк ӧйлась. Ёросъёсын 35 мурт быръемын ке но, соос пӧлысь уноезлэн гурт калыклэн ужпумъёсыныз выремез уг поты. Ярам коть, селтаос уваосын ӵош асьсэ адямизылы дурбасьтӥзы. Отысь хозяйствоослэн кивалтӥсьёссы огазе люкаськизы но шуизы: депутатэ быръёно асьме пӧлысь. Пӧрмиз ук! Со уг возьматы шат ӵош ужамлэсь пайдаё луэмзэ? Нимаз верам кылмы омыре сылме, нош огъя куарамы шаер тыр но чузъяськоз. Николай Покумин, Удмурт Республикаысь гурт хозяйствоысь дано ужась (Ува ёрос): - Движенилэн валтӥсь ужпумъёсыз пӧлы пыртыны мон дэмласал музъем ужез радъянэз. Асьмеос чутрак вераны кулэ сое тус-тас каронлы пумит луон мылкыдмес. Кузьма Куликов, история наукаосъя доктор: - Ялан шуисько: асьмелы уг яра музъеммес вузлы пӧрмытыны. Со сюрес Россия понна - бырон сюрес. Куд-ог эшъёс чӧлско Петр Столыпинлэн кутсконъёсыз вылэ. Но солэн реформаосыз ӧз пишме ук. Асьме странын гурт хозяйствоез хутор амалэн азинтыны уг луы. Маке мед пӧрмоз шуыса, тӥледлы тыршоно власте, кивалтон ёзъёсы пыриськыны. Со уж капчи ӧвӧл. Но дышетсконо. Мон ӵошатӥ Удмуртилэсь но Татарстанлэсь суверенитетсэс. Асьмеос бускельёсмылэсь котыр ласянь бере кылиськом. Тужгес но - палэнысь коньдонэз (инвестициосты) экономикаямы кутон ласянь. Узыр муртъёс асьмелэсь кышкало, кусып тупатыны уг дӥсьто. Удмуртиысь заводъёслэсь, бадӟым предприятиослэсь куашкамзэс лыдэ басьтоно ке, амалтэк таӵе малпанэ вуоно: шаермес гурт гинэ утёз. Отын асьмелэн осконмы. Но со понна шӧдскымно умоятоно валэктон ужез. Уго ӵем дыръя калык мазэ-созэ валаса но уг вуы. Сое адӟиськом котькуд быръёнэ. Адямиос куаразэс сёто маин ке юрттыны быгатӥсь муртъёс понна, асьсэ киын властез кузьмало, бӧрысь ӧпкелё: улон, пе, нуналмысь уродме. Уг валало, олигарх шуонъёслы огшоры калыклэн сюлмаськонъёсыз кулэ ӧвӧл шуыса. Монэ паймытэ республикаысьтымы туала властьлэн ас палаз гинэ ужамез. Пумен берытске ни кадь цензура. Тани кылем сӥзьыл куиняз ик кун газетъёсы конституция пумысен малпанъёсме гожтыса сётӥ. Огез но ӧз печатла. Редакторъёс кышказы, дыр, уженызы люкиськоно луозы шуыса. - Валерий Каракулов, Дэбёс ёросысь "Труженик" эштослэн кивалтӥсез: - Пыкылэме потэ Кун Кенешлэсь депутатъёссэ. Мар-о тӥ отын юнме пукиськоды? Правительство но гурт хозяйствоын югдурез уг тоды, экономикаен уг кивлаты. Адямиос, тужгес но гуртоос, туала вакытэ властьлы кулэ быръён дыръя куараоссэс басьтон понна гинэ. Тани али ёросамы мандат бушамын. Администрация лулысь-сюлмысь ужа сое одӥг муртлы сётон понна. Кызьы шуо, инты вузамын ни. Шонер-а со? Му вӧй поттӥсьёслэн кузёоссы сотэк но ваньмыз сямен Кун Кенешын ни, табере, пе, ми но нефтяник пала кариськыны куэ. Тӥни озьы асьмелэн ваньмыз мыдланьскемын: правительствоен депутатъёс уг кивалто, соиз ачиз аслыз тупамон муртъёсты парламентэ вуттыны тырше. Тамаша ук. Яке тани выль министрмес басьтом. Солэн крестьянъёсты дораз лэземез ик уг поты, кулэ ӧвӧл кивалтӥсьмылы милям шугъяськонъёсмы. Николай Чувашов, "Ижсталь" АО-лэн "Металлург" совхозэзлэн директорез, Кун Кенешлэн депутатэз: - Мон Ижевске ужаны лыктӥ вал, гурт хозяйствоын югдурез утьыны яке умоятыны юртто шуыса. Номыр уг пӧрмы кадь. Сюлэм вӧсь луэ. Атае азьын возьыт: война вакытэ со утиз Родинамес, нош мон уг быгатӥськы. Жаль соиз: экономикаез тарканы, азьло поколениосын лэсьтэмзэ куашкатыны калыкен быръем депутатъёс но юртто. Кивалтӥсьёсты воштытэк, умойгес улыны ум кутске. Кызьы тодӥськоды, тулыс турттӥськом вал властез музонъёсызлы сётыны - кужыммы ӧз тырмы. Ма, бырйисьёс асьсэос но пумен валало ни кадь, "коньдон пуйыосты" Кун Кенеше бырйыса янгышазы шуыса. Кылем арын турттӥськом вал Удмуртиысь колхозникъёслэсь съездзэс люканы. Правительство ӧз лэзьы ук. Кызьы-о сое валано? Николай Русинов, Пичи Пурга ёросысь "Юж-Пурга" колхозлэн тӧроез: - Туннэ райцентрын активез люказы, Чечняысь террористъёслэсь утиськон пумысен кенешим. Нош кин юрттоз асьмелы дорысьтымы террористъёсын нюръяськыны? Мон верасько энергетикъёс сярысь. Сӥзьыл пал колхозмес куиньмойлы электрокужымтэк кельтӥзы - 4 сюрс (!) манет тыронмы люкаськиз. Пыдъяськыса кури кык арнязэ чиданы. Верамме ӧз кылэ. Озьы хозяйствомы кидыстэк кылиз. Сояз вторнике тылэз нош кысӥзы. Ньыль кунян кулӥз, огзэ скалмес но утьыны ӧм быгатэ. Кытчы гинэ ӧй ветлы, югдурез тупатыны турттыса. Министерствоысь вань кабинетъёстӥ ортчи ни. Пайдаез ӧвӧл. Кивалтӥсьёслэн нокызьы но валамзы уг поты, туннэ дорамы куронэн лыктӥсь адямиос ӵуказе райадминистрацие мынозы, отӥяз Иже но вуттӥськозы шуыса. Соку, оло, маке малпалозы. Власть али сюлмаське ас сярысьтыз гинэ . Уж нокинлы кулэ ӧвӧл. Тазьы ик улӥм ке, гурт хозяйство копак быроз. Александр Белослудцев, Каракулино ёросысь "40 лет Победы" колхозлэн тӧроез: - Яратӥськом ик асьмеос отчы-татчы шонаськыны. Туннэ быдэс администрацимы Путин вылэ ужа. Солэн кивалтӥсез возьдаськытэк вазиське коммунистъёслы, соослэсь быгатэмзэс президентлэсь ужзэ быдэсъясь понна кутон вылысь. Депутатмы Олег Кузьменко благотворительной фонд кылдытӥз. Табере кузьмаське, лэся. Мыным потэ, со коньдон "Жигулиен" ворттылӥсьёслы шеде кадь. Уго райцентре машинаен вуыны, уксё курыны каньылгес. Сыӵе учыръёс шоры адямиос киынызы шонтӥзы ни. Ма, председательёс но буйгатскем мылкыдын уло - номыр кулэ ӧвӧл кадь. Соин ик тазьы огазеяськыса ужаны тыршеммы сюлэмез шунтэ. Александр Яковлев, нылпи юртлэн директорез: - Движениын ивор вӧлмытӥсь центр усьтоно. Котькудӥз мылкыд карись, отчы лыктыса, аслыз кулэ документ, материал басьтыны мед быгатоз. Собере умой луысал, шоркарысь тодӥсь-валась адямиос гуртэ валэктон уж нуыны ӵемгес потасалзы ке. Уго калык троссэ тодытэк улэ. Аркадий Малков, Кун Кенешысь ялан ужась комиссилэн тӧроезлэн воштӥсез: - Газетъёсъя гинэ депутатъёслэсь ужамзэс дунъяны уг луы ай. Ми, гуртоос, трос шуг- секытъёсын пумиськиськом. Комиссия гинэ но кылдытыны шугъяським. Озьы ке но, пыкылӥсьёс шедё. Кылемаз созывын ужамъёсты туннэ лыктэмъёсыз кивалтӥсьёс янгыше уськыто, музъемез вузаны-басьтыны лэзись закон ӧм кутэ шуыса. Малпанъёсмес быдэстыны, улонэ пыӵатыны кужыммы уг тырмы. Со сярысь вераны возьыт ке но, озьы со. Тани крестьянъёслы йӧл потэмзы понна дотация тырыны тупатэмын. Трос ик коньдон отчы уг кутӥськы. Озьы ке но, городысь депутатъёслэн созэ но сётэмзы уг поты. Кылем гужем куазь укыр кӧс улэмен, республикамылы Москва 53 миллион манет ватсаса сётӥз. Но гуртоос дорозь со пӧлысь данакез уз вуы. 30 миллионэз туэлы бюджетэ пыртэмын. Малы озьы лэсьтэмын? АПК-лы юрттон сярысь законъя бюджетлэн ичизэ 10 процентэз гуртэ кошкыны кулэ. Со куронэз быдэстон вылысь ик кылем арлы чаклам уксёез таяз бюджетэ выжтӥзы. Тӥни сыӵе политика. *** Заседание лыктэмъёс правительствомылэн кивалтӥсезлы Николай Ганзалы вазиськон кутӥзы, шуг-секытъёсты палэнтон бордын уртче ужаны мылкыдзэс юнматӥзы. И. ЛЕБЕДЕВ. Умой адямиос Вазиськод - юрттоз, выльзэ тодоз - валэктоз Кияса ёросысь Вуж Салья гуртын улӥсьёс трос шуныт кылъёс веразы Аркадий Николаевич Куликов сярысь. Ижевскысь медучилищеез йылпумъяса, куамын куинь арзэ ужа ни Сальялась медпукнтын. Кызь арзэ фельдшер но медпунктлэн кивалтӥсез вал. Тазалыкез лябӟемен, массажистэ кариськиз, медсестралэсь ужзэ быдэсъя на. - Котьку вазиськы - юрттоз. Мар выльзэ тодэ, кылэ - валэктэ, - маде Аркадий Николаевич сярысь дышетӥсь Лидия Геннадьевна Баранова. - Пинал-а, арлыдо адями-а, нылкышно-а - вань висёнъёсъя котькудӥзлы дэмланъёс сётоз. Мылкыд секыт дыръя адӟиськиськод, вераськиськод соин, сюлмын ик каньыл луэ. Медпукнтэ но мынӥськод ке, ноку час шоры уз учкы, пумозяз кылзоз. Сальяла вуылон нуналэ но Аркадий Николаевич дорысь калык ӧз бырылы. Фельдшерзы Светлана Егоровна Дмитриева декрет отпускын, воргорон сое но воштоно луэ. Ужан вискын дыр сюриз юанъёсын вазиськыны. - Аркадий Николаевич, кыӵегес висёнъёсын гурт калык вазиське дорады? - Киоссы, пыдъёссы висё. Ужасьёс пӧлын одӥгез но кускыз висьымтэез ӧвӧл. Сюрлы бордысь - остеохондрозлэсь - вань висёнъёс пото. Массажен эмъяны турттӥськом, шунтӥськом. Нош уколъёс дунын басьтоно луо. Пунэмен но сётӥськом. - Дунъёс уг кышкато-а бен адямиосты? - Кышкато. Тани нылпиослы соска 20 копейкаен вал, луэмын 2 манет но 80 копейка. Уколъёс трослы дуноямын. Анальгин одӥг пачкаез 15 манет но 80 копейка луиз, сылэ вал 57 копейка. Та эмъюмъёстэк куд-огез улыны ик уг быгаты. Нош толэзяз 100 манет уждун басьтӥськод ке, эмъюм сярысь малпалод на шат. Дунъёслы луыса, адямиос эмъяськыны уг быгато. Лыкто, учко но кошко. Кин турын паре. Валэктӥськом ни кызьыгес эмъяськыны. - Пиналъёс но висьытэк уг уло, соосъя кыӵегес югдур? - Пиналъёссэс эмъян понна анай-атайёс коньдонзы шоры уг учко ни, пунэмен но басьто. Азьло аръёсын ӵошатыса, али таза пиналъёсты уд шедьты, одӥг-кыкез ке шат номырин уг висё. Али ик сюрлыосынызы курадӟо. Сиён но пиналъёслы азьло кадь уг йӧты, ӟечлыкез но солэн урод - соин ик ӝушъёс висё. Куд-огезлы сӥль но йӧназ уг шедьы. Нош котькудӥз сямен семья пудо-живот вордэ, но коньдон поттон понна сӥльзэс вузано луо. Жаль, но ма карод, улон сыӵе. - Тазалыксыя кинъёс золгес возисько: арлыдоос-а, пиналъёс-а? - Пересьёс умойгес эмъясько, озьы ик соослэн лул-мугорзы но юнгес, нылпиосын ӵошатыса. Пиналъёс али ляб но ляб луыса кошко. Тани ужаны кутскем берам дас ар ӵоже одӥг адямилэн инфаркт луиз, али котькуд ар ӵоже ужаны быгатӥсь адямиосты шукке со висён. Но туэ вакытэз азьло аръёсын ӵошатоно ке, соку дас нылпи пӧлысь, шуом, одӥгез золэз улэп кыльылӥз. Нош али нуны кӧт пушкын дыръяз ик укол пуктылыны кутско, эмъюмъёс сётъяло. Кытысь таза нылпи вордӥськоз? Нош ляб муртлэн кык поллы лябгес нылпиез луоз. Азьло аръёсы нылпи ваёно анайёслы сиён но висъяло вал, озьы ик дунтэк эмъяллязы. Али номыр со ӧвӧл. Ваньмызлы кулэ коньдон. - Пинал вордыны мылкыд карисьёс вань-а бен? - Вань али. Сальялан со ласянь умойгес луиз ини. Киясаын сояз арын куамынлэсь тросгес нылпи вордӥськиз, Подгорноеын - дас вить, Сальяын - дас ньыль нылпи. Озьыен, азьланезлы осконзы вань. - Берло дыре туж трос реклама мынэ кунгож сьӧрысь ваем дуно эмъюмъёслы. Нош тӥ мае ӵектӥськоды висисьёслы? - Бен, вань соос котькыӵе дунын - сизьымдон, сю манетэн, эшшо но тросгес. Но ми басьтыны тыршиськом дунтэм эмъюмъёсты, адями басьтыны мед быгатоз соосты. Собере, асьме эмъюмъёс мыным кельшогес. Мон тазьы верасал: реклама лэсьтӥське вузан понна, нош ӟеч арбериез рекламатэк но басьтозы. - Азьло аръёсын ӵошатыса, кыӵегес югдур кылдэмын адямилэн тазалыкезъя? - Висисьёс берло дыре туж трос луизы, троссэ рак куасалтэ. Азьло дыръёсы вить ар понна Сальялан одӥг адями раклэсь кулэ ке вал, али арлы быдэ - куинь-ньыль. Америкаысь тодосчиос 1965-тӥ арын шуизы вал, 2000-тӥ аре котькуд кыкетӥез адями раклэсь, пе, кулоз. Озьы ик луыса кошке ни кадь. Сое валэктыны луоз улонамы химия паськыт вӧлмемен. Тани сиёнъёс пӧлы оломар но ватсэтъёс тыро. Озьы ик экология уродме. Шокаськомы кырсь омырен, радиация вӧлмемын. Пиналъёс синзэс быдто, телевизор дорын пукыса. Ми пичи дыръя гурезьёс вольытэсь луо вал, али отчы ветлэмын ик ӧвӧл. Пиналъёс понна мультфильм, боевик медло. Азьвыл телевизор но, радио но ӧй вал, адями бускелез доры кенешыны, ивор тодыны ветлӥз. Озьы соос ог-огзылы матын вал. Черкъёс но калыкез огазеяны юрттылӥзы. Милям гуртамы югдур чылкак урод ӧвӧл ай, адями ог-огезлы юрттэ. Нош трос интыосын калык ас понназ улэ. - Уин яке шутэтскон нунал медло, шуг-секытъёс кылдыку, адямиос вазисько эмъясьёс доры. Котьку ик-а гуртысь специалистъёслэн луонлыксы вань висисьёслы юрттыны? - Алигес тани мынам агае Василий Николаевич Бубякин кулӥз, витьтон сизьым арес вал солы. Кулӥз ужан интыяз, сюлмыз кутыса. Кардиологъёс милям ӧвӧл татын. Пичи Пургаысь врачъёс шуизы, юрттэт дырыз дыръя вуысал ке, оло, улэп но кыльысал. Гуртын со ласянь секыт, нимаз специалистъёс ӧвӧл. Ӝог юрттэт сётӥсь машинаосъя но шуг- секытъёс кылдэмын эстӥськон ласянь. Сменалы ньыльдон вить литр бензин кулэ ке одӥг машиналы, сёто кызь литр. Юрттэт сёто ни тужгес секыт висисьёслы гинэ. Кинэ ке больницае нуоно ке, колхозлэн председателезлы вазиськиськом. Бензин вань ке, со пумит уг луы висисьёслы юрттыны. - Аркадий Николаевич, эмъяськон удысын кема аръёс ӵоже ужам муртлэн синмыныз учкыса, кыӵе дэмланъёс ӵектысалды лыдӟисьёсмылы, гуртын улӥсьёслы? - Ӟучъёс шуо, бережённого бог бережёт. Адями ассэ ачиз ӧз ке утялты, со нокинлы кулэ ӧвӧл. Тамак кыскон, вина юон озьы ик тазалыкез лябӟыто, нош кин физкультураен выре, ассэ чакласа возе, со висёнлы но ӧжытгес сётске. Вина юон пумысен ик верано ке, кӧня гурт калык солэсь быре, шуккиськон учыръёс но туж трос. Мултэссэ юоно ӧвӧл, кыӵе ке но мертэт луыны кулэ. Кудӟыны ӧдъяд ке, озьыен, тырмоз юыны. Котькуд адямилэн мусаз вань алкогольлы пумит нюръяськись клеткаос. Кинлэн со одӥг-кык гинэ, мукетызлэн - сю-кык сю. Сыӵе клеткаос трос ке, адямилы макмыр но уг йӧты, ӝыны час изёз но, нош пыд йылаз ни. Нош кудӥз, кык-куинь чарка юыса, ӵуказеяз но кудӟемын на. Вина эмъюмлы кылдэм маке вылэм куке но, нош табере со адямиосты пыд йылысьтызы погыртэ. Л. МАЛЫХ. Аркадий Николаевич Куликов висисьёсты эскере. Туспуктэмез В. Камашевлэн. Сюресъёсты ФСБ "кортназ" Россия Федерациысь ФСБ-лэн Удмурт Республикая Управлениез ортчем аре ужамезлы йылпумъянъёс лэсьтӥз. Кызьы чакламын вал удысъя, ваньмыз сямен ужпумъёс быдэстэмын. Республикамылэн улон-вылоназ но политикаяз югдурез огсыр возьыны со юрттӥз кун ёзъёслы, озьы ик Удмурт Республикаысь Кун Кенеше но Россия Федерациысь Кун Думае депутатъёсты быръён вакытэ. Асьме дорын ӧй вал терроризм но экстремизм, ӧз пумиськылэ шукрес учыръёс, мукет кунъёсы ӧз кошке шарае поттыны лэзьымтэ (гостайна) иворъёс, кивалтон органъёсы ӧз "чуртнаське" кулэтэм адямиос. Улон-вылонмы котыр ласянь оскымон утемын. Зэм, мукет страноасысь спецслужбаос асьме шаерен тунсыкъясько ик. Умоесь азинсконъёс басьтэмын наркотикъёсын, пыӵал тӥрлыкен вузкаронэн нюръяськонын. Уногес материалъёс шараямын Россилы но Удмуртилы кышкытлык кылдытон ласянь. Со пумысен ивортонъёс сётэмын Россилэн Президентэзлы, Правительстволы, Безопасностья Кенешлы, МИД-лы, Обороная министерстволы, асьме Республикаысь кивалтон ёзъёслы. Асьмеос тодӥськом: республикаямы интыяськемын обороная уно предприятиос но институтъёс. Мар отын потто но мар бордын ужало учёнойёс - со но котькинлы сямен тодмо ни. Но асьме доры лыктэм "куноос" - иностранецъёс ялан "выль" иворъёс утчаны тыршо политика, экономика, наука но техника удысын. Сыӵе учыръёсты палэнтон вылысь, дыраз ужрадъёс кутӥсько. Куд-ог лыктэм "куноос", общественной организациослэн бурд улазы тыршыса, мукет ужъёсты но быдэсъяны ӧдъяло. Кылсярысь, кунгож сьӧры ивортон келяны дасямын вал асьме дорысь одӥгаз обороная заводын поттӥськись вузъёс сярысь. Соин ик военно-промышленной комплекслэн предприятиосаз чурытэсь ужрадъёс кутыны косэмын. Санкт-Петербургысь одӥгез фирма Ижевсклэсь вылтуссэ шара поттыны дася вал геоинформатикая ёзэтын. Асьме республикаын ӝегатэмын мукет кунъёсысь вуэм 11 мурт. Соос улӥзы, законэз тӥяса. Югдурез утёнъя министерстволэн ёзъёсыз пыр со адямиос Россилэн палэназ келямын. Уголовной уж ӝутэмын адямиосты кунгож сьӧры келянъя йыртэмасьёслэн группазылы пумит. Соос пӧяськыса лэсьтэм документъёсъя Удмур Республикаын улӥсьёсты Турцие "вузало" вылэм. ФСБ-ын ужасьёс одӥгысьтыз предприятиысь талазы иворъёсты лушкемен "басьтӥсь" аппаратура. Та пумысен республикаысьтымы прокуратура Россия Федерациысь Уголовной кодекслэн 138-тӥ статьяезъя уж ӝутэмын. Коррупциен нюръяськон ласянь бадӟым йыруж шараямын Удмурт Республикаысь Культурая министерствоын. Отысь кивалтӥсь ёзъёс 46 но ӝыны миллион манетлы ваньбур капыртыны малпало вылэм. Югдурез утёнъя министерство та пумысен Россия Федерациысь Уголовной кодекслэн 286-тӥ но 160-тӥ статьяосызъя уголовной уж ӝутӥз, но со али эскериське Удмурт Республикаысь Вылӥ Судын. РФ-ысь Уголовной кодекслэн 285-тӥ но 290-тӥ статьяосызъя пытсэт улэ кыскемын шаерысьтымы Котырысь инкуазез утёнъя комитетлэн кивалтӥсез. Со коммерциен вырись одӥг ёзлэсь бадӟым кузьым басьтэм. Республикамылэн экономикаезлы 5 но ӝыны миллион манетлы изъян ваемын. Пӧяськыса лэсьтэм долларъёсты (США) асьме доры вайыны но вӧлмытын турттэмзы понна ӝегатэмын но суд улэ кыскемын Америкаысь кык адямиос. Наркотик вӧлмытэмзы понна нимысьтыз ужрад пайдаё ортчытэмын вал, Таджикистанысь но Россиысь адямиосты ӝегатонъя. Соос уно гинэ героинэз Россие вутто вылэм Афганистанысь. Ар ӵоже асьме республикае наркотик ворттонъя 8 "сюрес" кортнамын. Озьы Удмуртиын гинэ таламын 16 килолэсь уно героин. Нош Урал но Поволжье улосъёсысь ФСБ-лэн управлениосыныз шараямын 35 килолэсь уно юн усыкмытӥсь суретъёс (со тырмысал ог 7 миллион пол бышкалтӥськыны), со дунъяське 40 миллион манетлэсь унолы. Террорен нюръяськонэз но "Вихрь-антитеррор" ужрадэз ортчытэмен валче кужмоятэмын Кавказ палась Удмуртие вуэм адямиосты эскерон. Дагестанысь ФСБ-лэн управлениеныз ӵош пытсамын Ижевскын поттэм пыӵал тӥрлыкез та республикае келянъя сюрес. Пыӵал тӥрлык поттӥсь предприятиосын кужмоятэмын сое эскерон-чаклан уж. Шымыртэмын лушкемен ыбылӥськись арбериос. ты лэсьтӥсь адямиос. Ортчем арын шараямын уно гинэ пыӵал тӥрлык, пуштытъян арбериос. Туэ но та ласянь чурытэсь ужрадъёс кутӥськозы. Н. Байтеряков. (Дасямын Россия Федерациысь ФСБ-лэн Удмурт Республикая управлениезлэн материалъёсызъя). Ӟечкылан Пичи пурга ёросысь Сосновка гуртысь Коновалов Тимофей Николаевич 7-тӥ феврале 50 арес тырмонзэ пусъе. Сюлмысьтымы ӟечкыласьком, дуно атаймы, та сӥё-дано нуналэныд! Сӥзиськом пилемъёсыз сэрттӥсь-уллясь капчи мылкыд, сюлэмад ноку медаз каръяськы куректон. Нош со сяна, луиз ке тазалык, ваньзэ ик вормыны шедьтод кужым. Гажаса анаед, кузпалыд, нылыд, эмеспиед. Тӥляд куремдыя Гажано редакциын ужасьёс, кемалась малпасько вал ини тӥледлы вазиськыны. Мыным туж кельше Светлана Яковлевалэн "Лымы" вальс кырӟанэз. Уг быгатӥськы вунэтыны сюлэме пырись гурзэ но туж быгатыса гожтэм визьмоесь кылъёссэ. Сётэ вал кылъёссэ газет бамады. Т. Драгомирова, врач МСЧ � 2 г. Ижевск. Лымы (Вальс) Крезьгурез Светлана Яковлевалэн Кылъёсыз Алексей Ельцовлэн Поромисько - Куке усе лымы. Тӧдьы вальсын кадь Нош поръяськомы. Усе, усе, усе тӧдьы лымы. Мон тодӥсько, Кызьы шуна лымы. Ӝиптӥськисько: Ӵошен кадь сюлэммы. Усе, усе, усе небыт мамык. Мон адӟисько, Кызьы поръя лымы. Возьмаськисько: Ку нош бергаломы? Монэ соге, соге тӧдьы лымы. Мон учкисько, Кызьы садмы пурӟе. Ӟыгырскиськом: Гажан золгес гомӟе. Поръя мамык, поръя быдэс кунмы. Мон адӟисько, Кызьы тол вальс берга. Утчаськисько - Аслам улон сэргам. Бамме жуге, жуге лэчыт лымы... Мон тодӥсько, Кызьы шуна лымы. "Ӝиптӥськисько: Ӵошен кадь сюлэммы. Усе, усе, усе небыт мамык. Ужтэк кылён - тэк улон Правительстволэн Президиумез юнматӥз калыкез уже интыянъя ужрадъёсын план. Кызьы ивортӥз Калыкез уже интыянъя Федерациысь кун службалэн Удмурт Республикая департаментэзлэн кивалтӥсез Юрий Брусянский, кылем арын та выллем ужрадъёсты улонэ пыӵатон юрттӥз ужтэк кылемъёслэсь лыдзэс 24,4 сюрслы кулэстыны. Берло аръёс ӵоже предприятиос нырысьсэ тросгес ужасьёс кутӥзы ужысь мозмытэмъёс сярысь. Калыкез уже интыянъя программа быдэстэмын 113 процентлы. Пайдаё ужрадъёс кутэмен, 1,6 поллы ичигес луизы адямиосты ватсаса опуске келян учыръёс, нош гуртысь 2 сюрс ужтэк кылемъёс быгатӥзы асьсэлы тупась удыс шедьтыны. Кык поллы кулэсмизы ужтэк кылемъёслы пособиосъя пунэм тыронъёс. Туэ но пӧртэм ужрадъёс чакламын ужтэк кылемъёслэсь улыдзэс кулэстонъя. Кылсярысь, 13,5 сюрс адямиос пыриськозы огдырлы чаклам но общественной ужъёсы. Нош тужгес но ёрмись 2 сюрс адямиослы кылдытэмын луозы нимысьтыз ужан интыос. *** Эстӥськонъя, электрокужымъя но связья министерстволы Лэсьтӥськонъя, архитектурая но улон политикая министерствоен уртче дасяны косэмын электрокужымез пайдаё кутонъя 2000-тӥ-2010-тӥ аръёслы программа. *** Совхоз "Восточный" кун предприятиын коньдонэн секыт югдур кылдэмын. Сое чылкак куашканлэсь утён вылысь, республикалэн бюджетысьтыз 15 миллион манет ссуда висъямын. Удмурт Республикаысь Правительстволэн пресс-службаез. Утчалэ асьтэос но Ми юрттом, но газет-журнал поттӥсьёс асьсэос но чупресгес бызьылыны кулэ, ватсаса коньдон шедьтон-поттон понна. Таӵе мылкыдзэ вераз валлян коллегилэн паськытатэм кенешоназ республикаысьтымы печатья но иворъёсъя министр Сергей Васильев. Журналистъёслэн но полиграфистъёслэн кылем арын ужамзылы йылпумъянъёсъя пумиськонзы пайдаё ортчиз. И.Кричев. Быръён азьын пумиськон Сизьым арня кыле на 26-тӥ мартозь. Соку асьмеос президент быръём. Ӧд-а вунэтэ со сярысь? Ма, вунэтыны чылкак уз сётэ ай. Ӝоген уен-нуналэн куашетон кутскоз. Тодмоосъя шӧдӥсько, куд-огез таизлы быръёнлы киыныз шонтӥз ни: мар-о, пе, юнме сюлмаськонэз, Кремльлэн кузёез интыяз пуке ни. Озьы ке но, ужрадлы дасяськыны кулэ. - Кун Думае депутат быръёнлы йылпумъян лэсьтыса ӧм вуттэ, кутскиз вылез кампания, соин ик ми мылкыд карим журналистъёсын кенешыны, - пумиськонэз усьтыса шуиз Удмурт Республикаысь Быръёнъя комиссилэн кивалтӥсез Афанасий Тубылов. Со вакчияк ивортӥз та дырлы кылдэм югдур сярысь. Пумиськылӥсь шуг-секытъёсты одно ик лыдэ басьтоно, пусйиз Афанасий Ильич. 19-тӥ декабре куд-ог участокъёсын бюллетеньёс урнае ӧз тэре, ватсаса ящик утчано луиз. Бырйисьёс но сураськизы, киязы укыр трос бумага басьтэмен. Кӧняяз ке округын уго Думае быръёнъёсын ӵош бырйизы асьме Кун Кенеше яке интыысь ёзъёсы депутатъёсты. Соин ик таяз учыре пӧртэм быръёнъёсты ми тыршом дыръя висатыны. Комиссие вуиз 147 ӝожтӥськон. Со пӧлысь ӝыныез герӟаськемын ивор вӧлмытӥсь ёзъёсын. Ваньмыз соос эскеремын, лыдэ басьтэмын. Куд-огезъя, оло, суд но ужано луоз ай. Сыӵе учыръёсты кулэстон вылысь, асьсэос, журналистъёс но соослэн кивалтӥсьёссы (кузёоссы) рос-прос сюлмаськыны кулэ вань законъёсты чакласа ужан сярысь. Быръён комиссилэн секретарез Георгий Пчельников вераз президент быръёнлэн аспӧртэмлыкез сярысь. - Россилы вылӥ кивалтӥсез дырызлэсь вазь быръёно луиз бере, котькуд ужрадлы дыр туэ вакчиёмытэмын ньыльмос люкетлы, - шуиз Георгий Сергеевич. - Агитация (ӝуткан- валэктон уж) но 25 февральысен гинэ кутскыны кулэ. Республиканской газетъёсын со дырысен кандидатъёс сярысь вань материалъёс дунын печатласькозы. Быръён ортчемен лыдъяськоз, участокъёсы 50 процентлэсь уноез бырйисьёс лыктӥзы ке. Сётэм куараос пӧлысь ӝыныезлэсь ятырез кудӥзлы ке одӥгезлы шедизы ке, со ик луоз президент. Куараос пазьгиськизы ке, ортчытозы кыкетӥ тур. Соку ини, 50 процентэз бырйисьёс ӧз ке но лыктэ, быръён ортчемен лыдъяськоз. Та дырлы Москваын лыдэ басьтэмын 34 кичӧлтӥсь группа. Котькудӥз ужа аслэсьтыз адямизэ кандидатэ дасян бордын. Со понна уго пӧртэм улосъёсысь 500 сюрс подпись бичано. Быдэс дуннелы тодмо политикъёсын артэ президент кариськыны туртто огшоры слесарь, ужтэк кылем мурт, мукет огшоры адямиос. Куд-ог эшъёс канжаськозы, вылды, документъёс борды. Котькудӥз кандидат, аслаз доходъёсыз, ваньбурез сярысь декларациос сяна, одно ик сыӵе ивортон дасяны кулэ матысь ӵыжы-выжыосызъя но. Пумиськон дыръя вераськон мынӥз шаерамы ортчытоно референдум пумысен но. И. ЛЕБЕДЕВ. ШӦКЫЧ Быръёнъёстэк улонэз син азе но пуктыын уг луы. Табере тани президент кулэ. Россиен кивалтыны мылкыд карисьёс ичи ӧвӧл - ог 40 мурт дась ни, пе, кандидат кариськыны но ӵошатсконэ пыриськыны. Воксё шузимиз ни кышное. Президент луэмез потэ солэн... Парсьпи куаёз Шудзялан Глаз ёросысь Гылёгурт почта ёзын лыдӟисьёсмы куать мурт сяна ӧвӧл ке но, парсьпи люконмес учкыны школае калык лачак люкаськиз. Тодӥськоды на луоз, татысь "Луч" СПК-лэн кивалтӥсез Петр Манашев сӥзьыл Глаз ёросысь лыдӟисьёслы парсьпи сӥзиз вал. Калыкен пумиським бере, вераськоно кожаськом. Корреспондентмы Татьяна Банникова веранзэ уг быдты на, редактормы кыл куре ни. Нош залысь калык парсьпи возьма... Шудо муртэ утчан понна пукисьёс пӧлысь муспотон нылашез юрттыны ӧтиськом. Таня Семенова сура ёросысь 160 гожтӥськисьлэсь квитанциоссэс. Ой, гылёгуртъёслы ик мед шедьысал! Татысь лыдӟисьёсмы но ас понназы парсьпи курыса вӧсясько, дыр - залын шып. Тани Таня поттэ одӥгзэ квитанциез. Но... лотерея - со лотерея. Парсьпиез утэ Люм почта ёзысь Шудзялан улӥсь Ушаков Анатолий Семенович. Паймымон, но гылёос туж куректонэ ӧз усе кадь. Ма, азьланяз соос одно маке утозы ай - "Удмурт дунне" но солэн оскымон эшъёсыз кузьымъёссэс уг жаляло. Собере вордскем кылыныд потӥсь тунсыко газетэз арбыт лыдӟон - со кузьым ӧвӧл шат? Тани Иваново гуртысь Нина Ильинична Иванова газетмес кемалась лыдӟе ни. Нырысь анаез гожтӥськылӥз, берло аръёссэс ачиз. "Та газет мыным туж матын потэ - уг ке вуы, мӧзмисько. Мае лыдӟемед потӥз, ваньзэ отысь шедьтод. Нош бакча утисьёслы приложениез понна пиналъёсы вожмасько, городазы нуо", - шуэ со. Таӵе лыдӟисьмылы кузьым сётытэк ӧм чидалэ ми. Чиль-дол кисьтаськись чебер пурты кузьмам солы. Эшшо одӥг кузьыммес утӥз Бабино гуртысь Леонид Юферев. Нош борддор сьӧрын кемалась кырӟаны дасяськыса уло ни Чебершурысь кенакъёс. Пӧлазы - агайзы но вань. Арлыдзы шоры учкытэк (куатьтон арес тырмытыса, пе, кырӟаны кутским), жингрес кырӟало соос. Ма, Глазъёсы, Ижъёсы олокинэ уз нуллэ ук, нош таосыд одӥг концертысь но уг кылё, шӧдске. Соослы вожъяськыса, эсьма, кивалтӥсьмы но, - Алексей Петрович, баян курыны кутскиз. Собере Почта Галя кылбуръёсме лыдӟо шуэ (та гожъясьмес ӟеч тодо, дыр, "Шӧкыч" баммес лыдӟисьёс). Я, учкисьёсты туж ӧм жадьытэ кадь. Но соослэн газетчиослы юанъёссы люкаськизы, дыр. Ваче син вераськем котьку дуногес ук. Жаль, таӵе ӟеч калык доры потаны ӵем уг кылды. Но газетмы пыр ми тӥ доры арняяз куинь пол вуылом. Редакцилэсь: Анатолий Семенович Ушаковез куриськом "Луч" СПК-е вазиськыны. З.Рябинина. Пумиськиз Владимир Путинэн Удмурт Республикаысь Кун Кенешлэн Тӧроез Александр Волков толон пумиськылӥз Россилэн Президентэзлэсь ужзэ быдэсъясен Владимир Путинэн. Пӧртэм ужпумъёсын ӵош вераськон мынӥз Удмуртиын автомашина поттон удысэз азинтонъя но. Владимир Путин умоен лыдъяз "Орбита" автомобильёсты тросэнгес лэсьтонэз но "Шкода-Авто-Удмуртия" интъетэз (проектэз) улонэ ӝоггес пыӵатонэз. Удмурт Республикаысь Кун Кенешлэн пресс-службаез. "Пуштытон" Городысь ульчаын-а, азбарын-а, подъездын-а, ужан кабинетын яке автомобильын пуштон учыръёслы асьмеос паймемысь дугдӥськомы ни кадь. Дунне вылын та политической шуон терроризмен али выро ог 500 пала группаос но организациос. Берло дас аръёсы соосын ог сизьым сюрс пала сьӧд ужъёс лэсьтэмын, быриз 5 сюрслэсь уно адями. СССР куашкам бере, асьме дорын экстремистъёс эрказъяськыны кутскизы. Зэм, терроризм ласянь Россия азьвыл но тодмо вал ини. Асьмеос тодӥськом Ульяновъёслэн семьяысьтызы бадӟымезлэн пизылэн эксэй борды урдскемез сярысь. Соку покчиез пизы оскытӥз вал, "мукет сюресэтӥ" мыном шуыса. Берло но трос гинэ вал ӟуч эксэйёсты но политикаен вырисьёсты быдтыны тыршон учыръёс, огшоры калыкез кышкатонъёс. Озьы 1906-тӥ арын 14-тӥ мае Севастопольысь Соборной площадьын пуштытон дыръя тямыс мурт быриз вал. Нош Аптекарской шормуӵысь П. А. Столыпинлэсь дачазэ пуштытыку, 32 мурт быриз, 22-ез сӧсырмиз. Берло 5 толэзьёсы уно адямиос бырыны шедизы Москваын, Буйнакскын но Волгодонскын луэм кышкыт учыръёс дыръя. Россиын пуштытъян учыръёс нокыӵе политикаен герӟаськемын ӧвӧл. Сьӧд ужъёс лэсьтӥсько кинэ ке кышкатон понна, яке "война" кылдэ узырлыкез люконын огъя кыл шедьтымтэысь. Чакласькись но сакгес адями шудтэм учыре шергес шедьылэ. Озьы ке но, тодмотэм, пуштытон арберилы укшась мае ке шараякуды вазиськоно специалистъёслы. Соин ик лыдэ басьтэ но чаклаське таӵе учыръёсы: - машина вылады яке солэн пушказ тодмотэм арбери яке воштос ёз вань; - та палан пумиськылӥсьтэм арберилэн юдэсэз лошъяське; - гозы яке ез золтэмын; - машина улады адӟиське ез яке изолента юдэс; - дачаяды адӟиське алигес гудэм яке куасьмем музъем; - улон инты котырысьтыды тупатъям бервылэз яке буям интыез наштаськемын; - автомобиль котырады мурт сумка, портфель, коробка яке тодмотэм бинет адӟиське. Тужгес бадӟым саклык висъяно транспортэ, магазинэ, кинотеатре яке калык люкаськон интые вунэтыса кельтэм арбериослы. Сыӵе дыръя вазиське милиционерлы яке кыл кутӥсь адямилы, соку куашетон ӝутыны эн тырше, мукетъёссэ но алэлэ. Ӵем дыръя соку аслыд ачид оскиськыны кыле на. Шуом, маке пуштӥз ни, табере мукетыз кышкытлык кылдэ - тылпу яке огыр-бугыр луон. Городын луылэ на эшшо одӥг пуштылон. Со потӥсь газэз ӝуась тылпоттонэн эскерон. Куд-огез тополь мамыклэсь тылэн мозмытскыны тыршо. "Космос" гостиницалэн прачечнояз ужасьёс 1985-тӥ арын омыр сётон шахтае люкаськем тополь мамыкез сутыны ӧдъязы. Малпамтэ шорысь соку пуштӥз, борддоръёс куашказы, тямыс мурт сутскиз. Ивортон дасямын УР-ысь Граждан оборона ужпумъёсъя но кышкыт учыръёслэсь утиськонъя комитетлэн материалэзъя. Данъязы "Газпромез" Матэктэ тулыс. Озьыен, ӝоген кутскоз футболэн шудон дыр. Асьмелэн "Газовик- Газпром" командамы 8-тӥ феврале Сочие кошке. Отысен кутске ни выль сезонлы дасяськон. Нош со азьын, январьлэн пумаз, ортчиз футболэз яратӥсьёсын пумиськон. Соку командалы "Газпром" акционер огазеяськонлэн "Честная игра" нимо призэз сётэмын. Футболистъёсты ӟечкыланы ветлӥзы республикалэн кивалтӥсьёсыз, министерствоосысь, Ижевсклэн мэриысьтыз, предприятиосысь адямиос. Кузьымез сётӥз "Газпром" акционер огазеяськонлэн спортъя департаментэныз кивалтӥсь, спортъя мастер В. И. Тортышев. Призэз басьтӥз "Спецгазавтотранс" акционер огазеяськонлэн генеральной директорез В. А. Тумаев. Команда вуоно чемпионатлы дасяське ни. Ортчиз ни пус чӧлтон но. Нырысетӥ кык шудонъёссэс "Газовик-Газпром" 9-тӥ но 12-тӥ апреле ортчытоз Смоленскын но Ярославльын. Нош асьме доры футбол вуоз 19-тӥ апреле. Соку Ижевскысь команда пумиськоз Читаысь "Локомотивен". Б. Никитин. Сизьым полэс песянайёс, песятайёс... Удмурт йылолъёс сярысь Сюан дыръя Азьло кен но эмеспи калык азьын уг но чупасько, уг но ӟыгыръясько вылэм, син усёз шуыса. Озьы ик калык азьын кизэс но уг кутыло вылэм. Нош "янгышаны" шедьто ке, та вамыш возьматэ егитъёслэсь яратонзэс но улонзэс герӟан сярысь малпанзэс. Куяськон Огазьын сиёно-юоно. Куяськонлэн пыжиськемез - пересьмон. Удмуртъёс куинь пол куясько вылэм: адямиез ватэм бере, сизьыметӥ уяз, сӥзьыл, йыр-пыд сётыку. Вандо скал, вал, ветыл, чуньы, нош курегез, берлань ӵабъяське шуыса, уг исало вылэм. Кисьтон дыръя одно ик юмал ыльняньлэсь пыжиськемъёс пӧраллям. Пыжиськемез вандылоно ӧвӧл - тӥялтоно. Али кулэмезлы сиёнэз куяно азьлань, кемаласьгес кулэмезлы - сьӧрлань. Аракыез но озьы ик кисьтоно. Вӧсяськыку кышномуртъёс тыбырзэс кыӵе ке дӥсен шобырто вылэм. Пиосмуртъёс но йырзы но кизы вылэ кыӵе ке дӥсь поно. Шунды котыртӥ котырсконо, ӟеч кылъёс вераса. Кылсярысь, тазьы: "Ваньды ик ӟеч улэлэ ни со дуннеяды. Милемыз отчы дырызлэсь вазь эн ӧтелэ. Сизьым полэс песянайёс, песятайёс, ӟеч улэлэ ни отын". Кыж-мыж кылэз одно ик пумаз верано, но юнме шорысь поттылоно ӧвӧл. Вӧсям нянез ӝӧк дуре гинэ пононо. Собере вань тӥям няньзэс окто но, вань кылъёс быриллям ини шуо. Вӧсяськонэз писпу дорын ортчытыны умойгес. Зэм-а, ӧвӧл-а но, адямиос таӵе учырез но верало. Быдӟым тылож дыръя одӥг семья, атайзы бырем шуыса, ивор басьтэм. Солэсь сизьым уйзэ, куанер ке но уло вылэм, бусьтыр ортчытыны тыршиллям. Озьы ке но, солдат ожысь улэп бертэм. Бӧлякъёсызлы, маде, пе: "Немецъёс монэ кутӥзы. Одӥг нуналэ туж сютэм вал. Соку инмысь шуак трос сиён-юон усиз". Лыдъяллям-чоталлям но, со ӵапак куяськон нуналазы вылэм... Гожтӥз С. ПЕТРОВА. ШӦКЫЧ Ялӥськом конкурс Очей Толилы - пӧсь салам Гажано лыдӟисьёсмы - пиналэз но, арлыдоез но, гур вылын пукисез но - ваньдэ ӧтиськомы Очей Толилы пӧсь саламъёс келяны: анекдотъёс, вакчиесь серемес учыръёс, эпиграммаос, пыӵкылонъёс. Тужгес серемъёсыз ужъёс печатласькозы "Шӧкыч" бамын. Устоосыз пӧлысь устооссэ ачиз Очей Толя - Россиысь дано артист Анатолий Алексеевич Ушаков синпель кузьымъёсын пусъёз. Нырысетӥосыз йылпумъянъёс лэсьтэмын луозы ни 1- тӥ апрельлы. Куинь толэзь ортчыса, нош ик тодомы вормисе потэмъёслэсь нимъёссэс. Озьы котькуд куинь толэзьлы йылпумъянъёс лэсьтэмын луозы. Нош ар пумын яломы конкурсын вормисе потэмъёсты. Куронъёс: гожтэтъёсады эн вунэтэ пусйыны улон интыдэс, быдэсак нимтулдэс, кытын ужамдэс яке дышетскемдэс. Ужъёсады пусъе, конкурсэ шуыса. Гожтэ на паспорт номеръёстэс, ку сётэмын, кулэ луоз на ИНН (налогъёсъя инспекциысь номер). Нылпи пособие чотын, пе - Оля, малы анаед сокем бадӟым кофта тыныд басьтэм? - юаз дышетӥсь куинетӥ классын дышетскись Петровалэсь. - Ӧз, со ӧз басьты, - валэктӥз нылаш, - милям коньдонмы ик ӧвӧл. Нылпи пособие интые куинь кофта алигес сётӥзы - таиз тужгес пичиез. Кӧня ке нунал ортчыса, Степан Иванов классэ Калашниковлэн автоматэныз пыре. Дышетӥсь кышкаменыз йырсазьзэ ыштӥз... - Иванов! Вера, кытысь шедьтӥд автомат? - школалэн директорез йырыз курен дыльдызэ ик пазя. - Нылпи пособие интые, толон атайлы автомат сётӥллям. Г. Жуковская. Ижевск. Ми - зучъёс Кӧня ке кузя люкаськыса, ӟуч эшъёс-юлтошъёс Удмурт шаермылэн палэназ шутэтсконо кариськизы. Поездэ пуксизы но уй пала шонтӥзы. Одӥгаз пичигес городэ вуыса, гостиницае курисько. Отын соосты шуныт ӧз пумиталэ, интыос, пе, одӥг но ӧвӧл. Кытчы кариськод? Кема малпаськытэк, етӥзэзгес егит пияш паспортсэ поттӥз. - Неужто милемды ураме кельтоды? Учкелэ - ми зучъёс, пӧртэм экспериментъёс ортчытыса кылдытэм адямиос, ваньмыз-ӧвӧлэз кызь-куамын кузя гинэ кылемын на. Нылкышно паспортэз кияз кутӥз. Зэмзэ но, национальность шуэм вадьсын зуч гожтэмын (удмуртъёс сое ӟуч шуыса лыдӟысалзы). Номыр пумит ӧз вера ни, ваньзылы ик эшъёслы кӧлон инты шедьтӥз. А. КАСАТКИН, Удмурт кун университетысь студент. Дышетӥсь но крезьгурчи Николай Михайлович Шабалинлэсь крезьгуръёссэ радио но телевидение пыр ӵемысь кылоно луэ. Тужгес но тодмо луизы Вячеслав Ар-Сергилэн "Тонэ кожай вал юг дыдык" пьесаезлы Михаил Федотовлэн кылбуръёсызъя кырӟанъёсыз. Трос дырзэ но кужымзэ Николай Михайлович нылпиослы сётэ - дас укмысэтӥ арзэ ини крезьгуръя училищеын ужа, оркестрын инструментъёсын шудыны дышетэ. Нош ваньмон дыръяз лулпушсэ либатӥсь, шунтӥсь, улӟытӥсь ужез борды кутске - крезьгуръёс гожъя. Алигес гинэ йылпумъяз Гарсия Лоркалэн "Андалузские баллады" кылбуръёсызъя вокал сузьетсэ, баянэн шудыны сонатаоссэ. Мылысь-кыдысь, ӝутскем мылкыдын ужа "Айно" спектакльлы крезьгуръёс кылдытон удысын. "Айно" быдэсак крезьгур вылын возиське, шуэ Николай Михайлович. Кылбуръёссэ Татьяна Чернова гожтӥз. Соин ик, пе, та ужез али тужгес кулэез но сюлэмшугоез луэ: учкисьлы крезьгурез яралоз-а, кызьы дунъялоз? *Николай Шабалин дышетоно нылпиосыз вӧзын. Владимир Беломорскихлэн туспуктэмез но гожтэмез. ЖУРНАЛИСТЪЁСЫН ПУМИСЬКОНЪЁС Дышетскизы кунгож сьӧрын Кык ар талэсь азьло Россиысь Президент кивалтӥсьёсты дышетонъя нимысьтыз программа кутӥз. Та дыр ӵоже Удмуртиысь 36 специалистъёс тодон-валанзэс будэтӥз. Со пӧлысь 23-ез дышетскиз кунгож сьӧрын. Соос ветлӥзы Италие, Францие, Германие, Канадае но США-е. Кин чотын бен соос дышетско? Ӝынызэ, 50 сюрс манет, сётэ Россия, кылемзэ - Сорослэн фондэз - 50 сюрс доллар. Сомында уксё висъяське котькуд дышетскисьлы. Та сярысь журналистъёслы мадиз Правительствоысь Наукая, вылӥ но шор профессиослы дышетонъя комитетлэн кивалтӥсезлэн воштӥсез Олег Власов. Пресс-конференцие озьы ик ветлӥзы кӧняез ке кунгож сьӧрын дышетскемъёс. Тани Ижысь полиграфкомбинатысь производствоя отделлэн кивалтӥсез Ольга Носкова куинь толэзь ӵоже тодон-валанзэс будэтӥз Германиын. Со вал Дрезден городын. Малы ке шуоно, татчы интыяскемын странаысь самой кужмоез полиграфической комплекс. Ольга Александровна Германиез юнме шорысь ӧз бырйы. Ижысь полиграфкомбинатын миым немецъёс инъязы асьсэлэсь усто техниказэс, офсет амалэн печатланэз. Табере шаерысьтымы кун газетъёс, журналъёс туж чебер печатласько, тужгес но усто пото туспуктэмъёс. Тӥни озьы лыдӟисьёс газетэз шумпотыса киязы куто. - Германиын монэ юн умой пумитазы, - маде Ольга Носкова . - Одӥг толэзьзэ теория сётӥзы, нош кык толэзь практика вал. Милям группаысь куд-огез ас ужзыя дышетскыны ӧз быгатэ, нош мыным удалтӥз. Германиын зол радъямын уж. Асьмеос соослэсь юн бере кылиськом. Мон кусыпъёс тупатӥ выль оборудование басьтонъя. Со лэсьтӥське Москваысь адямиос пыр ( соос Германиен ужало, кусып возё). Пумиськонын озьы ик асьсэлэсь малпанъёссэс веразы мукетъёсыз дышетскисьёс но. Г.Романов. Кияса ёросысь Тӥгырмен (Колошур) гуртысь Юрий Кузьмич но Антонида Кузьмовна Танаевъёслэн семьяязы бадӟым кайгу-куректон пыриз. 22-тӥ январе автокатастрофае сюрыса быриз соослэн Москваын улӥсь Владимир пизы. Владимир Юрьевич Танаевлы 28-тӥ январе 37 арес гинэ тырмысал ай. Вань улонзэ со герӟаз инбам сюресъёсын. Пермьысь военной ракетной училище бере служить кариз Плесецк космодромын. Тодон-валанзэ будэтӥз Дзержинский но Можайский нимо академиосын. Пенсие потытозяз - 35 аресозь - ужаз инженер-исследователь луыса Лобанъёсын кивалтонъя центрын (ЦУП-ын). Владимир Танаев - удмуртъёс пӧлын нырысетӥез космонавтъёслэн уженызы сокем зол герӟаськем, вылӥ дышетскем адями. Берло дыре подполковник Танаев ужаз Россия Федерациысь Обороная министерстволэн Вооружениосъя но военной техникая валтӥсь управлениезлэн штабаз, старшой офицер вал. 1997-тӥ арын Москваысь удмуртъёс Владимир Юрьевичез бырйизы "Герд" национально- культурной огазеяськонзылы тӧрое. Та удысын но со аслэсьтыз кужымзэ, уж борды ӟырдыт басьтӥськыны быгатэмзэ возьматӥз. В. Ю. Танаевез ватӥзы Москваын 26-тӥ январе. Берпум сюрес вылэ келянын вал Россия Федерацилэн Президентэз бордын Удмуртилэн ялан ужась представительствоысьтыз, Москваысь правительсволэн межрегиональной но общественной кусыпъёсъя департаментысьтыз, национально-культурной огазеяськонъёсысь адямиос. "Удмурт кенеш" но "Удмурт вӧсь" огазеяськонъёслэн нимынызы люкиськон кыл вераз В. Ю. Танаевлэн ӵыжы-выжыез В. А. Якупов. 1997-тӥ арын пӧсьтолэзе Владимир Юрьевич милям редакциямы пыраса мадиз вал аслаз ужез но Москваысь удмуртъёслэн сюлмаськонъёссы сярысь. Вань удмуртъёслэн 1998-тӥ арын ортчем ӧтчамазы но со вераськиз (адӟиськоды туспуктэмысь). Трос чебер малпанъёссэ с ӧз вуы быдэстыса. Улонэз сяськаяськон вакытаз ик шорияк чигиз. Та палаз кылизы пинал дырыз, анай-атаез, семьяез но ужез, ракета но космодром, орбитальной комплекс но космонавтъёсын кусып возён, Москваысь эшъёсыз, "Герд"... Инсьӧре (космосэ) лобаны аслыз ӧз кылды. Нош лулыз пыраклы кыстӥськиз инбаме... Та визьмо, чебер адямилэсь сайкыт тусбуйзэ, ӟеч ужъёссэ васяк возём сюлэмъёсамы. Редакциын ужасьёс, эшъёсыз. Судьяосты - гуртъёсы Кун Кенешлэн Законъёсты быдэсъямез чакланъя, калыкез кышкытлыклэсь утёнъя но гражданъёслэн правооссыя ялан ужась комиссиез люкаськылӥз. Татчы пырись депутатъёс кӧня ке законъёслы проектъёсты эскеризы. Кылсярысь, "Гражданъёслэн югдурез утёнэ пыриськемзы сярысь" Законлэн проектэз пумысен трос юанъёс кылдо ай. Кыӵе солэн формаез луоз: муниципальной милиция яке мукет огазеяськон? Кин чотын со возиськоз: аскивалтонэ-а яке республикалэн бюджетаз-а пыртэмын луоз? Машинаен ветлон правилоосты тӥям понна ГИБДД гинэ дугдытыны быгатэ-а яке гражданъёслэн дружиназы но- а? Соин сэрен комиссия проектэз юристъёслы выльысь тупатъяны берыктӥз. 26-тӥ мартэ Удмуртилэн Конституциезлэн 10-тӥ ёзэтаз воштон пыртыны калык мылкыд кариз ке, республикаямы кун властез быдэсъялозы Президент, Кун Кенеш, Правительство, Конституцияя суд но мировой судьяос. Берпуметӥосызлы Москва коньдон висъяз ни, но соос пумысен республикаямы законлэн проектэз гинэ дасяське ай. Мировой судьяос уждун федерацилэн бюджетысьтыз басьтозы, нош аппаратсэс аскивалтон органъёс возёзы. Кылсярысь, гуртъёсын ужан инты, юрт висъяны кулэ. Калыклы матэгес карон вылысь, мировой судьяос ёрослэн пӧртэм пумысьтыз гуртъёсын ужалозы. Россилэн одӥг улосвылаз но таӵе сӧзнэт (система) кылдытэмын ӧвӧл на. Соин комиссия законлэсь проектсэ юристъёслы эшшо огпол рос-прос эскерыны косӥз на. Куд-ог ужпумъёсъя депутатъёс дасяськемын ӧй вал. Соосты сэрттыны-пертчыны комиссия выльысь люкаськоз 7-тӥ феврале. А. Андриянов. Шӧкыч ТПДО Фельетон Ӝытазе, куать час бере, одӥг учрежденилэн одӥг кабинетаз огез бӧрсьы мукетыз кыстӥськизы воргоронъёс. Егитэз но арлыдоез, тушоез но туштэмез, мыйыкоез но мыйыктэмез... Берлоез пырись бӧрсьы ӧс пытсаськем бере, интыысьтыз султӥз тужгес йӧноез воргорон. Люкаськемъёсты синъёсыныз котыртыса, капчияк лулӟиз: - Попиросов сянаез, ваньмыз. Эшъёс, туннэ асьмеос люкаським Тамак пурккетэмысь дугдӥсьёслэсь огазеяськонзэс кылдытон пумысен, вакчияк вераса - ТПДО. Кылдэм сямъя, асьмелы бырйыны кулэ тӧро. Кинлэн кыӵе ӵектонъёсыз? - Цигаркинэз! Цигаркинэз! - кылӥськизы куараос. - Мон сямен, туж усто кандидатура. Цигаркин асьме ӵынын кыдам воргорон. Солэн ноку буш киосын ветлэмез ӧвӧл, котьку "ыбышты", чильымзэ уз жаля. Огкылын вераса, одӥг ӵынэн шоканы соин туж каньыл. Кичабемъёс улсын интыысьтыз султӥз ӝужыт, чиед мугоро воргорон. - Оскемдылы туж бадӟым тау, - ӵужектэм пиньёссэ ик возьматыса кабинет тыр зыл-зыл куараен вазиз со. - Асьмеос татчы ваньмы люкаським одӥг мылкыдын: куштӥськоно урод сяммылэсь. Учке ай ог-огдэс. Юлтошъёс, неужто асьмеос воргоронъёс ӧвӧл ни! Та кылъёсты кылыса, тросэзлэн пукисьёслэн ланьырскем пельпумъёссы ӝутскизы, гадьзы азьпала сётскиз. - Вань ик, дыр, зол сямо адямиос. Кызьы ке но дугдо ӵындэмысь, - кылӥськиз кытысь ке сэргысь Махоркинлэн чангес куараез. - Уг оскиськы, ваньмыз со алдаськон но юнме зулён. Мон ас вылам оскалтӥ. Арня чидай, кык чидай. Лябоми, ӵемонам ик йӧтӥз. Уг, уг оскиськы, - ӟырдаз Пенькин. - Малпаськод, мон ӧй туртты со черлэсь куштӥськыны? - итӥськиз вӧзаз пукись Муштук. - Кышноен капчигес люкиськыны, нош со проклятэз... сизьым пуныен но уд улля. - Эшъёс! - нош ик кыл кутӥз тӧро. - Со урод сяммес выжыеныз порон понна дэмласько та кенешамы тамаклы суд усьтыны. Соку ик ӝӧк вылэ интыяськиз кисыысьтыз поттэм "Прима". Со вӧзы оградэ султӥзы мукетъёсыз но "йыртэмасьёс": "Петр И", "Донской", "Родопи"... Мар кутскиз соку отын. Кыӵе гинэ пӧртэм "йыружъёс" понна янгыше ӧз уськытэ мискиньёсты. Адямилэн тазалыкез вылэ, пе, урдско: визьзэс сурало-пожало, тымуссэс сюпсё, синъёссэс вотсало. Одӥгезлы машина басьтыны люкетэм. Кызь ар, пе, пичиен-пичиен "капыръяз", "Москвичсэ" ӵынлы, пеньлы пӧрмытӥз. Мукетызлэн гуртоосы понна нимы ик, пе, ӧвӧл ни, "ӵындӥсь завод" но тӥни. Нош куиньметӥезлэсь быдэ вуымтэ пизэ умойтэм уже кыскем... Вань та умойтэм ужъёслы пум понон понна, "суд" одӥг малпанэ вуиз: ӝӧк вылын кыллись сигаретъёсты ӝегатскытэк ӵынлы но пеньлы пӧрмытоно. Кӧня ке минут ортчыса, сигарет пумъёс гинэ ӵындо на вал. Люкиськон азязы тӧро йылпумъян лэсьтӥз: - Эшъёс, огазеяськонмылэсь ужзэ ӵуказе азьланьтом. Тамак пурккетэмысь дугдӥсьёслэн огазеяськонысьтызы репортаж нуиз Л. МАЛЫХ. Алнашысь шуныт тӧл Нылкышноослэн нуналзы азьын таӵе нимо концерт программаен шумпоттоз учкисьёсты Удмурт Элькунысь сӥё-дано артист Геннадий Ганьков. Удмурт кун филармонилэн юртаз та ӝытэ чузъяськозы Геннадий Николаевичлэн тужгес ӟеч, тужгес тодмоесь кырӟанъёсыз. Та шуныт пумиськонэ лыктэмъёсты вань сюлмысьтыз шулдыртоз Удмурт Элькунысь Кун премилэн лауреатэз эстрада кырӟанъя "Шулдыр ӝыт" ансамбль. Концерт луоз сизьыметӥ мартэ. Кутскоз ӝытазе куать часын. Касса ужа нуназе бере часысен ӝыт сизьым часозь. Юан-веранъёсын вазиськыны луоз 43-23-38, 43-22-71 телефон номеръёсъя. Книга ӝажыяды Иж сярысь кырӟась Удмуртиысь ӟуч кылбурчилэн Владимир Тяптинлэн азинлыко гожъяськемез сярысь нырысьсэ тодӥ 1992-тӥ арын, нырысетӥ книгаез потэм бере. Со дырозь кылылэме но ӧй вал кадь адями та сярысь. Басняосыз, фельетонъёсыз, серемес чуръёсыз паймытӥзы монэ, малпаськонэ уськытӥзы. Нырысь -валысь учкыса, соос огшоры кылын гожтэмын кадь. Котьку сяменгес ик басняослэн персоналъёссы - пӧйшуръёс но пудо-животъёс. Нош сюжетъёссы, малпанъёссы сыӵе лэчытэсь - соос меӵак возьмато политикаысь югдурез, выльдӥськон шуыса нимам учыръёсты, соослэсь ужась калыклы изъян ваемзэс, сьӧд кужымъёслэсь кузёяськемзэс, адямиослэн кусыпъёсазы шуг-секытъёслэсь шуак кылдэмзэс. Сыӵеесь луо "Круглый стол", "Медведь-лежебока", "Осёл-реформатор", "Лесные крикуны" басняосыз. Ачиз кылбурчи верамъя, гожъян мылкыдыз пуромиз 1990-тӥ арлэн пумаз. Книга поттӥсь "Удмуртия" юрт малпаз солэсь кык бичетсэ печатланы. Нырысетӥяз - сатира но юмор, кыкетӥяз - лирика. Кылбур гожъяны Владимир Тяптин кутскем пичи дыръяз ик. Нош поэт луон сярысь малпанэз быдэсмем витьтон арессэ пусъемез бере гинэ. Укмыстонэтӥ аръёсы Владимир Тяптинлэн синмаськымон книгаосыз арысь аре потылӥзы. Кылбуръёссэ но кырӟанъёссэ печатланы ӧдъязы газетъёс. Ачиз выль чуръёссэ калык пӧлын, сцена вылысен лыдӟылӥз. Кылбуръёсызъя кырӟанъёс но кылдытъяны ӧдъязы, соосты кырӟало ни тодмо артистъёс но ансамбльёс. Улонэз валаны кылбурчилы юрттӥз, дыр, калыкен ялан ужамез но. Дораз бадӟым библиотекаез. Лыдӟе ӟуч кылбуръёсты, удмурт кылысь берыктэмъёссэ, кунгож сьӧрысь поэтъёслэсь гожъямъёссэс. Яратоно кылбурчиосыз - Александр Пушкин, Сергей Есенин, Уильям Шекспир. Удмуртъёс пӧлысь - Флор Васильев. Таиныз ас вакытаз эшлыко кусыпъёс возиз. Владимир Яковлевичлэн котькуд ужез улонысь кыӵе ке но пусйымон учырлы яке дано адямилы сӥземын. "На пруду Ижевском" (1993-тӥ арын потӥз) кылбурын возьматэмын асьме шаерысь дано адямиос. Данакез сӥземын удмурт литератураысь классикъёслы: Куӟебай Гердлы, Ашальчи Окилы, Кедра Митрейлы. Сюлэмез вырӟытӥсь кылъёсын вазиськиз кылбурчи Флор Васильевлэн шӧдтэк шорысь быремезлы. Вылӥ тубатэ ӝутскон луиз 1994-тӥ арын Иж сярысь усто кырӟан гожтонлы сӥзем конкурсэ пыриськемез. Владимир Тяптинлэн "Город нашей любви" кылбурезъя кырӟан пӧрмытӥз Виктор Шацкий (отӥяз та усточиос пыраклы эшъяськизы). Ижын улӥсьёс яратӥзы та кырӟанэз. Городмылэн аслаз кунгурез но (гимнэз но) луиз ни кадь со. Бӧрысь Москваын но чузъяськылӥз. Тодмо критик-литературовед Анна Зуева-Измайлова бӧрысьгес сое гожтоз но вералоз: "Ижевск аслэсьтыз кырӟасьсэ шедьтӥз". Москвалэсь 850 ар тырмонзэ пусйыку, отын чузъяськиз Владимир Тяптинлэн кылъёсызъя гожтэм кантата (крезьгурез Валерий Шкурихинлэн). Ар талэсь азьло, 1999-тӥ арын 6-тӥ феврале, мыным шуд усиз Владимир Тяптин кылбурчилэн ӝытаз вуылыны. Удмурт кун филармонилэн концерт возьматъян залаз соку люкаськылӥзы кылбурчилэн уно гинэ эшъёсыз - поэзиез но крезьгурез яратӥсьёс. Адямиослы ӝыт яраз. Сцена вылын ог-огзэс вошъязы Удмурт Элькунысь дано артист Виктор Сергиенко, кылбурчиен эшъяськыса ужась крезьгурчиос Виктор Шацкий но Евгения Копысова. Собере паймытӥз учкисьёсты Москваысь куно, Россиысь калык артистка, тодмо композитор Людмила Лядова. Зол чузъяськизы Владимир Тяптинлэн "Мынам яратонэ - Россия" кылбурезъя кырӟанэз но мукет гуръёсыз. Али Владимир Тяптин англи кылысь берыкъя Уильям Шекспирлэсь сонетъёссэ. Ужез азинлыко мед ӧръяськоз. Леонид Фёдоров. Валэктэ юрист Сэрегез нуэ адвокат Лилия Шкляева Внукме басьтозы-а армие? Мон пенсиын, улӥсько нылылэн пиеныз, луисько таизлэн опекунэз. Нылы (внукелэн мумиз) выль семья кылдытӥз, мукет районэ кошкиз. Внукелы 15 арес ни вал, сьӧразы мынэмез ӧз поты, мон борды улыны кылиз. Ӝоген армие но басьтоно, шуозы, - 17 арес ни. Тодэме потэ: нуэмзы луэ-а внукме армие? Мынам келяме уг поты. Аслым но секыт йӧтоз огнам. Армиын пиосты но ултӥяло, пе. Газеттэс кемалась басьтӥськом, быдэсак лыдӟиськом, яратӥськом. Шудбур но тазалык тӥледлы. Анна Петровна. Дэбес ёрос. Таӵе юанлы валэктон утчаны кулэ "Военной обязанность но военной служба сярысь" Россия Федерацилэн Законысьтыз. Нырысь ик чаклано: внуктэс луоз-а армие мынонлэсь копак мозмытыны, яке отчы кошконзэ берлолы кельтоно-а? Законысь 23-тӥ ёзэт (статья) вера военной службае басьтонлэсь мозмытӥськись яке отчы сюрисьтэм муртъёс сярысь. Армие басьтэмлэсь мозмытӥсько таӵе адямиос: тазалыксыя военной службае ярасьтэмъёс, военной службаен ӵошась кыӵе ке граждан службае пыриськемъёс, мукет кунын военной службае пыриськемъёс, наукаосъя кандидат яке доктор ним басьтэмъёс, сыӵеос, кинъёслэн бубызы, мумызы, агай-вынзы, апай-сузэрзы быриз (кулӥз) военной службаен герӟаськем муген. Военной службае уг басьто таӵеоссэ: кинъёслы сётэмын наказаниос - одно ужатон, тупатон вылысь ужатон, эрикез шымыртон, арест яке эриклэсь люкон; кинъёслэн вань йыртэмамзы понна судимостьсы; кинъёс пумысен мынэ дознание яке следствие яке судэ сётэмын уголовной уж. Анна Петровналэн внукез вылӥ верам учыръёсын герӟаськемын ӧвӧл кадь. Тӥни малы сое армие басьтонлэсь мозмытыны уг луы, дыр. Табере учкоме армие кошконэз берлолы кельтонэз. Солы сӥземын вылӥ верам Законысь 24-тӥ ёзэт. Военной службае мынонзэс берлолы кельтыны луэ соослы: кин законэн тупатэм радлыкъя тазалыкезъя огдырлы уг тупа военной службалы - одӥг арозь; кин весь утялтыса возе бубызэ, мумызэ, кышнозэ, агай-вынзэ, апай-сузэрзэ, песятайзэ, песянайзэ яке вордэм муртэ, таосызлэн законъя ӧвӧл ни ке музон утялтӥсьсы, яке сыӵе учыре, ку таоссэ быдэсак уг утялты кун но соос тазалыксыя чакламез кулэ каро, яке нырысетӥ но кыкетӥ группаен инвалид лыдъясько, пересьмыса пенсия басьто яке 18 арессэс ӧз тырмытэ на. Та чуръёсысь ик, Анна Петровна, утчалэ асьтэлы валэктон. Редакция тодэ: ог люкетэз лыдӟисьёсмы "Валэктэ юрист" сэрегез вандылыса утё. 24- тӥ ёзэтъя соослэн но, оло, юанъёссы кылдозы. Тӥни малы сое быдэсак сётӥськом. Армие мынонзэс берлолы кельтыны озьы ик быгато: мумытэк нылпи будэтӥсьёс, кык но тросгес пинал вордӥсьёс, куинь аресозь нылпи будэтӥсьёс, сыӵе муртъёс, кинъёслэн мумызы (бубызы) кузпалтэк вордэ эшшо кык яке ятыргес нылпи (таосызлы тямыс арес тырмытозь), пиналысен инвалидэз, сыӵе муртъёс, кинъёс вылӥ дышетон заведениез быдтыса, соку ик ужало басьтэм специальностьсыя, быдэс нунал ӵоже, кун организациын (таоссэ тупатэ Россия Федерациысь Правительство). 1998-тӥ арын 21-тӥ июле та законэ эшшо одӥг ватсан пыртэмын. Со сыӵе ик право сётэ сыӵе муртъёслы, кинъёс йылпумъязы вылӥ профессиос сётонъя кунлэн луись муниципальной яке кунлэн луисьтэм дышетон учреждениосты, но службазэс нуо югдурез утёнъя ёзъёсын (органъёсын), уголовной наказаниосты быдэсъясь учреждениосын но ёросъёсын, вытъя (налогъя) полициын, таможняын, 1999-тӥ арын 21-тӥ октябре Россия Федерациысь Конституцияя суд валэктон сётӥз 24- тӥ ёзэтысь 2-тӥ люкетъя. Отысь "а" пунктын вераськон мынэ: кунлэн луисьтэм вылӥ профессилы дышетон заведение кун ласянь аккредитациез ӧз ортчы ке, отын очной амалэн дышетскисьёслы армие мынонзэс берлолы кельтыны право уг сётӥськы. Дышетсконэн валче армие мынонэз берлолы выжтыны кык поллэсь тросгес уг яра. Лэчыт пероен КИНЛЫ КОНЬДОН ГУРЕЗЬ? Лэчытэсь мадёнъёс дасян вылысь, Шӧкычлы куддыръя уно иськемъёс лобано луэ. Туннэ эскере Кизнерын улӥсьлэсь ӝожтӥськонзэ, ӵуказе мыноно луэ Яре. Нош куддыръя вероссэ дася, "Удмурт дунеысь" потатэк. Татын ужасьёслы почта вуттэ уга олокыӵе гинэ иворъёс. Соосты учкы, ог-огенызы герӟа но - мадён дась. Миллион, миллион... Дорамы пыриз редакциямы азьвыл ужам мурт. Пенсиез азьло минстрлэн мында ӧвӧл бере, коньдонзэ шыръясагес улэ. Нялтас кыӵе ке амал утча уксё пуйызэ кӧнялы ке но зӧкомытыны. Кин утча, со шедьтэ, шуо. Ужасьмылы вуиз чебер конвертэн гожтэт. Сое ыстэм Москваысь "Ридерз дайджест" нимо издательство - акциосын огазеяськон. Шонергес вераса - отысь лотерея ортчытонъя комиссия. Ужасьмылы ивортэ: тӥ пыртэмын лотереяен шудӥсьёс пӧлы. Нырысетӥ кузьым - 1 миллион манет. Куинь быръён пыр потӥды ке, тӥляд осконды кылдоз сыӵе бадӟым утон басьтыны. Гожтэт улэ гожтӥськем кыӵе ке Е. Смирнова. Пенсионермы дышем сямызъя визь-кенеш куре редакцилэсь. Куспамы таӵе вераськон пӧрмиз. Азьвыл корреспондент. Мар-о кароно та гожтэтэн! Али корреспондент. Кесяса кушты. Азьвылэз. Ма, Москва али мынэсьтым номыр уг уг куры ук. Гожтэт гинэ отчы ыстоно, пе. Алиез. Маркалы но конвертлы коньдонэд жаль ӧвӧл ке - келя гожтэт. Азьвылэз. Кин тодэ, оло утон кемдоз. Алиез. Москваос коньдонзэс кытчы поныны уг тодо ни. Йырзы висе: кыӵе, пе, улэ ни меда Ижысь огез мискинь пенсионер? Коньдонлы уг ёрмы-а? Азьвылэз. Бен-бен, конверт вылэ мынэсьтым нимме-тулме печатласа гожтӥллям. Алиез. Москвае ар куспын кык-куинь пол ветлӥсько. Данак издательствоосы но редакциосы вуылӥсько. Нош "Ридерз дайджест" издательство сярысь кылылэме но ӧвӧл. Азьвылэз. Котьма ке но, сюлэмам шудо учырлы кыӵе ке осконэ вань. Алиез. Гожтэт ыстӥсь организацилэн нимыз ик возьматэ: со малпамын кунгож сьӧръёслы пышкылыса. Отын, капиталлэн дуннеяз, адямиез олокызьы но алданы выро. Азьвылэз? Кызьы? Малпаськытӥсь ивор (информация к размышлению) Германиысь андан ӵыжатон заводын ужась Дитер Ципрат пыриськиз огаз шудонэ: утӥз 466 сюрс 153 марка (конверт вылэ лякон марка ӧвӧл - коньдон). 400 сюрссэ кельтӥз выль корка басьтыны. Кылемзэ, ог 66 сюрссэ, быдтӥз шудо учырез миськыны. Куинь нунал кыстӥськиз шулдыр юондыр. Ньылетӥ нуналаз Ципрат басьтӥз гожтэт. Шудонэз радъясь фирма туж жаляса ивортэ: солы бадӟым утон усем... компьютер янгышамен сэрен. Дитерлы 153 марка гинэ вуыны кулэ вал. Корка басьтыны кельтэм коньдонзэ со берыктӥз фирмае. Нош юондыр ортчытыны быдтэмзэ... Шонер верало, вылды: дунтэк сыр кылле капканын гинэ. Котьма ке но пенсионерез осконтэм издательствоен герӟаськыны алэммы иназ ӧз мыны. Москваысь гожтэтсэс пияз туж чакласа ватӥз но отчы ивор келяло, шуиз. Сыӵе учыръёсы шедьыса ӵуштаськем муртъёс сярысь вераммес пеляз ӧз поны. Жаль. Нош ми мадьыны медӥськом вал... ...Зарни улысь зарни сярысь Одӥгез ужасьмы курортын шутэтскыкуз лыдӟем "Дочки-матери" газетэз. Син азяз йӧтэм книгаос вузась фирмалэн адресэз. Нимъёссы нош кыӵеесь: "Что сексолог делает в постели", "Травник для мужчин", "Лекарства без врача" но мукет. Пӧлазы кызьы ке сюрем крем. Нимыз: "Депил плюс". Малы меда "Дебил плюс" ӧвӧл? Котькудӥз 199 манетэн. Коньдон келямез бере дыдымес книгаен шумпоттӥллямтэ - "Сони" фотоаппаратэн гочатӥллям. Собере вуэм таӵе ивор: 1999-тӥ арын 1-тӥ октябре 13 час 45 минутэ шудон ортчытонъя комитет решение кутӥз ӵапак тӥледлы, одӥгезлы усто басьяськисьлы, туж аспӧртэм кузьым сётыны. Кузьым зэмен ик осконтэм - "Сони" аппаратура. Вӧзаз - зарнивуам бумага. Вылаз пусъемын: зарни шобретэз ӵушылэ но тододы, кӧня муртлы кузьым вуэ. Ужасьмы, огназ улӥсь дыды, озьы ик лэсьтӥз. Буёл улысь потӥзы зарни кылъёс: ньыль муртлы. Озьыен, шудо мурт утӥз буёло телевизор (72 сантиметр), стереорадио, колоннаос (акусутической система) но видеомагнитофон. Сыӵе чебер бумага улэ киоссэс нюртӥллям Москваысь "Покупки на дом" акциосын огазеяськонлэн валтӥсь директорез Ксавье Брандизи, солэн воштӥсез Николай Какаулин но шудон ортчытонъя кыл кутӥсь Наталья Прусаченкова. Зэм, огазеяськонлэн адресэз сётэмын ӧвӧл - гожтэмын почта ящиклэн номерез гинэ (ож тӥрлык поттӥсь заводлэн сямен). Сыӵе бадӟым утонэз басьтон понна лэсьтоно пичи уж - огаз банке келяно но 467 манет. Тазэ но ужасьмес кема сюлворим: эн ысты коньдондэ. Алэммес пеляз ӧй понысал, но та вакытэ уждун тырон ӝегаз. Соин гинэ, вылды, дыдымы "мултэс" коньдонэзлэсь ӧз мозмытскы. Вылаз ик, солы лыдӟыны сётӥм кунгож сьӧрысь иворез. Информация к размышлению Франциын вань Бордо город. Отын уло вынъёс-математикъёс - Роже но Реймонд Пуатьеос. Соос кема малпаськизы рулетка сярысь - котырес дырды кузя бызьылӥсь шарикен шудон сярысь. Шедьтӥзы келянлэсь утись амал. Мынӥзы Средиземной зарезь дурысь Монако кунэ, дугдӥзы дано Монте-Карло городэ. Нырысь нуналэ вынъёс утӥзы 167 сюрс франк, ӵуказеяз - 548 сюрс, усьсэаз - 2 миллион 800 сюрс. Соос вылэ синзэс уськытӥз отысь мафия. Казиноысь дӥсяськон сэрегын вынъёслэсь утэм коньдонэн сумказэсшырмачъёс лушкемак воштӥзы. Со интые кельтӥзы суредам франкъёсын сыӵе ик сумка. Ульчаысен Пуатьеосты дугдытӥзы полицейскойёс. Вынъёсты янгыше уськытӥзы суредам коньдон вӧлмытэмзы понна. Табере математикъёс малпасько кыл кутонлэсь мозмон сярысь. Москва уг оскы синвулы Таӵе учыръёс сярысь рос-прос ӧй мадьысалмы, соос одӥг-ог гинэ луысалзы ке. Почта ивортэ: миллион яке "Сони" утыны вырисьёс гуртъёсын но уно ни. Шаркан ёросысь огез семья миым октябре 600 манет келям Москвае. Книга но, телевизор но ӧз вуэ. Кин но со дэмлалоз: милицие вазиськы но кырмы йыртэмасьёсты. Вераны гинэ капчи. Удмурт милицаос шуозы: коньдондэс Москвае лэзиды - Москва ик мед утчалоз. Нош отчы мыныны уно сю манет кулэ - ачид уд вырӟы. Москва уг оскы синвулы. Малпаськытӥсь ивор Уно аръёс ӵоже Нью-Йоркын ужа ни... кураськыны дышетон школа. Сю доллар тыр но, тыныд рос-прос валэктозы, кыӵе адямиез кыӵе амалэн луоз дугдытыны, вераськонэ кыскыны, куронзэ кылзыны но коньдон пуйызэ усьтыны. Кытын меда дышетскизы Москваысь вылӥ верам фирмаысь кескичьёс? Америкаын ке шат? Адямиез ныдъян амалъёс быдэс дуннеын огкадесьгес. Россия капитализме выже бере, котькудӥз ачиз сюлмаськыны кулэ ачиз сярысь. Кинлы коньдон гурезь? Кинлы зарни гурезь? А. Шкляев. "Тор-ъёс" кошко Грецие Туэ Россиын ож тӥрлык поттонэз одӥг но ӝыны поллы будэтон Удмуртилы умоен берытскоз. Со али ик шӧдӥське ни. Тани Ижысь электромеханической завод - "Купол" акционер огазеяськон "Тор-М1" зенит ракетной комплексъёссэ (ЗРК-сэ) алигес келяз Грецие. Нош нырысетӥосыз вузамын миым август толэзе но декабре. Берлояз "Тор-М1" нуэмын 5 "Руслан" транспортной самолётэн Ульяновск город пыр. Январе Грециысь вооружённой кужымъёс нош ик кык ЗРК басьтӥзы. Соос ньыль толэзьлы вазьгес вуттэмын. Грециысь ПВО ваньзэ 21 "Тор-М1" комплекс басьтоз. Со 526 миллион доллар (США) тыр луоз. Асьме республика понна тамында ож тӥрлык вузан берло дыре самой бадӟымез луэ. Озьы ик пусйыны кулэ, кылем арын быдэс Россия мукет странаосы тросгес пыӵал тӥрлык вузаз. Сое "Профиль" журнал но гожъяз. Огъя вераса, миым ож тӥрлык вузаса, федеральной бюджетэ 3 миллиард доллар пала пыртэмын. Специалистъёс лыдъямзыя, туэ со лыдпус эшшо 500 миллион долларлы йылыны кулэ. Отчы пыроз Удмуртиысь предприятиослэн но тыршемзы, ож тӥрлык вузамзы. Г. Васильев. ТУЛКЫМ Калык визьбуро суредась Мынам ужан кабинетам борддоре ошемын тодмо удмурт суредасьлэн Менсадык Гариповлэн кык ужъёсыз - "Дуннелэн кылдэмез" но "Нюлэскын". Та суредъёссэ со мыным кузьмаз вал 1995-тӥ арын, Шубашкарын (Чебоксарыын) выставкаез ворсаськем бере. М.Гарипов удмурт художникъёс пӧлын нырысьэс ас ужъёссэ возьматӥз Чувашилэн шоркараз. Нош сое ортчытон понна сюлмаськиз Вань чувашъёслэн общественно-культурной центрзылэн удмурт ёзэныз кивалтӥсь Анатолий Иголкин. Менсадык Гариповлэн адӟытоназ трос калык ветлӥз, синмаськыса учкизы ужъёссэ. Соос уго улонлы шумпотонэн тылсиясько, суредасьлэн сюлэм пыртӥз поттэм калык визьбур отысь адӟиське. Аслаз ужъёсыныз художник вера кадь: адямиос, улэ шумпотыса, ог-огдэс яратыса, котькудӥз тӥ пӧлысь шудо-буро мед луоз, малы ке шуоно, асьмеос вордскемын шудо луон понна. Тужгес дуно кузьымез кадь утисько мон та художниклэн киыныз пӧрмытэм ужъёсты. Мӧзмытгес луэ ке, "Нюлэскын" суред доры лыктӥсько но отысь нылаш шоры учкисько. Паллян кияз солэн куды, кема ветлӥз, дыр, нюлэскытӥ, жадиз, луоз, нош тани узыен пиштӥсь нюлэс куше потӥз но - синъёсыз палёмизы. Нош анаез солы шуэ: "Бича, дыдые, бича инкуазьлэсь сётэм емышъёссэ!" Отӥязгес таӵе ик мылкыдын бичаське нылашлэн выныз. Шумпото адямиос, серекъя инкуазь. Мынам но сюлэмам капчигес луэ. Кыкетӥез суред - "Дуннелэн кылдэмез" - ортчем дауръёсысь омырен кадь шока. Мон ӵем учкылӥ со шоры, "Вашкала чуваш инмаръёс но батыръёс" книгае бордын ужакум. Чувашъёс но, удмуртъёс но дуннелэн кылдэмез шоры огвыллемгес учко вылэм: музъем возиське ош вылын, ош - чорыг вылын, нош чорыг уя дунне зарезьын. Тодӥсько на: вуылӥзы ми доры Австриысь журналистъёс. Туж кельшиз соослы та суред. Вузаны куро вал. Со дэмлам уксёенызы мон быдэс романме печатланы быгатысал. Но кызьы вузалом сюлэмам сокем лякиськем арбериосыз? Суредъёс кылизы ас интыязы ик. Бен, адями весяк уг улы та дуннеын. Лыктэ но - кошке, берытсконтэм. Нош ӟеч ужъёсыз, уката ик - отчы лул шокчемын ке, пыраклы кылё. Сыӵе адямилэн нимыз но уг вуны. Ӟеч ужъёс... Одӥгезлэн соос туж уно, мукетъёсызлэн... Малы мон гожтом таоссэ? Мон гожтӥсько матысь эше Менсадык Гарипов сярысь. Со туж бадӟым художник вал, тыршиз адямиос понна. Яратӥз ас калыксэ, улӥз со сярысь малпанъёсын. Котькуд суредэз - удмуртъёслэн улонысьтызы огэсэп. Удмурт усточиос пӧлысь со кадь кин меда быгатӥз ас калыкезлэсь сямзэ, манерзэ, туссэ пуктыны? Котькуд выль уженыз ачиз но усьтӥськиз, зэмос художник сямен. Соин ик со асьмелы дуно, соин ик быдӟым. Тае азьпалан, асьме бере улӥсьёс эшшо но юнгес валалозы, малпасько. Мишши Юхма, Чувашиысь калык писатель, Удмуртиысь культура удысын дано ужась. Вазьылоз меда? Крезьгурез Пантелей Кузнецовлэн Кылъёсыз Людмила Хрулёвалэн 1. Шур сьӧрысь одӥг пиез пумитай толон. Паймоно кадь куараез - уӵыпи, оло? 2. Кусоез капчи шудэ кузь турын пӧлын. Синъёсы мынам шудо ялан со вылын. 3. Уйвӧтам но малы ке соин пумиськи. Шур сьӧрысь казакпилы шат мон синмаськи? 4. Мылкыдме нош со куке валалоз меда? Одӥг кыл ке но маке вазьылоз меда? Кастрен нимо обществолэн премиосыз но стипендиосыз Финн-угор калыкъёслэсь литературазэс азинтон, писательёслы но берыктӥсьёслы (переводчикъёслы) юрттон вылысь, Финляндиысь М. А. Кастрен нимо общество 2000-тӥ арын литературной премиос сётыны чакла. 1997-тӥ-1999-тӥ аръёсы Россия Федерациын кудӥныз ке финн-угор кылын гожтэм но печатлам яке кудаз ке кылэ берыктэм но печатлам чеберлыко произведение понна - солэн авторезлы яке берыктӥсезлы 10 сюрс финн марка премия. Со сяна, луозы на поощрительной премиос - 10 сюрс финн марка тыр. Литературной премияя кенешись комиссилы дэмланы луэ литературной журналын печатлам пьесаосыз но, романлэсь журналын потэм вариантсэ но, со 30 бамлэсь пичи ӧвӧл ке. Издательёс, авторъёс, озьы ик журналъёслэн редакциоссы премилы дэмлам произведениосты ыстыны кулэ кык экземплярен валэктон-дэмланъёсын (рекомендациосын) М. А. Кастрен нимо обществое туэ 31-тӥ мартозь. Премия сётӥськоз 2000-тӥ арын сӥзьыл. Котькудӥз премия чакламын одӥг авторлы яке берыктӥсьлы. Со сяна, М. А. Кастрен нимо общество 2000-тӥ арын Россиысь финн-угор кылъёсы чеберлыко но научно-популярной литератураез берыктӥсьёслы стипендиос висъяны чакла. Стипендилы вазиськыны быгатозы нимаз адямиос но авторской коллективъёс, издательствоос но редакциос, та аре берыктон бордын ужан планзэс ивортыса. Берыктыны луоз котькыӵе кылысь но, кудаз ке финн-угор кылэ. Стипендилы вазиськыку, заявлениен ӵош луыны кулэ произведениез берыктӥсь муртлэн издателен яке журналлэн (газетлэн) редакциеныз огкылэз. Кенешись комиссия нырысь ик учке пырак оригиналысь берыктэмъёсты - дунне классикаысь, ӵыжы-выжы луись калыкъёслэн литератураысьтызы произведениосты, озьы ик - нылпиослы но егитъёслы, научно-популярной литератураез. Стипендия пумысь вазиськонъёсты комиссия эскерон араз кык пол. Куриськонъёсты ыстоно туэ 7-тӥ апрелёзь яке туэ ик 13-тӥ октябрёзь. Премия но стипендия ласянь куриськонъёсын вазиськоно почта пыр таӵе адресъя: М. А. Цастрени сеура, ПЛ 242, 00171 ХеИсинки,ФИНЛАНЛ /ФИНЛЯНДИЯ. Пыр-почгес тодэмды потэ ке, вазиське М. А. Кастрен нимо обществолэн проектъёсызлэн координаторезлы господин Тармо Хаккарайненлы таӵе телефонъя: +358-9-6222 784, факсъя: +358-9-6222 315. Редакцилэсь. Озьы ик ватсаса валэктонъёс сётыны быгатозы та обществолэн Удмурт Республикая координаторез Людмила Евгеньевна Кириллова но Удмуртиысь Писательёслэн огазеяськонзы. 02 ИВОРТЭ Кечтэк кылиз Ижевскын улӥсь 64 аресъем кышномурт шӧдтэк шорысь кеченыз люкиськоно луиз. Одӥгаз уе пудо-животсэ гидысьтыз поттӥллям. Милиционеръёсты пуны вуттӥз 39 аресъем Ильдуслэн улон коркаез доры. Азьвыл суд улэ сюрылэм пиосмурт кечез вандыны вуттэм ни. Сӥльзэ сиыны ӧз кылды - талазы. Пыӵалзэ талазы Якшур-Бодья ёросысь Вуж Ӟатча гуртысь 40 аресъем И.-лэсь вакчиятэм пӧйшуран пыӵалзэ шедьтӥзы. Милиция эскере, кытысь со пиосмурт кие вуэмын. 16 полэс лушкаськись Ижысь Индустриальной районысь уголовной розыскын ужасьёс 25 аресъем К.-вез ӝегатӥзы. Берло куинь толэзь ӵоже со 16 улон коркаосты бушатэм. Вуылэм Энгельс, Челюскин, Потёмкин, Пархоменко, Бабушкин, Смирнов, Серов, 8-тӥ Март, Михайлов, Индустриальной, 9-тӥ Январь урамъёсы. Лушкаськемезлэн ог люкетэз таламын. Югдурез утисьёс солэсь 28 аресъем юлтошсэ утчало на. Чай юэмез потэм Нуназе бере Ижысь "Горница" кафе дорысен Р.-лэсь киысьтыз дас килограмм сакыр песоксэ талазы. Но лушкаськисьлы соин чай юыны ӧз кемды. Кырмизы. Азьвыл суд улэ сюрылэм 44 аресъем пыдйылчилэн мурт чотын кӧтсэ тыремез потэ вылэм. Усыкмизы Воткинской Шоссе урамысь "Темп" автокооперативын шудтэм учыр луиз. ВАЗ-111 машина пушкысь пиосмуртлэсь но кышномуртлэсь шӧйёссэс шедьтӥзы. Мугорысьтызы вӧсь карон пытьыос шараямын ӧвӧл. Югдурез утисьёс малпало, соос усыкмыса быризы шуыса. "Юрттӥськомы-а?" Степан Разин нимо ураметӥ ортчыкузы, ГИБДД-лэн экипажезлэн син шораз йӧтӥз нылкышно. Телевизорзэ вормытэк, со кокырскыса мынэ вал. Милициын ужасьёс нылкышнолы юрттӥськыны ӵектӥзы. Шонерак юазы: "Кытысь телевизоред?" 24 аресъем Б.-ва ватытэк вераз, та урамысь ик одӥг коркась поттӥ шуыса. Сюрес вылын Укмыс часэ ӵукна Можга-Алнаш сюреслэн 15-тӥ иськемаз Иж-2715 машина "Волгаен" мырӟиськиз. "Москвич" пумит сюрес вылэ потэм. Татын пукись пассажир соку ик кулӥз, нош водителез больницае сюриз. Саклыкез ыштон трос шудтэм учыръёсы вуттэ. Удмурт Республикаысь МВД-лэн сводкаосызъя дасяз А.Андриянов. Куинь омоновецъёс быризы 4-тӥ феврале Чечняын Катыр-Юрт гурт дорын Удмуртиысь куинь пиос бырыны шедизы: - милициысь младшой сержант Токарев Константин Васильевич, 1976-тӥ арын вордскемын; - милициысь прапорщик Собин Владимир Александрович, 1971-тӥ арын вордскемын; - милициысь прапорщик Востриков Владимир Иванович, 1965-тӥ арын вордскемын. Эшшо куинез сӧсырмемын. Тазалыксы сокем урод ӧвӧл. Грозныйысь чигнась боевикъёс Удмуртиысь ОМОН вылэ шӧдтэк шорысь урдскизы. Шаерысьтымы милиционеръёс нюръясько гурезьёсы кошкись бандитъёсын. Удмурт Республикаысь МВД-лэн пресс-службаез. Кышнояське но шудо улэ! Ортчем вторнике журналистъёсын пумиськиз Правительствоысь загс ужъёсъя комитетлэн кивалтӥсез Лариса Лукинская. Со меӵак пусйиз, миым, пе, нылпиос, кулэмъёсын ӵошатыса, 30 процентлы ичигес вордӥськизы. Таӵе лыдпус нокинэ уг шумпотты. Озьы ке но, миым 82-ез кышномурт кыкто ваиз, кыкез - куиньмоос. 274 нылпи вордскемын - быдэ вуымтэослэсь. Таӵе лыдпусъёс амалтэк малпаськыто уката ик кун службаын ужасьёсты. Анай-атайёс кыӵе бен нимъёс сёто. Тужгес но трос Анастасияос но Аннаос. Тани Ижысь Ленин районын миым 28-эзлы Алина ним понэмын. Удмурт шаерамы вань ни Эльза, Дарина, Сабрина но Констанция нимъёс. Пиос пӧлын пумен уногес луо Никитаос, Димаос но Даниилъёс. Нош самой трос Александр ним. Берло дыре анай-атайёс таӵе но нимъёс сёто - Савелий, Глеб, Никон, Филипп но Богдан. Кылем арын тужгес но трос вал кышнояськисьёс. Со бен юнме шорысь ӧвӧл. Егитъёс дыртӥзы луоз, кузпалъяськонзэс туэлы (високосной арлы) кельтонтэм вылысь. Но Лариса Лукинская ивортэмъя, 2000-тӥ ар луэ Драконлэн арез, нош со котьку умойзэ гинэ вае. Соин ик туэ но кузпалъяське но шудо улэ. Г. РОМАНОВ. Удмурт Республикаысь Кун Кенеш, Правительство, Югдурез утёнъя министерство кайгыро Удмурт Республикаысь МВД-лэн ОМОН-аз ужасьёс Востриков Владимир Иванович, Собин Владимир Александрович, Токарев Константин Васильевич 2000-тӥ арын 4-тӥ феврале Чечня Республикаысь Катыр-Юрт гурт дорын ожъёс дыръя бырыны шедеменызы валче но ӵыжы-выжыоссылы, матысь адямиоссылы мур куректэмзэс верало. "Медведь" пыдъяськиз Кылем арня вискын "Единство" ("Медведь") нимаськись региональной общественно- политической огазеяськонлэн учредительной кенешез ортчиз. Солэн ужаз пыриськиз 113 делегат. Соос юнматӥзы огазеяськонлэсь Уставзэ, бырйизы асьсэлы Совет но кивалтӥсь. Отчы дэмламын Николай Иванович Хохлов, Удмурт Правительстволэн Тӧроезлэн промышленностья воштӥсез. Огазеяськонлэн исполкоменыз кивалтоз Энвиль Владимирович Касимов, Кун Кенешлэн депутатэз. Конференция "Единстволэн" учредительной съездаз бырйиз 12 делегат. Со ортчоз Москваын. Делегатъёс пӧлын: Николай Хохлов, Виктор Хорошавцев, Энвиль Касимов, Александр Першин но мукетъёсыз. Кенешон ортчиз нуназе, нош нуназе бере "Единстволэн" Удмуртиысь ёзэныз кивалтӥсьёс Николай Хохлов, Энвиль Касимов но Россиысь Кун Думалэн депутатэз Владимир Коптев-Дворников журналистъёсын пресс-конференция ортчытӥзы, юанъёслы валэктонъёс сётӥзы. Соку ик вералом, вераськон огыр-бугыргес кутскиз. Куд-ог журналистъё уго "Единстволэн" конференцияз лэземын ӧй вал, соос пӧлын "АиФ Удмуртии" газет, "Новый регион" телекомпания, нош кудъёсызлы ивор ик ӧз сётэ. Малы та кенешон сокем ӝог но ватскыса сямен ортчиз? Малы 800 делегат интые, кызьы азьвылгес верамын вал прессаын ужасьёслы, конференцие ӧтизы пичи люкетсэ гинэ? "Единстволэн" кивалтӥсьёсыз та юанъёслы пыр-поч валэктыны ӧз быгатэ. Соос чӧлскизы Москва вылэ, отысь сыӵе косон вуиз шуыса. Воштэмын вал конференцилэн дырыз но: 23 январьысь малы ке но вуиз 3 феврале. Огъя вераса, "Медведьлэн" Удмуртиын пыдъяськонэз чутысагес кутскиз, 19 декабре йырпоромымон вормон басьтӥз ке но вал. Та огазеяськон ласянь Кун Думае ӧз шедьы одӥг депутатмы но. Азьланяз "Единство" партия яке огазеяськон ик луыса кылёз-а? Та юанлы Николай Хохлов шуиз: - Со луоз общественной но политической организация, ми котырамы огазеялом вань мылкыд карисьёсты: кивалтӥсьёсты но огшоры адямиосты, тодматскемын ке соос Уставенымы но куронъёсынымы, тырмемын ке 18 арес. - Россилы Президентэз быръёнэ тӥ пыриськоды-а? - Одно ик. Таяз быръёнъёсын ми бадӟым ыштон адӟим, одӥг муртэ но Удмуртиысь Кун Думае юнматытэк, азьланяз та янгышмес тупатыны тыршом. - Николай Иванович, тӥ ужаськоды Правительстволэн Тӧроезлэн воштӥсез луыса. вуоды- а кык удысэз нуыны? - Мон оскисько, вуо шуыса. Огез уже мукетызлы уз люкеты. - Ньыль ар ортчыса, "Единство" но "Отечество" сямен уз куашка-а? - Та юанлы валэктон сётыны мон уг быгатӥськы. Тодӥсько одӥгзэ: янгышантэм понна дышетсконо муртлэн лэсьтэм янгышъёсыз вылын. - Коньдон дасянь кин тӥледлы юрттоз? - Луозы инвесторъёс, членской но ас мылкыдзыя сётэм взносъёс. Ужалом, эшшо огпол пусйиськом на, общественной амалэн. - Азьланяз, оло, нимаз партия но луоды? - Сыӵе мапан вань. Л. Медведева. Луозы выль кырӟанъёс Удмурт лулчеберлыкъя дэменлык кичӧлтэмъя, шаерамы ялӥське нылпи кырӟанъёсъя Г.А.Ходырев нимо конкурс. Ас кужымзэс эскерыны быгато татын котькыӵе арлыдъем крезьгурчиос. Конкурсэ пыриськыны малпась адямиос азе пуктӥське таӵе курон: кылдоно кырӟанъёсыд пӧлысь одӥгез мед луоз тодмо нылпи кылбурчилэн Герман Алексеевич Ходыревлэн кылъёсызъя, мукетыз - аслад яке музон кылбурчилэн чуръёсызъя. Аудиокассеталэн плёнкаез вылэ гожтэм кырӟанъёсты Удмурт радиолэн юртаз ваёно 15-тӥ маёзь. Выль ужъёсты сюлмысь дунъялозы шаерысьтымы тодмо крезьгурчиос, кылбурчиос, культура удысысь адямиос. Конкурслэн кыкетӥ вакытэз радъяськоз сӥзьыл, толалтэ. Та ужрадлы сӥзем ӝытын (гала-концертын) устоосыз пусъемын луозы дуно кузьымъёсын, дипломъёсын, данъян грамотаосын. "НУНЫ-2000" Мувырын вордӥськиз президент Пичи Иви чыс-чыс изе ни ӵыжак выль коляскаын. "Воткинск заводысь" "Вузкарон юрт" огазеяськонлэн лыз вылын пӧртэм буёло кӧжыосын та кузьымез сюриз "Удмурт дунне" газетэз лыдӟись егит кузпалъёслэн Выль ар уе вордӥськем нунызылы Иван Никитинлы. Югыт дуннеен тодматскон понна пичи эте анаезлэн но, атаезлэн но малпанъёссыя ӧз кариськы. Лена нуныезлэсь вордӥськемзэ возьмаз 28-тӥ декабре, нош Андрейлэн атай луэмез потэ вал аслаз вордӥськем нуналаз - 3-тӥ январе. Егит кузпалъёслэн тодазы но ӧз лыктылы 2000-тӥ арын нырысетӥ вордӥськем нунылы "Удмурт дунне" газетэн ӵектэм кузьым. Ма, верасез, лӧпкытъясез но нокин ӧз луы. Нош пизы тӥни кыӵе бадӟым кузьым лэсьтӥз Выль арлы соослы но, аслыз но - быдэс республикалы тодмо луиз. Югыт дуннеез адӟем потэменыз курадӟытӥз ик бен анайзэ. Давлениез ӝутскемен, Ленаез Шаркан больницаысь келяло Ижевскысь 7 номеро нылпи ваён юртэ. Котыраз бергась врачъёслы но, Леналы но Выль ар праздникозь ӧй вал. Таза ик вылэм нуны - секталаез 3,5 килограмм, нош кузьдалаез 51 сантиметр. Иви вордӥськыку выль дауре выжон ар шаертӥмы 35 минут ӵоже вамышъяз ни. Анаез но, нуны котырын бергась эмчиос но ӧз тодэ, пичи этеез кузьым возьма шуыса. Лена сярысь верано ке, та иворез со кылӥз больницаысь потон нуналаз гинэ, 20-тӥ январе. Пиез таза вордӥськиз - аслыз нош тани операция бере кемагес йӧнатсконо луиз. Андрей шумпотон иворез вазьгес тодӥз. Нылпизы вордӥськем сярысь спарвкаез но газетлы гожтӥськем квитанцизэ Шаркан ёрос загсэ нуэмез бере, газетысь ивортонэз лыдӟиз. Нырысь-валысь ӧзгес ик оскы вал, оло, кинлэн ке нуныез эшшо но вазьгес вордӥськиз. Ӧз, Мувыр гуртысь Иви ик нырысетӥез луиз. 4-тӥ феврале нуназе бере трос гинэ калык люкаськиз Мувыр шор ёзо школаысь залэ(гуртын клубзы ӧвӧл). Люкаськем калыкез но лыктэм куноосты шуныт мылкыдын пумитаз сельсоветлэн кивалтӥсез Зоя Геннадьевна Широбокова. Тӧр шоры ик пуксизы кузпалъёс Никитинъёс пичи нуныенызы, матысь ӵыжы-выжыоссы, кирос анай-атайёссы. Ёрос загслэн кивалтӥсез Вера Николаевна Райкова но культура отделысь методцентрлэн директорез Надежда Константиновна Волкова нунылы сӥё-дано гожтӥськон ортчытӥзы, анай-атаезлы сётӥзы пизылэн вордӥськемез сярысь свидетельство, ёрос администрацилэн кивалтӥсезлэн Александр Аркадьевич Прохоровлэн нимыныз кузьмазы анай-атайёслы энциклопедия. Вера Николаевна люкаськемъёслы ивортӥз, таяз аре февралёзь ёросын кызь куать нылпи вордӥськиз ни, пе, куатез соос пӧлысь Мувыр палъёсысь. Нош бускель Выль Пашур гуртысь Валентина Поткиналэн Аделина нылызлы ёрос администрация коляска кузьмаз - со Шаркан ёросын нырысетӥез Выль аре вордӥськем нылпи (вордӥськиз 1-тӥ январе 21 час 45 минутэ). Иван Никитинлы нимысьтыз кузьым лэсьтӥзы Мувыр школаысь 7-тӥ классын дышетскись пиналъёс. Удмурт кылъя но литературая дышетӥсенызы Ольга Кузьмовна Малыхен ӵош соос возьматыны дасяллям "Нуны сюан" вашкала йылолысь кӧня ке кырӟан-веранъёсты, сямъёсты. "Удмурт дуннелэн" нимыныз возем пимес ӟечкылаз но коляскаез кузьмаз газетлэн валтӥсь редакторез Алексей Петрович Шкляев, аслаз кырӟанъёсыныз шулдыртӥз газетын ужась Светлана Яковлева. Сӥё-дано ӟечкыланын шудо анай-атай вӧзын пукизы Ивилэн песянаез Римма Дмитриевна Абросимова но песятаез Виталий Степанович Никитин. Римма Дмитриевна куать нылпи будэтӥз, Лена - витетӥез. Нылкышно туж шумпотэ, нылызлэн пиез сыӵе дано луиз шуыса. Ачиз со улэ Кусогуртын пичиез пиез вӧзын, ӝоген солэн но нуныез вордӥськоз. Виталий Степановичлэн озьы ик мылкыдыз лӧптэмын - Иви солэн куинетӥ внукез. Туж, пе, сюлмаськи тазалыкез пумысен, уйёссэ но изьытэк ортчылэм. Пичи пиен данъясько ӵыжы-выжыосыз но. Нуны сюан ортчытыны та нуналэ трос гинэ люкаськиллям соос, корка тыр тэшкыли нылпиос бызьыло, коляска котырын бергало, Ивиен шудыны мерско. Нош экелы соосын йырин ӧвӧл. Солы ай будыны но будыны, кужым люканы кулэ. Аслэсьтыз мылкыдъёссэ, куронъёссэ пиёк али бӧрдон пыр гинэ вераны быгатэ. Нош бӧрдыны, пе, со яратэ. Ойдо ӵок, вань бӧрдонзэ пичи дыръяз мед ортчытоз. Ивилы президентозь будыны кулэ на. Кызьы вераз кирос анаез, Мувыр совхозысь зоотехник Инна Ивановна Федорова, Удмурт Республикалы удмурт президент кулэ. Ивилэн атаез Андрей ужа "Мувырский" совхозын тракторист луыса. Со туж возьмаз пиезлэсь вордӥськемзэ, воргоронлы кивоштӥсь но юрттӥсь кулэ угось. Нош Лена витиз ныл. Нылпиез пи луоз шуыса тодэмез бере бӧрдӥз но, ненег анай сюлэм нылпизэ кышкытлыкъёслэсь утён сярысь сюлмаське угось. Соин ик туж оскем потэ, кызь одӥгетӥ дауре нылпиосмы йыгмыт вамышъёсын вамыштозы шуыса, нош гуртъёсын уз чалмылэ нылпи куараос. Кин тодэ, оло, зэмзэ но, кудӥз ке но кӧкыын удмуртъёслэн азьветлӥсьсы та вие ческыт уммен изе. Л.Малых. Синмаськыса пуктӥ 20-тӥ аръёсы Куӟебай Герд ӵемысь гинэ вуылӥз Марий Эл шерысь Бадӟым Карлыганэ. Со туж синмаськиз та палась калыклы, улэм-вылэмзы сярысь, кырӟан-веранъёссэс люкаса, бадӟым уж гожтӥз. Бадӟым Карлыганын ик Куӟебай Герд синмаськиз Ольга Кузьминична Андреевалы. Ӵош улыны ӧз кылды ке но, К.Гердлэн нылашез гудӟем (колодча) дурын патретэ пуктэмез кылиз. Писательлэсь быгатыса лэсьтэм туспуктэмзэ табере пӧртэм газет-журналъёсысь адӟыны луэ. 1995-тӥ-1997-тӥ аръёсы мон но Карлыган пала вуылӥ. Татысь капчи мылкыдо, шырыт калык мыным но кельшиз. Тужгес но яразы "Ӟардон" ансамбльысь нылъёс-пиос. Киосы амалтэк асьсэос фотоаппарат бордам кыстӥськизы. * Катя Андреева - Ольга Кузьминичналэн ӵыжы-выжыез. * Радик Васильев но Лариса Абдулова. * Катя Кириллова (пуке). * Ӟаны (Карлыган) чеберайёс. Туспуктэмез но гожтэмез Владимир Беломорскихлэн. Визь быртыкъёс Улон сярысь-а?.. Одӥг тысь кык муртлы... Тон мар малпад? Котькыӵе сяська ас вакытаз чебер. Мон но чылкак таӵе ӧй вал... Тон кошкид ке но, кылид. Нош мон вань на-а? Кизилиё инбам. Кыӵе паськыт дунне! Кыӵе ӟоскыт тонэн... Мон мӧзмисько шунытэдлэсь. Мукет номыр но уг вера. Сётод, тодӥсько, валестэ но, сюдод-секталод, чебер дӥсялод, астэ но ӵектод. Шырыт адями, нош малы тон сокем кезьыт? Озьы но вамыштӥ. Тазьы но вамыштӥ. Чебер-а ветлӥсько? Пичи дыръям умойтэм кылъёсын вераллязы, кызьы мон умой луом на? Кузётэк кылем чебер юрт. Ас дуннеяз усем визьмо адями. Паймоно кадь, малы озьы луэ? Шуиськод, ымныры кырсь? Со вужеред тынад. Трос вера, вакчи гожтэ. Луысал ке нош мукет сямен? Учкы ай, макем ӝутӥськиз ни... усемез бере. Кыӵе улӥсько? Картэ юись... Кышное куинетӥез, кышномуртэ нош - нырысетӥез. Пичи ныл улэ ортчеменыз. Жаль... Тӧлӟись сяськалэсь утчаськод на зынзэ... Муш лексе ке, ачиз но быре. Вань дуринчиос но. Паймиз аслаз визьмоезлы. Малпаз, аслаз со визьмыз. Аслаз ик ке вал, кытчы ыштӥз меда? Калык понна сюлмаськонъяз огназ кылиз... Паймоно кадь, куд-ог адямиослэн фамилиоссы сокем тупало быръем ужзылы: Николай Коровин - зоотехник, Николай Корнев - агроном... Вань на мукет но тодмое, нимыз сыӵе ик, Коля-Николай, нош фамилиез Безделов. Ма, озьы ик вань но... Бичаз Арсентий Павлов. Ужась калыклэсь ватыса кадь Нырысетӥ феврале Россилэн нырысетӥ Президентэзлэн Борис Ельцинлэн вордскемез дырысен 69 арес тырмиз. Соин валче Москваысь "НТВ" телекомпания со нуналэ возьматӥз Великобританиысь тележурналистъёслэсь кык сериен "Царь Борис" документальной фильмзэс. Со пуктэмын ни вылэм кык ар талэсь азьло. Нош асьме экранъёс вылэ вуиз ай али гинэ. Россилэсь дас ар ӵоже улэм-вылэмзэ шунды пуксён палась политикъёс возьматӥллям озьы, кызьы соос асьмелэсь улонмес ас сяменызы адӟо, солы ас сяменызы дунъет сёто, югдурез номыре ватытэк шараяны тыршо. Выльдӥськон шуон вакытысен кутскыса, соос возьмато М.С.Горбачевлэсь СССР-ен кивалтон вакытсэ. Шонерак адӟыто, кызьы Росссиын властез Б.Н.Ельцин киултӥз но Советской Союзэз куашкатӥз. Куинь президентъёслэн чебер тэле пӧйшураны люкаськемзы, кенешыса сием-юэмзы бере Союзлы пум вуиз. Яркыт возьматэмын Ельцинлэн командаезлэн Россия Федерацилэсь Вылӥ Советсэ пазьгемез-уллямез, Тӧдьы юрт шоры ыбылэмез. Фильмлэн пумаз трос инты висъямын Ельцинлэн 1996-тӥ арын кыкетӥзэ Россилэн Президентэз луон понна нюръяськемез. Политикаен герӟаськем лэчыт пуштросъем фильмъёсты берло дыре малы ке бер уингес возьматыло. Озьы вал та учыре но: 1-тӥ сериез кутскиз асьме дырын 21 час 55 минутэ, 2-тӥез йылпумъяськиз 0 часэ 40 минутэ. Со бӧрсьы мынӥз на та фильмез меӵак эфирын эскерон. "Глас народа" передача кыстӥськиз 1 час 45 минутозь. Вераськизы отын Россиысь данакез тодмо политикъёс. Соос фильмлы вылӥ дунъет сётӥзы, уго отын ваньмыз шонер но пӧяськытэк возьматэмын. Юн сюлэмшугъяськонъёс шӧдӥськизы выль Президентэз быръён ласянь. Мон сямен, тросэз адямиос та передачаез учкыны ӧз быгатэ, та вакытэ Ижын улӥсьёс уноез кӧло вал ини. Оло, кинлы но солы фильм но передача юрттысалзы вотсам синъёссэс усьтыны, улонмы сярысь мургес малпаськыны. Собере, мон тодэмъя, "НТВ" телекомпанилэсь программаоссэ сокем трос учкисьёс ӧвӧл, дыр. Л.Федоров, Ижын улӥсь. "Удмуртъёс" портозы Ливиез Удмуртиысь музъем портӥсьёс пумен тодмогес луо ни солэн палэназ но. "Удмуртнефть- Бурение" акционер огазеяськонын ужасьёс чаклало ни кунгож сьӧрын ужаны но. Вераськон мынэ Ливиын музъем портон сярысь. "Интернешнл Петролеум Компани" российско-арабской предприятиез кылдытонэ пыриськиз "Удмуртнефть-Бурение" огазеяськон. Озьыен, "удмурт" ӝоген Ближней Востокысь музъемез портыны кутскоз. Н.Сергеев. "Чипчирган" Таӵе нимо опера-балетсэ тодӥськом Геннадий Корепанов-Камскийлэсь. Тазьы ик нимам со аслэсьтыз выль книгазэ. Отчы пыре авторлэн нылпиослы гожтэм 31 кырӟанэз. Куд- огезлы крезьгурчи ачиз ик кылъёссэ но гожтэм, озьы ик юрттӥллям Александр Белоногов, Герман Ходырев, Гай Сабитов, Николай Васильев но мукетъёсыз. Кырӟанъёсын бичетэз поттыны коньдонэн юрттӥз "Байгурезь" огазеяськон. Калыкез дышетонъя министерство пыр книга вуоз нылпи садъёсы, начальной школаосы. В. МИХАЙЛОВА. Берло вакытъёсы удмурт писательёс шер шумпоттыло выль книгаосынызы. Нош Вячеслав Ар-Сергилы удалтӥз, шуыны луоз. Ӟеч муртъёс юрттэмен, солэн проза амалэн гожтэм выль книгаез алигес потӥз "Удмуртия" издательствоын. Тазэ ужзэ тодмо удмурт писатель кык кылын радъям. Шуыны луоз - одӥг книга липет улэ кык книгаез пыре. Огезлэн нимыз - "И плакало небо...", мукетызлэн - "Лемлет гондыръёс". 11-тӥ феврале ӝытазе куать часлы Удмурт кун филармонилэн юртаз Вячеслав Ар-Серги аслэсьтыз лыдӟисьёссэ сюлмысьтыз ик ӧте та книгаеныз тодатскыны. Ӝытэ озьы ик пырисько эстрадаысь усточиосмы но: Михаил Ворончихин, Светлана Смагина, Николай Кардапольцев, Галина Платонова, Николай Шабалин но мукетъёсыз. Вячеслав Ар-Серги али ужа выль книгаез бордын, азинтэ видеофильмъёс поттон удыссэ но. Автор тӥляд трос юанъёстылы валэктонъёс сётоз. Кылбурчилэн ужъёсызлы, улэм- вылэмезлы сӥзем ӝыт вакчияк но шуныт чузъяське - "Ӟечбур, выль книгае!" ВЯЧЕСЛАВ АР-СЕРГИ Элегия Нош мае быгатэ нылкышно карыны? О-о-о! Туж троссэ, Туж троссэ - Жин сяськаен уйшоре пушйыны, Юрт пушкысь кезьытэз улляны. Нош со сяськаосты уг яра дыртыны Тугокое думылыны. Озьы соос нимзэс ышто. Нош юрт пушкысь юг тыл Пичи гинэ мед ӝуалоз. Озьы ӟечгес Со возьматоз Йыромемлы сюрес. Нош быгатоз-а кышномурт тури кариськыны? Инвис сьӧры лопырскыны? Со быгатэ ке - Мед луом пезьгыт бурдаз одӥг ке но тылы. Лобыштыса Вакытмылы шумпотыны. Со тылыез нош луысал ке кылбурелэн чурыз, Ӧй адскысал та улонлэн пумыз. Тылскоз югыт инмын Пезьгыт тылы Инву ныллэн лысву синвуэныз... Озьы со думылоз Та Музъемез но инсьӧрез - Пумиськонмес но даурмес... Сыӵе малпанъёсын шоказ акшан, Оло нош огшоры ишан Усьтӥз инӧсъёсты асьме понна Со пичияк гинэ юртын. Кизилиос - Ю кидысъёс кадь Усьылӥзы Музъем бусы вылэ. Кыкнамылэн, сюлэмъёсын Буйгатскыса. Дунне вал тырмемын Тынад ненег шокаменыд. Нош шур сьӧрысь турнам турын Вӧлмыт кыллиз - Тынад йырсиедлы тупась. Ӧтись, Шокась но шутэтскись. Нош тон соку ӧд дырты Тупала. Азвесь тулкым ӧз ӧтьы Пыдъёстэ. ... Со гурт ӧвӧл табере, Кык пол уд пыр одӥг шуре. Со тулкымъёс валэктӥзы мыным - О-о-о! Нылкышно туж троссэ Быгатэ воштыны. Котыр ёросэз жингыртӥсь карыны, Сое кырӟанлы пӧрмытны. Нош мон мае быгатӥсько? Дышетскисько Сое яратыны, Аслым синмаськытны. Ялан одӥг классын Кайтаезлы но кыльыны. *** Михаил Федотовлы Э, шундые, вазь ӵукнае, Эн жингырты тон выж вылтӥ Сиосыныд. Эн сайкаты сое. Нош тон, бурдо эше, Ӵуквыл кырӟанъёстэ кырӟась - Сипыртыса гинэ тон мыт гурдэ... Эн сайкаты сое. Бусыостӥ ворттӥсь ыртӧл, Та коркаез палэнтыса тон ортчы вал, Эн йыгаськы усьтэм укноосы, Эн сайкаты сое. Кӧлэ со мур уммен, Вӧтлэсь но вотэслэсь керттэм пуръёс вылын. Лэйка лулыз, Веськрес мугор юртсэ вунэтыса. Котыр нош лӧсъясько ӵыжыт улмо зынъёс. Гаде секыт изъёс музэн пуксё соос - Мон месӥсько йырме пуштрес кыз вайёсы. Солы луса мон дуак тэтчисько, Шарак кадь луисько. Шунды ӝужан пала кирос мон пуктӥсько. Нош собере лачмыт Пилем укноосты ворсаллясько. *** Ӧвӧл. Мон вунэто ваньзэ. Ӧз лыкты зор соку. Кугӟаз со Кам дуре. Ӧз лыкты ни сьӧрам. Ӧз люкта со Кӧсам ымдуръёсме. Ӵуж йырсияд шудӥз Льӧль акшан тӧл... Эктон сямен - Калык тымет вылтӥ Юг юсь кадь уялляд. ... Ӧд адӟы тон монэ. Ӧвӧл, мон вунэто Синъёсысьтыд ӧтись тылсиостэ. Нош сипырто соос: "Сое вунэтыса, Астэ но вунэтод. Ыштод инвисъёсы ӧтись сюресъёстэ". Я, учкы, учкы - Кӧс зоред Гылтэ ни кӧдэктэм Бамдэ. Быдӟым Вормонлы 55 ар тырмон азьын Кичӧлтӥсьлэсь адӟем карыса Дэри (Завьялово) ёросысь дышетӥсьёс кемалась ини малпало вал Первомайской посёлокысь школаысь военно-патриотической уж нуонэн тодмасткыны. татын уго трос пайдай ужрадъёс ортчыло. Музей кылдытонын дышетӥсьёс асьсэос кичӧлтӥсьёс вал. Быдэс ёросысь школаослэн кивалтӥсьёссы алигес та посёлоке вуылӥзы. Семинар- дышетсконэз аспӧртэмлыко радъяз республикаысьтымы ожысь ветеранъёслэн огазеяськонзы. Соку школалэн военно-патриотической ужлэн амалъёсыз гинэ сэрттэмын-пертчемын ӧй вал, возьматэмын, кызьы умойгес ортчытъяно батыръёслы сӥзем урокъёсты, фронтовикъёсын пумиськылонъёсты. Та ортчылӥсь ужрадъёслэн дышетскисьёслы пайда сётэмзы сярысь но тодӥзы Первомайское лыктэмъёс. Татысь школалы сётэмын землякмылэн, Советской Союзлэн Героезлэн тодмо партизан отрядлэн кивалтӥсезлэн генерал-майорлэн А. Н. Сабуровлэн нимыз. Валамон ни, музейзы но та батыр командирлэн, солэн партизанъёсызлэн тушмонэн нюръяськемзылы сӥземын. Ма паймымонэз вал музейлэн кылем арын ужаз? Азьвыл партизанъёслэн татчы вуылэмзы, пӧртэм-пӧртэм ужрадъёсы пырылӥськемзы бере дышетскисьёс пӧлын нимысьтыз конкурсъёс ортчыло, 10-тӥ но 11-тӥ классъёсысь пиналъёс рефератъёс гожъяло. Батыр ужъёсты мургес валаны юрттэ музейын кылдытэм документальной кинофильм. Сое учкыны артэ гуртъёсысь мӧйыос но татчы ӵемысь вуыло. - Ми шумпотӥськомы, - шуэ музейлэн кивалтӥсез Лия Ивановна Кузьминых, куке школаысь военно-патриотической уже мылысь-кыдысь пыриськисьёсмы армие мыныса, азьветлӥсьёс луо, кӧняез ке военной училищее но пыризы ни. Семинаре Ижысь лыктэм фронтовикъёс азьвыл артиллерист Н. В. Попов, азьвыл телефонистка М. С. Каргашина но мукетъёсыз юрттӥзы, Быдӟым Вормонлы 55 ар тырмонэз пумитаку, выль ужрадъёс шедьтыны. Сыӵе ик ӵектонъёссэ вераз история наукаосъя кандидат тодмо учёной А. А. Александров. Озьы ик соос пыриськизы школаын ортчылӥсь "аспӧртэм пумиськонъёслэн клубзылэн" ужаз. Отын уго эскерылӥсько войнаез ортчемъёслэн подвигъёссы, сямъёссы, туала улонэн герӟаськемзы. Кин утча, со шедьтэ Якшур-Бодья ёросысь Чур посёлок школаысь музей бадӟым ӧвӧл, кылдытэмын ар талэсь гинэ азьло. Нош отысь тыршисьёслэсь ужамзэс элькунысь ожысь ветеранъёслэн комитетсы умоен лыдъяз ни, нырысетӥ инты сётӥз. Ма вылез вань татысь следопытъёслэн ужазы. Музейлэн кивалтӥсез Валентина Анатольевна Мокрушина тазьы шуэ: - Ми трос ужпумъёс борды ӧм кутскелэ. Басьтӥськимы школаямы дышетскем но войнаын бырем дышетӥсьёс, выпускникъёс сярысь документъёс люканы. Табере, соослэн батыр ужъёссылы сӥзьыса, пӧртэм-пӧртэм ужрадъёс ортчытъяськомы. Ветлӥсь адямиослэн пумзы ик ӧвӧл кадь. Зэм, татчыозь посёлокын но, матысь гуртъёсын но школаын тодӥсь ик ӧй вал, кытын ожмаськизы войнаысь берытскымтэ директорзы лейтенант Аркадий Михайлович Алтынцев, завучсы Леонид Степанович Пермяков, тросэз войналэсь азьло школаез йылпумъямъёс. Та уж борды туж бер, вормем бере 54 ар ортчыса гинэ кутскизы ке но, следопытъёс туж кулэ документъёс но материалъёс шедьтӥзы ни. Соос интыямын "Батыръёсмы уг вуно, уз но вунэ" нимо стенд вылын. Нош кӧня но ужрадъёс ортчытэмын ӧвӧл ини музейын кышкатэк ожмаськем дышетӥсьёслы но дышетскисьёслы. Кылсярысь, нимаз вераськонъёс, пумиськонъёс тазьы ик нимаськизы: "Ма юрттӥз асьме пиослы фронтын батыр луыны?" Нош кӧня калык ветлӥз Николай Михайлович Гурин лётчиклы сӥзем пумиськонэ. Со тодмо Талалихин лётчик кадь ик подвиг лэсьтӥз. Трос адямиос люкаськыло Александр Петрович Белорусов выпускниклэн тамак пуйыезлэн интыям стендэз доры. Анаез солы фронтэ кошкыкуз тае вурем но отчы Чурысь музъемез понэм. Озьы солдат быдэс войнаез та пуйыен ортчем. Ар ӵоже та пичи гинэ музее ог 4 сюрс экскурсантъёс вуылӥллям ини, быдэс ёросысь дышетӥсьёс татчы вуылӥзы. Ижысь школаосысь музеен кивалтӥсьёс юромо тодматскыны ветлӥзы. Чур посёлокысь ветеранъёслэн советсы, батыръёслы сӥзьыса, татын нимаз пумиськонъёс ортчытъязы ини. Нош кыӵе бадӟым юрттэт сёто музее люкам документъёс но материалъёс дышетскисьёс пӧлын военно-патриотической уж нуыны. Али школаын ортчыло Вормонлы 55 ар тырмонлы сӥзем слётъёс, пумиськонъёс, ожысь ветеранъёсын кенешонъёс. В. НИКИТИН, ожысь ветеран. Писательёслы но кельшиз Вячеслав Костылевлэн нимыз искусствоез яратӥсьёс пӧлын умой тодмо. Солэн ужъёсыз кыдёкын республикамылэн палэназ - Англиын - возьматъяськизы, кылем арын Россиысь МВД-лэн академияз выставкаын вал. Художник трос ужа портретъёс кылдытон бордын. Таин валче солэн писательёсын кусыпъёсыз юнмазы. 1998-тӥ арын шуркынмонэ Россиысь Писательёслэн союззылэн секретариатэз Ижевскын ужаку, куноос Вячеслав Костылевлэн Национальной музейысь выставкаяз вуылӥзы, солэсь акварельёссэ синйылтӥзы. Соку вераськемын вал, Вячеслав Григорьевич ас ужъёссэ Москваын Россиысь писательёслэн юртазы но (Комсомольской урам, 13) возьматоз шуыса. Та малпан быдэстэмын. Алигес, Писательёслэн огазеяськонзылэн секретариатэз люкаськем дыръя, - Удмуртиысь художниклэсь ужъёссэ адӟытон усьтӥськиз. Татын Вячеслав Григорьевич видеокамеразэ ужатӥз но ачиз ик фильм лэсьтӥз. Сое учкыны 17-тӥ январе изобразительной искусствоосъя музее люкаськылӥзы творчество удысын ужась нылкышноос (федерациенызы кивалтэ З.А.Богомолова). Соос адӟизы, макем тунсыкен учко суредъёсыз тодмо писательёс Михаил Алексеев, Валерий Ганичев, Валентин Сорокин, Валентин Устинов, Вадим Дементьев но мукетъёсыз. Нылкышноос учкизы на Куӟебай Гердлы памятник усьтон сярысь фильмез но - тазэ дасям Юрий Андреевич Чайниковлэн пиез Олег. Т.Николаева. ШӦРТЧИОС АСЬМЕ УЛОНЫН Пӧясез пӧя, оскисез оске Тодмоосылэн нылзы миым Удмурт университетэ пырыны ӧз быгаты. Мумиз Валя шаплы кышномурт, ӧз буйгатскы: коньдонме но, марме но уг жаля, но нылме одно ик дышето, пе. Озьы нылыз пыриз сьӧрлось кыӵе ке институтлэн татысь ёзаз: мар, пе, пӧртэмез кытын дышетскыны, диплом одӥг кадь луоз ук. Нош озьы-а со, зэмзэ но? Берло аръёсы ог сю пала олокыӵе но институтъёс, университетъёс, академиос, центръёс но вылӥ школаос доразы дышетскыны ӧтё егитъёсты. Дышетскыны луэ котькызьы - ӝытъёсы, заочно, очно-заочно яке дистанционной амалэн. Экзаменъёс котьку сямен ньӧмыз понна гинэ. Дышетскем понна дунъёс, государственной вузъёсын сярысь, пичиесьгес - шорлыдын араз 5 сюрс манет. Дышетсконо 4-5 ар. Куд-огаз дышетскыны луэ нимаз программая: предметме дышеты но экзамен сёт. Озьы кык ар куспын дышетскондэ йылпумъялод. Но дышетсконэд дунтэмгес усёз шуыса эн лӧпты. Кузёослэн ваньмыз чакламын. Кызьы сотэк, вылӥ школа ук. Тани Москваысь экономикая, статистикая но информатикая университетлэн (МЭСИ) Ижевскысь ёзаз одӥг предметъя дышетскон но экзамен сётон 600 манет сылэ. Нош сыӵе предметъёс - 49. Лыдъялэ. Ваньмыз дышетскон учреждениос доразы дышетскемъёслы государственной диплом сётыны сӥзё. Таиз - меӵак но возьыттэк пӧяськон. Данакез дун тырыса дышетскон интыос сыӵе диплом уз сётэ, уз но быгатэ. Басьтом негосударственной шуон дышетон учреждениосты. Соос государственной диплом сётъямзылэсь азьвыл, государственной аккредитация ортчыны кулэ. Удмуртиын одӥгез но сыӵеез ӧвӧл ай. Кыӵе аккредитация луоз, соослэн дышетыны лицензиоссы но ӧвӧл бере. Нош государственной вузъёслэн татысь ёзъёссы вылтӥясько: милемлы, пе, нокыӵе аккредитация но, лицензия но кулэ ӧвӧл, ми сотэк но государственной луиськом. Кылсярысь, озьы верасько вылӥ верам МЭСИ-лэн Ижевскысь ёзаз. Мар бен, югдурез рос- прос сэрттыны-пертчыны оскалтом. Кызьы ивортӥзы Удмурт Правительстволэн Вылӥ но шоро-куспо профессиональной дышетонъя но наукая комитетаз, дышетон ужез нуыны законъя быгатэ вуз но солэн филиалэз гинэ. Пусйыны кулэ: филиаллэн "анай" вузэзлэсь нимаз ужаны кулэ аккредитациез но, лицензиез но. Сотэк со государственной диплом но сётъяны, дышетон уж но нуыны уг быгаты. МЭСИ-лэн асьме дорысь ёзэз - представительство гинэ. Озьыен, солэн уз луы аккредитациез но, лицензиез но. Представительствоын валэктыны туртто: ми, пе, дышетонэн ум выриське, вузмы Москваысь, со ик диплом но сётъялоз. Таиз но аладаськон. Представительство ачиз медъя дышетӥсьёсты, соослы коньдон тыре, дышетон ужез радъя, "анай" вуззы кизэ но уг йӧтты со борды, коньдон пайзэ гинэ басьтэ представительствоезлэсь. Ӧйтӧд, вывесказэ уже кутэм понна-а, мар-а. Нош студентъёс со МЭСИ-лэсь дипломзэ уз басьтэ. Малы ке шуоно, котькыӵе вуз, со государственной аккредитациез ортчемын ке, Россиысь Дышетонъя министерствое арлы быдэ отчётъёсаз студентъёсызлэсь списоксэ сётэ. Шуом, Ижевскысь студентъёс дышетсконзэс йылпумъязы ке, МЭСИ соос понна но министерствоысь дипломъёс куроз. Уз сётэ, шуозы: тӥляд отчётъёсады ӧвӧл сыӵе студентъёсты. Вань ужез. Сыӵе югдур ваньмаз одӥгтэмак представительствоосын. Пӧртэм негосударственной учреждениос сярысь веранэз ик ӧвӧл ни. Шуг оскыны таӵеезлы но: сыӵе дунъет югдурлы сёто Вылӥ но шоро-куспо профессиональной дышетонъя но наукая комитетысь специалистъёс. Кызьы шуиз соос пӧлысь одӥгез, Л.М.Зубарева, вал "МММ" выллем коньдон пирамидаос, табере - дышетонъя пирамидаос. Ярам, негосударственной вузъёс кыӵе ке дипломъёссэс сётозы ик. Кыӵе нош солэн секталаез? Кызьы сое дунъяло уже кутӥсьёс? Кыл сётом соослы. "Удмуртнефть" огазеяськонысь кадръёсъя отделлэн кивалтӥсез Олег Порошин: - Ми доры сыӵе дипломъёсын "специалистъёс" ӧз на вуылэ. Нош ми ужасьёсмес тодон- валанзэс будэтыны келяськом ке, дышетскон интыез котыр ласянь дунъяськом, чакласьком, вань-а солэн аккредитациез но лицензиез. Юстицияя министерствоысь кадръёсъя отделлэн кивалтӥсез Александра Никитина: - Мар сярысь тӥ вераськоды? Ми государственной вузъёсын дышетскемъёсты гинэ кутӥськомы. Сбербанкын но сыӵегес ик валэктон сётӥзы, синпӧет диплом, пе, со буш бумага. Ярам, дипломъёслэн нокыӵе кужымзы но ӧвӧл. Малпан кылдэ, со асьсэ коже кылдэм "академиосын" тодон-валанъёс но сыӵегес ик сёто шуыса. Дышетон уже угось соос кыско вузъёсысь котькудзэ мылкыд карись дышетӥсез. Тани Деловой карьерая институтэ (сыӵеез но вань, ява) студентъёсты но дышетӥсе куто. Ма, ассэ гажась тодосчи соглаш луоз шат одӥг час ужзэ 20 манетэн дунъяны? Озьы ик куашка вылӥ дышетсконлэн но, дипломъёслэн данзы. Лыдӟисьёс юалозы, оло: малы бен со вузъёсты лэзё калыкез пӧяны? Шонер юан. Сыӵе шӧртчиослы, мон малпамъя, могӟет пуктыны кулэ, дыр, интыосысь властьёс, кудъёсыз регистрировать каро, мукетъёсыныз ӵош, дышетон учрежедениосты но. Соос нырысь ик эскерыны кулэ лицензиосты, собере гинэ регистрация ортчытыны. Пыкылон кыл вераны луоз прокуратуралы. Со угось кыл кутытыны кулэ законэз тӥяса коньдон поттӥсьёсты. Но, кызьы шуиз одӥгез прокурор, соослэн дырзы но, кужымзы но уг тырмы ваньмаз вутскыны. Кытӥяз тодытэк но уло лушкем университетъёс сярысь. Соин ик нырысь сак луоно асьсэлы дышетскыны малпасьёслы. Кытчы ке дышетскыны пыриськоды ке, со учрежденилэсь одно ик учке государственной аккредитация сярысь свидетельствозэ но дышетыны право сётӥсь лицензизэ. Сак луэ, договор гожтыкуды. Со сяна, тӥледлы 18 арес ӧвӧл на ке, договоре мед гожтӥськозы анай-атайёсты. Малы ке шуоно, дышетон учреждениеныды ченгешонды судозь вуиз ке, тӥляд гожтӥськемдылэн кужымез уз луы. Тӥни озьы, дырдэс но коньдондэс юнме ыштэмды уг ке поты, чаклаське. Г.Тихонов. Пыдберзэс "лёгало" ни... Ортчемзэ арез азинлыко йылпумъяз Ижевскысь механической завод. Ар ӵоже вуз поттэмын 104,9 процентлы, яке ог 891 миллион манетлы. Кун предприятиын поттыны кутскемын МР-133 помпаен пыӵал, та нуналъёсы ужало выль МР-153 пыӵал бордын. Магазинъёсы келямын 37 сюрс электроперфоратор, 53 сюрслэсь уно электрорубанок, дискен ужась 61 сюрс бычкы, 39 сюрс шлифомашинка. Таяз нырысетӥ кварталлы но заказъёс тырмыт вуэмын. Берло дыре завод электроинструментсэ меӵак келя Москваысь "Интерскол-Иж" фирма пыр. Со коньдонзэ азьвыл ик висъя. Озьы ик асьмелэсь инструментмес умой басьто Сургутысь, Выль Уренгойысь но мукет городъёсысь "сьӧд зарни" поттӥсьёс. Нош электроен ужась инструментъёсты вузанъя но соослэн ӟечлыксыя Ижевск пумен пыдберзэс "лёга" ни Пермьысь, Кировысь, Ростовысь эшъёсызлэсь. Б. Никитин. Дас ар ӵоже - вашкала дауре Дэри (Завьял) ёросысь Ильинка гурт дорысь инбам улысь музейлы туэ дас ар тырмоз. Та дыр ӵоже Тамара Алексеевна Шиловалэн кивалтэмез улсын трос гинэ ӟеч ужъёс быдэстэмын ини: йылаз-пумаз вуттэмын вашкала шор удмуртъёслэсь улэм-вылэмзэс возьматӥсь одворича, мылысь-кыдысь ужало уй пал но лымшор удмуртъёслэсь улэм- вылэмзэс, ӟуч калыклэсь азьвылзэ суредась одворичаос. Вань ини тӧл вукозы, тарантасъёссы, сьӧд мунчозы, йӧгузы... Озьы ке но, уж малпамъя уг азинскы. Котькытын сямен ик одӥг "висён" люкетэ: уг тырмы коньдон. Шор удмуртъёслэсь улэм-вылэмзэс возьматӥсь одворича. Та пичи шурез ӵыпыны малпало, тыметаз чорыг будэтозы. Ю тысь возён кенос лэсьто. Анна Степановна Куликова - пӧрась, куно пумитась-келясь. Владимир Беломорскихлэн туспуктэмъёсыз но гожтэмез. Тодам ваисько та пиналъёсты Удмурт гуртъёсын пиналъёс ужасесь, инкуазез яратӥсесь будо. Кӧкыын кылльыкузы ик кыло уӵылэсь, шырчиклэсь но мукет тылобурдоослэсь кырӟамзэс, песянайзылэсь, анайзылэсь яке сузэрзылэсь веттан гурзэс. Соин ик, вылды, кырӟан мылкыд сюлэмазы каръяське, пумен будыса куд-огезлэн артист но луэмез потэ. Озьы мон верасал Четкер гуртысьтымы куинь артистъёс сярысь. Николай Кардапольцев (али со Удмурт Республикаысь искусствоосъя сӥё-дано ужась) будӥз бадӟым семьяын, вазь кылиз бубытэк. Анаез ваньмон дыръяз арганэн шудылӥз, кырӟалляз - со пиезлэн сюлэмаз шӧдӥськытэк ӧз кыльы. Глазовысь пединститутын дышетскыса, 1964-тӥ арысен мон аслам гуртысьтым школае ужаны бертӥ. Соку ик валай, кыӵе чебересь вылэм пиналъёслэн куараоссы, соосын быгатыса ужаны гинэ кулэ. Нырысь вамышъёсме ик кутски хор бордысен, кык-куинь куараен кырӟаны дышетӥ, нимаз кырӟасьёсын ужай. Пӧрмиз, лэся, Дэбес ёросамы смотръёсын ялан нырысетӥ интыос басьтылӥм. Сыӵе ик вормонъёссы вад дышетӥсьёсмылэн, колхозын ужасьёслэн. Соку бен калык но клубе трос ветлэ вал - егитъёс гинэ ӧвӧл, пересьёс но гурт ужзэс быдтыса потазы. Коля но Шудзялудысь тросэз нылъёс-пиос одӥг репетициез но кельтытэк тыршылӥзы. Куддыръя анайёссы пыкылӥзы монэ: кема, пе, школаын возиськод, гуртын ичи-а, мар-а уж. Ма карод, буйгатӥськод вал. Куараез бен солэн инмарен сётэмын, волятоно гинэ вал, дырыз дыръя шокан басьтоно. Туж кылзӥськись но тыршись пияш одӥг кадь умой кырӟалляз ӟуч но удмурт гуръёсты, художественной самодеятельностья смотръёсын одно ик нырысетӥ интые потылӥз. Озьы ке но, со аръёсы усточиослы али кадь саклык ӧй вал, синйылтытэк кельтылӥзы. Коля ӧжытак арганэн шудыны дышиз - трос пукыны дыр ӧй вал. Мыным туж яра вал солэн сцена вылэ потэмез, зэмос артистлэн кадь, йӧно. Соку ик шуылӥ: тыныд, пӧй, пияш, азьланяз дышетсконо вылэм. Николай Кардапольцев школа бере Воткаын кӧня ке ужаз, отын но кырӟанзэ ӧз вунэты. Собере ини Г. Корепанов-Камский синйылтӥз но - зэмос артист пӧрмиз. Туж шумпотӥ, дано ним басьтэм сярысь иворез тодэме бере. Мед жингыртоз, Николай, куараед трос аръёс ӵоже, калыклэсь та секыт улон вакытэ мылкыдзэ ӝутыса. Лу яркыт кизили. Александр Перевозчиков сярысь ке верано... таиз кырӟаз ке но, пиналъёсты туж серекъятыны яратэ вал. Шудылӥз серемес пьесаосын, пионеръёслэн бордгазетазы туж тумошо суредъёс поттылӥз. Урокъёсын но ӵош пукись эшсэ бышке, маке серекъятэ, класс гор-гор горе, ачиз нош, солэн ужез ик ӧвӧл кадь, дышетӥсь шоры али вордскем пиналлэн синмыныз учке. Эшъёсыз кӧтсэс посыны кутско, серемзэс кутэмзы уг луы. Школаез быдтыса, Александр Перевозчиков кӧня ке клубын ужаз, отын ик пьесаосыз пуктон бордын ужакуз волятӥз быгатонлыксэ. Егитъёсты но бордаз кыскыны шаплы вал. Иж карын ужакум, дорам лыктӥз но шуэ: мон, пе, Мунё театрен ужаны кутски, уждунэз туж ичи - 60-70 манет, нош со понна уже туж кельше. Александр Перевозчиков республикаысьтымы калык артист, Россиысь дано артист луиз. Кема аръёс ӵоже, Шурике, калыкез шумпоттыны мед быгатод. Вань удмурт калык тынэсьтыд шудэмдэ яратэ. Озьы ик мед луоз. Алевтина Галичанина (али Степанова - мынам нырысетӥ дышетӥселэн Евдокия Степановналэн нылыз, пиналъёссы пӧлысь самой пичиез. Сое нырысетӥ классын гинэ дышетыны вуи ке но, али но син азям. Парта сьӧрын братэным Гераен пукыкузы, йыръёссы гинэ адско вал, сыӵе пичиесь. Куараоссы жингрес ке но, Аляез парта сьӧрысь озьы гинэ уд потты, туж возьдаськись вал. Ӵыж-ӵыж гордэктэ, синкылиосыз ик пото. Дол-дол абдрасько, кызьы со артистка луиз (эшшо ке - Удмурт Республикаысь калык артистка). Мунё театрын шудэ, радио пыр но куараез ӵем кылӥське. Пинал мурт бӧрысь туж воштӥське вылэм, уката ик ачиз бордын зол ке ужа. Шуд но бур тыныд, Аля, кема мед возиськоз егит мылкыдыд. Ӵемгес вуылы вордскем палъёсад. Тӥляд дышетӥсьты Ю. Шкляев. ЖУРНАЛИСТЪЁСЫН ПУМИСЬКОНЪЁС Огез шарая, мукетыз дугдытэ Удмурт Республикаысь Эскеронъя кун комитет меӵак ужа, Кун Кенешлэсь куронъёссэ быдэсъяса. Но кылем арын трос гинэ эскеронъёс ортчытэмын вал интыосысь ас коже кивалтон ёзъёслэн вазиськемъёссыя. Комитетлэн ужамез сярысь журналистъёслы валэктонъёс сётӥз солэн кивалтӥсез Александр Кузнецов. Пумиськонлэн ужаз озьы ик пыриськиз Россия Федерациысь Лыдъян палаталэн аудиторез Александр Ножников. Эскеронъя кун комитет 1999-тӥ арын 108 эскерон ортчытэм. Трос шараямын пӧртэм бюджетъёсысь коньдонэз тус-тас карон учыръёс. Кылсярысь, республикалэн бюджетысьтыз кулэезъя кутымтэ 3182,3 сюрс манет, ёрос бюджетъёсысь - 7377,0 сюрс манет, бюджетэ пырисьтэм фондъёсысь - 374,0 сюрс манет. Озьыен, 11 миллион манет пала коньдон кулэтэм интыосы кошкемын. Сыӵе учыръёс ӧжытгес мед луозы шуыса, Эскеронъя кун комитетын нимысьтыз кылдытэмын республикалэсь бюджетсэ но бюджетэ пырисьтэм фондъёсты чакласа возёнъя управление. Комитетын ужасьёслы ӵем пумиськоно луылэ гражданъёслэсь правооссэс тӥян учыръёсын. Тужгес но трос ӝожтӥськонъёс вуыло черодъёстэк квартираос басьям пумысен. Александр Кузнецов верамъя, вань районъёсын улоннилы кредитъёс висъясько, Жилищной кодексэз тӥяса. Сыӵе учыръёсты шараяку, шуиз со, котьку но шуге-леке сюроно. Кызьы кыл кутон улэ кысконо кредитъёсты умойтэм люкылэм кивалтӥсез но кызьы со кредитэз берлань берыктоно. Асьме законъёсын со ласянь номыр чакламын ӧвӧл. Шараям тырмымтэосъя комитет кылем арын 14 пол прокуратурае вазиськылэм. Куд-ог учыръёсъя уголовной ужъёс ӝутыны удалтэм ик. Кылсярысь, кема эскерон ужъёс мынэм бере, уголовной ужъёс ӝутэмын инкуазез утёнъя комитетлэн азьвыл кивалтӥсез В.Н.Гуров но культурая азьвыл министр Г.В.Чайников вылэ. Сыӵе ик адӟонэз луиз "Удмуртлестоппром" предприятилэн Играысь филиалэныз кивалтӥсьлэн В.С.Поздеевлэн. Предприятилы со 7745616 неденоминированной но 4528 деноминированной манет тыр изъян ваем. пӧртэм кыл кутытон улэ Кылем арын 17 мурт кыскемын. Соос пӧлын Грах но Сюмси ёросъёсысь ветеринаръёслэн станциоссылэн директоръёссы - соослы коньдон тырон тупатэмын. Нош Игра но Вавож ёросъёсысь ветстанциосын кивалтӥсьёс ас ужысьтызы кошкытэмын. Озьы ик кыл кутон улэ кыскемын Гур хозяйствоя но сиён-юонъя министерствоысь коньдон ужпумъёсъя но кредитъёсъя отделлэн кивалтӥсез. АПК-лэсь фондзэ тус-тас каремез понна. Озьы ке но, Эскеронъя кун комитетлэн лэсьтэм ужъёсыз ӵем дыръя прокуратураын гуньдо. Малы? - Законъёсмы лябесь, - шуиз А.Кузнецов. - Соин ик шараям тырмымтэос сярысь золгес гожъяно корреспондентъёслы но. Законэз тӥяса ужасьёс калыклэн син шораз йӧтыны кышкало ай. Нимаз адямиослэн комитетэ вуэм ӝожтӥськонъёссы но палэнэ уг кылё. Сыӵе гожтэтъёсъя эскерем учыръёс ӵем дыръя зэмало, шуиз А.Кузнецов. Куд-ог ужъёссэ комитет нуэ Россиысь лыдъян палатаен ӵош. Солэн ужамез сярысь журналистъёслы вераз Александр Ножников. Паймоно кадь: Россия бадӟым, нош палатаын 12 адями гинэ ужа. Мар карыны быгато меда соос туала вакытэ, Россиын законъёс уг быдэсъясько бере? - Ужасьёсмы пӧртэм удысъёсъя люкылэмын, - шуиз со. - Ачим мон эскерисько кунгож кусыпъёсын герӟаськем ужъёсты. Татчы вуи, ож тӥрлык поттӥсь предприятиослэсь, кылсярысь ЭМЗ-лэсь, бадӟым экспортёръёсынызы ужанзэс эскерон вылысь. Ӧвӧл малпано, сыӵе эскеронъёс тымымтэосты шараян понна гинэ ортчыло шуыса. Лыдъян палата шуге-леке сюрем предприятиослы юрттыны но тырше. Тани "Ижмаш" предприятилэсь трос люкаськем тыронъёссэ быдтон понна сюресъёс шедьтӥм. Мынам малпамея, сыӵе бадӟым предприятие Россилэн юрттэмезтэк пыд йылаз султыны уз быгатэ. Александр Ножников верамъя, таяз арын Лыдъян палата но Эскеронъя кун комитет ӵош эскерозы ЭМЗ-лэсь, Удмуртиысь санэпидстанциослэсь но Федерациын почта кусыпъёсъя Удмурт Республикаысь управленилэсь ужамзэс. Россиысь Лыдъян палата но (5 ар талэсь азьло кылдэмын) Удмуртиысь Эскеронъя кун комитет кема уг на ужало. Соин но, вылды, соослэн ужазы трос шуг-секытъёс кылдыло на. Огласянь соос тырмымтэосты шараяны юртто, нош мукет ласянь государстволы изъян ваисьёсты кыл кутытон улэ кыскыны кужымзы уг тырмы, прокуратураосы ыстэм ужъёс аръёсын кыстӥсько. "Законъёслэн быдэсъяськымтэзы законлы пӧрмиз ини", - шуиз А.Кузнецов. Тӥни соин ик тросэз кутскем ужъёс интыысьтызы вырӟытэк кыллё. Т.Банникова. Героин но, пуштытъян но Россия Федерациысь ФСБ-лэн Удмурт Республикая управленияз ужасьёс но "Вихрь- антитеррор" ужрадэ пырисько. Туэ январь толэзьлэн пумаз кырмемын наркотикъёсын вузкаронъя группа. Отысь адямиос Таджикистанысь Екатеринбург пыр Ижевске наркотик вутто вылэм. Нимысьтыз операция ортчытку, 2 кило героинэн ӝегатэмын нылкышно-курьер но лымшор республикаысь наркотик вӧлмытӥсь воргорон. Та пумысен ӝутэмын уголовной уж. 1-тӥ феврале Удмуртилэн шоркараз УФСБ ӝегатӥз Ижевскын улӥсь кык адямиез. Соос йырвандисьёслы уно пуштытъян арбери вузаны туртто вал. Ӝегатскытэк ужардъёс кутэмен валче, УФСБ-ын ужасьёс талазы 100 килолэсь уно тротил, 19 электродетонатор, пӧртэм калибрен кӧня ке сю патрон. Нырысь эскеронъёсъя, пуштытъян арбери лушкамын одӥгысьтыз воинской частьысь. Ӝутэмын уголовной уж, мынэ следствие. РФ-ысь ФСБ-лэн Удмурт Республикая управлениезлэн пресс-службаез. Заводъёсын кузёяськоз казна Ижевсклэн мэрез Анатолий Салтыков берлозэ пресс-конференцизэ нош ик сӥзиз коньдон ужпумъёслы. Со мадиз, кыӵе бадӟым удысъёсы ӧръямын луоз 2000-тӥ арлы юнматэм бюджетысь коньдон. Город туэ бюджетаз люканы чакла 1,8 миллиард манет. Быдтыны но сомында ик пусъемын. Миым сярысь тросгес коньдон висъямын луоз дышетон но тазалыкез утён удысъёсы, быдэн 27,5 но 17 процент. Жилищно-коммунальной хозяйство бюджетлэсь 22,5 процентсэ кыскоз. Лэсьтӥськон удысэ висъяны чакламмын 96 миллион манет, миым та лыдпус 66 миллион вал. Озьы ке но, выль лэсьтӥськон мытэмын уз луы, малы ке шуоно, городын тырмыт на ай йылаз-пумаз вуттымтэ объектъёс. Тужгес но бадӟымъёсыз пӧлысь - азинтэмын но йылпумъямын луоз ву сётон но чылкытатон сооружениосты но кык школаосты лэсьтон но выльдон. Быдӟым Вормонлы 55 ар тырмон аре 10 милион манет висъямын ожысь ветеранъёслы улон инты лэсьтонлы но басьтонлы. Туэ Удмурт Республикаысь Правительство но городлэн администрациез Россиысь вуэм коньдонэз социальной удысын шырытгес но пайдаёгес кутон сярысь тупанкыл гожтӥзы. А.Салтыков нялтас вераз, та нуналъёсы Москваысь 20 миллион манет вуиз шуыса. Арня ортчыса, эшшо вуоз на. Та коньдон нырысь ик мыноз дышетӥсьёслы уждун тыронъя пунэмъёсты кулэстыны. Чакламын та пунэмен тыронэз 15 апрелёзь быдэстыны. Кызьы шуиз городлэн кивалтӥсез, та ужпумез, пе, вазьгес быдэстэм потэ вылэм но нырысетӥ кварталэ югдур коньдонэн котьку сямен уката но секыт. Предприятиослэн городлы тыриськонзы озьы ик бадӟым на. Ар талэсь азьло 800 миллион манет вытъёс тырымтэ ке вал, туэ 1 январьлы тырытэк кылемын 670 миллион. Югдурез уката шугомытӥз взаимозачётъёсты алон. Азьвыл коньдонэн выт тырыны быгатӥсьтэмъёс школаосы, больницаосы но нылпи учреждениосы сиён-юон коть сёто вал, табере соиз но, таиз но уг вуы. Анатолий Иванович журналистъёсты паймытӥз городысь заводъёс сярысь ивореныз. Кӧнязэ ке, пе, предприятиосты, соос пӧлын нырысь ик "Ижмаш" огазеяськон, огдырылы киултоз ачиз Россия Федерация. Кыӵе со пайда сётоз асьмелы? Нырысь учкыса, пичи ӧвӧл кадь. Та заводъёс али кӧня выт тырыны кулэ, сомында ик коньдон компесация бюджетэ сётоз Федерация. Озьы ик палэнэ уз кыльы социальной удыс но. Умой соиз но - ужан интыос луозы. Федеральной ёзъёс та предприятиосты чаклам дыр куспын ӝутыны кулэ. Малпамын умой кадь, но учком ини, мар пӧрмоз. Г.Тихонов. 02 ивортэ Аракы ӟече уг вуты Дэбесын шедьтэмын 78 аресъем пиосмуртлэн шӧйыз. Кызьы тодмо луиз, пересез жугыса вием одӥг урамын улӥсь тодмоез. Нырысь соос ӵошен аракы юиллям. Но малы ке но 49 аресъем Д. мӧйы муртэн одӥг кыл шедьтымтэ. Соизэ али милиция тодыны турттэ. Улонлэн пумыз Зура черко гуртысь Игра райполэн котельнояз вииллям 39 аресъем татын ужасез. Эстӥськисез сокем тышкаллям - ужан интыяз ик улонэныз люкиськиз. Йыруж лэсьтӥсен малпало Игралась 18 но 17 аресъем кык пиосты. Соосты утчало. Машина валлэсь кужмогес Елабуга-Ижевск сюреслэн 43-тӥ иськемаз шудтэм учыр луиз. Алнаш ёросысь Суворов нимо колхозысь 26 аресъем П. валэн ас понназ мынэ вал. Малпамтэ шорысь со борды машина мырӟиськиз. Дӧдьын пукись егит пи бырыны шедиз. Нош машиналэн руль сьӧраз пуке вал Ленинград улосвылысь ужбергатӥсь 39 аресъем Р. Одӥг ӟенелиик - кык ковёр. Ас дорад тодмотэм муртэ вайыса соин вина юыны - умойлы ӧвӧл. Ӵапак озьы луиз Х. пересен. Клубной урамысь квартираяз тодмотэм пиосмуртэз пыртӥз. Ӵошен ӟазьыртэмзы корка кузёлы ыштонэн берытскиз. Дорысьтыз кык ковёрез "лобаз". Лушкаськисез тодӥзы ни. Со - Можгаысь 32 аресъем К. Али сое милиция утча. Ӟеч-а автобусын? Нуназе Воткинскысь кык егит пиос асьсэлы аспӧртэм йыртэман инты шедьтӥзы. Воткинск-Шаркан сюрестӥ ветлӥсь автобусэз. Отысен соос, вӧсь каронэн кышкатыса 18 но 20 аресъем пиослэсь киын нуллон часъёссэс, уксёзэс (39 манет) талазы. Йыртэмасьёс ӝегатэмын. Армиын кадь Ижысь Гурт удысъя кун академиез кемалась верало ни, общежитиосазы эрказмемъёс уло шуыса. Пичи курсъёсысь пиосты шымыръяло. Песочной урам, 40 А адресъя интыяськем общежитиын куинь пиос капчи улон радъяны малпазы. 5-тӥ курсын дышетскись 25-28 аресъем муртъёс та академиысь ик Е. студентэз жугонэн кышкатӥзы. Солэсь пальтозэ но чайылэсь вурем изьызэ талазы. Кызьы студентъёс-йыртэмасьёс кыл кутозы, милициын малпасько на. Улон эсэпез вакчи вылэм Сарапулын нуназе бере С.-лэн коркаез ӝуаз. Ӵын пушкын ӝокаса кулӥз 3 аресъем пияш. Бадӟымъёслэн тылпулы огшоры кариськемзы нылпиослэсь улонзэс тала. "Ментъёс" гинэ-а меда? Арлэн кутсконаз югдурез утёнъя министрлы гожтэт вуиз. Сюлмысьтыз ик тау каремзэ вера Можга ёросысь Поршур гуртын улӥсь Зинаида Владимировна Храмова. Со али пенсиын ни. Нош мӧйы муртлэн шуныт мылкыдыз кылем Можгаысь ГОВД-лэн кивалтӥсез пумысен. Со Анатолий Михайлович Федоров. Нош ужпум тани ма бордын вал. Якшур-Бодья палась Храмова доры ӵыжы-выжыосыз лыкто. Улон интызы ӧй вал бере, кышномурт соосты бордаз кариз. Огшоры семья, кык пиналъёссы. Огшап ортчыса, соослы улон инты нимаз сётӥзы. Но рос-прос нокытын ӧз ужалэ, аракыез но яратӥзы. Нош мӧйы кышномуртлэн улонэз тыл пушкын кадь луиз. Со ӵыжы-выжыосыз дораз пенсизэ портыны ветлылӥзы. Чиданлэн пумыз вань. Одӥг полаз уксёзэ портыкузы, Храмова пумит кылзэ вераз но ӧз сёты. Соку пиосмурт коркае кык артана пис лэзиз. Зинаида Владимировна югдурез утисьёслы вазиськиз. Чик ӝегатскытэк милиция вуиз. Артанаен лэзьяськись пиосмуртэз 158-тӥ статьяя 40 манет тыриськытӥзы. Бӧрысьгес гурт администрациысь муртъёс но югдурез утисьёс комиссия кылдытӥзы но со семьяез эскерыны мынӥзы. Но комиссиез татын "возьмаллям" - кытчы ке ватскиллям. Трос-а кулэ арлыдо кышномуртлы улонзэ капчиятыны? Нош кыӵе со табере милиция пумысен шуныт вазиське. Асьмеос югдурез утисьёсты ум яратӥське. "Мент" гинэ шуиськом. Ведь котькинэн пӧртэм учыр луыны быгатоз. Кытчы пырод, яратӥськод-а, уд-а - со "ментъёслы" ик вазиськод. Зэм, соос пӧлын но олокыӵе адямиосыз вань. Сотэк уг луы. Но тау карон кылъёс погонэн адямиослы вераны кулэ, дыр. Милицитэк улонмы шурдыт луоз. Удмурт Республикаысь МВД-лэн сводкаосызъя дасяз А. Андриянов. Кинлэн ульчаез чылкытгес? Туэ 15-тӥ мартысен республикаямы кутско котырысь инкуазьлы кышкытлык ваись учыръёсты палэнтонъя ужрадъёс. Солы дасяськон мынэ ни Ува ёросын но. Таин валчекылдытӥське нимысьтыз радъясь комитет. Туэ та ужрадэ дышетскись пиналъёс сяна пыриськозы предприятиос но организациос. Котькудӥзлы юнматэмын нимысьтыз ульчаос. Соосты жуг-жаглэсь утялтоно луоз. Тулыс пумын ини тодмо луоз - кин ньӧмыз понна гинэ тыршиз, нош кин зэмзэ но инкуазь сярысь сюлмаськиз. Н.Ефремов. Россиысь наукалэн нуналэныз! 8-тӥ февраль Россиын нырысьсэ пусъё наукалэсь нуналзэ. Наука - паськыт, азинскем удыс, солэн вань аслаз институъёсыз, пӧртэм вузъёсын наукая ёзъёсыз, научно-производственной комплексъёсыз. Берло аръёсы быдэс Россиын экономикалэн куашкамез шӧдӥськиз наукаын но. Удмуртиысь учёнойёс но секыт югдуре шедизы. Озьы ке но, азьлане вамышъёс лэсьтэмын. Ас интызэс шедьтӥзы гуманитарияя наукаос - философия, политология, социология, экономика, право, педагогика, психология. Та удысъёс узырмо выль ужасьёсын, бадӟым луонлыкъёс кылдэмын Россиысь но кунгож сьӧрысь наукая центръёс пыр ог-огеныд ӟеч кусыпъёс возьыны, тунсыко иворъёсын вошъяськыны. Удмуртиысь учёнойёслэн вылӥ тодон-валанъёссы юртто калык хозяйстволэн пӧртэм удысъёсаз пайдаё технологиосты пыӵатыны, улон- вылонэз, экономикаез выль сямен радъяны. Наука удысын тыршисьёсты ӟечкыласьком праздникен! Сӥзиськом юн тазалык, шудо улон, ужады выль вормонъёс. Удмурт Республикаысь Кун Кенеш Удмурт Республикаысь Правительство. 4-тӥ феврале Чечняын Катыр-Юрт гурт дорын бырем куинь омоновецъёсын: - Константин Васильевич Токаревен - Владимир Александрович Собинэн - Владимир Иванович Востриковен люкиськон ортчоз 10-тӥ феврале 11 часысен 13 часозь "Металлург" культура дворецын. Ватозы 13 часэ. Удмурт Республикаысь МВД-лэн пресс-службаез. КОНСТИТУЦИЯ Вамыш бӧрсьы вамыш Асьме элькунлэсь ва__лтӥсь законзэ выльдонъя нимысьтыз кылдытэм комиссия куинь пол люкаськылӥз ни. Берлояз заседаниын эскеремын нырысетӥ но кыкетӥ люкетъёсы пыртоно ӵектонъёс. - Ми понна валтӥсез курон - асьме Конституциез Россилэн законодательствоезъя тупатон, - вера комиссилэн секретарез юридической наукаосъя кандидат Константин Глухов. - Конституцие воштонъёсты нырысь дасяло юристъёс, котькуд ватсанъя-воштонъя соиз яке таиз закон вылэ чӧлско, соку гинэ ини дэмланзэс комиссие потто. Соин, дыр, уж но умой азинске. Тани нырысетӥ люкетъёсы ӵектэм 25 воштон пӧлысь 23-ез умоен лыдъямын. Бен, споръяськонтэк уг ортчы. Юн мылкыдзэ ялан возьматэ Валентин Тубылов, мукет эшъёс. Отын номыр умойтэмез ӧвӧл. Оскисько, азьланьын но огкыл шедьтыны быгатом. Ӵуказе комиссия нош ик люкаськоз. Таяз учыре депутатъёс но комиссие пыртэм специалистъёс учкозы куинетӥ но ньылетӥ люкетъёсты. Отын, кызьы тодмо, вузаськон мынэ Удмуртилэн Россиен кусыпъёсыз но асьме улосвылэз кивалтонъя люкылон сярысь. Тужгес но пӧсь эчешон ӝутскоз ни, валамон, 5-тӥ-6-тӥ главаосъя, куке комиссия эскероз Удмуртиын вылӥ кивалтон ёзъёсты радъянэз. О.Марков. Куноослы шумпото Шаркан ёросысь Мувыр шор ёзо школаын удмуртлыклы бадӟым саклык висъяло. Татын дышетско кык сюлэсь ятыр пиналъёс. Удмурт кылъя но литературая дышетӥсьёс школаын вить кузя. Ваньзы ик ужазы кутыны тыршо пӧртэм амалъёсты. Надежда Юрьевна Широбокова урокъёсаз трос саклык висъя удмурт газет-журналъёслы. Амалыз ке луысал, нылпиосын пусмиськонэ тросгес ӧтьылысал кылбурчиосты, писательёсты, журналистъёсты. 2000-тӥ аре вордӥськем нырысетӥ нуныез сӥё-дано ӟечкылан ужрадэз Мувыр школаын ортчытыку, муг луиз редакциын ужасьёсын пумиськон ортчытыны. Бадӟым классъёсын дышетскись нылпиос но дышетӥсьёс мыло-кыдо кылзӥзы Ижевскысь куноослэсь мадемъёссэс. Туспуктэмъёсыз В.Беломорскихлэн. Кудӥз кылбур тунсыко? Кызьы ивортылӥм ни, "Ингур" радио ялӥз кырӟанлы тупась тямыс чуръем усто кылбурлы конкурс. Ужъёсты ыстыны кулэ вал 10-тӥ февралёзь. Йылпумъянъёс лэсьтон понна трос кылбуръёс пӧлысь табере быръёно тужгес умойёссэ. Радио кылзӥсьёс но газетэз лыдӟисьёс соосын тодматскыны быгатозы "Удмурт дунне" пыр. Тужгес тунсыко кылбур чуръёслэн авторъёссы пусъемын луозы синпель кузьымъёсын. "Ингур" радиоез кылзӥсьёслы сыӵе юрттэт сётыны мылкыд каризы Иж карысь "220 Вт" (кивалтӥсез Николай Соловьев) но Алнашысь "Дядя Ваня" (кивалтӥсез Иван Самсонов) вузкаронтӥос. Йырдэ "тӥялод" - котькинэ вормод "Ижпланета" клубын арлы быдэ ортчыло "Тӧдьы ладья" клублэн призэз понна шахматэн шудонъёс. Городъёсысь командаос сяна, отчы мылысь-кыдысь пырисько гуртъёсысь но пинал спортсменъёс. Туэ но та ӵошатсконъёсы гуртъёсысь 11 команда ветлӥз. Соос пӧлын тужгес но усто шудӥзы Красногорск ёросысь пиналъёс. Та командаын нюръяськизы С. Кондратьев, А. Сакерин, А. Данилов, С. Данилов но Н. Давий. Пиналъёсты шахматэн шудыны дышетэ Красногорск селоысь нылпи школаысь шахматъя тренер Г. Л. Мартынов. Солэн кружоказ сизьымдон пала егитъёс ветло. Озьыен, азьланьын но луозы трос вормонъёс. Е. Николаева. "Тӧдьы ладья" клублэн призэз понна шахматэн шудонъя ӵошатсконъёс дыръя. Красногорск селоысь команда понна нюръяськись Сергей Кондратьев. В. Камашевлэн туспуктэмъёсыз. ДАРТ Милемлы толшорын но шуныт Кезьыт шунды пиштэ ке но, гужем шунытэз уд берыкты ни. Но "Шунды" дэменлыклэн сиосыз котьку пӧсь но яркыт пишто. Со толалтэ но уг вунэты аслаз эшъёсыз сярысь. Тани толшоре гужем "Шундыкарын" дышетскем пиналъёсты выльысь лагерьын огазеяны быгатӥз. Макем шумпотӥзы пиналъёс. Соос возьмамтэ шорысь эшъёсынызы пумиськизы, трос выльзэ тодӥзы уго. Куинь нунал туж ӝог ортчиз. Кӧлыны но дыр жаль потылӥз - сомында тунсыко ужрадъёс, лекциос, пумиськонъёс, эктонъёс-кырӟанъёс. Мыным туж кельшиз "Золушкалэн балэз" ӝыт. Нылъёсмы одӥг ӝытлы выжыкылысь Золушкалы пӧрмылӥзы. Нош КВН-ын вожатойёсмы визьмес сыназы. Туж тунсыко лекциос лыдӟизы милемлы психология, этнология, культурология, философия, кылтодон удысъёсъя. Монэ тужгес бордаз кыскиз психология. Люкиськон нуналамы но туж шулдыр вал кадь, но тросэз бӧрдытэк ӧз чидалэ. Ӟеч эшъёсын люкиськыку, котьку озьы лэу. Н.Пименова. Гожня гурт, Пичи Пурга район. Мӧйыос сярысь книгаос Удмурт Республикаысьтымы ожысь но ужысь ветеранъёслэн кенешсы умой лэсьтэ, ветеранской организациос но тодмо адямиос сярысь книгаос поттыса. Та ласянь трос ужало элькунысь ветеранъёслэн советсылэн председателез М. Е. Зыков, солы юртто Ю. К. Шибанов, Л. П. Емельянов но В. Н. Никитин. Тани мынам киям куинетӥез поттэм книга. Солэн редакторез Л. П. Емельянов. Книгалэн кутсконаз М. Е. Зыков маде Россиысь ветеранъёслэн организацизылэн ортчем съездэз сярысь. Отчы Удмурт кунысь ветлӥзы М. Е. Зыков, Б. Г. Аминов, В. П. Вахрушев. Республикаямы бадӟым саклык висъяло ветеранъёс сярысь федеральной законэз быдэсъянлы. Но жаляса верано луэ, коньдон тырмымтэен, та закон уж вылын урод быдэсъяське на. "Буммаш" акционер огазеяськонлэн генеральной директорез В. В. Жебровский вера предприятиысь ветеранъёслэн 25 ар талэсь азьло кылдытэм организацизылэн ужамез сярысь. Та заводын Вормон но мӧйыослэн нуналъёсазы цехъёсы вань пенсионеръёсты ӧтьыло но соослы синпель кузьымъёс сёто. Озьы ик татысь пенсионеръёс асьсэлэсь тазалыксэс юнмато заводлэн санаторий-профилакторияз но мукет эмъяськон интыосын. "Буммашысь" ветеранъёслэн огазеяськонзылы промышленной предприятиос пӧлын конкурсын вормисе потэмзы понна Диплом сётӥзы. Нош кивалтӥсьсэс Аркадий Венедиктович Пицковез пусйизы "За заслуги перед Отечеством" орденлэн ИИ степенё медаленыз. Удмурт Республикаысь ожысь ветеранъёслэн комитетэнызы азьвыл кивалтӥсь А. П. Храмцович гожтэ Быдӟым Отечественной война дыръя асьме дорын кылдэм воинской частьёс но соединениос сярысь. Унояз школаосын ожын басьтэм вормонъёсмес возьматонъя музейёс усьтэмын. Но куд-огаз школаосын, районъёсысь но городъёсысь ветеранъёслэн огазеяськонъёссы дыраз юрттэт сётымтэен, музейёсты ворсазы. Ижевскысь 8 номеро школаысь 208-тӥ стрелковой дивизилы сӥзем музейлэн кивалтӥсез В. Русских книгаын маде дивизиын ожмаськись тодмо удмурт писатель М. П. Петров сярысь. Со 49-тӥ бригадаен ӵош Москваысен Кенигсбергозь ортчиз. Егит лётчикъёслэн школазылэн директорез Л. Коробейникова берло дас аръёс ӵоже дасяз ог 350 спортсмен- парашютистъёсты, спортъя мастеръёсты, уно чемпионъёсты. Та школаын дышетскон ар кутске асьме землякмылы бортпроводницалы Надежда Курченколы сӥзем калык музейысен. Автоматэз кылдытӥсь Михаил Тимофеевич Калашников сярысь туж тунсыко материал гожтэм Удмурт Республикая ИТАР-ТАСС-лэн корреспондентэз Альфред Артамонов. Мыным озьы ик кельшиз Социалистической Ужысь Герой, Ижевскысь тодмо андан пӧзьтӥсь Евгений Васильевич Черных сярысь В. Логиновлэн "Сюмсиысь пияш" зарисовкаез но трос мукет корреспонденциос. Удмуртиысь ветеранъёслэн огазеяськонзы али дася мӧйыос сярысь ньылетӥ книгазэ. Мон сямен, та книгаос пичи тиражен пото ке но, Удмуртилэн историяз пыраклы кылёзы. Москваысь "Ветеран войны" журнал туж вылӥ дунъяз "Ветераны Удмуртии" книгалэсь куинетӥ выпусксэ. В. Чернов. ГОЖТӤСЬКОН - 2000 Нош дыртэ ош Туннэ газетлэн редакцияз ортчоз туала лыдӟисьёсмылы сӥзем ошлэсь кузёзэ утчан лотереялэн нырысетӥ люкетэз. Гожтӥськемъёслэн лыдзыя ог-огзылэсь туж ик висъяськисьтэм округъёс кылдытэмын. Котькудаз ог 800 мурт пыре. Тани Пичи Пургаын ог 1600 адями газетмес басьтэ ке, отын кык округ. Нош куд-огаз 100-150 мурт гинэ ке, сыӵе ёросъёс огинэ каремын. Лыдъям-чотам но таӵе йылпумъян лэсьтӥм. Ваньмыз 16 округ луиз. 1. Алнаш - И 2. Алнаш - ИИ 3. Шаркан - И 4. Шаркан - ИИ 5. Пичи Пурга - И 6. Пичи Пурга - ИИ 7. Можга - И 8. Можга - ИИ 9. Завьялово 10. Игра 11. Балезино, Яр 12. Вавож, Ува 13. Кизнер, Киясово 14. Кез, Селта, Сюмси, Як.-Бодья 15. Глазов, Грахово, Дэбес, Каракулино, Юкаменск. 16. Ижевск, Воткинск, Сарапул, Каракулино, Камбарка, республикамылэн палэнысьтыз гожтӥськемъёс. Лотереяез радъян вылысь кылдытӥм нимысьтыз комиссия. Со ик туннэ юрттоз милемлы тодыны, кудпала вамыштоз редакцилэн ошез. Шуом, потоз 12 номеро шар. Та округе пыро Вавож но Ува. Кыкетӥ тур ортчытыса, ми та ёросъёс пӧлысь тодом шудозэгес. Отӥяз ини шараяны быгатом почта ёзэз яке гуртэз. Бӧрысь интые потыса тодом ошлэсь кузёзэ. Газетмес кӧня ке ар ӵоже басьтӥсьёсмылы лотерея ортчытон рад тодмо ни, соин ик кулэез ӧвӧл, дыр, со сярысь выльысь пыр-поч вераны. Но юанъёсты кылдӥзы ке, ми валэктом телефон пыр. И.Лебедев. Кун Кенешын Нылкышно интые нылкышно быръемын Таяз арня вискын ужаны кутскиз Удмурт Республикаысь Кун Кенешлэн азьвыл чаклам укмысэтӥ сессиез. Нырысетӥ нуналаз депутатъёс сэрттӥзы-пертчизы ог дасо ужпумез. Кенешлэн кутсконаз ик ӟырдыт вераськон ӝутскиз районъёсын но гуртъёсын калык дружинаосты кылдытон пумысен. Та ласянь азьвыл созывысь депутатъёс но огпол гинэ кылпум ӧз поттылэ, но пумаз-йылаз озьы ик ӧз вуэ. Али но малпанъёссы люкиськизы. Правительстволэн Тӧроез Н.А.Ганза обществомес кышкытлыклэсь утён борды дэмен султонэз умоен лыдъя. Глазовын, кылсярысь, ас мылкыдзыя кылдытэм оперативной отряд нырысетӥ арзэ гинэ уг ужа ни, калык солы оске, юрттэ. Вань сыӵе кутсконъёс куд-ог музон интыосын но. Оперативникъёслы дурбасьтэмзэс веразы депутатъёс М.К.Кокорин, И.Н.Семенов но эшшо кӧня ке мурт. Ижевсклэн мэрез А.И.Салтыков калык дружинаосты кылдытонлы чутрак пумит луиз. Аслэсьтыз мылкыдзэ со валэктӥз отчы пыриськись адямиослэн улонзы сярысь сюлмаськыса: пыӵал тӥрлыкен бандит пумитэ гольык киын-а потом? Депутатъёс О.Л.Кузьменко но С.Г.Беркутов ӵектон сётӥзы та ужпумез умой-умой эскерыны но вуоно сессиын йылаз-пумаз вуттыны. Сарапулысь депутат Р.Ю.Рыбаков озьы ик ӵектонэн потӥз парламентлэн огаз кенешаз Эскерон кук комитетлэсь ужзэ кылзон сярысь. "Эскерон палатаез асьмеос быдтӥм, нош маин выре Эскерон комитет - ум тодӥське, - шуиз со. Рыбаковлэн вазиськонэз озьы ик санэ басьтэмын. Сессия юнматӥз Кун Кенешлэсь 2000-тӥ арын законъёс кылдытон бордын ужан планзэ, воштонъёс но ватсанъёс пыртэмын "Удмурт Республикаысь калыкез уже интыян сярысь" Законэ, кутэмын вазиськон сюрес вылын мынон-ветлон льготаосты выльысь кутскыса эскерон сярысь. Ваньмыз сямен соос сётэмын но юнматэмын федеральной законэн, соин ик депутатъёс вазиськонэн пото Кун Дума азе. Удмуртиын улӥсьёс пӧлысь 60 пумоезлы дун тырытэк ветлыны право сётэмын, пассажиръёс пӧлысь со ӵапак - ӝыныез. Та чотын автотранспортной предприятиос ар ӵоже 160 миллионлы ыштон адӟо, Ижевск - ог 85 миллион. Льготаосты кулэстон пумысен Кун Думае вазиськонэн потӥзы ни музон регионъёс но, кылсярысь, Калуга но Владимир областьёс. Вераськон мынэ федеральной службаосын ужасьёс понна коньдон мед лыктоз центрысь шуыса, нош али та ныпъет куштэмын интыысь бюджет вылэ. Укмысэтӥ сессилэн нырысетӥ заседанияз учкемын организационной ужпум: юнматэмын Кун Кенешлэн Тӧроезлы выль воштӥсь. Кызьы тодмо, С.К.Смирнова, Кун Думалэн депутатэз луэмез бере, Тӧролэн воштӥсезлэн интыысьтыз мӧзмытэмын вал. Со интые А.А.Волков дэмлаз Наталья Алексеевна Харинаез, Кун Кенешысь социальной полтикая комисилэсь кивалтӥсьсэ. Залын пукисьёс пӧлын мукет но мылкыдъёс вал. Кылсярысь, В.Л.Фридрих, коньдонэз шыръян вылысь ӵектӥз Тӧролы кык гинэ воштӥсь кельтыны. Солэн верамезлы дурбасьтӥсьёс сокем трос ӧз шеде. Н.А.Хариналы оскемзэс веразы депутатъёс З.И.Степнова, В.Г.Хорошавцев, Ю.В.Шестаков но мукетъёсыз. Лушкем куара сётыса, Н.А.Харина быръемын Удмурт Республикаысь Кун Кенешлэн Тӧроезлы воштӥсе. Укмысэтӥ сессилэн вуоно кенешонэз табере ортчоз 22-тӥ феврале. Отын ужамез сярысь отчёт лэсьтоз Удмурт Республикалэн Правительствоез, шаерамы кылдэм югдурен тодматоз Кун Кенешлэн Тӧроез, депутатъёс кылзозы Эскерон кун комитетлэсь отчётсэ но сэрттозы- пертчозы музон ужпумъёсты. Л.Медведева. *Сессилэн кенешаз. Туспуктэмъёсыз В.Беломорскихлэн. Лыдӟись гожтэ Кипыдэс вылын кадь 1993-тӥ арын "Кенеш" журналысь Л. Емельяновлэн "Кудпала берга дунне питран" повестезлэсь нырысетӥ люкетсэ лыдӟеме бере, таӵе малпанэ вордскиз: татын туж трос адями возьматэмын, бадӟым инты висъямын азьвыл вылӥ партийной кивалтӥсьёслы - быгатоз меда авторез та адямиосты герӟаны, соослэсь улон-вылонзэс, сямъёссэс, выросъёссэс суреданы? Таӵе малпанлэн мукет мугез но вал на. Куке но аслым но партилэн обкомаз ужано луиз бере, повестез лыдӟыны кутскыкум ик отысь адямиосты тодмай. Таос сярысь мадьыны капчи уз луы шуыса малпай. Пусйыны кулэ на созэ но: повесть сӥземын лэчыт ужпумлы. Писатель басьтӥськем 60- тӥ-80-тӥ аръёсы кивалтӥсь партилэсь косъяськон, ачимъяськон амалъёссэ, солэсь калыклы изъян ваемзэ асьме элькунмы вылын эскерыны. Та темая чеберлыко литератураямы трос гожъямын ӧвӧл на ук. Табере, "Кудпала берга дунне питран" книга лыдӟисьёс доры вуэм бере, вераны луэ ини: юнме вылӥллям со сярысь сюлмаськонъёс. Отын адямиос огшорыгес, бездытгес возьматэмын луысалзы ке, повесть сярысь вераськонъёс ӧй луысалзы, дыр. Ожысь ветеранъёслэн элькун комитетазы ужаса, мыным ӵемысь пумиськылоно луылэ мӧйыосын. Книгаез лыдӟыса вуттэмъёслэсь, нырысь ик - азьвыл партийной но советской ужасьёслэсь отын возьматэм адямиос сярысь вераськон ӝутылэмзэс, даллашемзэс кылылэме вань. "Пӧртэм-пӧртэм трос адямиос пыр книгаын ӟеч суредамын косъяськонлэн но мукет валантэм амалъёслэн соку партимылэн вань ёзъёсаз пыӵамзы", - тазьыгес шуыло мӧйы лыдӟисьёс. Зэм но, олокыӵе но малпанъёс тэбинё, повестен тодматскем бере. Тодӥськом: ваньмы ик шӧдылытэк ӧм улэ куд-ог вылӥ партийной ужасьёслэсь партилэсь Уставзэ гинэ ӧвӧл, кытӥ-отӥ законэз но тӥямзэс. Нош чурытэсь куронъёс малы дыраз ӧм пуктылэ, юн ӧм нюръяськылэ талы пумит? Партийной номенклатурае пырисьёслэсь ужамзэс, улэмзэс эскерыкуз, Л. Емельянов быгатэм соослэсь образъёссэс оскымон суреданы. Книгаысь адямиос асьсэлы гинэ тупась манеръёсынызы, сямъёсынызы висъясько. Вылӥ партийной органъёсын ужамъёс пӧлысь пыр-почгес возьматэмын партилэн обкомезлэн нырысетӥ секретарез Грознов. Озьы ик кулэ вал, дыр. Солэн нимыныз, кивалтэменыз герӟаськемын уго элькунамы ортчем тодмо югдуръёс. Куд-ог ужъёсты радъяку, кузё ачиз кичӧлтӥсь но луылӥз. Лыдӟись вала: нырысетӥ аръёсаз Грознов шаерысьтымы калыклы умойзэ ӧжыт ӧз лэсьты. Собере ачимъяськыны кутскиз. Бадӟым властез яратон, ас малпандэ одно ик (шонер-а со, ӧвӧл-а) быдэстон, адямиосты ултӥян, мытылӥсь муртлы пунэмзэ берыктон - кивалтӥсьлэн та сямъёсыз возьматэмын пӧртэм-пӧртэм суредъёс вылын. Повестьысь таослы сӥзем люкетъёс мукет интыослэсь трослы ӟечгес пӧрмиллям кадь. Кылсярысь, зэм гожтэмын, партилэн обкомезлэсь пленумзэ дасяку, чик кулэтэм выремъёс, огшоры адямиосты ултӥям, соослэсь мылкыдзэс дауре ӝожомытэм сярысь. Озьы ик шуыны луэ, кузёлэн малпамезъя, партийной организациосы гинэ ӧвӧл, каръёсы но гуртъёсы уполномоченнойёсты ысъянэз возьматэмлы сӥзем бамъёс сярысь. "Нырысетӥ секретарь кузё гинэ ӧвӧл - республикалэн эксэез но, инмарез но" - Грозновлэн ачиз сярысь пырак тазьы шуэмезлэсь уж вылын быдэсъяськемзэ но адӟе лыдӟись. Вераны луоз таӵе учырез гинэ. Калыкен кенешытэк, ас малпамезъя гинэ, нырысетӥ секретарьлэн косэмезъя, быдэс элькунын вань комбайнъёс борды макня люкась секытэсь агрегатъёс (половоуловительёс) юнмато. Татын трос коньдон, андан быдто, ужын трос муртъёслэн дуно дырзы ыше. Нош "кичӧлтонлэн" пайдаез чик уг луы, бадӟым изъян гинэ вае со. Грозновлэсь образзэ ватсаны юрттэ, партилэн обкомезлэн идеологияя секретарезлэн образэз. Касаткиналэн косъяськон-керӟегъяськон сямыз мукетгес возьматэмын. Нырысь ик адӟиськод солэсь кузёезлы одно ик юрттыны тыршемзэ. Собере ини валаськод: та сюлмаськонзэ быдэстон понна, со аслэсьтыз ужасьёссэ но ултӥяны дась. Книгаын возьматэмын партийной ужасьёс пӧлын но ужъюгдурез валасьёс, кулэтэм амалъёслы пумит нюръяськисьёс. Пумитъяськисьёс тросгес огшоры адямиос пӧлын. Маиз яра лыдӟисьлы, автор таӵеоссэ суредаку? Соос син шоры йӧто, соиныз яке таиныз лэчыт ужпумен тодматскыку, кыӵе ке янгышез тодыку... Басьтом таӵе учырез. Партилэн обкомезлэн промышленностья секретарез Посадов, партилэн обкомезлэн Кожиль ёросысь нырысетӥ секретарез Купреев Москваысь военной лэсьтӥськонъя управлениысь куинь генералэз но кык полковникез, элькунамы командировкае лыктэмзы бере, колхозлэн муш бакчаяз вутто. Юромо куноян понна. Собере, пе, соослэсь тросгес фондъёс курыны луоз. Уйшор берозь шулдыръяськемзы, куноослы кык бекче чечы кузьмамзы но юн кудӟем Посадов серемес учыре шедем - тылскеме усемез бере, лыдӟись азе нырысь ик кылдэ огшоры персонаж - мушкась Илья агай. Колхозлэн тӧроезлы Макшаковлы та "шулдыръяськонлэн" трос сюрс манет тыр изъян лэсьтэмез сярысь вератэк уг ни чида со. "Малы тӥ, калыклэсь ватӥськыса, солэн коньдонэз чотын лушкем юиськоды, тужгес дуно сиён-юонэз тыкиськоды, шулдыръяськиськоды?" - таӵе юан пуктэ тӧроез азе мӧйы колхозник. Янгышъёсты, тырмымтэосты, партийной ужысь валантэм амалъёсты тодыку, повестьлэн нырысетӥ люкетаз ик син шоры йӧтэ партилэн Сэбед райкомезлэн нырысетӥ секретарез Никишин. Сое суредакуз, писатель возьматэ ужез тодӥсь-валась адямиез. Зэмлык понна нюръяськыкуз уг курда Грозновлы мытылыны, нош партилэн обкомезлэн пленумаз национальной политикаез радъян удысын бадӟымесь янгышъёс лэсьтэм кивалтӥсьёс, соосын ужан сярысь ас малпанъёссэ, лэчыт кылъёссэ пырак вера, ӵектонъёс но сётэ. Тросэз дэмланъёсыз Грознов дыръя партийной ужын уг кутылӥсько ке но, лыдӟисьёс повестьысь синйылто Никишин пала дурбасьтӥсьёсты. Солэсь адӟем карисьёс ӧжыт вылӥллямтэ элькунамы - таӵе малпан кылдэ, та образэн тодматскыса. Та ласянь ик аспӧртэмгес луэ Емшановлэн образэз. Солы книгаын тырмыт инты висъямын. Журналист луыса ужакуз, со пыр возьматэмын печатен партийной амалэн кивалтон. Партилэн обкомезлэн секретарьёсыз тае, оло, мукет сямен валало. Яке юромо ас малпамзыя мыдланьто. Емшанов, партилэн обкомысьтыз культурая отделын ужаны кутскемез бере, умойгес адӟе ини партийной ужысь шекъёсты, валаны кутске соослэсь калыклы изъян ваемзэс. Берлогес быгатэмезъя соосты шараяны но нюръяськыны кутске. Ваньзэ ик сое лыдӟисьёс но туж валамон ужпумъёс вылысь адӟо. Шӧдске: та образ быдэсак герӟаськемын гожъясьлэн ортчем сюресэныз. Соин ик писатель быгатэм адӟемъёссэ, кылэмъёссэ яркытгес возьматыны. Повестьысь тросэз мукет образъёс но оскымон пӧрмиллям. Озьы ке но, книгаысь лябгес гожтэм интыоссэ но шедьтозы, дыр, лыдӟисьёс. Мынам малпамея, кыкетӥ люкетлэн пумаз вылӥын кадръёслэн вошъяськемзы огъя кылъёсын гинэ возьматэмын. Персонажъёсты суредаку, куд-ог интыосын пумиськыло огкадесь верамъёс. Тямысэтӥ бамын Касаткина сярысь гожтэмын: "Нылмурт кадь веськрес". 24-тӥ бамын нош ик со "веськрес мугоро". "Веськрес мугоро" шуыса ик гожтэмын Бадӟым Пудга ёрослэн кивалтӥсез Таблов сярысь но (215-тӥ бам). Валамон ни: та выллем веранъёс образэз валаны уг люкето ке но, соосты палэнтоно ик вылэм авторлы но редакторлы. Ӟеч луысал, писатель татын ӝутэм ужпумъёсты азьланьтысал на, туала демократия шуон вакытэз возьматысал на ке. В. Никитин, ожысь но ужысь ветеран, партийной органъёсын ужам адями. Лэчыт синмо, востэм сямо Удмурт телевиденилэн историез - со Рудольф Зоринлэн но улон сюресэз. Солэн татын тыршемезлы туэ 2-тӥ январе 40 ар тырмиз. Телевидение азинскемъя, аръёс ортчемъя будӥз Рудольф Александровичлэн но ужазинлыкез. "Удмуртия" телерадиокоманиын туннэ со одӥгез валтӥсь оператор. Нош кутскиз ужанзэ осветитель луыса, уго, тыл пуктытэк, кинокамераен снимать карыны уг луы вал. Татысен ик кошкиз со армие, атыкай музъемзэ утьыса, азьвыл ужан интыяз ик берытскиз. Нырысь кинооператорлэн юрттӥсез вал, собере аслыз кинокамера сётӥзы. Кӧня иськем сюресъёс ортчемын шаермес котыръяса, кӧня иськем киноплёнка "улӟиз" операторлэн ки улаз. Телевизор учкисьёс нуналлы быдэ сямен тодматско солэн усто лэсьтэм ужъёсыныз, но ӵе дыръя уг ик тодо кинлэн синмыныз соос адӟо созэ яке тазэ улэп суредэз, угось ачиз оператор кадр сьӧры кыле. Удмурт телевидениысь тужгес но оскымон, востэм, лякыт сямо операторлэн усто быгатонлыкъёсыз адӟымтэ улсы ӧз кыле. Рудольф Зорин пусъемын "СССР-ысь радио но телевидение удысысь отличник" знакен, сётэмын "Удмурт Республикаысь культура удысысь дано ужась" ним, озьы ик со луэ Удмурт Республикаысь кун премилэн лауреатэз. 6-тӥ феврале Рудольф Александровичлы тырмиз 60 арес. Телевиденын ужасьёс понедельнике люкаськылӥзы валтӥсь операторез юбилееныз ӟечкыланы. "Удмуртия" кун телерадиокомпанилэн кивалтӥсез Александр Ушаков Рудольф Зоринлы сётӥз Кун Кенешлэсь Данъян грамотазэ. Юбилярез шуныт кылъёсын ӟечкылазы ӵош ужась эшъёсыз но. Р.А.Зорин тросгес ужаз иворъёсъя "Шаер" предачаез дасян бордын, али но дышем ужзэ азинтэ. - Телевидение - со мынам улонэ, нош шаер - республикаысьтымы гуртъёс, ошмесъёс, бусыос, озьыен, "Шаер" передача мынам лулсюлмы луэ, - шуэ Рудольф Александрович. "Шаерчиос" но операторез асьсэлэн каро, ӟеч кылъёсын гинэ верало со сярысь. - Рудольф Александровичен туж каньыл, туж капчи ужаны, - шуэ корреспондент Федор Миннигараев. - Со операторлэн синмыныз адӟе журналистлэсь но ужзэ. Командировкаосы но потаны яратэ, отын со пиналме кадь. Ачиз ик шедьтэ, утча пӧртэм сюжетъёс. Режиссёр Надежда Корнилова но операторлэн ужысьтыз шекъёссэ уг адӟы: - Ас удысаз со туж быгатӥсь-валась специалист. Мед луоз со пресс-конференция яке командировка, ваньмыз туж умой снимать каремын, монтаж лэсьтыны курадӟонэз ӧвӧл. Мыным кельше соин ужаны. Та верам кылъёс вӧзы итӥськысалзы, дыр, телевидениын ужась мукетъёсыз но эшъёсмы. Л.Малых. Удмурт телевидениысь устоез оператор Рудольф Зорин. Журналистъёсын пумиськонъёс Ужтэк кылемъёс сино Быдэс Россиын но, Удмуртиын но берло дыре кулэсме ужтэк кылемъёслэн лыдзы. Со шумпотымон. Кылем арын озьы ик одӥг но ӝыны поллы синӥзы огдырлы шутэтскыны келян учыръёс. Со калыклы вузъёс но музон продукция поттонын шӧдскытэк ӧз кыльы. Производство кӧнялы ке будӥз. Та но куд-ог мукет ужпумъёс сярысь кылем вторнике, 8-тӥ феврале, журналистъёслы мадиз Уж сётонъя республикаысьтымы департаментлэн кивалтӥсез Юрий Брусянский. - Ортчем арын ужтэк кылемъёслэн лыдзы 10 сюрс муртлы синӥз, - пумиськонзэ кутскиз Юрий Михайлович. - Миым предприятиос милемды кышкатӥзы вал, 7,5 сюрс адямиосты ужтэк кельтом шуыса. Но шумпотыса верам потэ, 2,5 сюрс мурт гинэ ужысь палэнтэмын. Оглом пусйыса, бадӟымесь промышленной предприятиосын ужасьёслэн лыдзы 4,5 сюрслы кулэсмиз, нош шоро-куспо но пичи предприятиосын н ужбергатонын данаклы йылӥз. Зэм, туэ но югдур уродмыны кулэ ӧвӧл. Уж сётонъя фондэ уксё тросгес вуэ, нош предприятиослы ужасьёссэс кулэстыны лэзьымтэ. Озьы ке но, ужтэк кылемъёслы ӝегаса коньдон сёто. Со али быдэс ар луэ, но туэ куинь толэзьлы кулэсмыны кулэ. Та удыс берло дыре 20-35 процентсэ уксёзэ висъя выль профессиослы дышетыны но ужтэк кылемъёслэсь тодон-валанзэс будэтыны. Туэ, лыдпусэн вераса, 4 сюрс адямиосты дышетыны но уж сётыны чаклало. Ӧлексыослы (инвалидъёслы) 500 ужан инты кылдытэмын луозы. Дышетскисьёс стипендия басьто но котькудӥзлы 4-5 сюрс манет уксё кошке. Кылем арын уж сётонъя фондэ 40 процентэз вошъяськон амалэн вузъёсын вуэмын, туэ со лыдпусэз 10-15 процентозь вуттыны чаклало. Предприятиос, организациос но учреждениос уждун фондысьтызы 1,5 процентсэ ужасьтэмъёслы висъяны кулэ. Но со урод быдэсъяське. Азьло ӝыныез гинэ вуэ ке вал, миым 73 процент луиз, нош туэ 85 процентозь вуттыны чаклало. Кылем арын та удысэ уж курыса 2001 сюрс пала адями вазиськиз. Со пӧлысь 41,4 сюрсэз ужтэк кылемен лыдъямын, нош валля арын со лыдпус 66,1 сюрс вал. Миым 24,3 сюрс дышетскись пиналъёс огдырлы уж куризы вал, яке, валля арен ӵошатыса, одӥг куиньмослы трос. Одӥг ар ӵоже ужтэк кылемъёслэн лыдзы 24,7 сюрс муртлы кулэсмиз. Уж инмысь ӧз усьы. Миым котькудӥз витетӥез дас нуналскын аслыз уж шедьтӥз, нош куинетӥез огдырлы уже интыямын вал. Озьы туэ 1 январьлы 28,8 сюрс адями уж утча. Соос пӧлысь 25,6 сюрсэз ужтэк кылемен гожтэмын но пособие басьто. Котькызьы та ужпумез бергаты, но Удмуртиын 3,1 процентэз адямиос ужтэк кылемын. Со лыдпус, Россиын но Урал улосвылын сярысь, кык ёрослы уно. Асьмеос озьы ик бере кылиськом ужтэк кылемъёсты дышетонэн. Элькунамы одӥг ужан интые 8-9 мурт пырыны мылкыд каре. Туннэ озьы ик пусйыны кулэ тани мае но. Куд-огез адямиос ужало но, пособие но басьто. Соос кык ужан книжка возё. Нош мукетъёсыз уждунзэс будэтыса бумага басьтыса мултэссэ пособие кыско. Шуом, адямилы толэзяз шорлыдын 2000 манет уксё тыро ке вал, солэн пособиез 1300 манет луэ. Сыӵе пӧялляськон учыръёс пумиськыло на. Г. Романов. Удалтӥз! Алнаш ёросысь Азамат гуртын валлян ортчиз "Удмурт дунне" газетлы гожтӥськемъёс пӧлын лотереяен шудытон. Отчы пыриськизы Азамат но Чем-Куюк почта ёзъёс пыр газетмес басьтӥсьёс. Тужгес шудоез лыдӟисьмылы ӵектӥмы вал мотопомпа. Солэн кузёез табере тодмо. Азаматысь егит воргорон Геннадий Бикузин пӧсь гужем бакчазэ кисьтаны уз курадӟы ни. ГОЖТӤСЬКЕ Ӵош Та кыл ӵем чузъяськиз Кун Думалэн депутатэзлэн Светлана Смирновалэн нырысетӥ пресс-конференцияз. Пумиськонэ кызьлэсь трос журналистъёс лыктӥзы. Светлана Константиновна дас сизьым юанлы пыр-поч валэктон сётӥз. "Россилы туннэ тужгес но кулэ луись законъёс дасян понна, ми, одӥг мандатэн округъёсъя быръем депутатъёс, группаосы огазеяським. Ӵош кариськыса, куара юнгес чузъяське уго..." "Дума Правительствоен ӵош ужаны кулэ. Тани мон матысь дыре пумисько вице- премьерен Валентина Матвиенкоен. Кенешом социальной удысын кылдэм югдур пумысен..." "Кусып возисько Удмуртилэн кивалтӥсьёсыныз. Таяз учыре но Александр Волковен но Николай Ганзаен ӵош вераським республикаез шугъяськытӥсь ужпумъёсъя..." "Асьме элькунлэсь быръм депутатъёс ӵош ужаны дась. Юрий Маслюков тросгес тырошоз промышленность бордын, асьме предприятиослы юрттоз, соос мынам округам шедё ке но. Мон дась "аслам" бырйисьёсылэн сюлмаськонъёсынызы артэ чакланы Завьял но Воткинск ёросъёсысь гуртоослэсь куронъёссэс. Николай Сапожников но милемын уртче ужалоз..." "Кытын но ма каре али азьлоез депутат Михаил Кошкин, уг тодӥськы. Но солэсь кутскем ужзэ азьланьтыны дась. Мон оскисько, люкам опытэз одно ик уже кутоно, республика азьын сылӥсь ужпумъёсты быдэстонэ азьлоосызлы но, алиосызлы но депутаъёслы ӵош пыриськоно..." "Нациослэн ужъёссыя комитетлэн кивалтӥсезлэн воштӥсез луисько бере, калыкъёслэсь кусыпъёссэс радъянэ амалтэк пыриськоно луоз. Чечня пумысен ке верано, таиз ужпум национальной гинэ ӧвӧл ни, со бадӟым политической ужпум. Соин ик ваньмызлы ӵош кариськоно. Матысь дыре Думаын нимысьтыз группа кылдытозы, отчы пыртэм депутатъёс Кавказэ мынозы..." "Комитетын эскероно уж сярысь пусйыса, тазьы шуысал: ми ум малпаське чылкак вылез бордысен кутскыны, уго азьлояз ӧтчамын ужам депутатъёс тэк ӧз пуке, унояз проектъёс эскеремын ни. Соосты туала ӵектонъёсын ӵош кары_�са дэмлалом Думаын эскерыны..." "Жаль, но Федеральной Собранилэн улӥ палатаяз нылкышноослэн лыдзы пумен кулэсме. Нырысетӥяз созывын соос 50-лэсь ятыр вал, кыкетӥяз - 43, таяз 35 гинэ быръемын. Озьы ке но, кышномуртъёсты кивалтонлэсь уг палэнто. Одӥгез быръемын спикерлы воштӥсе, кӧняез ке - комитетлы тӧрое. Ми ум тыршиське висъяськыны, ужалом воргоронъёсын ӵош..." Светлана Смирновалэсь юазы улэм-вылэмез сярысь но. Солы сётэмын "Россия" гостиницаысь номер. Уждун федеральной министрлы мында - 9 сюрс анет - тупатэмын. 3600 манет аванс басьтэм ни. Ӵукназэ мон уг сиськиськы, пусйиз депутат, нуназе - Думаысь столовойын, ог 30-50 манетлы, ӝытсэ - номерын. Чайник но басьтӥ ни, мыньпотыса вераз Светлана Константиновна. Пресс-конференция ортчытон нулаз С.Смирнова вуылӥз Сарапулэ, пумиськиз отысь кивалтӥсьёсын, ӵуказеяз кошкиз вордӥськем палъёсаз - Дэбесэ. Таяз арняе ужа Думаын. Быгатӥз ке, вуылоз Краснодарын ортчоно совещание. Со сӥземын луоз гурт хозяйстволы. И.Лебедев. Будон аръёс Ӵапак нырысетӥ колхоз кылдон вакытэ, 1929-тӥ арын 3-тӥ сентябре, Корепановъёслэн бадӟым семьяязы вордскиз дас витетӥ адями. Бубызы, Сергей Васильевич, юртъерзэ ӝикыт утялтӥз. Трос пудо сюдӥз. Бускеленыз ӵош возиз тӧлӥськон но кутсаськон машинаос (тазэ вал бергатӥз). Сӥзьыл, бусы ужъёс бырем бере, Сергей Васильевич юрттылӥз Глазын улӥсь ӵыжы- выжыезлы Иван Будинлы. Соос гуртъёсысь басьязы етӥн кидыс, мертчан, куж. Валамон ини, куанеръёслы озьы "узырмыны вырон" ӧз кельшы. Соос огаз корка лушкем люкаськыса кенешизы Сергей Корепановез кулак карыны. Вынъёссэ-сузэръёссэ кайгулэсь утён вылысь, Сергей Корепанов яна потыны малпаз. Мукет азе кошкем Абрам Суходоевлэн корказ сэрытак нуллӥз котырзэ. Огаз нуналэ соос доры вуиз кулакъёсты шараянъя комиссия. Районысь егит кышномурт- комсомолка кивалтэмъя гожъязы вань узырлыксэс но чыры-пырызэс. Дӥсез, пыдкукез, посудаез ворсазы кеносэ, ӧс борды ошизы кык тунгон. Нуизы валзэс, скалзэс, дас кык воз тысьсэс. Валамон ини, улыно-вылыно кенос но, азбар но, выль юртъерез ӝутыны дасям коръёс-пулъёс но вань "калык кие" выжизы. Ӵуказеяз нянь пыжыны немырлэсь. Пызь пунэмазы бускельёслэсь. Та вакытэгес ик газетъёс ивортылӥзы адямиосты укыр вӧсь карем сярысь (ӟуч сямен - перегибы на местах). Сергей Васильевич олокӧня пол ветлӥз райисполкоме, жаляны курыса. Татын ужа вал ӵыжы-выжыез Марк Андреевич. Юртыны ӧз быгаты. Ярам коть, "кулакез" палэнэ келяны чаклам адямиос пӧлысь палэнтӥзы. 1933-тӥ арын Корепановъёсты но колхозэ кутӥзы. Сергей Васильевич но кышноез Евдокия Федоровна чаляк сюризы ударникъёс но стахановецъёс радэ. Но соосты, кулак выжыос шуыса, пыр вӧсь карылӥзы. Куать аресъем секыт висись нылзэс больницае келяны вал ӧз сётэ. Кышномурт нылоксэ ки вылаз кык пол Глазове нуллӥз. Мискинез кулонлэсь утьыны ӧйлась. Пичи Валерикез но та аръёсы пӧртэм кылъьёс курадӟытӥзы. Улэп кылиз ке но, соослэн бервылъёссы вань улятозязлы кылизы. Валесын погылляськыны пичиослы но маза ӧй вал. Пудо утялтоно, пу корано, картош мерттоно. Школаын Валерий ӟеч дышетскиз. Огаз шулдыр гужем нуналэ солы сётӥзы ньылетӥ классэз йылпумъям сярысь свидетельство но ушъян грамота. Собере ик дышетӥсь Алевтина Алексеевна ивортӥз война пуромем сярысь. Гуртысь данакез воргоронъёс оже кошкизы. 1941-тӥ арын Валерийлэн Сеня нюняез быриз. Бубызэ возизы Иж-Балезино чугун сюрес лэсьтонын, отӥяз - Златоустысь огаз заводын. Нылпиос сярысь вань сюлмаськон усиз мумызы вылэ. Трудоденьёс понна сётэм нянь кык толэзьлы но ӧз окмылы. Сисьмем картош, пушнер, пот - номыр но ӧз мыльылы. Коӵышысь ог кызь пинал дышетскыны ветлӥз тямыс иськеме - Качкашурысь школае. Сизьыметӥ классэз йылпумъяны быгатӥз ньылез гинэ. Берпуметӥ нуналъёссэ дышетскыкузы, быдэс классэз урок бере кельтӥзы но шуизы: - Тӥледлы ваньдылы пыроно комсомолэ. Пукселэ но гожъялэ анкетаос. Туж трос юанъёслы валэктон сётоно, пе. Янгышаськод - выльысь гожъяно. - Анкета дасятэк, нокин но дораз уз берты. Нош билетъёс сётом яке комсомоллэн горкомаз, яке школаын - сӥё-дано ужрадын. Бер ӝыт гинэ Валерий дораз вуиз. Мумиз ӧз жаля - тышкаськиз комсомолэ пыремез понна. Нокызьы вунэтэмез уг луы кулаке поттэмзэс. Та ужен кивалтӥз уга кышномурт- комсомолка. Зэм, дышетскон ар быриз - билетъёс ӧз вуэ. Валера малпа вал ремесленное кошкыны. Отын ӟеч сюдӥзы но дӥсязы. Мумиз ӧз лэзьы: мын, пе, педучилищее. Нош пияшлэн дышетӥсь луэмез чик уг поты. Сюлэмыз уг кыскы сельхозтехникуме но. Нокыӵе мылкыдтэк Корепанов вуиз счётоводъёсты-бухгалтеръёсты дасян курсэ. Шумпоттэ огез гинэ: нуналаз ӝыны колды нянь сёто. Сое 1945-тӥ арын быдтӥз но колхозаз чотасьын ужаз. Вормон нуналэз мадьыны кыл уд шедьты. Данакез серекъяло но кырӟало. Матысь адямизэс ыштэмъёс зар-зар бӧрдо. Война вакытэ сюлмо тыршемез понна дас вить аресъем Корепановез медален пусйизы. Мар сярысь но ӧз малпаськылы соку пиёк! Оло, мыноно музъем мертасе? Гуртазы землемер вуиз но Валералы кыӵе ке гумы пыртӥ учкыны лэзьылӥз. Оло, бырем Сеня нюняезлэсь ужзэ азьланьтоно? Со быгатэ вал вуриськыны, суреданы, балалайкаен, гитараен, гармошкаен шудыны. Огез сюрес пияшез котьма ке но вуттӥз сельхозтехникуме. Вормон бере но улон сокем ик ӧз капчия. Валерий дышетскиз но ужаз я ветлечебницаын, я чугун сюрес вылын. Киыз суреданы пишмытэ бере, клубын пӧртэм ӧтёнъёс гожъялляз. Музъем мертасез Гурт хозяйствоя министерство ысъяз пӧртэм ёросъёсы. Бератаз выжтӥз Пониное. Со соку нимаз район вал. Дышетскыны Корепанов пыриз Пермьысь Гурт хозяйствоя институтэ. Ваньмон дырыз трос ӧй вал ке но, районысь "Выль улон" газетэ гожъяз очеркъёс но кылбуръёс. Редактор дэмламъя, куд-ог ужъёссэ келяз "Молот" журналэ. Валэктон вуиз ньыль бам вылын. Нырысетӥяз пусъемын маке-маке умоез, куиняз - шекъёс гинэ. Вань гожъямзэ пияш гуре куштӥз но куинь ар ӵоже кияз ручка ӧз кутылы, шуыны луоз. Комсомол ласянь но шуг-секытъёс кылдӥзы. Оглом ВЛКСМ-лэн Понино райкомез азьмынӥсь лыдъяськиз. Пӧртэм аръёсы татын кыдазы "Удмуртиысь комсомолец" газетлэн редакторез, компартилэн Дэбес райкомезлэн нырысетӥ секретарез, Глазов пединститутысь доцент Ливий Ураков, тазалыкез утёнъя министр, Ижысь Медициная академиысь профессор Владимир Савельев, гурт хозяйствоя министрлэн воштӥсез Аркадий Караваев но мукетъёсыз. Нош соку... Пӧсь вераськон ӝутскиз соку комсомоллэн Понино райкомезлэн бюрояз. Бератаз кин ке дэмлаз: - Сыӵе муртлы комсомолын инты ӧвӧл! Улляно сое! - Уллялэ! Туннэ ик заводэ кошко. Вань эшъёсы отын, - Валерий Корепановлэн синъёсаз чилектӥзы ваменэс тылсиос. Ӟырдам йыръёсты секретарь кӧня ке зӥбломытӥз: - Дугдэ ай, дугдэ, эшъёс. Ойдолэ сое огпол кылзом на. Мед вералоз, малы Валерий комсомоллэсь люкиськиз. - Мар отын веранэз, - лулӟиз Корепанов. - Дышетскыны пырай дышетӥсе но счетоводэ... Собере йылпумъяй совхоз-техникумез. Республикаысьтымы Гурт хозяйствоя министерство монэ, егит шуыса, ялан ысъяляз кыдёкысь гуртъёсы. Озьы ик люкиськи комсомоллэсь. Табере тани ыстӥзы Пониное. Музъем мертасе. - Малы бен вормытъяськиськод, заводэ кошко шуыса? - Янгыш мон. Валасько ук сое. Нош тӥ соку ик кылпум ӝутӥськоды комсомолысь уллян сярысь. Со ведь адямиез одӥг урамысь мукетаз поттон ӧвӧл. - Ярам, - шуиз секретарь. - Таӵе ӵектон вань, Валерийлы, учётной карточкаяз гожтытэк, выговор ялоно. Ассэ ужын мед возьматоз. Райисполкомысь сельхозотделын егитъёс трос. Нош художественной самодеятельностьсы аналтэмын. Сое улӟытоно. Тӥни сыӵе общественной уж сётӥськом тыныд, комосомлец Корепанов. Мукетъёсыз соглаш луизы. Егитъёслы Валерий возьматӥз аслэсьтыз "Кысык дыре" шуыса нимам пьесазэ. Пьеса юрттӥз районын нырысетӥ агитбригада кылдытыны. Гуртэ лыктыса, егитъёс возьматъязы "улэп" газет" шуонзэс. Отӥяз сюризы шулдыр кырӟасьёс, арганчиос, эктӥсьёс. Нырысетӥ агитбригада вуылӥз районысь вань гуртъёсы. Егитъёс кичӧлтон сётӥзы эктон площадка лэсьтыны. Мӧйыос соослэсь сюлэмзэс ӧз валалэ. - Эктонэн йырин ӧвӧл ай. Корка пуктыны но пулъёс уг тырмо. Тямыс кузя пиос уж бере, уин, тямыс иськемысь пулъёс вуттӥзы. Озьы эктон площадка кылдӥз. Нырысетӥ площадка. Кӧня ке толэзь ортчыса, Валериез бырйизы комсомоллэн райкомезлы членэ, райкомлы кыкетӥ секретаре, собере - нырысетӥ секретаре. Пӧртэм ужпумъёс борды басьтӥськылӥзы комитетэ быръем активистъёс. Егитъёслэсь ужазинлыксэс ӝутон сярысь кенешыса, асьсэос мыно нюлэскы пу дасяны. Соослэсь шутэтскон дырзэс умой радъян пумысен верасько но культура юртын тодматско выль эктонъёсын. Спорт ужез кужмоятыны мылкыд карыса, пленум бере ик азбарын волейболэн шудыны дышетско. Комсомолецъёсты ӟеч сямъёслы дышетон улсын гуртъёстӥ ветло но аракы пӧзьтӥсьёсты шараяло. Огез кичӧлтон емышъёссэ сётэ соку ик, мукетыз - трос аръёс ортчыса. Советской Союзлэн Героезлы Татьяна Барамзиналы сӥзем памятниклы коньдон люкан. Пудо сиён дасянъя воскресникъёс. Пониноысь сельхозвыставкае экспонатъёс дасян. Егитъёсты выльвыл музъемъёсы келян. Огвакытэ паськыт вӧлмиз таӵе ӧтён: - Котькуд гуртын мед ӝуатскоз Ильичлэн лампочкаез! Кызьы егитъёс кылёзы та удыслэн палэназ? Огаз гуртын шурез тымо, мукетаз юбоос пуктыло, куинетӥяз езъёс кыскало. Элекутрокужым вуиз Пудвае, Изошуре, Полдарае, Усть Пызепын кылдӥз трос хозяйствоосын ӵош пуктэм электростанция. Районын нырысетӥез. 1957-тӥ арын Валерий Корепановлы шуд усиз дуннеысь егитъёслэн но студентъёслэн фестивалязы ветлыны. Матысь эшеныз, соку Глазовысь райгазетын ужась кылбурчиен Флор Васильевен ӵош соос пумиськылӥзы мукет странаосысь куноосын. Соку лэсьтэм фотооссэ Корепанов туннэ но уте самой дуно кузьымъёсты сямен. Комсомоллэсь райкомзэ ВЛКСМ-лэн обкомез пусйылӥз грамотаосын но мотоциклэн. Пӧртэм семинаръёсын Валерий Корепановез курылӥзы ужан амалъёсыз сярысь мадьыны. Берлогес та пумысен малпанъёссэ инъяз ньыль чуре: Тон эн лыдъя астэ визьмогес, Лыкты, кур визькенеш калыклэсь. Кар озьы тодэмдэ узыргес, Данъяса коллектив кужымез. Кын корт куртчон Газетъёсын потӥз писательлэн Валентин Овечкинлэн "Асьме киосын" статьяез. Отын со районысь кивалтӥсьёсты ӧтиз хозяйствоосы мыныны. Валерий Сергеевич Корепановлы дэмлазы Понино районысь ик колхозэз. Нош со уйвӧтъёсаз ӵем адӟылӥз Глазов дорысь вашкала Коӵышгуртсэ. Бератаз Корепанов вуиз вордскем палъёсаз. Лябӟем Ильич нимо колхозэз соку огазеязы "Нырысетӥ май" сельхозартелен. Кӧня ке гуртъёсысь удмуртъёс, бигеръёс но ӟучъёс люкаськизы председатель бырйыны. Егит муртэ оскытэкгес пумитазы ке но, Корепановез кивалтӥсь каризы ик. Кытчы интыяськоз правление? Калык та пумысен огыр-бугыр луоз шуыса малпаз Корепанов. Нош Тат. Парзи гуртын улӥсьёс ӧз вожмаське. Огкылысь дэмлазы: - Контора Коӵышын медло. Нырысетӥ вераськоназ ик Валерий Сергеевич шуиз: - Коӵышын ӝыны гурт - мынам ӵыжы-выжыосы. Соос мон пыр медаз утчалэ капчи ужез но лякыт улонэз. Котькудӥз мед сюлмаськоз хозяйствоез ӝутыны. Ильич нимо колхозлэсь малы чутэмзэ кивалтӥсь чаляк валаз. Тат. парзиос кысык вакытэ, самовар кутыса, уже мыно ӵукна куинь часэ. Коӵышгуртъёс мырдэм но кызьы пото тямысэ. Тылпу эскерон каланчаын пукись пересьлы председатель шуиз: - Татын час вань-а? Ньыль часэ ӵукна гырлы шуккод. Соя вань котыр гуртъёс уже мынозы. Таӵе аспӧртэм "гурт гудок" бере самой азьтэм адямиос но валесазы ӧз погылляське ни. Корепанов огаз кылбураз гожтӥз: Нянь ке вань, Кузь нунал но потэ вакчигес. Нянь ке вань, Секыт уж но потэ капчигес. Нянь бен нырысь-валысь сокем ик ӧз удалтылы. Уката ик тросэз тус-тас луылӥз ворттыку но куасьтыку. Соин ик Валерий Сергеевичлэн дэмламезъя пуктэмын вал туала иншыр. Районын нырысетӥез. Тужгес ик уно шуг-секытъёс вал пудо вордонын. Тат. Парзиын сылӥз пулэн липем но автопоилкаен гид. Мукет гуртъёсын соос ваньзы куроен шобыртэмын. Кивалтӥсь соку ик басьтӥськиз выль гидъёс пуктон борды. Парсьёсты возьыны кутскизы бадӟымесь уллёосын. Школаосын дышетскисьёс будэтыны ӧдъязы курег но кролик. Уката но паймытӥзы ыжъёс. Странаысь ВДНХ-ын соосты пусйизы медален. Районын нырысетӥоссэ. Огпол, больницаын кылльыкуз, председатель ваньмиз азьпалан улон сярысь пыр-поч малпаськыны. Трудодень туннэ нуналлы уггес тупа ни кадь. Пайда-а сётӥськод тон аслад удысад, изъян-а ваиськод - со люкаське но люкаське. Куд-огез малпаськыны кутске аслыз тросгес капыртон сярысь гинэ. Кулэ мукет амал. Корепанов бугыръяськиз уно книгаосын, вуылӥз Удмуртиысь кӧня ке колхозъёсы. Вань тодэмез-адӟемез люкаськиз одӥг кылэ - хозрасчётэ. Соку та кыл тросэзлы воксё тодмотэм вал. Кивалтӥсь дэмлаз адямиослы уждун коньдонэн тырыны. Кытысь сое шедьтоно? Валерий Сергеевич райцентре мынӥз коньдон курыны: - Юрттӥды ке, ми усьтом кирпич шуккон завод но столярной цех. Тыронмес чаляк берыктом. Ӧз валалэ Корепановез. Укыр вылӥетӥ лобаськод, пе. Котькуд адями янгышалля. Оло, председатель зэм но умойтэм сюрес бырйиз? Оло, юнме поромытэ районысь кивалтӥсьёсты? Оло, токма малпаське ӧвӧлтэмзэ вань карон сярысь? Бератаз со усьтӥз ӵужон дасян цех. Таизлэн пайдаез кирпич шуккон заводлэн мында ӧй вал ке но, хозрасчётэ колхоз выжыны быгатӥз. Районысь хозяйствоос пӧлын нырысетӥез. Кӧня ке коньдон люкаськем бере, правленилэн членъёсыз малпаськыны кутскизы олома но лэсьтон сярысь. Валерий Сергеевич дэмлаз: - Асьмелы кулэ котьма - гид но, мастерской но, клуб но. Озьы ке но, нырысь ик пуктом нылпи сад. Жаль, школалы коньдонмы уг тырмы на. - Со тэтэ карисьёс ку ай колхозникъёс луозы? Пудоез али сюдоно, тракторъёсты али тупатъяно, - шуизы куд-огез. Югдурез кема валэктӥз председатель. Туннэ нуналэн гинэ улыса, пе, асьмелэсь пуконо ваймес коралтом. Нош пиналъёс понна быдтэм коньдон ӟечен ик берытскоз. Озьы колхозын кылдӥз нылпи сад. Районысь гуртъёс понна - нырысетӥез. Берлогес колхоз аслаз кужыменыз ӝутӥз спортзалэн школа но культура юрт. Ул, дышетскы, кужым люка, вуоно колхозник! Шуг-секытъёс, малпаськонъёс, куд-огеныз даллашонъёс пытьытэм уг ортчо. Кивалтӥсьлы операция лэсьтоно луизы. Бератаз врачъёс секыт ужлэсь алӥзы. Корепановлы сётӥзы "дано колхозник" ним но телевизор. Колхозэн кивалтыны кутскиз музон мурт. Зэм, Валерий Сергеевичез городэ кошкыны ӧз лэзе - бырйизы Коӵыш сельсоветлэн исполкомезлы председателе. Вылласянь учкыса, со но бен кыл кутыны кулэ кадь колхозын югдур понна. Нош правленилэн кивалтон амалъёсыз - аслаз, сельсоветлэн - аслаз. Сюлмыз пӧсьвуаськыса учкылӥз Корепанов хозяйство шоры. Колхозысь выль председатель доры бульдозерист лыктэ, ӝӧк вылаз мыжгыса черектэ: - Толон лумбыт ужай! Уждун ӝынызэ гинэ тыриллям. Будэтэ! Председатель кылзӥське. Оло тодэ, оло уг, та механизатор толон лумбыт юиз но, тракторез юнме гуретӥз шуыса. Контораын пукисьёс тямыс муртлы йылӥзы ке но, адямиос кивалтӥсьёслэсь кылзӥськемысь дугдӥзы. Районын выль председателез ушъяло. Тужгес ик - трос сӥль вузамез понна. Солэсь амалзэ тодыса оло тодытэк, вылды. Данак хозяйствоосын специализация ортчытон вакытэ Коӵыше вуттӥзы пӧртэм интыосысь скалъёсты. Тазаоссэ вордыны татчы ик кельтӥзы. Ӟызыоссэ сӥльлы келязы. Озьы колхоз данэ потӥз. Мурт чотын весь азьмынӥсьын уд ветлы. 1960-тӥ арысен вань планъёссэ быдэсъям хозяйство пумен бере кыльыны ӧдъяз. Корепанов кошкыку, солэн счётаз вал ке 100 сюрс манет, вить арскын пунэмен тыронэз вуиз куинь но ӝыны миллион манетозь. Тӥни сыӵе югдуре выль пред кошкиз. Бен-бен, кутӥз но колхозысь тӧлӟиз. Янгышъёссэ валаз оло ӧз, соос сярысь калыклы шара вераны ӧз дӥсьты. Секыт мылкыдын берытскиз Корепанов колхозэ. Адямиос лекомемын. Кидыс ӧвӧл. Пудо сиён уг тырмы. Ӟег бусыос кулэстэмын. Со интые олома но киземын. Оглом соос пайдаёесь, дыр. Нош татын пашмиллям, жаг турынэн ӵакмиллям. Корепанов кутскиз вань удысъёсы оскымон адямиосты пуктылыны. Контораын пукисьёсэсь лыдзэс кулэстӥз. Институтэз йылпумъям агрономез Ростислав Аркадьевич Ельцовез, осконтэм шуыса, мызон колхозын огшоры уже выжтӥллям. Сое Корепанов ас дораз валтӥсь агрономе дэмлаз. Хозяйствоысь коммунистъёс Ельцовез партие кутӥзы. Берлогес со луиз районысь самой устоез агроном. Ильич нимо колхозэ азьвылгес вуиз вал Глазовысь совхоз-техникумез йылпумъям нылаш Кифая Касимова. Вужез председатель сое техник-строитель карем. Огпол татчы лыктӥллям медъяськем "шабашникъёс". Суп-сап лэсьтэмзэс Касимова медаз "адӟы" шуыса, солы быдэс чемодан емыш вуттӥллям. Таӵе "кузьымез" техник-строитель ӧз басьты. Соин сэрен азьло председатель азьын уродэ усиз. Кыӵе ке муг шедьтыса кошкыны дасяськиз гинэ - председатель воштӥськиз. Кифая луиз партие членэ кандидат. Кивалтэ колхозысь комсомол организациен. Сяська кадь улӟиз адямиед! Нош мар но уг малпа лэсьтӥськонэз азинтон ласянь! Табере татын нокинэ но медъяса уг уло ни. Школаез алигес йылпумъям пиос огазеяськизы стройбригадае. Берло дыре гинэ ӝутэмын пудо гидъёс, ю тысь но удобрение возён складъёс. Хозяйствоысь 190 коркаос пӧлысь 43-ез - колхозлэн. Унояз ву пыртэмын. Тат. Парзи пӧрмиз районысь самой чебер гуртлы. Коӵышын ваньмыз сямен юртъёс котыртэмын сад- кенеръёсын, лачакез шуккемын пулэн. Сое колхоз дунтэк висъя. Огпол председатель питомникысь вуттӥз кӧня ке модос улмопу. Вожмаськыса ур-вар карозы кожа вал - нокин ӧз басьты. Куд-огезлы кужмысь сямен сётӥз. Табере тросэз адямиос емышо сад будэто ни. Учкисько председатель шоры. Солэсь пӧрмысал, оло, усто кылбурчи (али но гожъя). Оло - артист (колхозлэн хораз кырӟа). Оло - журналист (райгазетлэн тодмо селькорез). Оло - партийной ужась (вал районысь устоез пропагандист). Оло - советской ужась (вал райсоветлэн мыло-кыдо депутатэз). Нош со бырйиз нянь поттон удысэз, дано сюресэз. Валерий Сергеевичлэсь дано нимъёссэ но наградаоссэ вераса уд быдты. Туннэ но тэк пукыны уг чида. 1988-тӥ арын кенешемын вал Коӵышын музей кылдытыны. Вуоно араз со усьтӥськиз. Корепанов кивалтэ музеен но ветеранъёслэн огазеяськонэнызы. Данъяськымон адямиос татын тачак. Коӵышын уло районысь устоосыз азьвыл механизаторъёс Геннадий Михайлов но Александр Корепанов, республикаысь дано дышетӥсь Анна Чупина но калыкез дышетонъя отличник Анна Корепанова. Школаез йылпумъязы Россилэн биатлонъя чемпионэз Виктор Гаджиев, кылбурчи но тодосчи (учёной) Виктор Шибанов, кышкасьтэм офицер Сергей Федоров. Зэм, улон татын но кижи-кожи кошкылэ. Кулэсме калыклэн лыдыз. Музъем пумен ичигес ваньбур сётэ. Нош коӵышъёс азьланезлы осконзэс уг ышто. А. Шкляев. Глазов район. "Пӧсь интые" уз келялэ Арлэн кутсконаз Чечняын ожъёс эшшо но зол пуромизы. Россилэн армиез боевикъёсты пачкатӥз. Карысьтызы дуринчиосты пурӟытэм выллем, чеченъёс шимес лекъяськыны ӧдъязы. Грозныйлэсь котькуд метрзэ утьыны выризы ке но, лымшор гурезьёсы чигнано луизы. Ӟырдыт ожъёс но выжизы Ичкерилэн шор карысьтыз лымшор палаз. Ӵапак со вакытэ Владимир Путин Россия Федерацилэсь запасын лыдъяськись гражданъёссэ военной сборъёсы басьтон сярысь Указ поттӥз. Со пумысен олокыӵе но малпанъёс вал. Я чеченъёсын ожмаськыны солдатъёс уг тырмо, я татысь хозяйствоез выльысь ӝутыны дунтэм кужым кулэ. Россиын армиез валтӥсь интые пуктыны туртто шуыса но верасьёсыз вал. Указ пумысен валэктонъёс сётыны мылкыд кариз Удмурт Республикалэн военной комииссариатысьтыз 3-тӥ отделлэн кивалтӥсез полковник МИХАИЛ НОВОСЕЛОВ. - Михаил Александрович, Указ поттэмлэн кыӵе мугез? - Милям малпаммыя, та сборъёс чакламъя ортчытӥсько. Нимысьтыз кыӵе ке югдур тупатон вылысь со малпамын ӧвӧл. Соин кышканы номырлэсь. Кутэмын "Воинской обязанность но военной служба сярысь" Закон. Со вылэ пыкиськыса, 1998-тӥ арын 26-тӥ апреле обороная министр приказ поттӥз. Арлы быдэ косэмын запасын сылӥсь гражданъёсты сборъёсы ӧтчаны. Одӥг адямиез кык толэзёзь гинэ возьыны луэ. Нош запасын сылэмзэ оглом басьтӥськод ке, та дыр куспын адямиез куать пол военной сборе басьтыны быгато яке со 12 толэзь луэ. - Кинъёс запасын сылӥсьёс пӧлы пыро? - Нырысетӥ разрядъя 50 арес тырмымтэ пиосмуртъёс: солдатъёс, матросъёс, сержантъёс, старшинаос. Вань военно-учетной специальность (ВУС). Со воштӥське, техника выльдӥськемъя. Воштӥськонъёсын ӵош адямиосты но выль специальностьёслы дышетыны кулэ. Запасын сылӥсьёс милемлы кулэ ожмаськон дыръя. Соослэсь уго выль частьёс кылдылозы. Соин военнообязанной котьку дась луыны кулэ пӧртэм югдуръёслы. Нош Путинлэн выллем Указъёс-приказъёс котьку потыло. Азьвыл соос нокинлэн син шораз ӧз йӧтылэ. - Озьыен, военной сборъёс котькуд ар вал? - "Вал" шуыны пырак уз луы. Уксё ӧвӧлэн, военкоматъёс кыкен-куинен гинэ басьязы. Тани С.Ястржембский ивортӥз Россиын бадӟым сборъёс ог дасо аръёс пала ӧй вал ни шуыса. Удмуртиын берлозэ ортчытӥзы сизьым ар талэсь азьло. Миым запасысь кык офицеръёсты ӧтчаны быгатӥм ик. - Указлэн 2-тӥ но 3-тӥ пунктаз "для служебного пользования" гожтэмын. Кызьы сое валано? Та кылъёс чакласькыны косо кадь. Собере вераськонъёс вань Удмуртиысь 20 сюрс муртэ, пе, Чечнялэсь хозяйствозэ ӝутыны келялозы? - Таӵе вераськонъёс быръёнэн герӟаськемын. Путинлы пыдзэс пуктыны туртто. Эшшо огпол верасько на: военной сборъёс Чечняе келян понна уг ортчытӥсько. Ваньмыз азьло чаклам планъя лэсьтӥське. Мар со "для служебного пользования"? Отын милемлы директиваос чакламын. Кыӵе ВУС- ъёсъя адямиосты дасяно, кытын сборъёс ортчозы, кӧня уксё висъямын. Но ваньзэ шараяны уг луы. Шонер валалэ. "Тон мар кариськод?" - юалозы мынэсьтым. Тросэз журналистъёс малпало: уг верало бере, маиз ке но вань. Мынам ватэме уг поты. Республикаысьтымы 400 пала запасысь муртъёсты басьтыны чакламын. Со пӧлысь 150-лэсь тросгес офицеръёсты. Нырысетӥоссэ январе-феврале ӧтьыны кулэ вал ни. Апрельлы кельтӥм. Соку 18 нуналлы финансистъёсты басьтом. Сборъёс ортчозы Казаньын, Ульяновскын, Оренбургын, Саратовын, Самараын, Ижевскын, Сарапулын, Чайковскийын, Тоцкын. - "Тӧдьы билет" сётэмъёсты басьтоды-а? - Кин тазалыкез лябен армие ветлэмын ӧвӧл, соосты ум йӧтылэ. Военнообязанной кышномуртъёсты но ум басьтэ. Ас мылкыд каремзыя мынӥсьёс но луозы, дыр. Соку адямилэсь дышетскемзэ учком, психологизэ. Оглом вераса, яралоз-а, уз-а милемлы. Туж оскем потэ вылэм полковниклы. Зэм но таӵе военной сборъёс армимылэсь ожмаськыны быгатонлыксэ ӧжыт ке но ӝутысалзы, дыр. Мукет муген ортчытыны уг малпало ке. Газетысь но телевидениысь кылыны луэ, В.Путин мукет Указ дася ни шуыса. Военной кафедраен вузъёсты быдтэм пиосты армие басьтозы. Армилы тужгес но уг тырмо лейтенантъёс. Сое возьматӥз Чечняын ожмаськон. Новоселов полковник вераз, сыӵе Указ зэм но дасяське шуыса. Но оскытӥз та выллем приказъёс котькуд ар, пе, пото. Дышетсконзэс йылпумъямъёсты ваньзэс уг басьто. Кудзэ-мыдзэ гинэ. Кызьы шуиз полковник, журналистъёс ӧвӧлтэмез вань арыны зол гинэ ярато. Ма бен, дыр возьматоз ай. Вераськиз А.Андриянов. Ӝуйы будэ кыз тэльын Та чебер, котьку но вож писпуэн асьмеос герӟаськиськом-эшласькиськом пичи дырысен пересьмытозь. Туала покчиос Выль арез син азязы уг ик пукто вож кызтэк. Уката ик - городын улӥсьёсыз. Толалтэ гинэ уг шумпотты асьмеды вож эшмы. Куартолэзе кыз сётэ нырысетӥ ческыт сиён - кызаузы (кыз узы). Зэм но, солэн тулыс ӝужам сяськаез бордаз кыске яркыт горд буёлэныз но узы шӧмыныз. Нош ачиз, зэмос узы, ӝужа кызлэн шундыё, лымшор урдэсаз. Кызьы-о уд яраты та писпуэз? Витьтонэтӥ аръёсы шаерамы вал кызлэн нимыныз герӟаськем сизьым гурт. Зэм, соос ӟуч кылын мукет сямен гожтӥсько. Солы паймонэз ӧвӧл: уно гуртъёсмылэн но интыосмылэн нимъёссы мыдланьтэмын, удмуртъёс соосты али но вашкала сямен верало ке но. Нош Сюмси ёросысь Вылынгуртысь кык чебер арамалы та писпулэн нимыз сётэмын. Дас кыз но Вӧсяськон кыз улын но котыразы мар гинэ ӧз будылы! Узы-боры, эмезьпуд, шупуд, пашпу, палэзьпу, намер, легезьпу, губи котьку шупоттылӥзы та пала ветлӥсьёсты. Табере ӧвӧл ни Дас кыз но, Вӧсяськон кыз но. Та писпуосты, отысь мукет будосъёсты бекыртӥзы "муэз умоятӥсьёс" (мелиораторъёс). Ю-нянь отын ӧз ни удалтылы, лудъёс аналтэмын, чеберзы быриз. Ортчем аръёсы вань гуртъёслэн Вӧсяськон лудазы (Кереметазы) Бадӟым кыз луылэ вал. Со азе султыса, вашкала удмуртъёс вӧсяськылӥзы-куриськылӥзы Быдӟым Инмарзылы. Та сям али но быремын ӧвӧл на Башкортостанысь, Татарстанысь но лымшор пал шаерысьтымы куд- ог удмурт гуртъёсын. Ортчем дауръёсы калыкмы ӵашъем кызлэсь Быдӟым крезь лэсьтылӥз. Озьы кызлэн улонэз трос аръёс ӵоже кыстӥськылӥз на. Асьме калык тужгес яратэ та писпуэз лэсьтӥськонын кутӥськеменыз валче. Азьло аръёсы вань коркаос, гидъёс, кеносъёс, мунчоос но пӧртэм юртъёс кызтэк-пужымтэк уг ӝутӥсько вал. Эстӥськонлы но трос пумо арбериослы кызлэн небыт пулэз мынэ. Туала улонын та писпулэн кулэлыкез уката будӥз. Солэн сирезлэсь пужым сирлэсь сямен ик дасяло скипидар, канифоль, сулэзлэсь - пудо куэз буёлан но юнматон-умоятон суретъёс, вож лысэзлэсь витаминъёс но пудо сиён. Сизьымдонэтӥ-тямыстонэтӥ аръёсы милемды, городын улӥсьёсты, толалтэ ысъяллязы Якшур-Бодья но Завьял ёросъёсысь колхозъёсы кыз лыс тӥялляны. Соосты векчиятыса тыро вал силос пӧлы. Сыӵе сиёнэн утялскыса, скалъёс тросгес йӧл сётъязы, ӧжытгес висьылӥзы. Гуртысьтымы Мохов, Поздеев, Сморкалов, Возисов, Филиппов, Соколов, Ильиных, Будин выжыослэн коркаоссы бадӟымесь вал. Тямыс-дас укноё ог дас вить пала коркан улӥзы- вылӥзы ужез яратӥсь, бадӟым семьяё, узыр адямиос. Одӥг корка гинэ дас куинь кузя тэрылӥзы. Али шуэм сямен, куинь семья огинын улэ вал. Со юртъёс туж валаса ӝутэмын луо вылэм. Соин, чик изъянмытэк, куатьтон-сизьымдон ар ӵоже сылылӥзы. Корка кема мед улоз шуыса, лэсьтӥськон понна толалтэ кораллязы кот, нюромем тэльёсысь кызъёсты. Валамон ини: пичи семьяё, начар улӥсь кузёослы сыӵе ужез быдэстыны шуггес вал. Соин ик соос пичигес коркаос пуктылӥзы, писпуосты туж бырйытэк. Озьы юртъёссы чалякгес сисьмылӥзы. Ӝыны палаез удмурт музъеммы тэльёсын шобырскемын. Улон таӵе ик луиз ке, нюлэсъёс уката бадӟымзэгес музъемез шобыртозы. Али ик ини угось сю сюрс гектарлэсь уноез колхоз лудъёс аналтэмын - отын будо ини выль писпуос. Соос пӧлын тросгес куаро писпуос. Ӟечгес луысал, отчы юри мерттысалыд ке лысо писпу (пужым, кыз, кедрапу) яке - мульы сётӥсьсэ. Озьы музъемлэн пайдаез будысал. Кыз тэльын дасяло небыт, шунытэз зол возись ӝуй. Вылӥ ӟечлыко ӝуй вылын ӝутэм корка шунытэз кема возе. Та писпуо нюлэскын удалтэ кудымульы. Нош пӧлаз пужымъёс ке вань - ягмульы но пӧртэм губиос. Кыз тэльысь туж шер бертыло буш киын. Тэляны-пӧйшураны яратӥсь отысь вайылэ сяла, дукъя, тур, луд кеч. Ӝожомыса верано луэ: нюлэсъёсамы азьло трос кыз, пужым будэ вал. Али соос кулэсмизы. Нош вань писпуос сямен, кыз асьмелы улыны кужым, трос пайда сётэ. Ойдолэ юрттом солы будыны! Юнме ум быдтэлэ! Н. ВОЗИСОВ. Пуштӥсь арбери шедьтӥд ке... Пуштӥсь арбери (граната, снаряд, мина, бомба но мукет) яке солы укшась мае ке синйылтӥд ке, дораз матэ эн лыкты. Ӝегатскытэк ивортоно адямиослы но 02 телефонъя жингыртоно. Двигательёсты кысыса, техникаез ужан интыяз ик кельтыны кулэ. Асьтэлы палэнсконо. Милиция яке саперъёс вуытозь, пуштон интылэсь ватскыса улоно. Солэн матаз нокинэ но эн лэзе (тужгес но нылпиосты). Кышкытлык кылдытӥсь арбери борды эн йӧтскылэ. Общественной транспотын, вокзалын яке аэропортын сак кариське кельтэм сумкаослы, портфельёслы, бинялтэм арбериослы но шудонъёслы. Отын асмалпамъя лэсьтэм пуштӥсь маке луыны быгатоз. Адӟемды сярысь ӝегатскытэк ивортэ водительы. Со радио пыр герӟаськоз диспетчерен. Эн йӧтскылэ шедьтэм арбери борды. Кышкытлык кылдон сярысь вералэ артэ сылӥсь адямиослы. Транспот дугдэм бере, отысь потэ но палэнэ кариське. Арбериез кельтӥсь муртэ синйылтыса вуиды ке, милицие ивортэ. Огъя кужымен гинэ дугдытыны быгатом терроризмез. Удмурт Республикаысь Югдурез утёнъя министерство. Пыэдэн курадӟо Адӟиськисьтэм грипп кыл вератэк кутэ но таза муртэ погыртэ - со туж кышкыт висён. Та чер алигес вуиз Якшур-Бодья ёросэ но. Ёрос больницаын тани 24-тӥ толшоре 64 больничной лист гожтэмын вал, 25-тӥе - 49, 26-тӥе - 26. Пыэдэн сэрен тросэз адямиос ужаны уг быгато ёросысь Вуж Зятцы, Лынга, Мукши, Порва, Чур но мукет гуртъёсын. "Кин ӧз на висьы, чаклаське", - шуо эмъясьёс. П.Скоболев. Куинь сюрслэсь ятыр Якшур-Бодья ёросысь "Дружба" эштослэн Кунянгурт фермаяз ортчем арез котькинлэсь ӟеч йылпумъязы. Скал кыскисьёс чаклало вал котькуд скалзылэсь шорлыдын куинь сюрс кило йӧл кыскыны. Нош люкаськиз тросгес - быдэн 3028. Фермалэн кивалтӥсез Михаил Мешин тужгес но тау каре дояркаослы Маргарита Загребиналы, Наталья Широбоковалы, Раиса Вахрушевалы но Светлана Павловалы. П.Скобелев. Чиганлэсь валзэ лушкаллям Вазен кызьы луоз вал? Чиган валъёсты лушкалляз. Таӵе учырлы соку нокин ик ӧз паймылы. Нош тани Якшур-Бодья ёросысь Вуж Зятцыын чиганлэсь аслэсьтыз валзэ лушкаллям. Уин. Одӥг быдэ вуымтэ пияшлэн валэн ворттылэмез потэм вылэм. П.Кузнецов. Вить ар шулдырто Якшур-Бодья ёросысь "Ӟуч кырӟан" ансамбльлы калык ним сётэмзылы туэ тырме вить ар. Усто кырӟасьёс та пичи юбилейзэс пусъёзы 29-тӥ феврале. Соин валче ёросысь калыклэн куронъёсызъя дасяське нимысьтыз концерт. Кырӟась коллективен быгатыса кивалтэ Россия Федерациысь культура удысысь дано ужась Виктор Широбоков. Та коллектив республикаын ортчем фестивальын лауреат луиз, уно дипломъёсын пусъемын. П.Скобелев. Сюрессы вольыт медло! Али Ижын ог дасо пала ини ас мылкыдзыя кырӟась-верась удмурт ансамбльёс. Тужгес трос соос Индустриальной ёросын. Шаерысьтымы Культурая училищеын гинэ куинь коллектив. Быгатонлыксыя соос чик бере уг кылё кун ансамбльёслэсь. Ленин ёросысь кырӟасьёс, эктӥсьёс азьвыл нимаз ӧз но люкаськылэ. Удмуртлыкез яратӥсьёс кык ар талэсь азьло пумиськылыны ӧдъязы "Ижмаш" АО-лэн Евгений Драгунов нимо урамысь библиотекаяз. Татын ужасьёс Мария Елмашева но Надежда Пономарёва калыкез кемалась ини люкалляло доразы пӧртэм ужрадъёсы. "Инвожо", "Ожо-вожо" ансамбльёс татчы сюрес трос ар талэсь азьло лёгизы. Соосын пумиськылонэ матысь юртъёсысь уно удмуртъёс люкаськылӥзы. Нош Дэри ёросысь Пероггуртысь "Чебер апайёс" татын ас доразы кадь. Соос ик бадӟым мылкыд сётӥзы выль ансамбль кылдытӥсьёслы. Нош арганчизы Евгений Медведев али "Ӟардонэн" кивалтэ. Ансамбль понна кырӟан но гожтэм ини. Милемлы но туж яраз. Галина Иванова, Мария Панкова, Таисия Зорина, Зоя Васильева кырӟаны но, эктыны но шаплыесь. Соос ик, ансамбль кылдыку, нырысь кичӧлтӥсьёс вал. Мария Савельевна Елмашеваез кемалась тодӥсько. Быгатэ со удмурт калыкез пӧртэм кулэ ужрадъёсы ӝутыны. Ачиз но сюлмысь пыриське калыкмылэн пӧртэм ӧтчамъёсаз, кенешъёсаз, шулдыръяськонъёсаз. Мария Савельевна понна ансамбльлэн ужамез - бадӟым шумпотон. Коллективысь егитъёс Людмила Бакулева, Августа Вахрушева, Галина Гаязутдинова ансамбле ваизы асьсэлэсь задор мылкыдзэс, туала кырӟанъёсты яратэмзэс. Нырысь ик "Ӟардон" ас ёросысьтыз калык азьын тросгес кырӟаз-эктӥз, табере вуэ ини Ижысь котькуд ёросэ. Дас витетӥ толшоре но шумпоттӥз культурая училищее лыктэм калыкез. Нырысетӥ тулыспалэ "Ӟардон" пусйиз кылдэмез дырысен кык ар тырмемез. Та пичи юбилее милемды, "ожо-вожоосты" но, ӧтчаз. Ми егит эшъёсмы доры ваим гажан-яратон мылкыдмес. Ленин ёросысь артистъёс яратоно кырӟанъёссэс мытӥзы. Ми но соосты шумпоттӥмы. Пыштурынэн ческыт чай бере ваньмы ӵош кырӟамы-эктӥмы, ӟеч-ӟеч тодматскимы-эшласькимы. Таӵе пумиськонъёсты азьланяз но ортчытъяломы, ӵош концертъёс но сётъяломы. Озьы улонмы но шулдыргес луоз. "Удмурт кенешлэн" Ленин ёросысь ёзэныз кивалтӥсь тодмо конструктор Илья Михайлович Викторов "Ӟардонысь" артистъёслы но милемлы ӟеч кылъёс вераз, ӵектӥз тулыс но пумиськылыны. "Ӟардон" яркыт ӟардыны кутскиз. Быдэс сюресэз вольыт мед луоз. Н. Возисов. БЫДӞЫМ ВОРМОНЛЫ - 55 АР Сюрессэ мытӥз Шабердыысен Таиз ар асьме калык понна но, быдэс дунне понна но аспӧртэмлыко. 2000-тӥ арын фашист Германиез пазьгем дырысен тырме 55 ар. Зэм, вормон нуналэз ваисьёс пӧлын ялан ичи но ичи кылё солдатъёс, фронтлэн мышказ тыршисьёс. Но улэпесь на соос, кинъёс пичиысен ик кутскыса тыршизы бусыосын, станокъёс сьӧрын вӧлӥзы пыӵалтӥрлык. Соос умой тодо на война кутскон нуналэз но, Вормон праздникез но. Вань со тодэ ваёнъёсты огазеяны юрттоз Завьял ёросысь альбом-эстафета. Со кылдытэмын районысь администрацилэн, ожысь но ужысь ветеранъёслэн кичӧлтэмзыя. Кылем арня куспын альбом-эстафеталы кутскон сётэмын вал Шабердыысь гурт администрациын. Отын со возиськоз арня ӵоже. Со дыр куспын альбомын возьматэмын луыны кулэ гуртлэн но хозяйстволэн, школалэн но культура юртлэн улэм-вылэмез, азинсконъёссы. Нимысьтыз инты висъяськоз ожысь но ужысь ветеранъёслы. Озьы альбом-эстафета 5-тӥ маёзь вуылоз 18 гурт администрациосы но калыклэсь тазалыксэ утёнъя, калыкез дышетонъя, калыкез шуг-секытлэсь утёнъя но культурая управлениосы. Озьы быдэс ёрос Вормон нунал азын аспӧртэмлыко отчёт лэсьтоз. Бӧрысь альбомез интыялозы ёросысь музее. Быдӟым Вормонлы сӥзем ужрад районын кутскиз ини кылем арын ик. Пиналъёс соку ожысь но ужысь ветеранъёс, гуртсылэн историез сярысь сочинениос гожъязы. Та нуналлы Завьял ёросын улэ ожысь 266 ветеран. Со пӧлысь 5-ез ожмаськиз Сталинград, 7-ез Москва понна, 14-ез нюръяськиз Курск-Орел кульчоын, 8-эз утиз Ленинградэз... Озьыен, альбом-эстафета сюрес вылын. Н.Лялин. Таӵеез нырысьсэ ортчиз Кылем арня вискын, 3-4 феврале, удмурт шаерамы нырысьсэ ортчиз тылобурдо вордонъя калык куспо (международной) научно-практической семинар. Со вал "Вараксино" тылобурдо воордон фабрикаын но "Металлург" санаторийын. Семинар сӥземын промышленной амалэн курег вордон фабрикаосын азьмынӥсь амалъёсты пыӵатонлы, та удысэз ӟеч радъянлы, тылобурдоосты сюдонлы но возёнлы. Та ужрадэз ортчытыны Удмуртия юнме шорысь бырйымтэ. Малы ке шуоно, элькунысьтымы тылобурдо утисьёс ваньмызлэсь усто тыршо. Птицефабрикаос пӧлысь тужгес висъяське "Вараксино". Тӥни соин ик семинар но татын ортчиз. Фабрика миым куреглы быдэ 308 курег пуз басьтӥз. Рентабельностез 23 процент луиз, нош валля арын 11,2 процент вал. Фабрика али 600 сюрслэсь уно курег вордэ. Ортчем арын 187 миллионлэсь уно курег пуз басьтӥз но вузаз. Курегъёссы туж ичи быро, 5 процентэз гинэ, нош чипыоссы 80 процентэз ӵогисько. Дас курег пузлэн асдуныз 5 манет но 43 коньы луиз. Вараксиноос тылобурдоосты сюдонэ выль амалъёсты куто, сиён пӧлазы ватсало белково-витаминной концентратъёс. Сое поттэ "Предкорм-ЪЪИ" фирма. Та огазеяськонлэсь продукцизэ басьто Россиысь данакез птицефабрикаос. Со юрттэ тросгес сиён-юон поттыны. "Вараксиноысь" тылобурдо вордӥсьёс доры азьвыл но ветлылӥзы ужан амалъёсынызы тодмасткыны. Нош таӵе бадӟым куноос ӧз вуылэ на вал. Удмуртие лыктӥзы Даниысь, Литваысь, Голландиысь, та удысын ужась адямиос, Россиысь бадӟымесь тылобурдо фабрикаослэн кивалтӥсьёссы, специалистъёссы но Москваысь тодосчиос (учёнойёс). Ватсаны кулэ на: та ужрадэз радъянъя кичӧлтӥсьёс луизы "Содружество" компания, Россия но кунгож сьӧрысь куд-ог валтӥсь тылобурдо вордӥсь фирмаос. Г. Романов. Тупанкылъёс гожтэмын Правительстволэн Тӧроез Николай Ганза городъёслэн но ёросъёслэн администрациосынызы тупанкыл гожтӥз бюджетэ вуэм коньдонэз шырытгес но пайдаёгес кутон сярысь. Таӵе ик тупанкыл гожтэмын вал 7-тӥ феврале Правительство но Ижевск городлэн администрациез куспын. Николай Ганза куриз та тупанкылъёсын пусъем ужрадъёсты дыраз но кулэезъя быдэсъяны. Дас витетӥ апрелёзь Бюджет чотын ужасьёслы пунэм тыронъёсты берыктоно дас витетӥ апрелёзь - таӵе ужпум сылэ республикаысь но интыосысь кивалтӥсьёс азьын. Январьлы планлэсь доходъя люкетсэ мултэсэн быдэстэм чотын луонлык кылдӥз та ужпумез дыраз быдэстыны. Николай Ганза бюджетэз узырмытыны юрттэмез понна, умоен пусйиз акциосын "Удмуртнефть" огазеяськонэз. Бюджетэ уногес коньдон вуттон ласянь мукет ужрадъёс но чакламын. Кылсярысь, Башкортостанлэн Правительствоеныз тупанкыл гожтэмын Удмуртилэн улосвылаз му вӧй поттэм понна выт тыронэз радъян сярысь. Гурт шудонъёс 25-тӥ-27-тӥ феврале Шаркан черкогуртын ортчозы республикаысьтымы гурт спортсменъёслэн 6-тӥ Тол шудонъёссы. Ӵошатсконъёслы дасяськонлэн кызьы мынэмез сярысь ивортӥз Спортъя кун комитетлэн кивалтӥсез Гарий Кремер. Пумаз-йылаз вуттэмын ини спортъя базаез дасянъя, командаосты интыянъя но сюдонъя ужпумъёс. Совхозлы - выль директор Совхоз "Восточный" кун предприятилы выль кивалтӥсь быръемын. Со - Гурт хозяйствоя научно-исследовательской институтлэн директорез Владимир Гусев. Со али быдэсъялоз директорлэсь ужзэ. Кызьы ивортылӥм ини, та предприятиын секыт югдур кылдэмын. Николай Ганза люкаськемъёсты оскытӥз, республика уз сёты солы чылкак куашканы. Июль толэзьлы ини чакламын сюдоно-утялтоно парсьёслэсь лыдзэс трослы йылэтыны. Со понна Правительство вань луонозэ лэсьтоз. Удмурт Республикаысь Правительстволэн пресс-службаез. Зӧк книга люкаськоз Литературовед Зоя Богомолова нош ик бадӟым уж борды басьтӥськиз. Удмурт классиклэн Михаил Петровлэн вордскемез дырысен 95 ар тырмонлы со дася "Гори, гори, моя звезда" книга. Татчы люкамын луозы ог сю авторъёслэн статьяоссы, очеркъёссы, эссеоссы, тодэ ваёнъёссы, озьы ик - азьвыл печатламтэ документъёс, гожтэтъёс. Нимысьтыз инты басьтозы М.Петровлэн "карысьтыз" потэм писательёс Г.Красильников, С.Самсонов, П.Куляшов, Г.Ходырев, П.Поздеев, К.Ломагин, А.Уваров но мукетъёсыз. Сборникез дасянэ тужгес но сюлмысь пырисько, писательлэсь творчествозэ пыр-поч, котыр ласянь эскеро тодосчиос В.Кельмаков, Г.Ушаков, Р.Насибуллин, В.Шибанов, С.Арекеева, Г.Шушакова, Л.Федорова но диплом гожъясь студентъёс. - Таӵе книга дасяны малпан умоен лыдъямын вал ӟуч литературая кафедраын, солэн кивалтӥсез Анна Зуева дорын, - шуэ Зоя Богомолова. - Собере та малпанэн потэмын университетлэн бадӟым кенешаз. Отысен туэ арез огкылысь ялоно кариським Михаил Петровлэн ареныз. Зоя Алексеевна озьы ик ивортӥз: книгае ас малпанъёссэ гожтыны мылкыд кариз тодмо конструктор Михаил Калашников но. Со тодэ на, пумиськылэм писателен, алигес нош ик лыдӟем солэсь "Старый Мултан" романзэ. Книгаез люкасьлы юрттыны басьтӥськизы Михаил Петровлэн нылыз Ольга Михайловна Петрова. Каролина нылызлэн пиез Валерий Александрович Никулин, калык куспо инженерной академиысь профессор. Т.Петрова. Кирпич - со ӟеч корка но, мунчо но Зэмзэ но, кирпич - со усто лэсьтӥськон арбери, со ӟеч корка но, шуныт мунчо но, ӝикыт гид но, юн юбо но. Берло аръёсы угось гуртъёсмы тодмантэм воштӥсько - вӧл- вӧлэсь кирпич юртъёс пуксё. Но тодыны кулэ на: кыӵеез кирпич кытчы мынэ. Тани Якшур-Бодья ёросысь Чур посёлокын поттэм силикат тӧдьы кирпич мынэ юртлэсь борддоръёссэ шобыртыны. Нош Радиозаводлэн "Альтаир" заводэз уката чебер вольыт горд кирпич поттэ. Тани Ижысь ик Холмогоров ульчаысь кема ужасез завод поттэ самой дунтэм горд кирпич. Таиз сокем юн ӧвӧл. Нош юн инъет (фундамент) тыроно ке, уд шедьтэ М-150 маркаё кирпичлэсь умойзэ. Сое лэсьтэ "Ижевскысь керамикая завод" акционер огазеяськон. Та кирпич котькыӵе котэз, мускытэз чида, самосвалысь кисьтыса ӝоктыку но уг пилиськылы. Тани ми пыриськом заводысь кирпич лэсьтон цехе. Паськыт пельпумо юн батыр кадь андан пресс дорын милемыз пумита Валентина Тихоновна Токмачева. Пресс пушкысь потэ пачкатэм сюй. Сое укмыс кирпичлы езэн вандо но собере уробоосы тырыса куасьтыны нуо. Котькыӵе ужлэн аспӧртэмлыкез вань. Кирпич поттонэз капчи ужъёс пӧлы уд пырты. Но Валентина Токмачева 1975-тӥ арысен татын тырше ни. Кышномурт задор мылкыдо, вераське пальпотыса, секыт пиосмурт ужлэсь уг кышка, табере, пе, машинаосмы "визьмоесь". Но котькыӵе машинаен быгатыса ужаны кулэ. Тӥни сыӵе тыршисьёсын завод ас данзэ ӧз ышты. Кивалтӥсьёссы данъясько азьмынӥсьёсынызы. Соос пӧлын механик Виктор Гаврилович Бузилов но мастер Надежда Анатольевна Олина, слесарь-наладчик Александр Александрович Фузеев но Николай Алексеевич Корниенко, растворъёсты дасясь Людмила Петровна Прозорова но цехлэн кивалтӥсез Николай Константинович Филиппов, технолог Лидия Семеновна Волкова но трос мукетъёсыз. Ваньзы соос тыршо ни кема аръёс ӵоже, ваньзы сямен ужаны кутскемын огшоры рабочий луыса. - Заводын ваньзэ радызъя лэсьто, ваньзэс чакласа ужато. М-150 кирпиче ватсало 10 процент пул пызь но 20 процент шамот. Туж оскымон тыршо слесарь-ремонтникмы Александр Фузеев, электросварщикъёсмы Михаил Ончуков но Юрий Ханжин. Заводэн 1973-тӥ арысен кивалтэ ни Михаил Михайлович Лучкин. Кутскиз со ужаны нырысетӥ цехын механик луыса, керамической кирпич поттон бордысен но пумен пӧртэм ужъёсты адӟиз-тодӥз, вылезлы дышиз, озьы гинэ директорозь будӥз. Валтӥсь технолог Алла Афанасьевна Сазонова шуэ, мон, пе, тытчы 1973-тӥ арын лыктӥ, уже кельше. Вератэк кельтыны уг луы азьло главной инженерзэс А. К. Голубевез. Солэн малпам автоматэз кирпич тыронэз но ӝоктонэз капчиятӥз. Альберт Константинович пенсия потыса но заводэ ветлэ, маке но выльзэ ялан утча-шедьтэ. Завод 27 миллион кирпич вузаз, нош 1992-тӥ арын со 54 миллион вал. Заводын ужъёссы ас ӧраз пырем бере, усьтӥзы вузкаронъя юрт. Отын вузаське кирпич (угось куд-ог адямиослы кӧня ке гинэ но кирпич кулэ луэ), мукет лэсьтӥськон материалъёс но чыры-пыры вузъёс. Вузкаронэз умой радъяз Олег Петрович Оленчук. Акционер огазеяськон озьы ик поттэ пасё кирпич, блок но керамзит. Берлоез вӧлдэтъёсты шунтыны мынэ. Предприятилэсь 40 ар тырмон юбилейзэс пумитаны али быдэс коллектив дасяське. Со нуналлы ӝӧк вылзы но тыр мед луоз, басяськисьёссы азьын но данзы медаз усьы шуыса, ваньзы уката ӟеч тыршо. Бадӟымесь кузесь кузовъёсын КамАЗъёс кирпичлы вуо но вуо. Лымыен стгиськыны вуэм поддонэн кирпичез кран огдыре кыксэ ӵош ӝутыса машинае интыя. Кирпич басьтӥсьёслы экономист Е. Н. Крапивина компьютерен накладнойёс печатласа сётэ. Ваньмыз кельышлы. Азьланяз ужды уката мед азинскоз, гажано керамблокъёс" Кресьян калыктэк ӝӧк вылэ нянь уг вуы ке, тӥтэк юн корка уд ӝуты. П. Скобелев. Туспуктэмъёсыз В. Беломорскихлэн. Николай НИКИФОРОВ Вожан чер Верос Пуктоно юртмы - колхозысь тӥяськем техникаез тупатъян мастерской - син азямы вылӥе ӝутске. Туала дырлэн куронъёсызлы тупамон лэсьтыны тыршиськом: кык этажен, специалистъёслы - нимаз-нимаз висъетъёс, шутэтскон комната, уж бере пыласькон инты... Гуртамы тӧдьы кирпичлэсь ӝутэм юртъёс трос ке но, таиз тымет вылын уясь тӧдьы юсь выллем висъяське. Ӝужыт, кельышлы, трос укноё, шундыя чиль-дол ворекъясь калай липето. Кин тодэ, оло, ачим та юртэз ӝутонэ пыриськемысьтым, сыӵе йӧтэ, луоз? Ас киыныд ӟустарилэсь лэсьтэм мунё гинэ но муспотымон йӧтэ уго. Укыр синмаськымон интые ӝутске колхоз мастерской. Кык паласен ваче учкыса сыло кызьпу арамаос, сьӧразы мур нюк. Арамаосын вожмаськыса чипсо, шулало бурдоос, нюк пыдсын жильыртэ Глязьтӥн ошмес (арлыдоос верамъя, сыӵе нимо бигер, пе, шедьтыса чылкытатэм та ошмес синэз, соин ик озьы нималлям). Ӵаж-ӵаж кезьыт, коняло-юмало шӧмо вуэз. Юиськод, юиськод - сю уг юзма. Юэмъя юэм потэ. Кымысысьтым пӧсям вуосме ӵушылӥсько но, суйпосысьтым часме учкыса, мастерокме огдырлы кирпичъёс вылэ интыясько. Аман* огсямен мыкыръяськыс, юн жаде егит мугор но. Уката ик кус кужекъя. - Всё, лэсьтэм раствормы быриз, - сигарет аратонъяз, улӥысен кеське Зяней Витя. - Выльзэ дасяно-а, ӧвӧл-а? Ӝоген нуназеяны вамыштомы ни, дыр. - Яралоз, ӧжытак шутэтском, - кирпичъёс вылэ интыяськыса вазе бригадирмы Дудай Пашка. Ми ваньмы - одӥг гуртысь воргоронъёс. Куспамы огкыл шедьтыса, тупаса ужаськом. Лушкем ужъёсты но шараяку, ужын но, ӟенеликъёс бушатъяку но - огӵош. Сяммыя но тупаськомы кадь - тӧдьы куакаос уг адско. Ас поннам "Ой, тӥ, чебер нылъёс, малы сыӵеесь?" нёжъяса, улӥе васькисько но тодмо кужен сюресэтӥ вамышъясько. - Геня, тон кытчы? - сьӧрам уиське ни Зяней Витя. - Кытчыез тодмо, Витёк. Радиаторе ӟырдаз. - Ойдо ӵошен ветлом. Мынам но юэме потэ. Глязьтӥн ошмес пала вамышъянъямы, эше кыл биньгозызэ соку ик лябӟытэ. Нош вераськон сӧзнэтэз одӥг - нылъёс сярысь. Нылъёс но... соосты лушкем мусоян-яратон. - Толон, Геня, Микта Зинаез пичи гинэ "писъятэк" кельтӥ, ява, - гор-гор серектэ егит пи. - Вот, чатран люкет! Чупаны, ноныоссэ кырманы лэзе. Нош киме макес бордаз ке йӧттӥсько, соку ик кышкатэ: "Черекъяло ведь! Соку ик атае лэчыт тӥрзэ кутыса потоз". - Кузпалъяськоно ни вал тыныд, Витёк. Мултэс атасъяськыса ке ветлӥд, зэмзэ но, шыд пуртые шедёд. - Кинэн-о кузъяськыны косӥськод? А-а? - Гуртамы нылъёс ӧжыт шат? Одӥгезлэсь мукетыз чебер, ужлы шаплыесь. - Тыныд вераны усто, Геня. Ачид Тамараез ӝабыртӥд но, йӧлвыл лушкам писэй музэн, мыргетыса-нукыртыса ветлӥськод. - Пересьёс верамъя, инмарлэн гожтэмез сыӵе, дыр, Витёк. Сиыны кылдымтэ нянез кушад ке но, ньылыны уд быгаты, шуо. - Э-э, к чёрту! - лӧпшаса вазе ни Зяней Витя. - Вить-куать нылэз секыто карытэк уг кузпалъяськы на. Вазь на мыным сюан шудыны. - Мыняк потыса, гаӵолӥн уд усьы-а, эше? Оло, вань нылъёс, вылдӥсьсэс куяса, валессы вылын тонэ возьмаса кыллё, кожаськод? - Уд валаськы тон, Геня, туала егитъёсты. Тани кылем арняе Чулык Галяез шур дурысен пумитай. Чильтэр ноны пуйыеныз но кык чиньы пасьта трусикен гинэ кылем но, кырӟаса-кырӟаса миськем дӥськутсэ гылля. Мон сьӧрпаласен шыпытак лыктӥ но соку ик тыбырзэ чупыштӥ. Отчыяз ик сылмиз, ява! Киме трусикезлэн резина улаз чуртнасько ни вал - ӵап гурезетӥ васькись пыдкуараос кылӥськизы. Сузэрез юрттыны васькем вылэм, албасты. Куакъёс пӧлы ватскытэк, амалы ӧз луы. - Кожаськод, Галя гольык мугорзэ мусояны лэзьысал? - Конечно, Геня. Гольык мугорыз борды йӧтскемен валче, синъёсаз тылгизьыос кенжытскизы, ымдуръёсаз - пальпотон. -Нош малпам уждэ малы ӝыт ӧд быдэсты? - алетскем тылӝуэ юри карасин пальккисько. - Сыӵе ужен уин йыринто кадь. - Шудон пӧлысен сьӧраз вамыштӥ вал - нырме ик пуны музэн куртчиз, Ягпери. Эх, шур дурысен йӧндыроно вал. Табанез пӧсь дыръяз сиё ук. Нюк бамалэтӥ шаян кечпиос сямен тэтчаса васькиськом но ошмес доры вуиськом. Нырысь ик Зяней Витя сюзэ юзматэ. Трос уг юы со, кӧня ке гучык веръя но ымдуръёссэ кимышкыныз ӵушылыса палэнске. Соку ик валатскисько: сьӧрам кылзэ шерон вылысь гинэ калъяськем. Ӟабыльтытэк кӧтыз пирсэкъя, лэся. Ярасал вылэм, кулэ ужпум сярысь ке кылпум ӝутысал. Ӧвӧл ук, черкысь поплэн выллем огкадь: я за упокой, я за здравие. Пыдесъяськыса дырды доры сузьтӥськисько но, ымдуръёсме кезьыт ву лекос тылыныз соку ик ӵушка. Юэмъя сабырске кадь, коняло-юмало шӧмо кариське. - Ош кадь юиськод ук, Геня, - сьӧрпаласен серектэ Виктор. - Мотри, ошмесэз эн кӧсаты. Пӧсь нуналъёс азьпалан но тырмыт луозы на. Юэмъя мугор сэзёме кадь. Оло, выль кужым ватсаське, кожалод? Дыртытэк султӥсько но, вӧзысьтым боры куарез чигтыса, песянаелэсь дышетэм кылъёссэ шыпыртӥсько: "Монэ эн куты, тани та куарез кут!" Кин тодэ, улэм-вылэм адямиос юнме уг верало, дыр: кыралысь ошмес, пе, адямиез кутэ. Кутэ но быдэс мугорзэ гижлояськытэ, висён кузьма. Соин ик, кыӵе ке будос куарез чигтыса, ошмеслы кузьманы косо. Боры куар зыл-зыл бергаса эктыны кутске, пӧзись ошмес синъёс бугыръяськемъя. Тани жадьытозяз юмшалоз но, бызись визылаз шедьыса, палдэм шиферлэсь лэсьтэм дырдые шедёз. Нош ик чылкыталоз ошмес: ас ӧраз жуг-жагез кема возьыны уг чида со. Лушкемен Глязьтӥн бигерлы но ошмеслы тау карыса, уж дуре вамыштӥськом. Зяней Витя нылъёс сярысь ас тодмо но пумтэм-йылтэм мадёссэ мытэ. *** Ӝыт пал дорам бертыкум ик валатски: тросгес ошмес ву юыны шедьтӥ, лэся. Йыры висьыны кутскиз, ньылоны но пыктэ кадь.Тодӥсько арлы быдэ ангинаен курадӟемме-тэльмыремме. Озьы ке но, асме кутыны уг быгатӥськы. Корка пыремен валче, валес вылэ уськытски. Быдэс мугоры куалекъя, йыры пилиськымон жонгетэ, мугор мунчо гурысь из кадь ӟырдамын. Катьтэммыса, вӧлдэтэ учкыса кыллёнъям, корказьын вераськем но пыд куараос кылӥськизы. Озьы ик вань: кузпалы, ужысь бертыкуз, нылпи садысь пимес но сьӧраз вуттэм. - Папа, жадид, оло? Малы таӵе вазь кӧлыны выдӥд? - дорам тунсыкъяськыса вуиз муспотон пие. - Маке чер шедьтӥ ай, пие, - секытак лулскисько, пежырес йырсизэ маялтыса. - Кезьыт ву юыны шедьтӥ, лэся. - Милемлы нылпи садын быректэм ву гинэ сёто. Сокем юэмед потэ вылэм - лимонад басьтыса юоно вал, - ӵектэ Сережа. Дыртыса кухняе бызе но анаезлы ивортэ ни: - Мама, папа висьыны усем. Укол пукты ай, мын. Эн кышка: со уз бӧрды. Амалтэк пальпотӥсько ни. Кышкатскем чипы анай музэн, Тамарае вӧзам вуэ. Соку ик киыныз кымысам йӧтскыса утча, вирсэр тэтчамез эскере. Гуртамы фельдшер луыса ужа бере, котькуд висён сярысь солэн аслаз малпанэз, дунъетэз. - Кӧня верасько, кезьыт ву эн юы шуыса, - эмъюмъёсын коробкаын бугыръяськонъяз куаретыны уг вунэты со. Чиданлыкед воксё ӧвӧл шат? Ме, юы ай тетрациклин но аспирин, - киям таблеткаос сётэ. Вӧзысьтым пукон вылэ эмезь вареньяен чай вайыса пуктэ на. - Тросгес юыны тыршы, Геня. Укыр ӟырдамын мугорыд. - Тау, утись-вордӥсь кылчинэ! - вӧзам сюлмаськыса бергамзэ валаса, шумпотон мылкыдме шараятэк уг чидаськы ни. - Шеде но улэ, - пирсэкъя Тамара. - Ужамед понна туннэ турын вайыса куштӥзы вал. Соин ик ужысь но вазьгес бертыны тырши. Кинэн ӝутъялом ни сенике? - Атаедлы вазиськыса утча. Асьмеос но быгатэммыя юрттӥськом ук. - Атай фермаысь ошпиосты Шемордан мясокомбинатэ нуыса кошкиз. Ку берытскоз ай со? Нош анайлэсь кыӵе юрттӥсь? Дугдылытэк кускыныз курадӟе. - Оло, кудӥз ке бускельмы юрттоз? Буш ум ужатэ ук. - Яралоз, кин ке доры ветлыса утчало ай, - кухняе вамыштэ кузпалы. Кыӵе ке кастрюля борӟетъёсын, табаосын лангыртэ но мыным вазиське: - Газ плита вылэ пуктэм сиёнъёсты ке но синйылты, Геня. Ӝук но котлетъёс пуктӥ вал. Медаз уртче, медаз сутске. - Эскеро, Тамара. Кема эн ӝегатскы. Юрттӥсь ке ӧд шедьты, ӵуказе варматай лыктоз. - Зор пилемъёс бугыръяськыса гинэ уло, - лулске со, синучкон азе султыса, кышетсэ тупатъянъяз. Дорамы вуттэмзэ коттоно ӧй вал ни. Пумитаз вазьыса уг вуттӥськы - Тамара ӧсэтӥ ӝогак потыса кошке ни. Чебер но муспотымон мынам кышное. Сюлмаськись но монэ жалясь. Ужаны но провор, кыллы но шаплы. Удалтӥз ке удалтӥз мыным та ласянь. Кык пол, кужмысь султылыса, кухняе ветлӥ. Йыр берга, ӧскем но потэ кадь. Ярам, мукетъят ветлоно ӧз лу ни: ӝук но пӧзиз, котлетъёс но ӵужпыръемесь пырсазы. Эмъюм юэмысь-а, мар-а, синъёс кыниськыны туртто. Ӵапак соку азбарын вераськем куараос кылӥськизы. Корка ӝогак пыриз Тамара (мон солэсь лёгаськем пыдкуаразэ ик тодмасько). Кухняе кожаса, дасям сиёнъёсме эскериз, вӧзам лыктыса, бабля йырсиме маялтӥз. - Шутэтскы, мусое, тазарскы. Ми турынэз ӝогак ӝутъялом но пыром. Соку ӵошен сиськомы ни. - Юрттӥсь кинэ шедьтӥд, Тамара? - Ӵош ужась юлтоштэ ӧти. Зяней Витяез. - Лыктӥз, иське? - О-о, со-а уз лыкты? - валантэм серектӥз Тамара. - Аракы понна Витя изо Аргурезез но тӥрен коралоз. Я, мон кошки. Мон пал кыл но вазьыса ӧй вутты - ӧслэн ворсаськем куараез кылӥськиз ни. Малпамтэ шорысь шунды пуксён паласен кезьыт тӧл ырак пельтӥз кадь: умпотонэ, лысву сямен, ӝогак тӧлӟиз. Синъёсме кынён сярысь малпанэз ӧй вал ни. Монэ акылес нылмурт сямен, ӟыгыръяны кутскиз кыкетӥез чер - вожан. Мугтэк ӧз кылды со. Егит дыръямы ми Зяней Витяен кыкнамы ик Тамара сьӧрын гожеръямы вал. Нырысь - Витя, службаысь берытскыса ни нылмуртэн ми огъя кыл шедьтӥм. Ма муген соос Витяен люкиськизы - кузпалылэсь юаме ӧвӧл. Син азям соку ик пуксё эшелэн гольтырес синъёсыз, пель сьӧрам чузъясько нылъёсты мусоян сярысь мадёсъёсыз. "Оло, небыт турын вылын кузпалме мусоя ни, шакшы лул? - гадьме портэ вожан мылкыд. - Эх, супыльтыса, ушъяськыса ветлоз соку. Шуоз: Варка Генялы "сюръёс" кузьмай. Шайтанлы-а ӧтем сое Тамара? Вот, шедиз юрттӥсь! - чебер кылъёс шедьтэ ӵош ужась эше. - Кутоз но кышноелэсь йырзэ поромытоз, мылкыдаз гочатӥсь тылгизьы куштоз". Эскерыны потыны но умойтэм йӧтэ. Шуозы: "Ужаны ке висе, эскерыны ке - потэм". Ӵапак пие пыриз. Мон вераны луонтэм шумпотӥсько. - Пие, кытӥ-о ветлӥськод? Мамаед котырынгес берга вал. Оло, маке- маке юрттӥськыны пӧрмытод? - Мама монэ возь вылысь бертоно скалмес возьманы косӥз. Дорамы пырытэк, клевер бусые, пе, медаз шонты. - Озьы бере, витьы-возьма скалмес, пие. Нош мамаосыд ужало-а? - Витя агай турын сётъя, мама сеникысен басья, - ивортэ Сережа но ульчае дыртэ. Пиелэн кылъёсыз лэчыт пурт йыл сямен йӧтскизы гадям. Лекос вожан тылошмес музэн вуӵыртэ ни. Тодӥсько: Тамарае вылаз сяськаё халат гинэ дӥсяз. Нош пушказ... Син азям пуксе сюбег гинэ буртчин трусикез. "Эх, Зяней Витя улӥысен эротической кино буш учке, луоз, - шоканэ ик пытсаське ни. - Оло, небыт, бабля гонъёсыз но син азяз? Вот, возьыттэм шакшы! Синъёсыд кымысад мед тэтчысалзы. Малы-о, кечтака сямен, быльккаса учкиськод мурт "ваньбур" шоры?" Минутлы быдэ кадь учкылӥсько суйпосысьтым часэ шоры. Нош стрелкаос воксё дыг бергало. Ваньзэ ӧвӧлзэ ӝыны час гинэ ортчиз ай. Ма, берытскыны дыр но вуэмын ни кадь. Ачим ке луысал, ог машина турынэз кызь минутскын ӝутъясал, дыр. Син азям пуксе сенике ӝутскыны лэсьтэм пагӟа. Тани огдырлы шутэтскыны дугдозы но, отӥ сьӧсь балян музэн ӝутскоз Зяней Витя. Ӝутскоз, йырез ческыт зынэн поромытӥсь турын вылэ уськытскозы но... Ой, йырбырон ук та! Сюлэм ворттӥсь валлэн сямен жугиське. Йырам черк гырлыос жонгето, оло. Гучыкен-гучыкен юисько эмезь вареньяен чайме. Со но кӧш, курыт шӧмо потэ. Ма каро меда Тамараен Витя? Неужто али но турынэз ӝутъяса уз быдтэ? Ӧвӧл, ӧвӧл. Маке но умойтэмлы укшаны кутске та. Ньыльдон вить минут ортчиз ни уго. Зэмен но, мусоясько, луоз. Эх, сюпсе, дыр, кузпалылэсь небыт ымдуръёссэ... Нош Тамарае март толэзьысь коӵыш музэн мыргетэ, лычсузьыса кылле, дыр, егит дырысьтыз яратоно адямиез улын... Иуда кадь вузаськисесь та кышномуртъёс. Йырсизы кузь, визьзы вакчи. Шат мон вань мылкыдме, кулэ ке - кужымме но жалятэк, гольык мугорзэ яратыны-мусояны ӧй быгатысал?! Остэ-э, козма! Ма, мар сьӧд адӟон та, мар ишан? Гуртын мукет юрттӥсьёс ӧй шедьысалзы шат? Юри ӧтиз, луоз, Зяней Витяез, зын кечтакаез... Секытлэсь но секыт вылэм вожан чер. Быдэс мугоры тышкам корт кадь нажгатэмын ни, кезеген висись мурт сямен, дыр-р! куалекъясько. Пыд йылам султыса, эскерыны потысал - курдасько. Лябӟи, воксё катьтэмми. Йыры бергаса сапкисько, дыр. Корказетӥ, маке вераськыса, кильтыро серекъяса пыро Тамараен Витя. Гадям ик кыкетӥез шокан пась усьтӥське кадь. Соослэсь сеникын возьыттэм дауртэмзэс малпаса, бам чокчороосы ик намерасько. - Ӧд но сиськы шат, мискине, - дорам лыктыса, небыт киыныз кымысам йӧтске кузпалы. - Ойдо, султы, муспотонэ. Сиськом, ӧжытак курытсэ но веръялом, - кухняе вамыштэ Тамара. - Мар-ось аналскид, эше? - йӧлвыл сием айы коӵышлэн кадь чилясь синъёсыныз кырмышъяса, вӧзам матэктэ Зяней Витя. - Верай мон тыныд: ошмес ву ас кужымзэ возьматэ. - Ӧй чакласькы уго, Виктор. - Ӟечлыко, небыт, ческыт зыно турын ваиллям. Ӵапак ыжгиослы, кунянлы сюдымон. - Тау юрттэмедлы, Витя. Ӧчкарем кадь, висён погыртӥз ук. - Ог-огмылы юрттытэк шат, Геня? - нокыӵе кариськытэк, синъёсам меӵак учкыны дӥсьтэ на Зяней Витя. Бур китӥм кутыса ӵектэ: - Ойдо ӝӧк сьӧры. Ӧжытак керытсэ веръяло но, ӝыт шудон пӧлы дыртытэк, амалы ӧвӧл. Нылъёс витё-возьмало ни, дыр. Амалтэк быдэс улонме каргаса вамыштӥсько кухняе. Кыксылэн ик шоразы учкеме потэ: кыӵеесь синъёссы, ваче ег-а кырмышъяло, ма сярысь вераськозы? Сиён уг мыны. Ог пуньы ӝукез но ньылыны ӧй быгаты, одӥг гучык кабак аракыен пытсаськи. Ӧй люкеты ни соослы - кузпалэлы тау карыса, валес вылам берытски. Кема кунояськыса, оломар сярысь но ӟабыкмтыса пукиз ай Зяней Витя. Кузпалы скал кыскон ведраез кияз кутэм бере гинэ кошкыны вырӟиз. Дорфм лыктыса, синзэ кыньыртыса, пельпумам чабкиз на: "Ӝоггес тазарскы, эше!" Кузпалы пудоос котырын бергатозь, ульчаын акшан кузёяськыны кутскиз. Серё1жа пимы кемалась ческыт уммен кӧлэ ни. Тани вуиз кема возьмам-витем дыр но: кузпалы, вылдӥсьсэ куяса, вӧзам выдэ. - Ӵуказе больничной лист гожто мон тыныд, Гени, - кымысме чупа со. - Уже эн дырты на. - Чаль матэгес, - жадем мугорзэ маяллясько пумен. - Жадид, луоз, мусокае. - Ярам ай, Зяней Витя юрттӥз. Огнам ма карысал? - Азьвыл гажанэзлы кызьы-о юрттытэк? - Вожаськод, оло? - Уг. Малы мыным кулэтэм чер? Сыӵе адями со, Зяней Витя: быдэс вераськонэз - нылъёс но гольык мугорез мусоян сярысь гинэ. - Тодӥсько, Гени. Соин ик вӧзысьтыз дыраз палэнскыны дыртӥ ук. Огпол гинэ кезьыт бакалэн выллем киосыныз мугоры борды йӧтскиз вал - быдэсак йӧӟектӥ соку. Кыкетӥ нуналаз ик шудон пӧлы потамысь дугдӥ. Собере тон но службаысь берытскид. - Озьыен, тон сое ӧд яраты? - Кулэез вал. Али ке но, со ӝыт тодам усе ке, шоканэ ик пытсаське. Ми кыкмы ик шудоесь. Пӧсь ымдуръёсмы ваче лякисько. - Геня, мон кыкетӥ пиналэнымы секыто, - пелям лушкем шыпыртэ Тамара. Оло та витем-возьмам кылъёслэсь, оло кузпалылэн ӟырдыт мугорызлэсь воксё усыкмисько. Кыӵе ке чылкыт, шуныт ву тулкымъёс веттало кадь монэ... *Аман - ялан. Театр шумпоттоз нылпиосты Узыр таиз арня культура удысысь турлы ужрадъёсын Калык киужъёсъя юртын ужаны кутскиз выльдӥсьлы сӥзем адӟытон. Со тодэ вайытоз вашкала удмуртъёслэсь дӥсьсэс. Возьматӥськозы театр дӥсья "Ирида" юртлэн но нылпи театр-студилэн коллекциоссы. Асьсэлэсь устолыксэс адӟытозы суредасьёс Людмила Молчанова но Ирина Зорина. Ужъёсын тунсыкъяськыны луоз тулыспал толэзь пумозь. Егитъёслэн культура юртазы ортчоз калык инструментъёсъя "Зарни крезь" оркестрлэн концертэз. Татын ик вылӥ быгатонлыкеныз паймытоз Россиысь дано артист Сергей Лукин. Шаерамы ортчыло ини Быдӟым тыложын вормеммы дырысен витьтон вить ар тырмонлы сӥзем фестивальёс но. Дас кыкетӥ тулыспалэ Глаз ёросэ люкаськылозы вордскем палъёсы сярысь кырӟаны яратӥсьёс. Глазкарын но Можгалан ог-огенызы ӵошатскозы шаерысьтымы эстрада кырӟанъя "Ӵук кизили" конкурсэ пыриськыны малпась адямиос. Дас куинетӥ тулыспал быдэсак сӥземын луоз театрлы но нылпиослы. БЫДӞЫМ ВОРМОНЛЫ - 55 АР Ишан вае тӧдьы тури Тӧдьы тури вае ишан. (калык веран). Дауръёсын сэстэм вуж Келей вуко тымет вадьсытӥ, черодэн-черодэн, одӥг-ог мӧзмыт гурласа, адямиослэсь сюлэмъёссэс кытчы ке ӧтьыса кадь, лыз инбамын кема поръяз кузь но сюбег тул выллем тӧдьы тури уллё. Оло кин ке кышкатӥз-а, яке айызы керек кариз-а, нёжал вылэ шутэтскыны соос таки ӧз пуксе. Поръязы, поръязы но шунды пуксён пала ӝот- ӝот шонерскизы. Паськыт кужмо бурдъёссылэн омырез вандэм куараоссы гинэ пель сьӧры шуккиськыса кылиз на. Со вие витьымтэ шорысь одӥгез тури уллё чурысь висъяськиз но ньӧл сямен уллане уськытскиз... Быронзэ утча, быронзэ утча, дыр, сипыртӥзы кудӥз-огез таӵе шимес уредэз адӟись муртъёс. Нош тӧдьы тури музъем пала матэ вуэмез бере, бурдъёссэ дуак вӧл-вӧл возъяз но гурт пуме лачмытак пуксиз. Адямиос каньылак шокчизы. Собере пересез но пиналэз, бадӟымез но пичиез усьтыр-табыр тури пала бызизы. Нош тури, номыр луымтэ выллем, йырзэ выллань урдыса, гадьзэ азьлань мычыса, ульча кузя калыклы пумит йӧн-йӧн вамыштӥз. - Умоен ӧвӧл та, ӟечен ӧвӧл та! - Шуыса но кирос карыса, вань калык паймыса учкиз йӧспӧртэм, чачырась тылобурдо шоры. - Трос калык быроз. Тӧдьы тури вае ишан! Со вал тулыс 1941-тӥ арын. Нош толэзь пала ортчыса, шукырес ожмаськонъёс сярысь секыт ивор вуэм бере, гуртын, акшан вакытэ кадь, чал-чал луиз. Нылпиослэн люр-ляр шудэм куараоссы гинэ но ӧз кылӥськы ни. Вань гуртоос ас доразы люкаськизы, дыр, кенешизы ма кароно, кызьы азьланяз улоно. Нош улон сотэк но туж секыт вал. Граждан ожын но колхоз ужын кыдам егитъёс, мӧйыос ӟырдыт мылкыдын басьтӥськизы вал выль улонэз ӝутыны. Колхоззэс но озьы ик нимазы - "Выль сюрес". Нош выль сюрес ньыль арлы ож сюреслы пӧрмиз. Берло мар веранэз на. Секыт йӧтӥз гурт калыклы. Мылысь-кыдысь ужаса но со ӟеч улонэз ӧз адӟылы. Уйёсты кӧлатэк поттэм дуно ваньбур пунэм тыронэ но эрикмес утёнэ сылмылӥз. Ортчем ож аръёсты тодэ вайыса, шимес адӟонъёсты син азе пуктыса, мыр-мыр паймиськод, ма кызьы чида на асьме калык та югыт дунне вылын улыны-вылыны. Соин, дыр, ортчем аръёс пӧлысь уката ик, ож вакытэ курыт синвуосын суралтэм адӟонмы, трос милион адямиослэн быремзы асьмелы али ке но маза уг сёто. Соосты буре ваён - со асьмелэн пунэммы, тыронмы, берыктонмы. Та шулдыр гужем нуналэз мӧйыос ӧз вунэтэ на. Нош со нуалысен ӝыны даурлэсь трос дыр отчиз ини. 22-тӥ июнь, 1941-тӥ ар... Ува районысь Сурӟи гуртэ но (Малые Сюрзи) военкоматысь одӥген-кыкен повесткаос вуылыны кутскизы. Озьы коркась корка пыраны ӧдъяз куректон ваись куажыртӥсь пичильтык бумага кесэг. Нош Сурӟи гурт пичи ӧй вал. Ог сю пала коркаос, кузьдалаез ог иськем мында... Ӝытъёсы егитъёс шудыны пото ке, быдэс улос маскаръяськонэн но кырӟан куараен кыдёке, кыдёке шуккиськылӥз, тымиськылӥз. Жаляса но, паймыса но верано луэ, война дырысь но, со бӧрсьы но, вашкалазэ но сямъёсты тодэ вайыса, туала егитъёс мукет йылолъёсъя быдэ вуо. Шонерак вераса, табере шер кылод ужысь но ожысь ветеранъёслэсь будӥсь нылпиос пӧлын чырмыт вераськемъёссэс, соослы ӟеч сямъёс пыӵатон вылысь кыӵе ке но мукет ужрадъёс нуэмзэс. Собере покчи нылпиос пӧлын гинэ ӧвӧл, школаосын но мукет вылӥ дышетскон интыосын военно-патриотической ужрадъёс дугдытэмын, яке ньӧмыз понна гинэ радъямын. Кин вае асьмелы ишан - тӧдьы тури-а, курень коньы-а, сьӧд коӵыш-а - шуг валэктыны. Оло со зэмен но зэм, оло юнме ишан вылэ чӧлскон гинэ. Та югыт дунне вылын котьмалэн йылыз но пумыз вань уга. Мукет сямен вераса, котьмалэн кык гинэ пумыз. Секыт куректон усем бере, куке но соку вуэ шумпотон. Сурӟи гуртысь калык но нырысь-валысь гуньдэм кадь луиз, нош бератаз сэзъялскиз, ӝутскиз. Кышкыт тушмонэз вормон понна огинэ кариськиз. Уй но нунал тэльын, бусыосын, лудъёсын, лёддорогаын ужаз, ваньбур поттӥз. Нош троссэ воргоронъёсты трудармие басьтӥзы, кинлэн тазалыкез лябгес вал. Ортчем сюресэз бугыръям туж ик уг поты ке но, мед вырозы ини сыӵе удысэн историез сэрттӥсьёс-пертчисьёс, философъёс, тодосчиос-а, мар-а. Нош одӥгзэ вератэк сюлэм уг чида7 Юнме шорысь уг шуо, дыр, кинлы - ожмаськон, кинлы ке вордэм анай. Нош мукет сяменгес вераса... Кинлы - ож, нош кинлы ке - ош. Сурӟи гуртын но вал, дыр, котькыӵеез. Нош уродэз ӝог вунэ. Озьы ин луыны кулэ, дыр. Ваньзэ согиз уга одӥг кичӧлтон но ӟырдыт мылкыд. "Ваньмыз фронт понна, ваньмыз вормон понна!" Кыӵе дунын басьтэмын вал Быдӟым Вормон 1941-тӥ-1945-тӥ аръёсы, кӧня курыт синкылилы усиз со - сое медаз вунэтэ туала егитъёс но, будӥсь нылпиос но. Война вакытэ улонзэс сётэм адямиосты буре ваён - со асьмелэн нырысетӥез сюлмаськонмы. Со асьмеды туннэ но мед огазеялоз, мед кыдатоз, мед кужмогес кароз, тупаса улонэз мед юнматоз. Быдӟым ожъёсын быремъёсты буре ваён - со врдскем шаермес ӟырдыт яратӥсь но сое секыт дыре утьыны дась кивоштӥсьёсты будэтон, атайёсмылэсь но песятайёсмылэсь уно аръёс ӵоже люкам мудрон сямъёссэс утён, азьланезлы оскон, азьланяз улон. Калыклэн историяз, шаермылэн секыт но кузь ортчем ож сюресаз бадӟым юрттэт кельтӥзы Ува районысь Сурӟи гуртын будэм но 1941-тӥ-1945-тӥ аръёсы бырем пиос но. Тани соослэн ноку вунонтэм нимъёссы... Белкин Николай Иванович Косарев Петр Алексеевич Косарев Андрей Иванович ?.. Косарев Константин М.? Косарев Дмитрий Петрович Соколов Андрей Иванович Соколов Андрей Иванович ?.. Иванцов Николай Павлович Иванцов Михаил Андриянович Иванцов Иван Андриянович Кусов Николай Иванович Венчиков Павел ?.. Зонов Михаил Арсентьевич Зонов Афанасий Андреевич Белкин Иван Иосифович Белкин Геннадий Иванович Волков Сергей Александрович Зонов Митрофан Иванович Зонов Андрей Егорович Зонов Иван Егорович Зонов Петр Ильич Зонов Михаил Ильич Иванцов Степан Алексееевич Зонов Николай Иванович Белкин Михаил Федорович Суворов Павел Михайлович Иванцов Владимир Алексеевич Суворов Иван Иванович Зонов Петр Иванович Зонов Степан Степанович Зонов Семен егорович Суворов Устин Елизарович Малых Феодосий Кузьмич Венчиков Сергей Федорович Пермяков Феодосий ?.. Соколов Андрей ?.. Косарев Павел М.?.. Соколов Владимир Васильевич? .......................................... .......................................... *** Косарев Михаил ?.. Белкин Николай Ф.?.. азьло оже быремын?.. .............................. .............................. .............................. *** Венчиков Павел ?.. Соколов Иван Тимофеевич ?.. келяса быремын?.. ........................................ ........................................ ........................................ *** Пермяков Алексей Иванович Пермяков Василий Иванович Ялмаш гуртысь ....................................... ....................................... ....................................... *** Ожысь сӧсырмыса бертӥзы но кема ӧз улэ ни... Соколов Иван Васильевич Соколов Василий Дмитриевич Белкин Александр Иванович Суворов Александр Трофимович Суворов Федор Трофимович Суворов Андрей Иванович Малых Степан Кузьмич Иванцов Николай Яковлевич Соколов Александр Иванович Соколов Анисим Иванович Блинов Арсентий ?.. Косарев Степан ?.. Волков Иван Александрович Соколов Николай Васильевич Иванцов Дмитрий Егорович ..................................... ..................................... ..................................... Кӧлэ, пиос, весяк уммен. Вождэс эн поттэ, серем эн каре лулооссэ. Ф.Суворов. Ува район. Йыртӥян Улонысь учыр Кинлы пельнянь, кинлы вӧйын нянь, кинлы табань, нош Онтон Еремеевлы номыр но кулэ ӧвӧл, вазь ӵукна ик голосовать карыны дыртэ. Тани 19-тӥ декабре но быръён комиссилэн тӧроез Бонифатий Петрович нырысь ик Еремеевез ӟечкылаз, собере буям бумагалэсь пӧрмытэм сяськаос кузьмаз. Онтон Онтоныч йыгмыт вамышен голосоваь каронъя кабинае дыртӥз. - Так, значица, куинь кандидатъёс. Нырысь ик гожтэмын коммунистъёслэн азьвыл секретарьзылэн нимтулыз. Конечно, Олег Митрич дыръя порядок вал, кивалтыны быгатылӥз. Мыным но юрттӥз, со понна куараме сёто, - бюллетенез куараме сёто, - бюллетенез учкыкыса сипыртэ Онтон Онтоныч. "Кирос" пуктыса вуттӥз гинэ син азяз йӧтӥз кыкетӥез депутатэ кандидат. Таиз Еремеевлэн ӵош дышетскем эшез Коля Петров, дас ар одӥг парта сьӧрын пукизы. Ой, кӧня пол Онтон со чотын диктантъёс но контрольнойёс "витьлы" гожъяз. Институтын дышетскыкузы но Коля ялан юрттылӥз. - Значица, Коляез обидёно ӧвӧл, солы но куараме жаляны уг яра, - кыкетӥ "кирос" пуктӥз Онтон Еремеев. Куинетӥез депутатэ кандидат матысь ӵыжы-выжыез, сузэрезлэн пиез Гера. Дотово шаплы пиосмурт, кӧня пол Онтон Онтонычлы пу дасяны, вайыны, пильылыны юрттылӥз. Одӥг манет коньдон но ӧз курылы, вылаз ик, ачиз юонэн куноятылӥз. - Усто, усто пияш. Пуны ымныр, коӵыш бам луо, со понна куараме ӧй ке сёты! - сипыртэ Еремеев, куинетӥ "кирос" пуктыса. Шудо пальпотыса, Онтон Онтоныч бюллетеньзэ урнае куштӥз. Комиссилэн тӧроез нырысетӥ бырйисез пырак ульчаозь келяз. Юаны но вуиз, кин понна, пе, куарадэ сётӥд. Умой улон понна, - йӧн-йӧн валэктӥз Онтон Еремеев. С. Васильев. Балезино. Нӧкы вӧез басьтозы-а? Правительстволэн Тӧроез Николай Ганза та нуналъёсы вуылӥз акциосын "Ижмолоко" огазеяськонэ. Отын кылдэм югдурен тодматӥз предприятилэн валтӥсь директорез Геннадий Красноперов. Солэн верамезъя, предприятиын вань шуг-секытъёс пото вӧй лэсьтон технологилэн туж дуно луэмез бордысь. Соин сэрен нӧкы вӧйлэн дуныз трослы бадӟым. Та вакытэ складъёсын витьтон миллион манет тыр нӧкы вӧй кылле, со пӧлысь ӝыныезлэсь уноез - "Ижмолоколэн" холодильникъёсаз. Уго асьме дорын поттэм вӧйлэн дуныз трослы вылӥын палэнысь ваемезлэсь. Югдурез тупатыны амалъёс вань. Йӧллэсь наплыксэ будэтыса, тросгес сыӵе сиён-юон поттыны кутсконо. Выль технологиен оборудование басьтон сярысь вераськемын ини. Сое улонэ пыӵатон юрттоз шаерысьтымы быдэс йӧл поттон удысэз азинтыны. Но со понна одно ик кулэ луоз кун ласянь юрттэт. Та ужпумъя матысь толэзьёсы ортчоз йӧллэсь сиён-юон поттӥсь промышленостьын ужасьёслэн кенешсы. Удмурт Республикаысь Правительстволэн пресс-службаез. ВАЛЭКТЭ ЮРИСТ СЭРЕГЕЗ ДАСЯ АДВОКАТ ЛИЛИЯ ШКЛЯЕВА Ужасько сьӧр гуртын... Мон - школаын гардеробщик. Уждунэ 126 манет. Лумбыт ужась (продленной) группа вань шуыса, мыным тупатӥзы 1,5 ставка - 185 манет. Ватсазы на ужъёс: звонок сётъяно, пырон-потонэз но коридорысь 12 укноез утялтоно, лымы сузяно. Ужай нуназе вис карытэк 8 часысен 3-ёзь, табере косо 8-ысен 4-ёзь вис карытэк. Шуо: сотэк 1,5 ставкалы часъёс уг тырмо. Улӥсько мукет гуртын, ужасько сьӧрлон, коркась потӥсько 7 час но 30 минутэ, бертӥсько 5 часэ, ялкарисько арня нуналэ гинэ. Шонер-а мыным тупатэмын ужан дыр но уждун? О.Сидорова. Алнаш ёрос. Уж сярысь законъёсты кодекс куре: огшоры уж дыр арняяз 40 часлэсь ятыр медаз лу (42-тӥ ёзэт). 1990-тӥ арын 1-тӥ ноябре РСФСР-ысь Вылӥ Совет кутӥз "Гуртын нылкышноослэсь, семьялэсь югдурзэс умоятонъя, анайлыкез но пинал дырез утёнъя берлолы кельтонтэм ужрадъёс сярысь" постановление. Со валэктэ: гуртын кышномурт арняяз ужаны кулэ 36 час, мукет законъёс музон дыр уг тупато ке. Сыӵе курон шонер луэ гурт хозяйствоын но, предприятиослэн цехъёсазы но, лэсьтӥськонын но, воинской частьёсын но, нефть поттонын но, гуртысь мукет ёзъёсын но. Уждун тыриське ошоры ужам нуналлы мында ик, вань ватсанъёсты но вераса. О.Сидоровалэн ужан арняез 48 час люкаське. Нош со луыны кулэ 54 час - 1,5 ставкая. Кыӵе но кыӵе ужъёсты быдэсъян сярысь кенешоно, адямиез уже пыртыку, солэсь должностьсэ но квалификацизэ лыдэ басьтыса. Со кутэмын ке, штатъя яке коньдонъя расписаниез тӥяса, уждун мед куроз зэмен ик кыӵе уж быдэсъямезъя. Лэсьтоно ужлэн быдӟалаез тупатӥське должностья инструкциын яке ужан огкылын (договорын). Нылы ляб адӟе... Нылы укмыс толэзь дыръяз гриппен висиз но, одӥгез синмыз адӟемысь дугдӥз. 16 аресозь солы бичай пособие. Нош собере тыремысь дугдӥзы. Али нылылы 20 арес. Дышетске медучилищеын. Солы али кыӵе ке пособие тыриськыны кулэ-а? А.А. Шаркан ёрос. Семьяослы пособие тырон сярысь законъя но улон-вылон минимум сярысь законъя тӥляд нылдылы пособие тыриськыны кулэ ӧвӧл. ШӦКЫЧ Утчасько кузпал Мыным 24 арес, утчасько кышно. Картэн улэмез кык арлэсь ӧжыт медаз луы. *** Семья кылдытон вылысь утчасько выль удмуртэз - 18 аресысен 70 аресозь пиосмуртэ. *** Утчасько кышно, мед луоз скалэз. Ӧвӧл ке - яралоз кечен но. *** Ваземзэ возьмасько узыр пиосмуртлэсь - картэ курортысь бертытозьлы. *** Ӵош улон вылысь пумиськысал ог 30 арес нылкышноен, умой луысал, солэн нылпи ваёнэз вань ке. *** Мыным 50 арес, тодматскысал карто кышномуртэн - пытсэт сьӧрын пуконэ дас ар кылиз на. *** Кузпалъяськысал аракы пӧзьтыны быгатӥсь кышномуртэн: аслам кышное ваменъяське, юиськод, пе. С. Савельев. Чылкыт омыр - таза улон Удмуртия дасяське кык бадӟымесь адӟытонъёсы (выставкаосы) пыриськыны. Нырысез - "Уралэкология - техноген-2000" - ортчоз Екатеринбургын 4-тӥ-7-тӥ апреле. Соку ик радъямын луоз промышленной предприятиосын, научно-исследовательской институтъёсын ужасьёс понна научно-практической конференция. Отын сэрттозы-пертчозы котырысь инкуазез утёнэн герӟаськем ужпумъёсты. Та адӟытон юрттоз кунгож сьӧрысь куноосын матысь кусыпъёс тупатыны, экология удысын уртче ужаны. Мукетыз адӟытон луоз Москваын 18-тӥ-22-тӥ апрле. Нимаське со "Адями, город но котырысь инкуазь" шуыса. Радъя сое Россиысь Эекологияя кун комитет. Та ужрадэ ӧтемын городъёслэн администрациосазы, улон юртъёсты возёнъя управлениосын ужасьёс. Н.Щеголева. Берпум сюресэ Удмурт шаер куинь чебер пизэ келяз толон берпум сюрес вылэ. Мурт музъем вылын бырем нуныкайёсынымы люкиськон кутскиз азьло ик. Андан ӵыжатӥсьёслэн культура дворецсы пала лыкто но лыкто таӵе бадӟым кайгуэз вормыны быгатӥсьтэм адямиос. Коросъёс выжые выдо но выдо льӧль герберъёс, ӝож гуръёс чузъясько. Номыре но уг шӧдо ни соос, улонысь дырызлэсь вазь кошкем егит пиос. Милициысь покчи сержант Константин Токарев, милициысь прапорщикъёс Владимир Востриков, Владимир Собин кыдёкысь, мурт музъем вылысь пӧсь ожъёсын улонзэс сётӥзы Россиысь калыклэн шудбурез но эрикез, Россилэн быдэслыкез понна. Мурт музъем вылын быремъёсты буре вайыса вераськизы Удмурт Элькунысь Кун Кенешлэн Тӧроез Александр Волков, Россиысь Президентлэн Удмуртиын оскем адямиез Виктор Балакин, шаерысь югдурез утёнъя министр Владимир Щербаков, Ижевск городлэн вице- мэрез Сергей Протазанов. Шаерысьтымы, Милициысь покчи сержант Константин Токарев, милициысь прапорщикъёс Владимир Востриков, Владимир Собин... Эн вунэтэ та нимъёсты! Е. Виноградова. Журналистъёсын пумиськонъёс Пиналъёс кӧс картофка вылэ кылё Таяз учыре журналистъёсын пумиськылӥз Кун Кенешысь ялан ужась комиссилэн кивалтӥсез депутат С. Э. Широбокова. Софья Эльфатовна вакчияк йылпумъян лэсьтӥз бюджетъя но налогъёсъя комиссилэн кылем арын ужамезлы, тодматӥз туэлы азязы пуктэм ужпумъёсын. Оглом вераса, пусйымонэз вань. Со шӧдӥськиз выльзэ бюджетэз кутэмъя гинэ но. Кызьы тодмо, 2000-тӥ арез республикамы пумитаз ни выль коньдон пуйыен. - Али югдур ӧжытак уродмиз, 5-тӥ январьысен взаимозачёт быдтэмен валче, - республикаын 30 процентсэ коньдонэз та амалъя тырыны лэземын ке но - шуиз Софья Эльфатовна. - Предприятиос понна, валамон, со нош ик шуккет луоз. Мон толон вуи Вавож палъёсысь. Отын али ик шӧдӥське ни нылпи учреждениос вылын: пиналъёсты столовойын сюдыны картофка гинэ кылемын на, йӧл но, сӥль но, коньдон тырытэк, табере нокин уз висъя. Отын но татын пумиськыло ни электрокужымез кысылон учыръёс. Огъя вераса, коньдонэн гинэ ужан, вузэн вошъяськыны лэзем луонлыкез чутрак быдтон, экономика вылын урод ласянь туж ӝог шӧдӥськоз. Кылем аръя ке учконо, вань тыронъёс пӧлысь бюджетэ 57 процентэз тыронъя улэп коньдон вуэмын. Ма луоз туэ - вераны шуг. Бюджетъя но выт тыронъя Федерациен кутэм выль документъёсъя трос гинэ юанъёс но валамтэос кылдо. Республикалэн казнаез кин чотын 1999-тӥ арын тырмиз? 175 предприятие пӧлысь нырысетӥ радъёсын мыно "Удмуртнефть", Чепецкой механической завод, Сарапулысь но Глазовысь вина пӧзьтӥсь заводъёс, "Белкамнефть", "Удмуртэнерго", "Удмуртгеология", "Спецгазавтотранс", "АСПЭК" ЗАО но Ижевскысь механической завод. Недоимщикъёс пӧлы нош ик шедиз "Ижмаш", "Ижмаш-авто" но куд-ог мукет предприятиос. Тужгес но секыт югдур кылдэмын Ижевск городъя, солэн казнаез буш. Татысь ик потэ дышетӥсьёсты но врачъёсты уждунтэк возён. Бюджет бордын ужан, сое юнматон районъёсын азинске на. Со йылпумъяськоз февральлэн пумаз. - Милям комиссимы нимысьтыз саклык висъя бюджетэ пырисьтэм фондъёслы но, - пусйиз С. Э. Широбокова. - Кылсярысь, кык пол кутскыса умой-умой эскерим но юнматӥм инкуазез утёнъя фондэз. Бадӟым уж нуиське выт октонэз радъянъя. Матысь дыре эскером автоуслуга сётон удысысь ужбергатӥсьёсты, Нимысьтыз инты басьтозы банкъёс. Комиссия ас вылаз басьтоз коньдонлэсь отчы вуэмзэ но кызьы кутӥськемзэ, ужрадъёс кутоно, республикалэн палэназ лэзёнтэм вылысь. Софья Эльфатовна умоен пусйиз Игра администрацилэсь промышленной предприятиосын огкылысь но пайдаё ужаны быгатэмзэ. Ӟеч амалэз вӧлмытон вылысь, бюджетъя огъясь ужась комиссилэн огез кенешонэз ортчоз Играын. С. Э. Широбокова валэктон сётӥз журналистъёслэн пӧртэм юанъёссылы. Л. Медведева. "Гожтӥськон -2000" Ош дасяське кузь сюресэ Толон редакциын ортчиз бадӟым ужрад. Эскерисьёслэн сак чакламзы улсын радъямын вал лотереяен шудон. Таяз учыре Кизнер палъёсысь ошлы кузь сюресэз ортчоно луоз, Шаркан ёросысь кузёзэ утчаса. Кыӵе почта ёзын гожтӥськемын лыдӟисьмы, созэ тодомы ни матысь нуналъёсы. Шарканэ потаса. Шумпотымон, таӵе дуно кузьым шарканъёслы усиз шуыса. Гожтӥськон туэ отын ӟеч радъямын вал угось. Мукет ёросъёсын ӵошатыса, лыдӟисьёслэн лыдзы туэ татын йылӥз: кылем арын 1543 мурт ке вал, туэ 1-тӥ январьлы 1600 луиз. Та нуналэ ик тодмо луиз устоез почтальонлэн нимыз. Со Алнаш ёросысь Писэйгуртысь Людмила Ивановна Кузьмина. "Удмурт дунне" газет солы кузьмалоз мотоколяска. Синпель кузьымъёсын пусъемын луозы "Удмурт дуннеез" трос вӧлмытӥсь мукет почтальонъёс но. Конкурслы йылпумъянъёсты ивортомы газетмылэн вуоно номераз. Л. Малых. ВОРМОНЛЫ - 55 АР ИСТОРИЫСЬ ЧУРЪЁС "Сталин эш татын мултэс", - шуиз Иосиф Виссарионович, "Победа" орденлэсь вылтуссэ юнматыса Та наградалэн кылдонэз кутскиз 1943-тӥ арын июль толэзе. Горд Армилэн тылысь штабаз ужась полковник Николай Нилов вылӥ командной составез наградить карон понна дасяз выль орденлэсь эскиззэ. Возьматӥз сое Горд Армилэн тылъя кивалтӥсезлы А.Хрулев генераллы. - Орден борды басьтӥськемелэсь азьло, - тодэ ваёнъёсаз гожтэ Николай Сергеевич, - мон туж сак учки вашкала ӟуч орденъёслэсь вылтуссэс. Соосъя кӧня ке эскиз лэсьтӥ. Уг ваты: трос курадӟи. Берпуметӥ быдэстэм уже гинэ сюлэмъям луиз. Таизэ ик дасяй Главнокомандующийлы возьматон понна. Орденэз кылдытӥсь, кызьы верало историе кылем чуръёс, малпаз вал награда вылэ "За верность Родине" шуыса гожтыны, нош вылысьтыз вылаз шуккем кык зарни кизилиослэн шоразы Ленинлэсь но Сталинлэсь тусбуйёссэс пуктыны. Суред дасямын. Табере, вылтуссэ умой-умой учкон понна, орденлэсь образецсэ дасяно. Эскизэз ваё Москваысь Пушечной урамысь ювелирно-часовой фабрикае, возьмато мастеръёслы но валэкто, кыӵе луыны кулэ выль боевой награда. Куспазы ӧжытак кенешыса, вылӥ быгатонлыкен специалистъёс авторезлы шуизы: сокем сӥё-дано орденэз ӟечгес лэсьтыны кулэ, эшшо но узыргес мед адскоз. Веразы ас малпанъёссэс но дэмланъёссэс. Орденэз дасян борды кыско на эшшо одӥг тодмо художникез - А.Кузнецовез, Отечественной война орденлэсь авторзэ. Бӧрысьгес Кузнецовлэн ик ужъёсызъя кисьтэмын вал "За оборону Советского Заполярья", "За освобождение Варшавы", "За взятие Кенигсберга" но мукет медальёс. Художник мыло-кыдо басьтӥськиз выль наградаез дасян борды. Пумиськылӥз ювелиръёсын-мастеръёсын, тодматскиз ӵектонъёсынызы, но 20-тӥ июле бумага вылэ пуктӥз ни нырысетӥ суредъёссэ, орденэз чеберъян вылысь, дуно изъёсты ужаз кутӥз на. Кӧня ке дыр вис карыса, наградаез дасян борды умой-умой басьтӥськизы 1943-тӥ арын октябрь толэзе. Малызэ валэктыны кулэез ӧвӧл, дыр. Фашистъёс кузёяськизы на СССР-лэн бадӟым территорияз, соос киын ай вал Украина но Белоруссия, лек ожъёс мынӥзы Карелиын но музон интыосын. Нош Курской дугаын Горд Армилэн басьтэм быдӟым вормонэз тушмонэз пазьгонлы оскон кылдытӥз но азьлань мыныны кужым сётӥз. Тӥни малы художниклы Кузнецовлы ӝегатскытэк косэмын вал выль наградаез пумаз-йылаз вуттыны но вылаз "Победа" кылэз шуккыны. 18-тӥ октябре РККА-лэн тылъя начальникезлэн ӝӧк вылаз вуо на выль суредъёс. Соос пӧлысь огез Хрулев генераллы туж яраз. Образецсэ кисьтыса, 25-тӥ октябре возьматӥзы Сталинлы. Верховной, выль наградаез кияз кема бергатэмез бере, авторезлы шуиз: - Мон татын мултэс, басьтоно Ленинлэсь но тусбуйзэ. Ми интые суредалэ СССР-лэсь гербзэ, яке Спасской башняез Кремльлэн борддореныз ӵош. Кӧня ке нунал ортчыса, Сталинлэн ӝок вылаз вутто эшшо сизьым пумо эскиз. Соос пӧлысь Иосиф Виссарионович быръе огзэ, дэмла на суредэз ӧжытак воштыны: быдӟыматысагес пуктыны башнялэсь но борддорлэсь вылтуссэ, мед, пе, соос пуксёзы чагыр буёл вылэ. Косӥз Кремль йылын пиштӥсь кизилилэсь сиоссэ ӧжытак вакчиятыны. Сталинлэсь верамзэ быдэстон вылысь, Кузнецов нош ик выль эскиз лэсьтэ, нош ювелирно-часовой фабрика басьтэ задание: эскерон вылысь одӥг орден кисьтоно, уже кутоно платинаез, бриллиантэз но рубинэз. Ювелиръёс трос пол люкаськылӥзы генерал Хрулев доры, кенешизы, кыӵе амалэн эскизэз быдэстыны капчигес луоно. 5-тӥ ноябре соос ортчизы, шуыны луоз, берпуметӥ экзаменэз: ужзылы дунъет сётӥз Советской Правительство. Орденъёсты кисьтӥзы ювелирно-часовой фабрикаын, кыл кутӥсе юнматэмын вал вылӥ квалификациен мастер И.Казеннов. "Победалы" дуно изъёсты - бриллиантэз но рубинэз - ваё Гохранысь - Дуно ваньбурез утёнъя государственной хранилищеысь. Изъёсты бырйиз но ӟечлыксэс эскериз В.Дронкин. Бриллиантэн ужан понна трос дыр кулэ, нош котькуд орденын - 170 из. Котькудзэ нимаз-нимаз учконо, быдӟалаезъя быръёно, интыяз пуктоно, секталаезъя мертано, ӧжытаклы ке но ятыргес кыскиз ке, орденлэн дуныз чакламлэсь трослы будоз. Котькуд "Победаын" бриллиантлэн секталаез луыны кулэ вал 16 карат. Сталинлэн заказэз дыраз быдэсмиз. Вань наградаос пӧлысь со луиз тужгес но даноез но дуноез. Рубинэн пиштӥсь горд кизили - Вормонлэн, армилэн символэз. Кизилилэн дуръёсыз чеберъямын бриллиантэн. Орденлэн шораз - котырес медальон, дуръёсыз "бинемын" лавр но тыпы вайёсын, керттэмын "Победа" кылъёсын шуккем горд лентаен. Медальон шорын - Спасской башнялэн, Кремль борддорлэн ог люкетэз но Ленинлэн Мавзолеез. Ваньмыз со пуктэмын тупаса но огкылысь улонэз возьматӥсь чагыр буёл вылэ. Лаврь - со данлыклэн пусэз, тыпы - кужмо, кышкасьтэм луэмлэн символэз. Кремль но Мавзолей - асьме странамылэн, Москвалэн шорсюлмыз. Приволжьеысь военной округлэн быдӟым Вормонлы сӥзем стендаз та наградалы нимысьтыз инты висъямын. Кылдӥз но со мукетъёсызлэсь пӧртэмгес - зэмос вормонлы оскыса. Вылӥ орден юнматэмын СССР-ысь Верховной Советлэн Президиумезлэн Указэныз 1943-тӥ арын 8-тӥ ноябре. Соин пусйыны чакламын вал Советской Армилэсь вылӥ командной составзэ тужгес но ӟеч боевой операциосы пыриськемез но вормонъёс басьтэмез понна. Кинлы шуд усиз "Победа" орденэз нуллыны? Соос пӧлы нырысь ик шедиз ачиз Верховной Главнокомандующий И.В.Сталин - наградить каремын кык пол. Озьы ик кык пол пусъемын Советской Союзлэн маршалъёсыз Г.К.Жуков но А.М.Василевский. Орденлэн кавалеръёсыз луизы - Советской Союзлэн маршалъёсыз Л.А.Говоров, Р.Я.Малиновский, К.А.Мерецков, К.К.Рокоссовский, Ф.И.Толбухин; Генеральной штаблэн кивалтӥсез - А.И.Антонов; Югославиысь Народно-освободительной армилэн кивалтӥсез маршал И.Б.Тито. Польской Войсколэн главнокомандующиез маршал Р.Жимерский, Европаысь союзной войскоослэн Верховной главнокомандующийзы генерал Д.Зазенхауэр, Европаысь английской войскоослэн командующийзы фельдмаршал Б.Мантгамери. Л.Медведева. * "Победа" орденлэн вылтусыз. ШӦКЫЧ Эмъюмъёс туж трослы дуноямын. Уждунъёсты ӝегато, нылпи пособиосты я дӥськутэн, я эшшо кыӵе ке вузъёсын сёто, нош пенсиослэн быдӟалазы дунъёс сьӧры уиськыса уг вуы. Озьы тӥни, висись адямиос но амалтэк висемысь дугдо. (Редакцие вуэм гожтэтысь). Санитар: - Доктор, таидлэн уксё пуйыез буш, одӥг копейкаез но ӧвӧл. Нош туала вакытэ коньдоно муртъёс гинэ висё. Алдаськыса аналскемын. Суредаз Игорь Кийко. ШӦКЫЧ Мынам телевизоре Светофорлы - лымы дӥськут Тол куазед лымызэ туэ уг жаля, валаса но уд быдты, йырчукин зымод букосэ. Мыным бен маке шат, бурдъёсы лымые уг колӟасько. Адямиос жаль, уката ик песянайёс но пичи нылпиосын анайёс. Амалы ке луысал, ваньзылы ик пал бурд ке но сётысал. Сыӵе мылкыдын алигес Ижевскетӥ котырскыны малпай. Пушкинской урам вадьсытӥ лобӟыкум, син шорам йӧтӥз ӝужыт траншея. Оло, городын кинлэсь ке утиськон ужъёс мыно? Ӧвӧл, со лымы гурезь вылэм. "Киров урам" дугдылонтӥысь "Прогресс" научно-исследовательской институтэ пырон ӧс доры лымы борддор пыр сюбег сюрес нуэ. Ӧжытак улӥынгес, Пушкинской но Киров урамъёс вожысь светофорлэн гордо-ӵужо-вожо синъёсыз ӝоген кыниськозы, мынӥсь-ветлӥсьёс но руль сьӧрын пукисьёслы лымы пыр кырмышъямез уз луы ни. Жаль, вераськыны быгатымтэеныз светофорлэн ӝожтӥськемез уг луы городысь кивалтӥсьёслы. Соку, оло, кин ке но кыльыны юрттысал солы лымы дӥськутсэ. Ӟечкылан! 31-тӥ декабре вордӥськем нуналзэ пусъе Шаркан ёросысь Мишкино селоысь Владимир Анатольевич Караваев. Юн тазалык но шудо-буро улон сӥзе школае ӵош ветлэм Аня эшед. Гажано эшъёс! Ӵыжы-выжыостэс, эшъёстэс, тдмоостэс ӟечкыламды потэ ке, ыстэ уксё тыремды сярысь квитанцидэс но гожтэттэс редакцие. Вуоно арысен ӟечкылан понна дун 15 манет. Коньдонэз ыстоно "Удмурт дунне" газетлэн расчётной счётаз 40603810300000010020 Ижевскысь газпромбанклэн филиалаз, БИК 049401853, к/с 30101810 300000000853 ОКПО 13051252 ОКОНХ 87100 ИНН 1834300211 Азьпалан Богомольный но мукетъёсыз Москваын потӥсь "Профиль" журнал 12-тӥ номераз сётӥз Удмурт Республикаысь бизнес удысын валтӥсь инты басьтӥсь адямиослэсь нимтулъёссэс. Отын валтӥсь интыын мынэ "Удмуртнефть" акционер огазеяськонлэн генеральной директорез Евгений Богомольный. "Удмуртиын бадӟым политика Богомольныйтэк уг лэсьтӥськы, - пусъе журнал. - Республикаысь парламентлэн но Ижевскысь город думалэн депутатэз сессиосын ӵем уг вераськы. Одӥгез тодмо, Удмуртиын ужась законъёс но постановлениос сотэк уг кутӥсько". Евгений Богомольный бӧрсьы мынэ Ижевскысь электромеханической заводлэн директорез Юрий Шестаков но "АСПЭК" акционер оагазеяськонлэн президентэз Виктор Хорошавцев. Б.Никитин. Ассэ вормись 20-тӥ даур асьме вылтӥ пӧртэм сямен погыльскиз: кинэ "калык тушмонэ" поттӥз, кинэ ож бусыын погыртӥз, кинлэсь лулпушсэ быдтӥз, кинэ вылӥе ӝутӥз но быдэс дуннелы тодмо кариз. Та удмурт нылкышнолэн пинал но егит дырыз ортчиз Сталинлэн ӧтёнъёсыз улсын, нош ужаны кылдӥз Хрущевлэн но Брежневлэн кивалтон вакытъёсазы. Вошъяськылӥз улон, но ӧз ыштылы ас ӧрзэ обкомлэн секретарез Балезино районын Чуялуд гуртын вордскем нылкышно Анна Георгиевна Максимова. Даурлэн адямиезлы кемалась ӧвӧл 80 арес тырмиз. Кызьы меда адӟиське туала улонмы кузь сюресэз вормем муртлы? Кызьы улэ туннэ вылӥ партийной ужын тыршем адями? Таӵе малпанъёсын со доры вамыштӥ. Анна Георгиевнаез нырысьсэ адӟыса, паймемме ватыны ӧй быгаты. Сокем егит но чебер потӥз. Ма неужто со 1919-тӥ арын вордӥськемын? Ӝужын, веськрес, нап но кузь йырсиез вылӥе ӝутэмын. Вылтусызъя но ассэ возён сямызъя сое амалтэк англи нылкшноен ӵошатӥ. Удмуртлы уг но кельшы кадь. Но вань вераськонмы удмурт сямен ортчиз. - Азьло аръёсы удмурт гуртъёсын нылпиосты вочяк удмурт кылын дышетылӥзы, - кутскем мадёнзэ Анна Прокопьевна. Туж дышетскеме потэ вал, но Чуялудын школамы ӧй вал. Зӧкез агае, Миша, Узяла (али село Балезино) дышетскыны ветлылӥз. Со, котькуд дышетскон кутскыку, дышетӥсьёсты ёртылэм: "Ку мынэсьтым сузэрме школае басьтоды ни?" Огпол шумпотыса ивортӥз: "Тонэ школае ӧтизы". Ӟеч, лэся, дышетскылӥськем. Сотэк ӧй бырйысалзы, дыр, учкомен но кивалтыны. 7-тӥ классэз 1935-тӥ арын йылпумъяй. Со вакытэ гуртын улон туж секыт вал. Ма, соку гинэ калык ваче ужаны дышетскылӥз, коллективизация улонэ пыӵаз. Адямиос ужатэк ӧз улэ, но коньдонэз ӧз адӟылэ. Тодам ваисько тятиньме. Ужысь бертылӥз, азькышетаз шелеп вайыса. Гуразе куштыса, мумилы шуылӥз: "Ме, Тоня, ужам понна ваи". Со плотник вал, бадӟымесь коргидъёс лэсьтылӥз, лумбыт сиськытэк ужалляз. Мумые сьӧраз одӥг гинэ курег пуз пӧсьтыса келялляз, но сое но со берлань вайылӥз. Пиналъёс мед сиёзы, шуылӥз. Семьямы бадӟым вал. Но 13 пинал пӧлысь витезлы гинэ инмар улыны сётӥз. Дышетскем адямиослы соку уждун тупатылӥзы, соин ик, вылды, начарысь потон понна кызьы ке но дышетсконме азьланьтыны малпай. Документъёсме Глазовысь педучилищее нуи. - Отын но-а удмурт кылын дышетылӥзы? - Ӟуч кылын. Со бордын ик вань секытэз вал. Шонер малпанъёсме ӟуч сямен вераны ӧй ватлайтылы. Вылаз ик, туж возьдаськись, кепырась вал. Тужгес но зол кышкалляй историен дышетӥсьлэсь Алексей Константинович Поздеевлэсь. Сое "курьерской поезд" шуо вал. Уже вуытозяз, быдэс городэз бызьыса котыртылӥз. Тӥни со понна солы сыӵе кушем ним лякизы. Уг тодӥськы, оло, кужмо, визьмо луэменыз со мыным сыӵе керпотон сётылӥз. Монэ султытылӥз но шуылӥз: "Пока Аня Максимова по-русски не ответишь - не сядешь". Малы удмуртлы ӟуч кыл сокем секыт потылӥз? Асьме кылын "родъёс" но "время" ӧвӧлэн-а, мар-а уг валаськы вал. Анна Георгиевна диплом басьтэм таки, но Чуялудаз бертыны ӧвӧл лэзиллям. Ужаны ыстӥллям Яр районысь тужгес но пыдлось гуртэ. Куинь ар куспын куинь школаез воштэм. Тарасово, Ворца но Байдалино гуртъёсысь школаосын пиналъёсты... ӟуч кыллы дышетылэм Тӥни, оло, соку ик ачиз но умойгес ӟуч кыллы дышиз. Нош Ворцаын (Михаил Федотовлэн гуртэз) бигер кылэз но валаны кутскиз ни вал. Яр ёросын ужамзэ Анна Георгиевна пӧртэм мылкыдын тодаз вае. Самой сайкытэз - яратон но семья кылдытон. Самой курытэз - война аръёс. Байдалиноын пумитаз яратонзэ, школалэз директорез Данил Агафонович... Перевощиков луиз солэн кузпалыз. Синмыз лябен, воргоронэз войнае ӧз басьтэ, райкоме кутӥзы, нош кышнозэ "Азьлань" газетэн кивалтыны пуктӥзы. Тодмотэм уж, туж секыт. Быдэс редакциын - кык ужась. Ярам, бӧрысьгес татчы ужаны фронтысь сӧсырмыса бертэм пиосмурт лыктӥз на. - Но тужгес но секытгес вал калык шоры учкыны, - маде Анна Георгиевна. - Гуртъёсын кышноос но нылпиос кылемын. Тросэз сютэм кулылӥзы. Газет арняяз огпол потылӥз. Материал бичаса, вань гуртъёстӥ пыдын ветлылӥм. Ноку уг вунэты таӵе суредэз: Ярысен Укан гурт пала мыныкум, сюрес вылысь куинь шӧй адӟи, огез кышномурт вал, кытчы ке сылал доры мынэ вылэм, лэся, вӧзаз ӟенелик посудаез усемын. Вань иворъёсты калыклы газет но радио пыр вуттыны тыршылӥм. Война азьын куд-огез радиоприёмникъёс возьылӥзы ни, нош табере соос таламын вал, марзэ кулэтэмзэ адямиос медаз кылзэ шуыса. Туж возьмаллязы Совинформбюролэсь иворъёссэ. Быдэс посёлоклы одӥг радиоузел, со но - линия сьӧрын. Уин 2 часлы мынӥсько отчы, кык час пала Совинформбюролэсь иворъёссэ кылзӥсько но гожтӥсько. Собере уйбыт удмрут кылэ берыктыса пукисько, вазь ӵукна нош ик радиоузелэ вамыштӥсько - табере быдэс районлы ивортон понна. Москваысь иворъёсты уйлы быдэ басьтылӥм, нош газетэ одӥг пол сётылӥм. Уин кӧлон ӧз шедьылы. Кӧня вал уждунэ уг тодӥськы. Но тодӥсько мае сиылӥм районысь столовойын: чырсатэм кубиста но губиен шыд, ялан нумыръёсын. Лыдӟисьёслы валэктэме потэ: война кутскон аре Анна Максимовалы 22 арес вал. Казённой пу коркан, картэз сяна, улӥзы на пичи сузэръёсыз. Вань шуг-секытъёс шоры учкытэк, соос, апайзылэсь кылзӥськыса, школаез Ярын йылпумъязы. Анна дас куинь ар пала пинал вайытэк улӥз. Война бере 1948-тӥ арын егит нылкышноез Играе ужаны ысто. Озьы со райкомлэн секретарез луэ. Но татын со куинь ар гинэ ужаны вуиз - Вылӥ партийной школае дышетскыны келязы. Йылпумъяз дышетсконзэ, вордӥськиз кема возьмам пиналыз. Макем шумпотон! Но 1953-тӥ арын, сюрес вылын машинаен шуккиськыса, картэз бырыны шедиз. Лена нылзылы соку ньыль толэзь гинэ вал. Куректонзэ вормиз ужен. Райкомлэн секретарез луыса дасо аръёс пала Глазовын ужаз. Хрущёвлэсь политиказэ нуыны та ёросын кылдӥз. Собере ужаны Ижевске выжтӥзы - табере партилэн обкомезлы секретаре юнматӥзы. - Выль семья кылдытон сярысь малпаськыны дыры но ӧй вал, - маде Анна Георгиевна. - Монэ но нокин ӧз адӟы, мон но ӧй адӟы. Асме эрикогес ке шӧдысал, оло, курась но луысал. Нылы бызьытозь, 21 ар огнам улӥ. Пенсие потыса гинэ выль семья кылдытӥ. Зэм, нылкышнолэн сюлмыз кема аръёс ӵоже яратонлэсь сӥяса кадь улӥз, но семьяез котьку бадӟым вал. Иже улыны выжыкузы, 8 кузя улӥзы: мумы-бубыосыз, братэз семьяеныз. Соин ик обкомлэн секретарезлы 65 квадратной метр быдӟа квартира висъязы. Собере улонысь кошкизы пересьёсыз, нимаз квартира висъязы братэзлы. Тӥни соку нылыныз ваче кылиз. Бадӟым квартираын улэмез понна кышкатскиз. Мар калык шуоз? Квартиразэ берен государстволы сётӥз. Солы пичигессэ висъязы. Али отын нылыз семьяеныз улэ. Нош ачиз пенсие потэмез бере выль картэзлэн кык комнатаен квартираяз выжиз. Табере татын ик быземез бере картэныз ӵош улэ Сашенька внучкаез. Уг ваты: обкомын ужам мурт доры мыныкум, йырам сьӧлыко малпан вал: адӟо, пӧй, узырлык пӧлы выйыса улӥсь адямиез. Угось сюрылӥ огпол сыӵе учыре. Материал гожтон понна мынӥ вал одӥг "партийной бослэн" кышноеныз тодматскыны. Пересь кышно корреспондент лыктон азьын зарни люстраоссэ газетъёсын шобыръям, дуно ковёръёссэ биняллям, домработница шуонзэ но кытчы ке лэзем. Анна Георгиевналэсь номыр сыӵе узырлыксэ ӧй адӟы: улэ огшоры комнатаын. Но сое котырто асэныз керттэм, пужыятэм, чильпам киужъёс. Кыкетӥ картэныз нылкышнолы шуд усиз на кызь ар улыны. Огазеяськизы кык огназы кылем сюлэмъёс. Юнме уг шуо, лэся: аслэсьтыд шуддэ дурыны ноку бер ӧвӧл. Улӥзы ог- огзэс валаса но гажаса. Кузпалыз улонысь кошкем бере, Анна Георгиевна куректонзэ но мӧзмонзэ нош ик вормыны быгатӥз: - Ӧсэ адямиослы котьку усьтэмын, - шуэ со. - Коркамы улӥсь кышноосты люкаллясько. Огпол крень нунал но ортчытӥм, соку 17 кузя люкаськылӥм. Тросэз кышноос огназы кылемын, нокытчы уг ветло, газет уг лыдӟо. Кык ар озьы люкаськылэммы бере, табере пӧртэм юанъёсын ялан мон доры пырало. Мон коммунист ик кыли, ветлӥсько коммунистъёслэн кенешъёсазы. Политикаын югдурез отын сэртто-пертчо ке, кышноослы но валэктӥсько ни. Но, кызьы меӵак вераз Анна Георгиевна, туала политикаез, пе, солы но, вань улонзэ партилэн ужъёсызлы сётэм адямилы, валаны туж шуг. - Али но кызьы но уг ватлайтӥськы, малы Думаын коммнуистъёс но "Единство" ӵош луизы. Бен, шумпотӥсько Селезневез тӧрое быръемзы понна, Маслюковез но тани экономикая комитетлы кивалтӥсе бырйизы, но малы Примаков солань-талань шонаськыны кутскиз, сое уг валаськы. Адямиос Удмуртиын "Единстволы" туж зол дурбасьтӥзы, малпасько, соос озьы валатэк куараоссэс сётӥзы. Коммунистъёс сярысь али озьы но, тазьы но верасько. Нош шӧдылӥз-а меда партилэсь янгышъёссэ обкомлэн адямиез? - Трос вал, конечно, янгышъёс. Соин ик перестройкалэсь кутскемзэ тросэз коммунистъёс туж умой валазы. Партилэн куд-ог решениосыз туж умойтэмесь вал. Кылсярысь, малы колхозысь калыкез гуртэ пытсано вал? Малы аслыз адямилы сюрес утчаны лэзёно ӧй вал? Коммунистъёс дыръя сад-бакчаос сётъяны кутскизы. Умой кадь со. Но партиен кивалтӥсьёслы сад-бакча возьыны лэземын ӧй вал. Глазовын улыкумы, бакчамы вал, Иже выжеммы бере мумы-бубуосылы озьы ик бакча басьтӥмы, соос вылэ ик гожтӥмы. Но, сое тодыса, обкомлэн секретарез В. К. Марисов монэ дораз ӧтиз но лек шуиз: "Или огородом будешь заниматься, или выкладывай партбилет!" Мар карод, бакчамес вузамы. Собере бакчаос пумысен нош ик выль постановление потӥз: музъемез 4 сотка гинэ мед луоз, коркаез 3х4, мунчо пуктыны уг яра. Кӧня ветлӥзы бакчаосты эскерыса... Тӥни сыӵе законъёс калыклы кулэ ӧй вал. Тӥни соин ик коммунистъёслы калыклэн вожпотонэз кылдылӥз. - Соку малы меда партия сыӵе чурытэсь решениос кутылӥз? - Соин, дыр, валэктыны луэ: соку асьме государство гинэ тодмотэм сюрестӥ мынэ вал. Партия, оло, кышкалляз но, социализмын выльысь узыръёс кылдозы шуыса. Соин государство ассэ ачиз пушкысеныз но утьыны выриз. Чурыт партийной дисциплина со бордысь ик, дыр, потылӥз. - Нош кызьы дунъяно партилэсь семья кусыпъёсы пыриськемзэ? Яратонлэсь кужмогес кулон гинэ шуиськом ке, шонер-а меда вал партилэн адями мылкыдъёслэсь но вылӥегес султыны турттонэз? - Партилэсь кадръёссэ зол чаклаллязы. Семья кусыпъёсы пыриськыса урод лэсьтылӥм. Тодам лыктэ Красногорск районысь секретарь. Пӧрасеныз кусыпъёсыз чидантэмесь вал. Кӧня курадӟыса улӥзы. Но озьы ик люкиськыны ӧз лэзе. Семьяез пыр ик аслыз бырон шедьтӥз. Нош али, мон сямен, воксё эрик сётэмын. Кӧня али огназы улӥсьёс - со тоже умойтэм мар ке. Кышно вайытэк но, бызьытэк но уло. Яке секыт улон-а курдатэ семья кылдытыны, яке висёнъёслэсь-а кышкало? Вераны шугъяськисько. Куд-огез, оло, шуоз: дыр ортчемъя, пе, партилэсь ужъёссэ курланы капчи. Нош со вакытэ тырмымтэосты вераны дӥсьтылӥзы-а меда? Дӥсьтылӥзы. Сыӵеос пӧлын вал Анна Георгиевна но. - Валерий Константинович Марисовен дас ар ужай, соин туж секыт вал ужаны. Кивалтон амалъёсаз со пумен валтӥсь интые пуктыны кутскиз "мон" кылэз. "Мар мон верай - закон", "лэсьты озьы, кызьы мон шуи". Сыӵе кузёяськон амалъёссэ эш мылкыдын но, коммунист сямен но трос пол критиковать карылӥм. Одӥг-кык арнялы кылзӥськылӥз, собере выльысь "мон гинэ валасько, мон быгатӥсько" шуылӥз. Мон сое ӧй чидалля. Соин ик 55 арес тырмиз но - ужысьтым кошки. Вал бен солэн ӟеч куронъёсыз но: со дыръя коньдон тус-тас ӧз луылы, ачиз но копейкаез но ӧз капыртылы, мукетъёссэ но ӧз лэзьылы. Анна Георгиевналэн ужам стажез 53 ар лыдъяське. Обкомысь кошкемез бере 72 аресозь ужаз на "Тодон" обществоын. Пусъемын медальёсын но почёт грамотаосын. Но ветеранъёс радэ сюрымтэ. Обкомъёсты быдтэм бере сыӵе луиз солэн адӟонэз. Арлыдоослэн нуналзы дыръя но солы мыныны некытчы - уг но ӧтё. Ярам, сое уг вунэты коммунистъёслэн организацизы. Вераськон куспамы трос пол пыраллязы одӥг коркан улӥсь бускельёсыз. Я керттӥськон, я лыдӟиськон мугъёсын. Ог-огенызы ӵошатскыса сямен лыдӟо Александра Марининалэсь книгаоссэ. Мӧзмыны дыр ӧвӧл кадь. Юатэк ӧй ӵыды: кин луысал меда та нылкышно, ас улонзэ партиен ке ӧй герӟасал? Шуиз: "Дышетӥсь". Зэмзэ но, Анна Георгиевналэн вань ӵыжы-выжыосыз - дышетӥсьёс. Лена нылыз - историлы дышетэ, солэн кузпалыз Юрий Валерьянович Семенов - озьы ик дышетӥсь (преподаватель), калыклы тодмо Кун Кенешын депутат луэменыз. Соослэн нылпиоссы но дышетӥсьлэсь сюрессэс бырйизы. - Но котькытын мон мед ужасал, улон шоры учконэ ӧй воштӥськысал, али кадь ик луысал, - мур лулскыса вераз кышномурт. Бен, улон пӧртэм сямен ке но бергалляз, нылкышно котьку оскылӥз шудо, сайкыт улонлы. Туннэ но со юн оске, асьмеос дуннеын шонер мынон сюрес шедьтомы шуыса, узыръёс но начаръёс уз луэ, котькуд адями огсыр улоз. Тӥни озьы улэ бадӟым сюресэ пичи удмурт гуртысь потэм нылкышно Анна Георгиевна Максимова. Шуг-секытъёслэсь али но уг палэнскы, ассэ куректонлэсь но, мӧзмонлэсь но вормыны быгатэ. Т. БАННИКОВА. КИЯСА ПАЛАН 22-тӥ интыын Пудо-живот вордонъя лыдпусъёсты учкиськод ке, Кияса ёрос улӥе но улӥе лэзиське. Вавож, Можга но Ува ёросъёсын котькуд скаллэсь 8 килограмм пала йӧл кыско, нош Киясаын 3,1 сяна уг луы. Таӵе югдур кыстӥське ини пудоез толйытыны пыртэмзы дырысен. Сӥль поттон ичиёме 1999-тӥ арын ёросысь ваньмаз сямен хозяйствоосын сӥль поттон но сое вузан кулэсмиз. Нош Суворов нимо колхоз но Ленин нимо совхоз ӧз кулэстэ. 1998-тӥ арен ӵошатыса, миым скалъёслэн 268 килограммлы продуктивностьсы усиз. "Яжбахтинское" но "Ленинец" хозяйствоосын пудолэн йырыз ялан кулэсме. Сюрес лэсьтон азинскоз Туэ Кияса-Юрмалай сюресэз асфальтэн шобыртон азинскоз. Озьы ик ужалозы Вуж Моньяысь Подгорное газ кыскон бордын но. Киясаысь сюрес лэсьтӥсьёс ёросысь сюресъёсты выльдон бордын тыршозы. Г.Васильев. Кияса школалы - 130 Туэ Кияса шор ёзо школалы 130 ар тырме. Нырысь со одӥг аръем земской школа гинэ вал. Дышетӥзы отын священник Иоанн Васнецов но почта станциез возисьлэн нылыз Римма Ивановна Смирнова. Дышетскиз 71 адями. Школалэн али юртэз 1971-тӥ арын пуктэмын. Татын 18 дышетӥсьёс ужало. Соос пӧлысь 11-ез калыкез дышетон удысысь отличник луо. Нош химияя предметэз нуисьлы Л.Н.Коробейниковалы Удмурт Республикаысь дано дышетӥсь ним сётэмын. А.Павлова. УР-ысь Кун Кенеш, Правительство но республикаысь 2 номеро больницаын ужасьёс куректыса иворто: кулӥз республикаысь 1 номеро больницаысь азьвыл валтӥсь врач, Иж горисполкомысь тазалыкез утёнъя отделлэн кивалтӥсезлэн азьвыл воштӥсез, республикаысь 2 номеро больницаысь врач, Удмурт Республикаысь дано врач ИЗАКОВИЧ Татьяна Марковна. Вато туннэ. Люкиськыны луоз 11-13 часэ "Аксион" культура дворецын. Удмурт Элькунысь Правительстволэн Тӧроезлэн Н.А.Ганзалы ВАЗИСЬКОН Гажано Николай Алексеевич! Элькунысьтымы экономикалэн аграрной люкетаз чидантэм секыт югдур кылдэмын: гуртлэн ваньбур поттон быгатонлыкез быдтэмын. 80 процентэз машинаос но тракторъёс пӧсьтэмын. 1991-тӥ арен ӵошатыса, 11 пол ичигес кутӥське удобрение. Пумен кулэсме муослэн удалтонлыксы, шӧдскымон ичигес люкаське урожай. 100 сюрс гектар пала гыроно-кизёно музъем аналтэмын, уже со тыро-пыдо уг кутӥськы ни. Республика арлы быдэ 70 сюрс тоннаозь ю тысь уг басьты. Эстӥськонлы но энергилы ялан будӥсь дунъёс ( 1999-тӥ арын соос куинь пол йылӥзы), промышленной но гурт хозяйствоысь вузъёслэн пӧртэм дунзы ( кусыпсы ньыль поллэсь ятырлы висъяське), ваньбурез келян интыын рыноклэн радъямтэез агропромышленной комплексэз куашкатонэ вуттӥзы. 1986-тӥ-1990-тӥ аръёсын ӵошатыса, 2000-тӥ арын гурт хозяйствое коньдон висъян 30 поллэсь унолы кулэсмиз. Пумен вужмо пудо вордон гидъёс но музон юртъёс. Дугдытэмын музъемез умоятон уж. Быдэсак сямен куашкатэмын "Сельхозхимилэн" ёзъёсыз, лэсьтӥськонъя, сюрес ӝутонъя, муосты кӧсатонъя, ву киськанъя гуртысь предприятиос. "Удмуртилэсь экономикаын кулэяськонъёссэ утён понна" движенилэн исполкомез вазиське тӥледлы, Николай Алексеевич, республикаысь агропромышленной комплексын кылдэм югдурез эскерыны но сое умоятыны дэмланэн. Озьы лэсьтоно луиськом, асьме шаерын кун аграрной политика нуымтэен но правительстволэсь АПК-лы туэ юрттон мылкыдзэ тодымтэен. 2000-тӥ арлы гуртлы юрттонэз кӧня ке пол йылэтон пумысен тӥляд ӵектонды республикалэн бюджетаз шӧдӥськытэк кылиз. Правительстволэн гуртоослэсь нуналмысь ужъёссэс радъяны сюлмаськымтэез мылкыдэз уг ӝуты. Ваньзэ тае лыдэ басьтыса, ми куриськом ӝегатскытэк эскерыны АПК азьын али но азьланьын сылӥсь ужпумъёсты, сотэк, малпаммыя, республикаез витё вераны луонтэм шуг- секытъёс. Удмурт Республикалэсь Правительствозэ куриськом: 1. Агропромышленной комплекслы туэ бюджетысь висъяно коньдонлэсь 80 процентсэ сётоно нырысетӥ маёзь. 2. Гуртысь ваньбур поттӥсьёслы республикалэн но ёросъёслэн бюджетазы тыронъёсты нырысетӥ ноябрёзь сётытэк кельтыны лэзёно. 3. Гурт кивалтӥсьёслэн кылем арын 16-тӥ декабре ортчем кенешсылэсь куронъёссэ одно ик быдэстыны. 4. АПК-ын кун политикаез радъян вылысь, ялан ужась комиссие Завьял ёросысь "Путь Ильича" колхоз-племзаводлэсь тӧрозэ, Кун Кенешлэсь депутатсэ В.А.Никитинэз пыртыны. 5. Правительстволэн кивалтӥсезлэсь гурт хозяйствоысь вузъёс поттэм понна коньдон висъянэз (дотациосты) 2-3 пол йылэтон но эстӥськонлы дунъёсты кулэстон, мултэс адямиослэсь но ёзъёслэсь взаимозачёт ортчытонэ пыриськемзэс палэнтон сярысь ӵектонъёссэ улонэ пыӵатыны. 6. Закон кылдытонлы кичӧлтон чотын Удмурт Республикаысь Кун Кенеше но Россия Федерациысь парламентэ эстӥськонлы но энергилы дунъёсты кортнан сярысь ӵектонэн потыны. Кутэмын "Удмуртилэсь экономикаын кулэяськонъёссэ утён понна" движенилэн исполкомезлэн паськытатэм заседанияз. Кыл дунне Вераськемдэс чаклалэ ай "Милям" - со "асьмелэн-а"? Анай кылзэс умой тодӥсь удмуртъёс но куд-ог дыръя янгыш верасько. Кылсярысь, басьтом "милям" но "асьмелэн" кылъёсты кызьы кутэмез. Шуом, куспазы умой улӥсь кузпалъёс пӧлысь картэз кышноезлы шуэ: - Мон шумпотӥсько, асьмелэн семьямы котьма ласянь адӟем карымон шуыса. Пиосмуртлэн веранэзлэн валатоназ пыре кышноез но, мукет сямен вераса, со мурт, кинэн вераське. Нош люкиськем кузпалъёс пумиськыку, пиосмурт азьвыл кышноезлы тазьы вераны быгатоз: - Милям ваньмыз умой, тонэн сямен чыры-пыры понна ум керетӥське. Таяз вераськонын "милям" шуонэ азьвылэз кузпал уз ни пыры. Озьыен, "милям" кыллэн валатоназ уг пыры со мурт, кинэн вераське адями. Нош "асьмелэн" шуэ ке, кылзӥсь мурт сярысь но вераськон мынэ. Вераськемдэс чаклалэ ай - валалоды. "Лыдъян" но "лыдӟон" Озьы ик шонер ум кутӥське "лыдъяны" но "лыдӟыны" кылъёсты. Ӵемысь кылоно тазьы верамез: - Лыдӟы, кӧня коньдонэд сьӧрад. Янгыш верамын. Шуоно вал: - Лыдъя. Малы? Коньдонэз лыдъяку, вераськон мынэ лыдпус сярысь. (Ӟуч сямен ке - счёт, считать, число, количество.) Нош "лыдӟыны" кыл возьматэ книга-газет яке мукет гожъям-печатлам вылысь букваосъя, кылъёсъя быдэс валанэз тодыны быгатэммы сярысь (ӟуч сямен - читать). Озьы ӧвӧл шат? Вераськыкуды но, гожъяськыкуды но чаклаське, соку ваньмыз ас интыяз пуксёз. П. СКОБЕЛЕВ. Крезьгурез улӟытӥсь Элькунысьтымы культура удысысь сӥё-дано ужась Вячеслав Степанович Лекомцев вордскемын Игра районысь Лонки-Ворцы гуртын дышетӥсьёслэн семьяязы. Кузпалыз Нина Васильевна - врач-невропатолог, радиозаводлэн медсанчастяз тырше. Кык нылъёсыз: Елена гурт удысъя академиез йылпумъяз, Ирина медициная академиын дышетске. Эх, арганэ, эх, баянэ! Адями гуртын вордске ке, чебер инкуазь, котыр нюлэсъёс, визылась шуръёс, пӧзись ошмесъёс, кырӟась тылобурдоос - ваньмыз со пӧртэм ворекъясь буёлэн адямилэн лулаз, йырвизьмаз пыӵа. Солы нокин но юри уг дышеты кадь. Нош кыӵе гурт бен аргантэк, кырӟантэк, эктонтэк луоз? Пичиысен ик пиос но нылъёс, атайзы-анайзы шудо ке арганэн, куро ини сое киязы. Ӝыт ульчаос арган куараен пачылмо. Сюлэм соку ик кыре куриське... Вячеслав Степанович со пумысен тазьы валэктэ: туж мур валаны но яратыны кулэ крезьгурез, инкуазьлэсь пуштроссэ, буёлъёсты. шӧдӥськод ке нылпилэсь крезьгур борды кыстӥськемзэ, сое яратэмзэ, соку ини вакытаз тыршоно солы юрттыны та сюрес вылэ потыны". Пичи Славалэн сюратаез Иван Леонтьевич шӧдӥз солэсь луонлыкъёссэ, басьтӥз арган. Слава туж шаплы шудыны дыше. Собере шӧртчи пияш кутске радио пыр чузъяськись крезьгуръёсын тунсыкъяськыны. Валаз: вань кырӟанъёсыз арганъя нёжъяны уг луы. Быдэс колхозазы одӥг гинэ баян. Колхозлэн кивалтӥсез Григорий Фёдорович Корепанов (ӵыжы- выжыез) сётэм солы шудыны. Мумы-бубыосыз басьто самоучитель. 7-тӥ классын Слава ӟеч-ӟеч шудыны дыше ни. Уката но яратыны кутске крезьгурез. Тодаз вае: "Сое яратыны юрттӥзы кык двоюродной сузэръёсы но анае. Сузэръёсы туж чебер кырӟало вал, нош анае пинал дыръяз гитараен шудылӥз". Выжызы кырӟась-шудӥсь вылэм бере, инкуазь эшшо одӥг усточиез сётэ та семьяе. Вячеслав Лекомцев, Лонки-Ворцы гуртаз сизьым классъем школаез йылпумъяса, 1960-тӥ арын вуэ Ижевскысь крезьгуръя училищее. отчы пырыкуз, комиссия юам: "Скалды вань- а?" Слава нокыӵе кариськытэк шуэм: "вань, но туж ӧжыт йӧл сётэ". Соос сюлмасько вылэм: квартираын улыса, коньдон тыремез луоз-а меда та пилэн, малы ке шуоно, общежитие соку ӧй вал на. Городын улон пӧртэмгес шуыса, пияш валаз. Ческытгес сием но, дӥсяськем но потэ. Бен, фуфайкаен уд ветлы. Пинал мурт шоры нылъёс но учкыло. Озьы малпаса, кыкетӥ курсын дышетскыкуз, егит студент пичиен-пичиен дӥсь но нянь понна ужаны кутске. Гужем вуэ ке, со ини пионеръёслэн лагерязы. "Туж шуг вал, тодонэ ӧвӧл, кельшисьсэгес, каньылэсьсэгес кырӟанъёсты кема бырйыса пукылӥ", - тодаз вае вячеслав Степанович. Крезьгуръя училищеез йылпумъяса, егит специалист Игра посёлоке ужаны мынэ. Отӥяз со Ленинградысь Крупская нимо культурая институэ заочно дышетскыны пыре. 1969-тӥ арын йӧно пияш Ижысь 3 номеро музыкальной школае ужаны лыктэ. Гурезь гурезен уг пумисько, нош адямиос пумисько, шуо калыкын. Татысен Вячеслав Степанович пумита ӵош дышетскем эшсэ, домбраен шудӥсез, со кивалтэ вылэм "Италмас" ансамбльлэн крезьгуро группаеныз. Ӧтиз эшсэ контрабасэн шудыны. "Италмасын" ужаз ке но, егит крезьчилэн сюлэмыз культурая училищее кыскиз: музыкальной училищеын дышетскыкуз, татын одӥг ар ужаса вуттӥз уго. Тӥни озьы, 1972-тӥ арысен Вячеслав Степанович Лекомцев республикаысьтымы культурая училищеын крезьгуръя дышетӥсь луыса ужа. Ужез яратӥсь адями ёрмыса уг пукы. 1976-тӥ-1995-тӥ аръёсы Вячеслав Степанович "Ижмаш" культура дворецысь "Тюрагай" калык хорын ӝытъёсы аккопониатор луыса ужаз на. "Зангари" ансамбле но нырысь-валысь вутскылӥз. "Ӧтё ке, пыкъяськеме уг луы вал, шудэме яра, дыр, шуыса малпалляй", - нош ик тодаз вае крезьчи. Бен, крезьгурез яратӥсьёс, учкисьёс ӵемысь адӟыло, луоз, та усто, зэмос дышетскем крезьгурчиез я Националной театрлэн, я филармонилэн, я мукет культурая юртъёслэн сцена вылысьтызы. "Солы инмар сётэм, дыр, сыӵе быгатонлык, со ми пӧлысь самой устоез импровизатор", - шуо ӵош ужась эшъёсыз. Вераськыкумы крезьчи дырын-дырын чиньыоссэ зӥбылэ: висё, шӧдске. Оло, ӟуч сямен вераса, пофессиональной висён. Озьы ке но, Вячеслав Степанович котьку капчи мылкыдо, со котькинлы дась юрттыны, вылтӥяськон сямыз ӧвӧл. Баянэн дышетэм сяна, со училищелэн хоровой но хореографической отделениосаз нимысьтыз вокалъя урокъёсын концертмейстер луэ на. Сюресъёс, сюресъёс... Пӧртэм интыосы вуттылӥзы сюресъёс Вячеслав Степановичез: кырӟанъя но эктонъя "Италмас" ансамблен - Украинае, Транссибирской магистраль кузя Владивостокозь, Челябинск улосэ, Москвае "Русская зима-72" фестивале, "Зангари" ансамблен - Томск улосэ, "Тюрагай" калык хорен Кирове фольклор празднике, Москвае удмур литературалы но искусстволы сӥзем нуналъёсы... Со сяна, трос мукет сэрегъёсы, кытын уло асьме удмурт выжыосмы. - Концертъёс дыръя олокыӵе но учыръёс луо вал. Тани шуом, баянлэн еэз чиге ке но, сылӥскьод-а, пукиськод-а - крезьгурез йылаз-пумаз вуттоно, пальпотыса тумошо учыръёссэ вера Вячеслав Степанович. - 1972-тӥ аре "Италмас" ансамблен Улан-Удэ гордын вал. Доре бертон азьын эше доры куное пыри. Дырлэсь ортчемзэ ик шӧдыса ӧй ву - поезд вырӟытозь, кӧня ке минут кылем на. Усьтыр-табыр дӥсяськи но бызисько ук тодмотэм урамъёстӥ, котыр пу коркаос. Поезд доре вуи но, нош ик абдрай: портфеле эше доры кылем. Куалектыса берен бызисько, адрессэ ук тодӥськы, синмыным гинэ шедьтӥ вал. Озьы утчаськыса бызёнъя, ӵапак со корка доры вуиськем. Собере ини, пыдъёсме шӧдытэк, поезд доры вуи но ... поезд вырӟиз. Тӥни сыӵе учыръёсы но шедьылэме вань. Ой, вужме ни баянэ... Мылыд потыса ужад ке, быгатэмзэ но пӧрмытод. Училищеын дышетӥсь луыса ужам сяна, Вячеслав Степанович туж бадӟым юрттэт сётэ мукет ласянь но: со усточи вылэм вужмем баянъёсыз тупатъяны. Чылкак сурыкмем баян но ӵыж-выль луэ солэн кияз. Берло аръёсы выль инструментъёс басьтыны училищелы коньдон уг висъяськы, шуыны луоз. Дышетскисьёслэн анай-атайёссы но тросэз сыӵе дуно мае ке басьтыны уг быгато. Нош инструментъёс арысь аре вужмо, сӧриськыло. Баян гурез яратэменыз ик, оло, Вячеслав Степанович мастер луиз. - Мон крезьгуръя инструментъёслэн эмъясьсы луи ини, - шуэ со. - Мыным тунсыко потэ баянъёслэн пуш ёзъёссы: кудӥз маин висъяське, кыӵе детальёслэсь лэсьтэмын. Озьы конструкцизэс дышетӥсько выль тодон-валанъёс басьтӥсь но аслым. Ньылетӥ арзэ ни тазьы тыршисько, кыкетӥ яратоно уже луэ та, - валэктэ Вячеслав Степанович. Куд-огез туж ик кулэен уг лыдъя та профессиез, уждунэз ӧжыт, шуо. Но культура удысысь сӥё-дано ужась В. С. Лекомцев тазьы лыдъя: "Коньдон поттыны котькыӵе удысын быгатоно, мылыд гинэ мед потоз". - Крезьгуро сюресэз бырйисьёслы таӵе визь-кенеш сётысал, - ватсаз на В. С. Лекомцев. - Нырысь ик ужез яратоно, эшъёстэ гажано, дышетскыны пырыкуды, кӧня ке но нотаос ласянь валанды мед луоз. Одно ик тыршоно ас малпандэ быдэстыны. Али рынокен экономикае выжемын бере, туж юнэсь куронъёс пуктӥськом абитуриентъёс азе: пыр-поч вераськиськом, пӧртэм эскеронъёс ортчытъяськомы. Котькытын - городын-а, селоын-а - крезьчиос золэсь мед луозы. Бен, Галина Романовалэн но кылбураз таӵе чуръёсыз вань: "Сюлмад ӧз лу ке кырӟанэд, юнме ортчоз вань дауред". Сяськаё возьвыл кадь, шундыё инбам кадь чылкыт-чебер улон тӥледлы, гажано Вячеслав Степанович. Юлия Кузьмина. Улонэз - пумтэм Леонид Прозоров сярысь тодэ ваёнме гожтэмелэсь азьвыл улон но кулон сярысь трос малпаськи. Тодэ лыктӥзы калыкмылэн лэчыт веранъёсыз: "Улонэз укно пияла пыр уд адӟы", "Кизили пичи но, тылыз бадӟым, "Пияла юн ке но, сӧриське". Таӵе верамъёс, мыным потэ, асьме дорысь шӧдтэк шорысь дырызлэсь вазь кошкем чылкыт сюлэмо бадӟым художниклы Леонид Прозоровлы но тупало. Шонерак уг тодӥськы ни, 1987-тӥ-1988-тӥ аръёсы вал кадь. Удмурт телевидениысь жингырто но шуо: "Дорамы вераськыны дасяськы, Леонид Прозоровен ӵош". Ма, шуисько, со художник ук, нош мон кылбурчи, скалэз уробое кыткем кадь ум адӟиське-а? Эн сюлмаське, пе, ми ваньзэ малпамы. Лёнялы кылбуръёстэ возьматы но соослы со суредъёс мед лэсьтоз. Собере Лёнялэн куараез чебер, кылбуръёсыдъя гожтэм куд-ог кырӟанъёстэ но кырӟалоз. Озьы ми Лёняен ӟеч-ӟеч дасяським. Куд-ог кылбуръёсылы тупась суредъёсыз солэн вал ини, куд-огъёсызлы выльысь суредаз. Чаклам-эскерем суредъёсыз пӧлысь мыным туж яразы берло ужъёсыз - черкъёс. Соослэн чебер куполъёссы йӧнъяськыса пыкисько инбаме, аспӧртэмлыкенызы паймыто, малпаськыто. Со вакытэ совето властьлэн идеологиез туж вылӥын вал на, инмар доры кыстӥськисьёсты сокем ик ӟечен ӧз лыдъялэ. Соин ӵош ик вуись выль вакытлэн шокамез но шӧдӥськиз ни: черкъёсты усьтон ласянь калыклэсь куронзэ каллен-каллен санэ басьтыны кутскизы. Соин но, дыр, мынам Лёнялэн лэсьтэм суредъёсызлы кылбур гожтэме потӥз. "Черк гырлыос" шуыса сое нимай. Чагыр инмозь йӧно ӝутӥськыса, Сэзь витязьёс сямен черкъёс сыло. Ортчем дауръёсысь вуттӥськыса, Асьме вакытмылы жингыртыло. Шуккиськыса кошке гырлы куара, Сюлэмъёсы со йыгаське, пельын жондэ. Кин ке тани пыдесъяське шара, Йыромыса ветлэм лулзэ, дыр, буйгатэ... Та гожтэм кылбуре но Лёнялэн суредам черкъёсыз телепередачаын валтӥсь инты басьтӥзы. Озьы ик Лёня Геннадий Бекмановлэн гожтэм гурезъя калыкын соку туж тодмо кырӟанъёсме кырӟаз: "Мон ӧвӧл тынад" но "Ой, шудо егит дыр". Эшъёсы веразы: передача, пе, туж тунсыко вал, кылбурчилэсь но художниклэсь творчествозэс таӵе амалэн возьматон-усьтон чылкак выль вамыш луиз. Леонид Прозоров асьме сьӧлыко дуннеез ӟечгес, чебергес карыны тыршиз. "Пайдаен ортчытэм улон гинэ кузь",- шуэ калык. Иське, Лёнялэн улонэзлэн пумыз-йылыз уг адӟиськы на. Галина РОМАНОВА. Леонид Прозоров кенеше Микворово гуртысь старообрядческой черке Москваысь лыктэм муртэн. (Снимок лэсьтэмын кылем арын Киров областьысь Кильмезь ёросын). "Усто почтальон" конкурслы йылпумъянъёс Ӟечкыласьком! Газетмылы гожтӥськонэз ӟечгес радъян понна, шаерысьтымы почтальонъёс пӧлын ялӥмы ӵошатскон - кин тросгес вӧлмытоз "Удмурт дуннеез" 2000-тӥ арлы. Конкурсэ пыриськон вылысь гожтӥськытыны кулэ вал 30-лэсь ятыр муртэ. Йылпумъянъёс лэсьтон понна вазиськимы ёросъёсысь почта кусыпъёсъя ёзъёсы. Туннэ вераны быгатӥськом ёросъёсъя устооссэ почтальонъёсты. Алнаш ёрос Кузьмина Л. И. (Писэйгурт) - 173 Пономарева В. (Варзи-Ятчи) - 128 Рафикова Л. П. (Чем-Куюк) - 105 Балезино ёрос Волкова О. В. (Котегурт) - 56 Наговицына С. Н. (Бадӟым Варыж) - 45 Вавож ёос Романова О. В. (Гурезь-Пудга) - 42 Грах ёрос Рупова А. А. (В. - Игра) - 52 Глазов ёрос Шудегова Н. А. (Куреггурт) - 31 Дэбес ёрос Серебренников И. И. (Лесагурт) - 41 Завьялово ёрос Веревкина Л. Б. (Юськи) - 66 Гурцева С. М. (Бабино) - 62 Кузьмина А. А. (Шор Постол) - 57 Игра ёрос Ложгина В. М. (Кабачигурт) - 58 Агафонова Л. Г. (Зура) - 46 Корепанова Т. Г. (Зура) - 38 Снитко Р. К. (Игра село) - 38 Кияса ёрос Иванова А. А. (Вуж Салья) - 73 Камашева Н. А. (Колошур) - 58 Самсонова Т. Н. (Карамас-Пельга) - 57 Кизнер ёрос Тихонов М. В. (Вуж Бодья) - 65 Оконникова Г. П. (Безменшур) - 54 Мухина Г. А. (Вуж Кармыж) - 45 Можга ёрос Михайлова Н. М. (Пычас) - 148 Абросимова Л. А. (Ныши-Какси) - 55 Смагина Л. А. (Пазял) - 48 Пичи Пурга ёрос Петрова Н. А. (Бобья Уча) - 143 Овчинникова Е. И. (Вуж Монья) - 92 Тарасова О. И. (Гожня) - 87 Ува ёрос Ефремов И. А. (Булай) - 90 Корнилова Т. И. (Б.-Жужгес) - 36 Шаркан ёрос Майорова Л. Д. (Ляльшур) - 111 Широбокова Л. Д. (Зар. - Вишур) - 105 Федотова Т. В. (Кельдыш) - 100 Газетэз тужгес но трос вӧлмытӥз Алнаш ёросысь Л. И. Кузьмина, со ик мотоколяскалэн кузёез луиз. Можга ёросысь Н. М. Михайлова, Пичи Пурга ёросысь Н. А. Петрова но Алнаш ёросысь В. Пономарева озьы ик пусъемын луозы дуно кузьымъёсын. Вань мукетъёсызлы вормисе потэмъёслы редакция синпель кузьымъёс сётоз. Сюлмысьтымы тау кариськом "Удмурт дунне" газетлэн мукетъёсызлы но оскымон эшъёсызлы - почтальонъёслы. Л. МАЛЫХ. Чупрес, шӧртчи, капчи мылкыдо, котькытчы вутскись... Тӥни сыӵе со - МударисМенландшин. Лыдӟисьёс сое ӟеч тодо газетъёсысь но журналъёсысь туспуктэмъёсызъя, пумиталод сое шаерамы ортчись пӧртэм ужрадъёсысь. Кияз котьку - фотоаппарат. Нош алигес Михаил шумпотон ивор басьтӥз Москваын потӥсь "Фаворит" газетлэн редакциысьтыз. Отын ялэм фотоконкурсын шаерысьтымы усто фотограф вормисьёс пӧлы шедем. Газетмылэсь эшсэ, юрттӥсьсэ сюлмысьтымы ӟечкыласьком но сӥзиськом солы азьланяз эшшо но бадӟымесь вормонъёс. Конкурсэ лэзем ужъёсыз пӧлысь. УСТО ХОЗЯЙСТВО "Чураез" ӝуто егитъёс Секыт адӟыны куашкам хозяйствоосты. Командировкаосы потаса, ӵемгес но ӵемгес син шоры йӧто гырымтэ-кизьымтэ бусыос, тупатъяны луонтэм техникалэн кылем-мылемъёсыз. Кык ар талэсь азьло республикаямы 34 хозяйство куашкамын ке вал, табере ваньмыз пӧлысь асьсэдыз сюдыны уг ни вормо ӝыныез. Мар кароно сыӵе калэ вуэм хозяйствоосын? Возёно-а бюджет чотын? Но ваньзэсты озьы возьыны нокыӵе коньдон уз тырмы ук. Соку, оло, банкротэн ялоно? Нош озьы ке мар кароно калыкен? Вань на эшшо одӥг амал: выль кивалтӥсь пуктыса, югдурез тупатыны. Таӵе амалэз уже кутыса, шуг-секытысь потыны быгатӥз Глазов ёросысь Чура эштос. Дас ар талэсь азьло отчы выль кивалтӥсе юнматэмын вал Петр Александрович Першин - табере со гурт хозяйствоя но сиён-юонъя министр. Кызьы кутскиз соку та гуртын выльдӥськон, ӟеч тодаз вае валтӥсь зоотехник Галина Васильевна СПИРКИНА. - Чура - Глазов районлэн тужгес но пыдлось гуртэз. Монэ татчы ужаны выжтон дыръя, 1990-тӥ арын, Чура вунэтэм-аналтэм гурт вал. Сюресъёс ӧвӧл, гидъёс кыед пӧлы выемын. Кивалтӥсь не вань, не ӧвӧл. Татчы Першин ке ӧй вуысал, калык но, хозяйство но бырысалзы. Галина Васильевна, кыллы бырем сэзь удмурт нылкышно, мылкыдзэ ватытэк шуиз: "Ачим сюлмыным коммунист ке но, коммунистъёсты гажасько райкомозь, обкомозь вуытозязы гинэ". Першин но отысь ик, "вылӥысь" лыктэм адями вал. Галина Сергеевна гинэ ӧз, гурт калык но, выль кивалтӥсь шоры оскытэкгес учкизы: "Пӧрмоз-а меда?" Нош табере со сярысь шуо: "Хозяйствомес пыд йылаз пуктӥз. Табере уз ни куашка. Адямиос сярысь сюлмаськонэз со валтӥсь интые пуктылӥз. Выль сямен малпаськыны но ужаны дышетӥз". Нош ик маде Галина Сергеевна: - Нырысь-валысь кивалтӥсь кадръёсты ялан вошъялляз. Азьвылъёсыз пӧлысь мон гинэ, дыр, ас интыям кыли. Но паймоно кадь: со понна адямиослэн вожзы ӧз потылы. Петр Александрович ваньмыныз огъя кыл шедьтылӥз, собере со ик ваньмызлы сюлэмзыя тупась уж но бырйылӥз. Кӧня со монэным но ужаз. Шуылӥз: "Уг яра сыӵе небыт сямо, жалясь сюлэмо луыны". Зэмзэ но, дыр, рынокен экономикае выжыку, мукет сямогес но луыны дышетсконо вал. Ӝоген сое татысь адямиос но ас вылазы шӧдӥзы. "Чура", Глазовысь "Электросетьлэн" подсобной хозяйствоез луыса, акционер огазеяськонлы пӧрмиз. "Чура" ОАО-ын туннэ 250 ужасез. Пудо-живот вордон сяна, татын али колбаса но вӧй поттон цехъёс ужало. Пичи заводъёсты усьтыны Глазовысь "Электросеть" юрттӥз. Соин ик акционер луэмъёслы городысь предприятизы азьын туж возьматоно вал ужаны быгатэмзэс. Выризы. Матысь хозяйствоостӥ, гуртъёстӥ пудо басьяса ветлӥзы. Колбаса поттон цехез дугдытэк ужатоно вал. Собере вузкарыны дышетскизы. Сӥль, колбаса, вӧй базаръёсын али данак, нош басьтозы-а тынэсьтыдзэ? Аслэсьтыд вуздэ басьяськисьёслы ӵектыны но быгатоно ук. "Купите масло Чуринское, вкусное!" кесяськыны дӥсьтон но кулэ вал. Галина Васильевна верамъя, со огдырлы зоотехниклэсь ужзэ но вунэтӥз кадь. Кык ар пала, дораз бертылытэк, гуртъёстӥ ортчылӥз. Вузкарисьлэн уженыз но пыр-поч тодмасткиз. Першинэз мукет уже басьтэмзы бере, "Чура" ОАО-ен табере кивалтэ Чупин Андрей Леонидович. Азьвыл инженер-электрик луыса ужамын. Егит, куамын арессэ алигес гинэ ортчем адями. Но соин тодматскыны ӧз кылды - Ижевске дышетскыны кошкем. Ас ужъёссэ огдырлы оскем Муханов Сергей Тихоновичлы. Таиз но егит, югдурез котыр ласянь валась адями. - Пудо сиён туэ окмымон дасямын, фуражмы ӧжытгес, - шуиз со. - Специалистъёсмылы ум ӝожтӥськиське. Уждун дыраз тыриськом. Адямиос ужзы борды возиськыны тыршо. Со ик вуттӥз милемыз колбаса но вӧй поттон цехъёсы. Тодӥськом: тросэз хозяйствоос переработка шуон борды басьтӥсько но бӧрысь куштӥсько. Пӧртэм мугъёс пӧлын луэ ӟечлыкъя бере кылён. Пӧртэм колбасаос, йӧл сиёнъёс рынокын уг вормо ке ческытэныз, синлы кельшымонэныз, хозяйство нокыӵе барыш уз потты - ыштонъёс гинэ адӟоз. Нош кызьы та уж пуктэмын "Чураын"? Валэктонъёс сётэ колбаса поттон цехлэн кивалтӥсез Лев Николаевич Ушаков: - Та уж борды басьтӥськыкумы ик Першин ми азе юн курон пуктӥз: асьме колбасаосмы, пе, базарын ӟечлыкенызы мед висъяськозы. Озьы ик ужаны тыршиськом. Парсьёсты, скалъёсты вандӥськом. Мукет районъёсысь пудоез туж чакласа басьтӥськом - висись пудоос трос. Таза пудо шедьтыны али туж шуг луиз. Умой пудозы "Кожильский", "Луч", "Коммунар" хозяйствоосын. Туннэ поттӥськом ни 3-5 пумо ӵынатэм, 6 пумо пӧзьтэм колбаса. Со сяна, лэсьтӥськом на сӥльлэсь пӧртэм полуфабрикатъёс. Тросгес поттыны ум дӥсьтӥське - калык начар. Соин ик вузаны тросгес Ижевске нуиськом. Предприятиослэн ужаны кутскемзы ми вылын но умоен шӧдӥське. Ижевскын сиёнмы ӟечгес кошке. Кин дышиз ни колбасаосмылэн шӧмзылы, милесьтым басьтэ. Лев Николаевич уг ваты: - Выль уж борды кутскыны капчи ӧй вал. Тодон-валан но ӧз тырмылы. Ачим инженер- механик, Ижевскысь гурт хозяйствоя институтэз быдтӥ. Но азьло аръёсы институтын таӵе ужлы ӧз дышетылэ. Тӥни соин ик ӵем ветлоно луиз командировкаосы, я оборудование утчаса, я выль ужлы дышетскыса. Каль но секыт йӧтэ на, уката но секыт продукцилы сертификат басьтыны. Сӥльлэсь ӟечлыксэ асьме лабораториын эскериськом колбасаосты котькуд дас нунал ортчыса, Глазове эскерыны келяськом. Адямилэн улонэз быдэсак туала шуг-секытъёсын герӟаськемын. Ӟеч мылкыдын кутскем ужъёсты но ӵем дыръя соос быдто. Тани "Чураысь" колбаса, вӧй поттон цехъёслы но али туж секыт йӧтэ: пудо сиён тырмымтэен, тросэз хозяйствоос пудозэс сӥзьыл ик вандылыны кутскизы. Вӧй поттон цех нырысетӥ арзэ гинэ ужа. Татын дышетско йӧллэсь пӧртэм сиёнъёс дасяны. Малпанзы вань азьланяз йогурт но лэсьтыны. Йӧл тырме. "Чураысь" скал кыскисьёс шорлыдын нуналаз 9,2 литр йӧл кыско. Та хозяйствоысь егит специалистъёсын вераськыса шӧдӥмы: соос мукетэсьгес ни: выль сямен малпасько, утчасько. Соос берлань уз ни чигналэ. Нош кыӵе кулэ вылэм юрттыны соослы государство ласянь. Оло, соку асьмеос магазинъёсысь ӵемгес адӟысалмы асьме гуртъёсын поттэм сӥль, йӧл сиёнъёсты, нош кунгож сьӧрысь ваем йогуртъёс но "Бушлэн пыдъёсыз" тодэ ваёнъёсы гинэ кыльысалзы. Тодэ лыктэ кылем арлэн пумаз агропромышленной удысын ужасьёслэн ортчем бадӟым кенешсы. Солэн ужаз пыриськизы республикамылэн вылӥ кивалтӥсьёсыз но. Трос вал ӝожтӥськонъёс, куронъёс. Лек кылъёс соку кылоно луиз гурт хозяйствоя но сиён-юонъя министрлы П.Першинлы. Нош табере, солэн азьвыл кивалтэм хозяйствояз вуылыса, пӧртэм мылкыд кылдэ. Чураос но матысь гуртъёсысь адямиос со сярысь ӟеч кылъёс гинэ веразы, нош республикаын Першинлы-министрлы али секытгес йӧтэ кадь. Пичи колхозэн но республикаен огкадь кивалтыны уггес луы, лэся. Но ӟеч котэм нянь пӧрме, шуо калыкын. Оскомы, выль министрмы но ассэ возьматоз ай шуыса. Нош огъя гурт ужпумъёс сярысь верано ке, та кенешын Правительстволэн Тӧроез Н.Ганза люкаськемъёсты оскытӥз агропром азьын сылӥсь ужпумъёсты Правительстволэн ужаз валтӥсь интые пуктыны. Татьяна Банникова. Вӧй поттон цехын ужасьёс: оператор А.Главатских, технолог Н.Иванова, цехен кивалтӥсь Л.Ельцова. Сергей Тихонович Муханов - энергетик - тазьы лыдъя: "Дипломед ке вань - уждун но тросгес мед тырозы. Но... аслэсьтыд быгатэмдэ но возьматоно. Колбасаосты керттылӥсь Н.Веретенникова. Туспуктэмъёсыз Владимир Камашевлэн. 02 ИВОРТЭ Быриз пичи пинал Пичи Даша одӥг ар но дунне вылын улыса ӧз вуы. Кошкиз асьме пӧлысь. Кин малпаз, тэтэ карись мурт машина питран улэ сюроз шуыса? Шимес учыр луиз Игралан Кооперативной урамын нуназе бере. Сюрес вылтӥ поттыкузы, нылаш салазкиысь бекмыльскиз... пырак ГАЗ-3307 машиналэн бер питранъёсыз улэ. Пиналлы 10 толэзь сяна ӧй вал на. Чаклаське кудӟемъёслэсь Игралан Жуков нимо урамын кык кудӟем пиосмуртъёс 28 аресъем кышномурт вылэ нуназе 16 часын урдскизы. Нырысь сое жугизы, собере эриктэмазы. Эрказмемъёс нырысетӥ номеро столовойысь 22-23 аресъем ужасьёс вылӥллям. Ӵукна ик ӧз удалты 9 часэ ӵукна Ижысь Киров нимо урамысь одӥгаз коркалэн подъездаз куинь пиосмуртъёс кышномуртэз кырмизы. Виёнэн кышкатыса, талало пыдкутчанзэ, выл дӥсьсэ, зарни зундэссэ. Милиционеръёс ӝоген кутӥзы азьвыл суд улэ сюрылэм 30 аресъем Б.-ез, кыксэ эшъёссэ утчало. Кӧтыд сютэм ке 26 аресъем С.-лэн мурт чотын кӧтсэ тыремез потэ вылэм, лэся. С.-валэн коркаяз укнозэ пильыса пыриз. 800 манет сяна, портэм сиёнъёс кутӥз на. Кӧтыз тырыса ӧз вуы - югдурез утисьёс "юрттыны" вуизы. Таӵе учыр вал Сарапул ёросысь Тарасово черкогуртын. Пыӵалъёссэ милицие сётӥз Завьял ёросысь Юськи черкогуртысь кышномурт, ас мылкыд каремезъя, 12 но 16 калибръем кык вакчиятэм пыӵалъёсты милицие ваиз. Кулэм картэзлэн вылӥллям соос. Югдурез утисьёс пыӵалъёслэсь кытысь потэмзэс эскеро. Тылпу жалянэз уг тоды Селта ёросысь Квашур гуртысь 58 аресъем пиосмурт аслаз корказ усыкмыса быриз. Кудӟем йырын тамак пумзэ валесаз уськытэм. Изён интыез кенжыса, тылпу корка выжез сутӥз. Та ёросын ик Головизнин Язок гуртын аслаз коркаяз 67 аресъем пересь пиосмурт ӝуаз. Кызьы малпало, тылпу потӥз гуре умойтэм эстӥськем бордысь. Корка пеньӟиз. Пересьёсты качазы Ижысь Ленин ёросысь югдурез утисьёс йыртэмасьёслэсь группазэс шраязы. Почтаын пенсия басьтӥсь пересез чакласа уло вылэм. Собере, сьӧраз мыныса, уксёзэ талало. Трос-а кужым кулэ пересь муртэ вормыны? Цыӵе ужен выро вылэм торгово-экономической техникумын дышетскисьёс, 69-тӥ но 14-тӥ школаосысь 11-тӥ классысь пиос. Удмурт Республикаысь МВД-лэн сводкаосызъя дасяз А.Андриянов. Паймытӥсь но ӝожомытӥсь Солэн киосыз уг тодо вал шутэтсконэз. Ӵемысь уж бере кыльыса но суредаськон дуннеяз выйылӥз. Ерпечка пияш "ӝужыт кызэ, лыз пилемъёс доры" тубе, солы "вить чиньыё кизэ" мыче бадяр куар. Нош улӥын шораз вожъяськыса учко эшъёсыз, ӵужанаез чабкиське... Нош таосыз пиос беризь борды ӟечыран думиллям. Шурдонэз валатэк, выллань кыстӥсько соос... Яке гурезьысь ке ширто - кин куасэн, кин салазкиен, кин йӧ тусен - сюлэмзы икак луэ. Кытын ке пиналъёс, отын ик пуны токмылляське, отӥынгес - коӵыш быжыныз выретэ, ӟольгыриос тани-тани кышкатскыса лобӟозы... Пуксеттэм, шаян пинал дыр. Вань меда солэсь шудоез, паймымонэз? Кылбур гожъясь авторъёс ноку пумит ӧз луылэ, книгазылы суредъёс лэсьтыны дэмлало ке вал Леонид Прозоровез. Куд-огез асьсэос но курылӥзы, тодо вал угось: та художник уж борды басьтӥськиз ке, одно ик оскымон луоз, - удмурт шӧм но отчы пыӵамын, серемесэз но, муспотонэз но вань. Сыӵеесь луо Куӟебай Гердлэн "Ужлэн крезьгурез" (1986), Владимир Романовлэн "Чебер мако бакчае" (1990), калык выжыкыл "Уродэсь эшъёс" (1992), Федор Пукроковлэн "Милям дормы" (1994), Семен Карповлэн "Чильтэръёс" (1994), пӧртэм авторъёслэн "Погыли" (1996) но мукет чеберъям книгаосыз. Солэн геройёсыз "Кизили" журналын но ӵем гинэ пумиськыло: нылпи тематика Л.Прозоровез тужгес но бордаз кыскылӥз: татын уго яркыт, шумпоттӥсь буёлъёсыз уже кутыны луэ, ӵем дыръя гуашен, акварелен суредалляз. Книгаосыз чеберманъя усто график луыны быгатоноез нырысь ик шараяськиз, лирика борды басьтӥськыса. Флор Васильевлэн "Куар усён толэзе" (1976) книгаяз со паймытэ чылкыт но вольыт, огысьтыз мукетаз нялмыт гинэ выжись гожъёсын тушен символ выллем пусъёс тодметъёс кылдытэменыз. Та авторлэсь ик пуш дуннезэ валаны тыршиз, ачиз но отчы сылмылӥз кадь, "Ойдо вераськом" но "Улытозям мон улонэз кырӟай" книгаос бордын ужакуз. Таосаз уже кутӥз линогравюра, офорт амалъёсыз. Гравюра, цинкография удысын утчаськонъёсыз-шедьтонъёсыз адӟисько Владимир Романовлэн "Покчи гужем", "Поляна" сборникъёсаз но. Леонид Прозоров - Удмурт Республикаысь искусство удысын дано ужась, кун премилэн лауреатэз. Тазэ дано нимез сётӥзы 1996-тӥ арын, 1-тӥ но 2-тӥ классъёслы "Анай кыл" учебникез кӧня ке авторъёсын-суредасьёсын ӵош дасямзы понна. Кӧня меда со лэсьтысал на? Витьтон куинь арессэ но тырмытыса ӧз вуы... Ӧз, со ӧз кылдыты вӧё буёло бадӟымесь полотноос. Трос ик дан ӧз потты аслаз тыршеменыз- кылдытэменыз. Нош ужзэ синйылто, адӟо ке, пичи мурт кадь шумпотэ вал. Озьы, 1996-тӥ арын пӧсьтолэзе Москваын удмурт литературалы но искусстволы сӥзем нуналъёс дыръя Россиысь художникъёслэн выставкаос ортчытъян пичигес залазы солэн но линогравюраосыз кӧня ке витрина улын возьматӥськизы. Леонид Алексеевич соку ассэ зэмос художникен шӧдӥз, синъёсысьтыз мур мӧзмонэз но огдырлы тӧлӟылӥз, ӝутскем мылкыдын ветлӥз. Художник-профессионал луыса но, Леонид Прозоров нуналмысь сьӧд ужез быдэсъяз: газетын ретушер вал, туспуктэмъёс умойгес мед потозы шуыса сюлмаськиз. Со дыре ик вутскылӥз "Шӧкыче" суреданы - таоссэ, Херлуф Бидструплэсь сямен, быдэс книгаен поттыны луоно. Берло арзэ "удмурт кизилиос" сузьет бордын ужаз. Ог куамын пала сыӵе портретъёс кылдытӥз. Уг кельшы, уг пӧрмыты ке, куректылӥз, выльысь но выльысь тусбуез укшатон борды кутскылӥз. Куд-огзэ аналтыса ӧз но поттылы. Озьы шуыны луэ та чуръёсыз гожтӥсьлэн тусбуез сярысь но (учке суредэз). Художниклэн бӧрсяз папкаосы кылемын уно эскизъёс. Соосъя адӟиське, макем со ужаз кизэ волятон бордын. "Кенеш" журнал лэсьтыкуз, шуом, Генрих Перевощиковлэсь, Вениамин Ившинлэсь, Вячеслав Ар-Сергилэсь тусбуйёссэс пуктыны, оло, дас пол но вырем, соослэсь тусысьтызы тужгес но син шоры йӧтӥсьсэ юромо бадӟыматыса капчияк серекъяса. Кылдытӥсь (творец), пе, та дуннее курадӟыны вордске. Пӧртэм ӧй вал сюресэз Леонид Прозоровлэн но. Т.Петрова (Чернова). Виталий Агбаев Уно улод, трос адӟод Учыръёс Пунэман Пунэман но кураськон, Кураськон но пунэман. Огвыллемесь та кылъёс, Нош малы пӧртэм соос? Пунэмен курон-луллы пыкъет. -Ачид нушы выллем ке. Пунэмез витён-чидан. - Ылё-кырсё курегпуз кадь. Оло... оло... Пунэман-минутлы, берыктон-арлы. - Ар ӵоже атас но быжтэм кыле. Пунэмен куре-лыктэ, берыктоно ке - пегаса ветлэ. - Гольтыръяськон ӵем дыръя шумес пыдсы вуттэ. Куре-кускозяз мыкыръяське, басьтэ - йырыз урдӥське. Майбыръяськон ӟичылэсь пӧртэм ӧвӧл. Пунэм тырон - ошет - Пегась скаллы гырлы кадь. Агай вынызлы пунэмзэ берыктӥсь уг луы. - Вашкала дырысен тодмо. Пунэмен сётод - гурезь улэ питырскод, пунэмдэ курод - пӧсьвуаськод. - Тодӥськод ке мунчолэсь гурезь улынзэ, веник дася. Киыныд басьтӥд - мынам пыдъёсыным эн берыкты (пыкылон). Тэльын - пу ӧвӧл, зуродын - турын ӧвӧл, пунэм тырыны - уксё ӧвӧл. - Азьтэмлэн кайгырон нёжъянэз. Шузи мурт кураське, нош эшшо но шузиез юисьлы пунэмен уксё мыче. - Тордос тордоссэ кыдёкысен тодма. Пунэманы тунсыко ӧвӧл, берыктыку кӧт пушкын дэй поръя. - Со гинэ мар? Кизерен напен но уртче, шуо. Урод пунэм тырисьлэсь сӧриськем пиялазэ но уд куры. - Ӧз ке сёты, кылемзэ жильды. Коньдон ӧд сёты - эштэ ыштод, сётӥд - эштэ но, коньдондэ но ыштӥд. - Эшед дуно ке, валты сое черке. Сьӧлык уз луы. Вань дыръяз жаль ӧвӧл, ӧвӧл дыръяз пунэм сёткам жаль. - Соиз озьы. Сьӧрос но берпал ӵогъяку гинэ кулэ. Пунэм да пунэм, берыктоно ке - арлан! (индылон). Кураськись муртлэн пунэм тыронэз зарезь мында: пыдсыз но, ярдурез но, тӧдьы пароходэз но уг адӟиськы. - Ӧвӧлэз вань уд кары, нош чыртыяд кыӵес уд донгы. Пунэмен сётӥськод - уллане васькиськод, пунэмез бичаськод - гурезь йылэ ӵабъяськиськод. - Гижыосыд кузесь ке, ӵабъяськы, ойдо. Кутӥсь ӧвӧл. Улонмы сыӵе, лэся, ини асьмелэн: пунэман но кураськон. Пунэмез берыктон но выльысь кураськон. О, Инмаре! Вик-вак шокад ке, таӵезэ гинэ уд адӟы, вылды. Калямпер Педор Пиналъёсты вордӥд-утялтӥд ке, котьмае адӟод: ӟечсэ но, уродзэ но. Аламаез ӧжыт ке но, син азе кемалы кыле. Умоез туж трос, куд-ог дыре ум адӟиське. Синйылтӥськом ке но, саклык ум висъяське. Бен, ӟечез котьку чебер адӟиське. Нуны вордӥське - анаен- атай шумпото. Нокыӵе шакшы малпанъёссы ӧвӧл. Нош азьпалан мар? Созэ, пе, одӥг Инмар гинэ тодэ. Озьы ке луысал.... Толэзьтэк уй югыт ӧвӧл, шундытэк нунал шудо ӧвӧл, мумы-бубытэк улон шулдыр ӧвӧл. Но... Атаез дуннеен люкиськем бере, Калямпер Педор сьӧраз ортчиз. Анайлэн лекъяськемез но уго мусоям кадь потэ. Курытсэ гажаменыз, сое ужысьтыз туздыризы. Али, ма, кусэз тӥятэк но улыны луэ. Кужмысь косӥсь ӧвӧл. Кышноез, пиналзэ кутыса, дорысьтыз пегӟиз. Кышномурт но адями ук: акыльтӥз, луоз. Калямпер Педорлы ӝоген витьтон тырмоз. Нош со, варгас ӟазег сямен, огназ. Кошкем кышнозэ но уг утча, мукетыз но кулэ ӧвӧл. Анаезлэн пенсиез вылэ чӧлскемын. Мар понна, пе, со монэ вордӥз. Ӵукналы быдэ йырыз пож ведрае месылоно кадь жонгетэ. Пинь сузян паста но, одеколон но уг мыльы бере, пужым су но, вуэн сураса, кужмо аракы кадь потэ, вылды. Сайка уин Калямпер Педор - ведраын ву ӧвӧл. Нош гадь пушказ гын сапег ӵуштаське кадь: ӵажыр! каре. Вулы мынэмез ӧз поты, усьтӥз компот. Ӝыны банкаез бушатыса басылаз, лэся. Кӧня ке дыр ортчыса, сюэз эшшо но куасьмиз. Кыкетӥ банкаез кымалтыса, вукак луиз, вылды. Урамысь лымы ческытгес потӥз, лэся: куаж-куаж сие. Мукет нуналаз анайзэ пыжыны ӧдъяз: "Мон, родной пиед, мед чоньдом-а, мар-а? Малы компотад, сакыр- песок интые, сылал тырид?" Анаез дыг-мог сылӥз но, сураськи, дыр, пе. "Возьмато мон - сураськон!" - йӧно атас кадь, пыдыныз торк! шуккиз. Юись мурт уго сиськон тусьтыяз но мырӟиське. Улӥськод-вылӥськод бере, сюлмаськытэк уг луы. Огзэ быдэстӥськод - мукетсэ малпано ни. Калямпер Педорлэн анаез медъяса тэльысь пу вайытӥз. Кызьы ке толъёно ук. Шедьтӥз пу вандӥсь но. Соиз ужез борды басьтӥськиз гинэ - шонаськыса Педор вуиз. Синъёсыз вӧйын зырам кадь чиляло. Анайлэн, шуэ, брагаез ӧвӧл. Мон, пе, сое бушатӥ. Мар, пӧй, даром ужалод. Вот таиз Калямпер ке Калямпер ик вань! Юись муртлэн йыртышкыз но, бамыз но одӥг. Бен, Инмар ваньзэ тодысал ке, калык тазьы ӧй верасал: пиед ӧвӧл - огпол бӧрдод, пиед вань - дас пол бӧрдод. Пыжымтэ нянь Пислэг пыдъюмылысь вӧй уд потты, шуо. Шонер, дыр, тазьы верамзы. Адямилы ӧд синмаськы бере, кызьы яратод сое? Шораз учкыны но кӧберано.Кужмысь мерскемзы эриктэмам кадь луэ. Коть озьы, коть тазьы - сыӵеос пумиськыло. Кыкетӥ смена бере троллейбусын бертӥсько. Жадиськем, лэся. Пукси ке, малпасько, ныруло. Ӧс дорын сылоно кариськи. Остановкаме, пӧй, медам ортчы. Толалтэ укноос кынмылэмын, нош водитель дугдылонниез уг иворты. Ымысьтыз вӧй кисьтӥськоз кожа, дыр. Сылӥсько, пыштурынэн чай сярысь малпасько. "Ойдолэ тодматском", - мышкысьтым куара кылӥськиз. Учкисько но - егит пияш мыньпотэ, ӧжытак шӧмаськемын. "Фи-и, - малпасько, - эшшо мар ке ӧвӧл-а?" Нош со ялан бордам тэбине. Азьло ик кылъёс но дасям, кожалод. Ву вылтӥ кадь, вольыт мынэ. Акыляк потэменым палэнски. Со ке быж музэн сьӧрам лыктэ. Мукет пала кожи - лякиськем кадь, бордысьтым уг кыльы. Кышканы ӧдъяй. Мон егит на ук. Куд-огез сизьым карт вылэ вуо, нош мон огпол гинэ ай быземын. Марысь мар ке, малпасько, газэн баллонэ вань. Только солэн пайдаез луоз меда? Огпол курдаменым пуны шоры пызйи но, кизьныса палэнскиз. Адями солэсь нокыӵе уз кариськы, дыр. Лекез гинэ потоз. Эшшо вожомыса тышкалоз на. Котьмар мед луоз, та пияш бордысь кызьы ке мозмоно. Йырам шуак чилектӥз одӥг малпан. Кылтэм, пӧй, кариськоно. Ну кутски ук киосыным оломар но возьматъяны. ачим но уг валаськы, мар дауртӥсько. Азьчиньыеным гадь бордам, макесам кокасько. Пиёке ымзэ усьтӥз но, лом ньылэм кадь, дыл-дыл сылэ. Мон эшшо шузиме возьматӥсько на. Паймемез бере пияш чиньызэ йырвекчи вадьсаз позыръя: "Э-э, ма тон сыӵе-а?" Пыжымтэ нянез уго шунды шорын уд пыжы ни. Троллейбусысь пырс! потӥз. Мыжгемелэсь курдаз, дыр. Шузи муртлы уго закон гожтымтэ. Озьы тӥни, эшъёсы: муртлэн визьтэмез серекъятэ, аслад шузияськемед куаратэк бӧрдытэ. Пашпу Уляш Возьыт пыдтышкын, синъёс йыртышкын, шуо. Ӧйтӧд, ӧйтӧд. Уйшор вуон азьын Карпа Ладиос доры жингыртӥсь луиз. Паймод ук - гуртоосыз. Городэ лыктыса, бертыны беромиллям. Уйзэ гинэ, пе, кӧломы. Тодмоосын пумиськон - ортчемзэ тодэ ваён. Кыл бӧрсьы кыл - дыр кыстӥське. Ӝӧк сьӧрын но пукытэк уг луы. Со но та куртчиськод, тумошо иворез кылыса серектӥськод. Серектэмлэн куараез кужмо уго: ураме кылӥське. "Ого, Карпушкалэн куноосыз вань. Муг утчано", - шумпотӥз Пашпу Уляш. Со артысь подъездын улэ. Кык арня пала юмшаменыз, ужысьтыз ӵужизы. Али, ма, кайгыре ик но, поезд кошкиз ини. Нош кайгуэз басылатӥсь ӧвӧл. пунэмен уксё уг ни сёткало. - Ладёк, - бускелез доры пырыса вазиз со. - Мыным консервировать карон машинкады кулэ вал. - Тӥляд сад-бакчады ӧвӧл ук. - Кузпалы кытысь ке гоносутэр шедьтэм. "Та адямилэн пельыз пась, лэся", - ас понназ малпаз огез куно. Лыктэмъёс чай юо, Пашпу Уляш йӧн шедьтэ. Али гинэ, пе, дорын юи вал (о, Инмаре, адямиос кӧлон висказы но чай юыны сайкало вылэм). Пуке со, каллен ӝӧк вылэз сузя. Ялан вите курытсэ. Куноос изьыны выдӥзы, со эшшо пуке на. Кузёос но вушйыло ини, со ялан, токмолёк кадь, ӝӧк сьӧрысь султыны уг вала. Курытэз ӧз донгиськы но, вожез потӥз, лэся: "Кулэ ӧвӧл ни машинкады, бер ини. Изёно". Кошкон азяз бускелезлэсь кылем сиёнъёсты куриз на: картэ, пе, висе. Сӥлен, оло, йӧналоз. Кык часын уин кияз сӥль юдэсъёсын Пашпу Уляш дораз тяпайтӥз. Бен, муртлэн ӝӧк вылаз чорыг но лытэм. Нош актык адямилы яра, лэся, мурт дӧдьыын пукыны. Бускелезлэн ванез вылын кема уз улы, дыр. Букоез кадь шонертоз, акыр. Вот... Адӟон, шуо, пыд улысь потэ, ишан-вирсэрысь. Улон-вылон али майтал шукы кадь. Кытчы пельто, отчы ик уяськод. Яке воксё пульыё луиськод но, бац-ц! - и тю-тю. Ужаны уг косо, вот кӧт сюма, корел нянь юдэс утча. Анай-атай вылын трос уд ворттылы. Асьсэлэн но тазалыксы сыӵегес: тӧл пельтӥз ке - погралозы. Нош мон кин? Мон эшшо ох-хо! - чылкак вож бадяр. Суй-пыд вӧлэмын, пельпумъёсы - артана, корка сигам - техникум. Быдэс муш уморто. Уж шедьтон понна, уй-нунал жужгетэ со. Кызьы но озьы одӥг АО-азы чуртнаськи. Вань шуг-секытсэ чидай. Ӟольгырилэн ву юэмез мында но курытсэ ӧй веръя. Вот кыкетӥ толэзяз вирсэръёс лябӟизы. Коньдон басьтэм бере, "Шайба" нергеазы ӧй-а пыры? Гучык гинэ веръяло шуисько вал, сайкасько -ӵужмуртъёс дорын. Отын юанъёслы уг валэкто: ать-два! и - шагом марш! Ужан интыям но: ме документ, шагом марш! Лушкаськисез сямен, проходной дорозь китӥм валтӥзы. Эх, мискинь вирсэръёсы! Йыртыштэ котькӧня корма, - нош сием потэ. Ӟенелик басьтӥ но ширтӥ артысь каре. Трос-а, ӧжыт-а ӟамыртӥськем - умме нуӵ- нуӵ усиськем. Ӟардон азьын одӥг станцие васьки. Номырзэ уг валаськы. Мыным Огырчи кулэ, нош татын чебер тылъёсын ворекъя "БУРГ". Оло, Украинае вуи? Ишан ӧвӧл-а та? Мон, конечно, шымырай. Юатэк ӧйлась. Екатеринбург, пе. Вот тыныд! "БУРГ"-аз гинэ тылъёсыз ӝуало но, визьмо мурт шузиме. Урод-а, ӟеч-а - вордскем юртын унолы умой: шуныт корка, мамык валес. Дор то дор, вот арлыдъёс йылӥзы. Анай ялан ву кӧзэ сизьдэ: ку тон кышнояськод ини? Шедьтӥ ведь одӥгзэ. Шораз учкыса, нӧкы вӧй вылын кадь шунано. Нош ымдуръёс? Огдыре кык ымын чупано кадесь. Улӥськом-вылӥськом ини, кыкмы ик тэк пукиськом. Ярам ай, анай-атай пенси вылын лулмес вик-вак возиськом. Уж утчан сямен, сьӧрло потано кариськи. Кызьы ке шуд усиз ик. Медъяськи вагонъёсты ӝоктӥсе. "Давай, давай", - шуо. "Давай вӧзы "валяй" йылто на. Пумитъяськид ке, берпалад но нушкытозы. Кылзӥськытэк ӧвӧл. Кык толэзь ортчыса, дорам вуисько но - атай уг куареты, анай таба пудэн, мусокме уг адӟиськы. Мон калтыртыку, пе, кышное мукетызлы бызиз. Вот тыныд! Таӵе дыре амалтэк йырсиостэ лӧдод, вирсэрдэ небӟытод. Кӧня ке дыр ортчыса, конюхе интыяськи: ӵапак огез пенсие потӥз. Ужез понна, конечно, уксё ӝыны аръёсын уг лыкты. Со понна дорын! Табере луоз кыкетӥзэ кышнояськыны. Анай пыкылэмлэсь азьло ваи бускель гуртысь нылашез. Тазэ син азям гинэ возё ини. Нокин уз дӥсьты лушканы. Со мынам гондыр кадь провор. Кышномурт ужзэ но, пиосмурт ужзэ но кыл вератэк быдэстэ. Таӵезэ утчано на. Вот огез беда - нырысетӥ кышноме ортчыт яратӥсько вал. Солэн но пӧсь мылкыдыз сӥямтэ на. Кыкмы ик одӥг гуртын бере, пумиськылытэк уг луы. Кытын скал, отын ош, шуо. Солэн кызьпу выллем мугорыз карнанъёс улын куасалскымтэ на. Мон но гурт пумысь кырыж ньылпу кадь ӧвӧл на. Мылкыд но воля лэзем валлэн кадь голя. Кеч ӧте бере, кечтака амалтэк кенер сьӧры тэтче. Огпол, кык пол ӧз шараяськы лушкем уж. Ваньмыз радызъя мынэ. Одӥг ӝыт урам кузя лӧж-лӧж бертӥсько. Вирсэр небӟемын, мылкыд тудӟемын, ачим кудӟемын. Олокытысь потӥз кыкетӥ пӧрасе. Кышномуртлэн, шуо, куинетӥ шӧдонэз вань. Озьы-а, мар-а. Пиосмурт, лэся, сое уг вала. Провор киыныз сапкытӥз ук музъем вылэ. Шатыр поттыса тышка, тузон гинэ пурӟе. Васькытъя но нушкытъя, нушкытъя но васькытъя. Урдлыосме лыдъяно кожаз-а, мар-а? Мон ак но, бак но шуыны уг вуиськы. Султыны гинэ медӥсько - пунэмзэ, пӧй, сачкыто ай. Монэ тузон пушкы лӧбак месэ. Йыр азям картуз быдӟа сялӟиз на берло. Сё, пе, оло, таин визь пыроз? Вот адӟон! Вот ишан! Вот беда! Вот... А кышно туфли ӧвӧл - пыдысь уд кушты. Яратоно сое. Виталий Агбаев. Эн аналскы - лыдӟиськы Улон-вылонмы начармемен валче, библиотекаосы ветлӥсь лыдӟисьёс берло дыре книгаослы ёрмо. - Нош туэ ужпум умой пала берытскыны кутскиз, - вера Кезысь почтаын ужась Е.Дементьева. - Тани 2000-тӥ арлы ёрос библиотека но солэн филиалъёсыз гожтӥськизы Кезын потӥсь "Звезда" газетлы, "Семья" газетлы, "Приусадебное хозяйство" но "Крестьянка" журналъёслы, "Миша" нылпи журналлы. Библиотека басьтэ уно центральной газетъёсты, озьы ик "Кизили" но "Удмурт кыл" удмурт журналъёсты. Шумпотымон соиз: библиотекалы юрттэт сётӥз Кезысь сыр поттӥсь завод. П.Николаев. Оскы, но эскеры... Озьы шуо Вавожысь милициын но быдэ вуымтэосын ужанъя комиссиын тыршисьёс. Соос алигес эскеризы, кызьы ортчыто шутэтскон дырзэс дискотекаосы но кафеосы ветлӥсь егитъёс. Эскерисьёс вуылӥзы, Вавоже сяна, Какможе, Нюрдор-Котьяе, Бадӟым Можгала. Какможын но Бадӟым Можгалан ваньмыз радызъя вал, нош Нюрдор-Котьялан клубзэс усьтыны чаклало вылэм, сое ворсан вакытэ вуыса гинэ. Озьыен, отын егитъёс ӵукнаозь шулдыръясько. Быгатыса шулдыръяськысалзы ке, ярам вылэм, маке гинэ медаз дауртэ. Котьма ке но: эскерем - со алэм ни, егитъёс таӵе ужрадъёсты шӧдытэк уг кылё. П.Кузнецов. Огмылкыдын Озьы шуыны луоз Кез ёросысь гулейшуръёс сярысь. Пудо утисьёс Выль арез пумитаны малпало вал, котькуд скаллэсь 5000 кило йӧл кыскыса. Вормон басьтӥзы тямыс нуналлы вазьгес. Юн инъет вылын азьлане вамыштыны лякыт. Гулейшуръёс выль арез ӟеч мытӥзы. Коньдон ласянь пунэме ӧз пыре, вань лэсьтӥськон ужъёты асьсэ чотын быдэсъяло. Эштосэн быгатыса кивалтэ Владимир Дорофеев. Вӧзаз усто специалистъёс тыршо: агроном Ирина Чиркова, бухгалтер-экономист Светлана Русских но мукетъёсыз. П.Скобелев. Галина Васильевна Спиркина "Чурае" вуылон нуналамы со дораз куноосты пумитаны дасяське вал: ӵапак та нуналэ солы куатьтон арес тырме вылэм. Картэныз ӵош Люмын но, Слудкаын но ужамын. Ужан интызэ воштылоно луылӥз, партилэн косэмезъя. Нош партия котьку но секыт ужъёсты ӝутыны ысъялляз: я картсэ кытчы ке предэ пуктылӥзы, я сое пудо вордон ужез ӟечгес радъяны курылӥзы. Озьы ик "Чура" эштосэ но сюризы. Галина Васильевналэн туж сюлмыз бӧрдэ быдэс республикамылэн ыж вордонлэсь куштӥськемез понна. Нош вал ук, вал ук сыӵе дыръёс, куке одӥг хозяйствоын ("Люмын") 4 сюрс пала ыж вордо вал... Лев Николаевич Ушаков, "Чураысь" колбаса поттон цехлэн кивалтӥсез, жаляса шуиз: "Калыклэн коньдонэз луысал ке, толэзьлы быдэ 10-12 тонна колбаса поттыны быгатысалмы". Фермер - 9 ар ӵоже Ува ёросысь Марсель Гаязов нырысьёсыз пӧлын фермер кариськиз. Кызьы бен мыно солэн ужъёсыз? Со пуктӥз улон корка, мунчо, пудо возён гид, мастерской, гаражъёс, складъёс, лэсьтӥз сюресъёс. Гаязов кутскиз вал кролик вордыны, ӧз пӧрмы, куштӥськиз. Ӵыпет тымыны кутскиз, коньдонэз ӧз тырмы, йылаз-пумаз ӧз вутты. Малы ке шуоно, нырысь-валысь кредит сётӥзы вал 1,2 миллион манет, бӧрысь юрттэмысь дугдӥзы, ас чотаз азьланьтыны секыт йӧтӥз. Озьы табере фермерлы 700 сюрс манет государстволы берыктоно, электрокужым понна 32 сюрс манет тыроно. Но ужез яратӥсь адями мугъёс утча, кызьы шуг-секытысь потыны, со ӵошен ужаны эш утча. Колбаса поттонэз ӧз радъяськы ке но, Гаязов басьтӥськиз лэсьтӥськон материалъёс но эстӥськон пу дасяны но вузаны, сельхозтехникаез тупатъяны, парсь вордыны. Таяз арын со тросгес картофка мерттыны, удалтэм ю-нянь будэтыны но сое вузаны медэ. Капчи ӧвӧл ке но, адями тырше бере, пумен пӧрмыны кулэ. Бадӟымесь азинсконъёс тыныд, Марсель! Мылкыддэ эн куашкаты, уката вылӥе ӝут! П.Николаев Фестиваль азьланьтӥськоз Таиз арня но шумпоттоз крезьгурез яратӥсьёсты. 14-тӥ феврале шаерысьтымы крезьгуръя училищеын луоз калык куспо конкурсъёслэн лауреатсылэн, пианистлэн Олег Морозовлэн концертэз. Мукет нуналаз татын ик - училищеысь теорияя ёзлэн куамын вить ар тырмонэзлы сӥзем концерт. 19-тӥ феврале, Драмая удмурт кун театрын ортчоз Казаньысь "Ульянов-хор" пиосмурт капеллалэн концертэз. 20-тӥ феврале татын ик нуназе бере кык часын кутскоз Атай музъеммес утисьёслы сӥзем концерт. Учкисьёсты шумпоттозы пинал усточиослэн школа-интернатысьтызы но крезьгуръя училищеысь пиослэн "Ингур" капеллазы, "Ульянов-хор", искусствоосъя нылпи школаосысь пиослэн хоръёссы, пиосмурт ансамбльёс. Азьланьтӥськоз Быдӟым Вормонлы витьтон вить ар тырмонлы сӥзем фестиваль. (2) <Ц:\Общая папка\Удмурт дунне\Фестиваль азьланьтиськоз.wри> 14.02.00 9:44 Цлов: 90 Цимволов: 671 Флор Васильев "Эзельлы сюресэз ворсаны Уг на тырмы туэ кужыммы. Асьмеос нош озьы но ваньмы Ӵем дыръя улыкуз эшмылы Вунэтском на ӟеч кыл вераны. Вунэтском на ӟеч кыл вераны, Со дорысь кошкыны дыртӥськом, Вань улон азьпалан, кожаськом, Визьтэмъёс кадь, оло, малпаськом Улонэз пунэмен басьтыны". 14.06.1975 Удмурт Республикаысь Кун Кенешын Толон Завьялово черкогуртын ужаны кутскиз интыосын ас коже кивалтонлы сӥзем кык нуналъем семинар. Сое ортчытон сярысь кичӧлтон сётӥз Конрад Аренауэр нимо фондлэн Москваысь представительствоез. Семинарлэн ужамез сярысь пыр-поч ивортом газетмылэн вуоно номераз. *** Толон люкаськылӥз Удмурт Республикаысь Кун Кенешлэн Президиумез. Со огкылысь кутӥз кык постановление - "Воткинсктара" кун предприятилэсь ваньбурзэ вузан сярысь но "Известия Удмуртской Республики" газетлы валтӥсь редакторе Заболотских Сергей Рудольфовичез юнматон сярысь. Заседаниез нуиз Кун Кенешлэн Тӧроез Александр Волков. Удмурт Республикаысь Кун Кенешлэн пресс-службаез. Тодматскизы, кенешизы Пичи Пурга районысь Норья вылъёсы вуылӥзы та ёросын вордӥськем но будэм гожъясьёс. Никвлад Самсонов, Кирилл Ломагин, Андрей Самсонов, Анатолий Перевозчиков, Семен Карпов, Илья Пельтемов, Любовь Тихонова, Владимир Возняков та палан ӟеч но бадӟым куноос луизы. Нош ӧтчаз соосты "Норья" эштослэн тӧроез Семен Соколов. Та пумиськон дыръя ик вал тодмо критиклэн, литературоведлэн, кылтодон наукаосъя докторлэн Фома Ермаковлэн "Пурга писательёс" книгаеныз тодматскон. Кенешон ӟеч ортчиз. Та ӝытэ ик писательёс лыдӟисьёслы книгаоссэс кузьмазы. Чузъяськизы кырӟан- веранъёс. Сыӵе вал мынам паньтэме Туннэ кадь ик ваньмыз син азям пуксе но пель сьӧрам кылӥське. Мыным 75 арес тырмон азьын Леня Прозоров ас дораз кабинетаз пыртӥз но укно азе пуктӥз. Вадьсам султыса, шорам туж кема учкиз. Огдышемъя тушсэ чиньыеныз ӵабыштӥз но пальпотыса вазиз: - Дырыд ке вань, али ик интыысьтыд султытэк, тустэ киям басьтыны тыршо... Куинь толэзь талэсь азьло ӵабъям портрет мыным чик ярантэм потыны кутскиз. Учкы ай ачид... Зӧк папкаысьтыз суредъёсыз пӧлысь одӥгзэ мынам киям мычиз но вазиз: - Тани тон пукиськод син азям: пальпотыны быгатӥсь адями, синъёсыд очки пыр ваньмыз шоры мур мертчисько... Баблес йырсиед ву тулкымъёс сямен пальккаськись малпанъёстэ возьматэ. Нош суредам вылысь ваньзэ сое адӟыны уг луы... Кутскиськом выльысь. Кык час ӵоже вырӟылытэк пукон понна ма но со сярысь вераськыны мултэс уз луы. Леонид Алексеевич пумен ужамез сярысь маде. Мон, пе, кин ке яке маке шоры мышкин султыса суреданы оскалтылӥ, но быгатонлыке ӧзгес тырмы. Соин ик пал синмыным одно ик кытчы ке учкылӥсько, нош мукетыныз - бумага шоры. Синъёс косэмъя, киы ӝог бызьылыны дыше ини, азьло кадь уг куалекъя... Та кылъёсты верамез бере Леня мур лулскиз но чик витьымтэ шорысь сюлэм пушказ мур ватэм малпанзэ шарае поттӥз: - Бен, суреданы быгатэмме эшъёсы но, "Удмурт дуннеез" лыдӟисьёс но ушъяло. Тау соослы ужме дунъямзы понна... Но вань на мынам эшшо одӥг яратонэ - кырӟан! Пичи дырысеным шутэтскон дыръёсы ымы уг пытсаськылы. Школаын кружокын кырӟалляй, Удмурт радиолэн хораз ужай. Отысь али ке но ӧй кошкысал, дыр. Но... музыкалы дышетскеме ӧвӧл... Озьы ке но, дорам ӵукналы быдэ атас сямен "чоръясько", ужысь бертэм берам но "гульымме сузясько"... Кылылӥ, тон но кырӟась сюлэмо адями шуыса... Вырӟылытэк пукон дырыд быдэс час на... Кырӟаса лэзём шат? Ымдэ усьян ужелы уз люкеты... ... Улытозям нокинэн но татчыозь сокем ӝутскем мылкыдын кырӟаме ӧй вал на. Ачим та дырозь пӧртэм хоръёсын, концертъёсын но учкылонъёсын кырӟалляй. Леня кырӟаны вордӥськем адями вылэм. Куараез кӧкыын веттаськон дырысеныз ик пуктэмын, кожалод. Ӟуч но удмурт калык кырӟанъёсты "коскатэммы" бере, Леня мылкыд кариз классикаез "шӧмъяны". Мон, консерваторилэн ӝыт ужась люкетаз дышетскем адями, шумпотӥ Леня макем умой тодэ вылэм пӧртэм ариослэсь гуръёссэс. Кырӟа Федор Шаляпинлэн, Максим Михайловлэн репертураысьтызы крезьгуръёсты. Сюлэмы бӧрдэ: ноку но Леняен артэ уг султы ни мон яратоно кырӟанъёсмес ӵош гурланы. Чал-чал луиз "Удмурт дуннелэн" одӥгез кабинетэз. Отын уго дырын-дырын кылӥськылӥз кырӟан яке серекъям куара, отчы редакциын ужасьёс но куноос пыразы- потазы пальпотыса. Сюлэмме буйгатэ тани ма гинэ: мон сямен, туж трос адямиос киязы кутозы "Удмурт дунне" газетэз, кудаз печатламын вал Лёнялэн зарни киыныз пуктэм тусбуйыз. Но лыдӟисьёс азьланяз ноку уз пумиталэ ни тодмо нимтулэз: "Суредэз Леонид Прозоровлэн". Леонид Данилов, Удмуртиысь дано журналист. Кинэ быръёмы Росилы президентэ? Телевидение но радио уен-нуналэн верало президентлэсь ужзэ быдэсъясь, Ельцинлэн кельтэм воштӥсез Путин сярысь. Нош кытын мукетъёсыз президентэ кандидатъёс? Соос сярысь туж ӧжыт верало. Кылсярысь, КПРФ но Зюганов сярысь ке верано, Сванидзе кадь журналистъёс туж быгато пож ву кисьтаны. Калыкез чылкак йыромыто. Соос валаса но уг вутто, кинъёс со "Единстволы", Шойгу но Путин сьӧрын пукисьёс. Кытысь соос потӥзы? Ваньзы ик соос Ельцинлы дурбасьтӥсьёс. Нош мар луиз асьмемын, ваньмы адӟиськомы ини 10 ар ӵоже. Улонлэсь чидантэм секыт луэмзэ калыклы валаны кулэ ини но сак кариськоно. Кун Думае быръёнъёс дыръя тросэз малпаськытэк но валатэк куараоссэс "Единство" понна сётллям. Нош отчы пырем кивалтӥсьёс кемалась куро ини музъемез вузаны-басьтыны, берпум кусок (юдэс) няньмес кыскыны. Азьвыл созывысь депутатъёс Кун Думаын зол сылыны быгатӥзы вал музъемез вузанлы пумит? Азьло аръёсы сямен котькуд кандидат понна валэктӥсьёс -агитаторъёс луысалзы ке, калык но валасал кинэ быръёно президентэ. Калыклы ӧвӧл осконо телевидениын гинэ верам кылъёслы. Лыдӟоно асьме кунын потэм газетъёсты но. Отыс шедьтоно на пӧртэм кандидатъёс сярысь гожъямъёсты. Тани "Удмурт дунне" газетмы но политика сярысь ялан валэктылэ, мыным со та вакытэ яркыт но лыдӟымон потэ. Огшоры ужась калыклы но политикаен мургес тунсыкъяськоно, дырыз, оло, ӧжытгес быдтоно телевидениысь кунгож сьӧрысь ваем сериалъёсты учкыса. Пинал калык соин но шузимемын кадь потэ мыным: котькытын юон, жугиськон, йыртэман учыръёсты возьмато. Пумтэм-йылтэм рекламаосын визьтэммыто ини. Америка мерске но мерске асьме шаер вылэ, сое но росэз уг валало. Капитализме - умой улонэ валтӥськом шуо ук. Умой-а бен луиз улон? Узыръёс но куанеръёс - кык пӧртэм пумо калык луиз ини: нош азьвыл аръёсы ог-огмес ноку ӧм висъялэ. Ойдолэ валаса но, оскыса сётомы куараосмес калык сярысь сюлмаськисьёс понна. А. Абрамова, Пичи Пурга ёросысь Пугачёво гуртын улӥсь. Юалэ - валэктом Висисько, нош группае уг потто - Мыным вить пол лэсьтӥзы ни операция. Ужаны уг быгатӥськы, но группае уг потто, шуо, ӧвӧл, пе, сыӵе закон. Кытчы вазиськыны кулэ. А. Бусыгина. Алнаш ёрос. - Одно ик вазиськыны кулэ Алнаш ёрос больницаысь валтӥсь врачлэн клинико- экспертной ужъёсъя воштӥсезлы. Медико-социальной экспертизаез ортчон понна со ик эскероз документъёстэс дасян ужпумез. Медико-социальной экспертизалэн улон интыосъя бюроез тупатэм графикъя нимысьтыз эскеронъёс ортчытъя Алнаш ёрос больницаын. Ужан графиксэ тодыны луоз больницаысь яке ёрос администрацилэн калыкез улон-вылонын утён отделаз. Медико-социальной экспертизаез улон интыя ортчем бере соглаш ӧд луэ ке солэн пуктэм ужпуменыз, тазалыкез выльысь эскерыны курыса, котькудӥз вазиськыны быгатэ медико-социальной экспертизалэн валтӥсь бюрояз. Со понна вазиськон гожтоно Удмурт Республикаысь кун медико-социальной экспертизалэн валтӥсь экспертэзлы. Интыяськемын со учреждение Ижевскысь Ломоносов урамысь 5 номеро юртэ. Тазалык лябӟиз ке - Мон Быдӟым Отечественной войнаысь инвалид, палляныз киы ӧвӧл. 1996-тӥ арын паллян пал мугорме пери шуккиз, кин ке юрттытэк улыны шугъяськисько. 1997-тӥ арын вазиськи вал Пичи Пурга ёрос больницаысь валтӥсь врачлы, группаме выльысь эскерыны куронэн. Куронме ӧз быдэстэ. 1999-тӥ арын 6-тӥ апреле эмъяськи Ижевскысь госпитальын. Медико-социальной экспертизаез ортчон понна кутэме луэ-а госпитальысь выпискаез? С. Ефимов. Пичи Пурга ёрос. - Мукет группае выжон понна вазиськыны кулэ ёрос больницаысь эмъясь врачтылы, госпитальысь выпискаез солы ик возьматоно. Висись муртлэн тазалыкез трослы лябӟемын ке,пуктэм группалы уг ни ке тупа медико-социальной экспертизаез ортчыны направление сётӥськоз. Соин валче верам потэ, нырысетӥ группа сётӥське висисьлэн тазалыкез туж секыт дыръя гинэ: огназ номыр каремез уг луы, солы ялан юрттыны кулэ, вӧзаз эскерисез медло. Н. Макотченко, Калыкез улон-вылонын утёнъя министерствоысь медико-социальной экспертизая но инвалидъёслэсь тазалыксэс утёнъя отделлэн кивалтӥсез. Министрен пумиськон Владимир Бельтюков: ""Улэп коньдон" тросгес пыре" Дыр ӝог ортче. Тани-тани йылпумъяськоз ни 2000-тӥ арлэн кыкетӥ толэзез. Кызьы быдэсъяське кун бюджет, вуэ-а отчы коньдон? Та но куд-ог мукет ужпумъёс сярысь кенешиськом Элькунысьтымы коньдонъя министрен Владимир БЕЛЬТЮКОВЕН. - Туннэ котькинэ сюлэмшугъяськытэ одӥг ужпум - уждун сётон но соя тыронъёсты быдтон, пенсиос но пособиос. Тужгес но секыт йӧтэ дышетӥсьёслы, врачъёслы но музон ужасьёслы. Соослэн уждунзы но ичи, вылаз ик, сое дыраз уг но басьто. Та ласянь мар верасалды, Владимир Васильевич? Азьланьын югдур воштӥськоз-а? - Меӵак пусйыса, пырак тазьы ум улэ, югдур умой пала берытскоз. Сое лыдпусъёсын возьмато. Тани миым 1 январьлы уждунъя пунэм тыронъёсмы 188 миллион манет ке вал, туэ 1 январьлы со 48 миллион манетлы кулэстэмын яке 140 миллион кылемын на. Со пӧлысь 84 миллионэз люкаськемын, миым апреле бюджетникъёслы уждун будэтэм бере. Кун бюджетамы со коньдон чакламтэ вал, нош федеральной бюджетысь уксё ӧз вуы (федеральной удысэ пырись организациослы но учреждениослы сяна). Озьы республикаез Москва секыт югдуре вуттӥз. Озьы ке но, районъёслы но городъёслы ми кун бюджетысь уждунлы тырмыт уксё висъям. Берыктымтэ на кредитъёсмы. Соос басьтэмын вал будэтэм уждун тырыны. Табере Россиысь Правительство ми азе ужпум пуктӥз, туэ 15 апрелёзь со тыронъёсты быдтыны косыса. Тӥни соин валче туэ 24-тӥ январе Россия Федерацилэн ужпумъёсъя министерствояз эскеремын Россиысь но Удмуртиысь Правительствоос куспын кутоно тупанкыл. Со герӟаськемын коньдон ужез умоятонэн но республикалы юрттэт сётонэн. Та документ вылэ кизэ нюртӥз ни Удмурт Правительстволэн Тӧроез Николай Ганза. Табере гожтӥськыны кулэ РФ-ысь Правительстволэн Тӧроезлэн воштӥсез Виктор Христенко. - Нош тупанкыллэн кыӵе пуштросэз? - Нырысез, Россиысь Правительство Коньдон ужпумъёсъя министерстволы косэ, Удмурт Правительстволэсь вазиськонзэ лыдэ басьтыса, республикалы толэзьлы быдэ улэп коньдонэн юрттэт сётыны. Нош Удмуртилы курон пуктэмын быдэс республикая (консолидированной) бюджетэз умой быдэсъяны. Отчы пыро районъёслэн но городъёслэн бюджетъёссы. Республика озьы ик толэзьлы быдэ уждун сётъяны кулэ но бюджетысь 40 процентсэ уксёез отчы кутыны быгатэ. Мукетыз ужпум герӟаськемын МВД-ен, Оборона но Атом промышленностья министерствоосын. Соос басьтэм ож тӥрлыксы понна пунэм тыронъёссэс берыктыны мед быгатозы. Нош со одӥг миллиардлэсь уно люкаськемын. Кыкетӥез, Удмурт Правительство кыл сётэ юнэсь кусыпъёс тупатыны ас коже кивалтонъя интыысь ёзъёсын, районъёсын но городъёсын тупанкылъёс кутэ. Отын ваньмыз азе курон пуктӥське туэ 15 апрелёзь уждун сётонъя пунэм тыронъёссэс быдтыны но 40 процент бюджет коньдонзэс уждунлы висъяны. - Владимир Васильевич, нош республикаямы кызьы мынэ бюджетъёс куспын тупанкылъёс кутон? - Вань районъёс но городъёс министерствоын учкемын. Та уж йылпумъяське ни. Правительстволэн Тӧроез Николай Ганза вань тупанкылъёс вылэ гожтӥськиз ни. Районъёс но, городъёс но 15 апрелёзь бюджетникъёслы пунэм тыронъёссэс пытсаны но асьсэ доходъёсысьтызы 40 процент коньдонзэс уждунлы висъяны кулэ. Соин ӵош ик республика юрттӥз но юрттоз районъёслы но городъёслы. Тани алигес Ижевсклы 40 миллион манет уксё висъяз. Со мыноз бюджетникъёслы уждунъя пунэм тыронъёссэ пытсаны. - Выль арлэн одӥг толэзез ортчиз. Кызьы бен январе ужам? - Правительство сётэм кылзэ быдэстӥз, ньыльдон процентлэсь уно уксё висъямын уждунлы. Озьы ик тырмыт сётэмын районъёслы но городъёслы. Огъя вераса, январе кун бюджет мултэсэн быдэстэмын. Азьланьын тазьы ик ужам ке, Удмуртия Россиен пуктэм ужпумез улонэ пыӵатоз. Нош кызьы бен ужазы интыос? Туж пӧртэм. Январьлы доход басьтонъя планзэс ӧз тырмытэ Грахово, Кез, Пичи Пурга, Можга, Селта, Сюмси, Ува, Юкаменск, Шаркан, Сарапул районъёс но ваньмыз городъёс. Тӥни сыӵе муген ик данакез районъёс уждунлы ичи уксё висъязы. Та ласянь тужгес урод югдур Юкаменск, Сарапул, Пичи Пурга, Шаркан, Ува, Кияса районъёсын но Можга городын. Ваньзэ сое лыдэ басьтыса, интыослы, 48,7 миллион интые, 59 миллион манет тыр юрттэт сётэмын. - Нош бюджетэ трос-а вуэ "улэп коньдон"? - Январе быдэс республикая огъя бюджетэ 96 процент "улэп уксё" пыртэмын. Озьы шуыны уг луы куд-ог интыос сярысь. Тани Вавож районын бюджетазы 39 процент "улэп коньдон" вуэ, Грахын - 43, Селталан - 42, Ярын - 37, Ижын - 36, Сарапулын - 42 процент. Тӥни отысь пото бюджетникъёслы уждунъя пунэм тыронъёс. Интыослэн кивалтӥсьёссылы сое вунэтыны уг яра. Предприятиоссэс ӟечгес ужатыны но выт (налог) тыронзэс умоятыны кулэ. Геннадий Романов. Валэктӥськом законъёсты Ваньбурлы кузё луэмды потэ ке Законъёсты тодымтэен олокыӵе но шуг-секытъёсы сюриськом. Озьы ик адями куддыръя ум тодӥське кытчы вазиськоно пӧртэм юанъёсын яке документъёс дасян муген. Нош кӧня сюбега асьмелэн эрикмы правоосмес ляб яке воксё тодымтэенымы пумысен. Вань та ужпумъёсты сэрттон-пертчон вылысь, газет бамъёсамы лыдӟисьёсмылы табере валэктонъёс сётыломы. Ас юанъёсыныды вазиськыны луоз меӵак телефон пыр но. Жингыртоно политикая но экономикая отделэ таӵе телефонъя: 21-63-75. Быгатӥськомы-а асьмеос ас ваньбурмылы зэмос кузё луыны? Котьма ке но, берло дыре адямиос быгато ни машинаос, гаражъёс, квартираос басьтыны. Куд-огез дуно бумагаос, акциос люка. Мар кароно, вань люкам ваньбур тус-тас медаз луы шуыса? Та юанъёслы валэктонъёс басьтӥм Удмурт Республикаысь Юстицияя министерствоысь специалистъёслэсь. Ваньбурлы кузё луон правоез юнматыны луэ, нотариус доры мыныса. Солэсь ик басьтыны луэ ваньбурез киысь кие сётон право (наследство) сярысь свидетельствоез но. Сыӵе правоос басьтон понна нимысьтыз документъёс кулэ. Соос тырмымтэен яке умойтэм лэсьтэмен адямилы ӵем дыръя кема бызьылоно луэ. Наследство сярысь свидетельство басьтон понна адямилэн таӵе документъёсыз луыны кулэ: - азьвыл кузёлэн собственник луон сярысь свидетельствоез; - пӧртэм огкылъёс (договоръёс), кылсярысь: басьтон-вузан, кузьман яке воштон сярысь; - справкаос (гараж, дача, ЖЭУ кооперативъёсысь); - судлэн решениосыз но постановлениосыз. Куд-ог адямиослэн улэп дыръязы ик мылкыдзы кылдэ ваньбурзэс "сётыны", нош мукетъёсызлэн "басьтыны". Со сярысь сюлмаськисьёс вылӥ верам документъёссэс сьӧразы кутыса вазиськыны кулэ Удмурт Республикаысь интыяз кыллись ваньбурез но сое кутон-возёнъя лыдэ басьтон правоез Пусъёнъя палатае (Регистрационная палата по регистрации прав на недвижимое имущество и сделок с ним). Но Пусъёнъя палата кылдытон сярысь Федеральной закон потӥз 1998-тӥ арын 31-тӥ январе гинэ. Соин ик адямиослэн юанзы кылдэ: кужымтэмен уз-а лыдъяське соослэн ваньбурлы кузё луон сярысь яке наследство басьтон сярысь та законлэсь азьлогес басьтэм свидетельствооссы? Кышканэз ӧвӧл. Азьвыл лэсьтэм документъёс зэмен лыдъясько. Пусъён палата кылдэмен валче, наследстволы правоез басьтон понна куд-ог воштӥськонъёс луизы. Кылсярысь, кытчы табере вазиськыны кулэ ваньбурез азьвыл кузёлэсь мукет кузёлы (наследниклы) гожтон понна? Азьвыл кузёлэн документъёсыз лэсьтэмын ке вал 1998-тӥ арозь, выль кузё луонлы вазиськоно отчы ик, кытын лэсьтэмын вал азьвыл кузёлэн документъёсыз. Сыӵе документъёс лэсьтэмын луыны быгато: технической инвентаризациез ортчон бюроосын (БТИ), музъем ужпумъёсъя комитетъёсын (земком), интыысь администрациосын, исполкомъёсын. Сыӵе учыръёсы азьвыл сямен ик выль кузёлы наследство сярысь документъёс лэсьто улон интыя ужась нотариусъёс. Нош соос отын ӧвӧл ке, вазиськоно ваньбур интыяськемъя нотариус доры наследствоез шараям бере куать толэзь куспын. Азьвыл кузёлэн вылӥ верам организациосын нокыӵе документъёсыз пусъемын ӧй вал ке (кулэ ке но вал), наследство сярысь документъёсты дасян понна нотариус доры вуттыны кулэ пӧртэм справкаосты. Кылсярысь, вераськон мынэ ке, лэсьтэм юртъёс сярысь справка басьтоно БТИ-ысь, музъем участок сярысь справка ваёно земкомысь. Нош мар кароно юртъеръёс интыяськемын ке гуртъёсын, кытын нокыӵе инвентаризация ортчытэмын ӧй вал? Зэмзэ но, тросаз гуртъёсын инвентаризация пумозяз ортчытымтэ. Сыӵе дыръя нотариус доры ваёно справка гурт адяминистрациысь, кытын луыны кулэ вань юртъёс сярысь нимаз возиськись книга. Ваньбур сярысь гожтэм огкылъёсты (вузан-басьтон, воштон, кузьман сярысь) нотариус уже кутэ Пусъён палатаын лыдэ бастэм бере гинэ. Но со сяна кулэ луозы на БТИ-ын пусъем бумагаос. Ваньбурлэн азьвыл кузёез улэп ӧвӧл ни ке, наследникъёслы вазиськоно судэ. Судлэн решениез бере выль кузёлы (наследниклы) озьы ик ваньбурлы кузё луэмзэ лыдэ басьтон понна вазиськоно Пусъён палатае. Югдытӥсь Сю куатьтон ар тырмиз тодмо дышетӥсьлэн, гожъясьлэн, этнографлэн, шаерчилэн Николай Николаевич Блиновлэн вордскемез дырысен. Н. Н. Блинов вордӥськиз 1839-тӥ арын 7-тӥ октябре Вятка губерниысь Орлов уездысь Зашижемье черкогуртын черкын ужасьлэн семьяяз. 1861-тӥ арын Вяткаысь духовной семинариын дышетсконзэ йылпумъяз но, сое ыстӥзы Глазов уездысь Карсовай черкогуртэ. Аслаз верамезъя, воргоронлы улонэз валаны зол юрттӥз литература. Тужгес но - Николай Добролюбовлэн гожъямъёсыз. Зэм, пинал дыръяз ик малпалляз: черкын ужаса гинэ калыкедлы пайда вайыны быгатод. Куатьтонэтӥ аръёсысь вань азьмынӥсь адямиос сямен ик нырысь интые пуктылӥз калык пӧлы тодон-валан вӧлмытонэз. Карсовай черкогуртэ вуыса, кызь кык аресъем Николай Блинов мылысь-кыдысь басьтӥськиз удмурт пиналъёс понна школаос кылдытон борды. Таин валче дасяз "Лыдӟон" нимо нырысетӥ удмурт азбука. Печатласькиз со 1867-тӥ арын. Гуртъёсы вуылыкуз, Николай Блинов тунсыкъяськылӥз Глазов уездын азьвыл улэм вотякъёслэн но пермякъёслэн йылолъёсынызы. Та вакытэ ик одӥг кыл шедьтэ газетъёсын ужасьёсын, пыриське Вятка губерниысь земстволэн статистикая комитетэзлэн ужаз. "Карсовай котырысь калык" кылужез понна тодосчилы сётӥзы Императорлэн ӟуч географической обществоезлэсь туй медальзэ. Та адямилы луыса, асьмеос туннэ трос тодӥськом азьвыл Карсовай котырысь калыклэн улэмез-вылэмез но йылолъёсыз-сямъёсыз сярысь. Бахта черкогуртэ (Вяткалы кыдёкын ӧвӧл со) вуыса, ӟеч сямъёс пыӵатэ пиосмурт училищеын дышетскисьёслы. Нимысьтыз школа кылдытэ нылъёс понна. Дышетэ Нолинскысь семинариын. Калык училищеос понна дася "Дышетскем - югыт" лыдӟон книга. Таиз кылдытэмын, Вятка котырысь гуртъёсы ветлыкуз. Бадӟым шумпотон кузьмаз дышетӥсьёслэн 1872-тӥ арын Москваын ортчем ӧтчамазы пыриськемъёслы. Калык школаосын шаермес тодонлы сӥзем курсъёс радъяны юрттӥз. Со сяна, дасяз но поттӥз кылбуръёсын, визькылъёсын но мадькылъёсын "Муш" книга. "Дышетӥсьёс понна дэмланъёс, ӵектонъёс". 1873-тӥ ар вунонтэм соин но: Николай Николаевич ас вылаз басьтӥз Ф. Ф. Павленковен дасям "Наглядная азбука" книга понна кыл кутонэз но. Та арын ик солы ӟеч дунъет сётӥзы Венаын дышетӥсьёслэн калык куспо кенешазы. Зэм, Россиысь кивалтӥсьёс солэсь изъянзэ гинэ адӟизы. Та муген валче ик, дыр, Блиновез выжто Слободск уездысь Лекма черкогуртэ. Дышетон ужлэсь люко. 1875-тӥ арын со кошконо луэ Петербурге. Университетлэн юридической факультетаз лекциос кылзэ, литератураын быгатонлыксэ эскере. 1879-тӥ арын вордскем палъёсаз берытскыны лэзё. Дас вить ар ӵоже Н. Н. Блинов Сарапулын черкын ужаз. Та вакытэ трос гожъяськиз: кӧня ке верос кылдытӥз, "Югыт пеймытын но пиштэ" пьеса пӧрмытӥз. Со сӥземын Л. Н. Толстойлы - писательлэн "Пеймытлэн киулаз" пьесаезлы вазиськон выллем луиз. Сарапулын, отӥяз - Елабуга уездысь Бемыж заводын улыса, Н. Н. Блинов лулысь- сюлмысь эскере но чакла удмуртъёслэсь ортчем сюрессэс, улэм-вылэмзэс, тунсыкъяське соослэн вашкала йылолъёсынызы но осконъёсынызы. 1898-тӥ арын печатла удмурт вӧсьлы сӥзем книга - туж тодмо луэм Мултан ужлы но аспӧртэмлыко дунъет сётэ. Улонэзлэн берло дас аръёсаз кылдытӥз шаеренымы герӟаськем трос дано ужъёс. Соос пӧлын ик - "Кавалерист-девица Дурова-Чернова-Александрова" книга. Николай Николаевич тодматскиз городлэн ортчем сюресэныз. Лыдӟисез шумпоттӥз Сарапуллы сю ар тырмонлы сӥзем книгаеныз, отӥяз - "Сарапул" очеркеныз. Архивысь материалъёсъя кылдытӥз Сарапул уезд, Сарапул, Вотка но Ож заводъёс сярысь веран. Ас бордазы кыско Сарапул уездысь крестьянъёслэн улон-вылонзылы но сое умоятонлы, Кам котырысь улослы, Камсьӧрлы сӥзем ужъёсыз. Н. Н. Блинов Сарапул музейлы кузьмаз аслэсьтыз библиотеказэ. Трос книгаос пӧлын вал "Француз революцилэн ортчем сюресэз", англи экономистъёслэн Давид Рикардолэн но Адам Смитлэн ужъёссы, В. И. Ленинлэн "Россиын капитализмлэн азинскемез" ужез (таиз уж ичи печатламын вылэм 1899-тӥ арын). Та вакчияк ивортон гинэ но вера ини Н. Н. Блиновлэн пӧртэм мылкыдъёсыз но малпанъёсыз сярысь. Удмурт шаермылэн кун архиваз али но утисько на Николай Николаевич Блиновлэн гожъямъёсыз. Соос пӧлысь одӥгез таӵе: - Гуртын кут кутамзы шоры учкытэк, Сарапулын азинтӥськиз кулэсь пыдкутчан дасян. Сапег лэсьтӥсьёслэн мултэс ку юдэсъёссы юнме кылльылӥзы. Кулэсь вузъёс берло аръёсы дуноямен, юдэсъёс но дуноязы. Соослэсь ик кутало дорын ветлон пыдкутчан-босикъёс. Туфлиос луо муресь, сюбег пыдныро. Пушласянь лякисько дунтэм югыт льӧль комнкорен яке - чибор басмаен. Базарын котькуд кузэз понна дун - кызь вить-куамын вить коньы. Кутало нылкышноос. Босикъёс сярысь тужгес трос юаллясько Сибирьын. Тулыс пал вуыло Екатеринбургысь, Камышловкаысь басьяськисьёс. Котькуд дасэз понна тыро кык-куинь манет. Валамон ни, ужась нылкышноос тулысэз уг витё - киужзэс вузано луо вуэмез бере ик. Городын вань кредитъёсъя эштос. Отысь тросэз адямиос - сапег вурисьёс. Соос пӧлысь куд-огезлы тол ӵоже эштосысь сю-сю кызь манетлы кредит висъяло, нош таосыз басьто ини сюрс но солэсь ятыр пыдкутчан. Вузало огломак, нош дуныз быдэсак тыриське тулыс. Ар ӵоже арняяз куинь пол туфлиос кулэсь мукет арбериосын ӵош вузасько музъем вылэ вӧлдэм дэра песьтэръёсысь. Котькуд вузкарись оскытэ: араз вуза со сюрслэсь трос ката. Е. Горбушина, Удмурт Элькунлэн кун архивысьтыз валтӥсь архивист. Удмурт Республикаысь Кун Кенешлэн Тӧроезлы воштӥсь быръён сярысь Удмурт Республикаысь Кун Кеншелэн ПОСТАНОВЛЕНИЕЗ Удмурт Республикаысь Кун Кенеш пуктэ: Наталья Алексеевна Харинаез быръёно Удмурт Республиаысь Кун Кенешлэн Тӧроезлы воштӥсе, сое Удмурт Республикаысь Кун Кенешлэн улон-вылон политикая ялан ужась комиссиеныз кивалтонлэсь мозмытыса. Удмурт Республикаысь Кун Кенешлэн Тӧроез А.А.Волков Ижевск город, 2000-тӥ арын 8-тӥ феврале. � 151-ИИ. Наталья Алексеевна Харина Вордскиз 1949-тӥ арын 7-тӥ апреле Удмурт АССР-ысь Якшур-Бодья ёросысь СтарыеЗятцы гуртын. Ӟуч. Дышетскемез вылӥ. 1972-тӥ арын йылпумъяз Ижевскысь медициная кун институтэз. 1998-тӥ арын солы сётэмын "Россия Федерациысь дано врач" сӥлы карон ним. Удмурт Республикаысь Кун премилэн лауреатэз. 1966-1972 - Ижевскысь медициная кун институтысь студентка. 1972-1975 - ИГМИ-ысь клиникая ординатура. 1975-1979 - 5 номеро нылпи ваён юртысь акушер-гинеколог. 1979-1999 - гинекологияя ёзэн кивалтӥсь, 1 номеро РКБ-ысь валтӥсь врачлэн воштӥсез. 1999-2000 - Удмурт Республикаысь Кун Кенешлэн улон-вылон политикая ялан ужась комиссиеныз кивалтӥсь. Экономика Камбаркаын нырысьсэ му вӧй пызйиз Пичиысен кутске бадӟымез Кылем арняе Камбарка районын шумпотымон но вунонтэм ужрад ортчиз - "Белкамнефть" акционер огазеяськонлэн нырысетӥ му вӧй кыскон скважинаез ужаны кутскиз. Со пуктэмын Алексеево нефть поттон интыын. Нырысетӥ скважинаез усьтонэ ветлӥзы Правительстволэн Тӧроезлэн нырысетӥ воштӥсез Юрий Питкевич, эстӥськонъя, энергетикая но связья, инкуазь узырлыкъёсъя министръёс Виктор Савельев, Александр Кулагин, "Белкамнефть" ОАО-лэн валтӥсь директорез Олег Кузьменко но мукет кивалтӥсьёс. - Та дырлы ми кема дасяським, трос ужъёс быдэстӥм, - шуэ Олег Леонидович. - Кызьы калык вера, пичиысен кутске бадӟымез. Туннэ одӥг скважина улӟиз, нош туэ татын 7-ез пуксёз но ичизэ 16500 тонна му вӧй кыскыны чакласьком. Татын уго 1,5 миллион тонна нефть шедьтэмын. Огазеяськон озьы ик ужа на районысь Никольское но Северо-Никольское му вӧй поттон интыосын. Татын ӧжытсэ 87 миллион манет коньдон кутыны чакламын. Камбаркаын но Каракулиноын сяна, ОАО ужалоз Удмуртиысь музон районъёсын но. Со умой йылпумъяз 1999-тӥ арез, 1,6 миллион тонна му вӧй кыскиз. Ужасезлы быдэ 2125 тонна усиз. Россиын та одӥгез умоез лыдпус. Соин ик алигес акционер огазеяськонэз ӟечкылаз Президентлэсь ужзэ быдэсъясь, Россиысь Правительстволэн Тӧроез Владимир Путин. Нош Алексеево му вӧй поттон интыын ужъёс пумен кужмояло. Кыскемын электро- юбоос, лэсьтэмын сюрес. Июле вуттыны чаклало подстанцизэс. Собере кысконо 14 иськем му вӧй гумы (нефтепровод). Озьы 2000-тӥ арын Камбарка районын 27-30 сюрс тонна му вӧй поттэмын луоз. "Белкамнефть" дугдоз берлань чигнамысь но уногес эстӥськон люкалоз. Матысь куинь-ньыль ар ӵоже со арлы быдэ 200-220 сюрс тонна му вӧй кыскыны ӧдъялоз. Арлэн пумаз 70 мурт ужасез луоз, нош али - 19. Камбаркаысь му вӧез сокем ӟеч уд шуы, со лякиськись но сирез трос. Вылаз ик, трос нюлэс корано (нош тэль нырысетӥ категорие пыре). Мар бен му вӧй поттон районлы сётоз? Валамон, интыысь бюджетэ 10,6 процентэз выт (налог) пыроз, нош кун бюджетэ - 120 миллион манет. Со сяна, миым 3 ноябре Удмуртия но Башкортостан куспазы тупанкыл кутӥзы. Озьы умоесь луонлыкъёс кылдэ "Белкамнефть" ОАО-лы ужаны. Нош со герӟаськемын кык республикаослэн куспазы эстӥськонэз но электрокужымез пайдаё кутонэн. Му вӧй поттон - со капчи уж ӧвӧл. Али одӥг скважина пуктыны 5 миллион манет уксё кулэ. Нош Удмуртия ваньзэ 240 миллион тонна нефть кыскиз ни. Му вӧй поттон интыос вужмо, шаермы нефть вылын 5-7 ар возиськоз на. Азьланьын газэн эстӥськемысь дугдоно луоз. Ваньзэ гуръёсты эстоно-шунтоно луоз чурыт но кизер эстӥськонэн. "Удмуртнефть" миым 5350 сюрс тонна нефть кыскиз, нош "Белкамнефть" - 1635 сюрс тонна. Кыкетӥ интыын мынэ. Кылем арын со 15 выль скважиназэ вуттӥз. Азьло аръёсы "Удмуртнефь" 200-250 скважина пуктэ ке вал, миым 36 гинэ лэсьтӥз. Удмурт Правительство вань му вӧй поттӥсь ёзъёсын но огазеяськонъёсын тупанкыл гожтӥз ни. Со юрттыны кулэ кӧня ке коть пунэм тыронъёсмес берыктыны. Г. РОМАНОВ. Туспуктэмъёсыз Н. Глуховлэн. АРМИЯ Кулэ-а Россилы Таджикистан? 20-тӥ январе потэм газетамы гожъямы вал, Приволжье округе пырись регионъёсысь куд- ог журналистъёс нимысьтыз самолётэн командировкае Чечняе кошкизы шуыса. Солэсь азьвылгес гинэ таӵе ик авиарейс лобаз Таджикистанэ, 201-тӥ мотострелковой дивизилэн подразделениосаз. Кызьы тодмо, та дивизия уте Таджикистан но Афганистан куспысь кунгожез. Газетлэн корреспондентэз Людмила Медведева телефон пыр герӟаськылӥз ПриВО- лэн пресс-службаеныз но "Солдат Отечества" газетлэн редакциеныз. Ӵапак солэн корреспондентэз подполковник Евгений Шальнев кӧня ке нуналзэ ортчытӥз кунгожез утисьёсын артэ. Ас синъёсыныз адӟиз отысь югдурез, солдатъёслэсь мылкыдзэс, туала армилэсь улон-вылонзэ. Та дивизиын трос гинэ Удмуртиысь пиос, вань сӧсырмыса бертэмъёсыз но. Пресс-служба дэмламъя, "пӧсь точкаысь" репортажен вакчияк тодматӥськом "Удмурт дуннеез" лыдӟисьёсты но. 1. Эскерон межаын писпу уг буды уг будо Курган-Тюбинской мотострелковой полкысь бронетранспортёр вань кужмысьтыз дыртэ афган кунгож пала. Котькуд 20 иськем сюресэз ортчыса, водительмы радиосвязь пыр полкен герӟаське, ивортэ, кытӥ мынэммы сярысь. Журналистъёсты сак утё броня вылэ интыяськем кӧня ке разведчикъёс-автоматчикъёс. Афганистан артэ, кин тодэ, ма луоз татын кӧня ке минут, куспын ик. Отын, Пяндж шур дурын, милемыз витё вал ини Халкаяр тактической группаысь боецъёс. "Халкаяр" кыл ӟуч сямен возьматэ "калык гурезь" шуэмез. Татысь пиослы оскемын кунгожлэн 60 иськем музъемез. Соос "куштэмын" самой кыдёкысь точкаын - эшъёссылэсь 130 иськемын. Татын йылпумъяське СССР-лэн азьвыл кунгожез. Пограничникъёс верамъя, ми вуытозь кӧня ке нуналлы гинэ азьвылгес та интыетӥ потыны выриллям наркокурьеръёс. Уйшоре, 1 часын, погранзаставаысь вуэ сигнал, Пяндж котырез быдэсак югдытыны курыса. Пограничникъёслы юрттон вылысь, верам интые ӝегатскытэк пото мотострелокъёс. Эскерон межаазьысь ярдур быдэсак сямен шобыртэмын минаосын. Озьы ке но, Афганистанысь потӥсьёс асьсэлы сюрес шедьто. Ӵем дыръя азьпалазы гурт пудоосты, пуныосты лэзё, асьсэос лёгасько соослэн пытьызы кузя яке шӧйёссы вылтӥ. Озьы мина бусы вамен асьме доры выжо. Нош татын витё ни музон курьеръёс, артысь аулъёсын улӥсьёс, самой та кунгожез азьвыл утисьёс. Соос умой тодо пограннарядлэсь ужзэ. Ватонэз ӧвӧл: данакез таджикъёс уло но семьязэс вордо наркотикен вузкарыса, мукет амал шедьтытэк... Кунгож вылын пиосмы шоры учкыса, амалтэк юам потэ: марысь мар луоно ке, быгатоз-а та пичигес гинэ группа кунгожез кулэезъя утьыны? Техниказы пӧсьтэмын, адӟиське, луо но изъёс вылын сое жалятэк ужато. Десисов майор верамъя, нырысь ик сӧриське эстӥськон аппаратура. Насосъёс бадӟым зӥбетэз уг чидало эстӥськон уродэн. Ай таиз но тырмыт уг вуы, пограничникъёс пунэмасько интыысь организациослэсь. Мотострелокъёс асьсэос ик кулэ насос утчаса бызьыло. Озьы-а кун сюлмаське армия сярысь ? Зэмен но, ас синмыныд адӟытэк, ноку но уд оскы офицеръёслэн ӝожтӥськемзылы. Солдатъёс но, армиысь бертэмъёс, синвуаськыса верало сакырмем техникаен оже потамзэс. Нош кытын туала поттэмез? Малы со татчы уг вуы? Юанъёс трос. Кин соослы валэктон сётоз? Кылсярысь, кун службае вуыса, малы солдат аслыз ачиз дӥськут басьтыны кулэ? Машинаосс сярысь. 60 градусъем пӧсь шорын изъёс вылтӥ ветлыса, соослэн резиназы кема ик уг чида. Солдат татын но амал шедьтӥз: Афганистанысь поттэм боевой машинаослэн сюе согыса кельтэм колёсаосты уже уг ярало ни - резинаез отын сокем "пилеш" ӧвӧл на. - Ми сярысь Россия кемалась вунэтӥз ни, талы мукет валэктонэ ӧвӧл, - шуэ майор Денисов. - Шур сьӧрысь боевикъёс дорамы ӧз ке потэ, тазьы ик возиськом. Нош потӥзы ке? Гольык киын-а султозы соослы пумит Россилэн солдатъёсыз? 2. Дуно ошмес ву но эстӥськон Кунгожез утисьёслэн эшшо огез йырвисёнзы - электрокужымтэк кылён. Интыысь энергетикъёслэн со самой яратон шудонзы. Югдурез ӧжытаклы гинэ капчиятыны юрттэ асьсэлэн вужмем дизельзы. Но час ӵоже гинэ со 25 литр пала эстӥськонэз "ньылэ" 10 нунал ӵоже - 3 тонна. Халкаярын службазэс нуись контрактникъёсын но сержантъёсын вераськыса, амалтэк малпаськод: "Тодо меда Бадӟым музъем вылын кыӵе условиосын службазэс нуо татчы, дунне пуме, ыстэм пиос? Тодо ке, соку малы складъёсын солдатъёслы сётъяло ӝутъяны вормонтэм секыт кирза сапег? Зэмен но, ассэ гажась контрактник базаре мыныса, уксёзэ тырыса, аслыз капчи пыдкутчан басьтоз. Басьтоз "афган" дӥсь но, малы ке шуоно, арлы сётэм комплект татын кӧня ке толэзь куспын ӟустарилы пӧрме. Соин-а потод смотре? Вакчи штань (шорты шуон) татын асьсэос лэсьто, бездэм камуфляжзэс пыдесозь вандыса. Таиз ини, кызьы шуо, чыры-пыры. Соя армилэсь ӟечлыксэ уг учко. Тросгес шугъяськытэ эстӥськонтэк сылӥсь техника. 3. Йыбырттӥсько тӥледы, офицер кышноос! Солдатэз яке офицерез гурезьёсысь пумитаса паймиськод: кызьы соос татын асьсэлэсь долгзэс быдэсъяло? Нош тужгес но паймоно (мон но, котьмае адӟылэм журналист), егит нылкышноослэн пумтэ-йылтэм чиданлыксы шоры учкыса. Нырысь-валысь секыт дышыны котлованэ пуктэм палаткаослы. Дугдылытэк пыжись шунды сиослэсь уте сетка гинэ. Вунэтыса кельтэм зажигалка, пӧсьлы чидатэк, син азяд ик пуштэ. Часъёс дугдо. Вылаз ик, кызьы вераз капитан Зиедалиев, 1991-тӥ арысен Таджикистанын офицер, котькуд минутэ возьма кегезъян (малярия) вӧлмытӥсь чибиньлэсь куртчемзэ. Яке чаян (скорпион), кый (кобра) дорад шыпытак вуозы. Но соослэсь кышкан ӝог ортче. Ваньмон дыръязы волейболэн, футболэн шудо, видео учко, одӥг ӝӧк сьӧры пуксьыса пусъё вордскем нуналзэс, пограничникъёс доры куное ветло. Нош арняосы телефон пыр жингыртыны быгато Россие. Ас синмыным адӟытэк, мон нокызьы но ӧй оскы вал, татын, Халкаярын, офицеръёсын ӵош соослэн кышнооссы но уло шуыса. Вераськиськом командирлэн кышноеныз Ольгаен. Со йылпумъяз Казаньысь Искусствоя академиез, дышетскемезъя - дирижёр. Таджикистанын - 1996-тӥ арысен, бордаз 7 аресъем Андрей пиез но. Ольга оске: со котьку картэныз артэ луыны кулэ, туж секыт дыръёсы но. Мукет сямен офицерлэн кузпалыз ассэ уг адӟы. Курган-Тюбеысь та пала лыктӥсь БТР- ен ваизы мисьтаськон машиназэ, утюган пулзэ, йырси куасьтон фензэ. Кинэн артэ пуктод меда та кышномуртэ, декабристкаосын гинэ шат? Ольга гурезьёсын огназ ӧвӧл. Россиысь офицеръёс сьӧры бадӟым городъёсысь кошкыса, улыны лыктэмын кузпалъёссы. Тодо, татын уг тырмы ву но сиён, ӧвӧл улон инты - озьы ке но семьязэс утьыны тыршо. Валало: картъёссылы соостэк но пиналъёссытэк эшшо но секыт луоз. Озьы ик дунъясал ке аслэсьтыз утисьёссэ кунмы? Тырысал ке соослы уждунзэс дыраз, черодтэк сётысал ке улон инты, юрттысал ке музон сямен... Таӵе калэ вуысал шат дунне вылысь куке но огез кужмоез армия? Оло, ваньмыз интыяз пуксёз на? Мынам туж оскеме потэ, армия улонын интызэ шедтоз на шуыса, азьвыл сямен ик будоз офицерлэн но лёгам-саптам данэз. Озьы мед луысал. Нош туннэ сюлэмы вӧсь луыса учкисько "пӧсь интыосын" - Таджикистанын, Кавказын, Югославиын, Чечняын службазэс нуисьёс шоры. Газетъёсты учконо ке, Югославиысь рядовой десантниклэн толэзьем уждунэз, 201-тӥ мотострелковой дивизилэн командиреныз ӵошатыса, куинь поллы (!) бадӟымгес. Мар веранэз на Таджикистанэ шедем солдат сярысь. Кунласянь армиез тоно- моно люкон ноку но ӟече уз вутты. Югославия - кыдёкын, тросэз ивор асьме дорозь уз но вуы. Нош Таджикистан тани со - СССР-лэн азьвыл улосвылэз. Россия али но уте та кунэз, уен-нуналэн службазэс нуо странамылэн оскымон пиосыз. Нош уждунъя ке учконо, ваньмыз соос люкылэмын, министерствоосъя "дунъямын". Кунгожез утисьёслэн уждунзы асьсэлэн, тупаса улонэз утисьёслэн - асьсэлэн, Таджикистанысь обороная министерство пыре куинетӥ группае, 201-тӥ дивизия - ньылетӥяз. Шонер, уждунзы огкадь нокызьы но луыны уз быгаты, но тоно-моно карыны уг яра, малы ке шуоно, ваньзы соос утё СНГ-лэсь кунгожъёссэ. Граждан калык пӧлысь пумен ӵемгес кылод таӵе юанэз: "Малы Россилы кулэ Таджикистан?" Погонъёсын адямиос озьы уг верало. Соос тодо, малы татын сылэмзэс. Жаль, Россия вунэтэ оскымон пиоссэ Е.Шальнев. Курган-Тюбе-Халкаяр-Душанбе. Выжыосмы Йырсиме ваё пунӥзы, тыбырам чалма ошизы Мынам ӵужмурт гуртэ - Косой - сылэ Ижевск-Можга бадӟым сюреслы кык иськем гинэ палэнын. Туж чебер но шулдыр интые пуксиллям вашкала пересьёс. Муш садэтӥ, вашкала пужымъёс вӧзтӥ, лулпу арамаетӥ келязы-пумитазы, дыр, Ураждан оже кошкись Косойысь пиосты-воргоронъёсты. Чидантэм вакыт вал со гурт калыклы. Тросэз воргоронъёс ӧз берытске ни ож лудысь. Соин валче семьяос куанермизы, пинал нылъёс калыке ӧз потэ, ӧз быгатэ семья кылдытыны. Куд-огез весяклы оген улыны кылизы. Огпол, пе, луэ яратон, шуэ вал гтцзыфте. Кулаке поттэмъёс огзы но пыд йылазы ӧз ни ӝутске, юртъеръёссы лябӟизы. Ужась воргоронъёс оже быризы, нош нылпиоссы пичиесь кылизы. Куд-огез землянкаосын но улӥллям. Аръёс ортчизы, нош шудо нуналъёс вуизы. Гужем возь выл сяськаос усьтӥськем музэн, Косойысь нылъёслэн но вуиз калыке потон, бызён дырзы. Соос пӧлын шудоез вылэм Лефим Оля - Коновалова, Пургала Комак Семонлы - Хомяковлы - бызем. Косой гуртысь укмыс ныллы семья кылдытыны со сюрес усьтэм. Та сюанысен ик дядяелэн (атаелэн) син шораз усем мынам мемее, Ермошка Палагей - Дедюхина. Дораз бертыса, семьяосызлы верам, Косойын туж чебер нылзы вань, кен юаны - "ветыл кураны" мыноно, пе, вал. Кӧня ке дыр ортчыса, ныл кураны мынӥллям. Сётӥллямтэ, пинал ай, пе, пирданэз но ӧвӧл на. Дядяе, лушканы шуыса, нош валэн мынэм, но мемее возьдаськыса пегӟем, дӥськутэ ӧвӧл, пе. Косойысь аранзы бырем бере, мемейме Эгралась ӵыжы-выжыоссы доры юрттӥськыны ыстӥллям. Дядяе отысь но утчаса шедьтэм сое. Мемейме лӥятыса, ӵужапаез шуэм: - Мын, Палагей, оло, отын тынад шудэд. Мемеелы вить арес дыръя дядяез Матвей граждан оже бырем, мемейзэ Баграш-Биграла бызьтӥллям, огназ улыны пинал ай шуыса. Озьы пичи нылашез вордыны кельтэм дядяезлэн выныз Ермошка. Нош табере тани дас тямыс аресъем нылэз ассэ бызьыны косо. Вань сюрессэ бӧрдыса мынэм мемее. Кутэз пась, кышетэз кышъямын, вылаз дӥсямын солдатъёслэсь басьтэм дэремлэсь выль кенакеныз Акулинаен вурем удмурт дэрем. Вуремын со вылэм азьдорин но, мыддорин но нуллыны ярамон. Вераны кулэ, азьло дыръя тросэз нылъёс куанеренызы, бусы капкаетӥ потэм бере, пыдкутчанзэс кушто, дэремзылэсь мыддорин палзэ дӥсяло вылэм - шунды медаз басьты шуыса. Ужысь бертыкузы, нош ик азьдоринзэ дӥсяло. Пургала егитъёс вуиллям ӵукна ӟардыку. Песянае Агафья Мохова соосты вӧен-нянен пумитам, инмарен вӧсяса, пырыны сюрес сётэм. Кензэ аслаз дӥськутэныз пӧрмытэм. Йырсизэ ваё пуныса, йыр котыртӥз котыртэм, тыбыраз чалма ошем. Соку ини шораз "кен" шуыса вазем. Нылзэс Пургала нуиллям шуыса Косойын тодӥллям но, куинь нунал ортчыса, чырс нянен вуиллям - капка сьӧры чырс нянен уг пыро вылэм. Дядяе бызьыса пырем кӧлан кеносэ, мемейлы ивор сётэм. Мар-о, пе, вералод семьяосыдлы, оло, соос сьӧры кошкод-а? Мемее кеносысь потэм но, дядяе сьӧры султыса, кошкыны пумит луэмзэ йырыныз шоналтыса гинэ верам. Туж зол кышкай, пе, бабуше но айымуртэ азьын тышкаськозы шуыса. Атаез нылзэ адӟыса валам - уз берты ни со гуртаз. Сюан-бӧрысь бере кӧня ке дыр ортчыса, выль эмеспиез, матысь тодматскон понна, куное ӧтизы. Ныллэн ӵыжы-выжыосыз солы дэрем кузьмазы. Куноысь кошкыкузы мемее эшсэ Лёгор Граняез (Коноваловаез) капка дорозь келяны чортэм. Соиз, номыре но малпатэк, келяны кариськем. Нош егит кузпалъёс нылэз Пургала бӧляк пизылы Юсь Иван Васялы - Сметанинлы - нуиллям. Нылмуртлэн дядяез вазь ӵукна дас кык иськемез пыдын мынэм, тышкаськыны малпаса. Граня пумит луэм бертыны, со ик луэм быземез. Яратон уг юа вылэм, узыр-а тон, куанер-а, кык сюлэмъёс амалзэ шедьто огинэ луыны. Озьы Наскем шур сьӧрысь кык братъёслэн нылъёссы Ольга но Граня Коноваловаос Пургалась одӥг бӧлякысь пиосын шудзэс шедьтӥллям. Мемее рос-прос уг тоды ни, оло 1939-тӥ арын, оло 1940-тӥ арын доразы куное бертылӥллям. Коркась корка юмшакузы, дядяймы синмаськем вить аресъем чебер но чырткем пилы - сьӧд йырсиё, мыт ымныро вылэм со. Кайта лыктыкуз мед тодмалоз шуыса, мандолина лэсьтыса сётэм пияшлы. Кибашлы вылэм дядяе, туж чаляк, пе, лэсьтӥз кузьымзэ. 1941-тӥ арын дядяе Быдӟым Отечественной войнае кошкем но бертымтэ ни. Ивортэк быриз шуыса, мемее похоронка басьтэм. Дядяе тодытэк но кылиз, чырткем но чебер пи Конда Васи (Арков) солэн эмеспиез, нош милям кырсимы луиз шуыса. 1947-тӥ арын шумпотон ивор вуиз - ожысь бертӥз мемеелэн атаез. Со сярысь тодыса, мемеен ми кыкнамы Косое пыдын кошким, мыным соку сизьым арес вал. Коркан ог дасо пиосмуртъёс пуко вал ини. Ӵужатае монэ вӧлдэтозь ӝутӥз: - Мон немецъёсын жугиськытозь, та быдӟа будӥд-а, нылы? Воргоронъёсын вераськыкуз, мон солэсь юалляськи: - Немецъёсын зол жугиськид-а? Бадӟымесь-а соос?.. Янгышаса сое дядяй шуыны шедьтӥ, кепыр потэменым палэнски. Нош со мон доры лыктӥз но, алвылаз пуктыса шуиз: - Тон мынэсьтым кепыр эн поты, атай шу, дядяед кадь ик мед пото. Одӥгаз гужеме, гырон быдтон ортчем бере, нылъёсын ӵужмурт гуртамы мыноно кариським (дас-дас одӥг арес вал милемлы соку). Ӝытазе, шудэмысь пырыкум, капказэс, корказьзэс ӵогай. Пыремме шӧдыса, атае юаз: - Ӵогаськыса пырид-а? - Ваньзэ ӵогай,- шумпотыса вазисько. Нош со потӥз но ваньзэ усьтӥз. - Уй ӵоже котыр калыклы мар ке луиз ке, пырыны уз быгатэ, вожзы потоз. Гурт калык ог-огезтэк улыны уг быгаты. Тани тӥляд мемейёсты Пургалан. Оло, кудзы ке куное бертозы, нош асьмеос ӵогаськемын луом. Ӵужатаймылы кема улыны ӧз кылды. Войнаысь бертэм адями улонысь вазь кошкиз. Солэн одӥг нылыз вал - Ӝакы - Серафима Аркова. Нылпиоссы кулэмен, пересьёс солэсь нимзэ ватыны косӥллям, тылобурдо ним, пе, сётоно. - Соин валче гинэ нылмы улыны кылиз,- шуэ вал ӵужмемеймы Акулина. Ӝакы Косое ик бызиз, со чебер, чырткем пилы, Конда Василы. Ӝакы апаймы но Вася кырсимы улонысь вазь кошкизы, куать нылпизы кылиз. Петя пизы 1996-тӥ арын кулӥз. Мемеез туж шумпотӥз вал, Афганистанын служить карыса, йырыз быгылес кылемысь. Нош со висёнэн бертэм вылэм. Косойысь огвакытэ укмыс бызем нылъёс пӧлысь самой шудоез Лефим Оля вал, со гинэ пересьмытозяз кузпалэныз улӥз. Мукетъёсызлэн картъёссы ожын быризы, бертэмъёсыз но кема ӧз улэ. Куинез егитысен кулӥзы, нылпиоссы сирота яке сюрмемей вӧзы кылизы. Али дыре со нылъёс пӧлысь мынам мемее гинэ улэп на. Шудо улысалыз, дыр, но война сое кызь тямыс арес дыръяз огназэ ньыль нылпиен улыны кельтӥз. Мемеез но дядяез нылзылы тазалык сётӥллям вылэм. Со али но гурт котырын ваньзэ ужа, улэ пиеныз. Тямыстон ньыль арес тырмыкуз шуиз, кулӥ ке, ватэ, пе, монэ Косой кельдосэ - шае. Т. МОХОВА. Пичи Пурга село. Удмурт уӵы Россия Федерациысь дано артистка Евгения Пахомова улонысь вить ар талэсь азьло ни кошкиз ке но, Удмурт Элькунысь Операя но балетъя кун театрын сое уг вунэто. - Консерваториын дышетсконме йылпумъяса, мон, кызь кык аресъем егит адями, лыктӥ Ижысь Крезьгуръя но драмая театре, - тодаз вае Удмурт Элькунысь дано артист Владимир Нефедов. - Соку ик ини Евгения Степановналэн дано нимыз вал. Театрысь парторг, туж гажано адями... Мон солэсь куддыр кышкалляй но... Евгения Пахомова шудылӥз валтӥсь рольёсты. Валтӥсь вал "Азин" драмаын но. Владимир Нефедовлы юрттылӥз нырысетӥ солдатэз возьматыны, сцена вылын возиськыны. Шаркан ёросысь Бередь гуртын вордӥськем нылаш пичи дыръяз ик ини малпаськылӥз актриса яке нылпиосты визьнодась луон сярысь. Улон сюрессэ чутрак шонертӥз Удмурт АССР-ысь Эктонъя но кырӟанъя кун ансамбле артистъёсты кутон сярысь ялон. Нылмуртлэн кемалась малпанэз быдэсмиз: луиз со хорын кырӟась. Ансамбльын ужаз вить ар. Быгатонлыкез вылӥ дунъямын вал: Удмурт шаерысьтымы кивалтӥсьёс кырӟасьлы сётӥзы Удмурт АССР-ысь дано артистка ним. Егит адями нуналысь нуналэ сюлмаськылӥз устолыксэ волятон сярысь - малпаськылӥз на консерваторие дышетскыны пырон пумысь. Со вакытэ ик тодон-валанзэ будэтӥз шаерысьтымы крезьгуръя училищелэн вокал люкетаз, кырӟаз Удмурт радиолэн но телевиденилэн хоразы. Огпол солы дэмлазы Геннадий Корепанов-Камскийлэн "Любушка" опереттаяз шудыны. Артистка пумит ӧз луы. Нырысетӥ ужез но усто пӧрмиз - кылдытӥз синмаськымон Любушкаез. Сцена вылын шудыкуз ик Евгения Пахомова кык арскын йылпумъяз училищелэсь ньыль аръем курссэ. Диплом басьтыса дасяськыны кутскиз консерваторие. Дышетскыны пыриз. Консерваториез йылпумъякуз, мылысь-кыдысь возьматӥз П.И.Чайковскийлэн "Иоланта" операысьтыз Иолантаез. Экзаменъёс дыръя вуоно кизилилы сётӥзы туж вылӥ дунъет. Театрысь артистлэн Геннадий Городиловлэн тодэ ваёнъёсызъя (татчы лыктӥз 1968-тӥ арын), Евгения Пахомова учкисьёслэн яратоно артистказы вал ини азьло ик. Евгения Степановна шудылӥз пӧртэм жанръем спектакльёсын - водевильёсын, выжыкылъёсын, опереттаосын но операосын. Котькудаз возьматылӥз вылӥ быгатонлыксэ. "Табачный капитан" спектакльын со вал эрикез яратӥсь но кужмо Свиньина боярыня, ляб сямо - "Девичий переполох" опереттаын, возьытэз валасьтэм - "Моя жена - лгунья" водевильын, туж ненег, туж капчи мылкыдо - "Наталь" операын. "Россиянка" операын возьматӥз туж кужмо, кышкасьтэм Антонинаез. Зэм, шуг-секытъёсыз ичи ӧй вал. Но соосты вормылӥз. Шудылӥз удмурт кылын но, ӟуч кылын но. "Полярная звезда" операын Сергей Кудрявцевен ӵош кырӟаз. Таиз отӥяз вылэ но вылэ ӝутскыны кутскиз. - Евгения Степановна театрлэн ымнырыз вал. Актриса луэм сяна, мукет но ужъёсты быдэсъяз со. Адямиос дораз лыктылӥзы пӧртэм куронъёсын - Евгения Степановна котькудӥзлы луэмезъя юрттыны турттылӥз, - нош ик тодаз вае Геннадий Городилов. - Анае мынам ӟеч, кужмо адями вал, - мумиз сярысь шуныт кылъёс вера солэн пиез, Станислав Пахомов но. - Весь сюлмаськылӥз мыным вылӥ тодон-валан сётон сярысь. Зэм, мон ӧй кылзы сое. Станислав кырӟа театрлэн хораз. Анаез улэп дыръя ай репетициосы соин ӵош но пыриськылӥз. Нош сценаен нырысьсэ тодматскиз укмыс толэзьем дыръяз ик. Евгения Степановна вань сюлмысьтыз яратӥз театрез. Владимир Нефедов паймыса тодаз вае на Геннадий Корепанов-Камскийлэн "Заговор" операяз туж капчи но быгатыса эктэмзэ. Берлогес Евгения Пахомова шудылӥз ини мӧйыослэсь рольёссэс. Театрлэн вуж юртаз ай синмаськымон возьматӥз пересь Семеновнаез - "Бабий бунт" опереттаысь вал сюдӥсь Захар песятайлэсь кышнозэ. Та спектаклез пуктӥз Волгоградысь режиссёр И.А.Фаликов. Премьера луон нуналэ театре шедьыны секыт вал. Со дырысен ортчиз ни кызь ар. Нош спектакль сцена вылын туннэ но мынэ. Песянайлэсь но песятайлэсь (Евгения Пахомовалэсь но Юрий Яковлевлэсь) ӵош кырӟамзэс ӵемысь кылӥськод концертъёс дыръя. Евгения Степановналэн куараез чузъяськылӥз зарни пластинка вылысен но (татчы гожтэмын опереттаысь ариос). Бен, улон солы бадӟым кузьым дасям. Сюлмысь тыршемез, ас удыссэ кужмо яратэмез юрттӥзы бадӟымесь азинсконъёс басьтыны. Евгения Степановналэн одӥгез бадӟым вормонэз - "Королева Чардаша" опереттаысь Юлианалэн партиез. И.А.Фаликов режиссёрен пуктэм спектакль кема мынӥз сцена вылын. Алигес выльдӥзы сое. Евгения Пахомоваез буре ваён нуналэ Юлианалэсь рользэ шудӥз артистка Любовь Виноградова, Бонилэсь - артист Владимир Нефедов. Театрын ужакуз ик Евгения Степановна Пахомова мылысь-кыдысь дышетӥз шаерысьтымы крезьгуръя училищелэн вокал люкетаз. Трос егитъёсты визьнодаз. Азьвыл дышетскисез Николай Нелюбин тодон-валанзэ будэтэ али Пермьысь культурая институтын. - Туж ӝож: таӵе адямиос вазь кошко улонысь, - сюлмысьтыз ӧпкеле артист Геннадий Городилов. - Евгения Степановна улэп луысал на ке, театрамы улон но мукет сямен радъяськысал. В.Лагунов. Быремъёсты буре вайыса 1994-тӥ-1996-тӥ но 1999-тӥ-2000-тӥ аръёсы Чечня Республикаын террористъёсын нюръяськон дыръя быремъёслы памятник пуктыны чакламын. Сое ӝутозы Моздок городын. Таин валче 58-тӥ армилэн командующиез генерал-майор В. Шаманов юрттэт курыса вазиськиз Россия Федерациысь улосъёсын (субъектъёсын) кивалтӥсьёслы. Та ӟеч уже пыриськыны мылкыд карисьёслы ивортӥськом войсковой частьлэсь расчётной счётсэ: г. Владикавказ, Полевое учреждение ЦБРФ "Казбекское", текущий счёт 40503810600000000001, БИК 049082002, ИНН 1501007915. Юанъёсын вазиськыны луоз Владикавказысь таӵе телефонъёсъя: 33-43-94, 75-62-78. Удмурт Республикаысь Правительстволэн пресс-службаез. Глазовысь аракы но сур пӧзьтӥсьлы - 100 ар Николай Сорокин: "Ӝӧк чебер ческыт винаен" Кин бен уг тоды Глазовысь аракы пӧзьтӥсьёсты. Татысь ликёро-водочной завод (ЛВЗ) тодмо ӟеч продукциеныз. Предприятиен сизьыметӥ арзэ кивалтэ ни Николай Борисович Сорокин. 1984-тӥ, 1985-тӥ аръёсы со вал валтӥсь инженер. Собере Николай Борисовичез басьто горисполкомлэн тӧроезлы воштӥсе. Нош 1993-тӥ арын мартэ сое валтӥсь директоре быръё. Со дырысен кутске предприятилэн кыкетӥ улонэз, выльдӥськонэз но ӝутсконэз. - ЛВЗ - Глазовысь одӥге вашкала предприятие. Миым быдэс даурзэ пусйиз городысь "Металлист" огазеяськон, нош туэ 100 ар тырме" "Глазовский" ликёро-водочной заводлы. Соин ик, Николай Борисович, ойдолэ вераськонмес мытом юбилейды бордысен. Калыклэн тодэмез потэ, кызьы со вордскиз - Зэмзэ но, предприятилэн ортчем сюресэз вакчи ӧвӧл. Совето власть дыръя гожъяллязы, революцилэсь азьло, пе, Удмуртиын ӧй вал школаос, заводъёс но мукет предприятиос. Но берло дыре зэмлык кыре потэ. Сое уд ваты. Али асьмеос школаослэсь, предприятиослэсь даур ӵоже тыршемзэс пусйиськом. Тани соос пӧлы пыре милям заводмы но. 1900-тӥ арын Чупчи шур дурысь Глазов городын лэсьтыны ӧдъязы аракы пӧзьтон завод. Ар ортчыса, со поттӥз ни чабей (пшеничной) водка. Россиысь вань вина поттӥсь заводъёс сямен ик, милям но пыд йылаз векась заводмы эсксэйлэн киулаз вал. Нош 1914-тӥ арын, Германиен война кутскем бере, со кабзэ пытсаськиз но татчы военной госпиталь интыяськиз. 1919-тӥ арын, тӧдьыос вуон азьын, госпитальлэсь но заводлэсь оборудованизэ мукет азе келязы. Та интые кылдӥз картофка возён гу, бӧрысьгес аръёсы нылпи юртлы пӧрмытӥзы. Собере гинэ, 1927-тӥ арын кутске вина заводэз выльдон. Та арын ик, 1 ноябре, завод ужаны ӧдъяз. Предприятие каллен юнмаз, гуртъёсын усьтӥськизы вузкарон интыосыз - лавкаос. 1928- тӥ арын заводэн кивалтӥз Петр Митрофанович Скрябин, нош ар ортчыса, директор луиз Тимофей Егорович Поздеев. Соку заводлэн вал ни котельноез, кебитэз, столовоез, мунчоез, улон юртэз но аслаз корам нюлэсэз. Соку завод продукцизэ келялляз вина вузан 34 лавкаосы. Зуевка но Фаленки черкогуртъёсы поездэн вина нуллӥзы. Ватка музъем данэ потэмын вал аракы но вина пӧзьтонъя. Нош Глазов кар пыре вал Вятка губерние. Тӥни ЛВЗ-лэн кузь сюресаз котькыӵе дыръёс вал. Дуннеысь кыкетӥ тылож вакытэ со тамак поттӥз. Со юн кулэ вал фронтлы, ожмаськисьёслы. - Нош туннэез но ӵуказеез сярысь мар верасалды. Ведь предприятиды быдэс даурез ортчиз ни. - Предприятимы Удмуртиысь но Россиысь устоосыз ЛВЗ-ос пӧлы пыре шуи ке, уг янгыша, дыр. Сое туж яркыт возьмато зарни, азвесь, бронза медальёс но уно грамотаос. Со сярысь берлогес рос-прос мадё. Ведь сыӵе наградаос инмысь уг усё. Туннэез сярысь ке верано, заводмы берло дыре пӧрмиз кужмо механизированной предприятилы. Али ми 80 пумо но пӧртэм винаос поттӥськом. Водкамы гинэ 10 пумо, кылемез ческыт винаос (настойкаос, ликёръёс, наливкаос, пуншъёс коктейльёс, бальзам но музонэз). Огъя пусйыса, завод арлы быдэ 1000 сюрс декалитрлэсь уно продукция потэ. Али ЛВЗ-лэн 23 аслаз магазинэз но 6 складэз усьтэмын. Соос ужало Ижын, Воткинскын, Можгаын, Играын, Уваын но Воткинск районысь Новый посёлокын. Али милям 700 ёрос ужасьёсмы. Уждун дыраз сётъяськом. Вина пӧзьтонмы радъямын 4 линиен. Одӥгез "Калашников" водка гинэ лэсьтэ. Солы "Люкс" спирт палэнысь басьтӥськом. Но милям продукцимылэсь данзэ уськытэ "Кредо" фирма. Со Глазовын ик ужа, урод аракы поттэ. Басяськисьлы сое тодманы секыт ӧвӧл, этикетка вылаз ЛВЗ "Кредо" гожтэмын луыны кулэ, нош милямаз - ЛВЗ "Глазовский". Собере вузкарисьлэсь но юаны кема ӧвӧл, кытын водкады пӧзьтэмын шуыса. Тӥни соку ваньмыз интыяз пуксёз, валамон луоз. - Николай Борисович, нош кытчы продукциды кошке? - Кызьы верай ни, ми асьме республика понна ужаськом. Ар ӵоже шорлыдын 180-200 сюрс декалитр кошке Ижевске, Глазове - 150-160, Воткинске - 50-60, районъёсы - 300- 310; нош палэнэ - 100 сюрс декалитр. Винамес басьто Пермь, Киров, Тюмень, Саратов, Самара городъёс. 2,5 сюрссэ кунгож сьӧры вузаськом. Водкамы кельше Австралиын, Кипрын, Германиы но музонэзлы. Кӧня продукция поттэммес син азе пуктон вылысь, одӥг лыдпус верало. Одӥг сюрс декалитр луэ одӥг вагон. Винамы кошке чугун сюресэн но, автотранспортэн но. Заводлэн вань аслаз кужмо автопаркез. Продукцимес вис карытэк вуттӥськом фирма магазинъёсамы но складъёсамы. - Маин бен пусйылэмын ни продукциды? - Ми пыриськиськом дуннеысь но Россиысь пӧртэм адӟытонъёсы (выставкаосы), ярмаркаосы но мукет ужрадъёсы. 1995-тӥ арысен лыдъяса, туннэ нуналозь подукцимы 50- лэсь уно зарни, азвесь но бронза медальёсын пусъемын, нош И, ИИ но ИИИ степен дипломъёсын - 20 пала. Тужгес но зол данъямын ни "Калашников", "Глазовская", "Фельдъегерская", "Золотая корона", "Шедевр", "Италмас". "Страдивари" водка, "Иднакар" бальзам, "Чепца" коктейль, "Журавушка" но "Золотой ярлык" ческытатэм юонъёс. Нош 1995-тӥ арын Америкаын басьтӥм, секыт вакытэ (кризис дыръя) ужаммы понна, "Факел Бирмингела" борддоре ошон пул но зарни медаль. Кылем арын Лондонысь "Олимпия-99" адӟытонын зарни медаль басьтӥз "Глазовская", водка, нош "Калашников" - диплом. Отын асьмелэсь бере кылизы Москваысь тодмо "Кристалл" ЛВЗ но мукетъёсыз. Соослэн продукцизы номырин пусйымтэ вал. Озьы ик зарни, азвесь но бронза медальёсын бертӥм Москваысь "Интердрина-99" адӟытонысь. Нош Брюссельысь "Эврика-99" ярмаркаын "Шедевр Страдивари" зарни медаль басьтӥз, бронзаен пусъемын "Калашников", "Глазовская водка" но "Чепца" коктейль. Тӥни кӧня люкасько, ваньзэ уд но вера. Ваньмыз со потэ быдэс коллективлэн лулысь- сюлмысь тыршемез бордысь, тужгес но технологъёслэн ужамзы бордысь. Зэм, предприятимы арысь аре будэ, паськыта но кужмоя. Миым тани "Чепецкое" сур пӧзьтыны ӧдъям. Одӥг линия ужа ни. Ортчем арлэн пумаз вуттӥм Балезиноысь ёзмес - спиртзаводмес. - Я, бен, спирт поттон борды вуим бере, со сярысь рос-прос вералэ вал. Малы со кулэ луиз? - Нырысь ик, пусъеме потэ, ми сое асьме кужымен, асьме уксёен пуктӥм. Со луэ ЛВЗ- лэн ёзэз, филиалэз шуо. Водка но вина пӧзьтӥсь котькыӵе заводлы кулэ спирт. Сое палэнысь басьтоно-ваёно луэ. Табере ми нокинлы ум йыбыртъялэ, асьмелэн сыръёмы луоз. Со араз ичизэ... спирт пӧзьтэ. Кӧня ке Сарапулысь эшъёсмылы но вузам ни. Нош "Калашников" водка поттыны "Люкс" спирт палэнысь ик басьтом на. Со уго герӟаськемын та водкалы юн бадӟымесь куронъёсын но кунгож сьӧры трос кошкеменыз. Балезиноысь спиртзаводмы кун бюджетэ арлы быдэ ватсаса 50 миллион манет коньдон пыртоз, нош посёлокын 150-лэсь трос выль ужан интыос усьтӥськозы. Со умой луоз районысь пудо вордӥсьёслы но. завод араз 20 сюрс тонна барда сётоз. Скалъёслы со ӟеч сиён луоз но пуж-пуж йӧл потоз. - Кин тӥляд матысь юрттӥсьёсты? - Валамон, быдэс коллектив юрттэ. Куке огкылысь, тупаса ке ужаськод, котькыӵе шуг- секытсэ вормыны луэ. Но котькинлы тодмо: нырысь юрттӥсьёс луо воштӥсьёсы, валтӥсь инженер, бухгалтер, экономист но музонэз. Тани сбытъя юрттӥсе луэ Зухра Никулина. Со вузкаронъя но сбытъя отделлэн кивалтӥсеныз Анна Рогозинаен ӵош продукцимес вузанэз радъяло. Та ужез быдэсъяны юртто валтӥсь диспетчер Надежда Осипова но маркетингъя специалист Лариса Сакерина. Туннэ озьы ик нимысьтыз пусъеме потэ валтӥсь технологез Галина Поздееваез, производствоя но технологияя лабораторилэсь кивалтӥсьсэ Наталья Брежневаез но музонзэ. Огъя вераса, коллективмы дауръем юбилейзэ ӟеч пусйыны дасяське. 100 ар - со кузь сюрес. Соин ик котькудӥз ас удысаз ӝутскем мылкыдын тырше. Дасязы Геннадий Романов но Владимир Беломорских (фото). Николай Сорокин. Сбытъя отделын. Продукцизэс келяло. Пӧртэм винаос. Пусйымон туннэ нунал - дорамы "Бадӟым Урал" Туннэ Ижевскын ортче Уралысь республикаослэн но улосъёслэн экономикаын валче ужанъя огазеяськонзылэн советэзлэн кенешонэз. Удмуртилэн шоркараз лыктэмын бускельёсмылэн кивалтӥсьёссы. Пумиськонэз усьтоз Свердловск обласьтлэн губернаторез Эдуард Россель. Удмуртиысь Кун Кенешлэн Тӧроез Александр Волков ивортоз асьме дорын югдур сярысь. Люкаськемъёс кенешозы кылем арын ужамзылы йылпумъянъёс но азьпалан уртче ужан пумысен. Чакламын Правительстволэн кивалтӥсезлэн Николай Ганзалэн докладэз. Со мадёз обороналы ужась предприятиосмылэн шуг-секытъёссы сярысь. Паськыт вераськон луыны кулэ энергетикаын югдур ласянь. Нуназе бере ортчоз пресс-конференция. О. Марков. Пусъемын эшшо одӥг "Единство" 15-тӥ феврале Удмурт Республикаысь Юстицияя министерстволэн юртаз "Единство" калык огазеяськонлэн Удмуртиысь ёзэзлэн кивалтӥсезлы Н.И.Хохловлы сётэмын вал та огазеяськонэз лыдэ басьтэм сярысь свидетельство. Юстицияя министерствоын туннэ нуналлы пусъемын 800 пала пӧртэм организациос, "Единстволэн" Удмуртиысь ёзэз но табере пусъем организациос пӧлы пыртэмын. Свидетельствоез сётӥз юстицияя министр В.С.Осипов. Кызьы шуиз министр, республикаямы "Единство" нимын ик эшшо куинь организациос вань на. Ваньзы соос лыдэ басьтэмын, законъёсты тӥятэк: уставъёссы но, программаоссы но вань. Лыдэ басьтон понна коньдон но тыремын - 20 манет 50 копейка. Таиз тумошо кадь но, со озьы: Юстицияя министерствоын пусйиськон понна вань огазеяськонъёслы огкадь коньдон тыроно. Узыръёслэн-а, начаръёслэн-а со огазеяськонзы - пӧртэмлыкез ӧвӧл. Та учыр эшшо огпол возьматэ на, макем бере кылё куд-ог законъёс асьме улонлэсь. Пӧртэм "Единствоос" пумысен адямиослэн йырзы медаз сураськы шуыса, лэся, Н.И.Хохлов журналистъёслы валэктӥз, ми, пе, Кун Думаысь депутатъёслэн "Единство" фракциеныз ӵош ужаськом. Та "Единстволэн" радъёсаз ас мылкыд каремзыя пырыны быгато кызьы нимаз адямиос, озьы ик пӧртэм огазеяськонъёс но. Со сярысь мылкыдзэ верам ни, кылсярысь, пенсионеръёслэн огазеяськонзы. Матысь дыре Москваын ортчоз "Единстволэн" ӧтчамез. Оло, соку отын одӥг кужыме кариськыны быгатозы Россиысь пӧртэм куо "Единствоос"? Т.Банникова. Россия Федерацилы Президентэ кандидатэ пусъем муртъёслы ивортон Удмурт Республикаысь Быръёнъя комиссия печатла иворъёс вӧлмытӥсь ёзъёслэсь списоксэс, кудъёсыз, "Россия Федерацилы Президент быръён сярысь" Федеральной законлэн 48-тӥ ёзэтысьтыз 4-тӥ люкетэз вылэ чӧлскыса, Удмурт Республикаын Быръёнъя комиссилы ивортӥзы Россия Федерацилы Президентэ кандидатэ пусъем муртъёслы эфирын дыр но печатьын инты висъяны дась луэмзы сярысь. 1. "Новости Ижевска" газет 2. "Прогресс" газет ("Ижнефтемаш " ОАО, Ижевск город) 3. "Нефтяник Удмуртии" газет ("Удмуртнефь" ОАО, Ижевск город) 4. "Алнашский колхозник" газет (Алнаш ёрос) 5. Алнаш ёрос радио 6. "Искра" газет (ОАО "Сарапульский радиозавод-Холдинг", Сарапул город) 7. "Арсенал" телекомпания (Ижевск город) 8. "ТВС" телекомпания (Ижевск город) 9. "Инфо-Панорама" газет (Ижевск город) 10. "Трудовая вахта" газет ("Воткинский завод" ГПО, Воткинск город) 11. "Воткинский завод" ГПО-ысь радио (Воткинск город) 12. "Ижевск школьный" газет (Ижевск город) 13. "Вперед" газет (Балезино ёрос) 14. "Авангард" газет (Вавож ёрос) 15. Вавож ёрос радио 16. "ТВС" информационно-производственной компания (Глазов город) 17. "ТВ Студия" газет (Глазов город) 18. "Круг" радиокомпания-"Европа плюс Ижевск" радиостанция (Ижевск город) 19. "Круг" радиокомпания-"Русское радио" радиостанция (Ижевск город) 20. "Трибуна" газет (Ижевск город) 21. "Можгинские вести" газет (Можга город) 22. "Росийский деловой мир. Коммерчесские вести" газет (Ижевск город) 23. "Воткинские вести" газет (Воткинск город) 24. "Новая жизнь" газет (Кизнер ёрос) 25. Кизнер ёрос радио 26. "ВТВ-плюс" (Воткинск город) 27. "Час Пик" газет (Воткинск город) 28. "Сарапул АВС" газет (Сарапул город) 29. "ВТВ" телекомпания (Воткинск город) 30. "Звезда" газет (Кез ёрос) 31. Кез ёрос радио 32. Можга радио 33. "Новый путь" газет (Дэбес ёрос) 34. Дэбес ёрос радио 35. "Сельская новь" газет (Грахово ёрос) 36. Грахово ёрос радио 37. "Чепецкий механический завод" ОАО-ысь радио (Глазов город) 38. "Все каналы ТВ" газет (Ижевск город) 39. "Субботняя газета" газет (Ижевск город) 40. "Увинская газета" газет (Ува ёрос) 41. Ува ёрос радио 42. "Абажур" газет (Балезино ёрос) 43. "Вега" газет (Воткинск город) 44. "Неделя Удмуртии" газет (Ижевск город) 45. "Удмуртия" гостелерадиокомпания (Ижевск город) 46. "Новое время" телерадиокомпания (Ижевск город) 47. "Работа для вас" газет (Ижевск город) 48. "Антенна" газет (Ижевск город) 49. "Антенна Плюс" газет (Ижевск город) 50. "Авто-Антенна" газет (Ижевск город) 51. "Аргументы и факты" газет (Ижевск город) 52. "Перекресток" газет (Ижевск город 53. "МК в Ижевске" газет (Ижевск город) 54. "Радуга радио-радио "Адам" (Ижевск город) 55. "Новый Регион" телекомпания (Ижевск город) 56. Воткинск радио 57. "Отечество" газет (Сарапул город) 58. "Городские ведомости" журнал (Глазов город) 59. "Мой город" газет (Глазов город) 60. "Семь вечеров. Программа телевидения, радио". газет ( Ижевск город) 61. "Авторадио" радиостанция (Ижевск город) 62. "Глазов-радио" радио (Глазов город) 63. "Иднакар" газет (Глазов город) 64. "Известия Удмуртской Республики" газет (Ижевск город) 65. "Удмуртская правда" газет (Ижевск город) 66. "Удмурт дунне" газет (Ижевск город) 67. "Машиностроитель" газет ("Ижмаш" ОАО, Ижевск город) 68. "АИФ Удмуртии" газет (Ижевск город) 69. "Красное знамя" газет (Глазов город) 70. "Калина Красная" газет (Глазов город) 71. "Ярмарка" газет (Ижевск город) 72. "Ижевск-Экспресс" газет (Ижевск город) 73."Рассвет" газет (Якшур-Бодья ёрос) 74. "Красное Прикамье" газет (Сарапул город) 75. "Наша жизнь" газет ("Сарапульский ЭГЗ" ОАО, Сарапул город) 76. "Знамя" газет" (Сюмси ёрос) 77. Сюмси ёрос радио 78. "Карьера" газет (Ижевск город) 79. Балезино ёрос телерадиовещание 80. Якшур-Бодья ёрос радио 81. "Вестник" газет (Шаркан ёрос) 82. Шаркан ёрос радио 83. "18 регион" газет (Ижевск город) 84."Камская новь" газет (Камбарка ёрос) 85. "ТНТ-Телесеть"-канал "ТПТ" (Москва город) 86. "Долг" газет (Ижевск город) 87. "Воткинская газета" газет (Воткинск город) 88. "Светлый путь" газет (Игра ёрос) 89. "Совершенно секретно" газет (Ижевск город) 90. "Альва" телекомпания (Ижевск город) Удмурт Республикаысь Быръёнъя комиссия. "Скаллэн йӧлыз кыл йылаз" Тазьы шуо калыкын. Тани Вавож ёросын туэ толшоре котькуд скалзылэсь шорлыдын быдэн 8,3 кило йӧл кыскизы, миым сярысь со 200 граммлы уногес. Нош кытын пудо сюдонзы уката умой радъямын, со усе быдэс ведраен но. Кылсярысь, "Колос" эштосын йыл басьто 10,5, Мичурин нимо эштосын - 11 кило. "Удмуртия" эштос республикаын но азьмынӥсьёс пӧлын - 13,5 килограммен йӧл кыско. П.Николаев. "Буртчин дышетскись" Кияса ёросысь Ильдибаево школаын покчи нылпиос пӧлын тодон-валанъёссэс эсккеронъя шудон ортчытӥзы. Арлыдзылы тупась кыӵе гинэ юанъёс ӧз сётъялэ дышетӥсьёссы. Куинетӥ классын дышетскись Арем Иштуганов ваньмызлы шонересь валэктонъёс сётӥз. Соин ик солы "Буртчин дышетскись" дано ним сётӥзы. Умоесь тодон-валанъёссэс возьматӥзы Сережа коробейников, Денис Шикалов но Сергей Сутягин. П.Скобелев. Нош кыз улэп кылиз Выль ар праздник ортчиз ини, нош корка пуктэм кыз улэп кылиз шуид ке, оло кин ке оскоз, оло уз.. Нош со зэм. Кияса ёросысь Михаил Ишпаевич Ишпаев понна. Улэ та песятай Чувашайка гуртын, туж гажа инкуазез. Выльзэ 2000-тӥ арез пумитан понна со пичи кызэз сюен вышкые мерттыса дасям. Нош праздник ортчем бре садаз поттэм. Ваньмы тазьы ке лэсьтысалмы, кӧня кызъёсты утьысалмы меда? П.Кузнецов. Мар сие кема улӥсь? Кияса черко гуртысь Анна Васильевна Бочкаревалы 106 арес ни. Вань улытозяз со ужаз гуртын. Ӧз тодылы жадёнэз-азьтэмъяськонэз. Ас бакчаяз-садаз но юртаз ваньзэ ачиз лэсьтылӥз. Нош мар сие меда кема улӥсь адями? Анна Васильевна пӧра пӧртэм шыдъёс, кельшо солы сылалтэм кубистаен картошка, мукет бакча сиёнъёс но емышъёс. Пересьлэн мылкыдыз умой. П.Николаев Тужгес но шулдыръёсыныз - выль дауре Кызьы малпаськоды, гажано эшъёс, трос-а асьме калыкмылэн сюлэмез бугыртӥсь, мылкыдэз вырӟытӥсь яратоно кырӟанъёсыз? Кӧня соос - ваньзэ люкаса, векчигес гинэ тетраде тэрытымон яке - кирпич зӧкта книгаен поттымон? Нош кызьы, кыӵе амалэн "омыръяно" калык пӧлы вӧлмемъёссэ? Огкылын вераса, кыӵе дунъетъёсъя висъяны луоно шулдыръёссэ но мӧзмытъёссэ, яратонооссэ но кельшисьтэмъёссэ? "Кенеш" журналэз котькуд ар басьтӥсьёс тодо: милемлы берло дыре трос гинэ ужано луиз кырӟанъёсты калык пӧлы вӧлмытон бордын. 1994-тӥ арысен кутскыса, лыдӟисьёс доры вить нимысьтыз номер вуттыны кылдӥз. Нош кызьы сузьйылӥмы ми со кырӟанъёсты? Люкакумы, валамон ни, огзэ таяз, огзэ сояз пыртон пумысен лыдӟисьёсын но одӥг-ог кенешылӥм, крезьгур удысэз умой тодӥсь-валась адямиосын но вераськылӥм. Озьы, огъя малпанэ вуыса, нимаз-нимаз сузьетъёс кылдытъям. Котькудаз сю витьтонлэсь трос кырӟан пыриз. Ушъяськем кадь медаз кылӥськы вылэм, но со ужъёсмы понна пӧртэм удысъёсын тыршисьёслэсь уно гинэ тау карон кылъёссэс кылылӥм. Тӥни со ик милемды уката бугыртӥз. Мукет ласянь чаклано ке, асьмеос выль дауре вамыштӥськом ук. Соин валче журналамы выль сэрег но усьтӥм - "Дауръёс вискын" нимам сое. Ортчем дауре маиз тросгес вал калыкмылэн улоназ - капчиез яке секытэз, шумпотонэз яке куректонэз, кырӟанэз яке бӧрдонэз?.. Вакытмы историе кыле, солы куке-соку рос-прос валэктон шедьтозы на, дыр. Ми но та сэрегамы со пумысен одӥг-ог вераськылонъёс ӝутылом ай. Дауръёс сярысь вераськонэз юнме шорысь ӧм поттэ. Таяз аре быдэстоно малпанмы ӵапак соин герӟаськемын угось. Кылем даурысь тужгес но жингыртӥсьёссэ, шулдыръёссэ, яратонооссэ кырӟанъёсты люкаса, эшшо одӥг сузьет поттоно кариськимы на. Валамон ни, кырӟаны яратӥсь удмурт калыкмы понна таиз кузьыммы котьмалэсь дуно луоз. Удысэз тодӥсь-валась адямиослэн чакламзыя, сыӵе кырӟанъёс кык сю пала люкаськыны кулэ. Та выль ужмес лыдӟисьёс доры вуттыны малпаськом гужем. Дыр вань на бере, котькуддылы тӥледлы - журналэз басьтӥсьёслы но, сое лыдӟисьтэмъёслы но - вазиськиськом таӵе куронэн: кыӵе кырӟанъёсты та выль бичетамы пыртыны ӵектысалды? Калыклэн кылдытэмез-а со, быгатэмезъя ужась композиторлэн гожтэмез-а, зэмос крезьгурчилэн "вордэм" кырӟанэз-а - сюлмысьтыды ик яратӥськоды ке, малы меда соосты одӥг "липет улын" выльысь поттонтэм? Но со кырӟанъёслэсь нимъёссэс вераны тыршелэ вал. Гожтэтады ик ивортэлэ ини, кӧнязэ басьтыны мылкыд карысалды. Дунтэм дунын шедьтэм дуно кузьымды ӵыжы-выжыостылы, дуно адямиостылы, матысь эшъёстылы но кулэ луоз угось. Дас вить манетэн вузаське со. Нош "Кенешлы" гожтӥськем муртъёс ЪЪ даурысь тужгес усто но яратоно удмурт кырӟанъёсынызы бичетэз почта пыр басьтозы, со понна ватсаса дун тыроно уз луэлэ. Коньдонэн юрттыны быгатӥсьёслы но вазиськиськом. Ортчем даурлэн тужгес но шулдыресь кырӟанъёсыныз ӵош историе пырыны мылыд кариськоды ке, жингыртэлэ милемлы 21-57-73 яке 44-43-13 номеро телефонъёсъя. Юрттӥсьёслэсь (спонсоръёслэсь) нимъёссэс номермылэн нырысетӥ бамаз ик вералом. Со телефонъёсъя ик организациослэсь, предприятиослэсь, колхозъёслэсь но совхозъёслэсь, калыкез дышетон, культура удысъёслэсь кивалтӥсьёссэс вазиськыны курысалмы. Кӧнязэ басьтыны мылкыд каремдэс алигес ик вераны мед быгатысалды ни. ХХ даурысь кырӟанъёсын сузьетмы - котькуд семья понна номырин воштонтэм усто кузьым. Озьыен, витиськом гожтэтъёстэс, жингыртэмъёстэс. Петр Сергеев, "Кенеш" журналлэн валтӥсь редакторезлэн воштӥсез. Ёросын но лушкасько Карамзин 18-тӥ даурын ай аслаз "История государства Российского" книгаяз асьме шаер сярысь одӥг кылын гинэ верам: "Лушкасько!" Табере шырмачъёс, Ижевскын но мукет городъёсын сяна, трос пумиськыло ни ёросъёсын но. Тани Пичи Пургаысь куштӥськем корт бичан интые алигес лушкаськисьёс пыраллям. Сейфсэс усьтыны толыксы тырмымтэ, шӧдске, кутӥллям но сьӧразы нуиллям. Нош отын вылэм 4500 манет уксё. Юан кылдэ, ма, кызьы меда сомында уксёзэс кузёоссыз уг возьмало? Сигнализацизы ужам, но милиция вуытозь, лушкаськисьёс тӧлӟиллям ни. Та ёросысь ик Уромын - алигес культурая юртсэс ворсаллям - стереоусилительзэс но магнитофонзэс лобатӥллям. Нош татысь ик "Радуга" ООО-лэсь лавказэ бушатӥсьёс кырсь ужзэс лэсьтыны быгатӥллямтэ. Озьыен, кытын вань возьмаськисьёс, лушкаськисьёслы шулдыръяськыны уг кылды. Быдэс ведраен Пичи Пурга ёросын котькуд скалзылэсь али шорлыдын 6,7 кило йӧл кыско. Со, миым та вакытэ сярысь, 300 граммлы ичигес. Со пумысен сюлэмшугъяськонъёссэ но умойгес ужан сярысь ёрос кенешлэн алигес ортчем сессияз тупен-тупен мадиз гурт ужъёсъя управлениысь валтӥсь зоотехник А. Кузнецов. Котьма ке но, котьку валтӥсь кужым луо азьмынӥсьёс. Ёросын сыӵеос ичи ӧвӧл. Тани "Родина" эштосысь Выль Монья фермаын скалзылы быдэ кыско быдэс ведраен - 9,9 килограммен. Соослэсь ӧжытлы гинэ бере кылё баграшбиграос, ягандокъяос, улынкечолъёс но шорынюриос. Пудо утёнзэс тужгес но ӟечгес радъян сярысь сюлмаськыны кулэ кулайёслы но кечуръёслы, соос, кылем арын сярысь, котькуд скаллэсь быдэн 3-4 килограмм кулэстӥллям йӧл кысконзэс. Ӝыны дунын Дышетскись нылпиосты пӧсь сиёнэн сюдон - со туж кулэ ужпум. Малы ке шуоно, кӧтын буш ке, йыре тодон уг пыры. Тае валаса, Пичи Пурга ёросысь Бобья Уча школалэн директорез С. М. Ивнаова ортчем гужем но сӥзьыл ӟеч радъяз школазылэсь бакчазэ кутонъя. Кубистазы мултэсэз _�но вань, кӧня ке тоннаез вузаны но тырмоз. Йӧлэн эштос юрттэ, нылпиослэн атайёссы чорыг кутылыса но сёто. Вань дышетскисьёс, нырысетӥ классысен дас одӥгетӥ классозь, пӧсь сиён басьто кыкетӥ урок бере. Та школаысь дышетӥсьёс но дышетскисьёс умоен лыдъяло 12 ар дышетсконэз. Эшшо одӥг арзэ ватсаса дышетскизы ке, шуо соос, улонэ одӥг арлы быдгес пырозы, кыӵе ке но ужлы дышыса. Куро вортто бускельёссылэсь Миым мудрон амалэн куазь зорылӥз. Ува ёросысь "Урал" эштослэн бусыосыз кӧс кыльылӥзы, зоро пилемъёс вӧзтӥзы ортчылӥзы, бускель музъемъёсты жаль-жаль коттыса. Зор ичи шедемен ю-няньзы ляб удалтӥз, куроез вакчи кылиз. Соин ик пудо сиён ласянь толзы секыт ортче. Берло дыре эштос 150 тонна куро ворттӥз Вавож ёросысь "Рассвет" эштосысь. Валтӥсь зоотехниксы Т. Климовали мукет интыосысь но пудо сиён басьтыны утча. П. НИКОЛАЕВ. Кин мусогес но визьмогес Шаерамы нырысетӥез "Чеберина" конкурс ортчиз вал 1995-тӥ арын. Сое радъяло но ортчыто культурая, калыкъёсын ужанъя министерствоос, егитъёсын ужанъя кун комитет. "Чеберина-2000" конкурс ортчытӥське егитъёслэсь быгатонлыксэс, тодон-валанзэс яркыт искусство пыр азинтон вылысь. Со удмурт егитъёслы луонлык сётэ возьматыны асьсэлэсь котыр ласянь узыр талантсэс. Республикамылэн пӧртэм сэрегъёсысьтызы егит нылъёс нош ик шумпоттозы аспӧртэмлыкоесь, визьмоесь, чебересь луэменызы. Конкурсэ пыриськыны быгато 17 аресысен 25 аресозь удмурт кылэз тодӥсь нылъёс, ӝуждалазы 165 сантиметрлэсь ичи медаз луы. Республикаысьтымы самой чебересьёсын нылъёс нюръяськозы "Чеберина" ним басьтон пона. Финалэ потэмъёслы жюри пусъёз "Мусокай", "Дыдыкай", "Визьнодӥ" но "Устокай" нимъёсын. Та нимез басьтэм нылъёсты пусъёзы лентаосын, дуно кузьымъёсын, вормисьёслы со сяна сётӥськоз корона. Озьы ик конкурсэ пыриськемъёсты дунъялозы учкисьёс но. Жюрие пырозы культура но искусство, модельёсъя бизнесын, политика удысын тодмо адямиос. "Чеберина-200" конкурс ортчоз 25-тӥ мартэ Ижевскысь "Аксион" культура дворецын, кутскоз 18 часэ. Юалляськыны луоз 78-83-18. З. НИКИТИНА. Фермаосын Кин туннэ азьпалан? (15-тӥ февральлы) Район Скаллы быдэ кыскемын(кг) Вузамын (ц) Скал йыр Вож лыс дасямын (т) Туэ Кылем арын Туэ Кылем арын Туэ Кылем арын 1. Вавож 8,7 8,6 355 329 5227 5119 15 2. Ува 8,5 8,9 560 622 7831 7768 79 3. Можга 8,4 8,5 667 572 9381 9273 546 4. Завьял 8,4 7,9 456 446 7515 7792 2,8 5. Игра 7,9 7,8 254 247 3960 3808 61 6. Воткинск 7,4 8,1 529 395 6240 6533 28 7. Алнаш 7,1 6,8 342 345 6465 6486 188 8. Балезино 7,1 6,4 473 453 8624 8927 141 9. Пичи Пурга 6,7 7,3 387 411 6786 6674 73 10. Глазов 6,2 6,5 373 392 7401 7720 16 11. Грахово 5,9 5,8 148 145 3139 3169 65 12. Дэбес 5,9 6,2 215 229 4723 4746 126 13. Шаркан 5,8 6,3 255 287 6138 6096 42,6 14. Кез 5,4 5,6 244 249 5569 5592 85 15. Як.-Бодья 5,2 6,0 88 95 2410 2319 51 16. Юкаменск 4,7 5,3 172 200 5126 5084 44 17. Сарапул 4,6 4,6 246 241 7649 7161 42 18. Селта 4,5 5,3 118 144 3794 3762 31 19. Кизнер 4,3 5,4 128 166 4089 4137 44 20. Камбарка 4,2 4,7 22 28 721 737 16 21. Каракулино 3,6 4,3 80 99 3617 3500 23 22. Киясово 3,4 4,2 104 124 4564 4730 41 23. Красногорск 3,2 4,1 80 108 3810 3730 36 24. Яр 3,1 4,1 108 107 5144 5292 - 25. Сюмси 2,9 4,4 51 74 1797 1643 15 Республикая 6,2 6,5 6322 6533 131720 131798 1811 Пудо толъён вакытлэн вуэ тужгес но секыт дырыз - фермаосын нуналмысь нуналэ кулэсме турын-куро, силос, жалем сиёнъёс. Зэм, ӟеч кузёлэн со вылез турын ӝужатозь тырме, вылды, но кин тодэ, кӧня кыстӥськоз ай тулыс куазед. Соин ик вань дасямзэ но туж ӝикатыса, эсэпаса сюдоно луэ. Куд-ог хозяйствоос али ик ог-огзылэсь пунэмасько ни. Кылем арын та вакытэн ӵошатыса, республикая йӧл кыскон оглом кулэсмиз. Трослы ик ӧз ке но, вузан вылын со шӧдӥськиз. Но басьяськись тае уз но вала, малы ке шуоно, йӧл дуноямен, магазинысь та продукция уг бырылы. Районъёс пӧлын йӧл кысконъя нырысетӥ интыын мынэ Ваво_�ж. Скаллы быдэ нуналаз татын 8,7 килограмм кыско. Вавожъёсын артэ ик мыно уваос. Огкадь ужало Можга но Завьялово районъёсысь хозяйствоос. Кылем арынлэсь шӧдскымон улӥ лэзькизы Киясово, Красногорск, Сюмси, Кизнер, Якшур- Бодья ёросъёсысь пудо вордӥсьёс. Таин ӵош йӧл кысконзэс будэтӥзы балезиноос, алнашъёс. Пудо йыръя ке учконо, скал уллёлэн лыдыз республикая кулэсмемын 78 йырлы. Районъёс пӧлын та ласянь тужгес но "висъясько" Завьялово, Воткинск, Балезино, Глазов но куд-ог мукетъёсыз. Умоен вераны кулэ вавожъёс, уваос, можгаос, играос сярысь. Соос арысь аре йылэто кысконо скалъёссылэсь лыдзэс, ӝуто пудозылэсь ӟечлыксэ но. Веранэз ӧвӧл, кыӵе пайда ваё скалъёслы витаминэн узыр луись вож сиён - пужым но кыз лыс. Данаказ хозяйствоосын толбыт сое дасяло, нуналлбыдэ пудолы сюдо. Та ласянь тужгес но сюлмо ужало можгаос. Фермаосы соос 500 тонналэсь ятыр нюлэс сиён вуттӥзы ни. Огъя вераса, тыршись кузёлэн пудоез сютэм уз кыльы, тол вылтӥ но ӟеч продукция сётоз. Л. Дмитриева. Котькуд вузлэн ас вакытэз Ижевскысь радиозаводын тыршисьёс экономикаын кылдэм шуг-секытъёсты капчиен вормыны быгатӥзы. Юрттӥз ужан но кивалтон амалъёсты дыраз выль сямен радъян. Татын али ужало Европаысь азьветлӥсь предприятиослэсь адӟем карыса, потто туннэ нуналлы кулэ луись вузъёс. Нош азьланьлы малпанъёссы эшшо бадӟымесь. Акциосын "Ижевский радиозавод" огазеяськонын югдурен тодматскон понна ик татын радъямын вал нимысьтыз кенеш. Лыктэмъёсты предприятиын поттэм вузъёсын тодматӥз солэн воштӥсь директорез Игорь Валиахметов. Правительстволэн Тӧроез Николай Ганза вылӥ дунъяз чугун сюрес вылын шудтэм учыръёсты палэнтонэн, связен, космосэн, медицинаен герӟаськем вузъёсты. Но предприятиез азьланяз но тазьы ик огсыр ужатон понна кулэ луоз кун ласянь коньдонэн юрттэт. Николай Ганза оскытӥз, сыӵе луонлыкъёс шедьтэмын луозы шуыса. Удмурт Республикаысь Правительстволэн пресс-службаез. ТАЗАЛЫК Тазалык ке кулэ, мынэ Хохрякие Асьмеос ӵем дыръя котырмес адӟытэк син сузёнтэмез сьӧры уиськиськом, луонтэмзэ матэктытыны турттӥськом. Тазалыкмы ке ляб, бадӟым городъёсысь врачъёслы йыбырттӥськом, шуныт палъёсысь санаторийёс-курортъёс сярысь малпаськиськом. Нош со дыре ик дунтэм дунын ас дорамы эмъяськыны луонлыкъёс сярысь ум тодылӥське. Со понна мон ялан асме но тышкаськисько. Арлыдоослэн аренызы валче кылем ар пумын Завьялово администрация кызь кык муртлы Хохряки посёлокысь "Завьяловский" профилакторие путёвка кузьмаз. Арлыдоослэн мылкыд пинал дыръя кадь ӧвӧл ни бере, мылпотытэкгес мынӥзы вал. Но отын эмъяськыса, выльысь олокӧня арлы пиналмизы кадь - мынэмысьтызы асьсэос шумпотӥзы. висёнъёссэс воксё вунэтӥзы. Эсьма, "лобаны" кутскизы - егитъёслэсь усто экто-тэтчало. Ма, сыӵе врачъёсын вунэтод но. Татын соос туж сюлмоесь уго - ас ужзэс ӟеч валало, олокызьы но эмъяны тыршо. Тани Альбина Константиновна Корепанова калык амалъёсын эмъя. Со сяна, профилакторийын вань марӟан ванна. Шарколэн дуннеез, пурысь дэриен, электроен эмъян, пинь эмъян, процедураос лэсьтон кабинет, массаж. Мылкыд карисьёс физкультураен выро, диетаез чакласа, мугорзэс чылкытато. Та амалъёс юртто, лулсэр системаез, кӧтпуш, йыр висёнъёсты бурмытыны. "Профилакторие" тросгес лыкто гуртын улӥсьёс. Ваньмыз сямен остехондрозэн, радикулитэн курадӟо. - Ми дорын эмъяськыса, соос выльысь вордским кадь, шуо, - вера "Завьяловский" профилакторийлэн валтӥсь врачез Надежда Черникова. - Со сяна, азьланяз но тазалыксэс чакласа возён вылысь, пӧртэм лекциос лыдӟиськом. Тани гуртын турын-куар пӧлын уло, нош соин шонер эмъяськыны уг валало. Туэ профилакторийлы 15 ар тырмиз. Та дыр ӵоже отын 10 сюрслэсь уно адями тазалыксэ юнматӥз ни. Азьвыл отын "Завьяловский" теплица комбинатын ужасьёс гинэ эмъяськылӥзы (профилакторий та предприятилэн вал уго), нош али, хозрасчёт амалэ выжыса, профилакторий ачиз путёвкаос вуза. Дунъёсыз, мукет санаторийёсын ӵошатыса, трослы дунтэмгес: 12 нуналлы - 1300 манет, 21 нуналлы - 2100 манет. Профилакторийын огвакытэ 25 адями эмъяськыны быгатэ. Троссэ ысто ёросъёсысь администрациос, колхозъёс, калыкез улон-вылонын утён ёзъёс. Мынам соослы нимысьтыз вазиськеме потэ: Шедьтэ луонлык калыктылы ӟеч уж лэсьтыны. Сыӵе кузьымды асьтэлы ик трос полэс берыктӥськоз - таза мурт ужаны но чырмыт, пунэмзэ но берыктыны шырыт. Тани лыдӟе ай татын эмъяськемъёслэсь верамзэс. А. Агафонов: - Мон улытозям олокыӵе но санаторийёсын эмъяськи, но таӵе шуныт коллективез адӟеме ӧвӧл на. Татчы бодыен лыктӥ вал, табере тани эктыса ветлӥсько ни. В. Савельева: - Кыдёке ветлытэк, таӵе ӟеч эмъясьскыны луэ шуыса ӧй тодылы. Туж бадӟым тау путёвка сётӥсьёслы но, эмъясьёслы но. З. Кузнецова: - 12 нунал шӧдытэк ортчиз. Оло, рае сюрылӥ кадь. Туж ческыт сюдӥзы. Мугорме гинэ ӧвӧл, сюлэмме но бурмытӥзы - сыӵе каньыл, сюлмо ужасьёс вылэм татын. М. ИШМАТОВА. Завьялово село. Путёвкаос пумысен профилакторие вазиськоно таӵе телефонъя - 21-08-17. Иземысь сайкатоз шаерчи Выльдӥське телевидение, выльдӥсько удмурт телепередачаос но. "Шаер" программаез дасясьёс но ужазы выль амалъёс пыӵато. Меӵак телефон пыр юалляськон ортчытыкузы 10 минут куспын гинэ 50-лэсь ятыр адями жингыртыны быгатэ. Иворъёсын "Шаер" передача телевизор учкисьёсын арняяз вить пол ӟечъяське 19 час 30 минутэ. Учкисьёс но мылкыдзэс вераны амалъясько, гожтэтъёс пыр ик, шуом. Тодмато кӧня ке чуръёсын (соосты мыным сипыртӥз маскаръяськыны быгатӥсь Федор Миннигараев, - но оскытӥз - алдаськонэз отын ӧвӧл): "Кылем арня вискын возьматӥды эмъясьёслэсь кенешсэс. Отын экранлэн бур пал сэрегаз берынгес адӟиськиз тӧдьы гын сапег. Со мынам пыды вал. Тау возьматэмды понна". Таиз Татьяна Денисовалы, пе, гожтэмын: "Гожтэтме басьтӥды ке, экранысен киыныды шоналэ вал..." Нош Алексей Ложкин, удмурт кун национальной театрысь актёр но "Шаер" передачаез нуись, пинал нылъёслэн бӧрдонзы - синвуаськыса гожтэтъёс ысъяло солы. Ма, удмурт нылъёс гинэ уг синмасько Ложкинлы. Ижевскын улӥсь лыдӟисьёсмы пӧлын ноябре ортчытӥмы лотереяен шудон. Газетмылы гожтӥськон нуыны ветлӥзы Ижевскысь почта ёзын ужась ӟуч эшъёсмы. Алексей Ложкинлэн кырӟамезлы синмаськыса, "Шаер" передачаез ик учкыны мылкыд каризы. Иворъёсын удмурт программаосты дасян бордын туннэ дас одӥг мурт тырше. Кивалтэ "Шаер" передачаен Светлана Семеркина. Ӵош ужась эшъёсыз сярысь со шуныт кылъёсын вазиське: - Котькудӥзлэн аслаз стилез, почеркез. Тани Евгений Михайлов парламентэз возьматон бордын ужа, гурт ужпумъёс но солы матын. Василий Богдановен Эдик Степанов - выпускающийёс, передачаез дасян бордын тросгес ужало, арняен-арняен вошъяськыса. Мария Евсеева тунсыко адямиосты шедьтыны быгатэ, культура удысэз, школа улонэз возьматъя. Светлана Касаткиналэн сюлмыз кыстӥське лулчеберлык борды, покчи нылпиос котыре. Экономика удысэз Федор Миннигараев но Алексей Слесарев возьмато. Вераны кулэ, Удмурт кун университетысь филологияя факульетытэз йылпумъямзы бере, соос кыксы но та университетын ик экономической образование басьто. Внештатной корреспондентмы Алексей Серебернников филфакын но дышетске, экономической образование но басьтэ. Внештатной корреспондент луыса, кык арзэ ужа ни Мая Бывальцева. Пӧрме ужамез, туннэ ик штатэ кутыны луысал ни. Кадръёс дасян сярысь сюлмаськытэк уг луы, та ужез весяк бергатыса возёно. "Шаер" программаез дасясьёс ик "Элькун иворъёсын" пото 34-тӥ каналэ но ӵукна эфире 10-тӥ каналын. Таосаз диктор интыын Алексей Слесарев но Светлана Касаткина. Стветлана Семеркиналэн верамезъя, шаерчиос многостаночнкъёс выллем. Передачаез ке нуоно ӧвӧл, сюжетъёс дасяло. Шуом, эфире потэ ке Алексей Ложкин, Татьяна Денисова программалы "сиён" утча. Кионэз пыдъёсыз сюдо, шуо, озьы ик тележурналистъёс но кӧттыр утчаса бызьылоно луо. Сокем-сокем ужамысьтызы ик, лэся, "Шаер" передачазылэсь дас ар тырмонзэ но синйылтытэк кельтӥзы. 2-тӥ январе тани дас одӥг ар тырмиз ни иворъёсты та нимын калык доры вуттэмзы дырысен. Та нуналлы сӥзьыса, матысь дыре праздник нерге ортчытыны чаклало. Нош одӥгаз передачаын учкисьёс пӧлын нимысьтыз юалляськон ортчытӥзы - шаерчиос пӧлысь кинэ соос вылӥгес пукто. Тросгес дунъет басьтӥз Татьяна Денисова. Ижевскысь сяна, жингыртӥсьёс вал Можгаысь, Алнашысь, Завьялысь, Киясаысь, Воткаысь но Кизнерысь. Бадӟым арлыдоезлы учкисьлы 84 арес, нош пичиезлы - 12 арес. Ивор дасясьёс азьланяз но чаклало учкисьёс пӧлын пӧртэм юан-веранъёс ортчытъяны. Нош али кылзом вормисьлэсь Татьяна Денисовалэсь мылкыдзэ: - Тып-тып материалъёс луо ке, вань ке мар вераны, учкисьёс азе шумпотыса потӥсько. Драмтеатрысь кошкемме уг жаляськы, но куд-ог спектакльёсын шудысал ик. Телевидение мыным асме яркыт усьтыны луонлык кылдытӥз. Аслыд оскон кулэ, соку адями котькытын но чебер луоз. Кызьы азьло дышето вал: нырысь ик яраты Родинаез. Туннэ нуналэ учкон мукет: асме ке ӧй яраты, мон мукетсэ но гажаны уг быгаты. Ас азям сыӵе куронъёс пуктэме ик юрттэ учкисьёс доры потыны. Юрттэ на актере дышетскеме, но иворъёсъя передачаез нуыку, мултэссэ шудыны уг яра. Калык соку ик шӧдоз сое. Нош иворлэсь пуштроссэ шӧдыны кулэ, соя ик интонациез вошъяно. Учкисьёс синйылтӥллям Евгений Михайловез но. Таиз ини телевидениын 1983-тӥ арысен ужа, солы сётэмын "Республикаысьтымы дано журналист" ним. Бен, азьло аръёсты туала вакытэн уд ӵошаты - техникалэн луонлыкъёсыз паськыт сюрес усьтӥзы тележурналистъёс азе. - Табере ӧвӧл ни выроно фотографиос утчаса, слайдъёсын сюжетъёс дасяса. Туннэ ветлӥд ужрадэ, туннэ ик мадь со сярысь учкисьёслы, - азьлозэ тодаз вае Евгений Николаевич. - Телекамералэсь уг кышкало-а адямиос? Кызьы вераськытыны быгатӥськоды гуртоосты? - юасько солэсь. Тодаз ваиз одӥг учырез. - Одӥг пол, фермаысь дояркаосты куинь час курадӟытӥ. Котькызьы но сюлворисько вераськыны курыса, уг дӥсьто, бигеръёс но ӟучъёс асьсэос камера улэ пырысалзы ни. Шуисько, ӟыгыртыны курысал ке, кемалась сётскысалды ни. Гурак серектӥзы, кышканзы но ортчиз. Тӥни озьы, асьмеды экранэ поттон понна, олокызьы но амалъяськоно луэ шаерчиослы, эсьмаса, ӟучъёссэ но удмурт сямен вераськыто. Камерунысь негр но Выль аре шаерысьтымы улӥсьёсты асьме кылын ӟечкылаз. Нош азьланяз эшшо но тросгес удмуртъёс чагыр экранысен учкозы шорамы. "Удмуртия" кун телерадиокомпанилы Москва тросгес дыр висъяны чакла. 34-тӥ канал но кузьгес луоз. Луонлык кылдӥз иворъёсъя передачаосын вазь ӵукна потыны - 6 час 30 минутысен 7 час 30 минутозь. Шаерчиослы 15 минут дыр сётыны чакламын. Но кызьы соос асьсэос шуо, быгатонлыкъёсмы но луонлыкъёсмы вань, пе, 20 минутсэ но вормыны. - Удмуртъёс табере пинёесь луэмын, - шуэ Светлана Денисовна, ас кылмес вераны быгатом. Озьы ик медло, чагыр экранысь асьме шоры котькуд нунал мед пальышалозы телевидениын ужась эшъёсмы, коркаосамы ӟеч иворъёсынгинэ мед пырозы. Л.Малых. Светлана Семеркина: "Мар бордысен кутском ай ужмес?" Татьяна Денисова эфире потыны дасяське. Шаерчиослэн Алексей Слесаревлэн, Федор Миннигараевлэн, Алексей Серебренниковлэн, Светлана Касаткиналэн мылкыд каньыл - ужзы пӧрме кадь. Режиссёр Надежда Корнилова "Шаер" программаез дася. Туспуктэмъёсыз В.Беломорскихлэн. Крезьзэс вузазы Галина Мурашовлэсь Роман пиезлэн крезен шудэмез улсын кырӟамзэ мон нырысьсэ адӟи К. Гердлэн вордскемез дырысен 100 ар тырмонлы сӥзем нуналъёсы. Сцена вылын кырӟасьёс пӧлысь мыным соос тужгес но яразы. Ӟечгес тодматскеме потӥз. Галина Афанасьевна тодэ вылэм, К. Герд крезен шудыса кырӟаны яратэ вал шуыса. Кунгуров усточилэсь со дышетскись пиезлы крезь басьтэм но ӵош калык кырӟанъёсты дышетӥллям. Берло но Галина Мурашоваез пиеныз сцена вылысь ӵемысь адӟылоно луылӥз на. Калык соосты шуныт пумиталляз. Ачиз но Галина Мурашова пиез сямен ик крезьгуръя училищеез йылпумъям. Со бере тани кызь сизьым арзэ ини радио хорын кырӟа. Солэсь шулдыр куаразэ ӵемысь кылоно луэ. Галина Афанасьевна тужгес но яратэ калык кырӟанъёсты. Нош берло вакытэ ачиз но гур пӧрмытъяны кутскиз. Н. Белоноговлэн, Т. Черновалэн, Г. Романовалэн кылъёссыя ог дасо кырӟанъёсыз вань ни, кыксэ Валентина Пудова но кырӟа. Азьланяз пиды крезьгур удысын ик ужаны малпа-а шуыса юамелы Галина Мурашова чутрак шуэ: - Уг. Ачим уг лэзиськы. Али культура удысын ужасьёсты чик уг дунъяло ни. Ачимъя сое шӧдӥсько. Собере крезьгурчилы туэ уж но шедьтыны туж шуг луиз. Училищеез йылпумъямъёс пӧртэм учреждениосы йыгасько, дорамы радиое но вуыло - нокытчы уг куто. Нош басьтэм крезьмес вузамы - коньдон кулэ луиз. Туспуктэмез но гожтэмез Владимир Беломорскихлэн. Вузъёс умой кошко Ижевскысь механической заводлэн 28-тӥ цехез арысь аре калыклы кулэ луись выль но выль вузъёс поттэ. Басьяськисьёс кемалась тодо ни фасовать карон автоматъёсты. Кылсярысь, "Уралкалий" акционер огазеяськон быдэсак ужа ни Ижевскын поттэм машинаосын. Нош азьло аръёсы отын сыло вал Германиысь "Графверке" фирмалэн автоматъёсыз. Кылем арын 71-тӥ цехен огазеяськыса, ӵош лэсьтэмын сиён-юонъёсты, сылалэз, удобрениез ӝоктон-калтон автоматъёс. Цех ӟеч кусыпъёс возе "Сургутнефть", "Пермьгеофизика", "Пургенефтеотдача" акционер огазеяськонъёсын но озьы ик ижъёс вуззэс келяло Челябинске, Курганэ, Чебоксарые. Оскон вань, завод туэ но уно вуззэ палэнэ келяны быгатоз шуыса. Н.Никтин. Мар мон понна "Шаер"? Василий Богданов: - Удмурт журналистикае мон сюрес лёги Удмурт телевиденысь "Шаер" передача пыр. Татын дасо аръёс ӵоже ужасько ни, мукет удысэ выжеме чик но уг поты. Евгений Михайлов: - "Шаер" мынам аслам вордэм нуные кадь. Со но, озьы ик быдэс телевидение мынам вань улонэ. Надежда Корнилова: - "Шаер" - со мынам ошмесо шаере. Эдуард Степанов: - "Шаер" котьку но улонлэн ӧраз берга. Со яратоно уже, яратоно эшъёсы, тунсыко улон. Федор Миннигараев: - Шаер - со ошмесо Удмуртия. Милям "Шаермы" но котькуд корреспондентлэн творчествояз - пӧзись ошмес. Сыӵе пичи ошмесъёслэсь ик пӧрме жадёнэз валасьтэм, чик дугдылытэк бызись шур. Со шурлэн нимыз - "Шаер". Алексей Слесарев: - Котькуд нунал шаерамы луэм иворъёсты удмурт кылын вуттӥсь адӟытон. Алексей Серебренников: - Вакчи улон ӵожам колхозын но, школаын но ужай. Нош "Шаерын" мон уг ужаськы, "Шаерын" мон улӥсько. Угось отын котькуд нунал ваньмыз выль, пӧртэм адямиосын пумиськылӥсько, чебер нылъёсын тодматскисько. Мая Бывальцева: - Котькуд нунал выль мылкыдын пычылмем улон. ШӦКЫЧ "Мынам телевизоре" Ж-ж-ж! Акыльтӥз ни огпӧртэм кырӟанэз золъяны, лобало ай Алнаше, соос котьку данъяськылӥзы кырӟась-верасьёсынызы, гожъясьёсынызы монэ но, оло, малы ке дышетозы. Но ... мар та таӵе? Культура юртсы куашканы ӧдъям. Нырысь ик ланьыраз, пе, культура юртысь заллэн вӧлдэтэз, солэсь адӟем кариллям репетициос ортчытъян кабинетъёсысь вӧлдэтъёс. Кутскизы ни вал Алнашын искусствоосъя центр ӝутыны. Коньдон ӧвӧлэн со "долгостройлы" пӧрмиз. Табере ёрос центрын кино но уг возьмато ни, концерт- спектакльёс но шергес луыло. Оло, кин ке "зӧк" кисыё адямиос юрттэт сётозы? Алнашъёс витё, мынам но соосын ӵош кырӟаме потэ. "Шӧкычез" келяса ветлӥзы Н. Лялин но В. Беломорских. Улон-вылонэз дышеты Та нуналъёсы Удмурт Республикаысь Праивтельство ёросъёсысь но городъёсысь администрациослэн кивалтӥсьёссылэн улон-вылон удысъя воштӥськонъёсынызы дышетскон ортчытэ. Лыктэмъёс азьын верасько министерствоосын но ведомствоосын ужасьёс, тодосчиос, пӧртэм специалистъёс. Дышетскыны лыктэмъёс доры вуылӥзы ни Россия Федерациысь Кун Думалэн депутатэз Светлана Смирнова, Удмурт Республикаысь Кун Кенешлэн тӧроезлэн воштӥсез Наталья Харина бадӟым пумиськон ортчытӥз шаерысьтымы Калыкез дышетонъя министерствоын. Быдӟым Вормонлы витьтон вить ар тырмонлы сӥзем концертлы тужгес устоезлы сценарийлы конкурс сярысь дӥньет (положение). Туэ, 9-тӥ Мае, вань азьмынӥсь адямиос пусъёзы Быдӟым Вормонлы витьтон вить ар тырмонэз. Удмурт Элькун Кивалтэтлэн "Быдӟым Вормонлы витьтон вить ар тырмонэн герӟаськем ужрадъёсты дасян но ортчытон сярысь" 753 номеро постановлениезъя Ижын радъяськоз сӥё-дано ужрад. Удмурт Элькунысь Культурая министерство ялэ та концертлы тужгес устоезлы сценарийлы конкурс. Солэн куронъёсыз таӵеесь: 1. Сценарийлэн инъетэз мед луоз Удмурт шаерысь ужаса улӥсьёслэсь Быдӟым Вормонэз дуремзэс, Анай музъеммылэсь данзэ, егитъёслэсь ас шаерзэс сюлмысь яратӥсь мылкыдзэс чеберлыко амалъёсын возьматон. 2. Сценарий мед тупалоз драма амалэн гожтэм ужлэн куронъёсызлы. 3. Конкурсэ пырисько вань мылкыд карисьёс. 4. Тужгес устоез сценарий дэмламын луоз концертэ пыртыны. Мукетъёсыз уже кутӥськозы, шаерысьтымы городъёсын но ёросъёсын пӧртэм ужрадъёс ортчыку. Конкурсэ вуэм ужъёсты дунъялозы тодмо писательёс, драматуръёс, режиссёръёс. Сценарийёсты вуттоно туэ 15-тӥ мартозь таӵе адресъя: Ижевск, Максим Горький ульча, 73. Тел.: 78-46-00. Утиське компьютерлэсь Анай-атайёс тыршо нылпиоссэс котыр ласянь етӥз, визьмо будэтыны. Со туж умой, номыр уд шуы. Но пинал, школаын дышетскемез сяна, дораз кема телевизор учке на, компьютерен шудэ. Синъёсыз жадьыса, ляб адӟыны, йырыз висьыны кутске. Туала арын компьютерен ужанлэсь уд алы ни, соку ма кароно синъёсты утён понна? Курадӟо уго тросэз мӧйыос но. Синъёсты утён амалъёс ӧжыт ӧвӧл кадь, но тросэзлэн пайдазы уг шӧдӥськы. Кылем арын кылдытэмын вал паймымон очкиос. Соос, синэз компьютерлэсь, телевизорлэсь утем сяна, адӟонэз умоято, лэчытгес каро. "Зеница" очки чакламын компьютерен ужасьёслы. А. Лялин, вылӥ категориен врач. Удмурт Республикаысь Кун Кенеш, Правительство, Сюмси ёрос администрация но депутатъёслэн Кенешсы кайгыро Социалистической Ужысь Герой БРАГИН Федор Федосеевич улонысь кошкемен валче но ӵыжы-выжыосызлы но матысь адямиосызлы мур куректэмзэс верало. Брагин Федор Федосеевич 15-тӥ феврале 2000-тӥ арын улонысь кошкиз Социалистической Ужысь Герой Федор Федосеевич Брагин. Ф. Ф. Брагин вордскиз 1925-тӥ арын Сюмси ёросысь Гуртлуд гуртын. 1939-тӥ арысен 1942-тӥ арозь ужаз "Прогресс" колхозын 1943-тӥ арын армие басьтӥзы. 1948-тӥ арысен пенсие потытозяз ужаз Сюрек леспромхозын, машинаен нюлэс ворттӥз. 1971-тӥ арын май толэзь ужын вылӥ азинсконъёсыз понна Федор Федосеевич Брагинлы сётэмын Социалистической Ужысь Герой ним. Федор Федосеевич Брагинлэсь сайкыт тусбуйзэ весяк возём сюлэмъёсамы. Эшъёсыз. Тазалык Зӧк мурт курадӟе, чиедэз - вожъяське Али нуналлы быдэ телевизор пыр возьмато, журналъёсын гожъяло зӧк адямиосты, соослы кызьы чиедомыны ӵектонъёс сёто. Нош малы пал кыл но уг поттыло чиед муртъёс сярысь. Мынам, кылсярысь, ӧжыт тупатскеме потэ. Врачлы озьы верай но, серекъяз гинэ. Оло, тӥ валэктоды? Алевтина Р. 46 арес Ижевск. Та юанъя валэктонъёс сётэ врач Наталья Меркушева: - Нырысь ик тодыны кулэ, малы тӥ чиед: выжыдыя яке висемысьтыды. Оло, ӵем висьылӥськоды, чаль жадиськоды яке, чиед ке но, чырткем бызьылӥськоды. Выжыдыя сыӵе чиед ке, (мугорды векчи ке но, туж шаплы, ужаны етӥз, ӟеч сиськыса но огвыллем улӥськоды), тӥ ноку но уд куае, дыр. Эн возьдаське сыӵе луэмысьтыды - учке ай макем курадӟо зӧк муртъёс. Нош тӥ пинал муртъёс кадь бызьылӥськоды, котькытчы вутскиськоды - со урод шат? Со сяна, медикъёслэн чакламзыя, чиед муртъёс кемагес уло. Тӥ чиед, но висьылӥсь, кынмись, пичи вирзӥбетэн курадӟись адями, вылаз ик, урод сиськиськоды (сием уг поты одно ке), врачлы вазиськоно. Таӵе учыре тӥ кыӵе ке висёнэн йырин чиедомиськоды. Нош эскеронъёс висёндэс ӧз шараялэ ке, соку чиедамдылэн мугез мукет. - Сиемды потыса но, тырмыт сиськемды уг луы - урод ужало кӧтпуш ёзъёсты, соин ик сиёнды иназ уг мыны. Урод сиськиськоды. Асьтэлы ческыт сиськиськом кадь потэ ке но, сиёнады маиз ке но уг тырмы (кӧй муртъёс сакыр, сӥль-вӧй сиемлэсь возисько ке, тӥледлы со туж кулэ). Соин ик, мугордылы кулэ улись калорийёс тырмымтэен, со ассэ сюпсьыны кутске. Сиемды уг поты. Куд-огез солы шумпото, но чиед муртлы со кышкыт. Уж вискын пичи гусъяськиськоды, ӝӧк сьӧрын пукыны дырды ӧвӧл яке сиён уг кельшы, озьы-а? Собере со сямлы пӧрме, сием потондэс чаен, чыры-пыры сиёнэн быдтӥськоды. Ӵемысь чиедомо паласькись секыт висёнэн висемъёс, операциез ортчемъёс. Ӟеч сиськыса но дыр ортчемъя, сыӵе муртъёс тупатско. Адямиез туж "сие" куректон-кайгу, ужын керетонъёс, семьяын тупамтэос, кыӵе ке мукет сюлмаськонъёс. Таиз муг техникаен герӟаськемын бере, нырысь ик буйгатскыны, лулсэръёстэс эмъяны кулэ. Та мугъёс пӧлысь асьтэлы тупамонозэ ӧд шедьтэ ке, утчалэ на эндокринологлы вазиськыса. Куддыр ньылон дор безлэн (щитовидной железалэн) урод ужамез сӧре мыгорысь веществоослэсь огсыр вошъяськемзэс, соин ик адями чиедоме. Тӥ кема аръёс ӵоже чиед ке вал, шуак ӟеч-ӟеч сиськыны кутскыса но озьы гинэ уд тупатске. Соин ик висёнъёслэсь эмъяськыны кулэ. Юоно сием поттӥсь эмъюмъёс, витаминъёс, чорыг вӧй (со юрттэ лулсэръёслы но). Чиедомонэз эмъяны капчи ӧвӧл, солы трос дыр кулэ, но врачлэсь вань ӵектонъёссэ шонер быдэсъяды ке, малпанды быдэсмоз. Сием потонэз ӝутыны юртто кузял турын-куаръёс. Асьме палан будӥсьёсыз пӧлысь тупалозы горечавка, чабрец, мята, зангари сяська (василёк), 15-20 грамм пыргытэм турын-куарез 1 литр быректэм вуэн парыса возе. (Загари туж кузял бере, 5-10 грамм тырмоз.) Юоно сиськемлэсь азьло, со бере но. Тросаз учыръёсы адями чиедме, мугораз витаминъёс тырмымтэен. Соин ик тырше соосты тросгес сиыны. А витаминэн узыр скаллэн но парсьлэн мусэз. В витаминэн - пудо-животлэн пуштросэз, сӥль, кӧжы, ю тысь, маял. С витамин вань кубистаын, сьӧд сутэрын, лимонын, кӧжыын, борыын, помидорын, редисын, баклажанын, картофкаын, сугонын, мандаринын, апельсинын... Кызьы сиськоно чиед муртлы? Валамон, трос но ческыт. Но мус, сэп висёнэн курадӟись муртъёс кӧё-вӧё сиськыны уг быгато (соослы возиськоно курег пуз, колбаса, укыр вӧё шыд, шоколад сиемлэсь). Соин ик сие тросгес выль йӧлвыл, нӧкы. Нош кӧтпуш висёнъёсын курадӟисьтэм чиед муртъёслы, зэмзэ но, вожъяськод. Соос кышкатэк сиыны быгатозы макаронэн сосиска, пыжем ӟазег, ӵынатэм кӧй, пушмульы, шоколад, торт, чечы, нап йӧл. Сиемзы потӥсьтэм адямиосын секытгес. Нуназеян вакытэ сок юэ - со юрттоз сием потонэз ӝутыны. Ӵукна сайкамды бере ик сакыр сюпсе, чечы сие. Нунал ӵоже 1 банка напчытэм йӧл юэ. Котькуд сиськемды бере кӧня ке кӧлыны дыр шедьтэ. Чиед муртъёслы тросгес шутэтскыны кулэ. Нош милям ӵектонъёсмы тупатскыны чик но ӧз юрттэ ке, шедьтэ луонлык санаторийын эмъяськыны. Отын, гурт котырысьтыды сюлмаськонъёстэс вунэтыса, ческыт сиськыса, эмъяськыса тӥ шӧдскымон тупатскыны быгатоды. Таза луэ! Юалэ - валэктом Поттозы-а группае? - 1986-тӥ арын уж дурысен циркулярка улэ лэзьыны шедьтӥ бур пал киысьтым кык чиньыме - кыкетӥзэ но куинетӥзэ. Кызьы кылӥ, сыӵе учыре шедем муртъёслы куинетӥ группа сёто. Нош монэ шузи улэ кельтӥзы, тон, пе, пинал ай, со пенсиен гинэ уд улы, ужаны кулэ пиналъёстэ сюдон понна. Нош куинетӥ группаысь инвалидъёс ужало ук. Алигес сыӵе ик учыр луиз мукет воргоронэн, солы куинетӥ группа сётӥзы. Мыным но группа уз сётэ-а, бер ӧвӧл-а та пумысен вазиськыны? Кыӵе документъёс кулэ? В. Максимов. Воткинск ёрос. Юанлы валэктон курыса, ми вазиським Калыкез улон-вылонын утёнъя министерствоысь валтӥсь специалистлы Н. Н. Макотченколы. Кызьы со вераз, тӥледлы вазиськыны кулэ Воткинск ёрос больницаысь клинико-экспертной ужъёсын вырись врачлы. Медико- социальной экспертизаез ортчон понна со ик эскероз документъёстэс дасян ужпумез. Котькуд ёрос больницаын вань нимысьтыз график, ку ортчыны луоз эксперт комиссиез. Тӥледлы ӝегатскытэк вазиськыны кулэ ёрос больницае, отын ик ваньзэ валэктозы? Лыдӟисьёслы верам потэ, тазалыктыя кыӵе ке шугъяськонъёсты вань ке, кинлэсь ке косэм-ыстэмзэ эн возьмалэ. Асьтэос ке ӧд сюлмаське, тӥ понна кин ке мукетыз уз бызьылы. Поръялозы поръёс Пор калык понна таиз ар бадӟым инты басьтоз. Туэ соослэн Вятка но Кам улосъёсы улыны вуэмзы дырысен 400 ар тырме. Удмуртиысь котькудӥз куинетӥез пор Каракулино ёросын улэ. Соин ик та палан уно ужрадъёс ортчытыны чакламын. Писательлэн но тодосчилэн Илья Ломберскийлэн (Токмурзин) вордскем гуртаз, Ныргындаын бюст усьтозы. Озьы ик поръёслэн улон иинтыосазы вуозы туристъёс. Куное лыктозы Грахово, Алнаш ёросъёсысь, Сарапулысь адямиос. Ваньмыз со ортчоз ай июне. Нош 5-тӥ-6-тӥ апреле радъямын луоз республикаысьтымы мари кыллы дышетӥсьёслэн семинарзы. Соку ик пор кырӟанъёслы сӥзем фестиваль но луоз. Каракулино ёросысь артистъёслы али нимысьтыз костюмъёс вуро. Б. Никитин. Ӟечкылан Игра ёросысь Порвай гуртын улӥсь анаймылы Валентина Николаевна Даниловалы 18-тӥ тулыспалэ тырме 67 арес. Сюлмысьтымы ӟечкыласьком, яратоно анаймы, та сӥё-дано нуналэныд! Сӥзиськом юн тазалык но шудбур, кема аръёс ӵоже умой мылкыд! Нылпиосыд. 426039, г.Ижевск, Воткинское шоссе, 10-й км, тел. 24-56-67, 24-55-58 ИНН 1834300211, р/с 40603810300000010020 ФКБ "Газпромбанк", к/с 30101810300000000853, БИК 049401853, ОКПО 13051252, ОКОНХ 87100. Сюлэмын кӧкыям млпан - Выльысен егит дырдэс берыктоно луысал ке, кыӵе удысэз али бырйысалды? - юасько Маргарита Владимировна Федоровалэсь. - Пичи дыръям ик дышетӥсь луыны малпай. Тужгес но химия урокъёс бордазы кыскылӥзы. Анаелэн слюдалэсь лэсьтэм горд весез вал. Мон сое огнам дыръям одӥген-кыкен сутӥсько - коркан ӵын лӧсъяське, сыӵе ческыт потэ вал слюда ӝуамлэн зыныз. Школаямы со вакытэ химиен, биологиен выль дышетӥсь К.Д.Анисимова лыктӥз. Пӧртэм опытъёс урокъёсамы возьматъялляз. Мон солэсь адӟем карылӥ, ялан школаен шудылӥ. Кӧня меда дневникъёс быдтӥ со шудонъёсам? Уно аръёс ӵоже утиз аслэсьтыз пичи дыр малпанзэ Маргарита Владимировна. Удмурт пединститутлэн филология факультетаз дышетскыса, 1971-тӥ арысен со пиналъёсты удмурт кыллы но литературалы дышетэ. Егит, чупрес дышетӥсез котьку но адӟыны луэ вал Булай школаысь пиналъёсын ӵош ёросын, Иж карын ортчылӥсь олимпиадаосын, ужрадъёсын. Аслэсьтыз 50 арессэ пусйыса но со мылысь-кыдысь тырше ас удысаз. Пиналъёсты дышетонэ кутэ дышетӥсьёсызлэсь ужан амалъёссэс, институтын басьтэм тодон-валанъёссэ. Али но тодаз вае на школаын дышетскыкуз шаерез тодонъя кружоке ветлэмъёссэ. Историен дышетӥсьсы К.Н.Лыткин пиналъёсын экспедициосы поталляз, пересьёсын пумиськылӥзы. Вань кылэм-адӟемъёссэс пиналъёс ӝикытак гинэ альбоме гожъяллязы. Кузьма Николаевичезлэн ужан амалъёсыз али но юртто шаерез тодонъя урокъёс нуыны. Син азязы яркытгес пуктон вылысь, Маргарита Владимировна дышетскисьёсты Можга, Иж, Вотка но мукет городъёсынымы, улосъёсынымы тодматэ, удмурт кырӟанъёслэн аспӧртэмлыкъёссыя нимысьтыз урокъёс ортчытъя. Солы юртто удмурт кылын потӥсь вань газет-журналъёсмы, удмуртъёс сярысь гожтэм азьвылъёсыз но выль потӥсь книгаос. Уно аръёс ӵоже люкам книгаос бадӟым но тунсыко билиотекалы пӧрмемын ини. - Ачим мон тросгес гужем лыдӟиськисько, - шуэ Маргарита Владимировна. - Нош толалтэ урокъёс, пӧртэм ужрадъёс бордын ужасько. Пӧртэм книгаос юаса, солы вазиськыло егит дышетӥсьёс, пиналъёс. Туэ Маргарита Владимировна дышетэ 6-тӥ, 7-тӥ, 9-тӥ классъёсты. Азьвыл дышетэм пиналъёсыз пӧртэм удысъёсын ужало ини. Нош Булай школаысьтызы гажано дышетӥсьсылы ялан ӟечкылан открыткаос лэзьяло, дырын-дырын пумиськылыкузы, шуныт вераськонзэс мыто. А.Айманова. М.В.Федорова. Туспуктэмез В.Беломорскихлэн. Дуно усе туала вакытэ книга, газет-журнал лыдӟыны. Почта кусыпъёсъя ёзъёсын ужасьёс, книга-газет поттӥсьёс, вузчиос олокызьы но амалъяськоно луо калыкен кусыпсэс юнматон понна. - Басьяськисьёсмылэсь дун ум куриське. Суредэз В.Шиловлэн. Тазалык Ыстэ кыӵе ке эмъюм? Ӟечбуресь, газетын ужасьёс! Вазиськисько тӥледлы куронэн. Мон телевизор пыр куаёнлэсь эмъюм сярысь реклама адӟи вал, но гожтыса ӧй вутты. Уд быгатэ-а юалляськыса со эмъюмез мыным почта пыр ыстыны. Мыным 70 арес. Ялан 53 килограмм улӥ но шаук зӧкомыны ӧдъяй. Али секталае 85 килограмм. Туж секытэн ветлӥсько, пыдъёсы висё, синмы лябӟе, пельы но секыт луиз. Ыстэ вал со эмъюмез, курисько. Дарья З. Вавож ёрос. Редакцилэсь: Гажано Дарья Егоровна! Тӥледлы туж юрттэммы потыса но ми со эмъюмез ӧм ыстысалмы. Валалэ, реклама сётӥсьёс нимысьтыз адямилэн тазалыкез сярысь тросгес асьсэлы коньдон жильдон сярысь сюлмасько. Собере, тӥ асьтэос но уд тодӥське, шӧдске, зӧкомемдылэсь мугзэ. Сое тодыса гинэ эмъяськыны кутсконо. Кышкатэммы уг поты, но гожтэмдыя висёнды диабетлы кельше. Туж куриськом, матысь дыре ик вазиське районысьтыды врачлы. Со, тӥледды эскероз но шонер диагноз пуктыса, тӥледлы гинэ тупась эмъюмъёсын но амалъёсын эмъялоз. Гожтэтэз лыдӟыса, сюлмы ик бышкыны кутскиз. Керӟегъяськисько, интыям пукыны уг чидаськы. Кызьы улом, мар монэ возьма? Гуртын вордски но будӥ бере, музъем туж мусо потэ. Нош табере выльысь вераськонъёс пуромо сое вузан-басьтон пумысен. 90-тӥ аръёслэн кутсконазы туртто вал ни сыӵе закон кутыны. Ӧз быгатэ. Сюлэмез ӵушкась гожтэт юромо мыным лэземын ӧй вал. Тодмое возьматӥз. "Советская Россия" газетын печатламын со. 5-тӥ феврале потэм номераз. "Путин "а"? шуиз ни, шуоз "б" но. Тани ма отын вераське. "Мон - ужбергатӥсь. Бен-бен, кызьы тросэз шуо, спекулянтъёс-лушкаськисьёс пӧлысь. Соиз ини асьсэлэн ужзы, ма ми пумысен верасько. Мон понна тужгес но дуноез та улонын - уксё. Адямиослэн ӝуштэмзы нокыӵе уг пот. Демократия - со кисые туйылэм "долларъёс". Мукетыз ӧвӧл. Мар мон возьмасько выль президентлэсь? "А" со шуиз ни - люкон уз луы. Шуоз "б" но - музъемез вузан-басьтон пумысен закон луоз. Милемлы со тужгес но кулэ. Бен, гыроно-кизёно музъемъёсты, вуосты, возьёсты мон басьто. Со понна валюта дасясько ини али ик. Но мон гыро но кизё уг шуиськы. Уг но малпаськы. Ваньзэ сое арендае сётъялом, выльысь вузалом, кузьмалом, закладэ сётом. Одӥг кылын вераса, зол табыш басьтом. Тужгес но чебер интыосын кунгож сьӧрысь туристъёслы шутэтскон юртъёс усьтом. Мар соослы кулэ луоз, туннэ нуналлы тупась куронъёсъя - ваньзэ сётом. Татын кузёяськоз доллар. Учке ай: басьто нюлэс, ты, шур. Малпаськоды, отын губияны, чорыганы, инкуазез учкыны быгатоды? Эн но малпалэ, медъям муртъёс эскерозы, кин мынам музъем вылам лёгськыны шедьтоз. Ми кутомы сыӵе законъёс - соос милемлы гинэ ужалозы. Со понна Кун Думае адямиосмес пуктӥмы. Милиция, полиция, налогъёсъя служба, администрация, пресса кемалась ми вылэ ужало. Но та тырмыт ӧвӧл на шоро-куспо улонэз, социализациез выжытэм быдтон понна. Дышетсконэз мукет сямен радъялом. Кивалтӥсь класслэн нылпиосыз котьмае басьтыны быгатозы. Соос Россиялэн выль кузёосыз. Медъямъёслы дышетскем кулэ ӧвӧл. Лыдӟиськыны, гожъяськыны быгатӥзы ке, тырмоз. Вылӥ школаез тырмытоно ӧвӧл жуг-жаг выллем ужась калыкен. Таиз пумысен огшоры адямилы сюрес пытсамын луоз. Кивалтӥсь класслэн элитаез кунлэн инъетэз луоз. Медицина быдэсыз сямен милемыз гинэ эмъя. Шонер вераз И. Хакамада пенсионеръёс пумысен. Быгатэмъя соосты сэрпалтоно. Пӧртэм иванъёсты, степанъёсты, татьянаосты, надеждаосты эмъян понна, малы ми уксё тырыны кулэ? Ми асьмелэсь куронъёсмес быдэсъяны уксё висъяськом - куанеръёслэсь лыдзэс будэтыны ум. Начаръёслэсь вордскемзэс ми эскерыса возём. Ужась кужым кулэ луиз ке, тросгес вордскозы, ӧз ке - ӧжытгес. Вань кивалтӥсь интыосын милям пуктэм адямиосмы ужалозы. Куаразэс поттытэк быдэсъялозы милесьтым законъёсмес. Властез кемалась киултӥм ни. Соин ик нокинэн но ум люкиське. Азьвыл уже кутэм чубайсъёс, гайдаръёс, немцовъёс, хакамадаос ми радэ султыны уз быгатэ ни шуыса малпасько. Асьсэлэсь ужпумзэс быдэстӥзы ни, соин ик соос вужере кошкыны кулэ. Ваньмыз понна уксё тыремын. Потэ ке печатлалэ, умойгес луоз Думаын лыдӟыны. Константин Заботин, Санкт-Петербург. Таӵе гожтэт... Сюлмаськоз-а, тӥ сярысь сыӵе адями? Уз. Вылады сялӟоз но кошкоз. Одӥг синвуэд понна но уксё уз сёты. Вашкала аръёсы кадь одӥг мурт вылэ уен-нуналэн ужалоды, выт тыроды. Нош гуртады ужаны дыр уз сюры. Вылӥ Россиын музъемез вузан-басьтон сярысь вераськыны кутскем бере, республикаысьтымы Кун Кенеш та юан вылэ дас арлы "пытсэт" пуктӥз. 2006-тӥ арозь удмурт музъемлэсь одӥг гектарзэ но вузаны уг яра. Отӥяз мар? Вузан калэ вуим ке, музъеммы начармоз. Кузёосыз вошъяськозы, ужасьёсыз кылёзы. Крестьянлы малы муртлэсь музъемзэ чакланы? Нош палэнысь кузёлэн сюлмыз висёз-а, музъемаз удобрение ӧз сюры шуыса? Кема уз малпаськы - вузалоз. Нош Питерысь Заботин выллемъёс понна, музъемлэн нимыз гинэ кылёз на. Гожтэт кинлэсь ке сюлэмзэ вырӟытӥз ке, ивортэлэ малпанъёстэс. Лэзе редакцие. Калыклэсь куаразэ санэ басьтытэк уз кельтэ. Огъя кужымен гинэ музъем узырлыкмес утьыны быгатом. Оло, республикаысьтымы гурт хозяйствоя но сиён-юонъя министрмы Петр Першин но музъемез вузан-басьтон пумысен малпанъёссэ воштоз на. А. АНДРИЯНОВ. Ӟеч кӧл! Улонысь пыраклы кошкиз егит гожъясь Анатолий Петров... ...Югыт дунне вылэ вордӥськемез бере ик малпаськылӥз, дыр, Со ӟеч адями луон сярысь. Син азяз трос пол пуктылӥз, дыр, сайкыт, чебер улонэз. Зэм, таиз азинтӥськиз чылкак мукет ӧретӥ. Гожъясь Анатолий Петров ас вакытаз тыршиз шаерысьтымы пӧртэм газетъёслэн редакциосазы. Ужаз Удмурт телевидениын. Кылдытъяз чебересь, сюлэмпушез вырӟытъясь телеочеркъёс. Тросэз тодо на, дыр, Ашальчи Окилы, Куӟебай Гердлы сӥзем ужъёссэ. Улон - лек маке. Одӥгзэ ки йылаз возе, мукетсэ - киулаз. Нош адями кыда ачиз сямен. Ӟеч адями вал тон, Толя. Сояз дуннеын улонэд но каньыл мед луоз... Ӟечкыласьком 50 арес тырмонэныз Сарапулысь Карпова Алевтина Васильевнаез. Кенакмес ӟечкыласа сӥзиськом солы юн тазалык, вань малпанъёсыз улонэ мед пыӵалозы, жадёнэз тодӥсьтэм чылкыт ошмеслэсь улон аръёссэ, тулыс куазьлэсь ӟырдыт мылкыдзэ но ваньзэ умойзэ гинэ. Андрияновъёс, Ижевск. Тазьы но луэ... Автостоп Швециозь вуттоз! Быгатонлыксэ эскерон вылысь, Россиетӥ автостопен котырскиз Уфаысь пенсионерка Сания Сагитова. Пӧртэм машинаосын вить сюрс километр сюресэз ортчыса, малпанэ вуиз: таӵе амалэн азьланяз но дуннеез котыртыны луоно. "Вечерняя Уфа" газетлэн гожъямезъя, матысь дыре кышномурт малпа на потыны выль сюрес вылэ. Тэк пукыны валасьтэм кышномуртлэн маршрутэз ортчоз Эстония, Финляндия, Швеция, Норвегия пыр. Солэн мадемезъя, сюрес понна дун уг тыры. Сюресчи водительёслы пӧртэм учыръёсты маде. Валэктэ юрист Сэрегез нуэ адвокат Лилия Шкляева Кинлы кылёз улон инты? Мемие улӥз Ижын, куинь комнатаен квартираын. Улон инты аслыз басьтымтэ - приватизировать карымтэ вал. Мемие кулӥз 1998-тӥ арын. Квартирае кылиз армиысь бертэм Сергей агае. Таиз ассэ ачиз быдтӥз. Мон 1987-тӥ арысен улӥсько вал Санкт-Петербургысь огаз общежитиын. Огнам вордӥсько ньыль аресъем пиме. Отысь бертыса, буш квартирае пырыны турттӥ но, улон интыен кузёяськись ёзъёс ӧз лэзе. Мар кароно? Елена Тукбаева. Сыӵе юанлы РСФСР-ысь Улон инты сярысь кодекслэн 60-тӥ ёзэтэз тазьы валэктэ. Огдыре кошкем муртъёслэн улон интызы соослы ик кыле, татысь зэмен ик огдырлы кошкыкузы. Шуом, зарезетӥ уяны, музъем узырлык утчаны, кунгож сьӧры дышетскыны - ужзы яке дышетсконзы йылпумъяськытозь. Соин ик, Елена, тӥляд Ижын улон интылы праводы вань-а, ӧвӧл-а шуыса чаклаку, одно ик лыдэ басьтоно тани мае но мае: весяклы яке огдырлы тӥледлы висъямын Санкт- Петербургысь общежитиын сэрег, герӟаськемын-а со ужен яке дышетсконэн? СССР-ысь Вылӥ судлэн пленумез 1987-тӥ арын 3-тӥ апреле таӵе ужпумез эшшо рос-прос эскериз на. Солэсь постановленизэ лыдэ басьтоно ке, тӥляд Санкт-Петербурге кошкемдылэсь азьвыл пропискады (регистрациды) Ижысь та квартираын луыны кулэ вал. Ваньмыз озьы ке, тӥ быгатӥськоды судэ вазиськыны буш квартираез асьтэлы берыктон сярысь куронэн. Музъемме кузьмасал 1993-тӥ арын Завьялово районысь Ягул черкогуртэ мыным музъем сётӥзы. Быгатӥсько солы кузё луыны, сое пырак азе возьыны, наследствое сётыны, уже кутыны. Сыӵе акт вылэ гожтӥськемын Ягул сельсоветлэн председателез но районысь музъем (земельной) реформая комитетлэн председателез. Али музъемме кузьманы ӧдъясько (отысь юртъерез лыдэ басьтытэк). Кыӵе документъёс лэсьтыны кулэ? Кытын соосты дасяно? Николай Возисов. Музъемез кузьман сярысь огкыл (договор) лэсьтыса мыноно Интыяз кыллись ваньбурез но сое кутон-возёнъя лыдэ басьтон правоез пусъён палатае. Ӟуч сямен: Регистрационная палата по регистрации прав на недвижимое имущество и сделок с ним. Интыяськемын Циолковский урамысь 17-тӥ юртын. Отчы озьы ик нуоно таӵе бумагаос: музъем кузё луэм сярысь свидетельство, музъем кесэглэн планэз, музъем кесэглы гожъёс тупатэм сярысь акт, музъемлы дун тупатэм сярысь акт, музъем понна выт (налог) тырон сярысь улон интыысь вытъя инспекциысь справка. Пусъён палата документъёс лэсьтэ дунэн. ШӦКЫЧ Алла КУЗНЕЦОВА Коньдонэд ке кисыяд А закон - что дышло, Повернул и вышло. А.Измайлов. 1917 г. Коньдонэд ке кисы тыр, Улон котьку но майбыр: Йыружед - Пичи янгыш. Со понна уг тыро тыш. Пӧя. Жуг. Я, ви кинэ... Штраф ке шат тырод гинэ. Коньдонэд ке кисыяд, Закон султоз ас палад. Нош ӧвӧл ке коньдонэд: Йыруж - Пичи янгышед... Коньдонтэм муртлы закон, Пытсэтын шедьтоз улон. Тол шорын - выль школае Февральлэн кутсконаз Каракулино черкогуртын бадӟым ужрад ортчиз. Школа вӧзы ӝутскиз куинь этажъем выль юрт. Сое лэсьтыны кутэмын 12 миллион манет. Табере уноез пиналъёс выжизы югытэсь классъёсы-кабинетъёсы. Туж бадӟым спортъя залэз но. Кызьы верало дышетӥсьёс, таӵе школа, пе, районын гинэ ӧвӧл, республикаямы но самой чеберез луэ. Ёрос администрация котькуд класслы быдэ дуно кузьымъёс сётӥз. Н. Ефремов. Вамышъя кыкетӥ даурзэ Вотка городын улӥсьёс 100 арес тырмонэныз ӟечкылазы Домна Ивановна Масленниковаез. Со вордскемын но будэмын Пермь областьысь Дуброво гуртын. Вань даурзэ нылкышно гуртын ужаса, котьмае адӟыса-чидаса ортчытэмын. Берло аръёссэ улэ Воткинскысь нефть поттӥсьёслэн посёлоказы, Марфа нылыз дорын. Музъем вылтӥ кыкетӥ даурзэ вамышъясь песянай улонын ассэ ачиз утьыны быгатэ на, очкитэк лыдӟиське, гожъяське, йырсазьыз лэчыт, пельёсыз гинэ лябгес кыло ни. Висёнъёсын курадӟемез ӧвӧл, трос шуг-секытъёсыз чидамын ке но. Бадӟым семьязэс картэныз ӵош кулак карыса Сибире келяллям. Отын Домна Ивановна 15 ар улӥз. Трос матысь адямиоссэ ыштӥз. Али куать нылпиосыз пӧлысь улэп на куинез гинэ. Куать внукъёсыз, сизьым правнукъёсыз, куинь праправнукъёсыз. Кыкетӥ даураз выжем песянаез ӟечкыланы дораз ветлӥзы Вотка городлэн мэрез В.Л.Фридрих, мерлыко юрттэт сётонъя ёзлэн кивалтӥсез Н.Е.Ожерелькова, Воткинск НГДУ- лэн кивалтӥсез А.И.Костенко, солэн воштӥсьёсыз, 14-тӥ микрорайонысь ветеранъёслэн кенешазы быръемъёс. Басьтэмын "Воткинские вести" газетысь. Мон - удмурт азербайджан Азербайджан Тофик Гаяверди-оглы Керимов - милициысь подполковник. Асьме республикаын ӧй вал на таӵе вылӥ кизилиосын участковой. Старшой инспекторлэн ужан интыез - Ижевсклэн шунды ӝужан палысьтыз 6-тӥ микрорайон. Отчы пыре Труд ульча. Кыӵе но ма сюрес вуттӥз Кавказ гурезьёсын вордскем но будэм воргоронэз асьме ошмесо шарамы, кызьы радъяськиз-ӧръяськиз татын солэн улонэз но ужез? Ӵапак со сярысь маде тодэ ваёнъёсаз Анатолий Федорович. Озьы гажаса нимало подполковникез ӵош ужась эшъёсыз но сое тодӥсь адямиос. Асме обидьыны ӧй сётылы Тодмо артистъёсын, инметӥ лобасьёсын, врачъёсын вераськон мытыса, ӵем гинэ юало: тӥ, пе, пиналысен малпады, луоз, асьтэлы сыӵе уж бырйыны. Монэ но трос пол шуге-леке вуттылӥзы таӵе вазиськонэн. Малпалэ ай асьтэос: тросэз-а егитъёс школаын дышетскыкузы ик ини асьсэды тодмо дадя Степа интыын адӟыны тыршизы? Пӧртэм ӧй вал мон но. Дышетӥсь - тӥни кин мон луо. Соку йырам но ӧз лыктылы, куке но милицие вуо шуыса. Озьы ик тодам но ӧй вал, аръёс ортчыса, соку мон чылкак тодмотэм Удмуртие вуо но отын улӥсьёслэн анай кылынызы вераськыны дышо шуыса. "Удмуртия", "Ижевск" кылъёсты мон нырысьсэ кылӥ армиын кӧлан интыосмы артэ учыраз ӵыж-горд удмурт пиен. Тодмо ини, али гинэ "вордскем" солдатъёс казармаын улонзэс ог-огенызы тодматскон бордысен кутско: кызьы нимыд, кыдёкысь-а вуид?.. - Удмуртиысь мон, - валэктэ со пи. - Кытын бен со? - юасько. - Ма, "Иж" мотоциклъёсты уд тодӥськы шат? - паймыса пыльккиськиз выль эше. - А-а, - возьдаськеменым ым пушкам нукыртӥсько. Собере данъяськыса будэтӥсько: - Нош мон тани шундыё Кавказысь. Таизэ ини, малпасько, пуныен-коӵышен тодо, дыр. Бен, вордски мон 1951-тӥ арын Азербайджанлэн Джалалабад ёросысьтыз Базайрен гурезё гуртын. Татын тулысъёсы юг-юг сяськаяло, нош сӥзьыл узыр емыш сёто улмопуос, хурма, гранат, апельсин, мандарин. Шукыяськыса бызись шуръёс кузя нёжалъёсын кисьмало чабей, ӟег. Милям шаерысьтымы тодмо кылбурчилэсь Самедвургунлэсь нимзэ нуллӥсь колхозмы котырысь узыръёсыз пӧлын вал. Ми но, гуртысь пиналъёс, быгатэммыя анай- атайёсмылы юрттылӥмы. Каникулъёсмы ортчылӥзы колхоз лудъёсын но возьёсын. Тысь ворттӥмы, пудо сиён люкамы. Нош макем бадӟым шумпотон вал - валъёсты уин возь вылын возьман. Котыр шып-шып, ӟозъёс гинэ шат турын пӧлын каллен ӟиргето. Я валъёс дырын- дырын гырдалтыло. Югак-югак пиштылэ тылскем. Ми, солэн шуныт омыреныз шокаса, котырак пукиськом, пельёсмы шуямон кылзӥськом милям кадь ик задор мылкыдо бабайлэсь- аксакаллэсь верам-мадемъёссэ. - Куке адӟылэмды вань-а ӝуась синмо шайтанэз? - кышкатскем куараен юа пересь. - Ӧв-вӧл... - вазиськом огымысь. - Татын со, артэ, - йырыныз лушкемак шонтэ мышказ. - Асьмелэсь вераськеммес кылзэ. Зынызъя шӧдӥсько, муньылонэз... - Кызьы озьы? - ангесмы ошиське. - Уд ке оскиське, учкелэ... Бабай киыныз палэнтэ урдсысьтыз ӝужыт потъёсты. Ой-ой!.. Ми шоры учко ӝуась кык синъёс. Юнгес шымырскиськом ог-огмы борды. Тодӥмы шат соку, ми ӝуын пыжем картошмес паланы выронъямы, пересь турын пӧлы гыбдась сэрегпумъёс ватыны вуттэм ни шуыса. Мугорыя мон эшъёсы пӧлын висъяськымон вал шуыны уг быгатӥськы. Но нокинлы но асме обидьыны ӧй сётылы. Котьку кужмоосыз, кышкасьтэмъёсыз пӧлы калъяськыны тырши. Ваньмон дырме соосын ӵош техника котырын ортчытылӥ, шур дуре пыласькыны, чорыганы ветлӥм. Нош гурт ураметӥ буш вал вылын лобатыны кылдэ ке, милесьтым шудоез ӧй вал. Огполаз люктан интые мыныкумы валэ дулатскиз. Канава вамен тэтчонъяз канжаськиз. Мон, сылалэн мешок интыын, зуп! Уси музъем вылэ. Гуньдӥ, шокчеме уг луы. Со дыре ик валэ дачаям азь пыдъёсыныз пыкъяськиз но, йырзэ ошыса, мон доры вуиз. Пельёссэ чорк- чорк пуктӥз, мугорме, йырме зынъя. Тау инмарлы, улэп... - Мар тыныд ялан кулэ?! - тышкаське анае. - Озьы выронъяд ик кытчы ке чоньдод ини... Нош монэ та кылъёс уката бурдъяллязы гинэ кадь. Кызьы ке эшъёсыным губияны мынӥмы. Ми палъёс нюлэсъёсын узыр ӧвӧл ке но, отысь губитэк уд берты. Куазь шулдыр, шундыё тупаз. Инмын одӥг пилем но уг адскы. Ӝутскиськом гурезе вылӥегес но вылӥегес. Нокыӵе сюресъёс но, пытьыос но ӧвӧл. Гуртмылэсь ог куинь-ньыль иськеме ортчим. Огпала учкиськод - корка быдӟаесь изъёс, мукет пала - пыдэстэм гопъёс. Я отысь, я татысь ошмес пызьыра но жильыртыса ваське улӥе. Тани шедизы ни нырысь губиос но. Кин кытчы пазьгиським. - Ого-го-го! - гурезь бамалъёс кузя кыдёке шуккиське ог-огмылы вазьылэммы. Кудыме ӝыныозяз тырмытӥ ни. Гуждор вылэ вӧлдӥсько анаелэн пыжем табаньёсыныз ӵушконме. - Эхе-хей! - кеськисько эшъёсылы. "Эхе-хей!" - ӟырдам изъёс борды шуккиськыса берытскиз аслам ик куарае. Кеськисько золгес. Вазись ӧвӧл. Ма, кыдёке ӧй палэнскы кадь ук. Сиськонэ сярысь вунэтыса утчалляськисько - кытчы табере мыноно. Учкисько: паллян палан кыр адске кадь. Вамыштӥсько отчы. Пичи гинэ возь нош ик котыртэмын нюлэсэн. Витьымтэ шорысь кытысь ке пыдлось кылӥськиз пуны утэм выллем куара. Дыртӥсько отчы. Могӟытӥз инмозь ик ӝутскем из гурезь. Озьыен, мыдлане кошкисько. Син шорам йӧтӥз али гинэ лёгам турын. Кин ке но татӥ ортчем. Пытьыосты ыштоно ӧвӧл. Потӥ сильтӧл дыръя выжыеныз валче бекмыльскем кыз доры. Соку ик тодмай сое. Татысь мон шляпа быдӟа гудыри пуз шедьтӥ. Тани со юдэсэн-юдэсэн вандылэмын. Валай: мон йыроми, ог интыетӥ поръясько. Губи тодын ӧвӧл ни, мылкыдын йыркур но кышкан. Пеймытозь котыръяй гурезьёсты но нюлэс кушъёсты. Пыдъёсы уг кылзӥсько ни. Ӝужыт писпу улысь турын-куаре усемме ик ӧй шӧды. Синъёсы кыниськизы. Асме мон ӧвӧлтэмезлы оскисьёс пӧлы уг пыртӥськы. Но мар луиз отӥяз, али но нокызьы валэктыны уг быгатӥськы. Азям кылдӥз кӧня ке ар азьло ватэм песянае Сабы. Матам уг лыкты, бус пыртӥ кадь адскыса сылэ палэнын. Ымнырыз гинэ чылк-чылк пиштэ. Гажась синмыныз учкиз шорам, шуныт пальышаз. - Мусое мынам, - выретӥз ымдуръёссэ, - тон жадид, сюмад. Эн кошкы, пие, мон утё тонэ. Ӵукна шунды ӝужаз ке, тон нокытчы кожылытэк мын со шоры. Валад-а, нокытчы кожылытэк... Песянае, шуак пельскем тӧл басьтэм кадь, олокытчы ышиз. Со дыре ик кылӥськиз мукетыз, кышкатӥсез куара: - Дур-рак! Дур-рак!.. Мар та таӵе? Кӧлӥсько яке сопал дуннее вуи мон... Усьтӥсько синъёсме... Ӝужыт писпулэн йылӥяз пуке курег быдӟа куака. Мыд-мыд пала йыбыртъяса кесяське: Ква-арк! Ква-арк!.. Шунды пумен ӝутске. Кытчы мыноно? Нош уйвӧт... Мар вал со? Осконо яке ӧвӧл? Интыяд уд сылы, кытчы ке но вамыштоно. Мынӥсько меӵак шунды шоры. Тани нюлэс но шеромыны гурезь бамалъёс но нялмытгес луыны кутскизы. Выль кужым пыриз кадь, пыдъёсы ӝоггес нуо. Тани кылӥсько ни скалъёслэн но ыжъёслэн бӧксэмзы, пуны утэм. Пумитам бӧрдыса бызе анае. - Кытчы ышид, ма луиз?! Тонэ быдэс гурт утча. Пумитаз номыр вераны ӧй шедьты, юай гинэ: - Эшъёсы кыӵе-ма? Ваньзы-а бертӥзы?.. ... Атаймес ми ватӥм вазь. Сое син шорам рос-прос пуктыны но уг быгатӥськы. Семьяямы вань воргорон ужъёс кылизы агае вылэ. Отӥяз мон но юрттыны кутски. Киос нярӟытозь ужано луиз тӥрен но, лопатаен но. Ӝыт урокъёсме дасяме бере кутскисько район гузетамы гожъяны школаын дышетскеммы, колхозлы юрттэммы сярысь. Нош кылбуръёсме кема дыр ӵоже нокинлы ӧй возьматъялля. Тодозы, пӧй, эшъёсы, сереме уськытозы. Одӥг пол почтальон мыным сётэ гожтэт. Огпал сэрегаз гожтэмын мынам нимы-тулы, мукетаз - пуктэмын газет редакцилэн штампез. Пыдъёсме шӧдылытэк бызи гурт пуме. Ватски куштӥськем корка сьӧры: гожтэт лыдӟемме адӟись медаз луы. Кылбурдэ шумпотыса лыдӟим, гожтӥллям редакциын ужасьёс. Тысез, пе, шӧдӥське. Но со тысез ӟеч-ӟеч удатоно но будэтоно на, соку гинэ шепез кылдоз. Гожъяндэ азьланьты. Оскиськом, газет бамын одно пумиськом шуыса. Мултэс веранэз ӧвӧл, дыр, кыӵе вал со дыре мынам мылкыды. Куд-огез, оло, кылбур "пӧраны" выронлэсь котькулы куштӥськысал, нош мон со борды выль кужымен басьтӥськи. Нырысез кылбуре потӥз Сумгаит городын, таӵе ик нимо газетын. Соку мон дышеткисько ни вал ГПТУ-ын. Зарисовкаосы, заметкаосы сяна, потӥзы ог кызё кылбуръёсы. Училищеез йылпумъяме бере ужай "Каучук" заводын оператор луыса. Отысен ик кошки армие. Нош солдат дӥсен люкиськонэ вуиз - мон тодӥсько ни вал кытын мыным выль выжы лэзёно. Со дыре Ижын ужаз мынам бадӟымез агае. Али со "Центрспецстройын" бригадир. Та ласянь мылкыдме бурдъяз армиысь удмурт эше но. Ойдо сьӧрам, шуэ, уд жаля, уж шедёз. Автозаводэ токаре кутӥзы. Ар ёрос ужай, куинетӥ разряд сётӥзы. Пичи гинэ комнатаын куинь кузя улӥмы - агае, кузпалыз но мон. Кызьы ке цехамы монэ ӧтё партбюрое. Мар пумысен, уг валаськы, кыл кутытыны номыр понна кадь. Уже ӟеч мынэ, нормаосме мултэсэн быдэсъясько, детальёсме нырысь возьматэме ик келясько. - Керимов эш, ми тодӥськом, татын ар гинэ ай ужаськоды шуыса, - кыдёкысен кутскиз партбюролэн секретарез. - Но та дыр ӵоже но тон астэ умой ласянь гинэ возьматӥд. Комсомол ужын но, станокед дурын но. Татын ми кенешим, - кызйылтӥз секретарь, - мукет сямен вераса, ӵектон вань тонэ комсомол ӧтемъя МВД-е ужаны ыстон сярысь. Кызьы учкиськод со шоры?.. Тӥни озьы 1974-тӥ арын мон вуи милицие... Кыл вылын гинэ капчи Нош уж вылын улон ӧрдэ шуак-дуак воштыны шуг вылэм. Асме ачим пыкылон мылкыд но, эшъёсылэн мыным оскемзылы шумпотон но огазе люкаськизы. "Малы соглаш луи, - даллашисько асме, - ныпъетэ вормонтэм луиз ке, ма шуозы адямиос, кыӵе синмын мон берытском азьвыл ужам?.." Со дыре ик асме буйгатыны вырисько: шуг-секытлэсь тон кышканы кулэ овӧл, кылдэ сётӥд - чигнан сюрестэ вунэты. Кема вераны ӧй дӥсьты со сярысь агаелы, солэн кузпалэзлы но. Ымме усьтӥсько гинэ - син азям пуктӥсько Вагифлэсь лек ымнырзэ. Тани со кеське ни кадь: уг чида мон аслам липет улам милиционерез. Тон ӧжытак коть малпаськид-а, ма шуысалзы ынаймы но атаймы. Мын кошкы, татчы пыддэ эн лёгы ни. Ог ӝытэ сиськон дыръямы, агаелэсь ӟеч мылкыдзэ учыртыса, вазисько: - Вагиф, мон уг ужаськы ни автозаводын... - Кызьы? - паймиз со. - Шедьтӥд мукетсэ, коньдонозэгес уж? - Коньдон пумысен уг тодӥськы. - Ялан котыръясько. - Нош куронъёс бадӟымесьгес луозы - соиз ӟеч тодмо. - Оло, кивалтон уж оско? - серектӥз Вагиф. - Толя, автозаводын тыныд общежитие инты ӝоген сётыны кулэ. Нош отӥяз семья кылдытӥд ке, нимаз квартирае но выжод, - вераськонэ пыриськиз Вагифлэн кышноез. - Мон милицие ужаны выжисько. - Ӧй возьма ни ӵыжы-выжыосылэсь чиданзэс. Агае ӧжыт гинэ ӧз гуньды. Ӝутэм пуньызэ берен ӝӧк вылэ лэзиз. Оскно-а, ӧвӧл-а кема учкиз шорам. Собере котькуд кылзэ печатласа кадь вераз: - Бе-ен, выжыямы таӵеез ӧй вал на... Йырад ваньзэ рос-прос бергатӥд-малпад-а бен?.. Валаськод-а, лушкаськисьёсын, йыр вандӥсьёсын, законэз тӥясьёсын нуналлы быдэ ваче син луод шуыса?.. Кылдэм югдурез котыр ласянь сэрттэм-пертчеммы бере Вагиф шуиз: мылкыдыд вань бере, тонъя ик мед луоз. Пинал ӧвӧл ни, аслыд сюрестэ ачид сайкыны кулэ. Керимовъёслэсь нимзэс гинэ пыд улад эн лёга. Ӵуказеяз ӵукна дӥсяй нырысьсэ ас коньдонэным басьтэм ӵыж выль костюмме. Вамыштӥ Индустриальной РОВД-э. Юртэ пырон ӧс урдсысь горд пул вылэ ӵуж букваосын гожтэм кылъёсты адӟыса, сылон интыям пуми кадь. Пыроно яке ӝоггес кошконо-а татысь? Та минутэ, пияш тонэ возьма одӥг гинэ сюрес - я азьлань мыноно, я палэнэ кожоно. Со куспын ӧс вӧлак усьтӥськиз. Потӥзы кыӵе ке майор но старшина. - Тӥледлы кытчы гражданин? - Адямиез пыртӥз адӟыны дышем майор валаз паймыса сылэмме. "Мон тӥляд выль уж..." - ӧжыт гинэ ӧй шедьты ымме усьтыны. Валатскыса шуисько: - Мон ӧтемын отделдылэн кивалтӥсеныз пумиськыны. Майор синмыныз эшшо огпол мертаз монэ йырысеным пыдозям. Кытчы мыныны валэктӥз но старшинаен ӵош дыртӥз кӧня ке вамышын сылӥсь УАЗ доры. Бен, табере зэм но чигнаны уг луы ни. Ӝоген монэ тодьы йырсиё нылкышно-секретарь ӧтиз кивалтӥсезлэн кабинетаз. Ӝӧк сьӧрын пуко кабинетлэн кузёез милициысь подполковник Владимир Владимирович Губин (али со пенсиын ни), отделлэн пӧртэм ёзъёсыныз кивалтӥсьёс. Али гинэ оперативка ортчытӥллям. Ма карыны ёрмыса сылӥсько ӧс дорын. - Сэзьгес, сэзьгес кариськы, пиёк, - атай музэн вазиськиз подполковник. - Ма, выль ужад но таӵе ик дӥсьтӥсьтэм луод-а?.. Пуксьы... Вераськон кема ӧз кыстӥськы. Юазы кытысь, кин но ма луэмме, малы татчы лыктыны мылкыд каремме. Кызьы, пе, валаськод милиция азе пуктэм кронъёсты, кыӵе уж нуид цехысьтыды комсомоллэн огазеяськоназ. Бератаз Владимир Владимирович витьымтэ шорысь юаз: - Кыӵе-ма ини дэриысь поттэм юлтошед? Тубат улын уг соргеты ни-а?.. Синъёсы паськытазы. Кытысь тодэ подполковник тае? Йырам чилектӥз: озьыен, мон сярысь татын ваньзэ азьвыл ик ӟеч тодо ни. Со учыр нош ик син азям пуксиз. Вал цехамы одӥг мӧйы ужась, пенсиозь кылем нуналъёссэ лыдъяса улӥз. Вылӥ классъем токарь. Одӥгез гинэ адямиез быдтӥз - пельсьӧраз мултэссэ киськаны яратӥз. Соин, ПТУ-ез йылпумъяса, бордаз дышетскыны юнматэм пияшлэсь но тыро-пыдо ӧз юалля. Солэсь но ортчыт, уж бере соосты ӵем гинэ ӵош адӟылӥзы чарка бекыръян интыосысь. Ма басьтод пересьлэсь? Заводысь дырызлэсь вазь уллялод - интыяз со кадь кибашлы ужасез уд шедьты ни. Соин, шӧдске, рабочийлы оскизы аслыз кивоштӥсь ӝоггес дасяны. Дышетӥсез пияшез котьку утьыны, сьӧлыкъёссэ лушкем возьыны тыршиз. Одӥг нуналэ вуоно токарез чылкак но ыштӥзы. - Туннэлы со шутэтскыны куриськиз, - валэктӥз дышетӥсь. Тодмо луиз: пияшез ӵукна кин ке но адӟем дӥсь воштон интыысь. Мастер уг кепыра, вазиське вылӥ кивалтӥсьёслы. Ышем адямиез нокин но лэзьымтэ уже потытэк кыльыны. Сое, бушатымтэ ӟенеликен артэ кӧлӥсь мае ке, шедьтӥзы тубат улэ люкам ӝуг-жаг пӧлысь. Ӵуказеяз комосомол кенеш пуктӥз: пияшез заводысь улляно. Кызьы озьы, юасько аслэсьтым, луэ шат адямилэсь улонэ али гинэ мытэм сюрессэ одӥг шонтэмен уретыны? Кинлы со табере кулэ луоз, кытчы мыноз? Одӥгез гинэ кыле - дэрие ялан мургес выйыны. Оло, адямилэн канжаськемез понна ми но ваньмы, нырысь ик мӧйы ужасьёс, янгыш... - Вань ӵектон, - ӧй чида ни, киме ӝутӥ. - Шонерзэ вераса, ӵектон ӧвӧл, - курон... - Вера, Керимов, - йыбырттӥз цехлэн кивалтӥсез. - Юнматэ пияшез мон борды, - шуисько. - Адями быремын ӧвӧл ук. Шедьтом, малпасько, огкыл... Озьы ПТУ-ысь вуэм эшмы кылиз цехе. Усто токарь луиз. Отӥяз заводысь кошкылытэк йылпумъяз техникумез, механической институтэз. Луиз валтӥсь инженер. ... - Ну мар, Керимов эш, сюлмысьтым ӟечкыласько тонэ семьяямы пыременыд. - Интыысьтыз султӥз подполковник. - Сӥзисько ӟечсэ гинэ... Монэ кутӥзы патрульно-постовой службае дышетскисе. Дышетӥсе луиз сержант Виталий Ермаков. Вуиз нырысетӥез ужан нунал. Патруле потӥськом 14 часын, ужмес йылпумъяськом ульчаосын берпум трамвай вагонъёс йыггетэмысь дугдэм бере. - Тани та ик вань асьмелэн утён-эскерон интымы, - киыныз возьматӥз сержант инмозь ик ӝутскем укмыс но соос вӧзын будонзы куспетӥ урем кадь пичиесь вить этажо коркаос, чир! Поттӥсь пиналъёсын тырмем азбаръёс шоры. - Асьмелы оскемын та юртъёсысь адямиосты, тӥни со нылпиосты улонын кырсезлэсь, калыклэн ваньбурез вылэ кизэс ӝутӥсьёслэсь утьыны. Милиция со кыл кутытӥсь орган гинэ ӧвӧл, нырысь ик со калык пӧлын валэктон уж нуыны, йыртэманэз выжыысеныз порыны кулэ. Озьы Ермаков монэ пумен дышетӥз, кыӵе луыны кулэ милиционер, кинэн но кызьы вераськоно, кусып возёно. - Быгатоно адямиез пыртӥз адӟыны, - шуылӥз со. - Ассэ кызьы воземезъя валано, кин сылэ тон азьын: янгышен чӧлскыны шедьтэм яке кион ымнырзэ ватыны турттӥсь маке. Кызьы ке ульчаысь адӟим юэм куинь воргоронъёсты. Дыльдызы пазяськыса ченгешо, киынызы шонало. Мынӥськом матазы. - Ма луиз, пиос, ма пумысен кылды ӧз тупа? - юа Ермаков. Керетӥсьёс чалмизы, ым пушказы маке нукырто. Гурт палазы ӝоггес шонтӥзы. Сержант возьматӥз ӵӧж музэн конгылясь чиед мугорез воргорон шоры: - Ойдо ай, сутом сое. Марлы со кулэ луиз, малпасько ас понам. Ӵапак таиз ченгешонэ пыриськемын ӧй вал, сылӥз но палэнынгес. - Тӥ ваньзэсты соосты тодӥськоды-а? - юаз Ермаков воргоронэн артэ вуэммы бере. - Кызьы шуод... - пельпумъёссэ ӝутказ сюресчимы. - Ваньмы ми ӵош ужаськом. - Вунэтӥськеммы ма но со юаны, - мон пала учкиз сержант. - Кемалась-а тодмоесь? - Кызьы шуод... - нош ик ӵемтӥз воргорон. - Со ӝужытэз ог вить ар ни дорамы. Нош лапегез - алигес вуиз... - Кытын улэмзэс тодӥськоды-а? - азьланьтэ Ермаков. - Чаклатэк ӧвӧл, сюрес вылын мыжгаськон медаз поттэ. - Ӵапак со лапегез ик кулэ асьмелы, - палэнэ кошкеммы бере сержант нош ик учкиз блокнотаз гожтэмзэ. - Ӟеч-ӟеч эскероно сое... Бӧрысь тодмо луиз: та воргорон, пал кышно дорын мурт нимын улэ. Сое кемалась ни милиция утча. - Кызьы соку ик валад умойтэмзэ? - паймыса юасько дышетӥселэсь. - Ӧд синйылты шат: асьмемыз адзыса, адями соку ик кушетскиз. Номыр ӧй вал кадь, пальпотэмъяське. Нош синъёсыз отӥ-татӥ зиркато. Пумит пал кыл уг поттылы. - Серектӥз. - Адямиез, эше, пыртӥз адӟыны быгатоно... Яке мукетыз учыр. Толалтэ вал со. Уй шор бер. Дугдылон интыосазы мышказы нап ӵын но бус кельтыса вуо берпум автобусъёс. Ӟукыраса мырдэм усьтӥськись ӧсъёстӥ потыса, калык пӧртэм пала пазьгиське. Заводъёсын йылпумъяськиз кыкетӥ смена. Дорамы, ӵем шокаса, витьымтэ шорысь вуэ нылкышно. - Юрттэ, - лулзэ мырдэм шедьтэ со. - Чайы изьыме басьтӥзы. - Кыл вылын суредаз лушкаськисьлэсь тусбуйзэ. Ӝог кырмим ми сое. Укмыс этажо юртлэн самой вылӥысьтыз шедьтӥм. - Ӟырдам кортэз пӧсь дырхъяз куасалтоно, - валэктӥз бӧрысь Ермаков. - Йыртэмась вакчи дыр куспын кыдёке кошкыны уз вутты. Писпуос сьӧры толалтэ уд ватскы. Ульчаын со кышка пумитаз шедем милиционеръёслэсь кырмемзэс. Подвалэ пырод - астэ гольык кельтыны шедьтозы. Чакла ни мукетсэ но. Та коркаосысь адями аслаз улон интыяз уз йыртэма, тодмасьёс шедёзы. Озьыен, кыле на одӥгез гинэ - кӧня ке дырлы выйтӥськоно подъездэ... Та дыре мон формаен ветлӥсько ни вал. Сётӥзы младшой сержант ним. Оскизы ыбылӥськон тӥрлык. Нош куинь толэзь ортчыса ыстӥзы дышетскыны милицилэн школаяз. Сое йылпумъяме бере эшшо куинь ар ӵоже ужай на патрульно-постовой службаын. Луи отделенилэн командирез. Будӥ милициысь старшинаозь. Табере ини ачим дышетыны кутски егитъёсты. Ог кызё вал мынам соос. Вал бен сыӵеосыз но: куд-огез дорамы лыктэ милица ужлэсь кыӵезэ рос-прос тодытэк-валатэк, мукетыз - капчи улон шедьтоз кожаса. Таӵеос кема уг возисько. Тодам ваисько: вал милям но погонэз чотын аслыз пайда поттыны турттӥсьмы. Бурд улаз ватыса возьыны кутскем лушкаськисьёсты. Валамон ни, та понна солы шалтыртӥсеныз тыризы. Но пежъянэз мешокын уд возьы - шараямы. Мон, отделенилэн командирез, меӵак верай: адямиез, милицилэн радысьтыз уллям сяна, судэ сётоно. Кӧня ке ар ортчыса, соин нош ик пумиськыны кылдӥз. Ачиз кылпум поттӥз куке но гылыт сюрес вылэ вуэмез сярысь. Тау кариз кыдёке гылӟемлэсь дыраз утеммы понна... "Сётӥськом тыныд выль удыс"... 1978-тӥ арын мултэс бадӟымам Индустриальной районэз люкизы кыклы. Озьы кылдӥз Устинов район. Мон шеди отчы. Со дыре мон вал ни МВД удысын ӟеч тодон-валанэн милиционер. Ужме трос пол нимысьтыз пусйылӥзы. Ноку но уг унэты одӥгзэ милицилэн нуналэзлы сӥзем ӝытэз. Мынам мӧля вылам бырттӥзы "Милициысь отличник" пус. Бератаз республикаысьтымы МВД-лэн знамяез вӧзын патретэ пуктӥзы. 1989-тӥ арын сётӥзы "СССР- ысь дано участковой" ним. Нош 1999-тӥ арын Россия Федерациысь Президентлэн указэзъя монэ пусйизы "За заслуги перед Отечеством" ИИ цтепенё орденлэн медаленыз... Устинов районын кутскиз мукетыз, шуыны луоз, ужан но улон сюресэ. Ог нуналэ монэ ӧтё РОВД-лэн кивалтӥсез Владимир Михайлович Останин доры (али милициысь полковник пенсиын ни). Котыръятэк меӵкытӥз со: - Сётӥськом тыныд выль удыс. Оскиськом, городмылэн шунды ӝужан палысьтыз 6-тӥ микрорайонын участковойлэсь ужзэ быдэсъяны кужмыд тырмоз шуыса. Погонэн адямиос кивалтӥсьёслэсь приказзэс сэраны-тураны уг быгато. Озьы ке но малпаськонэ уси. Мылкыдме валаса кадь, Владимир Михайлович азьланьтӥз: - Тодӥсько: микрорайон капчиосыз пӧлысь ӧвӧл. Вылаз ик, со чылкак выль на. Татын уло городлэн пӧртэм интыосысьтыз вуэм адямиос. Соос пӧлын вань котькыӵеез. Соин ик участковой отын калыкен ужаны, соин огкыл шедьтыны быгатӥсь мурт луыны кулэ,- офицер сӥсъяса кадь учкиз синмам. - Малпаськыны куинь нунал сётӥсько... Мынӥсько выль ужан интыям - вить комнатаен квартирае интыяськем опроной пунктэ. Шалтрак буш со. Ӧвӧл пукон но, ӝӧк но, радиоез но телефонэз вератэк ни. Озьыен, ваньмыз та сярысь аслыд сюлмаськоно. Соин ӵош ик валасько: ужез кабинетэз шулдыртон бордысен кутсконо ӧвӧл. Нырысь ик тодматсконо но кусып тупатоно микрорайонын улӥсьёсын, татысь предприятиосын но учреждениосын ужасьёсын. Мынӥсько семьяосы, вузкарон интыосы, школае, можтажной управление. Таяз улӟытӥм дружиналэсь ужзэ. Бадӟым осконэ вал мынам юртъёслы но подъездъёслы быръем тӧроос вылэ. Соос юрттыса соку но, али но ортчытъяськом улӥсьёсын пумиськонъёс, кенешъёс, сэрттӥськом- пертчиськом пӧртэм ужпумъёсты. Дырме бер ӝытозь, нош куддыр быдэс уйзэ ортчытъяно луиз опорной пунктын. Бен али но мон уг тодӥськы шутэтскон, тужгес но праздник нуналъёсты. Вунэтӥ ни ку вал берпуметӥзэ отпускын. Нош макем бадӟым шумпотон со, куке шӧдӥськод, тынад ужед пайдатэм уг кыльы, калык тонэ гажа но оске шуыса. Тани вал милям ньылоныз куасьмылӥсьтэм юисьмы. Нокытын но ӧз ужа. Юиз кышноезлэсь берпум коньдонзэ таласа я лушкаса. Гуртаз жугиськиз. Мон, старшой участковой, юрттӥсьёсы со семьяе нуналлы быдэ сямен вуылӥм. - Сё, сё, Анатолий Федорович, - кылзэ мырдэм выретыса оскытэ воргорон. - Ӵуказе нуналысен гульчык но... Вуиськод ӵуазеяз - со нош ик тютьмемын. Яке кышноез уй куазен дорамы бызьыса вуэ: - Юрттэ мынэсьтым со тордосме буйгатыны... Трос пол ми соин ваче син но, улӥсьёслэн общественной советазы но вераським. Кӧня ке дыр ортче - ваньзэ вунэтэ. - Чыртыям гозы поном ни шат, Анатолий Федорович, - синкылизэ ӵушылэ воргорон, - номыр кареме уг луы. - Бен, ӵапак со калэ вуиськод ни, шӧдске, - чурыт вазисько шораз. - Ымам шапык пыре - кыкетӥез, куинетӥез кулэ, - сюлворе адями. - Тон эн учкы чарка шоры. Палэнскы ульчаысь тордос эшъёсыдлэсь. Тынад мукет сюресэд. Яке возьмаськод семьяысьтыд уллямзэс?! Атайзы шоры учкыса, кин луозы тынад пиналъёсыд?.. Таӵе вераськонъёслэн емышсы интыяз усизы. Воргоронлы ми юрттӥм уже интыяськыны. Ваньзэ лэсьтӥм, аракы лэзьян интыосы сюрессэ вунэтытон понна. Кызьы ке пыре опроной пунктэ, ӧс дорысен ик пальпотыса вазе: "Бадӟым тау, Анатолий Федорович, карт но атай луэмме валаны юрттэмды понна. Дуннее выльысь вордски кадь". Пуксиз вадьсам, азьланьтӥз: "Юрттэлэ вал бускелелы но. Усто пияш. Нош берло дыре эсэпсэ валатэк юыны кутскиз. Кышнозэ, пиналъёссэ ултӥя. Мон сямен ӟенелике чылкак медаз выйы вал..." Сюлмысь потэм таӵе вазиськонъёсъя, милям юрттэммылы осконъя мон ӟеч валай, участковой формаен гинэ огшоры милиционер ӧвӧл, нырысь ик, со калык пӧлын зечсэ вӧлдӥсь, вань уродэзлы пумит кужымзэ жалятэк нюръяськись адями. Азьвыл ӵем гинэ луылоз вал тазьы но. Мынӥськод кыӵе ке предприятие яке организацие, тонэ ӧс куспысен ик гуньдыто: "Ма тон, Керимов, ми дорысь ялан утчаськод? Мукет ужед ӧвӧл шат?" Тодазы ӧз лыктылы таӵеослэн, тросэз пӧлазы ужасьёс милям микрорайонамы уло шуыса. Та адямиос ваньзы пӧртэмесь. Одӥгез, шуом, уж дураз кӧй но вӧй, азьветлӥсь, гуртаз бертэ - кымысаз сюръёс кылдо кадь, лекаськыны кутске. Таӵе кык ымныро адямиослы пумит огъя кужымен нюръяськоно, соосты интыязы пуктоно. Мылкыд бурдъяське, али со предприятиосын ик возьмам кунозэс кадь пумитало. Но котьма ласянь юрттыны тыршо ке. Эшшо но ӟеч ужам потэ, куке РОВД-э таӵе гожэтъёс вуо: "...Туж куриськом Милицилэн нуналаз нимысьтыз пусйыны милесьтым страшой участковой инспектормес Керимов Анатолий Федоровичез. Со шырыт сюлэмо адями, котькудӥзлы вазиське гажан мылкыдын. Сотэк уг ортчыло милям кенешъёсмы. Ӵем дыре ӧтьытэк но вуылэ семьяосы, юрртэт ӵектыса..." Та чуръёсты гожъясь Г.Т.Злобиналэн нимыз вӧзы гожтӥськиллям на эшшо кызьлэсь уно улӥсьёс. Ульчаын пумиськыку но тросэз матысь эшсылы кадь вазисько: - Ӟечбур, Анатолий Федорович! Кыӵе ини ужъёс? Ӵемысь юало: - Юрттэт кулэ ӧвӧл-а? Ӵапак таӵе мыло-кыдо адямиос пыриськыса, микрорайонамы котькуд ӝытэ быдэн кык мурт участковоен ӵош эскеро ульчаосты, азбаръёсты, подъездъёсты. Вуыло трос калык люкаськон интыосы. Кезьыт тол уйёсы куд-ог егитъёс дырзэс ӵапак подъездъёсын ортчытоно кожало. Соос пӧлын шедё вень вылэ "пуксемъёс", йырез шузимытӥсь макеосты зынъясьёс. Жаляса верано, таӵеослэн лыдзы ялан йылэ. Соосты ми котьку син азямы возьыны тыршиськом но урод сямзылэсь куштӥськыны амалъёс утчаськом. Ӵапак таос пӧлын угось тросгес йыртэмасьёс, адями вылэ кизэс ӝутӥсьёс, нылъёсты сантэмасьёс. Ог ӝытэ, укно пыр тыл чилектылэмез адӟыса, юрттӥсеным подъездэ пыриськом. Укмысэтӥ этажын жаг киськан труба борды ӝиптӥськыса сыло кык пиос. - Ма кариськом пеймытын, юлтошъёс? - Ми-а? Озьы гинэ сылӥськом, шунскиськом. - Нош таос ма? - возьматӥсько сэргын сылӥсь бинетъёс шоры. - Со-а? Ум тодӥське. Кин ке жагзэ куштыны дасяз, дыр... - Озьыен, уд тодӥське, ма отын. Вае бен ӵош эскером. - Милемлы маиз. Эскере. Нырысез бинетысь ик педлось чильпырась тыл шорын пиштӥз пичи телевизорлэн экранэз. Со дыре ик одӥгезлэн пилэн кияз чилектӥз кыӵе ке корт арбери. Дышем амалэн кыксэс ик борддор борды "печатлам". Ярам, юрттӥсе кышкасьтэмъёс пӧлысь, сӥльвиро адями вал. Жин! Усиз бетон вылэ кузь пурт. Озьы артэ коркась лушкам дуно арбериос берытскизы кузёзы доры. Йыртэмасьёс, кызьы тодмо луиз, огез решётка сьӧры вуылэм ни, мукетыз - со бордын выль "профессилы" дышетскись макеос вылӥллям. Котьма ужме мон калыкен кенешыса радъяны тыршисько. Таин валче микрорайонамы кылдытӥм общественностьлэсь советсэ. Соин кивалтэ опроной пунктлэн тӧроез Б.В.Наговицин. Юртто солы ужысь но ожысь ветеранъёслэн советсылэн тӧроез Г.П.Карачева, 49 номеро школаысь дышетӥсь В.Е.Минеев, педучилищелэн директорезлэн воштӥсез Н.Ю.Балицкая но мукетъёс. Совет люкаськылэ толэзьлы быдэ. Трос пумо ужпумъёсты эскериськом, соосты быдэстыны луонлыкъёс утчаськом. Ӧтьылӥськом юисьёсты, киынызы шонаськыны яратӥсьёсты. Но тужгес но бадӟым инты висъяськом быдэ вуись пиналъёс пӧлын ужез паськытатон-кужмоятонлы. Озьы, кылсярысь, 49 номеро школаен вераськыса, бадӟым классъёсын дышетскисьёс гужем каникулъёссы дыръя нуналлы быдэ быдэн ньыль час ужало микрорайонын. Сюресъёсты волято, азбаръёсты чылкытато, сяська убоос лэсьто, жуг-жаг окто-калто. Спонсоръёсмы юрттыса, соослы коньдон тыриськом. Трос ӧвӧл, но киное ветлыны, ческыт сиён басьтыны тырме. Бадӟым уж ортчытӥм но ортчытӥськом "Вихр-антитеррор" операция дыръя 17 номеро ЖРП но милиция пыриськыса эскерим но муртъёс пыраны быгатонтэм пытсам корка сигъёсты, подвалъёсты. Озьы ик эскерим пыӵал тӥрлык возисьёслэсь азязы пуктэм куронъёссты кызьы быдэсъямзэс. Ваньмыныз улӥсьёсын пумиськонъёс ортчытӥм. Котькуд коркан кылдытӥм шудтэм учыръёслэсь утиськонъя комитетъёс. Соослэсь ужзэс радъя микрорайонысь совет. Кызьы верай ни, участковой инспекторлэн нырысь ужез - улонын йыромем адямиез йыртэман сюрес вылэ султонлэсь утён. Но ӵем гинэ ваче син пумиськоно луэ сьӧсьлы пӧрмем макеосын но. Выль ар азьын мыным опорной пунктамы жингыртэ микрорайонамы одӥгез улӥсьмы. Соосты ваньзэсты сямен мон нимын-нимын тодӥсько. Куалекъясь куараен вера: 14 номеро юрт вадьсысь гопын, пе, шӧй кылле. Пуныеныз ветлыкуз адӟем. Ивортӥсько отделамы. Ачим дыртӥсько верам юрт доры. Вуизы следовательёс, РОВД-лэн кивалтӥсез, районысь прокурор. Воргоронэз сюлэм вадьсаз, тыбыраз, ымныраз маке йылсо арбериен бышкаса вииллям. Ӝегатскытэк кутским йыруж лэсьтӥсез утчаны. Вазиським котырын улӥсьёслы. Ӵапак соос юрттыса, адями виисьлэн но, пурт улэ шедем муртлэн но нимзы кӧня ке нуналскын тодмо луиз. Куддыр ачиз участковой но вамышъяно луэ эзелен артэ. Огшоры ужан нуналэ вал со. Дыр ортчемын ни уйшорлэсь. Ӝоген дугдозы ветлэмысь трамвайёс но троллейбусъёс. Юрттӥсьёсы кошкизы шутэтскыны. Мон кабинетме пытсамелэсь азьло утялтӥсько нунал ӵоже люкаськем бумагаосме. Ӧс витьымтэ шорысь вӧлак усьтӥське. Шок-пуль пыре мынэсьтым кык йырлы ӝужыт воргорон. - А-а, тани кытын тон! - аракы зын вӧлмытыса ӝӧке доры вамыштӥз. Мазэ-созэ валаса ӧй быдты - йырам мырӟиз мыжык. Синмысьтым пазьгиськизы тылгизьыос. Со куспын пӧсекъяны кутскиз нырвыжые. Выж вылэ усизы вир шапыкъёс. Таин ӧз тырмы, воргорон кекатыны кутскиз. Милица школаын дышетэмзы татын но юрттӥз. Быгатӥ мозмытскыны. Сьӧсез интыяз сапкытӥ, киоссэ тыбыр сьӧраз бералтӥ. Ӧтьымтэ куно дас арлы люкиськиз эрикен, нош мон толэзь пала кылли йӧнатскон интыын. Таӵе учыръёс бере куд-ог скмьяосын шуысалзы, дыр: куштӥськы со ужедлэсь, эн ветлы лэчыт пурт вылтӥ. Та ласянь мыным юн удалтӥз. Кузпалы монэ одӥг пол но ӧз пыкылы на, гуртам кӧлыны гинэ бертылэме понна. Монэ ӟеч вала но котькызьы юрттыны тырше. Ачиз но уго ялан калык пӧлын. Со городысь ужтэк кылемъёслы инты утчан-шедьтонъя бюроын юрист. Ӵапак кузпалы мыным кызьы ке шуэ: - Тынад участокад ӝыныез сямен улӥсьёс удмуртъёс. Малы уд дышетскиськы соослэн анай кылзылы? Кышнолы пумит уд мыны. Кыл бӧрсьы кыл - дыши валаны, шенгыль ке но вераськыны. Соин ваньмызлы шуисько: "Мон - удмурт азербайджан!" Озьы ик вань но ини со. Татын кызь вить арлэсь кема улыса, Удмуртия мон понна кыкетӥ вордскем шаере луиз. Печатланы дасяз журналист Н.Долгов. Музейлэн кылдытӥсез вал Та нуналъёсы сю арес тырмысал В.Н.Ступишинлы. Воткинскысь шаермес тодонъя калык музеез кылдытӥсьлы. Со вордскемын Пермь областьысь Бикбарда посёлокын. Воткинске семьяеныз улыны лыктэм 1938-тӥ арын. Вань улытозяз дышетӥз историлы но географилы. Со тунсыкъяськылӥз трос удысъёсын: люка вал почта маркаос, трос ужаз архивъёсын, тодыны но гожъяны тыршиз Кам котырысь заводъёслэн но Вотка карлэн историез сярысь. Калык музей усьтыны дасяськыса, 50-тӥ аръёсысен кутскыса, уно сюрс тунсыко но дуно арбериос люказ. Вордскем шаермылэсь историзэ утён вылысь, котыраз огазеяз трос юрттӥсьёсты - мӧйыосты но егитъёсты. Музей усьтэмын вал 1968-тӥ арын 21-тӥ феврале. 1980-тӥ арын ноябре Валеьян Николаевич Ступишинлы Воткинсклэн сӥё-дано улӥсез ним сётэмын. Со улонысь кошкиз 82 аресказ. Алигес солэн кылдытэм музеез борды, шаерчиез сӥлы арыса, буре ваён пул юнматэмын, усьтэмын музеез кылдытӥсьлы сӥзем адӟытон. Л.Федоров. Уколэн усыкмыто Аспӧртэмлыко йыртэмасьёс вуизы Казане. ... Пичи пиен ӵош, лифтэ кык егит воргоронъёсчуртнаськизы. Сайказ пияш корка тубатъёсыз вылын: курткатэк, изьытэк но частэк. Дораз гинэ адӟизы ини макесысьтыз бышкалтэм бервылэз. Сыӵе ик пус кылем егит кышномуртлэн мугораз но. Таиз тодмотэм адямиослэн "Жигулиязы" пуксем вылэм. Вадестӥз ортчисьёс сайкатӥзы сое ӵукна, автобус дугдылон дорысь: сумкатэк, шубатэк, изьытэк. Ӧсэз чакласькытэк усьтэмез понна нылкышно дышетӥсьлэн но макесаз укол вуиз. Лушкаськисьёс, тодмотэм изьытӥсь эмъюм пуктыса, солэсь коньдонзэ нуизы. Кызьы пусъе "Столичная газета", таӵе амалэн, пе, наркоманъёс ужало. Удмурт французъёс яке француз удмуртъёс Кыдёкысь Франциын улӥзы-вылӥзы кузпалъёс Бернар но Габриелла Валлаос. Кыксы ик инженеръёс. Арлыдоесь ке но, весь ужало на. Асьсэ нылпиоссы бадӟымесь - ньыльдон арес котырын. Нош пересьмемзы уг поты. Соос мылкыд каризы Россиысь анай-атайтэм пиналъёсты ужатыны. Мугез валамон. Габриелла ачиз но огназ кылиз. Атаез вазь кулӥз. Анайзэ фашистъёс Германие келязы. Со будӥз песянаез-песятаез вӧзын. Габриелла малпаз мурт пиналъёслы сюлэм шунытсэ кузьманы. Картэз но пумит ӧз кариськы. Соос кызьы ке кусып тупатӥзы Глаз ёросысь Понино школа-интернатэн. Татын французъёслэн син шоразы йӧтӥзы вынъёс Алексей но Валентин. Азьвыл улӥзы Яр ёросысь Туканпи гуртын. Анай-атайзэс быдтӥз юон. Сюратайзы (анайзэс виись) - пытсэт сьӧрын. Озьы 1993-тӥ арын Алексей но Валетин луизы Валла фамилиен французъёс. Удмурт но ӟуч кылъёсты туж чаляк вунэтыса вераськыны ӧдъязы француз сямен. Зэм, дорзэс уг вунэто. Алексейлэн вань пичи дыръяз анаеныз ӵош пуксем фотосуредэз. Али Удмуртиысь тодмооссэ куре вордскем коркаезлэн вылтусыныз фото ыстыны. Пиналъёс-лицейын ик тунсыкъяськыны кулэ вуоно удысэнызы. Шуом, тросгес тодон-валан люкано экономикая, наукая, литературая. Алексей яратӥз кадь математикаез. Собере мургес дышетыны ӧдъяз англи кылэз. Пичиосын шудыны яратэ бере, доктор луо, шуэ. Солы али 15 арес. Валентин Пониноын шулдыр кырӟа вал. Та сярысь тодыса, сое Франциын гожтӥзы крезьгуръя (музыкая) школае. Кык ар ортчыса аналскиз. Табере полицейской луэмез потэ. Пияшлы 12 арес. Удмурт французъёсты (яке француз удмуртъёсты) туж адӟемез потэ Удмуртие кылем песятайзылэн. Куректэ, сыӵе шуд уз усьы ни шуыса. Нош пиёкъёслэн бертылон мылкыдзы сокем ик бадӟым ӧвӧл, лэся. Тодо: Россиын юо, эрказъясько, каргам сюратайзылэн пытсэт сьӧрысь потон дырыз но матэктэ. Озьы кык удмурт пиос удмурт калык понна пыраклы ыштэмын. Нош кӧнязэ отчы-татчы пазьгоз на радъямтэ улонмы? (Ярысь но Глазысь газетъёс гожъямъя). Му вӧй но экономика "Удмуртторф" уксёзэ ӧз жаля Шаерамы таӵе ужрадъёс шер ортчыло. Кылем пятницае Правительствоын ортчиз 10 му вӧй поттон интыосты вузан (аукцион). Соос бен узыресь ӧвӧл ке но, куд-огез нефть кыскись огазеяськонъёсмы коньдонзэс ӧз жалялэ. Та ласянь нимысьтыз пусйыны кулэ "Удмуртторф" кун предприятиез. Соин кема аръёс ӵоже кивалтэ ни Анатолий Марченко. Предприятие Покровское му вӧй поттон интыез 30 миллион 100 сюрс манетэн басьтӥз. Аукционлэн тӧроез Игорь Торопов валэктӥз, му вӧй поттон интыос, пе, пӧртэм районъёсын, ог-огзылэсь висъёссы бадӟымесь. Кылдытэмын вал аукционъя комиссия. Солэсь ужзэ радъяз Правительстволэн тӧроезлэн нырысетӥ воштӥсез Юрий Питкевич. Комиссие озьы ик пыризы Удмуртиысь эстӥськонъя но энергетикая, музъем узырлыкъёсъя министръёс Виктор Савельев, Александр Кулагин, республикаысьтымы но Россиысь мукет кивалтӥсьёс. Му вӧй интыосты вузан пытсам амалэн ортчиз. Ужрадэз нуиз Москваын дышетскем адями Дмитрий Коробейников. Нырысетӥез, Азинское му вӧй инты, вузамын вал 10 миллион 470 сюрс манетлы. Сое басьтӥз тодмотэм "Селена" ПКФ. Нош та инты нырысь 230 сюрс манетлы гинэ лыдъямын вал. Заборское му вӧй инты шедиз "Удмуртнефть" ОАО-лы, нош Окуневское - "Белкамнефтьлы". Соос 25 миллион 600 сюрс но 30 миллион манет уксё тырозы. Собере куинь интыос - Решетниковское, Тыловайское но Ирымское - 650, 650 но 600 сюрс манетэн гинэ вузамын. Куинезлы ик кузё луиз "Удмуртгеология" огазеяськон. Со ваньзэ-ӧвӧлзэ 2 миллион пала гинэ уксё тыроз. Дубровинское но Южнолюкское му вӧй поттон интыосты вузаны ӧз быгатэ. Но соосты басьтыны мылкыд каро "Белкамнефть" но "Сайгас-Спецавтоматика". Соослы ик та интыосты вузаны дэмлан сётэмын Удмурт Правительстволы. "Нева-Сайгас" выль огазеяськон Горлинское му вӧй интыез 800 сюрс манетэн басьтӥз. Огъя вераса, аукционын тямыс инты 98 миллион 870 сюрс манетлы вузамын. Со пӧлысь 40 процентэз уксё кошкоз федеральной бюджетэ, нош 30-эз - кун но интыысь бюджетъёсы, но со коньдон вуоз Удмурт Правительство но му вӧй поттӥсь компаниосын - конкурсын вормисьёсын арендая огкыл кутэм но лицензия басьтэмзы бере гинэ. Аукционэ ветлӥз Правительстволэн Тӧроез Николай Ганза. Со, вормисьёсты ӟечкыласа, нимысьтыз пусйиз: нефть компаниос аукцонлэсь условиоссэ дыраз быдэсъяны кулэ. Правительство со ужез син азяз возьыны кыл сётӥз. Г. РОМАНОВ. "Шулдыр ӝытсы" - асьсэлэн Башкортостанысь Вылӥ Тыхтем гурт нимез мон нырысьсэ кылӥ тодмо прозаик Роман Валишин пыр. Кулэмез бере солэсь "Тодметъёс" книгазэ дасякум, фотоос курыса, писательлэн вордӥськем гуртаз вазиськи вал. Отысь мыным туж кулэ, дуно снимокъёс лэзизы: вордскем юртэзлэсь туссэ (али со ӧвӧл ни) но пичи дыръяз анаеныз пуксемзэ. Берло аслым но вуылыны кылдӥз Вылӥ Тыхтеме, культура юртазы сцена вылын но вераськи. Татын тупаса, огкылысь уло вылэм бигер, пор, ӟуч но удмурт калыкъёс. Куинетӥзэ та пал удмуртъёсын пумиськи Камбаркаын финн-угор калыкъёслэн огазеяськонзылы сӥзем фестивальын. Отчы аслаз "Шулдыр ӝыт" ансамбленыз лыктэм Вылӥ Тыхтем культура юртлэн директорез Анатолий Латыпов. Та шӧртчи, чырмыт воргорон отысен мыным вазиськиз, Роман Валишинлы музей усьтыны материалъёс курыса. Киям кылемын на вал солэн фотоосыз, командировкае ветлэм блокнотъёсыз - соосты Иже вуылыкуз сётӥ. Нош Камбаркаын монэ "Шулдыр ӝытсы" паймытӥз. Асьсэ пал вашкала гуръёссэс, туалаоссэ но кырӟанъёсты соос туж аспӧртэмлыко быдэстӥзы. Коллективзы сярысь вераны курыса, Анатолий Латыповлы вазиськи. Со шуиз, "Шулдыр ӝытсылы" чылкак куинь ар гинэ али, пе. Озьы ке но, вормонъёссы син азьын ини. "Шулдыр ӝытэ", егитъёс сяна, пыре на вылэм семейной ансамбль но. Сое Илюза но Валентин Камидуллин кузпалъёс кылдытӥллям, пӧлазы ас ӵыжы-выжызэс кутӥллям. Самой пичиезлы, Олеся Назумутдиновалы - 12 арес, нош мӧйыезгес ачиз Анатолий Латыпов, 40 арес. Та 9 муртлэсь семейной ансамбль 1998-тӥ арын Башкортостанын ортчем "Семейная мозаика" фестивале пыриськем но 120 кырӟась-эктӥсь семьяос пӧлын вормисьёслэн радазы сюрем. Устоосыз - 37 коллектив - Уфаын гала-концертэ пыриськем, Вылӥ Тыхтемысь семейной ансамблез ачиз Муртаза Рахимов Башкортостанлэн Президентэз но учкем. Галина Романова. Илюза Валентина но Камиддулин кузпалъёс. Та кырӟасьёс-эктӥсьёс - ог выжыысь. Туспуктэмъёсыз В. Беломорскихлэн. ЭКОНОМИКА НО ПОЛИТИКА Бускелед ке узыр - тыныд но умой Кылем арняе Ижевскын ортчиз Урал ассоциацие пырем улосъёслэн но республикаослэн бадӟым кенешсы. Ужрадэз нуиз ассоциацилэн президентэз, Свердловск улослэн губернаторез Эдуард Россель. Люкаськемъёс йылпумъянъёс лэсьтӥзы кылем арын ужамзылы но эскеризы 2000-тӥ арын быдэстоно ужпумъёсты. Кенешлэн ужаз пыриськиз Россия Федерациысь Правительстволэн вице-премьерез Илья Клебанов. Урал улосъёслэн экономикаын югдурзы сярысь ивортон лэсьтӥз Урал регионэз азинтонъя экономикая комитетлэн кивалтӥсез Сергей Воздвиженский. Кылем арын Урал котырысь калыклэн улонэз 35 процентлы начаргес луиз, шуиз со. Озьы луиз Западысь специалистъёслэн асьме улонмес мыдлань сюрестӥ нуыны турттэменыз. Но Россиез быдэсак кекатыны чаклам ужзы соослэн ӧз пӧрмы. Западысь асьмемын кивалтӥсьёслы но Гайдарлэн-Чубайслэн программаоссылы дыраз шуккет сётэмын вал. Урал котырысь улосъёс бадӟым саклык висъяны кутскизы ас экономиказэс ӝутонлы. Кылем арын ассоциацие пырись улосъёслэн промышленностьсы 7,6 процентлы будӥз, нош Челябинск но Свердловск улосъёслэн - 13 пролцентлэсь но тросгес. Тужгес но ӝог азинскыны кутскиз машина поттон удыс - 28,9 процентлы будӥз, нош Башкортостанын, Удмурт Республикаосын, Челябинск улосын машина поттон - 40 процентлы. Кулэсмиз ужтэк кылемъёслэн лыдзы, 1,5 поллы йылӥз уждун но 2 поллы кулэсмиз уждун тыронэз ӝегатон. Ваньмыз со возьматэ экономикалэсь вырӟемзэ. Табере вань кужыммес сётоно предприятиослэсь ужамзэс вылӥегес ӝутон понна. Кылем арын Россиын пусъемын вал 300 азьмынӥсь предприятиос. Нырысь интыын сылэ Уралысь 12 предприятие. Ож тӥрлык поттӥсь предприятиослэн ужпумёссы сярысь вераськиз Удмурт Республикаысь Правительстволэн Тӧроез Николай Ганза. Со ӟечен пусйиз кылем арын Нижний Тагилын ож тӥрлыкез возьматон ужрадэз. Соку отчы пыриськиз Уралысь но Россиысь 107 предприятие. Ужаны кутскиз Уралысь обороная предприятиослэн валтӥсь конструкторъёссылэн кенешсы. Солы но шумпотоно, угось конструкторъёслэн тыршеменызы ож тӥрлык поттон берло аръёсы шӧдскымон выльдӥськиз. Но со дыре ик, шуиз Н.Ганза, Обороная комплексын югдур туж секыт. Государстволэн та предприятиослы тыронъёсыз 2,8 миллиард манет люкаськемын. Али но тодмо ӧвӧл на, кыӵе кунзаказъёс луозы 2000-тӥ арын. Соин ик Россиысь Правительстволы матысь дыре ик кутоно обороная доктрина, шуиз Н.Ганза. Соку гинэ котькуд предприятилы заказъёсты шонер чакланы луоз. Нош али Россилэн бюджетысьтыз обороная предпритиослы коньдон туж ӧжыт вуэ. Та удысэз ӝутон понна республикамылы чакламын вал 900 миллион доллар, нош вуэмын 78 миллионэз гинэ (1996-тӥ арысен). Обороная предприятиослы юрттон сярысь Президентлэн указъёсыз потылӥзы ке но, соос ӧз быдэсъяськылэ. Электрокужымез уже кутон ласянь но Урал улосъёс азьын уно шуг-секытъёс сыло. Со сярысь вераськиз Свердловск улосысь правительстволэн тӧроезлэн нырысетӥ воштӥсез Николай Данилов. Со пусйиз: та удысын югдурез тупатытэк, промышленностез ӝутыны уз луы. Соин ик мукет сямен ужатоно "ЕЭС" РАО-ез но. Электрокужымлы огкадь тарифъёс тупатоно. Пазяны лэзёно ӧвӧл "Уралэнерго" ёзэз. Урал котырысь улосъёслэн кивалтӥсьёссы нимысьтыз вазиськон кутӥзы Россилэн Президентэзлэсь ужзэ быдэсъясьлы В.Путинлы но Россилэн Правительстволы та кенешын ӝутэм ужпумъёсты ӝоггес сэрттон-пертчон вылысь. Пуктэм куронъёс сярысь ас малпанъёссэ вераз Россия Правительстволэн вице- премьерез Илья Клебанов. Солэн верамезъя, Россиысь Правительство чакла вал кунзаказъёсъя лэсьтэм ужъёс понна коньдон быдэсак тырыны... но люкетӥз Чечняын югдур. Соин ик уксё 86 процентэз гинэ сётэмын. Со оскытӥз, обороная предприятиослы 90-тӥ аръёсы люкаськем коньдон 2000-тӥ арын одно ик берыктэмын луоз шуыса. Кызьы со радъяськоз, 25-тӥ мартозь тодмо луоз, пусйиз со. Али таӵе малпан вань: одӥг ар куспын куинь арлы люкаськем тыронъёсты висъяно. Ож тӥрлык поттон программалэн инъетэз дась ни, шуиз Илья Клебанов. Со чакламын 2015-тӥ арозь. Туэ март толэзьлэн пумаз со программа кутэмын луоз. Вице-премьер верамъя, матысь дыре В.Путин гожтӥськыны малпа банкротэн ялон сярысь закон улэ. Со кемалась дасямын ни вал, но азьвылэз Президент малы ке документэз ялан палэнтылӥз. Кема вис луэм бере туэ выльысь радъямын луоз граждан авиатехникаез поттон. Но дуно вертолётъёсты но самолётъёсты туннэ одӥг авиакомпания но басьтыны уз быгаты. Юрттоз соосты лизинг аалэн басьтон гинэ, шуиз И.Клебанов. Но сыӵе ужлы пумитъяське Центробанк, угось лизинг 10 арлы чакламын. Озьы ке но, лизингъя дасям документъёс вылэ В.Путин гожтӥськыны малпа. Уралысь куноос вуылӥзы автозаводэз, тодматскизы адӟытонын возьматэм ож тӥрлыкен. Кенешлэн ужрадэз дыръя Кун Кенешлэн Тӧроезлы А.Волковлы, запасысь полковниклы, кузьмамын вал ыбылӥськон пистолет. Сыӵе дуно кузьымен сое пусъён сярысь ршение кутэм обороная министр Игорь Сергеев, ож тӥрлык поттонэз Удмуртиын азинтыны юрттэмез понна. Эшшо одӥг шумпотымон ужрад ортчиз на ассоциацилэн ужамез дыръя. Удмурт но Башкортостан Республикаос куспын гожтэмын му вӧй поттонын коньдон ужпумъёсты радъян сярысь огкыл. Со чакламын вить арлы но герӟаськемын "Белкамнефть" ОАО-лэн ужаменыз. Та огкыл луонлык кылдытоз асьме бюджетэ ватсаса 40 миллион манет коньдон пыртыны. Огкыл улэ гожтӥськизы Удмуртия ласянь Юрий Питкевич, Правительстволэн Тӧроезлэн нырысетӥ воштӥсез, Башкортостан ласянь Мидхат Шакиров, премьер-министрлэн воштӥсез. Со шуиз: "Бускелед ке узыр, милемлы но умойгес". Журналистъёслы сётэм пресс-конференциын Уралысь вылӥ кивалтисьёс та ужрадлы вылӥ дунъет сётӥзы. Татьяна Банникова. * Свердловск улослэн губернаторез Э.Россель но Удмуртиысь Кун Кенешлэн Тӧроез А.Волков. * Россия Федерациысь Правительстволэн вице-премьерез И.Клебанов. * Уралысь куноос - автозаводын. Туспуктэмъёсыз Николай Глуховлэн. ЖУРНАЛИСТЪЁСЫН ПУМИСЬКОНЪЁС Усьтэлэ ӧстэс: выт бичанъя полиция! Котькудӥз ужась выт тыре. Пичи-а, бадӟым-а уждунэз - закон ваньмызлы одӥг кадь. Озьы котькуд толэзь. Огшоры адями выт тыронлэсь пегӟон сярысь уг но малпаськы. Нош бюджет "пась". Солы уг юртто предприятиос. Векаса улӥсь заводъёс но фабрикаос тросэз вытъёсты уг вормо ни. Кужмоосызгес дыраз тыро. Но тужгес но трос тырмымтэос шараясько ужбергатӥсьёслэн ужазы. Выт тыронлэсь палэнскон вылысь соос олокыӵе но амалъёс шедьто. Соосын нюръяськемзы сярысь журналистъёслы мадиз Россия Федерациысь Выт бичанъя полицилэн федеральной службаезлэн Удмурт Элькунъя Управлениезлэн кивалтӥсез генерал-лейтенат Владимир ЛЕПИХИН. Выт бичанъя полицилэн ужаз югдурез утисьёслэн кадь ик секыт. Солы уго выт тырисьтэмъёсты шараяно, законэз тӥясьёслэсь кылзэс юано. Полиция озьы ик уте выт бичанъя инспекциын ужасьёсты но. Алигес Россиысь Выт бичанъя полицилэн федеральной службаезлэн коллегиез ортчиз. Отын полицилэн 1999-тӥ арын ужамезлы йылпумъянъёс лэсьтэмын. Кызьы ивортӥз В.Лепихин, 1998-тӥ арен ӵошатыса, миым уголовной уж кык поллы тросгес ӝутэмын. Россиын огъя со 16,5 сюрс пала луэ. Удмурт Республикаын кылем арын 248-лэсь тросгес уголовной уж усьтэмын. Солэсь азьло 79 гинэ вал ай. Выт тыронъя законъёсты тӥян пумысен полиция 364 учыр пусйиз. 274-ез со пӧлысь бадӟымесь луо. Бюджетэ 428 миллион манет берыктэмын. 221 сюрс манет тыр штраф сётэмын. Кивалтӥсьлэн ивортэмезъя, таӵе лыдпусъёс полицилэсь ӟеч ужамзэ возьмато. Арысь аре выт бичасьёс доходзэс ватӥсьёсты тросгес шараяло. Куд-ог предприятиос юромо выт тыронлэсь пегӟо. Тани, шуом, автомобильысь чемоданзэс лушкаса, пе, нуиллям. Нош отын уксёлы документъёс вылӥллям. Яке сӧриськем канализация бухгалтерлэсь бумагаоссэ "гылтэ". Берло дыре ӵемысь пумиськылоно луэ таӵе учыръёсын но. Фирмаез муртлэн паспортэныз пусъё. Усксёен операция лэсьто но фирмаез быдто. Банкъ_�ёс но пӧясько. Выт тырись уксёзэ банке келя. Солэн сюлмаськонэз быриз - выт тыремын. Нош казнае уксё уг вуы. Банке вые. Озьы бадӟым шудон ӧръяське. Азьвыл полиция Выт бичанъя инспекциен ӵош ужа вал. Табере понназ но эскеронъёс ортчытыны быгатэ ни. Но куддыр инспекциысь муртъёсты утёно луэ. Одӥгез шоры пуртэн шоналскиллям. Бухгалтеризэ возьматэмез потымтэ... Коррупция ласянь ке верано, миым дас сыӵе учыр пусъемын. Кыксэ шырмачъёсты, Сюмси но Дэбес ёросъёсысь ужасьёсты, суд улэ кыскизы. Кин ке Калачева пӧяськыса ветлэм, выт бичанъя инспециын ужасько шуыса. Табере со кырмемын, вить арлы пытсэт сьӧры келямын пуктэмын. Миым коррупциен герӟаськем 330 уголовной уж усьтэмын. 80-эз со пӧлысь Выт бичанъя полициысь ужасьёсын герӟакемын. Быдэс Россиез чаклано ке, Урал котырысь 11 улосвылъёсын выт бичанъя полиция тужгес но умой ужа. Асьме республикамы но нырысетӥосыз пӧлы пыре. Нош азьланяз Выт бичанъя полиция, доходъя люкетсэ сяна, бюджетлэсь расходъя люкетсэ но эскерыса улоз, дыр. Та выллем вераськонъёс вань. Соку ини со финансъёсъя полиция шуыса нимаськоз. А.Андриянов. Героез буре вайыса Та нуналъёсы Ижысь "Металлист" спортклубе люкаськылӥзы эркын амалъя нюръяськисьёс. Та ӵошатсконъёс сӥземын вал Россилэн Героезлы, аспал эшмылы Сергей Боринлы. Сергей Борин дышетскиз Ижысь 20-тӥ школаын, 9 номеро техучилищеез йылпумъяса ужаз механической заводын. Дырыз вуыса, егит адямиез басьто кунгожмес утьыны. Эшъёссэ утьыса, со геройлыко быре. Батыр солдатлы сӥзем турнире вуылӥзы пӧртэм ёросъёсысь егит спорстменъёс. Кужмо нюръяськыса вормисе потӥзы: Е.Камаев, С.Кислицын, В.Емельянов, В.Стерхов, Р.Мифтахутдинов, А.Калмыков ("Металлист"); Р.Хузяхметов (2-тӥ ДЮСШ); В.Клоян (4-тӥ ДЮСШ); А.Захаров (Шаркан); М.Нефедов ("Аксион"). Та ӵошатсконъёслы юрттӥзы Ижысь спорткомитет но шоркарысь егитъёсын ужанъя комитет, акциосын "Ижсталь" огазеяськон, Ижысь механической завод, "Ваш дом" огазеяськонлэн валтӥсь директорез Юрий Тюрин. А.Иванов. Дор "Байгурезь" ӧвӧл гырезь - Ма но уг малпало таосыд - тани землячество кылдытӥллям, сёровно пайдаез уз луы, быръён ортчиз ке, ваньмыз вуноз, - дэбесъёс сярысь кылем тулыс тазьы верасьёс ичи ӧй вал. Но соос уг тодо вылэм Чупчи палан вордскемъёслэсь юн сямзэс. "Байгурезь" огазеяськонэ пыремъёс возьматӥзы дэмен улыны быгатэмзэс. Ар ӵоже соос уно ужрад ортчытӥзы. Бадӟымез "нылпизы" - сыӵе ик нимо вузкарон юрт. Буш киын кутскыса, шӧртчи дэбесъёс вакчи дыр куспын быгатӥзы сиён-юон басьтонэз, сое вузанэз радъяны. Туж юрттӥзы Кезысь но Можгаысь сыр поттӥсьёс, вуззэс соос нырысь-валысь верам кыллы оскыса сётъязы. Озьы вузкарисьёс пыд йылазы султӥзы, ӝог гинэ пайда басьтыса ужаны кутскизы. Валамон ни, люкаськем коньдон кутӥськиз землячестволэн кулэяськонъёсызлы. Шедизы мукет но амалъёс. Кылсярысь, "АСПЭК" холдинг 50 сюрс манет сётӥз. Солэн кивалтӥсез Виктор Хорошавцев дэбес музъемез гажа - отын куке но улӥллям песятайёсыз. Коньдон сярысь юнме уг вераськы. Туала вакытэ уго ваньмыз со вылэ пыкиське. Уксё ке вань, уж но вань. Ар ӵоже "Байгурезь" шӧдскымон юрттӥз ёрмись ветеранъёсызлы, юн кусып тупатӥз ёросысь администрациен, гуртъёсысь кивалтӥсьёсын. Трос лэсьтэмын Дэбесысь дано адямиосты данъян ласянь. Кузьма Ложкинэз сӥлы карыса усьтэмын стела. Паськыт пусъемын землячестволэн кивалтӥсезлэн Геннадий Корепанов-Камскийлэн юбилеез, юрттэт сётэмын пинал спортсменъёслы. Землячествотэк ӧй вордскысал, вылды, Милитина Гавриловалэн кылбур сборникез но. Ма, ваньзэ вералод шат? Кылем субботае дэбесъёс ортчытӥзы огъя кенешсэс. Ог 300 мурт люкаськемъёс йылпумъян лэсьтӥзы ар ӵоже ужамзылы. Веразы ӟечсэ, пусйизы тырмымтэоссэс. Артист Евгений Андреев, библиотекаын ужась Надежда Лимонова, тодосчи Роза Яшина но мукетъёсыз данъяськон мылкыдзэс ӧз ватэ - уго зэм ик та палан трос тодмо адямиос вордскемын-будэмын. Кенеше лыктэм Виктор Шудегов но, Правительствомылэсь кивалтӥсьсэ воштӥсь, ассэ дэбес адямиен лыдъя. Экономика наукаосъя доктор Михаил Шишкин но пыремын землячествое. Ваньзэсты соосты огазея Байгурезь палъёсыз гажан но яратон. Кенешез нуиз огазеяськонлэн тӧроезлэн воштӥсез, Кун Думалэн депутатэз Светлана Смирнова. "Байгурезь" солэн нылпиез шуимы ке, ум янгышалэн, вылды. Уго ӵапак Светлана Константиновна ёрос администрациен ӵош басьтӥськиз бӧлякъёссэ огазеян борды. - Табере мон Москваын ужано луисько ке но, тӥледын кусыпъёсме туж утеме потэ, - шуиз С. Смирнова. - Ӵош будэм эшъёсты адӟыса, выль адямиосын тодматскыса, котькудӥз ватсаса кужым басьтэ. Соин ик асьмелы ваньмылы тыршоно землячествомес кужмогес карыны. Золгес ужано бордамы егитъёсты кыскон ласянь. Дэбесысь потэм студентъёсты но син азьын возёно, луэмезъя соослы юрттоно. Светлана Константиновна ӵектӥз гужемлэн кутсконаз Чупчи шур дорын бадӟым пумиськон радъяны. Отчы лыктыны быгатысалзы ёросын али но азьло улӥсьёс. Толэзь ортчыса, дэбесъёс асьсэлы депутат быръёзы. Котькинлы мед шедёз мандат, ми соин огкылысь ужалом. Со дыре ик Кун Думалэн депутатэз шугъяськемзэ вераз, асьме парламентын удмуртъёслэн лыдзы кулэсме шуыса. Кенеше люкаськемъёс правленилэсь ужамзэ умоен лыдъязы. Тодмо композитор Геннадий Корепанов-Камский луиз землячестволэн дано президентэз. Правленилы тӧрое быръемын отставкаысь полковник Иван Кропотин. "Байгурезь" егит на, но сое гырезь шуыны нокызьы но уг луы ни. Огазеяськон йыг- йыг учке азьпала. И. Лебедев. Кенеш дыръя. Анатолий Максимов, Кез сырзаводлэн кивалтӥсез, ассэ дэбес адямиен лыдъя. Со быръемын правленилэн тӧроезлы юрттӥсе. Ижысь нефть кысконъя компанилэн кивалтӥсез Александр Фокин но советник луиз. Фотоосыз В. Беломорскихлэн. Ӵуказе - Атай музъеммес утисьёслэн нуналзы Офицерлэн уставез аслаз, атаманлэн - аслаз Зэмос офицер берпуметӥ шокчытозяз ассэ стройын возе, арлыдызъя кемалась отставкае яке запасэ потэмын ке но. Удмуртиын куинетӥ арзэ кылдытэмын Офицеръёслэн огазеяськонзы, кивалтэ Кун Кенешысь депутат полковник Валерий Васильевич Ходырев. Ма лэсьтэмын та дыр ӵоже, нош маиз быдэсмытэк кылиз, кыӵе муген? Со сярысь ӟырдыт вераськон мынӥз кылем арня пумын Офицеръёслэн союззылэн кыкетӥ отчётно-выборной конференцияз. Огазеяськонлэн ужамезлы йылпумъянъёсын вераськиз полковник Ходырев. Та дыр ӵоже союзэ пыризы на куать пумо военной организациос. Соос азе пуктэмын вал одӥг ужпум: ӵемгес пумиськылоно воинской подразделениосын, валэктон уж нуоно школаосын но училищеосын. Умоен пусйыны кулэ Сарапулысь, Можгаысь, Воткинскысь офицеръёсты. Соос мыло-кыдо нуо армия пала дурбасьтонъя ужез, Ижевскын та ласянь висъясько Ленин но Первомай районъёсысь военной комиссариатъёс но офицеръёслэн огазеяскьонъёссы. Ӟеч мылкыд кельтӥзы Кун Кенеше но Кун Думае быръёнъёс. Удмурт парламентэ офицеръёс пӧлысь шедемын 3 мурт: майор Шаргаев, подполковник Рыбаков, полковник Ходырев - куиньназы но соос Офицеръёслэн союзысьтызы. Бадӟым уж нуэмын Ю.Д.Маслюков понна, уката но Воткинскысь но Ижевскысь заводъёсын. Ӟеченыз артэ трос гинэ тырмымтэос но. Кылсярысь, кызьы пусйиз полковник Ходырев, егитъёсын кусып тупатон ласянь палэнэгес кылё глазовъёс. Та понна янгыш, шуыны луоз, республикаысь Офицеръёслэн огазеяськонзы но. Кык ар ӵоже солэн кужмыз ӧз тырмы вутскыны котькудаз воинской часте, армиысь ветеранъёс доры. Конференцие люкаськемъёс пӧлысь тросэз веразы газетъёслэн редакциосынызы кусып тупатыны быгатымтэзы сярысь но. Тӥни малы огазеяськонлэн лэсьтэм ужез но шараяськытэк кылиз. Кенешонын лэчыт ужпум ӝутскиз Россилы Президент быръёнэн валче. Офицеръёслэн мылкыдызы кыклы люкиськиз. Одӥгъёсыз меӵак веразы Геннадий Зюгановлы дурбасьтэмзэс, мукетъёсыз синмаськемын Владимир Путинлы. Огъя малпанэ ӧз вуэ. Озьыен, котькудӥзлы право сётэмын аслыз кельшись кандидатэз бырйыны. Полковник А.М.Васильев сюлэмшуген вераськиз егитъёсты бордазы кыскон пумысен. Ижевскын, шуом, со умой радъямын. Офицеръёслэн союззы кусып тупатӥз суворовоской но нахимовской училищеосты быдтэмъёсын кадет классъёсын, "Ожгарчи" клубен. Но музон городъёсын но районъёсын та удыс аналтэмын, шуыны луоз. Егитъёсты армие дасян вылын со уката но юн шӧдӥське. Кызьы шуиз подполковник В.Ю.Боринец, огазеясконмы мыло-кыдо ассэ возьматэ быръёнъёс азьын гинэ, собере интыямы пукиськом, соин ик улонлэсь но бере кылиськом ни. Музонгес югдур Можгаын. Татысь офицеръёслэн союззы вань быгатонозэ лэсьтэ азьвыл военнослужащийёслэсь улон условиоссэс умоятон понна. Та дыр ӵоже гинэ 16 семья выль квартирае выжиз, котькуд мылкыд карисез быдэс 10 сотка мерттӥськон музъем басьтӥз. Асьсэлэн ужан радлыкенызы люкаськемъёсты тодматӥзы казакъёс. Соослэн куронъёссы чурытэсьгес, уставзы но мукетгес. Офицеръёслэн союззылы ӧзгес кельшы. Конференцие люкаськемъёс асьсэлы кивалтӥсе нош ик кельтӥзы В.В.Ходыревез, со понна дурбасьтыса вераськизы полковник Н.Д.Украинец, капинат Н.П.Юшков но куд-ог мукет эшъёс. Л.Медведева. Мазай Бабай но луд кеч? Малпамтэ шорысь Киров улосысь Андрей Паненков пӧйшурасьлэн дораз кылдӥз паймымон семья. Алиса нимо коӵышез, солэн аслаз пиосыз ӧй вал, вить пичи луд кечъёслы сюрмумы луиз. Тазьы со вал. Огпол пӧйшурась сюрес урдсысь шедьтӥз сӧсырмем, пинал ваёно луд кечез. Дораз ваиз гинэ но, пӧйшур лулзэ сётӥз. Андрей солэн кӧтысьтыз порыса пичи пиоссэ поттӥз. Быдэс семьяен сюдӥзы соосыз йӧлэн, нырысь - пипеткаен, собере - соскаен. Но тужгес но сюлмаськиз Алиса коӵышсы. Луд кечпиосыз со маялляз но, нюлылӥз но. Пӧйшурась соосты интыяз вуж изьые. Луд кечпиос чырткем будӥзы. Табере одӥг вамышлы но уг кылё коӵышлэсь. Нуналлумбыт квартираетӥ бызьыло, ӝыт ваньзы огинын изё. "Эктон корка" 24-тӥ тулыспалэ 19 часэ Иж карысь Егитъёслэн юртазы Пичи залаз адӟыны но дышетыны быгатоды немец, карел, норвег, финн мадьяр, пор но удмурт эктонъёсты. Ӧтиськом вань мылкыд карисьёсты! ОГАЗЬЫН, КАПЧИ МЫЛКЫДЫН Ваньмыз со "Эктон корка" - Эшъёссэ озьы люка. Кӧтӝожед ке вань сюлмад, Лыкты дорамы чаляк... Туэ "Эктон коркалы" кык ар тырмиз. Туж ик трос ӧвӧл ке но, со асьме культурамес азинтонын бадӟым вамыш лэсьтӥз, ас котыраз трос эшъёссэ люканы быгатӥз. Нош тодӥськоды-а, мар со - "Эктон корка"? Кыӵе солэн алпаъёсыз, ужан амалъёсыз, ужпумъёсыз? Нырысь ик вераны кулэ, "Эктон корка" студиез кылдытӥзы егит тодосчи Андрей Прокопьев но хореограф Наталья Чиркова. Зэмос калык культураез, фольклорез азинтонын соос выль ӧр шедьтӥзы. "эктон корка" - со, нырысь ик, эктон ӝыт, А.Прокопьевлэн верамезъя, "со концерт ӧвӧл. Концерт но, фольклор ӝыт но - учкись ласянь вераса - эктон-кырӟан быгатонлыкез уг будэто, малы ке шуоно, учкись ачиз уг но кырӟа, уг но экты. Со огшоры шутэтскись, учкись но кылзӥсь. Нош "Эктон коркалэн" радыз юри тупатэмын озьы, лыктэм куноос эктыны быгатонлыксэс котыр ласянь мед азинтозы". Бен, татчы лыктэмъёс огшоры гинэ уг экто - калыкмылэн вашкала дырысь возиськем чебер эктонъёсыныз, шудонъёсыныз тодматско, шутэтско, капчи мылкыд басьто. Кыкетӥез, "Эктон корка" - калык эктонъя студия, со юрттэ (!) эктонъёсыз калык пӧлы вӧлмытыны. Со дыре ик аслэсьтыз репертуарзэ гуртысь ваем-бичам эктонъёсын узырмытэ, аутотентичной фольклор коллективъёслэсь дышетскыса, тодон-валан басьтэ хореограф но чеберлыкъя кивалтӥсь постановкаез йырысьтызы уг малпало, кызьы со ӵемысь луэ самодеятельной коллективъёсын. Наталья Чиркова аслэсьтыз малпанъёсстэ тазьы усьтэ: - Мон будӥ ӟучъёс пӧлын. Уг тодӥськы, кызьы но малы пичи дырысеным ик удмурт эктонъёс борды кыстӥськи. Малпанмы, уж вылын быдэсмытозь, туж кема "кисьмаз". Ми Андреен одӥг кылэ вуим, но ум тодӥське вал ай, кыӵе со луоз, "Эктон корка". Синмес усьтӥз Венгриын вӧлмем "танцхаз" ("эктон корка") нимо фольклор движение. Солэсь адӟем карим, шуыны луэ. Озьы пӧрмизы эктон ӝытъёс но студия. Ми азьын туж бадӟым, вормонтэм кадь ужпум сылэ. Капчи ӧвӧл сое быдэстыны, но туж шумпотӥськом, куке гуртысь песяйёс милемыз туж ушъяса верало - соослэн ӟеч кылзы ми понна тужгес но дуно. Али студиын 16 егит эктӥсьёс, соос пӧлын 2 арганчи. Малпаськомы, азьланяз газетэз лыдӟисьёс умойгес тодматскыны быгатозы усточиосынымы. Кызьы верамын вал ини, "Эктон корка" асьме дорын кылдӥз, Венгриысь эктон сямъёслэсь адӟем карыса. Та сямез "Эктон коркамы" быдэс Удмуртие, озьы ик солэн палэназ вӧлмытыны кулэ. Тудву кадь пачыласа мед ортчоз со шаертӥмы. Котькуд городын, котькуд гуртын мед луоз таӵе "Эктон корка", удмурт калык, тужгес но егитъёс, мед тодозы, яратозы вуныны кутскем эктонъёсмес, кырӟанъёсмес, крезьгуръёсмес, мед данъяськозы удмурт луэменызы. Эшшо одӥгез, мар туж шумпоттэ, сюлэмез бугыртэ, лулэз бурдъятэ, "Эктон корка" - со эшъёсын пумиськон, выль тунсыко адямиосын тодматскон. Эктыны сяна, татын луэ кырӟаны, арганэн яке мукет музыкальной инструментэн шудыны, кылбуръёс вераны, серекъятыны - огкылын вераса, котькыӵе быгатонлыктэ возьматыны луэ. Семья пушкын сямен ог-огедлы матэ кариськыны, котыр ласянь астэ усьтыны быгатӥськод. Таяз учыре ас киынызы лэсьтэм-вурем дӥсьёсынызы тодматозы Ижевскысь 7 номеро училищеын дышетскись нылъёс. "Эктон корка" герӟа но огазея капчи мылкыдоосты, задор сюлэмъёсты. Асьсэос "эктон коркалэн" эшъёсыз тазьы верало малпанъёссэс. - " Нош татчы вуимы капчи мылкыдын. Малпаськомы, "Эктон коркалэн" кужымез уз быры". (Кузьмина, Камашева, Тарасова). - "Котькуд мылкыд карись татчы лыктыса эктыны-кырӟаны дышетскыны мед быгатоз. Ми ӧм малпалэ вал, татчы туж трос капчи мылкыдо адямиос люкасько шуыса". (Алексеева, Смоленцева, Седова, Тарасова). - "Это была прекрасаная идея создать танцевальный дом, где участники и зрители все вместе разучивали народные танцы, песни и игры, все заряжались энергией танца и не хотели расходиться. Хочется, чтобы эта традиция был продолжена...". (Ольга Александрова). - "Татын ми шӧдӥм: секыт дыр шоры учкытэк, удмурт культура выльдӥське. Кӧня татын егитъёс - арессыя гинэ ӧвӧл, мылкыдзыя но. "Эктон коркалы" сӥзем потэ кема но пайдаё улыны. Соин ӵош асьме егитъёслэн ас дор палъёсынызы данъяськонзы медбудоз". (Н.Александрова, Л.Терентьева). - "Ми туж шумпотыса тодматским удмурт эктонъёсын, возьматӥм асьмелэсьсэ но - Удмуртиысь поръёслэсь эктонъёссэс. Оскиськом, таӵе пумиськонъёс азьланяз но юрттозы ог-огмылэсь культурамес кыкна ласянь ик азинтыны". (Иж карысь поръёслэн огазеяськонзы). - "Эктон корка", сӥзиськом ваньзэ умойзэ гинэ! Котьку но мед луоз тӥ котырын шуныт мылкыд, шулдыр кырӟан, капчи эктон!" (Егитъёслэн "Шунды" дэменлыксы). П.С. Тодады вайытӥськом, "Эктон корка" толэзьлы быдэ, берпуметӥ покчи арняе, 19 часысен люкаське. Сьӧрады вайыны быгатӥськоды чебер кырӟанъёстэс, арганъёстэс, тунсыко шудонъёстэс. А.Петрова. Таиз тулыс мукет Чебер кырӟанэз яратӥсьёс! 2-тӥ мартэ Удмурт драмая кун театрын тӥ понна но тӥледын - Надежда Уткина, Ирина Габитова, Иван Григорьевых, Игорь Михайлов. Ӝытбыт - удмурт но ӟуч кылын шулдыр кырӟанъёс. Тӥ адӟоды мукет Надежда Уткинаез, солэсь выль кырӟанъёссэ. Саксофон, флейта, рояль бугыртозы мылкыддэс. Лэсьтэ асьтэлы праздник - матэктытэ тулысэз. Надя яратэ тӥледыз но хризантемаосты. Сазьтӥськиз Санкт-Петербургысь дас вить аресъем пияш малпаз песятаезлэн машинаеныз ворттылыны. Огъёзоосыныз ӵош кык ӟенелик водка юыса, эшъёсыныз ӵош пуксиз инвалид пусэн вуж "Запорожец" сьӧры. Юэмъёс соку ик ӧз синйылтэ милицилэсь дугдыны куремзэ. Руль сьӧрысез сыӵе небӟем, пыд йылаз но уг лу сылэмез. Сюрес вылэ усиз но, ньыльпыдъяськыса милиционер доры сузьтӥське. Нош погонэн адями воксё но мукет машинаез дугдытэ вылэм ук. Кыӵе паймиз, "Запорожецысь" "инвалидлэсь" гызмыльтэмзэ адӟыса. "Тӥ мар, мынэ, мынэ, мон ӧй дугдыты тӥледыз!" - черетскиз постын сылӥсь. Тае кылыса, пияш шумпотэменыз тэтчиз но - чаляк машинаяз зымиз. Йыртэмасез ӝегатӥзы вуоно постын. А.Калачева. Конкурслы йылпумъянъёс Гурла "Ингур" радио Удмурт радиолэсь вакчи тулкымъёс вылын эфире потӥсь радиоверанъёссэ калык шумпотыса пумита. Шаерысьтымы но дуннеысь, бускельёсмы дорысь иворъёсын артэ трос тодон-валан сётӥсь, секыт дыръя буйгатӥсь, шулдыр крезьгуръёсын мылкыдэз бурдъясь радиоверанъёсты кылзыны луэ. Нимыз но калыклэн сюлэмызъя луиз: "Ингур" - жингрес удмурт кыл, со возьматэ адямиос доры инметӥ, омыретӥ вуись гурлэсь, веранлэсь жильыртэмзэ, гурламзэ. Кылӥськоды, луоз, тросэзлэн радиостанциослэн ӧтён-вазиськон гурзы вань, нош малы милемлы но со выллем кырӟан-салам кылдытонтэм? Озьы Удмурт радио но "Удмурт дунне" газет пыр ялэмын вал кырӟанлы тупась тямыс чуръем кылбурлы конкурс. Мыло- кыдо радиокылзӥсьёс гожтэтъёсын но, телефон пыр но кылдэм чуръёссэс редакцие вуттӥзы. Конкурсэ пыриськиз 48 мурт. Уноез соос пӧлысь 2-5 кылбуръёссэс ыстӥллям. Ӟечлыксыя, пуштроссыя пӧртэмесь, отын ик кылбуран удысын шаерамы тодмо луэм адямиослэн но, нырысьсэ ручка кутэм муртъёслэн но чуръёссы. Удмурт улосмылэн вань сэрегъёсаз улӥсьёс со. Жингрес, чебер чуръёсты котькудзылэсь шедьтод. Бадӟым тудву кадь кылӥське крезьгур - Лэйкась тулкымъёсын лыктӥсь "Ингур" (Мария Васютина, Завьял ёрос, Выль Казмас.) Азвесь гуръёс гурлало, Визьмо кылъёс буйгато, "Ингур" тулкымъёс лобо, Пырак сюлэме пыро. (С. Савельев, Иж кар.) Зарни но азвесь кылӥськоз куара, Туннэ удмуртъёс кырӟало шара. (Н. Широбоков, Шаркан ёрос, Порозово.) Эфирын ӵукна, нуназе но ӝыт Даурмес сэзёмытэ радио "Ингур". Кылзытэк сое ноку но уд ӵыд, Удмуртъёс понна - со улон крезьгур. (А. Петров, Иж кар.) Калыклы даур гырлы - "Ингур" радио гурла. (С. Игонин, Иж кар.) Куректӥсьсэ шумпоттытэ, Сюлэмъёсты эмъя-шунтэ, Пӧсез тырме вань кылзӥсьлы, Пиналэзлы но пересьлы. (А. Перевощиков, Иж кар.) Со котьку тыныд юрттоз, Секыт дыръя буйгатоз. (Н. Пименова, Пичи пурга ёрос, Гожня гурт.) Учконо ке, тросэзлэсь гожъямъёссэс, кӧня ке тупатыса, "Ингур" радиолы кырӟанлы инъет карыны луоно. Котькудӥзлэн шӧдӥське радиоез гажаса сюлмысь вазиськемез. Любовь Тихонова припевен дась кырӟан ыстэм, Ф. К. Баталов (Завьял ёрос, Вылӥ Женвай) серем пыр кузь медёс пӧрам. Котькудӥз сярысь луысал умойзэ вераны, но али кӧня ке кыл тырмымтэос сярысь. Конкурсэ пыриськисьёс пӧлысь уноез валаллямтэгес, лэся, куронъёсмес. "Ингур" сярысь кырӟан луыны кулэ ӧвӧл со, "Ингур" радиолэн кылзӥсьёсызлы ӧтён-вазиськон кырӟанэз мед луоз. Тросэз кылбуръёс яке кузесь (8 чур сярысь вунэтэмын), яке эфирез нуисьёсты гинэ данъямын, яке одӥг адямилэн-авторлэн нимыныз "Ингур" радиоез гажамезяратэмез сярысь гожтэмын (нош радио быдэс шаермы понна ужа). Озьы вань кылбуръёсты пыр-поч эскерыса, таӵе огкылэ вуимы. Нырысетӥ инты сётоно Иж карысь Елена Петровалы, удмурт кун университетын ужась нылмуртлы. "Ингур" радиолы со куинь чебер кылбур вуттэм. Кыкетӥ интыын милям эшмы, "Визыл" программалэн режиссёрез Юргис Алексеев (асьмеос но ум тодӥське вал, режиссёрмы кылбураны но яратэ шуыса). Куинетӥ интыын - Серафима Пушина-Благинина. Со кылбураз рефрен амалэз кутэм - чурез вискатыса, "Ингур" радиолэсь нимзэ поттылэ. Та вормисьёслы синпель кузьымъс сётэмын луозы. Со сяна, нимысьтыз пусъемын эшшо кӧня ке авторъёсмы. Елена Ямщикова (УдГУ), Семен Савельев (Иж кар), Николай Широбоков (Шаркан ёрос, Порозово), Любовь Тихонова (Иж кар), Надежда Ходырева (Як.-Бодья ёрос, М. Ошворцы), Алексей Ельцов (Иж кар), Мария Васютина (Завьял ёрос, Выль Казмас), Владимир Симаков (Иж кар), Анатолий Перевозчиков (Иж кар), Лилия Бакаева-Рыбакова (Алнаш черкогурт), Анатолий Петров (Иж кар) басьтозы на "Ингур" радиолэсь кузьымъёссэ. Ӟечкыласькомы ваньзэ ик вормисьёс радэ потэмъёсты, тау кариськомы ваньзылы конкурсамы пыриськемъёслы. Туж бадӟым тау конкурсэз ортчытыны коньдонэн юрттӥсьёсмылы: Иж карысь "220 Вт" (кивалтӥсез Николай Соловьёв) но Алнашысь "Дядя Ваня" (кивалтӥсез Иван Самсонов) магазинъёслы. В. Исламгареев. "Ингур" радиоэфирез нуись но конкурсэз радъясь. Атыкай музъеммес утисьлэн нуналэныз! Гажано эшъёс! Кун Кенешлэн но Правительстволэн нимынызы вань сюлмысьтымы ӟечкыласьком тӥледыз Атыкай музъеммес утисьлэн нуналэныз! Та нунал бадӟым инты басьтэ Россиысь мукет праздникъёсын ӵош, котькудмылэн сюлэмъёсамы со ӝуатэ югытэзлы оскон, данъяськон мылкыд. Котькуд ар та нуналэ асьме калык пусъе Россиысь солдатлэсь Атыкай музъеммес утёнын бадӟым вормонъёссэ. Асьме армия уно пол возьматӥз ини котькыӵе вакытъёсы вормонтэм луэмзэ. Калык ноку уз вунэты вордскем шаермес фашистъёслэсь утисьёсты, сослэсь кышкатэк, улонзэс жалятэк нюръяськемзэс. Туннэ но Атыкай музъеммес утисьёс котькыӵе шуг-секытъёсты чидало но вормо. Музъемозь ик йыбырттӥськом тӥледлы, гажано ветеранъёс, солдатъёс, офицеръёс. Будӥсь егитъёс котьку тодазы возёзы но адӟем карозы асьме пиосмылэсь но нылъёсмылэсь лэсьтэм подвигъёссэс. Бадӟым тау тӥледлы, Атыкай музъеммес утисьёс. Юн тазалык, ӵуказе нуналлы оскон, семьяосады тупаса но шудо-буро улон. Удмурт Республикаысь Кун Кенешлэн Удмурт Республикаысь Правительстволэн. Тӧроез А. А. Волков. Тӧроез Н. А. Ганза. Котьку калыкен артэ Матэктэ Атыкай музъеммес утисьёслэн нуналзы. Соин валче толон Удмурт Республикаысь Кун Кенешын ортчиз шаерамы интыяськем воинской частьёслэн командиръёсынызы пумиськон. Офицеръёсты праздникен ӟечкылазы Кун Кенешлэн Тӧроез Александр Волков, Правительстволэн кивалтӥсез Николай Ганза, Россия Федерацилэн Президентэзлэн республикаямы оскем муртэз Виктор Балакин, Удмуртиысь военной комиссар генерал- майор Геннадий Барсков. Кызьы пусйиз Александр Волков, армия котьку но калыкен артэ вал. Тани кылем арын, офицеръёс сярысь сюлмаськыса, улон интыослы 60 сертификат сётэмын. Кемалась вераськон мынэ ни шаерамы интыям химической пыӵал тӥрлыкез быдтон пумысен. Алигес Россиысь но Италиысь Правительствоос та пумысен огъя кыл шедьтӥзы. Озьы Удмуртилы висъямын луоз ог 8 миллион доллар коньдон. Александр Волков та пумиськонын ик ивортӥз шумпотымон указ сярысь. Россилэн Президентэзлэсь ужзэ быдэсъясьлэн Владимир Путинлэн Указэзъя Удмуртиысь Шуг- адӟонъёслэсь утиськонъя но граждан оборона ужпумъёсъя комитетлэн кивалтӥсезлы Тамази Габричидзелы генерал-майор звание сётэмын, нош военком Геннадий Баранов пусъемын Россия Федерациысь МЧС-лэн "За заслуги" медаленыз. Пумиськон йылпумъяськиз шулдыр концертэн. Н. Байтеряков. Котькуд корка - телефон Кылем пятницае Ижевсклэн администрацияз журналистъёсын пумиськылӥз мэрлэн воштӥсез Валерий Кузьмин. Вераськон мынӥз шоркарын вузкарон удысэз ӟечгес радъян но асьсэ юртъеразы улӥсьёслы телефон пыртон сярысь. Берло аръёсы городын вузкарон но сиськон интыослэн лыдзы чутрак будӥз. Кемалась ик ӧвӧл ай арлы быдэ 90-100 мында выль сыӵе интыос усьтӥсько вал. Али Ижевскын ужа 1281 магазин, 750 киоск но 240 сиськон инты. Зэм, соос тырмыт но таула куронъёсъя уг ужало, калыклэсь кулэяськонъёссэ лыдэ котьку ик уг басьто. В.Кузьминлэн верамезъя, табере бадӟым лыдпусъёс бордысь выжоно вылӥ ӟечлык борды. Тужгес но бадӟым саклык висъяны кулэ киоскъёслы но пичи базаръёслы. Номыр выльзэ уд вера, данакез киоскъёс ульчаосты воксё уг шулдырто, кыӵе ке будкаослы укшало шуид ке. Соин ик соосты огъя архитектурной туслы тупась кароно. Со дыре ик бордазы лэсьтоно пичи вузкарон залъёс но павильонъёс, уката но - транспортэз возьман интыосын. Пичи базаръёсын но вузкаронэз ялан син азьын возьытэк уг луы. Выль ужрадъёс пӧлын - табере тамакен вузарисьёсты кассовой аппартъёстэк ужаны уз лэзе ни. Со сяна, соослэн, патентъёс интые, лицензиоссы луыны кулэ. Городысь кивалтисьёс понна олокӧня дасо аръёс ӵоже бадӟым йырвисён вал телефон кыскон, уката но - нимаз коркаосын улисьёслы. Ижевскын али лыдъясько 21 сюрс нимаз коркаос но 28 пичи гуртъёс. Валамон, ваньмаз телефон кыскыны матысь дыре уд быгаты. Но тужгес но кулэяськисьёсызлы - висисьёслы, ӧлексыосы но ветеранъёслы - луоно. Соос али 2100 пала. "Пу" ульчаосы телефон кыскон - огшоры ужпум ӧвӧл. Дуно но, ужез но тачак. Вылаз ик, езъёс кыскид ке, соос чонари вотэс музэн возъялозы ульчаосты. Соин ик администрациын решение кутэмын "Тадеран" езтэк ужась телефон системаез пыӵатыны. Миым 1 миллион 800 сюрс манет тыр оборудование басьтэмын ини. Туэ та ужлы висъямын 2 миллион манет. Али мынэ ини оборудованиез пуктон. Туэ чакламын Ленин но Первомай районъёсын быдэн 106 терминалъёсты (котькудӥз 4 номерен) уже кутыны. Соос пуктэмын луозы тужгес но кулэяськисьёслы, кинлэн тужгес но бадӟым льготаосыз но кемалась ини черодын сылэ. Ваньмызлы мылкыд карисьёслы соку ик телефон кыскыны уг луы. Со дуно маке. Одӥгез ФАУ-4 терминал 2100 доллар сылэ. Со ньыль абонентлы чакламын. Данаксэ дунэз город ас вылаз басьтэ. Абонент телефон пуктэм понна 2500 манет тыроз, толэзьлы дуныз но мукет АТС-ъёсын кадь ик - 35 манет. Озьы ке но, кызьы пусйиз В.Кузьмин, матысь аръёсы телефон ваньмызлы кулэяськисьёслы кыскемын луоз. Нош кинлэн луонлыкез вань быдэскын дунзэ тырыны, город юрттытэк, солы телефон пуктэмын луоз черодтэк. Г.Тихонов. 02 ИВОРТЭ Вандо, ӵого, бышкалто Та дырозь нокин но валэктыны ӧз быгаты - мар со сыӵе яратон. Оло шумпотон, оло куректон. Котькудӥз ас сяменыз яратэ. Матысь гажанзэ нокинэн люкемез уг поты. Тани Яр ёросысь Озерки гуртысь 51 аресъем пиосмурт аслэсьтыз ньыль ареслы егитгес кузпалзэ бышкалтӥз. Вожаменыз сэрен пыраклы яратонэныз люкиськиз. Ува ёросысь Каркалай станциысь 39 аресъем кудӟем кышномурт керетӥз 40 аресъем А.- ен. Трос ик кулэ вылымтэ юэм нылкышноез вожомытыны? Пуртэн пырак пиосмуртлэн сюлэмаз донгиз. Сарапулысь Сибирской урамысь одӥгаз юртын азьвыл суд улэ сюрылэм 44 аресъем пиосмуртлэн шӧйыз шедьтэмын. Йыраз тӥрен ӵогиллям. Кызьы следствие возьматӥз, сьӧд ужез пиосмуртлэн сюратаез быдэстэм. Ӵошен вина юыса пукиллям, собере ӵашетон кутскем. 64 аресъем пересьлы сюрпиезлэн мылкыдыз кельшымтэ. Шимес вал улонэзлэн пумыз Кизнерысь 24 аресъем П.-лэн. Егит кышномуртэ ымныраз мыжгаса быдтӥллям. Югдурез утисьёс солэсь шӧйзэ шедьтӥзы вазь ӵукна Савин урамысь 5- тӥ коркалэн подъездысьтыз. Ужез эскерыса, милиционеръёс таӵе малпанэ вуизы: кышномуртэз быдтӥз соин ӵош улӥсь 33 аресъем С.-их. "Вожъёсыз" дуногес Дэри ёросысь милициын ужасьёс ӝегатӥзы 23 аресъем З.-ез, Азербайджанын вордскем 23 аресъем Артур К.-ез. Соос Б.-лэн квартираысьтыз 1200 доллар лушкаллям вылэм. Асьме уксёен 34 сюрс манетлэсь тросгес луэ. Лымшор палась лыктэмъёс малпаллям капчи улон утчаны. Витьымтэ куно Игра ёросысь Зура черкогуртын улӥсь 22 аресъем Ш.-ов дор палысьтыз лушкано кадьзэ шедьтымтэ ни, лэся. Яке малпаз, дыр, палэнын йыртэмаса, вольтчыны быгатоз. Озьы зконэз утисьёсын азьвыл пумиськылэм мурт Ижевске "куное" лыктэм. Холмогоров урамысь одӥгаз коркан квартиралэсь ӧссэ тӥяз. Кузёосыз ӧвӧлтэм дыръя киултӥз телевизорез, видеомагинтофонэз. Огъя 7 сюрс манет тыр. Но "ваньбуреныз" потыкуз ӧз удалты, ӧс сьӧрын сое югдурез утисьёс кырмизы. Кинлы кабак? Алнаш-Ӟатча сюрес вылысен ГИБДД-ын ужасьёс ВАЗ-31061 машинаез дугдытӥзы. Бер тыриськонысьтыз 80 ӟенелик кабак вина шедьтӥзы. Одӥгаз но штрих-кодэз, акциз маркаез ӧй вал. Автомашиналэн кузёез К. Можгаын улэ, нош кудӟытӥсь юон Челябинскын поттэмын. Кытысь аракы багажнике вуэм, кытчы сое вузаны туртто вылэм - эскерозы Алнашысь югдурез утисьёс. Удмурт Республикаысь МВД-лэн сводкаосызъя дасяз А.Андриянов. Россия Федерацилы президентэ кандидатэ пусъем муртъёслы ивортон Удмурт Республикаысь Быръёнъя комиссия ивортэ: Россия Федерацилы президентэ кандидатэ пусъем муртъёслы эфирын дыр но печатьын инты дунтэк висъянъя пус чӧлтон ортчоз 2000-тӥ арын 25-тӥ феврале Удмурт Республикаысь Быръёнъя комиссилэн юртаз (Ижевск город, Октябрьлы 50 ар площадь, 15 номеро юрт, 705-тӥ кабинет). Удмурт Республикаысь Быръёнъя комиссия. НАТАЛЬ Вордӥськиз атай Нылпизэ вайыны курадӟемысь Люда Володяезлэсь йырсиоссэ но погмаз ни, киоссэ но вӧсь луымон кырмаз. Володя ваньзэ чидаз, кышноезлы гинэ капчигес медло. Суббота уйысен нунызы ачиз сярысь ӵемгес но ӵемгес тодаз вайытӥз. Ижевскысь 5 номеро нылпи ваён юртысь врачъёс со сярысь Володялэн бускельёсыз пыр ивортӥзы. Кышноеныз ӵош луон понна егит воргорон пеймыт урамъёстӥ ӝыны городэз пыдын ортчиз. Нылпизы вордӥськиз арня нуналэ гинэ, нуназе бере 3 часын. Берпум минутъёсаз Володя сак кылзӥськыса сылӥз ӧс сьӧрын: уг кылӥськы-а пинал куара. Нуны бӧрдэмез кылыса, сюлмыз икак луиз: кин меда - ныл-а, пи-а? Егит кузпалъёс дырызлэсь вазь тодыны ик ӧз турттэ со сярысь, ныллы ним дасяз атаез, нош пилы - анаез. Кӧня ке минут ортчыса, егит атай пизэ но кышнозэ бордаз ӝиптӥз ни. - Тон ке вӧзам ӧй луысал, операция лэсьтытэк кужмы тырмысал меда пимес вордыны, - шумпотон мылкыдзэ ӧръяз Люда кузпалэзлы. Володя та нуналэ ачиз нуны вордэм мурт кадь вал, копак катьтэммиз. Пинал ваён шудон уж вылымтэ. Малпаз, та нуналэ Людаеныз ӵош луиз ке, кышноез сое золгес яратоз но гажалоз. Егит нылкышно озьы ик оскиз, картэз вӧзаз луиз ке, семья кусыпъёссы уката юнмалозы. Нунызы зэмос воргоронъёс кадь батыр вордӥськиз - 3738- грамм но 54 сантиметр. Эшшо ке Яратӥсьёслэн нуналазы, 14-тӥ феврале, анай-атаезлы бадӟым кузьым лэсьтӥз. Экелэн нимыз Андрей. Со "Удмурт дунне" газетлэн матысь эшезлэн, фотокорреспондентлэн Владимир Камашевлэн пиез. Людмилаез но Володяез сюлмысьтымы ӟечкыласьком семьязы йылэмен. Нош Андрейлы сӥзиськом чырткем но таза будыны, Атыкай музъеммес зэмос утись луыны. Л.Малых. Кезьыт лымы но ӟырдам куас Ӵуказе Шарканын усьтӥсько гуртысь спортъя 6-тӥ тол шудонъёс - "Удмурт дунне" газетлэн кубокез понна куасэн 49-тӥ бызьылонъёс. 50-тӥ шудонъёс азьын газет печатла 1952-тӥ арысен таӵе ӵошатсконъёсысь вань вормисьёслэсь нимтулъёссэс. 48 ар куспын азвесь кубокез утылӥзы таӵе районъёс: 1 пол - Кулига, Иж, Балезино, Ува 2 пол - Игра, Вотка, Якшур-Бодья, Яр 7 пол - Глазов 8 пол - Шаркан 9 пол - Завьял 12 пол - Можга. Учкелэ 3-тӥ бамез - тодады ваелэ азьло стартъёсмес - утчалэ дано тодмоостэс! Кин басьтоз кубокез туэ? Лыдӟелэ "Удмурт дуннеез" - тододы! Кун Кенеш ивортэ Кун Кенешлэн Тӧроез Александр Волков городъёсысь но ёросъёсысь администрациослэн кивалтӥсьёсынызы кенеш ортчытӥз. Со тодматӥз матысь дыре быдэстоно ужпумъёсын. Нырысь ик - куинь ар ӵоже республикаез поттоно дотация чотын улӥсьёс пӧлысь. Со понна луонлыкъёс вань. Берло аръёсы огсыр, пайда вайса ужаны кутскизы шаерысьтымы нефть поттӥсь но обороная промышленность. Бюджетэз узырмытыны озьы ик юрттоз Ижевскысь машина поттӥсь заводэз вань луонлыкъёсты кутыса ужатон. Кун Кенешлэн Тӧроез промышленностья министр но "Ижмаш" огазеяськонлэн кивалтӥсез азе ужпум пуктӥз: автомобиль поттонэз туэ арын 30 сюрсозь вуттоно. Промышленностьын вузъёс поттонлэсь быдӟалазэ арлы быдэ 5-8 процентлы йылэтоно. Шаерысьтымы уноезлэн предприятиослэн пайда вайыса ужаменызы, луонлык кылдӥз пенсиосъя пунэмъёсты тырыны. Туэ но шырытгес но пайдаёгес ужаса, кулэстоно уждунъя но нылпи пособиосъя пунэм тыронъёсты. Кызьы пусйиз Александр Волков, шаерамы воштӥськонъёс юн герӟаьскемын политикаен. Удмуртиын али мынэ Конституцие ватсанъёс, воштонъёс пыртон ласянь уж. Со пумысен 19- тӥ декабре ортчиз ини калык пӧлын юалляськон. Мукетыз ужпум - республикаямы Президент быръёнъя референдумлы дасяськон. Удмурт Республикаысь Кун Кенешлэн пресс-службаез. Наталь Алексей Шкляев Лыдӟелэ нылпиостылы Куа-куа (В. Гаршинъя) Сӥзьыл. Зӧк мугоро пурысь эбек шӧдэ ни кезьыт куазь вуонэз. Нюрысь куакъёс пӧлын отчы-татчы тэтча, толалтэлы кӧлон инты утча. Пилемъёс сьӧрысь витьымтэ шорысь мычиськиз ӟарыталэс шунды. Кужымез гужем мында ӧвӧл ке но, кезьыт тӧлэз зӥбыны вормиз. Куазь шуныт-шуныт кариськиз. Сое шӧдыса, эбек кыре потӥз: - Куа-куа! Куа-куа! Матын жомбыллясько вылэм луд ӵӧжъёс. Кузь сюрес вылэ потон азязы кужымзэс эскеро. Бурдъёссэс лопыръяло но черекъяло: - Лымшоре! Лымшоре! Матысь ӵӧж доры лыктыса, эбек юаз: - Мар со лымшор? Ӵӧж кырыжак учкиз: - Тон бон кин-о? - Мон-а? Мон - куа-куа. - Эбек-а, мар-а? Тон, нодтэм, лымшорез уд тодскы? Али тонэ ам! ньылӥ ке, тыныд лымшор но, уйшор но кулэ уз луэ ни. - Монэ сиыны уг яра, - пыкиськиз эбек. - Одӥг ӵӧж уллё монэ ашаны медэ вал, но курдаз. Лекос зӧк, пе, тон - ньылонэ ёркалод. Тылобурдо кисырскиз: - Бен, укыр бадӟым тон. Воньдытод эшшо. Эбек выльысь тэбине: - Соин ик мон тӥлесьтыд уг шимиськы. Мар бен со сыӵе лымшор? - Лымшор-а? Лымшор - со нясь-нясь куазь, цапляос, страусъёс, пеликанъёс, грифъёс. От соос тонэ ньылыны вормысалзы. Сьӧрамы лобӟод-а? - Ма, ачид али гинэ кӧшкематӥд ук. Тунсыко вераськонэз кылыса, мукет тылобурдоос но матэктӥзы. Ӵӧж буйгатӥз: - Мон озьы гинэ, шудыса кышкатӥ. Ойдо сьӧрамы. Дуннеез адӟод. Бертод но та нюрысь кошкылымтэ шузи-мазиосты паймытод лымшор сярысь мадёнэн. Эбек малпаськонэ усиз. Малы ке шуоно, со котьку выльзэ тодыны тыршылӥз: - Сэре кызьы-о мон лобом? Кызьы бертом? Бурдъёсы ӧвӧл ук. Мытэм гурзэ ӵӧж эшшо азьланьтӥз: - Бурдъёсыд ӧвӧл? Ма, милям соос котьку вал шат? Ми но тон кадесь ик сумбресэсь но зӧкесь вал. Лобаммы туж потӥз но, бурдъёсмы будӥзы. Озьы-а, эшъёс? - Будӥзы! Будӥзы! - черекъязы луд ӵӧжъёс. Асьсэос но ӧз валалэ, малы соослы кулэ луиз та тунсыкъяськись куа-куа, нош эшсылы мыло-кыдо дурбасьтӥзы: - Ха-ха-ха, солэн бурдъёсыз, пе, ӧвӧл. Ма, сумедын жомбылляськыса, соос будозы ке шат? Йыртэм тон. Йыртэм, соин ик бурдтэм! Быдэс дауред ортчоз та зын вуын. Возьма татын Африкалэсь дорад вамышъямзэ. Кема ӟабыльтӥзы бурдоос. Эбеклэсь падаса улэмзэ шӧдыса, чурыт куаразэс сётӥзы: - Пыкиськид ке, ми тонэ али ик кокчаса виём. - Ярам, та нюрысь но кинлы ке лымшоре вуылыны кулэ ук. Ӵӧжъёс камыш бодыез ишкалтӥзы. Пумъёссэ пиньёссы вискы пачкатӥзы но шиетӥзы: - Куртчиськы тон но! Эбеклы кылзӥськытэк ӧйлась. Модос борды вань пиньёсыныз ӝабырскиз. Быдэс уллё, шимес черекъяса, интыысьтыз вырӟиз, азьлане бызиз. Чальгес, чальгес, чальгес! Син азьын ворекъяло камыш модосъёс, ву синучконъёс, куакъёс, писпуос... Уллё ишкалскиз музъем бордысь. Со - омырын! Бадӟым эбек боды бордын юн возиське но, шурдэмзэ вунэтыны вырыса, солань-талань учкылэ. Сокем кышкыт вылымтэ. Тани уллё вӧзын уӵерак адскиз пурысь вишты. Я матэктэ, я палэнэ куриське. Кин бен со? Ӵӧжлы уг укша. Кыӵе ке музон выжыысь эбек ке шат? Вишты туж матэ вуиз. Эбек ӧз чида ни - юаз: - Тон - куа-куа. Секыт эбек, ньӧр бордысь мозмыса, из сямен уллане лобиз. Абдрам пурысь вишты солэн бӧрсяз кесяськыса вуттӥз ик: - Куа-куа? Куака мон! Ӧд тодма шат? Тонэ кокчалтыны медӥсько вал. Лобись эбек тае ӧз кылы ни. Со шлёп! сапкиськиз музэ. Шонергес вераса - тыэ. Юн шуккиськиз ке но, улэп кылиз. Табере мукет эбекъёслы весь индылэ: - Нюрын улэ куа-куа, инмын лоба куака. Нюрын - куа-куа, инмын - куака. Кудпала вамышъя "Гондыр"? 10-тӥ феврале Удмурт Республикаын пусъемын эшшо одӥг "Единство" калык огазеяськон. Куддыръя йыр пороме: кудӥз та "Единство", кин сярысь вераськон мынэ? Удмуртиын "Единство" нимын ик эшшо куинь организациос вань ни. Милемлы, журналистъёслы, шуг дышыны ньыль огазеяськонъёс вискытӥ "уяны", нош огшоры лыдӟись кызьы сомында иворез аслаз йыраз радъялоз? "Единствоослэн" парадзы кутскиз одӥг ар талэсь азьло. Выль быръем Кун Кенешын кылдӥз "Единство" фракция. Азьмынӥсез луиз Виктор Хорошавцев. Ӝыны ар ортчыса, паськыт вамышъяны кутскиз "Медведь", со ик "Единство". Кун Думае быръёнлы дасяськыса, власть аслэсьтыз огазеяськонзэ кылдытӥз. Вакчи дыр куспын "Гондыр" данакезлы сюлмазы пыӵаз. Кун Кенешлэн Тӧроезлы дурбасьтӥсь В. Хорошавцев Кун Думае быръён азьын ик Москваысь "Единстволэн" радаз султӥз. "Единство" радын вамышъясьёс, огвакытэ ик "Отечестволы" "дурбасьтӥсьёс", вунэтӥллям федеральной списоке асьсэлэсь кандидатсэс пыртыны. Хорошавцевлэн янгышез республикалы дуно усиз. Кун Думаысь "Единство" фракциын Удмуртилэсь одӥг но депутат ӧвӧл. Нош Тува Республика бӧрсьы "Медведь" огазеяськон асьме республикаын тужгес трос куара люказ. Асьме республикаын Кун Думае быръён дыръя "Единстволэн" мукетыз ваез ужаз на. Соизэ валтӥз техника наукаосъя доктор Владимир Забильский. Быръёнэ пыриськыса, со 55 сюрслэсь тросгес куара люказ. Но Кун Думаын депутат луыны со тырмыт ӧй вал. Янгыше усем республикалы Москва куратор висъяз ик. Пуктӥзы Кун Думалэсь депутатсэ, Москваын улӥсь В. Е. Коптев-Дворниковез. Котьма шу, но асьме Единство" кыклы люкиськемын. Одӥгаз - В. Хорошавцев но солы дурбасьтӥсьёс, мукетаз - В. Забильский аслаз бырйисьёсыныз. Али гинэ юнмась огазеяськон кык ӧретӥ бызе. Кудӥзлы сюрес усьтэмын? "Единстволэн" Удмурт Республикая кураторез В. Коптев-Дворников В. Забильскийлы гожтэт лэзиз. Кызьы отын ивортэмын, 3-тӥ феврале Ижын ортчытэм конференция быдэсак демократия амалэн радъямын вал. Нош Хорошавцевлы, Э. Касимовлы но Н. Хохловлы пумит сылэмез пумысен, выльысь малпаськыны ӵектэмын на. Озьы ик куратор ӵектэ Забильскийлы "Единстволэн" ужаз пыр-поч пыриськыны. Мукет сямен - властья кариськыны. "Единство" али гинэ кылдэ ай, но люкиськылыны кутске ни. Калыклы матынгес луысал ке, югдур озьы ӧз берытскысал. Чиновникъёс озьы каро. Асьсэлэсь гинэ интересъёссэс утьыса. Соос малпало кадь: ми кин пала кариським, калык одно ик шонерен лыдъялоз. А. Андриянов. НАТАЛЬ Изьы нуллэмысь воргорон уд на луы Яратон ке ӧвӧл, семья куашка. Нылпитэм коркалэн но шулдырез ӧжыт. Но улонын малы ке ӵемысь озьы шуо: кинлы нылпи кулэ ӧвӧл, солэн нуныез вордӥське. Нош кин мӧзме пинал куаралэсь, солы анай яке атай луыны шуд уг усьы. Нылпитэм семьяослы юрттон ласянь тазалыкез утён удысын ужасьёс ӧжыт уг лэсьто. Нырысетӥ республиканской больницаысь Семья улонэз радъянъя центрысь врач-андролог Андрей Иванович ГЛАЗЫРИН юрттэт сётэ шуге-леке сюрем воргоронъёслы. - Андрей Иванович, ку но кызьы кылдӥз шаерамы та выль эмъяськон удыс? - Совето власть аръёсы "секс" шуон ӧвӧлэн лыдъяськиз бере, соин герӟаськем ужпумъёс но ӧй вал. Нош ми, эмъясьёс, озьы ӧм лыдъяллялэ. Со сярысь сюлмаськись эмъясьёс ичи ӧй вал. Соин ик та центр но кылдӥз. Со вал 1992-тӥ арын. Ачим мон азьло хирург но уролог луыса ужай. Валамон, ватсаса дышетсконо луиз. Тодон-валанзэс азинтӥзы ӵош ужась эшъёсы но. Ми татын кык андрологъёс - пиосмуртъёслы юрттэт сётӥськом, нылкышноосын ужало вить гинекологъёс. Кивалтӥсьмы Светлана Петровна Кривилева тодон-валанъёссэ будэтыны вуылӥз ни Нью-Йорке но Великобритание. Со - вылӥ квалификациен врач, Тазалыкез утёнъя удысысь валтӥсь специалист. - Кызьы малпаськоды, кыӵе мугъёсын уно семьяосын нылпиоссы уг вордско? - Эскеронъёс возьматӥзы: 50-58 процентаз семьяосын пиналъёс уг вордско кызьы ке кышномуртлэн, озьы ик пиосмуртлэн янгышенызы. Шонергес вераса, соослэн тазалыксы уродэн. Дышем сямъя, пиосмуртъёс сыӵе учыре янгыш карылӥзы кышнооссэс. Нош учконо ке, таосыз асьсэос 28 процентэз янгыш вылӥллям - кышномуртъёслэсь но тросгес. Но мон али шумпотыса вераны быгатӥсько: шуге-леке усем пиосуртъёсты ми табере ваньзэс сямен эмъяны дышимы ни. Центрамы вань сыӵе эмъюмъёс но эмъяськон амалъёс, кудъёсыз ӧвӧл на мукет эмъяськонтӥосын. Верало кӧня ке учырез. Нылпиез ӧвӧлысь 1993-тӥ арын дорамы эмъяськиз араб шейх. Черодзэ возьмаса ӧс сьӧрын туннэ пуке Африкаысь лыктэм эмъяськись - мугез сыӵе ик. Вуылӥзы ни ми доры Тюмень, Санкт-Петербург, Петропавловск-Камчатский но трос мукет городъёсысь пиосмуртъёс. Озьы ик трос лыкто Ижевскысь но шаермылэн пӧртэм сэрегъёсысьтыз эмъяськисьёс. - Юрттэт сётэмды понна кӧня дун куриськоды? - Дэмланъёс сётэммы понна Ижевскын улисьёслэсь ми басьтӥськом 72 манет, ёросъёсысь ыстэм (направлениен) муртъёсты дунтэк кутиськом. Нош эмъян но пӧртэм юрттэт сётон - данакез коньдонэн. Улонэз сыӵе угось. Но семьялэсь шудзэ, кузпалъёслэсь кусыпсэс коньдонэн уд мерта. - Андрей Иванович, вакчияк вералэ вал, кыӵе куронъёсын вазисько адямиос но кызьы соосты эмъяськоды? - Нырысь интые пуктӥськом нылпи ваисьтэм семьяосты эскеронэз. Азьло кышномуртэ яке пиосмуртэ нимаз чаклаллязы ке, табере одно ик кыксэс но эскериськом. Озьы гинэ луэ шонер валэктон сётыны, эмъян амал шедьтыны. Кыкетӥез сюлмаськонмы - куашкан калэ вуэм семьялы юрттон. Валче кусыпъёс юнматон пумысен туж кулэ валэктонъёс сётӥськом соослы. Ужаськомы гинекологъёсын кенешыса, соостэк нокызьы но уг луы. Туж сюлмаськыто нылпи куштон учыръёс. Абортъёс эмъясьёс пыр гинэ уг лэсьтӥсько, тросэз лушкемен выро нылпизылэсь куштӥськыны. Со кышномуртъёслэсь тазалыксэс лябӟытэ, кулон учыръёс но луыло. Та ласянь пиосмуртъёслы но чакласькыны кулэ, кышномуртъёсты шуг-секытэ вуттонлэсь эскериськоно. Вазиськисьёс вань пиосмурт кужымзы быремысь. Со потэ пӧртэм мугъёслэсь. Шӧдскытэк уг кыльы инкуазьлэн кырсёмемез. Куд-огез армиын дыръязы радиация улэ шедё - Чернобыле ветлэмъёс озьы юмоке сюризы. Мултэс вина юисьёс пиосмурт данэнызы люкисько, соослэн нылпиоссы вордско ке но, уноез висись но ляб визьемесь. Кудзэ эмъяно луэ "яратон" висёнъёслэсь. Но вань на воспалительной висёнъёс: простатит, уретрит, везикулит, геморрой но пӧртэм паласькись висёнъёс. Валче кусып возьыкузы, пиосмурт но кышномурт борды аляны быгатоз хламидиоз, уреаплазмоз, микопалзмоз, герпес, ноо мукет со выллем висён. Тани хламидиоз - трахомасин висёнлэн 17 пӧртэмлыкез пӧлысь одӥгез. Таӵе висёнъёсты ми капчиен эмъяны дышимы ни. Но одно ик ӵош эмъяно кышномуртэ но пиосмуртэ. Висёнъёс пумысен веранме тазьы йылпумъяме потэ: валче кусыпъёссы кузпалъёслэн чечыё уйёслы пӧрмыно быгатэ ке, семья номырин люконтэм луоз. Тямыс ар ӵоже андролог луыса ужатозям, пиосмурт кужымзылы оскисьтэмъёслы трос гинэ юрттӥ ни, куд-огезлы операция лэсьтоно луылӥз. Пиосмуртлэн, кышномуртлэн сямен ик, климакс вакытэз вуэ. Сыӵе дыръя пӧртэм дэмланъёс вань: кызьы эмъяськоно яке кызьы астэ шонергес возёно кышномуртэн. Яратон - тылскем выллем, пу куятэк со кысоз. Ми, андрологъёс, со яратон тылскемез утьыны турттом. Кыӵе ке шуг-секытъёсты кылдӥзы ке, вазиське дорамы, асьтэ тодэмъя ноку эн эмъяське. Жингыртыны луоз таӵе телефонъя: 26-55-74. П.Скобелев. Наталь Кылем арын вордӥськем пиослы тросгес Саша, Никита, Дима, Максим, Даниил ним сётъязы. Шер пумиськыло Радамир, Савелий, Никон, Богдан, Глеб, Филипп, Ярослав но Светослав. Кызьы шуо, пыӵал ас понназ но, пе, одӥг пол ыбе. Нош осконтэм киосы ке шеде! Ижевскын нош ик ӝегатэмын пыӵал тӥрлыкен вырисьёс. Таяз учыре воргорон пиеныз йӧндыро вылэм пистолетъёсты бичан-вузанэн. Соос киысь шедьтэмын 2ПМ, 1ПММ, 1ПСМ маркаё пистолетъёс. Гумыосазы тупатэмын вылэм ыбем куараез кысӥсь глушительёс. Озьыен, та тӥрлык коньдон тырыса адями виисьёслы, "киллеръёслы" чакламын вылэм. Али та ужез эскере следствие. ФСБ-лэн Удмурт Республикая управлениезлэн пресс-службаез. Мӧйыосты уг вунэто Вавож ёросын али 4620 пенсионер. Ортчемез 1999-тӥ ар мӧйыослэн аренызы лыдъямын вал. Но со уг вера, туэ мӧйыос сярысь сюлмаськон лябӟоз шуыса. Ожысь но ужысь ветеранъёслы ёросысь кенешенызы кивалтэ Л. В. Шестаков. Леонид Владимировичлы мӧйыос ӵемысь вазисько улон интыоссэс тупатъяны курыса. Берло дыре 12 семьяе телефон пыртэмын, со понна дун но ичигес басьтӥське. Тросэзлы дунтэм дунын эстӥськон сётэмын. Жаляса верано луэ: кунмы котьку уг ни юртты. Но ёросысь ужбергатӥсь И. М. Обухов но М. М. Ушков ожысь ветеранъёслы кузьымъёс басьязы. Ёрослэсь юбилейзэ пусйыку, Удмурт Республикалэн Почёт грамотаосыныз пусъемын вал ёрос понна трос лэсьтэм адямиос Е. В. Семин, Т. И. Пресслер но Н. Г. Радыгина, 13 адямилы сётэмын кузьымъёс. Нош Вормонлы 55 ар тырмонэз пусъёнлы ёросын али дасяськыны кутскизы ни. Со понна кылдытэмын оргкомитет, соин кивалтэ В. П. Абашев, ёросысь администрацилэн главаезлэн юрттӥсез. П. Николаев. Куронъёсынызы - депутатсы доры Котькуд толэзьлы быдэ, одӥгаз удмурт арня нуналэ Удмурт Республикалэн Кун Кенешезлэн депутатэз В. А. Соловьев аслаз бырйисьёсыз доры Вавоже вуылэ. Тани берло пумиськоназ Виталий Александрович доры ветлӥзы кызь пала бырйисьёс. Вавож черкогуртысь нылпи садъёслэн кивалтӥсьёссы Н. В. Соловьева, О. А. Сухарева но Л. Ф. Зорина куризы нылпиосты сюдонэз умоятыны. Депутат вераз, правительство пыр куронзэс быдэстыны тыршоз шуыса. Уже интыяськон пумысен вуылӥз куинь мурт. Е. И. Филимоновалэн висись нылызлы эмъюм висъялозы. В. Р. Репиналэн висись нылызлы кардиостимулятор сётозы. Уноезлы бырйисьёслы юрттэт сётӥськоз транспорт висъян яке улон интызэс тупатъян ласянь. П. Николаев. Наталь Психологен кенешон Уг ке вожа - уг яраты? Мон ужасько Культура юртын. Ӵемысь ӝытъёссэ отын ышылоно луэ ужрадъёс, концертъёс дасяса, но малы ке но монэ картэ... уг вожа. Куддыр сыӵе потэ, уж вискам мед жингыртоз, пумитаны мед лыктоз, ужрадам мед пукоз шуыса. Но со нокыӵе уг кариськы, доре сяськаен бертыкум но кытысьсэ уг юа. Ачиз со туж умой адями, но монэ уг яраты кадь потэ. Ира Э. - Тодӥськоды-а, Ира, тӥледлы туж но туж удалтэм. Тӥляд кузпалды туж валась, тӥлесьтыд уждэс гажась адями. Вылаз ик дорысьтыды вань уждэс лэсьтыса тӥледды возьма ке, со урод шат? Вераллялэ куддыр асьтэос, жингыртэмзэ возьмаськоды, мӧзмиськоды шуыса, ӧтё асьтэлэн ужрадады. Тӥ сыӵе вамыш ӧд лэсьтэ на ук, озьы-а? Быгатэ дунъяны кузпалдэс таӵеен. Пие атайзэ гинэ дунъя Мон туж яратӥсько пиме. Но мыным потэ, со атайзэ гинэ яратэ шуыса - соос ялан ӵошен: шудыкузы но, маке ужакузы но, сиськыны, кӧлыны гинэ но атаеныз. Мон тыршисько сое эркияны, ческыт сиёнъёс, басьяны, но озьы но мон котыре ӧжыт кариське. Яратэ ик-а со монэ? Тамара Л. Пинал яратэ анайзэ но, атайзэ но. Со туж ӟеч вала соослэсь кусыпъёссэс. Огвакытэ тӥ асьтэос пиналдылы ӧжытгес саклык висъяськоды луоз: гуртпӧрез ужаса ялан мукет. Со вакытэ тӥледыз атаез воштылӥз - со озьы ик луыны кулэ. Яке солы кельшегес атаеныз шудыны - тӥ ӧд шӧдылэ-а пиосмуртъёс пичиосын умой-умой шудо, нош нылкышноос - ньӧмыз понна гинэ. Тӥляд пиналды туж шудо: сое ярато, нош со яратэ тӥледыз. Тодӥськоды-а, кызьы валэктӥз одӥг пинал, кинэ золгес яратӥсько юанлы (та юанэз сётъяны уг яра ке но)? Мапаме. Соин ик тӥляд сюлмаськемды юнме. И. Горбунова, Республикаысьтымы "Егит семья" центрысь психолог. Сюлмысь тыршись "Мылысь-кыдысь" Зол. Туж зол. Паймымон зол. Таӵе дунъет сётӥзы Удмурт телевидениысь "Мылысь-кыдысь" программалэн 100-тӥ передачаезлы сӥзем ужрадэ ветлэмъёс. Осконтэм кадь, но зэм. Сюрслэсь ятыр билетъёс "Металлург" культура дворецлэн кассаысьтыз куинь нуналскын быриллям. Кыӵе гинэ яркыт кизилиос та тужгес но дано сцена вылын ӧз ворекъялэ ни, но билетъёс сокем ӝог ноку ӧз вузаськелэ на, пе. Ма, ас вылам но тае шӧдӥ. Пумиськонэ мыныкум, мултэс билет юаны кутскизы Правительстволэн юртэз дорысен ик. Залын радъёс вӧзы быдэн кык пукон ватсаса пуктэмын вал на ке но, инты озьы но ӧз тырмы. Уно дасо адямиос ураме кылизы. Жаль. Нош мукет ласянь - шумпотымон. Калыклэн ӝытэз адӟыны тыршемез мылкыдэз бугыртэ ук. Озьыен, адямиослэн адӟемзы потэ телевидениын ужасьёсты, кырӟасьёсты, ог-огзэс. Вазен филармониысь залэ но тырмыт учкись люканы шугъяськиськом вал, табере "Металлургын" инты уг тырмы. Тани нылкышноослэн праздниксы азьын отын кырӟалоз калык артистка Валентина Пудова. Солэн концертаз но вань билетъёс вузамын ни. Туж умой со. Я, передачалы матэгес. Кык ар ӵоже "Мылысь-кыдысь" сюлэсь ятыр тодмо адямиос пыриськизы ни. Кин но со шуэ вал, ӝоген, пе, куное нокинэ ӧтьыны луоз ни. Сыӵе верамъёслы пум понӥзы передачаез нуисьёс Анна Федотова но Валерий Сидоров. Черодын, кӧня ке арлы тырмымон адямиос сыло ни, шуизы оос. Озьы ик вань, вылды. Уго залэ люкаськемъя но адӟиськиз, макем трос асьме пӧлын маин ке но висъяськись муртъёс. Тани артистка но журналист Светлана Кибардина аукцион ортчытӥз, передачалэн фондэзъя дасям видеокассетаез басьтыны ӵектӥз. Солэн дуныз дас манетысен 600-озь вуиз. Кассета шедиз Владимир Шкляевлы, аслаз верамезъя, огшоры ужасьлы. Передача лэсьтӥсьёсты ӟечкылазы Павел Вершинин, Виктор Шудегов, Валентин Тубылов, мукет тодмо адямиос. Шедизы меценатъёс но - коньдонэн юрттӥсьёс. Соос пӧлын Ваелрьян Никитин (Завьял ёрос), Александр Фокин (Ижевск), Аркадий Вершинин (Можга ёрос), Анатолий Максимов (Кез). Ӝытлэсь пуштроссэ вераны кулэез ӧвӧл кадь. Сое адӟоно вал. Сюлмысь кылъёс, серекъян, олокыӵе но ӵошатсконъёс - ужрадэз дасясьёс олома но малпаллям, ява. Празднике ӧтиллям (оло, асьсэос куриськизы-а?) вань кизилиосмес. Люкаськемъёсты шумпоттӥзы Любовь Быкова, Геннадий Ганьков, Надежда Уткина, Алексей Ложкин, Валентина Пудова, Геннадий Бекманов но трос мукетъёсыз. Туж шумпоттӥзы асьсэос телевидениын ужасьёс. Соос возьматӥзы артистъёс сямен кырӟаны-вераны быгатэмзэс. Оскон вань, та ӝыт кызьы ке "Мылысь-кыдысь" передачалэсь, озьы ик быдэс "Удмуртия" ГТРК-лэсь данзэ шӧдскымон ӝутоз шуыса. Дворецысь потыкум тодматски отчы ветлэм мӧйы кышномуртэн. Антонина Мазур Ижын улэ. "Мылысь- кыдысь" сярысь иворез кылыса, со кык пол ветлэм кассае - билетъёс нырысь вайылӥллямтэ на вылэм. Куинетӥ нуналаз удалтэм. Черодын сылыса, со билет басьтэм. Туж шумпотэ концертэз адӟемезлы. Улонэз адӟи ке, шуэ, вуоно арын но одно ик мыно. Тау тӥледлы, "Мылысь-кыдысь" бордын сюлмысь тыршисьёс! Выльысь пумиськытозь. Ватсаса веран. "Мылысь-кыдысь" передачалы сӥзем ӝытысь куд-ог люкетъёссэ адӟыны луоз 27-тӥ феврале. Учкытэк эн кыле. И.Лебедев. Фотоосыз М.Егоровлэн. Бадӟым тау! Тодмо гожъясьлэн Андрей Сергеевич Бутолинлэн нылызлэн, Нелли Андреевна Неклюдовалэн, нылыз, Светлана, вань сюлмысьтыз тау каре тодмо ужбергатӥсьлы Владислав Аксямович Якуповлы, анайзэ ватыны юрттэмез понна. Владислав Аксямовичлэн адями сярысь сюлмаськемез тросэзлы адӟем карымон. Шугадӟонъёссы вакытэ дыраз юрттыны быгатэмез понна, тодмо ужбергатӥсьлы озьы ик сюлмысь тау каро Роза Ивановна Яшина, Нина Матвеевна Данилова, Любовь Андреевна Баранова. Йыбырттоме! Уй пал Кавказысь пӧсь ожъёсын быризы ни данак удмурт пиосмы. Сюлэм чутрак шымырске, выль но выль нимъёсты кылыса. Шаркан ёросысь Гондырвай гуртысь Дмитрий Вахрушев, Вавож ёросысь Нюрдор-Котья посёлокысь Андрей Агеев, Глазкарысь Андрей Салтыков, Можга ёросысь Вылын Юри гуртысь Александр Лавров, Владивостокысь Юрий Курягин, Эгралась (Игралась) Николай Логинов пыраклы кошкизы асьме дорысь - дырызлэсь вазь выдӥзы кот музъеме. Ноку но уз адӟелэ ни соос льӧль ӵукез, югыт нуналэз, мынясь шундыез... Удмурт калык йӧно батыръёссэ уз вунэты! Йыбырттоме соослы! Дыртэлэ! Эшшо огпол ивортӥськом: чебер нылъёсты выльысь огинэ люкалоз "2000-тӥ - Чеберай" - кызь витетӥ мартэ таӵе нимо бадӟым шулдыртӥськон ортчоз "Аксион" культура дворецын. Мусокай, визьмокай, дыдыкай, устокай луыны малпась егит нылъёс мед луозы пальышась ымныро, лэчыт визьмо, веськрес вылтыро, котькыӵе ужез пӧрмытыны быгатоно. Нимысьтыз дунъяськоз нылмуртлэн удмурт дӥсез, солэн кырӟаны-вераны, эктыны быгатэмез. Аспӧртэмлыко вожвылъяськонын вормем одӥгез чеберай отӥяз пыриськоз туэ, шуркынмон (ноябрь) толэзе, ортчоно "Мисс Финно-Угрия" конкурсэ. Асьсэлэсь кужымзэс эскерыны малпась нылъёсы тодазы вайытӥськом: азьвылъёсыз чеберайёс вал Наталья Калшина но Алёна Фёдорова. Ижын ортчоно ужрад азьын - егитъёс али пыриськыло ёросъёсын ортчылӥсь "покчи чеберайёсы". Вань юан-веранъёсын вазиськыны луоз 76-64-11, 78-83-18 телефон номеръёсъя. Кутскоз "Чеберай" ӝытазе куать часын. Дыртэлэ! Е. Ромашова. Шумпоттоз одӥгез устоез Удмурт кырӟанэз яратӥсьёсты матысь дыре ик шумпоттоз "Зарни шеп" - Пичи Пурга музъем вылысь одӥгез устоез ансамбль быдэс шаерамы но Ижын улӥсь удмуртъёслы кузьмалоз кырӟанъёсмылэсь ноку жадисьтэм мылкыд, сэзьлык, задорлык, чеберлыкез яратон. Сцена вылысен возьматӥськозы "Ныл сётон", "Выль кен пылатон", "Кубо дусым", "Ӝыт пукон" но мукет йылолъёс, чузъяськозы туж че,ер удмурт калык кырӟанъёс, сьӧрлось ваем гуръёс. Асьсэлэн устолыксылы синмаськтозы Удмурт Элькунысь культура удысысь дано ужасьёс Федосья Тубылова, Александра Ефремова, Галина Тубылова, Наталья Кольцова, Александр Степанов, Борис Горбушин, Леонид Громов, мукетъёсыз. Эшшо пусйыны кулэ созэ: туэ "Зарни шеплы" тырмиз кызь ар. Ансамбльлэн концертэз луоз кӧс нуналэ, 26-тӥ феврале, Драмая удмурт кун театрын. Кутскоз нуназе бере ньыль часын. Вунонтэм чеберылыкен тодматскыны лыктэлэ, удмурт кырӟанэз яратӥсьёс! НАТАЛЬ Семья ке юн, улон но йӧн Ньыль пиос - удалтэм нылпиос Татьяна Геннадьевна но Николай Никитьевич Долгов кузпалъёслэн куинь пиоссы будо вал ни. Ныл пыры куаратэк мӧзмыт ик семьяын, анайлы но эш кулэ. Малпазы, оло, ньылетӥез дыды вордӥськоз. Эшъёссы туж но туж оскытӥзы уго, вань тодметъёсъя ныл, пе, луыны кулэ. Анай-атаезлы но, соослэн эшъёссылы но ӧчкарыса сямен, нош ик вордӥськиз эке. Миши али ветлэ ни кыкетӥ классэ, анай-атайзэ но, агайёссэ но шумпоттэ ӟеч дышетскеменыз. Бадзымъёчсызлэсь номыр ласянь но бере кылемез уг поты. Нылъёсыз ӧвӧлысь Татьяна Геннадьевна уг ёрмы, пиосыз ужасесь будо. Зэмос юрттӥсьёстэк гуртысь дышетӥсьлы капчи ӧй луысал вань быгатонлыкъёссэ но кужымзэ яратоно ужезлы сётыны. Кияса ёросысь Ермолаево шор ёзо школае ветлӥсь нылпиосты со дышетэ удмурт кыллы но литературалы. Ӟуч гуртын (ӝыныез удмуртъёс ке но) удмуртлыкез капчи ӝутыны ӧвӧл. Школа но ӟуч вал, кемалась ӧз лу ай национальной. Ӝыныез дышетӥсьёс удмуртъёс бере, удмурт кыл но литература шоры учкон пумен воштӥське. Удмуртлыклы сӥзем огъя ужрадъёсы ӟуч дышетӥсьёс но мыло-кыдо пырисько. Татьяна Геннадьевнаез сюлмаськытэ ӟучомем нылпиосты удмурт кыллы дышетон, огвакытэ басьтӥськиз ни вал со борды, но шуг-секытъёс кылдӥзы методической пособиос ӧвӧлэн. Т.Г.Долгова кивалтэ на ёросысьтызы удмурт кылъя но литературая дышетӥсьёслэн методологияя огазеяськонэнызы. Дышетскон ар кутскем бере Калыкез дышетонъя министерство национальной школаос пумысен ортчытӥз вал бадӟым кенешон. - Туж шумпотыса бертӥмы отысь, - шуэ Татьяна Геннадьевна. - Бурдъёс ик будӥзы кадь, удмурт кылэз дышетӥсь пиналъёс понна азьланезлы бадӟым оскон кылдӥз. Дышетсконзэс азинтон ласянь паськыт сюрес усьтӥськыны кулэ соос азе. Шумпотоно, ёросамы удмурт кылъя но литературая дышетӥсьёсмы туж золэсь. Ваньмы огазе люкаськыса, араз кык пол кыӵе ке но школаосы потаськом, ог-огмылэн ужан амалъёсынымы тодматскиськом. Татьяна Геннадьевналэн картэз Николай Никитьевич ужа "Рассвет" колхозын, валтӥсь энергетик луыса. Кышноезлэсь сюлмаськонъёссэ со вала, бадӟым хозяйствоысьтызы троссэ ужъёсты ас вылаз басьтыны тырше. Нош сюлмаськонъёссы Долговъёслэн трос: пудо-живот утялтоно, мушъёссы вань, сад-бакчазы бадӟым. Тани кылем ар пумын воргорон отпускын вал. Дораз пукиз бере, гурт котырысь ужъёсты ас вылаз басьтӥз. Пиосыз школаысь вуо, нош соосты возьма ни атайзылэн ческыт пӧрам сиёнэз. Нылкышнолы но капчи вӧзаз сыӵе пиосмурт ваньысь. Атай мурт туж данъяське пиосыныз, нош пичизэ весь эрикиясал, нуныясал на кадь. Сюлмаське нылпиосызлэн азьлань улонзы сярысь. Ачиз со йылпумъяз Ижевскысь гурт удысъя институтэз. Нылпиосты дышетон туала вакытэ секытэн ке но сётске, Николай Никитьевичлэн одӥг сюлмаськонэз: школазэс йылпумъяса, пиосыз мед азьланьтозы дышетсконзэс. Пинал Долговъёс анай-атайзэс шумпотто умой дышетскеменызы но, уж борды мыло-кыдо басьтӥськеменызы но. Бадӟымез Коля пизы туэ йылпумъя ни дас одӥгетӥ классэз, аслэсьтыз улонзэ атаез сямен ик герӟаны малпа гурт удысэн. Пияш яратэ пудо котырын берганы. Сыӵе мылкыдзэ шӧдыса ик анай-атаез пизылы утялтыны-вордыны бӧрсьысь куинь арзэ парсьпи басьтылӥзы. Коля кунян но утялтӥз ни. Поттэм коньдонзэ кузпалъёс пизылы ик каро, ужамез чотын солы мотоцикл но басьтӥзы. Сашиксылэн врач луэмез потэ. Дышетске со укмысэтӥ классын, дневникез "витьёсын" гинэ тырмемын. Агаез сямен ик яратэ пудо котырын вырыны, вань аслаз вордоно кроликъёсыз. Со сяна, Сашаез бордазы кыско на сад-бакча котырысь ужъёс, ачиз ик кизе-утялтэ будосъёссэ. Емышо садъёс котырын берганы яратэ, олокыӵе но опытъёс лэсьтэ. Ньылетӥ классын дышетскись Павликез но "витьёс" гинэ ярато. Сюлмаськонъёсыз солэн али, Мишилэн кадь ик, юмалэсь на, агайёсыз дорозь будыны но будыны кулэ ай. Тӥни сыӵеесь соос, Долгов кузпалъёслэн ньыль пиоссы. Нокыӵе спорт ӵошатсконъёс, КВН-ёс, олимпиадаос школаын соостэк уг ортчо. Удалтӥз Татьяна Геннадьевналы воргоронъёсын. Семьяын со огназ нылкышно, вань шуныт кылъёс, ӟеч мылкыдъёс солы сӥземын. Нош нылкышно аслэсьтыз сюлэм пӧсьсэ кузьма яратоно пиосызлы но кузпалэзлы. Л.Малых. * Тодматске: Долговъёслэн семьязы. Туспуктэмез В.Камашевлэн. Продается с/о земельный участок 0,05 га в массиве "Черемушки" по Вотк. шоссе, 10 км, асфальт, свет, вода. Участок удобренный, без посадки и дома. *** Продается авторезина с диском и для а/м "Нива", 400 руб+15 кг мяса говядины за 2 шт. Меняется 2-х комн. кв. у Восточного рынка, г. Ижевск, на хороший частный дом с надворными постройками, земельный участок, газ, вода в селе Завьялово. Тел. кв.: 21-25-79. КУН КЕНЕШЫН Дунъямын Правительстволэн ужез Таяз арня вискын ужзэ азинтӥз Удмурт Республикаысь Кун Кенешлэн азьвыл чаклам ИЪ сессиез. Ӧжытак вис карем бере, депутатъёс лумбыт ӵоже пыр-поч эскеризы Правительстволэсь ар ӵоже ужамзэ. Отчёт лэсьтӥз солэн кивалтӥсез Николай Алексеевич Ганза. Таӵе кенешонъёс сяме пыӵамын ни. Вераны кулэ, выль быръем Правительство укмыс толэзь гинэ ужа ай, озьы ке но, депутатъёс со азе чурыт куронъёс пуктӥзы ни. Н.А.Ганзалэн но веран кылыз тросгес пӧрмиз тырмымтэосты шараянлы, соос бордын азьланяз ужанлы. Зэм но, туала вакытэ ушъяськымонэз ӧжыт, экономикаез ӝутонын уката но. Басьтом сиён-юон поттонэз ик яке музъемен ужанэз. Гурт удыс пумен улӥе но улӥе ваське, куд-ог "шормуӵъёсын-хозяйствоосын" возиськыны выре на ке но. Басьтом ю-нянь будэтонэз. Со вылын возиське пудо вордон но музъем ужасьлэн улон-вылонэз. Возьыт вераны, но лыдпусъёслэсь нокытчы уд ватскы: ю тысьлэн удалтонлыкезъя асьмеос кызь арлы бере кылиськеммы ни. Малы со озьы луиз? Гурт калыклы, специалистъёслы мугзэ вератэк но тодмо - выльдӥськон кутскем дырысен вань кун политика юри берыктэмын вал гурт удыслы - колхозъёслы но совхозъёсты пумит. Малы ке- а кунгож сьӧрысь ваем сиён-юонэн тырмытэмын вал Россиысь быдэс рынок, Удмуртия но та ласянь, валамон ини, палэнэ ӧз кыльы. Минерал сылалъёс тырмыт шедьтытэк, кыед, торф кулэезъя басьтытэк, сотэк но начар муос арысь аре жаг турын улэ пашмо, сю-сюрс гектарен музъемъёсмы гырытэк-кизьытэк кылё. Озьы-а басьтод ӟеч урожай? Депутатъёс верамъя, ярам ай, та аръёссэ инкуазь гурт удыс понна зор- котсэ но, шунытсэ но тырмыт сётӥз. Шумпоттӥзы картофка но бакча сиёнъёс, соос удалтонлыксэс ӧз ыштэ. Секыт югдур пудо вордонын. Йӧл, сӥль поттонъя республика арысь аре бере кыле, пудолэн йырыз, оглом вераса, туж каллен йылэ. Тӥни кытын "бусьтыр" улон-вылонмылэн выжыосыз, угось азьмынӥсь хозяйствоос экономиказэс юнмато самой та удысын, переработкаез но ас киулазы басьтыса. Но сыӵе кузёос гуртын, районъёсын туж ӧжыт. Соослы но люкето ялан будӥсь дунъёс - эстӥськонлы, электрокужымлы, удобрениослы но техникалы. Лябъёсыз сярысь веранэз ик овӧл.Депутат Николай Семенович Сычев шонер, дыр, юан пуктӥз "Удмуртский" племсовхоз но "Пихтовка" совхоз пумысен: малы нырысетӥез скаллы быдэ туннэ 2 килограмм йӧл кыско, нош кыкетӥяз - 20 килограммлэсь ятыр? Малы одӥгаз хозяйствоын воштэс ёзлы но коньдонзы уг тырмы, нош мукетыз арлы быдэ техниказэ выльдыны тырше. Вань ма сярысь малпаськыны Правительстволы но, районэн, хозяйствоен кивалтӥсьлы но. Таин валче сессиын вераськон ӝутскиз кадръёс ласянь но. Кызьы пусйиз Н.А.Ганза, гуртын туннэ нокинэ председателе пуктыны. Вань кивалтӥсьёс, валтӥсь специалистъёс пӧлысь 26 процентэз гинэ вылӥ образованиен. Бере кылеммылэн огез мугез потэ кадръёс бордысен. Кыкетӥез, докладын верамъя, пыкиське коньдон ужпумъёс вылэ. Гурт удыслы со тырмыт уг висъяськы. Куинетӥез - калыклэн уксёлы ёрмемез но басьяськыны быгатымтэез. Таин сэрен вуз кылле, отчы понэм коньдон уг берга, экономика вылэ уг ужа. Ньылетӥез - пунэмаськем коньдон но сое тыронэн ӝеган. Та вакытлы республикая 1 миллиард 600 миллион манетлэсь ятырлы люкаськмын ни калыклы уждун тырон но нылпиослы чаклам пособиосты берыктон. Оглом верано ке, Россия Федерацияя берло 10 ар ӵоже калыклэн улон- вылонэз куинь поллы начармиз. Удмуртия та ласянь номырин пӧртэм ӧвӧл, Урал котырысь улосвылъёс пӧлын уждунлэн быдӟалаезъя берпуметӥосыз радэ шедиськом. Вань куд-ог пусйымон интыосмы но. Кылсярысь, ӟечгес ужаны кутскиз промышленность, вырӟе машина поттон удыс, Удмуртилэсь казназэ узырмытэ му вӧй кыскон. Депутатъёс пӧртэм ласянь дунъяны выризы Правительстволэсь ужзэ. Солэн Тӧроез меӵак шуиз: "Мон сямен, Правительстволы дунъет сётыны кулэ бюджетлэн быдэсмемезъя". Та бордысен кутске ваньмыз, калыклэн улон- вылонэз но. Залын пукисьёс пӧлысь асьсэлэсь мылкыдзэс веразы депутатъёс С.Г.Беркутов, В.М.Кушко, Г.Е.Абросимов, А.К.Лопатин, В.С.Кудрявцев, Л.К.Фролов, Р.Ю.Рыбаков но мукетъёсыз. Вал пӧсекъянъёс но, пыкылонъёс но. Огез мӧйы депутат В.И.Кудинов шуиз: - Правительстволэсь ужзэ огласянь гинэ дунъяны уг луы, татын вераськон мынэ йыружъёслэн йылэмзы но калыклэн улон-вылонэз уродмем ласянь. Правительство - со Н.А.Ганза гинэ ӧвӧл, вань на Министръёслэн кибинетсы. Озьыен, ас удысэзъя котькудӥз нимаз-нимаз кыл кутыны кулэ. Но самой главноез, асьмеос тае пыр-поч кутскыса туннэ ӧм эскере: ма бордысен кутске преступностьлэн будэмез но улонмылэн улӥе лэзиськемез? Кызьы сое дугдытоно но ма лэсьтоно со понна? Тӥни ма бордын ужано Правительстволы но парламентлы. Республикаын кылдэм социально-политической югдурен тодматӥз Кун Кенешлэн Тӧроез А.А.Волков. Сессия табере ужзэ азинтоз 1-тӥ мартэ. Л.Медведева. * Кун Кенешлэн укмысэтӥ сессияз. Туспуктэмъёсыз В.Беломорскихлэн. Тужгес даноез но йӧноез 24-тӥ тулыспалэ куатьтон вить арессэ пусъе Россия Федерациысь дано дышетӥсь, удмурт методист, покчи классъёсын дышетон книгаослэн но дышетӥсьёслы дасям методической пособиослэн авторзы, Можга городлэн дано адямиез Римма Ивановна Данилова. Римма Ивановнаез шаерамы тодӥсьтэмез ӧвӧл. Сое озьы ик тодо Башкортостанысь но Татарстанысь данакез дышетӥсьёс но школаосысь кивалтӥсьёс. Малы ке шуоно, уноез соос, Можга педучилищеез йылпумъяса, ужан сюрессэс асьсэ куназы мытӥзы. Р.И.Данилова - вылӥ квалификациен специалист. Солэн улон но ужан сюресэз но адӟем карымон. 1958-тӥ арын Ижысь пединститутэз йылпумъяса, егит кузпалъёс - Римма Ивановна но Григорий Данилович Даниловъёс - Можга педучилищее ужаны лэземын вал. Пенсие потытозяз ик Римма Ивановна татын удмурт кылъя но литературая, покчи классъёсын удмурт кылэз дышетон методикая вуоно ӧнерчиосты дышетӥз. 1990-тӥ арын пенсие потыса но шутэтскыны эрик ӧз сюры на: дышетон книгаос гожъясь тодосчиосмы тырмымтэен, Р.И.Данилова Россия Федерациын дышетон удысын национальной школаосъя научно-исследовательской институтлэн соку гинэ кылдытэм Удмурт филиалаз ужаны ӧтемын вал. Со дырысен римма Ивановна татын тырше. Солэн эскероно ужпумез - покчи классъёсын дышетон книгаослэсь пуштроссэс ввльдон но методикаез узырмытон. Филиалын дас ар пала ужатозяз, дано дышетӥсь нырысьсэ кылдытӥз педучилищеосын тыршись методистъёслы удмурт методикая программа, удмурт внеклассной лыдӟонъя урокъёс нуыны дэмланъёс, нырысетӥ класслы "Букварь" но соя гожъяськыны дышетон "Прописьёс". Али кылдытэ букварья ужаны методической валэктонъёс. Пусъёмы на: Данилова сюлмаське удмурт кылъя урокъёсты тунсыко но дышетонэз пайдаё карон сярысь. Туала нылпиос телевизорен сэрен мылкыдтэк лыдӟисько но уно янгышъёс лэсьтыса гожъясько. Вольыт но ӝог лыдӟиськыны, шонер, янгышъёстэк но чебер гожъяськыны дышетон вылысь, тодмо методист выль книгаоссэ азьмынӥсь опытэз но туала наукалэсь куронъёссэ лыдэ басьтыса гожтэ. Ваньзэ-ӧвӧлзэ со кызь куинь пумо книга поттӥз ни. Римма Ивановна сярысь туж трос вераны луысал. Ведь солэн киосыз но сюлэмыз пыртӥ куамын кык ар ӵоже олокӧня сю егит ӧнерчиос, кивалтӥсьёс, наукаын ужасьёс потӥзы но шаерамы дано адямиос луизы. Соос - история наукаосъя доктор М.Г.Иванова, Г.А.Никитина, кылтодон наукаосъя доктор А.С.Зуева, педагогика наукаосъя кандидатъёс З.В.Суворова но Н.А.Шкляева (кыксы но пӧртэм институтъёсын кивалто), Удмурт Элькунысь дано дышетӥсьёс но школаослэн директоръёссы Р.П.Герасимова но А.М.Егоров но трос-трос мукетъёсыз. Данилов кузпалъёс данъяськымон нылъёссэс будэтӥзы (таосыз луизы крезьгуръя дышетӥсь но врач). Удмурт дышетӥсьёс пӧлын Римма Ивановна одӥгез тужгес даноез но йӧноез луэ. Бадӟым юбилееныз ӟечкыласа, гажано но дуно ужасьмылы но эшмылы - Римма Ивановналы - азьланяз но юн тазалык, шудбур но вылӥ азинсконъёс сӥзиськом. А.Журавлева, Россия Федерациысь национальной школаослэн удмурт ёзысьтызы научной ужась. Судьялэн янгышамез дуно усе Судэ адями лыктэ зэмлыкез утчаны. Соин ик улонлы осконзэ ыштэм мурт понна судэ вазиськон ӵем дыръя берпуметӥ вамыш луэ. Нош быгатэ-а юрттыны судья? Судьяослэн ужамзы сярысь пыр-поч вераськон мынӥз соослэн Ижевскын ортчем ӧтчамазы. Удмурт Республикаысь Вылӥ Судлэн тӧроез Ю.Суханов вераськонзэ валтӥсь ужпум котыртӥ нуиз: йыружъёс йыло, нош судын ӝутэм ужъёс ляб эскерисько. Мар люкетэ судьяослы ӟечгес но ӝоггес ужаны? Куд-ог ужъёсты ялан мукет дырлы выжтоно луэ, я адӟисьёс, я адвокатъёс дыраз вуымтэен. Адвокатъёс тырмо. Но адямиос, юрттэт курыса, ӵем дыръя одӥгъёсызлыик вазисько. Соин ик бадӟым опытэн адвокатлы огдыре ик трос ужъёсты нуоно луэ. Азьвыл аръёсы тазьы вал: адвокат 14 нунал ӵоже судэ лыктыны ӧз ке быгатылы, суд улэ кыскем муртлы мукетсэ юнматылӥзы. Оло, выльысь та амал борды берытсконо? Судьялэсь ужзэ мукет мугъёс но ӝегато. Кылсярысь, уголовной ужъёс нуыку уг тырмо йыруж лэсьтэм муртъёсты пытсэт сьӧрын возён интыос, нош конвой улсын ваем муртэз коридорын возьыны уг яра. Уголовной кодекс туала улонлы чылкак уг ни тупа, соин ик ужлэн сэрттӥськемез быдэсак потэ судьялэн визьмыз но быгатэмез бордысь. Та ужпум сярысь трос вераськизы районъёсысь судъёслэн кивалтӥсьёссы но. Гражданской но уголовной ужъёсты эскерон умойгес пуктэмын Ижевскысь Первомай ёрослэн судаз. Татын 11 судья ужа, со мукет ёросъёслэсь ӧжытгес. Озьы ке но, кылем арын татын 838 уголовной но 1400 гражданской уж эскеремын. Кызьы шуиз судлэн тӧроез М.Глазырин, судьяослы ужаны туж ӟеч юртто технической ужасьёс. Ваньмызлэсь трос ужъёсты эскерем судья А.Ильин. Судьяослы трослы ужаны капчигес луысал, республикаысь судъёсын али ик мировой судьяос ужасалзы ке. Соку данаксэ чыры-пыры ужъёсты соослы оскыны луысал. Но Удмуртиын сыӵе закон кутымтэ на. Россия Федерацилэн бюджетаз мировой судьяослы коньдон висъяны учкемын, таяз арын куд-ог улосъёсы коньдон келямын но ни. Соин ик асьме депутатъёслы та ужез ӝегатскытэк йылаз-пумаз вуттоно. Судьяос тырмымтэен, тросэз ужъёс дыртыса лэсьтӥсько. Тани кызьы шуиз со сярысь Завьял ёросысь судлэн тӧроез А.Ермолин. - Кылем арын 180 пала уголовной уж (24 процентэз) янгышъёсын лэсьтэмын. Судьяослэсь лыдзэс будэтытэк, югдурез уд тупаты. Кулэсмиз конвойлэн лыдыз но, 16 мурт интые 11 кылиз. Завьял ёросын суд ужъёс соин но будо: татын интыяськемын ньыль пытсэт сьӧрын пукон учреждение но одӥг психиатрической больница. Кылем арын отысь адямиос сэрен мултэс 930 уж ӝутэмын вал. Нош малы меда трос янгышъёсын ужало Якшур-Бодья ёросысь судьяос? Вылӥ Судлэн тӧроез таӵе юанэн меӵак вазиськиз Якшур-Бодьяысь судлэн кивалтӥсезлы. Зэмзэ ик, татын 1998-тӥ арын 29 процентэз уголовной ужъёс янгышъёсын нуэмын вылэм, нош 1999-тӥ арын - 59 процентэз. Ёросысь судлэн кивалтӥсез та учыръёсты валэктӥз судьяослэн ӧжыт луэменызы - соос татын куинь кузя гинэ. Вылаз ик, судын одӥг гинэ, пе, компьютер ужа. Но та мугъёсты Ю.Суханов лыдэ ӧз басьты. Верамын вал, Якшур-Бодья ёросысь судлэн ужамез азьланяз нимысьтыз эскеремын луоз шуыса. Тӥни озьы ӧтчамын куд-ог судьяослэсь кылзэс но юазы. Со озьы ик луыны кулэ, дыр, угось судьялэн умойтэм быдэстэм ужез бордысь ӵем дыръя адямилэн адӟонэз потэ. Кенешын умоен пусъемын вал Судъя департаментлэн ужамез. Со одӥг ар талэсь азьло гинэ кылдытэмын, кивалтӥсез - В.Городилов. Табере судьяос вань куронъёсынызы татчы вазиськыны быгато. Азьло соос Юстицияя министерство борды юнматэмын вал, нош министерстволэн удысэз паськыт, соин ик судьяослэн куронъёссы вуныса но кыльылӥзы. Табере уждун, компьютер техника басьтон ласянь но лякытгес луиз. Зэмзэ но, та кенешын ик В.Городилов ялӥз, кӧня ке районъёсысь судьяос доразы компьютеръёсын бертыны быгатозы шуыса. Кызьы адӟиськом, судьяос но сюлэмшугъяськонъёстэк уг уло. Но кулэ дыръяз асьме азе судья доры мынон сярысь ужпум кылдӥз ке, мыноно кышкатэк но оскыса. Сыӵе мылкыд кылдытӥз судьяослэн ӧтчамзы. Бен, судьяос но янгышалляло. Но соослэсь ужамзэс юн чакласа возё вылэм. Собере асьмеос быгатӥськомы ярасьтэм судья дорысь мукетыз доры вазиськыны. Тросэзлы та кенешын сётэмын вал Почёт грамотаос но синпель кузьымъёс. Ужрадэ пыриськиз Удмуртиысь Правительстволэн Аппаратэныз кивалтӥсь А.Горяинов. "Судьяос ог-огзылэсь зол кылзэс юаны быгато бере, суд оскымон киын, - шуиз со. Т.Банникова. Удмурт Республикаысь Кун Кенеш, Правительство мур куректэмзэс верало Удмурт Республикаысь Кун Кенешлэн депутатэзлы Владимир Николаевич Зенинлы атаез Зенин Николай Николаевич улонысь кошкемен валче. Атыкай музъеммес утисьёс Кыдёкысь кунгожъёс Удмуртиысь Кильмезь посёлокез странаямы гинэ ӧвӧл, асьме шаерын но куд-огез уг тоды луоз. Нош татын вордскем пияш Валерий Попков ас калыксэ данэ поттӥз. Ужась семьяын будэм-кыдам воргорон Россилэн Героез луиз, Афган калыклы юрттэт сётыкуз. Лобанъёс огшоры ужлы пӧрмизы ни. Вакытэз огшоры ӧвӧл ке но, адями котьмалы дыше. Котьку сямен, азьпалан лобе капитан Ильгиз Шарипов, со бӧрсьын - эшез Валерий Попков. Зӧк пилемъёсты вандыса, вертолётъёс чылкыт инбаме "тэтчизы". Соку ик азь машинаысь тыл кизилиос пазьгиськизы. Вертолёт чукинскиз но уллане кошкиз. Пияла пырыосын вандӥськем Шарипов сӧсырмем вертолётсэ кылзӥськытыны ӧз пӧрмыты ни - кабинаысьтыз йырчукин тэтчиз. Музъемозь кылиз на ньыль сю, куинь сю метр. Тани душманъёс сое пумитаны бызё ни. Со вискын парашютистлэн йыр вадьсытӥз ик Попковлэн вертолётэз гудыртыса ортчиз. Валерий югдурез шаплы валаз. Азьвыл но шуг-секытъёсын пумиськылэм мурт тазьы малпаз: бандитъёсты ыбылоз, собере куалектэм душманъёс ки улысь эшсэ мозмытоз. Усьтыр-табыр пазьгиськем бандитъёс мазэ-созэ валаса но ӧз вуттэ, кызьы вертолёт душес кадь лэзькиз но выльысь вылӥе ӝутскиз. Зэм, берлогес тодмо луиз, 21 интыетӥ вертолёт пасяськем. Одӥгез пуля, пилотлэн кабинаяз пырыса, аппаратурае кугӟам. Ӵапак Валерийлэн йыр вадьсаз. Кызьы шуо, кышкасьтэм муртлэсь пуля ачиз кышка. Таиз учыр но Афганистанэн герӟаськемын. Ижысь Сергей Борин армие шедиз Таджикистанэ, Москва нимез нуллӥсь погранотрядэ. Удмуртиысь пияшлы оскизы кыдёкысь кунгожез утьыны. 1993-тӥ арлэн пӧсьтолэзяз одӥгаз вазь ӵукна моджахедъёс 12-тӥ заставаез вистэм- вожтэм ыбылыны ӧдъязы. Пушка снарядъёс но ракетаос котыр музъемез пазяло, ваньзэ ӝуато-суто, окопъёсы но пуляос, снарядъёс йӧзор кадь усьыло. Боринэн артэгес пулемётысь ыбылэ Майборода лейтенант. Тани со супыляк пограз. Пулемёт доры Борин кыстӥськиз. Тушмон капчиен гинэ вормыны малпа вал. Но янгышаз. Куинь пол со ӝутскылӥз атакае, но куинь полаз ик чигнано луиз, Боринлэн пулемётэзлэн узвесь "саламъёсызлы" чидатэк. Сӧсырмыса но Удмуртиысь солдат ӧз чигна. Соку моджахедъёс асьме "ӧрӟиез" котыртӥзы. Берласянь матаз кыстӥськыса, шораз гранатаосын ыбылӥзы. Удмуртиысь кык батыръёс, кыдёкысь кунгожъёсмес утьыса, Россилэн Геройёсыз луизы. Таӵе адямиосын данъяське странамы. А. Иванов, "Граница" ожгар-спортклублэн директорезлэн воштӥсез. Асьсэлэн гербзы луоз Юкаменскын ялэмын ёрослэн гербезлы но эмблемаезлы конкурс. Ыстэм ужъёс возьматыны кулэ районлэс историзэ, солэсь азинскемзэ, инкуазь тодметъёссэ, калыклэсь сямъёссэ конкурсэ пыриськыны быгатэ котькудӥз мылкыд карись адями. Герб понна сётыны чакламын 300 манет премия, эмблема понна - 200 манет. Ёрос кунпусын луыны кулэ ӧвӧл Россилэн но Удмуртилэн гербъёсысьтызы тодметъёсыз. С. Петров. Нюръяськизы, вормизы "Ижевскысь радиозавод" акционер огазеяськон арлэсь кема нюръяськиз Россиысь связья министертсволэн ялэм конкурсаз. Ортчем арлэн пумаз та предприятилэн "Связькомплекс" огазеяськон но шумпотымон ивор вуиз: соослэн радиостанцизы премиен пусъемын. татын ужасьёс туэ но выль вуззэс конкурсэ сётыны чаклало. Б. Никитин. ПОЛИТИКА Кинлы оском меда? Россия дасяське президент бырйыны. Со туж пусйымон ужрад. Уго странамы секыт югдуре шедемын, улонмылэн пӧртэм палъёсыз шальтрамын. Экономика куашказ, асьме реформаторъёс выльдӥськонэз политика бордысен кутскемен. Нырысь кулэ вал ук калык хозяйстворез азинтыны. Нош асьмелэн обществолэсь пуштросэ воштоно кожазы. Со шӧлкын пазьгизы кызь миллионъем кивалтӥсь партиез, быдтӥзы кужмо Совето Союзэз, тус-тас каризы калык хозяйствоез. Дыртыса кутӥзы Ельцин понна дасям конституциез. Западысь капиталистъёслэн косэмзыя тупатӥзы президентлэсь постсэ, бырйыны ӧдъязы губернаторъёсты, мэръёсты но мукетсэ. Озьы куашкатӥзы Советъёсты - калыклэсь властьсэ. Табере реформаторъёс (нокин азьын кыл кутӥсьтэм чиновникъёс) ваньзэ лэсьто, Россиын капитализмез пыӵатон понна. Учке ай со партиосын шудонэз ик. Соос сюлэсь ятыр ни ук. Данакез кылдэмын, адямиосты ог-огзылэсь висъян понна. Рос-прос ужасьёс, ожысь но ужысь ветеранъёс, куинь копартиосы сяна, мукетъёсыныз уг герӟасько. Соин ик выль огазеяськонъёслэн калык пӧлын кужымзы уг но шӧдӥськы. Реформаос кутскытозь, дуннеысь 140 государство пӧлын асьме кун нырысетӥ дас азьмынӥсьёсыз пӧлын вал. Али со шор вадьсосяз ляб азинвкемъёс дорозь лэзиськиз. Куанермиськом нуналмысь. Дунъёс уго дугдылытэк будо. Трослы тыроно луиськом ни котьма понна: электротыл, газ, связь, транспорт, эстӥськон туж дуноямын. Странаын пумен паськыт вӧлме преступность, лушкаськон, пӧяськыса вузкарон. Та умойтэм ужъёсын нюръяськон радъямын ӧвӧл. Калык пӧлын валэктон уж но уг нуиськы. Тани табере эмъяськон-дышетскон понна но дун басьтыны кутскизы ни. Малы озьы лэу? Кызьы тае валано? Синовникъёс шуо: ми калыклы эрик сётӥм. Соос асьэлы эрик тупатӥзы, чакламлэсь-эскеронлэсь мозмытскизы. Соин ик лэсьто ваньзэ асьсэ понна, мар каремзы потэ. Вить-куать ар ӵоже уноез туж зол узырмизы. Правительстволэн азьло воштӥсез Потанин, озьы ик Березовский быдэн миллиард американ долларлэсь ятыр коньдон люкаллям ни. Кытысь-о со потэ? Малпаськомы, государствоез но калыкез куанермытэм чотын шуыса. Чечняын ожмаськонэз но чиновникъёс асьсэлы пайдаен берыктыны выро. Калыклы зэмзэ соос уг верало, олокызьы но пӧяны тыршо. Соин ик адямиос но ог-огзылы пумен кыдёкын луо. Кӧня ке процентэз син куспын узырме, уноез эшшо но уродгес улыны ӧдъя. Капитализм возиське огшоры калыкез ужатон вылын. Та вунэтэм сям берло аръёсы выльысь улӟиз. Кивалтӥсьёс кӧбератэк ужало ляльчиосты, асьтэлы дача, коттедж пукто, кун ваньбурез киулто. Посёлокамы но сыӵе учыръёс пумиськыло. Куд-ог организациос выль чилясь юрт пукто, со дыре ик больницаосын эмъюмлы ёрмо, апайёс нылпиоссылы пособие басьтыны уг быгато. Улонысьтымы шуг-секытъёсты чиновникъёс Ленин но коммунистъёс вылэ погыльтыны тыршо. Но социализм тужгес азинскем строй луэ ук. Солэсь ӟечез дуннеын малпамын ӧвӧл на. Туала кузёосмы пӧлысь данакез куке но партие пыризы вал, со чотын дышетскизы, кивалтонэ шуизы но, югдур воштӥськемен, копак мукет сямен вузаськыны ӧдъязы. Кык ымныро муртъёс соос. Сыӵеослы Ленинлэсь дышетсконо ай ас шаердэ яратыны, астэ шонер возьыны, котыр ласянь адӟем карымон луыны. Война дыръя партилэн ӝыныез ӧжыт быриз ке но, коммунистъёс ӧз сётске, куашкатэм странаез выльысь улӟытӥзы, калык хозяйствоез ӝог азинтыны быгатӥзы. Кӧня ке дасо ар ӵоже уно ваньбур люкамын ни вал. Нош туала чиновникъёс ваньзэ сое тус-тас каризы 7-8 ар куспын. Озьы ӧвӧл шат? Чиновник господаос! Тӥ люкиськемын огшоры калыклэсь, асьтэос нокыӵе сюлмаськонъёстэк улӥськоды, нош пенсионеръёс, егитъёс, ужтэк кылемъёс курадӟо. Россиын улӥсьёслэн лыдзы арлы быдэ миллионлы кулэсме. Со понна нокин кыл уг куты. Президентлэсь ужзэ быдэсъясь В.В.Путин азьлоезлы кивалтӥсьлы пӧртэм льготаос тупатон сярысь указ юнматӥз. Кун Думалэн депутатъёсыз но та ласянь бере уг кылё. Югдурез тупатон амал, ми сямен, одӥг гинэ - социализм лэсьтонэ берытскон. Сотэк странамес выль революциозь, граждан ожозь вуттозы. Калыклэн чиданэз куке но пӧсьтоз ук. Вир кисьтонлэсь утиськон вылысь, Россиын кылдытоно КПСС выллем кужмо партия. Отчы огазеяськыны кулэ ужасьёс, военнойёс, коммунист мылкыдо мукет адямиос. Президент ваньзэ лэсьтыны кулэ, обществомес ялан азинтон понна. Калыклэсь пумен будӥсь кулэяськонъёссэ быдэсъян - таӵе ӧтён улсын радъяно улонмес. Умойгес ужано КПРФ партиен. Уго отын тунэ тужгес азьмынӥсь адямиосмы. Соос азьлоез понна кыл кутыны кулэ ӧвӧл, коммунистъёс утё асьмелэсь интересъёсмес. Кун Кенеше но Кун Думае быръёнъёсын калык келяз. Асьме парламентэ быръемын бадӟым предприятиослэн кивалтӥсьёссы. Ёросысьтымы адямиос асьсэ адямиоссэс ӧз быръе. Ми малпаськом, депутатъёс бурйисьёсынызы артэ улыны кулэ. Народно-патриотической огазеяськон Кун Кенеше вӧзысьтымы куинь муртэ ӵектӥз вал. Бырйисьёс палэнысь кандидатъёс пала кариськизы. Кун Думае быръён дыръя 40 процетлэсь ятырез калык "Единство" пала кариськиз. КПРФ пала 18 процентэз гинэ луиз. Со дыре ик Чувашиын, шуом, сыӵеос кык пол уноегс. Малы? Уноез асьме пӧлысь ӧз валалэ на макем секыт югдуре шедемзэс. Нош чиновникъёс олома но каро, вылӥ ёзъёсы асьсэ адямиоссэс утон понна. Ми ваньдэсты ӧтиськом быръёнэ малпаськыса пыриськыны. Е.В.Касаткин, куинь оже ветлэм мурт. И.П.Белых, Ожысь инвалид. В.Н.Корепанов, ожысь ветеран но мукетъёсыз. Игра посёлок. РЕДАКЦИЛЭСЬ: Тани таӵе гожтэт ыстӥллям игра посёлокысь ветеранъёс. Соослэсь мылкыдзэс валаны луэ. Но ми быръён азьын агитация кутскем бере ум быгатӥське соизлы яке таизлы кандидатлы дурбасьтӥсь материалъёсты дунтэк печатланы. Озьы чакламын законын. Соин ик гожтэтэз сётӥськом. Сюрес дурын но базар, ульчаосын но базар Ижевскысен Можга пала ширтыку, Пичи Пурга ёросычь Абдэс-Урдэс гурт дорысен кутскыса, сюрес урдсысь пумиталод аспӧртэмлыко базаръёсты. Гуртоос отын вузкаро ас киосынызы будэтэм вузъёсын - сӥлен, картофкаен, йӧлын... Та выллем базаръёс кылдӥзы, куке улон-вылонмы чутрак уродмыны кутскиз. Адями амалтэк сюрес вылэ потоно луиз. Кызьы ке но улоно ук. Нырысь ик сюрес вылэ потӥзы абдэс-урдэсъёс. Бӧрысьгес соослэсь адӟем каризы мукет гуртъёс но. Нош чылкак мукет суредэз адӟод Можгаысь етӥн сэстон заводын ужасьёслэн посёлоказы. Нырысь-валысь демонстрацие вуид, кожалод. Пӧртэм буёло мучолоос синъёсты ик мальдыто. Дунъёссы - 15-ысен 60 манетозь. Сюрес дуре урдылэмын лопатаос, швабраос. Азьло вузкаро вал кужен (пакляен) но. Тодматскиськом одӥгеныз вузкарисен Надежда Черноваен. - Ӟеч улэмлэсь бон сюрес вылэ уд потӥськы ни, - шуэ со. - Ачим етӥн сэстон заводын ужасько. Предприятимы али кык сменаен тырше. Но етӥн куромы мартлэн ӝыныозяз сяна уз тырмы. Кылем арын етӥн ӧз удалты уго. Нош ик ужтэк пуконо луом ини. Азьло уждун интые пакля сётылӥзы. Солэсь кӧня ке уксё поттӥськом ик вал. Кыле на одӥг амал - мучолоен вузкарон. Алнаш черкогуртын базарзы сокем бадӟым ӧвӧл. Но котьма кулэзэ шедьтод. Дунъёс но городынлэсь пӧртэм ӧвӧл. Пумитай азьвыл тодмоме Петр Поляковез. Та вакытэ со пызен вузкаре. Вань аслаз ашинаез. Тодэмея Петр азьло вал дышетӥсь но, тылпулэсь утиськонъя инспектор но. Басьяськисьёс Поляков сярысь шунытэн вазисько. Пызез котьку вылӥ ӟечлыкен луэ, дунзэ но уг куасалты. - Улонмы умой луысал ке, тазьы ульчаын часъёсын пукысал шат? - вера вузкарись. - Ма карод? Ваньмыз радъяськиз ке, югдур воштӥськоз ай, ӧраз пыроз... Ма бен, али котькытын ик югдур та выллем, дыр - Алнашын-а, Ярын-а. Ӟеч улонлэн тылсиосыз маке бездытгес пишто на ай. Оло, туэ 26-тӥ мартэ Россилы выль президент быръеммы бере маке воштӥськоз? Ӧйтӧд, ӧйтӧд... Н.Байтеряков. В.Беломорских (фото). Надежда Черновалэн мылкыдыз секытгес; Алнашысь ужбергатӥсь Пётр Поляков. Вормизы конкурсын "2000-тӥ арын устоез ужбергатӥсь" смотр-конкурсэ Селта ёросысь 38 ужбергатӥсь пыриськиз. Соос возьматӥзы ужан культуразэс, вузкарон правилоосты тодэмзэс. Комиссия кузьымъёсын пусйиз Таисия Константиновна Батуеваез, Елена Петровна Болотоваез, Хатиса Парамоновна Манесянэз. Л.Павлов. Выльдэм клубын пумитазы Селта ёросысь Халды культура юртэз кемалась рос-прос тупатъяно ни вал. Та уж борды алигес басьтӥськизы Халдыын улисьёс Сергей Вараксин, Александр Федоров, Сергей Злобин, Виктор но Алексей Зоринъёс. Толэзь ӵоже тыршизы соос. Тупатъязы котыр, со сяна, эстӥськон пуктӥзы фойее но кафе пушкы, кулэ висъетъёс лэсьӥзы. Ужысь ветеран сварщик Сергей Хитрин корт вурысъёс лэсьтӥз. Мӧйыос но, нылпиос но шумпото тупатэм, шуныт но югыт карем юртлы. Соос тау каро "Родники" эштослэн, "Рыбовод" ЗАО-лэн, Халды аграрной школалэн кивалтӥсьёссылы. Л.Федоров. Выль удыс Ваньбурез пусъён сярысь Пусйыны кулэ: та удысэз шаерысьтымы куд-огез улӥсьёс уг но тодо на. Вераськон мынэ республикаысьтымы Ваньбурез пусъёнъя (регистрационной) палата сярысь. Со кун учреждение, кыдытэмын ар талэсь азьло. Та дыр куспын палатаын 64 сюрс 394 муртлэн ваньбурез пусъемын. Кинъёс бен палатае вазисько? Соос пӧлын тужгес трос нимаз адямиос, ичигес - предприятиос, организациос но учреждениос. Берлоосызлэсь вить сюрс пала гинэ куронъёс вуэмын. - Нимаз адямиос законъя улыны тыршо, - шуэ Ваньбурез пусъёнъя палаталэн кивалтӥсез Людмила Кривопуст. - Соос ваньбурзэс шара возьмато. Озьы шуыны уг луы предприятиос но организациос сярысь. Тӥни соин ик кызьы ке Россиын, озьы ик Удмуртиын но тодмо ӧвӧл, кӧня но кин киын асьмелэн ваньбурмы - пуктэм юртъёсмы, музъеммы, нюлэсмы но вуосмы. Ӵапак со ик люкетэ Ваньбуръя кун реестр лэсьтыны. Ваньбурез пусъёнъя палаталэн интыосын ёзъёсыз ужало. Соос кылдытэмын Завьялово, Игра, Ува, Балезино, Кизнер районъёсын но шаерысьтымы вань городъёсын. Соос усьтӥськозы музон районъёсын но. Али палатаын 159 специалист ужа ни. Соос пӧлысь данакез - юристъёс. Палата юнэсь кусыпъёс возе правоосты утись ёзъёсын, соослы юрттэ - кинлэн кӧня ваньбурез сярысь иворъёс сётэ. Палата ас кужмыныз улэ, аслыз ачиз коньдон поттэ. Кылем арын, кылсярысь, 10 миллион пала уксё люказ. Ог люкетэз выт тыронэ кошкиз, кылемез - уждун сётыны но материально-технической инъетсэ юнматыны. Г. Романов. Валэктэ юрист Сэрегез дася Лилия Шкляева Музъем кесэг Вордски но улӥ Пушкин нимо колхозысь Гондырвай гуртын. Дышетсконме быдтыса, кык арзэ ужай Воткаысь машина лэсьтон заводын. 1988-тӥ арын октябрь толэзе бызи со колхозысь ик Пипиё гуртэ. Пропискае отын 1989- тӥ арын апрель толэзьысен. Колхозын ужаны кутски 1992-тӥ арын октябре гинэ, отчыозь пуки пиналын. 1996-тӥ арын адямиослы сётъязы музъемлы свидетельство, нош мыным - ӧз: ӧвӧл, пе. Сельсоветысь юай но - шуизы: тонэ вунэтӥськеммы списоке пыртыны. Мон сяна но сыӵе кылемъёсыз вань на. Нош список келеямын ини, пе, музъемъя комитетэ. 1998-тӥ арын колхозмы люкиськиз куинь пичи хозяйстволы. Кивалтӥсьмы табере шуэ: уг быгатӥськы ни музъем пай сётыны. Нош запас музъемзы вань. Быгатӥсько на-а мон музъем пай басьтыны? Нина Денисова. Шаркан районысь Пипиё гурт. Россиысь Правительство 1992-тӥ арын 4-тӥ сентябре поттӥз 708 номеро постановление. Со юнматӥз колхозъёсты, совхозъёсты выль сямен радъян но гурт удысысь предприятиосын приватизация ортчытон сярысь положениез. 1995-тӥ арын 1-тӥ феврале Россия Федерациысь Правительство ик кутӥз "Музъем кесэгъёслэн но ваньбур пайёслэн кузёоссылэсь правооссэс быдэсъян радлык сярысь" постановление. Отын сётэмын музъемен но ваньбурен кузёяськонъя списокъёс но музон документъёс дасян сярысь дэмланъёс. Асваньбур (собственность) чотын музъем басьтӥсьёслэн списоказы сюро: - колхозъёсын но совхозъёсын, гурт удысысь мукет организациосын ужасьёс, 1992-тӥ арын 1-тӥ январ бере но музъем кесэг басьтыны право кылдон вакытозь ужысь кулэстэмъёс. Списоке уг пыро огдырлы но граждан правоя огкылэн (договорен) кутэмъёс, совместительствоя кутэмъёс, таосызлэн нырысетӥ (основной) ужзы музон азьын ке; - гурт удысын вузан-басьтонэн (коммерциен) вырись организациысь пенсие потэмъёс, пӧлазы - сюдӥсьсэс ыштыса, ӧлексы (инвалид) луыса, ӧлексы муртэз утялтӥсь луыса пенсия басьтӥсьёс - организацилэн улосвылаз (территорияз) улӥсьёс. Таӵе улосвылэ пыро хозяйствоосты выльсямен радъямлэсь азьвыл висъям музъемъёс. Организацилэн улосвылаз улӥсен лыдъясько сыӵе пенсионеръёс но, кинъёслы сётэм квартираос организацилэн балансаз пыро вал музъем кесэглы кузё луон право кылдытон вакытозь, та квартираос улосвыллэн палэназ интыяськемын ке но. - сыӵе пенсионеръёс, кинъёс уло гурт удысын вузан-басьтонэн вырись организацилы (предприятилы) сётэм улосвылын - кинъёс пенсие потӥзы та музъемез азьвыл возись хозяйствоысь. - гуртын улон-вылонэн (социальной удысэн) герӟаськем адямиос - тазалыкез утёнын, культураын, бытъя юрттэт сётонын, кусып (связь) возёнын, вузкаронын, калыкез сюдонын, дышетонын ужасьёс, предприятиоссы но организациоссы интыяськемын ке гурт удысын вузан-басьтонэн вырись организацилэн (предприятилэн) улосвылаз; - гурт удысын вузан-басьтонэн вырись организациын (предприятиын) ужасьёс - огдырлы кошкемъёс: армие басьтэмъёс, хозяйстволэн стипендиеныз дышетскисьёс, тодон- валанзэс будэтыны ыстэмъёс - бертыса азьло интыязы законъя ужаны правоен муртъёс, нуны вайыны но утялтыны отпуске потэмъёс. Музъемлы бумага басьтыны яке солы доверенность келяны адями уг быгаты ке, солы висъяны чаклам кесэг сюре висъямтэ люкетэ, сое курыны луэ берло, иск сётыны Россия Федерациысь законъёсъя тупатэм дыр ӵоже; - музъемлы правоен адями сое басьтыны вуытэк кулыку - кельтослы (наследстволы) правоен муртъёс - иск сётыны тупатэм дыр ӵоже. Законын тупатэм куронъёсты юнме шорысь тазьы рос-прос ум гожъяське. Музъемен герӟаськем юанъёс "Удмурт дуннее" лыдтэм-чоттэм вуо. Озьы ке но, валантэм учыръёс тачак на. Музъем кесэген валче кылдэм данаксэ шуг-секытъёсты суд гинэ сэрттыны-пертчыны быгатэ. Отчы куронэн (искен) вазиськыны куинь ар ӵоже луэ. Та дырлэн кутсконэныз лыдъяське сыӵе вакыт, ку адями тодыны ӧдъяз яке тодыны кулэ вал правозэ тӥям сярысь. Соин ик Нина Денисовалы дэмлам потэ интыысь кивалтӥсьёсын рос-прос кенешыны. Нош огъя кыл ӧз шедьы ке, судэ вазиськоно. *** 1992-тӥ арын, колхозмылэн музъемезлы правтизация ортчытыкузы, мон но 0,15 га кесэг басьтӥ вал. Со бусыын. Аслам но, пенсие потэм пиосылэн но кесэгме утялтыны моӵмы уг сузьы ни. Мар карыны луэ сыӵе музъемен? Быгатӥсько-а вузаны яке арендае гинэ сётыны? Вузаны яра ке - кыӵе условиосын, арендае гинэ сётыны ке - кызьы? Анастасия Евсеева. Завьялово районысь Лудорвай гурт. Удмурт Республикаын кутэмын Музъем сярысь кодекс. Отысь 49-тӥ ёзэт (статья) валэктэ: адямиос музъемлы кузё (собственник) луо, кун яке интыысь (муниципальной) музъемъёсын приватизация ортчытыку, музъемез вузаку-басьтыку, кузьмаку, кельтос (наследство) карыку, воштыку, уставъя узырлыке (капиталэ) пыртыку но музон учыръёсы. Кузё быгатэ сое кутыны, законъёсты чакласа. Та сярысьгес ик вера Россия Федерацилэн Президентэзлэн "Россиын музъем кусыпъёсты радъян но гуртын реформаез азинтон сярысь" 1993-тӥ арын 27-тӥ октябре юнматэм Указэз. Соя музъемез луэ вузаны, наследствое кельтыны, кузьманы, арендае яке залоге сётыны, воштыны, устав капитал чотын сётыны акциосын огазеяськонэ, эштосэ, кооперативе (таосыз кунгож сьӧрысь коньдонэн но герӟаськемын ке). Кесэгез кинлы но кызьы сётон сярысь ужпумъя огъя валэктон шедьтыны шуг. Котькуд эштослэн, хозяйстволэн, акциосын огазеяськонлэн вань аслаз уставез. Нимаз адямиен соос ужаны кулэ огкылъя (договоръя). Адвокатлэн телефонэз: 25-33-70. Квартиралэн кузёез картэ гинэ вал Картэ квартиразэ приватизировать кариз. Соин мон 20 ар пала ӵош улӥ. Но люкиськеммы бере, ӝыны ар ортчыса, картэ кулӥз. Завещание ӧз кельты. Судлэн решениезъя квартиралэн кузёез табере нылы луэ, нош мон 6 толэзь куспын отысь кошкыны кулэ, пе. Мар мыным кароно? С. В. Игнатьева. Россия Федерацилэн Граждан кодексысьтыз 305-тӥ ёзэтаз тазьы валэктэмын. Тӥляд правоосты сыӵеесь ик, кыӵе квартира кузёлэн. Соин ик, квартираын улыны люкетыкузы, тӥ судэ вазиськыны быгатӥськоды. Картэныды люкиськем бере но, тӥ солэн квартираяз улон праводэс уд ыштӥське (Улон интыя кодексысь 53-тӥ ёзэт). Озьыен, судлэсь решениоссэ воштон вылысь, тӥ быгатӥськоды вазиськыны законъёслэсь быдэсъяськемъёссэс эскерись ёзъёсы (шуом Юстицияя министерствое). Куд-ог учыръёсы уже кутыны луэ таӵе амалэз но. Шуом, квартирадэс картты приватизировать карыку, тӥ асьтэ праводы сярысь ӧд малпаське - азьланяз кыӵе учыре сюрондэс ӧд тодэ. Соин ик судын умой-умой валэктыны быгатӥды ке, тӥляд вамышъёсты йыромыса но югдурез валатэк лэсьтэмын вал шуыса, суд квартиралы азьвыл лэсьтэм документъёсты кужымтэмен лыдъяны быгатоз. Таӵе амалэз уже кутыны сокем ик капчи ӧвӧл, но кужымды вань ке - нюръяськелэ. Кышное вузаз коркамес Кема аръёс ӵоже кышноеным ӵош улӥм. Но берло аръёсы кусыпъёсмы сӧриськизы, нимаз улӥськомы. Алигес тодӥ, кышное, мынэсьтым юатэк, дачамес вузам шуыса. Сое вузан сярысь мон ӧй но малпаськылы - мыным отын туж кельшылӥз. Ас вамышсэ кышное валэктӥз: дача солы мумы-бубыосызлэсь кылемын, соин ик кышное гинэ. Отысь корказэ быдэсак мон выльдӥ- ӝутӥ вал. Корка лэсьтон ужъёслы коньдонмы кыкмылэн ик кошкылӥз. Мынам малпамея, со коркалы мон но кузё луисько. Озьы-а со? Быгатӥсько-а мон корка вузан сярысь огкылэз умойтэмен лыдъяны? Кытчы вазиськоно со пумысен? И. Ковалев. Семья кодекслэн 35-тӥ ёзэтаз валэктэмын: ӵош улыку люкам ваньбурлы кыксы ик кузпалъёс кузё луо шуыса. Огезлэн кузпаллэн ваньбурез ас вылаз гинэ каремез потэ ке, со понна соглаш луэмзэ вераны кулэ мукетыз но. Та ужез нотариус доры мыныса юнматыны кулэ. Сыӵе соглаш луэмзэ мукетыз кузпал верамтэ ке, таиз мед вазиськоз судэ, ваньбур вузан сярысь тодэм нуналысен одӥг ар ортчытозь. Дача сярысь верано ке, семья кодекслэн 36-тӥ ёзэтаз гожтэмын: ваньбур, кудӥзлы кузё вал котькудӥз кузпал семья кылдытэмзылэсь азьло но ваньбур, кудӥз кузьмамын яке наследствое кылемын котькудӥзлы кузпаллы, меӵак огезлэн гинэ ваньбурез луэ. Ӵош улэм кузпалъёслэсь огъя ваньбурзэс кыклы люкон дыръя судын лыдэ басьтӥське котькуд кузпаллэн коньдонзэ, ужзэ но дырзэ быдтэмез. Корка вузан сярысь огкылэз умойтэмен лыдъян понна, тӥ судэ вайыны кулэ квитанциос, чекъёс но мукет документъёс, соосъя валэктыны мед быгатоды, кӧня тӥляд коньдонды кошкиз коркаез тупатъян-выльдонлы. Юрттозы адямиослэн верамъёссы но. Нош оскымон валэктонъёс ӧд ке шедьтэ, соку кышнодылэн дача вузамез шонерен лыдъяськоз. Валэктонъёс дасяз Ижысь правоез утёнъя центр. Телефонъёс: 48-55-25, 43-01-36. Маин лябесьгес нылъёс? Номырин ӧвӧл Бен, ӵошатсконлы кутскон сётэмын. Нош кызьы меда солы дасяськизы шарканъёс? Тани ма ивортӥз милемлы Шаркан ёрос администрациысь спортъя ёзэн кивалтӥсь Владимир Перевощиков: - Ӵошатсконлы ми дасесь. Куасэн бызьылон сюреслы вылӥ дунъет сётӥзы Спортъя кун комитетысь специалистъёс. Но туэ сюресмес ӧжытак воштӥм. Табере воргоронъёс но, нылкышноос но одӥг сюрестӥ огдыре бызёзы. Шудонъёсты учкыны лыктэмъёслы но со огласянь умойгес. Собере нылъёс пиосъёслэсь маин пӧртэмесь? Вуыны кулэ 650 спортсмен. Витиськом на 100 куноосты. Луозы республикаысьтымы вылӥ кивалтӥсьёс но. Соос но тол шудонъёсы пыриськозы. Лыктэмъёс улозы 2 школаын но 2 нылпи садын. Спортъя залъёс, сиськон интыос, культура юрт тупатъямын-выльдэмын. Огкылын вераса, ми куноосты пумитаны дась! Н.Байтеряков. СЮРЕСЪЁС Лымыё шаерысь - ӟырдам гужеме Кылем ар пумын малпамтэ шорысь шуд усиз Египетэ вуылыны. Чылкак гужем шорын лымы усем выллем. Африкае мынонме тодыса, нылы сирпу кадь бордам лякиськиз: вай, пе, мыным отысь обезьян. Крокодил ым-пиньлэсь но, пе, утиськы. Африка, АфРИка... Та вакчи кыл ачиз ик ӟырдам омырен шока кадь. Сое кылыса, зэмзэ но нырысь ик син шоры пуксё "Айболит" выжЫкылысь суредъёс. Мынам но тодам лыктӥз пинал дышетскем аръёсы: вашкала Египет сярысь паймымон веранъёс, визьмо но кужмо фараонъёс, Троя но колесницаос, сутӥсь шунды шорысь рабъёс но пирамидаос. Зэм, со вакытэ люкам кеньыре кемалась ӝуклы пӧрмиз ини. Озьы ке но пичиысен син азе кылдэм суредъёс, кемлы учыр тупаса, мылкыдэз выльысь гочатыны кутскизы. Зэм ик-а меда сыӵе фараонъёс улӥзы? Нош кыӵегес югдур туннэ Египет кунын? Москваысь "Шереметьево-2" аэропортын Ил-62 самолётэ пуксьыны азьло талонэн кабак вина дуре кадь черод кылдэмын. Калык пыре но пыре та чебер машиналэн ымпушказ. Бадӟымесь котомкаосын, векчи нылпиосын, кин кыӵе тӥрлыкен. Быгатоз на-а тамында муртэн корт ӧрӟимы инбаме ӝутскыны? Артэгес пукись нылаш кирос вылэ кирос тыре. Аслам но сюлэмы шымырскиз, шораз учкыса. Нош кӧня ке минут ортчыса буйгам - вакчи дыр куспын ми, 350 туристъёс, ог дасо иськем вылӥе ӝутским но лымшор пала лобатӥм. Кузь сюрес но самолётэн вакчи йӧтэ. Ньыль час ортчыса, ми Каир вадьсы вуим. Эшшо ӝыны час лобыса, Ил-62 бурдъёсыныз шона ни вал Горд зарезь вадьсын. Учкиськом укное. Вань дуннеез одӥг гож вандэ. Огпалаз чибориё-лыз - Горд зарезьлэн вуосыз, мукет палаз курень-ӵуж - пустынялэн луо букосъёсыз. Самолёт поглянъёс музъеме гинэ йӧтскизы, кужмо кичабонъёс мотор куараез ик согизы. Ваньмы капчияк шокчим - ми Египетэ, Хургадае, вуим Аэропортын милемыз витё ни вал пумитась турфирмаосысь адямиос. Учкисько шоразы - воргоронъёс, шоколад выллем куренесь. Россиысь вуэм туристъёсын верасько англи кылын. Мон ымтэм-кылтэм кадь - сое уг тодӥськы. Дорам вуиз лапег мугоро эгыр кадь сьӧд негр, ӟуч сямен умой вераське. Юрттӥз виза басьтыны. Со ик милемыз Луксоре экскурсие но нуллӥз. Азьпалтыса ке но, верам потэ: сюрес вылын ньыль час ӵоже одӥг кыл но ӧз поттылы, ымысьтыз вӧйыз кисьтӥськоз, кожаз, дыр. Тӥни сыӵе сюриз гид. Аэропорт город вӧзын ик. Автобусысен укное лякиськи. Ваньмыз паймытэ: сюрес кузя куасьмем-пыжем музъем - сюй но, Хургадаысь огезлэсь мудрон чебер юртъёс но, со вӧзын будӥсь магнолиос, пальмаос но. Чылкак уйвӧтын кадь. Кык нунал мар ортчыса, та выжкыл суред ӵукна бус сямен пумен тӧлӟиз. Ульчаосысь пиккетӥсь, бызгетӥсь машинаос но вамышлы быдэ лавка кузёослэн "как диля" шуыса пумитамзы акыльтыны ӧдъязы. Вашкала Луксор городэ ветлыса валан кылдӥз, курорт город но пыдлось пустыняын улон инты ӵошатыны луонтэм. Огшоры египет калык улэ кырсь но начар. Ми вуылыку, со вал декабрь пумын, бакчаосысьтызы утялто вал кисьмам помидорзэс, сакыр тростниксэс. Валамон, ваньзэ будэто ву киськаса гинэ. Куазь туж кӧс улэ, араз огпол-кык пол зор усе. Гужемзэ 40 градус но солэсь пӧсь, Выль ар котырын - 22-25 градус. Зэм, уин салкымгес - 12-14 градус. Та вакытэ Горд зарезь дурын уно шутэтскисьёс, шунды - небыт, ву - шуныт. Ваньмыз умой кадь, но ӟызы кисыен лыктыны шулдыр ик ӧвӧл. Пирамидаос но, Горд зарезьысь шормуӵъёс но, вуэ зымылон но - ваньмыз понна бусьтыр коньдон медло. Кылсярысь, верблюдэ пуксьылон 15 фунт усе, асьме манетэ берыктыса 120 манет пала. Луксоре экскурсие ветлон понна (Хургадалэсь со 300 иськемын) быдэн 70 доллар тырим (2000 манет котырын). Египетын ваньмыз дуно. Малпасько ни вал, кӧты тырымон емыш сиё. Юасько ульчаысь пересьлэсь бананзэ - килоез, пе, 5 фунт. Ижын со уг ке но буды - кык пол дунтэм. Юалоды, мар паймытӥз, мар сюлме кылиз? Нырысь ик адямиос, дыр. Арня ӵоже улыса ӧй адӟы одӥг юэм муртэ но, тамак пурккетӥсьёсты но пумитаны шуг. Лушкаськисьёссы но асьме дорын кадь ӧвӧл, шӧдске. Нош киязы уксё сётэмез, чаевые шуонэз, возьмало. Юрттозы-а чемодандэ ӝутыны, утялтозы-а кӧлан интыдэ - дася шальтыртӥсьсэ. Англи колония вакытысь сямъёс татчыозь возисько, господаослы выллем табере узыр туристъёслы кизэс мычо. Англи кылэз Египетын ӟеч тодо. Телевизор пыр иворъёсты нырысь араб кылын, собере англи кылын верало. Чылкак асьмелэн "Шаер" но "Песочная" программаос выллем. Жаль, но асьме странаын лэсьтэм вузъёс та палан уг адӟисько. Тросгес учко Америка шоры. Огеныз шат данъяськод, "Калашник" (кызьы шуо татын) автоматэн. Полиция но, армия киын - со тырмыт. Тӥни озьы... Оло шумпотод, оло бӧрдод. Арня ӝог ортчиз. Вуим пыласькыса но синкыли кадь чылкыт но кузьыт Горд зарезьын, тодматскыны но вуттӥм. Кыкетӥ-а, мар-а нуналаз Петербургын улӥсь нылкышно монэ Удмуртиысь ӧвӧл-а шуыса юаз. Чылкак пайми. Отысь шуисько. Нош кызьы-о, пӧй, валад? Быземезлэсь азьло со Чайковскийын улэм, Удмуртиен артэ. Сузэрез Ижын улэ. Вераськемея тодмам. Вот озьы. Кытчы пырод на, англи шпионлы уд тупаськы бере. Одӥгез тодмое Москваысь кинооператор Сергей Стариков пӧртэм киностудиосын ужамын. Али Останкиноын видеооператор. Огъя кыл ӝог шедьтӥм. Соин ӵош ВГИК-ын дышетскем Ижысь Сергей Федоров. Салам вераны косӥз. Тодӥсько сое, но шер адӟылӥсько. Та чуръёсыз лыдӟыса, оло, кин ке солы ивортоз азьлогес. Вуиз кошкон дыр но. Ми интые лыктозы Уралысь но Сибирьысь, Украинаысь но Прибалтикаысь, Германиысь но мукет кунъёсысь туристъёс. Нош ми витиськом самолётэ пуксёнэз. Сюлэм пирсэкъя, ӝеганъёс медам луэ вал. Кема ӝегам куно, акылес луэ ни. Мурт шаер - со мурт ни, дор палэд мусогес. Огпӧртэм гужем кинлы ке яра, дыр, нош мон понна вошъяськись инкуазь кельшегес. Арня куспын лымылэсь мӧзми. Чалякгес Россие - вордскем Удмурт шаерам! Ӟеч лу, Африка! Г.Юсаев. "Етӥн" программа Улӟоз уй пал буртчин Шаермы вашкала дырысен етӥн будэтӥз, дэра куиз, та дуно культураен данъяськиз. Элькунамы али но ужало трос етӥн заводъёс. Но берло дыре, жаляса верано луэ, чагыр сяськаяськись бусыосмы данаклы сюбегазы. Соин сэрен етӥн предприятиосмы мырдэм "шокало". Вазен но, война бере но етӥнэз киын ишким, валэн заводъёсы нуллӥм. Табере хозяйствоосы вуэмын пӧртэм машинаос но техника. Но югдур уг воштӥськы. Сое тупатонлы али Россиын но Удмуртиын тросгес саклык висъяське. Шаерамы али кутэмын "Етӥн" кун программа, сое улонэ пыӵатонъя кылдытэмын нимаз комиссия. Та нуналъёсы со Правительствое люкаськылӥз, кенеш ортчытӥз. Ужрадэз нуиз комиссилэн кивалтӥсез Правительстволэн Тӧроезлэн воштӥсез Михаил Назаров. Туэ уй пал буртчинэз 6 сюрс гектарлэсь уно кизьыны чакламын. Трос-а, ӧжыт-а со - туннэ но кин уз вера. Малы ке шуоно, етӥн бусыосмес кыеданы, ватсаса кужым сётыны ум яратӥське. "Етӥн" программа чакламын ке куать миллион манет пала юрттэт сётыны, кӧняез со та культураез будэтонэ шедёз? Нокин уг тоды. Сыӵегес вераськон вал комиссилэн кенешаз но. Но туннэ элькунысьтымы куд-ог районъёсын уй пал буртчин будэтӥсь хозяйствоосмы асьсэды возьматӥзы ни. Тани Игра районысь "Рассвет" гурт хозяйство та культураез будэтон бордын тырше. Эштослэн кивалтӥсез Иван Чирков шуэ: - Етӥн будэтыны ми пумит ӧвӧл, со изъян ке но сётэ. Али хозяйство гектарысьтыз 2 центнер куж (волокно) но 5 центнер ёрос кидыс басьтэ. Со трос ӧвӧл. Милемлы кулэ юрттэт, тужгес но техникаез выльдон ласянь. 70 процентэз со вужмемын ни. Вылаз ик, етӥн вузаммы понна дыраз коньдон ум басьтӥське. Соин сэрен трос ыштонъёс адӟиськом. Азьло одӥг комбайн 180 сюрс ке сылэ вал, али 290 сюрс луиз ни. Кызьы сое умоен ладъялод? Лизинг амалэн шаермылы 6 етӥн комбайн басьтыны чакламын. "Рассвет" но одӥгзэ возьма. Малы бен етӥн бусыос уг паськытало? Зэм, берло дыре солэсь дунзэ будэтӥзы. Но со ӧжыт на, шӧдске. Малы? Уг тырмы кидыс, уката ик - ӟечез. Мукет юосын ӵошатыса, етӥн кидыс ӝог кужымзэ ыштэ. Тани Ува районысь Ленин нимо крестьян хозяйствоын арлы быдэ котькуд гектарысь шорлыдын 5-6 центнер етӥн кидыс но 7-8 центнер мертчан басьто, нош республикаямы со лыдпус 2-3 поллы ичи. Малы со озьы луэ? Та культураез будэтонлы уг висъяськы кулэезъя саклык. Шуом, хозяйствоослы етӥн будэтонлы сёто минерал сылалъёс. Малпаськоды, со тукъёс етӥн бусыосы пазясько? Матын но уг. Тӥни со бордысь ик потэ пайда басьтонмы. Ваньзэ сое лыдэ басьтыса, комиссия кенешиз юрттэт сётыны сыӵе хозяйствоослы, кытын висъям уксё мыноз етӥн будэтыны, та культураен герӟаськем техника басьтыны. Юнме шат асьсэос етӥн заводъёс но та культураез кизьыны чаклало. Кылсярысь, Игра районысь Зура етӥн завод туэ малпа 220 гектар вылын етӥн будэтыны, музъемез арендае басьтыса! Со понна предприятилэн техникаез но, кидысэз но вань. Кызьы сое умоен уд лыдъя. Россиын но шаерамы тужгес но бадӟым ужпум - ӟеч етӥн кидыс уськытон. Азьло асьмелэн ужазы етӥн кидысъя станциос, табере соос быдтэмын. Соин ик хозяйствоослэн кивалтӥсьёссы но специалистъёс, етӥн заводъёс сюлмасько та ужез умоятон сярысь. Со уго герӟаськемын арысь аре тросгес мертчан но етӥн кидыс басьтонэн. Сотэк асьмеос азьлане йыгмыт вамыш ум лэсьтэ. Кыкетӥез ужпум - техникаез выльдон, азьмынӥсь амалъёсты пыӵатон. Кенешын вераськон мынӥз голландской амалэн етӥн будэтон сярысь но. Со, пе, зэмзэ но, пайда сётоз. Озьы-а, тазьы, но солы асьмеос дась ӧвӧл на. Соин ик туннэ ог дышем амалъёсын ужаны кулэ, соос уродэсь ӧвӧл. Хозяйствоослы одӥгез гинэ уг тырмы - етӥн сярысь тырмыт сюлмаськон. "Етӥн" программалэн кыкетӥ бадӟым люкетэз сӥземын сое переработать каронлы. Таин валче, кызьы бен тодэ уд вайы удмурт кенакъёсмес! Соос етӥнлэсь мар но ӧз куэ - дэрем, айшет, ӵушкон, ковёр, выжлёгет но музонзэ! Нош али етӥн заводъёсмы куж гинэ лэсьто. Тырмыт-а со? Ӧвӧл. Пайда басьтод соку гинэ, куке солэсь ӟеч вуз лэсьтод. Етӥн дӥськутэз маин ке ӵошатод, шат? Бен, асьмеос ваньмызлы ӝог дышиськом, берло гинэ изъян ваемзэ шӧдӥськом- валаськом. Озьы медаз луы вал уй пал буртчин будэтонын но сое переработать каронын. Со понна кулэ басьтыны туала ӟеч тӥрлык но машинаос. Нош гурт калык етӥн будэтыны быгатэ. Туннэ шумпотыса ивортэме потэ, та уж борды, кышкатэк басьтӥсько Зура но Селта етӥн заводъёс. Соослэн быгатонлыксылы огласянь оскиськом-шумпотӥськом, но мукет ласянь соослы шӧдскымон юрттэт кулэ. Геннадий Романов. Ӵуказеяз отельын пумиськи ог куамын аресъем тузӥ нылкышноен. Учкисько но - асьме адямилы кельше кадь,ӟуч туристъёсты экскурсие гожъя. Зэм но, Россиысь вылэм. Татчы быземын. Вуоно картэныз тодмасткем шутэтскыны вуылыкуз. Наташа вордскемын-будэмын Златоустын. Нош али кык гражданствоез: Россия но Египет. Марысь мар ке - чигнан сюресэз кылемын. Кызьы шуиз, Горд Зарезь, пе, со понна ваньмыз. Ӧй выжыяты, оло, озьы но. Но Хургадаысь "Маруся" ресторанысь егит эктӥсь нылъёсы адӟыса, мукет малпан каръяське. Таосыз пыласькон понна ведь ӧз лыктэ, кузь уксё гочатӥз. Россиен герӟаськем эшшо одӥг учыр. Одӥгаз магазинын кузьым утчасько. Вузчиен ог- огмес ум валаське, эшсэ ӧтиз. Таиз шатыр ӟуч сямен бӧтьыртэ, шаплы, кескич, алдалоз но куштоз. Юатэк ӧй чида, кытысь сыӵе мотор пияш. Ӧз танӥськы, сюлэмзэ усьтӥз. Нимыз Дима, 29 арес. Атаез Екатеринбургысь. Али, пе, Египетын улэ - Луксорын. Кӧня ке пол ачиз но Урал музъеме вуылэм. Туж потэ ӟуч нылашен кышнояськемез. Татын Дималэн аслаз магазинэз. Пырай дораз, отысь мон улэпкын мырдэм потӥ: маке но басьтыны косыса копак лякиськиз. Амал ӧз луы ни эрекчатэк, шуисько, сьӧрам коньдонэ ӧвӧл. Шарканын туннэ праздник Шаркан черкогуртын туннэ кутско республикаысьтымы гурт спортсменъёслэн 6-тӥ тол шудонъёссы. Сое радъясьёслэн чакламзыя вуыны кулэ вань ёросъёсысь командаос. Спортсменъёс куас вылын ӵошатскозы, винтовкаен ыбылӥськозы, кужымъез мертан гимнастикая нюръяськозы. Чакламын Удмурт Правительствоысь но ёросъёсысь кивалтӥсьёслэн командаоссы куспын волейболэн но футболэн шудон ортчытыны. Таяз тол шудонъёсын озьы ик нюръяськон мыноз "Удмурт дунне" газетлэн азвесь кубокез понна но. Туэ со ортчытӥськоз 49-тӥзэ. Нош солы кутскон сётэмын вал ай 1952-тӥ аре. Азинсконъёс тӥледлы, гуртысь спортсменъёс! Н. Лялин. Синмаськиськод "Россия" кинотеатр кӧня ке нунал ӵоже ини шумпоттылэ выль уженыз - учкисьёслы туж яра "Сибирский цирюльникъ" фильм. Та суред тодамы вайытэ Россиысь вашкала улонэз, возьматэ солэн шоркарезлэсь, Москвалэсь, азьвыл но туала чеберлыксэ. Учкисьёс синмасько муспотон егитъёс куспын пуромем ӟырдыт яратонлы - пинал юнкер - вуоно офицер Андрей Толстой но Америкаысь куно Джейн Маккерин нырысьсэ пумиськемзы бере ик ог-огенызы шуныт кусыпъёс тупато. Зэм, ӟырдыт яратонзы бератаз укыр лек шугадӟонэ вуттэ. Кызь ар ӵоже уг пумиськыло яратӥсь сюлэмъёс, кызь ар ӵоже уг тодо ог-огзы сярысь нокыӵе иворез. Рольёссэс усто шудо Россиысь актёръёс Олег Меньшиков, Алексей Петренко, Анна Михалкова, Никита Михалков, англичанка Джулия Ормонд. Фильм экран вылэ вуттэмын, Россия Федерациысь кивалтӥсьёс сюлмаськемен. Озьы ик уно юрттэт сётэм солэн валтӥсь продюсерез Мишель Сейду. Учкисьёслы таӵе дуно кузьым шедьтэмез понна, тужгес бадӟым тау карыны кулэ кинофильмлэн атаезлы - тодмо режиссёрлы Никита Михалковлы. Е. РОМАШОВА. Покчи гужем Таӵе кыл кузъетэз али тодо ини чеберлыко удмурт литератураен вань тунсыкъяськисьёс. Соин ик сизьымдонэтӥ аръёсозь потылэм удмурт-ӟуч кыллюкамъёс пӧлысь одӥгаз но пыремын ӧвӧл со шуи ке, тросэз уз оске, дыр. Словарь лэсьтӥсь кылчиос сое, озьыен, уг тодо на вылэм та дырозь. Ӟуч-удмурт кыллюкамъёс но ӵапак со муген ӟучъёслэн "бабье лето" шуонзы берыктытэк, воксё пыртытэк кельтэмын. Озьы бере, амалтэк малпаськоно луэ: кытысь вуыса но кызьы "покчи гужем" кыл сузьет асьме вераськонэ но гожъяськонэ пыриз? 1971-тӥ ар котырынгес вал кадь та учыр. Егит-егит суредчи Семен Виноградов УдНИИ-е ужаны интыяськиз гинэ но удмурт калык устолыкъя - искусствоя - нимаз уж дасян борды сэзь-сэзь басьтӥськиз. Кызьы ке огпол удмурт пужыос люканы кузпалызлэн вордӥськем гуртаз - Огырчилы матысь Варклет-Бодьяла - ветлӥз. Иже бертысааз ини литературая секторысенымы мыным шумпотыса возьматӥз отысь олокӧня пӧртэм пужыоссэ но сыӵе ик шумпотыса ивортӥз: - Тодӥськод-а, Кириллыч, варклет-бодьяос ӟучъёслэсь "бабье лето" шуонзэс тыпак удмурт сямен но туж чебер верало - "покчи гужем" шуо. Яра вылэм со веранэз асьме гожъяськонэ но кызьы ке выжыятыны. Валамон ини, солэн шумпотонэзлы мон но шумпотӥ. - Яра вылэм, - шуи. - Только кызьы ке озьы кароно вылэм - "диалектизм" шуыса, шуак медаз палэнтэ. Арня-а, тросгес-а ортчиз но, Семен Николаевич шуэ: - Сыӵе амал мон шедьтӥ кадь. Солы сӥзьыса гожтоно, дыр, нимысьтыз кылбур. Кылбурзэ соку ик лыдӟиз. Кыкмы но таӵе малпанэ вуимы: пуштросэзъя кылбур ярамон ини, кылгурзэ, чеберлыксэ ӟечгес карыны, выльысь ужаны кулэ на. Нош ик арня-а, тросгес-а ортчыса, УдНИИ-е дышем сямызъя пыриз Володя Романов, кыллэсь чеберлыксэ но дунолыксэ кийыгыриеныз но туж ӟеч шӧдӥсь-валась кылбурчи. Семен Николаевич покчи гужем сярысь кылбурзэ - сюлэм писыръямзэ вормытэк, лэся, - солы возьматӥз. Володя, пукон вылэ пуксьыны тодаз но лыктытэк, шарак лыдӟыса ортчиз но серектӥз: - Ма, пуштросэзъя та туж ӟеч маке ини. Тае ик тусъяны, ӧйтӧд, пӧрмыто-а, уг-а - меӵак вераме али уг луы. Тая мон, пожалуй, воксё мукет кылбур гожто, дыр, озьы карыны пумит уд луы ке ачид. Сыӵе кылбур, мынам валамея, одно ик поттыны кулэ. "Диалектизм" шуонъёсты таӵе амалтэк литературае пыртыны туж шуг - "пересьёс" сыӵе кылъёсты соку ик ӵушо яке мукет кылъёсын, зумыттэм макеосын вошто. Семен Николаевичлэн Володя кие сётэм кылбурез берен ӧз берытскы ни. "Покчи гужем" кылбур, тыпак мукет луыса, Володялэн нимыныз кыре-буре потӥз. Со йылпумъямын вал таӵе чуръёсын: Покчи гужеме Уг ворды музъем... Сюлмын нош Чебер малпанъёс Вордӥсько. Бератаз ини, 1975-тӥ арын, та кылбурезлэсь нимзэ выль кылбур книгаезлы но сётӥз. Варклет-бодьяослэн "покчи гужем" кыл кузъетсы со дырысен вань удмуртъёслэн гожъяськон-вераськоназы выжыяськиз. Со понна асьмеос котьку тау карыны кулэ, малпасько, асьсэлы варклет-бодьяослы но, Семен Виноградовлы но, Владимир Романовлы но. Вань удмуртъёслы таӵе тодмотэм инӟы пырыос калык пӧлын али но ай трос гинэ на, дыр. Соосты утчаны но шедьтыны, гожъяськонамы-вераськонамы интыяны гинэ моггетоно, азьтэмъяськоно ӧвӧл. Асьме кылмес узырмытон сярысь асьмеос ик сюлмаськыны кулэ. П.Поздеев, "Кенеш" журналын ужась. Эмъюм эм мед луоз Шаерамы вуись вань эмъюмъёслы сётӥськись сертификатъёс 1-тӥ мартысен табере пусъемын, лыдэ басьтэмын луозы. Та ужез эскерыса возёз Аптекаосъя управлениысь сертификацияя но эмъюмъёслэсь ӟечлыксэс эскеронъя центр. Тазалыкез утёнъя министр Сергей Шадрин ивортӥз: Удмуртиын фармацевтика ужен выро кун луисьтэм сюлэсь ятыр огазеяськонъёс, дасо пала нимаз ужбергатӥсьёс, сю витьтон укмыс аптекаос. 70-лэсь ятырез медициная учреждениос эмъюмъёс ас кожазы басьяло. Соин ик соослэн ӟечлыксы тыро-пыдо уг эскериськы. Россиын кылем арын гинэ 1314 пумо эмъюмъёс ӟечлыксыя куронъёслы тупасьтэмен лыдъямын, нош Удмуртиын - 78-эз. *** Государстволэн выль ыстэм муртъёсыз юнматэмын акциосын "Удмуртский хладокомбинат", "Можгинский хлебокомбинат", "Игринский леспромхоз" но "Комета" огазеяськонъёслэн кивалтон ёзъёсазы. Удмурт Республикаысь Правительстволэн пресс-службаез. Ӟечкыласьком! Та нуналъёсы вордскем нуналзэс пусъё газетын ӵош ужась эшъёсмы Ольга Дмитриева, Раиса но Ольга Корепановаос, Зинаида Рябинина но Виктор Белов. Ӟеч мылкыд но уртчись шуд тӥледлы! Тодазы ваёзы Кызь тямысэтӥ феврале Национальной библиотекаысь "Удмурт шаер" клуб нош ик огинэ люкалоз удмурт литератураез яратӥсьёсты - та нуналэ ог-огенызы сюлмысь кенешозы Алнашысь "Ошмес син" огазеяськонэ ветлэм адямиос. Ортчем аръёс пумысь асьсэлэн малпанъёсынызы тодматозы тодмо гожъясьёсмы Пётр Кубашев, Пётр Поздеев, Пётр Чернов, Анатолий Комаров, Егор Загребин, Иосиф Иванов, биология наукаосъя доктор "Алнаш" бӧляклэн тӧроез Виктор Туганаев. "Ошмес син" огазеяськонын кыдаса, берло аръёсы тросэз тодмо адямиос луизы. Соос пӧлын - тодмо кылбурчи Иосиф Бобров, кылбурчи-кырӟась Владимир Котков, журналист Арсентий Павлов, суредась Юрий Лобанов, мукетъёсыз. Та пумиськон меӵак герӟаськемын улонысь дырызлэсь вазь кошкем тодмо кылбурчилы Флор Васильевлы сӥзем нуналъёсын. Кенешон кутскоз ӝытазе вить часын. Туно-пеллё - сизьым кыло Бер сӥзьыл, кынтылэм бере, бигер гуртэтӥ кибиткаен чиганъёс юмшаллям. Бусыын кӧлыны кезьыт бере, огаз корка куриськиллям. Бигер кышномурт нуныоссэс жаляса кӧлтэм, утялтэм. Ӵукна туж тау карыса кошкиллям. Но ӝоген огез вож нуныен кышномурт берытскем - кибиткамы тӥяськыса, лумбыт бусы шорын сылӥськом ни, пе, тупатытозямы нуныме уд-а эскере? Эскеро, ма жаль ук. Нуныез доры чиган кышномурт берытскымтэ ни. Со дырысен пичи чиган ныл бигер семьяын будӥз. Кыкетӥ анаез со учырез ватыса ӧз улы - ма нылашлэн тусыз-буйыз но, сямъёсыз-выросъёсыз но ас выжыяз, чиган вирез уд вошты. Туж-туж мӧзмылыкуз, бусые потыса, сэрек кырӟалля, пе, вал со. Ӟучлы бызьыса но, аслаз ик вирыз вормем. Ачиз тунаськон-пелляськонэз оло, ӧвӧл валаллям, оло шарае ӧвӧл поттэм, но нылыз пичиысен "пӧртмаськыны" кутскем. Вить аресъем Нурия (ӟуч нимыз - Анна) шуак маке ӧвӧл вера, пе. Корказы пырем мурт шоры долкаса учке но чальгес берт, нылпиед шудтэм учыре шедёз яке эшшо маке, луоз, пе. - Со учыръёсты ачим но тодӥсько ай, - шуэ Анна Гавриловна. - Кулэтэмзэ зулисько шуыса, кӧня монэ тышкаллязы, но верамъёсы зэмало вал. Ма, пыр адӟиське ук. Соку ини, йӧспӧртэм луэмме валаса, алӥзы: сыӵе муртъёсты уг ярато, шып ул! Бигер песянай-песятаез инмарлы туж оскылӥзы. Соин ик Казаньысь мечете дышетскыны келязы. Тыныд аллах мудрон быгатонлык сётэм - соин вӧсяськыса ул шуылӥзы. - Вань дышетскытозям, больницаын ужан сярысь малпаськылӥ, сюлэмы калык пала кыскылӥз, - вера Анна Гавриловна. - Озьы ик луиз. Мечетез йылпумъяса, дышетсконме азинтэме ӧз луы ни - сютэм аръёс вал соку. Интыяськи санитаркае. Куддыр врачлы но, аслыз висисьлы но вератэк пеллялляй. Кык-куинь нунал ортчыса, кырылыны дасям висись пыд вылаз султылӥз. Врачъёс паймылӥзы асьсэлэн сыӵе "быгатонлыкъёссылы". Кӧня соослэсь янгышсэс тупатъялляз, адямиослы выльысь улон сётылӥз огшоры санитарка. Нош быгатэмзэ шараяны ӧз дӥсьтылы - соку "сенсъёслы" эрик сётымтэ на вал уго. Пельысь пеле кылыса, со доры висись муртъёс вуылӥзы ик. Быгатэмезъя юрттылӥз. Кузпалзэ вот, Алексеез, утьыны ӧз быгаты. - Радиациез уд вормы, - шуэ Анна Гавриловна. - Со раклэсь кышкыт маке. Нош Алексей пиналысен заводын ужаз - уран пыӵаз, дыр. ФЗУ-ез быдтэмез бере ик Глазове ыстӥзы уго милемды. - Нош ракез вормыны луэ ик шат? - юасько арлыдо кышномуртлэсь. - Дырыз дыръя ке эмъяны кутсконо, луэ. Но адями врачлы но оскыны кулэ, пелляськись операция уг лэсьты ук. Вот юонэз, наркоманиез эмъяны секыт ке но, огнамлы но вормонтэм овӧл. - Тунамъёсмы оскыны кулэ-а, солэсь куддыр мылкыд но сӧриське, дыр, ук. - Умой ке верай - оскы, урод ке - эн, - мылкыдэз куашкатонтэм вылысь, лэся, вераз со. - Зэм вера со, - шуэ монэ татчы тодматыны ваем эше. - Выны аварие сюрыса кулӥське ни вал. Больницаын шӧй кадь кыллиз, врачъёс но бурмемезлы ӧз оскылэ ни. Кытысь ке кылыса, татчы лыктӥ. Анна Гавриловна сиён-юон вылэ пельтыса лэзиз, улӟоз, ай соид кышнояськоз но шуиз. Кӧня ке дыр ортчыса, вынмылы зэмзэ но йӧнгес луиз, но пыд вылаз султэмез ӧз ик луы. Гуртэ нуим, туж куректӥм ӧлексы кылемысьтыз. Кин малпалоз на, коляскаын пукись мурт кышнояськоз на шуыса. Но оскоды, оло, уд, ар ортчыса, вынмы кышно кураны ӧтьыны кутскиз. Больницаын дыръяз отысь пинал санитарка синмаськем солы. Ар ӵоже гожтэтъёс пыр кусып возиллям. Нош табере тани кык ар уло ни. Оло, пыд йылаз но султоз ай... Тодмоеным куспамы удмурт кылын вераськеммес кылыса, Анна Гавриловна но асьме кылэ выжиз. - Ма тӥ удмуртэз но тодӥськоды шат? - Уд, пе, тоды. Кӧня ар мон удмуртъёсын артэ улӥсько ни. Бигерзэ но, ӟучсэ но, мордвазэ но, араб, узбек, азербайджанзэ но, чиганзэ но... - Зол. Нош чиган выжыдэс шӧдӥськоды-а? - Шӧдӥськытэ уго. Урамысен но, чиганъёсты адӟисько ке, сюлэмы уг чида, котыразы мынӥсько, вераськисько. Но куное уг ӧтчаськы. Ӟеч малпанъёсын ветлӥсь муртъёсты гинэ мон коркаям лэзисько - куд-огзэ пелляськыны лыктэмъёсты но уг кутӥськы, малпанъёссэс пыр адӟисько. Юонэн курадӟисьёсты жалясько - секыт висён со. Огпол гинэ алдаськы, собере быдэс улонэд кырыж-мерыж кошке. - Ма, асьсэды кутэмзы ке ӧз луы, кызьы соосты пелляса эмъялод? - Мед возиськозы шуыса ик пелляно. - Анна Гавриловна, куд-огез ялан пелляськисьёс дортӥ ветло, но эмез-юмез уг луы ук. - Ваньмыз понна вераны уг быгатӥськы. Озьы луылэ, малы ке но туж шер - кык-куинь мурт, дыр. 8-тӥ Март азьын Анна Гавриловналэн квартираез улэп сяськаос пӧлы вые. Соос шоры учкыса, кышномурт шумпотэ - кӧня мурт выльысь шудо луиз. З.Рябинина. Удмурт Республикаысь Правительство, "Ижевский механический завод" кун предприятилэн но Удмуртиысь промышленностья но экономикая "Развитие ассоциацилэн администрациоссы но профсоюз огазеяськонъёссы кайгыро Удмуртиысь промышленностья но экономикая "Развитие" огаезяськонлэн быдэсъясь директорез СТЕПАНОВ Юрий Александрович улонысь дырызлэсь вазь кошкемен валче но ӵыжы-выжыосызлы но матысь адямиосызлы мур куректэмзэ верало. Зямбайысь азьмынӥсь Мичурин нимо гурт хозяйствоын Елышевъёсты чипыез но, курегез но тодэ, дыр. Соос данэ потэмын Вавож районын но, Удмртиын но. Кузёзы Михаил Егорович устоосыз пӧлысь устоез механизатор, кузпалэз - Нина Николаевна - республикаямы тодмо экономист. Михаил Елышев Зямбайын 33 ар механизатор луыса ужа ни. Али солы Т-150 кужмо трактор оскемын. Ми гуртэ ветлон нуналэ со "корт валзэ" эмъя вал. Гуртысь вань механизаторъёс Михаил Егоровичлэсь адӟем каро, со сьӧры уисько. Сергей пиез но атаезлэсь сюрессэ бырйиз, механизатор луиз. Соос пӧртэм техникаен ужаны быгато. Сергей али К-701 "Кировец" тракторен ке ужа, гужем СК-5 комбайнэ пуксе, ю-нянез октэ-кутса, нош атаез КСК-100 комбайнэн пудо сиён дася. - Михаил Егорович техникаен ужаны кадь вордӥськемын, - данъяськыса вера колхозысь валтӥсь агроном Владимир Канеев. - Машинаосты вить чиньызэ кадь ӟеч тодэ, техникаез быгатыса ужатэ, пиезлы но сыӵе сям пыӵатӥз. Кызьы солы уд шумпоты. Бен, Зямбайын Елмышевъёс кадь усто ужасьёс трос. Соин ик хозяйство арысь аре удалтэм ю-нянь, картофка будэтэ, уно сӥль-йӧл поттэ. Нош гурт хозяйствоен 30 ар пала быгатыса кивалтэ ни шаерысьтымы одӥгез тодмо но дано специалист - Валентин Егорович Калинин. Г. РОМАНОВ. Михаил Елышев. Туспуктӥз В. КАМАШЕВ. "Завьяловский" профилакторий 12 но 21 нуналлы путёвкаос вуза. Вазиськоно Хохряки посёлоке 21-08-17 телефонъя. Прокуратураын Инкуазез бӧрӟыто солэн "эшъёсыз" Инкуазез утёнъя Удмурт межрайонной прокуратура кылем арын эскериз "Пермтрансгаз" ООО-лэсь Можга, Воткинск, Ува но Ижевск управлениосызлэсь инкуазез утёнъя законъёсты быдэсъямзэс. Трос тырмымтэос шараямын. Чагыр эстӥськон гумыосты лэсьтон но тупатъян ужъёс нуэмын экологияя экспертизалэн йылпумъянъёсызтэк. Куд-ог интыосын музъем вылэ му вӧй бервылъёс киськамын. Шараямын сыӵе учыръёс но, куке тыметъёсы но шуръёсы лэзьылэмын вал чылкытатымтэ вуос. Со понна кӧня ке кивалтӥсьёс административной кыл кутытон улэ кыскемын. Удмурт Республикаысь Музъем пуш ваньбуръя комитет но ялан законъёсты тӥяса ужа. Куд-ог учыръёсы музъем ваньбурез уже кутон сярысь лицензиос экологияя но кун экспертизаос лэсьтытэк сётъямын. Лицензия сётонлы куронъёс чакламтэ, музъем ваньбурлы дунъёс тупатэмын, законъёсты ортчыса. Вань сыӵе учыръёс, куке законъёслэсь кылзӥськытэк ас коже кивалтон ёзъёс музъем пуш ваньбуръя комитетэн ӵош куд-ог адямиослы музъем узырлыкенымы кузёяськыны лэзё. Озьы, кылсярысь, умойтэм лэсьтӥз Каракулино ёрос администрация, "Стройснаб" ЗАО- ез "Каракулинское-И" песок-кӧльы поттон интыен кузёяськыны лэзьыса. Солэсь азьло но та ёрослэн администрациез музъем узырлыкъёсын кузёяськыны кинлы ӧвӧл лицензиос сётъяз. Та учыръёс пумысен югдурез пумозяз сэрттыны косэмын Удмурт Республикаысь музъем узырлыкъёсъя но инкуазез утёнъя министрлы но Музъем пуш ваньбуръя комитетлэн кивалтӥсезлы. Законъёс озьы ик уг быдэсъясько Удмурт Республикаысь бюджетэ пырисьтэм экологияя фондлэсь коньдонзэ кулэезъя кутон пумысен. Соосты тӥяло кызьы ке фондлэн правлениез, озьы ик музъем пуш ваньбуръя комитет. Тодмо луизы сыӵе учыръёс, куке фондлэн коньдонэз кутэмын чик но инкуазез утёнэн герӟаськымтэ ужъёсы. Но тужгес но паймытэ мукетыз: законъёсты тӥяло вылӥ должносте пуктэм адямиос, кинъёс нырысь ик асьсэос чакланы кулэ законъёсты быдэсъямез. Инкуазез утёнын лэсьтэм янгышъёсты прокуратура шараяз Ижевск городысь инкуазез утёнъя комитетын, чорыгез утёнъя инспекциын, Правительстволэн пӧйшуран хозяйствоя управленияз, "Сарапульский водоканал" МП-ын, "Удмуртнефтепродукт" ОАО-ын. Вань учыръёсъя прокуроръёс ужазы, янгышам муртъёс кыл кутытон улэ кыскемын. Инкуазез вӧсь каронлы пумит ӝегатскытэк но чурытэсь ужрадъёс кутыса гинэ луоз та удысын югдурез тупатыны. В. Походин, инкуазез утёнъя Удмурт межрайонной прокурорлэн воштӥсез. 31, 32, 33-тӥосыз... Константин Токарев 33-тӥез ни... Та нимтулъёсты гожъяны кутскизы 1918-тӥ арысен. Со - бырем милиционеръёслэн списоксы. Пыраклы пыртэмын МВД-лэн быремъёсты Буре ваён пул вылаз. Туэ гинэ, 4-тӥ феврале, эшшо куинь фамиля йылӥз. Чечняысь Катыр-Юрт дорын бырем Удмуртиысь куинь омоновецъёс В. И. Востриков, В. А. Собин но К. В. Токарев югдурез утёнъя министрлэн приказэзъя пыраклы пыртэмын МВД-ысь ужасьёс пӧлы. Буре ваён пул вылын соос интыяськемын 31, 32 но 33 номеръёсын. Атыкай музъеммес утисьёслэн нуналазы МВД-ын буре ваизы та куинь пиосты но. Ӧтемын вал соослэн анай-атайёссы, ӵыжы-выжыоссы. Ӧз чидалэ синвуаськытэк бырем пиослэн анай-атайёссы. Нош ик бам кузя васькизы сутӥсь шапыкъёс. Ӝож крезьгур сюлэмез позыртэ. Люкаськемъёс чалмыт сылыса буре ваё бырем эшъёссэс. Мемориальной пул вӧзы выдо улэп сяськаос. Секыт люкиськыны ӟеч адямиосын. Но улэпъёсызлы улоно но ужано. Атыкай музъеммес утисьёслэсь нуналзэс пусйыса, югдурез утисьёслы Кун Кенешлэн Тӧроез Александр Волков но югдурез утёнъя министр Владимир Щербаков МВД-ысь устоосызлы почёт грамотаос сётӥзы. Куать мурт полковник звание басьтӥз. Куд-огез пусъемын дано нимъёсын. А. Андриянов. Туспуктэмъёсыз В. Камашевлэн. Кусып матын медло Кун Думалэн депутатэз Светлана Смирнова ортчытӥз аслаз юрттӥсьёсызлы семинар. Отчы ог 50 мурт пыриськиз. Люкаськемъёс тросгес тодӥзы Россиысь парламентлэн улӥ ёзэзлэн, отысь аппаратлэн ужамез сярысь, кылзӥзы бырйисьёсын пумиськонэз радъян, гожтэтъёсты эскерон, соосъя ужрадъёс кутон пумысен ивортонъёсты. Та ласянь опытэнызы тодматӥзы Кун Думалэн, Кун Кенешмылэн но правительствомылэн аппаратъёсысьтызы валтӥсь специалистъёс Александр Ряплов, Галина Ходова, Александр Перевощиков. Мур но пайдаё вераськон вал интыысь ивор вӧлмытӥсь ёзъёсын валче ужанэз радъян пумысен. Республикаысьтымы кун органъёсысь пресс-службаослэн кивалтӥсьёссы Виктор Чулков но Иван Белов пыр-поч валэктӥзы на ужлэсь пӧртэмлыксэ. Кун Кенешлэн депутатэз Владимир Бодров мадиз Николай Сапожниковлэн юрттӥсьёсыныз кызьы ужамез сярысь. Кенешемын округысь котькуд ёросын но городын Светлана Смирнова депутатлэсь приёмнойёссэ усьтыны. Озьы калыклэн шугъяськемез валамонгес луоз, адямиослэн куронъёссы но ӝоггес быдэсъяськозы. Куд-ог эшъёс быръён вакытэ трос сӥзе, нош мандат басьтэмзы бере калыкез вунэто, мыным сыӵе сюрес уг тупа, пусйиз Светлана Константиновна. И. КРИЧЕВ. Вавожын лэсьтӥсько глазовъёс Выль культура юртэз уктон сярысь вераськонъёс кема аръёс ӵоже мыно ни. Кык ар талэсь азьло лэсьтӥськон ужъёс кутскизы. Собере, коньдон ичи вуэмен, оскон ӧй ни вал кадь выль лэсьтӥськонлы. Но Правительство тырмыт коньдон висъяз. Вавожын сомында лэсьтӥськисьёсты шедьтыны шуг вал. Соин та уж борды басьтӥськиз лэсьтӥськонъя Чепецкой стротельной управление. Миым толсур толэзе глазовъёс вуизы Вавоже. Соку котлован гудэмын но инъетлэн ог люкетэз гинэ ӝутэмын вал. Глазовысь ик вуттӥзы лэсьтӥськон материалъёс. Транспортэн юртто асьсэос вавожъёс. Культура юртэз 2001-тӥ арын вуттыны чаклало. Солэн бадӟым залаз 300 муртлы инты луозы. Нимысьтыз комнатаос лэсьтэмын луоз кружокъёс нуыны, кырӟась-эктӥсьёслы люкаськылыны. П.Кузнецов. Республикаысь гурт спортсменъёслэн ВИ тол шудонъёссы Шарканъёс вормылӥзы - играос азьпалтӥзы Ортчемаз шутэтскон нуналъёсы Шарканэ люкаськылӥзы шаерысьтымы тужгес кужмоосыз гурт спортсменъёс. Соос ыбылӥськизы, ки кужымзэс мертазы, куасэн бызьылӥзы. Данъян тубат вылэ тужгес но трос пол ӝутскылӥзы но чемпион медаль басьтӥзы шарканъёс. Куас сюресъёс вылын ӝужам кизилиоссы ваньзэ, луонозэ но луонтэмзэ но, лэсьтӥзы командаен вормон понна. Канжаськизы шарканъёс баскетболэн шудонъя - сизьыметӥ инты (таиз азьвылгес ортчиз Уваын). Многоборьеын но адӟиськиз ляб интызы - со ыбылӥськон. Озьы соосты азьпалтыны быгатӥзы играос - 344 очко. Ньыль очколы гинэ бере кылизы шарканъёс (340 очко). Куинетӥ интые потӥз Завьяловоысь команда - 332 очко. Кыкетӥ группае пырись командаос интыосъя тазьы радъяськизы: Яр - 272 очко, Дэбес - 266 очко, Алнаш - 257 очко. Тол шудонъёслэн кызьы ортчемзы сярысь пыр-поч ивортом газетлэн вуоно номераз. Тазьы нянен-сылалэн куноосты пумитазы шудонъёсты радъясьёс, шарканъёс. Куас сюрес вылын егит спортсмен Можгалась Семен Иванов. Нылкышноос-ветеранъёс пӧлын вормисе потэмъёс (паллянысен буре) Нина Данилова (Дэбес), Антонида Трефилова (Шаркан), Юлия Рудина (Яр). В. Беломорскихлэн туспуктэмъёсыз. "Но мон ӧй кушты на крезьме..." Егит пи крезен шудэ. Туж ӝожмыт туннэ солэн куараез. Дырын-дырын викышъяса кадь бӧрдэ крезь. Пияшлэн но синкылиосыз чилектӥзы. Зал шорысь корос котырын сыло адямиос, бам кузя васькись синкылиоссэс дыртӥд гинэ киосынызы маялто... Ӧз чида ни крезьчи. Дыректӥз но чалмиз крезь. "Шуд на, шуд на эшшо", - куризы. Ӧз ни быгаты. Вожзэ медаз вайы дышетӥсез - берпум сюрес вылэ келяно гурзэ йылаз-пумаз ӧз вутты, пушкыз тыриз... Ваньмыз понна тау, Владимир Иванович, ӟеч лу... Кыӵе чебер но небыт вал соку куазь. 2000-тӥ арлэн куинетӥ нуналыз, толшор ӵукна... Воткинскысь чус омырез сайкатӥзы нырысь автобусъёс, кытчы ке дыртӥзы адямиос. Соос ӧз на тодэ: туннэ улонысь кошкиз бадӟым дышетӥсь, бадӟым адями - Владимир Иванович Корепанов. Воткинсклы гинэ овӧл, Удмурт дунне тыр шуккиськыны кулэ вал солэн нимыз, угось кельтэм пытьыез мур но вунонтэм. Но тросэз-а улэп дырхяз тодӥзы сое? Али но тодӥськоды-а тӥ: кин вал со? Кыӵе вал со? Владимир Иванович туж яратӥз удмуртъёсты. Вордӥськиз со 1958-тӥ арын 10-тӥ мартэ удмурт семьяын. Ӟуч городын улэменызы, анай-атаез удмурт кылын ӧз вераськылэ. Озьы пияш ӟуч луиз, но удмурт сямен вала вал. Крезьгурез яратэмез вуттӥз сое Ижевскысь музыкальной училищее, собере Пермьысь культурая институтэ. Ужаз Воткинскын ик. Владимир Ивановичлэн ваньмыз вал кадь: кышноез, нылыз но анаез, яратоно ужез. Уж сярысь ке, со ассэ чик но ӧз жалялля. Тужгес но берло аръёсы. Ялан кытчы ке дыртӥз. Быронзэ шӧдыса, вакчи дыр куспын луонозэ лэсьтыны тыршиз, оло. Огдыре ик ужаз 1-тӥ школаын, "Крезьчи", "Вуюись" ансамбльёсын, крезьгуръя Чайковский нимо школаын... Берло вакытэ ӧй вал солэн шутэтскон нуналъёсыз но. Владимир Ивановичез туж яратӥзы пиналъёс. Угось котькудӥзлы со нимызъя, мусояса, лякытак вазьылӥз. Крезен, баянэн, пӧртэм шуланъёсын, ымкрезен, тутэктонэн шудыны дышетэ вал. Солэн пиналъёсыз уно пол пӧртэм улосвыл, финн-угор ӵошатсконъёсын вормисьёс, лауреатъёс, дипломантъёс луылӥзы. Со будэтӥз егит усточиосты-крезьчиосты: Ваня Марковез, Миша Трофимовез... Дышетӥсь ӧз ужа кыӵе ке сӥ-дан понна, сюлмыз куремъя тыршиз. Озьытэк басьтысал шат со аслыз дышетскисе церебральной параличен висись нылашез? Оля Перевощиковалэн пал киыз но пыдыз ӧз ужалэ. Озьы но со крезен шудыны дышетскиз. Али пыдыз умоямын, шуыны луоз ини, киыз лябгес на. Владимир Иванович сётӥз Олялы ас кужымезлы но быгатэмезлы оскон. Дышетӥсез тодазы вайыса, анай-атайёс верало: "Пиналъёс сое туж юн яратӥзы. крезьгуръя школаын но Владимир Ивановичлэн ваньмызлэсь трос дышетскисьёсыз вал. Со сяна, котькудӥзлэн дораз ветлылӥз, баянъёссэс тупатъяз. Ас вылаз укыр трос басьтэменыз, ассэ жалятэк ужаменыз ик ӝуаса быриз". Зэм но - уж, уж, уж... Али паймоно кадь: кызьы та адями ваньзэ лэсьтыса вуттэ вал? Сиськыкуз гинэ кияз газет кутыны ваньме. Анаез вазе: "Сиськыкуд ке но гань-гань лу". "Газет но лыдӟеме потэ ук, нош дыры ӧвӧл", - лулӟылӥз пиез. Сергей Семенович Трофимов, ӵош ужам эшез, пусъе: - Владимир Иванович туж зол адями вал, шӧдыны но валаны быгатӥсь, зэмос психолог но усто специалист. Мукет крезьгуро инструментъёсын артэ дышетсконэ крезез пыртӥз (нырысьсэ республикаямы). Мукетыз та уж борды кутскиз но оглом радъяны ӧз быгаты. Нырысь-валысь Корепановлы ӧз оске. Но со "быдӟым" крезен шудыны дышетонэз умой пуктӥз - нырысь огшорыяз, собере крезьгуръя школаын. Солы луыса, ӟучъёс но крезь борды кыстӥськизы. Но дышетӥсь туж сюлмаське вал удмурт пиналъёсты чеберлык борды кыскон сярысь. Крезен гинэ ӧз буйгатскы, ансамбльлы ас киыныз кубыз лэсьтӥз. Калык инструментъёсын шудонэз азьланьтэмез но паськытатэмез понна Владимир Иванович Корепановлы Россилэн Президентлэн грантэз сётэмын вал. Гажаса но данъяськыса учкылӥзы Владимир Иванович шоры ӵош ужась эшъёсыз, анай- атайёс. Нош пиналъёс тросэз солы луыса гинэ шуг-секытъёслы ӧз сётӥське, ӧз куштэ крезьгурлы дышетсконзэс. Владимир Ивановичлэн сюлэмыз дугдон азьын, 2-тӥ толшоре, Воткинскын удмурт Выль ар праздник ортчиз. Туж шулдыр но вунонтэм яркыт вал со. Соку Владимир Иванович вань пӧсь мылкыдзэ шудэмаз поттӥз. Ку бен со сыӵе зол шулдыръяськиз на! Вӧзаз - дуно эшъёсыз, дышетскисьёсыз. Нош собере тӥни - секыт кайгу. Дышетӥсь дорозяз бертыса вуттымтэ ни, кезьыт из тубатъёс вылэ ик усем. Лябӟем сюлэм ӧз чида ни бадӟым шумпотонлы но... "Таки табанен куноятыса ӧй вутты ук", - бӧрдӥз Марина. Выль арлы юри дышетӥсезлы шуыса табань пыжиз вал. Собере малпаз: "Умой-а меда луоз? Табань нуи ке, сереме уз уськытэ-а? Нош Владимир Ивановичлы ӧз кельшы ке?.." Возьдаськон сямыз вормиз. Нош берло кӧня чигиськиз нылаш: "Табаньме веръятоно ик вылэм..." Пичи сюлэмъёс та кайгу бере трослы кыдазы, асьсэос но будӥзы кадь. Нылъёслэн- пиослэн сайкыт тусъёсазы малпаськон вужер усемын. Уг поты оскемзы, Владимир Иванович интыын мукет дышетӥсез син азязы уг быгато пуктыны... Но ваньмыз ортче, адями котьмалы дыше. Тодэ лыкто чуръёс: Улон берга, улон берга, Садэ усе ини пужмер. Ваньзэ ӧй быдэсты уга Чебер но ӟеч малпанъёсме... Эшшо но эшшо вераны кулэ: туж бадӟым уж нуиз В.И.Корепанов. - Калык инструментъёсын шудонъя со валтӥсь дышетӥсь вал, та отделениын кивалтӥз, - пусъе крезьгуръя школалэн директорез Владимир Борисович Сычев. - 1998-тӥ арын крезьгуръя школаос пӧлын элькунамы ортчем конкурсын ми 14 диплом басьтӥм. Тросэз соос 1-тӥ степенё. Ӵошатон понна: Ижевскысь искусствоосъя школалэн 7 гинэ дипломез. Владимир Ивановичтэк ми сыӵе бадӟым вормонъёс ӧм басьтысалмы. Солэн кивоштӥсьёсыз кылизы, нырысь ик - пиналъёслэн "Крезьчи" ансамбльзы. Нош "Крезен шудыны дышетонъя пособиез" 1997-тӥ арын Россиысь методической ужъёсты эскеронын нырысетӥ интые потӥз. Элькунамы сыӵе книга мукет ӧвӧл ни, солэн кулэлыкез туж бадӟым, угось крезен шудыны мылкыд карисьёс йыло. Тау со понна Владимир Ивановичлы. Но мон ӧй кушты на крезьме Бызе, бызе на ошмесэ, Со мынэсьтым малпанъёсме Нуэ сьӧраз, югыт бусэ. Кырӟа "Быдӟым" крезь. Огназ ӧвӧл со, вӧзаз уно эшъёсыз. Ӧз быры дышетӥсьлэн ужез. Коньдон, визь, компьютер кузёяськон улонэ - 2000-тӥ арлэн гожез вамен - выжиз крезьмы. Выль кужымен кырӟалоз со, сайкыт сюлэмъёсы яратон, оскон ваёз. Елена Миннигараева (Панфилова). Воткинскыст "Крезьчи" ансамбльысь пиналъёс кык-куинь ар талэсь азьло. Кивалтӥсьсы - Владимир КОРЕПАНОВ (шорысез). ... Нош мон юрист луысал! Тросэз пиналъёс тодо, кин луэмзы потэ бадӟым будыса. Нош тон? Эскеры аслэсьтыд мылкыддэ та тестъя. 1. Мар карыны яратӥськод вал пичи дыръяд? а) суредаськыны б) шудонъёсын валтӥсь луыны в) ватскемен шудыны г) анаелы юрттӥськыны. 2. Кыӵе возиськод комнатадэ? а) чылкыт утялтыса б) огшоры, ужан дыръя сямен в) сильтӧл кошкем бере кадь г) шулдыр. 3. Кыӵегес арбери басьтысал магазинысь матысь дыре? а)книга б) пӧйшур в) чеберъяськон г) компакт-диск. 4. Кыӵе дӥськут яра тыныд? а) классической б) ӟеч, вылтыръя в) мар сюре г) маке но шоголь, выль. 5. Тон уж утчаса, мырдэм инты шедьтӥд. Но кӧня ке улыса, ужась кулэ ӧвӧл ни шуизы. мар карод? а) куатаськыса кошко б) мугзэ валэктыны куро в) мукет инты утчало г) валэктыны выро, ӟеч ужасез ышто шуыса. 6) Тон синйылтӥд магазинысь лушкаськисез... а) куарето сое б) со мынам уже ӧвӧл в) верасько соин, магазинысь потыса г) жаляло: пияш туж сютэм вал, дыр. 7. Праздниклы класстэс чеберъяно. кыӵе ужез вылады басьтод? а) утялско, сяськаен чеберъяло б) косъясько в)ӟечкылан гожто, суред лэсьто г) маке эшшо тунсыкозэ малпало. 8. Урокын возьмамтэ шорысь куӵыкъяны ӧдъяд... а) вождэс эн вае, монэ кин ке малпа, шуо б) возьдаськемысьтым бызьыса классысь пото в) дышетӥсьлэсь юыны потаны курисько г) асме ачим серекъяло. 9. Тон кинлэсь ке дуно арберизэ огдырлы шуыса курид но изъянтӥд? Табере со понна коньдон куро. Мар карод? а) аслэсьтым кыӵе ке арбериме вузаса, коньдон сёто б) анай-атаелэсь юрттэт куро в) кыӵе ке уже интыясько, уждунысьтым берыкто г) маке но малпало ай. 10. Тӥ эшъёсыныды инкуазьын шутэтскыны малпады. Шулдыр: чылкыт омыр, шур, шашлык но... чибиньёс. Куашкалоз-а соин йырин мылкыдыд? а) бен, мон соку ик берен кошко б) ноку но! Таӵе вакытэ соосты шӧдыны ик уг луы в) уз - мон сьӧрам аэрозолен лыктӥ г) туж-туж ёртӥзы ке гинэ. 11. Нылъёс ярато ог-огзы сярысь вераськыны. Кызьы малпаськод, мар шуо кадь тон сярысь? а) туж лачмыт, умой. Котьку ик юрттыны дась б) мыло-кыдо, ас азяз ужпумъёс пуктыны, соосты быдэстыны быгатэ в) капчи, шулдыр мылкыдо г) оскымон. 12. Тонэ тодмоед вордскем нуналаз ӧтиз. Солэн куноосыз тыныд тодмотэмесь, кытынгес ортчытод ӝыттэ? а) ӝӧк сьӧрын - отын сомында ческытэз б) кухняын - отчы зульыны яратӥсьёс люкасько в) калык пӧлын анекдотэн мылкыдзэс шулдырто г) кыӵе ке синмаськымон пияш бордын. 13. Кызьы учкиськод спорт шоры? а) эктон - со спорт ке, умой б) яратӥсько сыӵе амалъёсты, кудаз адями ас понназ выре - гимнастика, кылсярысь в) яратӥсько командаен шудыны г) яратӥсько дзюдоез - мынэсьтым кышкало! 14. Тыныд электрической шудон кузьмазы. Но кӧня ке улыса, со сӧриськиз... а) тупатъяны сёто б) кытчы ке сэрпалто в) атайме тупатыны косо г) ачим тупатыны выро. 15. Аслэсьтыд кыӵе сямъёстэ тон лыдъяськод тужгес но кулэен? а) авторитет луыны быгатэмме б) мыло-кыдо луэмме в) аслым ачим оскемме г) кыл кутыны быгатэмме. 16. Азьланяз кыӵе уж сярысь тон малпаськылӥськод? а) кыӵе ке шыпыт, мултэс керӟегъяськонъёстэк мед луоз б) ялан маке но вылез, тунсыкоез мед луоз в) бадӟым уждуно г) мон яратӥсько малпаськыны, но зӥбо ке, уг кельшы. Валэктонъёс Лыдъя аслэсьтыд очкоостэ та схемая: 1. 5 10 15 20 2. 20 10 5 15 3. 10 20 5 15 4. 10 15 20 5 5. 20 15 5 10 6. 15 5 10 20 7. 20 10 5 15 8. 15 20 10 5 9. 10 20 15 5 10. 20 15 10 5 11. 20 10 5 15 12. 15 20 5 10 13. 20 5 15 10 14. 10 5 20 15 15. 10 15 5 20 16. 20 15 10 5 80-130 очко Тон быгатӥськод улонлы шумпотыны. Яратӥськод маке малпалляны, калык пӧлын берганы, ачид бордын ужаны, мукетъёссэ шумпоттыны. Тыныд кыӵе ке творческой уж быръёно: артист, журналист... 131-200 очко Тон - азьветлӥсь. Мыло-кыдо басьтӥськиськод тодмотэм уж борды но, рос-прос сое лэсьтыны, пумозяз вуттыны быгатӥськод. Тунсыкъяськиськод котырысьтыд югдурен, трос тодон-валан басьтыны тыршиськод, эшъёсыд ӵемысь кыӵе ке юанэн вазиськыло, ужрадъёсты ортчытыны тонэ куро. Малпаськом, тупасал банк ужез яке кыӵе ке кивалтон удысэз бырйысалды ке. 201-280 очко Тон туж чупрес адями! Котькытчы вутскиськод: уроктэ дасяны но, анаедлы юрттӥськыны но, дискотекае ветлыны но. Уждэ дыртыса ке но лэсьтӥськод, ваньмыз туж умой пӧрме. Тынэсьтыд ӟеч менеджер, социальной ужась пӧрмысал. Тон быгатысалыд, дыр, аслэсьтыд уждэ но усьтыны. 281-320 очко Тӥ туж оскымон адями. Вань ужез сюлмо быдэстӥськоды. Быгатӥськоды мӧзмыт ужез но лэсьтыны. Юрист, экономист, реставратор, фармацевт - тӥляд удысты. Дарт, Бырйы! Хит-парад Февраль толэзе "Ингур" радиое ӵемгес вазиськылӥзы таӵе кырӟанъёсты курыса: нимаз кырӟасьёс: 1. Валентина Пудова, "Гажанэ", "Кык юсьёс". 2. Геннадий Ганьков, "Кӧня пол". 3. Пантелей Кузнецов, "Ортчись аръёс". 4. Ольга Зорина, Алефтина Корепанова, "Капи-кап". 5. Александр Катков, "Чао, Бамбино!" ансамбльёс 1. "Италмас" но Людмила Ахтариева, "Улӥськод ке кырӟанэн". 2. "Айкай". 3. "Шулдыр ӝыт". Удмурт Республикаысь Мукет кунъёсын кусыпъёсъя министерство, Нациосын ужан политикая министерство но Егитъёсын ужанъя кун комитет пӧртэм калыкъёсысь егитъёслэн валче ужан удысысьтызы проектъёслы утён конкурс яло. Конкурслэн валтӥсь ужпумъёсыз: - егитъёслэсь общественной огазеяськонъёссылэсь но егитъёслэн ужпумъёссы бордын ужась кун учреждениослэсь калыкъёсын кусып возёнын луонлыкъёссэс паськытатон; - егитъёслэн мукет калыкъёсын кусыпъёс возёнын выль (инновационной) поектъёсты умоен лыдъян, юрттон; - Удмуртиысь но кунгож сьӧрысь егитъёслы кусыпъёс тупатыны но ог-огзылэн культураосынызы тодматскыны луонлыкъёс азинтыны. Конкурсэ пыриськыны быгатозы республикаысьтымы городъёсысь но районъёсысь общественной огазеяськонъёс, егитъёсын ужась культурая но калыкез улон-вылонын утёнъя коммерческой луисьтэм ёзъёс. Конкурслэн куронъёсыз: - конкурсэ ӵектыны луэ Удмурт Республикаын 2000-тӥ арлэн кыкетӥ ӝыныяз быдэстыны чаклам калык куспо но республикаос куспын радъяны луымон проектъёс; - грант сётэмын луыны быгатоз общественной огазеяськонъёслэсь сюлмаськонъёссэс, сэрттон-пертчонэн егитъёслы социальной юрттэт сётонэн, калыкъёс куспын иворъёсын вошъяськонэн, егитъёс пӧлын калык кусыпъёсты тупатонэн, культура удысъя кичӧлтонъёсын потонэн герӟаськем проектъёслы; - конкурсэ ӵектэм проектъёс семинаръёс, практикумъёс, тренингъёс, презентациос, чеберлыко ужрадъёс ортчытонэз, сьӧрло группаен ужаны потанэз чакланы быгато. Умоен лыдъямын луозы выль шӧмъем, республикамылы туж кулэ луись, та удысын ужась организациосын уже пыӵатӥсь проектъёс. Конкурсэн чакламын ӧвӧл научной но социологической эскеронъёс, политикая но рекламая кампаниос ортчытонлы, берыктон но книга-газет поттонлы, конкурсэ пыриськисьёсты дышетонлы но соослэсь материально-технической базазэс паськытатонлы юрттэт висъян. Конкурсэ куриськонъёсты ыстоно мукет кунъёсын кусыпъёсъя министерствое 30-тӥ апрелёзь. Телефонэз 25-91-17. Ужъёсты эскерозы май толэзе экспертъёс. 1-тӥ июнёзь йылпумъянъёс лэсьтоз конкурсэз ялӥсьёслэн нимысьтыз комиссизы. Вормисьёслы проектъёссэс уже пыӵатон понна, 10-30 сюрс манет коньдон висъяськоз. Чидатэк витём тӥледыз... Сюлэсь ятыр пиосмес нош ик келям Чечняе. Сюлэсь ятыр семьяос куинь толэз ӵоже чидатэк витёзы яратоно пизэс, кузпалзэс, атайзэс. Югдурез утёнъя министерстволэн патрульно-постовой службаяз ужасьёслэсь огазеям отряд Чечня Республикаыс одӥгаз ёросын чакласа возёз блок постъёсты, быдэсак югдурез, улон интызэс куштыса кошкемъёслэсь бадӟымесь лагерьёссэс. Пӧлазы вань водительёс, экономика удысын йыружъёсын нюръяськисьёс, кинологъёс. Тани Хузин Ренат пунызэ но сьӧраз басьтэм. - Мон Чечняе кыкетӥзэ мынӥсько ини, - шуэ Ренат. - Пуныме но кыкетӥзэ нуисько. Со туж визьмо, мыным соин капчи. Дорлэсь но сокем уд мӧзмиськы ни, матысь адямиед вӧзад кадь. Чечняе уд кышкаськы-а мыныны шуыса юамелы Ренат мынектӥз но юн-юн ӟыгыртӥз вӧзаз сылӥсь анайзэ, сузэръёссэ. Анаезлэсь синвуоссэ адӟыса буйгатӥз сое: "Мон одно ик берто". Бен, озьы ик мед луоз, одӥг семьяез но шуд палэнэтӥ медаз ортчы. Чечняе кошкисьёслы шудо сюрес сӥзьыса вераськиз югдурез утёнъя министр Владимир Щербаков: Одӥг вамыштэс но малпаськытэк эн лэсьтэ. Сак кылзэ командиръёстэс. Возьматэ асьтэлэсь вылӥ быгатонлыктэс, тодон-валандэс. Тужгес но курисько: уте асьтэдыс, тӥ татын милемлы кулэ, уката ик - семьяостылы. Тазьы ик ваньдэс ӵош пумитано мед луом. Оркестр шудэмъя егитъёс вамыштӥзы автобусъёс пала. Куинь нунал ӵоже ширтозы соос сюрес кузя. Вольыт сюрес тӥледлы! Е. Николаева. "Шунды" пиштэ Удмурт егитъёс люкаськылӥзы "Шунды" огазеяськонлэн конференцияз. Соос эскеризы берло дыре ужамзэс но азьланезлы ужпумъёсты. Быръемын выль кивалтӥсь ёзъёс. Правленилэн тӧроез луиз удмурт движение кӧня ке ар ӵоже ни пыриськись дышетӥсь Татьяна Прокопьева. Огазеяськонлэн советэныз нош ик кивалтоз Галина Юсупова, Удмурт Республикаысь Егитъёсын ужанъя кун комитетлэн тӧроезлэн воштӥсез. Шумпоттэ соиз: удмурт егитъёс валазы ни уртче ужанлэсь пайдаё луэмзэ. Соос азьланьын но азьпала ӵош мыныны туртто. "Шунды пиштэ. О.Максимов. Гажано егит эшъёсмы, 8-11 классын дышетскисьёс! Ӧтиськом тӥледыз Дуннеысь финн-угор егитъёслэн ВИ слётсылэн ужаз пыриськыны. Слётлэн историез 1994-тӥ арын кутскиз. Котькуд гужем слётэ люкасько Коми Республикаысь, Марий Элысь, Мордовиысь, Карелиысь, Эстониысь, Венгриысь куноос. Татарстанысь, Башкириысь но асьме шаерысь удмурт нылпиосын ӵош соос мылысь-кыдысь пыриськизы слётлэн пӧртэм ужрадъёсаз: научной конференциосы, тодосчиосын пумиськонъёсы, визьсынан ужъёсы. Ваньзы соос Удмуртилэн пӧртэм сэрегъёсаз вуылӥзы, Иж тымет кузя катерен уязы. Нош макем жингрес чузъяськизы ӝыт чусомем омырын пӧртэм финн-угор выжы калыкъёслэн кырӟанъёссы. Мар веранэз, задор егит калык ӵош люкаське ке, мӧзмыса уг улы. В слётын тужгес но бадӟым саклык висъямын вал асьме калыклэн азьлань улонэз сярысь малпаськон-вераськонлы, соин ик отын кылдӥзы выль проектъёс. Соос пӧлын вал слётлэсь ужзэ выль сямен радъян но азьланьтон сярысь дэмланъёс. Туала слёт вань эшъёсмылэсь мылкыдзэс санэ басьтэ. Бер ӧвӧл на тӥледлы но солэсь программазэ радъян уже пыриськыны. Со понна таӵе конкурсъёс ялӥськом: 1. Школадылэсь дышетскон пуштроссэ возьматӥсь карталы. 2. Дышетскисьёслэсь научно-практической конференцизэс ортчытон программалы. 3. Слёт ужан дыръя быдэстыны луымон проектъёслы. Пыриськемды луоз огаз яке ваньмаз конкурсъёсы. Вормисьёс гужем слётэ люкаськозы. Конкурсъя юанъёсыныды вазиське таӵе адресъя: 426035, Ижевск, Шишкин нимо ульча, 3. Гуманитарной лицей. Тел. /факс (3412) 22-53-95. Интернетысь адрес: глуни. удм.ру яке варусхнеwмаил.ру Витиськом гожтэтъёстэс! Удмурт Республикаысь вылӥ должностен муртлэсь полномочиоссэ быдэсъян сярысь Гажано депутатъёс! Тӥледлы ивортӥсько республикаысь вылӥ кивалтӥсьлэсь Удмуртилэн Конституциезлэн 84-тӥ ёзэтэныз тупатэм полномочиоссэ кызьы быдэсъямез сярысь. Нырысетӥ сессиын мыным оскемдэс верамды понна, мон вань луонозэ лэсьтыны тыршо. Ортчем дыр ӵоже мынам ужам валтӥсь инты басьтӥз законъёсты дасян но кутон, кудъёсыз чакламын республикаын улон-вылонэз но экономикаез азинтон, политикаын югдурез огсыр возён, гражданъёслэсь правооссэс но эрикъёссэс утён понна. Меӵак ачим пыриськыса но мынам кивалтэме улсын ортчытэмын Кун Кенешлэн 8 сессиез. Отын кутэмын 34 закон но 108 постановление. Со сяна, Кун Кенешлэн Президиумезлэн 18 заседанияз юнматэмын 116 постановление. Кун Кенешен кутэм вань законъёс но норма луись актъёс пӧлысь 35 процентэз сӥземын экономикаысь ужпумъёслы, 12-ез - улон-вылон удыслы но 53 процентэз - кунэз радъянлы. Кун Кенешлэн тямыс сессиез ортчытэмын оглом 22 ужан нуналскын. Котькуд ужан нуналэ эскеремын но кутэмын шорлыдын 7 документ. Сокем трос лэсьтыны луиз, Кун Кенешысь ялан ужась комиссиос документъёсты дыраз но ӟеч дасямен, депутатъёс вань кужымзэс сётыса ужамен. Мон ялан син азям возисько таӵе ужпумъёсты: - республикаын машина лэсьтон удысэз выльдон но азинтон; - ож тӥрлык поттӥсь предприятиослы кун ласянь пунэм тыронъёсты берыктонэз ӝогомытон но уногес заказъёс шедьтон; -"Сиданко" пыр республикалэн бюджетаз ватсаса коньдон пыртон; - республикалэн улосвылаз интыям химия ож тӥрлыкез быдтон; - республикалы Федерация ласянь коньдонэн юрттон; - сьӧрлось кунъёсын ог-огедлы пайда ваись кусыпъёс тупатон; - ожгарчиослы сертификатъя тросгес улон инты висъян, - Ижевскын цирк пуктон но трос мукет ужпумъёс. Соосты быдэстон понна, мон ньыльдон поллэсь трос потай командировкаосы Москвае, Татарстанэ, Башкортостанэ, Екатеринбурге, Перме, Оренбурге, Курганэ. Москваын гинэ кык сюлэсь ятыр пумиськонъёс вал. Республикалэсь экономиказэ ӝутонын бадӟым инты басьтэ Ижевскын машина лэсьтон удысэз азинтон. Тае лыдэ басьтыса ик трос дырме висъяй "Шкода-Авто-Удмуртия" валче предприятие кылдытон сярысь инъетэз улонэ ӝоггес пыӵатонлы но "Ода" автомобиль поттонэз йылэтонлы. Та пумысен трос пол пумиськылӥ Россилэн Президентэзлэсь ужзэ быдэсъясен Владимир Путинэн, Россиысь премьер-министръёсын, нырысетӥ вице-премьерен но коньдон ужпумъёсъя министрен Михаил Касьяновен, экономикая министрен Андрей Шаповальянцен. Та ужпумъёсъя ик ветлӥ Чехие но. "Шкодая" ужпум ӝоген пумаз-йылаз вуттэмын луоз. Миым декабре юнматэмын ини огъя инъетэз улонэ пыӵатонъя программа. Россия Федерацилэн Президентэзлэсь ужзэ быдэсъясь Владимир Путин федеральной министерствоослэсь но ведомствоослэсь кивалтӥсьёссэс куриз та бадӟым проектэз ӝоггес улонэ пыӵатон вылысь, огъя ужрадъёс кутыны. "Росвооружение" кун компаниен но "Антей" концернэн ялан кусыпъёс возён юрттӥз Удмуртиысь пыӵал тӥрлык поттӥсь предприятиослы кылем арын оглом 500 миллион доллар тыр 18 контракт быдэстыны. Мынам кичӧлтэмея, Ижевскын ортчиз пыӵал тӥрлык поттӥсь удысъёсын тыршисьёслэн кенешсы. Солэн ужаз пыриськиз "Росвооружение" кун компанилэн валтӥсь директорез Григорий Рапота. Соин огкыл шедьтэмын кунгож сьӧры тросгес вузъёс келян пумысен. Кылсярысь, акциосын "Ижмаш" огазеяськон контрактъёс юнматӥз ни туэ ик уногес вузъёсты кун сьӧры келян сярысь. Трос тыршоно луиз, Ижевскысь электромеханикая заводын кылдэм ужпумъёсты сэрттон- пертчон бордын. Та пумысен вераськон мынӥз Россия Федерациысь Правительствоын, Обороная министерствоын, Вузкаронъя министерствоын, "Антей" концернын. Евгений Исаакович Богомольный юрттыса, "Сиданко" компаниысь кивалтӥсьёсын пумиськонъёс юрттӥзы му вӧез вузаны 10 процентъем квота басьтыны но республикалэн бюджетаз ватсаса кык сю витьтон миллион манет коньдон пыртыны. Туэ январь толэзе гинэ "Удмуртнефть" тыронъёсъя тупатэм графикъя республикалы висъяз ини сизьымдон вить миллион манетлэсь ятыр коньдон. Химия ож тӥрлыкез быдтонъя федеральной программалэн кивалтӥсьёсыныз пайдаё вераськонъёс юрттӥзы унозэ ужпумъёсты сэрттыны-пертчыны. Туэ 25-тӥ январе Россия Федерациысь Правительство но Италия республикаысь Правительство куспын огкыл гожтэмын Россия Федерациысь химия ож тӥрлыкез быдтонын Италия ласянь юрттэт сярысь. Кызьы тодӥськоды, та уж кутскемын ини кык ар талэсь азьло, куке мон Россия Федерацилэн Президентэзлэн Борис Николаевич Ельцинлэн делегациеныз ӵош ветлӥ Италие. Республикаямы куинь ар куспын вуоз 15 миллиард лир (США-лэн ог 8 миллион долларез), со пӧлысь кык но ӝыны миллион долларез туэ ик вуыны кулэ. Республикалэсь кулэяськонъёссэ лыдэ басьтыса, мон ужай Россилэн данак улосъёсыныз ог-огедлы пайда ваись кусыпъёс тупатон бордын. Куспамы гожтэм тупанкылъёсын пусъем ужрадъёс бумага вылэ гинэ медаз кыле, соос улонэ мед пыӵалозы но ог-огмылы пайда мед ваёзы. Ӟеч кусыпъёс тупатэмын Москваен. Россилэн столицаяз туннэ келяськом машина лэсьтон но капчи промышленностьлэсь вузъёссэс, шоркарысь рынокын ас интызэс шедьтӥзы ини аракы но сиён-юон поттӥсьёсмы. Та нуналъёсы йылпумъясько ини "Москонтрактпром" кун унитарной предприятилэн возьматон центраз Удмуртиысь вузъёслы инты дасян ужъёс. Удмуртиен кусыпъёсты азинтон вылысь, Москваысь Правительство Россия Федерацилэн Президентэз бордысь Удмурт Республикалэн ёзэзлы (представительствоезлы) юрт пуктыны юрттэт сётон сярысь постановление кутӥз. Озьыен, одӥг но ӝыны ар ортчыса, Москваын луоз асьмелэн ёзмы (огъя площадез - 1,5 сюрс квадрат метр). Озьы ик вераськемын ини Москваын "Удмуртия" вузкарон юрт ӝутон сярысь. Таизлы но лэсьтӥськонлы шоркарысь кивалтӥсьёс юрттыны дась луэмзэс веразы. Татарстанэ берлозэ ветлон но отысь Президентэн Минтемир Шаймиевен пумиськон муге: тазалыкез утён удысын валче ужан. 1999-тӥ арын ноябре бадӟым вамыш лэсьтэмын Башкортостан Республикаен вузкарон кусыпъёсты радъянын. Республикалэн президентэныз Муртаза Рахимовен пумиськон дыръя юнматӥм кыказ ик улосвылъёсын шуныт но электрокужым сётӥсь комплексъёсты ог-огенымы кенешыса ужатон сярысь тупанкыл. Нош алигес, "Бадӟым Урал" огазеяськонлэн кенешез ужан нуналъёсы эшшо одӥг тупанкыл гожтӥм. Таиз сӥземын "Белкамнефтен" герӟаськем коньдон ужпумъёсты радъянлы. Сое кулэезъя быдэсъян республикамылэн бюджетаз ватсаса 40 миллион манет коньдон пыртоз. Огсыр азинско бускель Мордовиен но кусыпъёсмы. Матысь но оскымон эшъёсмы Пермь но Киров областьёс, Уралысь но Поволжьеысь мукет улосъёс. Кылсярысь, Оренбург, Курган областьёс но асьме республика куспын гожтэмын отысь ю тысь басьтонъя кема дырлы чаклам огкылъёс. Малпасько, туннэ кулэлыкез ӧвӧл, дыр, валэктыны, мар сётӥз асьмелы вузкарон но экономика, наука но техника, культура удысъёсын валче ужан сярысь Удмурт Республика но Беларусь Республика куспын грожтэм тупанкыл. 1998-тӥ-1999-тӥ аръёсы "Улон интылы кун сертификатъёс" программая оглом ньыльдон миллион манет тыр квартираос басьтэмын. Валерий Федорович Загайновен ӵош Россия Федерациысь Лэсьтӥськонъя министрен пумиськылэммы бере, ватсаса куамын сертификат висъязы на. Озьыен, эшшо куамынэз ожгарчимы улон инты басьтӥзы. Таяз арын но кык сю квартиралы сертификатъёс басьтыны чакламын. Азьло сямен ик шонерен лыдъясько: Кун Кенешлэн Тӧроез аслэсьтыз полномочиоссэ быдэсак уже кутэ, республикаысь Правительстволы пӧртэм ужпумъёсты сэрттыны-пертчыны юрттон вылысь. Берпуметӥез сыӵе пумиськонмы вал премьер-министрлэн нырысетӥ воштӥсеныз Михаил Касьяновен. Пайдаё вераськонъёс пайдаен берытскизы - бюджетэ сю миллион манет коньдон вуиз. Туж кулэен лыдъясько Федерацияя Кенешлэн но Экономикаын политикая комитетлэн ужаз пыриськонэз. Отын вераськыкум, мон котьку лыдэ басьтӥсько но нырысь интые пуктӥсько экономикаен, калыкез улон-вылонын утёнэн, кун ужез радъянэн герӟаськем ужпумъёсты асьме Кун Кенешлэсь кызьы но кыӵе амалъёсын быдэсъямзэ. Соин ик оскыса вераме луэ, Федерациысь кивалтон ёзъёслэн машина лэсьтон, пыӵал тӥрлык поттон удысъёслы, химия ож тӥрлыкез быдтонлы, калыклэсь улонзэ умоятонлы саклык висъямзы трослы потэ улосъёсысь кивалтӥсьёс шоры кызьы учкемзы бордысь но. Трос тыршоно-сюлмаськоно луиз, 1999-тӥ арын асьме республикаын бадӟым ужрадъёсты дасян-ортчытон понна. Соос пӧлысь одӥгез - 11-тӥ ноябре дано конструкторлэсь Михаил Тимофеевич Калашниковлэсь 80 арессэ пусъён. Ужрадэз тужгес но аспӧртэмлыко кариз отчы Владимир Владимирович Путинлэн пыриськемез. Но тросэз уг тодо, дыр, Владимир Владимировичен 10 ноябре пумиськон дыръя гинэ мон кызьы но озьы быгатӥ сое та бадӟым ужрадэ кыскыны. Озьы ик умой радъямын вал прессалэн "Быдэс Россия-99" фестивалез. Уката ик пусйымон соиз, национальной республикаын со ортчиз нырысьсэ. Со понна быръемын вал Удмуртия. 1999-тӥ арын август толэзе Россиысь экономикая министрен Андрей Шаповальянцен но "Росгосцирклэн" президентэныз Людмила Яироваен пумиськон дыръя умоен лыдъямын вал Ижевскын выль цирк лэсьтонлы соос ласянь коньдонэн юрттон сярысь ӵектонэ. Выль циркез ӝутонэ быдэс шаермы пыриське. Мынам тау кареме потэ ӵош ужась эшъёсылы: Евгений Исаакович Богомольныйлы, Юрий Владимирович Шестаковлы, Виктор Геннадьевич Хорошавцевлы, Анатолий Владимирович Марченколы, Олег Леонидович Кузьменколы, республикаысьтымы уноезлэн бадӟымесь предприятиослэн кивалтӥсьёссылы, озьы ик Сарапул, Якшур-Бодья, Игра, Завьялово, Каракулино, Воткинск ёрос кенешъёслэн депутатъёссылы. Лэсьтӥськонэ пыриськемъёслэн нимъёссы пыртэмын луозы циркез усьтон азьын мемориал пул вылэ. Туннэ нуналлы солэн расчётъя счётаз лыдъяське кызь миллион манетлэсь ятыр коньдон. Сомында ик бичаны кулэ таяз аре но. Озьы ик бадӟым тау кареме потэ Свяето-Михайловск черкез лэсьтыны юртӥсьёслы. Монэ ӵемысь пыкыло - али черкъёс лэсьтон вакыт ӧвӧл, черкъёсты ӝутон-выльдон - со кунлэн (государстволэн) ужез ӧвӧл. Но мон малпасько, асьмеос калыклы берыктыны кулэ кунэн куке но куашкатэмез, быдтэмез пӧлысь пичи ке но люкетсэ. Нош циркез лэсьтон - со асьме нылпиосмылэн азьпал улонзы, шумпотонзы. Соин ик мыным жаль пото соос, кинъёс тае уг валало. Бадӟым саклык висъясько Кун Кенешлэн Тӧроез бордысь Кадръёсын ужан политикая кенешлэн ужпумъёсызлы. Кыкетӥ ӧтчамын выльдэмын но паськытатэмын Обществоез кышкытлыклэсь утёнъя кенеш. Аслам ужам туж кулэен лыдъясько адямиосын синмысь синме вераськонъёсты. Кылем арын гинэ куатьтонлэсь ятыр пумиськонъёсы вал промышленной предприятиосысь, дышетон учреждениосысь коллективъёсын, городъёсысь но ёросъёсысь активъёсын. 1999-тӥ арын Кун Кенеше вуиз гражданъёслэн 2360 вазиськонзы, нош Кун Кенешлэн Тӧроезлы - 880 вазиськон (оглом лыдпуслэн 64 процентэз). Вань вуись почтаез мон ачим эскерисько. Гражданъёслэн данак вазиськноъёсазы верамын асьсэлэн кулэяськонъёсынызы герӟаськем куронъёс. Со возьматэ: улон-вылонын но экономикаын трос на быдэстымтэ ужпумъёс, нош ӵем дыръя интыосын пыр-поч уг эскеро гожтэтъёсты но вазиськонъёсты. Кун Кенеше вазиськыса, адямиос оско, улон-вылонын кылдэм шуг-секытъёсты эскерыку, Кун Кенеш соослы дурбасьтоз шуыса. Уноез вазиськонъёс ӵапак озьы ик сэрттэмын- пертчемын. Республикалэн 1999-тӥ арлы бюджетаз Кун Кенешлэн Тӧроезлэн нимысьтыз фондаз юнматэмын вал 750 сюрс манет коньдон. Кун Кенешлэн Тӧроезлэн постановлениосызъя ар ӵоже 700 сюрс манет коньдон висъямын вал трос нылпиё семьяослы, сӧсыръёслы, школаослы но больницаослы юрттон понна. Адямиослэн коньдонэн юрттэт курыса вазиськонъёссыя висъям коньдон пӧлысь 43 процентэз келямын Ижевскын улӥсьёслы, 40 процентэз кошкиз гуртъёсы. Ваньмыз та быдэстэмын администрациослэн, предприятиослэн но организациослэн, Кун Кенешысь ялан ужась комиссиослэн кивалтӥсьёссылэсь юрттэт курыса вазиськонъёссэс лыдэ басьтыса. Нош коньдонэз кулэезъя уже кутэмез чакласа возе Эскеронъя кун комитет. Республикаын улӥсьёслэсь лулысь-сюлмысь тыршемзэс власть адӟыны но кулэезъя дунъяны кулэ. 1999-тӥ арын 1556 мурт пусъемын кун наградаосын. Соос пӧлысь 161-езлы сётэмын Россия Федерацилэн орденъёсыз, медальёсыз но дано нимъёсыз. 679 мурт нуллэ Удмурт Республикалэсь дано нимзэ. 716 мурт пусъемын Удмурт Республикаысь Кун Кенешлэн Данъян грамотаеныз. Веранме йылпумъяса пусъеме потэ: Удмуртилэн ӝутсконэзлы оскисьтэмъёс ар талэсь азьло гинэ ай вераллязы: республика ноку уз быгаты ни коньдонэн герӟаськем секыт югдурысь потыны, промышленность но гурт удыс чылкак куашкалозы, власть уз шедьты шонер сюрес но мукет со выллем малпанъёс. Таӵе юнме вераськонъёс ӧз зэмалэ, зэманы но ӧй быгатысалзы. Малы ке шуоно, Удмуртия узыр экономикаеныз но ӟеч ужаны быгатӥсь адямиосыныз. Кун Кенеш, Правительство, городъёслэн, ёросъёслэн, предприятиослэн но организациослэн кивалтӥсьёссы югдурез валаса, уртче тыршеменызы республикаямы ӟеч пала воштӥськонъёс луизы. Тау кылзэмды понна. Кун Кенешын но Правительствоын ужасьёслы сӥзисько пайдаё ужаны но Удмурт Республикалэсь улон-вылон но экономика удысъёсты азинтонъя 2000-тӥ арлы Программазэ азинлыко быдэстыны. Пӧртмето выжыкылъёс Ӟучъёс выжыкылъёссылэсь одӥг люкетсэ волшебной шуыса нимало. Куӟебай Герд таӵеоссэ удмурт калык выжыкылъёсты пӧртман кылъёс шуыса висъяны ӵектӥз вал. Мынам чакламея, соосты шонергес луоно вылэм, дыр, пӧртмето выжыкылъёс шуыны. Теория ласянь учконо ке, таӵеоссэ удмурт калык выжыкылъёсты нырысьсэ рос-прос эскериз асьмелы туж тодмо тодосчи но кылбурчи Даниил Яшин. Со бере ини, дас ар талэсь азьло, та ужпумъя Москваын диссертацизэ утиз но кылтодон наукаосъя канидат луиз удмурт калык кылосъя устоосыз пӧлысь устоез ӧнерчи, Удмурт кун университетысь дышетӥсь доцент Галина Шушакова. Миым ини солэсь та ужзэ кык нимаз-нимаз брошюраосын поттӥз Ижысь "Алфавит" издательство. Нырысетӥяз брошюраын автор вера-маде пӧртмето удмурт калык выжыкылъёсты кылем даурысен асьме вакытозь люкам но эскерем сярысь но соослэн сюжет пӧртэмлыкъёссыя маин но маин висъяськемзы пумысь. Кыкетӥез сӥземын та выжыкылъёслэсь персонажъёссэс эскеронлы. Брошюраезлэн ӝыныезлэсь бадӟым люкетаз возьматэ удмурт калыкмылэн пӧртмето выжыкылъёсызлэн пуштроссы но чеберлыксы ласянь пӧртэмлыкъёссэс. Пӧртмето удмурт калык выжыкылъёс, кызьы валэктэ Галина Шушакова, мукет калыкъёслэнэн ӵошатоно ке, тужгес висъясько вашкала удмурт калык мифъёсын герӟаськеменызы, вакчи сюжето луэменызы. Пӧртмето удмурт калык выжыкылъёслэн - ма, мукетъёсызлэн но ини - кузь-кузь, бадӟым-бадӟым вылымтэзы, шуэ автор, потэмын удмурт калыклэн трос вераськыны, зульыны выжыысь выжые яратымтэез бордысь. Кыкез ик та брошюраос печатламын "Удмуртская волшебная сказка" нимын. Мынам малпамея, соос ноку но уз вужме. Соосты тодытэк, лыдэ басьтытэк, азьланьын одӥгез но ӧнерчи удмурт калык выжыкылъёс сярысь йӧнала, ас вакытэзлы тупась выль уж гожтыны уз быгаты. Пётр Поздеев, писатель-фольклорист. Удмурт Республикаысь Правительстволэн Удмурт Республикалэн улосвылаз эмъюмъёслы сертификат сётъянэз радъян сярысь Постановлениез Эмъюмъёслэсь ӟечлыксэс, пайдалыксэс, кышкытлык ваемзэс кун ласянь эскерыса возён вылысь но Россия Федерацилэсь "Эмъюмъёс сярысь", "Продукциослы но юрттэтъёслы (услугаослы) сертификат сётъян сярысь" Законъёссэ, Россия Федерациысь Госстандартлэсь 1998-тӥ арын 24-тӥ апреле кутэм "Эмъюмъёслы сертификат сётъян Правилоосты юнматон но уже кутон сярысь" 26 номеро постановленизэ быдэсъяса, Удмурт Республикась Правительство пуктэ: 1. 2000-тӥ арын 1-тӥ мартысен одно ик пусйылыны кутсконо Удмурт Республикалэн улосвылаз вуись асьме дорын (отечественной) но кунгож сьӧрын поттэм вань эмъюмъёслы сертификатъёсты, кудъёсыз сётэмын Россия Федерациысь сертификатъя ёзъёсын. 2. Пусъён ужез нуыны осконо Удмурт Республикаысь Тазалыкез утёнъя министерствоысь Аптекаосъя управленилэн Эмъюмъёслы сертификат сётъянъя но соослэсь ӟечлыксэс эскеронъя центрлы, кудӥз Россия Федерациысь Тазалыкез утёнъя министерствоен Удмурт Республикалэн улосылаз эмъюмъёслы сертификат сётъясь ёзэн тупатэмын. Удмурт Республикаысь Правительстволэн Тӧроез Н. А. Ганза. 2000-тӥ арын 21 феврале. Ижевск город. � 194. Улонысь учыр Песянай но гондыр Шуо, курдаку, пе, синъёс бадӟымесьгес луо. Собере кышкасьтэм ужъёс лэсьтэмдэ но уд валаськы. Огшоры сыӵе суредъёсыз син азе пуктыны ик шуг. Кин ке, ядо кыен синмысь синме тупаса, альпинистлы тубонтэм гурезь йылэ пал пыдкутчанэн тубе; кин ке, кыр парсьлэсь кышкаса, куасъёсын пужыме тубе; кин ке, гольык киын гондырез уськытэ... Зэм, зэм, таӵе учыр вал тайгаын, Мария Петровна Соколоваен. Кӧня ке аръёс ӵоже Машапай улэ ни вал огназ: нылъёсыз бызизы, пиез ужа кытын ке Полярной окрыгын. Анайзэс шергес гинэ чаклаллязы. Гужемлы нылпиоссэс келякузы шат. Но уксёлы Машапай ноку ӧз ёрмылы. Нылпиосыз ялан сётъязы. Озьыен, улыны ваньмыз тырме. Сад-бакчаяз будэтэм емышез юрттэ на. Вордэ вал ай кроликъёс но. Куатьтон куать аресъем песянай улонлы ӧз ӝожтӥськылы. Одӥг пол сӥзьыл, нырысь лымы усем бере, песянай малпаз тайгае потаны, эстӥськонлы кос пу бичаны. Пичи гинэ тӥр кутыса кошкиз нюлэскы. Котыр улосэз со туж умой тодэ: быдэс улонэз посёлокын ортчиз ук. Нюлэскын трос гондыръёс уло шуыса но тодэ вал. Соин ик пыдло нюлэс куше пырыны курдаз, гондыръёслэн изьыны выдон вакытсы вуиз ке но ини. Кин тодэ, олокызьы но луэ. "Олокызьы" ик луиз.Кышномурт мар кулэ бичаз но дор палаз вамыштӥз. Но мышласянь кӧс пу ӵаштыртэмен, берзэ учконо кожаз. Учкиз но дэймиз: нюлэс дурын мар ке бадӟа ик гондыр сылэ. Уг вала ни кышномурт ма карыны. Гондыр но. Озьы сылӥзы соос кӧня ке секунд, ог-огзы шоры учкыса. Ваньмыз умоен ортчысал, дыр, шӧдтэк шорысь писпу вай вылысь тылобурдо шуш куараен ӧз лобӟысал ке. Со куара ик кышкатӥз гондырез. Кӧшкемыт вузыса вамыштӥз песянай доры. Таиз пегӟоно кожаз но... янгышаз. Сьӧсьлэн пӧсь шокамез ымныр дораз ик вуиз. Собере гондыр сое погмаз улаз. Нош отӥяз мар вал, песянай умой уг тод ни. Ваньмыз уйвӧтын кадь ортчиз. Тӥреныз кутӥз но гондырез шуккиз. Кытысь меда кужым но потӥз чиед мугоро кышномуртлэн! Ургетыса-вузыса гондыр усиз: тӥр кӧтурдэссэ шырзем. Маша апай малпаз на секундной "тайм-аутэз" уже кутыны: эшшо огпол тӥрен шоналскиз. Тӥр кыриз гондырлэсь син виссэ. Виресь пӧйшур вузыса пыд йылаз султӥз но песянаез нош ик погыртӥз. Маша апай бекмыльскыса палдӥз палэнэ. Соку гондырлэн секыт пыдыз ӝабырскиз песянайлэн йыр бордаз. Сьӧсь гижыосыныз быдэсак сямен йыркузэ но бамзэ ӵабъяз. Но со дыре песянай чик но ӧз шӧды вӧсь луэмзэ. Етӥз кышномурт, зэмос нюръяськись музэн, вылысьтыз гондырез сэрпалтӥз но нош ик тӥрен ожалскиз. Сьӧсь вузыса усиз музъем вылэ. Со валатскемлэсь азьло, кышномурт олимпийской чемпионка сямен, пегӟыны малпаз но кыз йылэ тубиз (собере гинэ тодмо луиз: солэн пыдыз но, мукет интыосыз но чигемын вылэм). Нюлэс куш, вирен орсмыса, вить минут куспын пӧрмиз ожмаськон лудлы. Мария Петровна кыз йылысен чакласа улӥз: гондыр вузыса султӥз но каллен нюлэскы кошкиз. Тӥни соку гинэ песянай шӧдӥз туж зол вӧсь луэмзэ, соку гинэ куалекъяны кутскиз. Чидантэм висе пыдыз. Кияз ялан тӥр. Вия на вирез. Кышномурт писпуысь васькиз но каллен гинэ, вань сӧнъёссэ золъяса вамыштӥз дор палаз. Корка муръёысьтыз ӵынэз адӟыса, усиз но - йырсазьзэ ыштӥз. Нош гуртын улӥсьёс бер ӝыт гинэ чабкиськизы ышем адямизы пумысен. Маша апаез шедьтӥзы - гуртлы кык иськемысь. Врачъёс нокызьы но ӧз оске, адями тӥяськем урдлыен, кесям йыркуэн, шуккиськем- посэм пуш тӥрлыкъёсын но чигем киын-пыдын ас понназ ог сизьым иськемез ортчиз шуыса. Веранэз ӧвӧл ни сьӧсьлэн секталаез сярысь: со кызь поллы уногес кыске кышномуртлэсь. Мар маскараез на: та учыр бере толэзь ортчыса, маша апай пыд йылаз вал ни. Табере со, оло, сю пол но шулдыр гинэ вералляз ни зэмос нюръяськемез сярысь. Вӧсь луэмъёсыз но, паймымон, туж чаляк йӧназы. Нош гондыр ӧз улӟы. Мукет нуналаз сое шедьтӥзы ас гуэз дорысь. Та учыр бере Машапай йыбыртъямон адями луиз, уката ик гондыр кутылӥсьёс азьын. Тодо уго гондырлэсь туж лек потылӥсь сямзэ. Сопал дунне вань-а, ӧвӧл-а - ум тодӥське, но амалтэк малпан кылдэ, сопал кужымтэк та ужпум ӧз ортчы, дыр. Пичи гинэ мугоро песянаез адӟыса, уд оскы, со таӵе-таӵе нюръяськонын вормисе потӥз шуыса. Зэм, асьмеос укыр ӧжыт тодӥськом али туж бадӟым кужым сярысь, кудӥз адями пушкы ватскемын но потэ туж кышкыт югдуръёсы гинэ. Табере Маша апай уг ветлы ни огназ нюлэскы. Курда. Уз пумита-а нош ик гондырез? Ӟуч кылысь берыктӥз Светлана Яковлева. (Басьтэмын "Незримая сила" газетысь). Удмурт Элькунысь калык суредасьлэн, Россиысь дано суредасьлэн, Россиысь калык суредасьлэн Алексей Холмогоровлэн вордӥськемез дырысен - 75 ар Ӝуждалаозяз ӝутскиз Россиысь калык суредась, Россилэн И. Е. Репин нимо Кун премиезлэн лауреатэз Алексей Павлович Холмогоров (1925-1987) суредан удысмес узырмытӥз уно ӟеч ужъёсыныз. Та аспӧртэмлыко адями котьку висъяськылӥз ас азяз пуктэм ужпумъёссэ быдэсъяны быгатэменыз, искусствоез вань сюлмысьтыз яратэменыз. Аслаз ужъёсаз адямиез ӝутыны быгатылӥз тужгес вылӥ ӝуждалаозь, со вакытэ ик тодматылӥз учкисез адямилэн туж узыр, аспӧртэмлыко дуннееныз. А. П. Холмогоров вылӥ культураё адями вал. Егитъёсты дышетӥз искусствоез сюлмысь яратыны, суредан удыслэсь чеберлыксэ валаны. А. П. Холмогоров вордӥськиз 1925-тӥ арын 1-тӥ мартэ Вотка ёросысь Молчаны гуртын. Пичи дыръяз ик яратӥз суреданэз. Нош быгатонлыксэ уж вылын возьматыны пӧрмытӥз Быдӟым тылож йылпумъяськем бере гинэ (ачиз но тушмонэз сэстӥз). 1948-тӥ арын Алексей Холмогоров дышетскыны пыриз Казаньысь Чеберлыкъя училищее. "Семьяын" нимо диплом ужзэ пинал суредась утиз 1951-тӥ арын. Кык ар ортчыса, 1953- тӥ арын, дышетскыны пыриз Москваысь Чеберлыкъя В. И. Суриков нимо кун институтэ. Сое йылпумъяса берытскиз вордӥськем удмурт шаераз. Татын мылысь-кыдысь пыриськиз Удмурт кун пединститутын чеберлыкъя но графикая факультет кылдытонэ. Сое усьтон юрттӥз суредан удысэз азинтыны эшшо вылэ ӝутыны. "Егит удмурт анай" - Алексей Павлович Холмогоровлэн нырысетӥ ужъёсыз пӧлысь одӥгез. Со возьматӥськылӥз "Советская Россия" (1960), "Всесоюзная выставка" (1961) адӟытонъёсын. Удмурт дӥсен удмурт кышномурт котьку чебер адӟиськылӥз. Анай луэмез возьматон удмуртлыклы сӥзем ужпумъёсын герӟаське "Мемиос" суредын. Татын суредась шарая туж ӟеч мылкыдъёсты, анай луонлэсь шумпотонзэ. "А. Александровалэн тусбуез", "Баграш-Бигралась" песянай Дарья "Курбатова" суредъёсаз усточи азьланьтӥз удмурт нылкышноез ӟеч-ӟеч возьматонзэ. Адӟытӥз солэсь ужез яратэмзэ, ӝикыт, востэм, зӥбыт, лачмыт, ӟеч сюлэмо луэмзэ. Эшшо огпол пусъём: Алексей Холмогоровлэн суредан быгатонлыкез тужгес ӟеч адӟиськиз "Удмуртиысь нылкышноос" люкетын. Со понна ик Алексей Павловичлы сётэмын Россилэн И. Е. Репин нимо Кун премиез. Нош уно суредъёссэ художник кылдытӥз Пичи Пурга ёросын - татын ужаз кызь вить ар ӵоже. Та люкетысь "Зоя Михайловалэн тусбуез" ужез, Удмурт шаерысь мукет суредасьёсты азьпалтыса, нырысь ик шедиз Третьяковъёслэн галереяязы. А. П. Холмогоров озьы ик кылдытъяз рабочийёслы, инженеръёслы, йырын-визьмын ужасьёслы сӥзем суредъёс. Оглом вераса - шаермес узырмытӥсьёслы. 1969-тӥ арын пӧрмытӥз И. А. Наговицынлэсь тусбуйзэ. Удмурт шаерысь устолык удысын историен герӟаськем нырысетӥ суред со. Алексей Павлович возьматыны быгатӥз зэмос революционерез, кунмес кылдытӥсез, кужмо, визьмо, лачмыт, зӥбыт адямиез. Берлогес А. П. Холмогоров трос пол кылдытъяз на шаерысьтымы пӧртэм дано ужрадъёсын герӟаськем ужъёс. "Пумозяз чидазы", "Ожысь ветеранъёс" суредъёсыз тодмо луизы быдэс Россиын. Нош ачиз Алексей Павлович луиз Россиысь валтӥсь суредась. Уно кужымзэ сётӥз дышетон ужлы. Дышетэм нылпиосыз асьсэос тодон-валан сёто ини туннэ Удмурт кун университетысь чеберлыкъя но графикая факультетысь егитъёслы. Нош ачиз ас вакытаз, дышетон но суредан удысъёсыз шоры учкытэк, бадӟым валэктон уж нуиз на калык пӧлын. Кивалтӥз Удмурт шаерысьтымы Суредасьёслэн огазеяськонэнызы. Трос пол бырйылӥзы Россиысь Суредасьёслэн огазеяськонзылэн кивалтэтэзлы секретаре. Пыриськылӥз Россиысь выставкаосъя комитетлэн ужаз. Кӧня ке ар ӵоже вал "Художник" журналлэн редколлегияз. А. П. Холмогоров кичӧлтэмъя ик тупатэмын вал "Ижсталь" огазеяськонэн огкыл: татын эшъёсыныз ӵош тужгес трос ужаз. Заводлэн цехъёсаз ик кылдытӥз корт нуйтӥсьёслэсь тусбуйёссэс но "Андан пӧзьтӥсьёс" бадӟым суредзэ. А. П. Холмогоров - ас сяменыз возьматӥз Удмурт шаерысь инкуазез, сюлмысьтыз кырӟаз солэн чеберлыкез сярысь, котьку шедьтылӥз выль но выль учыръёс. А. П. Холмогоров художник-лирик. Данак ужъёсаз кузёяське ӝутскем мылкыд. Уно пол пыриськылӥз Россиын радъяськылӥсь бадӟымесь адӟытонъёсы. Трос пол возьматъяз суредъёссэ кунгож сьӧрын но. А. ЗОЛОТУХИН, искусствовед. х х х Алексей Павлович Холмогоровлэн ужъёсыныз адӟытон усьтӥськоз 10-тӥ мартэ Суредасьёслэн огазеяськонзылэн выставкаос ортчытъян юртаз. Президент луыны дасяськись эшъёслы но соослэн юрттӥсьёсссылы "Удмурт дунне" газетлэн редакциез ивортэ: 25-тӥ феврале ортчытэмын печатлан инты висъянъя пус чӧлтон. Котькуд кандидат (солэн штабез) быгатэ газетын дун тырыса инты басьтыны. Квадрат сантиметр понна тыроно 15 манет (огшоры номерын) яке 25 манет (телепрограммаен номерын). Тупатэмын черод. Тани со: 29-тӥ февраль - Алексей Подберезкин. 2-тӥ март - Станислав Говорухин. 3-тӥ март - Элла Панфилова. 7-тӥ март - Геннадий Зюганов. 10-тӥ март - Константин Титов. 14-тӥ март - Юрий Скуратов. 17-тӥ март - Умар Джабраилов. 21-тӥ март - Владимир Путин. 23-тӥ март - Алган Гулеев. 24-тӥ март - Евгений Севастьянов. Григорий Явлинскийлэн ыстэм муртэз шара ялӥз, дун тырыса материалъёс уз печатлалэ шуыса. Валамон, куд-ог музонъёсыз но кандидатъёс уз быгатэ яке мылкыд уз каре газтамы асьсэ сярысь ивор сётыны. Соку та графикын но воштӥськонъёс луозы. Редакция дась котькуд кандидатлэн оскем муртъёсыныз нимаз кенешыны, огкыл утчаны. Жингыртоно 44-43-44 телефонъя. Витиськом! Телевизор но ӝуа Туала адямиез телевизорен уд паймыты ни. Соин герӟаськемын шутэтсконмы но, тодон- валан люканмы но. Паймытоз, дыр, одӥгез: та чебер дуно арбери куддыръя бадӟым кайгуэ вуттэ. Миым шаерамы 48 пол тылпу гомаз телевизоръёс сутскемен. 323 сюрс манет тыр ваньбур пеньлы пӧрмиз, 4 адями бырыны шедиз. Жаляса верано, телевизор гомӟон учыръёс уг кулэсмо. Январе гинэ та муген 3 тылпу ӝутскылӥз, 2 адями быриз. Кышкыт учыръёсы тужгес но вутто "Рекорд", "Рубин", "Электрон", "Изумруд", "Березка" но мукет асьме телевизоръёс. Та аппаратъёс сутскыку, омыре чаляк вӧлмо адямиез усыкмытӥсь ядъёс. 10-12 минут куспын шоканэз пытсаськыса адями кулэ. Ма муген телевизор сутске? Ум вералэ ни технология но конструкция ласянь тырмымтэоссэ. Пусъём гинэ: гомӟо вужмем телевизоръёс, кудъёсаз уродмемын изоляциез, аппарат тузонӟемын. Соин ик кӧня ке ар ужамзы бере телеприёмникъёсты дырын-дырын эскерытоно специалистъёсты. Ма кароно сутскись зынэз шӧдыса? Нырысь ик - эн куалектэ! Телевизордэс кысэ. Гомась яке ӟырдам интыяз ву палькке, экранэзлэсь палэнэ кариськыса. Ӝуась аппаратэз кысыны луоно сое шобыртыса но. Коркась поттоно-улляно татын улӥсьёсты, нырысь ик нылпиосты, пересьёсты. Одно ик ивортоно тылпу кысӥсьёслы. Кышкыт учыръёсы холодильник но вуттэ. Тани ортчем аре соин сэрен республикаямы тылпу 22 пол потаз, 150 сюрс манетлы ваньбур тӧлъя-буръя кошкиз. Лыдпусъёс возьмато: ӝуаны ӧдъяло 15 арлэсь кема ужатэм холодильникъёс. Соин ик та дуно арбериез чакласа ужатоно. Урод ке сӥятэ-кынтэ, мултэс электрокужымез ке кыске, ӧсэз ке лач уг пытсаськы - озьыен, кулэ каре ни эскеремез-тупатъямез. Таӵе дуно чебер арбериостэк улыны ум быгатэ ни. Но соосты ӝикыт утялтӥсь кузё гинэ шудо-буро луоз, ваньбурзэ но тазалыксэ изъянлэсь утёз. С.Метелягин. Ойдолэ кенешом Трос пӧлысь одӥгез Президент луоз Толэзь пала кылиз Россилы Президент быръёнозь. Туннэ нуналлы тодмо ни: Президент луон понна 11 кандидат нюръяськоз. Та бадӟым ужрадэн валче адямиослэн пӧртэм юанъёссы кылдыло. Соин ик Президент быръён сярысь законэз лыдӟисьёсмылы валэктон пумысен газетмылэн корреспондентэз Т. Банникова вазиськиз экономика наукаосъя кандидатлы Р. В. КОНДАУРОВЛЫ но юридической наукаосъя кандидатлы С. В. ЮШКИНЛЫ. - Ойдолэ лыдӟисьёсмылы тодэ вайытом, кин быгатэ Россилэн Вылӥ Законэзъя Президент луыны но кыӵе куонъёс пуктӥсько Президентэ кандидатъёс азе? С. Юшкин: - Президент луыны быгатэ Россилэн гражданинэз гинэ, но 35 ареслэсь егитгес муртлы та сюрес уг на усьтӥськы. Россиын улэмез 10 арлэсь ӧжыт медаз луы. Президентэз быръё ньыль арлы. Одӥг муртэз ик бӧрсьысь бӧрсьы кык поллэсь трос бырйыны уг яра. Но Конституциын лэземын кӧня ке вис карем бере со адямиез ик куинь пол но, ньыль пол но Президентэ бырйыны. Президент сярысь законын выль куронъёс пуктэмын на. Президентэ кандидат Россилэн избиркомаз вуттыны кулэ на таӵе документъёс: кык гражданствоез сярысь (сыӵеез вань ке), суд улэ кыскылэмзы сярысь (вал ке сыӵе учыр), кандидатлэн, солэн кузпалызлэн но нылпиоссылэн доходъёссы но ваньбурзы сярысь. - Президент луон понна туэ 11 кандидат нюръяськоз. 1996-тӥ арын но Президент быръён дыръя сомында ик адями вал. Со лекос трос ӧвӧл-а? Р. Кондауров: - Макем трос луыны кулэ кандидатъёс, законын ӧвӧл верамын. Но Быръёнъя комиссиын пусъемын ке луиз кыклэсь ӧжыт кандидат, быръёнъёсты ортчытыны уг яра. Сыӵе учыре, кандидатъёсты выльысь ӵектон понна, ватсаса дыр висъяське, соин ик быръёнъёслы мукет дыр тупатӥське. - Президентэ кандидатъёс ЦИК-ын пусйиськемзы бере, быръёнъёс ортчытозь, азьвыл ужзылэсь мозмытскыны кулэ, соос ужало ке вал муниципальной но кун службаын яке иворъёс вӧлмытӥсь ёзъёсын. Озьыен, В. Путин но али огдырлы ужезлэсь мозмытскыны кулэ? С. Юшкин: - Вань кандидатъёс вылэ сыӵе курон уг вӧлмы. Президент быръён сярысь законын тазьы учкемын: ас ужзылэсь аналскыны уг быгато Президент, со кыкетӥ дырлы кылён понна ке нюръяське, но Правительстволэн Тӧроез, со огдырлы Президентлэсь ужзэ ке но быдэсъя. Малы озьы учкемын - валамон. Государствоез кивалтӥсьтэк кельтыны уг яра. Соин ик Путин быръёнъёс ортчытозь ик ас ужъёссэ быдэсъялоз. - Быгато-а Президентэ кандидатъёс калыкез ас палазы карон понна кыӵе ке благотворительной ужъёсын вырыны? Р. Кондауров: - Уг. Сыӵе ужъёсын вырыны озьы ик уг быгато кандидатъёслэн юрттӥсьёссы но. - Нош кӧня луыны быгатэ Президентэ кандидатлэн оскем адямиосыз (юрттӥсьёсыз)? Р. Кондауров: - Законъя лэземын 600 пала но возьыны. Быръён нуналэ соос быгато эскерисьлэсь (наблюдательлэсь) ужзэ но нуыны. - Быгатэ-а пусъем кандидат ас кандидатураезлэсь куштӥськыны? Р. Кандауров: - Быгатэ. Но куара сётон дырлэсь вить нуналлы вазьгес. - Быръёнъёсты ортчытон понна коньдон висъяське федеральной бюджетысь. Нош со сяна кыӵе коньдонэз уже кутыны луэ на кандидатъёслы? С. Юшкин: - Выль законъя котькуд кандидатлэн аслаз фондэз луыны кулэ на. Со фонд кылдытӥське аслаз кандидатлэн коньдонысьтыз, солэн быдӟалаез ичи уждунлэсь 2000 поллы тросгес луыны уг быгаты, нош выльысь быръёнъёс ортчытыку - 3000 поллэсь тросгес. Со сяна, та фондэ ик коньдон висъя кандидатэз ӵектэм быръёнъя огазеяськон яке блок - коньдонлэн быдӟалаез ичи уждунлэсь 200 000 поллы тросгес луыны уг быгаты. Коньдонзэс озьы ик ас мылкыд каремзыясётыны быгато нимаз адямиос (ичи уждунлэсь 400 поллы трос уг яра) но юридической муртъёс (ичи уждунлэсь 40 000 поллы трос уг яра). Вераны кулэ на: кандидатлы ӧвӧл лэземын ас фондысьтыз коньдонэз ичи уждунлэсь 300000 поллы тросгес быдтыны, нош выльысь быръёнъёс радъяку - 400000 поллы тросгес. - Быръёнъёслы быдтэм коньдонэз кандидат берыктыны кулэ-а? Р. Кондауров: - Законъя учкемын: пусйымтэ-а кандидат, пусъемын-а быръёнъя фондлэсь уже кутымтэ коньдонзэ со одно ик берыктыны кулэ. Озьы ик ЦИК-е берыкто уже кутымтэ коньдонзэс быръёнъёс дыръя 3 процентлэсь ӧжыт куара бичам кандидатъёс но ас кандидатуразэс куштэм кандидатъёс. - Президентэ кандидатъёс пӧлысь (11 мурт пӧлысь) кудӥз вормисен лыдъяськоз? - Кудӥз люкалоз быръёнъёсы лыктэмъёслэсь ӝыны пала кураоссэс. - Нош кыӵе учыръёсы Президент быръёнэз выльысь ортчытоно луоз? С. Юшков: - Куке куараоссэс сётыны ӝыныезлэсь но ӧжыт бырйисьёс лыктозы. Куке бюллетене пыртэм кандидатъёс пӧлысь одӥгез но кулэ мында куара уз бича. Но куке "ваньмызлы пумит" вадьсы бырйисьёс, кандидатъёс вадьсы сярысь, тросгес пусъёссэ пуктозы. - Шуом, Президентэз быръёмы. Кыӵе дырысен со ас ужез борды кутскыны быгатэ? - Азьвыл законъя - быръёнъёслы йылпумъянъёс лэсьтэм дырысен 30 нунал ортчыса. Нош выль законъя учкемын азьвыл Президентлэн ужаны кутскемез нуналысен. Но куд-ог учыръёсы выль Президентлы ужаны кутскыны яра азьвыл законъя но. - Бадӟым тау кенешеммы понна. Малпасько, лыдӟисьёсмылы но табере валамонгес луоз, малы 26-тӥ мартэ одно ик быръёнъёсы пыриськоно. Соос бордысь потэ ук кызьы ортчоз Президентэз быръён. Та уже туж ляб пыриськимы ке, выльысь кӧня коньдон но кужым быдтоно луоз. Нош азьпалан бусы, бакча ужъёс... Адӟем карыса, ӵошасткыса Алнаш ёросын улисьёслэн валтӥсь удыссы луэ пудо вордон но сое утлятон. Солы сӥзьыса ик туэ кык пол ортчизы ни кенешъёс. Огинэ люкаськылӥзы "Прогресс" колхозысь Вишур бригадаын но. Мынон-ветлон ласянь секытгес ке но луэмын, вань колхозъёсысь сямен ветеринаръёс, зоотехникъёс но ферма кузёос лыктэмын вал. Одӥгез ивортон сӥземын вал вордӥськем кунянъёсты утялтнлы. Со сяна, азьмынӥсь колхозъёсысь кивалтӥсьёс та удысъя асьсэлэн ужан амалъёсынызы но малпанъёсынызы тодматӥзы. Пудо вордонын ӟеч азинсконъёс басьяло али Асан совхоз- техникум кыске, кылсярысь, "Молодая гвардия", "Нива", "Родина" колхозъёс. Асан совхоз-техникум, 5000 литр йӧл, "Прогресс" - 2400. Ӝыныез но ӧвӧл! Соосын-а ӵошатскод? Совхоз-техникумын нош пудозылы кыкетӥ арзэ ини сётъяло пӧртэм ватсэтъёс. Соин ик герӟаськемын шумпоттӥсь лыдпусъёс но. Зэм, мукет колхозъёсын витаминъёс сярысь малы ке уг сюлмасько. Нош кемалась ик ӧвӧл толшор толэзе совхоз-техникумысь зоотехник Н.К.Соколова вуылӥз Самараысь одӥгаз вузэ. Со сяна, ветлӥзы на "Большевик", "Молодая гвардия" колхозъёсысь но зоотехникъёс. Соослы отын трос тодон-валан сётӥзы. Надежда Кирилловна Соколова вераз Самараысь фермеръёслэн ужазы паймымон амалъёсты кутэмзы сярысь. Кылсярысь, отын, пе, пудоез толзэ но, гужемзэ но сюдо яке кӧс турынэн, яке сенажен, яке вож турынэн гинэ. Нош фуражез воксё палэнто. Люктало сакыр вуэн. Яке сое сиён пӧлазы ик ватсало. Таиз амал туж юрттэ йӧлэз йылэтыны. Соин ик самараослэсь та амалзэс уже пыӵатон пумысь вераськизы: дышетскем ноку но сиён уз куры угось. Ёрослэн валтӥсь ветврачез Н.В.Краснов оскытӥз, азьланяз мукет колхозъёсысь но специалистъёсты тодон-валанзэс будэтыны ысъялом шуыса. Кенеш ортчем бере, лыктэмъёсты тодматӥзы вож кунянъёсты возён но утялтон интыен. Со быдэсак тупатъямын-выльдэмын. Выж вылэ пул пызь вӧлдэмын, котыр чылкыт, кӧс. Пудолэн сиёнэз азьысьтыз уг быры. Зэм, вань тырмымтэез но. Куазь кезьыт ке, татын но салкым луэ. Соин сэрен кунянъёс, кын пыӵаса висьыны кутско: Зэм, татысь ветеринар Л.М.Никифорова ужзэ валса быдэсъя. Кунянъёслэсь висёнзэс дырыз дыръя синйылтэ но эмъяны быгатэ. Шумпотыса верам потэ: Людмила Михайловналэн эмъям пудоез туэ ӧз кулы. Вишурысь ветеринарлэсь ужзэ капчигес каре на лазер. Сыӵе усто "эмчиез" Никифорова кутэ ай толэзь быдӟа гинэ. Пайдаез туж ӟеч шуыса оскытэ: сю куатьтон ньыль пумо висёнэн, пе, нюнъяськыны юрттэ. Экскурсия ортчем бере, куноосты горд сэреге вуттӥзы - чаен утялтӥзы. Нош кытысь, шуоды, туала арын сакыр но, чай но? Таиз сярысь туж сюлмаське фермалэн кузёез В.И.Антонов. Вандэм пудозылэсь пуштӥрлыксэ вузаса, Валерий Иванович быдэс мешок песок басьтӥз. Коньдонэз эшшо ӵашаослы но тырмиз на. Куноос паймизы вишуръёслэн сэрегзылэн чылытэзлы но. Вишурысь фермалы со понна алигес коньдон премия но сётэмын вал. Районын та сэрег нырысетӥ интыын сылэ. В.и.антоновлэн но пудо утялтӥсьёслэн ужзэс гажамзы татысь но адӟиське. Эмъян юртын сямен, татын тодматскыны луоз "Айболитлэн" визь-кенеш бамен. Одӥг кылын вераса, улон но ужан интызы синмаськымон. Тыршемзылэн пайдаез эшшо но мед луоз шуыса, таӵе ӵемгес ортчытъяно вылэм. Соку пудо утисьёс ас удысазы ог-огзылэсь адӟем карыса но куспазы ӵошатскыса ужасалзы. Светлана Никитина, Удмурт журналистэ кун университетын дышетскись. ДАРТ КОНКУРС, КОНКУРС... Инкуазез гажасьёслы Удмурт Республикаысь Инкуазез утёнъя комитет нылпи экологической лагерьёс радъян программаослы конкурс ялэ. Соосты эскероз нимысьтыз комиссия. Ӟеч программаосты уже пыӵатон понна, коньдон республикаысьтымы экофонд висъялоз. Конкурсэ пыриськыны мылкыд каремды сярысь ивортоно 30-тӥ мартозь. РЕФЕРЕНДУМ АЗЬЫН Кин кинэ вормоз, кин маин кивалтоз 25-тӥ феврале нош ик люкаськылӥз Удмуртилэн Конституциез бордын ужась комиссия. Та нуналэ эскеремын вал Конституцилэн 5-тӥ люкетэз. Со нимаське: "Удмурт Республикалэн Кун Кенешез". Комиссилэн кенешоназ журналистъёс ӧз пыриське, соин ик та ужрадлэн ужамез сярысь бӧрысь валэктонъёс сётӥз Кун Кенешысь правоосъя управленилэн кивалтӥсез К.А.ГЛУХОВ. - Конституцилэн 5-тӥ люкетысьтыз вань ёзэтъёссэ (статьяоссэ) эскерыны ӧм вуэ, - шуиз К.Глухов, - 13 ёзэтъёс пӧлысь ватсанъёс пыртӥм витяз гинэ. Нырысь ик комиссия ватсанъёс пыртӥз "мар со сыӵе Кун Кенеш" валэктонэ. Конституцие тазьы гожтыны ӵектэмын вал: Кун Кенеш - со ялан ужась, одӥг гинэ, вылӥ но законъёсты кутӥсь ёз. Куд-огез та валэктонэ пыртыны дэмлало на вал, Кун Кенеш - со эскерись ёз но луэ на шуыса кылъёсты. Таӵе дэмлан ӧз ке но ортчы, пусъемын вал, Кун Кенешлэн эскерон функциез азьло сямен ик кыле шуыса. Комиссилэн адямиосыз огкылэ вуизы 78-тӥ ёзэт пумысен. Отын вераськон мынэ Кун Кенешлэн депутатъёсыз сярысь. Азьло сямен ик Кун Кенешын 4 ар ӵоже 100 депутат ужалоз. Депутатэ бырйыны луэ 21 аресысен. Кун Кенешлэн депутатэз огдыре ик уг быгаты ужаны Россиысь Кун Думалэн депутатэз, судья луыса, уг быгаты Россилэн но Удмуртилэн кун ёзъёсаз ужаны но мукет коньдоно ужъёсы пыриськыны. Но Кун Кенешысь депутат быгатэ преподавательлэсь но тодосчилэсь ужъёссэс нуыны. Константин Глухов ивортэмъя, 80-тӥ ёзэтэ нырысьсэ пыртыны ӵектэмын таӵе ватсан: Кун Кенешлэн сессиезлэн ужаз вань мылкыд карисьёс пыриськыны быгато, Россилэн Конституцияз пусъем учыръёсты вератэк. Таяз учыре комиссия туж трос дырзэ быдтӥз 81-тӥ ёзэтэз эскерыку, угось отын вераськон мынэ Кун Кенешлэн но Правительстволэн быдэсъяно ужъёссы сярысь. Удмуртиын президентлэн нимаз структураез кылдытӥське бере, Кун Кенеш но Правительство куд-ог полномочиоссылэсь люкиськоно луозы. Тужгес но трослы кулэсмоз ужез Кун Кенешлэн, К.Глухов пусъемъя - 70-80 процентлы. Кылсярысь, Кун Кенешлэн Тӧроез президентлы "сётоно" луоз наградаосты сётъянэз, Россиен но мукет субъектъёсын вераськонъёсты нуонэз но огкылъёсты гожтонэз, Законъёс улэ гожтӥськонэз, азьвыл чакламтэ сессиосты ӧтчанэз но мукет. Нош Правительстволэн Тӧроезлэн ки улысьтыз президентлы кошкозы, кылсярысь, таӵе ужъёс: министръёсты юнматон но правительстволэсь азьвыл кутэм решениоссэ воштон но мукет. Кызьы адӟиськом: президент ке Удмуртиын луиз, Кун Кенешлэн но Правительстволэн кужымзы трослы лябӟозы. Президент - со луоз выль кивалтон ёз. Озьыен, ӝоген Удмуртиын куинь кивалтон ёзъёс ужаны кутскозы - таӵе кивалтон амалэн комиссилэн адямиосыз соглаш луо. Но озьы ке но, полномочиосты люкылон пумысен ваньмыз ик огкылэ вуымтэ на. Соин ик, кык арня ортчыса, Конституция бордын ужась комиссия ас ужзэ азьланьтоз на. Т.Банникова. ДАРТ Визь ке ӧвӧл - басьтод? - Алло, ӟечбуресь. Мон - ялонъя. - Мар тӥляд? - Литература, Азвесь вакыт, курсовой. - Учком. Темазэ ӝот-ӝот дасяса лыктэ. - Кӧня? - Одӥг бамез - 15 манет... Та-ак, шоро-куспо курсовой 25 бам котыр ке, 350-400 манет. Чидамон. Дунын рефератъёс, контрольнойёс, курсовой, диплом уж басьтон сярысь малпаськисько мон озьы. Али сыӵе юрттэт сётон пумысен ялонъёс котькудаз сямен газетын вань уго. Курсовой кулэ ӧвӧл ке но, сётэм телефонъёсъя юри жингыръяны малпай - тунсыко ук. Час ӵоже филолог но, психолог но, физик-математик но, экономист-бухгалтер но луылӥ. Литература предметъя дунзэ верай ни, бухучётъя, малпамелы пумит, туж ӧжыт куризы - 1 бамлы - 8-10 манет. Тужгес секыт дышетскыны, шӧдске, программистъёслы. Кылсярысь, компьютер цехысьтымы кивалтӥсьмылэн Сергей Акбаевлэн темаезъя (УдГУ-ысь дышетӥсен вераськонэ оскымонгес мед луоз шуыса, темазэ юай), 1 бамлы 30 манет куро. Секыт, пе. Профессиональной математик озьы шуиз (макем секыт, сокем дуногес - З.Р.). Нош Сергей "Построение частотного словаря" темая дипломзэ 1996-тӥ арын "витьлы" гожтӥз. Дунтэк, ас визьмыныз. Секытгес вераськыны вал психологъёсын. Зэмзэ но, психологиез ӟеч валась адями сюриз. Тема бен малпай ик, но кушаса сётыны косэ, дунзэ уг вера, кытын дышетскемез, дышетӥсез юа, соку ик пумиськыны уг ӧтьы. Та удысын дилетант луытозь, журналист ик мед кылём шуыса, тунсыкъяськон мугме шараяй. Ӧз паймы, ӧз но йыркуръяськы, но пумиськыны яке секретъёссэ шараяны пумит луиз. Озьыгес ик сопроматэн. Та предметэз дышетымтэ студентэз студентэн ик уг лыдъяло, пе. (Удмурт филологъёс сое В.Кельмковлэн дисциплинаосыныз ӵошато). Ялон сётӥсь ужез кушаса вераны косэ. Та удысэз чик но син азям пуктыны уг быгатӥськы бере, кузь командировкаосы ӵем ветлӥсь, заочной люкетын дышетскись пияшлэн анаез кариськоно луи. Дунтэм уз луы, учкытэк вераны уг быгатӥськы, шуиз. Озьы ик ӧй тоды. Но вераз - али трос уже, курсовойёссэс ваё, дыртэ. Иське, студентъёс сокем куанер ӧвӧл! Дипломен ӵошатыса, мар со - 500-700 манет. Сюлмо анайёс шедьтозы. Тунсыко, вань-а меда удмурт студентъёс пӧлын дунын "зачёт" басьясьёс. Нуназе дышетскон ёзысь тодмо но тодмотэм студентъёс пӧлысь ӧй шедьты. Заочнойысь - кыксэ. Одӥгез, Ольга, городын улэ, кык пичи нылпиосыз, соин ик библиотекаосын пукыны уг ваньмы. Картэз коньдонлы уг ёрмы бере, ачиз сыӵе амал ӵектӥз. Фанзиля Башкириысь пичи гуртын улэ. Валамон, курсовой гинэ ӧвӧл, ӟеч реферат гожтыны но отын луонлык ӧвӧл. Нош татысь тодмоез ӝыны дунын гожъя. Одӥгез, пе, преподаватель кык пол юаз ни: - Тани ук, быгатӥськод, нош экзаменын малы сыӵе урод вераськод? Куалекъясько, пе, шуи. Амалоосыз, конечно, экзаменын но уг куалекъяло. Сюлмо дышетскисьёс сярысь уг вераськы, соос, зэмзэ но, югыт дуннеез адӟылытэк экзаменлы дасясько. Нош азьтэмъёсыз дунын шпаргалка басьто ( асьсэос гожъясьёсты азьтэм уд шуы). Куро 50-100 манет яке коробка конфет, дуно сур. Огласянь умой кадь - пумен визь но дунъяськыны кутске. Визьмо мурт алдаськытэк, ас визеныз коньдон поттыны быгатэ. А мар учконэз - тонэ ке гожтыны ӧз косэ, мукетсэ шедьтозы. Дунын дышетско ук эркиям, азьтэм, ёрмисьтэм, ӵемысь шузи (вождэс эн вае) адямиос. Шергес вазиськыло кузь командировкаосын йырин ваньмылӥсьтэм, кык-куинь ужез бергатӥсь, вож нуныен пукись яке висись адямиос. Берпуметӥосыз сыӵе куронъёсын одӥг-ог гинэ вазиськыло ке, нырысетӥосыз - диплом басьтытозязы. Кыӵе ужасьёс луозы соос - мукетыз ужпум. Юнме шат али асьэды гажась предприятиос пӧртэм конкурсъёс, тестъёс, собеседованиос ортчытыса гинэ уже куто, ӵемысь штатъёссэс сузяло. Нош вылӥ образованиен адямиослэн лыдзы ужтэк кылемъёс пӧлын ялан йылэ. Соин ик, кисыяд мултэс 400 манетэд ӧвӧл ке, эн уректы, эше - туннэ ик курсовоед борды пуксид ке, апрелёзь вуттод, йырад кеньырез но йылоз. З.Рябинина. Кенешизы кузёос Кылем арняе Правительстволэн бадӟым залаз ортчиз республикаысьтымы кивалтӥсьёслэн кенешонзы. Пумиськонэз усьтӥз Николай Ганза. Со ик мадиз быдэсъясь ёзын ортчытыны чаклам воштӥськонъёс сярысь. Пӧртэм интыосын люкам опытэз лыдэ басьтыса, асьме дорын тупатыны туртто президентлэсь постсэ. Валамон ни, солэн аппаратэз но луоз. Отчы, верамзыя, выжозы правительстволэн ёзъёсаз ужась муртъёс. Соин ик чиновникъёслэн лыдзы уз йылы. Куд-ог службаос президент вылэ но, правительство вылэ но огдыре ужалозы. Кенешонын вераськон мынӥз референдумез радъян пумысен но. Та ласянь валэктон ужез кужмоятоно, пусйиз Александр Волков. Озьы ик эскеремын мукет ужпумъёс. Министръёс Светлана Андреева, Сергей Шадрин, Валерий Загайнов мадизы асьсэ удысъёсын кылдэм югдур сярысь. Кенешемын умоятыны Быдӟым Вормонлы 55 ар тырмонэз пусъёнлы дасяськонэз. О. МАРКОВ. Газетмылэн вашкала но ӟеч эшез, тодмо писатель Вячеслав Ар-Серги Удмурт кун филармонилэн залаз алигес ортчытӥз творческой ӝытсэ. Отчы люкаськемъёсты тодматӥз выль книгаеныз. Оскиськом: писательлэн выль ужез лыдӟисьёс доры ас сюрессэ одно ик шедьтоз. Та ӝытэ Вячеслав Ар-Сергилы пӧртэм юанъёс сётъязы. Соос пӧлысь одӥгез таӵе вал: - Вячеслав, мар бордын ужаськоды али? Со шуиз: - Ужасько выль книгае бордын. Со луоз бадӟым кылбур сборник. Кык кылын ик. Нош вис усьыку азинтӥсько берыктон удысме. - Тӥ трос писательёсты берыктӥды ни удмурт кылэ. Мадьярлэсь Дюла Чаклэсь, ӟучлэсь Александр Островскийлэсь пьесаоссэс, чувашлэсь Мишши Юхмалэсь романзэ, пор, ханты, манси, словак, мордва поэтъёслэсь кылбуръёссэс. - Эшшо... - Оглом вераса - вань гинэ. Нош али ужасько быдӟым еврей писательлэсь Шолом Алейхенлэсь "Тевье - йӧл вузась" нимо повестьсэ берыктон бордын. Та уж мыным аслэсьтым устолыкме волятыны туж юрттэ. Уката ик - классикъёсты берыктыку. Тевье - калык пушкысь ик басьтэм образ. Синву пыр серекъя со, та улонмы шоры учкыса. Кытӥ-отӥ куасалскоз ке но - ноку уз чигы. Со - ачиз калык. Со сётэ аслыд оскон мылкыд. Соин ик таӵе шукрес вакытъёсамы та образлэн дуныз уката но вылӥе ӝутске. - Нош Шолом Алейхем? - Со - Быдӟым Мастер. Мукет кылысь берыкъя. Солэсь дышетскыны - бадӟым дан. Тӥни озьы, писатель ялан ужа. Вуоно ужысьтыз ог люкетсэ туннэ ӵектӥськомы тӥледлы, лыдӟисьёс. Шолом Алейхем Шуд зориз! Тевье - йӧл вузась повестьысь люкет Паймымон югдур, кудаз галак мурт - йӧл вузась Тевье, куанер семьяеныз улонын курадӟись маке, шуак-дуак шудо луэ. Та сярысь веран-мадён воксё мултэс уз луы. Вылаз ик, гожтэмын но быдэсак аслаз Тевьелэн верамысьтыз. "Из праха подъемлет он бедного, из тлена - нищего..." Псалтырь, 113,7. Тодӥськоды-а, пан Шолом Алейхем, шуд усёно луэ ке но та дуннеын, со ас кожаз вуоз, пиньёстэ ик тӥяса, ымад пыроз! Кызьы шуо калыкын - вӧл-вӧл усьты капкадэ. Сыӵе дыръя визь но, нодлык но кулэ ӧвӧл. Нош шуд вуон гожтэмын ӧвӧл ке - коть йырдэ пиль, коть валдэ пузаны пукты... Вань курадӟемед - мимала лымы. Нош шуак-дуак удалтыны кутскиз - адӟон, пе, пыд улысь потэ. "Свобода и избавление да приидут на иудеев!" Та веранлэсь пуштроссэ, мон сямен, тӥледлы но кушаса сётонэз ӧвӧл. Огъя вераса - мугорын лул пуке на ке, одӥгез вирсэред жугиське на ке, ыштоно ӧвӧл - ачимъя созэ ӟеч тодӥсько. Зэмзэ но, кыӵе сюресъёс вылын кымесам лодӥга пуктылыса, мон та улонам, туннэ нуналам вуи? Мынам песянаелэн но, песянаелэн но песянаезлэн, мон тодэмъя, йӧлын-маин выремзы ӧвӧл. Скал вераосты кыскамзы вань ик, дыр, нош вузаськемзы, сьӧд гижы быдӟа кадь семьязылы таин табыш вайылэмзы ӧвӧл. Ӧвӧл, тӥледлы ваньзэ тупен-тупен, кутсконысеныз ик мадёно луоз. Тани мон утялак гинэ вӧзады пуксем каро, нош валэ кӧня ке турын-куар мед ишкалоз. Мар шуод - со но улэп лул, сием потэ. Со югдур вал Будӟиннуналлэн витьтонэтӥ нуналаз... Бен, со бӧрсьы, витьтонэтӥ нуналэ - швуэс шуиськом сое. Оло нош солэсь ог кык арнялы азьлогес? Бергес ке ӧвӧл?.. Эн вунэтэ - та югдур туж кемалась вал ини, со бӧрсьы ведь монэн кыӵе гинэ учыръёс ӧз ни луылэ. Дас ар ортчиз ни, дыр. Дас. Даслэсь ятыргес, дыр. Соку мон сыӵе ик, али кадь ик Тевье нимын ветлӥ, но воксё мукет адями вал. Кабез сыӵе ик, но, марым, кутэз музонгес вал. Марлы, шуоды? Да самой исьникут, галак но буш кӧт вал мон. Инкуазен сётэм возьытэз но, вождэс эн ваелэ, ватыны номырин вал. Гольыш! Дугдэ ай... Ма, туннэ но мон сокем ик бусьтыр уг улӥськы. Быдэс гужем но ужаса, мон сюрс иськемлы но матэ уг вуы Бродский миллионерлэн узырлыкъёсыз дорозь. Нош азьло мон талэсь но куанергес вал... Ведь мынам али вал нергее но вань. Уробоен маин. Вылаз ик, кыкез ик скалъёсы - тьфу! тьфу! - син медаз усьы - йӧлзэс ӟеч сёто. Куинетӥез тани кунянаны выре. Инмар вожзэ медаз вайы: ӧпкелёнэ ӧвӧл - нуналлы быдэ мынам али кыскем йӧлы, нӧкые-вӧе, сыре но йӧлвылы вань. Быдэс семьяеным лумбыт ужаськом, пуксён инты шедьтылытэк. Кышно скал кыске, нылъёс нӧкы шукко, нош ачим котькуд ӵукна тани базаре ветлӥсько - Байберикын улӥсьёслы но Егупецысь узыр шутэтскисьёслы йӧл-вӧй нуллӥсько. Пӧртэм адямиосын вераськоно, кусып возёно луэ... Кудӥныз, ява, вераськиськод но, лул ик лопырске кадь, астэ куко-пыдо уробоен уд лыдъяськы ни, эсьмаса! Нош суббота нуналэ!.. Та нуналэ мон - эксэй. Кытӥ-отӥ книгае но учкылӥсько, нырме донгылӥсько - "Пятикнижиысь" одӥг ёззэ лыдӟисько, "Поучение отцов" но уг вунэтӥськы. Псаломъёс... Маке но визьмо уж шеде ик... Табере тӥ мон шоры учкиськоды, пан Шолом Алейхем, адӟиськоды на, та воргорон огшоры картуз нуллӥсь вылымтэ ведь, шуиськоды, дыр. Ма, кытчы ай мон дугдӥ? Асме куасалтӥ ведь. Галаклэсь но галак улӥ мон со вие. Шонерзэ вераса, семьяеным ӵош нуналаз куинь пол чатраллямы, сютэм кулыса. Инмарен сялӟем мурт кадь ужано луылӥз мыным - вокзалэ нуллӥ нюлэскысь коръёсты. Уробое тыриськод тани та-а! зӧкта коръёсты но нуиськод. Чылкак дас алтын усьылӥз курадӟемедлы. Нуналаз, шуисько. Со но ява - пӧрат! Тӥни со коньдон нергееныд ик сюд быдэс семьядэ. Куакапиослэн ымъёсазы кадь куяськод, нош со, семья, пӧй, ялан сютэм. Нокытчыяз но номыр но уг дугдылы-ёрмылы, ява. Валэз но котькуд нунал сюдоно. Со, ойдо, уг но кылзы супыльтэм-визьнодам-пыӵкылэм кылъёсты. Сюд но тӥни, а то интыысьтыз ик уз вырӟы. Вырӟиз ке - погралоз. Но вань на ик вылэм инмын Инмар! Ведь со, шонерзэ вераса, така ӧвӧл - ваньзэ, ваньзэ адӟе, чакла. Адӟиз со, кыӵе курадӟисько мон нянь шорем понна. Адӟиз но шуиз: "Тон мар-о, Тевье, кожаськод, мон номыре уг адӟиськы? Малпаськод - инбам музъем вылэ куашка, нош мон бабисько? Эх, шузи ик тон, Тевье, шузи. Адӟод, адӟод на - ваньмыз паллянысь буре берытскоз но, пеймыт сэрегъёс югдытскозы". Кызьы шуо, - "Кто будет вознесен, а кто - низвергнут..." Кин пудэн ветлӥз - вал вылэ пуксёз, кин вал вылын гонӟыртӥз - табере пыдъёссэ зыралоз. Осконо! Осконо гинэ. Нош татчыозь курадӟим ке югыт дуннеез адӟытэк - ведь со понна ик еврейёс, быръем-пусъем калык, пе. Юнме-а милемлы вань дунне вожъяське? Марлы мон со сярысь поттылӥ ай? А- а... Монэ но, пӧй, Инмар ас ӟечезлэсь ӧз палэнты, ӧз вунэты. Тӥ кылзэ ай, мар гинэ уг луылы, ява, та сьӧлыко дуннеяд. Одӥг ӝыт, акшан усьыку, гызмыльтӥськом ми валэным нюлэскытӥ. Буш бертӥськом. Йыр ошемын, кӧтпушез сюрс сютэм коӵышъёс партчало-кесяло кадь. Вал нергее но пыдъёссэ мырдэм вошъя. - Нюжтӥськы, - шуисько солы, - нюжтӥськы, шудтэм пудо-живот! Быр, ойдо, монэн уртче! Тон но тодод, мар со, быдэс нунал кузёеныд ӵош кӧс возён, кузь гужем лумбыт визян! Котырак нош чал-чал. Сюлоен сачкетэм жинграк гинэ шуккиськылэ буш сикетӥ. Шунды пуксиз, нунал кысӥз. Писпуослэн вужеръёссы оломар кузьдаесь кыстӥсько, кыйёс кадь выдо сюреслы кечат. Йыре оломар но пыре, ява. Кемалась кулэм муртъёс, тодмоос но ӵыжы-выжыос тодэ лыкто. Гурт сярысь малпаськод - остэ! Коть кыӵесэ пыр! Коркан - пеймыт гутё, нылпиос - таза мед луозы - дӥсьтэк-куттэк. Мольк! учко ураме сютэм синъёсын: ку меда атайзы вуоз? Оло, туриж нянь ваёз?.. Нянь... Оло нош, тӧдьы булка?! Нош кышно? Кышнолэн кырӟан - вузон одӥг: "Нылпиос солы ваи. Сизьым лул! Остэ! Коть ваньзэс али ик шуре выйтылы... Катьы ӧвӧл ни..." Со кылъёсыз чыртые чорыг лы кадь мертчо, ява. Чорыгед ке вань... А ведь асьмеос адямиос гинэ. Лы, вир но сӥль. Кылъёсын кӧттэ уд тыры... Сылалтэм чорыг сиим ке, чай юэм потэ. Нош чай вӧзы сакыр луысал на ке... - Нянь ке нянь, - ӟукыртэ кышно, - ӧвӧлэзлы кӧтпуш дышоз. Нош ӵукназэ чай стакантэк мон нокызьы но уг быгатскы - нылпи уйскын вань гадьёсты пызьыръяса нонэ. Шунды пуксиз. Вунэтоно ӧвӧл, тон но еврей шуыса - вӧсяськон вакыт. Вӧсяськон - гурт кеч ӧвӧл, уз пегӟы. Но сё ж таки вӧсяськем кароно ик. Зэмзэ вераса, кыӵе вӧсяськон но та виын луоз?! Син азяды пуктэ - со нодтэм, буш йыро пудо-животлы, кудзэ вал шуо, тып! гинэ ойдо сылоно ни вал ас интыяз, нош соид ка-ак! кутскоз ук лашкинтыны. Эсьмаса, ваче пыд. Вот и бызиськод ини уробо сьӧрад, шукы пазяса, кияд биньгозыез золтыса. "Господь Авраама, господь Исаака, господь Иакова..." Со-а, пе, сюлмысь ик вӧсяськон кыл луоз? Нош марлы ке но вӧсяськем туж потэ, лычсузьымон потэ, ява. Ки буш ӧвӧл ке - кымес лыдэ. Вӧсяськод но, лул капчи луоз, кожаськод. Огъя вераса, бызисько мон со уробо сьӧры но синагогаын сямен чирдӥсько (синагога кыл артэ верамын медам лу вал. Аминь.). "Питающий все живущее от щедрот своих!" Иське, котькуд куанер лулэз сюдӥсь-вордӥсь маке-а? "Выполняющий обет свой перед покоящимся во прахе!" Иське, со азьын но, кудӥзлэн вань улонэз ик кот-сапрес шайгу кадь адске... "Эх, - малпасько, - зэм но, вань улонэд - мур шайгу. Эх, курадӟиськом ук ми та югыт дуннеын - сое паньсасьёс. Ӵошатонэз ик ӧвӧл Байберикын узыр шутэтскисьёсын. Ишь! Кыӵе майбыр уло соос, вань улонзы - пумтэм-йылтэм юондыр. Кӧй но вӧй. Эх, господи владыко небесной! Кыӵе-мар сьӧлык понна та курадӟон? Мон но ваньзы кадь. Яке музонгес-а? "Воззри на нашу бедность..." Ма, учкы ай, вылысь Инмар, гылты ни урӟем-пыкмем синъёстэ - кыӵе секыт улӥськом ми. Ми понна, куанер исьникутъёс понна, нокинлы дурбасьтыны. "Исцели нас да будем исцелены..." Эмъя вал-а, мар-а ини милемыз тон коть, Инмар. Учкы ай, мар мында яраосмы вирӟекто милям? "Благослови нас..." Умой ардэ но сёт вал, жаль ке сокем ӧвӧл - мед удалтозы ю-няньёсмы, тыр тысен мед ӝутскозы вал соос инмозь ик. Нош мар солэсь пайдаез мынам валэлы? Солы сё одӥг - дунозэ-а сезьыез хрумкеты яке дунтэмзэгес-а... Но ми кадьёслы-а, пе, Инмарлэсь ужъёссэ чакланы-мертаны? Еврей ваньзэ бордаз огсямен карыны кулэ - умойзэ но, уродзэ но. Солэн одӥг кыл гинэ медло: "Таиз но ӟеч!" Сыӵе ини Инмарлэн мылкыдыз. Нош визьмояськись-ачимъяськись "ристократ" шуонъёс сереме уськытэмын луозы, самой Со доры вуизы ке. Ишь! Инмар, пе, ӧвӧл?! Соку ини адӟоды - мар со, Инмарлэн, пунэмзэ берыктыса, визьмамез. Соин сокем ик былекъяса, кылдэ шерыса уд улы, ява. Соку вузозы на соос: "Отец всемилостивый! Внемли гласу нашему!" Вылаз ик: "Обрати милосердие твоё к нам!" Жаляны курозы кышнозэс, нылпиоссэс. "Почти за благо-смилостивься над возлюбленным народом твоим, как некогда в священном храме, когда первосвященник и левиты..." Стоп! Валэ мынам мырк! гинэ дугдӥз но выжыоссэ соку ик музэ лэзиз. Мон сипыр-сяпыр гинэ йылпумъяй на вӧсяськон нергеме, синъёсме ӝутӥ но жӧл-жӧл луи, ява - артысь сикысь пырак дорам паймоно - мудрон дӥсьёсын кык муртъёс вамышъяло. "Разбойникъёс... Курокъёс та", - дзинь! гинэ чигиз кадь маиз ке кӧт пушкам. Собере сэзяк кариськи: "Ма тон, Тевье, воксё колӟо ук. Кӧня ар ветлӥськод ни татӥ... Кытысь-марысь татчы курокъёс вуозы? Хи". Синъёсыным кром-кром кырмекъяй, паллянэ сялски - лыктӥсьёс уг ышо. - Вьо! - черетски ук мон валэ шоры. Таос шоры нош чик но уг учкиськы - быдьто соос ӧвӧл. - Гажано адями! Кылзэ ай, дяденька! - вазиське мыным огез нылкышно куараен. Вылаз ик, ялыкеныз но шоналля. - Дугдэ ай! Эн пегӟе. Минутлы коть могалэ - ми тӥледлы номырзэ но уродзэ ум лэсьтэ! "Эхе. Нечистой ук та! - малпай мон но соку ик асме пыкылӥ. - Ма, кытысь-марысь татын чёртэз луоз?" Дугдытӥ валме. Умойгес учки лыктӥсьёсты - зэм но, кышномуртъёс. Огез - арлыдо, йыраз - буртчин кышет. Музонэз егитгес, таизлэн йыраз парик, лэся. Кыкназы ик пӧсяллям, ӵыжектӥллям. - Ӟечесь но буресь! - боз-боз карисько куараме, шумпотэм, оло, мед кожалозы шуыса, - мар ке муг усиз-а? Мар ке курем-басьтэмды ке потэ, маи мынам вань, тӥлед ӵекто - сютэм кӧтлэсь позыръямзэ, сюлэмшугъяськонме. Быдэс арнялы азьло, ява. Сюлмаськонъёс, куректонъёс, ыштонъёс но кайгуос - сыӵе мынам вузэ. - Чусгес! Дугдэ ай! - шуо соос, - учке ай, кыӵе кыло-буро луиз со. Кылыз воксё сэраськиз, оло. Извозчиклы вазь гинэ, нош собере пельдэ коть ӵокса. Номырдэс басьтыны ми ум но медӥське. Вералэ вал - кытын Байберике нуись сюрес? - Байберике? - куараме серекъясь карыны вырисько. - Ӟеч юан. Мон солы шонерак валэктон шедьтыны быгато. Озьы ик - кызьы мынам нимы - Тевье. - Иське, озьы, - шуо соос, - тӥляд нимды Тевье? Ӟечесь но буресь, раб* Тевье. Нош мар ай тӥ озьы былекъяськоды? Номыр но тумошоез ӧвӧл кадь... Ми татысь ӧвӧл. Ми - Егупецысь, али шутэтскиськом Байберикын. Ёросэ юмшаны шуыса потӥм но йыромим. Лумбыт, оло, бергаськом ни та нюлэс котыр. Сюресэз воксё ыштӥм. Кылӥськом - кин ке кырӟа, черекъя нюлэскын. Нырысь кышкам вал - оло, пӧй, урод адями та. Нош матысен еврей луэмдэс адӟим но соку ик буйгам. Валаськоды-а? - Ха-ха! Нош мон курок ке луысал?! - шуисько мон. - Куке но кылэмды вань-а?.. Улэм-вылэм одӥг еврей, разбойник. Дугдытэм со сюресчиез но ёртэм солэсь чепыльтэт тамаксэ... Выжыкыл... Пумозяз ик мадём-а? - Выжыкылдэс, - шуо, - мукетъятлы кельтом. Нош али возьматэ вал Байберике сюресэз. - Байберике?! Ма, ӵапак со сюрес вылын сылӥськом ук асьмеос. Мылды ке но ӧз поты - со пырак Байберике гинэ вуттоз! - Марлы соку уд вераськы? - А мар, - ӟудэм луисько, - гульым тыр кесяськоно шат? - Соку, - шуо соос, - тӥ тодӥськоды, дыр, кӧня иськем Байберикозь? - Кыдёкын ӧвӧл. Кӧня ке иськем. Оло вить, оло куать. Оло, быдэсак - тямыс! - Тямыс искьем! - черетскизы кышномуртъёс огымысь кадь. Синву пыр чигисько - тямыс иськем? Шудон-а со - тямыс иськем?! - Тӥ валаськоды-а, мар верады али? - Марым, - шуисько, - мар каром мон? Быгатысал ке, оло, вакчиятысал. Адями улонын ваньзэ оскалтыны-веръяны кулэ. Котьмар луылэ угось. Куддыр пырак суббота нуналэ ик, ява, гуртад дыртӥськод - ымныре тӧл шукке, сюрес вылын дэри-напра. Питранъёс палэнэ гылӟо. Собере трах! - ось чиге!.. - Оломар но супыльтӥськоды тӥ, - шуо соос, - кыдды бертэмын ӧвӧл на кадь ук ?! Мар тӥ татын выжыкылъёс мадиськоды - пырак "Тысяча и одна ночь", ява. Адӟиськоды ук - пыд йылысь пограськомы ни. Быдэс нунал ӧм но сиське, ӵукназэ мушникен кофе гинэ юим... Нош тӥ кылдэс шерыса сылӥськоды, возьыттэм. - Ну, таиз мукет ужпум, - шуисько, - туж но туж валамон маке ужпум. Мар со, сютэм улон - ӟечлэсь ӟеч валасько. Мушникен кофеез сю ар ке но ӧй адӟылы ни. Соку ик, ява, син азям мушникен кофе пуксиз. Вӧзаз - эшшо но ческытгес макеос. "Мар сярысь малпаське ведь, - пыкылӥсько асме, - мушникен кофе - туж деликатно! Нош вӧзаз сьӧд нянь туриж но селёдка ке луысал..." Малпасько но - син азе сӥзьыл кут кадь суред мерске - буй-буй пыжем мушник но парланӥсь кофе. Остэ. Остэ. Остэ. - Тодӥськоды-а, раб Тевье, - шуо соос, - татын, юбоос кадь, юнме сылэм интые, ӟечгес луоз, ми уробояды ке пуксим. Озьы тӥ милемыз живо-два Байберике вуттоды. Я, кызьы? - Вот те на... Мон ведь Байберикысь бертӥсько, нош тӥледлы кытчы кулэ - нош ик Байберике? Кызьы-озьы луоз, пе, со? - Огшоры, - шуо соос, - уд валаське-а, мар кароно? Визьмо адями, тӥ но сыӵе кадь, огшоры учкоз та шоры - вайыжъёссэ берлань берыктоз. Эн сюлмаське, раб Тевье, милемды дорамы ӟечен вуттӥды ке - сомында мед висёмы, тӥ кӧня дырдэс быдтоды. "Мар таос тарабар кылын верасько? Ялан чалышак, чалышак. Нет бы шонерак меӵкытыны? - пайми мон". Соку ик кулэм муртъёс, чёртъёс, нюлэсно вукузёос тодэ лыктӥзы. Тыбыр юзыр-кезьыр луиз. "Шузи пуклёк, - асме курласько, - мар таосын чеберъяськыса сылонэз? Тэтчы али ик уробояд, валдэ биньгозыен шуккы но пегӟы!" Соку ик кин ке кылтӥм кыскиз кадь, шӧдытэк вази: - Пуксе уробое. Нош соос, та кылъёсты кылӥзы гинэ, соку ик уробое тэтчазы. Валме биньгозыен сач- сач шобыръяса, мон берен берыктӥ сое Байберик пала. Пошёл! Кытын, пе. Табере валэ уг но вырӟы ни. Коть ванды, ява, со пудо-животэз. Валамон табере, кыӵе муртъёс пуксизы уробоям. Я, марлы мыным дугдоно вал та нюлэскы? Валаськоды-а? Котыр пеймыт, чус, кык кышноос уробоын... ИНТЫОС НО ДЫР Баскетбол (Уваын ортчиз) 1. Ува - 40 очко 2. Як.-Бодья - 38 очко 3. Камбарка - 28 очко Полиатлон (ыбылӥськон, гимнастика, куасэн бызьылон) 1. Плицев Эдуард (Можга) - 242 очко 2. Корепанов Валерий (Игра) - 237 очко 3. Бушмакин Николай (Воткинск) - 236,6 очко Куасэн бызьылонъёс: Егит нылъёс (5 иськем) 1. Воронцова Екатерина (Шаркан) - 17 мин.13 сек. 2. Новикова Валентина (Сарапул) - 17 мин.33 сек. 3. Кельдибаева Лилия (Воткинск) - 18 мин.02 сек. Егит пиос (10 иськем) 1. Вылегжанин Максим (Шаркан) - 29 мин.30 сек. 2. Виноградов Леонид (Як.-Бодья) - 29 мин.59 сек. 3. Иванов Семен (Можга) - 31 мин.04 сек. Воргоронъёс (10 иськем) 1. Мезенцев Александр (Шаркан) - 29 мин.31 сек. 2. Корепанов Владимир (Балезино) - 29 мин.53 сек. 3.Шкляев Сергей (Игра) - 30 мин.21 сек. Нылкышноос ( 5 иськем) 1. Русских Наталья (Игра) - 18 мин.05 сек. 2. Нуриллина Альфия (Можга) - 18 мин.22 сек. 3. Иванова Ольга (Шаркан) - 18 мин.26 сек. Нылкышноос-ветеранъёс (3 иськем) 1. Трефилова антонида (Шаркан) - 11 мин.54 сек. 2. Данилова Нина (Дэбес) - 12 мин.04 сек. 3. Рудина Юлия (Яр) - 12 мин.13 сек. Воргоронъёс-ветеранъёс (5 иськем) 1. Батаногов Николай (Шаркан) - 15 мин.49 сек. 2. Ефремов Вениамин (Игра) - 16 мин.25 сек. 3. Смелов Александр (Завьялово) - 16 мин.55 сек. Эстафетаос: Воргоронъёс, 4х5 1.Вылегжанин Максим Батаногов Николай Перевозчиков Олег Мезенцев Александр (Шаркан) - 52 мин.32 сек. 2. Казаков Вадим Ефремов Вениамин Копысов Виктор Шкалев Сергей (Игра) - 59 мин.20 сек. 3. Иванов Семен Романов Леонид Александров Василий Иванов Евгений (Можга) - 1 час.07 сек. Нылкышноос, 4х3 1. Воронцова Екатерина Трефилова Антонида Коробова Анна Иванова Ольга (Шаркан) - 48 мин.52 сек. 2. Дектярева Юлия Рыбакова Елена Николаева Светлана Норуллина Альфия (Можга) - 50 мин. 07 сек. 3. Ахмадиева Роза Чиркова Валентина Вахрушева Елена Русских Наталья (Игра) - 50 мин.47 сек. Ёрос кивалтӥсьёслэн ӵошатсконзы куасэн бызьылон (2 иськем) 1.Протопопов Николай Валентинович (Шаркан) - 5 мин.46 сек. 2. Арафаилов Петр Павлович (Игра) - 5 мин.58 сек. 3.Дюкин Валерий Михайлович (Яр) - 6 мин.01 сек. ыбылӥськон 1.ФалалеевСергей Александрович (можга) - 99 очко 2. Афанасьев Василий Иосифович (Завьялово) - 98 очко 3. Шумихин Владимир Петрович (Сарапул) - 95 очко. Спортивной семьяос 1. Лекомцевъёс (Игра) 2. Трофимовъёс (Завьялово) 3.Меньшиковъёс (Шаркан) Огъя зачётын вормисе потэм командаос И группая 1. Игра - 344 очко 2. Шаркан - 340 очко 3. Завьялово - 332 очко ИИ группая 1. Яр - 272 очко 2. Дэбес - 266 очко 3. Алнаш - 257 очко Шаркан мальдэ вормонъёслэсь Котькулэсь пӧртэм туннэ Шаркан - улӟиз татысь Арбат: кырӟаса-вераса ортчисьёсты пӧсь чаен утялто шоголь кенакъёс, буртчин флагъёсын артэ тӧласько чибориё кышетъёс. Спортивной марш шудэм улсын вамышто стадион пала шаерысьтымы тужгес йӧногес йӧно но сэзь спортсменъёс. Азьпалаз мыно "Гурт шудонъёслэн" трос полъем чемпионъёссы: можгаос, играос, шарканъёс... Яркыт, мыло-кыдо вурем комбинезонъёсын дӥсяськем шӧртчиос тырмыто быдэс стадионэз, мальдыто люкаськем калыкез. Трибуна вылысен соосты данъяса но та чебер праздникен ӟечкыласа вазиське Кун Кенешлэн Тӧроез Александр Волков: - Мон туж шумпотӥсько, та сямез утьыны быгатӥм шуыса (огвакыт Гурт шудонъёсты дугдытон сярысь вераськонъёс мынылӥзы). Спорт но эшъяськон, ӟеч мылкыд вылын шыръяны уг яра. Татын кутске шаермы понна нюръяськон, солы дан ваён... Со борды итӥсько Правительстволэн Тӧроез Н.А.Ганза, солэн воштӥсез В.Е.Шудегов, Шаркан ёрос администрацилэн тӧроез А.А.Прохоров, "Удмурт дунне" газетлэн валтӥсь редакторез А.П.Шкляев... Зол кичабонъёсын пумитало Галина Кулаковаез. Олимплэн йылаз ньыль пол тубам муртлэн верам кылъёсыз спортсменъёслы уката бадӟым оскон кужым, пумозяз нюръяськон мылкыд пыӵатӥзы кадь. Нош куазь юри ӧчкарем кадь ӟыртгес кариське, спортсменъёслэсь чиданзэс эскере, кожалод. Пыдъёс чидантэм кынмо. Но одӥг адями но уг кошкы, гурт шудонъёсты усьтонэз учкыны быдэс Шаркан лыктэмын. Пичиез но, бадӟымез но асьсэды зэмо олимпиадаын кадь шӧдо. - Папа, тӥни! - шудонъёслэсь факелзэ ӝуатыны бызись дано спортсменъёсты нырысь ик со адӟиз кожаса кеське пичи пияш. Гомак ӝуатскыса лопырскиз факел. Сое ӝуатӥзы ёросысь тужгес усто спортсменъёс Нина Маринина, Максим Вылегжанин, Екатерина Воронцова но Николай Батаногов. Шарканын ортчись Тол гудонъёслэн талисманзы - Коньы - ваньзэс бадӟым круге шулдыръяськыны ӧте. Югак! пазьгисько Шаркан вадьсын дасо сюрс кизилиос - вормонъёсы ӧте адӟылымтэ чебер салют. Космосын но лобало, зарезьёстӥ но поръяло Владивосток, Мурманск, Санкт-Петербург, Байконур, Балтийск... Северной, Тихоокеанской, Балтийской флотъёс. Тӥни кытчы вуылоно луэ акциосын "Ижевский радиозавод" огазеяськонлэн 444-тӥ отделаз ужасьёслы. Отысь специалистъёс поттэм вузъёссэс эскероно но тупатъяно луо уго. Нош техниказы космосын но лоба, зарезьёстӥ но поръя. Кылем арын гинэ отдел 2,9 миллион манетлы ужъёсты быдэстӥз. Ваньмыз герӟаьскемын командировкаосын. 1999-тӥ арын та ёзын ужасьёс азинлыко тыршизы куать ракетамес США-лэн "Глобал стар" спутникъёсыз доры келянын. Туэ но заводын чаклало туала аппаратура дасяны. Куронъёс предприятие вуэмын ни. Н. Лялин. Референдум азьын Мар сярысь силе кикы? Куӟебай Гердлы сӥзем спектаклез "Кикы нош силе но силе..." учкыны лыктэмъёс азьын 27-тӥ феврале Удмурт драмтеатрын вераськизы "Удмурт кенеш" огазеяськонлэн тӧроез В. Тубылов, Кун Кенешлэн Тӧроезлэн воштӥсез П. Вершинин но Ижевскысь удмуртъёслэн огазеяськонэнызы кивалтӥсь И. Байметов. Россилы президент быръён но Удмуртиын референдум ортчытон азьын удмурт кичӧлтӥсьёсмылэн калыкен таӵе пумиськонзы туж кулэ шуыса шӧдӥськиз - политикаын туала югдур пумысен адямиос трос юанъёс сётъязы. Валентин Тубылов мылкыдзэ вераз референдум пумысен. Кызьы тодмо: ини референдумын пуктоно юанэз Кун Кенешлэн сессиез юнматӥз ини. 26-тӥ мартэ Калык валэктон сётыны кулэ Удмурт Конституцилэн 10-тӥ ёзэтаз таӵе ватсан пыртон пумысен: шонерен-а лыдъяно, асьме республикаын кун властез Кун Кенеш, Президент, Правительство, Конституцияя суд, мировой судьяос но мукет кун ёзъёс мед быдэсъялозы шуыса. "Удмурт кенеш" тазьы пуктэм юанлы пумит луэ. Со сярысь мылкыдзэ В. Тубылов ялан вералляз Конституция бордын ужась комиссилэн кенешъёсаз но, Кун Кенешлэн сессиосаз но. Огаз сессиын со ӵектӥз вал нырысетӥ юанэн артэ "Удмурт кенешлэсь" юанзэ но референдуме поттыны. Но тросэз депутатъёс пумит луизы. Сайкан сярысь вераськиз Павел Вершинин. Куӟебай Герд дыръя кадь ик улӥськомы на, шуиз со. Кӧня со удмуртъёсты ӝутыны выриз - ӧз пӧрмы, али но пыд йыламы ӧм на султэ. Туннэ ваньмы ӵош лэсьтӥськом асьме историмес. Залын пукисьёслы туж кельшиз Павел Николаевичлэн историын пытьы кельтон сярысь верамез. Тани Гердлэсь улэмзэ но тулкым пельтэмъя дунъяськом: кытӥ укыр ушъяськом, кытӥ курласьком гинэ. Нош котькуд адямиез возьматоно озьы, кыӵе со вал улыкуз - янгышъёсыныз но ӟеч ужъёсыныз. Оло, зэмзэ ик, летопись гожъян борды кутсконо ни. Соку пыраклы историе кылёз кин кызьы ассэ возиз, улонмылэн пӧртэм вакытъёсаз. Бен, удмуртъёс плын лидеръёс вань, нош вылӥе ӝутыку, калык соос шоры сазь йырын учкыны кулэ. Павел Вершинин таӵе учырез тодэ ваиз. Ар кунын улыкузы ик удмуртъёслэн, пе, зол купецъёссы вылӥллям. Нош ужъёссы ӟечгес мед мынозы шуыса, соос асьсэдыс ӟучен лыдъяллям. Али но асьмелэн сыӵе сяммы ик кылемын ӧвӧл меда? Россилы президент быръён матэктэ ини. Али шӧдӥське ини: нюръяськон Путин но Зюганов куспын мыноз. Кинлы дурбасьтоно, котькудӥз бырйись ас понназ малпа. Озьы ке но, та ужрадэ лыктэмъёс азьын мылкыдзэ шараяз Роза Яшина. Со ӧтиз Зюганов понна куараосты сётыны. Соку ик залын Зюгановлы пумит кеськись луиз. Адямиослэн мылкыдъёссы люкиськизы. Та ужпумъя вераськыны татын эрик сётэмын луысал ке, удмуртъёс кема гинэ, дыр, эчешысалзы на... огкылэ вуытозь. Нош кикы силе. Мар сярысь? Оло, удмуртъёслэн ялан пазяськем мылкыдын улэмзы пумысен? Т. БАННИКОВА. ВИ ТОЛ ШУДОНЪЁС Изьыдэс куштэ - шудо министръёс Таӵеез ӧй вал на кадь. Шарканысь лымы сюресъёсты мертазы-котыръязы 12-14 аресъем егит пиос-нылъёс но, ёросъёслэн кивалтӥсьёссы но асьме шаерысь министръёс но. Огшоры возьматскон понна гинэ лыктӥллямтэ бадӟым адямиос. Кужымзэс, быгатонлыксэс эскеремзы потэм зэмос воргоронъёс пӧлын. Возьытэ усёнтэм вылысь, суч-суч пӧсяно-тыршоно луиз. Ёрос кивалтӥсьёслы но правительстволэн командаяз пырисьёслы кузь сюрес ӧз ӵектэ - 2 иськемен но, пе, тырмоз. Сое но ӝог ортчон понна суй-пыдъёстэ ой-ёй-ёй! кыӵе выретоно. Куасэн бызьылэм мурт гинэ тазэ валалоз. Нош волейбол шудонын нокыӵе жалянъёс ӧй вал. Ваньмыз ортчиз озьы, кыӵе куронъёс тупатэмын дуннелэн чемпионатаз но. Правительстволэн но ёрос администрациослэн командаоссы сокем лэчыт нюръяськизы - шудон 5 партиозь кыстӥськиз. Люкыт залэ часталы гинэ пырем адямиос потыны ӧз ӵыдэ ни, сокем тунсыко нюръяськон мынӥз. ... Кык партия шудэмын. 2:0 лыдын азьпалан правительстволэн командаез. Кутске куинетӥ партия. Но мар луиз министръёсын, янгышало но янгышало, оло, вазьгес буйгатскизы. Кужымзэс шӧдыса, ёрос кивалтӥсьёс ог-огзылы ӟеч пасъёс сёто, сетка сопала тупез сальыло-ыбыло. Партия вормемын. Лыд 2:1 луэ. Ньылетӥ партия бере - 2:2. Нерваос золскемын, мылкыдъёс пуромемын. Берпуметӥ партиын азьпала пото правительствоысь шудӥсьёс (соосты "гордъёс" шуыса нимазы). 5:0 - зал тыр верало. - Молодцы! Молодцы! - кесяське Дэбесысь тодмо куасчи Нина Данилова, правительство понна шудӥсьёсты лӧпкытыса. Отын, пе, солэн картэныз ӵош дышетскем мурт, Виктор Шудегов, шудэ. Соин ик сокем зол "висе" соос понна. Тупез шукке Юрий Попов. Эх! ӧз пӧрмы, соиз вӧлдэтэ йӧтэ. Нош "лызъёслэн командаысьтызы Играысь Петр Арафаилов (бызьылӥз но зол, кыкетӥ интые потӥз) тупез "ыбылэ но ыбылэ". Лыд вошъяське - 9:3, 10:7, 14:12, 18:15. Тани-тани гуртоос азьпала потозы кадь. Туж тыршо генералъёс, Вячеслав Осипов но Владимир Щербаков, нош янгышъёстэк уг пӧрмы: я туп сеткае кугӟа, я палэнэ лобе, я сопалась салем туп асьсэ доры усе. Правительстволэн Тӧроезлэн воштӥсез Виктор Шудегов но шудонэз кулэ ӧраз возьыны весь уг пӧрмыты. Лэчыт учыре юрттэ Виктор Викулов - командаезлы очко бӧрсьы очко вае. Лыд 28:26 луэ. Шумпотэмзэс ватытэк-вормытэк министръёс тэтчало, ӟыгыръясько. Ӧз ӝожоме соослы пумит шудӥсьёс но. Бадӟым эшъёссэс вормонэн ӟечкылазы. Удмурт Республикаысь Правительстволэн 1999-тӥ арын ужамез сярысь Удмурт республикаысь Правительстволэн Тӧроезлэн Н. А. Ганзалэн докладэз Удмурт Республикаысь Кун Кенешлэн гажано Тӧроез, Президиумлэн членъёсыз, депутатъёс, ӧтем эшъёс! "Удмурт Республикаысь Правительство сярысь" законъя Удмурт Республикаысь Правительстволэн валтӥсь ужпумез луэ республикаысь калык хозяйствоен но социально- культурной лэсьтӥськонэн кивалтонэз радъян, калыклэсь улон-вылонзэ умоятон, адямилэсь лулпуш (духовной) куронъёссэ быдэсъян. Удмурт Республикаысь Правительстволэн ужамез сярысь отчётын огшоры лыдпусъёс гинэ верамын ӧвӧл, отын возьматэмын валтӥсь ужпумъёсты быдэстон понна кутэм коньдон но огъя кужымен лэсьтэм ужъёс 1999-тӥ арын Удмурт Республикаысь Правительство азьын сылӥзы таӵе ужпумъёс: 1. Калык хозяйствоен кивалтонэз выль сямен радъян, нырысь ик промышленность удысын. Ваньбур поттонэз йылэтон но рынокен экономикалы азинскыны луонлыкъёс кылдытон. 2. Калыклы ӟеч улыны луонлыкъёс кыдытон, сциально-культурной лэсьтӥськонэн кивалтонэз выльдон. 3. Бюджетлэсь доход люкетсэ будэтон, вытъя но бюджетъя дисциплинаез юнматон, кун асваньбурен кивалтонэз умоятон, пичи ужбергатонэз но инвестициосын ужанэз кулэезъя радъян. 4. Улон-вылонын но экономикаын кылдэм шуг-секытъёсты сэрттон-пертчон понна, Удмурт Республикаысь Правительстволы Россия Федерациысь кун властьлэн но интыын аскивалтонъя ёзъёсын, промышленной предприятиосын но экономикая мукет удысъёсын уртче ужаны луонлыкъёс кылдытон. 5. Законъёс дасян бордын ӟечгес ужан, калык хозяйствоез радъянын рынок амалъёсты валаса кутон. 6. Йыружъёсын нюръяськонэз пайдаёгес радъян, экономика но улон-вылон удысъёсын кышкытлыклэсь утиськонэз кужмоятон. Удмурт Республикаысь Правительстволэн ӝегатскытэк быдэстоно ужпумъёсыз герӟаськемын вал пенсиосты, уждунэз, нылпи пособиосты дыраз тыронэн, сиён-юонлы дунъёсты радъянэн, басьяськисьёсты алама вузъёслэсь утёнэн, рынокъёслэсь ужамзэс эскеронэн, жилищно-коммунальной ужпумъёсты сэрттон-пертчонэн, адямиослэсь тыллы, электрокужымлы, сиён-юонлы но мукет кулэяськонъёссэс быдэстонэн. Правительстволэсь 1999-тӥ арын кызьы ужамзэ возьмато гурт удысын, промышленностьын поттэм огъя ваньбурлэн быдӟалазы, бюджетлэсь доходъя люкетсэ йылэтон, ужтэк кылемъёслэсь лыдзэс кулэстон, дыраз уждун тырон но мукет. 1999-тӥ арын быдэстэмын планэн чаклам вань валтӥсь ужпумъёс. Нырысь ик промышленностьын ваньбур поттонэн герӟаськемъёсыз. Та удысын 32 миллиард 799 миллион манет тыр (НДС-эз но акцизъёсты вератэк) вузъёс поттэмын но юрттэт сётэмын. 1998-тӥ арен ӵошатыса промышленностьын ваньбур поттонлэн быдӟалаез 108,3 процентозь ӝутскиз, 1997-тӥ арын та лыдпус 100,2 процент вал, 1998-тӥ арын - 98,0 процент. Бюджетлэн доходъя люкетэз быдэстэмын 147,8 процентлы. Промышленностьлэн 14 удысъёсыз пӧлысь 10-эз будэтӥзы ваньбур поттонзэс. Промышленной предприятиослэн барышсы 7,8 поллы йылӥз, кулэсмизы изъян вайыса ужась предприятиос. Трослы йылӥз гурт удысын огъя продукция поттон (107 процент), республикалэн бюджетэз чотын улӥсь городъёслы но ёросъёслы коньдон висъян (110 процент), шӧдскымон кулэсмизы бюджет удысын тыршисьёслы пунэм тыронъёс, берыктэмын пенсионеръёслы вань пунэмъёс, быдэстэмын Россия Федерациысь Президентлэн Указэныз юнматэм огпол сётӥськись коньдон тыронъёс. Та лыдпусъёс верало Удмурт Республикаысь Правительстволэсь промышленностез, агропромышленной предприятиосты, ужбергатонэз азинтонэн герӟаськем ужпумъёсты шонер, валаса быдэсъямзэ. Озьы ик соос возьмато бюджетэ тросгес коньдон пыртонъя ужрадъёслэсь пайдаё луэмзэс, улон-вылон удыслы юрттонъя кун ласянь луонлыкъёсты дыраз но кулэезъя кутэмез. Удмурт республикаысь Правительство бадӟым юрттэт сётэ акциосын "Ижмаш" огазеяськонлы, нырысь ик "Шкода-Ижавто" инъетэз улонэ ӝоггес пыӵатонын, 20 миллион манет коньдон висъямын "Ижмаш-Мото" ДАО-лы, "Ижмаш-Авто" ДАО-лэн кулэяськонъёсызлы Россия Федерацилэн сбербанкысьтыз 27,1 миллион манет но Россия Федерацилэн кун резервысьтыз 150 миллион манет кредит басьтыны огкыл тупатэмын. Куинезлы промышленной предприятиослы вытъя льготаос сётэмын, соин валче луонлык кылдӥз производствоез азинтонэ 5 миллион манет коньдон висъяны. Озьы ик бадӟым саклык висъяське капчи промышленностья предприятиослы. "Шаркан- трикотаж" ЗАО-лы республикалэн бюджетысьтыз 300 сюрс манет кредит висъямын. Со сяна, банкысь 15,6 миллион манет кредит басьтыны чакламын на. 2000-тӥ арлы бюджетын капчи промышленностьысь предприятиослы висъямын 3 миллион манет коньдон. Удмурт республикаысь Правительстволэн ужаз бадӟым инты басьтэ ВПК-лэн предприятиосызлы юрттон. Россия Федерациысь Правительствоен юнматэмын пыӵал тӥрлык поттӥсь предприятиослы но быдэс республикалы пайда ваись контрактъёс. Обороная заказъя пунэм тыронъёс 1999-тӥ арын 762 миллион манетлы кулэстэмын, нош оглом удысъя, 1998-тӥ арен ӵошатыса - 8,2 процентлы. Трослы умояз ожгар тӥрлык поттӥсь предприятиослы Федерация ласянь юрттэт сётон. Озьы ке но, обороная кун заказъя пунэм тыронъёс 2000-тӥ арын 1-тӥ январьлы 1175 миллион манет лыдъясько. Огъя продукция поттонэн валче трослы йылӥз нимысьтыз куронъя дасям вузъёслэн лыдзы. 1996-тӥ арын сыӵе вузъёс лэсьтэмын 9,7 процентлы, 1997-тӥ арын - 27,1 процентлы, 1998-тӥ арын - 34,4 процентлы, 1999-тӥ арын - 48,1 процентлы. Промышленностьын уждун тыронъя пунэмъёс 2000-тӥ арын 1-тӥ январьлы 246,9 миллион манет люкаськемын. Со пӧлысь 79,6 процентэз - акциосын "Ижмаш" но "Аксион- Холдинг" огазеяськонъёслы. Правительстволэн огез валтӥсь ужпумез - шунытлы но электрокужымлы дунъёсты (тарифъёсты) радъян, промышленностьын ужасьёслэсь но энергетикъёслэсь кулэяськонъёссэс, куронъёссэс лыдэ басьтыса. Промышленной предприятиосты улӟытон понна, Правительство уже кутӥз банкрот амалэз. Солэн ӟеч емышъёсыз шӧдӥсько ини акциосын "Редуктор", "Ижевский литейный завод" огазеяськонъёс но мукет предприятиос вылын. Ӟеч ӧре пыриз лэсьтӥськон удыс. Инвестициослэн быдӟалазы йылӥз 5 миллиард манетлы, 1998-тӥ арен ӵошатыса - 13 процентлы. Республикалэн 1999-тӥ арлы бюджетаз лэсьтӥськонлы висъям 155 миллион манет коньдон быдэсак но дыраз кутэмын та удысэз юнматонлы. Берло куинь аръёс ӵоже та нырысетӥез таӵе учыр. "Улон инты" пограммая нимаз адямиослы 6 миллион манет кредит висъямын. Ӝутэмын 218,2 сюрс квадрат метр улон юртъёс, 1998-тӥ арен ӵошатыса, 16,7 процентлы тросгес. Нимаз лэсьтӥськисьёсын ӝутэмын огъя площаден 139,2 сюрс квадрат метр улон коркаос, миым арен ӵошатыса со 26,5 процентлы ятыргес. Коньдонэн секыт югдур шоры учкытэк шаерамы азинтэмын улон юртъёсы лыз эстӥськонэз вуттон ужъёс. Ар ӵоже кыскемын 233,7 километр газ гумыос, кылем арын сярысь 30 процентлы уногес. Нош квартираосы сое кыскон йылӥз 23 процентлы. Республикаысь бюджетлэн доход люкетэз, 1998 арен ӵошатыса, 17 процентлы будӥз, нош коньдон люкетэз 57,1 процент луиз. 1999-тӥ арын республикалэн бюджетаз налогъёс чотын пыртэмын 1 миллиард 416 миллион манет коньдон, яке быдэстэмын 172 процентлы, налоге пырисьтэм коньдон люкаськиз 49 миллион манет, яке планэн чакламлэн со 156 процентэз луэ. Ар ӵоже федеральной бюджетысь басьтэмын 903 миллион манет, со пӧлысь 481,9 миллионэз трансфертъёс, 39 миллион манетэз висъям субвенциос, 210 миллион манетэз бюджетысь проценттэк ссудаос но 172,4 миллион манет висъямын ваче расчётъёс лэсьтонлы. Тужгес шӧдскымон вамыш лэсьтэмын Удмурт Республикалэсь огазеям бюджетсэ быдэстонын. Со люкаськиз 5 миллиард 495 миллион манет, 1998-тӥ арын доходъёс сярысь со одӥг но ӝыны поллы уногес. Озьы ик йылӥз вуэм коньдонлэн быдӟалаез: со 29 процент ке вал, луиз 53 процент. Бюджетлэн доходъя люкетэз йылӥз но умояз промышленностьлэн ӟечгес ужаменыз, му вӧйлы дунъёслэн будэменызы, кунлэсь коньдон ужпумъёссэ умойгес радъямен валче. Асьмеос ватсаса басьтӥм 154,8 миллион манет, со пӧлысь 150 миллион манетэз вуиз му вӧйлы квотаосты тупатэмен валче. 1999-тӥ арлы йылпумъянъёсъя огазеям бюджетлэн быдӟалаез 122 миллион манетлы йылӥз но 2000-тӥ арын 1-тӥ январьлы со 590 миллион манет луиз. 1999-тӥ арын республикалэн бюджетысьтыз кунлэн бюджетэ пырисьтэм фондъёсаз уждун тырыны келямын 919 миллион манет, со пӧлысь 513 миллионэз коньдон кошкиз ёросъёсы но городъёсы, 406 миллион манетэз - республикаысьтымы учреждениосы но орагнизациосы. Тарифъёсъя огъя сеткая нырысетӥ разрядлэсь быдӟалазэ будэтэмен валче, Удмурт Республикалэн Правительствоез 1999-тӥ арын 1-тӥ октябрьысен луонлык шедьтӥз бюджет удысын тыршисьёслы уждунзэс будэтыны. Солы висъямын 230 миллион манет. 1999-тӥ арын куазь урод улэмен басьтэмын 478,2 сюрс тонна ю тысь (гектарлы быдэ 8,1 центнер усиз), нош гуртоослы асьсэлэн кулэяськонъёссылы со ӧжытсэ кулэ 760 сюрс тонна. Республикаысь гурт удысъя уноез организациос тырмыт пудо сиён басьтыны ӧз быгатэ. Одӥг йыр пудолы 24 центнер сиён кулэ ке, дасямын 13,1 центнер гинэ. Солэн но ӟечлыкез сокем вылӥын ӧвӧл. Азьло сямен ик кулэсме пудолэн лыдыз, улӥын солэн продуктивностез. Одӥг кысконо скаллы йӧл басьтон синӥз 54 килограммлы но кылиз 2730 килограммозь. Республикаысь куатез районъёс гинэ скаллы быдэ куинь сюрс килолэсь уно йӧл кыскыны быгатӥзы. Йӧл поттон кулэсмиз 12,3 сюрс тонналы, сӥль поттон - 2,7 сюрс тонналы. Соин ӵош ик югдур умояз тылобурдо вордон удысын. Тылобурдо сӥль поттон будӥз 2 поллы, курег пуз вузан - 8 процентлы. Сиён-юон поттонъя предприятиослэн азинсконзы потэ гуртоослэн тыршемзы бордысь. Йӧллэсь сиёнъёс поттон кулэсмиз 7,6 процентлы, сӥльлэсь сиёнъёс поттон - 11 процентлы. Но со дыре ик будыны кутскиз сыр, нянь но пыжиськемъёсты поттон. Музъемлэсь удалтонлыксэ ӝутон но музъем узырлыкъёсын ужан кусыпъёсты кун ласянь умоятон вылысь, 1999-тӥ арын дасямын но Удмурт Республикаысь Кун Кенеше эскерыны сётэмын "Удмурт Республикаын 2000-тӥ-2002-тӥ аръёсы музъем реформаез азинтонъя кун программа. 1999-тӥ арын гурт удысэз азинтонлы республикамылэн бюджетысьтыз 252,8 миллион манет висъямын, яке со вань кулэяськонъёслэн 84,7 процентэз луэ. Со пӧлысь 137,4 миллион манетэз келямын гурт удыслы кун ласянь юрттонлы, 4,6 миллионэз пудолэсь выжызэ ӟечгес каронлы, 2,9 миллион манетэз крестьян (фермер) хозяйствоосты азинтонлы 5,5 миллион манетэз кизёно - кидысэз умоятонлы, 2,0 миллионэз сётэмын гуртъёсын бусыосы ву сётон ёзъёсты возьыны, 3 миллионэз АПК-лэн дышетскон заведениосызлы юрттыны. Со сяна, 6,3 миллион манет висъямын Правительстволэн сётэм облигациосыз понна пунэм тыронъёсты берыктыны. Озьы ик ар ӵоже удысын тыршисьёслы уждун тырыны сётэмын 16,7 миллион манет, яке со планэн чакламлэн 100 процентэз луэ. Агропромышленной комплексын лэсьтӥськон ужъёс быдэстэмын 3,7 миллион манет тыр, яке планэн чакламлэн 99,8 процентэз. Со сяна, АПК-лэн предприятиосызлы Удмурт Республикалэн бюджетысьтыз 44,5 миллион манет кредит висъямын. Быдэс Россилэн улоназ воштӥськонъёс республикалэн калык хозяйствояз но шӧдӥськытэк ӧз кыле. Со туж аспӧртэмлыко ёз, кудӥз герӟа но огазея экономикалэсь вань удысъёссэ. Нырысь ик бадӟым саклык висъяське ӝегатскытэк быдэстоно ужпумъёслы. Соин валче экономикаен кивалтон удыс но бадӟымесь куронъёс пуктэ. Со понна кулэ нимысьтыз радъям программа, кудӥзлы котыр ласянь дунъет сётоно. Выль амалъёстэк республикаез азинтыны туж шуг луоз. Удмурт Республикаысь Экономикая министерство кылем арын уж вылын быдэсъяны кутскиз Удмурт Республикаысь Правительстволэсь дасям выль программазэ. Отын котыр ласянь чакламын выль сямен кивалтон амалъёс, лыдэ басьтэмын экономикалэн вань удысъёсыз. Программа трос аръёслы азьпала учкемын. Табере министерствоос но ведомствоос ог- огенызы уката валче ужаны кулэ. Соос юн кусыпъёс тупатозы республикаысьтымы городъёсысь но ёросъёсысь ас интыосын кивалтон органъёсын. Соку бюджет кылдытон но лякытгес мыноз. Удмурт Республикаысь Правительство экономикалэн вань удысъёсызъя ужаны инъет дасяз. Экономика удысын сыӵе кун политика чакламын, туала югдурез лыдэ басьтыса. Странаямы та дырозь умой-умой кутымтэ на экономика но социальной удысын кусыпъёсты тупатъян сярысь инъет. Соин валче ик власть но огшоры адямиос куспын кытӥяз ваче тупамтэос кылдо. Улон-вылон уродме калыклэн коньдонлы ёрмонэныз сэрен. 1999-тӥ арын январе-ноябре республикаямы котькуд улӥсьлэн шорлыдын коньдонэз 955,5 манет лыдъяське вал, со социально-экономической азинсконъя чаклам програмаын сярысь 35,5 манетлы уногес. Кулэсме калыклэн басьяськыны луонлыкез. Но вань умой воштӥськонъёс но. 2000-тӥ арын 1-тӥ январьлы предприятиосын но организациосын, арлэн кутсконэныз ӵошатыса, уждун тырон кулэсмиз 49,5 процентлы но луиз 531,8 миллион манет. Социальной удысын пунэм тырон кылем арлэн кутсконаз кулэсмиз 44,6 процентлы. Со дыръя ик республикалэн бюджетысьтыз коньдон басьтӥсьёслэн пунэмъёссы ӧвӧл. Огъя республикая социальной удыслы, калыкез дышетонэз но эмъянэз, культураез вераса висъямын 2,8 миллиард манет, планэн чакламлэн со 95 поцентэз луэ. Арлы йылпумъянъёсъя калыкез дышетон удыслы сётэмын 1,5 миллиард манет (100%), культуралы, искусстволы, кинематографилы висъямын 151,1 миллион манет, 100 процент, тазалыкез утёнлы но физкультуралы 918,7 миллион манет, планэн чакламлэн 99,7 процентэз. Социальной удысын ужрадъёслы кутэмын 263,9 миллион манет (66,4%), нылпиослы пособиослы висъямын 149,6 миллион манет (53%). Огъя республикая бюджетысь уждун басьтӥсьёслы келямын 1,3 миллиард манет, яке планэн чакламлэн 127 поцентэз. Социальной удысын эмъюмъёс басьтыны быдтэмын 62,2 миллион манет (82%). 1999-тӥ арын сиён-юон басьтыны кутэмын 183,1 миллион манет, яке планлэн 96,9 процентэз. Удмурт Республикаысь Правительство бадӟым уж нуэ рынокъёсын югдурез тупатон, соосты азинтонъя кун политика кылдытон ласянь. Дасямын рынокъёсты но вузкарон интыосты азинтонъя концепцилы инъет, вузкарон рынокъёслы радлык, республикаын ю тысен вузкаронлы концепция. Аракыен вузкаронэз эскерыса возён, вузкарон удысысь йыружъёсын нюръяськон понна МВД-лэсь нимысьтыз ёззэ кылдытыны чакламын, вузкарон правилоосты быдэсъянэз эскерись постъёс кылдытэмын. Правительство ялан ужаз ужбергатонлэсь пайда поттон, выль ужан интыос кылдытон бордын. Уно юанъёс кылдӥзы вал табышез азьпала лыдъяса басьтэм выт пумысен. Со интыысь бюджетъёсы пайда ваиз ини. 17 миллион манет доход басьтэмын, миым та вакытэн ӵошатыса кык поллы тросгес. Та налог азьланьын паськытгес кутэмын луоз. Кылем арын кык поллы кулэсмиз ужтэк кылемъёслэн лыдзы, арлэн пумаз 25,6 сюрс мурт вал, вань ужаса улӥсьёсын ӵошатыса, 3,2 процент. Ужтэк кылемъёслэн лыдзы кулэсмиз республикаысь ваньмаз сямен городъёсын но ёросъёсын. Удмурт Республикаысь Правительство рос-прос пыриське тужгес кулэ луись сиён- юонъёслы, монополиослэн вузъёссылы но услугаоссылы (электрокужымлы но шунытлы, чагыр эстӥськонлы, чугун сюрес вылын нуон-ваёнлы дунъёсты радъянэ, калыклэсь но предприятиослэсь кулэяськонъёссэс лыдэ басьтыса, озьы ик со уж нуэ пайдалыко рынок но отын зэмос дунъёс кылдытонъя. Ӝоген вуттэмын луоз республикаысь банкъёслы сӥзем концепция, эшлыко кусыпъёс тупатэмын страховой компаниосын но аудиторской фирмаосын, быдэстэмын республикалэсь бюджетсэ азинтонъя валтӥсь ужпумъёс, та удысъя юрттэт сётӥське ёрос администрациослы но. Власть но асваньбур - валтӥсь ужпумъёс, соос экономикаен кун кивалтонлэн инъетэз, Удмурт Республикаысь Правительство понна нырысьёсыз луо. Быдэсъясь власть, тросгес пайда басьтон вылысь, кун ваньбурен кивалтонъя стратегизэ выльдӥз. Чакламын республикаысь "Ваньбурен кивалтонъя центр" кун учреждение кылдытыны. Кун ваньбурен кивалтон ужпумъёс люконтэм герӟаськемын экономикалы, промышленной предприятиосын кун кивалтонэз выльдонэн. 1999-тӥ арын ваньбурен, сое нимаз кузёослы вузанэн герӟаськем таӵе валтӥсь законъёс кутэмын: "Удмурт Республикаысь кун властьлэн ёзъёсызлэн Удмурт Республикаысь кун асваньбурен кивалтонъя, уже кутонъя но люкылонъя полномочиоссы сярысь"; "Удмурт Республикаысь кун асваньбурлэсь объектъёссэ муниципальной асваньбуре сётон радлык сярысь"; "Удмурт Республикалэн куд-ог акционер огазеяськонъёсын кивалтыны нимысьтыз правоез ("зарни акция") сярысь; "1999-тӥ-2000-тӥ аръёсы Удмурт Республикаысь кун ваньбурез нимаз кузёослы вузан сярысь". Власть но асваньбур люконтэм герӟаськемын кузёослэсь, кивалтӥсьёслэсь но ужасьёслэсь кусыпъёссэс радъянэн. Удмурт Республикаысь Правительстволэн одӥгез бадӟымез ужпумез луэ ӟеч инвестиционной политика но кылдытон. Со мед юрттоз ваньбур поттонэ коньдон кыскыны, кун гарантиос сётыны, бадӟым ыштонъёс медаз луэ шуыса, страхование ортчытыны, пунэмен коньдон висъяны, со висъям уксёез пайдаё кутыны но берыктыны. 1999-тӥ арын Удмурт Республикалэсь кун гарантиоссэ сётонэн герӟаськем инвестиционной проектъёсын конкурсъёс 50 миллион манетлы ортчытэмын вал. Озьы луонлык кылдӥз инвестиционной проектъёслы 407,65 миллион манет кыскыны но 143 выль ужан инты кылдытыны. Та вакытэ Правительство инвестициосын, гарантиосын, залоген кивалтон огъя радлыклы сӥзем концепция бордын тырше. Республикалэсь кун резервзэ но кун заказзэ кылдытон уж радъямын. Кутэмын Удмурт Республикалэн кун резервез сярысь закон, дасямын со сярысь Положение. Та документъёс секыт вакытъёсы республикае сиён-юон, эстӥськон но мукет продукция вуттонэз радъяны юрттозы. Кун ласянь одӥг заказчикез - Удмурт Республикаысь Экономикая министерствоез - юнматыса, кун заказэз конкурс амалэн висъялляса, Правительство бюджет расходъёсты кулэстыны, мукет ыштонъёсты палэнтыны луонлыкъёс кылдытӥз. Ужбергатонэн вырыны луонлыкъёс сётэмын вань удысъёслы. Соин ик ужбрегатон удысэз азинтон, рынокын зэмос вожвылъяськонэз но дунъёсты юнматон, ужбергатӥсьёслы юрттон понна Правительствоысь Пичи ужбергатонлы юрттонъя но сое азинтонъя комитет пӧрмытэмын Удмурт Республикаысь Ужбергатонъя кун комитетлы. Ужбергатонэз азинтон, басьяськисьёслэсь правооссэс утён, дунъёсты но тарифъёсты радъян, рынокъёсын югдурез тупатон ужпумъёс эскеремын, монополиослы пумит законодательствоез лыдэ басьтыса. Республикалэн котькуд удысъя политикаяз нимысьтыз антимонопольной блок луыны кулэ, угось монополиослы пумит ужрадъёсты чакланын но улонэ пыӵатонын валтӥсь инты басьтэ государство. Удмурт Республикаысь Правительстволэн ужаса улӥсьёслэсь кулэяськонъёссэс лыдэ басьтӥсь рынокен экономика кылдытонъя бадӟым ужпумез быдэсмоз, республикалэсь вань визь-кужымзэ, научно-технической, технологической но произвоственной луонлыкъёссэ уже кутӥм, Россиын но кунгож сьӧрын эскерем азьмынӥсь технологиосты пыӵатӥм ке. Удмурт Республикаысь Правительство инновациосты уже кутӥсь экономика кыдытонъя концепцилы инъет дасяз. Со шаермылы азинскыны сюрес усьтэ, ваньбур поттонэз паськытатыны но бюджетлэсь доходъёссэ будэтыны юрттэ, политикаысь, экономикаысь но улон-вылонысь пӧртэм инновациослэсь кусыпъёссэс юнматэ. Правительстволэн ужаз котьку но бадӟым инты басьтылӥзы дышетон удыс, кадръёсты дасян ужпумъёс. Россиын та дырозь документъёс ӧвӧл ке но, ми дась ини Удмурт Республикаысь дышетон удыслы концепция бордын ужаны. Правительство озьы ик лыдъя, быдэсъясь властьлы но кадръёс дасянъя концепция яке стратегия кулэ шуыса, угось странаысь кризис, нырысь ик, герӟаськемын обществоен кивалтонысь кризисэн. Жаляса вераны кулэ, уг кулэсмы йыружъёслэн лыдзы. 1998-тӥ арен ӵошатыса, со 14,8 процентлы будӥз. Таӵе югдур быдэс Россиын, соин ик та удысын правоез утись ёзъёс сяна, ужаны кулэ республикаысь властьлэн вань ёзъёсыз, общественность н ужаса улӥсьёс. Будӥз озьы ик кулон учыръёслэн лыдзы (1000 адямилы). 1998-тӥ арын вал 11,7 процент, 1999-тӥ арын - 12,7 процент. Озьыен, Удмурт Республикаысь Правительство таӵе валтӥсь ужпумъёс пусйиз: - улон-вылонэз радъян, социальной стандартъёсты утён но экономической кулэяськонъёсты быдэсъян, уждун, пенсия но нылпи пособиез дыраз тырон; - республикамылэн бюджетэзлэн доходъёсыз, соосты будэтон, быдэс финансово- бюджетной радлыкез азинтон, стратегической но оперативной ужъёсты быдэстон; - кун асваньбур, соин пайдаё кивалтон; - ужбергатонэз азинтон, ужан интыос кылдытон, калыкез уже интыян ужпумъёс; - инвестиционной политика, соосын герӟаськем ыштонъёсты кулэстон, кунсьӧр плитика; - экономикалэн бюджетэ коньдон ваись удысъёсыз, нырысь ик, машина лэсьтон но металлообработка, му вӧй кыскон, аракы поттон, озьы ик республикалэсь кулэяськонъёссэ быдэсъясь промышленностьлэн удысъёсыз но городэ пырись предприятиос, нырысь ик "Ижмаш" ОАО; -программно-целевой планъёсын радлык кылдытон со мед герӟаськоз хозяйствоез нуонысь рынок амалъёсын; - республикалэн улон-вылон но экономика удысъёсын азинсконэзлы прогнозирование, планирование но мониторинг ортчытон понна программно-аналитической информационной комплекс кылдытон; - йыружъёсын нюръяськонъя ужрадъёс кутон, экономика удысын кышкытлыклэсь утиськонъякуронъёсты быдэсъян. Экономика но улон-вылон удысъёслэн ужамзылы пыр-поч йылпумъянъёс сётэмын Удмурт Республикаысь Правительстволэн отчётаз. Тау кылзэмды понна! Март: тодмо нимъёс но нуналъёс 1. Вордскемез дырысен 75 ар тырме А. П. Холмогоровлы (1925-1987), Удмуртиысь калык суредасьлы, Россиысь дано художниклы, РСФСР-ысь но УАССР-ысь кун премиослэн лауреатсылы. Вордскиз Воткинск ёросысь Молчаны гуртын; - вордскемез дырысен 70 ар тырме Г. Н. Матвеевлы (1930-1995), удмурт крезьгурчилы, музыковедлы, Удмуртиысь культура удысын дано ужасьлы, калыкез дышетонысь отличниклы. Вордскиз Пичи Пурга ёросысь Ильинск черкогуртын; - Граждан обороная калык куспо нунал. 5. Вордскемез дырысен 90 ар тырме Т. И. Шмаковлы (1910-1960), удмурт кылбурчилы, журналистлы. Вордскиз Вавож ёросысь Монья гуртын; 8. Нылкышноослэн калык куспо нуналзы. 9. 50 ар талэсь азьло эскерыны кутскемын Ижевскысь минерал вуосын интыос. 12. Вордскемез дырысен 140 ар тырме Бернат Мункачилы (1860-1937), венгер финноугроведлы, академиклы, удмурт кылын но фольклорен тунсыкъяськись учёнойлы. Бернат Мункачи 1885-тӥ но 1887-тӥ аръёсы экспедициен потаз Казань, Вятка, Уфа губерниосысь удмуртъёс доры. Поттӥз "Традиционная народная поэзия удмуртов" (1887), "Вотский словарь" (1896) ужъёссэ; - 80 ар талэсь азьло (1920 - Удмурт Комиссариатлэн кылдытэм издательской отделэз Сарапулын нырысетӥ книгаос поттыны кутскиз; - 135 ар талэсь азьло (1865) Сарапул городын библиотека усьтӥськиз. 15. Басьяськисьёслэн калык куспо нуналзы. 17. 65 арес тырме (1935) И. С. Кузнецовлы, медицина наукаосъя кандидатлы (хирург), Удмуртиысь дано врачлы. Гожтӥз 40-лэсь уно ужъёс. Вордскиз Алнаш ёросысь Шадрасак- Кибья гуртын; 18. Париж коммуналэн нуналэз; 19. Вузкаронын, калыклы бытовой юрттэт сётонын но жилищно-коммунальной хозяйство удысын ужасьёслэн нуналзы; 20. 65 арес тырме А. Н. Бургановлы (1935) скульпторлы, Удмуртиысь калык художниклы, СССР-ысь Кун премилэн лауреатэзлы. Со "Калыкъёслэн эшъяськонзы" монументлэн авторез; - вордскемез дырысен 65 арес тырме А. А. Корепановлы (1935), гурт удыс наукаосъя докторлы, Нижний Новгородысь гурт удысъя академиысь профессорлы, Россиысь естественной наукаосъя академилэн член-корреспондентэзлы. Вордскиз Якшур-Бодья селоын. 21. Музъемлы сӥзем калык куспо нунал; 22. 85 арес тырме А. Е. Ефремовлы (1915), краеведлы, Ижевсклэн сӥё-дано адямиезлы; - Вулы сӥзем калык куспо нунал; - 30 ар талэсь азьвыл (1970) Глазовын нырысьсэ усьтӥськизы пинал хоккеистъёслэн "Зарни шайба" приззы понна ӵошатсконъёс; 23. Метеорологилы сӥзем калык куспо нунал; 26-30. 35 ар талэсь азьвыл (1965) Москваын улӥсьёсты асьсэлэн быгатонлыкенызы паймытӥзы Алнаш ёросысь "Большевик" колхозысь эктӥсьёс но кырӟасьёс. 27. Россия Федерациысь Югдурез утёнъя министерстволэн внутренней войскоосызлэн нуналзы; - Театрлы сӥзем калык куспо нунал; 30. Музъемез утёнлы сӥзем нунал; - 55 ар талэсь азьвыл (1945) Сарапулын усьтӥськиз нылпиослэн крезьгуро школазы; - 40 ар талэсь азьвыл (1960) УАССР-ысь Верховной Советлэн Президиумезлэн указэныз Пычас посёлок пыртэмын рабочий посёлокъёс пӧлы. Мартэ: - 40 ар талэсь азьвыл (1960) Чехословакиын ортчем калык куспо ӵошатсконъёсын Ижевскысь мотоциклистъёс пусъемын мотоспортъя калык куспо федерацилэн (ФИМ) Бадӟым зарни медаленыз; - 5 ар талэсь азьвыл (1995) Ижевскысь гурт удысъя институт пӧрмытэмын академилы. Е. Ушакова, Удмурт Республикалэн туала историезлы сӥзем центрысь ёзлэн кивалтӥсез. Дауръёс вискын Март 85 ар талэсь азьло (1915-тӥ) Россия Великобританиен но Франциен таӵе тупанкыл (соглашение) гожтӥз: война йылпумъяськем бере Россилы сётэмын луозы Константинополь но Сьӧд зарезьысь проливъёс. 80 ар талэсь азьвыл (1920-тӥ) 27-тӥ мартэ А.И.Деникин вылӥ кивалтонэз сётӥз П.Н.Врангельлы. 70 ар талэсь азьвыл (1930-тӥ) 2-тӥ мартэ "Правда" газет печатлаз И.В.Сталинлэсь "Азинсконъёс но йыр поромон" статьязэ. Отын интыысь кивалтӥсьёс янгыше уськытэмын колхозъёс кылдытонэз укыр ӝог радъямзы понна. 14-тӥ мартэ ВКП(б)-лэн ЦК-ез кутӥз та ужпумъя постановление. Мартэ уноез гурт калык колхозъёсысь потыны кутскиз. 65 ар талэсь азьло (1935-тӥ) Китайысь чугун сюресэн кивалтон вузамын Японилы. 60 ар талэсь азьвыл (1940-тӥ) 12-тӥ мартэ гожтэмын Финляндиен тупаса улон сярысь огкыл (договор). Война йылпумъяськем бере СССР-лы сётэмын Карел перешеек но Выборг город, арендае сётэмын Ханко шормуӵысь военной база. 31-тӥ мартэ РСФСР-е пырись Карел АССР пӧрмытэмын Карел-Финн ССР-лы. 45 ар талэсь азьвыл (1955-тӥ) Радъямын колхозъёсты бадӟыматон но совхозъёслы пӧрмытон. 35 ар талэсь азьвыл (1965-тӥ) 18-тӥ мартэ нырысьсэ космонавт А.А.Леонов космосэ потаз. 15 ар талэсь азьвыл (1985-тӥ) 10-тӥ мартэ кулӥз К.У.Черненко. 11-тӥ мартэ М.С.Горбачев быръемын компартилы генеральной секретаре. 10 ар талэсь азьвыл (1990-тӥ) 2-тӥ мартэ КПСС-ын кылдӥз демократияя люкет (платформа). 11-тӥ мартэ Литва ялӥз эрико луэмзэ (центр зӥбемъя та уж берлогес дугдытэмын). 12-тӥ мартэ усьтӥськиз СССР-ысь калык депутатъёслэн ӧтчамзы (съездзы). Со быдтӥз СССР-лэн Конституциысьтыз 6-тӥ ёзэтэз (статьяез), озьы КПСС-эз палэнтӥз кивалтон бордысь. Тупатэмын СССР-лэн президентэзлэн постэз. Отчы быръемын М.С.Горбачев, СССР- лэн Вылӥ советэзлы Тӧрое - А.И.Лукьянов. 30-тӥ мартэ Эстония ялӥз эрико луэмзэ (центрен кусып возьыса). Ёросъёсын пумиськонъёс 28-тӥ феврале Кун Кенешлэн Тӧроез Александр Волков вуылӥз Каракулино селое. Нырысь ик со тодматскиз Каракулиноысь ляб визьем нылпиослы школа-интернатэн, кудӥз вуоно арын пусъёз 60 ар тырмонзэ. Школаен тодматскон ӟеч мылкыд кельтӥз. Отын улӥсь пиналъёслы дышетскыны, шутэтскон дырзэс пайдаё ортчытыны вань луонлыкъёс кылдытэмын. Александр Волковен ӵош школа-интернатысь нылпиосын, дышетӥсьёсын пумиськонэ ветлӥзы Удмурт Республикаысь Правительстволэн Тӧроезлэн воштӥсез Виктор Шудегов, Калыкез дышетонъя министрлэн воштӥсез Галина Васильева, Каракулино ёрос администрацилэн тӧроез Леонид Кондаков, депутатъёслэн ёрос кенешсылэн кивалтӥсез Эвелена Трефилова. Школаысь пиналъёс куноослы ас киосынызы лэсьтэм синпель кузьымъёс дасяллям. Нош Александр Волков школалы сӥзиз физиолеченилы аппаратура кузьманы. Со понна Кун Кенешлэн Тӧроезлэн фондысьтыз куамын сюрс манет коньдон висъямын луоз. Ижысь куноосты нянен-сылалэн пумитазы селоысь шор ёзо школаын. Та нуналэ сӥё-дано усьтӥзы школа вӧзы 320 интыен выль ӝутэм юртэз. Со понна Александр Волков тау кариз ёрос администрацилэн тӧроезлы Леонид Кондаковлы. Школаын ужасьёсты ӟечкыласа, Кун Кенешлэн Тӧроез ивортӥз аудиоаппаратура басьтыны ас фондысьтыз кызь сюрс манет коньдон висъяны мылкыд каремез сярысь. Дышетӥсьёсты озьы ик ӟечкылазы мукет лыктэм куноос но. Собере Александр Волков пыриськиз депутатъёслэн ёрос кенешсылэн паськытатэм заседанияз. Отын йылпумъянъёс лэсьтӥзы 1999-тӥ арын Каракулино ёросын улон-вылон но экономика удысъёсты азинтонын кызьы ужамзылы. Ӝыт Александр Волков Сарапулын кенеш ортчытӥз администрациослэн тӧроосынызы но депутатъёслэн ёрос кенешъёссылэн кивалтӥсьёсынызы. Люкаськемъёс вераськизы Россия Федерацилы Президент быръёнлы но республикаямы референдум ортчытонлы дасяськон пумысен. Кенешлэн ужаз озьы ик пыриськизы Кун Кенешлэн Тӧроезлэн нырысетӥ воштӥсез Владимир Агашин, Правительстволэн Тӧроезлэн нырысетӥ воштӥсез Юрий Питкевич, коньдон ужпумъёсъя министр Владимир Бельтюков но печатья но иворъёсъя министр Сергей Васильев. Удмурт Республикаысь Кун Кенешлэн пресс-службаез. Совет по премиям Правительства Удмуртской Республики объявляет прием работ на соискание премии Правительства Удмуртской Республики за выдающиеся достижения в труде за 2000 год в отраслях социальной сферы. Материалы на соискание премии принимаются до 1 сентября 2000 года по адресу: 426007 г. Ижевск, Дом Правительства, к. 114, телефоны для справок: 52-53-31, 52-53- 38. Удмурт Республикаын улӥсьёслы Вазиськон Туэ 4-тӥ феврале Чечня Республикаысь Катыр-Юрт село дорын боевикъёсын лек ожмаськон дыръя бырыны шедизы Удмурт Республикаысь Югдурез утёнъя министерстволэн ОМОН-аз ужасьёс: - милициысь прапорщик Собин Владимир Александрович, - милициысь прапорщик Востриков Владимир Иванович, - милициысь младшой сержант Токарев Константин Васильевич. Кунмылэсь эриксэ, Россиысь калыкъёслэсь улон-вылонзэс утьыса, терроризм странаямы выжызэ медаз ни лэзь шуыса, соос улонзэс сётӥзы та музъем вылын. Владимир Собинлэн семьяяз атайтэк кылизы кык пичи пиналъёсыз, Владимир Востриковлэн семьяяз кузпалыз куинетӥ пиналзэ вите. Бырем милиционеръёслэн семьяоссылы та вакытэ туж секыт. Удмурт Республикаын вань улӥсьёслы вазиськиськом ӟеч уже пыриськыны - маин ке но юрттыны со семьяослы. Пиналъёссы мед быгатозы пыд вылазы султыны, дышетсконзэс азьланьтыны, зэмос адямиос луыны. Соин валче Удмуртиысь Национальной Банкын усьтэмын нимысьтыз счёт: 40503810600002000262, БИК 049401001, ГРКЦ НБ УР г. Ижевск "Чечняын бырем милиционеръёслэн семьяоссылы". Бодылэн пумыз кык Кызьы тодмо, таможняез ортчыку, кунгож сьӧрысь ваем машина понна пошлина (коньдон) тыроно. Но пӧртэм адямиослэсь пӧртэм сямен басьто. Кылсярысь, лётчикъёслы, дипломатъёслы но кунгож сьӧрын ӝыны ар улэм зарезьчиослы (морякъёслы) та дун трос пол кулэстэмын. Тае валаса кескич ужбергатӥсьёс дуно иномаркаосты кулэ адямиослэн паспортъёссыя "пӧраллязы". Зэм, дунтэк ӧвӧл. Тон мыным, мон тыныд шуэм сямен. Озьы зарезьын уяны дасяськись курсантъёслы 100 доллар кузьмаллязы, лобасьёслы, документъёссэс сётэм понна, 500 доллар. Чернобыле ветлэмъёс воксё но мозмытэмын пошлина тыронлэсь но вытъёслэсь. Вылаз ик, кӧня машина вайыны луон пумысен соослы нокыӵе алонъёс ӧвӧл. Таможняын ужасьёс верамъя, радиациен нюръяськем куд-ог адямиос огдыре кунгож сьӧрысь 8-10 машина но вайылӥзы. Сыӵе пӧям-пӧрамъёсъя правоез утись ёзъёсын али 300-лэсь уно уж эскериське. Кызьы ивортэ "Деловой Петербург" газет, уй пал шоркарысь таможняын ужасьёс матысь дыре малпало 10 сюрс пала иномаркаосты таланы. Дано ним басьтӥз Кылемаз арня нуналэ трос калык люкаськылӥз Андан ӵыжатӥсьёслэн культура дворецазы - аслаз ӟеч кырӟан-веранъёсыныз, эктонъёсыныз шумпоттӥз "Италмас" кун ансамбль. Сцена вылысен чузъяськизы азьвылъёсыз, туалаосыз удмурт но ӟуч кырӟанъёс. Котьку сямен ик шумпоттӥзы Удмурт Элькунысь дано артистка Людмила Ахтариева, Удмурт Элькунысь калык артистка Евгения Медведева, Удмурт Элькунысь дано артист Иван Русских. "Италмаслэн" концертъёсаз тужгес паймытъяло эктӥсьёс. таяз учыре но Леонид Смагин, Анжела Иловайская, Салават Абдуллин, Сергей Ожегов, Ирина Закирова, Елена Ермолаева, Елена Швецова, Наталья Конышева, Марсель Сойфуллин асьсэлэн устолыксылы синмаськытӥзы. Ортчем ӝыт тужгес шумпоттӥз эшшо одӥг дуно кузьымен - азьвыл эктӥсь, али оркестрын шудӥсь Пётр Бердников луиз Удмурт Элькунысь дано артист. Ӟечкыласьком! Е. Ромашова. Одӥг колхозын - кык чемпион! Кык иськем (классика амалэн), нылкышно-ветеранъёс. Старт азьын адӟисько ваньмызлы тодмо Нина Данилова, Юлия Рудина, Лидия Близнецова, Антонида Трефилова... Пӧлазы кемалась тодо ни кадь, вормоз тужгес кужмоез - Дэбес ёросысь Нина Данилова. Учкисьёс но синзэс уг вошъяло пичигес мугоро но чупрес кышномурт вылысь. Костюмез укыр чебер, кыдёкысен тодмалод. Нина куас сюрес вылын ӧз шугъяськы, куасэз дышем сямызъя зол ширтӥз, "тушмонзэ" Антонида Трефиловаез трослы кельтэ вал кадь, но таяз учыре солы малы ке ӧжытгес удалтӥз. Нырысетӥ луиз Шаркан ёросысь Антонида Трефилова. - Бызьыкуды оскиды-а Даниловаез азьпалтонлы? - Ӧй, али но уг оскиськы. Куинетӥос луо шуыса малпаськи ик, соин ик нырысетӥ инты туж возьмантэм шорысь луиз. - Оло, дорды юрттӥз? - Озьы шуод-а, мар-а. Сьӧрлось спортсменъёс кышкало милям гурезьёсмылэсь. - Нош кызьы секытгес бызьыны: онады-а, эстафетаен-а? - Эстафетаен, конечно. Кышкано команда понна - котькуд секунд дуно, тон ке сётӥськид, эшедлы мукетъёссэ сутыны секытгес луоз ни. - Нимысьтыз дасяськиды-а та ӵошатсконъёслы? - Кытын со? Ӵошастконъёс понна колхозэз куштыса уд кельты ук (Антонида Александровна Титовоын "Выль сюрес" колхозэн кивалтэ). Кык нуналлы гинэ азьпал лыктӥ. - Мылкыдды вань на-а азьланяз но кужымдэс эскерыны? - Котькуд аре, куд-огъёсызлэсь валамтэысьтызы уг бызьылы ни шуисько, но сюлэм уг чида. Нош табере - таӵе вормон басьтэм бере, бызьылытэк сьӧлык луоз. - Пиосмурт ветеранъёс пӧлысь нош ик чемпион луиз тӥляд водительды - Николай Батаногов. Тӥляд гуртады спортлы бадӟым саклык висъяське, шӧдске. - Ӧйтӧд, озьы шуыны уз луы, дыр. Адямиос нимазы выро. Спорт уго трос дырез, чидамез кулэ каре. Коньдон но трос кошке. Юрттэм интые пыкылэмзы потэ. Но туннэ мон пайми: азьвыл мынам спортэн выреме шоры кырыж учкылӥсьёс монэн ӵош шумпотӥзы, мылысь-кыдысь ӟечкылазы. Иське, валазы вормонлэсь дунзэ. З.Рябинина. Ӧз лыктэ "Удмурт кенеш" кылем арысен турттэ ни вал Печатья но иворъёсъя министерствоен ӵош пумиськон ортчытыны, ӵош ужан амалъёсты умоятон вылысь. Со ужрадэз пусйизы 29-тӥ февральлы. Оло нуналэз сыӵе, оло эшшо маке - малпан ӧз быдэсмы, пумиськонэ ӧтем эшъёсты мукет кенешонэ кыскизы. "Удмурт кенешлэн" исполкомаз быръемъёс но ёросъёсысь ёзъёслэн кивалтӥсьёссы ужпумез куспазы эскероно луизы ни. Решение кутэмын, пумиськон дыръя лэсьтэм ивортонэз редакциосы ыстыны. О.Марков. ВИ ТОЛ ШУДОНЪЁС Спорт - ӝыны улонэ. Можгаослэн командаязы тужгес даноез, сӥлы карон спортсмензы Бадӟым Сибы гуртысь Семен Шишкин. 30 ар ӵоже ни со вис карытэк пыриське газетлэн призэз понна ӵошатсконъёсы. Шарканын со нюръяськиз плиатлонын (ыбылӥськон, ки кужымез мертан, куасэн бызьылон). Ӵошатсконъёс вискын вакчияк таӵе вераськонмы пӧрмиз. - Семи, тон Можга педучилищеын дышетскыкуд ик спортэн выриськод вал. Кызьы бен берлогес улонэд ӧръяськиз? - Соиз озьы. Педучилище кебит нерге вал, татын трос спортсменъёсты будэтӥзы. Дышетскеме бере ыстӥзы Бадӟым Учае физикаен дышетыны. Татын ужакум ик 1968-тӥ арын нырысьсэ пыриськи "Советской Удмуртия" газетлэн призэз понна ӵошатсконъёсы. Дышетсконме азьланьтӥ пединститутын. - Физматэ, озьыен, пырид? - Ӧй, географиен дышетӥсь луэме потӥз. - Школаын ужасько шуид бере, озьыен, али географиез нуиськод? - Уг ведь! Историез. Нош азьлогес Сибыын ик колхозысь парторганизациен кивалтӥ. - Озьыен, одӥг ӧретӥ гырыса уд ветлӥськы? - Улонэз сыӵе-а, мар-а, оло, адӟонэ-а. Косо бере, кыткиськоно, кожасько, уг бырйиськиськы. Соиз но, таиз но пӧрме, лэся. - Нош спортэз басьтоно ке, кытчыгес сюлмыд биниське? - О-о-ой! Маин гинэ выреме ӧвӧл. Куасэн бызьылэм сяна, биатлонын но вал, шахматэн но шудӥ, ӝӧк выл теннисъя но ӵошатскылӥ, велосипедэн но ворттылӥ, та удысъя Удмуртилэн чемпионэз но вал, велокроссын быдэс Россиысь спортсменъёс пӧлын куинетӥ интые потаме вань. Нош огъя грамотаосыз ке лыдъяно, Можгалась гинэ сётэмъёсыз 385 люкаське. - Нош таӵе шудонъёсын чемпион луэмед вань-а? - Огпол эстафетаен вормылӥм. Татын ик, Шарканын. Кыӵе аре, уг тодӥськы ни. Кемаласьгес вал. - Нош кыӵе вормонэн тон тужгес данъяськиськод? - Паймод но... 44-тӥ интыен. Соку мон Горькийын (али Нижний Новгород) ассэ Валерий Лихачевез, сӥё-дано мастерез, азьпалтыны быгатӥ. Соку со 46-тӥ интыез басьтӥз. Нош та велосипедист дуннеын одӥгез кужмоез вал. - Нош ма сётэ тыныд спорт. Уд тодӥськы-а? Туэ тани 52 арес тырмоз. - Жадён веська. Нош эшъёсын пумиськон сюлэмез кема шунтэ. Егит муртлэн одно вормемез потэ, нош ми, арлыдоос, спорт валлин тазалыкмес утьыны сюлмаськиськом. Спорт - со мынам ӝыны улонэ. Гуртын тренер луисько бере, вераме потэ Сибыысь спортсменъёсмы сярысь. Василий Васильев чемпионэ потаз республикаысьтымы егит пиос пӧлын, ньылетӥ вал Россиысь кужмоосыз куасэн бызьылӥсьёс пӧлын. Удмурт шаерамы вормисе потазы Владислав Петров, Нина Васильева. Удмуртиын тодо вал спортъя мастерез Михаил Ивановез. Табере тани мынам дышетэм тренерелэн дышетскисьёсыз бадӟым спортэ пото ни. Алигес спортъя мастер луиз Евгений Иванов. Со ик шумпоттытэ, ужаны мылкыд, кужым сётэ. Верало таӵе учырез гинэ. Огез выны, Саша Михайлов, огвакытэ Сухумиын улӥз. Абхазиын со вань ӵошатсконъёсын вормылӥз, нош колхозамы ньылетӥ интылэсь вылӥе уг ӝутскы - пиосмы сокем кужмоесь. ВИ тол шудонъёс "Таӵеез Олимпиадаосын но ӧй вал" Озьы шуиз Шарканысь куас сюресъёс сярысь дуннелэн но олимпийской шудонъёслэн трос пол чемпионказы Галина Кулакова. Гурезе, пе, жадьыса тубиськод-тубиськод но, уллане лэзиськыны шымырано. Нош Шарканысь пиос но нылъёц та сюресъёс вылын - вуын чорыг зымылэм выллем. Котькуд вырйылэз, нюкез-гопез, кожонэз соос вить чиньызэс кадь тодо, роть уйшоре лэзь, уз янгышалэ. Куд-огез сю пол но, дыр, котыръязы ни та сюресэз. Соин ик дорысь борддоръёс но юрттӥзы, лэся, шарканъёслы зол бызьылыны. Арня нунал. Туннэ ортчозы кулэ эстафетаос. Урамын 25 градус кезьыт. Нош стадионэ чибориё комбинезонъёсын пиос но нылъёс кыстӥсько ни. Соосты уг кышкаты, лэся, чепыллясь куазь. Мугорзэс посо-куасало, куасъёссылэсь гылӟемзэс эскеро. Куазен йырин пичи воштӥськонъёс луизы ик - стартэз кӧня ке ӝегатыса сётӥзы. Эстафета сюрес вылэ нырысь нылкышноос султӥзы. Нырысетӥ люкетаз бызё егит нылъёс, кыкетӥяз - ветеранъёс, куинетӥ но ньылетӥ этапын - нылкышноос. Тани нылъёс старт сётон гож сьӧры султӥзы. Кыло меда ог-огзылэсь сюлэм йыггетэмзэс. нылъёс Али соос лобыны дась, котькуд азьпал выроссэс, вамышсэс али йыразы бергато. Стартын ӝегад- марад ке, сюрестэ азьмынӥсьёс пытсалозы, ури-бери выронъяд юмоке шедёд: мукетъёсыныз колӟаськод, куастэ, бодыдэ тӥялод. Озьыен, шоро-куспо зарни амал шедьтоно. Тани старт сётэмын. 24 нылъёс (киясаос ӧз бызьылэ) лымыез пурӟытыса азьлань ширтӥзы. Паськыт сюрессы пумен сюбегаса эстафета сётон интые вуттэ. Татысен котырскыса, кыр бусые пото, собере сюрессы нюлэскы коже, гурезьёсы но нёжалъёсы вуттэ. Стартысь азьпала кошко Воткинскысь Лилия Кельдибаева, Пичи Пургалась Светлана Тихонова, Сарапулысь Валентина Новикова. Соос бӧрсьын - Шарканысь Екатерина Воронцова. 5 иськемез со толон 17 минут но 13 секундскын ортчиз. Озьы егит ныл нылкышноос пӧлысь чемпионкаез но, Игралась Наташа Русскихез, 50 секундлы кельтӥз. Тырмоз на-а туннэ Катялэн кужымез? Стадионэ уно люкаськем калык пӧлын Катялэн мумиз, Фаина Нестеровна сылэ, возьма радиоивортонэз. Тани шумпотымон ивор вуиз: азьпалан солэн нылыз. Синъёсыз чилектӥзы, мыньпотӥз. Кыӵе меда малпанэн-осконэн татчы лыктӥз, юаса утчай. - Оскисько вормонэзлы. Медаз гинэ усь кытӥ ке. Вань веранмы-данъяськонмы али со. Бызьылонэныз чылкак шузимемын. Куасъёстэк улэме ик уз луы, шуэ. Лымы усемез, тол вуэмез чидатэк возьма. Гуртамы, Сюрсовае, туж шер вуылэ, кунояны гинэ. Гужемзэ бен, турын дасяку кӧня ке юрттӥськыны вуттэ ик. Весь сборъёсын, ӵошатсконъёсын ветлэ. Мумизлэн осконэз зэмаз: Катя ваньмызлэсь вазь финише вуиз, командаысь эшъёсызлы вормыны ӟеч сюрес лёгиз. Эстафета сюресэз азьланьтӥзы Антонида Трефилова (ветеранъёс пӧлын вормись), Анна Коробова (нылкышноос пӧлын укмысэтӥ вал) но Ольга Иванова (5 иськемез куинетӥ интыын йылпумъяз). Шаркан командалы та сюлмоесь нылъёс нош ик зарни очкоос ваизы. Ог минутлы бере кылизы можгаос, куинетӥ луизы играос. Эстафета стартын юмоке усён сярысь поттылӥм вал ини. Ӵапак озьы луиз пиослэн бызьылоназы. Нырысетӥ этапе потэм Максим Вылегжанин усеменыз сэрен стартысь ваньмызлэсь бер кошкиз. Шарканъёс куалектӥзы. Максимлэн мумиз Людмила Павловна кӧсэктӥз, ымдуръёссэ куртчылыса сылэ. "Аслым но возьыт луиз кадь, Максим эшъёссэ но канжатӥз шуыса, - бератаз сюлэмзэ усьтӥз со. - Вормон сярысь малпанэ ик ӧй вал. Куке ивортӥзы нырысь интые потэмез сярысь, синкылиосме кутэме ӧз луы ни". Бен, Максим шудонъёсын герой луиз. Нырысь со вормиз 10 иськеме бызьылонын. Егит эшъёссэ гинэ ӧз, вань воргоронъёсты азьпалтӥз. Саша Мезенцев солы 1 секундзэ келяз. Кыксы но соос бызьылон наукаез Олег Орестович Перевозчиков дорын ортчо. Мезенцевез та ӵошатсконъёслы дасяз но азьланезлы юрттыны басьтӥськиз Ижысь минерал-емышо вуосъя завод. Уногес таӵе спонсоръёс луысалзы ке, асьме удмурт пиосмы но нылъёсмы дуннелэн чемпионатаз но вормысалзы. Нош эстафетаез та верам пиос тренеренызы ӵош но Н. Батаноговлэн юрттэмезъя кыкетӥ призёрлэсь, Играослэсь, 7 минутлы пала! вазьгес йылпумъязы. Мукет командаысь пиослы вормон сярысь малпаны гинэ но луонлык ӧз сётэ. Туж зол! Шудонъёс йылпумъяськизы. Кызьы шуим ини, чемпион нимъёс тросгес басьтӥзы шарканъёс, нош вормисе потӥзы играос. Ма бен, таӵе ӵошатсконъёсын ӝог бызьылӥсьёс сяна кулэ на лэчыт синмо ӧрӟиос, кужмо быгытъёсын вогоронъёс. - Шарканысь калык понна та нуналъёс бадӟым праздниклы пӧрмизы, - шуиз татын будэм-бызьылэм пияш, бератаз быдэс дуннелы тодмо луэм спортсмен Владимир Никитин. - Мон оскисько, - пусйиз со, - татын, Удмурт Швейцариын, спортъя кизилиос луозы на. Талы ми пумит ӧвӧл. мед луозы гинэ соос, коть Шарканысь, коть Можгалась, коть Игралась. Со понна егитъёслы сюрес усьтоно, юрттоно. Правительствоын ужасьёс но ӵошатсконъёсы пыриськеменызы возьмато: соос спортэз гажало, соин эшъясько. Сое интыысьтызы вырӟытон, сое азинтон сярысь сюлмаськемзэс но верало. Озьыен, оскон кылдэ, спорт уз пашмы. Тае умой возьматӥзы Шарканын ортчем гурт спортсменъёслэн тол шудонъёссы но. Зинаида Рябинина, Георгий Юсаев, Владимир Беломорских (фото). Супыль-сапыль апрель Удмурт филармонилэн залаз 30-тӥ но 31-тӥ мартэ гинэ "Супыль-сапыль апрель" кырӟан-серекъян-маскаръяськон ӝыт. Туэ со пусъе вордскем нуналзэ - 10 ар тырмонзэ. Чирдо, верало, шудо, серекто: "Шулдыр ӝыт" ансамбль "Чулпон" ритм-балет Маскарчиос: Александр Перевощиков Анатолий Григорьев Александр Баймурзин Вячеслав Байков Вячеслав Иванов Алевтина Степанова Алексей Шкляев Рома Николаев но мукетъёс. 10 ар талэсь азьвыл кылдэм сямъя ӝытчиос маскаръяськыны озьы ик дасясько пӧртэм районъёсын. Режиссёр Анатолий Ушаков. Кутсконэз 19 часын. Телефонъёс: 43-23-38, 43-22-71. Касса ужа 14 часысен. Туэ, 10-тӥ мартэ, витьтон ар тырме тодмо кылбурчилэн Александр Егорович Белоноговлэн "Мынам шаере" нимо нырысетӥ кылбурез печатласькем дырысен. "Советской Удмуртия" газетэз лыдӟисьёс соку ик синйылтӥзы егит гожъясьлэсь лэчыт визьзэ, улон- вылон шоры пӧртэм ласянь учкыны быгатэмзэ. Туннэ тодматӥськом лыдӟисьёсмес Александр Егорович Белоноговлэн выль чуръёсыныз. Александр Белоногов (паллянысез) шаерысьтымы егит гожъясьёслэн кыкетӥ кенешазы лыктэмъёс пӧлын. 1951-тӥ ар, октябрь. Журналистъёсын пумиськонъёс "Единство" Путинлы дурбасьтоз Кылем арняе, 27-тӥ феврале, Москваын ортчиз "Единство" огазеяськонлэн учредительной кенешез. Солэн ужаз пыриськизы республикаысьтымы "Единство" ёзлэн кивалтӥсьёсыз но: Н. Хохлов, Э. Касимов но С. Беркутов. Политикаен герӟаськем ужъёс кенешын эскеремын ӧй вал, шуиз Н. Хохлов журналистъёсын пумиськон дыръя. "Единстволэн" программаез кутэмын луоз, Россилы Президент быръем бере. Москвае ветлэм делегатъёслы таӵе юан сётэмын вал: пыриськиз-а "Единство" Путинлы Удмуртиысь юрттӥсьёсты быръён уже? - Та уже "Единство" ӧз пыриськы, - валэктӥзы делегатъёс. - Путинлы, "Единство" сяна, мукет партиос но огазеяськонъёс дурбасьто. Нош Президентэ кандидатлы юрттӥсьёс бырйыку, партиос куспын огкылэ вуон одно ик кулэ ӧвӧл. Кызьы луиз ини тодмо, Удмуртиын Путинлы юрттӥсьёсыз луозы: С. Смирнова, В. Жебровский, В. Чугуевский, Е. Одиянков. Кин соосты ӵектӥз но кызьы соосын азьланяз ужаны малпа Удмуртиысь "Единство", пумиськонын верамын ӧй вал. Москваын ортчем кенешазы "Единстволэн" делегатъёсыз бырйизы политсовет, исполком но ревизионной комиссия. Кызьы валэктӥз Н. Хохлов, политсоветэ бырйизы вань регионъёсысь та огазеяськонлэн ёзъёсыныз кивалтӥсьёсты. Соин ик Удмуртиысь "Единстволэн" кивалтӥсез Николай Иванович Хохлов но отчы быръемын. Т. МИРОНОВА. Герман, Нина, Гера - тужгес шӧртчи семья Юнме анайёс та нуналэ нылпизэс ӝот-ӝот сиськыны косӥзы - куд-огез сюлмаськемысьтыз пичи сяна ӧз йӧтскылы. Нуназе бере соос анай-атайёсынызы ӵош шаерысьтымы тужгес шӧртчи но кужмо семья ним басьтон понна нюръяськизы уго. Та ӵошатскон тужгес учкымонэз потэ мыным. Стартозь 15 минут. Анай-атайёс покчи спортсменъёссэс огдыре буйгато но, индыло но. Тани Завьял ёросысь Юра Трофимовлы 10 арес сяна ӧвӧл ай, нош со зэмос пиосмурт кадь юн возиське. - Юра, кулэ! Вань кужмысь кулэ! пельпумаз топ-топ веша атаез. Юрик, ымдурзэ куртчыса, куас бодыосыз борды кырмиське. Игра ёросысь Ирина Лекомцевалэн вормонлы осконэз вань ке но, керӟегъяське: я солань-талань нискыла, я куасъёсыз вылын тэтча, куртказэ дӥся-куштэ. Мугез вань - Кез ёросысь солэн кадь ик фамилиен пияш вӧжогес. Чупрес шуыса но кылӥськиз. Озьы ик вань. Тани куас сюрес вылэ огез бӧрсьы мукетыз пиналъёс потэм бере, комментатор ялэ: - Трассаез ӟеч ортче Кезысь Максим Лекомцев. Со нырысетӥез луыны быгатоз! Бӧрсяз ик: - Ӝог бызе Играысь Ирина Лекомцева! Вормисьлэсь интызэ басьтон понна нюръяськон уката пуроме. Мон, валамон, "висисько" нылаш понна. Но пияш - со пияш, ог минут палалы азьпалтӥз. Ирина но молодец - вань кужмысьтыз тыршем. 1 иськемез со 8 минут 28 секунд ӵоже ортчиз. Финишын ӧжыт бӧрдэмез уг поты, аслаз лулскемез но уг луы ай, урод-а бызи шуыса юа. Куинетӥ луиз Воткинскысь Паша Вострокнутов. Валамон, дас аресъем пинал дас ньыль аресъемзэ уз ортчы - спортын со вис бадӟым ик лыдъяськыны кулэ, дыр. Но Юра Трофимов уг куректы - солэн анаез укыр чупрес. Тӥни ук вань мукетъёссэ ортчиз. Атаез но куинетӥ вуиз. Нош кӧня ке минут улыса, семья ӟыгырске - соос туннэ нырысетӥосыз! Ӵуказеяз - эстафета. Игра ёросысь Кабачигуртысь Герман Лекомцевлэн вань осконэз солы. Туннэ со, 5 иськемез 15 минут но 16 секунд ӵоже ортчыса, нырысетӥ луиз, но малы ке кузаклыз возьмамзылэсь лябгес бызиз. Ӵуказе пӧрмоз, - шуэ со семьяезлы. Озьы ик луэ. Эстафетаез Лекомцевъёс тужгес ӝог ортчо но кык ӵошатсконъёсъя огъя нырысетӥ интыез басьто. Трофимовъёс луо кыкетӥ, Шарканысь Меньшиковъёс - куинетӥ. Вераны кулэ: Лекомцевъёс кыкетӥзэ ини Тол гурт шудонъёсын зарни медаль басьтӥзы. Ӵошатсконъёслы соос котьку рос-прос дасясько. Зэмзэ но, кыӵе спортсмен тон, та быдӟа шудонъёсы шаркан гурезьёстӥ нискылан понна гинэ лыктӥськод ке? Лекомцевъёс понна спорт - улон. Со юрттэ куспазы тупаса улыны, тазалыко луыны. Герман ужа Играысь ГИБДД-лэн начальникез луыса - ужез но кужмо, чырткем луэмзэ кулэ каре. Нина школаын дышетэ. Та ӵошатсконъёс азьын ӝыны толэзь ӵоже рос-прос дасяськизы. Юрттӥзы ӵош ужась эшъёссы но, районысь спорткомитет но. - Туэ тӥляд кужмо "тушмонъёсты" кылдӥзы. Кызьы малпаськоды, кин вормоз вуоно тол шудонъёсы? Лекомцевъёс шуизы: - Ми! З.Рябинина Инмысь сюрес ... Ӝужыт воргорон сьӧрам бызе. Тани-тани сутоз. Нош мынам пыдъёсы музъеме уг ик йӧто ни кадь. Шуак канжаськыса уси. Воргорон монэ кутӥз... Шӧдӥ - пеймыт уй. Синъёсме кыньыса, ваньзэ вунэтыны но берен умме усьыны турттӥсько. Нокызьы но уг луы: со суред весь син азям пуксе. Кышканме вормыса, шыпытак дӥсяськи но педло потӥ. Кырын югыт. Толэзь пиштэ. Омыр чылкыт. Салкым. Чал-чал. Куддыръя гинэ тӧллэн писпуослэн куаръёсыныз шудэмез кылӥське. Тани со мон борды йӧтӥськиз но сэзъя лэзьям йырсиосме. Кыӵе умой! Мынӥсько гуждор вылтӥ гольык пыд. Нунал куспын жадем пыдъёсме лысву небӟытӥз. Писпуос улысь ӟусэз адӟи. Со пала вамыштӥ. Пукси. Шорам мӧзмыт учко инмысь кизилиос. Шӧдӥсько: соос монэ валало но жаляло. Соку ик вераме потӥз аслэсьтым сюлэм шугме, яратонэ, эше сярысь. "Юрттэлэ мыным! Мед яратоз со монэ. Кизилиосы, кызьы бен уг шӧды со мынэсьтым мур гажамме? Малы-о монэ кельтӥз?.." Синвуосы васько бам вылтӥм - уг лу ни кутэме. Мед, мед васькозы. Оло, сюлэмме небӟытозы? Пыдъёсме ӟус вылэ тырыса, шымырскыса викышъясько. Малы-о нокин но уг юртты мыным? Малы-о ваньзы вунэтӥзы, огнаме кельтӥзы? Малы яратон сыӵе курыт? ... Кин ке пельпумам йӧтскиз. Куалектӥ. Кин со? Кин лыктӥз дорам? Оло, уйвӧтысьтым воргорон? Йырме каллен ӝутыса, шораз учки... Синъёсылы уг оскиськы: тон вуид. Уд тодӥськы, кӧня толэзь мон тонэ возьмай! Ӟыгырты! Ӟыгырты ни монэ чалякгес! Кыӵе кужмоесь тынад киосыд! Тодӥськод-а, тон вӧзын мон нокинлэсь но уг кышкаськы. Тон вӧзын мон тужгес но шудо нылмурт! - Малы-о мон тонэ кельтӥ! Кыӵе яратӥсько мон тонэ! - каллен сипыртӥз пияш. Нош мынам номыр куаретэме уг луы ни. Викышъяса гинэ пукисько. - Мон тонэ ноку но уг кельты ни: оскы мыным, - небыт чупаз. Кыӵе возьмай мон тонэ! Вань осконэ быриз ни вал ук. Нош тон тани вунэтымтэед - вӧзам. Шудэн пачылмем синъёсме ӝутӥ инбаме. Нош музъем вылэ ӧжыт гинэ адскымон тӧдьы сюрес ваське... Надежда Митрофанова. Вавож ёросысь Ӟамбайгурт. Россия Федерациысь Пенсиосъя фондын ужасьёсты Россия Федерацилэн кун наградаосыныз пусъён сярысь Россия Федерацилэн Президентэзлэн Указэз Пенсия тыронэз радъянын лулысь-сюлмысь тыршемез но пенсиосъя пунэмъёсты берыктонъя кун ласянь ужрадъёсты улонэ пыӵатэмез понна "За заслуги перед Отечеством" ИИ степенё орденлэн медаленыз пусъёно Леонтьева Татьяна Адамовнаез - Пенсиосъя фондлэн Удмурт Республикая ёзэзлэн Игра ёросъя валтӥсь уполномоченнойзэ. Россия Федерацилэн Президентэзлэсь ужзэ быдэсъясь В. Путин. Москва, Кремль, 2000-тӥ арын 17-тӥ феврале. � 372. Ӟечкыласьком вормонэн! Журналистъёс куспын арлы быдэ ортче "Россиысь топливно-энергетической комплекслэн ужпумъёсызъя умоез публикация" конкурс. Телевидениын та ужпумъя быдэс цикл передачаоссы понна, кылем арын вормисен лыдъямын Ижевскысь улон интыя управлениысь "Перспектива" пресс-группа. Та коллективез сюлмысьтымы ӟечкыласьком но сӥзиськом азьланяз эшшо но бадӟымесь вормонъёс. Е. Николаева. 8 МАРТЛЫ ЧИГЫМТЭ ЧИДАН Коӵо пуксён майыгтэк Ӧйтӧд, кытысь сомында чидан сётэм инмар милемлы. Малы сомында курадӟытэм, уг тодӥськы. Анай-атае Анастасия Тимофеевна но Михаил Самсонович Самсоновъёс 1910-тӥ арын кузпалъяськиЛлям. Куспазы тупаса улӥллям, ньыль нылпи вордӥллям. 1923-тӥ арын уродос интые гинэ яна потӥллям. Корказы земланка кадь, пе, вал. Но атае нырысь амбар, кенос, куала, гидъёс лэсьтыны вырем. Кутсаськон лапасэз, пе, туж кузь вал, кыкнапал ласянь капкаен - котыр калыкъёс но отын кутсаськылӥллям. Гид тыр пудо вордӥллям, эшшо мон но покчиез выны вОрдӥськиськеммы. Табере йыг-йыг корка гинэ пуктом на, собере асьмеос но калык кадь улом ни, шуэ, пе, вал атаймы. Но куамынэтӥ арын гуртамы колхоз кылдытыны кутскиллям. Атае колхозэ пырымтэ. Адӟонтэм карыса, кулакъёс вӧзы кариллям, сыӵеосты вердой, пе, шуо вал (твердый налог шуэмлэсь). Номырмес но кельтӥллямтэ: юртэз но, пудоез но, нянез но, дӥськутэз но. Коркалы дасям корез но тырыса нуиллям. Одӥг курегмы гинэ бкчае лобӟыса кылем, кутэмзы луымтэ. Тӥни со куреген землянкаямы кайгырыса кылиськеммы. Атаймес зарнизэ курыса ёрто вылэм, со понна пытсэт сьӧры келяллям. Куинь ар пукем атае, Казаньысь дары поттон заводын ужатӥллям. Тазалыкез бырыса ни атаймес лэзиллям. Зарниез ке адӟылэме луысал, шуэ вал, пе. Атаймес нуэмзы бере ик анаймы бӧрдыса-куректыса адӟемысь дугдэм. Врач доры мыныны валэз валтыны но уг адӟы вылэм. Бӧрдэмысь синъёсыз ӵоктаськемлы уг оскы, пе, врач, картэд мыжгаз, дыр, шуэм. Кызьы ми соку сиытэк ӧвӧл кулӥськеммы? Мон кӧкыын на вылӥськем. Ӟеч калык юрттӥз, дыр. Ваньбурез таласа ветлэмъёс уралтыса кулэммес возьмало вылэм. Туж, пе, ӝож вал озьы каремысьтызы. Ма, колхоз кивалтӥсе, ваньбур таласе азьтэм, начар улӥсь муртъёсты пуктылӥллям - таламысьтызы кызь вить процентсэ асьсэлы карылӥллям. Возьыттэм муртъёслы Мар ке шат, дыр, муртлэн сютэм нылпиосыз. Атаймы бертэм бере ӧжыт, пе, капчигес шокчытским ни вал. Муртлы дунын араса, уродос ке но вал басьтэм. Бадӟым суЗэр-агайёсме но вазь ӵукна бусые араны поттылӥллям. Атай жаля ке но вылэм соосты, кытчы кариськод? Озьы медъяськыса уробо, дӧдьы басьтыны быгатӥллям. Бадӟым агае, пе, шуэ, костюм басьтом шуыса арай вал, вожъяськыса ик пинал дыры ортчоз ни. Я, семьяосмылэн няньзы удалтэм. Выльысь гид, амбар лэсьтӥллям. Но калык радъя улыны нош ӧвӧл сётӥллям - бадӟым выт куриллям. Асьме валэн ик Можгала нуллыса, бадӟым агае тыронмес тырмытэм. Кӧня ке улыса, нош сомында ик тырон сётӥллям. Таизэ тыриллямтэ ни, семьяез маин сюдод шуыса. Сӥзьыл кисьтон нуналэ пыжкиськом, пе. Дас кык валэн азбаре пыриллям. Вань нянез тӧлбереныз суро ӵужыса нуиллям. Дас пиен парсьмес мунчоын но, нюкын но, пе, ватыса сюдыны вырим, но кезьыт луэм бере ваиллям вылэм ини гидэ. Нош ик валэз но, толэсэз но, скалэз-кунянэз, дас пиен парсез но, ыЖъёсыз но нуиллям. Лулмы юн вылэм-а, мар-а - улэп кылиськеммы. Кыкетӥзэ майыгтэк но кылиськеммы. Мыным соку вить арес вал. Ёрмемысьтызы Оляпаймылы вордыны сётӥзы. Но выль атае туж сантэм кариз, ултӥяса возиз. Одӥг учырез нокызьы но вунэтыны уг быгатӥськы. Оляпаен кырси монэ сьӧразы выль мунчолы из бичаны нуизы. Лумбыт ужало ни, мынам сиеме потыны ӧдъяз. Оляпайлы верай но, кеськиз ук кырсие шорам: - Си, татын из трос. Озьы сантэмамзэс ӵужмуртэ нэнэелы верам. Анае монэ со нуналэ ик доразы нуиз. Оляпае бӧрдыса кылиз. Солы но таки ӧз удалты улонын. Картсэ войнае нуизы, кӧня ке улыса, "Родинаез вузась", шуизы. Ма лэсьтӥз, ум тодӥське. Оляпайме шӧдтэк шорысь ужан дорысьтыз ик керттылыса нуизы. Ураметӥ нуыкузы, калыклы маке вераны турттэ вылэм но ымаз кышетсэ донгиллям. Пересьмон-уймон вакытаз вить ар но кык толэзь пукиз Сибирьын. Потон нуналыз вуыса но, кызьы бертыны тодытэк, эшшо кык толэзь удмурт эшсэ возьмаса пукем на. Коӵо пуксён майыгзэ но ӧз кельтэ вал солэсь, ваньзэ колхозэ нуизы. Коркаез али но Пычасын сылэ ай. Комсомоллэн райкомез но отчы интыяськылӥз. Бертэм бераз апайлэн ураме но потэмез уг лу вылэм, чиньыенызы возьматыса пыкыло, пе, вал. Тужгес сантэм карем Палсуй Кузьма. - Ярам, нылме берен басьтӥ, оло, Сибире нуыкузы ик кулысалыз ни, - шуэ вал анае. Табере тани аслам нылпиосылэн нылпиоссы вань ини. Сыӵе курадӟонэз нокин но медаз адӟы. Нош анай-атае сояз дуннеын ке но ӟеч мед улозы. Ымныр вылазы усем сюйзы мамык мед луоз. Кемалась сюлэм висёнме синву пыр гожтӥ - ваньмыз бугырске. Гожтонлэсь алӥсез но вал - янгышсэс, пе, валазы ук, кулакъёс радэ пыртэмзы понна куинь сюрс манет сётӥзы. Соин гинэ яра уг бурмы вылэм, нуныосы - интыяз коньдон сюроз, небыт, бурмытӥсь кыл уг сюры. Е.АФАНАСЬЕВА. Улын Юри гурт. Пичи Пурга ёрос. * Елена Тимофеевна нылызлэн нылыныз. Туспуктэмез В.Беломорскихлэн. Куазь кезьыт на, нош сюлэмъёсмес шунтэ ни тулыс мылкыд. Нылкышноос но та нуналъёсы выль ӝужам сяськаос кадесь. Бен соос понна ик туннэ усьтӥсько сяськаос. Ижысь 9-тӥ Январь урамысь "Мир цветов" магазинын ужасьёс басьяськисьёслы чеберевсь сяськаос ӵекто. Маин кузьым ӧвӧл синъёсты палёмытӥсь будосъёс Нылкышноослэн нуналзылы? Татысь ик шедьтыны луоз мукет кузьымъёс, трос пӧртэм кидысъёс. П.Скобелев. Вузкарисьёс Замира Закаева но Алина Ризванова басьяськисьёсты шуныт пумитало. Туспуктэмъёсыз В.Беломорскилэн. "Кубо" Кияса ёросысь Вуж Салья школаын ужа фольклоръя "Кубо" фольклор клуб. Сое кылдытӥз дышетӥсь Надежда Васильевна Бочкарёва. Отчы ветло мӧйыос но, пиналъёс но. Кылем арын "Кубое" ветлӥсьёс уно концерт возьматылӥзы ас доразы но, мукет гуртъёсын но. Туэ клуб нош ик ужаны кутскиз. Солэн нырысетӥ люкаськоназ ветлӥзы Киясаысь куноос но - ёросысь "Удмурт кенешлэн" кивалтӥсез Н. В. Пономарев, школаез азьло быдтэмъёс М. И. Гурьев но А. И. Камашев, Лутохаысь дышетӥсь Г. П. Костенкова. Та ӝытын радъямын вал пичигес киужъёсъя адӟытон. Н. Грибов. Вырӟы, удмурт! "Удмурт кенеш" огазеяськон кичӧлтэмъя, кылемаз удмурт арня нуналэ Удмурт Кивалтэтлэн юртаз люкаськылӥзы Удмурт кун университетысь удмурт дышетӥсьёс, музон интыосысь адямиос. Ӧтчамлэн мугез таӵе вал: йырын-визьмын ужась адямиослы ӟечгес пыриськоно удмуртлыкмес азинтон удысэ, лулысь-сюлмысьгес басьтӥськоно удмурт калыкмес тужгес сюлэмшугъяськытӥсь ужпумъёс борды. Вераськонэз усьтыса, "Удмурт кенеш" огазеяськонлэн тӧроез Валентин Кузьмич Тубылов пусйиз: удмурт интеллигенция - оглом кужмо калык. Аслэсьтыз лэчыт визьзэ но котькыӵе быгатонлыксэ лыдэ басьтыса, мылысь-кыдысьгес мед пыриськысал со тужгес бадӟым моӵез кулэ карись удысъёсы. Ӧтчаме люкаськемъёс ӧз чидалэ, сюлэмзэс тужгес вӧсь карись учыръёс сярысь ивортытэк. Тодмо тодосчи, кылтодон наукаосъя кандидат, шаерысьтымы вань удмуртъёслэн азьветлӥсьсы Роза Ивановна Яшина туж сюлэмшугъяськыса пусйиз: - Татчыозь кутэмын ӧвӧл на Кун кылъёс сярысь законмы. Нош со чакла: удмурт шаерысь вань адямиос дышетыны кулэ удмурт кылэз. Зэм, удмуртъёс пӧлысь ик куд-огез али ик ало ини: ум дышетэлэ нылпиосмес анай кылмылы. Удмурт интеллигенция та пумысен ас кылзэ уг вера. Кун Кенешлэн депутатъёсыз но шып уло. Кемалась ини кылдытоно вал, удмурт кыллы дышетонъя эсэпъёс. Удмурт кыл - кун кыл. Солы одно ик дышетоно мукет калыкъёслэсь но нылпиоссэс. Зэм, тросэзлэн визьмо удмуртъёслэн но пиналъёссы анай кылзэс уг тодо. Валентин Кельмакович Кельмаков, кылтодон наукаосъя доктор: - Кун кылъёс сярысь закон чик уг чакла кун кылъёсты пӧртэм ужъюртъёсын дышетон ужпумез. Куд-огез шуо: удмурт кыллы кужмысь дышетон адямиослэсь эрикрадъёссэс тӥя. Нош анай-атайёс малы меда сокем ачимъясько? Кун кылъёсты дышетон - аслаз кунлэн ужез. Шаерамы улӥсь котькуд адями ӟеч тодыны кулэ созэ но, тазэ но. Василий Михайлович Ванюшев, кылтодон наукаосъя доктор: - Зэм но, асьмемыз малы ке ялан унь-мань каро. Удмурт калыклы автономия сётэм дырысен эрикрадъёсмы ялан сюбегало. Вань шуккетъёслы пумит дэмен ӧм ӝутскелэ ке, югдур эшшо шугомоз. Али монэ сюлэмшугъяськытэ куинь ужпум. Кемалась ик ӧвӧл "Век" газет печатлаз таӵе нимо кылуж: "Быдӟым Суоми дыртэ Енисей пала..." Татын шӧдӥське весь вань финн-угор выжыосты курлан. Кыкетӥез. Туэ, толсуре, Финляндиын ортчоз быдэс дуннеысь финн-угоръёслэн кенешсы. Шаерысьтымы Суредасьёслэн огазеяськонзы солы сӥзьыса дася бадӟым адӟытон. Зэм, отын аслэсьтыз устолыксэ возьматоз, пе, кык гинэ удмурт. Та сярысь тодыса, Суредасьёслэн огазеяськонзылэн тӧроез Пётр Васильевич Ёлкин пумитъяськыны кутскем - куд-огез валаллямтэ. Куинетӥез. "Удмуртия" книгапоттонни малпа акциосын огазеяськем луыны. Озьы бере, удмурт книгаос поттон пумысь кыӵе ке вераськон мытыны дӥсьтод на шат? Светлана Леонидовна Белых, психолог: - Удмурт кылэз ӟеч-ӟеч уг тодӥськы - пичи дыръям весь ултӥяло вал. Вотянка, кулэтэм маке - ӵемысь кылоно луылӥз эшъёсылэсь. Зэмзэ ик, малы асьмемыз ялан унь- мань каро? Удмурт - возьдаськись. Ульчае потэ ке, соку ик ас кожаз кыле. Иське, ачиз янгыш. Удмурт егитъёс пӧлысь туж ичиез дышетске туннэ Удмурт кун университетысь тужгес йӧно факультетъёсын: яке коньдонзы ӧвӧл, яке... "Удмурт кенеш" огазеяськонын одно ик мед луоз удмурт психолог. Иван Васильевич Тараканов, кылтодон наукаосъя доктор: - Ялан вераськиськом ас удысазы ӟеч ужаны быгатӥсь удмуртъёсты будэтон сярысь. Та ужпумез йылаз-пумаз вуттоно ни - университетысь удмурт кылтодонъя факультетын усьтоно удмурт кылмес дышетонъя но удмурт калыкмылэсь ортчем сюрессэ тодонъя нимысьтыз ёз. Вера Григорьевна Пантелеева, литератураез эскерись, кылтодон наукаосъя кандидат: - Милемыз, егит тодосчиосыз, гожъясьёсыз, куд-ог будосъёсыз но пӧйшуръёсыз музэн, ӝоген Горд книгае пыртоно луоз ини. Али тужгес курадӟиськом, улон инты ӧвӧлэн. Малы тус-тас луэ му вӧймы? Кытчы ыше-быре солэн барышез? Луэ, дыр, ук та ваньбурез дышетонын, книга поттонын, мукет удысъёсын кутыны... Ачим мон дэмласько: кызь вить- ньыльдон аресъем егит тодосчиос, гожъясьёс, оглом - интеллигенция понна нимысьтыз улон юрт пуктыны кутсконо ини - югыт сюресмы сотэк пеймыталоз. Альберт Алексеевич Разин, философия наукаосъя кандидат, Удмурт лулчеберлыкъя дэменлыклэн тӧроез: - Удмуртъёс пӧлын ортчытоно нимысьтыз юан-веран. Котькудӥзлэсь юалляськыса, ӟеч- ӟеч тодоно: кыӵеесь солэн туала сюлэмшугъёсыз, кыӵе ӟеч уженыз шумпоттӥз ни, шумпоттоз на яратоно удмурт калыксэ? Ольга Константиновна Шилова, Ижысь Куӟебай Герд нимо удмурт гимназилэн тӧроез: - Кӧня тэльмырисько-тэкшерисько - мынам уже нокинлы ик кулэ ӧвӧл. Кӧт тужгес ӝож соиз понна: удмурт дышетӥсьёс пӧлысь ик ог кызь тямыс процентэзлэн аслэсьтыз анай кылзэ дышетэмез уг поты... Тӥни сыӵеесь сюлэмшугъёс. Оглом бугыртӥзы соос люкаськемъёсты. Нош луоз-а та ӧтчамлэн кыӵе ке эмез-юмез? Мылысь-кыдысь басьтӥськозы-а йырын-визьмын ужасьёс кыӵе ке удыс борды? Та кенешын ик асьсэлэн-малпанъёсынызы тодматӥзы суредась, университетысь дышетӥсь Сергей Анатольевич Орлов, кылчи, кылтодон наукаосъя кандидат Бибинур Шараповна Загуляева, "Удмурт кенеш" огазеяськонлэн тӧроезлэн воштӥсез Нина Игнатьевна Малых, кылчи, кылтодон наукаосъя доктор Анна Сергеевна Зуева, историк, история наукаосъя кандидат Иван Матвеевич Зонов, университетын литературалы дышетӥсь, педагогика наукаосъя кандидат Любовь Петровна Фёдорова. Тодосчиослэсь сюлэмшугъёссэс син азьын ялан возён вылысь кылдытэмын нимысьтыз кенеш. Солэсь ужзэ радъялозы но "Удмурт кенеш" огазеяськонлэн университетысь удмурт кылтодонъя факультетлэн деканэз Пётр Иванович Воронцов, психолог, дышетӥсь Светлана Леонидовна Белых, психолог, дышетӥсь Сергей Анатольевич Орлов, литературалы дышетӥсь Вера Григорьевна Пантелеева, историлы дышетӥсь Иван Матвеевич Зонов, мукет адямиос. Ӧтчам оглом ӟырдыт ортчиз. Зэм, азьвыл сямен ик сюлэмшугъяськытэ соиз: татын верам кылъёс шедьтозы меда асьсэлэсь интызэс зэмос улонын? Вырӟы, удмурт! Тырмоз кӧлыны! Е. Ромашова. ЯРАТОНО НЫЛЪЁС НО АПАЙЁС! Сюлмысьтымы ӟечкыламмы потэ ваньдэсты тӥледыз тулыс праздникен. Та нунал мед ваёз котькудмылы выль шумпотон, выль оскон! Юнме уг шуо: нылкышно - юртлэсь шунытсэ утись. Лыдъяло ке но сое ляб муртэн, озьы со верамын ньӧмыз понна гинэ - пиосты лӥятон вылысь. Нош улонын кышномуртлы ваньзэ чидано луэ. Котькыӵе шуг вакытэ но нылкышно тырше ӟечезлы оскыны, секытсэ вормыны, вӧзысьтыз адямиослэсь улонзэс каньылгес карыны. Праздникен тӥледыз, яратоно нылъёсмы но апайёсмы! Нимысьтыз ӟечкылам потэ калыкмылэсь асваланзэ ӝутон бордын нуналмысь тыршись нылкышноосты! Тау тӥледлы, эшъёс! Тӥляд сюлмаськемды одно ик ӟечен берытскоз. В. ТУБЫЛОВ, "Удмурт кенеш" огазеяськонлэн тӧроез, Г. НИКИТИНА, Удмурт нылкышно кенешлэн кивалтӥсез. Коньдон кошке бускель улосэ Туэ 24-тӥ феврале Воткинск районысь администрациын ортчиз ёрос кенешлэн сесиез. Депутатъёс сяна солэн ужаз пыриськизы организациослэн но учреждениослэн кивалтӥсьёссы. Сессиын кылем арын ужамзылы йылпумъянъёс лэсьтӥз ёрос администрацилэн кивалтӥсез Владимир Варламов. Озьы ик отын вераськиз Удмурт Республикаысь югдурез утёнъя министр милициысь генерал-лейтенант Владимир Щербаков. Со тодматӥз кылем арын но та арлэн кутсконаз элькунамы югдурен. Воткинск ёросэз пусъёно ке, министр таӵе лыдпусъёсын тодматӥз. Районын йыружъёслэн лыдзы будӥз лушкаськон чотын - 1998-тӥ арын 248 учыр ке вал, кылем арын со вуиз 314- ёзь. Йылӥз 26 процентлы. Уногес луизы складъёсын, фермаосын, хранилищеосын йыртэманъёс. Ваньмыз со потэ кивалтӥсьёслэн ваньбурез утён сярысь сюлмаськымтэзы бордысь. Эскеронъёс возьматӥзы: унояз объектъёсын ваньбурез утён ас эрказ лэземын, куд-ог интыосын тунгонъёссы гинэ но ӧвӧл. Возьмаськисьёс сярысь ке верано, соос ваньбурез утем интые сое юон вылэ воштыса лэзё, лушаськисьёсын огкылысь луо. Уноез кивалтӥсьёс чӧлско, та ужез радъяны коньдон уг тырмы шуыса. Министр сыӵе вераськонъёсты умойтэмен лыдъяз. Уго лушкаськон уката уногес изъян вае. Возьмаськонэз радъян пайдаен гинэ берытскысал. Соин сэрен ик "Двигатель" эштосын 18 лушкаськон учыр вал. Озьы 96 сюрс анетлэсь унолы ваньбур ыштэмын. "Новая жизнь" акционер огазеяськонын 17 пол лушкаськизы. Изъянэз 32 сюрс манет. Министр куд-ог администрациослэсь ужамзэс ӟечен но пусйиз. Адӟем карымон луэ Кварсаысь администрацилэн югдурез но ваньбурез утёнъя дружиналэн ужамез. Со фермаосысь пудоосты лушкан 3 учырез палэнтӥз, одӥг пол кырмиз эстӥськонэз капыртыны турттӥсьёсты, ужысьтызы мозмытӥз 9 кудӟем возмаськисез. Но жаляса верано луэ, мукет гурт администрациослэн кивалтӥсьёссы та ӟеч амалэз пыӵатыны уг тыршо. Со дыре ик ваньбурез лушкан учыръёс ялан будо, тужгес но городъёслы но ёрос центръёслы палэнэ интыяськем гуртъёсын. Кивалтӥсьёслы тужгес бадӟым саклык висъяно милицилэн участокъёсъя инспекторъёсыныз ужанлы. Кытын инспекторъёс вань, отын чутрак кулэсме йыружъёслэн лыдзы, ӧжытгес адӟод юэмъёсты, керетыса ветлӥсьёсты. Тани, кылсярысь, Якшур-Бодья ёросын ватсаса инспекторъёсты уже кутэмен валче, йыружъёс шӧдскымон кулэсмизы. Мукет районъёсын соослэн лыдзы будэ. Воткинск ёросысь депутатъёс министрлэн та ӵектонэныз соглаш луизы. Озьыен, татын но югдур азьланяз воштӥськыны кулэ. Пумиськон дыръя Владимир Щербаков депутатъёслэн куд-ог юанъёссылы валэктонъёс сётӥз. Одӥгез депутат ӵектӥз ГИБДД-лэсь автомототранспортэз пусъён ёззэ Новый посёлоке усьтыны. Со Пермь областьлы матын сылэ. Нош Воткинсклы - 40 иськемын. Соин ик посёлокын уноез улӥсьёс транспортсэс пусъён яке номер басьтон понна Воткинскын черодъёсын сылоно луо. Нош Пермь улос воксё артэ. Озьы налогъёс но мукет тыриськонъёс Удмуртилэн палэназ кошко. Министр кыл сётӥз югдурез толэзь ӵоже тупатон сярысь. Люкаськемъёс но, министр но пусйизы, таӵе пумиськонъёс одно ик кулэ шуыса. Соос пайдаен берыктӥськыны кулэ. С.Климок. Гурт удыс Николай Веретенников: Выльзэ но поттӥськом, эмъяськом но... Николай Веретенников - шаерамы тодмо кивалтӥсь но политик. Со вал Кун Кенешлэн нырысетӥ ӧтчамезлэн депутатэз. Выль законъёс дасянэ, бюджетэз эскеронэ котьку пыр- поч пыриськылӥз. Николай Даниловичез тужгес но ӟеч тодо гурт удысын тыршисьёс. Солэн уго быдэс улонэз герӟаськемын гуртэн. Йылпумъяз Глазовысь гурт удысъя техникумез но Ижысь институэз. Собере тодон-валанзэ будэтӥз Подмосковьеысь гурт удыслы кивалтӥсьёсты дасянъя университетын. Николай Веретенников Глазовысь ремонтно-механической заводын 30 ар ужа ни. Кутскиз со слесарьысен. Вал мастер, комплектовщик, отделлэн кивалтӥсез но 13 ар ӵоже луэ ни предприятилэн тӧроез. Вераны кулэ, 1993-тӥ арын РМЗ пӧрмиз акциосын "Реммаш" огазеяськонлы. Валтӥсь директоре нош ик бырйизы Николай Даниловичез. - Николай Данилович, кӧня ке ар талэсь азьло "Удмурт дунне" газет гожъяз ни вал тӥляд предприятиды сярысь. Мар ваиз 1999-тӥ ар? Кызьы сое йылпумъяды? - Мултэс ушъяськеме уг поты, но урод но шуыны ымы уг усьтӥськы. Ортчемез ар трос умойзэ, ӟечсэ сётӥз. Огазеяськон быдэс ар огсыр ужаз. Нырысь ик, уллань гылӟемысь-куашкамысь дугдӥм, 1998-тӥ арен ӵошатыса, миым 2,5 поллы уногес продукция поттӥм. Предприятие кибашлы ужасьёссэ утьыны быгатӥз, выль техникая конструкторъёслэсь бюро кылдытӥз. Ми котьку дышем сямъя гурт понна ужаськом, отысь хозяйствоослы кулэ оборудование но кыед поттон транспортёръёс лэсьтӥськом. Али берлооссэ 3 пумо поттӥськом: ТСН- 3,ОБ, КСН-Ф-100 но ТСН-160 М. Соин ӵош ик УАЗ автомобильёслы валтӥсь воштос ёзъёс (мостъёс) лэсьтӥськом. Тупатъяськом автомашинаосты, электродвигательёсты, корт ӵыжатон трансформаторъёсты но музонзэ. Кылем арын кылдытӥм выль АКР-1 но КДМУ ю тысь изонъёс (дробилкаос). АКР-1 дробилка басьяськисьёссэ туж ӝог шедьтӥз. Арлэн пумаз вуттӥм эскерон вылысь КДМУ дробилка. Со векчиятэ ю тысез, кыз лысэз, турынэз но куроез. Хозяйствоос понна со туж усто машина луоз. - Огазеяськонады усьтӥсько-а выль ужан интыос? - Кызьы бен туннэ улод, ӵуказеез сярысь сюлмаськытэк. Милям специалистъёсмы котьку пырисько пӧртэм адӟытонъёсы (выставкаосы). Отын продукцимес возьматӥськом, озьы вузъёсмылы сюрес усьтӥське. Мукетъёсызлэсь но адӟем кариськом, ужан амалъёссылы дышетскиськом. Со урод ӧвӧл. Кылем арын предприятиямы ватсаса 30 выль ужан инты усьтӥм но вань пунэм тыронъёсмес быдтӥм. Дыраз тыриськом выт (налогъёс). Валля арен ӵошатыса, миым шоро- куспо уждунмы 2 поллы йылӥз. Предприятимы ялан юрттэ городысь 16 номеро шор ёзо школалы. Ортчем арын татын удмурт культурая музей усьтӥм. Бадӟым классъёсын дышетскисьёс дорамы, заводын тыршо, ужлы дышетско. Школаез быдтэмзы бере, соос аттестатэн ӵош механической ужъёсъя слесарь квалификация басьто. - Николай Данилович, рынокен экономикае выжем юн шӧдске-а? Мар люкетэ на уката ӟечгес ужаны, вамышъёстэс кузёмытыны? - Кызьы бен уз шӧдӥськы. Табере ми асьмеос пызь изӥськом, нянь пыжиськом, кондитерской изделиос лэсьтӥськом. Предприятиямы "Вешенка" губи будэтӥськом. Тол шорын выль губиен кутэмнянь, перепеч кыӵе ческыт кошке, нош предприятилэн кассаяз уксё вуэ. Кин бен али шуг-секытъёстэк ужа, шуг вераны. Милям одӥгез бадӟым ужпуммы герӟаськемын бюджет чотын улӥсь организациослы шуныт сётонэн. Соослы юрттӥськом, нош шуныт басьтэмзы понна коньдон тырыны уг быгато, пунэм тыронзы арысь аре йылэ. Нош милям эстӥськон (газ) понна тыронъёсмы будо. Валамон, таӵе югдур азинлыко ужаны уг юртты. - Туала улон азямы бадӟымесь куронъёс пуктэ, утчаськон мылкыдэз кулэ каре. Берло дыре тӥляд мар эшшо вылез лэсьтӥське на? - Шаерысьтымы Гурт хозяйствоя но сиён-юонъя министерстволэн куремезъя, али ужаськом выль агрегат кылдытон бордын. Со огдыре музъемез небӟытоз, кидысэз согоз, минерал сылалъёс пазялоз но муэз ӵошкатыса кельтоз, оглом вераса, ньыль ужез огдыре быдэсъялоз. Та уж борды кыским Ижысь гурт удысъя академиысь, Гурт хозяйствоя научно-исследовательской институтысь специалистъёсты но мукет адямиосты. Та машина туэ хозяйствоосы вуоз, отын ас интызэ ӝог шедьтоз шуыса юн оскиськом. - Мар верасалды ужасьёсты сярысь? Кинэ нимысьтыз пусъемды потэ? - Зэмзэ но, предприятиямы усто, лулысь-сюлмысь тыршисьёсмы трос. Тани кызьы ушъяса уд вера Инесса Сикова сярысь. Ужан сюресэз кутскиз Юкаменск районын, токарьлэн юрттӥсез вал. Собере вуиз Ижысь подшипниковой заводысь механо-сборочной цехе. Ӧз чида кема ужаны, вордскем палъёсаз берытскиз. Табере со дорамы дасэтӥ арзэ тырше ни. Бен, Инессалэн удысэз капчи ӧвӧл, воргорон ужез быдэсъя, синмаськымон токарь луэ. Куинетӥ разряд сётэмын. Туннэ озьы ик ӟеч кылъёс вераме потэ Евгений Емельяновлэн бригадаез сярысь. Газосварщикъёс вань ужъёссэс мылысь-кыдысь быдэсъяло. Ачиз бригадир татын 20 арлэсь кема ужа ни. Солэсь адӟем каро эшъёсыз Шейхулла Касимов, Александр Адаев но Сергей Ельцов. Али бригада выль кормодробилка лэсьтэ. Сое дасязы предприятиысь инженеръёс. Таӵе агрегатэз гурт калык возьма. "Реммашын" ӟеч тодо Александр Иванович Ившинэз. Со дорамы кызь одӥгетӥ арзэ тырше ни. Сётэмын самой вылӥ 6-тӥ разряд. Ужа энерго-механической отделын. Александрлэсь быгатонзэ туж умой возьматэ одӥг учыр. Предприятие миым басьтӥз программаен станок. Сое пуктӥм, нош ужатыны ум быгатӥське. Заводысьтыз специалистъёсты ӧтим. Ветлӥзы, но номыр карыны, тупатыны ӧз быгатэ. Та уж борды басьтӥськиз Плександр Иванович. Ваньзэ ас киосыныз сэрттӥз-пертчиз но станокез "эмъяз". Александр Ившинлэн ужано бригадаяз - 9 кузя кибашлыос. Соос син азязы возё ваньзэ механической оборудованиез но станокъёсты. Огдыре Александр Ивановичез бригадире пуктыны малпаськом вал. Соглаш ӧз луы, мон, пе, ачим механизмъёсын ужаны яратӥсько, мыным улэп уж кулэ. Вератэк кельтэме уг поты Дмитрий Чернышев сярысь. Со быдтӥз Глазовысь 24 номеро профессионально-технической училищеез, механо-сборочной ужъёсъя слесарь луиз. Армие ветлӥз но дорамы ужаны лыктӥз. Вакчи дыр куспын усто зуборезчик луиз. Солэн ки пыртӥз кыӵе гинэ шестерняос уг ортчо. Ваньзэ оскымон выльдэ, эскерыса ветлонэз ӧвӧл, нокинэ юмоке уз вутты. - Нош ужасьёсты сярысь кызьы сюлмаськиськоды? - Со милям нырысетӥ интыын. Умой ужа столовоймы. Отын усьтэмын кондитерской цех. Ческыт тортъёс но мукетсэ пыжо кондитеръёс Мария Третьякова но Елена Анисимова. Соослэсь пыжиськемъёссэс ужасьёсмы но, городын улӥсьёс но шумпотыса басьто. Ческыт сиён-юон дасяло пӧрасьёс Надежда Косенко, Людмила Борнякова но Татьяна Лихачева. Соос пӧрало пельнянь но. Геннадий Романов. Токарь Инесса Сикова. Газосварщикъёс Шейхулла Касимов, Александр Адаев, Евгений Емельянов (бригадир) но Сергей Ельцов. Слесарь Александр Ившин. Зуборезчик Дмитрий Чернышев. Кондитеръёс Мария Третьякова но Елена Анисимова. Пӧрасьёс Надежда Косенко, Людмила Борнякова но Татьяна Лихачева. Туспуктэмъёсыз Владимир Беломорскихлэн. Гажано нылкышноос! Нылкышноослэн калык куспо нуналзы - одӥгез югытэз но шунытэз праздник. 8-тӥ Мартэ нылкышноосты ваньмыз ярато но гажало шуыса гинэ ӧвӧл. Та нунал асьмелы луонлык сётэ огсыр ужъёслэсь палэнскыны, тужгес но дуноез - яратон, семья, асьме улон сярысь малпаськыны. Вуись тулыс калыклэсь азьланезлы осконзэ улӟытэ. Котькудӥзлэн оскемез потэ, туала шуг-секытъёсты палэнтыны, кужымзэ но мылкыдзэ выльдыны, азьпала кышкатэк учкыны быгатоз шуыса. Та малпанъёслэн быдэсмемзы потэ кышномурт бордысь. Ӟечкыласько тӥледыз нырысетӥ тулыс праздникен! Удмуртиысь вань нылкышноослы сӥзисько шуд, котыр ласянь ӟеч улон но, валамон ни, тазалык! Вань чебер малпанъёсты мед быдэсмозы. Россия Федерациысь Кун Думалэн депутатэз Светлана СМИРНОВА. 8-тӥ Март азьын Кун Кенешлэн Бадӟым залаз люкаськылӥзы Ижевскысь школаослэн директоръёссы. Матэктӥсь нылкышно праздникен соосты ӟечкылазы Кун Кенешлэн Тӧроез А. Волков, солэн воштӥсез Н. Харина, Правительстволэн Тӧроезлэн воштӥсез В. Шудегов, калыкез дышетонъя министр Л. Захарова но коньдон ужпумъёсъя министр В. Бельтюков. Нылпиосты будэтон быдэсак нылкышноослы оскемын, тани уно школаосын но соос кивалто. Нош воргоронъёс школаосысь кошко - уждун басьтытэк улыны чиданзы уг тырмы. Соин ик та пумиськонын но вераськон мынӥз дышетӥсьёслы уждун тырон пумысен. Кивалтӥсьёс оскытӥзы, тулыс нылкышно праздникозь коньдон городысь школаосы вуоз шуыса. А. Волков тау кариз дышетӥсьёслэн Кун Думае быръёнъёсы мылысь-кыдысь пыриськемзы понна. Со осконзэ вераз, 26-тӥ мартэ но дышетӥсьёс Россилы президент быръёнлэсь но шаерамы ортчись референдумлэсь уз палэнске шуыса. Т. Миронова. Туспуктэмъёсыз В. Беломорскихлэн. ЛЫМЫ КОРОЛЕВА Та нылкышноен али вераськоно луысал ке, конечно, мон воксё мукетыз сярысь юаськысал: яратон, сяськаос, супыльтонъёс... Но ӵошатсконъёс дыръя лулскон висказ гинэ пумиськылӥм бере, тросгес пӧрмиз нылкышно кужым, чидан но вормон сярысь. Ойдо мед, соиз ваньмыз туж вакчи луэ - выжыкылын кадь, нош таиз - улон, солэн кечат- вамат, азьдорин но мыддорин, бездыт но чилясь нюжаосыныз. Антонида Александровна Трефилова но тани малы ке выжыкыллы пичи дырысеныз ик ӧз оскы. Атайтэк будӥзы, соин-а, мар-а. Туж жаль йӧтылӥз солы анаез - вань секытэз вылаз нуэ, юрттӥсез, пельпум пуктӥсез, лӥятӥсез ӧвӧл. Быгатэмзыя апаеныз но агаеныз ӵош юрттӥськыны выризы. Со понна пичи дырысен таза но кужмо будӥзы. Тоня ныл ке но, туж вожъяськылӥз атаен эшъёсызлы. Соин ик, лэся, бадӟым классъёсын дышетскыкуз ни куасэн бызьылонъя ӵошатсконъёсын синмаськиз тренерлы. Синмаськиз атайлы кадь. Возьмалляз солэсь визь-нод сётэмзэ, пельпумаз кизэ поныса, ӝот-ӝот индылэмзэ, лӧпкытъямзэ, ужъёсыз сярысь юалляськемзэ. Соин ик школа бере чик малпаськытэк Можгалась веттехникуме кошкиз. Татын уката пуромиз куасэн бызьылон мылкыдыз - уйёссэ но ӵошатсконъёсты, куас сюресэз адӟылӥз кадь. Кытчы но ӧз вуылы со, куасэн бызьылыса: Чебаркуле, Шушенское, Волдае, Пензае... Техникумез йылпумъяса, "Воткинский" совхозын ужаны кутскиз. Ужез кельше, но сюлэмызлы маиз ке уг тырмы, дышетскемез но потэ кадь. Нош Омскысь эшъёсыз ялан доразы шутэтскыны ӧтё (соос отысь институтын дышетскизы). Ветло но вал, но туж дуно, гостиницаед ик - ой-ой-ой. Тонялэн йыраз визьмо малпан лыктӥз: Омскысь кыӵе ке дышетсконние документъёссэ сётыса, абитуриент кариськоно. Сыӵеослы огвакытлы общежитие сёто ук. Озьы ик кариз. Собере шудыса сямен гинэ экзаменъёсты сётӥз но бертэмез но ӧз поты ни. Озьы гурт удысъя институтысь студентка луиз. Кӧня анаез сюлвориз, уг лэзьы вал. Мон, пе, быдэс улонме ужаса со быдӟа уждунэз ӧй адӟылы, тон, али кутскыса, 50 манет басьтӥськод. Антонида мыло-кыдо дышетскиз, котькуд ӵошатсконъёсы пыриськылӥз. Отысь вань спортсменъёсын тодмо ни вал. Институтсэ йылпумъяса, ӟеч уж шедьтӥз, но, анаез висьыны кутскемен, Шарканэ берытсконо луиз. Ӵектӥзы "Идеал" хозяйствое зоотехнике. Огвакытэ ик быдэсъяз ветврачлэсь но ужзэ. Ужзэ ӟеч валась специалистлы синмаськиз гурт калык но, кивалтӥсьёс но. Соин ик, "Идеал" хозяйство кыклы люкиськем бере, Трефиловаез Мыддоринэ кивалтӥсе пуктӥзы. Кышномуртлэсь кивалтӥсь луон мылкыдзэ нокин юась ӧй вал, луод, шуизы но тӥни. Кӧня пыкиськыны выриз,ӧз ик кылзэ. - Нефтяникъёс ас кылзы вылын туж чурыт сылыны быгато, уго, кызьы шуизы, озьы ик луоз, - вера Антонида Александровна. Нош хозяйствомылэн кузёосыз соос бере, кытчы-о пырод? Кык арзэ уйёссэ но кӧланы ӧз быгаты кышномурт. Йырысьтыз колхоз ужъёс уйлы но уг тӧлӟыло: кызьы кароно, кинэн лэсьтоно? Валалозы-а, уждунтэк чидалозы-а? Тӥни толон одӥгез шораз кесяськиз, пай курыса, нош со кемалась аслэсьтыз пайзэ валатэк нефтяникъёслы вузам ни, ох-хо та калыкен. Ӝамдэлы умме усьылэ но, нош тэтчыса кадь султэ - нырысь фермае ветлоно, собере конторае. Ой, ма укыр вазь на, вай-ко куасэн нискылско. Юзмыт омыр ымныраз ырак пельтэ, куас улаз лымы ӟырдаса кыле - кӧня ке улыса, калык доры задор мылкыдын вуэ ни Антонида. Озьы нискыламъёссэ кин ке со-та шуэ ке, мар - ваньмызлы ноку уд кельшы. Кин ке валалоз шат, куас тӥрлыклы сюрсъёсын коньдон быдтэмез? Нош Антонидалы соос шоголь машиналэсь дуногес. Бен, бен, угось куас басьтӥз Антонида... "Жигулизэ" вузаса. Аслаз коркаез ӧй вал бере, машиназэ вузаса пуктӥськиз, кылемезлы кемалась вӧталлям малпанзэ быдэстӥз - басьтӥз "Фишер" куас, ботинка. Вужгес ик но, яралоз ни. Ма, соиз но куать но ӝыны сюрс тыр луиз. Ӵапак соос ик республикаямы ортчем Гурт шудонъёсын кузёзэс финише котькинлэсь ӝог вуттӥзы. Выжыкылын кадь ширтӥз Антонида, шораз учкыса ик шурдоно. Нырысетӥ луон понна ӧз ке но тыршы, луиз. Дасяськемез но, тодмо гурезьёс но, тани та куасъёс но юрттӥзы. Азьвыл син ултӥзы учкылӥсьёс но дораз кожизы, вормонэныз ӟечкылазы. Валазы кадь вормонлэсь шӧмзэ, спортлэсь кужымзэ. Табере соослэн колхозазы - кык чемпион! Николай Батаногов но пиосмуртъёс пӧлын нош ик вормись луиз уго. Шонерзэ ке, одӥг машинаын кык чемпион луэ - колхозлэн председателез но солэн водителез. Юри но уд малпа. - Ноку но ӧй малпаллялэ-а бадӟым чемпионатъёсын, олимпиадаын нюръяськон сярысь? - юасько Антонида Александровналэсь. - Вал, дыр, олокыӵе но малпанъёс. Но али со сярысь вераськыны бер ни - ваньмыз луиз, дыр, озьы, кызьы кулэ вал. Мынам умой кусыпъёсы асьмелэн дано спортсменъёсынымы Владимир Никитинэн, Галина Кулаковаен, Тамара Тихоноваен... Туж данъяськисько эшъяськонэнымы, шумпотӥсько соос понна. Малпасько егит эшъёсы быгатозы сыӵе бадӟым вормонъёс басьтыны. Тани Катя Воронцовамы туж сэзь нылаш. - Кужмоесь-а спортсменъёс пуш ласянь? - Олокыӵе но дыр луылэ. Но мон аслым лябӟытскыны уг сётӥськы - тон кулэ, чида, вормы... Озьы ик улӥсько. Пиосмуртъёслы пичи дырысен уг оскиськы, соос туала арын йӧнзэс ыштэмын. Аслыд сокем оскыны уг яра, дыр, но... Вань гуртъёсын кужмо нылкышноос! З. РЯБИНИНА. Солдат дӥсен нылъёс Арня ӵукна вал со. Ческыт уммен изе калык. Вань улосъёсы, шаеръёсы вӧлмиз лэсянтэм кыл - "война". Радио шимес иворез быдэс дуннее вӧлмытэ. Вань городъёсы, гуртъёсы шуккисько "Асьмелэн ужмы шонер, асьмеос вормом!" кылъёс. Калык бугырскиз. Тушмон лёга асьме музъемез. Вирен саптам сапегъёссы, шуръёс, нюлэсъёс но лудъёс вамен потыса, пумен пыдло мерско. "Вставай, страна, огромная..." - чузъяське секыт ожлэн нырысетӥ нуналъёсаз ик гожтэм кырӟан... Соку тросэз аслэсьтыз ачиз юаз: кытын мынам интые, сьӧд кылез вормон понна ма лэсьтыны быгатӥсько? Гозыен кадь кыстӥське калык военкоматъёсы. Пиос пӧлын егит нылъёс но оже курисько. Тросэзлэн уго мусо гажанъёссы ожен пумиськизы кунгож дурын ик... Ож сюресъёс та нылъёсты вуттӥзы одӥг липет улэ. Кытысь гинэ ӧй вал соос: Сибирьысь, Уралысь, Уй пал зарезь дурысь, Ока но Москва шур дуръёсысь... Удмурт шаер но аслэсьтыз нылъёссэ шуныт гур вылын ӧз возьы, троссэ келяз ожмаськон лудъёсы. Шонерзэ ке верано, кин кытысь, сое юаны но дыр ӧй вал. Шат ваньмон дыр шедьыку гинэ нылъёс мадьылӥзы вордӥськем палъёссы, лушкем малпанзы сярысь, сюлэмзэс усьтылӥзы эшъёссы азьын. Люся Белова уйвӧтаз но адӟылӥз кезьыт зарезетӥ йӧослэсь уямзэс, чорыгамысь бертӥсьёсты. Катя Николаева мадьылӥз Гусь Хрустальный городысь нылъёслэн синмаськымон чебересь пияла посуда лэсьтэмзы сярысь. "Яратӥсько мон аслэсьтым городме", - шуылӥз со, войналэсь дугдэмзэ витьыса. Нарядысь бертэмезлы быдэ Зоя Ладыгина гожтэт сярысь юалляськиз: туннэ но, пе, вуымтэ-а? Мӧзме со Обь шур дурысь городэзлэсь. Нош таиз Шура Воробьева, Ока шур дурын ик гуртэз. Сое шугъяськытэ ини аръёслэн ортчемзы. Трос ӝытъёсы гуртысьтызы пиен пумиськылӥз. Соос ог-огзылэсь номыре ӧз ватылэ. Сюан сярысь но вераськон ӝутылӥзы. Сое сӥзьыллы кельтэмен, шулдыр гуръёслы жингыртыны ӧз кылды. Егит пиез ожлэн нырысетӥ нуналъёсаз армие келязы. Шура одӥг гинэ гожтэтсэ басьтыны вуиз. Собере иворъёс ӧй вал ни. Шура тодӥз гуртысьтызы эшъёсызлэсь: гажанэз бырем Москва дорын лек ожмаськон дыръя. Соин ик Воробева, кема малпаськытэк, мынӥз военкоматэ. Тушмонлы пунэмзэ берыктон вылысь малпанзэ вераз. Шураен ми, пумиським Кыкетӥ Украинской фронтысь огаз дивизионын. Ныллэсь верамзэ кылзӥсько но тодмо интыос син азе пуксё. Ока шур вамен пыжен потэмме тодам ваисько. Огпол со шуиз уго: мон, пе, Дощатое гуртысь, оло, кылэмды вань. Кылэме гинэ ӧвӧл, ульчаостӥз ортчыны кылдӥз. Ока шурлы кыдёкын ӧвӧл, улыггес интые пуксем гуртлэн урамъёсаз пулъёс вӧлдэмын. Соин но, дыр, солы Дощатое ним сётэмын. Котькинлэн аслаз сямыз, улон кынарыз но малпанэз-сюлмаськонэз. Дивизионын нокин ӧз тодылы Наташа Никитиналэсь одӥг солдат шоры лушкем учкылэмзэ. Нош сибиряк Сидоренко сое шӧдэм. Со ватытэк юам: кулэ-а мылкыдэз ватыса возьыны? Озьы шуэм ке но, яратонэз шараясь ӧй вал, солэн, пе, дырыз вуоз. Уть ай, тушмон чигна ке но, пиньзэ ӟар поттылэ на. Со тодэ, асьме дорын укылтэмъяськемез, трос адямиослэсь улонзэс тугамез, городъёсты, гуртъёсты куашкатэез понна кыл кутоно луоз шуыса. Кужымлы пумит кужым султӥз. Тани асьмеос но, Молдавиысен кутскыса, Румыния, Венгрия, Словакия, Австрия, Югославия пыр ортчим. Котькыӵе дырыз вал. Тушмонлэсь малпанзэ но, сьӧсь планъёссэ но куашкатыны тыршим. Со понна асьмемыз та дивизионэ ыстӥзы. Таӵе вераськон ог-огдэ эскерон понна вал. Яратон пумен мургес бугыртӥз кык сюлэмъёсты. Соос витизы ож куаралэсь дугдэмзэ. Вуиз сыӵе нунал. Марина Соколова, нарядысь берытскыса, нылъёсты паймытӥз: - Ой, эшъёс-солдатъёс, мар верало мон тӥледлы. Война дугдэм! Ас пельыным кылӥ, номыре ватсатэк верасько. Нылъёс вылысь шобретъёс палдӥзы. Кин кӧлон интыяз пуке на, кин выж шорын эктэ ни. Шумпотонлэн пумыз вӧл. Ӝоген, туж ӝоген нылъёс бертон сюрес вылэ потозы. Ма, озьы ик вал со - бертыны лэземын, документъёс гинэ кулэ на. Штабе лыкто пӧртэм сэрегъёсысь, шаеръёсысь солдат дӥсен нылъёс. Пыре веськрес мугоро, тӧлам ымныро ныл. - Тыныд кытчы? - юа штаблэн начальникез. - Кытчы мон мыном, Удмуртиын мынам выжыосы но, вайёсы но. Отын монэ трос толэзь ӵоже витё ини. Ираида Георгиевна Суслопарова (али Блинова) мӧзмем сюлэмзэ но, кемалась малпанзэ но ӧз ваты. Солэн дышетӥсь луэмез потэ. Пыроно институтэ. Нош куд-ог тодонъёсыз война вылтӥ тӧлӟыны вуизы, со шугъяськытэ нылэз. Ӧз аналскы. Бертэмез бере ик учебникъёсты усьтӥз. Трос аръёс ӵоже Блинова Ижевскысь пиналъёсты дышетӥз. Солы сётэмын дано ним. Али но дышетэм нылъёсыз но пиосыз тау каро улонэз, наукаез валаны-тодыны юрттэмез понна. Тодэ лыктэ на Архангельскысь ныллэн Люся Беловалэн ӝож мылкыдын бертыны дасяськемез. Сыӵе дыръя юатэк чидалод-а? - Ма луиз? Ваньмыз бурдъяськемын, нош тон?.. - Нош мон кытчы мыном, кин вите монэ? Детдомын улӥсь сузэре ке шат... Анае но, атае но ӧвӧл ни. Мыным сузэрме быдэстоно луоз, дыр... Наташа Никитина сярысь кӧня ке кыл верай ини. Ӧйтӧд, гуртазы сюан вал-а, нош Болгарилэн столицаезлы матысь Банни гуртын сюан вал, шуыны луоз. Дивизилэн командирез доразы бертӥсь солдатъёслы но офицеръёслы сӥзем ӝыт ортчытыны дэмлаз. Пуко радистъёс, связистъёс. Соос пӧлын - Наташа но солдат-сибиряк. Ӧжытак шӧмъяськем бере, отысь но татысь кылӥськизы: - Курыт! Курыт! Наташалы но сибирякезлы султоно луиз. Нырысьсэ соос калык азьын чупаськизы. Табере номыре ватыны кулэ ӧй вал ни, ваньмыз шараяськиз. Та дивизиен ӵош мон кузь сюресэз ортчи. Ваньмыз матысь эшъёс луизы. Нош люкиськоно луиз но, доразы бертӥсьёсты Пловдив городозь келяй. Софияысен пуксим поездэ. Мышке кылё ини Витоша гурезь, инкуазен сётэм шулдыр интыос. Шӧдӥське нылъёслэн ӝутскем мылкыдзы. Ог-огзылы адресъёссэс сёто, кусыпсэс ыштонтэм верасько. Кӧня, пе, кунъёстӥ ортчим, пӧртэм кылын вераськись адямиосын пумиськылӥм. Котьмаиз вал. Кин ке но сюлмысь юрттӥз, шорем няньзэ шори люкылӥз. Оло, вал кырыж учкисьёсыз но. Соос асьсэлэсь лек ымнырзэс шара ӧз возьматылэ. Ма карод, умоез пӧлын уродэз но шеде. Мылкыд умой ке, кырӟан но паськыт тулкымен ӧръяське. Кин ке но сое мытӥз ини: Хороша страна Болгария, А Россия лучше всех. Кырӟась вагонъёсты келяса, болгаръёс кизэс шонало, шудо сюрес сӥзё. ... Кемалась вал ини со. Нылъёсын пумиськыны выльысь ӧз кылды. Мон оскисько, Ираида Георгиевна Суслопарова сямен ик, соос асьсэлы сюлэмазы кельшись удыс шедьтӥзы шуыса. Нылъёс туж егитэсь вал ук ай, куд-огезлы кызь арес но тырмыны ӧз вуы. Озьы ке но, соос кужмоесь вал. Василий СМИРНОВ, отставкаысь капитан. Людмила КУТЯНОВА Нэнӥелы Та ортчем аръёсме Ӝамдэлы чигнато, Самой со гож сьӧры Кӧня ке ӝегато, Ку ӝужась улонам Визь пыры ӝабырскиз, Ку вадьсам, нэнӥе, Тусбуед ӝуатскиз. Тылсиясь шундылы, дыр, Соку тон кельшид Я мынясь кизили пыр Астэ возьматӥд - Губырмем вакытад но Егит потӥськод, Пужмерам юг йырдэ нош Йӧно нуллӥськод... Котькинлы но аслаз Нэнӥез ик мусо, Котькинлэн сюлэмаз Со улэ ог тусо. Но улон жалясьтэм - Весь куаса но куаса, Пересьмон жалектэ, Ас палаз карыса. Улон кысоз Таӵе кышкыт кылъёсты верало Инсьӧрез чакласьёс. Но сокем эн куалектэ - со дырозь кема на. 500 миллион ар ӵоже Музъем бергалоз, шунтоз, сюдоз-вордоз. Америкаысь учёнойёс верамъя, Музъемлэн азьпал улонэз герӟаськемын солэн матысь кизилиен - Шундыен. Нош таиз пӧсьгес но пӧсьгес луэ. Озьы планетаямы климат но пумен воштӥське. Кызьы валэкто тодосчиос, Музъем вылын шоро-куспо шунытлык 60 градусозь вуиз ке - улон быроз. Соку ву пар луыса вылӥе ӝутскоз, стратосфераын солэн молекулаез кислород но водород атомъёслы люкиськоз. Таиз эшшо но кыдёке, Космосэ, лобӟоз. Ӵошатон понна али Россиын шоро-куспо шунытлык - 2-4 градус. Та пумысен ик вань мукетыз малпан. Музъемез, пе, лобан сюресысьыз донгыны быгатоз бадӟым Юпитер планета, тазэ интыысьтыз кыӵе ке кизили вырӟытӥз ке. Та учыре Музъем Шундылэсь кезьыт Космосэ палдоз. Конституция Удмуртилэн президентэз егитгес луыны быгатэ Удмуртиын референдумлэн дырыз матэктэмъя, Конституция бордын ужась комиссия арнялы быдэ люкаськылыны кутскиз. Берло кенешоназ, 3-тӥ мартэ, комиссия йыла-пумаз вуттӥз Конституцилэсь Кун Кенешлэн быдэсъяно ужъёсызлы сӥзем 81-тӥ-91-тӥ ёзэтъёсты эскеронэз. Кызьы шуиз комиссилэн секретарез К. Глухов, та ёзэтъёсы ватсанъёс пыртэмын вал, огкылэ кариськыса. Со нуналэ ик комиссия выжиз "Удмурт Республикалэн Президентэз" нимо ёзэтэз эскерыны. Глухов верамъя, та ужпумез эскерон секытгес мыноз. Со шӧдӥськиз ини таӵе юанлы "Кин быгатэ Удмуртиын президент луыны?" валэктон сётыку ик, комиссия таӵе ӵектонъёсты лыдэ басьтӥз. Президент луыны быгатэ Удмуртиын улӥсь гражданин. Нош кӧня ар со улэмын та шаерын, Конституцие пыртыны чакламын ӧвӧл. Президентэ 30 ареслэсь егит муртэз ӵектыны уг яра. Россилэн Конституциезъя президент луыны уг быгаты 35 ареслэсь егит мурт. Комиссия ас ужзэ азьланьтоз 10-тӥ мартэ. Т. МИРОНОВА. 8-ти Мартлы Удмуртлэн курегез но удмурт Ӟучъёс, бигеръёс пӧлын ужаса но ӟуч картэн улыса, Антонида Александровна удмурт кыллэсь туж мӧзмылӥз. Уж бере яке шутэтскон нуналъёсы ас калыкед пӧлы пот вал, нокин ӧтись, люкась ӧвӧл. Сарапулын удмуртъёс трос ке но, вордскем кылзы борды уг кыстӥсько. Шаркан районысь Сосновка палъёсаз бертылыкуз ини Антонида Александровна кӧтыз тырымон бӧтьыртӥз ас кылыныз. Нош пиосыз озьы ик ӧз дыше удмурт кыллы, гуртэ дырын-дырын гинэ бертылӥзы угось. Антонида Александровна Щина кызь ньыль ар ужаз Сарапулысь радизаводын. Пенсие потэмез бере ини мылкыдзэ буйгатыны быгатӥз. Удмурт культурая огазеяськонлэн ёзэз Сарапулын кылдэм бере тямыс нылкышноос-пенсионеръёс кырӟанъя асьсэлэсь ансамбльзэс кылдытӥзы. Но удмуртлыклы Сарапулын бадӟым саклык ун висъяськы бере, кырӟаны яратӥсь песянайёслы шуг-секытъёсын пумиськоно луэ. Кытчы ке мыноно ке, машина ӧвӧл. Концертъёс дыръя но ӵемысь соосты учкисьёс радэ пукто. Ярам, ӟуч культурая огазеяськонысь баянист соосын ужаны соглаш луиз, шугъяськытэк шудэ удмурт гуръёсты. Удмурт Республикалэн нуналэзлы сӥзем праздникын Сарапулысь нылкышноос но быгатэмзэс возьматӥзы. - Туж сюлэмшугъяським, - шуэ Антонида Александровна. - Милемлы ивортыкузы, праздник нуналозь куинь нунал гинэ кылемын на вал. Ай эшшо ке милемды нырысь ик сцена вылэ поттӥзы. Костюмъёсмы но мукетъёслэн кадь йӧназ ӧвӧл. Мон тани аслым шортдэрем вури шарканъёслэн кадь. Городлэн пӧртэм сэрегъёсаз уло бере, песянайёслы ӵем уг кылды пумиськылыны. Но огинэ люкасько ке, мылкыдзэс ог-огзылы ӧръяло ини. Дасэтӥ арзэ гинэ Антонида Александровна эшъяське "Удмурт дунне" газетэн, аслэсьтым кылме медам вунэты, пе. Улэ со пиеныз ӵош. Пиез вала анаезлэсь удмуртлык борды кыстӥськемзэ. Газеттэк синтэм мурт кадь улӥсько, - шуэ кышномурт. - Дуно дунын но гожтӥськисько. Пие но кытӥ-кытӥ юа, мар, пе, гожтэмын газетад. Вераса пукисько. Но ӧжытгес потэ газетты, арнялы куинь пол потӥсь маке уг тырмы лыдӟыны. Газетэз киям кутэм бере нырысь ик утчасько, мар гожтэмын Шаркан район сярысь. Лыдӟыны кутскисько ньылетӥ бамысен, собере шорзэ учкисько, нырысетӥ бамзэ берлолы кельтӥсько. Телевизор пыр яратӥсько учкыны "Шаер" передачаез. Вордскем кылызлэсь мӧзмыса, кышномурт удмурт сямен вераське коӵышеныз, пуныеныз, курегъёсыныз. Удмурт тусо адямиослы кытӥ-кытӥ урамысен но ас кылынызы вазиське, валалозы, шумпотозы кожаса, лэся. Но малы ке но соосыз паймытско, валаса но верамезлы пумит ӟуч сямен вазисько. Л. Малых. 01 ивортэ Чильым пум но куректон-кайгу Ар кутсконысен республикаямы 300-лэсь трос пол тылпу пуромылӥз ни, соин сэрен 1 миллион 760 сюрс манетлэсь ятыр изъян лэсьтэмын. Тылӝуэ сюрыса бырыны шедиз 32 адями, кылем арын та вакытэн ӵошатыса куать адямилы уногес, 17 адями сӧсырмиз. Азьло таӵе лыдпусъёсты шараяны уг лэзё вал, калык, пе, медам тоды ваньзэ. Нош али мар сюрем ваньзэ верано кожаськом. Ми малпаськом вал, таӵе шимес лыдпусъёсты, кышкытэсь учыръёсты кылыса, телевизор пыр учкыса яке газетъёсысь лыдӟыса, асьме калык пумен-пумен визьмаськоз, дыр, шуыса, нош со озьы вылымтэ. Учке али, ӵем потась тылпуослэн лыдзы будэ, тылпуэ сюрыса бырем адямиослэн лыдзы озьы ик йылэ. Нош тылпу потан мугъёсты эскерыса валано, соос азьвылъёсыз ик кылё. Тылэн чакласькытэк вырон, уката ик кудӟем йырын но чильымен, сӧриськем-куашкам ӵын потон гумыос, электролэсь шуныт поттон арбериосты чаклатэк вунэтыса кельтон, электроезъёслэн ваче етонзы но нылпиослэн тылын шудонзы - тӥни ма вуттэ кайгуэ. 19-тӥ феврале тылпу ӝутскиз Ижысь Пушкин нимо ульчаысь 243 номеро юртын. Тылпу кысӥсьёс дыраз вуэмен гинэ ӵынэн тырмем коркась кулон радэ вуэм воргоронэз ульчае поттӥзы но больницае келязы. Нош тылпу потон муг - кудӟем йырын чильым кыскон. Та нуналэ ик та выллем учыр вал Ижысь Руднев нимо ульчаысь 42 номеро пу коркан. Тылпуэн сэрен изъянмыны сюриз юрт но ваньбур. Тылӝуэ сюрыса быриз 32 аресъем воргорон. 24-тӥ феврале вить часэ ӵукна, тылпу потыса, Як.-Бодья ёросысь Варавай гуртысь клубзы быдэсак пеньлы пӧрмиз. Нош мугез озьы ик - чильым пум. Отын угось туж шулдыр пумиталлям Атыкай музъеммес утисьёслэсь нуналзэс. Тужгес но шимес учыр вал 26-тӥ феврале. Ӵукна 7 часын тылпу ӝутскиз Ижысь Литвинов нимо ульчаысь 148-тӥ юртын. Корка сутскиз, нош куинь адями ӵынэн воньдыса быриз. Тылпулэн мугез - электролэсь ас киын лэсьтэм шуныт поттон арбери. Тулыспал толэзьлэн нырысетӥ нуналаз ог кык час уйшоре тылпу потӥз Сарапул городысь Дубровский нимо переулокысь куинетӥ номеро коркан. Тылпу кысӥсьёс вуыку, корка быдэсак ӝуа ни вал, кысыны гинэ кутскизы, шӧдтэк-шорысь витьтон литрьем газ баллон пуштыса, тыл эшшо но зол лопырскиз. Озьы ке но, тылпу кортнамын вал. Туж жаль, корка сутскиз, нош тужгес но жаль мукетыз , та тылӝуын бырыны шедиз 13 аресъем нылаш, нош 86 аресъем песянай сӧсырмыса больницае шедиз. Тылпу тупатъямтэ гур бордысь потэм. Озьы тӥни асьме калык, йырыныз малпаськытэк - ас киыныз ассэ быдтэ. Гажано эшъёс, утиське тылпулэсь! Дыраз эскере но тупатэ гуръёстэс, учкелэ но воштэ вужмем электроезъёстэс, чаклалэ чильым пумъёстэс. Ӝоген вуозы шунытэсь нуналъёс, ойдолэ ваньмы ӵош сое пумиталомы, ог-огмес ыштытэк. Н. Ильин. СПОРТ Баскетболэн шудонъя вылӥ лигаысь "ИЗП-Университет" команда туэ суперлигае потон вылысь нюръяське. Алигес со дораз кык пол вормиз Волгоградысь азьпалан мынӥсь "Надеждаез" (63:53; 82:69). Читаысь "Дауриен" шудон Ижысь нылъёс понна капчиенгес сётӥськиз. Нырысетӥ нуналаз 76:57 лыдын вормизы. Мукетаз пумиськонын но кузёос капчиен вормонлы оскиллям. Янгышазы... Турнир таблицалэн пумазгес интыяськем командалы ӧжыт гинэ ӧз келялэ. Шудон пумын нылъёсмы "сазьтӥськизы" но очкооссэс утӥзы ик, кунооссэс 69:65 лыдын вормизы. *** Вазенгес шаерамы зол радъямын вал "Зарни шайба" приз понна ӵошатсконъёс. Арысь аре отчы уно сюрс нылпиос пыриськылӥзы. Ӵапак таӵе азбар нюръяськон-ӵошатсконъёс пыр потыса, бадӟым спортэ сюрес лёгизы вал Александр но Игорь Орловъёс, Мисхат Фахрутдинов, Сергей Лубнин но мукетъёсыз. Пиналъёслэн та тужгес яратоно шудонзы туэ выльысь улӟиз. Ас ёросъёсазы, городъёсазы нюръяськыса, егит хоккеистъёс турнирлэн финал люкетаз Иже люкаськизы. Жаляса верано, 13 команда гинэ вуиз. Кужмоосыныз лыдъяло Ижысь "Гвоздика" командаез, Вотка ёросысь Новый посёлокысь покчи хоккеистъёсты. *** Тупен хокейя нырысетӥ дивизионын шудӥсм Воткинскысь "Знамя" ас зонаяз вормисе потӥз. Табере асьме хоккеистъёс нюръяськозы мукет зонаосысь 5 кужмоосыныз. Финалын вормисе потэм командалы сюрес усьтӥськоз вуоно сезонын суперлигаын нюръяськыны. М. Кузьмин. Паллянэ уг кожаськы монолог Осто! Нош ик вуэ ни 8-тӥ Март. Воргоронъёс усьтыр-табыр бызьыло, бурезлы но, паллянэзлы но кузьым утчало. Мон но итӥськи бордазы. Ачим чылкак паллян ке но, отчы- татчы кожан сямы ӧвӧл. Паллянэ мынӥсько шуи ке, тод, мон кышное доры дыртӥсько. Нош со, албасты, уг вала, ваньзэ паллян киын лэсьтӥськод бере, паллянэ кожаны но яратӥськод, шуэ. И куаньгетэ ук, и куаньгетэ. Кӧт уг веська! Одӥг-кык пол небыт интыяз но шлачкетэме вань - шудыса сямен. Но та учыре малы ке бурыз киы гинэ мынэ, паллянэзлэн вырӟемез ик уг поты. Мар сярысь ай мон озьы? А-а, 8-тӥ Мартлы кузьым кулэ вал - крезьгуро открытка, отын "Пуны вальс" гожтэмын медло. Ижысь одӥгаз магазинэ пыри но верасько, озьы но озьы, кышноелы кузьым кулэ вал. Кутскизы ук котканы. А мар отын серемез. Кинлы кыӵе вальс кельше ини: одӥгезлы коӵыш вальс, мукетызлы - пуны вальс яке лымы вальс, нош кинлы ке - серенада. Тани уж дурамы нылкышноос чиньыосы тэронтэм, котькыӵеез вань: гордэз, сьӧдэз, тӧдьыез, пурысез, лызэз. Мар малпаськоды, соос ваньзы одӥг гуръя экто-а? Осто! Уйвӧтам гинэ но адӟи ни соосты. Маялляло, ӟыгыръяло, чупало, кытчы ке но чиньыенызы ӧтё. А кытысь мон соослы ваньзылы кузьым шедьто? Мырдэм мозмытски ки улысьтызы, улӥ штани коже кылиськем. Малпасько, кызьы табере кышноелы возьматском ай. Нош соос, шайтан басьтэмъёс, сьӧрам уисько. Милемды уд яратӥськы, "Коӵыш вальс", пе, тыныд кузьмано. Кесяськытэк ӧйлась. Караул! Юрттэ, шуисько, мон кышноме гинэ яратӥсько, нокыӵе "Коӵыш вальс" кулэ ӧвӧл мыным. Со вие ик йыг! гинэ кӧтурдэсам мырӟись луиз. Сайкай. Кышное вӧзын кыллисько. Дол-дол шорам учке. Ма, пе, уйвӧтад но монэ тодад ваиськод бере, мурт азбаръёстӥ йыромыса уд ветлцмрс ик, дыр. Озьы шуыса, лыч сузьымонам ик чуп кариз. Табере малпасько ни, "Пуны вальс" интые, кышноелы серенада кузьмало. Лана Светина. ЖУРНАЛИСТЪЁСЫН ПУМИСЬКОНЪЁС КУЛЭ-А МУЗЪЕМЛЫ КУЗЁ Берло дыре пумен тросгес вераськонъёс пото музъемез кузёослы вузан сярысь. Со бен юнме шорысь ӧвӧл. Россиын сое ваньбур карыны дасясько. Соин герӟаськемын вал азьвыл Президентлэн Б.Ельцинлэн Музъем сярысь кадастрез кутонлы пумит луэмез. Тӥни та но куд-ог мукет ужпумъёс сярысь Удмурт Республикаысь Правительствоын журналистъёслэн пумиськоназы рос-прос кенешон мынӥз. Пресс-конференциез нуиз республикаысьтымы Музъемъя но сое радъянъя комитетлэн кивалтӥсез ВЯЧЕСЛАВ КУНШИН. - Али ми законъёстэк ужаськом, шуыны луоз, - ивортӥз Вячеслав Иванович. - Россиын кутэмын ӧвӧл Музъемъя кодекс но кадастр. Нош музъем огшоры ваньбур ӧвӧл. Сое одно ик лыдэ басьтоно. Ми укмыс ар ужаськом ни. Янгышъёс ӧм лэсьтылэ на. Удысамы быдэс республикая ваньзэ-ӧвӧлзэ 106 мурт ужа. Но али милемды кулэстон сярысь верасько, музъем кадастръя палатаос кылдытыны чаклало. Соос калыклэсь дун басьтыса музъемез юнматъялозы (регистрировать карозы). Музъемез сётыны уг яра предприятиослы, организациослы но учреждениослы (юридической лицоослы). Сое висъяны луэ нимаз адямиослы лэсьтӥськыны, сад-бакча возьыны гараж пуктыны но мукетызлы. Вячеслав Куншинлэн ивортэмезъя, музъемез вузаны вазь на. Озьы ке но, Росиын но Удмуртиын сое ваньбур карыны мылкыд карисьёс вань. Соос чик кӧбератэк шуо: музъемез, пе, вузаны ӧд ке лэзьы, страна куашкалоз. Кинлы бен со кулэ? Нырысь ик, Западысь но США-ысь фирмаослы, МВФ-лы но музон банкъёслы, Россиысь Березовский, Чубайс, Гусинский, Абрамович кадьёслы но мукет узыр адямиослы. Соин сэрен президент Музъем кодекс вылэ кизэ уг нюрты. Огласянь со озьы, нош мукет ласянь, музъемез пайдаё кутон сярысь "сюлмаськись" Черниченко выллемъёс ымазы ву ӟузем кадь асьсэды возё. Странаысь либералъёс вис карытэк калыкез пӧяны выро, музъемез вузаны лэзьытэк, пе, экономикамес ум юнматэ, вань шуг-секытъёсты ум быдтэ, азьлане ум вамыштэ. Со чик но озьы уз луы, чылкак мукет сямен берытскоз - ас музъем вылаз крестьян калык ляльчи кылёз. Тӥни мар понна либералъёс-егит реформаторъёс нюръясько. Табере асьтэос малпаське ай, та быдӟа музъемен Россиын та удысэз куашкатӥм ке, кызьы бен улонмес умоятом, экономикамес азинтом? Чик валантэм. Ведь калык хозяйствоысь ваньмыз сямен удысъёс АПК-ен герӟаськемын. Мар бен луоз азьланьын? Ваньмыз потоз, кинэ Россилы президент быръём. Малы бен музъемез одно ик вузано? Со асьмелы чик но кулэ ӧвӧл. Музъем рынок лэсьтыны луэ, сое вузатэк но, арендае сётыса, ӟеч уже кутыса, уно пайда поттыса. Тани Израильын одӥг вамыш музъем но вузамтэ, государство сое кияз возе, нош США-ез, пе, сюдо фермеръёс. Но кызьы бен Америкаез ӵошатод Россиен. Асьмелэн дас ар талэсь азьло фермеръёсмы вордӥськизы, колхоз-совхозъёслэсь нимъёссэс вошъямы но удысын югдур кабзэ уг воштӥськы, арысь аре уродме. Фермеръёсмы, будэм интые, син азьын кулэсмо. Гурт хозяйствоосмы пумен лябӟо, котыр ласянь куанермо, техниказы быре ни, бусыоссы сюбегало. Тани удмурт шаерамы али 102 сюрс гектар муосмы аналтэмын, отын жаг турын будэ. Огласянь вераськиськом музъемез вузаны лэзён сярысь, нош мукет ласянь, сое ӝоген гырыны-кизьыны нокинлы луоз. Туннэ жаляса верасько, государство куштӥз фермеръёсты, гурт хозяйствоослы уг юртты, шуыны луоз. Соин ик гурт хозяйствоосмы 2-3 ар чидалозы на-а, уз-а - шуг вераны. Куд-огезлэн дэмламез потэ, фермеръёслы, пе, кредит сётоно. Но кызьы сое басьтод сыӵе бадӟым процентэн. Вылаз ик, дунъёс будо техникалы, минерал сылалъёслы, транспорт услугаослы, электротыллы, машина ёзъёслы но музонэзлы. Я, шуом, фермер басьтӥз коньдон ссуда, сое уже кутӥз, но со чик утьымтэ ук инкуазьлэн вошъяськемезлэсь (кӧс гужем, сильтӧл, мултэс зоръёс луыны быгатозы). Со урожайтэк кылёз, нош кредитэз берыктоно, но кызьы, маин? Государство нош ик палэнске музъем ужасьлэсь. Нош мукет странаосын озьы уг уло: сиён-юон поттӥсьёслы, музъем вылын ужасьёслы котьку юртто. Асьмелэн ваньмыз мыддорин лэсьтӥське. Тӥни озьы улӥськом-вылӥськом. Кунгож сьӧрысь "эшъёсмы" странаямы (Чубайсъёслэн юрттэмзыя) промышленностез, лэсьтӥськонэз, калыклы услугаос сётонэз куашкатӥзы. Табере соос басьтӥськизы гурт хозяйствоез, чугун сюресэз быдтон борды. Но соослэн номыр уз пӧрмы. Сыӵе осконэ. Геннадий РОМАНОВ. 8-тӥ Мартлы Адямилэн чеберез Сяська ӧз кыльы пушйытэк Туэ январь толэзе Нина Ивановна Беляниналы тырмиз тямыстон арес. Арлыдыз бадӟым но ни сое дорысьтыз уд шедьты. - Клубын со, - валэктӥз нылыз Валентина Константиновна Шапошникова. Ӝытазе но ӧй шедьты нылкышноез дорысьтыз, клубысь вуымтэ на вылэм. Н. И. Белянина дышемын калык пӧлын луыны. Кӧня арзэ ини ветлэ Устинов ёросысь калыклы улон-вылонын юрттэт сётонъя центрлэн клубаз. Татын ортчыло пӧртэм ужрадъёс. Пенсионеръёсын ӵош театре, концертэ, лекциосы ветлэ. Клубын ужа керттӥськонъя кружок, Нина Ивановна отын староста, аслаз быгатэмезлы мукетъёссэ но дышетэ. Кылем арын аслаз семьяезлы кызь вить мамык кышет керттӥз. Мукет сямен но лул-сюлэмзэ буйгатыны быгатэ со. Сизьыметӥ арзэ ини та мыло-кыдо кышномурт ветеранъёслэн хоразы ветлэ, концертъёсы пыриське. Егит дыръяз Нина Ивановна селоысь комсомол огазеяськонлэн секретарез вал. 1942-тӥ арын мукет комсомолецъёсын ӵош ыстӥзы фронтэ, разведчикъёс но прожекторен югдытӥсьёс кулэ вал. Ниналы кема ӧз кылды ожмаськыны, синмыз ляб адӟемен, дораз ыстӥзы. Эмъяськиз ни Киров улосысь Уржум городын. Нина Ивановнаез улон ӧз эркия. Но со шуг-секытъёслэн кузязы ӧз ветлы. Уржумысен уже интыяськиз огназы куштэм, калгись нылпиосын ужанъя инструкторе. Капчи ӧй вал, уен-нуналэн тэк улонэз ӧз адӟылы. Война вакытэ но война бырем бере урамъёсы кылем нылпиос укыр трос вал уго. Соосты шедьтыса миськылӥзы, дӥсязы-кутчазы, сюдылӥзы н нылпи юртъёсы интыяллязы. Та вакытэ ик нылмурт бызиз. Картэз ужаз НКВД-ын секретарь луыса. Ӝоген егитъёслэн вордӥськиз нылзы но пизы. Но семья улонэз ӧз удалты Нина Ивановналэн, картэз кошкиз мукет кышномурт доры. Нылпиоссэ кутыса, 1946-тӥ арын со улыны кошке Татариысь Зеленодольск городэ. "Бытовик" артельын кассир луыса ужаз. Пумитаз аслэсьтыз шудзэ, кыкетӥзэ бызиз. Картэныз дас сизьым ар улӥзы. Но одӥг пол со кошкиз Кунгуре, отысь ӧз берты ни. Кытчы гинэ ӧз вазиськылы кышномурт, пайдаез ӧз луы. Ньыльдон куать аресказ укмыс нылпиосын огназ кылиз. Ваньзэс утялтӥз, пыд йылазы ӝутӥз, ужез гажан мылкыд пыӵатӥз. Карттэк кыльыса, Н. И. Белянина кӧня ке арзэ ужаз Верхне-Камской леспромхозын. Татын ик ужлэсь шӧмзэ ас вылазы шӧдӥзы нылпиосыз. Дас ньыль арескысен соос семьязэс сюдыны юрттӥзы ни. Вордӥзы пудо-живот, бакча сиён мерттӥзы. Со но юрттӥз секыт аръёсты пыр потыны. Витьтон арескын Нина Ивановна пенсие потӥз. Семьяеныз улыны лыктӥзы Ижевске. Квартиразы ӧй вал. Дворникын ужаса, 24-тӥ школа юртын но улоно луиз, собере - лэсьтӥськисьёслэн общежитиязы. Улон югдурез сярысь Москвае гожтэмез бере ини ньыль комнатаен квартира сётӥзы. Али со улэ Валентина нылызлэн семьяеныз. Валентина Константиновналэн анаезлэн сямен ик семьяез бадӟым. Аслаз одӥг пиез, солы кызь куинь арес ни. Семьяязы утялтыны басьтӥзы на вить нылэз но куинь пиез. Одӥгез нылашсы бызиз ни. Валентина дышетскиз педучилищеын, ужаз нылпи садын воспитательын. Шуге-леке усем нылпиосты али ас дораз утялтэ-будэтэ, уло одӥг семья кадь. Анаез сямен ик пиналъёсты пичиысен ужлы дышетэ. Вуж Чультемын та семьялэн вань 37 сотка музъемез. Отын будэто пӧртэм бакча сиёнъёс, картофка. Вань корказы, гаражзы, мунчозы, автомашиназы. Шофёрын - Валентиналэн картэз Николай Александрович. Со ик бакча сиён нуэ-вае, нылпиосты сад-бакчае нуллэ. Пиналъёс ужлэсь уг палэнско, бакчаын утялтӥсько, анай- атайзылы юртто кролик, курег, ветыл будэтыны. Нина Ивановна Беляниналэн куать кенэз но куинь эмеспиез, кызь вить внукъёсыз, но сизьым правнукъёсыз. Дуно анайзылы но песянайзылы соос сюлмысьтызы тау каро улон сюрессэс югдытэмез понна. В. Лагунов. Тодмалод-а, уд-а? Кӧня пӧртэм дунне вылын сяськаос, сомында ик нылкышноос но. Таосыз чебер сяськаос - шаерысьтымы тодмо удмурт нылкышноос. Я, кинъёс бен соос, тодмалоды-а, уд-а? Кин нырысь ик шонер валэктон сётоз, соосты синпель кузьым возьма. Жингыртыны луоз таӵе телефонъёсъя: 44-41-00, 21-37-14. Яке ыстоно гожтэт. КЫЗЬЫ УЛӤСЬКОД ВЕТЕРАН? Туннэзэ ӵуказелы уг кельто Ӧд ке кутскы, номыр но ачиз уз лэсьтӥськы. Тазьы верамез мон кылӥ вал, кылем арын Можгаысь "Свет" заводысь ожысь но ужысь ветеранъёсын пумиськыкум. Пайми соослэн котькытчы вутскемзылы но: пӧртэм общественной комиссиосын ужало, егитъёс но 4 номеро средней школаысь дышетскисьёс доры ветло, соослы визь-кенешъёс сётыло, предприятиысьтызы музеязы экскурсиос ортчытъяло, хор кылдытӥзы. Табере концертъёсын ёросысь гуртъёсы но потало... Кызьы меда быгато вань та пайдаё ужрадъёсты ортчытъяны городысь мукет ветеран организациосын? Алигес гинэ ваньзэ тодӥ, Можгаысь ветеранъёслэн отчетно-выборной собраниязы вуылыса. Докладын пырак верамын вал: "Свет" пенсионеръёс кыӵе ке уж борды кутскемзылэсь азьло нырысь огазьын кенешо, собере ини дэмен со борды басьтӥсько. Озьы луиз, кылсярысь, 4 номеро школаен кусыпез юнматон удысын. Ветеранъёслэн солы сӥзем пумиськоназы олокыӵе но ӵектонъёс верамын вал. Табере соос, нырысь ик фронтовикъёс секытэз вормемзы сярысь мадьыса, пиослы но нылъёслы визьмо дэмланъёс сёто. Городысь конференциын заводысь ветеранъёслэн огазеяськонзылэн тӧроез Ф.Н.Парханюк пыр-поч мадиз мӧйыослэн общественной уже пыриськемзы сярысь. Нош предприятиысь кивалтӥсьёс мӧйыослэн тазьы тыршемзэс вылӥ дунъязы. - Заводамы "Пенсионерлы юрттэт" нимо программа дасямын. Валлян арын ожысь но ужысь ветеранъёслы дунтэк 174 санаторно-курортной путёвка сётэмын вал. Соолэсь трос адями предприятилэн профилакторияз шутэтскиз. Кылем арын мӧйыослы юрттыны висъямын вал 200 сюрс манет коньдон. Пенсионеръёслэсь улонзэс капчиятон ласянь Можгаын мар но со лэсьтыны быгато. Конференциын верамын вал куд-ог лыдпусъёс. Быдэс городын юнматэмын "Мӧйыослы юрттэт" программа. Кылем арын фронтовикъёслы но инвалидъёслы висъямын вал 309,3 сюрс манет коньдон. Со сяна, тужгес кулэяськись 4417 адямилы корказэ тупатъяны, дӥськут басьтыны, бакчазэ гудыны юрттэмын. Пенсионеръёслы юрттӥсь нимысьтыз центр вань. Татын адямиос шутэтско, тазалыксэс юнмато. Отысь ужасьёс тужгес мӧйыослы, висисьёслы, оген улӥсьёслы юрттыны доразы но вуыло. Городысь Ожысь но ужысь ветеранъёслэн кенешсылэн сюлмаськемез сярысь таӵе учыр но вера. Солэн кичӧлтэмезъя кылдытэмын ветеранъёслэн клубзы. "Набат памяти" музейын фронтэ ветлэм нылкышноос люкаськыло, "Спутник" кинотеатрын ужа "Оскон" клуб, кык номеро библиотекаын - "Сӥзьыл". Бигеръёслэн общественной центрзылэн но клубез вань. Огазе люкаськылыса пенсионеръёс асьсэлэн улэм-вылэмзы сярысь кенешыло, ӵош шутэтско, егитъёсын пумиськыло. "Фронтэ ветлэм нылкышноослэн клубзылэн" ужамез сярысь конференциын пыр-поч вераськиз солэн кивалтӥсез С.П.Горошникова. Кыӵе но пайдаё ужрадъёс татын уг ортчыло: семьяос куспын пумиськонъёс, огазьын чай юонъёс, "Зарни сюанъёс", алигес кылдытэмын мӧйы лыдӟисьлы нимаз библиотека. Л.В.Брызгалова - городысь ветеранъёслэн кенешсылэн культурно-массовой комиссиеныз кивалтӥсез - делегатъёслы мадиз огназы кылем пенсионеръёслэн огазе люкаськыса асьсэлэсь улэм-вылэмзэс сэрттылэм-пертчылэмзы, ог-огзылы визь-кенешъёс сётэмзы, юрттылэмзы сярысь. Ветеранъёсты конференциын шумпоттӥз Можга администрацилэн кивалтӥсезлэн И.Н.Семенов. Со, кылсярысь, ивортӥз, туэ ветеранъёслы юрт усьтӥськоз шуыса. Со Восточной посёлокысь чебер тымет дурын луоз. Ваньмыз со умой. Нош гороыдысь ветеранъёслэн организациосазы мӧйыос сярысь тырмыт сюлмаськон котьку уг шӧдӥськы на. Кыӵе ке праздниклы дасяськыку, пенсионеръёсты огазе люкало, кузьымъёс сётъяло, больницае йӧнатскыны ветлон сярысь тодазы вайыто. Нош праздник ортчем бере шып гинэ луэ. Мӧйыос доры ветлӥсьёс шер гинэ луо. Озьы медаз луы вылэм Вормонлы 55 ар, Можгалы туэ 75 тырмемез пусъем бере но, - шуиз конференциын вераськыкуз делегат В.Г.Колесникова. - Та выллем учыръёс луо на, куд-ог ветеранской организациосын пенсионеръёсын нимаз-нимаз ужаны быгатымтэенызы, ас котыразы оскымон актив люкамтэенызы. Городысь ветеранъёслэн советсы уг эскерылы азьвыл кутэм решениослэсь быдэсъяськемзэс. Тани кылем отчётно-выборной собраниын но вераськемын вал ини, городын одӥг ке но "Ветеран" магазин усьтоно шуыса. Таӵе магазин али но ӧвӧл на. Соин ик карысь ветеранъёсын кивалтӥсьёслы таӵе калык верамез тодазы вайытэм потэ: "Туннэзэ ӵуказелы уг кельто". В.Никитин, элькунысьтымы ожысь ветеранъёслэн комитетсылэн тӧроезлэн воштӥсез. Тулыс праздникен! 8-тӥ Март котькуд семьялэн, котькуд адямилэн улоназ пыртэ югытэзлы, ӟечезлы, чеберезлы оскон мылкыд. Та нунал - Нылкышнолы бадӟым яратонэз, семьязэ утьыны быгатэмез, ассэ жалятэк тыршемез понна, тау карыса музъемозь йыбырттон нунал. Секыт дыре улӥськомы ке но, нылкышноос уг сётско курадӟонлы, юн мылкыдзэс возьмато. Соос нылпи будэто, юрт котырзэс утё, шуге-леке шедемъёслы юртто. Кунлэн соку гинэ азьпал улонэз вань, куке со валтӥсь ужпумен лыдъя анайлыкез но нылпилыкез утёнэз, нылкышнолы ужаны но пинал будэтыны луонлыкъёс кылдытонэз. Ӵапак таӵе ужпумъёс ас азязы пукто Удмурт Республикаысь Кун Кенеш но Правительство. Гажано нылкышноос! Сюлмысьтымы ӟечкыласьком тӥледыз шуныт тулыс праздникен. Котькуд нунал мед ваёз шумпотон но шулдыр мылкыд. Шудо луэ! Тупаса улон, яркыт пиштӥсь шунды, тазалык тӥледлы! Удмурт Республикаысь Удмурт Республикаысь Кун Кенешлэн Тӧроез Правительстволэн Тӧроез А. А. Волков. Н. А. Ганза. Тужгес гажаноос Мынам вераме потэ туж адӟем карымон, синмаськымон куинь удмурт нылкышноос сярысь. Секыт война бере милям улонмы кутскиз та кышномуртъёсын ӵош, соослэн уженызы, сюлмаськонэнызы герӟаськыса. Полина Николаевна Ухова улонмес нырысь-валысь шулдыртӥз удмурт сцена вылысен. Нош телевидениын ужаны кутскыса, со Удмурт шаерамы котькуд коркан дуно ӧтем куно кадь вал. Солэн пальпотӥсь ымнырысьтыз, ӵук ӝужась шундылэн пӧсь сиосыз бордысь сямен, котькуд сюлэме шумпотон но шуныт мылкыд пыӵалляз. Паймисько, кызьы кыдёкысь удмурт гуртын, чылкак чын удмурт семьяын вордӥськем но быгыльскем сокем йӧно чебер нылаш. Сыӵе котыр ласянь учкымон адями сярысь пересьёс шуозы вал: мыскалэн мертамын но колёсаен кыскамын. Зэмзэ но со озьы. Полина Ухова бере, мон сямен, Удмурт телевидениын та дырозь сыӵе ужась ӧз шедьы на. Мон кинэ ке янгыше уськытыны уг турттӥськы. Котыр ласянь пӧрмем адямиез инмар шергес сётэ. Инкуазен но анай-атаен сётэмез валчеяськыса гинэ, нылпи вираз ик ӟеченыз пыӵаса вордӥське. Сыӵе нылъёсты инмармы одно кузьмалоз ай... Гажано Полина Николаевна, тӥ милесьтым пинал дырмес бурдъяды но лӧпкытӥды, шулдыръяды но азьлань валтӥды. Табере улон гурезь уллане питыра, уллане со бадӟым ӝоглыкен питырске вылэм, нош кыӵе уг поты мылкыдлэн солы сётскемез... Мон уг оскискы, Тӥ кадь йӧно адямилэсь вылтуссэ ортчись аръёс гужатыны быгатӥзы ни шуыса. Одӥг пол ке но, одӥг нунал ке но потысалды на ке пальпотӥсь тусыныды чагыр экранэ, кӧня монэн огъёзо нылкышноос тау карыса учкысалзы шорады. Кыкетӥез дано кышномуртэ - Милитина Васильевна Гаврилова. Солэсь вераськемзэ ӵошатысал чик дыртытэк, вӧл-вӧл кошкись паськыт шурен, нокыӵе сильтӧл сое уг тулкымъяськыты, читыр-чутыр ярдуръёс но уг шугъяськыто. Пыре со небыт куараеныз, чебер радиоверанъёсыныз котькуд корка, ужась калыклэсь мылкыдзэ бурдъяса но шумпотон кузьмаса. Городын ортчытъяськись творческой ӝытъёс но солэн куараезтэк луысалзы туж мӧзмалэс но палдурес. Залын пукыса солэсь куаразэ кылыку, сюлэм соку ик ӵыжтэм вӧй кадь шуна. Тупал удмуртъёслэн улон-вылонэнызы асьмемыз трос аръёс ӵоже тодматъяз, Евгения Ивановна Плотникова. Аслаз кепырась, зӥбыт сямыныз со ладь-ладь гинэ лыдӟылӥз радиоверанъёссэ, нош соосты дорамы вуттон понна лёгалляз уно сю иськемъёсты. Калык понна сюлмаськемез вормылӥз ӝадёнзэ но висёнзэ. Кулэ ке луоз, ас калыкеныд чын пересь кадь кырӟалод, нош куддыр пинал мурт сямен лопырскоз. Чебер эктон, такмак гуръёсты но ӧжыт ӧз кузьма Евгения Ивановна асьме пал калыклы. Куинь дано удмурт кышноос, куинь яркыт пиштӥсь кизилиос. Тӥ выль сямен, уд но ӝуатске, уд но кысэ ни. Нош шутэтскыны кошкыса, тӥ чалмиды. Ми трос гинэ тӥледыз кылӥськом но адӟиськом на удмурт калык тӥлесьтыд мӧзме, тӥледыз гажа, яратэ но куара сётэмдэс возьма. Нёшто сыӵе кужмо кышноослэсь кин ке но чигыны быгатӥз, лобоно бурдъёстэс, уретӥз вераса быдтымтэ сюлэм гуръёстэс? Эн ыше тӥ нокызьы но пурысь бус пӧлы, тӥляд ышемды калыклы но бадӟым ыштонэн берытске. Асьтэлэсь малпанъёстэс, сюлэм висёнъёстэс, зӧк биниськыса улон бугордэс пыр-поч сэрттыса-пертчыса, кӧня выль суредъёсты улӟытыны быгатоды. Вань адӟемдэс "Удмурт дунне" газетлэн бам вылаз гожтӥзы ке, кӧня шумпотон ваёды лыдӟись эшъёслы, соку асьтэлэн но тырмем сюлэмды ӧръяськоз. Шуд но тазалык тӥледлы, гажано дано нылкышноос. Мон оскисько пуш кужымдылы но быгатонлыктылы. Васса Васильева. Пичи Пурга черкогурт. Ӟечкылан. Ува ёросысь Нылга гуртын улӥсь Валерий Евгеньевич Акбаевез ӟечкыласьком 50 арес тырмеменыз. Сӥзиськом кема аръёс ӵоже юн тазалыко луыны. Сюлэмад ноку медаз каръяськылы куректон, ымнырад котьку мед пиштоз шумпотон но пальпотон. Тонэ яратӥсь кышноед, нылпиосыд но кенэд. Очей Толилы - пӧсь салам Сюрес вожын Сюрес вожын пумиськизы зырым но таракан Зырым шуэ: - Городэ мынӥсько улыны. гуртын со горд Петыред монэ сальк! куштэ но пыдыныз лёга на. Нош городын, пе, ӝикытак ныркышетэ бинялто, кисыязы поныса нулло. Собеер, городын ныръёс но уно гинэ, мӧзмыт уз луы сультыртыны. - Нош мон тани гурт пала дыртӥсько, пумитаз вазиз таракан. - Чурыт, кӧттырмостэм кузёос дорын туж сютэм улонэ. Э-э, мар вераськонэз на куанеръёс сярысь. Вылаз ик, олокызьы но усыкмытыны туртто, карандаш гожъёсы кекато, тодам ваисько ке, со курадӟонъёсме, пыдъёсы нош дыр-р-р! куалекъяны кутско. Гуртын капчи ӧвӧл ке но, тыршись кузёос дорын сютэм уг кул. Пудо-животъ пуртыысь, ӝӧк вылысь чыры-пыры мыным но мылёз, вылды. Коскам пыдъёсме но пӧсь гур вылын пыжо, йӧнато ай городысь шунтӥськон арбериос мугорме но шунтыны уг вормо. - Я, мед удалтоз бен сюресэд, капчи, кӧё-вӧё мед луоз улонэд гуртын, эше. - Тау! Тынад но озьыгес медло. Уть-ай, тӥни городъёс шур дурын погыллясько. Ойдо, ӝабыртӥськы каньсыраса кыллисез борды. С. Федулова. Ижевск город. Кӧня улӥсез шаерамы? Правительстволэн Президиумаз люкаськемъёс эскеризы 2002-тӥ арын Удмурт Республикалэн улосвылаз калыкез гожъяса лыдэ басьтон (перепись) ортчытон сярысь" постановленилэсь инъетсэ. Та ужрад ортчоз 9-тӥ октябрьысен 16-тӥ октябрёзь. Сое радъян-ортчытонлы оглом кулэ луоз 4 миллиард манет коньдон. 3,2 миллиард манет висъямын луоз федеральной бюджетысь, нош кылемзэ, 800 миллионзэ, улосъёс шедьтыны кулэ ас бюджетъёсысьтызы. Статистикая кун комитетлэн тӧроезлэн Геннадий Дойниковлэн верамезъя, вуоно арын ик ини та ужрадэз дасянлы кулэ луоз ог 100 сюрс манет коньдон, со лыдэ басьтэмын луоз 2001-тӥ арлы бюджетэз дасяку. Юнматэмын переписез ортчытонъя комиссия. Соин кивалтоз Правительстволэн Тӧроез Николай Ганза. Йыружъёсын нюръяськон кужмоя Россилэн Президентэзлэсь ужзэ быдэсъясь Владимир Путин но вице-премьер Илья Клебанов пусйизы, асьме республикаын вузкарон удысын йыружъёсын нюръяськон уж ӟеч радъямын шуыса. Озьы ке но, та удыс кулэ каре ватсаса ужрадъёс кутонэз. Законъёсты тӥяса вузкарон учыръёсты алон вылысь, 40 адямилэсь кылдытыны чакламын милицилэсь нимысьтыз ёззэ. Со ик эскероз кудӟытӥсь юонъёсын вузкаронэз но. Президиумлэн та кенешаз ик кутэмын "Удмурт Республикалэн улосвылаз аракыен вузкаронлы лицензия сётъян радлыке воштонъёс но ватсанъёс пыртон сярысь" Постановление. Ёрмон медаз зӥбы Кылем арын декабрь толэзе кутэмын "Удмурт Республикалэн кун резервез сярысь" зкон. Сое быдэстон понна дасямын нимысьтыз положение. Солэн пуштросэныз тодатӥз премьерлэн воштӥсез Сергей Чикуров. Кызьы со пусйиз, республикалэн резерваз туннэ нуналлы лыдъяське 10 сюрс тонна ю тысь но 2 сюрс тонна дизель эстӥськон. Гуртоослы юрттэт Правительстволэн постановлениеныз "Племтицесовхоз "Увинский" кун предприятилы республикалэн бюджетысьтыз висямын 1,5 миллион манет ссуда. Предприятие та коньдонэз берыктыны кулэ туэ ик 1-тӥ декабрёзь. Удмурт Республикаысь Правительстволэн пресс-службаез. Котьмалэн кутсконэз но пумыз луэ. Нош выльдӥськон шуонлэсь пумзэ-йылзэ адӟыны уг луы на. Калыклэсь чиданзэ эскерыса сямен, со гызмыль гызмыльтэ. Тани Ува ёросысь Нылга черкогуртэ пызь но сакыр песок вайыса машина лыктӥз. Райполэн лавкаосаз сярысь со трослы дунтэм. Калык трос малпаськыса ӧз улы - син куспын машинаез бушатӥз. Кин тодэ, ӵуазеяз мар луоз: оло, пызьзэ но, сакыр песоксэ но басьтыны уд быгаты ни. В. Беломорскихлэн туспуктэмез но гожтэмез. Шӧкыч Ӝожтӥськон сэрег Квакаосты куака уд кар Бурдъёссы ке луысал, Ува ёросысь Квака станциын улӥсьёс, сьӧд куакаос музэн, кӧттыро но майбыр улон инты утчаны лобӟысалзы. Пичи гинэ станциын дасо улон корка сылэ. Ӧвӧл отын школазы но, вузкарон интызы но, эмъяськоннизы но. Сад-бакча возисьёс корка нергеос пуктӥллям на. Азьлоез вокзалын вузамын но пытсамын. Поезд возьмасьёслы тӧллэсь но лымы-зорлэсь утиськыны пуллэсь шуккем сарай нерге гинэ сылэ. Со но кырыжтӥськем ни, но солы мултэс луэм. Квакаос кӧтсэс тыро бакча возьыса, пудо-живот вордыса, губи но емыш бичаса, пересьёслэн пенсизы юрттэ на ужтэк пукисьёслы. Зэм верало ӟучъёс: инмар ке ӧз сёты, парсь уз сиы. Туэ лымы укыр трос усиз ке но, Квакаез ӧз согы. Медам ик слы вылэм, станциын улӥсьёс сярысь кивалтӥсьёс воксё но вунэтозы. П. Скобелев. Вуылӥз маршал Сергеев 7-тӥ мартэ Удмуртие вуылӥз Россилэн Обороная министрез маршал Игорь Сергеев. Лыктэм мугзэ со журналистъёслэсь ӧз ваты: пыӵал лэсьтӥсь предприятиосын тодматскон. Нырысь ик министр вуылӥз Воткинске, машина лэсьтон заводэ. Кызьы тодмо, та предприятиын дасяло дуннеын самой кужмо луись "Тополь-М" ракетаосты. Игорь Дмитриевич кенешиз сое кылдытӥсьёсын, ортчиз цехъёстӥ, вераськиз рабочийёсын. Кун Кенешлэн юртаз маршал пумиськылӥз министръёсын, предприятиослэн кивалтӥсьёсынызы, войсковой частьёсысь командиръёсын. "Ожгар тӥрлык поттонын Удмуртия кемалась валтӥсь интыын, - люкаськем калыклы вазиськиз И. Д. Сергеев. - Шуг-секытъёслы сётскытэк, татысь предприятиос ӧз шонаське, огсыр ужазы, вань заказъёсты дыраз, ӟеч быдэсъязы. Матысь дыре ми пунэмъёсмес берыктом, - оскытӥз министр. "Ижмаш" огазеяськонлэн полигоназ Игорь Сергеев тодматскиз предприятилэн продукциеныз - выль пыӵал тӥрлыкен. Ижысь электромеханической заводын министр кенешиз ож тӥрлык поттӥсь предприятиослэн кивалтӥсьёсынызы. Люкиськон азьын пумиськон 2000-тӥ арлэн тулыспал толэзяз Анатолий Петров кылбурчи кыӵе ке шаян машинаен сэрен бырыны шедиз. Арня-а, кык-а солэсь азьло мынам та студент дырысеныз тодмое редакциямы пыраз но "Кенеш" журналамы Михаил Покчи-Петров сярысь бадӟым-бадӟым публикация дасямез сярысь ивортӥз. Туэ коньывуон толэзе уго солэн та матысь ӵыжы-выжыезлы, улэп луысалыз на ке, сизьымдон арес тырмысал ини. Тазьы ивортэмез бере, Толя, милям гажано автормы, вераз на Ижысь "Алфавит" издательствоен нимаз кылбур книгазэ поттыны огкыл шедьтэмез пумысь. Книгаез дась ини, пе, печатланы. Ӝеган мугез, пе, одӥг гинэ: солы кулэ на машинкаен дасям одӥг лист тыр азькыл. Вераськем адямиосыз сыӵе азькыл ӝогак гожтыны ум быгатэ, шуизы, пе. Соослэн валэктэмзыя, куриськонэн вазиськисьсылэсь вань гожъямъёссэ выльысь бугыръяса ортчоно луозы на, пе. - Пётр Кириллович, тӥ монэ асме но, гожъямъёсме но кемалась тодӥськоды бере, арня куспын азькыл гожтыны быгатысалды, оло? Мон солы соку ик шуи: - Ӵуказе, нуназе котырын, дырды луиз ке, пырелэ татчы, ми доры. Текстэ мынам соку дась луоз. Вераськем дырмылы мон таӵе азькыл дасяй вал. Та книгалэн авторез сярысь Та кылбур бичет - Анатолий Петровлэн нырысетӥез нимаз книгаез. Со сярысь чуръёсме гожтыны кутскыкум, соин ик, вылды, син азям пуксизы элькунысьтымы егит авторъёслэн "Пыд улын - музъем" (1977) но "Йыр вадьсын инбам" (1984) книгаоссы. Нырысетӥяз Анатолий Петров пыремын дас кылбуреныз, кыкетӥяз - дас ньыль кылбуреныз. Кылбур сузьетъёсыз азьын ивортэмын: вордскиз Анатолий Петров 1953-тӥ арын Можга ёросысь Бадӟым Сибы гуртын, дышетскиз ас ёросысьтыз Можга черкогуртын но Удмурт кун университетын. 1975-тӥ арысен ужа Удмурт радиоын. Тазьы верам бере, али йылэтыны кулэ ни: радиоысь кошкемез бере тыршиз Ижысь Пионеръёслэн юртазы, отысь кошкемез бере, нош ик ужа журналистика удысын, печатлаське Ижын потӥсь ваньмаз сямен удмурт газетъёсын но журналъёсын. Анатолий Андреевич чеберлыко литературае сюрессэ мытӥз студент вакытаз. Со аръёсы солы ӟеч-ӟеч кылбурчи луытозь будыны юрттӥзы УдГУ-ысь удмурт литературно-творческой кружок но солэн кивалтӥсез Даниил Яшин кылбурчи. Поэзиын ас интызэ шедьтыны, куаразэ юнматыны, мынам шӧдэмея, мылкыд но кужым сётӥзы анаез ласянь агаймуртэзлэн Михаил Покчи-Петровлэн кылбуръёсыз, кырӟанъёсыз но поэмаосыз. Анатолий Петров быгатонлыкезъя агаймуртэз дорозь будэмзэ возьматӥз "Йыр вадьсын инбам" бичетысь кылбуръёсыныз. "Ашальчи" сонет тугокоез ("Кенеш", 1999, � 2) сярысь верано ке, поэма жанрын со агаймуртэзлэсь но вылӥегес ӝутӥськиз ни. Ашальчи Окилы сӥзем та выллем произведениос пӧлын солэн "Ашальчи" сонет тугокоез нокинлэнэн ӵошатонтэм луэ. Со быдэсак гожтэмын шуныт мылкыдын но синмаськымон яркыт, чылкыт, чебер кылын. Оскыса верасько: Анатолий Петровлэн та книгаез лыдӟисьёслы одно ик яралоз. Гожтэм азькылэлы Анатолий Андреевич синкылиез потымон шумпотӥз но киме кема-кема сэзъяса тау кариз. Со луиз весяк ӵожелы люкиськон азямы берпуметӥез пумиськеммы. Али уг тодӥськы на, потоз ик-а, уз-а солэн кылбуръёсыныз нырысетӥез нимаз книгаез. П. Поздеев. Надежда Гильманшина Ма понна яратӥ? Чильпырась омырлэсь но чылкыт шур вуын Шундылэн сиосыз пыласько, Вож куаро писпуос но куакъёс сьӧръёсын Бакаос йӧспӧртэм кесясько... Адӟисько мон веськрес мугоро валъёсты, Выль пыжам каньылэн васькисько... Ма понна яратӥ мон та мур воусты? Котькуд ар шур кузя уясько. *** Эх, мусо пинал дыр! Тусбуйдэ гурезьысь адӟисько. Нош чырмыт куарадэ кылӥсько ке, Азьло кадь ик егит луисько. Тонэн ӵош ваче ки кутскисько но, Узырлы-борылы мынӥсько. Чорыго тыметад зымисько но - Потыса луоын кыллисько. Тон шорад палэнысь учкисько ке, Нылылыэсь тусбуйзэ адӟисько. Бызьылэм сюресме лёгисько ке, Аръёслэсь ортчемзэ шӧдӥсько. Мынам гуртэ Мон яратско котькуд улэп гуртэз, Нош Богородск гуртэ эшшо но дуногес. Тулыс куазен вамыштӥсько урам кузя, Тӧдьы льӧмпу азям сяська пазя. Тани корка выем вож сад пӧлы, Пичи нылаш кадь улосэн шудэ. Уд оскиське ке - лыктэ ми доры, Я учкелэ кыӵе мынам гуртэ! Уло отын дано адямиос, Ужын дано, Ужен чебер соос! Сюлэмы кыске доре Татын мыным ваньмыз дуно: Сюрес вожъёс но бусыос, Пеймыт нюлэс, садысь улмо, Муресь кожъёс но ошмесъёс. Вордскем гуртам ваньмыз тодмо: Котькуд кенер но урамъёс, Чильпам налишнико корка Но ӟукыртӥсь уробоос... Тани татын куке но мон Шудӥ-тэтчай сузэреным, Тани татӥ куке но мон Ветлӥ ӵукна чорыганы. Татын ортчиз пичи дыры... Тани вуи дор палъёсам... Сюлэм котьку кыске доре, Анаелэсь юн мӧзмыса. Анаелы Бам вылад кисыри но кылдэм ни, Дырызлэсь вазь губырмем тыбырыд. Сьӧд чилясь йырсиед пурысьтам ни, Син шорын воштӥськем тусбуйыд. Кӧня тон улонын курадӟид но, Секытэн нылпидэ будэтӥд. Туж уно кайгуэз адӟылӥд тон, Нош ялан улонлы шумпотӥд. Нюлэскын тон писпу-а ӧд кора, Палэнэ ӧз, ӧз кыль Кекоран. Тон Мукши палъёсысь но ӧд пыра. Бен, секыт телефон ез кыскан. Аръёсыд олокытчы дырто ни, Жильыртӥсь ошмес ву кадь кошко, Малпанъёс сюлэмдэ позырто но Кытчы ке дыртӥсь вал кадь вортто... Улонысь кошкем эешелы Трос аръёс ӵоже тон Кыллиськод ни сюйын, Нош тодэ ваёнъёс Весь ветло монэным. Тон мынам йырвизьмам, Малпанам улӥськод, Кайгуме но шудме Тон шори люкиськод. Тон мынам улонам Тӧдьы юсь кадь кылид, Котькудаз вамышам Пытьыдэ кельтылӥд. Шай вылад мыныкум, Пыдъёсы канжасько, Горд сяська поныкум, Киосы дыректо. Мон уг оскиськы чик, Тон ӧвӧл шуыса, Вазисько мон шорад, Матысь эш карыса. Юись воргоронлы Сюлэмме мынэсьтым тон басьтӥд, Аслэсьтыд нош кузьмад - я кинлы? Улонме чидантэм тон карид, Нош ачид каргаськод бен малы? Тодӥсько: мӧзмылэс тусбуе, Мугоры но ӧвӧл ни веськрес. Кельшымон шат ӧвӧл выжые, Куарае-а потэ ни шимес? Тон ачид ик монэ яратӥд, Шуныт кыл вераса мусояд. Нылпимес винаен-а воштӥд? Кусыпмес пыд улад-а лёгад? Туналляй... Тӧдьыписяй сяська бурдэз ишкылыса Тунай тынад яратонэд сярысь: - Яратэ, уг яраты, яратэ, уг яраты... - Ымдуръёсы сипыртӥзы сюлмысь. - Яратэ, уг яраты, яратэ, уг яраты... Ма кытысь-о лыктӥз та малпан? Тон монэ уд вунэты, Оскисько, уг вуны, дыр, - Сюлэмад шат ӧз пыӵа гажан? Туналляй, уг ватӥськы, Яратӥ, уг пӧяськы, Яратонэ эшшо но пуроме. Асьмеос семья ини, Нылпимы но кык тани, - Гадь пушкам тырме шумпотонэ. *** Улондэ воштыны мон уг куриськы, Кузпалдэ алданы мон уг косӥськы, Нош лушкем яратӥ ке - эн пыкылы, Нош шорад вазьылӥ ке - эн вазиськы, Мон вӧзтӥд ортчылӥ ке - эн берытскы, Лушкемен лулӟылӥ ке - эн шӧдӥськы, Уйвӧтын лыктыса гинэ ӟыгырты, Мон вӧзы пуксьыса гинэ буйгаты. Чебер кылъёс Тон куке шуид мыным: - Куректӥд ке - вазиськы, Мон соку дорад лыкто, Кайгудэ шори люко. Тон куке верад мыным: - Шумпотӥд ке - иворты, Пумитад ӝогак бызё, Либытак шорад вазё. Куректӥ - ӧд лыкты тон, Шумпотӥ - ӧд вазьы тон, Макем бер мон валаськем: Со кескич кылъёс вылэм. Мон шудо Калыкын шуиллям: Вордӥськид ке, пе, тон Куар потон толэзе, Уз, уз, лу шумпотон. Уг, уг оскиськы чик - Мон тазьы верасал: Шудтэмлы шат шырчик Кырӟанзэ кырӟасал? Шат мыным луытэк Юг кечсин ӝужасал? Шат монэ бурдъятэк Турын-куар потысал? Мон соку мылкыдтэк Ас ужам мынысал. Яратон нылпитэк Весь огнам улысал. Мукет кунъёсы келялоз Тулаысь конструкторъёслэсь дасям чылкак выль пумо пыӵал тӥрлыксэс поттыны кутскозы Удмуртиысь одӥгаз бадӟымаз предприятиын - "Ижмашын". Нырысетӥ партизэ бичаны чакламын ини сентябре ик, кыкетӥзэ - вуоно арын. Кызьы ивортӥз "Ижмашлэн" кивалтӥсез, та вузъёслы туж вылӥ дунъет сётэмын. Алигес Ижевскын возьматэмын "Китолов" тужгес выль луись артиллерийской снарядъёс. Сое адӟытэк ӧз кыле Турциын ортчем калык куспо адӟытонын но. "Ижмашын" ожгар тӥрлык поттон вань вузъёс пӧлысь витетӥ люкетсэ басьтэ. Туэ со кӧнялы ке будоз. Завод ог сю миллион долларлы продукцизэ мукет странаосы келялоз. "Российкая газета" гожъямъя. Утёме памятникъёсмес! Историяя но культурая памятникъёсты утёнъя огазеяськонлэн Удмурт ёзэзлэн пленумез газет пыр вазиське городъёсысь но ёросъёсысь администрациослэн тӧрооссылы, банкъёслэн, коммерция огазеяськонъёслэн, промышленной предприятиослэн кивалтӥсьёссылы, вылӥ дышетсконниосын, школаосын, училищеосын, колледжъёсын, техникумын дышетскисьёслы, вань ужаса улӥсьёслы, егитъёслы. Вазиськонын вераськон мынэ Удмуртилы но быдэс Россилы дуно луись памятникъёсты утён сярысь. Удмуртиын лыдъясько 607 объектъёс но ожын но ужын вормонъёслы сӥзем памятникъёс, соос пӧлысь 30-эз - Советской Союзлэн Геройзылы бюстъёс но памятникъёс, 13-эз - Афганистанын но Чечняын быремъёслэн шайвылъёссы, 490-эз - Быдӟым Отечественной войнаын быремъёслы обелискъёс, монументъёс, 10-эз - ужез данъясь памятникъёс. Ӝоген асьмеос пусъём Быдӟым Отечественной войнаын вормонлы 55 ар тырмонэз. Соин валче, пленуме ветлэмъёс шаерамы вань улӥсьёслы вазисько памятникъёсты утён, эскерыса-чакласа возён, тупатъян, выльдон уже пыриськыны курыса. 9-тӥ апрельысен 9-тӥ маёзь городъёсын но гуртъёсын ортчоз памятникъёсты тупатъянъя, котырзэс сузян-утялтонъя месячник. Ӧтиськом та ӟеч уже вань мылкыд карисьёсты пыриськыны. Шудо сюрес - арнялы Сюресъёс вылын мынон-ветлонэз радъян, шуккиськонъёсты палэнтон - одӥгез бадӟым ужпум луэ. Берло вить ар ӵоже гинэ Россиын 1 миллионлэсь уно адями пӧртэм шуг- секытъёсы шедиз. Со пӧлысь 150 сюр мындаез быризы, уноез сӧсыр кылизы. Быдэс дуннеын югдур пӧртэм ӧвӧл. Тае лыдэ басьтыса, ООН-лэн Европаысь ласянь экономикая комиссиез ялэ сюресъёс вылын кышкытлык кылдытытэк ветлон арня. Таӵе ужрад ортчоз туэ Европаысь странаосын 1-тӥ-7-тӥ мае. Россия Федерациысь Правительство, калыклэсь улонзэ но талазыксэ утьыны тыршыса, миым март толэзе та ужпумъя нимысьтыз постановление кутӥз. Соя чакламын сюресъёс вылын шудтэм учыръёсты палэнтон вылысь пӧртэм ужрадъёс. Отчы пырисько вань кивалтӥсь ёзъёс, мынон-ветлонэз чакланэн герӟаськем общественной организациос. Сюресъёс вылын шуккиськонъёсты алонъя арнялы дасясько Удмуртиын но. Кылдытэмын комиссия, дасямын программа, юнматэмын кулэ адямиос. Ужрадлэсь быдэсъяськемзэ эскероз Удмурт Республикаысь МВД-лэн Мынон-ветлонэз чакланъя инспекциезлэн управлениез. М.Кузьмин. Шӧкыч Пӧлы пум Серемес верос Кияз бюллетень кутыса, бырйись пыриз куараез лушкем сётон укабинае. Депутатэ кандидатлы Кузьымовлы пумит со суредаз кык чиньы вискы бадӟым пӧлы пум, собере бюллетеньзэ урнае куштӥз... Быръёнъя комиссия мур малпаськонэ усиз: шонерен-а лыдъяно со бюллетенез яке умойтэмъёсыз пӧлы пыртоно? - Ӵушъяллы гинэ но валамон - бырйись Кузьымовлы пумит. Но малы со мукетыз кандидат понна куаразэ ӧз шты? - пайме комиссие быръемъёс плысь одӥгез. - Иське, солэн нокин понна но куаразэ сётэмез ӧз поты, - ятвылтӥз мукетыз. - Соку малы нокыӵе пус ӧз пукты "Вань кандидатъёслы пумит" шуэм вадьсысь квадратэ? - юаз куинетӥез. Ӧйтӧд, маин йылпуъяськысал вылды та эчешон, ёросысь быръёнъя комиссилэн тӧроез аслэсьтыз кылзэ ӧй ке верасал. - Та учыре, - шуиз со, - куара сётонъя куронъёс чик но тӥямтэ. Аслыз кельшись кадидатлы пумит бырйись пуктыны быгатэ кирос, "лобись бурдо" яке мукет кыӵе ке пус, соя ик лэсьтэмын вал. Озьыен, та куара Кузьымов понна сётэмын. Г. Жуковская. Алла Кузнецова Силезиус верам кылъя сонет Как быть мне, если всё во мне приют нашло: Миг, вечность, утро, ночь, жизнь, смерть, добро и зло. Ангелиус Силезиус - 1624-1677. Котькуд анай ӟечлы гинэ пия. Мон но, вылды, ӟечлы вордӥськемын. Нош трос-а вал ӟечез мон котырын, Ачим шайтан кадь луисько ке куддыръя? Шырыт мон сямыным - котьмаме кузьмасько, Чурытаськон чёртлы ӧй усья ӧсъёсме. Нош лӥятӥсь кыллы ӵемысь чурытасько - Беромыса тышкаськисько асме. Шудо минутъёсме дасо аръёс ӵоже Тодэ ваёнъёсам нуныясько огъя. Ӝыны даур нунал кадь ортчемын. Силезиус верам кылъя: улон гоже Ноку, лэся, ӧй вал калык радъя... Марлы дунне вылэ мон вордскемын? Ягул - я, ул... сонет Ягул... Ягул, кытын ини ягед? Яг шоръёсыд? Курег куко юртэд? Яг кышноед кытчы ышиз-лобӟиз? Выжыкылэ нимыз гинэ кылиз. Яг корамын. Арамаед быре. Шуред вамен выже коткась курег. Трактор гинэ вӧл бусыез гыре. Элькункышет лопыръяське, выре... Ягул. Ягул... Яглэн уллапалыз. Выллапалыз но вал, дыр, куке но. Йыромытъяз, вылды, ягшоръёсаз шайтан. Ягул - я, ул... Улонмылэн пумыз Ай кыдёкын. Кыштыр коть улоно. Удмурт уго ноку ӧз ул шаян. Эн потты йыркурдэ Ф. В.-лы Мон ӧй вал ни таяз дуннеын, Быремын вал ини, кулэмын: Шайгуме гинэ шедьтӥськымтэ, Коросме гинэ шуккиськымтэ. Вунэтӥ: калгиськем мон кытӥ, Сииськем-юиськем но мае. Мар меда дауртӥ - вунэтӥ... Вуттӥллям монэ больницае. Отысен, йырсазьме шедьтыса, Ой, макем кулэме нош потӥз!!! ... Гажанлэсь быремзэ тодам вайыса, Сюлэмтӥм ныж пила кадь ортчиз. Дыр эмъя. Бен, озьы ик, вылды. Тани нош кылбуръёс гожъясько. Вань визьзэ ыштымтэ на йыры, Пайдаё улыны тыршисько. Гажанэ, тон сопал дуннеяд Йыркурдэ эн ай потты мыным. Мар каром на? Улэп даурам Быгыльскиз выль мылкыд гажаны. Со тон кадь ик: бабля йырсиез. Синъёсыз тынад кадь чылкытэсь. Со тон кадь ик гажа чуръёсме. ... Гажалоз-а тон кадь ик асме? 15.02.80. х х х Кинлы мар Люке инмар. Кинлы - пичи пуры. Кинлы - пачыл дуры. Мыным гинэ - Кыл кенэм. Та кенэмме но вань адӟисез, Кыл кидысме таласез. Ойдо, ӵок ини. Чидасько. Кенэме понна бадӟым тау карисько. Нош таласьсэ но лушкаськисьсэ Инмар синйылтоз ай усьсэ. х х х Сукыр адӟем. Пельтэм кылэм. Бак мадем. Бак мадем - кыл вӧлмем! Кыл вӧлмем, тонэ дэймытэм, Мынэсьтым тонэ кыдёке пезьдытэм. Адӟисез мед вылэм адӟысал. Кылӥсез мед вылэм кылысал. Верасез мед вылэм верасал. Соку мукет уж луысал. Ӧвӧлтэм маркелэсь курдаськод. ... Пиосмурт-а астэ кожаськод?! Тыр толэзь улын сонет Тыр толэзен шур пачылме, Лысву напчыса турынэз пылатэ, Син мальдымон сяська усьтӥське, Кӧлэм потыса но ум сэраське. Тыр толэзен емыш быгыльске, Жалем ческытэн утялтын дасяське, Тыр толэзе мугор бурдъяське, Бабем но мылкыд улӟе, исаське. Тыр толэзё уйшоре малы ке Валесме куштыса пегалляй кыдёке, Зар-зар бӧрдылӥ, мугъёс утчатэк. Ой но, ой, инвожо, тыр толэзь-атыкай Пичи дыр ӝожъёсме тодам эн ни тон вай. Укыр ук секыт анай киостэк. х х х Шузимем пӧсь шунды жалятэк пыжыку, Тол Бабай шокчемез куриськом. Ӟырт кезьыт толсуре кизили кынмыку, Гужем шор шундыез утчаськом. Вормонтэм мӧзмонме улляны турттыкум, Эшъёслэсь ватскыса, тон доры дыртыкум, Одно ик кинэн ке пумиськын шедьтӥсько - Тон доры беромыса вуисько. Гадь пушкам со дыре пӧсь шунды каръяське Но гадям кызьы ке со толэн эшъяське, Кезьытъёс но пӧсьёс ӵушкало лулпушме. Кын пушкын, тыл пушкын но кыдам сюлэмы Кулэтэм тон понна луэмын. Мон вӧзы уг ни поты шудлы султэмед. ЖУРНАЛИСТЪЁСЫН ПУКИСЬКОНЪЁС ПЕНСИОНЕР КИНЛЫ КУЛЭ НА? Та нуналъёсы Россия Федерациысь Кун Думалэн депутатъёсыз ужало асьсэлэн округъёсазы. Николай Иванович Сапожников пумиськылӥз журналистъёсын. Со вакчияк тодматӥз Кун Думалэн куинетӥ созывезлэн нырысетӥ лэсьтэм вамышъёсыныз, нимысьтыз саклык висъяз социальной политикаен герӟаськем ужпумъёслы. Кызьы тодмо, тросэз депутатъёс ужзэс кутскизы пенсиослэсь быдӟалазэс ӝутон бордысен, со - бырйисьёслэн огез валтӥсь куронзы. Парламентарийёсын та ласянь быдэсак огкылысь луэ Правительстволэн Председателезлэн воштӥсез В.И.Матвиенко. Со меӵак шуиз: - Пенсилэсь быдӟалазэ 50 манетлы ӝутыса, калыкмес сереме уськытом. Со 2 доллар но уг луы ук! Туала дунъёсъя самой ичиез пенсия 500 манетлэсь улӥын луыны кулэ ӧвӧл. Кызьы учкиз Кун Дума арлыдо адямиослы юрттон шоры? Пенсилэсь быдӟалазэ будэтон понна куаразэ сётӥз 267 депутат (59,3 процент); солы пумит - 77 мурт (17,1 процент); куаразэс сётонлэсь возиськиз - 9-эз (2 процент). Куара сётонэ пыриськиз 353 депутат, со пӧлысь куаразэ сётонлэсь палэнскиз 97-ез. Тӥни озьы, кун пенсилэсь быдӟалазэ будэтонъя решение кутытэк кылиз. Н.И.Сапожников верамъя, со адске Россиысь Пенсиосъя фондлэн инструктивной документъёсызъя но, государство аслэсьтыз пенсионеръёссэ туж быгатыса пӧяз. Законэн тупатэм пенсилэсь 30 процентсэ берен талаз. Зэмлыкез берыктон вылысь, Кун Дума кылем арын но та ужпумез эскерон но Федеральной Законэ воштонъёс пыртон борды берытскылӥз, но Федерацилэн Кенешез Правительстволы пумит ӧз мыны, законэз ӧз вошты. Выль быръем Дума 23-тӥ феврале нош ик пенсиосъя законэз выльдон борды кутскиз, кызьы адӟиськоды - номыр ӧз пӧрмы. Кулэ луись 300 куара ӧз люкаськы. - Табере чаклалэ но ӵошатэ, кыӵе огазеяськонъёс кызьы но кӧня куара сётӥзы: "Коммунистическая партия Российской Федерации" фракция - 87 мурт (97,8%); "Отечество - вся Россия" - 25 мурт (53,2%); "Союз правых сил" - 13 мурт (40,6%); "Регионы России" - 35 мурт (87,5%); "Единство" ("Медведь") - 5 мурт (6,1%); "Яблоко" - 17 мурт (81%); ЛДПР - 1 мурт; "Народный депутат" - 36 мурт (62,1%); Агропромышленникъёслэн огазеяськонзы - 41 мурт (97,6%). Удмуртиысь депутатъёс ваньмыз ик куаразэс сётӥзы пенсилэсь быдӟалазэ будэтон понна. Тодмо политикъёс пӧлысь кин талы пумит луиз? - КПРФ-лэн, аграрникъёслэн, "Отечестволэн", "Регионы России" фракциосын сыӵеос ӧвӧл. Пумит куаразэ сётӥз Ижевске вуылӥсь депутат Коптев-Дворников ("Медведь"). Голосовать каронлэсь палэнскизы таӵе тодмо депутатъёс: Роман Абрамович, Борис Березовский, Владимир Жириновский, Михаил Задорнов, Ирина хакамада, Борис Немцов, Владимир Рыжков, Евгений Примаков, Екатерина Лахова, Станислав Говорухин... Зэм но, малы соослы кулэ "Пенсия тырон сярысь" Закон? Н.И.Сапожниковлы журналистъёс сётӥзы пӧртэм юанъёс: - Кызьы тӥ учкиськоды Валентина Матвиенколэн Ленинград областьлы губернатор луыны мылкыдыз шоры? - Умой. Ужаны со быгатэ. Валентина Ивановна котькинэн кыл шедьтэ, пӧртэм сямо адямиосты бордаз огазея. Ачиз со вордскемын Ленинградын, семьяез али ке но отын улэ. Малпасько: Матвиенко ӟеч кивалтӥсь луоз. - Кун Думаын нимаз ужан кабинетты вань-а? - Вань. Витетӥ арзэ отын ужасько. Мон нош ик шеди промышленностен герӟаськем ялан ужась комиссие, соин кивалтэ асьмелэн депутатмы Юрий Дмитриевич Маслюков. Та вакытэ пӧртэм амалъёс пыр юрттыны выриськом "Ижмашез" улӟытонлы. Югдур секыт. - Осконды вань-а, вуоно быръёнъёсын Зюганов вормоз шуыса? - Со сярысь вераськыны вазь на. 17-тӥ-23-тӥ феврале республикаямы ортчытэм юалляськонъя В.Путин люказ 43 куара, Г.Зюганов - 25. Огез тодмо: быръёнъёс одӥг пол кутскемен уз ортче. Л. МЕДВЕДЕВА. Берытскизы ваньзы 6-тӥ мартэ Удмуртиысь Югдурез утёнъя министерстволэн патрульно-постовой службая полказ Чечня Республикае ветлэм боецъёсын пумиськылӥз югдурез утёнъя министр милициысь генерал-лейтенант Владимир Щербаков. Отрядлэн командирез милициысь подполковник Вячеслав Забенько министрлы ивортӥз отрядлэн кыдёкысь Знаменский посёлок дорын ужамез сярысь. Вераны кулэ: отряд отын бадӟым уж лэсьтӥз. Боецъёс посёлокын югдурез чаклам сяна, возьмазы МЧС-лэсь медициная госпитальзэ но кык лагерез. Отчы интыямын вал быдэн 3,2 сюрс чеченъёс. Боецъёс пыриськизы нимысьтыз 23 ужрадъёсы, эскеризы гурезьёсы интыяськем 15 гуртъёсты. Соку ӝегатэмын 187 осконтэм адями, таламын Калашниковлэн 7 автоматэз, 11 пӧйшуран пыӵал, уно пуштытон арбери, 3 "Муха" гранатомёт, 1 "Фогот" ПТУР, бронежилетъёс, уин адӟись приборъёс но радиостанциос. Удмуртиысь милиционеръёс шараязы но быдтӥзы бензин поттонъя лушкем ужась 4 пичи заводэз, талазы тонна но ӝыны эстӥськон, тонна пала спирт. Сое вузаса, боевикъёс асьсэлы пыӵал тӥрлык басьто вал. Министрлы тау карон гожтэтъёс ыстӥллям военной комендант но администрацилэн кивалтӥсез Завгаев. Соос шуныт кылъёс вераллям Чечняын бадӟым юрттэт сётэмзы понна. Владимир Щербаков отрядысь боецъёсты ӟечкылаз дор палъёсазы вуэменызы но тау кариз Россилэн "пӧсь интыяз" бадӟым но кулэ ужез быдэстэмзы понна. Удмуртиысь МВД-ын ужасьёс республикалэн палэназ но данзэс ӧз уськытэ. Котькудӥзлы боецлы министр сётӥз Россилэн Вылӥ Главнокомандующиезлэсь Владимир Путинлэсь тау карон гожтэтъёссэ, коньдон премиос. Куд-огез милиционеръёс дырызлэсь вазь званиос но басьтӥзы. Котькуд боецлэн анай-атаезлы республикаысьтымы югдурез утёнъя министрлэсь милициын Владимир Щербаковлэн нимыныз тау карон гожтэтъёс ыстэмын луозы. Удмурт Республикаысь МВД-лэн пресс-службаез. Таняпайлы тау Выжыезъя пушъетэз луэ, шуо. Озьы ик - Таняпайлэн но. Гурт ужез яратыса, чырткем ужаз, пенсие потыса но ужлэсь уг пыкиськы. Нылпиосыз но ачиз кадь ик ужасесь. Пиез, Аркадий Григорьев, - комбайнер. Солэсь зол тыршемзэ, "Решительный" колхозын гинэ ӧвӧл, районын но ӟеч тодо. Пичиез нылыз, Юля, кык ар Афганистанын ожмаськиз. Отысь бертыса, Курильской шормуӵъёсы кошкиз. Каньыл улон инты уг утча - кытын секытгес, отчы ик мынэ. Таняпайлэн мукет кык нылъёсыз Алнаш станциын но Кам дурысь Менделеевск городын ужало. Та суред азьвылгес лэсьтэмын ни вал, но Таняпайлэн тусыз али но сыӵе ик. Юрт котыраз бергам сяна, со учке-утялтэ бадӟым аресо атайме - кык ож пыртӥ ртчем ветеранэз Николай Петрович Виноградовез. Со кадровой офицер вал, финнъёсын ожмаськиз но отчысь сӧсырмыса бертӥз. Йӧназ но, Быдӟым оже келязы. Отысь нош сӧсырмыса бертӥз, али но бурмемын ӧвӧл. Таняпаез тулыс праздникен ӟечкыласа, солы атайме утемез-вордэмез, учкемез понна бадӟым тау кареме потэ. Семен ВИНОГРАДОВ, калык суредась. ШӦКЫЧ Алексей АЛЕКСЕЕВ Сал ке луысал Эх, малы меда асьмеос туала улонлэсь сокем бере кылиськом? Каргам капиталлэн дуннеяз тани олошайзэ но малпало. Австриысь тодосчи Отто Кауж, кылсярысь, аспӧртэм амал шедьтэм вуж шубаосты выльдон ласянь. Дӥсякутысь пилеш интыез Калуж зыре аспӧртэм сылметэн (растворен). (Тазэ малэсь лэсьтэмзэ со уг вера). Собере дӥсез понэ шуныт азе. (Отын кыӵе температура воземзэ уг шарая).Толэзь ортчыса, гольык интыын пуштыр-пуштыр ӝужа выль гон. Соболь ку вылын - соболь гон. Чайы ку вылын - чайы гон. Тодосчилы сётӥзы музейын 18-тӥ даурысен утиськись шубаосты. Одӥгтэм "эмъяз" ява кибашлыед. Кин тодэ, буржуйёсыд оломар но шедьтозы ай. Пӧйшуръёсты виылыны "вожъёс" уг лэзё ни бере, оло коньылэсь быж йылзэ гинэ вандозы но отысь быдэс шуба будэтозы. Озьы пишмысал ке, Ижысь механической заводлэн 33-тӥ цехаз ужась Наталья М. Культурая училищеетӥ юнме ӧй кельтысал. Дышетӥсьёслэн комнатаязы ӧй пырысал но 3 сюрс манет тыр шубаез капыртыса ӧй пегӟысал. Озьы пишмысал ке, милицаос нокыӵе лушкаськисез ӧй утчасалзы но нокинэ ӧй ӝегатысалзы. Озьы луысал ке, Натальяез судэн но ӧй курдатысалзы. Солы 20 арес ке, 21 арессэ кытын ке палэнын пумитано луоз шуыса ӧй малпасал. Каргам капиталистъёс! Малы выль амалдэс ватыса возиськоды? Шубаен сэрен ик умойтэме усизы Ижысь автовокзал котырын гожеръясь ерпечкаос. Сьӧдкысъем егит пиез куризы дӥсьсэ кыльыны. Пайдаез ӧвӧл. Косӥзы кылиськыны. Пи ӧз вала. Курдатӥзы. Мырдэм ятвылтӥз. Сириысь лыктыса. Медициная академие пырем мурт ӟуч йыртэмасьёслэсь кылзэс дышетыны вуымтэ уга. Со понна арабез чаляк валазы милициын. Шаермылэсь данзэ утён вылысь туж чаляк бызьылӥзы но шедьтӥзы дась кӧтъёсты. Малэсь лэсьто спагетти шуонэз? Та вынъёс туж ярато, дыр, спагетти шуонэз. Соос чик соглаш ӧвӧл, сыӵе макаронэз Италиын гинэ ярато шуыса. Шонерзэ верано ке, отын ар ӵоже шорлыдын сиё, пе, 73 кило нянь но 35 кило гинэ спагетти. Ӵошатсконын гинэ итальянецъёс куддыръя сьӧраз ортчыло. Роччелла городын нюръяськон дыръя 27 аресъем Лило Гуарнери минутскын огназ 250 грамм макарон. Нош 12 аресъем Катальдо Ванкери сомындазэ ик ньылӥз 5 секундлы чальгес. Ӝог сиськисьёс вань Англиын но. Соос кужымзэс мерталляло Нортунч городын. Берлоучыре ӵошатскизы сӥлен миськем сиёнын. Питер Даусвил нимо воргорон сизьым минутскын 64 мильым сииз. Зэм, Чкордлэсь кузёзэ ӧз ӝутэ медадь сётъян пьедестал вылэ. Сое дыртӥд-вуттӥд нуизы больницае. Улонзэ мырдэм утизы. Тодмо ӧвл, мае юнгес ярато вынъёс Николай но Юрий 0 макаронэз яке мильымез. Созэ но, тазэ но пӧраны чабей кулэ. Кытысь сое шедьтод? Валамон ини Селта ёросысь Валамаз черкогуртлэн кеносысьтыз. Пиёкъёс уин лыктӥзы кенос дӥне. Ӧсэз пыльчытӥзы но 146 кило тысь капыртӥзы. Кемалы окмысал, вылды, лушкам чабей. Нош со спагетти дасяны ӧз яра. Вынъёсты кырмизы. Азьвыл судэ шедьылэм Николайлы пӧсь йӧтоз, дыр, 16 аресъем Юра вынзэ коть жалялозы меда? Эрик люке эриклэсь Яр Челлы городын улӥсь К.Каримов кӧня ке ар талэсь азьвыл малпаз... велосипед. Шонергес вераса - солы педаль. Огшоры велосипедын педальёсты бергатоно луэ. Татын - вылӥысен улӥе зӥбылоно гинэ. Яке огзэ бӧрсы мукетсэ, яке кыксэ ик ӵош. Выллане тубыку но пыдъёс сокем уг жуммо. Глазовын Кибашлы К.Каримов уг улы, татын тросгес Касимовъёс но Корепановъёс. Удмурт городысь кык пиослэсь уин курадӟемзэс Каримов адзысал ке, маке ӟечсэ соос понна но малпасал, луоз. Нош пиёкъёс пичи дӧдьыен (салазкиен) секыт мае ке нуо вал. Туж пычкисько. Эрик (Свобода) карлудын пияшъёсты дугдытӥзы милицаос. Ерпечкаослэн олокытысь кужымзы потӥз. Дӧдьызы омыре ӧжыт гинэ ӧз ӝутскы. Отчы тыремын вылэм сыномисьтэм андан гумыос. Кӧня ке час ортчыса, та площадьын ик дугдытэмын вал "Москвич" машина. Отысь шедьтэмын таӵак воштос детальёс. Лушкаськисьёс Эрик карлудэз табере Эриклэсь люкон карлуд нимало. Синпӧртмасьёс Музон йыртэман учыръёс но ӵемысь герӟаськемын луо машинаен. Тӥни малы транспортэз чаклало лушкаськисьёс но, милицаос но, полициос но. Америкаысь Детройт городысь поилция уг уйылы ни машина лушкасьёсты. Осконтэм автомобиль шоры фонарик выллем арбериен мертасько но пичи бирдыез зӥбо. Машина тыпак! Дугдэ. Малы, шуоды? Приборысь электротулкымъёс кӧня ке дырлы кысо аккумуляторез но генераторез. Пегасьлы пегӟыны нокытчы. Со гипноз улэ шеде кадь. Глазовысь ик огез водитель милицилэсь ноку но ӧз пега. Нош ульчаысь тодмотэм воргорон кизэ ӝутӥз но - шофёр тормоззэ зӥбиз. Пиосмурт вакчияк вазиз: - Сулимов ульча6 56. Гипноз улэ сюрем водитель кылзӥськиз. С.ресчи кулэ интые вуэм но машинаысь потыса ышем бере гинэ шофёр сайказ. Шӧдӥз: синпӧртмась адями сьӧры кӧчем машинаысь дуно изьы но. Машина бен юмоке ӧз усьы. Пӧртмаськись воргоронэз шедьтӥз но кырмиз. Уката абдрамонгес учыр вал Ижысен Можгае мынон сюрес вылын. Автоинспекторъёс дугдытӥзы син шоры йӧтӥсьтэм КамАЗ машинаез. Тодматскизы но - ребус мактал пӧрмиз. Солэн кузёез - Волгоградысь "Февраль" нимо огазеяськон. Моторзэ утча Таджикистан. Прицепсэ но шассизэ - Москва область. ШӦКЫЧ СЕРЕМ ПЫР *** Бакчаез копаны дыр вуиз ни. Пересь кышноезлы шуэ: - Ойдо, мусое, "Угадай мелодию" шуонэнызы шудом. - Ойдо, - соглаш луиз соиз. - Мон бакчаез сизьым час куспын копало. - Нош мон, - шуэ кышноез - куать час ӵоже. - Мон - вить час куспын. - Нош мон - ньыль час куспын. - Копа, - шумпотӥз пересь. *** Кышномурт гуртаз таксиен бертэ. Сюрес дунзэ тырыны шуыса сумказэ усьтэ но - уксёез ӧвӧл. - Номырин тырыны! Шофёр берлань берытске но машиназэ нюлэскы дугдытэ, собере турын вылэ простынь вале. - Мар тӥ кариськоды? Мынам куинь нылпиосы. - Нош мынам ньыльдон кролике. Турын ишкы но татчы тыр. Г. БАЖЕНОВА. Удмурт Элькунысь Нациосын ужанъя министерство, "Удмурт кенеш" огазеяськонлэн исполкомез, Удмурт нылкышноослэн кенешсы мур куректыса иворто удмурт калык движение мыло-кыдо пыриськем мурт СУРИНА Светлана Андреевна улонысь дырызлэсь вазь кошкем пумысь но кайгыремзэс верало солэн ӵыжы-выжыосызлы но эшъёсызлы. Альбом вамышъя ёросэтӥ Быдӟым Вормонлы сӥзем альбом-эстафета Завьял ёросысь Якшур гуртэ вуиз. Соин валче вуэм куноосты пумитазы кырӟанъёсын, нянен-сылалэн. Альбомез сӥё-дано сётӥзы ужлы но ожлы сӥзем музейын. Тодэ ваёнъёс... Соос уно гинэ чузъяськизы. Войнаын трос секытсэ адӟиз разведчик- артиллерист Н.Г.Баймачев. Мырдэм улэп кылиз Якшурысь одӥг гинэ фронтэ ветлэм кышномурт Е.И.Осинцева. Со нылкышноослэн зенитной дивизионазы немец самолётъёсты уськытъяз. Фронт мышкын лэсьтӥськон ужъёсын тыршизы А.М.Морозова, К.М.Одинцова, А.Г.Пудов. Альбомез сётонын вераськизы ёрос администрациысь ужъёсты радъянъя ёзлэн кивалтӥсез Л.В.Есюнина, ёросысь ветеранъёслэн кенешсылэн председателез Л.Н.Вахрушева, мукет адямиос. Матысь нуналъёсы альбом-эстафета "вамыштоз" Хохряки гурт администрацие. Н.ИВАНОВ. Юбилей азьын Кызьы ивортылӥм вал ини, Быдӟым Отечественной ожын Вормонлы 55 ар тырмонэн валче сое дасянъя но радъянъя комитет кылдытэмын. Алигес ортчиз солэн кенешез. Нуиз сое Правительстволэн Тӧроезлэн воштӥсез Виктор Шудегов. Кенешын вераськон мынӥз дано нуналлы дасяськонлэн мынэмез сярысь. Кылсярысь, Тазалыкез утёнъя министерство сюлмаське оже ветлэмъёслы ватсаса юрттэт сётон сярысь. Культурая министерство кылдытӥз нимысьтыз ужась группа, кудӥз радъя шайгуосты, памятникъёсты но мукет дано интыосты утялтон-выльдонэз. Правительство дасяз оже ветлэмъёслы но Атыкай музъеммес утьыку бырыны шедемъёслэн семьяоссылы коньдонэн юрттон сярысь постановленилэсь инъетсэ. "Ветеранъёс сярысь" Федеральной Законэз кызьы быдэсъямзы сярысь ивортӥзы Вавож ёрос администрацилэн тӧроез Татьяна Иноземцева но Дэбес ёрос администрацилэн тӧроезлэн воштӥсез Валентина Перевозчикова. Удмурт Республикаысь Правительстволэсь юбилейлы дасяськон сярысь постановленизэ быдэсъян пумысен вераськизы калыкез дышетонъя министр Любовь Захарова, Егитъёсын ужанъя кун комитетлэн тӧроез Андрей Гальцин но культурая министр Николай Бессогонов. Оргкомитетлэн ужаз озьы ик пыриськиз Кун Кенешлэн Тӧроезлэн воштӥсез Наталья Харина. Удмурт Республикаысь Правительстволэн пресс-службаез. Вӧсьлык ужъёсъя Кун Кенешлэн Тӧроез Александр Волков пумиськылӥз Ижевскысь но Удмуртиысь Архиепископен Николаен. Вераськон мынӥз Казань Инмар анайлэн черказ лэсьтӥськон ужъёс мынэм сярысь но. Свято-Михайловской соборез ӝутон пумысен. Туннэ нуналлы пӧртэм организациос но нимаз адямиос черк лэсьтонэ 6 миллион пала коньдон люказы-сётӥзы. Александр Волков но Владыко Николай огъя кылэ вуизы: Свято-Михайловской собор луыны кулэ сыӵе, кыӵе вал со азьвыл. Быдэс Россиын со выллемез ӧвӧл. Кун Кенешлэн Тӧроез но Епархилэн кивалтӥсез малпанъёссэс веразы вуоно быръёнъёс но Удмурт Республикалэн Конституцияз воштонъёс пыртонъя референдум пумысен. Александр Волков пумиськылӥз Россия Федерациысь мусульманъёслэн духовной управленизылэн кивалтӥсеныз Талгат Таджуддинэн. Соос пусйизы: Удмуртиысь мусульманъёс вылэ мукет калыкъёс ласянь зӥбон-пачкатон мылкыд уг шӧдӥськы, шаерысь вань калыкъёс тупаса, огъя сюлмаськон-куректонэн уло. Удмурт Республикаысь Кун Кенешлэн пресс-службаез. АКАДЕМИЯ ПОЛОСА Надежда КОНДРАТЬЕВА: "ЯЛАН БУДӤСЬКОМ" Ижысь гурт удысъя кун академиын Надежда Кондратьеваез гажало. Со - учёной- секретарь но автоматизированной электроприводъя кафедраын доцент. Лыдӟе лекциос, нуэ семинарской занятиос но дася егит тодосчиосты, аспирантъёсыз вань. Туннэ гурт хозяйствоя вылӥ дышетсконниез син азе ик пуктыны секыт. Ватонэз ӧвӧл, вазен гурт хозяйствоя институтъёс кыкетӥ радын кадь возиськизы. Отчы пырыны мылкыд карисьёслэн лыдзы ноку бадӟым ӧй вал. Но берло дыре югдур воштӥське. Челябинскысь гуртын механизацияя но электрофикацияя институтэз быдтыса, монэ ужаны ыстӥзы Ижысь гурт хозяйствоя институтэ. Со вал 1978-тӥ аре. Собере Москваын дышетски аспирантураын, йылпумъяй 1985-тӥ арын, технической наукаосъя кандидат луи. ИСХИ ваньзэ лэсьтӥз, тодосчи луон понна. Али пунэмзэ берыктӥсько, егитъёсты наукае кыскисько. Кык аспирантъёсы. Кылем ар пумын одӥгез, Иван Владыкин, Москваын научной ужзэ юнматӥз, техника наукаосъя кандидат луиз. Со шумпотымон. Кыкетӥез, Александр Бекмачев, дышетске на. Со "Аксион-холдинг" огазеяськонын валтӥсь инженер луыса ужа. Куд-огез мынэсьтым юа, кыӵе, пе, тӥляд ужды? Лекциос лыдӟем сяна, нуисько семинарской занятиос но студентъёслы юрттӥсько дипломной но курсовой ужъёс лэсьтыны. Соос котьку тау каро. Но со ушъяськемлы медаз пӧрмы. Егит муртлы юрттӥськод ке, со ноку уз вунэты. Эшшо одӥгзэ вераме потэ на. Валля арын (1998) Ижысь думалэн премиезлэн лауреатэз луи. Дас лауреатъёс пӧлысь академиысь ми кык кузя вал. Одӥгез - Светлана Ижболдина, наукаосъя доктор, профессор, шаерамы тодмо тодосчи (пудо вордон удысъя). Со юнэсь кусыпъёс возе Вавож районысь Мичурин нимо гурт хозяйствоен, солы трос юрттэ. Эшшо одӥгзэ пусъё на. Вить ар талэсь азьло Всероссийской конкурсын студентмы Алексей Кельдышев вормисе потӥз. Вож сиён будэтонъя установкаез самой устоез лыдъямын но солы медаль сётэмын. Академиысь учёной-секретарьлэн ужез котьку тырме. Озьы ке но, шумпотыса гожтэме потэ, ИжГСХА арысь аре будэ. Пумен тросгес луо наукаосъя докторъёсмы но кандидатъёсмы, профессоръёс но доцентъёс. Нош ректорлы Валентин Фокинлы академик ним сётэмын. Огъя вераса, студентъёсты 335 мурт дышетэ. Соос пӧлын - 5 академик, наукаосъя 21 доктор но профессор, нош 170-эз доцентъёс но наукаосъя кандидатъёс луо. Вань дышетӥсьёс пӧлысь 60 процент ёросэз тодосчиос луо. Со урод ӧвӧл. Академиын 13 специальностьёсъя, аспирантураос усьтэмын. Али 70-лэсь уно аспирантъёс но тодосчи луыны мылкыд карисьёс. Кандидатской ужъёсъя нимаз советъёс кылдытэмын таӵе профессиосъя: "Пудо вордон амалъёс но нимаз зоотехника", "Калык хозяйствоын экономика но кивалтон". Тодосчиосмы арысь аре ӟеч ужъёс лэсьто, патентъёс басьто но научно- исследовательской ужъёссэс паськытато. Тани академиын кылдытэмын усто выль сорт "Улов" сезьы. Сое Россиысь 48 улосвылъёсын кизё но будэто ни. Озьы ик кылдытэмын чабейлэсь но ӟеглэсь гибрид сорт. Сое "Тритикая" нимало. Академиысь тодосчиослэн тыршеменызы умоятэмын ыж выжы, лэсьтэмын музъем ужанъя выль машинаос но оборудование. Соос герӟаськемын музъемез усто гыронэн, кизёнэн, юосты утялтонэн, аранэн но переработкаен. Тодосчиосмылэн ужъёссы тодмо Россиын но кунгож сьӧрын, кылсярысь, США-ын, Германиын, Мексикаын Канадаын, Голландиын, Венгриын, Финляндиын но музон кунъёсын. Кунгож сьӧрысь тодосчиос дорамы но вуыло, академиын лекциос лыдӟо. Шат со урод? Ӧвӧл, конечно. Кӧняез ке студентъёсмы ужан практиказэс ортчо Германиын, Венгриын, Голландиын но мукет кунъёсын. Нош данакез ортчо шаерысьтымы азьмынӥсь гурт хозяйствоосын но АПК-лэн предприятиосаз. Тӥни озьы академия дуннеысь кунъёсын кусыпъёссэ ялан юнматэ но паськытатэ. Со шумпотымон. Али академиын 5800 мурт дышетске. Со пӧлысь нуназе - 3600, нош заочно - 2200. Миым нырысетӥ курсэ кутэмын 800 адями (нуназе) дышетскыны, заочно - 300. Быдӟым Вормонлы - 55 ар Каръян кенакъёс чидазы Вормон нунал матэктэмъя, нош но нош тодэ лыкто война дыръя улэм-вылэм дыръёс. Соин ик газет баме гожтыны малпай. ... Война! Нырысь-валысь та шимес кыллэсь кышканы ӧй вала, еж на вал. Арысь аре улонмы туж секыт луыны кутскиз. Гурт калык вылэ кык-куинь полэс секыт зӥбет усиз: кайгу, ёрмыса улон, секыт уж. Гуртэ нылпиос но нылкышноос кылё. Собере котькудаз сямен семьяе секыт ивор вуэ, кузпалзы, пизы, вынзы-агайзы бырыны шеде, яке сӧсырмем сярысь гожтэт басьто. Куд-ог семьяысь куинез-ньылез быризы. Кылсярысь, вордскем гуртысьтым (Вукогурт) Перевощиков Иванлэн вить пи пӧлысь ньылез бырыны шедиз: Матвей, Мануил, Семон но Михаил. Куинезлэн кузпалзы но нылпиоссы кылизы. Никитина Федоралэн но кузпалыз, Илья, пиосыз, Женя, Миша быризы, Алексей пиез палпыд бертӥз. Федоров Кирилллэн кыкез пиез, Степан но Геннадий, улонэн люкиськизы, Гриша пиез, тазалыкез лябӟыса бертӥз, дырызлэсь вазь улонысь кошкиз. Хохрякова Вералэн кузпалыз Николай но куинь пиосыз, Витя, Кронид но Асинкрит, бырыны шедизы. Леконцева Алёналэн (гуртын Олёна кенак шуо) кыкез пиез ӧз берытске ни. Ой, ма быдӟа кайгуэз чидано луиз мискинь нылкышноослы. Ужанниын кылыны луэ вал куректыса-бӧрдыса пыд ӟигаръёсмы но ӧй вал ни шуыса верамзэс, вылаз ик, сиён но урод вал. Вормонлы 50 ар тырмонлы сӥзем нуналэ люкаськем калыклы фронтовикъёслэсь куд-ог гожтэтъёссэс лыдӟизы, ваньзэ лыдӟыны валаны но ук луы ни вал, ӵужектэмын, посӥськемын, семьяын олокӧня пол лыдӟылэмын-бергатэмын уг со гожтэтъёс. Со пӧлысь огез уг вуны.Тюарысь Семенов Федор гожтэм: - Марина, гуртысь кошкыкум пиосме чупаса-вешаса но ӧй кельты, лэся, ук (соос ньыль кузя вал) будэты, утялты, кызьы ке но дышетыны сюлмаськы вал. Атай ож лудысь ӧз берты ни, пиналъёс сирота кылизы. Кышкыт тушмонэз вормон понна, калык, секыт улонлы сётскытэк, уй но нунал сикын, лудъёсын, сюрес лэсьтонын ужаз, ваньбур поттӥз. Колхозын будэтэм ю-нянез ваньзэ сямен государстволы келяло вал, со сяна, арлы быдэ котькуд нимаз хозяйство военной но сельхоз налог, заём тыриз, 40 кило сӥль, 75 курег пуз, 160 литр йӧл, ыж гон сётоно луэ вал. Ас мылкыд каремзыя кисет, носки-пӧзь фронтэ ысъяллязы. Таза валъёсты но уробое кыткон тӥрлыкен валче келяло вал. Озьы гурт калык уробое порозъёсты (ошъёсты), скалъёсты кыткыса ужаз. Кыӵе курадӟоно вал соосты дышетыны. Нокин но шуг-секытъёслэсь ӧз палэнскылы. Кинлэн ке пичи пиналъёссы вал, огназэс корка пытсаса кельтылӥзы. Вазен борддор валлин ӟус пуктылэмын луэ вал. Пиналмы укное тубыны медаз быгаты шуыса, ӟусмес, пе, гаӵоло берыкъяса кельтӥськомы. Озьы гурт калык гыриз, усыяз, кизиз, турназ, араз, ю-нянь будэтӥз. Нокызьы но вератэк кельтэме уг поты тол вылтӥ сикын пу кораса улэммес но Ижевск- Балезино чугун сюрес лэсьтонын ужаммес. Та сярысь бен трос гожъямын ини, но пинал дыръя курадӟыса секыт ужам дыръёс ялан тодэ лыкто. Сикын но нылпиос но нылкышноос ужазы. Пиналъёс писпу погыръязы, нылкышноос валэн кор поттылӥзы. Ӝытазе бараке кускозь котмыса бертӥськод но дӥськутэз плита котыре ошылӥськод, отын ик сиён пӧзьтӥськомы. Собере нараос (кӧлан интымы озьы нимаське вал) вылэ шутэтскыны-кӧлыны каръяськиськомы. Пельмы - миндэр, урдмы валес вал. Кезьыт но секыт ужын жадиськод но кӧлӥськод вал ини. Чугун сюрес лэсьтыку, нырысь Кекоран сикын балаганын улӥмы, собере Лысо гуртын туж мур нюкез сюен тырмытыса ӵошатоно вал. Ӵукна шунды ӝужаку ик, бригадирмы подъём! шуыса кеськыса сайкатъяз, кӧлан интымы тырттэм сеник вал. Нош ужын, ӵапак ужась кузьылиослэн мыд-мыдлань ветлэмзы сямен, кин валэн, кин носилкаен сюй нуллэ, кин киськам сюез пуклёкъёсын ӵошкатыса ветлэ. Толалтэ Гыра селоын выж лэсьтонын ужамы, собере чугун сюрес поттыны сикез сайкылӥм. Нокыӵе техникаез адӟылыны ӧйлась, ваньзэ адями киосын но, вал кужымен лэсьтӥськиз. Озьы фронт мышкысь калыкмы вань шуг- секытъёсты чидаса тыршиз: со ик юрттӥз лек тушмонэз вормыны. Тани вуиз кема витем шумпотон - Вормон нунал. Калык хозяйство туж зол куашкатэмын. Куашкам калык хозяйствоез тупатон, выльдон, ӝутон понна правительство вить арлы план кутӥз. Со но сюлмо калыклэн тыршеменыз дырызлэсь вазь быдэстэмын вал. Витьтонэтӥ аръёсы калыклы туж кулэ луись вузъёслы: няньлы, сылаллы, спичкалы, керосинлы, майталлы дунъёсты кулэстылӥзы. Улонмы арысь аре тупатске ни вал. Нош табере - выльдӥськон. Нош ик керӟег война. Юнме шорысь егит пиосмы быро, соослэн югыт дунне вылын улэмзы уг поты вал шат? Анайёслы, ӵыжы-выжыоссылы ма быдӟа куректон, номырин воштонтэм ыштон. Матысь тодмо пиослэсь быремзэс тодыса, уката бадӟым кышкан, куректон сюлэме каръяське. Тани мынам но куинь кузя пиосы армиын служить каризы. Соос понна сыӵе кышкаса ӧй улы, малы ке шуоно, соку война но ӧй вал, армия но данъяське вал. Нош али куать кузя внукъёсы будо. Одӥгез армиысь бертӥз, мукетыз мынӥз, Дагестанын службазэ нуэ, кылемъёсыз но мынозы, вылды. Соос понна ялан сюлэм кышкаса-куалекъяса улэ. Газет басьтӥсько ке, одӥг кылзэ но кельтытэк лыдӟисько, утчасько, шумпотон ивор ӧвӧл-а меда, ӧз дугды-а Чечняын война? Кун Думаын но Правительствоын туж визьмо калык быръемын. Малы войнаез дугдытыны уг быгато, малы одӥг кылэ вуыны уг сюлмасько? Соослэн сюлэмзы уг висьы шат? Та гожтэтме туж бадӟым кӧтӝожен гожтӥсько. Война аръёсы но, бӧрысь но секыт улон нылкышноослэн но пиналъёслэн пельпум вылазы усиз. Самой вож пинал писпуэз вушъён дыръяз чигтэм сямен, пинал ёзвиосты война куасалтӥз, соин ик али котыр ласянь висён зӥбе. Пенсия лыдъякузы, воксё санэ ӧз басьтэ война дыръя секыт ужъёсты быдэсъямез. "Ужысь ветеран" нимез нуллӥськомы, эмъюмлы гинэ но льгота ӧвӧл. Ку меда улон- вылонмы тупатскоз? М. Шкляева. Шаркан район, Н-Кивар. Ивортон Котырысь инкуазез кышкыт учыръёслэсь утёнъя нуналъёс ортчытэмен валче, ӵуказе, 15- тӥ мартэ, экологияя меӵак телефонъёс ужалозы. 10 часысен 12 часозь юанъёслы валэктонъёс сётозы: Кургузкин Михаил Георгиевич, УР-ысь инкуазь узырлыъкёсъя но котырысь инкуазез утёнъя министрлэн 1-тӥ воштӥсез - 51-39-67 Деньгин Александр Сергеевич, УР-ысь Котырысь инкуазез утёнъя комитетлэн кивалтӥсез - 51-46-45 Протозанов Сергей Владимирович, Ижевсклэн вице-мэрез городысь инкуазез утёнъя радъясь комитетлэн кивалтӥсез - 22-73-06 Загребина Татьяна Аркадьевна, Удмурт гидрометлэн кивалтӥсез - 26-59-86 Прокашева Тамара Васильевна, УР-ысь Инкуазь узырлыкъёсъя комитетлэн кивалтӥсез - 78-47-11 Тепляков Александр Васильевич, УР-ысь чорыг вордон-будэтон но утён удысэз эскеронъя валтӥсь кун инспектор - 75-57-11 Торопов Игорь Валентинович, УР-ысь Музъем узырлыкъёсъя комитетлэн кивалтӥсез -51-37-67 Булатов Василий Прокопьевич, УР-ысь пӧйшуръёсты утёнъя, соослэсь лыдзэс эскеронъя но кутонъя управленилэн кивалтӥсез - 78-61-03. Пумиськон Кылбурчиез кылзо вуоно дышетӥсьёс Удмурт кун университетлэн одӥгаз юртаз, азьло общежитиын, али уло 56 номеро гимназиын дышетскисьёс, республикамылэн пӧртэм ёросъёсысьтыз, гурт школаосысь лыктэм пиналъёс, азьланьын дышетӥсь луыны дасяськисьёс. Отысь пичи аудиториын, азьло сое горд сэрег шуо вал, поэзилы сӥзем ӝыт кутскиз. Жингырто кылбур чуръёс - вордскем шаермы но ӵыдонтэм инкуазьмы сярысь, Удмуртимес но солэсь шоркарзэ Ижез данъяло. Со чуръёс басьтэмын ӟуч поэтлэн Владимир Тяптинлэн "На пруду Ижевском", "Город нашей любви", "Вздымаются храмы в России" книгаосысьтыз. Отчы пырем кылбуръёссэ, сцена вылын шудӥсь артист сямен ик чебер но сюлме пыӵамон лыдӟе авторзы. Вераськон потӥз солэн "Зеркало" нырысетӥ книгаезлэн кызьы но ку кылдэмез сярысь. Отчы пыртэмын басняосыз но серемес веросъёсыз. Таисьтыз Владимир Яковлевич лыдӟиз куд-ог басняоссэ. Вераны луоз, кылбурчилэн ужъёсыз ваньмыз сямен яратонлы сӥземын. Сое возьматэ али гинэ потэм ӵыжак выль книгаез. "О роза дивная!" нимаське со. Улӥяз гожтэмын на: "200 тостов о любви". Валамон ини, авторлэн лыдӟисьёссэ тодматэмез потэм выль книгаеныз. Поттэмын со ӵапак юбилеез - 60 арес тырмонэз - азьын. Дышетскисьёсты юбилярен тодматӥз но вакчияк творчествоез сярысь вераз университетысь ӟуч литературая кафедраен кивалтӥсь, писатель, филология наукаосъя доктор Анна Сергеевна Зуева-Измайлова, со ик та пумиськонэз радъяз но. Ӝытэ люкаськемъёс вераськон вискын кылзо кылбурчилэсь кырӟанлы пӧрмытэм гуръёссэ но. Магнитофон нырысь ик шудэ "Город нашей любви" кырӟанэз, тае Ижын улӥсьёс асьсэлэн гимнзы интыын лыдъяло ни. В. Я. Тяптинлэн сюлэсь ятыр кылбуръёсыз. Ижысь но Москваысь крузьгурчиосын синйылтыса, кырӟанъёслы пӧрмытэмын. Нош кызьы уд вера поэзилы сӥзем ӝытэ лыктэмъёсты, дышетӥсь луыны дасяськись нылъёсты но пиосты?! Гимназилэн 10-тӥ но 11-тӥ классъёсаз дышетскисьёс со, тодон- валан шаере туж мыло-кыдо кыстӥськись муртъёс. Татын кык ар дышетскыса, университет улонэз ӝог валалозы, студентъёс радэ султозы. Сыӵе малпанъёсын гимназие лыктэмын. Быръем специальностьсылы вить ар дышетскизы бере, гуртъёсазы дышетӥсьёс луыса бертозы. Нош али егитъёс тодон-валанъёс но кужым люкало. Огшоры школалэн программаезъя гинэ ӧвӧл, пӧртэм факультативъёсы ветло на. Тани таиз но ӝыт - поэзиен тодматскон - пиналъёслы шумпотон но ӟеч мылкыдъёс вае. В. Я. Тяптин кылбурчи сярысь тросэзлэн кылылэмез но ӧй вал, нош Катя Измайлова со сярысь тодӥз 14-тӥ лицейын дышетскыкуз ик. Отчы Владимир Яковлевич поэзиен тодматскон урокъёс нуыны ветлылӥз. Та ӝытэ солэсь кылбурзэ лыдӟиз Катя но. Тодматскисько куд-ог нылъёсын но пиосын. Наташа Шудегова, татчы 10-тӥ классэ лыктытозяз, Завьял ёросысь Шаберды школаын дышетскемын, Удмурт филологияя факультетэ пырыны дасяське. "Куӟебай Герд, Кедра Митрей, Ашальчи Оки но мукет кизилиосмы сярысь ӟечгес тодэме-валаме потэ", - шуэ со. Ӟуч кылэз но литератураез яратыса гимназие лыктэмын Балезино ёросысь Каменное Заделье гуртысь Юля Михайлова, Балезино посёлокысь Маша Варзегова. Соос филология факультетэ пырыны дасясько. Юля аслаз школаяз 10-тӥ классэз йылпумъям ни вылэм, нош татчы выльысь 10-тӥ классэ лыктэмез пумысен уг жаляськы ни, шуэ. Татын программалэсь мултэссэ, трос тунсыкозэ тодэмез луоз. Нош гуртысь школаяз ӟуч кылъя но литературая дышетӥсьёс арлы быдэ сямен вошъяськылӥзы, пе. Пиналъёсын ӵош поэзилы сӥзем ӝытэ ветлӥзы дышетӥсьсы Мария Валерьевна Данилова, интернатэн кивалтӥсьсы Елена Александровна Фоминых. Соос но дышетскисьёссы сярысь ушъяса, шуныт кылъёс гинэ веразы. Пусйизы егитъёслэсь трос тодыны-валаны тыршемзэс, улонэ мылысь-кыдысь пыриськемзэс, пӧлазы самоуправлениез радъяны тыршемзэс. 10-тӥ классын соос 28 кузя, 11-тӥын - 22 кузя. Конкурс экзаменъя шедемын удмуртъёс но, ӟучъёс но. Нош пиос пӧлазы ӧжытгес - 8 мурт гинэ. Та ӝытэ, кылсярысь, лыктэмын вал 11-тӥ классысь Сергей Кирдяев, азьло аръёсы Пычас школаын дышетскемын. Шаплы пияш физкультурая но спортъя дышетӥсь луыны малпаське. "ХХИ дауре кужмо дышетӥсьёс гуртъёсын но луыны кулэ", - сыӵе малпанэн ужало туннэ гимназиын. Л. Федоров. ФЕРМАОСЫН Якшурын бызе йӧл шур Трос йӧл кыскыны быгатӥсь фермаос сярысь кылыса, малы ке но соку ик тодэ лыктэ йӧлэн палькаськыса бызись шур но кисаль кадь суралтэм ярдуръёс. Ваньмыз со - выжыкыл, улонысь таӵе суредэз ноку но уд пумита. Нош умой-умой учконо, лыдъяно- чотано ке, зэмен но, вань фермаосты огинэ карыса, шаертӥмы кыӵе меда йӧл шур ӧръяськысал? Тужгес но кужмоез та вакытэ бызьысал, дыр, Вавож, Ува, Игра, Воткинск ёросъёсын, Ижевскез котыртӥсь Завьялово районын. Самой соос али азьпал радъёсын мыно. "Путь Ильича" колхозысь Якшур ферма ог куамын арлэсь ятыр устоосыз пӧлы пыре. Кемалась пенсие кошкизы но шутэтско ни данэ потэм скал кыскисьёс, ошпи куайытӥсьёс, кунян будэтӥсьёс. Интыязы лыктӥзы егитъёс. Соос быгатыса азинто пудо вордӥсьёслэсь сямъёссэс - арлы быдэ трос йӧл кыско, сӥль будэто, колхозлэсь кассазэ узырмыто. Хлзяйстволэн одӥг гинэ фермаез, соин ик ваньмыз - син азьын. Кин кызьы ужа, кыӵе мылкыдын лыктэ, кыӵе мылкыдын бертэ, кӧня йӧл нуналаз кыскиз, кӧня пудо сиён быриз - ӟеч кузё ваньзэ адӟыны, чакланы кулэ. Котькудӥзлэн сюлмаськемез бордысь потэ хозяйстволэн пыд вылаз йыг-йыг сылэмез но уждунлэн быдӟалаез. Ушъяськон медаз луы, но якшур калык дышемын пӧсятозь ужаны но коньдонэн улыны. Городэн артэ пуксем бадӟым гуртын котькудӥз (ӧз ке азьтэмъяськы), уксё поттыны быгатоз. Но со понна кустэ, кужымдэ эн жаля: бакчаяд ужа, пудо ворды. Кызьы шуо, вӧз вӧзы вӧз, вань вылэ вань. Уждунзы сярысь ке верано, якшуръёс понна туала вакытэ со бадӟым уг поты - шорлыдын вераса, толэзяз 1500 манет пала люкаське. Колхозникъёслы арлэн пумаз сётӥське на 13- тӥ уждун, стаж понна ватсаса уждун, натуроплата - ю тысь, картофка, 200 килограмм йӧл. Ваньмыз со висъяське дунтэк. Правленилэн таӵе решениез кутэмын вал 60-тӥ-70-тӥ аръёсы, Николай Петрович Тарасов кивалтон вакытъёсы, туннэ но ӟеч сямзэс утьыны сюлмасько. Колхозлэн огез валтӥсь удысэз - скал кыскон но поттэм продукциез дыраз переработать карон. Якшуръёслэн йӧлзы басьтӥсь кие вуэ ни пакетъёсын но шуккем нӧкы вӧен. Та чотын ик скал кыскон пайдаен берытскыны ӧдъяз. Кызьы шуэ колхозлэн председателез Валерьян Арсентьевич Никитин, тол вылтӥ гинэ 6,5 миллион манетлы дась продукция вузамын. Тӥни озьы, куке но ыштон ваись удыс али пӧрмиз уксё поттӥсьлы. Озьыен, макем трос йӧл кыскод, сокем трос пайда басьтод. Арифметикалэн законэзъя музон сямен луыны но кулэ ӧвӧл кадь. Сӥль будэтон но кемалась ик ыштон ваемысь ӧз дугды, татын но юрттӥз переработка. Колхоз вузкаре сӥлен, пельнянен, ӝоген магазинъёсы вуоз Якшурын поттэм ӵынатэм колбаса. 1999-тӥ ар понна, оглом вераса, хозяйстволэн 3 миллион манет пала прибылез люкаськиз. Пунэмен тыронъёсыз ӧвӧл, нош колхозлы тыронъёссы вань гинэ. Котькытын сямен ик, татын но пудо вордон возиське нылкышноос вылын. Турын, силос дасян, валамон, таиз воргорон уж. Нош йӧл кыскон, кунян сюдон - быдэсак оскемын кышномуртлы. Колхозъя скаллы быдэ али кыско 14 килограмм ёрос. Нырысетӥ интыез басьто Любовь Баженова но Ольга Трофимова. Кылем ар ӵоже одӥг кысконо скалзылэсь соос 4905 килограмм йӧл люказы. Трослы ик бере уг кылё Людмила Антонова но Наталья Шамова. Соос быдэн 4889 килограмм йӧл кыскизы. Куинетӥ интыын - Валентина Медведева но Алевтина Сергеева - 4760 килограмм. Та лыдпусъёсты огинэ ватсаса но пудо йырлы уноятыса, зэмен но, пуж-пуж бызись йӧл шурез адӟысал, дыр. Нош колхозлэн скал уллёез пичи ӧвӧл - 550 йыр. Ӟеч кылын пусйыны кулэ кунян вордӥсьёсты но. Нина Загребина утялтэ али гинэ водскемъёссэ, куинь толэзёзь будэтыса келя "бадӟымъёсыз" пӧлы. Сутка ӵоже солэн пичиосыз, шорлыдын вераса, чеберско 676 граммлы. Аресозь ветылъёсты сюдонын адӟем карымон луэ Галина Бадьина. Солэн пудоосыз миым суткалы быдэ 541 граммлы куайизы. Ферма азинсконъёсын ужа бере, котькудзэ но пудо утялтӥсез умоен гинэ вераны луоз, дыр. Собыдӟа удысэз уго быдэс коллектив нуэ, котькудӥз огкадь кыл кутэ. Татын но ведь ваньмыз вӧй вылтӥ кадь уг кошкы, пумиськыло тырмымтэос но, янгышан учыръёс но. Куд-огез хозяйство бордысь ке но уг поты, шуккетэз со вылэ усе. Кылсярысь, "Путь Ильичаын" пудо йырзэс йылэтыны мылкыдзы туж бадӟым вылэм, но - луонлыксы ӧвӧл. Нош мугез одӥг: уг тырмы гырон-кизён музъемзы, возьёссы. Нокытын пудоез возьыны, сиён будэтыны. Якшуръёс туннэ ик дась ватсаса муос басьтыны. Озьытэк силос но, мукетсэ но тырмыт дасяны уд быгаты. Тани ук, туэ толзэ быдэсак сямен ортчо ни палэнысь басьтэм силос вылын. Со дуно усе. Нош кытчы пырод? Озьы тӥни, ӟеч кузёлэн котькуд гектарез - зарни чотын, нош мукетызлэн гектарен-гектарен буш кылле, аслыз но, бускелезлы но пайда сётытэк. Л.Медведева. * Валерьян Никитин - "Путь Ильича" колхозлэн председателез, Кун Кенешлэн депутатэз. * Зоотехник Любовь Моторина но азьмынӥсь доярка Людмила Антонова. * Николай Жуйков пудо-животлы сиён котьку дыраз вуттэ. Туспуктэмъёссы В.Камашевлэн но В.Беломорскихлэн. Генералэн вераськон Мар война та?.. Юады ке, ма туннэ тужгес но сюлмаськытэ странаямы улӥсьёсты, уноез шуоз - война. Бен, война. Чечен война. Валантэм война. Солэсь шуккемзэ тужгес но юн шӧдыны кутскиськод, асьме пичильтык элькун "груз-200" нимаськись коросъёс вуыны ӧдъяло ке. Озьы гинэ шат кӧня ке сюрс калык потӥз асьме ОМОН-ысь куинь егит пиосты берпум сюресазы келяны? Чечен ож сярысь кенешыны малпамы та ужпумез тодӥсь-валась муртъёс пӧлысь огеныз - Ижын улӥсь Геннадий Петрович Климентов генерал-майорен. Та адямилэн службаез уно пол герӟаськылӥз Кавказ палъёсын. Ма, шонерзэ вераса, со вань "пӧсь" интыосты ортчемын. Вал Афганистанын но, Вьетнамын но, Анголаын но... 1994-тӥ арын отставкае кошкиз, солэн огёзъёсыз шуныт кабинетъёсын ялан пуко на ке но. Геннадий Петрович ӧз ни быгаты асьме армиын кылдэм умойтэм югдурез чиданы. Озьы ке но, Климентовез чылкак ӧз палэнтэ. Одӥг-ог солы весь выроно луэ на армиен герӟаськем ужпумъёсын. Тани туэ январе со нош вуылӥз Кавказэ, мукет экспертъёсын ӵош эскериз тугаськем бугоре биниськем шуг-секытъёсты. - Геннадий Петрович, тодэм потэ Чечняын но со котырын кылдэм югдурлы дунъеттэс. Мар война та?.. - Кӧня ке нунал ӵоже ужамы Ингушетиысь лагерьёсын, вуылӥм Дагестанэ, со ёросъёсы, кытысен кутскиз, шуыны луоз, кыкетӥ чечен война. Валамон ни, Чечняын но трос пумиськон вал. Соку паськыт ожъёс мынӥзы ай. Берло дыре суред, кызьы тодмо, воштӥськиз. Котькуд адямилэн, котькуд ужлэн сямен, войналэн но пӧртэм палъёсыз вань... - Неужто отын но, вир пӧлын, маке умоез луыны быгатэ? - Бен, ӟечез сомында ни. Озьы ке но, пусъем потэ тани мае. Странаез утьыны быгатӥсь луон понна, армия аслэсьтыз кужымзэ одӥг-ог ке но зэмос ожын эскерыны кулэ. Афган война бере сыӵе луонлык ӧй вал, шуыны луоз. Бадӟым опытэн генералъёс шутэтскыны кошкизы. Армиен кивалтонэ академиосты йылпумъям но ожез адӟымтэ егитъёс вуизы. Соин ик Вооружённой Кужымъёсмы Кавказын али быгатонлыксэс волято. Кыкетӥез. Олань-талань шонаськонъёсын йырин асьме обществоын ыштэмын ни вал ас шаердэ гажан, соин данъяськон мылкыд. Али со выльысь улӟе. Солдатъёс, офицеръёс умой-умой валаны кутско: соос улонмес утёнлэсь палэнскизы ке, страна кушкалоз, асьмемыз мукет кунъёс копак пыд улазы лёгозы. Шӧдӥсько, мынэсьтым веранме лыдӟисьёсты шонер уз валалэ шуыса. Озьы ке но, уг ватӥськы. Россиысь складъёсын люкаськиз ни вал туж уно ож тӥрлык. Уго быдэс Союзысь снарядъёс, бомбаос асьме доры ваемын. Тросэзлэн утён дырзы ортчыны ӧдъяз. Сое кызьы ке но быдтоно вал. Войнаын та кышкыт тӥрлык кутӥське, террористъёсты виён понна. Кызьы шуо, чакламъя. - Россиын дасо ар пала верасько ни профессиональной армия сярысь. Кыӵе тӥляд та пумысен малпанды? - Бен, вераськон трос. Тужгес но та пумысен ӟырдыт выро солдат анайёслэн комитетъёссы. Ужпум капчи ӧвӧл. Отын но пӧртэм палъёсыз адӟисько. Чечняын али ожмаськисьёс пӧлысь ог 60-65 процентэз контрактъя вуэмын. Война соос понна - уж. Соин ик профессионалъёс ожмаськон шоры мукет синмын учко, куронъёсты ӟеч быдэсъяны, котьмае валаса лэсьтыны тыршо. Со умой. Но мукет ласянь монэ но, музон специалистъёсты но шугъяськытэ пиослэн аспӧртэмлыко психологизы. Кин-о оже ас мылкыдызъя куриське? Валамон ни, соос пӧлын трос сыӵеосыз, кин ассэ ӧз шедьты улонын, кин малпаз вакчи дыр куспын уно коньдон поттыны. Отын огшоры солдатлы нуналлы быдэ 900 манет тыро, офицеръёслы 300-500 манетлы уногес. Контрактъя ожмаськыны лыктэм воргоронъёслэн пӧртэм мугъёсъя люкаськем йыркурзы куддыр умойтэмен берытске. Шуом, автоматэн адямилэсь эшсэ ожын виыны шедьтӥзы. Сыӵе дыръя пиос вожомо, олома но дауртыны кутско, син азязы шедем котькыӵе муртъёсты, тушмон карыса, быдтоно кожало. Озьы янгыш луисьтэм мӧйыос, нылкышноос, пиналъёс но бырыны шедё. - Соин ик чечен калык, небыт вераса, армиез, милициез уг яраты, дыр? - Озьы со. 8-10 аресъем чечен пиос меӵак шуо: будӥм ке, ӟучъёсты (тазьы нимало Россиын вань улӥсьёсты) виылом. Сыӵе мылкыд вазен но шӧдӥськылӥз. Чеченъёс туж йыркуръяськизы, соосты Сталин 1944-тӥ арын 23-тӥ феврале вордскем музъемысьтызы улляз шуыса. Но туннэ мукет но верамъёсты кылыны луэ ни. Чечен кышномуртъёс тазьы шуо: пуля яке бомба улын бырытозь, оло, умойгес луысал, милемыз нош ик кытчы ке мукет интые келясалзы ке. Ми вуылӥм уллям (пегӟем) муртъёслэн лагерязы. Шимес суред. Калык ас палъёсаз берытскыны уг дырты - уго уноез улон юртъёс куашкатэмын, тыл ӧвӧл, шуныт ӧвӧл. Паймымон кадь но, гуртъёсын бомба улэ шедьытэк кылемын полевой командиръёслэн, кужмо выжыослэн кузёоссылэн коркаоссы, юртъеръёссы. Западысь, озьы ик Россиысь бадӟым гуманитарной юрттэт вуэ. Лагерьёсы. Но отысь со, кызьы ке но ыше, боевикъёс кие шеде. Грозный быдэсак куашкатэмын. Выль администрациез ик нокытчы интыяны. Кин но со ӵектэ Грозныез музей карыны. Номырзэ, пе, отысь тупатоно-выльдоно ӧвӧл. Кенерано но туристъёсты вайылоно: мылкыд карисьёс, пе, мед адӟозы туала войналэсь бервылъёссэ. Куд-ог узыр чеченъёс со понна коньдон но висъяны дась. Ма, Чечняын трос валантэмез. Тани асьмелы телевидение возьматэ, боевикъёс дасоосын пленэ сётско шуыса. Но сётско сӧсырмем но висись муртъёс. Ожмаськыны соос уг быгато ни. Кулонэн пленэн вискысь сыӵеос нырысетӥзэ быръё. - Геннадий Петрович, тӥ пыриськиды Малофеев генералэн луэм умойтэм учырез эскеронэ но. Ма верасалды та пумысен? - Бен, мон пыртэмын вал нимысьтыз комиссие эксперт чотын. Малофеев бырыны шедиз малпамтэ шорысь. Внутренней войскоослэн батальонзы Грозныйысь Минутка площадьысь кык юртэз ки улаз басьтыны кулэ вал. Командирзэс виизы. Со интые та ужлы дасямтэ сержантэз пуктӥзы. Вылӥ кивалтӥсьёс, югдурлэсь уродмемзэ шӧдыса, батальонэн генералэз кивалтыны косӥзы. Озьы армиысь адями милицаослэн йырзы луиз. Со атакае ӝутскыны приказ сётӥз, солдатъёс интыысьтызы ӧз вырӟе, командазэ выльысь вераз - нош ик ӝутскись ӧз луы. Ма карыны паймыса, вылды, со султӥз но Быдӟым война дыръя сямен "За мной!" кеськыса азьлань вамыштӥз. Чечен снайпер соку ик пулязэ генераллэн чыртыяз мертчытӥз. Малофеев усиз. Сое утьыны луысал на но, внутренней войскоосысь офицер рация пыр юрттэт куриз. Инме ӝутскизы штурмовикъёс, артиллерия но куаразэ сётӥз. Одӥгезлэн юртлэн борддорез куашказ но генерал вылэ усиз. Тӥни сыӵе адӟон... - Ку бен та ожлэн пумыз вуоз? - Боевикъёсын нюръяськон та тулыс вылтӥ йылпумъяськоз. Но война соин гинэ уз быры ай. Солэн бервылъёсыз кема шӧдӥськозы на. Чечняез ӝутонэ страналэн бюджетысьтыз трос коньдон кошкоз. Нылпиосмылэн нылпоссылы но со вылэ ужаны кылдоз на. Умойтэм соиз но. Та ожмаськонлэн статусэз но ӧвӧл уго. Милиционер, шуом, коть Чечняын мед быроз, коть Ижысь урамын - пӧртэмез ӧвӧл. Мон верасько льготаос сярысь. Ваньмылы асьмелы малпаськоно Россиын тупаса улон сярысь. Мукет сюресэз мон уг адӟиськы. Кенешиз И. Лебедев. Журналистъёсын пумиськонъёс Нылпи юрт уз вошты семьяез Адями вордӥське куинь пол: анай улон сётыку, ужаны кутскыку но семья кылдытыку. Озьы кутскиз журналистъёсын вераськонзэ Кун Кенешлэн Тӧроезлэн выль воштӥсез Н. Харина. Мар кароно, котькуд адями шудо мед луоз шуыса? Валамон кадь: семьялы государство ласянь пыр-поч юрттоно. Нош али озьы уг на пӧрмы. Н. Харина таӵе лыдпусъёсты вераз. Туннэ Удмуртиын 50 процентэз семьяос начар уло. Кузпалъяськемъёс пӧлысь ӝыныез люкисько, куать процентэз нылпиос анайтэк яке атайтэк будо. Аналтэм нылпиос понна 11 нылпи юрт усьтэмын, отын али 860 пинал улэ. Самой кышкытэз: 90 процентэзлэн мумы-бубыоссы вань. Туэ вордӥськем нылпиос пӧлысь 82-ез секыт висёнъёсын улонэ потӥзы. Анайёс ӵемгес но ӵемгес нылпиоссэс роддомъёсын ик аналтыса кельто. Удмуртиысь 39 нылпиез ас доразы будэтыны басьтӥзы кунгож сьӧрысь семьяос. Улонзы туж умой, шуиз Н. Харина. Огласянь, со пиналъёс понна шумпотоно - курадӟонъёсты адӟытэк будозы. Нош мукет ласянь учконо ке - государствомы понна возьыт. Семья политикаез радъян ужпумез алигес "котырес ӝӧк" сьӧрын эскеризы Кун Кенеш но Россиысь Федерацияя Кенешлэн Кивалтонъя аппаратэз. Семья ужпумъёсты валтӥсь интые пуктон понна, нимысьтыз дэмланъёс дасямын Удмурт Республикаысь Правительстволы, Калыкез дышетонъя, Печатья но иворъёсты вӧлмытонъя , Югдурез утёнъя министерствоослы, прокуратуралы, ас коже кивалтон ёзъёслы но Кун Думалэн Федеральной Собраниезлы. Кун Кенешлэн Тӧроезлэн воштӥсез луыса, мон нырысь ик басьтӥсько аналтэм нылпиослэн ужпумъёссы борды, шуиз Н. Харина, матысь дыре вуылыны малпасько вань нылпи юртъёсы но приютъёсы. Кызьы ивортӥз Наталья Алексеевна, алигес со тодматскем Кизнерысь нылпи юртлэн улэм-вылэменыз. Татысь коллектив адӟем карымон ужа. Озьы ке но, котькыӵе ӟеч мед луоз нылпи юрт, пиналлы семьяын кадь нокытын умой уз луы. Т. Банникова. Удмурт Республикаын улӥсьёслы ВАЗИСЬКОН Гажано эшъёс! Туэ 15-тӥ мартысен 5-тӥ июнёзь Удмуртиын ортчытӥсько экологияя кышкытлыклэсь утиськон нуналъёс. Со ортчоз "Экология. Кышкытлыклэсь утиськон. Улон" ӧтён улсын. Быдэс дунне вуиз туж кышкыт югдуре. Азьланяз котырысь инкуазь уката но уродмыны быгатоз. Россиын улон-вылон уродмемен валче, экология ласянь югдур тужгес но кышкытгес учыре вуэмын. Пӧртэм висёнъёс вӧлмемен сэрен, 30 процентэз адямиос дырызлэсь вазь куло. Ваньмыз со герӟаськемын котырысь инкуазьлэн уродмеменыз. Соин ик та дыре но, азьланяз но дуннеын бадӟым инты басьтыны кулэ экология сярысь сюлмаськон. Республикамес инкуазь кышкытлыклэсь утён понна нимысьтыз ужрадъёс чаклано. Котькудзэ улӥсез ми ӧтиськом та уже быгатэмезъя пыриськыны. Куриськом чылкытгес возьыны ужан но улон интыостэс. Предприятиослэн кивалтӥсьёссы мед тыршозы котырысь инкуазез ӧжытгес саптаны. Эн вунэтэ та вакытлы но тупась куронэз: мертты но будэты писпу, ӝут юртъер, пиналъёстэ визьнода, инкуазьлы гажан мылкыд пыӵатыса. Ваньмыз со бӧрысь ӟечен гинэ берытскоз. Ойдолэ озьы ужаломе! Огъя кужыменымы республикамылэсь инкуазьзэ чебергес но узыргес каром, со ӟеч улыны ярамон мед луоз! Котырысь инкуазез кышкытлыклэсь утёнъя нуналъёсты радъянъя республикаысьтымы комитет. 15-ТӤ МАРТЭ - Басьяськисьлэн нуналыз УРОД ВУЗ БАСЬТӤ - ЮРТТЫ, ДУРБАСЬТӤСЬ 1962-тӥ арын Джон Кеннеди, Америкаысь Президентэ ассэ ӵекыткуз, басьяськисьёслэсь правооссэс утьыны сӥзиз. Со дырысен отын басьяськисез дунъяны кутскизы: солэн вуз бырйыны, вошъяны, со сярысь тунсыкъяськыны правоез кылдӥз. Асьмелэн сыӵе законодательство 1993-тӥ арын гинэ кутэмын. Басьяськисьёс солэсь ӟечсэ ас вылазы шӧдӥзы ни: вузчиен кылзы ке уг тупа, бызьыса мыно Басьяськисьлэсь правооссэ утёнъя комитетэ. Комитет аспӧртэм дурбасьӥсьлы пӧрмиз. Со сярысь газетлэн корреспондентэныз вераське Ижевскысь Басьяськисьёслэсь правооссэс утёнъя комитетысь отделлэн кивалтӥсез Л.В.РАЧКЕВИЧ. - Людмила Витальевна, воштӥськиз-а басьяськись шоры учкон таӵе законодательство кутэмен? - Веранэз ик ӧвӧл. Тӥ сое асьтэос но шӧдӥськоды, дыр. Тодады вае ай, мар вал, укмыстонэтӥ аръёс кутскыку. Дефицит бере тросэн кооперативъёс усьтӥськылӥзы, урод вузэн вузкарылӥзы. Адями маке басьтэ, нош нуллыны уг яра. Берыктэмез уг луы ни - вузчи нокыӵе кыл ӧз куты. Али та ласянь чылкак мукет югдур. Закон куинь пол выльдӥськиз ни - отын басьяськисьлэсь правооссэ ялан паськытато. - Кыӵе правоосыз вань басьяськисьлэн? - Ваньзэ вераны уз луы, но валтӥсьёсыз - вуз басьтыны, шексэ шараяку воштыны яке берыктыны, со сярысь тунсыкъяськыны, гарантия сётӥськись дыр ӵоже дунтэк тупатыны, аслэсьтыз правооссэ утьыны но мукет. Ваньмыз та правоос сётӥсько, адями вуз аслаз кулэяськонъёсыз понна гинэ басьтэ ке. - Аслэсьтыз правооссэ ӟеч тодыса, туала басьяськись мултэс копаськись ӧвӧл-а? - Котькыӵеез вань. Кудӥз кык манетлы алдамзы понна но чагиськыны ми доры лыктэ. Котькудаз учыре басьяськись но шонер уг луы - ӵемысь со ачиз вузкарисен мугтэк керетыны, бырйиськыны кутске, интыяз ик сэрттыны-пертчыны луоно ужпумез одно судозь вуттыны тырше, малпа изъян адӟемез понна коньдонэн бадӟым компенсация басьтыны. Но возьмамъёсыз ӵемысь уг зэмало - моральной изъян берыктӥське тазалыклы кышкытлык кылдыкугес гинэ. - Быгатӥськоды-а тӥ вань ӝожтӥськонъёсты эскерыны? - Ужмыя ми ӝожтӥськонъёсты эскерыны кулэ ӧвӧл. Со понна вань госторгинспекция, санэпидемстанция, антимонопольной комитет но трос мукет ёзъёс, но адямиос малы ке соку ик ми доры лыкто. Соин ик валэктӥсько: ми выриськом басьяськисьлэсь правооссэ утёнэн. Вузкарись но басьяськись куспазы огкыл уг шедьто, нырысетӥез пумитъяське сётэм кылзэ быдэстонлэсь (дырыз дыръя заказэз уг быдэсты, гарантия сётэм вакытаз техникаез тупатъяны) но мукет. Соку ини висказы пыриське милям комитетмы, озьы но югдур уг тупатскы ке, юристъёсмы юртто ужез судозь вуттыны. - Мар верасалды та нунал азьын басьяськисьёслы? - Кемалась тодмо вазиськонэз тодазы вайытысал: вузкарись но басьяськись, гажалэ ог-огдэс! Вузкарисьёс сыӵе ик басьяськисьёс бере, медаз вунэтэ огзэ: кызьы тон, озьы ик со. З.РЯБИНИНА. СЕЛТА ПАЛАН ТУННЭ АЗЬМЫНӤСЬ "Серп и молот" эштосын пудо вордӥсьёслэн ӵошатсконзылы ортчем арлы йылпумъянъёс лэсьтэмын. Тужгес умой ужаллям Тамара Крестьянникова, Ольга Мамилова но Галина Лебедева. Соос скалы быдэ 2712, 2647 но 2595 килограмм йӧл кыскиллям. Нош Чашкагуртысь пудо куайытӥсьёслэн Виктор Кельмаков но Римма Метелевалэн кунянъёссы нуналлы быдэ 573 но 565 граммлы будӥллям. СЮРЕСЪЁС ГЕРӞАСЬКО Селтаысь сюрес лэсьтонъя ёзлэн кивалтӥсезлэн В.П.Смирновлэн верамезъя, Казань- Малмыж-Екатеринбург сюреслэн та ёросысь люкетэз быдэстэмын луоз 2001-тӥ арын. Нош 2002-тӥ арын та федеральной сюрес быдэсак асфальтэн шобыртэмын луоз. Туэ сюмсиос уваосын ӵош сое Сюмси паласен Селта ёрослэн границаез дорозь вуттозы. Н. ВОЗИСОВ. Утелэ паспорттэс Котькинлы тодмо, котькуд адямилэн валтӥсь документэз паспорт луэ шуыса. Нош быгатӥськомы-а асьмеос сое утьыны-возьыны? Паспортсэ ыштэмез понна котькудӥз чурыт кыл кутэ нимысьтыз законъя. Озьы Ижевскысь Первомай ёросысь паспортъя но визаосъя служба кылем арын 841 уж ӝутӥз. Со пӧлысь 649 паспорт ыштэмын трос калык люкаськоно интыосын, 30-эз воинской частьёсын, 13 документ ӝуамын яке ярантэм луэмын, 149-эз лушкамын. Паспортэз воштон понна вазиськоно улон интыя милицие. Со понна луыны кулэ таӵе документъёс: улон интыысь справка (нимаз коркан улӥсьлы - книга), ужан интыысь справка яке ужам сярысь книжка) военной билет, кузпалъяськем яке люкиськем сярысь свидетельство, нылпиос сярысь (16 аресозь) свидетельство. Озьы ик ваёно 35-45 миллиметр быдӟалаен 4 туспуктэм. Паспорт лушкамын ке вал, озьы ик вазиськоно милицие. Вунэтоно ӧвӧл созэ но: Россия Федерациысь гражданъёслы паспортлы выль бланкъёс ӧвӧл. Соин ик ыштэм документ интые сётӥське огдырлы удостоверение - ӝыны арлы. Бланкъёс уг ке вуо, со нош ик ӝыны арлы азьланьтӥське. Ф. Петрова, Ижевск городысь Первомай ёросысь югдурез утёнъя отделлэн паспортъя но визаосъя службаезлэн кивалтӥсез, милициысь подполковник. Дышетско - профессор луо Гурт улонъя тодосчи луон сярысь нимысьтыз ӧй ик малпаськылы. Вордски Ижын, нош атае - Балезиноысь, анае - Сюмси районысь. Анай-атае музъем вылын вордӥськемын бере, мыным но сыӵе сям пыӵамын, шӧдске, гурт калыклы юрттэм потэ. Валамон, мынам ваньмыз азьпалан, егит ай, 26 арес гинэ. Озьы ке но, кылем арын 6- тӥ октябре Россиысь гурт удысъя заочной кун университетын кандидатской ужме ути, техника наукаосъя кандидат луи. Туннэ, оло, куд-огез малпаське, удмуртъёс, пе, наукае уг кыстӥсько. Мон чик но озьы ӧй шуысал. Академиын тани кык интыын ужасько - автоматизированной электроприводъя кафедраын ассистент но кадръёсты дасянъя методист фонизатор луисько. Оско мыным. - Научной уже сӥземын бакча сиёнъёсты будэтонэз умоятонлы, кидыс дасянлы. Со быдэстэмын но эскеремын Завьяловоысь тепличной комбинатын. Пайдаез син азьын, 8 процентлы уногес урожай басьтэмын. Вераськон мынэ огреч будэтон сярысь. Научной ужея кык кивалтӥсе вал: одӥгез - Надежда Кондратьева, мукетыз - Москваысь тодосчи Алексей Коломиец. Со техникая университетысь проректор. Надежда Петровнаен Москваын аспирантураын ӵош дышетскиллям. Тодосчи луыны соос мыным трос юрттӥзы. Ачим но бен сюлмаськи-бызьылӥ. Али но кутскем ужме азьланьтӥсько. Пичи басьтэм азинсконэным буйгатскыны уг малпаськы. Сыӵе сямы ӧвӧл. Алигес нылы вордӥськиз, кузпалэ - медсестра. Ӵуказе нуналлы бадӟым осконэн улӥсько. Матысь дыре - Россиын но улон тупатскыны кулэ. Соку тодосчиослы капчигес луоз. Но мон одӥгзэ ӟеч тодӥсько, наука юрттытэк, ваньбур поттон азьпала уз вамышты. Малпасько, научной ужме азьланьтӥ ке, доктор но, профессор но луо. Сыӵе осконтэк кызьы улод? Иван Владыкин, техника наукаосъя кандидат. Политика Чечня - Россилэн яраез Удмуртиын улӥсьёс, быдэс Россия сямен, ялан син шоразы возьыны тыршо Чечняын кылдэм югдурез. Калыкмес тужгес но зуркатӥз огнуналэ куинь пиосмылэн быремзы. Та секыт кайгу кематэк уз кошкы сюлэмъёсысьтымы, ялан но ялан тодэ вайытоз нокинлы кулэтэм юнме шорысь пуромытэм секыт ожмаськонэз, пӧртэм выжыысь адямиосты ог-огзы вылэ юри малпаса узатонэз. Кыӵе синмын учко Чечняын вир кисьтӥськон шоры шаерамы улӥсьёс? Кыӵе дунъет сёто отын кылдэм югдурлы? Та юанъёсын мон вазиськи пӧртэм арлыдо воргоронъёслы. С. Т. Сафонов, отставкаысь майор: - Мыным ярало Россиысь МВД-лэн но Обороная министерстволэн кутэм чурыт ужрадъёссы. Али вань луонозэ уже кутоно, Чечняысь бандаосты выжытэм быдтон вылысь, малы ке шуоно, Чечня - со Россия. Нош огшоры калыклы юрттоно. Егит дыръям мон 3 ар служить кари Кавказын, чеченъёсты ӟеч тодӥсько. Уродзэ номыр вераме уг поты, соос ужасесь. Но пӧлазы вань узырмыны вырисьёсыз дворецъёсын улыса, ляльчи чотын возьысалзы сыӵеос куанер, огшоры калыкез. Тӥни сыӵеос ик ӵыжы-выжыоссэс сурало-пожало. М. Н. Васильев, полковник: - Алигес мон вуылӥ вордскем палъёсам, Волгоград областе. Отын ог 14 сюрс чеченъёс уло. Юасько, кышкыт ӧвӧл-а таӵе бускельёсын артэ корка пуктыны? (Сузэрелэн семьяез ӵапак выль юртъере потыны дасяське .) Селоязы нокин но та юанэлы валэктон ӧз сёты. Ма шуод, калык, зэмен но, кышкатэмын отын но татын луэм шудтэм учыръёсын. Югдурез син шорын возён понна, Волгоград палан улӥсь чеченъёс асьсэлы старейшинаос бырйиллям. Соос кыл куто ваньмыз понна. Доразы дугдылытэк вуыло "вербовщикъёс". Виёнэн кышкатыса, егит пиосты соос нуыны выро асьсэлэн бандаосазы. Золгес пумитъяськисьёссэ заложнике басьто. Тӥни малы отын, Удмуртиен ӵошатыса, ожмаськонлэн мынэмез уен-нуналэн шӧдӥське, милицлы шӧдскымон трос уж шеде. Волгоградлэн мэрез решение кутӥз вал, чеченъёсты одӥгтэм уллян сярысь. Но со бумага вылэ ик кылиз: тросэз семьяос сураськемын, нылпиоссы будо ни. Кызьы соосты люкод? Кытчы уллялод? В. Т. Егоров, механизатор (азьвыл сержант): - Служить кари ГДР-ын, танкист вал. Армия сярысь малпанъёсы туж ӟечесь кылемын. Бадӟымез пие сӥзьыл гинэ службаысь, Севастопольысь, вуиз. Солэн мылкыдыз мукет ини: Черноморской флотлэсь куашкамзэ ас вылаз чидаз. Ӝоген армие мыноз пичиез пимы. Солэн десантэ шедемез потэ вал, нош али малпанъёссэ пушказ ватӥз: служба сярысь вераськон потэ ке - чалме. Мон шӧдӥсько, со Чечняе мыныны пумит шуыса. Нош ма карод, приказ сётӥзы ке, нокытчы уд пыры. Аслам но, шонерзэ вераса, Чечня сярысь веранъёсты кылэме-адӟеме уг поты ни. Мон валамъя, ваньмыз со потэ Россилэн лябӟемез бордысь. Кызьы-о озьы асьмелэн ФСБ-мы (КГБ-мы) ужа, сыӵе юн тушмон кужым Советской Армилэн базаосыз вылын ик кылдӥз ке? Неужто разведчикъёсмылэн синъёссы но, туала чаклась- эскерись техниказы но ӧвӧл? Т. И. Никитин, пенсионер (азьвыл рядовой): - Мынам кенэ - чеченка, пие - удмурт. Куспазы оглом тупало кадь, котькыӵе дыръёссы луыло ке но. Сузэр-вынъёсыз кыкетӥ арзэ Ижевскын уло, тодмоосмы кунокуае лэзизы. Нырысь-валысь соос уйёссэс но йӧскадь ӧз кӧлаллялэ, миндэр улазы я тӥр, я пурт поныса возизы. Ӧз, асьмелэсь ӧз кышкаллялэ, малпазы, боевикъёс вуыса быдтозы шуыса. Соос, пе, Чечняысь кошкись егит калыкез дезертиръёс радэ пукто но самой кышкыт приговор куто. Отӥе бертскемзы уг поты ни. А. Г. Потапов, азьвыл контрактник: - Армиысь бертӥ 3 ар талэсь азьло, ас мылкыдыя мынӥ вал 201-тӥ дивизие, Таджикистанэ. Афганэн артэ 1,5 ар улӥ. Отысен валай: службазэс нуись пиос нокинлы но кулэ ӧвӧл. Сӧсырмыса кӧня ке толэзь кылли госпитальын. Басьтэм уждунме сётӥ пересь анаеныз улӥсь трос нылпием кышномуртлы. Огшоры калык отын сютэм улэ, пичи пиналъёссэс макен пӧзьтэм вуэн сектало, кемагес мед изёзы но сиён медаз куре шуыса. Чечняе мон уг мыны, адямиос шоры автомат урдэме уг поты ни. Школаын дышетскыкум, нош одӥг гинэ малпанэ вал, военной луо, армиысен ик училищее дышетскыны мыно. Озьы ӧз луы. Со сярысь али уг жаляськы. Чечня сярысь малпанэ таӵе: уг яра музъеммес бандаос ки улэ сётыны. Но соослы пумит ыстоно нимысьтыз дышетэм отрядъёсты. Юалляськиз Л. Медведева. Чузъясько пор гуръёс Кияса ёросын вашкала дырысен пӧртэм калыкъёс уло. Тросгес удмурт но ӟуч гуртъёс. Со сяна, вань на кык бигер но пор гуртъёс. Туэ поръёс пусъё Ватка но Кам палъёсы вуэмзы дырысен 400 ар тырмонэз. Соин валче едмурт шаерысь поръёслэн "Одо Мари Ушем" огазеяськонзы пор гуртъёсын пӧртэм ужрадъёс ортчытъя. Алигес Кияса районысь Унур Кияса гуртэ вань ёросысь поръёс люкаськылӥзы. Ӝытэз усьтӥз ёрос адяминистрацилэн кивалтӥсезлэн воштӥсез Т. Е. Васильева. Татчы лыктэмын вал районысь удмурт, ӟуч, бигер культурая огазеяськонъёслэн тӧрооссы. "Одо Мари Ушем" огазеяськонлэн кивалтӥсез А. И. Радыгин тодматӥз асьме палась поръёслэн ортчем сюресэнызы. Бӧрысь люкаськемъёс азьын шулдыр концерт возьматӥзы Унур Кияса но Кумырса гуртъёсысь усточиос. Таӵе пумиськонъёс ортчылозы республикаысь вань ёросъёсысь пор гуртъёсын. Н. РОМАНОВ. Берытскизы! Тямысэтӥ мартэ, Нылкышноослэн калык куспо нуналазы, сюресъёс вылысь лымыё тӧлэз но букосъёсты вормыса, Иже берытскиз Удмурт Элькунысь Югдурез утёнъя министерствоысь милицилэн нимысьтыз учыръёслы дасям отрядысьтыз ожчиосын колонна. Егитъёсты чидатэк витизы та нуналэ соослэн ӵыжы-выжыоссы но матысь адямиоссы, ӵош ужась эшъёссы. ... Кема возьмам адямиос ӝоген вуизы интыязы. Егитъёсты соку ик сюлмысь ӟыгыртӥзы ӵыжы-выжыоссы но матысь эшъёссы. Анайёссы, кузпалъёссы но яратоно муртъёссы шумпотонэн тырмем синвуоссэс кутыны ӧз быгатэлэ: "Пиосмы луло берытскизы!" Куинь толэзь ӵоже кӧламтэ уйёслы, сюлэмшугъёслы пум вуиз 8-тӥ Мартэ! Пиосты пумитась нылкышноослэн верамзыя, та нуналэ соос понна талэсь бадӟым кузьым ӧй вал. Лыктэмъёс азьын сылӥз кызь ньыль адями. Тыр пыр но кулон пыр ортчизы соос. Кыдёкысь Чечняысь Катыр-Юрт посёлок вадьсысь югдурез утьыкузы, ожъёсын ыштӥзы куинь эшсэс. Зэм, асьсэос ӧз чигналэ. Мурт музъем вылысь вуэмъёсты туж шуныт мылкыдын ӟечкылазы Удмурт Элькунысь югдурез утёнъя министр Владимир Щербаков но быдэс дуннелы тодмо конструктормы Михаил Калашников. Покчи пиналъёс вожъяськыса учкылӥзы атайёссы киысь зэмос автоматъёс но снайпер винтовкаос шоры. Та пыӵал тӥрлыкез киязы кырмем воргоронъёс дырыз дыръя алӥзы Россилэн музъемез вылын кузёяськыны малпась йырвандӥсьёслэсь сьӧсь кужымзэс. Табере утиськоз со ОМОН-лэн "кеносъёсаз". Нош кулэ луиз ке, та адямиос выльысь кутозы киязы ожъёсын кыдам "эшсэс" - семьяосамы ноку медаз вуэ нокыӵе кайгуос, коркаосамы котьку мед кузёяськозы тупаса улон но ог-огдэ валан. *** Дасэтӥ мартэ Удмурт Элькунысь югдурез утёнъя министр милициысь генерал-лейтенант Владимир Щербаков но министерствоысь мукет кивалтӥсьёс отрядлэн кенешъёс ортчытъян залаз пумиськылӥзы Чечняысь бертэмъёсын. Милициысь подполковник Олег Гольцов ивортӥз отрядлэн чечен музъем вылэ вуылэмез но быдэстэм ужъёсыз сярысь. Куинь толэзь ӵоже отрядысь ожгарчиос блок-постъёсын эскеризы 2050-лэсь трос автомобилез, 1726- лэсь трос адямиез но татчы 1608-лэсь трос вуэмъёсты, ӝегатэмын йырвандӥсьёслы мылысь-кыдысь юрттӥсь но соослэн уллёосазы огазеяськыны малпась кызь адями. ОМОН- ысь сапёръёс шараязы но дырыз дыръя палэнтӥзы кык граната, пехоталы пумит чаклам куинь мина, РПГ-7-лы чаклам кык патрон, пӧртэм калибръем (82 миллиметрысен 182 миллиметрозь) куамын вить артиллерийской снаряд но куинь НУРС. Отрядысь эмъясь дырыз дыръя юрттӥз матысь гуртъёсысь сю куамын вить адямилы. ... Ньылетӥ феврале ӵукна Ачхой-Мартан ёросысь Валерик гурт вӧзысь блок-пост дорын Удмурт ОМОН-ысь ожгарчиос нырысетӥосыз пӧлын ӝутскизы Руслан Гелаевлэн Грозныйысь потӥсь кык сюрслэсь ятыр йырвандӥсьёсызлы пумит. Асьсэлэсь улонзэс жалятэк, Владимир Собин, Константин Токарев но Владимир Востриков дугдытӥзы котыртэме шедем йыртэмасьёслэсь гурезьёсы кыстӥськонзэс. Таин валче та пиос но соослэн эшъёссы утизы федеральной кужымъёслэн мукет ёзъёсысьтызы ожмаськисьёслэсь улонзэс. Пумиськонэ лыктэмъёс минут ӵоже чалмыт сылыса буре ваизы ожъёс дыръя бырем эшъёссэс. Ыштонъёсыз шоры учкытэк, Удмурт ОМОН азинлыко быдэсъяз йырвандӥсьёслэсь уллёоссэс быдтонъя но соосты ожъёс мынӥсь интыосысь туэ 15-тӥ мартозь поттонъя ужпумез. Со сярысь верало Удмурт Элькунысь югдурез утёнъя министрлы вуэм гожтэтъёс - соосты ыстӥзы Россиысь МВД-лэн Уй пал Кавказэ интыяськем кужымъёсыз но Ачхой-Мартан ёросысь Катыр-Юрт посёлокысь Ожысь ветеранъёслэн кенешсылэн тӧроез Александр Исламханов. Владимир Щербаков Удмурт ОМОН-ысь кӧня ке адямилы сётӥз выль сӥё-дано нимъёс. Ваньмызлы озьы ик сётэмын Россиысь Пыӵал тӥрлыкен узырмытэм Кужымъёслэн Вылӥ Кивалтӥсьсылэн Владимир Путинлэн тау карон гожтэтъёсыз но коньдон премиос. Анай- атайёссылы ыстэмын луозы тау карон гожтэтъёс, Атай музъеммес ӟеч утисьёс, милициысь нимысьтыз учыръёслы чаклам отрядысь ожгарчилэсь сӥзэ-данзэ уськытымтэ адямиос будэтэмзы понна. Та нуналэ ик отряд вуылӥз Хохряки шай вылэ - татын ческыт уммен кӧло соослэн бырем эшъёссы Владимир Собин но Константин Токарев. Лыктэмъёс, минут ӵоже чалмыт сылыса, батыръёсты буре ваизы. Сергей Климок, Удмурт Элькунысь МВД-лэн пресс-службаез. Журналистъёсын пумиськонъёс Шудтэм учыръёс уг кулэсмо Туннэ огыр-бугыр улон вакытамы мар но уг луы. Чечня Республикаын нуналлы быдэ быро егит пиос. Соослэн лыдзы кык сюрсозь вуэ ни, нош сӧсырмемъёс эшшо трос. Калык озьы ик ӧжыт уг быры сюрес, ву вылын, тылпуын но музон интыосын. Та но куд-ог мукет ужпумъёс сярысь журналистъёслы мадиз элькунысьтымы Граждан оборона ужпумъёсты но кышкыт учыръёслэсь утиськонъя комитетлэн тӧроез Тамази Габричидзе. Нырысь ик кӧня ке лыдпусъёсты вералом. Соос югдурез тужгес яркыт возьмато. Басьтом берло кык арез но туэ кык толэзез. Валля арын но миым огмында - 12 кышкыт учыръёс - вал. 1998-тӥ арын 237 мурт шудтэм учыре сюриз, нош миым - 74. Кык ар ӵоже быдэн 2 но 3 адями быремын. Но тужгес бадӟым изъян лэсьтэмын калык хозяйстволы: 1998-тӥ арын 66 миллион манетлы, кылем арын - 335 миллионлы, яке 4 поллы уно. Шаерамы уг сино тылпу потон учыръёс. Валля арын 23-29 тылпу вал, миым - 2540, нош туэ 2 толэзьскын - 305. 1998-тӥ арын 140 мурт шудтэм учыре шедиз, миым - 163, нош туэ - 19 адями. Быремын 137, 132 но 31 мурт, нош утемын 256, 241 но 32 адями. Кык ар ӵоже 42,2 миллион манетлэсь ятыр изъян лэсьтэмын, туэ - 1,7 миллион манетлы. Югдур уг воштӥськы сюресъёс вылын. 1998-тӥ арын 1748 шудтэм учыр вал, миым - 1681, туэ 2 толэзьскын - 181. Отын тазалыксэ уродмытӥз 1936, 1898 но 196 адями. Со аръёсы ик быремын 271 (1998), 280 (1999) но туэ 24 мурт. Ву вылын но трос калык быре. Валля арын 225 адями улонысь кошкиз, миым - 189. Та дыре утемын 105 мурт. Огъя вераса, ортчем арын 2175 шудтэм учыръёс вал но, отын 604 адями быремын, туэ - 55. Со дыре ик утемын 745 но 115 адями. Нош кызьы ужа Россиысь МЧС-лэн Удмуртиысь кун поисково-спасательной службаез? Кылем арын калыкез утисьёс 927 пол шудтэм учыръёсы потазы, туэ - 183. Миым 464 мурт утемын, туэ - 83. Кылем арын 52 техногенной авариос вал, инкуазен герӟаськемъёсыз - 19. Туэ быдэн одӥг гинэ учыр вал. Миым калыкез утисьёс адямиослэн квартираосазы, улон интыосазы 856 пол потазы, туэ - 181 пол. Ваньмыз сямен со герӟаськемын газэз кутонэн. Шаерамы 70 мурт калыкех утисьёсмы. Но соос ичи уждун басьто, кулэ вылэм ичизэ 1000-1500 манет тырыны. Та ласянь тужгес но умой югдур Воткинск городын. Отын бомбоубежищеос но умой возисько. Ижын уродгес. Столицаысьтымы бомбоубежищеос арендае сётэмын, маке уродэз, кышкытэз луоно ке, соос 12 часкын бомбоубежищеез мозмытско. Граждан обороналы но кышкыт учыръёслэсь утиськыны калыкез пичиысен дышетоно школаосын. Учебникъёс басьтыны Правительство 1500 сюрс манет коньдон висъяз. Удмурт кун университетын кык кафедра кылдытэмын. Отын методистъёсты но дасяло. Г. Романов. Калык творчество Шудэ выль ансамбль! Чугун сюрес вылын тыршисьёслэн культура юртазы дас вить ар пала ини ужало пӧртэм кружокъёс. Тужгес тодмоосыз - "Гузель" бигер ансамбль, ветеранъёслэн "Уралочка" хорзы. Соос луо калык коллективъёс. Нош дас ар талэсь азьло культура юртлэн директорез Владимир Алексеевич Хван вылӥ верам коллективъёсысь арганчиослы Вячеслав Чирковлы но Фат Каримовлы арганэн шудӥсь ансамбль кылдытыны ӵектӥз. Усточиослэн куремзыя, Владимир Алексеевич соку ик вить арган басьтӥз. Озьы улонзэ кутскиз выль коллектив. Арганчиос синмаськымон шудо удмурт, ӟуч, бигер гуръёсты. Отчы ветлӥсьёс но угось - пӧртэм калыкъёс пӧлын будэмъёс. Удмуртъёс Вячеслав Чирков, Василий Вахрушев, Александр Дубовцев, бигеръёс Фат Каримов, Дамир Сайхутдинов, ӟучъёс но мукет выжыосысь адямиос Василий Климов, Любовь Шоронина, Яков Кудымов ог-огзэс гажаса-валаса тыршо. Вячеслав Чирков бадӟым мылкыдын ветлэ вал "Ижмаш" культура дворецысь "Тюрагай" ансамбле. Али чугун сюрес вылын ужа бере, ӵош тыршись эшъёсыныз ик огазьын кырӟа- вера, шудэ. Ансамбльлэн кивалтӥсез Дамир Сайхутдинов, ачиз бигер ке но, удмурт гуръёсты зол тодэ-яратэ. Со угось дас ар пала Виталий Шоркинлэн "Октябрь" культура дворецысь "Бӧляк" ансамбляз арганчи-баянчи вал. Чугун сюрес вылын ужась арганчиос ансамбль кылдэм дырысен вуылӥзы ини шаермылэн пӧртэм сэрегъёсаз. Дэбес, Эгра (Игра), Сюмси, Сарапул, Ува, Дэри (Завьял), Пичи пурга ёосъёсын улӥсьёс соосты али но чидатэк витё. Нижний Новгородын ортчылӥсь фестивале та дыр куспын соос куинь пол вуылӥзы ни. "Гузель", "Уралочка" ансамбльёсы ветлӥсьёсын ӵош чугун сюрес вылын ужасьёслэн шоркаразы котьку басьтыло нырысетӥ, кыкетӥ, куинетӥ степенё дипломъёс. Туэ но дасясько Кирове, озьы ик - яратоно Нижний Новгородазы мыныса, шаермес данъяны. Арганчиослэн ансамблязы ветлэ паймымон усточи Фат Каримов. Солэн улон интыяз быдэс музей кылдытэмын. Отын - крезьгур кылдытӥсь сю куамын пумо инструмент. Соос пӧлын ик - сизьымдон пумо арган. Тужгес яратонооссэ со сьӧраз концертъёсы но басьтылэ. Берло дыре Ижын усто ужало вал "Октябрь" культура дворецысь но шаерысьтымы культурая методцетрысь "Арганчи" ансамбльёс. Но берло дыре соослэн куаразы уг кылӥськы ни. Со понна чугун сюрес вылын ужасьёслэн арганъёссы дугдылытэк жингырто. Шулдыр гуръёсты яратӥсьёс тау каро дворецлэн кивалтӥсезлы Владимир Хванлы: со угось ачиз но, гитараен крезьгур кылдытӥсь усточи, умой вала арганчиосты, шуг-секытъёс кылдыку юрттэ. Н. Возисов. Фат Каримов но Вячеслав Чирков. ПАЙДАЁ АМАЛ Сад-бакча возисьёслэн ӝоген кутскоз пӧсь вакытсы. Мон асме но соос пӧлы пыртӥсько. Миттлайдерлэн амалэзъя будосъёсты мерттон-утён сярысь кылылӥ вал ини. Но рос-прос лыдӟеме ӧй вал на. Калыкын шуо: "Кӧня ужад, сомында сиёд". Со веранлы котьку осконо ӧвӧл. Сое возьматэ музъем бордын Миттлайдерлэн амалэзъя ужан. Сое куто ни удмурт шаерын но. Пайдаез паймымон. Ньыль муртъем семьялы быдэс арлы тырмымон бакча сиён будэтыны луэ 1,5 соткаын - котькыӵе ляб музъем мед луоз. Ваньмыз сад-бакча возисьёс озьы ужасалзы ке, матысь аръёсы соос быдэс Россиез бакча сиёнъёсын сюдысалзы. Н. ВОЗИСОВ. ЧЕБЕР ТЭЛЬ МЕД БУДОЗ Камбарка ёрос вӧлскемын 67 262 гектар вылын. 58 процентэз нюлэс улын, гыроно музъемез 15 процент, гуртъёс улын 7 процентэз. Берло дыре, арлы быдэ трос сю гектар гырон-кизён музъем аналтӥське. Туэ нырысетӥ январьлы гинэ 1700 гектарез берыктэмын залеже, отчы номыр уз кизе ни. Утялтымтэ музъем жаг турынэн но бадьпу, лулпу, серыпу куакъёсын аляське. Районысь администрация алигес кутӥз аналтэм музъемъёсты уже кутонъя программа. Но пыӵалоз меда со улонэ? Огдыре районын трос фермер хозяйствоос вал, нош али 27 гинэ кылизы на. Ӵапак фермеръёс 63 гектар нюлэсэз сайкытӥзы, ю-нянь мерттом шуыса. Со музъем пӧлысь одӥг гектарез гинэ пайдаё кутӥське, одӥг гектарез юртъёс улын. Озьыен, 60 гектарлэсь тросэз нош ик писпуосын шобырскозы. Я, коть отчы пайда золгес ваись тэль мед кылдоз вал. Н. ВОЗИСОВ. Псков кайгыре "Эхо Москвы" радиостанция ивортэмъя, Псковысь десантникъёслэн девизизы кӧня ке нунал ӵоже Чечняын 100 пала адямизэ ыштӥзы. Та иворез ВДВ-лэн командующиез Георгий Шпак умойтэмен лыдъя. Солэн верамезъя, 1-тӥ мартэ выжон уе Аргун ущельеын ожмаськонын 31 десантник быриз, мукет ыштонъёс солэн войскоосаз ӧй вал. 80 бырем мурт сярысь ивор вӧлмиз, Евгений Михайлов губернаторлэн кылъёсыз вылэ чӧлскыса. Ачиз Михайлов интервьюын та веранлэсь палэнскиз, быремъёслэн лыдзы тодмо ӧвӧл на, пе. РЕДАКЦИЛЭСЬ: газетэ та ивор потытозь тодмо луиз: Псковысь десантникъёс пӧлысь бырыны шедем 84 мурт. Али соосты берпум сюрес вылэ келяло. Эмъяны юрттэ Выль препарат Туж пайдаё аппарат малпаз но лэсьтӥз кун академиысь доцент Сергей Юран. Тодосчи ужа автоматизированной электроприводъя кафедраын. Нош аппаратэз юрттэ пудоосты эмъяны, тужгес но скалъёсты. Вераны кулэ, шаерысьтымы 40 процентэз пудо маститэн курадӟе. Ӵапак та аппарат скаллэсь веразэ инфракрасной сиосын юн мур шунтэ но ӝоггес эмъяны юрттэ. Но та прибор вылэ гинэ оскиськыны уг яра, пудолы огдыре эмъюмъёс но сётъяно, тужгес но антибиотикъёс. Та аппаратлэн электросхемаез, эмъян амалэз кутӥське ни адямиослэсь тазалыксэс юнматыны. Пудо утисьёс та приборез чидатэк возьмало ни. Г. ВАСИЛЬЕВ. Скал вераез эмъян аппарат. Эскере кужымдэс! Шаерысьтымы Егитъёсын ужанъя кун комитет но "Луч" журналлэн редакциез яло Быдӟым Вормонлы витьтон вить ар тырмонлы сӥзем гожъямъёслы конкурс. Солэн мугез таӵе: утчано, шедьтоно, шараяно но лыдӟисьёс доры вуттоно гожъяны кутскисьёслэсь выль ужъёссэс. Соос мед возьматозы адямилэсь ожын но ужын кыдамзэ, солэсь тужгес ӟеч сямъёссэ. Дась ужъёсты ыстоно туэ 20-тӥ мартозь "Луч" журналлэн редакцияз. Устоосыз печатласькозы солэн бамъёсаз. Пусйиськозы дуно кузьымъёсын. Юан-веранъёсын вазиськыны луоз 51-35-61 телефон номеръя. Сэзъялтӥське! Шаерысьтымы егит нылъёслэн чеберлыксылы сӥзем "Чеберай" ӵошатскон нырысьсэ ортчиз 1995-тӥ арын. Со сярысь сюлмаськизы, али но сюлмасько Удмурт Элькунысь Культурая министерство, Пӧртэм калыкъёслэн ужъёссыя министерство, Егитъёсын ужанъя кун комитет. "2000-тӥ - Чеберай" ортчытӥське, егитъёслы чеберлыкез валаны юрттон вылысь. Со луонлык сётоз удмурт пиналъёслы асьсэзыз возьматыны, котькыӵе быгатонлыксэс, устолыксэс азинтыны. Шаермылэн пӧртэм сэрегъёсысьтыз пинал нылъёс нош ик шумпоттозы асьмеды асьсэлэн аспӧртэмлыко луэменызы, чеберлыкенызы, егитлыкенызы. Конкурсэ пыриськыны быгато 17-25 аресъем, удмурт кылэз ӟеч тодӥсь, 165 сантиметръем но солэсь но ӝужыт нылъёс. Ялан ужано ас чеберлыктэ утён бордын, тодоно аслэсьтыд дундэ, дӥсьтӥсьгес но шӧртчигес луоно. Чеберай луон вылысь, сцена вылэ потозы шаерысьтымы тужгес устоосыз нылъёс. Вормисьёс пӧлын шараяськозы "Мусокай", "Дыдыкай", "Визьнодӥ", "Устокай". Ӵошатсконын вормем нылъёс пусйиськозы дано лентаосын, дуно кузьымъёсын. Нош тужгес устоезлы - чебер изьы. Одӥгезлы нылмуртлы сётэмын луоз учкисьёслэн кузьымзы. "Удмурт дунне" газетлэн редакциез вормисьёслы сётыны чакла чебер суредъёс. Ӵошатсконэ пыриськисьёсты дунъялозы культура, искусство, бизнес, политика удысъёсысь тодмо адямиос. Эшшо огпол ивортӥськом: "2000-тӥ - Чеберай" ортчоз туэ, 25-тӥ мартэ, Ижысь "Аксион" культура дворецын. Кутскоз ӝытазе куать часын. Чебер нылъёс, сэзъялтӥське! Е. Ромашова. ГУРТ УЛОН НО НАУКА Валентин ФОКИН: "АКАДЕМИЯ ЮНМА, КУЖМОЯ" Ньыльдон куать ар талэсь азьло Удмуртилэн шоркараз усьтӥськиз Гурт хозяйствоя институт. Со кылдӥз Москваысь Вал вордонъя институтлэн инъетэз вылын. Та дышетскон заведениез 1954-тӥ арын выжтӥзы Ижевске. Соин ӵош дорамы вуизы кӧняез ке тодосчиос. Но тросэз кылизы столицае, берло лыктэмъёсыз пӧлысь но ог люкетэз берлань кошкизы. Выль институтлы кулэ вал уно тодосчиос. Иже лыктӥзы егит учёнойёс. Соос пӧлысь одӥгез вал Валентин Фокин. Шаерамы со вуиз 1958-тӥ арын, Ленинградысь гурт удысын механизацияя но электрификацияя институтэз но отысь аспирантураез йылпумъямез бере. Ар ортчыса луиз техника наукаосъя кандидат. Егит тодосчиез институтын шуныт пумитазы. Соку ик пуктӥзы фермаосын ужъёсты капчиятонъя но электрификацияя кафедраын доцентлэсь ужзэ быдэсъяны. Вить ар ортчыса, ректорлы воштӥсе юнматӥзы, нош 1988-тӥ арын - ректоре. 1995-тӥ арын институт академия луиз. Валентин Васильевичез нош ик кивалтӥсе бырйизы. - Валентин Васильевич, тӥ вордӥськемын Вологда улосысь Кононика гуртын. Кызьы бырйиды удмурт шаерез? - Огшоры. Ленинградын аспирантураез йылпумъяме бере, ужаны лэзизы Ижысь гурт улонъя институтэ. Со вал 42 ар талэсь азьло. Кельшиз мыным удмурт ошмесо шаер, яразы чебересь нюлэсъёс, шуръёс, вӧл-вӧл ӟег, етӥн бусыос, но тужгес но лякыт сямо удмурт калык. Удмурт элькун луиз кыкетӥ родинае, татын вордскизы кык нылъёсы. Собере советъёсын улон вакытэ егит специалистъёсты ысто вал отчы, кытын тон золгес кулэ луиськод. - Уд жаляське-а быдэс улондэс татын ортчытэмдылы? - Сыӵе малпан йырам ик ӧз пыра. Шуом, Ленинградэ кыльысал яке Москвае кошкысал ке, кытын ужасал - туннэ шуг вераны. Но одӥгез тодмо - вылӥ дышетскон ёзлэн тӧроез отын ӧй луысал, дыр. Оло, пурысь ыж интыын ветлысал. Нош татын 25 ар проректор вал, 12-тӥ арзэ академиен кивалтӥсько. Со туж бадӟым оскон. Институтэн ӵош будӥ, юнмай, арысь аре паськытаз вуз. Ведь вить ар талэсь азьло со юнме шорысь академия ӧз луы. Али но ялан азинскиськом, огинтыын ум лёгаськиське. Котькуд вузлэн тӧроез, 5 ар ортчыса, выльысь бырйиське. Мыным со кышкыт ӧвӧл, коллективлэсь оскемзэ умой быдэсъясько. - Валентин Васильевич, вакчияк вералэ, кызьы улэ туннэ академия? - Милям али 3800 студентъёсмы. Соос дышетско 6 факультетъёсын, 9 пумо специалистъёс дасяськом. Выпускникъёсмы ваньмыз сямен гурт удысын ужало. Туэ нырысьсэ поттӥськом пудо эмъясь врачъёсты но нюлэс хозяйствоя специалистъёсты. Соосты возьмало ни хозяйствоос но предприятиос. Академиын 700 мурт ужасьмы. Соос пӧлысь 60 процентэз тодосчиос луо, нош наукаосъя докторъёсмы но профессоръёсмы - 25 кузя. Та ласянь куд-ог вузъёслэсь ӧжыт бере кылиськом. Но егит учёнойёсмылэн лыдзы пумен йылэ. Матысь кык ар ӵоже 18-эз дышетӥсьёсмы тодосчиос луизы, учёной ним басьтӥзы. Соос тодон-валанзэс будэто Пермьын, Кировын, Уфаын, Москваын. Тани алигес Санкт-Петербургын ужзэ юнматӥз Ирина Селезнева, экономика наукаосъя кандидат луиз. Воштӥсьсылы Ильдус Фатыховлы но Александр Любимовлы, мыным сямен ик, доктор уж гожтытэк, профессор ним сётӥзы. Тӥни озьы каллен юнмаськом. Миым аккредитациез ортчим но сертификат басьтӥм. Со право сётэ дышетыны но кун диплом сётыны. Ушъяськемлы медаз пӧрмы, но вераме потэ: ортчем арын бухгалтеръёсты дасянъя Урал институт луим. Та понна нюръяськиз на Челябинск, но Москва милемлы оскиз. Табере лыдъян-чотан удысысь специалистъёслы кун диплом сётӥськом. Миым озьы ик нырысьсэ право басьтӥм хозяйствоосты шуг-секытысь поттонъя кивалтӥсьёсты дасяны. Алигес 24 мурт свидетельство басьтӥз ни. Ваньмыз сямен соос гурт хозяйствоосын кивалто яке валтӥсь специалистъёс луо. Соос пӧлысь 16- ез эшшо мылкыд каризы на тодон-валанзэс будэтыны. Берло дыре академия бадӟым инты висъя АПК-ысь кивалтӥсьёсты но специалистъёсты дышетонлы. Туэ кык толэзьскын гинэ 1100 мурт тодон-валанзэ будэтӥз ни. Та уже озьы ик пырисько гурт удысъя техникумъёс, Агробизнесъя но кадръёс дасянъя институт но Удмурт кун университет. Огъя вераса, ар ӵоже 300 адями дышетскиз. Программа 36 часысен 150 часозь чакламын. Берлодыре студентъёс кыкетӥ вылӥ образование басьтыны тыршо. Кылсярысь, 4-тӥ курсысен кык факультетын дышетско. Егитъёс тужгес но кыстӥсько экономикаез тодыны - экономист, бухгалтер, аудитор луэмзы потэ. Кызьы сое умоен уд лыдъя. Нош военной кафедраын дышетско сюресъёс лэсьтонлы (дорожной службалы). - Валамон, академиез музон вузъёсын уд ӵошаты. Тӥляд ань музъемды, фермаосты. Кызьы ужа "Июльское" хозяйстводы? - Урод шуыны уг быгатӥськы. Миым котькуд гектарысь 21,7 центнер ю тысь кутсам (валля арын 18,3 вал), нош картофка 125 центнер усиз (1998-тӥ арын 70,7 центнер вал). Умоя музъемез кыедан, тырмыт дасям пудо сиён. Кылем арын скаллы быдэ (ваньмыз 813 йыр) 4200 килограмм йӧл кыским, валля арен ӵошатыса, 500 килограммлы уногес. Кунянъёс сутка ӵоже 700 грамм пала йыло. Ортчем арын куинь пол трос вузам картофка, йӧлмес пакетъёсы тырыны кутским. Со бадӟым пайда сётэ. 3,2 процент напен килограммзэ 5,6 манетэн вузаськом, нош "Ижмолоко" чылкак 2 манетэн гинэ кутэ. Тӥни кӧня табышез луэ. Учхоз нош нуналлы быдэ шорлыдын 10 сюрс килограмм йӧл кыске. Табере лыдъялэ, кӧня пайдаез люкаське! Огъя вераса, миым хозяйствомы 4 миллион манетлэсь уно пайда басьтӥз. Со пӧлысь тужгес но бадӟым люкетэз усе пудо вордон вылэ - 3 миллион, нош музъем ужан 1,2 миллион манет сётӥз. Хозяйстволэн рентабельностез 43 процент ёрос луиз. Со туж умой. - Валентин Васильевич, учхозды Воткинск районысь музон хозяйствоослы но юрттэ. - Шонер. Тани кылем арын ёросысь Фрунзе, Калинин, "Новая жизнь" колхозъёслы, "Воткинский" совхозлы но "Позимь" гурт кооперативлы юоссэс но кидыс бусыоссэс утялтыны юрттӥм. Ваньзэ 2080 гектар вылын ужъёсты быдэстӥм яке, коньдонэн лыдъяса, 56,5 миллион манет тыр. - Нош хозяйстводылэсь ӵуказезэ кызьы адӟиськоды? - Умой. Хозяйствомы ялан паськыта. Завьялово ёросысь Докша гурт вӧзысь 650 гектар муосты арендае басьтӥм. Со сяна, бускель Калинин нимо колхозэз бордамы басьтыны малпаськом. Со умой луоз хозяйстволы но, учхозлы но. Пыд йыламы уката золгес султом, уногес сиён-юон поттом. Со бордын азинскон-будон сюресмы. - Матысь дыре гурт удыс юн воштӥськиз. Кылдӥзы пӧртэм пумо ваньбурен ужась кузёос, эштосъёс, хозяйствоос, кооперативъёс, акциосын огазеяськонъёс. - Наука АПК-лы юн трос юрттыны кулэ. Со герӟаськемын визьмо ужасьёс, специалистъёс но кивалтӥсьёс дасянэн. Туннэ та ужпум туж лэчыт сылэ. Мугез тодмо, гурт удысын тыршисьёс ичи уждун басьто, уродэсьгес условиосын уло, техника ляб пыӵа. Тӥни соин уг буды ужазинлык, пайда ичи люкаське. Али меӵак пусйыны луэ, Россиын но, Удмуртиын но удыслы кадръёс дасянэз умоятон ласянь ужрадъёс тырмыт уг кутӥсько. Научной ужъёс вань, но соос уже уг пыӵало. Жаляса верано луэ, наука ӧжыт инты висъя адямилы, специалистъёслы, соосты котыр ласянь ӟеч дасянлы. Тани шаерамы валля арлэн пумаз кадръёс дасянъя 2005-тӥ арозьлы программа гожтэмын. Та уже пыриськизы академия но Гурт улонъя но сиён-юонъя министерство. Тае син азямы возиськом. Программаын шӧдскымон инты висъяське кадръёслэсь тодон-валанъёссэс, быгатонлыксэс ӝутонлы. Нош со юрттыны кулэ удалтэм ю-нянь будэтыны, тросгес сӥль но йӧл поттыны. Кылсярысь, академиын, колледжъёсын но техникумъёсын егитъёс таӵе выль специальностья дышетско: "Сиён-юон дасянэз капчиятон", "Пудо эмъян", "Нюлэс хозяйство", "Ужбергатон", "Страховой уж" , "Музъем ужез радъян", "Правоез дышетон" но мукетыз. Озьы ик мынэ фермеръёсты, механизаторъёсты но музонзэ дасян. Академие пырыны дасянъя факультетлэн 7 районын 15 агрошколаез усьтэмын. Кӧняез ке гурт техникумъёс колледжъёс каремын, нош гуртысь ужасьёслэсь тодон-валанзэс будэтонъя школа пӧрмиз агробизнесъя но кадръёс дасянъя удмурт институтлы. Но ваньмыз та ужрадъёс тырмыт ӧвӧл на. Данакез вуж сямен ужало ай, рыноклэн куронъёсыз ляб быдэсъясько. Азьло тодоно, кыӵе но кӧня кадръёс асьмелы кулэ. Собере тырмымон уксё висъяно. Огъя вераса, академия ваньбур поттонлы ӟечгес юрттыны, усто специалистъёс дасяны кулэ. - Валентин Васильевич, студентъёсты учхозын ужало-а яке практика гинэ ортчо-а? - Валамон ужало но. Тани студентъёслэсь картофка будэтонъя отряд кылдытӥм. Соослы умоесь ужан условиос кылдытӥм, усто техника висъям, кӧня урожай басьтэмзыя, уждун тупатӥм. Валля арын отряд котькуд гектарысь 255 центнер картофка копаз, нош миым со лыдпусэз ортчиз. Котькудӥз басьтӥз быдэн магнитофон, спортивной костюм но музон вуз. - Кин тӥляд самой матысь юрттӥсьёсты? - Нырысь воштӥсьёсы - проректоръёс - дышетонъя Александр Любимов, наукая Ильдус Фатыхов, экономикая Сергей Селиванов, хозяйствоя Евгения Сажина, валтӥсь бухгалтер Тамара Никонова но муетъёсыз. Ректорлы юртто ваньмыз тодосчиос, дышетисьёс. Сотэк кызьы бен кулэ ужпумъёсты быдэсъялод. - Нош туэ студентъёсты кутонын мар вылез луоз? - Нырысетӥез, тани гуртысь школаосысь выпускникъёс республикаямы ортчись олимпиадаосын призовой 1-тӥ-3-тӥ инты басьто ке, соос математикая, физикая, биологияя но химияя экзамен уг сёто ни. Кыкетӥез, гуртысь школаосын гожтэм сочинение академие пырыку лыдэ басьтӥське. Куинетӥез, академия 18 агрошколаосын кусыпъёс возе. Отысь выпускникъёс огдыре академие но экзамен сёто, шор ёзо школаез йылпумъям отметкаосын вузэ кутӥсько. Ньылетӥез, котькуд районысь котькуд специальностья одӥг мурт нимаз контрактъя академие пыре. Мукет сямен вераса, районысь укмыс мурт контрактъя кутӥське. Таӵе вамышъёсмес туж умоен лыдъяло ёрос кивалтӥсьёс но хозяйствоосысь специалистъёс. Солы озьы ик шумпото анай-атайёс но. - Валентин Васильевич, кызьы шутэтскиськоды? - Ваньмон дыры ичи ке но, яратӥсько бакчаям ужаны. Шер-шер ветлӥсько губияны но чорыганы. Пыӵалэ вань, но пӧйшураны уг ветлӥськы, улэп макеос жаль пото. Соослэн но улэмзы потэ, инкуазез мед шулдыртозы. Яратӥсько лыдӟиськыны, уката ик историен герӟаськемъёссэ (Россилэсь ортчем сюрессэ, Карамзинэз, Сибирь сярысь) но мукетсэ. Кельшо классической музыка, советской кырӟанъёс. - Адямиослы мар мылкыд карысалды, кыӵе сямъёссэ пусйысалды? - Калыкын пыӵатоно эшъяськон, Родинаез яратон, дэмен ужан но ог-огедлы юрттон мылкыд. Котькуд адями мед луоз чылкыт сюлэмо, мылысь-кыдысь ужась, ответственностез валась но секыт, сьӧд ужлэсь кышкасьтэм. - Нош семьяды сярысь мар меда верасалды? - Кузпалэным кык ныл будэтӥм. Атайзылэсь адӟем карыса, лэся, кыкназы Ленинградын дышетскизы, инженер-электрик но архитектор луизы. Асьсэос куинь пи но одӥг ныл будэто ни. - Вуоно арын 11-тӥ ноябре тӥледлы, Валентин Васильевич, 70 арес тырмоз. Ужаны малпаськоды на-а? - Ваньмыз потэ коллектив, учёной совет бордысь. Кызьы верай ни, ректорез котькуд 5 ар ортчыса быръё. Оскон но тазалыке луиз ке, учком. Но азьланьзэ тунаны уг яратӥськы. Улон возьматоз. Вераськиз Геннадий РОМАНОВ. Ӟечгес кылзом - умойгес валалом Ивор вӧлмытӥсь ёзъёсын поттылӥзы ни, Ижын "Тол школа - 2000" ужаны кутскиз шуыса. Со сярысь ми вераны курим тодмо политологез Юрий СЕМЕНОВЕЗ. Тани солэн мадемез: - "Тол школа" - адямиосты дышетон туала амалъёсты пӧлысь огез. Тани асьме доры люкаськемын калык кусыпъёсты эскерись тодосчиос. Дышетонэз радъя Удмурт университетысь историяя факультет, шонергес вераса - отысь кафедралэн кивалтӥсез Татьяна Ефремова. Та ужен вырыны мед лэзёзы шуыса, солы трос бызьылоно луиз. Асьме учёнойёслэн проектсы ӵошатсконын умоен лыдъямын вал, озьы Удмуртилы гранд - дышетыны луонлык, со пӧлын ик коньдон - шедиз. Университетамы кӧня ке дасо егит специалистъёс вуизы. Соос лыктӥзы Волга но Урал котырысь, Сибирьысь. Уноез вузын дышето, вань на кӧня ке студент но. Школалэн ужпумез - калык кусыпъёсты азинтонын югдурен тодматон, законъёсты ӵош эскерон но, оло, котьмалэсь кулэез, вуоно даурын ужано муртъёсты ог-огзылы матэгес карон. Удмуртиын берло дыр ӵоже та ласянь пусйымон опыт люкамын ни ук. Национальной политикая концепцимы Россиын одӥгез устоез лыдъяське. Дорамы ужало дуннелы тодмо учёнойёс. Соин ик юн оскисько, таӵе пумиськонъёс ваньмыз понна пайдаен берытскозы шуыса. - Юрий Валерианович, та "Тол школа" огполлы гинэ кылдытэмын-а? - Ӧвӧл, программа бадӟым. Али лэсьтэмын ай нырысетӥ вамыш гинэ. Азьпалан луозы на трос мукет пумиськонъёс, со понна возьматоно ужаны быгатэммес. Татчы ӧтьыны чакламын Россиысь валтӥсь тодосчиосты, кин выре калык кусыпъёсты радъянэн. Шуом, Рамазан Абдулатиповез ик. Соиз туж умой: наукае но, огъя улонэ но вуо выль мылкыдо егит адямиос. Соос милесьтым, мӧйыослэсь, туж виъясько. Сэзесь, дӥсьтӥсесь, дуннеысь тодон-валанэз уже кутыны быгатӥсесь. Туала тодосчиос валало: макем асьмеос ӟечгес но ӵемгес кылзом ог- огмес, сокем умойгес валалом вӧзысь адямиослэсь кулэяськонъёссэс. И. Лебедев. УНО ТЫЛПУОС ГОМАЛО Кылем арын Шаркан районын 41 пол тылпу потылӥз. Кык пол тэль ӝуаз. Озьы 626 288 манет тыр ваньбур эгырлы пӧрмиз. Быризы улон коркаос, пудо, сутскиз "Атэй" кафе но "Севан" барлэн котельноез. Тылын быриз 3 мурт. Быдэн вить тылпу потылӥз Бородули но Мишкино гурт администрациосын, нош Шаркан гурт администрациын - пырак 16. Та гуртъёс дорын сюресъёссэс чакласа уг возё, дась ӧвӧл тылпу кысон техниказы. Унояз гуртъёсын эстӥськон гуръёс, электрохозяйство туж шер эскериське. Югдурез тупатон вылысь, арлэн пумаз дышетон ортчытэмын гуртъёсысь старостаосын. Н. ВОЗИСОВ. Инспектор котьку калыкын Милицилэн ужезлэсь бадӟым люкетсэ лэсьто участокъёсъя инспекторъёс. Соос котьку калык пӧлын. Тыршо, шутэтскон нуналъёсты но адӟылытэк. Инспекторъёслэсь ужзэс, быгатонлыксэс умойгес радъян вылысь, Удмурт Республикаысь Югдурез утёнъя министерство милициысь инспекторъёс пӧлын конкурс ортчытӥз. Со радъямын вал кык этапъя. Нырысетӥез ортчиз городъёсысь но ёросъёсысь югдурез утёнъя органъёсын. Та уже кыскемын администрациослэн кивалтӥсьёссы но. Отын вормемъёс лыктӥзы республикаямы ортчись конкурсэ. Соос азе туж бадӟымесь куронъёс пуктэмын вал. Конкурсэ 27 инспектор ветлӥз. Вормисе потӥзы Ижевскысь Октябрь РОВД-ысь участокъя валтӥсь инспектор, милициысь лейтенант Алексей Широбоков, Сарапул РОВД-ысь участокъя валтӥсь инспектор, милициысь майор Дмитрий Сегал, Вавож РОВД-ысь участокъя валтӥсь инспектор, милициысь капитан Владимир Борисов, Грахово РОВД-ысь участокъя инспектор, милициысь старшой лейтенант Сергей Назаров. Вормисьёслы сётэмын дипломъёс но коньдон кузьымъёс. УР-ысь МВД-лэн пресс-службаез. Гурт улон но наука Дышетско кивалтыны Академиын 1981-тӥ арын усьтӥськиз кадръёслэсь тодон-валанзэс будэтонъя факультет (ФПК). Та дыр куспын отын дышетскизы ни гуртысь 8 сюрс специалистъёс но хозяйствоослэн кивалтӥсьёссы. Улон кадръёс азе юнэсь куронъёс пуктэ, уката ик рынокен экономика. Али факультетын тодон-валанзэс будэто хозяйствоослэн кивалтӥсьёссы, агрономъёс, зоотехникъёс, инженер-механикъёс, инженер-электрикъёс, экономистъёс, бухгалтеръёс, пудо эмъясьёс, переработкая специалистъёс но огшоры ужасьёс. Соос дышетско таӵе программаосъя: "Музъем ужын экономика но кивалтон", "Лыдъян-чотан уж но аудит", "Коньдон ужпумъёс", "Ваньбурез дунъя", "Сиён-юонэз возён но переработать карон амалъёс" но мукетъя. Хозяйствоослэн кивалтӥсьёссы эшшо тодон-валанзэс будэто на "Менеджмент" программая. Туэ академиын, Правительстволэн куремезъя, республикаысьтымы гурт удысысь 3000 кивалтӥсьёс но специалистъёс дышетскозы. Россиысь Коньдон ужпумъёсъя министерствоысь бухгалтеръёсты дасянъя аттестационной комиссилэн лэземезъя, ФПК-ын кылдытэмын бухгатеръёсты дышетонъя учебно-методической центр. Со пыр 200-лэсь уно адями аттестат басьтӥз ни. Факультетын "АПК-ын экономика но кивалтон" программая тодон-валанзэс ӝуто хозяйствоослэн кивалтӥсьёссы но валтӥсь специалистъёс. Нош академиысь асьсэос тодосчиос, профессоръёс дышетско Россиысь музон вузъёсын но, палэнэ ветлыны коньдон тырмымтэен, академиын семинаръёс мыно педагогикая, психологияя, рынокен экономикая но музонэзъя. Россилэн Президентэзлэн Советэзлэн решениезъя академиын кылдытэмын профессиональной бухгалтеръёсты дасянъя Удмурт улосвыл институт Москваысь Бюджетъя но казначействоя академиен ӵош. Отын 100 аудиторъёс тодон-валанзэс выльдӥзы ни. Алигес факультетын кылдытэмын АПК удысын иворъёс но валэктонъёс сётонъя центр. Факультет хозрасчёт амалэн ужа. Сое куре рынокен экономика, ФПК-ын ужало таӵе кафедраос: бухучёт, гурт производствоен, экономикаен кивалтон, гурт предприятиосын ужез радъян но планъёс лэсьтон. Республикаысьтымы Правительство гурт удысысь ужасьёсты дышетыны уксё висъяз. Академия Сарапулысь совхоз-техникумен, Агробизнесъя но кадръёсты дасянъя удмурт институтэн но Можгаысь ветеринарной техникумен но мукет дышетскон заведениосын ӵош туннэ нуналозь гуртысь 1500 ужасьёсты дышетӥз ни. Та уже пырисько наукаосъя докторъёс но кандидатъёс, валтӥсь кафедраосысь доцентъёс, профессоръёс но бадӟым опытэн специалистъёс. Гурт удысысь азьмынӥсь амалъёсын тодматскем сяна ветло усто хозяйствоосы, музейёсы, театръёсы но музон тунсыко ужрадъёсы пырисько. Кылсярысь, вуылӥзы ни Завьялово тепличной комбинатэ, Вавож районысь Мичурин нимо гурт хозяйствое но музон интые. Висъям коньдонэз пайдаё кутон но гуртысь специалистъёслэсь тодон-валанзэс муромытон вылысь, академия дораз ӧте дышетскыны. Борис ЗОНОВ, Гурт улонъя академиысь ФПК-я проректор. Ньыльдон ар пала Та арлыдо кышномуртэз академиын тодӥсьтэмез ӧвӧл, дыр. Вера Дмитриевна Дерендяева - быдэс республикаямы но, палэназ но тодмо адями. Солэн дышетэм муртъёсыз - специалистъёсыз - лыдъянтэм ни. 40 ар ӵоже студентъёсты дышетэ ни. Выпускникъёсыз шаерысьтымы котькуд гурт хозяйствоын но музон удысъёсын ужало. Вера Дерендяева гурт худысъя институтэ лыктӥз 1961-тӥ арын. Егит специалистэз соку ик пуктӥзы вылӥ математикая кафедрае валтӥсь дышетӥсе. Собере вал гуртын механизацияя факультетлэн деканэзлэн воштӥсез но гуртын электрофикацияя факультетлэн деканэз. Оглом Вера Дмитриевна быдэс улонзэ сӥзиз гурт хозяйствоослы инженеръёс-механикъёс но инженеръёс-электрикъёс дасянлы. Задор мылкыдо, чырткем кышномурт берло аръёсы ас интызэ шедьтӥз дышетон отделын. Кык ар та ёзэн кивалтӥз, нош 1996-тӥ арын солы оскизы академиысь методической кабинетэз. Али со вузысь вань дышетӥсьёслы методической литература, положениос но куронъёс дася. Вера Дмитриевналэн кыкетӥ ныпъетэз но вань на. Со луэ академие пырыны дасянъя факультетлэн деканэзлэн воштӥсез. Мукет сямен вераса, Вера Дерендяева элькунысьтымы 18 агрошколаосын ужа. Соос кылдытэмын ни сизьым районъёсын но Агрыз городын. Тужгес но трос, 5 агрошкола, ужа ни Завьял ёросын, нош Пичи Пургалан - 3, кылемъёсаз - 1-2. Академие ветлон нуналамы Вера Дмитриевнаен дыртыса гинэ вераським, Пичи Пургала, пе, кошкисько. Отын улӥсьёс ёрос библиотекаын пумиськизы землякенызы, академиысь проректорен, профессорен Борис Дмитриевич Зоновен. Г. Васильев. Вера Дмитриевна Дерендяева. Кин ӝуатъя кизилиосты Борис Ложкинэн туннэ вордскемез дырысен - 90 ар Дышетӥсь кыӵе ке уж сётэ гинэ, чиедгес мугоро Борис кизэ ӝутэ ини: "Мон та задачаез тазьы лэсьтӥ..." Чупырес пияшен артэ пукись Васи, йырберзэ кормаса, эшезлэсь тетрадьзэ учкыны куре. Номырзэ валатэк ик кӧчыртэ но Борис сямен гань-гань пуке парта сьӧрын. Нош таӵе майбыр улон Васи понна ӝоген йылпумъяськиз: эшсэ мукет классэ выжтӥзы. Вить ар интые Борис куинь тол куспын быдэстӥз Стеньгурт школаез. - Мынам пие зӧке потоз, - Глазов педтехникуме дышетскыны пырем пиеныз данъяськыса шуылӥз Горей агай. Угось гуртын соку дышетӥсьлэсь бадӟымез но визьмоез адями ик ӧй вал. Нош Борис вань гуртооссэ абдратӥз: педтехникумысь дышетӥсьёсызлэн лӧпкытэмзы улсын нодлыко егит пи пырак Москвае тодон-валан люканы кошкиз. Куамынэтӥ аръёсы удмурт гуртъёсын школаын дышетскемъёс но чиньыен лыдъямон гинэ вал ай, нош Ложкин Горейлэн Борис пиез тӥни Москваын инженере дышетске. Таӵееныз бубиз гинэ ӧз, быдэс гурт, ма, ёрос но, туж данъяськизы. Вылаз ик, удмурт пияш куд-ог эшъёсызлэсь шаплыгес но визьмогес вылэм: Борис Григорьевичлы азьлань дышетскыны дэмлазы. Табере ини ӵыжы- выжыосыныз адӟиськыны шуыса бертэм егит пи шоры гуртоосыз бубы нимыныз вазиськылӥзы: - Тон, Гигореич, со Америка шуонзэс но абдраты, ява. Зэмзэ ик, Кез районысь пичигес Стеньгуртын вордскем Борис Ложкин ӝоген быдэс дуннелы тодмо луиз. 1935-тӥ арын партилэн Центральной комитетэз Москваез выльдонъя план кутӥз. Кремльлэн йылӥысьтыз кык йыръем ӧрӟиосты кизилиосын воштыны чакламын вал. Тужгес но секыт но шуг ужез - кизилиосты юнматонэз - оскизы лачмыт, ужез гажась удмурт пилы. Оло, сю пол тубаз Борис Григорьевич Кремльлэн башняосыз вылэ. Юрттӥсьёсызлы оскытэк, уно пол мерталляз турлы-турлы эскизъёсъя лэсьтэм конструкцилэсь ёзъёссэ. - Кизилиосты юнматоно кузь но гырккес гумыос вылэ. Соку ог 6 квадратной метр пасьталаем пияла кизилиосты нокыӵе сильтӧл нуыны-сӧрыны уз вормы, - ӵектӥз Б. Г. Ложкин. Юрттӥсьёсыз соин соглаш кариськизы. Кизилиос пушкын ӝуась лампаосты цилиндр тусо лэсьтӥзы. Молибден пиялалэсь кылдытэм лампаослэн кужымзы - 5000 ВТ, нош Боровицкий но Водовзводной башняосъёсаз - 3700 Вт вал. 1937-тӥ арын Кремль но солэн башняосыз йылын ӝуатскизы тупаса улон понна луэмез возьматӥсь кизилиос. Соос али ке но югыт пишто. Зэм, со дырысен та кизилиос уно пол выльдэмын ни вал. Кышкыт ӧрӟи выльысь медаз басьты вылэм кизилилэсь интызэ... Нош мынам земляке Кремль йылэ кизили ӝуатэменыз гинэ дано ӧвӧл. Быдӟым Отечественной война вакытэ Б. Г. Ложкин азинлыко тыршиз самолётъёсты эскеронъя туж бадӟым аэродринамической гумыез кылдытон бордын. Со юрттӥз ожгар самолётъёслэсь ӝоглыксэс будэтыны. Та ужез понна Борис Григорьевич Ложкинлы 1943-тӥ арын сётэмын СССР-лэн Кун премиез. Москваысь тужгес ӝужыт юртъёслэн кылдэмзы но меӵак герӟаськемын Борис Григорьевичлэн нимыныз. Кылсярысь, Смоленской площадьысь Кунсьӧр ужпумъёсъя министерстволэн юртэз, Котельнической набережнойысь но Дорогомиловской площадьысь инбамозь ик ӝутӥськись юртъёс улосчиёслэн аслыз ачиз пуктэм синпелетъёсыз выллем луо. Ма, соос гинэ шат? Таосыз борды ватсаны луысал туж уно объектъёслэсь нимъёссэс: Челябинскысь металлургической заводлэн электроен андан ӵыжатон но мартен цехъёсыз, омыр сётӥсь но ӵынэз лэзись гумыосыз, металлоконструкциосъя заводлэн юртъёсыз, Нижний Тагилысь но Орскысь та выллем ик объектъёс... "Ижсталь" огазеяськонлэн куд-ог цехъёсыз но выльдэмын-тупатэмын вал соку гинэ Вылӥ инженерно-строительной училищеез йылпумъям инженерлэн Б. Г. Ложкинлэн но солэн ӵош дышетскем эшъёсызлэн - Балепинлэн но Басиловлэн - проектъёссыя. Зэм, ог вить ар талэсь азьло вордскем палъёсаз бертылыкуз, Борис Григорьевич татысь металлургической заводэз ӧз тодма ни, прокатъя цехлэн вуж юртэз гинэ шат егит дырзэ тодаз уськытӥз. Вордскем Стеньгуртэз но тодмантэм воштӥськемын. Трос гинэ выль коркаос пуктӥллям. Нош Ложкинъёслэн улэм корказы интыын сылэ Быдӟым Отечественной войнаын быремъёслы сӥзем синпелет. Отысь нимтулъёс пӧлысь тросэз Борис Григорьевичлы тодмо вал: угось куке но ӵош бызьылӥзы гольык пыдын... Жаляса верано луэ: техника наукаосъя кандидатлэн, СССР-ысь Госстройлэн Центральной научно-исследовательской институтысьтыз одӥгезлэн отделлэн кивалтӥсез луыса ужам муртлэн, Б. Г. Ложкинлэн землякъёсыныз таиз пумиськонэз берпуметӥез вылэм... Римма Игнатьева-Лаптева. ПЕЛЯД ПОН! Визьмо мурт изъянысь но пайда басьтэ Тон но, мон но, соос но - ваньмы асьмеос нуналлы быдэ потребительёс луиськом. Трамвайын кӧня ке остановка мынӥськом яке кыӵе ке шормуӵын шутэтскиськом, майтал яке машина басьтӥськом, пинь пуктылӥськом яке ву юиськом... Нош тодӥськом-а асьмелэн правоосмы сярысь? Кылсярысь, тол но, гужем но, уй но, нунал но коркаосамы пӧсь но кезьыт ву бызьыны, 18 градусысен шуныт луыны, лифтъёс ужаны кулэ, нош кылем арняе базарысь басьтэм дуно шубаед (дэремед, костюмед...) вылтырыдъя ӧз тупа ке, 14 нунал ӵоже воштыны яке берыктыны луэ шуыса. (Зэм, нуллыса ке ӧд вутты но чекед яке адӟисьёсыд луизы ке). Басьяськисьёслэн промышленной вузъёс но бытовой, медицинской, коммунальной но мукет услугаос басьтонын правооссы пумысен конференция люкалляз 13-тӥ мартэ Ижевскысь Басьяськисьёслэсь правооссэс утёнъя комитет. Зэм, асьсэос басьяськисьёс яке тодымтэысьтызы, яке законэз укыр ӟеч тодэмъяськеменызы конференцие ӧз лыктэ, соин ик вераськон вузкарисьёсты басьяськисьёслэсь правооссэс тӥянлэсь алонлы пӧрмиз. Соиз но кулэ, дыр. Туала басьяськись - ой-ой-ой! Тани кылем гужем одӥг семья Николаев городэ путёвка басьтэ. Путёвкаын гожтэмын вал, отын санаторийын музэн эмъяло шуыса. Но шутэтскон интые вуыса, медпунктэз сяна уг шедьто. Кык арня Сьӧд зарезь дурын шутэтскыса, семья Иже берытске но турфирмаез, алдамез понна, коньдонзэс берыктыны косэ. Берыкто. Яке тӥ кыӵе ке дуно концертэ мынӥськоды. Билет басьтыкуды, артист фонограммая кырӟалоз шуыса ӧз вералэ, нош кырӟаз - соя. Тӥ гань-гань концерт учкиськоды, нош быремез бере - администрацие. Озьы но озьы, коньдонме, пожалуйста. Кӧня лулсэрдэс сэстоды, уг тодӥськы, но коньдондэс законъя берыктыны кулэ. Азьвыл тросгес ӝожтӥськонъёс дӥсь яке дуно техника вузасьёс вылэ вуо ке вал, али тросгес - коммунальной услугаос сётӥсьёс вылэ. Медицина дунын луэмен йыло урод эмъямлы ӝожтӥськонъёс (тросгес пинь эмъянлы, косметической операциослы). Комитет ужаны кутскем дырысен судэ 1079 иск сётэмын но калыклы 3 миллион 84 сюрс манет коньдонзэ берыктэмын. Та быдӟа город понна сокем трос ӧвӧл. Кӧня ке ар ортчыса нош, оскем потэ, вузкарись но басьяськись ог-огзэс керетытэк, пал кык вератэк валаны кутскозы. Америкаысь супермаркетъёсын кадь. Кулэ ук асьмеос соослэсь маке умойзэ но асэстыны. З.РЯБИНИНА. Туспуктэмез В.Беломорскихлэн. Кема ул! Драмая удмурт кун театрын та ӝытэ укыр пӧсь вал - "Арня ӵукна" радиожурналлэн кылдэмез дырысен ньыльдон вить ар тырмонлы сӥзем ужрадэ туж трос калык люкаськылӥз. Мугез валамон: радиожурналэз вань сюлмысьтызы ярато егитъёс но, мӧйыос но. Котькуд арня ӵукна кылзӥсьёслы вае со ӟеч ивор гинэ. "Арня ӵукна" радиожурналэз туж ярато культура, литература, искусство удысъёсын тыршисьёс. Юбилее лыктэмъёсты лулысь-сюлмысь пумитазы Кияса ёросысь Вуж Салья гуртысь чебер апайёс, агайёс. Йӧно дӥсяськем гурт калык туж уноезлы шумпотон но капчи мылкыд ваиз. Радиожурналлэн ортчем сюресэз сярысь лулысь-сюлмысь веразы сое дасян бордын уно аръёс ӵоже тыршем адямиос. Борис Саушкин, Милитина Гаврилова, Анатолий Митрофанов - та нимъёсты туж тросэз тодо, гажало но ярато. "Арня ӵукнаез" дасясьёсты ӟечкылазы Удмурт радиоысь данак эшъёс - мукет удысъёсты валтӥсь журналистъёс. Озьы ик - шаерысьтымы сӥё-дано адямиос. Нош кырӟанъёслэн пумзы-йылзы но ӧй вал та ӝытэ. Ньыльдон вить ар но тырмыса медаз ӟаректы журнал. Котькуд арня ӵукна дорамы мед лыктоз "Арня ӵукна". Владимир Беломорскихлэн туспуктэмъёсыз. 01 ИВОРТЭ Верам кыл иназ уг мыны Кылем арня куспын шаерамы 30 пол тылпу потаз, 250 сюрс манетлы ваньбур гомӟиз. Тыл пушкын 3 адями быриз, 3 мурт эмъяськонние шедиз. Паймоно соизлы, индылонъёс калыклы иназ уг мыно. Нуналлы быдэ тылпу пота, адямиослэн чакласькымтэенызы, нӧзь луэменызы. Соин сэрен ӝуало юртъёс, быро адямиос, с пӧлын ик чик янгыштэм нылпиос. 6-тӥ мартэ 10 часын ӝыт тылпу потӥз Ува посёлокысь 1 номеро школалэн азбараз. Ӝуаса вуттӥз вуж мебелен тырмытэм склад. 2 сюрс манетлы ваньбур оп! Шуытозь шупчиз. Тылпуэн нюръяськисьёслэн чырткем ужаменызы сэрен гинэ артэ сылӥсь юртъёс утемын. Та нуналэ ик нуназе бере тылпу ӝутскиз Воткинск ёросысь Первомай посёлокын Соколовлэн квартираяз. Солэн пиез 29 аресъем Сергей юэм йырыныз тамак пумзэ сэрпалтэм. "Горд атасэз" зӥбломытӥзы, нош чильым кыскисез больницае келязы. 7-тӥ мартэ ӝытазе жингыртӥзы Можгалась тылпу кысӥсьёслы. Чугун сюреслэн бытовкаяз "Конус" акционер огазеяськонлэн возьмаськисез виемын, дӥськутэз со вылын ӝуа. Адямиез быдтӥллям йыраз тӥрен шуккыса, нош сьӧлыксэс ватон вылысь ӝуатыны малпаллям. Та йыружъя али следствие ужа. Та нуналэ ик Воткинскысь Вокзальной ульчаын сутскиз 7 номеро юрт. Тылпу бервылысь шедьтэмын ӝуам шӧй. Кин со, кыӵе муген тылпу потӥз - соиз тодмо луоз бӧрысьгес. Таӵе ик учыр луиз 8-тӥ мартэ ӝытазе Ижысь Байкальской ульчаын - озьы ик пеньӟиз юрт, сутскиз-быриз адями. Республикаямы ортчем "Вихрь-антитеррор" ужрадъя уно тырмымтэос шараямын тылпу потон ласянь. Со пумысен предприятиослэн кивалтӥсьёссы алэмын но тодазы но вайытэмын. Озьы ке но улон юртъёсысь гулбечъёслэн ӝуамзы возьматэ: ГЖУ-ысь кивалтӥсьёс тылпуэн нюръяськисьёслэн куронъёссы шоры чиньы пыр учко. 12-тӥ мартэ 10 часын ӝыт Ижысь Школьной ульчаысь 7 номеро юртлэн подвалаз люкам жуг-жаг сутскиз. Ярам коридоръёсы нап ӵын люкаськыса ӧз вуы, дыраз кысӥзы. Та учырлэсь кык часлы вазен шоркарысь ик Азин урамын ньыль этажо юртлэн кладовкаосаз электрокабель езъёс ваче вуизы. Умой коть, тылпутэк ортчиз. Республикаысь тылпуэн нюръяськисьёс эшшо тӥледлы ваньдылы вазисько: сакгес кариське, чаклаське ужан интыяды но юрт котырады но. Удмурт Республикаысь МВД-лэн тылпуэн нюръяськонъя службаез. Син кышка, ки лэсьтэ Кылем арын академия шуге-леке шедем - банкрот карем - хозяйствоослы кивалтӥсьёс дасян борды басьтӥськиз. Вуз оскем ужзэ умой быдэсъя. Алигес отын нырысетӥез выпуск ортчиз. Гурт удысысь али кивалтӥсьёс но специалистъёс свидетельствоос басьтӥзы. Группазы пичи ӧй вал, 24 мурт. Со пӧлысь 16-ез эшшо мылкыд кариз дышетсконзэс огдыре ужаса азьланьтыны. Таосызлы Москва лицензия сётоз. Академилэн ректорез Валентин Фокин, свидетельствоос сётъякуз, выль кузёослы таӵе кылъёсын вазиськиз: - Эн кышкалэ, ичигес кӧлэ. Син кышка, ки лэсьтэ. Калык юнме шорысь озьы уг вера. Кинъёс бен со выль кузёос? Гуртысь эштосъёслэн, крестьян хозяйствоослэн, кооперативъёслэн туала кивалтӥсьёссы но отысь специалистъёс. Тани одӥгез соос пӧлысь - Сергей Максимов. Со ужа, Балезино районысь Чапаев нимо колхозын валтӥсь агроном луыса. Ижысь гурт хозяйствоя институтэз 1988-тӥ арын йылпумъяз. Вӧёгуртын со гажано адями, усто агроном, музъем ужез ӟеч тодэ. Вордӥськемын татын ик, бускель Адам гуртын. Сергей Петровичлэн тыршемез-сюлмаськемез син азьын. Балезино палан музъемъёс начаресь ке но, 1997-тӥ арын колхоз котькуд гектарысь 17-18 центнер ю тысь кутсаз. Миым куазь ӧз тупа, кык толэзь зоръёс чик ӧй вал, юос пыд йылазы куасьмизы, ӧз удалтэ. Озьы ке но валтӥсь агрономлэн суй-пыдыз юскиськымтэ, азьланезлы юн оске, арысь аре умоятэ музъем ужанэз. Г.ВАСИЛЬЕВ. * Валентин Фокин Балезиноысь валтӥсь агрономлы свидетельство сётэ. Шаркан палан туннэ Кырӟало-верало ветеранъёс Шаркан черкогуртысь ветеранъёлэн хорзы туж мыло-кыдо пыриське ёросын ортчись пӧртэм ужрадъёсы. Котькудӥзлы соос рос-прос, вань сюлэмзэс, быгатэмзэс сётыса дасясько. Тани гурт спортсменъёслэн ВИ тол шудонъёсазы лыктэмъёсты но мӧйыос пумитазы шулдыр кырӟанъёсын, ческыт пӧрамъёсын. Капчи мылкыдынызы бугыртӥзы куноослэсь мылкыдзэс. Кырӟаны-вераны яратӥсьёсты арнялы быдэ репетициосы люка кивалтӥсьсы - крезьгурчи Анатолий Протопопов. Ар кутскем дырысен "Ветеран" хор уно концерт возьматӥз ини, ёросысь уно гуртъёсты шулдыртӥз. Озьы ик соосты котьку шумпотыса пумитало мӧйыослэн шутэтскон-эмъяськон центразы но. О. Николаева. Кытчы лобӟид-ышид тон, тутыгыш? Тутыгыш (павлин) нимо тылобурдоез асьмеос книгаосысь суредъёсъя но телевизорысь адӟем учыръёсъя тодӥськомы. Асьме палан со уг улы. Яратэ шуныт шаеръёсты. Озьы ке но, тутыгышлэн нимыз пумиськылэ удмуртъёслэн кылан-буранъёсазы. Тужгес но - сюан кырӟанъёсазы. Тутыгыш кылэз удмурт кылын гожъямъёсаз нырысьсэ пыртӥз Борис Гаврилов. "Произведения народной словесности, обряды и поверья вотяков Казанской и Вятской губерний" (Казань, 1980) шуон книгаысьтыз та кылэз адӟиськом таӵе ньыльчуръем кырӟанысьтыз: Урамтӥ ортчись секыт ӟюгед (возэд) Буртчин ӟюг медам, мар медам? Милемыз вордӥсь анаен атай Тутыгыш медам, мар медам? Мадьяр тодосчи Бернард Мункачи, та тылобурдолэсь нимзэ та гожтэм чуръёсысь басьтыса, аслаз "Удмурт словаряз" пыртэм. Юрьё Вихманн тутыгыш кылэз шедьтэм малмыж, малмыж-уржум но уфа диалектъёсысь. Башкириысь Янаул, Калтасы ёросъёсын улӥсь удмуртъёс пӧлын тутыгыш кыл али но ӵем гинэ пумиськылэ сюан кырӟанъёсын. Отын ӵем дыръя пусйиськылэ та тылобурдолэн чебер быжыз. Кылсярысь, тазьы: Тутыгыш, татӥ мар ветлӥськод, Чебер быжыкайдэ вӧлдыса? Эн бӧрды, келын (кен), эн бӧрды, Чебер симыкайдэ быдтыса. Тутыгыш син азе пуксьымон ик суредамын бере, таӵе малпан кылдэ: та тылобурдоез удмуртъёс куке но вордӥзы, дыр. Бернард Мункачи но Юрьё Вихманн малпаллям, та кыл бигер кылысь вуэмын, дыр, шуыса. Но вылтусызъя со бигер кыллы уг тупа. Асьме доры выжиз, луоз, булгар кылысь. Нош ассэ тылобурдоез но, нимзэ но булгаръёс ваизы, дыр. Удмуртъёс асьсэ азбаразы ӧй ке вордысалзы, выль кенэз тутыгышен ӧй ӵошатысалзы. Удмуртъёс но асьме котырысь мукет калыкъёс тутыгышез табере малы уг ни вордо? Кытчы быризы тутыгышъёс?.. Та юанлы оскымон валэктон шедьтыны луэ, асьме палась инкуазьлэсь вошъяськемзэ тодыса. Ог укмыс сю ар талэсь азьло татын куазь сӥяны ӧдъям. Гужем туж зоро-кото но салкым улэм,_Г тӧлъёс туж кезьытэсь луылӥллям. Куазь тужгес но урод возиськылэм 1670-тӥ-1825-тӥ аръёсы. Шунытэз яратӥсь кыр будосъёс, тужгес но писпуос, кынмыса быриллям. Комиос палан куке но будэм тыпы, пашпу, урыжпу, пуныльӧм уй палан куасьмиллям. Удмуртъёс, поръёс тариез, кичивичиез киземысь дугдӥллям. Та муген валче ик крестьянъёс вунэтӥллям та будосъёслэсь нимъёссэс. Куазь шунытгес кариськем бере, бигеръёслэсь но ӟучъёслэсь кидыс курылӥллям. Тӥни соин ик уй пал удмуртъёс та будосъёсыз проса, кичивичи шуо, лымшор удмуртъёс - тари, яснык. Толалтэ, куазь кезьыт кариськыны ӧдъяку, адямиос вож пудозэс но курег-ӟазегзэс коркаязы возё вылэм. Куд-ог интыосын бадӟым пудозэс но уйлы коркаязы пырто вылэм. Тӥни та кезьытъёс дыръя ик тутыгышъёс одӥгтэм быриллям. Али куазь ан шуныта. Табере тыпы, пашпу, урыжпу выллем писпуосыз быдэс Удмурт шаерын будэтыны луоно ини. Нош тутыгышез вордыны луоз-а? Куазьлэсь кудлань вошъяськемзэ чаклано ке, асьме дорын тутыгышъёс улыны быгатозы ини. Али соослэсь выжызэс туж каньылэн уськытыны луоно. Со понна мыло-кыдо адямиос мед ваёзы та тылобурдолэсь пузъёссэ но инкубаторын тутыгышпиосты мед поттытозы. Риф НАСИБУЛЛИН, кылтодон наукаосъя доктор. РЕФЕРЕНДУМ АЗЬЫН Люкетытэк! Кызь куатетӥ мартэ, Россия Федерацилы Президент быръён нуналэ, шаерамы радъямын луоз Удмурт Республикалэн азьпал улонэз пумысь кенешон. Адямиослэсь юалозы: кыӵеесь малпанъёсты Удмурт Элькунлэн Конституциезлэн дасэтӥ ёзэтаз таӵе ватсан пыртон пумысен: Удмурт Элькунэн азьланяз мед кивалтозы Удмурт Элькунысь Кун кенеш, Президент, Правительство, Конституцияя суд, мировой судьяос но мукет кун ёзъёс. Адямиос малпало пӧртэм сямен. Шаерысьтымы валтӥсь драматург Егор Загребин дэмла: - Йӧн-йӧн сюлмаськисьмы ӧвӧлэн ик калыкмы туж куанер. Вань улосъёслэн кузёоссы вань ини - асьмелэн гинэ на ӧвӧл. Озьы бере, эшъёсмылэсь адӟем карыса, асьмелы но шедьтоно ини шаермылы ӟеч-ӟеч кивалтӥсь - Тӧро - Президент. Та ласянь туж ӟеч уло бускельёсмы - Бигер но Башкир шаеръёс. Бигер Элькунлэн Тӧроез Минтимер Шаймиев быгатэ калыкезлэсь улон-вылонзэ радъяны - ас музъемез вылысь ваньбурезлэн укмыстон процентэз дораз кыле. Чылкак мукет югдур шаерамы. Алигес гинэ тодмо луиз: му вӧймылэсь ньыльдон процентсэ нош ик келяллям сьӧрло - Москвае. Дорамы кылем кӧня ке люкетэз гинэ. Вылӥ кун ёзъёсын артэ нокыӵе улӥкун ёзъёс медаз ни луэ. Али котькытын укыр трос котькыӵе кивалтӥсьёс. Пӧртэм ужъюртъёсын чыры-пыры кулэяськонъёсты быдэсъясьёс кузьылиос мында. Музон ӧвӧл югдур гуртъёсын но. Али котькудзэ тужгес сюлэмшугъяськыто музъем сярысь вераськонъёс. Данаксэ туж керӟегъяськытэ сое вузлы пӧрмытыны турттон. Нош сюдӥсь- вордӥсьмы али ик аналтэмын ини. Вордӥськем музъеммес ӧвӧлтэмак карон меӵак герӟаськемын сое йӧн-йӧн утялтӥсь ӧвӧлэн. Аслам вордӥськем палъёсы вӧзын вань ӵошкыт гурт. Отын туж уно ӟеч тракторъёссы- машинаоссы вал. Али тросэз сётэмын нимаз кузёослы. Кылемез куашкамын. Озьы бере, сюдӥсьмы-вордӥсьмы сярысь сюлмаськись тыпак уз луы ни. Нош ӟеч кузёез озьы гинэ уд шедьты. Соин ик юаны-вераны чаклам ужпумысь одӥг удысъя туж курисько: ӟеч кивалтыны турттӥсьёслы люкетыны малпась нокыӵе мукет кун ёзъёс кулэ ӧвӧл. Россия Федерацилэн кун наградаосыныз пусъён сярысь Россия Федерацилэн президентэзлэн УКАЗЭЗ Кун азьын вормонъёсыз, калыкъёс куспын эшъяськонэз но ӵош ужанэз юнматонын бадӟымесь азинсконъёсыз но трос аръёс ӵоже пайдаё тыршемез понна "За заслуги перед Отечеством" ИИ степенё орденлэн медаленыз пусъёно Макаров Николай Григорьевичез - акциосын "Сарапульский машиностроительный завод" огазеяськонлэсь валтӥсь директорзэ, Удмурт Республика. Россия Федерацилэн Президентэзлэсь ужзэ быдэсъясь В.Путин. Москва, Кремль, 2000-тӥ арын 4-тӥ мартэ. � 467. Ньыль сюрслэсь ортчиз Селта ёросысь пудо вордӥсьёс кылем арын ужамзылы йылпумъянъёс лэсьтӥзы. Эштосъёс пӧлын скаллы быдэ куинь сюрслэсь уногес кыскиллям "Свободаын" но "Мельничанскойын" быдэн 3029 но 3023 клограмм, нош "Родникиын" - 1774, "Уть- Сюмсиын" - 2028 килограмм гинэ. Фермаос пӧлын азьпалан Эшметьгурт, Мельничанской но Орловской - скаллы быдэ 3234, 3039 но 3023 килограмм потӥз. "Свобода" эштосысь Н. Г. Баймачева гинэ 4000 килограммлэсь трос йӧл кыскиз. Н. Романов. Мувыр школаын Шаркан ёросысь Мувыр школаын ортчем семинаре люкаськылӥзы гурт администрациослэн тӧрооссы, школаослэн директоръёссы, дышетӥсьёс. Ужрадэз ортчытыны юнме быръемын ӧй вал та школа. Отын вань уго мае возьматыны. Мувырысь дышетӥсьёс кемалась ӟеч кусыпъёс возё гурт администрациен, нылпи садэн, анай-атайёсын. Вань ужрадъёсты ӵош, ог-огенызы кенешыса ортчытъяны тыршо. Лыктэм куноосты но ужан амалъёсынызы тодматӥзы школалэн директорез Василий Анатольевич Туров, завуч Валентин Васильевич Двоеглазов, дышетӥсьёс-ветеранъёс. Радъямын вал секциосъя но уж. Нош школаез туэ йылпумъясь пиналъёс анай-атайёсынызы ӵош пыриськизы "Кизилиё вакыт" ужрадэ. О. Сидорова. УЛОН-ВЫЛОН Улэмед ке потэ - дун тыр! Февраль понна вуэм квартира дун сярысь квитанциос Ижын улӥсьёслэсь мылкыдзэс куашкатӥзы ке но, ӧз кулектытэ. Нуналлы быдэ будӥсь дунъёслы пумитъяськыны уг луы бере, иське, паймонэз но ӧвӧл. Вылаз ик, городысь администрацилэн туэ понна берпуметӥез "кузьымез" ӧвӧл та. Али квартира дунъёс 35 процентлы ватсамын ке, ар пумозь верасько сое 50 процентозь будэтон сярысь. 2000-тӥ арлы республикалэн бюджетэз сярысь законын ӵапак озьы пусъемын уго: улон интыез возем коммунальной услугаос понна улӥсь (квартира возись) 50 процентсэ тырыны кулэ. Вераны кулэ, федеральной программаын чакламын квартира дунэз 70 процентсэ тырытыны. Но Ижевскысь администрация, калыклэсь ёрмемзэ лыдэ басьтыса, 50 процент вылэ ик дугдыны чакла. Со сяна, тыриськыны быгатӥсьтэм семьяос (квартира дунзы огъя доходзылэсь 12 процентлэсь трос луиз ке), компенсация басьтозы - улон интызы но коммунальной услугаос понна ичигес дун тырозы. Сыӵеос, ГЖУ-лэн коммисиезлэн тупатэмезъя, пенилэсь но утемын луозы. Мукетъёсыз квартира понна дун тыронзэс ӝегатӥсьёс сое ас вылазы шӧдӥзы ни, луоз. Зэм, 0,1 процентэз шӧдскымон ик уд шуы. Сомында ватсаса тыро одӥг нунал ӝегамзы понна муниципальной луись юртъёсын улӥсьёс, соослэн ЖРП-ен социальной наймъя огкылзы вань ке. Сыӵе огкыл гожтымтэос но улон интылэн кузёосыз (собственникъёс) - 1 процент. Уждунзэс, пенсизэс ӝегаса басьтӥсьёсты ГЖУ валаны тырше - соос куинь толэзь тыриськонэн ӝеганы быгато, но со понна ужам интыысь нимысьтыз справка басьтоно. Справка интые коньдон ке сётъясалзы... З.РЯБИНИНА. Гожтӥськон - 2000 Шудоез - сюэтӥез Ошпилэсь кузёзэ утчаны потон нуналэ куазь малы ке но укыр йӧнтэмъяськиз - мынон сюресмес зорен, пельскись лымыен вализ. Кельдыше пырон азьын машинамы лымыен гуньдылыны ӧдъяз. Ӟазег куды шуон гуртэ озьы гинэ уд пыры вылэм. Водительмылы Виктор Беловлы пӧсяно ик луиз, "буханказэ" азьлань валтон понна. Пыкъяськись машинаез уллятэк ӧйлась, валтӥсь редакторлы но фотографлы кужмо пельпумъёссэс уже кутоно луиз. Сюлмаськыны ӧдъямы, ми тазьы-тазьы лыктыны выриськом, нош артысь гуртъёсысь газет лыдӟисьёслэн мылкыдзы сузёз-а сюрес вылэ потыны? Луоз-а пыремзы колхоз автобусъёслэн Кельдыше? Юнме тунаськеммы. Бородульысь но, Мукабанысь но автобусъёс вуизы, зэм, тракторлэн юрттэтэз кулэ луиз ик. Кельдыш гуртысь клуб вырӟыны луонтэм тырмемын вал калыкен - "Удмурт дунне" газетлэн эшъёсыныз. Бородуль но Кельдыш почта ёзъёсын гожтӥськемъёс пӧртэм колхозъёсы пыро ке но, сельсоветсы одӥг. Одӥгаз почта ёзын тросгес гожтӥськизы, нош мукетаз ӧжыт шуыса, милям одӥгзэ но лыдӟисез палэнэн кельтэммы ӧз поты. Шаркан ёросысь почта ёзын ужасьёсын кенешыса, лыдӟисьёсъя нимаз список кылдытэмын вал, сомында ик лыдпусъёс тодмостэмын. Лыдпусъёсын быгыллям бумага юдэсъёсты кутам кудые интыям, табере кылиз на кузьымъёслэсь кузёоссэс тодыны. Но нырысь вал концерт, "Удмурт дунне" газетэн но отысь ужасьёсын тодматскон. Люкаськемъёс туж мыло-кыдо кылзӥзы Алексей Шкляевлэсь мадемзэ. Куке но та палъёсын ужам Людмила Хрулёвалэн мылкыд тымиськемын вал выль пумиськонэн. Шаркан калыклы аслэсьтыз кырӟанъёссэ кузьмаз Светлана Яковлева. Кузёос но бере ӧз кыле. Кельдышысь "Жильыртӥсь ошмес" ансамбль люкаськемъёсты быдэс ӝыт ӵоже шулдыртӥз. Асьсэлэсь быгатэмзэс возьматӥзы бородульёс но. Соослэн кемалась ик ӧвӧл кылдэм ай вокально-инструментальной ансамбльзы, кивалтӥсез Георгий Кузьмин. Сцена вылэ аслэсьтыз семьязэ поттӥз Лып- Селяныысь почтальон Любовь Ложкина. Сьӧразы ваиллям Лӧпшо Педуньзэс но, маскаръяськыны быгатӥсь Елена Максимова. Шаркан ёрос почта ёзлэн кивалтӥсез Виктор Мушин но солэн воштӥсез Надежда Протопопова дуно кузьымъёсын пусйизы нырысетӥ юрттӥсьёссэс почтальонъёсты Татьяна Федотоваез, Любовь Ложкинаез но Алевтина Хохряковаез. Нош Кельдышысь потчальон Татьяна Федотова (ачиз улэ Мукабанын) синпель кузьым сётӥз нырысетӥ гожтӥськисезлы Зинаида Ивановалы. Озьы калленэн-калленэн лотерея шудон дорозь но вуимы. Лыдпусъёсты кыскыны оскимы Кельдышысь пичи Катилы. Пичи нылоклэн киыз пыдлотӥ но утчаськиз, вылӥын кыллись лыдпусъёс вылэ но дугдылӥз, озьы ке но, та нуналэ удалтӥз Кельдыш почта ёзын гожтӥськемъёслы: таяз - сюлэсь ятыр гожтӥськемъёс, нош Бородульын - куамын котыр. Тросэз кузьымъёс кылизы кузёослы. Ошпиез яке кызьы шуо шарканъёс - порозэз Катимы кузьмаз Мукабанын улӥсь Людмила Юрьевна Федотовалы, со "Ита" колхозысь валтӥсь ветврач. Картэз Валерий Федотович озьы ик ужа колхозын механизатор луыса. Асьсэлэсь нимзэс кылыса, нылкышно копак дэймиз, шудэзлы оскыны ик уг вормы. - Ӧй ик малпа, таӵе бадӟым кузьым милемлы усёз шуыса. Кельдышын газетлы трос гожтӥськемын бере, Бородулие гинэ ошпи медаз шедьы шуисько вал, - шуэ Людмила Юрьевна. - Ачим мон Сюмси районысь Вуж Какси гуртысь. Дышетски ӟуч школаын. Шаркан пала бызьыса ини дыши удмурт сямен лыдӟиськыны. Кызь одӥг арзэ улӥсько ни та палан, вераськон кылы но шарканъёслэн кадь луиз. Вордӥськем гуртам бертӥсько ке серекъяло ини вераськемме. Газет сярысь ке верано, туж яратӥсько "Наталь", "Шӧкыч" бамез, ноку синйылтытэк уг кельтӥськы политикаен герӟаськем ужпумъёсты. Коньдонлы ёрмемысьтызы Людмила Юрьевна туэ газетмылы гожтӥськыны ик уг малпа вылэм. Колхоззы туж куанер, нош кык нылъёсты сюдоно-дӥсяно - пичиез дышетске сизьыметӥ классын, нош бадӟымез Воткинскысь Музыкальной колледжын. Почтальонзы Татьяна Федотова ёртӥз, гожтӥськы, пе, газетлы, тон сюэтӥез луод. Шаплы почтальон аслэсьтыз коньдонзэ но тырыны дась вал. Тӥни кызьы берытскыса кошкиз, ӧжыт гинэ аслэсьтыз шудзэ нылкышно мукет ӧсэ ӧз йыгаськыты. Бородуль сельсоветэ пырись гуртъёсысь лыдӟисьёсмы понна сельсоветлэн кивалтӥсез Зоя Анатольевна Широбокова нимысьтыз кузьым дасям. "Ита" колхозлэн кивалтӥсез Зинаида Ильинична Докучаева но ужасьёсызлы ю тысь мылетӥз. Та ӝытэ ик редакцилэсь кузьымзэ сётӥмы "Тодмалод-а, уд-а" нырысетӥ конкурсын вормисе потэмлы Александр Пантелеевич Вахрушевлы. Пусйымон соиз но, нырко-гопо но вуо сюресъёстӥ ветлоно ӧз луы кузьым басьтӥсьёсмес утчаса - ваньмыз сямен ик пумиськонэ лыктӥллям. Шуныт мылкыдын пумитамзы понна бадӟым тау карем потэ Зинаида Ильиничналы но "Жингыртӥсь ошмес" ансамбле ветлӥсьёслы. Л. Малых. Кельдышъёс пумитало куноосты. Катилы оскизы шудо номеръёсты шедьтыны. Шаркан ёросысь почта ёзлэн кивалтӥсезлэн воштӥсез Надежда Анатольевна ӟечкыла ошпилэсь кузёзэ Людмила Федотоваез. Туспуктэмъёсыз В. Беломорскихлэн. Быръёнъёс азьын Россия Федерацилы Президент быръён но Удмурт Республикаын референдум ортчон вакытлы Удмурт Республикалэн прокуратураяз нимысьтыз ужась группа кылдытэмын. Со радъялоз быръёнъя законэз тӥян учыръёсты дыраз палэнтон но алон ужез. Законэз тӥян учыръёс сярысь ивортэмды луоз 78-40-74 телефонъя. Со сяна, быръёнъёс азьын но быръён нуналэ республикаысь прокуратуралэн аппаратаз (таӵе адресъя: Ижевск город, В. Сивков урам; 78-45-78 телефонъя) но прокуратуралэн городысь ёзъёсаз радъямын луоз уй но нунал дежурство. Пайдаё ортчиз Толэзьлэн кутсконаз, 1-тӥ-3-тӥ мартэ, Ижысь гурт хозяйствоя кун академиын ортчиз ЪЪ научно-производственной конференция. Сое усьтӥз академилэн ректорез, профессор Валентин Фокин. Докладъёс лэсьтӥзы проректор, профессор Александр Любимов, экономика наукаосъя доктор, профессор Михаил Шишкин но ветеринарной наукаосъя доктор, профессор Алевтина Новых. Нырысез сӥземын вал элькунамы скал вордонлы, кыкетӥез - экономика ужпумъёслы, нош куинетӥез - пудо висёнъёслы но соосын нюръяськонлы. Конференциын ужаз 9 секция. Тужгес но бадӟым инты басьтӥзы агрономияя но экологияя, пудо вордонъя, ветеринарияя, экономикая но механизацияя секциос. Озьы ик вал тылобурдо вордонъя, гуманитарной наукаосъя но педагогикая секциос. Отын куинь нунал ӵоже 200 пала ивортон лэсьтэмын, тужгес но трос вал экономикалы сӥзем секциын - 67. ХХ научно-практической конференцие ветлӥзы Москваысь, Пермьысь, Екатеринбургысь, Пензаысь, Ставропольысь, Кировысь, Казаньысь, Алтайысь но музон интыосысь тодосчиос. Агрономияя на экологияя секциын Удмуртиысь нюлэс будэтонэз умоятон сярысь вераськиз нюлэс хозяйствоя министр Николай Буераков. Оглом пусйыса, научно-практической конференция пайдаё ортчиз. Г. РОМАНОВ. Дэменлыклы - дас ар Вуоно кӧснуналэ, дас тямысэтӥ мартэ, Удмурт лулчеберлыкъя дэменлык пусъёз кылдэмез дырысен дас ар тырмонзэ. Таин валче Драмая удмурт кун театрын ортчоз та юбилейлы сӥзем ужрад. Пыд йылаз султон вакытаз огазеяськонлы трос юрттӥзы ёросъёсысь пичи дэменлыкъёс. Зоя Поликарпова, Мария Ишматова, Альбина Вахрушева, Альбина Тарасова, Валентина Иванова, Екатерина Спиридонова, Фёдор Кабиров, Татьяна Сайдакова, Надежда Пахомова, Анатолий Комаров, Надежда Золотарева но трос мукетъёсыз туж бадӟым но дуно куноос луозы та нуналэ. Ӝытэ люкаськемъёсты шулдыртозы Воткалась пинал крезьчиос, Ижысь "Инвугур", "Айкай", Пичи Пурга ёросысь Бобья-Уча гуртысь "Арганчи" ансамбльёс, мукет кырӟасьёс-верасьёс. Пумиськон кутскоз нуназе дас одӥг часын. Суредъёс вылын - чеберлык Шаерысьтымы Суредасьёслэн огазеяськонзылэн Ижысь Пушкин ульчаысь Выставкаос ортчытъян юртаз кылемаз удмурт арня нуналэ бадӟым ужрад вал - усьтӥськиз Удмурт Элькунысь калык суредасьлэн, Россиысь калык суредасьлэн, Удмурт Эькунлэн Кун премиезлэн лауреатэзлэн Алексей Павлович Холмогоровлэн вордӥськемез дырысен сизьымдон вить ар тырмонлы сӥзем адӟытон. Возьматӥсько татын аслаз художниклэн ужъёсыз. Алексей Павлович Холмогоровлэн данак суредъёсыз верало шаерысьтымы туж тодмо но дано адямиос сярысь. Соос - Пичи Пурга ёросысь Баграш-Бигра гуртысь куиськись Дарья Курбатова, быдэс дуннелы тодмо спортсменка Галина Кулакова, озьы ик - огшоры эмъясьёс, корт нуйтӥсьёс, андан пӧзьтӥсьёс, пудо утисьёс! Дано суредасьлэн юбилеезлы сӥзем адӟытонэз усьтыку, шаерысьтымы трос тодмо адямиос вераськизы. Ваньмыз пусйизы Алексей Павлович Холмогоровлэсь кибашлы, усто, туж ужась луэмзэ. Е. Ромашова. Малпанзэ вера бырйись Гожтэт шара. Ма со вера? Россилы президентэ В. В. Путинэз быръён понна нырысь ик, Выль ар азьын, куаразэ сётӥз Б. Н. Ельцин. Тӥни со дырысен телевидение но радио, тросэз газетъёс Путинлэсь котькуд вамышсэ возьмато: тани со Чечняын сӧсырмемъёсты эмъясь больницаын, тани гурезь бамын куасэн нискыла, вертолётэн лобе, кинлы ке наградаос но кузьымъёс сётъя, уждунэз но пенсиосты будэтыны оскытэ... Ӵапак 1996-тӥ арын Ельцинэз президентэ быръён азьын кадь ик. Нош кыӵе сюресъёстӥ валтыны малпа Путин странамес, кыӵе солэн программаез - соиз сярысь нокинлы тодмо ӧй вал. Чечняын ожмаськонэз выльысь пуромытэмен гинэ сое возьматъяло нуналлы быдэ. Зэм, 25-тӥ феврале куд-ог газетъёс печатлазы В. В. Путинлэсь бырйисьёслы вазиськонзэ. Нош тросэз-а соин тодматскизы? Ӧз, дыр. Соинтэк- а журналистъёслэн куд-ог адямиослэсь со сярысь юалляськемзылы уноез номыр ик вераны уг тодо, мар понна Путинэз президентэ быръёно. Огез шуэ, мыным, пе, солэн кызьы ветлэмез кельше, мукетызлы егит но задор луэмез, нош пенсионерка синмаське вӧй кадь шунам пенсизэ будэтыны оскытэмез понна. Огъя вераса, Путинэз адӟо вылласянь гинэ, солэсь сюлэм малпанъёссэ нокин уг тоды. Вае, бен, вакчияк тодмастком солэн программаеныз. Аслаз шара гожтэтаз В. В. Путин шонер пусъе странаямы югдурлэсь уродмемзэ: государствоен кивалтон лябомемын, преступникъёсын, законэз тӥясьёсын йӧскадь нюръяськон ӧвӧл, миллионъёсын адямиос начар но сютэм уло, Быдӟым Отечественной войнаын ожмаськемъёс ульчаосын кураськыса ветло... Нош малы асьмеос сыӵе улонэ вуимы, кин со понна янгыш - соизэ Путин меӵак уг вера. Солэсь верам кылъёссэ трос дышетскем адямиос но огпол лыдӟыса гинэ уз валалэ. Тани со шуэ, азямы сылӥсь шуг-секытъёсын, пе, меӵак нюръяськоно, нырысь ик - тужгес кышкытъёсыныз, кудъёсыз азьлань мынонамы могӟетъёс пукто, экономикалы шоканы уг сёто, государстволы азинскыны люкето, меӵак вераса, азьланьын улонмылы кышкытлык кылдыто. Нош кинъёс-маръёс бен сыӵе кышкытэсь макеос? Валано луэ, со - реформаосты али сямен нуонлы, калык ваньбурез асэстон но тус-тас каронлы, экономикаез куашкатонлы пумит нюръяськисьёс. Путин пусъе: странамы узыр, нош калык начар улэ. Асьмеос, пе, ӟеч-ӟеч ум но тодӥське, кӧня но кин киын асьмелэн узырлыкмы, ваньбурмы, кӧняез со пӧлысь государство киын. Кӧня али ужась предприятиос, кыӵе соослэн доходъёссы; кӧня асьмелэн та дыре калыкмы, сое но, пе, пыр-поч вераны нокин уз быгаты. Соку ик юан кылдэ: нош вань-а асьмелэн правительствомы, вань ке, мар-о ужа со, государствоез азинтон но юнматон, калыклэсь улон-вылонзэ умоятон понна, странаысьтымы луонлыкъёсты уг тоды бере? Правилоос кулэ котькытын но ваньмызлы, шуэ Путин, властьлы но, ужбергатӥсьёслы но, уката ик лябӟемъёслы, кин тужгес кулэяське юрттэтлы. Нош мар-о лэсьтоно со понна? Валамон, экономикаез ӝутытэк, одӥг удысын но номыр уд лэсьты. Уката ик уд быгаты калыклэсь улон-вылонзэ умоятын, со понна кулэ ужрадъёс кутыны. Нош Путинлэн гожтэтаз номыр верамын ӧвӧл производствоез, гурт хозяйствоез ӝутон сярысь. Сотэк мар вераськод калыклэсь улон-вылонзэ умоятон пумысен. Али асьмеос ялан кылӥськом: соизлы яке таизлы коньдон ӧвӧл. Нош кытчы-о луиз со? Путин малы ке уг вера яке уг тоды, кызьы 200 миллиард доллар тыр сылӥсь калык ваньбур приватизация ортчытон вакытэ чылкак 7,2 миллиард манетэн вузамын вал. Озьы узырмизы Чубайс, Березовский, Абрамович, Вяхирев но соос кадь куд-ог мукет адямиос. Табере соослэсь ваньбурзэс, пе, государство утьыны кулэ. Путин со олигархъёсты одӥг радэ пуктэ пичи лавкаын яке мастерскойын ужасьёсын. Государстволэсь экономикаез радъянэ пыриськонзэ но со одӥг ласянь гинэ валэктэ: калык ваньбурез узыръёс киысь берыктыны кулэ ӧвӧл, государство соослэсь узырлыксэс синчеберез кадь утьыны кулэ. Тӥни озьы. Тани учке ай. Акциосын "ЕЭС Россиын" обществоысь кивалтӥсьёс, кытын кузёяське А. Чубайс, толэзяз басьто 10 сюрс доллар, со мында ик соослы тыро на премиос но мукет ватсэтъёс. "Транснефть" компаниын президент басьтэ 10 сюрс доллар, отысь нырысетӥ разрядэн рабочийёслэсь 100 пол трос. "Росвооружение" государственной предприятие луэ. Татын генеральной директор толэзьлы быдэ 173 сюрс манет басьтэ. Таӵе примеръёс трос вераны луысал. Югдур сыӵе ик Центробанкын но мукет интыосын. Нош кӧня коньдон тус-тас кошке сыӵе "кузёослы". Дуннеысь машинаос, квартираос, дачаос басьтыны, кунгож сьӧрысь курортъёсы ветлыны. Таӵе учыръёс сярысь ӟеч тодо прокуратура, Кун Думаысь депутатъёс, правительствоысь кивалтӥсьё, со сярысь огпол гинэ ӧз ивортылы ни Российской Федерациысь Счётной палата, нош законэз тӥясьёслы, калык ваньбурез тус- тас карисьёслы пумит нокыӵе ужрадъёс уг кутӥсько. Таӵе югдур интыосын но. Нош Путин аслаз гожтэтаз чик уг вера, кытысь коньдон утчано. Уг поттылы со, кӧня коньдон кошке кунгож сьӧры. Нефть, газ, нюлэс, металл но мукет ваньбурез вузаса поттэм коньдон ог люкетэз ке но бюджетэ вуысал ке, кӧня со люкаськысал! Тани Г. А. Зюганов кемалась вералляз ини, калык ваньбурез вузаса поттэм коньдон чотын бюджетэз данаклы йылэтыны луысал шуыса. Озьы, коньдонэз кунгож сьӧры келянэз дугдытыса, бюджетэ 320 миллиард манет берыктыны луысал, нефть но газ вузаса поттэм коньдон чотын - 110 миллиард манет, монополистъёслэсь калык ваньбурез ас тодэмзыя кутэмзэс дугдытыса - 90 миллиард, водка но тамак вузанэз государство кие басьтыса - 60 миллиард, Центробанклэсь табышсэ бюджетэ тырытыса - 30 миллиард манет но мукет. Тӥни со коньдон чотын Зюганов дэмла уждунэз но пенсиосты будэтыны, наукаез, калыкез дышетонэз но эмъянэз, культураез азинтыны, нылпиослы пособиос тыронэз йылэтыны но мукет. Нош Путин шуэ, со, пе, быръёнъёс азьын озьы быдэстонтэмзэ но ӵектэ. Странаямы коньдонэз басьтон-кутон ужпумъёсты пыр-поч радъям интые, Путинлэн правительствоез Кун Думае вазиське, туэлы юнматэм бюджетысь наукаез, культураез, калыкез дышетон но эмъян но мукет социальной удысъёсты азинтонэ висъям коньдонэз данаклы кулэстыны курыса. Озьы со малпа, шӧдске, 1-тӥ апрельысен уждунэз будэтыны но куд-ог мукет тыронъёслы коньдон шедьтыны. Собере угось Чечняын ожмаськон дыръя отысь куашкатэм хозяйствоез ӝутыны кӧня коньдон кулэ луоз на. Путин гожтэтаз бадӟым инты висъя законъёсты чакланлы но юн быдэсъянлы. Милиция но прокуратура азьын сылӥсь нырысез ужпум - адямиосты утён. Туж шонер. Нош малы соку асьмелэн прокуратура но суд законъя ужаны уг быгато, соосын косъясько властен кивалтӥсьёс? Со сярысь уг верало шат Путинлэн, Ельцинлы гинэ ӧвӧл, Конституцияя судлэн членъёсызлы но соослэн семьяоссылы льготаос тупатон сярысь Указэз, Генеральной прокуратураын кылдэм югдур, ку азьвыл ӝутэм уголовной ужъёс вылӥ кивалтӥсьёслэн косэмзыя дугдытэмын. Путин аслаз гожтэтаз номыр ик уг вера странамылэн дуннеын интыез, кунсьӧр ужпумъёс сярысь. Но солэн берло дыре верам кылъёсыз ӟеч возьмато, со Россиез НАТО-лэн бурд улаз, США-лэн пыд улаз куштыны дась луэ шуыса. НАТО-лэн вань политикаез ӟеч возьматэ, со ноку но Россиез быдӟым державаен адӟыны уг малпа шуыса. Англилэн но США-лэн кивалтӥсьёссы трос пол вераллязы ини, Россиын калык ӧжыт кыльыны кулэ, сое сырьё сётӥсьлы гинэ пӧрмытоно шуыса. Нош Путин Англилэн премьер-министреныз ӟыгыръяське но шуэ: таӵе адямиосты ми туж гажаськом! Тӥни сыӵе луо президентэ кандидатлэн Путинлэн верам кылъёсыз но ужъёсыз. Бырйисьёс асьсэос мур-мур малпаськыны кулэ, кинэ быръёно президентэ. Одӥг кышномурт алигес Удмурт телевидение пыр вера: Зюганов уждунэз но пенсиосты будэто шуэ, нош кытысь со коньдон шедьтоз. Зэм, Зюгановлэн али коньдонэз ӧвӧл, но со возьматэ, кытысь коньдон шедьтыны луоз, сое президентэ бырйизы ке. Нош кин туннэ Путинлы тау каре пенсиосты 20 процентлы будэтэмез понна, со уг толы, лэся, со дыре ик дунъёс но тыриськонъёс 30 процентлы йылӥзы шуыса. Али интыосысь тросэз кивалтӥсьёс но государственной служащийёс чик кӧбератэк, законэз тӥяса пырисько Путинэз президентэ быръён понна валэктон уж нуонэ. Соос угось, Советской власть аръёсын ӵошатыса, али трослы умойгес уло. Кивалтон удысазы югдур тупатскемен яке адямиослэн улонзы умоямен ӧвӧл, соос табере асьсэлы асьсэос "зэмос кузё" луо. Асьсэлы асьсэос уждун тупато, бюджетысь висъям коньдонэз кызьы мылзы потэ озьы куто, дуноесь машинаос, квартираос, дачаос басьто. Нош соослэсь со понна юась-верась ӧвӧл, кыл кутэмлэсь уг курдало, урод ужзы шараяськиз ке но, номыр уз луы. Тани республикаысьтымы, Эскронъя государственной комитетлэн ивортэмезъя, кылем арын бюджетысь 11 миллион манет тус-тас каремын. Кин ке кыл кутӥз-а со понна? Кун Думаысь депутат В. Кудрявцев гуртын ужасьёслэн кенешоназы ивортӥз, ёрос администрациосын ужасьёслэн шоро-куспо уждунзы быдэс районын сярысь 15-20 пол вылӥынгес луэ шуыса. Табере вералэ: кудӥз ке кивалтӥсь яке чиновник луоз-а улон- вылонамы кылдэм туала югдурез воштон понна? Уз. Соин ик со ачиз но, мукетъёссэ но ӧтёз президентэ Путинэз бырйыны. Бырйисьёс туж возьмало странамес азинтон ужпумъёсты президентэ мукет кандидатъёсын ӵош эскеронэ Путинлэсь но пыриськемзэ. Соку котькинлы валамон луысал, кыӵе солэн зэмос малпанъёсыз. Нош со пӧртэм мугъёсын палэнске сыӵе пумиськонлэсь: оло малы ке уг дӥсьты, оло вераны номыр, оло нош озьы ассэ ултӥямез уг поты, туж ӟеч оске, сотэк но сое президентэ быръёзы шуыса. Гажано бырйисьёс! Асьме кивалтӥсьёсмылэн быръёнъёс вакытэ солань-талань шонаськемзы шоры эн учке, соос асьсэлэсь шуныт интызэс ыштэмлэсь кышкало. Асьтэлы асьтэос кузё луэ: 26-тӥ мартэ куарадэс сётэ сыӵе кандидат понна, кин, зэмзэ но оскытэ, странамес быронэ нуись сюрес вылысь поттыны быгатоз шуыса, ӟеч тодэ, со понна кытысь кужым но, коньдон но шедьтыны луоз. В. Михайлов, ожысь но ужысь ветеран. БЫДӞЫМ ВОРМОНЛЫ - 55 АР Синкылиоссэс ньылылӥз музъем Лек ожмаськонъёс мыныку, тросэз соос быдэ но вуэмын ӧй вал ай. Ма, дышетсконзэс но ӟеч-ӟеч йылпумъяны ӧз сётэ. 16-18 аресъем еж нылъёсызыз фронтэ кошкем йыг-йыг воргоронъёс интые, андан валъёсы гырыны пуктӥзы. Ярам ай, тракторъёс ке йӧнала луысалзы. Ӧвӧллэсь гинэ вань. Ана пумозь но уд вуиськы - подшипникъёс сылмо. Я герылэн амезез пӧсьтэ, я мотор гуньдэ. Гырон ӧвӧл со - курадӟон, кайгырон!.. Ай валэд мыныку но уен-нуналэн корт поглянъёс вылын. Кортлэсь ик дурем пукон вылын зуркаса, мугор куӵ-куӵ зубектылэ. Котькызьы ке но, сузмем, жадем тракторъёс, мынэм интые, тросгес сылылӥзы - ӧз чидалэ "шутэтскылытэк". Бен, корт но, андан но жадьылӥзы, чигылӥзы, нош нылъёс, еж лулъёс, ваньзэ чидазы, вормизы! Яратонзэс но пумиталлязы ас вакытазы, шумпотон дыръёссы но уно вал. Зэм, пӧлазы вал чигиськемъёс но. Озьы шуыны луэ ке соосыз. Тужгес секытлы чидатэк, андан валъёссэс зыл-зыл ужатыны нокыӵе амал но йӧн шедьтытэк, куд-огез сузмем тракторъёссэс механиклы кельтыса кошкылӥзы уката но секыт, кышкыт азе - фронтэ: "Луӵӵе отын мед сузмоз пинал йыры!.." Ӵапак соосыз, война вакытысь андан нылъёсыз, алигес, Нылкышноослэн нуналзы азьын, Завьял ёросысь Шор Постол гуртысь (Ӵӧжгуртысь) культура юртэ люкаллязы сюлмысь данъяны, йыбырттыны. Татчы ӧтемын вал война аръёсы Норьялась МТС котыре огазеяськем колхозъёсысь тракторъёсын ужам нылашъёс. Туала Норья пыре ини Пичи Пурга ёросэ. Нош куд-огез гуртъёс Завьял ёросын. Озьыен, кык районысь бускель гуртъёслэн огъя ужрадзы вал со. Вунонтэм пумиськон! Шумпотонэн но синкылиен суро мадёнъёс, тодэ ваёнъёс. Быдӟым Вормонмылы 55 ар тырмонэз данъян! 1941-тӥ-1945-тӥ аръёсысь шӧртчи нылъёс табере ваньзы олокӧня полэс песянайёс ини. Озьы ке но, сыӵе ик чебересь, йӧноесь. Уката ик - калык азе, сцена вылэ потто ке. Клубын тыршисьёс туж усто амал шедьтӥллям соосты калыкен тодматыны. Котькудзэ героиняез кунултыса потто та вакытэ школаосын дышетскись нылъёс. Культура юртэ люкаськемъёс сылыса, киоссэс юн чабыса пумитало соосыз. Озьы гинэ ӧвӧл, котькудзэ андан нылэз воргоронъёс ки йылазы ӝутыса, ӟыгыртыса поттыны но небыт миндэро пукон вылэ пуктыны кулэ вал - шырыт мылкыдмы кытӥяз уг тырмы. Война дырысен корт бордын ужаса но али гурт котырын юрттӥськыса жадем, сюрмем киоссэс чупано вал, дыр. Котькуд чиньызэс! Сцена вылэ пуктэм нылкышноосты нырысь ик туж шуныт ӟечкылаз Завьял ёросысь техникаез эскерыса возёнъя инженер Н.М.Лазарев. Шор Постолысь тӧроен Н.П.Митрошинэн ӵош соос андан валъёсын ужамъёслы конвертъёсын коньдон сётӥзы. Улонмы секыт бере, пичи юрттэтлы но шумпото мӧйыос. Культура юртын ужась Н.Л.Хохрякова тани котькудӥныз трактористкаен тодматэ залын пукисьёсыз. Кыӵе но югдуре шедьылӥллямтэ егит нылъёс со секыт аръёсы! Жадён но, кынман но, сюман но, кӧшкеман но! Укыр ежесь вал ай угось соос, руль сьӧры пуксьыкузы. Эсьмаса, кудӥз-огез тюрьма пыр но ортчиллям. Надежда Леонидовналэсь верамзэ кылзыса, кытӥяз йырси пежырске. Усто коть, ортчем сюресэнызы тодматонэз со ас вылаз басьтэм. Асьсэос, война вакытэ нянь будэтэмъёс, ваньзэ вераны ӧй быгатысалзы - пушсы тырысал, гуньдылысалзы. Пумиськон кутскемлэсь азьвыл куд-ог дано трактористкаослы мон вазиськылӥ вакчияк юанъёсын. Тазьыгес шуо соос: - Шуг-секытъёсыз вормыны юрттӥз, вылды, егит дырмы, улонэз яратэммы, тушмонэз вормонлы юн оскеммы. Бӧрдылон учыръёс? Вал соос. Но синкылимес куасьтылӥз ачиз ик музъем. Ваньмыз пыӵаз сюе... Тракторен гырем сяна? Бен, гыреммылэсь азьло ужаллямы аэродром лэсьтонын но, тэль коранын но, сюрес тупатъянын но. Пӧлысьтымы одӥгез кебитын молотобоец но вылэм. Уд ке мынӥськы, кужымысь келяло вал. Ярам, ӧм чигналэ, секыт эзельлы ӧм сётӥське! Быдӟым Вормонлэсь 55 -тӥ арзэ но адӟиськом ай тани... Али ма кариськом? Нылпиосмылэсь нылпиоссэс будэтыны юрттӥськом. Улэм потэ на. Чебер Шундыез, дуно Музъемез адӟем потэ... Бен, ӟечезлы, азьланезлы оскон ик бадӟым кужым сётӥз соослы туннэ нуналозь таза, йӧно улыны. Нош куд-ог нуналъёсы со оскон чутырак чигылӥз, шуыны яра. Тани кык эшъёс толон гинэ сьӧд сюлмазы вуытозь курадӟизы тракторенызы. Азьвылаз подшипниксэс тупатъяны ки йылазы нуллӥзы дасо иськеме. Туннэ тракторзы нош ик тыпак дугдӥз. Куиньмой-а, мар-а умой-умой кӧлылэмын ӧй вал ни нылъёс. Ӵошен но, ньыль кузя но андан валзэс вырӟытыны турттӥзы - ӧз пӧрмытэ. - Сё! - кеськиз огез нылаш эшезлы. - Мон... марым... Йырме быдто! Уг чидаськы ни. - Ма, озьытэк но мозмытскыны луоз та сузмем шӧйлэсь! - Кызьы? - Фронтэ пегӟыса... Кӧня ке улыса, Вера Максимовна Сидорова шонтэ Нылгала, призывникъёсты люкан юртэ. Басьтӥзы ведь армие... - Кин вал отын? - лушкемгес юасько туала песянайлэсь. - Шофёр. - Иське, уждэс ӧжытак воштоно луиды? - Кык толэзь ӵоже дышетӥзы машинаез нуллыны. - Кыӵезэ? - "Студебекерез". Шаплы маке! Кык но ӝыны тоннаез но солэсь но ятырзэ ӝутэ. Американецъёс юрттӥзы угось соку. Г.К.Жуковлэн фронтаз вал. Уно пол адӟылӥ дано Героймес. Котькыӵе вузъёсыз, котьмае нуллӥ. Вылам одӥг бомба но ӧз усьы. Кышномуртэ Инмар но утиз, вылды. Зенитно-артиллерийской полкын вал. Польшаозь ви! 1945-тӥ арын сӥзьыл гинэ бертӥ... Вера Максимовна али но бӧрдыса тодаз вайылэ кызь кык аресъем эшезлэсь, Настя Андреевалэсь, тракторзэ тупатъякуз, тылпу ӝутскыса, улэпкын сутскыса быремзэ. Котькудӥзлэн дӥсьтонэз но огкадь ӧвӧл. Шудэз но, адӟонэз но. Вера Кошовкина ожъёсы ӧз куриськы, Постол котырысь бусыосыз гыриз. Югытэн - со, уин - эшез, Никон. Усто адями, нылмуртэз жалясь, валась. Каньылля но лушкемен ог-огзылы синмаськиллям. Кузпалъяськизы. Ӵошен, валамон ини, шӧдскымон каньыл. Тракторзы но золгес кылзӥське, умойгес мынэ. Егитъёс нормаоссэс но ӵемысь мултэсэн быдэсъяло вал. Ӝож: та пумиськонэз ӧз адӟы кузпалыз - югыт дуннеысь кошкемын ни... Ӧжыт музонгес вылэм Зоя Сапожниковалэн сюресэз. Трос курытсэ омыръяно луэм со. Огпол тракторзэ гараже кельтэм но ӵуказеяз сое улӟытыны быгатымтэ ни. Моторез уг вырӟы но - тӥни! Кужымез бырыса кошкем дораз. Лӥятӥсь, юрттӥсь сюрысал ке, нылаш, оло, выльысь бурдъяськысал. Нош сое пуктӥзы... тюрьмае. Пытсалозы шуыса уг но оскы вал, дыр. Ньыль толэзь ултӥяса возиллям. Гыронлэсь но секыт ужез быдэсъям куанер. Секытэсь коръёсыз ӝуткам, тыбырзэ сюло пульсатъям... Луыло вылэм серемес учыръёссы, юмокъёссы но. Оля Окорокова, азьысьтыз корт поглянэз-бадӟым могӟетэз шуак адӟыса, юн куалектэм, тракторзэ кызьы дугдытыны вунэтэм. - Басьтэ! Басьтэ-палэнтэ со колёсаез! - чирак кеськем. Бригадирзы каньылак верам: - Нош азьпалад корка ке пумиськиз, сое но сэрттыны-палэнтыны косод-а?.. Сыӵе со, егит дыр. Соку ӟечез но, уродэз но туж ӝог чепыльтэ сюлэмез. Ежъёслэн ай кӧшкеман, кышкан вакытсы но тӧлӟымтэ на. Матрёна Веревкина тани, гырись эшсэ воштыны мыныкуз, куинь кионэз адӟем. Война вакытэ соос но малы ке сютэмесь вылӥллям. Пудоос ичи кылемен, вылды. Пырак дораз, пе, матэкто. Матрон чальгес вамышъяны ӧдъям. Кионъёс но шаплыгес бызё. Мар карыны ёрмеменыз, нылаш вӧсяськыны шӧтам. Собере чи-и- р! кесяськыны кутскем. Сьӧсьёс каньылля палэнскиллям. Кышкасалыз ке, усьысалыз ке, отчыяз ик кесясалзы, вылды, нянь будэтӥсез... Нылъёслэн дӥсьсы но аламагес гинэ вылэм: фуфайка, урдэг, поньток, кышет, пыдъёсазы - кутъёс. Ужаллям уен-нуналэн, кӧлаллям пырак бусыын, тылскем дорын. Зор но, лымы но жалятэк коттылӥзы соосыз, пуэн-газэн ужась трактор кӧня ӵынзэ сётэ вал! Тузонэз но тоннаосын ныр пыртӥзы, ты пыртӥзы лэзьязы. Нянь я сюре, я уг. Кытӥяз уждунзэс но пичильтык ӝегатскылэмъёс понна судын ньыльмос ёроссэ кулэстыло вылэм. - Нош соос ваньзэ-ваньзэ чидазы. Ӵемысь одӥг но ӝыны норма лэсьтыло вылэм. Тракторзы ке золгес мынэ, кырӟаса гыро-кизё. Куаразы, оло, мотрлэсь но юнгес чузъяське бусыос, возьёс кузя. Тӥни озьы - ӟеч ужамзы понна, залэ люкаськемъёс йыбырттӥзы юн сюлэмо нылъёслы. Шор Постолысь мӧйыослэн огазеяськонзылэн тӧроез, та пумиськонэз радъясь З.А.Кузнецова, ваньмызлы нылкышноослы кузьмаз шунытэсь, небытэсь ӵушконъёс, нош Завьял ёросысь ветеранъёслэн огазеяськонзылэн кивалтӥсез Л.Н.Вахрушева ӝутыны вормонтэм бадӟым торт ваем. Отын суредамын вал чебер-чебер нылмурт. Песянайёссылы кузьымъёс сётӥзы нылпи садысь пиналъёс но. Нош клубын ужасьёс нылкышноослы кузьмазы яратоно кырӟанъёссэс. Шор Постолысь мӧйыослэн ансамбльзы но туж ӟеч кырӟаз. Лек ожъёс вакытысь нянь будэтӥсьёсыз котькудӥзлэн сюлэм пыдсаз пыӵамон шуныт ӟечкылазы котырысь эштосъёслэн кивалтӥсьёссы Н.П.Митрошин, А.В.Соловьев, С.И.Соколов но мукетъёсыз. Бер ӝытозь кыстӥськиз пумиськон. Андан нылъёсты гуртоос утялтӥзы пӧрамъёсын, пӧсь чаен. Мӧйыос но, егитъёс но жадьытозязы эктӥзы, шулдыръяськизы. Та ӝытэз радъясьёслы З.А.Кузнецовалы но культура юртын тыршисьёслы дас пол но, оло, сю пол но тау каризы, ваньзэс огазе люкамзы понна. Адямилэн даурез та югыт дуннеын кузь ик ӧвӧл. Ожъёс вакытэ бусыосын жадьылытэк ужамъёслэн нимъёссы весяклы мед кылёзы, туала егитъёсмы но соослэсь адӟем мед карозы шуыса, ваньзэс соосты "Удмурт дунне" газет печатла аслаз бамаз. Тани соос: Окорокова Ольга Александровна Овчинникова Вера Игнатьевна Тетерина Анна Дмитриевна Байбекова Улита Сидоровна Мираева Анна Филипповна Веревкина Матрена Федосеевна Бектышева Василиса Петровна Сапожникова Зоя Игнатьевна Вершинина Василиса никитьевна Кошовкина Вера Трофимовна Бушкова Анастасия Павловна Камашева Анна Александровна Сидорова Вера Максимовна. Кирилл ЛОМАГИН. Тулыслы шумпотыса Тулыс вуэмлы нылпиос тужгес но шумпото. Инкуазь улӟемъя, соослэн быгатонлыксы синазе яркытгес усьтӥське. Суредаськон ласянь ке верано, шаерамы али мынэ нылпиослэн "Зарни италмас" фестивальзы. Пӧртэм ёросъёсысь ужъёс вуттэмын но возьматӥсько ни Ува посёлокын. Ижевскысь 56 номеро школаын усьтӥськиз цирк темая адӟытон. Татын ужъёссэс возьмато искусствоосъя школаосын дышетскисьёс. Нош театрез яратӥсь пиналъёс люкаськылӥзы Шарканэ. Асьсэлэн умой пӧрмем ужъёсынызы соос пырисько республикаямы ортчись "Театр но нылпиос" фестивале. Т. Николаева. Тудвуэз дыраз кортнано Нуналлы быдэ юнгес шӧдӥське ини тулыслэн матэ вуэмез. Соин валче йыло тудвуэн сэрен кылдӥсь сюлмаськонъёс но. Соосты сэрттон-пертчонъя нимысьтыз комиссия кылдытэмын. Алигес ортчиз солэн кенешез. Люкаськылӥзы ву тудӟон вакытэ ваньбурез утён но адямиослэн улонзы понна кыл кутӥсь министерствоослэн но ведомствоослэн, предприятиослэн но организациослэн кивалтӥсьёссы. Гидрометеорологияя центрлэн ивортэмезъя, республикаын февраль пумын лымы шоро- куспо нормалэсь 20-60 процентлы тросгес усиз. Югдур ӧз воштӥськы, март толэзьлэн кутсконаз шоро-куспо температура нормалэсь 7 градуслы вылӥын ке но вал. Нош март толэзе огъя температура нормалэсь 2 градуслы вылӥын луоз. Озьы ке но, Гидрометцентрын ужасьёслэн верамзыя, тудву трос шуг-секытъёс уз вайы. Малы ке шуоно, музъем, шоро-куспо нормаен ӵошатыса, 30-70 процентлы гинэ кынмемын. Лымы быдэсак шунаса быроз апрельлэн кыкетӥ ӝыныяз. Комиссилэн кенешаз бадӟым саклык висъямын вал гидротехникая сооружениосты дыраз дасянлы. Кызьы пусйиз Граждан оборона ужпумъёсъя но кышкыт учыръёсъя комитетлэн кивалтӥсез Тамази Габричидзе, республика ас вылаз басьтэ шуръёсын пуштытъян ужъёсыз, улосэз омырысен эскерыса-чакласа возёнэз, кышкыт учыре шедемъёсты утёнэз. Та ужъёсты радъян понна, республикалэн бюджетысьтыз висъяны чакламын 500 сюрслэсь ятыр коньдон. Комиссиысь адямиосты тужгес но сюлмаськытэ Ижевскын но Яган посёлокын кылдэм югдур. Отын арлы быдэ тудву бадӟым изъян вае адямиослы но, калык хозяйстволы но. Комиссилэн кивалтӥсез - Правительстволэн Тӧроезлэн воштӥсез Николай Хохлов - тужгес но бадӟым саклык висъяны куриз сюресъёсты но выжъёсты эскерыса-чакласа возёнлы. Удмурт Республикаысь Правительстволэн пресс-службаез. Гуртоос уг вунэто Шаркан районысь Вортча починка гуртын ортчиз Людмила Хрулевалэн творчествоезлы сӥзем ужрад. Гуртысь усточи песянайёс но школаын дышетскись нылпиос возьматӥзы кырӟаны-вераны быгатэмзэс. Чузъяськизы Людмила Хрулевалэн кылбуръёсыз но кырӟанъёсыз. Людмила Яковлевна кема аръёс ӵоже ужаз "Советской Удмуртия", нош берло "Удмурт дунне" газетын. Пумиськонэ ветлӥзы редакциын ужасьёс но - валтӥсь редактор Алексей Шкляев, кырӟась Светлана Яковлева. О.МАЛЫХ. Инженеръёс уг дырто Завьял ёросын тулыс бусы ужъёслы техникаез дасян секытэн мынэ. Сое пусйиз гурт удысъя управленилэн комиссиез но. Техникаез выльдон но тупатон - со али туж бадӟым сюлмаськон. Выль агрегатъёс, механизмъёс, тракторъёс, машинаос басьтон сярысь малпанэз ик ӧвӧл. Нош ик дунъёс чутрак будыны кутскизы. Шуом, кылем арын "Нива" комбайн сылэ ке вал 375 сюрс манет, туэ 800 сюрслэсь ортче. "Дон" комбайн 1,2 миллион манетлэсь но дуногес. Мукет техникалы но дунъёс будӥзы. Вань оскон кыле на кибашлы тупатъясьёслы. Унояз хозяйствоосын кылдытэмын бригадаос но звеноос. Но ваньмыз пыкъяське коньдон вылэ. Комиссия шараяз, ёросысь ӝыныяз эштосъёсын инженер службаос ужзэс дыг быдэсъяло шуыса. Уноез специалистъёс югдурез урод тодо. Соин валче ик, дыр, тросэз валтӥсь инженеръёс комиссилы отчётъёссэс ӧз вуттэ. Соос пӧлын "Урал" но "Труженик" СПК-ос, Холмогоров нимо но "Завьяловская МТС" акционер огазеяськонъёс, "Выль Сентег", "Ож-Пурга", "Восход" эштосъёс, "Докшинский" подсобной хозяйство. Н.ИВАНОВ. НАТАЛЬ Тодматскон сэрег Аб. 347. Мынам нимы Анна, 15/160, гороскопея Близнецы. Дышетскисько школаын, улӥсько анай-атаен ӵош. Яратӥсько кырӟанъёсты, пӧйшуръёсты, гурт котырын ужаны. Ачим ӟуч, но вераськисько удмурт кылын. Гожтэт пыр кусып возён понна тодматскысал 17-20 аресъем пияшен. Возьмало фотографиен гожтэт. Аб. 348. Удмурт пияш, 26/175. Ужасько шофёр луыса, улӥсько гуртын анаен ӵош. Тамак уг кыскиськы, юонэн уг эшласькиськы. Тодматскысал 18-24 аресъем удмурт нылашен, дышетскемез мед луоз. Возьмало фотографиен гожтэт. Аб. 349. Удмурт нылкышно, 24/66/154, люкиськемын, будэ нылы. Улон интыме воштыны соглаш. Аб. 350. Удмурт воргорон, 35/160, гороскопея Дракон-Овен. Улӥсько гуртын анай- атаен ӵош, нокыӵе ужлэсь уг кышкаськы, улон интые вань. Тодматскысал ужез гажась, лякыт сямо, урод сямъёстэм 25-35 аресъем удмурт нылмуртэн, пумит ӧвӧл одӥг нылпиезлы. Аб. 351. Удмурт пияш, 20/175, гороскопея Телец. Улӥсько гуртын анаеным ӵош. Котькыӵе уж борды капчиен басьтӥськисько. Тодматскысал 18-25 аресъем лякыт сямо удмурт нылашен. Возьмало фотоен гожтэт. Аб. 352. Ӟуч нылаш, 16 арес, гороскопея Овен. Яратӥсько лыдӟиськыны, чебер крезьгур кылзыны, выль адямиосын тодматскыны. Тодматскысал гожтэт пыр кусып возён понна, возьмало фотографиен гожтэт. Гожъяно ӟуч сямен. Аб. 353. Учкымон тусбуё, веськрес мугоро 19 аресъем удмурт пияш. Тамакен уг эшъяськиськы, курытсэ Выль аре но 8-тӥ Мартэ гинэ веръясько. Толалтэ куасэн бызьылыны яратӥсько, гужем - чорыганы, инкуазе потаны. Киосы зарни, котьмалы мыно. Тодатскысал тӧдьмыт йырсиё, чагыр синмо, веськрес мугоро удмурт нылашен. Валче кусып возён улонамы бадӟым инты мед басьтоз. Паллянэ кожан сямы ӧвӧл. Редакцилэсь: Лыдӟисьёсмылэсь ялонъёссэс тодматскон сэреге сётӥськомы, дун басьтытэк. Нимзэс, кытысь луэмзэс газет пыр ум шараяське, ваньмызлэн адресъёссы редакциын. Ялон сётӥсен тодматскыны мылкыд карисьёслы ивортӥськом: адресъёсты ми нокинлы ум келяське. Абонентлэсь номерзэ пусйыса, редакцие гожтэт ыстэ. Нош кинлы ке сӥзем гожтэттэс маркаен чылкыт конвертэ понэ - ыстомы кулэ адресъя. Кыз лыс но чырсатэм Та нуналъёсы котькуд скаллэсь 9 килограммлэсь уно йӧл кыско Пичи Пурга ёросысь "Рассвет" эштослэн Шор Юри фермаяз ужасьёс. Тол вакытлы татын тырмыт сиён дасязы. Али скаллы быдэ 20 кило силос, 8 кило куро, 1,5 кило пызь висъяло. Ватсэтъёс чотын кыз лысэн сюдӥзы. Кӧс сиён вӧзы чырсатэм йӧл будэто. Миым хозяйствоя котькуд пудолэсь шорлыдын 3016 килограмм йӧл люкаськиз ке, туэ та лыдпусэз ортчыны малпало. М.Кузьмин. Будӟым нунал, Будӟым крезь, Будӟым куа... Котькыӵе калыкез чебер каро но шулдырто солэн сямъёсыз но йылолъёсыз. Пӧртэм сэбедъёс калыклы аспӧртэмлык кузьмало, сое мукет калыкъёслы но синмаськымон но тунсыко каро. Вань-а удмуртъёслэн чебересь сямъёссы? Вань - соос трос. Озьы ке но, асьмеос унозэ вунэтӥмы но ыштӥмы ини. Нош калыклэн аспӧртэмлыкез быре ке, со ачиз но быре. Соин ик калык сямъёсыз, ненег сяськаосыз выллем, чакласькыса но тыршыса утёно. Алигес ортчизы Ымусьтон но Йӧ вылэ султон. Шулдыр портмаськимы. Нылъёс тунаськизы. Табере вуоз Вӧйдыр. Отӥяз - Тулыс кисьтон, собере - Дӧдьы куштон. Али ик дасяськыны кутсконо ни асьмелэн чын дуно но бадӟым шулдыръяськон нуналъёсмылы. Сокем ик кема ӧз кыльы ни Будӟым нуналмес пумитан дырозь но. Инкуазьлэн сайканэзлы но улӟонэзлы сӥземын та сэбед. Удмуртъёс котьмарзэс пичиятысагес вераны ярато. Туж ик данъяськыны но ушъяськыны уггес ярато. Соослэн, бадӟым сяна, вань на быдӟым яке Будӟым кылзы но. Тужгес дуно, дано но бадӟым мазы ке сярысь веракузы гинэ куто соос быдӟым кылзэс. Огшоры калык вераськонын мон куинь интыын гинэ та кылэз кутэмзэс тодӥсько: Будӟым нунал, Будӟым крезь но Будӟым куа. Таос ваньзы одӥг бадӟым вӧсяськон но шулдыръяськон котыре бинялскемын. Мон малпасько, вашкала дыръёсы удмуртъёслэн выль арзы тулыс пучыос но выль гуждор потыны шӧтаку кутске вал, луоз. Соин чын бадӟымез нуналзы тулыс пусйиське. Будӟымналлэсь огарнялы азьло пусъё Пучы арняез. Азьвыл та нуналэз вань удмуртъёс уг тодо вал. Али тросэзгес пусъё ни. Нош собере куиньмой ортчыса вуэ пиослэсь быдэ вуэмзэс пусъён. Сое шуо Эру карон. Со луэ Будӟымнал азьысь покчи арняе. Уйзэ шуо кулэм потон уй. Та уй-нуналъёсыз пусъён понна, дас сизьым арессы тырмись пиос кема дасясько: соку угось соослэсь быдэ вуэмзэс, бадӟым мурт радэ пыремзэс пусъё. Лэсьто соос нылъёслы пӧртэм устолыко арбериос: кубо пужъято, котькудзы пӧрмыто тачырнаос, пукыӵъёс, нальыкъёс. Та йылол ортчем бере, пиослы котькыӵе бадӟым уже пыриськыны яра ни. Вашкала дыръёсы ожмаськонъёсы но пыриськыны косо вылэм ини шуыса шӧдӥське. Нуназе куалы быдэ кеньыр, сылал, вӧй, курег пуз люкало но ӝук пӧзьто. Пересь мурт ӝукен вӧсяське пиослэн тазалыксы понна. Собере огазьын сиё-юо, шулдыръясько. Та тунсыко йылолэз тросаз гуртъёсын туала сяменгес пусйыло. Быдэ вуэмез одно ик пусйыны кулэ, дыр. Варклет-бодьяос та шулдыръяськонъёсыз вашкала сямен но ортчытыны тодо на, нош писэйгуртъёс туала сяменгес ортчытъяло ни. Эру карон ортчем бере, арня нуналэ вуэ Будӟым нунал. Удмуртъёслэн чын бадӟым нуналзы-вӧсяськонзы та. Будӟым нунал удмуртъёслэн выль арзылэн кутсконэз луэ бере, йылолъя котькуд удмурт та нуналэ кыӵе ке выль дӥськут дӥсяны кулэ вал. Быгатӥсез али но озьы каре на. Та нуналэ вӧсясько дорысьтызы куалаязы но, Будӟым куалаын но. Будӟым куалаын вӧсяськыкузы, быдӟым крезь шудо. Ӝыт пал вӧсь нерге ветло бӧлякен- бӧлякен, вӧсь гур кырӟаса. Шур кошкемез чакласа ветлоно. Вӧсь нерге дыръя гуртлэн уллань паласьтыз выллань палаз тубоно (нош кисьтон ортчытыку, со мукет дуннеен - сопал дуннеен герӟаськемын. Соин ик мукетлань ветло бӧляказы: выллапалась уллапала мыныны кулэ, вашкалаысь лыктӥсь йылолъёс косэмъя). Будӟымнал ортчем бере, ӵуказеяз (со луэ ни вордӥськонэ) ортче на эшшо одӥг бадӟым йылол - Кураськон. Дас сизьым арессы тырмем нылъёс та нуналэ, огвыллем чебер дӥсяськыса, быдэс гуртэтӥ ортчо. Озьы соос быдэ вуэмзэс ортчытыны, шулдыръяськыны но вӧсяськыны курасько. Соослы кеньыр, сӥль, вӧй, курег пуз но мукет сиёнъёс сёто. Кинлэн ӧвӧл, солы, сётымтэез понна, нокин вожзэ уг потты. Гурт сьӧрын, та йылолэз ортчытъян интыын, люкам кеньырлэсь ӝук пӧзьто. Пересь муртэ вайыса вӧсято со ӝуксэс. Татчы быдэс гурт люкаське, вӧсям ӝуксэс быдэс гуртэн сиё, собере шулдыръясько. Валъёсын ворттыло. Ӝыт валэн корка пыраса но ветло вал азьвыл куд-ог гуртъёсын. Семен ВИНОГРАДОВ, шаерысьтымы калык суредась. Можга нылъёс чеберъясько Ёросъёсын мынэ "Чеберина-2000" ужрадлы дасяськон. Гуртъёсысь но городъёсысь тужгес чебер нылашъёс Ижын ортчоно конкурсын ӵошатскон понна нюръясько. Можгаысь нылъёс туж чебересь но визьмоесь потӥзы мыным. Соос кырӟаны но, телефон пыр визьмо вераськыны но быгато вылэм. Со сяна, возьматӥзы литератураез но изобразительной искусствоез ӟеч тодэмзэс. Пӧртэм конкурсъёс пыр ортчыса, вормисе потӥзы Наташа Мартынова, Ирина Иванова но Лариса Павлова. Нош "Чеберина" луиз Наташа. В. Кибардина, Удмурт университетын дышетскись. Гурт удыс Музъем сюлмез сэректытэ Гурт удысын югдур туннэ верантэм секыт. Куд-ог дыръя паймиськод но: кызьы та гуртоос йӧл, сӥль, нянь поттыны-будэтыны быгато на. Асьме музъем понна сюлмаськисьёслэн кичӧлтэменызы, Удмуртиын кылдӥзы Колхозъёслэн союззы но "Удмуртилэсь экономикая куронъёссэ утён" движение. Та огазеяськонъёсы пыремъёс но соослы дурбасьтӥсьёс алигес, 14-тӥ мартэ, валче кенешазы люкаськылӥзы. Ужрадэз нуиз движенилэн исполкоменыз кивалтӥсь но Кун Кенешлэн депутатэз В. Никитин. Люкаськемъёс эскеризы Удмуртиысь Правительстволэн Тӧроезлы Н. Ганзалы туэ 28-тӥ январе ыстэм вазиськонлэсь быдэсъяськемзэ. Та ужпумъя вераськиз гурт хозяйствоя министрлэн воштӥсез А. Коробейников. Миым сӥзьыл тросэз хозяйствоос тырмыт пудо сиён дасяны ӧз быгатэ. Соослы юрттон вылысь, правительство 16 миллион манет коньдон висъяз, солэн бадӟым люкетэз сётэмын уй пал районъёсысь хозяйствоослы. Кизер эстӥськонъя нимысьтыз 185 номеро постановление кутэмын. Эстӥськон басьтыны 35 миллион манет висъямын, эстӥськон вуоз Саратовысь март но апрель толэзьёсы. Удобрение басьтэмын луоз "Ассо инвест" фирма пыр. Удобрение вузасьёслы конкурсын ӵапак та фирма вормиз. Солы 25 миллион манет висъямын. Гурт хозяйствоосын али 12 сюрс 205 трактор лыдъяське, туннэ нуналлы бусыосы потыны 54 процентэз дась, шуиз А. Коробейников. Республикалэн бюджетысьтыз коньдон висъяны чакламын кидыс басьтон понна но. Сыӵе районъёслы, кытын кылем арын зорытэк улӥз, висъяны чакламын 28,5 миллион манет. А. Коробейников оскытӥз, со коньдон хозяйствоосы бусы ужъёс кутскемлэсь азьло ик вуоз шуыса. Но... колхозъёслэн предъёссы та верамлы скоем ик ӧз оске, угось кылем арын но сыӵе коньдонэз ӧз адӟе, нош висъямын вал 59 миллион манет. Кытчы со ышиз-быриз, гурт удысъя министрлэн воштӥсез валэктыны ӧз быгаты. Оло, та ужпумез кызьы но озьы валэктысалзы Н. Ганза но гурт хозяйствоя министр П. Першин, но соос та кенешонэ лыктыны быгатӥллямтэ. Ужрадын бадӟым вераськон мынӥз музъем реформа сярысь. Туннэ нуналлы дасямын ни Удмурт Республикаын 2000-тӥ-2002-тӥ аръёслы музъем реформаез азинтон сярысь кун программа. Та ужпумъя кун комитетлэн кивалтӥсез В. Куншин вакчияк, пе, тодматӥз со программалэн инъетэныз, шуиз: Удмуртилэн музъем сярысь программаез пумит уг луы Россилэн федеральной программаезлы. Кызьы тодмо ини, отын эрик сётӥське музъем вузанлы. Кенеше люкаськемъёс сыӵе программалы пумит луэмзэс веразы. Тужгес но лэчыт вераськиз юридической наукаосъя доктор В. Яковлев. Со шуиз: Россиын музъем реформа ортчытон сярысь программа улэ гожтӥськиз Степашин, бур кужымъёслэн лидерзы. Солы умой дунъет сётӥзы асьме кивалтӥсьёс но. Но та программаос кыксы ик Конституцилы пумит мыно. Соин ик музъем реформаез нокызьы шонерен лыдъяны уг яра. Эскерем ужпумъёсъя люкаськемъёс нимысьтыз решениос кутӥзы. Та валтӥсь ужпумъёсты выльысь эскерыны чакламын колхозъёслэн ӧтчамазы, кудӥз республикаямы ортчоз туэ 17-тӥ мартэ но гурт удысын ужасьёслэн бадӟым кенешазы, 23- тӥ мартэ. Ужрадын вераськон мынӥз матэктӥсь референдум сярысь но. Т. Банникова. Улон со - утон Вуж бумагаос пӧлын бугыръяськыкум, мон шедьтӥ ӵужектэм гожтэт. Сое мыным 1989-тӥ арын сётӥз кулыны дасяськем мурт. Нош пӧртэм мугъёсын сэрен печатланы ӧз луы. Туннэ, дас арлэсь кема ортчем бере, асьмеос странамес пӧртэм сямен дунъяськом. Кин СССР-ез тупыттэм ушъя. Кин сое радазтэм карга. Дас ар талэсь азьвыл дасям гожтэтэз лыдӟыса валаськод: соку но вал ӟеч но урод муртъёс, шумпотонъёс но куректонъёс, нуны вордсконъёс но адями кулонъёс, сюанъёс но музон учыръёс. Гожтэтэз туннэ сётӥськом сыӵе муген. Адями мед шумпотоз котькыӵе вакытэ: дуннеын солы усиз верантэм бадӟым утон - улон Дыр вералоз берпуметӥ кылзэ Врачъёслы-эшъёслы, учёнойёслы, егит коммунистъёслы Тӥледлы вазиське Быдӟым Атай музъем (Отечество) понна оже ветлэм мурт, медицина наукаосъя кандидат, компартие 1950-тӥ арын пырем но медициная институтын ужам маке. Мон ыштӥсько кужымме. Матэктэ сьӧд нунал: сюлэмы берпуметӥзэ дыректоз но весяклы чалмоз. Нош улэп дыръям мон ӧй вуы, ӧй быгаты партия азьын сылӥсь ужме быдэстыны. Мон янгышамлэсь утьыны выри кафедраысьтымы егит учёноез но коммунистэз Василий Широкихез. Со мыным тау кариз. Вань сюлмысьтыз тау кариз кадь потӥз мыным. Но Широкихез кин ке донгиз бадӟым сьӧлыке. Со ыштӥз коммунистлэсь, врачлэсь но учёнойлэсь данзэ, нош мон, оло - улонме. Ужпум тазьы вал. Кафедраын монэ юнматӥзы Широкихлэн диссертациезлы рецензентэ. Эшлыко мылкыдын гожтӥ егит муртлэн куд-ог янгышъёсыз но тырмымтэосыз сярысь. Кылсярысь, диссертация тырмыт уг валэкты таӵе юанлы: мар выльзэ дэмла учёной пиналъёслэсь туберкулёззэс йӧнатонын? Ужъя адӟыны уг луы: эскеронъёс ортчытэмын-а, ӧвӧл-а, соос вал ке, кыӵе пайда сётӥзы. Сётэмын ӧвӧл анализъёс, висёнъёслэн историоссы. 1982-тӥ арын 20-тӥ мартэ люкаськиз кафедралэн кенешез. Солэн кивалтӥсез егит учёнойёслы дэмлаз рецензия гожтӥсьлэсь ӵектонъёссэ лыдэ басьтыны но диссертациез октябрёзь йылаз-пумаз вуттыны. Широких мыным но мукетъёсызлы тау кариз юрттэммы понна. Нош отӥяз мар дауртэмзэ валаны шуг. Октябре со ӧз возьматы выльдэм диссертацизэ. Мыным шуиз: - Институтлэн партбюрояз гожтэт сётӥ. Отын ивортӥ: тӥ монэ наукаын умойтэм ужасько шуыса янгыш кариськоды но диссертация утёнме ӝегатӥськоды. Мон абдрай. Мынам куронъёсы - со наукалэн котькуд егит учёной азе пуктоно куронъёсыз. Малпай: ужезъя материалъёс вань, вылды, но Широких соосты диссертациез борды вурыны вунэтӥз. Отӥяз тодмо луиз: сыӵе материалъёс ӧвӧл. Ӧвӧл рентген снимокъёс, микро- но макропрепаратъёс. Эмъямлэсь пайдазэ возьматӥсь документъёс ӧвӧл ке, кызьы сыӵе дэмланэз улонэ пыӵатыны лэзёд? Широкихез кури висёнъёслэсь историоссэс коть возьматыны. Кема нуйтӥз: архивын ремонт, пе. Собере сётӥз кыӵе ке историослэсь номеръёссэс. Бадӟым курсысь студентъёсты косӥ соосты вайыны. Сак тодматски историосын. Дас тямысаз номыр верамын ӧвӧл диссертациен герӟаськем эмъюм сярысь. Кызьы сое валано? Ми студентъёсты дышетӥськом Ленинъя: зэмлыкез возьматэ практика гинэ. Нош татын теория вань, практика ӧвӧл. Кыл но уж вискын бадӟым вукырем кылдэ. Василий Широких монэ зол-зол пыкылыны ӧдъяз. Со куремъя, 1983-тӥ арын 13-тӥ декабре люкаськиз институтысь партбюро. Монэ янгыше уськытӥз кафедраын югдурез сураме-пожаме понна. Юанъёс кылдо. Малы партилэн ёзэз сьӧлыко уг лыдъя суп-сап диссертациез? Малы пӧсе вуттэ сыӵе умойтэм ужъёсын нюръяськемез? Малы мон чалмыт улом? Малы сюрес усьтыны кулэ рос-прос эскерымтэ амаллы? Кытчы со вуттоз висись нылпиосты? Юрттэт кури партилэн обкомезлэн нырысетӥ секретарезлэсь Валерий Константинович Марисовлэсь. Юнме. Ыстэм гожтэтме со келяз монэ кафедраын мыскыллясьёслы. 1984-тӥ арын 22-тӥ феврале кафедраысь партгруппа люкаськиз. Партбюрое быръем мурт Широкихлэсь меӵак юаз: - Шонерен лыдъяськоды-а рецензентлэсь тӥ азе пуктэм куронъёссэ? Широких валэктӥз: - Тау карисько дэмланъёс понна, соос ваньмыз лыдэ басьтэмын. Оло, мынам ӵектонъёсы зэмен ик санэ понэмын вал? Озьы ке, выльдэм диссертациез малы меда мыным сётъязы одӥг но ӝыны часлы гинэ? Соин рос-прос тодматскыны ӧй вуы ни. Кафедраын выль керетон пуромиз. Монэ сьӧлыке уськытӥзы висёнъёслэсь историоссэс лушкаме понна. Мон нокинлэсь ӧй ватылы, соос кафедраын шуыса. Дас укмыс историез кельтӥ, берлогес рос-просгес эскерон вылысь. Кылемзэ келяй архиве. Кафедраын ужасьёс та учырен валче кылдытӥзы комиссия мактал. Таиз утчаськем ворсаськисьтэм сейфам, отысь шедьтэм "лушкам" историосты. Акт вылэ гожтӥськемъёс пӧлысь кыкез, доцент но лаборант, берлогес веразы: документэ кизэс нюртӥзы, историосты адӟытэк. Таӵе ӧвӧлтэм акт сярысь вераськон потӥз институтысь коммунистъёслэн кенешазы. Монэ нош ик янгыше уськытӥзы лушкаськеме понна. Югдурез шонер валасько ке, лушкаськон - со уголовной кодексын верам йыртэман. Адямиез йыртэмась (преступник) шуыны луэ судлэн приговорезъя гинэ. Нош судтэк озьы ним тырон лыдъяське кыл вӧлдонэн. Мон быгатӥсько вал судэ вазиськыны, чылкыт нимме утьыны курыса. Но оски: партиысь эшъёсы сотэк но валалозы, мар со тӧдьы но сьӧд. Жаляса верано луэ: янгышаськем. Югдурез рос-прос ӧз эскере компартилэн Октябрь райкомаз но, Иж горкомаз но, Удмурт обкомаз но. Вить комиссия учкиз куронъёсме. Институтлэн ректорез 1985-тӥ арын 18-тӥ декабре юнматӥз приказаз. Пусйиз: гожтэтын верам учыръёс ӧз зэмалэ. Мыным сётэмын юн (строгий) выговор. Мон мозмытэмын ужысь. Кивалтӥсьёс озьы дыртӥзы Широкихлы инты бушатыны. Малы ке шуоно, со ньыль ар ӵоже кафедраын ужаз, штатэ пырытэк. Ваньмыз та учыръёс мынэсьтым тазалыкме сузмытӥзы. Сюлъёсам кылдӥз гижло (рак). Сое вандэмзы бере, мыным каньыл улон кулэ вал. Озьы ӧз пӧрмы. Табере гижло будӥз тыам. Со понна мон кафедраысь эшъёсме меӵак сьӧлыке уськытыны уг быгатӥськы. Озьы ке но, йырысьтым уг кошкы одӥг малпан: сокем ӧй ултӥясалзы ке, мон, оло, такем чаляк ӧй лябӟысал. Мон вир юись ӧвӧл. Янгыш муртъёслы пунэмзэ берыктыны уг дыртӥськы. Зэмлыкез утчан пуромытоз выль вожвылъяськонъёс. Кызьы алигес вераз М. С. Горбачев, таза кужымъёсты огазеян понна, асьмелы сэрпалтоно урдскылон кивалтосмес, дугдоно, малпаськоно. Ми - коммунистъёс но наукаысь адямиос. Ми понна тужгес дуно маке - зэмлык, калык сярысь сюлмаськон. Мыным дэмлазы выговорме куштон вылысь курон (заявление) гожтыны. Мон лыдъясько: выльдӥськон (перестройка) ласянь учкыса, выговор сётыны кулэ ӧй вал. Кулыкум но оскисько: институтамы выльдӥськон кутскоз, со вань жуг-жагез гылтоз. Оскеме потэ: диссертация ласянь сётэм ӵектонъёсы лыдэ басьтэмын. Тӥни малы 1987-тӥ арын 26-тӥ мае Москваысь Туберкулёзъя институтлэн директорезлы гожтэт келяй но кури Широкихлэсь диссертацизэ учкыны. Институтысь учёной секретарь ивор ыстӥз: Широких диссертацизэ Туберкулёзъя институтэ ӧз вутты на. Ижысь Медициная институтлэн ректорез та выллем ик куронэлы таӵе валэктон келяз: "Диссертациен тӥ тодматскыны быгатоды институтлэн библиотекаяз. Диссертациез кытын но ку утён сярысь тӥледлы ивортом". Берлогес нокыӵе ивор ӧй басьты. Муртъёс пыр тодӥ: диссертация утемын ни. Ятвылтӥ: монэ алдазы. Наукаез утьыны тыршеме, нылпиослэсь тазалыксэс оскымон утьыны выреме токма луиз. Мар кароно на мыным, зэмлыкез шедьтон вылысь? 1988-тӥ арын 21-тӥ ноябре туберкулёзъя диспансерын кылльыкум ялӥ сютэм улыны кутскеме сярысь. Кышноме вӧсь каронтэм понна, солы ӧй вера. 1988-тӥ арын 23-тӥ ноябре диспансерысь валтӥсь врачлэн воштӥсез, мыным номыр ивортытэк, кышноме ӧтем но музон врачъёс азьын курем: соглаш кариськы карттэ психбольницае келяны. Озьы сютэм улэмысь дугдоно луи. Мон ожмаськи, тазалыкме жалятэк. Возьманы турттӥ Октябрьлэсь вормонъёссэ. Ӧй малпалля, милям утем адямиосмы но соослэн нылпиоссы милемды озьы вӧсь карозы шуыса. Эрикмес киултозы но милемлы каньылак кулыны но уз сётэ шуыса. Тодӥсько: газетэз лыдӟозы но вунэтозы. Куд-огез, оло, пыкылоз юнме гинэ нюръяськеме понна. Озьы ке но, оскеме потэ: кин но со монэ валалоз. Шуоз: огинтыын лёгаськон вакытэ но зэмлыкез утчаме мар но со сётӥз. Егит эмъясьёс, гожтэтме лыдӟыса, оло тунсыкъяськозы: диссертациын ушъям амал зэмен ик усто меда? Озьы ке, солэсь кузёзэ мынам нимыным но мед ӟечкылалозы. Озьы, ӧвӧл ке, мед малпаськозы наукаез чылкытатон сярысь, висись адямиосты юнме курадӟытонлэсь утён сярысь. Курисько монэ шонер валаны. Судэ шедем муртлы берпуметӥ кыл сёто. Сое дунъяло судьяос. Мынам гожтэтэ пумысен Дыр гинэ вералоз берпуметӥ кылзэ. 1989-тӥ арын 2-тӥ феврале. Йылпумъян. Гожтэтлэн авторез кулӥз та арын ик. Амалтэк вуиськод таӵе малпанэ. Наукалэн тужгес чылкыт удысаз, калыкез эмъянын компартия таӵе бадӟым янгышъёс лэсьтӥз ке, быгатэ-а вал КПСС кивалтонын возиськыны? Уг. Печатланы дасяз Алексей Шкляев. Утиське луло узвесьлэсь Удмурт Республикаысь ФСБ-ын ужасьёс шедьтӥзы капчиен узырмыны дышемъёслэсь 30 килолэсь ятыр узвесь (ртуть). Та кышкыт арбериез соос интыяллям огшоры пияла посудае. Нош со киськыны шедьысал ке, макем бадӟым изъян вайысал адямиослэн тазалыксылы. Жаляса верано, та выллем учыръёсын правоез утён удысын ужасьёс туж ӵем пумиськыло. Ужбергатӥсьёслэн тодазы но уг лыкты, узвесез ужазы кутӥсь предприятиос нимаз адямиослэсь сое уг басьто шуыса, нош улонлы со бадӟым кышкытлык кылдытэ. Уката ик - улон интыосын. Уго солэн парез капчиен пыӵа выж пулэ, укно янакъёсы, рамаосы, обое. Соин ик соосты ваньзэ вошъяно луэ. Нош 1 кило узвесез быдтон-утялтон понна, ог сюрс манет коньдон кулэ луоз. Россия Федерациысь ФСБ-лэн Удмурт Республикая управлениезлэн пресс-службаез. ГУРТ УЛОН Ӟечез ӟечен берытске Кышномурт - ӝыны юрт, шуо калыкын. Нош Нина Николаевна Елышева возе быдэс колхозэз: пульпум вылаз уг - лыдъяны-чотаны, ваньбурез шыръяны но азьпал улонэз адӟыны быгатэменыз. Юнме шорысь солы ӧз сётэ ук "Удмурт Республикаысь гурт удысын дано ужась" ним. Зямбайёс Вавож палан гинэ ӧвӧл, быдэс республикаын тодмо ӟеч ужаменызы, азинсконъёс бысьтэменызы. Удалтӥз, шуыны луоз, татысь председательлы Валентин егорович Калининлы но удысэз валаса нуись специалистъёсын. Котькудӥз сярысь умойзэ гинэ кылод. Озьытэк-а Мичурин нимо колхоз кема аръёс ӵоже аслэсьтыз данзэ йыг-йыг возе. Нина Николаевна сярысь ке верано, со пыраклы выжыяськемын ни хозяйстволэн инъетаз - экономикае. Тамында ар ужаса, зэмен но, ачид но "улэп энциклопедилы" пӧрмод. Елышева сярысь колхозникъёс озьы ик шуо: уйшор уин но сайкатыса юа ай солэсь кыӵе ке лыдпусэз - шалтыр вераса куштоз. Таӵе дунъет адямилэн ужезлы сёто бере, озьыен, со - ас интыяз. Тросгес мед луозы вылэм визьмо, валась специалистъёсмы музон интыосын но. Зямбайын синмаськымон калык улэ. Вуылэмлы быдэ мар ке но выльзэ, сюлмыдлы кельшымонзэ татысь адӟоно. Юртъеръёссы ӝикытэсь, гуртоос сямзыя небыт, вазиськисесь. Сьӧрлось вуэм муртэ одно ик турынъёсын парем чаен секталозы, асьсэ пыжем ческыт чабей нянень утялтозы. Чурытаськонэз уг тодо, шуим ке, ум, дыр, янгышалэ. Но шырытэз ярато. Колхозлэн кузёез но, экономист но уго та ласянь нуналысь нуналэ, арысь аре чурыт курон пукто. Тӥни малы татысь уд адӟы суп-сап ужам бервылэз, нуназе шорын ӝуась электротылэз, зор-кот улын сисьмись пудо сиёнэз, утялтытэк кыллись техникаез. Ваньмыз со шӧдӥськоз колхозниклэн уждунэз вылын. Озьы бере, макем ӝикыт улод - сокем ческыт сиськод, йӧногес дӥсяськод. Мичурин нимо колхозэ одӥг гурт гинэ пыре. Ужасез - 180 адями, гыроно-кизёно музъемзы - 3 сюрс гектар пала. Валтӥсь инты басьто тысё культураос. Котькыӵе секыт ар мед луоз но, зямбайёслэн ю-няньтэк кыльылэмзы ӧвӧл. 1997-тӥ арын, кылсярысь, гектарезлы быдэ 36,6 центнер кутсазы вал, берло кык аръёссэ - быдэн 24 центнер. Картофка 97 гектар вылэ мерттылӥзы, удалтонлыкез 170 центнер котырын люкаськиз. Пайдаез - 400 процентозь вуиз. Таӵе арын со туж ӟеч ини. "Невский" выжы картофка удалтэ, номыр уд шуы. Басьтӥсь вань, коньдонэз мынэ удобрениос вайыны, электрокужым понна тыриськыны. Кыле на уждунлы но. Колхоз юн кусып возе гуртысь школаен. Нылпиослы гужем каникулъёссы дыръя ужаны луонлык сётон понна, хозяйство юри кизе пудо сиёнлы кушман. Миым 5 гектар вылын будэтӥзы, туэ кык поллы тросгес инты висъяны чакламын. Нош урожаез вань: гектарысьтыз 375 центнер люкаськиз. Кызьы-о сыӵе сиён вылысь трос йӧл уд кыскы! Зямбайёс туэ котькинлы адӟем карымон ужало. - Тамында йӧл ноку но люкалляммы ӧй вал, - шуэ Нина Николаевна. - Дояркаосмы нуналаз куинь пол скалъёсты кыско, озьы тросгес йӧл лыктэ. 7-8 арзэ кык пол кыскыса эскерим, озьы продукцимес троссэ ыштӥм. Скаллы быдэ ар ӵоже, шорлыдын вераса, 4200 килограмм кыскиськом. Кӧня ке арзэ ини колхоз юн кусып возе Ижевскысь Гурт удысъя академиысь учёнойёсын. Таӵе эшъяськон котькуд ласянь пайда вае: пудо вордонын но, ю-нянь будэтонын но. Тани йыды гинэ 3-4 пумо кизьыса эскеро. Кудӥз удалтэ, созэ ик кидыслы кисьто. Хозяйство пайда басьтэ йӧл кыскон чотын. Куд-ог дояркаос кемалась 4 сюрсэз ортчизы ни, тани-тани 5000-озь вуозы. Сыӵеос пӧлын Светлана Павловна Черняева, Ангелина Леонидовна Пантюхина, Надежда Афанасьевна Матвеева, Раиса Михайловна Чернышева, Нина Александровна Кленова, Тамара Аркадьевна Елышева но мукетъёсыз. Кема аръёс ӵоже радъяса нуо племенной ужез. Котькуд 100 скаллы чаклало 90 кунян басьтыны. Пудо йырзы та чотын ик арысь аре йылэ. Кысконо уллёзы миым 450 йыр ке вал, туэ 600-озь вуттыны малпало. Со понна выль гид но пуктӥзы. - Калыкмы туж ужась, - шуэ Н.Н.Елышева. - Колхозмы, хозяйствомы одӥг бере, люкыны- басьтыны милемлы номыре. Фермеръёсмы ӧвӧл. Уждун татын дыраз тыро, кварталлы быдэ сётӥське на премия. Котькуд колхозниклэн - аслаз лицевой счётэз. Хозяйство ужасьёссэ ӟеч возе ю-нянен но, пудо сиёнэн но. Татын асьсэ будэтэм чабейзылэсь нянь пыжо, колхозникъёслы дунтэм дунын вузало. Номыр уд шуы: Зямбай калык ёрмытэк улэ. Со понна тау карыны кулэ колхозлы. Дэмен ужамлэн пайдаез котькуд семьяын шӧдӥське: ӟечез ӟечен берытске. Л.МЕДВЕДЕВА. * Н.Н.Елышева. Туспуктэмез В.Камашевлэн. Шӧкыч Ческытак юод - погралод Фельетон - Опеть-а со нушыдэ басьтӥд? - Ӧй, мусое, ӧй, - буйгатэ Микаль кышнозэ. - Нушы шуонэдлэсь дунзэ нош ик будэтӥллям уга. Табере со 40 манетлэсь но ятыр сылэ, пе. Ӵок ойдо, ӧжытгес юом. Микаль кисыысьтыз чебер этикеткаен мырк ныро бутылказэ поттӥз но ӝӧк вылэ пуктӥз. - Вот, мусое, табере асьмеос ческытатэм вуос гинэ юыса улом на. "Атасын" (озьы нимаз гурт калык Атасовлэсь ларёксэ) тае вузало. Ву со сыӵе марке: пырон-потон сюрес аслыз шедьтоз, нош вина йыре кугӟаса кылёз. Куръя кенак мырк ныро бутылкаез кияз ик кутылыса учкиз. - Аромат малиновый, душистая вода, - шара лыдӟиз со яркыт буям этикета вылысь зӧк букваосын гожтэм кылъёсты. Синмаськиз отысь суредлы но. Ӵыж-горд кисьмась эмезь гуры ыме ачиз куриське кадь. - Я, бен, юом ке юом. Тани ӝӧк вылэ сиён гинэ пуктыло. Ӝоген корка тыр вӧлмиз ческыт пӧрам зын. Куръя кенак ӝӧк вылэ пуктӥз сӥльын-кубистаен пыжем пирог. Сиемед потытэк но сиськод. Но паймоно кадь: Микаль мольк! пуке. - Пирогед сӥя, си ини, мар тунаса пукиськод? - куаретӥз картэз шоры Курья кенак. Нош Микаль кыл вератэк ланьырскиз но ӝӧк улэ лэзькиз. - Микаль, Микаль, мар луиз тыныд? - куалектӥз нылкышно. Тыныд секыт луиз, оло? Куаретэм интые Микаль выж вылэ шӧй кадь выдӥз. Киысьтыз мырк ныро бутылкаез палдӥз но ӧс пала дыбыр-шалтыр питраз. Курья кенак уката куалектӥз. Умойтэмез шӧдыса, ульчае ури-бери потӥз но больница пала шок-пуль бызиз. Пумитаз шедем Сандӥлы номыр тыро-пыдо валэктыны ӧз быгаты. Нош со, гуртысь вань иворъёсты кылӥсь-адӟись но вӧлдӥсь, Курья кенак Тупал ульчаысь больницае бызьытозь, котырысь калыкез пыд йылаз ӝутэм. - Мар та таӵе луиз, кытчы калык дыртэ, - коркасьтыз толбыт потамтэ пересь Миквор но капказяз потӥз но паймыса сылэ. - Бускелед Микаль чоньдэм, шуо, - валэктӥз солы одӥгез кенак. - Чоньдэм ӧвӧл, кулэм, пе, Сандӥ югдурез тодытэк уз зульы, - вераз мукетыз. - О-о угось чоньдоз ини Микалед, сое зырын тышкаса но уд погырты ай, шуиз пересь Миквор но, ӟукыртӥсь капказэ вӧлак усьтыса, берен азбараз пыриз. Люкаськем калык корка пырыны уг дырты, витё Курья кенакез. Со ӝог вуиз. Куараен бӧрдэ, ческыт вуэз юыса, пе, Микальлы оломар луиз. Сьӧраз вуизы врач но участковой. Со куспын коркась кырӟам куара кылӥськиз. - Кытысен мон тонэн пумиськи, Кытысен мон тонэн ӟыгыръяськи... Корка пырем калыкез Микаль керӟег пумитаз: - Кытысь, кинъёс тӥ? Мар кулэ? Кошке татысь, адӟеме уг поты. Уйжомем, кожалод, ноку озьы дарманьтэмез ӧй вал угось. Милиционер пыд улын лошъяськись мырк ныро бутылкаез адӟыса ӝутӥз: - Ваньмыз валамон. Микальлы нокыӵе чер йӧтымтэ, сач-сач кудӟемын. Козьма Прутков шуэм сямен, синъёстылы эн оске. Та ческыт вуын 70 градус спиртэз. Юон мар ке ӧвӧл со, оломар суретъёс ватсамын, косметикаын, пе, кутӥське. Врач нош калыкез алӥз, "Аромат", "Лимон" но со выллем вуосты юыса, адямилэн мусэз куашка, сое номырин эмъяны уг ни луы. Ярам, Атасов татын ӧй вал. кыӵе гинэ кылъёсын калык ӧз сизьды сое. Алэм интые, юри, пе, сыӵе вузъёсты чалякгес вузаны тырше. Солы ке мар, тросгес барыш гинэ медло. Нош сылал, кеньыр яке мукет вузъёсын гурт калыкез уд пӧя. Люкаськемъёс Микаль дорысь кыштырак потыса кошкизы. *** Нялтас вераны кулэ, ческытатэм вуос кунгож сьӧрысь ваемын. Сое потто Украинаысь Киев но Золотоноша городъёс. Уть кыӵе амал шедьтӥллям асьме калыкез пӧяны. Н. Тебетеев. ШОРМУӴ Пересь Шамарданъя Тӥ мынэсьтым картме тодӥськоды-а? Микворез, шуисько. Удмурт со. Нош кыӵе мусо. Мыным весь кузьма пель угыос, чыртывесьёс, зундэсъёс. Узыр улӥськомы. Милемлы юрттӥз шормуӵ. Егит дыръяз Микворме комсомолын етӥз ужамез понна кунгож сьӧры келязы. Лобыкузы самолётсы тодмотэм шормуӵе васькем но пазьгиськем. Куинь кузя улэп кылиллям. Толэзь пала улыса, американец но немец воксё куасьмизы. Ма, кыр улмо гинэ сиид ке, уд куайы. Нош удмурт - туж ужась адями. Луд парсь вордэ, тамак кизе, картофка мерттэ. Емышъёслэсь кумышка но пӧзьтыны дышиз. Жаляса учкылэ кык мискинь эшъёсыз шоры. Шормуӵе вуиз Кашпировский, мон, пе, тӥлесьтыд мылкыддэс быдэсто. - Кышнолэсь мӧзмисько, пиналъёсы витё, гуртам бертэме потэ, - шуиз американец. - Сютэм улыса кулӥсько ни. Сур юэме потэ - ӝожзэ вера немец. Соослэн куронзы быдэсмиз - кошкизы. - Нош тынад, удмурт эше, кыӵе куронэд вань? - юа Кашпировский. - Мон ведра кумышка пӧзьтӥ, нош вузаны нокинлы. Американецез но немецез шормуӵе чалякгес берыкты. Озьы ик луиз. Удмурт Миквор узырмиз, бадӟым пыж лэсьтӥз но ошмесо шаераз берытскиз. Кузпалъяським.Ог-огмес яратыса улӥськом. Шормуӵын поттэм ваньбурез трос аръёслы тырмоз. Ма, вань ке коньдон - яратон но муспотон. ГАЛИНА ЛАРИОНОВА. Глаз кар. Селтаос сярысь Ижевскысь "Слайд" издательство Селта ёросысь дано адямиослы сӥзем книга поттӥз. Со бордын трос авторъёс ужазы, тужгес но тыршизы С.Л.Княжин но В.Г.Осетров. Ог 400 адямиослэн улон-вылонзы возьматэмын книгаын. Али ёросын 15 пӧртэм калыкъёс уло. Районлэн быдӟалаез 1884,5 квадрат километр, калыклэн лыдыз ог 15,5 сюрс адями. Селта палъёсын вордскизы Советской Союзлэн Геройёсыз Н.И.Голдобин, В.В.Микрюков, М.В.Карачев, Социалистической Ужысь Геройёс А.И.Дюкина, Н.С.Обухов, тодосчиос Н.Д.Соболев, Е.А.Ирисов, суредасьёс Л.А.Прозоров, В.М.Зворыгин но мукет дано адямиос. Нош кин уг тоды Россиысь калык но Удмуртиысь дано артистэз, пӧйшуръёсты дышетӥсез Иван Кудрявцевез (1932-1984). Тодмо дрессировщик Гоша гондыреныз быдэс дуннеез паймытӥз, шуыны луоз. Нош спортсмен Иван Шутов, дуннеысь самой кужмо адями кык пол пыртэмын Гиннесслэн рекордъёсъя книгаяз. Книгаез кылдытонын кичӧлтӥсь луизы Селта ёрос администрация но Удмурт Республикаысь Национальной библиотека. В.РОГАЛЕВ. Школаосы берытскозы Удмурт кун университетын ортчиз шудтэм учыръёслэсь утиськон ужпумъёсъя олимпиада. Та аспӧртэмлыко ӵошатсконын тодон-валанзэс эскеризы Якшур-Бодья, Селта ёросысь Югдон, Можга ёросысь Бадӟым Уча, Красногорск ёросысь Васильево, Архангельск, Камбарка ёросысь Шолья, Ижысь, Воткалась шор ёзо школаосын дас одӥгетӥ классын дышетскись пиналъёс. Визьсынан дыръя егитъёслы ӵектӥзы пӧртэм юанъёс. Соос пӧлын тужгес кулэез вал шуге-леке усем муртлы дырыз дыръя ӝог юрттэт сётыны быгатон сярысь ужпум. Олимпиадаын вормись пиналъёс, нокыӵе конкурсэз но экзаменъёсты лыдэ басьтытэк, туэ ик дышетскыны пырыны быгатозы Удмурт кун университетлэн юртаз интыяськем Правоя, кивалтонъя но шудтэм учыръёслэсь утиськон инъетъёсъя иститутэ. Вить ар дышетскыса но ӟеч тодон-валан люкаса, егитъёс берытскозы школаосы - пиналъёсты дышетозы. Е. РОМАШОВА. Быгиысь чеберай Нылкышноослэн нуналзылы сӥзьыса, Шарканысь культура юртын ортчиз чебер нылъёслэн конкурссы. Зал тыр калык люкаськиз пӧртэм гуртъёсысь лыктэм чеберайёсты учкыны. Соос куать кузя вал. Егит нылъёс возьматӥзы кырӟаны-вераны быгатэмзэс, кибашлы луэмзэс, веськрес мугорзэс, лэчыт визьзэс. Нош вормиз Быгиысь Буранова Ирина. Со кылем арын гинэ йылпумъяз школаез, ветлэ гуртысь кырӟаны-вераны яратӥсьёслэн коллективазы. Табере со дасяське республикаын ортчоно "Чеберина" конкурслы. Вань гуртоосыз солы сӥзё бадӟымесь азинсконъёс. О. Сидорова. Дано орден Алигес Пичи Пурга ёросысь Яган-Докья посёлокын улӥсь Л. Силкинлэн гадь вылаз ИИИ степенё Слава орден бырттӥзы. Таӵе дан солы вуиз, 55 ар беромыса. Война пумын Леонид Николаевич сӧсырмыса кыдёкысь госпитале шеде. Артиллеристэз пусъён кагазъёс, кузёзэ шедьтытэк, архиве кылиллям. Г. Иванов. Дасязы выль кивалтӥсьёс Алигес "Удмуртнефть" акционер огазеяськон (валтӥсь директорез Евгений Богомольный) шуге-леке шедем яке банкрот карем ёзъёсын кивалтонъя менеджеръёс - выль кузёос дасяз. Соос нимаз программая дышетскизы. Та ужез радъяз Москваысь "Школа бизнеса - Корпорация Центр" фирмаен. "Удмуртнефтьлэн" специалистъёсызлы лекциос лыдӟизы та фирмаысь, РФ-ысь Вылӥ арбитражной судысь но Маркетингъя кун центрысь дышетӥсьёс. Огъя вераса, акционер огазеяськонысь 12 специалистъёс сертификат басьтӥзы. Со право сётэ банкрот карем предприятиосын кивалтыны но соосты пыд йылазы пуктыны. Зэм, та пумысен тани мар вераз Россия Федерациысь банкрот ужъёсъя управленилэн Удмурт Республикаысь агентствоезлэн кивалтӥсез Сергей Щуклин: "Удмуртнефть" али радызъя дася выль кивалтӥсьёс, усто кадровой политика нуэ, вылӥ но шоро-куспо ёзъёслы менеджеръёс дышетэ. Азьланезлы со бадӟым оскон кылдытэ". Г.РОМАНОВ. Одӥг гуртын - сизьым герой. Котькуд гуртысь шедьтыны луоз, дыр, орденэн пусъем адямиез. Нош Завьялово ёросысь Подшивалово гуртын соос - сизьым кузя. Соосты данъяса, татын дасямын "Ветеран" бордгазет. Колхозын усто ужамзы понна Ленин орденэн пусъемын Л.Е.Петрова, Т.Ф.Мушегова - Октябрь революция но Трудовой Горд Знамя орденъёсын. М.И.Пушин Октябрь революция орденэн данъямын, нош солэн гуртоосызлы А.С.Макаровлы но Е.С.Матвеевалы "Знак Почета" орден сётэмын. Трудовой Горд Знамя орденъёс озьы ик басьтӥзы А.М.Гаврилова но И.П.Макарова. Быдӟым Отечественной войнаысь ветеранъёс М.И.Пушин, В.К.Лошкарев но Л.П.Петров али но Подшиваловоын уло на. Ватсаны кулэ: ас вакытаз Подшивалово гурт администрациын улӥзы но ужазы Александр Сабуров - Козлово сельсоветлэн азьвыл кивалтӥсез, Александр Лушников но Василий Зайцев - Советской Союзлэн Геройёсыз. Василий Петрович Зайцевлэн бюстэз сылэ Подшивалово гуртысь культура юрт азьын. "Ветеран" газетэз дасям дышетӥсь Н.А.Зеленина, Подшивалово школаын со куамын арлэсь трос ужа ини В.ПОЗДЕЕВ. Удмурт Республикаысь Экономикая министерство республикалэн кун резерваз 10 сюрс тонна чабей висъян пумысен конкурс ялэ. Отчы пыриськыны мылкыд карисьёс вазиськыны быгатозы Правительстволэн юртысьтыз 78 номеро кабинетэ яке жингыртыны 25-00-22 телефонъя. Шӧкыч Очей Толилы - пӧсь салам Амало парсь Пумиськизы кык воргоронъёс. Одӥгез шуэ: - Кылзы ай, парсьме шудытоно вал. Оло, аслэсьтыд пороздэ (айы парсьтэ) сётъялод? - Сёто. Но кызьы тодоно, со шудэ шуыса? - Быжыз куасалскиз ке, соку ик ваёд, - валэктӥз эшез. Кузё ӵуказеяз учке но, порозэзлэн быжыз купырскемын. Соку ик парсьсэ мотоцикллэн коляскаяз интыяз, думылӥз, йыраз каска изьыяз на. Ачиз руль сьӧры пуксиз но эшез доры ширтӥз. Ӵуказеяз кузё учке но, порозэзлэн быжыз нош ик купырскемын. Парсьсэ коляскае пуктӥз, йыраз каска изьыяз но выльысь мумы парсь доры лобатӥзы. Мукет нуналаз воргорон кышноезлы шуэ: - Пота ай азбаре, учкы, кыӵе отын порозлэн быжыз: купырскемын-а, ӧвӧл-а? Кышноез ӝогак гинэ потаз. - Ну, мар шуод? - юа картэз. - Уг тодӥськы, кыӵе солэн быжыз. Нош ачиз со коляскаын пуке ни, йыраз каскаен. Г. Баженова. Глазов ёрос, Чебершур. Адӟизы - данъязы Можга ёросысь библиотекаослэсь миым ужамзэс чакласа-эскерыса нырысетӥ инты сётэмын Бадӟым Сибыысь Л.З.Шишкиналы. Республикаысь культура удысысь сӥё-дано ужась трос пол пусйылэмын почёт грамотаосын но дуно кузьымъёсын. Ӟеч специалист ужзэ радъя, гурт администрациен но колхоз правлениен кенешыса. М.Кузьмин. Ӟечкыласьком праздникен! Удмурт Республикаысь Кун Кенешлэн но Правительстволэн нимыныз сюлмысьтымы ӟечкыласьком бытовой юрттэт сётон удысын но жилищно-коммунальной хозяйствоын ужасьёсты профессиональной праздникенызы! Адямилы огсыр улыны-вылыны луонлыкъёс кылдытон - котькуд кунлэн валтӥсь ужпумез. Сое быдэстон герӟаськемын юрттэт сётон удысэз паськыт но валаса радъянэн. Соин ик дуннеысь азинскем странаос та удыслы тужгес но бадӟым саклык висъяло, солэсь ужзэ умоятонын уно сюрс адямиос тыршо. Асьме шаерын но котькуд адямилэн улонэз герӟаськемын калыклы юрттэт сётон удысэн. Экономикаын шуг-секытъёс шоры учкытэк, котькуд юртэ лыктэ ву но шуныт, выльдӥсько улон интыос, чылкыт луо городъёс, будосъёсын шобырско урамъёс но азбаръёс. Удмуртиысь Кун Кенеш но Правительство туж ӟеч валало удыслэсь республикалэн улоназ валтӥсь инты басьтэмзэ. Соин ик азьланяз но солы азинскыны вань луонлыкъёс кылдытэмын луозы. Тӥляд сюлмысь тыршемды но уждэс яратэмды, вылӥ быгатонлыкъёсты но зэмос кузё луэмды понна мур гажаськом но тау кареммес вераськом. Жилищно-коммунальной хозяйствоын вань ужасьёслы сӥзиськом юн тазалык, шудбур, ӟеч малпанъёсты одно ик мед быдэсмзы. Удмурт Республикаысь Кун Кенешлэн Тӧроез А. А. Волков. Удмурт Республикаысь Правительстволэн Тӧроез Н. А. Ганза. Кин со вал Михаил Стрелков? Вордскемын, школаез йылпумъямын но быдэ вуэмын Завьял ёросысь Ожмос гуртын. Анаез кулэм бере, Константин Федорович Камашев пизэ степанэз вынызлы вордосэ сётӥз. Вынызлэн нимыз Михаил вал. Пияшез со быдэ вуытозяз будэтӥз. Армие мынытозяз избач луыса ужаз. Со вакытэ отчы ужаны Дэриысь дышетӥсь Галина лыктӥз. Ог-огзэс яратӥзы. Семья кылдытыса ӧз вуэ, егит пияшез армие басьтӥзы. Степан шеде Белоруссие. Со луэ Александр Суворов нимо партизан ортядлэн командирез. Татысен со Степан Михаил Стрелков нимын ветлэ. Но солы Вормон нуналозь улыны ӧз кылды. Кин ке чагиськыса, удмурт воргоронэз немецъёс куто но 1943-тӥ арын 7-тӥ июне ыбо. Ватэмын герой Белоруссиысь Ятры гурт доры. Со сярысь гожтӥз отрядлэн санитаркаез. Михаил Стрелков сярысь Удмурт калык туж ичи тодэ. Нош Беларусь музъем вылын сое данъяло. Та республикалэн президентэз Александр Лукашенко но солэсь нимтулзэ поттылӥз, Ижевске вуылыкуз. Василий ДАВКОВ. "Котьку тон мынам сюлэмам" Тазьы шуэ Вячеслав Петрович Кириллов дор палъёсызлы сӥзем кылбур-кырӟаназ, вордскем интызэ гажаса. Со угось быдэс улонзэ ини вань кужымзэ сётэ Ува ёросысь Булай палъёссэ шулдыргес карон понна. Ижысь культурая училищеез йылпумъяса, вордскем палъёсаз бертӥз, егитъёслэсь "Инвожо", пиналъёслэсь "Чибори" ансамбльёс кылдытӥз. Нокыӵе пумиськон но, праздник но та коллективъёсысь кырӟась-верасьёстэк уг ортчы. Туэ гужем Ува ёрослэн - юбилеез. Солы сӥзьыса, Вячеслав Петрович "Ува вальс" кырӟан гожтӥз: Ува ёросам, вордӥськем палъёсам Шунды но пиштэ яркытгес. Небыт уйёсы, инбамын уяса, Толэзь буйгатэ мылкыдэз. Пычи дыръёсы но татын ортчемын, Егит дыръёсы но татын герӟамын. Возе, нюлэсэ, инкуазе но аслам - Котьку тон мынам сюлэмам... Туспуктэмез но гожтэмез Владимир Беломорскихлэн. Валэктэ юрист Сэрегез нуэ адвокат Лилия Шкляева Кассаын коньдонэ "ӝуаз-а"? Будӥ мумытэк-бубытэк. 1986-тӥ арысен улэмын песянае бордын. Ужасько колхозын. 1991-тӥ арын 4-тӥ мартэ сберкассае понӥ 1 сюрс манет. 18-тӥ сентябре мукет счёт усьтӥ нош ик 1 сюрс манетлы. 21-тӥ декабре бызи. Картэ вордскемын 1973-тӥ арын, быдэ вуэмын озьы ик мумытэк-бубытэк. Быгатӥсько-а басьтыны сбербанкысь коньдонме, со дунтэмамен валче адӟем изъянэз но вераса? Г. Перевозчикова. Шаркан район. Таӵе ужпумъя 1995-тӥ арын 10-тӥ мае кутэмын нимысьтыз закон. Нимыз таӵе: "Россия Федерациысь гражданъёслэсь люкам коньдонзэс берыктон но утён сярысь". Сое кун (Россия) аслаз пунэм тыронэныз лыдъяз Россилэн сбербанказ 1991-тӥ арын 20-тӥ июнёзь понэм коньдонэз, нош озьы ик Россия Федерациысь кун ласянь страхованиен вырись организациосы 1992-тӥ арын 1-тӥ январёзь сётэм коньдонэз. Таин валче Россилэн президентэз 1996-тӥ арын 16-тӥ мае юнматӥз "1992-тӥ-1995-тӥ аръёсы коньдон дунтэмамен валче нимысьтыз категориосысь гражданъёслы азьвыл ик юрттонъя ужрадъёс сярысь" Указ. Нырысь ик сыӵе юрттэт басьтӥзы 1916-тӥ арын но солэсь азьвыл вордскем муртъёс. 1997-тӥ арын 2-тӥ декабре таӵегес ик нимын музон Указ потӥз. Таиз юрттӥз 1917-тӥ- 1920-тӥ аръёсы вордскемъёслы. 1999-тӥ арын 20-тӥ июне Россия Федерациысь Правительство кутӥз постановление. Соя юрттэт басьтыны быгато: -1922-тӥ арозь вордскемъёс; - Нырысетӥ группаен ӧлексыос (инвалидъёс); - кулэм муртлэсь кельтос (наследство) басьтӥсьёс - сое ватыны - 1 сюрс манетозь; Люкам но дунтэмам коньдонэн герӟаськемын уно миллион адямиос - пересьёс, сӧсыръёс, мумы-бубытэк кылемъёс - тужгес шуге-леке учыре шедемъёс. Соослы юрттон укыр дуно усе бере, ужпумез быдэсъялозы люкетэн-люкетэн, нырысь ик - адямиослэсь арлыдзэс санэ басьтыса. Жаляса верано луэ: гожтэтлэн авторез выллем муртъёслы юрттэт сётон сярысь закон ӧвӧл на. Лыдӟисьёслы вазиськон "Валэктэ юрист" сэреге нуналлы быдэ гожтэтъёс вуо. Ог люкетэзлы ивортон сётӥськом газет пыр, мукетъёсызлы - гожтэтэн. Лыдӟисьёсмы таин валче юаллясько: малы одӥг муртэн гинэ герӟаськем юанлы но визь-кенешлы соня быдӟа инты висъяськоды? Ужпум тани мар бордын. Улон-вылонлы лекос пӧртэм кадь ке но, одӥг выллем юанъёс сюлэмшугъяськыто туж унозэ. "Валэктэ юрист" сэрегын али тани печатланы дась ни ог дасо гожтэт - ваньмыз герӟаськемын колхозысь музъем пай но ваньбур пай басьтонэн. Редакция лыдъя тазьы: одӥг адямилэн юанэзлы иврез газетын сётом но, со юрттоз трос мукетъёсызлы. Тӥни малы авторлы нимаз гожтэт келяса гинэ ум буйгатскиське. Улон татын но аспӧртэмлыко возьматэ. Музъем пай сярысь туннэ гинэ мадимы Алнашысь Ивановлы. Ӵуказеяз та вылем ик юанэн вазиське ни Балезиноысь Корепанов, усьэяз - Можгалась Комаров. Лыдӟисьёсмес куриськом: учкелэ мукетъёсызлы но сӥзем чуръёсмес, оло, отысь ӵапак асьтэлы визьнод шедьтоды. Собере таӵе но малпан вань. Куд-огез вазиськисьёс "Удмурт дуннеез" уг лыдӟо, лэся. Юан келяло но ӵуказеяз ик валэктон возьмало. Сое уг ке шедьто, кык-куинь пол гожтэм ысто на. Конвертъёслы но маркаослы коньдонзэс юнме эн быдтэ, эшъёс. Валэктэ юрист сэреге вуэм котькуд гожтэтъя рос-прос уж мынэ. Ятвылтӥды, луоз: кулэ бумага шедьтыны лякыт ӧвӧл, Вуж но выльдэм законъёс, указъёс, постановлениос заерзьысь ву мында. Тупасьсэ бырйыны компьютерлы но секыт. Соин ик, юандэс, арлыддэс, сеьядэс, улон но ужан интыдэс, юанэн герӟаськем вань учыръёстэс. Куддыръя пичи чыры-пыры гинэ но ивор утчанэз олокӧня нуналлы ӝегатэ. Кыӵе черодъя печатласько валэктонъёс? Веранэз ӧвӧл: вазьгес вуэм но рос-просгес гожтэм юанлы ивортон вазьгес сюре но газетэ азьлогес потэ. Куддыръя черодтэк сётӥскьом "пӧсь" визь-кенешъёсты. Шуом, адямилэн суэ вазисько дырыз быре ни яке ужпумен герӟаьскем муртъёс, организациос, фирмаос син азьысь копак ышыны быгатозы. Газетэ инты ласянь ӟоскытгес ке, одӥг выллем юанъёслы валэктонъёсты кытӥяз юри ӝегатӥськом. Огшоры лыдӟисьёслы акыльтэ, вылды, нуналысь нуналэ лыдӟыны квартира басьтон сярысь гожъямъёсты, вылаз ик, сое али ӵем ик уг висъяло ни. Озьыен, сюлэмдэс урод эн карелэ, гажано лыдӟисьёс. Улон туннэ уг йылпумъяськы. Юанды дыртӥд-вуттӥд выремез кулэ уг кары ке, солы ивортон сётэмын луоз али тулыс но, гужем но. Ми тодӥськом: гуртысь адяиослы дунтэк адвокат шедьтыны шуг. Сое возьматэ "Валэктэ юрист" сэреглэн пумен зӧкомись папкаез но. 1972-тӥ арысен кылдэм йыръянэлэн кулэлыкез весь будэ. Соин ик редакциын ? кылдылэ таӵе дэмлан: нырысь ик визь-кенеш утчалом, дыр, газетмес трос аръёс ӵоже лыдӟисьёсмылы. Юанъёстэс сётэмды луоз гожтэтэн 25-33-70 телефонэн удмурт но ӟуч кылын. РЕФЕРЕНДУМ АЗЬЫН: МАР ШУЭ КАЛЫК "Кузё кулэ ни кемалась..." Кызьы тодмо, Россия Федерацилы Президент быръён нуналэ шаерамы радъямын луоз Удмурт Республикалэн азьпал улонэз пумысь кенешон. Адямиослэсь юалозы: кыӵеесь малпанъёсты Удмурт Элькунлэн Конституциезлэн дасэтӥ ёзэтаз таӵе ватсан пыртон пумысен: Удмурт Элькунэн азьльланяз мед кивалтозы Удмурт Элькунысь Кун Кенеш, Президент, Правительство, Конституцияя суд, мировой судьяос но мукет кун ёзъёс. Мар малпало та пумысен шаерамы улӥсьёс? Сыӵе юанэн корреспондентмы вазиськиз кӧня ке муртлы. Дмитрий ПИВОВАРОВ, Ижын улӥсь пенсионер: - Мон тазьы малпасько, Россиысь ваньмаз республикаосын но областьёсын нырысетӥ кивалтӥсьсэс калык быръе ке, асьмеос но тазьы ик карыны кулэ. Маин пӧртэм меда Удмуртия? Со уг пыры шат Россия Федерацие? Уката ик лыдэ басьтоно ке созэ: та пумысен кылем арын октябре нимысьтыз закон поттэмын ук, котькытын огъя рад тупатыны косэмын. Референдумтэк но со законъя кариськыны кулэ. Но Кун Кенеш юалляськон ортчытон сярысь решение кутӥз бере, асьмелы луонлык сётӥське мылкыдмес вераны. Тырмоз ни велосипед малпаса улыны. Со кемалась кылдытэмын... Любовь АФАНАСЬЕВА, Алнашысь жилищно-коммунальной хозяйствоя предприятиысь инженер: - Мынам малпамея, кышномуртлы туж ик кулэ ӧвӧл политикаен герӟаськыны. Со понна пиосмуртъёс вань. Но быръёнэ котьку ик ветлӥсько. Туэ но мыно. Озьы будэтэмын мон. Референдуме но пырисько. Нош кудпала кариськон пумысен нылыным верасько ай. Со мынам та огыр-бугыр улонэз ӟечгес вала - пединститутын дышетске. Леонид МИРОНОВ, Пичи Пургалась ужтэк кылем мурт: - Референдум сярысь кылылӥ ни. Вераськон президент пумысен мынэ ук? Кузё кулэ ни кемалась. Мар-о весь Москва гинэ-а, мар-а асьмемын кузёяськыны кулэ? Удмуртиын ваньмыз вань ук: нефть но, оружие но, гурт хозяйствомы но воксё начар ӧвӧл кадь. Соин ик ужпумез шонерен лыдъясько. Валерий ДВОЕГЛАЗОВ, Алнаш ёросысь Ильич нимо колхозлэн тӧроез: - Президент кулэ. Соиз, мон сямен, ваньмызлы ик валамон ни. Уго котькытын соос вань ини. Мукет ужпум: кыӵе президент асьмелы кулэ. Мынам малпамея, республикаенымы мед кивалтысал кадь ёрос кузёын ужам мурт. Со огшоры калык сярысь ӟечгес сюлмаськоз, крестьянъёслэсь но сюлмаськонзэс ӟечгес валалоз. Шугъяськытэ на соиз: выль ёзъёс кылдэмен ӵош шӧдскымон йылэ чиновникъёслэн лыдзы. Озьы бюджетысь трос ватсаса коньдон кошке. Мылкыд карон чотын верасал: Удмуртиын мед тыршысалзы выль кивалтӥсьлэсь аппаратсэ мукет интыосысь специалистъёсты кулэстон чотын кылдытыны. Соку умой луоз. Бадӟым Вормонлы - 55 ар Соку солы 18 арес вал Ижысь Москвае, Исаковской ульчае, туэ 23-тӥ феврале Советской Союзлэн Героезлы отставкаысь генерал-лейтенантлы Виталий Андреевич Ульяновлы ӟечкылан телеграмма ыстэмын. Сое 75 аресэныз сюлмысь ӟечкылазы 73 номеро школалэн коллективез, "Аспалъёсмы - Советской Союзлэн Геройёсыз" музейлэн кивалтӥсез, РСФСР-ысь культурая сӥё-дано ужась Р. М. Сонина но татысь "Поиск" штаб. Музейын Героез ӟеч тодо, трос аръёс ӵоже соин кусып возё, ачиз но татчы вуылэмын. Нош вордскемын Виталий Андреевич 1925-тӥ арын, ӵапак Атыкай музъеммес утисьёслэн нуналазы, Киевын, рабочийёслэн семьяязы. Войналэсь азьло куать классэз гинэ йылпумъяса вуттӥз но пиналысен ик "Арсенал" заводын ужаны кутскиз вал. Дас куать аресказ кутскиз война. Фашистъёс матэ вуыку, бадӟым предприятиосты, туж дыртыса, шунды ӝужан пала келязы. Ульяновъёс Воткинске улыны лыктӥзы. Егит пияш кутскиз вал военкоматэтӥ бызьылыны - фронтэ куриськиз. Пинал, шуизы, арлыдыд вуымтэ на, пе, чида. Ужаз. Нош 1942-тӥ арын егит адямилы учыр ӵапак тупаз: Воткинскын кылдӥз Удмуртиысь Комсомол нимо 174-тӥ артдивизион. Та дивизион дасяськиз тушмон танкъёсты быдтылыны, фашистъёслы асьме музъем вылын сьӧсьяськемзы понна пунэмзэ берыктыны. 1942-тӥ арын августэ гудырикошкон толэзе татчы аслаз ӟырдыт мылкыдыныз лыктӥз комсомолец Виталий Ульянов но. Арлыдзэ со бадӟыматыса верам. Ӧжытак курсын дышетскемез бере, эшелонэн келязы фронтэ. Виталий ож тылӝуэ нырысьсэ сюриз 1942-тӥ арын 16-тӥ декабре. Артдивизион соку Юго-Западной фронтын ожмаськиз. Собере егит воин младшой сержант Ульянов, кужмо ожмаськиз Ворошиловград областьысь Новопсков город понна. Противотанковой орудиеныз пуштытӥз шоро-куспо тушмон танкез, быдтӥз ньыль огневой точкаосты, кызё пала фашистъёсты. Подвигзэ пусйизы "За отвагу" медален. Сӧсырмыса йӧнатскемез бере, егит артиллеристэз кутӥзы 92-тӥ гвардейской стрелковой дивизилэн 280-тӥ гвардейской стрелковой полказ, орудилэн наводчикез луиз. Быгатыса но туж сэзь ожмаськиз со Курск котырын. Пусъемын вал кыкетӥ степенё Отечественной война орденэн. Нош 1943-тӥ арын сӥзьыл, асьме войскоос Днепр доры вуыку, гвардиысь сержант Ульянов ожъёсын кыдамын, взводлэн усто командирез вал ини. Герой мылкыдын ожмаськиз шурлэн паллян пал ярудраз ик. Собере шур вамен нырысетӥ орудиез поттыку ик бур пал ярдуре выжиз, меӵак мертаськыса, тушмонлэсь кӧня ке точкаоссэ пазьгиз. Быдэсак батальонэзлы сюрес усьтӥз шур вамен выжыны. Собере кутскиз Зелёный хутор но Куковка гурт понна ожмаськонъёс. Отын Ульянов тушмон танкъёслэсь но пехоталэсь контратаказэс дугдытӥз. Кык орудие вӧзы огназ кылиз. Меӵак мертаськыса ыбылӥз но со учыре гинэ быдтӥз кык тушмон танкез, сизьым бронемашинаез, басьтӥз одӥг пушказэс, быдтӥз взвод мында фашист солдатъёсты. Озьы полкезлы Днепрлэн бур пал ярдураз азьлань мыныса ожмаськыны паськыт сюрес усьтӥз. Ваньзэ 16 танкез пазьгиз егит боец. Солы соку 18 арес гинэ вал. Полкезлэн командирез гвардиысь подполковник Плутахин 1943-тӥ арын 20-тӥ октябре награда сётон сярысь лист вылэ гожтӥськиз, Виталий Ульяновлы "Советской Союзлэн Героез" ним сётыны ӵектыса. Сыӵе указ поттэмын вал 1944-тӥ арын 22-тӥ феврале, кышкасьтэм но сэзь воинлы 19 аресэз тырмыку. Отӥяз В. А. Ульянов вань улонзэ ожгарчилэн ужезлы сӥзиз. Дышетскиз военной академиын, собере ачиз дышетӥз военной училищеосын. 1976-тӥ арын Ижысь 73-тӥ номеро школалэн делегациез, ветлӥз уй пал Осетие, Орджоникидзе городэ. Со вакытэ татысь вылӥ общевойсковой командной училищеен кивалтӥз Советской Союзлэн Героез генерал-лейтенант В. А. Ульянов. Удмуртиысь егитъёслы соин пумиськон вунонтэм кылиз. Татысен куд-ог пиослы пыӵаз ожгарчилэн ужезлы дышетскон сярысь малпан, нош герой Ижысь следопытъёсын но музеен кусыпъёссэ со дырысен ӧз ыштылы ни. Ачиз но вуылӥз Ижевске но Воткинске. Табере со отставкае потэмын, улэ Москваын. Нош Быӟдым Отечественной война дыръя ожмаськемъёс сярысь туннэ верано ке, Виталий Андреевич тужгес егитъёсыз пӧлы пыре. Жаляса верано луэ, ожысь ветеранъёс пӧлын талэсь егитъёсыз уг кылё ни. 75 аресэныз ӟечкыласа, солы сӥзизы трос аръёс ӵоже юн тазалыко улыны, нош тулыс Геройлэсь возьмалозы Иже ожысь ветеранъёслэн слётазы лыктэмзэ. Л. Федоров. Курайлэн куараез ӧте... Шаерамы али пӧртэм калыкъёслэн 20 огазеяськонзы лыдъяське. Соос ог-огзылэсь висъясько нырысь ик культура ласянь тодметъёсынызы. Соин ик, дыр, республикаямы азьло ик кылдылӥзы культурая, лулчеберетъя огазеяськонъёс. Кылем кӧс нуналэ соос пӧлысь тужгес кужмоосыз, ужзэс умой радъяны быгатэмъёсыз - удмурт но ӟуч культурая дэменлыкъёс - эшъёссэс люкаллязы ас ӧтчамъёсазы. Нош 2-тӥ апреле эшшо одӥг ужрад луыны кулэ: усьтӥськоз республикаысьтымы национальной культураосъя центр. 18-тӥ мартэ бадӟыматэм кенешазы "Металлург" двореце люкаськылӥзы шаерамы улӥсь башкиръёс но. Кылем арын 27-тӥ мартэ соослэн вал нырысетӥез курултайзы - ӧтчамзы. Кылдӥз Удмуртиысь башкиръёслэн "Салават" общественной центрзы. Тодады вайытӥськом: асьме республикаын уло 6 сюрс пала башкиръёс (тросэз соос асьме доры вуизы 70-тӥ аръёсы, Удмуртиын му вӧй поттон удысэз радъяку). Ог 5 сюрсэз башкиръёс уло Ижевкын, тужгес уно соос Октябрь районын. Соин ик матысь дыре Октябрь ёрос администрация но Нефтекамск городысь кивалтэт культура но экономика ласянь ваче кусыпъёс герӟан вылысь огкыл кутыны малпало. "Салават" огазеяськонлэн Правленияз 13 мурт, кивалтэ соин Ижевск НГДУ-ын ужась Д.Х.Хасанов. - Али ар ӵоже ужаммылы маке-со йылпумъянъёс лэсьтыны луэ ни, - шуиз Дильфар Хасанович. - Юрттӥсьёстэк ӧй луысал. Ми котьку сямен вазиськиськом "Завьялово агропромхимия" огазеяськонэ. Солэн кивалтӥсьёсыз Валерий Владимирович Абрамов но Радик Адгатович Гарапов милемлы юрттӥсь кизэс мычо, тау соослы. Нылпиосты анай кылзылы дышетытэк, нокыӵе культура уз пушйы. Озьы ик лыдъяло татын но. Ӝоген усьтӥськоз арняосы ужась школазы (83 номеро школаын). Дышетозы кык кузя, огез соос пӧлысь - Г.Н.Асадуллина, 63 номеро школалэн директорезлэн воштӥсез. Гульнур Надмитдиновна котькытчы вуттӥське. Азьпалан со ас кылыныз пыриськоз телевидениын "Хаэрле кич" передачаосы. Башкир кылын толэзяз огпол потылоз бигеръёслэн "Янарыш" газетсы но. "Металлургысь" адямиос ӝутскем мылкыдын бертӥзы. Соосты лӧпкытӥз на Нефтекамскысь артистъёслэн бадӟым концертсы. Курайлэн вӧлмыт куараез пыр улӟиз, дыр, вашкала выжыосыз шӧдон... Т.ПЕТРОВА. Кыкез но кузьым Алнашын Газетмылэн самой матысь эшъёсыз почтаын ужасьёс шуим ке, ум янгышалэ. Соос уго жадёнэз тодылытэк тыршо газетмес вӧлмытонын. Кылем арын редакция "Устоез почтальон" конкурс ялӥз вал.Ӵошатскон ӟеч гинэ радъяськиз. Табере тодоно вал, кудӥз почтальон тросгес вӧлдэм "Удмурт дуннеез". Нырысь ик лыдэ басьтӥмы самой трос газет басьтӥсь ёросэз. Татын азьпала потӥллям алнашъёс - 1780 семья гожтӥськем солы. Озьы одӥгез бадӟымез кузьыммы мотопомпа кошкиз Алнашысь Азамат гуртэ. Нош кудӥз почтальонка самой чупресгес ужам меда? Йылпумянъёс лэсьтӥмы ёросъёсысь почта кусыпъёсъя ёзъёсы. Озьы тодӥм: "Удмурт дуннеез" самой трос вӧлдэм Алнаш ёросысь Писэйгуртысь почтаын ужась Людмила Кузьмина - 173 экземпляр. Вормисьлы ӵектэмын вал дуно кузьым - мотоколяска. Озьы кылем арня куспын кузьыменымы шонтӥм Алнаш палъёсы. Туж шуныт пумитазы сырьезьёс но, писэйгуртъёс, Ӧрка гуртын улӥсьёс но Почтаын тыршо асьсэлэсь ужзэс яратӥсь нылкышноос - солэн кивалтӥсез Ирина Викторовна Николаева, почта вӧлмытӥсьёс Людмила Ивановна Кузьмина но Ольга Петровна Балашова. Кузьым сётон зэмос праздниклы пӧрмиз. Сое радъяны мылысь-кыдысь юрттӥзы Ильичнимо колхозлэн тӧроез Вениамин Васильевич Двоеглазов, культура юртын ужасьёс. Со ӝытын ик ёросысь почта кусыпъёсъя ёзын ужасьёс берло нуналъёсы газетъёслы выль гожтӥськемъёс пӧлын лотерея ортчытӥзы. Люкаськемъёс азьын усто концерт возьматӥз Алнашысь ветеранъёслэн хорзы. Н.БАЙТЕРЯКОВ. * Почтаын ужасьёс Л.И.Кузьмина, И.В.Николаева но О.П.Балашова газетлэн кузьымез дорын. В.Беломорскихлэн туспуктэмез. Няньтэк но жингыртэ кырӟан Калык пӧлын верало: нянь ке вань - кырӟан но жингыртэ. Нянед ке ӧвӧл - кырӟам но уг поты. Но туала арын ваньмыз чукин-бекин луыса уг кошкы меда? Ува ёросын вань Узей-Тукля гурт. Куке но татын трос нянен, пудоен данъяськизы. Но улон воштӥськемен, колхоз лябӟиз. Адямиос татын туж секыт уло, аръёсын уждунзэс уг адӟо. Озьы ке но, лыктӥсь куноослы котьку шумпото. Куно пумитаса, кырӟаса,вераса соос асьсэлэсь кӧтӝожъёссэс вунэто. Кырӟаны узей-тукляос, оло, кӧкыысен ик дышо. Нош быгатӥсь дышетӥсьёс (соос пӧлы пыртӥсько культура удысын ужасьёсыз но) сюрес усьто чеберлыко дуннее. Узей-Тукля культура юртэ пырид ке, котьку кылод жингыртӥсь крезьгур, арган куараез - туала эстрада но фольклор гуръёсты. Школа, нылпи сад пыӵамын вашкала шӧмен. Татысь дышетӥсьёс но воспитательёс угось валтӥсь интые пукто удмуртъёслэсь азьвыл сямъёссэс но йылолъёссэс утёнэз. Медаз, пе, вунэты калык кыӵе выжыысь потэмзэ. Котькуд гуртлэн аслаз сямъёсыз. Адямиос отын одӥг бугоре бинямын. Нош Узей-Тукляын улӥсьёслы инмар ӟеч сямъёссэ жалямтэ. Ужез яратӥсь, курӟась-верась, кибашлы, огъя вераса, гажамон калык та гуртын. Нылпи садын ик татын дышето крезьгурлы, суредаськыны, спортэз яратон мылкыд пыӵато. Школаын урокъёссы бырем бере, нылпиос бызьыса мыно культура юртэ, библиотекае, кибашлыослэн юртазы. Культура юртын соосыз витё пӧртэм кружокъёс. Клубазы ньыль оркестровой группазы. Кивалтэ соосын элькунысьтымы культура удысын дано ужась В.И.Шиляев. Тодмо луо "Азвесь" но "Девчата" ансамбльёс. Таизлэн кивалтӥсез Н.В.Шахтарина. Культура юртэн нош кивалтэ О.Б.Конышева. таос сяна, вань сюлэмзэ поныса, кема аръёс ӵоже гуртын культура, дышетон удысъёсыз азинтон бордын ужа ини Ф.В.Штумф. Та адямиос тыршемен, асьсэлэсь улонзэс искусствоен герӟазы ини тросэз пиналъёс. Котькуд ар ӝуатско выль "кизилиос". Шаерамы тодмо луизы ни пинал талантъёс Коля Лопати_Дн, Оля Рябинина но мукетъёсыз. Соос нылпи садысен ик крезьгур борды кыстӥськизы. Нош "Азвесь" фольклор ансамбль элькунмылэн палэназ но быгатэмзэ возьматылӥз. Узей-Тукляын туж уно кибашлы адямиоссы но. Гуртын соослэн асьсэлэн юртсы. Татын тыршо пу вылэ вандылонъя, куиськонъя, росписья но суредаськонъя. Тужгес но кибашлы ачиз кивалтӥсьсы Геннадий Сидоров. Солэсь пуэз вӧлыса лэсьтэм ужъёссэ шаерамы умой тодо ни. Та вакытэ трос интыосын культурамы палэнтэмын, удмуртлыкмы вунэ ини. Унояз гуртъёсын культура юртъёссы кушкан калэ вуэмын ни. Нош узей-тукляос шыкысысь ваньбурзэс туала вакытозь утьыны быгатӥллям. Сюлэм бадӟым шумпотонэн тырме, удмуртлыкмес, культураез гажась, кырӟаны-вераны яратӥсь калык таӵе секыт улонын но мылкыдзэ уг куашкы шуыса. Ирина КОНЬКИНА-КОНОНОВА. Грах ёрос, Муркемыр гурт. ПОЛИТИКА МА ВИТЕ РОССИЕЗ АЗЬЛАНЯЗ? Огаз пумиськонын Кун Думалэн депутатэз Николай Сапожников сюлэмшугъяськонзэ вераз Россия Федерацилэн азьлань сюресэз сярысь. Со герӟаськемын Кавказысь югдурен но, улосвылъёсысь кивалтӥсьёслэн ужаменызы но. Депутат верамъя, федеральной властьлэсь лябзэ губернаторъёс, президентъёс туж ӝог шӧдӥзы: кин кызьы быгатэм, федеральной законъёслэсь куронъёссэс асьсэ пала берыктӥзы. Та ласянь бере ӧз кыльы, нырысь- валысь учкыса, чалмыт Поволжье но. Тужгес но со шӧдӥське Татарстан, Башкортостан, Самара область вылын. Соослэн асьсэлэн радлыксы но законъёссы. Умой-а, урод-а аслыд ачид кузё луон? Кудпалласянь учкод ведь. Чечняын пуромем ожмаськон, ватонэз ӧвӧл, быдэс Россиез вир кисьтонэ кыскиз. Кӧня семьяосы коросъёс вуэмын но вуозы на, кӧня пиосмес ыштӥм но ыштом на ялымтэ войнаын. Татарстан огдырлы та ожлэсь палэнскылӥз, солдатъёссэ отчы келямысь дугдытыса. Нош мукетъёсыз но солэсь адӟем карысалзы ке? Соку кин вылын возиськоз на Россилэн армиез? Таӵе кышкытлык вань, угось котькудӥз губернатор, президент ассэ вылӥ кивалтӥсен лыдъя. Ваньмыз со кутске федеральной властьлэн, законодательстволэн кужымтэмез бордысен. Поволжье Россилэн экономикаяз нимысьтыз инты басьтэ, татын улэ 56 миллионлэсь ятыр калык, странамылэн промышленностезлэн ог 40 процентэз интыямын Волга но Урал котырын. Ма луоз соин, котькудӥз республика "шобретсэ" ас вылаз гинэ кыскыны выриз ке? Мукет регионъёсын ӵошатыса, пӧртэм огкылъёс пыр центрлэсь тросгес таланы быгатӥзы Татарстан, Башкортостан, Калмыкия. Соослэн кутэм законъёссы данакез уг тупало Россилэн Конституциезлы. Татарстан сярысь ке верано, та республика ассэ нимаз государство кадь пуктӥз, солэн Конституциез но Россилэнэзлэсь вылӥынгес лыдъяське. Тӥни малы октэм вытсэ но Казань быдэсак сямен аслыз кельтэ, федеральной казнае лэзьытэк. Татарстанлэн призывникъёсыз ваньмыз сямен ас доразы службазэс нуо (контрактникъёсты вератэк). Минтимер Шаймиев, Россия но Белоруссия куспын Союзной государство кылдытонъя Огкыл гожтэм бере шуиз вал, Татарстан но ас статуссэ воштыны дась. Но туннэ нуналозь воштӥськонъёс уг шӧдӥсько на. Табере витё, дыр, Россилы президент быръёнэз: кин тодэ, кудпала шонтӥськоз страналэн выль кивалтӥсез. Башкортостан пумен ӵемгес учкылэ бускелез шоры, солэсь адӟем карыны выре. Интыын кутэмзаконодательство российскойзэ пумен юнгес улаз пачкатэ, уката ик - национальной ужпумъёсын но быръёнъёсты ортчытонын. Тӥни малы огдырлы татын кысылӥзы ОРТ-лэсь но РТР-лэсь телеканлаъёссэс но. Волга котырын кылдэм "ислам треугольниклэн" быжыз вуэ Дагестанозь, Астрахань областёзь. Нош таиз улосвыл али пачылмемын, шуыны луоз, Кавказысь пегӟем калыкен. Вылаз ик, калмык музъемъёс олокӧня пол люкемын вал ни бускель Астраханен. Али но солэн ог люкетэз сётэмын та областьлы. Тӥни ма котырын бергало Калмыкилэн туала кивалтӥсьёсыз. Соослэн висказы ӝегатскытэк пыриськоно луиз Федерацияя Кенешлы. Кемаласенгес вераськон мынэ ни Урал республика кылдытон ласянь но. Таӵе кичӧлтон сётӥз Свердловск областьлэн губернаторез, дурбасьтыны дась Саратов область, Самара. Малы соос центр ки улысь потыны выро? Нырысь ик, экономиказэс ас быгатэмзыя кужмоятон понна. Уг кельшы Москвалэн тоно-моно каремез но юрттымтэез. Тӥни малы котькудӥз улосвыл пӧртэм амалъёс утча, ас кожаз улон но ужан понна. Кытчы оглом вуттоз со Россиез? Н.И.Сапожников малпамъя, таӵегес мылкыдзы тросэзлэн политикъёслэн, Россия, СССР сямен ик, пичиен-пичиен куашкалоз. Сахалин, Дальний Восток, Сибирь ас вылазы шӧдо ни Шунды ӝужан палась бускельёссылэсь асьме музъемъёсмы вылэ выжы лэзён мылкыдзэс. Кун Думалэн заседаниосаз одӥг пол гинэ вераськон ӧз ӝутскылы ни Приморье но Хабаровск край пумысен. Отын улӥсь калыклэн лыдыз ялан кулэсме, со понна туж ӝог йыло Китайысь но Кореяысь потэмъёс. Шыпытак гинэ мынӥсь оккупация каллен-каллен матэктэ ни Урал котыре. Нош Россиысь калыклэн лыдыз, статистика верамъя, арлы быдэ 1 миллионлы синэ. Зэмен но, быръёнъёс азьын вань ма сярысь малпаськыны. Кинэ странамылы кивалтӥсе пуктом - озьы ик улом. Тросэз уго потоз президент бордысь: Поволжье котырысь республикаослэн но. Л.МЕДВЕДЕВА. ВОРМОНЛЫ - 55 АР Улэ, кулонлы ӧчкарыса Песятаймы Аркадий Медведев, анайлэн атаез, калыклэсь пӧртэмгес вылэм. Эксэй вакытэ со дас вить арлэсь кема армиын служить карем. Анай верамъя, эксэй юртэз - Зимний дворецез - возьмаса улэм. Лялие бертэм офицер званиен. Варзи-Ятчи котырын песятаймы нимо-дано адями вылэм - гожтэтэз тодэ, улыны быгатэ. Песянаймы вазь кулэмен, анаймес будэтэм ни кыкетӥ кышноез. Нылыз сярысь атаез туж сюлмаське вылэм, вань кужымзэ но валамзэ сётэм солы. Висьыны усьыса, анаелы туж ӵем вераллям: - Нылы, быдэ вуыса бызёд, нылпиосыд луозы - пионере, комсомолэ, коммунистэ медам пыре, бератаз со ваньмыз быроз. Янгыш карыса, вӧсь карыны шедьтозы я мар. Колхозъёс кылдозы - эн пыр отчы, кема уз кыстӥськы колхоз улон. Атаезлэсь кылзӥськыса улыны турттӥз, дыр, анай. Пионере, комсомолэ пырамы ик, коммунист луыны ӧмгес быгатэ. Анаен атай колхозэ ӧз пыре, ваньбурзэс таламзы бере но. 1935-тӥ арозь нимаз улӥзы. Ӧчкарем кадь, гырем-кизем бусыязы ваньмыз удалтэ, пудо-животсы йылэ вылэм. Но ӧз сётэ семьямылы огсыр улыны, юртъер котырмес, пудо-животэз выт тырыны каризы. Атай кошке палэнэ, уже интыяськыса, милемыз но сьӧраз нуон вылысь. Озьы анаймы куать пичи нылпиосын пыдйылчие потэ. Агаймылы Павел Сергеевич Калининлы соку дас вить арес вылэм. Варзи-Ятчи школаез "витьёслы" йылпумъяса, Гульшурмае улыны кошке, ужаны пыре отысь спиртзаводэ. Бадӟым бекчеосын спиртэз Казане пароходэн келяса ветлэм. Ужаз отын агаймы куинь ар, ми но со дорын улӥмы соку. Отӥяз агаймы кошке Ижкаре, счетовод-бухгалтер луыса ужа заводын, пумен дышетске. Аслаз улон комнатаез вал ни, трос книгаосыз. Егит дыръяз ик агай улонэз валаны тыршем, котьку вылэм калык радын. Ижысен ик кошке Быдӟым оже, сюре ленинград фронтэ. Ожмаськиз радист-морзист луыса. Ӵем дыръя ивортоно луэ вал, пе, штабе: ыбылэ мон вылэ - котырам фашистъёс. Пырпотэм Ленинград блокадаез. Со нуналъёс сярысь Пакон агайлэн бӧрдытэк верамез уг луы. Туж трос калык, пе, быриз сютэм но кынмыса. Кулэм муртъёс вылтӥ канжаськыса ветлӥмы, шуэ. Городын одӥг пуны, писэй, тылобурдо вылымтэ ни - ваньмыз сиемын. Но военнойёслы кӧнялы ке капчигес ик вылэм паёк ласянь, куд-ог дыръя спирт но, пе, сётылӥзы. Цинга кутэмлэсь кузял шӧмо вож ву ютытӥллям - пужым лыслэсь пароссэ. Блокадаын дыръяз ик агаймы сӧсырмыны шеде, сюре госпитале. Отысь потэ ни Ленинградэз мозмытэм бере. Доре бертэ 1944-тӥ арын, сюлэм быгытаз мертчем чалепен. Врачъёс дораз лэзиллям, кема, пе, уз чида улыны. Ми соку улӥськом вал гурт пумысь бусыын сылӥсь буш коркан. Паймыса но вожъяськыса учкылӥм солдат дӥськутэн ветлӥсь агаймы шоры, уллёен ветлӥськом вал сьӧраз. Висёнэз шоры учкытэк, агаймы кема ик ӧз ялкары, милемды Шадрасак-Кибьяе интыяса, кышноеныз улыны кошко Алнаше. Нырысь ужа столовойлэн кивалтӥсез луыса, собере нош ик счетоводэ-бухгалтере кариське. Соку Алнашын усьтӥськизы бухгалтеръёсты дасянъя курсъёс. Агай отын вал одӥгез валтӥсез-бергатӥсез ужась. Вакчи дыр куспын вань колхозъёсысь бухгалтеръёсты дышетӥзы. Курсъёсты быдтэмзы бере, ужамзэс эскерыса, вань гуртъёстӥ ветлӥз на. Витьтонэтӥ аръёсы Пакон агай кышноеныз кошке Завьял ёросысь Люк черкогуртэ. Отчы ик улыны интыяськизы, пуктӥзы улыно-вылыно корка. Татын ик вордӥськиз Сережа пизы. Улонзы радъяськиз, номырлы ӧз ёрме: бадӟым юртъерзы, пудо-животсы, машиназы, мушъёссы вал. Соос шоры вожъяськыса но учкылӥзы, дыр. 1995-тӥ арын Пакон агай кышнозэ ватэ. Нош одӥг ар ортчыса, лек тылпу сутэ вань люкам ваньбурзэ. Пиез нимаз улэ ни вал. Висись пересь муртлы со туж бадӟым шуккет луиз. Но агай ӧз сётскы, ӧз куасалскы, али но пыд йылаз сылэ. Та дыре улэ пиеныз, солэсь нылпиоссэ будэтыны юрттэ. Павел Сергеевич Калининлы 12-тӥ феврале тырмиз 80 арес. Витьтон вить арлэсь ятыр нуллэ ни со сюлэмаз лек ож тылӝулэсь тодметсэ. Туж мӧзмыса тодаз вае Ляли палась ошмесъёсты. Йыл кыӵ ӧр бамалысь пушмульы бичамъёсыз но уг вуно, син азяз весь улэ гурт дорысь вӧсяськон гурезь. Луысал на ке выльысь улыны, со гольык кылем гурезь бамалъёсы писпуос, пе, мерттысал. А.ПАВЛОВ, Ижевскын улӥсь. * Павел Сергеевич Калинин егит дыръяз. Чебер пипу Ваньмызлэн сямен куаро писпуослэн тужгес чебер дырзы - тулыс яке гужем, сяськаяськыкузы. Нош пипу вань калыкез синмаськытэ сӥзьыл, куарзэ уськытон азяз. Та вакытэ кыӵе гинэ пипу арамае уд вуы - ӵуж, горд, льӧль, курень буёл тэлез пӧрмытэ, зэмос выжыкыллы. Пипуэз куд-огез уггес дунъяло ке но, солы уноез синмасько. Та писпу угось быдэс шаерамы вӧлмемын. Пӧртэм удысъёсын уже кутӥське. Тросэз гуртъёс дорын пипу арама будэ. Шаерамы вить гурт та писпулэсь нимзэ нуллэ. Озьыен, сое уноез ярато. Мон но соос пӧлын. Та куамын вить метр ӝужда будӥсь пурысялэс-вож, вольыт суло писпуэз котькин тодма, луоз. Солэн котырес, пинё-пинё куарез тӧлтэм дыръя но выре-шудэ. Пипу арамаын пӧртэм мульы ваись будосъёс пушъё. Нош адямиез золгес шумпотто отын будӥсь губиос. Уката ик - гордйыр (подосиновик). Та чебер губи яра шыд пӧзьтыны, нош толалтэлы сое сылалтыса но куасьтыса дасяло. Небыт юг-юг пуэзлэсь усточиос пӧртэм арбериос лэсьто. Эстӥськыку но пипу трос пӧсьсэ поттэ. Пипулэсь пучызэ, куарзэ, сулзэ куто, уно висёнъёсты эмъяку. Ты, кызьпуйы, ӝуш, кӧт, пинь, кус бурмо, куарезлэсь дасям чай юыса. Шуо: пипу кужымез басьтэ. Кинлэн мултэс, солы туж умой. Пипу тэльын шутэтскем бере, ӟеч-ӟеч кӧлоно. Нош ӟеч изьыса, мылкыд но капчи луэ, тазалык но умой. Н.Возисов. Разъяснения по референдуму Удмуртской Республики, назначенному на 26 марта 2000 года 26 марта 2000 года РЕФЕРЕНДУМ УДМУРТСКОЙ РЕСПУБЛ ПОСТАНОВЛЕНИЕ ГОСУДАРСТВЕННОГО СОВЕТА УДМУРТСКОЙ РЕСПУБЛИКИ О назначении референдума Удмуртской Республики по внесению поправки в часть 1 статьи 10 Конституции Удмуртской Республики Рассмотрев инициативу депутатов Государственного Совета Удмуртской Республики и материалы, представленные Президиумом Государственного Совета Удмуртской Республики, на основании статьи 15 Закона Удмуртской Республики "О референдуме Удмуртской Республики" Государственный Совет Удмуртской Республики постановляет: 1. Назначить референдум Удмуртской Республики на 26 марта 2000 года по вопросу: Принимаете ли Вы поправку в часть 1 статьи 10 Конституции Удмуртской Республики, изложив ее в следующей редакции: "1. Государственную власть в Удмуртской Республике осуществляют Государственный Совет Удмуртской Республики, Президент Удмуртской Республики, Правительство Удмуртской Республики, Конституционный Суд Удмуртской Республики, мировые судьи Удмуртской Республики. В Удмуртской Республике могут образовываться иные органы государственной власти. Порядок их формирования и компетенция определяются законами Удмуртской Республики в соответствии с федеральным законодательством." 2. Согласовать обращение Избирательной комиссии Удмуртской Республики к Центральной избирательной комиссии Российской Федерации о выполнении функций территориальных и участковых комиссий по проведению референдума Удмуртской Республики соответствующими избирательными комиссиями по выборам Президента Российской Федерации. Председатель Государственного Совета Удмуртской Республики А.А.ВОЛКОВ г. Ижевск, 24 января 2000 года, � 1423-ИИ Часть 1 статьи 10 Конституции Удмуртской Республики Действующая редакция 1.Государственную власть в Удмуртской Республике осуществляют Государственный Совет Удмуртской Республики, Правительство Удмуртской Республики, суды Удмуртской Республики. Предлагаемая поправка 1. Государственную власть в Удмуртской Республике осуществляют Государственный Совет Уд- муртской Республики, Президент Удмуртской Республики, Правительство Удмуртской Республики, Конституционный Суд Удмуртской Республики, мировые судьи Удмуртской Республики. В Удмуртской Республике могут образовываться иные органы государственной власти. Порядок их формирования и компетенция определяются законами Удмуртской Республики в соответствии с федеральным законодательством. БЮЛЛЕТЕНЬ ДЛЯ ГОЛОСОВАНИЯ НА РЕФЕРЕНДУМЕ УДМУРТСКОЙ РЕСПУБЛИКИ 26 марта 2000 года РАЗЪЯСНЕНИЕ ПОРЯДКА ЗАПОЛНЕНИЯ БЮЛЛЕТЕНЯ Поставьте любой знак в пустом квадрате под словом "ДА", если Вы голосуете за принятие вопроса, вынесенного на референдум Удмуртской Республики, либо в квадрате под словом "НЕТ", если Вы голосуете против принятия вопроса УДМУРТ ЭЛЬКУНЫСЬ РЕФЕРЕНДУМЕЗ ОРТЧЫТОНЪЯ БЮЛЛЕТЕНЬ 2000 арын 26 южтолэзе БЮЛЛЕТЕНЕЗ КЫЗЬЫ ПУСЪЁН СЯРЫСЬ ВАЛЭКТОН Кыӵе ке но пус пуктэ "БЕН" кыл улысь буш квадрата, Удмурт Элькунысь референдуме пуктэм юан понна куарадэс сётӥськоды ке, яке "УГ" кыл улысь квадратэ, референдуме пуктэм юанлы пумит ке луиськоды Принимаете ли Вы поправку в часть 1 статьи 10 Конституции Удмуртской Республики, изложив ее в следующей редакции: "1. Государственную власть в Удмуртской Республике осуществляют Государственный Совет Удмуртской Республики, Президент Удмуртской Республики, Правительство Удмуртской Республики, Конституционный Суд Удмуртской Республики, мировые судьи Удмуртской Республики. В Удмуртской Республике могут образовываться иные органы государственной власти. Порядок их формирования и компетенция определяются законами Удмуртской Республики в соответствии с федеральным законодательством. " Умоен-а Тӥ лыдъяськоды Удмурт Элькунлэн Конституциезлэн 10-тӥ ёзысьтыз нырысетӥ люкетаз воштон пыртонэз, сое тазьы гожтыса: "1. Удмурт Элькунын кун властез быдэсъяло Удмурт Элькунысь Кун Кенеш, Удмурт Элькунлэн Президентэз, Удмурт Элькунысь Правительство, Удмурт Элькунысь Консти-туцияя Суд, Удмурт Элькунысь мировой судьяос. Удмурт Элькунын кун властьлэн мукет ёзъёсыз но кылдытӥськыны быгато. Соосты кылдытон но ужатон радлык тупатӥське Удмурт Элькунлэн катъёсызъя но федеральной катрадлыкез лыдэ басьтыса. " Порядок заполнения бюллетеня для голосования на референдуме Удмуртской Республики Если гражданин голосует за принятие вынесенного на референдум Удмуртской Республики вопроса, он ставит любой знак в квадрате под словом "ДА/БЕН". Если гражданин голосует против вынесенного на референдум Удмуртской Республики вопроса, он ставит любой иной знак в квадрате под словом "НЕТ/УГ". Бюллетени, по которым невозможно установить волеизъявление гражданина, в частности такие, в которых любой знак поставлен в двух квадратах или не проставлен ни в одном из них, считаются недействительными. Избирательная комиссия Удмуртской Республики. Буре ваён Парашютэн тэтчанъя сӥё-дано спортсменлэн Владислав Крестьянниковлэн нимыз 60-тӥ аръёсы ялан чузъяськылӥз. Можгалан будэм пияш дуннелэсь рекордъёссэ 40 пол выльдӥз. 100 утэм медалез пӧлысь ӝыныез зарни вал. Можгалась шаертондонъя музейын 5-тӥ мартэ дано землякмылэн 60 арес тырмонэныз валче буре ваён ӝыт ортчиз. Г.Александров. СПОРТ Дась лу, ожгарчи! Алигес шаерысьтымы ожгар клубъёс но кадет классъёс кужымзэс мертазы, республикаямы нырысетӥ интые потон вылысь. 13 командаысь пиос 5 иськеме куасэн бызьылӥзы но пистолетысь ыбылӥзы. Зол пелляськись тӧл но сулеп лымы егитъёслэсь мылкыдзэс ӧз сӥяты, эшшо но пуромытӥз. Секыт лымы сюресэз ваньмызлэсь ӝог ортчизы "Граница" клубысь Динар Вахитов, Сергей Даниленко но Александр Алыков. Двоеборьелэн мукет удысаз, ыблӥськонын, азьпала потӥзы Ижысь "Дельфин" клубысь Дмитрий Пермяков но Станислав Сметанин, куинетӥ интыын - Можгалась "Авиатор" клубысь Денис Копытов. Кык нунал ӵоже нюръяськыса, огъя зачётын вормисе потӥз Ижысь "Граница" ожгар клублэн командаез. Кыкетӥ интыын шоркарысь 4-тӥ профучилищеысь кадетъёслэн командазы, куинетӥ интые потӥз Ижысь "Дельта" клуб. Нимаз адямиос пӧлын вормиз "Дельтаысь" Александр Пантюхин, кыкетӥ луиз 4-тӥ профучилищеысь Владимир Перевощиков. "Рекрут" клубысь Максим Юрьев куинетӥ интые потӥз. А.Иванов. ГУРТ УДЫС Озьы луыны кулэ: Кин сюдэ - со ик кивалтэ Музъем ужасьёс понна туж кысык вакытэ Ижын 17-тӥ мартэ ортчиз Удмуртиысь колхозъёслэн нырысетӥ съездзы. Отын ӝутэмын вал сыӵе лэчыт ужпумъёс, кудъёссэ али ик сэрттытэк, гурт хозяйствоослэн ӵуказе нуналзы ӧвӧл. Залын - тодмо колхоз кивалтӥсьёс, устоосыз пӧлысь устоосыз, кудъёсыз туннэ но, шуг-секытъёслы сётскытэк, ас удыссэс азьлань нуо. Тани соослэн нимъёссы: И.П.Перевощиков, В.Е.Калинин (Вавож ёрос), В.А.Никитин, Н.Ф.Чувашов (Завьял ёрос), И.П.Чирков (Игра ёрос), , А.Б.Белослудцев (Каракулино ёрос), А.В.Серых (Ува ёрос). Татын ик тодмо учёнойёс В.П.Ковриго, М.И.Шишкин, В.Н.Яковлев. Ужрад ортчиз Кун Кенешысь, Правительствоысь, Гурт хозяйствоя но сиён-юонъя министерствоысь кивалтӥсьёстэк. Син шоры ӧз йӧтэ Кун Кенешысь туала депутатъёс но, В.А.Никитинэз вератэк, гурт хозяйствоосын кивалтӥсьёс пӧлысь солы огназ гинэ депутат луыны шуд усиз. Мар бен кулэ та ӧтчаме люкаськем делегатъёслы? Эскеремын кык валтӥсь ужпум: гурт удыслэн туала югдурез но азинсконэз но Удмуртиын 2000-тӥ-2002-тӥ аръёсы музъем реформаез ортчытонъя кун программалэн ужпумъёсыз. Нырысетӥ ужпумъя вераськиз Завьялово ёросысь "Путь Ильича" колхозлэн тӧроез, Кун Кенешлэн депутатэз Валерьян Афанасьевич Никитин: - Туала союзъёс, партиос чик но уг сюлмасько гурт калыклэсь куронъёссэ быдэстыны, меӵак вераса, соос гурт удыслэсь быдэсак палэнскизы. Соин ик кылдытоно асьмелэсь, колхозъёслэсь, союззэс. Огазеяськоно секыт югдурысь валче потон понна. Шонерзэ верано ке, Гурт хозяйствоя но сиён-юонъя министерство но Правительство ас азязы сыӵе ик ужпум пукто: гурт удысэз кризисысь поттыны. Но улонын мукет сямен кошке. Кылем арын республикамылэн бюджетысьтыз гут хозяйстволы висъяны учкемын вал 252,8 миллион манет, висъямын - 37 миллион. Кин янгыш? Гурт хозяйствоя но сиён-юонъя министерство, кудӥз ляб сюлмаськиз ас удысэзлы юрттон сярысь. Таяз Кун Кенеше депутатэ быръемын 36 гурт округысь адямиос, но агропромышленной комплексъя комиссилэн ужаз пыриське 7 депутат гинэ. АПК-лэсь ужпумъёссэ эскерыку, гурт удыслы дурбасьтэ 10-20 депутат, нош 16-ез депутат быдэсак палэнскиз та ужпумъёслэсь. Соин ик асьмеды утьыны нокин уг ни ке быгаты, огазеяськоно вань колхозъёслы но кооперативъёслы. Валче ужано "Удмуртилэсь экономикаын куронъёссэ утён" движениен но "Удмурт Кенеш" ассоциациен. Туннэ республикаямы ужа 166 колхоз но кооператив, нош движение пыро куд-ог банкиръёс, ужбергатӥсьёс но предприятиослэн кивалтӥсьёссы, кудъёссэ туж сюлмаськытэ туала югдур. 1999-тӥ ар гурт хозяйство понна туж секыт вал. Гыроно-кизёно бусыосмы республикаын 1 миллион 516 гектар. Но со пӧлысь кылем арын аналтэмын вал 120 сюрс гектарез, 1998- тӥ арын сярысь, со 80 сюрс гектарлы тросгес луиз. Будӥзы дунъёс кизер эстӥськонлы. Республикамылы бадӟым шуккет лэсьтӥз инкуазь но, бӧрсьысь бӧрсьы кык ар кӧс улӥз, ю-нянь октонъя 20 арлы берлань чигнамы. Асьмедыз сюдон понна гинэ 760 сюрс тонн ю-нянь кулэ ке, басьтӥмы 478 сюрс тонна гинэ. Ушъяськымонэз ӧвӧл пудо вордон, йӧл кыскон, етӥн будэтон удысъёсын но. Кылем арын куать хозяйство гинэ одӥг скаллэсь 3000 килограммлэсь ятыр йӧл кыскиз. Быдэс республикая ке верано, 1998-тӥ арын сярысь, йӧл 12 сюрс тонналы ӧжытгес кыскемын, сӥль поттон 4,3 сюрс тонналы кулэсмемын. Хозяйствоослы туж люкето электрокужымез кысылон учыръёс. Соин йырин сӧриське электрообрудование, приборъёс, компьютеръёс, гумыос. Но нокин со понна кыл уг куты. Тылэз кысон учыръёс вал ни Вавож, Красногорск, Кез, Завьялово, Пичи Пурга ёросъёсысь хозяйствоосын. Гурт удысын югдур чидантэм луиз. Берло 2 ар ӵоже гинэ АПК-ысь 7761 адями кошкиз, 138 кивалтӥсь (442 пӧлысь) воштӥськиз. Мугез валамон: кинлэн бен туннэ ужамез потоз, 300-600 манет уждун басьтыса. АПК-ын ужась специалистъёслы котыр ласянь юрттыны мед тыршозы вылэм районъёсысь но министерствоысь кивалтӥсьёс. Музъем кусыпъёсты выль сямен радъян вылысь 1991-тӥ-1998-тӥ аръёсы пӧртэм постановлениос кутылэмын вал, соосъя хозяйствоос ӟеч музъемъёссэс дунтэк сётылӥзы фермеръёслы, сад-бакча возисьёслы, коттеджъёс-гаражъёс пуктӥсьёслы. Колхозъёслэн ваньбурзы - музъемзы - пайёслы люкылэмын. Озьыен, 160 сюрс адямилы музъем кузё луон сярысь право сётэмын. Но малы меда соос та дырозь ӧз узырме? Туннэ уже кутӥськытэк тамында музъем кылле: 640 гектар - сад-бакча кооперативъёслэн, 5000 гектар - гурт администрациослэн, 5340 гектар - фермеръёслэн, 3000 гектар - подсобной хозяйствоослэн. Музъем реформаез ортчытонъя программалы Удмуртиын сюрес усьтӥмы ке, югдур уката но кышкыт луоз, угось отын меӵак вераськон мынэ музъемез приватизировать карон сярысь. Колхозъёслэн союзэнызы но "Удмуртилэсь экономикаын куронъёссэ утён" движенилэн кивалтӥсь луыса Гурт хозяйствоя но сиён-юонъя министерстволы меӵак ӵектэме потэ: гурт хозяйствоен кивалтон амалъёсты воштоно! Уг быгато огдыре ик 300 пала гурт кивалтӥсьёс янгыш луыны умойтэм малпаськыны но ужаны. Вылаз ик, соослы дурбасьто трос специалистъёс, учёнойёс. Мар кароно? Зэмзэ ик, мар кароно гурт удысэз кекатӥсь югдурысь поттон понна? Экономика наукаосъя доктор профессор Михаил Иванович Шишкин шуиз, учёнойёс, пе, кык сюрес ӵекто: яке выльысь берытсконо 70-тӥ-80-тӥ аръёсы, куке экономикаез быдэсак государство радъяса возьылӥз, яке рынок реформаосты азинтоно. Но профессорлэн малпамезъя, гурт хозяйстволэн кивалтӥсьёсызлы умойгес луысал кыксэ ик амалъёсты уже кутыны. Та сярысь ик вераськиз Вавож районысь Мичурин нимо колхозысь экономист Нина Николаевна Елышева. Та хозяйство республикаямы огез устоез лыдъяське. - Котькуд хозяйство ас ужан сюрессэ шедьтыны кулэ, - шуиз Н.Елышева. - Вылӥысен кивалтон амалъёслэсь но куштӥськоно ӧвӧл, рыноклэсь куронъёссэ но лыдэ басьтоно. Зарни шорзэ шедьтӥм ке, ваньмыз умой луоз. Зэм, туж дыртӥм колхоз музъемез пайлы люкылонэн. Куд-ог колхозникъёс кемалась палэнэ кошкыса уло ни, но пайёссэс судэ вазиськыса ке но куро. Суд соослы дурбасьтэ. - Хозяйствоен кивалтыку, бадӟым инты басьтэ ачиз кивалтӥсь, - шуиз Нина Николаевна, - кыӵе кивалтон амалъёсты со быръе, озьы ик улӥськом. Милям кивалтӥсьмы Калинин Валентин Егорович вань калыкмылэсь ужаны мылкыдзэ ӝутэ. Кыӵе гинэ малпанъёсын со милемыз уг бурдъя! Сыӵе адямиен артэ урод ужаны но возьыт. Кызьы шуиз Н.Н.Елышева, хозяйство улонэ умой пыӵатэ хозрасчёт амалэз но, планъёсъя ужанлэсь но, рыноклэсь но ӧз куштӥськы. Соин ик, вылды, Россиысь данак хозяйствоосты азьпалтыса ужаськом. - Уг яра палэнскыны азьвыл аръёсы люкам ӟеч кивалтон амалъёслэсь, - шуиз мукетыз тодмо гурт кивалтӥсь, Кун Кенешлэн азьвыл депутатэз Николай Федорович Чувашов. - Сое валаны кулэ: гурт хозяйство ке ӧвӧл, государство но ӧвӧл. Гитлер но асьме музъемъёсмес киултэм бере солдатъёсызлы ӧз лэзьылы быдтыны асьме вӧй шуккон, етӥн сэстон предприятиосты но МТС-ёсты. Отысь специалистъёсты но улэп кельтыны курылӥз. Нош мар лэсьтӥмы асьмеос? Вакчи дыр куспын пазямы колхозъёсты, тӥямы ӟеч технологиосты, кунгож сьӧры келяськомы удобрениосты. Татарстанын одӥг колхоз но быдтэмын ӧвӧл ук. Мар люкетэ асьме вылӥ кивалтӥсьёслы гурт удысэз ӝутыны? Табере тазьы валэкто: Президент ке, пе, Удмуртиын луысал, сыӵе калэ ӧй вуысалмы. Президент быръён бордын шат ужпум? - Президентэн гинэ ке ваньмыз герӟаськемын, малы соку кулэ на асьмелы Правительство, Кун Кенеш, - шуиз Каракулино ёросысь "Вормонлы - 40 ар" хозяйстволэн киввалтӥсез Александр Борисович Белослудцев. Нянь но политика ог- огенызы валче герӟаськемын, шуиз со. Нянь ке ӧз луы, оло, соку асьме политикъёс гурт удыс шоры учкыны кутскозы. "Кин сюдэ, со ик власть", - шуиз мукетыз Игра ёросысь хозяйстволэн кивалтӥсез Иван Петрович Чирков. Шонер но зол верамын. Но туала предъёсты власть шуыны нокызьы но ым уг усьтӥськы. Музъемзы пичиен-пичиен люкылэмын ни. Соин ик музъем реформаез ортчытон сярысь программаез калыкен эскерытэк кутыны уг яра, шуиз учёной Вячеслав Никитович Яковлев. Удмуртиын вашкала дырысен ноку но музъем кузёос ӧй вал. Музъем община ки улын возиськылӥз. Колхозъёслэн нырысетӥ съездазы люкаськемъёс бадӟымесь но лэчытэсь решениос кутӥзы. Удмуртиын ортчытыны малпам музъем реформаосты соос калыклы пумит чаклам политикаен лыдъязы, озьы ик оскымтэзэс веразы гурт хозяйствоя но сиён-юонъя министрлы П.Першинлы. Та решениос пумысен вераськонэз соос выжтыны малпало 21-тӥ мартэ Завьяловоын ортчоно гурт хозяйствоослэн бадӟым кенешазы. Татьяна БАННИКОВА. * "Гурт калык музъем реформа сярысь али номыр уг тоды. Музъем крестьянъёс киын луыны кулэ", - шуо Можга ёросысь колхоз кивалтӥсьёс К.Фатыхов ("Алча" колхоз), В.Александров ("Верхнеюринское" ОАО), Г.Николаев ("Восход" колхоз). Туспуктэмъёсыз Владимир Беломорскихлэн. Россия Федерациысь Юстицияя министерство, Удмурт Республикаысь Кун Кенеш но Правительство, Россия Федерациысь Президентлэн Удмурт Республикая ужоскето муртэз, Россия Федерациысь Юстицияя министерстволэн Удмурт Республикаысь Кылкутытонъя управлениез кайгыро нимысьтыз учыръёслы дасям "Кречет" отделлэн штурмъя ёзэныз кивалтӥсь внутренней службаысь старший сержант Закиров Ильфат Индулисович нимысьтыз учыръёслы дасям "Кречет" отделлэн штурмъя ёзысьтыз инспектор внутренней службаысь младший сержант Бахарев Валерий Александрович Чечня Республикаын ожъёс дыръя бырыны шедеменызы валче но ӵыжы-выжыоссылы, матысь адямиоссылы но эшъёссылы мур куректэмзэс верало. Улонысь дырызлэсь вазь кошкизы Родиназэс, ас калыксэс пумтэм юн яратӥсь муртъёс. Соослэн сайкыт тусбуйзы весяклы кылёз сюлэмъёсамы. Киосыз зарни Гавриил Григорьевич Григорьевез Якшур-Бодья палан гажало. Гуртлэн-а, ёрос администрацилэн-а праздниксы - воргорон котькытын дуно куно. Солэн киосыныз лэсьтэм ужъёс синмаськыто но паймыто. Ачиз Г. Григорьев Чур посёлокын врач луыса ужа. Ваньмон дыръяз нош кияз кутэ лэсьтӥськон тӥрлык - вӧлӥське, вандылэ, волятэ, буя... Озьы кылдытэ аспӧртэмлыко скульптураос пулэсь чильтэръям арбериос... Ма, ваньзэ вераса но уд быдты. Мон ачим но киужен вырыны яратӥсько бере, та зарни киё воргоронэз тӥледлы но возьматэм потӥз. Гожтэмез но туспуктэмез Владимир Беломорскихлэн. Вӧй дыр ортчиз - ӟечбур, тулыс! Ортчемаз кӧс нуналэ "Югдон" посёлоклэн куасэн бызьылонъя стадионаз люкаськылӥзы МВД-лэн Юридической институтэзлэн Ижысь филиалаз ужасьёс. мумы-бубыос шулдыр интые нылпиоссэс но ваиллям. Ӵапак покчиослыгес ик но чакламын вылэм таиз ужрад. Бадӟым кыралын люкаськемъёс кема шулдыръяськизы, шудӥзы, серекъязы. Воргоронъёс кужымзэс мертазы гиря ӝутъянъя, граната лэзьянъя, нылпиос пистолетысь ыбылӥзы. Нош канатэз кысканы нылкышноос но юрттӥськизы. Вормись командалы уго быдэс ящик сур ӵектӥзы. Но келясьёс-вормемъёс та нуналэ ӧй вал. Сур ваньмызлы тырмиз, вылаз ик, тулысэз пумитасьёсты вашкала сямъя чабей ӝукен но мильымен куноятӥзы. Г. ЮСАЕВ. Кооператоръёслэн кенешсы азьын Рауф Каримов: "Нырысь интыын - пайщикъёс" Рауф Каримов - республикаямы тодмо кивалтӥсь. Солэн быдэс улонэзгерӟаськемын гуртысь вузкаронэн. Уно аръёс ӵоже ини кивалтэ Удмуртпотребсоюзэн. Берло дас аръёссэ, выльдӥськыны, рынокен экономикае выжыны кутскем бере, та удыслы но капчи ӧй вал. Но Рауф Мухаметовичлэн тыршеменыз-сюлмаськеменыз гуртын вузкарон ӧз куашка, одӥг магазин но пытсамтэ. Вылаз ик, Удмуртиысь кооператоръёс Россиын котьку азьпал радын, нырысетӥ-кыкетӥ интыын мыно. Газет лыдӟисьёслы гуртысь вузкарисьёслэн ужъёссы но куд-ог ужпумъёссы сярысь туннэ маде Рауф КАРИМОВ. Матысь дыре вань ёзъёсмы огсыр ужало, арысь аре азинко, юнмало. Ортчем арез но умой йылпумъям. Розничной товарооборотмы 790 миллион манетлэсь трос луиз, яке, валля арен ӵошатыса, 293 миллион манетлы уногес вузъёс вузамын. Кулэсмиз вузъёсты возён дыр. 1998-тӥ арын 35 нунал ке вал, миым - 27, нош сиён-юонъёсъя - 19 нунал. Вузкаронын озьы ик синӥз мултэс коньдон быдтон. Вань райпоосмы пайдаё ужазы. Асьмелэн оборотной средствоосмы 8,8 процентозь вуттэмын но 11,2 миллион манет тыр луизы. Райпоос пӧлысь тужгес но усто ужазы Игра, Шаркан, Ува, Каракулино, Пичи Пурга но мукет районъёсысь кооператоръёс. Соос данаклы трос вузкаризы, товарооборотсэс будэтӥзы но уно пайда басьтӥзы. Тани Играысь кооператоръёс районысь котькуд адямилы - 3400 манетлы вуз вузазы. Со быдэс республикаямы самой бадӟым лыдпус. Каракулиноын 3294 манетлы лэсьтэмын, Пичи Пургаын - 3085-лы. Вузкаронэз ялан син азьын возьыны, басьяськисьёслэсь кулэяськонъёссэс но куронъёссэс тодыны кулэ. Шуом, одӥг вуз уг ке мыны, дэмлано мукетсэ. Тани миым быдэс Удмуртпотребсоюзъя сахар вузан Удмуртпотребсоюзъя сахар вузан 2 поллы кулэсмиз но вань вузкарем пӧлысь 1,8 процентсэ гинэ басьтӥз. Ёросъёсын та ласянь юн пӧртэм суред. Кылсярысь, Игра но Пичи Пурга райпоос адямилы быдэ 7-8 килограмм сахар вузазы ке, Юкаменск но Можга - 1,3 килограмм гинэ. Берло дыре будэ мороженой вузан. Миым со 6 процентлы йылӥз. Таин вузкарон котьку пайда сётэ. Со сярысь пӧртэм кенешъёсын вераськонъёс потылӥзы. Играос миым 1,5 миллион манет тыр мороженой вузазы, Юкаменск но Глазов райпоос - быдэн 150-160 сюрс манетлы, нош Можга - 300 сюрс манетлы, яке, играосын ӵошатыса, 5 поллы ичи. Огъя товарооборотын одӥг куиньмосэз (34 процентэз) асьмелэн поттэм вузъёсмы но пыжиськемъёсмы. Отчы пыре калыкез сюдон но. Нош Глазов райпоын со лыдпус 40 процент луэ, Балезиноын но Ижын - 38, Воткинскын - 36 процент. Туннэ ми калыклы тырмымон пыжиськом нянь, поттӥськом макаронъёс, кондитерской изделиос, кудӟытӥсьтэм юонъёс, ӵынатэм чорыг, колбасаос но музонзэ. Асьмелэн поттэм вузъёсын вузкарон пайдаен берытске. Ялан будэтӥськом соослэсь ӟечлыксэс но кулэстӥськом дунзэс. Тани няньлы ватсаса вузкарон дун шорлыдын 20-25 процент пуктӥськом, нош Кез, Шаркан, Вавож, Сюмси райпоос 5-ысен 12 процентозь гинэ тупато. Мукетыз ужпум герӟаськемын поттэм вузъёсмес ӝоггес магазинъёсы вуттонэн но сое вузаны быгатонэн. Тани Кизнер, Балезино, Пичи Пурга районъёсын вузкарон интыосы няньзэс гуртъёсы вазь ӵукна ик 5-6 часэ вутто. Асьме продукциен вузкаронэз умой радъям понна адямиослы ватсаса уждун но сётоно. Товарооборотэз будэтыны юрттэ - промышленной вузъёсын вузкарон. Али Ижевскын вань куд-ог фирмаос, кудъёсыз меӵак кусып возё Самараысь майтал пӧзьтон заводэн, Пермьысь "Пемос" акционер огазеяськонэн но Свердловскысь "Уральские самоцветы" заводэн. Соос азьло дун басьтытэк вузъёссэс сёто. Шаерамы оглом майтал но мисьтаськон арбериос вузан синӥз ке но, таӵе вузъёс вузамын Ува (589 сюрс манетлы), Кизнер (238 сюрс манетлы), нош Глазов райпоын но Иж потребобществоын - чылкак быдэн 2-3 сюрс манетлы гинэ. Сюмси райпо одӥг ар ӵоже 3 холодильник вузаз, бускельёссы селтоос - 35. Берлоосыз басьяскисьёслэн куронъёссыя (заявкаоссыя) ужало но магазинъёсазы образецъёссы вань. Культурно-бытовой вузъёсын вузкарон озьы ик умой радъямын Игра, Яр, Пичи Пурга, Шаркан но Каракулино райпоосын. Соос юнэсь кусыпъёс возё но дыраз коньдон сёто "Ижбыттехникалы" но Витебскысь телевизоръёс поттӥсь заводлы. Соин ик сыӵе вузъёс вузкаронысь уг бырыло. Умоя лэсьтӥськон материалъёсын вузкарон. Со огъя товарооборотын 15 процент басьтэ. Миым 23 процентлы уногес вузамын цемент, 2 полы трос - пияла но рубероид, нош шифер -2,8 поллы. Устоосыз пӧлы нош ик пыро Игра но Пичи Пурга райпоос. Соос быдэн 12-14 вагон цемент но 4-6 вагон шифер вузазы. Вузкарон материалъёс озьы ик умой вузазы Балезино, Красногорск, Селта, Ува, Кез но Шаркан районъёсысь кооператоръёс. Нош та ласянь мылкыдтэк вузкаре Глазов райпо, со ваньзэ-ӧвӧлзэ 8 тонна цемент вузаз. Малы ке шуоно, Глазовысь "Оптовик" потребобщетсволэсь бадӟым дунын басьтӥз, нош "АССО-Инвест" фирмалы апреле басьтэм шиферез но пиялаез понна арлэн пумаз гинэ коньдонзэ тыриз. Глазовъёслэсь адӟем каре, шуыны луоз, Иж потребобщество. Огъя вераса, кытын малпаськыса вузкаро, калыклэсь куронъёссэс тодо но ассортиментсэс ялан паськытато, отын ужъёссы умой мыно. Вузкаронэз умоятыны озьы ик юрттэ магазинъёс лэсьтон, соосты выльдон, ӟеч оборудование басьтон но пӧртэм пумо вузъёс вузан. Тани кылем арын Шарканысь райпо райцентрын но Кипун гуртын вузкарон интыос арендае басьтӥз, Кез райпо - посёлокын, Игра райпо - Выль сюрес посёлокын, Киясово райпо - Киясово черкогуртын. Яр райпо посёлокын магазин пуктӥз. Дэбес райпо - Бадӟым но Пичи Чепца гуртъёсын, Пичи Пурга райпо - Иваново-Самарское гуртын. Играысь кооператоръёс миым 3 магазинэз арендае кутӥзы. Одӥгез со Лоза станциын. Отын кабзэ вузкарон интызы ӧй вал. Выль магазинъёс усьтэмен ӵош, Удмуртпотребсоюз вузкаре 569 пичи гуртъёсын. Отын одӥг магазинзы но ӧвӧл. Али милям 9 автомагазинмы. Кылсярысь, Селтаын 2 автомагазин тупатэм дыре (графикъя) ужа, калыклы кулэ вузъёс вуттэ, адямиослэсь куронъёссэс дыраз быдэсъя. Одӥг автомагазин 50 сюрс манетлы вузкаре. Тани Шаркан районын 44 гуртын магазинзы ӧвӧл, Вавожын - 36, Алнашын - 25 гуртын. Соин ик матысь дыре радъяно автомагазинъёслэсь ужзэс. Со калыклы кельше. Выльёссэ магазинъёсты пуктэмен ӵош, вужъёссэ но выльдӥськом. Вузкарон оборудованиез выльдон, холодильникъёс пуктон юрттэ товарооборотэз будэтыны. Тани Пичи Пурга, Завьялово но Воткинск райпоосын сыӵе магазинъёсын вузкарон 20-50 процентлы йылӥз. Кылсярысь, Игра посёлокысь "Бакча сиёнъёс" магазинэз тупатъямзы но усто оборудование пуктэмзы бере, 3 поллы уногес вузкаризы но оборотсы 450 сюрс манет тыр луиз. Отын тырмыт но ӝог быдэсъясько адямиослэн куронъёссы. Вылаз ик, выльдэм, чебер магазинэ басьяськисьёс, капчи мылкыдын лыкто. Калыклэн куремезъя, куд-огез магазинъёс ужан дырзэс кузёмытӥзы. Тани Дэбесысь "Дежурный" уин 2 часозь ужаны ӧдъямез бере, товарооборотсэ 60 процентлы йылэтӥз. Берло дыре кутскимы эмъюмъёс но вузаны. Аптекаос усьтэмын ни Ижысь потреобществоын, Алнаш, Сюмси, Пичи Пурга, Воткинск, Балезино но Кез райпоосын. Балезиноысь но Ижысь аптекаос миым быдэн 940 сюрс манетлы эмъюмъёс вузазы. Сюмсиысь аптека 28 сюрс манет пайда басьтӥз, Алнашысь - 10 сюрс манет. Паськыта гурт калыклы услугаос сётон. Миым 9,1 миллион манет тыр услугаос сётэмын, валля арын сярысь 2 поллы трос. Играын тани тупатъяло сложно-бытовой техникаез, умой радъямын кулэмъёсты ватон, дӥсь вандон, йыр ӵушкон но мукетыз. Кылем арын играос 319 сюрс манетлы услугос сётӥзы, нош кезъёс - 325 сюрс манетлы. Балезиноос туспукто, фотомастерской усьтӥзы, нош пичи пургаос калыклы пызь изо, транспортной услугаос но музонзэ сёто. Та уж кулэезъя радъямтэ Ува, Дэбес, Алнаш, Вавож райпоосын. Коопертивной промышленностья предприятиосын шӧдскымон будӥз нянь, булкаос пыжон, макаронъёс, кондитерской изделиос, консерваос поттон. Калыклы оглом 206 миллион манет тыр поттэмын, 1998-тӥ арен ӵошатыса, 70 процентлы уногес. Тани Уваысь пищекомбинат туэ кык толэзьскын минерал ву поттонэз 3 пол йылэтӥз, преникъёс - 2,5, зефир - 2 поллы. Производствое газэз кутон ужан амалъёсты умоятӥз. Юзматӥсь юонъёсты пластик посудае лэзьяськом. Со юрттӥз продукция поттонэз 2-5 поллы йылэтыны. Али 21 райпо макарон лэсьтэ. Миасс городысь выль туала оборудование басьтӥзы ни Балезиноысь потребобщество, Кез, Пичи Пурга, Воткинск но Яр райпоос. Озьы продукцилэн ӟечлыкез ӝутскиз. Арез умой йылпумъяз Можгаысь консерва поттонъя завод. Куашкан калэ вуэм предприятие пыд йылаз султэ ни. Татын 2312 сюрс банка уно пумо консерваос поттэмын. Планзэс 122 процентлы тырмытӥзы но 1509 сюрс манет пайда басьтӥзы. Соос уже кутӥзы банкаосты выль сямен бинялтонъя оборудованиез. Вылез пыӵа музон предприятиосын но. Ушъяськыны уг луы колбаса лэсьтонъя. Миым ваньмыз цехъёсмы изъян адӟизы. Озьы со луиз ичи но дуно продукция поттэмен. Трос кутӥське эстӥськон но будо музон расходъёс. Предприятиослы дыраз коньдон тырымтэен, производствоез азинтонын кылдо шуг- секытъёс. Озьы продукцилэн асдуныз но уг кулэсмы, шуыны луоз, Глазов, Юкаменск, Кез, Селта, Шаркан, Можга райпоос сярысь. Соос ноку дыраз коньдон уг сёто. Тани Уваысь вина цехлы 560-1000 манет тыронзы, Воткинскысь райполы - 100-260 сюрс, Можгаысь консерва лэсьтӥсьёслы - 180 сюрс, Ува райполы - 200 сюрс манет. Озьы вань бюджетъёсы выт тырымтэ понна "Бахус" ЗАО-лы 123,5 сюрс пени тупатэмын, нош Пенсиосъя фондэ 17,5 сюрс манет ватсаса тыроно луоз. Каллен азинске заготовка. Но миым та удысмы изъянтэк ужаз. Калыклэсь 2530 тонна йӧл басьтэмын, валля арын сярысь, 80 процент пала тросгес. Усто ужазы Селтаысь, Вавожысь, Шарканысь но Алнашысь йӧл октӥсьёс. 13200 тонна картофка дасямын, валля арен ӵошатыса, 2,2 поллы уногес. Бакча сиёнъёс 2300 тонна басьтэмын. Та ласянь ваньмызлэсь умойгес ужазы Можгаысь консерва завод, Ува, Завьял, Вавож но Кез райпоос. Соин ӵош ик пусйыны кулэ, та ужез йӧскадь радъямтэен уг быдэсъяськы сӥль но куос басьтонъя задание. Сӥль басьтэмын 3005 тонна (87,7 процент), нош куос - 34150 (76 процент). Кооперативной организациос миым 12,4 миллион манет пайда басьтӥзы, валля арын сярысь 1,9 миллион манетлы уногес. Потребокооперациез азинтонэ 18,8 миллион манет кутэмын, нош капвложениос 17,7 миллион манет луизы. Удмуртпотребсоюзлэн али 216,5 сюрс мурт пайщикъёсыз. Миым эшшо 1614 адями пайщике кутэмын. Та ласянь синмаськымон ужало Балезино, Красногорск но Воткинск райпоос. Али гуртысь 70,4 поцентэз улӥсьёс пайщикъёс луо, нош Сюмси райпоын - 42,3, Завьялово потребобществоын - 37,7 процент гинэ. Бадӟымесь луонлыкъёс вань на данак райпоосын. Ми али пайщикъёсын ужанлы нырысь инты висъяськом. Дасяз Геннадий Романов. Референдум азьын Удмурт Республикалэсь Конституцизэ "Россия Федерациысь улосъёсын кун властьлэн закон кылдытӥсь (калыкен быръем) но быдэсъясь ёзъёссэ радъянъя огъя принципъёс сярысь" федеральной законъя тупатон вылысь, отчы воштонъёс пыртонлэн кулэлыкез сярысь ужпумъя Малы воштыны кулэ Удмуртилэсь Конституцизэ? Россия Федерацилэн Президентэз 1999-тӥ арын октябрь толэзе юнматӥз "Россия Федерациысь улосъёсын кун властьлэсь закон кылдытӥсь (калыкен быръем) но быдэсъясь ёзъёсты радъянъя огъя принципъёс сярысь" федеральной закон. Отын верамын: вылӥ должностен муртэ калык быръе но со кивалтэ быдэсъясь властен. Нош Удмуртилэн Конституцияз та сярысь верамын ӧвӧл. Али вылӥ должностен муртэ быръё Кун Кенешлэн депутатъёсыз но со кивалтэ закон кылдытӥсь властен. Улосъёсысь законодательствоез федеральной законъя тупатон вылысь сётӥське кык ар. Удмурт Республика пыре Россия Федерацие, соин ик со кулэ Россилэсь законъёссэ быдэсъяны. Мар луоз, со дыр ӵоже ӧм вуэ ке законэ воштонъёс пыртыны но республикалы вылӥ должностен мурт бырйыны? Та учыре вылӥ должностен мурт юнматэмын луыны быгатэ Россия Федерациысь Президентлэн указэныз. Нош республика понна со туж ик устоез амал ӧвӧл. Президент бырйим ке, выль структура кылдытыны бюджетысь трос-а коньдон кошкоз? Удмурт Республикаысь Кун Кенешлэн депутатъёсыз кутӥзы "Удмурт Республикаын кун властез выльдонлы коньдон висъян радлык сярысь" постановление. Отын гожтэмын: Президентлэсь постсэ юнматонлы коньдон висъяськоз, республикалэн бюджетаз кунэн кивалтонлы чаклам уксёез лыдэ басьтыса. Ватсаса нокыӵе коньдон кулэ уз луы, кун служащийёслэн аппаратазы но ужасьёс уз йылэ. Удмурт Республикалэн Президентэзлэн администрациез кылдытэмын луоз Кун Кенешлэн но Праивтельстволэн аппаратъёсазы ужасьёс чотын. Маин пӧртэм луэ референдум юалляськонлэсь? Юалляськон ортчытыку кун властьлэн ёзъёсыз калыкен кенешо гинэ. Солы йылпумъянъёс лэсьтыса, кун органъёс адямиослэсь малпанъёссэс-ӵектонъёссэс лыдэ гинэ басьто созэ яке тазэ ужпумез эскерыку. Нош референдумын кутэм решенилэн выль юридической кужымез, сое воштыны уг луы ни. Удмуртиын азьло референдумъёс ортчылӥзы? Ӧз. Удмуртиын со нырысьсэ ортче. Удмуртиын улӥсьёс азьло юалляськонэ гинэ пыриськылӥзы. Нырысьсэ республикалэсь азьпал сюрессэ быръёз ачиз калык. 1999-тӥ арын 19-тӥ декабре Россия Федерациысь Кун Думае депутатъёсты быръён нуналэ адямиос веразы вал ини вылӥ должностен мурт пумысен асьсэлэсь малпанъёссэс. малы кулэ на референдум? Юалляськон ортчиз вылӥ должностен мурт кызьы ниман пумысен гинэ: "Республикалэн йырыз" яке "Президент". Тросэз бырйисьёс мылкыдзэс веразы "Президент" пумысен. Сое лыдэ басьтыса, Удмурт Республикалэн Конституциезлэн 10-тӥ ёзэтаз вылӥ должностен мурт табере нимаське "Президент" шуыса. 2000-тӥ арын 26-тӥ мартэ ортчоно референдуме поттэмын Конститцилэн воштонъёсын но ватсанъёсын 10-тӥ ёзэтэз, кудаз Удмурт Республикаысь кун властьлэн ёъёсыныз ӵош поттэмын "Презиеднт" пумысен но. Быгато-а асьсэос депутатъёс Удмурт Республикалэн Конституцияз тупатъянъёс пыртыны? Бен, быгато вал. Луэ вал та сюрестӥ мыныны. Но Кун Кенешлэн Тӧроез А. А. Волков дэмлаз та ужпумез референдуме поттыны. Малы ке шуоно, Удмуртиын кивалтон власть быръён республикаын вань улӥсьёс понна валтӥсь ужпум луэ. Референдум пыр калык эркын вераны быгатоз ас мылкыдзэ. Кин ужа Удмурт Республикалэн Конституцияз воштонъёс но ватсанъёс пыртон бордын? 1999-тӥ арын 16-тӥ ноябре Кун Кенешлэн постановлениеныз кылдытэмын Конституцияя комиссия. Конституцие воштонъёс пыртыку, республикаысь вань гражданъёслэн малпанъёссы лыдэ мед басьтӥськозы шуыса, комиссие пыртэмын калык огазеяськонъёс, политикая пӧртэм партиосысь, интыын аскивалтонъя ёзъёсысь адямиос, Удмурт Республикаысь Правительстволэн членъёсыз но Кун Кенешлэн депутатъёсыз. Та уже озьы ик пырисько вылӥ тодон-валанъёсын юристъёс - Удмуртиысь устоосыз специалистъёс. Юристъёслэн ужась группаязы пыртэмын покуратуралэн ёзъёсаз, Юстицияя министерствоын, Вылӥ судын, Удмурт кун университетысь правоя институтын ужасьёс, Кун Кенешысь но Правительствоысь Правоя управлениослэн кивалтӥсьёссы, Кун Кенешысь кун ужез радъянъя нациосын ужан политикая но интыын аскивалтонъя комиссилэн кивалтӥсез. Удмурт Республикаын вылӥ должностен муртэ Президент шуыса ниманэз умойтэмен лыдъясько. Россиын одӥг гинэ Президент луыны кулэ. Та сярысь вераськон нуоно вал 1993-тӥ-1994-тӥ аръёсы федерацилэн мукет улосъёсаз кун ужез радъян мынон вакытэ. Унояз республикаосын вылӥ должностен муртэ Президент нимало. Мукет республикаосын вань-а Президентъёс? Бен вань. Со - Адыгея, Башкортостан, Бурятия, Ингушетия, Кабардино-Балкария, Калмыкия, Марий Эл, Саха (Якутия), Северной Осетия, Татарстан, Тыва, Чувашия. Ньылез республикаосын - Алтайын, Карачаево-Черкессиын, Комиын, Мордовиын - вылӥ должностен муртэ Республикалэн йырыз нимало. Кун Кенешлэн Тӧроезлэн, югдурез огсыр радъян понна, тырмыт ӧвӧл шат полномочиосыз? Удмурт Республикаысь Кун Кенешлэн Тӧроез кун властьлэн быдэсъясь органэныз уг, калыкен быръем ёзэныз кивалтэ. Нош со пумит луэ "Россия Федерациысь улосъёсын кун властьлэсь закон кылдытӥсь (калыкен быръем) но быдэсъясь ёзъёссэ радъянъя огъя принципъёс сярысь" Федеральной законлы. Республикаысь вылӥ должностен муртлэн полномочиосыз али шаерамы ортчись унояз ужрадъёсы меӵак пыриськыны но дыраз но пайдаё амалъёсты пыӵатыны. Удмурт Республикаысь Президентлэн нимысьтыз кыӵе полномочиосыз луозы? Юристъёслэн Конституция комиссиен кылдытэм ужась группазы "Россия Федерациысь улосъёсын кун властьлэсь закон кылдытӥсь (калыкен быръем) но быдэсъясь ёзъёссэ радъянъя огъя принципъёс сярысь" федеральной закон вылэ чӧлскыса, Удмурт Республикаысь президентлы таӵе полномочиос тупатӥз. Удмурт Республикаысь Президент луэ Удмурт Республикалэн вылӥ должностен муртэз но кивалтэ Удмурт Республикаысь вылӥ быдэсъясь органэн - Удмурт Республикаысь Правительствоен. Удмуртилэн Президентэз кыл кутэ Удмурт Республикалэн Конституциез, адямилэн но гражданинлэн правоосыз но эрикез понна, уте соосты закон но правопорядок ласянь. Удмурт Республикалэн Президентэзлэн валтӥсь полномочиосыз пӧлы пыртыны луэ таӵеоссэ: 1) Республикалэн нимыныз кун властьлэн федеральной ёзъёсыныз, Россия Федерацилэн улосъёсысьтызы кун властьлэн ёзъёсыныз, интыын аскивалтонъя ёзъёсын кусыпъёс тупатон но огкылъёс но тупанккылъёс гожтон; 2) Удмурт Республикаын политикая югдурез радъян; 3) республикаын югдур сярысь кун Кенешын арлы быдэ доклад лэсьтон; 4) Удмурт Республикаысь Правительствоез кылдытон но соин кивалтон; 5) Республикалы бюджетлэсь инъетсэ, улон-вылон но экономика удысъёсты азинтонъя программаослэсь инъетъёссэс дасяно но соослэн кызьы быдэсъяськемзы пумысен Кун Кенешын ивортылон; 6) Удмурт Республикалы проркуроре, Удмурт Республикаысь Югдурез утёнъя министре, Россия Федерациысь Вылӥ судлэн Судья департаментэзлэн Удмурт Республикаысь управлениезлы кивалтӥсь - адямиосты кенешыса ӵектон (ӵектэм-дэмлам адямиос) пумысен кенешон. 7) Удмурт Республикаысь Калыкез кышкытлыклэсь утёнъя кенешез кылдытон но соин кивалтон, кышкытлыклэсь утиськонъя ужрадъёсты федеральной законэз лыдэ басьтыса кутон; 8) Удмурт Республикалэсь кун Кенешен кутэм законъёссэ юнматон яке палэнтон; 9) Удмурт Республикалэн дано нимъёсыныз но Удмурт Республикалэн кун наградаосыныз федеральной законэз лыдэ басьтыса пусъён. Удмурт Республикалэн Президентэз озьы ик мукет полномочиосты но быдэсъя, федеральной законъёс, Удмурт Республикалэн Конституциез но Удмурт Республикалэн законъёсыз вылэ чӧлскыса. А. А. Волковез ар талэсь азьло гинэ бырйизы, Со ик мед луоз Президент, малы юнме коньдон быдтонэз быръёнъёслы? Республикалэн туала кивалтӥсез быръемын Кун Кенешлэн депутатъёсыныз. Сыӵе радлык юнматэмын Удмурт Республикалэн Конституцияз. "Россия Федерациысь улосъёсын кун властьлэн закон кылдытӥсь (калыкен быръем) но быдэсъясь ёзъёссэ радъянъя огъя принципъёс сярысь" федеральной законъя, кудӥз кутэмын кылем арлэн пумаз (Кун Кенешлэсь Тӧрозэ быръем бере) вылӥ должностен мурт быръемын луыны кулэ республикаын вань улӥсьёсын. Тае лыдэ басьтыса, Удмурт Республикалэн Конституцияз одно ик воштонъёс пыртоно, нош собере тупатоно Удмурт Республикалы Вылӥ кивалтӥсь быръёнъя дыр. Малы кулэ на Правительстволы Тӧро, куке Правительствоен кивалтэ Президент? Уг луы шат та кык должностьёсты огазеяны но одӥг муртлы оскыны? Та пумысен вераськонъёс пото, Президентлэсь но Правительстволэн Тӧроезлэсь ужан удысъёссэ мыдласянь валам бордысь. Правительстволэн Тӧроез радъя Правительстволэсь ужзэ но Президент азьын со понна кыл кутэ. Правительстволэн Тӧроезлэн полномочиосыз пӧлы пыро: кун комитетъёслы кивалтӥсьёс, министръёс, Правительстволэн Тӧроезлы воштӥсьёс дэмлаку, ӵектэм адямиос (кандидатураос) пумысен Президентлы ивортон; Президентлы Правительстволэн структураезъя дэмланъёс-ӵектонъёс сётон; Правительстволэн кенешъёсаз но Президиумаз кивалтон; Правительстволэн Тӧроезлэн воштӥсьёсыз куспын быдэсъяно удысъёсты люкылон но трос мукет полномочиос, кудъёсыз меӵак герӟаськемын быдэсъясь ёзлэн - Правительстволэн уженыз. Президентлэн полномочиосыз Правительствоен кивалтонэн гинэ уг быро. Со пыриське законъёс кылдытон уже, республикалэн нимыныз кусыпъёс тупатэ федеральной центрен, Россия Федерациысь улосъёсын но мукет кунъёсын, кыл кутэ Удмурт Республикалэн Конституциез, адямилэн но гражданинлэн правоосыз но эрикез понна, уте соосты закон но правпорядок ласянь. Улон возьматэ: сыӵе республикаосын но областьёсын, кытын вань Президентсы но Правительстволэн Тӧроез, тросгес луонлыкъёс кылдо улон-вылон но экономика удысъёсты ӟечгес но пайдаёгес азинтыны. Озьыен, Президентъёслэн но, Правительстволэн Тӧроезлэн кулэлыксы бадӟым. Валэктэ вал, Россиын Конституцияя суд вань бере, малы со кулэ на республикаын? Малы кылдытыны чакламын мировой судьяослэн институтсы? Судъя выль органъёс кыдытӥсько Россия Федерацилэн "Россия Федерациын судья система сярысь" но "Россия Федерациын мировой судьяос сярысь" законъёсызъя. Мировой судьяос - со пичи пуштросъем ужъёсты судын эскеронэз ӝогомытонъя ёз: люкиськонэн, огъя ваньбурез люконэн, ужын вожвылъяськонэн, пичи йыружъёсын герӟаськем ужъёс но трос мукет со выллем. Конституцияя суд - со Конституцилэн правоя удысаз кылдэм ужпумъёсты сэрттон- пертчонъя но Удмуртия Республикаын правоя норма луись актъёслэн но интыын луись актъёслэн Удмурт Республикалэн Конституциезлы но республикаысь законъёслы тупамтэзэс палэнтонъя ёз. Федеральной законлэн куронъёсызъя одно ик кылдытыны кулэ судья выль органъёсты - Конституцияя судэз но мировой судьяосты. Удмуртилэн Конституциезлэн выльдыны ӵектэм 10-тӥ ёзэтаз кун властьлэн кыӵе мукет ёъёсыз сярысь вераськон мынэ? "Россия Федерациысь улосъёсын кун властьлэн закон кылдытӥсь (калыкен быръем) но быдэсъясь ёзъёссэ радъянъя огъя принципъёс сярысь" федеральной законлэн 2-тӥ ёзэтэзъя, Россия Федерациысь улослэн (субъектъёслэн) кун властья ёзъёсыз пӧлы пырыны быгато: Россия Федерациысь улослэн закон кылдытӥсь ёзэз, Россия Федерациысь улослэн вылӥ должностен муртэз, Россия Федерациысь улослэн быдэсъясь ёзэз, озьы ик Россия Федерациысь улослэн кун властья мукет ёзъёсыз, кудъёсыз кылдытэмын Россия Федерациысь улослэн Конституциезъя. Озьыен, Россия Федерациысь улослэн кун властья мукет ёзъёсыз но луыны быгатозы. Уго улон воштӥське, кылдо выль ужпумъёс, кудъёссэ сэрттон-пертчон понна кулэ луо чылкак выль ёзъёс. Соин ик, вылӥ верам федеральной закон вылэ чӧлскыса, Удмурт Республикалэн Конституциезлэн выль сямен гожтэм 10-тӥ ёзэтаз чакламын Удмуртиын кун властьлэсь мукет ёзъёссэ кылдытыны луонлыкъёс. Соосты кылдытон кылдытон но ужатон радлык тупатӥське луоз федеральной законъя. Референдумлэн кыӵе йылпумъянъёсъя Конституцие пыртэм воштонъёс кутэмен лыдъяськозы? Конституциын ӵектэм воштонъёс понна референдуме пыриськемъёс пӧлысь ӝыныезлэсь тросэз со понна куаразэ сётӥз ке. Озьы ик пусъем (заинтересованный) бырйисьёс пӧлысь референдуме тросэз пыриськиз ке. Материал дасямын Удмурт Республикаысь Кун Кенешлэн Аппаратысьтыз общественно-политической анализъя отделэныз. "Италиысь" кизилиос Ижысь Ленин ёрослэн администрациез но татысь спорткомитет покчи нылпиос понна туэ тямысэтӥзэ ни куасэн ӵошатсконъёс радъяз. Кык ар талэсь азьло городысь эшъёсынызы нюръяськонэ пыриськизы Завьялово ёросысь "Италмас" посёлокысь нылпиос но. Со дырысен котьку вормо гуртоос. Ма, соосты тодмо куасчи ачиз галина Кулакова уго "бурд улаз" возе "Италмасын" улӥсь дано спортсменка туэ но нылпи комбинатэ ветлӥсь вуоно кизилиосты Иже ваиз. 24 команда пӧлын нош ик таосыд кужмоосыз луизы, нош "Италмасысь" Алёна Камаева 240 бызьылӥсь пӧлысь ваньмызлэсь чупрес вылэм. Городысь нылпиос пӧлын вормисе потӥзы 213 номеро садике ветлӥсьёс. Будэтӥськом но ыштӥськом Удмуртия кужмо спортсменъёсын котьку ик данъяськылӥз. Нимъёссэс гинэ гожтыны трос инты кулэ луоз. Но та ӟеч веранлэн сьӧд виштыез но вань. "Небыт сюй вылын" ӝужам талантъёсмы дор палъёсысьтызы пегӟо. Берло вакытэ озьы кошкизы: Ханты-Мансийске - куасэн бызьылӥсь Сергей Крянин, Тюмене - биатлонист Михаил Сушинцев, Волгоградэ - футболист (Игорь Дубровских Альметьевске - хоккеист Владимир Маслов но трос мукетъёс. Алигес спортъя одӥгез газет Россиысь 7 усто гандболистъёслэсь нимъёссэс ивортӥз. Соос пӧлы пыро Роберт Минагутдинов но Алексей Попов. Нырысез шудэмын ЦСКА-ын но мукет кужмо клубъёсын, Европалэсь Кубоксэ утэмын. Мукетыз Волгоградысь "Каустик" командаын шудэ. Спортъя та коллектив али Россиын одӥгез устоез луэ. Поповез ӧтё Австралие, со понна 200 сюрс доллар сӥзё. Минагутдиновез Австрадие чорто. Нош кыксы но соос будӥзы -пушйизы, гандболэн шудыны дышизы Удмуртиын. Озьыен, "сюранай" вӧзын но улыны умойгес вылэм. М. Кузьмин. БЫРЪЁНЪЁС АЗЬЫН Зол кузё кулэ 26-тӥ мартэ Россия быръёз выль Президент, нош Удмуртиын та нуналэ ик ортчоз калыклэсь юалляськон - референдум. Пусйыны кулэ, шаермылэн ортчем сюресаз таӵе ужрад, вань калыкен кутскыса, вылӥ кивалтон органэ, Удмурт Республикалэн Конституцияз воштонъёс пыртон, нырысьсэ ортче. 19-тӥ декабре данакез бырйисьёс веразы ни, асьмелы Президент кивалтэм улсын улыны кулэ ни шуыса. Та ласянь бускельёсмылэсь туж бере кыльыса мынӥськом. 26-тӥ мартэ, референдум ортчытон нуналэ, котькудмылы одно ик верано на ас мылкыдмес. Со юрттоз Удмуртилы азьлане одӥг вамыш лэсьтыны но федеральной законодательствоен тупаса ужаны. Кызьы учко вуоно воштӥськонъёс шоры кивалтон удысэз нуисьёс? С.Э.Широбокова, Кун Кенешысь Бюджетъя, налогъёсъя но коньдон ужпумъёся ялан ужась комиссилэн кивалтӥсез: - Отысь номыр уродзэ уг адӟиськы. Республикаен кивалтон выжоз чылкак мукет ӧре: али со парламентской луэ ке, азьланяз президентской шуыса нимаськоз. - Софья Эльфатовна, таин валче депутатъёслэн полномочиоссы но данзы уз усьы-а? - Валамон, Кун Кенешлэн интыез одно ик воштӥськоз, но, мон малпамъя, солэн ужан удысэз сокем уз сюбега, парламент тросгес саклык висъялоз соку законъёсты эскеронлы- кылдытонлы, ӧжытгес луозы янгышан учыръёс. Быдэс страна та амалэ выже бере, озьыен, Удмуртилы но одӥг сюрес вылэ султоно, дыр, кельше-а со тыныд, уг-а. Самой главноез - республикаын одӥг кузё луыны кулэ, ваньмыз понна со кыл мед кутыны быгатоз. Таӵе осконзэ вераны кулэ ачиз калык. Тӥни малы ортчытӥське референдум. Мукет сямен учконо ке, та полномочиосты депутатъёс но быдэстыны быгатысалзы, мултэс коньдон быдтытэк, адямиосты бугыръятэк, асьсэлы ярась муртэ президентэ дэмласалзы но ужез бырысал. Но Удмуртия бырйиз демократической амалэз - республикалэсь кивалтӥсьсэ бырйыны кулэ вань калык. Озьы капчигес луоз президентлы но: пӧртэм пумо политической огазеяськонъёс солы ужаны уз люкетэ. Нош мукет ласянь, ачиз но юнгес шӧдоз калык азьын кыл кутонзэ, ответственностьсэ. Данакез депутатъёс сямен ик, мон лыдъясько: республикаен кивалтыны кулэ президент, Правительство ужа со кивалтэм улсын, исполнительной власть луыса, нош Кун Кенеш тыршоз законлэсь инъетсэ умоятон бордын. В.Е.Шудегов, Правительстволэн Тӧроезлэн воштӥсез: - Кылем сӥзьыл 10-тӥ октябре Россия Федерациын кутэмын вал закон интыосысь законодательствоосты федеральноезъя тупатон ласянь. Со ик кутскон сётӥз Удмуртилэн Конституцияз но ӝегатскытэк воштӥськон пыртон сярысь, вераськон мынэ 10-тӥ статья пумысен. Та ужез быдэстыны быгатысалзы депутатъёс но, но Кун Кенешлэн Тӧроез вазиське шаерамы улӥсь вань калыклы, котькудӥз ас малпанзэ мед вералоз шуыса. Та амал туж умой, малы ке шуоно, огез но адями палэнэ уг кыльы: референдум дыръя со вералоз аслыз гинэ тупась мылкыдзэ. Жаляса верано, куд-ог политической кужымъёс туннэ мыло-кыдо ужало ни референдумез но Россилы Президент быръёнэз ортчытонлы пумит. Со туж умойтэм. Малпалэ асьтэос но: кӧня коньдон отчы кошке, кыӵе дуно сылэ котькудӥз таӵе ужрад! Иж городлы мэрез быръён гинэ 100 компьютер класс усьтон мында уксёез кыскиз. Нош республикалэн туэ арлы юнматэм бюджетаз коньдон висъямын 10 компьютер класслы гинэ, соос ужалозы районной центръёсын. Нимысьтыз вераме потэ референдум сярысь. 26-тӥ мартэ сое ортчытыны ӧм ке быгатэ, ортчытоно луоз мукет нуналэ, мукет толэзе. Нош кӧня отчы уксё кошкоз? Ваньмыз со асьмелэн налог тыремъёсмы но калыклэсь улон-вылонзэ умоятонэ ыстоно коньдонмы. Россилэсь Президентсэ быръён но мед йылпумъяськоз И турен, одӥг кутскемен. Кыкетӥ турен потоно луиз ке, Центральной избиркомлэн кивалтӥсез верамъя, ватсаса кошкоз на 1 миллиард манет. Страна понна со туж бадӟым коньдон, уката но али, уждунъя, пенсиосъя но нылпи пособиосъя йылзэ-пумзэ шедьтыны вырыку. Алигес мон вуылӥ Дэбес районэ, пумиськылӥ бюджет удысын ужасьёсын. Ӵошатоно ке кылем гужем но декабрь толэзе вераськеммес, соослэн мылкыдзы али умой. Уждунъя юанъёссы таяз учыре ӧз кылдэ ни, кылдӥзы методической пособиосъя но коммунальной услугаос сётонъя. Мон малпамъя, матысь дыре таоссэ но шугъяськонъёсты пумен-пумен кулэстыны луоно. Со дыре ик Правительство азе туннэ султэ ни мукетыз йырвисён: кытысь шедьтоно 500 миллион манет - ӵапак сомында коньдон кулэ луоз бюджет удысын тыршисьёслы, 1-тӥ апрельысен кутскыса, соослэсь уждунзэс 20 процентлы будэтоно ке. Россилы Президент быръён пумысен малпанэ одӥг: мед луоз со ужаны быгатӥсь мурт. Россилэн шугъяськонъёсыз коньдон тырмымтэ вылэ ведь уг пыкисько, пыкисько ас кожаз лэзем кивалтон вылэ. Со ик ваньзэ куашкатӥз, быдтӥз. Россиын но, Удмуртиын но улӥысен вылӥозь юн власть радлыкез тупатыны луоз. А.П.Перевощиков, Правительстволэн калыклэн вазиськонъёсызъя ужась отделэзлэн кивалтӥсез: - Мон малпамъя, таосыз быръёнъёс странамылэн но республикамылэн улоназ бадӟым инты басьтыны кулэ. Соин ик котькудӥз адями отчы сюлэмыз кыскемъя гинэ ӧвӧл, визьмыныз валаса мед мыноз, малы ке шуоно, 26-тӥ март бордысен кутскоз Россилэн кудпала берытскемез, калыклэн улон-вылонэз. Референдумлэн но кулэлыкез туж бадӟым. Федеральной законодательстволы пумит мынӥм ке, Удмуртиен кинлэн вераськемез потоз на? Референдум ортчытӥське калык понна, солэсь мылкыдзэ тодон вылысь. Тӥни малы егитэзлы но, арлыдоезлы но одно ик пыриськоно та юалляськонэ. Палэнэ кыльыса, асьмелы асьмеос урод гинэ лэсьтом. Мон калыкен ужасько бере, дорамы олокыӵе но юанъёсын, ӝожтӥськонъёсын пыро. Тросгес вуо городын улӥсьёс. Соослэн юанзы одӥг: кызьы улоно таӵе пичи пенсиен, кызьы тыроно улон инты понна дун, кызьы басьтоно эмъюмъёс? Ваньмыз юрттэт витё Правительстволэсь, нош асьсэос быръёнъёслы но, президентлы но уг оско. Тросэз меӵак озьы ик шуэ: котькинэ бырйы - номыр уз воштӥськы. Со малпам туж умойтэм. Тон интые но, мон интые но бюллетень куштӥсьёс шедёзы. Нош кин понна куаразэс сётозы? Тӥни ужпум ма бордын. Кыӵеен мон адӟисько Россилэсь Президентсэ? Со котыр ласянь зол, честной адями мед луоз. Ӵектэм муртъёс пӧлысь мон малы ке но сыӵезэ ӧй пумита на. Куд-огез паймытэ миллионъёсын коньдон люкаменыз. Кытысь соос со быдӟа уждун басьто? Удмуртилы но Президент кулэ, дыр, ини. Мон оскисько, республика соку умой пала воштӥськоз шуыса. Сое адӟоно бускель республикаосъя. Л.МЕДВЕДЕВА. Куарадэ ас поннад сёт Кун Кенешлэн Тӧроезлэн воштӥсез Наталья Алексеевна Харина пумиськылӥз Удмуртиысь егитъёслэн но студентъёслэн огазеяськонъёссылэн кивалтӥсьёсынызы. Вераськон мынӥз республикаямы ортчоно референдум но Россилы Президент быръён сярысь. Со вакчияк тодматӥз туннэ кылдэм югдурен но Кун Кенешын нуоно удысэныз. - Профессие мынам - врач, нош политикае лыктӥ, улон-вылонмес умой пала воштон вылысь. Семьяям кык пиналы будэ, кык внучкае вань ини. Мынам сюлэмы висе соослэн ӵуказе нуналзы понна, малы ке шуоно, обществомы курадӟе туж секыт висёнэн. Малпаны кышкыт, ма луоз азьланяз егит поколениен, кинэ асьмелы кивоштӥсе кельтом? Азьвыл шуиськом ке вал, государство возиське семья вылын, али югдур воксё мукет пала воштӥськиз: котькуд кылдӥсь выль семьялы кык семья куашка. Нылкышноос пинал вайыны кышкало, шуге-леке вуонлэсь кышкаса. Нош егитъёс пӧлын кӧня наркоманъёс но СПИД-эн висисьёс! Ижевскын гинэ туннэ 10 сюрслэсь ятыр наркотикен вырисьёс. Вераны кышкыт, но будӥсь пиналъёсмы султо геноцид, астэ ачид выжытэк быдтон сюрес вылэ. 1999-тӥ арез гинэ басьто: республикаын улӥсьёслэн лыдзы 2 сюрс муртлы кулэсмиз, озьыен, сомындалы ӧжыт луиз вордскисез. Калыкез эмъян удысын ужасьлы, врачлы-гинекологлы, уката но секыт та лыдпусъёсты вераны. Тӥни малы Наталья Алексеевналэн егитъёсын кенешонэз сюлмысь вераськонлы пӧрмиз, соин ӵош - политической улонэ мыло-кыдо пыриськыны курыса вазиськонлы. Быръёнъёсы тросгес ветлэ мӧйы поколение, нош егитъёс палэнско. Туж умойтэм со, малы ке шуоно, тӥлесьтыд мылкыддэс нокин но мукетыз уз быдэсты. Куаразэ котькудӥзлы ас понназ гинэ сётоно. Ас маланъёссэс веразы пумиськонэ лыктэмъёс но. Соос - Удмуртилы Президент быръён понна. Л.ДМИТРИЕВА. Ильич нимо Вениамин Двоеглазов: "Крестьянлэн кужмыз музъем бордын" Ма сярысь верасько воргоронъёс, туэ тулыс вылтӥ пумиськыкузы? Кожаськоды, нылъёс сярысь? Ӧвӧл. Озьы ӧвӧл. Вань пиослэн йыразы политика выжыяськемын ни. Милям но Алнаш ёросысь Ильич нимо колхозлэн кивалтӥсеныз Вениамин Двоеглазовен вераськонмы ӵапак со бордысен кутскиз. - Городын ӝыныез гинэ бырйисьёс куаразэс сёто ке, милям 70-80 процентэз участоке ветло. Мар-о со: дышем сям яке демократиез шонер валан? Вераны шуг. Мон малпасько, гуртоос та кырсь вакытэ но озьы возьмато асьсэлэсь чылкыт сямо луэмзэс, азьланезлы оскемзэс. - Вениамин Васильевич, кызьы тӥ малпаськоды, адямиос пумозяз-а валало кадь политикаын ортчись воштӥськонъёсты? - Уноез валаса уг вутты. Мугез огшоры - верась-валэктӥсь ӧвӧл. Гуртэ ветлэмысь дугдӥзы ук. Калык нокинлы кулэ ӧвӧл ни, шӧдске. Вот тон ужа, кыед потты, картофка будэты, нош мар тынад сюлмад, мар тынад йырад - соиз нокинэ но уг шугъяськыты. Мар веранэз гуртоос сярысь? Кивалтӥсьёс асьсэос но югдурез тыро-пыдо уг тодо. Алигес Алнаше министерствоысьтымы кузёос вуылӥзы. О-о-о, пе, татын умой улӥськоды ай, котьмады тырмыт, шуо. Эстӥськонды но вань, пе. Одӥг тонна коть луысал ке. Сюлмаськонъёс пумтэм ук. - Ойдолэ эскероме политикалэсь кӧня ке палэнскыны. Вералэ ай хозяйстводылэн туннэ нуналыз сярысь. - Тужгес ӟечез со бордын, вылды: колхозмы утиськыны быгатӥз солань-талань шонаськонъёслэсь. Куд-ог интыосын хозяйствоос я эштослы, я кооперативлы пӧрмизы, олокӧня пол нимзэс вошъяса вуттӥзы ни. Нош ми кызьы ке ужам колхозын, али но озьы ик тыршиськом. Ильичмылэсь гинэ но ӧм куштӥське. Ним бордын ужпум ӧвӧл. Али колхозамы кык гурт пыре. Гыроно музъеммы ог 3100 гектар. Куиньмос люкетаз трос аръем турын будэтӥськом. 270 семья улӥсез, котькудӥзлэсь шорлыдын одӥг ужась усе. Ужтэк кылемъёс ӧвӧл, шуыны луоз. Толалтэ ке шат кӧня ке сыӵе мурт шеде. Гужемзэ ужлы ум ёрмиське. - Ёрос администрациын мыным веразы, тӥледлы Калыкез уже интыянъя департаментлэн Удмуртиысь ёзэз нырысетӥ степенё диплом сётӥз шуыса. Но та ужез, мынам малпамея, пӧртэм сямен радъяны луэ. Кин ке, шуом, коллективаз сюрс муртэ возёз но быдэн сю манет тыроз, мукетыз сю муртлы быдэн сюрс сётъялоз. Тӥ кыӵе сюрестӥ мынӥськоды? - Городын луэ, вылды, оломар но лэсьтыны. Гуртын та ласянь шуггес. Правлениын ми тазьы кенешим: асьме адямиослэн ужан мылкыдзы вань ке, котькудӥзлы уж шедьтоно. Колхоз ӧз юртты ке, кытчы кариськоз гуртысь воргорон яке кышномурт? Мукет организациос татын ӧвӧл ук. Соин ик ми тани вуриськон цех усьтӥм. Отчы дорысьтымы куинь нылъёс интыяськизы. Анжела Аристархова - кивалтӥсьсы - туж сэзь маке. Киыз но мынэ, йырыз но ужа. Заказ Алнашысь но, Можга ёросысь но вуэ ни. Али тани парихмахермы ужаны кутске. Таиз но асьмелэн. Вераны луоз пекарнямы сярысь но. Вазен со гужемзэ гинэ ужалля. Туэ тол вылтӥ отын нянь пыжо. Бордаз ик колхоз магазин. Отын но ньыль мурт ужа. Огъя вераса, ми ум быгатӥське ас калыкмылэсь палэнскыны. Я, шуом, туннэ кинэ ке кулэстод, ужтэк кельтод, нош кызьы соин ӵуказе урамын адӟиськод? Татын ваньмыз ог- огзэ тодэ ук. Тросэз ӵыжы-выжы но луо. Крестьян калык котыр ласянь аспӧртэмлыко уго, солэн гогыез музъем борды бурмемын. Отын ик солэн кужымез но. - Коня бен уксё басьтэ туннэ Ильич нимо колхозын ужась? - Кылем арлы йылпумъянъя учконо ке, толэзьем уждун 423 манет усиз. Валасько, со туж ичи шуыса. Но ваньмыз ӵошатыса адӟиське ук. Куд-ог хозяйствоосын аръёсын уждун уг сётъяло. Ми кылем ар понна тыршим ни. Туэлы но пичиен-пичиен люкылӥм ини. Но лыдэ басьтоно мукетсэ но: колхоз быгатэмезъя мукет амалъёсын но ужасьёсызлы юрттэ. Шонерзэ вераса, мон куддыр паймисько но гуртослэн ӟеч сямъёссылы. Соос татын вордскемын, будэмын, кышнояськемын-быземын. Татын ик ужало. Вань сюлэмзэс сётыса. Луонлык кылдысал ке, соослы сюрсъёсын уксё сётыны кулэ вал. Мон умоезлы осконме уг ыштӥськы. Йырам таӵе но малпан нуллӥсько. Дас-дас вить ар ортчыса, югдур тупатскиз ке, таӵе секыт вакытэ пичи уждунэн тыршемъёслы ватсаса тыроно вылэм. Кин тодэ, оло, пӧрмоз но ай. Весь тазьы курадӟыса ум улэ, дыр. - Вениамин Васильевич, туала дыре гурт кивалтӥсьёслы но секыт йӧтэ. Чиданды тырме- а? - Кохозын демократилэн выжыосыз юнэсь. Арлы быдэ ӧтчам люкаськылэ ук. Маке мыдлань лэсьтӥд ке, гуртоосыд ӝог гинэ туздырозы. Мон татын ужаны кутскыкум ик ялӥ: оскиськоды ке, тыршо, уг тупаськы ке, кыл вератэк кошко. Котькуд ар та сярысь ужпумез ачим ӝутӥсько. Коть шара, коть лушкем эскерыны дэмласько. Туэ но поттылӥ. Та дырозь укыр бадӟым янгыш ӧй лэсьты на, вылды, соин ик ӟечгес оско. Нош оскон вань ке, уж но ӟечгес мынэ, мылкыд но умойгес возиське. Берло дыре гинэ ёросамы даслэсь уно председательёс воштӥськизы. Мон малпамъя, кузёосты ӵем вошъян уродэн берытске. Хозяйствоос но куанермо, коллективъёс но лябӟо. - Маин туннэ тужгес но трос выроно луэ колхоз тӧролы? - Тазьы чакласько, тол вылтӥ вить толэзьзэ бызьылоно луэ пудо вордонэн, кылем дырез "сие" музъем уж. Но арбыт ик шугъяськытэ утчаськон. Я таиз кулэ, я соиз, я куинетӥез... Куд-ог дыръя чыры-пыры воштос ёзлы ӝыны республикаез ортчоно луиськод. Бен, али тросэз пыкиське коньдон борды. Азьло вакытэ "Агроснабе" мынӥськод но ваньзэ басьтӥськод вал. Табере отӥ-татӥ ворттылӥськом. Ярам, куд-ог фирмаосын юн кусып тупатӥм ни, ог-огмылы оскиськом. Тани алигес Набережные Челныысь сизьым кизён агрегат басьтӥм, коньдонэз ваньмыз тырымтэ ай ке но, вуззэс сётӥзы ни. Нимаз адямиосын умгес ужаське. Пӧлазы туж осконтэмъёсыз шедё, олокызьы но милемыз, гуртоосыз, пӧяны тыршо. Одӥгез легковой автомобиль басьтымон коньдонмес капыртӥз. Дышетӥз. Озьыгес ик поттэм ваньбурмес вузанэн. Бен, таиз но шуген сётске. Тани сырзаводын ог 200 сюрс манет коньдонмы кылле. Уг сёто. Нош макем со кулэ вылэм. Эстӥськон но басьтоно, тракторъёсыз но выльдоно - уксётэк номыр кареммы уг луы. Котькудӥз агрегат кизёнын кулэ. Одӥгез коть бусые потонэн ӝегаз ке, ужъёс беромозы. - Тӥ коть кӧня ке быгатӥськоды ик ай техникадэс выльдыны. Куд-ог колхозъёс выль тракторъёсыз кемалась уг адӟо ни. - Арлы быдэ басьтӥськом. Кылем арын "Дон" комбайн уськытӥм. Со выль ӧвӧл ни ке но, умой ай. Гужемзэ зол юрттӥз. Алнашысь мехстанциысь техникаез ужатон дуно усе. Нош асьмелы басьтыса, агрегат кык-куинь ар ӵоже дунзэ берыктэ. Соин азьланьын но тыршом тазьы ужаны. - Нош кыӵе югдур эстӥськонэн? - Туэ шуггес. 16 тонна сяна ӧвӧл ай. Кылем арын умой пӧрмиз вал. Манет но куамын копейка тырыса, ог 100 тонна дизтопливо басьтӥм. Со милемлы кизёнлы но, пудо сиён дасянлы но, ю октонлы но тырмиз. Бӧрысь ини вить манетлы дуноенгес басьтоно луиз. Тулыс басьтэм эстӥськон чотын 300 сюрс манет шыръяны быгатӥм. Урод шат? Огшоры адямиос но адӟо ук озьы ужамез. Уго шыръям уксё колхоз кассае кыле. - Тӥ туннэ, кызьы шуо, кын корт куртчон арлыдады. Тодэм потэ азьланезлы мылкыддэс. Кыӵеен адӟиськоды ӵуказе нуналэз? - Бен, вордӥськем музъем вылысь нокытчы но кошкем уг поты ни. Татын будэмын, татын котькудӥз тодмо. Ми дышемын огазьын улыны. Соин ик, малпасько, нимаз семьяен висъяськыса улон-ужан асьмелы уг тупа. Трос, туж трос гуртъёсты быдтӥзы огдыре, вераны луонтэм изъян ваемын Россилы. Табере сюлмаськоно кӧня ваньзэ утён сярысь. Татысен ог вить иськемын Иваново вордскем гуртэ вал. Быриз. Бусыос кыдёке кылизы. Отчы кыед но ворттыны шуг, трос эстӥськон быре. Котьма ке но, крестьян калык улоз. Сое озьы гинэ чигтыны уз луы. Ассэ со котьку ик сюдоз. Нош мукетъёссэ но сюдыны мед быгатоз шуыса, солы государство юрттыны кулэ. Куддыр тазьы но малпаськод, ява: юрттэт но кулэ ӧвӧл, медам гинэ люкетэ вал. Укыр трос луизы индылӥсьёс. Кин гинэ власте уг шедьы, одно кутсконо кожа гурт хозяйство бордысен. Мыдлань политика со. Но, кызьы верай ни, умоезлы осконме уг ыштӥськы. Тодӥсько, ӵуказе нунал сайкытгес, шулдыргес луоз. Сыӵе ик мылкыд сӥзисько гуртоосылы но. Кенешиз И. ЛЕБЕДЕВ. Ӟечкыласьком! Кылемаз кӧс нуналэ нош ик трос калыкез люкалляз Драмая удмурт кун театр - кылдэмез дырысен дас ар тырмемзэ пусйиз Удмурт лулчеберлыкъя дэменлык. Зэм, капчи ӧй вал солэн вордӥськонэз. Куд-огез юри люкетылӥзы кичӧлтӥсьёслы. Озьы ке но, "Дэмен" вань шуг-секытъёсты вормиз, пыд йылаз султӥз. Юбилей ӝытын асьсэлэсь тодэ ваёнъёссэс ивортӥзы дэменлыклы лул сётӥсьёс Карл Пономарёв, Лидия Крестьянинова, Николай Симанов, Василий Осипов, Пётр Чернов, мукет адямиос. Удмурт лулчеберлыкъя дэменлыкез дас ар тырмон юбилееныз ӟечкылазы Удмурт Элькунысь Кун Кенешлэн Тӧроез Александр Волков, "Удмурт кенеш" огазеяськонлэн Тӧроез Валентин Тубылов, Россия Федерациысь Кун Думалэн депутатэз Светлана Смирнова. Агайзэс озьы ик ӟечкылазы вынъёсыз - покчи дэменлыкъёс. Ёросъёсысь тужгес устоосызлы - Евдокия Ильиныхлы, Екатерина Спиридоновалы, Надежда Пахомовалы - данъян грамотаос сётэмын. Удмурт лулчеберлыкъя дэменлыклэн юбилей ӝытаз ик Трофим Борисов нимо премиен пусъемын огазеяськонлэн тӧроез Альберт Разин. Ӟечкыласьком! Юбилей ӝытын. Владимир Беломорскихлэн туспуктэмъёсыз. Выжыед ке юн... Ӵӧжи шур, Мосей Яг, Карашур Сэрег, Данабей нюлэс, Магазей гурезь, кузьтубон сюрес, Такаюрт бам... Мекей, Юсып, Очей, Шулась Матрон, Кучыран, Кузьма, Ондрей Дарья, Шугай, Бочкар, Микол Васьлей, Шоголь Сидор, Бечей... Та аспӧртэмлыко нимъёсты мон синйылтӥ колхоз музейысь. Солэн кирос анаез - Екатерина Павловна Машкова. Туж трос лэсьтӥз-бызьылӥз ни, та кышномурт дор палъёсызлэсь историзэс пыраклы тодэ ваёнъёсын кельтон вылысь. Маиз гинэ ӧвӧл музейын? Дӥськут, пужыос, арбериос, фотоос, документъёс. Ваньмыз - син азьын. Васильева Агафья Васильевналэн нэнэезлэн (Гордшыр Васьлей кышнолэн) чалмаез... Таӵе но мукет гожтэмъёс ик йырез поромыто ук. Кин кызьы, вылды, мон музейысь лопыръяськись мылкыдын потӥ. Пыраклы тодэ кылиз Катя апайлэн мандолинаен шудэмез но мӧзмыт гурен кырӟамез. Таза луэ, Екатерина Павловна! Выжыосты утён бордын ужамды одно ик ӟечен берытскоз. В. Беломорских. Дарт Яратэ, уг яраты Йырдэ воксё берыкто - даурлы аслым каро ... Пеймыт комната. Ӝӧк вылын - сюсьтыл, синучкон но кыӵе ке туспуктэм. - Кара-бара, али-бали... берыктӥсько Олеглэсь йырзэ. Кызьы мон сое яратӥ, озьы ик со но мед яратоз". Эх, уг пӧрмы кадь. Толыке ӧвӧл, лэся. Кыӵе потэ вал солы яратымон луэме. Алдасько газетъёс! Тани синмаськоно пиелэсь йырзэ берыктыны юртто, пе. Юрттозы соос! Эшъёсылэсь ик юаськыса, пайдаез тросгес луоз, дыр. Сюсьтылъёсме сэрпалтыса кошки общежитиысь комнатаостӥ. Соня К: Мынам огпол дауртэме вань. Классэнымы походэ ветлыкумы. Но ӧй вӧта. Выльысяз нош ик озьы дауртӥ. Уй вӧтам вуиз. Соберегес ик ветлыны кутским. Но яратонмы толэзь мында сяна ӧз кыстӥськы. Таня П: Мон туж трос йыр берыктон амалъёсты тодӥсько. Кылсярысь: сигарет вылэ яратоно пияшедлэсь нимзэ гожтоно, кыскыса пеньзэ омыре пельтоно, кылъёс верано. Тунаськыны луэ туспуктэмъёсын, йырсиен. Чечыен посудае туспуктэмзэ ляконо, ачиз но бордам озьы мед лякиськоз шуоно. Яке ныллэсь но пилэсь тусъёссэс ваче керттылоно, вылаз сюсьтыл виятоно. Эшшо сылалэн луэ. Кема-кема сьӧрад нуллоно, собере гажанэд вылэ пызьнано. Мон оломар но дауртылӥ, но со-а юрттӥз, ачим-а маинмы ке бордам кыскыны быгатылӥ. Оля С: Азьвыл мон но йырберыктонлы оскылӥ, али уг выриськы ни. Серем. Кин оске, мед выроз. Но малпасько, сыӵе яратон кемалы уг луы шуыса. Нылаш ассэ гажаны кулэ - кылдымтэзэ уд кары. Я бен, Оляен ик соглша луо мон но. Зэмос яратон ачиз ик лыктыны кулэ, дыр. О. Никитина, Удмурт университетысь дышетскись. Дарт Чеберина Йырсиосме лӧсъяло - ваньзэс-ваньзэс гочато Кин споръяськоз монэн, нылашлэн чеберез йырсиез бордын ӧвӧл шуыса? Уд ке оскиське, юалэ яратоно пияштылэсь. Со, конечно, тӥледды куатаськытонтэм вылысь, тон тазьы но чебер шуоз, но йырсиед тӥни озьы пельпум вылад лӧсъяськысал яке чебер пунэтэн гадь вылад усьысал ке... Учке ай кыӵе чебер пунэтэз Сарапулысь Анна Пастуховалэн. Эх, Анялэн лулӟылӥсьёсыз туж трос, дыр. Нош тӥляд, ушъяськемды уг поты-а? Ыстэ милемлы туспуктэмъёстэс, кузь йырсиё чеберайёс. Тужгес синмаськымонъёсыз газет бамъёсмес шулдыртозы, нош соослэн кузёоссы чебер кузьымъёс басьтозы. Журналистлэн блокнотысьтыз Марий Эл кыкетӥ Президентэн улэ ни Шаермылэн президентэн улон сярысь бугырскем мылкыдыныз ӵош, тодам ваисько Марий Эл Республикалэн кыкетӥ Президентэныз Вячеслав Кислицынэн пумиськылэмме. Соин кык пол но вераськыса вылысь, огез но интервьюэ газет баме ӧз вуы. Нырысетӥез пумиськонмы ортчиз Марий Элысь Медведевской районлэн администрацияз, Вячеслав Александровичлэн ужан кабинетаз. Соку со кивалтӥз республикаысь огеныз усто, экономика ласянь самой кужмо районэн. Вераськеммы берегес, азьвыл Президентэнызы кылзы тупатэк, Кислицын ужысьтыз мозмытэмын вал. Тӥни сыӵе муген ик диктофонэ гожтэм интервью газет баме ӧз вуы. Нош дыр ваньзэ интыяз пуктэ. Марий Элын улӥсьёс 1997-тӥ арлэн кутсконаз асьсэлы Президентэ огкылысь кутскыса бырйизы Вячеслав Александрович Кислицынэз, сэзь сямо, ужаны быгатӥсь, калык понна сюлмаськись адямиез. Выжыезъя - ӟуч, вордскемын но будэмын пор музъем вылын. Кыкетӥез пумиськонмы (табере ини Президентэн) ортчиз кык ар талэсь азьло. Соиз но вераськонмы кылиз пленка вылэ, малы ке шуоно, Удмуртиын нокин но шара ӧз поттылы на Президент быръён сярысь. Кинлы кулэ вал меда соку бускель республикаослэн азинлыко ужан амалъёссы, юнме шорысь кутскыса, газет баме поттэм бугыръянъёс? Уг ваты, мон соку но гожъяй отысь пресса, журналистёс сярысь. Асьме дорын газетъёсты, журналъёсты кулэстон пумысен вераськон потэм бере ("Удмурт дунне" арняяз 5 пол потэ ке вал, 3- озь усиз), Марий Элын ноку но таӵе ужпум ӧз ӝутскылы. Соос туннэ но арняяз 5 пол пото, нош "Марийская правда", приложениоссэ лыдэ басьтыса, 8 пол. Удмурт Республикалэн кивалтӥсьёсыз, Кун Кенеш но, Правительство но луонлык ӧз шедьтэ, ӧз но утчалэ кадь, асьсэлэсь изданиоссэс утён понна. Бускель республикаос та ласянь - трослы вылӥынгес. СМИ-ос ласянь, оло, югдур тупатскоз на Президент быръеммы бере? Ас кылызлы кузё - озьы шуэ Президентэз сярысь пор калык. Нош ма шугъяськытэ сое ассэ? Таӵе но мукет юанъёсын вазиським ми, финн-угор республикаосысь вуэм журналистъёс, В. А. Кислицынлы. - Вячеслав Александрович, палэнысь лыктэм куноос котьку синмаськыса учко Йошкар- Олалэн чылк-чылк ӵужем, утялтэм ульчаосыз шоры. Котькуд вамышын шӧдоно калыклэсь ӝикытлыксэ, радлыкез утемзэ. Тӥ, куд-ог мукет городъёс сямен, ӧз "вые рыноклэн кырсь шукыез" пӧлы. Кызьы та шоры асьтэос учкиськоды но кыӵе дунъет сётӥськоды ас уждылы? - Сётэм кылме та дыр куспын ӧй ке быдэстысал, командаеным ӵош кемалась отставкае потысал ни. Но мынам малпанэ мукет: кошкыны ноку но бер ӧвӧл - ужаны кулэ. Дырыз сыӵе: али ӧд ке лэсьты, берло нокыӵе кужым но уз юртты, ваньмыз куашкалоз. Азинсконъёс ке вань, соосты калык ӝог шӧдэ. Ми утьыны быгатӥм гурт удысэз, социальной сфераез, бадӟым саклык висъяськом гуртъёсты, городъёсты утялтонлы но шулдыртонлы. Нош кӧня выль школаос но нылпи садъёс усьтэмын ни! Пиналъёсты сюдонэз, каникулъёсты радъянэз но ас выламы басьтӥм. - Республикалэн бюджетэз кызьыгес кылдэ? Москва ласянь юрттэт вуэ-а? - Мон ноку но палэнысь юрттэтлы ӧй оскылы. Марий Элын улэ туж ужась, визьмо но быгатонлыко калык. Соин котькыӵе шуг-секытэз вормод. Мон солы оскисько. Москва сярысь ке верано, зэм, отысь юрттэттэк улыны уггес луы на. Но азьланяз, законъёс кулэезъя ке ужазы, республика ас кожаз экономиказэ ӝутыны но азинтыны вормоз. Бюджетэз кылдытон сярысь ке верано, мыным кельше Медведевской районлэн амалэз. Отысь администрациен кивалтон аръёсы ми кылдытӥм бюджетэ пырисьтэм фондъёс, соос чотын люкаськиз ватсаса поттэм коньдон. Банкъёслэсь ужзэс быдэсак чакласа возе Правительство. Нырысь нуналъёсысен ик ас киуламы кутӥм выт октӥсь органъёсты. Со утиз бичам коньдонэз быдэсак Москвае келянлэсь. Воштоно луиз куд-ог кивалтӥсьёсты но. - Марий Элын, куд-ог мукет регионъёсын ӵошатыса, ӧжытгес шӧдӥське монополистъёслэн кужымзы... - Мон Президент дыръя, монополистъёслы "сяськаяськыны" луонлык уз луы. Вань Президент но Правительство, вань калык. Ваньбур - соос киын. Но монополист ужа ке республикалэн кисыяз - отысь номыр урод з эуг адӟиськы. - Кызьы тӥ учкиськоды куд-ог промышленной предприятиослэн иностранной фирмаосын ӵош ужанзы шоры? - Мынам одӥг веранэ: республикалэсь ваньбурзэ, узырлыксэ тус-тас карыны уг яра. Быгатэмеъя ас кожамы ужаны тыршоно но пайда поттоно. Мед со мыноз бюджетэз юнматонэ, уждун тыронэ. - Марий Эл Республика самой секыт аръёсы но калыклы улон юртъёс лэсьтӥз, тӥ дорын тужгес быгатыса кутӥське кооперативной амал. - Зэм, пуктоно юртлэсь 70 процентсэ тырылӥм федеральной но интыысь бюджетъёс чотын. Али вераськон мынэ ни лэсьтӥськонъя нимысьтыз фонд кылдытон сярысь. Дунтэк улон инты висъяськом но висъялом ожысь но ужысь ветеранъёслы, трос пиналъем семьяослы, ёрмыса улӥсьёслы. Ужтэк кылемъёслэн лыдзы пумен кулэсме. Дунъёсты но "кырмыса" возьыны выриськом. Бускельёсынымы ӵошатыса, йӧл, сӥль, нянь но мукет тужгес но кулэ сиён-юонъёс ми дорын дунтэмгес. - Транспортын мынон-ветлон понна льготаос чакламын-а? - Федеральнойёссэ вератэк, Президентлэн указэзъя городысь транспортын дун тырытэк ветло пенсионеръёс, ожысь ветеранъёс. Берлоосыз понна нимысьтыз льготаос кутэмын междугородний автобусъёсын, ву вылтӥ но чугун сюрес кузя ветлӥсь транспортын. Пусйыны кулэ на: республикаын нимысьтыз программая бадӟым саклык висъяське арлыдо адямиослы, соос понна пуктэмын интернатъёс, юрттэт мынэ шуге-леке шедем семьяослы, дышетскисьёслы. - Вячеслав Александрович, калык верамъя, тӥ котькуд ӵукна асьтэос чакласькоды Йошкар-Олалэсь ӝикытлыксэ? - Озьытэк уг луы. татын 10 ар ӵоже, администрация нырулэмъя, калык понна номыр но йӧскадь ӧз лэсьтӥськы, шуыны луоз. Мае быгатӥзы - сопала-тапала люкылӥзы, вузазы. Налогъёсты бичась ӧй вал, ульчаос кырсен ӵакмизы. Али, асьтэос адӟиськоды, городмылэн тусыз воштӥське. Но со понна мыным аслым вазь ӵукна ик ульчаосты котыръяно луэ, администрацилэсь кылзэ юан вылысь. Со Президентлэн шат сюлмаськонэз? - Президентлэн структураяз кылдытэмын вуоно чиновникъёсты-кивалтӥсьёсты дасянъя школа. Соос дышетско бюджет чотын. Вань-а кулэлыкез сыӵе кадръёсты дасянын, малы ке шуоно, вылӥ дышетон заведениосын луонлыкъёс трослы ӟечгес, куронъёс но чурытэсьгес. - Мыным со уг кельшы, но институт кылдытэмын вал азьвыл Президент дыръя. Татын кыкетӥ профессия басьто вузъёсты йылпумъям специалистъёс. Ужпум мукетыз бордын ай. Институтэ кутэмын "асьме адямиос". Мон ужакум, дышетскыны кутом, конкурс ялыса. Соку шедёзы визьмоосыз студентъёс. - Тӥ туж трос ветлӥськоды республикаетӥ, нуналлы быдэ пумиськылӥськоды пӧртэм коллективъёсын, оглом вераса, одӥг минут но интыяды пукыны уд чидаське. Кызьы радъяськоды ужан нуналдэс? Малы одно ик асьтэос пыриськиськоды сояз яке таяз ужрадэ? Чидало-а таӵе ныпъетэз командаяды пыртэмъёс? - Кин уг чида - кошке, мон нокинэ кужмысь уг возиськы. Зэмос профессионал ужлы ёрмыса уз пукы. Малы ачим котькытчы вуыны тыршисько? Улон косэ. Кабинетын пукыны капчи, но - уж уг мыны. Мон асме ачим бызьылытӥсько, сюлоен шуккем кадь, соин ӵош котькуд ужасьлэсь кылзэ юаны быгатӥсько: мар лэсьтӥд нунал ӵоже, кытчы вуылӥд, кинэн пумиськылӥд. Адямиослэн та вакытэ мылкыдзы куашкамын, дасьсэ гинэ витё. Тӥни ма бордын кивалтӥсь ужаны кулэ: калыкез сэзъялтоно, азьланезлы оскон сётоно. Соку со ас интыяз кузё луоз. Малы Президент, министръёс интые, вазь ӵукна ик вутскыны выре ю-нянь арасьёс доры, заводэ, фермае? Валэктонэз одӥг: огинтыязы дасо аръёсын пукыса, "бабыны" дышемын. Сыӵеослэсь дас полэс ик юаны кулэ, но со понна аслыд югдурез ӟеч-ӟеч тодоно. - Таӵе веран вань: макем юн оппозициед - сокем юн сылод пыд вылад, пель сьӧртӥд лэзёд ушъян-данъян кылъёсты. Президент малэсь тужгес но кышка? - Мон номырлэсь уг кышкаськы: оппозицилэсь но, мултэс ужанлэсь но, президент креслотэк кылёнлэсь но, мултэс дунъян-ушъянлэсь но. Монэ калык бырйиз, калык ик мозмытоз, кулэ луиз ке. - Ваньмызлы тодмо, ужан нуналды "Марийская правда" газет бордысен кутске шуыса, Медведевской районэн кивалтыкуды - "районка" бордысен. Интыын потӥсь газетъёсты лыдӟыны дышетӥды республикаысь вань кивалтӥсьёсты. Со туж умой. Нош кызьы дунъяло соос критической материалъёсты? - Сюлэмазы йӧтытэк уг кыльы ке но, тупатскыны выро. Критика шонер но дыраз ке сётэмын, Президент азьын кыл кутоно луэ. Пресса, мон сямен, эшшо но тросгес ужаны кулэ шекъёсты возьматон бордын. Озьы гинэ соослэсь палэнскыны быгатом, огъя кужымен басьтӥськыса. - Вячеслав Александрович, тӥ утьыны быгатӥды ваньзэ государственной луись газетъёстэс. Соос, одӥг пол но вис карытэк, арняяз 5 пол пото, самой ӟеч вакытъёсы сямен. - Газет - со республикалэн синучконэз, идеологической ужлэн "пыӵалэз". Ассэ гажасьтэм кивалтӥсь гинэ калыксэ синтэм - газеттэк-журналтэк кельтоз. Газет мон понна - нырысетӥ юрттӥсь. - Тӥляд кабинетады 7 часын ӵукна тыл ӝуатске ни, нош кысэ 22 час котырын... - Сомында кыстӥське Президентлэн ужан нуналэз... Людмила Медведева. ПС. Та материалэз газетэ дасякум, кенеши на Марий Эл Республикаысь журналистъёсын Наталья Кулешоваен ("Марийская правда" газет) но Валерий Ларинэн ("Марий Эл" ГТРК). Соос верамъя, В. А. Кислицынлэн данэз калык пӧлын бадӟым. Со вуэмен, республикаын шӧдскымон ӝутскиз улон-вылонлэн радлыкез, зӥбломизы дунъёс, калык капчигес шокчиз. Умой пала воштӥськонъёс ортчо социальной удысын. Арлэн пумаз Марий Эл дасяськоз ни выль быръёнъёслы. Эшъёсмы верамъя, Кислицынэз туннэ воштыны нокинэн, солы альтернатива ӧвӧл. Ужаны быгатэмзэ, калык понна сюлмаськемзэ республикаын вылӥ дунъяло. Лыдпусъёслэсь уд пегӟы Кызьы шуо, кыл вылын трос вераны луэ, но югдурез ӟечгес возьматэ лыдпус. Со понна ик ми печатлано кариським сводка. Отын умой адӟиське Ильич нимо колхозлэн ёросысь хозяйствоос пӧлын интыез. Нырысетӥ колонкаын - 100 гектар гыроно-кизёно муослы йӧл поттэмын (цн). Кыкетӥяз - котькуд скаллэсь йӧл кыскемын 1998-тӥ арын (кг), куинетӥяз - 1999-тӥ арын (кг). Асан. совх. техникум 678,1 4338 3719 "Молодая гвардия" 462,9 3017 2814 "Большевик" 412,3 3073 3035 "Кизили" 396 3182 3978 "Нива" 344 3080 3247 "Родина" 343,7 3232 3168 "Коммунар" 332 3012 2271 Азин нимо 325,9 2459 2686 Ильич нимо 316,3 3316 3279 "Казаково" 309,7 2538 3105 "Красное знамя" 276,7 3134 2742 "1 Май" 273,4 2248 3000 "Правда" 269,2 2209 2630 "Колос" 268,9 3038 2640 "Прогресс" 263,6 2437 2581 "Мир" 250,1 2288 2796 Суворов нимо 199,8 2105 2261 "Решительный" 192,1 2019 2379 "Варалинский" 184,9 1953 1615 "Искра" 141,2 1730 2337 "Кама"125,2 1375 1548 Районъя 300,6 2689 2754 Удмурт Республикаысь Правительство кайгыре гурт удысъя министрлэн азьвыл воштӥсез, Удмурт АССР-ысь Планъя кун комитетлэн кивалтӥсезлэн азьвыл воштӥсез, Быдӟым Отечественной ожысь ветеран, "Знак Почёта" орденэн ньыль пол пусъем мурт Хомяков Александр Иосифович кулэмен валче но ӵыжы-выжыосызлы, матысь адямиосызлы мур куректэмзэ вера. Люкиськон луоз 24-тӥ мартэ 13 часэ таӵе адресъя: Ижевск город, Квартальный проезд, 82-тӥ юрт, 54 номеро квартира. Улон - бугор Улон бугор макем зӧкгес, сокем тросгес отын пертчыны луонтэм гердъёсыз. Ува ёросысь Ӝужгес гуртысь Алевтина Васильевна Карповалэн но бадӟым улон бугораз трос гинэ гердъёсыз. Кыӵе вань - вань ини, соосты выльысь волятыны уд ни быгаты, улонэз но выльысь уд ни ортчы. Озьы ке но, кышномурт номыре уг жаля. Муртлэсь кураськыса, муртлы вожъяськыса ӧз улы. Уй-нунал ужаз, тужгес секыт вакытъёсаз но чигиськыны ӧз сётӥськы - вӧзаз кузпалыз, ӵыжы-выжыез, бускельёсыз вал. Но берло вакытэ Алевтина Васильевнаез ӵемгес но ӵемгес сюлэмшугъяськытэ нылпиосызлэн но соослэн нылпиоссылэн азьпал улон сюрессы. Дас вить кузя соос кышномуртлэн. Нош котыр дунне солы пумен валантэмгес но кышкытгес луэ кадь потэ, кузёяськыны кутскизы лекъяськон, уродъяськон, вожъяськон. Кыӵе луоз нылпиосызлэн улон бугорзы, уз чигиське-а отысь керттылэм гердъёссы? Владимир Беломорскихлэн туспуктэмез но гожтэмез. *** Шунды ӝужа, шунды пуксе. Выль нунал вордске, ортче. Уродэн, яке ӟечен-а Улонэ пытьы кыле. Адӟисько уйвӧтъёсам мон Мылкыдме бурдъясь вӧтъёс, Улонын но, ужъёсам но Мед быдэсмозы соос. *** Адӟонэдлэсь уд кошкы Адӟонэдлэсь уд кошкы, куректонлэсь уд пегӟы, Бадӟым ке но дунне. Туж бай ке но луид тон, шудэз дунэн уд басьты, Шуэ вал анае. Ай сюресэ вакчи на, но ымтырос шӧмъяй ни Шӧгзэ но кузьытсэ. Кылӥ вал эшелэсь мон, инмар курадӟытэ, пе, Кельшем адямизэ. Таня Замятина. Алнаш ёрос, Кучыран гурт. Дарт Басьтӥськом интервью асьмеос Улон дӥсьтӥсь муртъёсты яратэ Валентин Кузьмич Тубыловез удмуртъёс пӧлын тодӥсьтэмез ӧвӧл. Синмасько солэн визьмо, рос-прос азьветлӥсь луэмезлы. Валентин Кузьмич сюлмаське егитъёс понна но - вазиськыкузы визьнод сётэ, сюрес возьматэ. Алигес мыным кылдӥз солы кӧня ке юанъёсын вазиськыны. - Кыӵе туннэ мылкыдды? - Огшоры, ӧжыт пыэдэн курадӟисько. - Кыӵе улон принципты? - Зэмлыко улон, ваньзэ рос-прос лэсьтон, меӵак вераны быгатон. - Кельшиськоды-а асьтэлы? - Мхм... котькуд адямилэн шекъёсыз вань. - Вань-а идеалды? - Анае. Мон котьку сое тодам ваисько. - Улонын малы тужгес но шумпотӥськоды? - Малпамея пӧрмем ужъёсылы. - Нош нылъёс кыӵеосыз кельшо? - Кузпалы кадъёсыз. - Мар тӥледыз али тужгес но шугъяськытэ? - Улон гожмы уллане усе, калыклэн ӟечезлы осконэз ыше. - Удмуртъёс пӧлын, пе, тужгес трос асьсэды быдтон учыръёс, пумисько. Кызьы малпаськоды, малы? - Удмуртъёс гинэ асьсэды уг быдто, сыӵе статистикалы мон уг оскиськы. Нош малыез тодмо - улонмы секытысь. Адямилэн соин нюръяськыны кужымез уг тырмы. - Нош ма кароно туала егит муртлы ассэ та улонысь ӝоггес шедьтон понна? - Нырысь ик дышетсконо ӟеч тодон-валанъёстэк туж секыт. Дӥсьтӥсь, аслад кужымедлы дӥсьтӥсь луоно. - Ужа-а "Удмурт кенеш" егитъёсын? - Егит муртъёсты палэнтыны уг яра, соос милям кивоштӥсьёсмы. Соин ик тыршиськом "Шунды" дэменлыкен кыӵе ке ужпумъёсъя валче кенешылыны, кусыпъёсмы умой кадь. О. Никитина. Удмурт кун университетын дышетскись. Быръён-2000 Улонмес Зюганов тупатоз Гажано удмурт лыдӟисьёс, бырйисьёс! Тӥледлы нимысьтыз ик вазиськем потэ, мед ӵошатоды азьлозэ алиеныз но чакласькыса быръёнъёсын куараостэс мед сётоды шуыса. Тани дас ар пала ини, "реформаос" ортчытӥськомы шуыса, Б. Ельцин но со котыре тэбинем пӧечиос ужаса улӥсь калыкез алдаса уло. Странаысь вань калыкен поттэм ваньбурез асьсэлы капыртонэн, "прихватизировать" каронэн, ӧз тырмытэ: власть возисьёс, ӝыны арлы но, быдэс арлы но уждунъёсты, пособиосты ӝегатыса, сое банкъёсын бергатӥзы но процентъёссэ кисыосазы донгазы. Городъёс котыре синэз мальдытӥсь пӧртэм-пӧртэм коттеджъёс пуктылыса серекъяны выро: уж, пе, шузи муртэ яратэ. Кивалтӥсьёс асьсэлы 15 сюрсысен 80 сюрсозь уждун пукто, ужасьёслы нош пичильтык уждунзэс но ӝегатыса сёто. Трос луизы кураськиськисьёс, войнаын быремъёс но сӧсырмемъёс, висись нылпиос но пересьёс. Али вордскемъёслэсь тросгес луо кулэмъёс. Б. Ельцин туж кескич ужаз: президент быръён выль дырозь ик ужало на шуыса оскытӥз но ачиз шӧдтэк шорысь Выль ар азьын отставкае потӥз. Интыяз В. Путинэз пуктыса, ваньмес сое быръёно шуыса оскытэ. Юан куриське: сомында урод уж лэсьтэм адямилэсь малы ми, бырйыны мынӥсьёс, кылзыны кулэ? Соос али ик верасько "губернизация" сярысь (автономиосты быдтон вылысь, озьы карыны выро!), музъемез вузан сярысь, президентлэсь кузёяськон дырзэ 7 арозь кузёмытон сярысь. Ваньмыз та огшоры ужась калыклы бадӟым изъян ваёз, тужгес но ӧжыт лыдо калыкъёслы - асьмеос ваньмы ляльчие (батраке) кылём. Та нуналъёсы аслэсьтыз программазэ калыке вутыны тырше КПРФ-лэн азьветлӥсез Зюганов Геннадий Андреевич. Партие со кылиз но кивалтӥсь луыны соглаш луиз КПСС-эз Б. Ельцин быдэсак куашкатыны вырон вакытэ. Г. А. Зюгановлэн дышетскемез туж бадӟым, со - профессор, философияя доктор, вань калык понна сюлмаськись адями. Мукетъёссэ со уг ултӥя, уг сантэма (нош ассэ ельцинистъёс пуныен суредаса но возьматыны выро). Нырысь ик Г. А. Зюганов кыл сётэ: нимаз адямиослэн кунгож сьӧрысь банкъёсы уксёез келянлы пум пононо - угось толэзьлы быдэ отчы кошке миллиардлэсь трос коньдон. Г. А. Зюганов, сое РФ-лэн бюджетаз ик кельтыса, пенсиосты но бюджет чотын ужасьёслэсь уждунзэс кык поллы будэтыны кыл сётэ; озьы ик синэтыны тырше налогъёсты, тыриськонъёсты, тужгес но - бензин, электро, газ понна. Пӧртэм пумо ваньбурез утёно, шуэ. Озьы нырысь араз ик улонмы умоялоз, асьмеос капчигес шокчыны быгатомы. Россилэсь ялан вирӟектӥсь-виясь яразэ, Чечняез, шонергес ужрадъёс кутыса, бурмытыны выром, пе. Мон Геннадий Андреевичлы оскисько. Ачим мон КПРФ-лэн членэз ӧвӧл ке но, коммунистъёслы дурбасьтӥсько. Куд-огез сое арлыдогес ни шуэ - 56-сэ, пе, ортчиз ини. Мынам чакламея, государствоен кивалтӥсь понна - со самой кын корт куртчон вакыт: опыт но вань, визьбурет (мудрость) но. Соин ик мон Г. А. Зюганов понна луисько но ваньдэс ӧтисько куарадэс со понна сётыны. Р. И. Яшина, УдГУ-ысь доцент, УР-ысь наука удысын сӥё-дано ужась, "Удмурт кенеш" огазеяськонлэн исполкомезлэн членэз. Материал печатламын Г. А. Зюгановлэн фондысьтыз коньдон чотын. Дарт Шогольяськом-а? Пинал ымныр буяськытэк но туж яркыт Сайкалэ - тулыс! Куштэ со секыт шубаостэс, дӥсялэ маке но капчи, чебер. Модаын - вакчи сайкыт пальтоос, ӝужыт каблукен ботинкаос, резинаен хлопоклэсь сьӧд брюки. Туэ туж модной шуо замшлэсь пыдкутчанъёсты, но асьме нӧдэн... Нулло кырето кофтаос, юбкаос, штаниос - кыре кытӥзэ мылды потэ. Тужгес дӥсьтӥсьёсыз тыбырзэс усьто. Пиджакъёс вылтыръя луыны кулэ. Кыӵе буёло? Лыз, чагыр-пурысь, зарезь тулкым тус... Басмаез - ыж гон, кашемир, хлопок, трикотаж. Бен, тужгес но векчи трикотаж. Выльысь модае пыро яркыт кускерттонъёс, еос, весьёсын, чилясен, сяськаен пужыятыса чеберъям джинслэсь ньыль сэрего сумкаос, одӥг еэн рюкзакъёс. Классической сумка - замшлэсь, бадӟым, ньыль сэрего. Эн вунэтэ капчи кышетъёс, шарфъёс сярысь. Нош яркыт буяськон модаын кемалась ӧвӧл ни. Дарт Вормонлы - 55! Песятайлэсь синпель Уг тодскы мон песятайме, Тусыз-буйыз гинэ тодмо - Борддорысен пыр потымон Семьяосыз шоры учке. Пересь песяй ӵуклы быдэ Маке соин сипыртылэ. Куддыр синвуоссэ ӵуше, Куддыр лушкем мынектылэ. Огпол ӝомал усем бере Песяй вӧзаз пуктӥз монэ. Аръёс нуо тазалыкме, Вераськонэ, пе, вань, пие. - Эн вунэты ас выжыдэ, Песянайдэ-песятайдэ. Онтон песятаед тани Ӝужыт ӧй вал кадь мугорын, Но кужымез! Ӟуч эксэйлы солдат со вал Кызь вить арзэ служить кариз Россия кунмылы. Ӧз кылды бен омыръянлы Шудэз-данэз Онтонэлы. Кема ӧз кылды улыны - Кельтӥз со милемды. Тани, пие, синпель солэсь Азвесь кирос. Онтонэлы - Онтонэлэсь. Данэ потты выжы ниммес. Антон Ганьков, 12 арес. Алнаш ёрос, Вуж Юмья гурт. ДАРТ ВОРЕКТӤСЬ КИЗИЛИОС Пешкаостэк ёрмоно Шахматэн шудӥсьёс пӧлын Завьял ёросысь Первомай школаысь Денис Кутлинлэсь нимзэ тодӥсьтэмез ӧвӧл, дыр. Туэ со республикаысьтымы Шахматэн шудонъя федерацилэсь "Ӟечбур, ХХИ даур!" медальзэ басьтӥз. Денис 7-тӥ классын гинэ дышетске ай, но троссэ арлыдо шудӥсьёсты но паймытъяз ни. Мон пияшен медаль басьтэмез бере пумиськылӥ. - Денис, кемалась-а шахматэн шудӥськод ни? - Школае мынэм дырысен. Нырысь шахмат фигураосты но уг тодмаськы вал, тренере Любовь Григорьевна Созонова дышетӥз. Шахмат - туж тунсыко, аспӧртэм шудон. - Нош тодӥськод-а, тренеред Удмуртиысь гуртысь шудӥсьёс пӧлын шахматъя куамын полэс чемпион шуыса? - Уг. Любовь Григорьевна ноку аслаз вормонъёсыз сярысь уг вералля. - Кыӵе сямо луыны кулэ пинал шахматист? - Чидась, котькуд вамышсэ чаклась, азьпалзэ адӟыны быгатӥсь, вормон понна нюръяськись. - Но, вормон сяна, луыло келянъёс но. Туж-а куректӥськод соку? - Пичигес дыръям бӧрдӥсько вал. Но Любовь Григорьевна валэктӥз, со улонын самой кышкыт маке ӧвӧл шуыса, чиданы, янгышъёсме эскерыны дышетӥз. - Шахматэн шудэмед дышетскыны уг люкеты-а? - Юрттэ гинэ. Адямилэн макем трос ужез, сокем чупресгес луэ кадь со. Тыршисько умой дышетскыны, "куиньёсы" ӧвӧл. - Тынад пичи выныд но шахматэн тунсыкъяське, районысь покчиос пӧлын вормисе потаз ни. Шудылӥськоды-а ваче? - Куддыр шудӥськом, но со мынэсьтым кышка. - Кыӵегес янгышъёс лэсьтӥськод шудыкуд? - Малы ке пешкаосме уг жаляськы, собере соостэк ёрмисько. Лябгес шудӥсько на блиц- турниръёсын. - Нош республикаын ортчись ӵошатсконъёсын секыт-а вормыны? - Капчи ӧвӧл. Октябрьскойысь, Пироггуртысь, Июльскойысь, Ярысь, Уваысь пиналъёс зол шудо. Асме эскереме потэ, городысь пиналъёсын шудыса. Соослэсь но дышетскысал, аслым выль композициос, оло, шедьтысал. - Вань-а тынад шахматъёсъя нимысьтыз книгаосыд? - Вань, но ӧжыт ай. Кӧнязэ ке кузьмаллязы ӵошатсконъёсын вормеме понна. - Кыӵе али малпанъёсыд? - Кыкетӥ разряд басьтэме потэ, отӥяз адӟом. - Малпанэд мед быдэсмоз. - Тау. Н.Иванов. Завьялово. Бырйисьлэн мылкыдыз Президент калыклы матын медло Тодам лыктэ песятаелэн пичи дыръям верамез. Со шуылӥз, эксэй дыръя удмуртъёс туж секыт улӥзы. Удмуртъёс пӧлын дышетскемъёсыз но туж ичи вал. Удмуртэз ултӥяло, серекъяло, сантэмало вылэм. Ленин удмуртъёслы шудбуро улон сётӥз, шуылоз вал песятае. Али малпасько ке, зэм вылэм со. Советской Союз дыръя улон умой луиз. Удмуртъёслы но дышетскыны сюрес усьтӥськиз. Кӧня сӥё-дано адямиосмы будӥзы: писательёс, художникъёс, артистъёс но мукетъёсыз. Удмуртъёс капчи шокчизы, синзэс усьтӥзы. Мон но кельшымон профессия басьтӥ, нылпиосылы но вылӥ образование сётыны быгатӥ. Дышетским дунтэк, стипендия но государство тыриз. Уждун но дырыз дыръя басьям. Мон асме шудоен лыдъясько, малы ке шуоно, будӥ, дышетски, ужай советской улонын. Нош шудмес утьыны ӧм быгатэ. Оло, со шуд нош ик берытскоз, малпаськыса Россилы Президент бырйим ке? Мон куараме сёто Г. А. Зюгановлы. Малы ке но солы гинэ оскисько на, КПРФ гинэ ужась калыкез секыт улонысь мозмытоз шуыса. Н. Андреева, Уваын улӥсь. Ольга Афанасьевна Двоеглазова - паймымон кышномурт. Ӟеч анай но усто дышетӥсь луэмез сяна, со калыкез шумпоттэ куиськыны-чильпаськыны быгатэменыз. Быдэс борддорез басьтӥсь ковёр (учке фотоез) солэн киосыныз лэсьтэмын. Сыӵе ужъёсыз солэн ичи ӧвӧл ни. Та нылкышно оломаин но тунсыкъяське. Милесьтым юа, ӧд-а, пе, адӟе телевизор пыр одӥг возьматонэз? Москва котырысь воргорон ог 20 метръем башняос лэсьтэ, озьы со котырысь музъем воштӥськыны кутске, бакча сиён удалтэгес, адямиослэн висёнзы палэнске. Туж, шуэ, со адямиен тодматскем потэ. Ми ма вераны ӧм тодэ. Оло, тӥ, гажано лыдӟисьёс, адӟиды со суредэз но юрттоды Ольга Афанасьевналы? Витём ивордэс. Эшшо кӧня ке лыдпус. 1994-тӥ арын колхоз 669 тонна йӧл вузаз, 1996-тӥ арын - 412, миым - 934 тонна. 1996-тӥ арын котькуд скаллэсь йӧл кыскон 1842 килограммозь лэзиськиз ни вал. Берло дыре со шӧдскымон йылӥз. Колхоз тӧролэн верамезъя, пудо вордонын воштӥськонъёс герӟаськемын егит зоотехниклэн Людмила Григорьевалэн тыршеменыз. Солы ӟеч юрттэ Нина Тарасова. Кылем арын котькуд гектарысь 14,3 центнер ю тысь кутсамын. Ӟеч аръёсы 17-18 центнер но люкаськылӥз. ДАРТ ДЫШЕТСКЫ Пичи дырез нуйтон Асьмеос ялан сузьтӥськыны выриськом "югыт азьлане". Одӥг вамыш капчияк, кыксэ- куиньзэ - кырыжак. Кымесмес ӵушыса учкиськом Шунды пуксён пала - нош соослэн кызьы? Кутскиськом эскерыны. Ӵемысь улонысьтымы самой дуноез - нылпиос вылын. Конечно, соослы умойзэ гинэ сӥзьыса, туж-туж визьмо но шудо-буро карыны турттыса. Школаосын 12 ар дышетон программае выжон пумысен верасько мон. Шӧдскымон пайда сётоз-а со нылпиосмылы яке дыр быдтон гинэ луоз-а? Бадӟым специалистъёслэн валэктэмзыя, сыӵе программае выжонлэн кулэлыкез туж бадӟым - туала пиналъёс уг вутто вань предметъёсты рос-прос дышетыны, нош химиез, физикаез, биологиез ӵемысь чик уг валало. Соин ик та предметъёсты нуйтыны кулэ. Сотэк асьсэос но дышетӥсьёс предметэз вылтӥз-вылтӥз гинэ сёто, институтэ пырон понна, пиналъёс выльысь дун тырыса дышетсконо луо. Нош 12 аръем программая берло кык арзэ меӵак вузэ пырыны дасялозы. Соос, нимысьтыз экзаменъёс сётытэк, студент луыны быгатозы. Но та но выль программае выжон понна, валтӥсез муг уг луы. Туала пиналъёслэн школаын дышетскыкузы ик тазалыксы быре ни. Шукке секыт программа но, сютэм улон но. Озьы ке, дышетонэз нуйтыса та 12 арзэ ик пиналъёсты школаосын азьвыл сямен дунтэм дунын сюдыны быгатысалзы на ке... Нош мар малпало меда та эскерон сярысь огшоры адямиос? Надежда Германовна, дышетӥсь: - Мон малпасько таӵе системалэн пайдаез шӧдскымон луоз. Учке ай, макем секыт туала пиналлы школаын. Сомында выль предметъёс пыртэмын, нуналаз 6-7 урок, ай вылаз, бадӟым классъёсын дышетскисьёс вузэ пырыны дасясько на - ныпъетсы бадӟым муртлэсь но секытгес. Тамара Евгеньевна, дышетӥсь, классэн кивалтӥсь: - Дышетӥсь сямен, мон талы дурбасьтыны кулэ, дыр. Нош зэмзэ ке, вутскисез котьку вутске. Азьтэмъёсызлы ке, эшшо одӥг ар ватсаськоз. Умой ук, ужаны но косӥсез уз луы, дышетӥсьёслэсь но нерваоссэс быдтыса улозы. Елена Александровна, быдэ вуымтэосын ужась: - Мон кемалась чакласько ни, 14-15 аресъемъёс тросгес йыртэмало ке, 17 аресъемъёс кышкыт йыружъёс лэсьто ни. Малы? Тросэз соос, школаез быдтыса, нокытчы уг интыясько, армие уг басьто на. Эскерись ӧвӧл, мар ке но ужано. Лушкаськыса коньдон поттыны тыршо, "бышкиськыны" кутско. Выль системая, оло, школа бере ик армие басьтозы. Но соиз рос-прос тодмо ӧвӧл ай. Людмила Николаевна, школаын ужась врач: - Школазэс быдтыкузы, пиналъёс ваньмыз висись луо ни, ляб адӟо, керӟег луо. Валамон, пинал мугор собыдӟа секытэз уг чида. Вылаз ик, али туж урод сисько: школаын столовое тросэз чик уг ветлы, доразы но макарон-картош вылын уло. Программаез кемалыгес кыскыса, оло, дышетскон капчиенгес сётӥськоз. Зоя Ильинична, участковой врач: - Мынам аслам нылы 18 арескын бызиз. Со дас ар талэсь азьло вал. Туала нылъёс тросэз 15-16 аресказы кер уг пото ни пиосмуртъёсын улэмзы сярысь вераны. Нош школаын 18 аресозь дышетӥзы ке, тросэз парта сьӧрын ик анай луозы. Соку 1-тӥ сентябре дышетскон книгаосын ӵош секытомемлэсь утиськон эмъюм сётъяно - Голландиын сямен. Татьяна Павловна, анай: - Мынам кык пиналы. Кыксы ик "витьёслы" дышетско, уг курадӟо. Соин ик дышетсконэз кузятэмзэс уг валаськы - сотэк но быдэ вуэмзэс кемалась возьмасько ни. Ляб дышетскисьёс понна ке озьы каро, соосты коть кызь ар пукеты, пукозы. Александр Григорьевич, атай, гуртын улӥсь: - Министръёс озьы малпаллям бере, кулэ, дыр. Мда, дас тямыс арескын азьло дыръя зэмос ужась, пиосмурт луо ни вал. Али эшшо кыӵе ке академиосы кошко на ай, пересьмытозязы дышетско. Самой тунсыкоез соиз - юалляськем пиналъёс пӧлысь огезлэн но одӥг арлы мултэс дышетскемез уг поты. Ми отчыозь школаез быдтом ни шуо, со амалъя дышетсконо покчиосты жаляло. Малы пиналлэн (ляб дышетскисезлэн но, отличниклэн) но школаысь чальгес кошкемез потэ? Оло, мугез секыт программа бордын гинэ ӧвӧл? Соку кызьы "Школа - кыкетӥ дор" шуон? Ӧтиськом та вераськонамы пыриськыны школаын ужасьёсты, дышетскисьёсты, анай- атайёсты. З.РЯБИНИНА. Туспуктэмез В.Камашевлэн. Эн янгыша! Кыдёкын ӧвӧл ни со нунал. Быръёнъёсты ортчытон участокъёс ӧсъёссэс вазь ӵукна ик усьтозы - мон верасько 26-тӥ март сярысь. Тодӥсько: котькудӥзлэн малпанэз аслаз. Огез сюлмаське тазалыксэ юнматон, кыдёкысь санаторие мыныса эмъяськон сярысь, мукетыз - пиналъёссэ будэтон, соосты пыд йылазы султытон сярысь. Пӧртэмесь, туж пӧртэмесь малпанъёс-сюлмаськонъёс. Тани мӧйы арлыдо ветеранъёсты басьтом. Соос пӧлысь уноезлэн пенсизы одӥг пумзэ мукетыныз герӟаны уг тырмы. Пенсия басьтон нунал вуытозь, бускельёсыд яке тодмоосыд доры йыгаськоно луэ. Нош пунэмен басьтэм коньдонэз берыктоно ук. Кӧня кыле на солэн "кассаяз", толэзь бырытозь? Адями ачиз сярысь гинэ уг сюлмаськы. Ужа заводын, чугун сюрес вылын, фермаын, лудын, нюлэскын. Капчи ӧвӧл солы. Нош ӧжытгес кужымен кызьы тросгес лэсьтоно меда? Кин матынгес властьёслы, законъёс кылдытъясьёслы? Огшоры адями оске аслаз быръем депутатэзлы, тужгес вылӥезлы - Президентлы. Мукетыз но юан кылдэ. Ӟеч-а тодэ со, кин понна сётоз куаразэ? Азьло быръёнъёсты тодэ ваёно ке, ватытэк вераны луэ: уг. Уноез бырйисьёс бюллетеньёсты киязы басьтэмзы бере но уг тодо на, кин понна сётоно куарадэ. Сыӵеос уката ик трос мӧйыос пӧлын: соос уго калык пӧлы ӵем уг потало ни, кенешъёсы, пумиськылонъёсы уг ветло. Дас, кызь ар талэсь азьло ортчем быръёнъёс азьын котькуд корка, квартирае агитаторъёс пырало вал. Соос депутатэ кандидатъёс сярысь пыр-поч мадьылӥзы. Бен, соос сярысь гинэ-а? Быдэс улон-вылон пумысен сюлмысь вераськон ӧръяськылӥз. Ужзэс яратӥсь, бырйисьёслэсь куронъёссэс кылзыны быгатӥсь агитаторъёс адямиослэн юан-веранъёсынызы мынылӥзы организациосы, предприятиосы, кивалтӥсьёс доры. Ӝутэм ужпумез сэрттытэк-пертчытэк ӧз кельтылэ. Соин угось усто ужась агитаторъёсты витьылӥзы городысь микрорайонъёсын, ульчаосын, коркаосын. Асьме вакытэ сыӵе сямлэсь палэнскон умой шат? Вужзэ, дышемзэ сантэман, вылтӥяськон со. Зэм, бырйисьёс доры чылкак нокин уг ветлы уд шуы. Ӧсэ йыгасько чылкак тодмотэм нылкышноос яке воргоронъёс. Ми, пе, соиз яке таиз кандидат пумысен ветлӥськом. Оло, кидэс нюртоды, дурбасьтэмдэс возьматыса? Нош бырйись ӟеч тодэ-а со кандидатэз? Кин ке гожтӥське, кин ке ӧссэ йыг! ворса но, ужез быре. Бӧрсязы лек кылъёс но верасьёсыз вань на: ветло, пе, югыт нуналэз сьӧдмаса. Олокин понна киме нюртыны кулэ - тодӥсько шат кинлэсь ке ӵектэм адямизэ? Бырйись шонер малпаське: быръёно адямиед кикур вылын кадь мед адӟиськоз. Бӧрысь нокин вылэ ӝожтӥськоно медам луы. Кандидатэн пумиськылонъёсын данак юанъёс сётӥсько. Соос пӧлысь огез - улон-вылонэз умоятон сярысь. Котькудӥз кандидат оскытэ: мон сюлмасько ужась калык сярысь. Зэм, оскеммес ӵемысь уг быдэсто. Ӵапак соин ик азьло бырйылэм уноезлы депутатъёслы кылем быръёнъёс дыръя выльысь оскемын ӧй вал ни. Соин выльысь но выльысь верано луэ, быръён участоке мыныкуд ик тодоно ини куарадэ кин понна сётондэ. Кабинае пырон азяд юано медам луы, кинлы дурбасьтоно (со законлы пумит луэ). Малпано ай мукетсэ но: кинлэсь юаны шедьтод. Оло, тынад осконэдлы чылкак пумит луись мурт дэмлан сётоз. 26-тӥ мартэ асьмеос быръёмы Россилы Президент. Солэсь бадӟымез кивалтӥсьмы ӧвӧл ни. Быръён нуналэ куарадэ туж чакласькыса сётоно. Аслад сюлэменыд шӧдоно ини осконо адямидэ. Али тани Президентэ кандидатъёс нуналлы быдэ радио, телевизор пыр верасько. Куд-огез экранысь туж шер ышылэ, нош мукетсэ вужерез кадь гинэ адӟоно. Дас кык мурт пӧлын кандидат кужмысь луэмъёсыз но вань - судэн-быжен вырем бере гинэ шедиз огез бюллетене (Владимир Жириновский). Со кемалась турттэ ини кунамы губерниос кылдытыны, нокыӵе улосъёс, республикаос кулэ ӧвӧл, пе. Солы дурбасьтӥсьёс но шедё. Президентэ кандидат сярысь, оло, тазьы вераны кулэ ӧвӧл, но зэмлыкез малы ватод? Сое котькызьы шобырты, пытса - одно ик кыре потоз. Президентэ кандидатъёс, асьсэды бадӟым удысэ ӵектон понна, пӧртэм амалъёс малпазы. Тани В. В. Путин чылкак мукет сюрес бырйиз. Быръёнъёс сярысь со трос уг вераськы, уката ик ассэ быръён пумысен "кӧс возе". Кыӵе малпанъёсын потӥз со Б. Н. Ельцинлэн кабинетысьтыз? Б. Н. Ельцин угось солы аслэсьтыз "песьтэрзэ" сётӥз. Кыӵе вераськон вал, ваче син учкыкузы - сое огшоры адямиос ӝоген уз тодэ. Оло, ноку шарае уз поты? Огез валамон: В. В. Путин "песьтэрез" кутэмез бере ик шара вераз, ужысьтыз кошкись президентлэн мытэм удысэз лыдэ басьтэмын но азинтэмын луоз шуыса. Уг, со, пукись ӟазег сямен, огинтыяз уг пукы - туннэ отын, ӵуказе - татын. Нунал куспын пӧртэм пумиськонъёсы, кенешонъёсы вуылэ. Адӟод калык пӧлысь. Кытчы ке нош одӥг-кык часлы гинэ вуылэ. Ӧйтӧд, со куспын ма гинэ лэсьтыны вуод. Заводэ, му вӧй поттӥсьёс доры ветлэмезлэн кыӵе ке пытьыез кыле меда? Ассэ возьматыны ветлэм кадьгес луэ ук со (оло, зэмзэ но, возьматэмез потэ?). Телеверанъёсты учкисьёслы акыльтӥз ини огпӧртэм тусбуйёсты адӟон. Экран вылэ нуналлы быдэ сямен потало Сергей Кириенко, Борис Немцов, Владимир Жириновский, Анатолий Чубайс, Борис Березовский но мукетъёсыз. Шат соос гинэ асьмелэсь улон- вылонмес радъяло? Кытын огшоры адямиос, ваньбур поттӥсьёс, соослэн улонэз адӟыса верам дэмланъёссы, малпанъёссы? Зэм, куд-ог дыръя радио но телевидение пыр кылӥськод "палдэм шелепъёслэсь" вераськемзэс. Соос азьлоез вылэ локанысь пож ву сяна кисьтаны уг быгато, ваньзэ дэриен сурало. Ӧй вал кадь дунтэк дышетскон, эмъяськон, шутэтскон. Ку бен выльдӥськизы городъёсмы? Нош кунокуа дунтэк басьтон но трос мукетыз?.. Сыӵеос медальлэсь одӥг палзэ гинэ адӟо. Соку ик таӵе малпан кылдэ: телевидениын но, радиоын но озьы вераськисьёсты юри утчало. Туала реформаез ортчытӥсьёслы со ик кулэ. "Выльзэ" лэсьтон понна, пе, вужзэ пож вуын гылъяно. Калыкез валантэм сюрес воже вуттон понна, пӧртэм амалъёс умоесь, шӧдске. Демократия вылэ чӧлскыса, ваньмыз ас эрказ лэземын. Нош со куд-ог учыръёсы изъян вае ке, соку мар? Президент одӥг нуналлы уг бырйиськы. Соин ӵош аръёсты ортчытоно. Улӥм Ельцин кивалтон вакытэ но: тодӥськом кызьы улэммес. Ӧм вунэтэ. Соку но, али но жуг=жаг куян интыосын бугыръяськисьёс ӧз кулэсме, уг но кулэсмо. Бырйисьёслы Президентэ кинэ быръён сярысь малпанзэс ӵуказелы кельтоно ӧвӧл - туннэ со чакламын мед луоз. Бюллетеньёсты лэзён урна дорын ӟудыса сылоно медаз луы. Нырысь ик - янгышано ӧвӧл. Огпол лэсьтэм янгыш уно аръёс ӵоже вӧсь карыса возёз. Куараез сётоно со понна, кин кунулаз из возьытэк, шара вера калыклы матысь малпанъёссэ. Сыӵе потэ мыным кунысьтымы коммунистъёслэн кивалтӥсьсылэн программаез. В. СМИРНОВ, ожысь но ужысь ветеран. Ӟеч тыршод - данэ потод Гуртын котькудӥз ик умой ужаны турттэ. Озьы ке но, куд-огезлы мукетъёссэ азьпалтыны кылдэ. Ильич нимо колхозын данъяськыса верало Сырьезысь вужаз гидын ужасьёс сярысь (учке фотоез). Татысь скал кыскисьёс шуг-секытлы ӝожтӥськыны уг ярато, тросгес йӧл поттон сярысь малпанэн уло. Отысь ик вормонъёс но пото. Нылкышноос куспазы но умой тупало. Котькуд праздникез ӵош пусйыны тыршо, вордскем нуналзылы ог-огзылы кыӵе ке кузьым дасяны сюлмасько. Ма, пиос но ужез гажало. "Корт валъёссэс" юн чакласа возё. Тани та нуналъёсы техосмотрлы дасясько. Тодо уго: бусые потытозь, рос-прос ужад ке, кизёнын ӝеганъёс уз кылдэ. Механизатор Герман Овчинников. Азьмынӥсь пудо утисьёс. Тракторист Михаил Овчинников. Таӵе чебересь юртъёс ӝуто туала дыре сырьезъёс. Колхоз нылъёс чебер вуриськыны но, умой вузкарыны но дышизы. Туспуктэмъёсыз В. Беломорскихлэн. Калыклы вазиськон Асьме республикаын уло 70-лэсь уно пӧртэм нациен калыкъёс. Ваньзы соос Удмуртиез вордскем шаерынызы лыдъяло но кыл куто Удмурт Республикалэн улонэз понна. Ми данъяськиськом, Удмуртия нациос куспын тупаса улӥсь элькунъёс пӧлы пыре шуыса. Асьме дорын кутэмын национальной политикая кун концепция но кылдытэмын Нациосын ужан политикая нимысьтыз министерство. Дасямын Удмурт калыкез дышетонъя национальной концепцилэн, нациосты азинтонъя кун программалэн, республикаысь калыкъёслэн кылъёссы сярысь законлэн инъетъёссы, кылдытэмын Национальной культураосъя республиканской центр. Нациослэн культурая огазеяськонъёссылы государство ялан коньдонэн юрттэт сётэ. Нош туннэ кивалтӥсьёс органъёсын асьсэлы но тӥлесьтыд юрттэт кулэ. Кужмо властен государство гинэ утьыны быгатэ асьмелэсь куронъёсес, сое валаса, ми ӧтиськом пӧртэм выжыосысь потэм эшъёсты 26-тӥ мартэ референдум дыръя куараосты сётыны Удмурт Республикалэн Конституциезлэн 10-тӥ ёзэтаз воштонъёс пыртон понна. Асьмелы кулэ Кун Кенеш - Удмурт Республикаысь калыкъёслы юрттонъя программаосты кутон понна. Асьмелы кулэ Правительство - кутэм документъёсты улонэ пыӵатон понна. Асьмелы кулэ Конституцияя Суд - законъёслэсь быдэсъяськемзэс чаклан понна. Асьмелы кулэ вань калыкен быръем Президент - Удмуртилэн Конституциен юнматэм луонлыкъёсты: вань калыкъёслэсь, лыдзы шоры учкытэк, огкадь нуон правозэс, адямилэсь правооссэ но эрикъёссэ гажан, котькуд адямилэсь кылыз, религиез, кытын но кызьы улэмез шоры учкытэк азинскыны быгатонлыксэ утён понна. 2-тӥ апрель Россиын ялэмын Калыкъёслэн огазеяськон нуналэныз. Огазе улон мылкыдмес ми возьматыны ӵектӥськом 26-тӥ мартэ, Удмурт Республикалэн выль кун властезлы дурбасьтыса. Нациослэн культурая огазеяськонъёссылэн кивалтӥсьёссы: М. К. Кокорин - Ӟуч культурая общество. А. А. Разин - удмурт культурая "Дэмен" общество. Р. Г. Габдуллин - Удмурт республикаысь бигеръёслэн общественной центрзы. А. И. Радыгин -Удмуртиысь поръёслэн "Одо Мари Ушем" союззы. Н. В. Ромащенко - Россиысь немецъёслэн Удмуртиысь "Видергебурт" центрзы. ТУГОКО Котькудӥз сяська ас сяменыз чебер Паймоно кадь тупаз кылем субботае. Та нуналэ трос пӧртэм ужрад ортчиз. Дас часын кутскиз ужаны Ӟуч культурая обществолэн йылпумъянъёслы но быръёнъёслы сӥзем конференциез. Дас одӥге люкаськизы Удмурт культурая "Дэмен" огазеяськонэ пырисьёс. Соос пусйизы обществозылы дас ар тырмонэз. Нуназе бере "Аксион" культура дворецын усьтӥськиз еврей калык творчестволы сӥзем праздник. Нош ӝытазе "Металлургын" ортчиз Удмуртиысь башкиръёслэн но бигеръёслэн эшъяськон фестивальзы. Тӥни сыӵе быдэс тугоко. Ӟуч культурая общество вордскиз укмыс ар талэсь азьло. Кызьы пусйиз докладаз солэн кивалтӥсез Михаил Кокорин, та дыр ӵоже огазеяськонэ пырисьёс быгатӥзы, янгыш луисьёсты утчанлэсь мозмытскыса, зэмос уж борды басьтӥськыны. Калык культураез утён но азинтон вылысь, обществолэн членъёсыз ортчытыло пӧртэм пумиськонъёс, адӟытонъёс, берло аръёсы кутскизы республикаысьтымы пыдлось ӟуч гуртъёсы экспедициосы потаны, озьы луиз трос ӟеч материал люканы. Али котькудаз сямен ёросын кылдытэмын ни обществолэн ёзъёсыз. Соос огазеяло ог 2000 муртэ. Михаил Кокоринэз шугъяськытэ егитъёсын ужез радъямтэзы. Сотэк азьлане мыныны уз луы, пусйиз со докладаз. Конференциын вераськиз Кун Кенешлэн Тӧроез Александр Волков. Республикаысьтымы калыкъёс куспазы тупаса мед улозы шуыса, Удмурт но ӟуч культурая обществоос, бигеръёслэн центрзы трос лэсьтыны быгато. Та ласянь соослы юртто кивалтон ёзъёс но. Умойтэм соиз, пусйиз Александр Александрович, куддыр асьмеос дырмес юнме быдтӥськом кулэтэм чыры-пыры ужпумъёсты эскеронлы. Озьы вырытозь, котькудмылы кутсконо уж борды - со укыр трос. Кенешонэ пыриськиз Россия Федерацилэн Кун Думаысьтыз Нациосын ужанъя комитетлэн кивалтӥсезлэн воштӥсез Светлана Смирнова. - Малы ке но Россиын тазьы дышемын: национальной культура пумысен вераськон потэ ке, бигер, удмурт, башкир но мукет культураосты азинтон сярысь кенешо, нош ӟуч культураез тодазы но уг ваё, - шуиз Светлана Константиновна. - Но сотэк асьмеос кыдёке ум вуэ ук. Тае лыдэ басьтыса, Кун Дума али рос-прос басьтӥське ӟуч кылэз утён, ӟуч культураез азинтон, Россилэн палэназ улӥсь ӟучъёслы юрттон борды. Со понна кутыны чакламын законъёс но нимысьтыз программаос. Депутат пыр-поч мадиз Нациосын ужанъя комитетын эскероно документъёс сярысь. Шумпотэмзэ вераз: Удмуртиысь пӧртэм калыкъёслэн огазеяськонъёссы берло аръёсы ог- огенызы тупасагес уло, огъя ужпумъёсты быдэсъянэ уртче пырисько. Обществолэн Алнашысь ёзэзлэн кивалтӥсез Надежда Уразбахтина, Завьял администрацилэн кивалтӥсез Галина Баталова но мукет эшъёс вераськизы культураез азинтон бордын ужамзы сярысь. Огазеяськонэн кивалтыны нош ик оскемын Кун Кенешлэн депутатэзлы Михаил Кокоринлы. О.МАРКОВ. Азьмынӥсь хозяйствоосын Ильич нимо колхоз пумен азьлань мыноз Писэйгуртын улӥсьёс Ильич нимо колхозэ огазеяськизы 70 ар талэсь азьло. 21 ар ортчыса, соос вӧзы итӥськизы "Батыр", "Новая жизнь" но Киров нимо колхозъёсын тыршисьёс. 1956-тӥ арын, Пычас ёросэз быдтэмзы бере, Ильич нимо колхоз но Писэйгурт сельсовет Алнаш районэ пыриз. 1962-тӥ арын партилэн райкомез колхозэн кивалтыны ыстӥз Улын Сырьез гуртын вордскем воргоронэз Петр Нестерович Сыропятовез. Татын со 1986-тӥ арозь ужаз. Визьмо но гажано муртлэн кивалтэмез улсын колхозэ пырись гуртъёс туж зол воштӥськизы. Ӝутскизы бадӟым административной юрт (отчы интыяськизы правление, сельсовет, сберкасса, почта, библиотека), нылпи комбинат, шор ёзо школа, 18 квартираен улыно- вылыно корка, пекарня. Ваньмаз гуртъёсын усьтӥськизы магазинъёс. 25 ар ӵоже колхоз ас ужасьёсызлы кызьлэсь трос квартира лэсьтӥз. Улын Сырьезын кылдытӥзы Егитъёслэсь урамзэс. П. Н. Сыропятов кивалтон вакытэ хозяйствоын 300 гектар етӥн, 120 гектар картофка будэтӥзы. Котькуд скаллэсь ар ӵоже йӧл кыскон 3100 килограммозь вуиз. Татын кутскизы районысь колхозъёслы тырмымон ветыл вордыны. 1986-тӥ арын Петр Нестерович аслаз интыяз дэмлаз та хозяйствое ик пырись Ӧркагуртын будэм егит воргоронэз Владимир Викторович Балашовез. Со ужаз куать ар ӵоже. 1992-тӥ арын председатель луиз Илья Михайлович Ильин. Сокугес ик Ӧркагурт нимаз колхозэ люкиськиз. И. М. Ильин трос лэсьтӥз, рыноке выжон огыр-бугыр вакытэ колхозлэсь экономиказэ утён но азинтон понна. Со дыръя басьтэмын вал электровуко, кеньыр лэсьтон агрегат, йӧлэз сӥсъян аппарат но мукет кулэ тӥрлык. 1995-тӥ арын феврале гуртоос асьсэлы кивалтӥсе бырйизы Вениамин Васильевич Двоеглазовез. ГОЖТӤСЬКОН-2000 Вань вӧзы вань медло Улмолы усён инты ӧй вал 16-тӥ мартэ Кияса ёросысь Вуж Салья клубын. Сомында калык люкаськиз оштрак но парсьпи люконамы. Кыӵе оштрак? Со Шаркан ёросэ кошкиз ни ук, шуэмды потэ, озьы-а? Бен, озьы ик вань. Но киясаослэн но пудоен улэмзы потэ ук, газетмес лыдӟисьёс но отын ӧжыт ӧвӧл. Соин ик татысь "Рассвет" колхозлэн тӧроез Петр Григорьевич Петров, "дунне оштраклэсь" соос пала вамыштэмзэ возьматэк, колхозын ужасьёсызлы ачиз кык центнерозь будэтэм оштрак но парсьпи сӥзиз! Салья но Ермолаево почта ёзъёсысь лыдӟисьёсмы пӧлысь кин тужгес шудоез меда? Люкаськемъёсты шулдырто Сальялась усточи пиналъёс, Пурга ёросысь Бобья-Учаысь нылкышно арганчиос. Ӝыт ортче, оштрак сярысь уг верасько. Но сальяос уг керӟегъясько, возьмало. Алексей Петрович Шкляев керетэ: оштракез, пе, уйшор бере гинэ шудытом. Возьмалом, шуо. Я, соиз серекъян понна. Лотереямы оскымонгес мед луоз шуыса, залысь чупрес нылашез ӧтиськом. Галя Петрова сура квитанциосты. Нырысь ик оштракез шудытӥськом. Та вие залын шып луэ: мынам мед луысал, осто! Но тужгес шудоез лыдӟисьмы залын вылымтэ. Кемалась лыдӟисьмы, пенсионер Владимир Никифоров, оло, утонъёслы оскымтэеныз, оло, тазалыкез лябен лыктыны быгатымтэ. Соин ик сцена вылэ потыны куриськом нылзэ Надежда Владимировнаез. Петр Григорьевич Петров ӟечкыласа солэн квитанциез вылэ сюлмысьтыз ик колхоз печать пуктэ. Сальяослы удалтӥз, парсьпи табере Ермолаевое кошкоз, дыр. Но ӧз. Парсьпиез утэ Нӧднюк починкаысь Владимир Архипов. Всё, ваньмыз шудытэмын, но калык уг кошкы. Кӧня ке кузьым шудытӥськом на редакцилэсь: инструментъёсын набор, книгаос, синучкон кадь чилясь кобыос. Юри но озьы уд малпа - ош но парсьпи кузьмась председатель кобы утэ. Дуно кузьым ӧвӧл бен, но татын маиз ке но вань. Кузьмаськемысьтыз колхоз казнаез медаз куанермы, азьланяз бырышез кобыен омыръямон мед луоз, шуиськом ми. Я, кин адӟем кароз Петровлэсь? З.ВАХРУШЕВА. * П.Г.Петров. Туспуктэмез В.Камашевлэн. Удмурт Республиаысь Правительстволэн Аппаратэз мур куректэмзэ вера Удмурт Республикаысь Правительстволэн Тӧроезлэн секретариатысьтыз валтӥсь специалистлы Галина Николаевна Орловалы солэн атаез Каменских Николай Фролович кулэмен валче. Дарт Яратэ, уг яраты Вералом-а, ум-а? Капчи ик пиослы - кӧня мылыд потэ синмаськы, яраты, ӝыт юмшаны ӧть, гожтэт ысты, нокин уз серекъя, шум гинэ потозы. Нош нылъёслы... Ох, тулыс! Кӧня курадӟон ваиськод тон. Вера вылэм со пияшлы мылкыдъёсыд сярысь, сьӧрам бызьылэ шуоз. Сыӵе секыт малпанъёсме верасько но ваньзы нырысетӥ вамыш лэсьтонэз сокем капчиен уг лыдъяло вылэм, соин ик нылъёслэн сюлэмзэс усьтэмзылы шум гинэ пото, шӧдске. Женя, Саша, Паша: Туж умой нылъёс дӥсьтӥсьгес луизы шуыса. Аслыд тодматсконо уг луы ни. Нылаш чебер, кельшымон ке, ӧм палэнтысалмы. Сыӵе нылъёс ӵем пумиськыло. Огеныз дискотекае мынӥськом, мукетзлэн дораз кунояськом. Сергей К.: Али туганэ ачиз нырысь вамыш лэсьтӥз. Ӧз дӥсьтысалыз ке, оло, мон сое ӧй но синйылтысал. Тау солы - ми ог-огмес туж яратӥськом. Слава Ж: Котькуд учырез нимысьтыз эскерыны кулэ. Востэм ке пияш, вера - оло, со ачиз уг дӥсьты. Нош шаплы, учкымон ке - ӧйтӧд. А, эшшо одӥг... уз шуы-а? Кин тодэ. О. Никитина. Удмурт университетын дышетскись. ШӦКЫЧ Юсь, Кисло-кусло но Чипей Туала выжыкыл Тыро возэз котькудӥз ас палаз кыскыны турттыса, Юсь, Кисло-кусло но Чипей копак жуммизы. - Ойдолэ ӝамдэлы ке но шутэтском, - бурдъёссэ уллань лэзиз Юсь. Кисло-куслоен Чипей сое ик возьмаллям, кожалод, жадем мугоръёссэс зуняк ву дуре золтӥзы. Кужым люканы турттыса, чал-чал кыллё, вырӟыны ик уг дӥсьто. Ӵапак со вакытэ вӧзтӥзы Адями ортчыны кемдӥз. Воз котырысь катьтэммем юлтошъёсты адӟыса, соку ик валатскиз кыӵе-мар югдур татын кылдэмын. - Эй, тӥ, ваментулъёс, кема-а тазьы шунды шорын ӵыжаса кыллёды? Оло, кылзоды улонэз адӟем Адямилэсь визь-кенешсэ? Ошиськем йыръёс соку ик выллане ӝутскизы. Куиньназы возьмало, мар пайдаёзэ вералоз соослы сюресчи. - Котькӧня кыске возэз ас палады, - валэктыны кутскиз Адями, - асьтэды гинэ жуммытоды, семьяосты но майбыр улонэз ноку уз адӟе. - Озьы, озьы, - йырынызы шонтӥзы возчиос, соос ас пельпум вылазы шӧдӥзы ни угось огинтыязы лёгаськемзылэсь шӧгзэ но кузьытсэ. - Ойдолэ бен соку кужыммес одӥг бадӟым уже огазеялом, - валанэз шӧдыса лӧптӥз Адями. - Возысь ваньбурлы луыса, тани та пичи шур интые бадӟым-бадӟым тымет ӵыпом. Асьтэос гинэ ӧвӧл, нылпиостылэн нылпиоссы но улытозязы кӧт сюманэз уз тодылэ, куасьмыны шӧтам шур но жильыртэмысь уз дугды. Юсьлэн, Кисло-куслолэн но Чипейлэн синъёссы соку ик ӝуатскизы. - Та шумпотон иворез семьяосмылы, ӵыжы-выжыосмылы вераны кулэ, - чыртызэ кузь-кузь золтыса шуиз Юсь. Кисло-куслоен Чипей соку ик соин соглаш луизы, кыл-куара поттытэк быжъёсынызы шоналтӥзы но вуэ зымизы. Юсь но ӝегатскытэк инме лопырскиз. Нош Адями воз дуре возьмаськыса кылиз. Лобе Юсь инметӥ но ас понназ малпа: "Малы шедьтэм ваньбурез мон ваньмыныз шори люкыны кулэ? Чипеен Кисло-кусло тыметын кузёськыны кутскизы ке, мынам нылпиосы сютэм кылёзы". Кӧльыос вылтӥ ӵуштым-ӵаштым вамышъян сямен Кисло-куслолэн но йыраз пӧртэм малпанъёс бергало: "Кулэ-а бен мыным бадӟым тымет? Луоё, кӧльыё интыын мон озьы но шудо луо. Ваньбурез киултыны быгатысалмы на ке, выжымы дауръёслы узырмысал, выльвылъёс утчаны кӧчысалмы". Вуэтӥ уян сямен Чипей нош пиньёсыныз гизьыртэ: "Огнам кузёясько тыметын, малы мыным кулэ Адями, Юсь но Кисло-кусло". Кӧня ке улыса, тыро воз котырын огыр-бугыр луиз. Юсь, Кисло-кусло но Чипей сьӧразы ваизы юлтошъёссэс. Кин кытчы кыске ваньбурез: юсьёс инме лопырскыны выро, кисло- куслоос ӝуштыса-ӝуштыса берлань чигнало, чипейёс вуэ нюжтӥсько. Адями учкиз, учкиз дарманьтэмзы шоры но киыныз шонтӥз. Тырттэм ныпъетсэ пельпумаз ошыса но боды вылаз пыкъяськыса, азьлане вамыштӥз. Л.МАЛЫХ. Радъёс шеромо - ужпумъёс кылё Пенсие потыса но, данакез мӧйы адямиос трос аръёс ӵоже калык пӧлын пайдаё ужъёсты быдэсъяны быгато на, ветеранъёслэн радъёсазы сюлмо но тыршыса ужаменызы висъясько. Удмурт шаерысьтымы сыӵе сюлмоосты адӟыны луиз кылем покчи арня нуналэ - соку Иж карын ортчиз ожысь, ужысь, Вооружённой Кужымъёсысь но эрикрадэз утёнысь ветеранъёслэн кенешсылэн пленумез. Котькуд карын ёросын но бадӟымесь гуртъёсын ветеранъёс сярысь сюлмаськонъёс вань. Кылсярысь, та пленумын Глаз карысь. Г. П. Константиновлы но Ижысь Ю. К. Шибановлы сётэмын вал ветеранъёслэн движениязы дасо аръёс ӵоже мылысь-кыдысь пыриськемзы понна "Удмурт Республикаысь дано ветеран" ним. Нош ветеранъёслэн Можга райсоветсылэн мӧйыос пӧлын ужан амалъёссы сярысь нимысьтыз вераськон мынӥз, соослэсь опытсэс быдэс республикаысь ветеран организациосы вӧлмытон вылысь. Можгаослэн ужан амалъёссы сярысь ивортӥз кенешсылэн тӧроез С. П. Зорин. Та ёросын луэмезъя ялан азинтыны тыршо "Мӧйыослы юрттэт" ("Забота") программазэс. Фронтовикъёслы но инвалидъёслы юрттыны кылем арын висъямын вал 309,3 сюрс манет коньдон. Городын пенсионеръёслы юрттонъя нимысьтыз центр вань. Отысь ужасьёс мӧйыослы, висисьёслы, оген улӥсьёслы юрттыны доразы вуыло. 4417 адямилы корказэ тупатъяны, бакчазэ гудыны но мукет учыръёсы юрттэмын. Пычас посёлокын пенсионеръёслы ӝог юрттэт сётӥсь службазы вань. Можгаос Быдӟым Вормонлы 55 ар тырмонэз пусйыны дасясько ини, республикаямы котькинлэсь азьло кутскыса. Ветеранъёслы сӥзем туж пӧртэм ужрадъёссы сярысь котьку дыраз гожъя ёросысь газет но ивортэ радио. 20 интыын люкаськыло "Ветеран" клубъёсы ветлӥсьёс. Соосын дырын- дырын пумиськыло ёросысь но гуртъёсысь администрациослэн, предприятиослэн, организациослэн кивалтӥсьёссы. Та ужпумъя ветеранъёс пӧлын ӟеч ужан амалъёсты вӧлмытонъя вераскьонэз азьланьтӥзы Вотка карысь С. П. Конышев, Каракулиноысь А. С. Мельников, Вавожысь Л. В. Шестаков но мукетъёсыз. Пленуме лыктэмъёс туж тунсыкъяӥськыса кылзӥзы Пенсиосъя фондысь кивалтӥсьлэсь В. М. Моряковлэсь верамзэ. Кивалтӥсь оскытыны тыршиз, пенсия тыронэз радъянын Удмуртия Уралысь регионъёс пӧлын азьпалан мынэ, мӧйыослы коньдон ӝегаса вуттон учыръёс уг луо ни шуыса. Ӧжытак воштськоз пенсия тырон радлык но, каньылля йылоз солэн быдӟалаез. Кык ар ӵоже пенсилэсь быдӟалазэ лыдъян коэффициент 0,7-ысен, 0,9-е вуттэмын луоз. Нош али пенсия тыронын туж трос тырмымтэос. Пленумын эскероно эшшо одӥгез бадӟым ужпум вал - Быдӟым Вормонлы 55 ар тырмонэз пусйыны дасяськон. Таизъя доклад лэсьтӥз ожысь ветеранъёслэн комитетсылэн председателез полковник В. И. Ярков. Юбилей туж матэ вуэ ни, шуиз со. Тросгес сюлмаськыто быдэстымтэ ужъёс, планъёсамы соос трос гинэ пусъемын. Та ужпумъя, мон шуысал, пленумын выль ужан амалъёс шедьтэмзы сярысь пыр-поч вераськисьёс-ивортӥсьёс ӧжыт вал. Юбилейлы дасяськонысь югдурез мургес бугыртӥз Ува ёросысь ветеранъёслэн комитетсылэн тӧроез, Быдӟым Отечественной войнаын ожмаськем мурт М. В. Попцова. Та ёросын али пӧртэм тунсыко ужрадъёс ортчыло но ортчозы на: слётъёсы люкаськылӥзы Ленинградын блокадаез чидамъёс, нылкышноос-фронтовикъёс, концлагерьёс пыр ортчыса, улэп кылем мӧйыос. Йӧнгес ужа "Ветеран" клубзы. Возьматъяло война сярысь кинофильмъёсты. Ортче "Солдат кырӟан" фестиваль. Но жаляса верано луэ, шуиз Мария Васильевна, ветеранъёслы школаосын, егитъёсын азьло аръёсы сямен ик ӟеч кусып возьыны кулэ, вылэм но соослы школаосы вуылыны пумен секытгес луэ: тазалыксы лябӟе, радъёссы ялан кулэсмо. Будӥсь поколениез ӝутыны быгатоно, егитъёс асьсэос мӧйыос доры ӵемгес мед вуылозы, состы кылзыны мед быгатылозы. Пленумын ӧжыт ӧй вал 26-тӥ мартэ быръёнъёс сярысь вераськонъёс но. Ветеранъёс азьын вераськизы алигес быръем депутатъёс: Кун Думаын нырысетӥ толэзьёссэ ужамез сярысь ивортӥз С. К. Смирнова, солы куд-ог юанъёс но сётэмын вал. Одӥгез наказ-ужан, фронтысь ветеранъёс сярысь умойгес сюлмаськон вылысь, Думалы рос-прос малпаськоно законъёс пуктыны. Пленумын озьы ик вераськизы Кун Кенешлэн Тӧроезлэн воштӥсез Н. А. Харина, Кун Кенеше алигес быръем депутат Ф. М. Федорова, социальной политикая ялан ужась комиссилэн тӧроез. Озьы ик мӧйы активистъёсын пумиськиз Кун Кенешлэн Тӧроез А. А. Волков. Л. Федоров. Вуоно арысен Президентэн улом ни? Удмурт Республика дасяське бадӟым воштӥськонъёслы: 26-тӥ мартэ шаерысьтымы бырйисьёс пӧлысь данакез куаразэс сётӥзы ке президент кивалтон понна, шӧдскымон воштӥськонъёс пыртэмын луозы Удмурт Республикалэн Конституцияз. Со сярысь журналистъёслы валэктонъёс сётӥз Конституцияя комиссилэн секретарез Константин Глухов, таяз учыре вераськон мынӥз Президентлэн полномочиосызъя. Соос бадӟымесь, малы ке шуоно, ужан удысэз но трослы паськытгес. Нырысь ик, Президент вань калык азьын кыл кутэ Конституциен сётэм правоослэн быдэсъяськемзы понна. Республикалэн вылӥ кивалтӥсез луыса Удмуртилэн нимыныз со пыриське Россия Федерацилэн экономикаын но политикаын улоназ. Президентлы луонлык сётӥське республикаын Правительстволы Тӧро но солы воштӥсьёсты юнматыны, министръёслэсь кабинетсэс воштыны. Правительстволэн Тӧроез ик быдэсъя президентлэн нырысетӥ воштӥсезлэсь ужзэ. - Кызьы тодмо, Татарстан, Башкортостан но Марий Эл кемаласьгес выжизы ни президентской правление, но котькудӥз та республика Конституцизэ воштӥз ас сяменыз. Татарстанлэн со, федеральноеныз ӵошатыса, уката но юнгес висъяське. Асьмеос та амалъя ум мынэ. Удмуртилэн Конституциезлы инъет интые басьтэмын Федерацилэн Конституциез - пусйиз. Ма луоз, референдуме поттэм юан малпамъя ӧз ке быдэсмы, мукет сямен вераса, Удмуртиын улӥсьёс Конституцие воштонъёс пыртонлы пумит ке луизы? Ватонэз ӧвӧл, со выллем калык бугыръянъёс вань ини. Та юанлы Константин Андреевич шуиз: - Али огез тодмо: югдур республикаын оглом уродмоз. Кун Кенеш сое тупатыны, воштонъёс пыртыны уз быгаты ни. Нош федеральной законъёслы пумит ужаны асьмелы нокин но право уз сёты. Озьыен, асьмеос ке ӧм быгатэ шонер решение кутыны но президентской власть кылдытыны, аслэсьтыз адямизэ татчы ыстоз Москва. 26-тӥ мартэ референдум ӧз ке пӧрмы, законъя сое 2002-тӥ арын гинэ ортчытыны луоз. Вань на эшшо одӥг амал: Кун Кенеш та ужпум борды берытскыны быгатоз одӥг ар ортчыса, парламентлы луонлык сётэмын ас кожаз Конституцилэсь статьязэ воштыны но тупатонъёс-ватсанъёс отчы пыртыны. Но огез но депутат та сюрес кузя уз мыны, бырйисьёсызлы пумит уз султы. Тӥни малы Удмуртия бырйиз тужгес но огшоры но калыклы матын луись амалэз - референдумез. Кун Кенеш, Конституцияя комиссия юн осконэн вазисько Удмуртиын улӥсьёслы: Россилэн законъёсызъя улэммы но ужаммы потэ ке, вуоно арня нуналэ котькудмы вераны кулэ ас мылкыдмес. Конституцилэн 101-тӥ статьяез быдэсак сӥземын Правительстволэн кивалтӥсезлы. Отын шуэмын: Правительстволэн Тӧроез Президент азьын кыл кутэ Правительстволэн ужамез понна. Со ик президентэз тодматэ аслыз воштӥсе, министерствоосын, ведомствоосын но комитетъёсын кивалтонэ ӵектэм кандидатураосын. Ас удысэзъя ужа Россия Федерациысь улосвылъёсын, соосын кусып возе. Озьыен, Правительство быдэсак ужалоз президент кивалтэм улсын, со азьын ик кыл но кутоз. Нош Президент? - Президентлэсь ужамзэ эскероз но чакласа возёз Конституцияя суд, - валэктӥз К.А.Глухов. - Конституцияя суд ик учкыны кулэ кивалтон удыслэсь вань ёзъёссэ, законэз тӥян но адямилэсь правооссэ, эриксэ зӥбон учыръёс медаз пумиськылэ шуыса. Чакламын Президентлы осконэз ыштон сярысь верась статья но. Со уже кутӥськоз Президентлэн соиз яке таиз указэз Удмурт Республикалэн но Россия Федерацилэн Конституциоссылы пумит луон дыръя. Кун Кенешлэн правоез вань Президентлы осконтэм мылкыдзэ вераны но ужан интызэ мозмытон сярысь куронэн потыны. Референдум умой ортчиз ке, кызьы пусйиз К.А.Глухов, Удмуртилы нырысетӥ Президентэз быръём ини вуоно арын март толэзе. Огпол кутскемен республикалы кивалтӥсь бырйыны ӧм ке пӧрмытэ, федеральной законъя кыкетӥзэ быръёнэз ортчытыны луэ, 6 толэзь ортчыса, озьыен, 2001-тӥ арын октябрь толэзе. Таӵе амал Удмуртилы тупа республикалэсь кивалтон статуссэ воштонэн валче, Удмуртилэн конституциез ӝыныез выльдӥськоз. Отчы пыро чылкак выль статьяос, кылсярысь, 106-тӥез, Конституцияя суд сярысь статья. Таиз пумысен но журналистъёслэн юанъёссылы валэктон сётэмын. - Кыӵе луоз Удмурт Республикалэн Конституцияя судэз? - Та сярысь пыр-поч гожтэмын 105-тӥ статьяын. Удмурт Республикалэн Конституцияя судэз кылдытӥське 5 судьялэсь. Со ужалоз Кун Кенешлэн, депутатъёслэн вань быръемез пӧлысь одӥг витьмос люкетэз ке луэ, Удмурт Республикалэн Президентэзлэн, Удмурт Республикаысь Вылӥ судлэн, Удмурт Республикаысь арбитраж судлэн, Удмурт Республикаысь Прокурорлэн но интыосысь ас коже кивалтонъя ёзъёслэн Удмурт Республикалэн Конституциезъя кылдэм юанъёсты сэрттон-пертчон бордын. Соос герӟаськемын луозы Удмурт Республикалэсь законъёссэ быдэсъянэн, озьы ик Кун Кенешлэсь, Удмурт Республикалэн Президентэзлэсь но Правительстволэсь, интыысь ас коже кивалтонъя ёзъёслэсь актъёссэс улонэ пыӵатонэн. - Огшоры адямиос Конституцияя судэ вазиськыны быгатозы-а? - Одно ик. Конституцияя суд учкоз шаерамы улӥсьёслэсь вань ӝожтӥськонъёссэс но вазиськонъёссэс, вераськон мынэ ке соослэсь конституциын чаклам правооссэс но эриксэс тӥян сярысь. Озьы ик эскероз судъёсысь ыстэм куд-ог законъёсъя огкылэ вуымтэ учыръёсты. Законъёс Конституцилы пумит мыныны кулэ ӧвӧл. - Нош сыӵе учыръёс пумиськылӥзы ке? - Соку Удмурт Республикалэн соиз яке таиз законэз, нормативной актъёсыз яке соослэн куд-ог люкетъёссы кужымзэс ыштозы но ярамтэмен лыдъяськозы. - Конституцияя судлэн кылдон сюресэз кыӵе? - Конституцияя судлэн радлыкез, ужан удысэз, полномочиосыз пыкисько федеральной законодательстволэн инъетэз вылэ, озьы ик Удмурт Республикалэн Конституциез но Удмурт Республикалэн законъёсыз вылэ. Конституцияя судэз возьыны коньдон висъяськоз Удмурт Республикалэн бюджетысьтыз. Правоез утёнын выль ёзлэн дорамы кылдэмез умой: Москвае ветлытэк, трос кужымзэ но уксёзэ быдтытэк, котькудӥз адями быгатоз табере отчы вазиськыны, аслыз юрттэт шедьтыны. Л.МЕДВЕДЕВА. Правительствоын Куӟебай Герд нимо Удмурт Республикаысь Правительстволэн Президиумез вылӥ профессиональной дышетскон заведениосысь устоосыз пӧлысь 5 устоосызлы студентъёслы Куӟебай Герд нимо премия тупатӥз. Стипендилэн быдӟалаез - куинь пичи уждун мында. Юнматэмын стипендия сярысь положение но. Постановленилэн инъетэз пыртэмын Удмурт Республикаысь Кун Кенешлэн Президиумаз но. Умоен лыдъямын Калыкез дышетонъя министерстволэсь "Самообеспечение" нимын кутэм программазэ Правительство умоен лыдъяз. Со улонэ пыӵаз ке, республикаысьтымы тросэз школаос гужем каникулъёс дыръя дышетскись пиналъёслы уж шедьтозы: асьсэ понна бакча сиён но картофка будэтозы. Школаослы юрттон вылысь, 2 миллион манет коньдон висъяны чакламын. Со сяна, Гурт удысъя но сиён-юонъёсъя министерство юрттоз удобрениен, техникалы эстӥськонэн, тысё культураослы но бакча сиён кидысэн, картофкаен. 1 апрелез пунэмаськемъёстэк пумиталом Озьы шуиз Правительстволэн Тӧроез Николай Ганза селектор пыр ортчем всероссийской совещание дыръя. Вераськон мынэ бюджет удысын ужасьёслы пунэме кылемъёсты берыктон сярысь. Али республикалэн казнаез 16,4 миллион манет тырыны кулэ (толэзьем уждун люкаське 146 миллионозь). Совещание мыныку, Правительстволэн Тӧроез Россиысь Правительстволэн вице- премьерезлы Виктор Христенколы юан сётӥз Федерация ласянь республикамылы пунэмаськонъёсты берыктон пумысен но. Соос люкаськемын оборона удысъя, жилищно- коммунальной хозяйствоя, социальной сферая, Виктор Христенко оскытӥз, соос 2000-тӥ ар йылпумъяськытозь одно ик тырмыт луозы шуыса. Удмурт Республикаысь Правительстволэн пресс-службаез. БЫРЪЁН НО РЕФЕРЕНДУМ АЗЬЫН Мажес вылэ кык пол уг лёгисько Кун Думае берло быръёнъёс дыръя Удмуртиысь тросэз бырйисьёс (36,5 процентэз, нош Можгаын 40 процентэз) куараоссэс сётӥзы "Единство" ("Медведь") огазеяськонлы. Тросэз ӧз но малпаське, дыр, кызьы утёзы Думаын "Единствоысь" депутатъёс калыклэсь интересъёссэ. Тани басьтомы пенсия сярысь ужпумез ик. 1998-тӥ арын улонэ пыӵаз пенсиез будэтон сярысь федеральной закон. Пенсия тупатон понна отын лыдэ басьтӥське котькуд пенсионерлэн ужам стажез но уждунэз. Пенсионеръёслы со закон кельше вал. Но Россия Федерацилэн Ужъя министрествоез (министр С.Калашников, ЛДПР-лэн адямиез) но Пенсиосъя фонд пенсиосты лыдъянъя выль документ поттӥзы, кудӥзъя пенсионерлэн коэффициентэз 0,7 интые 0,525 луиз. Озьы лыдъяса, тросэзлэн мӧйыослэн пенсизы кулэсмиз. Новосибирск областьысь пенсионеръёс 1999-тӥ арын ик со пумысен Вылӥ судэ вазиськылӥзы. Суд соослэсь правозэс утиз. Судэ вазиськон учыръёс али но туж трос луыло. Правительство но куд-ог депутатъёс тазьы валэкто: пенсиез будэтыны коньдон ӧвӧл. Кытысь шедьтоно коньдон пенсионеръёслы, врачъёслы, дышетӥсьёслы, культура удысын ужасьёслы? Неужто асьме бырйисьёс нош ик куараоссэс сётозы Ельцинлэсь реформаоссэ азинтон понна? Бен, реформаос кулэ. Но соосты кутоно калыклэсь улонзэ умоятон понна. С.ЧИПЕЕВ. Бадӟым Уча черкогурт. Малы Башкортостан ӟечгес улэ? Та юанлы валэктон шедьтон вылысь, Удмуртиысь журналистъёс вуылӥзы бускельёсмы доры. Аслэсьтыз кылэмзэ-адӟемзэ газет бамамы вуттӥз Сарапулысь "Красное Прикамье" газетлэн редакторез В. Ахмадуллин. Башкортостан пумысен пӧртэм вераськонъёс ветло. Одӥгъёсыз солэн улэм-вылэмезлы вожъясько, кыкетӥосыз феодальной княжетсвоен ӵошато, куинетӥосыз... сизьым пол кылытозь, одӥг пол ас синмыныд адӟоно. Уфа - милемыз пумитаз ӝужыт лымы букосъёсын, но - чылк-чылк сузям, мычем сюресъёсын. Город чылкыт, ӟеч кузёлэн юртъер котыраз кадь. Кинэн гинэ ӧз пумиськылэ, ваньмыз пусъё кутэм законъёслэсь улонэ пыӵамзэс. - Малы Татария но Башкирия ӟечгес уло, малы ке шуоно, 1993-тӥ-1994-тӥ аръёсы кутскем приватизациез ми дыраз "кортнаны" быгатӥм, - шуэ Законодательной кенешлэн председателез Ф. Амеров. - Ми утим ваньзэ колхозъёсты но совхозъёсты, соосты селхоз кооперативъёслы пӧрмытыса. Президентмылэн Муртаза Рахимовлэн быгатыса но дыраз решение кутыны быгатэменыз, олигаръёсты экономика удысэ пыриськыны ӧм лэзе. Тӥни малы республикаын берло 10 ар куспын шӧдскымон азинсконъёс басьтэмын. Ӝоген йылаз-пумаз вуоз гуртъёсы газ кыскон, арлы быдэ ӝутско выль больницаос но школа юртъёс, улон коркаос. Пенсия котьку дыраз тыро, бюджет чотын уждун басьтӥсьёслы март понна аванс сётэмын ни, та толэзь понна ик нылпи пособиос берыктэмын. (Асьме понна со - паймымон!) Гурт удысын коньдонэн ӝеганъёс луыло ке но, данакез хозяйствоос уждунзэс тупатэм нуналаз басьто. Башкортостан кураськыса уг улы, экономиказэ юнматыса, ас вылаз "бергатэ", бичам выт быдэсак вуэ республикалэн казнаяз. Бадӟым саклык висъяське гурт удыслы. Туэ гинэ ю-нянь будэтӥсьёслы Правительство висъяз 350 миллион манет. Сётӥське со, пунэмен берыктон вылысь: ю тысен, картофкаен, йӧлын, сӥлен - кин маин быгатоз. Шумпотоно башкир крестьянъёс шоры учкыса: соос туннэ ик бусые потыны дась. Аургазинской районын, кылсярысь, гыроно-кизёно техниказы кемалась тупатъямын, кидыссы вузаны но шедёз, эстӥськонзы, удобрениоссы тырмыт. Ма кулэ на гуртын улӥсьлы? Башкортостан - трос нацием республика. Газетъёс гинэ татын сизьым кылын пото, туэ арысен удмуртъёс басьто "Ошмес" республиканской газет. Нош школаосын дышетон мынэ 14 кылын: ӟуч, башкир, бигер, чуваш, пор, мордва, удмурт, украин, немец, латыш, еврей... Классын ӟуч нылпиос пӧлын одӥг бигер ке шедемын, сое но анай кылызлы дышето. Аургазинской районын, кылсярысь, башкиръёс ӧжытгес, чувашъёс, мордваос, бигеръёс тросгес. Ваньзы соос тупаса уло. Огъя вераса, национальной ужпум зӥб-зӥб пуктэмын, ӝожтӥськыны мугез ӧвӧл. Вакчияк вераса, озьы улэ бускель Башкортостан. Табере учком на солэсь политической инъетсэ: зэм ик-а Президент ваньзэ ас ки улаз возе? Муртаза Рахимовлы, зэмен но, бадӟым право сётэмын. Но со уг быгаты Законодательной Собраниез - Курултаез - пытсаны, солэсь ужзэ дугдытыны. Нош Курултай Президентэз но, солэсь правительствозэ но отставкае поттыны быгатэ. Вань татын политической огазеяськонъёс но. Соос ласянь Рахимовлэн куронэз чурыт: "Республикалэсь улон-вылонзэ сураны-пожаны кутскизы ке, та нуналэ ик ужзы пытсаськоз". Бадӟым политик луытозяз, Муртаза Рахиов кивалтӥз бадӟым заводэн. Республикаез заводэн уд ӵошаты, но татын но куронэз одӥг: дисциплина но порядок. Государстволэн радлыкез возиське со вылын. Пӧртэм адямиосын вераськыса шӧдӥське: Президентэз татын гажало, но... кышкало. Сямыз чурыт, мар малпа - меӵак синмад вералоз, нокинлы, ноку уз пыриськы. Будэмын крестьян семьяын. Соин но, дыр, гурт улонэз ялан капчиятыны сюлмаське. Башкортостан визьмо, ӟеч кивалтӥсен улэ. Уждунзы но татын, Россиез оглом басьтыса, шӧдскымон бадӟым, дунъёссы - асьмемын огкадьгес. Арысь аре йылэ гуртын улӥсьёслэн лыдзы - берытско городэ кошкем егит семьяос. Башкортостан Россиысь троссэ улосъёсты туннэ азьпалтэ но валтӥсь интыын мынэ. Нырысь ик, кутэм законъёслэн лыдзыя. Соос бумага вылэ уг кылё, ӝегатскытэк улонэ пыӵало. Тӥни малы республика устоосыз радын вамышъя но адӟем карымон улэ. "Нылкышноослы витьымтэ кузьым" Тазьы нимаське Национальной музейысь паймымон адӟытон. Со сӥземын Оренбургысь кибашлыослы. Кеч гонлэсь керттэм кышетъёс, паутинкаос, палантинъёс, Россиын гинэ ӧвол, кунгож сьӧрын но тодмо. Та небыт, чебер кышет пыр адӟыны луэ ӟуч культуралэсь ог люкетсэ - вунонтэм тунсыко пужыосты. Чеберенызы, ненегенызы соос синэз мальдыто. Векчи черсэм сӥньысэз но мудрон пужыосыз понна, дыр, та кышетэз паутинка шуо. Та выставка Иж каре вуытозяз ортчем кузь сюресэз: вуылэм Сибире, Волга дуре, кезьыт уй пала но пӧсь лымшоре, возьматэмын Самараын но Иркутскын, Тольяттиын но Туапсеын, Сыктывкарын но Ташкентын... Е.КУДРЯВЦЕВА. Валэктэ юрист Сэрегез нуэ адвокат Лия Шкляева Мыжык вылэ мыжык Кышноеным ӵош улӥ Пичи Пургаын. Одӥг нуналэ со кутӥз но улыны кошкиз Огырчие (Агрызэ), музон воргорон дӥне. Тае тодыса, мон отчы мынӥ, улон корказэс шедьтӥ но доразы пыри. Кышное но кыкетӥ картэз доразы вал. Куинь кузя кык ӟенелик юим но... воргоронэз кык пол мыжгыса кошкиськем. Ӵуказеяз пиосмурт кышноеным ӵош лыктӥзы Пичи Пургала. Куинь кузя куинь ӟенелик юим но, воргорон монэ куинь пол мыжгыса кошкиз. Азьвыл кышное кыксэ ик учырез ивортэм милицие. Мынам жугиськеме сярысь - Огырчие, кыкетӥ кратэзлэн мыжгаськемез сярысь - Пичи Пургала. Табере ушъяськыса ветлэ: кыкнадэс, пе, пукто, юртъеръёстэс киултыса вузало но Иже кошко. Мар кароно мыным? Анатолий Перевозчиков, Пичи Пургаын улӥсь. Таӵе юанлы валэктон шедьтыны луоз Россия Федерацилэн Уголовной кодексысьтыз. Отысь 1051-тӥ ёзэт (статья) озьы ик нимаське: "Кык кузпалэн улон". Кышномурт, одӥг картэзлэсь судын яке загсын люкиськытэк, мукет пиосмуртэн улэ ке, сое ассэ пуктыны луэ 2-5 арлы. Тӥ шедьтыны кулэ ичизэ куинь адӟись. Азьвыл кышнолы воргоронъёс пӧлын жугиськон пуромытӥз шуыса судын валэктыны быгатӥды ке, солэсь пукон дырзэ 7 арозь будэтыны быгатоды. Со понна судэ вазиськыны кулэ тӥ но, Огырчиысь пиосмурт но. Курондэс ӝоггес дасялэ, малы ке шуоно, Татарстан, Ингушетилэсь адӟем карыса, кык-куинь кышно яке карт возьыны лэзён сярысь закон кутыны быгатоз. Мувыр но бакча Кӧня ке ар талэсь азьвыл Шаркан районысь Мувыр но Пашур гурт вискын республикалэн герберез ортчиз. "Алангасарлэн вужерез" фильмез дасяны тымет вамен праздник азьын паськыт выж лэсьтэмын вал. Гербер ортчем бере, вань калык кошкыса, выж вылэ кык сю ведра сюй нуллӥ но бакча нерге лэсьтӥ. Отын арлы быдэ сяська будэтӥсько но вузасько. Интыысь администрация монэ весь кышкатэ. Музъемез, пе, нокин лэзьытэк киултӥд, вылаз ик, "незаконной предпринимательство" шуонэн выриськод. Кин шонер - мон-а, администрация-а? Александр Шкляев, Мувырын улӥсь. Сыӵе шуг юанлы ваэктон шедьтыны ӧз луы Музъем сярысь кодексысь но, Ву сярысь кодексысь но. Ву вадьсысь выж со музъем ӧвӧл. Нош вуэз "киултон" пумысен законъёсын номыр верамтэ вылэм. Интыысь администрация правоез утись ёзэ вазиськиз ке, тӥледды шымыртыны быгатозы (мувыр континентальной шальф) сярысь законъя гинэ. Зэм, штраф сокем бадӟым ӧвӧл - 10 сюрс манет. Сяська вузаса, тӥ ар куспын ичизэ 100 сюрс манет жильдыны кулэ. БЫРЪЁНЪЁС АЗЬЫН Ӵошен капчигес луоз Кӧня ке гинэ дыр кылиз на, Россилы президент бырйытозь. Али ик шӧдӥське ини: тужгес уноез калык куаразэ сётоз Владимир Путин но Геннадий Зюганов понна. Геннадий Зюганов но Владимир Путин - кыкназы ик визьмоесь, оскымонэсь адямиос. Туж умой луысал, соос огазьын ог-огзэс валаса ужасалзы ке. Геннадий Андреевич вормиз ке, юрттӥсе мед пуктысал Владимир Путинэз. Нош Владимир Владимирович, президент луыса, вице-президентэ - Геннадий Зюгановез. Озьы асьсэлы но ужаны капчигес луысал. Кылем арлэн пумаз быръем Кун Думаын, оглом вераса, ӝыныезлэсь тросэз - коммунистъёс но "Единство" фракцие пырись депутатъёс. Соослы ик дурбасьтӥз Владимир Путин. Нырысь нуналъёсаз ик КПРФ но "Единство" одӥг кыл шедьтӥзы, Кун Думалы кивалтӥсьёс бырйыку. Озьыен, оскон кылдэ: ӵош ужаны быгатонлыксы вань. Н.Возисов. Бырйисьёслы вазиськон Озьы тупаз, Россия Федерациысь Кун Думае быръёнъёс ортчытэм бере ик кутскиз Россилы Президентэз быръёнлы дасяськон. Таяз арня нуналэ, 26-тӥ мартэ, странамы но, котькудмы асьмеос но туж кулэ вамыш лэсьтоно луом - оскымон адямиез быръём. Со вамыш капчи уз луы - дас одӥг кандидат пӧлысь бюллетеньын пусйыны быгатӥськом одӥгзэ адямиез. Дас одӥг пӧлысь одӥгзэ бырйыса, асьмеос котькудмы син азямы пуктыны тыршом, кыӵе луыны кулэ кадь Россия кунмылэн кузёез. Куд-огез верало, вормисьлэн нимыз тодмо ни, пе, соин ик ӧтё бырйисьёсты "ваньмызлы пумит" пус пуктыны курыса. Сыӵе ӧтёнэн вазиськисьёс, валамон ини, кунамы улӥсьёслэн ӟеч улон-вылонзы, солэн азинсконэз но сяськаяськонэз сярысь чик уг малпасько. Кинъёс бен со адямиос, мар соослэн сюлэмъёсазы? Та пумысен ини бӧрысьгес гожтозы историкъёс но политологъёс. Но асьмелы со умойтэм ӧтёнъёсты пелямы поныны кулэ ӧвӧл. Россия Федерацилы Президент быръён сярысь Законын ӟеч валэктэмын, ку но кыӵе учыръёсы быръён ортчымтэен лыдъяськоз шуыса. Быръёнэ 50 процентлэсь ӧжытгес адямиос пырисько ке, озьы ик бырйисьёс бюллетеньёсы вормись кандидат понна "ваньмызлы пумит" шуыса пусъё ке, соку ньыль толэзь ортчыса, нош ик выль быръёнъёс ортчытӥсько. Со ӵапак тупа июль толэзе. Нош соку тросэз шутэтско, кошко сад- бакчаосазы. Валамон ини, быръён участоке кык-куиньмосэз сяна бырйись уз лыкты. Выльысь быръён ортчытэк но кыльыны быгатоз, вылаз ик, кандидатъёс кылёзы азьлоосыз ик, оло нош соослэн лыдзы эшшо йылоз на. Но тужгес но сюлэмшугъяськытӥсез ужпум - выль быръёнлы дасяськыны нош ик уно коньдон кулэ луоз. Республикамылэн улоназ нырысьсэ Удмуртиысь уно пӧртэм калыкъёслы кун властен кивалтонъя органъёсын ужанъя выль радлык кылдытон сярысь ужпум кутоно луоз. Удмуртиын но мукет улосъёсын конституцияя реформаос ортчытон пумысен пусъемын Россия Федерацилэн законаз. вуоно воштӥськонъёс пумысен ортчоно референдумын ас малпанзэ вераны кулэ котькудӥз бырйись. Асьмелэн нылпиосмы мед данъяськозы странаенызы, уно аръёс ортчыса но медам жалялэ ортчем вакытэз. Мед уломы азьланезлы осконэн, мед гажаломы Россимылэсь флагзэ но Россилэсь Президентсэ, мед гажаломы ог-огмес, мед гажалозы асьмеды мукетъёсыз но, соин ик: Ойдолэ лыдэ басьтом та луонлыкез но азьланезлы сюресмес асьмеос ик лёгом. Удмурт Республикаысь Кун Кенешлэн Тӧроез А. А. Волков. Удмурт Республикаысь Правительстволэн Тӧроез Н. А. Ганза. Россия Федерацилэн Президентэзлэн Удмурт Республикае ыстэм муртэз В. В. Балакин. ШӦКЫЧ Ӝожтӥськон сэрег Кӧня колды нянь ыштӥ? Милемды, Россия Федерацилы президентэ кандидат луыны мылкыд карем Алексей Подберезкин понна подпись бичаны соглаш луэм муртъёсты, пӧяме кельтӥзы. Котькуд подписьлы 3 манет сётом шуизы. Трос ӧвӧл ке но, ёрмись муртлы со но кӧня ке колды нянь. Кин ичигес, кин тросгес муртэ гожтӥськытӥз. Бумагаос янгышъёстэк гожтэмын ке, соку ик уждун басьтӥз. Гожтӥськытыны луэ вал 31-тӥ январёзь. Нош 29-тӥ январе Подберезкинлэсь оскем муртсэ Раиса Солоненкоез ӧтиллям Москвае, юрттӥськисьёсызлы ивортыса но вуттымтэ. Ог кызь муртлэн кияз подписьёсын бумагаосыз кылизы, куд-огезлэн 20 бланк пала. Мон 78 муртэ гожтӥськытӥ, уждунэ 234 манет тыр луэ. Нош кин 200 муртэ гожтӥськытӥз, 600 манетсэ ыштӥз. Милям ужаммы мултэс луэм, мукет улосъёсын гожтӥськемъёс тырмыт люкаськиллям, пе. Тӥни озьы, тыршеммы юнме луиз. Кин ке тырись луоз на-а бызьылэм- пӧсяммы понна? П.КУЗНЕЦОВ. Тӥяд законэз - вазиськы милицие Россилы Президент быръёнлы туэ котькулэсь но золгес дасяськоно луэ странаысьтымы югдурез утён удысын ужасьёслы. Чечняын война азьланьтӥськемен валче уго олокыӵе но учыръёс луыны быгатозы. Асьме республикаысь милиция но 21-тӥ февральысен ужа ни нимысьтыз тупатэм радлыкъя. Уно саклык висъяське улонамы тужгес бадӟым инты басьтӥсь ёзъёсты, теле-но радиокомпаниосты возьманлы. Со сярысь журналистъёслы ивортӥз Удмурт Республикаысь Югдурез утёнъя министерстволэн общественной порядокез утёнъя управлениезлэн кивалтӥсез, милициысь подполковник Рафаел Баласанян. Шаерамы быръёнъя 1108 участок лыдъяське. Котькудаз ужалозы милиционеръёс. Со сяна, юн саклык висъяськоз бюллетеньёсты возьманлы. Соос куд-ог городъёсы но ёросъёсы келямын ни. Документъёсты уен-нуналэн возьмалозы 26-тӥ мартозь. Быръёнэ кыскемын луоз 1867 милиционер, висъяськоз 237 автомашина. Озьы ик кылдытэмын луозы на нимысьтыз группаос. Соос законэз тӥян учыръёсы ӝегатскытэк потыны быгатозы участокъёсы. Кызьы тодӥськоды, 25-тӥ мартысен валэктон-ӝуткан уж нуыны лэземын ӧвӧл ни. Нош сыӵе учырез адӟоно-кылоно луиды ке, МВД куре жингыртыны "оскон" телефонъёсъя. Номеръёсыз 55-73-73, 55-74-74, 55-75-75. Ёросъёсын жингыртоно 02 телефонъя. Н. Байтеряков. ШӦКЫЧ Пенсиез йылэто - дунъёс выллань тэтчо, уждун кӧнялы ке будэ - дунъёс нош ик киынызы шонто но азьлане вамышто. Коммунальной юрттэт, транспорт, эмъяськон пенсилэсь но уждунлэсь ӝыныезлэсь троссэ сиё, нош адямилы аслыз маин кӧтсэ тыроно? Суред пушкы - Песянайлэсь но песятайлэсь пегӟи, тон дорын но уг возиськы. - зарплата интые гожтоно уждун. Пересь кызьпу Жингыртӥз гырлы. Пиналъёс школае бызьыса пыризы. Ваньзы партаос сьӧры дырто. Нош мынам уроке ӧвӧл. Мар кароно? Кытчы мыноно? Паймыса сылӥсько огинтыям. Сюлэмы шуак куриськиз тэле. Нюлэс татын чал-чал. Писпуос чибор дэремъёссэс кылиллям ини. Мӧзмыт сыло соос, кинэ ке но возьмало кадь. Нокин но уг шулдырты ни сикез. Бен кин шулдыртоз на, тросэз тылобурдоос лобӟизы ни ке? Пыд улысь турын но тани сьӧдэктэм ни, весь зорыса. Нош чылкак али гинэ со вож-вож вал. Пересь кызьпу дорысь ӟусэз адӟыса, со пала вамыштӥ. Шӧдске: трос калык татчы ветлэ: уть ай, турын вылын сюресэз ик адӟиське. Пукси. Туж мӧзмыт. Малы? Уроке ӧвӧлэн яке - огнам кылемен? Ачим но уг валаськы. Сюлэмы нош кинэ ке возьма. Нош со уг вуы. Шӧдтэк шорысь лымы усьыны кутскиз. Мон солы шумпотӥ гинэ. Каллен бергаса усе лымы писпуос, музъем но мон вылэ. Шобырты, ӵокта тӧдьы мамыкеныд нӧд сюресэз, сисьмем гуждорез, гольык писпуосты. Эн кельты одӥг но интыез. Соку мынам но сюлэмысьтым изэз усёз. Синкылиосы асьсэос бам кузям васько. Ымныр вылам усем чылкыт лымы курыт вулы пӧрме. Малы-о со мынэсьтым яратонме ӧз адӟы? Малы-о ултӥяз монэ, чигтӥз ӟырдыт мылкыдме?.. Шӧдӥсько, пересь кызьпулэн вайёсыз пельпум вылам усизы. Солы гинэ верало кӧтӝожме. Шӧдӥсько, валалоз шуыса. Ӟыгырски кызьпу борды. Бӧрдӥсько. Со но монэ ӟыгыртӥз кузесь куаръёстэм вайёсыныз. Сипыртӥз: "Лыктоз. Оскы: одно лыктоз. Возьма сое". Сюлэмы ӧжытак ке но буйгаз. Синкылиосме ӵушылӥ но нош ик ӟус вылэ пукси. ... Кин ке но лыктэ кадь. Эше вылэм. - Нади, - куаретӥз со, - татын огнад мар кариськод? Пуксиз вӧзам. Шорам учкиз но ӟыгыртӥз. - Валасько мон тонэ, Надя: мӧзмиськод. Вунэты тон сое - ултӥяз ук!,, Номыр вераны уг быгатӥськы. Вунэты, шуиськод. Нош пересь кызьпу? Берытскыса учки шораз. Мар кароно, кинлэсь кылзӥськоно?.. Нош сюлэмы весь шумпотэ бергаса усись лымылы. Шунтэ со бамъёсме, киосме, пыдъёсме, шунтэ пересь кызьпуэз... Надежда Митрофанова. Вавож ёросысь Ӟамбайгурт. Тодматскон сэрег Аб. 354. Удмурт нылкышно, 38/154, веськрес мугоро, гороскопъя Лев. Улӥсько городын, будо 13 но 15 аресъем нылпиосы, ужасько. Яратӥсько керттӥськыны, лыдӟиськыны, бакча котырын берганы (вань сад-бакчае) Семья кылдытон вылысь тодматскысал зэмос пиосмуртэн, нылпиосылы но аслым эш мед луоз. Гуртэ улыны ӧй кошкысал. Гожтоно таӵе адресъя: 426050, Ижевск, до в/с, 50-ое почтовое отделение, предъявителю паспорта � 581654. Аб. 355. Удмурт воргорон, 40/170/65, гороскопъя Стрелец, сварщик, кышнояськылымтэ, средне-специальной образованиен, лякыт сямо, вазиськись, ужлэсь кышкасьтэм. Яратӥсько чорыганы, бакча котырын берганы. Тодматскысал 30-40 аресъем чебер кышномуртэн, пумит ӧвӧл одӥг нылпиезлы. Возьмало фотографиен гожтэт. Аб. 356. Удмурт пиосмурт, 29/170/50, гороскопъя Овен, вазиськись, лякыт сямо. Улӥсько но ужасько посёлокын. Тодматскысал 25-28 аресъем удмурт нылмуртэн, керӟегъёсыз но таза мугороосыз медаз вазиське. Аб. 357. Удмурт пияш, 22/180, улӥсько но ужасько городын плотник луыса. Вань аслам квартирае, гуртын - дачае. Тодматскысал ужез гажась, пӧраны быгатӥсь 20-25 аресъем нылмуртэн, пумит ӧвӧл одӥг нылпиезлы, Можга ёрослы матысь медло. Аб. 358. Удмурт пияш, 25/160, гороскопъя Близнецы. Улӥсько гуртын, анай-атаен ӵош, тракторист. Тодматскысал 17-25 аресъем удмурт нылашен. Пумит ӧвӧл одӥг нылпиезлы. Витисько фотографиен гожтэт. Аб. 359. Гожтэт мед ыстоз яке телефон номерзэ мед вералоз Можга ёросысь огнын улонлэсь жадем 39 аресозь удмурт нылкышно, урод сямъёсыз медаз луэ. Ачим сярысь: 39 арес, коньдонлы уг ёрмиськы, рабочий, кышнояськылымтэ (Ялонэз потаз ни - Аб. 323). Редакцилэсь: Лыдӟисьёсмылэсь ялонъёссэс тодматскон сэреге сётӥськомы, дун басьтытэк. Нимзэс, кытысь луэмзэс газет пыр ум шараяське, ваньмызлэн адресъёссы редакциын. Ялон сётӥсен тодматскыны мылкыд карисьёслы ивортӥськом: адресъёсты ми нокинлы ум келяське. Абонентлэсь номерзэ пусйыса, редакцие гожтэт ыстэ. Нош кинлы ке сӥзем гожтэттэс маркаен чылкыт конвертэ понэ - ыстомы кулэ адресъя. "Гужем" вуэ Эн малпалэ, зэмос гужем вуэ ини шуыса. Дышем сямъя нош ик дыр вуиз часъёсмес "гужем" вакытлы пуктыны. Озьыен, быдэс Россия туэ 26-тӥ мартэ кык часэ уин часъёслэсь стрелкаоссэс одӥг часлы азьлань воштоз. "Гужем" дыр кыстӥськоз 29-тӥ октябрёзь. Адямиез пушласянь югдытоно Кызьы кужмо властьтэк? Тани милесьтым театрмес ик басьтоно ке. Мукетъёсыныз ӵошатыса, пичи ик ӧвӧл со, ужасез 500 котыре вуэ: солистъёс, хор, оркестр, балет, производствоя цехъёс, администрация, - котькуд чиньы-пӧлы одӥг кырымын кадь возиськыны кулэ. Коллектив кӧня ке толэзь директортэк улӥз. Али тыршиськом ужмес выль сяменгес радъяны, документациез туала куронъёсъя выльдӥськом, сценаез, выжез но мукетсэ тупатъян борды кутскиськом. Буфет усьтӥм ни. Собере, театр ас кожаз нокызьы уз улы. Уката, ик творческой коллектив сярысь малпано ке. Театръёслэн калык куспо нуналзы азьын дорамы ӧтьылӥмы библиотекаысь, музейысь, училищеысь но мукет интыосысь эшъёсмес. Театр - со кужмо эстетической центр, адямиез пушласянь югдытӥсь луыны кулэ. Та ласянь, мон оскисько, Президент культура удысын ужасьёс боры пыкъяськоз. Мон - властез юнматон понна, солэн вань ёзъёсыз огъя сӧзнэтэн герӟаськемын мед луозы. Соин ик - референдум понна. Анетта Сидорова, Операя но балетъя кун театрлэн директорез. Юан-веран азьын Шудонъёслы - пум! Альберт Разин, тодосчи: - Удмуртъёс вашкала дырысен йыбырттылӥзы ӧтчамлы. Солэн тӧроез ачиз нокыӵе законъёс ӧз кылдытъя. Музъемез люкылонъя, веме ортчытонъя, выт бичанъя, пиосты армие келянъя, анайтэк-атайтэк кылем нылпиосты утялтонъя куронъёсты быдэстылӥз ӧтчам - тӥни кытын вал демократия. Солы пумитъяськись тӧроез ужысьтыз соку ик куштылӥзы. Асьмелэн туала кивалтӥсьёсмы шаермылы Тӧро - Президент - юнматон сярысь малпанэ вуизы ни бере, мед луоз озьы. Зэм, куд-огез шуо: Россиын гинэ ӧвӧл, быдэс дуннеын таӵе кивалтэт юнматэмын. Быдэс дуннеын нош адями, адямилык сярысь сюлмаськон чик уг шӧдӥськы. Инкуазез саптало, калыкез быдто. Асьсэос шуо: "Эн виы!" Озьы ке но, адямиез арам каро. Туала вакытэ элькунамы нимаз, пе, мед луозы Кун Кенеш, Кивалтэт, Президент, Конституцияя суд, мировой судьяос. Мукет кун ёзъёс шуэмез тазьы валасько: Удмурт Элькунлэн Тӧроез - Президентэз - ачиз юнматыны быгатоз ёрослэсь кивалтӥсьсэ. Гуртэ но, кыӵе ке предприятие но, гурт кенеше но ыстыны быгатозы сыӵе адямиез. Мон весь шуисько: быдэс Россиын ортчытъяськись шудонъёслы пум пононо ни. Али тани колхозъёсыз куашкато. Соосты кылдытон но аспӧртэмлыко шудон вал. Мон весь шуисько: ойдолэ кӧня ке гуртын колхозъёс интые кылдытъялом эштосъёс. Отчы котькудӥз аслаз "юдэсэныз" мед лыктоз. Яке - выжоно кооперацие. Тодмо экономист Александр Чаянов та сярысь весь тодамы вайытылӥз. А. Разин, тодосчи. Инкуазь сярысь сюлмаськыса Природая юртэ люкаськылӥзы шаерысьтымы ог 150 пала экологъёс. Пумиськонэз радъязы Инкуазез утёнъя обществолэн удмурт люкетэз но шаерысьтымы егитъёслэн "Родники" огазеяськонзы. Инкуазез утён бордын республикаямы ог 20 пала огазеяськонъёс ужало. Соос ог-огзэс ас ужан амалъёсынызы тодматӥзы, сюлмаськытӥсь ужпумъёсты ӵошен быдэстон сярысь кенешизы. Слётэ лыктэм котькуд делегацилы дасямын вал нимысьтыз сузьет. Отчы люкам тунсыко визь-кенеш дэмланъёс экологъёслы азьланьын ужаны юрттозы. Н. Щеголева. Референдум азьын Конституциез воштон - ӝыны уж гинэ Удмурт Республикалэсь Конституцизэ федеральной законъя тупатон вылысь кылдытэмын вал юристъёслэсь нимысьтыз группа. Солэн ужаз пыриськиз Россия Федерацилэн правительствоез бордысь Законодательствоя институтлэн конституционной правоя люкетэныз кивалтӥсь юридической наукаосъя доктор Александр Евгеньевич Постников. Туннэ со валэктонъёс сётэ Удмурт шаерысь Конституцилэн 10-тӥ ёзэтаз воштонъёс пыртон пумысен. - Конституция - сыӵе документ, кудаз кылъёсыз ӧжыт, нош пуштросэз мур. Соин ик воштон но пыртыны кулэ вал туж чакласькыса, кыдёке азьлане учкыса, со дыре ик та ватсэтын номыр мултэсэз луыны кулэ ӧй вал. Та уж умой быдэстэмын, ӵектэм воштонэ номыр но уд будэты ни, одӥг кылзэ но отысь уд кушты. Малпасько, калыклы но со валамон. "Россия Федерациысь улосъёсын кун властьлэсь закон кылдытӥсь но быдэсъясь ёзъёссэ радъянъя огъя принципъёс сярысь" федеральной закон чакла, Россиысь улосъёсын кун властьлэн быдэсъясь ёзъёсыныз кивалтыны кулэ вань калыкен быръем мурт шуыса. Таӵе веран инмысь усемын ӧвӧл. Со тросаз улосъёсын улонэ пыӵаз ини. Та закон потытозь. куд-ог улосъёсын кун властез люкон пумысен судэ но вазиськылонъёс вал. Лэчыт ужъёсты Россиысь Конституцияя суд но эскериз, кылсярысь, Алтай крайлэн но Тамбов областьлэн уставъёссы пумысен. Табере улосъёс асьсэлэсь документъёссэс, нырысь ик Конституцизэс, федеральной законъя тупамон карыны кулэ. Озьытэк уно учыръёсы федеральной кивалтэт улосъёсысь тугаськем тэльбугоез сэрттыны выре (кылсярысь, указъёс пыр). Токма дыр но кужым быре. Парламент республика-а яке Президентэн кивалтон-а умойгес - созэ али уг ӵошаты. Асьмеос кивалтӥськыны кулэ федеральной законъя. Нош со ӵектэ вылӥ должностен адямиез вань калыкен бырйыны. Бырйыны - быръём, со сяна, туж валамон луыны кулэ статусэз, ма_Е понна кыл кутоз. Россия Федерацилэн быдэслыкез пумысен вераськыку, меӵак президентэн кивалтон ужпумъёсты но ӝутыло. Югдурез кужым чотын тупатон чакламтэ Конституциын. Шуом, Удмуртия шуге-леке вуиз ке, нырысь ик шуккет ас вылаз йӧтоз. Соин ик ужпумез кин ке вылэ погыльтоно ӧвӧл, со сярысь республика нырысь ик ачиз мед сюлмаськоз. Референдум таяз учыре - самой тупамоноез. Удмурт Республикалэн Конституцияз чаклам воштонын огдыре 4 ужпум пуктэмын кадь: Президент, Конституцияя суд, Мировой судьяос но кун властьлэн мукет ёзъёсыз. Юан кылдэ: уг луы-а котькудӥз пумысен нимаз куара сётыны. Валэктӥсько - уг луы, малы ке шуоно, соос ог-огенызы герӟаськемын, куинезлы дурбасьтыса, нош огзэ палэнтыса - ӵектэм воштонъёслэн быдэсак кужымзы ыше. Вунэтоно ӧвӧл созэ но, Конституцие воштон пыртыса гинэ ужп уз быдэсмы, быгатоно на сое улонэ пыӵатыны. Г. ЮСАЕВ. Удмурт Элькунын сюресъёс кузя автотранспортэн мынон-ветлонэз огдырлы кулэстон сярысь Удмурт Элькунысь Правительстволэн ПОСТАНОВЛЕНИЕЗ Автомобиль сюресъёсты но сюрес дурысь сооружениосты утён сярысь правилоосты лыдэ басьтыса, кудъёсыз юнматэмын РСФСР-ысь Министръёслэн Советсылэн 1969-тӥ арын 5-тӥ мартэ кутэм 129 номеро постановлениеныз, 2000-тӥ арын тулыс сюресъёсты дырызлэсь вазь изъянтэмлэсь утён вылысь, Удмурт Элькун Кивалтэт пуктэ: 1. 2000-тӥ арын 1-тӥ апрельысен 45 нунал ӵоже огъя кутӥськись сюресъёс кузя ветлыны уг яра 10 тонналэсь уногес огъя секталаен но осьсы вылэ самой троссэ 6 тонна нагрузкаен вань транспортлы, урод сюресъёсты ортчыны быгатӥсь груз нуллӥсь автомобильёслы, ГАЗ-66-ез, ЗИЛ-130-эз, ЗИЛ-131-ез, ЗИЛ-157-ез вераса, вань маркаен тракторъёслы. 2. "Удмуртавтодор" унитарной кун предприятилы Удмурт Элькунысь Югдурез утёнъя министерстволэн Сюресъёс вылын кышкытлыклэсь алонъя кун инспекциеныз ӵош маршрутъёс чаклано но Удмурт Элькунын огъя кутӥськись сюресъёс кузя огъя секталаен 10 тонналэсь ятыр но осьсы вылэ самой троссэ 6 тонна нагрузкаен бадӟым грузъем автомашинаослы, юнматэм вылтусо пропусксы вань ке, мыныны-ветлыны луонлык кылдытоно. Чаклано сюрес пусъёсты пуктылонэз, кулэ интыосын шлагбаумъёсты интыянэз но уен-нуналэн дежурствоез радъянэз. 3. Дэмлано: Удмурт Элькунысь городъёслэн но ёросъёслэн администрациоссылэн тӧрооссылы юнматэм вылтусо пропускен транзит транспортлы тупатэм маршрутъёсъя каньылэн мынон-ветлонэз радъяно; акциосын усьтэм амалэн ужась "Удмуртнефть" огазеяськонлы, элькунысь Югдурез утёнъя министерстволэн Сюрес вылын кышкытлыклэсь алонъя кун инспекциеныз ӵош огкыл шедьтыса, маршрутъёс чаклано но транзит автотранспортлы ветлыны луонлыкъёс кылдытоно; промышленной но лэсьтӥськись организациослэн кивалтӥсьёссылы, ведомствоязы пырись предприятиоссэс вискарытэк ужатон вылысь, 2000-тӥ арын 1-тӥ апрелёзь кулэ материалъёсты, сырьёез но мукет грузъёсты тырмыт ваёнэз радъяно. 4. Сюресъёс вылтӥ ветлыны лэзёно автобусъёслы, йӧл, пызь, эстӥськон, пропан, почта нуллӥсь автомобильёслы, аварийной службалэн автомобильёсызлы, ӝог уродмись сиён-юонэз, эмъюмъёсты, комбикормез, кидысэз, минерал сылалъёсты, пудоез но тылобурдоез нуись-ваись нимысьтыз автотранспортлы, азот но кислород нуллӥсь автомашинаослы, Удмурт Элькунысь утиськонъя но спортъя технической организациослэн но профессиослы дышетонъя шор ёзо учреждениослэн руль сьӧрын ветлыны дышетонъя автомобильёссылы, озьы ик нюлэс мерттонэн герӟаськем автомобильёслы. 5. Удмурт Элькунысь быдэсъясь властьлэн ёзъёсызлы, ведомствоязы пырись предприятиоссылэсь ужанзэс вис каронтэм вылысь, 2000-тӥ арын 1-тӥ апрелёзь кулэ луись материалъёс, сырьё но мукет грузъёс тырмыт люкано. 6. "Удмуртавтодор" унитарной кун предприятилы огья кутӥськись сюресъёс кузя ветлыны юнматэм вылтусо пропуск сётъяны лэзёно, Удмурт Элькунысь сюресъёсъя улосвыл фондэ вуэм коньдонэз пусйыса. Нимысьтыз пропускъёслы бланкъёс лэсьтэм но соосты сётъям, огья кутӥськись сюресъёс кузя ветлӥсьёслы иворъёс сётонэз радьям понна тыронъёслы, озьы ик сюресъёсты изъянтэмлэсь утёнъя но соосты тупатъянъя ватсаса ужрадъёслы уксё висъяно Удмурт Элькунысь сюресъёсъя улосвьы фондлэн коньдонэз чотын. 7. Мукет ведомствоосты но организациосты огья кутӥськись сюресъёс вылтӥ ветлыны пропускъёс сётъяны лэзёно ӧвӧл. 8. Та постановленилэсь быдэсъяськемзэ эскерыны осконо Удмурт Элькунысь Кивалтэтлэн Тӧроезлэн Нырысетй воштӥсезлэн секретариатысьтыз кивалтӥсьлы Г.А.Детинкинлы. 9. Постановлениез печатлано "Удмуртская правда", "Известия Удмуртской Республики" но "Удмурт дунне" газетьёсын. Удмурт Элькун Кивалтэтлэн Тӧроез Н.А.Ганза. Ижевск город, 2000-тӥ арын 6-тӥ мартэ � 243. Вуоно арын быръёмы Кылемаз покчи арня нуналэ журналистъёсын кенешиз Удмурт Элькунысь Кун Кенешлэн Кунэн герӟаськем ужпумъёсты радъянъя, калык кусыпъёсъя но интыысь аскивалтонъя ялан ужась ёзэзлэн тӧроез Кун Кенешлэн депутатэз Жанна Дворцова. Вераськон мынӥз Удмурт Элькунлэн Конституциезлэн дасэтӥ ёзэтаз одӥг ватсан ӵектон (адямиос со понна куаразэс сётӥзы Россилы Президент быръён нуналэ) пумысен. Солэн пуштросэз кемалась тодмо: Удмурт Элькунын улонэз азьланяз радъялозы Удмурт Элькунысь Кун Кенеш, Кивалтэт, Удмурт Элькунлэн Тӧроез - Президентэз -, Конституцияя суд, мировой судьяос. - Удмурт Элькунлэсь Тӧрозэ, - пусйиз Жанна Дворцова, - быръёз калык. Миым, толсуре, ортчытэм юалляськон дыръя шаерамы улӥсьёс пӧлысь 51,6 процентэз огкылысь луиз Президент понна. Зэм, данакез лыдъяло: выль ёз кылдэмен валче уно сюлмаськонъёс тэбинёзы. Сыӵеез уз луы: Удмурт Элькунлэн Тӧроезлы юрттозы Кивалтэтысь но Кун Кенешысь лыктэм адямиос. Конституцияя судын луоз вить судья. Конституцияя суд эскерылоз Президентлэн, Кун Кенешлэн, кӧня ке депутатъёслэн, Вылӥ судлэн, Арбитражной судлэн, интыосысь аскивалтонъя ёзъёслэн юан-веранъёсынызы валче кылдэм ужпумъёсты. Озьы ик лыдэ басьтылоз соизлэсь яке таизлэсь законъёслэсь Конституцилэн куронъёсызлы тупамзэ яке тупамтэзэ. Со сяна, калыклы ивортылоз Конституцилэн пуштросэз сярысь. Конституцияя судлы коньдон висъялоз шаерысьтымы бюджет. Конституцияя суд аслыз Тӧро ачиз быръёз. Луозы на эшшо мукет кивалтӥсьёс - мировой судьяос. Удмурт Элькунын соос сизьымдон куинь кузя ужалозы. Бигер Элькунын луыны кулэ сю куатьтон тямыс адями, Башкир Элькунын - сю тямыстон куинь. Мировой судьяос эскерылозы люкиськись кузпалъёс, соослэсь ваньбурзэс люкон пумысен кылдэм, йыртэмасез кык арлы пытсанэн герӟаськем ужпумъёсты. Мировой судьяослы коньдон висъяськоз Россия Федерацилэн бюджетысьтыз, соослэн ужан тӥрлыксылы - шаермылэн бюджетысьтыз. Луыны быгатозы на эшшо мукет кивалтӥсь ёзъёс. Шуом, кудаз ке ёросын кылдӥз туж секыт югдур: ю-нянь будэтӥсьёсты "кекатӥз" кӧс гужем. Яке - кытын ке луиз шудтэм учыр. Соку Президент татчы ыстыны быгатоз аслэсьтыз адямизэ. Кылдытоз кыӵе ке мукет ёз. Зэм, солэсь азьло кутоно нимысьтыз закон. Куд-огез кышкало: Президентлы сётэмын луоз туж бадӟым эрик. Таӵе малпан нокинлэн йыраз медаз лыктылы. Удмурт Элькунлэн Тӧроез кыл кутоз Кун Кенеш азьын. Нош Удмурт Элькунлэн но Россия Федерацилэн Конституциоссылы пумит луись ужъёсын вырыны ӧдъяз ке, ужысьтыз мозмытэмын луоз. Удмурт Элькунлэн Тӧроез быдэстэм ужъёсыз сярысь ивортылоз Удмурт Элькунысь Кун Кенешлы. Куд-огез малпало: Удмурт Элькунлы кивалтӥсь ыстыны быгатоз Москва но. Таӵеезлэсь но палэнтӥськыны уг луы. Шаерамы улон-вылон ӟеч радъяськиз ке, Удмурт Элькунлы Тӧро - Президент - быръёмы вуоно арын - март толэзе. Е. РОМАШОВА. Россия Федерацилэн кун наградаосыныз пусъён сярысь Россия Федерацилэн Президентэзлэн Указэз Вузкарон удысын пусйымон ужъёсыз но трос аръёс ӵоже сюлмысь тыршемез понна "Россия Федерациысь вузкарон удысысь дано ужась" сӥлы карон ним сётоно Карякина Людмила Николаевналы - "Виктория-сервис" огазеяськонлэн валтӥсь директорезлы, Удмурт Республика. Россия Федерацилэн Президентэзлэсь ужзэ быдэсъясь В.Путин. Москва, Кремль, 2000-тӥ арын 9-тӥ мартэ. � 473. Выль дауре выль кивалтӥсен Россия быръёнысен быръёнозь улэ, ӟеч кузёлэн вуэмезлы ялан оскыса. Сыӵе мылкыдын ик мынӥм избирательной участоке 26-тӥ мартэ но. Быдӟым странамылэн ваньмыз 89 улосвылэз мыло-кыдо пыриськиз Россия Федерацилы Президент быръёнэ. Табере тодмо ни: ӝыныезлэсь ятырез бырйисьёс куаразэс сётӥзы Владимир Путин понна. Кыкетӥ интые потӥз Геннадий Зюганов. Таяз быръёнъёсын, 1996-тӥ арен ӵошатыса, со шӧдскымон бере кылиз. Федеральной информационной центр ивортэмъя, КПРФ-лэн кивалтӥсез понна мыло-кыдо куаразэс сётӥзы Приморье край, Якутия, Оренбург, Новосибирск областьёс но куд-ог мукет регионъёс. Новосибирскъя, кылсярысь, Владимир Путин понна дурбасьтэмзэс веразы бырйисьёс пӧлысь 39 процентэз, Зюганов понна - 38 процентэз. Президент луыны мылкыд карисьёс пӧлын зэмос нюръяськон мынӥз та кык кандидатъёс куспын гинэ, кылемъёсыз оглом ичи куара люказы. Но шахтёр регионъёсын вормиз Аман Тулеев, ас кивалтоно областяз со люказ 51,37 процент. Куд-ог городъёсын, кылсярысь, Москваын, Путин бӧрсьы тросгес калыкез бордаз кыскыны быгатӥз Григорий Явлинский. Шумпотоно нылкышноос понна. Президентэ кандидатъёс пӧлы нырысьсэ пыриськиз Элла Памфилова. Озьыен, азьланезлы кутскон сётэмын. Кин тодэ, вуонояз быръёнъёсын, оло, ӵапак нылкышноос вормозы ай. Ас вакытаз кивалтӥзы ук Россиен Екатерина ИИ но мукетъёсыз. Озьыен, странамылы Президент бырйим. Удмурт Республикаын улӥсьёс пӧлысь но данакез вуоноезлы осконзэс герӟазы Владимир Путинэн. Избирательной участокъёсы ветлэмъёс пӧлысь 61 процентэз со понна куаразэ сётӥз. Калыкез бордаз кыске арлыдыз. Азьвылэныз ӵошатыса, Россилы та вакытэ ӵапак уг тырмы вал ужась егит, чупрес кивалтӥсь. Путинлэсь нимзэ адямиос герӟало Чечняын кылдэм югдурез тупатонэн но. Тӥни малы Владимир Владимирович огкутскемен ик тырмыт куара люканы быгатӥз. Федеральной информационной центр ивортэмъя, одӥг турен ортчытэм быръёнъёс 800 миллион манет коньдонэз шыръялозы, ӵапак сомында кошкысал кыкетӥ быръёнъёсы. Удмуртия та нуналъёсы кык полэс шугъяськонэн улӥз, шуыны луоз: Россилы Президент быръемен ӵош асьмеос мылкыдмес верам Конституциямы воштонъёс пыртон сярысь. Пуктэм юанлы шаерамы улӥсьёс "Бен" шуизы. Озьыен, республикамы каллен-каллен берытскиз ни Президентэн улон пала. Нош быръёнъёс ортчыны кулэ 2001-тӥ арын март толэзёзь. 26-тӥ мартъя оглом ма вераны луоз? Удмуртиысь калык таяз быръёнъёсы, азьвылъёсыныз ӵошатыса, мыло-кыдогес ветлӥз, ӟеч воштӥськонъёслы оскон мылкыдзэ вераз. Озьы ик мед луоз вылэм. Л.МЕДВЕДЕВА. Театръёсъя ВИ фестиваль Яратон ворме! Шаерамы ортчиз театръёсъя куатетӥез фестиваль. Соин валче учкисьёс выльысь пумиськыны быгато яратоно актёръёсынызы. Ижысь Егитъёслэн юртысьтызы егитъёслэн "Иднакар" театрзы возьматӥз "Тристан и Изольда" спектакльзэ. Сокем ӝог но етӥз шудӥзы артистъёс - учкисьёс ӧз ик шӧдэ, луоз, дырлэсь ортчемзэ но. Соос пӧлын тросэз вал дас куинь-дас сизьым аресъем пиналъёс. Спектакль маде ог-огзэс вань сюлмысьтызы, ӟырдыт яратӥсь егитъёслэн - Тристанлэн но Изольдалэн - секыт адӟонзы сярысь. Улон туж трос могӟетъёс пуктылӥз кадь, яратӥсь сюлэмъёсты люкон вылысь. Тристанлэн агаез огпол шӧдӥз: выль кышноез, Изольда, сое уг ни яраты. Таин сэрен матысь адямизэ быдтыны малпаз - сое тылскемын сутыны дэмлаз. Таӵе ик адӟон вите вылэм вынмуртсэ - Тристанэз. Корольлэсь вожпотонзэ пуромытэ но тыл пушкы "вӧй киська" ведӥн кышно - корольлэн лулгажанэз... Тристан уте аслэсьтыз яратонзэ. Зэм, собере кошконо луэ кыдёкысь шаеръёсы. Но берытсконэзлы осконзэ уг ышты (Изольда но со сярысь тодытэ - чебер зундэс кузьма). Кема ветлэмез бере, Тристан шуак шеде удмуртъёслэн вашкала йылолазы. Нош татын палэнысь мурт ноку медам луы. Сое адӟем адямиез вите кулон. Зэм, Тристанэз уте вӧсяськись кышномурт - палэнысь вуэм воргоронлы со улон кузьма, собере таос кузпалъясько. Кышнояськыса Тристан чик уг вунэты нырысетӥ яратонзэ. Зэм, тазэ но кузпалзэ азьвылзэ сямен ик Изольда шуо. Нош Тристан уг яраты удмурт Изольдаез. Таин валче кышномурт воргоронэз быдтэ. Нош Испаниын улонэныз люкиське Тристанлэн зэмос яратонэз - Изольда. Озьы ке но, соослэн лулъёссы бӧрысь пумисько. Спектакль йылпумъяськем бере, учкисьёс актёръёслы султыса кичабизы. Спектакльысь суредъёс. Владимир Беломорскихлэн гожтэмез но туспуктэмез. Удмурт Элькун Кивалтэтлэн 1999-тӥ арын 20-тӥ сентябре кутэм 906 номеро постановлениеныз юнматэм Удмурт Элькунлэн улосвылаз аракыен вузкаронлы лицензия сётъян радлыке воштонъёс но ватсанъёс пыртон сярысь Удмурт Элькунысь Правительстволэн ПОСТАНОВЛЕНИЕЗ Удмурт Элькунлэн улосвылаз кудӟытӥсь юонъёсын вузкаронэз кун ласянь юнгес эскерыса возён вылысь, Удмурт Элькун Кивалтэт пуктэ: 1. Удмурт Элькун Кивалтэтлэн 1999-тӥ арын 20-тӥ сентябре кутэм "1995-тӥ арын 22-тӥ ноябре кутэм "Этил спирт, аракы но спирт продукция поттонэз но вузан-басьтонэз кун ласянь чакласа возён сярысь" 171-ФЗ номеро Федеральной Законэз улонэ пыӵатонъя ужрадъёс сярысь" (1999-тӥ арын 7-тӥ январе кутэм 18-ФЗ номеро Федеральной Законын гожтэмъя) 906 номеро постановлениеныз юнматэм Удмурт Элькунлэн улосвылаз аракыен вузкаронлы лицензия сётъян радлыке воштонъёс но ватсанъёс пыртоно. 2. Удмурт Элькунысь городъёслэн но ёросъёслэн администрациоссылэн тӧрооссылы пусйыны ӵектоно матысь улосвылъёсты, кудъёсаз тупатэм радлыкъя кудӟытӥсь юонъёсын вузкарыны уг яра. Удмурт Элькун Кивалтэтлэн Тӧроез Н.А.Ганза. Ижевск город, 2000-тӥ арын 6-тӥ мартэ, � 231. Милиция но ужа Удмуртиын азьланьтӥське "Вихрь-антитеррор" бадӟым ужрадлэн куинетӥ вакытэз. Сое ортчытон дыръя милициын ужасьёс 763 йыружъёсты шараязы, со пӧлысь 607-зэ "пӧсь пытьыосъя". Йыруж лэсьтэмзы понна ӝегатэмын 353 адями, нош 62-сэ милиция азьло ик утча вал ини, соос пӧлысь 28-эз арестовать каремын. Ужрадэз ортчытыку шараямын административной куронъёсты тӥян 31133 учыр, таламын 43 пыӵал тӥрлык (соос югдурез утёнъя органъёсын пусъемын ӧй вал), 16,6 сюрслэсь уно боеприпас, 2 пуштытон арбери, 6 пурт, 966 грамм наркотик но азьвыл лушкам 12 автотранспорт. Милициын ужасьёс эскеризы 109487 объектэз, со пӧлысь 53 сюрслэсь уноез улон юртъёс (15,3 сюрс корка сигъёс но 15,7 сюрс подвалъёс) 542 гостиницаез но 1268 общежитиез. Озьы ик эскеремын 31,2 сюрс автомашина, 1586 автотранспорт сылон интыос, 204 вокзалъёс но станциос, улонын тужгес но бадӟым инты басьтӥсь 4600 объект, со пӧлысь 81-аз кужмоятэмын соосты возьман. Чакламын пыӵал тӥрлык, боеприпасъёс, пуштӥсь арбериос возёнъя 499 интыос, 7-аз ужзы дугдытэмын. Таламын служебной луись 136 пыӵал тӥрлык, басьтэмын пыӵал тӥрлык возьыны лэзён сярысь 137 документ. "Вихрь-антитеррор" ужрад азьланьтӥське. Удмурт Республикаысь МВД-лэн пресс-службаез. ЖУРНАЛИСТЪЁСЫН ПУМИСЬКОНЪЁС Малы сюресъёсмы Западын кадь ӧвӧл? Алигес Правительствоын журналистъёсын пумиськылӥз "Удмуртавтодор" кун предприятилэн кивалтӥсез Александр СОЛОВЬЕВ. Люкаськемъёслы со мадиз миым но туэ кызьы ужамзы но азязы сылӥсь куд-ог ужпумъёс сярысь. Предприятилэн 5 330 иськемлэсь уно сюресъёсыз. Куинь сю иськемез федеративной луо. Миым сюрес лэсьтонэ, тупатъянэ но возёнэ 974,5 миллион манет интые, 691 миллион манет кутэмын. Берло дыре сюрес фондэ уногес коньдон вуэ. Но Александр Васильевичлэн ивортэмезъя, буйгатскыны вазь на, уксё озьы но уг тырмы. Предприятиос но организациос фондэ 350 миллион манет висъяны кулэ. Со коньдон дыраз вуысал ке, Иж котыртӥ сюрес лэсьтыны луысал. Арысь аре фондэ коньдон уг тыро Ижысь механикая завод, "Аксион", "Ижмаш" но мукетъёсыз. Шоркар котыртӥ сюрес лэсьтон сярысь вераськон кемалась мынэ ни. Али одӥг кылэ вуэмын: ӝынызэ коньдон сётоз Россиысь сюрес агентство, кылемзэ кун сюрес фондысь кутозы. Но кулэ вылэм та ужез быдэсак Москвалы басьтыны. Александр Соловьевлэн сыӵе мылкыдыз. Али РФ-ысь Правительствоын сюрес лэсьтонъя национальной программа дасяське. Асьмелэн но куд-ог объектъёсмы отчы шедё, кылсярысь, Иж котыртӥ сюрес ӝутон, Ижевск- Якшур-Бодья-Игра сюресэз выльдон но Тарасово черкогурт дортӥ Кама вамен бадӟым выж пуктон. Солэн кузьдалаез 1 иськем, 700 миллион манет уксё кулэ луоз. 1993-тӥ арысен выльдӥське ни вашкала Сибирь сюрес. Со герӟа Казань-Малмыж-Пермь- Екатеринбург городъёсты. Асьме шаертӥмы 139 иськем сюрес вуттоно. Со пӧлысь 70-эз лэсьтэмын ни. Та уже федеральной сюрес фондысь 132 миллион манет уксё висъямын. Кылемзэ - витьтон иськемзэ - ӝутыны эшшо 250 миллион манет кулэ на. Жаляса верано луэ, та ужпум йылаз-пумаз вуттымтэ на, нош сюресэз вуттыны чакламын вуоно арын. Малы бен асьмелэн сюресъёсмы уродэсь, Западын кадесь ӧвӧл? Асьмеос но ӟеч сюрес лэсьтыны быгатӥськом. Но ваньмыз пыкъяське коньдон тырмымтэ борды. Тани Финляндиын выль сюрес лэсьтонэ 1 метр зӧкта кӧльы но луо кисьто, нош асьмелэн - 25-30 сантиметр. Тӥни соин ик сюресъёсмы кема уг чидало, ӝог куашкало. - Шаерысьтымы хозяйствоослэн али 3,5 сюрс иськем сюрессы, - шуэ Александр Васильевич. - Но соосты ваньзэ огдыре асьме вылэ басьтыны ум быгатӥське, уксё уг тырмы. Удмуртия сюресъёсъя Россиын 28-тӥ инты басьтэ. Шаерамы умоез сюрес лыдъяське Ижевск-Воткинск, самой кышкытэз - Играе нуисез. "Удмуртавтодор" берло дыре сюрес лэсьтонъя но сое выльдонъя конкурсъёс ортчытъя. Озьы миым кызь миллион манет ёрос уксё шыръямын. Азьланьын сюресъёсты возёнъя но конкурсъёс ортчытъяны малпало. Малы Ижын сюресъёс уродэсь юанлы Александр Васильевич ӧз валэкты, милям удысамы, пе, соос уг пыро. Г.РОМАНОВ. Гурт улон Тулыс ӧте ни бусые Котькуд аре тулыс бусы ужъёс кутскон азьын гурт удысын тыршисьёс асьсэлэн бадӟым кенешазы люкаськыло. Таяз учыре но, азьло аръёсы сямен ик, соослэн кенешонзы Завьяловоын ортчиз. Правительстволэн Тӧроезлэн Н. Ганзалэн но, гурт хозяйствоя но сиён-юонъя министрлэн П. Першинлэн вераськемзы бере, АПК-ын кылдэм югдур лыдпусъёсын син азе пуксиз ке но, жаляса верано, кризисысь потон сюресъёс пусъемын ӧй вал. Соин ик гуртъёсысь вуэм кивалтӥсьёс кенешонэз ялан та ужпум вылэ выжтылӥзы. Шаркан ёросысь администрациен кивалтӥсь А. Прохоров кык ӵектонъёсын потӥз: туж кулэ АПК-ез азинтонъя нимысьтыз концепция но государстволэсь оскымон юрттэт. Соиз но, таиз но ӧвӧл бере, гуртоос арысь аре асьсэдыз огвыллем юанъёсын ёрмыто: кызьы выльдоно техникаез, тырмоз-а эстӥськон, висъяськозы-а дотациос, кыӵе луозы закупочной дунъёс но пӧртэм-пӧртэм мукет юанъёс. Лэчыт луиз кадръёсъя ужпум но. Шаркан ёросын гинэ 26 хозяйствоос пӧлысь 14-аз кивалтӥсьёссы воштэмын, 9 хозяйствоен туэ нылкышноос кивалто. Аграрно-промышленной комплекслы государство ласянь тырмыт юрттон сярысь вераськиз Завьял ёросысь "Путь Ильича" колхозлэн кивалтӥсез В. Никитин но. ГСМ-лы, газлы, электрокужымлы дунъёсты со кулэстыны ӵектӥз. - Таӵе куронэз мон ноку умоен уг лыдъя, - лек шуиз Н. Ганза. - Али быдэс дуннеын нефтьлы , газлы дунъёс будо. Собере залэ вазиськыса шуиз: - Ойдо ӝутскелэ, кинэ меда кыл кутытӥзы ни пениос но штрафъёс тырымтэ понна? Правительстволэн Тӧроез уг малпа вылэм, ӝожтӥськисьёс луозы шуыса, соин ик паймыса кылзӥз адямиослэсь верамзэс. Тани Воткинск ёросысь одӥг кивалтӥсь вылэ электротыллы тыронъёсыз люкаськем понна, уголовной уж ӝутӥллям. Мукетыз доры судысь приставъёс лыктӥллям но колхоз кассаысь коньдонэз талаллям, куинетӥезлэсь тракторзэ нуиллям. Со выллем учыръёс сярысь трос гинэ верамын вал. Н. Ганза та ужпумез нимысьтыз эскерон сярысь кыл сётӥз. В. Никитин озьы ик ивортӥз Кохозъёслэн союззылэн нырысетӥ съездаз кутэм решение сярысь. Кызьы гожъяллямы ини, делегатъёс, Н. Ганзалы вазиськыса, гурт хозяйствоя но сиён-юонъя министрлы оскытэмзэс веразы но сое ас ужысьтыз мозмытыны куризы. Правительстволэн Тӧроез шуиз: - Тау сыӵе ӵектон сётэмды понна но министръёсты юнматон но воштон - со мынам уже. Со озьы, вылды. Но тани мар син шоры йӧтӥз. Та кенешын В. Никитинлэсь верамъёссэ кичабонъёсын пумитазы. Сыӵе ик кичабонъёс чузъяськизы Каракулино ёросысь хозяйствоен кивалтӥсьлы А. Белослудцевлы. Калыклы туж кельшиз солэн верамез: - Туж курисько: музъемез вузаны ӧвӧл лэзёно! Удмуртилэн Конституцияз 10 арлы сыӵе мораторий пуктэмын. Колхозъёслы пумит умойтэм политика нуэмен, музъемъёс озьы но пайёслы люкылэмын, аналмыса кыллё. Кизь вал со музъемъёсты - уг луы. Бадӟым кенешын ӝутэм ужпумъёс, вераськонъёс ваньзы ик одӥг малпанэ вуттылӥзы: государстволэн юрттэмезтэк гурт хозяйствоез уд ӝуты. Берло аръёсы гуртэ уг ни кылё егитъёс. Соин ик кадръёсъя ужпум ӝоген одӥгез валтӥсез луоз. Ижевскысь Гурт хозяйствоя академиысь ректор тазьы шуиз: - Туэ академиез 832 специалист йылпумъялоз. Со пӧлысь 177-зэ гинэ гурт кивалтӥсьёс ас доразы ужаны ӧтё. Озьы ке но, таосызлэн но гуртэ мынэмзы потоз меда? Угось улон инты 43 муртлы гинэ ӵектэмын. Удмуртилэн азьвыл правительствоез нимысьтыз постановление кутӥз вал, бере кылись хозяйствоен кивалтыны мылкыд карем адямиослы юрттон понна. Солы оскыса куд-огез секыт ныпъетэз ас вылазы басьтӥзы. Но постановление уг ужа, пӧям специалистъёслы ас кужымзы вылэ гинэ оскыса ужано луэ. Куазь кӧс улэмен валче шуге-леке сюрем хозяйствоос но государстволэсь зэмос юрттэт ӧз басьтэ. Шаркан ёросысь одӥгез фермер но Пичи Пурга ёросысь "Родина" СПК-лэн кивалтӥсез таӵе мылкыдзэс веразы: макем ӟечгес ужаськод, сокем золгес кыл кутоно луэ. Секыт югдуре шедемъёслы юрттоно, но дас поллы тросгес юрттоно сыӵе хозяйствоослы, кудъёсыз кӧс куазен но ӟеч урожай басьтыны быгатӥзы. Умоен пумитазы фермерлэсь таӵе малпанзэ но. Ӝоген, пе, вуомы сыӵе югдуре, куке нокытчы луоз вузаны поттэм продукцимес. Та ужпум сярысь но правительство уг малпаськы. Малы нокин уг чакла "Ижмолоко" ОАО-лэсь ужзэ? Улэп коньдон интые соос дуно вӧйзэс сёто. Мар кароно крестьянъёслы со вӧйын? Та юанлы Н. Ганза тазьы валэктӥз: кык арня куспын, пе, сыӵе "варварской переработкалэсь" ужзэ эскером. Та кенешлэн ужамезлы йылпумъянъёс лэсьтӥзы П. Першин но Н. Ганза. Николай Алексеевич шуиз, асьме правительство, пе, гурт удысъя кулэ решениос кутоз, соос ваньмызлы быдэсъян вылысь луозы, нош нокыӵе политической огазеяськонъёслэн, кылсярысь, "Удмурт Республикалэсь экономикаын кулэяськонъёссэ утён понна" движенилэн ужаз правительство уз пыриськы. Татьяна Банникова. Туспуктэмъёсыз Владимир Камашевлэн. Дэбес ёросысь колхозъёслэн кивалтӥсьёссы А. Хохряков (Малыгин нимо колхоз), В. Баженов ("Урал") но Л. Ложкин (Фрунзе нимо колхоз) та кенеше лыктӥзы вал, ас юанъёссылы валэктонъёс шедьтон понна. Александр Анатольевич Хохряков ар талэсь азьло ас мылкыд каремезъя бере кылись колхозэ ужаны выжиз. Туж секыт йӧтэ: асьме правительство сётэм кылзэ уг быдэсъя, нокыӵе юрттэт уг вуы. Председатель луыса одӥг ар гинэ ужа Леонид Валентинович Ложкин но. Таизлэн но сюлмаськонъёсыз уно: мар кизёно, кызьы радъяськозы бусы ужъёс? Ӧжыт умойгес югдур "Урал" колхозын. Но азьмынӥсь хозяйствоос дорозь туж кыдёкын ай. Ужаны мылкыд вань - юрттэт ӧвӧл. *** Балезино ёросысь "Андрейшурский" совхоз 70-тӥ аръёсы йыг-йыг пыд йылаз сылӥз. Табере со сярысь тодэ ваёнъёс гинэ кылизы на. Совхоз но быриз. 1992-тӥ арысен со интые пичи хозяйствоос - "Рассвет" но "Андрейшурский" - кылдӥзы. Кивалтыны нокинлы, ужаны нокинлы. Кылем арысен "Андрейшурский" СПК-ен кивалтыны бырйизы кышномуртэз. Валентина Филипповна Князева та хозяйстволэн ньылетӥез ни кивалтӥсез. Лад-лад, калыкез ӟеч тодэ. Оло, солэн ужез табере пӧрмозгес? - Мон азьын хозяйствоенымы кивалтыны палэнысь дышетӥсез пуктылӥзы вал. Дисциплина уката но куашказ, - вера Князева. - Турскисько ни ужаны. Ми ас гуртамы улӥськом, нокытчы ум ни кошке. Талэсь азьло но бригадирын но, агрономын но, диспетчерын но ужай. Тӥни сыӵе ужъёсын тыршеме ик, оло, али юрттэ мыным. - Ушъяськыны али номырин, - азьланьтэ веранзэ председатель. - Техникамы вужмемын, уждун 300 манет пала гинэ луэ, ужасьёс уг тырмы. Эстӥськон дуно. Кин гуртэ кылемын на, соосын ик выриськом ини, одӥг адямиос ик пудо вордонын но, бусыын но тыршо. Ярам ай, ужаны мылкыдзы вань. Музъемъёсмы туж начаресь, песок гинэ. Районэн кивалтӥсьмы Р. Касимов ӵектӥз ляб колхозъёсты золъёсыз борды огазеяны. Мар бен, ми соглаш. Но кинлы ми кулэ? Собере кужмо хозяйствоос но ми вӧзын ӧвӧл ни. "Мылысь-кыдысь" Озьы нимасько Кияса ёросысь ожысь но ужысь ветеранъёсты сӥлы карон ужрадъёс. Фашист Германиез вормем дырысен 55 ар тырмонлы дасяськыса, соос ортчо ни миым октябрь толэзьысен. Киясаысь ёрос культура юртэ алигес 11 ветеран вуылӥз. Люкаськемъёс сак кылзӥзы Ю.П.Сутягинлэсь, А.Я.Шамшуриналэсь, А.А.Санниковалэсь лек ожмаськон вакытэ улэм-вылэмзы сярысь. Шимес аръёсы соос еж пельпумъёссы вылэ трос сюлмаськонъёсты погыльтӥзы. Тани одӥгез соос пӧлысь - Александра Михайловна Голубева. Война потыку, солы 20 арес тырмиз. Нылашез МТС-э басьто. 3 толэзь дышетскыса ужаны кутскиз тракторен. Гужемзэ уен-нуналэн гыриз-кизиз, жадеменыз дорозяз мырдэм вуылӥз. 1956-тӥ арын нылкышно выже пудо вордон удысэ. Солэсь нимзэ гожто Данъян книгае, ӟеч ужамез понна гадяз медаь быртто. Усто пудо утисьлы, "Ужысь ветеран" ним сёто. Улон сюрессы та выллемгес ик мукет мӧйыослэн но. Ветеранъёсты ӟечкыласа, соослы синпель кузьымъёс сётӥзы, егит вакытысьтызы кырӟанъёсын шулдыртӥзы. Та выллем ужардъёс ёросын 9-тӥ Маёзь мынозы. В.ЛАГУНОВ. ШКОЛА НО УЛОН Уисез - уе, кутӥсез - кутэ Кылем арын школаосын 12 ар ӵоже дышетсконэ выжон сярысь вераськон потӥз. Валамон ини, дышетӥсьёс сое кылыса нырысь алякмизы, луоз. Выльдӥськон, галсность, демократия шуон вакытэ уго олокыӵе но малпамтэ воштӥськонъёс луыны быгато. Воштӥськонъёс пумысен Алнаш ёросысь Писэйгурт школаысь дышетӥсьёсын Елена Николаевна Евсееваен, Лариса Альбертовна Романоваен, Ольга Михайловна Бусыгинаен кенеше Светлана ЯКОВЛЕВА. - Елена Николаевна, вераськиды-а ни куспады 12 ар дышетскон пумысен? - Рос-прос ӧм на кенеше. Но со туж бадӟым ужпум. Таӵе программае выжоно ке, соку пиос школазэс 18 аресысен быдтозы ни. Воштоно луоз армие басьтон арлыдэз но. Пиослы вузъёсы пырон понна одӥг ар ке но сётыны кулэ. Лариса Альбертовна, географиен дышетӥсь: - Татын пусйымонэз но вань тани мар ласянь. Дышетӥсьёслэн часъёссы будозы - 2-3 часлы. Уногес коньдон басьтозы. Дышетскисьёслы но умойгес луоз, оло, мургес тодон- валан басьтозы. Елена Николаевна, школалэн завучез: - 2001-тӥ арын ик выжоно шуо ке, программа но, учебникъёс но ӧвӧл на ук. Дасяло-а, уг-а соосты ӧм на кылылэ. Собере ваньмыз анай-атайёс уз быгатэ сомында учебник басьтыны. Министерство ялоз, нош вань секытэз ми вылэ усёз. Огшоры дышетскисьлы со чик но кулэ ӧвӧл. Али ик ини 10-тӥ-11-тӥ классъёсын программаос секытэсь. Малы соослы со кулэ? Кыӵе ке профессия мед басьтозы но - ужалозы, ӟеч ужась луозы. Тазьы но луэ: 9-тӥ класс бере умой дышетскисьёс городэ кошкыса, уродэсьгес луо. Нош "куиньлы" дышетскисьёс, 10-тӥ классэ мыныса, лякытэсьгес луо. Ольга Михайловна, удмурт кылъя но литературая дышетӥсь: - Зэм но, гуртысь пиналъёс ма карозы? Компьютеръёсмы милям ӧвӧл. Гуртын юнме дыр быдтон луоз со. 12 аресъем программаязы нырысетӥ ужпумез - вылӥ дышетскон заведениосы пырон. Монэ шугъяськытэ тани мар: гуртысь визьмо нылъёс-пиос палэнэ кылё. Шаплы анай- атайёс уксё но шедьто, пиналзэс озьы но азьы вузэ пыртыны быгато. Гуртысез уг быгаты. Валамон ни малы. Мед кутысалзы гуртысь егитъёсты сыӵеоссэ, кинъёс улонамы умойзэ сётыны быгатозы. Туж чакласькыса визьмооссэ быръёно. Огыр-бугыр улон луэмен, медаз ыше вал соос. Визьмо адями ноку но йырзэ уг урды, соин ик со палэнэ кыле. - Вераськиды-а ни пиналъёсын? - У-у, кулэ ӧвӧл, шуо. Пинал визьмо, ӟеч сямо будэ анай-атай вӧзын. Мон кема малпаськи: ӟеч сямъёс пыӵатонэз яке тодон-валан сётонэз-а нырысь интые пуктоно? Но ӟеч сямо адями котьку тодон-валан басьтыны быгатоз. Таӵе малпанэ но вуоно ни. Дас кык ар дышетонэ выжемлэсь азьло малпаськоно азьланяз улон сярысь но. Пиналлы азьланез сярысь малпаськыны азьвыл ик пыд пуктэмын ни ук. Азьло космонавт луыны малпа ке вал, малпанэз быдэсмылӥз. Али малпанэз быдэстон понна, вундеркинд луыны кулэ. Туала пинал тодэ ни: анай-атаез юрттыны уз быгаты дышетскыны пырыны. - Воштӥськемын-а берло аръёсы пиналъёслэн сямзы? - О-о, укыр шаплыесь луэмын. Зэм, отын номыр уродэз ӧвӧл кадь. Но шаплыяськон но интыяз мед луоз вал. Возьдаськон адямиез чебер каре. Елена Николаевна: - Общественной организациос быризы но государстволы но визьмоос кулэ ӧвӧл ни. Визьтэм калыкен кивалтыны каньыл ук. - Ольга Михайловна, ма ласянь азьвыл тунсыкогес вал ужаны? - Котькуд вакыт ас сяменыз тунсыко. Али но, азьло но секытэз вал ялан городъёсын ӵошатскон. Олокыӵе но программаос, материалъёс утчаськом, пиналъёсыз вузэ дасян вылысь. Та ӵошатсконын воксё кал быре. Книгаос но уг тырмо. Ольга Николаевна: - Тумошоез со: ӧвӧл ни лушкемен возён литература. Малпаськыны эрик сётэмын. Вань алама палыз но: бадӟым адями пинал понна авторитет ӧвӧл ни. Улон шоры асьсэ сямен учко, дэмланъёсыз кылэм-адӟем уг каро ни. Ӟечбуръясько но анай-атайёсын ӧжытгес. Кыӵе ке но асьсэлы асьсэос туж оскисесь, тодӥсесь карисько. - Мар верасалды школа дӥськут пумысен? - Таиз туж бадӟым ужпум. Вылӥысь косысалзы ке одӥг пумо форма кутыны, туж умой луысал. Одно ик кулэ. Жаль пото пиналъёс. Ваньмыз мумы-бубы уг быгаты ведь пиналзэ чебер дӥсяны. Нош куанеръёсызгес кыӵе мылкыдын ветло вӧзазы. Татысь ик исаськон но потэ. Мед ӝутысалзы та ужпумез. Котькинлы со валамон ук. Тани Воткинскын пиналъёс ветло ни туала огкадь дӥсен. Вань ни сыӵе школаос. Оло, умой луысал районэн-районэн нимысьтыз школа форма вылэ выжыны. Шуом, одӥг районлы таӵе дӥсь кельшиз, мукетызлы... Номырлы умоезлы ӧвӧл ни оскон. Та чуръёсыз лыдӟыса, Удмуртиысь Калыкез дышетонъя министерство куд-ог сюлэмшугъяськытӥсь юанъёсты оло нош нимысьтыз эскероз? Медаз луы вылэм пиналъёслэн ог-огзылы вожъяськон, вылтӥяськон сямъёссы. Школа дышетэ, школа бадӟым улонэ поттэ. 48 номеро школаын куаразэс сётӥзы Удмуртской но Карл Либкнехт нимо урамъёслэн ог люкетазы улӥсьёс. Соос пӧлын вал тодмо адямиос но. Татын быръёнэ пыриськиз Россия Федерациысь Кун Думалэн депутатэз Светлана Смирнова. Куаразэ сётыса, со дыртӥз аэропортэ. Толон Светлана Константиновна кошкиз Будапештэ, финн-угор калыкъёслэн туэ ар пумын ортчоно бадӟым ӧтчамзы пумысен кенешыны. Куаразэс сёто Кун Думалэн депутатэз Светлана Смирнова но Кун Кенешлэн депутатэз Сергей Беркутов. Ижысь одӥгаз участокын кутскиз бюллетень лыдъян. В. Камашевлэн туспуктэмъёсыз. Спорт Уй пала - празднике Удмурт шаере тулыс вуиз ини, нош кужмоосыз куасэн бызьылӥсьёс шутэтскыны уг малпало на. Азьпалан соосты бадӟымесь ӵошатсконъёс витё. 29-тӥ мартысен 3-тӥ апрелёзь Мурманскын ортчоз Россилэн чемпионатэз. Огдыре ик татын уй пал праздник ортче. 4-тӥ-9-тӥ апреле Апатиты город вӧзысь куас сюресъёс вылын нюръяськозы егит нылъёс но пиос. 15-тӥ апреле Мончегорскын 50 иськеме (марафон) бызьылозы нылкышноос. 16-тӥ апреле Кандалакшаын марафон сюресэз, 70 иськемез, ортчозы воргоронъёс. Удмуртилэн валтӥсь командаяз пыртэмын Олег Переятенец, Евгений Иванов, Ирина Баженова (юридической институт), Александр Мезенцев (Шаркан, спонсорез - Ижысь минерал вуосъя завод), Игорь Королев, Алексей Вольчук (Динамо-УИН), Денис Панаев (УдГУ-УИН), Дмитрий Ходырев, Вячеслав Бегтянин (УдГУ), Галина Казанкова (УдГУ-УГПС). Командаен кивалтэ тодмо удмурт спортсмен Владимир Никитин. М. Кузьмин. Удмуртия мылкыдзэ вераз Кызьы ортчиз Россилы Президентэ быръён асьме дорын? Таӵе юанэн вазиським Республикаысь быръёнъёсъя комиссилэн кивалтӥсезлы А.И.Тубыловлы. Афанасий Ильич верамъя, 1996-тӥ арен ӵошатыса, быръёнъёсы пыриськемъёслэн лыдзы таяз учыре йылӥз 6 процентлы, нош кылем арын 19-тӥ декабрен ӵошатыса, 9 процентлы. Президентэ кандидатъёсъя ке верано, нырысетӥ интые потӥз Владимир Путин, кыкетӥ интыын Геннадий Зюганов, куинетӥ луиз Владимир Жириновский. Озьыен, Удмуртиын улӥсьёслэн тросгес осконзы та адямиослы. Геннадий Андреевич пала дурбасьтӥсьёс вань ке но, 26-тӥ артэ КПРФ ас интызэ келяз, шуыны луоз. Со понна нош ик берытскоме 1996-тӥ аре ортчем быръёнъёсы. Соку нырысетӥ турын Борис Ельцинлы куаразэ сётӥз 40 процентэз бырйись, Зюгановлы - 30-эз. Кыкетӥ турын Ельцин люказ 52 процент, Зюганов - 40. Али та лыдпус усиз 24,83 процентозь. Референдумъя йылпумъянъёс умоесь. 68,8 процентэз бырйисьёс - Президент понна. Пумит 27,31 процентэз. Л.ДМИТРИЕВА. Чернобыле ветлэмъёслы Федеральной казначействолэн Удмурт Республикая управлениезлэн ивортэмезъя, туэ 23- тӥ мартэ Удмуртиысь ёросъёсы федеральной бюджетысь 5,8 миллион манет коньдон келямын. Со висъяськоз "Чернобыльысь АЭС-ын пуштон бервылэз быдтон дыръя радиация басьтэм адямиослы юрттэт сётон сярысь" Законэн валче но мыноз 1999-тӥ ар понна пунэм тыронлы но туэлы чаклам тыронъёслы. Удмурт Республикаысь Правительстволэн пресс-службаез. Ӝожмыт пумиськон Тодмоеным возьмамтэ шорысь пумиськи. Со ОМОН-ын ужа. Ымныр шораз учки: синъёсыз утчаськыса солань-талань бызьыло, мынекъякуз ымдуръёсыз одӥг ог дыректыло. Омонъёсты Чечняе лэзизы, кинлэн ке но верамез тодам лыктӥз. Кыӵе мар ини отын, юасько. - Мон Чечняе кыкетӥзэ ветлӥ, - вера тодмое. - Нырысетӥзэ 1995-тӥ арын вал. Соин ик соглаш но луи, кыкетӥзэ отчы мыныны. Куинь толэзь ӵоже оломае но адӟиськиз. Тужгес кышкаськиз, куке ми куатьтон кузя сюрс но ӝыны боевикъёс пумитэ султоно луимы. Куинь эшмес виизы! Ӟеч валай, ма со матысь эштэ ыштон! Соку куинь пол лекгес но йыркурогес жугиськыны ӧдъямы... Сюлэм ик лычсузе, куке ӝуась тамак пумез вием сьӧсьлэн мугораз шумпотыса кысӥськод... Зол жугиськемез понна та воргоронлы бадӟым награда - командир час - сётӥллям но контрактъя чаклам уждунзэ кык поллы уноятӥллям. Коньдонэныз со табере квартираяз мебель но небыт ковёръёс басьтоз. Чечняе мынон азяз тодмоелэн нылыз вордӥськем. Кышноез нуны ваем, нош мукет нуналаз со кошкем ини, нылпизэ адӟытэк. Куинь толэзь ӵоже кыӵе малпанъёс бергазы меда солэн йыраз? Бертыкуз кышноез сое подъездысен ик пумитам: ӟыгыръя-бӧрдэ, ӟыгыръя-бӧрдэ, улэп бертэмезлы шумпотыса. - Ожмаськон пумысен пумитам эше тазьы валэктӥз. Кинлы ке но Америкаын улӥсьёслы-а, шуом, кинлы ке мукетызлы-а - му вӧй кулэ луэм. Нефть Кавказын трос. Тӥни соос ик коньдонэн медъяло адями виылӥсьёсты. Чечняын кинэз гинэ ӧвӧл: чеченъёс, арабъёс, турокъёс, негръёс... Юан-веранлэн сӥньысэз ӧй бырысал, дыр, но тодмое дыртӥз. Лек ожмаськонъёс бере солэн умой-умой шутэтскемез потэ нылъёсын, коньдонэз табере трос. Мыным ӵектэ вал но, мон сое уретӥ. Вина уг юиськы, тамак уг кыскиськы, пиосын уг калгиськы, шуисько. Ӧз оскы кадь. Кышноезлы эшъёсы доры мынӥсько шуиз ке но, мон тодӥсько, кышнозэ со яратэ. Соин ик оскисько, семьяязы соослэн ваньмыз умой луоз, тодмоме возьытэ уськытыны выри ке но. С. ПЕТРОВА. Президент быръёнэз астролог тазьы чаклаз Россилы президент быръемын. Кӧня со пумысен вераськонъёс но нюръяськонъёс вал. Табере ваньмыз бере кылемын. Озьы ке но, быръёнъёслы йылпумъянъёс лэсьтыса, малы ке тодэ лыктӥзы астрологлэн П.Глобалэн верамъёсыз. Ас поннам эскероно кариськи: макем зэмазы меда соос? Глобалэн малпамезъя, Россилы президент быръён ортчыны кулэ ни вал 1999-тӥ арын ик. Нош кин луоз Президент, со тазьы чаклаз. Кивалтыны, пе, лыктоз "сьӧд ымныро" карлик. Со адямиен Глоба Примаковез лыдъяз. Ельцинэн ӵошатыса, зэмзэ но, Примаков лапег, карликлы укша. Нош "сьӧд ымныро" адямиен азьло аръёсы шуо вал шпионъёсты. Кызьы тодӥськомы, Примаков кема аръёс ӵоже разведчик луыса ужамын. Тӥни озьы тодмо астролог янгышаз. Быръёнлэсь дырзэ но, вуоно Президентлэсь нимзэ но шонер ӧз вера. Бен, одӥгзэ шонер пусйиз: Россиен кивалтонэ разведчик пуксиз. Президентэ кандидатъёслэн нимъёссы пӧлын, Глобалэн верамезъя, вал Жириновский, Лебедь, Лужков, Черномырдин, Зюганов. Кызьы адӟиськом, Путинлэсь нимзэ кылем арын астролог уг но поттылы на ай. Нош Зюганов сярысь, мон сямен, со туж шонер вера. Президент быръёнъёс дыръя со, пе, трос куара бичалоз но солэсь вылӥе тубыны уз быгаты. Солэн, пе, адӟонэз, лэся, сыӵе. Умойтэм пуксем кизилиос дыръя вордӥськем. Котьку но трос куараос бича-бича, вылӥе ӝутске но... собере улӥе ваське. Тазьы луиз соин 1996-тӥ арын Президент быръён дыръя но. Соин ик, дыр, коммунистъёслы мукет лидер шедьтоно. Тӥни озьы. Та чуръёсты гожтыкум жингыртӥз Пичи Пурга районысь Бобья-Уча администрацилэн кивалтӥсез Е.Ф.Григорьева. Милям участокысь бырйисьёс куараоссэс тазьы, пе, сётӥзы: Путин понна - 62 процент, Зюганов понна - 30 процент, Удмуртиын референдум ортчытон понна - 81 процент. Тае гожтоно луисько соин: Кун Думае берло быръёнъёс ортчыку, Пурга районын улӥсьёс ужрадэ туж ляб пыриськизы вал. Нош таяз быръёнъёсы та гуртын гинэ 73 процент бырйись ас мылкыдзэ вераны лыктӥз. Т.БАННИКОВА. Путин, Фокин но мукетъёсыз Республикаысьтымы Быръёнъя комиссилэн нырысетӥ йылпумъянъёсызъя, 26-тӥ мартэ Россилы Президент быръёнэ пыриськиз 839 сюрс мурт, ваньмыз пӧлысь со 70,26 процент луэ. Владимир Путин понна куаразэ сётӥз 511,8 сюрс мурт (61 процент). Геннадий Зюгановлы дурбасьтӥз 208,3 сюрс адями (24,8 процент). Куинетӥ луиз Владимир Жириновский (3,05 процент). Умар Джабраилов понна куаразэ сётӥз 397 адями (о,о5 процент). Референдуме пыриськиз 853,9 сюрс адями (71,47 процент). Соос пӧлысь 68,; процентэз "Бен" шуизы. 228 сюрс мурт пумит луэмзэ возьматӥз. Озьыен, ӝоген асьме республикаын выль кивалтон ёзъёс кылдозы. Кызьы тодмо, Дэбесын но Шаркан ёрослэн оглюкетаз улӥсьёс асьсэлы Кун Кенеш депутат бырйизы на. Светлана Смирнова Москвае ужаны кошкем бере бушам интыын табере Алекандр Фокин, му вӧй поттӥсь компанилэн кивалтӥсез. Ижысь думае быръемын Юрий Порин но Людмила Зырянова. Огезлэсь чебер мукетыз "Аксион" культура двореце кылем кӧс нуналэ тыраз калык люкаськылӥз. Котькудӥзлэн тодэез потӥз: удмурт нылъёсмы пӧлысь кудӥз тужгес чеберез, мусоез, визьнодоез. Ӵошатсконэ лыктӥллям 25 чеберайёс. Пӧртэм конкурсъёс пыр потыса, дас вить тужгес но устоосыз кельтэмын вал. Собере, ӝытлэн пумаз, жюри йылпумъянъёс лэсьтыса тодмо луиз: Устокай нимез басьтӥз Можга педколледжын дышетскись Екатерина Васильева, Дыдыкай - Дэбесысь Ольга Серебренникова (дышетске медициная академиын), Мусокай - Шарканысь Татьяна Лопатина. Нош Чеберина-2000 луиз бесермян нылаш Елена Дюкина. Со Яр ёросысь Ворца школаын 11-тӥ классын дышетске. Т.НИКОЛАЕВА. Эмъя но сюдэ но Мувыре потэм беризед - Асьме калыклэн мылкыд со вылын... Калык кырӟан Та писпуэз сяськаяськыкуз адӟид ке, солы весь синмаськод. Мон но пичиысен синмаськемын беризьлы. Дядие, пиналъёсыз вордскылыку, котькудӥз понна писпу мерттылэм. Тужгес но троос - беризь. Корка, гидкуа, бакча вадьсы. Солэсь адӟем карыса, бускельёсыз но та писпуэз ураме мерттылӥлям. Пичи дыр тодам лыктыку, син азям ӵемысь пуксыло ӵыжалэс-тӧдьы сяськаё беризьёс, соос вадьсысь гужетыса чечы бичась мушъёс, котыр вӧлскем ческыт сяська зын. Берлогес ини, урамез умоятыку- ӝутыку, тросэз беризьёс быризы. Кӧня ке кылемез али но тодэ вайтоэ на пичи дырез. Беризь будэ котькытын. Ӵемысь - мукет пиоспуос пӧлын но. Шаерамы кыз тэльёс - вань нюлэсъёс пӧлын 40 процент луо. Пужым 14 процент басьтэ, ньылпу - 1 процент. Нош куаро тэльёс пӧлын - кызьпу 29 процент, лулпу - 3 процент луэ, беризь тэльёс - 7 процент гинэ луо. Озьы ке но, лысо писпуос кулэсмо ке, беризь арамаос будо. Шаермылэн шор музъемъёсаз тужгес трос беризен, кызьупуэн сураськем нюлэсъёс. Пӧлазы будо на палэзьпу, лулпу, сирпу, льӧмпу, нюло, уйпу, сусыпу. Иж котырын вань чылк-чылк беризь тэльёс но. Гужем отысь кошкем но уг поты - сыӵе ческыт чечы зын вӧлске омыре! Беризь угось тужгес уно чечы сётӥсь писпуос пӧлысь одӥгез. Сяськаяськыкуз тужгес бадӟым тонна пала чечы сётэ. Беризьысь люкам чечыын уно пӧртэм витаминэз. Соин вань уно висёнъёсты эмъяны луэ, уката ик кынмыку "лякиськемъёссэ". Сяськаяз уно эфир вӧез, глюкозаез, каротинэз, С витаминэз; куаръёсаз - дубилез, аскорбиновой кислотаез, фитонцидэз. Беризь сяська озьы ик эмъя кызыку, йыр визьыку, кӧт чутыръяку, пыдъёсы, тыосы кын пыӵаку, вир вияку. Ижысь Вадим Сивков ульчаысь Калык киужъёсъя юртэ пыраса, беризьлы уката но синмаськоды. Татысь ӝыныезлэсь тросэз арбериос та писпулэсь лэсьтэмын. Солэн небыт, капчи, шонер вандӥськись пилиськись пуэз пӧртэм лэсьтӥськонъёсы мынэ. Суредан пулъёс, вӧшъёс, пичи пиналъёслы шудонъёс, тусьты-пуньыос, бекчеос, вал кыткон котыръёс - ваньмыз таос беризь пулэсь тужгес ӟеч пӧрмо. Нинэзлэсь-бунэзлэсь кутало кут, ката, песьтэр, куды, кертто-пуно гозы, сюло. Ваньзэ вераса но уд быдты. Гуртын улӥсьёс ноку но уз кыле кызьпу веник сяна, бериз веник но дасятэк. Гужем керттэм беризь веникъёс туж ярало кечъёслы, ыжъёслы, уката ик соослэн пиоссылы. Гужем пумын но беризь адямилы пайда вае на. Ческыт зыно нингуби, лӥялгуби котьку шедё беризь арамаын. Лабрес беризез юнме уг мертто городын но. Тужгес но - эмъяськонниос, паркъёс вадьсы. Чебер, вӧл-вӧл будӥсь вож, паськыт куаро писпу кырсь омырысь урод суретъёсты кыскыса быдтэ но котырамы вӧлдэ кислородэн, фитонцидъёсын тырмем омыр. Куаро писпуос пӧлын беризь одӥгез туж пайдаёез луэ. Калыкмы солэсь нимзэ юне ӧз сёты, дыр, дас одӥг гуртлы. Уно кырӟан но кылдытӥз со баблес писпу сярысь. Ойдолэ утёме сое! Н.ВОЗИСОВ. ФСБ уг кӧлы Азьланьтӥське "Вихрь-антитеррор" ужрад. Бадӟым саклык висъяське, чечен гыжкалъёс лаянь йыружъёс медаз лэсьтӥське шуыса. Золгес радъямын республикаысьтымы тужгес кулэ объектъёсты возьман. Контрразведка ужзэ кужмоятӥз чечен но уй пал Кавказысь вуэм мукет калыкъёс пӧлын. Ожъёс кутскем дырысен соослэн лыдзы асьме дорын одӥг но ӝыны поллы йылӥз. Ивортон басьтэмын Удмуртие кулэ документъёстэк чеченецъёс вуэм сярысь. Соос пусйиськыны туртто вал, олокыӵе но пӧяськон амалъёсты кутыса. Республикаысьтымы промышленностья предприятиосын кужмоятэмын соосты возьман но кышкытлыклэсь утён, со нырысь ик "Ижмашын", механической заводын, Чепецкой механической заводын, Камбаркаысь но Кизнерысь химия пыӵал-тӥрлык возён арсеналъёсын, Воткинскысь США-лэн инспекцияз. Чаклам планъя эскерон ортчытэмын электрокужым но шуныт, ву сётон ёзъёсын, транспортын но связьын, ужазы радиация сётӥсь, ӝуась но пуштӥсь, улонлы кышкытлык вань арбериосты кутӥсь предприятиосын но организациосын, мукет интыосын. Шараям тырмымтэос пумысен уно пол ивортылэмын республикаысьтымы кивалтӥсьёслы, министерствоос но ведомствоос соосты палэнтонъя ужрадъёс кутӥзы. Кылем арлэн пумаз терроризмлы пумит нюръяськонъя нимысьтыз эскерон ортчытэмын транспортъя ёзъёсын. Туэ 25-тӥ феврале "Ижевск" аэропортын "Набат" операцилэн куронъёсызъя дышетскон ортчытэмын. Терроризмлы пумит ужрад кутскем дырысен правоосты утёнъя органъёсын ӵош таламын 87 пыӵал тӥрлык, 1600-лэсь уно патрон, 9 пуштытон арбери и 392 электродетонатор, быдтэмын лушкам ёзъёслэсь пыӵал тӥрлык бичанъя лушкем ужась 2 мастерской. Ужез быгатыса радъямен валче, дыраз палэнтэмын 100 кило пуштытӥсь арбериез (тротил) лушкан. Сое поттэм вылэм Кизнер посёлоке интыяськем войсковой частьысь военнослужащий. Тротил дасямын вал вузаны. Та пуштытӥсь арберилэсь кӧня ке дасо пуштытон арбериос дасяны луысал яке палэнтэмын кӧня ке дасо шимес учыръёс. Можгаын шараямын дышетскон ЗРК С-75 гранатаен контейнер. Ӝегатэмын Чечняысь Удмуртие пӧяськыса лэсьтэм 10000 доллар коньдон. Таджикистанысь наркокуръеъёс кутэмын 2 кило героинэн. Россия Федерациысь ФСБ-лэн Удмурт Республикая управлениезлэн пресс-службаез. Быдӟым Вормонлы - 55 ар Сюлэме ик мертче... Ньыль но, вить но туж бадӟымесь борддоръёсы тэронтэм трос ужъёссэс ваиллям Пичи Пургалась Национальной библиотекае черкогуртысь усточиос-суредасьёс Владимир Баталов, Александр Викулин, Георгий Соколов но Андрей Хомяков. Та адӟытон сӥземын Быдӟым Вормонлы 55 ар тырмонлы. Йыбырттыса учко суредъёсты татчы пырасьёс-потасьёс. Нылкышноос, уката ик - мӧйыосызгес, синпумъёссэс но ӵушыло. Тодмооссэс но адӟыло, вылды. Лек ожъёсты возьматэм сяна, суредасьёс лэсьтӥллям уго данак ветеранъёслэсь тусбуйёссэс. Секыт аръёс, ыштонъёс, Быдӟым Вормон соослэн синъёсазы но, ымныръёсазы но кельтӥллям кадь асьсэлэсь вунонтэм пужыоссэс. Нимысьтыз кудзэ ке ужез пусйыны шуг - огез бордысь но синъёстэ чаляк гинэ воштыны уд быгаты. Сюлэме ик маке мертче кадь, та адӟытонэн тодматскыса. Тани омырак ӝутско асьмелэнъёс фашистъёс вылэ. Тросэз солдатъёс тушмонлэн окопъёсыз дорын ни. Соос одно вормозы. Нош куд-огез ӝутскыкузы ик турнамын ни сьӧд узвесен. Кинъёс соос, мискиньёс? Оло, ӵапак пурга пиос? Тани танк улэ берпуметӥ гранатазэ зӥртэ вирен пыласькем, лек сӧсырмем ожгарчи. Вунонтэм суред! Тусысьтыз но, вань золтӥськем мугорысьтыз но шӧдӥськод: со дугдытоз, одно пазьгоз кышкыт "Тигрез". Ож вакытысь суредъёс пӧлын но сюлэмез шумпоттӥсез вань. Тани фронтысь бертэм солдат. Кыӵе мусо со! Шунды кадь югдытэ пурга музъеммес. Кыӵе шуныт пумитало гуртоосыз, мусо учко шораз пиналъёс. Тани Быдӟым Вормонэз пумитало асьмелэнъёс кыӵе ке но тодмотэм вырйыл дорын. Макем чебер, яркыт адӟисько вырйылэ, вылӥе юнматэм знамя но флагъёс! Ож лудын гинэ ӧм, дор палъёсамы но дуримы Быдӟым Вормонмес. Вань кужыммес, кытӥяз нош - улонмес но сётӥмы, тушмонэз быдтон понна. Паллян пала, вылӥе, тужгес дураз, ошиллям мылкыдэз чигтӥсь суредэз. Вить-а, сизьым-а нылкышноос вал интые кыткиськиллям герые. Куанеръёслэн мугоръёссы някыртӥськемын ке но, ымнырысьтызы, синъёсысьтызы осконзы тӧлӟымтэ. Гырисьсы но - кышномурт. Эсьмаса, таиз но, герыез возем сяна, донгыса но юрттэ жадем "валъёсызлы"... Адӟытонэн тодматскемез бере, учкисьлэн мылкыдыз медам куашка шуыса, вылды, усточиос татчы туала пурга музъемлэсь чебер интыоссэ усьтӥсь трос ужъёссэс ваиллям. Сюлэм ик нясь-нясь луэ, соосыз адӟыса. "1941-тӥ-1945-тӥ аръёсы батыръёсмы улонзэс юнме ӧз сётэ - та чебер Атыкай музъеммес утизы", - шуо кадь суредасьёс. Бадӟым тау соослы! Выставка кыстӥськоз пырак быдӟым Вормон нуналозь. Зэм, кӧнязэ ке, тужгес усто пӧрмем ужъёссэс, Пичи Пурга художникъёс май толэзе ыстозы Иже но - быдэс шаермылэн адӟытоназ. Алигес та выставкаен пыр-поч тодматскизы пурга музъем вылын вордскем но будэм писательёс. Удмурт кыллы но литературалы дышетӥсьёсыз но школаослэсь директоръёссэс люкаса, татын ӟырдыт вераськон мынӥз Фома Ермаковлэн "Пурга писательёс" книгаез пумысен. Владимир Голубев, Илья Пельтемов но улонысь кошкем гожъясьёсмы сяна, библиотекае люкаськылӥзы та палась вань писательёс. Быдэс автобусэн лыктӥзы. Пумиськонэ ветлӥзы шаерысьтымы Писательёслэн огазеяськонзылэн тӧроез Егор Загребин, книгаез кылдытӥсь Фома Ермаков. Кырӟанэн, юачаен, пӧсятэмен пумитазы гажано кунооссэс пургаос. Вылӥ дунъязы выль книгаез, нылпиосмес анай кылзылы дышетонэз умоятонъя туж трос устоесь ӵектонъёссэс, дэмланъёссэс веразы. Та пумиськонын вакчияк вераськиз Россиысь Кун Думалэн депутатэз Светлана Константиновна Смирнова но. Куд-огез бырйисьёс солы куронъёссэс веразы. Пумиськонэз туж шуныт ӧръяз "Дэменлэн" та ёросысь тӧроез З. И. Поликарпова. Мӧйы нылкышноос, "Зарни шеп" ансамбльысь артистъёс но кылбурчи, крезьгурчи Сергей Соснов куноосты тодматӥзы выль кырӟанъёсынызы. Нош Ф. К. Ермаковлы дэмламын вал, вить ар ортчыса, книгазэ азинтыны, отчы выльёссэ писательёсты пыртыны. Кирилл Ломагин. ТӦДЬЫ ГОНДЫРЪЁС ДОРЫН Контрактной службазэ Новая Земля шормуӵын нуэ Петыргуртысь матрос Леонид Абросимов. Ортчем ар пумын со отпуске бертылӥз. Таӵе паймымон учырез синйылтытэк ми ӧм кельтэ. Вераськоно кариським Лёняен но солэн кышноеныз Любаен. - Лёня, кызьы вуид тон самой кыдёкысь уй пал шормуӵе? - 1987-тӥ-1989-тӥ аръёсы срочной службаме Дальний Востокысь военно-морской флотын ортчыса, 1994-тӥ арын военкомат пыр 3 арлы контракт гожтӥ та шормуӵын служить карыны. Ньыль толэзьзэ огнам улӥ, нош отпуске бертылэме бере семьяме но отчы нуи. Бадӟымез Ванимы соку 2-тӥ классэ ветлӥз ай, Машилы 3 арес вал, Ондӥлы - кык. - Нош тон, Люби, дӥсьтӥд гинэ-а гуртысьтыд кошкыны? Кышкасьтэмесь ик тӥ. - Сямыя мон туж мӧзмись, кузпалы кошкем бере, ньыль толэзь ӵоже мӧзмыса висьыны ик кутски ни вал. Бертӥз но сьӧрам нуо, шуиз. Мар сярысь отын малпаськод на? Коть дунне пыдсы мед нуоз, бордаз гинэ мед луо, малпай. - Кыӵе потӥз тыныд со инты? - Самолётысь потэм бере ик адӟи, ма со сыӵе Заполярье: писпуос ӧвӧл, син сузёнтэм одӥг тырттэм бусы гинэ. Куазь туж урод улэ, кезьыт, тол но гужем дугдылытэк тӧлаське, лымыен пельске. Тӧласькыны кутске ке, пыд йылысь погыртоз, нуоз. Вань ньыльпыдъяськыса, кӧт вылын нюжтӥськыса но ужысь бертылэммы, малы ке шуоно, пыд йылад возиськыны уд быгаты. Пельскыку 25-30 градус кезьыт 45 градус кадь потэ ини. Соин ик нимысьтыз шуныт дӥсь сёто, тулуп, воротникез быдэс йырез шобыртэ. - Мӧйы мурт чидалоз, вылды. Нош нылпиос отын кызьы уло? - Нылпиосмы али татын, Урдогуртын, ӵужмамазы Вахрушева Серафима Петровна бордын уло. Мамалы бадӟым тау кариськом пиналъёсмес воземез понна, уго ӧз яра соослы уй палан. Сильтӧл потэ ке, арняосын коркась потыны уг луы, нош пиналлэн коркан пукемез уг поты ук. Куазез ӵукна ик телевизор пыр иворто, школае мыныны луэ-а, уг-а шуыса. Урокъёссэс но телевизор пыр сётъяло. Пиналъёс табере бадӟымесь ини, ваньзэ валало, вордскем гуртысьтызы кошкемзы уг поты. Собере Новая Земляын нырысетӥ классысен ик дышето иностранной кылэз, нош асьмелэн - 5-тӥ классысен гинэ. Ванимы, кудӥз али ветлэ 6-тӥ классэ, нокызьы но уз ни сутылы отысь эшъёссэ. Лёнилэн контрактэз бырытозь, куинь арзэ чидамы но нылпиосты берен гуртэ ваимы. Нош асьмеос выльысь отчы ик кошким, уго улон туж валантэм, огыр-бугыр луиз, гуртын уж ӧз шедьы. Уй палан мон нырысь магазинын вузкари. Уже туж кыдёке ветлоно луоз шуыса, специальностея медицина удысын ӧй ужа. Малы ке шуоно, сильтӧл кутске ке, ужысь потыны уг луы ни. Арняосын ужын улӥськод, нош пиналъёс - гуртын огназы. Али бен госпитале кутом шуизы ини. Уж понна отын секыт ӧвӧл, котькытчы кутскы. Мон но служить карыны малпасько вал, 10 ар служить карыса, пенсие потысал, но службаын медсестраослы ӧжытгес, пе, тыро, вольнонаёмнойёслы сярысь. - Улон интыды кыӵе? - Огшоры посёлок. Коркаос вить этажъемесь, квартираос одӥг, кык но солэсь трос комнатаен. Кудаз улэмед потэ, созэ ик бырйиськод. Милям нырысь кык комнатаем вал, но кезьыт шуыса выжим одӥг комнатаеназ. Шунтыны секыт ук. Тӧл ваньзэ пельтэ. Ноябрьысен кутске полярной уй. Али милям отын тём-тём пеймыт. Нуназе вакытэ гинэ ӧжытак югыт, ӝомо-югдо кадь. Огенн ветлыны кышкыт. Тӧлын гинэ нуоз шуыса ӧвӧл, посёлокетӥ тӧдьы гондыръёс ветло. Полярной уй кыстӥське мартозь, отӥяз асьмелэн кадь ик уй но нунал луэ, нош апрель пумысен июлёзь - полярной нунал. Со туж шӧдӥське адямилэн тазалыкез вылын. Тазалыкед ӧвӧл ке, отчы мынон сярысь эн ик малпаськы. Отын кислород уг тырмы. Ӟуч сямен вераса, Вечная мерзлота, кызьпуос но музъем валлин гинэ кыстӥсько, карликовой шуо. Бакча сиён ум будэтӥське. - Нош вань, дыр, ук маке но умоез, чеберез? - Гужем бен тундрае потаны луэ, губияны, турын-куар, емыш октыны. Нокыӵе нюлэстэм азьын, бусыын, пужей ӝуй улын параен-параен нингуби, шыргуби будэ. Котькыӵе губиос вань. Ваньзэ октӥськом. Асьмелэн татын туж трос пумо губиосты урод шуиськом ук, ум сииське, нош отын ядо губиос ӧвӧл. Кемагес бен пӧзьтӥськом, мариновать кариськом. Емышъёс пӧлысь отын морошка вань. Но нырысетӥ гужемзэ со кисьманы ӧз вуы, ми отпуске бертӥм. Нош кылем гужем куазь туж кезьыт улӥз. Соин ик чик но ӧй вал. Сяськаос отын туж чебересь, ӝужытэсь ик ӧвӧл ке но. Быдэс тундра куэм ковёр кадь. Пужей ӝуйлэн сяськаез льӧль-льӧль, тӧдьы, ӵуж. Нош незабудкаос вакчиесь гинэ, сяськаосыз лемлетэсь, льӧлесь, чагыресь, пеймыт-лызэсь, лемлетэн льӧлен куӵоосыз но вань. Асьме палась ноку но сыӵеоссэ адӟылэм ӧвӧл. Со сяська понна гинэ мон улысал Новой Земляын. Валля гужем шуныт вал, кытӥяз, оло, пӧсь но шуыны луоз, калык одӥг полэс футболкаен гинэ ветлӥз. Нош огъя вераса, гужем но курткаен, пыдамы тулыс- сӥзьыл нуллон сапеген ветлӥськом, туфли ум тырылӥське. - Нош, Люби, кызьы шутэтскиськоды отын? - Толалтэ инкуазь педло потыны уг лэзьы ке но, гужем шашлыканы но ветлӥськом, пӧйшурасез пӧйшура. Пужей сӥль сииськом. Чорыгаськом. Тужгес но трос чорыг луэ, куке заливе корабльёс вуо. Кылем арын августэ, сентябре трос ветлылӥмы. Корабль сьӧры со чорыг быдэс уллёен сьӧд-сьӧд лыктэ. Визнанэ тросгес курик тыриськод ке, огполскын ик 4-5 сайка поттӥськод. Нырысь аръёсы огнам но мон визналляй, быдэс пакетъёсын чорыг вайылӥ. Тодӥсьёсыз кытчы ке тундраысь твэ ветло на. Вань туж бадӟым, тунсыко чорыг - бычок нимаське. Пештырске ке, ымыз оломар пасьта усьтӥське, йыр вадьсаз шиё-шиё веньёсыз ӝутско. Гордэн-куӵо но вань соос, ӵужен-куӵо но. Сиё сайкаосты. Нош медузаос кыӵе чебересь, сяськаос кадь уяло. Коральёс причалэ вуо ке, мынӥськом ини учкыны, ву кыӵе ке но лызпыръем, вож-вож. Корабльысь потон понна, залив шорозь кортлэсь кузь выж лэсьтэмын, со вылысен ик чорыгаськом. Зарезь пыдсы учкиськод ке, куальымъёсын артэ отын пӧртэм ву будос, ву кубиста веттаське. Куальымъёс лемлетэсь, туж чебересь. Нимысьтыз соосты октыны но ветлылӥм. Кораблен асьме палась одӥг сьӧд куака вуылӥз но ышиз кытчы ке, кулӥз, дыр. Праздникъёс туж шулдыр ортчыло. Тол келян дыръя, кылсярысь, нимысьтыз дасям гурез тракторен яке машинаен кыскаса нулло, пиналъёслы пыжиськемъёс люкыло. "Здравствуй, Весна Заполярья!" шуыса нимаське. - Бакча сиёнъёс уд будэтӥське, пудо уд вордӥське бере, мар сииськоды? - Сиён отын тросэз консервировать каремын. Гужем кораблен пырто, толалтэ - самолётэн гинэ. Соин ик уждун басьтэмлы пумит сиён-юон татын дуно, трос коньдон кошке. Военнослужащийёслы паёкъёс луо, нош гражданскойёс магазинысь бичасько. Азьло вал татын скалъёс, нош али кӧня ке парсь гинэ вордо на. Со понна луд ӟазегъёс кӧня! Луд ӵӧжъёс вань, туж бадӟымесь бакланъёс лобало. Пӧйшураны яратӥсь мурт семьязэ пӧйшураса гинэ сюдыны быгатоз. - Со кузя сюресэз кызьы ветлӥськоды? - Отчы мыныны но, отпуске бертылыны но сюрес вылэ проездной сёто. Одӥг пала гинэ самолётэ 3200 манет кулэ ук. - Вань на-а кин ке Шаркан районысь? - Кипун пиен ӵош служить кариськом. Со но отчы семьяеныз кошкемын. Дышетскыса али мичман луиз ини. - Нош, Лёни, кӧня тӥ отын озьы ужаны малпаськоды? Сюлэмды гуртады уг кыскы-а? - Котькытчы мын, котькыӵе умой ул, нош сюлэм одно ик гуртэ кыске. Анай-атай ӧвӧл ни ке но, вын-сузэръёслэсь мӧзмоно. Нош уката ик мӧзмоно пиналъёслэсь. Но ми понна али та умоез вариант луэ. Али Архангельске дышетскыны ысто но, дышетскем бере, оло, материке инты сётозы. Умой-умой интыяськимы ке, соосты нуом ини. 5 ар кылиз на служить карыны. Отын одӥг ар интые кык ар мынэ. - Вань, дыр, ук адӟылэмды северной сияниез? - Туж чебер маке со. Инмысь нымы бурд тусо штора выллем лэзиське но вуюисьлэн пӧртэм буёлъёсыныз вошъяськыса веттаське кадь. Нырысь арзэ мынэммы бере пиналъёсын ӵош ульчае потыса учкылӥмы. Синмаськыса кема сылылӥмы. Нырысьсэ мае ке адӟиськод ке, пинал кадь ик шумпотӥськод. - Вожъяськоно тӥледлы - дуннеез, пӧртэм городъёсты адӟиськоды ини. - Пелляськем сяна, отын туж ӵем луыло бусъёс, артэ сылыса но ог-огдэ уд адӟы. Самолётъёс арняен-арняен дорамы пуксьыны уг быгато. Берен Архангельске яке Нарьян- Мар городэ лобо. Одӥг пол Архангельскын 12 нунал пукимы, шукыръяськись куазьлэсь зӥбломемзэ витьыса. Быдэс городэз котыръямы, Набережноез, морской портэз учкимы. Озьы ке но, ум жаляске, таӵе вамыш лэсьтӥм шуыса. Кытысь ми адӟысалмы ай Архангельскез но, Вологдаез но, Нарьян-Марез но, нош Новой Земляе улытозямы ӧй вуылысалмы, коньдон ке но луысал. Ветлӥмы ини Северодвинске - туж чебер, чылкыт город, улӥсьёсыз егит параос гинэ. Одӥгез умой - дуннез адӟимы ини. Со понна шумпотоно. О. НИКОЛАЕВА. Басьтэмын Шарканын потӥсь "Инвис" газетысь. Ӟечкыласьком! Туннэ куатьтон арес тырме Алнаш ёросысь Ляли гуртын улӥсь анаймылы Капеева Анисия Васильевналы. Вордӥськем нуналэныз ӟечкыласа, нэнэмылы сӥзиськом сыӵе ик юн сям, капчи но лякыт мылкыд. Йыр вадьсысьтыд ноку но медаз ышылы зарни шунды, чалмыт уйёстэ ноку но медаз сӧрылы витьымтэ шорысь вуэм лек гудыри. Котькуд нунал мед данъяськод вордӥськем шаереныд, удмурт калыкеныд. Шуд но тазалык, яркыт шундыен, бадӟым шумпотонэн пачылмем нуналъёс тыныд азьпал улонад! Тонэ яратыса но гажаса- нылпиосыд, кенэд. Автомат... хрустальлэсь Брянск улосысь "Дятьковский хрусталь" акционер огазеяськонысь инженер-конструктор Л. Чижов водка лэзьяны аспӧртэмлыко синпель-кузьым дасяз. Солэн посудаез Калашниковлэн автоматэзлы укша. Тодмо пыӵал тӥрлык кылдытӥсь конструктор Калашников война аръёсы Брянщинаысь одӥгаз госпитальын эмъяськиз. Алигес со та пала вуылӥз. Дятьковоысь инженер- конструктор табере, тодмо конструкторлы сӥзьыса, солэсь автоматсэ хрустальлэсь лэсьтоно кариськиз. Н. Петров. Коньдон мыноз выльдӥськыны "ИЭМЗ-Купол" Ижевскысь электромеханикая завод Азиысь одӥгысьтыз страналэн зенитно-ракетной полказ келяз "ТОР-М1" зенитно-ракетной комплекссэ. Сое интыязы 40 чугун сюрес платформаосы. Заказ дунъяське 100 миллион доллар тыр. Поттэм коньдон мыноз заводлэсь калыклы кулэ луись вузъёс поттонъя удыссэ выльдыны. Кызьы ивортӥз "ИЭМЗ-Куполлэн" генеральной директорез Юрий Шестаков, апрель толэзе Россилэн Правительствоез пыӵал тӥрлык поттонъя 2015-тӥ арозьлы чаклам национальной программаез эскероз. Соя Ижысь электромеханикая завод Россилэн армиезлы кун заказъя арлы быдэ 1-2 зенитно-ракетной комплекссэ келялоз. Н.СЕМЕНОВ. "Удмуртия" - Москваын Туэ сентябре Москваысь Братиславская ульчаысь 31-тӥ юртын вузкаронъя "Удмуртия" юрт усьтӥськоз. Солэн быдӟалаез 450 квадртаной метр. Юрт ачиз дась ини, кылиз на кӧня ке ужъёсты быдэстыны. Асьсэлэсь вузъёссэс татчы вуттозы республикаысьтымы 15- лэсь уно предприятиос. Удмуртиын поттэм арбериосын тунсыкъяськемзы сярысь веразы ни Москваысь вузкаронъя 200-лэсь уно организациос. Колмогоров выжыысь Удмурт кун университетын (соку пединститут вал ай) художественно-графической факультет усьтӥськиз 1959-тӥ арын. Со дырысен татын дышетӥз но уно студентъёслы улонэ паськыт сюрес усьтӥз Алексей Павлович Холмогоров. Туж трос дырзэ висъялляз со егитъёслы, соосын ӵош инкуазе, пленэръёсы поталляз, зэмос чеберлыкез шӧдыны дышетӥз. Алексей Павловичлы, секыт ож пыр потэм дано суредасьлы, туэ 1-тӥ мартэ тырмысал ни 75 арес. Дышетскисьёсыз шуныт кылын гинэ со сярысь тодазы ваё. Петр Ёлкин, табере ини калык суредась, аслаз дышетӥсез сярысь вера: - Солэсь луэ вал адӟем карыны. Мыным со мылкыдызъя, суредаськон амалызъя туж матын. Быгатэ вал буёлъёсыз уже кутыны, соосын "шудыны". Кинэ суреда, сое котыр ласянь туж умой чакла. Усто портретъёсыз понна Алексей Павловичлы Репин нимо премия но сётэмын. Москваысь художникъёс сое гажало вал, Ткачев агай-вынъёс но солэсь мылкыдзэ лыдэ басьтылӥзы. Алексей Холмогоровез бырйылӥзы Россиысь Художникъёслэн союззылэн правлениезлы секретаре. Со ӧй вал на профессор, но инъет кылдытӥз зэмос суредасьёсты будэтыны. Быгатонлыксэс волятон ласянь солэн туж чурытэсь вал куронъёсыз. Художниклэсь- реалистлэсь нимзэ табере котьку тодэ вайытылоз университетлэн азьвыл худграф юртэз борды шуккем буре ваён пул (авторез Виктор Борискин). Искусствовед Евгений Шумилов, Удмуртиысь но Россиысь калык художниклы, республикаысьтымы кун премилэн лауреатэзлы А.П.Холмогоровлы сӥзьыса, 1988-тӥ арын бадӟым альбом-монография поттӥз. Валамон, со туж умой тодэ та суредасьлэсь творчествозэ но, улэм-вылэмзэ, выжыоссэ но. - Воткинск ёросысь Молчаны гуртын Колмогоровъёс вылӥллям, - шуэ со. - Нырысьёсыз кафтан вурисьёс пӧлын вылэм Марк Колмогоров... Алексей атаеныз ӵош репрессировать каремын вал Быдӟым ожлэсь азьло. Пиналысен ик пыдйылчилэн адӟонэныз пумиськыса, шаертӥмы калтыртыса, со сюлэмаз пыӵатӥз, дыр, нылкышно тусбуйлэсь, синъёслэсь шунытсэс. Зэм ик но, Алексей Холмогоровлэн пейзажъёсыз, жанровой картинаосыз пӧлын нимысьтыз инты басьто, висъясько нылкышноослэн портретъёссы. Удмурт гуртъёсын суредам тусбуйёс кытчы гинэ ӧз вуэ! Кылсярысь, Пичи Пурга ёросысь Вуж Монья гуртысь Зоя Архиповалэн тусбуез возиське Москваын Третьяковской галереяын. Тросэзлы тодмо, дыр, "Егит удмурт анай", "Дарья Курбатова", "Евдокия Кириллова", "Зинаида Леонтьева пичи пиеныз", "Надя Дмитриева", "Алнашысь доярка", "Анайёс", "Чильымен удмурт кышно" но мукет ужъёсыз. Та апайёс, кенакъёс пырак улонысь басьтэмын, "чылкак асьсэос кадесь", шуозы тодӥсь муртъёс. Нош со дыре ик Алексей Павлович шӧдыны быгатэм удмурт нылкышнолэсь нокинэн сурантэм аслыз тупась туссэ-буйзэ, пуштроссэ. А.Холмогоровлэн суредъёсыныз адӟытонъёс туэ тулыспалэ вал Воткинск, Як.-Бодья, Ува ёросъёсын. Нош таяз толэзе солэн творчествоеныз тодматскизы Ижевскын Выставкаос возьматъян залын. Та пичи люкетэз гинэ. Художниклэн трос ужъёсыз возисько Уралысь но Поволжьеысь музейёсын. Ог 30 ужзэ утьыса возё на семьяяз. Быдӟым художниклэн, классиклэн творчествоез омыръяса быдтонтэм. Вуоно толэзе Удмурт кун университетын луоз на Алексей Холмогоровлы сӥзем научно-практической конференция. Т.ПЕТРОВА. * А.Холмогоровлэн "Егит удмурт анай" суредэз (1959). "Калашников"... супермодель Тодмо конструктормылэн Михаил Тимофеевич Калашниковлэн внучкаез Женя Колумбиын улэ. Отын со тодматскиз араб выжыысь Хуан Илиес Надхарен. Чебер ӟуч нылэз со яратӥз, кузпалъяськизы. Али егит кузпалъёс уло Баранкия городын. Хуан тодмо ужбергатсь, солэн вань аслаз ювелир фабрикаез. Женя дышетске татысь ик медициная университетын, со вуоно хирург. Будэ пизы, кык аресъем Камалито Надхар Ильич Ветшев. Со Михаил Тимофеевичлэн чылкак одӥг гинэ правнукез луэ. Кызьы вера солэн нылыз Нелли Михайловна, пияш Колумбиын туж тодмо супермоделен лыдъяське. Вылаз ик, Камалито та страналэн гражданинэз на. Пияш подиумын возьматылэ пиналъёслы вурем туала дӥськутэз. Со сярысь алигес гожъяз "Труд" газет. Юалляськон "Ингур", "Удмурт радио" ортчытэ калыклэсь юалляськон. Та юанъёслы валэктон сётыса ыстэ гожтэт яке открытка. Иворъёстэс возьмаськом таӵе адресъя: Ижевск, 426004, Коммунаръёслэн ульчазы, 216 номеро юрт. 1. Кин Тӥ? (кышномурт, пиосмурт)? 2. Тӥляд арлыдды. 3. Тӥляд дышетскемды (вылӥ, шоро-куспо яке мукет). 4. Кыӵе семьяысь луиськоды (служащий, рабочий, крестьян)? 5. Вань-а крезьгур удысъя дышетскемды? 6. Тӥляд яратоно радиопрограммады. 7. Маин со тӥледлы яра? 8. Маиныз уг яра? 9. Ма тӥ понна радио (шулдыртӥсь, ивор сётӥсь, тодон сётӥсь яке мукет)? 10. Кыӵе луыны кулэ тӥляд малпамдыя программаез нуись? 11. Кыӵе приёмникен кылзӥськоды яратоно радиопрограммадэс? 12. Улон интыды. 13. Шуомы, тӥледлы луонлык сётӥзы радиопрограммаез лэсьтыны. Мазэ тӥ отысь воштысалды, кыӵе радиоверанъёс бере кудзэ пуктысалды? 14. Мукет дэмланъёсты-ӵектонъёсты. ПРАВИТЕЛЬСТВОЫСЬ ИВОРЪЁС Куное - Венгрие Туэ июнь толэзе Венгриысь Секешфехервар городын ортчоз финн-угор калыкъёслэн фильклоръя ВИИИ-тӥез калык куспо фестивальзы. Удмуртиысь отчы мыноз 25 мурт. Отын асьсэлэсь быгатэмзэс возьматозы Игра ёросысь Сундур гуртысь фольклор коллектив но Алнаш районысь кибашлыос. Правительстволэн президиумез та ужрадлы 96,8 сюрс манет коньдон висъяз. Сиськем но улэм-вылэм понна кулэяськонъёсты ас вылаз басьтэ Венгрия. Грахъёслы юрттэт Правительстволэн постановлениезъя ёросысь "Мамаевское" эштослы шудтэм учырлэсь бервылъёссэ быдтон вылысь 50 сюрс манет коньдон висъямын. Тысё юослы но пудо сиён культураослы кидыс басьтыны бюджетысь 800 сюрс манет ссуда сётэмын. Солэн одӥг куиньмос люкетэз тыриськоз Россилэн Центробанкысьтыз. Дунъямын 1,5 миллионлы Эскеремын научно-исследовательской ужъёс, кудъёсызлы 2000-тӥ аре коньдон висъяське республикалэн бюджетысьтыз. Тужгес бадӟым инты басьтозы Удмурт Республикаын информационно-аналитической ёзъёсъя инъет дасянлы, бюджетэз пайдаё кылдытонлы, электрокужымез но шунытэз шыръянлы. Ваньзэ висъяськоз 1,5 миллион манет. Удмурт Республикаысь Правительстволэн пресс-службез. Наталь Иземысь сайкам яратон Картэз кулэм бере, Валентина дас кык ар улӥз огназ, будэтӥз нылъёссэ. Соосыз бурдъяськизы, пыд йылазы ӝутскизы. Табере дыр вуиз ачиз сярысь но малпаськыны. Тодматскон службае вазиськон понна, нылкышно кык ар пала ассэ дасяз. Сомында ар ӵоже огнын улыса, сюлэмыд шуак уз усьтӥськы ук мурт дуннее йыгаськыны. Валентиналы соку ньыльдон вить арес вал. Тодмоез пыр вазиськиз тодматскон службае, кӧня ке кыл гожтӥз ачиз сярысь. Толэзь ортчыса вуиз гожтэт, телефон пыр вераськизы пумиськон сярысь. Пумиськизы. Выль тодмоез нылкышнолы малы ке но ӧз кельшы. Оло, малы пумиськон мугзэс азьло ик тодыса, кыксылэн но кылзы ӧз сэра? Толэзь ортчыса, воргорон нош ик жингыртӥз. Театре билетъёс, пе, басьтӥ, нош огнын учкыны мӧзмыт. Пумиськизы. Театрысен Валентина азьын усьтӥськиз копак выль адями. Со шӧдӥз но адӟиз воргоронлэсь пуш дуннезэ, визьзэ, нош соин валче - макем секыт солы огназлы та улонын. Таяз учыре ини выль тодмоос кусыпъёссэс ӵогыса куштыны ӧз дыртэ, телефон пыр ог- огзылы жингыръязы. Толэзь ортчыса пумиськизы "Пингвин" кафеын. Кофе юон сямен вераськон бугорзы но сэраз. Та нуналэ соос ог-огзы сярысь троссэ тодӥзы, но улон шуккетъёссы сярысь усьтӥськыны ӧз дыртэ. Ӝыны ар пумиськылэмзы бере гинэ Валентина нырысьсэ сюрес лёгиз воргоронлэн дораз. Соос ӧз ватэ ни ог-огзэс яратэмзэс, ог- огзытэк улыны быгатымтэзэс. Ӝоген яратӥсь сюлэмъёс кузпалъяськизы. Нылкышно понна выль дунне усьтӥськиз кадь. Та дыр ӵоже изьыса улэм яратонэз сайказ; ачиз но выльдӥськиз, картэзлы но вань шунытсэ кузьмаз. Макем шудоесь вал соос. Но кузпалъёсты азьпалан шуг-секытъёс возьмало вылэм. Кык ар огазьын улыса, Валентина шуд пӧлы йыромем мурт кадь улӥз. Ӧз ик малпаськы, малы картэз куное ветлыны уг яраты, ас дораз но тыро ӝӧк сьӧры нокинэ ӧз ӧтчалля. Ачиз уг юы бере, юэмъёсты уг яраты, луоз, малпалляз нылкышно. Нош мугез мукет вылэм: картэз кужмысь юонлэсь куштӥськем. Табере тани со чер нош ик бордаз лякиськыны турттэ. - Ог-огмы сярысь ваньзэ мадимы кадь, - шуэ Валентина. - Нош юонлэсь эмъяськемез сярысь Саша мыным номыр ӧз поттылы. Соиз ӝож, ӧз оскы со мыным. Нош мукет ласянь, юылэмез сярысь тодысал ке, герӟасал меда улонме соин. Озьы ке но, мон шудо адями: тодӥ бадӟым но зэмос яратонэз. Саша но кышка монэ ыштэмлэсь. Али Валентина картэныз нимаз улэ, аслаз квартираяз. Ог-огенызы, адӟиськыло, пумиськыло, мар ке юрттоно ке - юртто. Сашаез со улонысьтыз пырак ӧз кушты, уз но быгаты ни. Нылкышно сюлэм оске, соос нош ик ӵош луозы. Картэзлы со шуиз: - Яратӥськод ке монэ, ӵош луэмед потэ ке, дорам лыктыны сюрес котьку тодӥськод. Бырйы кин тыныд матынгес. Саша кӧня ке толэзьзэ уг юы ни, но Валентина сое уг дыртыты. Л. МАЛЫХ. Кусыпъёсты юнматон вылысь Шаерамы лыктэмын немец музъем вылысь куноос. Отысь 22 предприятие сьӧраз ваиз доразы поттоно вузъёссэ. Пусйыны кулэ, куд-ог фирмаослэн нимъёссы асьмелы тодмоесь ни. Выль луисьёсыныз тодматскыны луоз Калашниковлэн залаз радъям адӟытонысь. Дӥсь сяна, химиен кылдытэм вузъёс, лэсьтӥськон арбериосты но мукет адӟыны луоз отысь. Таӵе ужрад радъямын, Удмуртия но Германия куспын кусыпъёсты юнматон вылысь. Э. Кумачева. Психологен кенешон Кызьы кельшом анайзылы? Улӥськом картэлэн анаеныз. Вань керетонъёсмы со бордысь пото: я мынам пудо сюдэме, нянь пуктэме уг яра, я пиналъёсты эркияськод, шоголляськиськод, шуэ. Данъяське пенси уксёеныз. Кузпалы анаезлы дурбасьтэ. Мар мыным кароно - нимаз улыны луонлыкмы ӧвӧл. Вера Ш. - Кузпалдылэн анаеныз тупамтэостылэсь мугзэ тӥ асьтэос но туж умой валаськоды. Со тӥледлы коньдонэн юрттэ бере, малпа, тӥляд семья кусыпъёсты - нырысь ик солэн ужез. Уродзэ малпаса со озьы уг лэсьты, дыр. Тӥледлы кызьы ке но тыршыны кулэ солэсь юрттэтсэ возьматэк улыны. Яна потыны луонлыкты ӧвӧл бере, чиданы кулэ - куддылы ке ӧжыт сётсконо. Утчалэ шораз мукет синъёсын учкыны - со тӥляд яратоно мурттылэн анаез ук, со тӥледлы ярамон кузпал будэтӥз. Кышкасько ыштэмелэсь Кызьы ке но ки улам сюризы кузпалъёслы ӵектонъёс. Керетонтэм вылысь, пе, малпалэ, тӥ та адямиен берпуметӥ нуналзэ улӥськоды шуыса: чупалэ, ӟеч кылъёстэс эн жалялэ, юрттэ. Мыным нырысь та амал юрттӥз кадь потӥз, но бӧрысь... Табере мон лумбыт кышкаса, керӟегъяськыса улӥсько: нош ӧз ке берты, мар ке луиз ке... Йырам урод малпанъёс гинэ лыкто. Кызьы соослэсь мозмытсконо? Валентина М. - Сыӵе малпаськонлэсь-сюлмаськонлэсь чылкак мозмытскыны уз луы, дыр. Тӥ туж яратӥськоды но дунъяськоды кузпалдэс, соин ик сокем кышкаськоды. Эскере со пумысен кузпалэныды кенешыса, вералэ керӟегъяськон мугдэс. Со, оло, уг но валатскы: ӝыт кыӵе ке мугъя ӝега, нош тӥ со вакытэ укно дурысь укно дуре бызьылӥськоды. Быгатэмезъя мед жингыръялоз, ӝегаллякуз мед алоз. Малпасько, со тӥледыз буйгатыны, умоезлы гинэ оскон пыӵатыны быгатоз. Ирина Горбунова, "Егит семья" центрысь психолог. Бигра Азьмынӥсь хозяйствоосын Мыным яра Баграш-Бигра Сыӵе мылкыдын уло Пичи Пурга ёросысь "1 Май" эштосын ужасьёс. Ӵуказе нунал туннэ кутске И Валасько, ас бордысен кутскыны чебер ӧвӧл. Но мукет ласянь учконо ке, котькудӥз та улонэз ачиз пыр шӧдыны-валаны выре ук. Тодам лыктэ Баграш-Биграе нырысетӥ лыктэме. Ог дас вить ар ортчиз ни со дырысен. Соку "1 Май" колхозэн кивалтӥз тып-тып удмурт воргорон Серафим Григорьевич Михайлов. Ми соин вераським гурт улонэ хозрасчётэз пыӵатон сярысь. Туж синмаськыса кошки соку та колхозысь. Яразы татысь адямиос, яразы чебер улон юртъёс (соку асьме шаерысь мукет гуртъёсын сокем чебер коркаос уг лэсьто на вал, яраз котырысь инкуазь... ИИ Ортчем толэзь пумын сюрес нош ик вуттӥз Баграш-Биграе. Кыӵе мылкыдын уло туннэ татын? Кыкетӥ арзэ колхозэн кивалтэ ни та палъёсын ик вордӥськем-будэм егит инженер Александр Николаевич Ерохин. Жаль, но соин пумиськыны ӧз кылды - Иже кошкем вылэм. Туж ушъяса верало гуртоос выль кузёзы сярысь. Сэзь, чырткем, котькытчы вутскись, олома но шедьтыны быгатӥсь - ӟеч кылъёс пӧлысь та ог люкетэз гинэ. "1 Май" али СПК шуыса нимаськем - сельскохозяйственной производственной кооператив. Асьме сямен вераса, эштос. Адямиос дышем сямзыя ялан колхоз ик шуо на. Ма, пуштросэз азьло кадь ик ук - огъя хозяйство. Эштослэсь кызьы шокамзэ тодон вылысь, мон нырысь ик вазиськи валтӥсь экономистлы Светлана Михайловна Тарасовалы. Кузёзы ӧвӧл дыръя со ик татын ваньмыз понна кыл кутэ. Ужез уго умой тодэ, Удмурт университет бере дас куать тырше ни. - Ойдолэ учком кылем арын ужаммес, - Светлана Михайловна ӝӧк вылэ бумагаоссэ поттэ. - Пӧртэм пумо сиён-юон, мукет ваньбур келяммы понна счётамы 11 миллион манет пала коньдон вуиз. Валамон, тросэз со хозяйство возёнэ кошкиз. Прибылез, урод ӧвӧл. Уго берло аръёссэ изъян адӟыса кызьы шуо, табышез ог 4 миллион луиз. Трос-а со, ичи- а? Кызьы учкод ни. Ми понна ужано луылӥм. Рентабельность кылем арын 54 процентозь ӝутскиз. ИИИ Биграос (малпасько, Куреггуртын но Орлойын улӥсьёслэн вожзы уз поты озьы шуэмлы, котькытынгес ик калыкез шор гуртъя нимало ук) котыр ласянь ӟечгес ужаны ӧдъязы. Кылсярысь, дояркаос скаллы быдэ йӧл кысконэз 3356 килограммозь вуттӥзы, 1998-тӥ арын сярысь, ӝыны тонналы уногес со. Огдыре татын ферма воксё лябӟиз ни вал. Ньыль ар талэсь азьло колхозын котькуд скаллэсь 2000 килограммлэсь ӧжыт гинэ трос йӧл кыскизы. Соку пудо но трос бырылӥз. Табере югдур воштӥське. Гуртоос йӧлзэс 3,9 процентъем напен келяло. Со чотын но ватсаса коньдон люкаське. Вань продукцизэс "Можгасыр" предприятие нуо. Али отын килозэ 3,75 манетэн басьто. Асдуныз 2 манетлэсь ичи усе. - 2,5 тонналэсь уно йӧл нуналлы быдэ келяськом. - веразы мыным бухгалтериын. - Сыр поттӥсьёс ӝегатскытэк коньдон сёто. Соин быгатӥськом калыкмылы пичиен коть уждун тырыны. Йӧл чотын люкаськем коньдонэз хозяйстволы кулэ луись вуз басьтонэ но кутӥськом. "1 Майын" вазен трос парсь но вордӥзы. Берло дыре кулэстӥзы - асьсэ ужасьёслы парсьпи сётон понна гинэ возё на. Ӝоген чылкак куштӥськыны туртто. Парсь гидэ кунян но ветыл будэтон интыос лэсьтыны чаклало. Пудо вордонын мыло-кыдо ужало дояркаос Галина Никандрова, Елена Баграшова, Анастасия Орлова но Любовь Баграшова. Вож кунянъёсты утялтонын ӟеч тырше Тамара Соснова. Баграш-Биграысь фермаен али кивалтэ Николай Чирков. ВИ Кубиста мон сиысал, кочонэз но ярасал... Тодмо удмурт кылбурысь та чуръёсты кин меда уг тоды? Юнме шорысь соос тодэ уг лыкто. Эштосын кема аръёс ӵоже ни выро бакча сиён будэтонэн, тужгес но ярато та палан кубистаез. Кылем арын со чотын гинэ татын ог 2,5 миллион манет пайда поттӥзы. - Ужъёсты умой радъямнн, бакча сиёнлэн асдуныз кулэсме, электрокужымлы, эстӥськонлы дунъёс йыло ке но, - маде валтӥсь экономист. Валля арын, шуом, одӥг центнер кубиста будэтыны 74 манет кутэмын вал ке, кылем арын - 63 манет гинэ. Пумен йылэ урожайность но. 1997-тӥ арын гектарысь 337 центнер басьтӥм, со бӧрсьы - ичигес, арез ӧз тупа уго. Миым нош гектарлы быдэ 520 центнер усиз. Урод шат? Номыр уд шуы, умой, туж умой. Но будэтэмзэ кызьы ке вузано но ук ай. Та ласянь ужаны быгатэмзэ возьматӥз эштослэн выль кивалтӥсез. Александр Ерохин, отчы-татчы ветлыса, соин-таин кенешыса, палэнысь басьтӥсь шедьтӥз. Биграос нырысь кык вагон кубистазэс Санкт-Петербурге келязы, бӧрысь отчы ик эшшо дас вить вагон вузазы на. Москвае дас вагон сётӥзы. Со чотын Е-280 комбайн басьтӥзы. Бен, та агрегат выль ӧвӧл ни, но туж яра на. Олег Шумилов, механизатор, сое быгатыса ужатэ. - Кубиста вузаса, азьло аръёсы люкаськем пунэм тыронъёсмес но берыктыны быгатӥм ни, - вера Светлана Михайловна. - Умой соиз но, чугун сюрес вӧзтӥмы ик ортче, вагон куриськом но сёто. Курадӟонэз коть ӧвӧл. Москва но, Санкт-Петербург но огкылэз умой быдэсъяло. Тани та дырлы тыронъёссы ӧвӧл ни. Туртто туэ но милемын меӵак ужаны. Кизёнлы, мукет кулэяськонъёслы кӧня ке коньдон но висъяны быгатом, шуо. "1 Майын" али куинь пумо кубиста будэто. Туж чаклало басьтӥсьёслэсь куронъёссэс. Петербургъёслы тани кельше "кейд" сорт. Солэн килограмм кидысэз 9 сюрс манет сылэ. Тани ӝоген куать кило ваёзы ни. Уго дыр вуэ рассада будэтыны. Куреггуртын со понна нимысьтыз теплицаос вань. Та дыре соосыз плёнкаен шобырто ни. Кылем арын эштосын 50 гектар кубиста будэтӥзы ке, туэ 20 гектарлы уногес мерттыны малпало. Шуг луоз ни сомында уд будэтыны, но гуртоос осконзэс уг ышто. В Хозяйстволэн кивалтӥсьёсыз берло аръёсы асьсэ калыкен но огкылъя ужаны ӧдъязы. Котькуд ужлы договор гожто. Отын ик ваньзэ пусъё-чаклало. Тупатэмын ватсаса тырон но. Шуом, лэсьтӥд дыраз но ӟеч - басьты премия. Озьы ик бакча сиён будэтӥсьёсын. Соосын кивалтэ агроном Лидия Васильева. Коллективе ог 30 кышномуртъёс, кӧня ке ву киськась оператор луыса ужась воргоронъёс пыро. Чур висъёсты быгатыса утялтэ Игорь Волков. Но та бригада огназ гинэ трос урожай басьтыны ӧй быгатысал. Отысь эшъёслы ваньмыз юртто. Уго вань ужасьёслы, гуртын улӥсьёслы, мукет мылкыд карисьёслы луонлык сётӥське кӧня ке рад кубистаез гужембыт семьяен утялтыны но со понна продукциен уждун басьтыны. Озьы ужасьёслы вань будэтэмез пӧлысь 6 процентэз сётӥське. Кудӥз- огез 45 сотка музъем басьтэ но аслыз гинэ тонна пала ваньбур уськытэ. Умой ук. Котьма кар соин - коть базаре ну, коть сылалты, коть вань ӵыжы-выжыосыдлы сётъя. Гуртоослэн мадемзыя, кубиста туж юрттэ соосын ёрмонэз вормыны. Тол вылтӥ соос кӧня ке мешок ваньбурзэс машинаязы тыро но я Огырчие (Агрызэ), я Иже кошко. Озьы доразы 300-400 манетэн берытско. Бен, котькудӥзлэн озьы уг пӧрмы. Тае лыдэ басьтыса, та арысен эштосысь специалистъёс выль сямен ужаны дэмлало. Малы, пе, адямиосты курадӟытонэз? Мед сётозы будэтэм кубистазэс хозяйствое, соиз ачиз вузалоз-келялоз но калыклы коньдонэн берыктоз. "1 Майын" ӵуж кушман, горд кушман но курыт кушман будэто на. Бен таосызлы музъем бадӟым уг висъяськы. Туж ик басьтӥсь ӧвӧл уго. Собере укыр вольыт но уг буды кушман. Кылем арын тани кӧня ке кешырзэс келязы вал Москвае - дунтэмен кошкиз, ӟечлыкез начаргес, шуизы. Соин ик туэ кык пол сюбегомытыны малпало кушман бусыоссэс. ВИ Мар сюлмаськытэ на гурт калыкез? Валамон ни, тулыс кизён. Ма но со та дырлы дась ини. Озьы ке но, бызьылонэз ичи ӧвӧл на. Тани туэлы хозяйстволы ог 500 тонна минерал сылал кулэ. 180 тоннаез ваемын ни. Сое вортто Кирово-Чепецкысь "КамАЗ" автомашинаосын. Михаил Орлов, Николай Андриянов, Василий Николаев кузь сюреслэсь уг кышкало, олокытчы но вуыло. Дизель тракторъёслы воштос ёзъёс, кылсярысь, Волгоградысь но ваё. Малы, юалоды. Мугез огшоры. Пӧртэм фирмаос, ог-огзылы вузаса- мараса, дунъёсты туж йылэто. Нош заводысь басьтыса, уно коньдон шыръяське. Эстӥськонлы быдтэм коньдон но берытске. Техникаез тупатъян но огкылъя радъямын. Али воргоронъёс та ужен рос-прос выро. Тодо уго - договорын тупатэм дыре ваньзэ вуттӥзы ке, кык полэс уждун басьтозы. Нош техника умой ужаз ке, урожай но бусьтыр люкаськоз. Эштосын берло дыре тросгес саклык висъяло валэс юослы. Доразы будэтэм чабеез асьсэ вукоын ик изо, со пыжиськыны но яра. Татын ужа пичи пекарня. Отысь нянез калык яратыса басьтэ. 1999-тӥ арын биграос гектарысьтыз 23,5 центнер ю тысь кутсазы. Юзэс Можгалась элеваторе но, райпое но келязы. Тырмиз асьсэ ужасьёслы но. Механизаторъёслы ик ог 42 тонназэ дунтэк сётъязы. 300 тонназэ люкылӥзы вань ужасьёс куспын, пичи дунын. Тӥни озьы уло-выло туннэ "1 Май" эштосын. Берло дыре соос капчигес шокчо. Уго инвисын шундылэн шудэмез адӟиськыны ӧдъяз. Гуртоослэн ӟечезлы осконзы пумен юнма. Соос тодо: ӵуказе нунал туннэ кутске. Тае валаса ик ужаны но тыршо. Иван Лебедев. Улон кузьмась лымы сюрес Трофимовъёсын мон вераськи ВИ гурт тол шудонъёслэн нырысетӥ нуналазы. Анатолий Петрович но, Вера Юрьевна но дас аресъем Юра но вормонзэс пусъё ни вал шуыны луоз. Семьяослэн ӵошатсконазы соос со нуналэ нырысетӥ луизы. Анайёс пӧлын туж шаплы бызиз Вера Юрьевна. Но ӵуказеяз эстафетаын Завьял ёросысь Пироггуртысь семьяез кык секундлы азьпалто Игра ёросысь Лекомцевъёс. Жаль, макем жаль! Юрик тӥни кыӵе шумпотӥз ни вал. Пияш ӵошатсконъёслы гижысь-пиньысь дасяськиз уго. Ма тросэз-а дӥсьтоз аслэсьтыд ньыль ареслы бадӟымъёсын ӵошатскыны? То-то. Нош Юрик ӧз кышка - солы атаез "кулэ!" шуиз. Туж-туж жадиз, шокантӥез пытсаськиз, бӧрдэмез потэ ни, но бызе - атаез куас сюрес вылысь ӧй кошкысал, анаез лымы вылэ ноку ӧй уськытскысал, бызёно! Со понна кыӵе данъяськозы соин анай-атаез, теренерез! озьы ик вань - пияшез финишын пӧсь чаен пумитало, молодец шуыса пельпумаз вешало. Валамон, со нокинэ ӧз азьпалты, но ведь ӧз но сётскы - дас ньыль аресозяз ай ваньзэ кельтоз. Семьялэн кузёез атайёс пӧлын куинетӥ луэ. Со данъяськыса но вожъяськыса учкылэ кузпалыз шоры. Вера уго анайёс пӧлын тужгес шӧртчиез. Со улонын но сыӵе ик. Тодматскизы университетын спортфакын дышетскыкузы. Кузпалъяськизы. Городын будэм нылаш ӧз кышка гуртэ интыяськыны. Гуртэз бен ныр улын, но - ужез... Шаплы мурт котьмалы чаль дышиз: сюйын копаськонлэсь но пудо утялтонлэсь но ӧз юрды. Кузпалыныз ӵош чебер юртъер пуктӥзы. Кыкназы школаын физкультуралы дышето. Гуртпӧрлэсь, ужлэсь жадьыса ӝытазе диван вылэ гинэ ланьырскы вылэм -кытын, пе. Трофимовъёс спортивной костюмъёссэс дӥсяло но бызьылыны пото. Сьӧразы пиналъёссэс но кыско. Юразы тани вить аресысен куасэн бызьылэ. Куд-огез анай-атайёс вить аресъем этеоссэс ки йылазы нулло, автобусын инты понна керето ай. Али та семья шоры учкыса уд но малпа, куке но соослэн улоназы туж секыт но кышкыт вакытсы вал шуыса. Кӧня ке ар талэсь азьло Вера Юрьевна секыт висьыны усиз. Кык ар ӧз пота со кардиоцентрысь. Тросэзлэн (врачъёслэн но) умоезлы осконзы ӧй вал ни. Улон кужым сётӥз семьяез но... спорт. Дырын-дырын ӟигар пыӵаллякуз куас вылэ султылӥз. Чылкыт омыр но висёнэз вормон мылкыд ӟеч ужзэс лэсьтӥзы. Учке ай табере Вера Юрьевна шоры! З. Рябинина. ЖУРНАЛИСТЪЁСЫН ПУМИСЬКОНЪЁС 2001-тӥ арын Удмуртиын но Президент луоз Удмуртиын референдум ортчиз. Быръёнъёсы лыктэмъёс пӧлысь 70 процент палаез умоен лыдъязы Удмуртиысь Конституцилэн 10-тӥ ёзэтаз ӵектэм ватсанэз. Озьыен, калык пумит ӧз луы, республикаямы таӵе кун ёзъёс мед кивалтозы шуыса: Кун Кенеш, Президент, Правительство, Конституцияя суд, мировой судьяос. Калык мылкыдзэ вераз, нош мар табере? - Табере тупатъям Конституциез учкыны (экспертизае) келяно республикамылэн Кун Кенешаз, Правительствое, Юстицияя министерствое, - шуиз журналистъёслы Конституция бордын ужась комиссилэн секретарез К.Глухов. - Собере гинэ Конституцилэн инъетэз Москвае эскерыны келямын луоз. Нош быдэсак со юнматэмын луоз Кун Кенешлэн сессияз. Конституциез кутэм бере гинэ радъяськоз Удмуртилы Президент быръён. К.Глухов верамъя, та ужрадэз ортчытыны луоз 2001-тӥ арын март толэзёзь. Озьыен, азьпалан асьмедыз возьмало на туж бадӟым ужъёс но воштӥськонъёс. Т.МИРОНОВА. БИГРА О, Бигра! Вордскем гуртэ! Кызьы тонэ мон данъялом? Узырлыктэ но чебердэ Кыӵе кылын вералом? Анай сямен сюдӥд-вордӥд, Анай сямен бурдъяд монэ. Азьвыл ке ӝож гурен бӧрдӥд Али сяська ни улонэд. Гурезь баме мон тубисько - Тонэ быдэс ик адӟисько. Агрыз ке шур, садъёс, урам - Ваньмыз улэ со сюлэмам. О, Бигра! Вордскем гуртэ! Эн лыдъя вал монэ муртэн. Трос иськемъёс уз люке, уз, Кусыпъёсмес уз возъя бус. Александр ТИТОВ. Баграш-Биграын ужазы газетлэн корреспондентъёсыз Юлия Александрова, Иван Лебедев но Владимир Камашев. Кык нунал ӵоже люкам материалъёс пӧлысь кӧняез ке та баме ӧз тэре. Но ми соосты бӧрысь одно ик сётом. Кин но со юаны быгатоз, малы ичи возьматэмын пудо вордон. Ми вуылӥм фермае но. Отын ужасьёс чутрак пумит кариськизы тусбуйзэс фотое пуктыны. Тӥни озьы: ужаны ужаськом, а пичильтык данъянлэсь но палэнскиськом. Сыӵе ини сяммы. Редакция тау каре Баграш-Бигра гурт администрацилэн кивалтӥсезлы Анатолий Яковлевич Матвеевлы, журналистъёслы ужаны мылысь-кыдысь юрттэмез понна. Тау карон гожтэт Удмурт Республикаысь Кун Кенешлэн Тӧроезлы Александр Волковлы Чечня Республикаысь Северной зоная военной комендантлэсь генерал-майорлэсь В.А.Ковровлэсь тау карон гожтэт вуиз. Отын гожтэмын: Удмуртиысь МВД-лэн патрульно-постовой службая полкысьтыз милиционеръёс ожъёсын вылӥ быгатонлыкъёссэс возьматӥзы. Соослэн сэзь но кышкасьтэм луэменызы, дыраз ӝегатэмын но пазьгытэмын йырвандӥсьёслэн уноез огазеяськонъёссы. 1999-тӥ арын 1-тӥ декабрьысен туэ 29-тӥ февралёзь соос юн утизы Надтеречной ёросысь блок-постъёсты, огъя югдурез. Удмуртиысь егитъёс трос пол пыриськылӥзы пыӵал тӥрлыкез, боеприпасъёсты, пуштытӥсь арбериосты, наркотикъёсты законэз тӥяса возисьёсты ӝегатонъя ужрадъёсы. Шедьтэмын но таламын 7 автомат, 11 пӧйшуран пыӵал, 3 гранатомёт, 93 граната, ӝегатэмын йырвандӥсьёслэн пӧртэм огазеяськонъёссылы юрттӥсь 187 мурт. Со сяна, мозмытэмын 4 заложник, радъямын улон интызэс куштыса кошкисьёслэсь лагерьёссэс утён. Генерал-майор В.А.Ковров сюлмысьтыз тау каремзэ вера Александр Волковлы но МВД-ын ужасьёслы, шаерысьтымы ожгарчиослэн оскем ужзэс азинлыко быдэсъямзы понна. Шунтэ но, эмъя но "1 Майын" вань асьсэлэн вуриськисьёссы но. Елена Шумилова но Антонина Ботникова гуртооссылэсь пӧртэм куронъёссэс быдэсъяло. Я куфайка вуро, я дэремлы басма вандыса сёто, я вуж дӥськутэз выльдо... Но берло дыре соослэн мукет сюлмаськонзы кылдӥз. Ыж гонэз вузаны шуг луэмен, колхозын тугон машина басьтӥзы но ас доразы шобрет вурыны кутскизы. Ыж гонлэсь одеял калыклы туж кельше: уго шуныт луэмез сяна, со тазалыкез но юнматэ на. Ӟеч шобрет басьтыны мылкыд карисьёсты Баграш-Биграысь вуриськисьёс шумпотыса витё. Повышение квалификации и переподготовка специалистов сельского хозяйства Осуществляется профессиональная переподготовка специалистов по программам "Экономика и управление аграрным производством", "Бухгалтерский учет и аудит", "Финансовый менеджмент", "Оценка недвижимости", "Технология хранения и переработки продукции растениеводства", "Технология мяса, молока и продуктов их переработки". Руководители хозяйства проходят профессиональную переподготовку по программе "Менеджмент". На факультете из числа специалистов сельского хозяйства готовится резерв руководителей хозяйств. По заданию правительства Удмуртской Республики в 2000 году в академии должны пройти повышение квалификации и переподготовку более 3000 руководителей и специалистов АПК республики. В рамках факультета по решению Аттестационной комиссии профессиональных бухгалтеров Минфина РФ создан учебно-методический центр подготовки и аттестации бухгалтеров, в котором прошли подготовку и получили аттестат "Профессиональный бухгалтер-главный бухгалтер" более 200 человек. На ФПК проходят профессиональную переподготовку по программе "Экономика и управление в АПК" руководители и главные специалисты колхозов, совхозов и других сельскохозяйственных предприятий. По решению Президентского Совета института профессиональных бухгалтеров РФ, на базе академии образован Удмуртский территориальный институт профессиональных бухгалтеров, как общественное профессиональное объединение бухгалтеров Удмуртской Республики. В рамках ФПК, совместно с Московской академией бюджета и казначейства организована подготовка и повышение квалификации аудиторов, обучалось около 100 человек. В марте 1999 года в академии при ФПК организован информационно-консультационный центр по более широкому использованию образовательных услуг в сфере АПК республики. В условиях формирования рыночной экономики сельскохозяйственной отрасли факультет работает на полном хозрасчете. На ФПК активно работают кафедры бухучета, управления сельскохозяйственным производством, экономики, организации и планирования сельскохозяйственных предприятий. Наши успехи в науке Важным событием для Удмуртской Республики в развитии научных исследований в области сельского хозяйства в начале 50-х годов стала организация Ижевского сельскохозяйственного института. Его кафедры сразу же развернули широкие изыскания по различным вопросам земледелия, растениеводства, животноводства, механизации сельскохозяйственного производства. Ученые института в содружестве с практиками решали актуальные для Удмуртской Республики проблемы ведения сельскохозяйственного производства. За 45 лет работы вуза в республике защищено 178 кандидатских диссертаций и 16 докторских, в том числе за последние пять лет (1995-1999) защищено 46 кандидатских и 3 докторские диссертации. Сделано 406 заявок на изобретение, из них на 188 выданы авторские свидетельства или патенты. Ежегодно сотрудники академии участвуют в работе 16 научных конференций, публикуют 257 статей и восемь монографий. В научной работе в среднем за год участвует около 1200 студентов под руководством 312 преподавателей. В академии разрабатываются 19 кафедральных комплексных, 2 хоздоговорные и 1 госбюджетная тема, которые являются составной честью тематического плана Российской академии сельскохозяйственных наук и Программы развития науки Удмуртской Республики. Из общего числа комплексных кафедральных тем одна тема фундаментальная: изучение магнитных свойств почв и разработка научных основ для новых агроприемов регулирования пищевого и водного режимов почв. Остальные темы прикладные. Все они направлены на повышение урожайности сельскохозяйственных культур и продуктивности животных, устойчивое ведение отраслей земледелия и животноводства, разработку методов лечения сельскохозяйственных животных, разработку новых машин и орудий для сельскохозяйственного производства, внедрение энергосберегающих технологий. В академии созданы крупные научные школы: на кафедре автоматизированного электропривода - профессора Фокина В.В., на кафедре почвоведения и агрохимии - профессора Ковриго В.П., на кафедре растениеводства - профессора Фатыхова И.Ш., на кафедре экономики сельского хозяйства - профессора Шишкина М.И., на кафедре управления сельскохозяйственным производством - профессора Трикоз Р.С., на кафедре частного животноводства - профессора Соколова В.В., на кафедре сельскохозяйственных машин - профессора Максимова Л.М., на кафедре ТМППЖ - профессора Ижболдиной С.Н. и другие. Ӝыны дунэн Быдӟым Отечественной войнаын Вормонлы 55 ар тырмонэз пусъёнэн валче но оже ветлэмъёсты сӥлы карыса, Удмурт Республикаысь Правительство "Вормонлы 55 ар тырмонэн валче, куд-ог гражданъёслы городлы матэ мынӥсь-ветлӥсь автобусъёсын ватсаса льготаос тупатон сярысь" постановление кутӥз. Та постановлениез лыдэ басьтыса, Атыкай музъеммес утьыку бырыны шедем ожгарчиослэн анай-атайёссы но кузпалъёссы, ож мышкын тыршемъёс 2000-тӥ арын 1-тӥ майысен 1-тӥ октябрёзь автобусэн ветлозы, билетлэсь ӝыны дунзэ гинэ тырыса. Правительство Коньдон ужпумъёсъя министерствоез куриз та ужрадлы республикалэн бюджетысьтыз куать миллион манет коньдон висъяны. Удмурт Республикаысь Кун Кенешлэн пресс-службаез. Бигра Дуннеез утёз кышномурт Адӟемды вань, дыр, гажано лыдӟисьёс, республиаысьтымы калык суредасьлэсь А. П. Холмогоровлэсь Баграш-Биграысь нылкышнолы Дарья Курбатовалы сӥзем суредзэ. Жаляса верано, кышномурт ӧвӧл ни. Нош та гуртын ик улэ солэн нылыз Устинья Пислэговна Курбатова. Художниклэсь ужамзэ солы тодаз вайытэ кибашлылэн одӥгез этюдэз. Ужлэн мышказ Алексей Павлович тау карон кылъёс гожтэм но дырзэ пусъем: 3-.Х.69. Суред шоры учкиськод но чылкак паймиськод: художниклэн героиняез но Устинья Пислэговна кисьтэм- басьтэм кадь огкадесь. Макем кужмоесь, иське, выжыосмы. Дыр но, инкуазь но, пӧртэм шуг-секытъёс но соослы люкетыны уг быгато. Устинья Писэговналы али 81 арес. Ортчемзэ тодаз вайыса, со шуэ: - Ужай колхозын но, нюэскын но, Балезино чугун сюрес лэсьтонын но. Нылдыр фамилизэ солы воштыны ӧз кылды. Ваньзэ сураз-пожаз война. Дырлы чидатэк ӵужектыны кутскем туспуктэм шоры возьматэ кышномурт, чебер йӧно воргорон пуксемын отын: - Тани мынам туганэ. Тупам но вал ини. Ваче улыса ӧм вуттэ. 1940-тӥ арын басьтӥзы действительное. Собере война кутскиз. Ышиз-быриз со. Ӧй оскылы кулэмезлы. Ялан берытскоз шуыса малпалляй. Мумиз но возьмамысь ӧз дугды. Бен, улон - лек маке, ныж пуртэн вандэм кадь вӧсь каре. Чидалод-а, уд-а - эскере кадь. Устинья Пислэговна выллем нылкышноосын тодматскыса, синмаськиськод соослэн чидамлыксылы. Зэм ук, макем зэм веран: дуннеез уте кышномурт. НАТАЛЬ Ӧтиськом кенешыны Уте-а нылпиез огъя липет? Шуо, семья будэтэ, визьма, улонэ вамыштон сюрес возьматэ. Нош кыӵе омырен шока со семья, мар бордын со возиське? Одӥг липет улын улӥсьёслэн, психологгъёслэн верамзыя, котькудзылэн асьсэлы тупась рольёссы вань. Анай-атайёс со - лякыт анай, пӧрась, тыршись атай, кузпал. Нылпиос быдэсъяло нылашлэсь, пияшлэсь, сузэр-вынлэсь, внукен внучкаослэсь рольёссэс. Шекспир шуиз ке но, улон - театр ӧвӧл, нош адямиос уг тупало актёръёслы, одӥг ролез ик котькуд актёр аспӧртэмлыко шудэ. Ас сяменыз возьматыны тырше геройлэсь лулпушсэ, мылкыдзэ, вераськон манерзэ, быдэсак вые солэн малпанъёсаз. Ма, зэмос улонын но ваньмыз потэ асьмеос рольёсмес шудыны быгатэмысь. Нош кыӵегес адске семьяын нылпилэн ролез? Ӧвӧл-а ултӥямын, ӝоже уськытэмын, яке тонэ нуныяло, эркияло? Валало-а тынэсьтыд куронъёстэ? Чакласько-а законэн гожтэм правоосыд? Нош кызьы тон малпаськод, нылпиос семья куспын кыӵе инты басьто? Кыӵе тӥляд дорады омыр, ог-огдэс валан шӧдиське-а? Кенешо-а анай-атаед тынад малпанъёсыд пумысен? Мар ке понна но кыл кутӥськод-а тон семьяын? Мар ке пумысен тон споръяськиськод-а анай-атаеныд, нош ма бордысь керетон потылэ? Яке ужпум тынад аресэд бордын-а? Огкылын вераса, юанъёслэн пумзы но уг адскы кадь. Дор, семья - со борды думиськемын асьмелэн улон дунне сярысь нырысь малпанъёсмы, яратонмы, утиськонмы. Та пумысен мон вераськылӥ котырысьтым адямиосын. Нош тани мар мадиз Лена нимо нылаш. - Кызьы ке чалякгес школаын дышетсконме мед быдто вал ини, соку мон соос дорысь синтэм-пельтэм пегӟысал. Кыӵе ми оскисесь луиськомы пичи дыръямы, малпаськом, матысь адямиос котьку ог-огзэс валаны быгато. Мыным табере ачиз "валан" кыл осконтэм кадь потэ ни. Соослэн вамышъёссы, куаразы гинэ но мынэсьтым сюлэмме ӵабъяло, соин ик дорын пукыны уг чидаськы. Мытылӥсько соослы. Монэн йырин ваче ченгешон потто. Но мынам номыр но уг луы асэным кареме. Нош соос уг валало, уг тодо, ку милям кусыпъёсмы тэшказы. Мон сӧриськи кык ар талэсь азьло. Пумитай кельшымон пияшез, со вал мынам нырысетӥ яратонэ. Пумиськылэммес анаен-атае тодӥзы. Кутскиз черекъян, кесяськон: "Кызьы тон уд валаськы, мар солы тынэсьтыд кулэ: со тынэсьтыд куинь ареслы бадӟымгес!" Радызъя вераны курылӥзы ваньзэ, мар милям вал. Янгыше уськытъяллязы сыӵе ужъёсын, кудъёсыз сярысь мон нырысьсэ кылылӥ соослэсь. Азьло сямен ӧй быгаты ни бызьыса анае доры лыктылыны, мӧля вылаз бӧрдыны, ваньзэ вераны, валэктыны. Мон дугдӥ пияшеным пумиськылэмысь но вераськемысь. Кылӟиськи шуыса ӧвӧл, вань та керетонъёс, янгыше уськытъянъёс бере мылкыды кысӥз кадь потӥз. Дорын но улонэ адлы пӧрмытскиз. Куддыр малпасько: ма, неужто мон соосты яратылӥ?! Кузьытэсь та верам кылъёс, но валаны луэ, мар пумысен чидантэмесь луиллям семья кусыпъёс. Нош куддыр валаны но уг луы, мар пумысен лэчытоме югдур. Кызьы ке одӥг дышетӥсь лӥятыны выриз укмысэтӥ классын дышетскись пияшез. Соиз олокӧня нуналзэ ини гуртаз ӧз возьматъяськылы, эшъёсыз дорын кӧлаз: - Тыныд жаль уг-а поты анаед? Туннэ синвуаськыса вуылӥз ук. Соос ведь тонэ музъем вылысь ваньмызлэсь юн ярато. Соин ик сюлмысьтызы тыршо ӟеч лэсьтыны. Нош пияш пумитаз вера: - Мынам уг поты улэме кыӵе ке арбери интыын, коть ярато ке но. Соос мыным диктантын сямен лыдӟо куронъёссэс, быдэс улонме гожъязы ни, озьы ик нуналъёсме но. Дас куинь-дас вить арескын пинал ассэ бадӟым адямиен шӧдыны кутске. Бадӟымъёслэн улон радазы мед кутозы кадь потэ солы. Нош анай-атайёс ӵемысь азьло мертэтъёсъя ик дунъяло пиналзэс. Весяк чаклало, эскеро, куронъёс пукто, индыло. Ортчыт сюлмаськемзы берытске зӥбыса, ултӥяса возёнлы. Визьмо, дышетскем муртъёс но, педагогикаен, психологиен книгаос лыдӟо ке но, таӵе учыръёсы сюро. Тодыны бен соос тодо, пизы пичи ӧвӧл ни шуыса, нош шӧдыны сое уг быгато... Оло нош радтэм кусыпъёс, ог-огедлы мурт кариськон быдэ вуон дыре котькуд семьяын пумисько. Ӧвӧл. Сое валаны луэ пинал ныллэн та верамысьтыз но. - "Мынам анай-атае туж шӧдскымон инты басьто улонам. Анае монэ котьку ик тодматэ сюлэм пушказ ватыса возёно малпанъёсыныз. Туж оскисько солы, котьку но дыр шедьтэ мынам сётэм юанъёсылы шонер валэктонъёс тунаны. Бен, ачим но мон солы усьтӥськисько, но котькуд адямилэн вань ватэм малпанъёсыз, кудзэ со туж матысь эшезлы но уг быгаты вераны. Анае ляб, ненег сюлэмо, соин ик, мылкыдзэ сӧронтэм вылысь, куддыр тыршисько вератэк но, сотэк сюлмаськонъёсыз трос гинэ уга. Мыным туж удалтӥз анаен. Мон уг тодӥськы буйгантэм куректонъёсме. Кема архъёс ӵоже улӥ атайтэк. Со кыдёке кошкемын вал. Анаё-атаё семьяын но нылпиос асьсэды ӵемысь шудтэмен лыдъяло, нош мон люкиськыса улонын но шудо потылӥ. Тодӥ - атае вань, возьмай, оски бертэмезлы, пумиськонмылы. Туж шунытэсь гожтэтъёс ысъялляз со мыным, кудъёссэ выльысь но выльысь лыдӟылӥ, син азям тусбуйзэ пуктыны тыршылӥ. Анае трос лэсьтӥз, атайме мед ярато шуыса. Одӥг пол, пичигес дыръям, атаелэсь туспуктэмзэ адӟеме потыны кутскиз. Анае трос туспуктэмъёс сётӥз, мон соосты котырак выж вылэ вӧлдылӥ но шумпотыса вералляй: "Кыӵе мон шудо! Кӧня мынам атайёсы!" Мон ӧй тэбиньы мултэс юанъёсын. Ваньзэ ачим тодыны но пыр-поч эскерыны тыршылӥ. Асме огнын ӧй шӧдылы. Вал анае, кудӥз мынам кузям ветлӥз, вал эшъёсы. Анае пумитаз кельшымон воргоронэз. Мон шӧдылӥ, солы огназ секыт, соин ик ӧй керӟегъяськы. Сюратае мыным трос дырзэ висъялляз, мон улытозям тау каро солы, азьпал улонме чеберманы тыршемез понна. Огкылын вераса, мынам ваньмыз вал, ӧй ӝожтӥськылы. Озьы ке но, мар ке но ӧз тырмылы. Нош мар - ӧй тодылы. Нош куке пумиськи атаеным, улонэ меӵак воштӥськиз. Соку гинэ валай - со ик мыным уг тырмы вылэм. Ми атаеным дас ньыль ар ӧм адӟылӥське. Пумиськем берам нош ӧй но люкиськылы кадь потӥ. Мон сое эшшо но юнгес яратӥ. Ма, мукет сямен луыны но ӧй быгатысал, милям соин одӥг вирмы. Нош кыӵе ӟеч, дас куать арескын бадӟым эштэ шедьтыны, кудӥз тонэ ваньмызлэсь усто вала, со пичи но уг кельшы мукетъёслэн анай-атайзылы. Ми ӝог шедьтим огъя кыл. Атае котьку мыным визь-кенеш сётэ, валэктэ, кызьы умойгес луоз лэсьтыны. Нош со дыре луонлыкъёс сётэ ас поннам малпаськыса вамышъяны. Мон вань лул шыкысме быгатӥсько солы усьтыны, тодӥсько, уго атае монэ шонер валалоз. Света НИКИТИНА, Удмурт кун университетысь студентка. Редкцилэсь. Гажано лыдӟисьёс, анай-атайёслэн но нылпиослэн кусыпъёссы пумысен ӝутэм та вераськонэ ӧтиськом пыриськыны ваньдэс. Ас малпанъёссэс шара вераса, пиналъёс юрттозы анай-атайёссылы шоразы мукет синмын учкыны. Анай-атайёс но улонэ вамыштыны нылпиослы синъёсэс усьтысалзы. Споръяськон-а со луоз, визь-нодан-а яке улонысь учыр пыр кенешон-а, созэ ини возьматозы тӥляд гожтэтъёсты. Кинлэн ассэ шараямез уг поты, нимъёссэс газет бамын ум вералэ. Серекъян ӝыт Серекъян нуналлы сӥзьыса, Удмурт кун университетын "Каляга" нимо ӝыт ортчоз. Серекъялозы, шулдыртозы, мылкыдзэс лӧпкытозы вузысь дышетскисьёс но дышетӥсьёс. Ортчоз со 30-тӥ мартэ 18 часын И корпуслэн актовой залаз. Ӝытэ ӧтемын актриса Валентина Бекманова. О. Эшкитина. БИГРА Гуртлэн ӵуказе нуналыз Нылпи садын покчиослэн жингрес куараоссы чузъясько. Милям куреммыя шӧртчи пиос Никита но Рома чебер удмурт кырӟан мыло-кыдо кырӟало. Кышкан-возьдаськонэз уг валало ай соос. Ма, туж мусоесь адӟисько ук та кык пиньтэм ерпечкаос. Шоразы учкыса, малпаськод - тани, дыр, соос, вуоно удмурт ложкинъёс, зубковъёс, мамонтовъёс. Сюлэмшунытмес ӧм жалялэ ке будозы, пыд йылазы йыг-йыг султозы, удмурт калыкмес данэ поттозы. - Милям соос татын куатьтонлэсь трос, - садэ ветлӥсь пиналъёс сярысь вера нылпи учрежденилэн кивалтӥсез Т.А.Савинова. - Покчиосмылэн лыдзы уг кулэсмы, ог котырыныгес улэ. Тани 1997-тӥ арын гуртамы 15 пинал вордскиз вал, 1998-тӥ арын - 20, миым - 17 пинал. Пусйыны кулэ, ачиз Тамара Анатольевна йылпумъяз Удмурт кун университетысь удмурт отделениез. Но школаын ужаны ӧз кылды солы, уно аръёс ӵоже тырше ни покчиос бордын воспитатель луыса. Нош нылпи садэн кӧня ке толэзь гинэ кивалтэ ай. Та ужлэсь секыт ныпъетсэ ас вылаз умой шӧдӥз ни. - Ужано ке - секыт, ӧвӧл ке - капчи, - шуэ со. - Коллективмы умой. Кызь мурт пӧлысь ваньмыз сямен нимысьтыз дышетскемын. Тани кызьы ӟеч кылъёс уд вера завхозмы Елена Васильевна Харитонова сярысь. Азьвыл маке нуоно-ваёно луэ ке вал, аслэсьтыз машиназэ уже кутылӥз. Али тросэн сиён-юон басьтыны ум быгатӥське ни. Елена Васильевна гужем великен вуттэ, толалтэ - салазкиен. Бен, улонлэн секытэзлы ӝожтӥськыса уг уло Баграш-Бигра нылпи садын ужасьёс. Сӥзьыл укыргес ик ӟырдыт вакытсы луэ. Асьсэлэн бакчаязы ужало, эмезь, сутэр, вишня, сьӧд палэзь бичало. Кырысь-парысь палэзь, легезьпу мульы, атас зырӟон окто. Толалтэ номыр но уг мыльы. Витаминэн узыр, ческыт юон дасяло. Картофка но асьсэос ик шедьто. Фермерен Владимир Захаровен кусып тупатӥзы. Солы бакча сиёнзэ октыны-калтыны юртто. Нош фермер картофка дунтэк сётэ. Йӧл, курег пуз гуртоослэсь басьто. Колхозмы, сӥльлзэ рыночной дунэн сётэ, - кӧтӝожзэ вера Тамара Анатольевна. - Сое валаны луэ, дыр. Гуртамы тыршисьёслэн гинэ пиналъёссы дормы уг ветло ук. Тросэзлэн покчиосмылэн анай-атайёссы Пургалась, Огырчиысь предприятиосын но учреждениосын ужало. Пиналзы понна нуналаз 2,5 манет тыро. Берло дыре нылпи садын ужасьёс коньдон ӧвӧлэн шугмылӥзы. Выль арысен ёросысь калыкез дышетонъя ёз коньдон кӧня ке висъя ни. Но быдӟалаез бадӟым ӧвӧл бере, уксё шудонъёс басьтыны гинэ но уг тырмы. Анай-атайёс соосты асьсэос лэсьтыны йӧндыро, уксё но бичано луэ. Школа ведь книгатэк школа ӧвӧл, нош нылпи сад шудонъёстэк нылпи сад ӧвӧл, шуэ Тамара Анатольевна. Нылпи садлэсь улыно-вылыно юртсэ ӝутӥз "1 Май" колхоз. Покчиослэн корка пыронзы 1989-тӥ арын вал. Со дырысен улон чутрак воштӥськиз. Ог дасо ар талэсь оскыны быгатысал шат, энергетикъёс тыронъёс люкаськемен валче нылпи садэз тылтэк кельтылозы шуыса. Нош туннэ талы чылкак паймонэз ик ӧвӧл ни. Кылем арлэн пумаз Баграш-Биграысь нылпи учрежденилэсь тылзэ кысӥзы. Зэм, экономикалэн куронъёсызъя энергетикъёс шонер лэсьтӥзы. Нош пиналъёс-а янгышесь асьмелэн ужъёсмы понна? Юнме шат верало, сыӵе общество, пе, таза, кытын нылпиос но арлыдоос сярысь сюлмаськон вань. КЕНЕШ БЕРЕ МАЛПАНЪЁС Гуртысь вузкарисьёслэн вамышъёссы юнмало Алигес ивортӥм ни вал, Удмуртиысь кооператоръёс Россиын устоосыз пӧлы пыро, котькуд кварталэ, арлы быдэ вормисе пото шуыса. Кылем арня вискын соос люкаськылӥзы Иже, потребобществоослэн адямиоссылэн укмысэтӥ кенешазы. Кооператоръёс йылпумъянъёс лэсьтӥзы 1998-тӥ-2002-тӥ аръёсы потребкооперациез азинтонъя программаез быдэсъямзылы но азьланезлы ужпумъёс пуктӥзы. Зэм, шаерысьтымы гуртысь вузкарисьёс выльдӥськон вакытэ (мукет удысъёс - калыклы бытовой юрттэт сётон сямен) ӧз куашкалэ, нош берло дыре пыд йылазы йыг-йыг султӥзы но гурт калыклэсь нуналмысь будӥсь кулэяськонъёссэс но куронъёссэс пумен паськытгес но тырмытгес быдэсъяло. Со шумпотымон. Тӥни соин ик элькунысьтымы кооператоръёслэсь азинсконъёссэс Москва ноку адӟытэк уг кельты, котьку классной интыосын пусъе. Удыс, зэмзэ но, кутэм программазэ улонэ пыӵатэ. Сое тужгес но яркыт возьмато лыдпусъёс. Тани Удмуртпотребсоюз (УПС) валля арын 506 миллион манет тыр вузкариз, нош миым - 792 миллион манетлы. Мукет сямен вераса, республикаысьтымы районъёсын ортчем арын кооператоръёс 27 процентлы вузкаризы (1998-тӥ арын 24 процент вал). Пумен йылэ нуналмысь кулэ луись вузъёсын вузкарон но будэ умой ужась райпоослэн лыдзы. Тани валля арын куинез гинэ районъёс (Игра, Каракулино но Сарапул) планъёссэс тырмытӥзы, нош миым - 13-ез. Куд-огез райпоос магазинъёссэс тупатъязы, выльёссэ пуктӥзы, столовойёс но автомагазинъёс усьтӥзы. Берлоосыз кыдёкысь пичи гуртъёсы потало, кулэ вузъёс вутто. Соин ӵош ик УПС паськытатэ эмъюмъёс вузанзэ, выль аптекаос лэсьтэ. Кооператоръёс пумен кужмоято продукция поттонзэс. Кооперативной предприятиосазы пӧртэм пумо вузъёс потто балезино, кизнер, воткинск райпоос, Можгаысь консерва завод но музонэз. Умоя нянь, булкаос, печеньяос, сушкаос пыжон, консерва поттон, чорыг, сӥль ӵынатон но йӧлэз переработать карон. Та ласянь умоен пусйыны кулэ юкаменск, ува, дэбес, пичи пурга, алнаш, кизнер но можга райпоосты. Гуртысь вузкарисьёс каллен умоято калыклэсь мултэс продуктъёссэс бичанзэс. Отчы пыро йӧл, курег пуз, сӥль, картофка, бакча сиёнъёс, куос, буёло металл, макулатура но музонэз. Туннэ нимысьтыз пусъем потэ, выльдӥськон кутскем дырысен (1992-тӥ арысен) миым нырысьсэ ваньмыз потребобществоос пайдаё ужазы. Оглом 12,4 миллион манет тыр пайда басьтӥзы, нош удыссэс азинтонэ 24 миллион манет ёрос уксёзэс кутӥзы. Райпоос шырытгес, ваньбурез шыръяса ужаны ӧдъязы, вузъёслэсь берыкъяськонзэс 9 нуналлы будэтӥзы но рентабельностьсэс 1,42 процентлы йылэтӥзы. Таӵе азинсконъёс инмысь ӧз усе. Секыт выльдӥськон вакытэ удысэз юн возьыны быгатӥзы УПС-лэн валтӥсь тӧроез Рауф Каримов, данак райпоослэн кивалтӥсьёссы но асьсэос кооператоръёс. Удмуртпотребсоюзын ялан умоя кадръёс дасян, соослэсь тодон- валанзэс будэтон. УПС берло дыре озьы ик бадӟым инты висъя пайщикъёсын ужанлы. Малы ке шуоно, "РФ-ысь потребительской кооперациос (потребительской обществоос, соослэн союзъёссы) сярысь" Законын пащикъёсын ужанлы нимысьтыз саклык висъямын. Соос кооператоръёслы котькызьы юртто, социальной инъет луо, нош мукет ласянь, райпоос пайщикъёсын уката юнэсь кусыпъёс возьыны, соослы льготаос, дунтэм вузъёс но сётъяны но куронъёссэс ӟечгес быдэсъяны кулэ. УПС-лэн али 216,5 сюрслэсь уно пайщикъёсыз, тужгес но трос Балезино, Алнаш, Можга, Ува, Яр но Игра районъёсын. Татын котькуд райполэн 10 сюрсысен 16 сюрсозь пайщикъёсыз. Кенеше люкаськемъёс умоеныз ӵош пусйизы ужысьтызы куд-ог шекъёссэс но сюбег интыоссэс. Тани кооператоръёс матысь аръёсы огмында ёрос, 80 процент сиён-юонэн вузкаро ке, нош промышленной вузъёсын вузкарись магазинъёслэн лыдзы кулэсме. Озьыен, басьяськисьёс но сино. Программаын чаклам мында али уг поттӥськы на колбаса, юзмытӥсь юонъёс, консерва, нянь но булка. Кылсярысь, Кез райпо колбаса поттонъя заданизэ миым 13 процентлы гинэ тырмытӥз, Шаркан - 20, Грах - 34 процентлы. Кудӟытӥсьтэм юонъёс ичи лэсьто Сюмси но Завьялово районъёсысь кооператоръёс. Калыклэсь кулэяськонъёссэс ляб тодо-эскеро Завьялово, Алнаш, Кез, Пичи Пурга райпоос. Ваньмыз сямен районъёс луонозэ но уг лэсьто на сӥль, йӧл бичанъя. Кенешын озьы ик верамын вал оптовой (ёзлэсь ужзэ умоятон сярысь. Соос райпоослы тырмыт вузъёс висъямысь дугдӥзы. Соин ик берлоосыз ичиен дуно вузъёс октыны ӧдъязы. Калык сое басьтыны уг быгаты, уксёез уг тырмы. Умойтэм со. Кооператоръёслэн магазинъёсазы но рынокъёсын вузъёс дунтэмгес луыны кулэ. Со сярысь кенешын ӝот-ӝот пусъемын вал. Нош УПС-лэн кивалтӥсез Рауф Каримов тазьы шуиз: - Туэ нырысетӥ кварталэ, кылем арын та дырен ӵошатыса, урод ужаны кулэ ӧвӧл. Будэтоно вузкаронэз, заготовкаосты но продукция поттонэз. Кооперациын нырысетӥ интые пуктоно пайщикез. Со пала берытсконо, юнэсь кусыпъёс тупатоно, льготаос кылдытоно но кулэяськонъёссэс уката ӟечгес быдэсъяно. Вузъёсмы дунтэмесьгес мед луозы, дугдоно посредникъёсын ужанлэсь, йылэтоно вузкаронэз но кулэстоно наценкаосты. Туннэ асьмеос толло кадь ужам ке, ӵуказе куашкалом, бырон калэ вуом. Нуналлы быдэ дунъёсты син азьын возёно, райпоослы огазеяськыса дунтэм вузъёс, шуом, кӧс вӧй цистернаосын басьтоно. Али куд-ог интыосын поттэм вузъёсмы (винаос) магазинъёсамы уг луо. Кызьы сое умоен лыдъялод?! Ялан будэтоно вузкаронэз. Со асьмелэн инъетмы, та ужез азинтытэк пумен лябӟыны но кема ик ӧвӧл. Геннадий РОМАНОВ. Александр Волков - Москваын Удмурт Республикаысь Кун Кенешлэн Тӧроез Александр Волков 28-тӥ мартэ кошкиз Москвае. Со пыриськоз Федерацияя Советлэн ужаз. Отын эскерыны чакламын кызё пала ужпумъёс. Соос пӧлын: Россия Федерацилэн "Чернобыль АЭС-ын пуштон бервылэз быдтон дыръя радиация басьтэмъёслы юрттон сярысь" Законаз ватсанъёс пыртон, Правительстволэн туэ бусы ужъёслы дасяськон ужрадъёс пумысен ивортонэз, химия ож тӥрлыкез быдтонъя ужрадъёс. Кенешын озьы ик вераськон мыноз Россия Федерацилэн Кун Думаеныз юнматыны чаклам куд-ог законъёс сярысь. Наталь Инметӥ лобась бурдо Малпамтэ мадёс Клуб бордысь ялонэз лыдӟыса, воксё лӧпшай. Ма, кызьы-о шум уз поты ӟыгыт (егит) мылкыд? Бадӟымесь букваосын ивортэмын, Сырья гуртысь егитъёс концерт, пе, возьматозы. Сюлэме оскон тылгизьы но кенжытске: "Оло, мылкыдылы укшамон, синмаськымон нылмуртэ но пумитало?" Концертэз мон шоканы дӥсьтытэк музэн учки, кылзӥ. Ачим но художественной самодеятельносте пыриськисько бере, пыр-поч эскерисько котькуд кырӟась-эктӥсьлэсь выросъёссэ, быгатонлыкъёссэ. Концертэз нуись ивортэ: - Кырӟалоз Зотова Алевтина (валамон муген вань нимтулъёс воштэмын). Сцена вылэ потэ ин кизили кадь чебереныз синъёстыз мальдытӥсь нылаш. Залын пукисьёсты паймытӥз со пезьдыт, жингрес куараеныз, капчи мылкыдыныз но мусо пальышаменыз, ас киосыныз чебермам дӥськутэныз. Егит пиос воксё палёмизы кадь. Мон но ас поннам малпасько: "Одно ик тодматсконо та муспотоно нылмуртэн! Чебер, ӵапак мынам мылкыдылы тупамон!" Сыӵе мылкыдзэ ик лушкемен шараяз вӧзам пукись Эдик эше но. Бен, эшелэн мылкыд каронэз быдэсмымонгес вал: со усто мызганчи (арганчи). Шудэменыз эксэй ныллэсь но йырзэ ас палаз берыктыны пӧрмытоз. Но... таяз ӝытэ шуныт зор мон шоры пальккиськиз. Алевтинаен ӵошен вальс бергамы, огдырлы чусомем ульчаетӥ ӵошен юмшамы. Вераськеммыя ог-огмы сярысь но тодэммы потэ. Нылмурт медучилищеын дышетсконзэ азинтэ вылэм. Мынэсьтым тямыс классэз йылпумъяме бере ик парсь вордон фермаын гур эстӥсь луыса ужамме тодыса, Зотова мынектӥз: - Фи-фи! Ма, кытысь сыӵе уж шедьтӥд? Кузпалъяськемед бере со уждунэн кызьы-о семьядэ сюдыны малпаськод? - Савалиысь гурт удысъя техникуме пырыны малпасько. Зоотехник луэме потэ. - О-о, всё равно колхозник! - серектӥз со. - Быдэс гумырдэ кыед пӧлын бугыръяськыса ортчытод. Уг ваты: сюлэм тарс! карыса гадьысьтым тэтчиз но тулыс юж лымы вылэ питыраз. Шӧдӥ- валай: нылмурт инметӥ лобась бурдо, коньдонэз адямилэсь но вылӥе пуктэ. Мукетъят соин пумиськыны муг ӧй утча ни, аслэсьтым кузме-парме шедьто ай малпай. Верало ук: ведраезъя ик, пе, борӟетэз луыны кулэ. Алевтинаен пыраклы люкиськеммы сярысь Эдик эшелы ивортӥ. Со соку ик мылкыдзэ шараяз: - Одно ик ӟеч кусып тупато Сырьяысь кизили-артисткаен. Бен, кылзы кельшиз кадь. Эше уй-нуналэн мадьыны дась вал яратонзы, Алевтинаен ӟеч кусыпъёссы сярысь. Ӵемысь вералляз: "Одно ик Аляез кузпал басьто". Нош мадемезъя шӧдылӥ ик: яратонзы палдурес, нылмуртлэн мылкыдыз сӥялэс. Егитъёсты улон сюресъёс мыд-мыд пала люкизы, сюан гуръёс но нимаз-нимаз жингыразы. Дасо аръёс ортчыса ни Алевтинаез Ижысен пумитай. Сюлэм висёнме шараятэк ӧй чида. - Малы-о Эдик эшелы бызьыны пумит луид? - Мон эмчи ук, - ушъяськыса вазиз со. - Солэсь тракторен ужам, вӧё-кырсь дӥськутъёссэ шат миськыса улыны кулэ вал? - Нош кинлы бызид? Кузпалэд визьмо, дышетскем адями, дыр? - О-о, - оло серектӥз, оло викыштӥз Зотова. - Куинь пол сюан нерге ортчытъяй ни: инженерен, дышетӥсен, журналистэн. Огеныз но улонмы ӧз пӧрмы-пишмы. Нылпиосы но ӧвӧл. Казак ӟазег музэн ортчытӥсько ни каръян гумырме. Эх, малы-о трактористлэсь вӧё дӥськутъёссэ миськыны ӧй кӧньы (соглаш ӧй кариськы) меда? - секытак лулскиз Алевтина. Н. Никифоров. Лыдӟись гожтэ малпанзэ Вала-а асьмемыз власть? Нош асьмеос сое валаськом-а? Кӧня пол мон радио но телевизор пыр кылӥ ини, кӧня пол газетъёсысь лыдӟи ини: власть, пе, огшоры калыкез валаны, солэн малпанъёсыныз улыны кулэ. Михаил Горбачев егитысен ик ужамез понна медаль басьтӥз. Борис Ельцин кема ужаз лэсьтӥськон удысын. Владимир Путин книгаяз шонерак гожтэ: мон, пе, институтын функционер ӧй вал. Сокем секыт шат валаны, та куинь адямиос асьме кадь ик улонэз адӟизы шуыса? Кӧня ар асьмеос сяласькиськом ини Россилэн властез шоры? Кӧня пол тышкаським сое уксё таламез понна? Нош алигес кинофильмын шонерак шуизы: ми, пе, государствоез - скалэз сямен кыскиськом-сюпсиськом. Властьысь адямиос? Ӧвӧл. Олигарх шуонъёс? Ӧвӧл. Асьме кадь ик адямиос. Власть - секыт удыс. Но тужгес секытэз: котькыӵе умой адями тон лу, ӟече уд поты. Соин ик Черччиль одӥг пол шуэм: демократия, пе, туж урод ужась машина. Но мукетыз ӧвӧл. Владимир Путинэз куд-ог дыръя диктатура пала мынӥсь адями шуо. Но со утча сыӵе амалъёс, кудъёсыз калыклэсь улонзэ троссэгес адӟыны юрттысалзы. Диктатура дыръя уката но ӧжытгес кылзӥсько адямиослэсь. Но - кулэез ӧвӧл! Кыӵе кылын асьмеос ӧм тышкаськылэ Б. Ельцинэз. Нош табере со адямиос ик вераны кутскизы: кызьы со кошкиз властьысь, ми озьы ӧй быгатысалмы. В. Мазитов. Кияса ёрос. Удмурт Республикаын Россия Федерацилы Президент быръёнъя, Удмурт Республикаын референдумъя, Удмурт Республикалэн Кун Кенешаз но интыысь аскивалтон ёзъёсы ватсаса депутатъёсты быръёнъя йылпумъянъёс пумысен ИВОРТОН 2000-тӥ арын 26-тӥ мартэ ортчиз Россия Федерацилы Президент быръён, соку ик - Удмурт Республикалэн Конституцияз воштонъёс, ватсанъёс пыртонъя референдум, Удмурт Республикаысь Кун Кенеше быръёнъя 73 номеро Дэбес ёрос округъя но интыысь аскивалтон ёзъёсы сизьым округъя ватсаса депутатъёсты быръёнъёс. Удмурт Республикаысь Быръёнъя комиссия йылпумъянъёс лэсьтӥз Удмурт Республикаын Россия Федерацилы Президент быръёнъя, Удмурт Республикаын референдумъя, Удмурт Республикалэн Кун Кенешаз но интыысь аскивалтон ёзъёсы ватсаса депутатъёсты быръёнъя куара сётонлы. Россия Федерацилы президент быръёнэ пыриськиз 839561 мурт, ваньмыз пӧлысь со 70,26 процент луэ. Россия Федерацилы Президентэ кандидатъёс понна сётэм куараослэн лыдзы: Джабраилов Умар Алиевич - 397 (0,05 процент); Жириновский Владимир Вольфович - 25605 (3,05 процент); Зюганов Геннадий Андреевич - 208311 (24,83 процент); Памфилова Элла Александровна - 8361 (1,00 процент); Подберезкин Алексей Иванович - 1041 (0,12 процент); Путин Владимир Владимирович - 511846 (61,01 процент); Скуратов Юрий Ильич - 2531 (0,30 процент); Титов Константин Алексеевич - 13154 (1,57 процент); Тулеев Аман-Г.Молдагазыевич - 23930 (2,85 процент); Явлинский Григорий Алексеевич - 23303 (2,78 процент); Вань кандидатъёслы пумит сётэм куараослэн лыдзы - 10668 (1,27 процент). Удмурт Республикалэн референдумаз пыриськиз 838668 мурт. Референдуме поттэм ужпумез шонерез лыдъяз 576176 бырйись (68,80 процент), пумит луиз 228683 адями ( 27,31 процент). 3,89 процентэз бюллетеньёс умойтэмен лыдъямын. *** Удмурт Республикаысь Кун Кенеше 73 номеро Дэбес ёрос округъя быръёнъёсы пыриськиз 9703 мурт (76,26 процент). Кандидатъёс понна сётэм куараос: - Козьмин Федор Геннадьевич - 1140; - Поздеев Игорь Валентинович - 331; - Сямин Владимир Борисович - 1044; - Фокин Александр Михайлович - 6652; - Вань кандидатъёслы пумит сётэм куараос - 339. Удмурт Республикаысь Кун Кенеше депутатэ та округъя быръемын Фокин Александр Михайлович, вордскемын 1947-тӥ арын, акциосын "Удмуртская национальная нефтяная компания" огазеяськонлэн валтӥсь директорез. *** Интыысь аскивалтонъя ёзъёсы ватсаса быръем депутатъёс: Ижысь думае - Зырянова Лариса Владимировна, Тюрин Юрий Алексеевич. Сарапулысь думае - Губин Григорий Валерьевич. Глазов ёрос думае - Богданов Леонид Моисеевич, Шибанов Геннадий Аркадьевич. Красногорск ёрос Советэ - Бабинцев Виктор Игоревич, Кулемина Галина Арсентьевна. Удмурт Республикаысь Быръёнъя комиссия. 4-тӥ, 5-тӥ, 6-тӥ но 20-тӥ апреле Драмая удмурт кун театр Татьяна Чернова, Василий Ушаков Премьера АЙНА Кык ёзэн крезьгуро драма Пуктӥсь режиссёрез Удмурт Элькунысь искусство удысын дано ужась Василий Ушаков. Суредасез Удмурт Элькунысь искусство удысын дано ужась Владислав Анисенков. Крезьгурзэ гожтӥз Николай Шабалин. Хореограф Ксения Русских. Спектакль кутске 18 часэ. Билетъёс вузасько 14 часысен. Юалляськоно 78-79-81, 78-45-92, 44-41-00 телефонъёсъя. Ӟечкыласьком! Константин Суворов спортсмен сярысь газет азьвылгес ивортылӥз ни вал. Соку удмурт пияш кунгож сьӧрысь дуно кузьымъёсын, кубокъёсын, берытскиз вал. Туэ Костя спортын выль вамыш лэсьтӥз. Толшор пумын Москваын Россилэн чемпионатаз со, винтовкаысь ыбылыса, 600 пӧлысь 592 очко люказ но спортъя международной классъем мастерлэсь куронъёссэ быдэстӥз. Алигес та вормонэз зэматӥсь кагазъёс но вуизы. Редакциын ужасьёслэн кык полэс шумпотонзы. Ми дорын уго тырше сэзь ӧрӟилэн атаез, тодмо удмурт кылбурчи-шӧкыччи Федор Суворов. Ӟечкыласьком сое батыр пи будэтэменыз. Инмын - тэркы? Адямиос весь ивортыло лобась тэркыосты адӟылэмзы сярысь. Нош Ижысь сое нокин ӧз синйылтылы на. Малы? Егор ЗАГРЕБИН, Ижын улӥсь. Сыӵе юанэз ми сётӥм Ижысь Космонавтикая музейлэн президентэзлы Сергей Колеватовлы. Со валэктӥз: - Егор Загребин Ижлэн шор вадесаз улэ но ужа бере, солы инбамысь уноез виштыос син азяз уг йӧто, вылды. Нош Ижлэн пумаз вуылӥсьёс оломае но адӟыло. Фотосуредась Владимир Беломорских ужа Воткинской шоссе ульчалэн пумазгес, 10-тӥ иськемын, Печать юртын. 28-тӥ мартэ Владимир Иванович уж дураз ӝегатскиз но ульчае 21 час 23 минутэ потӥз. Шуак котырак югак луиз. Фотосуредась выллане учкиз. Печать юрт бордысь лампа кысэмын. Нош инмын пиштэ яркыт туп (шар). Фотоаппаратэз сьӧраз вал бере, Беломорских затворзэ зӥбыны вуиз. Дас витё секунд улыса, тэркы ышиз. Дораз бертыса но фотоаппаратсэ усьтыса, Владимир Иванович копак абдраз: плёнкаын одӥг гинэ кадр кылем на вылэм. * Тани со, лобась тэркы. Кин со - серекъясьтэм ныл? Малы апрелез маскаръяськон толэзь нимало? Анатолий УШАКОВ, Удмурт кун филармониын ужась. Удмурт кылэз но Шундыез эскеронъя научно-исследовательской институтлэн директорез Василий Рогалев таӵе юанлы тазьы валэктӥз: - Вашкала дырысен тодмо ни Серекъясьтэм эксэй ныл сярысь выжыкыл. Солэн зарни юртаз котькыӵе узырлык вал, нош нылок ноку но ӧз пальпотылы. Адямиос вазь тулысысен сое серекъятыны выризы. Малы ке шуоно, эксэй ныл пальпотысал ке, шунды ӟырдасал, лымы шунасал, музъем вожектысал. Эксэй нылэз серекъятыны быгатӥз одӥг гурт пи гинэ. Озьы 1-тӥ апреле тулыс вуиз но, адямиос музъем ужзэс мытыны быгатӥзы. Со дырысен та нунал лыдъяське маскаръяськон нуналэн. Жаляса верано луэ: серекъясьтэм эксэй нылэз пальпотытон амал туннэ но тодмо ӧвӧл. 1775-тӥ арын поттэм нырысетӥ удмурт грамматика, асьме доры Америка пыр вуэм маке, валэктон сётэ: та маскара верос гожтэмын кызьпу туй вылэ но ватэмын Глаз дорысь Иднакар музъеме. Азьвыл эскеронъёс дыръя со шедьтымтэ на. Выль экспедицие мыныны коньдон висъямтэ на. Тӥни малы Удмурт кылэз но Шундыез эскеронъя институт али утча спонсоръёс. Василий Рогалев Ушаков Толялы тодаз вайытэ: сыӵе бадӟым учыръёс сярысь малпаськон висказ артист Очей Толя медаз вунэты - туннэ ӝытазе со кун филармониын ортчытыны кулэ "Супыль-сапыль апрелё" концертсэ. 1-тӥ апреле сыӵе концертсэ мед возьматоз Кизнерын, 2-тӥ апреле - Можгалан. * Очей Толя - Анатолий Ушаков. Вормизы италмасъёс Завьял ёросын нырысьсэ нылпи садъёсы ветлӥсь пиналъёс пӧлын спортлы сӥзем праздник ортчиз. Дас куать садъёсысь командаос ветлӥзы отчы. Куасэн котькинлэсь шаплы бызьылӥзы Италмас посёлокысь пиос но нылъёс. Вал на эшшо 4 конкурс, концерт. Озьы нырысетӥ интые потӥзы Италмас посёлокысь нылпи садэ ветлӥсьёс, кыкетӥ луиз Завьялысь "Солнышко", куинетӥ интые кылизы Вараксино посёлокысь покчиос. Н. Иванов. Владимир Данилов уно аръёс ӵоже ини тырше Пичи Пурга ёросысь "Юж-Пурга" эштосын. Гуртын кысык ужъёс дыръя машинаеныз бусысь ю тысь ворттэ яке силос нуллэ. Нош "корт валэз" эскерыса возе слесарь-наладчки Михаил Зянкулов. Солэн быгатӥсь киосызлы луыса, машинаос но тракторъёс тэк уг сыло. Эштослэн кивалтӥсьёсыз та кык пиосмуртъёс сярысь туж шуныт вазисько. Косэм ужез, пе, тыро-пыдо быдэсто. Туспуктэмез В. КАМАШЕВЛЭН. Кин кызьы быръёнъёсы пыриськиз 26 мартэ 2000-тӥ ар �/п Районъёс но городъёс Быръёнэ ветлӥз (процентэн) Кин понна куаразэ сётӥз Путин В. В. Зюганов Г. А. Жириновский В. В. Референдумын "Бен" шуизы (процентэн) 1. Индустриальной 67,59 58,89 22,02 3,98 57,68 2. Ленинской 67,42 55,15 29,38 2,58 57,79 3. Октябрьской 70,25 82,42 22,09 2,26 53,70 4. Первомайской 67,10 68,93 21,68 2,91 55,98 5. Устинов 70,81 77,86 22,55 2.78 56,36 Ижевск 68,78 345,49 23,33 2,86 56,12 6. Воткинск 65,95 50,16 29,29 3,27 59,58 7. Глазов 73,04 68,40 17,68 3,66 73,38 8. Можга 72,55 25,46 28,54 3,18 82,45 9. Сарапул 67,48 58,59 25,75 3,11 72,90 10. Алнаш 71,02 9,34 41,39 2,56 83,49 11. Балезино 72,84 21,49 30,30 2,81 80,92 12. Вавож 71,48 10,72 21,20 2,51 84,92 13. Воткинск 75,92 12,85 28,02 3,15 78,78 14. Глазов 76,79 13,16 22,11 3,89 86,04 15. Грахово 81,23 6,64 33,23 3,15 84,31 16. Дебес 75,93 7,77 33,53 3,25 79,49 17. Завьял 70,57 30,80 23,79 3,03 72,33 18. Игра 64,74 23,98 24,25 3,23 81,55 19. Камбарка 68,41 12,51 24,94 3,74 72,79 20. Каракулино 69,06 7,36 30,71 3,31 81,28 21. Кез 73,71 16,12 28,68 2,33 85,90 22. Кизнер 74,62 14,64 26,95 2,47 86,36 23. Киясово 75,15 5,70 40,01 2,53 83,90 24. Красногорск 74,14 8,93 19,19 2,56 84,50 25. Пичи Пурга 73,78 16,07 33,44 2,81 80,99 26. Можга 83,35 18,36 26,06 3,42 85,60 27. Сарапул 70,08 13,69 24,48 3,54 80,23 28. Селта 72,28 8,88 19,08 4,03 84,07 29. Сюмси 73,44 10,25 23,27 2,88 86,33 30. Ува 72,88 25,16 20,50 2,90 82,44 31. Шаркан 73,25 12,20 29,11 3,19 83,93 32. Юкаменск 74,23 7,59 23,98 4,19 90,30 33. Якшур-Бодья 68,10 11,81 26,63 2,96 74,75 34. Яр 72,67 72,03 18,13 3,96 84,06 Республикая 70,26 61,01 24,83 3,05 68,80 Венгрие мыноз Кылдэмез дырысен кызь вить ар тырме Эгра (Игра) ёросысь Сундур гуртысь "Ӟардон" ансамбльлы. Ӵуказе, куамын одӥгетӥ мартэ, со пусъе аслэсьтыз юбилейзэ. Та усто кырӟасьёс-верасьёс шаерысьтымы калыклы кемалась тодмо. "Ӟардон" адямиосты трос пол шумпоттылӥз ни Эгра вылысь аспӧртэмлыко кырӟанъёсын-веранъёсын, эктонъёсын. Ӟечесь, эшлыко кусыпъёс тупатӥз шаерысьтымы мукет усточиосын. "Ӟардон" ансамбль сярысь, солэн ӵуказе нуналэз пумысь туннэ но асьсэлэсь вань шуг-секытъёссэс вунэтыса сюлмасько Эгра ёрос кивалтэтысь культура ёзлэн тӧроез Анатолий Чирков но солэн кузпалыз Людмила. Пусйымон соиз но: туэ инвожо толэзе ансамбль аслэсьтыз устолыксэ возьматоз Венгриын - вынлыко кунысь Сегешпехервар городын ортчоз дуннеысь финн-угор выжыослэн (фольклоръя) тямысэтӥез калык куспо фестивальзы. ЖУРНАЛИСТЪЁСЫН ПУМИСЬКОНЪЁС Петр ПОНОМАРЕВ: "Вузкарон асэрказ уг радъяськы" Кин бен туннэ басьяськись уг луы? - шуг вераны. Но котькызьы со ужпумез бергаты, государство калыклэсь кулэяськонъёссэ тырмыт быдэсъяны кулэ. Таин люконтэм герӟаськемын шаерысьтымы Вузкаронъя но калыклы бытовой юртттэт сётонъя министерстволэн ужез. Кылем вторнике та удыслэн кузёез Петр Пономарев Правительствоын журналистъёсын пумиськиз, мадиз кызьы ужамзы но куд-ог лэчытэсь ужпумъёсты ӝутӥз. Берло дыре, выльдӥськон кутскем бере вузкаронын бадӟымесь воштӥськонъёс ортчизы. Со нырысь ик герӟаськемын дунъёсты ас эрказ лэзёнэн но кун предприятиосты но магазинъёсты вузанэн. Тӥни соин ик государство кие вузкарись предприятиос но организациос трос кыльымтэ ни. Тужгес но ӝог, вакчи дыр куспын быдтэмын-куашкатэмын вал калыклы бытовой юрттэт сётонъя удыс но калыкез сюдон. Кызьы бен али ужало вузкарисьёс но бытовикъёс? Матысь дыре та ёз каллен тупатскыны ӧдъяз. Калыкез сюдонын но бытовой услугаос сётонын дунъёс сокем бадӟымесь ӧвӧл. Миым 11 миллиард манетлэсь унолы вузкаремын ке но, со лыдпус 1998-тӥ арын сярысь ичи на. Тӥни озьы та удысын 2003-тӥ арозь кутэм нимаз программа ляб быдэсъяське ай. Министерство миым районъёсын но городъёсын тупанкылъёсъя ужаз. Оптовой ярамаркаосын сиён-юонъёс но промышленной вузъёс вузанъя огкылъёс кутылӥз. Та ужрадэ котьку сямен пыриськылӥзы бускель Татарстан Республика, Пермь, Киров улосъёс, Н.Новгород но музонэз. - Матысь дыре элькунамы кӧня вузъёсмы вань син азямы возиськом, - шуиз министр. - Нош 1994-тӥ арысен чакласьком кӧня но кыӵе вузъёс палэнэ келяськом но кӧня вписьком. Республикаямы 259 лицензиос сётэмын автомашинаослы но мукет техникалы. Аракы вузанэз государство ас кияз кутӥз_в. Али министерство таин вузаны лэзёнъя 1200 лицензиос висъяз ни. Азьло та ужен выризы интыысь администрациос. 18 оптовой базаос аккредитовать каремын. Озьы берло дыре пумен умоя эскерон уж. Соин ӵош ик Петр Пономарев бадӟым инты висъяз рынокъёсын-базаръёсын вузкаронлы. Удмуртия та ласянь Россилэсь бере кыле. РФ-ын 32 процентэз вузъёс рынокын е вузасько, асьмелэн али - 15-16 процент. Арлоэн пумаз гинэ та лыдпусэз 23 процентозь вуттыны малпало. Огъя вераса, али рынокъёсын 1,5-3,0 миллиард манет тыр вузкарон мынэ. Соин ӵош ик пусйыны кулэ министрлэн ивортэмезъя, базарын тросэз лыдэ уг басьтӥськы, выт уг тыро. Со но миллиардъёсын лыдъяське. Удыс азьын, зэмзэ но, лэчытэсь ужпумъёс сыло. Кулэсме вузкарон. Люкето трос эскеронъёс. Но сотэк нокызьы уг луы. Вузкарисьёс уно миллионъёс штраф тыро. Озьы ке но, лыдъямтэ вузъёссы ялан шараясько. Выт тыронлэсь палэнскыны выро. Пресс-конференциынзьы ик вераськон мынӥз минерал вуос, тамак вузанэз умоятон сярысь. Та вузъёслэн ӟечлыксы юн улӥын на, уката ик минерал вуослэн. Соин ик ӝоген соос штрих-кодэн - маркаосын вузаськозы. Со юрттыны кулэ та вузъёслэсь ӟечлыксэс будэтыны. Г.РОМАНОВ. Кытын тӥ, кибашлыос? Шарканысь егитъёсын ужанъя центр туэ арлы "Егит азьветлӥсь" конкурс ялӥз. Отчы пыриськозы производство, дышетон, культура, эмъян но мукет удысъёсын тыршись кибашлы, визьмо егитъёс. Конкурсын лыдэ басьтэмын луоз ужын басьтэм азинсконъёссы, предприятиослэн, культура учреждениослэн ужрадъёсазы пыриськемзы, газетъёсын ужъёссэс возьматэмзы, калыкен дунъямзы. Йылпумъянъёс лэсьтэмын луозы ар пумын. О.СИДОРОВА. "Нива" но поттозы, "Ода" но бичалозы Кызьы ивортэ Интерфакс, Владимир Путин "Москвич" акционер огазеяськонлы кредитэн висъям импортной оборудованиез Уфаысь моторъёс лэсьтонъя заводлы сётон сярысь постановление гожтӥз. "Ижмаш" акционер огазеяськонлэн генеральной директорезлэн Владимир Гродецкийлэн верамезъя, 2-3 ар ортчыса ини Уфаысь завод Ижевсклы лэсьтыны кутскоз чылкак туала двигательёс. Со оборудование нырысь келямын вал "Москвич" АО-лы. Но "Москвич" сое таки ӧз басьты. В.Гродецкий озьы ик ивортӥз на: "Авто ВАЗ" но "Ижмаш-Авто" акционер огазеяськонъёс куспын гожтэм огкыл Чехиысь Шкодаен ӵош предприятие кылдытонлы уз люкеты. Но планъя чаклам ужъёс 2 толэзьлы ӝегаса мыно. Азьвылгес ивортылэмын ни вал: "АвтоВАЗ"" АО но "Ижмаш-Авто" АО Ижевскысь автозаводын чаклало араз 120 сюрс пала ВАЗ-21213 ("Нива") автомобильёсты бичаны, озьы ик Иж- 2126 ("Ода") автомобильёсты поттонъя ӵош предприятие кылдытыны. Отчы кутӥськозы "АвтоВазлэн" двигательёсыз. Со сярысь ивортӥз "Известия" газет. Сётэмын Президентлэн премиез Огъя тодон-валан басьтон учреждениосын дышетскись егитъёс пӧлын устоесь тодон- валанъёс басьтэмзы но предметъёсъя калык куспо олимпиадаосын 1999-тӥ арын вормонъёссы понна Россия Федерациысь Президентлэсь премиоссэ сётон сярысь распоряжение гожтэмын. Вормисен лыдъямын Ижевскысь 30 номеро школаысь 11-тӥ классын дышетскись Игорь Жилин но. Со вормиз химияя олимпиадаын. Н.СЕРГЕЕВ. Тӥ юады вал "Мерседес эке" Ми доры паймымон ивор вуиз. Елабугаысь трактор заводын, пе, лэсьтыны кутскозы ву ултӥ уясь танкъёс, соослы броня ӵыжатоз "Ижсталь" огазеяськон. Шонер-а со? Александр Белоногов, Менделеевск районысь Вандэмо гуртын улӥсь. Валэктон утчаса, редакцие вазиськиз Татарстанлэн Удмуртиысь посолэзлэн экономикая кенешчиезлы (советникезлы) Ильгам Шакировлы. Тани ма вераз со: - Юанады вань зэмез но, янгышез но. Шонер ӧвӧл соиз: Елабугаын танк поттыны уг дасясько. Отын малпамын "Мерседес эке" машина лэсьтыны. Кылем толэзе гинэ Татарстанысь делегация бертӥз Германиысь. Соин ӵош Елабугае вуизы Германиысь "Мерседес-Бенц" фирмалэн кузёосыз. Соос милям трактор заводысьтымы кивалтӥсьёсын гожтӥзы дас арлы чаклам огкыл (договор). Нырысь-валысь чакламын вал Елабугаын огшоры "Мерседесъёс" интъяны. Котырысь инкуазез эскерыса, немецъёс ортчизы Елабуга-Иж-Шаркан-Тыловай-Дэбес сюресэз. Соос шуизы: удмурт нырккоосты "Мерседес" уз чида. Озьы лэсьтыны кенешемын "Мерседес- Ока" (бигер сямен: "Мерседес эке"). Маин пӧртэм луоз "Мерседес эке" огшоры "Мерседеслэсь"? Та юанэз Ильгам Самуилович валамтэ улэ кариськиз, собере "фирмалэн секретэз" шӧлкы ватскиз. Кенешчилэн бигерысь немец кылэ берыктӥсез (переводчикез) Фридрихсон Энгель шарагес сямо вылэм. Со шуиз: - "Мерседес экелэн" выжез лэсьтэмын луоз дас сантиметр зӧкта бронялэсь. Озьы машиналэн секталаез чутрак будоз но, со вань нырккоосты ӵошкатыса ширтоз. Азьвылгес малпамын вал броня вайыны Нижний Тагил городысь - дано "Уралвагонзаводысь" - танк поттон предприятиысь. Нош Борис Ельцинэз Владимир Путин воштэм бере, Россиысь Правительство та пумысен ялӥз тендер - ӵошатскон. Отын вормиз "Ижсталь" огазеяськон, малы ке шуоно, отысь броняез сокем кыдёке нуоно ӧвӧл, со дунтэм усе. Озьы "Мерседес эке" Ижын ог 18 сюрс муртлы уж сётоз. Нырысетӥ машинаос сюрес вылэ потозы 1-тӥ май азьын. Тулыслы но ужлы сӥзем праздник нуналъёсы со вузаськоз 135 долларен. *Таӵе луоз "Мерседес эке". Подопригора? Маскара! Алнаш районысь спирт завод ялӥз отын поттоно вузъёслы чебер нимъёс малпанъя ӵошатскон. Мон сётӥ - ачим лыдъямъя - туж усто ӵектонъёс: отын поттоно "Образцовая" настойка но "Городилово" пиво. Нош алигес "Алнаш колхозник" газет монэ гуньдытӥз: Алнашын дасялозы, пе, "Подопригора" аракы. Кин сое малпаз? Маин герӟаса озьы дэмлаз? Иосиф Бобров-Иванов, Алнашын улӥсь. Жаляса верано луэ: спиртзаводын "Подопригора" аракыез малпам муртлэсь нимтулзэ шараяны чутрак пумит вал. Коммерческой тайна, пе. Милям корреспондентмы жингыртоно луиз Москвае, Новгород областьлэн губернаторезлэн Россилэн Президентэз доры ыстэм муртэзлы (представителезлы) Владимир Подопригоралы. Аракы сярысь юанлы со чик ӧз абдра: - Тӥ тодӥськоды: Удмуртиысь калык монэ кык пол бырйылӥз Россиысь Вылӥ Советэ депутатэ. Бӧлякъёсы монэ ӧз вунэтэ Новгород областьлэн ыстэм муртэз луэме бере но. Удмурт шаерысь ужбергатӥсьёс (предпринимательёс) мыным пумнала вазиськыло нимме выль вузлы сётон сярысь ӵектонэн. Кылсярысь, "Подопригора" ниманы медо вал Ижын поттӥськись диванэз, Кизнерысь крахмалэз, Кезысь сырез. Мон пумит кариськылӥ. Малы ке шуоно, аслам республикаелы кӧня быгатӥсько сомында ӧй юртты на бере, монэ вазь ай данъяны. Алнашысь спирт заводысь кивалтӥсьёслэсь "Подопригора" аракы поттыны ӵектонзэс умоен лыдъяй таӵе муген. Соос оскытӥзы: сыӵе юон уз кудӟыты, малы ке шуоно, отын одӥг грамм но алкоголез уз луы. Тусызъя но шӧмызъя "Подопригора" туж укша "Шиповниклы". Москвае ыстэм 25 ӟенеликез тодмоосы куинь нуналскын быдтӥзы но туж ушъязы. Нырысь ик - соин сэрен макмыр уг золты. Кыкетӥез - сое юыку, куртчон кулэ ӧвӧл. * Тани со, кудӟытӥсьтэм "Подопригора" аракы. Билет понна - 25 миллион? Космосысь "Мир" станциез усемлэсь утён пумысен али оломар но верасько. 25 миллион доллар тырыса, отчы, пе, туристъёс но лобаны быгатозы. Россиысь огез дано кырӟась "Мире" тубон понна коньдон но тырем ни. Кин меда со - Филипп Кер-коров-а, Иосиф Кобзон-а? Удмуртъёс пӧлын сыӵе узыр муртъёс ӧвӧл шат? Лев Роднов, Ижын улӥсь. - Адямиез космосэ билет басьтытыса матысь дыре уз лэзьялэ, - валэктӥзы Россиысь "Главкосмос" агентстволэн Ижысь управленияз. - Отчы лобан - шудон ӧвӧл. Шуом, Кобзон - дано кырӟась. Нош кин оскытоз, солэн сюлэмыз "Мирын" чидалоз шуыса? Марысь мар ке, кин кыл кутоз, Кун Думалэн депутатэз шуге-леке шедем понна? - Тӥледды, журналистъёсты, шумпоттэммы потэ мукет иворен, - шуиз управлениысь пресс-секретарь Сергей Гулин. - "Главкосмос" но Россиысь Журналистъёслэн союззы гожтӥзы таӵе огкыл: космонавтикалэн нуналэз азьын, апрельлэн кутсконаз, "Мире" келямын луоз асьме республикаысь удмурт журналист. Нимзэ вазь на поттылыны. Неофициальной шуиськись вераськонын Сергей Петрович шараяз шуд пуйылэсь нимтулзэ: Федор Суворов, тодмо кылбурчи но фельетончи. "Удмурт дуннелэн" корреспондентэз абдраз: - Суворов - милям азьвыл ужасьмы. Нош ӵапак 12-тӥ апреле, космонавтикалэн нуналаз, со ортчытэ лыдӟисьёсын сӥё-дано пумиськонзэ. Сергей Гулин ӧз куалекты: - Тодӥськом ми та сярысь. Фёдор Александрович "Мире" тубаны ар пала дасяськиз бере, лобан программаез бер ни воштыны. "Главкосмос" али дасяське планзэ кӧня ке воштыны. Шуом, Суворовез космосысь берыктоно кык нуналлы вазьгес - 10-тӥ апреле. Солэн кораблез Казахстанэ уз васькы - лэзиськоз Пермь областе. Ӵапак отчы, кытчы ог куамын ар талэсь азьвыл усиз вал Алексей Леоновлэн спутникез. Леонов алигес Иже вуылӥз но таӵе ӵектонмес умоен лыдъяз. * Фёдор Суворов мерта выль дӥськутсэ. Чебер гурезьын - зарни? Милям гуртмы дорын туж паймымон вырйыл вань. Нимыз но озьы ик - Чебер гурезь. Пересьёс вералляло: 20-тӥ аръёсы отысь зарни утчаллям. Кылем гужем отын нош ик геологъёс бугыръяськизы. Зарни ӧз шедьтэ меда? Татьяна Федотова, Шаркан районысь Мукабан гуртысь почта нуллӥсь. Сыӵе юанлы валэктон сётэ "Удмуртгеология" огазеяськонысь зарни но азвесь утчан отделысь старшой референт Егор Егорович Пельтемов: - Чебер гурезьын зарни вань шуыса, ми кемалась тодӥськом. Сое 20-тӥ аръёсы шараяны ӧз быгатэ, малы ке шуоно, изотопен приборъёс ӧй вал на. 50-тӥ аръёсы гамма- излучение сётӥсь аппаратъёс оскымон возьматӥзы: 18 сюрс 560 метрын вань зарни. Тужгес ик паймытэ соиз: дуно металл отын гизьыен-гизьыен ӧвӧл - сӥен кылле. Зӧкталазэ тодыны шуг - оло 20 сантиметр, оло, куинь метр. - Жаляса верано луэ: сыӵе узырлыкез поттыны туннэ ум быгатӥське на оборудование ӧвӧлэн. Ижысь "Нефтемаш" завод 20 сюрс метр мурдалае пырись портон лэсьтыны дась. Нош со понна ичизэ 20 миллион доллар кулэ. Коньдон пумысен али вераськонъёс мыно кунгож сьӧрысь фирмаосын. Япониысь "Палсуй" концерн валютазэ сётыны дась. Со аслыз куре вань поттэм зарнилэсь ӝынызэ. Удмурт узырлыкез озьы пазяны асьмеос ум быгатӥське. Матысь дыре дорамы лыктыны кулэ Кореяысь "Пал Кук" фирмалэн кузёез. Таиныз кенешон, оло, пайда ваёз. * Тани со, зарниен Чебер гурезь. Лыдӟисьёслы Берло дыре редакцие вуо ӝожтӥськонъёс. Газетады, пе, янгышъёс уно. Я нимтул сурамын, я буква кельтэмын, я кыӵе ке учыр мыдланьтыса верамын. Туннэ лыдӟисьёслы вазиськиськом: кӧня сыӵе "конгыртэм" учырез шедьтоды та бамысь? Кин тросгес гожтыса редакцие ивортӥз - басьтоз пичияк кузьым, нош редакциысь янгышъёс кельтэм мурт - бадӟым алон (предупреждение). Университет ӧте пумиськонэ! Удмурт кун университет дасяське вуоно абитуриентъёсыныз пумиськонлы. Егитъёс татчы 1-2 апреле люкаськозы. Соос тодматскозы вузысь факультетъёсын, отын дышетон программаосын. Удмурт филологияя факультетын туэ, кылем аръёсы сямен ик, студентъёсты 5 специальностья дасялозы. Татын шумпотозы, удмурт но ӟуч кылъёсты дышетыны мылкыд карисьёслы сяна, англи, немец, венгер яке финн кылъёсын тунсыкъяськисьёслы но. Пумиськон кутскоз 10 часын, И корпуслэн актовой залаз. Удмуртъёсты анайзэ кадь яратӥз Берло вакытэ калыкез уд паймыты ни кунгож сьӧрын улӥсь муртъёслэн, тужгес но - финн-угор выжыысь калыкъёслэн - удмурт кылын чебер вераськыны быгатэменызы. Юнме шорысь ӧвӧл со. Эшшо кылем дауре ай куд-ог финн, мадьяр (венгер) тодосчиос мылысь- кыдысь басьтӥськизы удмурт кылэз эскерон борды. Удмурт гуртъёстӥ ветлыса, калыкысь кырӟанъёс, мадёсъёс, выжыкылъёс бичаса, соос кылдытъязы ас вакытазы туж дуно луись удмурт грамматикаос, кыллюкамъёс. Одӥгезлы сыӵе муртлы, мадьяр тодосчилы Бернат Мункачилы (1860-1937), туэ оштолэзе тырмысал сю ньыльдон арес. Бернат Мунк (Мункачи фамилия солэн семьяез басьтӥз 1881-тӥ арын) вордӥськиз румыниысь Надьвард гуртын. Пичи дыръяз ик пияш шӧдыны кутскиз кылъёслэсь чебер, паймымон, тунсыко луэмзэс: гимназиын дышетскон аръёсаз мылысь-кыдысь басьтӥськиз турок кылэз дышетон борды. Нош Будапешт городысь университетэ вуэмез бере, Мункачилэн мылкыдыз пуромиз Ар шаерын улӥсь калыклэн кылыныз тодматскыны. Та ласянь бадӟым юрттэт сётӥз солы Б. Гавриловлэн "Произведения народной словесности, обряды и поверья вотяков Казанской губернии" (Казань, 1880) книгаез. "Кин быгатоз валаны но шонер дунъяны удмурт кылбуретлэсь шӧмзэ, со трос паймымонзэ но чеберзэ шедьтоз калыклэн кырӟанъёсысьтыз, визьлыко мадиськонъёсысьтыз но мадёсъёсысьтыз", - пусйиз Мункачи, та книгаен тодматскемез бере. 1885-тӥ арын кызь вить аресъем мадьяр тодосчи вуэ удмуртъёслэн шаеразы. Туала Завьял, Кизнер, Алнаш, Селта, Балезино, Шаркан, Татариысь Елабуга но Башкириысь Янаул ёросъёсы вуылыса, Мункачи люканы быгатэ узыр но тунсыко материал. Соин валче 1887-тӥ арын поттэ "Народно-поэтические традиции удмуртов" нимо книга. 277 кырӟан, 168 чакласькон, 148 мадиськон, 17 выжыкыл но мадёс, 15 куриськон, 10 дауркыл но преданиос, 5 кижкыл пыртэмын вал та книгае, со вакытысь наукалэсь вань куронъёссэ чакласа, лыдэ басьтыса. Юнме шорысь вылӥ ӧз дунъя ук та ужез Куӟебай Герд... Тодосчиос понна туннэ озьы ик туж тунсыко луэ Бернат Мункачилэн куинь кылын (удмурт-мадьяр-немец) гожтэм "Удмурт кыллэн словарез". Татысь тодыны луоно кыллэн пӧртэм диалектъёсын кутӥськемез, вашкала текстъёсын пумиськемез сярысь. Словарь Словарь дуно луэ соин но: татын пумисько трос тунсыко мадиськонъёс, лэчыт веранъёс, визькылъёс калык веранъёс. Соосъя ӟечгес шӧдыны луэ кыллэсь пуштроссэ. Таӵе, вылӥ дунъямон ужъёс поттэмез бере но тодосчи ганяк ӧз кариськы. 1927-тӥ арын печатлаз "Туала удмурт литература" нимо кылужзэ (статьязэ). Татын эскере со удмурт литературалэсь революция бере азинскемзэ. Аслэсьтыз ужзэ Мункачи йылпумъя таӵе кылъёсын: "Удмурт калык шудо-буро мед улоз!" Нырысетӥ дунне тылож вакытэ Венгриын, Эстергомын, кылдытӥзы бадӟым лагерь. Отчы котыртэме сюремын вал пӧртэм калыкъёслэн пиоссы. Кызь вить удмурт воргоронэз шедьтыса, Мункачи нош ик басьтӥськиз текстъёс но вераськон кылэз люкан борды. Ӝожомыса верано луэ: та ужзэ со нимаз книгаен поттыса ӧз ни вуы: 1937-тӥ арын визьмо но жадёнэз валасьтэм тодосчилэн синъёсыз пыраклы кыниськизы. Нош удмурт калык понна лэсьтэм ужъёсыз таин уг йылпумъясько. Малы ке шуоно, Бернат Мункачи ас вакытаз дасяса кельтӥз синмаськымон дышетскисьсэ - Давид Рафаэль Фокош-Фукс, дас вить ар ортчыса, лыдӟисьёс кие вуттӥз дышетӥсезлэсь йылаз-пумаз вуттымтэ ужзэ - 1957-тӥ арын солэн чакламез улсын потӥз "Народные обычаи и народная поэзия удмуртов" нимо книга. Ӵемысь дырыз дыръя дунъяны ум быгатӥське вӧзысьтымы адямиосты, соослэсь быдэстэм ужъёссэс. Бӧрысь история ачиз тупатъя, "кышъя" адямиослэсь янгышъёссэс. Ас вакытаз Бернат Мункачи трос ик ӧз кылы тау карон кылъёс, нош финно-угроведениен вырись котькуд адями туннэ вылӥ дунъя мадьяр тодосчилэсь удмурт кыллэн азинсконэз сярысь сюлмаськыса быдэстэм ужъёссэ. Бернат Мункачилы, солэн ужъёсызлы сӥзьыса потэмын пӧртэм кылужъёс но нимаз бичетъёс (сборникъёс). Кылсярысь, А. Н. Уваровлэн, В. К. Кельмаковлэн, Ф. К. Ермаковлэн, И. В. Таракановлэн ужъёссы. 1987-тӥ арын поттэмын "Мадьяр тодосчиос но пермь филология" сборник. Татын озьы ик бадӟым инты висъямын Мункачилэн ужъёсызлы. Наталья Кондратьева, Удмурт кун университетысь аспирантка. "Усьтэм укно пыртӥ сямен" Педучилищеез мон йылпумъяй, Ашальчи Окилэсь нимзэ тодылытэк. Мон гинэ шат? 1930- тӥ-1950-тӥ аръёсы дышетскемъёс ваньмыз сямен озьы: угось поэтлэн нимыз калыклэсь ватэмын вал. Алнашын улӥз син эмъясь Лина Григорьевна Векшина. Нош дыр ваньзэ ас интыяз пуктэ. 1968-тӥ арын выльысь потӥзы Ашальчи Окилэн 20-тӥ аръёсы гожъям кылбуръёсыз. Со тросэзлы тодмо луиз. Лыдӟисьёс соку ик шӧдӥзы: та - зэмос поэзия. Нош зэмос поэзия дасо аръёс ӵоже гинэ ӧвӧл, дауръёс ортчыса но уг безды, со ялан яркыт пиштэ но мукетъёссэ ас палаз кыске. Али котькинлы валамон ни: Ашальчи Оки удмурт калыклэн лулчеберетаз но историяз весяклы пыремын, со калыкмылэн туж данъяськымон адямиез. Ашальчи Окилэсь кылбуръёссэ нырысьсэ лыдӟон мон понна выль поэтэн огшоры тодматскон вал. Соку тужгес но кельшизы яратон сярысь кылбуръёсыз. Мон но егит вал на. Трос ик дыр ӧз ортчы, аспирантураын дыръям монэ малпаськонэ уськытӥз К.Гердлэн "О чем поет вотячка?" юанэз (озьы со нимаз Ашальчи Окилэсь ӟуч кылэ берыктэм кылбур сборниксэ). Соку мон, Гердлэн юанэзлы валэктон утчаса, поэтессалэсь кылбуръёссэ выльысь лыдӟи. Табереяз со мыным ас калыксэ тодӥсь, тужгес но нылкышно сюлэмез, солэсь кӧткуректонъёссэ валась адямиен адӟиськиз ни. Берло дыре мон тодмо удмурт нылкышноос сярысь книга гожтыны малпанэн улӥсько, я соизлэн, я таизлэн нылкышнолэн улэменыз тодматскисько, архивъёсын бугыръяськисько- утчаськисько. Со дыре ик нош но нош Ашальчи Окиез лыдӟисько. Куӟебай Гердлэсь со сярысь гожтэмзэ тодам ваисько: "Солэн гожъям пыртӥз асьмеос усьтэм укно пыртӥ сямен удмурт нылъёслэн сюлэмъёсазы учкиськом". Людмила ХРИСТОЛЮБОВА, тодосчи, Ашальчи Оки нимо премилэн лауреатэз. Ӵапак кулэ дыръя ортчиз "Вихрь-антитеррор" бадӟым ужрадлэн 3-тӥ вакытэз йылпумъяськиз. Операция мынон вакытэ 1 сюрс 192 йыруж усьтэмын, со пӧлысь 982-ез - "пӧсь пытьыосъя". Ӝегатэмын 611 йыртэмась, розыске сюрем 103 адями, пӧлысьтыз 55-ез пытсэт улэ кыскемын. Ужрад дыръя эскеремын 53 сюрс 120 законъёсты тӥян учыр: таламын 62 пыӵал тӥрлык, 17,7 боеприпас, 1 килограмм пуштытӥсь арбери, 2,3 килограмм наркотик но мукет. Милиционеръёс вуылӥзы 190,4 сюрс интыосы. Соос пӧлын 107-ез улон юртъёс, 25 сюрсэз корка сигъёс, 26 сюрсэз подвалъёсы луо. Эскеремын пыӵал тӥрлык, пуштытӥсь веществоос, боеприпасъёс возён 836 инты, 11-ез пӧлысь пытсамын. Законэз тӥямъёс понна таламын ужын кутӥськись 181 пыӵал тӥрлык, 4 предприятие сое возён сярысь лицензитэк кылиз. Шараямын нимаз адямиослэн 602 пыӵал тӥрлыксы. МВД-ысь аналитикъёслэн верамзыя, "Вихрь-антитеррор" операция ӵапак кулэ дыръя ортчиз. Соин но Россилы Президент быръён но республикаямы референдум ортчытон дыръя шаерамы нокыӵе умойтэм учыръёс пусъемын ӧй вал. Удмурт Республикаысь МВД-лэн пресс-службаез. Ӧръёсыз паськытало Удмурт кун университетысь историяя факультетын "Российская археология: достижения ЪЪ и перспективы ЪЪИ вв" калык куспо научной конференция ортчиз. Со сӥземын вал В. Ф. Геннинг профессорлэн вордскемез дырысен 75 ар тырмонлы (1924-1993). Тодмо ӟуч археолог В. Ф. Геннинг Удмуртиын нырысьсэ кылдытӥз археологияя экспедиция.Солэн мытэм ужез туннэ нуналозь паськыт ӧре ӧръяськиз. Университетын кылдытэмын археологияя ӟеч школа: усьтэмын кафедра, музей, Урал котырысь калыкъёслэн историзыя но культуразыя научно-исследовательской институт, ужало аспирантура но докторантура. Конференциын эскеремын та школалэн ортчись даур пумын лэсьтэм ужъёсыз, чакламын выль даурлы лэсьтоноосыз. Уже пыриськизы Россиысь наукая центръёсысь учёнойёс, Украинаысь, Казахстанысь, Венгриысь, Австриысь, Италиысь тодосчиос. Н. ЛИРИНА. Апрель: тодмо нимъёс но нуналъёс 1. - 80 ар талэсь азьвыл (1920) Сарапулын усьтӥськизы калыклэсь тодон-валанъёссэ будэтонъя курсъёс. - Тылобурдоослы сӥзем калык куспо нунал. - Серекъянъя но пӧяськонъя нунал. 2. - Нылпи книгаослы сӥзем калык куспо нунал. - Геологлэн нуналыз. 4. - Ашальчи Окилэн вордскем нуналэз (1898-1973). 7. - Тазалыкез утёнлы сӥзем нунал. 9. - Противоздушной обороная войскоослэн нуналзы. 10. - 240 ар талэсь азьло (1760) Ижевск городэз кылдытонлы нырысетӥ вамышъёс лэсьтэмын. Заводъёслы корпусъёс пуктыны кутскемын, Иж шур вамен паськыт выж (плотина) кыскемын. 11. - Концлагерьёсы пытсамъёсты мозмытонлы сӥзем нунал. 12. - Авиацилы но космонавтикалы сӥзем нунал. 14. - 100 ар талэсь азьло (1900) Ижысь пыӵал поттӥсьёс асьсэлэсь ужъёссэс возьматӥзы Парижын ортчем адӟытонын. - Вордскем дырысеныз 65 арес тырме Вячеслав Никифорович Нисковскихлы (1935), Операя но балетъя кун театрысь солистлы, Удмуртиысь дано артистлы. 16. - Наукалы сӥзем нунал. 17. - Вордскем дырысеныз 75 ар тырме Евгений Васильевич Самсоновлы (1925-1989), удмурт прозаиклы, кылбурчилы. - Тылпуэн нюръяськисьёслы сӥзем нунал. 18. - Памятникъёслы сӥзем нунал. 20. - Вордскем дырысеныз 80 ар тырме Виктор Кузьмич Пислегинлы (1920-1941), Советской Союзлэн Героезлы. Дано ним солы сётэмын 1940-тӥ арын, белофинъёсын кышкатэк ожмаськемез понна. 22. - Музъемлы сӥзем нунал. - Ленинлэн вордскем нуналыз. - 30 ар талэсь азьло (1970) Ижевскын усьтэмын "Ударник" кинотеатр. 23. - Пучы арня. 24. - 65 ар тырме (1935) Мунё кун театрез усьтэм дырысен, Удмуртиысь кун премилэн лауреатэзлы. - Вордскем дырысеныз 55 арес тырме Валерий Федорович Загайновлы (1945), Удмурт Республикаысь жилищно-коммунальной хозяйствоя предприятиослэн союззылэн президентэзлы. 25. - Вордскем дырысеныз 90 ар тырме Василий Афанасьевич Меркушевлы (1910-1974). Советской Союзлэн Героезлы. Вордскиз Сюмси ёросысь Кучей гуртын. Война ӵоже лётчик 418 пол омыре ӝуткаськиз, отын 100 пол ожмаськонэ пыриськиз, 29 тушмон самолётэз пазьгиз. 26. - 110 ар талэсь азьло (1890) Сарапулэ вуылӥз А. П. Чехов. Татчы кожылӥз Сахалинэ мыныкуз. - Радиациен герӟаськем шудтэм учыръёсы быремъёсты буре ваён нунал. - Удмурт Республикалэсь кун пуссэ кутон нунал (1994). 29. - Эктонлы сӥзем калык куспо нунал. 30. - Пасха, Быдӟым Нунал, Великтэм. Апреле: - 165 ар талэсь азьло (1835-1837) ссылкае А. И. Герцен келямын вал Вотка палъёсы. Соку ик эскериз удмурт калыклэсь сямъёссэ но йылолъёссэ. - 65 ар талэсь азьло (1935) ужаны кутскиз Сарапулысь вуриськон фабрика. - 30 ар талэсь азьло (1970) хоккеен шудонъя "Ижсталь" команда кутэмын вал "А" классысь ИИ группаен мастеръёслэн СССР-ысь чемпионатазы. Е. Ушакова, Удмурт Республикалэн туала историезлы сӥзем центрысь ёзлэн кивалтӥсез. "Театр но нылпиос" Быдӟым Вормонлэн 55 ар тырмонэзлы сӥзьыса, быдэс Россиын ортче калык творчествоя "Салют победы" фестиваль. Татчы йӧн-йӧн пырисько асьме нылпи театральной коллективъёс но. Соослэсь ужъёссэс учкон ортчылӥз ни пӧртэм ёросъёсын. Нош 27-тӥ-29- тӥ мартэ Воткинске люкасько тужгес устоосыз 12 коллективъёс. Берло нуналаз "Театр но нылпиос" фестивалез йылпумъяку, вормисе потэмъёс дипломъёсын пусъемын луозы. Крезьгуро концертъёс П.И.Чайковскийлэн вордскемез дырысен 160 ар тырмонлы сӥзем фестиваль усьтӥськиз ни, шуыны луэ, искусствоосъя школаосын дышетскисьёслэн концертъёсынызы. Нырысь ик пӧртэм ёросъёсын ас быгатэмзэс возьматӥзы фортепианоя отделениосын дышетскисьёс. 30- тӥ-31-тӥ мартэ Ижевскысь 2 номеро искусствоосъя школае люкаськозы тужгес устоосыз пинал пианистъёс. Нош оркестровой отделениосысь пиналъёс ас устолыксэс возьматозы 28-тӥ мартэ крезьгуръя училищеын. А.Апаева. Тулыс, тулыс урамын! Алигес "Студентлэн тулысэз" нимо фестиваль ортчиз. Со вить нунал ӵоже кыстӥськиз. Егитъёс ог-огзылы дышетскон-шутэтскон амалъёссэс мадизы. Азьланяз ӵошен ужан сярысь кенешизы. Куспазы ӵошатскизы эктыны, кырӟаны, серекъяны быгатэменызы. Пумиськон шулдыр, задор мылкыдын ортчиз. О. Никитина. Суредъёс пачылмо инбамен Якшур-Бодьяысь искусствоосъя школаысь егит суредасьёслэн ужъёсынызы адӟытон усьтӥськиз Мунё кун театрын. Ужрадэз радъязы Международной восточно-европейской университет но "Грифон" галереяысь нылпи творчествоя музей. Гуртын будэм пиналъёслэн ужъёсазы ӟеч адӟиське соослэн инкуазьлы матын луэмзы. Суредъёс пачылмемын музъемез, сяськаосты, инбамез яратонэн. Адӟытон ужалоз театрын, сезон йылпумъяськытозь. Май толэзь шорын со сӥё-дано ворсамын луоз. Тужгес устооссэ егит суредасьёсты синпель кузьымъёсын пусъёзы. Н. Орлова. Тымет дурысь кышкыт шедьтос Россия Федерациысь ФСБ-лэн Удмурт Республикая управлениез Россилы Президент быръён нуналэ ватсаса ужрадъёс кутӥз, шаерамы нокыӵе кышкытлык, терроризм но экстремизм учыръёс медаз луэ шуыса. Городамы но республикаямы югдур эскерыса возиськиз, номыр умойтэмез ӧз шараяськы. Но со дыре ик эскерон-утчаськон ужъёс ӧз дугдылэ. Басьтэм ивортонъёсъя, ФСБ-ын ужасьёс Иж тыметлэн ярдурысьтыз лушкемен арбери ваткан интыез шараязы. Отысь шедьтэмын танклэн броняезлэсь дасям пластина, кытчы интыямын вал 200 грамм пуштӥсь арбери, "пластид". Та учыръя ӝутэмын уголовной уж, мынэ следствие. Россия Федерациысь ФСБ-лэн Удмурт Республикая управлениезлэн пресс-службаез. Гулбечын улэмын шат? Дас укмысэтӥ мартэ "Мылысь-кыдысь" телеверанэз учкеме бере, шумпотэмме но сюлэм вӧсьме ивортытэк ӧй ни чида. Та телеверанэз дасясьёс кытысь меда сомында тунсыко удмурт адямиосмес шедьто? Тани таяз учыре пумиськимы туж визьмо, йӧно, удмуртлыксэ ыштымтэ удмурт воргоронэн. Со вал Яковлев Александр Григорьевич. Туж шумпотыса пумитасько мон тӥлесьтыд вань адямиостэс. Соосын пумиськыкум, сюлэмы котьку вӧсь луэ. Йырам кылдэ таӵе юан: малы меда асьмелэн, удмуртъёслэн, визьмоесь, чебересь, лякыт сямоесь, асьсэ анай кылзэс яратӥсь нылъёссы но пиоссы мукет калык пӧлы сылмо? "Мылысь-кыдысьтэк" тодысалмы шат пельпумъёсазы трос кизилиё пиосмес? Таӵе адямиосын тодматскем бере, асьмелы йырмес ноку но ошыса ветлоно ӧвӧл. Сюлмамы но йырамы ялан возёно таӵе валанэз: "Мон - удмурт, данъяськисько удмурт луэменым!" Котькытын - ульчаын но, транспортын но, магазинын но, гуртын но - ас кылыныд вераськоно. Мон, мӧйы ке но ини, удмурт телеверанъёсты учкытэк ноку уг кылиськы. Удмурт кылын ортчись кенешъёсы но ветлыны яратӥсько. Тани алигес гинэ вуылӥ Драмая удмурт кун театре. Нош бертыкумы автобусэ пуксимы но, удмурт эше ӟуч сямен вераськыны кутскиз. Таӵе дыръя мынам йыры кур луэ. Та учыр возьматэ ини удмуртлэсь ассэ ултӥямзэ, кышкамзэ, удмурт луэмезлэсь возьдаськемзэ. Нош малы? Малы асьмеос возьдаськыны кулэ?.. Сомында асьмелэн дышетскем, тузӥ, лякыт сямо, визьмо, доразы кызь-куамын ар улытэк но удмуртлыксэс ыштымтэ пиосмы но нылъёсмы! Лыдӟелэ ай Л.С.Христолюбовалэсь "Удмурт тодосчиос" книгазэ но... Удмуртъёслэсь тазьы но верамзэс кылыны луэ: "Со удмурт, нош быгатоз-а кивалтӥсьын ужаны?" Тазьы вераськисьёс гулбечын улэмын, дыр. Асьсэды но арлы одӥг пол сяна уг ярато, дыр. Мон данъяськисько удмурт луэменым. Удмурт калыкме но туж яратӥсько. Но - воже потыса. Малы ке шуоно, тросэз удмуртъёс огазе кариськыны уг тыршо. Удмурт ужрадъёсы ветлэмзы уг поты. Соосты огинэ люканы туж шуг. Йылпумъяса тау карисько "Мылысь-кыдысь" телеверанэз дасясьёслы но, сое учкисьёслы но. О.КУБАКОВА, Ижын улӥсь. Зарни медален Та нуналъёсы шумпотымон ивор вуиз Томскысь. Егитъёс пӧлын куасэн бызьылонын Шарканысь Максим Вылегжанин вормисе потӥз. Классика амалэн 10 иськемез со 28 минут но 25 секундскын ортчиз. Мукет нуналаз эркын амалэн бызьылыса 15 иськемъем сюрес вылын Максим бронза медаль басьтӥз Шарканысь Екатерина Воронцова 10 иськемез витетӥ интыын йылпумъяз, нош эстафетаын куинетӥ луиз. Дас кужмоосыз пӧлы шедизы Александр Веретенников (Як.-Бодья), Андрей Вахрушев (Шаркан), Валентина Новикова (Сарапул). Огъя зачётын Удмуртиысь команда куинетӥ интые потӥз. М.КУЗЬМИН. Туннэ, ӵуказе улыса Туннэозь югыт нунал 5 час но 51 минутлы ватсаськиз ни. Ӵуказе аспӧртэм нунал - шулдыръяськон, пӧяськон, маскаръяськон, огкылын - пальпотон праздник. Кызьы со кылдӥз? Инкуазь вошъяськемез валатэк одӥгаз тулыс нуналэ вашкала адямиос сьӧд кужымъёсты улляны вырылӥзы. Асьсэды медаз тодмалэ шуыса, кышкаменызы ымныръёссэс ватылӥзы, пӧйшур куосын пӧрмытскылӥзы. Дэмен кырӟаса, эктыса ас котырысьтызы вань кырсьсэ, уродзэ уллям карылӥзы. Тазьы пӧяськыса шулдыръяськон сям азьланяз но пыӵаз. 2-тӥ апрель - калыкъёсты огазеясь нунал. 4 ар талэсь азьло сыӵе указ поттӥз Россилэн нырысетӥ Президентэз Борис Ельцин. ЮАН-ВАЛЭКТОН Адямиослэн телефон пыр сётэм юанъёссылы валэкто Юстицияя министерствоысь специалистъёс. Семьямы улэ куашкан калэ вуэм пу коркан. Солэн вужмемез 80 процентозь лыдъяське. Коньдон тырыны кулэ-а сыӵе улонни понна? И.Лысова. Ижевск. Вань гражданъёслы, кудъёсыз уло улон юртъёсъя фондэ кутэм коркаосын, огкадь тыронъёс тупатэмын: улон юртъёсъя фондэз возён но тупатъян, капитальной ремонт но огдырыл дунэн басьтэм (наём) улонни понна. Со сяна, толэзьлы быдэ тыроно луэ на коммунальной юрттэт понна. Солы дунъёсты арлы быдэ тупато ас коже кивалтон ёзъёс. Улыны ярантэм юртъёсын лыдъясько (РСФСР-лэн жилищно-коммунальной хозяйствоя министреныз 1989-тӥ арын 529 номеро поттэм приказэзъя) 70 процентозь вужмем кирпич коркаос но 65 процентозь вужмем пу коркаос. Лысовъёслэн семьязы улэ ке кун яке муниципальной ваньбурен лыдъяськись коркан, соослы вужмем пу коркан улэмзы понна коньдон ӧвӧл тыроно капитальной ремонт но наём понна. Кытчы вазиськоно квартираез приватизировать карон понна? Р.Самигуллина. Ижевск. "Россия Федерациын улон юртъёсъя фондэз приватизировать карон сярысь" Законын чакламын кун но муниципальной юртъёсысь улонниосты кузё луыны мылкыд карисьёслы дунтэк сётыны. Квартираез приватизировать карон понна соглаш луэмзэс вераны кулэ отын ваньмыз ик быдэ вуэм улӥсьёс. Улоннилы кузё луон понна вазиськоно: ас коже кивалтӥсь ёзъёсы (юрт мунициалитетлэн ке) яке предприятие но учреждение (юрт ведомстволэн фондэз луэ ке). Улонниез кузёлы сётон понна нырысь ик гожтоно та организациос но гражданин куспын огкыл (договор). Собере кузё луонлы со огкылэн вазиськоно городысь приватизацияя бюрое. Приватизацияя ужпумез быдэстоно кык толэзь куспын. Басьтэм квартираез одно ик пусъёно ас коже кивалтон ёзын. Со дырысен гинэ адямилэн та квартиралы кузё луон правоез кылдэ. Ужан интыям профкоммы ӧвӧл ни. Кин вырыны кулэ квартира ужпумъёсын, кылсярысь, черодэ пуктонэн но квартираос люкылонэн? Н.Пестова, медсестра. "Гражданъёсты лыдэ басьтон правилоосъя" улоннилы кулэяськисьёсты лыдэ басьто улон интызыя ас коже кивалтон ёзын, кытын та ужпумъёсъя нимысьтыз отдел яке нимысьтыз адями юнматэмын луыны кулэ. Мар быдӟа улон интылы норма тупатэмын адямилы быдэ Россиын но Удмуртиын? РФ-ысь Президентлэн 1997-тӥ арын 28-тӥ апреле потэм указэзъя тазьы тупатэмын: куинь но солэсь трос адямиен семьялы квартиралэн быдӟалаез котькуд адямилы быдэн 18 квадратной метр мында усьымон луыны кулэ, кык адямиен семьялы - 42 квадратной метр, огназы улӥсьёслы - 33 квадратной метр. Удмуртиын кужыме пыре на Министръёслэн Советсылэн 1994-тӥ арын 17-тӥ феврале кутэм 71 номеро постановлениез: котькуд адямилэн огъя улонниез 15 квадратной метр быдӟа луыны кулэ. Учке али та садмес! Вордскем шаердэ, аслэсьтыд калыктэ гажан мылкыд адямилы пичиысен пыӵатыны кулэ. Та ласянь адӟем карымон луо шарканъёс. Ёросын 25 нылпи сад пӧлысь 17-ез - удмурт. Пиналъёс пӧлын тросэз ӟучъёс ке но, занятиос но, вань уж но нуиське удмурт кылын. Тужгес синмаськымон уж пуктэмын Шарканысь 3 номеро нылпи садын. Воспитательёс тыршо пиналъёслэсь пичи дыр вакытсэс вунонтэм карыны - сюлмасько котькуд нуналэз тунсыко ортчытыны, тросгес тодон-валан сётыны. Пиналлэн улоназ тужгес бадӟым инты семья басьтэ бере, нылпи садын ужасьёс тыршо анай-атйёсын юн кусып возьыны. Пӧртэм ужрадъёсы, шулдыръяськонъёсы анай-атайёс но пиналъёс ӵош пырисько: мылысь-кыдысь шудо-кырӟало, ӵошатско. Кӧня праздник луэ та садын! "Сӥзьыл бал", "Выль ар", "Пӧртмаськон", "Вӧй келян", "Быдӟым нунал", "Выжыкыл дунне" но трос-трос мукетъёсыз. Котькуд праздникамы анай-атайёс удмурт пыжкемъёс ваё, пиналъёсын ӵош чай юо. Нылпи садын вань пичияк музей но. Отчы люкамын вашкала удмурт арбериос, шудонъёс, инкуазен тодматон сэрег. Воспитательёс ужало "Этнография удмуртов" книгая. Нылпи садэ ветлӥсь пиналъёсты вордӥськем шаеренызы тодматон ужын бадӟым инты висъяське экскурсиослы. Покчиосын садикмы котырысь инкуазез эскериськом. Будэмзыя тодматӥськом гуртэн, ульчаосын, потаськом бусые но нюлэскы. Экскурсиосы потаку, пиналъёслэн трос юанъёссы кылдо: малы тылобурдоос шуныт пала кошко, кыӵе пайдазы нымы-кибыослэн... Пиналъёслы удмурт культураез яратон пыӵатӥськом кырӟанъёс-эктонъёс, шудонъёс пыр. Пичиос туж ярато "Лымы тӧдьы", "Кечпие", "Учке али бкчамес" кырӟанъёсты. Жадё ке, шудыны кутскиськом "Магазинэн", "Болницаен". Шудон сямен уго пиналъёс ог- огенызы вераськыны дышо. Занятиосамы вуыло Кизили, Нюштылёк, Погылёк, Лӧпшо Педунь, Дядяй, Чебер Анай, Вася коӵыш... Удмурт кыл ӟучомем нылпиослы кунгожсьӧр кыл кадь потэ. Соин ик трос шуг-секытъёсын пумиськоно луэ соосты кыллы дышетонын. Соин ик кылтӥрлыксэс волятыны тыршиськом, лэчыт веранъёс, кылбуръёс, лыдъяськонъёс, кырӟанъёс дышетыса, мургес тодматӥськом нылпи фольклорен, выжыкылъёсын, визькылъёсын, ӝог веранъёсын. Пиналъёслы занятиын тунсыкогес мед луоз шуыса, одӥг ужез мукетаз выжтӥськом. Тани, шуом, лыдӟиськом удмурт калыклэсь Музъем кылдэм сярысь легендазэ, суредан урокын сое тодазы вайыса пиналъёс суредало ни Инмарез, музъем Кузёез, Кылдысинэз. Нош физкультураын тодамы ваиськом вашкалаосмылэсь шудонъёссэс: "Кукей лушкан", "Пуклёен шудон", "Небыльток"... Удмурт кыллы дышетонлэсь пайдалыксэ возьматон понна, анай-атайёсты занятиосмес учкыны ӧтчаськомы. Пиналъёслэсь мыло-кыдо ужамзэс, шудэмзэс адӟыса, асьсэос но шумпото. Анай-атайёс асьсэос но пиналъёсынзы ӵош ӵошатсконъёсамы, концертъёсамы пырисько. Соос ке пиналзылы вордскем кыллэсь дунэ ӧз валэктэ, нылпи сад огназ уз быгаты. Т.ВАХРУШЕВА, Шарканысь 3 номеро нылпи садысь воспитатель. Спорт Чемпионат азьын Кӧня ке нунал ортчыса, нырысетӥ лигаысь командаос чемпионатсэс мыто. Пус чӧлтыса тодмо луиз: Ижысь "Газовик-Газпром" нырысетӥ шудонзэ 9-тӥ апреле Смоленскын ортчытэ, нош 12-тӥ апреле кужымзэ эскероз Ярославльын, татысь "Шинникен". Футболэз чакласьёс тодазы ваё на, луоз, кызьы пар валъёсын вылӥ лигае ворттӥсь "Газовиклэсь" нырулзэ ӵушылтӥз вал "Шинник". Соку асьме командамы чемпионатын ньылетӥ интые кылиз. Со вал 1996-тӥ арын. Бӧрысь 3 арзэ Ижысь клуб сокеме ӝутскыны уг пӧрмыты ни, шоро-куспо нюръяське. Малы? Тренеръёс вошъяськылӥзы. Палэнысь ӧтем футболистъёс, ар-кык шудыса, мукет командаосы выжо. Асьме дорын будэмъёсыз но кема тунаса уг уло, ӟеч ӵектон вуыку кошконо карисько. Тани туэ. Волгоградысь "Роторын" кужымзэ эскере Игорь Дубровских. Вань мукет ыштонъёс но. Владимир Федотов мылкыд кариз Саратовын шудыны. Александр Боровик но мукет инты утча. Нош кин вуиз "Газовике"? Пумозяз тодмо ӧвӧл на, кин зэмзэ но юрттыны быгатоз командалы. Чемпионат кутскытозь, туэ но тренеръёс трос футболистъёсты эскеро, пуж пыртӥ кадь сӥсъяло. Соослэн верамзыя, выльёсыз пӧлысь асьсэды умоен возьмато Ярославльысь вуэм Николай Сидоров (нападающий), Казаньысь Рашид Зайнутдинов (защитник), Челныысь Рашид Мурадымов (полузащитник), Тюменьысь Константин Фишман (полузащитник). Командаын асьсэлы умой-умой инты шедьтозы, дыр, асьме дорын будэм егит футболистъёс Анатолий Завьялов, Николай Ронжин, Дмитрий Максимчук но мукетъёс. Шумпотоно соиз понна: берло дыре Ижысь кык футбол командаослэн кивалтӥсьёссы огкылэ вуизы, бадӟым ужпумез быдэстонэ огазе кыткиськизы. Озьы "Динамоысь" яркыт шудӥсьёсты "Газовике" ӧтё. Нош таяз командаысь ныпъетсэ вормисьтэм футболист улӥегес, "Динамое", лэзиське. Валче ужамлэн пайдаез син азьын. Али Удмуртилэн валтӥсь командаяз ӝыныез пала - Ижын будэм футболистъёс. Оло, ӵапак соос ик юрттозы "Газовиклы" вылӥ лигае ӝутскыны. Та сярысь туэ кылпум ӧз поттылэ на ке но, клублэн кивалтӥсьёсыз уйвӧтъёсазы но асьсэды кужмоосыз пӧлын адӟо ни. Кузь нюръяськонлы дасяськыса, "Газовик" Сочие но Кипре вуылӥз, уно командаосын пумиськылӥз. Валамон, эшлыко пумиськонъёс ӟырдыт турнирлэсь висъясько ке но, лыдпусъёс командалэн кужымез сярысь ма но со верало ик. Тырмыт-а соиз "Газовиклэн", вылӥе ӝутскон понна? Чаклалэ ни асьтэос. Нош Сочиын шудонъёс тазьы йылпумъяськизы. Асьме пиос 0:1 лыдын келязы Майкопысь, Орёлысь, Ногинскысь но Сочиысь футболистъёслы. Нош Нижнекамскысь "Нефтехимикез" 5:1, Сочиысь "Жемчужинаез" (кыкетӥяз пумиськонын) 4:0, "Тюменез" - 2:0, Иркутскысь "Звездаез" 2:0, Тамбовысь "Спартакез" - 4:3 лыдын вормиз. Кипрын 10 пумиськон пӧлысь "Газовик" витьсэ вормиз, куиньзэ келяз, кыкез нокин вормытэк йылпумъяськиз. Ижевскын кӧня ке нунал улэмзы бере асьме футболистъёс выльысь Сочие кошкизы. Татын берпуметӥ тренировкаоссэс ортчытозы но нырысетӥ пусъем пумиськоназы Смоленске потозы. Нош асьме шаере бадӟым футбол вуоз 19-тӥ апреле. Соку "Газовик" шудоз Читаысь "Локомотивен". Г. Юсаев. Постановление Президиума Государственного Совета Удмуртской Республики О проекте закона Удмуртской Республики "О внесении поправок в Конституцию Удмуртской Республики Рассмотрев подготовленный Конституционной комиссией проект закона Удмуртской Республики "О внесении поправок в Конституцию Удмуртской Республики", Президиум Государственного Совета Удмуртской Республики постановляет: 1. Одобрить проект закона Удмуртской Республики "О внесении поправок в Конституцию Удмуртской Республики". 2. Обратиться к депутатам Государственного Совета Удмуртской Республики с предложением поддержать проект закона Удмуртской Республики "О внесении поправок в Конституцию Удмуртской Республики" в целях реализации положений статьи 114 Конституции Удмуртской Республики. Председатель Государственного Совета Удмуртской Республики А. А. Волков. г. Ижевск, 31 марта 2000 года. � 132-ИИ. Гажано лыдӟисьёс! Кызьы тӥ тодӥськоды ини, 26-тӥ мартэ ортчем референдумын шаерамы улӥсьёс пӧлысь тросэз умоен лыдъязы Удмуртилэн Конституциезлэн 10-тӥ ёзэтаз пыртэм воштонъёсты. Кун Кенешлэн дасэтӥ (азьло пусйымтэ) сессияз эскерыны чакламын Валтӥсь Законлэн выль дасям инъетэз. Конституцияя комиссилэн ӵектэмезъя, туннэ печатласьком Удмурт Республикалэн Конституцияз пыртэм вань воштонъёсты. Со пумысен асьтэлэсь малпанъёстэс, дэмланъёстэс ыстыны куриськом редакцие яке Кун Кенешысь Конституцияя комиссие. Гажано эшъёс! Та май нуналъёсы асьмеос ваньмы улӥськом дано нуналэз витёнэн. Со - Быдӟым Отечественной войнаын Вормеммы дырысен 55 ар тырмон. Соку, 1945-тӥ арын, асьмелэн песятайёсмы но атайёсмы вир кисьтон ожъёсын фашизмлэсь сюрлызэ тӥязы, куашкатэм Берлинысь Рейхстаг вадьсы ӝутӥзы Вормон знамяез. Европае вуиз кема возьмам тупаса улон. Быдӟым Отечественной войнаын вормон понна калыкмы бадӟым ыштон адӟиз - ож бусыосын быризы миллионъёсын солдатъёс но офицеръёс, сю сюрсъёсын огшоры адямиос кулӥзы концентрационной лагерьёсын, миллионъёсын нылкышноос но пиналъёс кылизы кузпалтэк но анай-атайтэк. Асьмелэн калыкмы ноку уз вунэты ӟуч солдатлэсь-вормисьлэсь дано ужъёссэ. Со фашизм зӥбетлэсь мозмытӥз Европаысь кунъёсты. Ноку уз вунэ со ожъёсын быремъёслэн нимъёссы, уз вунэ эрико улонмы понна нюръяськисьёслэн нимтулъёссы. Ӟеч кылъёс вераны кулэ фронт мышкын тыршемъёслы - быдэс война мынон аръёсы ужам пересьёслы но пиналъёслы. Соос уен-нуналэн сылӥзы станокъёс но мартен гуръёс вӧзын. Соос Вормонлы лэсьтӥзы пыӵал тӥрлык, будэтӥзы нянь, вань берпумзэ сётӥзы ӟеч улонмы понна. Ижевскысь пыӵал тӥрлык поттӥсьёс гинэ война мынон аръёсы сомында пыӵал лэсьтӥзы, со тырмысал быдэс дивизилы. Нимысьтыз ӟеч кылъёс вераны кулэ фронтовикъёслы, кудъёсыз тузонӟем шинельзэс воштӥзы милиция формаен, соос нюръяськоны кутскизы гыжкалъёсын, асьме калыклы юрттӥзы войнаен куашкатэм хозяйствоез ӝутыны, Родинамес кужмогес но юнгес карыны. Дыр уг жаля ожын но ужын тыршемъёсты, соослэн лыдзы пумен кулэсме но кулэсме. Соин ик асьмелы, вормисьёслэсь ужзэс азинтӥсьёслы, ялан сюлмаськыны кулэ соос сярысь, соослы дыраз юрттоно, бадӟым саклык висъяно. Гажано ветеранъёс но фронт мышкын тыршемъёс, республикаысьтымы Югдурез утёнъя министерстволэн коллегиезлэн куремезъя, озьы ик аслам нимыным, сюлмысьтым ӟечкыласько тӥледыз та дано нуналэн - Быдӟым Отечественной войнаын Вормонлы 55 ар тырмонэн. Сӥзисько тӥледлы юн тазалык, ӟеч мылкыд, азьланезлы юн оскон, асьтэлы но матысь адямиостылы вань ӟечсэ гинэ! Бадӟым дан но азинлык воинъёслы-вормисьёслы но фронт мышкын тыршемъёслы! Быдӟым Вормонэн тӥледыз, гажано эшъёс! Удмуртиысь югдурез утёнъя министр милициысь генерал-лейтенант Владимир Щербаков. Сак луэ! "Атас" пуроме! Туэ арлы нырысь кык толэзь куспын 305 пол тылпу потӥз. Отын 1 сюрс 750 манет коньдон ыштэмын, быриз 31 адями, пӧлысьтыз 3-ез - нылпиос. Тылпу потэмлэн мугез асьме бордысь гинэ потэ: отын тамак кыскемын, татын утюг я чайник кысытэк кельтэмын. Эшшо кышкытэз - пиналъёсмылэн ки улысьтызы тылӝу кенжытонъёсмес ум ватӥське. Тулыс-гужем вуэмен тылпу, потон учыръёс тросгес луо. Соин тылпуэн нюръяськисьёс та вакытэ асьмеды эшшо сакгес кариськыны куро. Ӝуам гуре кылем сэрегпумъёсты одно вуэн пазьгыса кельтоно. Медам кылле корка сигъёсын ӝуась арбериос, миськем дӥсез но куасьтыны отын уг яра. Лымы шунамъя, азбаръёсты, гидкуазез жуг-жаглэсь чылкытатоно. Котькуд улон юрт котырын вуэн бекче я огнетушитель луыны кулэ. Нош ма кароно, тылпу кенжиз ни ке? Нырысь ик кышкатсконо, огыр-бугыръяськоно ӧвӧл. Дорын котьку шедёзы тыл кысон арбериос: ведраос, одеялъёс но мукет. Со дыръя ик ӧсъёсты, укноосты пытсано, кенжем электроприборез кысыса, вуэн "пылатоно". Пуромем "горданен" ас кожады нюръяськыны кужымды уг ке тырмы, ӝоггес ӧте тылпуэн нюръяськисьёсты. Н.Феденко. Шахмат Визьлюкъёс ке огазьын Кужмоосыз шахматистъёс-ветеранъёс Удмуртиын нырысетӥ интые потон вылысь нюръяськизы. Ӵошатсконэ 40 мурт пыриськиз. 9 луоноез пӧлысь 7,5 очко люказы ожысь ветеран Владимир Иванов но 2 номеро ТЭЦ-ысь инженер Виталий Акименко. Нимаз коэффициентъёсты чакласа, чемпион ним сётэмын В. Ивановлы. Куинетӥ интые потӥз (7 очко) Владимир Федосеев. Нылкышноос пӧлын азьпала потӥз Ижевсклэн азьвыл чемпионкаез радиозаводысь инженер Тамара Евстратова. Ӝыны очколы солэсь бере кылиз Зинаида Иютина, Завьялово ёросысь Первомай школаысь дышетӥсь Любовь Созонова куинетӥ луиз. *** 50 егит нылъёс но пиос Ижевсклэн чемпионэз луон понна ӵошатскизы. 10 луоноез пӧлысь 8,5 очко люказ 30-тӥ школаын дышетскись Дмитрий Кочуров. Со турнирын нокинлы ӧз келя но спортъя мастере кандидатлэсь куронзэ быдэстӥз. Нылъёс пӧлын Ижевсклэн чемпионкаез нырысьсэ луиз 30 номеро школаысь ик 12 аресъем Анастасия Банникова. Кыксы но соос шахмат быгатонлыксэс 6 номеро споршколаын волято, кӧня ке арзэ ини быдэс Россиын ортчылӥсь ӵошатсконъёсы но пыриськыло. И. Вельтмандер. Вормизы удмуртъёс Театрлэн калык куспо нуналэзлы сӥзьыса, шаерысьтымы Мунё театрын чебер ӝыт ортчиз. Татын ик лэсьтэмын театръёсъя куатетӥ фестивальлы йылпумъянъёс. Тужгес устоосызлы сётэмын дано нимъёс но данъян грамотаос. Удмурт Элькунысь калык артисткаос луизы Драмая В. Г. Короленко нимо ӟуч кун театрысь актрисаос Татьяна Князева, Галина Аносова, Операя но балетъя кун театрысь актрисаос Вера Кузнецова, Татьяна Силаева, Удмурт Элькунысь дано артистка - Мунё театрысь актриса Алевтина Кравченко, Удмурт Элькунысь дано артистъёс - Операя но балетъя кун театрлэн оркестрысьтыз шудӥсьёс Анатолий Абалаков, Николай Морозов. Ӟеч актёр луэмзы понна, лауреат нимын пусъемын Драмая В. Г. Короленко нимо ӟуч кун театрысь артистъёс Александр Баров, Юрий Малашин, Операя но балетъя кун театрысь актриса Марина Кузнецова. Ӟеч режиссёр луэмез понна, лауреат ним озьы ик басьтӥз "Егит адями" театрлэн режиссёрез Евгений Столов. Удмуртъёс пӧлын фестивальлэн лауреатъёсыз луизы Драмая удмурт кун театрысь актриса Галина Владыкина, Мунё театрысь артист Александр Перевощиков, егитъёслэн "Иднакар" театрзы, солэн режиссёрез Ольга Александрова. Удмурт Элькунысь культурая удысысь дано ужась луиз фольклор кырӟанъя "Айкай" театрлэн директорез Стелла Кудрявцева. Фестивальын вормисьёсты, ӝытэ вань люкаськемъёсты лулысь-сюлмысь ӟечкылазы Удмурт Элькунысь Кун Кенешлэн Тӧроезлэн воштӥсез Удмурт Элькунысь Кун Кенешлэн депутатэз Наталья Харина но Удмурт Элькунысь культурая министр Николай Бессогонов. Театрлэн калык куспо нуналэзлы сӥзьыса ик радъямын вал актёръёслэн улон- вылонысьтызы, пӧртэм серемес учыръёсты возьматон. Аспӧртэмлыко ӵошатсконын вормизы Драмая удмурт кун театрысь актёръёс. Егитъёс Алексей Ложкин, Андрей Сергеев, Сергей Салтыков, Сергей Семенов та ӝытэ тужгес устоосыз вал. ВОРМОНЛЫ - 55 АР ВОЗЬЫТ БЫРЕМЪЁС АЗЬЫН Тани азьпалан бадӟым праздник - 9-тӥ Май. Сое пӧртэм сямен дунъяны кутскизы. Огшоры калык ветлоз асьме солдатъёсмылэн шайвылъёсазы, сяська тугокоос тыроз, улэп кылем ветеранъёсты ӟечкылалоз. Вылӥ кивалтӥсьёсмы но бере уз кыле - вералозы чебересь кылъёс, черкъёсын сюсь тыл но ӝуатозы. Вератэк уз кельтэ война вакытэ еврейёслэсь курадӟемзэс. Но воксё вунэтозы вераны одӥгез сярысь - фашизмен жугиськонын геройёс-комммунистъёс сярысь. Вормонэз матэктон понна улонзэс сётӥзы куинь миллионлэсь ятыр коммунистъёс. Ыбылэм партиен лыдъяло Францилэсь Компартизэ. Франциысь, Югославиысь, Италиысь но мукет странаосысь компартиос кивалтӥзы нацизмлы пумит нюръяськонэн. Гитлер но солэн матысь юрттӥсьёсыз меӵак шуылӥзы, Дуннеысь кыкетӥ война, пе, коммунизм идеологиез быдтон война. Но война йылпумъяськиз мукет ласянь. Коммунизм тӥяз фашизмлэсь сюрлызэ, но трос вирзэс кисьтоно но кужымзэс сётоно луизы коммунистъёс. Совето Союзысь геройёс пӧлын 65 процентэз комунистъёс. ВКП(б)-лэн радъёсыз пӧлысь 60 процентэз меӵак пыриськизы ожмаськонэ, но куинь миллионлэсь ятырез быризы Родинамы понна. Коммунистъёс котьку но фронтын азьветлӥсьёс, кичӧлтӥсьёс вал. Соин ик, вылды, уноез солдатъёсмы пӧсь оже, атакае мынон азязы заявлениосазы гожтылӥзы: "Бырыны шеди ке, лыдъялэ монэ коммунистэн". Ма бен вань на ай талэсь дуноез. Партилэн куронэз вал таӵе: "Коммунистъёс быро, нош тушмонлы уг сётско". Вань уно гинэ сыӵе ветеранъёс Шаркан районын но, кудъёсыз партие пыризы Быдӟым Отечественной войналэн фронтъёсаз. Тани соос пӧлысь куд-огез: Н.М.Шикалов, М.Ф.Булдаков, А.С.Вахрушев, П.С.Вахрушев, Н.Н.Олин, Г.Ф.Лопатин, Н.П.Шилохвостов, Б.А.Акулов но мукетъёсыз. Бен, таос пӧлысь тросэзлы уз ни кылды быдӟым праздинкез асьме пӧлын пусйыны. Но соос сярысь калык ноку но уз вунэты. Коммунистъёс ожмаськизы котькытын, котькыӵе условиосын. Тушмонэн киултэм музъем вылын, лушкем ужась райкомъёс, обкомъёс, партячейкаос кылдытылӥзы. Быдэс дуннеын коммунистъёслэсь батыр луэмзэс уг вунэто, данъяло, но со мукет странаосын. Нош Россиын вылӥ кивалтӥсьёсмы коммунистъёслэсь фашизмен ожмаськемзэс вераны уг ярато. Тани 1991-тӥ арын ик Ельцин Америкаысь Буш президентлы ушъяськыса вераз: коммунизм, пе, Россиын быдтэмын. Нош коммунистъёс Россиын воксё бырыны уг малпало. Тани берло Кун Думае бырйыку но нош ик нырысетӥ интые потӥзы, а вот Ельцинлы кошконо луиз отставкае. Солы дурбасьтӥсь газетъёс но Ельцинлэсь кивалтон вакытсэ меӵак шуизы ук: "Эпоха запоя и загула". Талэсь умой уд ни вера. Ма бен кивалтӥсьёслэсь буре ваемзэс витьыса ум улэ. Ми асьмеос но быгатом буре вайыны бырем солдатъёсмес, соослэсь подвигзэс. Но буре ваёнэн гинэ окмоз-а меда? Узгес, дыр. Улонзэс сётэм солдатъёсмы но та понна гинэ простить уз каре. Ведь вал Вормон, но табере ӧвӧл но кадь ни со. Воразы вормонмес калыклэсь, приватизировать каризы. Самой умойёсыз, батыръёсыз пиосмы войнаын быризы, нош пӧртэм гыжкалъёс ватскизы, витьыса улӥзы, власовской флагез но дасяса возиллям кулэ дыръяз поттыны, и вот табере соос йырзэс ӝутӥзы, сяськаясько, шумпото СССР-лэн куашкамезлы. Уж вылын быдэсъяло Гитлерлэсь малпанъёссэ: туж кужмо Совето Союз интые карта вылэ вӧлмизы ог дас вить пала выль государствоос. Россиысь калык арлы быдэ кулэсме одӥг миллионлы, странамы пӧрмытэмын колонилы, армимы но лябӟытэмын. Прибалтикаын но Украинаын асьме соладтъёслы пуктэм памятникъёсты куашкато, соос интые пуктыло обелискъёс "СС" дивизиын ожмаськемъёслы, бендеровецъёслы. Рейхстаг вылэ Вормон знамя ӝутэм солдатъёслэн Егоровлэн но Кантариялэн нимтулзы но Берлинлэн дано списокысьтызы ӵушылэмын. Со вакытэ ик Горбачев лыдъяське сӥё-дано немецен, кудӥз вань кужымзэ понӥз Совето Союзэз куашкатонэ. Со озьы ик "умой" ужъёсыз понна луиз Нобель премилэн лауреатэз. Но дыр вуоз: история но калык кыл кутозы со сьӧд ужъёссы понна. Солэсь уз кылды ватскыны шайгуын но. Коммунистъёс-фронтовикъёс война бырем бере но тэк ӧз пуке. Соку ик басьтӥськизы лэсьтӥськон ужъёс борды. Ӝутоно вал война дыръя куашкан калэ вуэм колхозъёсты. Кема дыр ӵоже кивалтӥзы колхозъёсын. Соос пӧлын вал К.И.Пашков, В.В.Чунарев, А.И.Иванов, Н.М.Шикалов, С.С.Титов, Н.Г.Надсонов, М.П.Курбатов, Я.П.Туданов, М.Е.Шибаев но мукетъёсыз. Уй но нунал калык пӧлын тыршизы партийной но советской уже кыскем фронтовикъёс М.Е.Прохоров, А.С.Вахрушев, С.С.Берсенев, М.М.Иванов, М.П.Перевозчиков, В.Н.Левийских, М.Ф.Булдаков, Л.С.Воронцов, В.И.Воронцов но мукетъёсыз. Таос трос дырзэс но кужымзэс сётӥзы калык пӧлын валэктон ужез умоятонлы, колхозъёсын первичной парторганизациос кылдытонлы. Витьтонэтӥ аръёсы тросаз колхозъёсын соос ӧй на вал. Улэп кылем коммунистъёс ужазы сельсовет борды кылдытэм территориальной парторганизациосын. Та вылӥ верам коммунистъёс пӧлысь тросэз улонысь вазь кошкизы. Война вакытэ сӧсырмем интыос но дырез лыдъятэк ужамзы тазалыксэс лябомытӥзы, но калык пӧлы соос чебер пытьы кельтӥзы. Кызьы бен ым пырыны кулэ коммунистъёслэсь война дыре но бератаз таӵе бадӟым ужзэс сьӧдмаса гинэ вераны. А.ВАХРУШЕВ. Шаркан черкогурт. Удмуртия ХХ дауре Удмурт Республикаысь кун архивын ужасьёс тодматскыны дэмлало берло 100 ар ӵоже шаерамы ортчем учыръёсын. Архивысь документъёсты эскерыса-чакласа, отысь материалъёсты сӥсъяса но кулэезъя радъяса, газет лыдӟисьёслы соос тодазы вайытозы яке нырысьсэ тодматозы та даурысь тужгес лэчыт иворъёсын. ЪЪ даурлэн кутсконаз Удмуртия пыре вал Вятка губерние. Шаермы соку 4 уездлы люкиськиз: Глазов но Сарапул, Елабуга но Малмыж уездъёслэн ог люкетсы (губерние 11 уезд пыре вал). Губернилэн шоркарез Вятка (али Киров город) вал улослэн культурая центрез но кивалтон ёзъёслэн интызы. Город пыр ортчись чугун сюрес герӟалляз Сибирез Москваен, Петербурген, Казанен. Вятка кузя Волга но Кам шур вӧзысь городъёсы келяллязы нянь, нюлэс но мукет вузъёс. 1897-тӥ арын ортчем переписья, губерниын улӥз 3030831 адями. Со пӧлысь 77 процентэз вал ӟучъёс, 12 процентэз - удмуртъёс, 5 процентэз - поръёс, 4-эз - бигеръёс, 2-эз - пермякъёс, башкиръёс но мукет калыкъёс. 1902-тӥ арын одӥгетӥ январьлы городъёсын но посёлокъёсын улӥз 5,67 процент калык, гуртъёсын - 94,33 процент. Вылӥ верам 4 уезд пӧлысь тужгес трос калык улэ вал Сарапул котырын - 386830 адями (21395 мурт Сарапул городаз). Глазов уездын - 370533 мурт (Глазоваз - 3415), Елабуга уездын - 232423 мурт (городаз - 9776), Малмыж уездын - 280538 (городаз - 3508). Губерниысь куд-ог промышленной центръёс улӥсь калыкезъя ортчылӥзы уезд городэз сяна, ассэ Вяткаез но. Озьы губернилэн шоркараз даур кутскон азьын улӥз 24782 адями, нош Иж заводын - 41097 мурт, Вотка заводын - 11166 мурт. 1901-тӥ ар 1900-тӥ-1903-тӥ аръёсы Россиысь экономика секыт югдуре шедиз. Кризис шуон зарезьысь тулкымъёс сямен страналэн вань сэрегъёсаз пальккиськиз. Ижевскысь предприятиосын продукция сётон 6 пол кулэсмиз. Сарапулын ку посон но пыдкутчан вурон 3 пол пичияз. Вотка заводын но ужъёс лазегазы. Пияла поттон предприятиосын производство одӥг куиньмослы кулэсмиз. Кудӟытӥсь юонъёсын вырись предприятиослы казна юрттӥз ке но, продукцизы вить миллионысен куинёзь лэзиськиз. Шуккетлэсь ӧз мозме нимаз ужась адямиос но, уноез чылкак гольык кылизы. Экономикалэн шальтрамез лэчытомытӥз огъя улон-вылонэз. 1901-тӥ арын август толэзе Вотка заводын кылдэ социал-демократъёслэн нырысетӥ кружоксы. Сое кылдытӥсьёс кусып тупатӥзы рабочийёсын, ортчытъязы кенешонъёс, тодматскылӥзы лыдӟыны лэзьымтэ книгаосын. Кружоклэн ужаз мылысь-кыдысь пыриськизы Н. В. Лисин, В. Ф. Рогозин, Г. Л. Колесников, Г. Кривоногов, Белокрылов, А. А. Барышников, Ф. П. Пестерев, А. И. Румянцев, А. Ф. Щегольков. 1901-тӥ арын Глазове ссылкае келямъёс кие лушкемен вуиз "Искра" газетлэн номерез. Ма ортчиз та аре: Апрель толэзе Глазовын ужаны кутскиз пияла поттон завод. Мае Иж заводын сӥё-дано ужрад ортчиз мумы-бубыостэк кылем но костаськись нылпиослы из юрт пуктыны кутскон пумысен. 18-тӥ мае Сарапул уездэ пырись Сосновка но Шаркан волостьёсы шугадӟон вуиз: йӧзор уно узьымез быдтӥз, 43 сюрс манетлы изъян ваиз. Июнь толэзе Калыкез дышетонъя министерство Петр Великий Император нимо премия (500 манет) сётыны кариськиз Сарапулысь дышетӥсьлы Василий Фабрицневлы француз кылъя грамматика но методика гожтэмез понна. 1-тӥ июльысен Вятской губерниын кудӟытӥсь юонъёсын вузкаронэз казна ас кияз басьтӥз. Вяткаын сӥё-дано вӧсязы аракы возён кун складэз. Таӵе ик складъёс усьтэмын вал Глазовын, Сарапулын, Елабугаын, Уржумын, Яранскын. Августэ "Вятские губернские ведомости" газет ивортӥз: "Кам шур лазегомемен бадӟымесь пароходъёслэн уянзылы шуг-секытъёс кылдӥзы. Сентябре Иж заводын Святой Архангел Михаил нимо храм йылэ кирос ӝутэмын. Та вӧсяськон юрт пуктэмын Ижысь Мастеровойёслэн ас мылкыдзыя коньдон люкаменызы (1-тӥ январьлы 150 сюрс манет люкаськиз). Октябре Сарапул уездысь Каракулино черкогуртын усьтӥськиз сазь улонъя комитетлэн лыдӟиськон юртэз. 11-тӥ октябре Елабуга городлэн шайвылаз сӥё-дано усьтэмын тодмо "кавалеристдевицалы" Надежда Дурова-Александровалы памятник. Декабре Сарапулысь мещанин С. В. Злыгостев 3000 манет уксёзэ сётӥз, йӧнатыны луонтэм висисьёслы приют усьтон понна. Е. Горбушина, УР-ысь Кун архивлэн архивен отделэныз кивалтӥсь. Иж завод даурлэн кутсконаз. Ялон Удмурт Республикаысь почта кусыпъёсъя управление почталэн ужез сярысь устоезлы материаллы конкурс ялэ. Конкурс ортчытӥське туэ 1-тӥ февральысен 1-тӥ декабрёзь. Кутӥсько республиканской газетъёсын но журналъёсын, радиоын но телевидениын потам материалъёс. Почтаослэн ужзылы сӥзем устоосыз материалъёс коньдон премиен пусъемын луозы. 1-тӥ премия - 2000 манет; 2-тӥ премия - 1500 манет; 3-тӥ премия - 1000 манет. Потэм ужъёсты УФПС ар ӵоже кутэ. Пусъёно нимтулдэс, материалдылэсь ку но кытын потэмзэ. Премиос сӥё-дано сётэмын луозы 20-тӥ декабре - УФПС-лэн но журналистъёслэн кенешазы. Ужъёстэс эскероз нимысьтыз жюри: Ю. М. Кайгородов - УФПС-лэн кивалтӥсез, С. Ф. Васильев - Печатья министр но почта кусыпъёсъя управлениын мукет ужасьёс. Возьмаськом ужъёстэс. 12-тӥзэ люкаськылӥзы Алигес ортчиз фермеръёслэн 12-тӥез конференцизы. Отчы ветлӥз 117 делегат. Озьы ик солэн ужаз пыриськизы ёросъёсысь гурт хозяйствоя управлениослэн кивалтӥсьёссы, республикаысьтымы гурт удысъя но сиён-юон поттонъя министр Петр Першин, Кун Кенешысь агропромышленность удысъя, музъем кусыпъёсъя но инкуазь узырлыкъёсты кутонъя ялан ужась комиссилэн тӧроезлэн воштӥсез Аркадий Малков, мукет кивалтӥсьёс. Ар ӵоже ужамзылы йылпумъянъёс лэсьтӥз Удмурт Республикаысь крестьян (фермер) хозяйствоослэн но кооперативъёслэн ассоциацизылэн кивалтӥсез Валерий Усков. Улӥын сётӥськом конференциын сэрттэм-пертчем ужпумъёс сярысь материалъёсты. Кинлэн дуныз ичигес? Йылпумъяськиз нылпи садъёслы, школа-интернатъёслы, санаторийёслы сиён-юон ӵектӥсь предприятиос куспын ялэм конкурс. Ӵошатсконын кужымзэ эскерыны мылкыд кариз 36 ӵектӥськись, со пӧлысь 32-ез пыриськиз отчы. Тужгес трос люкаськизы сӥль, нянь, пызь, кеньыр, макарон поттӥсьёс. Пӧлысьтызы ӟечъёссэ быръён мыр-мыр ортчиз. Сиён-юонъёслэн дунъёссы конвертъёсы пытсаса ӵектӥськизы. Озьы луонлык кылдӥз тужгес дунтэмзэ но ӟечлыкозэ продукциез сӥлы карыны. Конкурс ортчытыса, огъя 5 миллион манет шыръямын. Вормисьёс пӧлы 22 предприятие шедиз. Соос пӧлы шедизы Воткинскысь тылобурдо фабрика, Сарапулысь но Уваысь мясокомбинатъёс, Ижысь 1 но 2 номеро нянь пыжон заводъёс, "Аспэк", "Удмуртия" АО, Урал-сервис но мукетъёсыз. Азьланьын та выллем конкурсъёс ялэмын луозы дӥсь но канцтовар ӵектӥсьёс куспын. Э.ВАСИЛЬЕВА. ЭХ, СТУДЕНТ АРЪЁС! Кисыяд тӧл шула ке... Студентъёс понна тужгес адӟемпотостэм урок физкультура луэ. Ма но уг малпало соос отчы ветлонтэм понна! Кыӵе но кӧшкемыт висёнъёс соосты ог нуналскын уг куасалто! Таизлэн кӧтыз висе, соиз пиньыныз курадӟе, сэргын пукисез пыдзэ бералтэм... Егитъёслэсь кескичъяськемзэс эмъясьёс но шӧдо. Соин зэмос курадӟисезлы но соос куддыр уг оско. Озьы "азьтэмез" дораз шутэтске ке, висисез ёзвиоссэ кыдатэ. Ма, секыт югдурысь потыны сюрес котьку но шедьтыны луоно. "Визьмоосыз" дышетӥсь син улэ урок кутскыкулы вутско ке - ярам! Собере чиптэм-чаптэм ышо. Сотэк но быдэстоно ужъёс трос: кельтэм лекциез гожтоно, дорын сузяськоно, кытысь ке коньдон поттон сярысь малпаськоно, кӧт но сюма... Ма карод, сыӵе ини студентлэн улонэз. Нуналаз одӥг пол сиськид ке - тырмоз! Со понна тып-тып кӧтыд тыре. ... Иське, физкультурая вуоно уроке потонтэм вылысь, муг но утчаны кулэ уз луы: пуштӥрлыкъёс маке шугъяськытыны ӧдъязы. Юнме уг шуо, дыр, та шулдыр вакытэ ик начарме тазалык. Но тазалыкед ӧз ке луы, кисыяд тӧл но шулалоз, йырад кеньыред но шеромоз. О.НИКТИНА, Удмурт кун университетын дышетскись. Кисыяз - героин Россия Федерациысь ФСБ-лэн Удмурт Республикая управленияз ужасьёс Октябрь РОВД-ын тыршисьёсын ӵош ӝегатӥзы Омскысь наркокурьерез. Сибирьысь вуэм ӧтьымтэ куно улыны интыяськем Ижысь шор площадьысь гостиницае. Ӵапак отысен ик сое кырмизы. Куртка кисыысьтыз шедьтӥзы 500 грамм пала героин. Нош Омске та усыкмытӥсь сурет вуэм Таджикистанысь. Озьыен, шаерамы наркотик вуттӥсь эшшо одӥгез сюрес пытсамын. Та учыръя ӝутэмын уголовной уж, мынэ следствие. Россия Федерациысь ФСБ-лэн Удмурт Республикая пресс-службаез. Коньдонэд вань - дышетскы Мукет вылӥ дышетон заведениос сямен ик Удмурт кун университетысь удмурт филологияя факультет но дышетон амалъёссэ выльдэ. Туала вакытэ паськыт вӧлме дун тырыса дышетскон. Огласянь со умой но, вань мылкыд карисьёсты угось дышетыны луонлыкъёс ӧвӧл. Мукет ласянь, амалъёс усьтӥсько ужез уретытэк (заочно) выль специальность басьтыны. Педучилищеосты йылпумъямъёс но средне-специальной образованиен дышетскисьёс куинь ар но куать толэзь куспын басьтыны быгатозы филологлэсь специальностьсэ, луозы удмурт кылъя но литературая, ӟуч кылъя но литературая, кунгож кылъя дышетӥсьёс. Сётӥськоз вылӥ образование басьтэм сярысь диплом. Удмурт филологияя факультет социальной психологияя факультетэн уртче озьы ик басьтӥськиз логопедъёсты дасян борды. Куинь ар дышетскыса, мылкыд карисьёс басьтозы кыкетӥ вылӥ образование, луозы удмурт но ӟуч кылэз ӟеч тодӥсь логопедъёс. Занятиос кутскозы, группаос люкаськем бере. Л. Малых. Комиссия ужа Тулыс бусы ужъёс матэктэмъя, Можга ёросысь хозяйствоосын техникалэсь дась луэмзэ эскеро. Та уж мынэ ни март толэзьысен ик. Гурт ужъёсъя управлениын кылдытэм комиссие пыро татысь валтӥсь инженер С.М.Шишкин, технадзоръя удысэн кивалтӥсь Н.В.Зорин, шудтэм учыръёсты палэнтонъя инженер Н.В.Сорокин. Техника бордын сӥзьылысен ик кутскыса рос-прос ужало "Красный Октябрь" колхозын. 30 трактор пӧлысь 29-сэ комиссия пал кыл вератэк кутӥз. Выль сортъёсты эскеронъя станциын (азьвыл "Гигант" колхоз) музъем ужлэсь- агротехникалэсь вань куронъёссэ санэ басьтыны тыршо. Соин ик гырон-кизён, ю куасьтон-шертон техниказы умой тупатъямын. Хозяйствоын вань кидыссы 1-тӥ но 2-тӥ классозь вуттэмын. Туэ "Агромак" йыдызэс но "Ирина" чабейзэс вӧлмытыны малпало. Та выль сортъёсты басьтыны мылкыд карисьёс туж уно. А.ЯКОВЛЕВА. Удмурт Элькун Кивалтэтлэн Распоряжениез 1. Удмурт Элькун Кивалтэтлэсь 1999-тӥ арын 16-тӥ декабре кутэм 466-р номеро распоряженизэ кужыме кельтоно 2000-тӥ арын 1-тӥ июлёзь. 2. Удмурт Элькунысь Тазалыкез утёнъя министерстволы, Югдурез утёнъя министерстволы, Вузкаронъя но бытовой юрттэт сётонъя министерстволы 2000-тӥ арын 1- тӥ августозь Удмурт Элькунлэн Кивалтэтэзлы ивортоно улӥ ӟечлыко аракыен вузкаронэз алонъя кутэм ужрадъёслэн йылпумъянъёссы, адямиослэн аракыен усыкмыса кулон учыръёссылэн мугзы сярысь. 3. Та распоряженилэсь быдэсъяськемзэ эскероз Элькун Кивалтэтлэн Тӧроезлэн воштӥсез С. В. Чикуров. Удмурт Элькун Кивалтэтлэн Тӧроез Н. А. Ганза. 2000-тӥ арын 20-тӥ мартэ, Ижевск город. � 122-р. "Кенеш" журналлэн выль номерез Мед жингыртоз даур кырӟан! Южтолэзь номермес усьтӥськом "Утчасько сюресме..." бадӟым кылбур сузьетэн. Мар тужгес но паймымонэз? Та чуръёслэн авторзы, Юлия Разина, "Кенеш" журналэз лыдӟисьёслы татчыозь тодмо ӧй вал, нырысетӥ кылбуръёсыз дас кык арес дыръяз ик вордскиллям ни ке но. 1995-тӥ арозь, ачиз верамъя, ӟуч кылын гинэ гожъяськем. Нош быдэсак сузьетсэ лыдӟоно ке, сыӵе малпан уг но вордскылы - адями вань улытозяз чылкыт, чебер удмурт кылын гожъяськем, малпалод. Кылбуръёсыныз сузьетсэ бордазы уката кыскись каро Юлиялэн аслаз ик суредъёсыз. Яратыса лыдӟиды, луоз, тодмо прозаиклэсь Кирилл Ломагинлэсь нырысетӥ кык номерысьтымы "Вир" повестьсэ. Отын возьматэм геройёсын люкиськемды потоз оло уз, но гожтӥсезлэн произведенизэ таин йылпумъямез потэм. "Югдуръёс но ужпумъёс" сэреге интыям материал тодматэ пӧртэм удысъёсын ужась но дышетскись адямиослэн матэктӥсь быръёнъёс, Чечняын ожъёс пумысен малпанъёсынызы. Тӥ но, гажано эшъёс, улонысь лэчыт ужпумъёсъя мылкыдъёстэс, гожтэтъёсады усьтыса, редакцие лэзьыны быгатӥськоды. "...Сюлмыз сабырскем бере, кияз карандаш кутӥз, укоё сандык вӧзы пыдесъяськиз но вылкымет пушказ маке-маке гожтӥз. Максим сярысь малпаз на: "Ярам ини, пуныен коӵыш музэн ӧм люкиське..." - тазьы йылпумъяське Николай Никифоровлэн "Укоё сандык" веросэз. Малпаськом: со лыдӟисьёсмылы озьы ик яралоз. Туэ, тулыспал толэзе, журналамы выль сэрег усьтӥмы - "Кенешлы - 75". Удмурт калыклэн яратоно изданиез вуоно арын та юбилеез пусйыны дасяське бере, татын ӝутэм вераськонъёс сӥземын луозы кызьы ке кемалась ортчемезлы, озьы ик - туалаезлы. "Шулдырты, даур кырӟан!" - таӵе нимын поттыны дасяськом удмурт кырӟанъёсын таиз ар понна выль сузьетмес. Кызьы малпаськоды, малы даур кылэз отчы пыртӥськом? Вакчияк ке, тазьы валэктыны луысал: кылем даурысь тужгес шулдыръёссэ, тужгес ӵем чузъяськылӥсьёссэ, жингыртӥсьёссэ, данакезлы яранооссэ кырӟанъёсты та сузьетлэн "липет" улаз пыртомы. Выль бичетмес туж но туж жингыртӥсь карыны юрттоды тӥ но, котькудды отчы кыӵе кырӟанъёсты интыян-пыртон пумысен малпанъёстэс вераса. Эшшо маиныз пӧртэмгес луоз со номер, ку потоз, кин басьтыны быгатоз - ваньмыз сярысь гожтэмын журналмылэн 47-тӥ бамаз. "Удмуртлык тугоко" сэрегын туала интеллигенцилэн улонын интыез сярысь вераське тодосчи Георгий Шкляев. "Кенеш" журналлэн выль номерез узыр пӧртэм арлыдо лыдӟисьёс понна дасям материалъёсыныз. Таиз ар понна дасям куинетӥ номермы лыдӟисез доры вуоз матысь нуналъёсы. Со сярысь юри тодытэммы потӥз. Малы ке шуоно, шаерысьтымы куд-ог ёросъёсын, ми понна валантэм мугъёсын сэрен, журналэз ӝегатон учыръёс пумиськыло. Сыӵе дыръя жингыртыны быгатӥськоды ёросысьтыды почта ёзэ яке - "Кенеш" журналлэн редакцияз. Петр СЕРГЕЕВ, журналлэн валтӥсь редакторезлэн воштӥсез. Шаркан ёросысь Кельдыш гуртысь укмыс классъем школа пинал ай, 1993-тӥ арысен гинэ усьтӥськиз. Дышетӥсьёс но татын егитэсь, уж борды туж мыло-кыдо басьтӥськизы. Шуг- секытъёссы но бен тырмыт гинэ вал. Методической пособиос ӧвӧл, книгаос уг тырмо. Котькуд дышетӥсь ачиз сюлмаськиз-выриз ни аслаз предметэз пумысен. Кенешо Кельдышысь дышетӥсьёс. Туспуктэмез В.Беломорскихлэн. Кырӟанъёсын тырмем тулыс Быдӟым Вормонлы витьтон вить ар тырмонэн валче, шаерамы ортчыло турлы тунсыко ужрадъёс. 5-тӥ-9-тӥ апреле Эгралан, Можгалан но Глазкарын луозы нылпи хоръёслэн, фольклор коллективъёслэн, покчи солистъёслэн-вокалистъёслэн "Зарни италмас" нимо фестивальзыя конкурсъёс. Быдӟым Вормонлы витьтон вить ар тырмонэн валче та театръёслэсь ужъёссэс учкон луоз Пичи Пурга ёросысь Вуж Монья гуртын. Ужрадъёс ортчозы 8-тӥ-9-тӥ апреле. 9-тӥ апреле ӝытазе ньыль часын Драмая удмурт кун театрын ортчоз шаермылы но атай музъеммылы сӥзем кырӟанъёсъя конкурслэн лауреатъёсЫзлэн но дипломантъёсызлэн концертсы. 4-тӥ, 5-тӥ, 6-тӥ апреле ӝытазе куать часын Драмая удмурт кун театрын нырысьсэ возьМатӥськоз "Айна" спектакль. КылдытэМын, Игнатий Гавриловлэн "Аннок" драмаезлэсь адӟем карыса. Гожтӥсьёсыз - шаерысьтымы тодмо кылбурчи Татьяна Чернова но Драмая удмурт кун театрысь режиссёр Василий Ушаков. 8-тӥ апреле "Аксион" культура дворецын - "Студентъёслэн тулыссы" нимо фестивальын вормисьёслэн концертсы. А.АПАЕВА. Яратон но тунаськон Кызьы ивортэ Тулаысь "Молодой коммунар" газет, та городысь "Лас-Вегас" казино "Яратон уй" шулдыръяськон ортчытӥз. Со сӥземын вуоно даурын нырысетӥ нылпи вордсконлы. Малпанэз улонэ пыӵатон вылысь, Тулаысь загс пыр ӧтемын вал куинь пар кузпалъёс. Ужрадэ пыриськизы специалистъёс но: нылпи ваён юртлэн валтӥсь врачез Наталья Власова но семья кылдытонэз чакланъя центрлэн кивалтӥсез Гулия Хадарцева. Соос лыдъямъя, 1-тӥ январе пинал мед вордскоз шуыса, со шедьыны кулэ 26-тӥ март но 7-тӥ апрель вискын. Улмо улмопулэсь... Таӵезэ син азе ик пуктыны шуг. Чаклалэ ай асьтэос. Егит кузпалъёс малпало гинэ ай вуоно нылпизы сярысь, нош эмчиос (врачъёс) тодо ни, дыраз-а со вордӥськоз, маин висёз но... таиз ини чылкак абдрамон, кыӵе со дышетскоз. Малпаськоды, та пӧян- маскаръяськон? Чик но ӧвӧл. Таӵе эскерон ужен 25 ар ӵоже ни выре цитохимияя но диагностикая лабортаорилэн кивалтӥсез профессор Р.П.Нарциссов. Та удысъя со нимысьтыз программа кылдытӥз, гожтэ "Труд" газет. Нылпи вае... воргорон? "Джуниор" кинофильмын из гурезьлы укшась Арнольд Шварценеггер секыт югдуре шеде но... нылпи вае. Сент-Джож (Ньюфаундленд) университетысь эскеронъёс возьмато, киноысь юри малпам учырлэн ог люкет зэмлыкез но вань шуыса. Татысь тодосчиос пусъё нылкышноос секытэн дыръя воргоронъёссылэсь воштӥськемзэс. Ньюфаундленд госпитальын эскерем воргоронъёслэн виразы тестостерон гормонзы (пиосмурт гормон) вошъяськылӥз, кышнооссылэн кӧтсы будэмен но нылпи ваемен валче. Паймоно кадь, но пиосъёслэн пролактин (нылкышно) гормонзы но йылылӥз. Басьтэмын компьютерысь Интернет ёз пыр. УДМУРТИЯ ХХ ДАУРЕ 1903-тӥ ар 1900-тӥ-1903-тӥ аръёсы ортчем промышленной кризис но гуртын сиёнлы ёрмон эшшо но уродмытӥзы калыклэсь сотэк но секыт улонзэ. 1903-тӥ ар рекорд пуктӥз ужез уретонъя но Уралысь отчы пыриськем рабочийёслэн лыдзыя. Та аре Сарапулын кылдэ РСДРП-лэн Кам котырысь люкетэз. Глазовын политссыльнойёс В.С.Бубнов, С.А.Домрачев но В.А.Кожевников ас котыразы социал-демократ учкон- малпанъёсын адямиосыз люкало. - Сарапул уездысь Бадӟым Норья черкогуртысь кенеше люкаськемъёс мылкыдзэс веразы кык классъем воргорон школа усьтон пумысен. - Мартэ Мултанысь покчи ёзо калык училищелы, Государь Императорлэн лэземезъя, "николаевский" ним сётэмын. - 15-тӥ июле Глазов уездысь земской управа В.Г.Короленколы телеграмма ыстӥз, сое 50 аресэныз ӟечкыласа. - Сарапул уездысь Пичи Пурга селоын улӥсьёс Алексей Островскийлэн пьесаезъя нырысьсэ спектакль пуктӥзы. - 10-тӥ декабре Вотка заводын туж бадӟым тылпу потӥз. Кенжиз 70 сюрс пудъем бакъёсысь му вӧй. Ӝуазы кӧня ке ужан юртъёс. Изъянмиз 300 сюрс манет тыр ваньбур. Тыл пушкын 15 адями быриз. Е.ГОРБУШИНА, УР-ысь Кун архивлэн отделэныз кивалтӥсь. Ми яратӥськом кармес Лымы шунамъя, урамъёсын толбыт люкаськем жуг-жаг кыре-буре потэ. Сое утялтон вылысь, городысь администрация 3-тӥ апрельысен 30-тӥ апрелёзь месячник ялӥз, нош 22-тӥ апреле - огъя субботник. Тол ӵоже урамъёсы 33 сюрс 5 тонна сылал-песок кисьтэмын - сое ваньзэ сузяно. Сюресъёсты тупатъяны-выльдыны куазь узгес сёты на, но ӝоген та уж борды но басьтӥськоно. Вераны кулэ, сӥзьыл вань сюресъёс тупатъямын вал. Котькуд предприятие кыл кутоз ас котыраз чылкытлык понна, котькуд квартира возись - улон юрт котыраз. Месячниклэсь кызьы ортчемзэ чакласа возёз нимысьтыз кылдытэм штаб. Э. Васильева. ЭХ, УЛОН Ми лябесь ӧвӧл ни! Тросэзлэн пиослэн армие мынэмзы уг поты. Ма, валамон малыез но. Котькытын дедовщина, эшшо ке "пӧсь интые" келялозы. Но куд-ог нылъёс пӧлын вань паймытъясьёсыз. Соос уйвӧтъёсазы адӟо армие кошкемзэс. Марина тодмоелэн но сюлэмыз кыске автоматъёс борды, бызьылыны, нюръяськыны... - Серем гинэ потэ, кышкась, ляб пиосты учкыса, - ӝожоме Марина. - Мон ачим служить карыны мынысал. Анай-атае ӧз лэзьы. Мар со, пе, сыӵе луоз. Аслэсьтыд тазалыктэ гинэ ыштод, шуизы. Кылзӥськоно луиз соослэсь. Мукетыз тодмое Катя вера: - Школаме йылпумъяса малпасько военной училищее дышетскыны пырыны. Адӟом: пӧрмоз- а, уз-а. Тыршо. Туж синмаськыса учкисько солдат дӥсьёс шоры. Соосын йыг-йыг, кышкасьтэм адямиос дӥсясько кадь потэ. Нылъёслэсь верамзэс кылзыса малпасько: югдур воштӥське, лэся. Туала дыдыослы уг тупало ни "тӥ лябесь" шуонъёс. Ваньмыз со вал ЪВИИИ-ЪИЪ дауръёсы. Нош туннэ? Туннэ соос туж сэзесь, чырткемесь. Ма карод - улон сыӵе. Уг учкы со, пиосмурт-а тон яке нылкышно-а - кужмо кариськыны косэ. Кин тодэ, оло, азьланьын пиос интые нылъёс армие кошкыны ӧдъялозы, Родинамес утёно луозы. О.НИКИТИНА, Удмурт кун университетысь студентка. Удмурт Элькунысь Правительстволэн "Пичи предприятиослэн но нимаз ужбергатӥсьёслэн инвестицияя проектъёссылы конкурс ортчытыса лизинг амалэн коньдон висъян сярысь" положениез юнматон сярысь Удмурт Элькун Кивалтэтлэн Постановлениез "Удмурт Элькунын пичи ужбергатонлы кун ласянь юрттон но сое азинтон сярысь" Удмурт Элькунлэн Законэзлэсь 43-тӥ ёзэтысьтыз 4-тӥ абзацсэ, "2000-тӥ арлы элькунлэн бюджетэз сярысь" Удмурт Элькунлэн Законэзлэсь 53-тӥ ёзэтсэ лыдэ басьтыса но пичи ужбергатон удысын инвестицияя ужез азинтон вылысь, Удмурт Элькун Кивалтэт пуктэ: 1. Юнматоно "Пичи ужбергатонъя субъектъёслэн инвестицияя проектъёссылы конкурс ортчытыса лизинг амалэн коньдон висъян сярысь". 2. Пичи ужбергатонъя субъектъёслэн инвестицияя проектъёссылы лизинг амалэн коньдон висъян вылысь конкурс ортчытонъя комиссие ӵектэм муртъёсты юнматоно. 3. Пичи ужбергатонъя суъектъёс понна лизинг амалэн инвестицияя ужез радъяны осконо Пичи ужбергатонлы юрттонъя удмурт кун ваньбуретлы (фонд) но усьтэм амалэн ужась "Инвестициосъя но лизингъя агентство" акционер огазеяськонлы. 4. "2000-тӥ арлы элькунлэн бюджетэз сярысь" Удмурт Элькунлэн Законэзлэсь 53-тӥ ёзэтсэ лыдэ басьтыса, та ужез радъянлы элькун бюджетлэн доходъя люкетэзлэсь уногес люкаськем коньдон чотын 20000 сюрс манет висъяно. 5. Удмурт Элькунысь Коньдон ужпумъёсъя министерствоез, "2000-тӥ арлы элькунлэн бюджетэз сярысь" Удмурт Элькунлэн Законэзлэн 43-тӥ ёзэтысьтыз 4-тӥ абзацез вылэ пыкиськыса, Пичи ужбергатонлы юрттонъя удмурт кун фондлы но "Инвестициосъя но лизингъя агентство" ОАО-лы пунэмен 3 арлы быдэн 10000 манет коньдон висъяны косоно, Россия Федерациысь Центральной банклэн рефинансированилы юнматэм ставкаезлэсь 1/10 процентсэ тырон вылысь. 6. Та постановленилэсь быдэсъяськемзэ эскероз Удмурт Элькун Кивалтэтлэн Тӧроезлэн воштӥсез С. В. Чикуров. 7. Постановление кужымме пыре 2000-тӥ арын 1-тӥ апрельысен. Сое печатлано иворъёсты вӧлмытон ёзъёсын. Удмурт Элькун Кивалтэтлэн Тӧроез Н. А. Ганза. 2000-тӥ арын 20-тӥ мартэ, Ижевск город. � 296. Нокинлы кулэ ӧвӧл Та дыре Алнаш ёросын 198 фермер (крестьян) хозяйство лыдъяське. Милемлы сётэмын 1869 гектар музъем, районъя со 3 процентэз луэ. Вань 24 автомобильмы, 52 трактормы, 12 комбайнмы. Мынам вераме потэ вал фермеръёсты дасян но дышетон ужпум сярысь. Ай 1991-тӥ арын Правительстволэн постановлениезъя шаерысьтымы ньыляз ёросъёсын - Алнашын, Воткинскын, Завьялын но Сарапулын - шор ёзо школаосты кулэ вал гурт удыслы специалистъёсты дасянъя школа-колледжъёслы пӧрмытыны. Алнашысь школаын но со ужаны кутскиз. Со понна висъяськиз нимысьтыз коньдон, техника, сётэмын 80 гектар музъем. Ортчиз ини 9 ар. Но отысь одӥг фермер но ӧз поты на. Фермеръёслэн классазы куто самой усто дышетскисьёсты. Школа бере соос дышетскыны пыро пӧртэм вузъёсы, нош гурт удысъя академие уг мыно. Малы со кулэ? Устоесь фермеръёс потыны кулэ вал кадь Асаново совхоз-техникумысь. Зэм, отын кибашлы специалистъёсты дасяны быгато. Но отын дышетскемъёс но уж шедьтыны уг быгато. Тани туэ 15-тӥ мартлы районамы ужтэк кылемъёслэн центразы сылэ вал 40 специалист. Пӧлазы 20 агроном, 14 зоотехник но 6 механик. Можга ёросын озьы ик уж возьмало 25 егитъёс. Озьыен, дышетскем адямиос нокинлы кулэ ӧвӧл. Но ведь та адямиос зэмос фермеръёс луыны быгатысалзы. К.БОБРОВ, Алнаш ёросысь "Италмас" крестьян хозяйстволэн кивалтӥсез. Маин ми пӧртэмесь? Милям "Руно" огазеяськонамы пыре 15 крестьян хозяйство. Гыроно-кизёно музъеммы 328 гектар, арендае басьтэмын на 42-ез. Озьы ик вордӥськом пудо но. Но тужгес бадӟым саклык висъяськом етӥнлы. Со етӥнлэсь куро но етӥн кидыслэсь вӧй но олифа поттон. Туж пайдаё удыс та. Кылем арын одӥг толэзьскын гинэ етӥн вӧез вузаса 7 сюрс манет пайда басьтэмын. Вӧзаз ик кыле на солэн кылем-мылемез - кыӵез (жмых), со пудолы туж пайдаё сиён луэ. Но кылем арын, куазь кӧс улэмен, етӥн кидыс басьтэммы ӧз луы. Соин ик цехмы та вакытэ тэк сылэ. Вераны кулэ: етӥн кидыслы дунъёс сярысь. Республикамылэн палэназ со копейкаосын кошке. Етӥн кидыс дасянъя станциос, кун предприятиос сое килозэ 3-5 манетэн басьто но милемлы 10-15 манетэн ӵекто. Сыӵе дунъёс бадӟым могӟет пукто. 1998-тӥ арын етӥн будэтонъя ми быдэс Россиын рекорд пуктӥм. Мертчанэн вераса, гектарысьтыз 9,74 центнер. Туэ республикаысьтымы етӥн будэтӥсьёслэн Кезын ортчем совещаниязы милемлы сётӥзы "Россилэн етӥнэз" ярмаркалэсь дипломзэ. Дипломзэ бен сётӥзы, нош 1998-тӥ арын вузам етӥн мертчанмы понна Россилэн бюджетысьтыз 60200 манет дотация татчыозь ӧз на вуы. Со аре ик вузам етӥн куро понна заводысь басьтэмын ӧвӧл на 13 сюрс манет. Юан кылдэ: кулэ меда ужаны етӥнэн, со тыныд изъян гинэ вае ке? 1998-тӥ арын ик вань кужыммес огазеяса басьтӥм вал ӟеч выжы пудо. Татын но ӧз удалты. Ӟеч выжы пудо басьтэм понна, Россия Федерацилэн бюджетысь 4,7 сюрс манет дотация нырултӥмы "лобӟиз". Ёрос бюджетлэн но милемлы 74 сюрс манет тыронэз вань. Кылем арын кӧс гужеме бырем юос понна Дэбес ёросысь фермеръёслы но колхозъёслы ог 400 сюрс манет коньдонэн юрттон сярысь документ дасямын вал (со пӧлысь 253 сюрс манетэз милемлы чакламын вал). Но кыӵе ке мугъёсъя фермеръёслэн документъёссы Москвае ӧз кошке. Нош ик пӧязы, лэся. Нюлэс сярысь. Колхозъёслы сое арлы быдэ дунтэмен висъяло, нош фермеръёс татын но ултӥямын. Маин бен ми колхозникъёслэсь пӧртэмесь? Ведь фермер пыд йылаз йӧназ султыны но уг вуы на, нош ваньбур уногес поттэ ни. Сыӵеослы улэп дыръязы ик памятник пуктыны кулэ. Татын котькуд фермерлэн но колхохзниклэн поттэм продукцизыя быдэсак дунъет сётыны кулэ. Лыдэ басьтоно тырем налогъёссэ но. Мон ялан паймисько: малы туннэ нуналлы кулэ на ёросъёсысь гурт удысъя управлениос? Сыӵе управление вань ке, со быдэсак мед ужалоз вань гурт удыслы, фермеръёсты но вераса. Нош со колхозъёс понна гинэ ужа ке, соосты нимано колхозъёслэн ужъёссыя гурт хозяйствоя управление шуыса. Котьма ке но, секытъёс шоры учкытэк, ми ужаськом. Кылем арын 60 йыр пудолы гид пуктӥм, отын пудоос уло ни. Туэ бадӟымзэ фермаез выльдыны чакласьком. Кыкезлы ик фермалы тырмыт пудо сиён дасямын. 1999-тӥ арын 584 сюрс манетлы ваньбур поттӥм, валлян арын сярысь, 2 поллы уногес. Быгатэммыя юрттӥськом бускель колхозъёслы. Миым куинь колхозлы пудозэс толйытыны юрттӥм турынэн но куроен. Бускельёсынымы тупаса но валче ужаськом. В.ХОХРЯКОВ, Дэбес ёросысь "Руно" акционер огазеяськонлэн кивалтӥсез. Мар война та? 1941-тӥ ар 22-тӥ июнь. Мыным, 19 аресъем пияшлы, со шимес нуналэз пумитано луиз Варшавской шоссеысь Филипповичи погранзаставаын. Ньыль часын ӵукна вуизы фашистъёслэн кырныж кадесь сьӧд самолётъёссы, бомбаос куяны ӧдъязы. Ми, кӧлӥсь муртъёс, ури-бери султӥм, номырзэ ум валаське. Кин ӧсэтӥ, кин укноетӥ ульчае тэтче. Бомбаос пуштыло, автоматъёс но пулемётъёс ыбыло. Пуля кинэ ке соку ик погыртӥз, кин ке сӧсырмыны шедиз... Уноезлы, шунды пуксён палась границаосмес возьмасьёслы ас вылазы басьтоно луизы самой секытсэ. Тушмон выламы омырскиз самой туала пыӵал тӥрлыкен. Ми сыӵе кужмо шуккетэз пумитаны дась ӧй вал. Озьыен, герман войскоослы Москвае сюрес усьтэмын вал. Нош асьмелэнъёс Брестысен Варшавской шоссе кузя пумтэм-йылтэм чигнаны кутскизы. Малы? Танкъёс сылӥзы эстӥськонтэк но аккумуляторъёстэк, лётчикъёслы омыре ӝутскыны сётэмын ӧй вал команда, орудиослэн октэмын вал замокъёссы... Озьы войналэн нырысетӥ нуналысеныз ик бадӟым ыштонъёсты адӟоно луиз. Вылаз ик, уноез визьмо командиръёс но полководецъёс быдтэмын вал. Кылсярысь, 1941-тӥ арын июльлэн кутсконаз Родиналэн тушмонэз шуыса пуктӥзы западной особой военной округлэсь командующийзэ генерал-полковникез Д.Г.Павловез. Соин ӵош басьтӥзы штаблэсь начальниксэ Климовскихез, со фронтысь ик штаблэсь начальниксэ Григорьевез но 4-тӥ армилэсь командующийзэ Коробковез. Нош ӟеч командиртэк ма кароз взвод, рота, батальон, полк, дивизия, армия, озьы ик быдэс фронт но? Вылаз ик, Советской Союзлэн со дырлы ӧй вал туннэ нуналлы тупась пыӵал тӥрлыкез, танкъёсыз, самолётъёсыз. Тушмон нош весь азьлань но азьлань мынэ. Вань улэпсэ тылын ӵушка. Асьме солдатъёс быгатэмзыя пумитъяськыны тыршизы ке но, сюрсъёсын боецъёс быризы, сӧсырмизы соку. Уноез али ке но кыллё на, дыр, тыос, шуръёс, нюръёс пыдсын. Мон понна ноку вунонтэм кылёзы Белоруссиысь Бобруйск дорысь Березина шур дорын Кричев районысь Сош шур дурын, Украинаын ортчем ожъёс. Кык пол потоно луиз тушмон кульчоысь. Войналэн нырысетӥ аръёсаз мон ожмаськи витетӥ гвардейской миномётной полкын. Со вакытэ ми тушмонэз пузкараз улляны кутским ини. Юго-Западной фронтлы азьлань мыныны соку бадӟым юрттэт сётӥзы асьмелэн кышкытэсь "Катюшаосмы". Мукет соединениосын ӵош мозмытӥмы Донбассэз, Воронеж, Курск, Орел но Харьков областьёсты. Вуылыны кылдӥз фронтлэн мукет интыосаз но. Война ортчем бере куамын ар ортчыса мыным кылдӥз ожмаськем интыосам вуылыны. Зэм, табере шуг ни тодманы ожмаськем бервылъёсты. Отын возьматӥзы ож мынэм интыосты. Тодэм потӥз: мар луиз меда сыръясь нюръёсын бырем но сӧсырмем эшъёсынымы? Зэм, нюръёс куасьтэмын. Интыысь улӥсьёслэн верамзыя, шедьтэмын вал сюосын бырем адямиослэн бервылъёссы. Кинъёс со боецъёс? Тодам ваисько асьме ёросысь ик Поторочино гуртысь Николай Наговицынэз. Со войнаез 22-тӥ июне пумитаз Филипповичи погранзаставаын. Бобруйск дорысь Березино шур дорын 30-тӥ июне ожъёс дыръя со мынам син азям быриз. Мынам соку пыды сӧсырмиз. Харьковщинаысь Барки село. 1942-тӥ арын мае соку милям полкмы но мукет соединениос котыртэме сюримы. Со селоын вал госпиталь. Верамзыя, Баркиез ӝоген немецъёс басьтӥллям. Госпиталез авиация сутэм, ваньмыз сюен сураськем. Фашистъёс техникаен бадӟым гу дасяло. Селоын улӥсьёсты косо вань адями шӧйёсты гуэ куяны. Со учырез гуртоос синвуосын тодазы ваё. Возьматӥзы со интыез. Госпиталь интые вырйыл кылдэм. Али отчы памятник ӝутэмын. Котькуд Вормон нуналэ адямиос отчы сяськаосын лыкто. Война озьы ик дырызлэсь вазь улонзэс уретӥз Балезино ёросысь Падера гуртысь вить вынъёслэсь Касимовъёслэсь - Маликалэсь, Бурганалэсь, Минсафалэсь, Нуриялэсь но Назипалэсь. Ньылезлэсь нокыӵе ивор ӧз вуы. Нош Минсафа 1942-тӥ арын 18-тӥ сентябре быриз Орел областьысь Тровинсково село дорын ожъёсын. Война азьын та гуртысь ик Мадыпалэн атаез Бурган Касимов ужаз Комсомольск-на-Амуре городын. Фронтэ басьтэмзы бере со дораз гожтэт ыстӥз: "Дуно анае, кузпалы но Мадына нылы. Кутскиз война, милемыз келялозы фронтэ. Ыстӥсько 200 манет коньдон. Туж адӟиськеме потэ. Милемыз Балезиноетӥ нуозы, дыр, лыктэ станцие, отысен адском..." - Ӝоген песянае, анае но мон станцие мынӥм, - тодаз вае Мадына. - Нунал возьмаськом, кык нунал. Атаймы весь ӧвӧл. Нош воинской эшелонъёс огез бӧрсьы мукетыз кошко шунды пуксён пала. Арнялэсь кема возьмамы атаймес. Пумиськыны ӧз кылды. Гуртэ бертыкумы анае но песянае быдэс сюресэз бӧрдыса бертӥзы. Бӧрысь ини фронтысь гожтэтсэ басьтӥм. Эшелонзы зэмзэ но Балезино пыр ортчем, отын со часлэсь кема сылэм. Милемыз утчаса перронэтӥ бызьылэм. Озьы ик секыт мылкыдын фронтэ кошкем. Тани гожтэтысьтыз чуръёс: "...Аслэсьтым дуно станциме берлозэ адӟи, дыр. Секыт ожъёс мыно, кык пол атакае ветлӥ ни. Эх, дуноосы, кылдоз на меда адӟыны тӥледыз. Быри ке, уродэн тодады эн вайылэ. Юн ӟыгыртӥсько, чупасько, дуно нылы, озьы ик мамадэ но песянайдэ. Ӟеч луэ!" Зэмзэ но, та вал фронтысь нырысетӥез но берпуметӥез гожтэт. Шимес ивор вуиз 1942- тӥ арын ноябре: "Касимов Бурган Заляутдинович быриз ивортэк..." Бен, трос сыӵе иворъёс вуылӥзы семьяосы со войнае. Нош адямиос пиоссэс аръёсын витьыса улӥзы на. Куд-огез али осконэн уло на. Но табере сыӵе иворъёсты витё Чечняысь. Малы кулэ на вал меда таиз война? Мар война та? Уг лу ни шат улэммы асьмелэн ожмаськытэк?.. Паймисько. Вячеслав КОРЕПАНОВ, ожысь но ужысь ветеран, азьвыл журналист. Мари Элысь куноос Удмуртие вуылӥзы Кык нунал ӵоже асьме республикаын ужазы Мари Эл Республикалэн Госсоветысьтыз, Правительствоысь, Коньдон ужпумъёсъя но Юстицияя министерствоосысь вуэм адямиос. Мари Элысь юстицияя министр В. Бушков но валтӥсь суд пристав С. Богатырев пумиськылӥзы Удмуртиысь юстицияя министрен В. Осиповен. Бускель куноос тодматскизы Удмуртиысь Юстицияя министерстволэн ужаны радъям ёзъёсыныз но тунсыкъяськизы асьме законодательствоын кун власть но ас коже кивалтон ёзъёсты выльдыны учкем ужпумъёсын. Удмурт Республикаысь Юстицияя министерстволэн пресс-службаез. Удмурт Элькунын вузъёс вылэ ӵошатон-эскеронъя (идентификацияя) маркаос пуктылон сярысь Удмурт Элькунысь Правительстволэн Постановлениез Басьяськисьёслэсь правооссэс но кулэяськонъёссэс утён, пӧяськыса но улӥ ӟечлыкен сиён-юонъёсын вузкаронэз алон вылысь но 2000-тӥ арын 2-тӥ январе кутэм "Сиён- юонъёслэн ӟечлыксы но тазалыклы изъян ваемзылэсь алон сярысь" 29-ФЗ номеро Федеральной Законэз лыдэ басьтыса, Удмурт Элькун Кивалтэт пуктэ: 1. Удмурт Элькунлэн улосвылаз вузъёсты ӵошатон-эскеронэз но нимысьтыз маркаен пусъёнэз вакытэн-вакытэн ортчытоно, таӵе ужез кулэ карись продукциен переченез но та ужъёсты кутскыны чаклам дырез лыдэ басьтыса. 2. Юнматоно ӵошатон-эскеронэз но идентификацияя маркаен пусъёнэз кулэ карись вузъёслэсь переченьзэс но та ужъёсты ортчытыны кутскон дырез. 3. Юнматоно вузъёс вылэ идентификацияя маркаос пуктылон радлыкез. 4. Удмурт Элькунысь Вузкаронъя но бытовой юрттэт сётонъя министерстволы, Югдурез утёнъя министерстволы кулэ луэмъя чаклано но ӵошатон-эскеронэз но идентификацияя маркаен пусъёнэз кулэ карись вузъёсын перечене воштонъёс но ватсанъёс пыртонэз Удмурт Элькунлэн Кивалтэтаз юнматыны ӵектоно. 5. Продукциез ӵошатыны-эскерыны но сое идентификацияя маркаен пусйылыны осконо Стандартизацияя, метрологияя но сертификацияя удмурт центрлы. 6. Та постановленилэсь быдэсъяськемзэ эскероз Удмурт Элькун Кивалтэтлэн Тӧроезлэн воштӥсез С. В. Чикуров. Удмурт Элькун Кивалтэтлэн Тӧроез Н. А. Ганза. 2000-тӥ арын 13-тӥ мартэ, Ижевск город. � 259. *** Удмурт Элькун Кивалтэтлэн та постановлениеныз юнматэм переченья 2000-тӥ арын 1-тӥ майысен ӵошатон-эскеронэз ортчытоно но идентификацияя нимысьтыз маркаен пусйылыны кутсконо: газэн но газтэм, емыш но узы-боры экстрактъёсын, цитрус но мукет паремъёсын дасям кудӟытӥсьтэм юонъёсты, эмъяськыны но юыны кутӥськись минерал вуосты, ёмкосте мертаса тырем юон вуосты, нош 15-тӥ майысен - тамакъёсты (папиросэз, фильтрен но фильтртэк сигаретъёсты, сигараосты). Валэктон (примечание): нимысьтыз маркаен пусйылонэз кулэ каре сыӵе продукция, кудӥз вуэ марка лякон сярысь дырез ивортэм бере; продукция вуэмын но со понна дун тыремын ке маркаен пусъён сярысь дыр ивортытозь, сое идентификацияя маркатэк вузаны яра 2000-тӥ арын 1-тӥ июлёзь. АРХИВЫСЬ ДОКУМЕНТЪЁСЪЯ Удмуртия ХХ дауре 1902-тӥ ар Экономикаын "кризис" мынэ на, политикаын югдур эшшо но лэчытоме. Март толэзе ужзэс урето но демонстрацие пото Вотка заводысь 5 сюрс рабочийёс. Соос куинь нунал ӵоже посёлокын кузёясько: полициез пыӵал тӥрлыктэк кельто, телеграф езъёсты вандо. Вяткаысь губернатор, рабочийёсты зӥбломытон вылысь, Казаньысь но Пермьысь солдатъёсты ӧте. 69 адями пытсэтэ келямын вал, 39 муртэ вань калык азьын ньӧрен жугизы. Воткинскысь рабочийёслэн пумитъяськемзы пумысен "Искра" нимысьтыз пусйылӥз 1-тӥ но 15-тӥ июне потэм номеръёсаз. 15-тӥ январе "Искра" газетын потӥз Сарапулысь ку посон заводысь рабочийёслэн секыт улонзы сярысь материал. Тулыс Вятка губерние вӧлмиз цинга. Та висёнэн нюръяськыны быдтэмын 75 сюрс манет, огдырлы 54 эмъяськон юрт усьтэмын, соос пӧлысь 45-ез Глазов уездын. 30-тӥ мае шуак-дуак люкамын вал губерниысь земской собрание. Цинга висёнэн валче со эскериз калыклы бакча сиёнъёс висъян-вузан сярысь. Казань-Малмыж-Чепца чугун сюресэз кыскон сярысь ужпумез ӝутъяз. 31-тӥ мае Иж заводын 17 пу лавка ӝуаз, 14 вузкарисьлэн 50 сюрс манетлы ваньбурез изъянмиз. 29-тӥ июне Кам-Вотка округлэн горной ужъёсъя кивалтӥсез Троян 1,5 толэзьлы ыстэмын командировкае Германие но Австрие. Со вуылӥз Дюссельдорфын ортчоно адӟытонэ, тодматскиз машина лэсьтон заводъёсын, паровозъёсты но пароходъёсты бичан-сӧзнан амалъёсын. 11-тӥ августэ сӥлы каризы Сарапулын нылкышно гимназилы выль юрт пуктонэз. Елабуга уездлэн Можга волостьысьтыз Сюгинский заводын усьтӥськиз дунтэк лыдӟиськонъя библиотека. Коньдонэн юрттӥзы С.А.Сырнева но С.А.Шишков. Сентябре Сарапулын усьтӥськиз Анна Николаевна Пельцлэн гимназия выллем нылкышноослы чаклам школаез. Дышетскем понна араз 45 манет тыроно. Вотка но Иж заводъёсын кылдытэмын сазь улонъя Сарапул уезд комитетлэн люкетъёсыз. 14-тӥ сентябре Иж заводын усьтӥськиз Ижевск-Нагорной волостьлэн юрттэменыз кык классъем училище, дышетскисьёслы правительство пособие висъялляз. 23-тӥ сентябре Елабуга уездысь земской собрание вылӥе вазиськиз, Варзи-Ятчиысь дэрилы вылӥ дунъет сётыса. 15-тӥ декабре Иж заводын вӧсяськон ортчиз нылпи юрт усьтон пумысен. Е.Горбушина, УР-ысь Кун архивлэн отделэныз кивалтӥсь. ЖУРНАЛИСТЪЁСЫН ПУМИСЬКОНЪЁС "Удмуртилы Президент, оло, туэ ик быръём" шуиз Кун Кенешлэн Тӧроез А.Волков Россилы Президент быръем но Удмуртиын референдум ортчытэм бере Кун Кенешлэн Тӧроез А.Волков нырысьсэ журналистъёсын пумиськылӥз. Со ивортӥз быръёнъёс бере Москваын В.Путинэн пумиськылэмез сярысь. Та ужрадэ выль Президент ӧтьылӥз улосъёсысь 20 кивалтӥсьёсты. Соослы со тау кариз Президент быръёнэз ас улосъёсазы умой нуэмзы понна. Кызьы тодмо ини, Удмуртиын 61 процент пала бырйисьёс В.Путинлы дурбасьтэмзэс веразы. Тау карем сяна, мар сярысь вераськиз на меда Россилэн Президентэз ӧтем кивалтӥсьёс азьын? - Кун властез, федерализмез юнматон, страналэсь интересъёссэ валтӥсь интые пуктон сярысь, - шуиз А.Волков. - Путинлэн верамезъя, Россилэн одӥг улосэзлы но нокыӵе привилегиос уз луэ. Россия но Башкортостан куспын, кылсярысь, огкыл гожтэмын ни выт бичанъя огкадь политика нуон сярысь. Сыӵе ик огкыл гожтэмын луоз Татарстанэн но. Журналистъёсын вераськон дыръя А.Волков В.Путинлы юн оскемзэ вераз. Вакчи дыр куспын, пе, со ассэ ӟечен возьматыны быгатӥз ни. Уждун, пенсиос тыронъя ӝеганъёс ӧжытгес луизы. Бадӟымгес саклык висъяськыны кутскиз асьме промышленностьлы. Путин соин но, дыр, трос куара бичаз: калыкен пумиськылыкуз, со пал кыл но ӧз поттылы, адямиос сое Президентэ мед быръёзы шуыса, уж сярысь гинэ вераськылӥз, шуиз Кун Кенешлэн Тӧроез. Быръёнъёс азьын Путинэз трос гинэ курлазы йӧскадь программаез ӧвӧлтэм понна, иське, экономикаез азинтонъя солэн кыӵе ке но малпанъёсыз вань? - Путинлэн вань ини "оборонкая" куинь арлы чаклам программаез, - шуиз А.Волков. - Обороная министр И.Сергеев но, Правительстволэн вице-премьерез И.Клебанов но асьме республикае юнме шорысь ӧз вуылэ. Александр Волков верамъя, Илья Клебанов, Удмуртие эшшо но вуылоз на. Табере Сарапулэ. Тодматскоз татысь "Элеконд" заводлэн продукциеныз но самолёт лэсьтон удысэн. Журналистъёс А.Волковлы мукет предприятиосъя но юанъёс сётъязы. Кылсярысь, автозаводлэн ужамез сярысь. - Али автозаводэ выль кивалтӥсь юнматэмын. Азьвылэз кивалтӥсь ужзэ оскымон ӧз быдэсъя, - шуиз А.Волков. - Татын ужасьёслы тямыс толэзь понна уждун тырымтэ на. Автозаводэн герӟаськем ужпумъёсты ялан син азям возисько. Завод араз 8 сюрс автомобиль ӧз ке потты, та ужпумлэсь уг буйгатскы. Азьланяз та лыдпусэз 30 сюрсозь вуттоно. Республикаын улӥсьёс тодазы возё Воткинск ёросын ракетаосты быдтонъя завод пуктон сярысь ужпумез. Кызьы тодмо ини, сыӵе завод пуктонлы пумит луэмзэс веразы ни Воткинск но Чайковский городъёслэн мэръёссы. Журналистъёслэн тодэмзы потӥз, мар малпаське со пумысен Кун Кенешлэн Тӧроез? - Мон со завод борды уг возиськиськы, - шуиз А.Волков. - Экспертъёслэн йылпумъянъёссы бере но воткинскъёс завод пуктонлы пумит луизы ке, мед озьы ик луоз. Тани ай Пермь мылкыд каре со проектэз басьтыны. Нош Воткинск трос ужан интыос ыштоз. Кун Кенешлэн Тӧроез тау каремзэ вераз асьме калыклэн референдуме умой пыриськемез понна. Бырйисьёс дышизы ни, лэся, шуиз со, прессаын олома но гожъямъёс пӧлысь зэмлыкез адӟыны. Конституцилэсь 10-тӥ ёзэтсэ бырйисьёс умоен лыдъязы бере, оло, соку Удмуртилы Президент быръёнэз ӝоггес ортчытоно? - Мон тазьы лыдъясько: та ужпумен туж дыртыны но, укыр бере кыльыны но уг яра. Со сярысь одно ик вераськоно депутатъёслэн сессиязы но Конституция бордын ужась комиссиын, вераз А.Волков. Кин тодэ, апрель-май толэзьёсы Конституция бордын ужез йылпумъямы ке, оло, зэмзэ ик туэ октябрь пумын Удмуртилы Президент бырйыны быгатомы. Асьме республикамылы Президент быръён лякытэн уз ортчы, дыр. Пумитъяськисьёс но луозы, лыдэ басьтытэк уз луы референдумлы пумит луисьёслэсь мылкыдзэс но. собере таӵе вераськонъёс но ветло: ачиз Путин Удмуртилы Президент уз-а меда юнматы? - Россилэн туала Конституцияз сыӵе амал учкемын ӧвӧл, - валэктӥз А.Волков. - Мон уг малпласькы, Путин вакчи дыр куспын Россилэсь Конституцизэ воштыны быгатоз шуыса. Нош Удмуртиын референдумлы пумит уж нуэмъёс сярысь тазьы шуысал: соос али ужаны гинэ люкето, соослэн вакытсы ортчиз, жалян мылкыд сяна, соос номыр уг кельто. Табере дыр вуиз "пазям изъёсты люканы". Ужано. Журналистъёсын вераськонэз йылпумъяса, Кун Кенешлэн Тӧроез таӵе малпанзэ вераз на. Асьме шаермы, пе, азьланяз озьы ик мед ӝог азинскоз, кызьы со кузь вамышъёсын азьпала мынэ ни вал 30 ар талэсь азьло. ...Ӵапак соку, 1970-тӥ арын, Александр Александрович Волков, Брянскысь лэсьтӥськонъя техникумез йылпумъяса, Удмуртие ужаны вуэм. Т.БАННИКОВА. Пичи гуртлэн адӟонэз Горд Шунды вадьсын пилемо Куке но йӧн-йӧн чебер, туж шулдыр гуртын 28 корка улӥсез кылемын на. Калыкезъя ке верано, ӝыныезлэсь ятырез - арлыдо адямиос, пенсие потэмъёс. Егитъёс кошко, ужлы ёрмыса. Азьвыл аръёсы нылкышноос, пиосъёс понна уж вал: "Радист" подсобный хозяйство татын пудо гид возиз. Нунал пӧрат ке но, гурт пыртӥзы Ижысь рейсовой автобус ортчылӥз. Асьсэ понна пичияк клубзы но вал, коркалы быдэ радио но вераськылӥз. Огъя вераса, Горд Шунды (нимыз кыӵе!) югыт дуннелэсь палдэмзэ ӧз шӧдылы. Нош туннэ со мумытэк-бубытэк кылем нылпи кадь: улод ке ул, кулод ке кул. Радио езъёс вандэмын, телефон ӧвӧл, ферма интые кылемын на кӧс кирпич борддоръёс. Гурт калык понна шыртыл кадь пиштэ на магазин гинэ. Солэн но ӝажыосыз, туала шумприч рынокен ӵошатыса, туж куанер. Узыр ке но луиз, басьтӥсь уз шедьы - уксёен улӥсез татын ӧжыт, нянь но коркалы быдэ сямен асьсэос пыжо. Мугез тодмо: дась ваемзэ басьтыны номырин. Ӟечгес улӥсь бадӟым гуртысь пичияз вуыса, мылкыд быре инмарлы оскисьтэм мурт, амалтэк кылчинэз тодэ ваиськод: осто, инмаре, кызьы ваньзэ тае чидаса улэ меда мискинь калыкмы? Кылтэм-ымтэм пудо-живот кадь нуэ со аслэсьтыз "кироссэ". Гурт вӧзтӥзы ик ог 20 арлэсь ятыр кошке ни газ гумы - татын ялан курадӟо пу коранэн. Сое но кораны лэземын ӧвӧл, Ижысь ваёно, кык-куинь полэс дун тырыса. Шуо, калык, пе, уката ик пичи, аналтэм гуртъёсын юон вылэ чӧлскемын: коть пиосмурт, коть кышномурт, коть егит, коть пересь - одӥгтэм зын бекчее выемын. Юод но, ява, таӵе улонлэсь! Но Горд Шунды сярысь озьы вераме уг поты. Ужась семьяос татын трос. Сотэк-а каллен ке но, курадӟыса ке но выль коркаос пуксё. Туала уждунэн, соиз валамон, нокин но юртъер ӝутон борды уз кутскы, уксё люканы выро, пудо вордыса, бакча сиёнэн, картофкаен вузкарыса. Но калыклэн чиданэз пӧсьтэмын. Соос яркыт шундыё нуналэз выллем туннэ но тодазы ваё хозяйствозылэсь одӥгзэ егит но визьмо кивалтӥсьсэ Петр Вениаминович Чувашовез. Горд Шундыын улӥсьёс огымысь кадь шуо: сыӵе кивалтӥсен ми ноку но ӧй бырысалмы. Петр Вениаминович мыло-кыдо басьтӥськиз вал дисциплина борды. Со ужаку, шӧдскымон тросгес йӧл кыскыны кутским, пудолэн лыдыз йылӥз, юисьёслэн но радъёссы шеромизы. Жаляса верано, арлы быдэ вошъяськись директоръёс пӧлысь огез но со сямен калык понна ӧз сюлмаськы. Али "Радистэн" кивалтэ Николай Семенович Тубылов, вылӥ образованиен специалист, агроном. Ужан опытэз бадӟым, гурт удысэз ӟеч тодэ. Вормоз-а, чидалоз-а лябӟем хозяйствоез ӝутыны, Горд Шундыын но музон гуртын улӥсьёслэсь зӥбиськем мылкыдзэс ӝутыны? Туннэ та сярысь вераны вазьгес на, улыса-вылыса адӟом. Нош горд шундыослэн куронзы трос ик ӧвӧл: ас гуртазы ужан инты кулэ. Соослэн туж кӧтсы ӝож пудо вордон гидзэс быдтэмзы пумысен. Табере вераськон ик ӧвӧл ни та удысэз выльдон сярысь. Быръёнъёс азьын пичияк люкам кенешен Норья сельсоветлэн кивалтӥсез В. С. Родионов но Н. С. Тубылов гуртоослы пӧртэм амал ӵектыны выризы: доразы пудо куйытон но, ятыргес музъем басьтыса, отысь асьсэ понна пайда басьтон но. Дэмланъёс умоесь, номыр уд шуы. Но солэн, бодылэн кадь, кык пумыз: пудо-животэз будэтыны тысь но, комбикорм но, мукетыз но кулэ ай. Уксётэк уд басьты, нош кӧс турынэн-куроен гинэ базарын вузкарымон йӧл-сӥль уд люка. Музъем сярысь ке верано, мултэс гектар воземлэсь нокин уг алы: кужымдэ ке шӧдӥськод - котькӧня гыр-кизь. Одӥг-ог семьяос озьы ик уло, асьсэды фермерен лыдъяло: техниказы вань, быгатэмзыя вузкаро. Но огназы кылем кышноос, пенсионеръёс та уж борды ноку уз кутске ни. Тӥни малы соослэн сюлэмзы юнгес бӧрдэ та улонлы, кынарзы, егит даурзы уго кошкемын ни. Табере кинлы сыӵеос кулэ на... Туж тросэз потэ районысь кивалтӥсьёс бордысь. Неужто уг луы вал радиоез утьыны? Толэзяз 4-5 манет тырыны котькудӥз семья шедьтысал, дыр. Нош татын огкутскемен быдэс гуртэз дуннелэсь люкизы. Горд Шундыын улӥсьёс гинэ ӧвӧл, мукетъёсыз но йыркурен верало "Удмурттелекомлэн" районысь ёзэзлэн кивалтӥсез Василий Москвин сярысь. Куке но соку пичи пургаослэн гажано но данъяськоно адямизы калык понна табере синазькыль луиз. Умой ӧвӧл лек верам кылъёсты кылыны, но со - калыклэн мылкыдыз. Малы-о музон интыосын та выллем учыръёс уг пумиськыло? Малы-о Ижевскен артэ пуксем районысь гуртъёс пеймыт гулы пӧрмизы? Ужась калыкез-а отын янгыш карод, толэзьёсын солэн кияз коньдон уг ке шедьылы? Та юанъёслы валэктон кылэм потэ вылэм республикамылэн кивалтӥсьёсызлэсь но. Удмуртиын улӥсьёсын ӵош Горд Шундыысь калык но оскемзэ вераз, улон мукет пала воштӥськоз шуыса, куаразэ сётӥз шаерамы Президент быръён понна но. Мед вуоз вылэм соослэн сюлмысь потэм куаразы туала кивалтӥсьёсмы дорозь. Соку, оло, та пичи аналтэм гурт вадьсын но чузъяськоз Ижевсклэн куараез. Калык та нуналэз витьыса жадемын ни. ЛЮДМИЛА МЕДВЕДЕВА. Усьтӥськоз башкир школа Башкириысь 55 школаын удмурт кылэз дышето. Асьме шаерамы та бускель кылэз дышетонъя школа ӧй вал на. Ӝоген та кылэз дышетозы Ижысь 83-тӥ школаын. Та пумысен 25 пинал мылкыдзэ вераз ни. Э.КУМАЧЕВА. ПРАВИТЕЛЬСТВОЫН Чечняе юрттэт вуоз Россиысь Правительстволэн решениезъя Северной Кавказысь югдурез эскерыса возён понна, матысь нуналъёс отчы кошкозы РФ-ысь Граждан обороная но кышкыт учыръёслэсь утиськонъя министерстволэн огазеям отрядъёсыз. Соос мыно Чечняын улӥсьёслы юрттыны но куашкатэм хозяйствоез ӝутыны. Вераны кулэ,ГО-лэн "НЗ" складъёсысьтыз 1999-тӥ-2000-тӥ ар ӵоже Дагестанэ но Чечняе келямын вал данакез пыӵал тӥрлык, техника но кулэ луись ваньбур. Таин валче Удмурт Правительствое, мукет улосвылъёсы сямен ик, вазиськон вуиз, огазеям отрядъёслы юрттэт висъян сярысь. Центрлэсь куронзэ Н.А.Ганза поттӥз республикаысь валтӥсь предприятиослэн кивалтӥсьёссы, магазинъёслэн директоръёссы, ужбергатӥсьёс азе. Соос шонер валазы кылдэм югдурез. Нырысьёсыз пӧлын Северной Кавказэ келяно боецъёслы юрттӥзы "Ижевский оружейный завод" ДОАО, "Зангари" вуриськон фирма, "Сактон" ЗАО, "Хольстер" производственной фирма. Магазинъёс: ЦУМ, "1000 мелочей", "Камелия", "Дом одежды", "Дом обуви", "Ландыш", "Детский мир". Соослы Правительстволэн нимыныз сётэмын тау карон гожтэтъёс. Отрядлэн кулэяськонэз 85-90 процентлы быдэстэмын, шуыны луоз. Со пӧлын - сиён-юон, дӥськут но мукетыз. Удмуртиысь отрядэн кивалтоз генерал Т.Габричидзе. Сюрес вылэ потозы 18-тӥ апреле. Кызьы шуиз Правительстволэн Тӧроезлэн воштӥсез Сергей Чикуров, Удмуртиысь отряд юрттӥськыны басьтӥськоз Чечняысь огезлы районлы. Отысь улӥсьёслы висъямын луоз сиён- юон, лэсьтӥськон материал но мукетыз. Л.МЕДВЕДЕВА. Чузъяськы, кисьтӥськы, крезьгуре Завьял ёросысь Первомай посёлокысь крезьгуръя школалы 25 ар тырмиз. Отысь дышетӥсьёс но дышетскисьёс сӥё-дано пусйизы юбилеез. Дасямын вал тунсыко программа. Кузёосты ӟечкыланы данак куноос вуылӥзы. Шуныт кылъёс верамын школалэн директорезлы А.А.Вечтомовлы. Александр Александрович ас кужмыныз кылдытӥз сое. Та дыр ӵоже уно егитъёс татын крезьгуръя тодон-валанъёс басьтӥзы. Тросэз соос пичиысен быръем удысазы зэмос профессионалъёс луизы. Н.ИВАНОВ. БЫДӞЫМ ВОРМОНЛЫ - 55 АР Быремзэ - данъяно, улэп кылемзэ - дунъяно 1418 уй-нунал - сокема кыстӥськиз Гитлер Германиен лек ожаськон. Асьме калык вань дуннеез паймытӥз чиданлыкеныз, ас музъемзэ яратэменыз. Удмурт шаерысь гинэ 70 сюрслэсь уноез пӧртэм орденъёсын, медальёсын пусъемын, нош ог 100 адями Совето Союзлэн Геройёсыз луизы. Нош Евгений Кунгурцев Горд Кизили медален кык пол данъямын. Куать землякмы батыр ожмаськемзы понна обороная министрлэн приказэныз весяклы пыртэмын солдатъёслэн радазы. Тани соос: Владимир Горячев, Михаил Зевахин, Григорий Ожмегов, Виктор Орлов, Вадим Сивков но Джурахан Усманов. Соослэн нимъёссы казармаын нуналлы быдэ чузъясько. Сизьымез аспал эшъёсмы секытэсь ожмаськонъёсын Гастелло капитан сямен самолётсэс тушмон вылэ уськытъяз. Озьы Алнашысь Петр Бабкин Выборг город дорын аэропланэныз немец пушкаосты пазьгиз. 1944-тӥ арын пӧсьтолэзе Глазовысь Анатолий Блинов корт ӧрӟизэ огазе люкаськем фашистъёс вылэ валтӥз. 1943-тӥ арын Курск котырын лек ожъёс дыръя ыбылӥсь пушкаосты гуньдытӥз Дэбесысь Николай Ефремов. Тазьы ик батыръёс сямен быризы Ижысь Геннадий Одинцов, Аркадий Черезов, Пичи Пургалась Василий Шамшурин. Ваньзы соос инбаме сюрес лёгизы Ижысь аэроклубын. 1944-тӥ арын тулыс Гомель областьын лек ожъёс пуромизы. Тушмонэн одӥгаз ваче пумит сылон нуналэ асьме ожгарчиослэсь азьлань сюрессэс пытсаз тачыртӥсь пулемёт. Удмуртиысь лейтенант Николай Жуйков но бускель бигер улосвылысь 50 аресъем старшина Филипп Мазинин малпазы дзотэз гранатаосын быдтыны. Ӧз пӧрмы. Ватскем немец пазя но пазя эзель ваись узвесь "саламзэ". Трос пиосмы улонэн люкиськизы ни. Соку Николай но Филипп ваче ки кутскыса, пулемёт шоры бызё. Пуляосын сӥсьям мугоръёс супыляк амбразура вылэ усизы, пулемёт чалмиз. Вырйыл басьтэмын вал. Герой пиосты татчы ик ватӥзы, соос Ленин орденэн пусъемын. Нош куинь Слава орден сётэмын Удмуртиысь 20 муртлы. Тӥни кӧня асьмелэн дано адямиосмы! Нош соос сярысь тырмыт-а тодӥськом? Ум. Иж карын ик, кылсярысь, кулэ вылэм туспуктэмъёссэс возьматыны. Аръёс ортчо. Тани 55 ар тырме ни ожлэн быремез дырысен. Нош сюлэм уг буйга. Странаямы мынэ ялымтэ ожмаськон. Егит пиос быро Чечняын, солэсь азьвыл вир кисьтӥськиз Афганистанын. Кин со понна кыл кутоз? Мон ужысь но ожысь ветеран. Ожмаськи Карел но 3-тӥ Украин фронтъёсын. Война аръёсы секыт ужъёсты но быдэсъяй. 14 аресысен сюрес лэсьтӥ, нюлэс корай, сое валэн поттылӥ. Сиён йӧназ ӧй вал. Сютэм улыса но секыт ужез быдэсъяса трос калык кулӥз. Али со вакытысь пересьёс чиньыен лыдъямон. Льгота шуонъёс чакламын ке но, малы ке уг быдэсъясько. Тани шуом автобусэн ветлыны но дунтэк уг луы. Нош Завьял ёросын ветло. Война вакытэ огкадь курадӟимы, вань калык вормон понна тыршиз. Н.БЕХТЕРЕВ. Пичи Пурга ёросысь Бураново черкогурт. Ожысь гожтэтъёслы конкурс Удмурт Республикаысь Федеральной почталэн ёзэз, Быдӟым Вормонлы 55 ар тырмонлы сӥзьыса, ожысь вуэм гожтэтъёслы конкурс ялэ. Со гожтэтъёс егитъёслы мед юрттозы улонэ мылысь-кыдысь пыриськыны, оже ветлэмъёслы бадӟым саклык висъяны, соосын сюлмысь вераськыны, огъя кыл шедьтыны, кулэ дыръяз юрттыны. Конкурсэ сётыны луоз фронтовикъёслэн улонысьтызы пӧртэмесь учыръёс, эшъёссы, командиръёс сярысь тодэ ваёнъёсты. Оже ветлэмъёс али но ӵемысь тодазы вайыло на со лек аръёсты. Асьме пӧлын уло Быдӟым Отечественной войнаысь ветеранъёс, Афганистанын но Чечняын ожмаськемъёс. Конкурсэ соос сярысь но гожтыны луоз. Ож мыныку, солдатъёсын артэ вамышъязы почтальонъёс, пӧрасьёс, медсестраос, врачъёс. Умой луысал, соос сярысь но мадьысалды ке. Конкурсэ вуэм гожтэтъёсты висъялозы куинь ёзлы - "Ӟуч солдат", "Фронт мышкын ужам мурт" но "Ожен герӟаськем улон". Конкурслы дасяськонэз но сое ортчытонэз радъя нимысьтыз комитет. Нош вормисьёсты дунъялоз жюри. Гожтэтъёслэн авторъёссы ӧтемын луозы Быдӟым Вормонлы 55 ар тырмонлы сӥзем концертэ. Тужгес устоосызлэн гожтэтъёслэн авторъёссы пусъемын луозы кузьымъёсын. Вормисьёс сярысь ивортозы газетъёс, телевидение но радио. Дыртэлэ, конкурс йылпумъяськоз туэ 1-тӥ мае. Конвертты вылэ гожтоно: "На конкурс "Военное письмо". Нош адресэз таӵе: 426004, Ижевск город, Коммунаръёслэн ульчазы, 216. Эн вунэтэ асьтэлэсь адрестэс, нимтулдэс гожтыны. В.Смирнов. ШӦКЫЧ Улытозяд дышетскы Тау чиганлы сю грамм сюремлы Машина возьмаса сылӥсько автовокзал вадьсысь Бытъя юрт дорын. Кынми но ӧжытак шунтӥськоно кариськи. Нырысетӥ этажаз тачак чиган кышноос - пересез но, егитэз но, пинал нылъёс но. Кынмиллям, лэся. Ӧжытак отӥ- татӥ калтыртӥ, нош потыкум чиган нылаш бордам кырмиськиз. Кӧня дыр шуыса юа. Нош мынам часэ ӧвӧл, кемалась тӥяськемын, коньдон ӧвӧлэн сое гинэ но тупатъяны уг быгатӥськы. - Мон шудо, дырез уг чакласькы, шуисько. Нош чиган ныл котырам тэбине но тэбине: - Ой, тау тӥледлы, вазиськемды понна. Вае со понна тиледыз тунало. - Ой, нылы, мынам ваньмыз умой, номыр но кулэ ӧвӧл - саесме лурк кыски но кыре потӥ. Синйылтӥ на, чиганъёс кыӵе ке пиосмуртэз котыртӥллям. Ну, малпасько, шедиз ук таид. Озьы ик вань. Кӧня ке улыса со кыре потӥз, ымнырыз паймем тус. Эшез монэным артэгес сылэ вылэм, соин ик соослэсь вераськемзэс кылӥ. Удмуртъёс вылӥллям. Жоб кылъёсын куаретэ ук чиганъёстэ. Ведь ачиз, пе, кисыям пыриз но вань коньдонме поттӥз. Эшез шораз мать но мать тон, пе, лапша, кызьы лэзиськод кисыяд пырыны, пиосмурт ӧвӧл-а, тон? Кизэ кутэмед уг луы-а вал? Таиз ассэ но шонере поттыны выре: - Мон, жаляса солы сётӥ вал уксё, нош со озьы кариз. Ӧй чида ни: - Коньдонэд бен трос-а вал? - удмурт сямен вази. - 70-80 манет вал, пе. Ёрмон калэ вуыку, со но трос йӧтэ ни. Ма, кызьы озьы аслэсьтыд коньдондэ юнме шорысь капыртыны сётод. Озьы но озьы, шуисько, кышкатэ милицие вазиськонэн, оло, мар ке но пӧрмоз. Кыкназы но кошкизы чиганъёс пала, кема ик ӧз вераське, мыняса вуо ни, 50 манетсэ берыктӥзы, пе. Я бен, умой ини таиз понна. Шумпотыса тау каро мыным, ойдо, пе, ми сьӧры, 100 грамм юом. Мон машина возьмасько шуисько, дыры ӧвӧл. Воргоронъёс кытчы ке шумпотэм мылкыдын кошкизы. Р.Игерманова. Эшмес буре вайыса "Удмурт дунне" ыштӥз эшсэ. 3-тӥ мартэ нуназе шорын Вячеслав Леонтьевич Корепановлэн сюлэмыз дугдӥз. Кулӥз "Советской Удмуртилэн" Балезино районысь азьвыл собкорез. Балезино районысь Кунай гуртын 1921-тӥ арын вордскыса, Вячеслав Корепанов улонзэ 18 арес дыръяз ик герӟаз журналистикаен. Ужаз районысь радиоын. 1941-тӥ арын мартэ армие мынӥз. Война кутскем бере, кыкетӥ араз, пленэ сюриз. Австриысь но Румыниысь уно лагерьёс но тюрьмаос пыр потӥз. Асьмелэнъёс сое мозмытӥзы но выльысь асьсэ строе кутӥзы. Нюлэс будэтонъя школаез йылпумъяса но Вячеслав Леонтьевич журналистикалэсь ӧз люкиськы ни. 1962-тӥ арысен 1982-тӥ арозь ужаз "Советской Удмуртиын". Ожысь но ужысь вормонъёсыз понна Вячеслав Леонтьевич пусъемын уно медальёсын, грамотаосын, премиосын. Пенсие потэмез бере, бугырес улонлэн палэназ ӧз кожы. Калык пӧлын бадӟым валэктон уж нуиз. "Удмурт дуннеысь" ветеранъёс но егитъёс В. Л. Корепановез гажазы лякыт сямыз понна. Сыӵеос сярысь шуо: солэн одӥг тушмонэз но ӧвӧл. Озьы пӧрмытэ вал, пӧртэм тӧлъёс улын някырскытэк, котькуд адямилэн сюлэмаз пырыны шуныт кыл шедьтыса. Редакциен кусыпъёссэ Вячеслав Леонтьевич ӧз ыштылы берло арозь. Алигес гинэ дорамы пыраз. Кельтӥз войналы сӥзем тодэ ваёнъёссэ (соосты туннэ печатласьком). Висемзэ сокем ӧз возьматылы ке но, матысь дыре койкае выдонэз сярысь вераз. Азьвыл но дырын- дырын госпитале сюрылӥз бере, нош катьяськоз но султоз кожамы. Янгышаськеммы. Больницае мыныны ӧз вуы, ас корказ кулӥз. Ӟеч кӧл, Вячеслав Леонтьич! Тюрагай чирдэ - мылкыд лӧптэ Нырысетӥ оштолэзез пусъё, шуныт интыосысь тылобурдоослэн вуэменызы герӟаса. Нош куд-огез соос пӧлысь лыкто асьме доры трослы вазь. Котькинлэсь азьло шаерамы вуо сьӧд куакаос. Туэ соосты синйылтӥзы ни 4-тӥ мартэ ик. Кӧня ке бергес вуизы вечи ӟольгыриос, ӵужйыръёс, пышӟузьыос (коноплянка). Нырысетӥ ву тудӟемен, дорамы вуозы тюрагайёс, ӟиллёос (зябликъёс), шырчикъёс, сэдыкъёс (чибис), ӵӧжъёс, тюливитьёс (кулик). Озьы асьме дорын гужемлы каръясько но пи потто 180 пала пӧртэм пумо бурдоос. Уно аръёс ӵоже ни Удмурт университетысь учёнойёс чаклало соослэсь лыдзэс, улон интызэс, сямъёссэс. Эскеронъёс возьмато: куд- ог бурдоос асьме дорысь ышизы. Кылсярысь, Кам шур вӧзысь тыосын уг адско ни гагараос, сапсан ӧрӟиос, кырекъёс (кречет). Республикаямы поттыны дасяськись Горд книгае али пыртэмын 45 пумо бурдоос. Соос пӧлын дукъя душес (беркут), тӧдьы быжо ӧрӟи (быркыт), чорыгась душес (скопа), мушбыдтӥсь (шурка золотистая) но мукет. Таин валче пусъёно созэ но, асьме палъёсын кунояны кутскизы азьвыл адскылӥсьтэм тылобурдоос. Озьы ог 10 ар талэсь азьло специалистъёслэн син шоразы йӧтӥз тодмотэм кыр дыдык (кольчатая горлица). Шыпытэсь тыметъёслы синмаськиллям, лэся, юсъёс (лебеди-шипуны). Соос ӵемгес но ӵемгес адӟиськыло. Н.ЩЕГОЛЕВА, Инкуазь утёнъя комитетын ужась. Алнаш ёросысь Улын Сырьез гуртын гажаса верало Тарасовъёслэн семьязы сярысь. Нина Михайловна вань улонзэ пудо вордонлы сӥзиз - со зоотехник. Владимир Иванович - Ильич нимо колхозысь одӥгез устоез механизатор. Кузпалъёс Тарасовъёс Коля пиенызы. В. Беломорскихлэн туспуктэмез. Туннэ Ашальчи Окилэн вордскемез дырысен 102 ар тырме Грах ёросысь Кузёбай гуртын Ашальчи Окилэн вордскем корка бервылаз быдэстӥське архитектурая но скульптурая ансамбль. Татын, туж шулдыр интыын, луоз сквер. Окилэн пинал дыр дуннеяз пырыны - кортлэсь капка, атыкай юртъерлэн одӥгез сэрегез (ӵуж коръёслэсь) ӝутэмын ни. Со сяна, кортлэсь дурем скульптура - тылобурдо "сьӧлтаськем" кызъёс йылэ. Шутэтскыны шуыса, скамьяос пуктылэмын. Ваньмыз та лэсьтэмын Касим Галиханов архитекторлэн проектэзъя. Нош Грахысь культура юртын озьы ик вань дано нылкышно кылбурчизылы сӥзем сэрег. Татын соку ик син шоры йӧтэ арлыдо Ашальчи Окилэн - Лина Григорьевна Векшиналэн бюстэз. Сое мраморлэсь лэсьтӥз скульптор Анатолий Аникин. Тыронъёс чотын Коньдон ужпумъёсъя министерстволы лэземын республикалэн бюджетаз тыронъёс чотын улон интыосты вузан-басьтонъя облигациосты кутыны. Та ужез ортчытыны нимысьтыз радлык тупатэмын. Облигациосты кутозы бюджетэ тыронэз возьматӥсь кагазъя, кудзэ сётэ вытъя служба. Облигациослэн огъя лыдзы тыронлэсь бадӟым луыны кулэ ӧвӧл. Пиос армие кошкозы Федеральной закон вылэ чӧлскыса, Правительство кутӥз "Туэ апрель-июнь толэзьёсы пиосты армие басьтон сярысь" постановление. Армие басьтозы 1973-тӥ-1981-тӥ аръёсы вордскем пиосты, кудъёсызлы та тупатэм дырозь тырмиз 18 арес. Коньдон висъямын Дэбес, Кизнер но Шаркан ёросъёслы тулыс бусы ужъёсты ортчытыны но пудо сиён басьтыны республикалэн бюджетысьтыз 2 миллион манет ссуда но кредитъёс висъямын. Удмурт Республикаысь Правительстволэн пресс-службаез. ДАУРЪЁС ВИСКЫН Апрель 100 ар талэсь азьвыл (1900-тӥ ар) Россия пыриськиз Китайын бугыръяськонъёсты зӥбонэ. Ӟуч ожгарчиос (войскоос) Маньчжурие пыризы Китае нуись чугун сюресэз утён вылысь. 80 ар талэсь азьвыл (1920-тӥ) 6-тӥ апреле кылдӥз Дальневосточной республика. 25-тӥ апреле пуромиз Польшаен ожмаськон. 65 ар талэсь азьвыл (1935-тӥ) 8-тӥ апреле тупатэмын 12 ареслэсь бадӟымгес нылпиосты но уголовной ответственность улэ кыскон радлык (виыны пуктонэз но вераса). 55 ар талэсь азьвыл (1945-тӥ) 4-тӥ апреле асьме ожгарчиос мозмытӥзы Словакилэсь шоркарзэ (столицазэ) - Братиславаез. 5-тӥ апреле СССР-ысь Правительство лыдъяз: Япония но СССР куспын ог-огед вылэ урдсконтэм сярысь 1941-тӥ арын гожтэм пакт кужымзэ ыштӥз. 9-тӥ апреле асьме ожгарчиос басьтӥзы Восточной Пруссилэсь столицазэ - Кёниксбергез. 11-тӥ апреле гожтэмын Югославиен эшъяськон, ог-огедлы юрттон но война бере ӵош ужан сярысь огкыл (договор). 13-тӥ апреле асьме ожгарчиос мозмытӥзы Австрилэсь шоркарзэ - Венаез. 21-тӥ апреле гожтэмын Польшаен эшъяськон, ог-огедлы юрттон но война бере ӵош ужан сярысь огкыл. 25-тӥ апреле СССР-ысь делегация пыриськиз Огазеям нациослэн конференциязы. 50 кун Америкаысь Сан-Франциско городын кутӥз ООН-лэсь уставзэ. 30-тӥ апреле Берлинысь рейхстаг вадьсы ӝутэмын Вормон флаг. 50 ар талэсь азьвыл (1950-тӥ) Кутскемын колхозъёсты бадӟыматон уж. 40 ар талэсь азьвыл (1960-тӥ) Апреле КПСС-лэн но Китайысь компартилэн кивалтӥсьёссы куспын лэчытэсь ченгешонъёс пуромизы. 35 ар талэсь азьвыл (1965-тӥ) Апреле Вьетнаме келяны кутскемын "музъем-омыр" ракетаос, США-лэсь самолётъёссэ уськытъян вылысь. 15 ар талэсь азьвыл (1985-тӥ) 23-тӥ апреле усьтӥськиз КПСС-лэн ЦК-езлэн пленумез. Со бырйиз экономикаез ӝог азинтон сюрес. Озьы кутскиз выльдӥськон (перестройка). 10 ар талэсь азьвыл (1990-тӥ) 28-тӥ апреле М.С.Горбачев ялӥз: СССР умойтэмен лыдъя огазеям Германиез НАТО-е кутонэз. Ӟеч-а мылкыдыд, фермер? Туала вакытэ фермеръёслэн но ужзы секытэн мынэ. Озьы ке но, миым кылдӥзы на эшшо 55 крестьян (фермер) хозяйствоос. Туннэ нуналлы шаерамы 3421 хозяйство лыдъяське, музъемзы 70,8 сюрс гектар, со пӧлысь гыроноез 63 сюрс гектар, республикаямы вань музъем пӧлысь со 4,2 процентэз луэ. Фермеръёсты эрико крестьянъёсын но ӵошатыны луоз. Куд-огез хозяйствоос пыд йылазы йыг-йыг сыло ни, мукетъёсыз, кинлэсь дыраз льготаос басьтыса вуымтэенызы уг быгато техника но мукет кулэ ваньбур басьтыны. Коньдон потто соос, бакча сиёнзэс, сӥль- йӧлзэс вузаса. Ортчем ар гуртоослы капчиен ӧз сётскы. Нырысь ик, кема кыстӥськиз тулыс. Дыраз ӧз вуы эстӥськон. Гужем куазь ӧз тупа тысё культьураослы но етӥнлы. Озьы фермеръёс нырысьсэ самой ӧжыт - гектарысьтыз 7 центнер гинэ ю тысь люказы. Но со дыре ик Пичи Пурга, Алнаш, Шаркан ёросъёсын басьтэмын ке 10-12 центнер, нош Кизнер, Сюмси, Ува, Красногорье палъёсын 4 центнерлэсь но ӧжытгес. Нош Алнаш ёросысь фермеръёслэн Пермяковлэн, Поповлэн бусыосысьтызы гектарысьтыз 20 центнерлэсь уно ю тысь басьтэмын, Воткинск районысь фермерлэн Поповлэн - 31 центнер. Татын куазь гинэ янгыш ӧвӧл. Уноезлэн крестьян (фермер) хозяйствоослэн ӧвӧл асьсэлэн кулэ техниказы, тужгес но комбайнъёссы. Нош 3421 хозяйство пӧлысь кӧняезлэн гинэ вань ю тысь куасьтон- шертон, кидыс дасян техникаез. Ортчемез ар тупаз, шуыны луоз, бакча сиён будэтӥсьёслы. Республикаысьтымы фермеръёс люказы 11,8 сюрс тонна картофка, коллективной хозяйствоосын ӵошатыса, со 17 процент луэ. Бакча сиён будэтэмын 2138 тонна, 1998-тӥ арен ӵошатыса, со 4,8 поллы уногес. Умоесь азинсконъёс басьтэмын Юкаменск, Дэбес, Игра, Шаркан ёросъёсын - гектарысьтыз 150-175 центнер. Нош Юкаменск районысь С.Н.Даниловлэн "Шеп" хозяйствояз со гектарлы быдэ 243 центнерен люкаськиз, Шарканысь Н.И.Собинлэн бусыосаз - 2700 центнер. Пудо вордон удыс кылиз 1998-тӥ арын кадь ик. Парсьёслэн лыдзы ог сюрс йырлы будӥз. Али фермеръёслэн 4800 парсьсы, 6100 йыр сюро таза пудозы, со пӧлысь 3200-эз - скалъёс, 3000 ыжзы. Вузамын 830 тонна сӥль, 7200 тонна йӧл, 1,7 миллион курег пуз, 62 центнер ыж гон, 22 тонна чечы. Пусйыны кулэ: фермер хозяйствоосын пудо вордон удыс ляб азинскемын. Татын мугъёсыз уно гинэ: уг тырмо гидъёс, поттэм продукцилы ичиесь дунъёс, коньдон уг тырмы ӟеч выжы пудо басьтыны. Пудолэсь лыдзэ будэтыны луонлык вань. Но со понна эштосъёслэсь бушам гидъёссэс фермеръёслы арендае сётон амалэз тупатыны кулэ. Фермер соосты басьтыны мед быгатоз, коньдонзэ бӧрысь тырыса. Нош унояз гуртъёсын та дыре гидъёсты кирпичен-кирпичен, корен-корен пумен лушкаса быдто ни. Крестьян (фермер) хозяйствоосты азинтонлы Удмурт Республикалэн бюджетысьтыз кылем арын висъяны чакламын вал 3 миллион манет, басьтэмын 2 миллион 950 сюрс манет, со пӧлысь 78 процентэз взаимозачёт амалэн. Коньдон висъямын тулыс но гужем бусы ужъёсты быдэсъянлы эстӥськон басьтыны, пудо гидъёс понна берыктыны. Туэ, валлян арен ӵошатыса, фермеръёслы коньдон висъямын 1,5 поллы ӧжытгес. Со пумысен фермеръёс уно пол вазиськылӥзы ни Удмурт Республикаысь Кун Кенеше но, Правительствое но. Нокыӵе ивор ӧз вуы. Крестьян (фермер) хозяйствоослы юрттонъя но попечительёслэн Советсы 2000-тӥ арлы смета юнматӥз. Но лыдпусъёс уг шумпотто. Кылсярысь, эстӥськон басьтыны чакламын 800 сюрс манетлы, со кылем арын сярысь, 2 поллы ичигес. Но эстӥськон со дыре ик 2 поллэсь дунояз, озьыен, 1999-тӥ арын сярысь, фермеръёс 4 поллы ӧжытгес эстӥськон басьтозы. Ортчем арын лизингъя (коньдонзэ пумен тырыса) басьтэмын 1 комбайн, МТЗ-82 вить трактор, мукет техника, ваньзэ 2,2 миллион манетлы. Туэ но та амалъя чакламын басьтыны "Нива" кык комбайн, ДТ-75 2 трактор, одӥг МТЗ. Беларусь Республикаен взаимозачёт но лизинг амалъёсты кутыса вераськемын ватсаса МТЗ тракторъёс вайыны. Секыт югдурзы фермеръёслэн льготаосын кредит басьтон ласянь. Ортчем арын АПК-лы юрттонъя нимысьтыз фондысь 2,1 миллион манет квота висъяськиз вал. Соку кредитэн 42 хозяйстволы юрттӥзы. Туэ "Золото-платина банклэн" льготаен кредитъёсын юрттыны луонлыкез вань куать хозяйстволы гинэ. Фермеръёслы ӧжытак ке но юрттэт сётыны луысал, ортчем арын бырем юоссы понна коньдонэн берыктыса. Кун 50 процентсэ ке но берыктысал ке со 1341,8 сюрс манет люкаськысал. Но умой луысал, сое меӵак коньдонэн сётысалзы ке. Куд-огез ӵектэ фермеръёслы сое ӟеч выжы кидысэн берыктыны. Но уноезлы со кулэ ӧвӧл, малы ке шуоно, ю тысьсы мыноз фуражлы гинэ. Вераны кулэ на тани ма сярысь но. Кӧня но кыӵе ваньбур поттэ фермер - соиз сярысь тодыны шуг. Государство выт октонъя полтиказэ урод радъямен, куд-огез поттэм продукцизэ ватыны, кулэстыны тырше. Куд-огез хозяйствоос лыдпусъёсты чик но уг возьмато. Каракулино но Камбарка ёросъёсысь фермеръёс, кылсярысь, одӥг гектар картофказэс но ӧз шараялэ, 6 район ӧз возьматы бакча сиён будэтэмзэ. Уноезлы хозяйствоослы умой-умой азинскыны люкетэ странаямы кылдэм секыт югдур. Но сиён-юон поттонын бадӟымгес инты басьто на нимысьтыз хозяйствоосгес. Соос тросэз уло мултэс сиён-юонзэс вузам чотын. Уноезлэн вань ни асьсэлэн тракторзы, автомобильзы, куд-огез вордэ 2-3 скал. Пуштросэзъя со семьяосын ужась Крестьян хозяйство луэ. Аспӧртэмлыкез со гинэ: соос уг дырто коллективной хозяйствоысь потыны, фермер но уг карисько. Озьы кутскиз ӟеч улыны тыршон понна аспӧртэмлыко ӵошатскон. 1999-тӥ арын нимаз семьяос но крестьян (фермер) хозяйствоос поттӥзы 35 процент йӧл, 51 процент сӥль, 80 процентлэсь уно картофка но бакча сиён. Крестьян (фермер) хозяйствоосты 1998-тӥ-2000-тӥ аръёсы азинтонъя ассоциация нимысьтыз программа кутӥз вал. Удмурт Республикалэн Правительствоез юнматӥз вал 1998-тӥ арын декабре. Соку ик сое эскерыны келязы Кун Кенеше. Но депутатъёс сое сэрттыны-пертчыны дыр таки ӧз шедьтэ, лэся. Табере Удмурт Республикаысь крестьян (фермер) хозяйствоослэн огазеяськонзы 2000-тӥ-2003-тӥ аръёслы выль программа кутӥз. Со кык эскеронэз (экспертизаез) ортчиз Удмурт Республикаысь Гурт удысъя но сиён-юон поттонъя министерствоын, Ужъя кун комитетын, Налогъёсъя службая управлениын, Юстицияя министерствоын, Музъем узырлыкъёсъя кун комитетын, гурт удысъя Удмурт научно-исследовательской институтын, Коньдон ужпумъёсъя но Экономикая министерствоосын, Правительстволэн правоосъя управленияз. Туэ 14-тӥ феврале та программаез Удмурт Республикаысь Правительство юнматӥз. Кыӵе юрттэт бен сётыны чакла Правительство? Со коньдон висъяны чакла пудо вордон удысын поттэм сиён-юон, ӟеч выжы ю тысь но пудо, етӥн вузам понна, музъемлэсь удалтонлыксэ ӝутэм но кадръёсты дасям но соослэсь тодон-валанзэс будэтэм понна. Программаын пусъемын: республикаысьтымы фермеръёс 4 ар ӵоже удыссэс паськытатыны, лэсьтӥськонэз азинтыны, техника басьтыны сётозы 110 миллион манет. Озьы ик программая 2003-тӥ арлы гурт удысъя продукция басьтонэз будэтыны чакламын 28 процентлы, ю тысь басьтыны кулэ 30 сюрс тонна, картофка 13,5 сюрс тонна, бакча сиён 2,4 сюрс тонна, сӥль 950 тонна, йӧл 7,4 сюрс тонна, чорыг 90 тонна, чечы 25 тонна. Ваньмыз со будыны кулэ али ужась хозяйствоосты паськытатэм чотын. Азьпала учкыса верано ке, 4 ар ӵоже кылдозы на эшшо 229 выль фермер хозяйство. Но выль программаез быдэстон кутске секыт вакытэ. Бӧрсьысь бӧрсе кык ар ӵоже куазь луонлык ӧз сёты ӟеч урожай басьтыны. Тодмо ӧвӧл, ку дугдозы дунъёс будэмысь. Тырмыт- а висъяськоз эстӥськон но минерал ватсэтъёс? Юанъёс, юанъёс... Трос гинэ соос. Нош валэктонъёс шедьтыны шуг. Оло вылез Президентмы, вылез Правительствомы валалозы фермеръёсты. Соосты гинэ ӧвӧл, вань калыкез. Н.Байтеряков. Россия Федерацилэн кун наградаосыныз пусъён сярысь Россия Федерацилэн Президентэзлэн указэз Ужын вылӥ вормонъёсыз но калыкъёс куспын эшъяськонэз но валче ужанэз юнматонын бадӟымесь азинсконъёсыз понна "За заслуги перед Отечеством" орденлэн ИИ степенё медаленыз пусъёно: Утробина Людмила Николаевнаез - Удмурт Республикаысь Грах ёросысь судлэсь кивалтӥсьсэ. Россия Федерацилэн Президентэзлэсь ужзэ быдэсъясь В. Путин. Москва, Кремль, 2000-тӥ арын 23-тӥ мартэ. � 544. Удмурт Республикалэн референдумаз кутэм решение Удмурт Республикалэн Конституциезлэн 10-тӥ ёзэтысьтыз 1-тӥ люкетаз воштон пыртоно, сое тазьы гожтыса: "Удмурт Республикаын кун властез быдэсъяло Удмурт Республикаысь Кун Кенеш, Удмурт Республикалэн Президентэз, Удмурт Республикаысь Правительство, Удмурт Республикаысь Конституцияя суд, Удмурт Республикаысь мировой судьяос. Удмурт Республикаын кун властьлэн мукет ёзъёсыз но кылдытӥськыны быгато. Соосты кылдытон но ужатон радлык тупатӥське Удмурт Республикалэн катъёсызъя но федеральной катрадлыкез лыдэ басьтыса". Удмурт Республикалэн Конституцияз воштонъёс пыртон сярысь решение кутэмен лыдъямын Удмурт Республикалэн референдумаз Быръёнъя комиссилэн 2000-тӥ арын 27-тӥ мартэ юнматэм 128. 3 номеро постановлениеныз. ШӦКЫЧ Выль Зеландия ӧвӧл та Дунне вылын туж трос паймымон интыос вань, шуо. Тани алигес гинэ мынам матысь эше Выль Зеландиысь вуиз. Воксё паймем, ява. Вера ук, вера ук вань адӟемзэ, эсьмаса, пельёс шуяло. Оскем но потэ кадь, уг но кадь... Аслам отчы вуылэме ӧвӧл бере, мытылыны уг дӥсьтӥськы. Фотографиоссэ адӟем бере гинэ кӧня ке буйгаз кӧты, оскон калэ вуи. Ой, нэнэ, ой, нэнэ, со Выль Зеландилы тыпак вожъяськи. Марзы гинэ отын вылымтэ! Лымы йыръёсын гурезьёс, зарни чорыгъёсын шуръёс. Нош инкуазь кыӵе мудрон но чебер вылэм. Омыред нош, омыред кыӵе ческыт вылэм отын. Шокаса, мар шокаса, вань пасьёстӥд кыскаса, кӧт уг тыры, шуэ. Шуэм - со зэм ӧвӧл, шуисько мон но пумитаз. Сётскем уг поты угось. Асьмелэн шоркарамы гинэ но паймымон интыос вань. Ойдо, кулэ ке, возьмато. Мынӥз ведь. Сюл-кал укмыс номеро трамвае пуксим но чугун сюрес вокзал сьӧры ширтӥм. Солэсь кыдёке трамвайёс уг ветло ни. Трамвайлэн берытскон интыез отын. Шӧдӥсько, эшелэн пуксетэз ик ӧвӧл, пӧсь таба вылысь табань кадь бырдамын ини. Трамвайысь ваським но отысен кыдёкын ик ӧвӧл, сюрес вамен гинэ, Гагарин нимо урамын 47 номеро корка сылэ. Со корка пала вуэмъя, эше эшшо но ӟудӥз ини. Малы монэ татчы ваид, пе? Малы, малы, солы шуисько, Выль Зеландиын ческыт омырен шокаса, урдсӥн тэтчась медад луы. Укыр ческыт омырен гинэ шоканы уг яра. Вордскем палъёсысь омырлэсь шӧмзэ вунэтод, кызьы кылбура вал тодмо мурт, шаермылэн ӵыныз но асьмелы ческыт но ярамон. Со корка пала вуим но тани зынъя шуисько. Эше ӧскыны кутскиз. Табере тӥледлы но рос-прос валэктытэк уз луы, дыр, мар бордын ужпум. Та коркалэн гулбечысьтыз дасо аръёс пала ини кыед зын но пӧсь ву лӧсъяськыса улэ. Татын улӥсьёслэн верамзыя, та пумысен вылӥ кивалтӥсьёслы но, улӥ кивалтӥсьёслы но трос пол верамын ини. Пайдаез гинэ ӧвӧл. Эскерыны ветлӥсьёс но вал, пе. Но корка пырыны юрдӥллям, ныръёссэс пытсаса пегӟиллям, нош огшоры адямиос, нылпиос уло ук, чидало, шокало. Кӧня аръёс ӵоже ини. Мар ке шат, кивалтӥсьёслэн квартираосазы кыед зын уг лӧсъяськы ук. Та гожтэт газетэ потытозь, корка интыяз ик сылыса кылиз на вал. Пӧсь пар но ву коркалэсь фундаментсэ, борддоръёссэ, ёзъёссэ ку, кыӵе нуналэ пыргытоз - тунаны шуг. Нош сыӵе учыръёс вал ини. Куке но соку пӧсь пар но пӧсь ву асьсэлэсь мытэм ужзэс йылаз-пумаз вуттозы, дыр. Адямиос гинэ бырыны медаз шеде вал. Д.Доминов. ТАЗАЛЫК Кытчы ватскем витамин? Кыӵе возьмаськом тулысэз! Нош со вуэ но... асьмеос ини кӧдэктэмын-жуммемын. Кинлы ке синмаськыса, ӝыт сайкыт омырын юмшан интые ӝоггес ӝокатскыса кӧлыны выдӥськом, нош ӵукна сыӵе ик керӟег сайкаськом. Малы? Врачъёс шуо: гиповитаминоз. Витаминъёс уг тырмо, иське. Сыӵе дыръя адями чаль жаде, ӵемгес пыэдэн висьылэ, йырсиез, гижыосыз тӥяськыны кутско. Валамон, витаминъёс асьсэос мугорамы уг кылдо. Соос сиёнэн шедё. Кылсярысь, А витамин вуэ пудолэн мусысьтыз, нӧкы вӧйысь, курег пуз ӵужысь, легезь мульыысь... Но туннэ мугормылы кулэ мында витамин сиыны асьмеос ум быгатӥське, куанер улэмысьтымы. Тани кин сие меда нуналаз 1,5 килограмм яблок (С витамин)? Со сяна, тулыс отын витаминэз но ӧжыт ини. Ӧжыт ай витаминэз али базарын вузаськись нырысетӥ бакча сиёнъёсын но. Зэм, адямилэн выль сиёнлэсь шӧдскымон мылкыдыз воштӥське, ӟигар пыре. Толбыт ӵоже картошка (сӥльын но) кемалась акыльтӥз ни уго. Соин ик - коньдонды ке вань, ческыт мед кошкоз! Я, кӧт тыриз. Нош витамин ӧз вуы. Мар каром? Врачлэсь юалом. - Али туж ӧжытэз ушъяськыны быгатозы асьсэлэн тазалыкенызы, витамино сиськеменызы, - вера врач Людмила Ситникова. - Алигес ортчытэм эскеронъёсъя, сыӵеос 10 процент гинэ. Соин ик юытэк уг луы дась витаминъёсты - соос али аптекаосын трос вузасько. Но ас тодэмдыя юыны кулэ ӧвӧл, котькуд учыре врачлы вазиськоно, малы ке шуоно, одӥгаз шуом огпӧртэм витамин гинэ, мукетаз - трос. Одӥгез гиповитаминозэз алэ, мукетыз - эмъя, кудаз ке микро- яке макроэлементъёсыз но вань, кудаз ке - ӧвӧл. - Асьмелэн-а, кунгож сьӧрын лэсьтэмъёсызлэн-а пайдазы тросгес? - Ӵемысь соос дунзыя гинэ висъясько. - Ну уг тырмо со витаминъёс, ма табере? - Соку ик ум кулэ, конечно (серекъя). Но тазалыкмес шӧдскымон ыштом. Кылсярысь, мугорын А витамин ке уг тырмы, син лябӟе, йырси усе, будэмысь дугдоно; Д ке - ӟигар быре, быгытъёс косканы кутско, лыос ӵемгес чигисько; Е, фолиевой кислота - анемия кутске, кӧтпуш висёнъёс аляло; В1 - неврит, сюлэм висёнъёс но мукет... Нош тазалыко улон понна нюръяськись Николай Январский промышленностьын поттэм витаминъёсты чик уг гажа. Ваньмыз со химия, шуэ. Витамин утчаны сиён-юонысь ик ӵектэ (кытысен кутским, отчы ик вуиськом ни). Солэн верамезъя, туж витамино - беризь сяська, кипрей, сутэр, эмезь, мята, виртурын, пыштурын, пушнер, тӧдьы сяська... Соосты парыса юылоно. Нош потытэм чабейлэсь витаминогес сиён дунне вылын туннэ но шедьтымтэ на - белокен но углеводэн туж узыр маке. Солэсь сиён но ческыт, дасяны но лякыт: ӝыт чабеез котэ, ӵукна 5 минут ӵоже пӧзьтэ. Кӧня ке сугон, ӵуж но горд кушман, кӧс вӧй но сылал ватсалэ. Чиньыдэ ньылод! Чабейды ке ӧвӧл, сое сезьы яке йыды тысь воштоз. Валамон, тужгес узыр витаминъёсын емышъёс: абрикос, виноград, чернослив, лимон, апельсин... Но со городысь узыръёс понна. Нош мар кароно гуртоослы? Туж огшоры - кубиста, ӵуж кушман, сяртчы, сугон, кӧмыныз валче пыжем картошка сиёно. Серекъян понна ум вераське, отын, зэмзэ но, вылӥ верам емышъёсын мындагес ик витаминэз. Вань витаминэз варенняын но -шонер ке пӧзьтэмын. (Емышъёсты дась сиропе кисьтоно, 5 минут ӵоже гинэ пӧзьтоно). Нош лэсьтылӥськоды-а тӥ паронка? Азьвыл сое пиналъёс конфет интые сиыло, пе, вал. Николай Январский сое тазьы лэсьтэ: чугунэ сяртчы, каляга, ӵуж кушман юдыса тыре, сое турынэн шобыртэ но ворсаса йырин уллань бекыртэ, 1 час ӵоже эстэм гурын возе. Ву поныны уг яра - отчы витаминъёсыз кылё. - Кытысь адями тодоз, кыӵе витамин солы уг тырмы? -Адями ачиз шӧдэ, мар солы уг тырмы: созэ яке тазэ сиемез потэ. Луэ ке, мед сиёз - иназ мынэм сиён тазалык вае. Но со сяна, адями ӟеч малпанъёсын улыны, мугорзэ кыдатыны кулэ: сиськыса гинэ шудо уд луы. Витамин утчазы З.РЯБИНИНА но О.ПЕТРОВА. Пеляд пон! * Пӧзьтэм сиёнъёсын тросгес витаминэз мед кылёз шуыса, пӧзьтэ одно ик ворсаса. * Бакча сиёнъёсты шыдэ понон азьын гинэ юдоно, юдэм маке кема кылльыса трос витаминзэ ыштэ. * С витамин трос сылалтэм кубистаын, В - сьӧд няньын. Туж пайдаё лыслэсь парос. ШӦКЫЧ Нырысетӥ вормисьёс Ялӥськом "Очей Толилы - пӧсь салам" конкурслэн нырысетӥ люкетаз вормисе потэмъёсты. Куинь устоосыз пӧлы пыремын: Г.Баженова (Глазов ёрос, Чебершур - "Амало парсь"; Т.Перевозчикова (Шаркан ёрос, Вортча починка) - "Кышнояськом, пе"; А.Касаткин (Ижевск - "Ми - ӟучъёс". 12 апреле 6 часын ӝытазе удмурт драмтеатрын луоз кылбурчилы но шӧкыччилы Александр Суворовлы сӥзем ӝыт. Та эшъёсты ӧтиськом отчы пыриськыны. Ӝытын ик маскарчи Анатолий Ушаков вормисе потэмъёслы синпель кузьымъёс сётоз. Кызьы ялӥмы вал, конкурслэн нырысетӥ люкетаз вормисе потэмъёс пыриськозы арлы йылпумъянъёс лэсьтыку. Валэктэ юрист Ужан сярысь книжка одӥг луыны кулэ Быгатӥсько-а мон пӧртэм трудовой книжкаосъя кӧня ке интыосын ужаны? Кызьы соку лыдъяськоз ужан стаже но кызьы тыриськоз пенсия? П. Алексеев. Можга город. Трудовой книжкаез нуонъя инструкциын (отчы кӧня ке воштонъёс пыртэмын 1990-тӥ арын 19-тӥ октябре) но Госкомтрудлэн постановленияз (1974-тӥ арын 20-тӥ октябре) валэктэмын: ужась муртлэн трудовой книжкаез одӥг гинэ луыны кулэ. Со возиське адямилэн ужан интыяз. Ужасьлэн мылкыд каремезъя, отчы гожтыны луэ адямилэсь мукет интыын (по совместительству) ужамзэ но. Ужъя законодательствоез тӥяса, куд-огез "быгатэ" кӧня ке трудовой книжка но возьыны. Озьы со тырше выт бичанъёслэсь пегӟыны. Кылсярысь, подоходной налог тыронлэсь: ас ужан интыяз адямилэн уждунэз ичи уждун быдӟа гинэ ке, солэсь подоходной налог уг кельтӥськы. Бухгалтериын уг тодо, адями кӧня ке интыосын ужа на шуыса, соин ик ичи уждунысьтыз подоходной налог но уг басьто. Сыӵе кескич адямиосты шараян понна ик малпамын доходъёс сярысь декларациос сётон. Ужан стажез но пенсиез лыдъян понна табере котькуд ужась Пенсиосъя фондын пусъемын ( котькуд адямилэн табере ас номереныз карточкаез вань), соин ик трудовой книжкалэн кулэлыкез адямилэн улоназ пумен сокем бадӟым инты уз ни басьты. Ижысь правоез утёнъя центр. Телефонъёсыз: 48-55-25, 43-01-36. Удмурт нылъёс нош ик паймытӥзы Кин шуиз: удмурт нылъёс дӥсьтӥсьтэмесь? Кин шуиз: асьсэ понна "ӝокатыса" возё ас чеберзэс? Таӵе малпан соку ик тӧлӟе, адӟиськод ке "Чеберина" конкурсэз. Чеберайёс куспын ӵошатскон куинетӥзэ ортчиз ни асьме шаерамы. Туэ тулыспалэ сыӵе конкурсъёс вал пӧртэм ёросъёсын. Нош 24-тӥ мартэ "Аксион" культура дворецлэн сцена вылаз потӥзы чеберайёс пӧлысь чеберайёс, ёрос конкурсъёсын вормемъёс. Тодмо гур шудэм улсын нылъёс потэмъя, шоканзэс ик пытсазы кадь учкисьёс. Кытысь адӟод на таӵезэ? (Зэм, асьме шаерысь сяна уд адӟы, мукет финн-угор элькунъёсын уг дырто та ласянь). Нырысь ик "Чебериналэсь" чылкытатӥсь тылзэ ӝуатӥзы 1995-тӥ но 1998-тӥ аръёсы вормисе потэмъёс: Шарканысь Наталья Кашина но Мукшиысь (Як.-Бодья ёрос) Алёна Федорова. Нош собере... кык-куинь час куспын нылъёслы возьматоно вал, нодлыко-чеберлыко луэмзэс гинэ ӧвӧл, котьма ласянь быгатэмзэс. Удмурт дэремен эктон-поръян воштӥськиз "кутюрье" шуонэн. Татын соос паймытӥзы ке паймытӥзы: синмальдымон поромытӥсь дӥськут "пӧраны" луэ вылэм... "крепдешорт" мешокъёслэсь, йӧл пакетъёслэсь, магнит лентаослэсь но тылыослэсь, пластик бутылкаослэсь но пластинкаослэсь... Быдэсак куро дӥсен, Бусы кузё ныл кадь потӥз учкисьёс азе Мукшиысь (али Воткинскысь музпедколледжын дышетскись) Настя Широбокова. Учкисьёслэн та нылашез адӟемзы ик уг луы вал кадь - кичабонъёсын согылӥзы - сокем синмаськизы. Соослэсь кузьым Настялы ик усиз. Ӝож ке но, сценаен люкиськытэк ӧз луы. 25 нылъёс пӧлысь 15-ез кылизы ӵошатсконлэн кыкетӥ люкетаз. (Эн малпалэ, 25 район пӧлысь котькудӥз быдэн чеберайзэ ыстэм шуыса: куд-ог ёросъёс татчы воксё но ӧз пыриське.) Синкыли вотсаз куд-ог нылъёсмылэсь синъёссэс... Зэм ик, жюрилы туж секыт вал висъяны самой-самойёссэ. Син азьын уго трослы ик ӧз ӝегатскылэ, куд-огез ньылен-витен ӵош потазы. Нош ӝытэз нуисьёс - Валерьян Исламгареев но Алексей Ложкин - нылъёслэсь нимтулзэс вераны "вунэтылӥзы" (соосыз ум каре янгыш - со нырысь ик сценариез дасясьёслэн, ӝытэз радъясьёслэн пыр- поч малпаськымтэзы). Соин ик жюрилэн "синтэм" луэмезлы пумит шуламъёс кылӥськизы. Кинлы ке кельшиз Балезиноысь Светлана Наговицына, кинлы ке - Киясаысь Светлана Куликова, кинлы ке - Бадӟым Кибьяысь Наташа Мартынова, кинлы ке - Сюмсиысь Наташа Сунцова. Яке - кырӟась "устокай" Оля Рябинина (Узей-Тукляысь), яке - кибашлы "устокай" Оля Кузьмина (Воткинскысь). Оло нош... "визьнодӥ" шуысалзы Шаркан ёросысь Мувырысь Лариса Широбоковаез. Но лэчыт визьзэс возьматыны нылъёслы луонлык ӧз сётэ (таӵе конкурсъёсын вакчи дыр куспын уг но луы, дыр, сое). Нош кыӵе йӧно адӟиськизы нылъёс "Сактонлэн" дӥсьёсыныз. Озьы ик - асьсэ вурем- малпам ӝыт нуллон дэремъёсынызы. Кӧня ке возьдаськисесь-шымырасесь - купальникъёсын (та ласянь зэм ик но малпаськоно: кулэ-а со удмурт нылъёсмылы)... Кема кенешем бере, жюри ялӥз (газетын ивортӥмы ни вал): Устокай луиз Шарканысь Татьяна Лопатина, Мусокай - Бобья-Учаысь (Можга педколледжын дышетске) Екатерина Васильева, Дыдыкай - Дэбесысь Ольга Серебренникова. Нош "Чеберай-2000" нимез но зарни коронаез басьтӥз бесерман нылаш - Яр ёросысь Ворца гуртысь Елена Дюкина. Таиз конкурс возьматӥз: ӵошатсконэ пыриськизы эшшо но чебересьгес, мугоесьгес, дӥсьтӥсесьгес нылъёс. Нош радъямын вал со азьвылъёсыз сярысь лябгес. Соизлы паймоно: быдэс нунал ӵоже пӧрмытскыны курадӟытэмзы бере, чеберайёсмы быгатӥзы на куремзыя "аспӧртэм образ кылдытыны, асьсэды йӧно возьыны, чебер, визьмо вераськыны"... Кылиз на ивортыны, кин дасяз, ортчытӥз та ӵошатсконэз. Азьвыл аръёсы сямен ик - Культурая министерствомылэн калык творчествоя центрез, "Удмуртия" ГТРК. Учредительёсыз - Культурая но Нациосын ужанъя министерствоос, Егитъёсын ужанъя кун комитет. Жюриос - азьлоосыз ик... Т.ПЕТРОВА. Улонысь суред Узиысь батыр Вордскем шаер сярысь малпаськыны кутскиськод ке, чебересь малпанъёслэн йылазы- пумазы ик уд вуиськы. Пӧртэм ӵошатонъёс, пӧртэм суредъёс ог-огзэс вошъяса, ог-огзэс азьпалтыны турттыса кадь, син азьтӥ ортчо. Татын будэмын, кыдамын угось, татын, вордскем гуртын, огъя вераса, вордӥськем шаерын, ваньмыз герӟаськемын анай но атай кылъёсын, улонэ нырысетӥ вамышъёсын, сюлмаськонъёсын, синвуосын, нырысетӥ вормонъёсын, шумпотонъёсын но келянъёсын. Туж чебер асьмелэн Удмурт шаермы. Котькин котьма мед шуоз, но кӧня ке гинэ палэнын улӥськод ке, сюлэм дор палъёсы чортэ ини. Вордӥськем палъёсы одно ик бертылэм потэ. Паськытэсь шуръёс-вирсэръёс, син сузёнтэм вож-вож нюлэсъёс, лудъёс но возьёс шобырто асьме шаермес, юртто асьмелы югыт дунне вылын улыны-вылыны, нылпиосмес шудо будэтыны, азьланезлы оскыса улыны. Юнме шорысь шат асьме шаерамы мукет калыкъёс но весяклы улыны интыясько. Лякыт сямо адямиос уло угось асьме палан. Лякыт сямо гинэ ӧвӧл ай, батыр калык улэ Удмурт шаерын. Уно шуг-адӟонъёсты чидаз ини со, нош чидан ӧз чигты сое, эшшо юнгес кыдатӥз гинэ. Сыӵе малпанэ вуиськод, кузь сюресъёсты ортчем, уно адямиосын пумиськылыса, пӧртэм учыръёсты адӟылэм бере. Котькуд гуртын, котькуд ёросын, котькуд городын вань угось аслыз тупась гинэ тодметъёс, инкуазь суредъёс, адямиос. Соосын данъяськыса, мылкыд ик пачыла, улэм потэ. Селта палъёсын гинэ ӧвӧл, быдэс дуннеын ӟеч тодо, Узи селоын вордскем но будэм пияшез Иван Вениаминович Шутовез. Тросэзлэн улӥсьёслэн, городын но гуртын, сое уно пол цирклэн арена вылысьтыз адӟылэмзы вань. Огшоры гуртын вордскем мурт трос пол паймытылӥз аслаз кужмо луэменыз, тыршись но сюлмо, ас азяз пуктэм ужпумез номыр шоры учкытэк, йылаз-пумаз вуттыны дась луэменыз. Трос адямиос солэсь адӟем каризы ини но солы ӟеч кылъёс вераллязы. Узи селоын 1951-тӥ арын вордскем пияш дас ньыль ар ужаз Ленинградысь циркын но Москваысь кужымъя театрын. Нырысетӥ бадӟым рекордзэ Иван Шутов быдэстӥз 1990-тӥ арын. Тросэз адямиос соку солы ӧз оске вал. Нош ас синъёсынызы но ас киосынызы кутылэмзы, эскеремзы бере гинэ сюлэмзы буйгаз. Паймонэз вал угось. Кужмо адями кык минут но куамын куать секунд куспын куать миллиметр зӧкта но кык сю миллиметр кузьда дас кык кортӵогъёсты куать гердэн куроез сямен керттылӥз. Таӵеез дунне вылын ӧй вал на. Нош 1998-тӥ арын Москваысь циркын Иван Шутов кыкетӥ рекорд пуктӥз. Ошъёсты думыса возён жильыез, кульчоосыз куать миллиметръем анданлэсь кисьтэмын, со кык секунд куспын кык пол мыжгыса сузмытӥз. Таӵе рекордъёс та дырозь ӧй на вал. Озьы Иван Шутов кык пол пусъемын Гиннесслэн но Россиысь "Пӧртмаськонъёс, рекордъёс но вормонъёс" книгаосазы. Циркысь кужмо артист мар гинэ ӧз дауртылы. Мар веранэз, Ижысь улӥсьёслэн сое асьсэлэн но адӟылэмзы вань. Вал дуретъёсты тямыс лыдпус кадь куасалляз но шори чигтылӥз. Нош корт лопатаез со тамак бумагаез музэн бинялтылӥз. Кызь кык секундскын ошъёсты думылон жильыез чигтылӥз но мукет. Одӥг пол мыжгемаз кирпичъёсты но изъёсты пыргытъяз, гольык киыныз выж пул пыртӥ поттылӥз кортӵогез. Одӥг пол мыжгыса гинэ. Нош кык пудъем гираосын тупен сямен шудылӥз. Пиньёсыныз сю тямыстон килограмм возьыса, вылаз кык воргоронъёсты но штангаен нылашез кутыса, арена вылтӥ ветлӥз. Огъя секталаен вить сю килограммлэсь ятыр. Арена вылын со уно пол паймытъялляз кужмо воргоронъёсты. Солэсь ваче кырмем киоссэ дасо адямиос вайяны ӧз быгатылэ. Мар веранэз на, со чӧльыеныз кык пудо гираосты шудыса сямен ӝутъя бере. Кудӥз-огез али ке но паймо, кытысь потэ солэн сыӵе кужымез. Иван Вениаминович паймымон востэм адями. Пальпотэ но шуылэ, ужаны кулэ, ужаны. Нуналлы быдэ лыосты-куосты жалятэк посыны кулэ. Гуртысь пересьёслэн верамзыя, солэн атаезлэн песятаез но туж кужмо но умой адями вылэм. Служить карем со гренадёрской полкын. Ваньмон дыръяз яратэ вылэм шулдыръяськыны но маскаръяськыны. Ӝутэ вылэм пал киыныз корка сэрегез но кинлэсь ке изьызэ отчы пачкатэ. Нош изьыез корка сэрег улысь вить кузя но поттыны уг быгато ни. Нош кык пудъем гираосты ӝужыт кенер вамен сэрпалля вылэм. Иван Вениаминовичлэн пиез но спорт удысэ вамыштӥз. Со дзюдоя Ураллэн чемпионэз, спортъя мастер ини. Нош кызьы шуо, адями малпа, инмар ятвылтэ. Улон сюрес Иван Шутовез чылкак мукет ярдуре вуттӥз. Ма сое гинэ-а? Циркъёс куашкан калэ вуэмен, данак тодмо артистъёс но, кужмо батыръёс но, пӧртмаськись адямиос но ужзэс воштоно луизы. Егитъёсты будэтон ужзэ, спортсэ палэнтыса, со выль уж борды басьтӥське. Кызьы ке но улоно угось та югыт дунне вылын. Нуналлы быдэ сямен сием потэ, нылпиосты утялтоно, быдэ вуттоно. Озьы тренер "Диво" фирмалэн генеральной директорез луиз. Татын солэн шӧдӥськиз сабырлы но шырыт сямо луэмез. Вань быгатонлыксэ сётыса, кужымзэ жалятэк тырше со ожысь но ужысь ветеранъёслы юрттонын. Со уг вунэты аслэсьтыз вордскем гуртсэ но, школазэ но. Сюлмысь юрттэ нылпиослы. Кыӵе кивалтӥсь, сыӵе ик ужасьёсыз но юнме уг шуо, дыр. Солэсь адӟем карыса ужало юрттӥсьёсыз но. Городын улӥсьёслы но со бадӟым юрттэт сётэ сиён-юонэн, лэсьтӥськон материалъёсын но мукет амалъёсын. Адямиос солы тау каро. Кужмо батырлэн сямыз но юн, куронъёсыз но чурыт, одӥг адямиез но юнме шорысь вӧсь но уз кары. Уно пол сое кунгож сьӧры но ужаны ӧтьылӥзы, нош со вордскем шаерзэ, ас калыксэ нокинэн но ӧз вошты. Ужа но улэ ас шаераз. Шудо сюрес тыныд, батыр кужым но тазалык, гажано Иван Вениаминович! Ф. Суворов. Алексей АЛЕКСЕЕВ Чыры-пыры арбери но секыт кыл Эх, малы меда егитъёс шер лыдӟисько? Тани Уваын 14-15 аресъем Сергей но Иван пичи лушкаськонлэн бадӟым изъянэ вуттэмез сярысь иворен тодматскысалзы ке, оло, ӧй мыдланьяськысалзы. Но... Ирландиысь Лимерик городын таӵе учыр вал. Кык егит пиос лушкемак пыраллям вуж арбериосын вузкарон лавкае. Соосты кырмизы но абдразы: пиёкъёс лушканы вуиллям ыргон коньдон гинэ. Таиз но вужмыса вожектэм ини. Пияшъёсты ньӧмыз понна гинэ судэ вуттӥзы. Чебер кыло-буро адвокат судьяосты ас палаз берыктэ ни вал. Нош таосыз пӧлысь огез нумизмат - вашкала коньдонэн тунсыкъяськись мурт вылэм. Со валэктӥз: вуж ыргон коньдонэз поттӥллям вашкала кельтъёс - асьме вапумлэсь (эралэсь) азьло Европаын улӥсьёс. Сыӵе коньдон сылэ ичизэ 1 сюрс фунт. Озьы вуж ыргон юдэс пиёкъёсты тямыс арлы тюрьмае ворсаз. Нош кытчы меда сюрозы ни вылӥ верам Сергей но Иван? Соос нуназе куазен пыразы Ува школа-интернатысь огаз кабинетэ, капыртӥзы дышетӥсьлэсь ог сюрс манет (фунт ӧвӧл) коньдонзэ. Олигарх шуонъёслэн лушкаськеменызы сое уд ӵошаты. Но Сергей азьвылгес судэ шедьылэмын ни бере, али сое уз жалялэ ни, вылды. Эшшо паймымонгес учыр вал Иж дорысь Пироггуртын. Кык пиос пыризы кафее, калык азьын кутӥзы кык блок сигарет но потӥзы. Соосты ӝегатӥзы... автоинспекторъёс. Шонер лэсьтӥзы - ӧтьымтэ куноос сотэк кыдёке кӧчыны быгатысалзы. 29 аресъем Андрей ужа вылэм Татариысь Агрыз городын "Лира" фирмаын. 29 аресъем Алнур кивалтэ Агрызысь ик рынокен (!) 308 манет тыр кыскон понна соос табере ворсамын изоляторе. Политикаен "шудӥзы" Март пумын "Дзержинец" лагерьын политикалы дышетскизы егитъёс. Ньыльдонлэсь уно 16-ысен 30 аресозь егитъёс ӵукнаысен бер ӝытозь 4 нунал ӵоже улӥзы асьсэлэн кылдытэм государствоязы. Нырысь нуналаз кутӥзы асьсэлэсь конституцизэс, люкиськылӥзы партиослы, бырйизы азьветлӥсьёссэс. Нош кыӵе государство президенттэк? Соин ик кыкетӥ нуналаз ортчизы быръёнъёс: котькуд партия аслэсьтыз ӵектӥз. Туж тунсыко ортчиз быръёнъёс азьын валэктон уж нуон но. Ваньмыз зэмос политикаын кадь. Шараяськылӥзы законэз тӥясьёс но. Куд-огез асьсэды асьсэос президентэ ӵектӥзы. Егитъёсты туала югдурен тодматӥз Виталий Николаевич Скрынник. Радъямын вал Воткинске но Сарапулэ потанъёс. Отын егитъёс асьсэос социологической юалляськон ортчытӥзы, войнаысь ветеранъёслы гурт котыразы куд-ог ужъёссэс быдэстыны юрттӥзы. Вуылӥзы Сарапулысь нылпи юртэ, пиналъёсты ческыт саламъёсын куноятӥзы. Ӝытъёссэ егитъёс улон сярысь вераськыны, лэсьтэм ужъёссэс эскерыны люкаськылӥзы. Та сменаез радъяз республикаысьтымы Егитъёсын ужанъя госкомитет. Политикаен "шудыны" шаерысьтымы пӧртэм организациосысь егитъёс люкаськылӥзы. "Шунды", "Родник", бадӟым классъёсын дышетскисьёслэн дэменлыксы, малпасько, таӵе ужрад юнме ӧз ортчы: тунсыкъяськыны, егитъёс политикаен ӟечгес тунсыкъяськыны, асьсэос отчы пыриськыны кутскозы. Н.ПРОКОПЬЕВА. Дӧдьы куштӥм Шунды нуналысь нуналэ вылэ но вылэ тубе, куазь но шунытгес кариське ни. Соин ик лымы кулэсме, котыр сьӧдэктэ. Вашкала удмуртъёс таӵе вакытэ, дӧдьызэс куштыса, уробо кыткылӥзы, со нуналъёсы ик кырын шулдыръяськылӥзы сиыса-юыса. Сое тодам вайыса, мон кӧня ке ар талэсь азьло та йылолэз матысь эшъёсыным, "Ожо- вожо" ансамблен, Ижын ортчытъяны кутски. Али та сям умойгес пыӵаны кутскиз городамы. Оштолэзьлэн кутсконаз "Удмурт кенеш" огазеяськонлэн Ижысь ёзэз Дӧдьы куштон йылолэз ортчытӥз Авангард ульча вадьсысь Кызьпу арамаын. Солэн кивалтӥсьёсызлы Илья Байметовлы, Анатолий Митрофановлы, Алевтина Поткиналы трос утчаськоно-бызьылоно луиз. Сюлмаськемзы юнме ӧз луы - праздник удалтӥз, калык ӧжыт ӧй вал. Лыктэмъёсты шулдыртӥзы Ижысь тужгес чебересь ансамбльёс: "Инвугурез" воштӥз "Бускель", "Инвожоез" - "Ожо-вожо". Калыклэсь мылкыдзэ ӝутӥз на городамы алигес кылдэм пор "Ош пеледыш" ансамбль. Сцена вылысь васькыса, артистъёс лыктэмъёсын ӵош кема эктӥзы-кырӟазы-шудӥзы на. Озьы Ижын улӥсьёс туж шулдыр-чебер келязы толэз, пумитазы тулысэз. Табере, лымы шуназ ке, вуозы Будӟым нунал - Акашка, Гуждор. Н.ВОЗИСОВ. ШӦКЫЧ Очей Толилы - пӧсь салам! Так же Мынэ ӟуч кылъя урок. Мария Петровна пиналъёсты берыктыны косӥз бакча сиёнъёслэсь нимъёссэс удмуртысь ӟуч кылэ. Кӧня ке гожъяськемез бере, Пичи Васи юаз дышетӥсезлэсь: - Марья Петровна, кызьы луоз чеснок ӟуч сямен? - Так же, - гожъяськон сяменыз йырзэ ӝутъятэк вераз дышетӥсь. Кӧня ке улыса Мария Петровна пиналъёслэсь юалляськыны ӧдъяз, кин кызьы гожтэм бакча сиёнъёслэсь нимъёссэс. Косӥз лыдӟыны Васиез но. Соиз султӥз но лыдӟе: - Морковь, капуста, свекла, также, лук... - Мар, мар? - юаз дышетӥсь. - Мар со "также"? - Мон тӥлесьтыд юай ук, кызьы луоз чеснок ӟуч сямен. Асьтэос шуиды - также, - валэктӥз Васи. Коньдон борды коньдон Картэным вераськыса пукиськом улон-вылон сярысь, узыръёс но куанеръёс сярысь. Шуисько, ӟучъёс верамъя, коньдон коньдон борды лякиське. Дорамы кунояло вал нылмылэн пиналъёсыз. Соос кылӥллям вераськеммес но пелязы понӥллям. Доразы бертыса ну выро ук, пе, коньдонэз огез борды огзэ лякыны. Нош соосыз нокызьы уг лякисько. Мумызылэсь юано кариськиллям: - Анай, малы песянайлэн коньдонъёсыз огез борды огез лякисько, нош асьмелэн - уг? М.ПЕРЕВОЗЧИКОВА. Шаркан. ЛЫДӞИСЬ ВЕРА МАЛПАНЗЭ Дорамы но вуиз Алигес гуртамы вуылӥз Кун Думалэн депутатэз Светлана Константиновна Смирнова. Люкаськем калык сое табанен, мильымен, перепечен пумитаз. Бадӟым куномы милемлы мадиз Москваын ужамез сярысь, вераз азьланезлы мылкыдъёсыз пумысен, валэктӥз уно юанъёсмылы. Пумиськон туж шуныт ортчиз. Умой на соиз. Та нуналэ ик гуртамы тол келянлы сӥзем праздник ортчиз. Депутатлэн дорамы лыктэмез сое уката но ӟеч кариз. Россиысь парламентэ трос муртэ бырйылӥм ни, нош гуртамы та дырозь огез но ӧз вуылы на вал. Тау, Светлана Константиновна! В.Чернышова, Кизнер ёросысь Синяр-Бодья гуртын улӥсь. СПОРТ Эн куалекты! Спортъя "Динамо" обществолэн ыбылӥськон тираз ӵошатскизы Удмуртиысь ожгар клубъёсысь но кадет классъёсысь егитъёс. Нюръяськонэ пыриськизы Ижысь, Сарапулысь, Воткинскысь, Можгаысь, Кизнерысь, ваньмыз 23 команда. Соос пӧлын вормизы Ижысь 4 номеро училищеысь кадетъёс, кыкетӥ но куинетӥ интыосын - "Граница" ожгар клубысь командаос. Нимаз ӵошатскисьёс пӧлын сэзь луэмзэс возьматӥзы 4 номеро училищеысь Дмитрий Варламов но Иван Булычев, "Граница" клубысь Андрей Миронов. А.ИВАНОВ. Тау тыныд, Лидия Дмитриевна! Национальной библиотекаысь "Удмурт шаер" клуб ӵемысь ортчытъя йӧно, визьмо, дано адямиосын пумиськылонъёс. 27-тӥ мартэ но таӵе ужрад вал. Национальной библиотека радъяз Татьяна Черноваен но солэсь гожъясь выжыосыныз пумиськон. Таӵе ужрад луоз шуыса тодэмед бере, пукод на, пе, дорад. Куамын арлэсь кема ужай бере книга поттон юртын, кинэн но пумиськоно ӧз луылы. Лидия Дмитриевнаез тодӥсько нырысетӥ сборниксэ поттэм дырысен. Мон солэсь кӧня ке ареслы бадӟымгес. Нош соку сое Лида гинэ шуисько вал. Паймыса учкылӥсько вал шораз: кытысь таӵе востэм, пичи мугоро нылашлэн сомында визьмыз, сюлэм пушкы пырись, адямилэсь мылкыдзэ бугыртӥсь кылбурчиос тупен туж ӧжыт вал. Ашальчи Оки, арлыдо вал ни ке но, кӧня ке пол вуылӥз издательствое. Паймисько вал Степанида Ивановналы. Дышетскемез но ньыль класс гинэ, шуэ вал. Ачим но, пе, валаса уг вуиськы, олокытысь марысь кылдыло такмакъёс. Туж жаль Ида (озьы шуисько вал мон сое): вазь кошкиз улонысь. Одӥг гинэ книга поттыны вуиз кадь. Озьы ик чик малпамтэ шорысь вуиз книга поттон юртэ Люся Хрулева. Ми дорын кема ик ӧз ужа ке но, туж тодмо адями луиз издательствоысен ик. Лидия Дмитриевнаен нош ӧм пумиськылэ ни вал пенсие потэм дырысен. Шутэтскыны кошкыса но издательствоен кусыпме уг ыштӥськы. Кыӵе пайми мон, татын Таня Чернова ужа шуыса тодэме бере. Созэ но тодӥ: та нылаш Лидия Дмитриевналэн нылыз вылэм. Лидия Дмитриевналэн данэз шаерамы туж бадӟым. Трос нылпиосыз пӧлысь одӥгез ас выжыяз мынэм. Таӵе учыр, оло, быдэс шаерамы ӧвӧл. Талы-а уд паймы? Та-а анай, песянай понна шумпотон, шуд ӧвӧл? Иське, удмурт кылмы уз быры. Лидия Дмитриевна, инмар тыныд визь, чидан, сомында нылпиостэ быдэ вуттыны кужым сётэм. Эн куректы, ваньмыз аслад сюрестӥд ӧз мынэ шуыса. Котькин сое ачиз быръе, Семьяын, мон малпамъя, пӧртэм ужасьёс мед луозы: дышетӥсьёс, инженеръёс, эмъясьёс, лыдъясьёс-гожъясьёс... Тазалык тыныд, Лидия Дмитриевна! Нокинлэн но улонэз ӵыжтэм вӧй вылтӥ уг азинскы. Тынад но, котькыӵе дырыд вал, дыр. Данъяськы асэныд, вордэм, быдэстэм нылпиосыныд. Тонэ но Таня нылдэ гажась, лыдӟись Анна Иванова. Котьма сярысь Анфиса "кузпал" утча Тулыс вуэмен Пермь улосысь Чайковский городысь пинал натуралистъёслэн станциысьтызы вить аресъем Анфиса обезъян сютэм улон сярысь ялӥз. Анфиса азьвыл котьку шулдыр мылкыдо вал, ӧз кепыра адямиослэсь но. Табере со клетка сэргы ӝиптӥське но мӧзмыт тусо улэ, сиён уг басьты. Станциын куд-ог ужасьёслы ӧчкаре на, кытӥяз сяласькыны но уг кепыра. Специалистъёслэн верамзыя, солэн мугез одӥг - Анфискалы кузпал кулэ. Но самой секытэз ужпум со бордын: матысь городъёсын "гусар" выжыысь мартышкаос ӧвӧл. Табере солы "кузпал" утчаны кутскизы дуннеысь Интернет ёз пыр. Тазалык Висён уг юа кытын улэмез Гуртоослэн висьыны дырзы ӧвӧл шуо ке но, Кельдышысь фельдшер пунктын калыкез уг бырылы. Тол вылын тани пыэдэн трос курадӟо, уколъёс басьяны ветло, уж лумбытлы тырме. Фельдшер Людмила Михайловна Максимова гуртооссэ умой пумита: кулэ эмъюм ӵектэ, массаж лэсьтэ, физиоен эмъя. Секытгес висисьёссэ районысь больницае келян сярысь сюлмаське. Феврале татчы юромо Зюзя больницаысь пинь эмъясь врач ветлӥз. - Араз одӥг толэзь сяна гуртъёсы потаммы уг луы. Но та дыр дыр ӵоже сомында калык луэ - нунал ӵоже пуксьылыны ик дыр уг шедьы. Азьвыл калык тазалыксэ аналтыса возе вал, али сюлмоесьгес - тани школаын дышетскисьёс туж трос вуо, - вера Маиса Михайловна Кузьмина. - Городын кадь аппаратурамы луысал на ке, ужаны но капчигес луысал, вӧсез но ӧй шӧдӥськысал. Вӧсез бен чидамон - сое Маиса Михайловна зӥбыт сямыныз, лӥятӥсь кылыныз зӥбломытэ. Фельдшер Л. Максимова. Марина Кардопольцева туж дӥсьтӥсь нылаш - пиньзэ эмъяны ӵукна ик лыктӥз. З. Рябинина. Туспуктэмъёсыз В. Беломорскихлэн. Висьыны пайдаё луоз-а? Странаямы улӥсьёс матысь дыре висемзы понна уногес коньдон басьтыны кутскозы. Россия Федерациысь Ужъя но улон-вылонэз азинтонъя министерство та дырозь висем понна (больничной листъя) коньдон тыре вал шоро-куспо уждунъя, мукет тыронъёс лыдэ ӧз басьтӥськылэ. Нош табере, Россия Федерацилэн Президентэзлэн Указэзъя, огдырлы ужаны быгатымтэ понна пособие сётӥськоз вань басьтэм коньдонэз лыдэ басьтыса. Зэм, "больничнойлэн" быдӟалаез ичизэ 85 уждунлэсь (7100 манет) бадӟым медаз луы. Но куд-ог ужасьёслы могӟетъёс пуктэмын уз луэ. Соос пӧлы пыро ВИЧ-инфекциез нуллӥсьёс, уж доразы яке службая долгзэс быдэстыкузы сӧсырмемъёс но Чернобыле ветлэмъёс. Н.НИКИТИН. Вормон нунал азьын Толон ортчиз Быдӟым Отечественной ожын Вормонлы 55 ар тырмонэн валче кылдытэм оргкомитетлэн кенешез. Сое нуиз Александр Волков. Правительстволэн Тӧроезлэн воштӥсез Виктор Шудегов люкаськемъёслы ивортӥз та бадӟым ужрадлы министерствоослэн но ведомствоослэн, интыысь аскивалтон ёзъёслэн кызьы дасяськемзы пумысен. Кылсярысь, йылаз-пумаз вуттэмын Быдӟым Отечественной ожысь ветеранъёслэн списоксы, эскеремын фронтэ ветлэмъёслэн коньдонэн но улон- вылонэн герӟаськем ужпумъёссы. Огкылын вераса, шуиз Виктор Шудегов, Вормонлы сӥзем праздниклы дасяськон мынэ кулэезъя. Правительстволэсь та ужрадлы сӥзем постановленизэ ӟеч быдэсъяло городъёсысь но, ёросъёсысь но администрациос. Кенеш дыръя вераськемын ожысь ветеранъёслы коньдонэн ватсаса юрттэт сётон сярысь. Ваньмызлы соослы келямын луозы Кун Кенешлэн но Правительстволэн тау карон гожтэтъёссы, нош 6-тӥ мае ортчоз Вормонлы сӥзем сӥё-дано кенеш. *** Вормонлы 55 ар тырмонэн герӟаськем ужпумъёслы ик сӥземын вал интыысь аскивалтон ёзъёслэн но ёросъёсысь депутатъёслэн Советъёссылэн кивалтӥсьёссылэн кенешсы. Со ортчиз Кун Кенешын. Александр Волков но Правительстволэн Тӧроез Николай Ганза ивортӥзы республикалэн улон-вылон но экономика удысъёсаз кылдэм югдурен, йылпумъянъёс лэсьтӥзы нырысетӥ кварталэ быдэстэм ужъёслы. Соос кӧня ке шумпотто. Кылем арын та дырен ӵошатыса, промышленной вузъёс поттон йылӥз кызь процентлы. Куинь толэзь куспын гинэ ужтэк кылемъёслэн лыдзы 5800 адямилы кулэсмиз. Правительство бюджет чотын улӥсьёслэсь уждунзэс будэтон сярысь постановление кутӥз. Кенешын озьы ик вераськизы калыкез улон-вылонын утёнъя министр Светлана Андреева, тазалыкез утёнъя министр Сергей Шадрин, Кун Кенешлэн Тӧроезлэн нырысетӥ воштӥсез Павел Вершинин. Удмурт Республикаысь Кун Кенешлэн пресс-службаез. Валэктэ юрист Сэрегез нуэ адвокат Лилия Шкляева Картэным ӵош утялтӥськом вить пимес но солэсь синтэм анайзэ. 1976-тӥ арын 23-тӥ феврале куать арес тырмымтэ пиме мотоцикл лёгаса вииз. Югдурез эскерыны следователь лыктоз шуизы - нокин ӧз вуы. Янгыш муртлэсь кылзэ ӧз юалэ. Та понна бӧрдыса но 35 ар тыршыса, тазалыке лябӟиз. Витьтон аресме тырмытӥ ни, монэ пери (паралич) шуккиз. 16 ар ужай заправкаын. Нош пенсие потэме уг луы. Али мыным 52 арес. Вить нылпи вордэмме лыдэ басьтыны уг луы шат, пенсие вазьгес лэзён вылысь? Раиса Протопопова, Дэбес ёросысь Такагурт. Таӵегес ик гожтэтэн редакцие вазиськиз Раиса Протопоповалэн Василий пиез. "Кун пенсиос сярысь" Закон Россия Федерациын кутэмын 1990-тӥ арын 20-тӥ ноябре. Отын пусъемын: пенсие вазьгес кошкыны быгато вить но ятыргес нылпи вордэм но тямыс аресозь будэтэм кышноос. Озьыен, огез коть пинал сыӵе арлыдозь вуэмын ӧвӧл бере, сыӵе пенсия басьтыны уг луы. Законлэн 12-тӥ ёзэтэз вера секыт но тазалыклы изъян ваись удысъёсын тыршем кышноосты 45 но 50 арес тырмем бере пенсие лэзён сярысь. Заправкаын ужам аръёс сыӵе право сёто-а шуыса тодон вылысь, ужан (трудовой) книжкадэс яке солэсь копизэ кутыса ветлэ Дэбес райсобесэ. Тазалык 7-тӥ апреле - Тазалыкез утён нунал Вень йылын - кулон Трос сюлмаськонъёсмы пӧлысь асьмеос куддыр ум быгатӥське тужгес висьытӥсьёсызлы саклык висъяны. Туннэ тодмоосмы, ӵыжы-выжыосмы пӧлын наркоманъёс, ВИЧ-инфекциен курадӟисьёс ӧвӧл ке, киынымы шонтӥськом, "асьсэлы медло" шуиськом. Нош сыӵе кышкытлык котькуд нунал кылдыны быгатэ. Уго туннэ Россиын 32 сюрс таӵе висисьёс, соос пӧлысь 700-эз - нылпиос. 90 процентэз эзелез шедьтӥзы "бышкиськыса". Удмуртиын али 28 мурт инфекциез нуллэ, одӥгез СПИД-лэсь кулӥз ни со висись сярысь газетмы кылем арын гожъяз вал. Кышкыт учыръёс шараямын ни Ижын, Глазовын, Воткинскын, Якшур-Бодья но Камбарка ёросъёсын. 17-ез соос пӧлысь - 16-25 аресъем егитъёс: школаын, училищеын дышетскисьёс, ужтэк улӥсьёс. Сыӵе адямиос вӧзаз ик ӵужектонэн висё на. Кызьы бен палаське та кышкыт кыль? Нырысь ик, гомосексуалистъёс пыр. Со сяна, ог-огзэс палато наркоманъёс (одӥг шприцен бышкисько), эрказъяськыны яратӥсь егитъёс. Али бадӟым кышкытлык кылдэ, тросгес калык паласькыны быгатоз шуыса. малы? Куд-огез висись пиосмуртъёс асьсэос но со сярысь тодытэк, мукет пиосмуртэн но, кышномуртэн но кӧлало, соосыз - мукетыныз... озьы быдэс рад. Пумиськыло ни тани быдэс семьяен висисьёс. 1998-тӥ арын асьме пала улыны лыктӥз Украинаысь семья. Картэз азьвыл наркоман вылэм, отӥын улыкузы ик висён шедьтэм, ачиз со сярысь тодылымтэ. Шараяськиз алигес гинэ, кышноез секытэн луыса консультацие учётэ султэмез бере. Тӥни сыӵе нуны возьман. Нош республикаямы асьмелэн 1250 наркоман лыдъяське... СПИД-эз эмъяны туннэ уг луы на. Зэм, котькуд странаын вакцина утчало. Кутско ни адямиос вылын но эскерыны. Но со ужъёс вить ар пала кыстӥськозы на. Собере, юрттоз ик-а со? Вераны но, оскыны но шуг. Соин ик котькудмылы асьмелы кышкыт адӟонлэсь утиськоно. Шаерамы ВИЧ-ез алонъя трос программаос ужало. Кылсярысь, али дасяло азьвыл наркотикъёсын вырем адямиослэсь "аутрич-ужасьёс". Соос ас вылазы наркотиклэсь изъянзэ шӧдӥзы бере, мукетъёсызлы со сярысь валамонгес но оскымонгес валэктыны быгатозы. СПИД-эн нюръяськонъя центр та удысын ужась врачъёсын дышетонъёс ортчытъя. 1999-тӥ арын гинэ психосоциальной консультацияя но ас мылкыд каремъя эскериськон кабинетэ 1137 мурт вазиськылӥз. Соос пӧлысь 143-ез - наркоманъёс. Республикаямы кылдытэмын наркотикъёсын вырись адямиосын нюръяськонъя но ВИЧ- инфекцилэсь паласькемзэ алонъя правительственной комиссия. Миым декабре республикаысьтымы Правительствоен но Кун Кенешен кутэмын Анти- ВИЧ/СПИД комплексной программа. Солы коньдон висъяны но чакламын. 2000-тӥ арын усьтӥськыны кулэ ни выль лаборатория - кылдоз висись муртъёсты ӟечгес чакланы- эскерыны луонлык. Ваньмыз ачид бордысь потэ, шуо. Но али, куке та кышкыт кыль тросэн вӧлмемын ни, аслыд гинэ оскыны уг луы ни. СПИД-эн нюръяськонэ пыриськыны кулэ бадӟым кивалтӥсьёс но, иворез вӧлмытон ёзъёс но, ваньмы, кинлы дуно та улон. Л. Кузелин, республикаысьтымы СПИД-эн нюръяськонъя центрысь врач. 1904-тӥ ар 1904-тӥ ар Россилэн историяз одӥгез секыт вакыт луэ. Та аре Россия но Япония куспын кышкыт ожмаськон кутскиз. Дальний Востокын пуромем ожмаськон сярысь ивор Вятка губерние телеграф пыр вуиз 27-тӥ январе, нош 30-тӥ январе татысь нырысетӥосыз пиос фронтэ келямын вал. Атыкай музъеммес лек тушмонлэсь утён вылысь, тросэз предприятиос но нимаз адямиос быгатэмзыя коньдон висъяны ӧдъязы. Озьы, Глазов уездын улӥсьёс 1 сюрс манет люказы. Горд Кирослэсь ужзэ юнматон вылысь, тамында ик коньдон келязы соос флотэз кужмоятонэ. 500 манет висъязы Глазовысь вузкарисьёс. Сарапулысь земской управа Горд Кирослы но флотлы люказ 3 сюрс манет, 300 манет висъяз солдатъёслы дӥсь вурон понна, 1 сюрс манет - фронтэ кошкемъёслэн семьяоссылы. Елабуга уездлэн управаез флотэ келяз 3 сюрс манет, 5 сюрс манет висъяз та уездысь фронтын сӧсырмемъёсты эмъян понна. Тушмонэз ӝоггес вормон вылысь, озьы ик коньдонзэс висъязы Ува волостьысь Тыловай но Волипельга, Полом, Селты, Понино, Зюзино черкогуртъёсысь кенеше люкаськемъёс но мукетъёсыз. Нимаз адямиос пӧлын аслаз шырыт сямо луэменыз тужгес висъяськиз Сарапулысь Семагин купец. Со зарни медальзэ сётӥз. - Январе Глазовысь нылпиос понна нырысьсэ радъямын вал выль ар кыз котырын шулдыръяськон. 175 нылпиез ческыт сиёнъёсын но пӧртэм кузьымъёсын шумпоттӥзы. - Феврале Сарапул уездысь Сосновский черкогуртын почта усьтӥськиз. - Сарапул городлэн сӥё-дано адямиез Ольга Ивановна Ижболдина Сарапул уездысь висисьёслы юрт лэсьтонэ 10 сюрс манет коньдон висъяз. 5-тӥ октябре Глазовын пиослы гимназия выллем школа усьтэмын, 1910-тӥ арын со гимназилы пӧрмытэмын. 28-тӥ ноябре кылдытэмын Вяткаысь учёнойёслэн архивъёсын ужанъя комиссизы. 1920-тӥ арын март толэзе кылдытэмын вал Вяткаысь историяя общество, со ог дасо ар возиськиз. 1922-тӥ арын 3-тӥ феврале усьтӥськиз Вяткысь шаертодонъя институт. Таиз 1941-тӥ арозь ужаз. Ноябре Сарапулын усьтӥськиз Мария Федоровна императрицалэн юрттэмез улсын ужась нылпи юрт. - 4-тӥ мартэ вордскиз удмурт писатель Григорий Медведев. - 17-тӥ мартэ вордскиз удмурт нылпи псатель А.Н.Клабуков. - 24-тӥ сентябре вордскиз адкадемик Б.В.Парин. Со Вир басьтонъя республиканской станция кылдытӥз. - 10-тӥ декабре вордскиз геолого-минералогической наукаосъя доктор Н.Д.Соболева. - Та аре Воткаысь завод но Сарапул город куспын усьтэмын вал дилижансэн ветлон сюрес. Валъёсын кыткем экипажен ворттон понна 1 манет 60 копейка дун чакламын вал. Сюресэз ортчоно луылӥз 12 час куспын, соос пӧлысь 4 чассэ валъёсты шутэтскылытӥзы. Е.ГОРБУШИНА, Удмурт Республикаысь кун архивысь валтӥсь специалист. * Анастасия Григорьевна Грехнёва Александра нылыныз. Шорысез офицер Лабутин (Иж завод, 1904-тӥ ар). * Вотка заводысь мартен цех. Адямиосты шумпоттоз балет Шаерамы нош ик ортчоз П.И.Чайковскиез данъясь фестиваль - таяз учыре со сӥземын луоз быдӟым ӟуч крезьгурчилэн вордӥськемез дырысен сю куатьтон ар тырмонлы. Асьме доры лыктозы бадӟымесь куноос. Соос пӧлын - Пермьысь Операя но балетъя П.И.Чайковский нимо кун академической театр, Москва кун филармониысь солистъёс калык куспо конкурсъёслэн лауреатъёссы Вадим Руденко (фортепиано) но Дмитрий Коган (скрипка), Удмурт Элькунысь кун симфонической оркестр (дирижёрез - Татарстанлэн, Казахстанлэн, Россилэн калык артистсы Фуат Мансуров), кырӟась - Россиысь дано артистка калык куспо конкурсъёслэн лауреатсы Лариса Рудакова, Удмурт Элькунысь Культурая министерстволэн духовой инструментъёсъя кун оркестрез, Удмурт кун филармониысь кырӟась Елена Бускина. Пермьысь театр возьматоз Петр Чайковскийлэсь "Лебединое озеро", "Спящая красавица" балетъёссэ, Сергей Прокофьевлэсь "Ромео и Джульетта" балетсэ. Москва кун филармониысь солистъёслэн Вадим Руденколэн но Дмитрий Коганлэн шудэмзы улсын чузъяськозы Никколо Паганинилэн, Петр Чайковскийлэн, Сергей Прокофьевлэн крезьгуръёссы. Удмурт Элькунысь кун симфонической оркестр шудэмъя быдэстӥськозы Михаил Мусоргскийлэн "Ночь на Лысой горе" фантазиез, Петр Чайковскийлэн Ньылетӥ симфониез, Джузеппе Вердилэн, Джоакино Россинилэн, Михаил Глинкалэн операосысьтызы ариос. Удмурт кун филармониысь кырӟась Елена Буснина шумпоттоз ӟуч романсъёсын. Фестивалез радъяны юрттозы Уральский Трастовый банк, "Крона" салон-магазин. Таӵе бадӟым ужрадлэсь палэнэ уз кыльы Удмурт Кивалтэт но - концертъёсты ортчытыны висъялоз сю витьтон сюрс манет. Кин юрттоз ветеранлы? Василий Григорьевич Юрасов - ожысь ветаран. Улэ Ижевскын. Валамон, пенсиез улыны уг тырмы. Музъеме ке луысал, шуэ со, ӧй ёрмысал. Но дунын басьтыны луонлыкез ӧвӧл. Зэм, ветеранъёслэн вань льготая дунтэк музъем басьтыны луонлыксы. Василий Григорьевич олокытчы но вазиськылӥз ни - малпанзэ быдэстэмез уг луы. Мӧйы муртлэсь кулэяськонъёссэ нокин уг кылы. Оло, шедёз город котырысь хозяйствоосысь кыӵе ке кивалтӥсь, быгатоз ветаранлы дунтэк музъем висъяны? Витиськом! Тӥ ӧд вунэтэ-а, ӵуказе, Космонавтикалэн нуналаз, Удмурт национальной театрын 18 часын кырӟан гожъясь кылбурчилэн Федор Суворовлэн ӝытэз кутске шуыса? Бен-бен! Солэсь ужъёссэ быдэстозы данак валтӥсь удмурт артистъёс. Витиськом, ваньмызлы ик инты тырмоз. Студентъёс но космонавтъёс та ужрадэ дунтэк пырыны быгатозы. И. Лебедев. Кенешыса-а ужаз "Кенеш"? Вашкала дауръёсысен кутскыса, 1930-тӥ арын колхозъёс кылдытозь, удмурт гурт тодмо вал музъем ужез огазьын (общинаен) быдэстэменыз. Нош ваньмыныз соин кивалтӥз быръем орган - "Кенеш". Озьы удмуртъёс котьку огазеяськыса ужало вал. Асьме калыклэсь революцилэсь азьло ик улэм-вылэмзэ эскеризы тодосчиос Г.Е.Верещагин, В.М.Бехтерев, С.К.Кузнецов, И.Н.Смирнов но трос мукетъёсыз. Гурт кенеш пыр крестьянъёс сэртто- пертчо вал музъем ужез но выт тыронэз, инмарлы осконэз, культураез, кивалтон удысэз, нылпиосты будэтонэз. Тужгес секытэз ужпум вал музъемез люкон. "Кенеш" озьы ик бадӟым саклык висъялляз выт октонлы, сюресъёсты тупатъянлы, кенеръёсты эскерыса возёнлы но мукет ужпумъёслы. Со сяна, "Кенеш" ляб хозяйствоослы юрттылӥз валъёсын, кидысэн, выт тыронэн. Удмуртъёслэн улоназы туж ӟеч юрттылӥз веме ортчытъян. Озьы, гурттоос огазеяськыса, корка ӝутылӥзы, юосты аразы, турназы, пу дасязы но мукет ужъёсты быдэсъяллязы. Кылсярысь, "Кенеш" гуртоос азе таӵе курон пуктылӥз: нянь сяськаяськыку но юос шепаку, уг яра дӥсез миськыны, нош Петров нуналозь - турнаны. Юосты пудо изъянтыку, дун тупатылӥзы аракыен. Бусыосты котьку кенераллязы, котькудӥз кузё аслэсьтыз бусызэ сак эскерыса возьылӥз. Пась кенер понна "Кенеш" тыриськон тупатылӥз. Вераны кулэ: "Кенешлэн" вал аслаз судэз но правоосты утёнъя ёзэз. Со азьын кыл кутылӥзы лушкаськисьёс, ужзэс урод быдэсъясьёс. Озьы ик гуртоос огкылысь пумитъяськылӥзы эксэйлэн чиновникъёсызлы пумит. Кыӵе ке ужпумез эскерыку, одно ик лыдэ басьтӥськылӥз гурт ӧтчамлэн куараез. Нош со понна куаразэс сётыны кулэ вал люкаськемъёс пӧлысь кык-куиньмос люкетэз. "Кенешлэн" ужамез сярысь тодосчи-этнограф Г.Е.Верещагин тазьы гожъяз: "Ужпумез сэрттон-пертчон ог 2 час пала кыстӥське. Со дыр ӵоже коркан тамак ӵынэн шоканы уг луы. Нырысь ик, котькудӥз бускеленыз кенеше гурт ужъёс, кизем юослэн но турынлэн удалтэмзы сярысь. "Кенеш" озьы ик йылпумъяське огъя улон-вылон сярысь вераськонъёсын - дасяськиськод-а праздниклы, куасьмиз-а ни музъемед, пӧзьтӥд-а ни аракы но сур? Собере тупатӥське бусые потон нунал". Юан кылдэ: "Кенеш" ужа вал меда демократия амалэн? Нырысь ик, отчы быръё вал мӧйы, гажамон кузёосты, кыкетӥез, соос висъяськылӥзы узыр улэменызы, отчы пыре вал гуртлэн старостаез но. Сое бырйылӥзы узыр крестьянъёс пӧлысь. Валамон ини, узыръёс азьвыл ик эскерылӥзы гурт ӧтчамын сэрттоно-пертчоно ужпумъёсты. Со пумысен Г.Е.Верещагин пусъе: "Куанер вотяк ӧтчамын одӥг кыл но вераны ӧз дӥсьтылы. Мукетъёслэн вераменызы соглаш ӧвӧл ке, пумит луэмзэ лушкемен гинэ поттоз, куаразэ но уд кылы". Со ӧтчамъёсын, - гожтэ В.М.Бехтерев, - вань ужъёсты бергато узыр но гажано адямиос. Мукетъёсызлэсь соглаш луымтэзы дыръя гинэ юалляськемъяськизы. Озьыен, "Кенеш" узыръёс поннагес ужаз. Соос ик нырысь амбаръёсысь нянез басьтылӥзы, вукоын пызь изон черодзэс куанеръёслы дунын вузаллязы, кенеръёс пумысен споръяськонъёс дыръя озьы ик янгыше уськытылӥзы куанер улӥсьёсты. Озьы вал революцилэсь азьло. Нош революция бере "Кенеш" Совето властьлы пумит султӥз. Со соглаш ӧй вал нянь но нюлэс дасянэн, музъем ужъёсты нуонэн, индустриализациез но коллективизациез радъянэн. Валамон ини, солы ӧз кельшы узыр крестьянъёсты яке кулакъёсты быдтон политика. Узыръёс Советской власть аръёсы но выт тыронзэс куанеръёс вылэ погыльтылӥзы, умой музъемъёсты киултылӥзы. "Кенеш" пыр соос "вӧсь карылӥзы" коммунистъёсты, колхозникъёсты, пумитъяськылӥзы государстволэсь заданизэ быдэстонлы, ас палазы карылӥзы шоро-куспо улӥсь крестьянъёсты. Узыръёсты удмуртъёс "кузё" шуыса нималлязы. Зэм, татын вал аслаз мугъёсыз но. Соос потылӥзы Совето власть бордысь. 20-тӥ аръёслэн пумазы Советской государство гуртын экономикая политиказэ умойтэм нуыны кутскиз, со ужаны кутскиз адямилы пумит. Секыт луиз нянен, мукет сиён-юонэн. 1928-тӥ арын нянь дасянъя югдур уката лэчытомиз. Малы? Малы ке шуоно, няньлы дунъёс ичи тупатэмын вал, нош выт тыроно луиз бадӟым. Узыр крестьянъёс но шоро-куспо улӥсьёслы пумит государство умойтэмесь ужрадъёс кутӥз. Озьы кылдӥзы ваче пумит луонъёс. Тодосчиослэн-аграрникъёслэн Бухаринлэн, Чаяновлэн, Кондартьевлэн но мукетъёсызлэн гурт удысэз азинтон сярысь сётэм ӵектонъёссы социализмлы пумит быръем сюресэн лыдъямын вал. Удмуртиын коллективизация ортчытон быдэс странаямы кадь ик огвыллемгес ортчиз. Но асьме дорын укыр мыдланьяськон учыръёс вал на. "Кенеш" вылӥын косъяськыса азинтонлы пумит луэмзэ вераз. Со ӧз ватылы Советской властьлэн гуртын политика нуэмезлы пумит луэмзэ но. Кылсярысь, Селта ёросысь Лыстем гуртын "Кенеш" калыкез ӧтиз нюлэс дасян ужлэсь палэнскыны, Бигиней гуртын колхоз интые кылдытӥзы пӧяськыса "пӧрам" тоз. Пичи Пурга ёросысь Абдульменево гуртысь колхозлэн кузёез, уно пол кышкатъямзы бере, ассэ ачиз быдтӥз. Ваньмыз со учыръёс верало, удмурт гуртъёсын зэмос нюръяськон пуроме шуыса. Ноку вунонтэм кылёз "Лудорвай уж" шуон. 1928-тӥ арын июне отын шимес учыр вал. Соку куинь гуртысь - Лудорвайысь, Юськиысь но Лудзиысь 300 крестьянъёсты ньӧразы. Кин сое лэсьтӥз но малы? Со уж пӧрамын вал, "Кенешлэн" ӵектэмезъя. дышем сямъя кенерез урод возем понна адямиез кыл кутытылӥзы. Ваньмыз лэсьтӥськиз законъя - "Кенешен" кутэмъя. Таяз учыре но озьы ик вал. Удмуртъёслэсь историзэс эскерисьёс выльдӥськон аръёсы "Лудорвай ужез" озьы ик дунъяллязы. Но соку уно юанъёс кылдо. Нырысь ик, малы жугизы янгыштэм муртъёсты но? Йӧтӥз куд-ог кивалтӥсьёслы но, тужгес но ултӥязы куанер улӥсь крестьянъёсты. Штраф тыронэз но водка пуктонэз "Кенеш" воштӥз ньӧранэн. Азьвыл кенер понна ӧз жугылэ ук. Татын ини шӧдӥське экономической но социально-политической шӧмлыкез. Уго матэктэ ни вал колхозъёсты кылдытон дыр. Узыръёс но коллективизацилы ас сяменызы дасяськизы. Соос куанеръёсты кышкатыса возизы, таосыз колхозэ пырыны медаз дӥсьтэ шуыса. Нош жугизы таӵе кылъёсын: "Тани тыныд музъем, тани тыныд колхоз". Та гуртысь крестьянъёс нюръяськизы, музъемез выльысь люкылон понна. Кыкетӥез. Куке кутскиз нянь дасян, куанеръёс узыръёслэсь трос мултэс няньзэс шараязы. Сое талазы. Узыръёс со понна ик пунэмзэ берыктоно кариськизы. Ньӧмыз понна йӧтӥз шоро-куспо улӥсьёслы но. Яке басьтом выт тыронэз. Кызьы сое тыро вал? Тани 1927-1928-тӥ аръёсы Лудорвайын улӥсьёслы таӵе дунъёс тупатӥзы. 1. Михайлов Андрейлы, вань 2 валэз, 1 толэсэз, 2 скалэз - 28 манет 70 коньы. 2. Сергеев Николайлы, вань 3 валэз, 2 толэсэз, 2 скалэз - 18 манет. 3. Косарев Степанлы, вань 1 валэз, скалэз ӧвӧл - 55 манет 5 коньы. 4. Овчинников Николайлы, вань 1 валэз, скалэз ӧвӧл - 88 манет 8 коньы. 5. Михайлов Петрлы, вань 2 валэз, 3 скалэз - 37 манет 53 коньы. 6. Сергеев Николайлы, вань 1 валэз, скалэз ӧвӧл - 60 манет 75 коньы. Тӥни озьы узыр гуртъёс "Кенеш" пыр экономической ныпъетсэс куанеръёс вылэ куштыны быгатӥзы. Озьы вал котькытын. Лудорвайын ортчем уж борды кырмиськизы партилэн но страналэн кивалтӥсьёссы. Со пумысен гожъязы уно газетъёс. 1928-тӥ арын октябре Удмуртиын ужаз ВКП(б)-лэн ЦК-лэн нимысьтыз комиссиез. Вотской партийной организацилэн ужамез сярысь кутэмын вал нимысьтыз постановление. 1929-тӥ арлэн кутсконаз ортчытэмын партилэн Нижегородской но Вотской обкомезлэн огазеям пленумзы. Та ужпумъя печатьын ужасьёслэн Всесоюзной совещаниязы вераськиз ВКП(б)-лэн ЦК-лэн секретарез В.И.Молотов. Лудорвай уж пумысен партийной но советской органъёс та пумысен трос вераськылӥзы на. 1931-тӥ арын мартэ пусъемын вал, "Кенеш" контрреволюционной уж нуэ шуыса. Но ведь партия но Правительство 20-тӥ аръёслэн пумысенызы асьсэос но крестьянъёслы пумит контрреволюционной уж нуыны ӧдъязы ук. Но ведь НЭП кутскон вакытэ "Кенеш" Советской властен кусып возиз вал. Тӥни озьы политической амалэн быдтэмын вал узыр но шоро-куспо улӥсь крестьянъёс. Соин ӵош ик 30-тӥ арлэн кутсконаз быриз "Кенеш" но. Леонид ВАРГИН, история наукаосъя кандидат. Журналистъёсын пумиськонъёс Николай Ганза "Верасько - котьку быдэстӥсько" Журналистъёсын таӵе пумиськон нырысьсэ, дыр, вал. Правительстволэн Тӧроез Николай Ганза иворъёс вӧлмытӥсь адямиосын вис карытэк кык час пала вераськиз. Ваньмызлэн юанъёссылы лад-лад, дыртытэк рос-прос валэктонъёс сётӥз. Котькудӥз отысь умой мылкыдын кошкиз. - Республикамы арез урод ӧз кутски. Туэ куинь толэзьскын, миым та дырен ӵошатыса, промышленной вузъёс поттон 15 процентлы йылӥз, - мадёнзэ ӧдъяз Николай Алексеевич. - Ӝоген пытсалом бюджет удысын тыршисьёслы уждун сётонъя тыронмес. Гурт хозяйствоос дасясько кысык тулыс бусы ужъёслы. Кидыс тырмыт, эстӥськон, вӧйёс (ГСМ) дасясько. Парсь вордонъя "Восточный" совхозлы 20 миллион манет бюджетысь уксё висъямын. Со эшшо сомында ик кредит басьтоз но, кӧня ке дыр ортчыса, пайдаё ужаны кутскоз. Озьы ик ум вунэтӥське мукетъёссэ парсь вордон комплексъёсты но тылобурдо фабрикаосты. Ю тысь (фураж) басьтӥм Курган областьысь. Шаерамы азинске му вӧй поттон. Ортчытэмын нефть кыскон интыосты вузанъя конкурс. Вормисьёс пӧлысь куд-огез мылысь-кыдысь уж борды басьтӥськизы ни. Озьы шуыны луоз "Удмуртторф" кун предприятилэн НГДУ-ез сярысь. Али вераськонъёс мыно 12 му вӧй поттон интыосты вузанъя. Отчы "Сэмсон" (США) компания пыриське. Оглом, му вӧй поттонъя конкурсын вормисьёс сётэм кылзэс дыраз быдэсъяны но чупресгес уж борды басьтӥськыны кулэ. Сое улон куре. Нефть кысконэз будэтытэк, бюджетэ уксё уз вуы. Вылаз ик, дуннеын му вӧйлэсь дунзэ юри кулэстыны выро, Россиез шуге-леке вуттон вылысь. Озьыен, асьмелы но капчи уз луы. Промышленной предприятиос но вамышъёссэс юнмато. Нырысетӥ кварталэз умой йылпумъязы Ижысь, Сарапулысь, Воткинскысь, Глазовысь данакез предприятиос. Соос пӧлы пыро "Ижмаш", механикая завод, электромеханической завод "Купол", Радиозавод, ЧМЗ, "Воткинский завод", "Аксион-Холдинг" но мукетъёсыз. Доход басьтонъя заданиоссэс ӧз быдэстэ Балезино, Кизнер, Яр, Пичи Пурга районъёс, Можга город но музонэз. Правительстволэн Тӧроезлэн ивортэмезъя, ож тӥрлык поттонъя заказъёсын гинэ кыдёке уд вамышты, огсыр уд ужа. Юнматоно огъя экономикаез. Тазьы ик ужам ке, 2001-2002-тӥ аръёсы гинэ шӧдскымон азинсконъёсмы луозы но улон-вылонмы кӧня ке умоялоз. Обороная куронъёсты шаер быдэсъя, продукцизэ келя, нош со понна 800 миллион манет тыр уксё вуымтэ. Центр сое пытсаны кыл сётэ. Али Москва верам кылзэ умойгес быдэсъя, вылӥ властья вераськыны каньылгес луиз. Озьы ке но, Николай Алексеевич Москвае ӵем гинэ вуылэ, пӧртэм ужпумъёсты сэрттэ-пертче. Тросэз соос герӟаскемын элькунлы юрттонэн, улон коркаосты интыослы сётэм понна понна коньдонэн куронэн, трансфертъёсты басьтонэн но мукетыныз. Правительство политикаен уг выры, нош быръёнъёсъя куд-ог ужрадъёс ортчытъя. Николай Ганза сётэм кылзэ котьку быдэстэ. Нош Правительствоын, пе, ужаны люкетэ тяпайтон но ваньбуръя тырмыт законъёс кутымтэ. Кун Кенеш та ласянь ваньзэ ӧз лэсьты на. Тӥни соин сэрен кивалтон амалъёс уг выльдӥсько, уката ик ваньбурез пайдаё кутонъя. Но берло дыре та ласянь но кӧня ке уж мынэ. Азьланьын огсыр ужан вылысь, производствоез кык пол будэтоно, тужгес но - калыклы вузъёс лэсьтонъя. Ож тӥрлык дурон (ВПК) ведь 20-30 процент гинэ басьтэ. Озьы гинэ бюджетэ тырмыт уксё пыроз но бюджетникъёслы дыраз уждун вуоз. Огъя вераса, туэ 15 процентлы уногес вузъёс поттыны кулэ. Сыӵе ужпум сылэ. Нош республикалы вылӥ кузё - президент быръён сярысь вераса, со Правительствоен кивалтоз но солэн Тӧроезлэн куд-ог полномочиосыз президентлы выжозы. Но отчыозь улоно на. Пресс-конференциын Николай Ганзаез Москвае ужаны басьтон пумысен кылпум ӝутэм бере, со меӵак вандӥз, мон, пе, ноку асме нокытчы ӧй дэмлалля на. Нош Александр Волков вылӥ кивалтонэ пуктэмзэс 6 ар возьма ни. Кема но тупен-тупен вераськон вал "Автозавод" но ВАЗ завод сярысь. Али асьмелы "Москвич", "Жигули" машинаос поттоно. Но "Орбита" машинаен кыдёке уд вамышты, кулэ выль модель лэсьтыны но СНГ-е пырись кунъёсын рынок утчано. Али таӵе ужпум сылэ: туэ 30 сюрс машина бичано, вуоно арын 80, нош 2002-тӥ арын - 125 сюрс. Али "Автозаводын" ВАЗ-ысь специалистъёс ужало. Выль директор аудит ортчытэ. Вань луонлыкъёс уг кутӥсько на пичи но шоро-куспо ужбергатонэз азинтонъя. Али бюджетэ Россиын но Удмуртиын та удыслэсь огмында, бюджетэ 8 процент уксё пыре. Валамон, рынокын юн порядок тупатоно. Вань кун предприятиосты эскером, ревизия лэсьтом. Гурт удысын но сюлэмшугъяськытӥсез трос. Огласянь техника вужме, нош мукет ласянь, кыӵе сое урод возиськом, аналтэмын, шуыны луоз. Озьы ке но, тулыс кизём но, юосты октом но. Гуртлы ӧжытсэ 200-250 миллион манет тыр юрттэт кулэ, нош техника но музонзэ басьтыны - ичизэ 600-650 миллион манет. Пумиськонын озьы ик вераськон потӥз Воткинскын чурыт эстӥськонэн ужась ракетаосты быдтонъя завод пуктон но химической ож тӥрлыкез (Камбарка, Кизнер) быдтон сярысь. Нырысетӥез ужпумъя уж мынэ, проектэз котыр ласянь учко-чаклало, экспертиза лэсьто. Но ӟеч проект малпамтэ на. Николай Ганза шуиз, мон, пе, сыӵе проектэз ӧй адӟы на. Нош кыкетӥ ужпумъя - коньдон ӧвӧл, юрттӥсьёс (инвесторъёс) утчано. Удмуртилэн али кӧня ке миллиард манет тыр тыронъёсыз люкаськемын. Отчы пыро кыл сётэмъёсыз но, бурд улаз басьтэмъёсыз но. Геннадий Романов. Москваын пумиськонъёс Москваын нош ик пумиськылӥзы республикамылэн кивалтӥсьёсыз но "Шкода-авто" концернын ужасьёс. Вераськон мынӥз "Шкода-авто-Удмуртия" инъетэз улонэ ӝоггес пыӵатон сярысь. Удмуртия ласянь вераськонэ пыриськизы Кун Кенешлэн Тӧроез Александр Волков, Правительстволэн Тӧроезлэн воштӥсьёсыз Николай Хохлов но Андрей Сакович, "Ижмаш" кун предприятилэн валтӥсь директорез Владимир Гродецкий но солэн воштӥсез Геннадий Кириллов. Нош Чехословакиысь ветлӥзы "Шкода-авто" заводлэн правлениезлэн кивалтӥсез Вратислав Кулганек, солэн воштӥсез Детлеф Виттиг, советникез Здэнек Сбытек но заводлэн кенешаз пыртэм мурт Богдан Войнером. Унозэ ужпумъёсты сэрттон-пертчон понна, Ижевске 10-тӥ-11-тӥ апреле вуыны кулэ экспертъёс. Май толэзе дась луозы ни предприятиослэн азьланьын валче ужанзыя вань документъёс, нош сентябре предприятие поттыса эскероз нырысьёссэ кӧня ке машинаосты. Вратислав Кулганек но Детлеф Виттиг оскемзэс веразы, "Шкода-авто-Удмуртия" огъя предприятиез кылдытон огсыр мыноз шуыса. Тау каризы Кун Кенешлэн Тӧроезлы, та уже мылысь-кыдысь пыриськемез понна. Соку ик Александр Волков пумиськылӥз Россия Федерациысь вытъя министрен Александр Починокен. Министр умоен пусйиз Удмуртиын выт тыронъя югдурез, федеральной бюджетэ солэн тыронъёсыз ӧвӧл. Соин ик, шуиз Александр Починок, Удмуртия матысь аръёсы быгатоз дотация чотын улӥсь республикаос пӧлысь потыны. Россия Федерациысь Правительство та ласянь дась юрттыны шаермылы. Удмурт Республикаысь Кун Кенешлэн пресс-службаез. Бигра Умоезлы оскиськом Азьпалан улон сярысь вераськонъямы ӵапак тазьы шуиз Л. А. Васильева, Баграш- Биграысь почта ёзлэн кивалтӥсез. Людмила Андрияновна та удысын кема аръёс ӵоже ужа ини. Соин ик ӵошатыны быгатэ, кыӵе югдур азьло вал, нош кыӵегес со али. - Улон алама луэмын, - шуэ нылкышно. - Адями уждун уг басьты, мылкыдыз куашкамын. Газет-журналлы но уг гожтӥськы. Азьвыл почтальон тыраз сумкаен ветлэ вал, табере - капчияк гинэ. Колхозмы узыр луиз ке, ми но умой ужалом. Одӥг адями гинэ но югдурез воштэ вылэм. Хозяйствомылэн выль кивалтӥсез Александр Николаевич Ерокин сюлмо ужа. Озьы бере оскон вань, улонмы ӟеч пала берытскоз. Гуртысь почта иворъёслэн аспӧртэм шорсюлэмзы луэ, шуыны быгатӥськом, дыр. Огшоры гороскоп гинэ но утчаны гуртоос татчы лыкто. Нош солэн кузё кышноез ваньзэ лэсьтыны тырше, адямилэн пыдыз татчы мед кыскоз шуыса. Тол куазен пуштыр-пуштыр пушйись чебер сяськаос гинэ но юртто ук мылкыдэз ӝутыны. Бен, калык газет-журнал ӧдыт басьтэ ке но, Л. А. Васильевалэн ужез уг кулэсмы. Пенсия сётъян, пӧртэм товарен вузкарон - солэн сюлмаськонэз. "Удмурт дуннемес" Баграш-Биграын гажало. Москваын печатласькись изданиосты басьтӥсьёс одӥг-ог кылизы ке, удмурт газетэз татын сюлэсь трос семьяос басьто. "Маяк" ёрос газет гинэ, пе, азьпалтэ "Удмурт дуннеез". - Удысэ кельше, - шуэ Людмила Андрияновна. - Калыкен ужано луисько ук. КапЧи мылкыдо, шаплы кышномурт - Л. А. ВАсильева. Туж тодэмез потӥз солэн "Удмурт дуннеез" тужгес трос вӧлмытыны быгатсь почтальонлэн ужамез сярыь. Ӵектон но сётӥз: умой, пе, луысал, редакция ас дораз удмурт газетэз вӧлмытӥсь почтальонъёсты люкасал но сосын кенешон ортчытысал ке. Вераськон почтальонъёс понна но, "Удмурт дунне" понна но пайдаё луысал. Быдӟым Вормонлы - 55 ар Шимес нуналъёс Витьтон вить ар талэсь азьло 22-тӥ июне 4 часын ӵукна фашист Германия вистэм- вожтэм ыбылыны ӧдъяз асьме странаысь шунды пуксён пал музъемъёсты. Та вакытэ кунгожъёсмес утё вал Удмуртиысь но 300 пала пиос. Войналэн нырысетӥ минутъёсаз ик соос тушмонэн ваче син луизы. Туж уноез лек тылӝуын сутскизы. Война бере Сарапулын улэм Елизавета Никитична Мухачева тодаз вае Брест крепость понна ожмаськемез: - Нырысетӥ нуналаз лек шимес вал. Бомбаослэн но снарядъёслэн пуштылэмзылэсь, автоматъёсысь но пулемётъёсысь дугдылытэк ыбылэмысь, котыр жон-н! вазиз, сюй-тузон пазяськемен, югыт нунал но ӝомалэс луиз. Ми, офицер кышноос, солдатъёсын ӵош атакае потам, сӧсырмемъёслы юрттылӥм, патрон-снарядъёс но сиён-юон вуттылӥм. Горд Знамяен пусъем 17-тӥ погранотрядын укмысэз Удмуртиысь вал. Со Перевозчиков Михаил Иванович, Алёшин Александр Егорович, Андреев Александр Яковлевич, Антуганов Александр Тимофеевич, Гордеев Андрей Михайлович, Калинин Илья Павлович. Матвеев Аркадий Степанович, Медведев Виктор Андреевич, Демидов Михаил Петрович. Пограничникъёсын ог ӵош ож тылӝуэ вамыштӥзы Горд Армилэн частьёсыз но. Буг шур вамен выжез чакласа возизы 333-тӥ стрелковой полкысь ожгарчиос. Та полкын службазэ нуиз Якшур-Бодья ёросысь Порва гуртын вордскем-будэм пи Николай Антипович Широбоков. Дышетскиз со Кекоранысь школаын, собере Якшур-Бодьялась педтехникумын. Эшъёсызлэн верамзыя, "витьёс" гинэ октылӥз. Нырысетӥ курсын дыръяз ик ас киыныз фотоаппарат бичаз. Пӧртэм удысъёсын тунсыкъяськылӥз. Техникумез йылпумъямез бере, умой дышетскисез ыстӥзы Удмурт пединститутэ. Николай дышетскиз естествознаниея факультетын. Уно лыдӟиськылӥз химияя, биологияя, философияя. Потэ вал учёной-химик луэмез. Малпанзэ сураз-пожаз война. Широбоков война потон уе сылӥз караулын. "Выль улон" колхозлэн тӧроезлы Михаил Афанасьевич Загребинлы ыстэм гожтэтаз вера, фашистъёсты пумитамез, эшъёссэ ыштэмез, котыртэмысь ожмаськыса потэмез сярысь, Кӧня ке дыр ортчоз но, ми тушмонлы ваньмыз понна берыктом, пе, анай-атае медаз сюлмаське. Ӝоген Николай Антипович Широбоковез десантникъёсын ӵош выльысь фронтэ келяло. 1941-тӥ арын октябре со бырыны шеде. А. Дерюшев, ЦДНИ-ысь валтӥсь специалист. СЮЛМАСЬКЫТӤСЬ УЖПУМ Шыкыс пыдсы ум-а йыроме? Ижысь 7 номеро училищеысь егит нылъёслэн туала удмурт дӥсь вурыны дышетскемзылы шумпотоно кадь. Уго ӵапак таӵе пичи гинэ вамышъёсысь адӟиське калыкмылэн чеберез. Нылъёслэн ненег киосынызы вурем но пужъятэм дэремъёсты, асьме шаерамы сяна, палэнын но синйылтӥзы. Киужъёс келямын Эстоние, Венгрие, Турцие. Килы усточиослэн азьланезлы но трос малпанъёссы, осконъёссы вал. Но туннэ соослэсь сюрессэз вожвылтӥзы - 28 номеро училище борды итӥзы. Валтӥсь мугзэ тазьы валэкто: училищелэн юртэз куашкан калэ вуэмын. Зэм, котырысьтыз пурысь коркаос пӧлысь сое соку ик уд но синйылты. 1941-тӥ арысен сылэ уго. Та дыр ӵоже егитъёс пӧртэм профессиослы дышетскизы татын. Туала удмурт дӥсь дасянъя группа усьтэмын вить ар талэсь азьло. Ӟуч адями, Татьяна Леонидовна Батырина, басьтӥськиз та уж борды. Нылъёслы живописья тодон-валан сётон борды кутскиз ас ужзэ ӟеч валась бигер нылкышно Римма Григорьевна Махмутова. Ковёр куисьёсын ужа эшшо одӥг ӟуч нылкышно - Людмила Григорьевна Дозналова. - Тӥни озьы, удмурт луисьтэм адямиос но сюлмасько удмурт калыкмылэн азьланез сярысь, - вера Людмила Сергеевна Загребина, 7 номеро училищелэн директорезлэн воштӥсез. Мон училищее вуылӥ, сое филиал карон сярысь приказ потэм бере. Татысь дышетӥсьёслэн мылкыдзы бугыртӥськемын. Людмила Сергеевна Загребина но воспитатель Валентина Владимировна Чазова журналистъёс вуэмлы берпум осконзылы кадь шумпотӥзы. Вазиськылӥллям ни соос пӧртэм кивалтон ёзъёсы - юрттэт вуымтэ. Котькытын чӧлско Калыкез дышетонъя министерство вылэ. Нош соиз туж капчи валэктон сётӥз: - Ми училищедэс быдэсак ум пытсаське. Ужалэ. - Но кызьы ужалод? 28-тӥ училищеысь кивалтӥсьёс пичиен-пичиен милемыз зӥбозы, ас ӧразы кыскыны тыршозы. Соослэн асьсэлэн ужан амалъёссы, методиказы. Отын дышетско городысь егитъёс, ми доры лыкто гуртын будэмъёсыз. Чеберлыкез валанзы соослэн пӧртэм. Гуртысь нылъёс пичиысен адӟылэмын анайёссылэсь киужъёсын тырмытэм шыкысъёссэс. Собере 28-тӥ училищеын басьтӥськылӥзы ни вал удмурт дӥсь вурон борды - куштӥськизы. Та ужлэсь кулэлыксэ ӧз валалэ, шӧдске. Калыкез дышетонъя министерствоын училищеез филиалэ пӧрмытэмзэс эшшо кык бадӟым муген валэктӥзы на: егитъёслы со тырмыт тодон-валан сётыны уг быгаты, соослы ужан инты висъямез уг луы. Ортчем эскеронъёс дыръя нылъёслэн ужъёссы 2,3 баллы дунъямын. - Асьмелэн но янгышмы вань, - шуэ Валентина Чазова. - Возьдаськон сяммы ваньзэ быдтэ, тодэмзэ но вераны ум быгатӥське. Куд-огез нылъёсмы ӟуч кылын но шенгыль верасько. Вань группаям дышетскисе. Со бӧрдыса вера, кыллэсь пуштроссэ валаны валасько, пе, нош валэктыны уг быгатӥськы. Жаль пото мыным нылъёс. Адӟе вал, макем соос дышетскыны тыршо. Адӟе вал, кызьы уло общежитиын. Калык пӧлы потам интые, ас сэрегъёсазы шымырско. Театре мыныны коньдонзы ӧвӧл, город кузя пыдын ветло. Озьы-а дышомы асьмеды дунъяы, данъяны? Ужан инты висъяны быгатымтэмы пумысен верамзы шонер. Училищеысь нылъёс ваньзы сямен выльысь берытско гуртэ. Пӧлысьтызы огез-кыкез гинэ шат интыяське райцентръёсысь творчествоя юртъёсы ужаны. Кылемъёсыз? Кылемъёсыз мыно фермае, бусые. Ӝытъёсы гинэ азязы поттыло соос турлы басмаоссэс, сӥньысъёссэс. Киужъёссэс мур шыкысъёсазы люкало. Нош самой со шыкысъёсы ик уг ватӥсько меда калыкмылэн быгатонлыкез, солэн чеберез? Самой со шыкысъёс бордысен уг пото меда кузёосмылэн "ляб интыоссы"? (Министерствоысь кивалтӥсьёс гинэ ӧвӧл, кузёослэн но кузёоссы вань на ук.) Училищеез филиаллы пӧрмытэмлэн мугъёсыз огласянь валамон но кадь. Но бодылэн кык пумыз шуыса калыкын веран вань ук. - Вурем, куэм дӥсьёсмес калыке поттыны мылкыдмы вань. Ми туала дӥсь дасяськом. Айшет - со кышномуртлэсь гурт котырын бергамзэ возьматӥсь арбери. Дӥсьёсмес чеберъяло пужъятэм сӧзулъёс, саесъёс. Киыз но пыдыз луысал куд-ог калык ансамбльёсмес дӥсяны. Дорамы вазиськылӥзы ни Удмурт кун университетын дышетскись егит нылъёс: дискотекаосы, пе, ветлысалмы. Дэремъёсмес нуллыны мылкыд каремзэс веразы куд-ог тодмо адямиос но. Выль юрт шедьтыны юрттысалзы ке, отын мастерской усьтысалмы ке, вань та малпанъёсмы быдэсмысалзы, вылды. Озьы ӧз луы, кивалтӥсьёс, ми малпамъя, капчи сюрес шедьтӥзы. Удмурт чеберлыкез ӝутон сярысь сюлмаськонэз мон отысь уг адӟиськы, - бугыръяське Людмила Сергеевна. Калыкез дышетонъя министерствоысь кивалтӥсьлы В.Н.Вахринлы, доразы лыктыны турттэме сярысь азьвыл ик жингыртӥ. Соин Василий Никитович, та юанэн тунсыкъяськом шуыса, азьвыл ик валатскем: - Республикаямы калык сямъёсты, йылолъёсты азинтон бордын ужась училищеос вань гинэ. Пӧраськисьёсты дасянъя (кулинарной) училищеысь егитъёс ӵем потало гуртъёсы, соку песянайёслэн пӧран быгатонлыкъёсынызы тунсыкъясько. Глазовысь 24 номеро технической лицей удмурт ӝӧк пуктон бордын ужа, отын дышетскисьёс удмурт кылын верасько. Сюмсиын 34 номеро училищеын пуэз вандылыса пужы кылдытыны дышетскисьёслэн группазы усьтэмын. Отчы Пичи Пургалась егит специалист ужаны кошкиз. Собере 28 номеро училищеын вань национальной люкетэз. Отын модая театр ужа. 7-тӥ училище данъяськымонъёс пӧлы уг пыры ни. Но Василий Никитович оске: министерство шонер лэсьтэ. - Со понна 7-тӥ училищеысь дышетскисьёс лицеистъёс луыса потозы. Ӧвӧл кышканэз, удмурт егитъёс ӟучъёсыз пӧлын ышозы шуыса. Соос озьы асьсэды возьыны, гажаны дышозы. Выль юртэн юрттыны быгатом, малпасько. Родниковой урамысь нылпи садэз соослы сётыны чакламын. Нош уже интыянъя верано ке, ми гинэ татын янгыш ӧвӧл. Туэ ваньмыз сямен дышетскон заведениос егитъёслы эркын диплом сёто. Ма бен, огласянь шумпотоно, кивалтон удысын ас малпанзэс утьыны, ужзэс дунъяны, данъяны быгатӥсь адямиос ужало шуыса. Но котьма шуэ, калыклэсь мылкыдзэ санэ басьтэмзы соослэн уг адӟиськы. Уг вала Калыкез дышетонъя министерство, 7 номеро училище огшоры ӧвӧл шуыса. Самой таӵе пичи ужъёсыз бордысь потэ удмурт калыкмылэн быгатонэз, чеберез. Озьы ке, малы та пичи гинэ ненег пушъетэз утёнтэм? Малы училищелы нимысьтыз юрттонтэм? Кулэ дыръяз юртэн но, пиналъёслы ужан инты шедьтонэн но. Синмаськыса учконо бускель бигеръёсмы шоры. Кызьы соос огъя кужымен утё асьсэ культуразэс. Малпасько, улон эшшо одӥг луонлык сётэ на асьмелы но удмурт кужыммес возьматыны. Дӥсьтомы-а? Э.КУМАЧЕВА. ЛЫДӞИСЬ ВЕРА МАЛПАНЗЭ Кин уксё тыре - со крезьгур куре Вылдӥськонлэн куашкамез пумысен туннэ юанъёс уг кылдо ни. Оло, со ӧз но кутскылы? Шунды пуксён палась экспертъёс татчыозь асьмемыз оскытыны турттӥзы, выльдӥськонъёсты шонер сюрестӥ мыно шуыса. Нош табере куашкатӥды шуо. Таӵе мылкыдэз одӥг кылын гинэ валэктыны луоно: Россия чыртыёзяз пунэм тырон, выемын. Сюлэм ӝож. Куке-соку быдӟым кун пыд ӵушет радэ кельтэмын. Асьмелэн гинэ сомында инкуазь ваньбурмы, нокинлэн но ӧвӧл ни. Нош табере странамы - банкрот. Кызьы но малы ми "сантэман юбо" доры вуим? Ведь котькудӥз лыдӟись шуыны быгатоз: "Одӥг коньы но, одӥг манет но ӧй пунэма. Мон "дано" выльдӥськон вакытэ ужай, нянь юдэс понна кужымме сётӥ. Ойдолэ учкоме, кӧня Россилэн пунэм берыктонэз. 1999-тӥ арлэн пумаз 150 миллиард доллар люкаськиз. Та процентъёстэк гинэ ай. 1985-тӥ арын пунэм тыриськонмы 28,3 миллиард доллар вал. 1990-тӥын 53,9 луиз, 1995-тӥын 101,6 миллиард доллар люкаськиз. Укмыс ар куспын мурт кисыысь 100 миллиард доллар тыр пунэмаськемын. Озьыен, Россилэн, СССР-ен ӵошатыса, кык поллы уногес пунэм тыронэз. Бен "выльдӥськисьёс" ик сое донгиллям нюре. Трос дауръем историез ӵоже Россия музъем таӵе возьытэз ӧз адӟылы вал на. Матысь 12 ар ӵоже кунмылы 160 миллиард доллар пунэмзэ берыктыны кулэ. Со 70 процентэз гинэ ай. Сомында ик ватсаса тыронмы но люкаськемын ни. Маин берыктом? Одӥг сюрес: Россиысь валтӥсь банклэн золото-валютной резервез. Но миым гужем со 11,8 миллиард доллар сяна ӧй вал. Бюджетэз ке басьтоно, доходъёсъя люкетэз удысъёсъя люкылэмын ни. Государстволэн куашкан сюресэз ваньмызлы тодмо. 1991-тӥ арын асьме "выльдӥськисьёс" быдэсак внутренней рынокмес усьтӥзы. Эркын лэзизы дунъёсты, герӟаськизы МВФ-ен. Валтӥсь интые заёмъёс потӥзы. Нырысь кунпушъёсыз (ГКО, ОФЗ) вылэ оскиськизы, собере кунсьӧръёсызлы вазиськизы: МВФ-лы, Всемирной банклы, Лондон клублы. Малы? Россия сыръясь нюре медам выйы шуыса, бюджет пасьёсты ӵоктаны. Выльдӥськисьёс уго оскизы: рынок тани-тани радъяськоз. Собере ини ваньмыз ас понназ кошкоз... Ваньмыз выжыкылын кадь. Шонерзэ вераса, "выльдӥськисьёслы" таиз сюрес самой капчиез вал. Соос котькуд вамышсэс США-ысь но шунды пуксён палась кунъёсысь "оскымон эшъёссылэн" дэмланъёссыя чакласа улӥзы. Со куспын асьсэос сярысь но ӧз вунэтэ, уске, мар понна нюръяськизы? Быдэс Россия доллар вылэ ужа, но со понна пӧлы пум басьтэ. Америка уксёез манетэн ӵошатэмзы - Россилэсь инкуазь узырлыксэ кунгож сьӧры дунтэм дунын келян. А ведь со номырин воштонтэм ваньбурмы луэ. Кытчы быриз улэп уксёмы? Соос одӥг люкетсэ сиим, мукетсэ качазы, куинетӥез кытысь вуиз, отчы ик кошкиз. Кунгож сьӧрысь банкъёсын счётъёс усьямын. Коньдон бергатонэ зол пырисько кунлэн вылӥ кивалтӥсьёсыз, соослэн ӵыжы-выжыоссы, политикъёс, чиновникъёс. Россие вуись юрттэтэз соос ик качало. Юрттӥсьёс но асьсэ понна гинэ тыршо. Одӥг муген гинэ сёто: Россиез тыриськон гуэ сэрпалтоно. Таӵе амалэн уго бадӟым кунэн косъяськыны, кузёяськыны капчи. Кин уксё тыре, со ик крезьгур но куре. Президентэз но парламентэз быръёнын доллар кузёяське. Манетэз кемалась пыд улаз лёгаз ни. Таиз "пыӵал" "кезьыт войналэсь" трослы кужмогес. Ог-огдэ пуштытъянэз- ыбылонэз ик ӧвӧл. Россия кемалась ни пыдесъяськытэмын. Быгатом-а пунэммес берыктыны? Соиз инмарлы гинэ тодмо, дыр. Возьыт луыны кулэ анай-атайёсмы, песянай-песятайёсмы азьын, та быдӟа Россиез вузаммы понна. И.ОБРАЗЦОВ, история наукаосъя кандидат. ГЛАЗОВЫСЬ ВИНА ПӦЗТӤСЬЁСЛЫ - 100 АР Спирт вӧзы - емышъёс но турынъёс Шаерысьтымы аракы пӧзьтӥсьёс пӧлысь Глазовысь ликёро-водочной завод (ЛВЗ) луэ одӥгез тодмо но вашкала предприятие. Туэ гужем солы тырме 100 ар. Азьло цехъёссэ туннэосыныз уд ӵошаты. Берло дыре завод тодмантэм воштӥськиз, будӥз но паськытаз. Балезиноын пуктӥз спирт поттонъя завод, нош миым сур пӧзьтыны ӧдъяз. Предприятилэн туннэ ужъёсыз, ӟеч продукция поттыны тыршемез но азьланез сярысь газетмы пыр мадёнмы. Котькуд вина пӧзьтӥсь предприятиын, Глазовын но озьы ик, производственно- технологической лаборатория нимысьтыз инты басьтэ. Со пыр пото ваньмыз - ЛВЗ-е вуись сырьё но, винаос но. Лаборатория азьын одӥг ужпум сылэ: ваньзэ чаклано-эскероно. ЛВЗ-ысь лабораториен ньылетӥ арзэ кивалтэ ни егит специалист Наталья Брежнева. Со татчы лыктӥз, Кемеровоысь сиён-юон промышленностья технологической институтэз йылпумъяса. Со вал 1996-тӥ арын. Инженер-технологез Глазовын шуныт пумитазы но Наталья Ивановна тодэм-валамзэ ӝог возьматӥз, ар ортчыса, быдэс лабораториез оскизы. Соин валче Наталья Брежнева шуэ: - Заводэ ӟечлыкезъя котькыӵе спирт вуэ вал. Отысь ик потэ винаослэн но водкалэн ӟечлыкез. Табере югдур воштӥське. Спирт асьмеос лэсьтӥськом, "Калашников" водкалы сяна. Солы "Люкс" спирт басьтӥськом. Со сяна, завод октэ уно пумо турынъёс, емышъёс, вӧйёс, кидысъёс но мукетсэ. Ваньзэ соосты пыр-поч учконо, анализ лэсьтоно. Сотэк адямиослэсь тазалыксэс но сӧрыны шедьтод. Озьы ик чакласьком этикеткаосты, фольга бумагаез, пробкаосты но прокладкаосты. Но тужгес но кулэез ужамы - спиртэз но вуэз эскерон. Спиртэз чылкытатоно, активированной эгыр пыр поттоно. Нош ву чурыт медаз луы, отысь кальцийзэ кулэстоно, щёлочной (небыт) кароно. Заводын вань спиртэз, солэсь ӟечлыксэ ГОСТ-лэн куронъёсызъя учко. Со луэ басьтэм продуктъёсты эскерон. Таин ӵош ик чаклало вина пӧзьтон технологиез, ассортиментэз но дасяло выль винаос. Али ЛВЗ тямыстон ёрос пумо винаос поттэ. Ваньзэ сое син азязы возё. Озьы гинэ басьяськисьёс кие ӟеч юон вуоз. Лаборантъёслэн со нырысез но самой бадӟымез сюлмаськонзы. Предприятилэсь лабораторизэ бадӟым уд шуы, ужало туж тупаса вить кузя. Одӥгез ӟечлыкъя инспектормы Ирина Ворожцова меӵак производствоын, цехъёсын (посуда миськон, вина лэзьянын) ужа. Со чакла поттэм продукциез: этикеткаосты, упаковкаез, маркировкаез, пробкаосты, автоматъёслэсь ужамзэс, технологилэсь куронъёссэ быдэсъямез но мукетсэ. Ольга Микрюкова ЛВЗ-ын 25 ар ужа ни. Со - ИИ категориен инженер-химик, чакла басьтэм сырьёез, поттэм продукциез, спиртэз, вуэз но музонзэ. Ольга Васильевна ветлӥз Брюссельысь адӟытонэ (выставкае). Со уго одӥгез усто но бадӟым опытэн лаборант. Ольга Микрюкова тодон-валан басьтӥз Сарапулысь сиён-юон промышленностья техникумын. Наталья Брежневалэн оскымон воштӥсез - Оксана Иванова. Нош химик-хроматографист луэ Марина Абалтусова. ЛВЗ басьтӥз США-ысь выль прибор - хроматограф. Марина Витальевна соин эскере-учке продукциысь микропримесьёссэ (альдегидъёссэ, сложной эфиръёссэ, урод вӧйёссэ, метанолэз но мукетсэ). Ваньзэ лыдпусъёсты потто компьютер пыр. Лаборатория узыр оборудованиен. Марина Витальевна талэсь азьло ужаз Чепца механической заводын. Татчы ӧтемзы бере, чырткем кышномурт соглаш луиз. Огъя вераса, лаборатория быдэсъя ӟечлыкен герӟаськем ужпумъёсты, чакла выль продукциез, вуэз, заводысь санитариез но мукетсэ. Со понна лабораторилэн ваньмыз вань: усто оборудованиез но приборъёсыз, реактивъёсыз но анализъёс лэсьтыны тырмыт химической веществоосыз. Со луонлык сётэ ГОСТ-эн пуктэм куронъёсты умой быдэсъяны. - Нош юбилейды азьын кыӵе выль продукция кылдытӥды? - юасько Наталья Брежневалэсь. - Та уж милям чик дугдылытэк, вис карытэк мынэ. Тани магазинъёсамы вузаське ни чылкак выль нимаз водка. Солы ним но "Глазов" сётэмын. Та удысын мылысь-кыдысь тырше валтӥсь технологмы Галина Поздеева. Озьы ик кылдытэмын "Боярыня Морозова" вина. Адямиослы со кельше. Котькинлы валамон, поттэм продукциез вузаны быгатоно. ЛВЗ та ужлы бадӟым саклык висъя. Али шаерамы усьтэмын ни 6 складъёсыз-базаосыз но 23 фирменной магазинъёсыз. Вань продукциез ортче вузкаронъя но сбытъя отдел пыр. Солэсь ужзэ быгатыса радъяз отделлэн кивалтӥсез Анна Рогозина, нош директорлэн сбытъя юрттӥсез луэ Зухра Никулина, маркетингъя специалист - Лариса Сакерина. Отделын 4 мурт ужа. Продукциез келя валтӥсь диспетчер Надежда Осипова. Нош фирменной магазинъёс кылдытъян борды нырысь ик басьтӥськиз Анна Александровна Рогозина. Со вузкаронъя усто специалист. Ведь продукциез вузам сяна тодыны кулэ на басьяськисьёслэсь кулэяськонъёссэс но куронъёссэс. Сотэк вузэд уз мыны. Тӥни отдел та ужез но быдэсъя, син азяз возе. Кӧня ке ар талэсь азьло та ужез одӥг мурт быдэсъяз. ЛВЗ-лэн администрациез валаз отдел кылдытонлэсь кулэлыксэ но ӧз янгыша. Вузкаронъя отдел озьы ик эскере кыӵе продукция (кыӵе пумо винаос но водка) ӟечгес кошке но соя ик куронъёс дася. Сотэк вузэд ӝажыосын кыллёз. Азьланез сярысь пусйыса, предприятие вис карытэк азинске, лэсьтӥське. Миым вуттӥз Балезиноысь спирт поттон заводзэ, али Глазовын ӝутэ админстративной юрт. Борддоръёсыз вань ни. Туэ корка пырон карозы. Зэм, ЛВЗ-ын вань ужъёссы умой радъямын. Нош соос быдэсъясько адямиослэн лулысь- сюлмысь тыршеменызы. Котькудӥз оскем ужзэ пыр-поч лэсьтэ. Тани водкалэсь ӟечлыксэ нуналлы быдэ чакла цехысь контролёр Наталья Максимова. Нош транспортникъёс пӧлысь усто тырше И классъем шофёр Николай Злобин. Солэн КамАЗ-эз котьку сюрес вылын, техниказэ дыраз тупатъя, юн чакла. Заводын тырон-ӝоктонэз ноку уг ӝегаты водитель Леонид Брыляков. Солэн автопогрузчикез час кадь ужа. Предприятиын лыдъян-чотан ужез валаса нуэ валтӥсь бухгалтер Алевтина Крестьянинова. Солэн оскымон юрттӥсьёсыз луо бухгалтеръёс Татьяна Ковальчук но Людмила Сверчкова. Соин ик ЛВЗ-лы нокыӵе эскерисьёс-контролёръёс кышкыт ӧвӧл. Глазовысь аракы пӧзьтӥсьёс туэ уката мылысь-кыдысь тыршо. Пумен матэктэ угось заводлэн бадӟым юбилеез, 100 ар тырмонэз. Солы сӥзем ужрадъёссы кутско ни. Нош пусъёзы сое мае. Глазове лыктозы Россиысь но Удмуртиысь дано но тодмо артистъёс, трос куноос но кивалтӥсьёс. Геннадий РОМАНОВ. * Маркетингъя инженер-специалист Лариса Сакерина. * Валтӥсь технолог Галина Поздеева. * Водка лэзьян цехысь контролёр Наталья Максимова. * Валтӥсь бухгалтер Алевтина Крестьянинова. * КамАЗ-лэн водителез Николай Злобин. * Бухгалтеръёс Татьяна Ковальчук но Людмила Сверчкова. * Таӵе посудаен но "Калашников" водкаез потто. * Таӵе луоз выль административной юртэз. * Автопогрузчик Леонид Брыляков. Водка "Глазов". Туспуктэмъёсыз Владимир Беломорскихлэн. БЫДӞЫМ ВОРМОНЛЫ - 55 АР Дас кык арес - вакыт бугрес Озьы ик гожтэмын: "Ижлес" трестлэн Селта ёросысь Виняшур-Бия лесопунктысьтыз телефонист. Дырыз но пусъемын: 1942-тӥ арын сентябрь толэзь. Лёнялы соку дас кык арес вал. Со вакытысен ужан стажаз вис ӧз луылы. Та нуналозь. Ваньмыз витьтон сизьым ар. Кинлы кызьы, вылды, мыным оскыны ик шуг. Быгатэ шат одӥг мурт куатьтон ар пала ужаны? Озьы но луэ вылэм. Ай солэсь но ортчыт. Леонид Михайлович Жевлаков шутэтскыны уг малпа на. Тани ӵуказе улыса 70 арессэ пусъёз ни, но нокин сомында уз сёты. Сӥлё- виро, таза воргорон. Туннэ со ужа профсоюзъёслэн дышетскон центразы, отысь кивалтӥсьлэн воштӥсез луэ. ...Калмез шур дуре интыяськем пристане кышкыт ивор войналэн кыкетӥ нуналаз гинэ вуиз. Пыдлось нюлэсэ ышем Виняшур-Бия, толбыт ас гуаз изем гондыр музэн, нырысь шуак сэзъялскиз но ӝытлань копак гуньдӥз кадь. Кор келянысь берытскем картъёссэс нылкышноос номыр вератэк пумитазы. Синъёссы гинэ ваньзэ валэктӥзы. Военкоматысь ыстэм косон кызьы ке но ас кожаз котькуд корка пыраса ортчиз кадь. Уй вылтӥ кӧлонэн йырин ӧй вал ни - ӵуказеяз пиосты Селталан котомкаен витизы. Фронтэ кошкиз пур келясь станциысь мастер Михаил Жевлаков но. Бадӟымезлы пиезлы, Лёнялы, трос вераса ӧз но вутты, ма, кулэен но ӧз лыдъя, вылды. Кизэ кырмиз но "оскисько" гинэ шуиз. Ньылетӥ классэз быдтэм пияш, пельпумзэ золтыны выриз ке но, нюромем синъёссэ атаезлэсь ватыны ӧз быгаты. Нюлэс посёлокын улон чусомиз. Ваньмыз сямен таза воргоронъёс кошкизы оже. Быдэ вуымтэос дышетсконзэс куспетӥ карыса султӥзы атайёссылэн ужан интыязы. Дас кык аресъем Леонид Жевлаковлы бубизлэн эшъёсыз ӵектӥзы телефонист луыны. - Бен-бен, Виняшур-Бия, - вазь ӵукнаысен бер ӝытозь контора тыр чузъяськыны ӧдъяз пияшлэн векчи куараез. Лёня телефон пыр басьтылӥз пӧртэм иворъёсты, герӟалляз лесопунктлэсь кивалтӥсьсэ мукет предприятиосын. Ӝытазе йырыз жон! вазе ни вал. Ассэ вормыны тыршыса, пияш котомкаысьтыз поттылӥз дышетскон книгаоссэ. Озьы ик умме но усьылӥз - ужан интыяз. Жевлаков возьматӥз йӧно но валась луэмзэ. Кадръёсъя инспектор фронтэ кошкем бере, пияшез солэн интыяз выжтӥзы. Бӧрысь оскизы плановой отделын ужаны. Отӥяз мастерлы юрттӥсь луиз: наряд дасялляз, лыдъяз-чотаз, сиён-юонлы талонъёсты люкылонэз но ас вылаз басьтӥз. Вормон нуналэз калык шумпотыса пумитаз. Жевлаковъёслэн семьяязы мылкыд мукет вал - атайзы вылэ похоронной вуиз уго. ...Трестын косэм ужъёсты быдэстыса, Леонид поездэн Ува станциозь вуиз, отысен Селталась кузёосын вераськем интые вамыштӥз соос егит ужасез сьӧразы басьтыны соглаш луизы. Эшъёссэ возьман куспын со доры быдэсак пурысьтам пересь лыктӥз: кызьы ке но, пе, Селтае шедёно вал. Туж сак учкиз песятай пияшлэн синмаз. Кызонзэ вормыса, оскытэкгес сипыртӥз: - Кылзы ай, тынад фамилиед Жевлаков ӧвӧл-а? Лёня соку гинэ валатскиз, со азьын воксё пересьмем атаез сылэ шуыса. Пленэ шедьылэм солдат дораз туж висьыса берытскиз. Озьы ке но, ужтэк пукыны ӧз чида - войналэсь азьло ужам интыяз куриськиз. Нош егитэз Жевлаков Кудымкаре дышетскыны мынӥз. Со бӧрсьы пияшез трест ыстӥз Нылга ёросысь Областной станциысь леспромхозэ. Отӥяз солы ужаны кылдӥз Выль Ӟатчаын но Кезын, Кабажурын но Арлетьын. 1962-тӥ арын Леонид Михайловичез юнматӥзы Глазов леспромхозысь валтӥсь инженере. Ньыль ар ортчыса, удыссэ солы воштоно луиз - партилэн горкомез Жевлаковлы оскиз ПМК-ен кивалтыны. Татын но пичи дырысен ужез гажаны дышем воргорон ассэ умоен возьматӥз. Сое юнматӥзы "Удмуртсельстрой" трестлы кивалтӥсе. Пенсие потэмез бере Жевлаковлы дэмлазы профсоюзъёслэн дышетскон центразы ужаны. - Трос адӟыны кылдӥз дауре ӵоже, - вера Леонид Михайлович. - Вал котькыӵеез. Но мон одӥг вамышме но уг жаляськы. Сюлэм висе мукетыз понна: асьме странаын, асьме республикаын лэсьтӥськемысь дугдӥзы. Ог куамын ар талэсь азьло милям трестамы гинэ ог 120 объект вутто вал. Юртъёс ӝутыны кирпич ӧз тырмылы. Сое куддыр партилэн обкомезлэн нырысетӥ секретарезлы люкылоно луэ вал. Табере котьма вань, нош вылез туж ик уг адӟиськы. Но, малпасько, котьма радъяськоз ай... Жевлаков йырзэ уг ошы, азьлане учкыса улэ. Юбилейзэ со ӟечезлы осконэн пумита. И.ЛЕБЕДЕВ. * Ужысь ветеран С.Л.Жевлаков. В.Беломорскихлэн туспуктэмез. КУН КЕНЕШЫН Дасясько выль законъёс Кун Кенешлэн ялан ужась комиссиосаз азинске выль законъёслы инъетъёсты эскерон но Удмуртилэн Конституцияз воштонъёс пыртонлы дасяськон. Куд-огез соос пӧлысь юнматэмын луозы ни 18-тӥ апреле, Кун Кенешлэн азьвыл чакламтэ сессияз. Бюджетъя комиссилэн кивалтӥсез С.Э.Широбокова журналистъёс азьын туэ нырысетӥ кварталэ ужамзылы вакчияк йылпумъян лэсьтӥз. - Лыдпусъёс шумпотымонэсь, - шуиз со. - 2000-тӥ арлы юнматэм бюджетын пичияк пась ке кылиз вал, куинь толэзь куспын "Удмуртнефть" чотын та дефицит пытсаськиз. Казнае налог вуиз ужаны кутскем промышленной предприятиослэсь но. Ваньмыз со луонлык сётэ пенсиосты дыраз тырыны но уждун ласянь пунэме кылемъёсты берыктыны. Вуоно сессие комиссия дася республикалэсь экономиказэ азинтонъя бюджетлэсь законопроектсэ. Озьы ик али бадӟым уж нуиське выт октонъя законъёслы огъя инъет кылдытон бордын. Таиз закон федеральноезлэн куронъёсызлы матынгес. Со улонэ пыӵаз ке, налог тырон улэ кыскемын луозы калыклы юрттэт сётон удысын ужасьёс, техника тупатъясьёс. Кылем арысен выт улэ шедизы парикмахеръёс, рынокын дӥськутэн но промышленной вузэн вузкарисьёс. Кызьы пусйиз ялан ужась комиссилэн кивалтӥсез, соос чотын казна шӧдскымон тупатскиз. Та вакытэ эскерон-чаклан ужрадъёс нуисько рынокын сиён-юонэн вузаськисьёсъя. Правительстволэн решениеныз соосты выт тырон улэ кысконъя вераськон мыныны кулэ Кун Кенешлэн май толэзе ортчоно сессияз. Вузкаронъя налог Удмуртиын 4 процент басьтӥське, Россия Федерациын та лыдпус 5 процент тупатэмын. Ар ӵоже республикая 137 миллион манет люкамын, азьвылэныз ӵошатыса, куинь поллы ятыр. Б ускельёсмыя ке верано, Башкириын - 247 миллион, Татарстанын - 240, Марий Элын - 32, Чувашиын - 69 миллион. Сомындалы узырмиз бюджетсы одӥг пумо выт чотын гинэ. Удмуртия та радын умой инты басьтэ. Таяз арысен налог тыроно луозы казино, шудон автомат возись кузёос но. Отын бадӟым коньдон берга, нош туннэ нуналозь, закон кутымтэен, казна понна соослэн пайдазы ӧвӧл. Вылӥ верам куд-ог улосъёсын игорной бизнес кемалась бюджет вылэ ужа ни. - Кун Кенешысь Эскерон палатаез быдтэмен валче, бюджетэ пырись но бюджетэ пырисьтэм фондъёслэсь ужзэс комиссимы эскерон кун комитетэн ӵош чакласа возе. Правительство ласянь бадӟымесь янгышъёс уг пумиськыло ке но, куд-ог интыосын бюджетысь коньдонэз законэз тӥяса кутылон учыръёс вань. С.Э.Широбокова умоен пусйиз оборона удысын но МВД-ын коньдон ласянь ӟеч воштӥськонъёсты: центр соослы бадӟымгес саклык висъяны ӧдъяз, ужзы понна дыраз уксё ыстэ. Татын шӧдӥське Чечнялэн "шӧмыз" но. Софья Эльфатовна вераз Кун думалэн депутатэзлэсь Ю.Д.Маслюковлэсь но республикамылы зол юрттэмзэ. Со сюлмаськемъя, кылсярысь, Удмуртиысь сюрес лэсьтонэ туэ арлы федеральной дорожной фондысь 200 миллион манет висъямын. Вераськонэз йылпумъяса, С.Э.Широбокова журналистъёслэн юанъёссылы валэктонъёс сётӥз. Л.МЕДВЕДЕВА. Ӧз пӧрмы Кызьы тодӥськоды, ньыль ар талэсь азьло Ижысь футбол команда чемпионатэз мытӥз вал Ставропольын, татысь кужмо "Динамоез" вормыса. Сыӵе ӟеч кутскон ик командалы ас кужымезлы оскон мылкыд но пыӵатӥз. Соку "Газовик" вань турнирез ӝутскем мылкыдын ортчытӥз но вылӥ лигае потон вылысь пумозяз нюръяськиз вал. Туэ чемпионатын нырысетӥ пумиськонзэ "Газовик" Смоленскын ортчытӥз. Егитомем команда кузёослэн пачкатэмзы улсын куасалскиз - 0:2 лыдын келяз. Ӵуказе "Газовик" шудоз Яраславльын, вылӥ лигаысь улӥегес васькем "Шинник" командаен. М.КУЗЬМИН. Дэриос дасясько тулыслы Матэктэ гырон-кизён вакыт. Солэсь кызьы ортчемзэ эскерон вылысь люкаськылӥзы Завьяловоысь хозяйствоослэн кивалтӥсьёссы. Ёросын туэ 22 сюрс 840 гектар музъем висъямын луоз тысё но пуртэсо юос улэ, 30 сюрс гектар - пудо сюдон турынъёс но 2 сюрс 500 гектар картошка улэ. Шугъяськонъёс луозы, дыр, вужмем техникаен, ӧжыт дасямын удобрение, эстӥськон кулэезлэсь ӝынылы гинэ тырмытэмын. Но куд-ог хозяйствоос дасьсэ возьмаса уг уло, асьсэос бызьыло-сюлмасько гырон-кизёнэз ӟеч радъян сярысь. Н.ИВАНОВ. Ӟеч улэмед потэ - тыршы! Завьял ёросын фермер огазеяськонъёслэн кылдэмзы дырысен 9 ар тырмиз. Татчы ваньмыз 378 адями пыре, пӧлысьтыз 200-эз ас удысаз бадӟым азинсконъёс басьтӥз. Тужгес синмаськымон ужало Люкысь эрико крестьянъёс (озьы шуом фермеръёсты). Интыысь колхозэн ӵошатыса, кылем сӥзьыл соос кык поллы ятыргес ю тысь басьтӥзы. Фермеръёс ог 20 йыр таза сюро пудо вордо. Скаллы быдэ 3 сюрс 500 литр пала йӧл кыско. Ӟеч ужамзы понна пусъёно Подшиваловоысь, Кашабегиысь фермеръёсты но. Ваньмыз та трос кужым кулэ каре. Ёросысь фермеръёслэн уг тырмы техниказы, пыр-поч радъямын ӧвӧл шугадӟонъёслэсь утиськон амалъёссы. Кылем огъя пумиськоназы крестьянъёс огкылысь ог-огзылы юрттыса ужан сярысь кенешизы. Н.ИВАНОВ. Улонэн люкиськиз Кырӟась Та чебер тулыс нуналэ улонысь кошкиз тодмо крезьгурчи но кырӟась Николай Уткин. Кияса ёросысь Уддяди (Карамас-Пельга) гуртын вордӥськем пияш ӧз ик тодылы, дыр, пилемо нуналъёсты. Вань улонзэ кырӟаз но кырӟаз, котькыӵе кайгузэ вунэтыса. Зэм, одӥгаз нуналэ ӧз удалты: сьӧдкыль та чебер но егит воргоронлэсь улонзэ пыраклы сьӧраз нуиз. Николай улонысь кошкиз, ӵапак сцена вылын кырӟакуз. Та чебер улонэн озьы люкиське, дыр, зэмос Кырӟась гинэ. Николай Уткин яратӥз Улонэз. Яратӥз Кырӟанэз. Улонысь но кошкиз Кырӟанэн ӵош. Кыллёно валесэд небыт медло, Николай. "СВД" паймытӥз дуннеез Вазенгес ай "Ижмаш" заводлэн музеяз возьматыны лэзё вал пыӵал тӥрлык кылдытӥсьлэсь Драгуновлэсь портретсэ гинэ. Вань, пӧй, заводын Ленин премилэн сыӵе лауреатэз. Нош конструкторлы 80 ар тырмон азьын усьтэмын вал нимысьтыз сэрег. Отчы интыямын солэн кылдытэм тямыс пумо пыӵалъёсыз, документъёс, туспуктэмъёс, портретэныз синпель медальёс, туж пичи гинэ снайперлэн ужась винтовкаез. Татын асьсэлэсь пыӵал-тӥрлыксэс возьматыны оскемын куинь муртлы гинэ - Михаил Калашниковлы, Геннадий Никоновлы но Евгений Драгуновлы. Ма ватонэз: азьло куинез ик конструкторъёс "ватэмын" вал. Кунгож сьӧрын соосты тодо вал. Нош ожгар тӥрлык кылдытӥсь специалистъёсты доразы ватыса возьылӥзы. Но конструкторъёсмы сярысь тодыны кулэ ик. Вордскиз Драгунов Ижевскын. Кылем толэзе солы тырмысал 80 арес. Соин валче республикаямы уно пӧртэм ужрадъёс ортчизы. Дасямын вал нимысьтыз медаль. Евгений Федоровичлэн ужам интыяз, 40-тӥ отделлэн борддорез борды, юнматэмын буре ваён пул. Драгунов ужаны кутскиз заводлэн ложаос лэсьтон мастерскояз. Отын ик трышизы солэн песятаезлэн песятаез, песятаез, атаез. Собере Мосинлэн винтовкаезлы штыкъёс лэсьтӥз. 1939-тӥ арын егит пиез армие басьто. Шеде со Дальний Востоке. 1945-тӥ арын декабрь толэзёзь отын Драгунов винтовкаосты тупатъясь мастер вал, озьы ик юрттӥз артиллеристской училищеын курсантъёсты дасяны. Фронтэ куриське вал. Олокӧня рапортъёс гожъяз. Шуылӥзы: ум быгатӥське. Заводаз берытскемез бере, сое басьтӥзы валтӥсь конструкторлэн отделаз. Бӧрысьгес куризы спорт удыслы пыӵалъёс дасян бордын ужаны. Инмар юрттэмен-а, мар-а, толэзь ортчыса, Драгунов "С-49" пыӵаллы быдэсак чертежъёссэ вуттӥз ини. Планъёсъя отделлэн начальникез воксё абдраз. Ма, пияш умой-умой бурдъяськыса но ӧз вуы на, табере солы уноен пыӵал поттыны коньдон сёт ини. Серем ӧвӧл-а со? Нош пыӵал улонэ сюрес шедьтӥз. Нырысетӥ ӵошатсконъёсын ик пуктэмын вал дуннелэн рекордэз. Драгуновез спортлы пыӵал тӥрлык дасян удысын валтӥсь конструкторъёс радэ пыртӥзы. Нош со улытозяз 27 пумо винтовка кылдытӥз. соос пӧлын "МЦВ-50", "Зенит", "Стрела", "Тайга", "СМ", "Биатлон" спортъя винтовкаос. Соосын асьме спортсменъёс уно олимпийской медальёс басьтылӥзы. Конструкторлы бадӟым дан ваиз снайперъёслы ачиз зарадаськись "СВД" винтовкаез. Котькуд ласянь со тупа вал туж уно куронъёслы. Капчиен ӧз сётскы та вормон. Война кутскон азьын ай Федор Токарев малпа вал снайперлы винтовка кылдытыны. Ӧз пӧрмы. Сергей Симонов аслэсьтыз ик "СКС" карабинзэ умоятыны выриз. Нош ик ӧз пӧрмы. Озьы ик Австриысь, Великобританиысь, Германиысь, Франциысь армиосын ялан ожмаськизы киын зарадано магазинэн винтовкаосын. 1958-тӥ арын Драгунов пыриське снайперъёслы винтовка кылдытонъя конкурсэ. Вить ар ӵоже шутэтскыны ӧз пота. Уйёссэ-нуналъёссэ бюрояз ортчытылӥз. Озьы "СВД" винтовкаен минутаз, вить патрон интые, табере ыбыны луиз куамынзэ. Винтовкалэсь луонлыкъёссэ эскерон вылысь, Советской Союзысь, Венгриысь, Финляндиысь но Швециысь судьяос ньыль пумо 200 патрон дасязы. Кузьдалазыя пӧртэмесь. Ваньмыз пӧртэм кортъёслэсь. Винтовка час кадь ужаз. 1991-тӥ арын Аргентинаын ортчем выставкаын со дуннеын самой умоеныз лыдъямын. Но со вакытэ Евгений Федорович Драгунов улэп ӧй вал ни. Атаезлэн сюрестӥз вамыштӥзы кык пиосыз но. Кыкназы но - пыӵал тӥрлык кылдытӥсьёс. Атаезлэсь кутскем ужзэ пумозяз вуттӥз Ижевскысь механической заводысь валтӥсь конструктор, техника наукаосъя кандидат Михаил Драгунов. Нош "Ижмашын" тодмо конструкторлэн пиеныз Виктор Калашниковен ӵош ужа Алексей. Соос кылдытӥзы ни "Бизон" пистолет-пулемёт, Калашниковлэн инъетэз вылын ужась тылпу кысон установка. Адями улонысь кошкемын ни ке но, солэсь ӟеч ужзэ уг вунэто. Берло ке но калык тодӥз визьмо пиез сярысь. А.АРТАМОНОВ. Тулыс тудву кышкатэ Правительстволэн Тӧроезлэн вштӥсез Николай Хохлов ортчытӥз городъёсысь но ёросъёсысь граждан оборона ужпумъёсъя но кышкыт учыръёсъя ёзъёслэн кивалтӥсьёсынызы кенеш. Вераськон мынӥз тудвуэн нюръяськонъя чаклам ужрадъёслэн кызьы быдэсъяськемзы сярысь. Шаерамы кылдэм огъя югдурен тодматӥз Граждан оборона ужпумъёсъя но кышкыт учыръёсъя комитетлэн тӧроез Тамази Габричидзе. Кык толэзь куспын эскеремын 52 шур но тымет, шараямын куд-ог тырмымтэос но. Сюлэмшугъяськонэ уськытӥз шаерысьтымы гидрометеорологияя центрлэн кивалтӥсезлэн Татьяна Загребиналэн ивортонэз. Солэн верамезъя, кыкетӥ декадалэн кутсконаз температура шуак ӝутӥськоз но, лымы чаляк шунамен, вуос ӧрысьтызы потозы. Нош огъя температура апрель толэзе нормалэсь одӥг градуслы вылӥынгес луоз. Шуръёс, чакламъя, таӵе дыре усьтӥськозы: Чепца Глазов ёросын - 16-тӥ-22-тӥ ареле, Лоза Игра посёлок котырын - 16-тӥ-22-тӥ апреле, Вало Вавож ёросын - 15-тӥ-21-тӥ апреле, Сива Гавриловка гурт дорын - 14-тӥ-20-тӥ апреле, Позимь но Иж - 12-тӥ -17-тӥ апреле. Кенешез йылпумъяса, Николай Хохлов бадӟым саклык висъяны куриз гидротехника сооружениосты эскерон-чакланлы, ваньбурез но тужгес ик адямиосты кышкыт югдуре шедемлэсь утьыны. Удмурт Республикаысь Правительстволэн пресс-службаез. Вормонлы - 55 ар Ез утиз йӧӟектэмлэсь Павол агаез курыт юанъёсыным гуньдытэмысьтым, ачим ик керпотӥ. Малы, малы нош ортчемзэ тодад ваёд? - шуизы кадь кисыриосын гыриськем ымныртӥз гылӟись синкылиос. Секытэн, курадӟыса ортчиз пичи дырыз. Озьы но котьку капчи мылкыдо, вазиськись вал, куректонзэ калыклы вераса ӧз ветлы. Школаын усто дышетскиз. 1940-тӥ арын Ижевскысь музыкальной школае пыриз. Дышетскем понна дун тыроно, дӥсь басьтоно... Озьы но со малпанэзлэсь ӧз куштӥськы - дышетскем потонэз котьмае вормиз. Но мытэм кырӟанэз куспетӥ луиз. Война кутскемен, Агрыз чугун сюрес вылэ ужаны басьтӥзы. Собере Канаше командировкае келяло. Татысен, поездысен ик, ивортӥзы, армие келяськом шуыса. Пудо нуллон вагон вуттӥз Ленинград пала. Толэзь пал связистэ дышетыса, ожмаськонэ лэзизы. Выборг город, пумтэм гуртъёс... Вамышлы быдэ - кышкытлык. Я отын, я татын, сюез пазьгыса, минаос пушто. Кӧня эшъёсыз кылизы, сюен суро согиськыса. Одӥгаз Ленинград дорын ожмаськонын сӧсыртӥзы Павел Васильевичез. - Эшъёсыз кулэмын кожаллям, кельтӥллям. Кӧня кылли, уг тодӥськы. Шӧдӥ: суез, пыдэз ӝутэм уг луы. Пал суй йылам нюжтӥськисько азьлань. Валэн сюрес вылэ вуи. Шудэ вылэм на, лэся. Ӵапак сӧсырмем солдатъёсты утчаса ветло вылэм. Вуттӥзы госпитале. Кема султыны ӧй быгаты, носилкаен мунчое нуо-ваё. Бурми. Выльысь фронтэ кошки. Бӧрсе кылизы Эстония, Польша, Германия... Шимес учыр вылэм Висла шур вылысен. Лэзизы разведкае, эскероно, пе, телефон езэз. Висла та палан - асьмелэнъёс, сопалан - немецъёс. Нюжтӥськыса мыно телефон ез кузя. Азязы - Павел Васильевич, бӧрсяз - эшъёсыз. Пель дортӥ шиетыса ортчо тушмон пуляос. Синйылтӥллям, шӧдске. Коть йӧтоз, коть уз - азьлань нюжтӥсько, шуак йӧ тачырак кариз но... пилиськиз. Кужмо ӧраз кыске дыртыса, позыръяськыса бызись Висла шур. Паймоно, кытысь адямилэн таӵе учыре но кужымез потэ. Берпуметӥ улон нюжа - векчи телефон ез. Вань кужмысьтыз кырмиськиз со борды. Тушмонъёс нош ыбыло но ыбыло. Ярам, ӧз куштэ эшъёсыз - вуысь езэн кыскыса поттӥзы. Дӥсез йӧлы пӧрмем вылэм ини. Лябӟемез вылэ туж зол висён кырмиз - малярия. Войналэн берпуметӥ нуналозяз ожмаськиз Павол агай. Дор палаз вуиз 1947-тӥ арын гинэ. Война бере кытын гинэ ӧз ужа, ас сярысьтыз чебер малпанъёс кельтӥз. Дас вить ар ужаз школаын завхоз луыса. Ужзэ рос-прос, ӝикыт быдэсъяз. Сӧриськем кенерез, отӥ-татӥ костаськись тӥрлыкез уд адӟы, пе, вал. Соку завхозлэн ужез секыт вылэм: пу дасяно-пильылоно, школа валэз сюдоно, толлы турын дасяно. Куас вылэ султыса ӵошатскыны но сцена вылын шулдыръяськыны вуттылэм. Трос нылпи будэтӥзы яратоно кузпалэныз. Жаль, Дарья апай улонысь вазь кошкиз. Ма карод - висён уг юа. Уг бездыто ортчем аръёс адямилэсь умой сямъёссэ. Уд адӟы Павол агайлэсь калык пӧлын акылляськыса, уродъяськыса ветлэмзэ. Со котьку лякыт, вазиськись, ужез гажась но адямиосты яратӥсь. Ольга Никитина, Удмурт университетысь студентка. Гурт шудонъёсын - нылпиос Завьяловоын йылпумъяськизы шаерысьтымы гурт школаосын дышетскисьёс пӧлын волейболъя ӵошатсконъёс. Татчы пыриськизы асьсэ зонаосын вормисе потэм командаос. Нылъёс пӧлын ваньмызлэсь кужмоесь вал кузёос. Завьялъёс вань пумиськонъёссэс вормизы. Кыкетӥ интые потӥзы Игра ёросысь спортсменкаос, куинетӥ луизы Можгалась нылъёс (ваньзы сямен Бадӟым Учалась). Пиос пӧлын вормизы можгаос, кыкетӥ интыын балезиноос (Карсовай школа), куинетӥ луизы завьялъёс. Май толэзе Завьяловое люкаськылозы на дышетскись пиналъёс - соос пӧлын ортчозы гурт шудонъёс. Н. Иванов. Оло, мукетъёсыз но адӟем карозы Суро-пожо секыт улонмы уката яркытгес син азе пуксе. Одӥгъёсыз лушкам ваньбурзэс кытчы мар карыны уг тодо, нош мукетъёсыз пумен ӝоггес куанермо. Соин сэрен висись нылпиослэн лыдзы арысь аре йылэ. Кӧняез ке соос (церебральной параличен курадӟисьёс) люкамын Ижысь 282 номеро нылпи садэ. Отын куинь арескысен уло но 10-тӥ классозь дышетско. Соос пӧлысь куд-огез кабзэ ветлыны уг быгато. Тӥни та нылпи садлы юрттыны басьтӥськиз "Удмуртнефть" акционер огазеяськон. Алигес солэн кивалтӥсез Евгений Богомольный татчы ветлӥз, нылпи садлэн ужаменыз тодматскиз, ваньзэ аслаз синъёсыныз адӟиз. Со та учрежденилы 3 ар юрттэ ни. Россиын ньыль гинэ таӵе садъёс. Одӥгез тани Ижевскын. Огазеяськон садлы басьтӥз ни тренажёръёс, эмъяськон шаръёс но мукетсэ. Та нуналъёсы 5 компьютер кузьмаз. Сад умой-умой тупатъямын ни. Али эшшо лифтэз выльдоно на. Нылпиослы тубаны-васьканы умойгес мед луоз. Соос татын дышетско но эмъясько, бассейнын уяло, физкультурая кабинетын вошъяськыса тазалыксэс юнмато. Нош кыӵе соос чебер суредало, кырӟаны дышетско, "Тулыс шапык ву" концерт дасязы но валтӥсь шефсылы -Евгений Исаковичлы - концерт возьматӥзы. "Удмуртнефть" му вӧй поттонзэ ялан будэтэ. Туэ мартэ 5 сюрс тонналы уногес кыскиз. Со дыраз тыре выт. Нош юрттэмезлы нылпиос кыӵе шумпото, тау каро. Нош ачиз Евгений Богомольный шуиз: - Милесьтым, оло, мукетъёсыз но адӟем карозы. Соку ӧжыт ке но улонмы капчигес луысал. Тани та садикысь но висись нылпиослэсь улонзэс ӧжыт ке но умойгес кариськом. Гуртлы али 20 сюрс тонна дизтопливо висъям ни. Нош одӥг куиньмоссэ кунгож сьӧры вузаськом. Инкуазез утьыны арлы быдэ 20-25 миллион манет уксё быдтӥськом. Но ужан амалъёсмес ялан умоятӥськом, инкуазьлы пумен ичигес изъян ваиськом. Новосибирск областьын но ужъёсмы ӧръясько. Но выль губернаторен пумиськыны кулэ. Г. Романов. ГУРТ УЛОН Зямбайысь Сунцовъёс Ма бордын меда гуртлэн шулдырез? Мынам валамея, муш семья кадь ужась калык бордын. Со сяна, кин пуктоз ӝик-ӝик юртъер, гид тыраз вордоз пудо, выжыоссэ весяклы лэзёз вордскем музъем вылаз. Татын со ачиз кузё. Ӵапак сыӵе семьяосын данъяське но арысь аре юнма Вавож районысь чылк-чылк удмурт Зямбай гурт. Ӟеч кузёез кыдёкысен тодмалод кибервылызъя. Синмаськод, вожъяськод, адӟем карод солэсь. Зямбайын улэ Галина но Леонид Сунцовъёслэн семьязы. Мукетъёсызлэсь номырин но сокем ик уг висъясько: узырлыкенызы но, пачыласа уртчись шудбуренызы но. Чылкытлыкенызы но ӝикытлыкенызы ке шат? Гуртооссы озьы ик шуизы: "Галялэсь ноку но курмем дырзэ уд адӟы, олоку гинэ утялскыны вуэ". Галина Борисовна ужа фермаын, учётчик, картэз Леонид Николаевич, татын ик слесарь- механик. Калык верамъя, котькыӵе ужлы со мастак, пытсам синмын но тӥяськем машинаез тупатоз. Озьы, дыр, асьмеос дышемын ни: косэмез витьытэк, тэк улыны дышымтэ киос асьсэлы асьсэос мазы уг сёто - маке но лэсьтоно, маке но бергатоно. Тани Сунцовъёс но огкутскемен корка борды корка пуктӥзы: верандазэс вӧл-вӧл комнатаослы пӧрмытӥзы, пиналъёссы понна улон инты лэсьтӥзы. Сыӵе ини мумы-бубы сюлэм: кужымед вань дыръя кивоштӥсьёсыдлы тросгес юрттэм потэ. Туала вакытэ адямиос ӧжытгес верасько ни шумпотон, азьпал улон-вылон сярысь, уката ик со шӧдӥське городын. Нош гуртъёсын мылкыд музонгес. Крестьян калыклы оло ӝожтӥськыны ноку, оло котьмалы дышемын ни. Но секыт из улэ пачкамез уг шӧдӥськы. Тани Галина Борисовна вераськонъяз, ачиз но шӧдылытэк, олокӧня пол ӟечен тодаз вайылӥз колхозлэсь правленизэ но председательзэ. - Колхоз туж юрттэ. Пудо вордытэк но вордод: турын-куро тюкен сёто, уждунъя висъяло ю тысь. Кылем ар понна милям басьтонмы, кылсярысь, кык тонна но ӝыны луиз. Гуртын коркалы быдэ скал вордо, ветыл но будэтӥсез вань. Пудотэк кызьы-о коньдон поттод? Гуртын ведь ялан лэсьтӥськоно: я отӥ, я татӥ куашка, ваньзэ дыраз выльдоно. Куать часэ султыса, со фермае кошке ни. Куать час но ӝыныен скалъёсты ӵукназэ кыско, кыкетӥзэ кыско нуназе шорын, ӝытсэ - куать часын. Учётчиклы котьку интыяз луоно. - Кӧня ке арзэ нуналаз кык пол кыскыса эскерим, калыклэсь адӟем карыса. Правленилэн решениезъя али выльысь берытским куинь пол кысконэ. Пайдаез вань: йӧл тросгес потэ. Сиён толбыт ӵоже ӟеч шедиз. Силос, клевер, турын пызь, кушман, куро - солэсь умой рацион вань на меда? Г.Б.Сунцова лумбыт-ӝытбыт дась вераны фермаез, ӵош ужась эшъёсыз сярысь. Зэмен но, тамында ар ӵоже семьяедлы кадь дышоно ни. Гуртысьтызы тросэз нылкышноос егитысен пенсие потытозязы скал кыско, кунянъёсты, ошпиосты будэто. Кытысь-о мукет уж утчалод на? Нош Мичурин нимо колхоз калыкез сярысь, зэмен ик, туж сюлмаське. Уждунзы ушъяськымон ӧвӧл ке но, маин быгатэ - колхозникъёслы юрттэ. Зямбайёс асьсэ будэтэм чабейзылэсь пекарняязы нянь пыжо. Ай кыӵе со удалтэ! Колхозын ужасьёслы сукыризэ, городын сярысь, кык поллы дунтэмен вузало. Столовойын нош 3-4 поллы дунтэмгес сюдо. Соин ик механизаторъёс, гуртэ бертылытозь, татын гинэ нуназеяло. Одӥг-кык манетлы кытын туннэ кӧттэ тырод? Вашкала удмурт гурт дугдылытэк выльдӥське. Кык-куинь арлы одӥг семья ке но ӵыжак выль корка пыре. Та ласянь но колхоз юрттэ. Улӥ дунынгес висъя лэсьтӥськон материал, техника, тужгес ик - пинал семьяослы. Бакча мерттонлэсь секытсэ но хозяйство ас вылаз басьтэ: кинлы вал, кинлы трактор сётэ. Эшшо одӥг ласянь зямбайёслэсь улон-вылонзэс пусъем потэ на. Тросаз гуртъёсын парткомъёсты быдтэмен ӵош ворсаськизы культура юртъёс но. Кино возьматонлэсь воксё куштӥськизы, чалмиз кырӟан-шулдыръяськон. Зямбае та тулкым ӧзгес вуы, палэнтӥгес кошке ай йӧнтэмъяськон но. - Калыкмы ужась, лачмыт сямо бере, нылпиос но сыӵегес будо, лэся, - шуэ гуртоосыз сярысь Галина Борисовна. - Кузё но зол: кинлы со яра, кинлы - уг, шунды но ваньзэ огкадь уг шунты ук. Ачид ке умой луид, юыса, лушкаськыса ке ӧд ветлы, нокин но шорад кырыж уз учкы. Туннэ нуналэз со шӧдтэкак ӵошатэ ортчеменыз. Сюлэмыз отчы ик кыстӥське: - Ӧм но валаллялэ ӟеч улон-вылонмес, ялан маке но уг тырмы вал. Нош соку дунтэк яке дунтэм дунын санаторие но ветлыны шуд усьылӥз. Турист интыын Молдавие, Прибалтикае семьяен-семьяен вуылӥм, путёвка колхоз сётъяз. Мон туж синмаськи Тираспольлы. Сыӵе чылкыт, шулдыр, чебер городэз улытозям адӟылэме ӧй вал на. Москвае но одӥг пол гинэ ветлыны ӧз кылды. Галина но Леонид Сунцовъёс будэтӥзы кык пиналзэс. Соос пыр шумпотонэз но, кайгыронэз адӟо. Уд тоды угось сайкыт шундыё инбамын кудпалась гудыртоз, кыӵе лек зорез со ас сьӧраз ваёз. Телевизор пыр мынӥсь киноосты учкыса, Галя озьы ик шуэ: "Улон - со кино выллем, кино - улон выллем". Та верамаз анай сюлэм вань адӟемзэ, куректонзэ понэ. Но азьланезлы осконзэ уг ышты. Озьы ик мед луоз вылэм соослэн улоназы но. Адямилы малы ке-а туж бадӟым чиданлык сётэмын. Та кузпалъёслэн бордазы юрттӥсьёссы вань на - кыксылэн но анайёссы одӥг липет улын уло. Александра Ильинична но Матрена Гурьяновна быгатэмзыя векчи пудоез сюдо, гур котырын бергало, киужен выро. Туала арын гуртысь но шер пумиталод таӵе песянайёсты, соин но, вылды, шоразы паймыса но мусо потыса учконо. Леонидэн вераськыны ӧз кылды, ӵапак та нуналэ нылзэс Ижевске больницае нуллэм, вуиз ӵуказеяз ӵукна гинэ. Соку ик уж дураз, фермае дыртӥз. Озьы улэ Зямбайысь Сунцовъёслэн семьязы, аслаз сюлмаськонэныз но шумпотонэныз. Людмила МЕДВЕДЕВА. Архивысь документъёсъя 1905-тӥ ар Россиысь калык бугыръяськон мылкыдын улэ. Экономика лябӟемен, япон ожын армилэн келямез эшшо но шугомытӥз татысь югдурез. 9-тӥ январь - Вир кисьтон арня. Георгий Гапон священниклэн кивалтэмез улсын Санкт-Петербургысь ужаса улӥсьёс вамыштӥзы Зимний дворец пала. Эксэй вылэ соос урдскизы, ас правооссэс утён вылысь. Вир кисьтонын 130 мурт быремын, но газетъёс гожъямъя, та лыдпус 2 сюрсозь вуылӥз. Россилэн шор каръёсаз кылдэм югдур сярысь Ижысь но Воткинскысь рабочийёс беромыса кылӥзы. Озьы Вир кисьтон арня сярысь соос феврале гинэ тодӥзы. С.-Петербургысь рабочийёс радэ март толэзе Сарапул уездысь ужаса улӥсьёс султӥзы. Бугыръяськонэ пыриськиз ог сюрс адями. Бӧрысьгес бордазы итӥськизы студентъёс - Глазовысь нылкышно гимназиын дышетскисьёс. 1-тӥ Мае Иж заводын ужасьёс лушкем люкаськылӥзы. Демонстрацие потӥзы Глазовысь ужасьёс но. 1905-тӥ арын ноябре Сарапулысь укмысаз предприятиын ужасьёс ужзэс уретӥзы. Рабочийёслэсь кӧня ке куронъёссэс лыдэ басьтӥзы: уждунзэс будэтӥзы, ужан дырзэс 9 часозь вакчиятӥзы. 15-тӥ ноябре. Кык арня ӵоже бугыръяськизы Глазовысь почта телеграф ёзын ужасьёс. Соос итӥськизы странаысь та удысын тыршисьёс борды. 8-тӥ декабре ужзэс уретӥзы Пермь чугун сюрес вылын тыршисьёс. Соос пала дубасьтӥзы Глазовысь эшъёссы но. Ужамысь дугдӥз Ярысь чугун сюрес станция. 13-тӥ декабре бугыръясько Воткаысь, Сарапулысь, Ижысь но Глазовысь ужаса улӥсьёс. 21-тӥ декабре Вятка губерния тужгес бугрес улосъёс пӧлы пыртэмын. Мар ортчиз та аре? Февраль 16-18. Огдырлы пытсамын Вятка городысь дышетскон заведениос, татысь дышетскисьёс бугыръяськемен сэрен. Соос, "марсельезаез" кырӟаса, город кузя поръязы. Март 15. "Глазысь училищеын ёрмем дышетскисьёслы юрттонъя обществолэн" уставез юнматэмын. 22. Вотка заводысь 200 мурт келямын Владивостоке, флотэз юнматон вылысь. 29. Валтӥсь Артиллерийской управление Ижысь пыӵал лэсьтон но андан ӵыжатон заводъёсын вуриськон машинаос поттыны лэзиз. Май 10. Слобода уездысь Городищенской гуртысь музъем ужасьёс бусыысь 820 вуж уксё шедьтӥзы. 15. Мария Александровна императрицалэн юрттэмезъя, Иж заводын син висёнъёсын курадӟисьёсты нимысьтыз ыстэм адямиос эмъяло. Сентябрь 4. Сарапулын нылкышно гимназилэсь выль юртсэ вӧсяло. Октябрь 15 (2). Бугыръясько Пермь чугун сюрес вылын ужасьёс. 25 (3). Глазов уездысь Униноын усьтэмын юисьёсын нюръяськонъя огазеяськон. 15 (1). Пытсамын Вяткаысь духовной семинария. Е. Горбушина, Удмурт Республикаысь Кун архивысь валтӥсь специалист. Ветеранъёслы кузьым Кун Кенешлэн Тӧроез Александр Волков, солэн воштӥсез Наталья Харина но тазалыкез утёнъя министр Сергей Шадрин вуылӥзы Быдӟым Отечественной ожысь ветеранъёслэн госпиталязы. Госпитальлы юрттонэз кемалась ас вылазы басьтӥзы ини Кун Кенешлэн но Правительстволэн кивалтӥсьёссы. 1999-тӥ арын та эмъяськон инты рос-прос тупатъямын вал, выльдэмын отысь оборудование. Татын кыллисьёс ӟеч кылъёс гинэ верало ужасьёслы, тау каро умой сюдэмзы, утялтэмзы понна. Зэм, котькытын сямен ик татын но трос гинэ сюлэмшугъяськонъёссы: уг тырмы эмъюм, дыраз уг сёто уждун. Озьы ке но, госпитальын тыршисьёс уг ӝожтӥсько, валало: соос дорын эмъясько тужгес но гажано адямиос - ветеранъёс. Та сярысь ик вераськиз пумиськон дыръя госпитальысь валтӥсь врач Александр Быстрых. Александр Волков но соин ӵош лыктэм муртъёс ортчизы палатаостӥ, кенешизы ветеранъёсын. Тужгес но тунсыко вал Советской Союзлэн Героеныз Артемий Дмитриевич Тороповен пумиськон. Республикалэн кивалтӥсьёсызлы со тау кариз, ветеранъёслэн улэм- вылэмзы, тазалыксы сярысь сюлмаськемзы понна. Александр Волковен Наталья Харина госпитальлы кузьмазы висёнъёсты тодманъя 50 сюрс манет сылӥсь аппаратура. Нош сое басьтыны уксё висъяз "Россиысь улосъёс" фонд. Удмурт Республикаысь Кун Кенешлэн пресс-службаез. СИНТЭМЪЁСЛЭН ОГАЗЕЯСЬКОНЗЫЛЫ - 75 АР Ляб адӟисьёсты ляб адӟо Шаерысьтымы синтэмъёс но ляб адӟисьёс азьло аръёсы калыклы трос вузъёс поттылӥзы, кылсярысь, "Москвич" машиналы, "Иж" мотоцикллы куд-ог ёзъёс, мукет кулэ арбериос. 1992-тӥ арын синтэмъёслэн предприятиязы вань ужасьёс 1278 вал, соос пӧлысь 690-эз - инвалидъёс. Куашкан вакыт предприятиез зол шымыртӥз, та дырлы 485 ужась кылиз, соос пӧлысь 250-эз - синтэмъёс. Котькытын куашкан кивалтӥз бере, синтэмъёслэн огазеяськонзы сярысь копак вунэтӥзы, ярам, предприятизэс налог тыронъёслэсь мозмытӥзы. Сое выльысь улӟытон понна кивалтӥсьёс асьсэос басьтӥськизы но шедьтӥзы та вакытлы тупатон пӧртэм удысъёс. Озьы Ижысь предприятие али поттэ шиферлы кортӵог, чутӥсьёслы бодыос, сад-бакча возисьёслы опрыскивательёс, "Иж" мотоцикллы но "Ока" автомашиналы тросъёс, дӥсь куасьтон чепыльтэтъёс, шурупъёс, шторалы пластмасса кульчоос, мучоло, буяськон кисточкаос. Ужасьёс толэзяз шорлыдын 560 манет уждун басьто, нош выль удысын, куштӥськем бумага бичаса курег пуз возён кассетаос лэсьтонын, сюрс манетозь вуэ. Та берлоез удыс луонлыкъёс усьтӥз выль ужан интыос кылдытыны - куштӥськем бумага бичан, сое прессовать карон но кассета дасян. Куиньмосэз вуж книга-газет кутӥське, кылемез - картон. Татын ӟеч тыршо Петр Тимошкин, Дмитрий Мерзляков, Владимир Рябков, Вера Тарасова, Надежда Воронова но водитель Сергей Сандалов. Куштӥськем бумагаен ужаны предприятие 1996-тӥ арын нырысетӥ установка басьтӥз, нош макулатура бичан но кассетаос поттон борды басьтӥськиз миым. Ужзы ӟеч радъяськем бере, кыкетӥ машина басьтӥзы. Ар ӵоже 400 тонна макулатура бичаса, поттӥзы 2629000 кассета. Соосты вузазы Вараксино, Глазов но Ува птицефабрикаослы. Курег пуз вузасьёслы али араз 5 миллион пала кассета кулэ. Соин предприятие матысь дыре эшшо кык установка басьтыны дасяське. Али кассета лэсьтонэ толэзяз 25 тонна макулатура кутӥське ке, соку 50 тонна кулэ луоз. Кык рабочийёс нуналлы быдэ одӥг тонна бумагаез утялто езъёслэсь но мукет кулэтэм арбериослэсь. Кассета поттон удысын ӟеч тыршо формовщикъёс Александр Мясников, Григорий Красильников но мукетъёсыз. Кинлэн ӧвӧл адӟемез, кызьы лэсьтӥське бумага яке картон, учкыны туж тунсыко. Макулатура кизер суретлы пӧрме. Кассеталы тырмымон суретысь вакуумной станок вузэ кыске но пресс улын кылдытэ 30 курег пуз тэрымон гырко-гопо кот кассета. Тазэ ини, ӝажыос вылэ тырыса, куасьтӥськон цехе нуо. - Азьло электрокужымен куасьтӥськиськом вал, нош табере куастӥськонэ газэз кутӥськом, озьы ужмылэн асдуныз данаклы кулэсмиз, - валэктэ предприятилэн генеральной директорезлэн социальной ужпумъёсъя воштӥсез Юрий Хозяйкин. - Ужмы ӟечгес мынӥз ке, тросгес ужасьёсты кутэммы улоз, - шумпотэ бумага бичасьёсын кивалтӥсь Анатолий Ходырев. - Тани Якшур-Бодьяысь, спецшколаез йылпумъяса, кызь аресъем Иван Закурдаев ужтэк пуке вылэм, ми южтолэзе уж сётӥмы. Но та вакытлы синтэмъёс но ляб адӟисьёс ӝыныез но уже интыямтэ. Предприятие ас кожаз шуг-секытысь потыны тырше ик ке но, ваньзэ лэсьтыны уг вормы. Соин Удмурт Правительстволы юрттэт сётон сярысь ӟечгес сюлмаськоно ужтэмъёс, соослы юрттыны быгатысалзы куштӥськем бумага бичаса гинэ но. Быдэс машинаен нуымон люкаса луысал предприятиысь машинаез ӧтьыны яке асьсэ машинаен келяны. Азьланяз предприятилы макулатура эшшо но тросэнгес кулэ луоз на - малпало картон коробка лэсьтон борды басьтӥськыны, соосты али Набережные Челныысь вортто. Таиз малпанзы туж юрттысал республикаысьтымы вуз поттӥсьёслы но вузкарисьёслы. Ижысь синтэмъёслэн предприятизылы кылдэмез дырысен 52 ар ни, нош ачиз огазеяськон туэ апреле пусъе 75 ар тырмемзэ. Соин валче но Удмурт Правительство нимысьтыз ужпум мед пуктысал ляб адӟисьёслы тросгес ужан интыос усьтон ласянь. П.СКОБЕЛЕВ. Туспуктэмъёсыз В.Беломорскихлэн. Медаз ышы оскон Улон кырыж-мерыж луэмен, колхозысь тросэз ужасьёс но кивалтӥсьёс паймемын ини: азьланяз кызьы улоно? Кыӵе сюрес шедьтоно? Та юанъёслы валэктонъёс утчаны вырыса, вылды, Алнаш ёросысь "Прогресс" колхозэ пырись Удмурт Вишур гуртын кенеш ортчиз. Гурт бадӟым ик ӧвӧл, нош калыкез трос гинэ люкаськиз. Озьыен, адямиос осконзэс ыштӥллямтэ на, секыт югдурлэсь мозмытскон сярысь сюлмасько ик. Кенеше озьы ик лыктэмын вал колхозлэн тӧроез П.М.Серапионов, гурт кенешлэн тӧроез Л.Е.Кузнецов, валтӥсь зоотехник М.Михайлов, агроном В.Н.Лебедев но трос мукет валтӥсь удысчиос. Соос сяна, вуылӥзы на ёрос кивалтэтын ужасьёс но. Вань специалистъёс ар ӵоже ужамлы йылпумъянъёс лэсьтӥзы, асьсэлэсь малпанъёссэс веразы. Югдур ушъяськымон овӧл. Тӧролэн верамезъя, "Прогресс" колхоз ёросын котькуд удысъя витетӥ-куатетӥ гинэ луэ. Нош кемалась ик ӧвӧл котьку нырысетӥ луылӥз. Мур малпаськонэ уськытэ пудо вордон. Туймыйыл бригадаын тросэз скалъёс лейкозэн курадӟо. Берло дыре шараяськиз на паратуберкулёз. Таиз висён чырс сиёнэн сюдэмен йырин вӧлме. Зэм, зоотехник оскытэ: паратуберкулёз дугдытэмын луоз - фермаысь кивалтӥсьёс но пудоез эмъясьёс со бордын тыршо. Бусы ужъёсын ушъяськыны луэ. Туэ гектарысьтыз 18,1 центнер ю тысь кутсаны кылдӥз. Зэм, та ю но ваньмыз сямен кошке пудолы, люкиське ужась калыклы, бартерлы яра. Вузаны кӧня ке гинэ на кыле. Кенешлэн валтӥсь мугез нош тани кыӵе вал. - Эшъёс, тазьы улыны уг луы ни. Мукет сюрес утчано, пӧртэмгес амалъёсты уже пыӵатыны кутсконо, - тазьы мытӥз вераськонзэ Вишурысь бригадир Ф.А.Кириллов. - Ойдолэ барыш поттыса ужаны турттом. Та амаллы тросэз дурбасьтӥзы. Зэм, пӧлазы вал ик палэнтыны турттӥсез. Барыш поттыса ужанлы оскон пыӵатыны турттыса вераськиз ожысь но ужысь ветеран, колхозлэн азьвыл председателез Иосиф Ефимович Семенов но. "Москваысь возьмаса улоно ӧвӧл - со асьмелы номыр но сётыны уз быгаты. Соин ик асьтэлы турттоно луоз", - шуиз со. Зэм но, та уж капчи уз луы. Нырысь ик дисциплинаез тупатоно. Туала калык уго улонмы сямен ик воштӥськемын. Уждун сётъямтэен, адями лушкаськыса улыны дышемын. Нош воргоронъёс юон пӧлы выемын. Кытысь быгато - фермаысь-а, вал гидысь-а, складысь-а - фуражез, ю тысез юон вылэ вузало. Тӥни таӵе югдур тужгес но сюлмаськытэ кивалтӥсьёсты. Ужась калык бен ачиз но тодэ, тазьы улыны йӧныз ӧвӧл ни шуыса. Соин ик паймемзы бере хозрасчётэ но валаса но валатэк вамыштӥзы кадь Вишур бригадаысь ужасьёс. Быгатозы-а соос асьсэды кутыны, азьвыл дыръёсы сямен, кенешыса улыны но ужаны? И.Е.Семеновлэн но гуртоослэн верамзыя, та бригадалэн луонлыкъёсыз вань ик. Бусыоссы паськытэсь, пудо вордон но татын, шоргуртын сярысь, трослы ӟечгес азинске. Озьы бере, вань оскон - калыклы. Зэм, таӵе амалэн улыны быгатозы сюлмо ужасьёс гинэ. Лушкаськисьёсын но юисьёсын нюръяськон вылысь, юн ужрадъёс кутэмын луозы шуыса ялэмын вал. Та уж пӧрмысал ке, туж ӟеч луысал. Медаз кысы вал оскон кылдытӥсь кизилилэн югытэз. Светлана Никитина, Удмурт кун университетын журналистэ дышетскись. БЫДӞЫМ ВОРМОНЛЫ 55 АР Нылкышно ветеранъёслэн азьветлӥсьсы Ожысь но ужысь ветеран Мария Семеновна Каргашина (ныл дыръяз Маша Кривилева) вордскемын 1923-тӥ арын 22 июле Алабго (Елабуга) ёросысь Гари гуртын. Анай-атаез Можга ёросысь Почешур гуртэ улыны выжизы. Нылзылэсь эмъясь луэмзэ адӟемзы потэ вылэм. Нылаш сизьым класс бере мынӥз Можга городэ, одӥг арзэ дышетскиз ни вал фельдшеръёсты дасясь школаын. Ӧз кельшы отын, куриськиз педучилищее. Кутӥзы кыкетӥ курсаз. Аслэсьтыз интызэ таяз учыре шедьтӥз. Быдэстӥз сое ӵапак война кутскон азьын. Дышетӥсь луыса ужаны луонлык басьтӥллям соку 54 пи но 58 ныл, тодмо ни вал кытчы мынонзы но. Ортчиз дышетсконзэс йылпумъянлы сӥзем балзы, нош ӵуказеяз война кутскиз. Егитъёслэсь вань малпанъёссэс, осконъёссэс со куспетӥ кариз, мукет пала берыктӥз. Данакез фронтэ куриськизы - кин со аре ик, кин бӧрысьгес Родинамес утисьёс радэ султӥзы. Тросэз выпускникъёс Можга педучилищелэн историяз вунонтэм пытьы кельтӥзы. "Кыкетӥ атай юртсэс" ӟеч ужъёсынызы но подвигъёсынызы данъязы. Та училище сярысь "Стало домом родным" книга но кылдытэмын. Маша Кривилева дышетскиз республикаямы тодмо луэм ожгарчиосын - Василий Никитинэн, Василий Михайловен, Василий Беляевен ӵош. Соос пӧлысь кыкез луизы тодмо журналистъёс, куинетӥез - военной лётчик. Ожгарчиос радэ султӥзы куд-огез нылъёс но, кылсярысь, Ираида Блинова, фронтын разведкая дивизионэ шедем. Педучилищелэсь историзэ кылдытӥсьёс таослэсь нимъёссэс книгаязы но пыртӥллям, данъясь кылъёс вераллям. Нош Мария Кривилевалэн нимыз отчы малы ке шедьымтэ, оло нош вуныса кылем. Егит дышетӥсь ыстэмын вал Грах ёросысь Мамаево школае, одӥг арзэ отчын покчиосты визьнодаса вуттӥз ик. Собере со но солдатъёс радэ султӥз. Военкоматын ужасьёс, нылашлэсь эмъясе дышетскыны кутскылэмзэ тодыса, сое но сӧсырмемъёсты эмъяны ыстыны малпало вылэм. Нош Маша фронтэ мынон азяз дышетскиз связистъёслэн курсазы - отын туж ӝог, кык толэзьскын, уйёсты но туж ичи кӧласа дасязы радисткаосты но телефонисткаосты. ...1942-тӥ ар сӥзьыл. Старая Русса город палтӥ вамышъяло 717-тӥ стрелковой полкысь связья роталэн солдатъёсыз. Соос пӧлысь 19 аресъем Мария Кривилева фронтэ соку гинэ вуэмын. Боецъёс передовой дорозь кыдёкынгес на шуыса чаклало вал. Тани малпамтэ шорысь омырын шуласа лобиз но кужмо пуштӥз тушмон снаряд, со бӧрсьы пуштылӥзы кыкетӥез, куинетӥез: немецъёс шӧдӥзы полклэсь соос пала матэ вуэмзэ. Озьы кутскиз Обжино черкогурт котырын секыт ожмаськон. Со трос уй-нунал ӵоже кыстӥськиз. Егит телефонисткалэн ож тылӝу пыр ортчон сюресэз татысен кутскиз. - Секыт та ож сярысь тодэ вайылыны, - вера Мария Семеновна. - Асьмелэнъёс туж ӧжытэз улэп кылизы. Обжино дорын кадь секыт ожмаськонъёс сярысь война дыръя газетъёсын туж ӧжыт гожъяллязы. Ивортылӥзы подвигъёс сярысь, нош вир кисьтэм сярысь кык-куинь кылын гинэ вераллязы. Али азьвыл связистка 1942-тӥ арын сӥзьыл ортчем ожъёс сярысь тросгес тодыны быгатэ ини книгаосъя. 170-тӥ стрелковой дивизиезлэн ортчем сюресэз сярысь пыр-поч гожъямын Пермь издательствоын поттэм "Боевые спутники мои" книгаын, сое гожтэм дивизилэн командирез. Соку та ожын 717-тӥ полк туж трос калыксэ ыштӥз. Стрелковой батальонъёс котыртэме сюрыса жугиськизы. Связья ротаын тросэз бырыны шедизы яке сӧсырмизы. Но полклэн подразделениосыз кусыпъёссэс ӧз ыштэлэ. Связистъёс, вис карытэк, кадь телефон езэз герӟаны тыршыса бызьылӥзы. Ожмаськон дыръя шуге-леке вуон вакытэ чырткем бызьылӥз но нюжтӥськылӥз Мария но, чигем езэз ӝог герӟаны быгатылӥз. Соку солы полклэн командованиезлэсь нырысьсэ тау карон кылъёс веразы (благодарность ялӥзы). Мария Каргашина аслаз ожмаськемез сярысь трос мадьыны уг яраты. Уногес вералоз эшъёсыз-связистъёс сярысь. Кылсярысь, И.К.Громыко телефонистлэн кыкез но пыдъёсыз сӧсырмизы. Озьы но, вӧсь луэмзэ вормыны турттыса, чигем езэз пиньыныз куртчиз, 200 метр пала нюжтӥськыса ортчиз но чигем интыез шедьтӥз, телефонэн вераськон линиез герӟаз но, бӧрысь йырсазьзэ ыштӥз. Собере Маша гажаз артэ ротаысь эшсэ Нина Дулинаез. Ужзэ туж ӟеч тодыса быдэсъяз, пе. Соку Ниналы куинетӥ степенё Слава орден сётӥллям.. Озьыен, нылкышно-боецлэн ож сюресэз кутскиз Старая Русса дорын. Нош йылпумъяськиз Восточной Пруссиын, Балтика зарезь дурын. Быгатыса но сэзь ожмаськемзэ возьмато "За отвагу", "За боевые заслуги" медальёсыз, кыкетӥ степенё Отечественной война орденэз. Ортчемез сярысь тодэ вайылыкуз, Мария Семеновналэн ымныраз ӝожомем кисыриос но кылдыло, нош синъёсыз лякыт но сайкыт учко. Аслаз связисткалэн ожмаськон лудын чупрес ужамез сярысь верало фронтын кылдэм документъёслэн копиоссы. Туж кемалась ӧвӧл соосты асьме шаерысь следопытъёс ваизы, Подолськысь военной архивысь шедьтыса. Со документъёс калыклы возьматэмын Можга городысь музейын. Тани характеристика, со улэ гожтӥськем 717-тӥ полклэн командирез Резинкин 1944-тӥ арын 30-тӥ апреле. Отын гожтэмын: "Телефонистка ефрейтор Кривилева М.С. ожмаськон нуналъёсы, 1944-тӥ арын 19-тӥ февральысен 29-тӥ февралёзь, тушмон артиллерия но минометъёс вистэм-вожтэм ыбылон дыръя, связьлэсь сӧриськем интызэ кызь пол тупатъяны но герӟаны быгатӥз". Озьы верамын связисткалэн Гомель областьысь одӥг интыын ожмаськемез сярысь. Музейын вань на мукетыз но документ. Полклэн командирезлэн 1944-тӥ арын поттэм 12 номеро приказаз косэмын телефонисткаез наградить карыны. Со связья линиысь чигем интыосты туж ӝог тупатъяны быгатэм, Сож шур вамен ожмаськыса потыкузы. Али вераны гинэ капчи: "связистъёс шур вамен ожмаськыса потӥзы". Тушмонлэн вис карытэк ыбылэмез улсын, сопал ярдуре выжыку, полклэн подразделениосыныз умой кусып возьыны туж секыт йӧтэ вылэм. Кривилева ефрейторлы аслаз ротаеныз ӵош трос пӧртэм шуръёс вамен выжыны кылдӥз. Бадӟымъёсыз таӵеесь: Днепр, Березина, Сож, Друти. Нош Восточной Пруссиын ожмаськизы Фриш-Гаф заливлэн ярдураз. Вуиз кема возьмам Вормон нунал, йылпумъяськиз война. Табере Мария Кривилевалэн нырысетӥ малпанэз вал - тодон-валанъёссэ будэтон, вылӥ образование басьтон. Пал пыдыныз вамыштӥз ни вал Удмурт пединститутэ, дышетон сярысь малпанэз ноку но ӧз кысылы. Нош улонэз мукет сяменгес ӧръяськиз. Ижысен пумитаз со сямен ик быдӟым ожмаськонысь бертэм Анатолий Каргашинэз. Со комсомолын ужа ни вал, сое быдэс республикаысь егитъёс тодылӥзы. Дышетскемез таизлэн но шоро-куспо гинэ. Кылдӥз шудо семья, шедиз улон сэрег но, сюлэмъёссылы кельшись уж но, кыкназылэн но азьланьын дышетскемзы потэ. Нош ваньзэ ӵош лэсьтыны уг луы вылэм. Анатолий яратоно кузпалзэ оскытыны быгатӥз: вылӥ образование басьтыны нырысь ик солы, пе, кулэ, собере ини черод вуоз Мариялы но. Ачиз комсомолецъёслэн азьветлӥсьсы огдыре заочно кык интыын дышетскиз - пединститутысь историяя факультетын но вылӥ партшколаын. Куд-ог предметъёс одӥг кадесь вал бере, дышетсконзэ кыксэ но вормиз. Со аръёсы егит кышномурт Мария Семеновна Каргашина ужаз 47 номеро школаын, покчиосты визьнодаз- дышетӥз. собере аслаз но нылпиосыз вордскизы. Нылпиос сярысь сюлмаськон вань ужатозяз нырысетӥ интыын луиз. Партилэн Удмурт обкомез Каргашинъёслэсь семьязэс ужаны Нылга черкогуртэ ыстӥз. Отчы куинь арлы шуыса мынӥзы вал, нош тыршизы 17 ар ӵоже. Дышетӥсь М.С.Каргашина аслэсьтыз быгатонлыкъёссэ арысь аре будэтӥз, гурт калык пӧлын ялан тыршыса ужаменыз, калыкез дышетонысь отличник луиз. Дышетон ужзэ азьланьтӥз, Ижевске берытскемзы бере. Эшшо сомындагес ик ужаз городысь школаосын но. Та удысын стажез 32 арлэсь ортчиз. Гуртын но, городын но быгатыса тыршемзэ, калык пӧлын сюлмо валэктон уж нуэмзэ синйылтытэк ӧз кельтылэ. Соин ик солэн гуртысьтыз архиваз трос люкаськемын 60-тӥ-70- тӥ аръёсы тыршыса ужамзэ возьматӥсь Данъян грамотаосыз. Кытысь гинэ ӧвӧл соос. Тани вералом куд-огзэ. 1960-тӥ-1961-тӥ аръёсы - калык пӧлын валэктон уж нуэмез понна; 1963-тӥ арын профсоюзын азинлыко ужез пусъемын РСФСР-ысь калыкез дышетонъя министерстволэн но та удысысь профсоюзлэн комитетэзлэн Данъян грамотаенызы. 1965-тӥ арын тыршыса ужамзэ данъя УАССР-ысь Калыкез дышетонъя министерство. Дас ар ортчыса, 1975-тӥ арын 9-тӥ мае, Данъян грамота улэ гожтӥське УАССР-ысь калыкез дышетонъя министр И.П.Тукаев. Мария Семеновна тросэзлэн визьнодам нылпиослэн сюлэмъёсазы но йырвизьмазы кылиз, луоз, "нырысетӥ дышетӥсе" нимын. Нош нырысетӥез дышетӥсь сюлэмъёсы ӟеч мылкыд но малпанъёс, усто сямъёс пыӵатыны быгатӥз ке, трос аръёс ортчыса но уз вуны, солэн югдытэм тылсиосыз пыраклы кылё. Сыӵе вылэм покчиосты визьнодась М.С.Каргашина. Собере со усто дышетскисьёссэ ачиз но вунэтыны уг быгаты. Сыӵе улэ, кылсярысь, журналистъёс пӧлысь Евгений Ламбин, "Удмуртская правда" газетлэн редакторезлэн воштӥсез. Пенсие потэмез бере усто дышетӥсьлэн Мария Семеновна Каргашиналэн обществолы пайда ваись ужъёсыз выль ӧретӥ кошкизы. Со табере, удмурт дышетӥсь-патриот луэмзэ возьматыса, калык пӧлын ужа. Сое адӟылод ожысь ветеранъёслэн пӧртэм ужрадъёсысьтызы. Калыкен кенешылыны ӟуч кылын но, удмурт кылын но усто быгатэ. Кӧня ке арзэ валтӥз Индустриальной ёросысь ожысь ветеранъёсты, соослэн комитетазы тӧролэн воштӥсез вал. Табере - ожысь ветеранъёслэн республикая комитетазы нылкышноос-фронтовикъёс пӧлын ужанъя комиссиен кивалтэ. Азьло ожгарчилэн малпанъёсыз таӵеесь: "Ортчем война сярысь ваньзэ тодыны кулэ. Тодоно, макем секыт, мертаны луонтэм секыт вал вань калыкмылы берлань чигнан нуналъёсы, собере макем бадӟым шуд луыса лыктӥз милемлы но ваньмызлы Быдӟым Вормон. Кӧня ыштонъёс адӟим асьмеос, кӧня ваньбурмес, улон юртъермес быдтӥз тушмон, улэп кылемъёслэн сюлэмъёсазы но, музъемлэн мугор вылаз но сӧсыр интыос кельтыса". Ветеранъёслэн движениязы мылысь-кыдысь пыриськемез пусъемын озьы ик пӧртэм Данъян грамотаосын. 1984-тӥ-1988-тӥ аръёсы Ижысь механической институтын гражданской оборона удысын ужакуз данъязы ветеранъёс но институтысь егитъёс пӧлын тыршыса ужамзэ. Быдӟым Вормонлы 50 ар тырмон азьын басьтӥз Ижысь ветеранъёслэн советсылэсь, Б.Аминовлэсь ӟечкыланзэ. 1996-тӥ арын солы Данъян грамота ыстӥз ветеранъёслэн Всероссийской советсылэн президиумез... Нош ожысь ветеранъёслэн республикаысь комитетазы соос ужало Можга педучилищеын одӥг группаын дышетскем эшеныз В.Н.Никитинэн ӵош. Василий Никитин - комитетлэн тӧроезлэн воштӥсез. Мӧйы активистъёс кыкназы сюлмасько, оже ветлэмъёс пӧлысь нокин но вунэтэмын медаз луы, егитъёс - туалаос соосты тодыны мед тыршозы шуыса. Тани туэ но мон синйылтылӥ ини "Известия Удмуртской Республики" газетысь "Быдӟым Вормонлы 55 ар" рубрика улысь куд-ог корреспонденциосты - ож сюресъёс сярысь тодэ ваёнъёсты. Соосты редакцие вуттӥз ветеранъёс пӧлын ужась активист Мария Каргашина. Нош та ветеранлэн аслаз ож сюресъёсыз сярысь трос-а меда тодӥсьёсыз? Ӧйтӧд, созэ вераны шуг. Анай-атайзылэсь сюрессэс азинтыса вамышъяло Каргашинъёслэн нылпиоссы но. Бадӟымез нылзы Ольга Сунцова - химияя но биологияя дышетӥсь, али Завьял ёросысь Первомайский школалэн директорез. Со школаын ик ужа Ольга внучкаез но, анаез сямен ик, удмурт университетын дышетскыса, химик луиз. Денис внуксы УдГУ-ысь историяя факультетын дышетске. Пизы Владимир Каргашин "Буммаш" заводын инженер. Солэн но нылыз Удмурт университетын заочно дышетске. Мария Семеновналы ӝоген тырмоз ни 77 арес. Солэн верамезъя, фронтовичкалэн сюлмыз азьло кадь ик кужмо но огсыр уг жугиськы ни. Озьы ке но, мылкыдыз азьло кадь ик сэзь. Сӥзём солы кема но тазалыко, шудо-буро улон, сюлэм шунытэз ялан мед пыӵалоз аслаз калыкезлы, вань нылпиосызлы, нош югытэз мед пиштоз котькинлы. Леонид ФЕДОРОВ. Туспуктэм вылын М.С.Каргашина. Ньыльдон уй ортчиз ни тодмо кылбурчи Анатолий Петров улонысь дырызлэсь вазь кошкем дырысен. Огшоры ӧй вал та адями. Зэм, улонлэн яркыт шундыез со понна туж шер воректылӥз. Озьы ке но, Анатолий Андреевич чидаз, улӥз... Луло дыръяз данакез чуръёсыз печатласькытэк кылизы. Куд-огеныз туннэ тодматӥськомы. Уж ӧз куасьты Секыт сютэм аръёс но война вакыт тупаз мынам песянаелэн улон сюресаз. Со - Алнаш ёросысь Кибья гуртын будэм но быдэс улонзэ улэм кышномурт Дарья Алексеевна Беспалова. Пичи дырысеныз пересьмытозяз ужаз-тыршиз со. Анайзы ялан висьылэм, операция вылысь операция лэсьтылӥллям, соин ик со интые песянайме пичи мае ке колхозын ужаны косылӥллям. - Семьяысьтымы ньыль нылъёс пӧлысь бадӟымез вал бере, доре бертыса, ужпӧрез но мыным ик лэсьтоно луылӥз, - вера песянае. - Нош пичи сузэръёсы, куанеръёс, лумбыт сютэм улӥзы - сиён пӧзьтыны уг быгато но. Туж дышетскеме потэ вал - математика яралляз, но витетӥ классэ но быдэс ветлыны ӧз кылды ни. Дас ньыль аресме Ӵушъялын (со Иж сьӧрын) ортчытӥ. 1944-тӥ арын вал со. Война дыръя ми кадь пиналъёсты но нюлэс кораны ысъяллязы уго. Вал сьӧры пыдын мынылӥм, толэзь пала ужаса нош бертылӥм. Кӧня ветлӥ, Ӵушъялысь кадь ӝужыт кызъёсты нокытысь ӧй адӟылы. 1949-тӥ арозь озьы отын-татын ужатӥзы. Со понна ноку уг вунэты Вормон нуналэз. Соку МТС-лы пу кораськомы вал. Шумпотон сяна, эшшо одӥг адӟон ваиз мыным со нунал - ӧжыт кулытэк кыли. Соку Мавра кышноен кыз погыръям. Кык кызъёс артэ будо, кыксэ но пусъемын. Кызьы погыртоно? Одӥгзэ туж шуген погыртӥм ик. Мукетызлэн йылыз куасалскемын. Коралтӥм но - жур-р! гурезь улэ васькыны ӧдъяз. Ми бызьыса палэнскиськом ни вал, но кызьы ке кыз дӥнь монэ шуккыса, улаз пачкатэм. "Поттэ, поттэ!" шуыса черетскиськем но, собере йырсазьме ыштӥськем. Кема улӟытыны выриллям. Ачим маке тодӥсько на кадь: кулэм, шуо. Врачъёс соку нокыӵе висёнме ӧз шедьтэ. Тодӥсь адямиос пудо эмъюм лэзьязы - йӧнай ведь. Только сюрлые весь туж висе. Атае войнаысь ӧз берытскы. Разведчик вылэм, Ленинград нюлэскын бырем. Соин ик сокем шумпотонэз но ӧй вала. Эх, шудо но шудтэм нунал! Но война бере но ай улон капчи ӧй вал - сиёнлы туж ёрмылӥм. Бызи 50-тӥ арын. Туэ гужем тани зарни сюанмес пусйысалмы ни, кулӥз Семонэ. Эн кулы ай, кузпалъяськыкумы но сюанэз ӧм адӟе, шуисько. Ӧз кылзы. Со мынам визьмо вал - счетоводын ужаз. Куать нылпи будэтӥм. Ӧйтӧд, кыӵе калыклы пото, но мон данъяськисько - ваньзы визьмоесь но чебересь: пӧлазы эмчиез но, ужбергатӥсез но, дышетӥсез но, вузкарисез но вань. Али асьсэлэн нылпиоссы бадӟымесь ни, туж ӟеч дышетско. Быдэс улонзэ ужаса, чидаса улэмын мусо песянае. Но озьы но уг ӝожтӥськы. Луысал ке, али но куаж-куаж ужасал на, шуэ. Л. Орехова, Удмурт кун университетын дышетскись. Чаклалэ бюрократлэсь тодметъёссэ Бюрократъёсын котьку но нюръяськылӥзы, но вормыны ӧз на удалтылы. Малы бен со сокем зол улонэн артэ вамышъя? Та ужпумез тужгес но валаны кулэ егит государствоослы - кивалтон пирамидаез дыртыса кылдытыку бюрократъёслы пушйыны амалтэк сюрес усьтӥське. Бюрократлэн ас тодметъёсыз вань: улэ нокыӵе принципъёстэк, ужез яратытэк, визьмыз сокем ик вылӥын ӧвӧл ке но туж зол шӧдэ ассэ сюлмаське ассэ вылӥе "тубытон" сярысь, вожъяське визьмо адямиослы, кыстӥське вузаськись-кузьмаськись но лек сямо адямиос борды. Со туж кышка витьымтэ шорысь учыръёслэсь, соос уго карьераезлы пум поныны быгато. Бюрократъёсын ачиз калык ӧз кен нюръяськы, государство трос ыштонъёс адӟоз. Кытысь бен потэ бюрократия шуон? Вань-а солэн выжыосыз? Яке котькуд обществолэн мынон сюресаз со одно ик пумиськыны кулэ? Озьы но, тазьы но, дыр. Обществолэн но бадӟым янгышез вань кивалтонэз укыр паськытатэмез понна. Собре та шеклэсь тодметъёссэ со ачиз ик чакламысь дугдэ. Нош бюрократия со куспын, тусбуйёссэ ялан вошъяса, кыда, нюръяськыны кужым люка. Но котьма ке но, бюрократилэсь азинскемзэ общетвомылэн янгышъёсыныз гинэ ӧвӧл герӟано, татын быдӟым инты басьтэ солэн выжыосыз. Мукет сямен вераса, кыӵе луэ адямилэн пуштросэз. Зэмзэ ик, кинэ золгес кышкатэ, шуом, кыӵе кивалтонлэн куашкамез яке дырызлэсь вазь ужамысь дугдытэмез? Сое, кин аслаз карьераез сярысь сюлмаськыса улӥз, тыро-пыдо ужаны юнме кужымзэ ӧз быдтылы. Нош ӟеч, визьмо ужасез со учыр уз кышкаты - со угось аслыз котькытын уж шедьтоз, котькытын ассэ возьматыны быгатоз. Нош бюрократ-карьерист - уз. Соин ик кивалтон удысэ ӵектыны тыршо но вылэм зэмос, быгатӥсь но визьмо ужасьёсты. Бюрократъёс нокыӵе государствоослы но пайда уг ваё. Демократия вань ке вань ини, трос партиос кылдытӥм ке кылдытӥм ини, нош кивалтон ужез зэмос профессионалъёслы сётоно вылэм. Соку гинэ асьмеос шуг-секытъёстэк азьлань мынын быгатомы. О.Гусев Чечняе кузьым Нырысетӥ май но Вормон нунал азьын Удмурт Республикаысь Югдурез утёнъя министерство шаерысьтымы иворъёсты вӧлмытонъя ёзъёсын ӵош "Тулыс посылка" ужрад ортчыто. Озьы МВД-ысь 200 адямилы Чечняе кузьымъёс келяны кенешемын. Асьмелэн пиосмы али ужзэс нуо Чечен Республикаысь Знаменский, Катыр-Юрт но Чири-Юрт посёлокъёсын. Туэ апрельлэн пумаз Чечняе люкам кузьымъёсын кошкоз Удмуртиысь МВД-лэн колоннаез. Отчы мынозы журналистъёс но. Кинлэн мылкыдыз вань Чечняе кузьым келяны, ивортӥськом Югдурез утёнъя министерстволэн ёзъёсызлэсь телефонъёссэс: - ОМОН - 20-17-00, 20-25-23. - милицилэн патрульно-постовой службаезлэн полкез - 21-94-00. - Дзержинский нимо культура юрт - 55-74-32. Озьы ик жингыртыны луоз ёросъёсысь милицилэн отделъёсаз 02 телефонъя. Малпанзэ вера лыдӟись Бай-а меда уломы ни? "Удмурт дуннеысь" лыдӟи Константин Заботинлэн гожтэтэзлы А. Андрияновлэсь валэктонъёссэ. Со пумысен аслэсьтым мылкыдме вераме потӥз. Удмурт газетын "Сюлэмез вандӥсь гожтэт" печатламын вал 18-тӥ феврале. К. Заботинлэн вераменыз мон быдэсак соглаш: вуоно улонмы капиталистъёс киын луоз. Кузёяськозы промышленникъёс, банкиръёс, вузчиос но мукет байёс. Кин юрттӥз 1991-тӥ арын демократъёслы властез киултыны? Асьсэос, бырйисьёс нырысетӥ тураз ик куать мурт пӧлысь Ельцинэз Президентэ бырйизы. Малы 1993-тӥ арын 25-тӥ апреле референдум дыръя калык пумит ӧз султы демократъёслэн выльдӥськонъёссылы? Кытын вал ужась калык та арын ик, Октябрь нуналъёсы, Ельцинлэн банкъёсыз Госдумалэсь дептатъёссэ ыбылыку? 1996-тӥ арын кипыдэс вылын кадь адӟиське вал ни демократъёслэн "ӟечсы". Озьы ке но, нош ик Ельцинлы куараосмес сётӥм. Миым Кун Кенеше но Кун Думае быръёнъёс дыръя нош ик данакез капитализме нуись сюрес пала султӥз. Демократъёс Россиез дуннеын 102-тӥ интые вуттӥзы ни. Нош куке но соку СССР кыкетӥ интыын вал. Россилы Президентэз быръён дыръя но зэмлык ӧз вормы. Куд-ог кандидатъёс экран вылысь чик ӧз кошкылэ. Мукетъёссэ туж шер гинэ возьматъязы. Зюгановлэсь ваньбурзэ акыльтымон адӟытӥзы. Путинлэн ваньмыз умой гинэ, шуизы. Огполаз Путин шуэ: "Ваньбурез нокыӵе люкон уз луы". Мукет ласянь вера, гурт музъемез вузан-басьтон пумысен референдум ортчытоно шуыса. Сыӵе референдумлэсь мон али ик кышкасько ни. Тросэз бырйисьёс, нош ик малпаськытэк, куаразэс сётозы. Гыроно-кизёно музъемез нимаз кузёослы вузано шуизы ке, озьы ик лэсьтозы. Угось музъем вылын зэмос ужасез 24 процент гинэ. Нош 76 процентэз россиянъёс городъёсын улэ, гурт хозяйство сярысь сад-бакчаоссыя гинэ тодо. Выль Президентлэн командаезлы референдум но, Музъем кодекс но кулэ уз луэ. Со понна Думаын куара сётон гинэ кылиз на. Музъемлы законъёс узыръёс понна тупатэмын луозы. В. Путин Краснодарысен гурт удысын тыршисьёслэн кенешазы ялӥз: гурт хозяйство секыт югдуре сюремын ӧвӧл на. Оло, солы озьы потӥз, азьмынӥсь хозяйствоосы ветлыса? Соин, дыр, Россиын 30 миллион гектар музъемъёсты уг утялто. Удмуртиын 100 сюрс гектарлэсь тросэз аналтэмын. Гурт техникалэн 80-90 процентэзлэн ужан дырыз ортчемын ни. Удобрение тырмыт тырытэк, сюдӥсь-вордӥсь музъеммы ӧжыт но ӧжыт урожайзэс сётэ. Хозяйствоос 90 процентэз банкрот калэ вуэмын ни. Путин ӵем вералля законъёслэн диктатуразы сярысь. Но со нырысь ик ачиз законъёсты тӥя. Кун Думае быръён азьын "Единство" движение понна дурбасьтэмзэ вераз. Кивалтӥсьёслы таӵе ялонъёс лэсьтыны Законъя лэземын ӧвӧл. Озьы бере, малпан кылдэ, капитализм законъёслэн диктатуразы луоз шуыса. Кыӵе правоосъя сомында льготаос кузьмамын Ельцинлы? Совето Союзэз куашкатэмез понна-а? Капитализмез улӟытэмез но уно-уно адямиосты сютэм, куанер кельтэмез понна- а? Одӥг странаын но азьвыл президентъёссылы сыӵе льготаос сётэмын ӧвӧл. Германилэн азьвыл канцлерез Гельмут Коль араз 20 сюрс марка басьтэ. Отысь электрокужымлы, коркаезлы но мукет вытъёсты ачиз тыре. Кунлэсь коньдонзэ таркамез понна, Кольлэсь партизэ тыриськыны косӥзы. Нош Ельцинэз суд улэ но кыскыны уг луы. Россиын паськыт вӧлмемын кузьмаськон. Огшоры калыкысь потэм йыртэмасьёс одно ик закон улэ сюро но кыл куто. Нош Кремле нуись сюресъёс пытсамын. ФСБ-ын, МВД-ын Генеральной прокуратураын - котькытын асьсэлэн адямиоссы пуктэмын. Табере нош ик одӥгзэ капиталистэз, Россилэсь миллионъёсын долларъёссэ "миськем" муртэз - Анатолий Чубайсэз - Правительствое пыртыны туртто. Оло, Премьер-министр но карозы на. Али со кивалтэ РАО ЕЭС-эн. Дуннеын табыдӟа огазеяськонъёс ӧвӧл ни. Монополист киын вань энерго кужым возиське. Солэн кивалтэмезъя, кӧня меда гурт хозяйствоос ыштон адӟизы ни? Россилы Президентэ быръён дыръя мӧйы муртъёс Зюгановлы куаразэс сётӥзы. Нош егитъёсыз - Путин понна. Паймонэз ӧвӧл. Трос аръёс ӵоже ни ивор вӧлмытӥсьёс коммунистъёсты урод ласянь гинэ возьмато. Нош арлыдоос солы уг оско, улонэз асьсэос ӵошатыны быгато ни. Жаляса верано, таизэ ожмаськонэз калык ӧз вормы. Аслыз ачиз пыдзэ пуктӥз. Али сяськазэ гинэ адӟиськом ай, нош емышсэ ар-кык ортчыса веръялом. С. Воронцов, Алнаш ёросысь Асан совхоз-техникумысь ужысь ветеран. Журналистъёсын пумиськонъёс Ужбергатӥсьёслы юрттэт Та нуналъёсы Ижевске вуылӥз пичи ужбергатонлы юрттонъя Калык куспо консультационной центрлэн кивалтӥсез Анатолий Поткин. Центр интыяськемын Екатеринбургын, ужа США-ын дасям программая. Кызьы шуиз господин Поткин, соос ужаны кутскизы 1997-тӥ арын, Америкаысь СДС огазеяськон кичӧлтэмъя, Россиысь шор но пичи ужбергатонэз ӟечгес радъян понна. Нош та огазеяськон США-ын кылдытэмын вал 1990-тӥ арын Джордж Бушен, Восточной Европаын но СССР-лэн азьвыл музъемъёсыз вылын рынок амалэн потонэз ӝогомытон вылысь. Америкаысь ваем программалэн 80-лэсь ятыр поектъёсыз умой выжыяськизы Москваын, Санкт-Петербургын, Екатеринбургын, Ростовын, Самараын, Нижний Новгородын но Тверьын. Таос радэ пыртыны чакламын Ижевск но. Кылдытэмын пичи ужбергатонлы юрттонъя консультационной центр, солы кивалтӥсе юнматэмын Ольга Терентьева. Кызьы юрттоз СДС Удмуртилы? Нырысь ик, со пыр бизнесэн вырисьёс дун тырытэк пыр- поч валэктонъёс басьтозы ас быръем сюрессыя. Кыкетӥез, консультационной центр дасялоз вылӥ ӟечлыко экспортъёсты- профессионалъёсты. Соос ужалозы США-ын, Англиын но куд-ог мукет странаосын дасям проектъёсты асьме дорын пыӵатон бордын. Анатолий Поткин верамъя, туала тодмо компаниослэн кивалтӥсьёссы пӧлысь тросэз ортчизы но тодон-валан люказы ӵапак СДС-лэн инъетэз пыр. Консультационной центр юрттэмен, ӝог пыд вылаз султӥз Екатеринбургысь "Калинка" предприятие (азьвыл "Уральские самоцветы" фабрика). Солэн парфюмерияя продукциез рынокын ас интызэ шедьтӥз ни, пумен азьпалтэ кунгож сьӧрысь вуттэм продукциез. Огъя вераса, Международной консультационной центр Россиез дышетоз коньдон поттыса ужаны: Вузкарон-а со, эмъяськон-а, дышетскон-а яке шутэтскон-а. Озьы улэ Америка. Нош дась-а солы Удмуртия но куд-ог мукет улосвылъёс, отысь калык 90 процентэз ёрмисьёс радэ шедемын ке ни? Та юанлы Анатолий Поткин валэктон сётыны шугъяськиз, малы ке шуоно, зэмен но, куанер муртлэсь трос уд басьты. Но СДС азинскоз, солэсь программазэ улонэ пыӵатон понна трос коньдон кисьтэмын. Кин тодэ, оло Россия но куке соку Америкаез сутылыса кельтоз ай. Чебер малпанъёслэсь куштӥськыны уг яра. Л. МЕДВЕДЕВА. Со мыноз Вормон парадэ Асьмеос Быдӟым ож ортчем дырысен ӝыны даурлэсь кема улӥськом ини. Соин ик ноку вунэтыны кулэ ӧвӧл отын ожмаськемъёсты. Ведь та войнае соку пыриськиз вань ужась калык. Мон мадё В. Ф. Мерзляков сярысь. Со вордскиз Сарапул ёросысь Становка гуртын крестьян семьяын 1925-тӥ арын пӧсьтолэзе. Кык ар ортчыса, солэн анай-атаез выжизы Пичи Пурга ёросысь Чекашево гуртэ. Татын Володя дышетскеменыз ӵош ужаны вуиз на паськыт колхоз бусыын. Колхозникъёсын ӵош гыриз но усыяз. Война кутскыку, солэн анаез Евдокия Ефимовна кулӥз. Атаезлы вить нылпиосты будэтыны капчи ӧй вал. Соин ик бадӟымез Володя пиез ужаны кутскиз Шор Кечёво МТС-ын тракторист луыса. Соку угось одӥг трудоденьлы куинь килограмм пызь сётъязы. 17 арес тырмем бераз Пичи Пурга ёросысь военкомат Володялы армие мыныны повестка ыстӥз. Со сюриз снайперъёсты дасян полке. Малы странамылы сокем трос снайперъёс кулэ шуыса солдатъёслэн юанзылы командиръёс валэктӥзы: "Асьме фронт дас сюрс километр кыстӥське. Котькуд иськемлы быдэ одӥг ке но снайпер пуктӥм ке, со нуналаз одӥг тушмонэз быдтыны мед быгатоз. Соку бадӟым юрттэт сётоды вормонлы". 1944-тӥ арлэн кутсконаз сое ыстӥзы омырысь десантъёслэн войскоязы. Владимир Фроловичлэн парашютэн васькисьёсыз азьвыл адӟылэмез ӧй вал ке но, солы 100-тӥ гвардейской десантной дивизиын нюръяськоно луиз. Карельской фронтын соослэн дивизизы ортчиз Лодейск бусыысен Петрозаводскозь. Самой секыт вал Свирь шурез выжон. Соку отын трос солдатъёс быризы. Тужгес курадӟоно луиз секыт техникаен нюр нюлэстӥ ортчыны. Дивизилы Свирско-Петрозаводской ним сётӥзы. Мерзляков соку, кияз автоматэз сяна, пулемётэз но кутылоно луиз. Ожлэн пумаз со вал Звенигородын. Отын дышетскиз 82 миллиметръем миномётэн ыбылӥськыны. 1945-тӥ арын оштолэзьлэн кутсконаз соосыз выль формаен дӥсязы но Москвае нуизы. Куатьтон машинаосын ваизы Москва дорысь Сокольникие. Отын палаткаос пуктӥзы. Уйлы быдэ машинаос пуксьылӥзы. Уйшор вакытэ вуылӥзы Свердлов площадка доры. Татын радэн ветлыны дышетскизы. Ӵукна 5 часозь ветлэмзы бере, асьсэлэн улон интыязы пыӵалъёссэс сузяллязы, сиськизы но изизы. Нуназе сиськемзы бере, паркын оркестр шудӥз. Отын эктӥзы но кино учкылӥзы. Быдэс толэзь соосты Вормон парадлы дасязы. 1945-тӥ арын нырысетӥ куартолэзе ортчиз ожчиослэн тулыс праздниклы сӥзем парадзы. Отын Мерзляков но вал. Собере 24-тӥ инвожое ортчиз Вормонлы сӥзем парад. Та парадэн кивалтӥз Маршал К. К. Рокоссовский, парадэз кутӥз Маршал Г. К. Жуков. - Та парадын милемын ӵош вал 49 сюрс мурт, солдатъёслэн но командиръёслэн мылкыдзы ӝутскемын, - вера В. Ф. Мерзляков. - Оркестрын 1400 крезьчиос шудӥзы. Тужгес но вунонтэм кылиз барабанъёслэн йыггетэмзы улсын немецъёслэсь знамяоссэс Мавзолей доры куштон. 1950-тӥ арын гвардиысь сержант Владимир Мерзляков Ижевске бертӥз. Татын со нырысь ужаз ТЭЦ-ын, собере андан пӧзьтон заводысь 20-тӥ цехын. Мыным но соин ӵош ужаны кылдӥз та цехын. Кыкнамы ик али пенсиын ни ке но, "Ижсталь" огазеяськонэн кусыпмес ум ыштӥське. Владимир Фроловичлы шуд усиз 1955-тӥ арын 9 Мае кыкетӥ Вормон парадэ ветлыны. Со отын ортчиз Ленинградысь фронтовикъёс пӧлын. Туэ Быдӟым Вормонлы 55 ар тырмонэн валче, Москваын нош ик Вормон парад ортчоз. Отчы Удмуртиысь вить фронтовик мыноз. Соос пӧлы Владимир Фролович Мерзляков но пыртэмын. В. Чернов, ужысь ветеран. Дӥсьтонтэк колхозъёсты уд ӝуты Аръёсын ини музъем понна жугиськонъёс дунне вылын куспазы ӧз на дугдылэ. Туннэ нуналын но со понна жугиськон-керетон мынэ. Соиз валамон: адямилэн котькыӵе узырлыкез, ваньбурез музъемысь потэмын, соин ик музъем котьмарлэсь дуно, зарниен но долларен ӵошатонтэм, воштонтэм. Мон ачим вордскемын, будэмын но 33 ар гуртын музъем вылын ужамын бере, малпанъёсме музъем сярысь азинто. Малы колхозъёс шимес тӧлпериен пазям кадь син азьын куашкало, киязы музъемзы вань вылысь 1950-тӥ-57-тӥ аръёсы Алнаш районысь Казакгуртын колхозлэн председателез луыса ужаз вал ньыль классэз йылпумъям воргорон Мыльников Павел Михайлович. Со уг тоды вал прибыль, ренталбельность, самооокупаемость, себестоимость, хозрасчёт но мукет кылъёсты. Но туж умой тодэ вал, колхозэз йыг-йыг пыд вылаз султытон понна, нырысь ик музъем котырын ужано шуыса. Трос будэтоно ю тысь, тырмыт люкано пудо сиён, озьы гинэ йылоз пудолэн йырыз. Ӟеч ужан понна кулэ юн дисциплина. Таӵе малпанъёссэ уже пыӵатыса но калыкен огкыл шедьтыса, Павел Михайлович кӧня ке ар куспын колхозэз районын но республикаын азьветлӥсь радэ поттӥз. Шӧдскымон умояз калыклэн улон-вылонэз, трослы будӥз уждун. Юыны, лушкаськыны, уж шоры мылкыдтэк учкисьёслэн лыдзы чутрак кулэсмиз. Та аръёсы ик мыным кылдӥз люпинэз удобренилы эскерыны. Казакгурт бусые сю гектар вылэ люпин кизимы. Июль толэзе, люпинлэн сяськаян вакытаз, вож будосэз катокен му вылаз погыртыса, дисковой лущильникен пыргытӥм. Собере ӟеч-ӟеч гырыса, август толэзе муэз ӟеч кидысэн кизимы. Мукет араз, ю-нянь вуэм быдэс бере дугдылытэк зориз ке но, ӟег тысьмы гектарлы быдэ ньыльдон центнерен усиз. Бусые кыедэз торфен но минеральной удобрениен сурет лэсьтыса поттылӥм (компост шуыса нимаське вал). Озьы ке но, музъемлэсь ӟечлыксэ вылӥе ӝутон амалъёс тросэз палэнэ кылё на. Колхозлэн кассаяз коньдон но вуиз. Озьы луонлык кылдӥз техника басьтыны, пудо гидъёсты выльдыны. Пуктэмын вал электростанция, кирпич лэсьтон завод, мерттэмын улмо сад. Мыльников П. М. пенсие кошкем бере, райкомлэн пуктылэм председательёсыз нырысетӥ арысен ик огзы бӧрсьы огзы йыг-йыг сылӥсь колхозэз куашкатӥзы. Огез дисциплинаез шальтратӥз, мукетыз кирпичной заводэз быдтӥз, куинетӥез сад бакчаез аналтӥз но порыса куштӥз. Ог дасо мында кивалтӥсьёс ваньзы ик мае ке но куашкатыса пытьы кельтӥзы. Берло дас аръёс ӵоже демократия, реформа, эркын рынок улсын выль кивалтӥсьёс колхозъёсты пумозяз быдтӥзы. Государство гуртын улонэз радъян но юрттон ужлэсь палэнскиз. Озьы кылем колхозъёс но йыромизы. Дунне питранъёслэсь кудпала бергамзэс валатэк, тросэз кивалтӥсьёс ас малпанзыя каньыл сюрес вылэ султӥзы. Ачимъяськись кивалтӥсьёс, гуртоосын кенешытэк вузаны кутско пудо животэз, быдто фермаосты. Каньылак гинэ музъемез тус-тас карон борды кутско. Музъемзэс кужмогес колхозъёслы сёто яке, гырытэк но кизьытэк кельтыса, жуг-жаг будэто, урод улон вылэ чӧлскыса, калыкен ужамысь дугдо, дисциплина син азьын куашка. Йыло лушкаськисьёслэн, юисьёслэн, колхозлы осконзы быремъёслэн лыдзы. Совето власть вакытэ но, али но колхоз куашканы кутске гыроно-кизёно музъем шоры мылкыдтэк, чиньы пыр учкон бордысен, пудолэсь йырлыдзэ кулэстонысен, калыкен кусыпез ыштонысен, кивалтӥсьлэн ачимъяськеменыз кудпала, югдурез валамтэеныз, дуннелэсь бергамзэ шӧдонэз ӧвӧлэн. Аналскыса улон мылкыд туж кӧшкемыт висёнлы пӧрмемын. Ужась калыклэсь осконзэ чутрак вандыса куштэ пичи уждунэз но дыраз тырымтэзы. Нокызьы но оскыны уг луы, гуртъёсын ужтэк кылемъёс вань шуыса. Со дыре ик гуртын пумтэм-йылтэм ужъёс быдэсъяськытэк кылё. Куашкам но куашканы вуэм колхозъёсын хозрасчёт шуон амал шоры малы ке но мылкыдтэк учко. Тани мынам кузпалэ Савельева Татьяна Ивановна кызь арлэсь кема валтӥсь экономист луыса колхозын но кык министерствоосын ужаз. Ужатозяз ӝыны дырзэ висъяз хозрасчёт амалэз улонэ пыӵатонлы. Отын, кытын та амалэз ужазы пыӵато ке, колхоз-а яке кыӵе ке предприятие-а, отын син азьын нырысетӥ араз ик ужазинлык трослы йылэ. Ужась калык ваньбур поттон шоры мукет синмын учкыны кутске. Тус-тас карон учыръёсты коллектив ачиз чакласа возе, мылкыдтэк ужасез асьсэос ик палэнто. Кӧня ваньбур потто, сомында ик уждун басьто. Поттэм продукцилэн асдуныз кулэсме, рентабельностез будэ. Озьы ужаса поттэм табышсы пӧлысь ог люкетсэ ужасьёс асьсэлы люко. Вавож ёросысь Мичурин нимо колхозэз мон 1964-тӥ арысен тодӥсько. 1970-тӥ арын мынэсьтым воштӥсьме Валентин Егорович Калининэз Зямбай гуртысь колхозникъёс асьсэлы кивалтӥсе бырйизы. Шонерзэ вераса, та пинал воргоронлы мон синмаськисько вал, дӥсьтӥсь, сэзь но тыршись луэменыз. Калыкен огкыл шедьтыны быгатонэзлы. Соин ик мур осконэ вал, Валентин Егорович куашкам колхозэз пыд йылаз пуктоз шуыса. Кивалтӥсе пуксемез дырысен трос ву бызиз ини, тани туэ март толэзе куамын ар тырмиз ини солэн одӥг колхозын тыршемезлы. Нырысь аръёсаз ик со гижысь-пиньысь кутскиз дисциплинаез юнматыны, музъемлэсь удалтонлыксэ ӝутыны, пудолэсь йыр лыдзэ йылэтыны, экономикаын ужез юн радъяны, хозрасчёт амалэз уже пыӵатыны. Калыклы трос валэктоно уж нуиз. Али та колхоз быдэс республикаын одӥгез азьмынӥсез но адӟем карымонэз. Валентин Егорович ужаны кутскыку, гектарысьтыз вить центнер ю тысь, нош али татын ньыльдон центнер пала басьто ни, тракторъёссы вить единица вал, али витьтон котырын. Кохозлэн котькыӵе кулэяськонъёсызлы "улэп" коньдонэз вань. Колхозниклы толэзьлы быдэ чик ӝегатэк уждун тыро, толэзьлы шорлыдын 1300 манет усе, ю тысь, пудо сиён тырмымон висъяло, уг вунэто пенсионеръёсыз но. Гурточиос Валентин Егорович Калининлы огкылысь тау каремзэс верало. Соос ӟеч валало ини, азинскон сюрес вылэ султон нырысь ик кивалтӥсь бордысь потэ шуыса. Зямбай калыкен ӵош мон но шумпотӥсько, данъяськисько, мынам азьло юрттӥсе осконме быдэстӥз шуыса. Тӥни озьы, одӥг инбам улын улыса, одӥгез колхоз куанерме, куашка, нош мукетыз - узырме, юнма. Туала демократия гурточиослы трос шуккет сётӥз ке но, самой кулэзэ, музъемез, таланы ӧз на быгаты. Соиз но паймымон: куд-ог кивалтӥсьёсыз Америкае дышетскыны лэзьяло, нош отын воксё мукет условиос ук. Асьме республикаын но адӟем карымон колхозъёс вань бере, соослэс дышетсконо. Но соиз но вань: азьмынӥсь колхозъёслэсь ужамзэс учкыны ветло, но жаляса верано, предъёс, гуртазы бертыса, секытлэсь кышкало но адӟемзэс уже пыӵатыны уг дӥсьто. Дӥсьтонлы но дышетсконо вылэм. Семен Савельев, ужысь ветеран, колхозлэн азьвыл председателез. Дас арзэ пусъёз Азьланьтӥсько Быдӟым Вормонлы витьтон вить ар тырмонлы сӥзем ужрадъёс. 15-тӥ апреле Ува посёлокын луоз театръёслэсь ужъёссэс учкон. 16-тӥ апреле нуназе дас часын Андан ӵыжатӥсьёслэсь быгатэмзэс учкон. 14-тӥ апреле ӝыт куать часын Андан ӵыжатӥсьёслэлы культура дворецазы - калыклэсь усточиослэсь культура дворецазы ик - фольклор кырӟанъя "Айкай" театрлэн дас ар тырмонэзлы сӥзем юбилей концерт. 14-тӥ апреле ӝыт сизьым часын Глазкарысь шутэтсконъя но культурая "Россия" центрын - эстрада эктонъя "Экзон" калык ансамбльлы сӥзем дырысен кызь вить ар тырмонлы сӥзем юбилей ӝыт. А. Апаева. Удмурт Республикаысь Кун Кенешлэсь дасэтӥ (азьвыл чакламтэ) сессизэ люкан сярысь Удмурт Республикаысь Кун Кенешлэн Президиумезлэн ПОСТАНОВЛЕНИЕЗ Удмурт Республикаысь Кун Кенешлэн Президиумез пуктэ: Удмурт Республикаысь Кун Кенешлэсь дасэтӥ (азьвыл чакламтэ) сессизэ люкано Ижевск городын 2000-тӥ арын 18-тӥ апреле 10 часэ. Удмурт Республикаысь Кун Кенешлэн Тӧроез А.А.Волков. Ижевск город, 2000-тӥ арын 31-тӥ мартэ. � 125-ИИ. *** Сессиын эскерыны чакламын Удмурт Республикалэн "Удмурт Республикалэн Конституцияз воштонъёс пыртон сярысь" Законэзлэн инъетэз. Дуно альбом Быдӟым Вормонлы 55 ар тырмонэн валче Пичи Пурга ёросысь Вуж Моньялан бадӟым ужрад ортчиз - биграос моньяослы киысь кие ветлӥсь альбомзэс сётӥзы. Огшоры альбом ӧвӧл со: отын гуртоослэн улонзы, адӟемзы-чидамзы но шумпотэмзы гожъямын. Альбомлэн нырысетӥ бамаз - война. Оже 406 мурт кошкем монья сельсоветысь. 200-лэсь ятырез ӧз берытске ни. Нош туннэ ветеранъёс чиньыен лыдъямон гинэ на. Улонысь кошко ни солдат кышноос. Мария Михайловна Кузьмина вера но вера война аръёсы гуртлэн улэмез, быремъёс но бертэмъёс, пал кышноос, ож вылтӥ ужам нылпиос сярысь. Адямиос синпумъёссэс ӵушыло. Шып кылзо фин ожмаськонын кузпалзэ ыштэм Елена Федоровна Тарасоваез. Нош Быдӟым оже ветлэм Матвей Сергеевич Крыловлэн пал кыл но верамез ӧз луы, ӝож кырӟанэныз сюлэмъёсты вырӟытӥз. Ӝыт куспын син азьтӥ ортчиз гуртоослэн быдэс улонзы, шуг-секытъёссы, куректон- кайгузы но шумпотонзы, ыштонъёссы но вормонъёссы. Ветеранъёслы но ог-огзылы кема но войнаотсэк тупаса шудо улон сӥзьыса шулдыр кырӟазы-эктӥзы гуртоос. Нош альбомез моньяос ильинскъёслы сётӥзы. О. Никитина, Удмурт кун университетын дышетскись. Правительствоысь иворъёс Дуно усёз Тазалыкез утёнъя министерство Удмурт Республикаысь Правительстволэн Президиумезлэн ортчем кенешаз эскерыны ӵектӥз "Вакцинопрофилактика" программалэсь инъетсэ. Министрлэн Сергей Шадринлэн ивортэмезъя, шаерамы трос пумиськыло на палась висёнъёс. Соосын нюръяськыны арлы быдэ ог 90 миллион манет коньдон кутӥське. Висёнъёсты кулэстыны но быдтыны юрттысал соосты дыраз алон, вакцинаосты кутон. Республикаямы палась висёнъёсын нюръяськон дуно усе - 76,7 миллион манет, со пӧлысь 68,5 миллион манетэз уксё кутӥськоз элькунлэн бюджетысьтыз. Валамон ини, ӝогак гинэ сомында коньдон шедьтыны капчи ӧвӧл. Ӵапак со сярысь ик вераськон ӝутскиз кенешын. Та документэз кутонлы нокин пумит ӧз луы уго, арлы быдэ ог 500 сюрс висён учыръёс пусйисько. Та удыслы коньдон висъян ласянь ужъёс мынозы на. Инъет бордын ужан азьланьтӥськоз. Ужбергатӥсьёс сярысь сюлмаськыса Можга городлэн администрациез ужбергатӥсьёслэсь коньдон басьтонэз кулэстон сярысь кичӧлтонэн потӥз. Уго бадӟымесь тыриськонъёс ӝегато калыклы услугаос сётонэз азинтыны. Озьы ар ӵоже Можгалэн бюджетаз уз вуы 27 сюрс манет коньдон, со доходъёслэн 0,03 процентэз гинэ луэ. Татын уногес саклык висъямын парикмахеръёслэн ужзылы. Правительство Кун Кенеше вазиськиз, тыронъёсты кулэстыны курыса. Озьы ик лыдэ басьтыны чакламын палаткаос, рынокъёс, ларёкъёс, лотокъёс, вузкарон павильонъёс пыр вузаськисьёсты но. Коньдон висъяськоз "Сарапулысь кеньыр поттон завод" кун предприятилы бюджетысь 1,5 миллион манет кредит висъян сярысь поствановление кутэмын. Со мыноз ю тысь басьтыны но ваньбур поттӥсьёслы пудо сиён висъяны. Машинотехнологической станциослы техника басьтыны келямын луоз 16 миллион манет. "Ожысь гожтэт" Сыӵе нимын конкурс ялӥз Федеральной почта кусыпъёсъя Удмурт Республикая управление. Со кичӧлтонэз умон лыдъяз Быдӟым Отечественной войнаын Вормем дырысен 55 ар тырмонэз пумитанъя но сое ортчытонъя республикаысьтымы оргкомитет. Конкурс ортчытӥське 10-тӥ апрельысен 1-тӥ маёзь. Фронтовикъёслэсь, фронт мышкын ужамъёслэсь тодэ ваёнъёссэс, Быдӟым Отечественной войнаысь геройёс сярысь гожтэмъёсты, Афган, Чечня оже пыриськемъёслэсь верамъёссэс, фронтысь ыстэм гожтэтъёслэсь копиоссэс куто таӵе адресъя: 426000, Ижевск город, Почтамт, "Ожысь гожтэт" конкурсэ. Апреле чылкытгес улом Республикаысьтымы Правительство апрель толэзе шаерысьтымы городъёсын но ёросъёсын чылкытатон уж ортчытон сярысь ялӥз. Жуг-жагез утялтоно улон но ужан интыосын, нюлэсъёсын но паркъёсын, шайвылъёсын, дано интыосын, саклык висъяно тылпуосын нюръяськонлы. Вань ужъёсын кивалтэ Удмурт Республикаысь лэсьтӥськонъя, архитектурая но улон-вылон политикая министр Валерий Загайнов. Юрттоме крейсерлы Кык толэзь талэсь азьвыл Северодвинск городын ортчизы тодмо флотоводецлы но Россилэн патриотэзлы Ф. Ф. Ушаковлы 225 ар тырмонэн валче ужрадъёс. Тодмо адмираллэсь нимзэ сю арлэсь кема ини нулло асьме флотысь корабльёс. Соос пӧлысь одӥгез - атомен ужась "Адмирал Ушаков" ракетной крейсер 18 ар ужамез бере тупатъяны но выльдыны келямын Россиысь одӥгаз устояз "Звёздочка" предприятие. Юбилеез пусъёнэ ветлэмъёс соку вазиськонэн потӥзы. Кин дунъя Россилэсь флотсэ, соос куро "Адмирал Ушаков" крейсерез выльдонлы юрттэт сётыны. Солэн расчётной счётэзлэн номерез таӵе: 40703810738090105704, Москваысь МБАКСБРФ-лэн 7811 номеро Мещанскысь отделенияз, корреспондентской счётэз 30101810600000000342, БИК 044525342, ИНН 7715206891, ОКПО 51030474 ОКОНХ 96190. Басьтӥсез - "Адмирал Ушаков" крейсерез выльдонъя но тупатъянъя благотворительной фонд. Удмурт Республикаысь Правительстволэн пресс-службаез. Бигра Солдатлэн пельпумаз - котомка но автомат Баграш-Бигра администрацилэн кивалтӥсез А. Я. Матвеев гурт калыкез сярысь уно тунсыко материал люказ ини. Со ик милемлы таӵе лыдпусъёсты сётӥз: "1 Май" колхозысь (татчы Баграш-Бигра, Курегово, Орлово, Чурашур гуртъёс пыро) Быдӟым оже кошкиз 201 мурт. 121-ез тушмонлы пумит нюръяськонын бырыны шедиз. 80-эз дор палъёсаз берытскиз. Туннэ нуналлы ветеранъёс 8 мурт вань на. Одӥгез соос пӧлысь Парамон Кириллович Гагарин. Кузпалъёс Гагаринъёс доры ми, журналистъёс, бер ӝыт вуим ни. Нунал ӵоже жадемзэс ӧз возьматэ мӧйыос. Шуныт пальпотонэн пумитазы милемды. Парамон Кирилловичлэн кытысь луэммес тодэмез потӥз. Валэктӥм, озьы но озьы, сыӵе-сыӵе гуртын вордским, будӥм, собере дышетским но городэ газетэ ужаны кылим. Воргорон мур-мур лулӟыса юаз: - Собере, нылы, малы-о гуртад ик скал кыскыны ӧд кыльы? Валэктыса ӧм улэ ни мугзэ, серектӥм гинэ, укыр паймытӥз ук мӧйы муртлэн лэчыт юанэз. Парамон Кириллович возьматӥз пиджак вылысь орденъёссэ но медальёссэ. Чыртывесь мында соос. Тани одӥгез - ИИИ степенё Слава орден. Мар понна басьтэмез сярысь юанлы валэктыны кутскыкуз ик ветеранлэн пушкыз тыриз, синъёсыз нюромизы. Выльысь тодаз ваиз угось секытэсь ож сюресъёссэ. Дас тямыс аресъем Парамон Гагарин фронтэ вуиз 1942-тӥ арын. Сталинград дорын нырысьсэ "шӧмъяз", мар со сыӵе ваньзэ куашкатӥсь-сутӥсь ож тыл, мар со сӧсырмон, кулон-бырон. Фронтовиклэн тодэ ваёнъёсаз весяклы кылизы Сталинградлэн ульчаосыз, сэрегъёсыз, юртъёсыз: чугун сюрес вокзал, Царицынлэн музеез, универмаг, Баррикада нимо завод но мукет. Ӵапак та город понна ожмаськонын немец нырысьсэ умой-умой ӵемтӥськиз, собере котыртэме шедьыса валаз, Горд Армилы со келяз шуыса. Гагарин кадь огшоры солдатъёс геройлыко луэменызы, сэзь но ӟырдыт мылкыдынызы ваизы Россилы Быдӟым Вормонэз. Курадӟыса, сӧсырмылыса, эшъёссэс ыштылыса, соос выльысь но выльысь солдат радъёсы султылӥзы тушмонэн ожмаськыны Атыкай музъемзы, калыксы понна. Таӵе сямо ик будо туала пиос но. Баграш-Бигра школалэн борддоръёсыьтыз, тунсыко стендъёс верало туала солдатъёс сярысь. Гуртысь пиос ожмаськиллям Афганистанын, Таджикистанын, мукет "пӧсь точкаосын". - Солдатлэн пельпумаз ма - котомка но автомат вал, - тодаз вае Парамон Гагарин. Ветеранлэн кылъёсыз вӧзы ватсам потэ на: бен, солдатлэн пельпумаз - котомка но автомат, нош мӧляяз - ӟырдыт сюлмыз. Ӵапак со мӧлязэ чебермало туннэ уно орденъёс но медальёс. Ю. Александрова. Кузпалъёс Гагаринъёс кенешо гурт администрацилэн кивалтӥсеныз А. Я. Матвеевен. Арлыдоос но устоесь Шаерысьтымы Калык киужъёсъя юртын усьтӥськиз ожысь но ужысь ветеранъёслэн ужъёсынызы адӟытон. Ёросъёсысь, городъёсысь усточиос возьматозы пулэсь, куролэсь, мукет арбериослэсь кыдытэм тӥрлыкъёссэс. Адӟытон ужалоз толэзь ӵоже. Со сӥземын Быдӟым Вормонлы витьтон вить ар тырмонлы. Чеберлыкен пумиськон понна пыралэ Ижкарысьтымы калык киужъёсъя юртэ. Огазеялоз пӧртэм калыкъёсты "Аксион" культура дворец та нуналэ калыкен пачылмемын вал - юртын усьтӥськиз шаерысьтымы пӧртэм калыкъёслэн культураоссыя центр. Удмуртъёсты, ӟучъёсты, поръёсты, бигеръёсты, башкиръёсты, чувашъёсты, казакъёсты: немецъёсты, еврейёсты, белорусъёсты, крашинъёсты, азербайджанецъёсты но мукет выжыосысь адямиосты огазеясь дэменлыкъёс табере быгатозы дворецын асьсэлэсь пӧртэм ужрадъёссэс ортчытъяны. Люкаськем калыкез сослэн тӧрооссы тодматӥзы огазеяськонъёссылэн шумпотонъёсынызы, шугадӟонъёсынызы. Та аспӧртэмлыко нуналлы мылысь-кыдысь дасяськиллям пиналъёс но. Пӧртэм школаосын, лицейёсын, гимназиосын дышетскись нылпиос тодматӥзы удмурт, ӟуч, башкир, немец, еврей эктонъёсын-кыраӟанъёсын. Центрез усьтонын кичӧлтӥсь луиз Удмурт Элькуныс Пӧртэм калыкъёслэн кусыпъёссыя министерство. Министр Николай Мусалиомв ӧтиз огкылысь уылыны но ужаны. Огкылысь кариськыны ӧтиз "Удмурт кенеш" огазеяськонлэн тӧроез Валентин Тубылов но. Удмурт Элькунысь Кун Кенешлэн Тӧроез Александр Волков центрлы кузьмаз Удмурт шаерлэсь кунпуссэ. Музонъёсыз сямен ик ӧтиз ӟеч мылкыдын тырме ужъёсы. Пӧртэм калыкъёслэн культураоссыя центрлэн директорез луоз Ольга Хабарова. Матысь дыре ик ини татын ортчылозы иурлы фестивальёс, конкурсъёс. Пусйымон соиз но: центрез усьтон нуналэ ик ортчиз калыкъёсты огазеянлы сӥзем ужрад. Е. РОМАШОВА. Николай Никифоров ИНӦС УСЬТӤСЬКОН АЗЬЫН Пьеса Шудӥсь муртъёс: Педор - 70-75 аресъем воргорон. Анок - солэн кузпалыз. Геня - пизы. Галя - нылзы. Тарас - бускель воргорон. Очан - гуртысь вӧсясь. Олёна - арлыдо кышномурт. Мария Осиповна - сельсоветысь секретарь. НЫРЫСЕТӤ СУРЕД Действие ортче туала гуртысь юртын. Кузёос туж ик куанер но, туж ик узыр но ӧвӧл. Син шоры йӧтымонэз - укно вӧзысь сандык, кузпалъёслэн борддоре ошем бадӟыматэм туспуктэмзы, котырес синучкон, час. Анок ӝӧк вылаз ӵашаос пуктылэ, нянь шорма. Чырткем выросо ай. Со бадӟым сяськаё кышетэн, магазинысь басьтэм дэремез вылэ куэм айшет керттэмын. Дырын-дырын укное, валес шоры учкылэ. Борддор вӧзы пуктэм койкаын берыкъяськыса, ӧжыт ӝуштылыса кылле Педор. Йырсиосыз лошъяськемын. Ульчаын жингыртэ скал гырлы, кылӥсько сюлоен шлачкетэм куараос. АНОК (кушетскыса). Ач-ач! Кӧттыр понна бергаса, скалэ гидэ кылёз ай. Сьӧд ӵукнаысен бергасько - номыр йӧнлы лэсьтыса уг вуттӥськы. (Бызьыса сямен потэ но огшап улыса берытске.) Та Идок Сандырлэсь йырзэ куӵо куака мед кесясал. Чырым но уг кары, лэся. Сьӧраз ӝыны гурт скалъёссэ улляса уиське. Кин гольык пыд, кин - пуш дэремен. Уть ай, албасты люкет, ма дауртэ! Кышноослэсь саклыксэс, пе, эскерисько. ПЕДОР (йырзэ миндэр вылысь ӝутыса но час шоры учкыса). Келяд-а Куӵомес, Анок? Кыскыса, сюдыса-люктаса вуид-а коть? АНОК. Ма, монэ-а бабытыса кельтыны малпаськод? Шалишь, брат. Тынад Анокед пыд йылаз нырулӥсь куака ӧвӧл. Мынам муръёетӥм ӵын котькинлэнлэсь азьло ӝутске. (Кышетсэ тупатыса.) Ойдо, султы ни тон но, Педор. Мисьтӥськы, дӥсяськы. Легезь мульылэсь, пыштурынлэсь, узылэсь чай дасяй. Индийской чаед дас иськем палэнын медло. (Дораз матэктыса.) Кыӵе кӧлӥд ачид? Маке уйбыт ӝуштӥд кадь. ПЕДОР (валес вылаз пуксьыса). Йӧнатскон сярысь малпанэз ӧвӧл ни, лэся, Анок. Инмарен сиыны висъям няне быре, луоз. Ой, лыдъясал, дыр: кӧня кабан нянь сии меда ни ас гумыре ӵоже, кӧня ведра ву юи? АНОК. Нош аракыез кӧня бекче луиз меда? ПЕДОК (лекак). Опять двадцать пять! Вань вераськонэз аракы вылэ выжтӥськод, едрёна-феня! Ужамме одӥг но уд лыдъяськы. Сопал дуннее выжи ке, дунме валалод ай. Кулэм скал йӧло луэ, шуо. АНОК (кузпалызлэсь йырзэ маялтыса). Ма-ось сыӵе мыддорин вераськиськод, Педи? Уломы ай, уломы. Кулон эзелед Шабер нюк сьӧрын мед котыръяськоз. Арлыд йылэмъя, сюлэм егитоме кадь. Улэмъя улэм потэ. Кин тыроз та югыт дуннелэсь? ПЕДОР (лулскыса). Эх, Ани. Мон но улысал ай. Уката ик берло аръёссэ ваче тупаса улыны кутскимы. АНОК. Ма, азьвыл ӝык урод-а улӥмы? Нылпиосмы пыд йылазы султэмын, асьсэ семьяоссы вань, юртъермы но тӧлъя кырыж-мерыж шонаськыса уг сылы. ПЕДОР. Верамедлэн зэмлык тысез вань. Нош сьӧлыклэсь кытчы ватскод? Егитгес дыръям юнме шорысь тонэ но вожалляй, курытсэ но норматэк ӟузьылӥ, тон шоры мыжыкме урдылыны но кер ӧй потылы. Со сьӧлыкъёсме лыдэ басьтыса ик инсьӧр кузё монэ адэ ӝоггес келяны тырше, луоз. АНОК (кышкатскыса кадь). Ач-ач, кӧлэм куака ик вань мон. Самоварме вунэтӥськем. (Бызьыса сямен кошке.) ПЕДОР (йырсизэ маялтыса). Азяз ӧжыт вӧяськытэк уз луы. Сотэк ватэтсэ но уз потты. Эх, ортчытӥ ук каръян гумырме мунчо кузёен. Ӧжыт-а нылъёс чыртыям ошиськылӥзы? Адӟонэ сыӵе вал, дыр. Ох, едрёна-феня! АНОК (самоварзэ ӝутыса вае но ӝӧк вылэ интыя). Ойдо, ӝӧк сьӧры дырты, Педи. ПЕДОР (валесысьтыз султонъяз, куссэ киыныз зыраса-маялляса). Мон сямен кускыныд курадӟемед потэ, оло, Ани? Малы-о со самоварен курадӟиськод? АНОК. Пыдъёсы ветло, ки кужыме вань ай бере, самоварелы шутэтскыны эрик уг сёт на. Со электрочайникеныд пӧзьтэм чаедлэн шӧмыз ик олокыӵе кӧш. Сынэм корт шӧмо. Эмезь веренья но, чечы но шӧмзэ воштыны уг вормо. ПЕДОР (выл дӥсьсэ дӥсянъяз). Кускам ик пери шуккиз ни, лэся. Не шонерскыны уг луы, не вамышъяны. Боды ньылэм мурт сямен ветлоно луэ. АНОК. Астэ ачид куареты, Педи. Аракы, тамак сыӵе каро. Сое шонертон понна, туно доры ветлонэз ӧвӧл. ПЕДОР (вожзэ поттыса). Эх, едрёна-феня! Куреглэн мында коть визьмыд вань-а тынад? А-а? Неужель, папирос кыскыса, кускын тэльмырод? АНОК. Котьма верад ке но, ас кыл вылам ик сыло. Мугорысь вир кузя тамак шакшыос кускад гинэ ӧвӧл, олошаяд вутскозы, ява. Тон монэ неграмотной эн кары. Куинь ар парта сьӧрын пуки. Юонэд но. Ас пайдэ (нормадэ) быдтыса, мынамезлэн пумаз вуиськод ни, дыр. ПЕДОР. Ой, кыллы бырем адями тон, Анок. Кый музэн, лушкем лексьыны яратӥськод. Берло верам кылъёсыд кусме ик ӵушказы. (Потыса кошке.) АНОК. Ой, уг яраты шонер верамез. Пичи муртэ сямен, ушъяса гинэ возёно. Мон но озьы гинэ улысал. ПЕДОР (висъет сьӧрысь берытскыса, бамзэ ӵушконэн ӵушылонъяз). Тон, Анок, синмез усьтэмен валче, монэ эн куареты ай. Берпуметӥ нуналъёсам ке но сизьдытэк чида. АНОК (ӵашаосы чай лэзьяса). Пуксьы, Педи. Кыкмы ик кыло ук. Вӧтме верало шуисько вал - вунэтӥ ни, лэся. Ӝӧк сьӧры пуксьытозь бызьылӥсько но, тӧл пазяса быдтэ чебересь вӧтъёсме. ПЕДОР. Уг мадьы шуисько вал вӧтме - сюлэм уг чида ни. АНОК. Мадьы, Педор, мадьы. Ачим шонерто. ПЕДОР. Вӧтме шонеръямед кулэ ӧвӧл мыным. Ваньзэ ачим тодӥсько. Ӝоген каюк! мыным. Оло, берпуметӥзэ огазьын чайласькомы, дыр. АНОК. Ач-ач! Ма-ось лабыртӥськод? Пыдессинъёсы ик шальтыразы. ПЕДОР. Радызъя мадё ай. (Интыысьтыз султэ но, пукон вылэ пуксьыса, папироссэ кенжытэ.) Син шорам учкыса кылзы, Анок - сотэк вераме пельсьӧртӥд тӧлӟоз. АНОК. Эн шугъяськы. Шорысьтыд синъёсме но уг вошъя. Эсьмаса, шокатэк кылзо. ПЕДОР (ӵынзэ палэнэ пельтыса). Значит, ужпум тазь азинске. Асьме доры лачак куноос люкаськиллям. Кудӥз вина юэ, кудӥз кырӟа, кудӥз вераське. Тӧр шорын ик, оброс улын, гуртысь вӧсясьмы, Очан, пуке. АНОК (чабкиськыса). Ач-ач-ач! Мар, мар вӧт луоз со? Кутсконэз ик мыддорин ук. То кырӟан, то вӧсяськон. Очанлэн асьме доры берло пырамез дырысен выль пипу ӝужаса сисьмиз ни, дыр. ПЕДОР. Тон-а монэ кылзӥськод, мон-а тонэ? АНОК. Луло мырык сямен пуком, оло? Мон Пу Матрон ӧвӧл ук, луло адями. ПЕДОР. Куриськид бере, пумозяз кылзы. Ас малпанъёстэ берло шараялод. АНОК. Озьы медло. Мадьы, Педи. ПЕДОР. Вот, значит. Пукиськом ӝӧк сьӧрын. Сииськом-юиськом. Маке кисьтон нерге ортчытӥськомы кадь. Малы ке шуоно, ӝӧк вылысь курег лыосты люкаса тон кудые тыриськод. АНОК. Ач-ач-ач! Тулыс кисьтон дыръя шат кинэ ке буре вайытэк кельтӥм? Яке сӥзьыл кисьтон матэктэмысь-а таӵе вӧт? ПЕДОР (кузпалзэ кылымтэ улсы аналскыса). Нош ӝӧк сьӧрын кинъёс пуко кожаськод? АНОК. Кытысь-о тодом? Тынэсьтыдзэ ке ӧвӧл, ас вӧтамме вунэтӥсько. ПЕДОР. Тани татын ик вӧтлэн шорсюлэмыз. Значит, мон вӧзын быдэсак кулэм ӵыжы- выжыосмы. АНОК. Ач-ач-ач! Осто, Инмаре! Нош Очан вӧсясьмы но, асьмеос но отын шуид вал. Асьмеос улэпесь на ук. ПЕДОР (папирос пумзэ сэрпалтыса). Шузи улэ эн аналскы ай. Кызьы-о тон отын уд луы, кисьтон ортчытӥськом бере? Очан вӧсясь сярысь поттылонэз ик ӧвӧл ни - вератэк но валамон. АНОК. Озьы, озьы. Табере валай кадь. ПЕДОР. Та интыысен вӧтлэн сюлэмез тужгес бичатӥсь вакытэз кутске. Ӝӧк сьӧрын пукыкумы ик кудыысь лыос сьӧд атаслы пӧрмытско. Атас, бурдъёссэ лопыръяса, ӵапак дас пол чортэ. АНОК. Ач-ач-ач! Нош тон ӝӧк вылын пӧзьтэм курег шуид вал кадь ук нырысь. ПЕДОР. Значит, атас вылэм. АНОК. Ой, тунсыко вӧт. Сюлэмы ик гиз-з! карыны кутскиз. Собере мар ни? ПЕДОР. Собере - каюк! Монэ кулэмъёс, китӥм кутыса, ӧс пала валтыны кутскизы. Мон чигиськыса бӧрдӥсько, Очан вӧсяське, гадяз кирос вылэ кирос тыре, тон тэтчаса эктӥськод... АНОК (синдураз кышет пумыныз йӧтскыса). Осто, Инмаре! Таӵе кышкыт вӧтъёсыд лыктэм сюрестӥзы ик яке тудву кузя мед кошкозы. (Палэнэ сялӟыса.) Тьфу-тьфу! Огзэ гинэ уг валаськы: нош мыным малы эктыны кулэ? ПЕДОР. Йылаз-пумаз вутскыны эрик сёт ай мыным, Анок. Кылзы. Атай монэ китӥм кутӥз но сьӧраз валтэ. Нош вӧзам анае лыктыса йырме маялтӥз но лушкем шыпыртыны кутскиз: "Ойдо, пие, инӧс усьтӥськытозь, коркась потом. Лулыд, тӧдьы бурдолы пӧрмытскыса, инсьӧры мед лобӟоз". Нош мон ӵыжаськыса ик мозмытскыны курадӟисько. АНОК (оброс шоры учкыса, гадяз кирос тырыса). Свят, свят! Ӟечлыктэ, тазалыктэ сёт, святой Отец, дева Мария, Иисус Христос! (Сабырскыса.) Мозмытскыны быгатӥд-а коть? ПЕДОР. Ӧй быгаты, Анок: сьӧд кужымъёс кужмоесь вылӥллям. Капка азе нюжтыр-няжтыр кыскаса поттӥзы но сьӧд ужпилэн дӧдьыяз пуктӥзы. АНОК (чабкиськыса). Ач-ач-ач! Ма, гужем куазен но дӧдьыен ветло шат? Оло, сураса- пожаса мадиськод? ПЕДОР. Вот, ыжлюгы! Котькуд верам кыл бордам ӝабырске. Ма-ось пӧртэмлыкез отын: коть дӧдьы, коть уробо?! АНОК. Э-э, озьы эн шу, Педи. Вӧтлэн котькуд тодметэз шонертон дыръя зарни пыры луэ. Тынад вӧтад дырез возьматэ со. Толалтэ яке гужем. ПЕДОР. От, едрёна-феня! Шонер вераськод. АНОК (шумпотыса выллем). Юнме шат, илларион кенак доры ветлыса, вӧтъёсты шонеръяны дышетски? Ай дышетэмез понна тынэсьтыд лушкемен кызь курегпуз, банкаен чечы сётӥ. ПЕДОР. Таиз ласянь тон усточи. Быгатӥськод люкам ваньбурез тус-тас карыны. (Йыртышсэ кормыштыса.) Тодам на: уробоен вал соос. Пельсьӧрам али но чузъясько питран куараоссы. Ӵапак ӟукыртӥсь куажылэн выллем вал. АНОК. Озьыен, гужем луэм, дыр. Уӵы куараосты ӧд кылы-а? ПЕДОР. Кулэтэм юанъёсыныд йырвизьме эн туга ай. Кылзы. Вӧтлэн тужгес кышкытэз со: монэ кулэмъёс сьӧразы нуыса кошкизы. Озьыен - каюк! Соосын огазе кариськем бере, значит, тодмо: корос дасяно. АНОК (викыштыса). Малы-о монэ курдатӥськод, Педор? Оло, юри ачид малпаса пӧлэстӥськод? ПЕДОР (вожзэ поттыса). Уд оскиськы ке, кымыс шорад ик пӧськы мед потоз. Неужель ачим малпаса пӧлэстом? Вот, едрёна-феня! Таӵезэ вераны кызьы-о ымыд усьтӥське? АНОК (картсэ ӟыгыртыса но викышъяса). Огнаме эн кельты вал, Педи. Кызьы улом-вылом мон? Корка муръё йылтӥм ӵын ӝутскемысь дугдоз ук. (Шуак кариськыса.) Ач-ач-ач! Ай тынад вӧтэдлэн пумыз ӧвӧл ук! Адями одно ик кызьы ке сайканы кулэ. ПЕДОР. Сайканы? Атас куараез кылыса, синъёсме усьтӥ. Ӵапак со лыослэсь пӧрмытскем сьӧд атас дас пол чортӥз вал. АНОК (шумпотыса). Та сярысь кемалась поттылоно ни вал, Педи. Атас чоръяку, куазь воштӥське, шуо. Оло, тынад бурмонэдлы-тазарсконэдлы юрттӥсь ивор та? ПЕДОР (папирос кенжытыса). Ӧвӧл, ӧвӧл. Кулэм муртъёсын огазе кариськон - мынам эзеле. Сьӧд ужпи - уй, ӝытлы тупа. Нош атаслэн дас пол чортэмез - дырез ивортон. Значит, туннэ ӝытазе, дас час... АНОК (бӧрдэм пыр). Эн курдаты монэ, Педор. Тани кӧты кизермоз. ПЕДОР (йырзэ маялтыса). Бӧрдонэн суро эн вераськы ай. Дырыз вуытэк, коркамес шимес эн кары. Секыт адӟонэз йырез вылэ ӝутыса пумитаны кулэ. Значит, тазьы лэсьтом. (Йыртышсэ кормыштыса.) Вань-а басьтэм аракыед? АНОК. Кускад зыраны шуыса, толон кык полуштоп вуттӥ вал. ПЕДОР (мыньпотыса). Кыкез, конечно, мултэс луоз. Огзэ потты ай. Мон пичиен-пичиен юо, ваньмыз сярысь дыртытэк малпасько. АНОК (сандыксэ ӝогак усьтэ но, тыро бутылка поттыса, сое ӝӧк вылэ пуктэ). Ю, мусое. Вождэ гинэ эн потты ни мыным. Куддыр юнме шорысь куаретылӥ но, дыр. ПЕДОР (азьчиньызэ урдыса). Значит, тазьы каром. Тон ӝогак почтае ветлы но, нылпиослы, атайды шуг югдурын шуыса, телеграмма ысты. Почтаын кызьы гожтыны визьнодалозы. АНОК. Ярам, ветло. Кызьы-о, соосты ӧтьытэк? ПЕДОР. Сберкнижкадэ но сьӧрад басьты. Кулэм муртэ келяку но трос коньдон кулэ луэ. Вина но трос кулэ луоз, мукет чыры-пырыос но шедёзы. Анок, огыр-бугыр дасяськыса, ӧс пала вамыштэ. ПЕДОР. Анок! Сыл ай. АНОК (берытскыса). Маке веранэд тодад усиз, оло? ПЕДОР. Кулон эзельлэсь ватскыса кыльыны уз луы. Соин ик урамысен пумитам гуртоосмылы иворты. Педор, шу, лябӟиз ни. Вераськемез потэ. Мед кожалозы. Вӧсясь Очан доры пыраса ик иворты: ӝытлань мед лыктоз. Ас сьӧлыкъёсме вераса кельто. Сьӧрам нуэме уг поты. АНОК. Ярам, ярам, вань косэмъёстэ дыраз быдэсто. Тон, Педи, чылкытсэ, выльзэ дӥськуттэ дӥся вал. Сандыкысь шедьтод. Адямиос пырыку, учкымон мед луод. (Потыса кошке.) Педор дыртыса бутылкалэсь букызэ усьтэ но, ог чарка лэзьыса, гулькак юэ. Ымдуръёссэ кимышкыныз ӵушылэ. ПЕДОР. Э-э, курыт, шайтан басьтон! Ул но ул вылэм, та кылчин вуэз юыса - уг лу. Инмаред улон гумырзэ мертаса сётэ. (Синучкон азе султыса.) Тусбуйын но шуш ӧвӧл, мугоры но шальтырамын ӧвӧл на. Нош югыт дунне вылын улон минутъёсы лыдъямын ни. Эх, улон - муньылон! КАТАНЧИ КЫКЕТӤ СУРЕД Отын ик. Ваньмыз азьло сямен. Педор, чебер дӥсяськыса, тыр ӝӧк сьӧрын пуке. Со кудӟемын ӧвӧл на, но ӧжытак шӧмаськемын ни. Ас понназ лабыртэ. ПЕДОР. Уть ай, кыӵе тупатэмын, едрёна-феня! Вордӥськи, улӥ, табере кулыны дасяськисько. Нош ма кельтӥ югыт дунне вылэ? Бен, нылы-пие вань, внукъёсы чырткемесь. Адями но, писпу сямен, ас выжыосыныз кужмо уго. Бен, киосы зарниесь вал. Ватонэз ӧвӧл: гуртысьтымы котькудӥз кыкетӥез юртъер мынам тӥреным лусъемын, ӵупемын. Озьыен, ваньмыз умой? Э-э, астэ ачид ӧрекчаськод, Педор. Яратымтэ, кӧтвеськантэм кузпалэныд гумырдэ ортчытӥд ук. Анае-атае кужмысь кузъязы. (Пальышаса.) Со понна мукет кышноосын но ӧжыт ӧй юмша. Кыӵе шудо кариськисько мон, со нуналъёсты тодам вайыса. Эх, берыктыны ке луысал ортчем дырез! (Кырӟан мытэ.) Поръялоз, поръялоз Ворпо-чибор душесэд. Со душес кызьы поръя, Мынам сюлэм сыӵе ик! Интыысьтыз султыса, укно вӧзы лыктэ но кырӟанзэ азинтэ. Поръялоз, поръялоз Вало дор но кожъёсыд. Со кожед кызьы поръя, Мынам кӧты сыӵе ик! (Ураме учкыса.) Уть ай, кин ке ми пала дыртыса вамышъя. Ма-а, Олёна ук та! Вот, едрёна-феня! Ма кароно ай? Укно вӧзысь ӝогак палэнске но ӝӧк вылысь аракызэ ватэ. Дӥсьёссэ куштытэк гинэ валес вылэ выдэ но тӧдьы шобретэн шобырске. Ӧсэ йыгаськем куара кылӥське. ПЕДОР. Ӵогамтэ. Пыре, пыре. Пыре Олёна. Со лапег, тыр мугоро. Аресэз шоры учкытэк, кильтыро дӥсяськемын. Пельпумаз пичи сумка ошем. Вераськыкуз "с" интые "ш" буква пыртылыса вераське. ОЛЁНА. Ӟечбуресь! Кыӵе улӥськомы-вылӥськомы ай? Ваньды чырткемесь-а? ПЕДОР. Туж ик ушъяськымон ӧвӧл ай, тутыгыше. ОЛЁНА (отчы-татчы утчалляськыса). Ма, арлыдо мурт, чебергеш вераськы. Тынад кыӵе тутыгышед луом мон? ПЕДОР. Я, эн курда. Анок дорын ӧвӧл. ОЛЁНА. Кытчы-о кошкиз "ач-ачед"? ПЕДОР. Пукон басьтыса, вӧзамгес пуксьы, Олёна. (Валес вылаз пуксьыса.) Анок почтае кошкиз ай. Нылпиосмес ӧтьыса, телеграмма шуккытэк уг луы. Висисько, оло, берпуметӥ минутъёсме шокасько ни, дыр. ОЛЁНА (пукон басьтэ но койкалы матэ пуксе). Кушкыныд курадӟиськод шуыша кылӥ но, вань ужпӧръёшме палэнтыша, дорад бызи. ПЕДОР. Умой лэсьтэмед, тутыгыше. ОЛЁНА. Жалясько мон тонэ, Педор. Ачим но, тон сямен, кушкыным тэльмыри уго. Кушкад мушъёшты лекатыша ӧд утча-а? ПЕДОР. Ӧй. Юрттэ, оло? ОЛЁНА. Мон озьы эмъяськи. Туж юрттэ. Шоин ик тыныд мушъёш вайыса лыктӥ. (Интыысьтыз султыса.) Выл дӥсьёштэ кушты ай - кушкад мушъёш лекатом. ПЕДОР (дӥсьёссэ куштыса но кымин выдыса). Вӧсь луэ-а, Олёна? ОЛЁНА (сумкаяз бугыръяськонъяз). Шое гинэ чидалод: тон воргорон ук. (Педорлэсь дэремзэ ӝутэ но тыбырзэ маялтэ.) Ай мугорыд бишкыль-бишкыль, Педор. Егит дыръяд кадь ик. ПЕДОР. Маялля гольык мугорме, тутыгыше, маялля. Киыныд йӧтскемлы быдэ выль кужым пыре кадь мугорам. Эсьмаса, виры ик быректымон ӟырда. ОЛЁНА (мугорзэ маялля, пумен пальпотэ). Ӧжыт шат мушояляй мон тонэ? Маяллямтэ, чупамтэ интыдэ ик ӧй кельты, луоз. ПЕДОР. Шонер вераськод, мусое. Ой, каньыл мугорылы! ОЛЁНА. Табере висён-черъёштэ улляны тыршом ай, Педи. Мушъёшты лекатом. (Сумкаысьтыз пинцет но шырпу коробка поттэ. Мушез пинцетэн кутэ но Педорлэн кусказ йӧттэ.) ПЕДОР (зуркак кариськыса). Ой, вӧсь каре, едрёна-феня! Муш интые, дуринчи ӧд вайы, дыр, ук? ОЛЁНА. Чида, мушое, чида. Чидатшкытэк бур уд адӟы. Эшшо кыкшэ лекато но, туннэлы тырмоз. (Нош ик лекатъя.) Кыӵе ни? Вӧсь уг луы-а? (Тыбырзэ маялля.) Вуонояз лыктыкум, витьшэ лекатом. Озьы дашозь, пе, вуттоно. Ачим, та амалэн эмъяськеме бере койык кадь чырткем кариськи. Я, табере интыысьтыд шулты но ӧжыт лёгаськыша ветлы. Муш яд вир кузяд быдэш мугорад мед вутшкоз. (Султыны юрттэ.) ПЕДОР (солань-талань ветлонъяз). Лексем интыез кужекъя ке но, кускылы умойгес луиз кадь. ОЛЁНА (шумпотыса). Верасько ук: туж юрттэ. Эсьмаша, нош ик казакпи кадь кариськод. ПЕДОР. Эх, медло вылэм, муш лекатыса, пинал даурез берыктыны. Быдэс умортозэ мугор вылтӥм ветлытысал. ОЛЁНА. Араз гужем кык пол уг лу, Педи. Тӧлӟиз ни асьме сяська даурмы. ПЕДОР. Нош сюлэм уг пересьмы ук, Олён. ОЛЁНА. Озьы, шонер вераськод. Гадьын олокыӵе но шаян мылкыдъёш вуӵыртыша уло. Мылкыд - инсьӧрын, берпалы - пень пушкын. Куддыръя олокыӵе но чебер вӧтъёш адӟисько. Кинэн ке чупаськисько, ӟыгыръяськисько но кадь. Синъёшме шарак усьтӥсько но, вӧзам губыршкем Исьтапанэ вал сямен шоргетыша кӧлэ. Эх, вожпотонэ лопыршке шоку! Огэшэп шокчыны но, лулӟыны но йӧн уг шедьтӥськы ни. ПЕДОР (ӝӧк вӧзысь пукон вылэ лыктыса пуксе). Аслам но ӵемысь озьы луылэ, Олён. Ог- огмес яратэм вылысь уга валче кариськыны ӧм быгатэ. ОЛЁНА. Инмар асьме шудмылы пумит кариськиз, лэся. (Сумкаысьтыз ӟенелик поттэ но ӝӧк вылэ пуктэ.) Юом ай, Педи. Толон ӧжытак виятэм вал. Нырйылзэ ик тыныд веръятоно кариськи. Кытын чыркаошыд? Ӝоген юыны кулэ. Я ач-ачед бертыша вуоз. Быриськиз шоку! Йырсиошме лӧдоз, ява. Педор дыртыса мынэ но чаркаосын берытске. Соосты аракыен тырмытъя. ПЕДОР. Ойдо, пумиськеммы понна кымалтом, Олён. Чаркаоссэс жингырак шуккыса ик юо. ПЕДОР. Тонэн пумиськыса вераськисько ке, висёнъёсме ик вунэтӥсько, тутыгыше. Мугорам пиосмурт кужыме лопырскыса ик кошке. ОЛЁНА (кильтыро серектыса). Али но шыӵеошты тодад ваиськод, иське? ПЕДОР. Луылэ. (Ымдуръёссэ ӵушылыса.) Тыл кадь пӧрмем аракыед, Олён. Виятэмедлы быдэ огпол но лушкемен куноятэк кельтэмед ӧвӧл. ОЛЁНА. Кызьы шотэк, Педи? Егит дырысеным вань мылкыды тон бордын уго. ПЕДОР (аракызэ чаркаосы лэзья но ӟенеликсэ Олёналы берыктэ). Сумкаяд ват, Олён. Олокин пырыны шедьтоз. Таӵе ужез адӟемлэсь адӟымтэ ӟеч. ОЛЁНА. Ач-ачедлэн син азяз шедеме уг поты. Юнме шорысь керетон ӝутыны дась гинэ улэ. (Юо. Педор чаркаоссэ укно янак вылэ пуктылэ.) ПЕДОР. Анокелэн сямыз ишан пушнер кадь уго. Ортчытӥ ук соин каръян гумырме. Улэм ӧй вал со, тэльмырон гинэ. ОЛЁНА. Мынам но ушъяськымон ӧвӧл, Педи. Валеш вылын мушоямдэ мугорыным али но шӧдӥсько кадь. (Серектыса.) Возьыттэмъёш ик вань асьмеош, Педор. Пиньёшмы усьылэмын ни, йырамы сьӧдчабей сяськаямын ни, нош визь шепмы буш. Уть ай, яратон сярысь лабыртыша пукиськом. ПЕДОР (пальпотыса). Асьмелэн кенешмы ӵапак одӥг анекдотын выллем луыса кошке, Олён. ОЛЁНА. Кыӵе анекдот сярысь тон? Мадь. ПЕДОР (папирос аратаыса). Одӥг пересь кышномурт милицие лыктэм но ивортэ, пе: - Монэ эриктэмазы. - Кытын? Ку? - шулӟектэм милиционер. -Шур дурысь куакъёс пӧлын, - нокыӵе кариськымтэ песянай. Будэтэм на: - ньыльдон вить ар талэсь азьло. - Нош малы такем беромыса ивортӥськод? - паймем милиционер. - Шумпотон вакытэз, гумырлы вунэтонтэмзэ кызьы тодэ вайытэк? - лулскем песянай. ОЛЁНА (горыса). Ой, лулы-сюлмы. Ӵапак мынам огпаре вылэм та пересь кышномурт. (Лулскыса.) Бен, шыӵезэ вунэтыны уг лу. Огзэ гинэ жалясько, Педи. Тодад на-а: монэ Исьток Лёгоръёшлэн мунчоязы кышкаськод вал? Ныл данэлэсь люкыны мершкид вал шо ӝытэ. ПЕДОР (ӵынзэ палэнэ пельтыса пальыша). Тодам, тутыгыше, тодам. Ачид пумитъяськид ук. Нош мынам яратоно адямиме эриктэмаме ӧз поты. ОЛЁНА. Шузи вылӥськем, Педи. Сётшконо вал мыным шоку. Тани Анокед быгатӥз: айшет калзэ итӥз но тыныд бызиз. Тынад но басьтытэк амалыд ӧй вал ни. Шоку секыто кариськысал ке, эсьмаша, анай луон шумпотонэз тодышал, вылды. Мынам улошо Исьтапанэ шое гинэ но ӧз йӧндыры. Албашты люкет! Пилеш йырзэ коӵо куака мед кокчалтышал. ПЕДОР. Гырпум матын ке но, сузьтӥськыны уг лу ни, Олён. ОЛЁНА (интыысьтыз султыса). Улонэ сярысь мадьыны кутшкисько ке, синвуошын ӵокшузисько. (Сумказэ пельпумаз ошыса, ӧс пала вамыштэ.) Я, мон кошко ни, Педи. Йӧнатшкы, эн висьы. ПЕДОР (папирос пумзэ куштыса лёге но келяны султэ). Кулӥ-марай ке, келяны, уйзэ пукыны лыкты, Олён. Сыӵе ивор ӝог вӧлдӥськоз гуртамы. Синъёсы кыниськымтэ луизы ке, кыньыты. Аслэсьтым сюлмысь гажам адямиосме сопал дуннее дырызлэсь вазь медам нуы. ОЛЁНА. Таӵе кылъёшыдлэсь сюлэм ик йӧӟектэ. Уд кулы ай, Педи. Ӵуказе ачим нош ик мушъёс вайыша лыкто. ПЕДОР. Ӧйтӧд. Мушъёсыд кулэ луозы на меда? Келяськон нергее курыт аракыдэ гинэ вайыны эн вунэты. (Йырберзэ кормыштыса.) Чаль ай вӧзам, тутыгыше. ОЛЁНА (пумитаз вамыштыса). Маке лушкем веранэд вань, оло? ПЕДОР. Дорам ветлэмедлы, саламедлы тау карыса, гумырам лушкем яратэмме лыдэ басьтыса, вай берпуметӥзэ чупало, Олён. ОЛЁНА (пальпотыса пумитаз вамыштэ). Олома дауртӥськод, Педи. Олёна сумказэ пыд азяз поныса ик воргоронлэн чыртыяз ошиське. Ог-огзылэсь йырзэс, тыбырзэс маялляло, вешало. Чупасько, ӟыгыръясько. Ӵапак Анок пыре. АНОК (чабкиськыса). Ач-ач-ач! Ма, мар дауртӥськоды, возьыттэмъёс? ОЛЁНА (Педор вӧзысь тэтчыса но сумказэ кияз басьтыса). Педорлэн синмаз жаг пыры шедем но, шое поттыны куриз вал. АНОК (керӟег). Адӟи, адӟи кыӵе жаг пырыез поттыны выремдэ. Синтэм ӧвӧл. Синмаз пырем жаг пырызэ малы ке ымдурысьтыз утчад кадь. Ач-ач-ач! Йырсиед пурысьтамын ни, Олёна - озьы но буйгатсконэз уд валаськы. Быждэ купырты но интыяд пук ни вал. ОЛЁНА (ӧс пала вамыштыса). Мынам быжы вань шат? Шайтан ӧвӧл ук мон. АНОК. Бызьылӥсь коӵышлы укшаськод тон, Олёна. Нош коӵышъёс быжтэм уг луо кадь. ОЛЁНА. Ой, Анок. Малы-о сьӧлыктэм муртэ сьӧлыкаськод? Тон лулме сьӧдмад ке но, чылкыт кылёз шо мынам. Я, мон кошки. Ӝог йӧнатшкы, Педор. (Дыртыса кошке.) АНОК (бӧрсяз сялӟыса). Фу, йӧспӧртэм адями. Ойдо мын, азьыдлэсь берыд чебер. (Педор пала берытскыса.) Тон но укыр йӧно. Ачиз лул потэмзэ возьма, отын ик, айы пуны выллем, кышноос сьӧрын зынъяськыса ветлэ. Ач-ач-ач! Дорысь огминутлы гинэ потӥ но, душым шедьтыны вутскем ни. Возьыттэм ымныр. Вузаськись лул тон, Педор. Одӥг стакан аракы понна Олёналы лулдэ вузаны дась. ПЕДОР (могаса). Ма-ры-ым, А-а-нок. Кускам лекатыны мушъёс вайыса лыктэм вал ӧлёна. Кызьы-о тау карытэк? Тыбырзэ ӧжытак гинэ маялтӥ, вешам нерге кари. АНОК. Тонэ мушъёсын эмъянэз ӧвӧл. Йыртышкад зырен шуккыса, пушнер пушкы сэрпалтон люкет тон! ПЕДОР. Ту-уж тау-у ӟеч кылъёсыд понна. Сыӵе шунытэсь кылъёс вераськод - сюлэмы ик вӧё ӟазег тылыен йӧтскем кадь луэ. АНОК. Нош ик курытсэ вайыса лыктэм-а дусымед? Вераськыкуд кылъёсыд ик канжасько ни. ПЕДОР. От шузи, от курег визь! Ачид ук одӥг полуштоп кабак аракы сётыса кельтӥд. Мон сое но ваньзэ юыса ӧй быдты ай, Олёнлэсь ватӥ. (Ӝӧк улысь полуштопсэ поттэ.) Тани, учкы. АНОК (сабырскыса). Йырвизьмысьтым воксё тӧлӟем. Вождэ эн вай, Педор. Со Олёнадэ адӟисько ке, мугорысьтым виры ик быректэ кадь. Гадьы сутскыны кутске. Лэзь ай мыным но аракыдэ. Оло, сюлэмы сабырскоз. ПЕДОР (укно янак вылысь чаркаосты вае но отчы аракы лэзья). Ю, Анок, ю. Шуккытэк гинэ юо. Анок пичиен-пичиен юэ. ПЕДОР. Ветлэм сюресэд удалтӥз-а? Ма шуиз Очан? АНОК. Ӝыт пал лыкто шуыса оскытӥз. Нылпиосмылы телеграмма ыстӥ, сберкнижкаысь коньдонме но басьтӥ. Жалькак векчи уксё сётӥзы. ПЕДОР. Значит, кулыны ваньмыз дась? Ӝыт дас часэз возьман гинэ кылиз на. Эх, каръян гумыре! Улӥ меда, ӧй меда мон та югыт дунне вылын? АНОК. Сокем эн чигиськы, Педор. Дунне вылэ вордскем огез но адями кулытэк уг кыльы. Ваньмылэн сюресмы одӥг - шайвылэ. ПЕДОР. Ас кутэдлэн ныраз тылгизьы усьытэк, муртлэсь ӝуамзэ уд тодӥськы, шуо. Тыныд вераны капчи. Тазалыкед вань, вал сямен бызьылӥськод ай. АНОК. Коросэ огӵош выдомы ке шат? (Чабкиськыса.) Ач-ач-ач! Монэ яратӥсько, гажасько, пе. Ачиз лушкемен мынэсьтым кулэмме возьма вылэм, му ньылон люкет. ПЕДОР (папирос аратыса). Вождэ эн вай, Анок. Янгыш вераны шедьтӥ. Шонерзэ ке верано, сюлэмы кужекъя ук, едрёна-феня! Мон куло, вылам турын-куар ӝужалоз. Нош тон азьло сямен ик улод на, ӝужась шундылы шумпотод, ошмес вуэныд чай юод... АНОК. Инмарлэсь кымысам гожтэмзэ адӟо ни, Педор. Кышноос, тӥ сямен, аракы уг юо, тамак уг кыско, муртэн уг юмшало. Соин ик, дыр, картсы кулэм бере но уло на. Кудӥз ай выль сюан шудыны но вутске. (Пальышаса.) Монэ но чиган кышно укмыстон кык аресозь улод, шуиз. Ӧйтӧд, кызьы луоз ни... ПЕДОР. Значит, мон кулэм бере, эшшо кызь ар улыны малпаськод ай? От, едрёна-феня! Нош ог-огзэс яратӥсь кузпалъёс бӧрсьысь бӧрсьы куло, шуо вал кадь ук... АНОК. Ач-ач-ач! Таӵе кылъёсыд понна кыл йылад пӧськы мед потоз. Мон кулыны уг дасяськиськы на, Олёнаед сьӧрад мед мыноз. Ог-огдэс яратӥськоды ук - пиньёсты усьылыса, ымдуръёсты кисырмем картошка выллем луыса но ваче нюлӥськиськоды на. ПЕДОР (ӵынзэ палэнэ пельтыса). Мылкыд пересьмонлы уг сётскы уго, Анок. Ялан, егит дырез тодэ вайыса, инсьӧрын поръя на. АНОК. Оло, мон-а егит дырме тодам уг ваиськы? Дудай Тараслэсь мыйыкеныз бичатыса чупамзэ тодам ваисько ке, ымдуръёсы али но кужекъяны кутско, бам чокчороосы пӧсекто, ява! ПЕДОР. Озьыен, Тарас нырысь чупаз? Нош мон бызьыкуд нецелованная, дыр, кожасько на вал. АНОК (мыняса). Шедьтэмед не-сэ-ло-ван-на-ез! Мыняк потыса, гаӵолӥн усёд. ПЕДОР (папироссэ гур пала сэрпалтыса). Оло, Тарас гольык мугорыныд но мусояськыны вутскиз? Ассэ арганчи кожаса, ӝытлы быдэ мукет нылъёслэсь йырзэс ас палаз берыкъяз, пуны лул. АНОК. Тон азьын Тарасэн сьӧлыкмы ӧвӧл, Педор. Ватытэк верано ке, Тарас мунчое но ӧтьылэ вал, куакъёс пӧлы но кыскалляз. Жаль: чидатски. Лопырскем мылкыдме вормыны йӧн шедьтӥ ик егит дыръям. ПЕДОР. Значит, Тарасэн но сьӧлыко вамыш лэсьтыны мылкыдыд кылиз? АНОК. Нош мон тынэсьтыд маин-о кулэс? А-а? Огазьын улыкумы но мукет кышноослэн дэрем сӧзулъёссы валлин костаськид ук ачид. Мыным лушкем учкыса сылоно вал шат тынад возьыттэмлыкед шоры? ПЕДОР (могаса). О-ло, ки-нэн ке цьӧ-лы-кад? АНОК. Кулоно муртлэсь кӧбераса уг улы ни, шараяло. Одӥг воргоронэз вӧзам кӧлытэме, мусояме вань. Тон ӵапак Олёнаед дорын кӧласькод вал со дыре. ПЕДОР (интыысьтыз тэтчыса). Кинэн-о? Вера али ик! АНОК. Нимзэ уг поттылы. Берло мар-о куара-ланга ӝутонэз на? Луэм - ортчем. Гумырмес валче ортчытӥмы ук. ПЕДОР. Оло, нылпиосмы но муртэн? АНОК. Азьвыл, лушкем уже шараяськоз шуыса, курдаса улӥ вал. Табере уг ваты ни: сопал дуннее кошкись муртлэсь мар-о кӧбералом? ПЕДОР. Значит... АНОК. Бен, значит. Геня пимы асьмелэн ӵошен "пӧрам" емышмы, нош Галя нылмы сярысь кызьы вераны уг тодӥськы. Со воргоронэз мусояме бере, секыто кариськи вал. Кин тодэм, оло, ачид ик йӧндырид, дыр. Олёна дорысь вуыса, мон вӧзы но выдылӥськод вал куддыр. ПЕДОР (пыкъяськон бодызэ кияз басьтыса). Ах, тон, бызьылӥсь пуны! (Кузпалзэ уйылыны кутске. Анок отчы-татчы бызьылэ.) Йырад бодыен кокало, уй бубыли. Иське, мон мурт нылпиез сюдӥ-вордӥ? АНОК. Тон огнад сюдӥд шат? Мон но ужатэк ӧй улы. Эшшо ке мытылыны дӥсьтэ, зын кечтака! Корка пуштӥ ог-огзэс уйылыса бызьыло. Анок миндэрен лэзьыны но вутске. Соку ӝогак кияз басьтэ гур вӧзысь ухватэз. АНОК (ухват урдыса). Ог вамышлы гинэ дорам матэкты - ӝуштэ соку ик кыре потто, ява. Эшшо ке монэ пыкылыны дӥсьтэ, му ньылон люкет! Ач-ач-ач! Ма, кыӵе-сыӵе возьыттэм адями тон? ПЕДОР (бодызэ урдыса). Кулон нуналам ке но тышкало. От, вузаськись лул! АНОК (лек). Эн матэкты - йырдэ пилё! Гумырам кышкатыса, сантэмаса возид. Табере уд ни кышкаты. Вӧзам лыктӥд ке, ӝыт дас час тырмытэк ик лулдэ адэ келяло. ПЕДОР (бодызэ йыг! куштэ но пукон вылэ лэзиське). Уть ай, кыӵе адямиен ӵош ортчытӥськем ас шудтэм гумырме?! Эх, каръян лул-сюлэмы. Кыез ук, кыез вӧзам шунтӥськем. (Бутылкаысь аракы лэзьыса юэ.) Коть малы-о Галя сярысь поттылӥд? Тодытэк ас нылы шуыса ик берпуметӥзэ мед шокчом вылэм. АНОК (ӝӧк доры матэктыса). Лэзь ай мыным но аракы. Чырты выжые ик кӧсаз. ПЕДОР (тыро чарка сётыса). Ю. Та аракыез юыса, сьӧлыкеныд ӵош ик мед ӵоксузёд! АНОК (гулькак юыса). Мон малы-о ӵоксузём? Тон та курыт вуэз Кам шур вуэз мында юид ни - ӧд ӵоксузьы. Мон юон-сиёнъёс, шулдыръяськонъёс дыръя гинэ веръясько. ПЕДОР. Нош туннэ кыӵе юондыр? АНОК. Тонэ сопал дуннее келян. ПЕДОР. От, едрёна-феня! Вераны кыл но шедьтэ. (Педор йыр бордаз кырмиськыса, малпаськыса пуке.) АНОК. Ай таӵе кузпалэн гумыр каремедлы шумпо. Кулэмед бере но шайвылдэ уг аналты. Вуыло. Аракы но вутто, пузасьтэм куреге ке луиз, сое но вандо. Жаль ӧвӧл. Только монэ гинэ эн иса. Берло аръёсме ке но каньылак шокчыса мед улом. ПЕДОР. Анок, ветлы ай сельсоветэ. Секретарьзы, Мария Осиповна, мед вуылоз дорамы. Кулон азям завещание гожтыса кельтыны кулэ. Сберкнижкаысь уксёме но кинлэн ке нимаз кӧчыроно вал. Ветлы. АНОК (интыысьтыз султыса но синучконэтӥ учкыса). Кулэ бере - ветло. Кулоно муртлэсь куриськонзэ кызьы-о быдэстытэк? (Ӧс пала вамыштыса.) Курыт вудэ эн юы ни. Мария Осиповна документъёссэ кудӟем адямиен ӵош гожъялоз шат? (Потыса кошке.) ПЕДОР (бӧрсяз учкыса). От шу, а? Оскы солы. Зэм вераллям: кышномуртлы но думетысь валлы эн оскы. (Интыысьтыз султэ но, кырӟан нёжъяса, солань-талань ветлэ.) Из но: му но пилиське но, Адямилы чидано... Сьӧдо-сьӧдо пилемъёс но Васько, васько Кам кузя... Гужем ортчиз, сӥзьыл вуиз, Туриос но кошкизы. Ой, мемие, ой, дядие, Ми но озьы ик кошком... Пыре Тарас. Со таза мугоро. Чылкыт дӥсяськемын. ТАРАС (кизэ сётыса). Ӟечбур, Педор. Висиськод шуыса верамзэс кылӥ но дорад кожано кари ай. Утёд ке, огшоры кыл вӧлдо вылэм. Висисьсы, артист музэн, кырӟаса пуке. Вот оскы адями кыллы. ПЕДОР (киыныз шонтыса). Эй, ла. Сюлэм сэректэмысь нёжъясько вал. (Пукон ӵектыса.) Пуксьы, Тарас. Куспамы туж ик эшъяськыса ӧм улэ ке но, пыремед. Тау. ТАРАС (пукон вылэ интыяськыса). Малы озьы шуиськод, Педор? Юнме шорысь ӧм но керетылэ, ваче ӧм но гадьяськылэ кадь. Зэм, ачид, курытсэ веръяллякуд, кырыж куттэ кутчалляськод вал. ПЕДОР. Анокеным вожалляй ук, лешак басьтон. Нош со воксё мукет муртэн юмшам вылэм. Тонэн чупаськи гинэ, пе. ТАРАС (пальпотыса). Олома лабыртӥськод - Анок гурт калык син азьын ук. Кинэн юмшалоз со? Кузпалыд, кылчин выллем, сьӧлыктэм адями. ПЕДОР. Э-э, озьы эн шу, бускель. Шыпыт тыметын, пе, шайтанъёс трос кузя уло. Кузпалэ туннэ мыным вань сьӧлыкъёссэ шараяз. Кулон азям, пе, верасько. ТАРАС. Кыӵе кулон сярысь кылпум ӝутӥськод? Али гинэ кырӟаськод вал ук! ПЕДОР. Куректон, кайгу но кырӟатэ, Тарас. ТАРАС. Соиз озьы. Шонер вераськод. ПЕДОР (чаркае аракы лэзьяса). Берпуметӥзэ ӵошен юом ай, бускель. Бератаз кисьтон дыръя я шайгу вӧзам гинэ юылод ни. ТАРАС (чарказэ палэнтыса). Уг юиськы ни мон та шакшы вуэз, бускель. Куинетӥ арзэ. ПЕДОР. Святое гожтӥськид, иське? Святой Тарас, значит? ТАРАС. Малы-о святой? Юи ас дыраз, табере ӧжытак шутэтскыны кулэ. ПЕДОР (чарказэ кымалтыса). Тормоздэ куштыры быгатэм бере - умой. Нош монэ вордскеме бере ик аракыен вӧсяллям, кулэме бере но аракыен мед вӧсялозы. (Папироссэ аратыса.) Уд но ӵындӥськы ни, оло? ТАРАС. Витетӥ арзэ. Азьвылгес куштоно вылэм - ӧй тыршы. ПЕДОР. Тон, зэмзэ но, святой кариськемед. Кема улыны малпаськод, вылды. ТАРАС. Инмарен висъям арлыдме пумозяз уло ни. Отӥзэ кин тодэм? ПЕДОР. Мынам тыныд одӥг куриськонэ вань. ТАРАС. Вера. ПЕДОР. Мон кулэм бере, Анок маке-маке юрттӥськыны ке но ӧтиз, эн ветлы ми доры. Мукет муртэ мед ӧтчалоз. Вожасько мон тонэ ас кузпалэным. Дораз ветлэмдэ тодӥ ке, коросам берытско, ява. ТАРАС (серектыса). Азьвыл шузи кожасько вал мон тонэ, пересьмемед бере но визьмыд йылымтэ, шӧдске. Егит дыръя чупаськеммы понна вожаськод шат? ПЕДОР (папироссэ кысыса). Тон эн серекъя: мон шудыса уг вераськиськы. Нош кулэме бере корос лэсьтыны лыкты. Ачим татын дыръя, номыр уд дауртэ, кожасько. ТАРАС (интыысьтыз султыса). Дорад кенешо, верасько шуыса кожи вал. Нош тон тӧдьызэ сьӧдмаса пукиськод. Тынад арлыдад кыӵе вожан луыны кулэ на? Бен, мон но сьӧлыктэм адями ӧвӧл: нылъёсты ас вакытаз чупалляй. ПЕДОР. Вот, вот. Мынам Аноке, тонэ пумита ке, синъёссэ соку ик кырмышъяны кутске. Мон синтэм ӧвӧл, ваньзэ адӟисько, шӧдӥсько. ТАРАС (ӧс пала вамыштыса). Эн висьы, бускель. Йӧнатскы. Нош Аноктэ монэн эн вожа. Егит дыръязы вӧсясь Очанэн мусояськылӥзы кадь соос. Очанлэсь юа. (Потыса кошке.) ПЕДОР. Лулылэсь потэмзэ возьмаса ветлэ ни, кырныж! Синъёсылэсь кыниськемзэс но уг витьы. Анокен вераськыса пуко кожаз, дыр. (Час шоры учкыса.) Час тиккетэ но тиккетэ. Ма, кытын ӝега та Анок? Очанэн лабырто ке шат? Тарас но вераз ук: егит дыръяз, пе, Очанэн мусояськиз, шуо. Оло, нылмы, зэмзэ но, Очанлэн меда? Эх, лулпыжет, Анок. Быжтэм ӟичы! (Интыысьтыз султыса, кырӟаса ветлэ.) Тон но пинал вал, Мон но пинал вал, Марлы тонэн пумиськи? Тон но чебер вал, Мон но чебер вал, Марлы тонэ яратӥ? (Валес палаз матэктыса.) Я, ӧжытак шутэтско ай. Мария осиповна вуытозь, ӟеч-ӟеч шутэтскыны, ваньмыз сярысь малпаськыны кулэ. КАТАНЧИ КУИНЕТӤ СУРЕД Отын ик. Педор валес вылын кылле. Юн умме усем, шӧдске. Пыро Анок но Мария Осиповна. Секретарьлэн кияз сумка. Отысь кыӵе ке книга-журналлэн йылыз адскыса улэ. МАРИЯ ОСИПОВНА. Кыӵе улон-вылонъёс? Ӟечбуресь, Педор агай! АНОК. Умме усем, лэся. Али ик сайкато. Интыяськы, Мария Осиповна. (Койка вӧзы лыктэ но Педорез пельпумтӥз выретэ.) Педор, султы ай, султы. Умме усид шат? Мария осиповна лыктӥз тон доры. ПЕДОР (мазэ-созэ валатэк кадь). Кулӥ-а мон, ӧй-а? АНОК. Ач-ач-ач! Визьмыд сураськиз-а, мар-а? Кулэм муртлэсь вераськемзэ кылэме ӧй вал на. ПЕДОР (валес вылаз пуксе но синъёссэ кимышкыныз зыра). Лул басьтыны куинь ӵошен лыкто, шуо вал ук. Тӥ кыкнады шат? АНОК. Кулонэн уйбыртыса, воксё огпалмиз ни. Сельсоветысь Мария Осиповна лыктӥз, шуисько. ПЕДОР (серектыса). От, едрёна-феня! Анок кылчин куараен вазиз но, воксё шулӟектӥ вал. Неужто рае сюрес дасяло? От, шу, а? АНОК. Мын ӝӧк вӧзы. Верано кылъёстэ вера, гожъянозэ - гожъяты. МАРИЯ ОСИПОВНА. Чебер вӧтъёстэс таркамы лэся, Педор агай. ПЕДОР (киыныз шонтыса). Выдэм вал - умме усиськем. Та сямен, кулэмез но шӧдытэк- валатэк кылёд. (Пукон вылэ интыяськыса.) Ӝог лыктӥды тӥ, Мария Осиповна. МАРИЯ ОСИПОВНА. Ужмы сыӵе уго. Ӧтисез доры лыктоно, уллясез дорысь кошконо. ПЕДОР. Анок вераз ни, дыр. Кулыны дасяськисько, Мария Осиповна. Инӧс усьтӥськон азьын берпуметӥ минутъёсме векасько ни. АНОК. Уд кулы ай, уд. Ымнырыд но кисьмам помидор кадь ӵыжыт, куараед но черк гырлы выллем. Ай ветлыкуд пыд улад выжпулъёс ӟукыр! каро. МАРИЯ ОСИПОВНА. Висьытэк нокин уг улы, Педор агай. Йӧнатскоды ӝоген. Ма муген ӧтиды вал? Асьмеос завещание гожтӥмы ни ук. ПЕДОР. Кулэмелэсь азьло кык ужпумез йылаз-пумаз вуттоно вал. МАРИЯ ОСИПОВНА (ручказэ поттыса). Кылзӥсько. Мар гожтоно? ПЕДОР. Завещание шуонам тупатонъёс пыртытэк, амалы ӧвӧл. Галина нылылы гожтэм машинаез ӵушы но пимылы гожты. АНОК (кушетскыса). Ач-ач-ач! Мар лабыртӥськод тон, шузи? Генямы ачиз ӵыжак выль машина басьтӥз ук. Малы солы тынад колхоз уробоед? ПЕДОР. Тупатъян ёзъёслы яралоз. Мон машинаме ужатэк ӧй басьты. (Киоссэ урдыса.) Тани, та киосы пульдытозь, тӥрен лусйиськи, кораськи. АНОК. Мон ужатэк пуки, оло? Фермаын мугорме сисьтӥ. Ӵош ужаса поттэм коньдонэн люкамын асьмелэн ваньбурмы. Озьыен, тон огнад гинэ кузё кариськыны уд быгатӥськы. МАРИЯ ОСИПОВНА. Анна кенак шонер вера. Тӥ кыкнады ик та ваньбурдылы одӥг кузё луиськоды. Сберкнижкае ас нимыныды тырем коньдонды вань ке, таиз мукет вераськон. ПЕДОР (йыртышсэ кормыштыса). Озьыен, мынам малпамея уг пӧрмы? МАРИЯ ОСИПОВНА. Уг, Педор агай. Куриськонэд законлэн букваосызлы уг тупа. ПЕДОР. Соку та ужпумез ик мукет палтӥз кутскыса учком. Пыдъёстӥз ӧвӧл, йыртӥз кутыса эскером. (Кузпалэз пала берытскыса.) Анок! Вӧзам лыктыса интыяськы ай. АНОК. Вера. Мон татысен но кылӥсько. ПЕДОР. Вӧзам пуксьы. АНОК. Ач-ач-ач! Монтэк ог минут но улэмед уг луы, лэся. (Дораз матэктыса.) Кылзӥсько. ПЕДОР. Мария Осиповна, мынам нимыным калык судэ куриськон гожты ай. Кузпалэным Анна Сергеевна Бабушкинаен ӵош гожтыса юнматэм семья кусыпмес люкыны курисько, шу. АНОК (интыяз тэтчыса). Ач-ач-ач! Ма дауртӥськод тон, Педор? Та вамыштэ гуртоос гинэ ӧвӧл, ӟазег-курегъёс но кылыса котканы кутскозы ук. Вот, тамаша! Вот, гоно бам! Вот, эгырӟем ӝуш! ПЕДОР. Гожъя, Мария Осиповна, гожъя. МАРИЯ ОСИПОВНА (ручказэ кияз басьтыса). Паймод но бырод! Ма, кыӵе пыӵ куртчиз тӥледыз, Педор агай? АНОК. Ач-ач-ач! Ӝыны гумыр огазьын улыса, ог валесын ӵош кӧласа, ог ӝӧк сьӧрын сиськыса но адямилэсь кыӵезэ ӧй тоды. Ой, Инмаре-Куазе! Улӥд-вылӥд ке, таӵезэ но адӟод вылэм. Ымныр пыжон ук та, ымныр пыжон! МАРИЯ ОСИПОВНА (гожъянзэ куспетӥ карыса). Кузпалъёс таӵе куриськон гожтыку, люкиськемлэсь мугзэ шараяны кулэ. Тынад таӵе мыддорин вамышед кыӵе муген валче кылдэмын, Педор агай? ПЕДОР (киыныз шонтыса). Умой адямилэсь ӟечлыксэ вераса уд быдты, уродэзлэсь - йӧнтэмзэ. Мугез одӥг гинэ: оскымон кузпал ӧвӧл Анок. Юмшась кышномурт со. МАРИЯ ОСИПОВНА (паймыса). Ма-ар? Гуртысь кинлэсь кылод таӵе кылъёсты? Анна кенак лачмытэныз, адямилыкеныз ушъямон ук. АНОК. Ач-ач-ач! Сурон бам тон, Педор. Ма, кызьы тонэ музъем ас вылаз нуллӥз, шунды ас тылсиосыныз шунтӥз, ошмес чылкыт вуэныз люктаз-сектаз меда? ПЕДОР. Туннэ ачиз янгышен вераны шедьтӥз. Галя нылмы мукет воргоронэн, пе, шедьтэмын. Таӵезэ чидалоз шат воргорон сюлэм? Али но дорамы пырем котькуд воргоронлы синъёссэ кырмышъян сямызлэсь ӧз куштӥськы на. АНОК (айшет сӧзулзэ син пумаз вуттыса). Ма, Педор, сое но ӧд вала шат? Ачид котьку азьвыл дусымъёсыныд ушъяськемысьтыд, сыӵезэ верано кариськи ук. Азьпалан ушъяськонтэм, йыртышкад зырен шуккем кадь медло кожасько вал. Зэм вераллям: бодылэн пумыз кык. Берытскыса асламаз ик шуккиз. От, ымныр пыжон! ПЕДОР. Я, я, кылчин кариськыны эн туртты. Тынад сьӧлыкъёсыд сярысь Дудай Тарас но мадьыса кошкиз ай. МАРИЯ ОСИПОВНА. Тарас агайлэсь маскаръяськон сямзэ уд тодӥськы, оло? Шудыса- серекъяса озьы ивортӥз, дыр. ПЕДОР. Котьма ке но, мынэсьтым куриськонме быдэсты, Мария Осиповна. Чылкыт лулын мед кошком сопал дуннее. Анок оген кышномурт луыса мед кылёз. АНОК (пукон вылэ ланьыраса). Ач-ач-ач! Син азям ӵуж-вож кульчоос берганы кутскизы. МАРИЯ ОСИПОВНА. Ву сётом-а, Анна кенак? АНОК. Вуэн кысод шат лопырскем вожпотонэз? Кулэ ӧвӧл. Лулыд чальгес мед потысал ни. Эсьмаса, калыклэсь лушкемен тэтчаса эктысал. ПЕДОР. Вот, едрёна-феня! Шонер адӟиськем вӧтам. Кисьтон дыръя огнад тэтчаса эктӥд, шуи вал ук. МАРИЯ ОСИПОВНА. Мыным гожтӥськемды сярысь свидетельстводэс ваелэ ай. ПЕДОР. Кыӵе-сыӵе документ эшшо? МАРИЯ ОСИПОВНА. Кузпалъяськыкуды семьядэс юнматэм сярысь гожтэт. АНОК. Ма, ми гожтӥськыны, али сямен, сельсоветэ ӧм ветлэ ук. ПЕДОР (йырзэ кокаса). Бен, ӧм ветлэ. Анок шонер вера. Сюанмес шудӥм, берло ни нылпиосмы вордскизы. Соин йырин вал шат? МАРИЯ ОСИПОВНА (журналзэ бугыръяса). Зэмзэ но, тӥляд семья кусыпты гожтыса юнматэмын ӧвӧл на. Озьы бере, тӥледлы люкиськон сярысь куриськон гожтонэз но ӧвӧл. Тӥ кузпалъёс ӧвӧл на. Огшоры ӵошен улӥсьёс нимаськиськоды. Педорен Анок интыысьтызы огӵош тэтчо. ПЕДОР. Кызьы озьы? АНОК. Нош нылпиосмы? Ӵошен ӝыны гумыр улэммы лыдэ уг басьтӥськы шат? ПЕДОР. Нош гурт калык? Шат соос уг тодо, ми кузпалъёс луиськом шуыса? МАРИЯ ОСИПОВНА (бумагаоссэ сумкаяз тырыса). Ӧвӧл, ӧвӧл. Тӥляд ӵошен улэмды законлэн букваосызлы уг тупа. Кузпалъёс ӧвӧл на тӥ. Огды - бызьымтэ нылмурт, мукетты - казакпи. АНОК (Педор пала матэктыса). Педор! Ма, мар улон та? Малы тазьы сантэмало? ПЕДОР (пумитаз вамыштыса). Эн куректы, Анок. Ваньзэ чидалом, вормом. Ваче ӟыгырско. МАРИЯ ОСИПОВНА (ӧс пала вамыштыса). Я, ӟеч улэ. Сӧл-таза, ваче тупаса. (Потыса кошке.) АНОК. Мусое тон мынам, казак воргоронэ! Ойдо, егитъёс сямен, загсэ ветлыса гожтӥськом. Мед пиштозы льӧльмыт сяськаос, ворекъялозы зарни зундэсъёс, мед шукыяськоз шампань вина. Мон дӥсяло тӧдьы буртчин дэрем, тон - сьӧд костюмен, галстукен... ПЕДОР. Озьы ум дауртэ, муспотонэ, егит нылмуртэ! Туннэ вӧсясь Очан дорамы лыктӥз ке, венчать карытом. Инмар пыр мед герӟалоз асьмеды. Малы кулэ бумага? Чаль вӧзам, тутыгыше! Ваче ӟыгырско. Педор Аноклэсь бамзэ ик чупа. КАТАНЧИ НЬЫЛЕТӤ СУРЕД Отын ик. Ӝӧк выл тыр сиён-юон пуктылэмын. Анок ӝӧк котыртӥ берга. Галяен Геня анай-атайзылэсь ӵош пуксем тусбуйзэс учкыса сыло. Очан кияз вӧсь книгаен. Дугдылытэк бугыръя со, ас понназ маке сипыртэ. Тарас палэнэгес пуксем, вераськонэ туж ик уг пыриськы. Олёна ӵемысь час шоры учкылэ. Дырын-дырын, Педор доры лыктыса, сое кунояны тырше: я сиён удэ, я аракы вуттэ. Педор валес вылын чус кылле. Оло малпаське, оло мукет - тодмо ӧвӧл. ГАЛЯ (туспуктэм шоры учкыса). Уть ай, кыӵе мусоесь вылӥллям анаен атай егит дыръязы, Геня. Парен дыдыкъёс кадь пуко. Мынам ныры но синъёсы атайлэн кадь, йырсие гинэ - анайлэн. ГЕНЯ. Тусбуй бордын шат ужпум, Галя? Мугорысь вир шӧдытэ матысь адямидэ. Та нуналъёсы сюлэмы маке писыраса улӥз вал. Азьвыл ик шӧдэм. Ӵапак, атаймы висе шуыса, телеграмма вуиз. ГАЛЯ. Эн но вера. Лыдӟисько, бӧрдӥсько ачим но. Ки-пыдъёсы ик юскиськизы. Уж дорам но ӧй ветлы ни, жингыртыса гинэ ивортӥ. Атайлэсь радикулитэн висемзэ тодысал ке, тылпу кысонэ сямен дыртысал шат? Анаен атай воксё абдраллям, эсьмаса, кисьтонлы дасяськиллям ни. Мон, татчыозь улыса, кус ошконэн висисьёслэсь кулэмзэс ӧй кылылы на кадь. ГЕНЯ. Ваньмыз тупатскоз. Ачим врач-терапевт бере, бертэмен валче атайлэсь тазалыксэ эскери ни. Секыт уж но пӧсямез бере кырын пукон ас черзэс кузьмаллям. АНОК. Воксё кулыны дасяськиз уго. Вӧтьёсын сэрен визьзэ ыштӥз. Мон но уд кулы ай, шуисько. Бамаз тэшкыльтӥд ке, вир пызъёз ук! Ӵыж-ӵыж. ОЛЁНА. Мон Педорлэн кушказ мушъёшты лекатылӥ ук. Шолэн но пайдаез шӧдӥськиз, дыр. АНОК (керӟег). Тынад ӟечед вераса-лыдъяса быдтонтэм ни, Олёна. Ма карысал меда мон тонтэк? ОЛЁНА (жальмыт куараен). Тямыш мушъёшме арамтӥ ук. Шоош лексемзы бере ик чоньдо, албаштыош. Жаль но, ма карод ни? АНОК. Ач-ач-ач! Тямыс мушъёсыд понна, оло, дун куриськод? Мон сыӵе эмъяськон йылолэз ке тодысал, Педорлэн кусказ майсыез лекатысал ай. Солэн ядэз тросгес ,луоз. ГЕНЯ. Олёна кенак ӟеч лэсьтэм, анай. Калык эмъяськонын муш лекатон туж ӵем кутӥське. ОЛЁНА (пальпотыса). Тау ӟеч кылыдлы, Гени. Мон огшоры ӧй даурты уго. Нырысь аш мугорам эшкери. АНОК. Ез юболы куар потытозь ушъяськод ни табере, Олён. Кызьпу пучыез водкаын возем настойкаен зыраськод ке, эшшо но юрттэ. Мон, кускыным тэльмырыку, озьы эмъяськи. ГАЛЯ. Нош атайлы сыӵе эмъюм дасямед ӧз лу шат? АНОК. Атаед аракыез кызьпу пучытэк но зол лобытъя. ОЛЁНА. Висьыку аракы туж юрттэ. Няньлэн вӧйыз ук шо. Шоин котькыӵе через вормыны луэ, шуо. ШПИД шуонзы гинэ уг сётшкы, лэся. ГЕНЯ. СПИД-лэсь эмъяськыны эмъюм ӧз шедьтэ на, Олёна кенак. Ма, со арлыдоослы кышкыт ӧвӧл. Адямиос гольык мугорынызы мусояськыку гинэ палаське. АНОК. Ач-ач-ач! Азьвыл сое куртчаньги шуозы вал. Оло, нимзэ воштӥзы ни? ГЕНЯ. Ӧвӧл, анай, ӧвӧл. Куртчаньги ӟуч сямен сифилис нимаське. Таиз воксё мукет чер. ОЛЁНА (кушетскыса). Шо ШПИД шуонды чупаськыку уг пала-а? Туннэ янгышен Педорез чупаны шедьтӥ вал. ТАРАС (мыняса). Вот, капканэ шедид, Олёна. Табере кема улытэк чоньдод ни. Мушъёсыд но уз юрттэ. ОЛЁНА (интыысьтыз тэтчыса). Зэм-а вераськод, Тарас? ГАЛЯ (серектыса). Мар кышкатскид, Олёна кенак? Синъёсыд ик кымысад выжизы кадь. Атай СПИД-эн уг висьы ук. ОЛЁНА (берен пуксьыса). Фу, шайтан! Ки-пыдъёшы ик шальтыразы. Ареш вань ке но, югыт дуннелэсь люкиськем уг поты на. ПЕДОР (йырзэ ӝутыса). Кӧня час? Час дугдӥз, оло? Куараез ик уг кылӥськы кадь. АНОК. Укмыс но ӝыны. Султы ай, сиськы коть. Пимылэсь, нылмылэсь ваем саламъёссэс веръя. ПЕДОР (мылпотытэк). Кулон азяз кин-о сиське? Эсьмаса, сюсьтыл ӝуатэ вал. Оло, лулы капчигес кельтоз сьӧлыко мугорме? Тон но, Очан, синмо мырык кадь пукиськод. ОЛЁНА (чаркае аракы лэзьыса, сое вареньяен сура но Педорлы вайыса удэ). Ю, Педи. Ым пушкыд кӧшаз ни, дыр. Лул потон азьын юэм потэ, шуо. ПЕДОР (чарказэ кымалтыса). Тау, Олён. Тон гинэ мон сярысь сюлмаськиськод. ОЧАН (сюсьтыл ӝуатыса, ӝӧк пуме пуктэ). Я, эшъёс, огшаплы шыпыт кариське ай. Висись мурт вӧзын олокыӵе черъёс но кулон эзель сярысь вераськыса пуконэз ӧвӧл. Сюсьтыл ӝуан дыръя, Педорлы но ас сьӧлыкъёссэ шараяны ярасал, вылды. Сыӵе дыръя лул- мылкыд ик капчия. ПЕДОР. Матэгес пуксьы, Очан. Юалляськы, вӧсяськы. Инӧс усьтӥськон азелы лулы мед чылкытаськоз. Ваньзы интыясько, чус карисько. ОЧАН. Тон дась-а ас сьӧлыкъёстэ шараяны, Педор? ПЕДОР (йырзэ ӝутыса но час шоры учкыса). Ӝоггес юалляськы ни, Очан. Мар-ось гызмыльтыса около но моколо бергаськод? Едрёна-феня кадь адями тон - дас тырме ни угось. ОЧАН (гадь вылаз кирос поныса). Ымдурысьтыд ӟеч кылъёс мед бурдъяськозы, Педор. Олома мудрон эн лабырты: инсьӧр кузё сыӵеез уг яраты. (Педорлы матэгес интыяське но юалляськыны кутске.) Улон-вылон дыръя, матысь адямиосыдлы урод ужъёс лэсьтылӥд-а, Педор? ПЕДОР (лулӟыса). Луылӥз, дыр, Очан. Кушты, улля сьӧлыкъёсме. ОЧАН (Педор шоры кирос карыса но маке-маке шыпыртыса). Кинэн ке жугиськид-а? Оло, кинэ ке, урод кыл вераса, вӧсь карид? ПЕДОР. Мон тон кадь святой ӧвӧл. Луылӥз, дыр, Очан. ОЧАН (йырыныз шонаса). Ас кузпалэд луэм вылысь ӧд гожеръя-а мукет кышноос котыртӥ? Ӧд басьты-а мултэс сьӧлык? ПЕДОР (интыяз пуксьыса но кунэрес пальпотыса). Атас даслэсь трос курегъёсыз луэм вылысь но бускеляз бызьылэ. Мон но улэп лул ук. Сыӵе учыръёс ӧжыт ӧй вал. Уката ик ӧлёнаен мултэс мынчыръяськи. АНОК. Ач-ач-ач! Ма, таӵе луоз шат сьӧлыкед сярысь веран? Ымныр пыжон та! ОЛЁНА (чабкиськыса). Ошто, гошподи! Ма, возьыттэ, аракыен ӵош ньылӥд оло, Педор? Аш кушпалэд, нылпиошыд азьын олома лабыртӥськод ук! Исьтапанэ кылӥз ке, кыкнамешты но тышкалоз, ява! От, тамаша! ПЕДОР (мыняса). Луэмзэ верасько, Олён. Ӧвӧлзэ уг пӧлэстӥськы. АНОК. Ач-ач-ач! Ма, кызьы возе тӥледыз музъем? ОЧАН (вӧлдэтэ учкыса но киоссэ вӧлъяса). Ой, Инаре! Кушты Педорлэсь янгышен басьтэм сьӧлыкъёссэ. Тон сяна, сьӧлыктэмез нокин но ӧвӧл. ПЕДОР. Шонер вераськод, Очан. Ачид но сьӧлыктэм адями ӧвӧл вылэмед. Озьы но вӧсясь луыса ветлӥськод. ОЧАН (гадяз кирос тырыса). Утьы, Инмаре! Педор уг вера та кылъёсты, шайтан шыпыртэ. ПЕДОР. Кылчин эн кариськы, Очан. Мон сьӧрттэм ӧвӧл, тон Анокен кыштыртэмед ук. Нош мон, синмо юбо, номыре адӟытэк, номыре сактытэк улӥ. АНОК. Ач-ач-ач! Визьмыз сураське ни, лэся. (Час шоры учкыса.) Коть ӝоггес дас мед тырмысал ни. Кайгырысал, бӧрдысал но - ужез бырысал. ОЛЁНА. Улӥд-вылӥд ке, оломае но кылод вылэм. Нош мон Анокез ашшэ кияз возись, эшэпшэ валась кышномурт кожасько вал. От тебе, гошподи! (Гадяз кирос каре.) Одӥг пишпуысь емышъёш вылӥськеммы. ГАЛЯ (интыысьтыз султыса). Ма дауртӥськод, атай? Малы анайлэсь сюлэмзэ юнме шорысь вӧсь кариськод? ГЕНЯ. Кыӵе юн сямо воргорон вал тон, атай. Малы ас лябыттэ возьматӥськод? ОЧАН (могаса). Оло-маръёс супыль-тӥсь-код тон, шай-танэн вош-тэм адями. (Интыысьтыз султэ.) Кин-о сыӵезэ вераны шедьтӥз? ПЕДОР (Тарас шоры возьматыса). Иворчиез тӥни шып гинэ пальышаса пуке. ТАРАС. Бен, мон озьы шуи вал, Очан. Ас вожаменыз сюлэм пыдсам вуиз ни уго. Ас вужереныз но вожалоз ай. Егит дыръяз кин кинэ-о уг чупа? ОЛЁНА. Чупаськон - не проблема. Чупаськыку сюлэм золгес жугиськыны-йыгаськыны кутске. ГЕНЯ. Воксё пичиос кадь дауртӥськоды. Шорады учкисько но серемме мырдэм возисько. ГАЛЯ. Нош мон синвуосыным ӝоген ӵоксузё тани. Юнме керето ук. ПЕДОР. Озьыен, Тарас, тон серекъяса верад? Пинал дырысьсэ? ТАРАС. Конечно, бускель. Вожпотыса пӧсекъяменыд, кулон сярысь малпанъёстэ мед вунэтод кожай. ПЕДОР. Нош тон, Очан, ымад ву ӟузид ке шат? Малы чус пукиськод? ОЧАН (гадяз кирос карыса). Инмар азьын верасько: тон азьын сьӧлыке ӧвӧл. Нош егит дыръямы Анокен чупаськимы ке, соиз милям ужмы ни. Тӥ соку кузпалъяськемын ӧй вал на. АНОК. Истинно шонер вераськод, Очан. ПЕДОР (час шоры учкыса). Учке ай, час стрелка даслэсь ортчем ни ук! Вот, улон шу, а?! (Интыысьтыз тэтчыса.) Значит, улэп мон, улэп! Анок! Тырмытъя чаркаосты. Юоме ай тазалык понна, шудмы понна, ваньмы огинэ люкаськеммы понна! Ваньзы огыр-бугыр карисько. Ӝӧк сьӧры интыяськыса, чаркаоссэс жингырак! шуккыса юо. Педор кырӟан мытэ: Кытысен мон тонэн пумиськи, Кытысен мон тонэ яратӥ?.. Ваньзы юрттыны басьтӥсько: Ой, быдтӥз ук тынад чеберед, Ой, быдтӥз ук тынад сьӧд синмыд... Педор, Анокез ӟыгыртыса, луч-луч чупаны кутске. КАТАНЧИ. Кин кӧня йӧл кыске (10 апрельлы) Инты Район Кыскемын скаллы быдэ (кг) Ваньмыз кыскемын (ц) Скал уллёлэн йырыз (1.04.2000) 2000 1999 2000 1999 2000 1999 1. Вавож 9,9 9,5 514 489 5210 5154 2. Ува 9,6 10,1 748 780 7767 7713 3. Игра 9,6 9,4 375 360 3915 3810 4. Можга 9,0 9,0 836 832 9308 9291 5. Воткинск 8,8 9,1 549 600 6237 6623 6. Завьялово 8,5 8,4 628 648 7414 7737 7. Алнаш 8,1 7,1 514 463 6385 6482 8. Пичи Пурга 7,7 7,8 513 519 6659 6677 9. Шаркан 7,7 8,0 494 518 6413 6464 10. Дэбес 7,6 7,3 356 346 4654 4743 11. Як.-Бодья 7,5 8,0 175 184 2343 2289 12. Грахово 7,5 8,0 236 250 3133 3143 13. Балезино 7,2 6,8 622 604 8608 8865 14. Глазов 7,1 7,4 518 569 7330 7648 15. Кез 6,8 6,8 376 379 5522 5577 16. Юкаменск 6,8 7,4 349 376 5139 5093 17. Камбарка 6,4 6,7 42 50 660 747 18. Каракулино 6,0 7,3 220 258 3656 3656 19. Сарапул 5,8 6,8 443 497 7626 7305 20. Селта 5,5 6,9 206 257 3728 3727 21. Кизнер 4,9 6,5 198 267 4044 4135 22. Красногорск 4,8 5,5 178 205 3736 3722 23. Сюмси 4,8 7,1 83 116 1737 1630 24. Яр 4,7 5,6 237 299 5079 5319 25. Киясово 4,6 7,5 208 352 4486 4687 Республикая 7,4 7,7 9618 10218 130788 132137 Вылӥ верам лыдпусъёс умой возьмато скал кыскон удысысь югдурез. Кытын пудо сиёнзы тырмыт - отын ик трос йӧл кыско. Синмаськымон та ласянь Вавож район: скал йырзы но ар ӵоже йылӥз, котькинлэсь трос йӧл но кыско. Республикаысь ёросъёс пӧлын вавожъёс нырысетӥ интыын мыно, суткаяз скаллы быдэ, шорлыдын вераса, 9,9 килограмм йӧлзы люкаське. Миымлэсь ӟечгес ужало играос, алнашъёс, балезиноос. Соин ӵош йӧлзы кулэсмиз Воткинск, Як.-Бодья, Грахово, Глазов но куд-ог мукет районъёсын. Тросэз фермаос кылизы ни кӧс куро вылэ, жалем сиёнъёссы, фуражзы тулысозь быриз. Республикая оглом ке верано, кылем арын та вакытэ скаллы быдэ 7,7 килограмм ке йӧл кыскиськом вал, туэ - 7,4. Со шӧдӥськиз валовой продукция вылын но. Озьы ик сюрслэсь ятырлы кулэсмиз кысконо скалъёслэн лыдзы. Л.ДМИТРИЕВА. Витиськом шуныт гожтэтъёссэс Тазьы нимам ужрад ортчытӥз солдат анай-атайёсын Вуж Сальялась нылкышно огазеяськон. Чечен музъем вылын ожмаськонъёс мынэмен валче, солдат анай-атайёслэн но уно гинэ сюлмаськонъёссы. Та вакытэ сизьым пиос служить каро странамылэн пӧртэм сэрегъёсаз, со Сергей Беляев, Дмитрий Павлов, Владимир Петров, Юрий Григорьев, Александр Степанов, Виктор Антонов. Игорь Ермаков ожмаськиз Чечняын, али со госпитальын, нош Сергей Беляев служить каре Таджикистанын. Ужрадэ лыктэм егитъёс лыдӟизы кылбуръёс, кырӟазы-веразы, шудӥзы "Весёлые старты" шудонын. Люкаськемъёсты шулдыртӥзы аргачиос Юрий Митрянов но Сергей Григорьев. Чай юэм сяна, анай-атайёс ог-огенызы вераськизы. Ӝытэз радъясьёслы соос сюлмысьтызы тау каризы. Бӧрысь таӵе пумиськон ортчиз Киясаысь культура юртын но. Н. Михайлова. Кияса ёрос. Инкуазь суредъёс Возьма - мон берто Пичи дырысеным инкуазен ӵыдонтэм герӟаськи. Анай ӵемысь сьӧраз юлтошлы басьтылӥз. Борыё, эмезё, губиё интыостӥ олокӧня пол, вылды, ветлылӥмы, калгылӥмы. Инкуазь тырмыт усьтылӥз аслэсьтыз музъем узырлыксэ. Бадӟымгес луыса, ачим ини юлтошъёсме со емышо, губиё интыосын тодматылӥ. Ми, инкуазьлэн нылпиосыз нунал-лумбыт ышылӥм- выйылӥм инкуазь сэрегамы. Бадӟым, ӝокыт городын али уг чида сюлэмы. Тужгес но та шундыё, сяськаё, шулдыр гужем нуналъёсы. Чылкытгес омырен дыртӥсько шокчыны, пегӟисько городысьтым. Тани тон, гуртэ мынам! Туж дуно Тыловай палъёс, тодмо инкуазь суредъёс нош син азям усьтӥсько. Татын ук пинал дыры ортчиз, бызьылӥ но шудӥ, сяська, узы-боры октӥ, нырысьсэ синмаськи. Ватӥськем пытьыостӥм жадёнэз валатэк калгисько, вож, мамык турынын небытак погыльскисько. Ӟыгыртӥсько вордӥськем, муспотон музъемме. Та музъем вылын ужаське но капчи. Вож бакча будосъёсты сюлмысь ик утялтӥськод, мушъёсты эскериськод. Ма, ичи-а гуртын гужем вакытэ уж-пӧр. Уката но турын октон ке вуэ. Жонгетэ, жингыра, пӧсятэ, куасьтэ пӧсьтолэзь. Лекоме гурт ужгур. Я, мед пӧсялозы сюлэм но йыр-пыд! Ужаса нюлам ву пыр мугорысь мед кошкоз вань кырсез. Гылскиськод шунды сиосын кужмоятэм, шунам вуэн но выльдӥськиськод кадь - жадем но ыше-быре. Вакчиесь та гужем уйёс. Кӧлон дыр но кулэсме. Тани туннэ умме уг усиськы чик, уго туж шулдыр урамын. Арганчи баянзэ золтэ. Кыдёке чузъясько егитъёслэн жингырес куараоссы. Тодэ ваёнъёс нош каръясько сюлэмам. Нёжъясько ас поннам тодмо кырӟанысь чуръёсты: - Ой, шудо егит дыр, Пуксьы вал на вӧзам, Ну монэ ас дорад - Паймымон шаерад... Тӥни чоръяса выль нуналэн ӟечъяське ни атасмы. Пудо котырын выре атай. Гольык пыд потӥсько лысвуо нёжалэ, выисько, ышисько бус тӧдьы дуннее. Шуак пельпумам ӟыгырско вож куаръёс. Со пичи даурысьтым вунонтэм писпуосы - тӧдьы кызьпуэ но паськыт палэзьпуэ. Кыкназы ик витё, дыр, небытэсь киосме, кыкназы ик кылзо кырӟаса веранме. Кызьпулэн йырси пунэтаз керттӥсько чагыр чук, ныл дырме тодам вайыса. Палэзьпу вай вылэ ошисько сяська туг, анайлэсь та писпу сярысь кырӟанзэ нёжъяса. Бусэн, оло, тодэ ваёнэн небӟо синъёсы. Юзмыт омырысь мур шокчыса потӥсько. Бӧрсям бус но тӧлӟе. Шунды тылсиос музъемез, мугорме небытак ӵушалто. Дыртытэк тубӥсько гурт вӧзысьтым вырйылэ. Син азям вӧл-вӧл пуксе доре. Уллане, Ита шур вӧзы, гуртмылэн огез ваез - Улын Тыловай выжыяськемын. Мукетаз вырйылэ тубыса-тубыса ик жуммиськод вал. Оло, соин но, вылды, лябӟем, чигиськем гуртмылэн та ваез. Улӥсьёсыз кин кытчы пазьгиськиллям. Пичиесь урамъёс пӧртэм пала кожо. Ӝикытэсь пу коркаос, гурт шорысь ӝужытэсь вож-вож топольёс шоры кема учкисько. Ваньзэ сюлэмам пыртыса, нош бурдъяськыса лобо Ижевскам. Уло, ужало, пиналъёсме вордо. Оскисько, куке но пыраклы берытско дорысь инкуазь сэреге. С. ФЕДУЛОВА, Ижын улӥсь. Журналистъёсын пумиськонъёс Клементий Роговец: "Адямиез утён понна" Горький чугун сюреслэн Иж ёзэзлэн тӧроез Клементий Роговец - шаерамы тодмо кивалтӥсь. Миым со нюръяськиз Россиысь Кун Думае шедён понна. Клементий Антонович - Горький чугун сюрес вылын одӥгез бадӟым опытэн кивалтӥсь. Озьы ик солэн данэз пичи ӧвӧл МПС-ын. Валлян, 11-тӥ апреле, Клементий Роговец пумиськиз журналистъёсын. Татчы озьы ик пыриськизы Ижысь радиозаводлэн директорез Игорь Валиахметов но "Ижсталь" акционер огазеяськонлэн тӧроезлэн воштӥсез Геннадий Колесников. Пумиськонэ кык кивалтӥсьёс юнме шорысь ӧтьымтэ вал. Ижысь чугун сюрес юнэсь кусыпъёс возе ни "Ижсталь" АО-ен но Ижысь радиозаводэн. Нош со эшъяськон люконтэм герӟаськемын чугун сюрес вылын шудтэм учыръёсын нюръяськонэн но адямиосты утёнэн. Та ужез уката юнматӥз Московской областьын Бекасово станция дорысь чугун сюрес вылын 1998-тӥ арын шудтэм учыр. Отын 4 мурт бырыны шедиз. Мугез тодмо: пичи поездъёсы (соосты самоходкаос шуо), утиськонъя приборъёс пуктымтэ но светофорысь горд тылэз машинистлы чакланы секыт вал. Югдурез чакласа, адямиосты утёнъя МПС кун программа кутӥз. Соя вань самоходкаосы утиськонъя приборъёс пуктылэмын. Табере машинист горд тылэз ӧз ке адӟы, поездэз прибор дугдытэ. Таӵе визьмо приборъёс лэсьтэ Ижысь радиозавод. Солы заказ сётӥз Россиысь быдэс чугун сюрес. Нош асьмелэн ёзмы миым 50 сыӵе прибор басьтӥз, туэ 177 чакла. Одӥгез 150 сюрс манет ёрос сылэ. Предприятие но чугун сюрес сётэм кылзэс дыраз но ӟеч быдэсъяло: железнодорожникъёс сыӵе ик юнэсь кусыпъёс возё "Ижсталь" акционер огазеяськонэн. АО 70 процент продукцизэ чугун сюресэн келя но арлы быдэ 4 сюрс вагонъёс но 1 сюрс контейнеръёс кутэ. Одӥг куиньмосэз автотранспортэн кошке. Огазеяськон чугун сюреслы поттэ противоугонной устройствоос но туж ӟеч ёз. Таӵе ёз татын гинэ лэсьтӥське. Технологиез юн ӟеч но кык толэзь кыстӥське. Нош цехлэн кузьдалаез 1,5 иськем пала. Тӥни соин ик Горький чугун сюреслэн выль кивалтӥсез Хасьян Зябиров та кык предприятиосы ветлӥз, ужъёсынызы тодматскиз. - Ми но чугун сюреслы ичи ум юрттӥське, - пумиськонын шуиз Игорь Нариманович. - Предприятие МПС-лы поттэ пассажирской поездъёсын калыкез утёнъя прибор (КЛУБ), 1995- тӥ арын 2000 сыӵе арбери лэсьтӥм, нош миым - 1500. Соос самоходкаосы пуктылэмын. Туэ 3000 поттыны малпаськом. Соос туала выль амалъя поттӥсько, машинистлэн самой бадӟым но оскымон юрттӥсез луо. Со 40 градус кезьытэз но, сомында ик пӧсез но чида. Завод приборез лэсьтэ ӟечлыкъя дуннеын тупась сертификатъя. Игорь Валиахаметов озьы ик пусйиз, огинтыямы ум сылӥське, та приборез эшшо умоятӥськом, выль уъёсмы вань ни. Соосын та нуналъёсы, 19-тӥ-20-тӥ апреле тодматскозы чугун сюресысь технической кивалтӥсьёс. Заводын семинар-кенеш ортчоз. Огъя вераса, машинистлэн радиомодемез луоз, диспетчерен кусып возёз но сое ассэ адӟоз. Нош диспетчер син азяз возёз поездлэсь сюрессэ, кытӥ мынэмзэ. Пыӵалоз спутник пыр связь-кусып тупатон. Предприятие туэ 1,5 поллы тросгес приборъёс поттоз. Со сётэ ватсаса выль ужан интыос, бюджетэ уногес уксё вуэ. Ӵапак со сярысь сюлмаське Клементий Роговец. Чугун сюрес трос кутэ электрокужым но эстӥськон. Но Иж ёзэз со уг сюлэмшугъяськыты. Малы ке шуоно, сое быдэсъя МПС. Министерство пыр меӵак огъя тыронъёс пытсасько. Геннадий Романов. Юбилеен! 70 ар талэсь азьло 1-тӥ апреле Можга городын но ёросын улӥсьёслэн киязы нырысьсэ вуиз асьсэлэн "Социализме" газетсы. 4 ар улыса газетлэн нимыз воштӥськиз, луиз - "Ленинъя", эшшо 20 АР ортчыса - "Ленинской знамя". 1992-тӥ арысен газет потэ "Можгинские вести" но "Можга иворъёс" (ӟуч кылысь берыктэм) нимъёсын. Тани витетӥ арзэ ёросысь удмуртъёс нимаз газетсэс лыдӟо. Со потэ арняяз огпол - кӧс нуналэ, 450 экземплярен. Газетэз дасян бордын ужа 3 журналист: Ю.Н.Чернова, А.С.Пудова но М.С.Никитина. Ӟечкыласьком, эшъёс! Кызьы шуо сыӵе дыръя, пероды медаз ныжомы. Кужымды мед тырмоз мур бугыртыны но лэчыт гожтыны. М.КУЗЬМИН. ШӦКЫЧ Пӧяськон Ма гинэ уг малпало туала арын. Табере кыӵе ке тестирование шуонзэс шедьтӥллям. Тодытэк но кыльысал, дыр, таӵе цивилизация сярысь, но кузпалы ялан кӧтурдэсам мырӟылӥз: Олёш, Олексей, тыныд одно дышетсконо, та визьмыд юнме ӵакмыса кылле ук. Кылзӥськытэк ӧйлась: кузпал - со кузпал. Тӥни озьы ИжГТУ-э вуи. Нош отын - черод, самой со тестирование шуонзы дуре. Ярам, нюлэм йырсиен кузь куко апок пыр-поч валэктӥз: - Дышетскыны пырон понна экзаменъёстэ азьвыл ик сётэмед потэ ке - пожалуйста: гожты куриськон - заявление. Нимаз чаклам нуналэ дорамы лыктоды, дасям компьютер эскероз, дунъялоз тодон-валандэс. Одӥг экзамен сётон понна - 100 манет. Кыксэ экзамендэс таӵе амалэн сётыны малпады ке - пожалуйста - дуныз 200 манет, куиньзэ ке - куинь пол пожалуйста. Самой ӟечез: та оценкаосыныды мылкыд каремъя мукет вузэ но пырыны быгатоды - да коть Москвае мынэ! Малпаськи, чакласьки. Усто штука! - Ма, мон но визьмо штука. Ӟуч кылын шенгылясько бере, дай-ко, малпасько, Педор кумме сьӧрам куто. Со дышетскем адями, ӟуч сямен но пырак ӟучъёс кадь ик вераське. Юрттоз, уз пумитъяськы. Ӵошен мыном, тестирование шуоназы артэ пуксём. Собере гожтэм ужъёсынымы лушкемак воштӥськом. Солэн "витез" - мыным, лябезгес - солы. Зэм, Педорлы но куриськон гожтоно луоз. Эшшо 10 манет жӥльдӥськоз на. Ма карод, дышетскыны ӧй ке пыры, кышно вань йырвиымме сиыса быдтоз. Малпамын, лэсьтэмын. Э-э, ёк-макар! Одӥгзэ гинэ чакласькымтэмы. Экзаменмес сётыны пӧртэм ӝӧкъёс сьӧры гинэ ке луысал, пӧртэм аудиториосы интыязы. Ӟуч кылъя озьы ик - пас! кылиз. Со понна Педор кыкетӥ вылӥ образование басьтэ ини. Э.КУМАЧЕВА. Дас ар бичам "марӟан" Шаерысьтымы фольклор кырӟанъя "Айкай" театр 14-тӥ апреле пусъе аслэсьтыз дас арессэ. Туннэ "Металлург" дворецын бадӟым концертсы луоз. Кыӵеен адӟомы яратоно артистъёсмес сцена вылысь? Мар вылез вань соослэн дӥськутсы ласянь? Та сярысь вера театрысь усточи (со ик кырӟась но, суредась но, куиськись но) Петр ДАНИЛОВ. - Милям балтась удмуртъёсмы кемалась юало ни вал, ку асьме пал дӥсьёсын потоды шуыса (ми Геннадий Кузнецовен Татарстанысь Балтаси ёросысь). Дас арзэ ик малпай ни вал ачим но та сярысь. Табере, адӟиськоды, дӥсьёсмы дасесь: дасэз - нылкышноослэн, укмысэз - пиосъёслэн. Уксёен-весен чеберманъёс но тани тыбыръёсазы бырттыло. Зэм ик но, синучкон азьын вожмаськыса кадь мертало ни дӥсьёссэс "айкайёсыд". Нылкышноослэн кильымо дэремъёссы сьӧд камзолэн ӝикытатэмын, кудӥз ашъя (айшон), сюлык йыраз понэм на. Пиос пеймыт-горд дукесъёсын гожеръяло... - Музейысь но, асьме пересьёслэсь но учкыса, котькуд сӥньыссэ лыдъяса тазьы куимы, - гордэн-тӧдьыен-сьӧдэн кечато айшетъёссэс возьматэ Петр Павлович. - Таиз нэнэелэн кадь, таиз тожо милям гуртысь... Та лентаос но ваньмыз милям кадь, пасьталазэ, туссэ чакласа вурӟылэмын. Дэремлы басма магазинысь но шедьтыны луысал, дыр, но мыным потэ: со зэмос мед луоз. (Вераны кулэ: ваньмыз куэм-вурем дӥсьёс - аслаз Петр Даниловлэн, кузпалызлэн Ириналэн, варманаезлэн Светлана Александровна Ашихминалэн но вуриськисьлэн Наталья Борисовна Сергеевалэн киужъёссы. Кылем гужем дырысен куыса дасяллям басьмаоссэс.) Нош огъя вераса, котькуд концертлы - куинь пӧртэм дӥсьмы. Ӝуткам айшетъёсын, дэремъёсын - лымшор удмурт, тӧдьы дэремъёсын - уй пал, бавлы удмурт, бесерман кариськыса потӥськом. Театр бере театр: татын котькудӥз кырӟась, шудӥсь син азе йӧтыны кулэ ас манерыныз-тусыныз. Дӥськут - адямилэн лул синучконэз кадь. Нош пуштросэз - нырысь ик кырӟанъёс бордын, дыр. Кыӵе меда гуръёсын бордаз кыскоз та ӝытэ "Айкай"? Со сярысь вера коллективлэн кивалтӥсез Евгений СЕРЕБРЕННИКОВ. - Дасямы ӵыж выль сюита. Бавлы удмуртъёслэсь кык кырӟан но эктон гожтӥм вал, соослэсь адӟем кырыса пуктӥм Айкай сярысь мадён но, ниммы но отысь потэмын уго. "Йӧ келян" композицимы вань. "Туно вӧт" - вылез, философской пуштросо, дауръёсыз герӟась. Тае дасяны юрттӥз Андрей Багор (Поздеев). Дас ар бичам "марӟанъёсмес" но поттӥськом. "Айкай" сузьетмы тани туж кельше адямиослы, кунгож сьӧрын но умой пумитало. Пичи спектакль выллем со. Быдӟым Вормонлэн юбилеезлы рекрут гуръёсмы вань. Та сюитамы самой нырысез вал. Отын вашкала кырӟанъёс. Армие кошкись пилэсь кырӟанзэ - "Сьӧд нюлэстӥ..." - Васса Виноградова кузьмаз вал. Сое Геннадий Кузнецовен кырӟаськом. Удмуртиысь кун премилэн лауреатэз фольклор кырӟанъя "Айкай" театр - сюанын кадь шулдыр вакытаз вуэмын. Отын кырӟало но экто Россиысь дано артистъёс Михаил Ворончихин, Геннадий Кузнецов, шаерысьтымы калык артистъёс Валентина но Евгений Серебренниковъёс, дано артистка Светлана Смагина, тодмо артист Николай Прокопьев но мукетъёсыз. Лыктӥды ке концертазы - адӟоды, выль "марӟан кизилиоссэс" но, оло, усьтоды. Т.ПЕТРОВА. Оскымон инты мед басьтоз Кызьы ивортылэмын ни вал, 29-тӥ мартэ Россия Федерацилэн Президентэз Владимир Владимирович Путин Кремльын пумиськылӥз Россиысь сыӵе улосъёслэн кивалтӥсьёсынызы, кытын 26-тӥ мартэ ортчем быръёнын со понна уногес куара сётӥзы. Соос пӧлын, кылсярысь, Москвалэн мэрез Юрий Лужков, Москва областьлэн губернаторез Борис Громов, Свердловск областьлэн губернаторез Эдуард Россель, Татарстанлэн Президентэз Ментимер Шаймиев, Башкортостанлэн Президентэз Муртаза Рахимов но Удмурт Республикаысь Кун Кенешлэн Тӧроез Александр Волков. Пумиськонын азьпалан сылӥсь ужпумъёс сэрттэмын-пертчемын. Ӧтемъёс Владимир Путинлы ивортӥзы улосъёсазы ужъёслэн мынэмзы сярысь, сое бдэстонъя ӵектонъёссэс веразы. Тужгес бадӟым саклык висъямын вал, озьы ик Александр Волковлэн верамаз но, Россилэсь кунлыксэ юнматонлы, улосъёс но центр куспын ог-огеныд ужанэз азинтонлы. Пумиськонлы йылпумъянъёс лэсьтыса, Россилэн Президентэз Владимир Путин вераз, огинтыын лёгаськонлэсь палэнскыны дыр вуиз ни шуыса. Улосъёс Россия Федерациез юнматон понна мед ужалозы, ог-огенызы кусыпъёссы пайда мед сётозы кызьы ке улосъёслы, озьы ик центрлы но. Нырысь ик сюлмаськоно промышленностез но гурт удысэз ӝутыны, юнматоно страналэсь оборона удысын кужымзэ, нюръяськоно национализмен но сепаратизмен. Адямиос мед оскозы кунлэн кужымезлы, ялан тыршоно Россилэсь данзэ ӝутон сярысь. Россия Федерация мед луоз ялан азинскись государство, дунне вылын оскымон инты мед басьтоз. Удмурт Республикаысь Кун Кенешлэн пресс-службаез. УЖБЕРГАТОН НО АДЯМИ Сюриськод ке улонлэн тулкымаз - тон котьку вал вылын Котькуд адями пушкын ужбергатӥсь пуке, дыр. Но улон косытозь, со быгатонлыкмы асьме пушкын бабыса улэ. Сайкалоз шат сыӵе мылкыдыд дасез чотын, номыр понна сюлмаськытэк улыкуд? Ужбергатӥсь, предприниматель, луон сярысь ӧз малпаськылы Виктор Михайлович Наговицын но. Ижевскысь гурт хозяйствоя институтэз йылпумъяз 1975-тӥ арын, куке ас радызъя но государстволэн юрттэмезъя ужазы на вань колхозъёс но совхозъёс. Егит зоотехникез "Россия" совхозэ ужаны ыстӥзы. Куать ар ортчыса, ужаны но улыны "Глазовский" совхозэ выжиз. Дас ар ӵоже совхозэн кивалтӥз. Ӵапак та ужын пумитаз со выльдӥськонэз. Табере котькызьы мед дунъялозы Горбачевлэсь политиказэ, но соку, 80-тӥ аръёслэн кыкетӥ люкетаз, со, котьма ке но, выль сямен малпаськыны но выль амалъёсын ужаны сюрес усьтӥз. "Ӟеч улэмед потэ ке - тыршы", шуиз кадь. Тӥни соку ик адямиос пушкын бугырскиз пыдло ватэм ужбергатон мылкыд. 90-тӥ аръёслэн кутсконаз Россиын вал ини 7,5 миллион арендаторъёс, 3,3 миллион кооператоръёс. Соос шуак инмысь ӧз усе ук. Озьы ке но, кинлы ке со пайдаен берытскиз, кинлы ке - уката но куанермонэн но пыдйылэ потонэн. ...Глазовын али тодӥсьтэмез ӧвӧл ни "Нива" ООО-ез. Со липет улын интыяськем базар. Пушкыз чылк-чылк, югыт, шуныт. Вузкарон ӝӧкъёс сьӧрысь амалтэк синйылтӥськод удмуртъёсты. Уг адӟисько Кавказ палась "сьӧдъёс" но. Та фирмалэн директорез - удмурт воргорон Виктор Михайлович Наговицын. Тодэме потӥз: кызьы кутскиз со та уж борды? - Выльдӥськон ӧръяськем бере "Глазовский" совхозын магазин усьтӥм. Со вакытэ тросэз предприятиос, организациос асьсэлэсь магазинъёссэс усьтылӥзы, - вера Виктор Михайлович. - Поттэм продукциез вузаны быгатоно ук. Кӧня ке улыса милемын ӵош огазеяськизы на "Кожильский" но "Чура" хозяйствоос. Тӥни озьы кылдӥз "Нива" вузкароннимы. Нырысь-валысь секыт вал, но юрттӥзы городлэн администрациез. Сыӵе вылэм кутсконэз. Но дыр ортчемъя, куинь хозяйствоослэн кивалтӥсьёссы, ас кужымзэс шӧдыса ини, выльысь люкиськиллям, нимазы магазинъёс усьтӥллям. Азьвыл куинь предъёслэн кутскем ужзы ӧз ӵакмы, ог-огенызы эшъяськонзы но азьланьтӥськиз. Кылем арын "Кожильский" совхозлэсь директорзэ Л.Фроловез Кун Кенеше депутатэ бырйизы, "Чуралэсь" кивалтӥсьсэ П.Перминэз - гурт хозяйствоя но сиён-юонъя министре юнматӥзы, нош В.Наговицын "Нива" ООО-лы кузё луиз. Та уже выжемзэ Виктор Михайлович уг жаля. Но выль удысэ басьтӥськиз кема но тупен- тупен малпаськемез бере гинэ. Басьтӥськиз кышкатскытэк, дӥсьтыса. - Колхозэн кивалтон - со бадӟым школа ини, - шуэ воргорон. - Со ужын котьмалы дышиськод. Тон ик производство понна кыл кутӥсь, тон ик вузкаронэн, коммерциен вырись,тон ик адями кусыпъёсты радъясь. Соин ик азьвыл ужам опытэ татын туж яраз. Зэм, маркетинген вырон ужлы дышетсконо ик луиз. Ужан нуналзэ директор котьку сямен ик кутске вузъёсты, техникаез эскерон бордысен. Собере тодоно, кытысь дунтэмгес но ӟечгес сӥль, йӧл, бакча сиёнъёс басьтыны луоз - таиз уж телефон пыр быдэсъяське ини. - Али гурт хозяйствоос котькыӵе продукция поттыны быгато ини, - шуэ кивалтӥсь, - но базаре ваён понна бырйыны быгатоно умойзэ, басьяськисьёс но визьмоесь ни уга тебере, кема кыллем сиёнэз уз басьтэ. Собере урод вузэз уд но ӵекты. Продукцилэн ӟечлыкез - фирмалэн данэз. Туэ мартэ Завьяловоын гурт ужасьёслэн ортчем кенешазы Шаркан ёросысь фермер таӵе сюлмаськонзэ шараяз: ӝоген, пе, поттэм продукциез туж секыт вузаны луоз. Иське, зэмзэ ик, та ужпум лэчыт югдурлы пӧрмыны быгатоз? Оло, соин ик паськытгес радъяно базарын вузкарон амалъёсты? - Зэмзэ но, берло дыре асьме дорын трос гинэ пӧртэм продукция поттӥське ини. Но сое вузаны тросэз ёрмо. Люкетэ калыклэн начармемез. Дунтэм вузэз но коньдонтэк базарысь уд басьты ук, - шуэ Виктор Михайлович. - Бен, фермер нырысь ик сюлмаськыны кулэ тросгес сиён-юон поттон сярысь, нош солы бызьылоно луэ продукцизэ вузан пумысен но. Куд-ог дыръя продукциез тросэн басьтыны ум быгатӥське, тырон интыос ӧвӧлэн. Тани республикаямы котьку картофка вузасьёс луо, но 100-200 килограмм сяна бсьтыны луонлыкмы ӧвӧл. Рынок ас эрказ азинскыны кулэ ӧвӧл, - лыдъя воргорон. - Государство та ужез кызьы но озьы радъяса возьыны кулэ. Монополистъёсты но серметано. Государстволэн юрттэмезлы оскон ке луысал, ужбергатӥсьёс но тросгес луысалзы. Нош али адямилэн дӥсьтонэз уг тырмы, я инфляция, я эшшо мар ке но кышкатэ. - Рекетир шуонъёс но уг-а кышкато? - Сыӵеослэсь али кышканэз ӧвӧл ни, соосты пичи базаръёсысь гинэ дырын-дырын адӟылоно на. Милицилэсь кужмо рекет али ӧвӧл ни. "Ниваын" туннэ 60 адями ужа. Вузкарисьёс - дипломен специалистъёс, соин ик ас ужзэс ӟеч тодо. Вузкарон культура вылӥе пуктэмын. Таӵе базарез мынам адӟылэме вань Набережные Челны городысь, Ижевскын сыӵеез ӧвӧл на. Директор верамъя, вань ужасьёслы висьыкузы больничной тыриське, ваньзылэн сямен ик ужан стажзы мынэ, толэзяз куинь пол уждун тыриське, санаторийын шутэтскисьлы путёвкалэн дуныз 15 процентлы дунтэмгес усе. Нокыӵе пунэм тыронъёс, налогъёс "Ниваез" уг ёрмыто. Коллективлэн ужез мынэ. Директор общественной ужлэсь но уг палэнскы. Ас мылкыд каремезъя, "Удмурт кенешлэн" Глазовысь ёзаз но пыриське. Удмуртъёслэн съездъёсазы сое ялан делегатэ бырйылӥзы. Берлояз азьвыл чакламтэ ӧтчамын, кудӥз ортчиз Ижын кылем гужем, вис ялэм дыръя урамын тросэз синйылтӥзы вал вылын лӧптэм мылкыдын пукись делегатэз. Со вал Виктор Михайлович Наговицын. Та суредэз эшъёсыз туспуктэм вылэ но пуктӥллям. Туж чебер пӧрмем, нош улӥяз гожтэмын: "Будь всегда на коне". Кытысь татчы, Операя но балетъя театр азе, вуэм вал, шуг вераны. Но кемдэм со одно ик та воргорон ки улэ. Директорлэн кабинетаз валъёсын календарь ошемын. - Туж мӧзмисько валъёслэсь, - шуэ со. - Иже ке вуисько, соку ик ипподроме дыртӥсько. Али тани дыр уггес тырмы. Институтын дышетскыкум, ялан валъёсын ӵошатсконъёсы пыриськылӥ, спортъя мастере кандидат луи. Пичи дырысеныз ик со эшъяськиз валъёсын. Пияш тужгес но яратылӥз Добрый нимо валэз. Озьы пичи вал кузёлы но пыраклы "Добрый" ним лякиськиз. Ми, соин ӵош будэм огъёзъёсыз, эшмес таӵе нимын гинэ тодэ ваиськомы. Трос аръёс ортчыса но вордскем гуртаз, Балезино районысь Люк гуртын улӥсьёс сое та нимын тодмалозы. Кин тодэ, оло, валлэн нимыз ик сое сыӵе лякыт сямо кариз. Та учырез тодӥсьтэмъёс озьы ик малпало, сое лякыт сямыз понна "Добрый" нимало шуыса. Улонысьтыз та учырез тодэ вайытэме понна, Виктор Михайлович, малпасько, вожзэ уз потты. Собере, оло, таӵе нимызлы тупась сямыныз ик солы удалтэ трос ужъёсты вормыны. Со пӧртэм адямиостын умоесь кусыпъёс возе. Нош сыӵе быгатонлык ужбергатӥсьлы уката но кулэ. Татьяна БАННИКОВА. * "Нива" ООО-лэн директорез В.Наговицын. * Магазинысь 2-тӥ отделлэн кивалтӥсез М.Корепанова но магазинлэн директорез Л.Катарина. * Вузкарись Н.Баженова. Туспуктэмъёсыз Владимир Беломорскихлэн. ТӤЛЯД КУРЕМДЫЯ - КЫРӞАН Гажано редакция! Берло дыре радио пыр ӵем кылыны луэ "Мон тынад тодад-а?" кырӟанэз. Мылкыдэз лӧпкытӥсь гур, со кытчы ке ӧте но, валтэ но кадь, капчи мӧзмонэз но отын вань, осконэз но. Таӵе шулдыр кырӟанъёсты газетады ӵемгес сётъялэ вал, песенникъёсыз угось озьы гинэ шедьтыны уг луы. Малпасько, куронме быдэстоды. Людмила Петрушева, Ижевскын улӥсь. Таӵе ик куронэн редакцие вазиськиз Сарапул ёросысь Шевырялово селоын улӥсь Раиса ТЕМИРОКОВА. Соослэсь куронзэс быдэстӥськом. Малпаськом азьланяз но кырӟанъёсыз газетамы ӵемгес печатланы. Мон тынад тодад-а? Крезьгурез Николай Уткинлэн Кылъёсыз Татьяна Черновалэн Мон тынад тодад-а Яке уйвӧтад-а? Кытын мон, ноку но тон уд тод. Бус кадь кутонтэм мон, Тӧл кадь адскисьтэм мон - / Котькытчы мынод но йыромод. / 2 пол Тон монэ уд адӟы, Тон монэ уд куты - Тон дорысь огдырлы кошкисько. Ӟазег сюрестӥ-а, Зарезь ву вылтӥ-а - / Одӥгзэ гинэ мон тодӥсько... / 2 пол Выльысь берытско но, Тон шоры учко но - Мон бордысь уз лу ни мозмемед. Пачылэс тудву кадь, Тылсиё инву кадь / Пылатоз тонэ пӧсь мӧзмонэ. / 2 пол Шӧкыч Валюта Серемес верос Кыдёке шаеръёсы улыны кошкыкум, ваньзэ-ӧвӧлзэ одӥг пирданэ вал - ӵӧж. Огшоры, гурт ӵӧж, олокыӵе шер пумиськись выжыысь ӧвӧл. Тол ӵоже, сарайысь вань пулъёсыз йырйыса быдтэ вал. Малпалод, коӵыш быдӟа комак улэ шуыса. Ӵӧже сяна, нокыӵе пудо-животэ луымтэысь, мон ӵӧжме кӧкые гинэ ӧй поны ини. Ним но малпай туж чебер - Валюта. Озьы нимыныз веракум, ӵӧже пальпотыса шорам учке вал кадь. Нош огвадес тулыс со чиптэм- чаптэм ышиз. Кытысь гинэ но ӧй утча - ӧй шедьты. Весь витисько яратоно ӵӧжме, бертоз ай шуыса сюлэмме буйгатӥсько. Уг оскиськы кескич ӟичылэн пиньёсыз улэ сюремезлы. Учкисько нюлэс пала, вань ӟичы выжыез каргасько но, лулам ӧжыт шуныт пыре кадь. Ачим ялан оскисько: одно ик бертоз, ведь пирданэ ук со мынам, озьы гинэ ышоз шат? Осконэ монэ ӧз алда, витеме огшоры ӧз луы. Мынам муспотон "Валютае" гужемлэн кутсконаз зэмзэ но бертӥз. Ӧвӧл, огназ ӧвӧл, дас кык ӵӧжпиосыныз, зарни комокъёсыныз! Шумпотэменым кытчы пырыны инты ӧй шедьты, чупаны ик дась вал соосты. Сюдӥ ӵӧжпиосме рационъя - витамино ӝукъёсын гинэ. Нош ӧжыт будэм-нодсаськем беразы, ваньзылы нимъёс но сётӥ. Самой чеберзэ нимай Доллар. Туж чырткемзэ - Шиллинг, туж каньылзэ - Йен... нош лябгессэ - Копейка. Сюлэмы шумпотонэн пачылмыса улӥз. Малпасько: Долларез Выль арлы ӝӧк вылам пыжем улмоосын чебермаса поно - со самой бадӟымез. Тужгес чеберзэ 8-тӥ Мартлы ӝӧк вылам дасяло. Кисьтонлы, семыклы но сӥлё луо. Сӥзьылозь ваньмыз сямен куаемынызы мырдэм лёгасько ни вал, сыӵе чебересь но тазаесь. Копейкае гинэ картофка октон вадескын кулӥз. Одӥг ӵукна ӵӧжъёсме шур дуре улляса васькытӥсько вал. Ойдо, мед уялозы шурын, бурдъёссэс-тылыоссэс мед чылкытатозы. Со вие инбамын кыр ӵӧжъёс адӟиськизы. Доллар одӥг синмыныз учкиз инме, черектӥз, бурдъёсыныз лопыръяз но лобӟиз. Со сьӧры вань ӵӧжпиосы кыр ӵӧжъёс сьӧры инме ӝутскизы. Кин ке но команда сётэм, шуод. Валютае гинэ пыд дорам султыса мынэсьтым юаз кадь: "Кытчы соос, кытчы?" Тӥни озьы малланъёсы куашказы. Гуртын со учыр сярысь уно гинэ вераськизы. Бускеле Очей бабай, каньыл шуиз, соос, пе, лобӟизы-кошкизы, озьы нимамысьтыд, долларъёс но шиллингъёс асьме палан улыны уг чидало, одно ик кыдёкысь шаеръёсы лобӟоОзьы ик вань, лэся. Анастасия Чуданова. Сизнер гурт, Татарсан. ВАЛЭКТЭ ЮРИСТ Сэрегез дася адвокат Лилия ШКЛЯЕВА Кыӵе нуналысен сётӥське юрттэт? Яратӥсько газетысьтыды юанъёслы валэктонъёсты лыдӟыны. 2000-тӥ арын 26-тӥ январе милям нылмы вордскиз. Бухгалтериын шуизы: солы одӥг но ӝыны арес тырмытозь пособие тыриськоз декретъя отпуске бырем бере нырысетӥ нуналысен - 9-тӥ апрельысен. Мон малпасько: сое сётыны кулэ нуны вордскем нуналысен - 9-тӥ апрельысен. Кин шонер? Кыкетӥ юанэ. Колхозысь кошки ке, вылӥ верам пособиез мыным тырозы-а? Тырозы ке, кытын? Н.П. Шонер вераллям бухгалтериын: пособие висъяське нуны ваем отпуск бырем бере нырысетӥ нуналысен. Ужысь кошкиды ке, та пособиез тыремысь дугдозы. Корка но ез юбо Ми 1998-тӥ арын корка пуктыны музъем кесэг басьтӥмы. Но сое сельсовет (гурт администрация) ӧз висъя отчы, кытчы куриськомы вал. Таяз сётэм интыын выль урам кылдытыны проектмы, пе, вань. Тыл но, ву но, газ но кыскыны уксё, пе, висъямын. Кытын висъям уксёзы - незнай. Туннэ номыриз ӧвӧл ай. Со сяна, участокъёс шорын ик ез юбоос вань. Корка пуктытозяды, пе, соосты октозы. Июне, корка пуктэммы бере, милемды Пургалась Южсете лэзизы. Отын шуизы: нокыӵе приказзы ӧвӧл юбоосты утялтыны, тӥ коркадэс выльысь кесяно луоды, дыр. И вообще тӥледлы, пе, отчы участок ик висъяны кулэ ӧй вал юбоос вань дыръя, малы ке шуоно, отысь езъёс пыр кошке вылӥ вольтэн ток. Яра вылэм, соос бакчатӥ кыстӥськысалзы ке, нош езъёс коркаос вадьсын ик. Милям сяна, отын 3-4 муртлэн фундаментэз кисьтэмын ини. Соос юртъер пуктыны дӥсьтытэк витё. Нош пинал семьяос кытын ке но улыны кулэ ук. Туж куриськом: валэктэ вал, мар кароно, кин янгыш? Одӥг гожтэмен, эшшо юан сётэме потэ вал. Нылпи ваёно мурт декретной басьтон понна, ичизэ коть кӧня толэзь ужаны кулэ? Яке ваньмыз потэ-а уж сётӥсь бордысь? Уж вань вылысь но уг куто. Яке туала арын котькудӥз кузьым возьма-а?! Кызьы адями улыны кулэ на? Татьяна Мокеева. Пичи Пурга ёросысь Уча черкогурт. Та ужпум сэрттэмын-пертчемын Удмурт Республикаысь Правительстволэн 1998-тӥ арын 20-тӥ апреле юнматэм постановленияз. Отын сётэмын лэсьтӥськыны музъем кесэг быръён но висъян сярысь положение. Нимаз юрт ӝутыны музъем висъян пумысен куронэн адями вазиськыны кулэ интыысь администрацие. Кесэглэсь быдӟалазэ администрация тупатэ азьвыл дасям проектъя. Нимысьтыз комиссилэн кутэм решениезъя музъемъя но музъем мертанъя комитет кесэг курисен ӵош шонерак ивортэ музъемлэсь интызэ но кадастръя номерзэ. Архитектурая но город лэсьтонъя ёз (озьы нимаське) адямилы сётэ участоклэсь лэсьтӥськонъя паспортсэ. Татчы пыро: музъем вылэ пуктоно юртеръёслэн планъёссы, бускель кесэгысь юртъеръёс дорозь кусыпез пусйыса, улон юртлы проектлы паспортэз, кенеръёсты но мукетсэ возьматыса, лэсьтӥськонэз кутскыны лэзён (разрешение). Ӝутэм юртэз кутэ администрациын нимысьтыз комиссия. Юртъерез законъя табере пусъёно (регистрировать кароно) та ужез быдэсъясь ёзын, адями солы кузё (собственник) медло шуыса. Пусйиськем юнме дун тыроно. Кесэг быръён висъян положениез тӥяса янгышасьёс кыл куто Россия Федерациысь административной ответственность сярысь законъя. Город лэсьтон кодексысь 66-тӥ ёзэт чакла 50-100 пичи уждун мында штрафъёс сётыны. Юртъер пуктӥсь мурт кин ке янгышамен сэрен изъян адӟиз ке, солэсь дунзэ берыктон вылысь судэ мед вазиськоз. Кыкетӥ юанлы валэктон таӵе. Россия Федерациысь Уж сярысь законъёсын кодексысь 170- тӥ ёзэт алэ адямиез уже кутытэк кельтыны яке уждунзэ кулэстыны секытэн но нуны ваёнэн герӟаськем мугъёсъя. Сыӵе учыръёсын сэрен адямиез кивалтӥсьёс уже уг куто ке, та сярысь солы гожтыса мед ивортозы. Улон инты басьтысал Удмурт кун университетысь экономикая факультетэз йылпумъяса, куинетӥ арзэ ужасько "Ижмашын". Граждан брак шуонъя ваем кышное но тырше татын ик. Мон, со но 18 аресъем сузэре (нырысетӥ группаен инвалид) малпаськом "Ижмашысь" курыны улон юрт басьтон вылысь субсидия. Луоз-а озьы лэсьтыны? А.Иванов. Сыӵе юанлы меӵак валэктон сётыны уг луы кӧня ке муген. Нырысетӥез: тодмо ӧвӧл А.Ивановлэн али кыӵе квартираын улэмез. Кыкетӥез: федерациысь закон чакла улон инты басьтонын юрттыны военнослужащийёслы, кыдёкысь уй палан улэмъёслы но мукетъёсызлы. Валаны шуг: пыре-а сыӵеос пӧлы А.Иванов. Куинетӥез. Огъя закон герӟаськыны кулэ предприятиысь нормативной акт шуонэн. "Ижмашын" но солэн ёзъёсаз улон инты басьтыны туннэ коньдон висъяло-а, уг-а - тодмо ӧвӧл. *** Мон - сирота. Тодӥсько: законъя мыным висъяны кулэ улон инты яке корка пуктон вылысь ссуда. Та сярысь юалляськыны ветлӥ ёросысь администрацие. Шуизы: сыӵе коньдон, пе, ми доры уг вуы. Кытчы вазиськоно на та юанэн? Быдэсъяське-а, уг-а закон асьме республикаямы? Быдэсъяське ке, кыӵе ёзъёс пыр басьтыны луоз ссуда? Л.Р. Алнаш черкогурт. Миым 8-тӥ феврале Удмурт Республикаысь Правительство юнматӥз улон интылы республикалэн бююжетысьтыз ссуда висъян сярысь положениез. Сыӵе коньдонэн лэземын улонни лэсьтыны, выльдыны, басьтыны. Сыӵе кулэяськисьёс пӧлы пыро: федерациысь, республикаысь но интыысь бюджетъёслэн организациосазы ялан ужасьёс но соослэн семьяоссы (таосыз ӵош уло но огъя хозяйство нуо ке, кытын ужамзы шоры учкытэк); гуртын вуз поттӥсьёс но соослэн ӵош улӥсь но огъя хозяйство нуись семьяоссы, таосызлэн кытын ужамзы шоры учкытэк; тылпуэн но мукет учыръёсын сэрен шуге-леке шедемъёс. Улон инты басьтыны ссуда сётӥське 20 арозьлы, арлы быдэ 7 процент тыронэн. Пунэмам коньдон берыктӥське нимысьтыз графикъя толэзьлы быдэ. Юртъер ӝутыны коньдон висъяське, вань ни ке музъем кесэг, проект но смета, лэсьтӥськыны лэзён (разрешение). Ссудалэсь быдӟалазэ тупатыку санэ басьтӥсько таӵе лыдпусъёс: коньдон курисьлэн толэзьем уждунэз (барышез, доходэз). Удмурт Республикаын котькуд адямилы тупатэм улон интылы норма (юнматэ асьме республикаысь Правительство), лэсьтоно (басьтоно) улон интылэн шоро-куспо дуныз. Ссудалэн быдӟалаез улон интылэн дунызлэн 70 процентэзлэсь тросгес медаз луы. Сое висъя Правительстволэн улон инты лэсьтонэз азинтонъя фондэз Россия Федерациысь Сбербанклэн Удмурт банкезлэн ёзъёсыз пыр. Ссудаен озьы ик герӟаськемын поручительство но залог. Договорлэн кужымез медло шуыса, поручительство (куронлы дурбасьтон) сётыны быгато: районъёсысь но городъёсысь администрациос асьсэ бюджетсы но асваньбурзы чотын, дун тырыны быгатӥсь предприятиос но организациос, коммерческой банкъёс но страхованиея компаниос, ялан барыш (доход) басьтӥсь адямиос. 1 сюрс долларозь ссудалы кулэ одӥг дурбасьтӥсь (поручитель), 1 сюрс - 5 сюрс долларозь - кык, 5 сюрс долларлэсь унолы - пунэмен тыронэз берыктыны кӧня ке пумо луонлык но залог. Залог чот карыны луэ ваньбурез, транспортэз, дуно бумагаосты, музъем кесэгез. Коньдон пунэмась заявлениен вазиське администрацилэн улон интыя комиссияз. Документъёссэ 30 нуналскын эскерыны кулэ. Отчы пыро: курон (заявление), улон условиосты эскерем сярысь акт, анкета, барыш сярысь справка, кытын улэм но семья сярысь справка но музон бумагаос. Вылӥ верам гожтэтъя валаны уг луы: кызьы вазиськылӥз солэн кузёез Алнашысь администрацие - вераса гинэ-а, документъёсын-а. Кулэ бумагаосыз луыса вылысь куронзэ ӧз быдэстэ ке, Л.Р. юрттэт курыны быгатоз вылӥгес ёзъёсысь. Колхоз сётӥз юртъер Мыным колхоз басьтыса сётӥз 2800 манет тыр корка но корказь. Зэм, юртъер ӝутыны 1986-тӥ арын колхоз висъяз адями, нош утялтӥмы асьме сиёнэн-юонэн. Картэ но ужаз ай со бордын, ачим но весь пӧрай. Корка приватизировать каремын ӧвӧл, сылэ колхозлэн балансаз, нош страхование понна котькуд ар ачим карисько. Марысь мар ке луиз, страховкаме кин басьтоз - колхоз-а, ачим-а? Картэ ӧвӧл ни, аслам арлыды бадӟым, нылпимы ӧвӧл. Коркалы завещание кареме луоз-а? Мукет юрт котыры (мунчо, гид, лапас, кенос) ваньмыз асьме пуктэммы. Нина АНИСИМОВА. Алнаш районысь Улын Сырьез гурт. Гожтэтын трос валантэмез. Кыӵе правоен тӥ кузёяськиськоды юртъерен но музъем кесэген? Кин ӝутыны лэзиз вал корка, мунчо, лапас но мукетсэ? Юртъерды завещаниын гожтэм муртлы выжоз соку гинэ, куке тӥ та ваньбурлы кузё (собственник) лукоды. Корка тӥляд уг лыдъяськы ке, тӥ сое колхозысь курыны быгатӥськоды вузан-басьтон, кузьман, воштон сярысь огкылъя (договоръя). Страховка сётӥське солы, кин страхование понна договоръя дун тыриз. *** Кылем арын 14-тӥ феврале суд кутӥз решение: "Почтовый" банк мыным тырыны кулэ отчы понэм коньдонме процентъёсын ӵош. Курон туннэ но берыктэмын ӧвӧл. Малы соку суд кулэ? Кытчы луиз коньдонэ? Малы сое мыным уг сёто? В.Васильева. Судъёслэсь решениоссэс кужмысь быдэсъянэн выро судысь приставъёс. Таосызлэсь куронзэс одно быдэстыны кулэ Россия Федерациысь вань ёзъёс, организациос, должностен муртъёс но гражданъёс. Решениез дыраз, быдэсак но шонер быдэстон понна, судысь пристав быгатэ: пунэмзэс берыктӥсьтэм муртъёслэн ужан юртъеръёсазы судэн герӟаськем муген пырыны, соосты усьтыны, ваньбуръя но коньдонъя арест ортчытыны, ваньбурез вузанэ сётыны но музон ужрадъёс кутыны. Решениея 3 нуналскын юнматӥське сое быдэсъянъя постановление. Курон 5 нуналскын лэсьтэмын ӧвӧл ке, ужрад кутӥське решениез уже кужмысь пыӵатонъя. Янгыш муртэ соку штраф тырыто. Нош пристав вылэ ӝожтӥськонэн вылӥысь судэ вазиськыны луэ. Кытчы луизы акциос? Картэ "Удмуртнефтьын 20 ар ужаз. 1994-тӥ арын 1-тӥ мае, 42 арес дыръяз кулӥз. Нош 17-тӥ мае басьтыны кулэ вал акциос, нимтулыз списокын вал. Соосты мыным ӧз сётэ. Ма кароно? Г.Зубарева. Та ужпумъя Россия Федерацилэн президентэз 1993-тӥ арын 27-тӥ октябре юнматӥз "Акционеръёслэсь правооссэс утён сярысь" 1769 номеро Указ. Отын пусъемын: кун но муниципальной предприятиосын приватизация дыръя, акциосын огазеяськон кылдыку, акционеръёслэн реестразы нимтулъёс гожтыны муг (основание) луэ ворсам гожтӥськонлы (подпискалы) йылпумъянъёс сярысь протокол. Тӥляд карттылэн правоез вал акциослы гожтӥськонэ пыриськыны но списоке сюрыны. Реестрын картты пусъемын ке, тӥ солэн кельтос басьтӥсез (наследникез) луиськоды но акцилы праводы вань. Реестрын карттылэн нимтулыз ӧвӧл ке, тодэлэ мугзэ, кулэ ке, сое отчы гожтон понна мынэлэ судэ. Адвокатлы вазиськыны луэ 25-37-70 телефонъя. ШӦКЫЧ Карманад гира нуллы! Куддыръя, куддыръя ветлӥсько мон базаре. Северной рыноке. Куддыръя юнме шорысь но пырасько, дунъёсты чакласько, адямиосты учкисько, тодмоосын ӟабыльтӥсько. Гуртын пукыса акылтэ угось, сюлэм гизи-гази луэ, мылкыд но сӧриське, берлань вордскем потыны ӧдъя. Улон-вылон туала вакытэ, азьлоеныз мыр-мыр ӵошатыса, ӝотырак пӧлэскиз уга. Пырак бульыр-бульыр пӧзе, жымбыль-жомбыль жомбыльтэ, душес кадь поръя. Тани, тани, мур коже музэн, выемдэ но уд валалля. Ву гуӵкад кошкоз но ӟеч лу шуыса но уд вутты ни. Сюлэм шугектыса, кылем арняе нош ик базаре ветлӥ. Тулыс вуэ ини угось. Бакчае ма но со мерттоно луоз, дыр. Соин ик кышное куинь кило сенчик басьтыны косӥз. Сугон вузасьёс туж трос вылэм. Кудзэ басьтыны ик паймоно. Солань-талань ветлон сямен, одӥг вузкарись нылкышнолэн сугонэз туж кельшиз. Укыр ушъяз угось. Сюлэм ӧз чида но куинь кило мерта-а, мар-а, шуи. Сугон басьтӥ но, пуйыме ӝот-ӝот кырмыса, трамвай дугдылон интые луть-лать вамышъясько. Со вие кызьпу йылын нырзэ сузяса пукись куака кар-р! гинэ каргетыны кутскиз. Нош ваньмыз тодо, дыр, куака ноку но юнме шорысь уг каргеты. Солэн кырӟан манерыз сыӵе, тодыса ул ини, мар ке но луоз. Озьы ик вань. Куака, йырзэ ик кырыжтыса, сугонэн пуйые шорысь синзэ но уг вошъя. Соку йырам малпан чилектӥз: пӧязы, дыр, монэ. Базаре берытски но сугон пуйыме контролёрлы мертаны сётӥ. Куакаосын сэрен бертэме уг луы шуисько. Мар ке но вань, дыр. Контролёр озьы но тазьы мерта, мукет весэ но мертаны нуллӥз, пайдаез ӧвӧл, шӧдске. Сугонэн пуйые нокызьы но куинь кило уг кыскы. Кык но ӝыны кило сяна ӧвӧл. Кинлэсь басьтӥд сугонзэ, со доры ик мын, пе, яке уксёдэ мед берыктозы, яке сугон мед сётозы. Мынӥ. Вузкарись нылкышно монэ соку ик тодмаз, ява. Ой пыриське ук, пыриське ук, янгышаськем, пе, вождэс эн вае. Ваньзэ-ӧвӧлзэ кызь манетлы сяна ӧвӧл пӧям, но ӵок-а, мар-а ини. Туэ кинлы-о капчи улыны? Котькин уксёлы ёрме уга. Мынам мар вераме потэ? Базаре ветлыкуды, сьӧрады одно ик гира нуллэ. Сотэк мон сямен юмоке усёды. Отын угось одӥг вузкарисьлэн но весэз шонер уг возьматы. Мон сое ас синъёсыным адӟи. Нош малы сое пӧртэм инспекциосысь тыршисьёс уг адӟо? Ӧйтӧд! Воксё паймисько. Л.Лукин. Кузьым - семьялэсь Завьял ёросысь Первомайский посёлокын ӟеч тодо Смагинъёслэсь семьязэс. Солэн кузёез Сергей Николаевич кивалтэ ЖКХ-ен. Со усто спортсмен. Галина Викторовна нылпи садэн кивалтэ. Таиз но спортэн юн эшъяське. Нош пиоссы Саша но Сергей "Ижсталь" клубын хоккеен шудо. Выль ар азьын Смагинъёс поселоказы куинь усто спортсменъёслы сӥзьыса нимысьтыз кузьымъёс дасязы. Линейка азьын нырысетӥ приз но "Мисс-спорт-99" ним сётэмын 11-тӥ классын дышетскисьлы Вероника Русскихлы. Кыкетӥ но куинетӥ интыосын пусъемын Нина Хисматуллина но Павел Галушкин. Н. ИВАНОВ. Кырӟанлы бурдъёс кулэ Солэн тусбуез - шаермылэн данъян пул вылаз. Сьӧд кысъем, сьӧд йырсиё, востэм тусо. Ас понназ малпаськыса ветлыны яратӥсь. Крезьгуръёсаз со озьы куддыр выйылэ, дыр. Николай Уткинэз умой тодӥсьтэм мурт таӵе огшоры гинэ дунъет сётоз. Нош сюлэмыз солэн пиналысен ик чеберлыклы усьтэмын вылэм. Школаын дышетскыкуз, кылбуръёс гожъяны выриз... 70-тӥ-80-тӥ аръёсы туж тодмоесь вал вокально-инструментальной ансамбльёс: "Весёлые ребята", "Самоцветы", "Цветы", "Песняры", "Сябры"... Со тулкым удмурт гуртъёсы но шуккиськыны ӧдъяз. Нырысьёсыз пӧлын вал Кияса ёросысь Карамас- Пельга (Уддяди) гуртысь пиослэн вокально-инструментальной ансамбльзы. Трос пол ӧтьылӥзы соосты Ижевске пӧртэм концертъёсы, творческой ӝытъёсы. Пель сьӧрын шуккиськыса улӥзы туала ритмъёсъя гожтэм кырӟанъёс, Николай Уткинлэн векчигес нёжмыт куараез. Людмила Кутяновалэсь кылбуръёссэ бырйиз (солэн братэныз армиын ӵош вал): "Уд учкиськы", "Ӵош кырӟано асьмелы". Нош пиналъёсын школаын но, садикын но ужаз бере, Николай Николаевич (табере озьы шуылӥзы ни) ӵем басьтӥськоно луылӥз нылпи крезьгуръёс кылдытон борды. Озьы тодмо луиз Юлия Байсаровалэн кылъёсызъя "Мусо мемие" ("Юасько мемиелэсь") кырӟанэз. Кызьы со пӧрмиз? - Нылпи кырӟанъёс ӧжыт вал, соин ик праздникъёслы ӵемысь выль кырӟан малпано луылӥз. Тани таиз бордын курадӟисько - нокызьы гур уг тупа. Учкисько - дыр туж ӧжыт кылемын, 15 минут. Соку ик крезьгур лобӟыса кадь лыктӥз, - тодаз вае Николай. Табере, лыдъямезъя, кырӟанъёсыз куамын пала луизы ни. Но та вылӥ верамъёсыз вужмизы (озьы малпа ачиз). Вордскизы выльёсыз, али кельшымонэз... - Нош кин юрттӥз со вакытэ гуртысь клубе музыкальной инструментъёс, аппаратура басьтыны? - Райисполкомысь культурая отдел, - валэктэ Николай. - Со аръёсы озьы вал: арлы сётэм коньдонэз культура юрт быдэссэ уже уг куты ке, вуоно араз сомындалы ик кулэсгес сёто. Нош ми культурая отделысь со кутымтэ уксёез аппаратура басьтыны курылӥм. Дыр ортчиз - со инструментъёссы вужмизы, куштӥськизы, соин ӵош ик ансамбльзы но куашказ. Модаез но ортчиз уго, табере вокально-инструментальной ансамбльёс ӧвӧл ни - группаос, компьютерен гожтэм крезьгуръёс. Таӵе улон дыръя кытын ай, пе, соос сьӧры уиськод... Николай Уткин пыре Пермьысь культурая институтлэн оркестръёсъя факультетаз. Культпросветучилищеын дышетскемез солы юрттӥз: балалайкаен умой шудэ вал. Шуг предмет - сольфеджио но капчиен сётӥськиз солы. Баян, гитара, балалайка, контрабас... - ваньмыз жингыртэ крезьгурчилэн ки улаз. Ас тодэмезлы дышетӥз Гриша Собиновез (10-тӥ классын вал ай та пияш). Табере со Уддяди клубын ужа, вань инструментъёсын шудыны быгатэ. Кырӟан но пӧрмытӥз ни, Г. Романовалэн кылъёсызъя - ӵош сое кырӟало Н.Уткинэн. Берло дыре таослэн дуэтсы тодмо луиз ни пӧртэм интыосын. Пиос шоры синмаськыса учко: Николай баянэн, Григорий балалайкаен, куддыр чипсонзэ (шуланзэ) ымдураз вуттылэ на. Кисьмато ке кисьмато, шуо сыӵе дыръя. Нош "Ашальчи" калык ансамблен ӵош кытчы но вуылэмын ӧвӧл... Татысь нылкышноос крезьгурчиенызы данъясько, ки йылазы нуллыны дась шуимы ке, ум янгышалэ, дыр. Кытчы гинэ потоно - Уткинэз "сюл-кал" сьӧразы басьто. Кырӟасьёслы шудӥсь кулэ ук. Нош со тырше выль кырӟанъёсыныз шумпоттыны. Озьы ке но... - Оломаиз оломар, - шуэ Н.Уткин. - Кӧня выриськод, аслыд кельше но кадь, кырӟан пӧрмиз, кожаськод. Нош калык аслыз уг кары но тӥни. Зэм, кырӟанлэн аслаз сюресэз. Калык пӧлы сюрессэ шедьтэ ке, мурт кунэ но сое сьӧразы басьто, кызьы луиз "Мон тынад тодад-а" кырӟанэн... - Нош маин аслыд кельше та кырӟан? - юасько. - Со лобӟись, сьӧраз ӝутӥсь-валтӥсь кадь. Кылъёсыз паймыто, - шуэ Николай. - Нош тон отчы пумаз... ватсад на таӵе кылъёс: Тон сьӧрлось гуртын-а, Ваче капка азьын-а - Кыӵе шумпотон та пумиськон. Озьы музъем вылэ ӧд васькыты-а лобӟем мылкыдэз? - Ма, зэм, отчы озьы уг тупа, со так, огшоры кырӟан понна гинэ, - пальпотэ Николай. Сое гажаса, яратыса ӵемысь Уткин гинэ шуо. Куддыръя шораз озьы вазё но. Калык котьмае ас кельшемезъя каре. Ӧтизы, куризы сое Киясаысь крезьгуръя школаен кивалтыны (нимыз вань, но юртэз ӧвӧл на - пинал музыкантъёс занятиосы культура юртэ ветло, соин ог-огедлы люкетон учыръёс луыло). Сокем ик уг дырты кадь, но котькытчы вутске Николай Николаевич. Тани со нош ик ӵукна выль лымы вылтӥ яке ӝыт пал сулепез коласа вамыштэ Киясае, сизьым иськем. Яке нялтас машина кемдэ. Озьы - нуналлы быдэ. Сюлэмаз кырӟанэн. Нош учконо ке - сыӵе ик гурт воргорон кадь, тӥрен, лопатаен... Выль коркаез, семьяез, нылпиосыз... Татьяна ЧЕРНОВА. * Баянэн шудэ но кырӟа Николай УТКИН. Соин ӵош - Юрий МИТРЯНОВ. В.Камашевлэн туспуктэмез. Бӧрдэ инкуазь... Котькудӥзлэн, пе, аслаз сюресэз... Но... адями, пе, ас сюрессэ ачиз быръе... Озьы ик - инме лобон сюрессэ но ачиз пусъе меда? Кыӵе нуналэ, кыӵе вакытэ кошконзэ, оло, со ачиз шӧдэ? 1999-тӥ арын республикамылэн Данъян пул вылаз шедемез бере, Николай Уткин шуиз: "Таӵеез мынам улонам нырысетӥез но берпуметӥез..." Нош туэ, 7-тӥ апреле, артысь ёросэ Яган-Докьяе концертэн мынэмезлэсь азьло со шуэм: "Йыры туннэ туж висе, сцена вылын медам усьы вылэм..." Кыл потэ ке - лобӟе, инмар доры, лэся, вуттэ "иворзэ". Ӧвӧл ни Николаймы - ӵапак со нуналысен, Киясаысь "Ашальчи" калык ансамбль солэсь таӵе ик нимо кырӟанзэ калыклы кузьман вакытэ крезьгурчилэн сюлэмыз жугиськемысь дугдӥз. Вень йыл быдӟа вирсэр пилиськыса, йырзэ пӧсен но вӧсен ӵушказ. Гриша эшеныз ӵош ӧз быгаты ни со быдэстыны куинетӥ кырӟанзэс. Ачиз шуиз вал алигес: "Собиновтэк Уткин ӧвӧл". Нош табере... Николай Уткинтэк - кызьы Григорий Собинов? Кызьы сотэк - Уддяди, Кияса, татысь дышетскись пиналъёс, "Ашальчи" ансамбль? Татысь инкуазь, дорез, коркаез, семьяез?.. Кызьы сотэк - удмурт шаер? Солэсь тусбуйзэ тодазы возё Финн шаерын, Кудымкарын, Нефтекамскын, Уфаын... Солэн кырӟанъёсыз - шаер вадьсысь тюрагайёс - кисьтӥсько, вӧлдӥсько пӧртэм палъёсын: "Ӵош кырӟано асьмелы", "Мон тынад тодад- а", "Кырӟасько ас поннам", "Уйёсы изёнме тон лушкад", "Нылмурт кырӟан", "Выль кен", "Юасько мемиелэсь"... Малы ум утиське, ум адӟиське огмес огмы дырыз дыръя? Нош уката ик - таӵе ненег сюлэмооссэ? Бӧрдэ инкуазь... Бадӟым ыштон. Сое ӧз вала на калык. Со нырысьсэ удмурт гуртын вокально-инструментальной ансамбль кылдытӥз. Ноку ӧз возьма данъямзэс, шып, ас понназ ветлӥз. Сюлмыз кырӟаз... Шуылӥзы весь ас вактаз. Куддыр серекъязы, ултӥяны вутскылӥзы. Ӧз тодылэ, мар сюлэмаз кырӟась муртлэн. Крезьчи вал со Удмурт шаерамы. Кӧня ветлӥз, кырӟаз, шудӥз - я гуртъёсын, яке Ижын - ноку ӧз куры дун. Малы-о нош бере кылиськомы тау карыны? Инвожое солы ай тырмысал ньыльдон арес гинэ. Семьяысь ньылетӥез нылпи, со вордӥськем вылэм, пе, дэремен. Сыӵе дыръя шуо: шудо дэремен вордскем. Шудо меда? Инмар сётэм солы вакчи даур. Укыр вакчи. Бадӟым малпанъёссэ быдэстыса ӧз вуы. Кык пиоссэ кельтӥз бӧрсяз. Мед будозы чебер, таза, визьмо. Ӟеч кӧл, Николай... Нош мон гожтӥ вал тон сярысь ӵапак кылем арын та вакытэ. Печатласа ӧй ву. Вождэ эн вай. КЕНЕШОН Югдурез эскерозы пуныос, валъёс... Городъёсысь но районъёсысь ас коже кивалтон ёзъёсын кылдытъямын законъёсты чакланъя но правоосты утёнъя комиссиос. Кун Кенешысь Законъёсты быдэсъямез чакланъя, калыкез кышкытлыклэсь утёнъя но гражданъёслэн правооссыя ялан ужась комиссилэн кичӧлтэмезъя алигес та ужез нуисьёс семинаре-кенеше люкаськылӥзы. Ужрадэз нуизы Кун Кенешлэн Тӧроезлэн воштӥсез П.Вершинин но ялан ужась комиссилэн тӧроез М.Кокорин. Та кенеш юнме люкамын ӧй вал, угось республикаямы берло дыре йыружъёсъя югдур уг тупатскы. Мар кароно, законъёсты тӥясьёсын нюръяськонэз кужмоятон понна? Оло, ас коже кивалтон ёзъёслэн та бордын ужан опытсы но уг тырмы? Туж лябӟемын калык пӧлын валэктон уж нуон, шуиз М.Кокорин, та ласянь уг тырмо мур пуштросъем теле-, радиопередачаос но. Ижевсклэн администрацияз законъёсты но правоосты утёнъя комиссия воксё но кылдытэмын ӧвӧл. М.Кокорин верамъя, туннэ нуналлы туж лэчыт ужпум кылдэмын... пытсэт сьӧрысь потэм адямиос пумысен. Соослы улон инты висъян, уж сётон туж секытэн мынэ. Та ласянь адӟем карымон Воткинск но Можга городъёслэн опытсы, огаз сыӵе адямиос понна усьтэмын приют, мукетаз - попечительской совет. Общественной порядокез утён сярысь ивортӥз Югдурез утёнъя министерствоысь та отделэн кивалтӥсь Р.Баласянян. Номыр уг лэсьтӥськы шуыны шонер уз луы. Тани Ижевскын милиционеръёслэн 22 постсы усьтэмын, Воткинскын - 3. Порядокез утёнэ табере паськытгес пуныос но кутӥсько, кылем арын 28 пуны ке ужаз, туэ - 59. Пуныосын чалякгес луэ йыртэмасьёсты кутыны. Нимысьтыз кылдытэмын луоз ньыль валэн (азьланяз тямыс) ужась подразделение. Вал вылын югдурез эскерыса возись милиционер воштыны быгатэ пыдын ветлӥсь 10 милиционерез. Ваньмыз та пусйымон. Но, Россиен но Урал регионэн ӵошатыса, асьме республикаын патрульно-постовой службаез (ПП), нуисьёслэн лыдзы трослы ичигес. Вылаз ик, ППС-ысь 100 адями али Чечняе келямын. Милиционеръёслэн ужан транспортсы но туж вужмемын. Валъёслэн но пуныослэн ужамзы сярысь ке верано, тая но республикамы азьпалан ӧвӧл. Воронежын, кылсярысь, нуналлы быдэ югдурез эскерыны потэ 100 пуны но 30 вал. Милиционеръёслэн ужазы компьютеръёс но туж ляб пыӵало - коньдон уг тырмы. Правоез утись ёзъёсты туж сюлмаськытэ наркотикъёслэн но ВИЧ инфекциен висисьёслэн вӧлмемзы. Но та ужпум шоры малы ке туж буйгатскем мылкыдын учко школаослэн, училищеослэн кивалтӥсьёссы. Туннэ нуналлы лыдэ басьтэмын 1000 пала наркоманъёс ( но соос та лыдпуслэсь данаклы тросгес), Глазовын гинэ шараямын ВИЧ инфекциен 9 висись адями. Туэ 15 килограмм героин шедьтэмын ини, сое 500 адями эскерыны вуиз, нош кылем арын та вакытэн ӵошатыса, героинэз "шӧмъямъёс" 2 мурт гинэ вал. Наркотикъёсын герӟаськем йыружъёслэн лыдзы туэ 1020 пала вуиз ини. Валамон, ас кожаз та эзель уз быры - наркоманъёсын нюръяськонъя нимысьтыз программа луыны кулэ, Россиын со 1997-тӥ арын ик кутэмын ни вал. Кызьы оскытӥз М.Кокорин, асьме депутатъёс сыӵе программаез таяз арлэн кыкетӥ палараз одно ик кутыны тыршозы. Вань йыружъёс котьку но йылпумъясько судэн, шуиз Удмурт Республикаысь Вылӥ Судлэн Председателез Ю.Суханов. Верам лыдпусъёс шуэрскыто: кылем арын 12 сюрс пала уголовной ужъёс эскеремын, 5 сюрс адями пытсэт сьӧры пуктэмын, нош тямысэз - пыраклы Ссмертной казнь интые). Судьяос ас ужзэс мырдэм вормо. Судьяослэн лыдзы тазьы тупатэмын: Удмуртиын 158 судья, Россиын - 15 сюрс. Ярам, шуиз Ю.Суханов, Президентлэн указэзъя туэ асьме республикалы судьяослэсь лыдзэс куинь адямилы будэтыны лэземын. Федеральной законъя озьы ик паськытатыны куремын калык заседательёслэсь службазэс: одӥг судья бордын 156 заседатель ужаны кулэ. Та уже адямиос 25 арескысен ас мылкыд каремзыя кутӥськыны быгато, валэктӥз судья. Бен, луэ, дыр, судьяослэсь ужзэс ӝогомытон но умоятон понна тросгес калык заседательёсты, мировой судьяосты ужатыны. Но тупатскоз-а меда югдур, быдэс Россиын политикаез но экономикаез тупатытэк? Но та семинар-кенешлэсь ужрадзэ огъя пайдаен лыдъяно, дыр. Берло аръёсы нырысьсэ Кун Кенешысь ялан ужась комиссия ас коже кивалтон ёзъёслэн законъёсты чакланъя комиссиосын валче ас азязы сылӥсь ужпумъёсты эскеризы. Татьяна БАННИКОВА. Футбол Вормонъёс но келянъёс Мини-футбол Россие ог дасо ар талэсь азьло гинэ пыӵаз. Вакчи дыр куспын со бадӟым вамыш лэсьтӥз, агайзэ, бадӟым футболэз, азьпалтӥз, шуыны луоз. Берло аръёсы та яркыт, чырмыт шудон асьме шаерамы но шаплы вӧлме. Ортчылэ Удмуртилэн чемпионатэз, город командаос но ас пӧлысьтызы кужмозэ утчало. Тужгес но та спорт удыс юн выжыяськиз ни Глазкарын. Сое возьматӥз алигес Калугаын егит пиос пӧлын ортчем Россилэн чемпионатэз. Отысь Глазовысь "Строитель" командаысь пиосмы зарни медальёсын бертӥзы. Нош Удмуртиысь бадӟым футболъя кужмоез команда "Газовик" кузь сюрессэ та нуналъёсы гинэ мытӥз ай. Кызьы ивортылӥм ни, нырысетӥ пумиськоназ со Смоленскысь "Кристаллы" 0:2 лыдын келяз. Ӧз удалты Ярославльын но. "Шинник" 3:1 лыдын вормиз. Ӵуказе "Газовик" ас дораз Читаысь "Локомотивен" шудэ. Асьме футболистъёслы одно ик вормонэз шӧмъяно. Таяз учыре мед удалтысал! М. Кузьмин. КОТЬМА СЯРЫСЬ Граждан авиацилэсь ортчем сюрессэ возьматонъя Ульяновскысь музей пытсаськон калэ вуиз. Инбам улын сылӥсь, нырысетӥысен туала дырозь, тунсыко но шер пумиськылӥсь лобан аппаратъёс зор-кот улын сыномо-сисьмо. Но тужгес сюлэм пирсэкъя соиз понна: музей самолёт ёзъёсты качало-лушкало. Таӵе югдур кылдӥз коньдон висъямысь дугдэмен. *** Япониысь куд-ог учёнойёс кылдытыны малпало... улэп адямиез. Та пумысен шунды ӝужан пал странаысь парламент чакла уголовной кыл кутытӥсь закон юнматыны. Юристъёс лыдъямъя, таӵе "кырсь" уж понна 5 арлы пытсэт улэ келяны луоно. *** Иркутскын азербайджан культурая центре кужмысь пыризы ымныразы маскаосын тодмотэм адямиос. Ваньзэс, кин вал отын, выж вылэ выдтӥзы но вистэм-вожтэм ыбылыны ӧдъязы, бератаз граната сэрпалтӥзы. Йырвандӥсьёс пегӟизы, нош милицилы тунаны гинэ кыле на, оло центрысь адямиос наркотик вузам коньдонзэс ӧз сётэ, оло сое вузаны пумит луизы, оло бӧлякъёссэс обидьыны шедьтӥзы. *** Европалэн лымшор-шунды ӝужан палъёсаз тудву тужгес но зол 20-тӥ апрель котырын ӧръяськоз, шуо куазез чакласьёс. Венгриын но Румыниын таин валче бырем адямиос но вань ини. Матысь эшъёсмы дорын таӵе учыръёс ӧз пумиськылэ на. Озьы ке но Украинаысь тросаз гуртъёсын кенеръёсты, пуэз, турынэз ву гылтыса нуэ. Скалъёссэс кыскыны нылкышноос пыжъёсын пото. (Басьтэмын компьютерысь Интернет ёз пыр). МАЛПАСЬКЫТЭ Востэм пычей кызэз куасьтэ Гуртын котькыӵе ивор но чилектэм музэн ӝог вӧлме. Мадись адями аслэсьтыззэ ватсаны тырше на. Озьы огшорыез ивор но кужмо гудырилы пӧрмылэ куддыр. Та нуналъёсы уж дурам лыктӥ но эшъёсы иворто: "Михеев Сережаез, пе, милицие келяллям. Колхоз кеносысь вить пуйы фураж лушкакуз кырмиллям". Сергей - егит удмурт воргорон. Ӟуч калык пӧлын улэмысь-а, мар-а, асьме выжыысь адями сярысь вераськон потыку, мон кык полэсь сак кариськисько. "Юнме шорысь уг-а мыскылляло, серем улсы уськыто? Оло, чик но янгыш ӧвӧл адями?" Мерттэм писпуэз мукет интые кӧчытӥськод ке, со ас ёзъёсыныз ӵошен пушйыны, вылэ ӝутскыса чеберскыны уг вутскы ни. Выль интыын котькыӵеез будос но курадӟыса выжыяське. Сергейлы но та ласянь ӧз удалты. Бигер шаерын вордскем но дышетскыны кутскем пияшлы, анай-атайёсыз сьӧры нырысь выжыны тупа Сюмси ёросысь Муки-Какси гуртэ. Палэнысь калыкен тодматскыса, шудыны эшъёс шедьтыса гинэ вуттэ - мукетыз шуккет: семьязы улыны выже Киров улосысь ӟуч гуртэ. Ватонэз ӧвӧл: удмурт нылпиос, ӟучъёс пӧлы шедьыса, ӵемысь кылтэм-ымтэ кадь карисько. Урокъёсын ас тодэмзэс но вераны-мадьыны курдало соос. Янгышаны ке шедьтӥд, классысь эшъёсыз сереме уськытозы ук. Ас эшъёсызлы вожъяське но со, огдыре ик йыркуро но кариське. Озьы, Сергей Михеев кышкась-курдась, пыриськись сямо, котьма верамез быдэстыны тыршись луыса будӥз. Дас классэз йылпумъяса, эшъёсыз сямен ӝыт шулдыръяськонъёсы гинэ но ӧз поталля. Сыӵеос сярысь шуо: "Со, пе, чибинез обидьыны но уз дӥсьты". Пизэс службае келякузы, анай-таез куректӥзы ик: "Ой, кур карозы ни пимес. Укыр лябыт сямо, ассэ ачиз утьыны уз быгаты". Сюлэмшугъяськемзы юнме вылымтэ. Ӝыны ар ортчыса, солдат службаысь пегӟыса дораз вуиз. Военной частяз вуытозь, атаезлэн келятэк амалыз ӧз луы ни. Ярам, шудзы вылэм: Ельцинлэн указэзъя ялэм амнистиен сэрен сое кыл кутонлэсь мозмытӥзы. Беглой кариськыса ветлон нуналъёсыз кельшиллям, лэся. Бӧрысь эшшо кык пол пегӟылыса дораз бертылӥз на. Таяз учыре инсьӧр кузё юрттӥз кадь: службазэ йылпумъяса, дораз сӧл-таза берытскиз. Шуг вераны, малы солы службалэсь пегаса ветлоно луиз? Оло, ляб сямыз, яке "пересь" солдатъёслэн ултӥямзы, яке... Улэп адями котьку но азьпалась ӟечезлы осконзэ ыштыны кулэ ӧвӧл. Михеев колхозэ ик ужаны интыяськиз. Пудо вордон удысэ. Мукет дышетскемез-быгатэмез ӧй вал угось. Уг ваты: ӟеч ужаз со. Кивалтӥсьёслэсь, специалистъёслэсь косэм- ӵектэмзэс котьку дыраз но ӟеч быдэстыны тыршылӥз. Шораз учкыса шумпотылӥ гинэ, эшшо но юнгес оскылӥ удмуртъёслэн ужез гажась луэмзылы. Атай мылкыдын малпасько вал: "Эх, усто кузпал гинэ мед шедьысал". Нош арлыдоос верамъя, инмарлэсь кымесад гожтэмзэ уд ӵушы ни. Озьы ик луиз Сергеен но. Огпол но нылмуртэ чупамтэ егит пи синмаськиз, ас мылкыд каремезъя Чечняе ож тылӝуэ кошкем воргоронлэн кузпалэзлы. Ӵошен улыны кутскизы. Выль семья кылдытонлы анай-атаез пумитъяськиз ке но, бератаз киынызы шонтӥзы кадь: "Мед улозы, ойдо". Люба кузпалызлэн нылпиосыз ӧй вал. Ужаны ӧз яратылы егит ӟуч кышномурт. Вылаз ик, курыт вуэн эшъяськылӥз, пиосмурт выллем сигарет ӵындылӥз. Чонари вотэсэ кыкетӥзэ шедиз удмурт воргорон. Ӵемысь юылыны, ужысь пеганы кутскиз. Нош курыт ву, наркотик выллем ик. Юытэк улыны, шокчыны ик уг лу ни кадь. Аракы ву но дунтэм ӧвӧл, сое басьтон понна коньдон шедьтыны кулэ. Та ик муг луиз кадь Михеевлы кырыж сюрес вылэ кожыны. Сӥзьыл бусы ужъёс дыръя ю тысь лушкаса шедиз. Нош дораз нуыны, вузаны ӧз вутты егит воргорон. Председательмы бусыысен ик кырмем. Таяз учыре штрафен мозмытскиз вал. Кылем толалтэ дорысьтымы парсьмес вандыны малпай. Бадӟым пудоез оген уд вормы, юрттӥсь кулэ. Уката ик кык пиосы но вӧзам ӧвӧл: бадӟымез Коми шаерын ужа, кыкетӥез - службазэ азинтэ на. Фермаысен пумитаса, Сергеез юрттӥськыны кури. Ӟеч, быгатыса тыршиз егит воргорон. Сӥльёсмес кеносэ ошылыса, корка пырим. Кузпалэ ӝӧквыл тыр сиён-юон дасяса вуттэм ни. Гажаса ӧтем куноез музэн сюдыса-сектаса, тау карыса келямы Сергеез. Ӝыт пал кузпалэ но, ачим но уж дурамы дыртӥм. Дорамы кылиз школаын дышетскись нылмы гинэ. Кыӵе ке уродэз сярысь малпаны огмылэн но йырамы ӧз лыкты. Нош ӵуказеяз кузпалэ кеносэ потӥз но шулӟектыса берытскиз: кеносэ ошылэм сӥльёс пӧлысь, парсьмылэн кык бер макесъёсыз "шупчиллям". Та иворез кылыса, мынам йырсиосы ик пежырскизы. Югыт дунне вылын ньыльдон вить ар улытозям, таӵезэ ӧй пумита на вал уго. Йырвизьме бергатэме, бускельёсме ваньзэс "пуж пыртӥ сӥсъяме" бере, малпан вуиз: "Лушкаськись - Сергей Михеев". Сергейлэн уж дураз бызи. Вераськонмес мытыны умойтэм ке но, юатэк амалы ӧвӧл. "Сережа, - шуисько, - кеносысь сӥльёсмы ышизы. Тыныд сьӧлыканы но умойтэм кадь. Огзэ курисько: кудӟем йырыныд лушкаса ке поттӥд - берыкты. Со сярысь одӥг лул но уз тоды". - Ӧй, - шуэ. - Кызьы-о, пе, Коля агай, ачим юрттӥськыны ветлыса, тӥляд юртады лушкаськыны пыралом? Сюдӥды, сектады но. Оски. Малпасько, кызьы-о ас выжы калыке сыӵе кырсь уж лэсьтоз? Та ивор быдэс гуртмес зуркатӥз. Ӧй вал на уго гуртамы сӥль ышылон учыръёс. Кӧня ке час ортчыса, мыным кык ӟуч нылкышноос, фермаын скал кыскисьёс, лушкемен иворто: "Толон милемлы Михеев сӥль ӵектылӥз. Одӥг ӟенелик водкалы - одӥг парсь макес сётыны оскытэ вал. Ӧм басьтэ, курдамы. Дораз уго пудо-живот уг вордо"... Нылкышноослэн верамзы монэ воксё усыкмытӥз кадь. Сергеен выльысь пумиськыса вераськон юрттымтэ бере, милицие жингыртӥ. Следовательёс "гердэз" ӝог сэрттӥзы- пертчизы. "Юрттӥсьме" дорамы вуттӥзы. Михеев возьматъя, кызьы но кытӥ юртамы пыраз, кыӵе кортӵоге ошем сӥльёсты басьтӥз, кудзэ лымые согиз... Лушкам вуззэ курыт вуэн воштыны басьтӥсь утчанъяз, сӥльзэ пуныос качаллям. Озьы аслыз но, милемлы но ӧз луы. Ми ужын дыръя пырыса лушкам вылэм. Нош нылмы магнитофон кылзӥськеменыз номыр но кылымтэ. Ортчиз суд. Судьялэсь сюлмысь кури: "Жалялэ таяз учыре Михеевез. (Лушкам сӥль дунзэ анай-атайёсыз милемлы берыктӥзы ни вал). Адями егит на, тупатскыны, визьмаськыны кулэ". Таяз учыре но Михеев пытсэт сьӧры ӧз шедьы. Суд бере мыным вера: - Вождэ эн вай, Коля агай. Туж сьӧлыко мон тон азьын. Воксё адямилыкме ыштӥ ни. - Таӵе кылъёсты вераны быгатӥськод бере, тон выльысь ас адямилыктэ берыктыны кулэ, - оскытӥсько сое. - Ужаса, котырысьтыд калыкез гажаса улыны тыршы. Ортчиз ӝыны ар. Сергей Михеев вить пуйы фураж лушкаса кырмемын. Киоссэ жильыяса ик милицие, пе, нуизы. Ма возьма азьпалан егит удмурт воргоронэз? Малы со тӥяськиз, кырыж сюрес вылэ кожиз? Юанъёслы соку ик уд валэкты. Та воргорон сярысь гожтӥсько одӥг муген гинэ. Оло, кин ке лыдӟыса малпаськонэ усёз, кырыж сюрес вылэ кожонлэсь утиськоз. Озьы медло вылэм. Н.ТУРИН. "Удмурт дунне" газетлэн редакциез кайгыре газетлэн редакцияз ужасьлэн Елизавета Николаевна Камашевалэн атаез Николай Федорович КАМАШЕВ улонысь кошкемен валче но солэн ӵыжы-выжыосызлы но матысь адямиосызлы мур куректэмзэ вера. Ветеранлы дунтэк гожтэт Вормонлы 55 ар тырмон азьын Быдӟым Отечественной войнаысь ветеранъёс ӵош ожмаськем эшъёссэс, ӵыжы-выжыоссэс но тодмооссэс ӟечкыланы быгатозы нимысьтыз поттэм дунтэм конвертъёсын. Россиысь связья министерстволэн "Марка" издательско-торговой центрезлэн поттэм конверт вылаз пуктэмын Берлинысь Трептов-паркын сылӥсь воинлы-мозмытӥсьлы сӥзем тодмо памятниклэн суредэз. Марка интые конверт вылэ суредамын фронтысь куинь сэрего гожтэт, котыраз гожтэмын "Письмо ветерана-2000" Россиысь улосъёсы 10 миллионлэсь уно таӵе конвертъёс келямын ни. Котькуд ветеран 5 сыӵе конверт басьтоз. Сыӵе конвертъёс сётэмын луозы Армениын, Казахстанын, Киргизиын, Молдоваын но Узбекистанын улӥсь ветеранъёслы но. Со сяна, Вормон нуаллы чакламын 4 маркаен серия поттыны. Отын возьматӥськозы война вакытэ поттэм плакатъёс. Н.СЕРГЕЕВ. ШКОЛА НО УЛОН Кечкутонэ йырвизь люканы Удмуртлыклы дышетскем бускель шаерын Ёросъёсысьтымы удмурт кылъя но литературая дышетӥсьёсмы тэк пукыны уг чидало. Монэ, удмурт кылъя секциен кивалтӥсез, пӧртэм пумиськонъёс ортчытъяны куро. Тани сӥзьыл дэмен вуылӥм Дэбе улосысь Байгурезе, Сибирь трактлы сӥзем музее. Отчы ветлэммы бере, "Сурсву" веросэз но, "Зурка Вужгурт" повестез но, "Байгурезь йылысен" кылбурез но нылпиослы вераны, адӟытыны туж тунсыко луоз ни, угось ми адӟеммес-кылэммес видеокассетае гожтӥм. Нош южтолэзе вуылӥм бускель Татарстанэ. Сюресмы кузь ке но вал, ветлэммы пайдаёлэсь но пайдаё ортчиз. Мар шуод, бигеръёс но, асьмеос сямен ик, быгато куноосты пумитаны. Бускельёсмы дорын тодматскимы Кичкетанысь гурт хозяйствоя экспериментальной лицеен. Отын дышетске 163 пинал:121 бигер, 40 удмурт, 2 ӟуч. 36 дышетӥсь ужа соосын. Лицейын дышето мушкасе, бухгалтере, вуриськисе, бакча сиён будэтӥсе. Огъя вераса, та лицей пиналъёсты дышетэ туала вакытэ гуртын кулэ луись ужъёслы. Матысь кусып возё Гурт возёсъя академиен. Лицеен кивалтэ Роза Хусаиновна Ибрагимова. Та чебер но йӧно кышномурт милемды туж сӥлы кариз. Лицеен тодматыкуз ик адӟиськиз зэмос кузё луэмез. Туж быгатыса, валаса чеберъямын кабинетъёс но, коридоръёс но. Быдэс школазы ужа инкуазез утён ужпум бордын. Вань асьсэлэн кункрезьзы, куншетсы, кунпуссы. Школаын синэз мальдыто пӧртэм сяськаос, нокин но соосты тӥясь ӧвӧл. Завучлэсь Гузалия Ибрагимовна Хусаеновалэсь ужзэ адӟим бадӟым методической кабинетысь. Туж мур пуштросъем стендъёс куинь кылын гожъямын: ӟуч, удмурт, бигер. Котькуд дышетӥсь син азе пуксе. Азьмынӥсьёсыз нимысьтыз пусъемын. Али гинэ ужаны кутскись завучъёслы мон одно ик татчы ветлыны дэмласал. Ми пукимы кык урокын но "Ӟазег веме" ужрадын. 3-тӥ "б" классын урок сётӥз С.Н.Антонова. Урок сӥземын вал инкуазь утёнлы. Эскеризы Н.Байтеряковлэсь "Пияш но Лосьпи" вероссэ. Котькуд урокысь, мылкыд ке потӥз, шедьтыны луоз пичи ке но шексэ, тырмымтэзэ. Нош та урокысь ми номыр сыӵезэ ӧм синйылтэ. Методика ласянь туж мур малпамын вал урок. 3-тӥ классысь пиналъёс туж чебер, мусо верасько удмурт кылын. Шалтыр гинэ лыдӟисько. Веросэз котыр ласянь сэртто-пертчо. Быгатонлыксы та пичи удмурт лицеистъёслэн 5-тӥ классын дышетскисьёсын ӵоша. Мынам син шорам туж йӧтӥз физкультминутка: синъёслы но, пельёслы но, мугорлы но нимысьтыз ортчытӥське. Со уроклэсь пуштроссэ эшшо муромытэ, дырез огшоры быдтон ӧвӧл. Ф.И.Гончарова 10-тӥ классын ортчытӥз Мадьяровлэн "Аналтэм сяська" повестезъя внеклассной лыдӟиськонъя урок. Ачиз Фаина Ивановна дышетскемезъя зоотехник, но дас сизьым ар школаын удмурт кылын дышетыса, зэмос дышетӥсь луэмын ни. Со дышетӥсь- методист. Урокез но туж малпамын вал, ӝутэмын туж бадӟым ужпум: анай-атаез вань дыръя но нылпи юртын улон. Уроке куное ӧтемын вал Можгаысь нылпи юртлэн директорез. Сюлэмез вырӟытымон, синкылиез поттымон вераз со нылпи юртысь пиналъёслэн улэм- вылэмзы сярысь. 10-тӥ классын дышетскисьёс но мылысь-кыдысь пыриськизы огъя вераськонэ, шара веразы асьсэлэсь малпанъёссэс. Кабинетэз но Фаина Ивановналэн туж ӝикыт, котьмаин узыр, ваньмыз аслаз киыныз лэсьтэмын. Фаина Ивановна ик возьматӥз "Ӟазег веме" йылолэз. Таӵе ужрадэз мынам адӟеме ӧй вал на. Туж тунсыко: удмурт нылпиос ӟазег ишкон куспазы мар гинэ ӧз каре! Маскаръяськизы, кырӟазы-веразы, эктӥзы. Котьмар карыны быгато, бигеръёс пӧлын улыса но. Вань дышетӥсьёс, пиналъёс бигер, ӟуч но удмурт кылын верасько. Таизлы мон туж вожъяськи, угось Удмуртиын удмуртъёс нуналмысь ӟучомо. Кызьы бен та 40 удмурт пиналъёс бигеръёс пӧлын ӧвӧл но бигермиллям, ӧвӧл но ӟучомиллям? Валэктонэз, мон сямен, татын одӥг: бигеръёс пӧлын улӥсь удмуртъёслэн удмурт кылзы сыӵе ик кулэ, кыӵе кулэ бигер адямилы бигер кылыз. Татарстанын улӥсь удмуртъёс озьы ик ӟеч тодо бигер кылэз но, соос уг ик валало, кызьы татын улыса бигер кылэз уд тоды. Асьмелэн малы озьы уг луы? Кытын ке вераськы ай удмурт сямен, нырысь чакла, ваньзы-а валало удмурт кылэз. Ук ке, вераськиськом ни ӟуч сямен. Соку, зэмзэ но, удмурт кылэз малы тодыны тыршод на? Соин но, дыр, Татарстанысь потэмын ни кык удмурт профессоръёсмы-кылчиосмы но: В.К.Кельмаков, И.В.Тараканов. Потозы но ай, Кичкетанысь лицее вуылыса ми сое юн валамы. Н.Ермокина, удмурт кылъя но литературая секциен кивалтӥсь. Пичи Пурга ёрос. Куинь "зарниен" бертӥз Кылем толэзе Тобольск городын куас вылын ӵошатсконъёсъя Россилэн чемпионатэз ортчиз. Отчы пыриськоно вал 30 но солэсь вылӥ арлыдо спортсменъёслы. Сибире соку люкаськылӥз 41 улосысь 250 спортсмен. Удмуртиысь отчы ветлӥзы ньыль кузя: Сарапулысь Юрий Порываев, Дэбесысь Нина Данилова, Ижысь Гурт удысъя академиысь Эмма Чиркова но "Буммаш" АО-лэн 380 номеро отделысьтыз Валерий Мусалимов. Ваньмызлэсь зол отын бызьылӥз Мусалимов, со куинь зарни медаль басьтӥз - 30, 15 но 50 иськеме бызьылонъя, озьы 2000-тӥ ар понна Россиысь чемпион луиз. Бен, кык зарни медальёс ваиз Нина Данилова, куинь азвесьсэ - Эмма Чиркова, одӥг бронза - Юрий Порываев. П. Николаев. Кылбуръёсыз улозы сюлэмын Валлян арын та вакытэ быдэс шаермы пусйиз нырысетӥ удмурт нылкышно кылбурчилэн Ашальчи Окилэн вордӥськемез дырысен сю ар тырмонэз. Кылбурчиез, син эмъясез буре ваизы Грах ёросысь Куӟебай гуртын (Л. Г. Векшиналэн вордӥськем гуртаз) но, Алнашын но - татын со улӥз но ужаз берпуметӥ аръёссэ. Ашальчи Окилэн улон сюресэз сярысь трос гинэ гожъязы ни критикъёс, писательёс. Нош кылбурчи но эмъясь али ке но "улэ" аслаз юртаз-музеяз. Наталья Михайловна Фадеевалэн туж трос тыршеменыз, Лина Григорьевна Векшиналэсь улэм, ужам тӥрлыкъёссэ утялтэмен валче кылдӥз таӵе ӟеч синпель кельтыны луонлык. Ашальчи Оки улонысь кошкиз 1973-тӥ арын 31-тӥ октябре. Нош 1987-тӥ арын 3-тӥ ноябре Алнашын усьтэмын солы сӥзем музей. Ваньмыз татын ачиз улэп дыръя кадь: диван, койка, дӥсь возён инты, ӝӧк, пуконъёс... Борддор бордын - аслаз туспуктэмъёсыз. Огез висъет быдэсак сӥземын син эмъясьлэн ужезлы. Татын - суредъёс, йӧнатон тӥрлык... Ваньзэ тае асьтэлэн адӟемды луоз, Алнашысь музее вуылыса. Лина Григорьевналэн ужам, улэм сюресэз сярысь туж тунсыко мадьыны быгато татын ужасьёс Л. И. Посадова но Н. М. Фадеева. Зэм, котькытын сямен ик татын но ӧжыт ӧвӧл шуг-секытъёс. Тросэз герӟаськемын коньдонэн. Валлян арын толалтэ Ашальчи Окилэн вордӥськемез дырысен сю ар тырмон азьын радъяллям куд-ог тупатъян ужъёс. Но йылаз-пумаз вуттӥллямтэ гужем но. Эшшо арбериосты но выльдыны кулэ. Вазь тулысысен бер сӥзьылозь газзэс дугдыто, нош экспонатъёсты возёно одӥг кадь температураем юртын. Телефонзы ӧвӧлысь но трос шуг-секытъёс кылдо: мукет ёросъёсысь лыктэмзы потэ, нош жингыртытэк кызьы дӥсьтод со кузьда сюрес вылэ потыны? Людмила Ивановнаен Наталья Михайловна таӵе амал но ӵектӥзы: Ижысь толэзяз огпол ке но экскурсие мед вуылысалзы. Азьло дыръёсы Елабугае ветлыкузы пырало, пе, вал. Трос ӟеч кылъёс вералляло вылэм. Удмурт литературалы воксё кыдёкын луись адямиос но шуылӥллям: "Тӥ милемлы выль адямиез усьтӥды". Алнашын вань на Г. Д. Красильниковлэн музей-юртэз. Иське, лыктэмъёслэн вуылэмзы юнме уз луы. Ашальчи Окилэсь музей-юртсэ утисьёслэн эшшо одӥг сюлэмшугъяськонзы вань на: Лина Григорьевналэсь пизэ, В. И. Карачёвез, чик уг санлало. Солы ӝоген сизьымдон арес тырмоз. Вылӥос но мед ӟечкыласалзы. Та адямитэк музей-юрт но ӧй луысал. Угось Валерий Иванович, пичи но дун курытэк, быдэс анай-атай юртсэ культуралы кузьмаз. В. И. Карачёв семьяеныз ӵош али улэ Владивостокын. Ужам метеоролог луыса. Атаез кулэм дырысен Удмурт шаере бертамтэ ни. Тӥни сыӵе сюлэмшугъяськонъёссы музейын ужасьёслэн. Ашальчи Окиен пумиськыны мылкыд карисьёс Алнаше вуылыны быгатозы котькуд нунал. Н. Прокопьева. Яратӥсь сюлэмъёсты уд люкы Выль спектакль возьматэ яркыт но кужмо яратонэз. Егит удмурт ныл, Айна, яратэ усто пӧйшурасез, Бурашез. Зэм, нылмуртэ асэстыны малпа узыр пи, Артан. Ог-огзылы ваче пумит сылӥсь кужымъёс куспын пуроме ӟырдыт нюръяськон. Артан асэстэ ик Айнаез. Зэм, соин быдэс улонзэ герӟаны уг кылды. Айна но Бураш выльысь ӵош луо. Егитъёс пумисько мукет дуннеын - яратӥсь сюлэмъёсты озьы гинэ уд люкы. Татын гинэ шедьто соос каньыллык но буйган. Татын гинэ огазея соосты Бадӟым Яратон. Выль спектакльын оглулысь шудо театрысь егит актёръёс: Игорь Моисеев, Алексей Ложкин, Валерий Мадзеков, Валентина Моисеева, Елена Сунцова, Наталья Ветрова-Тур но музонъёсыз учкисьлэн сюлэмаз яркыт тодэваёнъёс кельто. ? Айна - актриса Валентина Моисеева. ? Артан - актёр Игорь Моисеев, Узыбей кенак, солэн анаез - Удмурт Элькунысь калык артистка Раиса Нефёдова. Бураш (паллян палаз) - актёр Алексей Ложкин, трос калык пӧлын шудӥсьёс - актёръёс Михаил Васильев но Андрей Сергеев. Владимир Беломорскихлэн туспуктэмез. Мулла Малпамтэ мадёс Гарип агаез мон кемаласен тодӥсько. Бигер кылэз йӧн-йӧн валаны, вераськыны кутскеме дырысен эшлыко кусыпъёс возиськом. Та арлыдо воргорон ӝужыт но таза мугоро. Ымныраз чабкид ке, вирыз пазьгиськоз. Гарип агай колхозын усто механизатор вал. Котькыӵе ужез ӵекты, дыраз быдэстоз. Но курыт вуэз яратылӥз, шайтан басьтон! Чыртызэ ке коттэ, уже но уз поты, верамдэ но пель сьӧртӥз гинэ лэзёз. Но тани шуак-дуак улон тӧлъёс воштӥськизы. Куашкам черкъёсты, мечетьёсты выльдыны- тупатъяны, выльёссэ ӝутыны кутскизы. Азьвыл инмарлы чик оскымтэос - атеистъёс - вӧсь книгаосты лыдӟыны, инсьӧр кузёлы вазиськон юртъёсы ветлыны кутскизы. Паймод: инмарен шайтанэз оградэ пуктӥсьёс ик воксё воштӥськизы, асьсэды сьӧлыктэмъёсын лыдъяны, муртэ визьманы-дышетыны ӧдъязы. Та "тӧлпери" шоры ӝимиз Гарип агай но. Пенсие кошкеменыз огӵош курыт ву юонлэсь куштӥськиз. Вылаз ик, арня нуналъёсы вӧсьёсы ветлыны кутскиз. Собере гуртысь арлыдоос сое воксё асьсэлы муллае бырйизы. Коранлэн (мусульманъёслэн вӧсь книгазылэн) куронэз сыӵе уго: мулла кариськыны быгатэ сьӧлыктэм, ужез но адямиез гажась, аракы юисьтэм, тамак ӵындӥсьтэм, нылкышноосын калгисьтэм мурт гинэ. Гарип агай ӵапак тупаз кадь сыӵе "стандартэ", курон-ӵектонэ. Озьы тодмое мулла кариськиз. Паймыса юан сётэмелы бигер воргорон вӧсь книгаысь кылъёсын ик валэктон сётӥз: "Утиськон сюреслэн кутсконэз - аслэсьтыд сьӧлыкъёстэ, шекъёстэ валан- адӟон". Пумитаз вазьыны кыл ӧй шедьты ни - могӟи. Нош со сярысь газетэ гожтыны малпанме шараятэк ӧй чида. Арлыдо эше монэ дораз ӧтиз. Пуком, вераськом, пе. Ӵапак ураза вакыт вал - мусульманъёслэн кӧс возён дырзы. Соос та нуналъёсы шунды ӝужатозь но шунды инвис сьӧры ватскем бере гинэ сиё-юо. Озьы косэ Коран. Уразаез утьытэк, газет баме шедёно выль герое ӝӧк выл тыр сиён-юон дасяз. Курыт вузэ чайнике лэзьыса пуктӥз, озьы, пе, сьӧлыко ужен уз лыдъяськы. Пукиськом, вераськиськом, мон блокнотэлэн куинетӥ бамаз гожъясько ни. Амалтэк юано кариськи: - Гарип агай, кызьы-о муллаозь ӝутскид? - Ас поннад шу: вань адямиос ӟеч ужъёссы понна рае шедёзы, одӥг мон гинэ ад капкаетӥ пыро, - вӧсь книгаысь кылъёсын валэктон сётӥз со. Уразаез утьытэк, нуназе куазен сиён-юонэз тыке гинэ мулла. - Кӧс возён-утён - сьӧлыклэн серметэз шуиське-а вӧсь книгаын, Гарип агай? - Алла та вие мед кӧлоз, - пальпотӥз со. - Тынад сяна, мултэс синъёс ӧвӧл ук. Озьыен, сьӧлык уз луы. Ю, Никол, - аракыен чарказэ азям пуктӥз. - Но вӧсяськон сярысь эн вунэты: аллалэн судаз медад сюры шуыса, одӥгзэ но вӧсяськондэ эн палэнты, - вазиз со вӧсь кылъёсын. Мукет висъет сьӧры ветлыса пыласькиз, выж вылэ пичи ковёр вальыса интыяськиз но вӧсяськыны кутскиз. Н. Никифоров. Архивысь документъёсъя Удмуртия ЪЪ дауре 1906-тӥ ар Бугыръяськись мылкыдын улӥсь адямиосты пытсэт улэ кысканы ӧдъязы. Вятка губерниын йылэтэмын полицейскойёслэн лыдзы, калыкез чакласа возён вылысь, татчы казакъёсты ыстӥзы. Калыклэн мылкыдыз огъя сӥяны ӧдъяз кадь, озьы ке но, Уралын улӥсьёс кема пӧсекъязы на. Вир кисьтон арнялэн ар тырмоназ, 9-тӥ январе Вотка заводын ужасьёс, быремъёсты буре вайыса, ужзэс дугдытъязы, Иж заводын демонстрация ортчиз. Паськыт ортчиз 1-тӥ Маез пусъён. Бугыръяськизы Вотка, Иж заводъёсын ужасьёс. 1906-тӥ арын тужгес бугыръяськизы Ижысь ужаса улӥсьёс. Таӵе ваче пумит сылон вакытэ соос азьветлӥсьёссэс кенеше бырйылӥзы. Асьсэлэсь огазеяськонзэс кылдытӥзы Воткаысь ужасьёс но. 1906-тӥ арын крестьян калыклэн огъя мылкыдыз сӥяз, нош Вятка но Оренбург губерниосын музъем бугыръяськонъёс йылӥзы ай. 1905-тӥ арын Вятка губерниысь 79 волостьысь кресьянъёс бугыръяськизы ке, 1906-тӥ арын - 104-яз. 5-тӥ сентябре Малмыж уездысь Мултан черкогуртэ артысь улосъёсысь ог сюрс адями люкаськиз. Соос интыысь властез воштӥзы, крестьян комитетъёс кылдытӥзы. Кузёослы пумит луэмзэс возьматон вылысь, крестьянъёс нюлэсэз коразы. 1906-тӥ арын Вятка губерниысь 27 сюрс йыртэмась суд улэ кыскемын. 1906-тӥ ар историе пыре на 1-тӥ Кун Дума люкаськемен. Отчы тросгес шедизы либерал учкон-малпанъёсын адямиос. Депутатъёс луизы: Ижысь пыӵал поттон заводысь мастеровой Николай Бирюков, Глазов уездысь дышетӥсь Павел Целоусов, Сарапул уездысь эмъясь Сергей Корнилов. Нырысетӥез Кун Дума ӝоген пытсамын вал. Е. В. Горбушина, Удмурт Республикаысь Кун архивысь валтӥсь специалист. Нырысьсэ адӟи - синмаськи Драмая удмурт кун театр та толэзе учкисьёс азе поттӥз выль ужзэ - "Айна" крезьгуро драмаез. Лирико-романтической шӧмын пыӵатыса, туала учкисьлы матэ карыса пуктӥллям сое режиссёр Василий Ушаков (со ик - пьесалэн авторез , нош соин ӵош пьесаез быдэсак выльдон, кылбурен-кырӟанэн чеберман бордын ужаз Татьяна Чернова), художник Владислав Анисенков, балетмейстер Ксения Русских но крезьгурчи Николай Шабалин. Спектаклез нырысьсэ куинь нунал пуктэмлэсь азьло сое театрын эскеризы, котыр ласянь "сэстӥзы". Ас малпанъёссэс веразы журналист Милитина Гаврилова, тодосчиос Татьяна Владыкина, Алексей Ермолаев, дышетӥсь Вениамин Морозов, суредась Валентин Белых, артистъёс Вероника Садаева, Петр Романов, Геннадий Бекманов но мукетъёсыз. Огкылысь пусйизы: тодмо сюжетъя пуктэм спектакль выль амалъёсын, выль тусо-буё, тунсыко пӧрмем. Кӧня учкись, со мында ик дунъет сётӥсь. Малпанъёссэс вераны курыса вазиським на кӧня ке адямиослы. Ангелина Решетникова, Иж карысь 44 номеро гуманитарной лицейысь дышетӥсь: - Мон туж шумпотӥ режиссёрлэн ужез понна. Азьло ӵемысь тышкасько вал, вуж сямен ужаськоды шуыса. Татын - выль утчаськонъёс. Художниклэн ужез яраз. Айшон, сюлык туж йӧно адӟыто удмурт кышномуртэз. Сыӵе вуроно вылэм сюанлы, малпай. Декорациос но паймытӥзы. Алигес Москваын Вахтангов нимо театре "Чудо святого Антония" спектакле ветлӥм. Ӵошатоно ке, сценаез чеберъян ласянь асьмелэн театрмы но бере уг кыльы. Отын Людмила Максаковалэсь шудэмзэ учки. Нош асьме дорын... малы ке нырысьсэ адӟи спектакльын Ольга Зоринаез. Татын но со быгатэ вылэм. Валентина Загуляева, Леонид Романов, котьку сямен ик, туж кельшизы. Котькуд вамыштэмзы, ки шонтэмзы интыяз - вӧй шунтэм-кисьтэм кадь. Нырысьсэ адӟи но синмаськи Наталья Ветровалы (Куарӟилы). Пайми, воксё ми палась, Кизнер ёросысь Вуж Бодьялась, вылэм шуыса. Елена Сунцова (Идай) паймытӥз ваньмызлэсь чебер, азвесь гырлы кадь куараеныз, но шудэмез кӧня ке огманергес потӥз. Айна (Валентина Моисеева) кузьымъёс сётъяса кырӟакуз сюлэмез ик позыртэ. Куд-ог кырӟанъёс кузьгес луиллям, мӧзмыто. Маскарчиос-егитъёс туж ик ӧз кельше. Ваньмыз ик сюлмысьтызы уг шудо. Оло, кожало, соос шоры учкисьёс ӧвӧл... Пьесалэн кылыз, текстэз капчи потӥз. Шӧдыны ик уг луы кадь, со кылбурен гожтэмын шуыса - ас эрказ ӧръяське. Дышетскисьёсылы, спектаклез учкемзы бере, сочинение-рецензия гожтыны гуртэ уж сётӥ. Котькудӥз ас мылкыдзэ вералоз. Анна Мерзлякова, пенсионерка: - Оглом кельшиз. Но вашкала яке туала вакытэ дыр ортче - ӧйгес вала. Нимъёс вашкала кадь, вужесь. Кырӟанъёс - туала, калыклы матынэз вань, сюан гуръёс. Спектакль сюлэмез бугыртэ. Шумпотӥ: сое трос егитъёс учкизы. Кирилл Ломагин, писатель: - Спектакль финн-угор дуннее но, потоз, дыр. Куд-огез кык пол но учкизы. Мон но ветлӥ на. Дӥськутъёссы золэсь. Туж умой соиз: татын сюан шӧдӥське. Крезьгурчи та гуръёсыз выльдыны, пӧртэмъяны тыршем. Одӥг гурен весь кырӟаса, улонлэн азинскемез уз адӟиськы. Людмила Кириллова, тодосчи: - Крезьгуро номеръёс трос кадь, кема кыстӥсько. Эктонъёс бордын кӧня ке ужано на. Боды ньылэм кадь медаз адӟиськы. Нош малы Айна? Бигер ним кадь та. Г. Саттаровлэн "О чём говорят татарские имена?" книгаысьтыз шедьтыны луэ. Куӟебай Герд, финнъёслэсь адӟем карыса, Айно шуиз вал. Эстонъёслэн но со ӵем пумиське. Касим Галиханов, архитектор: - Та пьеса лирико-драматической гинэ ӧвӧл, трагическойлы матэктэ. Но трагедия шуоно ке, пуштроссэ философия ласянь муромытоно луысал. Кыкетӥ действиын омыр ӟырдаса кошке. Нырысетӥез сыӵе ик ӧвӧл. Пиослэн эктон выросъёссы небытэсь, огкадь мыньпото. Татын но пиосмурт кужым, нюръясьыны дась мылкыд мед шӧдӥськысал. Уллё кадь медам луэ. Кӧня учкисьёс, со мында ик синъёс. Котькуд чыры-пыры син шоры йӧтоз. Нош огъя - спектакль пӧрмем, мон шуысал, ӟечкыланы кулэ. Тодады вайытӥськом: "Айна" спектакль луоз на 20-тӥ апреле. Та верамъёсын тӥ соглаш луыны быгатӥськоды. Яке - вордськозы ай чылкак мукет малпанъёс но. Журналистъёсын пумиськон Улонлэн синучконэз - семья Семьялэн азьлань улонэз но быдэ вуымтэослэн тазалыксы, наркоманиен герӟаськем ужпумъёс сярысь вераськон ӝутскиз кылем пятницае Кун Кенешлэн Тӧроезлэн воштӥсез Наталья Харина кивалтэм улсын. Журналистъёсын пумиськиз Россиысь "Семья улонэз радъянъя" ассоциацилэн валтӥсь директорез Инга Гребешева. Кенеше озьы ик ӧтемын вал республикаысьтымы Калыкез дышетонъя, Тазалыкез утёнъя, Югдурез утёнъя министерствоосысь но мукет ведомствоосысь валтӥсь специалистъёс. Семья улонэз радъян ужпумъёс шаерамы кӧня ке аръёс ӵоже ини син азьын возисько. Та удысэн герӟаськем нимаз службаос кылдэмен валче, югдур ӧжыт ке но умояз ни вал. Кулон учыръёс нуны вордӥськонлэсь тросгес ке но, нылпиослэн лыдзы йылыны кутскиз ни вал (1997-тӥ ар - 9,4 процент, 1998-тӥ ар - 9,9 процент, 1999-тӥ ар - 9,6 процент). Кулэсмизы аборт лэсьтон учыръёс, анайёс пӧлын кулон учыръёс. Озьы ке но, Россиын кылдэм огъя югдур Удмуртилэн палэнтӥз уг ортчы. Туннэ нуналэ Россиысь семьяос секыт вакытэ вуттэмын: нылпи пособиос тросаз регионъёсын аръёсын уг тырисько; дунъёс сьӧры уиськыны уждун уг тырмы; ужтэк кылён учыръёс 12 процентозь будэмын, нош нылкышноос но егитъёс пӧлын солэсь но трос. Европаысь вань странаосын ӵошатыса, Россиын нылпиос тужгес но ӧжыт вордӥсько. Вордӥськемъёсыз но анай-атайёссы ваньысь нылпи юртъёсын будо яке урамъёсы куштэмын. Кылсярысь, та вакытэ Россиысь нылпи юртъёсын 590 сюрс нылпи будэ, 90 процентэзлэн вань анай-атайёссы. Нош 2 миллионэз урамъёстӥ костасько. Берло аръёсы туж трослы будӥзы венерической висёнъёс, соин йырин но тросэз воргоронъёс нылпитэм кылё. Эскеронъёс возьмато, 50 роцентэз воргоронъёс нылпилы улон сётыны уг быгато. Россиын 20 процентэз семьяос пиналлы кулэясько. Со вакытэ ик куинь нылпи ваёно нылкышноос пӧлысь кыкез аборт лэсьтэ. Нылпи куштон учыръёс тужгес но тросэз герӟаськемын улонмылэн шуг-секытъёсыныз. Секыт югдур ик быдэ вуымтэосты вуттэ кырыж сюрес вылэ. Вить-куать ар ортчыса, кинлы оскомы асьмеос улонмес? Та сярысь туннэ ик кулэ ужпумъёс ӝутоно. "Котырес ӝӧк" сьӧры люкаськемъёс бадӟым саклык висъязы наркоманиен нюръяськонлы. Наркотикъёс ик усьто уго сюрес кышкыт висёнъёслы, СПИД-лы. Наркотикъёсын нюръяськонъя шаерамы дасямын нимысьтыз программа, со бордын ужалозы пӧртэм министерствоос но ведомствоос. Матысь дыре со кутэмын луоз. Озьы ик Ижевскын ӝоген усьтӥськоз быдэ вуымтэослы наркологической центр. Шаерысьтымы тросэз школаос дасесь ӧвӧл наркоманилы пыдзэс пуктыны. Ӧвӧл нимаз программаос, методикаос, кадръёс. Та югдурез тупатон понна, апрельлэн пумаз нырысетӥ республиканской больницаын ортчоз школаын ужась психологъёсын, педагогъёсын, воспитательной ужъя директорлэн воштӥсьёсыныз семинар. Та кулэ но пайдаё ужрад озьы ик азьлане вамыш луоз. Но анай-атайёс кин ке вылэ оскиськыса улыны кулэ ӧвӧл. Наркотикъёслэн кышкытлыксы сярысь, соос тодыны кулэ, нылпизэс чакласа возёно. Мар ке умойтэмзэ шӧдыса, соку ик вазиськоно юрттэтлы. Берло дыре телевидение но газетъёс трос верало наркотикъёслэсь пайдаё эмъяськыны луонлык сярысь. Эн буйгатске, гажано эшъёс. Нырысь ик, со понна кӧня ке сюрс долларъёс кулэ луозы. Нош кыкетӥез, специалистъёс верамъя, организм эмъюмлы кулэяськемысь дугдоз, нош мылкыд, улон югдур воштӥськоз меда соку ик? Соин ик нырысь интые пуктоно таза улонэз. Тросэз со потоз семья бордысь но. Наркотикъёсын нюръяськон борды басьтӥськиз Югдурез утёнъя министерство но. Со ужпумъёсын выре нимысьтыз отдел. Ёросъёсын но нимаз адямиослы оскемын та уж. 1999-тӥ ар ӵоже гинэ наркоманияя 1932 уголовной уж эскеремын вал. Таламын 15 килограмм героин но 135 килограмм мак куро. Кенешон пайдаё ортчиз. Москваысь кунолэн Инга Ивановна Гребешевалэн верамезъя, Удмурт Республика семья улонэз радъян ужпумъёсты уг палэнты. Правительстволэн ужезлы дунъет сётонын но та ужпумъёслы нимысьтыз саклык висъямын, мукет республикаос сярысь озьы вераны уг луы. Россия Федерациысь Правительство но калыклэсь тазалыксэ нырысь интые уг пукты. Семья улонэз радъян ужпумъёсты али тросэз курланы, умойтэмен лыдъяны туртто. Валтӥсь интые политикаез но экономикаез пукто ке но, странамылэн азинсконэз возиськоз калыклэн, семьялэн тазалыкез бордын. Л. Малых. Ӵошатскон - вӧлмиз ёросэ Вуж Салья гуртысь "Нылкышнолэн шудэз" нылкышно огазеяськон пӧртэм тунсыко ужрадъёс ортчытъя мӧйыос но шоро-куспо арлыдоос пӧлын, уг вунэто пудо утӥсьёсты но. Таяз учыре егитъёс куспын КВН ортчиз. Гуртысь культура юртэ лачак калык люкаськиз. Сцена вылын асьслэсьтыз быгатэмзэ возьматӥз кык команда: "Сальялэн данъяськонэз" (капитанэз Валентина Морякова медакадемиысь студентка) но "Выль удмуртъёс" (капитанэз - гуртысь егитъёслэн огазеяськонзылэн кивалтӥсез Виталий Ермаков). Командаос быгатэмзэс пӧртэм ласянь возьматӥзы, ог-огзылэсь визьзэс но сыназы. Возьматӥзы 2000-тӥ арысь модаез, ӵошатскизы, кин азьлогес дӥсялоз пу корасьёслэсь дӥсьсэс но мукет. Жюриын пукисьёслы школалэн кивалтӥсезлэн воштӥсезлы Виталий Николаевич Пудовлы, дышетон удысысь отличниклы Валентина Павловна Осиповалы но скал кыскисьлы Нина Николаевна Мизиревалы капчи ӧй вал дунъяны егитъёслэсь быгатэмзэс. Вормиз огъя эшъяськон - ӵошатскон одӥг кадь лыдын йылпумъяськиз. КВН-ын асьсэлэн быгатэменызы висъяськизы университетысь студентка Светлана Мизирева, Виталий Ермаков, фермалэн кивалтӥсез Леонид Камашев, воспитательёс Светлана Егорова, Эльвира Самсонова, ужбергатӥсь Аркадий Петров, Наталья Гереева, Людмила Федорова, Елена Трофимова но мукетъёс. Сальяос КВН-концертэн вуылӥзы бускель гуртъёсы - Вылын Сальяе, Кады Сальяе. Собере Уддядиысь "Слабо" но Колошурысь "Шаян йыръёс" командаосын быгатэменызы ӵошатскизы. Пумиськонъёс котькытын зал тыр калыкен ортчизы. Командаос шудон вискын люкаськемъёслы мӧзмыны ӧз сётэ Сальялась усто кырӟасьёс Галина Федорова, Валентина Лесова, Ольга Зыкова но Уддядиысь усточиос Григорий Собинов но Николай Смирнов. Ӵошатскон ортчиз Колошурын. Сое радъяны юрттӥз "Удмурт кенеш" огазеяськонлэн ёзэз (тӧроез Н. В. Пахомова) но ёросысь егитъёсын ужанъя ёзлэн кивалтӥсез Е. Е. Григорьева. Куинез ик команда кузьымъёсын пусъемын вал. Автобус висъяз ёросысь культурая отдел. Огъя вераса, егитъёс куспын пумиськонъёс пайдаё ортчизы, ог-огенызы соос шуныт кусыпъёс тупатӥзы, ӵошен шулдыръяськизы. Н. Моряков. Бакча возисез ӧте музей Толон Удмурт Элькунысь Национальной музейын усьтӥськиз "Сад. Бакча. Дача" ярмарка-адӟытон. Со ужалоз арня пумозь. Адӟытонын взьматэмын музъем ужен вырон тӥрлык, будосъёсты утён суретъёс, пӧртэм удобрениос, ужан дӥськут, бакчаын возёно эмъюмъёс но мукет. Отысь озьы ик адӟыны луоз туала дача юртъёслы но мунчоослы проектъёсты, лэсьтӥськон вузъёсты. Выставкаез радъясьёс витё тӥледыз, музъемез но шутэтсконэз яратӥсьёс! О. Марков. "Байгурезь" Москваын Кылем арня куспын Ижын улӥсь дэбесъёслэн "Байгурезь" огазеяськонзылэн правленияз быръем эшъёс Москвае вуылӥзы. Соос пумиськизы Кун Думаысь Нациосын ужанъя комитетлэн тӧроеныз Александр Ткачевен, тодматскизы Россиысь парламентлэн улӥ палатаезлэн ужаменыз. Озьы ик вуылӥзы Удмурт Республикалэн представительствояз, кенешизы асьме бӧлякъёслэн Москваысь "Герд" огазеяськонзылэн ужъёсыз сярысь. Дэбесъёслэсь Россия Федерацилэн шоркараз ветлонзэс радъяз Кун Думалэн депутатэз Светлана Смирнова. И.ЛЕБЕДЕВ. ТУЛЫС СЮЛМАСЬКОНЪЁС Шунды - выллань, нунал азьлань Таиз но тулыс шӧдтэкак вуиз. Толон гинэ букосъёсын кыллись лымы олокызьы гинэ шуназ - бусыос кесэген-кесэген усьтӥськизы, гурезь бамалъёсын ӟег уд но тол шобретсэ куштӥз ни. Озьыен, тулыс ужъёс туэ вазьгес кутскозы, уката но луоё муос вылын. Дась- а солы гурт удысэз нуисьёс? Завьялово районъя ке верано, югдур, кылем арен ӵошатыса, сокем урод ӧвӧл. Гурт удысъя управлениысь специалистъёсты та нуналъёсы огзэ но интыысьтызы уд шедьты. Сизьым часэ ӵукна, вакчияк кенешыса, соос дырто хозяйствоосы. Шугъяськытӥсь ужпумъёс уго лачак, ваньмызъя валэктон шедьтоно, юрттоно. Кутском пудо вордон фермаос бордыен. Кудӥз-огез соос пӧлысь туннэ ик дась живот уллёзэс му вылэ улляны - не пызьзы, не курозы кӧт тырымон сюдыны ӧвӧл ни. "Камское" эштосын, кылсярысь, скаллы быдэ туннэ 2,8 килограмм сяна йӧл уг кыско. Кылем арын, та вакытэн ик ӵошатыса, быдэн 5,2 килограмм лыктэ вал. Мугез тодмо: кысконо пудоез, сютэм возьыса, продуцкция уд люка. Талэсь но секытгес югдур "Ижевский" эштосын. Йӧл кысконзы кулэсмиз 5 килограммлы. Соос радэ ик пыре "Колос". Скаллы быдэ туннэ кыско 4,6 килограмм, миым та толэзе 7,9 килограммозь ӝутскылӥзы. Ёросын ӧжыт ӧвӧл адӟем карымон хозяйствоос но. Котьку сямен, азьпалан мынэ "Путь Ильича" колхоз-племзавод. Якшурысь пудо утисьёс та нуналъёсы суткаяз 13,8 килограмм йӧл басьто, продукцизы йылӥз килограммлэсь ятырлы. Миымлэсь ӟечгес ужало "Ож- Пурга", Холмогоров нимо, "Россия", Азин нимо, "Юськи", "Подшиваловское" эштосъёс. Озьыен, тол вакытлы соос умой дасяськизы, куд-огезлэн силосэз но, жалем сиёнэз но туннэ нуналозь тырмыт. Районъя ке верано, бере кылись хозяйствоосын сэрен, йӧл кыскон оглом 8,1 килограммысь 7,9 килограммозь усиз. Трослы ӧз ке но, огъя лыдпус вылын со шӧдӥське. Миымлэсь уродгес ужало "Урал", Завьяловоысь МТС, "Труженик", "Родина", "Шабердинское". Та фермаосын югдур тупатскоз, дыр, вож сиён вылэ потыса гинэ. Тӥни малы шундылэн вылӥе но вылӥе ӝутскемез шумпоттытэ пудо вордӥсез. Шундыё нуналъёсты витё бакча сиён будэтӥсьёс но. Район городэз котыр ласянь котыртэ бере, теплицаен вырисьёс татын вань гинэ - 5 хозяйство возьыны тырше пленка улэ ватэм убооссэ. Тужгес но бадӟым бакча - "Правда" эштосын. Татын пленкаен шобыртэмын 15 сюрс квадрат метръем музъем. Со пӧлысь 13 сюрсэз гумыосын шунтӥське, 12 сюрсаз вазь вуись кубиста киземын ни. "Правдаын" сяна, та культураез кизизы "Россия", "Юськи", "Родина" но "Ижевский". Толэзь ортчыса, кубиста удъёс вузаны вуозы ни. Тырмоз со районлы но, палэнэ но келяны. Кубистатэк ум кыле. Шуггес луоз тысё но силослы чаклам культураосты будэтон ласянь. Азьвыл сямен ик куд-ог эштосъёсын соос улэ кыед туж ӧжыт яке воксё поттэмын ӧвӧл. Сыӵеос пӧлы пыро "Ож-Пурга", Холмогоров нимо, "Выль Сентег", Завьяловоысь МТС, "Колос, "Юськи", "Родина", "Правда", "Шабердинское", "Камское" эштосъёс. Самой та хозяйствоосын ик ялан курадӟо пудо сиён суралтон пызьлы но жалем сиёнъёслы. Нош музъемез ӧд ке кыеда, кызьы тырмыт урожай басьтод? Азьмынӥсьёсызлэн та ласянь но ваньмыз дыраз лэсьтӥське. "Путь Ильича" туэ, миымен ӵошатыса, кык поллы ятыргес кыед поттӥз ни. "Ижевский" - куинь поллы. Умой ужа "Подшиваловское" эштос. "Урал", "Труженик" но Азин нимо хозяйствоос азьвыл мында ик дасязы. Та нуналъёсы музъем бордын ужасьёс тупато на техниказэс, кидыслы кортофка быръё. Бусые потон азелы экзаменлы кадь дасясько. Куазь али кадь сылӥз ке, арня куспын вырйыло интыос куасьмозы. Л.МЕДВЕДЕВА. Быдӟым Вормонлы - 55 ар Шумпоттӥзы Быдӟым Вормонлы витьтон вить ар тырмонэн валче, республикаямы пӧртэм ужрадъёс ортчыло. Палэнэ уг кылё культура удысын тыршисьёс но. Али Ижын мынэ кырӟанлы-веранлы сӥзем фестиваль. 9-тӥ оштолэзе шулдыртӥзы Ижысь Ленин ёросысь огазеяськонъёс. "Аксион" двореце лыктӥзы трос ӟуч но бигер коллективъёс.Соос пӧлын тужгес тодмоосыз вал чугун сюрес вылын ужасьёслэн культура юртысьтызы "Гузель", "Уралочка" ансамбльёс, арганчиослэн ансамбльзы, духовой оркестр. Концертэз учкыны лыктэмъёс соослы синмаськизы. Уката ик шуныт пумитазы "Гузель" ансамбльысь эктӥсьёсты. Ӟечесь кырӟанъёссэс-эктонъёссэс возьматӥзы "Спартак" культура центрысь артистъёс но. Удмурт учкисьёс понна шумпотымон луиз "Ӟардон" ансамбльлэн кырӟамез. Соос сцена вылэ алигес гинэ потаны кутскизы ке но, асьсэды синмаськымон возьматӥзы. Тужгес умойёсыз коллективъёс но артистъёс фестивальлэн лауреатъёсыз луизы, нырысетӥ но кыкетӥ степенё дипломъёс басьтӥзы. Соос пӧлын вал удмурт "Ӟардон" ансамбль но. Валамон ини: татысь усточиослэн мылкыдзы ӝутскиз. Табере соос уката чебер кырӟалозы но эктозы. Со понна ӵемгес огазе люкаськылозы, быгатонлыксэс нуналысь нуналэ волятозы. Н. Возисов. Шумпоттозы куноос Удмурт Элькунысь Операя но балетъя кун театрын туэ кык бадӟым ужрад ортчоз. Кыказ ик пыриськоз Москваысь "Новая опера" театр (кивалтӥсез - Россиысь но Европаысь одӥгез устоез музыкант Евгений Колобов). 1995-тӥ арын та коллектив Ижын возьматӥз кык спектакльзэ - тодмо итальян крезьгурчиослэсь Джузеппе Вердилэсь "Двое Фоскари" но Гаэтано Доницеттилэсь "Мария Стюарт" операоссэс. "Травиата" операез возьматыку, Евгений Колобов кивалтӥз ни вал татысь хорен но оркестрен. Спектаклез учкизы крезьгур удысэн тунсыкъяськисьёс. Операя но балетъя кун театрысь кырӟасьёс устолыклы дышетскизы Москваысь "Новая опера" театрын. 21-тӥ апреле татысь егит артистъёс, пинал вокалистъёслэн быдэс Россиын ортчем конкурссылэн лауреатъёсыз Галина Бадиковская но Михаил Дьяков, быгатонлыксэс возьматозы гала-концертын. Соос кырӟалозы Петр Чайковскийлэн но Шунды пуксён палась классикъёслэн операосысьтызы ариосты. 22-тӥ апреле Москваысь егит артистъёс Ижысь артистъёсын ӵош пыриськозы "Евгений Онегин" операез возьматонэ. Татьяналэсь партизэ быдэстоз Галина Бадиковская, Евгений Онегинлэсь - Михаил Дьяков. В.Лагунов. ИЖЫСЬ МЭРИЫН Бусьтыр пумиталом куномес Журналистъёсын пумиськиз город администрациысь культурая но туризмъя управленилэн кивалтӥсез Елена Николаевна Швед. Солэн верамезъя, культуралэн вань жанръёсыз озьы но тазьы азинско. Ижысь котькуд сизьыметӥез улӥсь ветлэ библиотекаосы. Азьвыл аръёсын ӵошатыса, кылем арын лыдӟиськисьёслэн лыдзы 755-лы йылӥз. Мугез со бордын но. Калыклэн журнал- газет басьтыны коньдонэз ӧвӧлысь, сое учкон вылысь библиотекае лыктэ. Дышетскисьёс кулэясько дышетскон программае пырись литератураен. Тросэз тунсыкъясько улон-вылонын юрттӥсь (познавательной) книгаосын. Кыкетӥ но куинетӥ интыосын кулэлыксыя мыно классика но яратон (любовной) романъёс. Берло дыре пичияк ке но йылыны ӧдъяз театръёсы ветлӥсьёслэн лыдзы. Кылем арын 320 сюрс учкисьёс вуылӥзы татчы. Ог 2 сюрс пиналъёс мылысь-кыдысь пырисько творческой коллективъёслэн ужъёсазы. Жаляса верано, мӧйыос берло дыре эктон-кырӟанлэсь палэнтӥськыны ӧдъязы. Йыг-йыг сыло ветеранъёслэн хоръёссы гинэ, соос туннэ 32 лыдъясько. Кышкытын сямен ик шугъяськонъёс кылдо коньдонэн. Озьы ке но, кылем арын Калашниковлы сӥзьыса выставкаосын комплекс усьтӥськиз. Татын ужаны кутскиз город кузя экскурсиос ортчытъянъя отдел. Секытэн ке но, со пыд ц йылаз султоз: дорамы вуись куноосты пайдаё пумитаны быгатом. Люкаськемъёс шонер пусйизы, ӧжыт пото Ижевслы но (республикамылы но) сӥзем тугокоос, книгаос - таиз но ӟеч кузьым луысал куноослы. Е.Н.Швед азьланьын та куронэз санэ басьтон сярысь вераз. Э.КУМАЧЕВА. Палэнэ уг кыльы Ӵуказе Кун Кенешлэн депутатъёсыз эскерозы асьме Конституцие воштонъёсты. Та кулэ ужлэсь палэнэ уг кыльы "Удмурт кенеш". Солэн исполкомаз быръем эшъёс алигес эскеризы ӵектэм дэмланъёсты. Данакезъя асьсэлэсь мылкыдзэс веразы. Ӵектонъёс сётэмын Конституцияя комиссие. Исполкомлэн кенешоназ озьы ик эскеремын огазеяськонлэн кыкетӥ кварталлы ужан планэз но мукет юанъёс. Вуоно толэзе чакламын Пичи кенешез люканы, отын вераськон мыноз Удмуртилы президент быръён ужрадэ пыриськон сярысь. Соку ик учкемын луоз Финн- угор калыкъёслэн ӧтчамазы ыстоно муртъёслэн списоксы. И. КРИЧЕВ. АРХИВЫСЬ ДОКУМЕНТЪЁСЪЯ УДМУРТИЯ ХХ ДАУРЕ 1907-тӥ ар 20-тӥ феврале ужаны кутскиз Кыкетӥ Кун Дума. Отчы быръемын вал Вотка заводысь паровоз лэсьтон цехысь рабочий В.А.Вахрушев но. Удмуртиын революциен герӟаськем бугыръяськонъёс лапкомизы. Политикаен вырисьёс мукет амалъёсы выжизы. Эсеръёс ласянь, кылсярысь, пуштытъян-виылон учыръёс алязы. Озьы 17-тӥ июле выжон уе Иж заводын приставлэн юрттӥсезлэн Григоровскийлэн квартираяз бомба куштэмын вал сыӵе ик "кузьым" вите вылэм волостьысь Самойлов старшинаез. Интыысь властьёс таӵе югдурез кылытэк-адӟытэк ӧз улэ, "кортнаны" выризы. Вятка губернилэн жандарм управлениез 15-тӥ августэ келяз Сарапул уездэ вал вылын 30 возьмась-чакласьёсты, нош 22-тӥ августэ - 46 чеченъёсты. Озьы но югдур ӧз тупатскы. Соин ик 26-тӥ августэ потэм указъя Сарапул уездын 6 толэзь ӵоже нимысьтыз радлык ялэмын вал. Полиция социал-демократ но эсер партиысь унозэ адямиосты пытсэт улэ келяз. Профсоюзъёсты но демократ шӧмо организациосты пачкатӥзы. Озьы ке но, Вотка заводысь социал-демократъёслэн "Труд", нош Ижысь эшъёссылэн - "Рабочий листок" газетсы потыны ӧдъяз. Июне Ижысь пыӵал поттон заводлэсь 100 ар тырмонзэ сӥё-дано пусъё. Сое кылдытӥсьлы, Андрей Федорович Дерябинлы, синпель (памятник) усьто. Юбилейлы Андрей Соловьев заводлэн ортчем сюресэз пумысен очерк гожтэ. Сентябре Вятка, Пермь но Уфа губерниос нырысетӥ адӟытон радъязы. Отын возьматэмын вал Вотка заводлэн продукциез но. Октябре Вотка заводын усьтӥськиз шор ёзо механикая-техникая училище, али со машина лэсьтонъя техникум. Ноябре Ижын усьтӥськиз нырысетӥ шор ёзо дышетскон заведение, 1910-тӥ арысен сое нылкышно гимназилы пӧрмыто. Е.ГОРБУШИНА, Удмурт Республикаысь кун архивысь валтӥсь специалист. Ӝытъёс, фестивальёс... Быдӟым Вормонлы витьтон вить ар тырмонлы сӥзьыса, шаерамы ортчозы музонъёсыз но ужрадъёс. 19-тӥ апреле Ижысь искусствоосъя кык номеро нылпи школаын луоз та юрт кылдэм дырысен ньыльдон ар тырмонлы сӥзем сӥё-дано ӝыт. 20-тӥ апреле Шаерысьтымы изоискусствоосъя музейын но усьтӥськоз Быдӟым Вормонлы сӥзем адӟытон. Возьматӥськозы живопись, графика, скульптура удысъёсысь ужъёс. 21-тӥ апрельысен 27-тӥ апрелёзь шаерамы ортчоз быдӟым ӟуч крезьгурчилэн П.И.Чайковскийлэн вордӥськемез дырысен сю куатьтон ар тырмонлы сӥзем фестиваль. 22-тӥ апреле Сарапулын - кырӟанъя но эктонъя ансамбльёслэн но хореографияя коллективъёслэн "Эшъяськон" нимо концертсы. 23-тӥ апреле Якшур-Бодья черкогуртын - театр коллективъёслэсь ужъёссэс учкон. А.АПАЕВА. Бусые потон азьын Пызь кудыысь пень кудые усиз гурт удыс реформаосын валлин Туннэ нуналэз, калык хозяйствоын кылдэм югдурез улон-вылонэз шӧмъям муртъёс ӵошато я 60-тӥ-70-тӥ аръёсын, я война вакытэн. Нырысетӥез тодэ вайытэ "коммунизме нуись сюреслэсь сайкыт дыръёссэ", кыкетӥез вера макем юн начармеммы сярысь. Басьтом гурт удысэз гинэ, муосты гырон-кизёнэз. Кык-куинь арня ортчыса, крестьян калык понна нош ик кутскоз кысык вакыт. Хозяйствоос пӧлысь тросэз-а дась бусы ужъёслы? Тырмыт-а кидыссы, техникалы эстӥськонзы, минерал сылалзы, тракторзы но мукетыз? Самой та пумысен ик Кун Кенешлэн Гурт удысъя музъем кусыпъёсъя но инкуазь узырлыкъёсты кутонъя комиссилэн азьвыл чакламтэ кенешонэз ортчиз. Солэн кивалтӥсез депутат Леонид Фролов вакчияк тодматӥз шаерамы кылдэм югдурен. Гурт удыс арысь аре уллань ваське, коллективной хозяйствоос, государстволэсь юрттэт басьтытэк, пумен лябӟо. Уката ик со шӧдӥське тулыс, гырон-кизёнэз мытыку. Та пумысен комиссие быръемъёс азьын вераськиз гурт удысъя но сиён-юонъя министрлэн воштӥсез Василий Наговицын. - Туэ арлы тысё культураос 535,1 сюрс гектар вылэ кизьыны чакламын, миымен ӵошатыса, 10 сюрс гектарлы ӧжыт, шуиз со. - Бушам муос чотын тросгес инты висъяськоз трос аръем турынъёслы. Озьы луонлык кылдоз пудо йырез будэтыны. Паськытатэмын толйись но валэс чабей кизёно муос, соос йылэтэмын 12,5 сюрс гектарлы, но соин ӵош ӧжытгес инты басьтозы фуражлы мынӥсь йыды но сезьы. Ятыргес мерттомы картофка, нош бакча сиёнъёсты 100 гектарлы кулэстыны чакламын, малы ке шуоно, кылем сӥзыл вань будэтэмзэ но вузаны ёрмим. Озьы ик ичигес киземын луозы кукуруза но силослы мынӥсь музон культураос. Министерство чакламъя, кызьы пусйиз В. И. Наговицын, туэ гектарезлы быдэ 12,7 центнер ю-нянь усьыны кулэ, кылем арен ӵошатыса, республкамылэн кеносъёсаз соку 219 сюрс тонналы ятыр ю тысь люкаськоз. Картофкалэсь удалтонлыксэ вуттоно 121 центнерозь, бакча сиёнъёслэсь - 226-озь. Нимысьтыз вераськон мынэ етӥн сярысь: уй пал буртчинлэн "секталаез" 2 поллы будыны кулэ. Озьы пусъемын бумага вылэ. Нош ма вите улонын? Валэс юос кизьыны чакламын 450 сюрс гектар. Со пӧлысь сӥзьыл гырыса дасям муос - 340 сюрс гектар. Куд-ог районъёсъя ке верано, ӝыныез но ӧвӧл. Тӥни ма бордысь ӝеганъёс потозы. Кидыс сярысь. Вань чаклам бусыосты кизён понна кулэ луоз 108 сюрс тонна ӟеч дасям тысь. Туннэ нуналлы уг тырмы на 4,7 сюрс тоннаез. Матысь дыре 1,3 сюрс тонна кидыс басьтыны чакламын центрысь висъям коньдонлы, Удмуртилы со сётэмын миым пӧсь куазен куасьмыны шедем ю бусыос понна. Одӥг сюрс тонназэ утчано луоз элита кидыс будэтӥсь хозяйствоосысь. Дасям кидыслэн ӟечлыкезъя ке учконо, 66 процентэз кондиционной лыдъяське, со пӧлысь 36 процентэз гинэ И но ИИ классъем. Кылем арын 41 процентэз вал. Кидыс бордын умойгес ужазы Можга но Алнаш районъёсысь хозяйствоос, соослэн 92 но 86 процентэз кизьыны дась. Азьвыл аръёсы сямен ик ю-нянь басьтыны соослэн инъетсы вань. Секыт йӧтоз лябӟем эштосъёслы но крестьян хозяйствоослы, малы ке шуоно, дунтэк одӥг хозяйство но кидыссэ уз сёты. Вань на амал фуражен воштыны, но тулыс куазен соиз но пудо сюдыса быдтэмын ни. Гурт удысын, туала экономической политикаез басьтыса, юрттэт чакламын пайда поттыса ужасьёслы гинэ. Пыд вылазы мырдэм но кызьы сылӥсьёсыз вылӥысен бырыны чакламын ни - сыӵе законэз рыноке выжонлэн. Соин ик социализмлэсь шуныт бурдъёссэ асьмеос кема тодамы возём на. Кызьы тодмо, республикаямы кутэмын "Етӥн" программа. Та культуралэн кулэлыкез, дуныз шӧдскымон будӥз бере, тросгес луизы кизьыны мылкыд карисьёсыз но. Туэ, кылсярысь, етӥн 8,5 сюрс гектар муосты басьтоз ни, чакламъя 990 тонна кидыс мыноз. Туннэ уг тырмы на 180 тоннаез. - Россиын но та ласянь югдур секыт, - шуиз министрлэн воштӥсез. - Мынам тодэмея, федерацилэн кеносъёсаз тулыслы кулэ на 5 сюрс тонна пала етӥн кидыс. Удмуртия, музон улосъёсын ӵошатыса, сокем урод уг адӟиськы на, кытын но отын воксё шуге-леке вуэмын. Асьмелэн кидысмы 7 сюрс гектарлы тырмоз, кылемзэ утча Прибалтикаысь, кылсярысь, Литваысь. Валамон, республика понна со дуно усёз, но бусыосты буш уд кельты ук. Оскиськом, етӥн пайдаен берытскоз шуыса. Картофка будэтӥсь хозяйствоос берло кык-куинь арзэ та культура чотын ӟеч коньдон люканы быгатӥзы. Удалтонлыкез вань, басьтӥсь шеде. Малы-о выронтэмез? Кидысэн но шугъяськонэз ӧвӧл, котькудӥз аслыз ачиз тырмыт кисьтэ, бускельёсызлы но висъяны шедьтэ. Тӥни малы "кыкетӥ няньлы" синмаськисьёслэн лыдзы туэ йылӥз. Куазез гинэ мед тупалоз вылэм. Табере - минерал сылалъёс сярысь. Соос республикае чакламъя вуыны кулэ 25 миллион манетлы, апрелёзь басьтэмын ӝыныез. Толэзь ӵоже эшшо ӝыныез лыктоз на. Кызьы оскытӥз В. И. Наговицын, хозяйствоос удобренитэк кизёнзэс уз мытэ. Секытгес югдур техника ласянь. 10 ар ӵоже тракторъёслэн лыдзы куинь поллы кулэсмиз, комбайнъёс - кык поллы. Таизлэн но 85 процентэз пӧсьтэмын, коть туннэ ик куштӥськем корт пӧлы келя. Ӟеч аръёсы со озьы ик луэ вал. Бусые потыны дасьлыксыя ке верано, ӝыныезлэсь ятырез тракторъёс, машинаос, плугъёс тупатэмын. Кылем арынлэсь беромыса ке но ужъёс мыно, сокем трослы ум кылиське. - Хозяйствоослы та ласянь нокыӵе но юрттэт ӧвӧл, - шуиз Василий Иванович. - Котькудӥз ас быгатэмезъя выре. Алнаш район гинэ 1 миллион манетлы воштос ёзъёс басьтӥз, уксё люказ, йӧл вузан чотын. Экономика ласянь ӟечгес улӥсьёсты но шугъяськытэ техникалы эстӥськон. Дыраз со вуоз-а яке, азьвыл аръёсы сямен, нош ик-а тракторъёсты бусыын сылэтоно луоз? В. И. Наговицын верамъя, тулыс гырон-кизёнлы гинэ кошкоз 21,5 сюрс тонна. Та пӧлысь 4 сюрслэсь ятырез басьтэмын ни, 2 сюрс но ӝыныез вуоз та толэзе. Ванез но али пудо вордон фермаосын кутӥське ни, соин ик ватсаса эшшо 7 сюрс тонна кулэ луоз на. Эстӥськонлы ог 40 миллион манет кошкоз. Сое басьтон сярысь вераськон мынэ Москваысь "Альфа-банкен" но Ижевскысь "Золото-платина" банкен. Кредитъёс ке луизы, бусы ужъёс каллен радъяськозы, вылды. Но дыраз со вуоз меда? Тӥни ма шугъяськытэ туннэ хозяйствоослэсь кивалтӥсьёссэс. Кылем арын но, валля арын но уго кема витем коньдон сӥзьыл пал гинэ вуиз. Кенешон оглом урод ӧз ортчы кадь, кызьы но озьы бусыос кизиськозы. Но йырысь уг кошкы вераськонэ пыриськем председательлэн юанэз: "Нош кызьы улозы пайда поттыны быгатӥсьтэм хозяйствоос, соослэн техниказы 92 процентэз куашкан калэ ке вуэмын ни?" Юанэзлы со валэктон ӧз шедьты. Нош сыӵе хозяйствоос асьмелэн ӝыныезлэсь трос. Вань ни банкрот радэ пыртэмъёсыз но. Соос арысь аре йыло. Нош кӧня гектар куштэм, аналтэм гыроно-кизёно муосмы? Кин со понна кыл кутоз? Л. МЕДВЕДЕВА. КУН КЕНЕШЛЭН СЕССИЕЗ АЗЬЫН Дэмласько Конституцие пыртыны Кивалтон удысын удмуртъёслэн лыдзы берло аръёссэ ялан кулэсме. Ваньмыз со калыклэн мылкыдыз вылын шӧдӥське. Ас музъем вылаз улӥсь но ужась адямилэсь верам кылзэ санэ басьтӥсь ӧвӧл ни. Мон но уг оскиськы, та гожтэтме Удмурт Республикаысь Конституцизэ воштыку учкозы, эскерозы шуыса. Озьы ке но, ас малпанъёсме шараяме потэ. Нырысетӥез. Политической югдурез умоятон понна, Кун Кенеше быръёнъёсты ортчытыны дэмласько национальной округъёсъя. Выжы калыкез кивалтон удысэ кыскон сярысь асьме доры ветлыкуз вераз вал Р.Абдулатипов но. Нош улонын воксё мукет луыса кошке. Тӥни малы калык бугыръяське. Депутатъёслэн тае валамзы уг поты. Кыкетӥез. Конституцилэсь 78-тӥ статьязэ курисько азьвылэз сямен ик кельтыны (1994- тӥ арын кутэм редакциезъя). Сое воштӥм ке, кивалтон удысэ эшшо но тросгес шедёзы криминалэн герӟаськем муртъёс. Куинетӥез. Удмурт Республикалэн Президентэз тодыны кулэ кыксэ ик кун луись кылъёсты. Озьы ке ӧз луы, вераськонэз но ӧвӧл, кыкез но кылъёс валтӥсь инты басьтозы шуыса. Россия ноку но Президентэ уз пукты ӟуч кылэз тодӥсьтэм адямиез. Шонер. Со озьы ик луыны кулэ. Удмуртия котьма ласянь Россилэсь адӟем карыны выре бере, Президент быръёнын но та сяммес вунэтоно ӧвӧл. А.ВОЛКОВ, Глазовын улӥсь. Быдӟым Вормонлы - 55 ар Эн ултӥялэ Намерова кадьёсыз! "Котьку сюлэмын" романэ печатласькиз Быдӟым Вормонлы ӝыны даур тырмон азьынгесСоин но, лэся, вожмаськыса музэн ӧтчаллязы книгаме эскеронэ. Монэ котькытын сабылӥзы юанъёсын. Романам ӝутэм ужпумъёсыз, ӟечгес тодэмзы потэ. Пумиськонъёс ӵемысь кык-куинь час, нош кытӥяз вить часлэсь кема ке но кыстӥськылӥзы, вань вазиськемъёсын кенешыны ӧй вуы. Али, Быдӟым Вормонлы 55 ар тырмон азьын, кӧняезлы ке юанъёслы вакчияк коть валэктэме потэ: лыдӟисез гажаны кулэ. Тани шаерысьтымы тодмо, гажано кышномуртлэн М. Д. Ишматовалэн юанъёсыз. Кытысь адӟиды Рево Конюхов, Галя-Валя, Окыльна Намерова но Одотья выллем геройёстэс? Кавалеристлэн Конюховлэн садэз Удмуртиын кытын ке вань-а? Тӥ асьтэос ож сюресъёсты ортчемын ӧвӧл, Германие ӧд вуылэ кадь, нош кызьы оскымон суредады со интыосыз? Книгадылэн вуоно люкетаз Осьып аслыз кузпал шедьтоз-а? Кинэн герӟалоз улонзэ? Романысьтым тросэз адямиос басьтэмын улонысь. Рево Конюхов кадь адямиез мон адӟи кинохроникаысь. Быдӟым Вормонлы куамын-а, ньыльдон-а ар тырмон азьын телевидение возьматӥз асьме солдатъёслэсь пырак каскаосысь ю киземзэс. Азьпаласез нянь будэтӥсь туж но туж удмурт тусо вал. Берлогес "Сельская жизнь" газетысь, лэся, лыдӟи "Солдатское поле" нимо пичильтык статьяез. Отын но возьматэмын вал ожгарчиослэн ваньмон дыръязы ю киземзы. Озьы кытын но ку ужамзэс вунэтӥ - книгае борды соку ӧй ик кутскылы на вал кадь. Берло тодӥ: Рево сяменгес ик 1945-тӥ арын мае миллионъёсын немецъёсты асьме нянен сюдэм Удмуртиын вордскем но будэм генерал-лейтенант Н. К. Жижин. Озьыен, оскыны луэ книгаям возьматэм югдурлы, романэлэн огъя ӧрезлы. Валя Шабурова выллем, мумытэк-бубытэк будэм адями - милям кенмы. Али но вань. Москваын улэ. Удмурт пилы, кузпалылэн агаезлы бызиз. Кытын вордскемзэ но уг тоды. Берлогес милям Клавамы сыӵе ик сирота кылемъёсты будэтӥз, шуысал. Ижысь нылпи садэн кивалтӥз. Кузпалыз ожъёсын десантник вал. Улэп бертӥз. Кулӥз ни... Одотьяез, юэм муртэ, мон адӟи, редакцие вазь ӵукна уже мыныкум. Пастухов урамын ужаськом на вал ай соку. Мискинь, юбказэ но ыштэм... Жаль потӥз, йыры но кур луиз. Нош Намерова кин? Асьмелэн ӵыжы-выжыысьтымы ик. Карттэк кылем туж трос нылкышноос пӧлысь огез - кузпалылэн мумиз, Екатерина Лебедева. Картсэ война пуромем бере ик машинаеныз валче басьтӥллям армие. Шольяысь дивизия пыр. Катя, эсьмаса, Ондреезлы яратӥсько шуыны но вуымтэ. Якшур-Бодья сьӧрысь Выжойыл гуртысь весяк пыдын ветлэм Кам сьӧры, Шольяе. Быриз Ондӥ. Чебер Катя нокинлы но ӧз синмаськылы ни, ньыль нылпиэз огназ будэтӥз... Мукетыз Намерова - милям выль кенакмы. Макар Пичи шуо вал сое, нимыз Марпа ке но. Чебер Марпа вал. картэз, мынам Олексей агае, озьы ик чиптэм-чаптэм быриз ожъёслэн нырысь толэзьёсазы. Бодья-Пуро гуртамы гинэ жиль-жиль сизьымдон вить егит кышноос картъёссытэк кылизы. Выль кенакмылы туж синмасько вал - мон тодӥсько. Пиосъёс котыраз "лякиськыны" выризы. Озьы ик чылкыт сюлэмын, чик сьӧлыкатэк ортчытӥз даурзэ туж но туж секыт колхоз ужын. Буш трудоденьлы оскытскыса. Пудо сиён но, эстӥськон но весь нуллӥз тыбыраз, ужысь бертылыкуз. "Кышномурт лябзэ огпол гинэ возьматӥз ке, пиосъёс ӵогам капказэ но тӥяса, борд йылтӥз но пырозы", - кызьы ке вераз мыным чебер выль кенаке. Кулӥз ни. Оскисько: сояз дуннеын но солы сыӵе ик чылкыт, чебер инты висъяз, вылды, инмар. Война вакытэ но, куашкам улонмес ӝутон аръёсы но гурт возиськиз огназы кылем Намерова выллем кышномуртъёслэн пельпумъёссы вылын. Ваньмызлы туннэ йыбырттыны кулэ. Мон редакциын гурт улонъя отделэн кема кивалтӥ бере, шаерысьтымы одӥгаз но гуртэ вуылытэк кылеме ӧвӧл. Туж трос пумиталляй парторганизациосын, кивалтӥсь нылкышноосыз. Огезлэсь мукетыз чебергес вал. Тусбуйёссыя гинэ уг шуиськы - сямзыя, сюлэмзыя, урод вамышъёслэсь юн утиськыны, музонъёссэ но соослэсь алыны быгатэмзыя. Кышномуртъёс пӧлысь ик огез лыдӟись монэ пыкылыны выре. Писатель укыр зол кивалтэ Намероваеныз но куд-ог мукет геройёсыныз. Ревоез туж яратыса но, купеын Ростовысь ваче гинэ бертыкузы, пиосмурт вӧзы выдыса вылысь но, пе, уг сьӧлыка, возиське. Книгалэн авторез ке ӧз, кин-о бен, Егор Загребин-а яке Генрих Перевощиков-а, гожтозы, кызьы возёно ассэ Намеровалы? Окыльнаез умойтэм вамышлэсь утизы, вылды, Паволэз, Конюховлэн Галяез но Валяез, Лукерья, Макар Пичи, Катя Лебедева но сюрсъёсын мукетъёсыз. Асьмелэн туж трос ини сьӧлыкъёсмы. Ӝоген музъем уз чида ни - пуньырак пилиськоз яке воксё мукет Шунды пала лобӟоз. Гажано удмуртъёсы пӧлын но кыӵе зол алямын ини куртчаньги, юмшан, юон, возьытлыкмес ыштон, наркомания, нылпи куян. Эсьмаса, СПИД но вуиз шаерамы. Нялтас верасал: "Вир" повестям мон вакчияк возьматӥ асьме яратоно калыкмы пӧлы но наркотикъёслэсь сюрес лёгемзэс. Эн ултӥялэ Намерова выллем, марӟан кадь чылкыт муртъёсыз! Книгаын коть мед луозы на соос! Егит нылъёслы адӟем карымон. Конюхов сярысь но огез тодосчи шуиз: укыр юн мылкыдо - Павел Корчагин выллем. Пичи но янгышъёс уг лэсьтылы. Но ведь книгае ӵапак кутске Конюховлэн янгышез бордысен. Кызьы со, командирезлэсь косэмзэ укыр зол быдэсъяны сюлмаськеменыз, минаосты эскерытэк ик ӝоггес гырыны тырше. Кышкыт ватос вылэ сюрыса сӧсырме. Револэн мында янгышъёсыз, оло, огезлэн но ӧвӧл. Кылсярысь, нылзэ со кылбуръёс лыдӟемез понна гинэ артистэ дышетскыны ыстэ Валяеныз ӵош. Мар луэ бӧрысь - тодӥськоды. Рево ик, асьме тэльмес лушкамзы сярысь тодыса, чылкак следователь музэн, рос-прос сэрттыны- пертчыны тырше та ужпумез. Лушкаськисьёсты шедьтэ но ӧжытак гинэ уг быры - кыкетӥзэ сӧсырто. Ма, инкуазьмес сутӥсь дустъёс пазясь лётчикез но резь-куаж керттылэ. Мукет сямъёссэ мургес суреданы шедьтэменым, лэся, Револэсь янгышъёссэ вунэто. Мар бен, мед луозы книгаын коть асьмелэн но Корчагинъёсмы. Юмшась, юись, лушкаськись, кышно вошъясь, ултӥясь, инкуазьмес саптась, вылтӥяськись, секытлэсь пегась воргоронъёсмы та секыт вакытэ туж трос ни. Шаерамы Конюховлэн выллем сад ӧвӧл на - тазэ жаляса верасько. Но мон тросэзлэсь ветеранъёслэсь, тужгес ик - гвардиысь 39-тӥ воздушно-десантной корпусысь ожгарчиослэсь - Украинаын пумиськылыкум кылылӥ: созэ яке тазэ бырем эшме буре вайыса, писпу мерттӥ, улмопу будэтӥсько. Ӧвӧл ке, кылдытоно сыӵе сад! Огинэ кариськыса. "Солдатъёслэн бусызы" вал бере, малы луыны уг быгаты "Солдатъёслэн садзы"? Мария Дмитриевналэн эшшо одӥг юанэзлы валэктӥсько на - та выллем кылъёсын музон лыдӟисьёсы но вазиськылӥзы угось. Бен, мон Быдӟым тыложе ветлэмын ӧвӧл. Ӧй вуылы Германие но, музон кунъёсы но, кытын гомалляз кышкыт тылпу. Но война меӵак пыӵамын вирам, сюлэмам, визьмам, улонам. Туж трос кинофильмъёсты учкылӥ, библиотекаям ваньмызлэн сямен бадӟым полководецъёсмылэн тодэ ваёнъёсын пачылмем книгаоссы вань - картаосын ик. Уно лыдӟылӥ газетъёсыз, журналъёсыз. Ма, Москваын дышетскыкум, куд-ог маршалъёсын меӵак вераськылыны но шуд усиз. Пумиськылӥм С. М. Будённыен, И. С. Коневен, И. Н. Кожедубен, тросэныз генералъёсын, адмиралъёсын, дивизиослэн, полкъёслэн командиръёсынызы, огшоры ожгарчиосын. Визьмы соку лэчыт вал ай - ваньмызлэн тодэ ваёнъёссы вунонтэм кылемын. Со ик юрттӥз, вылды, ож суредъёсыз оскымонгес возьматыны. Завьял ёросысь Подшивал школаысь 9-тӥ классын дышетскись нылаш (нимтулзэ гожтымтэ) юаз вал: "Малы тӥ, Кирилл Егорович, войналэн пумаз быдтӥды на Галя Суслоноваез?" Мон ӧй быдты сое - сутӥзы фашистъёс. Война нокинэ уг жаля. 9-тӥ май бере но сюосын асьме ожгарчиос бырылӥзы на. Нош бендеровецъёсын уката кема ожмаськизы. Галялэн кулэмез книгаям пыриз кызьы ке шуак - планам пусъемын но ӧй вал. Озьы луылэ гожъяськыку. Туж тунсыкоесь, визьмоесь юанъёс сётъяз Якшур-Бодья ёросысь Мукши гуртысь библиотекарь А. Загребина: Рево кадь адямиосмы ӧй луысалзы ке, вормысалмы-а фашизмез? Соку ик валэктӥсько: ӧй вормысалмы. Быдӟым кунмы, юн эшъяськонмы, атай музъеммес зол яратэммы юрттӥз асьмелы. Партимы юрттӥз, сое али тышкасько ке но. Бызёз на-а Окыльна кыкетӥзэ? Романэлэн выль люкетэз чальгес гожтэмын луысал ке, со, оло, мырдэм но кызьы бызьысал ик Осьыплы. Но туж жаль: табере Окыль но пересьмиз, бездӥз ини. Арлыдо муртлы огназ улыны секыт. Малпамея Осьып доры, оло, куриськысал со юрттӥськись чотын гинэ улыны? Но йӧно кышномурт сыӵе вамыш лэсьтысал-а? Осьып ведь озьы ик тупамтэ на али но. Юэмысь дугдымтэ. Берло вакытэ сыӵеосмы уката трос луэмын. Намерова куриськоз, дыр, пересь вакытсэ Ревоен Валя дорын ортчытыны. Яке сое басьтозы соослэн нылпиоссы. Ма карозы Револэн садэныз отӥяз? Журналист К. К. Кузнецов, матысь эше: - Романад син шоры йӧтымон возьматэмын няньлэн выжыосыз, философиез, нянь но политика, нянь но улон, нянь но наука, нянь но Вормон. Государство гуртлы ӧз ке юртты ни, кыӵе югдуре вуом? - Куашканэ. Сокем уно музъемъёсмы вань вылысь, палэнысь сиён-юон нуллом, уката зол кураськисьёслы пӧрмом. Тодэмея али шаерамы лыдъясько 120 сюрс гектар пала аналтэм муос. Музъемез эркын вузаны уг яра. Зӧк кисыослы сюроз ваньмыз. Гурт калык ачиз мед кузёяськоз соин. Асьме нылпиосмылы выльысь кулакъёс дорын ляльчиос чотын ужано луоз на шат? Таин валче йырысьтым нокызьы уг поты Ужысь Геройлэн М. З. Орловлэн книгаме Баграш-Бигралан эскерыкузы верамез: "Милям кадь ӟеч музъемъёсыз олокинъёслы сётъяны кутскизы ке, мон нырысь ик ачим киям пыӵал куто!"" Бен, выльдӥськыны одно ик кулэ. Но вуж сюресмы вылэ медам султэ ни. Государство музъемлэн кузёезлы ӟечгес мед юрттоз. Тани милям "Тазалык" бусыямы, Кенӥ тэль сьӧрын, трос гектар музъем висъямын вал бакчаослы. Нош али "Тазалыкамы" ог куамынэз бакча аналтэмын - жаг турынэн шобырскемын ни. "Мынон-ветлонлы сокем трос коньдон быдтытозь, магазинысь яке базарысь гинэ картофка октом", - шуэ калык. "Удмурт дунне" газетлэн редакцияз ужам офицер (нимтулзэ уг вераськы) юаз: - Выльдӥськон вакытэз выль книгаяды возьматыны уд медӥськы-а? - Уг. Выльдӥськонэ мургес мед пырисько шуыса, монэ обкоме но ӧтчаллязы. Ӧжыт гинэ выговор ӧз ляке. Сюлэм шӧдӥз, лэся, кытчы вуонмес. Туннэ нуналлэсь сьӧд палъёссэ адӟыса, сюлэм жаде ни. Реформа шуонъёс эрик ласянь гинэ шат марке пичильтык ӟечсэ сётӥзы. Улонмы копак начармиз. Быдӟым кунмы но куашказ. Россия но кураськисьлы пӧрмемын - ялан палэнысь коньдон куре... Оскисько: мӧйыосмылэн Быдӟым Вормонзы ик, оло, асьмеды ӝутоз на ай азьмынӥсь странаос радэ. Маин пумитаськод Быдӟым Вормонэз? - юало огез но мукетыз. - Куинез книгае дась. Куать повестеным "Ӟыгыръя, киосыд вань дыръя" бадӟым томме поттысал вуоно юбилеелы. Тырмыт люкаськемын ни гражданской шуиськись кылбуръёсы. Улон-вылонын адямилэн интыез сярысьёсыз, кырӟанлы чакламъёсыз, мукетъёсыз. Нош серемес кылбуръёсын сузьетме сётӥ ни "Удмуртия" издательствое. Ваньмыз соос туж кулэ школаослы, будӥсь нылпиослы, егитъёслы. Котькытын куро выль книгаосме. Вуоно тулысозь мед вуттысал "Удмурт чиган" повестьме, отӥяз - "Учкысалды ке синъёсам" романме - тодэ ваёнъёсме. Кирилл Ломагин, писатель. 40 пол будоз Сомындалы ятыргес му вӧй кыскыны чакла "Удмуртнефть" АО Новосибирск областьысь Верх-Тарской меторождениын. 1999-тӥ арын татысь 26 сюрс тонна ке поттэмын вал, вуоно арын та лыдпус 300 сюрсозь вуоз. Нош 2002-тӥ арын, кызьы шуиз предприятилэн валтӥсь директорез Евгений Богомольный, ваньзэ 1 миллион тонна му вӧй кыскемын луоз. Со сярысь огкыл гожтэмын "Удмуртнефть" АО, "Сиданко" АК но Новосибирск областьысь администрация куспын. Документын пусъемын, "новосибирск проектэ" туэ ӝыны ар куспын 180 миллион манет висъямын, отысь 100 миллионэз ужа ни. Али мынэ эскерон но проектэз дасян. Йылаз-пумаз вуттэмын луоз 180 иськеме кыстӥськись му вӧй лэзён гумы, кутскоз нырысетӥ скважинаез гудон. Быдэстоно ужъёслэсь ӟечлыксэс ӝутон вылысь, "Удмуртнефть" 3,6 миллион долларлы Канадаысь "Дреко" компанилэсь выль буровой установказэ басьтӥз. Верх-Тарской месторождение 25 миллион тонна нефть сётыны кулэ, со понна висъямын 40 миллион доллар, нош вань ужъёсты быдэстонэ мыноз ог 150-170 миллион доллар. Л.Дмитриева. КУН КЕНЕШЫН 89 странаен вузкариськом Пӧртэм мугъёсъя Удмуртия 1991-тӥ арозь мукет кунъёсын экономической кусып ӧз возьы. Ас кожаз со вузкарыны кутскиз 9 ар талэсь азьло гинэ. 1999-тӥ арын кунгож сьӧры келям вузъёс чотын 609 миллмон доллар поттэмын, со пӧлысь 480 миллионэз - предприятиослэн продукцизы. Озьыен, республикамылэн вань ужамезлэн куинетӥ люкетэз мынэ мукет кунъёсы. Россиез та ласянь Удмуртия азьпалтэ. Сое адӟоно кылем арлы йылпумъянъёсъя но. Асьмелэн шаермы кусып тупатӥз ни дуннеысь 89 странаен. Продукцимес тросэн басьто Греция, Нидерланды, Польша но США. Рынокын интыдэ ӝоггес шедьтон но кема дырлы юнматскон вылысь, Удмурт Правительство 1998-тӥ арын "Удмурт Республикаысь устоез экспортёр" конкурс ялӥз. Туэ, 14-тӥ апреле, солы йылпумъянъёс лэсьтэмын. Вормисьёс радэ шедизы ИЭМЗ "Купол", "Чепецкий механический завод" ОАО, "Харви-Яр" ООО, "Лес" ООО, "Удмуртнефть" ОАО. Кыкетӥ степенё дипломен пусъемын "Ижевский подшипниковый завод" ОАО, "Сарапульский электрогенераторный завод" ОАО, "Сарапульский машиностроительный завод" ОАО, "Ижсталь" ОАО, "Ижтел" ЗАО, "Уральская нефть" ОАО, "Интур-ПРИН" ООО, "Удуртгеология" ОАО, "Удмуртторф" кун предприятие. Дипломен пусъемын Кезысь сырзавод. Вормисьёсты ӟечкылазы Кун Кенешлэн Тӧроез Александр Волков но Правительстволэн Тӧроезлэн воштӥсез Сергей Чикуров. Етӥнлы - бадӟым саклык "Етӥн" программалы сӥзем кенешон алигес ортчиз Кун Кенешын. Нуиз сое Александр Волков. Отчы люкаськылӥзы та культураен вырись хозяйствоослэн кивалтӥсьёссы но етӥн шуккись заводъёслэн директоръёссы. Вераськон дыръя соос ӧз ватэ сюлмаськемзэс но: висъям коньдон вуоз меда интыосы? "Русский лён" программа, кылсярысь, федералциын туэ йылпумъяське ни, нош чаклам коньдон 2 процентэз гинэ та удыс вылэ ужаз. Тӥни малы Россиын етӥн будэтон ыштонъёсын берытскиз, льнозаводъёс 15 сюрс тонна продукция басьтоно луизы кунгож сьӧрысь, 5 сюрс тоннаез гинэ вуиз асьме улосъёсысь. Ортчемзэ тодэ ваёно ке, СССР етӥнъя котьку нырысетӥ интыез возе вал, али азьпалтӥзы ни Бельгия, Франция, Китай. Кенешонэ пыриськемъёс огмылкыдын веразы, Удмуртия та ласянь огез кужмоез республика луыны быгатоз шуыса, но со понна луонлык сётоно, луонлык кылдытоно, техника висъяно. Правительстволэн Тӧроезлэн воштӥсез Михаил Назаров верамъя, "Етӥн" программалы коньдон бюджетысь 23 миллион манетлы кредит сётэмын луоз. Та кульрураез будэтыны басьтӥськись хозяйствоос 15-тӥ маёзь льнозаводъёсын ӵош ужанъя огкыл гожтыны кулэ. Ожъёсы пыриськем понна юрттэт Кун Кенеше люкаськылӥзы Афганистанын, "пӧсь интыосын", Кавказын оже пыриськемъёслэн огазеяськонъёссылэн кивалтӥсьёссы. Вераськон мынӥз отын ожмаськемъёслы юрттэт сётон сярысь. Кылпум ӝутэмын республикаысь огзэ санаториез реабилитационной центр улэ сётон ласянь, озьы ик ожъёсы пыриськемъёс понна тупатоно квота соосты ужаны интыянъя но дышетскон заведениосы пыртонъя. Кенешонэз нуиз Кун Кенешлэн Тӧроез Александр Волков. Солэн кичӧлтэмезъя, та выллем пумиськонъёс ортчылозы толэзьлы быдэ. Вераськонэ пыриськизы Кун Кенешлэн Тӧроезлэн воштӥсез Наталья Харина, Ялан ужась комиссилэн кивалтӥсез Фания Кузнецова но Калыкез уже интыянъя Департаментлэн кивалтӥсез Юрий Брусянский. Удмурт Республикаысь Кун Кенешлэн пресс-службаез. ТАУ! Сюлмысьтым тау карисько монэ юбилееным ӟечкыламзы но бадӟым юрттэт сётэмзы понна Удмурт Республикаысь Журналистъёслэсь союззэс, Печатья но ивор вӧлмытонъя но Национальной политикая министерствоосты, "Удмуртия" ГТРК-ез, журналъёслэсь но газетъёслэсь коллективъёссэс, "Буммаш" ОАО-ысь, "Удмуртнефть" ОАО-ысь, "Удмурт нефтяной компания" ОАО-ысь кивалтӥсьёсты, И.В.Шутовез, Удмурт госторгинспециысь ужасьёсты, Удмурт эстрадаысь но театрысь кивалтӥсьёсты но артистъёсты, "Свобода" эштослэсь кивалтӥсьёссэ С.Т.Телицынэз, Сюрзи гуртысь улисьёсты но вань ӵыжы- выжыосме, ӵош ужам но ӵош дышетскем эшъёсме, тодмоосме но та ужрадэ вань пыриськемъёсты. Шудбур но тазалык тӥледлы! Федор СУВОРОВ. Суреда пичи принцез Таиз ар Франциын ялэмын Экзюперилэн ареныз. Быдӟым романтиклы, философлы, кылбурчилы Антуан де Сент-Экзюперилы тырме 100 ар. Сое Франциын гинэ уг пусъё. Удмуртиын но Экзюперилы сӥзем ужрад ортче. 6-17 аресъемъёс пырисько нылпи суредъя "Пичи Принц" калык куспо конкурсэ. Мылкыд карисьёс суредъёссэс ыстыны быгато 15-тӥ маёзь. Соосты ваёно Ижевскысь Пушкинской ульчаысь 268-тӥ юртэ, телефонэз 43-62-22. Б. СЕРГЕЕВ. ВАКЧИЕСЬ ВЕРОСЪЁС Никвлад САМСОНОВ Еремейлэн ветылэз яке - Шерше ля фам Котькытчы кариськы, котьмар кар - ӧйлась ни Еремейлэн берло аръёсы скал выжы уськытэмез. Арысь аре вошъя но вошъя скалзэ: я нюр вылысен пыдзэ чигтэ, я лейкоз. Нош гурт адямилэн скалтэк улонэз вашкала дырысен огшорыгес луэ... Февральлэн пумаз Еремей скал пумысен нош ик бускель ёросысь одӥгаз совхозэ юромо вераськыны ветлӥз. Усто тупаз: директорзы - асьсэ гурт выжыысь адями. Тӥни со пыр ик кусып тупатӥз. Бызьылэм ветыл басьтӥз воргорон. Шуняньгуртозязы ик совхоз машинаен келязы. Кузовез липето, пытсаське. Ветылэз машина пушкы пыртыны совхозысен сокем ӧз курадӟе: эстакада шуоназы улляса пыртӥзы, отысен ини - кузове. Шуняньгуртэ вуэмзы бере поттыны малпазы но - машина лымы букос вӧзы бер палыныз пыкъяськиз: пудо ачиз тэтчиз, кӧтъёсыныз ӵожин кылле букосын. Урамъёс туэ сомында лымыен тырмытэмын: валлян колхозысь огназ кылем бульдозерен донганы выризы - урам пумозь ӟигарыз ӧз тырмы. Лымытэм инты ик ӧвӧл кадь. Машина кошкем бере, Еремейлэн ветылэз ачиз ик бульдозерен кыскем сюрес вылэ потӥз. Вылтырысьтыз лымыез зуркак! кариськыса куашкатӥз, вирӟектэм синъёсыныз отчы- татчы утчаське: пинал на, мурта, сюрысьтыз керттылэм гозызэ сэрпалтыны турттэ. Мар карод, вань даурзэ ветыл нырысь ик кунян уллё пӧлын ортчытэмын, собере - ветылъёсын, ошпиосын ӵош. Соин ик адями килы дышемын ӧвӧл, уг вала ӟеч кылэз но, шораз небыт ваземез но. Озьы малпаз Еремей выль скал выжыез сярысь. Ма, ветыл пала вамыш гинэ лэсьтэ - соиз зуркак луэ, палэнэ тэтчыса кӧчыны дась. Соин ик, лэся, синъёс гордэктэмын. Воргоронлэн юртэз-ерез урам пумын, вамышъяны но вамышъяны кулэ. Йыртышсэ корманы кутскиз: кызьы та ваменэсэз дорозь вуттод меда? - Айда, нуные, айда... Тпрьё, тпрьё... Ӧвӧл пудолэн валан мылкыдыз: гозытӥз гурт палаз кыске воргорон - ветыл ваменске, уг мыны. Пал вамыш но уг лэсьты выль кузёез сьӧры. Воргоронлэн суй-пыд жиль-жиль куашказ: мар кароно, уд пукы ук тазьы урам шорын. Ветылэз бӧрсяз уллясь мед луоз вылэм. Ньӧрын. Отчы-татчы утчаське - нокин ӧвӧл. Пужмертэм кызьпуын кынмем ӟольгыриос гинэ вай вылысь вай вылэ тэтчало. Кытын ке пислэг пиньгетэ. Пролкаысь ӵап потэ Политик Санька. Ог куамын аресъем воргорон. Номыртэм яратэ телевизорысь адӟемзэ ас малпамезъя сэрттыны-пертчыны. Ним но соин йырин сыӵе лякизы Шуняньгуртын. Со сяна, бекыръяны яратэ Санька. Сазь дырыз туж шер луылэ. Али но коркась корка бичаса ветлон мугез, дыр. Еремейлэн мылкыдыз эшшо но чырсгес кариськиз: таид табере одно няняськоз, бордэ люгы кадь лякиськоз. Секыт лулӟиз воргорон: кытчы кариськод - чидалод ни. - О-о-о, Еремей агай, тон мар, ветыл-а басьтӥд? Кылэм вал, кылэм вал... Уг кылзӥськы? Чечас, али ик! Милям, ява, депутатской корпусын кадь: кин мудрон выре - сое соку ик ньӧрын! Только ньӧрын! Олокытӥ мар сэрытак выллань тэтчиз, кызьпу вай борды ӝабырскиз, сое уллань някыртӥз, узрак чигтӥз. Эсьма, акылес ӟольгыриослэн берзы но ӧз адӟиськы ни. - Ну, милай, айда! Еремей агайлэн коргидаз бертом! Мон, ява! - ветыллэсь саурзэ олокытӥ-мар шобыртӥз ук чигтэм вайыныз! Еремейлы аслыз ик жаль потӥз пудоез. Ачиз но олокызьы палэнскыса вуттӥз - ветыл, оло вамензэ вормытэк, оло кӧтыз ӝож луыса, оло вӧсь луонлы дышымтэ мар ке, палэнысь букосэ туж чырткем тэтчиз! Эсьма, куара ик поттӥз. Еремей киысьтыз гозызэ ӧжытак гинэ ӧз уськыты. - Ак, тон озьы азьтэмъяськиськод! Шуняньгуртын таӵе ваменэсъёсыз тани тазьы дышето! - Политик Санька нош ик ветыл вылтыре кызьпу вайын сачкытӥз. Пудо нош ик сюрес сопала тэтчиз. Кӧтыныз ӵожин лымыын Еремей нош ик гозызэ олокызьы умой-умой кутыса вуттӥз. Политик Санька, тае адӟыса, умой-умой вожомыны кутскиз: эсьма, бызьыса мынӥз но вань пиосмурт кужымзэ кыре поттӥз, нош сачкытӥз пудо вылтыре. Ветыл нош ик, азьвыл сямен, сюреслэн мукет палысьтыз букосэ тэтчиз. Пиосмурт нош ик - со сьӧры. Эшшо но кужмогес шукке - скал выжы бурсэ. Еремейлэн вань сюлмаськонэз табере - гозы борды юнгес кырмиськыса, сопала но тапала тэтчан. Тазьы дарманьтонъязы, кык-куинь коркаез гинэ ортчизы. Таӵе ӝоглыкен бертоно ке луиз, уйшорозь гинэ вуозы Еремейлэн юртэз- ерез вадьсы. Политик Санька но тае валаз, лэся, шутэтсконо кариськиз. Йырысьтыз изьызэ ик кылиз, котмем йырсиосыз бордысь бус ӝутске. - Ма, кытысь таӵе экземпляр шедьтӥськод, Еремей агай? - букосын кыллись ветыл шоры уг но учкылы ни, киыныз гинэ возьматӥз. - Таӵе ужам понна, сандӥ апаедлэсь бутылка, ява. Вераським?! Хо, тӥни ачиз но ваське. Учкы... Зэм но, Еремейлэн Сандӥез. Дыртыса вамышъя, дыртонъяз ӵӧж кадь олань-талань сёткаськыса ветлон манерыз но уг шӧдӥськы. - Возьмасько, возьмасько гуртын. Капка азе но кык пол потай ни. Нош соос весь уг вуо. Чаль, нуныкае, чаль... ачим тыныд тани таӵе нянь турижез ӝыны карыса васькытӥ. Ме, ме... Уд сииськы... Казённой пудо... Казённой гурт нянь шӧмлы дышемын ӧвӧл... Ойдо, нуныкае, ойдо. Бертом. Табере асьмеос ӵошен улом, ойдо... Вот тӥни озьы... Потом та букосысь... Ортчись адямиос серекъялозы ук... Ойдо, ойдо, доре бертом. Ачим тыныд шуныт вуэн суралтӥ, тыбырад вешало, гидмы начар ӧвӧл, уд кынмы, уд... Ачим миым вань пасьёссэ, тӧл пырон интыоссэ горд сюез макиняен сураса няняй: усто, номыртэм шуныт луиз. Ойдо, гыдыке, ойдо... Кышномурт пиосмуртъёсыз уг но адӟы, кожалод, букосэ чырткемак пыриз, ветыл вӧзы кариськиз, чыртыяз вешаз, сюръёсыз вискысен кутскыса маялтӥз, собере тыбыраз топ-топ кариз - пудолэн гордэктэм, даралияса улӥсь синъёсыз небытэсь луизы, кышномурт дорысь зур! куалекъяса ӧз палэнскы ни. Сандӥ апай Еремейлэсь гозызэ пертчылӥз, вераськыса-вераськыса, ветылэн ӵош ик тракторен кыскем вольыт сюрес вылэ потӥз, озьы ик кылбураса-кенешыса, пиосмуртъёс вӧзтӥ дор палаз вамыштӥз. Политик Санька кенжытоно сигаретэз сярысь ик вунэтӥз: - Вот тыныд! - синъёсыз чарка пасьтаесь. - Котьмар шу, Еремей агай, французъёс шонер верало... - Кыӵе французъёс? Марлы французъёс? - воргорон кузпалыз сьӧры шонтыны дасяськем вал ни. Ӧз чида, берытскиз на Политик Санька пала: - Шерше ля фам! - Мар-мар? - Еремей табере дыртон мугзэ ик вунэтӥз. - Кышномуртэ утчано! - Марлы сое утчалод? Тӥни со! - Эк тон, Еремей агай, Еремей агай... визьмо воргорон, нош... Ярам, верало... Французъёслэн верамзыя, котькытын, котькыӵе ужын кышномуртэ адӟыны кулэ. Нылкышно бордысь потэ ваньмыз! Озьы шуозы удмурт сямен! Ойдо, Сандӥ апай тӥни кудкеме вуиз ни, вамыштӥм! Ветылдэ миськом! Сандӥ апаед ӟеч мылкыдо туннэ, нырйыл виятэмзэ поттоз, одно утялтоз! Айда! Пужмераку Куазь номыртэм шулдыр: жобаськыса, сульпаськыса улэмез бере, ӧжытак юзыралэс кариськиз. Соку ик котыр дунне гӧртэм пушкы веттылэм кадь луиз: писпуос пужмертэмын, электроезъёс гӧртэмын, эсьма, Марья апайлэн корка укно наличникъёсыз но пужмертыса эшшо но чеберскемын. Гӧртэм синкашъёс кадесь адӟисько. Пужмертымтэез номыр но кыльымтэ ни кожалод. Дурыстэм усто! Эсьма, вазем куараед бордысь но пужмер куашкалоз кадь... Марья апай ву вае. Ведра-карнанэн кырӟаса-кырӟаса вераське пыд улысьтыз ӟукыртӥсь лымыен. Таӵе шулдыр ӵукна понна, лэся, Марья апай кутчам та "кукмор" гын сапегъёссэ. Сӥлы сапегез Марья апайлэн. Мукет дӥськутэз курламон шат? Пичи но ӧвӧл! Ӝикыт, чебер, сэзь, чырткем, чупрес адӟиське кышномурт. Оло нош, инкуазьлэн таӵе жингрес кариськеменыз шат? Карнан пумъёсысьтыз тырмыт ведраосыз вамыштэмезлы быдэ каньылак вазисько: одӥг шапык но вуэд уз киськы, ӵапак егит кенак дыръяд сямен, пе. Тодо на, шакшыос, Марья апайлэсь, егит кен дыръяз, сюан-бӧрысь ортчыку, татӥ вамышъямзэ. Аслаз тодэ ваёнъёсызлы луыса пальпотэ кышномурт. Шораз ваземен сэрен, куаляк луиз: азяз сьӧд чиган кышно сылэ. Луть-лать курткаен, номыртэм бадӟым сумкаен, губырскытэ кадь со кышномуртэ. Соин ик бадӟым кӧто скал кадь адӟиське: - Эй, женчина, айда, погадаю! Марья апай, пал кыл но вазьытэк, вӧзтӥз кошконо кариськиз: таӵе шулдыр куазен таидлэн ваземез ӵапак сьӧд ӵаналэн каргетэмез кадь потӥз солы. "Тынад аслад сюресэд, мынам - аслам", - малпаз. Сьӧд адями тэбиниз: - Пачиму не говоришь? Дай погадаю! Посмотри, какая ты больная, какая... Ӧз шедьты ни верано кыл. Могӟиз. - Погадаю - ни будешь болить. Ой, какая больная! Вожез потӥз. Ог дасо вамыш палэнскем вал ни: зӥрак берытскиз на ӧтьымтэ, сӥлытэм тунаськись пала: - Никакой я не больной. Посмотри на себя: кудой да тощий - ветер погыртоз! Ачид висиськод, ас вылад мед усёз верам кылыд! Тьфу! Сэрегпум! Тьфу! Сьӧд куака! Албасты ик вань! Ветло ук, шулдыр дуннеез саптаса! Кош! Ас юртэз пала сапегъёсыныз ӟикырак карыса берытскиз. Оло нош, ведра-карнанэз, соглаш луыса, озьы вазиз? Одӥг шапыксэ но ӧз кисьты Марья апай. Табере бӧрсяз пичи но ӧз учкылы ни, йырзэ выллань урдӥз: егит кен дыръяз кадь. Мотор адӟиське. Нош сьӧд чиган кышно? Урам кузя лашкинтӥз. Бадӟым сумкаез улын уката губырскиз: инмар мед утёз, тазьы аслыз черлан медаз йӧт вылэм. Сокем жаль адӟиськиз со: калгись мумы пуны выллем... Марья апай ӟезьызэ лачмытак пытсаны медэ вал - марлы аслэсьтыд вожпотэмдэ капка вылэ уськытод? Соиз ачиз йыг! ворсаськиз. Тунаськисьлы луыса, лэся. Липет пумъёсысь, ӵаштыр карыса, пужмер куашказ... Коллегия законъёслэсь тырмымтэоссэс пусйиз Кылем арня вискын ортчиз Удмурт Республикаысь Юстицияя министерстволэн коллегиез. Отын вераськон мынӥз быдэсъясь ёзъёслэн законодательной но мукет нормативно-правовой актъёсызлы экспертиза лэсьтон сярысь. Кызьы пусъемын вал, министерствое вуись актъёслэн но законъёслэн инъетъёссы пӧлысь 80 процентэзлы кыӵе ке но ӵектонъёс но ватсанъёс сётоно луэ. Куд-ог документъёс дасямын луо, Россия Федерацилэсь Конституцизэ но мукет федеральной законъёсты тӥяса. Сыӵе тырмымтэос ӧжытгес луысалзы, законъёсты дасян уже кыскемын луысалзы ке министерствоосысь но ведомствоосысь юристъёслэн службаоссы. Жаляса верано, куд-ог быдэсъясь ёзъёсын сыӵе службаоссы воксё но ӧвӧл. Коллегиын озьы ик йылпумъянъёс лэсьтэмын Удмурт Республикалэн Конституцияз пыртыны чакламтэ ватсанъёслы. Коллегия озьы ик ӵектонъёссэ вераз куд-ог вузъёсын но услугаосын вырыны лэзёнтэм пумысен. Пусъемын вал та ужпумез федеральной закон вылэ пыкъяськыса нуоно, шуыса. Удмурт Республикаысь Юстицияя министерстволэн пресс-службаез. Юн возисько Та нуналъёсы Завьял ёросысь нырысетӥ фермер хозяйстволы 10 ар тырме. Со борды басьтӥськиз вал Изгуртысь (Каменное) Василий Иосифович Афанасьев. Выль ужез-удысэз со кулэезъя радъяз, ас котыраз оскымон муртъёсты люказ, хозяйствоез валтыны ӟеч ӧр шедьтӥз - бакча сиёнъёсты будэтонэн выриз. Фермерлэн быгатыса, пайдаё ужамез калыклэн син шораз. Сое ёросысь гурт удысъя управлениен кивалтыны бырйизы. Фермер ужзэ Афанасьев оскиз пиезлы Ижысь Гурт удысъя академиез быдтэм инженер-механиклы. Али "Заряын" (фермер хозяйстволэн нимыныз 20 адями тырше. Соос кубиста, горд кушман, картофка, ӵуж кушман будэто, вань вузкарон интыоссы, гырон-мерттон, муэз небӟытон но мукет техниказы. Шаерамы уноез та выллем хозяйствоос куашказы, нош изгуртъёс уг чигнало, азьланезлы выль малпанъёсын уло. Н. Иванов. Василий Чугуевскийлы - 60 Улонзэ герӟаз механикая (одӥг) заводэн Одӥгез усто кивалтӥсь "Ижевский механический завод" кун предприятилэн валтӥсь директорезлы Василий Сергеевич Чугуевскийлы туннэ, 20 апреле, 60 арес тырме. Со вордскиз 1940-тӥ арын 20- тӥ апреле Ставрополь улосвылысь Кисловодск городын. 1962-тӥ арын йылпумъяз Ижысь механической институтэз, полигонной установкаосъя специалист луиз. Со дырысен заводын тырше. Пуктӥзы мастере, собере луиз инженер-технолог, цехлэн кивалтӥсезлэн воштӥсез, цехлэн, производстволэн кивалтӥсез. Вал со валтӥсь диспетчер, валтӥсь инженер, директорлэн нырысетӥ воштӥсез. Нош 1980-тӥ арысен 20 ар кивалтэ ни предприятиен. Секыт ныпъетэз ас вылаз басьтӥз Василий Сергеевич. Но шуг-секытъёслы ӧз сётскы. Ӝыныез 10 ар тупаз выльдӥськон вакытлы. Ож тӥрлык поттӥсьёслы но капчи ӧй вал. Но соос Василий Сергеевичен ӵош быгатӥзы вольыт сюрес вылэ, азинсконэ потыны. Отын, зэмзэ но, бадӟым сюлмаськемез валтӥсь директорлэн. Туннэ номыре уд ваты: мар лэсьтэмын-быдэстэмын - ваньмыз со син азьын. Василий Чугуевский быдэс улонзэ герӟаз Ижысь механикая заводэн. Лыктӥз со егит специалистлэн дипломеныз но ортчиз вань ёзъёсты-тубатъёсты. Мастерысен кутскыса, валтӥсь директорозь будӥз. Нош предприятие одӥгез бадӟым завод луэ. Отын 13 сюрс пала адямиос ужало но асьсэлэн кивалтӥсенызы данъясько. Со юнме шорысь ӧвӧл, дан инмысь уг усьы. 1980-тӥ-1987-тӥ аръёсы Василий Чугуевскийлэн кивалтэмез улсын предприятилэн кужымез 2 пол будӥз, юнмаз производственно-технической инъетэз, поттыны ӧдъязы выль пумо ож тӥрлык но калыклы усто вузъёс. Директор огинтыын ӧз сылы. Солэн кивалтэмез улсын, 1988-тӥ-1991-тӥ аръёсы предприятиез выльдонъя программа кутӥзы. Кутскиз рынокен экономикае выжон. Завод 67 процент ож тӥрлык дуре ке вал, со 1 процент гинэ кылиз. Мар кароно сыӵе дыръя? Коллектив азе бадӟым ужпум султӥз. Валтӥсь директор ӧз куалекты, шуг-секытысь потон амалъёс утчаз. Кутскизы выль продукция поттыны, ӟечлыксэ умоятыны. Василий Сергеевич шонер сюрес бырйиз. Предприятие поттыны ӧдъяз быдэс дуннеын вузаны ярамон продукция, тужгес но спортивной но пӧйшуран пыӵалъёс. Лыдпусэн вераса, соосты бичан 3 поллы йылӥз. 1993-тӥ-1999-тӥ аръёсы кылдытэмын но поттыны ӧдъязы таӵе выль продукция: универсальной кухонной машина, 8 пумо электроииструмент, му вӧй кысконэн герӟаськем приборъёс, тазалыкез эмъян инструментъёс (электрокардиостимуляторъёс, "Биофон") но мукетсэ. Предприятие шӧдскымон паськытатӥз рыноксэ. Заводлэсь продукцизэ дуннеысь 60-лэсь трос странаос басьто. Предприятилэсь "Байкал" нимо фирмазэ тодӥсьтэмез ӧвӧл ни, дыр. Со оскымон, кышкатэк сюрес лёгиз США-е, Азиысь но Западысь кунъёсы. Ватонэз ӧвӧл, кык-куинь ар талэсь азьло, завод гаӵоло кылле ни вал, шуыны луоз. Предприятиез нош ик пыд йылаз пуктӥз, улӟытон, ӝутскон сюрес вылэ вуттӥз Василий Чугуевский. Со умоесь кусыпъёс тупатӥз США-ысь но Западысь тодмо фирмаосын. Озьы "БАЙКАЛ" бурдъёссэ вӧл-вӧл усьтӥз, пыӵалъёсыз уно кунъёсы кошкыны ӧдъязы. Озьы куашкан калэ вуэм предприятие каллен-каллен юнманы кутскиз. Коллектив капчияк шокчиз. Адямиослы уж шедиз. Табере заводын чик ӝегатскытэк толэзьлы быдэ дыраз уждун тыро ни. Ваньмызлы умой луиз. Кызьы бен предприятие берло дыре ужа? Умой шуим ке, син ум уськытэ, дыр. Малыез тодмо, миым, 1998-тӥ арен ӵошатыса, 1, 5 поллы уногес подукция поттӥз. Туэ но вамышъёсыз юнмало. Сое тужгес яркыт возьматэ одӥг лыдпус. Берло вить ар ӵоже предприятилэн продукциез калык куспо адӟытонъёсын (выставкаосын) 9 пол дипломъёсын пусъемын. Нош ортчем ар ужамез понна заводлэн коллективез пыртэмын Удмурт Республикалэн Данъян пул вылаз. Сое-а ӝог вормон шуод? Нокызьы уд. Валамон, Василий Сергеевичлэн вамышлы быдэ пытьыез вань. Берло кык дас ар ӵоже мар гинэ лэсьтымтэ, вераса но уд быдты. Валтӥсь директорлэн сюлмаськеныз, предприятие, мукетъёсыз палэнскизы, ӧз куштӥськы соцкультбытъя учреждениосызлэсь. Солэн быдэс шаерамы самой ӟеч "Сосновый" санаторий-профилакториез, 3 номеро медико-санитарной частез. Та нуналъёсы сӥё-дано усьтӥзы солэсь эмъяськон люкетсэ. Отын нырысьсэ элькунамы кылдытэмын пересьёсты эмъян ёз, 60 койка пуктэмын. Таӵеез нокытын ӧвӧл на. Завод ӧз пытса город сьӧрысь нылпи шутэтскон лагерьёссэ, сад- яслиоссэ но музонзэ. Азьло сямен ик ужа "Октябрь" культура дворецез. Кин бен туннэ оскоз, Василий Сергеевичлы 60 арес тырме шуыса? Нокин уз. Солэн мылкыдыз пачыла, трос кужымзэ, визьзэ сётэ яратоно ужезлы, предприятизэ уката йыг- йыг пыдйылаз пуктонлы. Нош Василий Сергеевичлэсь одӥг предприятиын 38 ар вис карытэк, со пӧлысь 20 ар валтӥсь директор луыса тыршемзэ, сюлмаськемзэ уката валамон взьмато-верало наградаосыз. Солэн мӧляяз пишто Ленин, ИВ степенё "За заслуги перед Отечеством", "Трудовой Горд Знамя", Почёт но "Знак Почёта" орденъёс. Василий Чугуевскийлы сётэмын Россиысь дано машиностроитель ним. Со кивалтэ Удмуртиысь "Азинскон" промышленно-экономической огазеяськонэн. Валтӥсь директор бадӟым саклык висъя заводысь ветеранъёслы, ужасьёслэн нылпиоссылэсь шутэтсконзэс радъянлы но мукетызлы. Гажано Василий Сергеевич, ӟечкыласьком юбилееныды, мылкыд кариськом коллективдылы азьланьын выль азинсконъёс басьтыны, нош тӥледлы - шудбур но тазалык! Г. РОМАНОВ. Василий Чугуевский. Кенешизы пайдаёгес ужаны Яр ёросысь хозяйствоосын ортчыло отчётно-выборной собраниос. Южтолэзь пумын со вал "Рассвет" эштосын но. Отын предсадателе выльысь быръемын И.П.Мищенко. Собере огъя кенешсы ортчиз "Эра" эштосын. Татын но кивалтӥсьсэс ӧз воштэ, В.Г.Будановез ик кельтӥзы. Таӵе хозяйство ёросын одӥг, кудӥз миым туж пайдаё ужаз. Пудо утён пайда сётӥз ӝыны миллион манетлэсь уногес, бусы ужъёсты ватсано ке - 554 сюрс манет. Но эштосын вань луонлыкъёссы кутымтэ на. Соин кенешазы юн вераськизы, ужан дисциплинаез юнматон но туэ уката пайдаёгес ужан сярысь. П.Кузнецов. Ӧз куштэ - юрттӥзы Селта ёросысь Ботино гуртысь Е.Богдановалэн пиезлы алигес туж урод луиз, чик ӝегатскытэк операция лэсьтоно вал. Анай ёрос калыклы райгазет пыр вазиськиз, коньдонэн юрттыны курыса. Сыӵе юрттэт солы ӝог сётӥзы Уть-Сюмси гуртысь Валентина Четверикова, Елена Камаева, Людмила Симанова, Любовь Дюпина, Татьяна Вавилова, Велентин Дряхлов, Валенитна Симанова, Ботино гуртысь пенсионеръёс Е.М.Богданов, А.И.Богданов но И.Л.Симанов, озьы ик Уть-Сюмси школаысь дышетӥсьёс, Копки участковой больницаысь эмъясьёс но Загвозкинъёс - ӵыжы-выжыоссы. Пияшлы юрттэт вуиз дыраз. Туж умой со - вӧзамы юрттӥсьёс вань ке. Со бордын калыклэн юнлыкез. П.Николаев. Йыружъёс, Чечня но медальёс Туэ 14-тӥ апреле ортчиз Удмурт Республикаысь Югдурез утёнъя министерстволэн коллегиезлэн кенешез. Отын эскеремын министерстволэн нырысетӥ кварталэ ужамезлы йылпумъянъёс. Озьы ик сэрттэмын-пертчемын Россиысь МВД-лэсь пуктэм куронъёссэ быдэсъян сярысь ужпум. Коллегиез усьтӥз но Удмурт Республикаысь МВД-лэн ужамез пумысен доклад лэсьтӥз югдурез утёнъя министр милициысь генерал-лейтенант Владимир Щербаков. Министр шуиз: йыружъёслэн лыдзы кӧня ке кулэсмиз ке но (-5,1%), республикаысьтымы 18-аз ёросъёсын но городъёсын соос будыны ӧдъязы. Тужгес но йылӥзы секыт яке туж секыт йыртэманъёслэн лыдзы, со вань лыдэ басьтэм йыружъёс пӧлын ог 60 процент луэ. Жаляса верано луэ, югдур ӧз воштӥськы узырмыны тыршон вылысь йыружъёс ласянь, шуом, адямилэсь ваньбурзэс талан (+0,4%), транспортэз лушкан (+8,8%). Югдур уг умоя городъёсысь но посёлокъёсысь ульчаосын. Йыло экономика удысын йыружъёс. Соос герӟаськемын коньдонэз бергатонэн, дуно кагазъёсты, ваньбурез вузан-басьтонэн, шунытлы но электрокужымлы дунъёсты вошъямен, автомобильёсын, кудӟытӥсь юонъёсын, сиён-юонэн вузкаронэн. Калыклы уно кышкытлык вае наркотикъёсын, пыӵал тӥрлыкен но пуштытӥсь арбериосын законэз тӥяса вузкарон. Та секыт вакытэ республикаысьтымы югдурез утёнъя ёзъёсын ужасьёс йыружъёсын нюръяськонъя куд-ог удысъёсын, калыкез кышкытлэсь утёнын югдурез ӟеч пала воштыны быгатӥзы. Ортчем кварталэ огъя йыружъёсты шараян йылӥз 1,5 процентлы (шараямын но эскеремын 72,5 процентэз йыружъёс) криминальной милицияя - 2,7 процентлы, калыкез кышкытлыклэсь утись милицияя - 2 процентлы. Радъям йыружъёсты шараян будӥз 51 процентлы. Республикаысьтымы экономика удысын йыружъёсты шараян йылӥз 4,3 процентлы. Кылем арын та вакытэн ӵошатыса, одӥг ньыльмослы тросгес шараямын но ӝегатэмын наркотикъёсын лушкем вузкарон учыръёс. МВД-ен кутэм ужрадъёсын валче, республикаысьтымы унояз городъёсысь но ёросъёсысь ульчаосын кулэсмизы ульчаосын йыружъёс. Ӧжытгес (-10,8%) пусъемын сюрес вылъёсын шудтэм учыръёс, 11,2 процентлы кулэсмизы тылпуос. "Вихрь-антитеррор" бадӟым операциез ортчытон дыръя республикаямы улӥсь калыкез терроризмлэсь утён вылысь уно ужрадъёс лэсьтэмын. Удмуртиысь милициын ужасьёс ӟеч пырисько Чечен Республикаын но Уй пал Кавказын терроризмлы пумит нюръяськонэ. Югдурез утёнъя министерстволэн ужамезлы кулэезъя дунъет сётэмен ӵош министр пусйиз тырмымтэосты но. Коллегиын куд-ог ёзъёсын кивалтӥсьёслы кыл кутоно луиз, тырмымтэосты палэнтон вылысь кулэ ужрадъёс чакламын. Министрлэн пусъемезъя, тужгес но юн саклык висъяны кулэ экономика удысын но радъям йыружъёсын нюръяськонлы, республикаямы улӥсьёсты кышкытлыклэсь утёнлы. Эскерем ужпумъёс пӧлын вал "Россия Федерацилэн Президентэзлэсь "Этиллэсь спиртэз но кудӟытӥсь юонъёсты поттонэз но вузанэз кун ласянь кужмоятон сярысь" указзэ, законэз тӥяса, пыӵал тӥрлыкен вузкарон сярысь ужпумез быдэсъянлэн мынэмез но мукет. Коллегиын ик Удмуртиысь югдурез утёнъя министр Владимир Щербаков кунлэсь "За отличие в охране общественного порядка" медальёссэ сётӥз: - Юрий Михайловлы, Удмурт Республикаысь МВД-лэн экономика удысын йыружъёсын нюръяськонъя управлениысьтыз, старшой оперуполномоченнойлы милициысь подполковниклы; - Андрей Бедилолы, Сарапул ГОВД-ысь старшой участковой инспекторлы милициысь старшой лейтенантлы; - Олег Свиреновлы, Сарапул ГОВД-ысь уголовной розыскъя старшой оперуполномоченнойлы милициысь лейтенантлы; - Ильдар Гизатуллинлы, МВД-лэн ОМОН-ысьтыз милиционер боецлы милициысь прапорщиклы. Озьы ик министр сӥё-дано ужрадын МВД-ысь - УВД-ысь службаослэн кивалтӥсьёсызлы Ринат Саитгареевлы, Николай Трегубовлы но Евгений Главатскихлы сётӥз полковникъёслэсь погонъёссэс. Удмурт Республикаысь МВД-лэн пресс-службаез. ЧЕБЕРИНА Йырсиосме лӧсъяло - ваньзэс-ваньзэс гочато Тӥ ӧд вунэтэ на-а чебер йырсилы конкурсмы сярысь? Соку ыстэ туспуктэмъёстэс редакциямы. Бугыръяське ай альбомады - оло, отын вань кузь пунэтэн яке лӧсъям йырсиен туспуктэмды. Нош ӧвӧл ке, куре тустэс пуктыны тодмоостэс. Сыӵе йырсиез ватыса улыны уг яра. Возьматске, чеберайёс! Нош туннэ бамамы - Алнаш ёросысь Удмурт Тоймобаш гуртысь Анжелика Аристархова. Анжеликалы 16 арес, дышетске 10-тӥ классын. Но кӧня дыр ӵоже будэтыны выриз со та чебер пунэтсэ, маин утялтэ йырсизэ, гожтыны вунэтэм. Тау, Анжелика, туспуктэмедлы. Оскиськом, одӥг гинэ пияшез тон ӧд гочаты ни йырси пунэтэныд, озьы-а? Кызьы юрттоно гуртысь абитуриентлы! Та юан алигес сэрттэмын-пертчемын Правительстволэн. Тӧроезлэн воштӥсез Виктор Шудегов дорын ортчем кенешонын. Ужрадэ пыриськизы вузъёсысь ректоръёс, куд-ог министерствоослэн кивалтӥсьёссы но мукет. Гуртъёсын дышетскисьёслэн вузъёсы пырон понна тодон-валанъёссы тырмыт ӧвӧл. Соин республикаямы удмурт специалистъёс уг тырмо. Ёросъёсысь администрациосысь кивалтӥсьёслы куронэн вазиськемын: лыдъяно кӧня но кыӵе специалистъёс кулэ доразы. Тае лыдэ басьтыса, вузъёсын гуртысь студентъёслы нимаз интыос висъямын луозы. Егитъёслы, оло, пичияк коньдонэн но юрттыны луоз. Э. Васильева. ЭХ! Мон - кузё! Узыр адямилэн уксёез уно ке но, малы ке солы котьку ӧжыт потэ. Ярам, узырмыса сямыз ке ӧй воштӥськысал. Но озьы уг луы. Ӵемысь "мон" гинэ шуэмез потыны кутске, куддыр, шорад учкытэк, сюрес урдсы но палэнтоз. Кызьы-о, пе! Солэн котьмаиз ваньмыз, со - кузё! Таӵе "сюресъя" вамышъяло нылпиоссы но. ...Кезьыт. Толалтэ. Векчи курткаен дӥсяськем нылкышно остановкаын семаен, кысконэн вузкаре. Университетэ мыныку, котьку син шоры йӧтэ. Чылкак аслад кадь потэ ини. Сылӥсько, витисько трОллейбусэз. Калыкез ичи. Вуизы куинь егит пиос. Соку ик адӟиське: "выль ӟучъёслэн". Пеле пырымон горо, вераськоназы "чебер" кылъёс пыртыло. Сыӵеесь тӥни соос! Шоразы учкыны ик уд дӥсьты. Йырзы урдэмын, гадьёссы ӝутэмын. Палэнысен учкыса, возьыт та пиос понна. Оло асьсэлэсь визьмо, туала луэмзэс возьматыны тыршо, оло сыӵе-сыӵе голям, лӧптэм луэмзэс. Кытӥ ке ӧвӧл, котыртӥзы вузкарись нылкышноез ог минут куспын быдэс нунал ӵоже тыршем ужзэ бушатӥзы: сема - муз вылын, тамак - ым дурын... Котыр сылӥсь адямиослы нокытчыязы ӧз йӧты. Милям со ужмы ӧвӧл, шуизы кадь. Оло, ваньмыз каньылэн сётӥськемен, оло шуныт но коньдоно анай-атай бурд улын улэмен ӝутӥське кизы уродзэ лэсьтыны. Асьсэлэн ужаса манет но поттэмзы ӧвӧл ай, дыр. Соос уг валало, кӧня кужым, дыр быре кӧттэ тырон понна. Кин ке валэктоз-а соослы? О.НИКИТИНА, Удмурт университетысь студентка. ОЖЫСЬ ГОЖТЭТЪЁСЛЫ КОНКУРС Мӧзмон буйгатэк кылиз Мон вордски (вуж сямен вераса) Вуж Зятцы районысь Ленвай гуртын. Татын кутски улонлэсь шӧмзэ, ымтыр няньлэсь кызьы ӝӧк вылэ вуэмзэ валаны. Улон капчиен ӧз сётскы ке но, дышетскем потэ вал. Крезьгурез яратон монэ вуттӥз Ижысь музыкальной училищее. Огез бӧрсьы мукетыз нуналъёс ортчо. Мон кыкетӥ курсэз йылпумъясько ни вал. Ог нуналэ (со вал 1941-тӥ арын) училищее ивор вӧлмиз, гужем нуналъёсы, пе, Можга городын ужан вылысь договор гожтозы шуыса. Мылкыд карисьёс духовой оркестрын ужалозы. Таӵе ивор мыным но яраз. Кема малпаськытэк, эшъёсын ӵош Можгае мыныны мылкыд кари. Зэм, кема ужаны ӧз кылды. Странае но быдэс дуннее вӧлмиз урод ивор: война! Сыӵе вакытэ договорлэн кужымез ӧй вал ни. Оркестр боддоре лэзем кӧжы сямен пазьгиськиз. Мон бертӥ дорам - Лынвай гуртэ. Ма карон табере, зэмос музыкант луыны ӧй вуы, тракторист но, комбайнёр но ӧвӧл мон. Атае ӵогыса сямен вераз: "Дышетсконо, кыӵе ке но специальность басьтоно. Мынод Иже ик, ФЗО-е пырод". Озьы нош ик городысь ульчаосты лёгасько, классъёсын пукисько, ветлӥсько заводысь цехъёсы, отделъёсы. Дышоно ук кортэз вӧлыны, портыны, волятыны, лэсьтэм детальёсыз сэрттыны-пертчыны. Ож лудын уез-нуналэз кӧлатэк ортчытӥсь солдатъёс витё городъёсын поттэм пыӵалъёсты, снарядъёсты. Вите сое мынам атае но. Со но 1943-тӥ арысен фронтовой сюресъёсты лёга. Ожмаськиз Украинаысь городъёсты но гуртъёсты мозмытон понна. Солэн гожтэтъёсыз веразы Корсунь-Шевченковской, Яссы-Кишиневской операциос сярысь. Зэм, кытын кызьызэ меӵак гожтыны дӥсьтымтэ. Военной цензура сак эскериз фронтысь но фронтэ мынӥсь гожтэтъёсты. "Мултэссэ" верам кылъёс цензоръёслэн пуж пыртӥзы ӧз потэ. Котыръяса гожъяз ке но, ми валатским атаймылэсь кытынзэ. Нуналлы быдэ возьмам ожлэсь дугдэмзэ. Ӵукна но, ӝыт но витим Левитанлэсь куаразэ. Кыӵе иворъёс сётоз со фронтъёсысь. Котькыӵе дырыз вал: шумпотонэз но, куректонэз но. Асьмелэн чигнало ке, ог-огмылэсь юаллям: шат нокызьы уг луы вал тушмонэз вормыны? Аслад синмыныд адӟытэк, умойтэм дунъян вал, дыр, со. Нош войскоосмылэн кӧня ке километрлы Шунды пуксён пала вамыштэмзылы, гуртъёсты, городъёсты мозмытэмзылы шумпотон юн пачылмылӥз. Тодмо муртэн-а, эшъёсын-а пумиськод, вераськон мытыку ик юаськод: "Кылӥд-а, туннэ асьме войскоос Киевез мозмытӥллям. Днепр вамен трос частьёс потыны быгатӥллям". Нош мынам йырам (бен мынам гинэ-а) атае сярысь сюлмаськон: быгатӥз-а со ассэ утьыны. Серекъяса вералоз вал ук: "Йыры быгылес, кӧты котырес". Ожын та кылъёс интыяз верамын луизы оло ӧз. Бырон солдатэн артэ ветлэ ук. Озьы но ми, Муравьев выжыос, атайлэсь гожтэтсэ витиськом. Ярам коть, солдат гожтэтлэн сюресэз кузь ке но, вуэ вал. Соосты атае гожтӥз, Дунай шур дурын сылыкузы, Будапешт но Вена городъёсын, Карпат гурезьёс вамен потыкузы. Вена! Тани кытын пумитаз атае секыт войналэсь дугдэмзэ. Гожтэтъёсаз ивортылӥз ини, ӝоген Лынваям берто шуыса. Йыр вылтӥм но, вӧзтӥм но пуляос шулазы. Озьы но тӥлесьтыд мӧзмон ӧз безды. Котькуд гожтэтаз атае юалляз кызьы улэммес, мар кизиськом, мар мерттӥськом бакчаямы? Ачиз ик дэмланъёс сётылӥз. Бен, созэ мон дорам бертылыкум гинэ тодылӥ. Ижын бакчае но, гырон-кизён тӥрлыке но ӧй вал. Бертӥсько ке, нырысь ик фронтысь вуэм гожтэтъёсты лыдӟылӥ. Солдат, уката ик мӧйы солдат, чидатэк вите ини бертон сюрес вылэ потонзэ. Вуиз сыӵе нунал. Война аръёсы шӧдскымон мӧймыны вуэм солдатъёсты но сержантъёсты пырак азелы доразы келяны приказ вуэм. Сыӵе солдатъёс пӧлын вал мынам атае но. Дунай дурысь Вена городэз кельтыса, Иван Муравьев Россие бертэ вал ини. Нош дорамы вуыны ӧз кылды. Румыниысен солэн бертон сюресэз чиге. Бендеровецъёс быдто сое. Озьы солдат мӧзмем сюлэмзэ буйгатыны ӧз вуы ни. Уг, со уг вуны, милям, Муравъевъёслэн, сюлэмамы улэ. В.МУРАВЬЕВ. Социалистической Ужысь Герой, ужысь ветеран. ДАРТ ЕГИТ КУАРАОС Маке сярысь зулён Вал ни поэма, Вань ни роман... Нош мон историе маин кылём? Уд тодэлэ! Мон кылдытӥ выль жанр. Нимыз солэн - Зулён. *** Турлы сяськаос пӧлын Кудӥз меда чебергес? Турлы дусымъёс пӧлын Кудӥз меда мусогес? Турлы сяськаос пӧлысь Туж чеберзэ ишкалтӥ. Турлы дусымъёс пӧлысь Огезлы тужгес оски. Сяськае дантэм вылэм - Туж ӝог бездӥз но тӧлӟиз. Быръем нылы йӧнтэм вылэм - Сьӧр пиосын кушласькиз. А.УЛЬЯНОВ. Ляльшур гурт, Шаркар ёрос. Тон вераськод ортчем дырез... Черсон дураз нырулыса, Песянае кырӟа ӝож гур. Берга черсэз дугдылыса, Пересь маке малпа туж мур. Мон мылкыдзэ ӧй тод солэсь, Малпаз меда пинал дырзэ? Яке пиштэм тулысэзлэсь Вераз-а со мӧзмем кылзэ? Сӥньыс сямен кыстӥськемын Лёгем сюрес, ортчем аръёс. Кӧня меда кисьтӥськемын Сюрес вылэ пӧсь синвуос? Оло, сое малпад-а тон, Ортчем дырез ваил тодад? Тырмоз, песяй, мукет улон Зэмос шудбур вуиз дорад. Огнад шат тон? Нылпиосыд Вӧзад пушъё, бадьпу сямен. Вирсэразы тынад вирыд. Выросазы - тынад сямыд. Ӝожзэ кельтом ортчемезлы, Я ӵок, ӧжыт пересьмемед. Пиосыдлэн улоназы Ӝужа тынад выль тулысэд. Лариса БЕЛЫХ. Мукши школа, Як.-Бодья ёрос. УХ! Сюлмо пияшъёс Али пичиысен кӧттыр сярысь сюлмаськоно луэ. Жаляса учконо вузкарись пиналъёс шоры. Трамвайысь трамвае пыро-пото, турлы газетъёс вузало. Кызьы но уг ушъяло вуззэс - асьсэос валтӥсь редакторъёс но газетсы сярысь озьы вераны ӧз быгатысалзы, дыр. Пиналлэсь сыӵе-сыӵе тыршемзэ адӟыса, эриктэм газетсэ басьтэм потыны кутске. Одӥгеныз пияшен вераськоно кариськи. - Тазьы ужаса, кӧня манет поттӥськод бен? - Нуналаз сю манет. Мон пайми. Ма пӧяськиськод, шуисько. Бордаз сылӥсь эшез дурбасьтыны кутскиз. - Зэм, сю манет луэ. Толон тани сумка басьтӥм. Азьвылзэ коньдонмес анайлы сётӥм. Я, иське, шуисько, уксёдэс кутыны ке валаськоды. Пичиысен тыршыса будӥды ке, азьтэмлы уд сётӥське ни. С.ПЕТРОВА. Мед луозы удмуртъёс "Удмурт кенеш" огазеяськонлэн Можгалась ёзэзлэн кичӧлтэмезъя, город администрациын ортчиз дышетскон заведениослэн кивалтӥсьёсынызы кенешон. Вераськон мынӥз экономика, культура, дышетон удысъёслы удмурт кадръёсты дасян сярысь. Администрацилэн семья, нация но вӧсьлык ужпумъёсъя люкетэныз кивалтӥсь Е.Ф.Бушмакина люкаськемъёслы огъя югдурез возьматӥз. Кенешчиос удмурт специалистъёсты дасянъя сюресъёс чаклазы-пусйизы. М.КУЗЬМИН. Вунэтэм амал "Удмурт кенеш" огазеяськонлэн Шарканысь ёзэзлэн правлениез люкаськылӥз. Татчы вуылӥз Валентин Тубылов. Вераськонэ озьы ик пыриськизы гурт администрациослэн кузёоссы. В.Тубылов тодматӥз "Удмурт Кенеш" ассоциацилэн уженыз, шаерамы кылдэм туала югдурен, юанъёслы валэктонъёс сётъяз. Вераськемын апРЕль пумын ёросын "Удмурт Кенешлэсь" нуналъёссэ ортчытыны. Гурт калыкен соку пумиськылозы огазеяськонлэн лекторъёсыз. Ож суредъёс. Быдӟым оже ветлэмъёслэн лыдзы Шаркан ёросын 98 гинэ лыдъяське на. Ӵапак соос но ож бусыын быремъёс сярысь вераськон мынӥз Шарканысь культура юртлэн сцена вылаз. Вормон нуналэз пумитаса, ёросысь дышетӥсьёс аспӧртэмлыко ӵошатскон ортчытӥзы - кин яркытгес возьматоз война суредъёсты. 9 коллектив пӧлысь вормисе потӥзы кыкваос. Асьсэды сцена вылын возьыны быгатэменызы но мур пуштросъем вераменызы висъяськизы нылпи центрын ужасьёс но Карсашур школаысь дышетӥсьёс. О.СИДОРОВА. УСТО КОНСТРУКТОР Атаезлэн сюрестӥз Михаил Драгунов - Удмуртиын гинэ ӧвӧл, быдэс Россиын тодмо конструктор. Вордскиз 1947-тӥ арын. Ижысь механической институтэз 1972-тӥ арын йылпумъямез бере ("Полигонные установки" специальностья), 11 ар ужаз "Ижмаш" огазеяськонын инженер-конструктор луыса. Со дыр ӵоже егит специалист 7 научно-исследовательской уж быдэстӥз но 6 авторской свидетельство басьтӥз. Ваньмыз со герӟаськемын ож тӥрлык поттонэз умоятонэн. 1975-тӥ арын пусъемын "Социалистической ӵошатсконын вормись" Всероссийской знакен. Михаил Евгеньевич - техника наукаосъя кандидат, доцент. Россиысь но Удмуртиысь наука удысысь дано ужась луэ. Бен, таӵе нимъёс юнме шорысь уг сёто. Михаил Драгунов, атаез Евгений Федорович сямен ик быдэс улонзэ сӥзиз ож тӥрлык, спортивной но пӧйшуран пыӵалъёс поттонлы. Кызьы шуо, пиез азинтӥз атаезлэсь кутскем ужзэ - пистолет-пулемёт лэсьтонзэ. Драгуновъёс сярысь трос гожъязы ни газетъёс, уно вераллязы радио но телевидение пыр. Алигес Евгений Федоровичлэн вордскемез дырысен 80 ар тырмиз. Солэн ӟеч ужез пиез кие шедиз. Со шумпотымон. Михаил Евгеньевич 1991-тӥ арын ужаны лыктӥз Ижысь механикая заводэ валтӥсь конструкторлэн отделаз. Пистолет поттонъя группаын радъяз пистолет-пулемёт дасянэз (атаезлэн кутскем ужез). Озьы кылдытэмын "КЕДР" пистолет- пулемёт но поттыны кутскемын Златоустысь машинаос лэсьтон заводын. 1996-тӥ арысен сое басьтэ Россиысь МВД, нюръяськон ож тӥрлык луиз. Михаил Драгунов уката азьпала вамыштӥз - валтӥсь конструкторлэн кивалтэмез улсын конструкторской группа "Клин" пистолет-пулемёт вордӥз. Солэн патронэз 9 миллиметръем. Али "КЕДР" но "Клин" пистолет-пулемётъёсты уже куто Россиысь МВД, ФСБ, РУОП но мукетъёсыз правоосты утись ёзъёс. Специалистъёс та ож тӥрлыкез вылӥ дунъяло. Михаил Евгеньевич ассэ туж умой шедьтӥз конструкторской ужын но егитъёсты дышетон удысын. Кӧня ке со ужаз Ижысь механической институтын но Удмурт кун университетын. Механической институтын "Проектирование автоматических машин" кафедраын дышетӥсь вал. Татын со наукаосъя кандидат 12 научно-исследовательской ужъёсты быдэстонэ пыриськиз, "Проектирование" темая лекциос лыдӟылӥз. Огъя вераса, институтын Михаил Евгеньевич 400 ёрос выпускникъёсты дышетӥз. Соос пӧлысь данакез вылӥ специалистъёс луизы ни. Тани солэн дышетскисез заводысь инженер Олег Ломагин Россиысь Правительстволэн премиезлэн лауреатэз луиз, нош мукетыз - Г.А.Романов РФ-ысь Минэкономикая министерстволэсь "Конструктор М.Т.Калашников" дано знаксэ басьтӥз. Соос гожтӥзы умоесь методической ужъёс, кудъёсыз кутӥсько ИжГТУ-ын. Ачиз Михаил Драгунов 52 научной но учебно-методической ужъёс гожтӥз ни. Али со (огдыре ужаса) УдГУ-ысь "Оружейное искусство но дизайн" кафедраен кивалтэ. Солы сётэмын доцент ним, Удмурт Республикаысь Инженерной академилэн член-корреспондентэз луэ. Михаил Евгеньевичен нырысьсэ пумиськи миым Макаров пистолет но пыӵал тӥрлык поттыны кутскем дырысен 50 арлы сӥзем ужрадъёсын. Тирын люкаськемъёс азе потӥз ӝужыт мугоро, паськыт кымесо, очкиен, чиль-чиль сьӧд йырсиё воргорон. Ӧжыт сумбресгес кадь потӥз. Соин, вылды, ассэ юн зӥбыт, востэм возиз. Журналистъёслэн юанъёссылы вакчияк но туж валамон валэктонъёс сётъяз. Нош кияз пистолет кутэмез бере адями син азьын воштӥськиз кадь. Со адӟиськиз, зэмос визьмо но дано конструктор луэ шуыса. Михаил Евгеньевич али ужа Ижмехысь предпроектъёсты эскеронъя группаын валтӥсь инженер-конструктор луыса. Меӵак вераса, со тырше гражданской оружие поттонэз умоятон, выльёссэ кылдытон, технической ужрадъёсты выльдон но продукцизэс возьматон бордын. Со герӟаськемын выль спортивной но пӧйшуран пыӵалъёсты паськыт вӧлмытонэн. Валтӥсь конструкторлэн статьяосыз печатламын ни "Красная звезда" газетын, "Техника и вооружение", "Солдат удачи", "Ружьё", "Российский оружейный журнал", "Мастер-Ружьё", "Оружейный двор" журналъёсын. Солэн материалъёсыз озьы ик поттылэмын ни Швейцариысь, Германиысь, Польшаысь журналъёсын. Тодмо конструктор котьку сямен пыриське дуннеысь калык куспо "Ива" но музон адӟытонъёсы. Таӵе инженерен тужгес но данъясько предприятиысь специалистъёс но ужасьёс. Нош ачиз Михаил Драгунов таӵе усто конструкторъёслэсь нимъёссэс ивортэ. Тани соос - Климов, Пугачев, Протопопов, Плецкий, Вотяков но трос мукетъёсыз. Та адямиосты ӟеч тодо быдэс дуннеысь ож тӥрлык поттон бордын ужасьёс. Нош соос пӧлын Михаил Калашников гинэ ӧвӧл, Драгуновъёс (атаез но пиез) Евгений Федорович но Михаил Евгеньевич. Геннадий РОМАНОВ. * Михаил Драгунов. Сизьымдон вить арес тырмысал ни тодмо гожъяськисьлы Евгений Васильевич Самсоновлы. Зэм, улонысь дырызлэсь вазь кошкеменыз валче, уно ӟеч малпанъёссэ быдэстыны ӧз вуы. Озьы ке но, лыдӟисьёссэ дырыз дыръя шумпоттылӥзы чебер веросъёсыныз, усто романъёсынызы. Туннэ одӥгез мадёнмы - ӵапак та адями сярысь. Ческытъяськиськом, тросгес кулӥськом Мар вал 2000-тӥ ар? Выль президент, нош эшшо? Республикаысьтымы туннэ югдурен тодматӥз Кун Кенешлэн аппаратысьтыз валтӥсь специалист Сергей Бехтерев. Со трос малпаськымон лыдпусъёс вераз. Кылсярысь, туэ нырысетӥ кварталэ (миым та вакытэн ик ӵошатыса) ӧжыт ке но тупатскиз калыклэн улон- вылонэз, умояз промышленностьын югдур. 2,6 поллы тросгес поттыны кутскемын ожгар тӥрлык (со пӧлысь 78 процентэз экспортэ кошке), будӥз мотоциклъёс, радиоприёмникъёс, нылпи коляскаос, дӥськут но пыдкутчан, сиён-юон поттон. Тунсыко соиз: кылем арын та вакытэн ӵошатыса, туэ кык поллы ӧжытгес макарон вузамын. Со понна тросгес басьяло бакча сиён, емыш, сур. Ваньмыз со вера калыклэн басьяськон луонлыкез будэм сярысь. Йӧназ пыриз уго бюджет чотын ужасьёслы уждун тырон, пенсиос но нылпи пособиос сётъян. Инфляция вань ке но, шоро-куспо уждунэз со уг ортчы. Январь толэзе шаермыя шоро-куспо уждун 1408 манет потӥз, пенсия - 520 манет. Пенсилэн быдӟалаез шугъяськытэ ик - али одӥг адямилы улыны ичизэ 1026 манет кулэ уго. Республикамылэн бюджетаз шӧдскымон пайда ваиз мукет улосъёсын но кунъёсын вузкарон, инвестициос. 5,8 сюрслы кулэсмиз ужтэк кылемъёслэн лыдзы, тросгес шараямын йыружъёс. Республикамы Федеральной бюджетысь бадӟым ссуда басьтыны быгатӥз. Со люкемын калыкез дышетон, культура но искусство, тазалыкез утён, гурт хозяйство удысъёсы. Зэм, гурт хозяйствоын югдур котьку сямен ик секытгес. Но кивалтӥсьёс оскыто, эстӥськон тырмымон висъямын луоз шуыса. Кышкатэ демографияя югдур. Кылем арын Удмуртиын 15 сюрс 752 мурт вордӥськиз ке, кулӥз 20 сюрс 730 мурт. Озьы ик туж трос семья куашказ - кылдэмезлы мынтӥд люкиськонъёс 112,6 процент луизы. З.Кириллова. ЯЛӤСЬКОМ КОНКУРС "Шундыкар-2000" Удмурт егитъёслэн "Шунды" дэменлыксы Егитъёсын ужанъя кун комитетэн ӵош 2000-тӥ арын июле ортчыто творчествоя "Шундыкар-2000" лагерь. Лагере шедён понна конкурсэ пыриськыны ӧтиськом 5-тӥ-11-тӥ классъёсын дышетскисьёсты, "Шунды" дэменлыке но "Шаер" программая "Родники" нылпи огазеяськонэ пыриськемъёсты. Нылпиос тодыны кулэ удмурт кылэз, озьы ик кыӵе ке но творческой ужен вырыны. Куронъёс: Конкурс ортчытӥське таӵе ёзъёсъя (направлениосъя): суредан, архитектура, литература, крезьгур (эстрада но калык крезьгур), театр, тележурналистика, национальной дӥськутлы дизайн, керамика (сюйлэсь шудонъёс). Конкурсэ пыриськыны мылкыд карисьёс ивортыны кулэ асьсэ сярысь: быдэсак нимтулзэс, вордӥськем арзэс, кытын улэмзэс, кыӵе классын дышетскемзэс, "Шундыкар" лагере ветлэмын ке - ку но кыӵе ёзъёсъя. Кыӵе ке но ёзэз бырйыса, тупатэм куронъёсты быдэстоно: 1. Суредан (5-тӥ-8-тӥ классын дышетскисьёслы) - "Мон но мон котырысь дунне" темая ыстоно 3 уж, суреданы луоз пӧртэм амалэн; 2. Архитектура (9-тӥ-11-тӥ классын дышетскисьёслы) - "Вань мынам выжыкыл дуннее" темая ыстоно 5 уж, быдэстыны луоз пӧртэм амалэн; 3. Литература (6-тӥ-11-тӥ классын дышетскисьёслы) - ыстоно дасозь кылбур яке 1-2 верос, яке улон интыды сярысь мадёс, кыӵе ке ужпумлы сӥзем зарисовка. 4. Крезьгур (калык крезьгур - 5-тӥ-8-тӥ классын дышетскисьёслы, эстрада - 9-тӥ-11- тӥ классын дышетскисьёслы) - удмурт кырӟанъёсты асьтэос быдэстыса ыстоно аудиокассета яке видеокассета (эстрада яке калык кырӟанъёсын), пӧртэм крезьгуро инструмент шудэм улсын яке сотэк; 5. Тележурналистика (9-тӥ-11-тӥ классын дышетскисьёслы) - егитъёслэн туала улонлы сӥзем ужпумъёссыя гожтоно телепередачалы сценарий. 6. Керамика (5-тӥ-8-тӥ классын дышетскисьёслы) - ыстоно 5 буёло фотографиос (10һ5 см) горд сюйлэсь яке пластилинлэсь ужъёсын, шудонъёсты сярысь кыӵе ке но мадёс гожтоно; 7. Национальной дӥськутлы дизайн (8-тӥ-10-тӥ классын дышетскисьёслы) - калык сямъёсты уже кутыса дасяно но ыстоно деловой костюмлы 5 эскиз (А 4 форматэн - альбом лист быдӟа); 8. Театр (6-тӥ-11-тӥ классын дышетскисьёслы) - дасяно сценка, кылбур, басня яке монолог. Конкурс ортчоз 27-тӥ ме "Шунды" дэменлыклэн комнатаяз 11 часысен 15 часозь. Конкурсэ дасям ужъёсты ыстоно 20-тӥ маёзь. Нылпиослэн мылкыд каремзыя ужъёс берыктэмын луозы 1-тӥ сентябрёзь. Ужъёсты эскерозы но дунъялозы "Шундыкар" лагерьын берло кык арзэ ужам специалистъёс. Конкурсъя йылпумъянъёс печатламын луозы республиканской но ёрос газетъёсын 1-тӥ июнь бере. Гожтэтъёсты но конкурсэ дасям ужъёсты гожтоно удмурт кылын. Ыстоно таӵе адресъя: 426051, Ижевск город, Советской урам, 1 номеро юрт, УМОО "Шунды". Юанъёсын вазиськоно таӵе телефонъя: 51-07-96. "Шунды дэменлыклэн правлениез. Пу басьтыны юрттэт Йӧналаез гуртын улӥсь толлы эстӥськон пу дася тулыс - куазь но шунытгес ни, ужъёс но ичигес, гужем соин выроно медаз ни луы, сотэк но сюлмаськонъёс тырмозы. Красногорск ёросысь лесхозын 10 кубометр писпулы тыроно 1600 манет. Сое вандоно но пильылоно на. Дуныз кык сюрс манет пала вуоз. Нош шуныттэк кызьы толъёд? Ёросысь оже ветлэм адями али пу вайыны 420,4 манет юрттэт басьтэ. Ветеранъёс (карттэк кылем кышномуртъёс, И но ИИ группаен инвалидъёс, ужысь фронтэ ветлэмъёс) басьто 18о манет. Нырысетӥ кварталэ Валамаз но Курья сельсоветъёсъя гинэ пу басьтыны юрттэт висъямын 95 сюрс манет. Ёросын оже ветлэмъёс 111 кузя. Таӵе юрттэтлы сос шумпото. П.НИКОЛАЕВ. Поездын - возьмаськись Алнаш станцие мынӥсь поезд Иж вокзалысь интыысь дырын 7 час 35 минутэ вырӟе. Кӧлэмез поттыса, небытак йыггето 5-6 вагонъёс. Син шоры йӧтэ формаен адями. Кенешиськом соин. Мынам тодэмея, пригородной поездъёсын куинетӥ арзэ охрана ветлэ. Нырысь кык кузя вал, али огнам, - валэктэ юанэлы Н.М.Тимофеев. - Ми чакласьком вагонъёсын укылтэмъяськисьёс медаз луэ шуыса, палэнтӥськом шудтэм учыръёсты, дурбасьтӥськом контролёръёслы но проводницаослы. Отрядмы - Ижын, командамы - Агрызын. Мон Пичи Пурга ёросысь бере, Агрызысяз ужасько. Тани Сарапулын анаен нылпи поезд улэ шедизы. Возьмаськисьтэк уг луы на. Николай Михайлович та уж борды басьтӥськем 1986-тӥ арын. Армиысь бертэмез бере нырысь ужам грузовой поездъёсты чаклан бордын. Лушкаськонъёс будэмен командамес данаклы йылэтӥзы, - вераськонзэ азинтэ со, - азьло 56 кузя гинэ вал, нош али - 240 ни. Ми алӥськом чугун сюрес вылтӥ келяськись вузъёсты лушкамлэсь. Бен, табере выль машинаосты келяны пытсам вагонъёс но потто ни. Соин ӵош нуон- ваён милемлы возьматэ, кызьы ужало заводъёс. Тани азьло Ижысь быдэс составен но арнялы быдэ машинаосты келяло вал ке, табере - кӧня ке вагонъёсын гинэ. Тимофеев - удмурт адями, яратыса лыдӟе "Удмурт дунне" газетэз. Сутка ужа, кык сутказэ - дораз, юртъерзэ выльдэ, пудо вордэ но сад-бакча возе. Ас ужез солы кельше. П.СКОБЕЛЕВ. Россия Федерациын Сюресъёс вылын шудтэм учыръёсын нюръяськонъя арня ортчытонэн валче Россия Федерациысь Правительстволэн ВАЗИСЬКОНЭЗ Гажано эшъёс! Странамылэн улон-вылоназ туж бадӟым инты басьтэ сюресъёс вылын шудтэм учыръёсын нюръяськон ужпум. Берло вить аръёсы сюресъёс вылын вӧсь луиз 1 миллион адями, со пӧлысь 150 сюрсэз быриз, уноез ӧлексы кылиз. Автомобильёслэн лыдзы туж ӝог йылэ. Соин ик быдэс дуннеын адямиослэн улонзы но тазалыксы сярысь сюлмаськон туж бадӟым ужпум луэ. Соин валче Огазеям Нациослэн Организацизылэн Европалэн экономической комиссиез 2000-тӥ арын 1-тӥ-7-тӥ мае ортчытыны чакла Сюресъёс вылын шудтэм учыръёсын нюръяськонъя арня. Европалэн экономической комиссияз пырись странаос та ужрадэз радъялозы огдыре. Со юрттыны кулэ тужгес ӵем пумиськылӥсь шудтэм учыръёсты палэнтыны. Огазеям Нациослэн Организацизы тужгес бадӟым саклык висъя пыдын мынӥсь- ветлӥсьёслы (нырысь ик - пиналъёслы, мӧйыослы, ӧлексыослы но егитъёслы), велосипедистъёслы, мопедъёслэн но мотоциклъёслэн водительёссылы но соослэн пассажиръёссылы. Уго соос ӵемгес шедьыло шудтэм учыръёсы. 1999-тӥ арын ог 30 сюрс быремъёс пӧлысь 33 процентэз ӵапак сыӵеос луо. Адямиослэн улонзы но тазалыксы сярысь сюлмаськыса, Россия Федерацилэн Правительствоез 1999-тӥ арын мартэ Россия Федерациын сюресъёс вылын шудтэм учыръёсын нюръяськонъя арня ортчытон сярысь постановление кутӥз. Отын сюресъёс вылын тужгес кышкыт учыръёсты алон но кулэстон сярысь ужпумъёс пуктэмын. Со ужрадэз ортчытыку, ужзэс кужмоятыны кулэ быдэсъясь властьлэн вань органъёсыз, озьы ик сюресъёс вылын шудтэм учыръёсты палэнтон ужен герӟаськем общественной организациос. Чаклам ужпумъёсты быдэстон юрттысал уно адямиослэсь улонзэс утьыны, тужгес но, пиналъёслэсь но быдэ вуымтэослэсь. Но со понна туж зол ужано, трос кужымез сётоно луоз. Россия Федерацилэн Правительствоез таӵе ӵектонэн вазиське: ваньмызлы сюрес вылын мынӥсь-ветлӥсьёслы туж юн чаклано но быдэсъяно сюресъёс вылтӥ ветлонъя куронъёсты, отын мед луоз ог-огдэ гажан. Эн вунэтэ, ульчаын-а яке сюрес вылын-а тӥ, соин герӟаськемын тӥляд улонды но тазалыкты, озьы ик мукетызлэн адямилэн улонэз но тазалыкез; калыкез дышетонын, тазалыкез утёнын, культура удысын, правоосты утён органъёсын, общественной организациосын ужась кивалтӥсьёслы но специалистъёслы уже кутоно асьсэлэсь тодон-валандэс но улон опытсэс, ваньадямиос сюресъёс вылын но ульчаосын юн мед чаклалозы тупатэм правилоосты, ваньзы ог-огзэс мед гажалозы; иворъёсты вӧлмытонъя ёзъёслэн кивалтӥсьёссылы, тужгес ик телерадиовещание удысын ужасьёслы, туж бадӟым саклык висъяно та ужрадлы; Россия Федерацилэн улосъёсысьтыз быдэсъясь властьлэн органъёсызлэн кивалтӥсьёссылы сюресъёс вылтӥ ветлонъя дисциплинаез юнматон вылысь кулэ ужрадъёс кутоно, ваньзэ лэсьтоно, Огазеям Нациослэн Организацизылэн Европейской экономической комиссиезлэсь Сюресъёс вылын шудтэм учыръёсын нюръяськонъя арня ортчытон сярысь ялэм ужрадзэ ӟеч быдэстон понна. И.КЛЕБАНОВ, Россия Федерациысь Правительстволэн кивалтӥсезлэн воштӥсез. Дарт Воректӥсь кизилиос Дипломат - со сям? Юрий Перевозчиков, удмурт, вордскемын Ижевскын 1970-тӥ арын, гороскопезъя - Весы, синмаськымон, визьмо егит пиосмурт. Кин меда таиз героймы - артист, журналист, спортсмен яке бизнесмен? Эн туналэ, уд тодэ. Юрий - дипломат. Нырысетӥез удмурт дипломат! Али ужа Республикаысьтымы мукет кунъёсын кусыпъёсъя министерствоын валтӥсь специалист луыса. Но - ваньмыз радызъя. Данъяськы, пионер, Тынад доред - СССР Туала пиналъёс сое ноку уз валалэ. Соин ик дунъяны но уз быгатэ. Нош ми ёзъёс со вакытъёсы, зэмзэ но, туж шудоесь вал. Юра но данъяське, солы октябрёнок, пионер, собере комсомолец луыны кылдӥз шуыса. Ваньмон дырез пайдаё ортчытъян сяна, ленинской организациос котькуд пиналэз ас азяз ужпум пуктыны, одно сое быдэстыны, мукетъёсызлы юрттыны дышетъязы. Зэм, пияш ӟырдыт азьветлӥсьёс пӧлын ноку ӧй вал, но дышетӥсьёс сое котьку ушъяллязы, адӟем карыны косылӥзы. Юра котьку отличник вал. Соин ик туж пичиысен пыриз Удмурт университетысь история факультетэ. Мон - удмурт?! Али малызэ уг тод ни, но туж но туж кулэ вал лекциысь кошкыны. Озьы гинэ параез кельтыны умой ӧз поты - профессор туж гажано адями уго. Юра Владимир Емельянович Владыкинлэсь куриськыны пыриз. Соиз, кошкон мугзэ юалляськем интые, пыр-пыр учкыса умоен гинэ шуиз: - Вордскем кылдэ тодыны кулэ, Юрий Александрович. Тӥни соку нырысьсэ ачиз, калыкез азьын возьыт луиз Юралы. Городын вордскем но будэм пияш ноку со сярысь ӧз малпаськылы. Анаез но уго ӟучомем семьяын будэмын вал. Зэм, анкетаос гожъякуз, национальностез вадьсы со котьку "удмурт" шуыса гожъялляз, но отысь нокыӵе пуштроссэ ӧз адӟылы. Со учыр бере гинэ Юра рос-прос малпаськыны кутскиз: мон удмурт ке, малы номыр аслам выжыосы сярысь уг тодӥськы? Владыкинлэн вуоно лекцияз мыныкуз, со мар но со удмурт кылын вераны быгатэ ни вал. Кӧня кужым кулэ луиз ӟучомем удмурт пияшлы кылэз дышетон понна: нимысьтыз книгаос, методичкаос ӧвӧл. Пичиен-пичиен, чыры-пырыен йылӥз кылтодонэз - бугыръяськылӥз словарьёсын, журналъёсын. Одӥгезлы туж паймиз егит мурт - удмурт шаерын котькыӵе мукет кылэз дышетыны удмуртлэсь капчигес вылэм. Кунсьӧр кылын вераськиськод ке, гажаса учко, удмуртэн ке - паймо. Огпол кылзэ узырмытон вылысь киоскысь "Кенеш" журнал куриз. Вузкарись паймиз: - Милям сыӵеез ӧвӧл. - Кызьы ӧвӧл? Тӥни ук - вож выло удмурт литературной журнал. - А-а, зэм но, - самой пыдло сэргысь поттыса журнал мычиз со. Университетэз йылпумъякуз, Юра аслаз тужгес гажано дышетӥсеныз чылкыт удмурт кылын вераськылӥз ни. Соин со горд дипломезлэсь но золгес данъяськылӥз. "Шунды" Та улонын троссэ лэсьтэ учыр. Соку Юрий Перевозчиков университетын научной сотрудник луыса ужа, аспиранутраын дышетске вал. Телефон жингыртӥз. Христолюбоваез утчало, "Шундылэн" кыӵе ке конференцияз, пе, ӧтьыны малпаськомы вал. Шуак егит ныл (Уткина шуиз ассэ) Юралэсь юаз: - Нош тӥляд мылкыдды ӧвӧл-а милемын тодмасткыны, конференцилэн ужаз пыриськыны - куарадыя егит муртлы кельшиськоды. - Мар ветлонтэмез, учком, - шуиз Юра. Сое шумпоттӥз удмурт егитъёслэн огазеяськыса ужамзы, но сюлмаськытӥз куд-ог ужпумъёсты вылласянь гинэ эскерыны турттэмзы. Пумен ачиз но дэменлыклэн ужаз пыриськиз, тунсыко кичӧлтонъёс ӵектылӥз. Кыӵе ке секыт ужпумъёсты сэрттыку-пертчыку, ӟеч визь-кенешъёс сётъяз. Эшъёссэ паймытӥз котыр ласянь визьмо луэменыз, котькинэн оскымон вераськыны дунъет сётыны быгатэменыз. 1996-тӥ арын эшъёсыз сое "Шундылы" кивалтӥсе быръё. Визьмо пияшез синйылтытэк ӧз улы Светлана Смирнова (соку - Республикаысьтымы калыкъёсын ужан политикая комитетлэн тӧроез), ӵектӥз Москваысь Дипломатической академиын дышетскыны. Юра соку ик соглаш луиз - мар эскеронтэмез? Осто, нош огез удмурт дӥсьтӥз - малпаз, вылды, соку Светлана Константиновна. Дипломатия. Маин сое сиёно? Дипломат - со кунгож сьӧрын государствоезлэсь интересъёссэ дурбасьтӥсь, кусыпъёс тупатӥсь политик. Но со азьветлӥсь политик уггес луы. Дипломат уго туж визьмо, зӥбыт, валась, зэмлыкез гажась адями. Нош политик - кивалтонэ кыстӥськись, ассэ калык пӧлын возьматыны яратӥсьгес адями. Дипломатлэн инкуазен сётэм шӧдонэз-валанэз луыны кулэ (удмуртъёс ӵапак сыӵе адямиос). Но та дырозь удмурт дипломатъёсмы ӧй вал на. (Али министерствоын соос кык кузя.) Зэм, Юрий Перевозчиков меӵак дипломатлэсь ужзэ быдэсъя шуыны уг луы. Асьмелэн ӧвӧл уго кунгож сьӧрын представительствоосмы. Но Юрий Александровичлэн вань Венгриысь, США-ысь валтӥсь консулъёсын кун ужпумъёсъя ваче син вераськылэмез. Мукет кунъёсын кусыпъёсъя асьме министерствоын со протоколлэн шефез луыса ужа - кунгож сьӧрысь куноосты пумита-келя, кусыпъёс тупатъя. Ачиз куинь пол Венгрие вуылӥз ни. Жаль, шуэ Юра, академиын басьтэм тодон-валан быдэсак уже уг кутӥськы, но малпасько, инвисъёс азьпалан на. Вераны кулэ, Юрий академиез но горд дипломен быдтӥз. Ӟеч тодэ ӟуч, удмурт, мадьяр, немец, чех кылъёсты, лябгес - англи но финн кылэз. Кызь укмыс аресаз со научной кивалтӥсь ни - туэ дипломатической но консульской службалэн инъетъёсызъя солы кык мурт диплом уж гожъя. Ачиз 28-тӥ апреле "Этнической меньшинство но государство. Этнополитической кусыпъёсын ужпумъёс" темая кандидатской диссертацизэ утёз. - Министерсвоын уж, социально-политической наукаосъя вылӥ колледжын лекциос, "Шунды" дэменлык, диссертация... Уд жадиськы-а - юасько Юралэсь. - Тэк пукись мурт чальгес жаде, - шуиз со. З. Рябинина. Туспуктэмез В. Камашевлэн. Депутатлэн нуналэз Кылем арня пумын люкаськылӥзы Кун Кенеше быръем депутатъёс. Соос эскеризы дасэтӥ сессиын учконо ужпумъёсты. Валтӥсез луэ Удмурт Республикалэн Конституциезлы дасям инъетэз юнматон. Кызьы тодмо, республикамы дасяське парламентской кивалтонысь Президентэн улонэ выжыны. Таин валче азьвыл кутэм Конституция шӧдскымон воштӥськоз. Солы дасяськон кутскиз ни кылем арын ноябрь толэзе, конституционной комиссия кылдытэм бордысен. Кызьы шуиз та комиссилэн секретарез Константин Глухов, туннэ нуналозь ортчытэмын 11 заседание. Отын пыр-поч учкемын Конституцие воштонъёс но ватсанъёс пыртонъя вань вуэм дэмланъёс. Комиссия сяна, документъёсты дасян бордын ужазы бадӟым опытэн юристъёс. - Конституцилэн дасям инъетэз ыстэмын вал Москвае. Отысь экспертъёс сое умоен лыдъязы, пыртӥзы на асьсэлэсь ватсанъёссэс. Соос герӟаськемын федеральной законодательствоен, - пусйиз К.А.Глухов. - Умоесь ӵектонъёс вуэмын асьме депутатъёслэсь, общественной организацоислэсь, нимаз адямиослэсь. Ас малпанъёссэс веразы депутатъёс но. Сергей Беркутов ӟеч дунъет сётӥз конституционной комиссилэн ужезлы. Павел Вершининэз шугъяськытэ калыклэн Конституцилэсь инъетсэ умой-умой лыдӟымтэез. Интыосын та ласянь нокыӵе валэктон уж уг мыны. Валентин Жебровский куриз на Президентлэн постэзъя лад-лад кутскыса малпаськыны. - Конституциын котькудӥзлы валамон мед луоз кинэ асьмеос республикалы кивалтӥсе пуктом: удмурт кылэз тодӥсь муртэ яке удмурт адямиез-а? Нош ик валамтэ учыръёс медаз кылдэ. Пумиськонэз йылпумъяса, Кун Кенешлэн Тӧроез Александр Волков депутатъёслы дэмлаз та нуналъёсы бырйисьёсынызы пумиськылыны но валэктон уж нуыны. Л.МЕДВЕДЕВА. Оскымон утёзы "Ижысь механикая завод" кун предприятиын ужасьёслы таиз ар вунонтэм кылёз. Отын тыршисьёс но, эмъясьёс но уг ни оско вал, соослэн 3-тӥ медико-санитарной частьсылэн (МСЧ-3) выль юртэз ӧсъёссэ усьтоз шуыса. Но заводчиослэн шудзы вылэм на. ...17-тӥ апреле, нуназе котыр, выль медсанчасть доры вуо но вуо пӧртэм машинаос. Лыктэмъёс пӧлын республикаысьтымы но городысь кивалтӥсьёс, медициная тодосчиос, мукет куноос. Но тужгес уно тӧдьы халатэн адямиос. Каллен гинэ чузъяське крезьгур. Кутске эмъяськон юртэз сӥё-дано усьтон. Кыл сётӥське Удмурт республикаысь Кун Кенешлэн Тӧроезлы Александр Волковлы. Кивалтӥсь ваньзэсты ӟечкыла та дано нуналэн, тау каре лэсьтӥськисьёслы, коньдонэн юрттӥсьёслы. Горд лентаез вандэ предприятилэн генеральной директорез Василий Чугуевский. Зэм, табере та эмъяськон инты нимаське МОК (медико-оздоровительной комплекс) шуыса. Ватсалом на: та юртэ озьы ик интыяськиз республикаысьтымы клинической геронтологической центр. Отын дунтэк эмъялозы ожысь но ужысь ветеранъёсты, мӧйы адямиосты. Соослы висъямын 60 койка. Озьы ик татын усьтӥськоз медицина удысын ужасьёслэсь тодон-валанзэс будэтонъя факультет. Та дырозь асьме врачъёс дышетско вал Москваын, Санкт-Петербургын, Екатеринбургын. Огкылын вераса, выль комплекс быдэс республикаямы улӥсьёс понна ужалоз. Нош туала оборудование сярысь веранэз ик ӧвӧл. Сыӵеез асьме дорын татчыозь ӧй вал на... Заводлэн директорез В. С. Чугуевский комплексэз лэсьтон борды басьтӥськиз "Тазалык" программаез быдэсъяса. Вераны кулэ: алигес Василий Сергеевичлы сётэмын "Тазалыкез утён удысысь отличник" дано ним. Кивалтӥсьлэн сюлмаськеменыз лэсьтэмын поликлиника, профилактикая отделение, "Сосновый" профилакторий, физкультурая но тазалыкез юнматонъя комплекс (ФОК). Лэсьтыны кылиз на выльзэ стационарез яке комплексэз. Ужъёс кутскизы 1989-тӥ арын сӥзьыл но умой мынӥзы 1995-тӥ арозь. Со дырозь уго завод пыд йылаз йыг-йыг сылэ вал. Но "экономикаын выль политика" лэсьтӥськонэз "гуньдытӥз". Со дырлы юрт быдэсак вал ини. 1994-тӥ-95-тӥ аръёсы толзэ выль юрт кылиз вутэк, шуныттэк но тылтэк. Ӝоген та уж сярысь республикаысьтымы Правительство, заводысь администрация, татысь лэсьтӥськонъя отделлэн кивалтӥсез, МСЧ-ысь валтӥсь врач сюлмаськемен валче, "из" интыысьтыз вырӟиз. Юрттэт сётыны басьтӥськизы Удмурт Республикаысь пенсиосъя фондлэн ёзэз но (со 2,5 миллион манет "улэп" уксё висъяз), медицинаын страхованиея фондлэн отделениез (со заводлэсь пунэм тыронъёссэ взаимозачёт амалэн берыктонлы 16 миллион манет коньдонэн юрттӥз). Медициная оборудованиен юрттэт сётыны кыл сётӥзы Республика (А. А. Волков) но мэрия (А. И. Салтыков). Озьы басьтэмын лаборатория, УЗИ но рентгенлы оборудование, выль аппаратура но инструментъёс висъямын реанимацияя блоклы, хирургияя отделенилы. Татын нырысьсэ республикаямы усьтӥське торокоабдоминальной отделение. Со табере луонлык сётоз тужгес секыт но шер пумиськылӥсь операциос лэсьтыны. Шуом, автомобильёсын шудтэм учыръёс дыръя адямилэн мугорызлэн уно интыосыз сӧсырмыны шедё. Соку огдыре кӧня интыын операция лэстыны кулэ. Ӵапак та выль отделение эмъянын выль вамыш лэсьтоз. Чакламын усьтыны эндоскопической центр но. Эндоскопия амалэн операция лэсьтӥське мугорез вандылытэк, пичи гинэ пась лэсьтыса. Азьланезлы татын ужасьёслэн осконзы трос гинэ.Но со понна кулэ луоз трос коньдон. Троссэ ас вылаз басьтозы предприятие но республика. Бен, ӵуказе нуналлы осконэд вань ке, улыны но капчигес. Уката но капчигес, котырад тазалыктэ оскымон утисьёс вань ке. Соос вань. Но котьма ке но, сьӧд кыльёс палэнтӥмы мед ортчысалзы вылэм. Тазалык тӥледлы! Н. Байтеряков. Выль комплекслэн юртэз; сӥё-дано усьтон дыръя, ультразвукен диагностикая отделенилэн кивалтӥсез Валерий Тронин Япониысь "Алока" фирмалэн аппаратэз вӧзын; реанимацияя кабинетын. В. Беломорскихлэн туспуктэмъёсыз. "Элеконд" - Интернетын Сарапулысь "Элеконд" акционер огазеяськон ӝоген почтаен кусып воземысь дугдоз, дыр. Алигес заводын сэрттӥзы телетайпсэс, кудӥз пыр уно аръёс ӵоже туж ӝог ивор басьяны быгатылӥзы. Малы ке шуоно, кылдӥз электронной почта. Ивор сётон-басьтон выль техникаен данаклы ӝогомиз но дунтэмаз. "Элекондын" электронной кусып возёнэз дасясьёс шумпотыса верало, табере Интернетын асьсэлэн адрессы вань ни шуыса. Валамонгес мед луоз шуыса, выль амал сярысь тазьы валэктыны луоз. Интернетэ адресэз гожтон понна 50 манет гинэ тыроно. Минут ӵоже текстэз сётон 50 копейка тыр усе. Нош минут ӵоже отчы 20 печатной лист текстэз келяны луэ. Германиен, шуом, ваче кусып возён озьы ик тамында гинэ сылэ. Та дун почта пыр гожтэт ысъямлэсь уно поллы дунтэмгес сылэ. Кылсярысь, огшоры гожтэтэз кыдёкысь зарубежьее ыстон али 7 манетлэсь дуно. Интернет факслэсь но данаклы дунтэм. Заводысь сбытъя но маркетингъя службаос, интернетэз ужазы кутыса, асьсэлы выль басьяськисьёс но кулэ маке вузасьёсты утчало- шедьто. П.СКОБЕЛЕВ. Труппаез утёзы егитъёс Сарапулын улӥсьёс ярато асьсэлэсь театрзэс. Театрлэн нуналаз татысь кивалтӥсьёс доразы ӧтизы городлэсь кузёоссэ. Актёръёс доры лыктӥзы мэр Роберт Берг, солэн воштӥсез Владимир Треллер, Думалэн тӧроезлэн воштӥсез Лев Высоцкий но мэриысь культурая люкетэн кивалтӥсь Галина Михлина. Роберт Берг артистъёслы но театрын ужасьёслы сётӥз данъян грамотаос но коньдон премиос. Актёръёс котьку шумпотто ӟеч ужъёсынызы. Егит режиссёр А. Агапов пуктӥз "Золотой цыплёнок" выжыкылъя спектакль. "Двенадцатая ночь" но "Недоросль" спектакльёсын (пуктӥз режиссёр Ю. Синин) тужгес ӟеч шудӥзы егитъёс. Театрысь коллектив ялан выльдӥське. Витетӥ арзэ ини ужа нимысьтыз студия. Тужгес быгатӥсьёсыз дышетсконзэс азьланьто институтъёсын. Азьланяз та студия юрттоз труппаез но утьыны. Театрын ужало егитъёслы визь-кенеш сётыны быгатӥсь адямиос. Пинал актёръёс нош отӥяз луыны быгатозы валтӥсь артистъёс. Та толэзьлэн кутсконаз Сарапулысь драмтеатр дас вить нуналлы потаз бускель улосвылысь, Башкортостанысь, Стерлитамак городэ. Артистъёс возьматӥзы театрлэсь быдэс репертуарзэ. Труппаысь кӧня ке адями гастрольёсы потӥз ке но, театрысь улон ас ӧрзэ уг ышты. Спектакльёсты возьматон вакыт йылпумъяськытозь ик Москваысь режиссёр кутскоз выль пьеса борды. 6-тӥ мае нимысьтыз спектакль возьматэмын луоз ожысь ветеранъёс понна. 15-тӥ мае театр гужем гастрольёсы потоз. В. Лагунов. ДАРТ Ох, етӥз та пияшсы "Нуны сюан" вашкала сямез адӟытонын чупыргы кадь етӥз та пияш нылъёс пӧлын укыр муспотон но синмаськымон адӟиськиз. Ай соку солэн ангесаз туш ошиськемын вал на. Дышетске Коля Любимов Шаркан ёросысь Мувыр шор ёзо школаын куатетӥ классын, нош улэ Суронын. Чырмыт сямыз пияшлэн дышетскыны но юрттэ, мукет ужъёслы но мылкыдзэ ӝутка. Классазы со культмассовой секторен кивалтэ. Дырыз тырме школаысьтызы драмкружоке но спорткружоке пыриськыны. Азьланяз но чупырес лу, Коля! Туспуктэмез В.Беломорскихлэн. Кызьпу тэльлэн югытаз Евгений Васильевич Самсоновлэн гожъяны быгатонлыкез шараяськиз студент дыръяз ик. Тросэз сямен ик кутскиз кылбуръёс бордысен. 1950-тӥ-1951-тӥ аръёсы "Егитъёслэн куаразы", "Под солнцем родины", "Ӟардон" сборникъёсын поттэмын вал егит авторъёслэн кылбуръёссы. Соос пӧлын ик - Евгений Самсоновлэн но. Озьыен, 1950-тӥ арысен кутскиз солэн литературае сюресэз. Но тужгес тодмо луиз Евгений Самсонов - прозаик-лирик. Вордскиз со 1925-тӥ арын 17-тӥ апреле Бавлы ёросысь Урсы (Покровское-Урустамак гуртын) крестьян семьяын. Пичиысен ик атайтэк кылиз, соин ик солы, семьяезлы юрттон вылысь, туж вазь ужаны кутсконо луиз колхозын. 8-тӥ классэз йылпумъямез бере пионервожатой вал. 9-тӥ классэ быдэстэм бере - дышетӥсь. Шор ёзо школаез экстернэн (ас понназ дышетскыса) быдэстӥз. Быдӟым тылож кутскем бере, 1942-тӥ арын, быдэ вуэм пияш, Женя, ас мылкыд каремезъя фронтэ кошке. Кышкатэк ожмаськемез понна, сое трос гинэ орденъёсын но медальёсын данъяло. Война бере кык ар ӵоже школаын дышетӥз на. 1948-тӥ арын дышетскыны пыре Удмурт кун пединститутлэн кылъя но литературая факультетаз. Татын Даниил Яшин эшеныз ӵош литературно-творческой кружок кылдытэ, гожъяны но литератураез мургес валаны мылкыд карисьёсты - ваньзэс отчы кыско. Со дыре ик ветлӥз удмурт хоре но. Ӟеч дышетскемез но общественной уж нуэмез понна, солы кык ар бӧрсьысь бӧрсе сётылӥзы Сталин стипендия (со огшорыезлэсь куинь поллы тросгес вал). Озьы Евгений, нокин юрттытэк, аслаз тыршеменыз гинэ дышетскыны быгатӥз. Удмурт кун пединститутэз йылпумъямез бере, Евгений Самсонов кык ар ужаз Ижысь педучилищеын, собере 1979-тӥ арозь дышетӥз вордскем гуртаз. Вал школалэн директорез. Чебер из юрт пуктэмез понна, гуртоосыз али но сое ӟечен тодазы ваё, тау каро. 1980-тӥ арысен улыны но ужаны кутске Ижын. Кык ар ӵоже тыршиз "Удмуртиысь нефтяник" газетлэн редакцияз. Собере писатель-профессионал кариське но та вакытэ уката усто произведениоссэ кылдытэ. Зэм, кужмо но азинлыко ужан дыръяз та писательмы 1989-тӥ арын 14-тӥ июне, шудтэм учыре шедьыса, улонысь дырызлэсь вазь кошкиз (сое лёгаз автомашина). Уката тодмо луиз веросчи, 1959-тӥ арын веросъёсын "Арама кузя" сборникез потэм бере. Писательлэн прозаик-лирик луэмез нырысетӥ сборниказ ик шӧдӥськиз. Ненег мылкыдъёсын тырмемын солэн "Виктория", "Пересь бакеншик", "Арама кузя" веросъёсыз. Ваньмыз сямен гожтэмын, зэмос учыръёс вылэ пыкиськыса. "Виктория" веросын покчи лейтенант танкист Виктор асэныз луэм учыръёс сярысь маде, ӧжытак данъяськыса но туж жаляса. Виктория вормон шуэмез, нырысь яратон сярысь малпаськемез но возьматэ - ваньмыз татын огазе биниськемын. "Арама кузя" верос сӥземын П. И. Чайковскийлы. Куамын куать аресъем крезьгурчи тодаз вае пичи дыръяз луэм учырез. Сое выльысь тодаз уськытыса кылдытэ "Тройкаын" пьесазэ, пыртэ сое "Арлэн вакытъёсыз" ("Времена года") фортепьянной циклаз. Со гурын ваньмыз верамын: "Арама кузя" кырӟанын мылкыдыз но, яратонэз но вань. Отын ик - шудбуро гудырилэн кужымез но. 1966-тӥ арын Е. Самсонов поттэ "Зор бере" сборниксэ. Ваньмыз сямен веросъёсыз озьы ик сӥземын адямилэсь чебер сюлэмзэ данъянлы. Валтӥсь веросэз "Кызьпу тэльлэн югытэз" нимаське. Татын мынэ адями сюлэмлэн югытэз сярысь вераськон. Самолёт возьмась сюресчиос мадё асэнызы луэм учыръёс, ӟеч адямиос сярысь. Егитъёсты умойтэм сюрес вылэ кожонлэсь утё. Та сборнике ик пыртэмын "Солдатлэн анаез" верос. Соин кемаласен тодматскыло ни 5- тӥ классын дышетскисьёс. Огшоры учыръёс сярысь писатель нош ик быгатэм ӝутскем мылкыдын вераны. Германиын службазэ нуись солдат Гена Шурыгин шутэтскыкуз быронлэсь уте шимес учыре шедем немец нылпиосты: тупен шудыкузы, соос пыро вуэн тырмем бадӟым гопе. Отчы, электроезлэн пумъёстӥз вуыса, электротыл люкаськем. Гена, ачиз сярысь малпаськытэк, вуэ пыре но косканы ӧдъям пиналъёсты поттэ, пумен ачиз но косканы ӧдъя. Нылпиос утемын, ачиз Гена эмъяськонние сюремын. Со доры ӧтё Удмурт шаерын улӥсь, анайзэ. Самолётэн ваё пиез доры. Утем пиналъёслэн анай-атайёссы Проска кенакез, ӵыжы-выжызэс сямен, доразы ӧтьыло. Автор умой возьматэм Геналэсь либыт но ушъяськисьтэм луэмзэ. 1978-тӥ арын потэм "Толэзьысь тӧл" сборник юнматӥз кадь Евгений Самсоновлэсь романтик-прозаик луэмзэ. Та книгае пыремын одӥг повесть но куать верос. Таосыз но ваньмыз лирической мылкыдын пачылмемын. "Улэм-вылэм выжыкыл" повестьлэн геройёсыз Роман агай но ТОня апай - арлыдо кузпалъёс. Соос кыкназы ик чебер сюлэмо адямиос. Ӟеч мылкыдо мурт, бадӟым заводлэн директорез, пенсие потэм пересь кузпалъёс сярысь сюлмаськыса, соосты интыя чебер нюлэскы пуктэм пионерлагере. Мӧйы кузпалъёс выльысь пиналмизы кадь: соос уго вань сюлэмшунытсэс сёто татын котькуд гужем шутэтскись нылпиослы. Озьы писатель, улонысь кырсьсэ палэнтыса, вераны турттэ кадь: улонын чеберез гинэ вормыны кулэ. Тужгес но удалтэмын "Толэзьысь тӧл" - нырысь яратон сярысь верос - баллада. Автор вера граждан ож вакытысь одӥг учыр сярысь. Та баллада - Дарка нимо ныллэн сӧсырмем гордармеецен пумиськемез, соослэн ог-огзэс яратэмзы сярысь поэтической верос. Со нырысь яратонэз толэзьысь тӧл ваиз кадь. Егит пи быре, выжыкылысь герой сямен. Верос-балладалэсь ӝутскем мылкыдо луэмзэ пусъё на мукет амалъёс но. Кылсярысь, Даркалэн паймымон чебер мылкыдыз сярысь иворто жингыр карись угыосыз. Та крезьгурен герӟаськем образ тямыс пол пумиське, егит сюлэмысь праздник мылкыдэз шараяса кадь: "жингыртэ толэзьысь васькись капчи тӧл", "жинграк серектэ ныл", "черк гырлы кыдёке кылӥськымон жингыртэ", "жильк-жильк вазё беризьлэн сяськаосыз", соос ик "жингрес сяськаосынызы кӧлон гур кырӟало", "Даркалэсь жингрес куаразэ толэзьысь тӧл сьӧраз басьтыса нуэ" но мукет. Геройзэ ватэм бере, Дарка "бадӟымъёс радэ пыроз". Кема но шуг сюресэз ортчоз, нош нырысь яратонэз котьку югдоз, ноку уз вуны. "Номыр уг вуны. Тужгес но уг вуны нырысь яратон" - таӵе кылъёсын йылпумъямын баллада. Писательлэн кужмоямез тужгес но адӟиськиз берлогес гожтэм куинь люкето романэз - трилогиез вылын. Нырысетӥез огазеяз куинь повестез. Нырысетӥез - "Льӧльшур палъёс" (1986), кыкетӥез - "Уй пал симфония" (таизлэн люкетъёсыз потӥзы "Молотын" азьлогес - 1982-тӥ арын), сюжетэзъя со кыкетӥ роман луэ, но "Тулыс ӵукна" повесть. Таиз люкет потӥз ини, писатель улонысь кошкем бере, 1995-тӥ арын. Зэмзэ ке верано, тае эпопея шуыны луоно. Трилогиын сэрттэмын-пертчемын шаерамы даур ӵоже ортчем учыръёс, шимес ожмаськонъёс, пӧртэм воштӥськонъёс. Шонер лэсьтэм автор, ваньзэ тае Россия империлэн историеныз герӟаса. Паськытлыкезъя но геройёслэн улон эсэпсыя тае ӵошатыны луоно А. М. Горькийлэн "Дело Артамоновых" яке А. Н. Толстойлэн "Хождение по мукам" романъёсынызы. Автор шонер возьматэм калык революцилэсь мугъёссэ, граждан ожлэсь шимес луэмзэ, адями кусыпъёслэсь пумен тушмон мылкыдо луэмзэс, Советской властьлэсь кылдэмзэ но юнмамзэ. Книгаысь умой адӟыны луэ, кыӵе пайда но кыӵе изъян ваизы революция но граждан ож, кыӵе азинсконъёс но кыӵе ыштонъёс вал кенешъёс вакытэ, кыӵе сюлмаськонъёс кылдӥзы 80-тӥ аръёсы. Зэмзэ вераса, трилогилэн пӧртэм интыосыз огкадь кужмын гожтэмын ӧвӧл: геройёс, персонажъёс укыр трос луэмен, сюжет гожъёс кытӥяз пумаз-йылаз йӧскадь вуттэмын ӧвӧл. Озьы ик быдэстытэк кылиз куинетӥ книга - "Тулыс ӵукна". Озьы ке но, туж синмаськоно удмурт литератураын табыдӟа (дауръем!) трилогилэн кылдэмезлы: асьме шаерысь нырысетӥ гудыри бордысен кутскыса, автор вуттэ историез асьме вакытозь. Аспӧртэмлыко луэ трилогиысь нырысетӥ книгалэн ("Льӧльшур палъёс") кутсконэз. Азьвыл ужъёсаз сямен ик писатель веранзэ кутске Льӧльшур гуртлэн ньылетӥ интые пуксемез сярысь легенда бордысен. Ӟеч инты утчаса, озьы кема гинэ ветлӥллям туймывожъёс - Туймы шур дурысь удмуртъёс. Зэмзэ но, калыкмылэн ортчем сюресэз но сыӵегес ик вал: ӟеч музъемъёссы вылысь ӟуч ушкуйникъёслэн улляменызы, удмуртъёс весь шунды ӝужан но уйшор пала мыноно луиллям, пеймыт нюлэсъёсты сайкыса, асьсэлы выль но выль муос сузяса. Яркыт возьматэмын ӟуч купечлэн, Вязьминлэн, удмуртъёслэсь Керемет гурезьзэс басьтыса, отчы туж йӧно дача пуктэмез. Собере татчы вуиз Егор Кедрин, сад утись но архитектор. Трилогилэн нырысетӥ книгаез куинь повестьлэсь радъямын: "Нырысетӥ гудыри", "Шундыез уд жильыя" но "Выль юрт". Котькудӥзлэн аслаз сюжетэз вань ке но, соосты герӟало историысь учыръёслэн бӧрсьысь бӧрсе ортчемзы, одӥг геройёс но соослэн кусыпъёссы. Нырысетӥяз кульминация возьматэ Вотка заводысь рабочийёслэсь бугыръяськемзэс но соосты ньӧрамез, революцилы дурбасьтӥсь мыло-кыдо адямиосты быдтэмез. Соослэн эзельзы пӧртэм: революционер Рогозин, ссылкаысь пегӟыкуз, Сибирьысь Ангара шуре выйыса быре, Сазонов Педорез курадӟытыса ыбо, Стародомскиез пытсало. Но кылемын на солэн пиез, Юшков песятайлэн пиосыз но трос мукетъёсыз. Сьӧсь ымныроесь луо романын Вотка заводлэн кузёез кескич Траян, солэн воштӥсез Диомидов, Вяткаысь губернатор но мукетъёсыз. Воткалан бугыръяськонэ пыриськемъёс пӧлысь одӥгез гинэ, Костя Морозов, адӟе Петроградысь бугыръяськонэз - Зимний дворецез басьтонэз. Артэ нуйтӥськись сюжет нюжаос кылдыто городъёсын но гуртъёсын луэм учыръёс. Льӧльшурын но, Вазьнимын но улон огсыр кошке кадь: крестьянъёс быдэсъяло музъем ужез, ортчыто гырон быдтонэз но герберез, чорыгало, пудо вордо, ярато но сюанъёс ортчыто. Зэм, улонзы огкадь ӧвӧл. "Уй пал симфония" книгаын суредамын ни Веткинъёслэн внучказылэн, Лина Веткиналэн, но солэн нылпиосызлэн улон эзельзы. Со меӵак герӟаськемын Сазонов Викторлэн улон сюресэныз. Таизлэн но нылпиосыз кусып тупато Лина Веткиналэн нылпиосыныз. Темаез ласянь учконо ке, таиз книга сӥземын каль Удмурт шаерысь нефтяникъёслэн улэмзылы но ужзылы. Ретроспектива амалэн (Викторлэн тодэ ваёнъёсыз пыр) автор вера Василий Веткинлэн, школалэн директорезлэн, буран дыръя быремез сярысь. Ӵапак со вакытэ гуртысь школаез суто, янгыше уськыто Василий Федоровичез. Сьӧд уж лэсьтыса пегӟиз шуыса, кыл вӧлдо. Викторлэн анаез секыт висе... Трилогилэн куинетӥ книгаез поттэмын, Удмурт кун университетысь профессор И. В. Тараканов дасямъя. "Тулыс ӵукна" повесть нимамын со. Писатель отын, азьло книгаосаз сярысь, но, оло, умойгес возьматыны быгатэм анай кылмылэсь узырлыксэ но паймымон чебер вылэмзэ. Кӧня вуныны кутскем кылъёсты но кылкузъетъёсты со яркыт тылын пиштытэ! Тани кӧняез ке. "Тылобурдо" кыл интые трос пол пыртэмын "кыйкай" яке -"кай" небыт кыл. Турсюан сярысь гожъякуз шуэ турнылъёс но казакбурдоос, кентуръёс. Тусбуйёссэс тазьы суреда: "Чиль-сьӧд мугорзы пӧртэм-пӧртэм лызо-вожо луыса воринъяське, лызпыр-сьӧд чыртызы чиль-дол кисьтаськыса вуюисьяське, пельйылъёссы горд намерлэн пызьыртэм вуэныз юри чебермам выллемесь, нош синдоръёссы пыр-пыр тӧдьы, лымыгырлылэн куаръёсыз кадь адӟисько, бурдъёссы ӵужмыт-ворино- вориноесь. Одӥгезлэсь мукетыз тузӥгес - учкыса-учкыса уд ӵыды!" Кыл уго - чеберлыко литературалэн лулыз но зэмос-зэмос инъетэз. Кыл произведениез лыдӟисьлы матэ каре, солэсь сюлэмзэ шунтэ, узырмытэ но мылкыдзэ бурдъя. "Тулыс ӵукна" повесть пуштросэныз но, радъяськеменыз но, кылтӥрлыкеныз но ӝутэ туала вакытысь тужгес лэчыт ужпумез. Автор вань дуннелы вань кужыменыз вазиське кадь: "Сазьтӥське! Малпаське! Уж борды али ик кутске! Сотэк ваньмы быромы, семьямылэн но, калыкмылэн но азьлань улонэз уретӥськоз, быроз!" Ӵапак тазьыгес алӥзы вал но ало лыдӟисьёсты С. Залыгин, В. Распутин, О. Адамович но мукетъёсыз тодмо писательёс. Со - инкуазез утён сярысь сюлмаськон. Инкуазез кырсьмытон - вуэз, муэз но омырез саптан - ожтӥрлыкъёсты ужатонлэсь но кышкыт. Со угось дуннеысь вань улэпсэ быронэ вуттэ. Та ужпумез ӝутыса, писатель адӟытэ адями кусыпъёсты но, кивалтон удысысь тырмымтэосты но. Выль персонажъёс тодэ вайыто кивалтонысь 60-тӥ-70-тӥ аръёсы тодмо луэм адямиосты. Соос пӧлын: Петр Петрович Лысоев (солэн прототипез - Сысоев), Валерий Константинович Морозов (Марисов). Капчиен тодмалод Кузьма Иванович Тиркушкинэз но. Озьыен, шуыны луэ: та произведенизэ писатель гожтэм историко- документальной амалэнгес. Тани, кылсярысь, тыпак лякыса кадь пуктэмын Валерий Константинович. Со кема дыр ӵоже элькунысь солы пумит вазьыны дӥсьтӥсь трос кивалтӥсьёсты, тужгес но удмуртъёсты, интыысьтызы ӵогыса кадь уськытылӥз. Озьы кариз Лысоевез но. Тунсыкоесь повестьысь мукетъёсыз но сюжетъёс. Огъя луисез отын быгатыса пӧлэстэмын нимаз геройёслэн улонысьтызы учыръёсын, праздникъёс воштӥсько сюлэмез чепыллясь кайгуэн но куректонэн. Кылсярысь, йыре кемалы кыле чеберкайлэн Надя Веткиналэн секыт висьыны усемез. Йырсазьзэ ыштымон куректэ со, Тиркушкин Кузьма но солэн эшез, Мичковский, кык тури пӧлысь одӥгзэ ыбыку. Чебер сяськаос кадь пишто Надялэн но солэн анаезлэн, Лина Михайловналэн, петя Юшковлэн но солэн сузэр пиезлэн, Лёнялэн, Виктор Сазонов профессорлэн сюлэмъёссы. Соос вӧзын туж сьӧсь мылкыдоесь но кескичесь адӟисько Кузьма Тиркушкин но Олег Мичковский. Соос котькытын - инкуазьын но, адями сюлэмъёсын но - пож виштыос кельто. Чебер сюлэмоос сьӧдзэ быдэсак вормыны уг быгато. Ма, улонын но со озьыгес ик луэ угось. Романтизм тодметъёс шӧдӥсько таяз книгаын но. Татчы пырем куд-ог веросъёсаз но вань аслаз авторлэн кутскон сётӥсь азькылыз. Пролог интые кутэм макеос кырӟан мытэт луо кадь. Кылсярысь, повестьлэн азькылаз туриос сярысь ивортэмын: "Лобе тылобурдо уллё чагыр инметӥ". Солэн нимыныз писатель вазиське: "Дугдэлэ, адямиос, музъемез саптамысь но пожамысь! Утелэ вордскем шаермес!" Но... уг кыло адямиос. Уг кыло кивалтэмъяськисьёс. Лыдӟись понна тужгес дуно луэ повесть пыр поттэм валтӥсь малпан: адямилэн нокыӵе вамышез бервылтэм уг луы, одно ик пытьы кельтэ. Сьӧлыкам понна кыл кутон нунал куке но вуэ (аслыд, нылпиосыдлы, соослэн пиналъёссылы). Умойтэм ужъёсыз понна кыл кутон адямиез сопал дуннеын гинэ уг, таяз дуннеын но возьма. Озьы луэ Лина Веткинаен. Нылыз Викторлэн шуыса, со картэзлы но, нылызлы но вераны кепыраз. Нош Марина пумиське Викторлэн пиеныз, Юраен. Соос огзэс огзы яратыны кутско. Лина кушетскемын: угось соос апаен вынъёс луо. Нош та пумысен ивортыны нокызьы уг быгаты. Мар луоз отӥяз - ум тодӥське (повесть йылпумъямтэ) но шугъяськиськомы. Е. Самсоновлэн гожъяськон сямыз очеркъёсаз, веросъёсаз но шӧдӥське. Куд-огез соос пӧлысь сӥземын гуртоосызлы. Лыдӟись тодматске ӟеч тодӥсь-валась инженерен-нефтяникен Леонид Алатыревен, нефть поттонысь операторен Галина Чепишкоен но мукетъёсыныз. Ваньзы соос - тыршись но сюлмаськись адямиос. Егит дыръяз, шонергес вераса, фронтын дыръяз но война берегес Евгений Самсонов кужымзэ эскериз кылбурет удысын но. Берлогес проза борды выжиз ке но, кылбуръёсызлэн лирической шӧмзы али но синмаськытэ, отын шараяське инкуазьлы синмаськемез но, яратон сярысь малпаськемез но, калыксэ, солэсь кылзэ гажамез но. Сыӵеесь солэн "Солдат дораз бертӥз", "Шедьтэм гожтэт", "Бурд сярысь", "Ошмес дурын", "Уй инбам" кылбуръёсыз. Зэм но, вунэтод шат та выллем инкуазь суредъёсты? Вӧлскем ӝомыт сьӧры уиськыса сямен, Ӝутскиз нюлэс вадьсы толэзь - азвесь сюрло. Кизилиос пазьгиськиллям лыз инбаме, Кенжытылэм тылъёс сямен ворекъяло. Ужгур ӝутӥсь паськыт ю бусыын Ӝыт тӧл тулкымъёссэ погылляса нуэ. Кисьмам юлэн тугокоез шепъёс пӧлын, Толэзь тылси ӝуа марӟан кадь лысвуэн. Марӟан кадь ӝуало Евгений Самсоновлэн ӝутскем мылкыдын, улонэз яратонэн пачылмем гожъямъёсыз. Р. И. Яшина, Удмурт кун университетысь доцент, Удмурт Элькунысь наука удысысь сӥё-дано ужась. ЖУРНАЛИСТЪЁСЫН ПУМИСЬКОНЪЁС Кивалтӥсьлэсь кылзэ юаны секыт Кыӵе ужъёсын выриз Удмурт Республикаысь Эскеронъя кун комитет туэ нырысетӥ кварталэ но мар лэсьтыны малпа азьпалан, со сярысь ивортӥз комитетлэн кивалтӥсез Александр КУЗНЕЦОВ. Ортчем дыр ӵоже 41 эскерон уж нуэмын. Со пӧлысь 6-ез Кун Кенешлэн Тӧроезлэн куремезъя, 16-ез ас коже кивалтон ёзъёслэн вазиськемзыя. Со сяна, эскеремын гражданъёслэн гожтэтъёсын вуэм 9 ӝожтӥськонзы. Комитетлэн коллегиосаз озьы ик эскеремын Уже интыянъя кун фондэн висъям коньдонэз кулэезъя кутэмез. Татын югдур сокем урод ӧвӧл ке, мукетыз учреждение, Правительстволэн Пунэм тыронъёсъя центрез, пумысен уно юанъёс кылдэмын вал. Соин ик та центрлэсь ужъюгдурзэ сэрттэм-пертчем бере, малпанэ вуэмын солэсь ужзэ дугдытыны. А.Кузнецов ивортэмъя, комитет кичӧлтонэн потӥз, бюджет уксёез умойтэм уже кутэмзы понна, кивалтӥсьёсты золгес кыл кутон улэ кыскыны. Со понна нимысьтыз ужрадъёс радъяно, угось асьме законъёсъя куд-ог янгышъёс понна кивалтӥсьёслэсь кылзэс нокызьы но юаны уг луы. Берло дыре бюджет уксёез тус-тас каремез понна пытсэт сьӧры пуктэмын одӥг мурт гинэ. Со выльысь тодэ вайытӥз Культурая министерствоысь югдурез. Азьвыл министрлэн янгышъёсыныз сэрен та дырозь министерстволэн счётъёсыз арестовать каремын солэн люкаськем пунэм тыронъёсыныз кема выроно луоз на. Трос тырмымтэос шараямын вал 1995-тӥ арын Федерациысь почта кусыпъёсъя Удмурт Республикаысь управлениын, тужгес но газет-журналъёслы гожтӥськонлы пенсиосты уже кутыку. Ярам, вань дэмланъёс табере лыдэ басьтэмын. Комитетэз туж сюлмаськытэ, шуиз А.Кузнецов, пекарняосты нимаз кузёослы вузанын кылдэм югдур. Кыӵе луозы табере няньлы дунъёс? Т.БАННИКОВА. КУН КЕНЕШЛЭН СЕССИЯЗ Валтӥсь законмы воштӥськиз Удмурт парламентлэн улон-вылонэз та вакытэ бугырес, республикалэсь Конституцизэ воштонэн сэрен, нуналлы быдэ кенешонъёс ортчо. Законлэн инъетэз бордын мылысь-кыдысь тыршо вань депутатъёс, конституционной комиссия. Та ужпумез эскеронъя 18-тӥ Апреле ортчиз азьвыл чакламтэ дасэтӥ сессия. Ӟеч сямъя со кутскиз ӟечкыланъёс бордысен. Депутатъёс ас радъёсазы кутӥзы али гинэ мандат басьтэм эшсэс Александр Фокинэз. Со быръемын Светлана Смирновалэн округаз Дэбес районэ. Шуныт кылъёс верамын "Вараксино" тылобурдо вордонъя фабрикалэн директорезлы Владимир Зенинлы, кивалтоно коллективез ужын басьтэм азинсконъёсыз понна пусъемын калык куспо дипломен. Сессия ужзэ мытӥз судьяосты юнматон бордысен. Удмурт Республикаысь Вылӥ Судлэн председателез Юрий Суханов котькуд кандидатлы характеристика сётӥз. Огез но палэнтэмын ӧвӧл. Парламентлэн кенешоназ валтӥсь инты басьтӥз "Удмурт Республикалэн Конституцияз ватсанъёс пыртон сярысь" Законлэсь проектсэ эскерон. Депутатъёс азьын вераськиз Конституционной комиссилэн секретарез Константин Глухов. Со йылпумъянъёс лэсьтӥз комиссилэн ужамезлы но тодматӥз Москваысь экспертъёслэн дунъетэнызы. Кун ужез радъянъя, нациос куспын политикая но интыын ас коже кивалтонъя комиссилэн тӧроез Жанна Дворцова вераз, Конституцилэн проектэз быдэсан федеральный законъёсъя дасямын шуыса. Соин ик тупамтэос, споръяськон учыръёс кылдыны кулэ ӧвӧл. Конституциез выльдон бордын ужаз котькудӥз фракция. Депутат Даниил Белоголовкин, дырез шыръян вылысь, "Единство" огазеяськонэ пырись депутатъёслэн нимынызы вазиськиз дасям законопректэз умоен лыдъяны но инъет интые кутыны. Озьы ик вераськиз Евгений Одиянков, гуртоослэн но городын улӥсьёслэн фракциенызы кивалтӥсь депутат. Депутат Павел Вершинин дэмлан сётӥз Удмурт Республикаын Конституционной суд кылдытонэз 2 арлы ӝегатыны. Со верамъя, выль органлэн кулэлыкез али бадӟым ӧвӧл, та удысэз нуыны быгатозы но нуо районъёсысь судъёс но республикаысь Вылӥ суд. Депутат Валерий Фридрих дасям Законлэн инъетаз эшшо кӧня ке ватсанъёс но воштонъёс пыртыны куриз на. Конституцилэсь куд-ог статьяоссэ выльдонъя ас малпанъёссэс веразы депутатъёс Анатолий Салтыков, Роберт Рыбаков, Юрий Шестаков, Сергей Беркутов, Валентин Тубылов. Кун Кенешлэн Тӧроез Александр Волков ӵектӥз выль дасям Законлэн нырысетӥ кык главаосызъя голосование ортчытыны. Соосты юнматон понна люкано 75 куара. Табло вылэ ӝуатскиз 88 лыдпус, пумит - 4, шугъяськемзэ вераз 2 депутат. Озьы выльдэм законопроектлэн та главаосыз огкутскемен юнматэмын вал. 90 куара сётыса пыртэмын ватсанъёс но воштонъёс Конституцилэн вань люкетъёсызъя. Нуназе бере сессия 2 часлы вис ялэ. Та дыр куспын Конституционной комиссия пыр-поч эскере на туннэ вуэм ватсанъёсты но дэмланъёсты. Соос кызё пала люкаськизы. Сессие лыктэмъёс котькудзэ юнматӥзы, тросэз ӵектонъёс шедизы Конституцилэн инъетаз. Озьы 18-тӥ апрель весяклы шедиз, шуыны луоз, Удмурт шаермылэн историяз. 91 депутат куаразэ сётӥз валтӥсь Законамы воштонъёс пыртон понна, Удмурт Республикалэн азьвыл юнматэм Конституциез ӝыныез выльдӥськиз. Со бордын ужан азинскоз на Кун Кенешлэн вуоно сессияз. Парламентарийёс воштонъёс пыртӥзы республикаысь Быръёнъёсъя комиссие но. Ужаны чаклам дырыз йылпумъяськемен, со выльдӥськиз. Кивалтӥсе юнматэмын Георгий Пчельников. Комиссие быръемын Михаил Вавилов, Виктор Коробейников, Андрей Пиликин, Андрей Шкляев, Дмитрий Талантов. Сессия эскериз мукет но ужпумъёсты. Л.МЕДВЕДЕВА. ДАРТ Кадръёсты кебитын уг дуро Тодӥськоды-а кыӵе ужпумъёсын выре Удмурт Республикаысь Егитъёсын ужанъя кун комитет? Тодӥськоды ке, туж умой. Нош кылэмды ик ӧвӧл ке яке ноку ӧд тунсыкъяське, бер уз луы солэн ужпумъёсыз пӧлы йырын-пыдын зымыны. Со понна Ижевске ветлонэз ӧвӧл, котькуд ёросын ужа егитъёсын ужанъя отдел, нош сельсоветъёсын - солэн юрттӥсьёсыз. Марлы та сярысь верасько? Туннэ нуналэ шаерысьтымы Егитъёсын ужанъя кун комитет Россиысь трос регионъёс пӧлысь одӥгез адӟем карымонэз. Егитъёслэн политиказыя кун комитетэз кадръёсын тырмытон ужпумлы сӥзем семинар-совещание юнме ӧз ортчы Удмуртиын. Та ужрадэ лыктӥзы Россилэн пӧртэм улосъёсысьтыз егитъёслэн ужпумъёсынызы герӟаськем специалистъёс, кивалтӥсьёс. Соослэн ужан амалъёсынызы тодматскыны но асьмелэн азинсконъёсмы сярысь вераны семинареозьы ик пыриськизы шаерысьтымы пӧртэм министерствоосысь ведомствоосысь но предприятиосысь егитъёслэн ужпумъёсынызы герӟаськем валтӥсь ужасьёс, ёросъёсысь егитъёсын ужанъя отделъёсысь специалистъёс. Ужрад кыстӥськиз кык нунал ӵоже, 12-тӥ-13-тӥ апреле. Усьтӥськиз со Правительстволэн юртаз. Ужрадлы дунъет сётыса, Россия Федерациысь Егитъёслэн политиказыя кун комитетлэн кивалтӥсезлэн воштӥсез Геннадий Красников пусйиз, Удмурт Республикаысь вылӥ кивалтӥсьёс егитъёслэн кенешазы пырисько бере, шаерамы та ужпумъёслы, зэмзэ но, бадӟым саклык висъяло. Нош тросэз регионъёсъя озьы шуыны уз луы. Бен, Удмуртилы вань маин ушъяськыны. Россия Федерациын та дырозь кутымтэ на Егитъёслэн политиказыя закон, нош асьмелэн со ужа ни. Озьы ик кӧня ке аръёслы чаклам "Удмуртиысь егитъёс" программаез улонэ пыӵа. Ужрад сӥземын бере кадръёсты дасян ужпумъёслы, Геннадий Красников тросгес саклык висъяз та юанъёслы. "Россиысь егитъёс" программаын но кадръёсты дасянъя нимысьтыз ужпумъёс чакламын. Валтӥсь интые туннэ пуктоно егитъёсын ужась специалистъёсты дасянэз но дышетонэз. Регионъёсын радъяно дышетскон заведениослэсь ужзэс. Палэнысь лыктэмъёслы туж тунсыко вал кылзыны республикаысьтымы Егитъёсын ужанъя кун комитетлэсь кивалтӥсьсэ Андрей Гальцинэз. Егитъёслэн ужпумъёссыя шаерамы кылдэм огъя югдурез со туж ӟеч суредаз, озьы ик осконзэ вераз, Россия Федерациын егитъёслэн политиказы шоры учкон умой пала воштӥськоз, закон кутэмен валче радъяськоз комитетлэн ужан структураез но. Кадръёсты дасян сярысь ке верано, егитъёсын ужась специалистъёслэсь тодон-валанзэс будэтон бордын комитет ялан ужа. Тросэз кыкетӥ вылӥ образование басьто. Толэзьлы быдэ ортчыло семинаръёс, пӧртэм ёзысь кивалтӥсьёсын пумиськылонъёс. Егитъёсты уже кутонъя ужпумъёс но эскерисько. Предприятиосын гожтэмын огкылъёс. Егитъёсын умой ужало Глазовысь "Чепецкий механической завод", Ижевскысь "Купол" электромеханической завод, Воткинскысь механической завод. Семинарын-совещаниын эскеремын вал кадръёсты дасянъя пӧртэм ужпумъёс. Люкаськемъёс азьын вераськизы Москваысь Егитъёслэн институтсылэн научно-исследовательской центрысьтыз директорлэн нырысетӥ воштӥсез Владимир Родионов, кун но муниципальной службая Удмурт институтлэн Кун службая Урал академиезлэн директорез Геннадий Овчинников. Люкаськемъёс тодматскизы Волгоградысь но Новосибирскысь институтъёслэн уженызы. Мукет нуналаз семинаре лыктэмъёс ужазы, секциослы люкиськыса. Та бадӟым ужрадлэн пайдаез адӟиськоз ни Россиысь Егитъёслэн политиказыя кун комитетлэн азьлань ужаз. Семинарлэн ужезлы йылпумъянъёс лэсьтыса, азьлане мынон вамышъёс но адӟиськозы. Егитъёслэсь ужпумъёссэс ӟеч валась специалистъёс асьме республикамылы но туж кулэ. Л.МАЛЫХ. Ватсаса барыш Удмурт Республикаысь Правительстволэн Тӧроез Николай Ганза президиумлэн берло ортчем заседанияз Пермь улослэн администрациеныз огкыл гожтӥз. Отын Воткинск водохранилищеез кутэм понна Воткинскысь ГЭС-эн поттэм электрокужым понна дун тупатэмын. Воткинск водохранилище интыяськемын Пермь улосын но Удмуртиын. Огъя водохранилищелэн быдӟалаезъя асьме республикаын со 6,8 процентсэ басьтэ. Россия Федерацилэн "Ву объектъёсты уже кутэм понна дун тырон сярысь" Законэзъя Удмуртилэн бюджетаз 269 сюрс манет коньдон вуыны кулэ. Со ватсаса барыш луэ. Правительстволэн президиумез озьы ик Удмурт Республикалэн улосвылаз будэтэм ю тысьлэсь поттэм этил спиртэз басьтон сярысь положение юнматӥз. Кылдытэмын Г.Е.Верещагинлэн вордскемез дырысен 150 ар тырмонэз ортчытонъя радъясь комитет. Удмурт Республикаысь Правительстволэн пресс-службаез. ШӦКЫЧ Очей Толилы пӧсь салам! Кин луоно? Корка вӧзтӥмы машинаос кошко. Ньыль аресъем Вити юа: - Кинлэн-о та машинаез? - Нефтяникъёслэн. - Мон бадӟым будӥ ке, нефтяник луо, - малпанзэ вера. Вадьсытӥмы "КамАЗ" ортче. - Таиз кинлэн "КамАЗ"-эз?- нош ик юа Вити. - Васёв предпринимательлэн. - Мон бадӟым луи ке, шофёр луо, - валэктэ Вити. Кошке "К-700" трактор. - Кинлэн-о "К-700"-эз? - нош ик тодӥсьяське. - Васёвлэн. - Мон "К-700"-эн ужало, - азьланьтэ. Кошке вадьсытӥмы "Беларусь" трактор. - Таиз кинлэн? - котьмае тодыны тырше Вити. - Васёвлэн ик тракторез. - Мон бадӟым луи ке - Васёв луо! - йылпумъя. С.ЕФРЕМОВА. Шаркан ёрос, Вортча починка. Шӧкыч Ю тысен но эстӥськонэн секыт югдур кылдэмен валче аналтэм бусыосмес лобась тэркыослэсь возьмано уз луы меда? *** Лобась тэркыос: - Ё, п, р6 с6 т! Ма та адямиос кайта сиськыны уг малпало шат? Бусыазы жуг-жагзы сяна номырзы ӧвӧл ук! Удмурт Республикаысь Правительсвоын Поръёслы сӥземын Поръёслэн Ватка но Кам улосъёсы вуэмзы дырысен тырме 400 ар. Соин валче 22-тӥ апреле Удмурт республикаысь операя но балетъя театрын 11 часэ усьтӥськиз мари культуралы сӥзем фестиваль. Та ужрадэз ортчытон азьын Правительствоысь кивалтӥсьлэн воштӥсез Виктор Шудегов фестивалез радъясь комитетэн кенеш ортчытӥз. Фестивале лыктыны кулэ Марий Эл Республикалэн Президентэз Вячеслав Кислицын. Кык республикас кумпын ӵош эшъяськонъя но ужанъя огкыл гожтэмын луоз. Кызьы ивортӥз Удмуртиысь нациосын ужан политикая министр Николай Мусалимов, фестивале пыриськозы бускель финно-угор Республикаысь эктонъя но кырӟанъя ансамбль, Удмуртиысь художественной самодеятнльностья ӟуч, бигер, удмурт коллективъёс. 23-тӥ апреле куноос Алнаш ёросэ вуылозы. Вормонлы дасяськыса Вормонлы 55 ар тырмонлы дасяськонлэн но сое ортчыонлэн кызьы мынэмез сярысь ивортон лэсьтӥз Удмурт Республикаысь калыкз дышетонъя министр Любовь Захарова. Со пусйиз, федеральной программаез быдэсъяса республикаямы дышетскисьёслы умоесь сямъёс пыӵатонлы кутскон сётэмын ни шуыса. Со ужын кутӥсько вань кужымъёс но ӟеч амалъёс. Патриотизм мылкыд пыӵатонлы юртто историез, ас шаердэ дышетон, туала улонын аслэсьтыд интыдэ шедьтонъя но мукет предметъёс. Школаосын ужало наукая 50-лэсь уно огазеяськонъёс. Туэ соос пыриськизы Россиын ортчем "Юность науки" конкурсэ. Сарапулысь школа-колледж но Ижевскысь 14 номеро лицей пусъемын дипломъёсын. республикаямы ортчытэмын историяя но ас шаердэ тодонъя олимпиада. Ижевскысь школаосын ортчиз праздник нуналъёсы Ялан ӝуась тыл дорын сылыны право басьтон понна смотр. Школаосысь музейёс пӧлын, соо асьмелэн 70, конкурсын йылпумъян лэсьтэмын луоз 25-тӥ апреле, Советской Союзысь Геройёслэн слётазы. Со нуналэ 17 дано землякъёсмы лыктозы 73 номеро школае. Культурая министерствоен ӵош ортчытэмын творчествоя коллективъёс пӧлын "Зарни италмас" фестиваль, эскеремын памятникъёс но ватэм интыос. Вормон юбилейлы дасяськыса министерство озьы ик ужа егитъёсын ужанъя кун комитетэн, администрациослэн кивалтӥсьёсынызы, физкультурая но спортъя кун комитетэн, ветеранъёслэн советэнызы ӵош. Любовь Захарова озьы ик дышетскисьёслэсь гужем шутэтсконзэс радъян сярысь журналистъёслэн юанъёссылы, валэктон сётӥз, вераз 12 ар ӵоже дышетон пумысен малпанъёссэ. Удмурт Республикаысь Правительстволэн пресс-службаез. Праздник удалтӥз Валлян Ижысь Центральной площадь вадьсын "гудыръяз". Эн малпалэ, инкуазь сыӵе йӧспӧртэм выриз шуыса. Ужпум мукетыз бордын. Шаерысь но городысь спорт удысэн кивалтӥсь ёзъёс сыӵе шулдыръяськон дасяллям, футболъя туэ нырысетӥ пумиськонэз пусйыса. Флагез ӝутон, гимн, кырӟасьёс-эктӥсьёс, оркестр - ваньмыз та вал, люкаськем калыклэсь мылкыдзэ ӝутон понна. "Футболэн висисьёсты" шумпоттӥзы "Газовикысь" спортсменъёс но. Соос туж тыршыса, янгышъёстэк шудыны тыршизы. Ас доразы нырысетӥ "пыжем табаньзы" удалтӥз - асьмелэнъёс 3:1 лыдын вормизы. Голъёсты пыртӥзы Николай Курилов но Амир Уралов (кыксэ). Ӵуказе "Газовик" кужымзэ мерталоз Красноярскысь "Металлурген". Шудон кутске 5 часын ӝыт. М. Кузьмин. Пучы арня Христианъёс самой бадӟым праздникен лыдъяло Пасхаез, удмурт сямен Быдӟым нуналэз, Великтэмез. Та нунал арлы быдэ вошъяське. Туэ Быдӟым нунал тупа 30-тӥ апрельлы. Пасхаез одно ик пусъё, тулыс понна нырысьсэ толэзь быдэсак усьтӥськем бере. Ӵуказе улыса пумиталом пучы арняез. Инмарлы окисьёс сое дасяло кӧс нуналаз. Нош арня нуналэ пучыез вӧсяло но вуоно Пасхаозь возё. калыклэн чакламезъя, пучы вайёс юртто коркась сьӧд кужымъёсты улляны. Вӧсям вайёсын йӧтскылыса эмъяны луэ, пе, висись пудоез. Калык чакламъя, ӵуказе - Родионлэн нуналэз. Соку шундыен толэзь пумисько. Куазь чебер луиз ке, гужем но шулдыр улоз. Вордӥськон - Антиплэн нуналэз. Со дырлы шуръёс ӧз ке усьтӥське, возьма урод гужемез. Ӵуказе югыт нунал кыстӥськоз 14 час 36 минут. Шунды ӝужалоз 6 час 11 минутэ, "кӧлыны выдоз" 20 час 47 минутэ. Н. Лялин. Шӧкыч Кузьым Аракы юисьёслэн тодмооссылы одӥг ӟеч дэмланэ вань. Эшъёстэс юонлэсь утемды потэ ке, Уфаысь Наташа нимо нылашлэсь адӟем каре. Со атаезлы вордскем нуналаз календарь кузьмаз, отчы пусйылэм котькуд юэм нуналзэ. Соя тодмо луиз, воргорон берло куинь арзэ 60 нунал гинэ сазь улэм. Нылызлэн сыӵе кузьымезлэсь атаез туж возьдаськиз - соку ик, ноку уг юы ни шуыса, кыл сётӥз, аслаз тазалыкез понна гинэ но чарка ӝутыны ӧз дӥсьты ни. С. Калугина. Удмурт университетысь студентка. ШӦКЫЧ Очей Толилы пӧсь салам Йыромем воргорон (Улонысь учыр) Одӥг ӝытэ Педорез но Матронэз бускельёссы куное ӧтизы. Нош Педор ужысь суть-суть юыса дораз вуиз. Солы куное мынонэн йырин ӧй вал ни. Кӧня ке улыса, койка вылаз соргетыны кутскиз. Соку Матрон куное огназ мыноно кариськиз. Кема ик ӧз пукы куноын, картэз огназ кылиз уго, дораз вамыштӥз. Куазь тём-тём пеймыт вал ини. Бускель кышнозэ келяны косӥз Матрон. Ураме гинэ потӥзы, туж зол черкекъям кылӥськиз: - Юрттэ, выисько! Соку ик нылкышноос куара пала бызизы. Матрон Педорезлэсь куаразэ тодмаз. Бускель кышно но Матрон корказе тубизы. Нош ик черекъя Педорез. Пеймыт, номыр уг адӟиськы. - Поттэ монэ куйыысь! - нош ик вазе Педор. Матрон паймемын ини, улытозязы куйызы ӧй вал азбаразы. Кызьы но озьы лампочка ӝуатӥзы но адӟо: корказьын Педор бӧрдыса ӝуштэ но ӧс сьӧрысь чулан борддоръёс кузя тубыны турттэ. Нош выж вылын сач-сач кот. Юэм йырыныз педло потам но колодчае усем малпам со. Матронзэ адӟыса гинэ валам кытынзэ. - Вождэ эн потты, Матронэ, йыроми. Нош ӵуказеяз асьсэос кӧтсэс кутыса серекъязы. Вот юэм йырын мар но уд даурты. Е.Петрова. ст.Алнаши. МИНИСТРЕН КЕНЕШОН Музъемлы кузё - музъем ужась Кылем арын Гурт хозяйствоя но сиён-юонъя министерстволы выль кивалтӥсь юнматӥзы. Кӧня ке дыр ортчыса, выль министрлэсь Петр Александрович ПЕРШИНЛЭСЬ лыктэмзэ шӧдӥзы. Шӧдӥзы, кызьы ке министерствоын ужасьёс, озьы ик гуртъёсысь предъёс но. Солэн кивалтон амалъёсыз кудӥзлы соку ик ӧз кельше, лекос чурытэсь потӥзы. Но вань мукет сямен дунъясьёс но. "Мон понна со пыраклы дышетӥсь кылёз, - шуиз "Чура" ОАО-лэн егит кивалтӥсез А.Л.Чупин. - Институт бере ик солэн хозяйствояз шеди, куать ар ӵош ужамы. Вань малпанъёссэ со котьку но йылз-пумаз вуттылӥз. Ужасьёс азе чурытэсь куронъёс пуктылӥз ке но, нокинэн ӧз керетылы, огъя кыл шедьтылӥз. Тау солы. Марлы дышетӥзы институтын, со кивалтэм дыръя мон уж вылын возьматыны быгатӥ. "Чурае" ужаны лыктэмез бере ик Петр Александрович вань специалистъёслы валанзыя но быгатонзыя ужъёс сётъяз, куд-огзэ интыосыныз но вошъяз. Малы озьы лэсьтэмзэ со котьку калыклы валэктылӥз. Кызьы со милемыз адӟиз, ужаны пуктӥз, озьы ик али но ужаськом". Глазов районысь ик "Нива" ООО-лэн директорез В.М.Наговицын со сярысь тазьы вераз: "Азьло кызьы вал: кин министрлы матынгес, со ик хозяйствоезлы коньдон, эстӥськон, удобрение курыны быгатылӥз. Но тазьы гинэ кивалтыса, югдурез уд тупаты, таӵе кивалтонлэсь кемалась куштӥськоно ни вал. Петр Александрович - аспӧртэмлыко адями. Хозяйствоосысь предъёс солы вазисько ке, троссэ районысьтызы кивалтӥсьёс доры ыстэ: соослы, пе, ваньмыз понна коньдон келямын... Оло, соин сое курлало? Но мон тазьы малпасько: гурт удысэн кивалтонэз вашкала амалъёсын нуыны уг ни яра". Министр сярысь пӧртэм ммлпанъёсты кылыса, мылкыд кари соин пумиськыны. Таӵе вераськонмы пӧрмиз. - Петр Александрович, туннэ крестьянъёс гинэ музъем сярысь уг ни сюлмасько, со лэчыт ужпум вань калык азе султӥз. Малы? - Мон тазьы шуысал: музъем реформаос ортчытон пумысен вераськонъёс котьку но быръёнъёс азьын лэчытомо. Но музъемез вузан-басьтон сярысь ужпум али чик но уг сылы. Сое басьтыны мылкыд карисьёс но ӧвӧл ай, но гуртын улӥсьёслы юн валаны кулэ: соослэн со музъемзы, соос отын кузё. - 30-тӥ аръёсы колхозъёслы эрик сётон вылысь кылдӥз таӵе ӧтён: "Не сметь командовать крестьянином!" Асьме дыре ини кутэмын вал федеральной закон, кудӥзъя кивалтон ёзъёслы лэземын ӧвӧл колхозъёслэн ужъёсазы пыриськыны. Асьме крестьянъёслы зэмзэ ик-а меда эрик кулэ? - Азьло аръёсы котькуд пред сыӵе эрик сярысь малпаськылӥз. Соин ик 90-тӥ аръёсы гуртын кутскем воштӥськонъёсты мон умоен лыдъясько. Гуртын улӥсьёс асьэлы музъем пайёс басьтӥзы. Но соосын адямиос пӧртэм сямен кузёяськизы, огъёсыз асьсэлы кельтӥзы, мукетъёсыз огдырлы колхозлы ик арендае сётӥзы, куинетӥосыз ас люкетсэс пыраклы колхозлы кельтӥзы. Та уж борды басьтӥськыса малпамын вал адямилэсь музъемлы кузё луон мылкыдзэ ӝутыны. Озьы ик эрик сётэмын вал нокыӵе могӟетъёстэк колхозысь потыны. Тодӥськоды на луоз, макем думыса возьылӥзы адямиез колхоз борды, гуртысь кошкыны но секыт вал. Тӥни озьы крестьянъёс тырмыт эрик басьтӥзы. Но эриклэн кык пумыз вылэм. Куд-огез хозяйствооссэс ӝутӥзы, ма, табере соослы нокин ужаны ӧз люкетылы ни ук. Нош мукетъёсыз эрикез мукет сямен валазы - нокин ужамдэ уг чакла бере, малы сюлмаськоно пудо вордон, йӧл кыскон сярысь. Али музъем сярысь вераськон потэ ке, мынэсьтым нимме поттыло, мон, пе, музъемез вузанлы дурбасьтӥсько. Мон котьку но пумит вал музъем пайёсты палэнэ вузанлы. Колхоз кивалтӥсь ачиз ас калыкезлы оскымон валэктыны кулэ "Тӥ колхоз музъем вылын улӥськоды, соин ик паёстэс нокинлы палэнэ эн сётэлэ!" Но кызьы луыса кошке. Малы ке куд-ог предъёс, коньдонэз шӧдыса, музъмзэс узыр кузёослы сёто, шуом, му вӧй поттӥсьёслы. Малы меда соку соос мынэсьтым уг юало? Калык асьмелэн небыт. Колхозникъёс ас кенешазы умоен лыдъязы ке музъемез вузано шуыса - озьы ик карозы. Со туж кышкыт но мыдлань политика. - Но луысалзы-а меда сыӵе учыръёс, крестьянъёслы, эрикен ӵош, государтво тырмыт юрттэт но сётыны быгатысал ке? - Меӵак верано ке, тазьы луыны кулэ. Шуом, мон, министр, котькуд районлы заказ сётӥсько: кӧня йӧл, сӥль, ю тысь дасяны кулэ, кыӵе луыны кулэ закупочной дунъёс но мукет. Со заказъёсты быдэстон понна, гоударство котькуд районлы кулэезъя коньдон висъя. Но сыӵе куронъёс районъёс азе али нокызьы но пуктыны уг луы. Угось асьме калыкмы али сокем начармемын, поттэм сиён-юонэз но басьтыны уг быгаты. Сӥль, йӧл котькытын тырмыт. Заказ ке сётоно, одно ик дотация но висъяно. Али тани быгатӥм, предъёслэсь куронзэс лыдэ басьтыса, трос йӧл кыскись хозяйствоослы быдэс ар понна дотация висъяны. Зэмзэ но, государство гуртъёслы котыр ласянь юрттыны кулэ - сюресъёсты тупатъянын, культураез, социальной удысэз, коммунальной хозяйствоез возёнын, Ужтэк кылемъёслы юрттонын - вань та ужъёслы коньдон учкемын луыны кулэ бюджетын. Министрлэн гинэ со ужез ӧвӧл, правительстволэн но. - Петр Александрович, мар луиз гуртъёсысь специалистъёсын? Пумен воргорон кивалтӥсьёс но уз ни кыле, дыр. Оло, кышномуртёслы-а али оскон бадӟымгес ни? - Югдурез тазьы валэктысал. Азьло аръёсы колхозъёслы кузё вал районлэн администрациез. Табере колхозъёс - ас пайёсынызы огазеяськем кузёос. Соин ик соос гинэ ӵош люкаськыса-кенешыса асьэлы ужан сюрес быръё, асьсэос поттэм барышсэс люко, асьсэос ик асьсэлы кивалтӥсь юнмато, солы уждун тупато. Кивалтӥсь бырйид ни бере, оскы вал солы, бадӟымгес уждун но тупаты. Но ӵем дыръя озьы уг луы. Колхозэ пырем кузёос тазьы малпало: "Кызьы озьы кивалтӥсьлы соку ик бадӟым уждун тупатод, ужаны но ӧз вутты на ай". Нош кыӵе кулэ вылэм егит кивалтӥсьлы нырысь-валысь юрттыны. Тӥни озьы куд-ог специалистъёс та муген но кошконо луо. Жаляса верано, кошко визьмоосыз, ас кужымзэс шӧдӥсьёсыз... Министерствоез сыӵе югдур туж сюлмаськытэ, соин ик правительство азе "Кадръёс" программаен потӥм. Отын учкемын специалистъёслы котыр ласянь юрттыны, уждунэз вераса но. Озьы ке но, татын одӥг шуг-секытэз вань. Закнъя уг луы бюджетысь уксёез колхозлэн кивалтӥсезлы уждун понна висъяны, угось колхоз - со табере частной хозяйство. Но праительство ӵектонмылэсь ӧз палэнскы, апрельлэн пумаз та программалэн пуштросэз эскеремын луоз. - Алигес кылӥськиз, Селта районысь "Свобода" эштослэсь кивалтӥсьсэ воштӥллям шуыса. Умой кадь кивалтӥсь вал. Нош ик кышномуртэз бырйиллям. Министерство быгатэ-а хозяйстволы тӧро быръён ужен кивалтыны, шуом, аслэсьтыз адямизэ ӵектыны яке властьлы тупасьтэм кивалтӥсьлэсь мозмытскыны? - Уг. Туннэ озьы "кивалтыны" министерстволэн правоез ӧвӧл ни. Коллектив решение кутӥз ке кивалтӥсьсэс воштон сярысь, нокин солы пумит мыныны уз быгаты. Но куд-ог секыт учыръёсы министерство, хозяйствое потыса, югдурез сэрттэ-пертче, калыкен вераське, кивалтӥсьсэс утьыны выре. Туж гажасько нылкышноосты. Но котьма ке но, хозяйствоен кивалтыны воргорон кулэ! Вераны уг быгатӥськы, малы озьы луиз "Свобода" хозяйствоын. Оло, выль азьветлӥсь татын кылдӥз... - Мар туннэ лэсьтыны быгатэ министр? - Бен, мон валасько кин луэмме. Азьло аръёсы министр предъёслы мар ке но сётыны быгатэ вал. Табере министерство киын номыр ӧвӧл. Маи мынам вань? Ручкае, бумагае но государствоен дотацилы чаклам коньдонэ. Ас мылкыд каремея кузёськыны мон уг быгатӥськы, собере мынэсьтым но вылӥын сылӥсь адямиос вань, шуом, коньдон ужпумъёсъя министр, правительстволэн президиумез. Но мартэ Завьяловоын гурт хозяйство удысын ужасьёслэн ортчем кенешсы бере Н.Ганза котькуд районлы коньдон висъяны малпаз быдэн кык силосоуборочной комбайн но быдэн кык трактор басьтон понна. МТС-ёсты кызьы но озьы юнматоно ук. - Мар понна туннэ тӥледыз курлало? - Одӥг ласянь сыӵе сямы понна: тырмымтэосты адӟисько ке, синмазы верасько. Мукет ласянь учконо ке, зэмзэ ик, мар луэ лэсьтыны вакчи дыр куспын. Выльдӥськон кутскытозь, кӧня коньдон кисьтэын вал гурт хозяйствое! Озьы но сое ӝутыны ӧз быгатэ. Нош али быдэсак куашкам удысэз ӝутоды шат ӝыны ар куспын? Туж секыт йӧтэ. Но тодӥськоды-а, кызьы шуиз одӥгез председатель: "Тӥ номыр карытэк ке али пукысалды, тӥледыз нокин тодаз ӧй вайысал". Критикаез шонер валасько. Вожпотон сямы ӧвӧл. Завьяловоын ортчем кенешын колхозъёслэн кивалтӥсьёссы сюлэмзы чигиськыса вераськизы - ваньмыз со азьпала улонлы оскымтэ бордысь потэ, но ӝожтӥськонъёссы мон вылэ кисьтӥськизы. Туж валасько соослэсь мылкыдзэс. ...Но мон министр, уже мынам сыӵе, ваньмызлы нокызьы но уд кельшы. - "Чураын" ужамды борды берытскыса, кызьы тӥ быгатӥды отын ӟеч кадръёс будэтыны? - Тазьы карылӥ, шуом, кошкиз валтӥсь механикмы. Со интые ог-огзэс вошъяса, кӧня ке адямиосты пуктылӥ. собре ужмзыя бырйылӥ ни, кудзылэн ужзы умойгес пӧрме. Озьы ик ас интыям но опуске кошкылыкум пӧртэм воштӥсьёсме пуктылӥ. Соос пӧлысь ик шедьтӥ вуоно егит кивалтӥсез, монэ воштӥсез. Егитъёслы оскиськод ке, соос йыг-йыггес карисько. Тазьы ужанлы мон ачим но дышетски аслам дышетӥселэсь "Кожильский" совхозэн кивалтӥсьлэсь. Милемыз, сизьым егит специалистъёсыз, со ог-огенымы вошъяса но милемлы оскыса пӧртэм ужъёслы дышетӥз. Собере райокмын, обкомын, кык хозяйствоосын ужаны вуытозям кадръёслы котьку но нимысьтыз саклык висъялляй. П.С. Министрен вераськеммы бере, ӵуказеяз к журналистъёсын пумиськылӥз Кун Кенешысь Агропромышленность удысъя, музъем кусыпъёсъя но инкуазь узырлыкъёсты кутонъя ялан ужась комиссилэн кивалтӥсез Л.Фролов. Солэн ивортэмезъя, асьме правительство Удмуртын музъем реформаез азинтонъя 2002-тӥ арозь чаклам программалэсь инъетсэ эскериз ни. Но комиссиысь депутатъёс со бордын ужало на. Со пумысен куинь пол люкаськылӥзы ни ке но, трос юанъёс кылдо ипотекалы сӥзем люкетъя. Но музъемез вузаны-бюасьтыны лэзён сярысь отын вераськон уг мыны, оскытӥз депутат. Зэмзэ ик, верантэм секыт али югдурзы музъем вылын ужасьёслэн. Огкылысь кариськыса мед юрттозы вылэм туннэ соослы депутатъёс, министерствоын но правительствоын ужасьёс. Соку гурт хозяйствоя но сиён-юонъя министр вылэ но изъёс, оло, ӧжытгес усьылозы. Татьяна БАННИКОВА. Туспуктэмез Владимир Беломорскихлэн. ШӦКЫЧ Семен Савельев Тамаша ук Мар тамаша, тамаша дыр, Сезьы луд вылын такыр. Агрономмы сюан шудэ, Председательлы макмыр. Тракторист лудын сылэ, Инженермы вузкаре. Секретарь сяська бича, Бригадир чарка утча. Мар тамаша, тамаша ук, Скалъёсмы гидын бурсо. Нош пастужен зоотехник Возь вылын "тэтэ" каро. Тамаша ке тамаша дыр, Берло уз-а лу макмыр?ыр. Кивалтӥсь ке юон дорын, Лушкаськись - амбар вӧзын. Удмурт Элькунысь Кун Кенешлэн Президиумезлэн но Удмурт Элькун Кивалтэтлэн 1995-тӥ арын 29-тӥ сентябре кутэм "Нылпиосты школалэсь азьло дышетон сӧзнэтэз (системаез) но дошкольной учреждениосын ужасьёсты улон-вылонын утён сярысь" 82/258 номеро постановленизылэн 3-тӥ пунктаз воштонъёс пыртон сярысь Удмурт Элькунысь Праительстволэн постановлениез Школалэсь азьло визьнодан юртъёсты интыысь (муниципальной) асваньбуре выжтэмен валче но нылпиосты дошкольной учреждениосын возем понна дун тыронэз радъян вылысь, Удмурт Элькунысь Кун Кенешлэн Президиумез но Удмурт Элькун Кивалтэт пукто: 1. Удмурт Элькунысь Кун Кенешлэн Президиумезлэн но Удмурт Элькун Кивалтэтлэн 1995- тӥ арын 29-тӥ сентябре кутэм "Нылпиосты школалэсь азьло дышетон сӧзнэтэз но дошкольной учреждениосын ужасьёсты улон-вылонын утён сярысь" 82/258 номеро постановлениязы таӵе воштонъёс пыртоно: 3-тӥ пунктэз тазьы лыдӟоно: "3. Удмурт Элькунысь интыосын аскивлатонъя ёзъёслы нылпиосты дошкольно учреждениосын возем понна тырон дунэз мумы-бубыослэсь кытын ужамзэс (дышетскемзэс, служба нуэмзэс) лыдэ басьтытэк тупатоно, котькуд семьялэсь материальной положенизэ, пиналлэсь тазалыксэ, нылпи учреждениосын пиналъёсты возьыны луонлыкъёсты чакласа. Россия Федерациысь Советлэн 1992-тӥ арын 6-тӥ мартэ кутэм "Нылпиосты дошкольной учреждениосын возем понна дун тыронэз радъян но та юртъёсты коньдонэн юрттон сярысь" 2464-1 номеро постановлениезлэсь 2-тӥ пунктсэ вӧлмытоно сыӵе анай-атайёслы, кудъёсызлэн туберкулёзэн черлам пиналъёссы дошкольной учреждениослэн нимысьтыз группаосазы ветло. Анай-атайёс пӧлысь огез яке кыксы ик 1-тӥ яке 2-тӥ группаен инвалидъёс но пенсизы сяна, мукет доходъёссы ӧвӧл ке, соослэсь нылпиоссы понна дун уг басьтӥськы. Ватсаса юрттон (компенсация) тыриське элькун бюджетысь коньдон чотын". 2. Та постановление кужыме пыре сое печатлам дырысен. 2000-тӥ арын 31-тӥ мартэ, � 135/329. Удмурт Элькунысь Кун Кенешлэн Тӧроез А. А. Волков. Удмурт Элькун Кивалтэтлэн Тӧроез Н. А. Ганза. Удмурт Республикалэн улосвылаз городлэн сьӧраз ветлӥсь (пригородной) автобусъёсын ворттылыны вань категориен пенсионеръёслы льготаос сётон сяырсь Удмурт Республикаысь Кун Кенешлэн Президиумезлэн но Правительстволэн Постановленизы калыкез улон-вылонын шугадӟонлэсь утён вылысь Удмурт Республикаысь Кун Кенешлэн Президиумез но Правительство пукто: 1. 2000-тӥ арын 1-тӥ майысен 31-тӥ октябрёзь городлэн сьӧраз велӥсь автобусъёсын ворттылыны 50 процентъем льгота тупатоно вань категориен пенсионеръёслы, бырем военнослужащийёслэн кышнооссылы но соослэн анай-атайёссылы. 2. Удмурт республикаысь Коньдон ужпумъёсъя министерстволы ватсас 13500 сюрс манет висъяно "Удмуртавтотранс" кун унитарной предприятилы, льготаос понна коньдонэз берыктоно республикалэ бюджетысьтыз планэн чаклам сярысь мултэс басьтэм доход чотысь. 3. Та постановленилэсь быджсъяськемзэ эскерыса возёно Удмурт республикаысь Правительстволэн кивалтӥсезлэн воштӥсезлы В. Е. Шудеговлы. Постановлениез печатлано "Удмуртская правда", "Известия Удмуртской Республики", "Удмурт дунне" газетъёсын. Удмурт Республикаысь Удмурт Республикаысь Кун Кенешлэн Тӧроез А. А. Волков Правительстволэн Кивалтӥсез Н. А. Ганза. Ижевск город, 2000-тӥ арын 18-тӥ апреле, � 138/42/. Шӧкыч Бур но Паллян Юмореска Ужан сяменызы Бур но Паллян киос ӵаш поттыса керето. - Тон мар, чиньыосме кортӵог кожад ке шат? Одӥг пол кортӵоге, одӥг пол чиньыосам шуккиськод! - кесяське Паллян. - Я, дугды ни, дугды, ӟигар быре со супыльтэмдэ кылзыса, - вазе пумитаз Бур. - Учке ай, кыӵе со ужась. Кучапи кадь куалекъяськод ни, - тышкаське Паллян. - Тырмоз тыныд, ачид но мынэсьтым кыдёке кошкемын ӧвӧл. Учкы ай ас шорад - ыж быж кадь дырекъяса сылӥськод, - исаса вераз Бур. - Ачид тон ыж быж. Гумыръям бервылыд али но шӧдӥське. - Ӵош ӧм юэ шат? - шуэ Бур. - Кызьы озьы ӵош? - пуштӥз Паллян. - Тон весь бекыръяд, нош мыным куртчон гинэ донгиськиз. - Йырмы бен одӥг ӧвӧл шат? - вера пумитаз Бур. - Одӥг. Тазэ туж шонер верад. Умойтэм луысал сотэк: одӥгез йыр юэ, мукетыз сазь улэ. Соку ог-огмес ой! кокасалмы ни, дыр, - буйгаз Паллян. Собере нош ик чирак кеськиз. - Учкы али, нош вир потымон шуккид ук. Чал-чал пуке Бур. Тамак кыске. Ӧз чида вераськытэк Паллян, нош ик Бур борды тэбиниз: - Тодӥськод на-а, кылем арын отвёрткаен азьчиньыме бышкалтӥд? Урӟектӥз ведь, хирург доры мынытэк ӧйлась. Ну кышкай ук соку, чиньыме воксё вандыса куштозы кожай вал. Инмар утиз - йӧназ. Номыр уг вазьы Бур, ас понназ тэк малпаське. - Учкы тазэ чиньыме, - нош ик котыраз мерске Паллян. - Кӧня пол тон сое пуртэн вандылӥд. Гижы улысьтым но сьӧд виштыез уг бырылы. Адӟиськод-а? Тонэн йырин ваньмыз со, тон янгыш. - Я, я, буйгатскы, чиньыед ӝоген йӧналоз. Мушко йырмес гинэ юэмысь дугдытоно. Гульымаз сю грамм сюре ке, дугдэмез уг луы ни. - Ачид ик бен солэн нырысетӥ юрттӥсез ӧвӧл-а? - пыӵкылӥз эшсэ Паллян. - Тон но куртчон сётыны соку ик дась, - ӧз сётскы Бур. Собере ӧжытак малпаськиз но шуиз: "Ойдо пум поном асьмеос та майбыр улонлы. Куаш-куаш ужам потэ ни. Мон чаркаез уг ӝутъя, нош тон куртчон борды эн йӧтылы". - Вераським! - шумпотӥз Паллян. Тупан кылэ вуыса, эшъёс юн-юн кырмиськизы. Мушко йыр та вераськонэз серем пыр кылзӥз, ӧз пыриськы куспазы. Нош куке эшъёс огкылэ вуизы, куалектӥз, ява, жонгетӥсь йырыз ик сазьтӥськиз. - Эшъёсы, ужась юлтошъёсы, ойдолэ тупаса улом. Кылме сётӥсько, юон котыре уг ёрсаськы. Туж бадӟым праздникъёсы ке шат пичильтык веръяны сётоды. - Яралоз, - капчияк шокчиз Паллян. - Мон соглаш, - мынектӥз Бур. Н. Баталов. Ижевск. Валэктэ юрист Сэрегез дася адвокат Лилия Шкляева Бускельёсме юн коттӥ но... Милям трос квартираен юртамы кӧня ке нунал ӵоже ву ӧй вал. Та дыре, 1999-тӥ арын 4-тӥ ноябре, мон гумы бордысь вентилез тупатоно кариськи. Сое басьтӥ гинэ - ву бызьыны ӧдъяз. Со юн коттӥз ми улысь кык квартираез. Огезлы бускельлы сётӥ 4 сюрс манет, мукетыз куре 5 сюрс. Юанэ таӵе: та учыр понна улон юртъёсты тупатъянъя предприятие (ЖРП) но янгыш ке, малы мон гинэ берыктыны кулэ изъянлэсь дунзэ? Х. Галиаскаров, синмызъя кыкетӥ группаен инвалид. Та пумысен Россия Федерацилэн Граждан кодексысьтыз 1064-тӥ ёзэт (статья) валэктэ: адямилы яке солэн ваньбурезлэсь лэсьтэм изъянэз быдэсак берыктыны кулэ изъян ваись мурт. Сыӵе адями тыронлэсь мозме, изъян понна со янгыш ӧвӧл шуыса валэктыны (доказать карыны) быгатэ ке. Мурт квартираосты коттэм понна улон юртъёсты тупатъянъя предприятие но янгыш вал шуыса оскымон валэктӥды ке, изъянлэсь дунзэ тӥ соин ӵош берыктоды. Суд тупатоз яке огкадь, яке котькуддылы пӧртэм тырон. Суд тӥлесьтыд тырондэс кулэстыны быгатоз, тӥлесьтыд кӧня ваньбурдэс лыдэ басьтыса, тӥ изъян ӧд ке лэсьтэ юри (1083-тӥ ёзэтысь 3-тӥ люкет). Бускельёсты коттэм понна тӥ янгыш шуыса возьматэмын медло комиссилэн гожтэм актаз. Ярантэм луэм арбериослэн (обойлэн, буёллэн) дунзы лыдъямын медло сметаен яке соосты басьтэм чекъёсын. Бускельёстылэн куронъёсынызы соглаш ӧвӧл ке, тӥ судын курелэ лэсьтӥськонъя но вузъёслэсь дунзэс лыдъянъя экспертиза лэсьтыны. Таиз эскероз умойтэм учырлэсь мугъёссэс но лэсьтэм изъянлэсь быдӟалазэ. Сыӵе куронэн судэ вазиське правоез тӥямын шуыса лыдъясь мурт. Пошлина тыроз янгыше уськытэм мурт яке организация. Озьыен, тӥ, Галиаскаров эш, быгатӥськоды лэсьтэм изъянэз ас мылкыддыя берыктыны. Солэн быдӟалаез возьматэмын медло сметаен яке чекъёсын, тӥлесьтыд янгыштэс санэ басьтыса. Коттэм бускельёс тани соглаш ӧвӧл ке, соос быгато тӥ вылэ бадӟымгес тырон пуктыны суд пыр. Выль ульча - выль корка Гуртысь администрация милем корка пуктыны инты висъяз выль ульчае. Отчы али ӝутӥське кык юртъер гинэ. Электротыл кыскон понна кулэ луоз 4-5 юбо но кӧня ке сю метр ез. Кин сое кыскыны кулэ - ми-а, администрация-а? Надежда Шудегова, Надежда Золотарева, Глаз ёросысь Кабаково гуртын улӥсьёс. Мукет законъёс сяна, Россиын кутэмын Городъёс лэсьтон сярысь кодекс. Отысь 14-тӥ ёзэт куре: инженерной ёзъёсты но улосэз чеберъян ужъёсты (писпу но сяська мерттон но мукет) быдэстыны кулэ интыысь аскивалтон ёзъёс. Озьыен, электротыл кыскыны кулэ интыысь администрация. УДМУРТИЯ ХХ ДАУРЕ 1908-тӥ ар Россия понна таиз ар одӥгез шудоез. Та вакытысен страналэн экономикаез шуак вылӥе ӝутске. Пушъён-будон сюрес усьтӥзы Столыпинлэн 1906-тӥ арысен гурт улонъя гожтэм указъёсыз. Россиын нырысьсэ крестьянъёслы луонлык сётӥзы музъемен кузёяськыны. 1914-тӥ арозь крестьян семьяос пӧлысь ньыльмос люкетэз, общинаысь люкиськыса, нимаз ужаны ӧдъязы. Кужмо кузёос вожвылъяськыса быдэс гурт удысэз "сайкатӥзы-бугыртӥзы". 5 ар куспын Россиын чабей тысь люкан 37,5, кукуруза 44,8, йыды 62,2 процентлы йылӥзы. Та аръёсы уно няньзэ Россия кунгож сьӧры вузаз. 1909-тӥ ар Промышленность ӝог ӝутске-азинске. Та удысысь продукция шорлыдын араз 9 процентлы йылэ, машина лэсьтон удыс - 13 процентлы. Та аръёсы чугун ӵыжатон США-ын будӥз 20, Германиын - 50, нош Россиын - 64 процентлы. 1907-тӥ-1913-тӥ аръёсы Вотка но Иж казна заводъёс пумен кужмояло. 1901-тӥ-1905-тӥ аръёсы Воткаын улӥсьёс арлы быдэ 13-19 пароход, 27-35 паровоз поттӥзы. 1908-тӥ арысен заводэз выльдыны ӧдъяло. Вятка губерниысь самой бадӟым Иж заводэ но выль тӥрлык пуктылыны кутскизы. Экономика азинскемъя, фабрикаослэн лыдзы Вятка губерниын 150-ысен (1900-тӥ ар) 225-озь (1913-тӥ ар) вуиз. 1914-тӥ арын пуромем тылож куспетӥ кариз экономикаын кутскем выльдӥськонэз. 17-тӥ августэ - Сарапул городын водопровод кыскон но электротыл пыртон пумысен Вятка губернаторлэсь гожтэтсэ эскеро. 10-тӥ октябе - Сарапул земстволэсь музейзэ кылдытыны басьтӥсько. 20-тӥ октябре - Глазов уездысь земской собрание ужпум кутӥз городын но уездын вань улӥсьёсты лыдъяны но гожъяськыны дышетонъя. - Иж заводын усьтӥськиз 4 классъем городской училище. 28-тӥ ноябре - Туркестан адӟытонын выставкаосъя комитет вылӥ ӟечлыко андан продукциез но пыӵал тӥрлыкез понна Иж заводэз Данъян дипломен но Бадӟым Зарни медален пусйиз. Е.ГОРБУШИНА, архивын ужась. Уз вуны! Улонысь кошкиз паймымон адями - Юрий андреевич Чайников. Быдӟым агаез сямен ик со юн яратӥз удмурт калыксэ, сое югдытон, солы лэчыт визь, ӟеч тодон-валан сётоз ужез. Куӟебай Гердлэн вынмуртэз, со, берпум нуналозяз сюлмаськиз быдӟым агаезлэсь, Гердлэсь, вылӥ но дано нимзэ пӧяськонлэсь, кыл вӧлдонлэсь утён, удмурт но Россиысь культуралы берыктон сярысь. Мон понна но, трос мукетъёсыз понна но Юрий Андреевич Чайников вал ас калыксэ вань сюлмысьтыз яратӥсь, лэчыт визьмо, ӟеч сюлэмо, ас ужъёссэ юн тодӥсь-валась адями. Таӵеен ик кылёз тодэ ваёнъёсамы. Россия Федерациысь Кун Думалэн депутатэз Светлана Смирнова. Удмурт Элькунысь Кун Кенеш, Удмурт Элькунысь Кивалтэт мур ӝоже усьыса иворто быдӟым удмурт кылбурчилэн, тодосчилэн но ас калыксэ югдытӥсьлэн Куӟебай Гердлэн (Кузьма Павлович Чайниковлэн) вынмуртэзлэн (вынызлэн пиезлэн) ЧАЙНИКОВ Юрий Андреевичлэн, удмурт калыклэн быдӟым пиезлэсь нимзэ пыраклы тодэ кельтонэ туж трос кужымзэ, визьзэ но быгатонлыксэ понэм адямилэн улонысь кошкемез пумысь но солэн ӵыжы- выжыосызлы но матысь адямиосызлы мур куректэмзэс верало. Юрий Андреевич Чайниковен люкиськон луоз 25-тӥ апреле Драмая удмурт кун театрын 11 часысен 13 часозь. Чебер сюлэм Шӧдтэк шорысь вуиз сюлэмез пачкатӥсь ӝож ивор: сизьымдон куинь аресказ мыныкуз, Нижневартовскысен улонысь кошкиз Удмурт литератураысь классиклэн Куӟебай Гердлэн вынмуртэз (вынызлэн пиез) Юрий Андреевич Чайников. Оскыны ик уг луы та небыт сюлэмо, интыяз пукыны валасьтэм, быдӟым агаезлэсь нимзэ пыраклы тодэ кельтон вылысь туж уно сюлМаськем адямилэн ӧвӧлэзлы. Солэн быдэс улонэз вал Атай музъеммылы, калыкез югдытонлы, культуралы, вань тодон-валандэ, визьдэ, кужымдэ сётон. Со сярысь вера улон сюресэз но. Куӟебай Гердлэн яратоно вынызлэн, Андрейлэн, семьяяз вордӥськыса, Юрий Андреевич та быдӟым кылбурчиез пытсамзы бере ик 1935-тӥ арын, юнме шорысь вӧсь каремзылэсь утиськыса но выль улон инты но уж утчаса, семьяеныз ӵош кошкиз Сибире. Школазэ йылпумъяса, Юрий Андреевич дышетскиз артиллеристъёсты дасясь училищеын. Советской Армиын вал дас кык ар. Вордӥськем палъёсаз берытскыса, тодон-валанзэ будэтӥз Удмурт кун пединститутысь историяя но филологияя факультетын. Калыкез югдытонын тыршиз ньыльдон ар - вал историлы дышетӥсь, школалэн директорез. Берло аръёссэ улӥз Башкириын. Нош сюлэмыз котьку вал вордӥськем палъёсаз - Удмурт шаерын. Куӟебай Гердлэн вордӥськемез дырысен сю ар тырмонлы сӥзем юбилейлы дасяськыку усьтӥськиз солэн туж узыр лулчеберлыкез, котькыӵе ужрадэз радъяны быгатэмез. Юрий Андреевич трос кужымзэ,визьзэ но быгатонлыксэ понӥз Куӟебай Гердлэн Дораз синпель юрт (музей) усьтонэ. Сое узырмытон понна люказ туж ӟеч но узыр ужъёс, кылдытӥз удмурт но ӟуч культураысь ньыльдонлэсь ятыр югдытӥсьёслэсь тусбуйёссэс. Тужгес бадӟым но быдэстоно сюлмаськонэз вал Ижысь Карлудын Куӟебай Гердлы сӥзем синпелет (памятник) усьтон, Карлудлы Куӟебай Гердлэсь нимзэ сётон. Куӟебай Герд сярысь тодэ ваёнъёсын "Как молния в ночи" книгаез узырмытӥз тунсыко кылужъёсын, тодэ ваёнъёсын, туж шер пумиськылӥсь документъёсын. Трос тодӥсь-валась, ӟеч сямо, синмаськымон но яратоно адями, Юрий Андреевич, шедьтылӥз выль но выль эшъёс, соин оглулысь малпаськыны быгатӥсь адямиосты, мылысь- кыдысь тунсыкъяськылӥз удмурт культураен, гожъясьёслэн ужъёсынызы. Ю.А.Чайников туж сюлмаськиз аслаз семьяез, Куӟебай Гердлэн ӵыжы-выжыосыз, бадӟымесь малпанъёсын тырмем быдэстоно ужъёсыз сярысь. Юрий Андреевичен ӵош дышетскем, ужам, кенешем адямиос ялан утчалозы та чебер сюлэмо адямиез, возьмалозы солэсь удмурт культуралэн но литературалэн улоназы пыриськемзэ. Ӟеч мылкыдын ялан тодамы вайыломы та синмаськымон, лулчеберлыклэсь пӧртэм удысъёссэ трос ӟеч ужъёсын пачылмытэм но сюлэмъёсамы вунонтэм пытьы кельтэм адямиез. Котьку буре ваём! Удмурт Элькунысь Калык кусыпъёсъя министерство Удмурт Элькунысь Культурая министерство Удмурт Элькунысь Писательёслэн огазеяськонзы. Буре ваём! Сюлэм али но уг оскы лек иворлы! Нош Со - ӧвӧл ни! Трос шумпотонъёс пӧлысь Со бырйиз одӥгзэ - ас калыкед сярысь сюлмаськон, солы котьку ӟеч сюрес сӥзён та адямиез утиз котькыӵе кайгулэсь, кулэтэм макелэсь. Дунне вылэ шер вордӥсько таӵе адямиос. Шер но ичи. Дунне вылысь тужгес быдӟым удмуртэз Куӟебай Гердэз котьку буре ваись адямиос тазьы ик сюлмысь буре вайылозы мукетсэ быдӟым удмуртэз - солэсь вынмуртсэ Юрий Андреевич Чайниковез! Эшъёсыз. Жингыртэ крезьгур, куашетэ тулыс Тулыс асьмеды котьку герӟа быдӟым ӟуч композиторлэн Петр Ильич Чайковскийлэн нимыныз. Быдэс дунне дунъя солэсь операоссэ, балетъёссэ, симфониоссэ. Чайковскийлэн музыкаез - со бадӟым праздник. Туэ дано землякмылэн вордскемез дырысен тырме 160 ар. Удмурт шаерамы, тодмо крезьгурчилы сӥзьыса, 43-тӥ арзэ ини ортчытӥське фестиваль. Котьку сямен ик сое сӥё-дано усьтон радъямын луэ композиторлэн вордскем городаз Воткинскын. Солэн музей-усадьбаез доры лыкто музыкаез гажасьёс, республикаысьтымы но городысь кивалтӥсьёс, артистъёс. Фестивальлы кутскон туэ сётэмын вал 21-тӥ апреле. Со нуналэ Воткинскысь "Юбилейный" культура дворецын Пермьысь П. И. Чайковский нимо операя но балетъя кун академической театр возьматӥз композиторлэсь "Лебединое озеро" балетсэ. Татын пусйыны кулэ тани ма сярысь но: городын улӥсьёс фестивалез чидатэк витиллям, шӧдске, ваньмыз концертъёсы билетъёс азьвыл ик вузаса быдтэмын ни. Воткинсклэн мэрезлэн Валерий Фридрихлэн верамезъя, городын улӥсьёс туж вылӥ дунъяло зэмос искусствоез. Пичиысен ик татын дышето валаны музыкаез, чеберлыкез валаны. Ачим но синйылтӥ сое фестивалез усьтонэ ветлыкум. Адямиос лыкто семьяосын-семьяосын, туж уно пиналъёс, егитъёс, ӧжыт ӧвӧл мӧйыос но. Туж кужмо кичабонъёсын келязы воткинскъёс куноссэс. Пермьысь театр алигес пусйиз 125 ар тырмонзэ, со Россиысь одӥгез вашкала театр. Али отын ужало валтӥсь режиссёр Россиысь дано артист Вадим Мюнстер, балетлэн чеберлыкъя кивалтӥсез Россиысь дано арист калык куспо конкурсъёслэн лауреатсы Кирилл Шморгонер, валтӥсь режиссёр Георгий Исаакян, валтӥсь хормейтер Россиысь калык артист Россиысь кун премилэн лауреатэз Владимир Васильев. Коллектив асьме доры ваем мукет ужъёссэ но. Бен, крезьгуро фестиваль азьланьтӥське. Та нуналъёсы музыка чузъяське Ижевскын, Сарапулын, Глазовын, Можгаын, Завьяловоын... Со чузъяське котькудӥзлэн сюлэмаз, кин гажа Петр Ильич Чайковскийлэсь зэмос музыказэ. Фестиваль йылпумъяське 26-тӥ апреле. Н. Байтеряков. В. Камашев (фото). "Зарни италмас" Шаерамы ортчыло Вормонлы 55 ар тырмонлы сӥзем ужрадъёс. Усточи нылпиос пӧлын "Зарни италмас" ӵошатскон сярысь сӥзьыл ик ялэмын вал. Нырысь ик со ортчылӥз ёросъёсын. Отын вормисьёс пыриськизы зональной конкурсэ. 8-тӥ апреле Можгалан сыӵе ӵошатскон ортчиз. Татысь искусствоосъя нылпи школае люкаськизы Кизнер, Вавож, Можга, Пичи Пурга, Завьял, Алнаш, Грах ёросъёсысь пиналъёс. Пӧртэм кырӟанъёс чузъяськизы татын: академической но калык кырӟан, хор но нимаз адями... Жюри нырысетӥ степенё дипломен пусйиз Алнаш ёросысь Асан совхоз- техникумысь Аня Меркушеваез, нош академической кырӟасьёс пӧлысь Завьяловоысь Женя Толстаяяез. Хорен кырӟасьёслы нырысетӥ инты ӧз сётэ одӥг коллективлы но - ӧжытак быгатонлыксэс будэтонлы инты кельтӥзы. Нылпиослэн фольклор ансамбльёссы пӧлысь пусйизы Алнаш ёросысь Кузебай гуртысь "Берекет" ансамблез. Нылъёс но пиос туж быгатыса возьматӥзы куно пумитан композицизэс но "Табасин" калык шудонэз. Учкисьёслы но соос туж яразы. Ӵошатсконэ пыриськем котькуд пиналэз но коллективез дипломъёсын пусйизы, вормисьёслы синпель кузьым сётӥзы. Н. Прокопьева. Удмурт Республикаысь Кун Кенешлэн дасэтӥ (азьло чакламтэ) сессияз Конституцияя комиссилэн секретарезлэн Константин Глуховлэн докладэз Гажано депутатъёс, гажано президиум, ӧтем эшъёс! Вераськонме кутскеме потэ ортчемзэ пичияк тодэ ваёнэн. Удмуртилэн Конституциез бордын уж миым октябре ӧз кутскы, сое мытӥз куинь ар талэсь азьло 1997-тӥ арын Кун Кенеш нырысетӥ ӧтчамез. Соку ик асьме Конституциез федеральной законодательстволы тупамон карыны, озьы ик Россия Федерациысь мукет субъектъёслэсь ужамзэс лыдэ басьтыса, республикалы вань калыкен быръем кивалтӥсьлэсь постсэ кылдытыны малпанъёс вал ини.Со вакытэ ини Кун Кенеше Удмуртилэн Конституциезъя уно ӵектонъёс вуылӥзы, кылсярысь, Россилэн Президентэзлэн Правоя кун управлениезлэсь, Россиысь Юстицияя министерстволэсь, Удмурт Республикалэн Прокурорезлэсь. Соку Удмуртилэн Конституцияз воштонъёс но ватсанъёс дасянъя депутатёслэн комиссизы кылдытэмын вал. Со бадӟым законопроект дасяз. Документ печатламын вал, но жаляса вераны кулэ, политикаын кылдэм югдурен валче Конституцие воштонъёс пыртэмын ӧй вал. Кылем арын октябре Россия Федерацилэн Президентэз "Россия Федерациыс улосъёсын кун властьлэсь закон кылдытӥсь (представительной) но быдэсъясь ёзъёссэ радъянъя огъя принципъёс сярысь" Федеральной закон улэ гожтӥськиз. Ватонэз ӧвӧл, та Закон Удмурт Республикалэсь Конституцизэ выльдонъя ужез азинтыны луонлыкъёс сётӥз. Федеральной закон Россиысь улосъёсын кун властез радъянын куд-ог валтӥсь положениос пыӵатӥз. Нырысь ик, кылдытэмын вылӥ должностен муртлы яке кун властьлэн вылӥ быдэсъясь ёзэзлэн кивалтӥсезлы институт. Законын яркыт возьматэмын но люкылэмын закон кылдытӥсь но быдэсъясь ёзъёслэн ужан удысъёссы, юнматэмын закон кылдытон удысын выль куронъёс, озьы ик вань чылкак выль положениос. Та Законэз кутэмен валче Удмуртилэн туала Конституциез уката пумит луиз федеральной законодательстволэн куронъёсызлы. Соин валче миым ноябрь толэзе Кун Кенешлэн азьло чакламтэ сессияз кылдытэмын вал Конституцияя комиссия, отчы пыризы Кун Кенешысь, Правительствоысь, интыын аскивалтон ёъёсысь, калык огазеяськонъёсысь муртъёс, тодмо юристъёс. Конституцияя комиссиын озьы ик кылдытэмын вал юристъёслэн ужась группазы, соос пӧлын Прокуратураын, Юстицияя министерствоын, Вылӥ Судын ужасьёс, Кун Кенешлэн, Правительстволэн, Ижевск городысь администрацилэн правоя управлениосынызы кивалтӥсьёс, Кун Кенешысь та удысъя ялан ужась комиссилэн кивалтӥсез, преподавательёс - Удмурт кун университетысь Правоя институтысь юристъёс, ваньмыз - 11 адями. Юристъёслэн ужась группазы кылем арын ноябрь толэзьысен ортчытӥз кызьлэсь ятыр кенешъёс. Котькудӥз со кыстӥськиз 6-8 час пала. Бадӟым уж лэсьтэмын федеральной законодательствоез сэрттон-пертчон, Россилэн мукет улосъёсаз кун ужез радъянэн тодматскон ласянь. Юристъёслэн ужась группаенызы Конституцие пыртыны дасям воштонъёсты бӧрысь эскерылӥз Конституцияя комиссия. Миым декабрь толэзьысен туэ апрелёзь ортчытэмын Конституцияя комиссилэн дас кенешез. Туннэ эскериськись законлэн инъетаз пыртэм воштонъёсты Конституцияя комиссия умоен лыдъяз. Март пумын Удмурт Республикаын ортчем референдумлы йылпумъянъёс лэсьтэм бере ик (отчы пыриськемъёс пӧлысь 68,8 процентэз Конституцилэн 10-тӥ ёзэтысьтыз нырысетӥ люкетаз пыртэм воштонъёсты умоен лыдъяз) Конституцияя комиссиен дасям "Удмурт Республикалэн Конституцияз воштонъёс пыртон сярысь" Законэзлэн инъетэз келямын вал Россиысь Президентлэн Правоя кун управленияз, Россиысь Юстицияя министерствое, Россия Федерациысь Правительстволэн Законодательствоя но правоведениеяя институтаз эскерыны. Со дыре ик законлэн инъетэз келямын вал Удмурт Республикаысь Правительствое, Прокуратурая, Юстицияя министерствое, Вылӥ Судэ йылпумъянъёс лэсьтыны. Москваын ортчытэм огъя эскеронъёс возьматӥзы: "Удмурт Республикалэн Конституцияз воштонъёс пыртон сярысь" Законлэн инъетэлыз ӟеч дунъет сётэмын вал. Умоен пусъемын Удмуртилэсь Конституцизэ Россилэн Конституциезлы но федеральной законодательстволы тупамон карыны тыршон. Озьы ик пусйытэк кельтыны уг луы таӵе учырез но: Конституцияя комиссилэн берло кенешаз, "Единство" фракциысь депутатъёслэн ӵектэмзыя пайдаё решениос кутэмын. Кылсярысь, 76-тӥ ёзэтлэн нырысетӥ люкетаз верамын, Кун Кенеш озьы ик эскерись ёз но луэ шуыса. 81-тӥ ёзэтэ но ватсан пыртэмын - Удмурт Республикаысь Югдурез утёнъя министрез но Правительстволы Председателез юнматонэ пыриськыны быгатэ Кун Кенеш но. Юристъёслэн ужась группазы эскериз Наукая, культурая, дышетонъя но егитъёсын ужан политикая ялан ужась комиссилэсь, депутатлэсь Беркутов Сергей Георгиевичлэсь ӵектонъёссэс. Йылпумъяса вераме потэ, уно толэзьёс ӵоже ужаммы, трос эскеронъёс ортчытэммы бере луонлыкъёс вань "Удмурт Республикалэн Конституцияз воштонъёс пыртон сярысь" Законэз быдэсак кутыны. Мон малпасько, ваньмыз со юрттоз республикаямы правоя огъя югдурез тупатыны, законодательствоез Россия Федерацилэн куронъёсызъя радъяны. Тау кылзэмды понна! Быдӟым Вормонлы - 55 ар Бышкись ез кенер вӧзын Асьме войскоос ньыльдон одӥгетӥ арын 6-тӥ декабре азьлань мыныны кутскизы. Со ик луиз Москва вылэ урдӥськем фашист войскоосты пазьгонлы кутскон нунал. Та лек ожъёсы пыриськиз Кезын но со котырысь гуртъёсын кылдытэм 46-тӥ бригада. Отысь подразделениосысь боецъёслэн ожмаськемзы сярысь вералом, политотделлэн ивортонъёсыз вылэ чӧлскыса. "Секыт ожъёсын Львово гуртэз басьтэммы бере, подразделениосмы чигнась тушмонлэсь бадӟым группазэ быдтӥзы на. Асьме частьёсмы басьтӥзы Коротово, Борщнево, Елизаветино гуртъёсты. Полежаево гуртын тушмонлэн батальонэз пумитъяськиз, контратакае но выжылӥз. Ожмаськон куать час кыстӥськиз. Красноармеецъёс но командиръёс, кужмо ожмаськыса, шӧдскымон шуккет сётӥзы но немецъёслэсь 50 ёрос солдатъёссэс но офицеръёссэс быдтӥзы. Кылемъёсыз фашистъёс кызьы сюрем озьы пегӟизы. Частьёсмылэн туж ӝог но кужмо шуккетсы сокем шӧдскымон вал, тушмон чигнакуз ӧз вуы ни Васильевской но Темниково гуртъёсыз сутыны". Нош таосыз чуръёс Старая Русса город дорын ожмаськонъёс сярысь. "1942-тӥ арын 19-тӥ феврале бригадалы приказ вуиз - Волышево гуртэз басьтоно. Ӝыт пал батальонъёс гуртлы 60-80 метр кеме интыяськизы. Тушмон кужмо ыбылэмен, боецъёс выдылоно луизы. Бышкись ез кенер сьӧрын вань куашкатэм сарай, отысен умой адӟиське тушмонлэн оборонаез. Сое валаса, батальонлэн командирез разведчикъёсты сараез басьтыны косӥз. Соос пеймыт уин сарае пыризы. Быдэс нунал ӵоже разведчикъёс чакласькыса улӥзы. Нош ож пуромиз. Сарайлэн борддорез куашказ, немецъёс сое котыртӥзы. Кык пол атакае ӝутскылӥзы. Азязы пуктэм ужпумзэс быдэстэмзы бере гинэ разведчикъёс сарайысь кошкизы". Табере вералом та ожъёсы пыриськем солдатъёслэсь но командиръёслэсь нимтулъёссэс. Капитан Бурдин Иван Тимофеевич вордскемын 1913-тӥ арын Кизнер ёросысь Люга гуртын. Со, роталэн командирез, кышкатэк ожмаськиз. Бурово гурт дорын сӧсырмыны шедиз, нош Ржев дорын кыкетӥзэ сӧсырмиз. Петровка гурт дорын танкъёслы пумит могӟет лэсьтон дыръя аслэсьтыз быгатэмзэ но ротаен умой кивалтэмзэ возьматӥз. Старшина Вертячих Петр Евдокимович вордскемын 1818-тӥ арын Юкаменск ёросысь Деряши гуртын. Со, отделенилэн командирез, Старая Русса дорын дыраз боеприпасъёс вуттылӥз огневой позициосы. Куинь сутка ӵоже шутэтскылытэк тыршоно луиз. Красноармеец Ившин Сергей Петрович вордскемын 1909-тӥ арын Юкаменск ёросысь Глазовский посёлокын. Со, телефонист. 1942-тӥ арын 16-тӥ сентябре Лычково станция дорын Ившин ыстэмын вал разведчикъёсын кусып возьыны. Тушмонлэн ыбылэмез улсын линиысь чигем интыоссэ ӝог итылӥз. Озьы разведчикъёсын кусып ӧз бырылы. И. Т. Бурдин капитан пусъемын вал "За отвагу" медален. Нош П. Е. Вертячих старшина но С. П. Ившин красноармеец - "За боевые заслуги" медален. Старшой лейтенант Орлов Леонид Тимофеевич, 46-тӥ бригадаысь взводлэн командирез вордскемын 1912-тӥ арын, Воткинскын. Кышкасьтэм но ас ужзэ умой тодӥсь командир, тушмонлэн ыбылэмез улсын но сапёръёсыныз кивалтыны быгатэ. Тушмонлэн оборонаезлы матэ кариськыса, дас сапёръёсыныз со Косино но Маслово гуртъёс дорын куать уй ӵоже кык сюрс мина пуктӥз. 1943-тӥ арын 20-тӥ мае Еремино но Липовка гуртъёс дорын немецъёслэсь минаоссэс октӥзы, пӧлазы дас куатез поттыны луонтэм амалэн пуктэмын вал. Заданиез быдэстыкузы, боецъёсыз пӧлын ыштонъёс ӧй вал". Л. Т. Орлов пусъемын вал "За боевые заслуги" медален. Сапёр Булдаков Павел Иванович вордскемын 1921-тӥ арын Кулига ёросысь "Дружба" колхозын. Группаеныз ӵош уйёсы, тушмонлы матэ кариськыса, Еремино но Костино гуртъёс доры сюрс мина пуктылӥз. Озьы сапёръёс оборонамес юнматӥзы. Со разведчикъёсын ӵош тушмон пала уно пол потылӥз, разведчикъёслы сюрес дасялляз. Кылсярысь, Колодино гурт дорын, мина утчаса, иськем мында нюжтӥськоно луиз. Танкъёслы чаклам куинь мина вискытӥ поттӥз. Ачиз нош ик азьпала потӥз но немецъёслэн блиндажзы азьысь бышкись ез кенер вамен потон инты дасяз. Озьы со разведчикъёсмылы немецъёслэн блиндажзы доры ик потыны луонлык сётӥз. П. Н. Булдаков пусъемын "За отвагу" медален. Кыкетӥез наградаез вал Горд Кизили орден. Красноармеец-сапёр Перевозчиков Михаил Михайлович вордскемын 1922-тӥ арын Дебес ёросысь Уйвай Медло гуртын. Уй ӵоже тушмонлы матын Ермяки но Малево гуртъёс доры минаос пуктылӥз. 1943-тӥ арын 2-тӥ июньысен 6-тӥ июлёзь разведчикъёсын ӵош куать пол потылӥз Худяки но Алексеево гуртъёс дорын тушмонлэн мышказ. Тушмонлэсь 63 миназэ октӥз. Бышкись ез кенер вамен дас интыетӥ потон инты лэсьтылӥз. Разведчикъёслэсь вить иськем ёрос сюрессэс эскериз. Младшой сержант Сементин Илья Михайлович вордскемын 1908-тӥ арын Воткинскын. 1943-тӥ арын 30-тӥ июне потон уе Худяки гурт дорын солы косэмын вал разведчикъёслэн группаенызы задание мыныны. Разведчикъёслэн азьпалазы немецъёслэн дзотсы азьысь бышкись ез кенер вамен потон лэсьтӥз но отын возьмаськиз. И. М. Сементин но М. М. Перевозчиков пусъемын "За отвагу" медален. В. Голубев. Журналистъёсын пумиськонъёс Владимир Бельтюков: "Му вӧй поттонлэсь уксё вуэ" Алигес журналистъёсын пумиськиз республикаысьтымы коньдонъя министр Владимир бельтюков. Люкаськемъёслы со мадиз, кызьы кун бюджетэ коньдон вуэ, районъёсын но городъёсын ӵош кутэм бюджетлэн быдэсъяськемез сярысь. Нырысетӥ кварталэ ужъёсмы урод ӧз мынэ. Со азьланезлы оскон сётэ. Нырысь лыдъямъя миым та дырен ӵошатыса, туэ куинь толэзьскын кун бюджет 138 процентлы быдэстэмын, нош быдэс республикая - 122 процентлы. Казнае 97 процент улэп коньдон вуэмын (миым 66 процент вал). Со Правительстволэн сюлмаськемез, производствоез радъяны быгатэмез бордысь потэ. Соин ӵош ик Правительство выль постановление кутӥз. Со герӟаськемын тыронъёсты уката умоятонэн, тужгес но подоходной акцизъёсъя но НДС вытъёсты бичанэн. Табеер ог-огезлэсь пунэм тыронъёссэ пытсаны юн секыт луоз, бартерлы пум вуэ, шуыны луоз. Зэмзэ но, туэ нырысетӥ кварталэ бюджетъёсы данаклы тросгес уксё пыриз. Со туж умой. Озьы бюджетникъёс дыраз уждун басьтыны ӧдъязы. Нош городъёсын н районъёсын ӵош кутэм бюджетэ туэ 5,9 миллиард манет уксё пыртыны чакламын. Но со 750 миллион манетлы будыны быгатоз. Сыӵе луонлыкъёс вань. Но татын ватсаны кулэ на, республикалы вань тыронъёссэ пытсаны ватсаса 1 миллиард 100 миллион манет уксё шедьтоно на. Югдурез котькуд ласянь солань-талань бегаты, но шаерамы коньдонэн герӟаьскем ужпумъёсты быдэсъян кӧня ке умоя. Каллен азинске, умой пала берытске нылпиослы пособие тырон. тая туэлы бюджетын 225 миллион манет уксё висъямын. Кылсярысь, калыклы социальной юрттэт сётонъя министерствоы 62,3 миллион манет коньдон вуоз. Али, 1-тӥ апрелёзь, республикалэн бюджетникъёслы уждун сётъянъя тыронъёсыз ворсамын. ваньмызлы сямен март понна уждун тыремын ни. Но министрлэн ивортэмезъя, 15 апрельлы уждунъя вань тыронъёсты быдтыны уз луы. Сётэм кылзы уз быдэсмы. Пумиськонын озьы ик вераськон вал бюджетникъёслы апрельысен уждунзэс будэтон сярысь. Со бен шумпотымон. Но та ужрадлы кун бюджетын коньдон учкымтэ. Озьы ке но, му вӧй поттӥсьёс туэ бюджетэ уксё умой пыртӥзы. Г. РОМАНОВ. Утчасько тонэ Вазиськы, Бикторанна! Кытчы вазиськыны ик уг тодӥськы, оло, тӥ мыным юрттыны быгатоды. Утчасько мӧйы кышномуртэ - Биктораннаез. Азьвыл со улэ вал Пичи Пурга ёросысь Абдэс-Урдэс гуртын, али - Ижевскын. Со, милемды лыктыны косыса, гожтэт ыстӥз вал, но ми адрессэ ыштӥськеммы, мар карыны ум валаське ни. Шедьтэ вал быдэсак адрессэ. О. Васильева. Редакцилэсь: Тӥлесьтыд курондэс быдэстон понна, ми вазиськылӥм республикаысьтымы адресной бюрое. Жаляса верано луиськом, отын но юрттыны ӧз быгатэ - утчано муртлэн одно фамилиез тодмо луыны кулэ шуизы. Вазиськиськом Ижын улӥсь лыдӟисьёсмылы! Оло, тӥ пӧлын вань Биктораннаез тодӥсьёс - жингыртэ редакцие 21-37-14 номеро телефонъя. Кырӟась вумурт Иже ӟырт кезьыт февраль нуналэ вуыса, дорам жингыртӥз ТАСС-лэн фотохроникаысьтыз корреспондент Юрий Каплун. Юртты, пе: кынмем сюлэмме но киосме шунтон понна, "ӵыжатэм учыр" кулэ. Вань, шуисько, татын милям сыӵеез. Зэм, кезьыт азьын "ӵыжатэмез"... Туннэ бер ини, шуисько, ӵуказе мон тонэ Кам шур котыре вутто. Отын, шуисько, быдэс дуннелы тодмо Вумурт улэ. Вуим Сарапул каре, Песьянка гурезь бамалысь улыно-вылыно коркалэн капка дораз. Йыгаськимы. Милемлы кытӥ-мартӥ усьтӥз мырдэм но кызьы гинэ дӥсяськем пересь адями: пыдъёсаз - гын сапег, вылаз - кикур пасьта гинэ плавкиез. Палэнысь вуэм тодмотэм адямилы, фотокорреспондентлы, кизэ мычыса валэктӥз: мон али, кузпалылэсь но нылылэсь комнатазэс шунтон понна, пу пильылӥ. Ӝыны час ортчыса, мыным Сарапулка шуре мыноно: отын монэ витё техникумъёсысь дышетскисьёс... Николай Иванович (мыным со кемалась дырысен ини тодмо) ӧтиз милемыз дораз: ӵош чай, пе, юом. Пыштурынлэсь, мукет будосъёслэсь, апельсин но лимон кӧмъёслэсь парем чай юэммы бере ӝутским вылысяз этаже. Татын, улӥын сярысь, унолы салкымгес. Шокчылэм омыр шӧдӥське. Сэргын - бадӟым "Петрофф" рояль, борддоръёсысь ӝажыосын - медицина но мукет удысъёсысь пӧртэм книгаос, выж шорын - ньыль пуконэн котырес ӝӧк. Со вылын - пӧртэм буёло пусъетъёсын зӧк календарь. Балкон ӧс шоры возьматыса, кузё бозгес куараен вазиз: отын мынам - чебересь уйвӧтъёс адӟон интые. Отын - мамыктэм валесэ, гонтэм шобретэ... Та кылъёсты верамез бере, Николай Иванович, рояльлэсь клавишаоссэ зол-зол зӥбылыса, спортивной маршлэсь гурзэ шудӥз но, огдырлы гинэ дӥсям халатсэ куштыса, милемыз сьӧраз ӧтиз. Сарапулка шур дуре бызьыса мыныкумы ивортӥз: "Ӵапак туннэ сизьымдон ар тырме толалтэ нырысетӥзэ пыласькыны кутскеме дырысен". Соин ик, пе, монэ ӟечкыланы люкмесэ доры лыктыны мылкыд каризы дышетэм адямиосы но городысь мукет егитъёс. Пересь "моржез" ӟечкыланы люкаськемъёслэн кужмо куаразы кыдёкысен ик кылӥськиз ни вал. Николай Иванович ваньмызлы йыбырттӥз но, быгытъёсыныз адӟем карымон шудыса, шуак! вуэ тэтчиз. Кӧня ке зымылэмез бере, киоссэ вылэ ӝутӥз но "Эй, ухнем! Эй, ухнем!.. Ещё разик, ещё да раз!.." - ӟуч калык кырӟанэз кутскиз. - Кырын кызь одӥг градус кезьыт, нош вуын кӧня? - юало егитъёс. - Кык но ӝыны градус шуныт, - валэктэ пыласькись... - Уд оскиське-а? Пыре! Дышетӥсьёсмы бере люкмесэ пыразы кӧняез ке "моржпиос", быгатэмзэс возьматыса. Москваысь лыктэм фотокорреспондентлы таяз учыре толон сямен кынмыны дыр ӧй вал. Люкмес котыртӥ шаплы бергано луиз, кассетаоссэ вошъяса. "Вот тыныд "жареной" факт!" - шуи мон солы серем пыр. ... Пукиськом Николай Ивановичлэн корказ, ужан ӝӧк сьӧраз. Кыдёкысь лыктэм кунолэн юанъёсыз пумтэм трос. Кузёмы ваньмызлы рос-прос валэктон сётъя. ... Вить аресаз мыныкуз, пичи Коля, юн кынмыны шедьыса, чахоткаен висьыны кутскем. Нуналысь нуналэ чиедгес но чиедгес луэ. Мур куректонэ усем атаезлы тодмо доктор верам: ёркам тулэз интыысьтыз тулэн ик потто. Пидэс, пе, огпол-а, кык пол-а туж кезьыт вуын пылатоно... Кулӥз ке, так но кулоз. Чидаз ке, таза будоз... Февраль толэзе, Сретенье нимаськись праздник нуналэ, атай пизэ, шубаен шобыртыса, салазкие пуктӥз, ваньзэ ӵош биньгозыен керттылӥз но матысь шурлэн ярдурысьтыз нискылтытӥз. Отын, йӧ улысь лазег интыын, азьло ик люкмес дасямын вал. Пельскись куазь сое лымыен шобыртыны вуэм: чик уг адскы... Вить аресъем пияш ӧз ик шӧдылы ангесозяз кезьыт вуын луэмзэ. Атаез сое кытӥ-мартӥ поттӥз но пӧсь мунчоын веникен париз. Колялы туж яраз витёнтэм шорысь луэм учыр. Атайзэ отӥяз ачиз "буль-буль" карыны чортыны кутскиз. Пияшлэн ӟарыт бамъёсыз пумен ӟырданы ӧдъязы. Ӝоген пыд йылаз но йыг-йыг султӥз, огъёзъёсызлэсь номырин бере ӧз кыль ини. Быдэ вуыса, Коля Казаньысь медицинской институтэ дышетскыны пыриз - атаезлэсь куронзэ но аслэсьтыз кемалась малпанзэ быдэстӥз. Кезьыт вуэн эшласьконзэ нош куспетӥ ӧз кар. Одӥг пол мечеть котырысь тылэн люкмесаз зымиз вал. Йырзэ вуысь поттыны вуиз гинэ - пельёсыз дортӥ маке но шуак! гинэ шуласа ортчиз. Синзэ усьтӥз но - азяз ик зыр зӧкта бодыен мулла сылэ... Кышкаменыз пияш бигеръёс сямен вӧсяськыны ӧдъяз... Сарапулын врач луыса ужатозяз, кӧня висисьёсты пӧртэм черъёслэсь бурмытӥз, мугоръёссэс кезьыт вуэн кыдатыны юрттыса. Ноку кылылымтэ врач-"морж" сярысь ивор быдэс ёросэ, отӥяз солэсь но кыдёке вӧлмиз. Странаысь медицинской академие но дышетскыны пырыны вуиз. Отысь тодосчи Саркизов-Серазини Николай Иванович доры огпол гинэ ӧз ветлы. Ужъёсыныз но кыдатӥськон амалъёсыныз рос-прос тодматскиз. Соос бератаз научной трактатъёсы люкаськизы. Таӵе эшласькон Саркизов-Серазинилы доктор но академик луыны юрттӥз. ... Кузё но куноос вискын вераськон азинске. Кезьыт комнатаын шунытгес луэ кадь. Ӝӧквыл журналъёсын, фотографиосын, документъёсын тырме. Николай Иванович Лушниковез, "морж" шуыса сяна, Коля-Бас шуыса но тодо на трос интыосын. Солэн туж кужмо гудыръясь куараез! Казань мединститутын дышетскон аръёсаз вуоно врач консерваторие но тодон-валан басьтыны ветлылэм. Нотаосты лыдӟыны но соосъя шудыны дышетскем. Тӥни ук роялез вылэ нотаосын альбомъёс люкен-люкен тырылэмын. Соос пӧлысь одӥгзэ басьтӥз, кыкетӥ яке куинетӥ бамзэс усьтӥз но, клавишаос вылэ вань чиньыосыныз зӥбиськыса кырӟаны кутскиз: "Много песен слыхал я в родной стороне. В них про радость и горе мне пели..." Фёдор Шаляпинлэн репертуарысьтыз яратоно "Дубинушка" кырӟанзэ... Борддоръёсы кужмо шуккиськыса, одӥгез бӧрсьы мукетыз чузъяськизы на Иван Сусанинлэн, Варягысь кунолэн, пересь Буршлэн но трос мукетъёсызлэн кырӟанъёссы. Пуштросъёссэс чик валатэк но бадӟым тунсыкен кылзӥм на ми пӧртэм псалмъёсты... Коля - Бас соосты трос аръёс ӵоже черкын кырӟалляз. Ялкарыку Николай Иванович милемлы юан сётӥз: "Тодӥськоды-а тӥ, малы толалтэ монэн пумиськылыны возьдаськылӥзы мынам тодмоосы - артистъёс, дышетӥсьёс, лекторъёс?.." Но ачиз ик валэктӥз: "Мон соослэн чыртыосысьтызы шарфъёссэс пертчылӥ но кисыосазы тырисько вал: куараосты но кыдатыны кулэ" *** Вазь ӵукна Иж тыметэ чорыганы мыныкум дугдоно луи "ӵындӥсь" люкмес вадьсы. Чорыганы пась портэмлэсь азьло уз лу меда, малпасько, отысь пичизэ ке но сюрсо урдэсозэ поттыны?.. Учкисько: люкмесын кыкез уя, кыкез черодзэ возьмаса сылэ. - Тол Бабай уг чепылля-а тӥледыз? - юасько соослэсь. - Чепылляны уз вуы... Вуын шунском. - ... Кӧняетӥ толзэ тазьы "шунскиськоды" ини? - юасько воргоронъёслэсь. - Туэ - куатетӥзэ ини... Нош милям Яхт-клубамы зэмос "моржъёс" но вань... Солохинъёс кадьёсыз... - Нош кылылэмды вань меда быдэс кунысьтымы тужгес пересез "морж" сярысь? Коля- Бас, шуо... Кам шур котырысь... Та кылъёсты вераса, кык эшъёс люкмесэ тэтчизы. Соослы киыным шонаса верай на: Коля-Баслэн вордскемез дырысен сю ар тырмысал та февраль нуналъёсы... Леонид Данилов. Ялон Редакцие тросэн вуо кыӵе ке школаен яке гуртэн пумиськонэ ӵыжы-выжыоссэс, бӧлякъёссэс ӧтьыса ялонъёс. Сыӵе гожтэтъёс газетэ дунтэк уг пото. Ялонэныды ӵош редакцие 30 манет дун тыремды сярысь квитанция ыстыны кулэ. Коньдонэз ыстоно "Удмурт дунне" газетлэн редакциезлэн расчётной счётаз. ИНН 1834300211 р/с 40603810300000010020 в филиале Газпромбанка в г.Ижевске БИК 049401853, к/с 30101810300000000853 ОКПО 13051252 ОКОНХ 87100. Москва-Удмуртия: кусыпъёс юнмало Туэ 19-тӥ апреле Правительстволэн кивалтӥсезлэн воштӥсез Николай Хохлов но Удмурт Республикаысь промышленностья куд-ог предприятиосын ужасьёс пумиськон ортчытӥзы Москваысь Восточной административной округлэн преффектураяз. Асьме республикаысь делегация отчы вуылӥз Москваысь Правительство но Удмурт Республикаысь Правительство куспын гожтэм огкыллэсь быдэсъяськемзэ эскерон вылысь. Ӵапак со документын пусъемын туэлы быдэстоно ужрадъёс. Соос 40-лэсь уно. Со ӵош ужась предприятиос кылдытон, пӧртэм пумо вузъёсын вожъяськон, сервисъя центръёсты азинтон. Та ужрадэ пыриськозы "Ижевский Мотозавод Аксион- холдинг" ОАО, "МЭМЗ-КУПОЛ" ФГУП, "Ижевский радиозавод" ОАО, "Сарапульское УПП", "Радиотехника ВОС" ООО, "Машиностроительный завод" ОАО, "Сактон" ЗАО, Сарапулысь но Камбаркаысь портъёс, мукет предприятиос. Озьы азинскоз вузъёсын ог-огеныд вошъяськон, юнманы кулэ экономика удысын ӵошен ужан. Пусйымон соиз: пумиськон дыръя планэн чаклам сярысь уногес ужрадъёс чакламын. Арня ортчыса Удмуртие Мсокваысь делегация вуоз. Удмурт Республикаысь Правительстволэн пресс-службаез. 1941-тӥ-1945-тӥ аръёсы Быдӟым Отечественной войнаын Вормон дырысен 55 ар тырмонэз пусъемен валче огпол коньдонэн юрттон сярысь Удмурт Республикаысь Кун Кенешлэн Президиумезлэн но Правительстволэн Постановленизы 1941-тӥ-1945-тӥ аръёсы Быдӟым Отечественной войнаын Вормон дырысен 55 ар тырмонэз пусъемен валче, Удмурт Республикаысь Кун Кенешлэн Президиумез но Правительство пукто: 1. Удмурт Республикаысь Калыкез улон-вылонын утёнъя министерстволы 2000-тӥ арын апреле огпол коньдонэн юрттэт сётоно Быдӟым Отечественной войнае пыриськемъёслы, котькудӥзлы 300 манет тырыса ("Ветеранъёс сярысь" федеральной законлэн 2-тӥ ёзэтэзлэн 1-тӥ люкетэзлэн 1-тӥ подпунктысьтыз "а"-"ж" подпунктъёс). 2. Удмурт Республикаысь Коньдон ужпумъёсъя министерстволы 3,3 миллион манет висъяно Удмурт Республикаысь калыкез улон-вылонын утёнъя министерстволы, коньдонэз тыроно республикалэн бюджетысьтыз планэн чакламлэсь мултэс басьтэм доходысьтыз. Удмурт Республикаысь Удмурт Республикаысь Кун Кенешлэн Правительстволэн Тӧроез А. А. Волков. Тӧроез Н. А. Ганза. Ижевск город, 2000-тӥ арын 10-тӥ апреле, 137/375. Кин ӝутоз колхозмес? Мынам вордскем гуртам, Филипповкаын, ваньмыз 15 корка вал, улӥз 100-115 мурт. 1931-тӥ арын вазь гужем нуналэ татын колхоз кылдытӥзы. Тӧромы туж визьмо, калык понна тыршись мурт вал Алексей Григорьев. Кандӥ Олексей дядяй шуылӥм сое. Колхозамы-гуртамы мар гинэ уг ужало, мар гинэ уг лэсьто - калыклы шумпотон вае вал. Нырысь аре ик 25 вал тэрымон коргид лэсьтӥзы. Пуктӥзы бадӟым экем. Отчы дасязы кутсаськон барабан, сое бергатон понна привод интыязы. Та агрегатэз уже лэзён - гуртамы туж бадӟым ужрад луиз. Гырон-кизён, ю тысь октон-калтон уж но каньылэнгес быдэсъяськиз. Соку араны ю тысь ӟеч кисьтэм бере пото вал. Сюрлоен-а, аран машинаен-а арало, ю-нянез культое кертто, суслонэ поныса куасьто, собере ини ана вылэ ик чумолёосы сюро. Чумолёосыз экем доры ворттыны уг дырто. Чумолёе ву уг сюры ю тысь уг сӧриськы. Колхоз тӧромы нылпиос сярысь но сюлмаськиз. Одӥг буш коркан со нылпи сад усьтӥз. 1934-тӥ арын гуртамы одӥг гужем куспын начальной школа вуттэмын вал. Та дырозь пичиос дышетскыны ветлӥзы Вуж Юмья но Ошторма Юмья гуртэ. 1935-тӥ арын мон но нырысетӥ классэ мынӥ. Выль школамы милям таӵе вал: куинь крестьян коркаез одӥг липет улэ пуктӥзы. Одӥг коркан - класс, мукетаз дышетӥсьмы улӥз, куинетӥяз сиён пӧзьтылӥзы. Вераллязы, со коркаосын азьло кулакъёс улӥзы. Ми шумпотылӥм: озьы ик кулэ вир юисьёслы. Ваньбурзэс талазы шуыса, бӧрысь гинэ тодӥ та коркаослэн кузёоссы сярысь. Соос нокинлэсь вирзэ юиллямтэ, нокинэ ултӥяллямтэ. Уен-нуналэн ужаллям, куанеръёс сярысь йӧногес улӥллям. Нош улон корказэс талам бере, трос курадӟиллям: пичи нылпиоссы, пересь анай-атайёссы сюрес вылэ кулыны сюриллям... Колхозын даслэсь уно уробоос, со мында ик дӧдьыос, вань кутсаськон машина, аран машинаос, кӧня ке тӧлӥськон машинаос. Соосты дуроно-тупатоно. Кулэ луиз дуриськон куала. Олексей дядяймы та уж борды кутскиз. Мусыр Миколаез - пинал воргоронэз - ыстӥз дуриськисьлы дышетскыны. Нош гуртлэсь палэнэ пуктӥзы бугро, интыязы гур, юнматӥзы кӧрык, артельлэсь одӥг вуж сандалзэ (наковальнязэ) ваизы, уробо питран дурон понна, котырес станок лэсьтӥзы. Кыӵе колхоз луоз, вукоез ке ӧвӧл? Олексей дядяй кытысь ке басьтэм вуж вуко. Сое гуртамы ваизы. Быдэс гуртэн адӟыны потӥмы. Нюлэскын утчаса шедьтӥллям туж зӧк кыз. Со кызлэсь лэсьтӥзы "заготовка" вуко выжлэн черсэзлы. Сӥзьыллы вукоез вуттӥзы. Та вакытэ ик Байзет шур сьӧры дӧдьы сюл куасэн, буко куасан станокъёс лэсьтыны чаклазы вал. Таиз малпанзы ӧз пӧрмы. 30-тӥ аръёсы, колхозамы сяна, гуртамы но бадӟым воштӥськонъёс мынӥзы. Тулыслы быдэ гуртмы бадӟым лэсьтӥськон интылы пӧрмылӥз: отын я татын бугро ӵупо, пул шыро. Та аръёсы вӧл-вӧл выль коркаос вуттӥзы Кӧрты Педор, Очай Сандыр, Кандӥ Олексей, Обран Педор, Исынбай агай. Нырысьсэ гуртамы куро липетъёсты пу липетъёсын воштӥзы. Вуизы ож аръёс. Та вакытэ улӥмы осконэн: война быроз, Сталин атаймы узыр, шудо улонэн сюрес возьматоз. ... Оже гуртысьтымы 24 воргорон кошкиз, сӧсырмыса но сӧсырмытэк бертӥз сизьымез. Ӧз берты колхоз тӧромы Кандӥ Олексей дядяй, ӧз вуы дораз дуриськись Мусыр Миколай дядяй, тӥр усточи Очай Сандыр кылиз ож бусыосы, азьвыл вукоын ужась Баймет Вася дядяй оже бырыны шедиз. Гуртмы сирота кылем гуртлы пӧрмиз. Бусыосты гыримы, кизимы. Сӥзьылзэ колхозамы одӥг кило ю тысь ӧз кельтылэ. Тулыс вань гурт калыкмес ыстӥзы Кукморое яке Шеморданэ ю тысь вайыны. 1940-тӥ, 1950-тӥ аръёсы гурт ужасьлэсь эриксэ талазы. Вуымтэ ю тысез калыклэсь кылзытэк октӥзы. Колхоз тӧромы соку потэм уполномоченной шуонлы пумит сылыны уг быгаты. Кышка "враг народа" луэмезлэсь. Арам ю тысь культоосын, оло, кӧня ке кисьмасал, дыр, но уполномоченной калыкез экеме кутсаськыны улля. Ю тысез кутсаса, куасьтыса, чылкытатыса уг вутто, Кукморое горд обоз келяно. Тӥни озьы мыдлань ужаса, ю тысь октон-калтон июле кутске, сӥзьыл лымы усьытозь кыстӥське. Будэм ю тысез но музъемен шори вылэ октӥськом. Гурт калык няньтэк кыле. Бӧрысьгес гуртмес мукет бускель гуртъёсын огазеяса, бадӟым колхоз кылдытӥзы. Филипповкаысь калык понна выль колхоз пайда ӧз вайы. Тракторъёс, комбайнъёс, Вуж Зумня гуртын интыяськизы, бадӟымесь пудо-живот фермаос озьы ик та гуртын, экем, куасьтонни озьы ик шор усадьбае интыяськемын. Кунмы колхозлы бадӟымесь кредитъёс сётэ техника басьтон понна. Таӵе кредит колхозникез сӧриз. Механизаторъёс чик уг утялто машиназэс гужем шорын гуртэ выль комбайн ваё, сое соку ик сӧро. Механизаторъёс доразы корт тӥрлык люкаллязы, собере вузазы. Лэсьтӥськон удысын ужазы палэнысь лыктэмъёс. Огдыре гурт калык уж ӧвӧлысь лушкаськыны дышиз. 1984-тӥ арын бадӟым "Заря" колхоз, райкомлэн дэмламезъя, Филипповкалэсь музъемзэ Казаньысь заводлы вузаз. Гурт калыкмы музъемтэк кылиз. Но Казаньысь завод но музъемо ӧз луы. Тани 15-16 аръёс ӵоже ини музъемез гырись-кизись ӧвӧл. Гуртмы ваньмыныз куштэмын, уж ӧвӧл, быдэ вуэмъёс уж утчаса палэнэ кошко, нылпиос ӧвӧл, школа ворсаськиз, сюрес ӧвӧл, пыжем нянен нимаз адямиос вузкаро. Быгатӥсьёс интыяськизы Кукморое, Полянае, Шеморданэ ужаны. Шумпотоно, соос асьсэды, семьяоссэс сюдыны- вордыны быгато. Одӥг нунал эшеным лыдӟимы - гуртамы 5 воргорон трактор басьтэм ини. Малпасько, та воргоронъёс, дыр вуоз, гурт котырысь тэк улӥсь музъемъёсты узыр анаослы пӧрмытозы. Удмуртиын коммунистъёслы оскисьёс трос. Соос шуо: Совето Союзэз, кужмо Атыкай музъеммес куашкатӥзы демократъёс. Нош мон тани мар верасал. Колхозлэсь кулэтэмзэ 1953-тӥ арын мыным валэктӥз бускель пи, куинь ар улыса, армиысь бертэм бераз. Ми кылпоттӥм та аре ортчем пленум пумысен. Со мыным вераз: "Дас ар ӵоже колхозын ужай. Тулыс нуналъёсы, тыбырам ныпъяса, 25 иськемысен ю тысь вайылӥ. Кызьы но ӧм курадӟелэ со сюрес вылын сӥзьыл зор ултӥ, дэри сюрес вылтӥ сютэм валъёсын горд обозэн монэ ыстылӥзы Кукморое ю тысен тырем уробоме мыным валлэсь тросгес кысконо луылӥз. Кызь аресам мон висись пересь муртлы пӧрми. Пленум уг гожты та курадӟеме сярысь. Со ассэ одӥг но янгышен уг лыдъя, пичи но уг ӧбкельы калыкез курадӟытэмез понна. Колхозын, 10 ар уен-нуналэн ужаса, мон одӥг манет тыр но уждун ӧй басьты. Озьы ке но нуналлы быдэ мынэсьтым пумтэм налогъёс кысказы. 10 ар ӵоже колхозын ужакум, кӧня нунал ӵоже мон кӧттыр сии медам? Огпол но ӧй, дыр. Сютэмен кулӥз мынам пичи выны. Та улон сярысь пленум кыл уг потты. Малы?" 1972-тӥ арын Тула городын партийной ужасьёслэн музъем ужъя семинарзы ортчиз. Татын ушъяськизы: Тула областьысь гурт калыклы юртто городын улӥсьёс: вошто скал кыскисьёсты но, кыед кыскасьёсты но, мукетъёссэ но. Таӵе ужпумез кин ке но ушъяз, нош тросэз валазы: колхозлы пум вуиз. Со озьы ик луиз. Иське, демократъёс татын янгыш ӧвӧл. Е. Степанов. Кукмор ёрос, Филипповка гурт. ЧАКЛАЛЭ Киосты сюрмо ке Сӥзьыл вуэмен валче, нылкышно киослы трос уж люкаське, емыш, картошка миськонэн- сузянэн валче. Соин ик ӵемысь киосысь ку сюроме, куасьме, пилиськылыны ӧдъя. Сыӵе дыръя ӵекто киосты 10 минут картофка пунемын возьыны, собере уксус будэтэм вуэн гылтоно. Гырезь картошкаез вуштыса, кӧня ке чечы будэтоно, яке лимон, кубиста сок будэтыса зырано. Киез небӟытэ озьы ик сема вӧй яке сезьы кисаль, кубисталэсь пызьыртэм ву. Удмурт Республикаысь Быръёнъёсъя комиссиын ужасьёсты юнматон сярысь Удмурт Республикаысь Кун Кенешлэн ПОСТАНОВЛЕНИЕЗ Федеральной Законлэн "Россия Федерациын улӥсьёслэн быръён правооссы но референдуме пыриськыны правозы сярысь" 23-тӥ ёзэтэныз валче Удмурт Республикаысь Кун Кенеш пуктэ: Удмурт Республикаысь Быръёнъя комиссие юнматоно таӵе муртъёсты: Вавилов Михаил Юрьевичез, вордскемын 1975-тӥ арын, дышетскемез вылӥ, Удмурт Республикаысь Кун Кенешысь правоя управлениезлэн кивалтӥсезлэсь воштӥсьсэ, Ижевск город, Коробейников Виктор Николаевичез, вордскемын 1952-тӥ арын дышетскемез вылӥ, "ИЭМЗ "Купол" ФГУП-лэн 074-тӥ управлениысьтыз правоя отделлэсь кивалтӥсьсэ, Ижевск город; Пиликин Андрей Викторовичез, вордскемын 1976-тӥ арын, дышетскемез вылӥ, "Республика" юридической агентстволэсь кивалтӥсьсэ, Ижевск город; Пчельников Георгий Сергеевичез, вордскемын 1950-тӥ арын, Удмурт Республикаысь Быръёнъя комиссилэсь секретарьзэ, Ижевск город; Талантов Дмитрий Николаевичез, вордскемын 1960-тӥ арын6 дышетскемез вылӥ, Удмурт Республикаысь адвокатъёслэн коллегизылэсь кивалтӥсьсэ, Ижевск город; Шкляев Андрей Васильевичез, вордскемын 1977-тӥ арын, дышетскемез вылӥ, та дыре уг ужа, Ижевск город. Удмурт Республикаысь Кун Кенешлэн Тӧроез А.А.Волков. Ижевск город, 2000-тӥ арын 18-тӥ апреле. � 170-ИИ. Вормонтэмзэ но вормоз Армиын службазэ йылпумъяса, Саша уж утчаса кема ӧз шонаськы. Эшъёсызлэн ӵектэмзыя, тылпу кысӥсьёс доры мынӥз. Солдат дӥсен пияш чурыт куронъёслы дышемын, мугорын сӥльвир шудэ, шуг-секытъёсты, егит ке но, адӟемын-чидамын. Самой кулэ итыяз сюриз кадь. Со дырысен тани 21-тӥ арзэ А. А. Костров Ижысь Устинов ёросэз тыллэсь уте-чакла. Нырысетӥ куинь арзэ со огшоры тылпу кысӥсь вал. Кӧня меда ӝуан учыръёс пыр потӥз - лыдъямын ӧвӧл. Соос пӧлын вал туж секыт нуналъёс но, ӵемысь ужано луылӥз противогазэн. 1982-тӥ арын Костровез юнмато отделенилы командире, туннэ но со та ужез быдэсъя. Тамында ар ӵоже, валамон, Александр бадӟым специалист луиз ни. Солэсь верамзэ санэ басьто егит эшъёсыз но, кизили погонъёсын адямиос но. Та верам борды будэтоно на, Александр яратэ радлыкез, улонысь, нырысь учкыса, адскисьтэм нюжаос но солэн син шораз йӧто. Костров сярысь верало, уй-нунал ужаны, пе, дась, вал кадь ваньзэ вормоз- нуоз. Чернобыль атом станция пуштэм бере, солэсь бервылъёссэ утялтыны А. А. Костровез но ысъязы. Отысь "За спасение погибавших" медален берытскиз. 4 ар талэсь азьло частьысь устозэ тылпу кысӥсез караулэн кивалтӥсьлы юрттӥсе юнмато. Таиз ныпъет но Александр понна вормымон. Ф. Гиляев., тылпуэн нюръяськонъя 4 номеро частен кивалтӥсь. Ильяпи гуртысь, Ӟатча выжыысь Валера пичиысен кин луон сярысь ӧз малпаськылы. Малы ке но сыӵе малпан но йыраз ӧз шуккылы. Эшъёсыз сьӧрын кыӵе ке костаськись пуллэсь пыӵал нерге лэсьтэмен войнаен шудылӥз. Бен, со вал огшоры шудон гинэ. Бератаз арлыдъёс лыктэмъя пичи дырысь та учыр визьзэ ӵемысь поръялляз: "Малы ай татчыозь весь войнаен шудӥсько?" Улон со улон. Юри малпаса но кытӥяз кулэезъя уг пӧрмы, куддыр номыр шоры учкытэк кулэ ӧраз со вуттэ. Игра ёросысь Ильяпи гуртысь Валера Шкляевлы повестка сётӥзы - армие дасяськоно. Гуртысь нокытчы потамтэ удмурт пияш ортчыт шумпотӥз. Нырысьсэ поездэ пуксиз. Армиын нырысьсэ самолётэн ӝутскиз - косӥзы тэтчыны. Тэтчиз! Кӧня ке дышетэмзы бере десантникез келязы афган оже - Фарах провицие. Малпаз-а меда со 50 градус пӧсь азьын ар но ӝыны улоз шуыса. Но пӧсьлы солдат чаляк дышиз. Самой секытэз вал - мӧзмон, таиз ӟырдам омырлэсь но золгес куасьтӥз. Но мӧзмыса гинэ улысалыд ке. Гурт сярысь тодэ ваёнъёсты куспетӥ карылӥзы ӟырдыт ожъёс. Одӥгаз учыре душманъёс Шкляевлэсь эшъёссэ гурезь нёжалэ ӝиптӥзы. Тани соос адӟисько ни, ӝоген моджахедъёс гольык киын кырмозы. Кызьы юрттоно? Миномётэн ыбылон ӵошкыт инты ӧвӧл. Нодзэ шедьтӥз ик удмурт пияш. Пырак тушмон вылэ минаоссэ ыбылӥз. Ӝоген батыр солдатлэн гадь вылаз "Горд кизили" орден бырттӥзы. Афган суредъёс уйвӧтъёсысь ӧз кошкылэ на, Шкляев мукетаз оже, тылпу кысонэ, вамыштӥз. Зэм, талэсь азьвылгес утчаз ужаса Игралась нефтникъёс дорын. Ужез кампет ӧй вал. Но нуналысь нуналэ огинтыын гудӥськон мудӥськон выллем йӧтӥз, лэся, - мӧзмыт. Тылпу кысонын котькуд нунал пӧртэм. Уд тодӥськы, мар луоз ӵуказе, солэсь улыса. - Ма, войнаен шудонлэсь таки уг ӵыдӥськы, - серекъя Валерий Геннадьевич, - ӵошкытэсь тӧдьы пиньёссэ возьматыса, - адӟонэ сыӵе лэся. Шонерзэгес вераса, сямы сыӵе. Та силё-виро пальпотӥсь воргоронэн каньыл ваче пукыны. Со бордысь адскисьтэм бадӟым кужым пачыла, задор мылкыдыныз вӧзысьтыз адямиез но бурдъя. - Уже кельше, - шуэ Шкляев. - Ас сяменыз котькуд тылпу секыт, кытӥяз пичи тылпу но туж жуммытэ. Тужгес но кышкытэз, куке адямиос быро, номыр но карыны уг луы ни ке. Быгатӥськод ке дыраз юрттыны, быронлэсь утьыны, жадемез но валано ӧвӧл ни. Нош тау ке шуо, тужгес но пересьёс, йыр ик ӝутске, лобам потыны ӧдъя. Тылпу кысконын Валерий Шкляев 14-тӥ арзэ ни тырше, со пӧлысь 10 арзэ Ижысь 2 номеро частьын, 8 ар ӵоже караулэн кивалтэ, та удысъя нимысьтыз дышетскиз Свердловскын (Екатеринбургын). Кӧня тылпу пыр потӥз ни майор Шкляев, кӧня адями куркетонэн пумиськиз - лыдъямын ӧвӧл. 500-лэсь уно люкаськоз, шуэ. Тани одӥгез гинэ соос пӧлысь - 13-тӥ апреле вазь ӵукна"тревога" сётӥзы. Одӥг минут но ӧз ортчы, караул сюрес вылын ни вал. Ӝуаны кутскиллям Удмуртской ульчаысь 229 номеро юртлэн пу кладовкаосыз. Корка вуж, 5 этажъем, 4 подъездэз, квартираосын пу висъетъёс. Подвалысь бугыр ӵын потэ. Куд-огез адямиос балконэ потӥллям ни, тубат кузя васькытъям. Нош беромыса ке ивор вуысал, кӧня мурт воньдысал ӵын пушкын. Уд но тодӥськы, кыӵе тӥрлык возиське гулбечын - пырод но пуштылыны кусткозы газ баллонъёс, яке мукет ӝуась арбериос. Таӵеез но луылэ. Соин ик котькуд нунал ожын кадь. Уд тодӥськы, ма вите ӵуказе. Г.ЮСАЕВ. 30-тӥ апреле - тылпу кысӥсьёслэн нуналзы Кайгу нюлэскын уг ветлы, адямиос пӧлын Тылпуэз каньылгес алыны, секытгес сое кысыны Удмурт Республикаысь Югдурез утёнъя министерстволэн Тылпу кысонъя кун управлениеныз 15 ар ӵоже валаса-быгатыса кивалтэ полковник Михаил Григорьевич Камалетдинов. Та удысын со 45 ар ӵоже тырше ни. Ужысьтыз секыт югдурез возьматыса, тырмымтэосты адӟыса-вераса, со улон шоры лекен уг учкы. Шуг-секытысь но потон сюрес адӟе. Тыл - адямилэн эшез, юрттӥсез. Нош соин чакласькытэк выриськод ке, кема ик ӧвӧл, лек тушмонлы со пӧрме. Миым республикаямы 2540 пол тылпу потаз, 20,8 миллион манетлы ваньбур шупчиз. Тыл пушкын 132 адями бырыны шедиз, 163-ез эмъяськоно луиз. Тылпуын 900-лэсь уно юрт сутскиз, мукет сямен вераса, шорлыдын, 4-5 гурт ышиз-быриз. Озьы - уно аръёс ӵоже адямиослэн люкам ваньбурзы пеньӟиз, ӵуказе нуналлы осконзы тӧлӟиз. Тылпуын 228 йыр пудо быриз, 76 машина-трактор сутскиз, 624 тонна пудо сиён ӝуаз. Шаерамы укыр шимес тылпуос миым, ярам коть, ӧй вал, Сарапул ёросысь Ельниково нефть кыскон интыез вератэк - соиз сярысь нимаз вераськон. Вань шумпотымонэз но. Материальной база кылдытонмы Россиын нырысьёсыз пӧлын йылпумъямвн, шуыны луоз. Миым выль депо пуктэмын Якшур-Бодья черкогуртын. Кемалась ик ӧвӧл Кезысь ттылпу кысӥсьёс ӵыж выль чебер юртэ выжизы. Тылпу кысон техникаез тупатъян-выльдонын нырысетӥ итые потэмзы понна Удмуртиысь тылпуэн нюръяськонъя управленилы кузь тубатэн автомобиль вутӥзы Ижысь механической завод (кивалтӥсез Василий Чугуевский) но Глазовысь ликёро-водочной завод (кивалтӥсез Николай Сорокин) - котькудӥз быдэн автоцистерна. Тылпу кысӥсьёслы ӟеч юрттэт сёто интыысь администрациослэн кивалтӥсьёссы но, республикалэн вылӥ адямиосын но. Тани бюджетын туэ нимысьтыз пусъемын тылпу кысон техника басьтон пумысен. Кутсконэз понна мед луоз со коть одӥг-кык, умой ини соиз - йӧ интыысьтыз вырӟе. Экономикаын югдур секыт ке но, валало, пожарнойёс вылын шыръяд ке, эшшо но бадӟымгес изъян адӟод. Тылпу кысӥсьёс "Вихрь-антитеррор" ужрадэ но мылысь-кыдысь пыриськизы, улон юртъёсъя управлениен огкылэ вуыса, ваньмыз сямен гулбечъёс но корка сигъёс тунгонамын. Озьы одӥгез кышкытлык кулэсмиз. Мурӝол-подвалъёсы уго олокыӵе но калгись адямиос, нылпиос укылтэмъяськыны пыро. Татысь потэм тылпу уно адямиосты быронэ вуттыны быгатоз. Оглом быдэс Россиен ӵошатыса, лыдпусъёс сокем уродэсь ӧвӧл кадь. Ми 7-тӥ интыын мынӥськом тылпуэз ӝог кысон ласянь. Огъя страная та лыдпус 1 час котырын, нош Удмуртияя со 31 минут луэ. Озьы ке но буйгатскыын вазь на. Вылаз ик туэ Азьдага кыйлэн (Драконлэн) арез. Соин ик милемлы котькыӵе югдурлы дась луоно. Сое возьматэ туэ 3 толэзь ӵоже ужаммы но. Та дыр куспын шаерамы 466 пол тылпу потаз, 2 миллионлэсь унолы ваньбур сутскиз, 47 адями бырыны шедиз. Улон возьматэ, тылпуосын адямиос ӵын-сурымен ӝокало, собере гинэ сутскыны шедё. Тылпуос кемаласен ини неномырин верантэм бадӟым куректон-кайгу ваё. Озьы ке но, та ыштонъёс сярысь малы ке туж чаляк вунэтӥськом. Куд-ог предприятиослэн, хозяйствоослэн кивалтӥсьёссы тылпуэз алонъя ужрадъёс но уг чаклало. Малпало лэся, "горд атас" солэн азбараз уз поръя. Нош со уг чакла, кин узыр, кин куанер, кытын "пась", отчы ик "йырзэ" чуртна. Ӝыныез мында тылпуос кылдо адямиослэн та ужпум шоры чиньы пыр учкеменызы, тылэн чакласькытэк, шудыса кадь выременызы. Чылкак паймытэ калыкмылэн тылпуэн кызьы нюръяськыны тодымтэез. Гурт хозяйствоос выльдӥськемъя тылпулэсь утиськонъя татысь служба но лябомиз. 840 пӧртэм эштосъёс но огазеяськонъёс пӧлысь 230-аз гинэ тылпуэз кысон техника вань на. Со пӧлын но, жаляса верано, я водительёссы, я машинаос эстӥськонтэк сыло. та ласянь пусйыны луоз Можга ёросысь "Россия" колхозэз. 2 машиназы котьку дась вырӟыны. Эскерон-чаклан ужзэс аналтыны кутскизы гурт удысъя министерство, "Удмуртлес" огазеяськон но куд-ог мукетыз. Сюлмаськыто бытовой техникаен герӟаськем тылпуос. Тужгес кышкыт та ласянь вуж маркаё телевизоръёс. Отын трос ӝуась интыосыз. Кизнер ёросысь Ягул посёлокын "Изумруд" телевизорзы уродмыса кенжиз но 2 адями бырыны шедиз. Таӵе шимес учыре вуттӥз огшоры куронъёсты тодымтэен. Кызьы адӟиськоды, тылпу со пожарнойёслэн гинэ ужзы ӧвӧл, со бадӟым социальной ужпум. Ыштонъёсты манетэн гинэ уд лыдъя. Коньдонэн мерталод шат адямилэсь куректонзэ, солэсь улонзэ. 6 ар талэсь азьло Кун Дума кутӥз вал "Тылпулэсь утиськонъя федеральной закон. Вераны кулэ, та документ кулэезъя уг ужа. Югдур умой пала уг вштӥськы, ӝоген уката но уродме. малы ке озьы луэ, адямиос огдышем сямзылэсь уг куштӥсько, вужмем малпанъёсын уло, огъя ванбур понна кивалтӥсьёслэн сюлэмзы уг висьы, ваньмыз шоры чиньы пыр учко, лякытэн гинэ улыны тыршо. Таӵе адямиосын секыт вераськыны, экономикая, техникая, правоя ужпумъёсты эскерыку. Тылпу кышкытлык ласянь асьме шаерамы Россиын одӥгез кышкытэз луэ. Кизнерысь но Камбаркаысь хими ож тӥрлыкен тырмытэм складъёсты ик вераса - йырси пештырске! Нош нефтебазаос, пӧртэм эстӥськонэн складъёс, газ но нефть кошкись гумыос - вань шаерамы соосын кечат-вамат гожмамын ук. Тодмо луэ, котрлэн дырыз 30 ар. Сыномон (коррозия) арлы быдэ 1 милиметр солэсь зӧкталазэ "сие". Нош нефть н газ гумыос 10-15 мм зӧкта. Озьыен, котькуд нунал кышкытлык кылдэ. Витьыса гинэ ул, кытысь-марысь секыт ивор вуоз. Таӵе югдурен тылпуослэн лыдзы кулэсмоз шуыны, астэ гинэ буйгатон-алдан луэ. Тужгес сюлмаськытэ гуртъёсысь нимаз адямиослэн юртъёссы. Соос уго ваньмыз сямен корлэсь-пулэсь ӝутэмын, чаляк кенжо. Ӝог ивортыны кытӥяз уг пӧрмы, я телефон уг ужа, я со чик но ӧвӧл. Куддыръя ульчаос но ортчыны луонтэм: я коръёс пазямын, я сюрес шорын ик бугро ӵупо, я мукет лэсьтӥськон материал костаське. Вунэто адямиос ву дасяны но. "Горд атас" кокчалтэ но ма карыны ёрме. Отчы-татчы бызьылытозь тыл быдэс юртэз "нюлыштэ" ни. Та пумысен вунэтоно ӧй вал азьло кутӥскьис ӟеч амалэз. Котькуд корка сэргы юнматылӥзы нимысьтыз пусъёс, кинлы ма кутоно, тылпу потыку: лопата, ведра, лом, багор но мукет... Гырлы жугонэз но вунэтоно вылымтэ, калыкез со ӝог люка, нош радио пыр ивортонэз, оло, кылозы, оло, уз ай. Шоркарез ке басьтоно, тылпу ӵемгес юмша Ленин ёосын. татын уго тужгес уно пу коркаос, ог-огзы борды лякиськем кадь артэ сыло. Тани одӥгез берлоез учыр. 1-тӥ апреле Балезинской ульчаысь Коньковлэн хозяйствояз тылпу потӥз. Пожарнойёс вуытозь кык этажъем улон корка но азбарысь мукет юртъер тылэн бастэмын ни вал. Но юрт кузёез утизы. Тылпуэз кысыку, корка сигын пожарнойёс мырӟиськизы бутыльёс борды. Лыдъязы - 25 посуда, котькудӥз 200 литр олифаен тырмытэмын. шурдыт малпаны ик! Со кенжысал ке, тылэд шукыръяськысал зарезьысь тулкым кадь. Дыраз вуттӥзы утялтыса. та районын ик со выллемгес учыр вал кылем арын. Тыллэсь утьыны выризы сандык кадь чебер, бадӟым, дуно юртъерез. Нош азбараз 200 литр бензин но 200 ящк спирт. Нош таӵе кизер ӝуась арбериез ву но уг вормы, со понна нимысьтыз тыл кысӥсь шукы кулэ. Миым быдэс ар ӵоже Ижысь Ленин ёросэз вылӥысен чакласа-эскерыса возим. Озьы тылпуэз алякуз ик сактоно но ӝоггес кысыны луоно. Мукет интыосын но, кылсярысь, райцентръёсын, таӵе амаллэсь куштӥськоно ӧвӧл. Удысамы шуг-секытъёс уно. Югдур тужгес секыт тылпу кысон техника ласянь, кулэезлэсь со ӝыныез гинэ вань. Со пӧлысь но куиньмос люкетэз ужан дырзэс кык пол- куинь пол ортчемын. Чакламъя шаерыс тылпу кысӥсьёслы кулэ али 36 автомобиль-тубат, нош милям со 19 гинэ, ваньзылэн дырзы ортчемын ни. 170 иськем ву сётон-чизъён гумыос (рукава) ке кулэ, милям со чылкак 3 гинэ. Ёрмыса улӥськом эстӥськонлы, вӧйлы - озьы кышкытлык кылдэ тылпу кысонэ дыраз потыны-вутыны. Воштос ёзъёс утчан, шукы кылдытӥсь тӥрлык, тылпу кысон дӥськут - уй-нунал йырвисёнмы. Шуг-секытъёсын сэрен суй-пыдмы уг юскиськы. Ялан маке но выльзэ утчаськом, азьлане вамыштыны тыршиськом. бадӟым юрттэт сёто Воткинск, Можга, Глазов городъёсысь, Алнаш, Воткинск, каракулино, Красногорск, Сюмси, Юкаменск, Яр районъёсысь администрацилэн кивалтӥсьёссы. Шуныт куазь вуэмен сюлмаськонъёсмы йыло. Гужемез котькудмы ӟеч мылкыдын гинэ мед ортчытысалмы. Со понна предприятиослэн, организациослэн, гурт возёсъёслэн кивалтӥсьёссылы тодазы вайытэм потэ, тылпулэсь утиськонъя кыл кутонзы пумысен чик ӝегатскытэк али ик палэнтоно тылпулы сюрес сётӥсь тырмымтэосты, ваньзэ дасяно "горд атасэз" "кортнан" вылысь. Городъёсын но районъёсын со понна кулэ: - юртъёсты, техникаез, мукет тӥрлыкез утёнъя ужрадъёсты ӝегатскытэк быдэстыны; - гуртъёсын, предприятиосын уй-нунал дежурство радъяны; - улон интыосын но тэльёсын тылпуэз кысонъя механизированной отрядъёс кылдытыны; - эстӥськон но вӧй, тылпу кысон тӥрлык, нимысьтыз дӥсь но кема кыстӥскьись тылпуосын нюръяськонлы сиён-юон дасяны; - гуртъёсын телефон герӟетэз умоятыны; - тыметъёс, шуръёс доры нуись сюресъёсты тупатъяны, ву возён башняосты тылпу кысон машинаослы ву сётонлы пӧрмытыны; - электроен ужась тӥрлыкез, электросетьёсты тупатъяны-выльдыны; - кулэ интыосы огнетушительёс, вуэн тырмытэм бекчеос пуктылыны, тылпуэз алонъя но соин нюръяськонъя дышетсконъёс ортчтыны. - Улон интыяды тылпу потӥз ке, соку ик "01" телефонъя пожарнойёслы жингыртэ. Соос вуытозь нылпиосты но пересьёсты ураме поттэ. Тылпуэз тырше ас кужыменыды кысыны (вуэн, юн материалэн возъяса, огнетушителен). Тыл вӧлме омырын, соин ик укноосты но ӧсъёсты усьялэ. Асьтэ коже тылэз ӧд ворме ке, ӝуась интыысь ӝегатскытэк кошке, ӧсэз пытсаса кельтэ. Туэ 3 толэзь ӵоже шаерамы потам тылпуос тылпуослэн лыдзы 2000 ар кылем арын та вакытэн ӵошатыса (будэмын+,кулэсмемын -) Тылпуослэн лыдзы 466 - 59 Изъян адӟемын, сюрс манеэн 2438 - 4144,6 Адямиос быремын 47 +5 Соос пӧлын нылпиос 4 +1 Эмъяськыны келямын 31 - 13 Тылпу потаз таӵе интыосын: поизводствоын 29 0 вузкаронын 11 - 6 дышетскон интыосын 5 -4 нылпи учреждениосын 1 0 культура юртъёсын 2 -1 эмъяськон интыосын 4 -2 административной учреждениосын 13 +2 гурт хозяйствоосын 7 - 4 али лэсьтӥськись объектъёсын 2 0 ведомствое пырись улон юртъёсын 155 -13 нимаз адямиослэн улонюртъёсазы 190 - 4 сад-бакча коркаосын 14 -8 транспортын 21 -11 Тылпу потаз таӵе муген юри ӝуатэмын 31 -12 технология янгышен 8 0 электрооборудование 119 - 42 котырысь электроприборъёс 30 -19 Сваркаен герӟаськем ужъёс 7 0 ас кожаз кенжемын 1 - 1 гурен эстӥськон 69 + 9 газэн ужась приборъёс 6 - 5 чакласькытэк тылэн вырон 177 0 тамак кыскон 95 - 8 нылпослэн укылтэмъяськемзы 32 + 6 вина юон 98 - 2 Сутскемын юртъёс 81 - 29 пудо (йыр) 34 + 8 пужо сиён (тонна) 14 + 5 техника 4 +3 Утемын адямиос 35 - 44 пудо (йыр) 681 + 347 техника 51 + 17 ваньбур, сюрс манетэн 23296,8 - 32828,8 Вакчияк Шаерысь тылпу кысӥсьёслэн радазы 2 сюрс пала адями тырше Кылем арын управлениысь 41 пожарнойлы орденъёс но медальёс сётэмын. 10-эз соос пӧлысь Мужество орденэн пусъемын. *** Уноез тылпу кысӥсьёс спортэн выо. Тужгес но татын вӧлмемын ыбылӥськон, дзюдо, капчи атлетика, куасэн бызьылон. Нош нырысетӥ иинтыын, валамон - пожарно-прикладной спорт. *** Коллективын гажаса верало подполковниклэсь С. М. Дьяконовлэсь нимзэ. Тылпуосты алон удысын со бадӟым специалист. Балезино посёлокез утись 26 номеро частен кивалтэ полполковник С. М. Дьяконов. Солэн кллективез республикаямы одӥгез азьмынӥсез луэ. Тылпу кысонъя техникаез выльдонлы синмаськымон тырше бригадир Николай Копысов. Тужгес секыт, мудрон ужъёсты оско Геннадий Быстровлы. Зарни киё мастерлэн кибервылыз синучкон кадь вольыт. Ижысь 4 номеро частьын ваньмызлы адӟем карымон луэ тылпу кысонъя отделенилэн командирез старшина А. П. Елхов. Можгалась 7 номеро частьын синмаськымон тыршо майор А. М. Анкудинов, инженер А. Ф. Лаптев, караулэн кивалтӥсь стршой лейтенант Э. Н. Ильин. Вормонлы - 55 ар Ветеранъёсты данъяса "Буммаш" АО-ысь ветеранъёс пӧлын война аръёсысьёсыз туж ӧжыт кылемын ни: 53- ез - оже пыриськемез но 290-эз - заводын ужамез. Сюлмысь ӟечкыласа, куноятыса, быремъёссэ буре вайыса - тазьы гинэ тау карыны быгатӥськом на соослы. Май нуналъёсы акционер огазеяськонын сӥё-дано ужрадъёс ортчозы. Ветеранъёсты ӟечкылалозы заводысь кивалтӥсьёс, пофсоюзысь адямиос но мукет мылкыд карисьёс. Соос понна дасямын концерт, саламъёс. "Буммашын" ужасьёс пыриськизы митинге, Север шай вылэ гирляндаос, сяськаос тырон ужрадэ. Татын ватэмын война аръёсы Ижевскысь госпитальёсын кулэм ожгарчиос. Вормонлы 55 ар тырмонэз пусъён понна, та предприятие Ижысь Индустриальной ёросысь ветеранъёслэн огазеяськонзылы 10 сюрс манет висъяз, сӧсыръёслэн обществозылы - 6 сюрс но М. Т. Калашниковлэн музеезлы - 33 сюрс манет. В. Сенчёнок. ПРАВИТЕЛЬСТВОЫСЬ ИВОРЪЁС Куноын - "Росвооружение" Асьме республикаын 23-тӥ-26-тӥ апреле ужаз "Росвооружение" кун компанилэн делегациез. Соин кивалтӥз предприятилэн генеральной директорезлэн воштӥсез Анатолий Аксенов. Вордӥськонэ ӵукна Правительстволэн юртаз совещание ортчиз. Отын эскеремын асьме республикаысь оборонно-промышленной комплекслэн предприятиосызлэн "Росвооружение" кун компанилэн 2000-тӥ-2001-тӥ аръёслы чаклам программаезъя мукет странаосын военно-технической удысын ужамзы. Со нуналэ ик Москваысь куноос Сарапулэ вуылӥзы но "Сарапульский радиозавод", "Элеконд" но "Сарапульский электрогенераторный завод" акционер огазеяськонъёслэн кивалтӥсьёсынызы вераськонъёс нуизы. "Росвооружение" компаниысь делегация вуылыны чакла "Ижевский электромеханичекий завод "Купол" предприятие, "Воткинский машиностроительный завод" кун огазеяськонэ. Озьы ик лыктэмъёс тодматскозы "Ижмаш" но "Аксион" акционер огазеяськонъёслэн, "Ижевский механический завод" кун предприятилэн поттэм нимысьтыз техникаенызы. Азьпалан - каникулъёс 24-тӥ апреле Правительстволэн президиумезлэн кенешез ортчиз. Отын эскеремын пиналъёслэсь но быдэ вуымтэослэсь каникулъёссы дыръя шутэтсконзэс но тазалык юнматонзэс радъянъя ужпумъёс. Пиналъёслэсь но быдэ вуымтэослэсь кызьы шутэтсемзэс чаклан вылысь, Правительствоын кылдытэмын нимысьтыз комиссия. Соин кивалтэ Правительстволэн кивалтӥсезлэн воштӥсез Виктор Шудегов. Комиссия ужалоз нимысьтыз дасям положениея. Правительстволэн Тӧроез Николай Ганза постановление куд-ог воштонъёс пыртыны куриз. Соос герӟаськемын шутэтсконэз радъянэ бадӟым промышленной предприятиосты кысконэн. Музейлы - Куӟебай Гердлэн нимыз Правительстволэн постановлениезъя Удмурт Республикаысь Национальной музейлы сётэмын Куӟебай Гердлэн нимыз. Кортэз - лицензиен Республикаысьтымы андан ӵыжатонъя но машинаос лэсьтонъя ёзъёслэсь ужзэс умоятон вылысь Правительстволэн постановлениезъя городъёслэн но ёросъёслэн администрациоссылы дуно но сьӧд кортъёсты дасянъя план юнматэмын. Предприятиослы но администрациослы корт вузан пумысен огкыл гожтоно сыӵе предприятиосын, кудъёсызлэн вань дуно но сьӧд кортъёсты дасяны лэзён сярысь Удмурт Республикаысь промышленностья но транспортъя министерстволэн лицензизы. Гуртлы юрттэт Вавож ёросысь "Удмуртия" колхозлы картофкаез выль амалэн будэтонъя техника басьтыны 1370 сюрс манет коньдон висъямын. 100 сюрс манет сётэмын Можга ёросысь "Ленинский путь" кооперативлы. Татын кылдытӥське ӟеч выжы картофка кидыс дасянъя хозяйство. Азьланяз со кидысэз вӧлмытыны чакламын Удмуртилэн лымшор ёросъёсаз. СПИД-эз кортнано Глазовын шараямын СПИД висён. Городэ вуиз ВИЧ-инфекция нуллӥсь Москваысь наркоман. Со татысь наркоманъёсын герӟаськиз но уно адямиослы висёнзэ "кузьмаз". Кызьы кортнано паласькись висёнэз? Та ужпум эскеремын республикаысьтымы Правительстволэн санитарияя но эпидемилы пумит нюръяськонъя комиссилэн кенешаз. Югдурез утёнъя министрестволы ӵектэмын вирсэразы наркотик лэзьясь адямиосты шараяны. Тазалыкез утёнъя министерстволы ӵектэмын "Анти-ВИЧ/СПИД" программаез быдэсъянъя ужез кужмоятыны. Комиссилэсь ужзэ нуиз Правительстволэн Тӧроезлэн воштӥсез Виктор Шудегов. Президиумын эскеремын куд-ог мукет ужпумъёс но. Удмурт Республикаысь Правительстволэн пресс-службаез. ШӦКЫЧ Верасько нылпиос Куакаос кинлэн? Песянай пичи внукеныз Петяен городысь гуртэ бертэ. Дор палъёсазы матэктыса, пиёклы вазиське: - Пети, учкы! Тӥни отын, гурезь йылын - асьмелэн гуртмы, соиз - асьмелэн возьёсмы, отын скалъёсты возьмало, нош таиз - асьме бусы. Со вакытэ бусые куака уллё пуксе. - Песянай, песянай, нош тылобурдоос кинлэн, асьмелэн ик-а? - юа Петя. Вож эшмы - Пиналъёс, туннэ асьмеос гожтом диктант, - вераз дышетӥсь. - Гожтэ йыръянзэ: "Нюлэс - асьмелэн вож эшмы". Ваньзы гожъясько. Одӥгез дышетскись кизэ ӝутӥз. - Мар вералод, Вася? - юаз дышетӥсь. - Нош атай шуэ, вож эшмы - доллар. Г. Бӧчыева. Можгинскому ветеринарному - 70 лет "Медицинский врач лечит человека, ветеринарный врач - человечество" (И. П. Павлов). Ветеринария - одна из самых древних, гуманных и благородных профессий. Современная ветеринария представляет собой комплекс наук. Она изучает строение и функции животного организма, методы распознавания болезней животных, способы их лечения, меры по предупреждению заболеваний. Ветеринарные специалисты дожны хорошо знать вопросы кормления, содержания и ухода за животными, экономики сельскохозяйственного производства и ветеринарии. Ветеринария играет огромное значение в охране здоровья человека. На специалистов данной отрасли возложена функция проверки на доброкачественность всех пищевых продуктов, поступающих для продажи на рынок, качества мяса и мясных продуктов, вырабатываемых мясокомбинатами. Не допустить в пищу продукты от больных животных - важная задача ветеринарных врачей и фельдшеров. Помимо этого многие болезни животных могут передаваться людям при уходе за ними. Предотвратить заболевание людей болезнями, передающимися от больных животных, - гуманная миссия ветеринаров. Поле трудовой деятельности ветеринарных специалистов очень широкое. Основной отряд трудится в колхозах, совхозах и ветеринарных учреждениях. Без ветеринарных специалистов нельзя представить современные мясоперерабатывающие предприятия - мясокомбинаты, консервные и колбасные заводы; хладокомбинаты, кожевенные и меховые фабрики. Ветеринары трудятся на рынках, ипподромах, в зоопарках, зверинцах и цирках. Государственная граница, китобойная флотилия, биологические фабрики, транспорт - важные объекты ветеринарной профессии. Кузница ветеринарных кадров На территории современной Удмуртии в 1925 г ветеринарной теятельностью занимались только 6 врачей и 30 практиков. Из-за нехватки кадров нужно было срочно организовать их подготовку для надежного ветеринарного обслуживания. С 1 октября 1930 года начались занятия во вновь созданном техникуме. Условия были очень трудными - не было своего здания, учебников, пособий, наглядных средств, не хватало кадров- преподавателей. Занятия проходили в здании педагогического техникума во вторую смену. В свободное время преподаватели, учащиеся заготавливали и вывозили лес на строительство своего учебного здания, помогали строителям. За 2 года общими силами был построен учебный корпус и Новый 1933-й год коллектив встречал в своем здании. 6 учебных лабораторий, библиотека, виварий были большой роскошью по тем временам. Собранные и изготовленные собственными силами скелеты животных, влажные паталогоанатомические материалы и другие пособия помогали в овладевании сложной ветериарной профессией. В военные годы техникум был переведен в с. Вавож, так как здание было передано курсантам пулемётного училища. Несмотря на трудности подготовка специалистов шла успешно. В 1946 г. коллектив техникума вновь вернулся в родные стены. Расширялась и укреплялась учебно-материальная база, улучшились жилищно-бытовые условия, развивались художественная самодеятельность и спорт. Второе рождение техникума началось в 70-е годы с началом строительства типового учебного корпуса. Большой вклад в дело строительства, преобразование техникума в современное материально оснащенное учебное заведение внесли директора Г. Г. Оревков, А. Ф. Петров, Н. П. Корнильев. За короткий сорок были построены корпус теоретических занятий, общественно-бытовое здание, два комфортабельных общежития, жилой дом для преподавателей, спортплощадка и учебный городок для начальной военной подготовки. Современный ветеринарный техникум (колледж) - это светлые, просторные аудитории, учебные кабинеты и лаборатории, оснашенные полным комплектом наглядных средств обучения. Это - библиотека, насчитывающая более 22 тысяч экземпляров книг с просторным читальным залом. Это - актовый зал на 300 мест с комнатами для кружковых занятий художественной самодеятельности. Это - уютная столовая на 120 посадочных мест. Это - огромный спортзал, где работают секции по 8 видам спорта и проводятся внутриколледжовские, городские, районные и республиканские соревнования. Это - материальная база для начальной военной подготовки с учебными классами, тиром в 50 метров, залом для атлетической подготовки и учебным городком. Это - общежития, где в комнатах живут по 2-3 учащихся в секциях на 16-20 человек с полным бытовым обеспечением. Это, наконец, сам коллектив, насчитывающий 28 преподавателей и около 500 учащихся. Заслуженным авторитетом в колледже пользуются преподаватели Т. М. Мингалеев, О. Г. Михайлова, Н. Л. Пантюхина, Н. Н. Галеева, Г. М. Шишкина. Преподавателям В. Н. Лазареву и А. Ф. Петрову за многолетнюю плодотворную работу присвоены звания "Заслуженный работник сельского хозяйства Удмуртской Республики", Б. Ф. Шишкину - "Заслуженный работник физической культуры Удмуртской Республики". Большой вклад в дело подготовки кадров внесли преподаватели, ныне находящиеся на заслуженном отдыхе М. К. Санников, Р. В. Ермолаева, Ф. М. Маннанова, И. Е. Петров, В. Е. Сухих, М. В. Камышева, С. Я. Плеханов и другие. Два выпускника, Н. М. Кривоногов и Г. Г. Оревков, удостоены высокого звания "Заслуженный ветеринарный врач РСФСР". Доктору ветеринарных наук профессору Казанского ветеринарного института В. А. Киршину и кандидату ветеринарных наук А. И. Фроловой присуждены Государственные премии СССР. Трудно перечислить всех выпускников, кто своим самоотверженным трудом обеспечивает ветеринарное благополучие, развитие животноводства. Немало выпускников работают председателями колхозов, директорами совхозов, возглавляют различные ветеринарные службы. В настоящее экономически нестабильное время зачастую выпускники работают в качестве предпринимателей, руководителями малых предприятий по переработке сырья, возглавляют крестьянские фермерские хозяйства. Настоящее и будущее колледжа - это учащиеся, будущие специалисты сельского хозяйства. Для них созданы все условия для учебы, отдыха, культурного развития. Большинство прилежно учатся, занимаются в кружках и спортивных секциях. Звенят медали Далеко за пределами Удмуртии известны имена выдающихся спортсменов. В годы учёбы в техникуме Тамара Тихонова в 1984 г. стала чемпионкой мира в эстафетной гонке по лыжам. В 1988 г. в Калгари на ЪВ зимней Олимпиаде она стала чемпионкой в эстафете и обладательницей серебряной медали на 10 км. Мастерами спорта международного класса стали Нина Парамонова, Татьяна Шадрина. Лыжники колледжа 14 раз были чемпионами России среди сельскохозяйственных техникумов, 1 раз чемпионами СССР. В последние годы колледж с односторонней, в основном лыжной, специализации переходит на всестороннюю физическую подготовку учащихся. Регулярно поводятся курсовые, межгрупповые соревнования по волейболу, баскетболу, мини-футболу, шахматам, стрельбе, настольному теннису и др. Спортсмены колледжа - чемпионы города по настольному теннису, волейболу, баскетболу, по зимнему многоборью. В 1997 г. они стали чемпионами Удмуртии по настольному теннису, заняли 5 место по уральской зоне среди девушек. В прошлом году лыжники ветеринарного заняли 1 место среди средних учебных заведений Удмуртии, нынче стали бронзовыми призерами, также третьими были по настольному теннису. Дорогой абитуриент! Если у тебя появилось желание побольше узнать о жизни колледжа, то приглашаем к нам в гости. Мы рады друзьям и говорим им - добро пожаловать! Тем, кому нравится специальность ветеринара, тем, кто любитживотных, мы говорим - добро пожаловать к нам на учёбу! Вехи истории 26 августа 1930 г. Президиум Облисполкома Удмуртской АССР принимает постановление за � 120 об открытии в г. Можге животноводческого техникума. *** За большие заслуги в деле подготовки ветеринарных специалистов и ознаменуя 50- летие техникума Президиум Верховного Совета Удмуртской АССР в 1980 г. наградил коллектив техникума Почётной грамотой. *** За достижение высоких результатов в социалистическом соревновании по достойной встрече 70-летия Великой Октябрьской социалистической революции в 1987 г. техникум награжден Почетной грамотой ЦК КПСС, Президиума Верховного Совета СССР, Совета Министров СССР, ЦК ВЛКСМ и ВЦСПС. *** В 1991 г. техникум преобразован в ветеринарный колледж. Логика цифр Первым директором и организатором техникума был Чернов Филипп Терентьевич. *** Сегодня колледж возглавляет 24-й по счету директор - Шушков Виктор Иванович, тоже выпускник Можгинского ветеринарного. *** Более всех на директорском посту продержался Фалалеев В. Н. (1954-1969 гг). *** Ежегодно колледж выпускает около 150 квалифицированных специалистов. *** За 70 лет из стен Можгинского ветеринарного выпустилось ветеринарных работников. *** В стенах учебного заведения подготовлено: 1 заслуженный мастер спорта, 2 мастера международного класса, 11 мастеров спорта, более тысячи разрядников. Вспоминают ветераны Мошкин П. В. (первый выпуск): "Учились по 8-10 часов - ежедневно. Летние каникулы были короткими - один месяц. Ввиду острой потребности в специалистах нас выпустили досрочно". Ашихмин А. Д. (выпускник 1935 г.) "Курс был дружный, спаенный, друг другу помогали во всем! В 1932-33 гг. из-за неурожая ввели карточную систему. Нам давали по 280 г. хлеба в день. Мы очень любили наших преподавателей, среди них были очень талантливые и умные люди. Окончили 16 человек: 14 мальчиков и 2 девочки". Что душе угодно Студентам колледжа не приходится скучать. К их услугам и библиотека, и спортзал, и кружки художественной самодеятельности. Пользуются популярностью здесь КВН-ы, беседы по нравственно-правовой тематике, встречи с работниками здравоохранения, правоохранительных органов, интересными людьми. А вечера отдыха, экскурсии по музеям и предприятиям - это расслабление после напряженной учебы и к тому же увлекательное занятие. В колледже сложились определенные традиции проводить "неделю ветеринарного фельдшера", "день работников агропромышленного комплекса", смотры художественной самодеятельности, "день здоровья", "день самоуправления". Основная часть студентов живет в общежитии. Здесь в традицию вошли такие мероприятия, как "посвящение в жильцы", "джентльмен шоу", "рыцарский турнир", "конкурс благородных девиц", "23+8", "конкурс семейных пар", "любовь с первого взгляда" и др. Можгинский ветеринарный колледж Порядок приема готовит ветеринарных специалистов с присвоением квалификации: - оператор по искусственному осеменению сельскохозяйственных животных (И ступень), на базе 9 кл. - 2 года, на базе 11 кл. - 1 год. - ветеринарный фельдшер (ИИ ступень), на базе 9 кл. - 4 года, на базе 11 кл. - 3 года. - старший ветеринарный фельдшер (ИИИ ступень), на базе 9 кл. - 5 лет, на базе 11 кл. - 4 года. К заявлению о приеме прилагаются: документ об образовании (подлинник), характеристика медицинская справка (форма 86-у) 6 фото 3х4 Лица, обучающиеся по контрактной основе, представляют договор в 3-х экземплярах. Документы, подтверждающие гражданство, предъявляются лично. Прием документов с 1 июня по 2 августа Приемные экзамены с 3 августа На базе основного образования (9 классов) - русский язык - диктант, - биология - устно; на базе среднего общего образования (11 классов): - русский язык - диктант, биология - устно По желанию абитуриента разрешается писать диктант на удмуртском языке. Студенты обеспечивается общежитием. Стипендия выплачиваются на общих основаниях. Для абитуриентов проводятся двухнедельные платные подготовительные курсы (180 руб.) Наш адрес: 427760 Удмуртская Республика, г. Можга, ул. Наговицына, 37 ветеринарный колледж, приемная комиссия, телефоны: 3-23-80, 3-16-94. Лицензия � 958 от 15 сентября 1994 г. Бусыосын "1-тӥ Май" пумита 1-тӥ Маез Пурга пал бусыосын нунал лумбыт мотор куара чузъяське ни. Ваньмаз сямен хозяйствоосын усыяло, муэ ватсэтъёс сёто, мускытэз ӝегато. Та ужъёс борды ваньмызлэсь вазь кутскиз "1-тӥ Май"! эштос. Татысь механизаторъёс 600 гектар пала трос аръем турынъёссэс усыязы но сылалъёсын сюдӥзы, кын улэ гырем 600 гектар муос вылысь мускытэз ӝегатӥзы, 100 гектар пала валэс юоссэс кизизы. Тулыс бусы ужъёссы пумен паськытало "Уромское" ОПХ-ын, "Югдон" но "Родина" эштосъёсын. В. Тронина. Оло, выльысь кизёзы Можга ёросысь "Ленинский путь" колхозын гырон-кизён ужъёсарня пала кыстӥскь ни. Музъем куасьмемъя вырйыло азьёсты нырысь мажсазы-усыязы, табере бусы удыс огъя паськыт ӧраз пыре ни. Музъем ужасьёс 40 гектар сезьы кизизы, 80 гектар трос аръем турынъёс вылэ минерал сылал пазязы. Гуртоосты сюлмаськытэ ӟеглэн толъемез. Нырысетӥ эскеронъёс возьмато: сое, оло, выльысь кизёно луоз. А. Яковлева. Му вӧй дуно, нош адями улон эшшо но Берло вакытэ чагыр экран пыр адӟыны луэ Турциысь, Америкаысь нефть возён интыосын кылдэм тылпуосты. Таӵе сутскон учыръёс зэмзэ ик бадӟым кышкыт ваё, соосты кысыны секыт, трос кужымез сётоно луэ. Нош нефть ӟырдаса позьыны кутске но пазьгиське-пуштэ ке, таӵе учыръёс ини секыт адӟонъёсы вутто. Шимес учыр вал 1948-тӥ арын 4-тӥ июле Самара областьысь одӥгаз нефть возён базаын. Ӵашйыса му вӧен, одӥгез резервуар ӝуаны ӧдъяз. Нош со котырын эшшо 40-эз сылэ. 5 час ӵоже тылэн нюръяськизы. Жадем адямиос капчияк шокчыны медо ни вал. Соку тӥни малпамтэ шорысь адӟылымтэ учыр луиз - пӧзьыны кутскем 50 тонна нефть, шуак ог 80 метре вылӥе ӝутскыса, адямиос но техника вылэ пальккиськиз. 19 мурт бырыны шедиз. Та тылпуэз сутка ӵоже кортнаны выризы на. Туэ март толэзе нош ик Самара областьын ик та выллем тылпу потаз. Кема пӧсяно-тыршоно луиз, куинез адями пӧсьвуаськиз-сутскиз, ярам бырыны ӧз шеде. Курадӟыса-курадӟыса тылпуэз таки пумозяз кысыны ӧз быгатэ, соку ини чаклам улсын пумозяз ӝуаны сётӥзы. Асьме республикаямы но нефтен тырмытэм интыос ӧжыт ӧвӧл. Тодэ лыктэ Чутырь месторождениын нефть люкам интыын кылдэм тылпу. Со вал 1990-тӥ арын 24-тӥ январе. Резервуаре трос нефть кыскемен, со вылтӥз уртчиз но ужась электроустановкаос вылэ пальккиськиз. Му вӧй кенжиз. 24 градус кезьыт вакытэ трос адямиосты татчы кысконо луиз. Шонересь ужрадъёс кутэмен, тылпуэз дыраз лапкомытӥзы. 9 ар ортчыса, 1999-тӥ арын август толэзе Сарапул НГДУ-лэн Ельниковоысь нефть кыскон интыын газорезкаен ужаку, 5 сюрс кубометр ыль нефтен резервуар кенжиз. "Горд атасэз" буйгатонэ 120 пожарной, 12 милиционер, ГИБДД-лэн 3 экипажез, эмчиослэн ӝог юрттэт сётонъя 2 бригадазы, НГДУ-ын ужасьёс, тылпу кысонъя 23 пӧртэм техника кыскемын-люкамын вал. Югдур уродмиз, резевуар пушкы липетэз куашкамен. Кык пол кутскыса, гомась тылэз шукы пазьгыса кысыны выризы. Ӧз пӧрмы. Уж борды басьтӥськиз подполковник А.Ю.Колесников. Ӟырдам омырлэсь утись костюм дӥсяса, со сутскись резервуарлэн падӟа тубатъёсыз кузя ӝутскиз. Солэн ӵектэм-верамезъя, шукыез кулэ азяз пызйизы. Ворекъясь тыломыр, кужымзэ ыштыса, пичиен-пичиен лапказ но бератаз воксё ассэ вормемен лыдъяз. Нош нюръяськон кема кыстӥськиз - 6 час. Ас ужзэс валаса но кышкатэк быдэсъязы тылпу кысонъя Иж, Сарапул но Камбарка гарнизонъёсысь боецъёс. Та бадӟым тылпуэз кысонын асьсэды геройлыко, кышкасьтэм воземзы но валаса-быгатыса ужамзы понна Россия Федерацилэн президентэзлэн 2000-тӥ арын 21-тӥ феврале поттэм Указэзъя пусъемын "Мужество" орденэн: подполковнк Н.Т.Пашенцев, подполковник А.Ю.Колесников, майор А.Р.Зарипов. "За отвагу" медален: подполковник А.П.Кузнецов, майор П.М.Черепанов, майор П.Е.Дулесов, майор А.А.Редников, химик-дозиметрист сержант О.В.Вотинцев. "За спасение погибавших" медален - сержант А.В.Дьяконов. Му вӧй кыскон-люкан интыосын вань, малы ӝуаны. Туэ 13-тӥ мартэ Каракулино ёросысь Гремячево гурт дорысен ог 3 иськемын сылӥсь 1843 номеро му поръян установкаын тылпу потӥз. Пожарнойёс вуытозь, вышкалэн вань ёзъёсыз сямен тылэн басьтэмын ни вал. Кышкытлык кылдӥз вӧй но эстӥськон бакъёс пуштозы шуыса. Утьыны быгатӥзы. Но дизелист С.Н.Перевощиков бамъёссэ, киоссэ сутӥз ик, больницае келятэк ӧйлась. Тылгизьы потэм, ужась двигательлэн ӟырдам коллектораз солярка шедьыса. 10 сюрс манет тыр ваньбур изъянмиз. Туэ 29-тӥ мартэ Красногорск му вӧй кыскон интыын Н.Е.Максимов, кивалтӥсез И.А.Язгильдин косэмен, тылпу кысӥсьёсын кенешытэк, газосварка ужъёсты мытӥз. Ас тодэмъя, ужамлэн "емышез" син азьын - кенжиз тылпу. Янгышам муртъёс кыл кутытэмын. Кыӵе мугъёсын тылпу потэ? Тужгес но ӵем тупатъян-выльдон ужъёс дыръя (23,5%), электроустановкаослэн тылгизьызылэсь (14,7%), ӵашъемлэсь (9,2%), ас понназ люкаськем электрозарядлэсь (9,7%), чакласькытэк тылын выронлэсь но мукет мугъёсын. Вань тылпу учыръёс ӟеч возьато, макем кышкыт му вӧй, соин туж чакласькыса ужано. Ас сяменыз кышкытлык ваё газ но нефть гумыослэн, му вӧй возён резервуаръёслэн, электрокужымез сётӥсь-кутӥсь тӥрлыклэн вужмемзы. Та ласянь арлы быдэ эскеронъёс ортчыло. Котькуд тылпуя та удысын ужасьёс котыр ласянь вань мугъёссэ эскеро, дунъет сёто. Эскеро-чаклало, азьланяз тылпу потон вань сюресъёсты пытсан вылысь. Н.ИЛЬИН, Удмурт Республикаысь тулпу кысонъя управлениысь инженер. Удмурт Элькунысь коньдэт удысысь организациосын ужасьёслы Уждун тыронъя огъя тариф сеткаен тупатэм тарифной ставкаосты (окладъёсты) будэтон сярысь Удмурт Элькунысь Кивалтэтлэн Постановлениез Россия Федерациысь Президентлэсь 2000-тӥ арын 20-тӥ мартэ кутэм "Бюджет удысысь организациоссы тыршисьёслы Уждун тыронъя огъя тариф сеткалэн нырысетӥ разрядэзъя тупатэм тарифной ставкаосты (окладъёсты) будэтон сярысь" 539 номере Указзэ но Россия Федерациысь Кивалтэтлэсь 2000-тӥ арын 30-тӥ мартэ кутэм "Бюджет удысысь организациосын тыршисьёслы Уждун тыронъя огъя тариф сеткаен тупатэм тарифной ставкаосты (окладъёсты) будэтон сярысь" 282 номеро постановленизэ лыдэ басьтыса, Удмурт Элькун Кивалтэт пуктэ: 1. 2000-тӥ арын 1-тӥ апрельысен 1,2 поллы будэтоно бюджет удысын тыршисьёслы Уждун тыронъя огъя тариф сеткаен тупатэм тарифной ставкаосты (окладъёсты), кудъёсыз чакламын Удмурт Элькунысь Кивалтэтлэн 1999-тӥ арын 5-тӥ апреле кутэм "Удмурт Элькунысь бюджет удысысь организациосын ужасьёслы Уждун тыронъя огъя тариф сеткаен тупатэм тарифной ставкаосты (окладъёсты) будэтон сярысь" 368 номеро постановлениеныз. 2. Удмурт Элькунысь Коньдон ужпумъёсъя министерстволы чаклано элькунлэн бюджетэз чотын улӥсь организациослы та постановленилэн 1-тӥ пунктэныз чаклам ужрадъёсты ортчытонэн валче расходъёс понна кытысь коньдон тырыны но сое тырон радлыкез. 3. Городъёслэн но ёросъёслэн бюджетысьтызы та постановленилэн 1-тӥ пунктэзъя коньдон басьтӥсь бюджет удысын ужасьёслы тарифной ставкаос (окладъёс) будэтӥсько Удмурт Элькунысь городъёслэн но ёросъёслэн администрациосынызы асьсэлэн коньдонзы чотын. 4. Удмурт Элькунысь министерствоослэн, ведомствоослэн, городъёслэн но ёросъёслэн администрациоссылэн кивалтӥсьёссылы бюджет удысын ужасьёслэсь уждунзэс будэтон вылысь ватсаса коньдон шедьтоно расходъёсъя структураез азинтэм, бюджет коньдонэз пырак басьтӥсьёслэсь но бюджет удысын ужасьёслэсь лыдзэс кулэстэм чотын. Удмурт Элькун Кивалтэтлэн Тӧроез Н. А. ГАНЗА. Усто вал! Ӵыжы-выжыосмылэн, поръёслэн, Вотка но Кам улосвылэ интыяськемзы дырысен ньыль сю ар тырмонлы сӥзьыса, шаерысьтымы Операя но балетъя кун театрын ортчиз та калыклэн кырӟан-веранэзлы сӥзем фестиваль. Театре люкаськемъёс азьын асьсэлэсь устолыксэс возьматӥзы, пӧртэм ёросъёсысь кырӟаны-вераны яратӥсьёс. Адямиос синмаськизы Алнаш ёросысь Варали, Грах ёросысь Мари-Возжой", Каракулино ёросысь Ныргында но Быргында гуртъёсысь но мукет интыосысь усточиослы. Тужгес ӟеч мылкыд кельтӥз эктонъя Марий Эл кун ансамбль. * Йӧшкар-Олаысь Светлана Степанова калыкезлэсь киужъёссэ возьматэ. * Кырӟало-верало Грах ёросысь Мари-Возжой гуртысь нылкышноос. Владимир Беломорскихлэн туспуктэмъёсыз. П. И. Чайковскийлэн вордӥськемез дырысен 160 ар тырмонлы сӥзем фестиваль Визьлюк Та бадӟым ужрадэн валче шаерамы ортчо пӧртэм концертъёс. Удмурт кун филармонилэн юртаз асьсэлэсь устолыксэс возьматӥзы пианист Вадим Руденко но кубызчи (скрипач) Дмитрий Коган. Вадим Руденко вордӥськиз 1967-тӥ арын 8-тӥ декабре вашкала ӟуч городын - Краснодарын. Семьяязы музыкантъёс ӧй вал ке но, пияш фортепьяноен шудыны кутскиз куинь арескысен. Сизьым аресказ нырысетӥ концертэз вал. 1975-тӥ арын дышетскыны пыриз Москваысь Центральной музыкальной школае. Дышетӥсьёсыз Анна Артоболевская, Вадим Суханов но профессор Дмитрий Башкиров ӟеч тодон-валан сётыны турттӥзы. 1982-тӥ арын Вадим луиз "Концертино Прага" калык куспо конкурслэн лауреатэз. 1989-тӥ арын дышетскыны пыриз Москва консерваторие - тодон-валан люказ профессорлэн Сергей Доренскийлэн классаз. Йылпумъяз сое 1994-тӥ арын. 1991-тӥ арын Бельгиын Вадим Руденко луиз пианистъёслэн Елизавета Королева нимо калык куспо конкурссылэн (таиз быдэс дуннеын тодмо) лауреатэз. Собере Вадим Руденко вуылэ пӧртэм кунъёсы - Россиын, Бельгиын, Германиын, Италиын, Испаниын, Бразилиын, Япониын, Нидерландыын, Франциын но мукетъёсаз кылзӥсьёссэ тодматэ вылӥ устолыкеныз но быгатонлыкеныз. Миланысь Верди нимо концерт зал, Токиоысь Саптори зал, Осакаысь симфонияя зал, Мадридысь Аудиториум, Брюссельысь исскусствоосъя дворец, Амстердамысь Концертгебаез Москваысь Бадӟым зал, Зальцбургысь Моцартеум, Парижысь Гаво али но тодо на, дыр, та адямиез. Пыриськылӥз Австриын, Швейцариын ортчем фестивальёсы. 1992-тӥ арын луиз пианистъёслэн испаниысь Сантандер городын ортчем "Палом О, шеа" нимо калык куспо конкурссылэн лауреатэз. 1993-тӥ арын вормиз Италиысь Верчелли городын ортчем ӵошатсконын. 1994-тӥ, 1998-тӥ аръёсы луиз П. И. Чайковский нимо конкурсъёслэн лауреатсы (басьтӥз куинетӥ но кыкетӥ премиос). Бобья-Учалан клубзы, пе, ӧвӧл Матэктэ Вормон нунал. та быдӟым праздниклы сӥзьыса, Бобья-Учаысь калык театр аслэсьтыз ужзэ учкисьёс азе поттӥз. Терешкинлэсь "Ньыльдонэтӥ уяз" пьесазэ пуктыны кутӥм. Туэ калык театрмы ветлӥз ни Выль Моньяла. Калык зал тыр люкаськемын ни вал. Драмаез возьматыны но, учкыны но капчи ӧвӧл. Куддыр туж секыт луэ учкисез "кырмыны", уката ик пиналъёс залын трос ке. Но Выль Монья калык милемыз шумпоттӥз. Спектакльлэн улоназ ик пыризы кадь: кытӥяз залын туж чалмыт луылӥз, кытӥяз гурак серектылӥзы, но ӵемгес синвуаськылӥзы. Озьыен, артистъёсмы учкисьёсты оскытыны быгатӥзы, юнме ӧз поталэ ӝытъёсы кезьыт культура юртамы. Нимысьтыз вераме потэ артистъёсмы сярысь. тани пламы быдэс семьяен ветлӥсьёс но вань. Со катя но Филипп Семеновъёс Саша пиенызы. Пӧртэм рольёсты туж быгатыса шудылӥзы соос В. Самсоновлэн "Пиртэш кизилиос", "Шуняньёс" пьесаосазы пуктэм спектакльёсын. Нош "Ньыльдонэтӥ уяз" спектакльын 4-тӥ классын дышетскись Саша но шудэ. Асьсэ выжыязы мынэм пизы. Ивилэсь рользэ сюлмысь шудэменыз учкисьёсты паймытӥз но шумпоттӥз. Котькуд аре ми витиськом коллективамы выль артистъёслэсь лыктмэзэс. Туэ тани егит кузпалъёс Надя но Валера Григорьевъёс вуизы. Эшшо ми пӧлы ветлыны кутскиз Лилия Евгеньевна Волкова, дышетӥсь. Со Катьырна апайлэсь образзэ возьматэ. Галя нимо нылашлэсь рользэ 7-б классын дышетскис Наташа Яковлева. Кызь арлэсь ятыргес луэ ни калык театре ветлэмзы дырысен Людмила но Галина Зотоваослэн. Тросэз учкисьёс соосты тодмало ни, шумпотыса учко выль ужъёссэс. Нош света Григорьева шоры мемй шуыса вазиськем потэ: сыӵе оскытэ со шудэменыз, анайлэсь рользэ пӧрмытэменыз. Вань артистъёсмы ужаны ветло, тросэз тыршо "Молния" кооперативлэн пудо вордон удысаз. Озьы ке но, соос дыр шедьто клубе но потаны, нылпиоссылы но юрттӥськыны. Со сяна, котькуд кышномурт толзэ киужъёсын но трос выре, киоссы зарниесь. Данъяськиськом ми артистъёсынымы, шумпотӥськом соослэн уж дуразы но, гуртазы но, сцена вылын но тыршыса ужамзылы. Коллективмы спектакльёссэ Пичи пурга районтӥ возьматыса ветлэ. Артистъёсмы шудӥзы ни Улын Юриын, Ильинскын. Котькуд аре вуиськом Можга но Кияса районъёсы. Туэ но малпаськом. 1999-тӥ арын "Шуняньёс" спектаклез ваньзэ-ӧвӧлзэ коллективен 24 пол пуктӥм. Озьы тӥни туэ но калыкез бордаз кыскыны быгатӥз режиссёр Филипп Александрович Яковлев. оскем потэ, артистъёс туэ но республиканской смотрын Бобья-Уча калык театрлэсь данзэ уд уськытэ. О. Яковлева, режиссёрлэн юрттӥсез. *** Луоно ук озьы: ӵапак та гожтэтэз бордын вырыкуз, кемдӥ мон Бобья-Учалась библиотекае но тодматски Ольга Алексеевна Яковлеваен. Ассэ со режиссёрлэн юрттӥсез шуиз, йылпумъямын Ижевскысь культурая профтехучилищеез. Нош режиссёрез кин? Солэн картэз Филипп Александрович вылэм. Школаын сяна, нокытын дышетскемез ӧвӧл, шофёр луыса ужа. Ноку адӟылымтэ адямилэн данэз, мон азьын соку ик верантэм вылӥе ӝутскиз. Арганэн шудон сяна, калыкез огазеяны но быгатоно ук! Собере кӧня валан кулэ пьесаослэсь пуштроссэ аслад йырад бергатон но учкисьёс дорозь вуттон понна! Бобья-Учаысь калык театрлэн нырысетӥ кивалтӥсьёсыз пӧлын вылӥллям В. Пчельников, Н. Леонтьев, А. Митрофанов. 1998-тӥ театр 30 арессэ пусъем. Но пересьёслэн верамзыя. та гуртысь артисъёс война вылтӥ но спектакльёёс возьматъяллям. Кин тодэ, оло театрлэн историез эшшо но кыдёкысен кутске. Ольга Алексеевнаен ӵош чиньыосмы вылэ поныса ветлэмъёс куспын семья кылдэм учыръёсты. Озьы 9 семья поттӥм: Альбина но Виктор Васильевъёс, Валентина но Парамон Антоновъёс, Ольга но Филипп Яковлевъёс, Дарья но Семен Леонтьевъёс, Елена но Виктор Николаевъёс, галина но Иван Ивановъёс, Екатерина но Филипп Семеновъёс, Екатерина но Филипп Яковлевъёс, Тамара но Владимир Панфиловъёс. Оло кинэ ке вунэтӥм но. Тужгес но вожъяськымонэз соиз: анай-атайёссы сьӧры нылпиоссы но кыстӥсько. Бобья-Уча - аспӧртэмлыко гурт. Калык театр сяна татын быдэс республикалы тодмо нылкышно гармонистъёслэн ансамбльзы вань. Кемалась ӧвӧл ас фольклор ансамбльзэс пересьёс но кылдытӥллям. Шуд усиз кылзыны соослэсь жин-жин чузъяськись турнан гуръёссэс. калык творчествоя фестивальын соосты дэмлаллям Пургаысь сцена вылын быгатонлыксэс возьматыны. Тазьы валай: Бобья-Учаын артистъёс ноку уз быре. апак 26 март азьын, Россилы Президент быръён но Удмуртиын референдум ортчытон азьын, татысь школаын туж бадӟым ужрад ортчиз: нылпиос кырӟаны-вераны, арганэн шудыны, эктыны быгатэмзэс возьматӥзы. Зэм, котькызьы мед вошъяськоз политика но культура ялан улоз! Угось со улӥысен, калык мылкыдысен потэ. Та мылкыдэз нылпиосмылы пичи дырысеныз быгатыса пыӵато дышетӥсьёс (школалэн директорез С. М. Иванова). Музъемозь тау карем потэ та коллективлы нылпиосты дӥстӥсь сямо будэтэмзы понна. Возьдаськон сям удмуртэз быдтэ, шуо. Но та концертын удмурт нылпи артистъёс вылын со вкосё но ӧз шӧдӥськы. Иське, возьдаськонэз тазьы но вормыны луэ. Ольга Яковлева ас гожтэтаз шӧдтэк шорысь гинэ кадь ӝожтӥське кезьыт клубзы вылэ. Зэмзэ но, пичи гинэ клубзы уг ужа, сое тупатъяны-выльдыны кулэ. Ӝожтӥськонъёсты азьланьтоно ке, культураен вырисьёслэн чеберлыкъя кивалтӥсьсы но ӧвӧл. Собере, артистъёсты нуллыны-вайыны машина утчаса но бызьылоно. тани машина ӧвӧлэн районын ортчем "Утренняя звезда" ӵошатсконэ пыриськытэк кылиз 9-тӥ классын дышетскись, усто кырӟась Люда Леонтьева. Огъя вераса, шуг-секытъёс - татын но тырмо. Но тани мар паймытэ: куд-ог гуртъёсын улыно-вылыно, кирпичлэсь лэсьтэм культурая юртъёс сыло. малы ке но уг дырты отчы калык, уг чузъясько крезьгур но кырӟан гуръёс. Бобья- Учалан югдур воксё мукет. Клубзы ӧвӧл ке но, аналскыса уг уло. - Клубмы уг ужа бере, ужрадъёсмес урамъёсын ортчытъяськом, - маде клублэн директорез Галина николаевна Михайлова. - Библиотекаын, клубын тыршисьёс пыр озьы ужамын, соин ик калыкмы шулдыръяськыны яратэ. Районмылэн юбилеезлы сӥзьыса ортчытӥм "Валче улон - быдэс даур" праздник. Котькуд урам быдэс улонзэ вераз. Таӵе учыръёсты н ӧз кельтэ: кинлэн кӧня машинаез, велосипедэз. Гуртлэсь эмблемазэ суреданъя ӵошатсконын вормиз дышетӥсь Леонид Евсеевич Никифоров. Та праздникез радъякумы ватӥсь интыын вал калыклэсь ӵош улон мылкыдзэ ӝутон. Ср нуналэ шулдыръяськонысь гуртысьтымы малпамтэ адямиосты малпамтэ адямиосты адӟи, кудъёсыз азьло ужрадъёслэсь палэнэгес кыльылӥзы. Адямиослэн сюлмазы пырыны быгатӥм бере, ми понна, культураен вырисьёслы, со туж бадӟым шумпотон ини. Галина Николаевна мукет пӧртэм праздникъёссы сярысь но кема гинэ мадиз на. калык али но тодаз вае "Тол келян" ужрадзэс. Ӵапак соку куд-ог гуртоссэс пенсие но келязы, котькудӥзлы ковёр кузьмазы. таӵе ужрадъёсты ортчытъяны мылкыд сяна, коньдон но, кузьымъёс но кулэ, дыр. Кытысь ваньзэ сое шедьтыны? - Асьме адямиосмы ик юртто но - валэктӥз Галина Николаевна, - гуртлэн администрациез, колхоз, райпо, "Герд" фермер хозяйствомы вань (кивалтӥсез Виталий Михайлович Иванов, - быгатэмезъя ваньзы ик юрттыны тыршо. Тӥни озьы ог-огзэс валаса но эшъяськыса уло Пичи Пурга ёросысь Бобья-Уча черкогуртын. Вань калык одг кужыме люкамын кадь, нош вань-а, ӧвӧд-а татын клубзы со бордын гинэ ужпум ӧвӧл, дыр. Ярато татын адямиез - тӥни отысь потэ огазеясь кужым. Татьяна Банникова. НАТАЛЬ "Наталь" дорын куноын "Микаль" Беромем тулыс Петр агаен кор вылэ артэ интыяськи но со но та сярысь вераськыса пукиськом. Кыкмылэн ик юанъёсмы тырмыт гинэ. Уго кемалась ни пумиськеммы, ваче син учкыса вераськеммы. Ӵапак соку вӧзтӥмы ӟечбуръяськыса Гата Зоя ортчиз. Арлыдо гуртое зурак кариськиз кадь, мылкыдаз олокыӵе воштӥськонъёс ортчизы. Валатски: кемалась кылдэм юанме сётыны дыр вуэмын. - Гуртоосмы верало, Витя эше тынад пиед шуыса. Зэм-а со, Петр агай? Воргорон шуак кариськиз. Сигарет аратӥз но, курыт ӵынзэ палэнэ пельтыса лулскиз: - Вань сыӵе сьӧлыке. Палэнын будӥсь ньыль нылпиослэн атайзы луисько, - могӟиз гуртое. Сӥсьяса кадь шорам учкемез бере тунсыкъяськиз: - Газетэ гожтыны малпаськод, оло? - Зэмос нимдэ уг шарая, Петр агай. Нош гожъясь адямилы котькуд мадёс но тунсыко. - Ярам,, - тамак пумзэ сэрпалтӥз со. - Оло, мадеме кинлы ке юрттоз, мур малпаськонэ уськытоз. Ракей Петр Тихоокеанской флотысь службае вуытозяз ик яратон зарезе зумиськыны шедтӥз. Гата Зоялэн чеберезлы но, колхозын сюлмо тыршемезлы но, ӝыт шудонъёс пӧлын шулдыръяськыны быгатэмезлы но синмаськыны вутскиз. Нош кузпалъяськон, сюан шудон сярысь млпаны ӧз дӥсьтылы. Анай-атайёсыз соглаш кариськозы шат? Апаез юыземын ӧвӧл на, агаез кузъяськымтэ. Службае келяськон ӝытазе ни Зоя лушкемен шыпыртӥз: - Секытэн мон, Петя. Нылпи вордыны малпасько. Та кылъёслэсь егит пилэн мылкыдыз ик бугырскиз. Атай кариськемез но, Зоялэн бызьытэк ик анай луэмез но одӥг бугоре биниськизы кадь. - Возьма, Зоя, службаысь берытскеме бере ик ӵошен кариськом. Нош егитъёслэсь мылкыд каронзэс олокыӵе супыльтонъёс, тӧлпери музэн кир-пазь тугазы. Армиысь бертэм Ркей Петрлы гуртоосыз, эшъёсыз ма гинэ ӧз маде?! Оскиз егит и. Гажанэныз пумиськыса, ваче син учкыса вераськыны кужым ӧз шедьты ни. Шонерзэ вераса, кулэен ӧз лыдъя кадь. Эсьмаса, пиезлэсь тусбуйзэ учкыны, мусояны но ӧз кожа. Ог аре гуртын кык сюан жингыраз. ракей Петр бускель гуртысь Наталь кузпалзэ вуттӥз, Гата Зоя, вордэм пизэ анай юртаз кельтыса, ас гуртоезлы, Мико Борислы бызиз. Кыказ но семьяын яратон выжыяськыны, сяська сямен лопырскыны йӧн ӧз шедьты. Малпанъёсазы, шудоесь вӧтъёсазы Петырен Зояос котьку ӵошен вал. Ог аре гуртоос нюлэс дасянын тыршизы. Воргоронъёсын ӵош та уже пыриськизы егит кышноос но. Тӥнь соку, лушкемен пумиськыкузы, Зоя ӝожаз: - Петр, азьло сямен ик яратӥсько мон тонэ. Борисэн кык ар валче улыса вылысь но анай луыны уг быгатӥськы. - Ачим но азьвыл сямен ик тонэ малпасько, тонэ гинэ яартӥсько, - лулскиз Петр. - Нош семьяме таркаме уг поты ни. Натале уго кык пиосын шумпоттыны вутскиз. Та уй "юрттэмен" гата Зоя кыкетӥ нылПизэ вордӥз. Борислэн но шумпотонэзлэн пумыз ӧй вал, кузпалызлэн мукет воргоронэн сьӧлыкамез сярысь малпаськыны тодаз но ӧз лыкты. Озьы кышномурт Борисэн улэм вылысь, нырысь гажанэныз ньыль нылпи вордӥз. Та сярысь тодӥзы кык яратись сюлэмъёс гинэ: Ракет Петр но Гата Зоя. Ярам ай, инмар юрттӥз, лэся: нылпиосыз тусбуен анайзы выжые кариськизы. Мико Борис висёнэн сэрен улонысь вазь кошкиз. Но йыркуро ӧз кошкы со. Ӧз ӧпкельы кузпалэзлы но, вакчи улон гумырезлы но. Атаезлэсь ужъёссэ азинтыны ньыль нылпиосыз кылё уго. Н.ТУРИН. Бусыос сайказы Тулыс шундыед пӧсьсэ жалятэк кисьтэ. Соин ик муос син шорын куасьмо. Республикамылэн уй пал районъёсаз но туннэ-ӵуказе бусы ужъёс кусткозы, нош лымшор палан соос арнялэсь ятыр мыно ни. Пич Пурга, Алнаш районъёс понна кысык вакыт туэ кык арнялы вазьгес вуиз, куд-ог хозяйствоосты шугомытыса. Кытын но отын пумаз-йылаз вуттымтэ техникаез дасян, секыт югдур эстӥськон ласянь. Но данакез эштосъёс но сельхозкооперативъёс ваньзэ дыраз лэсьтыны вуизы: кидыс но, удобрение но, эстӥськон но дасязы. Техникаез тупатонъя азьпала потӥзы вавожъёс, балезиноос, можгасо, алнашъёс. Бере кылисьёс пӧлын - Якшур-Бодья, Киясово, Сюмси, Юкаменск районъёс. Республикая оглом верано ке, югдур кылем арен огвыллемгес. Бусы ужъёсъя: котькинлэсь вазь кизёнэз мытӥзы пургаос. Тунэ нуналлы ог 100 гектар вылын кидыс муосы согемын ни. Соослэсь трослы ик бере уг кылё можгасо, куинетӥ интыын - алнашъёс. Валэс юосты кизён кутскиз ни Завьялово, Сарапул, Воткинск районъёсысь хозяйствоосын. Нуналмысь нуналэ со паськыта. Азинске трос аръем турынъёс вылэ минерал сылалъёсты пазян. Та ласянь юнгес сюлмасько Завьялово, Шаркан, Глазов палъёсын. Озьы ик ӟеч удэз сюдонъя но. Кытын удобрение басьтыны быгатӥзы, отын вуоно урожайлы юн инъет но кылдытыны тыршо. Л.ДМИТРИЕВА. Наталь Платина сюан - чебер "сьӧлык" Милям пичи Можга городамы улэ одӥг синмаськымон семья. Кылем арын соос 70 ар (!) ӵош улэмзэс пусйизы. Мариам Мутыгуловна но Латып Мухаметшевич Мухаметшенъёслы али быдэн 90 арес. Нош тодматскыкузы сыӵе пиналэсь на вал. Сабантуйысен чебер Мариамез синйылтӥз Латып. Азьвыл улон капчи ӧй вал ке но, шудо улӥзы. Война но Сталин вакытэ шуэръяськонъёс гинэ кӧня ке арлы люкылӥз соосты. Латып Мухаметшевич ожмаськиз Смоленск палан, тушмонэз Москваысь но Белоруссиысь туриз. Огпол ӧжыт гинэ улэп кылиз - немецъёсын ваче кымес вуизы. Лымы люке ватскыны валатскиз, нош эшъёсыз кӧняез быризы... Но война бере но сое адӟон возьма на вылэм. Сталин кивалтон вакытэ, колхозын бригадирын ужакуз, кык арлы пытсэт сьӧры келязы. Тынад участокад, пе, кык мултэс шеп шедьтэмын. Бумагая гожтӥзы: "Суп-сап ужамез понна". Ар пала пукыса лэзизы. 1952-тӥ арын Татариысь Кукмор ёросысь Можга городэ улыны выжо. Латып Мухаметшевич инвалидъёслэн артеленызы кивалтэ, Мариам Мутыгуловна кызь вить ар уждунэз адӟылытэк колхозын ужаса кошкиз, ассэ - семьяезлы но нылпиосызлы сӥзиз. Нош нылпиоссы соослэн сизьым кузя. Со сяна, дас тямыс внуксы, кызь одӥг правнуксы, одӥг праправнуксы. Сизьымдон ар ог-огзэс гажаса, тупаса уло соос. Куректонэз но, шумпотонэз но ӵош люко. Жаль Мариам апа али ӵем висьылыны кутскиз. Но со озьы но осконзэ уг ышты - платина сюанмес ортчытом ай, шуэ, бигер кылын кылбуръёс гожъя (солэн анай-атаез но гожъяськисьёс вылӥллям). Нош Латып Мухаметшевич чырткем ай, котькуд нунал одно "Время" передачаез учке, дуннеысь олокыӵе но иворъёсты тодэ, политикъёсты тышкаське. Но Аман Тулеевез гажа. Мусульман сямъёсъя, семья праздникъёты уг пусъё. Но Мухаметшинъёс сыӵе "сьӧлыклэсь" ӧз кышкалэ. Сизьымдон ар валче улэмзэс пусйыны ӵыжы-выжыоссэс, тодмооссэс беляш сиыны, чак-чакен чай юыны ӧтчазы. В. Кибардина. Пусйиз - быдэстӥз Ӵош ужась эшъёстэ, коллективез гажалод-яратод меда ужед сюлэмъя ке ӧз луы. Уд, дыр. Соин ик егит адямилы нырысь пыӵатоно ужез гажан мылкыд. Нош со огнуналскын, огкутскемен уг лэсьтӥськы. Караулэн кивалтӥсьлы таӵе ужын юртто кема ужамъёс. Николай Сысоевлы та ласянь удалтӥз, шуыны луоз. Ньыль ар талэсь азьло сое ньылетӥ караулэн кивалтыны юнматӥзы. Коллективазы соку тужгес гажаноосыз вал Александр Костров но Виктор Тюлькин. Кыксы но ог кызё арзэ тыршо ни, уно сю тылпуос пыр потэмын, кызьы шуо, кезьытсэ но, пӧсьсэ но адӟемын-чидамын. Тылпу ужез та воргоронъёс ас чиньыоссэс кадь тодо, отделениосысьтызы адямиосын быгатыса занятиос нуо, кышкатэк но чырмыт тылпуэн нюръясько. Калыкен ужаны-вераськыны быгатон, секыт югдуре шедьыса шонер но ӝогак сюрес быръён ас кожаз уг лыкты. Таӵе сям улонлэн кӧаз аръёсын воля. Со бордын Николай ужаны кутскиз Челябинскысь физкультурая институтын дышетскыкуз ик. Туннэ старшой лейтенант Н. Л. Сысоев азьвыл ас азяз пусъем ужпумзэ быдэстӥз - со 4-тӥ пожарной частьын караулэн устоез кивалтӥсь луэ. Удмурт Республикаысь Кун Кенешлэсь дас одӥгетӥ сессизэ люкон сярысь Удмурт Республикаысь Кун Кенешлэн Президиумезлэн ПОСТАНОВЛЕНИЕЗ Удмурт Республикаысь Кун Кенешлэн Президиумез пуктэ: Удмурт Республикаысь Кун Кенешлэсь дас одӥгетӥ сессизэ люкано Ижевск городын 2000- тӥ арын 16-тӥ мае 10 часэ. Удмурт Республикаысь Кун Кенешлэн Тӧроез А.А.Волков. Ижевск город, 200-тӥ арын 31-тӥ мартэ. � 127-ИИ& *** Сессиын эскерыны чакламын Удмурт Республикалэн законъёсызлэсь таӵе инъетъёссэ: - Гражданъёслэн Удмурт Республикалэн улосвылаз югдурез утёнэ пыриськонзы сярысь; - Удмурт Республикаысь йыружъёсын нюръяськонъя "Правопорядок" фондлэн кун бюджетэз сярысь; - Интыосын ас коже кивалтон органъёслы граждан состояниея актъёсты пусйыны полномочиос сётон сярысь; - Удмурт Республикаын мировой судьяос сярысь; - Гражданъёслэн вазиськонъёссы сярысь; - Удмурт Республикаын кудӟытӥсь юонъёсын вузкарыны лэзем понна лицензиослы дун тупатон сярысь но мукет ужпумъёс. Газетмы чебер-а? Дуно! Кык ужпумез эскериз Печатья но иворъёсъя министерстволэн коллегиез. Удмуртиысь печатьлэсь инъетсэ техникаен узырмытон вылысь, республикаямы кутэмын 1997-тӥ-2001-тӥ аръёслы программа. Кызьы ивортӥз министрлэн воштӥсез Ханлар Азизов, 1997-тӥ-1998-тӥ аръёсы со юрттӥз республикаысь полиграфпредприятиослы норайонъёсысь редакциослы выль ужан тӥрлык басьтыны луиз. Жаляса верано луэ: бюджетын коньдон окмымтэен, музон программаосын ӵош таиз но берло аръёсы уг быдэсъяськы. Соин ик кенешемын Кун Кенеш вазиськыны, вуоно арлы бюджетын та программая коньдон мед висъяськоз шуыса. Миым 16-тӥ мартэ министрестволэн коллекгиез эскериз вал Ижысь полиграфкомбинатлэсь выль оборудованиен ужаны дасяськемзэ. Со дырысен предприятиое кыдёке азьпала вамыштӥз. Отчы пуктэмын Германиысь ваем газет печатланъя "Унисет" машина. Али коллегия выльысь берытскиз та ужпум борды. Комбинатлэн директорез Олег Радионов верамъя, машиналэн ог 70 прроцент кужымез уже кутӥське ни. Со печатла 36 газетэз. "Унисетэн" "эшъяськыны" мылкыд каро ни Казаньысь, Пермьысь, Москваысь редакциос. Нош "висён" азьвылэз ик: мшина понна дун тырымтэ. Коллегия выльысь вазиськиз Удмурт Республикаысь Правительстволы, "Уникет" понна пунэм тыронэз берыктыны мед юрттоз шуыса. Газетмы чебер-а? Дуно! "Удмурт дуннелы" гожтӥськон гурт калык понна секыт шуиськомы ке но, лыдӟись тыре шуыны луоз солэсь почта дунзэ гинэ. А.ПЕТРОВ. Наталь Одӥг липет - дас вить семья - Толон гинэ вуимы, туннэ кошконо ни, кык нунал ке но мед кыстӥськоз на вылэм та праздник. - Лыктэммы бере ог-огмы шоры кырыжак учкылӥм, нош туннэ люкиськем уг поты ни, сокем матысь луимы - одӥг семья кадь. - Быдӟым тау фестивалез радъясьёслы, специалистъёслы, ваньмызлы, кин люказ милемды та липет улэ... Йылпумъяськиз шаерысьтымы егит семьяослы сӥзем сизьыметӥез фестиваль. Радъяз сое республикаысьтымы Егитъёсын ужанъя кун комитетысь "Егит семья" кун учреждение. Котьку сямен, та фестивале пыриськизы ёросъёсысь устоосыз семьяос: кин семьяослы сӥзем ӵошатсконын вормисе потӥз, кин мыло-кыдо луэмзэ возьматӥз кыӵе ке но ужын, ужрадын. Таяз учыре "Дзержинец" шутэтскон лагере люкаськиз дас вить семья, нош возьмало вал кызьлэсь ятыр семьяез. Пӧртэм мугъёсъя куд-огез егит кузпалъёс лыктыны ӧз быгатэ. - Мукетъёсыныз ӵошатыса, таиз фестиваль кӧнялы ке пӧртэмгес вал, шуэ "Егит семья" учрежденилэн кивалтӥсез Татьяна Башкова. Семьяос ог-огенызы быгатонлыкъёсынызы ӧз ӵошатске, асьсэды пӧртэм ласянь взьматӥзы ке но. Малы сыӵе малпанэ вуим? Котькудӥз семья маин ке но аспӧртэмлыко, пӧртэм быгатонлыкъёсын. Солы ик нокинэ нимысьтыз висъяны ӧм чаклалэ. Озьы ке но, ӵошен пӧръям-суредам юртлы одӥгезлэсь семьялэсь нимзэ сётоно кариськизы ик фестивалез радъясьёс. Кинэ бен ялэмын луоз устоосыз пӧлысь усто семьяен? Люкаськемъёслэн но егит кузпалъёслэн синъёссы мертчемын пуйые. Татарстанысь Егитъёсын ужанъя комитетысь вуэм куно бумага юдэсэз поттӥз но лыдӟиз Борисов кузпалъёслэсь нимзэс. Марина но Денис Борисовъёс уло Ижевскысь Индустриальной ёросын. Юля нылзылы вить толэзь гинэ али. Марина дышетскемезъя воспитатель, нош Денис - инженер, ужа ТЭЦ-2 предприятиын. Егит кузпалъёс уло общежитиын. Нош та фестивале шедизы, ёосазы радъям конкурсын вормисе потыса. Кыл сётом та семьялэн "кирос анаезлы" Татьяна Лекомцевалы, Индустриальной ёросысь егитъёсын ужась специалистлы: - Милям ёросамы, рабочийёслэнэз гинэ кызь вить семьяос, нош воспитательёс ньыляз гинэ вань. Ёросамы туэ нырысьсэ радъямы егит семьяос пӧлын ӵошатскон, та ужын милемлы юрттӥзы воспитательёс. Кытын соос вань, отын ик уго пӧртэм ужрадъёс ортчыло, семьяос но син шорын. Конкурсэ пыриськыны мылкыд ариз ньыль семья, ортчиз со "ТЭЦ-2 предприятилэн общежитияз. Та предприятие ик юрттӥз коньдонэн, Индустриальной ёросысь егитъёсын ужанъя одтел уксё висъяз на. Вормисе потӥз Борисовъёслэн семьязы, соослы кузьмамы 8 программаен "Лира" радиёприёмник. Мукетъёссэ но семьяосты ӟеч кузьымъёсын пусйим. Конкурсэз учкыны лыктэмъёс но та нуналэ ӟеч шутэтскизы, малпасько, азьланяз соослэн но мылкыдзы ӝутскоз быгатэмзэс возьматыны. Табере выльысь берытском фестивале. Туж синмаськыса учки удмурт семьяос шоры. Удмурт луэмзэс соос ватыны чик но ӧз турттэ, сцена вылын асьсэды йӧн-йӧн возизы - дӥськутъёссы но аспӧртэмлыко, удмурт кырӟанъёс но жин-жин чузъясько. Со - Дэбес ёросысь Зар-Медла гуртысь Анна но Александр Черновъёс, Алнашысь Лариса но Иван Печниковъёс; Пичи пурга ёросысь Вуж Монья гуртысь Марина но Андрей Филимоновъёс. Вераськыкумы Маринаен Лариса пусйизы, таӵе фестивальёсы тросгес поттоно вылэм гуртъёсын улӥсьёсты, райцентръёсысь егитъёслы капчигес ик специалистъёсын пумиськыны, ваньмон дырзэс но тунсыкогес, пайдаёгес ортчытыны. Озьы ке но, Вуж Монья гуртысь Филимоновъёслэн семьязы мӧзмыса улэ уд шуы. Гуртазы соослэн ужа "Егит семья" но "Сизьым+кык" клуб. Егитъёс мылысь-кыдысь пырисько солэн ужаз, асьсэос ик кичӧлтӥсьёс луо. Ортчытъяло пӧртэм конкурсъёс. Пумиськонъёс. Соос котыре огазеяськемын дас семья. Гуртъёсын улӥсь егит семьяос понна Филимоновъёслэн ужзы адӟем карымон. Алнашысь "Егит семья" клублэн ужаз мылысь-кыдысь пыриське Печниковъёслэн но семьязы. Таӵе клубъёс шаерамы ньыльдонлэсь ятыр лыдъясько ини. Россиысь мукет регионъёсын нокытын но сомында ӧвӧл. та ласянь шаермылы вылӥ дунъет сётӥз Россиысь Егит семьялы юрттэт сётонъя центрлэн директорез Александр Плотников. Егит семьяослы сӥзем фестивале со нырысьсэ уг пыриськы ни. Ёросъёсысь клубъёслэн ужъёсынызы но тодмо. Таяз лыктэмаз Александр Дмитриевич вуылӥз Завьяловоысь клубе, умоен пусйиз егит семьяосын психологилэсь, юристлэсь ужамзэ, туризмен выремзэс. Фестивале пыриськем егит семьяос но Москваысь кунолы туж кельшизы: - Ватӥськыса уг уло, малпанъёссэс шара верало. - Та вылысь но огъя суред кылдыны луэ. Александр Дмитриевич егитъёс пӧлын нимысьтыз занятие ортчытӥз. Соя тодмо луиз, кыӵе тужгес но сюлэмшугъяськытӥсь ужпумъёс сыло шаерысьтымы егит семьяос азьын. Кызь укмыс верам ужпумъёс пӧлын нырысетӥ интыын сыло: начар улон; коньдонлы ёрмон; дыр уг тырмы нылпиосын пукыны; улон интылы ёрмон. Таӵе эскеронъёс ортчытъямын вал мукет регионъёсын но. - Паймымон соиз, нокытын нылпилы дыр тырмымтэез валтӥсь интые ӧз пуктылэ, - шуэ Александр Плотников. - Сыӵе югдур кылдэмын начар улэмысь но коньдонлы ёрмонысь, анай-атайёс тросгес саклык висъяло ни тросэзлы ужпумъёслы. Озьы ке но, фестивале пыриськем семьяослы та ласянь удалтӥз, шуыны луоз. Нылпиосты будэтонъя соос трос выльзэ тодӥзы, семья кусыпъёссэс радъян ужпумъёслы но саклык висъямын вал. Психологиен сексопотологен ку ай выльысь дыр шедёз пумиськыны. История наукая доктор, удмурт нылкышно огазеяськонлэн кивалтӥсез Галина Никитина н люкаськемъёслы трос тунсыкозэ мадиз удмур семьялэн йылолъёсыз, сямъёсыз сярысь, туала ужпумъёсты пусйиз. Азьланьын шаерысьтымы егит семьяосын ужанлы тросгес саклык висъяськоз, Россиысь вань регионъёс пӧлын республикаямы нырысьсэ усьтӥськоз егит семьяослы юрттонъя площадка. Россия Федерациысь Егитъёслэн политиказыя кун комитетын та сярысь ужпум кутэмын ни. "Егит семья" кун учреждение пыр арлы быдэ коньдон висъяськоз. Соку, оло, егит семьяослы сӥзем ужрадъёсын тросгес фестивальын вань люкаськем калыкез укыр синмаськытӥз Як.-Бодья ёросысь Селычка посёлокысь вить аресъем Андрюша Новокрещенов. Сцена вылын ассэ зэмос артистъёс кадь возе - дышемын ни угось пӧртэм ужрадъёсы анай-атаеныз ветлыны. Нош кыӵе гинэ такмакъёсты со уг тоды. Эшъёсыз пӧлын солэн нимыз Крутой. Будӥ ке полицейской яке президент луо, шуэ, вань бандитъёсты, пе, куто. Ушъяськиз, удмурт кылэз но тодэменыз, песянае, пе, дыештэ. Л. Малых. Наталь Егит семья Тон мыным кылдэмын Вожъяськиськод-а? Вожъяськы, вожъяськы, - гомась розаос шоры возьматыса пыӵкылэ Светланаез эшез. - Ӧйтӧд, - мылкыдтэк вазиз со. Аслаз сюлэмыз, зэмзэ но, туж ӝож луиз. Со аспирант ке мыным куке таӵе розаос кузьмасал... Малы со монэ ноку уг келя? Малы кабинетаз юромо пыраса но уг синйылты? Но ӵукна гинэ тылскем дурысь пырем муртлэн кӧлэмез потэмысь трос малпаськыны ӟигарыз ӧз тырмы ни, валесаз зымиз. - Света, тон мар? Ӧд вала-а, мар-а - со сяськаос тыныд! Тани гожтэмез. - Кинлэсь? - Кыӵе ке егит интеллигент пыртӥз, тон дорад ӧй вал. Ах вот, малы со тылскем дурысь вазьгес кошкиз. Ну всё, Касаткин, сюрид. ... Сережа Касаткин, соку университетэз йылпумъясь мурт, радиоын иворъёсъя отделын ужаз. Ужантӥын со сярысь умой вераськонъёс ветлӥзы: синмаськымон, визьмо пияш, туж тыршись, аспирантурае пырыны малпа. Валамон, сыӵе вераськонъёстэк Светлана Белых соку чиед студент шоры ӧй но учкысал, дыр. Со ведь соку радиоын "кизили" вал, шуыны луоз - валтӥсь диктор. Но ялан ушъямзы кытчыяз ке йӧтӥз, лэся - огпол жингыртыны шуыса юромо дораз пыриз. Зэм но, мултэс уг вераськы, но туж интеллигентной. Сергей розаос кузьматозь, Светлана ӧз ик оскылы соослэн куспазы маке луонолы. Та учыр берегес ик Сергей огпол дораз лыктӥз но... кылиз. Ӵуказеяз табазэ (!) ваиз, улысаяз - магнитофонзэ. Валче улэмзы сярысь сюанзы дорозь нокин ӧз тодылы. Собере вордскиз Ксюша. Светлана, гороскопъёсын тунсыкъяськись мурт, нырысь куалектӥз вал: соос кыкназы ик Чорыгъёс. Вылаз ик (юри утчаса но озьы кузпал уд шедьты), кыкназы одӥг нуналэ вордӥськемын! Зэм, арессы пӧртэм - Сергей вить ареслы пичигес, но со чик но ӧз люкеты ог-огзэс валаны, семья кылдытыны. Бӧрысьгес одӥг астролог соослэсь семьязылэсь гороскопсэ учкыса абдраз: тӥляд кылдэмез сыӵе - кусыпъёсты кизилиосын пусъемын ни вылэм! - Тӥни малы мон шудме кема утчаськем, - шуэ Света. Милям, зэмзэ но, туж трос огкадез. Нырысь ик, зэмзэ но, гороскопмы, собере - ужмы (кыкмы ик журналистъёс), пичи дыръямы улэм интыосмы но. Шаркан ёросысь Светалэн песянаезлэн но Яр ёросысь Сергейлэн улэм коркаоссы туссыя но, пе, огкадесь, интыяськемын но гурт пумысь тужгес шулдыр интые - шур дуре. Только бертылыны ӵем уг кылды: я ужлэсь ваньмытскыны уг луы, я нылпи висе. Со понна гужем ини асьсэды гуртын кыӵе ке шормуӵъёсын кадь шӧдо, мылысь-кыдысь шутэтско. Нош нырысьсэ Сергейлэн гуртаз мыныкуз, Светлана вань выль кенъёс музэн ик туж сюлмаськиз: кельшо-а меда, умой-а пумиталозы? Сюлмаськемез огласянь зэмаз. Пумитаны умой пумтазы, но ялан "тӥ" шуыса вазьыло. Гуртысь арлыдо муртъёс азьло ик туж ӟеч тодо ни вал уго дикторез Светлана Белыхез. Соин, лэся, туннэ но кенэнызы озьыгес ик верасько. Али Свелана ужа телевидениын, "Шаер" программаын. Табере сое экранысь адӟыса данъясько ӵыжы-выжыосыз но эшъёсыз. Нош тужгес но - кузпалыз но, нылыз. Ксюша азьвыл тросгес радио кылзылэ вал, ТВ (папае вераське!), али мамаезлэсь чагыр экранэ потэмзэ возьма, со сямен йырсиоссэ тупатъяны выре, выль дэрем куре, будӥ ке, телевидениын ужало, пе. Журналистлэсь ужзэ капчи уд шуы. Уката ик семьяын кыкез но со удысэз нуо ке. Сергеен Светлана куддыр нуналаз кӧня ке час сяна уг адскыло, но ог-огзы вылэ уг ӝожтӥсько. Ваньмон дыръязы но весь уж вылэ ик вуо. Тани Сергей радиоын кык кылын иворъёс дася. Удмурт но, ӟуч кылын но меӵак эфире синмаськымон репортажъёс сётэ. Но Светлана дырын-дырын кузпалызлы вералля: тынад умойгес пӧрмыны кулэ - ужа дикциед бордын! Сергей Светазэ ноку но уг курла: со котьку чебер, визьмо. Куд-ог сюжетэз малпамъя ке уг пӧрмы - ӵок, со ачиз вала ук, выльысь сюлмогес тырше. Семья улонын но озьы ик: Света аслэсьтыз сямзэ секыт шуэ ке но, Сергейлы озьы уг поты. Куатаськылэ ке мар, со понна ик со нылкышно. Дырыз дыръя ӟеч кыл вера, яратоно хризентемаоссэ кузьма - буйгалоз. Нош ӝытазе Светлана сыӵе сиён пӧралоз - чиньыдэ ньылод! Собере со гитаразэ кутоз но мур пуштросъем чебер кырӟанзэ мытоз. - Ми тазэ ӧм кылылэ на! - пайме Сергей. - Со али кылдӥз, - пальпотэ Светлана. З. Рябинина. Телевизор басьтӥзы... шудыса Алнаш ёросысь егитъёс мӧзмыса уг уло. Пӧртэм ӵошатсконъёс, шулдыръяськон ӝытъёс ортчытъяло. Тани кемалась ӧвӧл ёросысь егитъёс вискын КВН ортчиз. Нырысь ӵошатскизы кык-куинь гуртысь командаос, отын вормисьёс пыриськизы йылпумъян ӝытэ. Финалэ шедён понна, зол тыршизы ни: кузьымъёсыз бадӟымесь вал уго: телевизор но магнитофон. КВН-лэн йылпумъян ӝытэз ортчиз Туймыйыл культура юртын. Сцена вылын визьмо, шаплы, быгатӥсь луэмзэ возьматӥз ньыль команда: Лялиысь, "Паримон но компания", Шайтангуртысь "СТЭК", Варзи-Ятчиысь "Висисьёс" но Алнаш станциысь "Горячая десятка". Ма но ӧз карелэ, ма гинэ ӧз дауртэ егитъёс сцена вылын: кырӟало, экто, Пугачёва, Киркоров карисько... Тунсыко валэктонъёс сётъязы шудӥсьёс юанъёслы но. Командаослы но, капитанъёссылы но пӧсяно луиз: соосты косӥзы шулдыртыны залын пукись калыкез. Кудӥз серемес вераськиз, кудӥз ымныр туссэ олокызьы но пуктылӥз, нош огез сцена шорын ӵуж кушман сиыса сылӥз. Вань шуг-секытъёс пыр потыса, котькинлэсь трос балл люказы Алнаш станциысь егитъёс. Соослы ик сюриз самой бадӟым кузьым - телевизор. Кыкетӥ интыез басьтӥз Лялиысь "Паримонлэн компаниез" - сьӧразы магнитофон нуизы. Куинетӥ но ньылетӥ интыосты люкизы Шайтангуртысь но Варзи-Ятчиысь егитъёс. Соослы спорт удысын кулэ арбериос кузьмазы. Таӵе ӵошатскон дасямын вал, ёросысь культура но егитъёсын ужанъя отделъёсын. Ӝытэз нуиз Алнаш ёросысь егитъёсын ужанъя отделэн кивалтӥсь Владимир Соловьев. Нош кыӵе ӵошатскон дунъясьёстэк? Та нуналэ куно радын но, дунъясьёс пӧлын но пукиз Андрей Гальцин - Егитъёсын ужанъя кун комитетлэн кивалтӥсез, Николай Софронов - ёросысь культура ёзэн кивалтӥсь но мукетъёс. Н. Прокопьева. Адямиез сантэматэк Ортчись арнялэн пумаз ортчиз Россиысь налогъёсъя полицилэн федеральной службаезлэн Удмурт Республикая управлениезлэн коллегиезлэн кенешез. Отын нырысь ик бадӟым саклык висъямын вал экономика удысын йыружъёсын нюръяськонлы но соосты дыраз шараянлы. Кызьы пусйиз Россиысь ФСНП-лэн Удмурт Республикая управлениезлэн кивалтӥсезлэн нырысетӥ воштӥсез налогъёсъя полициысь полковник Андрей Синильщиков, экономика удысын йыружъёсын нюръяськыны юрттоз соосты ӝог шараяса но пыр-поч сэрттыса-пертчыса ужан. Туэ куинь толэзьскын управленилэн следствиосъя отделэз 94 уж ӝутӥз, 49-эз йылпумъямын ни, соосъя 6,5 миллион мАнетлэсь унолы изъян ваем коньдон кыре поттэмын. Макем кулэ уж лэсьто налогъёсъя органъёсын ужасьёс но кыӵе пайда ваё соос калыклы, адӟыны луэ республикаысьтымы калыкез улон-вылонын утёнъя министрлэн Светлана Андреевалэн верамысьтыз. Тани Быдӟым Отечественной войнаын Вормонлы 55 ар тырмонэз ортчытонэн валче, ожысь ветеранъёслы но сӧсыр кылемъёслы медициная юрттэт сётон понна, Удмурт Республикаысь Правительство улонысь куинь валтӥсь удысъёсъя гинэ висъяны кулэ вить миллион манет. Вытъёсъя полицилэн тыршеменыз нырысетӥ кварталэ кунлэн казнаяз берыктэмын 6 миллион 457 сюрс манет. Коллегилэн кенешезлэн решенияз верамын Россиысь ФСНП-лэн Удмурт Республикая управлениез Россиысь законъёссэ юн быдэсъяса ужа шуыса. Управленилэн начальникез генерал-лейтенант Владимир Лепихин нимысьтыз пусйиз: ужано, адямилэсь правооссэ сантэматэк. Россиысь ФСНП-лэн Удмурт Республикая управлениезлэн пресс-службаез. Быдӟым Вормонлы - 55 ар Ӟеч адямиосты будэтэ Огырчи (Агрыз) городын вордскем ныл, Рая, 1943-тӥ арын июне, сюлэмыз косэмъя, фронтэ кошкиз. Пиосмуртъёс ӧжыт кылемен, 1924-1927-тӥ аръёсы вордскем нылъёсты но армие басьтылӥзы. Рая сюриз зенитчицаос пӧлы. Укмыс толэзь ӵоже дышетӥзы Казаньысь воинской частьын. Соослэн зенитно-артиллерийской полксы тушмонлы пумит нырысь ик нюръяськиз 1944-тӥ арын Польшаысь Сарна город палан. Сӧсырмемъёсты йӧнатыны келякузы, вӧзазы бомба пуштӥз но, солэн тулкымез Раялэсь йырзэ поромытӥз, пельыз урод кылыны кутскиз. Йӧнатэмзы бере стрелокъёслэн полкысьтызы штабе келязы. Та частен ӵош ик нылаш Берлинозь вуиз. Татын тодматскиз миномётчикъёслэн командиренызы Виктор Петрович Сонинэн. 1945-тӥ арын соос ӵош гожтӥськизы рейхстаг вылэ. Ар ортчыса, Берлинысь ЗАГС-ын улонзэс весяклы герӟазы. Соку Раиса Михайловна но Виктор Петрович кыл сётӥзы ортчем сюрессы сярысь калыклы вераны. Егит кузпалъёс берло улӥзы, Германиын сяна, Польшаын, Чехословакиын но Белоруссиын. 1955-тӥ арын соос вуизы Иже. Политрук Виктор Петрович армиын куамын сизьым ар пала тыршиз. Раиса Михайловна 55 номеро школаын ужлы дышетӥз. Огпол та школае пыраз Брест крепостез утьыкузы бырыны шедем офицерлэн кышноез Е. Н. Мухачёва. Елизавета Никитична ачиз но отын вылэм. Раиса Михайловнаен но пиналъёсын ӵош со Брестэ ветлӥз. Ожлы сӥзем сэреглы следопытъёс трос материал ваизы. Зэм, ӝожомыса верано луэ: Сонина автозавод вӧзысь выль школае выжем бере, 55 номеро школаын ожлы сӥзем комнатаез ворсазы. Соку дышетскон арлы 73 номеро школа быдэсак вуттэмын ӧй вал на. Соин ик пиналъёс тужгес матысьёсаз ветлӥзы. Завуч Маргарита Ивановна Боцко Р. М. Сонинаез ваньмыкуз ыстылӥз дышетскисьёс доры. Раиса Михайловна пиналъёслы мадьылӥз советской воинъёслэн сьӧсь тушмонлы пумит ожмаськемзы сярысь. 1971-тӥ-1972-тӥ аръёсы сентябре школаын кылдӥз "Поиск" клуб. 5-тӥ "а" классысь пионеръёсын ӵош та уже пыриськиз 6-тӥ "а" класс но. Та пиналъёсын кивалтӥзы Р. М. Сонина но А. В. Шевкунова. Быдӟым Вормонлы 50 ар тырмон азьын Удмурт кун университетысь издательство поттӥз Раиса Михайловна Сониналэсь музеен ужамез сярысь "Атайёслэн-геройёслэн сюрестӥзы" книгазэ. Книгалэн тиражез бадӟым ӧвӧл ке но (вить сюрс гинэ), сое лыдӟиллям ини странамылэн пӧртэм сэрегъёсаз. Авторлы шуныт кылъёс веразы Кун Думалэн Тӧроез Геннадий Селезнев, Татарстанлэн Президентэз Минтимер Шаймиев но мукетъёс. Али Раиса Михайловна, ватсанъёс пыртыса, та книгазэ кыкетӥзэ поттыны дася. Музеез кылдытон бордын трос тыршиз солэн кузпалыз Виктор Петрович но. Азьвыл политрук трос туспуктэмъёс лэсьтыны вуттӥз. Солэн бадӟымесь ужъёсыз али школалэн кыкетӥ этажаз интыямын. Ӝож: вазь кулӥз Виктор Петрович. Но солэсь мытэм удыссэ азинто пиналъёсыз Сонинъёс. Школаын дышетскисьёс данъясько Россиын нырысетӥ инты басьтӥсь музеенызы. Экскурсоводъёссы татын асьсэос пиналъёс ик. Соосты висъяло 5-тӥ-9-тӥ классъёсысь, усто вераськыны быгатӥсьёсыз пӧлысь. Дышеткисьёс пӧртэм кылъёсын экскурсиос ортчыъяны быгато. Удмурт кылын но мадё. Тросэз нырысь следопытъёс уг вунэто на 1971-тӥ арын коньывуон толэзе Советской Союзлэн Героез А. Е. Ярославцев доры ветлэмзэс. Александр Егорович, толэзь ортчыса, улонысь кошкиз. Геройлэн кулэмез сярысь ивор пилемтэм инмын гудыртэм кадь кылӥськиз. Собере, шуыны луоз, школаын уката умой ортчытъяны кутскизы кужмо луонлы сӥзем урокъёс. Берлогес та урокъёсты тупаса улонлы сӥзизы. Россилэн ожен герӟаьскем пӧртэм городъёсаз ветлӥзы та школаын дышетскисьёс. Татчы мукет музейёсын ужасьёс но, нимаз адямиос но пӧртэм юанъёсын вазиськыло. Музее уно гинэ вуыло куноос, соос ас мылкыд каронъёссэс ивортыло. Ваньмыз быдэс зӧк книга люкаськем ини. Юри учки сое. Музейлы выль азинсконъёс басьтыны мылкыд каро Воткалан улӥсьёс. Удмурт кун университетлэн географияя факультетысьтыз студентъёс тау каро следопытъёслы, таӵе трос материал люкамзы понна. Раиса Михайловна туж шумпотыса но данъяськыса вера солэн следопытъёсыз улонын зэмос адямиос луэм сярысь. Тани Сергей Дроздов, Вылӥ зенитно-артиллерийской училищеын дышетскыкуз, Москваысь А. Н. Сабуров генераллэсь кительзэ ваиз. Геройлэн ӵыжы-выжыосыз сое кузьмаллям. Сергей школаын кителез ас вылаз дӥсяса шуиз: "Мон но генерал луо". Пияш училищеез ӟеч йылпумъяз. Кин тодэ, оло нош, генерал но луоз? 10-тӥ "в" классын дышетскись Андрей Сонин векчи пужымъёслэсь, партизанъёслэн кадь, пичи землянка лэсьтӥз. Отчы тыризы Сабуровлэсь ожтӥрлыксэ. Огпол Р. М. Сонина 1998-тӥ арын ноябре Москваын пумиськиз генералъёсын. Одӥгез вал Алнаш районысь Подгорное ӟуч починкаын вордскем Иван Клевцов. Война аръёсы со инбаме тямыстон куать пол ӝутскылэм, быдтэм уно фашистъёсты, соослэсь техниказэс. 1943-тӥ арын гудырикошкон толэзьлэн огаз нуналаз Иван аслаз ИЛ-2 штурмовиказ нош ик лобиз... Но... ӧз берытскы ни. Ӝуась самолётысьтыз парашютэн тэтчыса, Ельня город дорысь пичигес гурт доры лэзиськиз. Соку лётчикез утиз Ваня нимо пияш. Иван Васильевич утисьсэ ньыльдон ар утчаз. Шедьтӥз ведь. Иван Семенович Громаков Москваын улэ но ужа вылэм Сьӧрлось кунъёслэн ужъёссыя министерствоын. Али соос кыкназы ик уло Москваын. Генералъёс, 1984-тӥ арын пумиськемзы бере, юн эшъяськизы. Иван Клевцов "Записки "трижды воскресшего" книгаяз ожысь тодмо эшъёсыз но сое мозмытӥсез, Иван Громаков, сярысь но гожтэ. 1966-тӥ арын Клевцовез ГДР-ысь войскоослэн группаенызы ӵош келяло Германие. Кык ар ортчыса, Москвае ВВС-лэн Главной штабаз ӧтё. Дас ар ортчыса, 1979- тӥ арын, генерал-майор Клевцов, висеменыз сэрен та удысысь кошкиз. Азьвыл сямен ик со яратэ Удмуртиез. Быгатэмезъя берта. 1982-тӥ арын апреле но 1985-тӥ арын мартэ Иже Советской Союзлэн Геройёсызлэн но партизанъёслэн- сабуровецъёслэн слётазы ветлӥз. Ӟеч кусыпъёс возе Ижысь 73 номеро, Можгалась 6 номеро шор ёзо школаосын но Алнаш районысь Сям-Какси школаысь следопытъёсын. Раиса Михайловна, егитъёсты батыръёслэн улон сюресъёсынызы тодматыса, пиналъёслы азьланяз будыны юрттэ. Владимир Чернов. Наталь "Ӟечбур, влыь даур!" конкурсэ - Ёркыт потэ пичи тазын Пыласькысал зарезьын! Туспуктэмез С. Касаткинлэн. Наталь Чидаськом Шара малпаськон Куд-огез асьме воргоронъёс палёмыса учкыло кунгож сьӧрысь нылкышноос шоры. Будьто ке соослэн кышномуртъёссы асьмелэнъёсызлэсь маин ке но умоесьгес. Мон бен соосты трос ӧй ке но адӟылы, шӧдӥсько: асьмелэнъёссэ соосын уд ӵошаты. Франциысь кышномуртъёсты ик басьтом. Соос, пе, чиедэсь, чебересь, асьмелэнъёсызлы соос дорозь кыдёкын на. Э-э, озьы ик ӧвӧл ай. Шуом, лыктэ француженка ужан интыяз - миллионер доры. Маникюр, чебер дӥсь! Нош соид шуэ: "Так, туннэ ваньмы мынӥськом кубиста ӝоктыны". Мынӥз француз духиен зыраськем кышномурт кубиста гуэ. Солэн тыбыраз одӥг мешок кубиста поно,... хлобысь! И ӧвӧл ни чиед чебер француженкаед. Нош асьме кышномурт тыбыраз кык мешоксэ понэ... хлобысь! И ӧвӧл ни кубистаед. Филипинкаос но туж чиедэсь но веськресэсь, шуо. Нош веськрес филипинка вылэ дӥсяды ке Китай поездысь басьтэм дӥсез, асьме автобусын солы инвалидъёслэсь интызэс сётыны кутскозы. Немец кышноос умой пӧрасьёс, шуо. Котькудӥз, пе, арняяз 50 пӧртэм пумо сиён дасяны быгатэ. Нош учконо вал, кӧня меда пӧрасал со, кубиста, картофка но таба гинэ ке сётысалыд. Асьме кышномурт картофкалэсь гинэ 63 пӧртэм сиён пӧраны быгатэ. Тани кубисталэсь шыд ке пӧсьтэ, быдэс арня сиыны тырме. Озьы ке но, нокин уг кулы. Англи кышноос, пе, ӧжыт верасько. Малы бен трос вераськод, ваньмыз дась бере. Ма борды гинэ эн кутскы, ваньмыз "пожалуйста". Нош асьме господин джентльменъёсмылы вазид ке, соку ик: "Пельдорад сётӥ ке, кытчы вуэмдэ ик уд вала!" Чидасьом, мукетыз кин озьы быгатоз на. Американкаос, пе, спортэз ярато. Нош асьмелэнъёсыз нуналлы быдэ сыӵе кросс сёто! Ӵукна семьязэ сюдэ, нылпиоссэ садике нуэ, 8 час кувалдаен яке лопаткаен ужа, собере кык-куинь сумкаен, эшшо нылпиоссэ кутыса, магазинъёстӥ бызьылэ. Гуртаз бертыса кык тусьты шыд но одӥг сукыри нянь сие. Вералэ, быгатоз-а американка одӥг кутскемен быдэс сукыри нянез сиыны? Уз! Нош шутэтскон нуналъёс басьтон понна, американка огкутскемен куинь литр вирзэ сётоз-а?Уз. Асьмелэнъёсыз сёто. Басьтэ японкаосты. Пичиесь, миниатюрноесь, пе. Кутчалэ вал соослы 40 размер ката яке дӥсялэ ужан халат но фермае ыстэ. Котькызьы бергаты, асьмелэнъёсыз ик нылкышноос умоесьгес. Кин мукетыз эркиялоз, яратоз, дӥсялоз - сюдоз, изьыны выдтоз нылкышноосмы сярысь уен-нуналэн сюлмаськись асьме воргоронъёсмес. Г. Ларионова. Глазов город. Тулыслы но Ужлы сӥзем праздникен! Россиысь кун праздникъёс пӧлын Нырысетӥ Май кӧня ке дасо аръёс ӵоже ини бадӟым инты басьтэ. Со возьматэ странамылэн улонысьтыз аспӧртмэлыко вакытсэ, ужась адямиос соку азьланезлы оскемзэс верало, государстволэн вормонъёсыныз данъясько. Котькыӵе удысын но котьку адямиез нырысь ик дунъяллязы солэсь ужез яратэмзэ лыдэ басьтыса. Заводысь цехын, крестьян бусыын но фермаын, конструкторлэн бюрояз яке суредасьлэн мастерскояз, врачлэн кабинетаз яке дышетскон аудиториын сюлмаськыса тыршон адямилы вае азинскон но калык пӧлын гажан. Соин ик Тулыслы но Ужлы сӥзем праздник та секыт дыре улыкумы но бадӟым инты басьтэ. Со асьмелы юрттэ огазеяськыны, выльзэ кылдытыны но азьланезлы осконэн улыны, ас кужымедлы но быгатонлыкедлы оскыны. Та праздник оскон кылдытэ, странамы кужмо но сяськаяськись держава луоз шуыса, адямиослэн улонзы пумен умоялоз. Уж ваньзэ ворме! Та вашкала веранэз асьмеос ӟеч шӧдӥськом республикамылэсь берло дас ар ӵоже ортчем сюрессэ син азямы пуктыса. Промышленностья предприятиосысь коллективъёслэн, гуртъёсысь но калык хозяйстволэн мукет валтӥсь удысъёсаз тыршисьёслэн юн тыршеменызы но сюлмаськеменызы Удмуртилэн экономикаез азинсконын выль кужым люка. Россиысь улосъёс пӧлын Республикамы экономикаез азинтонъя 46-тӥысен 27-тӥ интые ӝутскиз, промышленностьын вузъёсты поттонъя 41-тӥысен 32-тӥ интые тубиз, нош гурт хозяйствоын ваньбур поттонъя Удмуртия али Россиысь кызь устоосыз улосвылъёс пӧлы пыре. Шумпоттытэ, республикамы понна таиз ар ортчемез сярысь уката но азинлыкогес луоз шуыса. Куинь толэзь ӵоже промышленностьын продукция поттонлэн быдӟалаез 133 процентлы будӥз. Та дыр ӵоже уже интыяськиз дас тямыс но ӝыны сюрс мурт. Предприятиосын шӧдскымон будӥз уждун, республикалэн бюджетысьтыз уногес коньдон висъяське социальной программаосты быдэсъянлы. Ваньмыз со азинскон басьтэмын Удмуртиысь трос нациен калыклэн сюлмысь но тыршыса ужаменыз. 1999-тӥ арын сюрс но ӝынылэсь уно адямиослэн ӟеч тыршемзы пусъемын Россия Федерацилэн но Удмурт Республикалэн кун наградаосыныз. Ми оскиськом, асьмелэн арысь аре праздник мылкыдъёсмы уногес луозы шуыса. Удмуртиысь гажано адямиос! Сюлмысьтымы ӟечкыласьком лякыт но шундыё праздникен, Тулыслы но Ужлы сӥзем нуналэн! Сӥзиськом юн тазалык, семьяостылы шудбур но тыр улон, яратоно ужады азинсконъёс. Праздникен! Удмурт Республикаысь Кун Кенешлэн Тӧроез А.А.Волков. Удмурт Республикаысь Правительстволэн Тӧроез Н.А.Ганза. Валэктэ юрист Сэрегез дася адвокат Лилия Шкляева Мон вордӥсько нуны Мон нылпи ваи 1999-тӥ арын 16-тӥ июне. Ужасько дышетӥсьын. Нырысь юанэ таӵе. Декретын вал 5-тӥ апрельысен 1-тӥ октябрёзь. Соин валче огъя отпуске ваньмыныз дышетӥсьёсын ӵош гужем ӧй поты. Сыӵе отпуске кошкыны курон (заявление) гожтӥ 1-тӥ октябрьысен. Но малпано ке, мон кулэ вал ни басьтыны 1-тӥ октябрьысен нылпи пособие. Мыным шуизы: одӥг дыре пособие но отпуск понна коньдон уг тыриськы. Соин кык толэзь ӵоже пособие ӧй басьты. Тазэ сётыны ӧдъязы 1999-тӥ арын декабрьысен гинэ. Шонер-а со? Кыкетӥ юанэ. Нылпие кыкто - ныл но пи. Но пособие огезлы гинэ тыро - 200 манет. Малы кыкезлы но уг сётӥськы 1,5 аресозь? Куинетӥез. Дышетӥсь ӧвӧлэн 2000-тӥ арын январе потӥ ужаны, нылпиосылы 7 толэзь ке но ай. Ужасько арняяз 15 час. Апрельысен 23 час луоз, но табере 200 манетъем пособие, пе, уз тыриськы. Картэ али нокытын уг ужа (азьло колхозын вал), пиналъёсын пуке. Уг луы-а со вылэ пособие тыронэз выжтыны, нош аслым 23 час ик ужаны? Азьло ик тау карисько. Елена Гаврилова. Завьялово районын Ӵӧж гурт. Уж сярысь законъёсын кодексысь 166-тӥ ёзэт (статья) валэктэ: секытэн луэмен но нуны ваёнэн валче отпуск азьын, яке со бере яке нылпиез утёнэн валче отпуск бере кышномуртлы со куремъя арлы быдэ отпуск сётӥське, та предприятиын, учреждениын, организациын кӧня ужамез шоры учкытэк. Арлы быдэ сётӥськись отпуске тӥ, Гаврилова эш, потады секытэн луэмен но нуны ваёнэн валче отпускты бере ик. Россия Федерациысь Правительство 1995-тӥ арын 4-тӥ сентябре поттӥз нылпиен муртъёслы кун пособиос юнматон но тырон радлык сярысь 883 номеро постановление. Отын пусъемын: пиналэз утялтыны отпуск дыръя пособие тыриське та отпуск кутскем нуналысен - нунылы одӥг но ӝыны арес тырмытозь. Тӥ нуны утьыны отпуске потӥды вал арлы быдэ сётӥськись отпуск бере. Пособие висъяськыны кулэ 1999-тӥ арын деабрьысен. "Нылпиен муртъёслы кун пособиос тырон сярысь" Закон (кутэмын 1995-тӥ арын 19-тӥ мае, воштонъёс пыртэмын 1999-тӥ арын 17-тӥ июле) куре: толэзьлы быдэ пособие тыриське самой пичи кык уждун мында, утялтоно нуныослэсь лыдзэс санэ басьтытэк. Кык-а, вить-а пинад - юрттэтлэн быдӟалаез огкадь. Пособие висъяське, отпуске потэм адями ужаку но, со быдэс нунал уг ужа ке, яке ас дораз ужа ке. Арняяз 15 яке 23 час ужам лыдъяське-а, уг-а быдэс нунал ужам - созэ тӥледлы валэктыны кулэ школа кивалтӥсьёс. Тӥляд ужасьтэм картты нуны утем понна пособие басьтыны уг быгаты, малы ке шуоно, ужасьтэм мурт пыртэмын ӧвӧл кун ласянь страхование. Кемалась ужасько колхозын. Пичи нуныеным коркан пукисько. Нылпиелы арес тырмоз ни. Одӥг пол но пособие ӧй на басьты. Сое милям 3-4 ар колхозамы уг тыро. Кытысь отчы коньдон висъяське? Шонер-а колхоз лэсьтэ, пособие сётъятэк? Тырозы на сое ваньзэ? Е. А. Игра район. Вылӥ верам рос-прос законъёс валэкто тани мае. Нунылы одӥг но ӝыны ар тырмытозь толэзьлы быдэ пособие басьто: мумыос, бубыос, музон ӵыжы-выжыос но опекунъёс, соос утё ке нылпиез но пыро кун ласянь страхование. Та коньдонэз сёто ужан интыын социальной страхованиея фондысь. Ӝегато ке, тӥ гожтэтэн (заявлениен) вазиськыны кулэ уж сётӥсьлы. Сыӵе куронэз вуттыны луэ нунылы одӥг но ӝыны арес тырмем бере но - эшшо куать толэзь ӵоже. Пособие тыриськыны кулэ весяк сыӵе дыр понна, ку адями пиналзэ утялтыны отпускын улӥз. Огнам будэтӥсько нылпи Нылпиме будэтӥсько огнам. Нылылы дас толэзь. Солы пособие ӧй басьты на. Валэктэ вал: кӧня тыриське али огназлы анайлы? Картэн улӥсьёслы мында-а, ятыргес-а? Эшшо одӥг юанэ вань на. Мон али уг ужаськы, нылпиен пукисько. Арес но куать толэзёзь уксё сётозы. Нош куинёзь малпай ке пукыны, тыриськоз на кыӵе ке уксё? Нылылы арес но куать толэзь тырмыса, уже ке ӧй поты, кышкато, монэ ужысь мозмытозы шуыса. Вань-а сыӵе правозы? Мон нимаз фирмаын уг ужаськы, огдырлы кутэм мурт но ӧвӧл. Таня. Пичи Пурга район. Татын висъяны кулэ кык пӧртэм тырон. Одӥгез: нылпилы одӥг но ӝыны арес тырмытозь толэзьлы быдэ сётӥськись пособие. Со тыриське тужгес пичи кык уждун мында. Кыкетӥез: пиналлы 16 арес тырмытозь (дышетонъя огъя учреждениын тодон-валанзэ будэтӥсь нылпилы - дышетсконзэ йылпумъятозь - 18 арес тырмытозь) толэзьлы быдэ висъяськись пособие. Со луэ тужгес пичи уждунлэн 70 процентэз мында. Огназ нылпи будэтӥсь анайлэн нылпиезлы со ватсаське 100 процентлы, алимент тыронлэсь пегась анай-атайёслэн пиналзылы - 50 процентлы. Нимаз районъёсын коэффициентъёс будэтӥсько на ( шуом, уральской, северной шуонъёс но мукет). Озьы верамын "Нылпиен муртъёслы кун пособиос тырон сярысь" 1995-тӥ арын 19-тӥ мае юнматэм 31-фз номеро Законын. Нуныезлы одӥг но ӝыны арес тырмытозь анай ужа ке ас дораз яке ужан нуналэн чаклам сярысь ичигес дыр ӵоже, яке азьланьтэ ке стипендия басьтыса дышетсконзэ, пособилы правозэ уг ышты. Тӥледды администрация ас кичӧлтэмезъя ужысь мозмытыны уг быгаты. Россия Федерациысь Уж сярысь законъёсын кодексысь 170-тӥ ёзэт (статья) озьы карыны уг лэзьы секытэн яке, куинь аресозь нуныен кышноосты, 18 аресозь ӧлексы нылпиен адямиосты, пиналзэс 14 аресозь огназы вордӥсь анайёсты но атайёсты. Сыӵеосты ужысь кулэстыны яра организация копак бырыку гинэ, соку но соослы мукет интыын уж сётоно. Шонер-а тыро юрттэт? Милям туж бадӟым юанмы вань (милям - нылпиен пукисьёслэн). Бюджет удысын ужасьёслы, декретын пукись нылкышноослы, тыриське 192 манет но ватсаса 48 манет, люкаське 240 манет. Нош колхозын - 192 манет гинэ. Милемлы шуизы: колхозлэн правленияз сётэлэ заявление, 48 манет мед тырозы шуыса. Ми озьы карим. Председательмы пумит луиз. Кин тырыны кулэ со 48 манетэз милемлы? Пичи Пурга районысь Выль Монья гуртысь кышноос. Валэктон сётэ "Нылпиен семьяослы, дышетскисьёслы но мукет муртъёслы компенсациос тырон сярысь" Россия Федерацилэн президентэзлэн 1995-тӥ арын 23-тӥ феврале юнматэм Указэз. Соя Россиысь Правительство 1995-тӥ арын 22-тӥ мартэ нимысьтыз постановление кутӥз. Соя висъяське пособие вӧзы 70 процентъем компенсация. Компенсациос чакламын федерацилэн бюджетысьтыз но кунлэн бюджетэ пырисьтэм фондъёсысьтыз висъяськись таӵе пособиос вӧзы: нуны вордскыку одӥг пол пособие, солы одӥг но ӝыны арес тырмытозь отпускын дыръя толэзьлы быдэ пособие, секытэн дыръязы кышномурт консультациын учётэ султэм кышноослы одӥг пол пособие, пиналлы 16 арес тырмытозь (огъя дышетон заведениын тодон-валанзэ будэтӥсьлы - дышетсконзэ йылпумъятозь) толэзьлы быдэ пособие. Компенсациос тырон понна ватсаса нокыӵе куронъёс но мукет документъёс сётоно ӧвӧл. Кинлы ке сое тыроно ӧвӧл шуыса, закон уг вера. Гурез газэн эстӥськом Кызьы уждун тыриське колхозысь гурез газэн эстӥсь операторъёслы? Уй сменалэн дуныз кыӵе? Кӧня час отчы пыре? Тазалыклы изъян ваись лыдъяське-а удысмы? Со понна йӧл висъяны кулэ-а? Ми шунтӥськомы дас объектэз. Уждунмы 270 манет, тямыс час ужаса, "за вредность" шуон понна номыр уг тыриськы. В. Сабуров. Уин ужан дыр одӥг часлы вакчигес луны кулэ. Озьы куре Россия Федерацилэн Уж сярысь законъёсын кодексысьтыз 48-тӥ ёзэт. Но нуназе но уин ужан дыр огкадь тупатӥське аспӧртэмлыко удысъёсын, шуом, дугдылытэк ваньбур поттонын, нош озьы ик арняяз капчигес ужан нунал но одӥг шутэтскон нунал дыръя. Уй дыр лыдъяське ӝытазе 10 часысен ӵукна 6 часозь кыстӥськись вакыт. 90-тӥ ёзэт косэ: уин ужам понна уждун будэ (пӧртэм удысъёсын одӥг час понна 20, 35, 50 но 75 процентлы). СССР-ысь Министръёслэн Совесты но ВЦСПС 1987-тӥ арын 12-тӥ феврале со понна тупатӥзы вал 40 процентлы ватсам уждун. Данак интыосын туннэ но сыӵе радлык утемын.Кодексысь 90-тӥ ёзэтъя котькуд предприятие ватсаса уждун тупатыны кулэ азьвыл мында (40 процентлэсь ӧжыт медаз луы). Та лыдпус возьматэмын медло администрация но коллектив куспын гожтэм огкылын (договорын) яке уждун тырон сярысь положениын. Тазалыклы изъян ваись удысъёсын йӧл яке мукет сиён-юон висъяны куре Уж сярысь законъёсын кодексысь 151-тӥ ёзэт. Сое кӧня но кызьы сётон сярысь пусъемын вал СССР- ысь Ужъя кун комитетлэн но ВЦСПС-лэн президиумезлэн 1987-тӥ арын 16-тӥ декабре юнматэм постановлениязы. Отын шуэмын: та ужпумез предприятиос асьсэ коже эскеро. Колхозын югдурез радъян пумысен, жаляса верано луэ, талэсь рос-просгес валэктон сётыны уг луы ни. Картэ Чернобыльын вал Мынам картэ 1987-тӥ арын Чернобыльын вал. Татчыозь арлы быдэ ветлӥз санаторие. Миым путёвка ӧз шедьты. Курон гожтӥз вал нырысетӥ ноябре. Солы врачез справка сётӥз: висись мурт санаторие ветлыны ӧз быгаты - тырозы, пе, со понна компенсация. Справказэ картэ Иже лэзиз. Нош Уфаын соцстрахын шуиллям: компенсация уз луы. Адями янгыш шат, солы путёвка ӧз вуы шуыса? Тыриськыны кулэ-а солы компенсация? Кулэ ке, кытчы вазиськоно? Р. Зорина. Селта ёрос. Чернобылен сэрен шуге-леке шедемъёсты утён сярысь верамын Россия Федерацилэн 1992- тӥ арын 18-тӥ июне та ужпумъя кутэм 3061-И номеро законысьтыз 13-тӥ но 14-тӥ ёзэтъёсын. Соослы тазалыксэс юнматон вылысь арлы быдэ сётоно санаторийын яке курортын дунтэк эмъяськыны луонлык яке путёвкалэн шоро-куспо дуныз мында коньдон. Путёвка висъян яке солэсь дунзэ тырон сярысь положениез Россия Федерациысь Правительство юнматӥз 1996-тӥ арын 23-тӥ апреле. Со косэ: ужасьёслы (дышетскисьёслы, военнослужащийёслы, югдурез утёнын ужасьёслы) юрттэт сёто ужан (дышетскон, служба нуон) интыын; ужасьтэмъёслы - пенсионеръёслы (службаысь мозмытэмъёслы) - улон интыысь шуг- секытлэсь утён (социальной защита) ёзъёсын. Путёвка висъяло тазалыкез утён ёзъёс но. Солэсь дунзэ (компенсациез) уг тыро: адями путёвкалы курон (заявление) но мукет документъёс ӧз дася ке, яке путёвкалэсь нокыӵе мугтэк куштӥськиз ке. Компенсация сёто ужан интыын, пенсия тырон интыын но музон ёзъёсын, отчы вуттэмын ке сыӵе документъёс, кудъёсыз уг лэзё огдыре путёвка но солэсь дунзэ басьтыны. Та коньдонэз адями куремъя лэзьыны луэ почта пыр аслыз яке сбербанкысь счётаз. Пенсие - дырызлэсь вазь Мон улӥсько Шаркан районысь Удмурт Альцы гуртын. Тӥляд гожтэтысьтыды шедьтӥ вал "Пенсие - дырызлэсь вазь" сэрегдэс. Отын шуэмын: кин утиз 5 яке ятыргес пинал, ужаз ичизэ 15 ар, со дырызлэсь вазь пенсие потэ. Тае лыдӟыса вазиськи вал Шаркан администрациысь юристлы. Со вераз: сыӵе закон ӧвӧл. Кызьы озьы? Мон ужасько колхозын. Сизьым кузя нылпие. Ужам стаже 31 ар ни. Кин шонер? Любовь Захарова. Тӥледлы валэктон сётэ "Россия Федерациын кун пенсиос сярысь" 1990-тӥ арын 20-тӥ ноябре юнматэм 340-1 номеро Законысь 11-тӥ ёзэтлэн а пунктэз (отчы воштонъёс пыртэмын 2000-тӥ арын 2-тӥ январе). Дырызлэсь вазь (50 арескысен но огъя 15 ар ужам стажен) пенсие пото: вить но солэсь ятыргес нылпи ваем но тямыс аресозь будэтэм кышноос, нош озьы ик ӧлексы (инвалид) кылем нылпиослэн мумыоссы - тямыс аресозь вордӥзы ке. Одӥгез коть та курон быдэстымтэ ке (шуом, вить пӧлысь огез пинал 7,5 арескын кулӥз), кышномурт дырызлэсь вазь пенсие потыны уг быгаты. Малы Любовь Захаровалы сыӵе законъя пенсия уг сёто? Гожтэтэзъя мугзэ валаны уг луы. Воспитательёслы шутэтскон вакыт Ужасько школа бордысь интернатын воспитатель луыса. Тодон-вланмес будэтон курсын 1994-тӥ арын веразы: воспитательёслы отпуск луоз дышетӥсьёслэн кадь ик. Милемлы озьы уг каро - сёто азьвыл сямен ик 36 ужан нунал. Шонер-а лэсьто? Зоя Кожевникова. Шаркан районысь Зюзя гурт. Та выллем юанъёсын вазиськисьёс вал "Удмурт дунне" газетлэн редакцияз лыдӟисьёсын пумиськонъёс дыръя но. Валэктон шедьтыны луиз Россия Федерациысь Правительстволэн 1994-тӥ арын 13-тӥ сентябре юнматэм 1052 номеро постановлениысьтыз. Нимыз тазьы: "Огъя дышетон учреждениосын ужасьёслы, музон учреждениосысь, предприятиосысь но организациосысь педагогикая ужасьёслы отпускъёс сярысь". Отын сётэмын кузь отпуск басьтыны быгатӥсьёслэн переченьзы. Сое валамонгес карон вылысь таблица выллем лэсьтӥм но удмурт кылэ ӧм берыктэ (дышетӥсьёс ваньмыз ик ӟуч сямен ӟеч валало). Перечень образовательных и других учреждений, предприятий и организаций и должностей, работа в которых дает право на ежегодные удлиненные оплачиваемые отпуска � п/п Наименование учреждений Продолжительность отпуска в календарных днях Наименование должностей работников 1. Общеобразовательные учреждения; образовательные учреждения (классы, группы) для детей-сирот и детей, оставшихся без попечения родителей; специальные (коррекционные) образовательные учреждения (классы, группы) для обучающихся, воспитанников с отклонениями в развитии (в т. ч. с задержкой психического развития); образовательные учреждения (классы, группы) санаторного типа для детей и подростков, нуждающихся в длительном лечении; специальные учебно-воспитательные учреждения для подростков с девиантным (общественно опасным) поведением; музыкальные, художественные школы и школы искусств. 56 директора (заведующие), их заместители; преподаватели- организаторы основ безопасности жизнедеятельности; старшие вожатые; учителя; преподаватели; учителя-логопеды; учителя-дефектологи; воспитатели (кроме воспитателей дошкольных групп школ-детских садов; заведующие: заочными отделениями, учебно-консультационными пунктами, логопедическими пунктами, интернатами при общеобразовательных учреждениях и другими структурными подразделениями; концертмейстеры; инструкторы: по труду, физкультуре; педагоги-психологи; педагоги дополнительного образования; классные воспитатели; музыкальные руководители; заместители директоров по режиму; дежурные по режиму. 2. Межшкольные учебно-производственные комбинаты (объединения, центры) трудового обучения и профессиональной ориентации учащихся; межшкольные компьютерные центры, межшкольные учебные и учебно-производственные мастерские 56 директора, их заместителями; руководители структурных подразделений; учителя; педагоги-психологи. 3. Специальные дошкольные образовательные учреждения для воспитанников с отклонениями в развитии; дошкольные образовательные учреждения санаторного типа для воспитанников, нуждающихся в длительном лечении 56 заведующие, их заместители; воспитатели; музыкальные руководители; инструкторы по физкультуре; учителя- логопеды; учителя-дефектологи; педагоги-психологи. 4.Дошкольные образовательные учреждения общего назначения, дошкольные группы школ- детских садов 42 заведующие, их заместители; воспитатели; музыкальные руководители; инструкторы по физкультуре; педагоги-психологи. 5. Образовательные учреждения дополнительного образования (внешкольные) 42 директора, их заместители; заведующие: отделами, кабинетами, секциями, лабораториями и другими структурными подразделениями; педагоги дополнительного образования; вожатые; воспитатели; концертмейстеры; культорганизаторы; тренеры- преподаватели; инструкторы-методисты. 6. Образовательные учреждения начального профессионального образования; учреждения дополнительного образования (курсы, учебно-курсовые комбинаты, технические школы и другие аналогичные учреждения по подготовке и переподготовке кадров, имеющие соответствующую лицензию) 56 директора, их заместители; преподаватели; преподаватели-организаторы основ безопасности жизнедеятельности; руководители физического воспитания; воспитатели; педагоги дополнительного образования; заведующие: филиалами, учебно-консультационными пунктами; заместители директоров по режиму; дежурные по режиму; педагоги-психологи. 7. Образовательные учреждения среднего и высшего профессионального образования и соответствующего дополнительного образования 56 ректоры (директора); первые проректоры; проректоры (заместители директора); директора (заведующие) филиалов; преподаватели; професссорско-преподавательский состав; воспитатели; концертмейстеры; педагоги-психологи; заведующие: докторантурой, аспирантурой, научно- исследовательским отделами (секторами), отделениями, учебным отделами (частями), учебноконсультационными пунктами; руководители (заведующие) производственной практики; руководители допризывной подготовки; преподаватели-организаторы основ безопасности жизнедеятельности; ученые секретари совета; педагоги дополнительного образования. 8. Учебные, учебно-методические, методические кабинеты (центры), в том числе входящие в структуру образовательных учреждений. 42 директора (заведующие), их заместители; заведующие отделами и другими структурными подразделениями; методисты; педагоги-психологи. 9. Психологические службы системы образования 56 директора (заведующие), их заместители; заведующие отделами (лабораториями); педагоги-психологи) учителя- дефектологи; учителя-логопеды. 10. Учебные подразделения учреждений здравоохранения 56 заведующие педагогической частью; учителя; учителя-дефектологи; логопеды; воспитатели; музыкальные руководители; педагоги дополнительного образования; инструкторы по физкультуре; мастера производственного обучения; старшие вожатые. 11. Образовательные учреждения, другие учреждения, предприятия и организации 42 педагоги-организаторы; социальные педагоги; воспитатели; педагоги дополнительного образования; методисты; мастера производственного обучения. Юанъёстэс адвокатлы сётэмды луоз 25-33-70 номеро телефонъя. Журналистъёсын пумиськон Майлы пенсиос будозы - Владимир Путин сётэм кылызлэсь куштӥськыны уг малпа, - шуиз Россия Федерациысь Пенсиосъя фондлэн Удмурт ёзэныз кивалтӥсь Владимир Моряков журналистъёсын пумиськонын. Берло ньыль толэзь куспын гинэ пенсиослэн быдӟалазы будӥз 38 процентлы. Но пенсионеръёсты азьланьын но возьмало шумпотонъёс. Май толэзьысен пенсилэн быдӟалаез 15 процентлы будоз на. Шорлыдын вераса, пичи пенсилэн быдӟалаез луоз 505 манет - вал 472 манет; бадӟым пенсилэн быдӟалаез луоз 595 манет - вал 546 манет. Таиз лыдпусъёс вуж законъя пенсия басьтӥсьёслы. Нош выль законъя пенсия басьтӥсьёслэн бадӟымез пенсизы луоз 754 манет 20 копейка - вал 616 манет 80 копейка. Но пенсионеръёс сюлмаськыны ӧвӧл кулэ: лыдъян-чотанъёс лэсьтэмын луозы соизъя но, таизъя но законъя. Кудӥзъя тросгес пенсия усе, соизъя ик быдӟалазэ тупатозы. Пенсилэн будонэз таин уз йылпумъяськы. Чакламъя, мукет йылтонъёс луозы августэ, ноябре но сояз арын феврале. Озьыен, пенсилэн быдӟалаез матэктоз одӥг сюрс манетлы. Владимир Моряковлэн верамезъя, коньдонлэн дунтэмамез (инфляция) чакламъёсъя 10 процентлэсь ятыр луыны кулэ ӧвӧл, та ласянь пенсионеръёс капчиенгес шокчыны быгатозы. Пенсиослэн быдӟалазы будэмен йыло выт тыронъя куронъёс но. Республикамылы толэзьлы быдэ кулэ луоз 35-40 миллион манет, нош Пенсиосъя фондэ пунэм тыронъёс люкаськемын ни одӥг но ӝыны миллиард манет. Выт тыронзэс трослы ӝегато "Ижмаш", "Аксион", лэсьтӥськон удысын но гурт хозяйствоя удысын ужасьёс. Пенсиосты дыраз тырон понна, ваньмыз соос азе чурытэсь куронъёс пуктэмын луозы. Майлы пенсия тыремын луоз ни 26-тӥ маёзь. Трос юанъёс кылдо кык законъя пенсиос тырон пумысен. Али вераськон мынэ ни соосты огазеян сярысь. Кызьы вераз Владимир Моряков, выль законлэн инъетэз дась луоз ни сояз арын январь-февраль толэзьёсы. Л. Малых. ШӦКЫЧ ОЧЕЙ ТОЛИЛЫ - ПӦСЬ САЛАМ Мыжгаськись Селифон? Ӵукна Вовик школае вуиз, уд тодма: синмыз лыз-вож, воксё пытсаськемын. Марья Петровна тунсыкъяське: - Вовик, кинэн жугиськид? Яке визьтэммыса бызьылонъяд сэрег борды мырӟиськид? - Котьку тӥ, Марья Петровна, мон сярысь урод гинэ малпаськоды. Ӧй но жугиськы, ӧй но мырӟиськы - Селифон агае кышнояськиз. - Селифонды кышнояськиз, тынад синмыд пытсаськиз - валамон ӧвӧл. - Калык сюанэ трос люкаськиз, кӧлон инты уг тырмы, монэ Селифонэн но выль кенэн артэ интыязы. Изьыны гинэ выдӥм, тылэз кысӥзы. Вить минут но ӧз ортчы, Селифон юа: - Вовик, изиськод-а? - Уг. Кӧня ке ортчыса, нош ик: - Вовик, изиськод-а? - Уг. Ма, сокем иземме та возьма, малпасько. Нош ик шыпыртэ: - Вовик, изиськод-а? - Уг. Изьыны валалод-а, уд-а тон, кион сиён! Туж зол озьы кеськиз но синмам мыжгиз. Ӵуказеяз Вовиклэн кыкетӥез но синмыз пытсаськемын вал. Марья Петровна юа: - Нош ик Селифон? - Селифон. - Ма луиз та Селифонэн? Ачим дышетӥ, кыӵе востэм но кылзӥськись пияш вал. Я, вера... - Монэ уйлы нош ик Селифонъёсын ӵош каризы. Селифон юа: - Вовик, изиськод-а? Э, малпасько, дышетэмын мон табере. Шып кыллисько, юри соргетыны кутски. - Изиз кадь та, айда поехали! - шуиз Селифон. - Кытчы тӥ уйлы пумит кошкиськоды, монэ но сьӧрады басьтэ! - кеськытэк ӧй чида мон. Нош ик мыжык сюриз. В.КУЗНЕЦОВ. Можга город. Ижевск-Удмурт Епархиен кивалтӥсь архиерейлэн Николай архиепископлэн Быдӟымнуналэн ӟечкылан гожтэтэз Христос улӟыса султӥз! Одӥгаз ыстэм гожтэтаз Павел апостол шуэ: "Зэм ик, Христос кулэмысь улӟыса султӥз, кулэмъёс пӧлысь Со нырысетӥез, Кин улӟыса султӥз" (1 Кор. 15:20). Та сярысь верало вань апостолъёс. Сюрсъёсын, миллионъёсын адямиос лулынызы-сюлмынызы шӧдӥзы, тодӥзы Инмар вань шуыса, оскизы Инмар Пи, Христос, асьмеды утён понна, кирос орды кортӵогамын вал, но Со кулонэз вормиз, улӟыса султӥз, асьмеды но сьӧлыкъёс полын кулӥсьёсты улӟытон понна. Павел апостол шуэ: "Таяз дуннеын улон понна гинэ Христослы оскиськомы ке, соку асьмеос вань адямиослэсь но шудтэм адямиос" (1 Кор. 15:19). Кирос борды кортӵогам Инмар Пи асьмелы бырисьтэм улонэ нуись сюрс возьматӥз. Соин ик ми оскыса, сюлэммы шумпотонэн пачылмыса, быдэс дунне азьын тодытӥськомы: Христос улӟыса султӥз, кулон вормемын, Инмарен адями вискысь могӟетъёс быдтэмын. Кузё-Инмарен яратэм пастырьёс, монахъёс, Ижевск-Удмурт Епархиысь Инмарлы оскись вань калык! Ваньдэс тӥледыз сюлмысьтым ӟечкыласько таӵе быдӟым, сӥё-дано, шумпотон ваись праздникен - Христослэн Улӟыса Султонэныз, ӟечкыласько апостолъёслэн верам вужмисьтэ-бырисьтэм кылнызы: ХРИСТОС УЛӞЫСА СУЛТӤЗ! ХРИСТОС УЛӞЫСА СУЛТӤЗ! ХРИСТОС УЛӞЫСА СУЛТӤЗ! Христос Инмарлэн улӟфыса султэмез сярысь ӟеч ивор котькуд корка, котькуд семьяе мед пыроз, вань адямиос доры мед вуоз, Инмарлэн кысӥсьтэ-бырисьтэм яратонэз ваньдылэсь сюлэмдэс мед шунтоз, каньыллык мед ваёз. Христослэн Улӟыса Султонэзлы шумпотыса, тӥледлы ваньдылы ӟечлык сӥзьыса. + НИКОЛАЙ Ижевск-Удмурт Епархилэн кивалтӥсь Архиереез Христослэн Пасхаез Ижкар, 2000-тӥ ар. П. И. Чайковскийлэн вордӥськемез дырысен 160 ар сӥзем фестиваль Уӵы куара Россиысь радио но ивортӥз ни быдӟым ӟуч крезьгурчилэн Пётр Ильич Чайковскийлэн вордскемез дырысен 160 ар тырмонлы сӥзем 43-тӥ крезьгуро фестиваль сярысь. Та адӟытонэ, учконэ н кылзонэ пыриськыса, валлян Удмурт кун филармонилэн юртаз ортчиз солисткалэн Елена Валентиновна Бускиналэн концертэз. Кырӟасьлы юрттӥзы республикаысьтымы культурая училищеысь гитаристъёслэн "Акустик-шоу" но "Экспромт" ансамбльёссы, Ижысь 2 но 3 номеро нылпи музыкальной школаосысь "Ваталинка" но "Сударушка" ансамбльёссы. Ӝытын кылбуръёс лыдӟонэ пыриськизы солисткалэн юрттӥсьёсыз николай Темников но Лариса Сидорова. Концерт кык ёзэн вал. Нырысяз Елена Бускина кырӟаз Петр Чайковскийлэсь романсъёссэ, кыкетӥяз - город романсъёсты. Котьку котьма лэсьтӥське, юрттӥсьёс вань ке. Кырӟасьлэн администраторез - картэз М. А. Попов. Дӥськутэн юрттэ "Ирина" фирмалэн директорез И. Ф. Суркина. Зал тыр люкаськемъёс азьын Елена Бускина кырӟаны нырысь-валысь дӥсьтытэкгес кутскиз кадь. Нош концертэзлэсь нырысетӥ люкетсэ Петр Чайковскийлэн "Я счастлива теперь" романсэныз йылпумъяз, вань сюлэмзэ кырӟанлы сётыса. Та номер сокем зол пӧрмиз - быдэс зал туж кема чабиз. Вӧзысьтым мӧйы кылзӥсь ӧз чида, шара вератэк: - Малы таӵе усточимес ватыса возиллям? Бен, Елена Бускиналэн куараез - туж шер пумиськылӥсь, аспӧртэм куара. Уӵылэн выллем, векчи но ненег, сюлэме кемалы кылись. Солы али куамын куать арес. Зэмзэ но, паймоно: таӵе кырӟасез асьмеос кызьы тодытэк улӥмы? Малы? Кыӵе муген? Елена вордскемын Ижын. 1985-тӥ арын йылпумъям крезьгуръя училищеез. Дышетӥсез вылэм Юлия Петровна Раскопина. Собере тодон-валанзэ будэтэм на Карелиын - Петрозаводскысь консерваториын. - Солэн репертуарез туж бадӟым, - шуэ кырӟасьлэн котьма ласянь юрттӥсез М. А. Попов. - Кырӟа шунды пуксён палась но ӟеч крезьгурчиослэсь кырӟанъёссэс - Бах бордысен кутскыса, Прокофьев дорозь. Азьло тросгес вал классикаез, кыкетӥ арзэ ни кырӟа выльзэ - классической но город романсъёсты... Но та дырозь, кызьы шуо, нокыӵе дано нимыз но, орденэз но ӧвӧл. Со бордын гинэ-а меда ужпум? Ачиз Елена шуэ: - Миым, 7-тӥ мае но, валлян арын но нимаз концертъёсы вал ни. Но Чайковскийлэн фестиваляз пыриськыны бере кыли кадь... Собере... дышетскеменым валче бер бызи. Нылпиосы но пичиесьгес на... Бен, туннэ тазьы шуыны луоз: нокинлы тодмотэм Елена Бускиналы, республикаысьтымы одӥгезлы усто кырӟасьлы, чик ӝегатскытэк паськыт но вож сюрес усьтоно, солы котькыӵе муген люкетон мед лыдъяськоз бадӟым сьӧлыкен. Нокинлы тодмотэм кырӟась Елена Бускина - уӵы куара но куанер улон. Солы та вакытэ гинэ юрттоно. Собере со пыд йылаз султоз но кылзӥсьёслы трос шумпотон ваёз. П. Скобелев. Вордӥськиз выль кырӟась... Кырӟа Елена Бускина. В. Беломорскихлэн туспуктэмъёсыз. Бурмисьтэм яраос 14 ар талэсь азьло, 26-тӥ апреле, быдэс дунне куалектӥз Чернобыльысь атом станцилэн пуштэмезлэсь. Та шимес учырын кылдэм яраос али ке но азо, чус кӧлыны уг сёто радиацияулэ пырамъёслы, малпаськонэ уськыто отчы ветлымтэ муртъёсты но. Республикаямы дасэтӥ арзэ "Союз Чернобыль" огазеяськон ужа. Со огазея радиациен герӟаськем авариосы пыриськем 3390 муртэ. Соос пӧлысь 2700-эз - Чернобыле ветлэмъёс. Арысь аре соослэн радзы шероме. Кӧшкемыт висён улонысь 294 гит воргоронэз нуиз ни. Валлян та шимес нуналэ но бӧрысь радиациен валче быремъёсты буре вайыса Ижысь та кышкыт учырез тодэ вайытӥсь синпелет - из дорын вӧсь ужрад ортчытӥзы. "Союз Чернобыль" огазеяськонлы ӟечен юрттыны мылкыд карисьёслы ивортӥськом солэсь счётсэ: р/с 40703810400000000004 "АК Удмуртинвестстройбанк", к/с 30101810400000000863 БИК 049401863 ИНН 1835011290 Н.ЩЕГОЛЕВА. * Буре ваён дыръя. Туспуктэмъёсыз В.Беломорскихлэн. ШӦКЫЧ Берло укмыс аръёсы Росссиын бусыосы минерал ватсэтъёсты поттон 10 поллы кулэсмиз. Одӥг гектар музъемлы 8 кило удобрение гинэ сётӥське. Пересь: Татчы пичияк удобрение поттӥм ик вал. Соин ик чабеймы но тузӥ удалтӥз. Мукетыз: Нош татчы мае инмар сётӥз, сое ик поттӥм. Удобрение басьтыны уксё ӧвӧл уга. Пери эн поръя котыртӥ Шаерамы ньылетӥ арзэ ини кык аресозь пиналъёс полиемилитлэсь вакцина басьто. Нырысетӥ тур ортчиз апреле, кыкетӥез ялэмын мае. Кыӵе солэн кулэлыкез? Со сярысь вераськиськом республикаысьтымы нылпи больницаысь врачен Люция Искаковаен. - Люция Ясовьевна, мар со сыӵе полиемилит но малы со висёнэз алонлы тужгес бадӟым саклык висъяло? - Полиемилит - туж кышкыт паласькись висён. Палаське со адямилэсь адямилы омыр но кырсь пыр. Вирус туж чаль лулсэр системаез сӧре - адямиез пери шукке. Тужгес кышкытэз со - та висёнэз тросгес курадӟо нылпиос. - Но берлозэ полиемилитэн курадӟизы 40 ар талэсь азьвыл... - Бен, вакцина шедьтэм бере асьме палан полемилитэн висён одӥг учыр но шараямын ӧвӧл. Но 1997-тӥ арын Архангельскын висиз полиемилитлэсь прививка лэсьтымтэ пинал. Со сяна, кышкытлык кылдытэ Уй пал Кавказысь югдур - отын сыӵе учыръёс дырын-дырын шараяськыло. Нош мар луоз, отӥысь висись асьме пала вуиз ке? Соин ик, черлэсь утиськон понна быдэс Россиын ялэмын иммунизация нуналъёс. Куинь толэзьысен кутскыса вань нылпиос полиемилитлэсь вакцина басьтыны кулэ. Кылем арын та ужрад республикаямы туж умой быдэстэмын - 130 сюрс пинал (98 процентэз) вакцина басьтӥз. - Ваньмызлы вакцина сётыны нокызьы уг луы. Тросэз курадӟо уго аллергиен яке эшшо кыӵе ке висёнэн, куке прививкаос лэсьтыны уг яра. Мынам вазиськем потэ анай-атайёслы: юрттэ та ужрадэн эмчиослы, эн аналтэ нылпиостэс. Вакцина гинэ соосты туж но туж кышкыт черлэсь утьыны быгатоз. З. Вахрушева. ТАЗАЛЫК "Пылаське" шунды сиосын Асьмеос ӝыны ар пала - сизьылысен тулысозь ум адӟылӥське шундыез. Витаминъёс сяна, мугормылы уг тырмо шунды (ультрафиолет) сиос. Лябӟе тазалык, аляло висёнъёс... Соин ик нырысетӥ шуныт нуналъёсы ик тырше шунды шорын улыны. Пыжыны уд пыже, нош Д витамин тырмымон басьтоды. Гужем шорын шунды улын пыжон мугорлы тросгес изъян вае (соку ультрафиолет сиос мултэс трос луо), соин ик эн вожъяське шоколад тусозь пыжем эшъёстылы. Пӧсь шунды шорын 20 минутлэсь кема улыны уг яра. Висемменыды яке эшшо кыӵе ке муген кыре ке потэмды уг луы, "пылаське" шунды сиосын коркан, укно дурын. Шунды сиос тужгес небыт, мусо но пайдаё - мае. Эн возьмалэ пӧсьтолэзез. Шӧкыч Э, Пекла, Пекла... Юмореска Йыр берга. Котыр берга. Берга, берга но - интыяз ик уг пуксьы. Ымныры тыбырам вуэ. Кышноен сэрен ваньмыз сураськиз ни. Малпаса-малпаса, йырсиосы пежырско. Ма, пе, озьы дауртод ини. Ма сыӵе ми уродзэ лэсьтӥм? Лушкемак гинэ чуланын пукимы но тӥни. Нокинлы ӧм люкетэ. А со? Кут но ваньзэс тургаты. Соосты тодэ вайыса, мынам сюлэмы уллань усе. Э, Пекла, Пекла. Вӧсь карыны быгатӥськод ик вылэм. Кутскиз но ваньзэс ог минутскын пазяз: Лидиез но, Изабеллаез но, Журавушкаез но. Малы ӧз яралэ? Соосты яратӥсько шуыса-а? Соиз зэм. Уг пӧяськы. Но со ачиз но кинэ ке яратэ, дыр, ук. Шуом, Наполеонэз, Калашниковез... Лидие жаль потэ. Соин уж дурысь эше, Горд Мико, тодматӥз вал. Шулдыр пуким куинь кузя. Лидия но бен туж учкымон, чебер, ческыт маке. Шораз учкыса-учкыса, эшшо оскалтэм потэ. Вань мылкыд ӟазег гон кадь лӧптэ. Ай сыӵе поръя, нокызьы музъем вылэ уд вуиськы. Кытын на, пе, кышно. А Лидиен зол эшъяськи. Берло, кышно медаз адӟы шуыса, пиям но ватыса вози. Ой, беслэн нылыз, шунтэ ик сюлэмез. Коть татчыяд ик усь. Ой, уг быгатӥськы, лобасько... Нош Пекла? Ойдо, шуисько... Пегӟе гинэ. Мукетъят Изабелла син азям шедиз. Адӟи но - давление ӝутӥськыны ӧдъяз. 90-ысен - 180-озь вуиз. Мугор солэн Мадонналэн кадь: кускыз азь чиньые но бадӟымез вискы тэре. Соку ик ӟыгыртэм потэ. Малпамын - лэсьтэмын. Ӵошен потӥм "Вуюись" магазинысь. Гуртэ вуыны манӥ ӧй вал ни. Вамышъяськом, нош пыдессинъёс ини куалекъяло. Кышно медаз адӟы шуыса, чаляк гинэ мунчо азе интыяським. Йыр шузимытозь пуким. Возьматӥз мыным Изабелла... виноград пӧлын улонэз. Суч-суч луыса, умме усиськем. Нош Журавушка... Таиз нош... Одӥг пол гинэ эскерид ке, инмысь уд васька. Тожо йырез шузимытэ... Бордаз пал кук йылын ке но сылыны тыршиськод, ачид но тури кадь луиськод. Яратӥ та куинь чеберайёсты. Кышнолэн куараезлэсь чидан быре ке, та шутозь, соос котыре кариськисько. Нош туннэ синъёсы лыз-вож адӟытозь йыры кур. Лызэктӥ ни. Чуланын кылльыкум ик маке жингыр-куангыр каремез кылӥ, но санэ ӧй басьты. Азбаре потӥ но... либрак луи: Лидия но, Изабелла но, Журавушка но азбар шорын кыллё. Пекла ваньзэс тургатэм. Огезлэн - мугорыз, мукетызлэн - чыртыез, куинетӥезлэн... Музъемез орсмытӥллям... Э-эх, мискиньёсы!.. Сюлэм небӟытӥсьёсы... Йыры курен тамак кенжытэме но уг луы. Коробка спичкаме арам кари ни. Куалекъяса сылӥсько. Пеклалэн сьӧд ужезлы луыса, коть ачид но сьӧд синкылиен бӧрд. Сыӵе, пе, сьӧраз ортчод-а? Э, Пекла, Пекла, Фёкла Виссарионовна, кин тонэ, таӵе лек кышномуртэ, куке но суред вылэ пуктоз. Чеберез уд валаськы... Экзотикаез. Лек дуринчи тон. Чебер бубылиосын огкыл кариськыса, поръя вал кӧня ке пӧлазы. А тон... Соку ик кузгатъяны... Мон тынэсьтыд тусбуйдэ, таӵе вӧсь каремед бере, чырс бражкаен фляга вылам но уг пукты. Ул ини весяк кышно палад, Фёкла Виссарионовна. Учкы гуред, плитаед шоры... Нош чеберайёсме таӵе секыт дыръязы огназэс уг кельты. Мусокайёсме, шуисько, сӧрылэм посудаосме... Корзинае тырыса, огъя люке нуо ай... Э, Пекла, Пекла... Сӧрылӥд ке но, кызьы соосты вунэтом? Эмма Загребина. Ӟечкылан Милям нэнэймы 40 арлэсь кема ужаз дышетӥсьын. Атаенымы ӵош будэтӥзы куинь нылпи. Яратоно нэнэймес ӟечкыласькомы вордскем нуналэныз. Солы 3-тӥ мае тырме 80 арес. Сӥзиськомы солы шудбур но тазалык. Нэнӥ, ми тонэ туж яратӥськомы. Эн мӧзмы. Римма нылыд, эмеспиед, Оля но Светлана внучкаосыд, Самаринъёслэн но Ивановъёслэн семьяоссы. Красногорск черкогурт. *** Котькыӵе удысын рос-прос, лулысь-сюлмысь ужаны быгатӥсь, туж чебер но визьмо, матысь но дуно эшме Раиса Леонтьевна Перевозчиковаез ӟечкыласько вордскем нуналэныз. Шудбур но тазалык тӥледлы. Гажаса Нина Михайлова. Пичи Пурга ёрос. ТАЗАЛЫК Визьмо пинал - висись Нылпи врачъёслэн чакламзыя, макем пинал висисьгес, сокем со ӟеч дышетске. Архангельскысь медицинской академиысь нылпи мугорысь веществоослэн вошъяськон аспӧртэмлыксэс эскерисьёс шедьтӥзы кадь солэсь мугзэ. Куд-огезлэн мугораз мултэс мочевой кислота люкаське (кызен сурано ӧвӧл), со юрттэ йырвиымез ӟечгес ужатыны. Соин ик мугоразы мултэс сыӵе кислотаен пиналъёс туж визьмо луо, школаын ӟеч дышетско. Ярато бадӟымъёсын вераськыны, ваньзэ "витьлы" лэсьтыны. Огласянь со туж умой кадь, мукет ласянь пинал ӵем кынмаса висе, мусэс, пекляосыз ляб луо, аллергиен курадӟе. Россия Федерациысь Президентлэн А.А.Волковлы "Россия Федерациысь дано лэсьтӥськись" сӥлы карон ним сётон сярысь УКАЗЭЗ Лэсьтӥськон удысын азинсконъёсыз но кема аръёс ӵоже паёдаё тыршемез понна "Россия Федерациысь дано лэсьтӥськись" сӥлы карон ним сётоно Волков Александр Александровичлы - Удмурт Республикаысь Кун Кенешлэн Тӧроезлы. Россия Федерациысь Президентлэсь ужзэ быдэсъясь В.В.Путин. Москва, Кремль, 2000-тӥ арын 24-тӥ апреле. � 721. *** 26-тӥ апреле Россия Федерациысь Президентлэн Кремльысь резиденциезлэн Екатеринской залаз Россиысь Президентлэсь ужзэ быдэсъясь Владимир Путин Александр Волков та кун наградалэсь мӧля вылын нуллон пуссэ (знаксэ) сётӥз. ТАЗАЛЫК Вӧсез усыкмытон Мон дышетскисько институтын. Ялан курадӟисько тазалыке лябен. Врач ӵектэ операция лэсьтыны. Уз лябӟы-а йыры наркозэн сэрен? Н.Сафонова, Глазкар. Юанлы валэктон утчаса ми вазиським республикаысьтымы 1-тӥ клинической больницаысь врачлы - анестезиологлы-реаниматологлы А.И.Слободинлы. - Александр Иванович, маин ке буйгатыны быгатоды-а нылашез? - Одно ик. Со нырысь тазалыкез сярысь сюлмаськыны, операцилэн умой ортчемезлы оскыны кулэ. Наркоз адямилы изъян ваён понна малпамын ӧвӧл, со вӧсез зӥбломытэ. Я, юалэ ай кинлэсь ке, соглаш луоз-а со кыӵе ке капчи операциез наркозтэк чиданы? Уз. Уз но чида. Со сяна, наркоз улсын кӧлыкуз, адями малпськыны уг быгаты, ассэ куректонлэсь, керӟегъяськонлэсь уте. Озьы ке но, наркоз бере дыг луон, йырсазь лябӟон, ӵемгес висьылон сярысь вераськонъёс вань... - Эн кылзӥське, со шонер ӧвӧл, мон тодӥсько, одӥг наркоз вить арлы улонэз кулэсмытэ шуыса вераськонъёс но вань. Азьвыл, зэмзэ но, отын кыӵе ке зэмлыкез вал, дыр, малы ке шуоно, висисез эфир маскаен усыкмытъязы, али анестезиологъёс ужало туала выль амалъёсъя (наркоз лэзё вирсэре, трахеяе), котькуд муртлы солы гинэ тупась эмъюм быръё. Вань кышкытлык мултэс наркоз лэзьыку, но сыӵе учыръёс туж но туж шер пумиськыло - 50 сюрс операцилы одӥг. - Ку кутӥське быдэсак (общий) но ку кыӵе ке интыез гинэ (местной) усыкмытӥсь наркоз? - Котькыӵе операциез луэ озьы но тазьы но лэсьтыны. Но секыт операция дыръя вандылоно интыез гинэ "Шӧдӥсьтэм" карыса, висисьлы секыт: со йырыныз ваньзэ шӧдэ. Мукетыз ужпум, куке вандӥськем интыез вуроно яке пинь кысконо - кулэ-а со понна быдэсак "кулылыны"? - Куд-огез оперкция азьын асьсэ тодэмъя вӧсез зӥбломытӥсь эмъюмъёс юо... - Соосты валаны луэ - котькуд улэп мурт вӧсьлэсь кышка. Но умойгес луысал со анестезиологен кенешысал ке. - Мар вераны кулэ операцие мынӥсь анестезиологлы? - Огъя тазалыкез, маин висьылэмъёсыз сярысь. Операция азьын врач солэсь ачиз юалляське, эскеронъёс ортчытэ. - Вӧсез шӧдытэк кӧлыны умой, но сазьтӥськыку улэм уг поты ук: ваньмыз ишкыса висе, вырем уг луы, чидантэм сю куасьме... - Озьы, но чиданы кулэ6 самой секытэз ортчемын ни, азьпалан - бурмон, висьытэк шудо улон. Врачъёс юрттозы тӥледлы пыд йылады султыны. Пеляд пон! * Операция азьын туж-туж керӟегъяськиськоды ке, арня ӵоже буйгатӥсь паросъёс, коӵыштурынлэсь (валерианалэсь) настойка юылэ. * Операция азьын уг яра сиыны-юыны. * Наркозлэсь сайкамды бере эн куалектэ асьтэды ӟигартэмен шӧдыса - ӝоген ваньмыз тупатскоз. * Операция бере уг яра сиськыны, юыны, валес вылысь султылыны. * Одно ик быдэсъялэ врачлэсь вань куронъёссэ, эн кылзӥське артэ кыллись "визьмо" бускельёстылэсь. З.РЯБИНИНА. Россиысь дано кырӟась Лариса Рудакова вордӥськиз но будӥз Свердловскын. Йылпумъяз татысь ик крезьгуръя П. И. Чайковский нимо училищеез. Собере дышетсконзэ азьланьтӥз Москва консерваториын. Ужаны кутскиз Бадӟым театрын. Лариса Борисовна кырӟаз ни "Севильский цирюльник", "Травиата", "Царская невеста", "Золотой петушок", "Богема", "Кармен", "Иван Сусанин", "Руслан и Людмила" но мукет операосын. Калык куспо конкурсъёслэн лауреатсы. Барселонаын басьтӥз Гран-при. 1995-тӥ арын ВВС телекорпорациен ялэмын одӥгеныз усто кырӟасен. Кырӟалляз "Метрополитен - опера" театрлэн сценаез вылын, Гамбургын, Зальцбургын, Флоренциын. Озьы ик - Бельгиысь, Англиысь, Франциысь, Даниысь но мукет кунъёсысь театръёсын. 1997-тӥ арын Лариса Рудакова луиз Россиысь дано кырӟась. Ижын Лариса Борисовна кырӟаз Удмурт Элькунысь симфонияя оркестр шудэм улсын. Нош кивалтӥз соин Казахстанлэн, Татарстанлэн, Россия Федерацилэн калык артистсы, Татарстанлэн Габдула Тукай нимо Кун премиезлэн лауреатэз Фуат Шакирович Мансуров. Владимир Беломорскихлэн туспуктэмез. Футбол Капчиен Красноярскысь "Металлурген" пумиськон "Газовиклы" капчиен сётскиз,, шуыны луоз. Шудонлэн нырысетӥ люкетаз ик Сергей Топоров (йырыныз) но Николай Сидоров быдэн гол пырто. Таин буйгатскизы кадь футболистъёс. Талэсь азьвыл Пермьысь "Амкар" "Металлурглы" 6 гол пыртӥз вал. Эшшо но бадӟымгес луонлыксы вал "Газовикысь" футболистъёслэн. Но одӥг висёнзы быдтэ - гол пыртыны быгатымтэзы. Озьы ке но Николай Курилов штрафнойысен лыдэз 3:0 каре. Урал Амировлэн но( одӥгез егитэз но устоез шудӥсь) тыршемез голлы пӧрме. Шудон йылпуъяське ни вал, соку "Газовиклэн" но капкаяз возьмамтэ шорысь туп лобӟе. Озьы пумиськон 4:1 лыдын йылпумъяськиз. М. Кузьмин. Тазалык Эмъя астэ ачид Кынмамлэсь мон тазьы эмъяськисько. Нап йӧлэз быректыса отчы векчи юдэм сугон ватсасько. Лач пытсаса 2-3 минут возисько. Юоно каллен - нырысь ымпушкын возёно. Сугонлэн курытэз йӧлын парыса уг шӧдӥськы ни, пичи пиналъёслы но юыны ярамон луэ. М. МИХАЙЛОВА. ТАЗАЛЫК Кылдэ мыч Сузяськоды-а тӥ ӵукна... кылдэс? Тодады но уг лыкты, озьы-а? Медицина наукаосъя кандидат Сергей Яковлев ӵектэ котькуд муртлы пиньёссэ сямен ик кылзэ но сузяны дышетскыны. Малы со кулэ? Врачъёслэн веремзыя, сиёнлэн ӟеч кужымез (энергиез) адямилэн мугораз кыл пыр пыӵа. Кырсь кыл люкетэ сиёнлэсь зэмо шӧмзэ шӧдыны, шонер шоканы, урод ужало ӝуш но сюл. Кылэз сузяны луэ чечы пуньыен вуштыса. Вуштэмды бере, зыралэ кылдэс кӧс вӧен - озьы сузяськозы кыл вылысь рецепторъёс но. Таза кыл льӧль луэ. Нош со тӧдьыалэс ке, вера кузёезлэн анемиен курадӟемез сярысь. Ӵужмыт ке, мус висе, чагыралэс ке - сюлэм. Китайысь эмчиослэн чакламзыя пыэдэн висьыку кыл нырысь тӧдьыалэс луэ, собере пичи пульыос, виштыос кылдо. Векчи но кӧс кыл вера йӧнатыны луонтэм висён сярысь. Кыл вылын мур гожъёс адӟисько ке - эскере пекляостэс. Юись муртъёслэн кылзы куалекъя. "Семья" газетысь. Сяськаос, крезьгур но нылпиос Национальной кун библиотекаын усьтӥськиз Петр Ильич Чайковскийлэн вордскемез дырысен 160 ар тырмонлы сӥзем адӟытон-выставка. Тодмо ӟуч композитор вордскем Воткинск городысьтыз тямыс аресъем пияшен кошкиз ни. Озьы ке но, гольык пыд бызьылон интыосыз сюлмаз пыраклы кылизы. Та городлы ик, отысь суредъёслы сиӟемын адӟытонлэн быдэс люкетэз. Татчы пыризы пичи Петялэн, солэн анай-атайёсызлэн, ӵыжы-выжыосызлэн туспуктэмъёссы но. Петр Чайковский яратӥз литератураез. Солэн лыдӟем книгаосыз, соос сярысь гожъям дневник-малпанъёсыз, гожтэтъёсыз но верало та сярысь. Улонлэсь тужгес но чеберзэ композитор адӟиз сяськаос, крезьгур но нылпиос бордысь. Выставка ужа 10 часысен 18 часозь. Э. Васильева. ВОРМОНЛЫ - 55 АР Ноку ум вунэтэ Калык дасяське быдӟым праздниклы. Витьтон вить ар тырме ини котькулэсь лек ожмаськонын фашизмез пазьгем дырысен. Соку, 1945-тӥ арын май толэзе, асьме шаермы вадьсын гинэ ӧвӧл, быдэс дуннеын выльысь яркыт ӝуатскиз эриклэн шундыез. Быдӟым праздник. Нош малы-о сюлэм шуген жугиське, мылкыд но шулдыр ӧвӧл. Чебер инбамез но кыӵе ке сьӧд вужеръёс вотсаны туртто кадь. Йыре лыкто олокыӵе но секыт малпанъёс, син азе пуксё ньыль арлы кыстӥськем ож сюресъёс, отӥ ӵош ортчем эшъёслэн сайкыт тусбуйёссы. Ох, аръёс, аръёс! Кыӵе ӝог ортчиськоды тӥ! Война вакытэ 20-30 аресъем егит пиослэсь арлыдзэс жалятэк бинялтӥськоды. Тани соос витьтон вить ареслы мӧйыгес луизы. Сюлэмзы но ӵемгес чепылля, виро вурысъёссы но ялан висё, йырсиоссы но пурысьтазы, шеромизы. Нош син азязы пукто ке ортчем сюрессэс, одӥг окопын сюен суро ӝук сием эшъёссэс, ӟаректэм синъёссы нош ик чиляны кутско. Кытын тӥ табере, ӵош ожмаськем эшъёсы? Одӥг вынлыко семьяын улэмъёс табере олокытчы но пазяськимы, иностранецъёс луимы. Кытын-о тӥ, украинец Володя Мельник но узбек Ирбалаев, казах Усманов но таджик Асмолов? Кунгож сьӧрысь утчано-а табере тӥледыз? Соин ик, дыр, ог-огмы доры гожтэтъёс но уг вуо ни. Бен, асьмеос быдӟым Родинамес, тушмонлэсь утем гинэ ӧвӧл, азьланьын уката юнматон но сяськаяськытон понна ожмаським вал ук! Кызьы пӧяны быгатӥзы асьмеды? Малы лэзимы дуннеысь одӥгзэ кужмо кунэз-странаез кас мылкыдо, тушмонлы вузаськем адямиослы куашкатыны? Тани алигес "Советская Россия" газетын Петербургысь кун университетысь профессор И.Я.Фроянов гожъяз: КГБ-лэн азьвыл кивалтӥсьёсызлэн В.А.Крючковлэн но В.М.Чебриковлэн верамзыя, странаенымы кивалтӥсьёс пӧлын ЦРУ-ен герӟаськем адямиос вал. Соос пӧлын А.Н.Яковлев но Э.А.Шеварнадзе. Отчы ик пырто М.С.Горбачевлэсь но нимзэ. США-лэсь косъяськемзэ быдэсъяса, соос реформа ортчытэм ньӧм улсын Быдӟым державамес куашкатӥзы. Со понна асьмеос но, туннэ улӥсьёсыз ветеранъёс, кыл кутӥськом ожын бырем эшъёсмы азьын. Война аръёсы Удмуртиысь 364 сюрс адями армие келямын вал, со сяна, 30 сюрс мурт ожмаськонлэсь азьло ик службае басьтэмын ни вал. Тӥни соос пӧлысь ӝыныез ёрос бырыны шедизы. Ожысь бертэм 118 сюрс адями пӧлысь туннэ улэп на 11 сюрсэз гинэ. Но соос уг витё кинлэсь ке жалямзэ, улон-вылонзы туж секыт ке но: пенсия ичи басьто, будӥсь дунъёсты нокызьы сутыны уг быгато, эмъяськыны но уг окмы коньдонзы. Ай чидано луо на куд-ог егит адямиослэсь, вирсэртэм чиновникъёслэсь ултӥямзэс, оломаин но пыкылэмзэс. Оло, асьсэос но ветеранъёс со понна янгыш: ичигес пумиськылӥськом егитъёсын, шергес вуылӥськом школаосы, зэмлыкез сюлэмазы возьматыны-пыӵатыны ум быгатӥське. Вормон нунал азьын ми внукеным котьку вуылӥськом Ижевскысь Ялан ӝуась тыл доры, сяська понӥськом Тодмотэм солдатлэн шайгуэз вылэ. "Нимыд тынад тодмотэм, батыр ужед вунонтэм" гожтэмын отын. Констатин Симоновлэн но Михаил Луконинлэн ӵош гожтэм та кылъёссы мур малпаськонъёсы вутто. - Нош малы солэн нимыз тодмотэм? - юа внуке. - Адями нимтэм луэ шат? Валэктӥсько солы: "Бен, котькуд адямилэн нимыз вань. Но война аръёсы тросэз солдатъёс нокыӵе ивортэк быризы. Зэм, анай-атайзы, ӵыжы-выжыоссы понна котькудӥзлэн нимыз вань, но кытчы но ку быриз со, соизэ уг тодо. Тӥни соин озьы бырем солдатъёслы памятник выллем пуктэмын та. - Нош малы ялан тыл ӝуа? - нош ик юа внуке. - Солдат оже мынӥз, музъем вылын улон котьку мед луоз но со ялан мед умоялоз шуыса. Со понна ик улонзэ но сётӥз, сутскиз ож тылӝуын, - верасько солы. - Табере солэн шайгуэз вылын ялан тыл ӝуа, со асьмеды, туннэ но азьланьын улӥсьёсты ӧте ваньзэс ожын быремъёсты тодамы возьыны. Кылбурчи Роберт Рождественский тазьы гожтӥз: Быремъёслы - пыраклы дан! Тодамы возём нимын-тулын! Кырӟанъёсыд сюлмад ке вань - Соосты сӥзёд батыръёслы! Кырӟанэн, нянен, сайкыт малпанэн, Котькуд секундэн, котькуд шокчемен Луыны тырше со батыръёс кадь! Сыӵе мылкыд сюлэмез ӧте бырем эшъёсмы понна ваньзэ лэсьтыны, ож тылӝуэз музъем вылысь пыраклы кысон понна. Нокытын но медаз гыбда ни со! Внукелы мон верасько аслам кыкетӥ зенитной взводысьтым батыр эшъёсы-солдатъёсы сярысь, кинъёслы ӧз кылды ни одӥгзэ но вормон нуналэз адӟыны. Тани 1944-тӥ арын гужем ми ожмаським Украинаез мозмытон понна. Одӥг уе выль интые вуим но ӵукнаозь гудӥським: пушкаослы, расчётъёслы окопъёс лэсьтӥм. Шунды ӝужам бере тулкымен- тулкымен вуись гуретэм куара кылӥськиз. "Омырын витьтон "юнкерсъёс!" - кеськиз разведчикмы Володя Мельник. - Кытчы меда ини нуо бомбаоссэс? - ыбылыны дасяськыса, понназы верасько солдатъёсмы. Нырысьёсыз "юнкерсъёс" шунды вадьсы вуэм беразы чутрак берытскизы но пырак вадьсамы лэзькыны кутскизы. Милям орудиосмы вистэм-вожтэм ыбыло. Нош тушмон бомбаос йырез но ӝутыны уг сёто, огез бӧрсьы мукетыз пуштэ. Огез бомба усиз снарядъёсын тырмытэм машинамы вылэ, табере пуштылыны ӧдъязы снарядъёс но. Асьмелэн истребительёсмы вуытозь эрказъяськизы тушмон самолётъёс. Н.Шлепинлэн но А.Потаповлэн расчётъёссы быдэн одӥг "юнкерсэз" уськытӥзы. Милям но ыштонъёсмы трос гинэ вал. Огез пушкамы сӧриськиз, кыкез машинамы ӝуаз. Куать эшмес ватӥм ми Башар хутор пумысь яге. батыръёс сямен быризы расчётысь кыкез солдатмы, куинез шофёрмы, фельдшер. Кыкез солдат но батареялэн командирез старшой лейтенант Воробев сӧсырмыны шедизы. Асьмеды табере оскытыны выро: дуннеын тушмонъёс ӧвӧл ни, озьы бере, война ӝутскон кышкытлык но быремын. Соин ик тупаса улон понна нюръяськон но кулэ ӧвӧл ни. Дуннеысь тупаса улон понна нюръяськисьёслэн огазеяськонзы социализм лэсьтӥсь странаослэн эшъяськонзы сямен ик куашкамын. Быдэс Музъем вылын кузёяськыны турттӥсь США-лы та ик кулэ. Со отын но татын мыжыкъёсыныз сэзъя, Россиез но куашкатыны, нимаз кесэгъёслы люкылыны турттӥсьёслы котькызьы ик юрттэ. Тани луысал ке Россилэсь ядерной кужымзэ быдтыны, соку солэн сюлмаськонэз одӥг гинэ кыльысал ни, быдэс дуннеез ки улаз кырмысал. Соин ик со асьме странаысь выль кивалтэт вылэ зӥбе, СНВ-2 договорез юнматыны косыса. Соку уго Америкаозь лобыны быгатӥсь ракетаосмес быдтысалзы. Уно миллион бырем солдатъёслэн нимынызы, соосты буре вайыса, асьмеос туннэ, Быдӟым Вормонлы 55 ар тырмонэз пусъён нуналъёсы, огмылкыдын юн вераны кулэ: "Ум сётэ секыт ожын утем эрикмес но шудмес таланы, ваньзэ лэсьтом Россиез выльысь кужмо но сяськаяськись кунлы пӧрмытон понна!" В.МИХАЙЛОВ, ожысь но ужысь ветеран. П.И.ЧАЙКОВСКИЙЛЫ СӤЗЕМ КРЕЗЬГУРО ФЕСТИВАЛЬ Мукет таӵе ӧй вал на кузьмадёс... В.Шекспирлэн "Ромео но Джульетта" трагедиез ньыль сю арлэсь кемагес улэ ни дунне вылын, кык яратӥсь сюлэмъёслэсь сьӧд кужымъёслы пумит нюръяськонын вормисе потэмзэс данъяса. Та выллем темалы сӥзем произведениоссэс кылдытӥзы пӧртэм кунъёсысь пӧртэм авторъёс, нош "Ромео но Джульетта" кадь ӝожез кузьмадёс, зэм ик но, ӧз на вордӥськы, дыр, ("Нет повести печальнее на свете, чем повесть о Ромео и Джульетте") - со дауръёслы кылемын аслаз кысонтэм-бездонтэм луэменыз. Солэсь дунзэ уката но вылэ ӝутыны юрттӥз на советской композитор С.Прокофьев, таӵе ик нимо балет кылдытыса. ХХ даурысь балет искусствоез азинтонын выль вакытэз усьтӥз, шуиз со сярысь мукетыз тодмо крезьгурчи А.Хачатурян. Та чеберлыкез, фестиваль нуналъёсы, асьме доры вуттӥз Пермьысь Операя но балетъя кун академической театр. 23-тӥ апреле "Ромео но Джульетта" спектакль возьматэмын вал асьме дорын, "Металлург" культура дворецын. Пӧртэм хореографъёс котькудӥз ас сяменыз адӟылӥзы та балетэз, нош Пермьысь театр выль тылын кадь югдытӥськиз, куке солэн сцена вылаз 70-тӥ аръёсы вуиз "Ромео но Джульетта" (та спектаклез понна коллективлы сётэмын вал Россилэн Глинка нимо кун премиез). Кызьы ке ачиз композитор, озьы ик балетэз пуктӥсь но - Россиысь калык артист Николай Боярчиков - тыршизы Шекспирлэсь адӟемзэ-верамзэ асьме вакытэ выжтыны, туала сюлмаськонъёсын пыӵатыны. Берлоез пуктэм та спектакль 115-тӥез луэ ни. Улэп крезьгур (дирижёр Олег Крохмаль кивалтэм улсын сое чузъяськытӥз асьсэлэн симфонической оркестрзы) кутсконысеныз ик шӧдытӥз мур визылъёсын бугыръяськыса "пӧземзэ": кык ваче шуккиськись тулкымъёс вискын пазьгисько-воректо тылсияськись шапыкъёс. Мукет сямен вераса, вир пӧлы выем, жалясьтэм сьӧсьяськон куспын вылӥе кыстӥсько кык люконтэм чылкыт лулъёс. Ромеолэсь но Джульетталэсь сыӵе валче, висъянтэм луэмзэс син азе пукто театрысь егит валтӥсь артистъёс - калык куспо конкурсъёслэн лауреатъёссы, Россиысь дано артистъёс Виталий Полещук но Наталья Моисеева. "Таӵе капчи пыдын та плитаос вылтӥ нокин ӧз вамышъя на вал. Яратӥсьлэн лулыз, дыр, со сыӵе капчи..." Амалтэк тодэ лыкто Шекспирлэн куке но гожтэм чуръёсыз... Солистка вань эктэменыз, мылкыдзэ сётэменыз та малпанэз юнматэ. Спектаклез син азе вунонтэм пуктыны озьы ик юртто, огласянь, Евгений Трефилов, Татьяна Микушева, Дмитрий Асауляк, Олег Посохин но, мукет ласянь, Игорь Шестериков, Римма Сираева, Сергей Загорулько, Александр Волков, Елена Морозова. Огъя вераса, Монтекки но Капулетти выжыослэн ваче пумит луэмзы крезьгур но эктон, дӥськут но тылэн югдытон пыр яркытак усьтӥське. Т.ПЕТРОВА. Лулчеберет пушъе Фестиваль. Та кыллэсь пуштроссэ малпано ке, син азе пуксе бадӟым шулдыръяськон, ог-огедлы ас быгатэмдэ возьматон, ӵошатскон: кин устогес, чебергес, мыло-кыдогес... Таӵе малпанэн ик "Удмурт кенеш" огазеяськонлэн Октябрь ёросысь ёзэз кыкетӥ арзэ ни тулыс ортчытэ фестиваль. Та ёросын уго удмурт нылпиосты чеберлыклы дышетыны луонлыкъёс вань: татчы интыяськемын пинал усточиослэн школа-интернатсы, Куӟебай Герд нимо школа-гимназия, пионеръёслэн дворецсы но мукет ужъюртъёс. Берлоез сярысь вератэк, та кык школаосысь пиналъёс кырӟамъя-эктэмъя адӟиськиз: шоркарамы удмурт лулчеберет пушъе. Тазьы ик шуыны луоз, 112 номеро нылпи садысь, 70 номеро школаысь, творчествоя школаысь нылпиосты учкыса. Одӥгъёсыз асьсэлы ним бырйиллям "Шунды", мукетъёсыз - "Шунды сиос". Зэмзэ но, шуныт, ненег тылсиос лыкто кадь таос бордысь. Ирина Черепанова кивалтэм улсын школа-гимназиысь нылъёс потыса бергало ке, зарни йыро италмасъёсыз пуктӥськом син азе. Татысь ик Снежана Эскандерова яке творчествоя школаысь Катя Лебедева, яке 112 номеро нылпи садысь Оля Корнеева кырӟало ке, малпаськод: Валентина Пудоваосмы, Надежда Уткинаосмы азьпал дыре но луозы. Нош 70 номеро школаысь 9-тӥ классын дышетскись куать нылъёс "Ширъялод-поръялод" выллем удмурт кырӟан-эктонэнызы номырин бере уг кылё гуртысь нылъёслэсь. Синмаськыса учкиськод 11 номеро школаысь нылашъёслэсь боз-боз "мӧйы" куараен кырӟамзэс- верамзэс но. Таосыд будыса, оло, "Айкаез" но ортчозы ай... Но та фестиваль пиналъёс понна гинэ ӧй вал. Отчы туэ нош пыриськизы ляб адӟисьёслэн огазеяськонысьтызы коллективъёс: "Лейся, песня" ансамбль сярысь веранэз ӧвӧл, со кылем арын 25 арессэ пусйиз ни. Берло аръёсы татын эшшо кык выль ансамбль кылдӥз. Удмурт кырӟанэз бурдъяны юртто ӟучъёс но, мукетъёсыз но. Озьы ик ас быгатэмзэс усьтӥзы Нагорныйысь "Родничок" ансамбле ветлӥсьёс. Концертэ пыриськизы "Инвожо" но "Тюрагай" тодмо калык коллективъёсмы. Сюлме пырись вашкала гуръёсынызы учкисьёслэсь синкылизэс ик поттӥзы Игерманысь мӧйы нылкышноос: Евгения Даниловна, Валентина Андреевна но Нина Аполосовна Вахрушеваос, Валентина Ильинична Максимова но Юлия Дмитриевна Могирева. Нош "Капи- кап-капи" кырӟанэз соосын ӵош шумпотыса быдэстӥзы Алефтина Корепановаен Ольга Зорина. Та нылкышноослэн ӝуткась-валтӥсьсылы В. А. Вахрушевалы та нуналъёсы 75 арес тырме. Сое ӟечкыланы ӧз вунэтэ. Нош ачиз Валентина Андреевна шуиз: "Сцена вылэ потӥсько ке, дас сизьым но ӝыны аресъем кадь луисько". Та праздникез радъясь Земфира Борисовна Петрова ас юрттӥсьёсыныз артистъёссылы сётъязы синпель кузьымъёс, грамотаос. "Инвожоысь" огез гажано кырӟасьсы Леонид Романович Овчинников басьтӥз Ижлэн мэрезлэсь данъян грамотазэ. Фестивалез сюлмысь радъяны, ортчытыны тыршем оргкомитетлэн тӧроез Геннадий Семенович Корепанов но. Нош ӝытэз режиссёр сямен дасяз, нуиз но озьы ик ас кырӟанъёсыныз шулдыртӥз солэн гурто пиез (Балезино ёросысь Быдыпиысь) Сергей Чирков (Сава). Удмурт театрын ортчем ужрад синмаськымон вал, трос калыклэсь мылкыдзэ ӝутӥз. Т. ПЕТРОВА. Лыктозы дуно куноос 25-тӥ-26-тӥ апреле, Быдӟым Вормонлы 55 ар тырмонэз пусйыса, Ижысь 73 номеро школаысь калык музейлэн кичӧлтэмезъя, Удмурт Республикаысь Калыкез дышетонъя министерство ортчытэ Советской Союзлэн Геройёсызлэсь, озьы ик Россиысь Геройёслэсь- аспалъёсмылэсь (землякъёсмылэсь) слётсэс. Таиз соослэн одӥг ӝӧк сьӧрын пумиськонзы укмысэтӥез луоз. Геройёслэн нырысетӥез слётсы ортчиз 1972-тӥ арын мае, Быдӟым Вормон нунал азьын. Л. Федоров. Удмуртиын - Германиысь куноос 25-тӥ оштолэзе Удмурт Правительстволэн Тӧроезлэн воштӥсез Виктор Шудегов пумиськиз Германиысь делегациен. Та ужрадэ озьы ик ветлӥзы шаерысьтымы страховой компаниослэн кивалтӥсьёссы но "Варзи-Ятчи" санаторийлэн валтӥсь врачез Александр Федотов. Германиысь куноос дорамы быдэс арня улозы. Правительствоын пумиськыку, Виктор Евграфович шуиз: - Кыдёкысь эшъёсмы асьмелы бадӟым юрттэт сёто но азьланьын но уз вунэтэ. Туннэ со сярысь но вераськонъёс мынозы. Кылсярысь, элькунысьтымы "Варзи-Ятчи" но "Ува" санаторйёсты выльдонъя юрттэт сётыны малпанъёссы вань. Куноос тунсыкъяськизы та эмъяськон но шутэтскон интыослэн проектъёсынызы. Отын чакламын туж чебересь, кызьы шуо, ньыль-вить кизилиен кӧлан юртъёс пуктон. тани "Увалэн" проектэз 50 миллион манет тыр ужъёсты быдэстыны учкемын, нош "Варзи- Ятчилэн" - 80 миллион манетлы. Германиысь куноос та санаторйёсты выльдыны юрттысалзы, инвестициос сётысалзы ке, веранэз ӧвӧл, туж умой луысал. Кинъёс бен дорамы лыктэмын? Делегациен кивалтэ Вольфганг Каске. Солэн эшъёсыз Аксель Болен но Игорь Сахаров. Берлоез вордӥськемын Сибирьын, нош Каске - Калининградын (Кёниксбергын) 1931-тӥ арын. Война кутскыку, солы 10 арес гинэ вал. Солэн тодаз ваемезъя, трос шуг-секытсэ, нацистъёслэсь кырсь ужъёссэс адӟиз. Но 30-тӥ аръёсы со идеологилэсь (фашизмлэсь) кышкытлыксэ уноез немецъёс валаса ӧз быдтэ. Со вакытэ Германиын туж шыпыт но умой улон вал. Кивалтонэ Гитлер лыктэм бере, ваньмыз йырчукин бырытскиз. Вольфганг Каске ваньзэ та сярысь вераз Удмурт кун университетын тодосчиослы, дышетӥсьёслы но студентъёслы. Со уго УдГУ-лы бадӟым юрттэт сётӥз ни, дунтэк кузьмаз усто компьютеръёс. Али но юрттэ. Азьланьын но озьы ик луоз. Университетлэн ректорез Виталий Журавлев сётӥз Каске господинлы УдГУ-лэн почёт доктор луэмез сярысь диплом но сьӧд-сьӧд шляпа но дукес (мантия) дӥсяз. Нош Виктор Шудегов Каскелы сётӥз Правительстволэсь тау карон грамота. Каскелэн кузпалэз но ар талэсь азьло Удмуртие ветлӥз. Соку кутскиз эшъяськон. Вакчи дыр куспын университетэн юнэсь кусыпъёс кылдӥзы. Нош Правительствоын рос- прос, пайдаё вераськон мынӥз республикаямы страховой ужез умоятон но та удыслы юрттон сярысь. Малы ке шуоно, Вольфганг Каске луэ Германиысь самой вашкала страховой компанилэн одӥгез кивалтӥсез. Та ёзлы 175 ар тырмиз но, Германиын страховой уж нуэмезъя, кыкетӥ инты басьтэ, нош быдэс дуннеын - 3-тӥ. Солэн ёзэз Италиын но вань. Каскелэн ивортэмезъя, Германиын уж сётӥсьёс но, отын ужасьёс но ваньмыз страховать каремын. Со луэ 20 процент. Ӝыныез кыле, шуом, фирмалы, кылемез - аслыз ужасьлы. Соя отын пенсия басьто (макем тросгес тырод, сокем уногес пенсия луоз). Адями сое толэзьлы быдэ басьтыны быгатэ, яке пенсие потэмез бере ваньзэ огдыре сётыны быгато. Созэ ачиз адями быръе, кызьы умойгес. Мукетыз делегациысь адями Игорь Сахаров кун университетлы ӟеч оборудование сётыны басьтӥське. Со герӟаськемын щелкография выль производствоен. Со висъяськоз искусствоя факультетлы. Буртчин басмалэсь усто кузьымъёс лэсьтыны луоз. Вольфганг Каске шуэ, мон, пе, ноку ӧй малпалля, ар талэсь азьло Удмуртие кышное (художник со) сьӧры, котыр-дӥсь нуллӥсьын ветлыса, таӵе юнэсь кусыпъёс тупатом шуыса. Вордӥськемезъя со ассэ прусак но немец лыдъя, нош шуэ, европеец, пе, луи ни. Со мылкыд каре Россилы но Германилы уката матынгес луыны, ог-огмы доры ветлыны номыр медаз люкеты - таможня, кунгож но визаос басьтон. Тани кыкетӥ мировой войналэсь азьло Казаньысь университетын ӝыныез дышетӥсьёс немецъёс вал. Германиысь куноос УдГУ-ын студентъёсын пумиськылӥзы, лекциос лыдӟизы, семинаръёс ортчытӥзы. Кылсярысь, Каске лыдӟиз Германиын правовой амалъёс но дунъёс сярысь лекция, нош Игорь Сахаров искусствоя факультетын семинар ортчытӥз. Германиысь куноосмы озьы ик ветлӥзы Глазовысь ЧМЗ огазеяськонэ. Соос озьы ик 29-тӥ оштолэзе вуылозы Воткинск городэ, П. И. Чайковскийлэн музеяз-усадьбаяз. Г. Романов. Правительствоын Шулдыръяськом но, ю нянь но кизём Правительстволэн Тӧроез Николай Ганза Вормон праздникен дасяськонлэн мынэмез пумысен кенешон ортчытӥз. Министръёс но ведомствоослэн кивалтӥсьёссы ивортӥзы ас удыссыя быдэстэм ужъёссы сярысь. Николай Ганза селектор пыр вераськиз городъёслэн но ёросъёслэн администрациоссылэн йыръёсынызы. Правительстволэн Тӧроез нимысьтыз пусйиз, республикалэн бюджетысьтыз висъям 300 манет коньдонэз ожыь ветеранъёслы 7-тӥ Маёзь сётыны курыса. Вань городъёсын но райцентръёсын праздниклы радызъя дасясько - ортчозы митингъёс но манифестациос. Можгалан 9-тӥ Мае мӧйыос понна нимысьтыз юрт усьтӥськоз. Ветеранъёсты ӟечкыланы потозы Правительстволэн адямиосыз но. Кенешонын вераськон ӝутскиз бусы ужъёслэн мынэмзы пумысен но. Гуртоосты тужгес сюлэмшугъяськытэ эстӥськонлэн но вӧйлэн тырмымтэзы. Удмурт Республикаысь Правительстволэн пресс-службаез. Дано нимъёс басьтӥзы Фольклор кырӟанъя "Айкай" театр учкисьёссэ эшшо огпол шумпоттӥз - кылемаз удмурт арня нуналэ Андан ӵыжатӥсьёслэн культура дворецазы ортчиз солэн дас ар тырмемезлы сӥзем юбилей концерт. "Айкайысь" усточиос нош ик возьматӥзы удмурт калыклэн вашкала йылолъёсызъя дасям кӧня ке учыръёссэс. "Армие келян", "Туно вӧт", " Йӧ келян", "Айкай сярысь мадён" но мукет композициос учкисьёслы кемалась тодмо. Азьвылгес ке но ини кылдытэмын соос, сюлэмъёсты ялан бугыръяло. Калыкез шумпоттӥзы нимаз кырӟасьёс но. Удмурт Элькунысь дано артистка Светлана Смагина, Россия Федерациысь дано артистъёс Михаил Ворончихин, геннадий Кузнецов таяз учыре но "согиськизы" кужмо кичабонъёсын. Театрлы дас ар тырмемен валче, татысь тужгес устоосыз пусъемын вылӥ нимъёсын. "Удмурт Элькунысь искусствоосъя дано ужась" луиз "Айкайысь" кырӟась, куиськись Пётр Данилов, "Удмурт Элькунысь дано артистка" - театрлэн оркестраз шудӥсь Таисия Кузнецова. Ӟечкыласьком! Быдӟым Вормонлы - 55 ар Одӥг адями но медаз вуны Сыӵе мылкыдын журналистъёсын пумиськонъёс ортчытӥзы Ожысь, ужысь, вооружённой кужымъёсысь но правоосты утись органъёсысь Удмуртиысь ветеранъёслэн кун советсылэн кивалтӥсез Михаил Зыков но республикаысьтымы тазалыкез утёнъя министр Сергей Шадрин. Соос люкаськемъёслы мадизы Быдӟым Вормонлы 55 ар тырмонэз пусйыны дасяськемзы но ветеранъёслы юрттэмзы сярысь. - Шаерамы али 300 сюрслэсь уно ветеранъёсмы, - веранзэ мытӥз Михаил Ефимович. - Со пӧлысь 11,5 сюрсэз ожысь, 4,5 сюрс инвалидъёс, 1600-лэсь ятыр нылкышноос- ветеранъёс, 4700 пала картъёстэк кылемын. Элькунамы та вакытсэ 1350-лэсь трос ветеранъёслэн первичной организациоссы, нош та уже ичизэ 10 сюрс мурт пыриське. Зэм, та ёзлэн данэз пумен будэ. Пересь калык пӧртэм куронъёсын вазиське ветеранъёслэн организациосазы, тужгес но куро улон интызэс умоятыны. 500 ветеранъёслэн квартираоссы тупатэмын, нош 4 сюрсэз та ужез витё на. Туэ Ижын ветеранъёслы 50 квартира висъялозы. Со понна 10 миллион манет коньдон сётыны учкемын. Сарапулын 25 квартира сётыны чаклало, Играын - 20, Киясовоын - 7, 1700 ветеранъёслы телефон пуктэмын, 3666-ез черодын сылэ на. Тужгес но вӧсь каремын ужысь ветеранъёс, кудъёсыз вордӥськемын 1932-тӥ арозь но ужысь ветеран медальзы вань. Али но соослы 100 манет гинэ уксё сёто, нош оже ветлэмъёслы - 390 манет. Со сяна, соослы эшшо ӟечкылан но 300 манет вуоз на. 65 инвалидлы автомашина висъямын, нош черодын 1500 адями возьма на. Вормонлы 55 ар тырмемен валче, шаерамы бадӟым уж ортчытэмын, 100 сюрс семьялэн улон-вылонэз эскеремын. Али 10 сюрс мурт огназы уло, ветеранъёслэн юртъёсазы уг мыно. Малы ке шуоно, 75 процентсэ пенсиез улэмез понна сётыны кулэ, аслыз 25 процентэз гинэ кыле. Михаил Зыков озьы ик туж кулэ ужпумез ӝутӥз. Со ивортӥз, Ижевскын, пе, война вакытэ городысь госпитальёсын 425 адями кулэмын. Соосты данъяса но вунэтонтэм вылысь, стела пуктыны кулэ. Отчы ваньмызлэсь нимъёссэ гожъясалзы. Нош мукетыз памятник куриське Ижысь ож тӥрлык поттӥсьёсты данъяны. Михаил Калашниковлы музей лэсьтӥське. Со умой. Но тодмо но дано конструктор огназ ӧз ужа ук. Мукетъёссэ но вунэтыны уг яра. Тани ведь война дыре Воткинскын уно сюрс пушкаос поттэмын. Оглом, выль памятникъёс пуктыса, вужъёссэ но черезёно. Быдӟым Вормонлы дасяськыса, умоен пусйыны кулэ Ижысь "Буммаш", "Ижсталь" огазеяськонъёсысь, Воткинскысь "Воткинский завод", Глазовысь Чепца механической заводысь, Сарапулысь радиозаводысь ветеран организациослэсь. Михаил Зыков озьы ик меӵак шуиз, "Ветеранъёс сярысь" федеральной Закон, пе, урод быдэсъяське. Тани ветеранъёс сад-бакчаосазы автобусэн дунтэк ветлыны кулэ, нош соосты ӝыны дунын нулло. Умойтэм со. Ожысь но ужысь ветеранъёслэсь телефон воземзы понна ӝыны дун басьтоно, нош со улонын озьы уг луы. - Медицинской юрттэт сётӥське улон интызыя, - пумиськонэз азьланьтыса шуэ Сергей Геннадьевич. - Нош бадӟымесь промышленной предприятиосын тыршемъёс медико-санитарной частьёсы юнматэмын, отын эмъясько. Войнае ветлэмъёс но инвалидъёс понна ужа кун госпиталь. Отын огдыре 90 мурт тазалыксэ юнматэ. Глазовын эшшо 30 интыен усьтӥськоз на. Нош Ижысь механикая кун заводлэн 3 номеро выль больницаяз пересьёсты эмъянъя алигес центр усьтэмын. Соин ӵош ик умоя ветеранъёсты эмъян, соослэсь висёнъёссэс тодон, эмъюмъёс вузан но пинь пуктылон. Тани 60 муртлы сюлэмзэс умойгес ужатыны электростимулятор пуктэмын, операция лэсьтэмын. Озьы ик трос адямиос кулэясько син (катаракта) но пель (ляб кыло) эмъянъя. Огъя вераса, Быдӟым Вормонлы 55 ар тырмонэз пусйыку, одӥг ветеран но палэнэ медаз кыльы. Соослэсь кулэяськонъёссэс умойгес быдэсъяно но лыдэ басьтоно. Одӥг адямилэн но ӝожтӥськонэз медаз луы. Г. РОМАНОВ. Одӥгез устоез Людмила Васильевна Протопопова уно аръёс ӵоже ини ужа Такагуртысь библиотекаын. Со сюлмаськемен, татчы одӥг пол лыктэм адями библиотекае отӥяз но ветлэмысь уг дугды. Гуртын улӥсьёс куд-ог учыръёсы татчы ваё асьсэлэсь книгаоссэс но. Соосты дырын-дырын выльдоно луэ - соку библиотекарьлы мылысь-кыдысь юртто черкогуртысь шор ёзо школаын дышетскись пиналъёс. Такагуртысь библиотека - пӧртэм ужрадъёслэн шорсюлэмзы. Нош гурт калык понна - культуралэн Дорез. Лулысь-сюлмысь ужамез понна, Людмила Васильевна Протопопова уно пол пусйылэмын трос пумо грамотаосын. Нош 1998-тӥ арын туспуктэмзэ интыязы шаерысьтымы Данъян пул вылэ. Дышетӥсе Можга педучилищее дышетскыны пыри 1944-тӥ арын. Атае улэп ӧй вал ни - кык ар талэсь азьло бырыны шедиз Ленинград дорын ожмаськонын. Агайме, Максимез, Можгала дышетскыны мынэме бере, ӵап военной училищее келямы. Покчиосыз, выны но сузэръёсы, пичиесь вал на. Ярано: вордскем Чурайгуртэ городлы кызь иськем гинэ. Толалтэосы арнялы быдэ куас вылын, нош тулыс-сӥзьыл велосипедэн нэнэе доры сиён-юонлы бертылӥ. Ижысь учительской институтэ пыреме бере, та ласянь шуггес луиз. Поездэ билет басьяны коньдон уг тырмы. Ӵем гинэ вагон тубатъёс вылын ворттылоно луылиз. Ярано: нэнэе огназ вань кужымзэ сётыса вордылӥз пудо-живот, тылобурдо. Милемлы сютэм улонэз адӟыны ӧз кылды. Нырысетӥ курсын дышетскыкум, азьвыл Верхний кусыпысь кык этажъем общежитиысь огаз бадӟым комнатаын сизьым кузя улӥмы. Нош кыкетӥ араз монэ интыязы куинь кузя улоно комнатае. Со аре пединститутэ дышетскыны пыризы Татариысь Бавлы ёросысь Урсыгуртысь (Покровское-Урустамак гуртысь) Евгений Самсонов но Иван Тараканов. Евгений Васильевич - ӝужыт, веськрес мугоро, лякыт сямо, мыло-кыдо, эшъёсызлы юрттыны котьку дась луись адями. Женя (куспамы ми сое озьы гинэ нимаськомы вал) - улон-вылонэз шӧмъям мурт, ожтыл пыр ортчем адями. Соин мыным но, Ванялы но (Иван Васильевичез но куспамы озьы нималлямы) Женя бадӟым агаймы но, атаймы кадь вал. Арлыдызъя но со, ми сярысь, мӧйыгес вал уго. Монэн ӵош одӥг группаын дышетскиз Кизнер ёросын будэм, ож пыр ортчем воргорон. Со адӟе вал мынэсьтым сиён-юон но дӥськут ласянь секыт улэмме. Кизнер пи мыным ӵем гинэ шуылӥз: возиськы, чида на, егит эше. Ӝыны ар ортчыса, мыном, пе, школае ужаны. Соку, пе, быгатод аслыд ӟеч дӥськут но басьтыны, нэнэедлы, вын-сузэръёсыдлы но юрттыны. Мон, зэмзэ, малпаськыны кутски вуоно уже сярысь. Но вань малпанъёсмес чылкак мукет пала берыктӥз Женя. Государственной экзаменъёсме сётон азямгес огӝытэ куспамы таӵе вераськон ӧръяськиз. - Ӝоген люкиськон дырмы но вуоз. Милемыз, институтэз йылпумъясьёсыз, ёросъёсы лэзён сярысь документъёс но дасяллям ни. Можга палъёсам ик берытско, - шуисько. - Тыныд, Леня, дышетскондэ азьланьтыны кулэ, - шуиз Самсонов. - Быдэсак вылӥ тодон-валан басьтоно тыныд. - Мон но озьы малпаськисько, - шуисько. - Дышетсконме азьланьто педагогической институтлэн заочной люкетаз. - Заочно со - заочно. Тон егит на, дышетскы очнояз ик. Кык-куинь предметъя экзамен сётӥд ке, куинетӥ курсэ кутозы. Мон Женялэсь ӵектонзэ, огарня малпаськеме бере, умоен лыдъяй. Агаелы но гожтэт ыстӥ. Со соку комсомоллэн Юкаменск райкомаз нырысетӥ секретарь луыса ужа вал. Шонер, пе, ӵектэ тыныд Самсонов. Ойдо, азьланьты дышетскондэ, ачим но быгатэмея юртто, пе. Соку ини мон пырай пединститутлэн директорез Михаил Павлович Бабин доры но малпанме верай. - Туж усто, егит эше, дышетскондэ азьланьтыны кулэ, - шуиз Бабин. - Ужаны вуод ай. Но азьвыл ик Калыкез дышетонъя министерствое ветлоно луоз. Дышетсконзэс йылпумъясьёслы ужан инты ведь висъямын ини. Министерствоысь кадръёсъя отделын шуизы: та ужпумъя огкылысь луэмзэ вераны кулэ министр. Куриськон гожтыса пырай министр Андрей Сергеевич Бутолин доры. Тодмо гожъясь мыло- кыдо пумитаз но ӟеч дышетскыны мылкыд кариз. Тӥни озьы. Евгений Васильевич улон сюресме чылкак мукет ӧре берыктӥз. Ноку уг вунэты солэсь визьнод сётэмзэ. Можга педучилищеын дышетскыкум, кӧня ке ветлӥ элькунысьтымы сӥё-дано дышетӥсьлэн Екатерина Алексеевна Коноваловалэн литературалы дышетскон кружоказ. Со аръёсы отчы мылысь-кыдысь пыриськизы Даниил Яшин, Михаил Покчи-Петров, Георгий Архипов, Герман Ходырев но мукетъёсыз. Евгений Самсонов пединститутэ вуэмез бере ик кылдытӥз литературно-творческой кружок. Мон но отчы шумпотыса пыриськылӥ но литература удысын нырысетӥ вамышъёсме лэсьтӥ. Удмурт газетъёсын поттылӥ пичиесь иворъёсме но корреспонденциосме. - Тон, Лёня, бадӟымгес кылуж (статья) гожтыса сёт "Советской Удмуртие", - шуиз огпол Женя. - Тани ӝоген кружокамы ӧтёмы писателез Михаил Ляминэз. Эскеромы солэсь али гинэ потэм "Шудбур понна" повестьсэ. Сое лыдӟы но кружокамы ачид но вералод аслэсьтыд малпанъёстэ. Нош бӧрысь та книга сярысь малпанъёсмес гожтыса сётомы "Советской Удмуртие". Редакциен мон со сярысь вераськи ини. Повестез эскерыку, кружоке вань ветлӥсьёс вераськизы. Мон, историяя факультетын дышетскись, вераськи писательлэн буржуазно-демократической революция дыръя Мултан черкогуртын ортчем бугыръяськонъёсты возьматэмез пумысь. Михаил Андреевич милемыз кылзэмез бере шуиз: "Бадӟым тау книгае сярысь верамъёсты понна. Писательлы лыдӟисьёслэн малпанзы туж дуно". Ог кык арня ортчыса, "Советской Удмуртия" газетлэн быдэс бамаз печатласькизы М.А.Ляминлэн "Шудбур понна" повестез сярысь статьяосмы но корреспонденциосмы. Кружокамы озьы ик ӵемысь эскерылӥмы эшъёсмылэсь гожъямъёссэс. Соку ик ини ачиз Евгений Самсонов, Даниил Яшин, Семен Перевощиков устоесь кылбуръёс кылдытъяло вал. Зэм, Женя поэмаосыз бордын но уно ужаз. Тодӥсько на: кытӥяз со уйёссэ но ӝӧк сьӧрын ортчытъяз. Бӧрысьгес ини Евгений Васильевич проза удысын но мыло-кыдо ужаны кутскиз. Рос-прос гожъяськон сярысь вераськемъёсынымы ӵош Евгений Васильевич пыр мон тодматски сӥё-дано писательёсын, искусство удысын тыршисьёсын. Верхний кусыпен артэгес ик Буденный нимояз областной партийной школалэн общежитиосыз интыяськемын вал. Та пичиесь кусыпъёс интые кемалась кылдӥзы бадӟымесь юртъёсын паськытэмсь ульчаос. Со аръёсы партшколаын дышетскизы кылбурчи Николай Байтеряков, журналист Федор Сергеев. Соос кыкназы одӥг комнатаын улӥзы. Ми ӵем вуылӥмы ог-огмы доры, ӵош калгылӥмы Киров нимо паркетӥ. Трос вераськылӥмы удмурт литературамы, искусствомы сярысь. Куд-ог арня нуналъёсы Евгений Васильевичен ӵош вуылӥмы партшколалэн юртысьтыз бильярдэн шудон залэ. Отчы ветлылӥзы соку ини вань калыкмылы тодмо писатель Михаил Петров, кырӟасьмы Григорий Титов, артистмы но кырӟасьмы Кузьма Ложкин. Маскаръяськыса пӧртмэ анекдотъёс, серемес учыръёс вераллязы соос, нош Григорий Титов паймымон чебер куараеныз кырӟалляз но. Вань улытозямлы тодам кылизы та вунонтэм пумиськонъёс. Евгениен тодмо ке ӧй луысал, отчы ноку но ӧй сюрылысал. Сыӵе сӥё-дано адямиосын но студент дыръям ик ӧй тодматскысал. Мон шумпотыса лыдӟылӥ эшээсь вань кылужъёссэ, книгаоссэ. Огшоры гинэ лыдӟыны ӧй тыршы, ачим гожъяны дышетски ужъёсыз вылын. Сюлмам мур пытьы кельтӥзы "Уй пал симфония" но "Льӧльшур палъёс" романъёсыз. "Льӧльшур палъёс" - ӟеч пуштросъем историко-революционной роман. Солы вылӥ дунъет сётӥз асьме критика но. Мон но история удысэз эскери куд-ог повестьёсам. Историмылы сӥзем произведениос лыдӟисьёсмылы, уката ик егитъёслы - туж кулэ книгаос. Малы ке шуоно, туала вакытэ демократ шуонъёс историмес йырчукин берыктыны тыршо но калыклэсь йырвизьзэ сурало-пожало. Зэм, котькызьы сьӧдма - зэмлык вормоз. Выльысь но выльысь тодам вайылӥсько Самсоновлы сӥзем ӝытэз. Удмурт литературалэн историяз со нырысьсэ вал - соку Ижысь тужгес бадӟым - сюрс сю адямиез тэрытӥсь "Металлург" дворецын - удмурт гожъясь пумиськиз аслаз лыдӟисьёсыныз. Шонерзэ вераса, ми ум оскиське вал сомында калык люкаськонлы. Но янгышаськеммы: трос адямиос лыктӥзы но сак кылзӥзы яратоно гожъясьсэс. Со-а ӧй вал Евгений Васильевичлэн гожъямъёсызлы вылӥ дунъет? Евгений Самсоновен, Иван Таракановен ми туж матысь эшъёс луимы. Ог-огмы доры куное ветлылӥмы. Иван Васильевичен али но эшъяськиськомы. Эсьмаса, Чурайгуртам но вуылӥзы Урустамакысь эшъёсы. Ноку уг вунэты гожъяськон ужысь нырысетӥ дышетӥсьме, визьмо но ӟеч эшме Евгений Васильевич Самсоновез. Зэм, шудтэм учыр вазь талаз солэсь улонзэ но лэчыт визьзэ. Данакез малпанъёсыз но ӧз быдэсме. Леонид ЕМЕЛЬЯНОВ, писатель. * Леонид но Максим Емельяновъёс, Рая - студентка, Евгений Самсонов, Глафира Никольская, Иван Тараканов, Федор Васильев (партийной ужась), Даниил Яшин Ижысь Киров нимо парклэсь гужем ужанзэ усьтон нуналэ. 1952-тӥ ар. Май: тодмо нимъёс но нуналъёс 1-2 Тулыслы но Ужлы сӥзем нунал. 1 75 ар тырме (1925) Шаркан черко гуртысь В.И.Ленинлы сӥзем памятникез усьтэм дырысен. 2 50 арес тырме Семен Демьянович Бунтовлы (1950), юридической наукаосъя кандидатлы, Удмурт кун университетысь правоя, социальной управлениея но кышкытлыклэсь утиськонъя институтэн кивалтӥсьлы. 3 Эрико прессалы сӥзем нунал. - 20 ар талэсь азьло (1980) Ижевскын сӥё-дано усьтэмын Буре ваён вахта. Со сӥземын Вормонлы 35 ар тырмонлы. 4 60 ар талэсь азьло (1940) Воткинскын усьтӥськиз П.И.Чайковскийлы сӥзем музей. Табере со музей-усадьбалы пӧрмытэмын. 5 20 ар талэсь азьло (1980) Сарапулын усьтэмын Советской Союзысь Геройлы М.С.Зевакинлы сӥзем памтяник. Со пуктэмын городысь комсомолецъёслэн но егитъёслэн коммунистической субботникъёсын шыръям коньдонэнызы. - Печатьлы сӥзем нунал. - Европалы сӥзем нунал. 6 25 ар талэсь азьло (1975) Юкаменск черко гуртын усьтэмын та музъем вылысь Быдӟым Отечественной войнае бырем солдатъёслы сӥзем мемориал. 7 Радиолы сӥзем нунал, связь удысын тыршисьёслэн праздниксы. - 160 ар тырме Петр Ильич Чайковскийлэн (1840-1893) вордскемез дырысен. Со вал тодмо ӟуч композитор. - Вордскемез дырысен 80 ар тырме Николай Аркадьевич Коровинлы (1920-1957), Советской Союзлэн Героезлы. Со вордскиз Каракулино ёросысь Галаново черко гуртын. Лётчик-испытатель, подполковник Коровинлы сӥё-дано ним сётэмын 1957-тӥ арын 9-тӥ сентябре, выль военной техникаез уже кутонын ассэ кышкасьтэм но геройлыко возьматэмез понна. - 55 ар талэсь азьло (1945) Сарапулысь Г.К.Орджоникидзелэсь нимзэ нуллӥсь радиозавод пусъемын Трудовой Горд Знамя орденэн. Таӵе сӥё-дано пусэн со сӥлы каремын СССР-ысь Обороная кун комитетлэн куремезъя нимысьтыз радиоаппаратура дасямез понна. - 25 ар талэсь азьло (1975) Ижевскын усьтэмын мемориальной пул. Со сӥземын 1941- тӥ-1945-тӥ аръёсы Удмуртиын кылдытэм воинской частьёслы. Данъян пул шуккемын азьвыл арсеналлэн, туэ - УР-ысь Кун музейлэн юртэз вылэ. 8 Горд Кирослы но Горд пилето толэзьлы сӥзем нунал. - 70 арес тырме Николай Иванович Поповлы (1930), СССР-ысь художникъёслэн союззылэн членэзлы. Со луэ "Ижевск строится", "Привал", "Праздник в деревне" но мукет синмаськымон ужъёслэн авторзы. - 25 ар талэсь азьло (1975) Можга городын усьтэмын гитлеровецъёсын нюръяськонын бырем землякъёслы-воинъёслы сӥзем мемориал. 1980-тӥ арын мае татын ӝутэмын Ялан ӝуась тыл. Тыл ваемын Ижевскысь. 9 1941-тӥ-1945-тӥ аръёсы Быдӟым Отечественной войнаын Вормон нунал. - 30 ар талэсь азьло (1970) Воткинскын сӥё-дано усьтэмын оже бырем татысь солдатъёслы сӥзем обелиск. Со ӝутэмын калык коньдонэн. Глазовын - та музъем вылысь потэм ожгарчиослы сӥзем монумент. 11 65 ар талэсь азьло (1935) кылдытэмын Мунё театр. Туннэ со Удмурт республикаысь Мунё кун театрлы пӧрмытэмын. Театр Удмуртилэн кун премиезлэн лауреатэз луэ. 12 Дуннеысь эмъясь сузэръёслэн (медсестраослэн) нуналзы. 14 Россиысь Анайёслэн нуналзы. 15 Семьялы сӥзем нунал. 17 Электросвязьлы сӥзем калык куспо нунал. - СПИД-эн висьыса кулэмъёсты буре ваён нунал. - 55 арес тырме Николай Александрович Киръяновлы (1945), вылӥ категориен эмъясьлы, доцентлы, Ижысь медициная кун академиысь проректорлы. 18 Музейёслы сӥзем калык куспо нунал. - 15 ар талэсь азьло (1985) Ижевскысь республиканской краеведческой музей азьын (табере со Калык музейлы пӧрмытэмын) мемориальной комплекс усьтэмын. Со сӥземын шаерыстымы потэм Советской Союзлэн геройёсызлы. 19 Пионер организацилы сӥзем нунал. 20 75 ар талэсь азьло (1925) усьтӥськиз Туберкулёзэн висисьёсты эмъянъя Республикаысьтымы клинической больница. 23-26 20 ар талэсь азьло (1980) Воткинскын ортчиз Республикаысьтымы П.И.Чайковскийлы сӥзем 1-тӥ нылпи фестиваль. 24 Славянъёслэн гожъяськонзылы но культуразылы сӥзем нунал. 25 Африкаез мозмытон нунал. 25-28 80 ар талэсь азьло (1920) Сарапул уездысь калыкез дышетон но культура удысын ужасьёслэн конферецизы ортчиз. 27 Россиысь библиотекаослы сӥзем нунал. 28 Пограничникъёслэн нуналзы - Химия удысын тыршисьёслэн нуналзы. 31 Кысконтэк ортчытон нунал - кыскисьтэмъёслэн нуналзы. МАЕ 55 ар талэсь азьло (1945) Сарапулысь К.И.Орджоникидзелэсь нимзэ нуллӥсь радиозаводын "Кама" радиолаос поттыны кутскемын. Играез сюдэ му вӧй Кун Кенешысь Бюджетъя, налогъёсъя но коньдон ужпумъёсъя ялан ужась комиссилэн берло заседаниез ортчиз Игра районын. Депутатъёс нунал ӵоже пумиськылӥзы пӧртэм коллективъёсын, тодматскизы соослэн висьытӥсь ужпумъёсынызы но азинсконъёсынызы. Игра берло вакытъёсы данэ потӥз му вӧй поттонэн. Кызьы шуиз татысь НГДУ-лэн кивалтӥсез Р.Б.Абашев, соос дорын туннэ 2210 мурт ужа. Талэсь бадӟым коллектив районын ӧвӧл ни. Кылем арын 1,5 миллион тонна нефть кыскемын, "Удмуртнефтьлэн" поттэм продукциезлэн куиньмос люкетэз луэ. Со бордысен ик кутскиз Игра районэн тодматскон. Куноос вуылӥзы 3 номеро му вӧй поттонъя участоке. Асьсэос адӟизы кыӵе условиосын ужало операторъёс, кызьы люкаське республикалэн "сьӧд зарни" фондэз. НГДУ кылдэм дырысен тырмиз ни 25 ар, сомында дыр ӵоже гумыос кузя дугдылытэк бызе Удмуртилэн узырлыкез. Огез жаль: асьмелы кыле кадь солэн кырсь бервылыз но уен- нуналэн сурыкмытӥсь ӵынэз гинэ. Тамында "шыкысъёсыз" вылысь, Игра но бай улон дорозь ӧз ӝутскы на, куд-ог воштӥськонъёс вань ке но. Зэмен ик, берытскысал ке, кыльысал ке му вӧйлэсь поттэм коньдон асьме доры, Удмурт Республика туннэ кадь курадӟысал-а? Крестьян калык но, саптам, бугыртэм муосыз понна сюрсъёсын пунэмзэ берыктысал ни. Тӥни малы сюлэм чигиське, дугдылытэк ужась качалкаос шоры учкыса. Кӧня арлы меда тырмоз татысь му вӧй? Рашид Басырович лыдъямъя, 60 процентэз кыскемын ини, кылемын на ог 40-45 процентэз. Со тырмоз на 25-30 арлы. Му вӧез кыско 1300-1400 метр мурдалаысь. Трос вераськонъёс вал музъемез, инкуазез саптам сярысь, газетъёс но огпол гинэ ӧз ӝуткалэ та ужпумез. Играос туннэ лапкомизы кадь, тулкымез сюлоен уд дугдыты уга. Гыроно-кизёно муос сярысь ке верано, 10 процентэз шедемын нефть поттон улэ. Нош мукет ласянь районэз сюдо ӵапак та гектаръёс. Игралэн казнаез 90 процентлы тырме му вӧй чотын. Тӥни малы дыраз тырисько уждун но пенсиос, лэсьтӥсько сюресъёс, выльысь улӟиз лэсьтӥськон удыс. Социальной сфера быдэсак возиське НГДУ чотын. Районлэн шораз вакчи дыр куспын ӝутскиз Нефтяникъёслэн посёлоксы. Уждунъя ке учконо, сярысь ке верано, шорлыдын соос толэзяз вить сюрс котырын басьто. Озьы улыны кулэ, дыр, туннэ вань коллективъёс. Соку ӝоггес ог-огзэс валасалзы нянь будэтӥсь но му вӧй поттӥсь. Жаляса верано, соосты люке государствоен тупатэм политика. Кыдёке ветлонэз ӧвӧл, ваньзэ тае адӟоно Игра районъя, "Чутырский" СПК-лэн улон- вылонэзъя. Хозяйствоен кема аръёс ӵоже кивалтэ ни Валерий Серафимович Митрофанов. Гурт удыс али возиське ӵапак сыӵе адямиос вылын. Татысь фермаос арысь аре висъясько ӟеч выжы скал вордэменызы, трос йӧл кыскеменызы. Кылем арлы йылпумъянъёсъя Чемошур ферма республикаын кыкетӥ интые потӥз. Али но скаллы быдэ 15 килограмм йӧл кыско. Трос-а шаерамы сыӵе фермаос? Жаляса верано, туж ӧжыт. Ваньмыз потэ кивалтӥсь бордысь: адямилэн ужан мылкыдз но, продукция басьтон но. Чемошур ферма куноосты паймытӥз ӝикытлыкеныз но задор сямо ужась коллективеныз. Дояркаосын кенешыса, вакчи дыр куспын валано соослэсь мылкыдзэс: куспазы тупало, ог- огенызы ӵошатско, ог-огзылы юртто. Валтӥсь зоотехниксы Татьяна Сергеевна Скрябина коллективезлы кык-куинь кылын гинэ дунъет сётӥз: - Калыкмы туж ужась. Сое возьматэ пудо утисьлы сӥзем стенд но: азьмынӥсь дояркаос туннэ 17 килограмм йӧл кыско. Кылем ар понна шорлыдын скаллы быдэ 5500 килограмм люкаськиз, нош самой трос йӧл сётӥсь скал 7 сюрс килограммъем рекорд пуктӥз. Дояркаосты огзэ но нимаз- нимаз ум вераське, 12 мурт пӧлысь кинэ-о висъяса кельтод? Котькудӥз синмаськымон ужа. Нош кыӵе соос кырӟало! Оло, шулдыр, жингрес куараоссы ик юртто фермазылэсь данзэ но утьыны? Соиз но, таиз но вань, дыр. Нош пусйымонэз тани ма: "Чутырский" СПК (азьвыл "Чутырский" совхоз) зол-зол басьтӥськиз вордоно пудоезлэсь выжызэ умоятон борды. Отысь ик потэ ассэ утемез но экономиказэ радъямез. Кызьы шуиз хозяйстволэн кузёез, 800 йыр кысконо скалъёсты сяна, вордо на 1000 йыр парсь, кык пасеказы, асьсэ понна кирпич но шукко. Быгатысалзы чорыг но, бакча сиён но будэтыны - сыӵе луонлыкъёссы вань. Азьланяз, оло, та удысъёсты но вормозы. Огъя уждунзы толэзяз миым ар понна 780 манет люкаськиз, скал кыскисьёс ӧжытак тросгес басьто. Со вӧзы хозяйство висъя на натуроплата, сётӥсько куд-ог льготаос. 1999-тӥ арез йылпумъязы, 3,5 миллион пайда басьтыса. Чемошур гурт сярысь ке верано, туннэ со дугдылытэк егитоме, нош куке-соку пыртэмын вал неперспективной шуиськись гуртъёс радэ. Макем трос пумиськылӥськоно игра калыкен, сокем юн солы синмаськоно вылэм. Чемошурысь вуим Сундуре. Куноосты татын, сояз гуртын сямен, ӟеч сямъя пыжиськемъёсын но кырӟан гурен пумитазы. Шӧдӥське: Кун Кенеше быръем депутатсэс вылӥ дунъяло но туж гажало, асьсэ адямиен лыдъяло. Софья Эльфатовна но вань быгатонлыксэ, кужымзэ сётыса ужа бырйисьёсыз понна. Тау карон кылъёсты кылоно котькуд пумиськон дыръя. Чемошурын куноослы возьматӥзы тужгес но дуно но дано интызэс - удмурт культурая центрез. Конторазылэн азьвыл юртэз, зэмен но, гуртысь кибашлыос тыршемен пӧрмиз "зарни шыкыслы". Татысь адӟод Сундурлэсь вашкала но туннэ нуналзэ, киужъёсты, куэм выжлёгетъёсын, ковёръёсын чеберъям корка пушез. Синпельлы шуыса усьтэм юрт краеведениея музейлы кутскон сётӥз, сое узырмытон бордын уж азинске на. Татысь огез сэрегез быдэсак сӥземын "Ӟардон" калык коллективлы. Гуртысь самодеятельной коллектив кылем арын пусйиз 25 ар тырмон юбилейзэ. Та дыр ӵоже сундуръёс трос пол потазы Удмуртилэн палэназ, нош июнь толэзе соос мынозы Венгрие. Сундурысь удмурт центрлы мыло-кыдо юртто районысь администрацилэн культурая отделэз но "Россия" СПК-лэн правлениез. Калык кырӟа бере, озьыен, ӧз куасьмы на солэн жильыртыса потӥсь кужымез. Депутатъёс та нуналэ вуылӥзы Факел посёлокысь пияла кисьтӥсьёс доры но. Тодматскизы соослэн ужаменызы. Заводлэн ортчем сюресэз сярысь вакчияк вераз директорез Николай Николаевич Ажимов. Секытэн ке но, планзы быдэсъяське, рабочийёслы дыраз уждун тыро. Шугъяськон учыръёс кылдо бутылкаоссэс интыян ласянь. Глазовысь ЛВЗ-эн кусыпъёссы тупало, но вань поттэмзэ отчы келяны уг луы - вань Факелэз азьпалтӥсьёс. Номыр уд шуы - конкуренция аслэсьтыз куасалтэ. Тӥни малы предприятилэн азбараз нуналъёсын сылэ черодзэ витись чильк-вальк кисьтаськись пияла посуда. Ялан ужась комиссилэн игра музъем вылын ортчись кенешонэз йылпумъяськиз "котырес ӝӧк" сьӧрын пумиськонэн. Со ортчиз Факел посёлокысь администрацилэн юртаз. Вераськонэ пыриськизы интыыысь депутатъёс, предприятиослэн но хозяйствоослэн кивалтӥсьёссы, районлэн администрациез. Администрацилэн кивалтӥсез Валентин Семенович Усков люкаськемъёсты тодматӥз районысь социально-экономической югдурен. Коньдон ужпумъёсъя ке учконо, играос му вӧй кыскон чотын умой уло. Шорлыдын вераса, толэзьем уждунзы районъя 750 манет, гурт удысын - 430, промышленностьын - 1900 котырын. Районын огдыре лэсьтӥське 3 школа, огез соос пӧлысь - Зура черкогуртын. Калык дыраз но тырмыт уждун басьтэ бере, ӝог азинске вузкарон. Играысь райпо кылем арын но, туэ но республикая огез устоез луэ. Миым кык поллы кулэсмиз ыштон сётыса ужась предпрятиослэн лыдзы, синӥзы ужтэк кылемъёс. Но играос чик но соглаш ӧвӧл гуртоосты асьсэ хозяйствое выжтонэн (самозанятостен). Крестьян калык сотэк но коньдонэн обидемын, таиз указ соосты эшшо но улӥе уськытэ на. Депутатъёс трос ужпумъёсты бугыртӥзы. Игра АТП-лэн директорез Валерий Александрович Прохоров, кылсярысь, шугъяськемзэ вераз автобусъёслэн вужмемзы сярысь. Арлы одӥг ке но выльзэ басьтоно вал, шуиз со. Ӵектон сётэмын калыклэсь тазалыксэ утёнъя нимысьтыз программа кутыны. Играын улӥсьёс коньдонлы ёрмонэз уг тодо, соиз - зэм. Нош кӧня мурт висьыны кутскемын, му вӧйлэн кырсеныз но уен-нуналэн ӵындӥсь газэн валлин? Сое манетэн но, долларен но уд лыдъя. Тӥни малы адямилэсь тазалыксэ утён но эмъян нырысетӥ интыын сылыны кулэ, со понна кутоно целевой программа. Шонер пусйиз депутат Абашев: играос "сьӧд зарнилэсь" дунзэ ӟеч тодо, сое котыр ласянь ас вылазы шӧдо. "Котырес ӝӧк" сьӧрын кенешон куноос понна но, кузёос понна но пайдаё ортчиз. Отын эскерем ужпумъёсъя Кун Кенешысь Ялан ужась комиссия постановление дасяз. Со улонэ пыӵаз ке, районын югдур эшшо но умой луыны кулэ, уката но социальной удысын. Та ласянь трос лэсьтэ но лэсьтоз на Игра районысь калыклэн депутатэз Софья Эльфатовна Ширбокова. Бырйисьёсыз сое гажало. "Депутатъёсмы трос вал ини, но Широбокова кадь район понна огез но ӧз ужа" - шуиз ужысь ветеран Вениамин Григорьевич Степанов. Арлыдо адямилэн сюлмысь потэм кылъёсыз - самой вылӥ дунъет, дыр. Людмила МЕДВЕДЕВА. * Татӥ кошкоз му вӧй. * Кун Кенешысь депутатъёсты пумита Сундурысь "Ӟардон" ансамбль. * "Котырес ӝӧк" сьӧрын пумиськон. Туспуктэмъёсыз Николай Глуховлэн. Тупаса улон. Май. Уж... Та кылъёсын герӟаськемын вал уно адямиослэн улонзы. Уго 1-тӥ Май праздник котьку огазеялляз быдэс дуннеын улӥсьёсты. Сюрсъёсын, миллионъёсын адямиос поталлязы демонстрациосы. Советской Союз куашкам бере таӵе шулдыръяськонъёс пумен басылмизы. Табере калыкез огазеяны шуггес луиз. Ортчем празднике но асьсэлэн политической митингазы люкаськылӥзы коммунистъёсгес. Калыкез бен сокем уно ӧй вал. Вылаз ик куазь но урод кариськиз. Митингын вераськиз КПРФ-лэн Удмурт рескомезлэн кивалтӥсез Николай Сапожников. В. Беломорскихлэн туспуктэмъёсыз. Удмурт Республикаысь Правительстволэн Распоряжениез 1. Быдӟым Отечественной войнаын Вормонлы 55 ар тырмон нуналэз пусъемен валче но 1999-тӥ арын 25-тӥ декабре 217 номеро Федеральной законэн чакламъя, 2000-тӥ арын 6-тӥ маез, суббота шутэтскон нуналэз, выжтоно 2000-тӥ арын 8-тӥ майлы понедельниклы. 2. Та распоряжениез печатлано Удмурт Республикаысь ивор вӧлмытӥсь ёзъёсын. Удмурт Республикаысь Правительстволэн Тӧроез Н. А. Ганза. Ижевск город, 2000-тӥ арын 27-тӥ апреле. � 217-р. Суредась луэмед потэ? Дышетскы Пинал суредасьёс, кытын тӥ? 19-тӥ мае 10 часын ӵукна тӥледды возьмало республикаысьтымы искусствоосъя школа-интернатын. Суреданы усточи нылпиос пӧлын ортчоз конкурс, тужгес устоосыз кутэмын луозы дышетскыны. Конкурс ортчоз таӵе классъёсы потэм нылпиос пӧлын: кыкетӥ, витетӥ, сизьыметӥ. Сьӧре ваёно суредам ужъёс, со сяна, нылпиос возьматозы суредаськыны быгатэмзэс: кулэ луозы краскаос, карандашъёс. Озьы ик кулэ дышетскем сярысь школаысь свидетельство но терапевтлэсь справка, нылпи кык школаын дышетскыны быгатоз шуыса. Л. КИМОВА. Вормон тулыслэн буёлъёсыз Сайкыт, югыт буёлъёсыныз шумпоттэ туэ тулыс. Быдӟым Вормонлэн 55 ар тырмонэзлы со озьы дасяське, дыр. Таин ӵош ик азьпал праздникез ятвылтыса ортчыло пӧртэм интыосын концертъёс, фестивальёс. Быдэс Россиын ортчись "Вормон салют" калык творчествоя фестивальлэн тулкымез погыльске асьме шаертӥмы но. Можга ёросысь но со котырысь драмколлективъёс 29-тӥ апреле ас спектакльёссэс возьматозы Можгалан. Нош та нуналэ ик Ижысь Операя но балетъя театрын 15 часысен луоз ожысь но ужысь ветеранъёслэн зональной фестивальёсазы вормисьёслэн бадӟым концертсы. 27-тӥ апреле Национальной театрын ортчытӥськоз декоративно-прикладной искусство удысысь быгатӥсьёслэн ИИИ республиканской слётсы. А.АПАЕВА. Соос уло асьме вӧзын Кырӟа на ай, Марпа апай Кылем арын вал со. Калмез кузя экспедициен ортчыкумы вуимы Киров улосысь Кильмезь ёрослэн редакцияз. Отын тодматским журналистэн Татьяна Сморкаловаен. - Ой,кылем арын нырысьсэ лад-лад кылзыны кылдӥз удмурт кырӟанъёсты, макем сюлэме пыӵасесь вылӥллям соос, - егит кышномурт тодаз ваиз районысьтызы Паска удмурт гуртэ ветлэмзэ. - Дырды вань ке, пыралэ ай отысь одӥг туж паймымон кышномурт доры. Марфа Васильевна Рыбакитоваез юады ке, улон интызэ возьматозы. Лапег, чиед мугоро кышномурт ӵапак ураме потэм вылэм - лудысь бертӥсь пудоез пумитаны. Кин луэммес но, малы со доры лыктэммес но тыро-пыдо валэктыса ӧм вуттэ, Марпа апай корка пырыны дэмлаз. Юля нылзэ куриз чай пуктыны, ачиз пуксиз диван пуме. "Нюлэскын писпуэд Кораса быдтонтэм. Нюлэскын шулдырез Бертыны потонтэм..." Мӧйы кышномуртлэн мӧзмыт куараез корка тыр чузъяське. Кырӟанэз яратӥсь суредасьмы Леонид Прозоров воксё паймемын: - Кызьы меда озьы? Адямилы тямыстон арес ини, нош мылкыдыз бызьыны дасяськись нылашлэн кадь ай... Марпа апай, кыдёкысь вуэм ӧтьымтэ куноослы шумпотыса, лэся, огзэ кырӟанзэ пумозяз уг вутты, мукетсэ нёжъяны ӧдъя ни: "Там в саду при долине Громко пел соловей, А я мальчик на чужбине Далеко от людей..." Марпа апайлэн куараез дырекъяны кутске. Ма, син азяз пуктэ, вылды, пинал дырзэ. Туж трос шуг-секытэз адӟоно луиз уго солы. Атаез, герман но граждан ожъёсты пырпотыса, дораз черласа берытскиз. Кема улыны ӧз кылды ни - висён сое вормиз. Анаезлы куинь нылпиез кызьы ке будэтоно вал. Марпа, бадӟымез, быгатэмезъя солы юрттыны выриз ик но, пичи ныллэн кужмыз сомында ни. Мумиз аслыз пыртос шедьтӥз. Но семьяе шумпотон соин ӵош ӧз вуы. Ассэ укыр яратӥсь воргорон пиналъёсты олокызьы но ултӥяз, соосыз сиёнэз но ӧз адӟылэ. Укмыс арессэ тырмытыса, Марпа школае куриськыны малпаз. Дышетскыны одӥг нунал но ӧз кылды - пичиысен ужаны быгатӥсь мурт гурт котырын кулэгес, шуиз анаез. Дас аресаз нылаш колхозын тыршиз ни, кузёос солы етӥн культоосты валэн ворттыны оскизы. Кин али тодэ на, оло, ӵапак соку пичи ныл яратӥз бусы тыр кырӟаны. Анаезлэсь, песянаезлэсь, бускель кышноослэсь кылэм гуръёсты со куаразэ жалятэк нёръяз. - Мон ӟеч тодӥсько на Бадӟым Гозекамы радио вуттэмзэс, - вера Марфа Васильевна. - Юбо йылэ ошем сьӧд тэркыысь куараосты кылыса, нырысь чылкак шуэрским: кызьы, пе, лултэм маке адями сямен вераськыны быгатэ. Радио пыр ик нырысьсэ кылӥ ӟуч кырӟанъёсты. Туж яратӥ соосыз. Ваньзэ йырам утьыны тырши. Кырӟан пыр ик ӟуч кылэз но дышетӥ кадь. Отӥяз ныллы нюлэскын ужано луиз. Тол вылтӥ гуртоос тэль коразы, тулыс сое шур кузя келяны дасязы. Та ужын но Марпа ассэ умоен возьматӥз. Кырӟан мытыса, эшъёссэ лӧпкытъяз. Одӥгаз ӝыт пуконын яратонзэ пумитаз. Баблес пияшлэн нимыз укыр аспӧртэмлыко вал - Абрам. Война азьын егит семьяын Таня нимо ныл вордскиз. Шумпотыса ул ни вал... Абрамез фронтэ басьтӥзы. Шудтэм Марпа озьы но тазьы выриз муспотон нылзэ утьыны. Татын но адӟонэз умойтэм вылэм. 1943-тӥ арын соиз висьыса кулӥз. - Нылылылэсь кизэ суредаса мыным лэзь ай, - ар пала ортчыса вуэм гожтэтаз вазиськиз Абрам яратоно кышноезлы. Марпа бускель кышномуртэз куриз гожтэт дасяны. Но Гозекысь салам солдат доры ӧз вуы ни. Кызьы тодмо луиз бӧрысь, удмурт воргоронэз ватӥллям Чехословакиысь Руська гурт вӧзысь шайвылэ. Война бере но Марпа улон ӧрзэ шедьтыны кема выриз на. Ужаз колхозын, ваиз на ныл но пи. Шуг-секытъёсты вормыны солы котьку сямен юрттылӥз кырӟан. - Ой, али кваре шакта ни, - шуэ Марфа Васильевна. - Азьло дыре тодымтэ кырӟан ӧй вал кадь потэ. Шумпотон-а, куректон-а - весь кырӟаса улӥ. Туж секыт луыку, тэле мыныса чирдӥсько вал. Калыке потыны Дорелэсь мӧзмисько, Вордӥськем шаерме Туж буре ваисько..." Марпа апай кӧня ке кыл вера но, выль кырӟанэз заводе. Ми, кӧлыны Кильмезе кошкыны малпасьёс, та туж аспӧртэмлыко кышномуртэн озьы гинэ люкиськыны ӧм ӵыдэ ни - Паскае ик кылим. Бер уёзь чузъяськизы Рыбакитовъёслэн юртазы та нуналэ пӧртэм гуръёс. Ӵукнаяз кузё кышно, оло, куатен ик сайкатӥз. Кылзэ ай, пе, шакта кунянлэн кадь куараеным эшшо кӧня ке кырӟало на. ... Август толэзьысен трос дыр ортчиз ни. Кошкиз пӧлысьтымы суредась Лёнямы. Ортчиз тол. Вуиз тулыс. Кылем арняе пусйим Быдӟым нунал праздникез. Со ик тодэ вайытӥз Паска нимо гуртэз но отысь одӥгзэ улӥсез. Материалэз бичаны сётон азьын жингыртӥ Кильмезе. Татьяна Сморкаловалэсь юасько Марпа апай сярысь. - Алигес гинэ отчы вуылӥ, соин но пумиськи, мылкыдыз умой, кырӟанзэ уг вунэты, - шуиз газетын ужась. Кема ул, кема кырӟа на ай, Марпа апай! И. Лебедев. Паска гуртысь Марфа Рыбакитова. Художникмы ужа портрет лэсьтон бордын. Суредэз Леонид ПРОЗОРОВЛЭН. Туспуктэмез Георгий Юсаевлэн. Кызьы уд чабы! 16-тӥ апреле Андан ӵыжатӥсьёслэн культура дворецазы концертэ трос калык ветлӥз. татын йылпумъяськиз Ижысь усточиослэн Вормон нуналлы сӥзем фестивальзы. Солэсь азьло фестиваль ортчиз городлэн котькуд ёросаз. Соин ик Быдӟым Вормонлы витьтон вить ар тырмонэз пусъён вылысь двореце люкаськылӥзы тужгес устоосыз артистъёс но коллективъёс. Кызьы тодмо, Ижын даслэсь трос удмурт ансамбль. Уноез соос 16-тӥ апреле но сцена вылэ потазы. Кызьы уд вера "Тюрагай", "Инвожо", "Зангари", "Инвугур", "Бускель", "Зарни тюрагай" ансамбльёс сярысь! Соос асьсэды татын синмаськымон возьматӥзы. Трос кичабонъёс артистъёслэсь мылкыдъёссэс уката вылэ ӝутӥзы. Н. Возисов. Гажано ветеранъёс! Вань сюлмысьтым ӟечкыласько тӥледыз асьме понна одӥгеныз сайкытэныз праздникен - Вормон нуналэн! Арысь аре Быдӟым Отечественной война ялан палэнэ но палэнэ кыле - со асьме калыкмылэн бадӟым куректонэз но вормонэз вал. Пӧламы со аръёсысь адямиос ӧжыт но ӧжыт кылё ни. Но сюлэмъёсамы ӟуч солдатлэн быдӟым вормонэз ноку вунонтэм. Ноку вунонтэм нылкышноосмылэн но пиналъёслэн со вакытэ асьсэды жалятэк ужамзы. Тӥ быдэс дуннелы возьматӥды асьтэлэсь быдӟым атай музъеммы понна нюръяськыны дась луэмдэс, быгатӥды утьыны сое. Ноку уз вунэ быремъёс! Данъяськом но гажаськом улэп кылем геройёсмес! Азьланяз но кема улэ, будэтэ нылпиостылэсь пиналъёссэс но соослэсь нылпиоссэс, мед гажалозы соос Родинамес. Шудбур но тазалык тӥледлы, гажано ветеранъёсмы! В.В.Балакин, Россия Федерациысь Президентлэсь ужзэ быдэсъясьлэн Удмурт Республикая оскем адямиез. ВАЛЭКТЭ ЮРИСТ Сэрегез дася адвокат Лилия ШКЛЯЕВА Коньдонэ "ӝуаз"... Тӥледлы вазиське гуртысь механизатор таӵе юанэн. Мон ужасько колхозын 1961-тӥ арысен. Со дырысен ӧдъяй быгатэмея коньдонме кассае тырыны. 30 ар ӵоже 14 сюрс 566 манет люкаськиз. 1998-тӥ арын касссае вазиськи но, книжкаям гожтӥзы 88 манет но 36 копейка. Кызьы тае валано? Сое 1991-тӥ арын курысал ке, маке-маке вуз басьтыны быгатысал. Табере сал луиз. Малы озьы ужась калыкез пӧязы? Законъя-а лэсьтӥзы кассаын? Туж курисько валэктон сётыны. Анатолий ХУДЯКОВ. Кез районысь Квасер гурт. Коньдон воштӥськемен валче, уно адямиос озьы ыштон адӟизы. 1991-тӥ арын 20-тӥ июнёзь Россия Федерацилэн Сбербанказ понэм коньдонэз берыктон вылысь, 1995-тӥ арын 10-тӥ мае кутэмын "Россия Федерациысь гражданъёслэсь люкам коньдонзэс берыктон но утён сярысь" 73-ФЗ номеро Закон. Соя кун аслаз пунэмен тыронъёсыз пӧлы пыртӥз вылӥ верам вкладъёсты но Россия Федерацилэн кун страхованиея организациосаз 1992-тӥ арын 1-тӥ январёзь тырем коньдонэз. Уно миллион адямиослэсь коньдонзэс берыктыны бюджетын коньдон уг окмы бере, та уж мыныны кулэ люкетэн-люкетэн. 1996-тӥ арын 16-тӥ мае Россия Федерацилэн Президентэз поттӥз таӵе Указ: "Россия Федерациысь куд-ог гражданъёслэн 1992-тӥ-1995-тӥ аръёсы дунтэмам вкладъёссылы азьвыл ик компенсация лэсьтон ужрадъёс сярысь". Соя юрттэмын вал 1916-тӥ арын но солэсь азьвылгес вордӥськемъёслы, нош 1997-тӥ арын 2-тӥ декабре поттэм Указъя - 1917-тӥ- 1920-тӥ аръёсы вордскемъёслы. Та компенсация юнме уг нимаськы азьвыл ик (предварительной) шуыса. Тӥни малы худяков эш медаз лыдъя, солэн уно аръёс ӵоже люкам коньдонэз 88 манетлы пӧрмиз шуыса. Таиз - ӵапак предварительной компенсация шуон. Нош вочаксэ коньдонэз кызьы утён сярысь нимысьтыз указ ӧвӧл на. Вормон нуналэ - мед вормоз! Нырысетӥ дивизионын шудӥсь "Газовик_Газпром" команда "висисьёссэ" шумпоттэ. 29-тӥ апреле со вормиз Москваын "Спартак-Чукоткаез" 4:2 лыдын. Нош 2-тӥ мае ас дораз нюръяськиз Казаньысь "Рубинэн". Кезьыт зоро куазен чебер шудон ӧз пӧрмы. Озьы ке но асьме футболистъёсмы ӝутскем мылкыдын нюръяськизы но 2:1 лыдын утӥзы. 9-тӥ мае "Газовик" Ижын ик шудэ. Со пумиськоз Астраханьысь "Волгарь- Газпромен". М. Кузьмин. Быдӟым Вормонлы - 55 ар Коръёслэсь лэсьтэм пушкаос Кызь арлэсь кемагес улӥсько ини Ижлэн шунды ӝужан палысьтыз микрорайонын. Со дырысен ик мынам бускеле луиз вадьсысьтымы коркан улӥсь кемалась тодмое, асьме шаерысь тужгес мӧйыез журналист, ожысь но ужысь ветеран Николай Иванович Кондратьев. Вормон праздник азьын, 7-тӥ мае, солы 90 арес тырме. Азьло аръёсы Николай Иванович ӵукналы быдэ кошкылоз вал сад-бакчаяз. Аналскыса уг улы али но. Йырсазьыз умой, шаермылэсь улонзэ радио, телевизор, газетъёс но эшъёсыз пыр тодыны-валаны тырше. Быгатэмезъя удмурт ужрадъёсы но ветеранъёсын пумиськонъёсы пыриськылӥз. Тазалыкез сярысь сюлмаськыса улэмез туалаослы туж адӟем карымон. Мынам тодэмея, тамак кысконэз но аракы юонэз кулэ ӧз карылы. Н. И. Кондратьев Совето власть дыръя улонлэн котькуд арезлы-вакытэзлы ас сяменыз, тодыса, валаса, лэчыт дунъет сётыны быгатэ. "Ортчем сюресъёс" тодэ ваёнъёсаз со тазьы гожъя: "Мынам ёзъёсылэн улон-вылонзы секыт ортчиз. Соос пиналысен ик трос курадӟонэз, куректонэз, сютэм улонэз адӟизы. Тани, шуом, граждан ож дугдӥз гинэ - 1921-тӥ арын сютэм дыр кутскиз. Таиныз ӵош лыктӥз секыт висён - тиф. Трос калык быриз. Крестьян калыклэн улон-вылонэз уката шуг луиз на гуртъёсын колхозъёс кылдон вакытэ. Егит пиез та вакытэ сельсоветын ужаны "кыткизы" ини. Секретарь луиз отын. Кужымзэ эскериз гожъяськонын. Нырысьсэ гожтэмез "Гудыри" газетэ потӥз 1926-тӥ арын. Нылмуртэз лушкаса кышно ваён сярысь ивортӥз вал. Куамынэтӥ аръёсы ик Николай Кондратьев Ижысь автомобилья техникумын дышетскиз. Быръем удысэзъя кӧня ке ужаз Вятка улосысь Котельнич городын. Но сюлэмыз вордскем палъёсаз ик кыскиз. Газетэ гожъян мылкыдыз эшшо ӧръяськиз. Маде Николай Иванович: - 1943-тӥ арын мон "Удмурт коммуна" газетлэн редакцияз куриськи. Редактор Петр Васильевич Кильдибеков ӟуч кылын пӧрам куриськонме лыдӟыса юаз: "Удмурт кылын гожъяськыны быгатӥськод-а? Возьматӥ вакчиесь веросъёсме. Редактор учкиз но шуэ: "Интыед татын, редакциын". Со вакытэ егит газетчилы кема ужаны ӧз кылды - басьтӥзы Горд Армие. "Удмурт коммунаез" лыдӟыны шедьтылӥ, пе, кыдёкысь шаерын, Монголиын но. Ысъяло вылэм редакциысь эшъёсыз. Службазэс нуись удмрут пиос шумпотыса лыдӟыло вылэм вордскем шаерысьтызы вуылӥсь иворъёсты. 1938-тӥ арын службазэ йылпумъяса, вордскем палъёсаз бертӥз. Кык ар ӧз ортчы, выль повестка вуиз - Финн оже. Собере - Германиын жугиськонэ. Со тодаз вае: - Сётӥзы киям стереотруба. Лабрес кызлэн йылаз тубыса, приборме пуктӥ. Учкисько, кырым пыдэс вылын кадь ик адӟисько тушмонлэн бышкаськись езэн кыскем кенеръёсыз, траншеяосыз. Пырак ӵошкыт возь вылын - тушмонлэн батареяез. Куать пушка артэ сылэ. Котыразы нокин ӧвӧл. Пушкаослы матын землянкаос луыны кулэ кадь. Батарея вылэ кык залп сётӥмы. Сюриды, каргамъёс! Дыртӥськем вылэм. Тушмон эрекчаны быгатэм. Коръёслэсь лэсьтэм суред гинэ вылэм со. "Разведчиклы ыжез скалэн сураны уг яра", - пыкылыса выллем вераз командирмы. Тушмон оборонаез чигтон понна командование Вязьма котыре люказ уно пушкаос но танкъёс. 1943-тӥ арын 9-тӥ августэ тушмонлэн йыр вылаз сюрсэн-сюрсэн снарядъёс усьылӥзы. Ӵукна ик шундыё нунал тём-тём пеймыт луиз. Кык час ӵоже тазьы кыстӥськиз. Шуак чал-чал луиз. Малпаськом: асьме пехота ӝутскоз ни. Учкиськом: солдатъёс гань-гань пуко на окопъёсын. Мар луиз? Командиръёс выль амал шедьтӥллям. Кызь минут ортчиз-а, ӧз-а - орудиос выльысь улӟизы. Кутскизы ук ныркыны тушмонлэсь кема дасям каръёссэ. Куазь нош ик шимес пеймыт луиз. Немецъёс ӧз чидалэ, кутскизы пегӟыны. Соосты уйыса, 107-тӥ артбригада вуиз Белоруссилэн кунгожез доры. 1945-тӥ арын 1-тӥ мае Кёнигсберглэн гарнизонэз сётскиз. 107-тӥ бригадалэн сюресэз, оло, таин йылпумъяськоз ни шуыса малпам вал. Кытын, пе? Ӵуказеяз ик келязы Латвиысь Либава город доры. Балтика зарезь дурын котыртыса кельтэмын тушмонлэн 33 дивизиез. Соосыз таркано на. Сокем кема ӧз мытылэ ни. 8-тӥ мае киоссэс ӝутыса, пыӵал тӥрлыксэс куяса сётскизы. Вормонлы шумпотыса, сюлмыз куриське ни вылэм дор палаз, выльысь газетын ужаны. Уката но соин: войналэн пумаз "Советской Удмуртия" газетэз лыдӟыны шедьтылӥз ни, пакетэн эшъёсыз ысъязы. "Туж шумпотӥ... Удмурт кыллы выльысь паськыт сюрес устэмын". Пӧртэм иворъёсын ӵош, лыдӟылӥз Тимофей Шмаковлэсь, Игнатий Гавриловлэсь фронтын гожтылэм кылбуръёссэс. Та эшъёсыныз фронтысен ик гожтэтъёс пыр кусып тупатӥз. Тодэ ваёнъёсаз тазьы гожтоз: "Тушмонэз вормыса, Прибалтикаысен бертыны дасяськисько вал ни. Редакторлы А. С. Бутолинлы гожтӥ: "Йыры быгылес кылиз. Газетлэн редакцияз ужаны мынысал". Фронтэ ветлэм эшъёсыз пӧлысь огез, батареялэн командирез лейтенант Михаил Спиридонов, Пичи Пурга ёросысь Курчум-Норья гуртын вордскемын, улэ Улын Юри гуртын. Со юрттэмъя, Николай Иванович Ижысь 50 номеро школаын, 107-тӥ артиллерийской бригадаезлы сӥзьыса, музей кылдытӥз. Нош школаосы со мылкыдыз но тазалыкез сэзь дыръя трос ветлӥз, ож сюресъёс сярысь егитъёсын вераськылӥз. 50-тӥ школаысь музейын бригадалэсь сюресъёссэ возьматӥсь бадӟым карта вань, трос документъёс, туспуктэмъёс, ожмаськон тӥрлык, мукет экспонатъёс люкамын. Азьло аръёсы ӵош ожмаськем эшъёс артиллеристъёс Вормон нуналэн валче пумиськонъёс, слётъёс ортчытъяллязы. Н. И. Кондратьев кыказ сыӵе пумиськонъёсы ветлэм - Вильнюсэ но Москвае. Соку ӵош ожмаськемъёсты пумита вылэм 3-тӥ артдивизилэн командирез генерал-майор Степан Ефимович Попов, Москваын улӥсь. Горд Армие куинь пол ветлэм солдат ожысь бертӥз 1946-тӥ арын гинэ, эшшо Уй пал Кореяе вуылыса. Бертыса выльысь пыриз "Советской Удмуртия" газетлэн редакцияз. Ӝоген отчы берытскизы куинез азьвыл ӵош ужам эшъёсыз - С. И. Иванов, Т. И. Шмаков, В. И. Иванов. "Кема гинэ ужай мон удмурт газетын. Мон тодэмъя гинэ "Гудыри", "Удмурт коммуна", "Удмурт правда", "Советской Удмуртия", "Удмурт дунне" газетлэн 1928-тӥ арысен дас вить редакторез воштӥськиз". 60-тӥ аръёсы Н. И. Кондратьев Завьял ёросысь "Ленинец" газетлэн редакторезлэн воштӥсез вал. Кивалтӥз удмурт кылын газет поттонэн. Со аръёсы мон соин артэ ужай, тэтэ карись вал. Шӧдылӥ, макем юнэсь куронъёс пуктылэ вал со гожъяськисьёс азе. Ӟуч сямен но, удмурт сямен но чылкыт гожъяськыны дышетӥз. Нимысьтыз куронъёс пуктылӥз удмурт кылэ берыктӥсьёс азе, ачиз угось со сыӵе школа пыр потэмын войналэсь азьло ик. Мон солэн дышетскисез луи. Пайдаё индылонъёсыз понна тау карисько. Удмурт кадръёсты будэтон понна со юн сюлмаськылӥз. Со аръёсы ик "Ленинец" газетлэн редакцияз машинисткаын ужаны лыктӥз Капитолина Петровна Калинина. Со вунэтыны уг быгаты таӵе учырез. Света нылыз пичи на вал, ясли-садике путёвкаез ӧвӧл. Сьӧраз ветлоно луэ. Капа шалтыр ужаку, нылзэ чаклалляны вутскылэ Николай Кондратьев но. Солы "уж" шедьтэ, кылсярысь, бурдоосты суреданы дышетэ. Озьы пичи ныл мукетъёслы уг люкеты ни. Огпол пичи Светалэн комнатаетӥ шудыса ветлэмез кельшымтэ редакторлэн ӟуч газетъя воштӥсезлы. Капаез пыкылыны кутскем. - Уд ке шедьтӥськы пиналыдлы инты, гуртад пук. - Кин милемыз сюдоз? - Картэд вань. Арня пала ортчыса, тае тодэм Николай Иванович. Таиз ӝегатскытэк профсоюзной кенеш люказ. Зол йӧттӥз йӧнтэмлы: - Кызьы тӥ дӥсьтӥськоды кадръёсын пазъяськыны, адямиез ултӥяны? Эшшо арня ортчиз-а, ӧз-а - садике путёвка шедиз. Николай Иванович газетын тужгес но азинлыко ужан аръёсаз бадӟым юрттэт сётӥз эшезлы-бӧлякезлы Иван Федорович Очеевлы. Таиз Пичи Пурга ёросысь ик Улӥ Кечол гуртын вордскемын. Соос эшъяськизы 1940-тӥ арын, финн оже ӵош ветлыса. Быдӟым Отечественной война бере пумиськыса, журналист печатлаз белорус музъем вылын ожмаськем партизан-командир сярысь очерк. Отӥяз книга кылдытыны вераськизы. И. Ф. Очеевлэн тодэ ваёнъёсыз кык кылын гожтэмын: удмурт сямен - "Тушмонлэн мышказ", ӟуч кылын - "Эхо над рельсами". Кык эшъёс книга гожъякузы вуылӥзы ожмаськем интыосы, пумиськылӥзы отысь эшъёсынызы. Кык ожгарчиос-эшъёс, арлыдзы бадӟым но тазалыксы лябгес луэмен, куспазы шергес пумиськыло ини. Нош алигес, та нуналъёсы гинэ, Николай Иванович шумпотэм мылкыдын вераз Иван Федоровичлэсь доразы адӟиськыны пырамзэ. Сое гуртысьтыз Иже нуллӥллям тазалыксэ эскерыны, соку гинэ герой-партизан эшсэ эскерыны луонлык шедьтэм. Н. И. Кондратьев. Л. Федоров. Лидия Чернова. Кошко ветеранъёс Арлы быдэ нош ик лыдпус синэ. Сыӵе уго улон. Кин ке но весяклы синзэ кыне - Вакчи вылэм улон. Вормон Парад. Маин-о со Шумпоттоз на ветеранэз? Огзэ эшсэ нош ик ыштӥз... Пушкыз тыриз - ӧз луы ваземез. Шергес, шергес радзы адске ни... Маин-о тырмытод та ыштонэз? Ялан ӝуась тылэд дыго гома ни - Оло, солэн но быре ни кужымез? Кошко ветеранъёс, Кошко батыръёсмы... Нуйтыны быгатомы-а арлыдзэс? Чиль-дол чилялозы медальёссы - Таос возьмато лек ожмаськемзэс. Кошко ветеранъёс, Кошко батыръёсмы... Эн вунэтэ бен соослы йыбырттыны. Вамышъялозы парадын Туэ Вормон Парадэ асьме республикаысь мыныны шуд усиз вить муртлы. Со отставкаысь полковник, 1945-тӥ арын Парадэ ветлэм ветеран Анатолий Кузьмич Рубленко, отставкае потэм полковник Виктор Игнатьевич Ярков. Отставкаысь подполковник Денис Григорьевич Урсегов, отставкаысь старшой сержант Мират Газетдинович Ишметов но Владимир Фролович Мерзляков. Куинетӥ мае соос Москвае кошкизы. Ветеранъёсты сюрес вылэ келяны ветлӥзы Удмурт Республикаысь Кун Кенешлэн Тӧроез Александр Волков, Кун Кенешысь ялан ужась комиссилэн кивалтӥсез Фаина Федорова, Удмурт Республикаысь ветеранъёслэн Советсылэн председателез Михаил Зыков, Удмуртиысь Правительстволэн Тӧроезлэн воштӥсез Виктор Шудегов, Удмурт Республикаысь егитъёсын ужанъя кун комитетлэн кивалтӥсез Андрей Гальцин. Соос ветеранъёслы шудо сюрес сӥзизы. Н. Лялин. Тани соос Вормон Парадэ мынэмъёс. Паллян паласен бур пала сыло В. Ф. Мерзляков, В. И. Ярков, М. Г. Ишметов, А. К. Рубленко, (Д. Г. Урсегов туспуктэм вылын ӧвӧл). В. Беломорскихлэн туспуктэмез. Ижевскысь Шор площадьын уно аръёс ӵоже ини ортче велосипедэн ворттылонъя ӵошатскон. Туэ но отчы уно спортсменъёс пыриськизы. Нимаз ӵошатскисьёс пӧлын вормизы Александр Порсев (Ижевск, "Локомотив"), Дмитрий Боталов (Воткинск), Александр Болдырев (Воткинк). 1999-тӥ ар понна Алексей Блиновлы спортъя мастер ним сётэмын. В.Беломорскихлэн туспуктэмез. Гажано ветеранъёс! Быдӟым Отечественной войнае ветлэмъёс вормонэз матэктон понна улонзэс ӧз жалялэ. Фронт мышкын тыршисьёс пӧсьсэ но, кезьытсэ но чидазы. Кинлы секытгес вал - передовойын-а, фронт мышкын-а, яке оккупацие, пленэ шедемъёслы-а? Гажано россиянъёс, ӧвӧл одӥг сыӵе семья но, кин куректыса синвузэ ӧз кисьты, кинэ секыт уж ӧз куасалты. Куасалтыны луонтэм кужым, чиданлык но вормонлы оскон гинэ матэктытӥзы та дано нуналэз 1945-тӥ арын 9-тӥ Маез. Ӟечкыласьком Тӥледыз фашизмез вормем дырысен 55 ар тырмонэн! Россиысь солдатэз но фронт мышкын тыршисьёсты данъян нуналэн! Асьтэлы, тӥляд ӵыжы-выжыостылы но матысь адямиостылы юн тазалык, тыр улон, бадӟым шудбур но тупаса улон. Удмурт Республикаысь Офицеръёслэн огазеяськонзылэн шор советэз. ШӦКЫЧ СЕРЕМ ПЫР Пӧртэмесь - Господин генерал! Тӥ пыдады пӧртэм ботинкаос кутчаллямды: одӥгаз - тӧдьы, мукетаз - сьӧд. Гуртады ветлэ но воштэ вал. - Да ветлӥ ни мон гуртэ. Отын но огез - тӧдьы, мукетыз - сьӧд. Амало парсь Парсь, дэриын нуш-нуш кылле, быжыныз шудэ. Вӧзтӥз Пуны ортче: - А мон тодӥсько, малы тонэ кузё кышно нап тяпняен сюдыны турттэ - арня ортчыса, солэн вордӥськем нуналыз. Соку ик тонэ вандозы. Парсь, дэриысь потыса, ури-бери бызьылыны кутскиз. Ог дасо котыр азбарез котыртэм бере, пунылы шуэ: - Туннэлы тырмоз. Кык кило куштӥ, луоз, ӵуказе нош бызьыло. Г.Баженова. Гажано ветеранъёс! Сюлмысьтым тау карыса ӟечкыласько тӥледыз Вормон нуналэн! Фронтын но солэн мышказ тӥ ваньзэ лэсьтӥды, странамылэсь эриксэ утён понна. Тӥлесьтыд геройлыко ужъёстэс ноку уз вунэтэ. Макем кыдёке кылё со кышкыт аръёсы луэм шимес учыръёс, сокем ӟечгес шӧдӥськом асьмеос соослэсь дуно луэмзэс. 45-тӥ арын басьтэм Вормон туж яркыт возьматӥз уго калыкмылэсь быгатонзэ, котькыӵе шуг-секытэз палэнтыны тырмымон кужымзэ. Та праздник оскон сётэ, али но асьмеос Вормон Знамяез азьпала данэн нуыны быгатом шуыса. Тазалык но шудбур тӥледлы, гажано фронтовикъёс - Быдӟым Отечественной война дыръя ожмаськем но тыршем эшъёс! Атайёсмылэсь-песятайёсмылэсь подвигзэс Россиын улӥсьёс котьку тодазы возёзы. Асьме дунне вадьсын ялан мед луоз чылкыт инбам! Россия Федерациысь Кун Думалэн депутатэз Светлана СМИРНОВА. Дыртэлэ! Удмурт крезьгурчиослы эшшо огпол ивортӥськом: удмурт лулчеберлыкъя дэменлык кичӧлтэмъя, шаерамы ялӥське нылпи кырӟанъёсъя Герман Алексеевич Ходырев нимо конкурс. Ас кужымзэс эскерыны быгато татын котькыӵе арлыдъем крезьгурчиос. Конкурсэ пыриськыны малпась адямиос азе пуктӥське таӵе курон: кылдоно кырӟанъёс пӧлысь одӥгез мед луоз тодмо нылпи кылбурчилэн Герман Алексеевич Ходыревлэн кылъёсызъя, мукетыз - аслад яке музон кылбурчилэн чуръёсызъя. Аудиокассеталэн плёнкаез вылэ гожтэм кырӟанъёсты Удмурт радиолэн юртаз ваёно 15-тӥ маёзь. Выль ужъёсты сюлмысь дунъялозы шаерысьтымы тодмо крезьгурчиос, кылбурчиос, культура удысысь адямиос. Конкурслэн кыкетӥ вакытэз радъяськоз сӥзьыл, толалтэ. Та ужрадлы сӥзем ӝытын (гала-концертын) устоосыз пусъемын луозы дуно кузьымъёсын, дипломъёсын, данъян грамотаосын. Вормисьёс понна чакламын коньдон премиос. Нырысетӥ инты басьтӥсь муртлы сётэмын луоз 1000 манет. Кыкетӥ инты понна чакламын луоз 700 манет. Куинетӥ инты понна - 500 манет. Быдэн вить премия луоз 300 манет тыр. Кузьымъёс озьы ик дэмлалозы на учкисьёс, узыр ужбергатӥсьёс. Гажано редакция, - гожтэ Можга ёросысь Кватчи гуртысь Валера Шикунов. - Тӥледлы мон вазиськисько нырысьсэ. Мыным туж кельше газетысьтыды "Шӧкыч" люкетэз. Отын вань трос кулэез но маскараез, соин ик малпай тӥледлы гожтыны аслэсьтым юморескаме. Мон туж шумпотысал, тӥ сое газетады поттысалды ке. Солэн нимыз "ОЗВЕРИН" Кыед Иван гуртын воргоронъёс пӧлысь ошлэн кадь зол кужыменыз висъяськиз. Солэсь гуртоос али ке но кышкало. Нош кышноез, Марпа, со шоры трос уг учкы, пельдораз табаен васькытъя, тыбыр кузяз гур суранэн сётъя, йыраз ухватэн тышка... Одӥг чебер нуналэ таӵе улонлы солэн чиданэз быриз. Ӵапак кылӥз "Озверин" эмъюм лэсьтӥллям шуыса, кудӥз, пе, адямилэсь вожзэ поттэ. Иван городэ мыноно кариськиз та эмъюмез утчаны. Базарез но ортчиз, дасо мында лавкаосты "бугыртӥз", олокӧня аптекае пыраз - нокытын но ӧвӧл. Иван йырзэ ик ыштӥз вал ини, мар карыны паймыса шӧдтэк шорысь урамысен тодмотэм муртэ пумитаз. Соиз юаз: - Вить минутскын сю доллар басьтэмед потэ-а? Кыед Иван шумпотэменыз интыяз ик пограське вал, моганы ик ӧдъяз. Ӵапак тупаны кулэ ук озьы, тодмотэм мурт телевидениысь вылэм, "Озверин" эмъюмлы реклама лэсьтыны таза воргоронэз утча. Со Иванэз нуиз студие но ваньзэ рос-прос валэктӥз. Передача, пе, меӵак эфирын луоз. Вуиз эфире потон дыр но. - Ваелэ вераськом "Озверин" эмъюм сярысь, - шуэ передачаез нуись. - Вераськом, - вазе Иван. - Валэктэ вал мыным, Иван Абдулович, мае тӥ шӧдӥды та эмъюмез юэмды бере? - "Озверинэз" юэме бере, мон нырысь ик шӧдӥ, лусьтро быжы потӥз шуыса, собере така сюръёс будӥзы, вылтыр гонэн шобырскиз, куарае муры скалэз утчась ошлэн бурсэмезлы кельшись луиз, синъёс вирен тырмизы, собере номырзэ но уг тодӥськы ни. - Таиз валамон, нош тӥ сое кӧня юиськоды? Татын Иван тыпак дугдӥз, угось, кӧня юыны солы ӧз валэктэ. Воргорон солэсь могӟемзэ валаз но чиньыеныз валэктыны кутскиз, "кык" шуыса. - Одӥг кобы, - шуэ Иван, нош ачиз ялан возьматӥсез шоры учке. Соиз шаплыгес вырыны кутскиз. Омырын "П" буква гожтэ, нуны веттам каре. Со озьы кык пилюля юоно шуыса возьматыны выре вылэм. - Кык кобы! - вазиз Иван. Возьматӥсез со вие пукон вылысь усиз, улмо кадь гордэктӥз. Нош передача нуись ялан юа но юа. Кыед Иван мар вераны паймиз ини. Воргорон выж вылын ньыль пыдъяськыса ветлэ но ялан азьвыл кадь возьматъя. - Кык ӟенелик! - кеськиз Иван. Учке но, воргорон выж вылын ӝуштыса кылле ини. Врачлэн тӧдьы дӥсезлэсь но бездыт луэм. Соку сое больницае нуизы. Иван сьӧраз мынӥз, передачалэсь йылпумъяськемзэ но ӧз возьма ни. Ог дасо минут улыса, воргорон улӟиз но, сю долларзэ сётӥз. - Мон тӥледыз эшшо огпол адӟи на ке!.. - вазиз но могӟиз со. - Мар луоз, огпол адӟиды на ке, кык сю доллар сётоды на-а? - серектӥз Кыед Иван. Воргорон миндэр вылэ усиз. Кыед Иван соку эмъюмтэк ик бертоно луиз. Коньдонзэ кышноезлы сётэм бере, соиз туж шумпотӥз. Гур суран борды но табере шер йӧтскылэ ни. Гажано эшъёс! Сюлмысьтымы ӟечкыласьком Быдӟым Отечественной войнае вань пыриськемъёсты, фронт мышкын тыршем ветеранъёсты Атай музъеммылэн одӥгеныз дано праздникеныз - Вормон нуналэн! Милемлы шуд усиз тӥледын артэ улыны. Дышетскыны тӥлесьтыд чидась но кышкасьтэм луыны, вордӥськем музъеммес яратыны. Ми пырак синъёсады учкыса меӵак вераны быгатӥськом - ваньзэ лэсьтыны тыршом, Быдӟым Отечественной войнае ветлэм солдатъёс, фронт мышкын тыршемъёс ноку уз вунэ шуыса. Вормон Нунал праздник политикаын нимысьтыз инты басьтэ. Берло аръёсы асьмеос уката но ӟечгес валаны кутскиськом - макем 1945-тӥ ар пумен историе кыле, сокем умойгес шӧдӥськом, кыӵе секытэн басьтэмын вал вормон, макем секытэн сётскиз дунне вылын тупаса улон. "Кезьыт война" шуон аръёсы Советской Армилэсь вормонъёссэ умойтэмен возьматыны тыршо вал, но калыкмы сое меӵак палэнтӥз. Вормон Нуналэз пусъён огшоры праздниклы медаз пӧрмы, сое адямиос сюлэмъёсынызы мед шӧдозы. Соин но, лэся, 9-тӥ Маез калык ялан паськытгес но паськытгес пусъе. Тушмонэз вормонын Удмуртия бадӟым инты басьтэ. Меӵак верано ке, война аръёсы республикамы странаын одӥгез уно пыӵал тӥрлык поттӥсь улос вал. Сутка ӵоже гинэ Ижевск одӥг стрелковой но авиационной дивизиослы тырмымон пыӵал тӥрлык келялляз. Асьмеос сюлэмъёсмы вӧсь луыса тодамы вайылӥськом ожын быремъёсты. Удмуртия Советской Армилэн радъёсаз 263 сюрс адямизэ келяз. Республикаысьтымы 35 сюрс адями службае басьтэмын 1938-тӥ-40-тӥ аръёсы. Соослы Родинамылэн кунгож вылаз нырысь ик пыриськоно луиз фашистъёсын ожмаськонэ. Солдат радэ султӥз Удмуртиысь котькудӥз ньылетӥез улӥсь. Ож лудъёсысь ӧз бертэ ни басьтэмъёс пӧлысь ӝыныез. Та лыдпусъёс малпаськытыны кулэ асьмеды. Асьме солдатъёсмылэн кышкатэк, улонзэс жалятэк ожмаськемзы сярысь верало соослэн наградаоссы. Соос умой возьмато асьме палан вордскемъёслэн Быдӟым Отечественной ожын нюръяськемзэс. Удмурт музъем будэтӥз Советской Союзлэсь сюлэсь уно Геройёссэ. Штурмовой авиациысь лётчиклы Евгений Максимович Кунгурцевлы та ним кык пол сётэмын вал. Данъяськыса вераськом: Удмуртиысь кызь мурт пусъемын Слава орденлэн куиненыз ик степеньёсыныз, со вылӥ пусъёс возьмато солдатъёслэсь кышкасьтэм луэмзэс. Вормон сюрес - со воинъёслэн кышкасьтэм луэмзы, шутэтсконэз, жадёнэз валатэк нуналмысь тыршон. Со утиз солдатъёслэсь улонъёссэ но техникаез. Со ӝутылӥз выжъёс, лэсьтӥз блиндажъёс, нюръёс пыр поттылӥз танкъёсты. Удмуртия Родинаенымы одӥг омырен шоказ, ваньзэ лэсьтӥз Вормон понна. Зэмос памятникен лыдъяны луэ Удмуртиысь ужаса улӥсьёслэсь война аръёсы Ижевск-Балезино чугун сюрес лэсьтэмзэс. Нылкышноос но быдэ вуымтэос сое туж вакчи дыр куспын ӝутӥзы. Быдӟым Отечественной ожлэн историяз ӧжыт ӧвӧл калыклэсь Вормон понна зэмос патриот луэмзэ возьматӥсь учыръёс. Шуг-секытъёс одӥг семьялэн но палэнтӥз ӧз ортче. Озьы ке но Удмуртиысь калык утиськонъя (обороная) фондзэ но боевой машинаос лэсьтонэ сётӥз 328 миллион 466 сюрс манет, дас кык но ӝыны кило зарни. Удмурт крестьянъёслэн коньдонэнызы лэсьтэм секыт танкъёслэсь "Колхозник Удмуртии" колонназы келямын вал Сталинградлы юрттыны, асьсэлэн люкам коньдонэнызы лэсьтӥзы самолётъёс, мукет техника. Капчи ӧй вал вормон сюрес. Но странамы со сюресэз данэн ортчиз. Быдӟым Отечественной войнаез асьмеос ноку вунэтыны кулэ ӧвӧл. Государство кужмо огкылысь луэменыз. Асьмелы туннэ но асьмеос быгатӥськом маин данъяськыны, Быдӟым Россиез уката но кужмо кунлы пӧрмытыны, Удмуртимес ӟеч ужъёсын уката узыргес карыны. Со понна юнгес сюлмаськоно вань социальной программаосты быдэстыны, нырысь ик Ветеранъёс сярысь Законэз улонэ пыӵатыны. Быдӟым Отечественной войнаысь но уж фронтысь гажано ветеранъёс, вань сюлмысьтымы ӟечкыласьком Быдӟым Вормонлы 55 ар тырмонэн. Сӥзиськом тӥледлы тупаса улон, юн тазалык, кема аръёс ӵоже тыр улон, яратон но шудбур! Удмурт Республикаысь Кун Кенеш. Удмурт Республикаысь Правительство. Удмурт Республикаысь Ожысь, ужысь, вооружённой кужымъёсысь но югдурез утён органъёсысь ветеранъёслэн советсы. ТОДМАТСКОН СЭРЕГ "Салон для двоих" - озьы нимаське Ижевскысь тодматскон служба, кивалтэ соин Алевтина Иосифовна Агалакова. Салон ужа огназы улӥсьёсын, кинлэн кылдытэмез потэ таза семья. Лулсэр висёнъёсын курадӟисьёс, кышнояськем-быземъёс, пытсэт сьӧрын пукисьёс медаз вазиське. Улӥын верам кыӵе ке абонентэн тодматскемды потэ ке, гожтэ солы гожтэт, келялэ салонлэн кивалтӥсезлы (абонентъёслэсь адресъёссэс нокинлы уг келяло). Гожтэт пыр кусып возён понна ыстоно луоз 10 манет яке 5 конверт. Вазиськоно таӵе адресъя: 426060, Ижевск город, а/я 3307. Гажано лыдӟисьёс, тодады вайытӥськом: та салонысь абонентъёслы сӥзем гожтэтъёстэс "Удмурт дунне" газетэ эн келялэ. Аб.4122. Удмурт пиосмурт, 58/165, улэ гуртын, вань аслаз юртэз, хозяйствоез, бакчаез. Яратэ ужаны. Улон интызэ воштыны пумит. Тодматскысал ӟеч сямо 45-55 аресъем нылкышноен. Аб.4126. Удмурт пиосмурт, арлыды бадӟым ни, но огнын улыны мӧзмыт. Тодмасткысал огназ улӥсь 65-78 аресъем удмурт нылкышноен. Аб.4135. Мариец, 41/170, кышнояськылымтэ, ужез яратӥсь. Семья кылдытон вылысь тодматскысал пыд вылаз йыг-йыг сылӥсь нылкышноен, пумит ӧвӧл одӥг нылпиезлы, улон интыме воштыны соглаш. Аб.4136. Удмурт нылкышно, 54/162, улӥсько Ижевск котырын, улон интые вань, вылӥ образованиен. Тодматскысал ужез яратӥсь, ӟеч сямо пиосмуртэн, улон интыме воштыны пумит ӧвӧл. Аб.4138. Гуртын улӥсь воргорон, 48/173, куинетӥ группаен инвалид, улон интыез вань, коньдонлы уг ёрмы, учкымон тусбуё. Тодматскысал 45-55 аресъем нылкышноен, улон интызэ воштыны соглаш. Аб.4139. Удмурт воргорон, 45/170, улэ Ижевскын, вань аслаз юртэз, ужез яратӥсь. Тодматскысал огназ улӥсь 40-45 аресъем, 160-165 ӝуждалаё нылкышноен. Аб.4140. Удмурт пиосмурт, 40/160, улэ гуртын, вань аслаз юртэз. Куинетӥ группаен инвалид, яратэ ужаны, гурт котырысь ужъёсты быдэсъяны. Тодматскысал ас понназ улӥсь, ужез яратӥсь но адямиез валась нылкышноен. Тараканов усьтэ катанчизэ Удмурт кылэн но литератураен тунсыкъяськисьёс пӧлын Иван Васильевич Таракановлэсь нимзэ тодӥсьтэмез ӧвӧл. Профессор, филология наукаосъя доктор уно лэсьтӥз но лэсьтэ анай кылмес азинтон понна. Соин Кузьма Куликовлэсь но Василий Михайловлэсь со сярысь фильм дасямзэс дунъяно но данъяно гинэ. "Азьветлӥсь" синмаськымон пӧрмем. Яркыт буёло, чебер крезьгуро лэсьтэмын со. Фильм дасямын И. Таракановлэн Татариысь вордскем Бавлы палъёсаз. Котьку визьнодъясь лектор, преподаватель огшоры улонын суредамын. Со фильмлэсь дунзэ эшшо вылӥе ӝутэ. Кытысь бен адӟысалзы на студентъёс Иван Васильевичез мунчое пырон вакытаз, вал вылын ворттылыкуз, кырӟакуз? УдГУ-ысь туала дышетскисьёс но дышетӥсьёс учкизы ни фильмез. Авторъёс татчы юромо ветлӥзы, соослэсь мылкыдзэс тодон вылысь. Ӧз ӧпкеле: тау карон кылъёс но, дэмланъёс но кылӥзы. "Азьветлӥсь" ӝоген 10-тӥ канал пыр возьматэмын луоз. Э. Кумачева. Ӟечезлы оскон Кин малпалляз, 90-тӥ аръёслэн кутсконазы Москваын Вормон парадъёс уз луэ ни шуыса? Кин малпалляз, медальёсын ульчае потэм муртэ клоун нималозы шуыса? Кин малпалляз, ожын басьтэм Ленин орденэз отысь платина понна вузаны луэ шуыса? Мар луэ асьмемын? Огез грузин, Иосиф Джугашвили (Сталин), быдэсак сямен Европаез СССР борды огазеяз. Мукетыз грузин, СССР-ысь мукет кунъёсын кусыпъёсъя министр Эдуард Шеварднадзе, НАТО- лы юрттӥз Ӟуч кунмес копак шымыртыны но пырак Киев дорозь суйзэ мычыны. Озьы ке но, 55 ар талэсь азьвыл вормисьёс вормемын ӧвӧл ай. Выльысь чузъясько маршъёс. Москваысь Горд карлудэтӥ выльысь артэ вамышъяны дасясько туала егит офицеръёс но пурысьтам йырсиё ветеранъёс. Выльысь ас ужгурзэ радъя Воткаысь дано ракетаос поттӥсь завод. Кыкетӥ шоканзэ шедьтыса сямен, дуннеез нош паймытэ дано конструктор Михаил Калашников. Ивор вӧлмытӥсь ёзъёс но тодазы ваизы кадь Вормонэз дурем эшъёсмес. Вожмаськыса данъяло винтовка дурисез но нянь будэтӥсез, танкистэз но лётчикез, морякез но солдатэз. "Удмурт дуннелэн" песьтэраз котьку трос вал вормисьёслы сӥзем чуръёс. Али но печатланы дасямын Пичи Пурга ёросысь Аксак гуртысь Иван Тихонов сярысь, Ува ёросысь Нылгалась Яков Зыкин но мукетъёсыз сярысь мадёнъёс. Ми котьку йыбырттӥмы сыӵе муртъёслы. Нялтас пусйыны кулэ: редакциысь 32 ветеран пӧлысь дасэз фронтын вал. Соослы сӥзиськом кузь улон даур. Вормисьёс берло аръёсы эшшо огпол вормон басьтозы на. Вормозы коньдонлы радазтэм йыбыртъянэз, лушкаськонэз, эрказъяськонэз, наркотикъёсын усыкмонэз. Уз, киязы пыӵал кутыса уз чигнатэ таӵе кыльёсмес. Соослэн кужымзы мукет. Котькыӵе шукыръяськон вакытэ но адямиос пушкы кыле ӟечезлы оскон. Таӵе сямез утё на Быдӟым оже ветлэмъёс, Афганистан но Чечня пыр потэмъёс. Сыӵеосты дунъямы-утимы ке, ӵапак соос асьмелы юрттозы мур нюкысь потыны. Али Россия кылдытэ выль военной доктрина. Отын чакламын кунлы кышкытлык кылдыку атом оружиез но кутыны. Кин но со вузэ: Россия нош ик вормытъяське. Уг вормытъяськы - дуннеын аслэсьтыз интызэ возьматэ. Берло аръёс асьмеды юн шузимытъязы. Нош али сурымысь мозмиськомы ни кадь. 55 ар талэсь азьвыл асьмеос вормимы. Азьланьын асьмеос вормомы. Вормомы кырсь улон-вылонмес. Георгий ГРЯЗЕВ Атай, весь эн бӧрды!.. Шундыё куазь. Пыдэстэм инмысь кисьтӥськыса кадь зорись тылсиос синмез ик вандо. Тӧл пелляськонзэ ик вунэтӥз ини кадь. Пӧсь пуртыын мур шоканы пась ӧвӧл. Писпу куаръёс пичи но уг выро, нош гольык пыд бызьылӥсь пиос понна маке шат: я тузонэн пазясько, я, шур дуре васькыса, асьсэ киынызы лэсьтэм "пароходъёссэс" лэзьяло. Ӵошатско, кинлэн чаклам сюресэз чальгес ортчоз. Коркасьтызы нуназе котыр потыса, шунды пуксем бере гинэ, коръёс лумбыт ӝутъям адямиос музэн, дор палазы жадьыса вамышто. Ма сиё, ку сисько - сое асьсэос гольык кӧтъёс гинэ тодо, дыр. Вуж Кушкет гуртысь пичиос Ӟуч урам палан шудо вал. Дарманьтонзэс куспетӥ кариз палазы матэ но матэ вуись тодмотэм куара. Я нюлэс палась лыктэ, я тымет гадь вылысь чальтче кадь со. Инмын жургетӥсь куара куд-ог дыръя йырбере ик усе кадь. Шунды шорын печен кадь пыжем пичиос котыр ласянь утчаськыны кутскизы - куара кылӥське, нош ма со - валантэм. Шудон но кулэ ӧвӧл ни - пыдэстэм инмын ургетэм золгес но золгес шуккиськыны ӧдъяз. Гольык кӧтъёсты лобась самолётэн уд паймыты ни - нунал ӵоже кӧня меда корт тылобурдоос чагыр инмез гожмаса сямен лобало? Пичиос асьсэ коже шудон но малпазы ни: кин самолётэз котькинлэсь вазь адӟиз, со самолёт-канфетка шуыны кулэ. Озьы бере, кылемъёсыз шудӥсьёс шудоезлы но синмо-пелёезлы быдэн конфет сётыны кулэ. Таӵе шудонэн быдэс нунал но вырыны луоно. Нош али чылкак паймемын: одӥг гуре сураськемын ургетон но, шаугетон но, таргетон но, омырез вандӥсь куара но. Синъёс адӟытэк, номырлы оскыны уг луы: оло, выжыкыл, оло Баба Яга аслаз вышкыяз инметӥ лоба ини? Пиналъёс, ымзэс куака тэрымон усьтыса, чылкак измизы кадь. Синъёссы гинэ шырпиослэн чимыоссы музэн бызьыло, мае ке утчало. Гурт пумысь кык мурт ӟыгыртымон топольёс йылтӥ пичи самолёт ортчиз. Со пиналъёс пала матэгес но матэгес вуыны кутскиз. Таӵе пичи самолётэз пичиослэн ноку но адӟемзы ӧй вал на. Тани-тани сое тӧл нуоз кадь. Шудон арбери кадь гинэ бурдъёс Ӟуч урам вӧзысь ӵошкыт интые пуксизы. Зырымен но дэриен паньсаськем пиналъёс планерез гужетӥсь дуринчиос сямен котыртӥзы. Нош лётчик ас дораз эшшо но матэгес лыктыны косӥз но, кышканэз но возьдаськонэз вунэтэм гольык пыдъёс пичи самолёт борды воксё тэбинизы. Кин ке питранзэ ӵыжаны тырше. Уг оскы, лэся, таӵе пичи самолётлэн но резина пыдкукыз луыны быгатэ шуыса. Со дыре ик мукетыз зырым вышкы, планерлэн бурд вылаз тубыса, лётчиклэсь кабиназэ усьтыны вуэм ини. Кык вамыш гинэ кылиз на вал - пияш кортӵогам кадь дугдӥз: кӧберанэз кылем ик на вылэм. Олег но эшъёсыныз ӵош бурд вылэ султӥз. Сюлэмыз ырак луиз: оло, инбаме ик ӝутскиз кадь. Музъем вылэ кылем юлтошъёсыз но, ог-огзэс куспетӥ карыса, ньылонзы кеськымон черекъяло: - Кыӵе отын? - Кышкыт ӧвӧл-а? Лётчик музъем вылэ васькиз. Пичиос но, ӟольгырипиос музэн, шалтыр гинэ тэтчазы. Сьӧд мыйыко, йӧно пиосмурт покчиосын ас ёзъёсыныз кадь ик, ожо вылэ пуксьыса, лад- лад вераськиз. Олег синъёссэ вошъятэк ик чемоданэн воргорон шоры учке. Оскыны нокызьы но уг быгаты, кебитэ тупатъяны ваем пичи уробо кадь гинэ арбери омыретӥ лобаны быгатэ шуыса. Вылаз ик, куараез корт тарантаслэн кадь. Оло, быдэс состав лыктэ, кожалод. Мукетсэ но валамез чылкак уг луы: планерысь адями кызьы уг кышка сыӵе ӝуждалалэсь? Инмар мед утёз но, марысь мар ке - коть йырбердэ корма на. Озьы ке но, кыӵе умой, дыр, лобаны. Тон вылӥын, улӥын ваньмыз кузьылиос кадь гинэ адӟисько. Тыныд киосынызы шонало, тыныд вожъясько... Таза мугоро пиосмурт пу кобызэ кема ӧз кока. Кабинае пуксён азяз гинэ котыраз кариськем пичиослэн синъёсазы каръяськем юанлы валэктӥз: - Лётчик луон понна, нырысь ик, инмар юн тазалык мед сётоз. Собере сандык тыр визь люкано. Сотэк тӥ китэм-пыдтэм муртъёс кадь луоды. Олег Исаев но нырысьсэ рос-прос адӟиз самолётэз. Та учырез ик пумиськыкумы тодаз ваиз солэн атаез но, Николай Степанович. Оло, пичи дыръяз ик сюлэмаз но йырвизьмаз пыӵам суред зэмос сюрес бырйыны юрттӥз? Кин тодэ на табере... Бигер элькунысь Балтаси ёросысь Вуж Кушкет гуртын вордӥськем удмурт пияш нырысь- валысь дышетӥсь луыны малпа вал. Зэмзэ но, тямыстонэтӥ аръёсы гуртын дышетӥсьлэн данэз бездэмын ӧй вал на. Олег Исаев тодон-валан басьтыны пыриз Арскысь педучилищее. Анаез, Вера Петровна, шумпотӥз ни вал: пиез, дышетсконзэ йылпумъяз ке, дор палаз бертоз, соослы оскымон юрттӥсь луоз. Но улонын ваньмыз малпамъя гинэ уг луы вылэм. Арскысь педучилищеез йылпумъямез бере, егит дышетӥсь диплом басьтыса вуэ гинэ - Советской Армие ӧтё. Службазэ Красноярскын ортчытыны дэмлазы. Армилэсь палэнскон сярысь малпан йыраз ӧз ик лыктылы. Кулэ бере - мыноно. Песятаез армиын вал, атаез чидаз, нош Олег лябгес шат? Погон нуллон аръёс секытэсь ӧй вал. Педучилищеын дышетскыкуз ик Исаев спортэн эшласькиз - армиын со туж зол юрттӥз. Сюлэмызъягес вал куасэн бызьылон. Лычсузьымоназ котыръяськылӥз педучилище вӧзыгес ик лэсьтэм лымы сюрес вылтӥ. Куасэн бызьылон ик юрттӥз Олег Исаевлы гира ӝутъянын но вормонъёс басьтылыны. Кызь ньыль но куамын кык килограммъем кортъёсты шудыса сямен сэрпалля вал. Ваньмыз умой луыны кулэ ни кадь: служба ӟеч мынэ, командиръёсыз, эшъёсыз гажало. Мар борды гинэ уг кутскы - ваньмыз ӝик-ӝик пӧрме. Одӥгез гинэ сюлэмызъя ӧй вал - Олег Исаев связистъёслэн дышетскон центразы сюриз. Кинлы ке яра, дыр, та удыс. Но чидасьтэм сюлэмо Олеглы пукыса быдэсъяно уж уг кельшы вал. Сюлэмыз чупырес, зэмос пиосмурт ужез витиз. Тӥни соку Олег Исаев улоназ, аслаз малпамезъя, тужгес шонер вамыш лэсьтӥз. Кема малпаськыса пукиз: ма бордысен гожтэт гожтыны кутсконо? Нырысь ик - анай-атай мед валалозы. Нош отӥяз аслад кужымедлы гинэ оскон кыле на. Олег нырысь ик Светлана сузэрезлы гожтӥз. Отын нырысьсэ ивортӥз военной училищее пырыны мылкыд каремез сярысь. Та ивор анай-атайзэ шундыё нуналэ гудыртэм кадь медаз кышкаты шуыса, сузэрзэ ик документъёссэ армие лэзьыны куриз. Красноярскын службазэ нуыкуз, дораз ветлӥз атаез. Татысен Николай Степанович нырысьсэ кылӥз пиезлэн лётчик луыны мылкыд каремез сярысь. Зэм, Николай Степановичлэн пизэ военной каремез уг поты вал. Озьы ке но, ачид тодӥськод гинэ шуиз: угось вордскем палъёсаз кылизы на вал Олеглэн вынъёсыз но сузэръёсыз. Анай сюлэм но таӵеезлы чутрак пумит луиз: оло, соку ик ини Вера Петровна шӧдӥз пиезлэсь умойтэм сюрес вылэ султэмзэ. - Соку мон тышкаськыса гожтэт ыстӥ, - тодаз вае анаез. - Шуи: одӥг удысэд вань ини - тырмоз. Кык ардэ ортчыты но гуртэ берытскы. Котьма ке но, Олег тӥрен коралтэм кадь шуиз: "Мон дышетскыны пыро. Лётчик луо!" Иркутске люказы куинь сю куатьтон пала егитъёсты. Сӥльвирез но тодон-валанэз эскерись сӥсэз Исаев туж ӟеч пырпотӥз. Нош тросэз военной училищее пырыны ӧз быгатэ. Тужгес шудоосыз гинэ курсантъёслэсь погонъёссэс нуллыны кутскизы. Мукетъёсыз кошкизы частьёсазы но гарнизонъёсазы, кылемъёсыз - вордскем палъёсазы - анай-атайзылэн шуныт бурд улазы. Военной сюресэз Олегез вуттӥз Воронеж улосысь Борисобоглебск карысь военной лётчикъёсты дасянъя Валерий Чкалов нимо Вылӥ училищее. Соку ик вераны кулэ: та дышетскон инты асьме кунмылы сю кызь кык героез будэтӥз. Татын Олег Исаев лётчиклэн ужезлэсь чебер но кырсь палъёссэ шӧдӥз-валаз. Озьы ке но, пал кыл но ӧз поттылы военной юнме луэмез пумысен. Воронеж музъем вылысен ик со шедьтӥз кузпалзэ но: Ирина кышноез но - дышетӥсь. Ньыль ар туж ӝог ортчиз. Егит лейтенантъёсты быдэс Союзэ пазязы. Исаев офицер семьяеныз нырысетӥ куинь арзэ азербайджан музъем вылын улӥз. Олег чагыр инбамез гожмаз. Тӥни соку ик гурезё Карабахын бугырскиз вал кык калык куспын дуринчи палэп. Дораз ӵем гинэ гожтэтъёс ысъя вал. Отын ялан семьяез сярысь гинэ ивортылӥз. Малпан кылдэ вал: Олег Исаев, оло, уг но лоба. "Малы кагаз вылэ оломаосты но гожъялод меда?" - малпаз удмурт воргорон. Вылаз ик, пересьмыны кутскем анай-атайдэ керӟегъяськытод на. Сюлмаськонъёссэ, шуг-секытъёссэ кыре поттыны ӧз дырты. Куинь ар ортчем бере вуэ Германие, отысен - Таджикистанэ. Ӵапак соку "шур сьӧрын" ваче кымес вуэмын вал Афганистанысь вылӥ кивалтӥсьёс. Соос вискы пыризы асьмелэнъёс. Кутскиз дас аръем ожмаськон-кораськон. Олег Исаевлэн погонъёсыз вылын ньыль пичи кизилиосыз чиляло ни вал соку. Афганистанын ожмаськемез сярысь Вуж Кушкетын улӥсь анай-атаез, сузэр-вынъёсыз ӧз но тодылэ. Кытысь бен валатскозы? Гожтэтын тодмо букваосын гожъямын вал: "Мынам ваньмыз умой! Мон понна эн сюлмаське!" Тӥни сыӵе вал Олеглэн ялан верано но лӥятоно кылъёсыз. Кӧня ке ар ортчем бере гинэ Вера Петровна но Николай Степанович Исаевъёс тодӥзы, соослэн пизы "шур сьӧрын" кышкатэк ожмаськемез понна "за отвагу" медален пусъемын вылэм шуыса. Нош одӥг пол Исаевъёс-егитъёс Адлере шутэтскыны кошкизы. Соку ини Олеглы куд-ог учыръёс сярысь верано луиз. Задание лобакуз, со эшсэ быронлэсь утьыны быгатэ, тушмонъёсты ас вылаз кыске, нош пасяськем кӧтурдэсо самолётэн эшез базае умой гинэ вуыны быгатэ. Кивалтӥсьёс Исаев капитанлы нимысьтыз час кузьмало но Адлерын шутэтскыны путёвка висъяло. Военной адями куке-соку малпа меда, со котьку сямен лэчыт пурт ултӥ ветлэ шуыса? Вань-а меда куалектонэз, пичи ке но кышканэз? Куд-огез вераны но тырше: зэмос герой номырлэсь но уг курда, азьпалаз сылӥсь вань гурезьёсты берыктыны быгатоз. Сыӵе кужым, пе, инмар сётэ. Озьы ке но, мон таӵе малпанэн огкылысь ӧвӧл. Адями котькыӵе батыр мед луоз но, солэн сюлэмыз вань. Адямилы йыр но малпаськыны сётэмын. Ужзэ сюлмаськытэк но малпаськытэк лэсьтӥсь мурт адями уг луы ни. Ма меда малпаз улонэзлэн берпуметӥ нуналаз Олег Исаев? Йыраз ӧз но лыктылы, дыр, лобанысь берытсконтэм сярысь малпан. Валантэм ожмаськонын быроз шуыса тодысал ке, инбаме, оло, ӧй но ӝутскысал. Майор луыса Исаев службазэ азьланьтыны вуэ Ставропольеысь Будённовск городэ. Та интыез туннэ быдэс дуннеын тодӥсьтэмез ик, оло, ӧвӧл ни. Нырысь ик - город нуллэ тодмо военачальниклэсь, Советской Союзлэн куинь пол Героезлэсь маршаллэсь Семен Будённыйлэсь нимтулзэ. Та палан ик быдэс дуннелы тодмо будённовск выжыысь валъёсты будэто. Куинетӥез - нырысетӥ чечен ожмаськон дыръя Шамиль Басаев та городысь эмъяськонниез басьтӥз но отысь висисьёсты, врачъёсты автомат улын кышкатыса возиз. Ӧз жаля пинал ваёно кышномуртъёсты но. Чик янгыштэм адямиос бырыны шедизы. Тӥни сыӵе интые сюриз Исаев майор. Собере ик чечен шаерын асьме солдатъёс Россия Федерацилэсь Конституцизэ тӥясьёсты лапкомытыны ӧдъязы. "Котырес ӝӧкъёс", верам кылъёс ӧз юрттэ - ыбылыны ӧдъязы пушкаос но автоматъёс, инме ӝутскизы самолётъёс но вертолётъёс. Талэсь палэнэ ӧз кыле Исаевлэн но эскадрильяысьтыз офицеръёс. 1996-тӥ арын 5-тӥ мае Исаев майорлы иворто: асьме пехотаез чечен йырвандӥсьёс гурезьёс вискы пачкатӥллям, таосыз асьсэ кужыменызы потыны уг быгато ни, юрттэт куро. Вакчи дыр куспын омыре ӝутсконо но солдатъёсты мозмытоно. Вазь ӵукна ньылетӥ эскадрилья омырын вал ини. Самолётэн кивалтӥз Исаев майор. Чечняын гинэ удмурт пияш инме сю поллэсь трос ӝутскылӥз ни вал... Кытын ке, кыдёкын ик ӧвӧл, секыт ож мынэ. Юрттэт дыраз ӧз вуы ке, асьме пиос из пуртые сюрозы. Нош отысь луло потыны уз быгатэ ни. Исаев майор адӟиз пуштылӥсь снарядъёсты. Сюен сураськем изъёс выллань ӝутӥсько но, пужнӥськыса сямен, выльысь усё музъем вылэ. Тӧл ӧвӧл, соин ик тузон кема дыр ӵоже огинтыяз сылэ. Рос-прос валаны но уг луы, гурезь нёжалын асьмелэнъёс-а, йырвандӥсьёс-а? Радио пыр сётӥзы ивор. Пиньёссэ куртчыса ик Исаев майор машиназэ тушмон пала берыктӥз. Тани адскизы йырвандӥсьёс но. Соку самолётысь секытэсь "саламъёс" музъем вылэ усизы. Кышкыт инты дорысь палэнскемез бере, стрелок ивортӥз: люказы эшшо одӥг бомба кылем на. Исаев машиназэ берыктӥз но выльысь кошкиз ыбылӥсьёс пала. Бомбазэ куштыса ӧз вуы - самолёт зуркак луиз но кылзӥськемысь дугдӥз. Собере шуак чалмиз. Машинае снаряд сюриз. Соку майорлэн йыраз чилектӥз: "Тэтчоно!" Но самолёт туж улӥетӥ лобе вылэм - йырвандӥсьёс гинэ но кырымпыдэс вылын кадь гинэ адскылӥллям. Тани самолёт усиз мур нюке. Со сьӧры васькиз Исаев но. Малпан одӥг: парашютэз усьтӥськыны вуоз меда? Тырмоз-а ӝуждалаез? Из кадь усиз музъем вылэ лётчик - лобась адямилэсь бурдъёссэ вандӥзы. Парашютлы усьтӥськыны ӧз тырмы вить-куать метр. Дораз соку ик вуизы асьме солдатъёс. Мукет палась ыбылэм куараос чалмизы - озьыен, Исаевлэн эскадрильяез йырвандӥсьёслэсь ымзэс пытсаны быгатӥз. Аслэсьтыз но машиназэ пазьгизы. Йырсазьзэ ыштэм но трос интыостӥ тӥяськем мугоро адямиез шедьто котыртэме сюрылэм солдатъёс. Офицер луло на! Ӝогак келяно сое Грозный городэ, отысен - Моздоке яке - Владикавказэ. Таӵе дыръя котькуд минут но быдэс час кыстӥське. Нош зол сюлэм жугиське на. Синъёслэн гинэ кужымзы усьтӥськыны уг тырмы ни. Кыллэн но кынарыз ӧвӧл ни маке вераны. Оскон вань на - офицер улон борды кырмиськемын. Ӝоггес эмъяськонние! Грозный городэ вуттыкузы, майор шока на вал. Кулэ уколъёс пуктылыса но бинялляса, Будённовске келяно кариськизы. Исаев быдэс сюрес вылын синъёссэ ӧз ни усья. Оло, тодмо городэ вуэмзэ шӧдыса, каллен гинэ мур-мур шокчиз, ваче куртчем пиньёссэ лэзиз но пыраклы гань-гань выдӥз. Собере майор одӥг пол но ӧз ни султылы. Удмурт пияшлэн ӵыжы-выжыосызлы кышкыт телеграммаос кошкизы. Воронежын улӥсь Ирина кузпалыз но Дима пиез доры 200-тӥ груз вуиз. *** 1996-тӥ арын 26-тӥ июне Россилэн Президентэз Борис Ельцин 886-тӥ указ поттӥз. Тодмо луиз: ас ужзэ усто быдэстэмез но геройлыко ожмаськемез понна, майорлы Олег Исаевлы Россилэн героез дано ним сётоно (быремез бере). Воронеж городэ вуиз генерал-лейтенант Михайлов. Солы косэмын вал батырлэсь медальзэ семьяезлы сётыны. Люкаськем калык туж паймиз, генерал Россиысь Геройлэсь 112 номеро зарни медальзэ куать аресъем Дима Исаевлэн гадь вылаз бырттыку. Шуо: адями та улонысь урод малпанъёсын кошке ке, ялан уйвӧтъёсы лыктэ, пӧртэм тодэ ваёнъёсын вуэ, вунэтыны уг лэзьы, мур малпаськонэ уськытэ. Мон юай Николай Степановичлэсь: - Пидэс уйвӧтъёсады ӵем-а адӟылӥськоды? - Куинь ар ортчиз ни (пумиськонмы вал 1999-тӥ арын - Г.Г.) - одӥг пол сяна адӟеме ӧвӧл, - мур лулӟиз арлыдо воргорн. - Соку но Олег "Атай, весь эн бӧрд!" гинэ шуиз. Улыны малпа вал, дыр. Мон паймисько но данъяськисько удмурт калыкеным. Со секытлэсь палэнэ ноку но ӧз кариськылы. Нош кулэ ке, оскем ужез рос-прос лэсьтоз: со понна азьланяз возьыт медаз луы... чечен ожын удмуртъёс пӧлын Россилэн нырысетӥ Героез луиз лётчик Олег Исаев. ... Олег Исаевлэн вордскем гуртысьтыз ӝыт палгес кошкимы ни. Али но ай син азям сьӧд басма вылысь горд сяськаё кышетэн Вера Петровна, пилеш кыльыны кутскем Николай Степанович. Соос, милемыз келяса, ураме ӧз потэ ни... ... Малы ке но быдэс нунал зориз. Ялан кыдырамен, коркаос но, писпуос но, кенеръёс но выжыкылысь суредлы укшало. Исаевъёслэн гурт пумын сылӥсь выль корказы гинэ та пеймыт суредэз югдытэ на. Капка азязы кема вераськыса, тамак кыскыса но сылӥмы на. Соку тодам лыктӥзы Олег Исаевлэн 1996-тӥ арын апрель толэзе лэзем берпуметӥ гожтэтысьтыз чуръёс: "Атай, июне мон отпуске потӥсько. Соку доре берто но, лэсьтӥськон ужъёсын выром ини..." Ӧз кылды воргоронлы анай-атаезлы выль корка лэсьтон бордын ужаны. Толэзь но ӧз ортчы - ассэ "пичи выль коркан" музъем пушкы келязы. Нош Вуж Кушкет гурт пумысь корка али но вите на кадь Олег Исаевез. Нош со уг берты ни... ... Кырын нош зоре но зоре. Музъем тулыс шунам лымыен гуньдэмын ини, нош инмысь шапыкъёс усё но усё. Та вакытэ музъемлэн но, котырысь инкуазьлэн но, оло, куректэмзэс возьматэмзы потӥз. Татысь кошкон азям укно пиялаос шоры учки на: Вера Петровна но Николай Степанович милемыз уг келяло меда? Зэм, отын нокин ӧй вал. Пияла борды шуккиськылӥсь шапыкъёс гинэ чальтчо но, адямилэн синвуосыз кадь, чурен-чурен уллань васько. Та нуналэ шунды инбаме таки ӧз пота. Малы меда?.. *** Бигер шаерысь бертэме бере, вордӥськем палъёсам вуылӥ. Туймат гуртэ доры матэктыкум, синъёсме сьӧдчабей бусы мальдытӥз. Юг-юг сылэ со, ческыт зыныныз бордаз мушъёсты, майсыосты кыске. Сьӧдчабей туж нап вылэм. Музъемлэн пичи виштыез гинэ но уг адӟиськы. Нош бусы вылэ тӧдьы ӝӧккышет вӧлдӥллям, кожалод... Пыдэстэм инмысь одӥг сьӧд виштыез адӟи. Аслэсьтыз сиёнзэ утчаса, бурдъёссэ выретытэк ик бӧдёно-душес лоба. Кожалод, сое инмын адскисьтэм кужым возе? Тани бӧдёно-душес шуак уллань из сямен васькыны кутскиз. Мон ымме но усьтыны ӧй вуы - тылобурдо сьӧдчабей пушкы зымиз ини. Нош ӝӧккышет ӧз но вырӟы. Секунд но ӧз ортчы - со выльысь инме ӝутӥськиз. Собере мон эрико тылобурдоез ӧй адӟы ни... Таӵе суред бере соку ик малпаськыны кутскиськод: ма дауртӥз душес? Йырам нош одӥг гинэ малпан: тылобурдо аслыз сиён шедьтӥз, луоз: шыр-а, пичи бурдо-а, мукет луло маке-а ӝимиз ымаз?.. ... Тазьы луэ кыр пӧйшуръёсын, тылобурдоосын. Мынэ инкуазен сётэм улон понна нюръяськон. Нош адямиос пӧлын малы ог-огдэ быдтон, виылон учыръёс луыло на? Асьмеос инкуазьлэн тужгес визьмо нылпиосыз ук. Озьы ке но, пӧртэм пыӵал тӥрлык малпаса, сое кылдытыса, ог-огмылы кужыммес возьматӥськомы, адямилэсь тужгес дунозэ - улонзэ - таланы тыршиськомы. Дунне вылын берпуметӥ ожмаськон бырем бере но мон рос-прос, пумозяз уг вала на, дыр, малы адямиос ог-огзэс виыло. Малы? Архивысь документъёсъя Удмуртия ЪЪ дауре 1911-тӥ ар Вятка губерниысь калык хозяйство капитализм сюрестӥ выльдӥськемен татын улӥсьёслэн лыдзы шуак вылӥе ӝутске. 1880-тӥ арын 2,5 миллион ке вал, 1911-тӥ арын - 3,5 миллион. Трос калык лыктэ городъёсы. Экономикаез азинтонын валтӥсь инты басьтыны кутско чугун сюресъёс. Та ласянь пусйымон Глазов. Пермь-Котлас (1899-тӥ ар) но Северной (1906-тӥ ар) чугун сюресъёсты татӥ кыскемен ас вакытэзлы Глазов вузкаронъя но культурая бадӟым центрлы пӧрме. Чугун сюресъёс губерниез но Глазовез страналэн шунды пуксён но шунды ӝужан пал уно улосъёсыныз герӟа. Озьы вузкарыны умоесь луонлыкъёс кылдо. Глазовысь купецъёс но нюлэс ужен вырисьёс пумен юнгес но юнгес басьтӥсько вузкарон борды, лябъёсыз вузчиос кужмоосыз ки улэ шедё. Калыклэн йылэменыз, промышленностьлэн но вузкаронлэн азинскеменыз валче городъёслэн доходъёссы но будо. Сарапул, Глазов, Иж но Вотка заводъёсын лэсьтыны кутско кирпичлэсь выль административной юртъёс, банкъёс, вокзалъёс, гимназиос. Кылдыны кутско паркъёс, скверъёс, изэн вӧлдэм сюресъёс, ульчаысь керосин лампаосты воштыны кутске электротыл. Улонысь кошке Сарапуллэн йырыз - Башенин. Со интые огкылысь быръё Сергей Иванович Бодалевез. Выль кузё сюлмаське Кам шурлэсь ярдуръёссэ юнматыны, городлы выль мунчо пуктыны, киужъёслы дышетонъя школаос усьтыны, дышетскон заведениослы казнаысь ватсаса коньдон висъя. Бодалевлэн кышноез ӟечен юрттон вылысь концертъёс, спектакльёс радъя, отысь поттэм коньдонэз нылпи юртъёсы келя. 3-тӥ феврале Андреевский черкогуртын Святой Апостол Андрей Первозванныйлы сӥзем черкез вӧсяло. Та нуналэ ик Вотка заводын Илья Пророк нимо черк лэсьтонэз йылаз-пумаз вуттӥзы. 17-тӥ июле Камбарка заводэ вуиз епископ Антоний, уно люкаськем калык азьын сӥё-дано вӧсяз вуж обрядъёсъя ужась Свято-Троицкой храмез. И. Зайцева, Удмурт Республикаысь кун ахивысь отделэн кивалтӥсь. "Кречет" сётэ пезьдэт Шоркарысьтымы Ялан ӝуась тыл дорын сӥё-дано ужрадъёс ортчылӥзы Вормон нуналлэсь азьвылгес ик. Татын присяга кутӥзы Россия Федерациысь Юстицияя министерстволэн Удмурт Республикая кыл кутэмез быдэсъянъя управленияз (управление исполнения наказаний) ужаны кутэмъёс. Табере соослы ужано луоз пытсэт сьӧры пуктэм адямиосын. Секыт удыс со. Та управлениын ик кылдытэмын "Кречет" спецназ. Отчы шедьыны капчи ӧвӧл. Быръё тазаоссэ но оскымонъёссэ пиосты гинэ. Соос быдэсъяло самой секыт но кышкыт ужез. "Кречет" пыриськиз Северо-Кавказ улосын ортчись пӧсь ожъёсы. Кышкасьтэм луэмзэс возьматэмзы понна Россия Федерациысь Президентлэн Указэзъя тямысэз пиос пусъемын кун наградаосын. Соос вуизы ӵапак Вормон нунал азьын. Суворовлэн медалез сётэмын старшой сержантлы Валерий Ашихминлы, младшой лейтенантлы Олег Большаковлы, прапорщиклы Анатолий Ляминлы, лейтенантлы Станислав Подшиваловлы, старшой сержантлы Ринат Фастахиевлы, лейтенантлы Алексей Чайниковлы. Капитан Павел Нелюбин пусъемын "За отличие в охране общественного порядка" медален, лейтенант Александр Шадрин - Жуковлэн медаленыз. Сӥё-дано ужрадэ ветлӥзы Кун Кенешын, Правительствоын, городлэн администрацияз ужасьёс, ожысь но ужысь ветеранъёс. Н. Байтеряков. В. Беломорских (фото). Йыбырттӥськом тыныд, солдат! Та тулыс нуналъёсы улмопу сяськаен ӵош асьме доры вуэ тужгес дуноез но сайкытэз праздник - Вормон нунал. Аръёс ортчо, нош асьме калыклэн батырлыко ожмаськемез но фронт мышкын уй-нуналэз валатэк тыршемез паймытэ но данъяськытэ. Тае пусйиз Кун Кенешлэн Тӧроез Александр Волков но, 9-тӥ Мае Ижысь Ялан ӝуась тыл дорын митингез усьтыку. Вазь ӵукна ик татчы уно калык люкаськиз: ожысь но ужысь ветеранъёс, Удмурт Правительствоысь министръёс, Кун Кенешлэн депутатъёсыз, Ижлэн администрациысьтыз адямиос, дано куноос. Чузъясько мугорез сӥсъясь, сюлэмез позыртӥсь ӝожмыт гуръёс. Укыр секытэн уго сётскиз вормон. Вераны луонтэм ыштонъёс адӟим. Миллионъёсын солдатъёс весяклы ож лудэ кылизы. Та секыт вакытэз тодаз вайыса, лэся, дыректэ куараез Борис Рогалевлэн, Удмуртиысь комсомол нимо 174 номеро артдивизионын ожмаськем солдатлэн. Быльырась синвузэ маялтэ Раиса Сонина, Ижысь 73-тӥ школаысь калык музейлэн кивалтӥсез. Ож тылӝуэз со ачиз шӧмъяз, эзелен-кулонэн артэ вамышъяз. Быремъёсты буре вайыса ялӥське минут ӵоже чус сылон. Тук! Тук! Тук! - радиорепродукторысь куара мертче сюлэме. Со тодэ вайытэ: улон азинске, со понна вирзэс кисьтӥзы агайёсмы, вынъёсмы, бубыосмы, песятайёсмы. Сайкыт нунал понна улонзэс сётӥзы уно нылкышноос но. Ваньзэс соосты тодэ вайыса, излэсь-гранитлэсь ӝутэм солдат - монументлэн пыд улаз азьвесьвуаськем ветеранъёс, ожын быремъёслэн пиналъёссы, таосызлэн нылпиоссы улэп сяськаос тыро. Дан тыныд, солдат! Музъемозь йыбырттӥськом сьӧд кыльлэсь утемед понна! *** Ӟеч сяме пыӵаз ини Вормон нуналэ Тупаса улонлы сӥзем эстафета ортчытыны. Ижысь шор карлудын (площадьын) парадэ султӥзы тужгес даноосыз спортсменъёс. Соос пӧлын Галина Кулакова, мӧйыос пӧлын дуннелэн рекордсменэз Борис Олеров, кузь сюресъёсы бызьылӥсь Анатолий Корепанов, спортысь ветеран Зоя Дедюхина. Ӵапак солы та сӥё-дано нуналэ Америкаысь Сиэтл городысь вуэм кубокез сётӥзы. Миым сентябре тупаса улонлы сӥзем калык куспо ӵошатсконъёсын 72 аресъем удмурт нылкышно 43 странаысь спортсменъёс пӧлын ас группаяз вормисе потӥз. Бадӟым вормонъёсын шумпоттӥзы туэ Анатолий Корепанов но Фарид Ганиев. 100 иськеме бызьылонын соос Россиын кужмоосыз луо. Али дуннелэн чемпионатаз Голландие мыныны дасясько. Вормонъёсты тренеръёс но дуро. Устоосыз - Леонид Вахрушев но Владислав Сулима та нуналысен Россиысь сӥё-дано тренеръёс луизы. Нош эстафетаез усьтӥзы мӧйы спортсменъёс. Гадязы льӧль-ӵыжыт лентаосын, ӝуась факелэн, тупаса улонэз данъяса, соос 2 иськем сюресэз котыртӥзы. Нырысетӥ группая бызьылӥсьёс пӧлын висъясько Удмурт кун университетысь спортсменъёс. Таӵе эстафетаын соос 36 пол вормылӥзы ни. Туэ но УдГУ-лэн нырысетӥ командаез мукетъёсызлы сузёнтэм вал. Кыкетӥ интые потӥз МВЕУ - ИжГТУ-осысь огазеям команда, куинетӥ луизы "Динамоысь" спортсменъёс. Шор ёзо дышетскон заведениос пӧлын вормизы монтажной техникумысь бызьылӥсьёс. Соослэсь кӧня ке кылизы 22 номеро промышленно-финансовой лицейын дышетскисьёс, куинетӥ интыын педколледжысь спортсменъёс. Покчиос пӧлын вормизы 45-тӥ школаысь бызьылӥсьёс. Кыкетӥ интые потӥз 31-тӥ школа, куинетӥ луизы 91-тӥ школаысь егитъёс. Г.ЮСАЕВ. Туспуктэмъёсыз В.Беломорскихлэн. Нокин вормытэк Футболэз яратӥсьёс чидатэк витизы "Газовиклэсь" Астраханьысь командаен пумиськонзэ. Ижъёс ньылетӥ интыын, нош куноос турнир таблицалэн берпуметӥ чуръёсаз интыяськемын вал. Вормонлы ик оскыса, уно калык люкаськиз стадионэ, ог 15 сюрс пала. Но "Газовик" праздник нуналэ "висисьёссэ" ӧз шумпотты. Футболистъёсмы котькудӥз гозызэ ас палаз кыскыны тыршиз, тупез кема возьылӥз. Шудонлэн кутсконаз ик лыдэз усьтыны усто луонлык вал. Туп капкае ӧз пыры. Кӧня ке улыса, со пыриз асьмелэназ. Мар быгатӥзы на "газовикъёс" - со одӥг гол пыртон. Бездыт шудэменыз дораз "Газовик" 2 очкозэ ыштӥз. Ӵуказе асьме команда пумиське Саратовысь "Соколэн". М.Кузьмин. Образование - техническое, обучение - развивающее... Асановский совхоз-техникум целый век и одну пятилетку выпускает специалистов сельского хозяйства, без труда которых невозможно первое ощущение счастья - быть сытым. В настоящее время здесь готовят агрономов, зоотехников, механиков для сельского хозяйства и авторемонтников со средним специальным образованием. Отрадно отметить: руководство и коллектив Асановского совхоза- техникума сумели пережить экономический кризис, сохранив при этом учебную и производственную материально-техническую базу. Наш менеджер по рекламе недавно встретился с директором учебного заведения и хозяйства Сергеем Петровичем ЦЫПЛЕНКОВЫМ и попросил рассказать об опыте работы и планах на будущее. - Сергей Петрович, у вас отличный музей. Среди фотографий лучших людей совхоза- техникума и ваши родители. Скажите, в вашей биографии есть некая преемственность и наследственность? - Интересный вопрос. Да, очевидно, это так. Мои родители на пенсии, оба орденоносцы, отец всю жизнь работал механизатором, мать - дояркой. Они для меня были примером в жизни. Но в выборе профессии советов не давали, однако и не мешали. Я - выпускник данного совхоза-техникума, как и моя супруга. Затем закончил экономический факультет Ижевской сельхозакадемии, еще дважды получал высшее образование. С супругой воспитываем троих детей. Я родился не здесь. Но мои родители меня привезли сюда в годовалом возрасте, так что у меня больше нет другой родины. - Что значит совхоз-техникум? И совхоз, и техникум? - Во-первых, о названии. Совхоз - советское хозяйство? Вроде так, но мы теперь его расшифровываем иначе: совместное хозяйство. Так что и при демократии оставили прежнее название. Такого сочетания, как наше, нигде нет. Ведь совхоз и техникум - это единое хозяйство, хотя первое подразделение - производственное, второе - учебное. Один руководитель, одна администрация. Мы твердо убеждены: именно такое сочетание создает наиболее благоприятные условия для подготовки лучших специалистов для сельского хозяйства. Бывший Асановский зоотехнический техникум преобразован в совхоз-техникум в 1964 году. И очень удачно. Учебно-производственная база имеет 1269 гектаров пашни, высокомеханизированный зерноток, машинно-тракторный парк, мастерские, гаражи, лаборатории. Развитое животноводство: крупного рогатого скота в пределах 550 голов, свиней - 1060, лошадей - 25, пчелосемей около 30. Производство тесно связано с учебным процессом. Самым ценным является то, что практическое обучение организовано в условиях производительного труда. Доля студентов в производимой продукции в животноводстве составляет 15 процентов, в растениеводстве - до 28. В студенческом тракторном отряде некогда было 30 тракторов. Теперь осталась половина. Они практически списаны, но на ходу и к нынешнему севу готовы. На такой технике студенты еще вырабатывают более 3,5 тыс.эталонных гектаров, что составляет почти пятую часть объёма механизированных работ. В результате комплексной механизации и последовательной интенсификации производства совхоз-техникум занимает одно из передовых позиций. К нам часто ездят иностранцы. Были американцы, голландцы, югославы. Желая помочь нам, гости как-то предложили создать некий производственно-учебный конлонерат, именно какой мы имеем уже добрых четыре десятилетия. - Сергей Петрович, каковы ваши учебно-воспитательные успехи? - О результатах могу сказать по совхозной работе. Многие наши трактористы закончили совхоз-техникум, поэтому им не надо напоминать о качественной работе. Такие кадры очень ценны, они в одном лице: сами механики, агрономы, механизаторы. Но главнее всего - каждый в какой-то мере хозяин этой общественной земли. Именно это самое отрадное. Здесь наша сила, которая дала нам возможность благополучно выжить в кризисные годы. Кризис можно было преодолеть только всем миром, только комплексно решая все проблемы. Мы имели здоровый коллектив преподавателей, студентов и рабочих. Комплексный подход в решении крупных задач ощущается уже в наших детях. Детсад, средняя школа, музыкальная школа, конноспортивная секция, кружки во дворце - все это звенья одной цепи. - Вернемся снова к производству. - Занимаясь подготовкой кадров среднего звена, мы всегда были в передовиках. Наше полеводство имеет семенное направление. С научной точки зрения смотрим и на животноводство. Зачем же содержать коров, дающих в сутки по 5 килограммов молока, если одна может дать 15-16 килограммов? Недавно мы закупили группу черно-бело- пестрых коров из Пермской области. Недешево, отдали 25 рублей за 1 килограмм живого веса. Не каемся, рады, что будет отдача. Во многих хозяйствах жалуются, то трактора стали дорогими, вся техника пришла в негодность. Все верно. "Беларусь" теперь стоит 300 тысяч рублей. Так вот я требую у механизаторов увеличения моторесурсов, чтобы служила техника гораздо дольше. И служит, поскольку каждый механизатор хорошо понимает, насколько он ответственен за доверенный ему трактор или сельхозинвентарь. - Сергей Петрович, расскажите, пожалуйста, о перспективах на будущее. - Строить бы надо, но, конечно, на новое строительство нужны большие капиталовложения. Было нелегко, но ввели новый коровник на 230 голов. Ветшают имеющиеся здания и сооружения. Вот и решаем, которую дыру надо быстрее залатать. В январе с "Агроводом" заключили договор на 700 тыс.руб. на строительство нового водопровода. Нынче реконструируем зерносушильный комплекс. В 80-е годы мы получали 1,5 млн.руб. на социальные нужды, теперь никто ничего не дает. В прошлом году значительное количество собственных средств было использовано на ремонт. Сейчас в частном секторе 30 недостроенных домов, им необходима помощь. В ближайшие годы планируем увеличить прием студентов до 1000, а это требует построения нового общежития. Недавно украли совершенно новый трактор из д.Удмурт Гондырево. Чтобы такого не случилось, планируем отгородить машинно-тракторный парк - и на это нужны средства. Наша кормилица - матушка-земля. А ее в совхозе-техникуме маловато. Рядом деревня Чумали, входящая в колхоз "Кама". Землицы у них 700 гектаров, 60 из них в прошлом году вовсе не обработали. Чумалийцы просятся к нам. Найдем общий язык - есть возможность посевные площади расширить и обеспечить работой соседей. Без забот не живем. У нас проводились семинары российского значения, готовимся и сейчас, имеем компьютерный класс. Твердо убеждены: мы - на правильном пути. Молоко - наша выручалочка Животноводство у нас является ведущей отраслью. На сегодня поголовье крупного рогатого скота - 570 голов, из них дойных коров - 224. К концу года планируем увеличить их на десять голов. С точки зрения экономики, молоко сегодня является нашей выручалочкой, а оно у коров на языке. Поэтому большое значение уделяется заготовке кормов. У нас почти всю зиму в рационе у животных клеверный и зерносенаж, белково-витаминно-минеральные добавки, полисоли. Второй месяц стали добавлять сахарный песок дойным коровам - для создания микрофлоры, чтобы полнее переварить и усвоить корм в организме животных. Правильное и полноценное кормление, содержание, уход и селекционная работа - все это дало нам возможность надоить в прошлом году на одну фуражную корову 4 тысячи 324 килограмма молока, что на 544 кг больше уровня позапрошлого года. В дружном молодом коллективе доярок сегодня работает 9 человек. Каждая доярка ухаживает за 26-30 животными. Четырехтысячный рубеж перешагнули О.М.Христофорова, Д.Н.Апышева, А.В.Смердова, М.Н.Шакина, Л.Н.Курсова, Н.Е.Алексеева, Т.С.Федоровских. Надои сейчас хорошие, так в начале апреля от каждой коровы в среднем надоили 16 килограммов в день. В хозяйстве имеются две учебные группы, где инструкторами являются М.Н.Шакина и А.В.Смердова. С ними вместе студенты приобретают навыки машинного доения и ухода за животными. Большую работу с животными проводит зоотехник-селекционер Л.Н.Прокопьева, конкретно занимаясь отбором и выбраковкой. Неплохие показатели получаются на откорме молодняка в учебной группе. Телята до 7 месяцев прибавляют в сутки более 730 граммов. Большие планы в свиноводстве. Есть задумки переделать учебную свинолабораторию под лабораторию искусственного осеменения свиней с тем, чтобы студенты получали и эту специальность. В 1999 году получено 16 голов поросят от одной основной свиноматки. Имеем желание увеличить поголовье свиней. Нам помогают рабочие кормозавода под руководством технолога Н.М.Смердовой. В настоящее время они производят гранулы для крупного рогатого скота, гидропонную зелень для поросят, заменитель цельного молока, дрожжи для коров. Здесь студенты проходят практику в течение всего года. Коллектив у нас очень работоспособный. Думаю, что достигнутое еще не предел. Есть силы и возможности на большее. С этой целью мы стараемся создать условия не только для работы, но и для отдыха. Отремонтированы бытовая комната, душ, летом планируем сделать бытовую комнату для свиноводов. Мы выдаем и тринадцатую зарплату. Н.СОКОЛОВА, главный зоотехник. Павел Старков Уг вуно, уг бездо... Алнаш ёросысь Азамат гуртын Старковъёслэн семьязы бадӟым но данъяськымон вал. Ог-огенызы ноку ик ӧз керетылэ. Ю-нянь будэтӥзы, пудо утизы-вордӥзы. Тодӥзы: ӟеч улон тыршон бордысь потэ. Ӵапак со усто улон сярысь малпанъёсты ож сураз-пожаз. Старковъёслэн семьяысьтызы куинь агай-вынъёс фронтэ кошкизы. Пӧртэм интыосын ожмаськизы, шуг-секытъёслэсь ӧз пегалэ, мукетъёс сьӧры ӧз ватскылэ. Шудзы сыӵе вылэм, дыр: Павел но, Филипп но, Алексей но таза, улэп берытскизы. Пӧлысьтызы одӥгез сярысь гинэ рос-просгес мадём. Павел Старков 1016-тӥ зенитно-артиллерийской дивизиосын орудилэн командирезлэн воштӥсез вал. Курск дорын ожъёслэсь шӧгзэ-кузьытсэ но шӧмъяз, Днепр шурез выжонэ но пыриськиз, Николаев, Запорожье, Одесса городъёсты мозмытӥз. Яссо-Кишинёвской операцие пыриськиз. Эшъёсыныз ӵош Висла но Одер шуръёсты выжиз. Э-э, вераны гинэ капчи, выжиз шуиськом. Вормонлы матэктытӥсь иськемъёс вирен орсмемын, эъёстэ пыраклы ыштонэн герӟаьскемын вал ук. Солдат кышканэз ӧз тодылы, солэн подвигъёсыз Отечественной войналэн ИИ степенё орденэныз, Горд Кизили орденэн но "За боевые заслуги" медален пусъемын. Вормыса дораз бертэм мурт Ижевске ужаны интыяськиз. Нырысь-валысь машина поттон заводын тыршиз. Нош бӧрысь ни пенсие потытозяз "Ижсталь" огазеяськонын ужаз. Валтӥсь механиклэн отделаз старшой инженер вал, бератаз - 47 номеро отделысь старшой инженер-метролог - лыдъян, чотан, мертан аппаратъёсты лулъясь но чаклась. Туннэ но ми печатласькомы ветеранлэсь П. С. Старковлэсь ож сюресъёсыз сярысь тодэ ваёнъёссэ. Малпаськом, ожмаськонын кыдам мурт ачиз ик со сярысь оскымонгес но син азе пуктымонгес, яркытгес мадьыны быгатоз. Солдат ӝук Солдат шинелен ветлон нуналъёсы кутскизы 50-тӥ мотомеханизированной бригадаын. Зенитчик каризы, 1942-тӥ арлэн кутсконаз бригадамес Москвалы матэ вуттӥзы но ӟеч-ӟеч интыяськыны косӥзы. Косэмын - лэсьтэмын. Землянкаос но траншеяос, пушкаосмес но машинаосмес ватыны гуос гудӥм. Табеер сиён сярысь малпаськоно. Артысь гуртысь туж бадӟым пуртыос вуттӥзы. Солдатъёс пӧлын гур пуктӥсьёс но сюризы. Час но ӧз ортчы - гур но, пичияк тылыс нерге но инъямын вал. Кухня дась. Милемлы пӧраз Андрей нимо пияш. Дӥсьтӥсьтэм, кепырась мурт, вераськыны но сокем ӧз яратылы кадь. Ӵапак соингес но егит пиез пӧрасе интыяллям, дыр. Зенитка доры пуктӥд ке, пайдаез уз луы, малпазы, вылды. Нош одӥгаз чебер нуналэ Андреймы гуртэ кошкиз. Юэм, куашетыны кутскем. Сыӵе лачмыт пилэн сямыз пота вылэм. Сое ӝегатӥллям но комендатурае пытсаллям. Озьы тӥни ми повартэк кылим.Батареялэн командирез мон сярысь тодаз ваем, дораз ӧтиз. Тон, пе, гуртын будэмын, соин ик котькыӵе ужез бергатыны пӧрмытод. Мон пумитаз вазисько: - Кыӵе пӧрась? Кышномуртъёс сиён дасяло вал. вылаз ик, сыӵе трос адямиез сюдоно. Уз, номыр уз пӧрмы. Нош командир уг сётскы: Дежурнойёсыд луозы. Пу но дасялозы, ву но ворттозы. Ву быректӥз ке, тонэ сайкатозы. Кухняе кузё сямен мынод, сылал но мар тырод но сиён дась. Нуналаз кык пол гинэ пӧралод. Та кылъёс беер командирен соглаш кариськытэк ӧйлась. А то гажамысь дугдоз, самой секыт ужъёсы ысъялоз но кытчы вуэмдэ валатэк кылёд. Командир ке но, со монэ сюлворе ук. Чурытак косыны но быгатысал, малы ке озьы уг лэсьты. Выль уж борды кутски. Солдатъёслы тушёнкаен шыд, ӝук но чай дасяны малпай. Уж ӧръяськиз. Шыдэ синмаськымон пӧрмиз. Чиньыдэ ньылод. Нош ӝук пӧранэн юмоке вуи. Пӧзьтӥсько, пӧзьтӥсько - ӝуке кизергес на. Кытчы пырод, кеньыр ватсасько, сурасько, выльысь пӧзьтӥсько. Ялан кизер. Эшшо кеньыр кисьтӥсько. Номыр уг юртты. Мешокысь вань кеньырез пуртые кисьтытэк ӧйлась. Ӝуке кольтыртэ, бультыртэ - напчыны уг ик малпа. Тӥн со куспын ӝуке пуртыысь уртчыны кутскиз. Ӝук йылэ но йылэ, пуртыын инты солы уг окмы ни. Оглюкетсэ висъятэк ӧйлась. Мар бен, сиён дась. Меӵак верасько: ӝукме но шыдме солдатъёс туж ушъязы. Зумыто но, ческыт но пӧрме, пе. Зэмзэ но, Андрейлэн пӧрамъёсыныз ӵошатыса, мынам сиён-юонэ трослы ӟечгес вал. Бӧрысь ни тодмо луиз: кеньырез, тушёнкаез, сылалэз но трос мукетсэ Андрей аракыен вошъя вылэм. Монэ воштэмзы ӧз пот ни. Солдат улонэлэн нырысь укмыс толэзьёсаз мон поварын ужай. Днепр дурын Нырысьсэ ожъёсы пыриським Сталинград дорын. Та улослэн войскоосыз сётскем беер ни зенитно-артиллерийской полкын отчы вуиз. Милемлы но пӧсь йӧтӥз. Нырысетӥ ыштонъёсмы но отын вал. Ми пыриськимы Морозовка, Суравикино, Лисичанск станциосты мозмытонэ. бератаз но туж трос ожъёс вал. Запорожье городэз мозмытэм бере полкмы ДнепроГЭС доры вуиз. Днепр шурлэн одӥг ярдураз ми, нош мукетаз - немецъёс. Та бадӟым шурез выжон дыръя ми адӟим тушмонлэсь выль пыӵал тӥрлыксэ. Фрицъёс уже кутӥзы термической ракетаосын орудиоссэс. Ми соосты "Геббелы" шуыса нимамы. Вань улэпсэ, будӥсьсэ сутылӥзы, пазьгылӥзы со снарядъёс. Ӵапак со ракетаосын йырин кыкетӥ батареямы быдэсак быриз. Я, кызьы но озьы солдатъёсмы мукет ярдуре выжыны быгатӥзы. Сапёръёс соку ик понтонъёслэсь выж инъяны кутскизы. Хортица шормуӵ дорын войскоосмы выж вамен пото. Танкъёс, артиллерия, пехота. Нуназе котырын милемлы но черод вуиз. Днепрлэн шорозяз вуим гинэ - инбамын фашист самолётъёс адскизы. Бомбаос куяло, шимес вузо. Ньыльысьтыз ик зениткаосысьтымы пырак выж вылысен шоразы ыбылӥськом. Кытӥ ке ӧвӧл одӥгез самолёт гомӟиз но ӵындыса уллань кошкиз. Мукет лётчикъёс куалектӥзы кадь. Бомбаоссэс кытчы сюрем куязы но кошкизы. Выж утемын вал. Бырон нёжал Полкмв ялан азьлань вамышъяз - отчы, кытын самой шимес но секыт ожъёс мынӥзы. Северный Донец шур сьӧрын Голая Долина нимо гурт вӧзысь ӟег бусые интыяським. Войскоосмы вазь ӵукна наступление выжизы. Нош ми, зенитчикъёс, тушмон самолётъёсын ожмаським. Малы ке та ож нокызьы но йырысь уг кошкы. Сокем трос быдтэм немецъёсты адӟылэм ӧй вал угось. Котькытын ик лошъяськизы шӧйёс, шӧйёс... Нош Голая Долина гуртэ пырем бере, мугор ик юзыр-кезьыр луиз. Быдэсак гурт сутэмын вал - корка бервылъёсысь адӟисько сураськем гуръёс. Боецъёсмы та гуртэз ас сяменызы нимазы, бырон нёжал шуизы. Нош скал кытын? Ми сылӥмы Украиналэн Потльшаен кунгожез вылын. Рава-Русская город дорын часьтмес дасязы Германиын ожмаськонъёслы. Одӥгаз ӝытэ батареямы доры скал вуиз. Уй пеймыт вал, котырысь номыре адӟыны уг луы. Часовоймы ӵаштыртэмез кылэм но соку ик черектэм: "Сыл! Кин лыктэ?" Чалмыт. Нокин уг вазь. Огшап ортчыса, мукет интыысь ӵаштыртэм кылӥське ни. Уставын кызьы косэмын, часовоймы озьы ик лэсьтэм, ыбылыны кутскем... скалэз вием. Мазэ-созэ валатскемзы бере расчётысьтымы боецъёс скалэз партчазы, кылем-мылемзэ музъеме согизы. Ӵуказеяз ӵукна скаллэн пытьыез кузя дорамы вуиз солэн кузёез, поляк. Лыктӥз, ваньзэ валаз, лэся, номыр вазьылытэк, особой отделэ кошкиз. Особистъёс пуныосын вуизы. Валамон, соос ваньзэ шедьтӥзы, шараязы. Батареямес люказы. Та уже пыриськем вань солдатъёсыз стройысь поттӥзы. Ваньзэс ик штрафной ротае келязы. Скал сӥль но сиыны ӧйлась. Улэп кыли Ми Польшаын. Тракт кузя мынӥськом, шуак команда чузъяське: "Пушкаосты ожлы!" Озьыен, заряжающийёс но наводчикъёс пушка доры кылё, нош мукетъёсыз винтовкаоссэс куто но котырак пазьгисько. Взводлэн командиренызы Вайнштейн старшой лейтенантэн артэ лымы вылэ выдӥм. Котырак нюлэс, номыр ик йӧназ уг адӟиськы. Кытын ке кыдёкын пулемётэн но автоматэн ыбылжм кылӥське. "Ура!" шуыса черекъям куара но нюлэс кузя шуккиськыса кошке кадь. Азьпаламы пехота ожмаське, лэся, малпасько поннам. Со вие дорамы управление взводлэн командирез Бойченко вуиз. Тамак аратӥз но шуэ: "Ярам, мон асьмелэнъёс доры шонто". Тӥни соку гинэ немецъёсты адӟим. Ми ӝоггес пушкаосмы доры бызим. Ньыльыстыз ик орудиосысь тушмон шоры ыбылӥськом. Шуак млям пушкамы гуньдӥз. Мар луиз? Мугзэ утчаны кутским. Немецъёс чылкак матэ вуизы но гранатаос зӥръяны ӧдъязы. Взводлэн командирез Вайнштейн но, орудилэн командирез Сергеев но, снаряд Шишкин но, кыкетӥ наводчик Вихляев но сӧсырмизы. Мон гинэ ыбылӥ на. Тушмонэз мырдэм но кызьы улляны быгатӥм. Ож бере ни учкисько: шинеле пуляосын оло нош кӧняетӥ пасяськылэмын. Инмарлы тау: таяз учыре но улэп кыли. Одер шур сьӧрын шуге-леке вуэмме но уг вунэтӥськы. Огневой позицимы нюлэс дуре интыяськемын. Тушмон самолётъёслэн куараоссы кылӥськизы. Ми соосты соку ик тодмаллямы. Ыбылыны кутским. Я, одӥгез гомӟиз, кытын ке палэнын пуштэмез кылӥськиз. Нош мукетъёсыз ялан бергало, бомбаоссэс жалятэк куяло. Матын гинэ пуштэм бомбалэн чалепез гадям шуккиськиз. Гимнастёрка кисыме пасяз. Нош отын портсигаре но документъёсы вал. Гадям кор чалеплэсь шуккиськемзэ но, солэсь пыд азям усемзэ но шӧдӥ, адӟи. Самолётъёс кошкем бере котырак эшъёсы люкаськизы. Учкиськом: портсигаретлэн в вылкыскетэз но, кӧня ке документъёсы но пасяськемын. Эшъёсы шуизы: "Портсигарет ӧй луысал ке, сояз дуннее вуысалыд". Бреслад городын ни Вормон нуналэз пумитай. Берпум пулямы бырытозь, ми шумпотыса омыре ыбылӥм. Ваньзэ чидамы, вормимы! Кызьы, пе, со окты-калты пуляосты жалялод на. Та дуннеын ноку ик ыбылӥськон, жугиськон медам пуромылы ни вылэм. Ӧвӧл ук, тупаса но огкылысь улыны ялан ӧм дыше. Туспуктэмъёс вылын: 1. Ожысь но ужысь ветеран Павел Сидорович Старков. 2. Старковлэн красноармеец книжкаез. БУСКЕЛЬЁСМЫ ДОРЫН Билык но Галимуллин огазеяло удмуртъёсты Набережные Челны - Татарстанысь одӥгез бадӟымез но чеберез город. 70-тӥ аръёсы со ӝог будӥз автомобиль поттон завод пуктэмен валче. Нош кытын выль лэсьтӥськон, отчы калык но пӧртэм интыосысь вуэ. Кин кыӵе муген: кудӥзлы уж кулэ, кудӥзлы - улон инты... Самой со лэсьтӥськон аръёсы ик та городэ котькыӵе сэрегъёсысь пӧртэм выжыосысь калыкъёс люкаськизы. Удмуртъёс, поръёс, чувашъёс, башкиръёс... Ваньмызлы сямен ужан интыос но квартираос шедизы. Ул но шумпоты гинэ! Но вань на ай котькуд адями пушкын ас калыкедлэсь мӧзмон. Тӥни со ик городысь удмуртъёсты ог-огенызы огазеяськытэ. Соос кылдытӥзы удмурт община. Гродысь кивалтӥсьёс пумиськылыны нимысьтыз инты висъязы. Нырысетӥосыз сюлмаськись но бызьылӥсь адямиос пӧлын вал Людмила Федоровна но Геннадий Евсеевич Пешковъёс, Лидия Семеновна Феофанова, Василиса Семеновна Карпова но мукетъёсыз. Бадӟымъёс понна кылдытӥзы кырӟанъя удмурт ансамбль, нош покчиослы усьтӥзы арня нуналэ ужась школа. Озьы кылдӥз удмуртлыкез одӥг тугокое бичась ӧр - "Ӟардон". Али ни, вить ар ортчыса, ансамбле ветло кызьлэсь ятыр мылкыд карисьёс. Арнялы кык пол соос люкасько сюлэмъёссэс кырӟан пыр усьтыны. Котькудӥныз тодматскыса, нимысьтыз статья гожтыны луысал, дыр. Ваньзы соос кырӟанэз лулынызы гажасесь но удмуртлык понна сюлмынызы висисесь. Тани Тамара Пчельникова. Чебер куараё кышномурт, бухгалтер. Городэ вуэмын Алнаш районысь Юмья гуртысь. Вис карытэк ветлэ репетициосы. Азьло быдэс семьяеныз вуылэ вал. Али пиналъёсыз бадӟымесь ни. Кытысь ке выль удмурт кырӟан шедьтэ но ансамблязы вуттэ. Шумпотымон татын соиз но: ӝыныез пала ансамбльын кырӟасьёс - пиосмуртъёс. Огез соос пӧлысь - Энвер Милидинов - ансамбле кемалась ветлэ ни. Нош нырысьсэ удмурт кырӟасьёсты сабантуйысен адӟиз. Собере кырӟась мылкыдыз ачиз сюрес шедьтытӥз ни. Пермь улосысь Гондыр гуртын будэмын. Отын но котьку кырӟанэн улӥз. - Тон кошкид но, гуртамы кырӟась но ӧвӧл ни, - али но мӧзмыт лулӟылэ анаез. Энвер вуиз кырӟан доры ик - таяз учыре "Ӟардонэ". - Арняяз кык пол ветлыны кызьы мылкыдды тырме? - юасько солэсь. - Жадьыса бертӥськоды, дыр, ук. Со пальпотэ гинэ: - Мон понна репетиция - шутэтскон. Лыктӥськод, кырӟаськод - вань уродэз вунэ. Улыны капчигес потэ. Валерий Хасанов "Ӟардон" сярысь поръёслэсь кылэм: отчы, пе, арганчи кулэ. Озьы Валерий Закирович мыло-кыдо кырӟаны ветлэ. Тӥни озьы, ог-огзылэсь кылыса, концертъёссэс учкыса шедьтӥзы ог-огзэс удмурт кырӟанэз яратӥсьёс. Секытгес вал арганчиен. Шедьтэмъёсыз пӧртэм мугъёсъя кошкылӥзы, нош ансамбль возиськиз. Али ансамбльлэн баянистэз - бигер пи Михаил Григорьевич Галимуллин. Но солэн сюлэмыз удмурт гурез умой тодэ. Кызьы сотэк? Ачиз Глазовын кема улӥз, кышноез - удмурт. Тросэзлэн татчы велӥсьёслэн пиналъёссы ветло арня нуналэ ужась школае. Удмурт кылэз дышето, удмурт калыклэн культураеныз но историеныз тодматско. Урокъёссы вискын удмурт шудонъёсын выро. Пичи концерт дасяса, одӥгаз нылпи садэ но потазы ни. Дышетӥсьсы Светлана Николаевна Сидорова ачиз но удмурт кылэз пиналъёсын ӵош дышетэ. - Ма карод, - чабкиське со, - мон городын будӥ, гуртамы бертылыкум гинэ удмурт кылэз кылылӥ. Нош татчы дышетӥсь ӧз шедьтэ но - басьтӥськоно кариськи. Ваньзэ тае - удмуртъёсты но, удмурт ужрадъёсты но - валаса но быгатыса сюлмысь радъя Валентина Михайловна Билык. Солэн сюлмаськеменыз ик вераськон ӝутӥськиз "Ӟардон" ансамбльлы калык ним сётон сярысь. Радъязы тунсыко удмурт суредасьёслэсь Петр Ильич Фадеевлэсь но Мария Ивновна Фадеевалэсь адӟытонзэс. Вордӥськемын но будэмын соос Елабуга ёросысь Тэремшур гуртын. Суредъёсазы - туала улон сярысь малпаськон но, дуннелэн чеберезлы паймон но, адямилэн пуш сюлэмызлы синмаськон но. - Мынам малпанэ вань "Волга котырысь чебер дыды" серия кылдытон сярысь, - шуэ Мария Ивановна. - Тани суредай ни удмурт чебераез, булгарка кышноез. Петр Ильич дуннеез шӧдонзэ авангард амалэн возьматэ, шунытсэ но кезьытсэ, тӧдьызэ но сьӧдзэ ваче шуккыса пӧрмытъя паймымон малпаськытӥсь суредъёс. Культураысь гинэ ӧвӧл, мукет удысъёсысь но адямиосты удмурт общиналэн ужаз кыске Валентина Михайловна. Врачъёс но дышетӥсьёс, бухгалтеръёс но мукетъёсыз пӧртэм сямен юртто соослы. Кылсярысь, Николай Мартынович Выгодчиков - 5-тӥ больницаын валтӥсь врачлэн воштӥсез. Ас вылаз эскериз ни эмъяськонлэсь куд-ог амалъёссэ. Тодон-валанзэ мадьыны ветлӥз удмурт общинае. Ужамзэс но быгатэмзэс возьматон вылысь радъямын вал таиз ужрад: "Ӟардон" ансамбльлэн концертэз, суредъёсын адӟытон. Ортчиз со калык эшъяськонъя "Ошмес" нимо юртын. Таиз юрт алигес усьтэмын: пӧртэм калыкъёсты оагезян понна. Самой татын - поръёс но чувашъёс, еврейёс но ӟучъёс, удмуртъёс но башкиръёс пичи ошмесъёсысь кадь одӥг шуре люкасько. Пӧртэм общинаослэн кивалтӥсьёссы ог-огзылэн малпанъёсынызы тодматско, ог-огзэс пӧртэм ужрадъёсы ӝуткало. Концерт бере куноос шуизы: - "Ӟардон" ансамбль пыр удмуртъёслы синмаським. - Кыӵе сабырлыесь, шунытэсь, ужез яратӥсесь тӥ. - Нош кыӵе кырӟаськоды: кылъёсты валатэк но сюлэм шуна, лӧптэ, небыт тулкым мугорез басылатэ. Таӵе кырӟанъёс бере вань уродэз вунэ. Городысь культурая учреждениысь лыктэм специалистъёс "Ӟардон" ансамбльлэсь концертсэ вылӥ дунъязы: - Шекъёс ик ӧвӧл, жильыртӥсь шур кадь кылӥське кырӟамзы. Малпаськом, Валентина Михайловналэн но, мукетъёслэн но ужамзы вылӥ дунъямын луоз. Нош ми, Удмуртиысь празднике ветлэм журналистъёс, бадӟым тау кариськом удмурт общиналы. Удмурт кырӟанъёсмес, эктонъёсмес мукетъёслэн сюлэмазы вуттыны, вырӟытыны быгатэм понна. Оскиськом, арня нуналэ ужась школае ветлӥсь п иналъёс но та уждэс азинтозы. Азинлык тӥледлы но ӟеч сюрес! Л.БАДРЕТДИНОВА. Берпум пумиськонэз тодэ вайыса "Адями кошкоз - ужез кылёз" - удмуртъёслэн тазьы верамзы тодэ лыктэ Вячеслав Леонтьевич Корепановлэн кулэмез бере 40 нунал тырмон азьын. Кызьы-о бен озьытэк. Газет поттон удысын гинэ ӧвӧл, ветеран организациослэн ужазы но со шӧдскымон пытьы кельтӥз. Пенсие потэмез бере уго ӟырдыт сюлэмо адями мылысь-кыдысь пыриськиз вал егитъёслы патриот мылкыдэз пыӵатон удысэ. Солэсь, война дыръя тужгес секытэз адӟем фронтовиклэсь, ӵектонъёссэ сак кылзылӥзы Глазысь, Балезиноысь нылъёс но пиос, со уго ӵемысь вераськылӥз отысь школаосын, музейёсын. Нош кыӵе бадӟым юрттэт сётӥз Вячеслав Леонтьевич элькунысьтымы Ожысь ветеранъёслэн комитетсылы. Конференциосы, семинаръёсы пыриськылӥз, ветеран организациослэн ужан амалъёссы сярысь муресь материалъёсты "Долг" газетамы печатлаз. Арлы быдэ потылӥсь "Удмуртиысь ветеранъёс" книгае но гожъяз. Берлогес потэмаз печатламын вал Балезиноысь но Карсовайысь мӧйыослы сӥзем зарисовкаез. Со вал март толэзе. Ижысь ожысь ветеранъёслэн госпиталязы "Вуоно арняе враче монэ городэ потаны лэзёз". Зэм ик, шутэтскон нуналэ эше дорам вуиз. Семьяенымы ик нырысь шумпотӥмы вал, бурме ни, малпамы. Ӧжыт кенешеммы бере валамы, секыт висемзэ возьматэмез уг поты шуыса. Азьвыл сямен ик тупен-тупен вераськыны тыршиз ке но. Дырын-дырын пальпотылӥз но. Озьы ке но, эшмылэн воштӥськемез адӟиськиз. Госпитальын сётэм бодызэ но нырысьсэ адӟимы. Нош азьпалан улон сярысь вераськон поттэмез бере ӧжыт паймимы но. Балезиное берытскемез бере малпа вал на кӧня ке муресь материалъёс гожтыны. "Долг" газетэ, пе, Волгоградысь Удмуртской ульча сярысь тодэ ваёнъёсме дасяло Быдӟым Вормонлы 55 ар тырмон азьын. "Удмурт дунне" фротовикъёслы сӥзьыса гожтонэз сярысь поттылӥз. Собере, пе, Ижысь "Металлург" санаторие шутэтскыны мыно. - Ас кужымезлы оске бере, со туж умой ини, - малпай мон соку. Малпанэ янгыш вылэм. Апрельлэн нырысь нуналъёсаз Вячеслав Леонтьевич улонысь кошкиз. Тодэ лыктэ, ульчаысен сое госпитале келякум, берпум верам кылъёсыз. "Иже вуисько ке, уг чидаськы ӵош кема ужам эшъёсы доры вуытэк. Ӵуказе "Удмурт дуннее" ветло. Ӧжыт ке но верасько Алексей Петровичен, Иван Ивановичен, Геннадий Васильевичен... Соослэн дырзы но ӧвӧл, дыр, праздникъёслы дасяськыку. Газетэ нуыны дасям "Мар война та" ӟуч кылын гожтэм тодэ-ваёнъёссэ кисыысьтыз поттыса ик возьматӥз. Гожтэмзэ удмурт кылэ берыктыны кужмыз уз ни тырмы шуыса, пырак вераз. Малпаны но уг луы вал, тодмо журналистэн, ожысь но ужысь ветеранэн та пумиськонэ берпуметӥез луоз шуыса. Вячеслав Леонтьевич Корепановлэн котьку ӝутскем мылкыдо сайкыт тусбуез уз кысы сюлэмысь. В. Никитин, элькунысь Ожысь ветеранъёслэн комитетсылэн тӧроезлэн воштӥсез. Писательлэн сюлэм югытэз Улонын озьы но луэ. Кутске, шуом, адями газетъёсы гожъяны, со гожъямъёс пумен тросгес но бадӟымгес луо. Гожъямъёссэ бугыръяса-сэстыса, адями повесть но, роман но пӧра. Писатель кылдэ. Сое ушъяло, данъяло. Дыр ортче но, сое вань книгаосыныз валче вунэто. Гожъямъёсыз куддыръя лыдӟымонэсь ик но - улонын солэн сюлмаськонъёсыз даурзэс ортчытӥллям ини, улонмы соосыз ортчем, бере кельтэм. Мукетыз писатель нош гожъя, книгаос но поттылэ. Соос лыдӟись син шоры малы ке ас дыразы уггес йӧтыло. Дыр ортчемъя, нош соос ик паймыто выль вакытлы туж тупаменызы. Лыдӟиськод но малпаськод: тани ведь писатель ку валам ини адямиосыз, соослэсь кусыпъёссэс, соосты асьмелы валэктыны тыршем. Асьмеос нош сое малы ке валаськымтэмы, соку сюлмынымы шӧдӥськымтэмы... Тани мон выльысь кутскыса лыдӟисько Евгений Самсоновлэсь гожъямъёссэ. Лыдӟисько но малпасько: визьмо писатель, адямиез но историез сюлмыныз валась писатель вылэм со. Тросэз тодмо адямиосмы сямен, Евгений Васильевич но вордӥськиз Удмурт Республикамылэсь палэнынгес, лымшор палангес - Татарстанысь Бавлы районысь Урсыгуртын (ӟуч нимыз - Покровское-Урустамак). Соин одӥг гуртысь кылтодонниысь профессор И.В.Тараканов, со удысысь ик В.И.Алатырев, со гуртлэсь кыдёкын ик ӧвӧл Михаил Петровлэн но Александр но Николай Белоноговъёслэн гуртсы, кыкезлэн Михаил Можгинъёслэн, Владимир Романовлэн вордӥськем интыоссы. Удмурт культурамылы трос ӟеч адямиосты сётӥз со музъем. Со музъем вылын 1925-тӥ арын 17-тӥ апреле-оштолэзе югыт дунне вылэ вордӥськиз Евгений Самсонов. Ас вакытэзлэн секытъёсыз, оло нош огез но палэнтӥз ӧз ортче. Школаын дышетскыкуз кутскиз секытлэсь секыт война. 1942-тӥ арын школаын Евгений дышетсконзэ самой ӟеч оценкаосын йылпумъя. Ачиз сюлмысь ик куриськыса, оже кошке. Усто ожмаське, война бырытозь. Дораз орденъёсын бертэ. Фронтын со ыштэ матысь эшъёссэ - вуоно Владимир Романов поэтмылэсь атайзэ но Гриша Чернов егит кылбурчиез. Ожысь бертыса, секыт аръёсы ас гуртаз дышетыны кутске. Собере Удмурт пединститутэ дышетскыны пыре. Сюлмо адями котькытын но ас вылаз шӧдӥськымон уж басьтэ. Пединститутын со котыраз огазея гожъяны кутскисьёсыз но литературной кружок кылдытэ. Отчы ӧтча тодмо писательёсыз. Ӟырдыт верасько отын ас гожъям чуръёссы сярысь но, бадӟым писательёслэн книгаоссы сярысь но. Со кружок пыр потыса, литературае ас сюрессэ шедьтӥзы Даниил Яшин но, Георгий Архипов но, Семен Перевощиков но, Герман Ходырев но, Петр Поздеев но. Соослэн будоназы литературной кружок бадӟым инты басьтӥз. Мыным нимысьтыз ик пусйымон кадь потэ Евгений Самсоновлэн мукетыз но ӟеч сямыз. Пединститутэз быдтыса, со ужаны кутске Ижевскын ик, педучилищеын. Собере ас гуртаз кошке но ас школаяз дышетыны басьтӥське. Отын директор луэ. Гуртоосыз солы али но тау каро выль школа пуктэмезлы. Берлогес со кие шедё бырем эшезлэн Гриша Черновлэн аслыз но матысь адямиосызлы гинэ тодмо кылбуръёсыз. Евгений соосыз радъя но журналын печатла. Басьтӥське со сярысь повесть но гожтыны. Ох! Котькудӥз ик писатель тодмотэм гожъясьёс сярысь озьы сюлмаськысал ке! Гожъяны Евгений Самсонов, тросэз сямен, кылбуран бордысен кутскиз. Со сюрестӥ ик азьлань мыноз шуыса осконо вал ини. Кылбуръёсыз пӧрмо вал. Нош со мукет сюрес вылэ ӵемгес но ӵемгес кожылӥз. Али чакласько но сыӵе малпанэ вуисько: Евгений ачиз но выльзэ утчаны яратӥз, выльзэ утчась геройёс но солы кулэ луизы. Соин но, дыр. Волга вылэ бадӟым электростанция пуктӥсьёс доры ветлӥз, отысь удмурт адямиосыз шедьтӥз но очерк гожтӥз. Самсоновлэн очеркъёсыз лыдӟисьёсын гажамонэсь пӧрмылӥзы. Пумен лирикаен но романтизм мылкыдын пыӵам веросъёс кылдӥзы. Выльзэ утчаны но шедьтыны луэ вылэм ортчем сюрес вылысь но. Быдӟым ӟуч композиторлэн П.И.Чайковскийлэн музыкаысьтыз со удмурт гуръёсыз шедьтӥз ("Арама кузя" верос), тодмотэм удмурт крезьгурчилэсь француз Жак Тибо композиторен пумиськемзэ возьматӥз ("Тибо"). Музыкаен но "толэзьысь тӧлэн" герӟаськем романтической веросъёсыз бере витьымтэ шорысь герӟаськиз Удмуртиысь нефть (му вӧй) утчасьёсын но сое музъемысь кыскисьёсын. Озьы тӥни Евгений Самсоновлэн гожъяськон ӧрез, Владимир Маяковский верамъя, "ялан тодмотэме мынон" выллем луиз. Соин ик, лэся, Татарстанын будэм адями Вотка-Идӟи шурлэн ваез дорысь "Льӧльшур палъёсын" тып-тып бадӟым эпопея кылдытыны басьтӥськиз. Озьы асьме доры пумен вуиз "Льӧльшур палъёс", "Уй пал симфония" романъёсын но "Тулыс ӵукна" повестен бадӟым произведение. Бен, кутскиз Евгений Самсонов лирикаен. Бӧрысь басьтӥськиз проза борды. Лирикалэсь нош люкиськыны ӧз быгаты. Ӧвӧл, со прозаез кылбурен чик но уг сура. Мон уг тодӥськы солэсь рифмаосын герӟам прозазэ но. Учке ай, туала арын сыӵе сумбрес но акылес пӧрамъёс ӵем кылӥсько радио но телевидение пыр. Ӧвӧл, Евгений Самсоновлэн сыӵе акылес чуръёсыз ӧвӧл. Солэн прозаяз туж шӧдӥське, улон шоры лирической поэтлэн синмыныз учкыса, образ пӧрмытыны быгатонэз. Со улонэз нырысь ик сюлмыныз дунъя, собере гинэ ини йырвизьлэсь кезьыт малпанзэ ватса, сюлэм ӟырдытсэ сӥятысагес, визь вылэ чӧлтӥське. Кызьы шуо, эмоция солэн прозаяз нырысетӥ интыын, рацио, сайкыт визь, сое кутысагес возе но котьмае шонергес дунъяны юрттэ. Самой со бордын ук прозае лирикалэн умой пыӵамез. Со бордын Евгений Самсоновлэн прозаезлэн самой бадӟым аспӧртэмлыкез, мукетъёс пӧлын висъяськемез. Возьмато тае, "Инженер" очеркысь (веросысь но ӧвӧл, очеркысь!) кӧня ке гинэ чуръёсыз тодады вайытыса. Тани со очерклэн кутсконэз: "Вордӥськем Урсы гуртэ, дуное, зарние, дунне вылысь нокыӵееныз но ӵошатонтэм улосэ, простить кар монэ, аслэсьтыд вордэм но будэтэм пидэ, бакельдэ сёт, тани, йырсиосы тӧдь-тӧдь пурысьтатозь, улонэз ортчи ни, нош тон сярысьтыд бадӟым дуннелы ӧй поттылы на. Ӧй вера тынад данъяськымон чеберниосыд сярысь, ӧй мадьы синпӧртмась чылкыт ошмесъёсыд пумысен, ӧй кырӟа ӟардонъёсыдлэсь кужмоесь льӧль-горд тулкымъёсын тудӟылэмъёссэ! Ӧй гожъя тынад огшоры тыршисьёсыд но быдэс шаермылы тодмо луэм адямиосыд сярысь! Бен, сёт бакельдэ, вордӥськем улосэ, тон гинэ простить карыны быгатӥськод ук, анай музъем, аслэсьтыд пиостэ!" Тӥни озьы кыласа-бураса кылдытӥз со прозаен гожтэм произведениосызлэсь трос люкетъёссэс. Лирикалэсь амалъёссэ кутыса но, котьку сямен, пӧртэм карыса. Лирика шӧмо чуръёс трос пумисько эпопеяын но. Эпопея - улонэз паськыт, вӧл-вӧл но кузь вакыт ӵоже эскерись роман, куд-ог писательёсмылэн но критикъёслэн туж вылӥ дунъяно жанрзы ке но, литератураын солэн интыез аслаз. Мукет жанръёслэсь ултӥ но, вылтӥ но ӧвӧл. Котькуд жанрлэн аслаз быгатонэз, аслаз удысэз. Бадӟым эпической жанрын тужгес но ӟугырес луыны кулэ сюжет гердъёсыз. Удмурт литератураямы озьы гожтыны быгатӥзы кадь Григорий Медведев ("Лӧзя бесмен" трилогия) но Игнатий Гаврилов ("Вордӥськем палъёсын" трилогия). Евгений Самсоновлэн эпосаз возьматэмын туж кема кыстӥськись но туж бадӟымесь учыръёсын узыр вакыт. Мадён кутске кылем даурлэн пум палысеныз, вуэ ХХ даурлэн пум палозяз. Быдэс даур пала. Мар но ӧй вал со дыр ӵоже! Тужгес но вӧл-вӧл шонтӥськем автор нырысетӥ книгаяз - "Льӧльшур палъёс" романын. Самой татын ук верамын, революцилэсь трослы азьло кутскыса, Быдӟым Отечественной война кутскытозь. Та романын геройёсыз но трос. Сазоновъёсыз но, Юшковъёсыз но мукет геройёс пӧлысь шугенгес висъясько. Ма веранэз, табыдӟа материалэз авторлы радъяны секыт вал. Уката ик азьвыл веросъёс гинэ ке гожъяз. Эпосын сюжет гердъёс но ӟугрес, конфликтъёс но огеныз мукетыз ваче вуо, ӟугъясько. Зэмос улонын выллем. Писательлы мадёнзэ ваньзэ со югдурез валаса радъяно луэ. Евгений Самсонов та ласянь шуглэсь но шуг амал шедьтэм: повестьёсын роман. Со амал авторлы юрттэ котькуд повестьын сюжетсэ нимаз радъяны. Роман бере, солэн но огъя радыз луыны кулэ ук. Нырысетӥ книгаын ваньмыз со шуг-секытъёс но авторлэн та борды нырысьсэ басьтӥськемез тужгес но шӧдӥсько. Нырысетӥ повесть ӟеч радъямын ке ("Нырысетӥ гудыри"), бӧрысьёсызлэн гердъёссы кылямынгес. Та югдур сярысь мон 1979-тӥ арын гожтӥ вал ("Кенеш", 1979, �12, 55-56 бам). Автор сое туж ик шумпотыса ӧз ке но пумита, азьпал ужаз лыдэ басьтӥз, кожасько. "Уй пал симфония" но "Тулыс ӵукна" та ласянь ӝикытэсьгес пӧрмиллям. 1989-тӥ арын Евгений Самсонов, автомашина улэ сюрыса, витьымтэ шорысь бырыны шедиз. Эпопеязэ пумозяз вуттыны ӧз кылды ни. Ачиз дасяса, издательствое вуттӥз "Льӧльшур палъёссэ" но "Уй пал симфонизэ". Кыкетӥ книга потӥз ини автор бырон аре. Писательлэн архиваз кылизы потылымтэ произведениосыз. Соосыз радъяны басьтӥськиз писательлэн матысь эшез профессор И.В.Тараканов. Озьы 1995-тӥ арын потӥз ини "Тулыс ӵукна" книга но. Отчы пыризы эпопеяез азьланьтӥсь повесть, очеркъёс но веросъёс. И.В.Тараканов дасяз но поттӥз на писательлэсь мукет книгаоссэ но. Тӥни озьы Евгений Самсоновлэн Гриша Черновлэсь гожъямъёссэ лыдӟись доры вуттыны тыршемез ас вылаз но ӟечен ик берыктӥськиз. Тау сыӵе ужзы понна Е.В.Самсоновлы но, И.В.Таракановлы но. Тани выльысь но выльысь эскерисько мон Евгений Самсоновлэсь гожъямъёссэ но со сярысь критикъёслэсь но литературоведъёслэсь гожъямъёссэс. Уг, уг тупало соос ог- огзылы. Евгений Самсонов удмурт литератураын нимысьтыз синмаськымон инты басьтэ. Солэн произведениосыз литературамылэн классикаяз пыро ини. Критика нош та дырозь соосыз пусйиз на кӧня ке чыры-пыры рецензиосын но обзоръёсысь чуръёсын гинэ. Чик но ӧвӧл быдэс творчествоез сярысь рос-прос гожтэм статья гинэ но. Малпасько, та - удмурт литературоведъёсмылэн бадӟым писательмы азьын сьӧлыксы. Писатель сярысь йӧн- йӧн гожтэм книга но мултэс ӧй луысал. Кулэ ини книгаоссэ школаослы программае но дӥсьтыса пыртыны. Алексей ЕРМОЛАЕВ. * Удмурт кун пединститутысь литературно-творческой кружокысь егитъёс. Евгений Самсонов пуке ӝӧк сьӧрын (бур паласен - кыкетӥез). 1949-тӥ ар, 1-тӥ декабрь. Огазеяськонъёслэн лыдзы кулэсмоз Юстицияя министерстволэн берлояз ортчем коллегияз йылпумъянъёс лэсьтэмын судья приставъёслэн службазылэн (ССП), экспертизая но нормативной актъёсты пусъёнъя отделлэн калык но религияя огазеяськонъёслэн ужъёссыя отделлэн ужамзылы. Куинь толэзь ӵоже ССП 30 сюрс пала ужъёсты быдэстӥз, кылем арын та вакытэ сярысь, со 42 процентлы тросгес луэ. Соин сэрен республикалэн но государстволэн бюджетаз 122 миллион 480 сюрс манет коньдон пыртэмын. Та дыр ӵоже ик дунъет сётэмын 92 номативно-правовой актъёслы. Эскеремын Удмурт Республикалэн 87 законэзлэн инъетэз, Правительстволэн но Кун Кенешлэн 46 постановленизылэн инъетсы, ас коже кивалтон ёзъёслэн 3 уставзы но 6 Федеральной Законлэн инъетсы, кудъёсызъя куд-ог ӵектонъёс но ватсанъёс сётэмын. Ялан йылэ пӧртэм огазеяськонъёслэн лыдзы, али соос 212 пусъемын ини, но соин ӵош али судъёсын куд-ог документъёс дасясько 60 пала огазеяськонъёслэсь ужамзэс дугдытон сярысь. Тупен-тупен эскерем бере шараямын уставъёссэс тӥяса ужась инмарлы оскисьёслэн Аль-Фатх (Медресе) но "Дианетика" центръёс. Озьы ик эскеремын быръёнъёс дыръя кылдэм политикая партиослэн, движениослэн но бадӟым калык огазеяськонъёслэн ужамзы. Соосъя законъёсты тӥян учыръёс шараямын ӧвӧл. Удмурт Республикаысь Юстицияя министерстволэн пресс-службаез. Дышетскиськом пудо будэтыны Завьяловоысь "Россия" эштосэ люкаськылӥзы шаерысьтымы пудо вордон удысысь валтӥсь специалистъёс. Соос азьын вераськиз биология наукаосъя доктор, профессор Николай Михайлович Костомахин. Сибирь палась вуэм тодмо куно егит пудоез будэтонын выль амалъёс пумысен мадиз. Со пусйиз, Урал но Сибирьлэн шунды пуксён палаз пайдаё луэ холмогор но голштин выжыосты сураса будэтэм таза сюро пудо. П.ИВАНОВ. Со ик ӧй вал-а шуд кизили? Валентина Павловна Филипповаен ми тодмо луим 1947-тӥ арысен. Чылкыт, ӝикыт, туж синмаськымон нылкышно монэ ӝог ас палаз кыскиз. Визьмо, котьмае тодӥсь-валась, ас ужзэ ӟеч быдэсъясь. Юнме шат Валентина Павловна 15 ар ӵоже Зура райисполкомлэн секретарез вал? Оло, пенсие но татысен ик потысал, но район быремен, со Балезиное кошконо луиз. Валентина Павловна татын но гажамон адями луиз. Солэн быдэс улон сюресэз герӟаськиз улонмес азинтонэн, пайдаёгес, шулдыргес каронэн. Быдӟым ожлэн куараез удмурт шаерамы но вуиз. Ой, кӧня эвакуированнойёс вал! Ваньзэс соосты интыяно, улон сэрег сётоно, дӥсяно-кутчано, сюдоно. Ведь туж тросэз соос дырттӥд-вутӥд гинэ кутэм дӥськутэн. Вал меда соку Валентина Павловналэн ваньмон дырыз? Гуртын ужась киос тырмымтэен, ӵемысь потано луылӥз колхоз лудэ но. Отчы но, татчы но вутскылӥз. Бен, со котьку калык пӧлын вал. Уж сяна, шутэтскон но вань. Егитъёсты огазеян ласянь но быгатонлыкез шӧдӥськиз Валентиналэн. Со туж матысь юрттӥсь луиз Владимир Маныловлы. Удалтӥз вал зуриослы: туж шӧртчи кивалтӥсьсы, Манылов, самодеятельной коллективзэ вылэ ӝутыны быгатӥз. Возьматылӥзы асьсэды зури егитъёс со аръёсы! Концертэн поталлязы ёросысьтызы гуртъёсы (тодско ай Играе, Дэбесэ но ветлэмммес). Селоысьтымы интеллигенция клублэн ужаз мылысь-кыдысь пыриськылӥз. Драмкружок рос-прос ужаз. Валентина Павловнаен отысен ик эшъяськи. 1950-тӥ арын Зуриысь кырӟанъя но эктонъя коллектив республикаямы смотрын нырысетӥ инты басьтӥз. Соку СНК-лэн (Совнаркомлэн) тӧроезлэн воштӥсез Ф.Растегаева В. Маныловлы но В.Филипповалы Почёт грамота сётӥз. Ма, со ик ӧй вал меда шуд кизили? Бен, кызьы вунэтод та аръёсты, куке егитъёс азьпал радын вал? Кырӟанэн уже мынылӥм, кырӟанэн ужысь бертылӥм. Ӵуказе нуналмы сайкытгес мед шуыса оскылӥм. "Песня о тревожной молодости", "Песня о встречном", "Марш энтузиастов" - та кырӟанъёс ми понна гимн кадесь луизы. Кырӟась мылкыд, кырӟанэн улон, - оло, та ик юрттэ шуг- секытэз вормыны? "Удмурт дуннелы"("Советской Удмуртилы") 80 ар тырмыку, Вячеслав Леонтьевич Корепановен тодматски. Сюресмы ӵош тупаз. Со ассэ журналист шуиз, 24 ар ужай, пе, корреспондент луыса. Бен, со "Советской Удмуртия" газетлэн Балезиноысь собкорез вылэм. Мон асме Зуриысь шуыса верай но, со пыр-пыр учкиз шорам, собере юаз: - Филиппова Валентина Павловнаез тодӥськоды-а? - Ма кызьы уд тод? - шуисько, - ведь со мынам эше вал. Вакчи тодматскон. Кысык люкиськон. Вячеслав Леонтьевичен рос-прос вераськыны но ӧз кылды. Но, Валя, Валяе сярысь, ышем эше сярысь коть тодӥ: Вячеслав Леонтьевичлэн кузпалыз со! Валентина Павловналы мон автографеным книгаме кузьмай. Ӝоген гожтэт вуиз - быдэс повесть шуыны луоз. Сомында аръёс ортчыса! Ма быдӟа шумпотонэ Валие понна но умой кузпал шедьтэмез понна... Но Вячеслав Леонтьевичлы, жаляса верано, ӧз кылды ни туэ фронтовикъёсын артэ султыны, Вормон нуналэз пумитаны. 3-тӥ апреле сюлэмыз жугиськемысь дугдӥз. Ожысь но ужысь ветеранлэн улонамы чылкыт пытьыез кельтэмын. Сое уз вунэты калык. Та кык арлыдо адямиос мӧйымыса но бугырес улонлэн палэназ ӧз коже. Жаль, доразы ветлыны ӧй быгаты, сюрес туж кузь. Но Валентина Павловналэн гожтэтэныз тодмато. "80-тӥ аръёсы мон ма гинэ ӧй гожъялля районамы потӥсь "Вперед" газетэ. Тема но ачим бырйисько вал. "Золотое перо" конкурсэ пыриськылӥ. Озьы мыло-кыдо корреспондент луи. Кыӵе гинэ ужрад поссовет ӧз ортчытъя, ми Вячеслав Леонтьевичен, оло, огаз но пыриськытэк ӧм кыльылэ. Кузпалэ уличкомлэн тӧроез вал. Фронтэз ортчем, трос адӟем муртлы шутэтскыны но кулэ вал, дыр, но со ноку общественной ужлэсь палэнэ ӧз кыльылы. Урамъёсты, юртъер котыръёсты чылкыт возён, сӥзьыллы быдэ "Сяськалэсь праздниксэ" ортчытъян. Сяська будэтыны туж яратӥсько. Уждэ адӟо ке, кызьы шум уд поты? Призъёс-сувениръёс - шумпотон синпель. "Тупаса улон понна" - праздник- концерт вал. Чапаев ульчаысь егитъёс, пиналъёс сое дасязы. Татчы ӧтемын вал Азин нимо но Октябрьской ульчаосысь улӥсьёс. Таӵеесь ужрадъёс ик куспамы юн эшъяськыса улыны юрттӥзы. Ма гинэ ӧз дэмлалля кузпалы, мон котьку санэ басьтылӥ. Огъя кыл шедьтылӥм. Вячеслав Леонтьевичлы юрттылӥз воштӥсез Любовь Матвеевна Леконцева, визьмо егит кышномурт. Али со ёросамы культура удысэн кивалтэ. Табере туж шуг, юн секыт калыкез репетицие люканы. Баянист утчано. Таӵе ужпумез ас вылаз Вячеслав Корепанове басьтӥз. Баянистэз Борис Сергеевич Корепановез шедьтӥз. Ужезъя - данэз. Борис Сергеевичмы алигес Балезинолэн дано гражданинэз луиз. ...Я, кӧня ке дыр куспын, ми, зӧкъёс (арлыдоос), бадӟым концерт дасямы. Конечно, пиналъёс но сюлмаськиллям. Чупчи шур дурын, вӧл-вӧл азьын гуждор вылын, калык юн трос люкаськемын. Берло огъя шулдыръяськон вал. Шулдыр крезьгур бер ӝытозь чузъяськиз. Тыршоно ке, шутэтсконэз но радъяны луэ вылэм. Бен, отын ик вал "Кин мае быгатэ" - кибашлыослэсь ужъёссэс адӟытон: дэра кесэгъёс, пужыятэмъёс, керттэм дӥськутъёс, чильпамъёс... Учкиськод но - паймиськод: ма гинэ уг быгато киос? Мынам аслам сыӵе адӟытонын вал А.С.Пушкинлэсь портретсэ киын пужыятэме но эшшо кӧня ке киужъёсы, чильтэръёсы... Калыклы юн яраз Пушкинэ. Луло кадь ик пуктэмын, пе. Та портретлэн сюресэз кузь луиз: районысь но республикаысь выставкаосы ветлӥз. Данъян грамота басьтӥ..." Бен, та аре ик "Советской Удмуртия" газетын Валентина Павловналэсь портретсэ печатлазы - пужыятэм, чильпам киужъёсыныз. Мар быдӟа уж со, кӧня чиданэз кулэ кариз, вылды. Юнме удмурт калыкмы верамтэ: курадӟытэк бур уд адӟы. Бен, чорыгез но капчиен тыметысь уд потты, ӝӧк вылэ нянед но уз вуы. Улон ӧвӧл бусыез гинэ выжон. Со котькыӵе палзэ возьматыны быгатэ: шедьтон но ыштон, шумпотон но кайгу... Алыны таосты уг лу... Витьымтэ шорысь!.. Витьымтэ шорысь, шуак ыштӥз самой матысь эшсэ, самой ӟеч адямизэ. Мон юн куректэмме верасько. Возькы, Валие, кайгулы укыр эн сётскы. Инкуазь выльдӥське. Потод кыре, адӟод картэдлэсь кибервылзэ, кельтэм пытьыоссэ... Вячеслав Леонтьевич кема-кема аръёс ӵоже улоз ай калык сюлмын. Кошкиз ветеран. Уз берытскы ни, уз. Нош ӟечен веран, Бен, со сярысь уз кыс. Пукисько но малпаськисько ӵемысь: ма понна улэ адями? "Вамыштоно ке, мед кылёз пытьы..." (Д.Яшин). Бен, та вылӥ верам тодмоосы но адскымон пытьы кельтӥзы. Но лыктэ пересьмон. Кинлы-о кулэ на соку тон?.. Сюлэмы уг буйга, Валиелэсь гожтэтсэ лыдӟеме бере. Тани со чуръёс: "Гожъясько но, синвуэ шапыкъя. Кыӵе та улон, собере пересьмон?! Табере нокинлы кулэед ӧвӧл - коркан пукись. Гурт котырын ужась-бергась адями пуксьылытэк лумбыт-лумбыт бызьылэ, лэсьтэ. Син азьын ужед но уг адскы кадь. Нош пересь мугорыд жаде, отӥ но татӥ вӧсь луэ. Нош мар карод - лэсьтоно. Улоно ук! Тани тулыс вуэ. Азьпал улон сярысь сюлмаськоно. Помидор, перец кизёно. Сяська выжыосты чаклано-утялтоно, картошен выроно. Кема ик уз ортчы, бакчаяд потоно, нуналлы быдэ отын бергано. Озьы ини, гогыед музъем борды бурмемын ке. Аслад коркаед ке, кӧня отын сюлмаськонэз-малпаськонэз пу сярысь! Секытэз - азбарад ваён, вандон- пильылон! Ой, сокем секыт со пу котырын вырон, трос коньдон куян. Дасяменыз гинэ но шунтыны, ялан гур котырын толбыт берганы, эстыны туж секыт потэ ни. Но лулыд ке вань на, улоно, тыршоно ук! Ярам, юлтоше, Вячеслав Леонтьевич, пыдъёсызлы уггес ӝожкы на. Ой, кӧня нулло сое пыдъёсыз нуналлы быдэ! Общественной ужен но, ас поннад сюласьконэн но. Райцентрлы кыдёкын улӥськом. Мынон-ветлон, утчан-ваён. Сотэк уг луы..." Бен, кинлы-о кулэ на пересь адями? Демократие выжонмы ваньзэ йырчукин берыктӥз. Совето Союзамы улыку, ужась адямиез данъяло ик вал. Та сярысь ик верало В.П.Филипповалэн гожтэтысьтыз чуръёс: "Мыным 70 арес луыса, 1987-тӥ арын 8-тӥ мартэ монэ но эшшо куинь нылкышноосты РДК-ын данъязы. "От всей души" ӝыт ортчытӥзы. 600 пала лыктэмъёс вал. Бадӟым концерт сётӥзы, ӟечкылазы. Сцена вылын, ӝӧк сьӧрын пукиськод но астэ ачид но уд валаськы: кытын-о тон? Вунонтэм шудо дыръёс кылизы..." Дан понна ӧз тырше Вячеслав Леонтьевичен Валентина Павловна. Соос мукет сямен улыны ӧз быгатэ, социализмлы, коммунизмлы тупась идеалэн улӥзы. Но, зэм, лыктэ ук пересьмон. Кужымдэ, ӟигардэ ыштон... Кызьы улӥськод, юрттэт кулэ ӧвӧл-а? - шедёзы на меда юасьёс туэ? Пересьёсты гажась ӧвӧл ни, мылес луэмын соос чиновникъёс понна но. Малы ке но та вылӥ верам пересь кузпалъёс улӥзы пу коркан - газтэк, чагыр эстӥськонтэк. Пелляськон дыръя азбарад но уд поты. Но коркадэ шунтоно. Пересь муртлы капчи-а со? Кошкиз фронтовик, трос курадӟон пыр потэм адями. Дуннемес туж паськыт ке но адӟиз - аслыз кык метр музъем тырмиз... Возиськы, Валентина Павловна! Оло, майбыр улонэз адӟод на? Лидия ЧЕРНОВА. "Солдат гожтэтъёс" Быдӟым Вормонлы 55 ар тырмонэн валче сыӵе нимын конкурс ялӥз вал Федерациысь почта кусыпъёсъя Удмурт Республикая управлениез. Ньыль сюлэсь уно гожтэтъёс вуизы отчы. Котькудаз адӟиське ож тыл пыр ортчем адямилэн сюресэз, войналэн бервылъёсыз быдэс странамылэн толон но ӵуказе улэмез. Тани конкурсын йылпумъянъёс лэсьтэмын. Дуно кузьымъёсын пусъемын Глазов ёросысь Вылӥ Слудка гуртысь Любовь Трефиловалэн, Ижевскысь Вера Балезиналэн, Вавожысь Софья Зориналэн, Глазовысь Тамара Буровалэн ортчем ож сярысь гожтэтъёссы. Уноез гожтэтъёс сӥземын вал Афганистанын, Чечняын но Дагестанын ортчем но ортчись ожъёслы. Умоен лыдъямын Завьяловоысь Лидия Диановалэн, Шарканысь Леонид Бельтюковлэн но Ижевскысь Юрий Сидоровлэн гожтэмъёссы. Нимысьтыз кузьымъёын пусъемын дышетскисьёслэн но егитъёслэн гожтэтъёссы. Конкурсын вормисьёсты ӟечкыланы ветлӥзы Удмурт Правтельстволэн Тӧроез Николай Ганза, солэн воштӥсез Виктор Шудегов, Федерациысь почта кусыпъёсъя Удмурт Республикая управленилэн кивалтӥсез Юрий Кайгородов, Удмурт Республикаысь калыкез улон-вылонын утёнъя министр Светлана Андреева, калыкез дышетонъя министрлэн нырысетӥ воштӥсез Наталья Сударикова, республикаысьтымы егитъёсын ужанъя кун комитетлэн кивалтӥсез Андрей Гальцин, элькунысьтымы Афганистан оже ветлэмъёслэн огазеяськонзылэн председателез Валерий Алехин. Кызьы пусйиз Юрий Кайгородов, "Солдат гожтэтъёс" конкурс табере арлы быдэ ортчоз. Н. Байтеряков. Зеленый Асановград Так любовно называют асановцы свой поселок. И правильно: дома кирпичные, многоэтажные, дороги заасфальтированные, везде деревья, есть скверы, аллеи. В Асаново студентов больше, чем обычных жителей. Так что поселок всегда молод, всегда зелен. Строки из истории Император повелел До наших дней дошел такой документ: "Государь Император в 28 день ноября 1894 года Высочайше утвердить соизволил и повелел исполнить воспоследовавшее мнение Государственного Совета о предоставлении в бесплатное пользование Елабужского земства для устройства учебно-практической образцовой сельскохозяйственной фермы 100 десятин 400 кв.сажен с растущим на ней лесом из Алнашской казенной лесной дачи 2-го Елабужского лесничества, с краю означенной дачи в смежности с крестьянскими владениями". Тогда губернское земство на покупку участка истратило 5500 рублей. Более 100 лет понадобилось, чтобы он стал современным Асановским совхозом-техникумом. Коняга-работяга и спортсмен В учебной конюшне содержится 25 голов лошадей шести пород. Здесь студенты проходят практику: учатся ухаживать за лошадьми, осваивают зоотехнические дисциплины. Но больше всего их привлекает конноспортивная секция - многие поступают к нам учиться именно из-за нее. Члены секции участвуют в различных конноспортивных соревнованиях, выезжают с агитпробегом по районам Удмуртии, участвуют в проведении общественных мероприятий, таких, как проводы зимы, для чего приготовлены разукрашенные дуги с колокольчиками, сбруи, красочные костюмы. Конюшня работает по четырем направлениям: это - конный спорт, индивидуальное обучение по уходу, сельскохозяйственный труд и работа в лаборатории по животноводству, коневодству и ветеринарии. В прошлом году деятельность нашей конноспортивной секции была представлена на Российской выставке, посвященной методическим разработкам по воспитательной работе со студентами. Было предложено распространить наш опыт работы во всех сельскохозяйственных техникумах, так как он оказался уникальным во всей России. В.Загуменов, заведующий учебной конюшней. Лаборатория, она же ферма На отделении "Зоотехния" создана учебно-производственная лаборатория по свиноводству. Вся работа на этой мини-ферме выполняется студентами при прохождении практики. Руководство группой возлагается на преподавателя - руководителя практики, непосредственно на рабочем месте студенты работают вместе с мастером. Форма организации работ - звеньевая. Каждое рабочее место оснащено инструкционно- технологическими картами, справочной литературой, необходимыми инструментами, материалами, комплектами спецодежды. Учебная лаборатория работает четвертый год. Студенты занимаются получением поросят, их выращиванием и продажей, частично - откормом. На ферме ведется зоотехнический и племенной учет. Вырученные деньги поступают на специальный счет совхоза-техникума. Г.Заколюкина, заведующая отделением "Зоотехния". Дипломы красные, синие... Большинство преподавателей и воспитателей техникума - наши же выпускники. Многие их них стали руководителями в других местах. В управлении сельского хозяйства нашего Алнашского района работают главными специалистами наши выпускники: главным агрономом - Харитон Кузнецов, главным инженером - Мансур Гараев. С 1964 года в техникуме ведется наглядный учет выпускников с красными дипломами. Стенд занимает всю стену, поскольку за последние 35 лет отличников выпущено более трехсот, как правило, они возглавляют сельскохозяйственное производство на самых разных уровнях. Сколько же мы даем специалистов в последние годы? В 1987 году выпустили 199, в 1998 году - 185. В 1999 году - 203, из них агрономов - 56, зоотехников - 104, механиков - 43. Н.Федотова, заведующая отделением "Агрономия". Являясь заместителем директора по практическому обучению студентов, я прекрасно понимаю, какой груз ответственности лежит на мне. Подготовка будущих механиков во многом зависит еще от материальной базы, которую имеет учебное заведение. Резко увеличили количество тракторов, при том, что в последние годы мы не получили ни одного нового. Какой выход? Не ждать, а давно списанный трактор отремонтировать своими руками. А сделать это невозможно, если хотя одно звено по ремонту даст слабинку. Поэтому рихтовку и сварку корпуса. Полное восстановление неработающего аккумулятора - абсолютно все делаем своими руками. Точнее так: при подсказке преподавателей силами самих студентов. Так молодой человек, изо дня в день своими руками восстанавливая из шихты настоящий трактор, становится ко дню своего выпускного вечера довольно уверенным механиком. В итоге получается: не было бы счастья, да несчастье помогло. И вот на такой технике ученический тракторный отряд выполнил в 1996 году 23 процента из всего объема совхозных работ, в 1997 году - более 25 процентов, в 1998 году - 19 процентов, в 1999 году - 16,5. Особенность нашего практического обучения заключается и в том, что студенты воочию видят результаты своего труда. Например, только кабинет овощеводства в прошлом году произвел продукции на 10 тысяч 796 рублей. Он реализовал рассады капусты, редиса, помидоров. Практика по плодоовощеводству всегда проводилась в теплице и саду. Но современный специалист должен уметь еще и выгодно продать произведенную продукцию и проанализировать конечные финансовые результаты. С этой целью в 1998 году хозяйство передало теплицу площадью 528 кв.м и 1,5 га сада на баланс учебного заведения. Они закреплены за кабинетом "Плодоовощеводство" как хозрасчетная лаборатория. При прохождении практики студенты осваивают технологию возделывания рассады овощных культур: капусты, огурцов, томатов, перца, редиса, зеленого лука, укропа, цветов. Занимаются реализацией продукции, получают навыки экономического анализа. Хозрасчетная лаборатория за счет полученной прибыли ежегодно обеспечивает себя необходимым инвентарем, материалами, семенами и методической литературой. При проведении практики по семеноводству устанавливаются сортность и сортовые качества посевов и семян. Апробация посевов состоит из нескольких этапов: проверка сортовых документов на высеянные семена, осмотр посевов и составление отчета о проведении апробации. Учебная практика по технологии металлов проводится в течение 6,5 недель. Основными задачами практики являются: приобретение умений и навыков по слесарной, столярной, механической, кузнечной обработке, сварке и наплавке деталей, выпуск продукции, пользующейся спросом на рынке. Н.Шкляев, заместитель директора. А зори здесь тихие Я так бы сказал про наше любимое Асаново. Но речь о спектакле под таким названием. Под руководством заслуженного работника культуры Г.С.Майорова при нашем дворце культуры "Юность" работает студенческий театр, который подготовил спектакль и выступает перед населением. И получается здорово! Студенты могут не только хорошо учиться и трудиться, но и с пользой проводить свободное время. Для них двери дворца культуры открыты всегда. При "Юности" организовано 13 различных кружков, особо отличились ансамбль удмуртских песен "Купанча", ансамбль девушек "Инвожо", кружки танцоров, вокалистов, гармонистов, гитаристов. Я полагаю, что художественные навыки пригодятся будущим агрономам, зоотехникам, механикам и авторемонтникам. Недаром говорят: нам песня строить и жить помогает. В.Гоголев, директор дворца культуры "Юность", заслуженный работник культуры УР. Даже засуха не помеха Наше хозяйство в 1999 году получило прибыль 895 тысяч рублей. Рентабельность составила более 10%. Не ахти какая цифра. Но ведь год был не очень удачный. В условиях засухи на 675 гектарах получено зерновых культур по 22,5 центнера с круга (по республике почти два раза меньше), 293 гектара занимают элитные посевы. Картофеля собрано 127,2 центнеров с гектара. Хороший урожай получен за счет использования классного посевного материала, внесения органических и минеральных удобрений, применения ядохимикатов, благодаря хорошей организации труда агрономов Петрова Д.В., Санниковой Т.В. и заместителя директора Н.А.Катаева. На 2000 год запланировано получить урожай зерновых с 1 гектара по 29 центнеров, картофеля - 138 центнеров. Готовность к весенне-полевой кампании было 100 процентной. Семенной материал - первоклассный. Горюче-смазочный материал и удобрения закуплены. Техника подготовлена. Механизаторы, специалисты и студенты приступили к работе. В.Шабалина, экономист. Некогда письмо написать Я родился и вырос в Татарстане. У нас много учебных заведений, но выбрал Асановский совхоз-техникум, поскольку много наслышан о нем. Мне не помешало и то, что мои родители платят деньги за мою учебу. Самым лучшим считаю то, что очень много внимания уделяется практике. А обучают нас влюбленные в свое дело преподаватели. Мы довольно быстро осваиваем разнообразную технику. Все мы очень хорошо устроены в общежитиях. С большой пользой проводим свободное время, а если точнее, то его вовсе не имеем, некогда даже домой письмо написать. Радик Каримов, студент 641-й группы. В Москву? Садись на свой автобус! Лучшим студентам техникума было обещано, что их свозим в столицу России. Съездили на автобусе совхоза-техникума. Но в стороне от бурной жизни не остаются и остальные. Мы, преподаватели и воспитатели, через определенные общественные поручения стараемся прививать студентам навыки руководителя-организатора. Начинаем эту работу с учебной группы. Хорошо работает молодёжный центр, где студенты сами организуют и проводят групповые вечера на разнообразные темы, встречаются со студентами других учебных заведений. Наши воспитательные мероприятия проводятся везде: в здании техникума и во Дворце культуры "Юность", в прекрасно оборудованном общежитии и на спортивной площадке. Педагогический коллектив помогает студентам самовыразиться. И для этого более 30 лет уже существует звеньевая система. Совет звеньев - основной орган студенческого управления, куда входят звеньевые всех учебных групп. Он имеет свой расчетный счет в банке, что дает возможность проводить различные мероприятия как группового, так и общетехникумовского уровня. На совете заслушиваются и обсуждаются все отчеты звеньевых о результатах работы на производстве, о успеваемости и посещаемости, о агитбригаде, конном пробеге, спортивных состязаниях и т.д. В общежитиях имеются свои советы общежитий. Вступить в жизнь студентам помогают наши опытные классные руководители Т.В.Красноперова, Т.В.Лявукова, С.И.Мечин, Н.П.Пушина, З.В.Югова, Н.М.Тупикова, Р.А.Николаева, Н.Г.Федотова. Я же объединяю их воспитательную работу в единое русло. Л.Цыпленкова, заместитель директора, выпускница 1974 года. Вормон нуналэн сюлмаськон медаз быры Ортчизы, куашетӥзы май праздникъёс, соосын ӵош быдӟым Вормонлы 55 ар тырмон нунал. Солы дасяськон мынӥз, кылем сӥзьылысен кутскыса. Оргкомитетэ быръемъёс вань луонозэ лэсьтӥзы, фашизмлы пумит ожмаськонэ пыриськемъёс но фронт мышкын ужамъёслы пичияк ке но шумпотон, ӟеч мылкыд кузьман понна. Ваньмыз чакламъя пӧрмиз кадь. Кызьы шуиз журналистъёсын пумиськон дыръя Правительстволэн Тӧроезлэн воштӥсез Виктор Евграфович Шудегов, асьмеос пыраклы пунэме кылемын ож пыр потэм поколение азьын. Быремъёссэ буре ваемен ӵош, ялан сюлмаськоно улэпъёсыз сярысь, соослэн лыдзы, жаляса верано, арысь аре кулэсме. Соин ик 9 Маен гинэ праздник медаз йылпумъяськы, Родинамы понна ожмаськемъёс нуналлы быдэ мед шӧдозы та улонын асьсэлэсь кулэлыксэс, дунъямзэс но гажамзэс. Удмурт Республикалэн кивалтӥсьёсыз туэ луонлык шедьтӥзы котькуд фронтовиклы быдэн 300 манет коньдон висъяны, со сяна, районъёс но быгатэмзыя юрттӥзы асьсэ ветеранъёссылы. Тужгес но юн та ласянь сюлмаськизы Воткинскын: соос сётӥзы быдэн 1000 манетэн. Куд-ог интыосын юрттэтсы вуиз 150-300, 800 манетозь. Ижевск гинэ берегес кылиз, татысь ветеранъёс басьтӥзы 80 манет. Зэм, котькуд адямилы та вакытэ копейкаез но дуно, нош солэсь но дуно - саклык висъян, сюлмаськон, ас вакытаз юрттон. Тӥни ма уггес тырмы тазалыксэс егит дырысенызы быдтэм песянайёсмылы но песятайёсмылы. Туэ луонлык шедьтэмын республикаысь вань пенсионеръёслы тӥ майысен 31-тӥ октябрёзь ӝыны дунын пригородной автобусъёсын ветлыны. Ожысь ветеранъёс пӧлысь 3 сюрсэз пинь пуктозы, ляб кылӥсьёсызлы 500 муртлы висъяськоз кылон аппарат, ляб адӟисьёслэсь синзэс эмъялозы. Ваньмызлы солы коньдон шедьтэмын бюджетэ пырисьтэм фондъёс пыр. Ӟеч юрттэт вуиз "АСПЭК", "Удмуртнефть", "Удмуртторф" огазеяськонъёсысь. Вуэм коньдон быдэсак сётэмын шаерысьтымы больницаослы, оже пыриськемъёслэсь тазалыксэс йӧнатон понна. - Ӧжыт уг лэсьтӥськы, но, огъя учконо ке, со туж пичи люкетэз гинэ. 48 мурт туэ басьтыны быгатоз черодъёсын витем "Ока" машинаез, кыкез Геройёсмы - Н. З. Ульяненко но А. Д. Торопов - "Орбита". Валамон, ваньзылэн кужымзы машина нуллыны уз тырмы ни. Но соос янгыш ӧвӧл ук, ӝыны даурлэсь кема та ужпумез пумаз- йылаз вуттыны ӧм быгатэ шуыса, - пусйиз В. Е. Шудегов. Журналистъёс юан сётӥзы памятникъёс пумысен но. - Шаерамы соос 400 пала, 9-тӥ Майлы ваньмыз тупатэмын, буямын. Отчы висъямын интыосысь бюджет коньдон. Али лэсьтӥськисьёсыз но лэсьтыны чакламъёсыз сярысь мон меӵак шуысал: 30 миллионэз памятниклы та вакытэ сётытозь, та коньдонлы улон интытэк курадӟись ожъёсы пыриськем ветеранъёслы квартираос пуктоно вал. Нош соос асьмелэн ӧжыт ӧвӧл, афган, чечен оже пыриськемъёс, вань на ай 1941-тӥ-1945-тӥ аръёсысь мӧйы солдатъёсмы но. Туннэ лэсьтонозэ ӵуказелы кельтонэз ӧвӧл ни - адямилэн даурез туж вакчи. Виктор Евграфович валэктон сётӥз та праздникен герӟаськымтэ музон юанъёслы но. Кылсярысь, ма вите туэ шаерысьтымы абитуриентъёсты. Учкемын-а соослы кыӵе ке квота? - Гурт школаосын дышетскем пиналъёс понна - одно ик, малы ке шуоно, дышетон луонлыкъёс отын шӧдскымон висъясько. 20 ар пала преподаватель луыса ачим ужай университетын, тодӥсько, гуртысь потэмъёс 2-тӥ-3-тӥ курсъёсын тодон-валанзыя городысь эшъёссэс ӵем дыръя кельто. Сыӵе абитуриентъёсты нокызьы но висъяны уг яра, уката но кадръёсты дасянъя ужпумъёсын. Л. Медведева. Журналистъёсын пумиськонъёс Валерий Благодатских: "Одӥг трактор басьтыны кулэ 60 ош" Алигес журналистъёсын пумиськылӥз "Удмуртагропромсервис" огазеяськонлэн валтӥсь директорез Валерий Благодатских. Вераны кулэ, со озьы ик кивалтэ Россиысь Аграрной партилэн Удмуртиысь ёзэныз. Валерий Филиппович люкаськемъёслы мадиз Россиысь но республикаысьтымы гурт удысын кылдэм секыт югдур, тулыс бусы ужъёс но Башкортостанэ та удысъя кенеше ветлэмез сярысь. Шаерамы мыно ни ӟырдыт тулыс бусы ужъёс. Туэ асьмелы 370 сюрс гектарлэсь уно валэс юос кизёно. Соос ог 9-10 сюрс гектарлы сюбегало. Отын ватсаса пудо сиён культураос будэтозы. Кызьы бен гурт хозяйствоос, эштосъёс но нимаз фермеръёс кысык ужъёслы дасяськизы? Ушъяськыны номырин. Кӧня ке сюрс тонна кидыс уг тырмы. Юрттэт луоз- а, уз-а, тодмо ӧвӧл. Ӝыныезлэсь ӧжыт гинэ тросгес дасямын техника но эстӥськон. Минерал сылалъёсъя югдур, кылем арен ӵошатыса, кӧня ке умойгес. Миым гектарлы быдэ 10 килограмм тукъёс люкамын ке вал, туэ 14,4 килограмм пала усе. Та ласянь умойгес ужало Вавож но Можга районъёс. Татын гектараз 29-30 килограмм сылалъёс шедёзы, нош Каракулино ёросын - чылкак 7 килограмм гинэ. Таӵегес ик югдур музон районъёсын. Оглом, гурт удыслы капчи ӧвӧл. 1991-тӥ арен ӵошатыса, элькунамы тракторъёслэн лыдзы 5 сюрслы кулэсмиз. Сыӵегес ик югдур комбайнъёсъя. Али 80 процентэз гурт техника (тракторъёс, комбайнъёс но мукет машинаос) вужмемын, металлоломе куштыны. Нош выльдыны музъем ужасьёсэн кужымзы ӧвӧл. Гурт техникалы дунъёс вормонтэм будэтэмын. Кылсярысь, 1991-тӥ арын ДТ-75 трактор басьтыны 6 ош тырме ке вал, али 60-зэ вандоно луэ. Нош "Дон-1500" комбайн басьтыны азьло 260 тонна чабей вузано вал, али - ичизэ 665 тонна. Нош гурт калык поттэм сиён-юонзэ 4-5 поллы дунтэмгес вуза. Тӥни маин герӟаськемын гуртлэн куашканэз но. Выльдӥськон, рынокен экономикае выжон вакыт кутскем бере, та удыс арысь аре уллань гылӟе, пумен лябӟе. Бен, хозяйствоос вань ик. Но соос но кӧня ке узыр мырдэм возисько, тужгес но усто кивалтӥсьёссы чотын гинэ. Озьы шуыны луэ Вавож районысь Мичурин нимо, "Колос", "Удмуртия", Игра районысь "Чутырский" хозяйствоос сярысь (кивалтӥсьёссы Валентин Калинин, Владимир Красильников, Аркадий Юшков но Валерий Митрофанов). Нош музон хозяйствоосын муоссэс арысь аре аналто-пашмыто. Тани быдэс Россиын 17 миллион гектарлэсь ятыр муос аналтэмын. Удмурт шаерамы но сыӵе ик югдур. 150 сюрс гектар кизёно-гыроно муос буш кыллё, пайда уг сёто ни. Мукет ласянь ке учконо, Москваысь реформаторъёсмы музъемез эркын вузан-басьтон ваньбур карыны тыршо. Кызьы бен сое шонерен лыдъялод? Куанер гурт калык музъем басьтыны быгатоз шат? Ноку уз. Гуртлы кулэ зэмос юрттэт, озьы лэсьто азинскем кунъёс. Государство крестьян калыклы юрттымтэеныз, 1999-тӥ арын кунгож сьӧрысь 14 миллиард манетлы сиён-юон басьтӥз, нош быдэс федеральной бюджет 20 миллиард тыр луэ. Музон кунъёс музъем ужасьёссылы арлы быдэ 70 процентозь юрттэт сёто ке, асьме республикаын со лыдпус - 3-5 процент гинэ. Лизингъя техника басьтыны ичизэ 9,5 миллиард манет коньдон кулэ. Нош шаерамы пудо сиён утялтон басьтыны гинэ 40-50 миллион манет утчано. Кун Кенеш но Правительство огдыре оско вал гурт удыслы юрттэт сётонъя фондлы. Но со озьы ӧз луы. Глазовысь но Сарапулысь ликёро-водочной заводъёс та фондэ кондон уг висъяло. Сотэк фондлэн кулэлыкез быре. Мукетыз ӟырдыт ужпум - МТС-ёс (машинно-технологической станциос) кылдытъян. Али котькуд районын соос вордӥсько ни. Та уж умойгес мынэ Игра ёросын. Тани Зура МТС-ын 3 КСК-100 но "ДОН" ю тысь октон комбайнъёс басьтӥзы ни. Кылдытъясько прокатъя пунктъёс. "Агропромсервис" МТС-ёслы техника басьтыны юрттэ. Та ужен со кылдэм дырысеныз выре, гуртэз выль техникаен узырмытэ. Туэ со пӧртэм программаосты быдэстонэ пыриське. Одӥгез тани герӟаськемын МТС-ёслы юрттонэн. Огазеяськон тая Правительствоен ӵош нимаз программа кутӥз. Али кун бюджетысь 16 миллион манет уксё висъямын ни. Со ваньмыз мыноз пудо сиён дасянъя техника басьтыны. Кыкетӥез сюрес - бюджетэ пырисьтэм ёзъёсысь коньдон шедьтон. Али куд-ог организациосын ӵош проект дасяське. Соя арлы быдэ техника но воштос ёзъёс уксё 30 миллион манет басьтыны висъяськоз. Куинетӥез амал - хозяйствоос, фермеръёс поттэм продукциенызы техника басьтыны быгатозы, ог-огзылы пунэмен сётыса. Тани Глазовысь "Оскон" предприятие йӧлэз переработать карисьёслы оборудование поттыны ӧдъяз. Соя ӵош программа кутӥм. "Осконлы" коньдон сётэ шаерысьтымы одӥгез банк. Табере амалтэк юан кылдэ, кызьы бен берло дыре республика техника басьтылӥз? Ӵошатон вылысь кӧня ке лыдпусъёс верало. 1991-тӥ арозь шаермы арлы быдэ 1500- лэсь уно трактор басьтылӥз, ю тысь кутсан комбайн - 500, пудо сиён дасян комбайн - 300. Нош 1996-тӥ-1997-тӥ аръёсы республика ваньзэ-ӧвӧлзэ 129 трактор, 20 ю тысь кутсан но 15 пудо сиён дасян комбайн басьтыны быгатӥз. Тӥни малы техника вужме. 1991-тӥ арысь машинно-тракторной парк 20 процентлы кулэсмиз. Данакез машинаос 8 арлэсь кема ужало ни. Сыӵе техника 70 процент мында люкаське. Гурт техникалы дунъёсты будэтэмен, нош сиён-юонъёслы данаклы ичигес йылтэмен, странаысь гурт удыс 1991-тӥ-1995-тӥ аръёсы гинэ 183 триллион манет коньдонзэ ыштӥз. Гурт удысъя политика ӧз ке воштӥськы, туннэ туж шуг вераны, кӧня ар чидалоз на та удыс. Куд-огез тодосчиос но специалистъёс 5-7 ар гинэ шуо. Валерий Филиппович Башкортостанэ кенеше ветлэмез пумысен тазьы шуиз, бускель республика, пе, троссэ ӧз быдты-куашкаты. "Башсельхозтехника" азьвыл сямен ик ужа. 25 МТС кылдытӥз ни. Вань техника кунгож сьӧрысь басьтэмын. Со 10 арлы арендае сётӥське. Висъямын ни 280 комбайн. Со пӧлысь 100-эз - "Дон-1500". Сельхозтехника 1 миллиард манетлы басьтэм ни. Паськыт мыно гуртэ газ кыскон, сюрес лэсьтон ужъёс. 3 сюрс иськем газ гумыос вуттэмын, нош сюрес - 900 иськем. Ваньмыз со гурт калык понна лэсьтэмын. Али республикаын 2 сюрс фермер но крестьян хозяйствоос. Башкортостан 80 процентсэ сиён-юонзэ ачиз поттэ. Туж вылӥын музъем ужан культура. 80 процентэз музъемъёссы гыремын. Пудо сиён будэто 500 сюрс гектар вылын. Али МТС-ёс сярысь закон дасяло. Геннадий Романов. Туспуктэмез С. Катаевлэн. Архивысь документъёсъя Удмуртия ЪЪ дауре 1910-тӥ ар калык вылын юн шӧдӥськиз Лев Николаевич Толстойлэн кулэмез. Гимназиосын но семинарийёсын дышетскисьёс кенешъёс ортчытъязы. Толстойлэсь лыдӟыны лэзьымтэ ужъёссэ вӧлмытъязы. Усьтӥськылӥзы лушкемен ужась кружокъёс, библиотекаос. Бере ӧз кыле Урал котырысь: Екатеринбургысь, Глазовысь, сарапулысь егитъёс но. Сарапулысь нылкышно гимназиын кылдытэм кружок сярысь кылӥськиз Кунгурозь. Кызьы пусйиз полиция, отын социал-демократ мылкыдъёс шӧдӥськизы. 1910-тӥ арын гужемысен бугыръяськыны кутскизы ужаса улӥсьёс, тужгес - пичи предприятиосын тыршисьёсыз. Ӵапак та вакытэ асьме доры вуэ синематограф. 1910-тӥ арын сӥзьыл Воткинск "Фурор" нимо электротеатр усьтӥськиз. Та арын ик таӵе театр усьтӥськиз Сарапулын. Таизлы но абдрамон ним лякизы - "Одеон" нимазы. Е. Горбушина, Удмурт Республикаысь Кун Архивысь валтӥсь специалист. Кун Кенеш ивортэ Калыкез кышкытлыклэсь утёнъя кенеш эскериз республикаямы сьӧд но дуно металлъёсын законэз тӥяса вузкаронэн нюръяськонъя ужрадъёс сярысь ужпумез. Кенеше люкаськемъёс азьын вераськизы промышленностья министр Виктор Долгов, югдурез утёнъя министр Владимир Щербаков но Кун Кенешысь Законъя, кышкытлыклэсь утиськонъя но гражданъёслэн правооссыя ялан ужась комиссилэн кивалтӥсез Михаил Кокорин. Ваньзы соос пусйизы, сьӧд но дуно металлъёсты кутонъя но вузкаронъя пусъем ужрадъёс кулэезъя уг быдэсъясько, уноез предприятиос та ужпумез палэнэ кельто шуыса. Калыкез кышкытлыклэсь утёнъя кенешлэн та ужпумъя ӵектонъёсыз матысь дыре эскеремын луозы Правительстволэн кенешаз. Та ужпумез ик Кун Кенешлэн вуоно сессияз, 16-тӥ мае, эскерыны дэмлаз республикалэн Прокурорез Виктор Походин. Ӵектонэз умоен лыдъяз Александр Волков но. *** Кун Кенешлэн Президиумез но Правительство ӵош эскеризы Удмурт Республикаын туэ куинь толэзь ӵоже улон-вылон но экономика удысъёсты азинтонъя программалэсь кызьы быдэсъяськемзэ. Та пумысен ивортӥз Правительстволэн кивалтӥсез Николай Ганза. Со умоен пусйиз огъя экономикаын кылдэм югдурез. Промышленность удысын ваньбур поттон, миым та дырен ӵошатыса, 133 процентлы йылӥз, связья юрттэт сётон - 86,2 процентлы, улон юртъёс лэсьтон - 30 процентлы, 87 процентлы тросгес нуэмын-ваемын пӧртэм грузъёс. Пусйымонэз вань коньдонэн герӟаськем удысын но: предприятиослэн огъя барышсы 3,7 процентлы будӥз. Тросэз хозяйствоос шӧдскымон йылэтӥзы сӥль но курег поттонзэс. Тулыс бусы ужъёсты дыраз но ӟеч ортчытон понна, республикалэн бюджетысьтыз висъямын 45,7 мллион манет коньдон, минерал сылалъёслы - 25 миллион манет, кидыслы - 17,8 миллион манет. Гырон-кизён ужъёсты быдэстыны техника умой дасямын. Республикалэн бюджетаз вуись вытъёслэн лыдзы 85,4 процентлы будӥз, мукет бюджетъёсы - 91,6 процентлы. Азинсконъёс басьтэмын улон-вылон удысын но. Дыраз кулэ ужрадъёс кутэмен, 41,6 процентлы кулэстэмын уждунъя пунэм тыронъёс, со сяна, бюджет удысъя - 46,6 процентлы. Быдэсак быдтэмын пенсиосъя пунэмъёс. 18,5 сюрс адямилы кулэсмиз ужтэк кылемъёслэн лыдзы, яке 42 процентлы. Правительстволэн та ивортонэз лыдэ басьтэмын. Удмурт Республикаысь Кун Кенешлэн пресс-службаез. Даурысь дауре Гуӵинэ ватэм марӟан Тодосчиослэн дуннеязы, Урал но Волга ёросъёсысь калыкъёслэсь вашкала историзэс эскерисьёс пӧлын, Римма Дмитриевна Голдиналэсь нимзэ тодӥсьтэмез ӧвӧл. Пумтэм трос статьяосаз, книгаосаз трос дасо аръёс ӵоже ини пыр-поч тодматэ пермь выжы калыкъёслэн - комиослэн, удмуртъёслэн - сюресэнызы, вашкала узыр культураенызы. Егит дырыз ортчиз Пермь, Свердловск каръёсын. Соин ик, дыр, тужгес но трос ужъёсыз сӥземын коми-пермяк калыклэсь историзэ тодонлы. Та уж луэ солэн яратонэз, шумпотонэз, сюлэмшугъяськонэз, данъяськонэз. Гурезьёсы тубаса нюръёс вылтӥ коласькыса, бадӟым вуос кузя уяса, гондыро сьӧд нюлэсъёстӥ ветлыса утчаз, шедьтӥз асьме выжыослэсь сюе улэм бервылъёссэс-каръёссэс, гуӵинъёссэс (куштӥськем гурт бервылъёссэс), шайёссэс. Пуртныр йылын гудыса - одӥгзэ но вашкала тӥрлыкез сӧроно ӧвӧл. Юрт бервылысь сюй но интыяз ик мед кылёз - мертано, тодоно быдӟалазэ, марлэсь лэсьтэмзэ, мар вал соизлэн я таизлэн пуктослэн пушказ. Шаез гудыку но туж-туж чакласьконо. Сӧрем гинэ ӧвӧл, вань арбериосты, чеберъянъёсты, дӥськут, шайпул бервылъёсты интыязы кельтоно-мертано, суредано, тусбуйзэс шукконо. Миллиметр вӧзы миллиметр ватсаса, гужем вылтӥ археологъёс усьто каръёсты, гуӵинъёсты вашкала шайгуосты. Тужгес но узыресь, бадӟымесь памятникъёсты дасо аръёсын но гудо. Та уж - Римма Дмитриевналэн, Удмурт кун унвиреситетысь сӥё-дано тодосчилэн, история наукаосъя докторлэн, профессорлэн, Урал котырысь калыкъёслэсь историзэс эскеронъя институтлэн директорезлэн быдэс улон-вылонэз. Туж сюлмо ужась-тыршись, бадӟым культураен, нимо-дано археологъёс О. Н. Бадер но В. Ф. Генинг (кыксы но - Россиысь немецъёс, асьме калыкъёслэсь вашкала историзэс эскерисьёс) кивалтэм улсын наукаын ужаз Р. Д. Голдина. Нош та дыре солэн дышетӥсьёсыз улонысь кошкизы ни. Но быдэс Россие, тужгес но - Урал но Волга котырысь городъёсы кылизы соослэн дышетскисьёссы - туннэ тодмо тодосчиос. Асьмелэн Ижамы, Удмурт кун университетын, кылдэмын археологъёслэн бадӟым школазы. Отын быгатыса, тырше Римма Дмитриевна Голдина. Удмурт калыклэн вашкала историеныз но культураеныз тунсыкъяськисьёс понна туннэ праздник: калыклэн кияз вуиз туж бадӟым но чебер книга. Солэн нимыз - "Древняя и средневековая история удмуртского народа". Быдӟалаез но мурдалаез зэмзэ ик паймытэ - ньыль сю куатьтон ньыль бам. Удмуртлыкез эскеронын, тодытонын тыршем тодосчиослэн П. Н. Лупповлэн, Г. Е. Верещагинлэн, Н. Г. Первухинлэн, В. Ф. Генинглэн, Т. И. Тепляшиналэн, В. Е. Владыкинлэн, М. В. Гришкиналэн нимъёссы вӧзы зарни букваен гожтӥськыса кылёз Р. Д. Голдиналэн нимыз но. Таӵе ужъёс туж шер вордӥсько. Но со понна кема уло. Таӵе секыт аръёсы но нодлыко муртъёс быгато чебер, кие кутымон книгаос поттыны. Та сӥё-дано, кужмо тодосчилэн вирсэртӥз бызе востэм, возьдаськись, ужез яратӥсь удмурт калыклэн вирыз - солэн песянаез удмурт вылэм, Киров улосвылысь Уни котырын вордскем удмурт ныл. Оло нош, песятай выжыосыз но Удмуртиысь ик потэмын вал - юнме ӧвӧл, дыр, Р. Д. Голдиналэн ныл фамилиез Вотинцева. Римма Дмитриевналэн та книгаез вашкала ӵыжы-выжыос понна вужмисьтэм кузьым луэ. Азькыл сӥзёнэз ик сюлме пыре: "Многим поколениям удмуртского народа, народа-труженика посвящается..." Книгалэн нырысь чуръёсыз кутско удмурт калыклэсь кылдон, азинскон сюресъёссэ эскерись тодосчиослы тау карон бордысен. Кыл, фольклор, этнография, антролопогия удысъёсын мар гожъямын вал вашкала удмуртъёс сярысь, ваньзэ тупен-тупен эскере, дунъет сётэ но аслаз ужаз кутэ. Табере кутске ини ужезлэсь инъетсэ - археология люкетсэ - котыр ласянь сэрттыны-пертчыны. Тодэмды потэ-а, ку, кыӵе вакытэ, кытчы интыяськизы нырысь адямиос асьмелэн Камдор, Ватка улосъёсамы? Лыдӟе Р. Д. Голдиналэсь книгазэ. Тододы, удмурт шаере кӧня сюрс аръёс талэсь азьвыл вуизы нырысь адямиос, мар ужазы соос, кызьы улӥзы, маин кӧтсэс тыризы, кыӵе вал дӥськутсы, улон но ужан тӥрлыкъёссы, осконзы, сямъёссы... Туала наукалэн азинсконъёсыз вылэ пыкиськыса, тодосчи маде урал, финн-угор дӥнькылын вераськись калыкъёслэн кылдон, азинскон сюресъёссы сярысь. Бадӟым инты висъям паймымон узыр, туж паськыт вӧлмем ананьино культураез котыр ласянь сэрттонлы-пертчонлы. Та туж тодмо, сиё-дано культураез кылдытӥзы комиосын огкадесь ӵыжы-выжыосмы ог 2800 ар талэсь азьвыл. Быдэс Камдор улосын, Ватка Кам (Вятка) но Тӧдьы Кам (Белая) шуръёс котырысь улосвылъёсын, Волга, Ветлуга, Вычегда, Сысола, Уйпал Двина, Печора шуръёс кузя улӥзы пермь выжыысь калыкъёс - комиослэн но удмуртъёслэн одӥг кылын вераськись выжы-кумыоссы. Ӝужытэсь гурезь йылъёсы, ӵемгес - шуръёслэн меӵ яр йылъёсазы, тушмонлэсь утиськон понна, каръёс (крепостьёс) лэсьтылӥзы. Та вакытэ ик ини асьме выжыос дышизы музъем ужаны, пудо вордыны. Чылкак паймыто ыргонлэсь-туйлэсь лэсьтэм ужан, ожмаськон тӥрлыкъёс, чеберъяськон-кильтыръяськон арбериос. Вузкаризы бускель иран выжыосын-скифъёсын, сарматъёсын, массагетъёсын - озьы ик - Кавказысь, Шор Азиысь, Сибирьысь, Скандинавиысь калыкъёсын. Ог 2300 ар талэсь азьло ананьино культураез кылдытӥсьёслэн улон сюресы кык пала вайяське: уйпал шаеръёсын - Камлэн уйпал люкетаз, Вычегда, Вымь, Печора шуръёс котырын кылдыны кутске гляденово шуиськись археологической культура - та луиз коми калыклэн кылдон инъетэз, нош лымшор люкетаз - Кам, Тӧдьы Кам, Ватка Кам, Волгалэн шор вадесозяз кылдэ пьяноборской археологической культура - удмурт калыклэн кылдон инъетэз. Та вал огсыр улон: ужан, кулэ дыръяз - ожмаськон вакыт. Та вие вашкала песятайёсмы кужмо калык вылэм: шаерысьтымы вань бадӟымесь шуръёсты соос киулазы возизы. Ананьино вакытэн ӵошатыса, улон интызы ӧжытак сюбегаз ке но, Чеганда, Карабыз котыръёсын улэм ӵыжы-выжыосмы синмаськымонэсь киуж бервылъёссэс кельтӥзы вашкала каръёсы, шайёсы, гуӵинъёсы. Вал соослэн кужмоесь, юнматэм каръёссы. Паймытэ туала Башкириысь Охлебнино гурт дорысь шедьтэм вашкала карлэн (городищелэн) бервылыз - 250 сюрс квадрат метр! Таӵеез быдэс Уралын, Волга улосын но ӧй вал (сюрс ар ортчыса кылдэм Иднакарлэсь со вить пол бадӟым, ява!). Та карлы кыдёкын ик ӧвӧл шедьтэмын вашкала выжыосмылэн шайзы - 10 сюрс мурт ватэмын отчы! Таӵеез нокытысь но шедьтэмын ӧвӧл на. Жаляса верано луэ: та карез но, та шаез но туала аръёсы эскерись ӧвӧл. Башкир археологъёс утчало асьсэ выжыослэсь улэм бервылзэс, нош удмурт тодосчиос понна Башкирия - мурт элькун ини; коньдон ласянь но туж секыт луэмен, берло дас арзэ археологъёс экспедициосы, гудӥськонъёсы йӧназ уг ни ветло. Одӥг карын ик, одӥг та шайын ик мар но ватӥськыса уг улы, дыр?! Нош мукет интыосын кӧня каръёс, гуӵинъёс, шайёс?.. Соос сюосын лыдъясько. Ку но кин эскероз на соосты? Туж тросэз куашкало, быро. Электростанциос пуктэм бере, пумтэм трос вашкала синпелетъёс (памятникъёс) Кам ву улэ кылизы. Нош кӧнязэ быдто сад-бакча возисьёс?!. Ог 1700-1600 аръёс талэсь азьвыл кыдёкысь Алтай, Монгол, Бурят улосъёсысь потэм, кӧчыса ветлӥсь тюрк, монгол выжыос огазеяськыса кужмо войско кылдыто но шаплы валъёсынызы, лэчытэсь палашъёсынызы вырӟо шунды пуксён пала. Кыр дуннеын улӥсь вань калыкъёсты пыд улазы лёгало, кылемзэ асьсэлы ожгарчи каро. Шимес вакыт вал. Гуннъёслэн ожъёсын юнмам армизы туала Венгрия дорозь вуиз, бӧрысь Италие, Францие но вуизы. Та шимес армилэсь ватскыса, кыр дуннеысь трос выжыос нюлэсо шаеръёсы но ватскыны тыршизы. Камдур улосын шедьтэмын соослэн шайёссы. Та вие пьяноборье нимо культура пичиесь люкетъёслы висъяськыны кутске. Та кышкыт вакытэ Уралысь ӵыжы-выжыосмы бадӟым шуръёс дурысь пеймыт нюлэсъёсы, Иж, Вало, Чупчи выллем пичи шуръёс котыре улыны выжо. Туала Башкир музъеме дугдылытэк вуыны кутско кӧчыса ветлӥсь калыкъёс (кочевникъёс) - туала башкиръёслэн, бигеръёслэн, венгръёслэн ӵыжы-выжыоссы. Удмурт выжыос, кужымзы бырытозь, та ӧтьымтэ "куноослы" пумитъяськизы. Ог 1300-1200 аръёс талэсь азьвыл удмурт выжыос - оглюкетэз - Ватка улосэ, туала Удмурт шаере кошкизы, но туж тросэз вуэм калыкъёс пӧлы сылмыса быризы. Тазьы асьме калык сьӧд нюлэсъёсы ватӥськыса улыны кылиз. Тюрк выжыос бере вуизы ӟучъёс. Ышыг, чебер, пырыны шуг луись Чупчи шаерын гинэ удмурт выжыос кужмоесь каръёс, азинскем культура кылдытыны быгатӥзы на. Зэмзэ ик, данъяськыса вераны быгатӥськомы Дондыкар, Учкакар, Иднакар, Гурьякар выллем юнматэм каръёсты- крепостьёсты кылдытӥсь ӵыжы-выжыосмы сярысь. Та каръёсмы ышем бере, удмурт калыклэн бурдъёсыз музъем вылэ лэзиськизы, ымнырыз му вылэ пуксиз. Европаысь калыкъёс, христиан осконэ выжыса, азинскем кунъёс кылдытӥзы, нош удмуртъёс вашкала сямъёсынызы кужмо калыкъёслы ляльчи радэ кылизы. Эх, история!.. Улон-вылон, дунне питыран! Та берпум абзацъёсысь чуръёсы Р. Д. Голдиналэн книгаысьтыз басьтэмын ӧвӧл. Со - мынам аслам малпанъёсы, мукет тодосчиослэсь ужъёссэс мур-мур эскереме бере кылдэм сюлэмшугъяськонъёсы. Котькудзэ но бадӟым ужез лыдӟем бере кылдо кыӵе ке но юанъёс, маин ке но огкылысь луымтэос. Та бадӟым книгаез лыдӟем бере но кылдӥзы юанъёсы, аслам малпанъёсы. Тодосчиослэн куд-ог веранъёсынызы огкылысь луыны уг быгатӥськы. Кылсярысь, Чупчи котырысь вашкала, узыресь памятникъёсмес авторлэн малы ке но коми-пермякъёслы сётэмез потэ. Берлогес Ватка улосысь удмуртъёс татчы, пе, вуизы но, ЪИИИ дауре нош ик татысь калык кошконо луиз, тросэз, пе, вашкала дор музъемазы - коми-пермякъёс пӧлы - кӧчизы. Чупчи батыръёс сярысь мадьёс, шуэ, кылдӥзы ЪВИИИ дауре гинэ. Мынам авторлы таӵе юанэ вань: каръёсысь калык вить сю ар азьвыл пӧртэм интыосы кошкиз но, татчы выль интыосысь калык вуиз ке, кызьы быгатозы на соос тып-тып удмурт нимо, удмурт сямо, удмурт каръёсты кылдытӥсь батыръёс сярысь мадьёс кылдытыны? Бускель Пермь улосвылын кадь туж ӵем пумиськись ва кылын (Сылва, Тулва, Лысьва, Косьва) инты нимъёс но ӧвӧл, шуыны луоз. Чупчи дурын коми-пермякъёс улӥзы ке, таӵе нимъёс одно ик татын трос луыны кулэ вал. Шур нимъёс шер вошъясько. Арча карлэсь кылдэмзэ автор герӟа Зарни Урдоысь вуэм бигер-монгол выжыосын. Революцилэсь азьвыл гожъям авторъёслэн, уката но - араб, вашкала ӟуч летописьёслэн Арча музъем, ар калык сярысь гожъямъёссы лыдэ чик басьтэмын ӧвӧл. Нош кӧня веранъёс, мадьёс герӟаськемын Арча музъемен! Удмуртъёс пӧлын гинэ ӧвӧл, соос гожтэмын бигеръёс, ӟучъёс пӧлын но. Арча музъем - удмурт калыклэн одӥгез азинскем шаерез вал. Но туж ӝож: Удмуртиысь археологъёс татын йӧназ ӧз но ужалэ на, нош туала бигер тодосчиослэн Арча музъемез ар - удмурт - калыкен чик но герӟамзы уг поты. Со гинэ ӧвӧл, вань соос пӧлын Чупчи котырысь памятникъёсты но ас калыксылы карыны турттӥсьёс. Та бугырес вакытэ кинлэн мар верамез потэ - вера, мар каремез потэ - каре. Гожтоно ке, бумага ваньзэ чида, со гожтэм зэмос историез но мыдланьтыны быгатэ. Ачиз автор гожтэ, саргат но кушнаренко культураосты угор (ханты, манси, венгр) выжыос кылдытӥзы шуыса. Калыкъёс кӧчыны кутскон вакытэ кӧня ке но люкетъёсыз Удмурт шаерамы но, пе, вуизы (Чупчи дуре, лымшор Удмуртие - Карйыл-Утчан котыре), нош инты нимъёс сярысь вераны кутске но ханты, манси, самоди кылъёсысь нимъёсты ӧвӧлэн лыдъя. Шур нимъёслы чылкак тупасьтэм этимология сётэ: Лумпунь шур ним кылдэмын шуэ удмурт "шурлэн лымшор пумыз" кыл бордысь. Одӥг удмуртлэн но визьмыз уз тырмы таӵе кроссвордэз тазьы ёзнаны: Лумпунь - "шурлэн лымшор пумыз". Топонимистъёс тодо: шуръёслы таӵе нимъёс уг сёто, соосты ӵемысь нимало "изо", "ошмесо", "паськыт", "чырмыт", "чус", "нюлэсо", "сьӧд", "тӧдьы", "горд" выллем кылъёсын. "Калмез" выжы нимез удмурт "кылемез" кылын герӟа. Чик осконтэм. Малы "кылемез" удмурт кылэз туала удмуртлы чик валантэм "калмез" кыллы пӧрмытоно вал? Соку юан кылдэ: "кылемез" выжы вылэм ке, кытын "кыльымтэез"? Гажано эшъёс! Ваньмыз та - чыры-пыры юанъёс, веранъёс. Дыр вуоз - Удмурт кун университетысь археологъёс Казаньысь, Москваысь, Удмурт НИИ-ысь археологъёсын, антропологъёсын, кылчиосын, мадьёс гожъясь тодосчиосын ӵош одно ик мур-мур эскерозы Арча музъемез, Чупчи котырез, Калмез шаерез, Ватка, Башкырт улосвылъёсысь памятникъёсты, отын улӥсь калыкъёсты но выль малпанъёсы вуозы. Тодонлык - азинскись маке, пукись ву кадь со, огинтыяз лёгаськыны ке кутске, пашме но быре. Азьпалан асьмеды витё на туж тунсыкоесь статьяос, зӧкесь книгаос, альбомъёс. Нош али, гажано Римма Дмитриевна, вань удмурт калыклэн нимыныз тӥледлы туж бадӟым тау кареме потэ таӵе бадӟым, туж узыр пуштросъем, синмаськымон книга гожтэмды понна. Инмар тӥледлы улыны, ужаны, удмурт калыклэн историезъя выль книгаос гожъяны кужым, азинлык мед сётоз. Тау! Михаил Атаманов, филология наукаосъя доктор. Вуоно сессия азьын 10-тӥ мае люкаськылӥз Кун Кенешлэн Президиумез, отын эскеризы сизьым ужпумез. Президиум нырысь ик юнматӥз Кун Кенешлэн дас одӥгетӥ сессияз (16-тӥ мае) эскерыны чаклам ужпумъёсты. Соос пӧлын: "Удмурт Республикаез азинтонъя бюджет сярысь", "Удмурт Республикалэн Президентэз сярысь", "Удмурт Республикалы Президент быръён сярысь", "Удмурт Республикалэн Быръён комиссиез сярысь" законъёслэн инъетъёссы но Кун Кенешлэн куд-ог постановлениосаз воштонъёс, ватсанъёс пыртонъя ужпум. Озьы ик кенешын умоен лыдъямын Волгоград областьысь Думалэн "Табышез азьпала лыдъяса басьтэм выт сярысь" Федеральной Законлэн 5-тӥ ёзэтаз ватсан пыртон сярысь ӵектонэз. Со герӟаськемын интыын аскивалтон ёзъёслы вытъя ужпумъёсты асьсэлы сэрттыны-пертчыны тросгес луонлыкъёс кылдытонэн. Кенешын трос вераськон мынӥз нянь пыжон промышленностьлэсь акциоссэ мукет кузёослы вузан но Удмурт Республикалы акциосын "Воткинский хлебокомбинат", "Глазовский хлебокомбинат", "Ижевский хлебомакаронный комбинат", "Игринский хлебозавод", "Камбарский хлебокомбинат", "Можгинский хлебокомбинат", "Удмуртхлебпром", 1 номеро хлебозавод, Ижевскысь 2 , 3 но 5 номеро хлебозаводъёс, "Сарапульский хлебокомбинат" огазеяськонъёсын кивалтонэ пыриськыны нимысьтыз правоос сётон сярысь. Та ужпумъёсты эскерыку, трос юанъёс кылдӥзы пызь изонэз но нянь пыжонэз пайдаёгес радъян ласянь. Удысэз ӟечгес азинтон вылысь, нимысьтыз ужась группа кылдытэмын. Соин кивалтыны оскизы Кун Кенешлэн Тӧроезлэн нырысетӥ воштӥсезлы Владимир Агашинлы. Та ужпумез эскерозы на Президиумлэн вуоно кенешоназ но. Удмурт Республикаысь Кун Кенешлэн пресс-службаез. Ижысь мэриын Кудӥз урам шулдыргес? Городэз чылкытатонъя ужрад-месячник йылпумъяськиз. Солэсь кызьы ортчемзэ тодон вылысь, мэрия журналистъёслы Ижысь куд-ог интыосты ас синмыныз учкыны ӵектӥз. Ужрадэ пыриськиз вице-мэр В. И. Засыпкин. Вормон нуналозь быдэстыны чаклам ужрад огъя кужымен йылаз-пумаз вуттэмын, сокем ӟеч ӧвӧл ке но. Кинлэн кызьы тыршемез соку ик адӟиське. Шумпотоно автозавод, пластмасса поттон завод, "Нефтемаш", "Ижмаш" но мукет предприятиос понна. Тол ӵоже азбаръёсын люкаськем жуг-жаг ЖКУ-осын ог 85 процент мындаез сузямын. Городлы трос сюлмаськонъёс ваё базаръёс. Ижын огъя люкаськись жуг- жаглэн ог 10 процентэз Восточной базарысь потэ. Озьы ке но, В. И. Засыпкинлэн малпамезъя, вокзалъёслэсь кырсь инты городын ӧвӧл ни, дыр. Нош журналистъёс чакламъя, тужгес паськыт но кузь урам - Удмуртской, егитэз - Октябрьлы 10 ар нимо, трос мынӥсь-ветлӥсен - Карл Либкнехт урам, тужгес кырсез - Молодёжной, чеберез - Вормонлы 40 ар нимо урам. Шӧкыч Вылӥос маскаръясько Вылӥ кивалтӥсьёсты асьмеос син азямы малы ке но кунэрес тусо пуктӥськом. Нош данакез соос маскара кылъёс вералляло. Яке юри, яке шӧдтэк кыльыса. Куддыръя шараяло ас малпанзэс, кытӥяз тодэ вайыто музонъёслэсь кылъёссэс. Борис Ельцин: "Жить будем плохо, но недолго". *** Александр Волков: " Вечер хорош, когда речи короткие, а колбаса длинная". "Чем дальше в лес, тем толще партизаны". Нянен вузкарон компанилэн кивалтӥсез котырын следствие нуись ёзъёс берганы кутскем бере: "Клюшник был при хлебе, а остался на сухарях". "Учить учёного - только портить". "Нас ждет светлое будущее в беспросветном рынке". *** Удмурт Республикаысь Правительстволэн Тӧроез Николай Ганза лулскиз: - Нылпи пособиосын югдурез сэрттыны-пертчыны шуг. Удмурт Праивтельство сётэм кылзэ быдэстӥз ик шуиськоды кадь. Если на меня будут наезжать, я могу их посылать? *** Николай Ганзалэн ӝӧк вылаз гожтэт поныны шуг. Правительствое вуэм котькуд бумага потэ пӧртэм цӥсъёс пыр. Тӧро доры туж ичиез тубе. Одӥгзэ сыӵе гожтэтэз Николай Алексеевич пичигес кенешын шара лыдӟиз. Удмурт Республикаысь Наукаосъя академилэн президиумез (вань сыӵе бадӟым нимо но огшорыгес гинэ кужмо общественной организация), городысь ӟуч кылэз утёнъя конференцилы дурбасьтыса, Правительствоез куре таӵе постановление кутыны: ӟуч кылъёсын ё куара кылӥськыку е ӧвӧл гожъяно - ё гожъяно. Ганза пайме: мар-о, Правительстволэн ё буква сяна нокыӵе сюлмаськонэз ӧвӧл ни шат? Правительстволэн Наукая, вылӥ но шор профессиослы дышетонъя комитетэзлэн тӧроез, химия наукаосъя доктор Сергей Решетников султэ: - Ми пӧлын, учёнойёс пӧлын, сыӵе визьмо адямиос трос. Люкаськемъёс ӵаш! горо. - Но мон сыӵе ӧвӧл. *** Кун Кенешын быръё комиссиослы тӧроосты. Отчы сюрон понна ичизэ 51 куара кулэ. Алексей Красильников, дано писательлэн Геннадий Красильниковлэн пиез, люказ 51 куара. Трибуна сьӧры потӥз но шуиз: - Тужгес ик мур тау карисько мон понна куаразэ сётэм 51-тӥ депутатлы. Кин мыным дурбасьтӥз, ваньды асьтэды лыдъялэ 51-тӥ депутатэн. *** Кун Кенеше берло быръёнъёс азьын коммунистъёс ялӥзы: - Депутатъёсмы трос луизы ке, Михаил Иванович Шишкинэз ми Кун Кенешлы Тӧро карыны турттом. Шишкин соку кивалтэ вал Кун кенешысь Эскеронъя палатаен. Кун Кенешлэн аппаратаз ужасьёслэн кенешонзы азьын Наукая, дышетонъя, культурая но егитъёсын ужан политикая комиссилэн тӧроез Алла Еременко ивортӥз: - Луыкуз Тӧро вӧзы пуксьыны турттоно на. Жаляса вераны кулэ: Шишкин но, Еременко но депутатэ ӧз сюре. *** "Гарант" огазеяськонлэсь кивалтӥсьсэ, Кун Кенешлэсь депутатсэ Даниил Белоголовкинэз ӟечкылало вордскем нуналэныз. Кун Кенешлэн Аппаратэныз кивалтӥсь Александр Фоминов пальпотэ: - Россиын кык гинэ гарант - Ельцин но Белоголовкин. *** Кун Кенешлэн комиссиеныз кивалтэм учёной историк Юрий Семенов: "Интеллигентный журналист имеет позвоночник". "Симбиоз журналиста и политика должен быть похож на связь между березой и подбрезовиком". "Консенсусы под столом не валяются". "Жить в России не быть сатириком невозможно". "Здравый смысл нам подсказывает: Солнце кружится вокруг Земли. Но можно ли верить этому?" *** Кун Кенешлэн депутатэз Александр Лопатин: "Нужно наконец принять закон о принятии законов". *** Кун Кенешлэн тӧроезлэн азьвыл воштӥсез учёной Владимир Пономарёв: "Часто повторяющиеся случайности есть закономерность". "Не бывает глупых вопросов, бывают глупые ответы". *** Кияса районысь Советлэн тӧроез Надежда Шатрова: "В Косолапове создадим муниципальное образование. Там хуже уже не будет, поскольку хуже некуда". *** "Удмурт Правительстволэн азьвыл Тӧроез Николай Миронов: "В вопросах развития культуры мы еще не схватили бога за бороду". *** Набережные Челны вал Брежнев город, Иж - Устинов. Городъёсты герӟась телефонистка - заказ сётӥсьлы: - Устинов, ответьте Брежневу. *** Селталан улӥсь Широких: "Дас ар талэсь азьвыл мон кылдытӥ аслэсьтым партиме. Отын кык мурт - мон но кышное". *** Красногорск районысь Малягуртын улӥсь политик Василий Спиридонов: "Ватымтэ мурт кӧшкематэ гуртэз. Ватымтэ Ленин кӧшкематэ быдэс кунэз". *** Вузкаронъя министрез Анатолий Синюшинэз ужысь кушто. Партилэн обкомезлэн нырысетӥ секретарез Валерий Марисов юа: - Ну, куда вы теперь? - Я предпочитаю работать с умными людьми. *** "Удмуртская правда" газетлэсь редакторзэ Юрий Кедровез обкомлэн секретарез пыже: - 1934-тӥ арын потӥз митингъёс сярысь закон. Тӥ, солэсь куронзэ вунэтыса, демократъёслэн пумиськонзы сярысь ивор сётӥды. Закон кужымзэ ыштӥз ни шат? Кедров: - Тӥ тодамы вайытэлэ на вал Веткий завод шуонэз. Оло, отын но митингъёс сярысь маке верамын? *** Редактор сизьдэ корреспондентэз: - Тон малы Сталинградэз Сталингад гожтӥд? Малы янгыштэ дежурной полосаысь ӧд тупаты? - Полоса тӥ киын вал. Асьтэос ӧд лыдӟе шат? - Мон - кивалтӥсь республиканского масштаба - полоса учкыны уг ваньмиськы. А. Шкляев. Удмурт Элькунысь национальной театр май толэзе таӵе спектакльёс возьматоз: 15 мае Т. Ардашева Е. Загребин "Тӧдьы льӧмпу улын" - 18.00 Кык ёзэн лирической драма 17 мае Т. Чернова В. Ушаков "Айна" -18.00 Кык ёзэн крезьгуро драма 19 мае Нылпиослы В. Зимин "Жили-были две лисички" Кык ёзэн выжыкыл. Кутске 10.00 но 13.00 часэ. Юалляськоно 78-79-81, 78-45-92 телефонъёсъя. Музейлы - 25 ар Кызь вить ар тырмиз "Буммаш" огазеяськонысь музейлы. Нырысь-валысь солы пичи сэрег гинэ висъязы. Музеез бадӟымгес интые выжтэмзы бере гинэ кылдӥзы стендъёс, пӧртэм альбомъёс, заводын поттоно вузъёсты адӟытонъёс. Туннэ музеен но адӟытонниосын центрын заводлэсь быдэс историзэ тодыны луэ. Синмаськымон ужъёсыз понна завод пусъемын Ужысь Горд Знамя орденэн, 1965-тӥ арын ыргонлэсь кисьтэмын нырысетӥ пилет. Предприятилэн данъяськонэз - кагаз поттон Б-15 но Б-28 машинаос, фотохимияя промышленностьлы оборудование но мукет. Соослэн макетъёссы музеез чебермало. Тунсыко учкыны "Буммашевец" газетлэсь бамъёссэ. Со нырысетӥ номеръёсысеныз ик люкамын татын. Кылем арын центр эшшо шӧдскымон узырмиз. "Буммаш" АО кылдэмез дырысен 40 ар тырмонзэ пусйиз. Таин валче данак кузьымъёс кузьмамын. В.СЕНЧЁНОК. Уло ӟечез но уродэз куспын Восточно-европейской университетысь "Грифон" галереяын усьтӥськиз Россиысь дано суредасьлэн Виталий Войловичлэн ужъёсыныз выставка. Екатеринбургысь тодмо иллюстраторез Россиын сяна ӟеч тодо Австриын, Америкаын, Германиын, Израильын, Франциын но мукет кунъёсын. Солэн геройёсыз уло но нюръясько ӟечез но уродэз, кулон но улон куспын. Виталий Войлович тужгес тодмо луэ классической литературалы суредъёс дасяменыз. Тужгес синмаськымонъёсыз "Слово о полку Игореве" вашкала ӟуч синпелетлы, Ж.Бедьелэн "Роман о Тристане и Изольде", И.Гётелэн "Эгмонт" ужъёссылы суредъёсыз но мукет. Н.ЛИПИНА. Университет нош ик ӝуа Уг удалты берло дыре Удмурт кун университетлы. Я компьютеръёссэ лушкало, я тылпу потэ. Кемалась ик ӧвӧл ньылетӥ корпуслэн сигез ӝуаз. Таяз учыре нош ик тыл кузёяськиз. Куке калык Вормон салют бырем бере, Шор площадьысь бертӥз но капчи мылкыдын изьыны выдӥз, УдГУ-лэн кыкетӥ корпусэзлэн сигез кенжиз. Сиг сяна, вӧлдэтлэн ог люкетэз ӝуаз на. Ӝуам интыысь шедьтэмын бензин возён канистраос. Сиг огвакытэ кӧня ке интыетӥ кенжем. Таӵе югдур вера, университетлэн корпусаз юромо тылпу понэмын шуыса. Учырез али эскеро тылпу кысӥсьёс, милиция, ФСБ. Кинлы люкетэм УдГУ-лэн самой пересь корпусэз - возьматоз следствие. Тылпу дыраз кысэмын вал ке но, ыштон трос люкаськиз. Кылсярысь, шукы компьютеръёсты ӵоктаз. Соос сӧриськиллям ке, Удмурт университетлы эшшо одӥг шуккет луоз на. Кыкетӥ корпусысь факультетъёс уг дышетско. А. Андриянов. Ӝажыосысь, борддоръёсысь адӟоды Быдӟым ож аръёсы Отечествомес утьыны Удмуртия ыстӥз 364 сюрс пиоссэ но нылъёссэ. Со сяна, 30 сюрслэсь уноез егит пиосмы, 1938-тӥ-1940-тӥ аръёсы службае кошкемъёс, войнаез пумитазы Горд Армиын. Советской Союзлэн Героез дано ним сётэмын 99-сэзлы асьме воинъёслы, со пӧлысь 21-езлы - быремзы бере. Зол юрттӥзы фронтлы асьме заводъёс. Интызэ паськытатытэк, выль оборудование пуктытэк но, Ижысь машиностроительной завод винтовкаос поттонзэ йылэтӥз 30 пол. Дасяны кутскизы карабинъёс но. Тушмон такнъёслы, авиацилы пумит пыӵал тӥрлык поттон радъямын вал. Машзаводын ик лэсьтылӥзы Березинлэсь бадӟым калибрен пулемётъёссэ, 37 миллиметръем пушкаос, "Ил-2" самолётъёс. Ижын кисьтэмын фронтлы 1484 сюрс тонна андан. Удмуртиысь калык ужаз торф поттонын, нюлэс дасянын, пӧртэм лэсьтӥськонъёсын. Кыскемын ог 150 иськемъем Ижевск-Балезино чугун сюрес. Уралысь мукет городъёсы сямен ик Ижевске трос ваемын вал эвакуацие шедемъёс. Ӝуась интыосысь татчы выжтэмын бадӟым предприятиос, нылпи юртъёс, культурая, калыкез дышетонъя учреждениос. Быдӟым ож вакытысь син азе пуксись пӧртэм материалъёсын тодматскыны быгатоды, та нуналъёсы национальной библиотекае пырыса. Татын ик тӥ шоры учкозы Удмуртиысь художникъёслэн ожлы сӥзем суредъёссы, асьме писательёслэн та темая книгаоссы. Шаертодонъя но финн-угор литературая отделлэн ӧсъёсыз усьтэмын 10 часысен 20 часозь. Г.НЕМЦОВА. 02 ивортэ Пересез вииз Можга ёросысь Кинеусь гуртысь лулсэр висёнэн курадӟись 14 аресъем пияш одӥгаз ӝытэ 83 аресъем пересь кышномурт доры пыриз но йыраз бодыен коказ. Мискинь кулӥз. Пияшлы соин гинэ ӧз тырмы. Пересьлэсь мугорзэ коркась поттыса, куро чумолёын сутыны турттэ вал. Но кышномуртлэн бускельёсыз тылэз адӟизы но кысӥзы. Пияш та вакытэ милициын. Юод-а, эше? Уйшор берозь юыса пукизы Кияса ёросысь Ленин нимо совхозысь 39 аресъем сварщик но 43 аресъем шофёр. Кыл бӧрсьы кыл, керетон ӝутскиз. Нырысетӥезлэн лулсӥосыз ӧз чидалэ ни. Пурт кутыса, юись эшезлэн мӧляяз донгиз. Сварщикез югдурез утисьёс ӝегатӥзы, пуртсэ талазы. Нош 43 аресъем юлтошез улонэныз люкиськиз. "Пенсионер" Ижысь милиционеръёс кырмизы "пенсионерез". Солы 25 арес, пе... Егит кышномурт аслыз пенсионной удостоверение лэсьтэм. Трос-а пайда ваиз со ныллы - возьматоз следствие. Вераны кулэ, документъёсты алдаса тупатъям понна уголовной уж ӝутӥське. Куинь ар но сётыны быгато. Дуно корт котьку но дуно Якшур-Бодья тракт вылын дугдытэмын вал ВАЗ-2109 машина. ГИБДД-ын ужасьёс багажникысьтыз 80 килограмм алюминий шедьтӥзы. 23 аресъем К., урамъёсысь пукон интыосты тӥяса, дуно корт люкам. Шабердино сюрес вылын ӝегатэмын Иж-П-3 мотоцикл. Солэн коляскаысьтыз шедьтэмын 50 килограмм алюминий листъёс. Кортлы нокыӵе документъёс ӧй вал. "Ижсталь" завод дорысен дугдытэмын КамАЗ. Кузовысьтыз 36 сюрс манет тыр сыномисьтэм корт шедьтэмын. Машина лыдъяське "Союз-1" предприятие вылын. Нош кортэз нуон понна документъёс пӧяса лэсьтӥллям "Ижагропромтранс" вылэ. Ульяновскысь доллар Ульяновск улосвылысь 35 аресъем Л. Можгаысь базарын умойтэм учыре шедиз. 100 долларъем банкнотазэ воштыкуз, сое ОБЭП-ын ужасьёс кырмизы. Кышномуртлэн долларез зэмос вылымтэ. Кин ке пӧям-а нылкышноез яке со мукет улосъёстӥ суредам "уксёзэ" пайдаё вошъяса ветлэ-а, возьматоз следствие. Удмурт Республикаысь МВД-лэн сводкаосызъя дасяз А. Андриянов. Журналистъёсын пумиськонъёс Выжоз-а Кун Дума Санкт-Петербурге? Таяз учыре журналистъёсын пумиськылӥз Кун Думалэн депутатэз, КПРФ-лэн элькун комитетэзлэн нырысетӥ секретарез Николай Иванович САПОЖНИКОВ. Пресс-конференцилы нунал, вашкала ӟеч сямъёсты тодэ вайыса кадь, 5-тӥ майлы быръемын вал. Май праздникъёсын ӟечкыламез бере, Н. И. Сапожников вераз Кун Дума сярысь. Ужаны кутскем дырысен апрель тужгес но пайдаё вал. Нырысь ик вераны кулэ СНВ-2 огкылэз умоен лыдъян сярысь. Трос аръёс ӵоже Дума сое ӧз юнматы. Огкыл умой кадь, нош шугъяськон вань. Вераськон мынэ СС-18 секыт ракетаосъя. Лобыкуз со 10 пичи ракетаослы люкиське. Ӝоген та техникаез быдтозы, интыяз мукет ракетаос уже кутэмын луозы. Тырмоз-а кужыммы соосты воштыны? Огкыл умоен лыдъямын бере, оскон вань, дыр. Но депутатъёс-коммунистъёс документлы пумит вал, Россилэн экономикаез уз чида шуыса. Ваньмыз тодмо луоз июне. США, ракетаослэсь утиськон вылысь, выль системазэ кутӥз ке, соку Россия СНВ-2 огкылэз быдэсъямысь дугдоз. Законъя со лэземын. Удмуртиысь коммунистъёс али конференцизылы дасясько. Ортчоз со 27-тӥ мае. Отын эскерозы элькун комитетлэсь выль ужан удысъёссэ. Кызьы шуиз Николай Иванович, партилэн валтӥсь ужпумез - ас радаз тросгес егитъёсты кысконо. Уго СССР дыръя вылӥ кивалтон интыосын ужам муртъёс пересьмо ини. Табере дыр вуиз кивоштӥсьёс дасяны. Кун Думалэн депутатэзлы журналистъёс юанъёс сётъязы на. - Кыӵе муген Кун Дума Москваысь Санкт-Петербурге выжыны турттэ? - Москвалэн мэриез рос-прос ужаны луонлыкъёс кыдытыны уг быгаты. Тросэз депутатъёс Москвалэн пӧртэм сэрегъёсаз уло. Толалтэ Кун Думаозь часлэсь кема мыноно луэ. Собере уй пал шоркаре потыны мылкыд каре Г. Н. Селезнёв. Отын уго солэн анаез улэ. Кун Дума но Федерацилэн Кенешез Москваысь нокытчы но уз кошке. Дума сяна, властьлэн куд-ог ёзъёсыз но мылкыд каро Петербурге потыны. - Трос верасько Президентлэсь полномочиоссэ кулэстон сярысь. Кызьы учкиськоды та ужпум шоры? - Сыӵе ужпум но али воксё кулэтэм луэ. Президентлэсь полномочиоссэ будэтыны кулэ. Со аслаз указэныз губернаторъёсты ужысьтызы мозмытыны мед быгатоз. Зюганов алигес мынэсьтым юаз: кулэ-а пырыны выль правительствое? Мон шуи: кулэ. Уг яра Правительствоез ялан курланы но солы пумит сылыны. - Газетъёсын гожъяло, Путин, пе, Президентлэн Администрацияз выльдонъёс ортчытыны малпа. Кун Думалэсь быдэсъясь властьлы оппозициын сылэмзэ дугдытыны туртто. Со понна Президент бордын кылдоз Политикая кенеш. - Таиз Кун Дума Президентлы оппозициын уг сылы. Тани СНВ-2 огкыл кутэмын вал Нош пӧртэм кенешъёс кылдытъяны нокыӵе кулэлыкез ӧвӧл. - Кызьы коммунистъёс пыриськозы Удмурт Республикалы Президент быръёнэ? - Элькун комитет малпаське аслэсьтыз адямизэ ӵектон сярысь. Со одно ик коммунист луыны кулэ ӧвӧл. Со сярысь вера туэ Россилы Президент быръён но. А. Андриянов. ШӦКЫЧ Атас (басня) Эктэ азбар шорын атас, Со ушъяське, чирдэ нялтас, Кыӵе мынам лэчыт синъёс, Сьӧсь ӧрӟилэн кадь гижыос, Гонэ-туре чибориё, Со инвожо но инвожо. Сямы сярысь ке верано, Мед тододы монэ азьло, Мон пуныез но кокчало, Капка пулэз но тӥяло. Уг курдаськы бызаралэсь, Уг кышкаськы... Нош со вие тупаз ӵапак, Пелё лобӟиз отӥ шуак, Гуньдӥз малы ке но Атас, Азбар шорын йӧтӥз кӧтаз, Кенос улэ мырдэм лобӟиз, Чирдон сярысь но вунэтӥз. *** Ма, мон ачим но сыӵегес, Кылме шол лэзьясько кузьгес. Сюре ке со понна мыжык Соку ик воштӥське сямлык. Николай БАТАЛОВ. ЖУРНАЛИСТЪЁСЫН ПУМИСЬКОНЪЁС Президент губернаторъёсты уз ӵектылы Матысь дыре Кун Кенешысь депутатъёс сессиын юнматыны кулэ Удмуртилэн Конституцияз воштонъёс пыртон, Удмуртилы Президент быръён но быръёнъёсъя комиссиос сярысь законъёслэсь инъетъёссэс. Озьы кутскиз журналистъёсын вераськонзэ Кун Кенешысь Кунэз радъянъя, калыкъёсъ куспын политикая но интыысь аскивалтонъя ялан ужась комиссилэн кивалтӥсез Ж.В.Дворцова. Удмуртилэн Конституцияз пыртэмын уз луы кӧня кылэз тодыны кулэ Президент но кыӵе медло солэн национальностез - озьы ӧвӧл учкемын Россилэн Конституцияз, валэктӥз Ж.Дворцова. Озьы ик лыдэ басьтымтэ кӧня ар одӥг интыын улыны кулэ президентэ кандидат. Законлэн инъетаз чакламын Президент быръёнэз одӥг кутскемен ортчытыны, угось кыкетӥ турен вырон понна туж трос коньдон кулэ луоз. Президент быръемен лыдъяськоз, та ужрадэ списокъёсы пыртэм бырйисьёс пӧлысь 25 процентэз пала бырйисьёс пыриськизы ке. Малы бен сыӵе ӧжыт куара люкано Удмуртилы Президент быръён понна? Солэсь мугзэ Ж.Дворцова тазьы валэктӥз: берло аръёсы, пе, адямиос мылкыдтэк быръёнъёсы пырисько. Соин ик трос куара бичаны туж секыт йӧтэ. Тае валаса, Россилэн 15 улосэз вазенгес ик сыӵе законъёс кутӥз ни. Удмуртилы Президент быръён сярысь законлэсь инъетсэ Кун Кенешысь депутатъёс 16-тӥ мае сессиязы кутозы. Малпан кылдэ, 25 процент лыдпусэз депутатъёс юнматозы шуыса Жанна Дворцова верамъя, Удмуртиын Президент быръемын луоз 2001-тӥ арын март толэзёзь. Та дыр сярысь одӥг пол гинэ верамын ӧй вал ни. Озьы ке но, Вормон нунал азьын "День" газетын поттэм статьяын верамын вал, Кун Кенешлэн Тӧроез куд-ог губернаторъёсын ӵош Путинлы гожтэм вазиськоназы куро, пе, сое аслыз губернаторъёсты пуктылыны. Зэм-а со? Та юанлы Ж.Дворцова шуиз, "День" газет, пе, лыдӟисьёслэсь йырзэс сураны выре. Нокыӵе вазиськонъёс улэ А.Волков ӧз гожтӥськылы. Но та ужпум сюлмаськытэ, лэся, Москваысь журналистъёсты но. 8-тӥ мае "Вести" передачаын одӥгез журналист Путинлэсь меӵак юаз, кызьы учке со, губернаторъёсты ачиз Президент мед юнматылоз шуыса. В.Путин юанлэсь палэнскытэк вераз, зэмзэ ик, куд-ог кивалтӥсьёс но губернаторъёс сыӵе куронъёсын вазиськыло шуыса. Но В.Путин оскытӥз, Россилэн Президентэз улосъёслэсь вылӥ кивалтӥсьёссэс ас мылкыд каремезъя уз юнматылы шуыса. Т.БАННИКОВА. ШӦКЫЧ Арган но дыр Кӧшкемыт вӧт адӟыса, Лӧпшо Педунь малпамтэ шорысь сайказ. Кӧня меда дыр? Учке, тик-такез куать час возьматэ. Шуак луиз: солы сизьымлы уже вуоно ук, табере кылид ке, ужысь чальтчытозы. Чассэ пель дораз вуттӥз, соиз уг но шокышты, сылэ. Кӧня меда дыр? Кызьы тодоно? Сак кариськиз, кылзӥське: бускель патерын чал-чал. Оло, уже кошкизы ни? Кӧня ке пол йырберзэ ӵабыштэм бере, йырвизьмаз нод чилектӥз. Вик-ваксэ кутӥз, балконаз потӥз, пичи пукон вылэ пуксиз но "Тӧлӟыло улмопу сяськаос" яратоно кырӟанзэ мытӥз. Ачиз но каллен арганэзлы юрттэ. "Шулдыръяськонзэ" пумаз ӧз вутты: улӥ патерысь бускель кышномурт балконаз потӥз но куаретӥз: - Педунь, тон кудӟемын шат? Кык час гинэ на, нош тон быдэс коркаез сайкатӥд ни. Дугды али ик. Педӥ шудэмысь дугдӥз, балконзэ пытсаз. - Кык час... О-о-о, изён трос гинэ на, - буйгам мылкыдын валес вылаз выдӥз. Кызьы ӟазегез люконо? Жадеменыз Педунь одӥг гуртын кӧлоно кариськиз. Пыриз гурт пумын сылӥсь пичи корка. Корказь пагӟа вылын, чильымзэ пурккетыса, пересь пуке. Юам-верам бере, пересь сюлэм висёнзэ кисьтӥз: - Кык мумы ӟазеглэсь одӥг пи гинэ потӥз - будӥз. Туннэ Матрон вандӥз-ишкиз, нош монэ ньыльлы люкыны косӥз. Кызьы шормано со мискинез, йырвизьмы уг тырмы. Аракы но юи ини. - Эн куректы, пересь. Валамея мон юртто. Вера гинэ, кинъёслы, кыӵе муртъёслы сое люконо, - буйгатэ Педунь. - Мыным, кышноелы, пиелы, нылылы, - йырзэ шонертӥз пересь. Кӧня ке малпаськемез бере, Педунь пурт кутӥз: - Тыныд тани йырыз: тон ведь та юртъерын йыр - кузё? Быж палыз - кышноедлы: со корка пушкын пуке-берга. Пыдъёсыз - пиедлы: тынад лёгем сюрестӥд мед вамышъялоз. Бурдъёсыд - нылыдлы: ӝоген солы вордскем юртысьтыз лобӟоно. Кылемез... Мыным кылемез но яралоз. Шумпотэменыз пересь мыняз, Педуньлы "секыт" ужез понна уксё но сётӥз на. Нош Педӥ ӟазег мугорез песьтэраз понӥз но сюрес вылэ потӥз. Жадемез быриз. С.СОКОЛОВ. ОЧЕЙ ТОЛИЛЫ - ПӦСЬ САЛАМ Витьыса вить луим Умой-а, гажано Очей Толи! Туж кема ни адӟиськем, соин гожтоно кариськи. Куарадэ бон одӥг-ог Ладилэн азбарысьтыз кылоно ик, но со капка сьӧры милям сюреммы уг луы. Ми пала азьвыл ӵемгес ик вуиськод вал, нош культура юртмы куашкам бере ымныр тустэ ик вунэтӥмы ни. Гурт калык весь тодаз вае кылчин куарадэ. Мӧзмеменыз тужгес но куасьмиз ни пересь апае, Мунё Маня шуисько. Што кырӟаны, што вераны вал со, но берло дыре калык азьын куаразэ поттыны ик уг дӥсьты ни. Ма, азьвылэз предмы, Петрович, туж обидем уго. Шулдыр мылкыдыз дыръя Мунё Маня, пе, лавкае пырыса ӧвӧлась кырӟам: Купим козу для колхозу, Бригадир будет доить. Председатель захворает - Будем молоком поить. Пенсионеръёслы нянь люкылыкузы, Семон кырсие но пайзэс басьтыны мынэм. Колхоз пред учкем со шоры но шуэм: - Михайловналы нянь ум сётӥське, кырӟанэныз кӧтсэ мед тыроз. Берло тодмо луиз: Маняпелэсь кырӟамзэ лавкаысен кылэм предлэн нылыз, бертыса атаезлы ӝожтӥськем. Берло бен Маняпелы пайзэ сётӥзы ик, но калык азьын тар-тар кырӟаны уг ни дӥсьты. Гурт калык милям ӟеч улэ. Нянь вань. Туж шулдыр луо юондыръёс. Тани али но толэз келям, тулысэз пумитам, дасяськиськом гырон быдтонлы. Соку городъёс но чиста бертозы. Кылем гужем тани туж мӧзмыса вуиз Сарапулын улӥсь Ӵышкем Ванька. Сюлэм висёнзэ эшъёсыныз буйгатэм урам огпалась ӵыпет дурын. Кӧня мыльтыртӥллям - тодӥсь ӧвӧл, но Ӵышкем интыяз ик бекмыляса кылем. Уйшор уин сайкам но ассэ Кам дурын кожам. Шур сопала уяса потыны малпам. Кускозяз вуэ пырем ик вылэм, но выемезлэсь курдам. Учке, пе, шур дурысь огаз коркан тыл ӝуа. Йыгаськем: - Эй, скажите, пожалуйста, как перейти на тот берег Камы? Капка сьӧрысь куара шуэ: - Ма, Ванька, тон лэся ук. Мон тонэ уд бертӥськы ни кожасько вал. - Как перейти на тот берег Камы? - Ванька аслэсьтыз гозызэ пунэ. - Осто, Ванька, тордос! Вордэм анайдэ уд тодмаськы ни-а? Сёто мон тыныд "на тот берег"! Соку гинэ Ӵышкем сазьтӥськем. Солэсь но катар учыр луэм Кочон Миклаен. Юэм куеныз, бускелезлэн эстэм мунчояз пырыса, лапча улаз интыяськем. Мисьтӥськыны нырысь ик мынӥллям Аннокен Такъян. Номыр сыӵе-таӵеез валатэк кылиськиллям. Фуфайкаен дӥсяськем Миклай пӧсь мунчоын ӝокаса ӝуштыны кутскем. Паймем апокъёс анайзылэн вышкые шутэм сюкасез чырса кожаллям. Выль кен лапча улэ учкыны валам. Ма, пе, така пырем, лэся, ук. Улляны кутскиллям но бускель пизэс адӟыса бакомиллям. Валатскемзы бере ну котырзэ сэзъялтӥллям. Мырдэм мозмытскем соослэсь Миклай. ТабереКочон мурт лапча улъёстӥ уг ветлы ни: бускель гуртысь кышно ваиз. Кышно шуэмысь, милям соос татын туж шаплыесь. Нош Эксэй Ондрейлэн кенэз чырткем ке но, нокызьы серметаны уг быгаты "паллянэ" кожась картсэ. Нылкышно ужъёсын больницае ветлыкуз ӧвӧлась дышетӥллям сое кышноос амало ужлы. Окси дораз бертэм но картэзлэсь "семейка" шуоно трусик пыдэссэ изэм сьӧд пӧсьтурынэн наш-наш пазяса утюгам но шифоньеразы лачатэм. Тупаны но кулэ ук, атайзы дӥсяны шедьтэм сое. Гидкуазьын эктэ, ураме потыса эктэ. Вазелинэн вата юамысьтыз ини Окси мазэ-созэ валтскиз. Шуныт мунчоысь вуын пукыса гинэ Ондрей агай катьяськиз. Окси озьы ик картсэ серметаны ӧз быгаты, нош атайзылы Эктӥсь Ондрей ним лякиськиз. Гажано, Очей Толи, ку меда сюрес шедьтод ни дорозямы? Гуртысьтымы мӧйы кышноослэн тонэн туж пумиськемзы потэ. Нош городэ мыныны уг дӥсьто, ӟуч кыллы, пе, дыг но мог. Ма, шаплы кышноосмы но бен вань милям, уг возьдасько ӟуч сямен но юаны-вераны. Тани кылем арняе Санко Тоня городэ ветлӥз. Магазинысь синйылтэм зӧк, шуныт шобретэз. Вузчилэсь юа, пе: - Почём у вас с мужиком спать одьяло? Вузчи валаз, ӧз паймы. Туж трос гожъясько ни, луӵӵо ачид ваньзэ синмыныд мед адӟод. Сьӧрад аргандэ но вай: асьмелэсьсэ арганчиеныз валче Сяська нюке ыргытӥзы. Уд жаля, гурт пумамы усьтӥськем выль кафеямы куно карысалмы. Цивилизация шуон ми пала но вуэ. Сико-Юко япон воргорон кафе усьтӥз. Инмар понна, воксё паймод менюэзлы: базаре келяно ыжъёслэн но кунянъёслэн синвуэнызы пӧзьтэм шыд; сьӧд таракан пыдъёслэсь пельнянь; соусэн акась-тукась; сульыклэсь лапша; пиньтурынлэн тысеныз пыжос; куасьтэм кут кулон губилэсь пыжем куасамнянь; кионмульылэсь сок; кузьыли пузъёслэсь юзматӥсь ву. Маиз гинэ ӧвӧл! Кышноос воксё ганяк кариськизы. Сиён пӧзьтыса дыр уг быдто - кафеын дунтэм но, ческыт но угось. Таин йылпумъясько. Ӟеч лу! Ӟеч ул! Гурысь пӧсь шунянез кадь возьмаса, Иванша Гиргорейлэн Аннокезлэн Олёнэз. Е.СМИРНОВА. Алнаш ёрос, Тыло гурт. Воштос ёзъёс - почтаен Татын воштос ёзъёсты почта пыр келян сярысь малпан кемалась кылдӥз ни вал. Но "Ижмаш-Мото" акционер огазеяськонын солы саклык ӧз висъяллялэ. Табере та предприятиын но та амалэз кутоно кариськизы. Воштос ёзъёс басьтыны мылкыд карисьёслы, прайс-листэн тодматскыса, предприятие ивортыны кулэ, кӧня но ма кулэ соослы, келям вузлэсь дунзэ шонер лыдъян понна гожтоно быдэсак почта адрестэс. Бӧрысь предприятие басьяськисьлы заказзэ келя почта дунъёсты лыдэ басьтыса. Басьяськись со дунъёсын соглаш ке, почта пыр ыстэ паспортысьтыз гожъямъёссэ но вуз понна 100 процентсэ тыре. Кыӵе воштос ёз кулэ, вазиське таӵе адресъя: 426006, Россия, Удмурт Республика, Ижевск город, Телегин ульча, 30, "Ижмаш- Мото" акционер огазеяськон. Жингыртэмды луоз таӵе телефонъя: (3412) 495-266. Кынмиськом Городысь юртъёсы шуныт сётон кезьытъёслэсь вазенгес дугдытэмын. Сое выльысь лэзён трос ыштонъёс ваёз. Озьы кынмоно луиськом. Нылпи садъёсы, юртъёсы, шуныт сётонэз 5-тӥ мае дугдытыны чакламын вал. Табере куазьлэсь тупатскемзэ возьмано луоз. Куд-ог нылпи садъёс шунытэз ас мылкыд каремзыя кысылӥзы, ӝокытлы чидатэк. Угось омырез сӥятон понна, шунтэм сярысь, уката тросгес коньдон кошкиз. Шукыръяське куазед. Н. Липина. Куноос - сепъёс но кузёбайёс Ижысь Егитъёслэн юртазы "Эктон корка" нош ик люкалляз ас эшъёссэ. Таиз пумиськон сӥземын вал Эктонлэн калык куспо нуналэзлы. Студие ветлӥсьёс ӝытэ лыктэмъёсты тодматӥзы немец, норвег, финн, карел но мукет эктонъёсын. Нош тужгес шумпотымонэз соиз: "Эктон коркалэн" куноосыз вал Игра ёросысь Сеп гуртысь но Алнаш ёросысь Кузёбайысь эктыны-кырӟаны яратӥсьёс. Таос озьы ик ас эктонъёсынызы тодматӥзы, ас пӧлазы кыскизы вань люкаськем калыкез. Т.НИКОЛАЕВА. Архивысь документъёсъя Удмуртия ЪЪ дауре 1912-тӥ ар Россиын цоциально-политической югдур нош ик лэчытоме. Помещикъёс куро выт тыронзэс капчиятыны, пунэмен коньдон висъяны. Буржуазия косэ налогъёсъя радэз выльысь учкыны, казна заводъёс пумысен (таосыз вытлэсь мозмытэмын) ченгешон ӝутэ. Интеллигенция паймемын-куалектэмын Москваысь университетысь азьмынӥсь профессоръёсты уллямлы. Крестьянъёс музъемез выльысь люкылыны куро, помещикъёслэсь ваньбурзэс таланэн куарето. Бугыръясько рабочийёс но, югдур тужгес но лекомиз, Лена шур дурысь зарни поттӥсьёсты ыбылэм бере. Воткинскысь социал-демократъёс Сибирын луэм учыр пумысен листовкаос потто, ыбылэм-сӧсыртэм рабочийёслэн семьяоссылы юрттэт люкало. РСДРП-лэн Ижысь организациез (кивалтӥсез Александр Пастухов) вӧлмытъя "Социал- демократ" газетэз но соку гинэ потыны кутскем "Правдаез". Партиен герӟаськем адямиос ужась коллективъёсын тыршо. Пумен соос ас палазы кыско "Союз труда", сазь улон понна но тылпу потонэн нюръяськисьёслэсь огазеяськонъёссэс. 16-тӥ июне Иж заводэ вуо Владимир Ленинлэн ӵыжы-выжыосыз: анаез Мария Александровна но али гинэ тюрьмаысь потэм апаез Анна Ильинична. Соосты Гольяныысь пристаньын пумита Мария Александровналэн племянницаез, Ижысь тодмо нотариуслэн кышноез, Мария Андреевна Грачевская. Куноос шаерамы укмыс нунал улӥзы, Иж посёлокен тодматскизы, тымет кузя, пужым ягетӥ лёгаськизы, узы но возь выл сяськаос бичазы. Арлэн пумаз ИВ Кун Думае быръёнъёс ортчо. Партийной тусызъя ке учконо, со ӧз воштӥськы, кык валтӥсь фракциос (право-октябрьской но октябристско-кадетской) озьы ик кылизы. Общественной улон "кӧлэмысь сайка". Одӥгез солэн тодметэз - кылдэ либерал мылкыдо выль Прогрессивной партия. Соин кивалто узыр адямиос - Коновалов, Рябушинский но мукет. Соос нюръясько Конституциен чаклам монархия понна, Думалы бадӟымесьгес луонлыкъёс сётыны ӵекто. И. Зайцева, Удмурт Республикаысь Кун архивысь отделэн кивалтӥсь. Глазовысь гимназиын берпуметӥ арзэ дышетскисьёс. Уноез соос пӧлысь, университетъёсы пырыса, лушкем ужась кружокъёсы ветлозы. Йылаз-пумаз вуттэмын Республикаысь Правительстволэн кенешаз йылаз-пумаз вуттэмын "Удмурт Республикалэн Президентэз сярысь", "Удмурт Республикалы Президент быръён сярысь"; "Удмурт Республикалэн Быръён комиссиез сярысь" но "Интыын аскивалтон ёзъёс куспын куд-ог кун полномочиосты люкылон радлык сярысь" законъёслэн инъетъёссы. Соос пумысен нокыӵе юанъёс ӧз кылдэ Юстицияя министерствоын но. Юристъёслэн но министръёслэн та документъёсъя куд-ог ӵектонъёссы умоен лыдъямын но Кун Кенеше эскерыны келямын. Тупанкыл гожтэмын Екатеринбургын гожтэмын Удмурт Республикалэн но Свердловск областьлэн правительствооссы куспын Тупанкыл. Отын вераськон мынэ экономика, наука но мукет удысъёсын валче, ог-огедлы юрттыса ужан, азьло кылдэм шуныт кусыпъёсты азинтон сярысь. Удмурт Республикаысь Правительстволэн пресс-службаез. Уксётэк уксё уд потты Евгений Григорьевич Прокопьевез азьвыл партийной ужасез, улон косӥз ужбергатонудысэн вырыны, со - ужа директорлэн воштӥсез луыса. Сюласьконэз тырмыт, тужгес но секыт йӧтӥз, рынокен экономикае выжонэз радъяку. Предприятиез утён понна шедьтоно вал дунтэмгес дунын но вылӥ ӟечлыко ю тысь. Прокопьевлы "шуд усиз", шуыны луоз, вань таркам кусыпъёсты выльысь кутскыса герӟаны но Россиысь улосъёсын аслыд тупась ӵош ужась эшъёс утчаны. Потӥзы Интернетэ, иворъёсты вӧлмытонъя ёзъёс вылэ. Соос дуно ке но сыло, рекламатэк рынок ӧвӧл. Сыӵе малпанэз коммерцияя кивалтӥсьлэн. Берло иворъёсты сямен, нуналлы быдэ сак учко дунъёслэсь вошъяськемзэс, асьме дорысь но кунгож сьӧрысьсэ син азязы возьыны тыршо. Пичияк бере кылид яке янгышад ке, рынок зӥбоз. Солэсь нокытчы уд пегӟы. Выль арысен предприятилэн поттэм вузэз паськытаз. Татчыозь сезьы но сьӧдчабей кеньыр палэнэтӥ утчаса ветлӥзы ке, али асьсэос соин вузкаро ни. Басьтӥсез вань. Тӥни малы предприятие ассэ возьыны быгатэ, конкурентъёсыз трос ке но. - Югдур котькытын пӧртэм, - шуэ Евгений Григорьевич. - Лымшор палан, шуом, Краснодарын, Оренбургын но музон улосъёсын, дунъёс асьмелэнлэсь улӥын. Оренбургын йыды, тари дунтэм, Удмуртиын - кӧжы, сьӧдчабей. Нош оглом учкыса, кеньырлы но пызьлы дунъёс, музон интыосын ӵошатыса, республикаямы бадӟымесь ӧвӧл. Маркетингъя служба алигес кылдӥз, но солэн бергамез бордысь потэ предприятилэн азинсконэз. Е.Г.Прокопьев лыдъямъя, соослы тросгес ужано на рекламаез паськытатон бордын. - Со понна ялан дышетсконо, котькуд луонлыкез дыраз кутыны быгатоно. Азьвыл аръёсы сырьёез ӝыны арозь пунэмен сёто вал, запасъёсмы тросэн кыллизы, али пырак вагонъёсысь ӝоктӥськом но изӥськом. Продукция поттонэз паськытатон понна кулэ коньдон. Тӥни ма бордысен кутско шуг-секытъёс. Предприятимы кун шуыса ке но лыдъяське, мон уг тодӥськы, ку государство милемлы берлозэ ссуда висъяз. Басьтӥськом сое коммерческой банкъёс пыр бадӟым процентэн. Нош ю тысь вайыны огъя коньдон кулэ, сотэк производство дугдоз. Мон малпамъя, кеньыр лэсьтонэз асьме дорын удалтӥсь культураос вылэ выжтыса, пайда трослы будоз. Но со понна юрттыны кулэ Правительство, налогъёсты но асьме бюджетэ кельтон вылысь. Макем ӟеч ужа предприятие, сокем кыдёке вӧлме солэн данэз. Ижевскысь 2-тӥ хлебоприёмной предприятиез Удмуртилэн палэназ умой тодо, коммерческой служба понна со ватсаса дивиденд вае. Тыныд оско, тонэ гажало ке, озьыен, кусып тупатонын валантэм учыръёс уз луэ. Татысь коллектив вылэ ӝожтӥськонъёс ӧй вал на. - Но пумиськыло милям ниммы улэ ватскыса лушкем ужась фирмаос. Палэнысь ваем урод кеньырез, пызез пӧяськыса калыклы вузало. Кинлы сыӵе "юлтошъёс" кулэ? - пӧсекъямзэ ватытэк вера Прокопьев. Вузкарон дунэ предприятие пыртэ ваньзэ, ма герӟаськемын коньдон ужпумъёсын: транспорт, лэсьтӥськон, нылпи учреждниосты возён но мукетыз. Социальной удысэз возёнлэсь соос ӧз палэнске на. Ма шугъяськытэ та вакытэ? - Пызен вузкарон. Правительстволэн косэмезъя, нянь пыжись заводъёс басьто сое Сарапулысь гинэ, милямез дунтэмгес ке но. Тӥни ма вылын предприятимы ыштэ. Ми пызь ум изӥське, ваиськом транспортэнымы мукет улосвылъёсысь. Озьы дунтэмгес усе. Кусыпъёсмы оскымонэсь Казахстанэн, Кубанен, Сибирен. Соос асьсэос но жингырто, продукцизэс дэмласа. Евгений Григорьевич, ачиз но шӧдылытэк, партийной ужысь выжоно луиз чылкак малпамтэ удысэ. Дышетскемезъя - радиоинженер, "Метеор" заводын ас дыраз ӟеч специалист вал. Конверсиен сэрен отысь кошкиз. Туж гажаса вера Кун Думае депутатмы Юрий Дмитриевич Маслюков сярысь. Быдэс семьяенызы со понна куаразэс сётӥзы. - Правительствоын тросгес сыӵе чылкыт сямо, государство понна сюлмаськись адямиос мед луысалзы, озьы гинэ улонмы воштӥськоз. Мон сямен, Россилэн туала висёнэз потэ ӟеч, визьмо политикъёслэн тырмымтэзы бордысь, - пушказ бергась малпанъёссэ вераз Прокопьев. - Асьме республикамылы но кулэ экономикаез, политикаез мур валась президент, сотэк номыр уз пӧрмы. Ужезъя Евгений Григорьевич вуылэ пӧртэм интыосы, ас синмыныз адӟе странамылэсь куӵо-коӵо "пасьёссэ" но "лякетъёссэ". Таӵе рынок солэн сюлэмызъя ӧвӧл. Зэмос государство азинскыны но ужаны кулэ чаклам планъя, нош Россиын котькудӥз область, республика "пӧзе ас пуртыяз", отысь потыны выре, пӧртэм пумо службаос кылдытыса. Сюлэмез сэректытӥсь, берлане кыскись сюрес со. Тӥни малы мылкыд бугыръяське. * Пыралэ "Деметрае"! Ижевскын улӥсьёс магазинэз ӟеч тодо. Рынокъёсын ӵошатыса, котькыӵе кеньырез, сиён- юонэз дунтэмгес басьтыны луэ. Со сяна, магазин нуналлы быдэ вузкаре пудо сиёнэн. Лыктэ, басьяське! Буш киын татысь уд кошкелэ. Синмаськоды асьсэ пекарняын пыжем няньлы, булкалы но. Соослэн дунъёссы, мукет магазинъёсын сярысь, шӧдскымон ичигес. Магазин интыяськемын хлебоприёмной предприятиен артэ, Пойма ульчаысь 17-тӥ юртын. * В.Р.Щербакова - 2 номеро хлебоприёмной предприятилэн кивалтӥсез. * Валтӥсь бухгалтер Т.С.Муравьева. * Валтӥсь инженер В.В.Федоров. * Кеньыр изонэз чакла оператор Ирина Малышева. * "Деметра" магазин. Продавец Татьяна Кузинова басьяськисьёссэ котьку ӟеч мылкыдын пумита. * Оператор Иван Осипов. * Слесарь Максим Низембаев. Бамез дасяз Людмила МЕДВЕДЕВА. Туспуктэмъёсыз Владимир Беломорскихлэн. Усто пар - Такъян но Петыр Шарканысь егитъёслэн "Зангари" центразы быгатонлыксэс возьматӥзы ёросысь егит семьяос. Асэнызы томатэм бере, соос киужъёссэс, ческыт пӧрамъёссэс возьматӥзы, кырӟаса-эктыса лэзизы. Вань ӵошатсконъёс пыр потыса, тужгес тупамоноен, чеберен, устоен адӟиськизы Пороз гуртысь Татьяна но Петр Лопатинъёс. Ёрослэсь данзэ табере соос республикаямы утёзы. О. Сидорова. ЖУРНАЛИСТЪЁСЫН ПУМИСЬКОНЪЁС Чиновникъёслэсь лыдзэс кулэстоно Али оскон кылдэ, Россия мыноз сыӵе выльдӥськон сюрестӥ, кудӥзъя со вамыштыны кулэ вал эшшо 15 ар талэсь азьло. Озьы вераз журналистъёслы Кун Кенешлэн Экономикаын политикая, инвестициосъя но асваньбуръя ялан ужась комиссилэн кивалтӥсез Р.Галиахметов. Сыӵе осконзэ со герӟа Президентлэн В.Путинлэн но премьер-министре ӵектэм муртлэн М.Касьяновлэн нимъёсынызы. Политикаын югдур тупатскиз, табере улӟоз экономика но, шуиз со. Депутатлэн верамезъя, таиз ар асьме понна умой кутскиз, со сярысь вера предприятиослэн нырысетӥ кварталэ ужамзы но. Миым та вакытэн ӵошатыса, промышленностьын 33 процентлы тросгес ваньбур поттэмын, продукция поттон шӧдскымон йылӥз 66 пумо вузъёсъя. Табере бадӟымгес саклык висъяно ужасьёслэсь уждунзэс будэтонлы, шуиз Р.Галиаметов. Зэмзэ ик, та ужпумъя асьме республика бускель улосъёслэсь бере кыле. Комиссилэн кивалтӥсез журналистъёсты таӵе кылъёсыныз паймытӥз: бюджетлэсь куд-ог статьяоссэ выльысь, пе, учконо луоз, куд-ог удысъёслы туэ, оло, ватсаса коньдон висъяны быгатомы, малы ке шуоно, берло аръёсы нырысьсэ умой радъяськиз вытъёсты бичан. Депутатлэн верамезъя, нырысетӥ кварталэ, кылем арысь та вакытэ сярысь, вытъёс 96 процентлы тросгес люкамын. Р.Галиахметов пусйиз матысь дыре быдэстоно ужпумъёсты. Соос пӧлы со пыртӥз музъемен герӟаськем ужпумез но. Та уж туж кема кыстӥське ни, шуиз комиссилэн кивалтӥсез. Нош сое йылаз-пумаз вуттытэк уг луы азинтыны пӧртэм пумо ваньбурен герӟаськем ужъёсты но. Озьы ик воштӥськонъёс ортчытоно кун аппаратэз кулэстонъя. Р.Галиахметов верамъя, берло 15 ар ӵоже со 3-4 поллы йылӥз. Собере Удмуртиын федеральной ёзъёслэн кыӵе гинэ люкетъёссы кылдытэмын ӧвӧл. Куд-ог министерствоосын 80-100 пала чиновникъёс ужало. Таӵе югдурез воштоно. Кун Кенешысь депутатъёс али ужало кадръёсъя политикалэсь концепцизэ дасян бордын. Туэ июль толэзе сое эскерыны чакламын. Музъемен, кун аппаратэз возёнэн герӟаськем ужъёс - со Россия азьын сылӥсь ужпумъёс. Нош кыӵе валтӥсь ужпумъёслы нырысь ик саклык висъяно та дыре Удмуртиын? - Пичи но шор ужбергатонлы, - шуиз Р.Галиахметов. - Та ужез рос-прос радъяно. Республикаысь коньдон палэнэ медаз кошкы. Асьмелэн али тазьыгес луэ: шуом, дышетӥсьёс бюджетысь уксёез уждунлы басьто ке, соос басьяськыны базаре пото. Нош базарысь уксё бюджетэ туж ляб берытске, угось котькуд вузкарись-ужбергатӥсь люкам коньдонэныз палэнысь вузъёс басьтэ. Кыкетӥез быдэстоно ужпум нырысетӥеныз ик, дыр, герӟаськемын, валэктӥз депутат. Паськытгес сюрес усьтоно асьме сиён-юон но ваньбур поттӥсьёслы. Т.БАННИКОВА. Шокатэк кадь учким "Айна" спектаклез учкеме бере, рецензия гожтыны малпатэк гинэ, учкись сямен ас мылкыдме верано кариськи. Со сюлэм пушме бугыртӥз но, мукет куараосын герӟаськыса, театрлэсь азьвыл пуктэм ужъёссэ тодэ вайытӥз. Алигес гинэ уго, мартэ ортчем фестивальын, Москваысь искусствоведъёс зол гинэ "ньӧразы" вал куд- ог постановкаосмес. Мынам соосын огкылысь луэме уг поты, тани, шуом, Е. Загребинлэн "Нош кикы силе но силе" пьесаезъя ик. Кун театрлэн сцена вылаз, озьы ик дуннеысь сценической искусствоын нырысьсэ возьматэмын выль герой - Куӟебай Герд аслаз секыт адӟонэныз (солэсь сюрессэ ӧз капчиятэ автор но, режиссёр А. Вершинин но, валтӥсь ролез быдэстӥсь Г. Бекманов но). Но та сярысь нимысьтыз зол вераськон луыны кулэ. Нош туннэ - выль крезьгуро драма сярысь. Сое гожтӥсьёслэн нимъёссы асьмелы туж тодмоесь: Т. Чернова - кылбурчи, Ф. Васильев нимо премилэн лауреатэз, В. Ушаков - режиссёр, Удмурт Республикаысь искусство удысын дано ужась. Пьеса гожтон - кыкназы понна ик выль удыс. Ӵош кутскем ужзэс огез узырмытӥз, луоз, поэзия ласянь шӧдон-валанэныз, мукетыз таизлы юрттӥз драматургилэн ӧраз пырыны. 4-тӥ, 5-тӥ, 6-тӥ но 20-тӥ апреле Удмурт театрын возьматэм "Айна" спектаклез учкыны трос, калык люкаськылӥз. Шӧдӥськиз: огполаз егитъёс тросгес лыктӥллям, мукет нуналаз - мӧйыос, озьы ке но, соизлы но, таизлы но спектакль туж яраз, сцена вылын ортчем югдуре йырынызы "месӥськылӥзы" кадь. Спектакль яркыт но аспӧртэм, ас сьӧраз валтӥсь мед луоз шуыса, трос кужымзэ сётӥзы уго, режиссёр сяна, суредась В. Анисенков, крезьгурчи Н. Шабалин, эктонъёсты пуктӥсь К. Русских, озьы ик - тыл, фонограмма но мукетыз бордын ужасьёс. Спектакльлы рос-прос дунъет сётӥсь шуысал, дыр: татын уже кутэмын Шекспир вакытэ драмаез пуктон амалъёс - но со пумитъяськон мылкыд уг кылдыты, малы ке шуоно, туж быгатыса йӧспӧртэмъямын, удмурт тусо-буё каремын. Луысал, дыр, пусйыны тырмымтэоссэ: кылсярысь, кутсконэз огъя сюжет борды лякем кадь луэм, куд-ог сценаосын мултэс бызьылонэз син шоры йӧтэ, собере действие весь ог интыын ортче кадь потэ. Удмурт театрын И. Гавриловлэсь "Аннок" пьесазэ нырысьсэ пуктэм бӧрсьы солэн "умоятэм" вариантэз но вал ни (ӟуч кылын). Нош таиз, мон шуысал, чылкак мукет, нимысьтыз выль пьеса. Туала синмын гожтэмын, туала, выль манерен пуктэмын. Героинялэн нимыз тупа К. Гердлэн Айноезлы (финн мадёсъёсысь басьтэмын). Авторъёс, сюжетэз выльдэм но выль геройёс пыртэм сяна, воштӥллям действилэсь ку ортчемзэ но: 20-тӥ даурлэн кутсконысьтыз выжтӥллям 17-тӥ-18-тӥ дауръёсы. Озьы ке но, та "вашкала" адямиос асьме вакытысь адямиослэсь висъянтэмесь, соос сыӵе ик шумпотонъёсын, куректонъёсын уло. Вужмисьтэм тема борды кутскыса, авторъёс куинь муртлэсь кылдытэм "треугольникен" гинэ буйгатскиллямтэ, татын валтӥсь инты басьтэ, ньылетӥез но героиня (Идай Е. Сунцова), аслаз "порыны быгатонтэм лӥял кадь" мур выжыяськем яратонэныз. Лэчыт синмо критикъёслы умойгес адске, дыр, кин артистъёс пӧлысь золгес быгатӥз героезлэсь характерзэ усьтыны, та ласянь маке но выльзэ шедьтыны. Нош мон шуысал: актёръёс котькудӥз тыршизы, соослы вал мае шудыны. Соин ик яркытэсь пӧрмизы нимаз эпизодъёс, мизансценаос, ӵош потанъёс, пӧртэм югдуръёс. Соин ик шокатэк кадь учким пиослэсь ваче жугиськемзэс, шулдыръяськон-мактаськонэз но, ышем выль кенэз утчамзэс но. Действие пушкы актёръёсын ӵош выйыса вунэтоно оформленилэсь условной луэмзэ но, куке син азьын сцена вылысь чыры-пырыос воштӥсько, выль арбериос ватсасько, тыл югытгес яке лябытгес луэ. Азьвыл но синмаськисько вал тодмо артисткаосмылэн ас героиняоссэс пуш ласянь но, вылтусын но тупыттэм усто син азе пуктыны быгатэмзылы. Али нош ик адӟи, макем соос вань выросъёсынызы, вераськеменызы тупало ас возьматоно нылкышнооссылы - серемес учырын но, кайгуэ усьыкузы но соосын одӥг улонэн уло кадь. Озьы шуысал мон Россиысь дано артистка В. Загуляева (Пилича), Удмурт Республикаысь калык артистка Р. Нефёдова (Узыбей), артистка Е. Сунцова (Идай) сярысь. Айналэсь рользэ шудӥсь егит артистка В. Моисеева сярысь озьы ик вераны луоз умойзэ гинэ. Ӝожен тырмем сюлэмзэ кырӟан пыр ӧръя яке уйвӧт кадь вакчи шудэныз ваче кыльылэ - синъёсыз, куараез но быдэс мугорыз возьмато зэмос мылкыдзэ. Пиосмурт рольёсы но артистъёс тупамезъя быръемын, синмаськымонэсь таосыз но: Ӵушег (Удмуртиысь калык артист, Россиысь искусство удысын дано ужась Л. Романов), Бураш (артист А. Ложкин), Артан (артист И. Моисеев), Ожман (артист В. Мадзеков) но мукетъёсыз. Спектаклез ӝутыса, валтыса, бурд вылаз ӟечыратэ крезьгур. Н. Шабалин быгатэм одӥг сӥньысэн кадь пумозяз герӟаны пӧртэм кырӟан жанръёсыз: татын вань калык гуръёслы тупасез но ариослы матынэз, трос кузя но ӵошен-ӵошен кырӟаны тупатэмез. Крезьгур инкуазь буёлъёсы пыӵаса (татын - сценографиен валчеяськыса) юрттэ спектакльлэсь пуштроссэ муромытыны. Суредась В. Анисенков туж чакласа дэмлам геройёслы дӥсьёс: отын яркыт (горд) но югыт (тӧдьы) буёлъёс вормо. Озьы ик дӥськутъя валаны луэ адямилэсь лобась яке зӥбем мылкыдзэ, узыр яке куанер луэмзэ. Но, вераны кулэ, драмаын социальной кусыпъёс валтӥсь инты уг басьто, нырысь интыын - геройёслэн лул пуштроссыя ваче пумит вуылэмъёссы яке адямилэн пушказ бугыръяськись мылкыдыныз нюръяськемез. Оскем потэ, "Айна" сцена вылын кема улоз ай шуыса. "Эбгаен но "Эш-Тэрекен" ӵошатоно ке, таиз спектакль вашкала улонэз чылкак мукет палтӥз югдытэ. Мынам шӧдэмея, соин Удмурт театрлэн выль шоканэз усьтӥськиз. Зоя Богомолова, литературовед. Спектакльысь суред. Айна - артистка Валентина МОИСЕЕВА, Бураш - артист Алексей ЛОЖКИН. В. Камашевлэн туспуктэмез. АЗЬМЫНӤСЬ ПРЕДПРИЯТИОСЫН Ӝӧк вылды ӝуко-мильымо медло! Таӵе ӟеч мылкыд сӥзё шаерамы улӥсьёслы Ижевскысь 2 номеро хлебопредприятиын ужасьёс. Соослэн улон-вылонзы уго быдэсак герӟаськемын асьмемын: татын кеньыр лэсьто, пудо сиёнэн вузкаро. Ижевскын но матысь гуртъёсын улӥсьёс шӧдӥзы продукцизылэсь ӟечлыксэ но дунтэмгес луэмзэ - меӵак татчы басьяськыны лыкто. Предприятиен кивалтэ Валентина Рафаиловна Щербакова. Ӵапак солы кышномурт пельпум вылаз кылдӥз та секыт вакытэ производствоез, коллективез утьыны. Вормиз. Ӧз куалекты, ӧз куасалскы. Вӧзаз котьку вал, али но ужало визьмо, быгатонлыко специалистъёс. Огез соос пӧлысь валтӥсь бухгалтер Татьяна Семеновна Муравьева. Ужа 1985-тӥ арысен. 7 ар ӵоже - директорлэн воштӥсез луыса, 8-тӥ арзэ - валтӥсь бухгалтер. Ужам стажзэ лыдэ басьтыса, Татьяна Семеновналы ик нырысь кыл сётӥськом. "Директор вакытэзъя тупаз". Таӵе малпанзэ вераз Татьяна Семеновна. Татчы лыктыкум, предприятиен кивалтэ вал Валерий Александрович Дмитриев, тодаз ваиз со, Валентина Рафаиловна соку ужаз валтӥсь бухгалтерын, бӧрысьгес - директорлэн воштӥсез луыса. Собере пуктӥзы директоре. Самой секыт аръёсы тупаз Щербаковалэн кивалтыны кутсконэныз, олокыӵе но учыръёсын пумиськоно луиз, но ми ум жаляське - директор валаса быръемын. Ортчемзэ тодэ ваёно ке, таӵе сэзь кивалтӥсьёстэк предприятие ассэ утьыны быгатысал меда? Кӧня ке арзэ "интыямы шонаськеммы" бере, туннэ ми пыд выламы султӥмы ни. Со - быдэс коллективлэн вормонэз. Калыкмы туж ужась, тросэзлэн стажзы - 20-30 ар. Рыноке потон трос конкурентъёсты кылдытӥз, инты понна вожвылъяськонэз асьтэос адӟиськоды Ижевскын вузкаронъя. Пызь, кеньыр, лапша дорамы кытысь но уг вутто! Котькудӥз выре ас продукцизэ басьтӥсь кие донгыны: дуно-а, дунтэменгес-а - мед гинэ пайда ваёз. Тӥни малы дунтэмгес сырьё утчано луэ. Эсэпсэ валатэк ужад ке, ваньмыз ыштонъёсын берытскоз. Азьло аръёсты туалаеныз матысь но ӵошатыны уг луы. Соку толэзьлы быдэ централизованной амалэн дась наряд вуэ вал: кинлы кӧня продукция келяно, кинлэсь ма басьтоно - ваньмыз гожтэмын. Кеньырез, пызез райпищеторг пыр бадӟым предприятиосы, столовойёсы келяллямы. Табере аслыд ачид ӵош ужась эш но, басьтӥсь но утчано, сюлмаськоно на продукцидэ ӟечгес поттыны, чебергес бинялтыны но рыноке йыг-йыг интыяськыны. Предприятилы туннэ дунъет сёто уждун тырыны быгатэмезъя но. Коллективмы азьын пунэмаськемъёсмы ӧвӧл, уксёлы самой шугъяськон вакытэ но кык арнялэсь ятырлы ӧм ӝегатылэ. Вань улон али коньдон вылын бере, поттэм продукциез складъёсын люкаса азьвыл сямен уд возьы - ӝоггес вузано. Интыяз басьтӥськом ю тысь. Сое быдэсак сямен ваёно луэ лымшор пал улосъёсысь. Оскымон кусыпъёс тупатэмын Краснодар, Ростов, Оренбург областьёсын, нош рис басьтӥськом США-ын, Испаниын, Китайын будэтэмзэ. Сьӧдчабей вутто республикаысь хозяйствоос. Дунзэ соку ик тыриськом: кинлы коньдонэн, кинлы продукциен - мылкыд каремзыя. Ассортиментмы узыр, уката но кеньыр ласянь. Продукцимес нуо Удмуртилэн вань районъёсаз, келяськом бускель республикаосы, областьёсы. Татын мон кемалась ужасько бере, 160 мурт пӧлысь тодӥсько котькуд адямиез. Коллективмылэн шоро-куспо арлыдыз 30 арес котырын. Нош пенсие кошкисьёс сярысь ке верано, тросэз 20-30 ар одӥг интыын ужамын. Дисциплинаез тӥясьёс ӧвӧл. Предприятилэн возиськемез но азинскемез та бордысь но потэ. Шумпотыса верасько, ортчем арез но, туэ нырысетӥ кварталэз но ыштонъёстэк йылпумъям. Миым быгатӥмы на асьме коньдон чотын выль цех усьтыны, вужъёссэ тупатъяны но кулэ луись оборудование басьтыны. Кивалтӥсь ке ӟеч, ужасез но сыӵе ик луоз. Кык номеро хлебоприёмной предприятилы та ласянь удалтӥз. Секыт мылкыдэз ӧс сьӧры кельтоно Валентина Рафаиловнаез нырысьсэ адӟыкум, сое бигер выжыысь, дыр, шуыса малпай вал. Кыллы шаплы, сэзь сямо егит кышномурт соку ужаз кык номеро хлебопредприятилэн директорезлэн воштӥсез луыса. Таӵе интыосысь уго удмуртъёсты удгес шедьты. Кыкетӥзэ пумиським Кезысь элеваторысен. Чылк-чылк удмурт вераськемзэ кылыса пайми: "Тӥ бигер ӧвӧл шат?" "Ӧвӧл, конечно, - кит-кит серектӥз пумитам В.Р.Щербакова. - Мон Игра районысь Сундур гуртын вордскемын но будэмын". Со дырысен Валентина Рафаиловнаез весяк син азям возисько, шумпотӥсько будэмезлы, предприятиезлэн азинскемезлы. Куать ар кивалтэ ни Щербакова Ижевскысь кыкетӥ хлебоприёмной предприятиен, ай кыӵе вакытэ шедиз солы та секыт удыс! Озьы ке но, Рафаиловнаез (озьы шуо директорзэс арлыдо ужасьёс) ноку но кунэрес, керӟегъяськись тусын уд адӟы, чагыр синъёсаз котьку шуныт тылсиос шудо. Визьмо, калыксэ гажась кивалтӥсь сыӵе ик луыны кулэ, дыр. Адямилэсь мылкыдзэ сӧрыса, кизэ-пыдзэ куашкатыса- а ужад вормон басьтод? - Тонэ директоре пуктӥзы бере, тыныд со быдӟа коллективез оскизы ке, сюлмаськы котькуд ужасед понна. Кыӵе мылкыдын со уже лыктэ, кыӵе мылкыдын дораз, семьяяз бертэ - ваньмыз со герӟаськемын производствоен. Тӥни малы кивалтӥсь нырысь ик ӟеч психолог луыны кулэ, - шуэ В.Р.Щербакова. - Мынам но секыт дыръёсы луыло, кызьы-о сотэк. Ужъёс ке урод мыно, малпамъя ваньмыз уг ке пӧрмы, сюлэм юн чигиське. Таӵе дыръёсы кабинетысь азбаре потӥсько, олань-талань ветлӥсько но ортче, мылкыд интыяз пуксе. Гуртэ бертыса, аслым нош ик уж шедьтӥсько: кузпалэным ӵош ӝытлы быдэ бызьылӥсько, бассейнэ ветлӥсько Спорт туж юрттэ: тазалык но юнма, стрессовой шуон югдурысь но поттэ. Картэ мынам - оптимист, капчи мылкыдо. Котькыӵе ужлы со егитысен дышемын, яратэ мушен вырыны. Мынэсьтым но гурт котырысь ужъёсме быдэсак сямен вылаз басьтэ. Аслыз таӵе оскымон эш но кузпал Валентина Рафиловна шедьтӥз, Сарапулысь совхоз- техникумын дышетскыкуз. Собере Сюмси районын ӵош ужазы. Ижевскын но кема гинэ уло ни. Асьсэ понна корка пуктӥзы, кык нылъёссэс будэто. Семьяын ог-огдэ валан мылкыд вань ке, уж дурын кык поллы капчи, кышномуртлы- кивалтӥсьлы уката но. Валентина Рафаиловна малы ке-а котькытчы вутске: пумен предприятизэ но вылӥе ӝутэ, соин ӵош ачиз но ялан азинске. Заочно дышетскыса, кык вылӥ образование басьтӥз. Нылъёссы но кыкез но студенткаос: бадӟымез - Удмурт кун университетысь удмурт филологияя факультетын, пичиез медициная академиын тодон-валан басьто. Калык пӧлысь куд-ог дыръя кылоно: кивалтӥсь мурт, пе, майбыр улэ, лумбыт интыяз пуке яке машинаен ворттылэ, секыт ужез уг адӟылы. Вань, вылды, котькыӵеосыз. Кудъёсыз, зэмен но, асьсэ сярысь мултэс трос сюлмасько, вань луонозэ капырто. Щербакова сярысь сыӵе супыльтонъёс-зулёнъёс ноку уз вӧлме, малы ке шуоно, котьмалэсь вылӥе со нырысь ик пуктэ огшоры ужась адямиез. Ачиз но уго гуртын, крестьян семьяын будэмын. Улонлэсь шӧгзэ-кузьытсэ вала. Солэн али кыӵе тужгес но бадӟымез сюлмаськонэз шуоды? Валентина Рафаиловналэн быдэсмымтэ малпанэз - пудолы вылӥ ӟечлыко сиён дасян. Кеньыр лэсьтонын трос гинэ бервылыз кыле: йыдылэн, чабейлэн, сезьылэн, сьӧдчабейлэн отрубез. Сое минерал ватсэтъёсын сурад ке, кыӵе ӟеч фураж луоз! Гуртын улӥсьёс туж кулэясько пудо сиёнлы, отысь но, татысь но басьтыны выро. - Выль удыс усьтыны нош ик коньдон кулэ, нош юрттӥсьёсмы ӧвӧл, - шугъяськонзэ вератэк уг чида предприятилэн кивалтӥсез. - Ми шормуӵе кылем муртлы укшаськом. Городлы кулэ ӧвӧл, Гурт удысъя министерство но шорамы уг учкылы. Ярам коть, "Удмуртпродконтракт" ма но со висъя. Оглом ке верано, ас поннамы бергаськом, вамыш бӧрсьы вамыш лэсьтыны выриськом. Нырысетӥ кварталэз урод ӧм йылпумъялэ, шуыны луоз. Ушъяськымон пайда ӧм ке но басьтэ, тыронъёсмы ӧвӧл, уждун дыраз сётӥськом. Мон малпамъя, та вакытэ со но умой ини. Ижевскысь 2 номеро хлебопредприятие нюръяське дунъёсты кулэстон понна. Зэмен но, рынокен ӵошатыса, татын пызь но, кеньыр но шӧдскымон дунтэм. Но вань соослэн но конкурентъёссы. - Огез вадьсамы, сюрес сьӧрын милям прдукциенымы вузаське, дунзэ кӧня ке копейкалы улӥегес лэзьыса. Сыӵеосты эскерисьёс но уг адӟыло, выт бичасьёс но палэнэтӥ кошко. Кызьы-о вожед уз поты дасез вылын улӥсьёслы? Ми быдэс странаез котыръяськом, сырьё утчаса, соос сюрес сопала потто но барыш люкало, нюлэм вузэс пичи но пызьыртытэк. Закон соосты ик уте ай, нош госпредприятиез котыр ласянь шымырто. Ма шуод, асьмеос ваньмы кыскемын "кыр" рыноклэн сьӧлтэтаз, цивилизацие вуытозь, трос гинэ дыр ортчоз на. Щербакова оске ӟечезлы, соин ик ялан утчаське, кабинетаз пукыны уг чида. Районъёсы потаса, огкылъёс гожто ни вуоно урожайзэс басьтон сярысь. Шаерамы тырмыт ю тысь ке будэтысалзы, предприятие эшшо но умойгес ужасал. Тани алигес гинэ ӝожон поттонъя выль цех усьтӥзы. Шаерамы улӥсьёс понна та сиён туж ӟеч кузьым, малы ке шуоно, Удмуртиын сое кемалась уг лэсьто ни, нош юасьёсыз трос. Табере котькуд гуртэ, котькуд ӝӧк вылэ вуоз. Хлебопредприятие кӧня ке ар талэсь азьло усьтӥз аслэсьтыз магазинзэ, интыяськемын со артэ ик, Пойма ульчаысь 17 номеро юртэ. Кин вуылэ "Деметра" магазинэ, отысь буш киын уг поты: татын нянь но мукет вузъёссы дунтэм. Ваньмыз со - 2 номеро хлебопредприятилэн продукциез. Вузало пудо сиён но. Огез урод - Ижевсклэн мукет палаз улӥсьёслы ветлонэз кыдёкынгес. Лууыал на ке таӵе ик магазинзы Центральной рынокын яке музон интыын, соку басьтӥсез эшшо но тросгес шедьысал, угось город котырысь гуртъёсын огез но семья пудо-животтэк уг улы. Валентина Рафаиловна ачиз вань сюлмыныз бурмемын гурт борды. Малы ке-а дась сётэм квартираысь ас пуктэм юртъераз выжиз: бакчаез бордаз, пудо возён интыез но, мунчоез но котыраз. Корказэс газэн шунто. - Мынам сямы сыӵе - огинтыын пукыны уг чидаськы, ялан маке но утчано, кытӥ ке но бызьылоно, маке но лэсьтоно. Пересьмыса но уг, дыр, воштӥськы, - серектэ Валентина Рафаиловна. Сямыз мукет ке луысал, директорын но ӧй ужасал, вылды, пукысал шыпытак гинэ бухгалтериын яке музон интыын. Люкиськон азямы гуртоослы со вераз сюлмысьтыз потэм кылъёссэ: - Нянь будэтӥсьёслы мон сӥзьысал юн тазалык. Бусы ужъёссэс дыраз но умой мед быдэстозы. Соослэн кеносъёссы ю-нянен тырмизы ке, ми доры но тросгес ю тысь вуттозы. Али лэсьтӥськом сизьым пумо кеньыр, отӥяз, оло, эшшо но ятыргес изом. Продукцимы мед вуоз котькуд корка, котькуд ӝӧк вылэ. Сыӵе сюлмаськонэн улэ но ужа Ижевскысь 2 номеро хлебориёмной предприятие но солэн кивалтӥсез В.Р.Щербакова. Инженертэк кеньыр уд изы Со зэмен но озьы. Виктор Васильевич Федоров нырысь аръёссэ татын механик луыса ужаз, 1996-тӥ арысен - валтӥсь инженер. Та дыр ӵоже предприятиез кортӵогысен кортӵогозь дышетӥз, шуыны луоз. - Миым ужамы сезьы но сьӧдчабей кеньыр изонъя цехез йылпумъян бордын. Татчыозь асьме дорын нокытын но сыӵе кеньыръёсты ӧз изэ, - шуэ В.В.Федоров. - Выль ар азьын шаерамы улӥсьёс понна усто кузьым лэсьтӥм - поттэм продукцимы быдэс республикаез сюдыны тырмоз. Малпан вал азьлогес ик та уж борды басьтӥськыны - ӧз пӧрмы. Коньдон дунтэмамен, кунгож сьӧрысь вайыны чаклам оборудованилы уксёмы тырмытэк ӝегано луим. Басьтӥм Россиын но Украинаын лэсьтэмзэ. Цех усьтон 2 миллион манетлы усиз. Мыло-кыдо юрттӥз "Буммаш" завод, электрокужым сётонэн герӟаськем люкетсэ со быдэсак ас вылаз басьтӥз но вакчи дыр куспын пумаз-йылаз вуттӥз. Озьы хлебоприёмной предприятие, выль цех усьтэмен валче, ватсаса ужасьёс кутӥз на. Вераны кулэ, сьӧдчабей ваньмыз басьтэмын асьме хозяйствоосысь. Та культура Удмуртиын вуэ, удалтэ. Тӥни малы цех усьтӥськемлы тужгес но шумпотӥзы ю тысь будэтӥсьёс, нимаз музъем возисьёс. Кылем гужем ӧзгес вуы сезьы, шонерзэ вераса, пыжись шунды солы ӝутскыны ӧз сёты, интыяз куасьтӥз. Соин ик сезьы кеньыр лэсьтӥське сьӧрлось ваемезлэсь. - Туэ тулыс магазинамы вузаны поттӥмы дорамы дасям ӝожон пызез. Оборудование кылем арын басьтӥм, сертификат но паспорт басьтоно на. Тӥни озьы, 2 номеро хлебоприёмной предприятие дӥсьтыса но оскыса кутске выль но выль удысъёс борды. Зэмен но, ӝожонлэсь шӧмзэ арлыдо адямиос но вунэтыны ӧдъязы вал ини. Удмуртиын сое изон ог дасо ар талэсь азьло ворсаськиз, нокин но тыро-пыдо радъяны ӧз пӧрмыты. Табере вашкала сиён-юонмы нош ик ӝӧк вылъёсамы берытскоз. Соин ӵош адямиос одно ик шуныт кылъёсын тодазы ваёзы, дыр, ӝожон пызь изӥсьёсты. Куд-ог воргоронъёс туж уг ярато нылкышно кивалтӥсен ужаны. Кызьы та шоры учке Виктор Васильевич? - Валентина Рафаиловна кадь директорен, валась, визьмо специалистэн, котькуд ласянь каньыл. Шара сямо луэменыз, удыссэ мур тодэменыз со бордаз кыске. Ӟеч кивалтӥсь туннэ коньдонзэ лыдъяны-кутыны мед быгатоз, сотэк ми выль цехъёс усьтыны быгатысалмы шат? Котькуд ужасез азе со чурыт куронъёс пуктэ, но нырысь ик - ас азяз. Мар ке борды кутскиз ке, одно ик пумозяз вуттоз. Валамон, кивалтӥсь луыны капчи ӧвӧл, но Валентина Рафаиловналэсь ӝожтӥськемзэ уд кылы. Валтӥсь инженер коллективзэс вылӥ дунъя. - Берло аръёссэ со шӧдскымон воштӥськиз. Тросэз адямиос вуизы заводъёсысь, таин ӵош юнмаз дисциплина. Котькудӥз возиськыны выре ас интыяз. Техника сярысь ке верано, сое туала технологияя выльдыны кулэ, Верещагиноын ваньмыз берло куронъёсъя пуктэмын. Ми но, люкетӥсьёс ӧз ке луэ, азинском шуыса малпасько. Продукцимы кошке, кеньыр изэмлэсь кылем-мылемез мынэ пудо вордӥсьёслы. Огъя вераса, одӥг нунал но интыямы ум сылӥське. Вуко кӧ бергамен ӵош, производство ялан азьлань но азьлань дыртэ. Инженерной служба азьын али бадӟым ужпум сылэ: лэсьтоно канализацияя сетьёс. Сотэк выль продукция поттон ӝега. Отӥязпичи пиналъёслы, висисьёслы сезьылэсь быгатысалмы диетической кеньыр, пызь изыны. В.В.Федоровлэн осконэз вань, Удмуртиын президент луиз ке, улонмы ӟеч пала берытскоз шуыса, тужгес но радлык тупатон ласянь. Соку, оло, 2 номеро хлебопредприятие но республикаын ас кулэлыксэ мургес шӧдоз, юрттэт но кулэезъя вуоз. Котькуд воргорон сямен, Виктор Васильевич сюлмыныз политикае кыстӥське, иворъёсын телепередачаосты огзэ но кельтытэк учке. Россилы Президентэ Путинэз быръёнэн со быдэсак соглаш, военной адямиослы осконзэ ӧз ышты на. Нош армия сярысь малпанэз суро-пожо. Югдурез чакласа, Федоров малпамъя, армиын служить карыны кулэ профессионалъёс-воргоронъёс. Та секыт ужез мукет пельпумъёс вылэ выжтыны уг яра. - Пие школаын дышетске на, 15-яз мынэ. Службалэсь со уз палэнскы, туала армие мынон мылкыдыз ӧвӧл ке но. Ачим сярысь ке верано, мон понна Советской Армия зэмос школа вал. Командиръёсме туннэ но ӟечен тодам ваисько, нош службаын басьтэм тодон- валанъёс али но ужаны юртто. Кеньыр изон удысэз политикаен герӟаны кулэез но ӧвӧл, дыр, но экономика сотэк луэ шат? Кызьы "ӝукмы пӧзёз", озьы ик улон-вылонмы радъяськоз. Федор СУВОРОВ Тӧл Тӧла тӧл. Я тӧла, тӧл. Кема эн кӧл. Тӧлат тон Вань уродзэ. Эн тӧлат Ӟечсэ. Тӧлат тон Така йырез. Тӧлат тон Гылатэм дӥсез. Тӧлат тон Урамъёсты. Тӧлат тон Бусыосты. Тӧлат тон Ӟырдэктэм Кусыпъёсты. Тӧлат тон Кисьмась юэз. Тӧлат тон Арамаез. Тӧлат тон Куректӥсез. Тӧлат тон Пӧсь сюлэмез. Тӧлат тон Ож бугорез. Тӧлат тон Гурезьёсты. Тӧлат тон Зарезьёсты. Тӧла, тӧл! Эн тӧлат Ымдуръёсты. Оскон Мон оскисько Ошмес Шулдыр жильыртэмлы. Мон оскисько Уй пеймытын Лушкем Шашы шыпыртэмлы. Мӧзмыт Кошкись пилемъёслы Но оскисько. Мон оскисько Кысӥсь Льӧль шундылы. Мон оскисько Огназ Калгись Вог толэзьлы. Туж кыдёкысь Кизилиослы Но оскисько. Мон оскисько Эшъёсылэн Юнэсь киоссылы. Мон оскисько Пуныелэн Либыт Учкемезлы. Уг оскиськы Тынад Синъёсыдлы. Варавай Варавай палъёсы вуыкум, Сюлэмы веранэн тымиське. Ӵуж мертчан йырсидэ адӟыкум, Мылкыды йырсияд тугаське. Пушйиллям шур валлин бадьпуос, Васькытэк мон отчы нош ӧй ӵыд. Согисько ветлылэм сюресъёс, Нош уг вуно верам кылъёсыд. Ортчыло бурд вылын кадь аръёс, Нырысьсэ пумитай кадь тонэ. Нош вуо чебересь малпанъёс, Яратон шат выльысь пуроме. Варавай палъёсы вуыкум, Мылкыды шудбурен пылаське. Варавай палъёсысь кошкыкум, Сюлэмы мӧзмонэн чигиське. Мӧзмон Вадур кузя, Вадур кузя Пурӟо ини легезьпуос. Тулыс, лэся, тулыс, лэся, Нош ик чирдо ни уӵыос. Вадур дуртӥ, Вадур дуртӥ Ветлӥ огнам мон мӧзмыса. Тыныд оски, тыныд оски, Татчы васькод тон шуыса. Вадур, Вадур, кӧня крезьгур Кырӟад монэ тон веттаса. Вадур, Вадур, кӧня шудбур Татчы кельтӥ мон ыштыса. Вадур кожъёс, чылкыт вуос Бызё ялан юн поръяса. Малпанъёсме, кайгуосме Возё соос мур ватыса. Тулыс, лэся, Вадур кузя Пурӟо ини легезьпуос. Кинлы меда, кинлы меда, Нош ик чирдо ни уӵыос. ВОРМОНЛЫ - 55 АР Сюлэм ялан бӧрдэ... Быдӟым Отечественной войналэн ортчемез кыдёке но кыдёке кыле. Тани туэ Вормонлы 55 ар тырме. Но атайёсмылэн, вынъёсмылэн, сузэр-апайёсмылэн ожмаськон лудэ пыраклы кылемзы, война вылтӥ милям - еж адямиослэн курадӟыса улэммы но ужаммы ноку но уз вунэ. Тани мон ог 40 ар ӵоже война сярысь киноосты учкыны ӧй быгатылы, бӧрдӥсько вал. Али но кулэмъёсты тодэ ваён нуналъёсы дядиме тодам вайыса бӧрдӥсько. Оло 1942- тӥ, оло 1943-тӥ арын ми солэн быремез сярысь ивор басьтӥм, "без вести пропал" шуилям. Кызьы озьы фронтэ келям солдатлэсь кытчы луэмзэ уг тодо? Ыжъёсты сямен нимтулзэс но юатэк-тодытэк тыложе келяллям-а, мар-а? Я, шӧйзэ ке ӧз шедьтэ, но кыӵе фронтэ келямез коть тдмо луыны кулэ ук! Ог дасо ар талэсь азьло военкоматэ ветлӥ. Тодэме потэ вал кыӵе фронтэ атаймес келяллям вылэм. Ветло, пӧй, со музъем вылэ, удмурт сюй нуыса. Ӧз пӧрмы. Военкоматын кыӵе ке офицер шуиз "Мар тӥ, пересь, али кытысь мае шедьтод на". Вераськемез но, утчамез но ӧз поты. Мон отысь кӧты ӝож луыса кошки. Фронтэ келямзы бере дядямылэсь одӥг гожтэтсэ сяна ӧм басьтэ. Со бере нокыӵе ивор ӧз вуы ни. Со гожтэтсэ но ыштӥськеммы. Али визьмы ке луысал, со гожтэтэз зарни интыын возьысал. Тодӥсько на, гожтэт вылаз гожтэмын вал г.Калинин. Ветлӥ Калинин городэ, сюй нуи. Юаса-юаса вуим ожын быремъёслэн памятниксы доры. Отын туж ӝужыт одӥг гинэ юбо сылэ. Номыр гожтэмез но, котыраз писпуосыз-сяськаосыз но ӧвӧл. Мон чылкак пайми. Газетъёс пыр тодӥсько, Калинин город дорын туж ӟырдыт ожъёс мынӥзы шуыса. Неужто солдатъёслэн отчы кельтэм улонзы юбо тыр гинэ сылэ? Та мыным кыкетӥ шуккет луиз. Тӥни озьы, туэ но синкылиосын пумитасько Вормонлы 55 ар тырмонэз. Мон али ке но возьмасько дядиме. Войнае басьтэмъёсты келяськомы вал быдэс гуртэн тӧл вуко дорозь. Дядилэсь со вуко дорысен верам кылъёссэ кулытозям но уг вунэты: - Нылы, пумозяз дышетскы, тыршы. Солэн индылэменыз, улон секыт ке но вал, 1944-тӥ арын пыдам кутэн педучилищее дышетскыны мынӥ. Нуналаз одӥг пол сиськылӥ. Собере быдтӥ институтэз. Дядиелэсь веранзэ быдэстӥ. Но со ӧз адӟы ни... О.КУБАКОВА. Ижын улӥсь. Солы оскиз бырйись Светлана Смирнова "Югдурез возьматэ калыклэн мылкыдыз..." Майлэн кутсконэз Кун Думаысь депутат Светлана Смирнова понна пӧсь луиз. Ӧвӧл, куазь ласянь ӧвӧл. Уж трос люкаськиз. Праздник нуналэ вордӥськем палъёсаз Дэбесэ - бертылыса, ӵуказеяз ик ортчытоно ни вал уно пумиськонъёс. Нуназеозь - юрттӥсьёсыныз, бӧрысь - "Байгурезь" землячествоысь ветеранъёсын, ӝытсэ - "Шунды" огазеяськон котыре люкаськем эшъёсын. 4-тӥ мае Смирнова ужаз Глазовын, вуылӥз отысь кӧня ке предприятиосы. 6-тӥ мае сое ӧтизы В. В. Путинэн пумиськонэ - Кремле лыктӥзы Президент луон понна нюръяськонын вормисьлэн дурбасьтӥсь адямиосыз. Соос ог 500 мурт вал, пӧлазы - асьмелэн депутатмы. 7-тӥ мае Светлана Константиновна пыриськиз иногурация шуонэ, 9-тӥ мае Мавзолей вӧзысен адӟиз Вормон парадэз. Толэзьлэн дасэтӥ нуналаз бер ӝыт Ижевске вуыса, ӵуказеяз ӵукна вить но ӝыны часын со Камбаркае кошкиз ни. Отысь вуиз ӝыт дас одӥг часын. 12-тӥ мае лумбыт ужаз Можга городын. Ӵуказе пыриськоз ни Кун Думалэн огъя кенешоназ - депутатъёс эскерозы премьер-министре ӵектэм Михаил Касьяновлэсь кандидатуразэ. Мыным кылдӥз депутатэн ӵош Камбаркае ветлыны. Нунал ӵоже С. Смирнова вить пумиськон ортчытӥз. Нырысь со вераськиз администрацилэн залаз люкаськемъёс азьын. 11 часын депутатэз витизы ни Шолья посёлокын улӥсьёс. Отысь клубе автобусэн ваизы Армязь, Ершовка но мукет гуртъёсысь калыкез. Кык час ортчыса - нефтебазаын пумиськон. Бӧрысь Камбаркаысь машина лэсьтӥсьёслэн дворецазы люкаськемъёсын кенешон. Ӝытазе, ужан смена бырем бере, газ тӥрлык поттонъя заводын ужасьёсын вераськон. Ма сярысь юалляське калык Кун Думаысь депутатлэсь? Каньылак вераны, дыр, мар пумысен уг юалляськы. Басьтом огзэ гинэ пумиськонэз. Шольяын, Светлана Константиновна ужамез сярысь ӝыны час ӵоже верам бере, нырысетӥ юан сётӥзы посёлокысь бигеръёс: "Малы выль паспортын национальность интые кирос пуктэмын. Уг-а луы сое отысь утялтыны?" Таосыз бӧрсьы султӥз ужысь ветеран Феофан Костриков. Со дасо пала юан дасям: "Кулэстозы-а уждун тыроно фондысь тыроно вытлэсь быдӟалазэ? Син азьын узырмем муртъёслэсь ваньбурзэс выльысь государстволы берыктозы-а? Посёлокысь нылпи садын туж кезьыт, уд-а юрттэ отчы шуныт сётӥсь гумы кыскыны?.." Уно юанъёсын вазисько школаын ужасьёс. Соосты шугъяськыто пиналъёсты транспортэн нуон-ваён, тазалыкез утёнысь тырмымтэос, йыртэмасьёслэн йылэмзы но трос мукет ужпумъёс. Егит муртэ сюлмаськытэ Россиысь экономикалэн ӵуказе нуналыз. Луоз на-а, пе, асьмелэн планъя вуз поттон? Мӧйы кышномурт вазиське висись бускелезлэн куронэныз: соиз ыштэм Ленинградысь война вакытэ кошкемез пумысен справказэ, соин валче ичигес пенсия басьтэ. Дышетӥсь Алсу Халимова сэзъя ёрос администрацилэн постановлениеныз. Кӧня ке ар талэсь азьло солэн коркаез ӝуаз, юрттон выльысь, квартира сётӥзы, нош со улон интылэн азьло кузёезлы коньдон та дырозь келямтэ. - Та ужпумъя тӥледлы асьтэ администрацие вазиськоно, - шуиз Светлана Константиновна. - Пайдаез ӧвӧл, кыл сёто - уг быдэсто, - дырекъяса вера ӟырдам кышномурт. Пумиськонэ депутатэн лыктэм ёрос администрацилэн кивалтӥсез Александр Романов йырыныз шона: "Тодӥськом та ужпумез, лэсьтом". - А-а, кӧня пол озьы вералляды ни, - осконзэ ыштэм дышетӥсь интыяз пуксе. - Ёрос йырды мон азьын кыл нырысьсэ сётӥз ай, - депутатлэн тазьы шуэмез залысь омырез шунтӥз кадь. Шонерзэ вераса, сю юан пӧлысь сизьымдонэз-тямыстонэз герӟаськемын интыысь ужпумен. Ма сярысь со вера? Калык шер адӟе гурт но ёрос администрациоысь кивалтӥсьёсты, специалистъёсты. Яке пумиськонъёс луыло ке но, отын ӝутэм ужпумъёсъя тырмыт ужрадъёс уг кутӥсько. Туж уг окмы валэктон уж. Тани алигес Камбарка городын но ёросын будэтӥзы улон инты понна дунъёсты. Ӧз, юнме шорысь ӧз. Озьы кароно луизы, быдэс Россиысь жидищно-коммунальной хозяйствоын реформа ортчытэмен. Соя чакламын уго юрт возёнэн герӟаськем вань тыронъёсты кӧня ке ар куспын калыклэн пельпум вылаз куштыны. Россиысь куд-ог улосъёсын тани тупатэм тарифъёслэсь ог 60 процентсэ тыро ини. Удмуртиын - ӝынызэ пала. Камбаркаын 1-тӥ апрельысен тырыны чакламын 30 процентсэ. Мукетъёсынызы ӵошатыса, трос ӧвӧл кадь. Но татын укыр бадӟымесь ыштонъёс адӟоно луо шуныт сётӥсьёс. Мукет ёросъёсын но городъёсын котельнойёс кемаласьгес ини газэн ужало, Камбаркаын весь мазутэн эсто на, кызьы шуо, гумы кузя лыктӥсь чагыр эстӥськон татчы ӧз вуы на. Отысь потэ квартира понна тыронъёслэн бадӟым асдунзы. Соин ик городын улӥсьёс толэзьлы быдэ ог 300-350 манет висъяно луозы куинь комнатаен огшоры квартира понна. Со ик шугъяськытэ калыкез. Ёрос кивалтӥсьёслы та пумысен трос гинэ валэктоно луиз пумиськонъёс дыръя. Куанер улӥсьёслы компенсация сётъяны чакламын шуыса верамезлы кин но со оскиз ке но, уноез адямиос та пумысен шуге-леке вуэмын на. Камбаркалэн мэрез Алексей Бейсле (со но пыриськиз пумиськонъёсы) решение кутӥз ӵуказеяз ик специалистъёсты люканы но калык пӧлын ЖКХ-ын воштӥськонъёс пумысен валэктон ужез чутрак кужмоятыны. ... Паром выжтӥз машинаез Кам вамен. Куазь пеймыт луэ ни. Депутат нуналлы йылпумъян лэсьтыса маде: - Котькуд районын, котькуд предприятиын пумиськон ас сяменыз ортче. Туннэ шуг вал. Ма карыны ёрмеменызы, адямиос депутатлы вазисько олокыӵе но куронъёсын. Данаксэ соосты уно кужым но коньдон кутытэк быдэстыны луоно интыосын. Куддыр шуныт кыл гинэ но тырме. Таӵе но чакламме верам потэ. Сояз яке таяз коллективын та дырлы югдурез туж шонер возьматэ калыклэн мылкыдыз. Тодэ лыктэ Чепца механической заводын алигес кенешонъёс. Отысь рабочийёс липет тупатъян яке гумы кыскон пумысен вераськон но уг ӝуто, юаллясько Думалэн кызьы ужамез, выль Президент, Чечня пумысен. Малыез валамон. Та азьмынӥсь предприятиын шоро-куспо уждун ньыль сюрс манетлэсь ятыр. Кивалтӥсьёс - сюлмаськисесь. Мукет югдур тани Камбаркаын. Залын пукисьёслэн ымныръёссыя ик шӧдӥське, татын туж трос на быдэстымтэ ужъёс шуыса. Озьыен, ёрос администрацилы чупресгес кариськоно. Быръён кампания дыръя Светлана Смирнова округысь ваньмаз городъёсы но ёросъёсы ветлӥз. Соку ик кыл сётӥз, та арлэн нырысетӥ ӝыныяз котькул коллективе вуылыны. Дас ньыляз ёросын пумиськонъёс ортчизы ни. Июнь пумын депутат чакла кылемъёсаз ветлыны. И. ЛЕБЕДЕВ. Киросэз сое утиз Таӵе орденъёсын, медальёсын, азвесям тушо пересьёс улонамы ӧжыт ини - газетъёсы, журналъёсы соос кылемын. Зэм ик, Артемий Петров но таӵе тусбуен "Удмуртия" книгае-альбоме сюриз. Легендаысь адями кадь адӟиське со табере. Музъем ужась, мушкась, Горд Армилэн азьвыл командирез туэ 88 арессэ тырмытэ ни. Секыт но кузь сюресэз со ортчиз, танк улысь окопысь улэпкын потӥз, концлагерьёсын костаськиз. Киноысь гинэ адӟод на сыӵе суредъёсыз. Но герой асьмемын артэ. Со улэ Пичи Пурга ёросысь Орлой гуртын. 1935-тӥ ар. Соку гинэ армие басьтэмъёс эшелонэн шунды ӝужан пала мыно. Мышказы кылизы Огырчи, Кечол, Сарапул... Урал гурезьлэн йылъёсыз, вистэм-вожтэм нюлэсъёс... Забайкалье - тӥни кытчы вуттӥзы соосты. Кунгожлы кӧня ке гинэ иськем. Сак луоно, сак учконо. - Куддыръя кунгож вамен потыны турттӥсьёс ньыльпыдъяськыса, гондыр куэн бинялскыса но частьмы доры вуылӥзы. Одӥг пол порох возён склад пала кошкись адямиез адӟи. Со сярысь разводящийлы верай. Тодмотэм адями складэз пуштытыны малпа вылэм, - тодаз вае Артемий Тимофеевич. Дальний Востокын югдур пумен ӟырдаз. 167-тӥ стрелковой дивизиысь автомеханизированной полкез Монголиысь степьёсы вуттӥзы. Шӧдӥське вал ни, Японилэн Квантун армиез асьме вылэ но урдскоз шуыса. Зэм ик но, 1938-тӥ арын Владивосток дорысь Хасан ты дорын ожъёс пуромизы. Боевой тревогая ӝутӥзы ке но, Артемий Петровлы эшъёсыныз отчы пыриськоно ӧз луы ни - самурайёсты соостэк но пазьгиллям... Быдӟым ож кутскыса, А. Т. Петров выльысь солдат шинель дӥсяз. Воронеж фронтэ сюриз. Армиын вал ни шуыса, сое отделенилы командире пуктӥзы. Шимес ожъёсы пыриськизы "максим" пулемётъёсын. Куддыръя, гранатаосын гинэ ӧвӧл, ӝуась суретэн тырмытэм бутылкаосын но пазьгылӥзы немецъёслэсь танкъёссэс. 1942-тӥ арын пӧсь гужем Березовское село дорын ожмаськемез Артемий Петров понна берпуметӥез луиз. Секыт сӧсырмыны шедиз со отын... Та нуналъёсыз ветеран али кадь ик син азяз пуктэ... (Тодэ ваёнъёссэ 1994-тӥ арын печатлазы районазы потӥсь "Маяк" газетын но.) - Ми вылэ немецъёслэн танкъёссы лыкто (пехотазы ӧвӧл, танкъёс гинэ). Соосты пазьгыны кулэ, шуэмын вал. Гранатаос лэзьям. Ог дасозэ сутӥм. Нош танкъёс кузьыли мында лыкто. Ми ӧжыт. Бутылкаосмы но гранатаосмы быризы - буш киосын ма карод на? Окопын - кык вием эшъёсы, мон контузить каремын, суйы вӧсь луэмын. Вылтӥмы танк ортчиз... Кӧня кыллиськем - уг тодӥськы ни. Шӧдыса кутски вырӟылыны, каллен гинэ одӥгзэ киме сюйысь поттӥ. Оло, ачим ик потыны быгатысал ай, но "юрттӥсьёс" вуизы - грузовикен немецъёс. Поттӥзы монэ сюйысь, пыд йылам султытӥзы, утчаськизы. Бумага юдэсме шедьтӥзы... Ожлэсь азьвыл ай мон сое окоп дорысь адӟи, сузьтӥськыны медӥсько вал (тамак бинялтыны, пе, яралоз) - тӧл ачиз сое окопе куштӥз. Отын молитва но православной киросъёс печатламын вылэм. Оскись вал бере, таӵе бумагаез арам карыны умой ӧз поты, кисыям понӥ. Монэ грузовике пуктӥзы. Отын пленэ шедем мукет солдатъёсмы но вылэм. Соос монэ дэременызы биньылӥзы, суйме пичи пулъёсын пачкатӥзы... Пӧртэм концлагерьёсын курадӟиськиз. Берло Бухенвальдын вал. Кыллиськод отын, кулэм мурт кадь, улысё-вылысё нара вылын... "Мунчое" мыныны черодэ вуиз. Носилкае кыскыса куштӥзы, "мунчоын" кыльылӥзы. Бадӟым гур ыме пырыны гинэ кылиз вал... Молитваен бумагаме олокызьы утьыны быгатӥ. Мырдэм кужмы тырмиз на пиысьтым поттыны. Малпазы, "инмарлы оскись" шуыса - гуре ӧз куштэлэ. Маин отын сюдӥзы? Сыӵе сиёнэн, кудзэ пуны но уз сиы. Шыд - кушман куаръёслэсь, пӧлаз - сузямтэ сьӧдчабей кеньыр пырыос но паламтэ картошка. Со но ваньмызлы уг тырмыт вал ай. Пул пызен нянь сётъяллязы: нуналлы - одӥг сукыри дас адямилы. Со нянез уж чакласа, огмындаен люкылӥськом вал. Асьме музъем вылын ке лагерь - отын улӥсьёс милемлы сиён сэрпалляло вал. Германиын озьы сётъясьёс ӧй вал. Одӥг пол пленнойёс немецъёслэсь пунызэс кутӥзы но сиизы. Возьмаськисьёс кема юалляськизы, кин пуныез вииз шуыса. Кык муртэ шедьтӥзы но улэпкын сюе согизы... Кызьы милемыз мозмытӥзы? Асьмелэнъёс Берлин дорын вал ни. Кылӥм пушкаосысь ыбыло шуыса. Немецъёс ваньместы ик бадӟым подвалэ пыртӥзы. Вылыстыз вылаз кадь пуким. Мар карыны ӧдъяло вал милемын - уг тодӥськы. Нош асьмелэнъёслы верамын вылэм ни, пленнойёс подвалэ пытсамын шуыса - юрттэт дырыз дыръя вуиз... Мозмытэмзы бере пӧртэм комиссиос, эскеронъёс пыр ортчи. Куать толэзь кыллёно луиз, тазалык, кужым люкаса. Артемий Тимофеевичез соку утиз осконэз. Инмарлы осконэз. Али сое утё Миша пиез, Альбина кенэз но яратоно Оля внучкаез. Ачиз верамъя, сое укно дурысь будосэз, сяськаез кадь утялтыса возё. Виктор Поздеев, историлы дышетӥсь. Котькудӥз ас интыяз Глазовысь аракы пӧзьтӥсьёс сярысь газетмы кӧня ке материалъёс печатлаз ни. Со юнме шорысь ӧвӧл. Ликеро-водочной заводлы (ЛВЗ-лы) туэ кылдэмез дырысен 100 ар тырме. Юбилейлы сӥзем ужрадъёс мыно ни. Нош самой бадӟымез луоз 20-тӥ мае Глазовын. Отчы пыриськоз "Играй, гармонь!" передача нуись Геннадий Заволокин но. Туннэ эшшо возьматӥськом на вашкала предприятилэсь ӟеч ужъёссэ но отысь куд-ог лулысь-сюлмысь тыршисьёссэ. Амалтэк тодэ лыктэ дуннеысь вина пӧзьтӥсьёслэн миым майлэн пумаз Лондонын ортчем адӟытонзы. Отчы асьсэлэсь аракызэс ваизы уно странаос, кылсярысь, Австрия, Швейцария, Германия, Нидерланды, Россия но мукетъёсыз. Выставкаын возьматэмын вал 500 пумо вина но 60 пумо водка. Глазовысь ликёро-водочной завод отчы ваиз "Калашников", "Глазовская", "Шедевр Страдивари" водка, "Чепца" коктейль, "Иднакар" бальзам но музонзэ. Кыӵе мылкыдын бен Лондонэ мынӥз ЛВЗ-ысь валтӥсь технолог Галина Васильевна Поздеева? Кӧня ке осконэз вал "Калашников" водкалы. Угось сое туж ӝог яратӥзы Удмуртиын но солэн палэназ улӥсьёс. Тодо сое кунгож сьӧрысь странаосы но. Завод та аракыез витетӥ арзэ пӧзьтэ ни. Солы сётэмын куинь зарни, ньыль азвесь но одӥг бронза медальёс. Нош Лондонын ваньмыз мукет сямен кадь берыктскиз, зарни медаль басьтӥз "Глазовская" водка. Пусйыны кулэ, татын продукцизэ возьматӥз Москваысь "Кристалл" тодмо ликеро- водочной завод но. Солэн аракыез 30-лэсь ятыр странаосы кошке. Но таяз выставкаын москвичъёс одӥг награда но ӧз басьтэ. Галина Поздеевалэн шумпотонэз кылын верантэм вал. "Калашников" водка но дипломен пусъемын. Глазовысь аракы пӧзьтӥсьёс кемалась дырысен ӟеч вина пӧзьтыны быгато. Юнме шат завод 100 арзэ пусъе. Солэн продукциез революцилэсь азьло ик Россиын тодмо но данъяськымон вал ни. Али завод - туала усто оборудованиен предприятие, вина лэзья ньыль автоматической линиен, вуэз чылкытатэ мембранной установкаен. Предприятие "Чепца" нимо сур но пӧзьтэ ни. Посудаез фирменной, музон заводъёсын уд ӵошаты, пеймыт пиялалэсь кисьтэмын. Глазовысь вина пӧзьтӥсьёс вашкала амалъёсты но уг вунэто. Уже куто ю тысьлэсь пӧзьтэм спиртэз гинэ. Пумен кужмоя Балезиноысь спирт поттон заводэз. Берло дыре ЛВЗ 80 пумо аракы но вина пӧзьтэ, водкаез гинэ 10 пумо. Берло вить ар ӵоже продукциез 50-лэсь уно зарни, азвесь но бронза медальёсын пусъемын, нош И, ИИ, ИИИ степенё дипломъёсын - 20 пала. "Калашников" водка вузаське Америкае, Австрие, Новой Зеландие, Германие но Западысь музон странаосы. Та водкалы уго нимаз линия усьтэмын. Таӵе азинсконъёс ас кожазы уг лыкто. Ваньмыз ӟечез герӟаськемын коллективлэн, котькудӥзлэн ужасьлэн мылысь-кыдысь тыршеменыз. Предприятиын семьяен-семьяен тыршисьёс но вань, арлыдоосын артэ ас нитызэс шедьто егитъёс. Тани кызьы уд вера вузкаронъя но сбытъя отделысь Лариса Сакеринаез. Со маркетингъя валтӥсь специалист, ваньзэ азьло ик чакла, лыдэ басьтэ тужгес но басьяськисьёслэсь куронъёссэс но мукет кулэяськонъёссэс. Оглом, производствоез но вузкаронэз герӟа, кулэ дэмланъёс но визь-кенешъёс дыраз сётъя. Соин гинэ ужез уг тйылпумъяськы. Выставкаосты но мукет ужрадъёсты радъяны юрттэ, уката ик пӧсь йӧтэ али, юбилейзылы дасяськон дыре. Со бен огназ ӧвӧл. Та бадӟым ужрадэ кин кызьы быгатэ ваньмыз пыриське. Татын бен директорлэн Николай Сорокинлэн сюлмаськонэз ичи шат? Огъя кужымен дэмен ваньзэ вормо. Тани ас ужзэс быгатыса быдэсъяло бухгалтеръёс Татьяна Ковальчук но Людмила Сверчкова. Эшъёс лыдъян-чотан ужез вить чиньызэс кадь ӟеч тодо, одӥг лыдпусэз но уз суралэ. Зэм, заводын котькудӥз ас интыяз, кулэ ужез лулысь-сюлмысь быдэсъя. Тани озьы шуыны луоз автопогрузчикын ужась водитель Леонид Брыляков сярысь. Солэн тырон- ӝоктонэз вазь ӵукнаысен бер ӝытозь тырме. Соин ик Леонид Петрович техниказэ юн чакласа ужатэ но нокинэ уг ӝегаты. Завод нуналлы быдэ уно тоннаосын продукцизэ келя. Водка но винаос пӧртэм интыосы кошко, тужгес но трос Ижевске мыно. Ваньзэ сое чаклано-эскероно. Та ужез син азязы возё утиськон ёзысь ужасьёс Сергей Подорожных но Надежда Золотарева но мукетъёсыз. Бен, ЛВЗ-ын мылысь-кыдысь тыршисьёссы уно. Ваньзы соос предприятилэсь юбилейзэ, 100 ар тырмонзэ капчи мылкыдын, ужазы выль вормонъёсын пумитало. Ӟечкыласьком тӥледды, Глазовысь аракы пӧзьтӥсьёс, бадӟым праздникеныды, сӥзиськом юн тазалык но шудо улон! Г.РОМАНОВ. Валтӥсь специалист Лариса Сакерина. Бухгалтеръёс Татьяна Ковальчук но Людмила Сверчкова. Автопогрузчиклэн водителез Леонид Брыляков. Утиськон ёзысь ужасьёс Сергей Подорожных но Надежда Золотарева. ЛВЗ-лэн продукциез. Туспуктэмъёсыз В.Беломорскихлэн. Ижын но ортчоз Тодмо кылбурчи Александр Белоногов али пумиськылэ лыдӟисьёсыныз. Вордӥськем гуртаз, Вандэмое, вуылӥз апрель толэзе. Туж шуныт пумиськон вал Можга ёросысь Бадӟым Сибы гуртын, Можгалась 10-тӥ школаын, озьы ик - Алнашысь нылпи крезьгуръя школаын. Сӥзьыл Александр Егоровичлэн улон-вылонэзлы но ужъёсызлы сӥзем бадӟым ӝыт ортчоз Ижын. Е.Ромашова. УЧКИСЬ ВЕРА МАЛПАНЗЭ Кулэ-а "Аннокен" ӵошатыны? Нырысьсэ учки - мон но синмаськи та выль бадӟым ужлы - "Айна" спектакльлы. Учкись луыса, мон вылӥ дунъет сётӥсько солы. Ма, зэм но, туж кельшиз. Егит, чебересь артистъёс быгатыса возьмато, ма со Яратон но Вожан. Бен, соос улонын ноку но ог- огенызы уг тупало, пӧртэм вожвылъяськон мылкыдъёс кылдыто, куддыръя йыружозь вутто. Та пумит луись мылкыдъёслэсь нюръяськемзэс сюлэме пыӵатыны юртто пеймытэз воштӥсь сайкыт, шундыё сценаос, озьы ик ӝож но капчи кырӟан гуръёс. Туж ик синмаськыто удмурт дӥсьёс но арбериос: ӵушконъёс, чалмаос, дэремъёс, айшонъёс, кортлэсь жингыртонъёс, чигвесьёс. Соос туж чебересь, чилясесь. Пыдкукъёс но умой малпамын - "кулэсь" вурем макеос. Тодӥськом, удмуртъёс кема дауръёсын усто пӧйшурасьёс вал. Одӥгез соос пӧлысь - азямы, пӧйшурась Бураш. Солэсь рользэ усто пӧрмытэм арист Алексей Ложкин. Та вакытэз туала учкисьлы матэ карыны юртто сцена дуре ошылэм пӧйшур куос (туж умой бутафория - луд кечлэн, ӟичылэн, кионлэн, гондырлэн куоссы яке кроликлэн, ыжлэн гинэ-а - мон соосты ог сю лыдъяй). Артан но Узыбей кадьёс узырмылӥзы, куанеръёслэсь выт - пӧйшур куосты - кужымысь октыса но сое вузаса, зарни поттылӥзы. Озьы ик яратонэз уксёен басьтыны луоно кожазы ("Кырым пыдэсад шильыртӥз ке коньдон, ныллэн сюлэмаз но шедьтод, дыр, усьтон). Пӧйшурась Бураш но узыр пи Артан куспын жугиськон пумен пуроме. Бадӟым яратон но вожан соосыз вуттэ пурт меӵ ваче. Кескич, пӧяськись узыр пи бышкалтэ пӧйшурасез. Тодӥськод: та зэмос ӧвӧл, нокыӵе вирез но ум адӟиське, - озьы ке но, та сцена сюлэмез шымыртэ, али тон учкись гинэ ӧвӧл ни, тон соосын ӵош, со югдуре сюремын кадь. Сыӵе ас палаз кыскыны быгатэ та спектакль. Берпум сценаос бырытозь, отысь уд потӥськы ни. Талы юрттэ Игорь Моисеевлэн Артанэз сокем оскымон, быгатыса, ассэ ик пызьыртыса кадь шудэмез но. Шӧдӥське: спектакль йылпумъяськем бере но актёр рольысьтыз потыны уг на быгаты. Куке ини ваньмыз пальпото... Спектакльлэн нырысь люкетаз егит артистъёслэн верамъёссы залэ ӧзгес кылӥське. Нош дано, туж тодмо артистъёсмы Валентина Загуляеваен Леонид Романов (Пилича но Ӵушег) капчи выросэнызы, чылкыт но маскара вераськеменызы учкисьлэсь серемзэ но потто. Валентина Александровна татын эшшо огпол возьматӥз на усто кырӟаны быгатэмзэ но. Солэсь бере ӧз кыле кадь егит артисткаосмы Валентина Моисеева (туж чебер, сюлэмез вырӟытӥсь вал А.Ложкинэн дуэтсы), озьы ик Елена Сунцова. Кулэ-а меда "Айнаез" "Аннокен" ӵошатыны? Соиз умой вал ас вакытаз, нош таиз туала учкисьлы туж кельше. Огкылысь, ог мылкыдын, ог-огдэ валаса пуктэмын та пьеса. Туж усто пӧрмем. Кытчы гинэ - кыдёке гастроле-а, шаерысьтымы гуртъёсы-а - вуылозы та спектаклен - оскисько, солы умой дунъет сётозы. Сюлмысьтым тау карисько "Айна" пьесаез дасясьёслы, пуктӥсьёслы, вань актёръёслы. Яратон гинэ мед луоз улонады, озьы ик ваче мед тупалозы ваньбур но шуд, талант но уждун. Милитина МИХАЙЛОВА, Ижевскын улӥсь. Лыдӟись вера малпанзэ Музъем - вуз ӧвӧл Мон "Удмурт дунне" газетэз трос аръёс ӵоже басьтӥсько ни. Шумпотыса лыдӟисько отысь статьяосыз. 18-тӥ феврале поттэм газетысь А. Андрияновлэсь "Сюлэмез вандӥсь гожтэт" статьязэ лыдӟыса, зэмзэ ик сюлэмез бышкалтӥз кадь. Сое быдэсак семьямы лыдӟиз. Мон - пенсиын ни. Колхозысь ветеранъёслэн кенешенызы кивалтӥсько. Пенсионеръёсын люкаськыса, статьяез котыр ласянь эскерим. Ваньмызлэн туж вожзы потэ музъемез вузаны турттэмзылы. Демократъёс умой улонэз быдтӥзы. Экономикаез куашкатӥзы. Азьло улонэз курлало. Куд-огез асьсэос но коммунистъёс вал. Соос ик предательёс но луизы. Кудпалась тӧл пельтэмез шӧдыса, калык ваньбурез качазы но узырмизы. Весь верало азьло черодъёсыз. Калыклэн уксёез азьвыл тырмыт вал. Ваньмыз ческыт сиён, дӥськут, мебель октылӥзы. Мынам 5 нылпие. Преникез ящикен басьтыса сиылӥмы. Ческыт сиёнъёсмы ӧз бырылэ. Нош табере килоен но басьтыны моӵ уг тырмы ни. Соин ик черодъёс но ӧвӧл ни. Ветлӥськод, вузъёсты учкыса, музейтӥ кадь, дунъёс нош ялан будо. Табере музъем борды эшшо урдскыло. Милям колхозлэсь трос гектар музъемзэ фермеръёслы висъязы вал. Табере со музъем вылын уг ужало ни. Буш кыллё. Отын кизем кадь ӝужытэсь кызьпуос будо. Колхозэ но берен уг сёто ни со музъемез. "Сётоно ӧвӧл музъемез вузаны!" - шуо ваньмыз пересьёс но, ужасьёс но. З. Куликова, Арвазь-Пельга гуртын улӥсь, Кизнер ёросысь. Калык возьма пумиськонъёсты Шарканын ортчизы "Удмурт кенеш" ассоциацилэн нуналъёсыз. Калыкен пумиськылӥзы ассоциацилэн лекциос ортчытъянъя группаысьтыз тодосчиос, культура удысын уажсьёс. Ёросысь гурт администрациосы вуылыса ортчытӥзы ог 30 пумиськон. Шарканысь пӧртэм организациосын но ёрос администрациын калыкен кенешиз Валентин Тубылов. Ляльшурын бадӟым уж лэсьтӥз Василий Ванюшев. Кыква палан дояркаосын, механизаторъёсын, гурт удысын тыршисьёсын пумиськылӥз Нина Малых. Порозэ вуылӥз Анатолий Осипов, Мувыре - Лидия Нянькина. Жаляса вераны кулэ, Быгиын пумиськон кулэезъя радъямтэ вал, Галина Романоваез татын пумитаны дась вылымтэ. Ужзы ӧжытгес пӧрмиз Кварсаын но Киварын, таосаз вуылӥзы Галина Никитина но Людмила Христолюбова. Йылпумъянъёс лэсьтыса тодмо луиз, гурт калык вите тодосчиосты. Пумиськонъёс умой мылкыд кельтӥзы, соослэн пайдазы бадӟым. "Удмурт кенеш" Шарканысь ёрос ёзэзлы дэмлаз гурт кенешъёс кылдытыны но калыкен та выллем ик пумиськонъёс ортчытъяны. О.СИДОРОВА. Вузкарон Куатетӥзэ усьтӥзы Ижын пумен тросгес луо предприятиослэн асьсэлэн магазинъёссы. Та ласянь бере уг кыльы "Ижевский завод минерально-фруктовых вод" огазеяськон но. Та нуналъёсы предприятие аслэсьтыз куатетӥ магазинзэ усьтӥз. Интыяськемын со Ленин урамысь 2 номеро юртын (машина лэсьтӥсьёслэн культура дворецсы вадьсын). Вузкарон интыез дасяз "Ижавтопласт" фирма. Шӧдӥське, отын туж усто кибашлыос тыршо. Магазинэ пырид ке, вуз басьтытэк уд кошкы, потэмед но уз поты. Со зэмос кузьым Ижевсклэн 240 ар но Быдӟым Вормонлы 55 ар тырмонзылы. Магазинэз усьтыку, горд басмаез вандӥзы огазеяськонлэн валтӥсь директорез Николай Полянский но Ленин районысь администрацилэн кузёез Андрей Пьянзин. Завод таин уг буйгатскы. Туэ Ижын эшшо куать таӵе магазин усьтоз на. Отын вузаськоз поттэм продукциез - минерал вуосыз, сокъёсыз, водкаез но сиён-юонэз. Акционер огазеяськон витетӥ арзэ водка пӧзьтэ ни. Ялан умоятэ ӟечлыксэ. Нош "Саяны" напитокез зарни медален пусъемын. Завод куинь ар талэсь азьло басьтӥськиз фирменной магазинъёс лэсьтон борды. Басьяськисьёслы соос кельшо. Отын вузъёс шӧдскымон дунтэмгес. Г. РОМАНОВ. Наталь Кык юсьёс - одӥг яратон Сюлэм ик позырске, София Ротарулэсь тӧдьы юсьёс сярысь кырӟамзэ кылзыку. Одӥгез юсь бырыны шеде но, мукетыз, туж вылэ инме ӝутскыса, музъем вылэ уськытске - эшезтэк улыны уг чида. Таӵе учыръёс улонын но пумисько вылэм. Австриез тушмонлэсь мозмытыкуз, Бадӟым Уча ёросысь Узей-Тукля гуртын вордӥськем удмурт солдатлы тау карыса, одӥгез улӥсь кузьмаз зарни час, вуоно кышноедлы, пе, синпель сётод. Со кузьым сюриз Евдокиялы. Можгаысь педтехникумез йылпумъяса, нылаш кӧня ке ужа Кизнер ёросысь одӥгаз школаын, собере пыре Удмурт пединститутысь естествознаниея факультетэ. Вылӥ тодонлыкъя диплом басьтэмез бере, Евдокия Андреевнаез ысто Бадӟым Учаысь шор ёзо школае. Химиен но биологиен дышетӥсь нырысетӥ араз ик тодматскиз тып-тып мугоро, синмаськымон тусо Аркадий Световидовен. Солэн сузэрез Валентина Бадӟым Учаын ик дышетӥз, агаез сярысь Евдокиялы мадьылӥз. Зэмзэ но, Аркадий Павлович сярысь вал мар мадьыны. 1941-тӥ арын июне Ижевскысь индустриальной техникумез быдтэмез бере, Аркадий ӝыны ар ужаса вуттӥз андан ӵыжатон заводын, сое басьтӥзы армие. 1944-тӥ арын Световидов улонзэ герӟаз партиен. Кияз партбилет басьтыса, со кыл сётӥз тушмонлы пумит уката но зол нюръяськыны. Нош талэсь азьло солдатлэн анаезлы гожтэт вуиз: "Гажано Елена Яковлевна! Тӥляд пидылы ефрейтор Аркадий Павлович Световидовлы умой ожмаськемез понна сётӥмы "За боевые заслуги" медаль. Ӟечкыласько тӥледыз пидылэн награда басьтэменыз, мылкыд карисько таза но шудбуро улыны. Частьлэн командирез подполковник Саенко. 21-тӥ март, 1943-тӥ ар". Геройлыко ожмаськемез понна отӥяз Аркадий Павловичлэн гадяз бырттӥзы И степенё Отечественной война но Горд Кизили орденъёс. Ӝыны Европаез ортчыса, Световидов Берлинозь вуиз. Война бере со выльысь ужаны интыяськиз Ижевскысь заводэ. Анаез доры адӟиськыны бертылыкуз, со пумиськиз Евдокияен. Нырысьсэ адӟиськыкузы ик Световидовлы нылаш кельшиз. Кышно басьтон сярысь мылкыдзэ анаезлы вераз. Елена Яковлевналы но кельшиз пиезлэн быръем нылыз. Озьы ӝоген выль семья кылдӥз. Световидовъёс интыяськизы Ижевске. Аркадий Павлович прокат нуйтон цехын энергетик луыса тыршиз. Татын со мылысь-кыдысь пыриськиз рационализаторской уже. СССР-ысь Изобретениосъя кун комитет солэн ӵектонъёсызлы 72 удостоверение сётӥз. Удмуртиысь премилэн лауреатэз ним басьтон понна республикаямы ортчем ӵошатсконын со вормисе потӥз, научно-технической обществолэн областной советэз Световидовез дипломен пусйиз. Аркадий Павловичлэн ӵектонъёсыз юрттӥзы ваньбурез шыръяны но секыт ужъёсты капчиятыны. Нош Евдокия Андреевна дышетӥз егит рабочийёслэн 11 номеро школаязы. Кузпалъёслэн вордӥськизы Люда но Лена нылъёссы. Гужемзэ ваньзы ӵош сад- бакчаязы ветлӥзы, нош толалтэ куасэн нискылазы, театре ветлӥзы. Аркадий Павлович нылъёсызлы но бускель нылпиослы мадьылӥз ож сюресъёсыз сярысь. Кызьы со пинтьтэк кылиз езэз пиньыныз вандылэменыз. Нош огпол вӧзаз пуштэм бомба ефрейторез музъемен ӵоктаз, лопатаен гудыса, солдатъёс сое сюйысь поттӥзы ини. Световидовъёслэн нылъёссы сюлмоесь но ужасесь будӥзы, котыр ласянь юрттӥзы анай-атайзылы. Кыксы но соос дышетскизы Ижевскысь механической институтын. Асьсэлэсь семьяоссэс кылдытӥзы. Аркадий Павлович но Евдокия Андреевна бадӟым квартираязы огназы улыны кылизы. Котьмаз вал кузпалъёслэн улоназы. Куд-ог дыръя, оло, валамтэос но кылдылӥзы, но соосты ноку ӧз возьматылэ артысь улӥсьёслы. Огъя кыл шедьтыса, вань шуг- секытъёсты ӵошен вормылӥзы. Арлыд вуыса, котыразы висёнъёс но биниськыны ӧдъязы. Сахарной диабетэн курадӟем сяна, Аркадий Павлович сюлэмыныз кык пол шуге-леке сюрылӥз. Нош 1999-тӥ арын феврале А. П. Световидов секыт висемез бере улонысь кошкиз. Картэз кулэм сярысь Евдокия Андреевна ивортӥз нылъёсызлы, ӵыжы-выжыосызлы, заводэ. Ӝытаз солы секыт луиз. Ма, кӧня ке талэсь азьло сое инфаркт шуккем вал уго. Ӧтизы ӝог юрттэт сётӥсь машинаез. Уколъёс пуктыса, висисьлы капчигес луиз, нош больницае выдыны со пумит луиз, картме, пе, берпум сюрес вылаз келяно. Мукет нуналаз Евдокия Андреевналэн но сюлэмыз йыггетэмысь дугдӥз. Ог-огзэс юн гажась но яратӥсь Световидов кузпалъёсты кыкназэс ик артэ ватӥзы. Озьы та юсьёслэн кырӟанзы уриськиз. В. Чернов. Наталь Йырчукин Малы ӧз валалэ Жанна ДАркез? Сьӧрло гуртысь одӥг нылашез егитъёс малы ке "супарень", мӧйыос "пиосарин" шуылӥзы. Мон пичи дыръям ӧй валалля, мар шуэм со, ялан штаниен ветлэмысьтыз озьы шуо, дыр, малпалляй. Озьы ик вылэм. Вӧзаз ик Любкалэн выросъёсыз но, вераськон манеръёсыз но воргоронъёслэн кадь вал. Кыкетӥзэ сыӵе нылмуртэн пумиськи, городын дышетскыкум. Нырысетӥ курсэ со гуртысь вуиз. Туж сэзь, кузёяськыны-индылыны яратӥсь, ӧз возьдаськылы тамак кыскыны, вина юыны. Пиосын бен ӧз калгылы. Но кӧня ке улыса общежитиетӥ супыльтонъёс ветлыны кутскизы: со, пе, нылъёсты шымыръя. Ми ӧм оскылэ. Но ӝоген тодмо луиз: Рита, зэмзэ но, одӥгзэ тужгес чебер нылашез аслыз туган карем. Со доры ветлӥсь пиосты, пе, тышкаса улля. Ритаен тросэз эшъяськемысь дугдӥзы, но со чик ӧз куректы, шӧдске. Супыльтонъёс, сяласькыса, "осто, осто!" шуонъёс но нокытчыяз ӧз йӧтылэ - ассэ туж йӧно, кужмо возиз. Милемлы гинэ-а озьы потылӥз? Берлогес ини, "Спид-инфо" газетысь тодӥм, сыӵе адямиос - инкуазьлэн янгышез шуыса. Медицинаын соосты "транссексуалъёс" нимало. Транссексуалъёс пумиськыло нылкышноос но, пиосмуртъёс пӧлын но ( таосыз пӧлын тросгес). Соос вал котьку - самой вашкала дырысен ик. Адямиос сыӵе удмуртъёсты ӧз валаллялэ - котырысьтызы палэнскылӥзы яке воксё ишанъёсты, ведӥнъёсты музэн быдтылӥзы. Со дыре ик, транссексуалъёс сыӵе вордӥськемысьтызы чик но янгыш ӧвӧл. Янгыш инкуазь яке нунызэ кӧтаз нуллӥсь анай. Али ини со наукаен ӟеч эскеремын. Асьмелы ялан верало, секытэн нылкышноослы нырысетӥ куинь толэзьёсаз асьсэды тужгес утьыны кулэ, эмъюм юыны уг яра шуыса. Уг яра вылэм бӧрысьгес но. Нуны ваён азьын берпуметӥ толэзьёсаз кышномуртлэн кыӵе ке паласькись висёнъёсын, пыэдэн гинэ но висемез нунылэн тазалыкез вылын шӧдӥсько. Мултэс яке шонертэм эмъюм юэмез нунылэн мугорысьтыз гормонъёссэ сураны быгатэ: нылашлэн шуак тросгес луо пиосмурт гормонъёсыз, пияшлэн - кышномуртлэнъёсыз. Вваламон, ваньмыз учыръёс тазьы уг йылпумъясько, озьы ке но... Тросэзлэн сыӵе (транссексуал) вордӥськемзы пичи дыръязы уг шӧдӥськы. Ваньмыз кутске быдэ вуон вакытэ. Нылаш тросгес пиосын эшъяське, юн, кужмо муртъёслы синмаське, ассэ пи манер возьыны ӧдъя - жаляны кутске ныл вордӥськемысьтыз. Пиос небыт сямо, ныл тусо, чеберъяськыны яратӥсь, вазиськись луо, но нылъёсын уг эшъясько. Будыса котькудӥз аслэсьтыз сюрессэ быръе. Ӵемысь нылъёс лесбиянкаос луо, пиос - гомосексуалистъёс. Но вань на трансвеститъёс. Таосыз ноку но лесбиянкаос яке гомосексуалист уг луо. Вань сямъёссы, выросъёссы, туссы транссексуалъёслэн кадь ке но, соос уг куректо со пумысен, малпанзы но ӧвӧл кышномурт кышномуртэн яке пиосмурт пиосмуртэн кӧлан сярысь, кылдыто асьсэлэсь семьяоссэс, калык радъя улыны тыршо, пумен со "шексы" сураське, вунэ. Малы бен уг валало сыӵе муртъёсты - ӧлексыосты жаляны мырдэм но кызьы дышим ни кадь ук? Вылаз ик, эскеронъёс возьматӥзы, асьсэлэн кышномурт яке пиосмурт вордӥскьеменызы соглаш уг луо данак адямиос. Луэ-а соосты эмъяны? Озьы ке, вань- а сыӵе луонлыкъёс асьме дорын? Таӵе юанъёсын мон вазиськи вал республикаысьтымы Тазалыкез утёнъя министерствое. Тодӥськоды-а, мар мыным отын шуизы? Сыӵе "проблемамы", пе, асьмелэн ӧвӧл, соин ик сыӵе-таӵе эмъяськонниос но луыны кулэ ӧвӧл! Зол-а? Нош республикаысьтымы Семья ужпумъёсты но нылпи ваёнэз радъянъя центрлэн кивалтӥсез, валтӥсь врач С. П. Кривилёва мыным чылкак мукет югдур сярысь мадиз: - Жаляса верано луэ, сыӵе адямиос вань. Тросэз вуо милям центрамы, тросэз уло ас вакытазы курадӟыса, куд-огез нош асьсэлэсь мыдлань" вордӥськемзэс чик уг валалляло. Маин ми юрттыны быгатӥськом? Нырысь ик, сыӵе муртэз валаны куэ. Со дышемын ини шораз чиньыен возьматъянъёслы, пыкылонъёслы. Нош милям специалистъёсмы сое кылзо, валаны тыршо. Собере ини эскеронъёс ортчыто. Татын тодмо луэ: зэм ик-а маке сураськемын яке адями сыӵе луэмын кема дыр ӵоже нырысь солы валантэм потӥсь муртъёс пӧлын улыса. Ӵемысь озьы ик луэ. Соку тырме психотерапевтэн, сексопаталоген кенешон. Нош генетика ласянь "тӥяськонъёс" вань ке... Туала медицина, конечно, котьмар быгатэ: пиосмуртэ кышномурт, кышномуртэ пиосмурт карыны но. Кунгож сьӧры ветлонэз но ӧвӧл, сыӵе клиникаос вань Москваын. Но операция туж но туж дуно сылэ. Дунзэ тырыны вормо узыр муртъёс гинэ. Соин ик транссексуалъёс озьы ик уло асьсэ курадӟонэнызы. Ум янгышалэ, дыр, мукетъёссэ но курадӟыто шуим ке. Соос ӝабырско соослы кельшись муртъёс борды. Кышномурт кышномуртэн, пиосмурт пиосмуртэн кузпалъёс музэн уло. Соослэн вань семьязы. Ваньмыз огшоры муртъёслэн кадь ик: яратон но, вожан но. Нылпизы гинэ уг луы. Пиосмуртъёс со сярысь туж уг сюлмасько ке, кышномуртъёслэн анай кариськемзы потэ, нылпитэк улэмысьтызы соос курадӟо. (Чылкак шузимымтэ ик ай инкуазь - З.Р.) Но ма карод - кышномурт кышномуртлэсь уг секытомы, нош лесбиянка - "карт" кышнозэ пиосмуртэн сьӧлыканы ноку уг лэзьы. Тани со муген ми доры одӥг пар вуылӥз. Соос малпазы донорлэсь секытомыны. Пинал но, мумиз но ноку уз тодэ улон сётэм пиосмуртлэсь нимзэ. - Малы со нылмурт озьы курадӟыса улыны кулэ? - Кулэ ӧвӧл, сыӵе паръёс куспын брак уг лэсьто, но вот озьы луэ, мозмытскыны уг быгато, собере, яратӥськом но шуо. Транссексуалъёс тужгес ненегъёссэ, сётскисьёссэ утчало, соослэсь улонзэс тӥяло. Сыӵе адямиосты валаны кулэ, но со уг вера, соослы сётӥськыны кулэ шуыса, соослэсь мозмытскыны турттоно пыкылытэк, вӧсь карытэк. ... Та сярысь вераськон мон ноку но ӧй мытысал, возьдаськысал, дыр. Одӥг учыр донгиз. Яке тросгес-а вал соос. Тодмомы, Эльвира, нылкышно общежитиын улэ. Ку гинэ дораз куное эн мыны, тубатъёс вылын но, кухняын но парен нылъёс сыло, тамак кыско, ваче чупасько. Кӧня арес соослы? Кызь вить, куамын? Малы нокудзы бызьымтэ? - паймылӥ мон нырысь. Берлогес валэктӥзы: тюрьмаосын сяна лесбиянкаос, тужгес трос нылкышно общежитиосын уло. Куд-огез, пе, семьяезлэсь палэнскыса татчы улыны выже. Тӥни малы одӥг комнатаын кык кузя уло, но валессы но, уксё пуйызы но одӥг. Тӥни малы со эшъёс сыӵе пӧртэмесь вылэм: одӥгез чебер, веськрес, лачмыт медсестра, суредась, вуриськись-керттӥськись луыса ужа, нош мукетыз - котьку вакчи йырсиё, боз-боз куараё, котьку джинсэн, тамак кыске, кыӵе ке фирмаын трос уксё поттэ, аслаз машинаеныз ворттылэ, синмаськем муртсэ ворттылытэ, сое, ки вылаз нуллэ". Паймемме ватыны выри ке но, Эльвира валатскиз. - Эн кышка, - шуиз со. - Нош маке шуэмед потэ ке, шу - мыным нокыӵе уг поты. Тани вань, дыр, ук тонэ кызьы ке но исамзы, горд, чатрес ныр, я эшшо кызьы ке - мыным со лесбиянка шуэмзы сыӵе ик потэ. Кожаськод, милемлы таӵе улон кельше? Тӥ ваньды алдаськиськоды! Мукет сямен уг луы, соин тазьы улӥськом. Иркаез вот ("кышноез" - З. Р.) жалясько, солэн мон дорысь кошкемез потэ, но мукет сямен улыны кутскыны кышка. Кудӥз шуо "психологъёслы" (психотерапевтъёслы, психологъёслы - З. Р.) вазиськоно, юрттозы. Тон уд тодӥськы-а, кытчы вазиськоно? - Тодо. *** Тӥни соку гинэ мон валай, малы та улонысь сокем вазь кошкиз Рита. Кылӥськиз вал, сое ӵыжы-выжыосыз кужмысь картлы сётӥллям шуыса. Буйгаз меда солэн лулыз отын? ... Инкуазь янгыша ке, сое тупатонлэсь уг алы кадь. Адрес - текст пушкын. З. Рябинина. Удмурт Республикаысь Экономикая министерство сахар диабетэн висисьёслы юрттон вылысь ялэ мугорысь сахарез ичиёмытӥсь препаратъёсты но инсулинэз басьтон- вузанъя конкурс, кудӥз кыстӥськоз 2000-тӥ арлэн пумозяз. Конкурсэ пыриськонъя юанъёсын вазиськемды луоз 25-00-22 телефонъя яке таӵе адресъя: Ижевск город, Пушкин урам, 214 номеро юрт, Экономикая министерство, 78 номеро комната. ЖУРНАЛИСТЪЁС ИЖЫСЬ СУР ПӦЗЬТӤСЬЁС ДОРЫН "Бодрое" кельшоз, мылкыддэ ӝутоз Алигес Ижысь "Гамбринус" огазеяськонын аспӧртэмлыко ужрад ортчиз. Сур пӧзьтӥсьёс доры ветлӥзы кун газетъёсысь, "Удмуртия" ГТРК-ысь но музон телекомпаниосысь журналистъёс. Огазеяськонлэн валтӥсь директорез Анатолий Васильев татын ужаны вордӥськемын кадь. Сур завод усьтэм дырысен, 1972-тӥ арысен, предприятиын тырше. Куамын ар пала предприятиен кивалтэ ни. Сур пӧзьтонэз вить чиньызэ кадь ӟеч тодэ. Журналистъёслы со ваньзэ возьматӥз, рос-прос валэктонъёс сётӥз. Шуом, кызьы солод лэсьтӥське, кытысь сур лэсьтыны ярамон йыды но туг басьто. - Али ми 8 пумо сур пӧзьтӥськом, - шуэ Анатолий Алексеевич. - Ялан умоятӥськом ӟечлыксэ. Сое яркыт возьмато 20 медальёс но дипломъёс. Ваньмыз сямен соос басьтэмын калык куспо адӟытонъёсын (выставкаосын). Ужаськом огсыр умой, ужан интыосмы буш уг кыллё. Му вӧй поттӥсьёс бере выт тыронъя кыкетӥ интыын мынӥськом. Толэзьлы быдэ 2 миллион манет бюджетэ улэп уксё келяськом. Огазеяськонын шорлыдын 3 сюрслэсь уно уждун люкаське. Предприятиын котыр чылкыт, тамак пумъёсты уд адӟы. Нырысь ик пырим чырсатон (бродильной) цехе. Татын сусло дасяське. Со понна 7-9 нунал дыр кулэ. Маялэз (дрожжиез) бадӟым чанъёслэн пыдсазы пуксем бере, со пияла гумыос пыр мукет интые бызе. Отын со 19-30 нунал возиське, татын салкым, 0-2 градус гинэ шуныт. Оглом вераса, сур одӥг толэзь пала пӧзьтӥське. Собере со вуэ посудае лэзьян цехе. Татын автоматъёс дымбыр-йыг ужало: бутылкаосты мисько, сур лэзё но пытсало. Татын кык конвейер берга, котькудӥз одӥг смена ӵоже 6 сюрс бутылка сур пӧзьтэ. Нош куинетӥяз конвейерын 12 сюрс бичало. Таяз пастеризовать карем сур люкаське. Сое 30 нунал возьыны луэ, уг сӧриськы. Огазеяськон йыды басьтэ Бельгиысь, нош туг - Чувашиысь. Со быдэс Россиын 80 процентсэ будэтэ. Удмуртиын та культураен одӥг хозяйство гинэ выре - Пичи Пурга районысь "Мир" хозяйство. "Гамбринус" огазеяськонын али шумпотымонэсь воштӥськонъёс мыно. Арня пала соос "Бодрое" выль сур пӧзьто ни. Нош "Жигулёвскойзэ" кабзэ поттэмысь дугдозы. Берлояз алкоголез 2,8 процент вал, нош "Бодрое" сурын 4 процент луоз. Со сайкыт тусо, ческыт шӧмо. Басьяськисьёслы кельшыны кулэ. Предприятиын та вакытэ 240 мурт ужа. Татын будӥзы усто специалистъёс. Котьку ик ӟеч кылъёс верало валтӥсь сур пӧзьтӥсьёслы Николай Фокинлы. Огазеяськонлэн сурез ваньмыз сямен Ижын вузаське. Кӧня ке люкетэз гинэ Чайковский городэ кошке. Нош бардаез мынэ гурт хозяйствоослы. Скалъёслы со ческыт но йӧло сиён луэ. Нуналлы быдэ 10 сюрс тонна люкаське. Басьтӥсь шеде. Г.РОМАНОВ. * "Бодрое" но "Гамбринус" сур. Шорам учко сайкыт синъёс Пичи Пурга ёросысь Улын Юри гуртысь ож тылэ кошкиз 180 воргорон, нош берытскиз 73- ез гинэ. 107 быремъёс пӧлысь ивортэк ышизы 65-ез. Быремъёс пӧлын - 78 кышнояськем воргоронъёс но 29 егит пиос. Ивортэк быремъёс пӧлын вал нэнэелэн 1917-тӥ арын вордӥськем выныз но. Ярам коть, 1939-тӥ арын пуксем туспуктэмез синпель кузьым кылемын. Ӵыжы-выжыосмы доры котьку пырыкум, укно йырйыл рамкаысь адӟисько вал со туспуктэмез. Аресэ пичиен сюлэмме шуг карыны ӧй ик валалля соку, но мӧйымемъя мон со шоры копак мукет синмын учкыны кутски. Туспуктэмысь шорам учко сайкыт синъёс. Ма меда малпало соос? Ӵужмуртэ шоры учкисько синмаськыса, нош куддыр туж кепыраса, синвуаськыса. Сокем пинал адямилэн макем чебер малпанъёсыз вылэм, сое валаськод, котькуд гожтэтсэ лыдӟыса. Ӵужмуртэ будӥз бадӟым крестьян семьяын, тросэз пиналъёссы кулӥллям тифен но мукет мугъёсын. Нэнэе Коля вынзэ одно дышетыны кариськем, лэзем Можга педучилищее. Тазалыкез лябӟемен, ӵужапай пизэ дышетсконлэсь куспетӥ дугдытыны малпа вылэм. Нэнэе дурбасьтэм. Дышетсконзэ йылпумъяса, 1936-тӥ арын ӵужмуртме лэзиллям Пычас районысь Вытчан-Шудзяысь пичи классъем школае. Нырысетӥ уждунзэ басьтыса, нэнэелы чагыр, вож но лемлет лентаос басьтэм. Нош кык ар ортчыса, ӵужмуртме басьто армие. Отысен ик со пырем дышетскыны Харьковысь военно-фельдшерской училищее. Война азьын отпуске но бертыны лэзиллямтэ ни. 1941-тӥ арын октябре со ивортэк бырыны шеде. Кема гинэ войнаысь берытскемзэ возьмам Можгалась яратоно нылыз. Бератаз бызем ини. Ог дасо ар талэсь азьло со доры юри адскыны ветлӥ, нэнэе туж косӥз вал. Ӵужмуртме 1939-тӥ арын Харьков округе депутатэ кандидатэ бырйиллям. Училищеын ортчем митинг, нош ачим, пе, караулэ кыли, ивортэ со гожтэтаз. Ӵужмуртэлы дурбасьтыса вераськиллям командиръёс, политрукъёс, ачиз комиссар Училищеысь вань курсантъёс пӧлысь тужгес ӟечен пусйиллям сое. Берло ини эшъёсыз вераллям, сюрс киос, пе, ӝутскизы тон понна. Туж потэ вылэм ӵужмуртэлэн семьяезлы капчигес каремез, соосты бадӟым сюрес вылэ поттэмез. Нош улонлэсь умойтэм пала берытскемзэ валаса гожтэм, эн, пе, вунэтэ монэ, мӧзмыса но эн улэ. Культураез ӝутон, эрико улон сярысь сюлмаськонзэ гожтэм, но уг тодӥськы, пе, мар возьма азьланяз. Дышетон журналъёссэ но тӥрлыкъёссэ ӵужатае пичи сандыкын ӵогаса возе вал. Война дыръя нокыӵе шудонъёс ӧй вал бере, милям туж адӟеммы потылӥз соосты. Одӥг пол ӵужанайлы "Сказка о рыбаке и рыбке" диафильмез сётӥз ик, но ми сое утьыны ӧм валалэ, визьтэмгес вылӥськеммы. Табере улонысь ваньмыз кошкемын, нокинлэсь номыр юаны уг луы ни, нош кыӵе ваньзэ тодэм потэ вылэм. Нэнэе но дас куинь ар талэсь азьло улонысь кошкиз. Война дыръя со бӧрсьысь кык ивор басьтӥз. Кузпалыз бырем сярысь сьӧд иворез гуртоос пӧлын нырысь ик нэнэе басьтӥз - 1941-тӥ арын сентябрь толэзе, нош октябре вуиз вынызлэн ышемез сярысь ивор. Озьы ке но, нэнэлы бӧрдыса ветлыны дыр ӧй вал, вань секыт ужъёс со вакытэ нылкышноос вылэ усизы угось. Нош ӵужмуртэлэсь берпум гожтэтсэ мон кылбурез сямен дышетӥ, сюлэмыз шӧдэм, лэся, ноку уз берытскы ни шуыса. "Прощайте родные, прощайте друзья! Если что случится, я умру защищая Родину свою, не плачьте и не горюйте обо мне. Ваш сын Николай Тройников. 23. ВИ 41 год" Туспуктэмын ӵужмуртэ ӵужатаелэн выныныз ӵош, со вал офицер. Таизлы войнаысь бертыны шуд усиз, улӥз Изюм городын, отысен ик улонысь кошкиз. В. Васильева. Наталь Шудоос Вавожысь Светлана но Николай Чайниковъёс огазьын уло ни дас тямыс ар. Будэ кык пизы - Андрей но Костя. Светлана Алексеевна - дышетӥсь, нош Николай Алексеевич ужа ёросысь Уже интыянъя центрын валтӥсь специалист луыса. Ӝыт быдэс семья люкаське ӝӧк сьӧры. Ог-огзылы выль иворъёсты верало, кроссвордъёс бордын йырзэс тӥяло. Нош шутэтскон нуналъёсы ваньзы ӵош выль корказэс лэсьтыны мыно, чальгес корка пырон сярысь малпасько. Туспуктэмез В. Беломорскихлэн. Ӝутскоз-а ГЭС-ын ву? Кӧня ке ар талэсь азьвыл уно вераськонъёс вал Нижнекамск ГЭС сярысь. Чакламын вал сое бадӟыматыны. Соин валче уно гуртъёсты выль интые выжтӥзы, трос нюлэсэз коразы. Но кытысь ке вылӥысь кивалтӥсьёслэн косэмзыя, со ужез дугдытӥзы. Ву азьвыл интыяз ик кылиз. Берло дыре быдэс странаямы секыт югдур кылдӥз электрокужым, газ, мукет эстӥськон ласянь. Соин ик Татарстанысь Правительство ужпум пуктӥз: Нижнекамск ГЭС-ысь вулэсь ӝуждалазэ 6 метрлы будэтоно но гидротурбинаосты вань кужымен ужатоно. Ву чотын поттэм электрокужым киловатт часэз сылэ 4 копейка. Со вить поллы дунтэмгес газэн поттэм электрокужымлэсь. Али Нижнекамск ГЭС-ын ву возиське 62 метр кемын. Араз ГЭС 420 мегаватт ток сётэ. Нош солэн луонлыкез вань араз 1,5-2 миллиард киловатт час электрокужым Проектъя вуэз 68 метрозь ӝутыны чакламын вал. Сое чакласа ик лэсьтэмын инженерной сооружениос но. Но ву ӧжытэн соос куашкало ни. Ву лазег бере, шуге-леке шедё судноос но. ГЭС-эз будэтэм бере Татарстанын ву улэ шедёз 43 сюрс гектар музъем, Башкириын - 15 сюрс, Удмуртиын - 13 сюрс гектар музъем. Та пумысь огъя кыл шедьтыны кулэ на куинь республикаослэн правительствооссы. Удмуртия соглаш-а луоз меда соин - тодмо ӧвӧл на. Вераны кулэ, Удмуртия уже кутэ ӵапак Нижнекамск ГЭС-лэсь кужымзэ. Н.ЛЯЛИН. Олимпиадалы йылпумъянъёс Йылпумъянъёс лэсьтэмын Удмурт кун университетысь журналистикая факультетэ пырыны мылкыд карисьёс понна ялэм олимпиадалэн нырысетӥ турезъя. Нырысетӥ туре 83 мурт пыриськемъёс пӧлысь кыкетӥ туре пыриськозы 75-90 балл (ӟуч отделение) но 35-90 балл (удмурт отделение) люкамъёс. Журналистикая факультетысь удмурт отделение пырыны мылкыд карисьёс пӧлысь тужгес трос балл люказы: 1. Агичев Сергей (Пичи Пурга ёрос) - 40 балл; 2. Коткова Елена (Алнаш ёрос) - 39 балл; 3. Япарова Алефтина (Можга кар) - 39 балл; 4. Арасланова Светлана (Селта ёрос) - 39 балл; 5. Малютина Ольга (Кизнер ёрос) - 39 балл; 6. Яковлева Светлана (Пичи Пурга ёрос) - 38 балл; 7. Добрякова Галина (Шаркан ёрос) - 38 балл; 8. Белых Лариса (Як.-Бодья ёрос) - 38 балл; 9. Перевозчикова Анна (Завьялово ёрос) 37 балл; 10. Семенова Марина (Пичи Пурга ёрос) - 37 балл; 11. Добряков Ян (Вотка кар) - 36 балл; 12. Буранова Лариса (Алнаш ёрос) - 35 балл; 13. Волкова Екатерина (Игра ёрос) - 35 балл; 14. Пименова Надежда (Пичи Пурга ёрос) - 35 балл; 15. Андреева Елена (Пичи Пурга ёрос) - 35 балл; 16. Максимова Оксана (Шаркан ёрос) - 35 балл. Олимпиадалэн кыкетӥ турез (творчествоя конкурс) ортчоз Удмурт кун университетын (2-тӥ корпус, 108-тӥ аудитория) 21-тӥ мае 11 часын. Абитуриентъёслы ӵектэмын луоз гожъяськон уж. Олимпиадаез ортчытӥсь оргкомитет. ВОРМОНЛЫ - 55 Соосты уг вунэто Кемалась ик ӧвӧл МВД-лэн поликлиникаезлэн одӥгез ужан нуналэз мукет сямен радъямын вал. Висисьёсты нуназе бере гинэ учкизы. Мугез таӵе: котькуд аре поликлиникаын пересьёслэсь тазалыксэс чаклало. Югдурез утён удысысь но Быдӟым Отечественной войнаысь ветеранъёслэсь тазалыксэс врачъёс пыр-поч эскеризы. Жаляса верано луэ, вуж яраос ялан асьсэ сярысь тодазы вайыто. Соик ик мӧйыос ӵем гинэ "куноясько" першалъёс дорын. Но та ӟеч ужрад юромо праздниклы шуыса дасямын ӧвӧл. Тазалыкез утисьёс котьку но саклыксэс гажано адямиослы висъяло. Медициная люкетлэн кивалтӥсезлэн Рудольф Иванович Пустоваловлэн верамезъя, поликлиникаын черод ӧвӧл. Туннэ больницаын 186 ветеран лыдъяське. Со пӧлысь кык куиньмосэз - инвалидъёс. 55 ар талэсь азьло соос ожмаськизы асьме кунмылэсь эриксэ утён понна. Соин першалъёс мур гажанэн вазисько мӧйыослы. Поликлиникаын эмъяськем сяна, кулэ дыръяз ветеранъёслэн гуртазы ветло на специалистъёс. Кызьы тодмо, тазалыкез уксёен уд басьты. Озьы ке но, азьвыл воинъёслы дунтэк эмъюм басьтыны рецептъёс гожто, дунтэмен протез пукто. Пенсионеръёсты мылкыд каремзыя курортын яке санаторийын эмъяло. Кин ке уг быгаты ке мукет улосвылысь санаторие мыныны, солы уксё висъяло. Ветеранъёслы сӥзем нуналлэн пумаз котькудӥзлы мӧйы муртлы синпель кузьым сётӥзы. Шергес мед вазиськылозы вылэм соос першалъёслы но уно аръёс ӵоже мед пусйылозы та быдӟым нуналзэс. В.ПАТРИН. Удмурт Республикаысь МВД-лэн пресс-службаез. УЖПУМ Дуно кортлэсь йыртӥян Дуно кортъёсын калыкмы сокем "висьыны" кутскиз ни, ӝоген фермаосын флягаос, скал кыскон аппаратъёс но уз кыле ни, дыр. Гуртын улӥсьёс кенер выль амалэн лэсьто: пу юбо интые алюминь труба пукто. Табере син азяды пуктэ ай: ӵукна султӥськоды но... вань кенерды выдэмын. Нош кӧня чайникъёс, тазъёс? Озьы асьмеос кунмес кужмоятон сярысь "сюлмаськиськом"! Соин сэрен юбоосысь электроезъёсты вандылӥськом. Тани Якшур-Бодья ёросысь одӥгаз хозяйствоын музъемысь 70 метр бронировать карем кабелез поттӥллям... Кунлэн дуно кортъёслы шугъяськемезлы юрттыса, со вакыт ик солэн экономикаезлы шуккет лэсьтӥськом: ужысь поттэм арбериез выленыз воштыны кулэ. Кӧня со сылэ? Бен, тӥляд налогъёсты ик отчы кошко. Зэм, уждун пичи яке воксё но уг сёто. Ойдолэ бен быдэс Россилэсь промышленностьсэ вузалом но выльысь улӟытом... Югдур сокем секытомиз ни, табере сое Удмурт Республикаысь Обществоез кышкытлыклэсь утёнъя совет нимаз эскерыса возе. Солэн кенешаз ивортэмын, 10 предприятилы гинэ лицензия сётэмын шуыса. Озьыен, соослы лэземын сьӧд но дуно кортъёсты дасяны. Кызьы ивортӥз югдурез утёнъя министр В.Щербаков, туэ лушкаськонъёслэн лыдзы 95 процентлы йылӥз. Нош огъя йыртэман учыръёс будӥзы кык но ӝыны пол. "Удмуртэнерголэсь" гинэ 154 километр ёзъёссэ дуно кортлы пӧрмытӥзы. Ыштонъёс лыдъясько 9 миллион манет тыр. Югдурез утисьёс 167 сьӧд но дуно корт басьтон интыосты шедьтӥзы. Феврале гинэ "Металл" операция дыръя 18 пункт шараямын на. 43 организация кортъёсты лицензитэк дася вылэм. Но югдур, оло, тупатскоз но ай. Туэ нырысетӥ кварталэ лушкаськон учыръёс ӧжытгес пусъемын. Таӵе лыдпусъёс сётӥз Югдурез утёнъя министерство. Но куке вераськыны кутскиз Кун Кенешысь Законъёсты быдэсъямез чакланъя, калыкез кышкытлыклэсь утёнъя но гражданъёслэн правооссыя ялан ужась комиссилэн кивалтӥсез М.Кокорин, йырын ваньмыз сураськиз. Солэн кылъёсызъя республикаын 344 интыын дуно кортъёсты басьто. Щербаковлэн верамез сяськалы гинэ кельше кадь. Нош депутатъёслэн комиссиенызы кивалтӥсь югдурез мукет ласянь возьматӥз. Сьӧд но дуно кортъёсты законэз тӥяса дасямзы но вузамзы понна 126 протокол гожтэмын. Со пӧлысь 26-ез - Воткинскын. Татын ик 43 уголовной уж ӝутэмын. Али городын корт басьтонъя 1 инты гинэ кельтэмын. Кызьы пусйиз депутат, котькуд пункт пумысен протокол гожтыны луоз. М.Кокорин озьы ик вераз на, Удмурт Республикаын Пермь улосвылын кадь ик дуно кортъёсты дасян пумысен нокыӵе радлыкез ӧвол шуыса. Нош Татарстанын вань, соос умой радъязы ужзэс. Оло, соослэсь адӟем кароно? Обществоез кышкытлыклэсь утёнъя советэ пырисьёс пӧртэм амалъёсты эскерыны турттӥзы. Ӵектэмын вал республикаын одӥг яке кык предприятие кельтыны. Котькуд ёросын асьсэлэн представительзы луоз. Но соку ик мукет юан кылдӥз: кулэ-а та удысын монополия кылдытыны? Одӥг кун унитарной предприятие луиз ке, со аслаз мылкыдызъя гинэ куронъёс пуктылоз. Таӵе ӵектон Правительстволэн Тӧроезлы Н.Ганзалы ӧз кельшы. Удмуртилэн экономикаезлы таӵе предприятие туж дуно усёз. Нош калыклэсь но организациослэсь дунтэм дунын басьтоз. Удмурт Республика сьӧд но дуно кортъёсты палэнысь басьтэ - аслазэз уг тырмы. Соин та удыс вылэ пытсэт пуктыны уг яра. Озьы угось тоннаосын кортъёс кеносъёсын сисьмозы. Кызьы кароно? Удмурт Республикалэн прокурорез В.Походин пусйиз: котькуд милиционер арняяз одӥг пол ке но пыраз ке корт басьтон интые, али кадь "бардак" уз луы ни. Кӧня корт басьтон пунктъёс республикаын: 10, 167 яке 344? Нокин рос-прос валэктыны ӧз быгаты. Кызьы кенешын шуизы, али соосты нокин но лыдъяны уз быгаты. Угось Ижкын котькуд сэрегын сямен "Цветмет" ялонъёс ошылэмын. Нош огшоры адямилы кыӵе пӧртэмлыкез: вузалоз-а со дуно кортсэ лицензиен предприятилы яке лушкем кылдытэмезлы? Кисыын гинэ мед шильыртоз. Югдур секыт но секыт луэ. Кутэм законъёс но постановлениос нокыӵе пайда ӧз вае на. Кызьы югдурез тупатоно? Со сярысь али малпасько Удмурт Республикаысь Правительсво, Обществоез кышкытлыклэсь утёнъя совет. Берпуметӥез нош ик люкаськоз июньлэн кутсконаз. Нош ик эскерозы дуно кортъёс сярысь ужпумез. Соку ик учкозы наркоманиен нюръяськон амалъёсты но. А.АНДРИЯНОВ. КУН КЕНЕШЛЭН СЕССИЯЗ Дыртоно-а, чаклано-а? Кун Кенешлэн дас одӥгетӥ сессиез аспӧртэмлыко кутскиз. Отын нырысь ик кыл сётӥзы Беларусь Республикалэн Россиысь посолэзлы Владимир Григорьевлы. Со тодмо конструкторлэн Михаил Калашниковлэн гадяз бырттӥз Данъян орден. Бӧрысь депутатъёс кутскизы асьме Конституциез выльдонъя законопроктъёсты эскерон борды. Удмурт Республикалэн президентэз, Удмурт Республикалы президент быръён сярысь законъёслы дасям инъетъёсты соос пӧртэм сямен дунъязы. Нырысетӥезъя вожвылъяськон ӧй вал. Нош кыкетӥезъя трос юан кылдӥз. Кун Кенешлэн Тӧроезлэн нырысетӥ воштӥсез Павел Вершинин проектысь уно шекъёсты шараяз, данак пунктъёсъя ас мылкыдзэ вераз. Со ӵектӥз туж кулэ луись законлы инъетэз выльысь дасяны. "Единство" фракцилэн нимыныз вераськиз депутат Даниил Белоголовкин. Со дэмлаз проектэз инъет чотын юнматыны. Промышленникъёслэсь сыӵе ик мылкыдзэс ивортӥз ялан ужась комиссилэн кивалтӥсез Виктор Кушко. Депутат Владимир Бодров паймыса вераз регламентэз тӥян сярысь. Малы, пе, законлы инъетэз туннэ гинэ сётъязы, сое сётыны кулэ вал кык арня талэсь азьло. Сергей Беркутов (дышетскемезъя со юрист) документысь трос тырмымтэосты адӟем, сое умоятон понна уно ӵектонъёссэ сётӥз. Валентина Дементьева пусйиз таӵе ужпумез: ма кароно, президентэ одӥгез но кандидат понна 25 процентэз бырйисьёс куаразэс ӧз сётэ ке? Сыӵе югдурез азьло ик чаклано. - Проект туж зол дасямын, - веранзэ кутскиз депутат Валерий Фридрих. - Но со лэсьтэмын одӥг мурт понна. Отын трос гинэ тырмымтэосыз. Кылсярысь, малы ке но пусйымтэ президентэ кандидатлэн но солэн семьяезлэн доходъёссы но ваньбурзы сярысь курон. Юн шугъяськытэ быръёнэ пыриськисьёслэн лыдзы. Инъетъя учконо ке, президент понна ог 60 сюрс мурт куаразэ сётоз но, со бадӟым кивалтӥсь луоз. Но сомында калыкез коньдонэн но басьтыны луэ ук. Шуом, сётъя быдэн 100 манет но луы президент. Сыӵе амал асьмелы уг тупа. Депутат Людмила Забродина пыкылӥз Кун Кенешысь правоя управленилэсь кивалтӥсьсэ Константин Глуховез но "Новый регион" телекомпаниез. Уг яра, шуиз со, быръем муртлэсь мылкыдзэ ивор вӧлмытӥсь ёз пыр мыскылляса сётыны. Николай Сычев дэмлаз дыртытэк ужаны. Наталья Харина пыкылоно кожаз эшсэ Павел Вершининэз: уг луы, пе, вал шат куд-ог ужпумъёсты сессилэсь азьло эскерыны но огкылэ вуыны. Кин кызьы дунъяз, вылды, солэсь верамзэ. Мыным малы ке но воксё ӧз кельшы. Евгений Одиянков эшъёсызлы ӵектӥз кизэс асьсэ малпамъя, сюлэмзыя ӝутыны. Тырмоз ни, пусйиз со, президент быръён пумысен даллашыны. Отӥяз вераськизы депутатъёс Владимир Агашин, Виталий Соловьев но мукет эшъёс. "Правительстволэн кивалтӥсез Николай Ганза умоен лыдъяз Раиль Галиахметовлэсь нимысьтыз комиссия кылдытон пумысен ӵектонзэ. Со дэмлаз та ужен Конституция бордын ужам адямиосты ик выль уж борды юнматыны. Ӵектэм законопроектъёс пумысен вераськиз Кун Кенешлэн Тӧроез Александр Волков но. Со куриз проектэз инъет чотын юнматыны но вуоно заседаниын вань дэмланъёсты эскерыны. Ӵектонзэ депутатъёс умоен лыдъязы. Сессия выльысь люкаськоз ни гужем. 8-тӥ июне депутатъёс азьланьтозы президент быръён пумысен документъёсты дасян бордын ужзэс. О.МАРКОВ. ТУННЭ - МУЗЕЙЁСЛЭН КАЛЫК КУСПО НУНАЛЗЫ Бодьяослы удалтӥз Ог кызь ар талэсь азьвыл Як.-Бодья черкогуртлэн шораз огшоры пу коркан ужаны кусткиз музей. Пӧртэм вашкала арбериосыз адӟод вал отысь. Пырем муртэ шумпотыса чаен куно карылӥз Мария Кирилловна Шкляева, музеез кылдытӥсь. Туэ солы 80 арес тырмиз ни. Дасо ар талэсь азьвыл солы шедиз туж усто кивоштӥсь, шаертодонъя ӧнерчи Валентина Никоноровна Иванова. Шонерзэ ке, бодьяослы та ласянь юн удалтӥз, шуыны луэ. Соослэн музейзы - республикаысь одӥгез устоез, Национальной музейлэн филиалэз. 1996-тӥ арысен со культура юрт борды кариськиз, экспонатъёсыз возьыны тырмыт инты висъямын. Пичигес залэтӥ но висъетъёстӥ ортчыса, та ёрослэсь быдэсак ортчем сюрессэ адӟыны луэ. Экспозициос ялан вошъясько. Огвакытэ, шуом, "АлнашЯк.-Бодья" сэрег вал. Гужем шудонъёсы лыктэм спортсменъёс паймизы: ми но татын вылэм... Алнашъёс гинэ ӧвӧл, вавожъёс но, мукетъёсыз но тазьы вераны быгатозы. Тани Куӟебай Гердлэн та ёросысь гожъям кырӟанъёсыз. Быдӟым удмуртмы, солэн вордскем палъёсыз сярысь трос выльзэ тодыны-шедьтыны юрттӥз Валентина Никоноровналэн бускелез врач Новосёлов - со Малиновка гуртысь вылэм. Чаклано ке, улонамы вамыштэмлы быдэ маке но тунсыкоез вань, сое синйылтыны гинэ быгатоно, синмо, пелё луоно. Тазьы лыдъя музейлэн кузёез. Куд-ог арбериосты нокыӵе мукет музейысь, Национальнойысьтыз но, уд шедьты, дыр, татысь сяна. Тани одӥг венен керттэм пӧзь (вашкалаосмы тазьы но быгато вылэм, пулэсь, лылэсь пасё вень лэсьтыса) - та амалэз вунэтымтэ Галина Пантелеевна Рудина, Ӵошкыт школалэн азьвыл директорез: пӧзьзэ но, веньзэ но дэмлам. Сое та нуналэ ваиз 11-тӥ классын дышетскись Петя Хохряков. Музеен тодматскытозям, кин гинэ ӧз жингыръя, кин гинэ ӧз пыра татчы. Кекоранысь дышетӥсь Клавдия Дмитриевна Загребина, музейлэн кемалась матысь эшез азьло писательёслэсь гожтэтъёссэ вуттэ ке вал, али куиськемъёссэ - "куӵозэ" кузьмаз. Музейлэн омыреныз шоканы пыраз Пислэглудысь тодосчи Алексей Степанович Широбоков. Экскурсие шуыса вуизы гимназиысь пиналъёс. Нош Зоя Филипповна Вахрушева, пенсионерка, вуж газетъёс ваем. 1936-тӥ арысен фотодокументъёс но - солэн кузьмамъёсыз. Куштэм вуж газетъёс пӧлын трос бугыръяське Валентина Никоноровна. Тани одӥгысьтыз тодӥз: куинь сузэръёс фронтысь улэп бертӥллям, кык вынъёссы быриллям. Ванькагуртысь Широбокова сузэръёсыз шедьтыны юрттӥз профессор Арсений Михайлович Загребин: соос пӧлысь огзэ, Любовь Захаровна Луговаяез, умой тодэ вылэм. Утчась мурт, зэм но, шедьтэ. Война вакытэ Як-Бодьяе Мурманск улосысь Кировск городысь нылпи юрт ваемын вылэм. 40 ар ортчыса, та нылпиос пумиськизы, туспуктэмъёссы музее кылизы. Вань на ож вакытэ пуксемъёссы но. Туэ 14-тӥ декабре Як.-Бодья педучилищелы 70 ар тырмоз (татын 24 ар ӵоже таӵе дышетсконни вал, собере сое выжтӥзы Дэбесэ). Педучилище бадӟым уж нуиз калыкез югдытон ласянь. Татысь потӥзы трос тодмо адямиос: соос пӧлын калык писатель Генрих Перевощиков, педагогикая нырысетӥ доктор, профессор Глафира Никольская, Ленин орденэн пусъем дано дышетӥсь Анна Егоровна Загребина но мукетъёсыз. Тани инкуазь узырлыкъёслы сӥзем сэрег, Чур заводлэн историез. Татын 90 ар талэсь азьвыл ик сюйлэсь арбериос - тусьтыос, горошокъёс - лэсьто ни вылэм. Али чуръёс тӧдьы кирпичен данъясько. ИжБалезино чугун сюрес, Кекоран. Таиз ёрослэн тужгес юн йыгаськись вирсэрез. Ож вакытэ адямилэн чидамез - син азьын. Чугун сюрес лэсьтыны юрттэм тӥрлыкъёсын артэ - гожтэтъёс, тодэ ваёнъёс, ужам адямиослэн нимтулъёссы. Книгаос: "Трасса мужества", "Народ на трассе", "Ӟукыртэ, ӝуштэ сюрес". Музеетӥ ортчыса, син азьысь экспонатъёсын гинэ тодматскыса но паймиськод: макем трос люкамын, тупатъямын, радъямын... Нош адскисез - со пичи люкетэз гинэ. Тросэз - ӝажыосын, тумбочкаосын. Сюлмо киос тодо, кытчы мае интыяно. Ӧйтӧд, кытчы карысал Валентина Никоноровна 70-тӥ аръёсы кутскыса бичам материалъёссэ, ӧй ке луысал вӧзаз кузпалыз Руф Федорович, суредась, дизайнер, лэсьтӥськись. Выль корказы верандаязы котырак ӝажыос, собере тыриськонъёсын ӝӧкъёс лэсьтӥз. Али музейын но ваньмыз солэн кибервылыз. - 1972-тӥ арысен ни ёросмылы сӥзем книга гожтыны малпанэн улӥ, - шуэ Валентина Никоноровна. - Районмылы 50 ар тырмыку ӧз ке но, али, 70 ар тырмыку, малпанэ быдэсмиз. Тани со книгамылэн макетъёсыз но. Собере выль потэм книгазэ кузьмаз. Макем тыршемын, макем лул кужым понэмын отчы. Быдэс ёрос - кырымпыдэс вылын кадь. Нош Быдӟым Вормонлэн туэ юбилеез азьын Валентина Никоноровна аспалъёссэ шумпоттӥз на эшшо одӥг зӧкос книгаен: "Помним каждого и чтим". Печатламын "Удмуртия" издательствоын сюрс экземплярен, поттэмын "АСПЭК" огазеяськонлэн коньдонэн юрттэмез улсын. Таӵе буре ваён книга (464 бамен) нокыӵе районлэн но нимысьтыз ӧвӧл на. Ортчозы аръёс. Выль, воштӥськем адямиос ож тылэ бырем адямиос сярысь кык-куинь чурен гинэ коть та книгаысь тодыса йыбырттозы соосты люкась-бичась адямилы но. Со калыкез дышетон удысысь отличник, культура удысысь дано ужась Валентина Никоноровна Иванова. Но та вылӥ гожтэм чуръёс туж кӧсыт гинэ верало ай бадӟым нылкышно сюлэм сярысь. Т.ПЕТРОВА. Удмурт Республикалэн Архив фондысьтыз документъёсты возёнъя, кышкытлык кылдонлэсь утёнъя но соосты уже кутонэз умоятонъя ужрадъёс сярысь Удмурт Республикаысь Правительстволэн постановлениез "Удмурт Республикалэн Архив ваньбуретэз (фондэз) но архивъёс сярысь" Удмурт Республикалэсь Законзэ быдэсъяса, Россия Федерациысь Правительстволэсь 1999-тӥ арын 14-тӥ декабре кутэм Россия Федерацилэн субъектъёсаз архив документъёсты утёнъя но соосты уже кутонэз умоятонъя кулэ ужрадъёс кутон сярысь ВМ-П8-41973 номеро порученизэ лыдэ басьтыса но Удмурт Республикалэсь Архив ваньбуретсэ кышкытлык кылдонлэсь утён вылысь, Удмурт Республикаысь Правительство пуктэ: 1. Удмурт Республикаысь министерствоослы но ведомствоослы архив документъёсты возён но соосты кышкытлык кылдонлэсь утён, али быдэсъяськись законъёсын тупатэм радлыкъя дыраз шараян, пыраклы кунэн утьыны выжтон вылысь ужрадъёс кутоно. 2. Удмурт Республикаысь Асваньбуръя кун комитетлы (Касихин С. П.), Удмурт Республикаысь Архивъёсын ужанъя комитетэзлы (Коробейникова Н. К.) Удмурт Республикаысь Архив фондысь кунэн герӟаськымтэ но нимаз кузёосын басьтэм организациосын утиськись документъёсты лыдъян-чотанэз радъяно, соосты нимысьтыз актъёсъя ведомствоосын кема дырлы но пыраклы кунэн утьыса возён вылысь. 3. Удмурт Республикаысь Лэсьтӥськонъя, архитектурая но улон-вылонэз радъян политикая министерстволы (Загайнов В. Ф.) Россия Федерациысь Правительстволэн 1997-тӥ арын 13-тӥ октябре кутэм "Россия Федерациын улон интыосъя ваньбуретэз кунэн лыдэ басьтон сярысь" 1301 номеро постановленизэ быдэсъянъя ужрадъёс кутоно. 4. Удмурт Республикаысь Промышленностья но транспортъя министерстволы (Долгов В. И.) та ужъёсын тунсыкъяськись министерствоосын но ведомствоосын ӵош "Ижмаш" ОАО, "Ижмашпроект" ОАО, "Камбарский машиностроительный завод" ОАО но мукет промышленной предприятиосын но организациосын кивалтон удысъя, наукая но техникая люкам документациез кунэн утён вылысь, сое быръёнэз радъянын но лыдъян- чотанын янгышъёсты палэнтонъя ужрадъёс кутоно. 5. Удмурт Республикаысь Инкуазь узырлыкъёсъя но инкуазез утёнъя министерстволы (Кулагин А. В.) Удмурт Республикаысь Архив фондэ геология удысысь документациез геология улосвыл фондэ утьыны сётонъя но лыдъян-чотанъя та дыре ужась законъёсты быдэсъяны луонлыкъёс кылдытоно. 6. Удмурт Республикаысь Правительстволэн Наукая, вылӥ но шор ёзо профессиослы дышетонъя комитетлы (Решетников С. М.) элькунысьтымы вузъёсын бюджет коньдон чотын научно-исследовательской уж нуыку люкаськем научно- технической документациез кунэн утьыны сётон вылысь, сое возёнъя, лыдъян-чотанъя но быръёнъя ужрадъёс кутоно. 7. Удмурт Республикаысь Лэсьтӥськонъя, архитектурая но улон-вылонэз радъян политикая министерстволы (Загайнов В. Ф.), Экономикая министерстволы (Захваткин В. Н.), Коньдон ужпумъёсъя министерстволы (Бельтюков В. В.), элькун бюджетлэсь инъетсэ дасяку, кун инвестициос висъяны чаклано архивъёслэсь юртъёссэс выльдыны но узырмытыны, документальной сборникъёс но архивъя справочникъёс печатланы, архивъя юртъёсын иворъёс сётонъя туала амалъёсты (технологиосты) пыӵатыны, Удмуртилэн историезъя солэн палэназ интыяськем улосвылъёсысь документъёс утчаны. 8. Удмурт Республикаысь Коньдон ужпумъёсъя министерстволы 2001-тӥ арлы элькун бюджетэз дасяку чаклано, элькунысьтымы архивъёсы компьютер но аудиовизуальной техника басьтон вылысь, 1000 сюрс манет коньдон висъяны, Удмурт Республикаысь Валтӥсь (Центральной) архивлэсь юртсэ выльдыны уксё висъяны. 9. Удмурт Республикаысь городъёслэн но ёросъёслэн администрациоссылы дэмлано: 9.1. Улосвылъёслэсь арлы бюджетсэс дасяку, нимаз чурен гожтыса, коньдон висъяны чаклано архив ужез азинтонъя, интыысь архивъёсты возёнъя, шуге-леке шедьыку, архив фондъёсты кышкытлык кылдонлэсь утёнъя ужрадъёслы. 9.2. Администрациослэн архив ёзъёссылы туала куронъёслы тупась компьютеръёс висъяно, та огъя удысъя "Архивлэн фондэз" АБД (автоматизированная база данных) кылдытон, организациослы но адямиослы иворъёс сётонъя ужез умоятон вылысь. 9. 3. Та дыре быдэсъяськись законъя улосвыл администрациосын кылдэм архив ёзъёслэсь структуразэс возён, быдтэм организациослэн личной составзыя документъёсты утёнэз радъян вылысь ужрадъёс кутоно. 10. Ижевск городысь, Балезино, Дэбес, Каракулино, Камбарка, Красногорск но Селта ёросъёслэн администрациоосылы интыысь архивъёслы выль но ватсаса юртъёс висъяны, соосты корт ӝажыосын но кулэ тӥрлыкъёсын узырмытыны. 11. Алнаш, Грахово, Дэбес, Кизнер, Пичи Пурга, Селта, Сюмси, Юкаменск, Якшур-Бодья но Яр ёросъёслэн администрациоссылы интыысь архивъёсы тылпулэсь утиськонъя сигнализация пуктыны яке сое выльдыны. 12. Та постановленилэсь быдэсъяськемзэ эскероз Удмурт Республикаысь Праивтельстволэн Архивъёсын ужанъя комитетэз (Коробейникова Н. К.). Удмурт Республикаысь Правительстволэн Тӧроез Н. А. Ганза. Ижевск город, 2000-тӥ арын 17-тӥ апреле. � 394. Наталь Умой адямиос Азь питран Вӧсь каронлы но ултӥянлы чидатэк, нылкышно вие визьтэммем картсэ. Ӧйтӧд, кӧня арлы люкысалзы, вылды, сое нылпиосызлэсь, Нылгаысь нылкышно кенеш юрттӥськыны ӧй басьтӥськысал ке. Прокурор доры но ветлӥзы, судэ но вазиськылӥзы, калыкысь дурбасьтӥсь но шедьтӥзы. Утьыны быгатӥзы ведь пытсэтлэсь. Кызь вить ар ӵоже Нылгаысь нылкышно кенешен кивалтытозяз, Клавдия Ивановна Пислегиналэн улоназ кыӵе гинэ учыръёс ӧз пумиськылэ. Юисьёсын но ужано, шуге- леке сюрем нылпиослы, ӧлексыослы юрттоно, ёрмись семьяос вӧзтӥ но палэнскыса уд кошкы. Кыӵе ке шуг-секытъёссы кылдо ке, нылкышноос тодо ни кин доры вазиськыны. Клавдия Ивановна ноку уз шуы - уг ваньмиськы, юрттыны уг быгатӥськы, лӥятоз но, кыӵе ке ужрадъёс но кутоз. Бен, со огназ ӧвӧл. Али Нылгаысь нылкышно кенеше дас вить мурт быръемын, пӧртэм удысъёсын ужало соос: вань пӧлазы дышетӥсез но, воспитателез но, эмъяськон, вузкарон, культура удысын ужасьёс, пенсионеръёс, колхозникъёс. Котькудӥз мар ке понна но кыл кутэ. - Валась эшъёс вӧзын вань ке, ужаны но капчи, - шуэ Клавдия Ивановна. - Но берло дыре пӧртэмужпумъёс зӥбо. Кыӵе ке ужрадъёс ортчытоно ке, уксё ласянь шуг- секытъёс кылдо. Собере калыкен но ужаны секыт луиз, буш кылын гинэ мылкыдзэс уд ӝуты ни адямиослэсь. Бен соиз валамон но, туала вакытэ ваньмызлы секыт йӧтэ. Капчи ӧвӧл Клавдия Ивановналы но. Атаез Иван Михайлович дышетӥсь вал. Ож лудысь ӧз берытскы, война йылпумъяськем бере ини, 11-тӥ мае, чиптэм-чаптэм ышиз. Берпуметӥ гожтэтсэ басьтӥзы 1945-тӥ арын 20-тӥ апреле. Атайзэ ыштэмысь нылкышно али ке но уг буйга, ялан утчаське, пӧртэм интыосы вазиськылэ. Аслаз но улонэз Клавдия Ивановналэн вӧй вылтӥ кадь ӧз ортчы. Палдурес шудэзлы ӧз ӝожтӥськы, будэтӥз пизэ. Со котьку вал калык пӧлын. Трос аръёс ӵоже Клавдия Ивановна кивалтӥз анай-атайёслэн комитетэнызы, семьялы но школалы юрттонъя комиссилэн ужаз пыриськиз, кивалтӥз товарищеской судэн, вал райсоветлэн депутатэз, сельсоветысьтызы калык контролья группалэн кивалтӥсезлэн воштӥсез, кызь аръёс пала кивалтӥз сандружинаен. Нош тужгес но трос кужымзэ но дырзэ сётэ нылкышно кенешлы, пенсие потыса но шутэтсконэз уг тоды. К. И. Пислегина понна уж - со улон. - Мар ватонэз, котькыӵе вакыт луэ, куддыр ваньзэ вунэтэм потэ. Мукетъёс сямен улысал, номыр сярысь сюлмаськытэк. Но куке уж пӧрме, кинлы ке но юрттыны быгатӥськод - нош ик бурдъёс кылдо кадь. Калык пӧртэм адями, лэся, мон - аслым но буйгатскыны уг сётӥськы, мукетъёссэ но сьӧрам валтӥсько. Зэмзэ но, Нылгаысь нылкышно кенеш возиське Клавдия Ивановналэн сюлмаськемез но тыршемез вылын, эшъёсыз аслыз но озьы ик шуо. Нош кутсконэз вал 1975-тӥ арысен 17-тӥ мае. Со вакытэз тодаз вайыса, нылкышнолэн серемез но потэ: - Нылкышно кенеше ӧтьыса, одӥг пол мыным повестка ыстӥзы. Мар понна кылме юаны туртто шуыса, воксё куалектӥ. Нош монэ кивалтӥсе бырйизы. Куамын ньыль арес вал ай соку мыным. Ӵош ужасьёсы ваньмыз арлыдоесь, егит шуыса туж возьдаськылӥ. Мар бордысен кутскыны уг тодӥськы. Ужез радъянъя нимаз положение ӧвӧл, журналъёсын, книгаосын бугыръяськи, мӧйыослы вазиськылӥ. Эшъёсы шуо, тазьы ужано ке, гурт ужез но ваньзэ вунэтоно луоз, кудӥз пумитъяськизы но. Со вал кутсконэз гинэ, отӥяз ужмы ӧръяськиз. Нырысь ик ортчытӥмы войнаын бырем солдат кышноослы ӝыт. Сценарийзэ но ачим ик гожъяй. Нош отӥяз кӧня вал сыӵе ӝытъёс Клавдия Ивановналэн улоназ. Ма, солэн гинэ-а? Капчигес, дыр, луоз вераны, Нылгаын ортчытоно кыӵе ужрадэ ӧз пыриськылы нылкышно кенеш. Уг вунэто арлыдоосты, ӧлексыосты, егит семьяос понна ӝыт радъяло, армиын служить карись солдатъёслэн анайёсынызы слёт ортчыто, пиоссэс но со ужрадэ ӧтьыса. Кӧня ӟеч кылъёс гожтэмын ни армиын служить карись нылга пиос сярысь частьёсысьтызы командиръёсын. Гожтэтъёс пыр кусып возён но нылкышно кенеш вылын. Ужъёслэн пумзы-йылзы но уг адӟиськы, басьтӥськыны гинэ кулэ соос борды. Ярам, нылкышноослы юрттыны пумит уг луо Нылгаысь предприятиос но, селоысь администрация но. Кусыпъёссы ӟечесь ветеранъёслэн советэнызы, парторганизациен, милициен. Азьло аръёсы нылкышно кенешъёслы бадӟым саклык висъяло вал республикаысьтымы вылӥ кивалтон ёзъёс но, Удмуртиысь Нылкышно кенеш но. Огазе люкаськыса, пӧртэм ужпумъёсты эскерыны луэ вал, ёросъёсысь лыктэмъёс ог-огзылэн ужан амалъёсынызы тодматскылӥзы. Берло дыре со уж чалмиз, со пумысен но Клавдия Ивановналэн сюлэмыз бӧрдэ. Кин азьланьтоз кутскем ужез? Кинлы кулэ нылкышно кенешъёс? Кулэ ик вылэм, адямиос юрттэт курыса вазисько бере. Л. Малых. Егит мылкыд Вормон нуналлы сӥзьыса 8-тӥ мае Владимир областьысь Ковров городын кутскиз мотопробег. Со сӥземын Вормон нуналлы. Пробег ортчоз тужгес но лек ожмаськонъёс ортчем интыостӥ. Ужрадэз дасяз Владимир областьысь комсомол. Тани ма вераз милемлы Россиысь комсомоллэн ЦК-езлэн секретарез А. А. Астахин: - Мотопробег ортчоз 27 город пыр, соос пӧлын Москва, Смоленск, Витебск, Минск, Брест, Бобруйск, Гомель, Киев, Курск, Орел, Тула но мукет городъёс. Ужрадэ пыриське мотозаводъёсысь вить команда - Ирбитысь "Урал", Киевысь "Днепр", Минскысь "Минск", Ковровысь "Восход" но Ижевскысь "Иж". Мотопробег кыстӥськоз толэзьлэсь ятыр. Солэн валтӥсез ужпумез - егитъёс пӧлын ас шаердэ яратон, мылкыдэз кужмоятон. Валамон ни, чакламын асьмелэсь пӧртэм пумо мотоослэсь данзэс ӝутон но. Кылем арын Владимир областьын ортчизы ни кык та выллем пробегъёс. Соосты но дасяз вал комсомоллэн отысь обкомез. Отчы пыриськемъёс трос шуныт кыл верало гуртъёсын но каръёсын пумитасьёс сярысь. Соослэн мотоциклъёссы вылын трос горд флагъёс вал, соин ик калык соосты паймыса юалляз "Совето власть берытскиз-а?!" Ярославльын таӵе учыр вал. 22-тӥ октябре отчы вуылӥз Сергей Степашин. Со дыре, ку сюресъёс усьтэмын вал солэн кортежезлы гинэ, мукет палысь потӥз _горд флагъёсын мотоциклъёслэсь туж кузь колонна. Калык шумпотӥз, кесяськыны ӧдъяз: "Коммунистъёс берытскизы!", "Комсомол улэп на ай!" Нокин но уг малпа вал, таӵе учыр луыны быгатоз шуыса. Соин ик Степашинлэн кортежез "гуньдӥз" но дугдӥз. Милиция уг тоды, ма карыны. Ярам, сюриз одӥг майор, кудӥз лэзиз мотоколоннаез азьлань, нош Степашинлэн командаяз пырем эшъёс озьы ик кылизы, паймем синъёсын соосты келяса... Нимысьтыз верам потэ вал "Иж" команда сярысь. Та командаын куать адями. Командирзы комсомоллэн Удмурт рескомезлэн нырысетӥ секретарез Юрий Мишкин. Мон туж шумпотӥсько солэн быгатыса та ужез радъямезлы. Ачиз со удмурт пияш, анай- атаез уло Пичи Пурга ёросысь Пуро-Можга гуртын. Юра пробеге пыриське "Юпитер" мотоциклэн. Командаын озьы ик комосомолец Павел Верещагин ("Планета" мотоциклэн), Александ Широбоков (мотозаводын ужась, алигес поттыны кутскем Иж 6. 113-05 "Чоппер" мотоциклэн), Рафис Гиниятуллин (мотозаводысь механик), Юрий Коробейников (автозаводын ужась, со мынэмын Иж- 21172 автомашинаен, Владимир Вологжанин ("Удмуртия" ГТРК-ысь оператор). Ваньзэ тае дасяз комсомоллэн Удмурт рескомез. Пиослэн бадӟым тау верамзы потэ "Ижмаш-мото" ДОАО но ДОАО "Ижмаш-авто" предприятиослэн кивалтӥсьёссылы выль техника сётэмзы понна. Та ужез радъянэ мылысь-кыдысь пыриськизы Удмурт Элькунлэн Кун Кенешысьтыз депутатъёс Вячеслав Николаевич Ануриев но Вламир Петрович Бодров. Уксёен юрттӥз Кун Кенешлэн Тӧроез Александр Александрович Волков. Та нуналъёсы мотоколонна потӥз ни Смоленскысь. Эшъёсын алигес телефон пыр вераським. Соос бадӟым салам вераны косӥзы анай-атайёссылы но вань тодмооссылы. Тазалыксы юн, техниказы чида. Оскиськом, ваньмыз озьы ик умой луыса кошкоз. И. ШИХОВ. Россия Федерацилэн кун наградаосыныз пусъён сярысь Россия Федерацилэн Президентэзлэн Указэз Дышетон но наука удысъёсын азинскон басьтэмез, вылӥ квалификациен специалистъёсты дасямез понна "Россия Федерациысь вылӥ школаысь дано ужась" сӥлы карон ним сётоно Михайлов Дмитрий Михайловичлы - Ижысь кун медицина академиысь профессорлы, Удмурт Республика. Россия Федерацилэн Президентэзлэсь ужзэ быдэсъясь В. Путин. Москва, Кремль. 2000-тӥ арын 26-тӥ апреле, � 736. Россия Федерацилэн кун наградаосыныз пусъён сярысь Россия Федерацилэн Президентэзлэн Указэз Калыкъёс куспын эшъяськонэз юнматонын трос кужымзэ сётэмез но уно аръёс ӵоже азинлыко тыршемез понна пусъёно: ИИ степенё "Заслуги перед Отечеством" орденлэн медаленыз Овечкин Виктор Ивановичез - акциосын "Ижевский литейный завод" огазеяськонлэсь валтӥсь директорзэ, Удмурт Республика; Кибашлы ужен кема аръёс ӵоже пайдаё тыршемез понна "Россия Федерациысь дано изобретатель" сӥлы карон ним сётоно Шаймарданов Вазих Харисовичлы - "Удмуртнипинефть" институтысь лабораторилэн кивалтӥсезлы, Удмурт Республика. Россия Федерацилэн Президентэзлэсь ужзэ быдэсъясь В. Путин. Москва, Кремль, 2000-тӥ арын 26-тӥ апреле. � 740. Россия Федерацилэн дано нимъёсыныз пусъён сярысь Россия Федерацилэн Президентэзлэн Указэз Гурт удысын азинсконъёс басьтэмез уно аръёс ӵоже мылысь-кыдысь тыршемез понна "Росия Федерациысь гурт удысъя дано ужась" Сӥлы карон ним сётоно Ушакова Валентина Павловналы - Глазов районысь "Удмуртская птицефабрика" акционер огазеяськонлэн валтӥсь директорезлы, Удмурт Республика. Мелиорация удысын азинсконъёс басьтэмзы но трос аръёс ӵоже сюлмо, пайдаё ужамзы понна "Россия Федерациысь дано мелиоратор" сӥлы карон ним сётоно: Мельчаков Валентин Петровичлы - Ува районысь акциосын "Гидростроитель" огазеяськонысь трактористлы, Удмурт Республика; Усков Виктор Артемьевичлы - "Удмурт водоэксплуатация" кун предприятилэн валтӥсь механикезлы, Удмурт Республика. Россия Федерацилэн Президентэзлэсь ужзэ быдэсъясь В. Путин. Москва, Кремль, 2000-тӥ арын 26-тӥ апреле. � 741. Вал комсомол, луоз "Гондыр" Россиысь "Единство" огазеяськон аслыз кивоштӥсьёсты дася. Та партилы дурбасьтӥсь егитъёс кылдытӥзы асьсэлэсь огазеяськонзэс, нимаське со "Егитъёслэн единствозы" (Молодежное единство). Огазеяськонэз кылдытонъя съезд ортчиз апрель пумын Москваын. Россилэн пӧртэм регионъёсысьтыз сюрс пала делегатъёс люкаськизы отчы. Соос пыро егитъёслэн пӧртэм общественной огазеяськонъёсазы - котькудӥзлэн кыӵе ке но аслаз удысэз: кин бырем солдатъёслэсь лысьӧмзэс утча, кин выре каратэен яке оборонно-спортивной но мукет кыӵе ке огазеяськонъёсы пыриське. "Егитъёслэн единствозылэн" бурд улаз огазеяськыса, соос ас азязы пуктэм ужпумъёсты уката но муромытыны но паськытатыны малпало. Оско, котыразы тросгес егитъёс огазеяськозы. Собере, огъя ужлэн пайдалыкез но шӧдскымонгес. - Та огазеяськон комсомолэз уз вошты, но ужпумъёс со азьын сыӵе ик паськытэсь пуктэмын луозы, - шуиз огазеяськонлэн Удмурт ёзэзлэн кивалтӥсезлэн нырысетӥ воштӥсез Равиль Гатаулин журналистъёсын пумиськонын. Егитъёслэн съездазы Удмуртиысь куать мурт ветлӥз, вить мурт быръемын Координационной Советэ. "Егитъёслэн единствозылы" кивалтӥсе быръемын Россия Федерациысь Кун Думалэн депутатэз Александра Буратаева. Выль огазеяськонлы бадӟым осконзэ вераз Россия Федерацилэн Президентэз Владимир Путин. "Егитъёслэн единствозы" политической уг нимаськы, со общественной огазеяськон, озьы ке но, со дурбасьтоз "Единствоен" пуктэм ужпумъёслы. Огазеяськонлэн луоз нимаз эмблемаез, уставез, програмаез. Отчы пырыны быгатозы 14 аресысен 30 аресозь егитъёс - нимазы яке быдэс огазеяськонэн. Куке но вал комсомол, табере егитъёсты огазеялоз "Гондыр". "Единство" - кивалтӥсьёслэн партизы, со киын кужым. Егитъёсты бордазы кыско бере, оском, трос ужпумъёсъя соослы вож сюрес усьтозы. Л. МАЛЫХ. Политика Юн Кремльлэн выль кузёез, "ужзэ быдэсъясь" шуонлэсь куштӥскыса, рос-прос басьтӥське, шӧдске, Россиын рад тупатон борды. Кылемаз субботае со улосъёсысь представительёсызлэсь ужзэс чутрак воштон сярысь Указ поттӥз. Та дырозь котькудаз регионын солэн нимаз ыстэм муртъёсыз вал ке (асьмелэн - Виктор Балакин), табере соослэн лыдзы дас поллэсь трослы кулэсмоз - Россия сизьым округлы люкемын. Данак губернаторъёс но республикаослэн кивалтӥсьёссы понна таӵе ивор малпамтэ шорысь луиз кадь. Уго округъёс кылдытон ортчытэмын, экономика ласянь кӧня ке ар ӵоже ни ужась огазеяськонъёслэсь гожъёссэс лыдэ басьтытэк. Шуом, асьме Удмуртия "Бадӟым Урал" ассоциацие пыре вал, выль Указъя шаермы пыртэмын Приволжской округе. Озьыен, Екатеринбурглэсь берытскыса, кивалтӥсьёсмы табере ӵемгес учкылоно луозы Нижний Новгород пала. Округе пыртэмын Волга котырысь вань республикаос, Киров, Пермь, Самара но мукет областьёс. Ваньмыз - 15 улос. Озьыен, Россилэн президентэз интыосын выль сямен кивалтоз - аслаз сизьым представителез пыр. Соослы шӧдӥськымон полномочиос сётыны чакламын. Странаез округъёслы люкон - кивалтонъя реформалэн нырысетӥ люкетэз гинэ. Валлян Владимир Путин калыклы телевидение пыр вазиськиз. Со пыр-поч валэктӥз властез юнматон пумысен малпанъёссэ, трос выльзэ вераз. Пусйымон соиз: вань воштӥськонъёсты ортчытыны чакламын, Россилэсь туала Конституцизэ йӧтскылытэк. Тани, кылсярысь, мукет сямен радъямын луоз Федерацияя Кенешлэн, парламентлэн вылӥ ёзэзлэн, ужез. Али, кызьы тодӥськоды, солэн членъёсыз луо улосъёсысь быдэсясь но быръем ёзъёслэн кивалтӥсьёссы. Озьы сурасько властьлэсь вайёсыз. Шуом, губернатор ачиз ик быдэсъя асэныз юнматэм законэз. Умой шат со? Владимир Путин тазьы шуэ: Федерацияя Кенеше интыосысь ыстоно ялан ужась специалистъёсты, нош улосъёслэн кивалтӥсьёссы тросгес мед вырозы республикаез яке областез азинтонэн. Выль президент озьы ик ӵектэ губернаторъёсты палэнтон рад тупатыны. Соос законэз тӥязы яке ӧз быдэсъялэ ке, Кремльлэн кузёез быгатоз сыӵе муртъёсты воштыны. Со дыре ик асьсэлы улос йыръёслы право сётыны чакламын аскивалтонъя ёзъёслэсь кивалтӥсьёссэс ужысьтызы палэнтылыны. Озьы Россиын власть шӧдскымон юнманы кулэ. Котькудӥз кузё азьзэ-берзэ чакласа ужаны кутскоз, ас тодэмезъя гинэ солэн кивалтэмез уз луы ни. Чурыт куронъёс пуктэ президент интыосысь законъёс ласянь но. Сыӵе улосъёслы, кытын конституциоссы но уставъёссы уг тупало страналэн валтӥсь законэзлы, косэмын тырмымтэосты ӝегатскытэк палэнтыны. Умой соиз: асьме Удмуртия та ласянь адӟем карымон луэ. Депутатъёсмы, референдумлы йылпумъянъёсты лыдэ басьтыса, алигес выльдӥзы Конституциез. Табере соос азьланьто президент быръёнэн герӟаськем законъёс кылдытон бордын ужзэс. Ваньмыз со туж тупа Россиын кутскем огъя воштӥськонъёслы. Котькудӥз ас интыяз аслэсьтыз ужзэ быдэсъяны кулэ, тодэ вайытӥз Владимир Путин. Солань-талань шонаськонъёслэсь жадем калык со верамез кема витем кылъёсты сямен пумитаз. Президент улонмес тупатон борды юн басьтӥське. Осконмы таяз учыре мед зэмасал вылэм. И. ЛЕБЕДЕВ. Пиос но будо но Быдӟым Отечественной ож вакытэ анай-атайтэк кылем пиналъёсты будэтон но дышетон понна кылдытэмын вал Суворовской училищеос. Аръёс ортчемъя, отын дышетскон амалъёс воштӥськизы. Озьы училищеос офицер луыны мылкыд карись пиналъёсты дышетыны кутскизы. Суворовской но Нахимовской училищеос, Россиысь кадетъёслэн корпуссы данъяськымон дышетскон интыослы пӧрмизы. Уноез анай-атайёс но дышетскись пиналъёс юан сёто: маин пӧртэмесь ог-огзылэсь кадетъёслэн корпуссы но Суворовской училище? Суворовской училищеын пиналъёсыз дышето, азьланяз вылӥ военно-учебной заведениосы дышетыны пырон вылысь. Нош кадетъёслэн корпуссы Вооружённой Кужымъёслэн радазы кутӥськись профессилы дышетэ. Суворовской училищеосты но кадетъёслэсь корпусъёссэс йылпумъямъёс вылӥ военно-учебной заведениосы кутӥсько. Со понна мед луоз ӟеч тодон- валанзы, дышетскыны мылкыдзы но юн тазалыксы. Суворовской военной училищее, Нахимовской военно-морской училищее но кадетъёслэн корпусазы кутӥсько туэ 8-тӥ классэз йылпумъясь 14-15 аресъем пиос. Москваысь военно-музыкальной училищее басьто 15-16 аресысен, 9 класс бере. Санкт-Петербургысь кадетъёслэн военно-космической но Горский (Назрань, Ингушетия) корпусазы 7 классэз йылпумъям 13-14 аресъем пиос кутӥсько. Дышетсконо 3-4 ар. Кандидатъёсты дышетскыны ысто военкоматъёс гинэ. Дышетскыны мылкыд карись кандидатлэн анай-атаезлэн куриськонэз но мукет кулэ луись документъёс кутӥсько улон интыя военной коммисариатын 15-тӥ апрельысен 15-тӥ маёзь. Куриськон вӧзы кулэ на таӵе документъёс: училищелэн начальникезлы кандидатлэн куриськонэз (заявление); вордскемез сярысь свидетельстволэн копиез; Россилэн гражданинэз луэмзэ возьматӥсь документлэн копиез; ; 8-тӥ (7-тӥ) класс понна 1-3 дышетскон четверте басьтэм оценкаосын табель; школаез йылпумъям сярысь аттестатлэн копиез (военно-музыкальной училищее пырисьлы); школалэн директореныз но класслэн кивалтӥсеныз кандидатлы гожтэм характеристика; 3х4 быдӟалаен 4 туспуктэм; тазалык сярысь справка. Быръем кандидатъёс 1-15 августэ экзамен сёто ӟуч кылъя - диктант, математикаез письменно, озьы ик кандидатъёсты эскеро психология ласянь, чаклало тазалыксэс. Нош физкультурая таӵе куронъёс пуктэмын: бызьылон километр, 60 метр, перекладинаын ӝутъяськоно ӧжытсэ 7 пол. 8-тӥ классэз вить оценкаен йылпумъям но Похвальной грамотаен пусъем кандидатъёс математикаен гинэ экзамен сёто. Суворовской училищее пырыны быръем кандидатъёслы военно-учебной заведениосы пырись кандидатъёслы кадь ик льготаос тупатэмын. Училищеез йылпумъям суворовецъёсты училищелэн начальникез ыстэ азьланяз военно- учебной заведениосы дышетскыны. Зарни медален пусъем суворовецъёслэн но нахимовецъёслэн правозы вань пырыны вылӥ военно-учебной заведение. Суворовской училищеез, кадетъёслэсь корпуссэс йылпумъямъёс военно-учебной заведениосы экзамен сётытэк пырыны быгато. Нахимовской училищеез йылпумъямъёс вылӥ военно-морской заведениосы озьы ик экзаментэк кутӥсько. Военно-музыкальной училищеез йылпумъямъёс азьланяз дышетскыны быгато Москваысь Государственной Консерваторилэн военно-дирижёрской факультетаз. Военно-учебной заведениосы дышетскыны пырон сярысь трогес тодыны быгатоды улон интыостыя ёрос военной коммисариатъёсын. Андрей Фурдык, Удмурт Республикаысь военной коммисариатлэн 2-тӥ отделэзлэн кивалтӥсезлэн валтӥсь юрттӥсез. Пиналъёс, эн тэтчалэ, эн бызьылэ, школамы куашказ ке, выльзэ ку пуктозы на. 1999-тӥ арын 1-тӥ сенятбрьлы республикаысьтымы 857 огъя тодон-валан сётӥсь школаос пӧлысь 65-ез выльдон-тупатъянэз кулэ каро вал. Югдур трослы ӧз воштӥськы, дышетон удыс, мукет удысъёс сямен ик, "чутэ" - уг тырмы коньдон. Пенсия басьтон сьӧлык ӧвӧл Пенсиос тыронэн югдур шаерамы радъяськиз, тросэз предприятиос но организациос пунэм тыронъёсынызы ӝегало ке но. Пенсиосъя фонд азьын та вакытэ мукет шуг-секытъёс кылдэмын - шуген мынэ страховой свидетельствоосты люкылон. Кызьы ивортылӥмы вал ини, котькуд ужась адямилэн луоз аслаз нимаз счётэз. Ужаса поттэм коньдонэзъя ик азьланяз пенсия басьтыны быгатоз. Чакламын, 2005-тӥ арын пенсие потэмъёс коньдон басьтозы ни страховой свидетельствоя. Та вакытлы шаерысьтымы Пенсиосъя фонд дасяз ни документъёс вань вазиськем гражданъёслы. 650 сюрс свидетельствоос пӧлысь 120 сюрсэз сётэмын ни кузёоссылы. Ужъёс ӟечгес мыно ёросъёсын, Пенсиосъя фондын ужасьёс асьсэос соосты люкылыса ветло. Секытгес югдур кылдэмын Ижевскын, 150 сюрс дась документъёс кузёоссэс возьмаса кыллё. Куд-ог предприятиослэн но организациослэн кивалтӥсьёссы та ужен уг дырто. Нош кулэ вылэм. Со юрттысал нимаз гражданъёсъя учёт нуонэз ӟечгес радъяны. Документъёсты суменак люкыса, азьлане вамыш лэсьтыны луонлык кылдысал, учёт нуонъя счётъёсы нимаз адямиослэн уждун басьтэмзы сярысь ивортонъёс ӝегатскытэк вуысалзы. Свидетельстволэсь кулэлыксэ куд-ог адямиос ас вылазы но шӧдо ни. Уж утчаса мукет регионъёсы вазиськемъёслы ӧс шоры возьматон учыръёс но вал ни - та документтэк уже уг куто. Асьме республикаын со ласянь ӝожтӥськонъёс ӧй вал на, закон но солы пумит. Страховой свидетельство басьтонлы калык пӧлын пумит веранъёс но вань, адямиосты нимаз лыдпусъёсын пусъён сьӧлыко уж, пе, луэ. Пенсиосъя фондын ужасьёс сыӵе пумитъяськонъёсты шӧдӥзы Алнаш ёросын. Валэктон уж нуэм бере ваньмыз радъяськиз кадь. Адямиос ӧвӧл, документъёс номеръёсъя радъямын (паспортын но сыӵе номеръёс ӧвӧл шат). Ужам ужед понна пенсия басьтонэз нокызьы сьӧлыко уд шуы. Л.МАЛЫХ. Дунъет сётэ Москваысь куно Удмуртие кык нуналлы вуылӥз Россиысь Обороная министерствоысь генерал- полковник Анатолий Ситнов. Республикаысьтымы Правительстволэн Тӧроезлэн воштӥсеныз Николай Хохловен Москваысь куно вуылӥз ИЭМЗ "Купол" кун предприятие, акциосын "Ижмаш" но "Аксион-холдинг" огазеяськонъёсы, Ижевскысь механикая заводэ Воткинскысь машина лэсьтон заводэ. Та предприятиослэн кивалтӥсьёсынызы пумиськонын вераськон мынӥз кун заказлэсь быдӟалазэ йылэтон но армилы кулэ луись выль продукция поттон сярысь. Пыӵал тӥрлык поттон удысэн тодматскыса, Анатолий Ситнов пусйиз республикаысь предприятиослэсь бадӟымесь луонлыкъёссэс, огъя югдурез умоен лыдъяз. Ивортӥз Обороная министерстволэсь асьме предприятиослы заказъёссэ туэ ик йылэтыны дась луэмез сярысь. Нош пунэм тыронъёссэ берыктыны чакла ар йылпумъяськытозь. Кусыпъёс лябӟо Гурт калыклэн улонэз котьма ласянь герӟаськемын татысь администрациослэн уженызы. Но со кусыпъёс, юнмам интые, пумен лябӟо. Унояз ёросъёсын администрациослэн кивалтон удысын кужымзы лябӟе. Коньдонлэн тырмымтэез вылэ чӧлскыса кулэсто отысь ужасьёслэсь лыдзэс, быдто банкъёсысь счётъёссэс. Нош бюджет чотын улӥсь учреждениослэн ужпумъёсынызы вазисько ёрос администрациослэн ёзъёсазы. Гуртъёсысь администрациосын кылдэм югдурез тупатон вылысь, Правительстволэн аппаратысьтыз Кадръёсын ужанъя, кун службая но интыын аскивалтон ёзъёсын кусыпъёсъя управление нимысьтыз положение кутӥз. Отын умой-умой валэктэмын гуртысь кивалтон ёзъёслы оскем удысъёс но быдэсъяно ужпумъёссы. Иворты - кызьы ужад Правительство юнматӥз кун асваньбуре пырись унитарной предприятиослэн но акциосын огазеяськонъёслэн ужамзылы йылпумъянъёс лэсьтон радлык сярысь постановленилэсь инъетсэ. Та документъя кун предприятиослэн кивалтӥсьёссы ужамзы сярысь йылпумъянъёс лэсьтылозы куинь толэзьлы быдэ, нош акциосын огазеяськонъёслэн тӧрооссы - арлы кык пол. Тупанкыл гожтэмын Удмурт Республикалэн Правительствоез но Россия Федерациысь Эстӥськонъя но энергетикая министерство куспын гожтэмын валче ужан сярысь тупанкыл. Со луонлык кылдытэ ООН-лэн экономикая комиссиезлэн "Энергоэффективность-200" калык куспо ужрадаз пыриськыны. Анай-атайтэк кылемъёслы Сарапулын усьтыны чакламын куамын интыен приют. Отын улозы юрттэтлы тужгес но кулэяськись, анай-атайтэк кылем нылпиос. Та ужлы республикалэн бюджетысьтыз висъямын луоз 250 сюрс манет коньдон. Юртлэсь кызьы ужамзэ эскерыса возёз Калыкез улон-вылонын утёнъя министерство. Ӟеч кутскон паськыт мед вӧлмоз Игра ёросысь "Россия" кооператив кылем арын аслаз хозяйствояз кутӥз банкрот кылем "Игринское" огазеяськонэз: нош акциосын "Граховоагрохим" - Грах ёросысь "Прибой" огазеяськонэз. Играослэсь но грахъёслэсь таӵе кутсконзэс умоен лыдъяса, Правительство соослы кизьыны кидыс но пудо басьтыны быдэн 300 сюрс манет коньдон висъяз. Гурт хозяйствоя но сиён-юонъя министерстволы косэмын та кутсконэз паськыт вӧлмытыны но ляб хозяйствоосты юнъёсыныз огазеян ужпумъя сентябрь толэзёзь нимысьтыз положение дасяны. Удмурт Республикаысь Правительстволэн пресс-службаез. Журналистъёсын пумиськонъёс Эксэй дырысен - туннэ нуналозь Та нуналъёсы Глазовысь ликёро-водочной заводлэн (ЛВЗ-лэн) директорез Николай Сорокин пумиськылӥз журналистъёсын. Люкаськемъёслы со мадиз заводлэн бадӟым юбилеез, предприятилы 100 ар тырмон но 20-тӥ мае городын ортчытоно ужрадъёссы сярысь. Зэмзэ но, Глазовысь завод Россиын одӥгез вашкала предприятие луэ. Со пуктэмын эксэйлэн косэмезъя 1900-тӥ арын. Нош ар ортчыса ужаны кутскиз ни. Аракы но вина пӧзьтӥсьёс кузь сюресэз ортчизы. Котькыӵе тӧл пыр потӥзы, куд-ог вакытъёсы пытсаськон калэ вуылӥзы. Нырысетӥ мировой война аръёсы татын госпиталь ужаз, нош Быдӟым ож вакытэ тамак поттӥзы. Россиын вань таӵе заводъёс огкадесь чебер архитектураен пуктылэмын. Вылтусыз сыӵе ик усто кылемын, нош пушказ 1980-тӥ арысен туала ӟеч оборудование пуктэмын. Вить автоматъёсын пӧртэм пумо водка но винаос потто. Кыкетӥ арзэ сур но пӧзьто ни. Дас ар талэсь азьло предприятие нош ик выльдӥськиз. Германиысь оборудование басьтӥзы но инъязы. Вить ар ӵоже асьсэ коньдонэн Балезиноын спиртзавод пуктӥзы. Табере завод аслаз сырьёеныз ужа. Кызьы солы уд шумпоты. ЛВЗ-лэсь туннэ нуналзэ пусйыса верам потэ, Россиын но Удмуртиын со одӥгез ӟеч предприятие луэ, вылӥ ӟечлыкен калыклы продукция поттэ. Сое тужгес яркыт возьмато дуннеысь адӟытонъёсын зарни, азвесь но бронза медальёсыз но дипломъёсыз. Берло вить ар ӵоже 50-лэсь уно сыӵе наградаос басьтэмын. Нош кӧня но кыӵе продукция поттэмез сярысь вераса, Николай Сорокин шуиз: - Али ми 80 пала пӧртэм пумо водка но винаос поттӥськом. Калык тужгес но яратэ "Калашников", "Золотая корона" но "Глазовская" водкаез. Соос вӧзы выльёсыз но ватсасько. Берло дыре арлы быдэ шорлыдын 900-1000 сюрс декалитр аракы но вина пӧзьтӥськом. Отчы сур уг пыры. Ушъяськемлы медаз пӧрмы, но продукцимы кошке ни Германие, Австралие, Новой Зеландие но Кипре. Тунсыкъясько ни США, Франция но музон азинскем кунъёс. Кылсярысь, Германиен тупанкыл гожтэмын ни 100 сюрс доллар тыр водка но вина вузаны. ЛВЗ берло дыре басьтӥське кудӟытӥсьтэм юонъёс поттон борды. Ӝоген лэзьяны кутскоз 5 пумо лимонадъёс но тоникъёс. Соос луозы полиэтилен посудаен. Ӵуказе, 20-тӥ мае, завод сӥё-дано пусъе юбилейзэ, 100 ар тырмонзэ. Глазове лыкто "Играй, гармонь!" передачаез нуись Геннадий Заволокин, дикторъёс Анна Шатилова и Игорь Кириллов. Москваысь озьы ик вуоз мунё театр. Кырӟалозы Валентина Пудова но музон артистъёсмы. Татын вузкарозы "Сактон", "Нептор" огазеяськонъёс. Ортчозы сур юонъя КВН но пӧртэм конкурсъёс. Лотереяын шудоосыз утозы пылесосъёс, холодильникъёс но мукет дуно арбериос. Луоз бадӟым ярмарка, ужалозы палаткаос. Куноос но городысь калык бер уинозь шутэтскозы. Г. Романов. Елена Павловна Хамитова но Людмила Семеновна Колесникова ужало Алнаш ёросысь почта кусыпъёсъя ёзын. Елена Павловна дас ньыль ар ӵоже ини татын адямиослэсь гожтэтъёссэс басьтылэ но соосты кулэ интыосы вуттылэ, нош Людмила Семеновна коньдон ужпумъёсын выре. Та нылкышноослэн быгатыса но ӟеч ужаменызы герӟаськемын гожтэтъёслэн но коньдонлэн калык доры дыраз вуэмзы. Алнаш ёросын улӥсьёс татын ужасьёс вылэ уг ӝожтӥсько. Нылкышноос котькудзэ лякыт, шуныт пумитало но келяло. Кулэ ке, юанъёслы валэкто. Юртто. Владимир Беломорскихлэн туспуктэмез. Татын будо усточиос Матэкто гужем каникулъёс. Школаосын дышетскон арлы йылпумъянъёс лэсьто. Шумпотымон соиз: пиналъёс, сюлэмзылы кельшымон удысъя мур тодон-валан басьтон вылысь, пӧртэм кружокъёсы ветло. Кин математикаез яратэ, кин инкуазь узырлыкез утён сярысь сюлмаське, кин ке шаермылэн историеныз тунсыкъяське. Нош Пичи Пурга ёросысь Иваново-Самарск шор ёзо школаысь дышетскисьёслэн мылкыдзыя - кылан-буран дунне, крезьгур устолык но пулэсь, нинлэсь, горд сюйлэсь кылдытэм чеберлык. Сыӵе малпан кылдӥз, киужъёсын адӟытонзэс учкыса, кылбур-верос лыдӟемзэс, кырӟамзэс, крезьгуро инструментъёсын шудэмзэс кылзыса но вакчи сценкаосын маскаръяськемзэс адӟыса. Тазьы соос май праздникъёс азьын пусйизы юнкор кружоксылы вить ар тырмон нуналзэс. Кружокез кылдытӥз но вить арзэ ик кыл устолык борды кыстӥськись нылпиосын мылысь-кыдысь ужа школаысь завуч, удмурт кылъя но литературая дышетӥсь Ирина Николаевна Коротаева. Удмурт кун университетлэсь удмурт филологияя ёззэ со йылпумъяз 1986-тӥ арын. Та школаын тырше ини 7 ар, ӵапак усьтӥськемез дырысен. Удмурт литератураез яратэмез нылпиослэн но сюлэмазы сыӵе ик бадӟым мылкыд улӟытыны быгатӥз. Юнкор кружоке ветлӥсьёс пӧлын вань кылбур "пӧрасьёсыз" но, верос пӧрмытӥсьёсыз но, заметка гожъясьёсыз но. Тани та люкаськоназы но ужъёссэс ас эшъёссылы лыдӟизы Саша Дедюхина, Галя Иванова, Аля Эркишева, Ирина Соловьева, Надя Бектышева но мукетъёсыз. Школаын озьы ик сюлэмзэ поныса ужа крезьгур устолыкъя дышетӥсь Виктор Анатольевич Эркишев. Пиналъёс солэн кивалтэмъяз кылдытӥзы аспӧртэмлыко ансамбль. Отчы ветло арганэн, балалайкаен, бубенэн но пу пуньыосын шудӥсьёс. Нылъёс но пиос туж ярато кырӟаны но. Юнкор кружоксылы 5 ар тырмонэ ӧтемын вал куноос: "Ӟечбур!" газетын ужасьёс Надежда Шкляева но Антонина Ермолина, "Кенеш" журналысь редактор Людмила Кутянова. "Ӟечбуръёс" покчи эшъёссэс пыр-поч тодматӥзы газет номер бордын ужаменызы, вуэм материалъёслы вакчияк дунъет сётӥзы но мылкыд каризы та школаысь авторъёслэсь гожъямъёссэс газет бамъёсысь ӵемгес адӟыны. Людмила Кутянова вераз аслаз творчествоез сярысь, кылбуръёссэ лыдӟиз но юанъёссылы валэктӥз. И. Н. Коротаева тодматэ пиналъёслэн "Маяк" ёрос газетын потэм ужъёсынызы. Кырӟало покчи классъёсын дышетскись нылъёс. Людмила Кутянова лыдӟе ас кылбуръёссэ. Юнкор кружоке ветлӥсьёс. В. Беломорскихлэн туспуктэмъёсыз. ШӦКЫЧ Кирос (Улонысь учыр) Чебер тулыс нунал уже вуи гинэ, шеф дораз ӧтиз. - Петро, туннэ мон тыныд необычайной уж сётӥсько. Сюрсовай черкысь батюшка киросме кутӥз вал, Шаркан черкысь батюшка сьӧры ыстэм табере. Нош таиз киросме ёрос тӧро доры вайыны кулэ вал. Значит, али ветлы Прохоров доры но вай киросме татчы. Кивалтӥсе шоры мон инмар шоры кадь учкисько бере, чик малпаськытэк ужез быдэстон борды басьтӥськи. Администрацие вуыса, куронме ёрос тӧролэн секретаршаезлы мади. Надежда Дмитриевна туж паймыса но оскытэк кылзӥз, Александр Аркадьевич доры пырыны уг лэзьы. "Прием по личным вопросам, - шуэ, - учкы, ӧс вылаз гожтэмын - вторник нуналэ". - Какой "по личным вопросам"? Мон кивалтӥсе понна ветлӥсько. Общественно- политической уж со. А тӥ... - Мар бен, мон пумит овӧл. Кивалтӥсед понна бызьылӥськод бере, так и быть, пырод- а, мар-а. Ёрос тӧролэн ужез лачак вылэм, телефонэз дугдылытэк жингыртэ. Ма муген лыктэмме тодэмез бере, шорам кыӵе ке умойтэмгес учкыны кутскиз. Но юрттыны соглаш луиз ик. Мыным, пе, нокин нокыӵе кирос ӧз сёты, ойдо ай воштӥселэсь юалом. Николай Григорьевич абдраса шорамы учкиз но пӧяськом, лэся, кожаса пальпотӥз: - Ма, мон но батюшкаез воштыны быгато, ачим сьӧлыкъёстэс лэзё. - Тау, - шуисько, - мынам сьӧлыкъёсы овӧл. Мыным босмылэн киросэз кулэ. Номырин юрттыны быгатытэк, ёрос йыръёс монэ ыстӥзы райсоветэ, оло, отчы, пе, пыртӥзы. Медведев интыяз ӧй вал, нош райсоветлэсь ужзъёссэ нуись Зоя Николаевна ӝот- ӝот вераз: - Нокыӵе киросэн муртэ татысь мон ӧй адӟылы. Культура отделэ пыра ай, культура удыс черклы матынгес кадь потэ мыным администрацилэсь но, райсоветлэсь но. Оло соос киын киросты. - Ма, шузимид ни шат тон, Петыр? Кыӵе кирос? - валасьтэм синъёсын учке шорам Валентина Павловна. - Ветлӥськод татӥ, ужлы люкетыса, - лек уретӥз со. Ӧвӧл, нокытын ӧвӧл. Ышиз Шкляевлэн киросэз. Соку йырам шуккиз: администрацие со вуымтэ бере, озьыен, Шаркан черкысь батюшка сое татчы вайыса ӧз вутты на. Ширтӥ черке. Кирос поныса вамыштӥ ӧс кусып вамен. Сэрегын кыӵе ке пиосмурт мыкырскыса маке но утчаське вал. Батюшка, дыр, та шуыса, со шоры кирос лэсьтӥ, озьы но озьы, шуисько, киростэк мон кивалтӥсе доры берытскыны уг быгатӥськы. - Мар тон, Петро, инмарлы оскыны кутскид шат? Коммунист мурт, мар шорам вӧсяськиськод? - вазиз со. Адями шоры умой-умой учки но му пыр вияно кадь луи. Бускельмы, Лади, вылэм. - Батюшка али гинэ кошкиз, витёно луод, - нош ик тыбырыныз берытскиз со мон пала. Кык час вити. Вуэмез бере ваньзэ тупен-тупен мади. Нош батюшка уг вала. Выльысь мади. Со озьы но шорам долкаса учке, дэмлаз Сюрсовай черкысь батюшкалы жингыртыны. Соин вераськемез бере, валантэм мыняса, киоссэ вӧлъяз. Котьма каре, но мон татысь киростэк уг кошкы, шуисько. Мар мон шуо кивалтӥсьлы? Тэльмырыса вӧсяськисько батюшка шоры. Ярам, батюшкалэн амалыз тырмиз, со мыным дэмлаз черкысь выль кирос басьтыны. Мынам мылкыд лӧптӥз. Ӝогак коньдон сётӥ но лобыса ик уже мынӥсько, ужан нунал бырытозь мед вуо на шуыса. Кивалтӥсь доры киросэн пырыкум ини йырам шуак чилектӥз, но бер вал ини: быдэс юртмы серемен гудыртӥз. Эшъёсы монэ лулысь-сюлмысь ӟечкылазы 1-тӥ апрелен. Пуйы Петыр. Мед вордӥськоз кырӟан "Удмуртская правда" газетын печатламын вал удмурт нылкышно кылбурчиосмылэн шара гожтэтсы. Ӵапак сое лыдӟон нуналэ телефон пыр вераськи Любовь Тихоноваен но кылбурчиосмылы дурбасьтэме сярысь верай. Любовь Ивановна гожтэт улэ гожтӥськем одӥгез кылбурчи. Мон пиналысен герӟай ас улонме крезьгурен но кылбуръёсын. Тодам ваисько школаын дышетскем аръёсме. Яратоно кырӟанъёсылы кык зӧк тетрадь сӥзи. Соосты татчыозь утьыны ӧй быгаты ке но, тодӥсько: котькуд кырӟанлэн нимыз вӧзын гожтэмын вал крезьгурчилэн но кылбурчилэн нимъёссы. Тазьы но луэ вылэм ужась адямиез гажан сям пыӵатыны. Арлыдо дышетӥсь луыса но весь чакласько кырӟан гожъясьёсты. Историяя, англи кылъя, улон-вылонмес но шаермес тодонъя урокъёсам ӵемысь кутӥсько тупась кырӟанъёсты. Нылпиосты дышетӥсько кырӟанлэсь нимтулзэ тодыны. Кыӵе чебересь чуръёс кылдыто кылбурчиос! Кыӵе чебересь гуръёс пӧрмыто крезьгурчиос! Кыӵе шулдырто но узырмыто соос огшоры улонмес! Пичиысен ик тодоно усточиосмес. Малпасько: та гожтэт улэ гожтӥськозы пиосмурт кылбурчиосмы но. Тани Можгалан уло туж дано гожъясьёсмы Александр Белоногов но Анатолий Леонтьев. Удмурт Пычас гуртамы улэ Павел Семенов. Соослэн но пӧсь сюлэмъёссы висё, дыр, та пумысен. Та гожтэт улэ гожтӥськозы крезьгурчиос но. Кыӵеезлэн кылэмез уз поты ас нимзэ, концерт мыныку? Бадӟым сцена вылын но луоз рос-прос вераны кырӟан сярысь. Адӟем кароно пичи клубъёсын но культура юртъёсын ужасьёслэсь: кырӟан кылдытъясь сярысь отын уг вунэто. Татын кырӟан но вӧл-вӧл кисьтӥське, сцена вылын одӥг кырӟась но уг тэтча, фонограмма но кулэ ӧвӧл. Валаса гожтӥсько тазэ но: кылбур но крезьгур гожъян - туж секыт удыс. Флор Васильев кылбур гожъяны дышетэ, саесъёсты пужалъяса. Геннадий Корепанов-Камский крезьгур гожъяны дышетэ, сое сюлэмпель пыр поттыса. Со ик дышетэ чебер кырӟаны но. Кылбурчи, крезьгурчи но кырӟась огазе кариськыса гинэ кылдытыны быгато сцена вылын куинь-вить минут ӵоже мынӥсь вунонтэм пичи спектакль. Валасько: кырӟась вылэ усе вань секытэз: нырысь ик - со возьматэ кылзӥсьёслы выль кырӟанэз. Ӧжыт-а сыӵе учыръёс - чебер кырӟан уг биниськы сюлэм борды, урод кырӟамен йырин. Али нош сцена вылын кузёясько шоу-бизнес яке - поп-культура. Тодмо луизы пӧртэм быгатонлыкъёсын туж трос кырӟасьёс. Мар ватонэз, данэ потон но кузь коньдон йырез поромыто. Соин ик куд-ог кырӟасьёсмы вунэто кырӟан "пӧрасьёсты". Соос ке ӧз луэ, кырӟасьёс ужтэк кылёзы. Соос пӧлысь тросэз-а быгато быдэс кырӟанэз огназы кылдытыны? Вӧсь карыны кызьы дӥсьтод дано кылбурчимес А.Е.Белоноговез? Чиданэз но, тазалыкез но тырме витьтон ар ӵоже гожъяськыны. Ултӥяны кызьы меда дӥсьтод ненег сюлэмо нылкышно кылбурчиосмец? Россиысь мукет кунъёсын вань меда тамында нылкышно кылбурчиос? Гажано кырӟасьёс, асьмеос ваньмы - дышетӥсьёс. Асьмеос дышетӥськом визьнод люканы, чебер гожъяськыны, эктыны, вераськыны но кырӟаны, дышетӥськом чеберез адӟыны но валаны, сое котькуд сюлэме пыӵатыны. Гажано кырӟасьёс, ойдолэ вӧсь ум каре ог-огмес. Ми тӥледыз туж яратӥськом, но со дыре ик гажаськом кылбурчиосты но крезьгурчиосты. Мед вордӥськозы выль жингрес кырӟанъёс! Н.ЕМЕЛЬЯНОВ, Можга ёросысь Удмурт Пычас гуртысь дышетӥсь. ВАЛЭКТЭ ЮРИСТ Музъем понна выт Улӥсько городын, гуртын возисько юртъер но бакча. Тодмоосы курдато: гуртын улӥсьтэм муртъёслы, пе сыӵе бадӟым налог тупатозы � бакча возёнлэсь ачид куштӥськод. Шонер-а со? Кин но кӧня тырыны кулэ сое? М.РОМАНОВ. Можга город. Музъем кусыпъёсты радъя "Музъем понна дун сярысь" Россия Федерацилэн 1738-1 номеро Законэз. Со юнматэмын 1991-тӥ арын 11-тӥ октябре. Выт тыро музъем кузёос, музъем возисьёс но сое уже кутӥсьёс. Солэн быдӟалаез вошъяське хозяйствоез нуон амалъёс мукет луэмъя но выль законъёс кылдэмъя. Россия Федерациысь Правительстволы право сётэмын налогез вошъяны, сое тужгес пичи уждунэн но улослэн аспӧртэмлыкъёсынызы герӟаса. Миым 31-тӥ декабре кутэмын "2000-тӥ арлы федерацилэн бюджетэз сярысь" 227-ФЗ номеро Закон. Со тупатӥз музъем понна выт но аренда понна дун. Соос 1999-тӥ арен ӵошатыса будэтэмын 1,2 пол. Городысь (посёлокысь) нимаз хозяйствоын, садын, бакчаын, фермаын 1 квадрат метр му понна тыроно 7,2 копейка, улон интыос улысь музъем вылын � 14,4 копейка. Туэ нырысьсэ вошъяны кутскемын аренда дун. Сое пукто быдэсъясь (исполнительной) властьлэн ёзъёсыз. Шиё пул Пенсиосъя фондэ выт вуэм чотын шаерысьтымы пенсионеръёс дырыз дыръя пенсиос басьтыны быгато. Но республикаысьтымы тросэз предприятиос но организациос пунэм тыронъёсынызы люкиськыны уг дырто, соос пӧлы пыро шаерысьтымы тросэз леспромхозъёс но. Кылсярысь, 1-тӥ апрельлы Балезино леспромхозлэн пунэм тыронъёсыз 8 миллион пала люкаськемын ни. Какмож но Кизнер леспромхозлэн 1 пала, Игра леспромхозлэн - 10, Кез леспромхозлэн - 3,5, Сюрек леспромхозлэн - 4,5 пала. Пунэм тыронъёссы трос Балезиноысь "Ремсервислэн" - 2 миллион пала, Воткинск ёросысь кортлэсь но бетонлэсь арбериос поттонъя заводлэн - 4, Сарапул ёросысь кеньыр поттонъя заводлэн - 1,4, "Увадрев" предприятилэн - 9 миллион. Тыронъёс пӧлы пачкамын шаерысьтымы ваньмыз сямен гурт хозяйствоос, лэсьтӥськон удыс, "Ижмаш", "Аксион" но мукет бадӟым предприятиос. Актриса - кырӟась Дэри черкогуртысь культура юртын ортчиз Драмая удмурт кун театрысь актрисалэн Валентина Бекмановалэн ӝытэз. Азьвылэныз ӵошатыса, Валентина Валентиновна таяз чылкак мукет ласянь усьтӥськиз. Актриса, спектакльёсын шудӥсь сяна, удмурт эстрадаын - ӝужась кизили. Аслаз ӝытаз со учкисьлы кузьмаз выль ужысьтыз кисьмам емышъёссэ - поп-кырӟанъёссэ. Ужрадлы аспӧртэмлыко шӧм но буёл пыӵатӥзы Валентиналэн кузпалыз - эстрадаысьтымы одӥгез яркыт кизили, артист Геннадий Бекманов, Драмая удмурт кун театрысь ик артистъёс Людмила Егорова, Иван Селюгин, Игорь Моисеев, Дэриысь "Гармония" клубысь егит нылкышноос. Дэри калык няськам мылкыдын, пальпотӥсь ымнырын потӥз концертысь. "Залын сыӵе шуныт, югыт вал - вуюись воректӥз кадь. Тау Валентиналы", - таӵе мылкыдзэ вераз огез кышномурт. Тросэз учкисьёс доразы бертӥзы сюлэмзэс шунтӥсь арбериен. Со - Валентина Бекмановалэн "Улон шур" нимо нырысетӥ крезьгуро альбомез. Туж шумпотымон - ар но ортчыса ӧз вуы, кырӟасьлэн емышъёсыз кылзись кие вуизы ни. Бичетысь данакез кырӟанъёс Людмила Кутяновалэн кылбуръёсызъя гожтэмын. Гуръёсыз - аслаз Валентиналэн. Озьыен, Бекманова эшшо - крезьгурчи но ай! Нош альбомез "Зеркало" студиын гожтэмын (аранжировщикез - Александр Козырев). Ӝыт йылпумъяськем бере, кӧня ке юанэн вазиськи ӝужась кизилимылы. - Валентина Валентиновна, кинлы сӥзиды нырысетӥ альбомдэс? - Нырысь ик - картэлы. Альбоме солы тау карон выллем мед луоз: угось Геннадий - эстрадаысьтымы нырысетӥосыз пӧлысь одӥгез. Собере - нылпиосылы, озьы ик - вань егитъёслы. Кырӟанъёсы, малпасько, соослэн сюлэмзыя луозы. - Трос-а дырды но кужымды быриз ӝыттэс дасянлы? - Дыр но кужым трос ӧз быре. Малы ке шуоно, ваньмыз дась вал. Мынам уже - мынам улонэ. Нош та ӝыт шараяз улонэлэсь огзэ пичи люкетсэ. Сое калыклы возьматӥ, усьтӥ. Табере нош азьлань вамышъяло улон шур кузя. - Та удысын тӥ бадӟым вормон басьтӥды, солэн йылаз ӝутсконын бадӟым вамыш лэсьтӥды. - Мон асме эстрада кырӟась ӧй шуылы, уг но шуиськы. Аслэсьтым улонме возьматыны малпай крезьгур пыр. Туж юрттӥзы Людмила Кутяновалэн кылбуръёсыз. Та аспӧртэмлыко суредаськон пуш дуннеме, сюлэм узырлыкме усьтон, дыр, нырысь ик. Нош вормон сярысь ке - адӟом ини, калык кызьы учкоз. Со гинэ быгатоз тужгес ӟеч, тужгес шонер дунъет сётыны. - Азьланяз та удысын кыӵе малпанъёстэс быдэстыны малпаськоды? - Выль кырӟанъёс гожтыны али уг малпаськы ай - таосыз бордын ӟечгес ужало. Одӥг суред кылдытыны тыршо. - Тау, Валентина Валентиновна. Малпанъёстылэн емышъёссы мед быгыльскозы. Сайкыт инвисъёс, ӵошкыт сюрес тӥледлы! Андрей КЛЕМЕНТЬЕВ, Удмурт кун университетын дышетскись. ГОЖТӤСЬКОН-2000 Гажано эшъёс, кызьы ивортӥмы вал, кыкетӥ паларлы гожтӥськыны почта дунъёс йылӥзы. Ми асьмелэсь дунъёсмес азьло мында ик кельтыны вераським, но кык индексъя редакция УФПС азьын пунэме кылёно луэ. Соин ик льготаосъя гожтӥськон 14402 но 14400 индексъёсъя кыкетӥ паларлы уз мыны. Июльысен "Удмурт дунне" газетэз басьтыны быгатоды таӵе дунын: 42 манет - 15 манет - Кивалтоз Кириенко Кылем арняе тодмо луизы Россиысь сизьым выль округъёслэн кивалтӥсьёсы. Витеныз соос пӧлысь Президентлэн нимыныз кузёясько генералъёс. Соин но, вылды, Кремльысь ыстэм муртъёсты генерал-губернатор шуыса нимало ни. Приволжской округын Владимир Путинлэн "синмыз" луиз Сергей Кириенко, огдыре Россиысь Правительстволэн тӧроез, берло толэзьёсы - СПС (Союз правых сил) огазеяськонлэн азьветлӥсез. Кун Думаысь азьпал радысь интызэ со табере Нижний Новгородысь бадӟым кабинетлы воштоз. Асьме республикалэн нырысетӥ кивалтӥсьёсыз понна та ивор туж ик шумпотымон ӧз луы: уго асьсэлэн властьсы но сюбега, адямиез но мылкыдзыя сокем ӧвӧл. И.КРИЧЕВ. Вирен но синвуэн пылатэм чуръёс Удмурт Республикаысь Правительствое гожтэт вуиз Хмельницкой областьлэн Славута городысьтыз (Украина). Сое ыстӥллям "1941-тӥ-1945-тӥ аръёсы ортчем Быдӟым Отечественной войналэн историезъя национальной музей" Мемориал комплексын ужасьёс. Война аръёсы отын интыяськемын вылэм "Гросс-лазарет" концлагерь. Гожтэтын верамын быремъёслэн нимъёссы, та ним радлыкез (списокез) лагере вуттэмъёс лушкемен нуиллям, соин ик пумиськыло янгышъёс. Ми быдэстӥськом мемориалын ужасьёслэсь куронзэс но аспал адямиосмылэсь (землякъёсмылэсь) нимъёссэс ивортӥськом. Малпаськом, Быдӟым Вормонлы 55 ар тырмон азьын кин ке матысь адямиосыз сярысь мӧзмыт-ӝож, со дыре ик туж кулэ ивор тодоз. Та пумысен рос-просгес валэктон сётозы таӵе адресъя: Украина, 01015, Киев - 15, ул. Январского восстания, 44, Мемориальный комплекс, тел. (044) 295-94-57. Удмурт Республикаысь Правительстволэн пресс-службаез. Удмуртская АССР 128. � 17513 ИИ блок Архипов Семен, удмурт, 1891 г., крестьянин, Удмуртская АССР, умер 27.5.43 г. КУ КП 60539 л. ИИ. 129. � 7157 ИИ блок Акузен Борис 1901г., удмурт, Удмуртская АССР, с.Андреево, умер 5.12.42г., КУ КП 60538 л.133,об. 134 130. � 14060 ИИ блок Александров Николай Георгиевич, русский, 1914г., учитель, Удмуртская АССР, с .Якшур-Бодья, умер 6. 3. 43г., КУ КП 60538 л.294 131. � 6429 ИИИ блок Быков Петр Григорьевич, 1903г., русский, Удм. АССР, с. Шадрино, умер 29.11. 42г., КУ КП 60538 л.114 132. � 8188 И блок Бушлеев Андрей, русский, 1906г., Удмуртская АССР, с. Красногорское, умер 13 .12.42г., КУ КП 60538 л. 163, об. 164 133. � 6775 ИИ блок Байков Василий, 1923г., удмурт, Удмуртская АССР, с. Удмурт Тоймобаш, умер 2.12.42г., КУ КП 60538 л.122,об.123 134. � 10221 ИИ блок Владыкян Сергей Ильич, удмурт, 1907г., Удмуртская АССР, с.Балезино, умер 27.12.42г. КУ КП 60538 с.219 135. � 8389 ИИ блок Вахрушев Семен, удмурт, 1903г., крестьянин, Удмуртская АССР, с.Нылга, умер 14.12. 42г., КУ КП 60538 л.169 об. 170 136. � 7199 ВИИ блок Ворончихин Семен, 1906г., украинец, Удмуртская АССР, умер 5.12. 42г., КУ КП 60538 л.134. об.135 137. � 17026 ИИ блок Вихорев Маркиян Самсонович, русский, 1891г., крестьянин, Удмуртская АССР, с. Ярково, умер 16.5.43г., КУ КП 60538 л. 346 138. � 15029 И блок Веселков Ефим Андреевич, русский, 1906г., крестьянин, Удмуртская АССР, Красногорский р-н, умер 28.3.43г., КУ КП 60538 л. 311 139. � 9018 ИИ блок Главацких Леонид, удмурт, 1921г., плотник Удмуртская АССР, д .Плаю, умер 18.12.42г., КУ КП 60538 л.107,об.108 140. � 13842 ИИИ блок Головкин Поликарп, руцский, 1922г., рабочий, г. Ижевск, Удмутская АССР , умер 1.3.43г., КУ КП 60538 л.290 141. � 14729 ИЪ блок Гончаров Николай Николаевич, удмурт, 1923г., рабочий, Удмуртская АССР, с. Сундуково, умер 19.3.43 г., КУ КП 60538 л.306 142. � 19360 ИИ блок Городилов Алексей Дмитриевич, удмурт, 1905г., крестьянин, Удмуртская АССР, д.Подливалово, умер 7.8.43г., КУ КП 60539 л. 74 143. � 18872 ИИ блок Дробинин Георгий, русский, 1917г., рабочий, Удмутская АССР, д.Шубноки, умер 13.7.43г., КУ КП 60539 л.57 144. � 18295 ИИ блок Евдокимов Петр Михайлович, удмурт, 1900г., крестьянин, Удмуртская АССР, д.Уйвай, умер 19.6.43г., понос, КУ КП 60539 л.38 145. � 7138 И блок Ерофеев Андрей Васильевич 1910г., русский, Удмуртская АССР, Руденский р-н, с.Аверино, умер 5.12.42г., КУ КП 60538 л.133,об.134 146. � 19026 ИИ блок Ельцов Иван, удмурт, 1917г., крестьянин, Удмуртская АССР, д. Кожил, умер 21.7. 43г., КУ КП 60539 л.62 147. � 10263 ИВ блок Жигалов Валериан Тимофеевич, удмурт, 1923г., Удмуртская АССР, Кезский р-н, умер 27.12.42 г., КУ КП 60538 с. 220 148. � 6728 ВИИИ блок Зуев Ф., 1884г., русский, Удмуртская АССР, умер И.12.42г., КУ КП 60538 л.121,об. 122 149. � 6856 ИЪ блок Игнатенко Федор, 1902г., украинец, Удмуртская АССР, Жаковский р-н (Граховский?), умер 2.12.42г., КУ КП 60538 л.125, об.126 150. � 18019 ИИИ блок Коновалов Николай Матвеевич, русский, 1898г., крестьянин, Удмуртская АССР, с.Б.Калмаши, умер 10.6.43г., КУ КП 60539 л.28 151. � 17839 ИИ блок Котов Анатолий, удмурт, 1913г., крестьянин, Удмуртская АССР, г.Дубрава, умер 5.6.43г., понос КУ КП 60539 л.22 152. � 9421 ИИ блок Какорин Александр Леонтьевич, русский, 1922., Удмуртская АССР, с.В.Бымыш (В. Бемыж?), умер 21.12.42г., КУ КП 60538 с.199 153. � 9945 ИЪ блок Корнев Иван Иванович, русский, 1919г., Удмуртская АССР, ст. Лечас (Пычас?), умер 24.12.42г., КУ КП 60538 с.213 154. � 8660 ИИ блок Кольцов Дмитрий, русский, 1921г. служащий, Удмуртская АССР, Ижевский р-н, умер 15.12.42г. , КУ КП 60538 л.177,об.178 155. � 8658 ИИ блок Концов Михаил, удмурт, 1922г. крестьянин, Удмуртская АССР, д.Арланово, умер 15.12.42г., КУ КП 60538 л.177,об.178 156. � 7136 И блок Кузин Иван Васильевич, 1910г., русский, Удмуртская АССР, Руденский р-н, с. Аверино, умер 5.12.42г., КУ КП 60538 л.133, об.134 157. � 10353 ИИ блок Кочуров Павел Андреевич, русский, 1902г., Удмуртская АССР, с7 Люк, умер 28.12.42 г., КУ КП 60538 с. 222 158. � 19713 ИИ блок Касаткин Матвей Васильевич, удмурт, 1898г., крестьянин, Удмуртская АССР, д. Малосозановка, умер 26.8.43г., КУ КП 60539 л.87 159. � 15996 И блок Карманов Сергей Петрович, русский, 1925г., учащийся, Удмуртская АССР, с.Елькино, умер 22.4.43 г., КУ КП 60538 л.328 160. � 18663 ИИ блок Корляков Александр, русский, 1905г., рабочий, Удмуртская АССР, д.Ува, умер 3.7.43г., КУ КП 60539 л.49 161. � 9452 ИИИ блок Лавров Борис Устинович, русский, 1912г., Удмуртская АССР, д. Кадиновец, умер 21.12.42г., КУ КП 60538 с.200 162. � 7597 ИИ блок Лекомцев Михаил, удмурт, 1906г., Удмуртская АССР, Балезинский р-н, умер 8.12.42г., КУ КП 60538 л.145,об.146 163. � 6687 ИИИ блок Ликомиев Михаил, 1904 г., удмурт, Удмуртская АССР, Далезенский р-н (Балезинский ?), с. Ягомура (Ягошур?), умер 1.12.42 г., КУ КП 60538 л.120, об.121 164. � 6544 ИВ блок Лелонусь Вениамин, 1917г., удмурт, Удмуртская АССР, умер 30.11.42г., КУ КП 60538 л. 117 165. � 15835 В блок Любимов Федор Никитьевич, удмурт, 1898г., крестьянин, Удмуртская АССР, с.Сосновка, умер 17.4.43г., КУ КП 60538 л. 326 1бб. � 9912 ВИИ блок Майтев Михаил Николаевич, русский, 1922г., Удмуртская АССР, д.Пешка, умер 24.12.42г., КУ КП 60538 с. 212 167. � 9994 ИИ блок Марыил Василий Яковлевич, удмурт, 1922г., Удмуртская АССР, с.Чатыровка, умер 25.12.42г., КУ КП 60538 с. 214 168. � 7209 ВИИ блок Мокашев Николай, 1915 г., удмурт, Удмуртская АССР, умер 5.12.42., КУ КП 60538 л. 134, об. 135 169. � 10666 ИЪ блок Мустафаев Тайлуп, азерб., 1922 г., г. Уба (Уфа?), Ленина, 86 Удмуртская АССР, умер 30.12.42г., КУ КП 60538 с. 229 170. � 14496 Иблок Мокшинов Григорий Александрович, русский, 1900 г., Удмуртская АССР, с. Макшаки, умер 16.3.43 г., КУ КП 60538 л. 302 171. � 19465 ВИ блок Мерзляков Николай, русский, 1920 г., рабочий, Удмуртская АССР, с. Киясово, умер 12.8.43 г., КУ КП 60539 л. 78 172. � 5499 ИИ блок Новиков Маркел Кирилович, 1907 г., удмурт, Удмуртская АССР, д. Чистостоп, умер 25.11.42 г., КУ КП 60538 л. 103, об. 104 173. � 17520 ИИИ блок Наговицын Федор, русский, 1905 г., крестьянин, Удмуртская АССР, с. Глазовское, умер 27.5.43 г., КУ КП 60539 л. 11. 174. � 16951 ИИ блок Николаев Мануил, удмурт, 1899 г., крестьянин, Удмуртская АССР, с. Писеево, умер 14.5.43 г., КУ КП 60538 л. 344 175. � 14697 ИИ блок Николаев Петр Степанович, удмурт, 1924 г., моторист, Удмуртская АССР, д. Муви, умер 19.3.43г., КУ КП 60538 л. 305 176. � 14737 И блок Охотников Владимир Тихонович, удмурт, 1923 г., колхозник, Удмуртская АССР, с. Н.-Пижмык, умер 20.3.43 г., КУ КП 60538 л. 306 177. � 8416 ИИ блок Поздеев Степан, удмурт, 1898 г., крестьянин, Удмуртская АССР, Орский р-н (Ярский?), умер 14.12.42г., КУ КП 60538 л. 170, об. 171 178. � 10670 ИЪ блок Плешаков Петр Васильевич, русский, 1908 г., Удмуртская АССР, д. Комберская, умер 29.12.42 г., КУ КП 60538 с. 227 179. � 10381 ИИИ блок Поздеев Язоф, удмурт, 1911 г., Удмуртская АССР, с. Верепари, умер 28.12.42 г., КУ КП 60538 с. 223 180. � 18298 ИИ блок Пермяков Иван Тимофеевич, русский, 1907 г., крестьянин, Удмуртская АССР, д. Зенчиур, умер 19.6.43 г., КУ КП 60539 л. 38 181. � 19927 ИИблок Пшенишников Сергей Михайлович, русский, 1924 г., крестьянин, Удмуртская АССР, Баварский р-н, д. Кахлюшчи, умер 14.9.43 г., КУ КП 60539 л. 94 182. � 13908 ИВ блок Пряткин Иосиф Маркович, русский, 1900 г., токарь, Удмуртская АССР, с. Воткинское, умер 2.3.43 г., КУ КП 60538 л. 291 183. � 16848 ИИблок Подчизерцов Николай, русский, 1921 г., электромонтер, Удмуртская АССР, с. Сада, умер 12.5.43 г., КУ КП 60538 л. 343 184. � 16177 ИИ блок Попов Алексей Степанович, русский, 1922 г., крестьянин, Удмуртская АССР, д. Холодный Ключ, умер 26.4.43 г., КУ КП 60538 л. 331 185. � 14870 ИВ блок Петухов Евгений Александрович, русский, 1918 г., учитель, Удмуртская АССР, с. Русская коса, умер 23.3.43 г., КУ КП 60538 л. 309 186. � 14863 ИИ блок Рябов Аркадий Филиппович, русский, 1922г., счетовод, Удмуртская АССР, д. Женкамур, умер 23.3.43 г., КУ КП 60538 л. 308 187. � 9361 ИИ блок Семенов Алексей Кузьмич, русский, 1903 г., Удмуртская АССР, д. Короли 188. � 17314 ИИИ блок Суслов Михаил, удмурт, 1922 г., крестьянин, Удмуртская АССР, д. Ст. Бер., умер 22.5.43 г., КУ КП 60539 л. 7 189. � 18478 ИВ блок Сутягин Владимир Яковлевич, русский, 1923 г., кровельщик, Удмуртская АССР, Военстрой, умер 25.6.43 г., истощение, КУ КП 60539 л. 44 190. � 142220 ИИ блок Сапожников Семен Федорович, русский, 1906 г., крестьянин, Удмуртская АССР, п. Игринский, умер 10.3.43 г., КУ КП 60538 л. 298 191. � 16431 ИИИ блок Семакин Антон, удмурт, 1899г., экспедитор, Удмуртская АССР, с. Салиты, умер 2.5.43 г., КУ КП 60538 л. 335 192. � 16833 ИИ блок Старков Иван, русский, 1896 г., бухгалтер, Удмуртская АССР, с. Як.-Бодва , умер 11.5.43 г., КУ КП 60538 л. 342 193. � 15469 Иблок Соропятов Александр Алексеевич, русский, 1910 г., крестьянин, Удмуртская АССР, с. Ермолаево, умер 8.4.43 г., КУ КП 60538 л. 319 194. � 15786 ИИИ блок Степанов Тихон, удмурт, 1899 г., крестьянин, Удмуртская АССР, Лесучасток, умер 16.4.43 г., КУ КП 60538 л. 325 195. � 19511 ИИ блок Транин Василий Филиппович, удмурт, 1904 г., крестьянин, Удмуртская АССР, д. Селегурт, умер 15.8.43 г., КУ КП 60539 л. 80 196. � 13076 ИИИ блок Тюлькин Дмитрий, русский, 1913 г., крестьянин, Удмуртская АССР, с. Чекан, умер 16.2.43 г., КУ КП 60538 л. 279 197. � 7020 ИИ блок Уткин Павел, 1915г., русский, Удмуртская АССР, умер 4.12.42 г., КУ КП 50538 л. 129, об. 130 198. � 18745 ВИ блок Умрилов Николай, русский, 1920 г., студент, Удмуртская АССР, д. Вишир, умер 6.7.43 г., КУ КП 60539 л. 52 199. � 13451 И блок Чирков Филарет, удмурт, 1912 г., рабочий, Удмуртская АССР, с. Божкир, умер 21.2.43 г., КУ КП 60538 л. 282 200. � 8562 ИВ блок Шустов Павел, русский, 1917 г., слесарь, Удмуртская АССР, д. Чежик, умер 15.12.42 г., КУ КП 60538 л. 174 об. 175 201. � 14748 ИИ блок Шемерданев Гайсе, татарин, 1924 г., крестьянин, Удмуртская АССР, умер 20.3.43 г., КУ КП 60538 л. 306 202. � 15689 ИИ блок Шулятаев Иван Павлович, русский, 1923 г., учащийся, Удмуртская АССР, д. Корма, умер 14.4.43 г., КУ КП 60538 л. 323 203. � 8388 ИИ блок Якомов Василий, удмурт, 1903 г., крестьянин, Удмуртская АССР, Лавский р-н, умер 14.12.42 г., КУ КП 60538, л. 169, об. 170. ЖУРНАЛИСТЪЁСЫН ПУМИСЬКОНЪЁС Александр ВОЛКОВ: "Россилэсь Конституцизэ тӥясь муртлы властез осконо ӧвӧл". Алигес Москваын Федерацияя Кенеш люкаськылӥз. Солэн ужаз пыриськиз асьме Кун Кенешлэн Тӧроез А.А.Волков но. Федерацияя Кенеш умоен лыдъяз Россия Федерацилэн Президентэзлэсь Генеральной прокурорлы ӵектэм муртсэ. Со - Владимир Устинов. Но журналистъёсын вераськыкуз, А.Волков бадӟым саклык висъяз В.Путинлэн федерациен кивалтонэз выль сямен радъянъя малпанъёсызлы. Та ужпум сярысь Россилэн Президентэз куинь час пала вераськем кунэз радъянъя ужась группае пырись адямиосын, кудӥныз кивалтэ Е.Строев. - Мон но со группае пырисько, - шуиз А.Волков. - Матысь дыре Владимир Путин малпа Кун Дума азе кӧня ке законъёслэн инъетъёсынызы потыны. Огез закон герӟаськемын луоз Федерацияя Советэз чылкак мукет сямен кылдытонэн. Отчы чакламын котькуд улосысь быдэн кык адями пыртыны, огез адями луыны кулэ властез быдэсъясь ёзысь, мукетыз - калыкен быръем ёзысь. Соос ужалозы, азьвыл ужзылэсь мозмытскыса. А.Волков верамъя, та закон кутэмын луиз ке, Федерацияя Кенешлэн ужамез пайдаёгес луоз. Путинлэн мукетыз законэз но дась ни, шуиз А.Волков. Отын вераськон мынэ Президентлы улосъёсысь кивалтӥсьёсты палэнтыны право сётон сярысь. Кыӵе учыръёсы бен Президент быгатоз та правозэ уже кутыны? Кун Кенешлэн Тӧроез тазьы валэктӥз: - Россилэсь Конституцизэ тӥяса ужам понна. Нош мон Путинлы тазьы ӵектӥ на: одно ик лыдэ басьтоно котькуд улослэсь азинскемзэ. Котькуд кивалтӥсь кыл кутыны кулэ ас улосаз экономикаез ӝутон, калыклэсь улонзэ умоятон понна. Зэмзэ но, шонер кадь ӵектон сётэм асьме кивалтӥсьмы. Но Путинлэн та законэз али ик уже кутӥськысал ни ке, кӧня меда улос кивалтӥсьёсты со ас ужысьтызы палэнтысал, угось тыро улӥсь регионъёс али сокем ик трос ӧвӧл. Тани асьме шаермы но азинскемезъя 89 улос пӧлын улӥысен куинетӥ интыын сылэ. - Тупатскыны дыр вань на ай, - шуиз А.Волков. - Я бен, асьмеос мукет улосъёсты азьпалтӥськом, дыр, Конституцимес выльдон бордын ужаменымы. Вить ар талэсь азьло ик мон тодӥсько ни вал, властез юнматытэк, нокыӵе уж уз мыны шуыса. Нош уз ӝегатэ меда Путинлэн законъёсыз Удмуртилы президент быръёнэз? Кун Кенешлэн Тӧроез оскытӥз: - Путин верамъя, улосъёсын вылӥ кивалтӥсьёсты быръён азьло сямен ик кылёз, улосъёслэн законъёссыя мыноз. Администрациослэсь тӧрооссэс быръён но возиськоз. Кызьы тодмо ини, Россилэн Президентэз ӵектӥз вань улосъёсты 7 округлы люкыны. Удмуртия пыртэмын Приволжской округе. Тодмо-а ни, кин кивалтоз со округен? Тани С.Кириенколэсь нимзэ поттыло ини. - Мон солы сыӵе удыс ӧй ӵектысал, - вераз малпанзэ А.Волков. - Нош округъёс сярысь ке верано, со сярысь нокыӵе документъёсын милемыз ӧз на тодматэ. Соос малпамын Россиын властез юнматыны, экономикамес ӟечгес ужатыны... Но со медаз луы вылэм выльысь совнархозъёслы берытскон. Кун Кенешлэн Тӧроез А.Волков выль Президентлэн законъёсызлы дурбасьтэмзэ но соосын быдэсак соглаш луэмзэ вераз. Т.БАННИКОВА. Каникулъёс дыръя нылпиослэсь но быдэ вуымтэослэсь шутэтсконзэс, тазалыксэс юнматонэз но соосты ужаны интыянэз радъян сярысь Удмурт Республикаысь Правительстволэн ПОСТАНОВЛЕНИЕЗ Удмурт Республикаын нылпиослэсь но быдэ вуымтэослэсь шутэтсконзэс, тазалыксэс юнматонэз но ужанзэс ас дыраз но ӟеч радъян вылысь, Удмурт Республикаысь Правительство пуктэ: 1. Каникулъёс дыръя нылпиослэсь но быдэ вуымтэослэсь шутэтсконзэс, тазалыксэс юнматонэз но соосты уже интыянэз радъян ужпумъёсъя Удмурт Элькун Кивалтэтлэсь Межведомственной комиссизэ кылдытоно. 2. Юнматоно та Комиссия сярысь положениез, отчы ӵектэм муртъёсты но "Удмурт Республикаын нылпиослэсь но быдэ вуымтэослэсь шутэтсконзэс, тазалыксэс юнматонэз но соосты уже интыянэз радъян сярысь" Положениез. 3. Тазалыкез кыдатон вакытэз (кампаниез) дасянъя, чакласа-эскерыса возёнъя, сое ортчытэм сярысь йылпумъянъёс лэсьтонъя ужрадъёсты но вань мукет ужпумъёсты Комиссиез быдэсъяны косоно, Россия Федерацилэсь туэ арлы тазалыкез юнматонъя кампаниез радъян сярысь норма луись документъёссэ, та дырлы элькунлэн бюджетэз сярысь Удмурт Республикалэсь законзэ но юнматэм положениосты чакласа. 4. Удмурт Республикаысь Калыкез дышетонъя министерстволы, Калыкез улон-вылонын утёнъя министерстволы, Тазалыкез утёнъя министерстволы, Культурая министерстволы, Инкуазь узырлыкъёсъя но котырысь инкуазез утёнъя министерстволы, Югдурез утёнъя министерстволы, Коньдон ужпумъёсъя министерстволы, Вузкаронъя но бытовой юрттэт сётонъя министерстволы, Егитъёсын ужанъя кун комитетлы, Физической культурая но спортъя кун комитетлы, Калыкез уже интыянъя федеральной кун службалэн Удмурт Республикаысь департаментэзлы, Госсанэпидемнадзоръя элькунысь центрлы, Россия Федерациысь социальной страхованиея фондлэн Удмурт Республикаын ёзэзлы, Эмъяськон понна одно тырон страхованиея удмурт улосвылысь фондлы Удмурт Элькунын нылпиослэсь но быдэ вуымтэослэсь шутэтсконзэс, тазалыксэс юнматонэз но соосты ужаны интыянэз радъян сярысь положениез но Комиссилэсь решениоссэ быдэсъямез радъяно. 5. Удмурт Республикаысь городъёслэн но ёросъёслэн администрациоссылы, предприятиослэн кивалтӥсьёссылы, кинлэн ваньбурез луэм шоры учкытэк, пиналъёслэсь тазалыксэс юнматонъя ужез радъяно, нылпиослэсь но быдэ вуымтэослэсь шутэтсконзэс, ужанзэс, тазалыксэс юнматонэз радъян сярысь положениез но Комиссилэсь решениоссэ чакласа. 6. Та постановленилэсь быдэсъяськемзэ эскероз Удмурт Республикаысь Правительстволэн Тӧроезлэн воштӥсез В.Е.Шудегов. Удмурт Республикаысь Правительстволэн Тӧроез Н.ГАНЗА. "Ваньмыз - сад-бакчалы" Озьы нимаськиз Ижевскысь "Газовик-Газпром" (азьвыл "Зенит") стадионын ортчем ярмарка. Кулэ-а вал таӵе ярмарка? Туж кулэ. Тани быдэс республикамес басьтоно ке, али кылдытэмын ни сад-бакчаосын 514 огазеяськон. Отын ичизэ 200 сюрс участок лыдъяське. Со музъем люкетъёсты бугыръянэ отын емышъёс но бакча сиёнъёс будэтонэ пырисько 600 сюрслэсь уногес адямиос, мукет сямен вераса, Удмуртиысь котькудӥз кыкетӥез улӥсь. 1998-тӥ арын тулыс Россиын юнматэмын вал сад-бакчаос но дачаос возись гражданъёслэн огазеяськонъёссы сярысь закон. Со сяна котькуд сад-бакча огазеяськонлэн вань аслаз уставез. Нимысьтыз быръем правлениеик радъя вань ужъёсты. Нош кык ар талэсь азьло котькытын сямен ик республикаямы но кылдытэмын сад-бакча возисьёслэн союззы. Таяз ярмаркаын вузкаронэ пыриськизы кызьлэсь уно организациос, пичи ужбергатӥсьёс но нимаз адямиос. Соос пӧлын вал Воткинскысь "Чайковский", "Можгинский", Ижысь "Декоративно-цветочные культуры" совхозъёс. Таос одӥг машинаен гинэ лыктӥллямтэ, туж кулэ вуз ваиллям - пӧртэм улмопуос но сутэрпуос. Трос вал ужрадын кидысэн вузкарисьёс, кылсярысь, асьме дорын нырысьсэ вузазы "Престиж" нимо кияр кидыс. Солэн емышез банан сямен люкрак, пе, будэ, озьы со данаклы тросгес урожай сётэ. "Радиан" акционер огазеяськон (интыяськемын "Прогресс" ИНИТИ-лэн юртаз) вузаз пластмассалэсь, капронлэсь лейкаос, "Глазовская" птицефабрика вуттэм гордалэс курегъёссэ. Ярмаркаысь озьы ик басьтыны луэ вал сад-бакчаын ужаны пӧртэм инструментъёс, буёлъёс, будос висёнъёслы но нымы- кибыослы пумит кутӥськись химикатъёс, удобрениос но мукетсэ. Калык тау каре таӵе ярмарка ортчытъямлы. П.СКОБЕЛЕВ. Туспуктэмез В.Беломорскихлэн. Калык дунъялоз Эгра (Игра) ёросысь Сундур гуртысь удмурт культурая центрын апрельлэн пумаз арлы быдэ ортче калык азьын устолыктэ возьматон. Таяз учыре та ужрадэ пыриськиз дас куать клуб. Фойеын учкись понна дасям выставкаосысь адӟыны луиз керттэм, чильпам, лусъем, вӧлэм киужъёсты. Нош концерт таяз аре куинь ёзлы люкемын вал. Нырысетӥез "Чингыли" нылпи ансамблен дасям "Быдӟым Вормонлы - 55 ар" нимо литературно-музыкальной композициен усьтӥськиз. Озьы ик та люкетэ аслэсьтыз номеръёссэ пыртӥз Сундурысь начальной школа. Сцена вылын быдӟым ожлы сӥзем кылбуръёс но кырӟанъёс чузъяськизы. Концертлэн кыкетӥ люкетаз ар ӵоже дасям номеръёссэс возьматӥзы мунёосын шудонъя но драмая кружокъёсы ветлӥсь дышетскисьёс. Выль репертуареныз тодматӥз "Чингыли" ансамбль. Куинетӥ люкетсэ эстрадалы сӥзизы. Татын ас быгатонлыкъёссэс гуртысь уӵыос (азьланяз, оло, бадӟым сцена вылэ вуозы ай) Агнесса Корепанова но Аня Вахрушева возьматӥзы. Пусйыны кулэ: Агнесса кыкетӥ арзэ ини кырӟа Сундурысь сцена вылын. Со сяна, та дыр куспын со мылысь-кыдысь пыриськылӥз ёросамы ортчылӥсь пӧртэм ужрадъёсы но аслэсьтыз учкисьсэ шедьтылӥз. Агнесса удмурт но ӟуч эстрадаысь тодмо артистъёслэсь кырӟанъёссэс быдэсъя. Нимысьтыз пусйыны кулэ таизлэсь концертлэсь аспӧртэмлыксэ но. Со сярысь вера центрлэн чеберлыкъя кивалтӥсез Е.Н.Феоктистова: - 2000-тӥ ар - культуралэн но искусстволэн арзы. Таин валче ёросамы "Культура удысысь устоез ужась" нимо ӵошатскон ялэмын. Тани али, февральысен кутскыса, нырысетӥ вакытэз мынэ. Со июнёзь кыстӥськоз. Мон но та ӵошатсконэ пыриськисько. Та концерт мынам дасям уже луэ. Аслым ик кулэ вал программа дасяны, аслым ик сое нуыны но. Капчиен ӧз сётӥськы - валамон ни. Одӥг пичи вис но медам луы программаяд. нылпиос но медам ӵашетэ-бызьылэ. Одӥг интыяз но учкись мӧзмыса медам пукы. Нош тужгес бадӟым дунъет - калыклэн дунъетэз. Аслам чакламея, концерт урод ӧз пӧрмы кадь. Е.Н.Феоктистовалэсь ужрадзэ дунъязы Эгра (Игра) ёрос кивалтэтысь культура ёзлэн тӧроез А.Г.Чирков, ёросысь чаклась, визь-кенеш сётъясь центрлэн директорез Л.Л.Чиркова. Малпасько: дунъетъёссы вылӥ. Нош Е.Н.Феоктистовалы азьланяз но таӵе ик тунсыко, вылӥ ӟечлыко ужрадъёс но ӝытъёс ортчытъяны мылкыд карем потэ. Андрей КЛЕМЕНТЬЕВ, Удмурт кун университетын дышетскись. 1Ирина Самигулова - юнмась куараё кылбурчиос пӧлысь одӥгез. Пичиысен ик гожъяны кутскыса, та удысэз со сюлмысьтыз яратӥз. Чуръёссэ котьку сямен сӥзе улонысьтымы тужгес кужекъятӥсь учыръёслы. Ирина улэ Башкириысь Татышлы ёросысь Калмияр гуртын. Ужа библиотекаын. Нош ваньмон дыръяз гожъя. Кылбуръёсыз вордӥсько уин. Соослы ӝужаны юртто шыпытлык, малпаськись мылкыд. "ВАШКАЛА ДЫРЫСЕН КАЛЫКЕ ВАМЫШЪЯ, ЖИНГЫРЕС КУАРАЁ АРГАНЗЭ КУТЫСА..." Ирина САМИГУЛОВА *** Сӥзьыл уй, кезьыт тӧл, Нош ик зор кыдыра. Тон туннэ но уд кӧл, Кинэ ке возьмаса. Сӥзьыл уй, кезьыт тӧл, Нош ик зор кыдыра. Зор ултӥ кин ке но Вамыштэ дыртыса. *** СадысьТЫМ куасьмизы ни берпум сяськаос - Соослэсь мон уг лэсьты керттэт. Кытӥ ке, бус пӧлтӥ, лобизы туриос - Киосме но кыли шонатэк. Валаса но ӧй ву - усизы ӵуж куаръёс, Лёгазы соосты жалятэк, Туж мӧзмыт, туж секыт луизы малпанъёс, Бер сӥзьыл зоръёсты чидатэк... Чик уг вала лулы кудпала ӝутскыны - Музъемен ин куспын весь поръя. Я дыртэ со тури уллёен лобыны, Я усе пыд улэ бергаса. Садысьтым куасьмизы ни берпум сяськаос... *** Кур-кур-кур! ни лобо туриос, Асьмелы берпумзэ кесясько, Нырулӥсь музъемлы нош соос "Ӟеч лу! Ӟеч кӧл!" выльысь шуыло... Кур-кур-кур! ни лобо туриос, Кужмоесь бурдъёссы сэзъясько, Соослы киоссэс шонаса, Калыкъёс гужемен люкисько... Кур-кур-кур! бертозы туриос, Вордӥськем палзылэсь мӧзмыса. Шаермы крезьгурен жингыртоз, Соослэсь куаразэс кылыса. *** Котькыӵе вакытэ, котькыӵе дыръёсы - Вазь ӵукна-а, вазен, я пеймыт уйёсы, Я сюан-а луиз, я гербер-а вуиз - Аслэсьтыз арганзэ удмуртэ кутылӥз. Юрттылӥз арганэз, вералляз арганэз, Одӥгназ кыльыку шунтылӥз арганэз. Бурдъялляз арганэз, кырӟалляз арганэз, Туж секыт луыку ӝутылӥз арганэз. Туж ӝожмыт крезьгурен куддыръя шудылӥз, Синкыли шапыкез бам кузяз васькылӥз, Келялляз эшъёссэ со берпум сюресэ, Люкылӥз соосын уродзэ но ӟечсэ. Яратон туганэз нош вӧзаз пукыку, Вордӥськем палъёссэ син азяз пуктыку, Шудолэсь но шудо со соку луылӥз, Жингырес крезьгурез котыре вӧлмылӥз... Уж дурысь бертыса но арган шудылӥз, Аслэсьтыз жадемзэ крезьгурен быдтылӥз, Вашкала дырысен калыке вамышъя, Жингырес куараё арганзэ кутыса... *** Вождэ эн вай, эн малпа уродэн, Эн шу: кошкиз, берзэ но учкытэк. Тон тоды: котьку, котькыӵе дыре Вамышъясько, тонэ вунэтытэк. Мед шуозы: "Эшъёс огпол кушто, Огпол кысэ яркыт ӝуась тылзы..." Эше, тон оскы: мон нош ик вуо, Пӧрмо тынад чебер кырӟанэдлы. *** Кылзӥськиз, пальпотӥз, Котькинэ оскытӥз. Весь мышке учкылӥз, Мар ке но сипыртӥз... Синъёссэ ватылӥз, Уйвӧтаз курадӟиз, Весь мар ке но малпаз Ӵуказе нош... "вузаз"... *** Уин гинэ мон шокасько капчи, Уин гинэ сюлэм мынам буша, Уин гинэ мон луисько ачим, Та дуннеен ваче син кыльыса. Уин гинэ чылкыт луэ омыр, Уин гинэ зарни вӧтъёс васько, Уин гинэ шыпыт луэ котыр - Солэн тулкымъёсаз мон лэйкасько. Уин гинэ малпанъёсы пачыл, Соин ик, дыр, уг кыс, ӝуа сюсьтыл... *** Пыдэстэм инбам кӧкыез ветта, Вань малпанъёсме со бине, туга. Пыдэстэм инбам - со тынад синмыд, Мон нош - синкыли, туж чылкыт шапык. *** Лулы кека куинь сэрегам - Ялан педло со куриське, Луоз меда куке валан - Кытчы озьы со весь дыртэ? Дыртэ-а со ӝутӥськыны Уй инбаме малпаськытэк? Яке выре со кошкыны Та улонысь, чик жалятэк? Чик дугдытэк, со весь поръя, Яке ӝутске, яке усе. Весь со ветлэ тӧлъя-буръя, Нош буйгатскоз меда куке?.. Вордскиз выль завод "Купол" берытске тазалыкез утён пала Та нуналъёсы шаерамы пусйымон ужрад ортчиз. Ижевскын вордскиз выль завод. Удмуртиын гинэ ӧвӧл, быдэс Россиын со нырысез таӵе предприятие луэ. Завод поттоз тазалыкез юнматыны усто эмъюм - инфузионной растворъёс. Элькунамы "Ижевский электромеханический завод "Купол" Федеральной унитарной кун предприятие тодмо ож тӥрлык - "ОСА", "ТОР" зенитной комплексъёс - поттэменыз. Со кошке мукет кунъёсы но. Берло дыре "Купол" басьтӥське калыклэсь тазалыксэ утён удыслы продукция поттон борды. Предприятие 1 ар но 2 толэзь куспын синмаськымон завод пуктӥз. "Рестер" завод висъяське вуз поттон амалэныз, выль но ӟеч технологиеныз. Тӥни озьы 16-тӥ мае сӥё-дано усьтӥськиз инфузионной растворъёс поттон. Со лэсьтэмын "ИЭМЗ "Купол" предприятилэн "Метеор" заводэзлэн инъетэз вылын. Выль заводэз уже лэзёнъя документъёс гожтэмын туэ 27-тӥ апреле. "Рестер" завод ним сётэмын поттоно продукциезъя. Латынь кылысь берыктыса, со юн чылкыт эмъюмъёс шуэм луэ. Нырысетӥез партия толэзь ортчыса дась луоз но Удмуртие гинэ кошкозы.Со тырмоз ваньмызлы кулэяськисьёслы, нош июне завод лицензия басьтоз но эмъюмзэ вузаны ӧдъялоз. Завод кык сменаен ужаса, арлы быдэ 5 миллион (0,5 литрен) эмъюм пакетъёс поттоз. Республикамылы (адямилы быдэ 2 пакет лыдъяса) 3,2 миллион пакет кулэ луоз. Кылемзэ завод палэнэ вузалоз. Нош куронъёс будӥзы ке, "Рестер" араз 7,5 миллион пакет лэсьтыны быгатоз. Сыӵе луонлыкез вань. Озьы завод арлы быдэ 200- 250 миллион манет тыр продукция поттоз но 3-4 ар ӵоже быдтэм коньдонзэ берыктоз. Зэм, тазалыкез утён удыслы таӵе эмъюм туж кулэ. Вылаз ик, со поттӥськоз кабзэ выль амалэн но мыноз адямилы трос вирзэ ыштыку но вирез уродмыку. Плёнкаын хлорез чик ӧвӧл. (Со лэсьтӥське Германиын.) Кызьы бен та уж кутскиз? 1997-тӥ арын "Куполлэн" "Метеор" заводэз инфузионной растворъёс поттонъя производство лэсьтыны кутскизы. Таӵе эмъюм тазалыкез утёнын азьло но кутӥське вал. Но сое поттон кулэезъя радъямтэ вал, вуж амалъёсъя мынӥз. Нош таиз технология быдэс Европалы тупа. "ИЭМЗ "Куполлы" юрттыны басьтӥськизы Москваысь "Машино-экспорт" огазеяськон но Швециысь эмъюмъёс поттонъя одӥгез кужмо "Луки" фирма. Огъя вераса, "Рестер"-лэн продукциез асьме шаермылы сяна, озьы ик тырмоз Чуваш, Башкортостан, Татарстан республикаослы но музонэзлы. Тӥни соин ик "ИЭМЗ "Купол" кун предприятилэн валтӥсь директорез Юрий Шестаков шуиз: - Ми та уж борды юнме шорысь ӧм басьтӥське. Нырысь ик чаклам азьланьзэ, ӵуказе нуналэз. Нош калыклы эмъюмъёс поттонэз ож тӥрлыкен уд ӵошаты. Со туж кулэ удыс, уката ик фармацилы. Вылаз ик, инфузионной растворъёс кутӥськозы али но, ожмаськон вакытэ но. Сое лыдэ басьтыны кулэ, нош упаковкаез котькыӵе условиосын (ож бусыын но) кутыны луэ. Соин ик таӵе куронъёсты азьланьын но быдэсъялом, уката ик кудъёсыз герӟаськемын кун оборона куронэн. Но туннэ ваньзэ вераны уг луы на. Юрттӥсе кыле "Луки" ("ЛУКИ") фирма ик. Со оскымон фирма: соин ик ӟечысь ӟечсэ уг утчало. Выль заводэз лэзёнэ-усьтонэ ветлӥз "Луки" фирмалэн президентэз Майкл Ларссон. Со данъяськыса сямен пусйиз: "Удмуртиез токма шорысь ӧм быръе. Милемлы кельшизы тӥляд кивалтӥсьёсты но калыкты. Заводэз вакчи дыр куспын (1,2 ар) пуктэмды возьматэ ужаны быгатэмдэс, калыклы ӟеч эмъюм поттыны тыршемдэс. "Рестер" азьланезлы бадӟым оскон сётэ. Татын поттыны кутскозы уката ӟечесь эмъюмъёс (аминокислотаосын). Та завод котыре пуксёзы эшшо выль предприятиос. Ваньмыз соос ужалозы фармация удыслы, калыклы кулэ эмъюмъёс поттозы. Нош Россилы али 5 миллиард тыр эмъюмъёс кулэ. Со пӧлысь 10 процентсэ гинэ ачиз поттэ. Туж ичи. Соин ик "Куполлэн" луонлыкъёсыз бадӟымесь, азьланьын вамышъёссэ уката кузёмытоз. *** "Ижевский электромеханический завод" "Купол" ФГУП нош ик висъяськиз. Та нуналъёсы выль продукцизэ - кардиомониторез ужатыса эскеремын Ижысь кун кардиоцентрын. Таиз но аппарат дуннеысь куронъёслы тупа. Предприятие калыклэсь тазалыксэ юнматон борды зол-зол басьтӥськиз. Валамон, таӵе приборъёсын котькуд висисез ӝоггес но ӟечгес эмъяны луоз. Нош таӵе мониторъёс лэсьтон возьматэ коллективлэсь бадӟымесь луонлыкъёссэ, будэмзэ но быгатэмзэ, выль ужез радъяны тыршемзэ, со сярысь Кардиоцентрын пусйиз "Куполлэн" валтӥсь директорез Юрий Шестаков. Геннадий Романов. "Рестер" выль заводлэн тусыз. Таӵе солэн оборудованиез. Кузьмалэ книгаостэс! Россиысь библиотекаос калыкез югдытонын, наукаез но культураез азинтонын номыртэм бадӟым инты басьто. Соин ик Россия Федерацилэн Президентэзлэн указэзъя кӧня ке ар талэсь азьвыл пусйыны кутскемын Россиысь библиотекаослэсь нуналзэс. Сыӵе нуналэн ялэмын 27-тӥ май. Таин валче библиотекаослы шӧдскымон юрттэт вуыны кутскиз кун но интыысь аскивалтэт ласянь. Озьы ик лыдӟисьёс но выльысь берытскизы лыдӟиськонни пала. Тани, кылсярысь, Дэбес ёросысь Пыктыдур библиотекае лыдӟисьёслэсь вуиз ни 2000 экземпляр книга. Озьы ке но, республикаямы улӥсьёслы пӧртэм тодонлыкен юрттон вылысь, библиотекаослэн кужымзы уг тырмы на, соослэсь фондъёссэс узырмытыны кулэ. Удмурт Республикаысь Культурая министерство вазиське Россия Федерациысь Кун Думалэн, республикаысьтымы Кун Кенешлэн депутатъёссылы, кун но интыысь аскивалтэтлэн ёзъёсаз, культура но искусство удысын ужасьёслы, тодосчиослы, ужбергатӥсьёслы, ветеранъёслы но озьы ик шаерысьтымы вань улӥсьёслы: асьтэлэн ӝажыосысьтыды книгаостэс кузьмалэ (сётэлэ) городъёсысь но гуртъёсысь библиотекаослы. Со понна лыдӟисьёс но библиотекарьёс тӥледлы тау карозы. Таӵе ӟеч, пайдаё уж (благотворительной акция) кыстӥськоз, туэ ар йылпумъяськытозь. Умойгес луоз, нырысь ик Центральной библиотекаосы вазиськыса. Нош пыр-почгес тодэмды потэ ке, вазиськелэ Национальной библиотекае 78-07-34 телефонъя яке Ижысь Н. А. Некрасов нимо шор библиотекае 78-73-77 телефонъя. Удмурт Республикаысь Культурая министерство. Кымалскиз "Казанка" 19-тӥ мае 22 часын Кам но Белая шуръёс огазеяськон интыын моторен ужась "Казанка" лодка кымалскиз. Лодка чакламын ке 4 адямилы, отын вылӥллям 6 кузя. Одӥгез адями ачиз уяса потӥз, мукетъёсыз сярысь ивор ӧвӧл. Куинез чорыгасьёс Башкортостанысь, куинез - Удмуртиысь. Лодка техосмотрез ортчымтэ вылэм ни 3 ар. Руль сьӧрын пукем правотэк адями. Н.ПЕТРОВ. Россия Федерацилэн кун наградаосыныз пусъён сярысь Россия Федерацилэн Президентэзлэн УКАЗЭЗ Нылпиосты дышетон удысын трос аръёс ӵоже сюлмысь тыршемзы понна "Росссия Федерациысь дано дышетӥсь" сӥлы карон ним сётоно: Арафаилов Петр Павловичлы - Удмурт Республикаысь Игра ёросысь калыкез дышетонъя ёзлэн кивалтӥсезлы, Хохлова Наталья Михайловналы - Удмурт Республикаысь Воткинск городысь лицейлэн директорезлы, Чопорова Екатерина Ивановналы - Удмурт Республикаысь Камбарка городысь 3 номеро шоро ёзо школаысь дышетӥсьлы. Россия Федерацилэн Президентэзлэсь ужзэ быдэсъясь В.ПУТИН. Москва, Кремль, 2000-тӥ арын 6-тӥ мае. � 839. "Луо часъёс" вырӟизы "Удмуртия" кун телерадиокомпания дасяз аспӧртэмлыко проект. Нимаське со - "Луо часьёс. ЪЪ даур". Солэн авторъёсыз азязы ужпум пукто ошмесо шаерамы пӧртэм вакытъёсысь адямиослэсь улэм-вылэмзэс, соослэсь быдэс историен герӟетъёссэс возьматонэз. Со уз луы огшоры документальной кадръёсты но тодмо адямиослэсь тодэ-ваёнъёссэс гинэ возьматон. Со мадёз ортчемзэ но туннэ нуналэз кызьы шӧдэммы, валаммы, дунъяммы сярысь. Уго история котькуд адямилэн улоназ ас сяменыз пытьызэ кельтэ. Озьы ик трос вераськом азьпал улонмы, малпанъёсмы пумысен, син азямы пуктом выль дауръёсты. Со сяна, котькуд бадӟым городысь, посёлокысь сямен ик, пичи гуртъёсысь но шедьтыны луоно кыӵе ке туж кулэ, весяклы пытьы кельтэм учырез яке паймымон ужрадэз. Соос кылизы асьме пушкын - сюлэмъёсамы, малпанъёсамы, тодэ ваёнъёсамы. "Луо часъёс" проект быдэяськыны кутскиз ини. Кемалась ик ӧвӧл "Удмуртия" кун телерадиокомпания возьматӥз Лев Вахитовлэсь "Художник Орлов. Странник. ЪЪ даур" туж быгатыса пуктэм фильмзэ. Кин сое адӟиз ини, валаз, луоз, мар сярысь отын вераське. Но та нырысь вамыш гинэ ай "Ало часъёс" пыр "тодмотэм Удмуртиез" вӧлак усьтыны тыршон ужын. Учкисьёс али адӟыны быгатозы ай нимаз- нимаз пичиесь люкетъёсты гинэ, нош туэ сизьы__лысен та проектлы кун телерадиокомпания арняяз час пала висъяны кутскоз. Ма веранэз, "Луо часъёс" передачаез дасясьёслы ас кожазы ужаны секыт луоз. Соин ик соос возьмало юрттэт. Но историкъёслэсь но краеведъёслэсь гинэ уг. Соос вазиськемзэс возьмало ваньмызлэсь, кинлэн вань тунсыко веранэз ачиз сярысь, бускелез, тодмоез пумысен. Котькинлэн улоназ одно ик вал, дыр, туж аспӧртэм учырез. Тодэ гинэ вайыны кулэ сое. Адямиос ог-огзы сярысь тросгес, мургес, паськытгес мед тодозы, ас синмынызы мед адӟозы котырысьтызы, вӧзысьтызы чеберзэ, дунозэ, вунонтэмзэ. Адӟом ини, кызьы та уж пӧрмоз. Котьма ке но, оскем потэ, малпамын быдэсмоз шуыса, уго кутским ӟеч уж борды. Зэм но, ма но со ӟечсэ лэсьтӥмы ини. "Удмуртия" ГТРК-ын ужасьёс "Луо часъёс. ЪЪ даур" проект улсын асьмелэсь улонмес, телеэкран пыр сяна, чебергес, чылкытгес карыны тыршо зэмос улонын но. Телецентрлы матын ик вань "Важнин ключ" ошмес. Вуэз отын паймымон чылкыт, нош солэн котыраз жуг-жаг тырмемын. Соин ик малпамын вал "Ошмесъёс" акция ортчытыны. Со кутскиз ини кылем понедельнике. Телевидениын ужасьёс сяна, та уже пыриськизы "Шунды", "Удмуртия", "Зеленка" но "Родники" огазеяськонъёс. Ужъёс азинскозы таяз арня куспын но. Отчы вань мылкыд карисьёс пыриськыны быгатозы. Но та проектлэн валтӥсь ужпумез - телевиденилэсь луонлыкъёссэ Удмуртиын вань улӥсьёс понна кутыны, юрттыны соослы огазеяськынытодон-валанъёссэс вӧлмытыны, ог-огзэс малпанъёсынызы, мылкыдъёсынызы тодматыны, асьсэды палэнысен учкыны, улонэз мукет муртлэн синмыныз адӟыны, валаны. Мар бен, луэ милемын ӵош, синйылтытэк эн кельтэ "Луо часъёс" передачаез. П. Возницын. Черк кужмоя, улон секыт луыку Туж паймымон вакытэ асьмеос улӥськом. Одӥг даур ӵоже кыӵе гинэ воштӥськонъёс ӧй ни вал улонамы: СССР-ез кылдытон но сое быдтон, фашизмен нюръяськон но выль нацистъёслы пӧламы улыны луонлык сётон, инмарлэсь чутрак палэнскон но со борды кыстӥськон... Дас ар талэсь азьло малпаны коть луысал-а меда, асьме пичи шаерын гинэ сомында пӧртэм черкъёс кылдозы шуыса? Табере соослы эрик сётэмын. Туэ 16-тӥ-17-тӥ мае Правительстволэн юртаз "Государство но черк дауръёс вискын" семинар ортчиз. Та ужрадын тужгес но пусйымонэз тани ма вал: асьме историын нырысьсэ радъялозы Удмуртиысь черкъёсын (конфессиосын) тодматонэз. Туннэ нуналлы Удмуртиын лыдэ басьтэмын инмарлы оскисьёслэн 230 огазеясьокон. Христиан религилэсь ортчем сюрессэ тодэ ваёно ке, вашкала аръёсы христианъёс кыклы люкиськизы. Озьы дуннеын кыдӥзы православнойёс но католикъёс. Асьме республикаын паськытгес вӧлмемын христинаъёслэн православной огазеяськонъёссы, 2000-тӥ арын Юстицияя министерствоын соос 201 пусъемын. Православилэсь пӧртэмгес луо протестантской черкъёс. Соос пӧлын туннэ олокыӵеосыз но вань ни. Христианъёс-адвентистъёс, евангелистъёс-лютеранъёс, евангелистъёс-баптистъёс, евангелистъёс-пятидесятникъёс но мукет. Берло аръёсы протестантской выжыысь потэм религиос асьме калык пӧлы уката но зол вӧлмыны кутскизы. Со сяна, Удмуртиын ужало на мукет огазеяськонъёс: ислам, удмурт вӧсь (язычество), Кришна, Свидетели Иеговы но музонъёсыз. Вератэк уг луы старообрядъёслэн общинаоссы сярысь но. Та ужрадэ соослэн адямиоссы лыктэмын ӧй вал, Москваын съездзы ортчемен сэрен. Пӧртэм религиослэн асьме улонын интызы пумысен туж шонер шуиз Правительстволэн Аппаратысьтыз специалист С. Ильинский: - Туннэ ваньмыз сямен калык кыскемын ни инмарлы оскисьёслэн радазы. Религиос куспын территориосты люкылон йылпумъяськиз. Нош государстволэн та пумысен али но нокыӵе концепциез ӧвӧл на. Ум малпаське та дырозь, кытчы мынӥськом, шонер-а вамыштӥськом, кызьы радъяно инмарлы оскисьёслэн огазеяськонъёсынызы кусыпъёсты? Асьмеос тодӥськом: религия государстволэсь люкемын. Озьы ке но, туала вакытэ государство инмарлы оскисьёслэн куронъёссылэсь быдэсак палэнскыны нокызьы но уг быгаты. Республикаямы соослэсь вазиськонъёссэс эскере Кун Кенешысь Кунэз радъянъя, калыкъёс куспын политикая но интыысь аскивалтонъя ялан ужась комиссия, нош Праивтельствоын та ужъёсын вырыны нимысьтыз адямиос юнматэмын - В. Шудегов, Правительстволэн Тӧроезлэн воштӥсез, но солэн юрттӥсез С. Ильинский. Религия ужпумъёсын вырись группа озьы ик кылдытэмын Югдурез утёнъя министерствоын. Нош Юстицияя министерство вань сыӵе огазеяськонъёсты нимысьтыз чакласа но пусйыса возе. Прокуратураысь ужасьлэн Л. Амбурцумянлэн верамезъя, вить ар ӵоже религиен герӟаськем ужъёсъя одӥг уголовной уж но ӝутэмын ӧй вал. Со пусйиз, кыӵе учыръёсы дугдытыны луэ черкъёслэсь (конфессиослэсь) ужамзэс. Сыӵе ужрад кутыны луэ, куке инмарлы оскисьёс ултӥяло мукет религиосты, нациос куспын ӝуто керетон, ожмаськонлы дурбасьто, семья кусыпъёсты сӧро, нылпиосты дышетсконлэсь ало, лэзьымтэ интыосы ялонъёс но ӧтёнъёс ошыло, медицина юрттэтлэсь палэнско. Соизлэсь яке таизлэсь конфессилэсь ужзэ дугдытыны луэ озьы ик соку, куке со адямиез ассэ быдтон калэ вуттэ. Но асьме дорын таӵе учыръёс пусъемын ӧвӧл на. Но умойтэм ужъёс луыло ик. Со сярысь мадиз Можга городлэн администрациысьтыз семья, религия но нациосын ужанъя отделлэн кивалтӥсез Е. Бушмакина: - Городамы вить конфессия ужа. Керетытэк улӥськом. Но шаерамы кӧня ке семьяосты, кытын нылпиоссэс школае ветлыны уг лэзё, пиналъёслэн дышетскемзы туж потэ ке но. Сыӵе учыръёс бере вазиським Калыкез дышетонъя министерствое. Сыӵе семьяос министерствоен нылпиоссэс доразы дышетон сярысь огкыл гожтӥзы. Куд-ог общинаос осконзы вылэ чӧлскыса пумитъясько врачъёс дорын эскериськемлэсь. Пичи пиналъёссэс но больницае уг нулло. Но мон тазьы малпасько: нуныос инмарлы оскытэк вордӥсько на ай, соин ик соосты прививкаос пуктытэк кельтоно ӧвӧл. Вератэк уг луиськы таӵе учырез но: огаз нылпи садын инмарлы оскись анай валэктон уж нуыны кутскем. Мукетъёсыз анай-атайёс пиналъёссэс та садэ нуллэмысь дугдӥллям. Правительстволэн Тӧроезлэн воштӥсез В. Шудегов таӵе валэктон сётӥз: - Зэмзэ ик, инмарлы оскисьёс пӧлын пумиськыло умойтэм учыръёс. Кылсярысь, школае ветлӥсь нылпиоссэс куд-ог анай-атайёс уг лэзё куд-ог предметъёсты дышетыны. Ваньмыз со луэ дышетонъя стандартэз тӥян. Сыӵе дышетскисьёслы азьланяз аттестатъёс сётъямысь дугдоно. В. Шудегов тодэ вайытӥз Россиысь Калыкез дышетонъя министерстволэсь решенизэ: религилы дышетон школаосын лэземын ӧвӧл. Та ужез черкъёс нуыны быгато мукет юртъёсын, но со черк одно ик пусъемын луыны кулэ Юстицияя министерствоын. Кыӵе бен пайда ваё адямиослы Удмуртиын ужась черкъёс? Секыт дыръёсы черк котьку но калыкен ӵош луэ. Озьы вал Быдӟым ож вакытэ, озьы луыса кошке али но, шуиз Виктор Шудегов. Нош тани мар веразы калыклы юрттон сярысь асьсэос черкъёсын кивалтӥсьёс (гожтэмын вакчиятыса). Ӟуч Православной Черклэн Ижевскысь но Удмуртиысь епархысьтыз архиерей Матфей: - Усьтэмын кык монастырь. Одӥгез - воргоронъёслы (К. Задельеын), мукетыз - нылкышноослы (Перевозное черкогуртын). Глазовын радъямын образъёсты (мудоръёсты) гожъяны дышетскон курсъёс. Ижевск епархиысь референт М. Атаманов Библиез удмурт кылэ берыктӥз. Ӟеч ужъёслы благословить кариськом пытсэт сьӧрын пукисьёсты но соослэсь улонзэс капчиятыны юрттӥськом. Ачиз Николай владыко но соос доры вуылэ. Лютеран Черклэн пасторез Г. Вогау: - Милям черкмы Ижевскын огез вашкалаез. Адӟонмы трос туж секыт вал, милемыз зӥбыса возизы кызьы ке Германиын, озьы ик Россиын (Совето власть дыръя). Нош табере ми доры но адямиос кыстӥсько, тужгес но егитъёс. Милям осконмылы Удмуртиын туннэ 400 пала адями дурбасьтэ. Яратон, ог-огедлы юрттон - тӥни соос вылын возиське осконмы. Вань праздникъёсмес ӵош ортчытъяськом. Туж усто хор кылдытӥм. Умой пусйим Пушкинлэсь 200 ар тырмон юбилейзэ. Тросэз егитъёс дышетско эктонъёслы, музыкалы, литературалы. Ачим 27 ар пала курадӟыса улӥ. Озьы ке но, вожпотон мылкыд монэ ӧз вормы, кык вылӥ образование басьтӥ, артист режиссёр луыса ужай, мон Ленин комсомоллэн премиезлэн лауреатэз луисько. Аслам нылпиослы но, семьяе но ӧвӧл, соин ик вань мылкыдме егитъёслы сётӥсько. Милям пиосмы уг палэнско армие мынонлэсь, соос службазэс нуо, нош ми соос понна вӧсяськиськом. Инмар уте, огез но бырыны ӧз на шедьы. Пыриськиськом вань быръёнъёсы, нош асьме адямиосмес нокытчы ум ӵектӥське. Вань одӥг куронмы: черк пуктыны интымы ӧвӧл. Та ужпумен вазиськылӥм ни депутатъёслы но. Евангелистъёслэн-пятидесятникъёслэн Удмуртиысь Союззылэн пасторез В. Жученко: -Нылпиос понна туэ кык лагерь усьтӥм, отын 500 нылпи шутэтскиз. Дас вӧсяськон коркамы вань. Тужгес бадӟымез Глазовын. Сое пуктыны коньдонэн юрттӥзы, США сяна, асьме кивалтӥсьёс. Али отчы 800 пала адями ветлэ. Властен кусыпъёсмы умоесь, но куд-ог дыръя ужаны люкетэ православной черк. Кузпалы Глазовысь воскресной школаен кивалтэ. "Дело Веры" ассоциациысь епископ Ю. Дектярь: - Ми евангелистъёслэн-пятидесятникъёслэн черказы ик пыриськом. Черк государстволэсь люкемын. Но Черк ӧвӧл люкемын обществолэсь. калыкен валэктон уж нуиськом газетмы пыр, ужаськом эфирын, дунтэк дышетӥсько Библиез валаны. Юрттӥськом наркотикен, аракыен герӟаськем муртъёслы. Ум аналтӥське пытсэт сьӧрысь потэмъёсты, соослы но, улон интытэк кылемъёслы, ужаны интыяськыны амалъёс утчаськом. "Свидетели Иеговы" огазеяськонысь комитетын ужась Д. Широбоков: - Милемлы дурбасьто 234 странаын, огъя лыдмы 6 миллион адями пала люкаськоз ни. Улӥськом таӵе куронъёсъя: семьяез яратон но гажан, политикаын нейтралитет возён. Ми пумит луиськом ожмаськонлы, тамак кысконлы, вина юонлы, кузпалъяськытэк сексэн выронлы. Ми умойтэмен лыдъяськом адямилэсь адямилы вир кисьтонэз (переливание). Залын пукисьёс сак кылзӥзы мукет эшъёсты но. Кылсярысь, тунсыко вераськизы Удмуртиысь бигеръёслэн-мусульманъёслэн но удмуртъёслэн-язычникъёслэн кивалтӥсьёссы. Зэм, кӧня конфессиос, сомында ик дунне шоры учкон сямъёс. Но инмар котькызьы сое нима - одӥг. Сое шӧдон-валан ик, лэся, юрттӥз пӧртэм религиосысь люкаськемъёслы лек, обидён кылъёслэсь возиськыны, омырын дырын-дырын сыӵе пилемъёс люкаськылӥзы ке но.Ужрадлэн кыкетӥ нуналаз христианстволэн кузь но секыт ортчем сюресэз сярысь вераськизы асьме тодосчиос М. Атаманов, Е. Шумилов, Ю. Семенов, М. Гришкина, Л. Макаров но мукетъёсыз. Христианстволэн дуннее выжыяськемезлы 2000 ар тырмиз. Озьыен, котькӧня мед мынозы споръяськонъёс инмарлэн ванез-ӧвӧлэз котырын, адямиослэн йыръёсысьтызы вылӥ кужым сярысь малпанэз куштыны уз ни луы. Но оскон-а, ӧвӧл-а соизлы яке таизлы инмарлы, адями ачиз быръе. Конституциын адямилы религиез бырйыны эрик сётэмын. Ленин гожъялляз: "Государство пырак уз луы", "Религия, коммунизм матэктэмъя, пумен ас кужымзэ ыштоз". Коммунизмозь вуон кыдёкелы кадь кылиз, нош государство но черк ас кужымъёсынызы ӵошатскыса уло. Соослэн асьсэлэн законъёссы: государство ляб дыръя кужмоя инмарлы оскон. Тодэм потэ вылэм, кӧня меда Россиын инмарлы оскисьёс кыльысалзы, матысь дыре ик государство адямиослы ӟеч улон тупатыны быгатысал ке? Оло, соку ваньмы нош ик атеистъёс луомы?.. Татьяна Банникова. Базаръёслы - вож сюрес 18-тӥ мае люкаськылӥзы базаръёсын вузкаронэз радъянъя нимысьтыз кылдытэм кенеше быръем муртъёс. Кенешез нуиз Правительстволэн кивалтӥсезлэн воштӥсез Сергей Чикуров. Правительство берло дыре трос гинэ кутӥз ини та удысэз радъянъя постановлениос. Соосты кызьы быдэсъямзы сярысь ивортӥзы Ижысь администрациын, Югдурез утёнъя министерствоын, Госсанэпиднадзорын ужасьёс. Базаръёсын югдур тупатске ини, нош городысь пӧртэм взкарон интыосын ӵем пумиськыло ай табышсэс ватыны тыршисьёс. Соин ик югдурез оглом умоятон вылысь, Вузкаронъя но бытовой юрттэт сётонъя министерство дасяз вузкаронэз азинтонъя 2003-тӥ арозьлы чаклам инъет. Сое ваньмыз сямен люкаськемъёс умоен лыдъязы. Проектъя чакламын выль базаръёс лэсьтыны, вужъёссэ тупатъяны-выльдыны, вузкарыны умоесь луонлыкъёс кылдытыны. Та нуналэ ик Сергей Чикуров ортчытӥз пичи ужбергатонлы юрттонъя Удмурт кун фондлэсь кенешсэ. Отын кылем арлы йылпумъянъёс лэсьтӥзы. Миым та фонд пичи ужбергатонэн герӟаськем удысъёслы 6 миллионлэсь ятыр коньдон висъяз. Со сяна, уже кутэмын на бюджетэ пырисьтэм 5 миллион манет коньдон. Таяз арын но пайдаё ужрадъёс пусъемын пичи ужбергатонлы юрттонъя. Сое ӟеч-ӟеч азинтон понна Правительство но сюлмаське. Туэ гинэ со висъяз ини 20 миллион манет коньдон. Тужгес но бадӟым саклык висъяське семьяен та удысын тыршонэз но калыклы юрттэт сётонэз азинтонлы. Шаерысьтымы вузъёслы - вылӥ дунъет Мексикаысь Маркетингъя национальной институтлэн валтӥсь кенешез басьяськисьёс пӧлын эскеронъёс ортчытӥз. Солэн тужгес но вылӥ наградаеныз пусъемын Можгаысь акциосын "Свет" огазеяськон. Та туж бадӟым дунъет луэ предприятиысь коллективлэн ужезлы, кудӥныз быгатыса кивалтэ Владимир Мохначев. Москваын ортчиз аспӧртэм возьматон-конкурс. Асьме республикаысь отчы пыриськиз вить предприятие. Вить зарни но одӥг бронза медален пусъемын Сарапулысь аракы пӧзьтӥсь кун предприятилэн продукциез. Азвесь медалез басьтӥзы акциосын "Ижмаш" огазеяськонын ужасьёс. Озьы ик куинь медален пусъемын акциосын "Ижевский мясокомбинат" огазеяськон. Удмурт Республикаысь Правительстволэн пресс-службаез. Будэто кыкетӥ нянь Гурт хозяйствоя кун научно-исследовательской институтын кемалась ужало висёнъёслы сётскисьтэм сорт картофка будэтон бордын. Туннэ нуналлы татысь специалистъёс ог дасо выль сортъёсты эскеро-чаклало. Быгатыса ужало соос, асьме сяна, немецкой, голландской, балтийской селекциосын. Институтлэн бусыосаз кылем арын удалтӥзы "невский", "луговской", "весна", "жуковский", "романо" сорт картофка. Кыкетӥ нянь гектарысь 260 центнер поттэмын. Та лыдпус трослы вылӥынгес луысал - куазь ӧз сёты. В.ЛАГУНОВ. ЖУРНАЛИСТЪЁСЫН ПУМИСЬКОНЪЁС Пиньзэс эмъяло Ижын, кисызэс пульдыто Москваын Кылем вторнике журналистъёсын пумиськиз Правительствоысь Тазалыкез утёнын но эмъюмъёс поттонын лицензиос сётонъя но аккредитация ортчытонъя комиссилэн кивалтӥсез Михаил ПЕТРОВ. Люкаськемъёсты со ужъёсынызы тодматӥз но трос юанъёслы валэктонъёс сётӥз. Таӵе ёз кемалась ӧз вордскы ай, вить ар гинэ ужа. Озьы ке но, та дыр ӵоже кун но интыысь учреждениослы, аптекаослы но нимаз адямиослы 13,5 сюрс лицензия сётӥз ни. Сотэк али одӥг больница но, ас кожаз ужась врач но адямиез эмъяны уг быгаты. Но кӧня ке учреждениос лицензия басьтыны ӧз быгатэ на. Отчы пыро участковой больницаос. Но ваньмыз сярысь озьы шуыны уг яра. Тани Пугачевоысь участковой больницалы нырысетӥ категория сётэмын. Озьы ик ужа Республикаысьтымы нырысетӥ клинической больница. Нош ёрос больницаослы ваньмызлы сямен ИИ-тӥ категория сётэмын. Эмъясь учреждениослы вылӥ категория басьтон пайдаен берытске, ужасьёсыз тросгес уждун басьто. Нош нырысетӥ но кыкетӥ категория басьтон понна, одӥг куиньмоссэ куронъёсты одӥг копейка коньдон быдтытэк быдэстыны луэ. Соос герӟаськемын эмъясь учреждениослэн кивалтӥсьёссылэн ужаменызы, кыл кутыны быгатэменызы. Йылэ аптекаослэн лыдзы, уката ик нимаз адямиослэн. Но кун аптекаос али данаклы трос на. Республикаямы тая югдур урод ӧвӧл. Одӥг аптека нормая 4 сюрс адямилы эмъюм вузаны кулэ, нош асьмелэн али 4,2 сюрс муртлы одӥг аптека усе. Шаерамы Урал улосвылын тая 1-тӥ инты басьтэ. Лицензиос но категориос сётэм сяна, комиссия бадӟым эскерон уж нуэ. Вить эмъясь учрежденилы но одӥг аптекалы лицензия сётымтэ, одӥг больница но одӥг аптека рагистрировать карымтэ. Огъя вераса, комиссия ар ӵоже одӥг куиньмос учреждениослэсь ужамзэс чакла. Миым 21 лицензия таламын. Со герӟаськемын документъёсты умойтэм нуэмен, эмъюмъёсты урод воземен но мукет мугъёсын. Озьы учреждение куинь яке куать толэзьлы ворсаське. Туэ кызьзэ эскерем пӧлысь куинез эмъясь учреждение ворсамын ни. Самой трос вал валля арын - 30, нош миым 24-ез пытсаськылӥз. Элькунамы али ас кожаз 212 врач ужа. Нош лицензия басьтон дуно уг сылы, ваньзэ- ӧвӧлзэ 1,5 сюрс манет гинэ тыроно. Россиын умойтэм закон кутэмын. Соя котькытын лицензия басьты, шуом, Москваын яке Санкт-Петербургын, адями асьме дорын ужаны быгатэ. Со понна со комиссие ивортэ гинэ. Нимазы ужасьёс пӧлын данакез пинь эмъясьёс (стоматологъёс), массажистъёс, наркологъёс но диагностикъёс луо. Пусйыны кулэ: Москваысь стоматологъёс, пе, пиньзэс эмъяло Ижевскын, нош асьсэос Москваын туж дуно эмъяло но кисызэс пульдыто. Тӥни кызьы луыса кошке. Мукетыз ужпум люконтэм герӟаськемын эмъюмъёсты прессаын возьматонэн, соослы реклама сётонэн. Кылсярысь, радио но телевидение туж ушъяло сиён-юон ватсэтъёсты. Соосты пищевые добавки шуо. Кыӵе та эмъюмъёслэн пайдазы - нокин тыро-пыдо уз вера. Нош гожто, уно висёнъёсты (наркоманиез, пыктосъёсты но) эмъяны юртто шуыса. Со калыкез пӧян гинэ, ведь сиён-юон ватсэтъёс - со эмъюмъёс ӧвӧл. Соин ик али Кун Думаын дасяське эмъюмъёсты возьматон ласянь закон. Но Москваысь закон дасясьёсмы чидантэм дыг ужало, ялан тяпайто, кин ке, шӧдске, ялан питранэ боды донге. Валамон, кинлы со кулэ - калыкез пӧяса, висисьёс чотын узырмыны тыршисьёслы. Кун Думаын вань депутатъёс бырйисьёссы сярысь огкадь уг сюлмасько на. Тӥни со бордысь тросэз потэ. Соос политикаен мултэс шудыны ярато. Г.РОМАНОВ. Ойдолэ дунъяломе кырӟанэз! Выжызэ, йылолъёссэ, сямъёссэ, кылзэ тодӥсьтэм-валасьтэм калык лябӟе, отӥяз - быре но. Шумпотоно: асьмеос, удмуртъёс, сыӵе калэ ӧм вуэ на. Озьы ке но, городъёсын, посёлокъёсын, ёросъёслэн шоръёсазы уноез улӥсьёс ас выжызэс, кылзэс вунэтыны кутскизы ни. Таӵе югдур ас калыксэс яратӥсьёсты кемалась сюлэмшугъяськытэ. Зэм, рос-прос сюлмаськисез азьвыл ӧй вал. Но Ижын удмуртъёсты люкаллязы "Ижмаш" культура дворецысь калык театр (кивалтӥсез А. А. Митрофанов) но "Тюрагай" ансамбль (кивалтӥсез В. Я. Митрофанов). Тямыстонэтӥ аръёсы Анатолий Андреевич Митрофанов ас ужзэ паськытатӥз. Толэзьлы быдэ "Ижмаш" культура дворецын ортчылӥзы фольклор ӝытъёс. Отчы вуылӥзы республикаысьтымы пӧртэм ёросъёсысь артистъёс. Учкисьёс но зал тыр люкаськылӥзы. 1987-тӥ арын "Инвожо" ансамбль кылдытӥ, удмурт йылолъёсты Ижлэн улон-вылоназ пыӵатон вылысь. Пӧрмиз, шуо. Со дырысь Буммаш дорысь Пазял шурлэн кутсконаз но Педучилище дорысь Чемошурлэн кутсконаз ялан ортчытъяськом удмурт праздникъёсты, пиналъёсты но мӧйыосты ӧтчаса. Берло дыре, уксё тырмымтэен, йылолъёсты радъяськомы "Ожо-вожо" ансамблен но матысь эшъёсынымы ӵош. Туэ но Вӧйдырез пусйим. Матысь нуналъёсы Йӧ келянэз ортчытом, собере - Гуждорез. Дядяе верамъя, со тазьы ортчылэм. Чаклам нуналэ гурт калык мынэ вылэм вӧсяськон лудэ. Пудо вандӥсьёс но ӝук пӧзьтӥсьёс отчы вазьгес лыктылӥллям. Нырысь ик, шунды вылэ ӝутскем бере, нуназе вадес, дас кык час котырын, бӧлякъёслэн тужгес гажано адямизы музъемез пичияк гырылэм но отчы курег пузэн сурам ю тысь пазьгылэм. Соку пиналъёс буям курег пузэз вожмаськыса бичаллям. Кизем музъемлэн пумаз, гопе, кизисьлэн кышноез тырылэм курег пуз, табань, сӥльын ӝук, сур, кумышка но мукет сиён-юон. Кизем бусы дуре бӧрысь вӧлдылӥллям ӝӧккышет, отчы сиён-юон тырылӥллям. Сиськон-юон азьын кузё быдӟым инмарлы куриськылэм-вӧсяськылэм. Солэн урдсаз султылӥллям бӧлякысь йӧн-йӧн пиос. Вӧсяськонлэн кылъёсыз пӧртэмесь. Соос пӧлысь одӥгъёсыз таӵеесь: "Осто, яратоно быдӟым инмаре! Умой мед будоз вань кизем ю-няньмы, сёт шуныт зордэ. Зурод зуродэн мед артэ сылоз, пудо чаляк мед будоз. Сёт тазалык ваньмызлы, уката ик - нылпиослы. Мед будозы соос визьмоесь, чебересь, кужмоесь, ужасесь..." Лудэ лыктэмъёс бӧрысь ваньзы огазе люкаськыса сиськылӥллям но. Со дыре ик егит нылъёс кизем ю вылэ ву киськаллям. Гуждор йылолэз возьматыку чузъяське даслэсь уно кырӟан. Соос пӧлын туж тодмоосыз но вань. Лыдӟисьёсыз туннэ тодматэме потэ ньыль тодмотэменыз. Тыро улон Огназ вӧсясь. Шундылэн тылсиез Сайкатэм ни тэлез, Бурдоос дугдытэк ӟильырто. Ваньзы. Тыро улон, Шудо улон Ой, вай, шунды, Ой вай, инмаре. Огназ вӧсясь. Шуныт зор усиз ке, Пӧсь шунды потаз ке, Осконо ю-няньмы удалтоз. Огназ вӧсясь. Лобало ке мушъёс, Азбар тыр пудоос, Сиёнмы ӝӧк выл тыр ик луоз. Чаляк буды Тазэ кырӟано кизьыку Чаляк буды, сезьые, Таза луы, сезьые, Куаръёсыд потэм бере, Шуныт зоред мед усёз. Ӝужыт буды, етӥнэ, Тысё луы, етӥнэ, Сяськаед ӝужам бере, Шунды ӵемгес мед пиштоз. Ваё буды, кӧжые, Весь кадь луы, кӧжые, Куаръёсыд потэм бере, Шуныт зоред мед усёз. Мульыё буд, кияре, Бадӟым луы, кияре, Сяськаед ӝужам бере, Шунды ӵемгес мед пиштоз. Чаляк буды, дыдыке, Чебер буды, дыдыке, Йырсидэ пунон вуоз, Тонэ бускель куралоз. Гуждор потыку Шур дуре но васькыса но Ӵуж пучыослы пайми, Ӵуж пучыослы пайми но Йырсидэ тодам ваи. Гуждор потыку, сурсву вияку, Тонэ пумитай возь вылын. Возь вылтӥ но ветлыкум но Италмаслы синмаськи, Италмаслы синмаськи но, Айшеттэ тодам ваи. Нюлэс дуре мыныса но Инвожолы синмаськи, Инвожолы синмаськи но Льӧль бамдэ тодам ваи. Бакча бере потыса но Вож кызьпуослы пайми, Вож кызьпуослы пайми но, Дэремдэ тодам ваи. Узы вуыку, веник тӥяку, Тонэ чупалляй соос улын. Милям бон Милям бон нылъёс чебересь, / 2 пол. Кыӵе гинэ чебересь - Мак сяська кадесь. Милям бон пиосмы сэзесь, / 2 пол Кыӵе гинэ чебересь - Тырвыл кисьтэм вӧй кадесь. Милям бон калык ужасесь, / 2 пол. Кыӵе гинэ ужасесь - Чечы бичась муш кадесь. Милям бон эшъёс кырӟасесь, / 2 пол. Кыӵе гинэ кырӟасесь - Шур дурысь уӵы кадесь. Инкуазь йылолъёсты ортчытъяны милемлы юртто "Дэмен", "Удмурт кенеш" но "Удмурт вӧсь" огазеяськонъёс. Со валамон. Мон угось соосты кылдытонэ нырысь нуналъёсаз ик пыриськи. 1988-тӥ арын Удмурт клуб нырысьсэ люкаськыку ик монэ фольклоръя кыл кутӥсе бырйизы. Укмыстонэтӥ аръёслэн кутсконазы "Инвожо" ансамблен Сарапул но Камбарка ёросъёсы потамы "Дэменлэсь" ёзъёссэ кылдытыны. Николай Возисов. Оломае но тодэменыз, котькыӵе уж борды басьтӥськыны дӥсьтэменыз тодмо луэ Сюмси ёросысь Кильмезь посёлокын улӥсь Сергей Миронович Гребенкин. Кылсярысь, со, куяськон интыез чылкытатыса, тымет лэсьтӥз, отчы чорыг лэзиз. Бакчаез но пенсионерлэн аспӧртэмлыко - отын пӧртэм емышо писпуос будо. С.М.Гребенкин. Леонид Прозоровлэн суредэз. Сизьымдон вить шуо ке но... Ноку но, ноку но ӧй малпа, студент вакытысьтым матысь тодмое, эше сярысь ортчем дырын вераськоно луоз шуыса. Умойтэм югдуре сюроно ведь, а? Ачид улэп на, нош мукетъёслэн тодазы вайытоно луиськод ини улонысь кошкем адями пумысь. Ог-огмы сярысь луло дыръямы вераны но, гожъяны но кулэ. Кызьы шуо - ӟечсэ но, уродзэ но. Ачим так- то озьыгес ик лэсьтыны вырисько. Адями мукет дуннее кошкем бере но, пе, лулыз кыле, уг быры. Озьы мед луоз вылэм. Лыдӟисьёс соглаш луозы-а, уз-а, но мон удмурт писателен Евгений Васильевич Самсоновен улэп муртэн кадь ӧжытак коть верасько но кенешо ай, учкыны йӧндыро далайгес но алигес ортчемез шоры. Туж ӟеч тодӥсько на 1949-тӥ арез. Иже талэсь азьло но вуылэме вал ке но, таяз учыре лыктӥ кемалы. Оло нош - пыраклы. Вуи УАО-лы дас ар нимо Удмурт пединститутэ. Озьы гожтэмын вал кадь ньыль этажъем чебер юртлэн вылӥяз. Физикая но математикая факультетэ пыроно мурт, мон, ӝогак гинэ интыяськи литературая факультетэ. Мугез одӥг гинэ но туж бадӟым вал: ачим но шӧдытэк тодматски кылъя но литературая факультетысь студентъёсын Евгений Самсоновен, Даниил Яшинэн, Иван Таракановен но эшшо кӧня ке егит пиосын. Ӝужыт, веськрес мугоро Евгений Самсонов малы ке но туж ик уг тупа вал огшоры студентлы. Мукетъёсыныз ӵошатыса, солэн ужез но сюлмаськонэз тросгес вал кадь. Зол дышетскиз адями. Тодӥз но трос. Соин ик бадӟымгес курсъёсысь студентъёс но эшъяськизы соку кыкетӥ курсын дышетскись Евгений Самсоновен. Адямилэн улон-вылоназ котьку но тазьы луэ, вылды: тужгес вунонтэмез но дуноез - егит дыр. Школаын - берпуметӥосыз классъёс, институтын - нырысетӥосыз курсъёс... Со аръёсы ук дасяськиськод бадӟым улонэ вамыштонлы, со аръёсы ук сюлэмад пичи но юаськытэк каръяськыны ӧдъя туж бадӟым но кужмо мылкыд - яратон. Дышетскон, тодон- валан сяна, милемды, студентъёсты, юн герӟаллязы на литературно-творческой кружокмы, кырӟан-веран уж но спорт. Трос дырмес отчы быдтӥськомы вал. Кызьы ке ай шутэтскыны но вуылӥмы. Туж яратӥмы литературно-творческой кружокмес. Солэн занятиосаз мылысь-кыдысь ветлылӥзы милям группаысьтымы ик Георгий Архипов, Фома Овчинников, Михаил Гаврилов но мон, Семен Перевощиков. Берло ньыльнамы ик ужамы али - "Удмурт дунне", нош соку - "Советской Удмуртия" газетын. Гожъяськонын кивалтӥсьмы но сюрес возьматӥсьмы вал Евгений Самсонов. Солэсь нимзэ соку ми гинэ ӧвӧл, республикаысьтымы трос лыдӟисьёс тодӥзы но гажазы ини. Нош ик кутӥсько киям 1950-тӥ арын потэм "Кизили" альманахез. Сое кузьмаз мыным Даниил Яшин. Татын печатламын Евгений Самсоновлэн кык кылбурез: "Кырӟан" но "Мынам шаере". Газет бамын ӧвӧл, книгаын! Нырысетӥзэ ке луысал - кыкетӥзэ ини! "Пумиськон" но "Шур дурын" кылбуръёсыз "Кизили" альманахын 1949-тӥ арын потӥллям. Евгений Самсонов сярысь вераназ та произведениослы ӟеч дунъет сётӥз Герман Ходырев. Со шуиз: "Соос мынэсьтым, егит муртлэсь, сюлэмме ас шуныт мылкыдынызы но лач-лач удмурт сямынызы бордазы кыскизы". Кылбуръёс бордын ӝикыт, сюлмаськыса ужаменыз, Евгений Самсонов милемды но сыӵе луыны дышетылӥз. Лыдӟисьёс понна туннэ дэмласько поэтлэсь "Шур дурын" нимо быдэс кылбурзэ. Тани со: Ӝомыт каньылля омырын напчоме, Шур ву кисьтаське азвесё тулкымен. Кӧлэ пеймытлэн саюлаз колхоз гурт... Ваське карнанэн шур дуре нылъёсмурт. Тӥни со отын дун вуэз омыртӥз... Соку луд палась, кытысь ке, омыртӥ Вуиз со доры жингыртӥсь сэзь кырӟан - Оло, пеймытэ кисьтӥськиз-а марӟан? Оло, кизили-а меда лыз инмысь Озьы сӧриськиз, пазьгыса зарни тысь? - Сермет кортнэтлэн куараез кылӥськиз, Дага шат озьы из бордын жингыртӥз? Тодмаз! Гажанэз луд ужысь сыӵе бер Вуэ кырӟаса, гужем уй кадь чебер. Уг юаськы, кельшиз-а шуыса. Туала лыдӟисьлы но гожъясьлы таӵе шуныт, мусо чуръёс туж яралозы. Пединститутысь литературно-творческой кружоке ветлӥсьёс понна зэмос праздник луиз 1950-тӥ арысь 26-тӥ март. Тау Евгений Самсоновлы но, "Советской Удмуртия" газетлы но. Быдэс бам сӥземын вал милям ужъёсмылы. Со нуналэ газетын печатласькизы Евгений Самсоновлэн, Вера Уваровалэн, Георгий Архиловлэн, Даниил Яшинлэн, Семен Перевощиковлэн кылбуръёссы, Фома Овчинниковлэн веросэз. Озьы ик сётэмын вал со дыре ӟеч тодмо журналистлэн Михаил Горбушинлэн "Студентъёс-кылбурчиос" кылужез (статьяез) но фотокорреспондентлэн В.Андреевскийлэн туспуктэмез. Адӟемды потэ-а со фотоез? Вуж альбомам али но кылле на вылэм. Тодады вайытӥсько гожтэмез но. Шуэмын тазьы: пединституысь литературной кружоклэн одӥгаз занятияз. Егит кылбурчи Е.Самсонов выль кылбуръёссэ лыдӟе. Вуж туспуктэм шоры учки но вань эшъёслэсь нимъёссэс верано кариськи. Куд-огез улонысь но кошкемын ини, мукетъёсыз луло ай, литература удысын ужасьёсыз но вань на. Озьыен, паллянысен буре: Г.Архипов, Д.Яшин, Ф.Овчинников, С.Перевощиков, В.Уварова, Е.Самсонов, М.Гаврилов, И.Тараканов, Л.Емельянов, В.Германова. Вот озьы. Куинетӥ курсысен Евгений Самсонов луэ Сталин стипендиант. Сое быръё на ВЛКСМ-лэн комитетаз. Секретарьлы воштӥсе. Ассэ соку гинэ ай комсомолэ но куто. Озьы кулэ вал, дыр. Туж ӟеч дышетскем сяна, Сталин нимо бадӟым стипендиез басьтӥсь студент калык пӧлын бадӟым уж но нуыны кулэ. Студентъёс юн гажазы Евгений Самсоновез. Угось соин артэ котьку но ӟеч мылкыдо луоно вал. Литературно-творческой кружокмы но зол ужаз. Шонер верало ук: кыӵе кивалтӥсь, сыӵе ик коллектив. Удмурт писательёс пӧлысь тросэз потэмын пединститутысь, али - университетысь литературно-творческой кружок пыр. Валамон ини, Евгений Самсоновлы тау карисьёсыз но ӧжыт ӧз луэ. Ньылетӥ курсэ выжемез бере, кружокен кивалтонэз мыным оскизы. Монэ воштӥз Петр Поздеев. Евгений Самсоновез ӟеч тодэм адямиос вылаз ноку уз ӝожтӥськылэ. Котькуд пумиськыку маке вералоз но бурдъялоз вал угось со. Эшлыко кусыпъёсмы пыраклы кылизы. Куке вунозы шат "Азьлань" журнал дасяммы, институтын но общежитиын литературной бордгазетъёс поттэммы, городысь рабочийёс доры вуылэммы? Студент дыръямы Евгениез ми Женя гинэ шуылӥмы. Озьы со милемлы матынгес, дуногес, асьме адями кадь потылӥз. Тодам на гажано эшмылэсь кызь вить арессэ пусъеммы. Лӧпшан сяммыя, дыр, кыӵе ке "юбилейной" комиссия" но кылдытӥмы. Женя соку улӥз общежитилэн нырысетӥ корпусысьтыз пичи комнатаын. Со дырысен витьтон ар ортчем ини... 1952-тӥ арын дышетсконзэ йылпумъяса, Евгений Васильевич Самсонов ужа Ижевскысь педучилищеын. Но ӝоген кошке вордӥськем палъёсаз - Татарстанысь Бавлы ёросысь Урсыгуртэ. Отын но школаын ужа, берлогес парткомлэн секретарез вал. Иже берытскыса ужаз "Нефтяник Удмуртии" газетын, саесъёссэ пужалляса тыршиз бадӟымесь прозаической произведениос бордын. Дуно синпель луыса, книга ӝажыям кылле "Льӧльшур палъёс" роман. Евгений Самсонов сое мыным кузьмам 1987-тӥ арын 23-тӥ апреле "Ижмаш" культура дворецын. Тау, монэ но сокем дунъямез понна. Авторлэн тусбуеныз артэ книгалэн азьпал бамаз гожтэмын: "Кужмо кылбуръёстэ яратыса, валче дышетскем аръёсмес тодэ вайыса, бадӟым гажанэн - Семен Перевощиковлы авторезлэсь. Е.Самсонов". Гожъяны пуксьыкум малпасько вал, созэ но, тазэ но верало шуыса. Уг тодӥськы, ӧжытак коть пӧрмиз меда. Вордскемез дырысен сизьымдон вить ар шуо ке но, Евгений Васильевич Самсоновез тодӥсь адямиос син азязы пукто веськрес мугоро, егит мылкыдо писателез-фронтовикез. Али но, трос аръёс ортчыса но, дырын-дырын тодам ваисько егит кылбурчиез юнме шорысь но мултэс вӧсь карыны выремзэс. Кылбуръёссэ эскерыса, одӥгез автор статьяезлы ик таӵе йыръян сётӥз вал: "Аккомпанировать карись кикыос но поэтлэн кылкутонэз сярысь". Мукет авторез бугыръяны кутскиллям кылбурчилэн яратон кусыпъёсыз. Статьялэн йыръяназ ик егит адямилэн нимыз но фамилиез поттэмын. Кулэ-а, ӧвӧл-а, умой-а, урод-а - ӟеч, быгатӥсь, визьмо адямиосты но "куртчылыны" яратӥзы, сэзь вамышъян сюрессы вылэ пыкетъёс урдылӥзы. Евгений Васильевич Самсонов трос шуг- секытъёсты адӟиз но чидаз, соосты вормылӥз: гадяз жугиськиз угось фронтэ ветлэм солдатлэн сюлэмыз. Семен ПЕРЕВОЩИКОВ, кылбурчи. Удмурт пединститутысь литературно-творческой кружоке ветлэм егитъёс. Паллянысен буре: Георгий Архипов, Даниил Яшин, Фома Овчинников, Семен Перевощиков, Вера Уварова, Евгений Самсонов, Михаил Гаврилов, Иван Тараканов, Леонид Емельянов, Вера Германова. 1950-тӥ ар, март толэзь. Татын кӧс, отын тудву Лымшор Уралын бусыос, возьёс тудвуэн шобыртэмын. Курган областьын уно сюрс юртъёс ву улэ шедизы. Калыкез кышкыт азьысь кӧс интыосы потто. Тудву уй пал шуръёсы но вӧлме ни. Юрттэт сётонъя ужрадъёс радъямын Архангельск областьын, дасясько Енисей шурысь зӧк йӧосты пуштытъяны. Сибире сое, Сибире! Москваысь Красноярске лушкемен келямын татысь алюминий заводлэн азьвыл директорез Анатолий Быков. Сибире сое вуттӥзы киоссэ кульчояса, вылаз бронежилет дӥсяса. Быковез янгыше уськыто коньдон капыръямез но медъям адямиос пыр кӧня ке муртэ быдтэмез понна. Мед кесясал тонэ гондыр Америкаын улӥсь 38 аресъем Джеймс Петерсонэз пуля но уг вормы, кионъёс но уг сиё. Лушкаськисьёс сое ыбыны малпазы. Ӧз пӧрмы - пыӵалзы ӧз ыб. Соку бандитъёс Петерсонэз писпу борды думылӥзы, котыраз парсь сӥль пазязы. Йыртэмасьёс малпазы, сӥлез веръям кионъёс, гондыръёс адями вылэ но урдскозы. Таиз амалзы но куашказ. Петерсон быгатӥз мозмытскыны но матысь фермае ватскыны. Басьтэмын Интернетысь. Туж вашкала шоркармы Национальной библиотекаысь "Удмурт шаер" клубын "Ижевск: тодмо но тодмотэм" темая вераськон вал. Отын люкаськемъёслы трос тунсыкозэ мадиз шаерчи В. П. Митрохин. Удмуртилэн шоркарез интыын нырысетӥ улон юртъёс кыдӥллям ни вылэм 1500-1600 ар талэсь азьвыл. Нош Ижевсклы 240 ар тырмиз шуыса лыдъяське. Историысь суредъёсыз адӟыны луиз нимысьтыз витринаосысь - отысь материалъёсты дасяллям шаертодонъя но финн-угор литературая ёзын ужасьёс. СПИД-лы пумит - сюсьтыл СПИД шаермылэн палэнтӥз ортчоз шуыса буйгатскыны вазь вылэм. Дасо аръёс ВИЧ инфекциез пушказ нуллӥсь одӥгез воргорон та висёнлэсь кулӥз ни. Кын куртчон вакытаз. Мыным со воргоронэн кык пол пумиськылыны кылдӥз. Кулон пала вамышъямзэ тодыса, со соглаш луиз вал юанъёсылы валэктонъёс сётыны, оло, кинэ ке но та кышкыт эзелен пумиськонлэсь алыны быгато, пе. Визьмо, вылӥ образованиен воргорон. Висён одолемлэсь азьло со туж учкымон вал, дыр, малпай мон соку ас поннам, ворогоронлэн бездэм синъёсыныз пумиськыса. Улонэн герӟась тылгизьыос уг пишто ни вал отын. Озьы ке но, висись котькуд вордӥськем выль нунал борды ӝабыртӥськыны турттӥз. Республикаысьтымы СПИД-эн нюръяськонъя центрысь врачъёс солэсь курадӟонъёссэ капчиятыны турттӥзы ке но, со син азьын пумен кысӥз но кысӥз. Ӝожтӥське вал йырсиез усемлы, гижыосыз, куэз паласькемлы. Ӟигарыз быремен, кытчы ке усемезлэсь кышказ. Соку воргорон ассэ утялтыны быгатэ на вал, но ӝоген, пе, юрттэт кулэ луоз. Зэмзэ но, интернат юртэ интыятэк сое ӧйлась. Нош таяз арын со улонысь кошкиз. ВИЧ-инфекция паламен, туэ шаерысьтымы эшшо одӥг мурт югыт дунеен люкиськиз, таиз ачиз мылкыд кариз улонысь кошкыны. Кылем арня нуналэ быдэс дуннеын ортчиз ВИЧ-лэсь но СПИД-лэсь кулэмъёсты Буре ваён нунал. 1983-тӥ арысен кусткыса, май толэзьлэн котькуд куинетӥ арняяз буре ваё та эзельлэсь кулэмъёсты. Берло 20 ар ӵоже быдэс дуннеын СПИД-лэсь кулӥз ни 15 миллионлэсь ятыр адями: арлы быдэ кулэ кӧня ке миллион мурт, нуналлы быдэ - кӧня ке сюэз. ВИЧ-лэсь но СПИД-лэсь кулэмъёсты Буре ваён нунал шаермылэн но палэнэтӥз ӧз ортчы. Сояз арня вискын республикаямы ужазы СПИД-эн нюръяськонъя Москваысь специалистъёс Наталья Ладная, Олег Юрин, Россиысь научно-методической центрлэн кивалтӥсез, Медицина наукаосъя академиысь член-корреспондент, профессор Вадим Покровский. Шаерысьтымы специалистъёс понна соос ортчытӥзы семинар, пумиськылӥзы журналистъёсын. Берло аръёсы Россиын но СПИД ассэ укыр эрико возьыны ӧдъяз. Таяз арын гинэ ВИЧ- инфекция палаз 8 сюрс муртлы, нош ваньмыз 40 сюрс пала вирус нуллӥсьёс. Со шараямъёсыз гинэ. Специалистъёслэн верамзыя, странаямы кылдэм югдурез шонергес тодон понна, огъя лыдпусэз 5 поллы уноятыны кулэ. Озьыен, шаерамы та нуналлы 86 муртлы ВИЧ паламын ке, зэмос лыдпус трослы уногес луыны кулэ. 10-12 ар ортчыса, кулон ваись эзель висисьёс пӧлтӥ кусоен ортчоз. Кинъёс сюрозы солэн ки улаз? Туннэ 20 аресъем егитъёс. Уже интыяськозы, семья кылдытозы, нылпиоссы вордӥськозы, собере? Малпаны ик кышкыт, мар возьма асьмеды, кӧня ке аръёс ортчыса. Огвакытэ трос вераськон мынӥз "Арменикум" сярысь. Армениын, пе, СПИД-эз йӧнатӥсь эмъюм шедьтэмын. Шумпотыны вазь вылэм. Вадим Покровскийлэн верамезъя, ушъяно эмъюм висисьёслэсь тазалыксэс нокӧнялы но ӧз умояты. Оскон ӧвӧл, матысь дыре кыӵе ке но эмъюм кылдоз шуыса, кӧня ке аръёс ӵоже солэсь эмъясь кужымзэ эскероно луоз на угось. Собере кинлэн кисыез буш быгатозы меда эзелен нюръяськыны, эмъюмъёс туж дуно сыло угось. СПИД висёнлы пумит али кутӥськись эмъюмъёс пӧлысь асьмелэнэз трослы дунтэмгес кунгож сьӧрысь ваемъёсызлэсь. Озьы ке но, соос но "куртылӥсько". Чаклалэ асьтэос: 1 таблетка сылэ 1,5 доллар, нош эмъяськыны кулэ толэзь ӵоже - нуналаз 3-4 таблетка юоно. Озьыен, 1 толэзь эмъяськон сылоз 180 доллар. Кунгож сьӧрысь эмъюмъёс понна 400 доллар кошкоз. Оскиськыны уг луы государство вылэ но. Шуимы, Россиын туннэ 40 сюрс ВИЧ-инфекция паламъёс. Специалистъёслэн верамзыя, куинь ар ортчыса, соосты ваньзэс сямен эмъяно луоз. Одӥг адямилы араз кулэ луоз 10 сюрс доллар быдтыны. Нош ваньмыз понна бюджетысь висъяны кулэ луоз 400 миллион манет. Вормоз-а Россиысь Правительство сое ас вылаз басьтыны? Уз. Озьыен, висисьёс эмъюмтэк кылёзы, законын гожтэмын ке но котькуд адямиез йӧнатон сярысь. Азьмынӥсь станаосын, США-ын ик, та ласянь югдур умой. Шоро-куспо уждун отын 2 сюрс доллар пала. Ӝыныез эмъяськыны кошкоз ке но, адями ёрмон калэ уз вуы. СПИД-эн висисьёсты эмъян государстволы нокыӵе шуккет уг сёты. Вадим Покровскийлэн верамезъя, Россиын кылдэм югдурез учконо ке, туннэ нуналлы тросгес кужымез но коньдонэз кутоно СПИД-эз алонлы, соин нюръяськонлы. Нимысьтыз ужрадъёс ортчытон понна араз кулэ луоз 70 миллион доллар. Жаляса верано, таӵе ужлэн емышъёсыз син шоры уг йӧто бере, куд-ог кивалтӥсьёс ласянь валамтэос но кылдо. Удмурт Республика сярысь озьы вераны уг луы. СПИД-эн нюръяськонъя шаерамы кутэмын нимысьтыз программа. ВИЧ-инфекция вӧлмонъя кыӵе югдур азьланяз луыны быгатоз шаерамы? Та юанъя Москваысь профессор кык пӧртэм адӟонзэ вераз. ВИЧ паланы быгатоз уно сюрс наркоманъёслы. Нош кӧня ке аръёс ортчыса, инфекция тросэн вӧлмыны быгатоз валче кусып возьыса, наркоманъёс юрттэмен ик. Мукетыз малпан - ВИЧ-инфекция вӧлмонэз дугдытыны луоз. Асьмелэн кадьгес ик югдур вылэм Нижний Новгородын. Но наркоманъёс отын дыраз визьмаськиллям. Котькудзылэн соослэн асьсэлэн кружказы, асьсэлэн шприцсы но... сюсьтылзы. Наркотик пыр инфекция медаз сюры шуыса, суретэз соос быректо. Таӵе калык эмъяськон пайдаё луиз. Вадим Покровскийлэн верамезъя, та амал адӟем карымон шаерысьтымы но наркоманъёслы, мед гинэ со кызьы ке пелязы кылӥськоз. Нош эшшо но умойгес - егитъёс медаз ик зыме вылэм йырпоромон дуннее. СПИД-лэсь кулэмъёсты Буре ваён нуналэ шаерысьтымы черкъёсын ӧжытгес сюсьтылъёс мед ӝуатскысалзы. Л.МАЛЫХ. Архивысь документъёсъя Удмуртия ЪЪ дауре 1913-тӥ ар Россия шукыръяське-данъяське Романов выжыысь эксэйёслэн 300 ар ӵоже кивалтэменызы. Праздникез ортчытон пумысен радъяло нимысьтыз комитет, потто юбилей медальёс, ортчыто выставкаос, губерниосы келяло праздникез кызьы ортчытыны ӵектыса гожтэтъёс. Иж но Вотка заводъёсын 21-тӥысен 24-тӥ февралёзь шутэтскон нуналъёс ялэмын. 21-тӥ феврале татысь тыметъёс дорын ӵукнаысен ик оркестр шудэ, чебер пӧрмытскыса калык юмша! Нош ӝытазе инбаме пазьгисько-воректо буёло тылъёс. Ноку адӟылымтэ фейерверк! Сое вуттӥзы Пермьысь. Заводъёслэн кивалтӥсьёссы косэмъя, кивалтэт юртъёс, черкъёс чеберъямын вал искусственной сяськаосын, ворекъясь электролампочкаосын. Бере кылемез ӧз поты Глазовлэн но. Юбилейлы дасяськыны кутскизы вазьынгес ик. Эксэйёсты данъяса ӝутӥзы памятник. 21-тӥ феврале сое флагъёсын чеберъязы. Преображенской соборысь священникъёс, вань умоезлы тау карыса, вӧсяськон ортчытӥзы. Глазовын улӥсьёс быдэс ар ӵоже адӟизы-учкизы кар кивалтэтлэн юртэз вылысь Николай Александрович государь императорлэсь, Александра Федоровна но Мария Федоровна императрицаослэсь, Алексей Николаевичлэсь но Михаил Федоровичлэсь ымныр тусъёссэс. Портретъёсты дасяз татысь суредась Попов, ужез понна 250 манет сётӥзы. Городысь дышетсконниосын Александр ИИ но Николай ИИ нимо 60 манетъем стипендиос пусъемын. Соосты сётъяны чакламын куанер улӥсь дышетскисьёслы. Вятка губернаторлэн И. М. Страховскойлэн лэземезъя, ӟуч крезьгуръя огазеяськонлэн Сарапулысь люкетэз крезьгуръя училище пуктыны коньдон люканы кутскиз. Варзи-Ятчиысь санаторийлы 300 аръем юбилеен валче эксэй грамота сётэмын. Ар талэсь азьло татын эмъяськиз императрица Александра Федоровна. Грамота пыр санаторийын ужасьёслы тау каремзэ вераз. Та шукыръяськон вакытэ вал мукет мылкыдын но улӥсьёс. Вяткаысь эсеръёс, праздниклы пумитъяськыса, губернаторлы, жандарм управленилэн кивалтӥсезлы но мукет вылӥ адямиослы Николай ИИ вылэ юри мыскылляса лэсьтэм суредъёс ыстӥзы. Таӵе ик суредъёсты вӧлмытыны туртто вал 21-тӥ феврале театрын "Жизнь за царя" операез возьматон дыръя. Таиз ужрад ӧз удалты - полиция суредъёсты талаз. И. Зайцева, Удмурт Республикаысь Кун архивысь отделэн кивалтӥсь. Глазовысь духовной училищелэн юртэз. "Аврора" бордын Ижлэн ки пытьыез Историе кылем "Аврора" крейсерлы 100 ар тырмиз. ЪЪ даурлэн кутсконаз со дуннеын одӥгез бадӟымез но кужмоез кораблен лыдъяськиз. Со воштӥз 12 сюрс вал кужымез, часлы быдэ 37 иськем ортчыны быгатӥз. "Аврора" пыриськылӥз со вакытэ пуромем пӧртэм бугыръяськонъёсы, И мировой но граждан ожъёсысен кутскыса. 1917-тӥ арын октябре та крейсер ужаса улӥсьёсты Зимний дворецез киултыны "ӧтиз". Со бере ог кызё ар татын дышетскизы военно- морской флотлы вуоно командиръёс. 1948-тӥ арысен Нева шур вылысь крейсер музейлы пӧрмытэмын. "Аврораез" утялтыса-чакласа возён уж борды кыскемын вал Иж заводысь ужасьёс но. "Ижмашын" но "Ижстальын" дасямын геройлыко крейсерлы кулэ луись куд-ог сӥё-дано куронъёс (заказъёс). В. Рогалев. Асьсэос книга потто Кияса ёросысь центральной библиотекаын ужасьёс асьсэ палась кылбурчиоссы сярысь пырыен-пырыен материал бичало но калык син азе поттыны тыршо. Татысь историяя но этнографияя отдел дасяз но печатлаз Тӥгырменын вордскем кылбурчилы но журналистлы Геннадий Камашевлы сӥзем буклет - библиографической указатель. Татчы пыризы авторлэн улэп дыръяз печатламтэ кылбуръёсыз но. Нош кылем арын потӥз Уддядиысь кылбурчилэн Владимир Бубякинлэн "Тузончик Кузя" пичи гинэ сборникез. Татын поэтлэн 80-тӥ аръёсы удмурт но ӟуч кылын гожтэм кылбуръёсыз. Таӵе кузьым дасямын вал кылбурчилэн 70 ар тырмонэзлы. Жаляса верано, сое В.Бубякин ӧз адӟы ни. Матысь дыре потыны кулэ улонысь вазь кошкем крезьгурчилэн Николай Уткинлэн кырӟан бичетэз. Т.НИКОЛАЕВА. ДЫШЕТОН УЖПУМЪЁС Парта сьӧрын - дас кык ар Тулыспал толэзе вуылӥ Иже, пырай Удмурт кун университет. Пумиськеме потӥз эшъёсын но дышетӥсьёсын. Соос монэ история но обществознание предметъёсты дышетӥсь луыны дышетӥзы. Ми сярысь тужгес но сюлмаськиз Мария Михайловна Мартынова. 70-тӥ аръёсы ӧм тодылэ, мар луоз 20-30 ар ортчыса. СССР куашказ, КПСС нимо валтӥсь кужым быриз, Совето власть дыръя лэсьтэм вормонъёсты курланы кутскизы. Политикаын воштӥськонъёсын сэрен вошъяны кутскизы учебникъёсты но программаосты, нырысь ик историен но обществознаниен. Ми, дышетӥсьёс но, нош но нош дышетскиськом, ми быдэстыны кулэ ук кунмылэсь выль куронъёссэ. Нош воштӥсько-а дышетскисьёс? Бен, воштӥсько. Но ӝожомыса верасько, нылпиосмы тужгес ярато Незнайкаез, нош Знайкаез уг но тодо кадь. Туж тросэзлэн нылпиослэн астэ ачид дышетон мылкыдзы ӧвӧл. Соос возьмало милесьтым дышетэммес гинэ. Ми дышетӥськом соосыз урокъёсын но урок бере пӧртэм ужрадъёсын. Трос дыр кошке соослы дасяськонлы, нош нылпиос дышо дырзэс юнме быдтыны: юо, асьсэдыз алама возё, алдаськыса яке азьтэмъяськыса уло. Сыӵеослы котькыӵе чебер, умой кылъёс вера, умой уз будэ ни. Мон дышетӥсь бере, туж валасько воштӥськонъёслэсь кулэзэс. Но 12 ар дышетон программалы мон пумит луисько, малы ке шуоно, нырысь ик нош дышетӥсь курадӟоз. Умойтэм семьяосысь нылпиосын эшшо одӥг мултэс ар ужано луоз. Мон уг оскиськы, 12 ар дышетскыса асьме нылпиос визьмогес луозы шуыса. Асьмелэн вал ини туж умой законмы: вань нылпиослы одно ик 10 класс йылпумъяно. Асьмеос умой тодӥськом, кызьы быдэсмиз та закон. Кивалтӥсьёсмы но адӟымтэ-кылымтэ улсын уло. Кыӵе умой воштӥськонъёс луысалзы школаосын, куке кивалтӥсьёс но депутатъёс огазе кариськыса удмурт кылэз зэмос кун кыллы пӧрмытыны быгатысалзы ке! Чидантэм возьыт вераны, та лэчыт ужпум трос аръёс ӵоже уг быдэсъяськы шуыса. Н.ЕМЕЛЬЯНОВ. Можга ёрос, Удмурт Пычас гурт. КНИГА ӜАЖЫЯДЫ Вячеслав Ар-Сергилэн "Уй вадьсын - бубылиос" романэз пумысь малпанъёс Мон нош ик шумпотыса кутӥ киям Вячеслав Ар-Сергилэсь выль книгазэ. Лыдӟись "Уй вадьсын - бубылиос" романэз ӝыныяз вуыса медаз пытса шуыса, автор ваньзэ лыдэ басьтэм. Нырысь ик - быдӟалазэ. Палэнысь гуртын улӥсьёс книгаез автобусэ я поездэ кутӥзы ке, мыныкузы но бертыкузы со лыдӟемын луоз ини. Книга ӝажы вылэ понод но - вуоно пумиськытозь! Романысь вань образъёс, солэн сюжетэз йыре компьютерысь винчестере кадь кылё. Мылкыд - ӟеч киноез учкем бере кадь. Зэмзэ но, лыдӟон вискам мон ӵем малпаськылӥ: "Та произведенилэсь усто кинофильм пӧраны луысал". Кытӥяз туж умой шӧдӥське, автор ачиз но со сярысь малпаськылэм шуыса. Лыдӟисьлэсь, учкисьлэсь-а шуод, вань куронъёссэ чаклам: татын ик - пӧртэм учыръёс, татын ик - детектив, кулэ ке - эротика, чебер легенда, мистика. Зэм, учыръёс азьланьтӥськемъя, куддыръя аслэсьтыд ачид юалляськиськод: "Кин та? Брем Стокер? Райдер Хаггард? Конан Дойль?" Но та малпанъёсын кыдёке уд вуы. Татын - Сергеев, Вячеслав Ар-Серги! Вием кышномуртэн ӵош автор лыдӟисез азе интрига куштӥз но, соиз, валамон, синъёссэ кадръёс бордысь уз палэнты ни. Сыӵе ик луыны кулэ зэмос произведение. "Уй вадьсын - бубылиос" кык амалэн гожтэмын. Нырысь ик - ваньзэ адӟись-тодӥсь муртлэн синмыныз (позиция всеведения), собере валтӥсь герой ик (Аруд) нырысетӥ ымныр луылэ. Валтӥсь геройлэсь интызэ тазьы вошъян туж шер пумиськылэ, дыр. мынам тодэме но ӧвӧл. Тунсыко пӧрме вылэм. Иське, писатель вань луонлыкъёсты уже кутэм. Нырысетӥ учырын автор котьма сярысь вераны быгатэ, солэн синмыз котькыӵе сюжетэз суреда, котькыӵе персонаж вылэ вуэ, котькудӥзлэсь малпанъёссэ, лул висёнъёссэ возьматэ. Кыкетӥ учырын, автор ачиз валтӥсь герой кариське (нырысетӥ ымныр луэ). Писатель умойгес усьтыны быгатэ висъям муртэзлэсь пуш дуннезэ. Таӵе амалэ выжылыса, Вячеслав Ар-Серги лыдӟисьсэ эшшо но ӟечгес оскытыны быгатэ. Угось ас кылэмез, адӟемез яке лэсьтэмез сярысь гожъя. Романъёсты кылдытъянын вань на куинетӥ амал но - сюжетэз гожтэтъёс пыр возьматон. Пичияк ке но, созэ но автор уже кутэм. Вань амалъёс туж быгатыса герӟамын - лыдӟись та сярысь малпаса но уг вуы (ма бен, солы со кулэ но ӧвӧл). Лыдӟисьлы, валамон ини, тунсыко гинэ мед луоз, сюлэмаз мед пыроз, книгаез палэнтэмез медаз поты. Соин ик Ар- Серги, лыдӟисьсэ гажаса, мултэс дышетытэк (чеберлыко уж - наука ӧвӧл), шутэтскыны ӧте кадь. Верай ни: та романэз киноез кадь лыдӟиськод-учкиськод. Нош театръёсы йырез тӥяны уг, шутэтскыны ветло. Озьыен, "Уй вадьсын - бубылиос" романлэн лыдӟисез туж трос луоз. Нокинэ но, йыр вадьсаз нушы возьыса, чеберлыко ужез лыдӟыны уд косы, со тунсыко ке ӧз луы. Писательлы аслыз гинэ со ужез быдэстоно луэ - бордаз маин ке кыскон вылысь. Табере - роман котырегес. Вячеслав Ар-Серги ӝик-ӝик басьтӥське эпической жанр борды. Берпуметӥ удмурт Тӧролэн, Дунайлэн, кунпусэз (тӧро боды) котыртӥ (сое шедьтыса, узыр, кужмо луод, пе) бергало вань персонажъёс. Ачиз но автор, лирической герой кариськыса, пумит ӧвӧл вылэм сое адӟылыны. Со - Быръем Адями. Со гинэ кияз кутыны быгатэ тӧро бодыез. Нош боды бордын - удмурт калыкез эрико, шудо карись кужым. Эпос! Вань удмурт калыкез герӟаськыны ӧтись маке! Кылъя ӵыжы-выжыосмылэн (финнъёслэн - "Калевала" - но эстонъёслэн - "Калевипоэг") эпосъёссы сямен, удмурт калык творчество таӵе кужымозь ӝутскыны ӧз быгаты бере, асьмеос ялан утчаськомы на сое, кудӥз быгатысал ваньмес валче карыны, одӥг мылкыдын шудо но эрико улыны. Быдӟым книга... Таяз учыре - тӧролэн бодыез. Нош быдӟым кужым сётӥсь макеос котырын котьку сьӧд кужымъёс бергало. Соослэн эшшо но вормонтэм луэмзы потэ. Нырысетӥ бамъёсаз ик - Аргус, Уй кузё. Сотона? Люцефер? Озьы автор ивортэ, лыдӟись татын мистикаен но пумиськылоз шуыса. Нош мистика ик-а? Зэмос улон ӧвӧл-а? Тани лушкем вырись ужбергатӥсьёс но сыӵе ик буёлэн суредамын. Калыклэсь вирзэ пумозяз юон понна, соослы но тӧро боды кулэ луэм. Романын учыръёс одӥг нунал ӵоже ортчо. Но со Аруд понна туж секыт нунал. Кытчы гинэ уг вуы, кыӵе гинэ учыръёсы уг шедьы! Чаклано ке, нокыӵе адями сомында лэсьтыны ӧй быгатысал. Но ужпум со бордын ӧвӧл. Таӵе амалэн автор лыдӟисьсэ туж зол "кортнаса" возе, мадёнзэ уг нуйты. Веран кылыз но солэн аслаз. Кытысь ке кыӵе ке текстэз авторзэ учкытэк лыдӟид ке, соку ик шӧдод: "Таиз - Ар-Серги". Угось котькуд ужаз пумиськылозы "тюак!", "ыбыштӥз" но та выллем макеос. Огласянь со умой но ӧвӧл, дыр. Собере кылдэ на романлэн нимыз пумысен юан. Малы со (тани нош ик азьпалаз учконо луисько - вунэтӥ) "Уй вадьсын - бубылиос" нимамын? Малпаськи-малпаськи - ӧйгес вала. Оло, ӟуч кылэ берыктэмез чебергес, вунонтэмгес? Автор таиз сярысь малпаськытэк уг улы, луоз. Оглом вераса, роман (озьы ик - быдэс книга, кудӥз ӟуч но удмурт книгаосты огазея: "И плакало небо...", "лемлет гондыръёс") туж шуныт мылкыд кельтэ, малпаськытэ, серекъятэ. Мон критик ӧвӧл ке но, аслэсьтым малдпанъёсме вератэк ӧй чида. Нош студентъёслы, озьы ик - зэмос литературоведъёслы татын трос бугыръяськыны луоно. Бен, котькуд персонажъя... "Уй вадьсын - бубылиос" романэз лыдӟыса, йырам таӵе чуръёс кылдӥзы. Пророк?! Вячеслав Ар-Сергилэсь романзэ лыдӟем бере. Тодад вай: Нырысетӥ веростэ лыдӟыса ик Шуи вал мон тыныд: "Россия Сибирен узырмоз-пушъёз, Нош удмурт литература - Сергеевен". Кыкетӥ люкетсэ Ломоносов ӧз - Ачим йылтӥ. Вуиз вакытэз! А?!! ... Только... Соку но, али но Ваньзэ ӧй вера. Владимир КОТКОВ. Россия Федерацилэн кун наградаосыныз пусъён сярысь Россия Федерацилэн Президентэзлэн УКАЗЭЗ Кун азьын вормонъёсыз, калыкъёс куспын эшъяськонэз но ӵош ужанэз юнматонын бадӟымесь азинсконъёсыз но кема аръёс ӵоже пайдаё ужамез понна Эшъяськон орденэн пусъёно: Валиахметов Игорь Наримановичез � акциосын "Ижевский радиозавод" огазеяськонлэсь валтӥсь директорзэ, Удмурт Республика. Россия Федерацилэн Президентэз В.ПУТИН. Москва, Кремль, 2000-тӥ арын 6-тӥ июле. � 1252. Дэбес педучилищелы - 70 Кулэ-а Байгурезь выжые колледж? Сизьымдон ар ӵоже ни Дэбесысь педагогической училище улэ, ужа но дася пӧртэм специалистъёсты. Отысь бадӟым залэ трос куноос лыктэмын. Ваньмызлэн ымныразы шумпотон, куд-огез синвузэ но уг ваты... Мынам но тодам лыкто устоесь дышетӥсьёсы: удмурт кылъя но литературая - Манефа Михайловна Пономарева, ӟуч кылъя - Наталья Васильевна Главатских, химияя, биологияя но музъем ужанъя - Раиса Михайловна Шкляева. Математикалы дышетӥзы Мария Афанасьевна Емшанова но Валентина Николаевна Дождикова. Тужгес ярало вал Леда Стефановна Левандовскаялэн урокъёсыз. Чебер, егит дышетӥсьмылы ваньмы кадь ик синмаським ми, гуртын будэм нылъёс но пиос. Соку ӧм тодылэ на вал, ма со гамма но нотной стан. Кыӵе пӧртэм музыкальной инструментъёс луо? Кызьы пуктоно куараез? Кырӟаку кызьы шокано? Ӧй вал со валантэм юанъёс. Татьяна Андреевна Юзефович нуиз гигиенаез но педагогикаез. Туж усто валэктылӥз, кыӵе пӧртэм сямъёс луо - меланхоликъёс но сангвиникъёс, холерикъёс но флегматикъёс. Суреданы ӵемысь ветлӥмы Чупчи шур дуре Байгурезь пала. (Та пумиськонын мон юри басьтӥ Байгурезьлы сӥзем этюдэз. Туж усто быдэстэм сое туала дышетскись Полина Опарина). Алевтина Николаевна Капачинская нуиз ӟуч литературая урокъёсты. Историен дышетӥз Юрий Филипповч Перевозчиков, - Туж яратылӥ Геннадий Васильевич Ложкинлэсь географияя урокъёссэ. Со ортчытъяз пӧртэм экскурсиос. Нырысьсэ соку, 1953-тӥ арын, вуылӥм Ижевске, Воткинске, Перме. Геннадий Васильевичлэсь одӥгзэ уроксэ тодам ваисько. Тодматскиськом СССР-лэн кунгожъёсыныз. Гуртэ аспӧртэм уж сётӥз: кыӵе писательёс кыӵе книгаосазы яркыт гожто кунгожъёс сярысь. Та дышетӥсьмы 1950-тӥ арын ик вералля ни вал асьме палась нефть сярысь. "Сьӧд зарниен" зарезьмы вӧлске Татарие но, Башкирие но. Дышетским черк бордысь пу коркан. Озьы ик пу юртын общежитие вал. Котьку толлы дасямы пу. Сое вандӥськом, пильылӥськом, лач тыриськом. Асьме столовойын пӧраны бакча сиёнъёс дасяськом вал, колхозъёсын ужаса. Озьы группаен-группаен картошка копаськом, етӥн ишкиськом. Сӥзьыл куазь кезьыт, пыдъёс но киос кынмо, сием потэ, шунскиськом бадӟым тылпу вӧзын. Пусйыны кулэ: 1950-тӥ-1954-тӥ аръёс - туж секыт но сютэм аръёс. Озьы ке но, бадӟым мылкыд вал дышетскыны. Соин но, вылды, 32 иськемез пыдын вамышъяллям эшеным. Туж мӧзмыса берталлямы Тюптие. Отын ик ортчытӥ педагогической практикаме. Соку валай, кыӵе шуг со одӥг урокын кык классэз дышетон. Сыӵе тодэ ваёнъёс бергало йырын, училищелы 70 ар тырмон сӥзем пумиськонын. Кык азьло директоръёс 48 аресъем Чирков Виталий Викторович но 70 аресъем Бабайлов Валентин Георгиевич кызь аресъем ерпечкаос кадь возьмато мудрон степ эктонэз. Концертын тужгес сюлме кельшизы бадӟым хор но оркестр. Вераме потэ, "Удмурт кенеш" огазеяськон татчы ыстӥз Дэбесын будэм дано кырӟасез Николай Кардапольцевез. Бен, вал, дыр, дыго-мого учыръёс но. Шуом, Кардапольцев сяна, одӥг адями но ӧз возьматы удмурт номер. Рос-прос ӧз маде но ӧз возьматэ татысь потэм дано ветеранъёсты. Дэбес педагогической училище асьме кунын огназ ас нимыныз кылемын. Ижын, Сарапулын, Воткаын но Можгалан - ваньмыз колледжъёс. Малы? Удмурт специалистъёсты дасян интыез кунгож сьӧрысь пунэмам кыл чеберъя шат? Сюлмысьтым тау карисько дышетӥсьёслы но районысь кивалтӥсьёслы, кин дасяз но ортчытӥз та пумиськонэз. Ваньмызлы умой тазалык, шудо улон, капчи мылкыд. Милитина Михайлова, ужысь ветеран. АДЯМИ НО ИНКУАЗЬ Кушыли Берпуметӥ дышетскон нунал. Ваньмыз шумпото. Нылпиос сыло сяська керттэтъёсын. Уката но йӧно адӟисько сьӧр Пудвай гуртысь нылъёс, соослэн киосазы туж чебересь сяськаос. Абдрай, кузьмам сяськаоссы кырын будо вылэм. Пиналъёс одӥг кылысь веразы, пионъёс, пе, со, удмурт нимзэ ум тодӥське. Эскероно кариськи книгаосысь, словарьёсысь удмурт кылэ берыктэм нимзэ. Ӧй шедьты! Кема аръёс ӵоже "Гуждор" фольклор ансамблен ужаса, гуртамы утиськем кырӟанъёсты, выжыкылъёсты нылпиосын гожъямы ни. Берло дыре инты, будос нимъёсты но эскериськомы. Таяз аре выльысь луонлык кылдӥз та будослэсь нимзэ утчаны. Асьме азе ужпум пуктӥмы: котькуд шер пумиськись будосъёслэсь удмурт нимзэ шедьтоно. Глазов ёросын сыӵе будосъёс пӧлы пыртэмын пион уклоняющийся но. Ми палан, Пӧжы, Пудвай, Помаяг котырын та сяська будэ бере, солэн удмурт нимыз но луыны кулэ. Кык ар ёрос утчамы, юалляськимы. 8-тӥ классысь Антон Юшков вераз, песянаез та сяськаез кушыли шуыса нима, укно уламы но, пе, будэтӥськомы. Удмурт сямен туж чебер кылӥське ук! Валамон ини, туж шумпотӥмы. Антонлэн песянаезлы эшшо но синмаськимы. Та дырозь утьыны быгатэм будослэсь сыӵе жингыртӥсь удмурт нимзэ. Кышномуртлэсь быгатӥсь киоссэ тодӥськомы ни вал. Солэн кузькышетъёсыз, ӝӧккышетъёсыз утиськыса уло Пӧжы гуртамы кылдытэм музейын. Тодэммы потӥз, кытын кушыли ӵемгес будэ, ку сяськая, кыӵе висёнъёслэсь кутӥське. Пӧжы (Золотарёво) гуртамы улэ эмъюм будосъёсты тодӥсь кышномурт Анна Ильинична Третьякова. Кыло-буро адями, клыклы котьку юрттыны дась, вазиськись. Кружоке ветлӥсь нылпиосы но гажало та нылкышноез. Кыӵе ке эмъюм будос, вашкала сямъёс, уй пал удмурт дӥськут сярысь тодон понна, капчиен вазиськыны луэ тросэзлы песянайёслы. Ми юалляськоно кариськимы Анна кенаклэсь та сяська сярысь. Со но нимзэ кушыли шуиз. Эмъюм турын, пе. Сое парыса юо пӧртэм висёнъёслэсь: ӟигар бырыку, йыр поромыса висьыку, сюлэм ӵогъяку. Та будос аслэсьтыз йырзэ быдтэ ни чебереныз. Эсэпсэ валатэк ишкаменымы, бырон калэ вуэмын ни со. Кушыли угось кидысэн йылэ. Сяськазэ октыса, солэсь йылон сюрессэ вандӥськомы. Пудвай гуртысь (со школамылэсь вить иськемын интыяськемын) Алёна Золотарева кушыли сярысь мадёс но шедьтӥз. Мадиз сое Нина Григорьевна Токмина. - Ми палан возьёс вылын кушыли сяська гинэ будэ вылэм. Урод адямилэн йырыз кур луэм та чебер будослы. Выжыеныз ик порылэм соосты. Одӥг пересь воргорон, сяськаосты утён понна, кушъёсы, пеймытгес интыосы, выжыоссэс выльысь мерттэм. Озьы кушыли выжытэк бырымтэ, инмар та сяськаез утьыны быгатэм. Нюлэс дуръёсын, кушъёсын будэменыз сыӵе ним солы кылем. Тодӥмы, оло, та сяськалэн мукет нимыз но вань. Шедьтомы ай созэ но. Кушыли ватӥськысагес будыны яратэ. Яркыт-льӧль бурдъёссэ кема уг возьы, кык-куинь нунал шунды шорын мальдэм бераз, сяська бездэ. Шораз кылё сьӧд тэчетъёсыз, кидысъёс шобыртэмын пуртэсъёсын. Пото соос одӥг интыысь, вить люкетъемесь, кизили кадь луо. Бӧрысь но кушыли паймытэ аслыз гинэ тупась сямъёсыныз. Кидысъёссэ, пуртэсъёсысь пазьгыса, кыдёке кизе. Кидысъёс кузялэсэсь, кӧжы быдӟаесь, чиль-сьӧдэсь. Песянайёс егит дыръязы соосты весьлы но октылӥллям. Куаръёсыз кушылилэн пинё, садын будӥсь пионлы быдэсак тупало. Модосэз чиньы зӧкта, котыраз будӥсь турынлэсь лекос ӝужыт ӧвӧл. Пезь-пезь будэменыз висъяське. Шораз учкыса синмаськоно. Йӧно тусыныз, чебереныз кушыли нокыӵе будослы уз сётскы. Со мусо сяськаяськыкуз но, кидысэз вуыку но, кидысэз усем бере но. Одӥгез жаль: та сяськалэн улон даурез туж вакчи. Таяз дышетскон аре валан-тодонмы выльысь йылӥз, гуртэнымы данъяськонмы будӥз. Та шер пумиськылӥсь будос пыртэмын "Горд книгае". Иське, азьпалан трос ужъёс на. Сяськалэсь удмурт нимзэ шедьтӥмы, табере сое утён сярысь сюлмаськоно. Кружоке ветлӥсь нылпиос ваньзы сое валало, тодо. Кушыли - пичи гинэ будос, нош кӧня мылкыд адямилы сётыны быгатэ. Со гуртмылэн, ёросмылэн, удмурт шаермылэн данэз. Ми чидатэк витёмы кушылилэсь бер тулыс сяськаяськемзэ. Л.ЛУКИНА. Изгуртэз ик быръёно луоз Ижевскысь Завьяловое нуись сюрес вылын котьку уно машинаос ветло, тужгес но - гужем. Уго сопалан туж уно сад-бакчаос, дачаос. Отчы интыяськемын трос гуртъёс. Отын ик республикмылэн "Омыр ӟезьыосыз" - аэропорт. Транспортэн мынӥсь-ветлӥсьёс уг но валало, шӧдске, макем кышкытлык вите соосты. Позимь шур вамен ортчись выжез ог дасо ар талэсь азьло тупатъяны чаклало ни вал. Но котьку ик секыт ужпум кылдэ - кытӥ келяно транспортэз? Выжез 6-ысен 10 метрозь паськытатыны чакламын. Уж борды июне кутскозы ни, дыр. Соку кызьы шедёд на Завьяловое но аэропортэ? Валамон ини, Сарапул трактысь Изгурт пыр. Но со понна сюрес данаклы кузьгес луоз. Шуом, Изгуртозь 10 иськем, отысен ёрос центрозь эшшо 10 иськем. Уно гинэ эстӥськон кошкоз. Вань на бусы сюрес. Со поттэ Вуж Мартьян гуртэ. Таизэ асфальт трактэн уд ӵошаты. Собере секыт автомашинаос но автобусъёс отӥ уз ортче. Кыле на одӥг сюрес - Изгурт пыр. Б.СЕРГЕЕВ. Бускельёсмы дорын Кырӟась мурт кутэтысен ик кырӟа Дыр уйшоре вуэ ни, нош "шулдыр ӝытъёс" уката зол "кисьтыны" ӧдъязы - котькуд кырӟанзы-эктонзы бере сюлэмазы выль кужым пыӵа, шӧдске. Ай, милям, пе, куать часын Набережные Челные потоно, отын "Вормонлы - Салют!" смотрын калык ансамбль ним понна нюръяськоно. Вот зол! Аристъёс понна со бадӟым вормон луыны кулэ. Нош учкисьёс понна соослэн нимзы одӥг - "Шулдыр ӝыт". Шулдыресь ке шулдыресь ни Башкортостанысь Выль татышлыысь усточиос: удмуртсэ но, бигерзэ-башкирзэ но паймытозы, интыязы эктытозы. Ма, со гинэ-а - 1998-тӥ арын Эстониын ӵыжы-выжы луись калыкъёслэн фестивалязы но, эктонъя калык куспо фестивальын но соослы туж кужмо чабизы, лауреат ним сётӥзы. Уката ик китаецъёс абдраллязы - матазы лыктыса, йырысенызы пыдозязы учко, пыдъёсынызы удмурт манер тапыртыны выро. Нош кылдӥз ансамбль 1991-тӥ арын. Зульфира Зарипова котыраз ас кадяз ик кырӟаны- эктыны яратӥсьёсты огазеяз. Шонергес луоз, кырӟантэк улыны быгатӥсьтэмъёсты шуид ке. Сотэк кызьы валэктод. гуртын бадӟым хозяйствоен улӥсь муртъёслэсь вань ужзэс, семъязэс куштыса, концертъёс возьматыса ветлэмзэс. Куд-огез нош кузэн ик ветло. Тани Ольга но Иосиф Константиновъёс, Наталья но Ринат Тимерхановъёс, Мадина но Салахуттин Нуртдиновъёс олокӧня арзэ ини сцена вылын ӵош - кырӟало-экто. Нуртдиновъёс сярысь нимысьтыз вератэк ӧвӧл. Вот кинъёс асьсэды кырӟанлы сёто ке сёто ни: вить нылпиё анай-атай сьӧрло гуртэ репетицие ветлыны ваньмо. Со гинэ мар! Покчиез пизылы куинь толэзь дыръя соос киязы нуныен Удмуртие фестивале ветлӥзы. Мадина номеръёс вискын пизэ эскерыны, нонтыны бызьылӥз, нош сцена вылын кырӟакуз, шофёрзы утиськиз. Али Саша но кырӟаны усто будэ. Ансамблез лыдӟисьёсмылэн син азязы пуктон понна асьмелэнъёсынзы ӵошатыны вырисько. Кудӥзлы тупамонгес бен со: "Чипчирганлы-а", "Инвугурлы-а", "Зарни шеплы-а"? Маиз ке но, зэм, тупа кадь, но мукет ӵошатыны уг луы, "Шулдыр ӝыт" ас сяменыз шулдыр. З.РЯБИНИНА. Быдӟым Вормонлы - 55 ар Нюр вуэ ватскыса Ог дасо аръёс талэсь азьло та адямиез тодо но тодмало вал, дыр, быдэс Алнаш ёросын, Михаил Григорьевич Григорьев Быдӟым тылож азьын но, со бере но ужаз ветеринар луыса Сырьезьын. 78 аресъем пиосмуртлэн улоназ ныро-гопо интыосыз ӧжыт ӧй вал, егит вакытаз ик пельпум вылаз трос шуг-секытъёс погыльскизы. Войналэсь азьло гуртъёсын уг тырмо вал фельдшеръёс, ветеринаръёс. Егитсэ, амалозэгес пиез лэзё Алнаше, татысь Григорьев бертэ ветеринар-фельдшер луыса. Кема ик ужаса уг вутты, кошке армие. Война кутскемен, соосты дышето Иж сьӧрысь офицеръёсты дасян училищеын. 1942-тӥ арын толшоре келяло фронтэ. Трос ик ожмаськыса уг вутты, секыт висьыны усе. - 1942-тӥ арлэн пумаз, коньывуон толэзе, дыр, выльысь мынӥ войнае. Тазалыке лябӟемен, оже ӧз ни нуэ, ветеринар-фельдшер луэмме тодыса, санинструкторе басьтӥзы. Эмъясьёс тырмымтэен, пудо-животэз но, адямиез но огкадь йӧнатӥм. Уг кылды Михаил Григорьевичлы ожмаськыны но, солдатъёсты но йӧнатыны. 1942-тӥ арын 17-тӥ декабре немецъёслэн котыртэмазы сюре. - Ми кык кузя кылим, эшмес снайпер вииз. Ватскыса ыбылӥськисез ӝоген ми кутӥм, но шумпотонмы вылымтэ со. Кытысь ке ӧвӧл ог дасо немецъёс потӥзы. Тыбыр шорамы пыӵал урдыса милемыз нюлэс пыр нуыны кутскизы. Кӧня ке мыныса, ми пӧлы эшшо дасо пала солдатъёсты донгазы, собере эшшо, эшшо. Бератаз 400 пала люкаським, дыр. (К. Симоновлэн "Живые и мертвые" книгаысьтыз одӥг сюжетэз выллем.) Вуттӥзы Попково гуртэ, кык корка люказы. Отысен поезд вагонъёсы туйылыса келязы шунды пуксён пала. Ми пӧлын солдатъёс гинэ ӧй вал, кышномуртъёс но, пиналъёс но, ваньмы олокӧня вагонъёсы пытсамын. Кык ар ӵоже фашист лагерьёсын костаськи. Нырысь-валысь милемыз возизы Латвиын, собере Кёнигсбергын курадӟытӥзы, бератаз нуизы Польшае, - пленэ сюремез сярысь вера Михаил Григорьевич. Немец ки улэ сюремъёсты кырӟатыса-эктытыса ӧз возе. Сиён-юонэн но бусьтыр уг шумпотто вал: кружка ву но нянь выллем маке, яке шыд шуыса олома зын ву сёто вал. Сиёнтэк-юонтэк возизы. Олокызьы но курадӟытӥзы. Окопъёс соослы гудӥм, из нуллӥм. Ужамтэ ужмы ик ӧй вал ни, дыр. Трос но секыт ужаса, сютэм улыса кужым но ӧй вал ни, тросэз висьыны кутскизы. Мынам но тазалыке уродмиз. 1944-тӥ арлэн пумаз Горд Армия матэ вуэмъя, немецъёс воксё урмизы. Милемыз шаплы-шаплы улляса мукет лагере выжтоно кариськизы. Кинлэн мынэмез уг луы, интыяз ик ыбылыса кельто. Шӧдӥське, курдало - пыӵалэн донгаса, кесяськыса бызьыны косо. Мынам пыдъёсыным мынэме уг ни луы, соин ик адӟымтэгес дыръязы мон уськытӥськыса кенер вӧзы питыртӥськи. Куазь ӝомалэн адӟыса ӧз вуттэ. Нош мыным одӥг кадь вал: быземе уг луы - уси ке ыбозы, ватӥськемысь шедьтӥзы ке, тожо виёзы. Но тазьы коть, оло, пегӟыны пӧрмоз. Уин ини, кошкемзы бере, лагерьын шыпыт луыса дасяськи кенер вамен потыны. Ӧжытак ветлыса, оген-оген пленнойёс потылыны кутскизы. Озьы 7 кузя люкаським, уй пеймытэн ик лагерьысь кошкыны быгатӥм. Табере сюрес одӥг, уй куспын кызьы ке но кыдёкегес вуттӥськоно, югыт луэм бере утчаськисьёс медаз адӟе. Михаил Григорьевичлэсь верамзэ кылзӥськыса, йырку ик лӧптэ, юзыр-кезьыр луоно. Лагерь бере асьмелэнъёс доры вуэмез сярысь мадёнзэ азьланьтэ ветеран: - Лагерь котырын олокӧня иськем нюр инты вал, кот. Сыӵе интыостӥ уин кытӥ кускозь выйыса, кытӥ кӧт вылын нюжтӥськыса мынӥськом, ӝоггес асьмелэнъёс доры вуоно. Нош нуназе, немецъёс медаз адӟе-шӧдэ шуыса нюр-котэ выдыса кыллиськом. Мон эшъёсылэсь нимъёссэс но уг ни тодӥськы. Ӟигар ӧвӧлэн, висемен, сием потэмен ӝоггес азьлань мыныны тыршоно вал. Асьмелэнъёс доры ваньмы ик ӧм вуэ ни кадь. Нош ик пленэ сюроно ке луим, ӵош медаз кутэлэ шуыса люкиськыса нимазгес кариськыса мынӥм. Олокӧня уй-нунал нюжтӥськемзы бере, пленысь пегӟемъёс потӥллям Белорус музъем вылэ. Советской солдатъёс кие сюрыса, соосыз сюдӥллям, дӥсяллям. Отысен ик юалляськыны кутскизы: кинъёс луиськом, кытысь мынӥськом, кызьы немецъёс ки улэ шедим но мукет. Берло но ай та выллем юанъёс трос гинэ сётказы, олокӧня пол КГБ-е допросэ ӧтчазы. Белоруссиысь военной частьысь соосты пыдын лэзё Брестэ, куинь нунал ӵоже вамышъяно луизы. Татысен но йырез поромытӥсь юанъёсын нерад кариллям, фильтрация, пе, нимаське вал со. - Брестын ик медосмотр ортчытӥзы. Тазалык ӧвӧлысь нокыӵе ож сярысь вераськон ӧй вал ни, эмъяськыны лэзизы, Озьы 1945-тӥ арын толшоре дорам бертай, собере выльысь йӧнатӥськи на. Вить ар ӵоже костаськоно луиз врачъёс дортӥ, но со висёнъёсты йӧнатод на шат. Война бырем бере, Григорьев дышетскыны пыре Можгаысь ветеринарной техникуме. 1948-тӥ арын сое йылпумъяса ужаны кутске аслаз гуртаз ик пудо эмъясь луыса. Та удысын тыршиз пенсие потыотозяз. Ӟеч ужамез понна пусъемын медальёсын но данъян грамотаосын. Гуртын ужакуз Михаил Григорьевичлы пумит султӥсьёс но вал, ужамзэ- улонзэ сьӧдмаса вылӥослы кагаз гожъясьёс. Соин сэрен данъян кылъёс, кузьымъёс уно пол палэнэтӥ ортчылӥзы. Пленэ сюремез понна олома но верасез вал, ултӥяны турттӥсьёсыз но чидаз, вормиз со. Вань сюлэмзэ сётыса ужаменыз гажано адями луиз. Н. Прокопьева. "Мушо му" Мар со этнофутуризм? Маин сое "куртчоно"? Кинъёс та бордын ужало? Та выллем юанъёслы валэктон шедьтыны быгатоды, дыр, та нуналъёсы К. Герд нимо национальной музейысь выставкаен тодматскыса. Туннэ 17 часысен татын усьтӥське егит финн-угор суредасьёслэн ужъёсынызы "Мушо му" нимаськись адӟытон. Асьме доры лыкто коми, пор, эрзя, эстон но финн усточиос - ваньмыз 20 мурт. Нош солэсь но трос - ог 30 пинал суредасьёс - Удмуртиысь. Асьме дорын таӵе адӟытон фестиваль витетӥзэ (арлы быдэ) ортчытӥське ни. Сое радъянлы трос кужымзэс сёто художникъёс Юрий Лобанов но Валентин Белых. Туэ та ужрадлы коньдонэн юртто "Окан" финансово-промышленной фирма, муш вордонъя "Тенториум" компания но Селта ёросысь "Свобода" колхоз. Т. Николаева. Тодэ ваён Мугорзэ музъем ӵоктаз меда? Тодмо: Константин Яковлевез литературалэн историяз "буржуазной" мылкыдыз понна пыкылӥзы. Нош книгаоссэ лыдӟисьлы ӧз возьматылэ. Туж аспӧртэм сюресэз ортчиз со. 1933-тӥ-1937-тӥ аръёсы Куӟебай Гердэн но Иван Бурдюковен ӵош пукиз Соловки шормуӵын. Тупаны но кулэ: Гердэз но Яковлевез пуктӥзы одӥг нуналэ - 1932-тӥ арын 13-тӥ мае. Ыбизы но озьы. 1937-тӥ арын 1-тӥ ноябре. Константин Сергеевич сярысь трос тунсыкозэ мадиз солэн сузэрезлэн нылыз (племянницаез) Алнаш ёросысь Кузебай гуртын улӥсь Валентина Николаевна Дмитриева: - Мон Яковлевен ачим адӟиськемын ӧвӧл. Тодӥсько сое племяницаез Абык ӵужапай но пиез Илья ӵужмурт верамъя гинэ. Кыӵе семьяын будэм Константин Яковлев? - Со вордӥськем Пичи Кузебай гуртын, шоро-куспо улӥсь семьяын. Анаез - Ӟимекей, атаез, Байметов Ӟакан (гожтӥське Яков Михайлович). Нылпиоссы трос вылӥллям. Азьло уноез кулыло вал, куинез сяна быдэ вуиллямтэ. Бадӟымез - Олексан ӵужмурт. Таизлэн сизьым нылпиез вылэм - куать пи, одӥг ныл (Абида ӵужапай). Собере - Игнатей ӵужмурт (Константин Сергеевич) но пичиез - анай (Ольга Яковлевна). Соослэн атай нимъёссы малы ке пӧртэмесь, мугзэ мон валэктыны уг быгатӥськы. Куиньназы ик - одӥг выжыысь сузэр-вынъёс. Выжыязы трос аспӧртэм нимъёс пумиськыло - Ӟакай, Камей, Абида, Ӟимекей, Гарифа, Мадина. Куд-огез бигер нимъёслы матын, (асьсэос чылкак удмурт выжыысь ке но). - Тӥ тодӥськоды-а вал Константин Сергеевич Яковлев со Игнатей ӵужмуртты шуыса? - Малпаськом вал, малы ке шуоно, Абык ӵужапай вералляз Игнатей ӵужмуртлэн "Сюртэм Карпа", "Володя", "Туноос" книгаосыз сярысь. Берлогес "Молот" журналэ Анатолий Уваровлэн "Вунэтэм нимъёс" материалэз потӥз. Отын гожъямын Константин Сергеевичлэн дышетскемез. Уфа губерниысь Бирск городын ужамез сярысь. 1917-тӥ-1919-тӥ аръёсы Алабго уездысь исполкомлэн но земской управалэн членэз вылэм. 1921-тӥ-1929-тӥ аръёсы ужам хозяйствоез нуон ёзъёсын. К. С. Яковлев сярысь мадёнэн журнал вуыку, 86 аресъем анае ми дорын улэ вал. Визьмыз ӧжытак сураськемын, милемыз уг тодма ни вал. Соин ик "Молотэз" нырысь ӧй возьматы. Арня ортчыса гинэ шуисько: - Тани, анай, учкы ай: кин адями та? Константин Сергеевичлэн туспуктэмез отын 3-4 сантиметр быдӟа гинэ, вылаз ик, урод потэмын. Анайлэн очкиез ӧй вал ке но, со вазиз: - Ма, родной брат Игнатей та, уд тодмаськы шат? Ми пограськом вал. Собере оским ини, Игнатей ӵужмурт но Константин Сергеевич одӥг адями шуыса. - Константин Сергеевич семьяеныз Кузебайын улэм-а? - Озьы. Кык пол ӝуаса, туж куанере кылиллям. Татын улыны ӧйлась ни шуыса, ӵужапай (Ӟакай-Яков) кошкыны малпам. Эшшо Игнатей ӵужмурт (Константин Сергеевич) сельхозартель нерге кылдытыны ӝуткам. Оген улыны секыт, дэмен кариськоно шуэм (огъя колхозъёс кылдэмлэсь азьло ай). Абык ӵужапайлэн верамезъя, артеле ньыль семья пырем. Курбатовъёс, Алексеевъёс, Ефрем агай но Байметов Ӟакай. Намер гурт дорысь нюлэсэз кораса, мыркъёссэ порылыса, асьсэлы музъем кариллям. Со кутыре (хутор шуэм, дыр) мыныны тросэз мылкыд кариллям но "ӝутскиллям" ньылез гинэ. Кутыр кылдэм 1924-тӥ арын. 1941-тӥ арозь пыр отын улӥллям. Ӵужатай ачиз кебит лэсьтэм. Молотэз гинэ дас кык пӧртэм вылэм. Игнатей ӵужмурт ачиз отын улыса вуымтэ ни, ваньзэ радъяса гинэ кельтэм. Колхоз кылдэм бере, семьямы отчы пырем. Артельысь нырысез геры но милям вылэм. Оло сое ӵужатай дурем, оло Игнатей ӵужмурт ваем. Ӵужатаез кулак кариллям, кебитез но тӧлӥськонэз ванен. 1941-тӥ арын корказэс сэрттыса, Намере ваиллям. Кулак карыкузы, таласькыса ветлэм воргоронлэн кышноез шуэм: ми ик нуллӥм ваньбурдэс, асьмеос байким ке, сое берен сётом ай. Пыдысьтызы гын сапегзэс но пыдвылъёссэс гинэ но кельтӥллямтэ. Кутырын туж майбыр улӥллям, выль музъемын ваньмыз удалтэм уго. Адямиослэн помидорез адӟемзы вылымтэ ай, нош милям бакчаямы горд-горд кисьма, пе. Сое Игнатей ӵужмурт ик ваем. Абык ӵужапай тодаз вае: - Игнатей ӵужмурт анаез кулыку бертэ вылэм, но ӝыны часлы бере кылем. Луло дыръяз адӟымтэ ини. Вуэм Огырӟаысь (Агрызысь) пар валэн, нокытчы ӝегатскытэк. Гырлы куараез кылыса, гуртоос ятвылто вылэм ини сое. Ноку но буш киын уг пыр вылэм. Сутӥськем беразы сузэрезлы ваем шымыриё шуба, Абык ӵужапайлы - бадӟым кышет. Ӵыжы-выжыезлэн нылпизы вордӥськем бере, нунызэ миськыны майтал кузьмам (таиз уг сюры вылэм). Ваньмыз со адямилэсь сямзэ возьматэ. Абык ӵужапаез ал вылаз пуктыса, пе, вешалоз вал, дышетскемед ӧвӧл, одно дышетскыны кулэ шуыса. Константин Сергеевич удмурт улосвылъёсысь кустарь удысэз радъянэн выриз. Кылсярысь, куас поттонэн. Юри бадяр нюлэс басьтэм. Агаезлэсь пиоссэ, Митокез но Миктаез, городын куас вузало вылэм. Толалтэ, уж ӧжыт дыръя, кышномуртъёслы шорт синьыс вайылэм. Соос шобрет куо, керттӥсько. Асьмеос тодӥськом: Яковлев огдыре эссер партие пырылӥз. Малы ке шуоно, эссеръёслэн музъем ласянь программазы валамон но матын вал удмуртъёслы. Тани ма гожтэ со пумысен удмурт писатель Николай Кузнецов "Шимес пеймытысь" книгаяз: Константин Сергеевич допросын вера: - Зэм, 1909-тӥ-1910-тӥ аръёсы, Казаньысь учительской семинариын дышетскыкум пыриськи пинал эссеръёслэн организацизылэн ужаз. Нош синмаськеме тӧлӟиз соосты мур-мур валам бере, 1926-тӥ арын малпанъёсы воштӥськизы. "Трактор" сельхозкоммунаын ужаме мынэсьтым синъёсме усьтӥз. Коммунае пыремъёс музъем ужез ӟеч радъязы. Соос, нимаз хозяйствоен улӥсьёс сярысь, вить пол тросгес пайда басьтылӥзы. Нуналлы быдэ шӧдылӥ: монэ чидазы, кутылӥзы мынэсьтым быгатэммес, визьме. Асме жалятэк тырши. Малпай, мыным оскозы шуыса. Чидатэк, сюлмы тэрс карытозь возьмай: ку мыным республикаен кивалтӥсь адямиос пӧлысь кин ке кизэ мычоз но шуоз мукетъёс азьын: "Константин Яковлев умой ужа, табере сое асьме радэ пыртоно". Нош сыӵе адямиос ӧз пумиськылэ улонам. - Улонысьтыды кыӵе учыръёс пыр сое возьматыны быгатоды меда? - Быгато. Кылсярысь, Удмурт автономной областьын аналтэмын вал кустарь промышленность но кибашлыослэн кооперацизы. Югдурез пыр-поч эскерыса, ӟуч но удмурт кылын потӥсь газетъёсы но журналъёсы уно статьяос гожъяй. Областьысь исполкомлэн Президиумаз но Совнархозын докладъёс лэсьтылӥ. Ужпум шоры мукет синмын учкон кылдытӥ. Трос тырши, асме ӧй жаля. Нош нокин сое ӧз адӟы, ӧз дунъя. Монэ нырысьёсыз пӧлын аппаратысь поттӥзы, ужысьтым уллязы, малы ке шуоно, улон сюрес вылам кожылӥ эссеръёс пала. 1929-тӥ арын печатьысь потӥз удмурт кылъя учебник. Авторез П. Горохов. Отын 18 люкетэз - мынам уже. Горохов соку ВКП(б)-лэн членэз вал. Мыным шуиз: "Тынад фамилиед улын книгаез уз поттэ". Баграшов монэ куриз коллективизация сярысь гожтыны. Тырши, быдэс брошюра пӧрмиз. Авторез луиз Баграшов". Озьы гожъяз Николай Кузнецов. Бен, секыт югдуре сюрылэм Константин Яковлев. Улон таӵе ик луиз ке, кунгож сьӧры кошкытэк уз луы", - шуэм со. Та кылъёссэ Валентина Николаевна кылэм аслаз анаезлэсь. Дмитриева ик азьланьтэ: - Константин Сергеевичлэн кышноез Кузебай гуртысь. Ми сое Казнакей ӵужкенак шуылӥм. Кык нылпизы вордӥськем. Марья ӵужапай Агрыз ёросысь Бӧдьялан улэ. Солы 86 арес. 84 аресъем Илья ӵужмурт - Тюмень областьын. Игнатей ӵужмуртлэн кышноез удмурт вылэм, ӟуч сямен пал кыл но тодымтэ. Картэз дышетскем мурт сое сьӧраз городэ нуэм. Казнакей ӵужкенаклы секыт потэм. Вылаз ик, та кышнозэ Константин Яковлевич мылыз потытэк ваем. Огпол со коньдон сётэм но шуэм: лавкае мыныса, нылпиослы нянь басьтыны быгатӥд ке, городын улод, ӧд ке, мон тонэ гуртэ келяло. Казнакей ӵужкенак, гуртэ бертыса, Бӧдьяла кыкетӥзэ бызем. Марья нылзэ сьӧраз нуэм. Илья пиез отчы мынымтэ, кылем песятаез доры. Константин Яковлевлэн атаез доры - Намер гуртэ. Игнатей ӵужмуртлэн кыкетӥ кышноез Дурга вылэм, Малмыж палась, лэся. Дурга вордос пизэ, Ильяез, урод карылэм кадь. Аслаз Люба нылыз вылэм на. Эшшо Игнатей ӵужмуртэн ваем кык нылпи - Шура пизэ но Тина нылзэ. Ижысь Узенький переулокын 25 номеро юртын улӥллям. Игнатей ӵужмуртэз пытсам бере, пытьызы ышем, кытчы ке кыдёке кошкиллям. Марья ӵужапай, Яковлевлэн нылыз, Игнатей ӵужмуртлэсь соин адӟиськыны ветлэмзэ вера. Бӧдьяла лыктэм но, бускельёсы доры пырыса, нылзэ ӧтем. Казнакей доры пырымтэ, таизлэн кыкетӥ картэзлэсь кыӵезэ тодымтэ бере. Марья, пе, пегӟыны выре. Игнатей ӵужмурт шуэ: чаль, нылы. Ката но дэремлы басма кузьмам. - Илья ӵужмурт, Яковлевлэн пиез, тодаз вае: - Ижын улыкузы, Игнатей ӵужмурт сое, тямыс аресъем мае ке, удмурт клубе нуэм. Отын удмурт спектакль возьматӥллям. Берло Игнатей ӵужмуртэз но Сугатов артистэз, сцена вылэ поттыса, быдэс зал чабем. Кин тодэ, оло, Константин Сергеевичлэсь пьесазэ пуктӥллям вылэм, соин залын чабиллям, дыр. Абык ӵужапайлэн пичиысен ик синмыз висе вылэм. Игнатей ӵужмурт сое ал вылаз пуктэм но шуэм: - Тынад, Абида, синмыд уг адӟы, тон кылдӥськы, мон лыдӟо. Озьы аслэсьтыз "Володя" книгазэ лыдӟем. К. С. Яковлевез пытсамзы бере, 1932-тӥ арын, солы гуртысьтыз посылка лэзиллям вылэм. Пушказ гын сапег но сиён-юон понӥллям. Куать толэзь ортчыса, бинет берен гуртэ вуэм. Быдэсак, пе, сургучен лякылэмын. Интыысь интые ветлыса, кузёзэ "шедьтымтэ". Кыӵе бен вылэм со - Констанит Сергееивч Яковлев? Ас лулыныз-визьмыныз улӥсь, удмурт калыксэ яратӥсь, со понна нюръяськись адями. Уката но удалто вылэм солы, кызьы шуылӥзы 20-тӥ аръёсы, "пушнеро" веросъёс. Вакчи дыр куспын трос гинэ ужпумъёсты ӝутӥз. 1918-тӥ арын январь толэзе кылдытӥз "Выль син" удмурт газетэз. Татын ик вордскиз туала "Гудыри"-"Удмурт дуннелэн" "песятаез". Кык учительской семинариос кылдытон понна Москвае Сталин доры ветлӥз. Алабгое удмуртъёслэсь нырысетӥ съездзэс люканэ пыриськиз. Гожъянме йылпумъяме потэ К. С. Яковлевлэн допросын верам кылъёсыныз ик (Н. Кузнецов "Шимес пеймытысь"): - Куд-ог кырсь сюлэмо адямиослэн малпамзыя, ӟучъёс шуэм сямен, мон вылэ вань кулэм пуныосты ошылыны луоз. Малы? Сыӵе адямиос ӧз кышкалэ монэ быдтыса куштэмзылэсь: мынам улонэ кырыж-мерыж луиз, шекъёсы трос люкаськизы. Соин ик, лэся, верамъёсме чик кӧбератэк берланьтӥзы, мыдланьтӥзы, монэ сьӧдман уж соослы шумпотон вайылӥз кадь. Таӵе сямъёсыз котькуд калыклэн пичи ке но вань. Нош удмуртъёс пӧлын 20-тӥ-30-тӥ аръёсы соос пумтэм вӧлмизы вал. Оскыса улӥ, со сямъёс бырозы шуыса. Г. Савина, Удмурт кун университетысь студентка. Удмурт авангард - Финляндиын Удмуртиысь егит художникъёс понна бадӟым шумпотон луиз туэ куартолэзьлэн кутсконаз Финляндие ветлэмзы. Мукет финн-угор республикаосысь эшъёсынызы артэ асьме усточиос но возьматӥзы авангард удысын быгатонлыкъёссэс, дуннеез ас сяменызы адӟыса ас суредаськон амалъёссэс. Соос пӧлын вал Сергей Орлов, Виталий Окунь, Вячеслав Михайлов, Ольга Листратова, Александр Пилин, Александр Суворов но Алексей Чернышов. Талэсь азьло соослэн "Аванград "7" нимо адӟытонзы возьматӥськиз Ижысь Выставкаос ортчытъян залын. Нош таяз учыре соослы шуд усиз быдэс дуннелы тодмо финн суредасьлэн Аксели Галлен-Каллелалэн музеяз выставкае пыриськыны. Та адӟытон быдэс ар кыстӥськоз. Т.НИКОЛАЕВА. Та залысь мае гинэ уд адӟы... Ольга Листратовалэн гобеленэз. Гуртысь пейзаж. Авторез Вячеслав Михайлов. М.Егоровлэн туспуктэмъёсыз. Ой, тыл гома, тыл гома но... Тани нош ик вуизы тылпуос потон ласянь кышкытэсь нуналъёс. Пӧсь куазен ӝуало нюлэсъёс, гомӟо пу коркаос. Тужгес но сюлэмшугъяськыто уно квартираен кык этажъем юртъёс. Калыкын соосты баракъёс шуо. Войналэсь азьвыл но собере ӝутэм коркаос трос гинэ сыло ай городъёсын, посёлокъёсын, ёрос центръёсын. Отын улӥсьёс малпало вал, куашкан калэ вуэм юртъёссэс ӝоген кесялозы шуыса. Но улон уродмыса кошкемен, баракъёс тып-тып интыязы кылизы. Котькуд юртлэн вань аслаз кузёез - предприятие, организация, ведомство. Котькудӥз сётэмын улон интыосты возёнъя управленилы. Но унояз коркаосын кузё мылкыд уг шӧдӥськы. Соос пумен куашкало, муръёос пильылӥсько, электротыл сётон проводъёс сисьмо. Ӵапак сыӵе улон интыосын ик берло дыре "кузёясько" тылпуос. Тани кӧня ке учыръёс. Кылем арын 30-тӥ мартэ Кез ёросысь Чепца посёлокын, пинал тылын шудэмен сэрен тылпу ӝутскиз вить квартираен кык этажъем юртын. Со вакытэ отын ньыль мурт вал. Ӝуась коркась 5 аресъем нылаш поттэмын. Изъян адӟемын 50 сюрс манетлы. Юртъер но отын улӥсьёслэн ваньбурзы пеньлы пӧрмиз. Коркалэн кузёез - калыкез дышетонъя отдел. Ортчем арын ик шуге-леке вуизы Глазов городысь Сибирской ульчаын улӥсьёс. Дас куать квартираен юртын "горд атас" гомӟиз уин кык часэ мыныку. Со потэм юэм муртлэн чакласькытэк тамак кыскемысьтыз. Одӥгысьтыз квартираысь шедьтэмын сутскем муртлэн шӧйыз, кык мурт вӧсь луиз. Ӝуаз тямыс квартира, уно ваньбур, липет. Изъянэз - 200 сюрс манет. Корка муниципальной ваньбурен лыдъяське. Туэ быдӟымнал бадӟым куректон ваиз Пичи Пурга районысь Яган посёлокын улӥсьёслы. Со нуналэ быдэсак сямен ӝуаса быриз 12 квартираен юрт. Тылпу кутскыку, отын 25 мурт вал. Таосыз потыса вуизы. Но бӧрысь одӥг сутскем шӧй шедьтэмын вал. Кӧня ке минутскын уно семьяос улон сэрегтэк кылизы. Республикаысьтымы Югдурез утёнъя министерстволэн Тылпулэсь утиськонъя управлениез журналистъёсын ӵош Ижевскысь баракъёстӥ рейд ортчытӥз. Нырысь ик вуылӥм Восточной посёлокысь Чапаев проездэ. 35 номеро юрт. Соку ик син шоры йӧтэ корка валлин золтэм суй зӧкта кабель. Со вуэ тамбурысь электрощитэ. Таиз номырин шобыртэмын ӧвӧл. Тылпу кысон тӥрлык уг адӟиськы, ӧвӧл бекчеен ву но. Телефонэн жингыртыны луэ магазинысен гинэ. Кызьы пусйизы специалистъёс, юртэз коть туннэ ик ворса. Солэн кузёез - механикая заводлэн улон интыосты возёнъя но тупатъянъя 1-тӥ предприятиез (ЖРП). Та проездысь ик 31-тӥ юрт паймытӥз куашканы кутскем сараен. Электротыл сётон проводъёс но суп-сап лэсьтэмын. Ву возён бекчезы тырмытэм кирпич но из люкъёсын. Юртлэн лымшор палаз борддорез сутскемын. Куке но тылпу потам вылэм ини. Кысӥллям. Первомай ёросысь Гольян посёлок, Орджоникидзе ульча, 57-тӥ юрт. Кузёез - "Ижсталь" акционер огазеяськон. Корка городлэн шораз ик сылэ бере, ма но со лэсьтэмын ик. Но, кызьы шуо тылпуэн нюръяськисьёс, "аварийной" юртъёс городамы туж уно ай. Котькудзэ эскеры, тырмымтэос пумтэм-йылтэм шедёзы. Нош берлоез тылпу потон учыр вал чылкак алигес гинэ. Ижевскысь Ленин районын вань вылэм Полигон нимо посёлок. Интыяськемын со Иж тымет валлин. Отчы йӧназ сюрес но ӧвӧл. Нош толалтэ куасэн сяна уд шедьы. Туэ 16-тӥ мае отысь 5 квартираен юртын уйшор бере тылпу ӝутскиз. Посёлокын телефон ӧвӧл. Гомась коркаез тепловозлэн машинистэз адӟем. Со ик 01 телефонъя ивортэм. Тылпу кысӥсьёс вуыку, юртъер ӝуаса быре вал ини. Отын улӥсьёс утьыны кутскизы мунчооссэс, сарайёссэс, мукет ваньбурзэс. Кытысь потӥз тылпу? Соиз тодмо ӧвӧл на. Юрт вуж вылэм, ку пуктэмзэ но тодӥсь ӧвӧл. Татын берлозэ тупатъян ужъёс ортчиллям 1979-тӥ арын. Электротыл сётон проводъёс вужмемын. Уноез корказэс шунто обогревательёсын, мукет арбериосын. Тылпу дыръя одӥг мурт юн сутскиз, мукетыз быриз. - Номыртэк кыли, - куректэмзэ вера та юртын улӥсь Раиса Николаевна Ворожцова. - Куинь мешок пызе, сахар песоке, холодильникысь вань сиён-юонэз ӝуаз. Вормон нуналлы сётӥзы вал. Документъёсме но чыры-пыры арбериосме гинэ поттыса вуи. Табере мунчоын улӥсько. Война вакытысен кутскыса, чугун сюрес вылын ужай. Кин ке юрттоз меда, уг тодӥськы. Сутскем юрт пумысен малпаськыны кулэ Горький чугун сюреслэн Ижевскысь отделениез. Туэ ньыль толэзь ӵоже гинэ Удмуртиын ведомствоослэн улон интыосазы вал 250 тылпу. Изъян адӟемын 503 сюрс манетлы. Тылпуос тросэз пото чакласькымтэ бордысь, нылпиослэн тылын шудэменызы. Уно кайгу ваё электроприборъёс, сисьмем провод, куашкам гуръёс, юри тыл понон учыръёс. Соин ик асьмеос сакгес чакласькыны кулэ. Туала вакытэ улон интытэк, ваньбуртэк кылён - бадӟым кайгу. Государство но ыштэм адӟондэ озьы гинэ уз берыкты. Кызьы шуо калыкын: "Вор дуно арберидэ гинэ лушкалоз, тылпу вань узырлыктэ ньылоз". Рейдэ потазы Н.Ильин, Удмуртиысь Тылпуосын нюръяськонъя управлениын ужась. Н.Байтеряков, газетлэн корреспондентэз, В.Беломорских, фотокорреспондент. Учкизы, кылзӥзы... Иж карысь Наговицын нимо библиотекаысь "Встреча" клублы дас ар тырмиз. Татчы ветло литератураез, поэзиез, историез яратӥсьёс. Котькуд пумиськонэз быгатыса радъяло библиотекаын ужасьёс. Надежда Николаевна Учанова но Людмила Васильевна Сибагатуллина. Дас ар ӵоже клубе вуылӥзы ини трос тодмо адямиос: Анатолий Ефремов - шаерчи, Игорь Бабушкин - телевидениысь журналист, Валентин Кунгуров - медициная доктор, Алексей Трехлебов - писатель, Александр Блинов - режиссёр... Берло пумиськон сӥземын вал удмурт нылкышно гожъясьёслы, крезьгурчиослы. Ӝытэз усьтӥз Анатолий Дубовцев. Удмурт кун университетын ӵош дышетскем эшез крезьгурчи но кырӟась Надежда Уткина сярысь со трос шуныт кылъёс вераз. Клубе ӧтем куноос Светлана Яковлева но Галина Романова кырӟазы, кылбуръёссэс лыдӟизы, туала удмурт литература сярысь мадизы. Пумиськон кылзӥсьёслы но, гожъясьёслы но пайдаё ортчиз, соос ог-огзы сярысь трос выльзэ тодӥзы. Владимир БЕЛОМОРСКИХЛЭН туспуктэмъёсыз. Кызь вить ар - башкир музъем вылын Пумиськонъёс, тодматсконъёс... Одӥгъёсыз югыт нуналэз пеймыт уй воштэм музэн тӧлӟо, вуно, нош мукетъёсыз аръёсын юнмало. Л.З.Королева Нефтекамск педучилищеысь школа ёзэн кивалтӥсь сярысь мон директормы пыр тодыса вуттӥ ни вал: милям, пе, отделениен кивалтӥсьмы удмурт кышномурт. Соку ик малы ке но син азям пуктӥ кильтрес, ӝужыт мугоро, вылтӥяськись кышномуртэз (угось кивалтонын ужась куд-ог удмуртъёслэн вань сыӵе сямзы). Нош сое нырысьсэ адӟеме бере ик малпанъёсы чутрак воштӥськизы: лапеггес мугоро, лякыт, туж мыло-кыдо интеллигентной кышномурт. Соку ик та кышномурт монэ анай выллем шуныт бурдъёсыз улэ басьтӥз кадь. Эшлыко кусыпмы пумен юнмаз... Люция Захаровна вордскемын Удмурт шаерын Пичи Пурга ёросысь Брангуртын 1950-тӥ арын. Будэм дышетӥсьлэн семьяяз. Анаез Алевтина Алексеевна дышетэм пичи пиналъёсты. Люся ӵем вуылэм анаезлэн ужан дораз но синмаськыса учкылэм со шоры. Озьы анаезлэсь нылашлы кӧчем та ужез яратон. Соин ик, вылды, вань улонзэ герӟаз дышетон удысэн. 1967-тӥ арын школаез пырпотыса, пырем Ижысь пединститутысь химико-биологической факультетэ. Эшъёсыз пӧлын висъяськем спортын но, дышетсконын но сэзь, туж тыршись луэменыз. Институтын дышетсконзэ йылпумъякуз дэмлаллям та факультетэ ик аспирантурае кыльыны, но нылпиосын ужан солы матынгес потэм. Интыяськем Пурга ёросысь Яган школае. Кӧня ке улыса басьтӥллям Пургала комсомоллэн райкомаз секретаре. Тани кызьы тодаз вае со сярысь Люция Захаровна: - Та уж мыным туж ик мылкыдыя ӧй вал. Чидантэм мӧзми школалэсь, пиналъёслэсь... Огпол, гужем отпуске дыръя, Нефтекамске эшъёсы доры куное лыктӥ. Соослэн юртсылы пумит гинэ сылэ вылэм гороно. Малпасько: оло, та юртэ пыраса оскалтоно? Пырай, вераськи кивалтӥсен, нош со дипломме учкиз но кыштырак гинэ ӝӧказ понӥз. Собере вераз: бертэ но, трудовойдэс кутыса, ми доры лыктэ. Тӥни озьы 1975-тӥ арысен Удмурт шаерын будэм но быдэ вуэм ныл герӟа улон сюрессэ башкир музъемен. Та аръёсы, зэмзэ но, городысь школаосын уг тырмо вал дышетӥсьёс. Егит педагог мылысь-кыдысь "зыме" яратоно ужаз. Вань сюлэмзэ но тодон-валанзэ сётыса тырше со ас удысаз. Со сярысь ик верало пиналъёсызлэн город, республика но Россия олимпиадаосын басьтэм вормонъёссы. Егит дышетӥсьлы та школаын ик завучлэсь ужзэ быдэсъяны оско, собере ньыль ар пала ужа гороноын методист луыса. Но нылпиосын, ужъя эшъёсын, дышетӥсьёсын кусып возён уг тырмы солы. Соин выльысен дышетон удысэ берытске. 1989-тӥ арын, Нефтекамскын дышетӥсьёсты дасянъя училище усьтӥськем бере, выже отчы. ...Аръёс ортчизы. 50 тулысъёс пӧлысь 28-эз ужын ортчытэмын. Со вакыт ӵоже кӧня пиналъёслы тодон-валан сётэмын, яратон кузьмамын. 25-ез - башкир музъем вылын. Наградаос сярысь малпан нош чик ӧз лыктылы. Но соос сое асьсэос шедьтӥллям. Со сярысь верало пӧртэм аръёсы сётэм Почёт грамотаос но тау карон гожтэтъёс, 1985-тӥ арын сётэм РСФСР-ысь дышетон удысысь отличник ним. Нош 1986-тӥ арын пиналъёслы мур тодон-валанъёс сётэмез понна ужез дунъямын СССР-ысь Калыкъёслэн Эшъяськон орденэнызы. Но самой бадӟымез дунъет - сое дышетэм пиналъёсызлэн, калыклэн гажамзы. Татьяна ГЛИМЗЯНОВА, педучилищеысь дышетӥсь. Башкортостан, Нефтекамс город. Будо кивалтӥсьёс Туала кивалтӥсьёсты дуризы пионер, комсомол огазеяськонъёс. Нош кин воштоз соосты азьланяз? Республикаысьтымы Егитъёсын ужанъя кун комитет та ужпумлы бадӟым саклык висъя. Дышетскыкузы ик тросэз студентъёс быгатонлыкъёссэс волято пӧртэм учреждениосын. Но саклык тросгес висъяське валтӥсьёсты дасянлы. Егитъёсын ужась специалистъёс кыкетӥ вылӥ образование басьто. 1995-тӥ-1999-тӥ аръёс ӵоже гинэ вылӥ тодон-валанъёс басьтӥз 36 мурт, нош ас удысэзъя быгатонлыкъёссэ будэтӥз 40 мурт. Кадръёсты дасянлы госкомитет нимысьтыз коньдон висъя. Ваньмыз сяменгес Егитъёсын ужась специалистъёс кыкетӥ вылӥ образование басьто Кун но муниципальной службая институтын. Туэ дас куинезлы шуд усёз кивалтон удысъя специалистлэсь дипломзэ басьтыны. Ваньмызлэн ик ужъёссы сӥземын егитъёслэн ужпумъёссылы. Кун комиссия азьын дипломзэс утемлэсь азьло куатез егит специалистъёс диплом утён ортчизы Егитъёсын ужанъя кун комитетлэн вторнике ортчем коллегияз. Та коллегиын ик эскеремын вал мукет ужпумъёс. Тужгес но сюлэмшугъяськытӥсез - быдэ вуымтэослэн но егитъёслэн наркотикъёсын эшласькемзы. Нош со вуттэ кышкыт учыръёсы: йыло пӧртэм йыружъёс, паласькись висёнъёс аляло. Табере тани СПИД-лы сюрес усьтӥськиз. Соиз валамон но, берло вить ар ӵоже гинэ наркотикъёсын йырзэс поромытӥсьёслэн лыдзы дас поллы йылӥз. Пиналъёсты но егитъёсты та кышкыт черлэсь утён понна Егитъёсын ужанъя кун комитетын кутэмын "Кузьма аслыд улон" программа. Коллегиын ӟырдыт вераськон ӝутскиз дискотекаос пумысен. Отысен угось йыр поромон дуннее сюрес капчиенгес усьтӥське. Чакламын азьланяз дискотекаосты эскерыса возьыны. Коллегиын эскеремын вал мукет ужпумъёс но. Егитъёсын ужанъя кун комитет 30 студентлы стипендия висъялоз. Озьы ик асьсэды котыр ласянь ӟеч возьматэм егитъёсты мӧля вылын нуллон значокен пусъён сярысь ужпум кутэмын. Л. МАЛЫХ. Журналист луыны тон дась-а? Газетмылэн 18-тӥ мае потэм номераз сётэмын вал Удмурт кун университетлэн журналистикая факультетаз дышетскыны мылкыд карисьёс понна ортчытэм олимпиадалэн нырысетӥ турезъя лэсьтэм йылпумъянъёс. Удмуртъёс пӧлысь отын тужгес но трос балл люказы 16 нылъёс но пиос. Кылем арняе соос пыриськизы олимпиадалэн кыкетӥ тураз. Вуоно журналистъёс тодон-валанзэс возьматӥзы творческой конкурсын. Удмурт отделение пырыны дасяськисьёс ужазы "Мынам гуртэ: аръёс но адямиос" темая, ӟуч отделениез быръемъёс "Пресса - четвертая власть?" тема бордын. Кык час куспын котькудӥз абитуриент пӧрмытыны кулэ вал газет баме поттымон материал. Жюри чурыт куронъёс пуктӥз творческой ужлэн мурдалаез ласянь: огшоры сочиненилы гинэ со медаз пӧрмы, пиналъёс улон шоры мед учкозы журналистлэн синмыныз, ӵошатыны но дунъет сётыны мед быгатозы. Но, жаляса верано, 16 мурт пӧлысь огез но уж вылӥ дунъет ӧз басьты. Кыкетӥ инты сётэмын Пичи Пурга районысь Сергей Агичевлы но Якшур-Бодья районысь Лариса Белыхлы. Куинетӥ интые потӥз Шаркан районысь Галина Добрякова. Кыӵе тырмымтэос шараяськизы, конкурс ортчытыку? Жюри пусъемъя, абитуриентъёс бадӟымгес саклык висъязы гуртсылэн историезлы, кылдэмезлы, соин сэрен палэнэ кылизы гуртлэн кузёосыз - отын улӥсь но тыршись калык. Малы ке но асьмелэн пиналъёсмы уг адӟо туннэ улонэз, уг адӟо гуртлэсь туала политиказэ, шуг-секытъёссэ, солэсь ыштонъёссэ но азинсконъёссэ. Соос буре ваё бырем солдатъёсты, нош артэ улӥсьёссэ возьматыны тодазы уг лыкты. Огъя вераса, вуоно журналистъёс пӧлысь огез но паймытыны, шумпоттыны ӧз быгаты. Шӧдӥське пиналъёсмылэн газет-журнал лыдӟымтэзы, республикалэсь, районзылэсь, гуртсылэсь маин "шокамзэ" умой-умой тодымтэзы. Соос уло на выжыкыл дуннеын. Кыл ласянь ке верано, таиз но начар. Конкурсэ пыриськон абитуриентъёс понна аспӧртэмлыко репетиция выллем луиз. Со возьматӥз, ма бордын ужано, кыӵе тодон-валан люкано вуоно журналистлы. Экзаменъёслы дасяськыны дыр вань на. Л.МЕДВЕДЕВА. Пушъёзы вож паркъёс Городамы писпуос сокем ик ӧжыт ӧвӧл ке но, Ижевскмы узыр паркъёсыныз сокем ик ушъяскьыны уг быгаты. Учконо ке, буш интыос вань гинэ. Тани кылем арня пумын "Радиотехника " магазин вӧзысь кык гектар музъем вылэ мерттэмын палэзьпуос. Татын луоз усто сквер. Шоркармылэн 240 ар тырмонэзлы со усто кузьым ини. Та интые мерттозы на льӧмпу, бадьпу, беризь, сирень, уно сюрс вакчи будӥсь писпуосты, сяськаосты. Азьланяз со зэмос шутэтскон интылы пӧрмоз. Скверез лэсьтонлы коньдон висъяз городысь экологияя фонд. Матысь дыре кык поллы йылоз Киров нимо парклэн быдӟалаез, Устинов ёросын кылдоз нылпиослы парк. Кызьы вераз городысьтымы валтӥсь дендролог Любовь Яковицкая, Карлудшур Ижевск пыр 7 но ӝыны иськемез ортче. Со шур валлин чакламын 11 парк усьтыны. Валтӥсез луоз ипподром дорын, нимаськоз со Спортивной шуыса. Н. Сергеев. Дорысьтыды сюлэм уг ӵыды Алигес мыным шуд усиз Завьял ёросысь санаторий-профилакторийын шутэтскыны. Паймымон инты вылэм со. Тазалыкез но юнматӥськод, ваньмон дырез шулдыр ортчытыны пӧртэм луонлыкъёс но дыр шедьтыны луэ татын. Автобусъёс но дыраз ветло. Сюрес вылын ӝеганъёс уг луо. Ми кадь арлыдо адямиослы, мар кулэ на. Мынам тау карем потэ райсобесысь ужасьёслы Г. Н. Журавлёвалы но солэн эшъёсызлы. Соос сюлмаськемен угось ми туннэ аналтэмын ӧвӧл. Эмъюм но, ӟеч кыл но сётӥсь-верась вань бере, мылкыд но тазалык но умой луэ. Санаторие вуэме бере иземе уг луы вал, сюлэм но шуг улӥз. Нош врачъёс юрттэмен, медсестраос сюлмаськемен, арня улыса, ваньмыз интыяз пуксиз. Маин гинэ татын уг эмъяло. Дуно эмъюмъёс вӧзы асьме шаерамы будӥсь турын-куаръёсты но уже куто на. Соин ик эмъяськонлэн пайдаез юн шӧдӥське. Нош врачъёслэн сюлмаськонъёссы асьсэлэн но трос. Азьвыл валтӥсь врачлэн А. К. Корепановалэн верамезъя, санаторийын 20 кузя ужало вылэм. Нош али 12 кузя гинэ кылемын на. Ужаны секыт луиз. Нош эмъяськыны мылкыд карисьёслэн лыдзы йылэ но йылэ. Котькуд йӧнатскись муртэн угось нимысьтыз вырыны кулэ. Ваньзэ чаклано котыр ласянь. Шутэтскыны лыктэмъёслы шуныт кыл верам сяна, соосты ческыт сюдоно, умой эмъяно, пӧртэм йӧнатскон процедураос ортчытъяно. Эмъяськисьёслы но шутэтскисьёслы умоесь условиос кылдытон сярысь санаторийысь кивалтӥсьёс ялан сюлмасько. Уже куто вань туала амалъёсты. Нош вуоно аре чаклало ини бассейн но лэсьтыны. Санаторийлэн интыез но туж шулдыр адӟиське. Асьмелэн Завьялово ёросмы понна та санаторий туж сӥлы но бурлы луэ. Уг вунэто татын культурно-массовой ужрадъёс сярысь но. Ӵем вуыло татчы художественной самодеятельностьысь артистъёс, пӧртэм ансамбльёсысь артистъёс, дышетскись нылпиос но мукет тодмо адямиос. Таӵе ужрадъёсы мылысь-кыдысь пырисько асьсэос шутэтскисьёс но. Шутэтскон но эмъяськон нуналъёс шӧдылытэк ортчо. Ӟеч шутэтскем но тазалык люкам бере ӟеч кыл вераме потэ валтӥсь врачлы Н. И. Черниковалы, медсестраослы Е. П. Красильниковалы, М. А. Золотаревалы А. С. Барановалы, Л. Г. Петровалы, Т. И. Емельяновалы но вань ужасьёслы. Шудбур но тазалык тӥледлы сюлмаськемды понна. Елизавета Камашева, Завьял черкогуртын улӥсь. ТОДЭ ВАЁНЪЁС Окопъёсы ӧй ке но вуылы... Дас сизьым арес тырмон нуналам атае бордам султӥз но тыбырме тып-тып вешаса вазиз: "Пие... пие... бен тон мынэсьтым быдэс йырлы ӝужытгес ни ук!.. Палэнысен учкыса, ӧй но шӧдылы, лэся, будэмдэ... Выль костюмме тыныд сёто шуыса кӧня ке пол гинэ дӥсялляй вал..." Атае, озьы ик палэнысен учкыса, уно пол адӟылэм йыр быдӟа гираосын "шудылэмме", нош туннэ ачиз но оскалтыны "дӥсьтэм"... Но выж бордысь соосты ишкалтыны "лулыз сузьымтэ". Пересь сюлэмын огдыре ик шумпотон но, куректон но. Нош соосты таӵеосыныз ӵошатод шат?! Выль корка пыронэн герӟаськем сюлмаськонъёс но... борддоре ошем карта вылэ киын лэсьтылэм выль пусъёс но. Чехословакия... Венгрия... Польша... Та кунъёсты Германия сьӧд вужерыныз сайям ини. Отын табере фашистъёс кузёясько. Атайлэн чиньыосыз, карта вылтӥ ветлыса, асьме кунлэн границаосыз доры дугдӥзы. Соос кема гинэ интыысьтызы уг вырӟыло. Кин тодэ: Сталин но Гитлер куспын тупаса улон сярысь договор гожтэмын ке но... Калыкын шуо ук: левлэсь пиньёссэ адӟыкуд эн малпа, со тыныд пальпотэ шуыса. Сьӧсь - со сьӧсь ини. Озьы валэктылӥз атае, соку со партилэн Кез райкомаз пропагандист луыса ужаз. Гужем каникулъёс кутскон азьын ми, тямысэтӥ классэз йылпумъясь кӧня ке пиос, дасяськыны кутским вал Кам шур кузя уяны. Малпам асьме киосын лэсьтэм бадӟым пыж вылын сю иськеме уяны. Шутэтскон нуналъёсы чугун сюрес вылын ужаса, коньдон но люкамын ни вал. Ваньзэ куспетӥ кариз, тарказ Вячеслав Михайлович Молотовлэн война кутскем сярысь радио пыр ивортэмез. Кык арня пала ортчыса, монэ комсомоллэн райкомаз ӧтизы. Ӧс куспысен ик юазы: "Горд галстук керттыкуд, кыӵе клятва сётӥд вал?" Озьы ик, чик могатэк, верай: "Будь готов к труду и обороне!" Нош туннэ, комсомолец бере, - "Всегда готов!" шуисько. Гужем каникулъёс ӵоже монэ фронтэ кошкем воргоронъёс интые лесопилкае ужаны ыстӥзы. Быдэ вуымтэ пиос пӧлын, пе, тон самой кужмоез. Нокин мукетыз отын ужаны уз вормы. Туннэ ик военной заказъёсты быдтон борды кутсконо. Паськыт липет улын бадӟым ӝӧклы укшась станок - танк. Шораз кузесь чилясь пиньёсын котырес пилаез. Станоклы матын кык муртлы ӟыгыртыны луымон кузесь пужым коръёс. Одӥгаз борддоре юнматэмын паськыт шкаф, отысь пото пӧртэм электропроводъёс но кабельёс. Ваньзэ сое учкыса сылыкум пумитам кытысь ке сайулысь шор арлыдо кышномурт потӥз. Лэчытэсь синъёсыныз монэ улӥысен вылӥе мертаз но ас понназ гинэ кадь вазиз: "Ӝужытэн - ӝужыт, нош арлыдын ежгес на кадь". Собере ӝажырес куараен юаз на: "Ас мылкыд каремедъя-а лыктӥд, кин ке ыстӥз-а?" Райком, шуисько, ыстӥз. Озьыен, пе, ӵош ужалом. Тон пул пилёд, нош мон, пе, азьло сямен ик мажесэн но исьнерен пул пызез утялто. Зӧк пужым корез ӝутыны гираослэсь секытгес вылэм. Ӝогак ӟыгыртыны киос мырдэм гинэ сузё. Тани солэн ог пумыз ӝӧк вылын ини. Мукет пумзэ киос вылын ӝутыса, каллен гинэ пельёсты урмытӥсь пилалэн пинъёсызлы сыскыны сётоно. Тани соос куртчиськизы. Вӧлдэтозь пазьгиськизы шелеп пырыос. Кӧня ке улыса липет улын шундыё нуналэ но ӝомыт кариськиз. Егит сюлэм ӝомыртэз но ӝомытэз уг шӧдылы. Пельёсы но синъёсы пырись пырыос уг люкето кадь. Тыбыр кузя виясь нюлам вуэн сэрен дэрем ёркыт луиз, тачыр! кесяське. Мылкыд капчи. Фронтэ кошкем эшъёсын артэ пушка сьӧрын яке пулемёт сьӧрын кадь астэ кожаськод. Тани одӥгез кор трос пулъёслы пилемын. Соос шоры учкыкуд, син азе пуксе валъёсын кыткем повозка, кудаз ожмаськон интыосы патронъёсын яке гранатаосын тырмытэм ящикъёсты нуо, яке кузесь ящикъёсы артиллеристской снарядъёс интыяло... Вазь ӵукнаысен бер ӝытозь ужаса, пулъёс ӝужытэсь пирамидаослы укшало. Пельёсын жон-н! вазе ке но, чылкыт малпанъёсты со уг сайя. Пыдъёс доре сьӧлтаськысагес ке но нуо, сюлэм чӧт-чӧт жугиське. Уйёс кыра-марлам вӧтъёстэк ортчыло. Толэзьскын уждун куинь сю манетлы люкаськем. Ужан интыын ку сапегтэк туж шуг. Нырысез сямен ик, тодылытэк ортчиз кыкетӥез но толэзь. Кутскон сётэмын куинетӥезлы. Школае мынон дырозь кык арня пала на. Кужым но мылкыд бырымтэ. Шунды пилемъёс сьӧры ватскемын ке но, нунал туж пӧсь. Выль коръёсты пильыны дасян вакытъёсы липет куашкамон гудыръя. Тани туж зӧк корлэн берло пулэз пилемын луоз. Секыт маке улын станок пограмон кадь куалекъя. Но тани синмез ӵушымон чилектӥз. Ваньзэ тыл басьтӥз кадь... Берло пилем пулэз пирамидае нуон вылысь, киям басьтыны турттӥсько но... уг пӧрмы: тӧдьы интые, со быдэсак горд адӟиське... Марзэ-созэ валатэк сылыкум, юрттӥсе Дарья апай куараез чигымон кесяськыны ӧдъяз: Вандӥськем киысьтыд, пе, жальыр! вир вия. Ачиз кышкаменыз интыысьтыз вырӟыны уг быгаты. Паллян киыным вирен кошкись бур киме зол-зол кутыса, больницае (со нюк сьӧрын гинэ вал) вань кужмысь бызи. ...Елизар Павлович Иванов хирургез фронтэ басьтӥллям. Мукетыз ӧвӧл. Усто сюлэмо адямиос Пермь палась Верещагино городысь чугун сюреслэн больницаеныз герӟаськыны быгатӥллям. Отчы монэ эвакуировать каремъёсын тырмытэм поездлэн подножка йылаз Кезысь медсестра келяз. Макем шумпотыса бертылӥ мон дорам ужан нунал бере, маке но ӝож мылкыдын пыри мон улон коркаямы, кыдёкысь больницаысь вуыса. Бур киы йыр быдӟа ватаен но марляен бинемын. Отын одӥг чиньы но кыльымтэ. Алигес басьтэм ӵыж выль баянме ал вылам пуктӥ но шудыны турттӥсько. Голосъёс пасьёстэк кулэ чуръёс уг кылдо вылэм. Туж матысь эшелы кузьмало. Ошетын матрослэн костюмез: бескозырка, тельняшка, бушлат но мукетыз - племянникъёсы мед нуллозы. Зарезьёс, океанъёс, материкъёс, шормуӵъёс но пӧртэм флотъёс сярысь альбомъёсме библиотекае кузьмало... Улытозям уйвӧтъёсы адӟылэм малпанъёсы пӧлысь куарае гинэ кылиз на. Умой-умой дасяськыса, Александровлэн кырӟанъя но эктонъя армейской ансамбляз неужто уз басьтэлэ шуыса малпай... Школаын дышетсконме азьланьтыса, эшъяськисько но пӧртэм ужъёсты быдэстыны медъяськисько. Тодмоос, ужын сӧсырмем бере, пенсия басьтыны дэмлало. Кызьы озьы, малпасько мон, возьыт ук: атайёс-вынъёс фронтын вир кисьто, нош мон егит адями, пельпумын йыр вань дыръя тэк пуком?! Котькызьы ке но, фронтэ шедьыны мылкыдме сӥятыны нокызьы уг быгатӥськы. Кырӟаны но кылбураны быгатэмме школаын кемалась ушъяло ини. Озьыен, ӧй быгатысал шат мон кыӵе ке воинской ансамбльын яке дивизионной газетын ужаны?.. таӵе мылкыды сярысь гожтӥ мон "Комсомольская правда" газетэ. Отысь ужасьёс, комсомолецлэсь куронзэ быдэстэ вал шуыса, районысь военкомлы гожтэт ыстӥллям. Военком монэ, акыльтэм адямизэ, дораз ӧтиз но таяз учыре эктыны курисько шуиз. Лулысь-сюлмысь эктӥ! Фронт доры келянлэсь азьло мон фельдъегерь луыса ужай Кезысь связья контораын, собере, сыӵе ужын ик - Ижевскын, связья Удмурт управлениын. Отын монэ дышетӥзы туж секретной пакетъёсын кызьы ужаны но пыӵал тӥрлыкез кызьы уже кутыны. Собере келязы Киеве, СССР-лэн связья Наркоматэзлэн Киевысь оперативно-секретной отделаз, фронт пала ыстон вылысь. Крещатик ульчаысь улыно-вылыно из юрт: укноосызлэн пиялаосыз кечат-вамат бумагаен лякылэмын, куд-огез фанера пулэн ӵоктамын. Буш кабинетын бадӟым ӝӧк сьӧрын пуке ӝужыт мугоро, лек тусо полковник. Киосыз мышказ ватылэмын. Вераськыкум чубыкез лэйка, но отысь гомак-гомак! ӵын потылэ. - Нимыд-тулыд кызьы? Верай. Нош, шуисько, отын, документъёсын, ваньмыз рос-прос верамын ук. - Тодӥсько, - шуэ, - озьы ке но вань юанъёслы шонер валэктонъёс сётъяны кулэ. Кытысь вуид? - Удмурт автономной республикаысь. - Кытын со интыяськемын? - Уралын... Солэн шунды пуксён палаз. - Кыдёкысь, туж кыдёкысь татчы лыктэмед... Нош татын, артэ - ожмаськись фронт. Тушмонъёс, предательёс, националистъёс... Нош тынад киыд одӥг гинэ. Государственной секретъёсын пакетъёсты тыныд оскыны ум быгатӥське. Берен Уралад кошконо луод. Та кылъёс пуртэн бышкалтэм кадь вӧсь каризы сюлэмме. Уг, шуи мон полковниклы, нокытчы уг кошкы мон татысь. Документ ӧд сётэ ке, ачим фронтэ мыно. Вием фашистлэсь автоматсэ басьтыса, со кадьёсызлы пумит ожмасько. Виизы ке - ӵок - сопал дуннеын капчигес луоз, али татынлэсь... Куинь уйзэ кӧлӥ коридорысь ӟукыртӥсь диван вылын. Ньылетӥ нуналаз ӵукна небӟем сюлэмо полковник мыным Тарнапольысь отделэ мынын документъёс сётӥз. Отын, пе, тонэ кытчы кулэ луид отчы ыстозы. Келяса кизэ но сётӥз. Почаев - шоро-куспо город. Шораз ик, вырйылын - Киевын выллем - туж бадӟым лавра сылэ - черкъёс азьын - черк. Дырын-дырын отысь гырлыос вылтырез зуркатымон жингырто. Немецъёс, инмарлы оскисьёс, лавраез исаллямтэ. Нош почта юртлэсь борддоръёссэ но куд-ог интыын пыргытъяллям. Солэн подвалаз интыяськемын фельдсвязьлэн оперативной пунктэз. Отчы фронтысь туж секретной документъёсын сургучен пусйылэм пакетъёс вуыло. Отысен фронтэ со выллемесь ик пакетъёсын Москваысь приказъёс, распоряжениос келясько. Одӥгаз учыре мыным Ковпаклэн партизанской отрядысьтыз связнойлы уно пакетъёс сётыны кулэ вал. Со возьма монэ �-ской аэродромын. Сюрес кузь, дыр - ӧжыт КПП-ысь дежурной монэ пуктӥз одӥг минутлы гинэ дугдылэм кузь автоколоннаысь машиналэн кузоваз но ивортӥз: �-ской аэродром вадьсын колонна уз дугдылы шуыса. Кызьы быгатод, озьы ик тэтчод. Пукисько снарядъёсын ящикъёс вылын. Выро-гопо интыосын ящикъёс солань-талань ветло. Пыдъёсты пачкатэмлэсь ӝутъяно луисько. Аэродром вадьсы вуон азьын буюварме киям басьтӥ. Возисько. Сюлэм шугъяське - колонна ӝог кошке... Тэтчыкум бювар ящик но борт вискы пачказ. Ишкалскем ручка киям кылиз. Государственной секретъёс тодмотэм интыосы кошко, нош мон интыям, вырӟылыны быгатытэк сылӥсько. Но тани тыбыр сьӧрам кыӵе ке машина дугдӥз. Колоннаез азьпалтыны люкетӥськем солы. Руль сьӧрын пукись офицерлы валэктӥ куректонме. Валазы. Тодмалод- а, пе, кудаз грузовикын кылиз секретной почтаед? Тодмало, шуи, - паллян бортлэн сэргыз ӧжытак куалдэмын. "Али ик сутом сое но басьтом, ма кулэ" ӟаректэм бамы шоры учкыса, лэся, небыт куараен пальпотыса вазиз берпал сиденниын пукись генерал... Баулме ӟыгыртыса аэродром пала вамышъякум, дуннеын самой шудо адями потӥ вал мон аслым. Реестрын мынам "подвиге" ваньзэ куинь кылын гинэ дунъямын вал: "Пакеты доставлены вовремя". Пыдесъяськыса вамышъясь адямилы укшаз горсоветлэн кытысь ке вуись машинаез. Омыртэк кылем питранъёс, шаньгиос кадь, куасаллясько. Ачиз "газик" туж лапег адӟиське. Озьы сюрес вылын "исаллям" сое бандеровецъёс... Нош мыным та машинаен, чик ӝегатскытэк, мыныны кулэ вал Збараж городэ, ӵапак со сюрес кузя ик. Мур малпаськонэ усемме шӧдӥз огшоры почта нуллӥсь пан Цыроник - витьтон аресъем поляк. Кытӥ-мартӥ кыткиз со куӵо "Фердинанд" ужпизэ, повозкае, олокытысь шедьтыса, пуктэм йӧл нуллон куинь бушесь флягаос. Одӥгаз - пакетъёсме тырим. Повозка пыдэсэ, турын пушкы, СВТ винтовка ватӥмы. Гимнастёрка интые, со сётӥз мыным аслэсьтыз пиджаксэ, кудӥз улэ умой "ватскиз" мынам "наганэ". "Аття!" шуыса, Цыроник каллен гинэ сэзъялтӥз биньгозызэ, "экипажмы" гудыръяны ӧдъяз изэн шобыртэм шлях вылтӥ. Таӵе ӵашпотонэз кылытэк уз улэ котыр ласянь нюлэсъёсы ватскылэм бандаос. Нош мар карод: мукетъёсыз сюресъёс ӧвӧл. Кӧня ке иськемъёс ортчеммы бере, кузь выж дорын, музъем улысь сямен, ӝутскиз автоматэн адями. Сылэ вырӟылытэк, юбо кадь. Ӝужыт мугоро, паськыт пельпумо. Чиль сьӧд тушо но мыйыко. Бандеровец. Пакетъёс пыдло ке но ватэмын, кин тодэ... медаз утчаськы вал. Сюлэм урдлыосты тӥямон жугиське. Мон, инмарлы оскисьтэм адями, ас поннам "Инмаре, уть милемыз" шыпыртӥсько. Тушмон патрульноёзь кӧня ке дасо вамыш гинэ кылиз на... Пан Цыроник "Фердинандзэ" дугдытӥз, повозкаысь тэтчиз но пертчиськем серметсэ тупатъяны ӧдъяз, чик дыртытэк. Ну, малпасько, быриськиз татчы: лякыт сямо поляк предатель вылэм. Наганме гырпумыным утчасько... Ӧжыт выриз на ке... Но, татын сермет тупатэмын, кемасе интыяз пуксиз, биньгозыен выретӥз... Патрульной паськытэсь сьӧд синъёсыныз милемыз пумитаз но, келяз но. Сюрес кожонэ ватскеммы бере, дугдылэм интыысьтымы автомат тэчыртэм куара кылӥськиз. "Вероятно: на всякий случай", - пальпотыса валэктӥз пан Цыроник. Мон но пальпотӥ. Гужем бырон вакытэ Почаев городэ ожысь Свято-Успенской лаврае, Мария Магдалинаез буре вайыса, асьсэлэсь сьӧлыксэс вӧсяны трос сю иськемъёсысь вуизы инмарлы оскись пересьёс но егитъёс. Соос пӧлын, кызьы ивортӥзы милемлы Киевысен, луыны быгато мурт дӥсен дӥсяськем националистъёс, бандеровецъёс, бульбовецъёс, мельниковецъёс но татчы кылем-мылем власовецъёс. Секретной корреспонденциен вырыны туж сак луоно. Пакетъёсты воштылонъя оперативной пунктмы огдырлы лавралэн "гулбечаз" каръяськиз вал. Сыӵе лушкем инты висъяз милемлы ачиз Свято-Успенской лавралэн наместникез архимандитр Патрокл. Со, юн данъяськыса, возьматӥз милемлы Сталинлэсь тау карон кык телеграммаоссэ, армилы танкъёс но самолётъёс лэсьтыны вылысь лавраысь келям коньдон понна. Осконо адями - святой Отец - милемлы но дырыз дыръя усто юрттэт сётыны быгатӥз Фельдсвязь ыштонъёстэк но туж ӝог ужаз. 1944-тӥ ар. Сӥзьыл. Фронтъёс ялан кыдёкегес но кыдёкегес шунды пуксён пала кошко. Ожысь фельдъегерьёслы дорамы вуылыны ялан тросгес но тросгес дыр кулэ. Оперативной пунктмес соослы матэгес карон вылысь, вераськон ӝутскиз. Выль фельдъегерьёс кулэ луизы, тазаосызгес... Киевын выльысь пумиськоно луиз полковникен. Киме юн-юн кырмыса, со сюлмысь тау кариз мыным кышкасьтэм луэме но ужаны быгатэме понна. Окопъёсы, пе, ӧд ке но вуылы, дырыз дыръя вуттэм пакетъёсыд снайперской винтовкалэсь но шонергес "ыбылӥзы". Туж ваменэс сямыд, кудӥныз, пе, мыным пумиськоно луиз, война бырем бере но котькыӵе ужын мед шӧдӥськоз! Октябрьской праздник азьын вордскем интыосам вуыса, мон Кезысь радиовещанилэн редакцияз ужаны кутски: редактор но, диктор но. Укмысэтӥ мае Вормон Нунал сярысь иворез радио пыр вань районлы кылӥськымон трос пол верай. Леонид ДАНИЛОВ, Удмурт кунысь дано журналист. Ижысь Егитъёслэн юртазы 1-тӥ июне 19 часысен Эктон корка Программаын - удмурт но мукет калыкъёслэн эктонъёссы. Куноын: немец культурая огазеяськонысь егитъёслэн "Югентхайм" юртысьтызы эктон коллектив. Алнаш ёросысь Ильич нимо колхозысь одӥгез устоез механизатор Иван Викторович Медведев Галина нылыныз. В. Беломорскихлэн туспуктэмез. Гурт улон Зурка Вужгурт Лыдӟисьёслы кутсконаз ик валэктӥсько: Кедра Митрейлэсь повестьсэ эскеронлы сӥзем реферат ӧвӧл та. Асьмелэн сотэк но тырмыт вужгуртъёсмы: 1990-тӥ арысен кутскыса, соос ваньзы сямен музъем зуркан дыре кадь дырекъяса уло. Уго асьме Правительство чылкак уг сюлмаськы гурт хозяйствоез азинтон, калыкез сюдӥсьёслэсь улон-вылонзэс умоятон сярысь. Вылӥ кивалтӥсьёслэн "выльдӥськон" нимам аръёссы пӧрмизы куашкан, берлане чигнан аръёслы. Асьме калыклы "ӟеч" лэсьтыны малпаса, Дуннеысь валютая банкысь тодосчиос 1989-тӥ арын ӵектӥзы вал Россиысь музъемъёсты пичи кузёослы-фермеръёслы люкылыны. Кунгож сьӧр ӵектонэз ӝегатскытэк уже кутӥз Черномырдинлэн-Гайдарлэн Правительствоез. Нош одӥг кун но, ас казнаяз валютаез ке ӧвӧл, из гурезез интыысьтыз вырӟытыны уг басьтӥськы. Угось котькыӵе ужез быдэстыны коньдон кулэ, калык котькыӵе ужась ке но луиз. Нош асьмелэнъёс кышкась-курдасесь ӧвӧл. Одӥг коньы уксё кутытэк но мукет улонэ вутскыны тыршо. Табере ӟеч адӟиськом ни выльдӥськонлэсь емышъёссэ. Туннэ нуналлы кылемын на ог 280 сюрс фермеръёс, соос пӧлысь тросэз ӝоген мытэм ужзылэсь куштӥськыны, палэнскыны малпало. Шуг-секытъёсты вормыны уго уг быгато, юрттӥсь но, жалясь но соосты ӧвӧл. Али фермеръёс кизёно музъемъёслэсь 6 процентсэ гинэ утялто, соосын поттэм сиён-юонлэн быдӟалаез 3 процент! Мукетсэ но вераме потэ, музъемез юдылыны кутскемлэсь азьло, 1990-тӥ арын, асьме кунмы сиён-юон поттонъя быдэс дуннеын сизьыметӥ интыез возиз. Табере та радлыклэн самой улӥ чураз лэзиським ни. Эсьмаса, со аръёсы асьмеос йӧл поттонъя Америкаез но азьпалтӥськомы вал, адямилы быдэ 380 килограмм йӧл кыскылӥм, 75 килограмм сӥль поттылӥм. Кытын-о табере со шумпоттӥсь лыдпусъёс? Быгатэ-а асьме кунын огшоры адями ас ӝӧк вылаз, нуналлы быдэ сӥль, йӧл, вӧй, курег пуз вуттыны... Бен, арысь аре чигнаськом, Кивалтӥсьёсмы оскыто: сютэм ум кулэ! Озьы, дыр. Телевизор пыр нунал пӧрат адӟиськом, кызьы асьме министръёсмы кунгож сьӧрын кизэс урдыса, кураськыса ветло. Я коньдон пунэмало, я сиён-юон. Океан сьӧрысь Сэм дядяйёс кылзо-кылзо но юрттыны соглаш карисько. Валало. Россия музъем узырлыкен узыр на, пунэмзэ берыктоз. Озьы асьмеос али вордскем нылпиосмес (вордӥськымтэоссэ но) Запад азьын пунэмо кыӵесэ чуртнаськомы ни. Зэмен но, ӟеч мылкыдын, асьмеды жаляса юртто, кожаськоды-а? Юн янгышаськоды, эшъёс. Тани мон тодмато кӧня ке лыдпусъёсын (басьтэмын центральной газетъёсысь). Кылем ар пумын Госхлебинспекция шараяз йыр поромымон учыръёсты. Кылсярысь, Америкаысь но Европаысь вуттэм сиён-юонлэн 350 сюрс тоннаез уже кутыны ярантэм, пе. Озьы, "сюлмаськись" дядяйёс асьмелы келяло вужмем сиён-юонэзс. Кожало, луоз, сютэм Россия ваньзэ сиёз. Ма, озьы ик луыса потэ но: та изъянмем сиён-юон ваньмыз люкылэмын вал 53 улосвылъёсы. Лыдӟыса, малпаса йырсиос пежырско, ява! Та лыдпусъёс вылэ ик ватсаны кулэ на изъянмыны вутскем сӥльлэсь но йӧллэсь лэсьтэм, кунгож сьӧрысь вуттэм сиён-юонъёсты но. Уго соос дасямын вылӥллям висись пудоослэн сӥль-йӧлынызы. Таӵе югдурысь потон понна асьмелы трос но кулэ ӧвӧл кадь. Юрттоно гурт калыклы коньдонэн, техникаен. Зӥбоно ӧвӧл соосты ӝутыны вормонтэм налогъёсын, электрокужымлы но эстӥськон вӧйлы, трактор ёзъёслы вылӥ дунъёсын. Нош калык ужаны бытэ на. Нош та сямен ик ке улӥмы, гурезь йылысь питырась буш уробо музэн шальтралом асьмеос. Кылсярысь, 1998-тӥ арын асьмелэн быдэс кунъя люкам ю тысьлэн быдӟалаез ӵошаз ни сютэм кадь улэм-вылэм 1946-тӥ арлэн лыдпусэзлы. Кышкыт. Ас вакытаз Конфуций вераз вал: "Тодонлык шаере вутто куинь сюресъёс: малпаськыса вамышъян сюрес - самой ӟечлыкоез; кинлэсь ке адӟем карон сюрес - самой капчиез; куинетӥез сюрес - уж вылын лэсьтыса-быдэстыса, аслэсьтыд кужымдэ эскерон - самой секытэз". Тани лыдэ басьтом Киров улосвылысь Кильмезь ёросэз гинэ. Милям кивалтӥсьёсмы котьку но кинлэсь ке адӟем карыны тыршо. Кык ар ӵоже ни котькуд кенешъёсын вераськон мынӥз Удмурт шаерысь Вавож ёросысь Мичурин нимо колхозлэн азинсконъёсыз сярысь. Дугдылытэк зулизы: "Кыӵе чырмыт ужало бускельёсмы! Туж зол возё ужан дисциплинаез, хозяйствоязы пыӵатэмын хозрасчёт амалъя ужан". Нош та ваньмыз вал ни уга, ваньмыз ортчемын. Ортчем аръёсысь улон тузонъёс, тӧлпериос пӧлы ышыса кылизы. Табере бускельёсмылэн азинсконзылэсь мугзэс со ыштэмъёсты воземзы, уже кутэмзы вылысь ик шараяськом. Улосвыламы выль тулкым лыктыса шуккиськиз: улонэ пыӵатоно орловской амалэз! Губернатормы, сьӧраз бадӟым делегация люкаса, юри ветлӥз Орёл областе. Ас синъёсынызы адӟизы, кызьы ужало но азинско гурт хозяйствоос. Отын уго кылдытъяло бадӟымесь агрофирмаос. Музъем ужась но, колбаса лэсьтӥсь но, вузкарись но одӥг кыткетын. Ваньзы огазьын ужало, берпум лыдпусъя гинэ уждун люкыло. Нокин, нокинлы уг йыркуръяськы. Вавож ёросысь Мичурин нимо колхозэз огдырлы вунэтыса, табере ёросысь кивалтӥсьёсмы кенешлы быдэ, кикы музэн силё ни орловской амал сярысь. Тани берло ортчем кенешысь гинэ куд-ог специалистъёслэсь, кивалтӥсьёслэсь таӵе верамъёссэс кылзоно луиз. Е. В. Николаев, ёросысь сельхозуправленилэн тӧроез: "Асьмелы одно ик улонамы пыӵатоно Орёл областьлэсь ужан опытсэ. Бадӟымесь агрофирмаос кылдытыса, поттоно ӟечлыко сиён-юонъёс. Сотэк ум дуггдэ йӧлэз, сӥлез палэнэ вузанлэсь. Кылем арын гинэ районлэсь палэнэ вузамын 450 тонна сӥль! Г. Ф. Соловьев, "Дубровский" колхозлэн тӧроез: "Ёросысь колхозъёс пӧлын милям хозяйствомы самой бадӟымез но кужмоез. Поттӥськом трос сӥль но йӧл. Нуыса вузаськом Удмуртие. Ма бен карод на? Кытчы ке но вузано ук поттэм ваньбурез. Асьмелэн вӧй шуккон заводмы басьтэм йӧл понна дун тырыны но уг быгаты. Со дыре ик, Сюмсиысь но Уваысь предприятиос нуналаз ик улэп коньдон сётыса лэзё". Ю. Т. Гулин, ёросысь администрацилэн тӧроез: "Улон возьматэ, ваньмылы огазе кариськыса кылдытоно агрофирма. Нош та вамышын асьмелы сьӧлтэт пуктэ Удмурт шаер". А. П. Логинов, улосвылысь Гурт хозяйствоя но сиён юон поттонъя комитетлэн тӧроез: "Тӥляд мадемдыя, поттэм сӥльды но йӧлды Киров улосвыллы кулэ ӧвӧл, кулэ - Удмуртилы. Тани туннэ ортчи райцентрысь куд-ог магазинъёстӥ. Трос ӝажыос вылын колбаса, творог, кефир, сыр, соос Уваын яке Сюмсиын потэмын, дасямын. Бен, ческытэсь соос. Быгато асьме бускельёсмы ужаны, ӟеч вузъёс поттыны. Нош соос асьмелы поттэм вуззэс сётэмысь ке дугдӥзы?! Пилиськем тусь вӧзы ум кыле-а? Тани малэсь кышкыт. Оло, нырысь агрофирма кылдытыса эскероно Кильмезь маслозаводын?" В. И. Перевозчиков, йӧл-вӧй поттон заводлэн директорез: "Шонер верало: Удмурт шаер кузёяське асьме йӧлэн, коньдонэн. Та сюресэз пытсан, йыг-йыг пыд йылэ султон понна, милемлы кулэ 200-300 сюрс манет тыр юрттэт. Соку поттыны кутскысалмы кӧс йӧллэсь порошок, казеин. Сое басьтӥсьёс, юасьёс тырмыт гинэ". А. П. Логинов: "Область сыӵе юрттэт сётыны уз быгаты, казнамы - буш. Утчалэ, шедьтэ. Асьтэос дышетске ни коньдон поттыны". Тӥни озьы: ваньмыз чигтонтэм-люконтэм эгесамын "коньдон" кыл борды. Таӵе дыре нокыӵе "опытъёс" но уз юрттэ ни. Аслыд сюлмогес кариськоно, вылды. Синмаськисько но ӟеч мылкыдын вожъяськисько мон Удмурт шаерын гурт удысын тыршисьёслы. Зол ужало, ӟеч уло. Нош ми ялан кинлэсь ке адӟем карыны тыршиськом. Соин ик дугдытэк зуркало вужгуртъёсмы но. Николай Турин. Винтовка, автомат но пистолет Ижевскын йылпумъяськиз законэз тӥяса пыӵал тӥрлыкен вузкарисьёслы пумит суд. Кӧня ке адямиос куинь ар ӵоже нимысьтыз дасям ёзъёслэсь пыӵал тӥрлык бичазы но бӧрысь сое вузазы. 1998-тӥ арын соос ӝегатэмын вал, Драгунов снайпер винтовка, Калашников автомат, Макаров но Марголин кӧня ке пистолет вузакузы. Та арбериос тупатэмын вал асьсэ киосын лэсьтэм лушкем ыбылӥськон системаен, оптикаен, озьы ик лазерен мертаськонэн. Пыӵал тӥрлык вузаны дасямын вал Новосибирскысь йырвандӥсьёслы. Но соосты ФСБ-ын ужасьёс ӝегатӥзы Можга тракт вылысь ГИБДД-лэн постаз, ыбылӥськон арбериосты келясь курьерен ӵош. Следствие мыныку, янгыше уськытэмъёс пӧяськон сюрес вылэ султӥзы, веранъёссэс ӵемысь вошъязы. Но со ӧз юртты, йыртэмасьёслы кыл кутоно луоз. Группалэсь азьветлӥсьсэ, Санниковез, Ижевскысь Октябрь ёросысь калык суд 4,5 арлы эриклэсь люкиз. Солэн эшъёсыз, Каплин но Радоник, 3,5 арлы пытсэт сьӧры келямын. Со сяна, суд Санниковлэсь кӧня ке сюрс долларзэ талаз. Россия Федерациысь ФСБ-лэн Удмурт Республикая управлениезлэн пресс-службаез. Кизё... музъемез гырытэк Воткинск ёросысь "Июльское" учхоз кык нуналлы быдэс республикамес огазе люказ шуыны луоз. Отын ортчиз бадӟым дышетскон. Семинар- совещанилэн нырысетӥ нуналаз хозяйствое вуылӥзы городъёслэн но ёросъёслэн администрациосс ылэн тӧрооссы, гурт удысъя управлениослэн кивалтӥсьёссы. Ӵуказеяз ветлӥзы эштосъёслэн, совхозъёслэн, гурт кооперативъёслэ н кузёоссы, гурт удысъя управлениослэн но хозяйствоослэн валтӥсь агрономъёссы. Семинарез радъязы Удмурт Республикаысьты мы Правительство, Гурт удысъя но сиён-юон поттонъя министерство. Дышетскыны юнме шорысь "Июльское" учхоз быръемын ӧвӧл. Татын уго ог кызь ар ини кидысэз кизё, музъемзэс гырытэк. Зэм, со понна кулэ нимысьтыз технология но техника. Лыктэмъёс асьсэ синъёсынызы адӟизы но дунъет сётӥзы со амаллы. Кутозы-а сое асьсэ хозяйствоосазы? Соиз ини кузёослэн но специалистъёслэ н ужзы. Н. Лялин. Вольыт сюрес! Ижын кылдӥз городысьтымы удмурт егитъёслэн огазеяськонзы - "Эрик" ас бордаз бинялтоз тэк улонэз тодӥсьтэм, калыкмылэн азьпал улонэз сярысь сюлмаськись адямиосты. Солэн нырысетӥ кенешез ик сӥземын вал матысь дыре быдэстоно ужпумъёслы. Удмурт нылъёсты но, пиосты но сюлмаськыто туннэ ужтэк но улон интытэк кылён, шутэтскон дырез кулэезъя радъяны быгатон. Матысь дыре ик "Эрик" пичиесь ёзъёссэ кылдытъялоз Ижысь ёросъёсын. Нырысетӥ кенешын ик быръемын огазеяськонлы тӧро. Соин кивалтоз егит азьветлӥсь Алексей Андриянов. Солэн нырысетӥ воштӥсез луоз Ижысь медициная академиысь дышетӥсь биология наукаосъя кандидат Павел Назаров. Егитъёслы юрттозы "Удмуртия" кун телерадиокомпаниысь журналистъёс Светлана Пикулева, Майя Бывальцева, Федор Миннигараев, Удмурт кун университетысь дышетскисьёс Владимир Широбоков, Алина Федорова, Алексей Танаев, Владимир Куликов, Удмурт кун университетысь дышетӥсь Алексей Терентьев, Ижысь Индустриальной ёросысь военкомлэн юрттӥсез Сергей Федоров, Дэри ёросысь Холмогоров нимо эштосысь агроном Алексей Михайлов, мукетъёс. Удмурт егитъёслэн выль огазеяськонзылы ӟеч сюрес сӥзизы Удмурт Элькунысь Кун Кенешлэн Тӧроезлэн нырысетӥ воштӥсез Павел Вершинин но "Удмурт кенеш" огазеяськонлэн ёзэзлэн тӧроез Илья Байметов. Е.РОМАШОВА. ЧУГУН СЮРЕС Воштӥське поездъёслэн ветлон дырзы Гужемлэн матэ вуэменыз валче, 28-тӥ майысен 24 часэ воштӥське поездъёслэн ветлон дырзы. Со сярысь алигес журналистъёслы мадиз Горький чугун сюреслэн Ижысь ёзэзлэн Адямиосты нуллонъя дирекциезлэн кивалтӥсезлэн воштӥсез Владимир Женин. Вераны кулэ, туэ пытсаське Ижевск-Симферополь поезд. Мугез одӥг - калык ичи ветлэ. Со понна Ижевск-Новороссийск поезд арняяз кык пол кошкоз Казань пыр. Дорысьтымы 5 вагон мыноз. Озьы ик кыле Ижевск-Адлер поезд. Со 22-тӥ мае 12 вагонэн нылпиосмес шутэтскыны лымшоре нуиз ни. Нош 28-тӥ май бере 14 вагонэн ветлоз. 25 номеро Ижевск-Москва поезд табере бергес потоз, 11 час но 45 минутэ (Москва дырын). Россилэн шоркараз вуоз ӵукна 6 час но 24 минутэ. Вылез вань Ижевск- Свердловск поездлэн ветлоназ. Табере со Тюменёзь мыноз. Та ӟырдыт вакытлы ветлонлы 120 проводникъёс кутоно луоз. Али 3 группа дышетске ни, котькудаз - 35-36 адями. Кема ужасьёсыз кыдёке ветлозы. Билет кассаос умой ужало, "Экспресс" аппаратэз вератэк. Со вужмиз ни. Кулэ ни "Экспресс-3" аппаратъёс пуктылыны. Али соос эскерисько Приволжской чугун сюрес вылын. Вуоно арын дорамы вуозы. Шумпотыса верам потэ, билет дунъёс но тарифъёс уг будо, али кадь ик кылё. Ижевск- Адлер поездэ гинэ, калыклэн куремезъя, СВ вагон ватсаське. Но чугун сюрес тужгес но бадӟым инты висъя нылпиосты зарезь доры нуон-ваёнлы. Озьы ик кылё ваньмыз льготаос, соос 40 пала луо. Пригородной поездъёс азьвыл сямен ветлозы, дырзыя бадӟымесь воштӥськонъёс ӧвӧл. Ижевск-Зилай поезд табере Кезозь мыноз, нош Ижевск-Воткинск ӵукна вить час интые 5 час но 42 минутэ вырӟоз. Поездъёсын озьы ик кылё услугаос. Но кӧлан дӥсез (простыняосты) али Горькийын мисько. Со дуногес усе, куддыръя ӟечлыкез но уг луы. Чугун сюреслы Ижын вуттоно прачечноез. Отын 8 тонна дӥсь миськыны луоз, пайдаез но люкаськоз. Оглом вераса, берло дыре калык поездэн тросгес ветлэ. Та лыдпус 15-17 процентлы йылӥз. Г.РОМАНОВ. Бускельёсмы дорын Вань калыкъёс одӥг кадь дуноесь Башкортостанысь калык туала Президентсылы Муртаза Рахимовлы дунъет сётыса, "от души" шуэ. Майбыр. Башкириын ортчем Удмурт культурая нуналъёс сярысь кылемаз гожъямам мон возьматыны тырши ни вал улон-вылонэз. Туннэ веранэ отысь дышетон удысысь национальной ужпумъёс, шонергес ке, соослэн ӧвӧлзы сярысь. Башкириын тросгес уло ӟучъёс. Соос - 38 процент. Но огезлэн но асьме дорын сямен тодаз уг лыкты асьсэлэсь гинэ кылзэс валтӥсь лыдъяны. Татын гинэ асьсэды туж эрико шӧдо бигеръёс но башкиръёс но, удмуртъёс но трос мукетъёсыз но калыкъёс. Сотэк быгатысалзы-а 0,29 процент мында немецъёс асьсэлы нимысьтыз куинь школа усьтыны. Со гинэ ма! Асьсэ кылын татын дышетскыны быгатэ котькудӥз калык, пӧлысьтызы куинь мурт ке но мылкыд карисез вань ке. Башкортостанысь Калыкез дышетонъя министерствоысь валтӥсь специалистлэн Танзиля Гариевалэн верамезъя, али республикаын асьсэ кылынызы дышетскыны быгато 14 пӧртэм калыкъёс. Школаосын чузъясько ӟуч, бигер, башкир, чуваш, пор, мордва, удмурт, немец, украинец, англи, белорус, латыш, еврей, поляк, грек кылъёс. Покчи классъёсын пиналъёс дышетско быдэсак вордскем кылынызы, отӥяз вордскем кыл предмет луэ. - Но кытысь шедьтӥськоды со кылъёсъя специалистъёсты? - Со, зэмзэ но, секыт ужпум. Но ужаськом республикаосын. Кӧня ке арзэ ини ӟеч кусып возиськом Белоруссиен, Украинаен, Латвиен. Соосын огкыл кутэмын - отысь дышетон пособиос, 1-2 арлы дышетӥсь ысъяло. Дышетӥсьёслэн ӵемысь вошъяськемзы умой ик ӧвӧл, но ма карод? Я коть одӥгез украин кыллы дышетӥсьмы али ми пала бызиз, со туж умой - таман ум ёрме ни. - Со понна туж трос коньдон быре, дыр, ук? - Соиз ини Президентлэн сюлмаськонэз. Кылъёс сярысь законын шуэмын, котькуд калыклэн огкадь правоосыз, озьы ик мед луоз. Озьы учконо ке, малы латыш класс возёно кадь - соос нырысь воксё куинь мурт гинэ вал, но ми шумпотӥськом, адямиос дорзылэсь палэнын улыса но выжыосынызы тунсыкъясько, асьсэды калыкез сямен дунъяло шуыса. Тӥ уд оске, но ми асьмеос калык пӧлтӥ ветлӥськом, тросгес национальной классъёс, школаос усьтыны курыса. Адями нырысь ик аслэсьтыз кылзэ ӟеч-ӟеч тодыны кулэ, собере - ӟучсэ но кунгож сьӧрысьсэ. - Вӧзаз бигерзэ-башкирзэ но, озьы-а? - Соиз пумысен вераськон ик ӧвӧл кадь. Кыӵе ассэ гажась мурт вӧзаз улӥсь калыклэсь кылзэ тодытэк улоз? - Анай-атайёс ласянь нокыӵе пумитъяськонъёс уг луыло шат? - Мон паймисько сыӵе юанъёслы. Анайлэн ужез ӧвӧл шат со - пиналдэ ас кылыдлы дышетон? Ми тани ӝоген малпаськом быдэсак латынь алфавитэ выжыны, со туж бадӟым воштӥськон луыны кулэ, но малпасько, пумитъяськисьёс уз луэ - историез гажаны кулэ. - Кыӵе югдур али Башкортостанысь удмурт школаосын? - Огласянь - ушъяськымон. Удмурт кылэз дышето 55 школаын. Тросэз соос республикаямы устоосыз. Берло дыре тупатскыны ӧдъяз удмурт кылъя но литературая дышетӥсьёсты дасян - Нефтекамскысь педколледжын вань нимысьтыз удмурт группа. Вылӥ образование басьто Ижевскын, Удмурт университетын. Валлян арын усьтыны быгатӥм Уфаын удмурт класс. Усьтоно на вылэм Илишевской районысь Ташличи гуртын удмурт школа. Но малы ке отысь удмуртъёс кема малпасько, асьсэды бигер каро. Но ми ёрмиськом удмурт книгаослы - библиотекаосмы туж начаресь. Та ласянь пыкылэме потэ Удмурт Кивалтэтэз - палэнысь удмуртъёслы туж ичи саклык висъя. З. Рябинина. Тамак уно аръёс ӵоже тодмо Европаын, Азиын, Африкаын. Сое кыско вылэм, пе, Египетысь фараонъёс но. Али тамакен усыкмемын Россия. Кыско ӝыныез воргоронъёс но куамын процентэз нылкышноос. Соосты уг кышкаты тамаклэн изъян, кулон ваемез. Угось Россиын арлы быдэ та муген улонысь кошке куинь миллионлэсь ятыр адями. Тамак кыскисьёс асьсэлы гинэ ӧвӧл, государстволы но изъян ваё. Чаклалэ ай кӧня кондон кисьтӥське лябӟем муртъёсты эмъянлы? Нош тамак кыскисьёс 13 поллы ӵемгес сюлэм но ӝуш висёнъёсын, пыктосэн курадӟо. Азьвыл тамак арлыдо адямиос кыскылӥзы ке, али кӧбератэк "шузиясько" пиналъёс но. Соосты туж алӥсь но ӧвӧл ни кадь, наркотикен гинэ медам выре, шуо. Нош наркотик кутске ӵапак тамак кыскон бордысен. Малы бен тамак уг кышкаты? Изъян ваемез соку ик шӧдӥськымтэысь, луоз. Но ӵап со ик кышкыт. Тамаке пыре куатьтонлэсь уно "отрава". Со никотин, углеродлэн окисез, пӧртэм сиръёс, радиоактивной изотопъёс, узвесь, кадмий, никель, кобальт но мукет. Ваньмыз со пыӵа вире, йырвизьме. Тодӥськоды-а, кӧня яд люкаське кема аръёс ӵоже кыскем муртлэн тыосаз? Килограмм пала. Отысь со вир кузя вӧлме быдэс мугоръя, адями лябӟе, начарме. Сыӵе муртъёслэн ӵемгес суйзы-пыдзы чигылэ. Воргоронъёс ышто асьсэлэсь "пиосмурт кужымзэс", кышномуртъёс "кезьыт"луо, ляб, урод нылпи ваё, вазь пересьмо. Америкаын тамаклэсь изъянзэ кемалась валазы ни - отын кыскисьёслэн лыдзы арысь аре кулэсме, нош асьмелэн визьмы котьку сямен ик бӧрсямы ветлэ. В. Городсков. Медицина наукаосъя кандидат. МЫНАМ ТЕЛЕВИЗОРЕ Каргам баракъёс Городлэсь вылтуссэ сьӧдмаса кадь, Ижысь урамъёсын сыло на ай уно баракъёс. Война вакытэ пуктэм юртъёс пумен куашкало, сисьмо. Но соосты туж яратэ вылэм "горд атас". Коркаосты умой-умой учкись ӧвӧл ни бере, отын ӵемысь потыло тылпуос. Тужгес но улыно-вылыно баракъёсын. Туэ ньыль толэзь ӵоже гинэ шаерамы ог 20 пала тылпу ӝутскылӥз ни. Изъянэз 170 сюрс манет пала. Ӝуа Иж, Яган, Дзякино, Дизьмино, Ува... Ижысь Чапаев проездысь 35 номеро юртын (1-тӥ туспуктэм) бадӟым электрокужымен электрощит интыямын пырон доры ик. Нокыӵе утиськон арбериен шобыртэмын ӧвӧл. Та проездысь ик 31-тӥ юртысь улӥсьёслэн пу возён лапассы тани-тани мынӥсь- ветлӥсьёс вылэ погралоз (2-тӥ туспуктэм). Отчы покчиос тылскиллям но вылэм ни. Баракъёсын улыны кышкыт ке но, адямиос чылкытлык сярысь уг вунэто (3-тӥ туспуктэм). Туэ 16-тӥ мае Ижевскысь Полигон посёлокысь Раиса Ворожцовалэн но эшшо ньылезлэн бускельёсызлэн улон интызы туж вакчи дыр куспын пеньлы пӧрмиз. Верамзыя, тылпу ӝутскем юэмъёслэн янгышенызы. Нош Раиса Николаевналы кин ке юрттӥсь шедёз меда? Али со мунчоын улэ. Ачиз со вань улонзэ тыршиз чугун сюрес вылын. Рейдэ потазы Н.ЛЯЛИН но В.БЕЛОМОРСКИХ. ТАЗАЛЫК Яратон со умой, но... ВИЧ-лэсь но СПИД-лэсь кулэмъёсты Буре ваён калык куспо нунал туэ ортчиз 21-тӥ мае "СПИД: тросэз потэ пиосмурт бордысь" курон улсын. Дуннеын ВИЧ паламъёс но СПИД-эн висисьёс 33,6 миллионлэсь ятыр, нош кулэмын ни та висёнлэсь 16,3 миллион адями. Россиын туэ ньылетӥ апрельлы пусъемын вал ни 35116 ВИЧ-инфекция паламъёс, соос пӧлын СПИД-эн висе 396 мурт, кулэмын 561 адями. Удмуртиын та нуналлы шараямын ВИЧ палам 86 мурт, одӥгез висе СПИД-эн. Кык мурт кулэмын ни, одӥгез СПИД-эн висе вал, мукетызлы паламын ВИЧ-инфекция. Малы таяз аре саклык висъямын пиосмуртъёслы? Висёнлэн паськыт вӧлмонэз ӵемгес соос бордысь потэ угось. Дуннелэн котькыӵе сэрегаз соос мед улозы, ваньмызлэнгес ик нылкышноосты трос яратон сямзы вань - одӥг-кыкеныз гинэ валче кусып уг возё соос, семьязы ке но вань ни. Нылкышноос со ласянь чакласькысагес уло. Озьы тӥни, ВИЧ улэ тросгес сюро пиосмуртъёс, соос ик инфекциез вӧлмыто кузъёссылы. Шуом, уж утчаса, семьялэн кузёез палэнын улоно луэ. Отысен ини со шедьтэ мылкыдзэ буйгатон пӧртэм амалъёс: нылкышноосын герӟаське, юонлэсь но мукет йыр поромон арбериослэсь уг палэнтӥськы. Воргоронъёс пӧлы гинэ сюрыса, таосыныз но валче кусып тупатӥсьёс вань. Пиосмуртъёсты котыр ласянь ушъяны луоз. Соос ик политикъёс, огшоры ужасьёс, синмаськымон атайёс, кинлэн ке пиосыз, агай-вынъёсыз, эшъёсыз. Кинэн ке валче кусып тупатыкузы яке семьязы азьын соос ик кыл кутыны кулэ. Та ласянь пиосмуртъёсты чакласькыны дышетоно, юрттоно соослы дышем сямъёссылэсь куштӥськыны. Тросэз малы ке но лыдъяло, наркотикъёсты кутыку чакласькон, озьы ик презервативъёсын вырон - со воргоронлы тупасьтэм сям. Кышкыт чер вӧлмонлэсь палэнскеммы потэ ке, дыр вуиз ини сыӵе учконъёслэсь палэнскыны. Адямилэн яратон мылкыдъёсыз бордысь но, наркотиктэк улыны быгатымтэез бордысь но та висён уг поты. Одӥгзэ вунэтоно ӧвӧл - кулэ утиськыны. Г.ВОРОНОВА, СПИД-эн но палась висёнъёсын нюръяськонъя но алонъя центрысь отделенилэн кивалтӥсез. Люкаськозы коммунистъёс Ӵуказе Ижкарысь Профсоюзъёслэен юртазы Удмуртиысь коммунистъёс люкаськозы. Ужрадзы сӥземын КПРФ-лэн республикаысьтымы ёзэзлэн ужамезъя йылпумъянъёслы но быръёнъёслы. КПРФ-лэн таиз 49-тӥ конференциез луоз ни. Озьы ик эскерозы кыӵе удыс бордын ужамзэс, план кутозы. Одӥгез сюлэмшугъяськытӥсь ужпумзы: коммунистъёслэн радазы егитъёсты кыскон. Сое улонэ пыӵатыса, конференциын кӧня ке муртэ партие партозы. А.АНДРИЯНОВ. ТАЗАЛЫК Мар уг тырмы? Сылал! 1998-тӥ арын Удмуртиысь Правительстволэн Эпидемиосын нюръяськонъя но чылкытлыкез эскеронъя комиссиез кутӥз вал йод тырмытэк кылдэм висёнъёслэсь утиськон сярысь решение. Асьме вуын но музъемын та туж кулэ луись вещество уг тырмы, соин валче вӧлме ньылондор безэн (щитовидной железаен) курадӟисьёслэн лыдзы. Со сяна, дырызлэсь вазь лябӟе йырсазь, нылкышноос ляб визьем пинал вордо. Соин валче пӧртэм ужпумъёс пуктэмын вал, но туннэ нуналозь соос быдэстымтэ. Кылсярысь, шаерысьтымы калыклы араз 5729,5 тонна йодэн сурам сылал кулэ, нош ваемын 2 тонна гинэ. Нылпи садъёсын, школаосын пиналъёслы тырмыт уг сётъяло зарезь сиёнъёсты но мукет. Адямилэн мугорысьтыз йод - ӝыныез ньылондор безэ люкаське. Со тырмымон ке, адями шергес висьылэ: йод ачиз пӧртэм вирусъёсты но бактериосты быдтэ, вирез чылкытатэ, мугорысь шунытэз возьыны юрттэ. Но али шаерамы чылкак мукет югдур. Мугоразы йод тырмымтэен мӧйыос гинэ ӧвӧл, нылпиос но курадӟо ни. Соос ляб дышетско, керӟег луо. Мар бен кароно? Валэктон туж огшоры - сиськоно. 90 процентэз йод мугоре сиён пыр шеде уго. Йодэн узыр луо зарезь сиёнъёс (чорыг, кубиста, креветка, кальмар, краб, мидия но мукет). Зарезь кубиста - со ву турын. Со туж кӧттыро ӧвӧл ке но, отын трос белокез но кӧйыз, йодэз, В витаминэз но минерал веществоосыз вань. Ньылондор безэн курадӟисьёслы сяна, со туж умой ишемиен, сахар диабетэн, атеросклерозэн висисьёслы. Зарезь чорыгын, йод сяна, вань фтор, ыргон, цинк... Тазалык понна со туж пайдаё. Но калык зарезь чорыгъёсты ӧжыт басья, соин ик али йод ватсалляло куд-ог ческыт сиёнъёсы, няне. Городысь магазинъёсын вузаське йодэн узыр "Рябинушка" нянь, сылал. Но тодыны кулэ, дыр ортчемъя, отысь йодэз тӧлӟе. Сиёнысь трос йодэз быре пӧзьтыку но. Кылсярысь, картофкаез быгылесэн пӧзьтыку ыше 30 процентэз, нош векчи юдыса - ӝыныез. Зарезь сиёнъёс сяна, мар ӵектыны луысал на гуртын улӥсьёслы? Сие пудолэсь пеклязэ, курег пуз, губи, чеснок. Зэм, мугорын йод мултэс ке, озьы ик кышкыт. Йодэн узыр улосъёсын будо тужгес бадӟым будосъёс, вуын - чорыгъёс но пӧйшуръёс. Но али со сярысь вераськонэз ик ӧвӧл ай. Л.ЗОНИС, республикаысьтымы валтӥсь диетолог. Чуръёс, чуръёс... Ужакуд гинэ дуно Сюлэмы чидатэк гожтӥсько газетэ. Ноку но умой улонэз адӟыны уз кылды ни, дыр - пичи дыръямы войнаын атаймы быриз. Дас аресысен ужано луи, соин школае но 12 арескын гинэ мынӥ ай. Ужам стаже 40 ар люкаськыны кулэ, но трудовоям 38 ар гожтӥллям. Малы озьы каро, мынам адӟисьёсы али вань ук ай. Ваньмыз паймо, кызьы, озьы, пе, пичиысен ужаса, тынад стажед ичигес. Егит дыръям дас ар пала заводын ужай, собере пенсие потытозям ик "Ижевский" колхозын пудо-живот утялтӥ. Ялан азьмынӥсьын ветлӥ но номыр ӟечсэ ӧй адӟылы. Кӧня квартира кури, возьма-возьма шуизы, нош пенсие потӥ но, кылэмзы но, адӟемзы но уг поты ни. Али ветеранъёслы юрттэт сётъяло ук, уг луы-а ми кадь курадӟыса будэмъёслы юрттыны? Коркае быдэсак сисьмемын, кызьы улыны йырвизьмы уг тырмы ни. А. Харлаева. Лудорвай гурт, Завьялово ёрос. Гурт улон Малы йӧл мултэс луиз? Куасалто гурт калыкез, зол куасалто. Колхозъёслэн тӧроссы котькуд нунал сямен пунэмен коньдон утчаса ветлоно луо. Нош кин сое сётоз? Шонер, нокин но уз. Я али тани гырон-кизён быриз, шуом. Но со сяна, мукетыз вань на. Удмурт Республикалэн 2000-тӥ арлы бюджетаз гурт удыслы висъяны чакламын 114 миллион манет. Со мырдэм- мырдэм тырмиз кидыс, эстӥськон, воштос ёзъёс басьтыны. Озьы 70 сюрс гектар пала удмурт бусыос кизьытэк кылёз. Нош собере? Ныр улын ни пудо сиён дасян. Ю тысез аран вуоз. Картошка но мукет бакча сиёнъёсты бичано. Собере пудоез толйытыны кулэ. Нош ужась калыклы уждун тырыны? Нош налогъёс? Бюджетысь висъям уксё нокытчы ӵогӟытэк кошкиз. Май толэзьысен эстӥськонлы но электрокужымлы дунъёс 40 процентлы йылӥзы, Техникалы воштос ёзъёс - 120 процентлы. Промышленнстьысь но гурт удысъёсысь вузъёслэн дунъёссы куать поллы пӧртэмесь. Татчыозь колхозъёс йӧлзэс вузаса гинэ пайда потто вал. Ю тысь, сӥль изъян вае. Табере нырысётӥ майысен "Ижмолоко" огазеяськон гуртоослэсь йӧлзэс килограммзэ 2 манет но 50 коньыен басьтэ. Отчыозь 1 манетлы дуногес вал. Озьы йӧл дун шуак одӥг куиньмослы кулэсмиз. Таӵе кыӵесэ сюрем колхозъёслэн тӧроссы ма карыны ёрмемын. Эстӥськонлы но электрокужымлы дунъёс будэмъя йӧллэн но ӝутскыны кулэ кадь. Нош асьмелэн ваньмыз мыддорин. Кыӵесысь потон сюрес утчаса, алигес Гурт удысъя но сиён-юон поттонъя министерствоын республикаысь колхозъёслэн кенешсылэн президиумез но "Удмуртилэсь экономикая кулэяськонъёссэ утён понна" огазеяськонлэн исполкомез нимысьтыз пумиськон ортчытӥз. Отчы пыриськемъёслэсь лыдзэс учкыса, валаны луэ: та югдур туннэ тужгес но ӟырдытэз луэ. Ужрадэ пыриськизы гурт удысъя но сиён-юонъя министр П. А. Першин, Кун Кенешысь гурт удысъя комиссилэн кивалтӥсез Л. К. Фролов, Кун Кенешысь депутатъёс, "Ижмолоко" но "Кезский сырзавод" огазеяськонъёслэн генеральной директоръёссы Г. Ф. Красноперов но А. Ю. Максимов. Бускельъёс йӧл тросгес потто, пайда уногес басьто. Пермь улос вылын одӥг тоннаез йӧл сылэ 3500 манет, Кировын - 3200, Башкортостанын - 3665, Татарстанын - 3500. Асьмелэн "Ижмолокомы" 2500 манетэн басьтэ, республикая оглом 3500 манет луэ. Но со понна Кировын гуртоослы одӥг тонна йӧл понна 200 манет юрттэт сёто, Татарстанын - 500, Башкириын - 165, асьмелэн - 110 манет. Тулыс 1 килограммез эстӥськон колхозъёслы 10 манетэн усиз. Шуге-леке вуэм тӧроос уг тодо ни ма вераны ужасьёссылы. Сотэк но туж пичи уждун басьто, табере йӧл вузан ваёз на ыштон. Шонер вераз Дэбес ёросысь "Труженик" СПК-лэн тӧроез Валерий Каракулов: таӵе ужрадэ, пе, республикаысь вылӥ кивалтӥсьёсты ӧтёно вал. Угось сиён-юонъя кышкытлыклэсь утиськон - со кунлэн ужез. Оло, ваньмыз та политикаен герӟаськемын? Соин али йӧлэз лавкаосын дунтэмгес карыны туж умой. Сыӵе мылкыдзэ вераз Вавож ёросысь "Луч" эштослэн тӧроез Иван Перевощиков. Республикаын кылдэм югдурен тодматӥзы министр П. А. Першин но депутатъёслэн комиссизылэн кивалтӥсез Л. К. Фролов. Кызьы ивортӥз министр, нокин но дась ӧй вал йӧллэн мултэс луонэзлы. Тулыс Украина но Белоруссия газлы пунэм тыронзэс йӧлын берыктӥзы. Соин Москваын но Петербургын асьмелэн вузмы кулэ ӧз луы ни. Удмуртиын сыр 200 тонна люкаськемын, вӧй - 600 тонна. Вузаны уг быгато. Туннэ ик ворсаны яра ни "Кизнермолокоез". Мукет предприятиосын но ужъёс ӟеч ӧвӧл. Гуртэз улӟытон понна рос-прос бастӥськоно картофка, етӥн, пудо будэтон борды. Люкаськемъёс "Ижмолоко" АО-лэсь валтӥсь директорзэ валэктыны куризы: малы со озьы чутрак дунзэ кулэстӥз? Гурт калыкез кекатон луэ ук со. Калыкен быръем депутат юанлэсь ӧз куалекты. Веранэз дась вал ни: дунъёсты нокыӵе Красноперов уг пукты. Ваньмыз понна янгыш промышленностьысь но гуртысь вузъёслэн дунъёссылэн пӧртэмлыксы. Предприятие 5 процент пайда вайыса ужа. 30 миллион манет тыр вузъёсыз нокинлы кулэ ӧвӧл. Г. Ф. Красноперов дась гуртлы юрттыны. Солы ӵектӥзы "Ижмолокоез" калык предприятие карыны. Депутат солы пумит огзэ гинэ вераз: предприятилэн вань акционеръёсыз, соос гинэ та ужпумез эскерыны быгатоз. Люкаськемъёслы валамон вал: Красноперовлы пайдаёгес акциосын огазеяськон ик кельтыны. Интыосысь сётъям юанъёслы пумит депутат ачиз юан сётӥз. Малы нокин но куаразэ ӧз потты мукет кунъёсысь вӧез Россие ваёнлы пумит? "Ижмолоко" та пумысен республикалэн кивалтӥсьёсызлы гожтэт ыстӥз вал. Кинлы, Волковен но Ганзаен сяна, та ужпумез ӝутоно вал Федерацилэн Кенешаз? Люкаськемъёс Красноперовлэсь номыр ӟечсэ ӧз кылэ. Экономика удысысь лыдпусъёс верало: предприятилы али пайдаё ужаны йӧлэз одӥг тонназэ 2500 манетэн басьтыса. "Кезский сырзаводлэн" Анатолий Максимов калыклы матынгес кадь. Сырзавод 9-11 процент табышен ужа. Со трос ӧвӧл. Но ӧвӧлтэмлэсь вань. Предприятие продукцизэ Нижний Тагил городэ но келя вылэм. Отысь санэпидемстанция табере уг лэзьы ни. Йӧлэз нимаз посудаосын 2 час гинэ сюрес вылын возьыны яра. Нош Удмуртиысь отчы нуо вылэм 12 час ӵоже. "Тӥляд продукциды ческыт, но милям калыкмес утеммы потэ", - шуиллям тагилъёс. Зэм, рыноклэсь уд пегӟы. Вань со. Котькытын пуроме нюръяськон. Сыӵе ик рынок радъямын Башкириын, Татариын но мукет улосъёсын. Кун Кенешлэн депутатэзлэн Н. Чувашовлэн кылъёсызъя Красноперов экономикаын умойтэм лэсьтэ. Германиысь йӧллэсь сиён-юон басьтыны мынӥсь коньдонэз асьме вуз поттӥсьёслы сётысалзы ке, ӝоген улӟысалмы. Жыльы кадь гуртысь йӧлэз басьто. Адямилэн ужез вань. Хозяйство табыш поттыса ужаны кутске. Озьыен, трактор, машина басьтэмез луоз. Соку заводъёс ужаны кутскозы. Маховик выллем ик. Газлы пунэм тырон чотын Украинаысь но Белоруссиысь йӧл басьтэм гуртоосты шугъяськонэ вуттӥз. Не йӧлзы уг вузаськы ни, не техниказы вужмемын. Пайдаёгес луысал Белоруссилэсь МТЗ тракторъёссэ курыны. Ярам, туннэ рынокез тырмытӥзы. Нош ӵуказе мар возьма? Ялан-а озьы "авось" вылын уломы? Сыӵе амалэн гурт удыс ноку но уз ӝутскы. Специалистъёслэн лыдъямзыя, одӥг хозяйство одӥг толэзь куспын 200-210 сюрс манетсэ ыштэ. Йӧлэз 3 манет но 50 коньыен ӧз басьтэ ке, гуртоос гужем куспын 36 миллион манетсэс ыштозы. Зэмзэ вераса, дунъёсын шудон огшоры калыклэн кисыез вылын шӧдӥське. Гурт продукция дунтэма ке, гуртысь адямилэн улонэз дуногес луэ, нош городысь - дунтэмгес. Яке мукет сямен: йӧл-сӥль дуноя ке, гуртлэн улонэз дунтэма, нош городлэн дуноя. Озьыен, кинлы ке но чидано луэ. Тросгес курадӟе гурт. Но мар веранэз, одӥг заводлэн но, одӥг колхозлэн но ыштонъёсын ужамез уг поты. Бырйизы 13 муртлэсь кичӧлтӥсь группа. Соос борды огазеясько гурт хозяйствоя министр но Кун Кенешысь агропромышленной комиссилэн кивалтӥсез. Быръем муртъёс пыриськозы Кун Кенешлэн 11-тӥ сессилэн ужаз. Со нуналэ ик, 8-тӥ июне, Кун Кенешлэн юртэз азьын Удмуртиысь гурт хозяйствоослэн тӧроссы пикет ортчытозы. Колхозъёслэн кенешсылэн президиумез но "Удмуртилэсь экономикая кулэяськонъёссэ утён понна" огазеяськонлэн паськытатэм исполкомез республикаысь хозяйствоослэн тӧроссылы вазиськизы, отчы пыриськыны курыса. Со сяна, люкаськемъёс "Ижмолоко" АО-лы алон ялӥзы. Кенешемын та предприятилы одӥг литр но йӧл вузантэм вылысь. Вазиськизы Кун Кенешлэн депутатъёсызлы, Музъем сярысь программаез медам кутэ шуыса. Ӵектэмын спирт, аракы, сур пӧзьтон заводъёсты выльысь берыктыны Гурт хозяйствоя но сиён-юонъя министерстволы. Республикаысь Правительствоез куризы кӧс куазь дыръя ыштонъёс адӟем понна пунэм тыронзэ 20-тӥ июнёзь берыктыны, эстӥськонлы но электрокужымлы дунъёс йылэмъя йӧллэсь дунзэ будэтыны. Тӧроос одно ик возиськыны мылкыд каризы Россилэн Президентэзлы, Правительствоезлы но Безопасностья Советэзлы сиён-юонъя кылдэм кышкытлыклэсь утиськон вылысь программа кутыны. А. Андриянов. Шӧкыч Очей Толилы - пӧсь салам! Чырткем-а, Очей Толи! Яратоно газетысьтым адӟи ялондэ. "Удмурт дуннетэк" мыным омыр ик уз тырмы, дыр, шоканы. Уката ик яратӥсько "Шӧкыч" бамез. Малпай, малпай но аслым шуисько, тырмоз тыныд дасьсэ лыдӟыны, мон но юртто ай Шӧкыч уромелы. Н. Абашева. Завьялово районысь Ожмос гурт. Зэмась вӧт Коркае шоры учкисько но, сюлэм ик ырак луэ. Ӝужыт, чебер, кык этажъем, тӧдьы кирпичлэсь ӝутэмын. Нылпиелэн нылпиезлэн нылпиезлы но чидалоз. Ужысь бертыкум, азбарысен ик мунё кадь чебер кышное пумита. Йырсиез чиль-чиль сьӧд, бамъёсыз горд яблоклы укшало, пиньёсыз сяртчы кадесь, мугорыз пукыль-пукыль, ӟыгыртытэк уд чида. Нош кылыз, кылыз. Шунтэм вӧй кадь, кӧялоз но, вӧялоз но. Тани али но дорам лыктыса ӟыгырскиз, тыбырме топ-топ вешаз: - Ой, Петыре, Петыре, ужаса копак жадемед ини. Ойдо, корка пыром, кӧтыд но сюмаз, луоз, - озьы шуыса, кунултыса ик корка пыртӥз. Ӝӧк вылын ваньмыз дась ни: пыжем ӟазег, така сӥль, пӧсь перепеч, йӧлвылын пельнянь. Ой, Даше, Дашие, ку гинэ вуэ ваньзэ пӧраны, гид тыр пудоез утялтыны кулэ на угось. Кыласа-бураса кышное сиёнзэ ачиз ымам тыре, кушаны ик мырдэм вуисько. - Э, Петие, Петие, кызьы меда улысал тонтэк? - Ку та ӟечез но адӟысал, мусокаетэк. - Петушокетэк кин меда монэ мусоясал?.. Ну, кисьтэ ук, ну, кисьтэ ӟеч кылъёссэ. Жадемме мед веськато шуыса, холодильникез усьтӥз. Нош отын - пиво, кыӵеез гинэ ӧвӧл: "Ымдордэ нюл", "Юэмед потӥз-а?", "Нырысь ужа - собере ю"... Быдэс холодильник тырмытэмын веськатӥсь юонэн. Кырӟаса-кырӟаса сектаз пивозэ Дашие. Кырӟан висказ ӧз чида ни, чмок гинэ чупаз йырситэм кымесам. Укыр зол яратэ, лэся, вӧсь луытозь ик чупаз... Синъёсме усьтӥ но - валесам кыллисько. Кышноелэн, со шузи Дарьюшлэн, кияз ву юон кобы. Тӥни соин ик кымес кузям васькытэм. Тьфу, шораз учкыса ик кӧшкемасько, мылкыды урод луэ. Пиньёсыз кыкез ке но вань на-а, ӧвӧл-а меда. Дыльдыез пазяськыса, шорам кесяське, горд йырсиосыз ик кышет улысьтыз тур-пар пазяськиллям. Мунчо Марья но тӥни. - Осто инмаре, кытысь, марысь та лул пыжет сюриз мынам улонам! Нянь но басьтыны коньдон ӧвӧл ук. Толон со тордос Миктаен берпуметӥ копейказэ пезьдӥллям. Э, инмаре, инмаре, кӧня нунал чай но песоктэк юисько ини. Кылбур нош со Дарьялэн адямилэн кадь-а луоз? Изэз но пасялоз, кот пенез но кенжытоз. Ӧжытгес мед кыло шуыса, йырме пыдло но пыдло миндэр улэ донгисько. Нош Дарья чирдэ но чирдэ, дугдыны ик уг мед, лэся. - Гужем ваем пуэд но пильымтэ ук, тордос бекче. Коркаед но тани корен, корен йыр выламы куашкалоз. Кытӥ быгатӥсько, пасьёссэ ӟустариен туйылыса пумаз уг вуиськы. Нош тон та дуннеын юыса гинэ улоно кожаськод, лэся, ини? Кесяськемзэ отӥяз ӧй кылы ни, вӧтэ тодам лыктӥз. Вот малпасько, озьы ке улонэ луысал, ёрмонэз но ӧй адӟысал, кесяськись но шорам ӧй луысал. Берло но со вӧтэ син азьысьтым ӧз кошкы, валесын но, ужакум но. Инмар понна, йӧнатӥсь вӧт вылэм, лэся, со, вина юонлэсь куштӥськыны юрттӥз. Улонэ но чутрак воштӥськиз, вӧтэ кадь ик бен ӧвӧл ай, но ӝоген, оло, со зэмалоз. Дашие но лек пушнер кадь ӧвӧл ни, небыт кылъёссэ поттылыны кутскиз. Бамаз но ӵыжыт пырыны ӧдъя кадь. Чай сыр-сыр песокен юэ, тӧдьы нянь сииськом. Пуме пильыса кемалась быдтӥ ини. Мукетсэ но ваи, вандӥ, пили. Калленэн корка пуктыны дасяськисько. Гурт калык пайме, кызьы, пе, та Петыр вина юонлэсь чутрак куштӥськыны быгатӥз. Нош мон, кызьы вал, ваньзэ радызъя верасько. Тросэз уг оско, шоналско гинэ. Ӵок, уз ке оске. Нош мон вӧтме одно ик зэмато. Со монэ дышетэ улыны, валэктэ, кудпалласянь кутскыны, улонэз бергатыны. Пиосмурт ик-а вӧзын? Кыскисьтэм муртлы ӵектонъёс сётыны капчи. Асьсэос кыскись муртъёс тамаклэсь пумен куштӥськыны ӵекто: толон дас сигарет ке кыскиды, туннэ укмысозь кулэстэ. Яке арняяз одӥг нуналлы дугдылэ. Быръе тупась нунал - кыӵе ке ӝог быдэстоно уж дыръя воштэ урод сямдэс чай юонэн, конфетэн, тысен. Малпалэ асьтэлэн матысь адямиосты, нылпиосты сярысь: соос пичиысен тӥляд тамак ӵынэныды усыкмыса уло. Кышкатэммы уг поты, но берло тямыс ар ӵоже 1700 тамак кыскись пиосмуртъёслэн тазалыксы эскеремын вал. Соос пӧлысь ӝыныезлэсь тросэз ӝожтӥськизы дырызлэсь вазь пиосмурт кужымзэс ыштэмзылы. Тамында ВИЧ-инфекциен паламъёс пусъемын 1987-2000-тӥ аръёсы 35000 30000 33000 25000 264114 20000 15000 10000 10631 5000 6926 0 23 69 337 440 521 607 712 863 1060 2459 1987 19888 1989 1990 1991 1992 1993 1994 1995 1996 1997 1998 1999 2000 (15.03.2000) 1987-тӥ-1997-тӥ аръёслы лыдпусъёс дасямын Россия Федерациысь Госкомстатэн; 1988-тӥ арлы - Россия Федерациысь Тазалыкез утёнъя министерствоен; 1999-тӥ-2000- тӥ аръёслы - СПИД-эз алонъя но нюръяськонъя Россиысь научно-методической центрен. Герд палъёсын - Сомында выльзэ тодыса, сомында кужым шедьтыса бертӥсько туннэ дорам, - шуиз "Удмурт кенешлэн" Ува ёросысь ёзэзлэн кивалтӥсез Пётр Люкин, Вавож районэ ветлэмез бере. Озьы веран юнме шорысь ӧвӧл. Зэм но, "Удмурт кенеш" Вавож ёросын ӟеч ужрад ортчытӥз. Куӟебай Гердлэн вордӥськем палъёсаз Ижысь но быдэс республикаысь куноосты шуныт пумитазы. Татысь азьветлӥсь Анатолий Егоров люкаськемъёслы пыр- поч мадиз тужгес но дано удмурт пилэн улэм-вылэмез сярысь. Татысь хозяйстволэн кивалтӥсез Иван Перевощиков мылкыдзэ вераз, удмуртъёс ас выжыенызы котьку данъяськыны кулэ шуыса. Гурезь-Пудгаын ортчиз "Удмурт кенешлэн" ужамезлы сӥзем семинар. Отын ӟырдыт вераськон мынӥз ужан амалъёсты умоятон пумысен. Со дыре ик Ижысь вуэм тодосчиос, писательёс, политологъёс пумиськизы ёросысь улӥсьёсын. Соос вуылӥзы пӧртэм гуртъёсы. Нуназе бере райцентрын кенешизы лыктэм куноос но ёросысь кивалтӥсьёс. Валентин Тубылов тодматӥз республикаямы та дырлы кылдэм югдурен. Со сярысь ик вераз Кун Кенешлэн Тӧроезлэн нырысетӥ воштӥсез Павел Вершинин. Вавожын пумиськон дыръя. Фотоосыз В. Беломорскихлэн. Егит но дано, югыт но йӧно Та адямиен вераськыса жадёно ӧвӧл. Вылаз ик, котькуд кылыз но котькуд предложениез укша борддоре котыр ласянь мертаса понэм кирпичлы. Ваньзэ верамзэ гожты но газетэ сёт - уд янгыша. Нина Образцова. Дышетӥсь. Алнаш ронолэн кивалтӥсез. Райисполкомлэн председателезлэн воштӥсез. Районысь Советлэн тӧроез. Удмурт Республикаысь Кун Кенешлэн депутатэз. Жаляса верано луэ: чиновник сярысь чебер гожтыны секыт. Солэн ужез адскисьтэм. 1981-тӥ1991-тӥ аръёсы районын выльмизы ке тачак школаос, нылпи садъёс дышетӥсьёслы улон юртъёс - мар каризы роно но Образцова? Ваньзэ сое лэсьтӥськисьёс ӝутӥзы ук. 1991-тӥ ар бере но Алнашын культура ӧз куашка ке - мар отын веранэз райисполком но Образцова сряысь? Кырӟасьёс чирдо, эктӥсьёс тэтчало, спортсменъёс бызьыло. Али олокыӵе но юрттэт сётоно луэ бырйисьёслы но коммунистъёслы, поръёслы но нылпиослы. Кызьы бен отчы "йӧтэ" Образцова? Шуг вераны. Туннэ Нина Андреевналэн вордскем нуналэз. Дышем сямъя "Удмурт дуннелэн" сое Ниночка яке Нинок шуэмез потэ. Но уг дӥсьты. Одӥг ласянь, Нина весь егит но задор. Мукет ласянь - быдэстэм ужъёсызъя йӧно но дано. Котьма ке но, весь пинал ул, Ондӥ Нина! "Удмурт дунне". ТАЗАЛЫК ПЕЛЯД ПОН! Иназ мед мыноз! Куд-ог висёнъёслэсь эмъяськыны луэ вылэм... сиськыса. Сиён-юонын уго вань пӧртэм веществоос: витаминъёс, макро- но микроэлементъёс но мукет. Соослэн тазалыклы пайда ваемзы, висёнъёсын нюръяськыны быгатэмзы кемалась тодмо ни. Кыӵе эмъюмъёсты воштыны быгатэ бен ӝӧк вылысьтымы сиён? Англиысь специалистъёс тани таӵе тунсыко таблица лэсьтӥллям: Антибиотикъёс: бактериосын нюръяськыны быгато чеснок, сугон, улмо, горд кушман, кирень, сельдерей, чай, Антикоагулянтъёс: та группаысь тужгес тодмо эмъюм - аспирин. Со лэсьтэмын бадьпу суллэсь. Сыӵегес ик эм сётыны быгато сьӧд виноград, чорыг вӧй, арбуз, дыня, горд вина. Антидепрессантъёс (шуккетъёслэсь утись, мылкыдэз ӝутӥсь эмьюмъёс): кофе, шоколад, конфет, чечы, имбирь, груша, айва. Вирзӥбетэз (давлениез) уськытӥсь эмъюмъёс: сельдерей, грейпфрут, нюрмульы, етӥн вӧй. Тулыс туж юрттэ сурсву. Антиоксидантъёс (та эмъюмъёс юртто хронической висёнъёсын но пересьмонэн нюръяськыны): ӵуж кушман, кубиста, чили пӧсьтурын, чеснок, сугон, шпинат, помидор, чорыг, лимон, апельсин. Язвалы пумитъяськись эмъюмъёс: кубиста, банан, инжир, вож чай. Иммунитетэз ӝутӥсь эмъюмъёс: чеснок но йогурт. Вӧсез зӥбломытӥсь эмъюмъёс: чай, кофе, имбирь, мята. Кӧлытӥсь эмьюмъёс: шуныт йӧл, чечы, апельсин. Районъёс Ваньмыз хозяйствоос Кыскемын йӧл (тонна) Кыскемын скаллы быдэ (кг) Кӧня коньдон кутэмын (сюрс манет) 1 тонна йӧллэн асдуныз 1 тонна йӧллэн вузам дуныз Пайдалыкез (%) 1. Алнаш 21 4173,2 647 9803 2280 3616 58 2. Балезино 20 5586,7 648 13139 2350 3370 43 3. Вотка 17 4295 682 11040 3150 3240 3 4. Глаз 20 4107,8 554 11820 3030 3530 5. Грах 13 1656,7 529 4876,0 2943 6. Дэбес 16 2544,2 541 7906 2770 3370 22 7. Завьялово 23 5715 717 16497 3120 8. Игра 15 2877,5 731 7579,9 2634 3440 30,8 9. Камбарка 3 296,3 420 863 2913 3862 53,7 10. Каракулино 15 1250,1 346 5689 4550 3660 -19 11. Кез 34 2664,6 480 6496 2460 3540 13 12. Кизнер 23 1608,4 388 5286 3280 2840 17 13. Кияса 7 1391,2 291 6000 4310 3497 -19 14. Красногорск 11 1123,7 294 4134 3670 3510 -43 15. Можга 22 6931,9 18153 2620 4010 53 16. Пичи Пурга 20 4103 607 10224 2490 3700 49 17. Сарапул 16 3216,4 421 11723 3640 3750 3 18. Селта 12 1529 411 5005 3270 3600 10 19. Сюмси 13 454,9 286 1709 3830 3500 -8,6 20. Ува 19 5718,5 755 16262 2810 3720 32 21. Шаркан 25 3234,5 528 7883 2430 3530 45 22. Юкаменск 18 2161,9 421 7362 3407 3530 5 23. Як.-Бодья 12 1159 498 3884 3330 3313 -6 24. Яр 15 1523,7 297 6111 4011 3558 Шӧкыч Визьпоглэн словарез Косъяськись мурт - Косыгин. Ужась мурт - кыткем вал. ЮАР- ар ӵоже юыны косӥсь кун. Якут - ассэ кутыны косӥсь мурт. Воргорон - удалтымтэ лушкаськись. Янаул - нимазы улыны косӥсь город. Спидометр - СПИД висёнэз мертась арбери. Троеборье - кыкез жугиське, огез люке. Султан - 8-тӥ мартэ вордӥськем пиосмурт. Комак гу - азьтэм коӵышез данъян инты. Л. Федоров. Шӧкыч Висисьёс серекъяло Висён но серекъян ог-огзылы тупасьтэм кылъёс кадь. Озьы ке но, больницаын кыллисьёс, эмъюмен ӵош, серемес веранъёсын но тазалыксэс йӧнато. Больницаен, эмъян удысын ужасьёсын герӟаськем куд-ог веранъёсын "Шӧкычез" лыдӟисьёсты но тодматэме потӥз. Лудзие-узие Ёрос больницаысь врач мӧйы кышномуртэз эскериз но шуиз: - Тӥледлы узие ветлоно луоз на. Висись: - Кулэ ке ветло ини, одно ветло. Нош Кабинетысь потыса, кышномурт малпаськонэ усиз: "Малы ке но врач Лудзие ыстэ. Гуртмы артэгес ке но, отысь медпунктын туж егит фельдшер ужа ук, кылем арын гинэ медучилищеез йылпумъяз". Пыдылы 80 арес Висись: - Доктор, уг ни чидаськы, бур пыдысьтым лыэз туж висе. Врач: - Арлыдды но пичи ӧвӧл ни ук. Тямыстонэ вуиськоды шуиды кадь. Висись: - Паллян пыдылы но тямыстон арес ини, малы ке соиз уг висьы ук. Даллашись кышно Арлыдо воргорон шок-пуль луыса пыре врач доры. - Доктор, кышноеным мар карыны уг тодӥськы ни - ӵукнаысен ӝытозь телефон пыр даллаше. Врач: - Мар отын паймымонэз. Кышномуртъёслэн ужзы со - телефон пыр дугдылытэк бӧтьыртон. Воргорон: - Соиз бен озьы. Но малы ке егит дыръяз со монэ гинэ тышкаськылӥз ук? Ой, тодам лыктӥз, милям соку телефонмы ӧй вал. Висисько, пе Песятай регистратураын ужасьлы вазиське: - Нылы, пелья-синъя врач доры гожтӥськыны луоз-а? Нылаш: - Сыӵе врач ӧвӧл, песятай. Пелез, ньылонэз, нырез йӧнатэ одӥг врач, нош синэз - мукетыз. Малы бен тӥледлы одно сыӵе врач кулэ? Песятай: - Висёнэ вань: кылӥсько огзэ, нош адӟисько мукетсэ. В. Никитин, ожысь но ужысь ветеран. ТУННЭ - РОССИЫСЬ БИБЛИОТЕКАОСЛЭН НУНАЛЗЫ КАЛЫК ВИЗЬБУР - ДУНЪЯНТЭМ ВАНЬБУР Калыклэн лулыныз-визьмыныз герӟаськем тодонлыкъёсты люкан - библиотекалэн нырысетӥ ужпумез. 1969-тӥ арын республикаысьтымы В.И. Ленин нимо библиотекаын краеведениея но национальной литературая отдел кылдытэмен валче кутскиз фондъёсты умой-умой эскерон но узырмытон. Калыкмылэн историезъя но удмурт кылын потэм вань книгаосты шедьтоно вал. Туж ӧжыт вылэм октябрь революцилэсь азьло печатлам книгаос. Та ласянь юрттэт сётӥзы Кировысь А.И.Герцен нимо областной но мукет бадӟым библиотекаос. Озьы ик юрттэт вуиз Финляндиысь. 1989-тӥ арын Республиканской научной библиотека национальной статус басьтӥз. Собере ик кутскиз "Память Удмуртии" программаез дасян. Та программалэн ужпумез: азьпал дырлы утёно национальной культуралэсь тужгес дуно синпелетъёссэ - киын гожъямъёссэ но, печатламъёссэ но; выль технической амалъёс пыр соосты кулэяськись адямиос доры вуттоно; национальной библиографилэсь сӧзнэтсэ кылдытоно. Дас ар ӵоже трос ужъёс быдэстэмын ни. Республикамылэсь огъя национальной фондзэ огазеясь электрон каталог лэсьтэмын, отын 70000 гожтэмез. (Татчы вань книгаос пусъемын, нош журналъёсысь статьяос - 1993-тӥ арысен.) Электрон каталог лыдэ басьтэ вань удмурт национальной документъёсты, кудъёсыз вань Россиысь но кунгож сьӧрысь библиотекаосын. "Память Удмуртии" программа бордын ужаны кутскыса шедьтэмын 6500-лэсь уно книга нимъёс, огъя фондэ шедьымтэосыз. Эскеремын, кытын соос луыны быгатозы. Озьы ужаса, фондмы 4600 экземплярлы узырмиз. Эшлыко кусыпъёс тупатэмын кунгож сьӧрысь 14 огазеяськонэ, 8 странаысь - Франциысь, Великобританиысь, Финляндиысь, Венгриысь, Эстониысь, Германиысь, США-ысь, Китайысь - библиотекаосын. Отысь 600 книга вуиз. Кылсярысь, США-ысь Конгресслэн библиотекаысьтыз басьтӥм "Первая грамматика вотяцкого языка" учебникез, Германиысь Геттинген университетысь - Вихманнлэсь но Видеманнлэсь, Франциысь Сорбоннаысь Ж.- Л.Моролэсь кӧня ке книгаоссэс. Библиографъёсмылэн утчаськемзы возьматӥз: тодонлыкъёсын туж узыресь луо газетъёсысь люкамъёс. Шумпотӥськом, соослэн кузёоссы милемды лэзё ке коллекциоссы бордын ужаны, дунъяны, каталоге пыртыны. Озьы туж узырмытӥзы фондмес кылтодонъя тодмо тодосчиосмы А.А.Поздеева, В.И.Алатырев, И.В.Тараканов, В.М.Ванюшев. Берло ньыль ар куспын гинэ милемлы кузьмамын 2000 документ, со пӧлын 1148-эз - книгаос. 1993-тӥ арысен библиотекамы люка ни удмурт крезьгуръёсты. Фондамы али 90 минутъем 158 кассета, соос гожтэмын студиын. Со сяна, ми дорысь гинэ шедьтэмды луоз Удмуртиысь композиторъёслэсь нотаосын рукописьёссэс - соос сюрслэсь уно, 16 нимаз архивъёс, тужгес бадӟымез - Герман Корепановлэн. Информатизацияя калык куспо академилэн Удмурт ёзэныз ӵош кылдытэмын Интеллектуальной собственностья фонд. Утьыны кутэмын 51 документ. Книгаосысь гинэ шедьтыны уг луы, мар кулэ, собере, соосыз поттыны луонлык но ӧвӧл. Библиотекамы амал шедьтӥз: тодмо адямиослэсь тодэ ваёнъёссэ аудиокассетае гожъяны. Со устной мемуаръёс шуиське. Сыӵе кассетамы 98 люкаськиз ни. Та удысын милемлы туж юрттэ М.В.Гаврилова-Решитько. Национальной фондэз, люкам сяна, утьыны но кулэ. Соин ик кылдытӥське страховой фондмы. Лэсьтэмын 27200 бам копиос, 37450 кадр микрофильмъёс. Азьпалан нимысьтыз научной проектъя куинь финн-угор газетъёс - коми, мордва но удмурт - гожтэмын луозы микрофильмъёсы. Удмурт калыклэн гожтэм визьбурез тросгес муртлы усьтӥськыны мед быгатоз шуыса, тужгес дуно, бырон калэ вуэм изданиос возиськозы мукет амалэн но: дасясько электрон изданиос но компакт-дискъёс. Та вакытэ дас сыӵе документъёсын издание поттыны чакласьком, кык СД-РОМ-мы вань ни. Программалэн "Национальной библиография" люкетэзъя юрттэт сётӥсь указательёс поттӥм ни удмурт кылтодонъя, удмурт кырӟанъёсъя, Удмуртия сярысь ужъёсъя, картографической изданиосъя, Мултан ужъя, Ашальчи Окия но мукет. Удмурт национальной библиографияя компакт-дисклэн нырысетӥ выпускез вал. Таӵе но мукет ужъёсмы понна кылем арын коллективмылы сётэмын Удмурт Республикалэн кун премиез. Ас кожамы гинэ ми ум ужаське. "Память Удмуртии" программаез быдэсъянэ пыриське 30 централизованной библиотечной система. 18-эз соос пӧлысь дасязы но быдэсъяло асьсэ программаоссэс: "Память города", "Память района". Вордскем шаермы сярысь тодон-валан люканын милемлы юрттысал одно ик библиотекае сётоно экземпляр сярысь закон. Сыӵеез асьмелэн ӧвӧл на. Соин ик тросэз 90-тӥ аръёсы пӧртэм издательствоосын печатлам книгаос ми доры уг вуо - сыӵе буш интыез тырмытыны бератаз секыт луоз. Городамы но, республикаямы но ӧвӧл на сыӵе книга, кытчы люкамын луысалзы шаермы сярысь выль тодонъёс, шедьтосъёс, озьы ик библиотекаослэн будон, азинскон сюрессы сярысь материалъёс. Удмурт Республикаысь Кун Кенешлэн 1998-тӥ арын 24-тӥ июне кутэм постановлениеныз "Память Удмуртии" программа нимысьтыз бадӟым ужпумен лыдъямын, сое быдэсъяны коньдон висъямын. Озьы лыдӟет памятникъёслэсь национальной фондзэс юнматон но утён вылысь, кун ласянь юрттэт шӧдӥське ни. Таин валче быдэсъяське республикамылэн "Культура сярысь" Законэз но. Надежда ЛИМОНОВА, Национальной бибиотекаысь шаертодонъя но финн-угор литературая ёзлэн кивалтӥсез. Тани таӵе нылкышноос ужало шаертодонъя но финн-угор литературая отделын. Соос пырисько "Память Удмуртии" но мукет программаосты, проектъёсты быдэсъянэ. Удмурт калыклэн шаермылэн улон-вылонэныз герӟаськем вань иворъёс соослэн ки, сюлэм, визь пыртӥзы пото. Соослэн тыршеменызы поттэмын пӧртэм указательёсын нырысетӥез электрон сборник - "Удмурт национальной библиография". Со понна библиотекарьёс пусъемын Удмурт Республикалэн кун премиеныз. АРХИВЫСЬ ДОКУМЕНТЪЁС Удмуртия ХХ дауре 1914-тӥ ар Россиын социально-политической югдур ӟырдамын. Ужаса улӥсьёс аьсэлэсь правооссэс утён вылысь, лекгес но лекгес бугыръясько. Воткинскын паськыт ортче Нырысетӥ майлы сӥзем бугыръяськон (забастовка). Большевикъёс та ужрадлы быдэс апрель ӵоже дасясько. Ужаса улӥсьёслэсь нуналзэс тыро- пыдо ортчытыны ӧтьыса, соос листовкаос потто. Большевикъёс борды мылысь-кыдысь итӥсько паровоз лэсьтӥсьёс. Нырысетӥ мае соос ужзэс урето. Посёлок сьӧрысь тэльын ортче митинг. 10-тӥ мае Вотка заводын югдур тужгес но лекоме, бугыръяськонэ пыриськемъёсты ужысь уллямзы но кылемъёсызлэсь уждунзэс пичиятэмзы бере. Заводысь ӝыныез пала рабочийёс 12 нунал ӵожелы ужзэс урето. Ижысь ужаса улӥсьёс Воткинскысь шуг-секытэ шедем эшъёссылы юрттэт люкало. Крестьянъёс кышкатэкгес но кышкатэкгес урдскыло кулакъёс пумитэ. Уката лекомо Елабуга уездысь Алнаш волостьысь музъем ужасьёс. 1914-тӥ арын гужем вуон азьын странаын политикая югдур пуштон калэ вуиз. Кутске Нырысетӥ мировой война. Озьы революция огдырлы буйгатске. 19-тӥ июле Германия Россилы война ялэ. 5-тӥ августэ Санкт-Петербург Петроград луэ. Ӵуказеяз ӝогак гинэ "Биржевые новости" газет потто: "Ми кӧлыны выдӥм Петербургын, нош сайкам Петроградын! Петербурглэн немец шӧмо вакытэз ортчиз... Ура, господаос!" Губерниын потӥсь "Вятская речь" газет одӥгаз гожъямаз пыро-поч возьматэ война кутскемен валче Глазовын ортчем югдурез: "5-тӥ августэ Глазов гарнизонлэн казармаосыз доры уно калык люкаськиз. Запасысь басьтэм солдатъёсты келяса вӧсяськон ортчытэмын. Бӧрысь вал манифестация. "Уть, инмаре" но "Инмаре, уть эксэез" кырӟанъёсын, государьлэн портретъёсыныз но знамяосын трос люкаськем калык ортче городлэн ульчаостӥз. Котькытын "Ура!" кесяськем кылӥське. Ӵуказеяз городысь думаын трос вераськисьёс вал. Соос огкылысь государьлы дурбасьтэмзэс веразы, городысь калык тушмонлэсь уродскемзэ нокыӵе пӧсекъяськонъёстэк пумитаз, ваньмыз одӥг кадь дась Отечествозэс утьыны!" Россилэн войнае пыриськемез калыклы патриотизм мылкыд сётӥз. Огдырлы бугыръяськонъёс чалмизы, ваньмыз сямен партиос (большевикъёс сяна) правительстволы дурбасьтэмзэс веразы. Но, Россия таяз учыре но ожлы дась ӧй вал. Япониен войнаез келям бере армиын кутскиз реформа, но со йылаз-пумозяз вуттэмын ӧй вал на. Военно- морской флотэз выльдон программа каллен быдэсъяськиз. Война кутсконысен ик чугун сюрес шуге-леке шедиз ляб ужаменыз, ӟуч армия дыраз басьтыны ӧз быгаты выль кужымъёсты но боеприпасъёсты. Немецлэн артиллериез, ӟучлэн сярысь, данаклы кужмогес вал. Тужгес но шӧдӥськиз армилы туала пыӵал тӥрлык, автомобильёс но мукетсэ висъян. Армия вужмиз. Вылӥ командиръёслэн тодон-валанзы улӥын вал. И.ЗАЙЦЕВА, Удмурт Республикаысь Кун архивысь отделэн кивалтӥсь. Ижевскысь рядовой солдатъёс ӟуч армилэн военной дӥсеныз. "Италмастэ" мерттоно ни Адями картофкаез котьку но ӵошатылӥз "кыкетӥ" нянен. Сютэм улон аръёсы та музъем емыш уго унозэ кулон-быронлэсь утиз. Али но ӝӧк выламы картошка нянь бере кыкетӥ куно луэ. Зэм, та культураез будэтыны капчи ӧвӧл. Трос гинэ солэн висёнъёсыз, табере тани колорад бӧчы тэбиниз. Собере картофка, аръёс ортчемъя, пумен векчия, сортэзлэсь ӟечлыксэ ыштэ. Ӵапак выль пумо картофка кидыс кылдытон бордын ужало гурт удысъя Удмурт научно-исследовательской институтысь тодосчиос. Соосты нырысь будэто пробиркаосын, теплицаосын, собере мертто нимысьтыз дасям бусые. Бӧрысь ини дась луэ вылӥ удалтонлыкен элита кидыс. Али институт ужа 70 пумо картофка кидыс вӧлмытон бордын. Та бакча сиён ваемын Россилэн пӧртэм сэрегъёсысьтыз, озьы ик кунгож сьӧрысь но. Тол ӵоже пробиркаосын 70 сюрслэсь уно картофка уд будэто. Республикаямы вазь вуись картофка пӧлысь тужгес но удалто "весна", "жуковский", "пролисох", "пушкинский", "италмас", "жёлтый" "ранний" пумоосыз. Басьтом, кылсярысь, "весна" сортэз. Шӧмызъя со туж ческыт, ачиз вольыт, базаръёсы но со нырысь ик вуэ, висёнъёслы уг сётскы. Нош "Жуковский" сортэз копаны луэ ни 60 нунал ортчыса. Со одӥг соткаысьтыз 400-450 кило емышсэ сётэ. Озьы ик вазь вуо "рождественский", "невский", "романо", "чародей", "лукояновский", "свитанок киевский", "зарево" сортъёс. Асьме палан тужгес но паськыт вӧлмемын "невский" пумоез. Шӧмыз солэн ческыт, висёнъёслы уг сётскы. Туж удалтэ "свитанок" но. Солэн пудэз кужмо, уг выды, умой тӧлъе. Таиз сорт тужгес умой пунем пӧраны. Институтысь озьы ик ужало Германиысь, Голландиысь, Прибалтикаысь ваем сортъёс бордын но. Тодосчиос пӧртэм амалъёсты утчало, соос асьме куазьлы мед тупалозы шуыса. Нырысетӥ вамышъёс оскон кылдыто - палэнысь "куноос" асьме дорын но удалтэм емыш сётозы. Али ӵапак картофка мерттон вакыт. Зэм, куазь урод улэмен, туэ уж ӝегаз. оскисько, "кыкетӥ" няньды удалтоз шуыса. Азинсконъёс тӥледлы. В. Лагунов. Журналистъёсын пумиськонъёс Кытчы кутоно мултэс коньдонэз? Кыӵе ужпумъёсты матысь дыре вырӟытыны малпа Кун Кенешысь Наукая, дышетонъя, культурая но егитъёсын ужан политикая ялан ужась комиссия? Со сярысь пыр-поч вераськиз комиссилэн кивалтӥсез А. Г. Красильников. Солэн ивортэмезъя, Удмуртиын ӝоген вордӥськоз библиотекаослэн ужзыя закон. Со законлэн кулэлыкез сярысь кемалась ужпум ӝутэмын ни вал. - Али культурая учреждениос куинь кивалтон вискы сюремын, - шуиз Алексей Геннадьевич. - Соос ужаны кулэ, Россилэсь, республикалэсь яке интыысь администрацилэсь кылзӥськыса. Сыӵе югдурзы библиотекаослэн. Закон юрттоз соослы сыӵе валантэм югдурысь потыны. Мукет комиссиос сямен ик депутатъёслэн таиз комиссиез но пыриськиз Удмуртилэсь Конституцизэ дасян борды. - Озьы луыса кошке ни вал: выльдэм Конституциын номыр учкемын ӧй вал егитъёслы государство ласянь юрттон сярысь. Но комиссилэн тыршеменыз отчы удалтӥз таки пыртыны егитъёслэн огазеяськонъёссылы юрттон пумысь малпанъёсмес, - валэктӥз А. Красильников. 12 ар дышетсконъя федеральной программа кутэмын ни ке но, сое уже пыӵатонъя пӧртэм юанъёс кылдыло на. Соин ик туэ 15 июне Россилэн парламентаз та ужпумъя кылзонъёс ортчозы. А. Красильников туж жаляса вераз таӵе ужпум сярысь: туэ бюджетэ нимысьтыз статья пыртыны ӧз луы П. И. Чайковскийлэсь Воткинскысь усадьбазэ возён понна. Чайковский быдэс дуннелы быдӟым композитор луэ шуыса ум валаське на, лэся, шӧдонмы но уг тырмы. Туэ Чайковскийлэн улэм коркаяз 140 сюрс пала адями пырам, азьло аръёсын ӵошатыса со 7 поллы тросгес. Сомында учкисьёс вуылэмен, пу коркалэн выжез някырскыны ик кутскем. Табере тупатъян ужъёслы 295 сюрс манет пала коньдон кулэ. Ярам коть Правительство коньдонэн юрттыны соглаш кариське. Законъёс бордын ужан сяна, комиссия ялан син азяз возе школаослэсь, вузъёслэсь улэм-вылэмзэс. Тани Гурт хозяйствоя академилы туж кулэ дышетскон юрт. Кӧня ке талэсь азьло солы электромеханикая завод (али "Купол") пумозяз лэсьтымтэ медсанчастьлэсь юртсэ сётӥз вал. Табере сое берлань куре. Нош академия отын чакла вал ветеринаръёсты дышетыны. Комиссилэн депутатъёсыз малпало, та юрт академилы ик кыльыны кулэ шуыса. Соин ик нюръяськытэк уз луы. Матысь дыре та комиссиысь депутатъёс озьы нюръяськыны малпало бюджетэ мултэс люкаськем коньдонэз шонер люкылон понна. Кызьы тодмо ини, туэ нырысетӥ кварталэ лэсьтэм йылпумъянъёсъя бюджетэ 700 миллион манет пала чакламлэсь мултэс коньдон вуэм. А. Красильников верамъя, со коньдонысь кӧня ке люкетсэ шонер, пе, луысал пунэм тыронъёсты берыктон понна висъяны. Со таӵе лыдпусъёсты шараяз. Республикалэн пунэм тыронъёсыз тужгес но трос люкаськемын дышетӥсьёслы. Кылсярысь, коммунальной услугаос понна - 44,9 миллион манет, книгаос но методикая пособиос понна - 77,9 миллион, нылпиосты школаын сюдон понна - 62 миллион. Нылпиослэсь гужем каникулъёсы шутэтскон дырзэс радъян понна туэ 15 миллион манет бюджетысь но 53,5 миллион манет социальной страхованияя фондысь висъямын. Кызьы шуиз А. Красильников, кылем арынлэсь та ужлы коньдон данаклы тросгес сётэмын. Нылпиос понна 29 лагерь ужалоз. Путёвкалэн дуныз 2-3 сюрс манет сылэ, но анай-атайёслы со дунлэсь 20 процентсэ гинэ тыроно луоз. Сӥзьыл депутатъёслэн комиссизы таӵе ужпумез эскерон борды басьтӥськыны малпа: кызьы республикаын мынэ нылпиослы ӟеч сямъёс пыӵатон. Наркоманъёслэн, ВИЧ- инфекциен висисьёслэн ялан будӥсь лыдзы та ужпум борды басьтӥськыны ӝегатскытэк куро. Вераны кулэ, та эзельёсты алонъя Россиын но нокыӵе законъёс ӧвӧл на. Оло, юри со озьы лэсьтӥське? Т. БАННИКОВА. Дарт Яраты монэ гинэ! Гожтэме потӥз аслам нырысетӥ яратонэ сярысь. Со вал кылем сӥзьыл. Одӥг пол мон доры лыктӥз Алёша. Ми соин ог-огмес кемалась тодӥськом ни ке но, рос-прос вераськеммы ӧй вал. Со ӝытэ ик ми ог-огмес яратӥм. Котькуд ӝыт со мыным шуныт кылъёс вералляз, ӟыгыръяз. Кыӵе мон шудо вал. Но кемалы вылымтэ мынам шудэ. Огаз ӝытэ со укно улам ӧз вуы. Нош ӵуказеяз уйшор котыр вуиз. Кӧня ке юэмез вань. Мар но ӧз шуы, кызьы но ӧз черекъя со мон шоры. Мон, пе, тонэн шудӥ гинэ. Та кылъёс бере мон асме быдтыны дась вал. Быдэс уйме изьыны ӧй быгаты, синкылиосылэсь миндэре ик сач-сач луэм. Бӧрдӥ ӵуказеяз но. Алёша адӟем, эше пыр мыным гожтэт вуиз: Лена, вождэ эн вайы, вӧсь карыны уг турттӥськы вал. Но мон тонэ зэмзэ но уг яратӥськы. Мон алдаськи: яратытэк тонэн озьы уг яра вал. Эн йыркуръяськы. Та гожтэтэз лыдӟеме бере, мыным уката секыт луиз. Алеша шорам ӧз учкылы ни. Ой сюлмы. Кӧня мон со сьӧры бызьылӥ. Кӧня мон сое кури берытскыны, номыр ӧз юртты. Эшъёсы но, анае но алӥзы: ачид эн бызьылы, иське, тон солы, зэмзэ но кулэ ӧвӧл, ӧй кылзӥськы. Озьы вераны капчи - соос уг тодо мар мынам сюлмам. Одӥг ӝытэ мон ачим Алешаез ӧти. Мон тонтэк улыны уг быгаты, соин ик, ӧд берытскы ке, мон асме ачим быдто, шуи. Малпаськыны кык нунал сётӥ. Кык нунал ортчыса, ми нош ӵош вал ини. Быдэс гужем пумиськылӥм ми. Алёша монэ "яратӥсько" шуылӥз, мусоялляз. Вань эшъёсмы паймылӥзы, шумпотылӥзы. Ог- огмытэк одӥг нунал но ӧз ортчылы. Но таиз но шудэ кемалы вылымтэ. Выль ар уе Алёша мон азьын выль туганэныз - Иринаен - ӟыгыръяськиз, эктӥз. Нош мыным шуиз: - Сокем лек эн учкы, со мынам азьло ик вал ни, тонэн яратытэк пумиськылӥ. Бертыса комнатаям ӵогаськи. Мар карыны уг тодӥськы - бӧрдыса кӧт уг тыры. Олокытысь ки улам эмъюм сюриз. Быдэс банка кыӵе ке таблеткаосты юи. Киосы дыр- р! куалекъяло, мар ужамме ачим но уг валаськы. Шӧдӥ - палатаын. Вӧзам бӧрдыса анае пуке. - Мар турттӥськод, нылы? Кулысалыд ук! - Алёшаез мукетыныз адӟытозь, эсьма, мед кулысал, - шуи мон солы. Анае со сярысь Алёшалы верам. Со вуиз. - Алёша, Иринаез туннэ ик ӧд ке кушты, мон сое но, асме но маке каро. Ваньмыз понна тон янгыш луод! - шуи мон солы. Та кылъёсме кылыса, Алёша палатаысь бӧрдыса потӥз. Куинь арня ортчыса, мон дорам бертӥ. Алёша Иринаез куштэм. Али ми соин куинетӥ арзэ ӵош ини. Оля. Алнаш ёрос. "Яратэ, уг яратылэсь": Оля гожтэм быдэсак адрессэ но, эшъёсызлэсь зэмос нимъёссэс но, но ми малпаськом солэн кулэлыкез ӧвӧл. Зэмзэ ке, та гожтэтэз лыдӟыса, мылкыд сураське. Мар верамез потэм егит лыдӟисьмылэн: яратонэз понна нюръяськемзэ, вормытъяськемзэ-а? Яке со чик но со сярысь уг малпаськы, ассэ шудоен лыдъя но со понна асьмеды но шумпотыны куре. Кызьы малпаськоды тӥ? Кызьы дунъяськоды Олялэсь "спектакльёссэ" - кӧня улыны кылдэмын та "яратонлы"? Гожтэ малпанъёстэс редакциямы. Нош "Дартмылэн" вуоно номераз печатлалом тужгес тунсыко гожтэтъёстэс. Аслэсьтыз малпанзэ вераны дасяське психолог но. Липеттэк уз кыле Кезысь инвалидъёслэн огазеяськонзы интылы уз ёрмы ни. Ёрос администрация дас арлы дунтэмен висъяз вужмем нылпи садлэсь юртсэ. Зэм, отын трос тупатъян-лэсьтон ужъёс ортчытоно луоз. Шифер, кирпич, лэсьтӥськон пул шедьтэмын ни, шуге-леке сюремъёслы юрттыны мылкыд карисьёс быриллямтэ на вылэм. Нош ёросысь уже интыянъя фонд лэсьтӥськисьёсты висъяз. Ёрос ёзэзлы юрттыны мылкыд кариз республикаысьтымы инвалидъёслэн огазеяськонзы но. Лэсьтӥськон ужъёслы со висъяз 6 сюрс манет, пыд йылазы йӧн-йӧн султӥзы ке, куинь сюрссэ со пӧлысь кезъёс берен берыктоно луозы. Л. Малых. Дарт Вормонлы - 55 ар Гажано редакция! Ӟеч малпаса тӥ доры вазисько Арков Сашалэн анай-атайёсыз. Ми улӥськомы Пичи Пурга районысь Уром посёлокын. Саша дышетске 2-тӥ классын. Туж пичи дырысеныз ини солэн адӟем карымон, яратоно эшез вал гуртысьтымы фонтэ ветлэм гажано Микол агаймы. Арков Николай Кондратьевич Школае ветлэмезлэсь азьло ик Саша трос пол вералляз, гожъяськыны дыши ке, Микол агай сярысь книга гожто шуыса. Быгатэмезъя Саша бен тырше ни, солы юрттэ мемеймы но. Туж шумпотысалмы, пимылэсь ужзэ газет бамысьтыды адӟысалмы ке. Микол агай Пичи Пурга ёросысь пичи гинэ Косой гуртысь фронтэ 50 воргорон кошкиз, берытскыны кылдӥз дас витезлы гинэ. Мынам песятае но - Степан Кириллович Арков ож бусые кылиз. Ватэмын со Смоленск улосысь Бодуны гуртэ. Война сярысь мыным трос мадьылэ гуртысьтымы Микол агай. Ачиз со Украинаын, 500-тӥ артиллерийской полкын служить каремын. Микол агай тодаз вае Житомир палан луэм бадӟым ожез. Асьмелэнъёс татын тушмонъёсты зол туздыризы, 40 иськемлы азьлань мынӥзы, Нош Кременчуг улын соослы туж ик ӧз удалты. Тросэз сӧсырмизы, быризы. Микол агайлэн но кияз, пыдаз, чыртыяз чалеп сюриз. Сое Сталинградысь госпитале келязы. Огзэ чалепсэ соку ик поттӥзы, нош чыртыысьтыз но пыдысьтыз - 30 ар ортчыса гинэ. Госпиталь бере Микол агай огвакыт ожмаськыны ӧз быгаты ни (укыр секыт сӧсырмем шуизы), соин ик Ижысь запасной полке келязы. Но ӝамдэ улыса, Николай Кондратьевичез нош келяло Москваысь 76-тӥ гвардейской полке. Ожмаськизы "Катюшаосын". 1942-тӥ арын мозмытӥзы Клин но Калинин городъёсты. Ох, кыӵе ӧз яратэ немецъёс асьмелэсь "Катюшаосмес"! Со бӧрсьы мозмытъязы на трос гуртъёсты но городъёсты. Белоруссиысь Орша город понна ожмаськыкузы трос калык быриз: солдатъёс но, городын улӥсьёс но. Али ке но чюлэмме позыртэ, шуэ Микол агай, таӵе суред: бомбалэсь кылдэм бадӟым гу, кулэм вал, шальтрам уробо, вӧзаз ик кымин кыллись кышномурт. "Мама, мама!" - берга котыраз ньыль аресъем пиналыз, но соиз уг шӧды ни. Куанеръёс, кытчы ке валэн мыно вал, дыр. Микол агай дораз бертэ Вормон бере ар ортчыса гинэ - 1946-тӥ аре 5-тӥ июне. Солэн мӧля вылаз пишто "За отвагу", "За боевые заслуги", "За взятие Кениксберга" медальёс. САША АРКОВ. Дарт Бырйы! Хит-парад "Ингур" радиолэн ивортэмезъя, апрель толэзе кылзӥсьёс ӵемгес вазиськылӥзы таӵе кырӟанъёсты курыса. 1. Валентина Пудова "Сьӧд мыйык" 2. 2. Светлана Ермакова "Выль улон" 3. 3. "Айкай" "Вае кырӟалом". 4. 4. Ольга Зорина, Алефтина Корепанова, "Ныл дыр" 5. 5. Алексей Ложкин, "Тон уд пегӟы". Гажано лыдӟисьёсмы! Котькуд кӧс нуналэ 512-512 номеро телефонъя жингыртыса, тӥ быгатоды гажано но яратоно адямиостэс "Ингур" радио пыр ӟечкыланы, соос понна чебер кырӟан курыны. ЪИЪ даурысь ватос Шаерысьтымы Национальной библиотекаын усьтӥськиз славян гожъяськонлы но культуралы сӥзем адӟытон. Татын тодматскыны луоз ЪИЪ даурлэн кыкетӥ ӝыныысьтыз ӟуч литератураен. "Адӟисьёс" нимо нырысетӥ люкетэз сӥземын Россиысь ӟуч литературалэн но быдӟым адямиослэн кусыпъёссылы. "Зэмлыкез утчаса" нимо кыкетӥ люкетаз возьматэмын ӟуч литератураысь тужгес висъяськись гожъясьёс. "Тодмотэм дунне" нимо люкет ивортэ ӟуч кылбурчиослэсь адямилэн улонэз, та дуннеын солэн интыез, ӟечез но уродэз сярысь малпанъёссэс. М. Немцова. Учкисьлы яраз Драмая удмурт кун театрын калыкез та нуналэ трос вал - возьматӥзы Татьяна Черновалэн "Айна" пьесаезъя спектакль. Пуктӥсь режиссёрез - Василий Ушаков. Та спектакль бордын озьы ик трос ужазы театрлэн директорез Анатолий Митрофанов, суредась Владислав Анисенков, хореограф Ксения Русских, крезьгурчи Николай Шабалин но мукет адямиос. Зэм, актёръёстэк номыр ӧй пӧрмысал. Рольёссэс туж быгатыса шудӥзы Валентина Моисеева (Айна), Алексей Ложкин (Бураш), Леонид Романов (Ӵушег), Игорь Моисеев (Артан), озьы ик - Валентина Загуляева (Пилича), Раиса Нефедова (Узыбей), Светлана Ложкина (Айна), Вячечслав Краснопёров (Ожман) но мукетъёсыз. Сак эскеризы учкисьёс сцена вылын ортчись учыръёсты. Котькинлэн тодэмез потэ угось, кинэн кылёз Айна: Артанэн яке - яратоно Бурашеныз. Спектакль йылсаськон азьын ваньмыз валамон луиз: Артан вииз Бурашез, Айна яд юыса кулӥз. Тазьы йылпумъяськиз Игнатий Гавриловлэн "Аннок" пьесаезлэсь адӟем карыса гожтэм "Айна" спектакль. Вань учкисьёслы яраз кадь со - ӟеч мылкыдын кошкизы соос театрысь. Н.КНЯЗЕВА, Удмурт кун университетын дышетскись. Учкыны чебер, улыны шурдыт Сизьымдонэтӥ аръёсысен кутскыса Ижевскын огез бӧрсьы мукетыз ӝужытэсь юртъёс ӝутско. Тылпуэн нюръяськисьёслэсь куронъёссэс лыдэ басьтыса, таӵе коркаосы проектэз дасясьёс нимысьтыз ватсанъёс йылэто. Кылсярысь, тубан-васьканын сурым медаз люкаськы шуыса, нимысьтыз ӵынэз кыскон чакламын. Озьы ас кожад но ӝуась юртысь потод-пегӟод. Со сяна, чакламын тылпу потэмез ивортӥсь датчикъёс. Котькуд этаже интыямын ву чизъён гумыос. Тылпу потыку, асьсэос улӥсьёс но кенжем интыез ӝог кысыны быгатозы. Озьы вань та верам ёзъёс тыро-пыдо ужазы ке, адями бырон учыръёс уз луэ. Озьы малпало поектэз кылдытӥсьёс. Но асьме улонын малпамъя уг пӧрмы на. Тани басьтом Ижысь Октябрь районэ пуктэм ӝужытэсь юртъёсты ик. 1998-тӥ арын 3-тӥ январе Максим Горький ульчаысь 16 этажъем юртлэн одӥгаз квартираязы тылпу потӥз. Ӵынэз кыскись шахта ужамтэен сурым коридоре вӧлмиз. Тылпу кысӥсьёс шаплы но валаса ас ужзэс лэсьтӥзы. Соин гинэ адямиос быронлэсь утиськизы. Берло аръёсы "Жилсервис-1" УМП-лэн Школьной ульчаысь 44 номеро юртаз ӵынэз кыскон шахтаын тамак кыскисьёсын сэрен жуг-жаг кенжылӥз. Янгышез вань чаклась- эскерись организацилэн - "Жилсервис-1 предприятилэн" но. Малы уг ужало юри тупатэм кранъёс, ӧвӧл соос борды итоно гумыос, сӧрылэмын ӵынэз кыскись шахтаос, тӥямын коридоръёсысь ӧсъёс. Улон юртъёсты чаклась организациослэн кивалтӥсьёссы таӵе дыре улӥсьёс шоры возьмато, соос, пе, ваньзэ тӥяло, лушкало. Нош выльысь тупатъяны уно коньдон кулэ, со ӧвӧл. Али Ижын трос этажен кӧня ке юртъёсты пукто, ӝужытэсь коркаослы выль проектъёс но дасяло. Та югдур тылпуэн нюръяськисьёсты юн сюлэмшугъяськытэ. Саратов областьын таӵе ужпумез огшоры быдэстӥзы: ӝужыт юртъёс лэсьтонлэсь куштӥськизы. Нош ма лэсьтэмын ини, созэ тупатъязы-выльдӥзы, азьланяз юн чакласа возёно кариськизы. Малы та сярысь вераськон поттӥмы? Ижын 50 метрлэсь кузь одӥг тубат но ӧвӧл. Озьыен, 9-тӥ этажлэсь вылӥын тыл кенжиз ке, адямиосты утёнын шуг-секытъёс кылдозы. Соин ик кулэ-а кӧня ке коньдон шыръян вылысь адями улонэз вунэтыны, сое пыд улэ лёганы? Калыкмылэн культураез уг тырмы бере, ӝужыт коркаос но пуктылоно ӧвӧл. Таӵе постановление дасязы тылпуэз алон бордын ужасьёс (пожарной надзор). Со сярысь ивортэмын интыосысь администрациослы, лэсьтӥськон но проектъёсты дасясь организациослы. Та пумысен берпуметӥ кылзэс вераны кулэ шаерысьтымы вылӥ кивалтӥсьёс. М. Кузьмин. А. БОБРОВ, инспектор ПЧ-2. ГУРТ УЛОН УЧХОЗЫН УЛОН БЕРГА - Мон уг валаськы, малы асьмеос ум лэсьтӥське сое, мае лэсьтыны быгатӥськом, - шуиз Удмурт Республикаысь Правительствоезлэн Тӧроез Н.А.Ганза, семинарез усьтыку. - Номыр ум кариське, шуыны луоз, агропромышленной комплексэз секыт югдурысь поттон вылысь. Тужгес но техникая но технологияя. Туннэ асьмелы быдэстоно одӥг ужпумез: гурт продукциез дунтэмгес поттыны тыршоно, пайдаёгес. Али мон бусыостӥ ветлӥ, учки - татын быгато. Татын со - Федеральной кун унитарной предприятие "Июльское". Ӵапак татчы шуныт май нуналэ люкаськылӥзы республикаысьтымы ёрос администрациослэн кивалтӥсьёссы. Кун Кенешысь гурт хозяйствоя кыл кутӥсь депутатъёс, Гурт хозяйствоя но сиён-юонъя министерствоысь специалистъёс. Семинар-кенеше пыриськизы Правительстволэн Тӧроез Н.А.Ганза но солэн гурт хозяйство ужпумъёсъя воштӥсез М.И.Назаров. Семинар чаклам дырлэсь беромысагес кутскиз. Ваньмыз возьмазы Ганзаез. Со вакыт премьер-министр "Июльское" учкохзлэн бусыостӥз ворттылӥз. Учкиз возьматыны дасям техникаез, пумиськылӥз механизаторъёсын. Дышымтэ сямъя Николай Алексеевич галстуктэк вал. Соин но, дыр, ёрос тӧроос вӧзын со ужась калыклы матынгес, гурт удысэз валасьгес адӟиськиз... Ужрадэз ортчытыны учхозэз огшоры ӧз быръе. Угось татын радъямын Ижевскысь Гурт хозяйствоя кун академиысь студентъёсты специализацизыя дышетон. Арысь аре вуоно специалистъёс "Июльскойын" тодон-валанзэс уж вылын юнмато. Котьку но татын выль амалъёсын будэтыны тыршо ю-няньзэс, вордо пудо-животсэс но мукетсэ. Ӵапак та сярысь кенешын вераськиз академилэн ректорез Валентин Фокин. Вуз бадӟым инты басьтэ гурт хозяйстволы специалистъёсты дасянъя. Ректор вераз тодосчиослэн армизы сярысь но, кудъёсыз дасяло со специалистъёсты. Ваньзэ шонер мадиз кадь Валентин Васильевич. Югдурысь потон сюрес но ӵектӥз на: фермер но крестьян хозяйствоос кылдытъян пыр. Но Ганзалэн мылкыдыз воксё мукет вал. Ректорез пыкылыса, со шуиз: "Тӥ, кагаз вылысь лыдӟыса, ваньзэ умоен вераськоды. Нош малы ялан одӥг интыямы лёгаськиськом? Мар бордын ужпум? Одӥг ар ужатозям, гурт хозяйствоя специалистъёсты дасянъя одӥг юан но ӧз сётэ на. Ялан техника, уксё куро". Бен, техника быре. Соин ик куро. Уксёзы но ӧвӧл. Нош договоръя ёрослы специалист дасяны дунтэм ик уг усьы - 8-9 сюрс. Араз одӥг студентэз дышетон понна кулэ 10-11 сюрс манет. Куд-огезлы квота висъямзы уг кельшы. Пайдаез, пе, ичи. Но ёрос тӧроос куризы квоталэсь быдӟалазэ йылтыны. 30 процент квота уг ке тырмы асьмелы, шуиз Правительстволэн Тӧроез, вазиськоно Москвае - мед будэтозы. Эшшо одӥгез умой ӵектон вал. Медакадемиын интернатура выллем гурт хозяйствоя академиын но сыӵезэ ик усьтыны кулэ. Но ваньзэс гуртъёсы, колхозъёсы келяны кулэ. Городын будэм егитъёсты но. Дышетскон хозяйство капчиен ӧз кылды. Кык аръёссэ туж секыт вал. 70-тӥ аръёслэн кутсконазы азьмынӥсь колхозъёслэсь кык поллы кылизы. Гыроно гинэ музъемзы 8,5 сюрс гектар лыдъяськиз. Нош ю тысь гектарысьтыз 10-12 центнер сяна ӧз басьтэ. Но учхозлы база туж умой бырйиллям. Уго татын котькыӵе музъемзы вань: капчиез но, секытэз но. Учхозлэн валтӥсь агрономезлы Леонид Смоленцевлы трос йырзэ тӥяно луиз. Нырысь музъемез гыронлэсь мурдалазэ пичиятӥзы. Урод музъемъёсазы нюлэс мерттӥзы. Чурыт интыосын пичи зорем бере ик кӧм выллем кылдылэ вал. Кидыс потыны уг вормы ни. Амал шедьтӥзы. Курозэс удобрение интые кутыны кутскизы. Но сое вылӥязгес кельтыны кулэ. Музъемлэсь мускытсэ кутэ. Собере жуг-жаглы будон понна азот кулэ. Нош куро сисьмыкуз азотэз ваньзэ бордаз кыске. Озьы нюръясько жуг-жаген. 1983-тӥ арысен хозяйство музъемез гырытэк кизьыны кутскиз. Нош эстӥськонэз шыръян понна паськытатэм агрегатъёсын ужаны ӧдъязы. Озьы куд-ог аръёсы луо интыосын но одӥг гектарысь 41 центнер пала ю тысь аразы. Табере учхоз элькунысь колхозъёслы араз 1000-1500 тонна ю кидыс вуза. Возьматӥзы, Удмурт шаерын но вылӥ ӟечлыко чабей будэтыны луэ шуыса. "Июльскойын" асьсэ пызенызы нянь пыжо. Миым татын куинь "Доминаторъёс" ужазы. Нош асьсэлэн "Ниваоссы" сизьым бускель хозяйствоослы юрттӥзы. Кык комбайн тӥяськиз, нош "Доминаторъёссэс" мукет хозяйствое басьтӥзы. Учхозлэн директорезлэн Александр Хлобыстовлэн верамезъя, немец комбайнъёссэс пӧяса талазы. Одӥг кылын вераса, "пилиськем тусь" доры кельтӥзы. Паймемын директор, кызьы дышето студентъёсты, тужгес но ӟеч техникаез адӟытытэк? Миым пуктӥзы газэн куасьтӥсь комплекс. Со дырыз дыръя но пайдаё ю тысь дасяны малпамын. Табере быдэс ар газлы лимит басьтыны уг быгато. Москвае но вуылӥзы ни - толыкез ӧвӧл. Куазь зоро дыръя комплекс зол юрттысал, ю-нянез меӵак араку. Бадӟым сюро пудозы 2400 йыр. Кысконо скалъёссы - 820. Миым скаллы быдэ 4200 килограммлэсь тросгес йӧл кыскизы. Нош пудозы шорлыдын куайиз 690 граммлы. Арысь аре учхоз тросгес но тросгес картофка будэтэ. Туэ 100 гектар вылын луоз. Малпало 150-озь вуттыны. Со понна 3 трактор но 3 комбайн басьтӥзы. Голландиысь картофка будэтон комплексэз семинаре пыриськемъёслы бусыын возьматӥзы. Ужамзэ учкизы озьы ик кизён агрегатъёслэсь но. ССПР-9 кидыслэсь висъя удобренизэ. Кидыс вылӥяз кыле, нош удобрение 8-9 сантиметрлы муре пыре. СДК-2,8 83 сюрс манет сылэ. Соин клевер туж умой кизьыны. Вуж бусы вылтӥ кизьыса ик собере турын будэ. Усыян-кизён агрегатлэн паськытэзлы паймизы. Тазэ малпаз учхозысь механизатор В.Коробейников. Гырымтэ бусыослы чакламын со. Нырысь радъёсын усыос (культиваторъёс) юнматэмын. Соос бӧрсьы пуктэмын секытэсь барабанъёс. Таосыз музъемез ӵошкытато. Собере гинэ ай кизён агрегатъёс сыло. Вормоз собыдӟа машинаез К-701 трактор гинэ. К- 700-эз секытэнгес кыске. Ёрос администрациослэн тӧрооссы та ужрадысь трос выльзэ басьтӥзы. "Июльское" учхоз миым 22 миллион 490 сюрс манет тыр продукцизэ вузаз. Пайда басьтӥз 7 миллион 723 сюрс манет яке 42 процент луэ. Уждунзылэн шорлыдыз - 879 манет, пунэмзы ӧвӧл. Аслаз 4 лавкаез вань. Али Воткинскын усьтозы на. Таӵе семинаръёс тросгес мед луозы вылэм. Ӝӧк сьӧрын пукыса дышетсконлэн пайдаез бадӟым ӧвӧл. Н.А.Ганза но семинарез йылпумъяса вераз, гурт удысысь специалистъёсын ӵемгес пумиськылоно шуыса. Ас синмыныд адӟыса, интыосы потаса, югдурез но умойгес валаны кутскиськод. Ӵуказеяз "Июльское" учхозын таӵе программаен ик семинар ортчиз ёросысь гурт удысъя управленилэн кивалтӥсьёсыныз но колхозъёслэн тӧроосынызы. А.АНДРИЯНОВ. Семинар-кенеш дыръя. Синвуэз кисьтӥськиз Шаркан районысь Ляльшур гуртын уло ожысь но ужысь ветеранъёс. Соос пӧлысь одӥгез - Надежда Михайловна Иванова. Вордскиз со 1924-тӥ арын. дышетскиз куатетӥ классозь гинэ. Коньдон но сиён ӧвӧлэн, дышетсконзэ ӧз ни азьланьты. Туж курадӟыса улӥзы угось. Война кутскыку, солы дас сизьым арес вал. Вань пиосмурт ужъёсты быдэсъяно луиз. Ӵош ИжевскБалезино чугун сюрес лэсьтонын но. Татын валъёсын ужазы. Киынызы сюй копазы. Асьсэос ик сое сюрес вылэ киськаны нуллӥзы. 1945-тӥ арын дышетскиз трактористэ. Мукет араз иини ужаны кутскиз - ваньзэ тыршиз дас ньыль ар, 1959-тӥ арозь. Куинь ар ужаз комбайнэн. собере колхоз тӧро Михаил андреевич Курбатов шуиз: "Надя, окмоз ини трактрен ужаны - егитъёслы интыдэ сётоно. Нош ачид парсь сюдыны мын". Озьы 1964-тӥ арозь та удысын ужаз. Война дыръя но со бере курадӟемез шӧдытэ ик. Вылаз ик, тракторысь усьыса, пыдзэ сӧсыртӥз на. Тазалыкез эшшо уродмиз - нырысетӥ группаысь инвалид луиз. Мӧйы муртлэсь сюлэмзэ буйгато но шунто котырысьтыз нылпиосыз но соослэн пиналъёссы. Улэ со али Аликезлэн семьяеныз ӵош. Сюлмасько песянайзы сярысь, жаляло сое. Кышномуртлэсь ӟеч но лулысь-сюлмысь тыршемзэ возьматэ ужысь ветеранлэн медалез но. Н.КНЯЗЕВА, Удмурт кун университетын дышетскись. Чеберина Йырсиосме лӧсъяло - ваньзэс-ваньзэс гочато Мынам но ушъяськеме потӥз йырсиеным. Сокем кузь ӧвӧл ке но, чебер - со мынам ас понназ бабыльске. Дышетскисько Можга педучилищеын. Милям татын нылъёсмы туж чебересь. А.Васильева. Алнаш районысь Азамат гуртысь Наташа Петровалэн но йырсиосаз сьӧлтаськод. Наташа дышетске школаын, солы 14 арес. Экономика ужпумъёс Быгатоз-а Россия Китаен оградэ султыны? Туала улонмес вакчияк одӥг кылын дунъяськом: кризис. Но кылем арысен кутскыса, ӵемгес вераськонъёс потыло ни экономикалэн ӝутскемез сярысь. Зэмзэ-а со яке калыкез буйгатон гинэ-а? Газетмылэн корреспондентэз Т. Банникова та ужпумъёсъя вераськонэз нуэ экономика наукаосъя докторен Анатолий Константинович Осиповен. - Зэмзэ ик, Россиысь Госкомстатлэн лыдпусъёсызъя берло 10 ар ӵоже нырысьсэ экономикаын югдур сайкытгес адӟиське. Кылем арын вань предприятиос, 1998-тӥ арын сярысь, 1,5 процентлы тросгес продукция поттӥзы, промышленность - 8,1 процентлы. Гурт хозяйство удысын сокем зол азинсконъёс ӧвӧл ке но, татын но сиён-юон поттон 2,4 процентлы йылӥз. Вань та лыдпусъёс азьлань мынэмез кадь возьмато. Но со дыре ик кылем арын азьвыл арен ӵошатыса калыклэн коньдон доходэз 15 процентлы кулэсмиз, уждунлэн быдӟалаез 23 процентлы ӧжытгес луиз. Ужтэк кылемъёслэн лыдзы 6,8 процентлы будӥз. Россилэн улосъёсаз кризис шуонлэн аспӧртэмлыкъёсыз вань ке но, огъя югдур сокем зол уг висъяськы. Удмуртиын, кылсярысь, промышленностьын ваньбур поттон 1999-тӥ арын 8,3 процентлы будӥз. Тужгес но пусйымон машина поттон удыслэн азинскемез - 40 процентлы йылӥз, химической но нефтехимической промышленность - 36,6 процентлы. Озьыен, куд-ог удысъёсъя Удмуртия Россиез азьпалтэ но кадь. Но предприятиослэн продукцизылы дунъёс 181 процентлы будӥзы. Табере асьтэос учкелэ макем шӧдскымон экономикамылэн умоямез. - Россиен ӵош одӥг кыткетын вамышъяськомы бере республика ас мылкыдыныз гинэ ужаны уг быгаты, дыр. Кыӵе воштӥськонъёс ортчизы Удмуртилэн экономикаяз берло 10 аръёсы? - Нырысь ик туж зол воштӥськиз экономикалэн инъетэз (базисэз). Табере со пыкъяське пӧртэм пумо собственность вылэ. Кун ваньбурлэн бадӟым люкетэз нимаз кузёослы но интыосысь предприятиослы выжиз. 1992-тӥ-1998-тӥ аръёсы приватизация улэ 1126 предприятие сюриз. Со пӧлысь 904-ез муниципалитетъёслэн ки улазы шедизы, 170-эз - республикалэн асваньбурез, 52-ез федеральной асваньбур лыдъяське. Воштӥськонъёс луизы экономикалэн удысъёсаз но. Дас ар талэсь азьло промышленностьын бадӟым инты басьтэ вал машина поттон удыс (65 процент), Соин нокызьы ӵошатыны уг быгато вал электрокужым сётон - 1,6 процент эстӥськон удыс - 4,3 процент, капчи промышленность - 4,4 процент. Сыӵе югдур герӟаськемын вал военно-промышленной комплекслы зол саклык висъямен. Со дыре ик туж каллен ужазы юрттэт сётон удысъёс. Таӵе югдурез умоен лыдъяны уг луы ни вал. Табере промышленностьын машина поттон удыслэн люкетэз 32 процентозь кулэсмиз, нош будӥзы эстӥськон сётон - 17 процентозь, электрокужым сётон - 14 процентозь, мукет сямен вераса, сырьё сётӥсь удыслэн азинскемез шӧдскымонгес луиз. Асьме республикаын ӟеч вамышъёсын вылӥе тубыны кутскизы пияла но медицина препаратъёсты лэсьтон. 1990-тӥ арен ӵошатыса, пияла поттон 132 процентлы будӥз, медицина препаратъёсты поттон - 334 процентлы. - Анатолий Константинович, выльдӥськон кутскемен Удмуртия пыртэмын вал дотациос чотын возиськись улосъёс пӧлы. Мар со сётэ асьме республикамылы? - Сыӵе политика асьмелы пайда уг вайы. Соин сэрен бюджетмылэн доход ваён люкетэз 10-15 процентлы Москваысь келям трансфертъёсын тырмытӥське. Нош Москвае республикамы солэсь данаклы тросгес коньдон келя. Шуом, ар ӵоже Удмуртия 8 миллиард манет коньдон люка ке, 4 миллиардлэсь унозэ Россилэн бюджетаз келя. Ёросъёс сярысь ке верано, куд-ог ёросъёслэн бюджетъёссы 80 процентозь дотациос чотын возисько. Азьланяз но сыӵе ик политика нуэмын луиз ке, асьме калыклэн улонэз уз умоя. Мукет люкетӥсь мугъёс но вань на. Кылсярысь, демографиен герӟаськем ужпумъёс. Калыклэн лыдыз асьме республикаын туж зол кулэсме. Кулэмъёслэн лыдзы, вордӥськемъёс сярысь, 1,5 поллы тросгес луиз (сыӵе югдур вал 1997-тӥ арын). Али та суред кӧнялы ке умой пала кадь берытскыны кутскиз. Озьы ке но, матысь аръёсы калыклэсь йылэмзэ возьмано уз на луы. Валтӥсь мугез: экономикаын секыт югдур. Асьтэос учке ай. Республикаямы 35 процентэзлэн улӥсьёслэн коньдон доходъёссы улыны тупатэм нормалэсь ӧжытгес луэ, отчы пыро, шуыны луоз. вань пенсионеръёс, гуртын улӥсьёс, бюджет чотын ужасьёс, тросэз рабочийёс. Республикаямы озьы ик 50 сюрс ужтэк кылемъёс лыдэ басьтэмын, нош ваньзэсты лыдъяса соос 100 сюрслэсь но трос. - Табере ачиз таӵе юан куриське: малы асьмеос таӵе югдуре вуим? -Вань янгышъёсмы пото политика бордысь. Россилэн экономикаез туж зол думемын политика борды. Экономикаын воштӥськонъёс ортчытон интые, нырысетӥ интые пуксё политикъёслэн партиослэн интересъёссы. Соин ик секыт югдуре вуэммес мон таӵе мугъёсын валэктысал: страналэн вылӥ эшелоназ кылдэм кризисэн, регионъёсысь кивалтӥсьёслэн, центрлэсь политиказэ быдэсак кылзӥськыса нуэменызы, экономикалэсь куронъёссэ лыдэ басьтытэк ужамен. Нош самой бадӟым янгышмы потэ со бордысь: азьвыл кивалтон амалъёслэсь куштӥськыса, номыр выльзэ кылдытыны яке ум быгатӥське, яке мылмы уг поты. Соин калык власть бордысь палэнскиз. калык - ас понназ, власть - ас понназ. Россия али берлань, капитализме, чигна, озьы учконо ке, странаын кылдэм югдурез аспӧртэмлыко шуыны луоз. - Тросаз странаосын пӧртэм вакытъёсы экономикаын секыт югдуръёс кылдылӥзы. Соослэн кризисысь потон амалъёссы Россилы уг-а тупало? - США "бадӟым депрессия" шуонысь потӥз, экономика радъянэз быдэсак государство кие выжтыса. Со вал Рузвельтлэн "выль курсэз". Со дырысен планъя ужанлэсь (государственной регулированилэсь) США ӧз ик куштӥськылы. Али но США-ын кылдытэмын штатъёслэсь азинскемзэс чакласа возёнъя нимысьтыз управление. Вань штатъёсын ужало экономикая министерствоос. Соос ик выро планъёсты дасянэн но соосты уже кутонэн. Таӵе сюрестӥ мынэ али ФРГ. Нош быдэс дуннеез али паймытэ Китай. Ар ӵоже отын, Россиын сярысь, 6 поллы трос продукция потто. Китайын но реформаос мыно, но соос чылкак мукет сямен радъямын. Выльдӥськон кутскыку, Россиын государство экономикаысь быдэсак палэнскиз (кошкиз), нош Китайын государство экономикалэсь вань ёзъёссэ туж зол ас кияз басьтӥз. Али отын быдэс экономиказы ужа арлы быдэ но вить арлы чаклам планъёсъя. Вить арлы чаклам планъёсъя озьы ик али ужа Южной Корея, но мукет странаос. Татын валтӥсь интые али кутэмын индустриализация, продукцизэс кунгож сьӧры вузан (экспорт) но импорт шуонлэсь палэнскон. Тӥни озьы та странаослэн азинсконъёссы возьмато кыӵе амалъёсты асьмелы но уже кутоно экономикамес ӝутон понна. Соин ик та секыт вакытэ асьмелы эсэпсэ валаса но быгатыса вань амалъёсты кутоно рынокын экономикаез азинтон но озьы ик экономика радъянэз государство ласянь умоятон понна. Макем золгес азинске рынок, сокем юнгес луыны кулэ планъёс. - Озьыен, тӥ ӵектӥськоды экономикаез выльысь планъёсъя ужан сюрес вылтӥ нуыны? Но одӥг мажес вылэ кык пол уг султыло шуо ук? - Зэмзэ но, совето планъёслэн туж трос тырмымтэоссы вал. Но улон возьматӥз: берло аръёсы планирование шуонлэсь быдэсак куштӥськон ӟече ӧз вутты. Куд-огез оскизы, экономикаез, пе, рынок радъялоз. Нош озьы со ӧз луы. Соин ик мон юн оскисько: рынокын экономикаез ас эрказ лэзьыны уг яра. Экономикаен тыро-пыдо государство кивалтыны кулэ. Западын сое кемалась валазы ини. Экономикаез радъян, мукет сямен вераса регулировать карон понна, пӧртэм амалъёс вань. Озьы ке но, азинсконъя стратегия кылдытон понна асьмелы одно ик пыкъяськоно луоз асьме кужыммы но узырлыкмы вылэ. Собере Россиысь котькуд удыслэн хозяйствоен кивалтонъя аслаз быръем сюресэз но луыны быгатэ. Огъя азинскон планэз дасяку, ӧвӧл вунэтоно луоз Россия Федерацилэн, улосъёслэн, городъёслэн но районъёслэн экономикаез азинтонъя чаклам сюресъёссэс но. - Анатолий Константинович, всё-таки экономика ласянь али Россия туж-а кыдёкын сылэ Китайлэсь? - Кыдёкын. Китайын берло дас аръёсы продукциез поттон арлы быдэ 10-12 процентлы йылэ. Продукциез поттонъя Китай али дуннеын США бӧрсьы кыкетӥ интыын мынэ. Специалистъёслэн лыдъямзыя, Китай озьы ик азинскиз ке 2025 арозь со США-ез сутоз. Соин ик Китайлэсь опытсэ мукет странаослы но ужазы кутоно, дыр. Отын быгатӥзы шонер сюрес шедьтыны. Экономикаын ог-огенызы артэ азинско государстволэн предприятиосыз но ужбергатӥсьёслэн хозяйствооссы. Зол кужымез партилэн, отын со одӥг гинэ, озьы ке но, со зол герӟаськемын калыкен, улонлэн куронъёсызъя со выльдӥськыны быгатӥз. - Удмуртия Президентлэн указэзъя Приволжск округе пыртэмын. Мар со сётоз асьме экономикалы? - Али шуг вераны. Но мынам малпамея, Урал улосэн Удмуртилэн кусыпъёсыз сыӵеесь ик кылёзы. Асьме республика котьку зол герӟаськемын вал Пермь улосэн (отысь асьме бюджетэ 15 процент уксё лыктэ) но Челябинск, Свердловск улосъёсын, нош берло аръёсы экономикаын кусыпъёсмы юнмазы. Башкириен. Машина поттон, корт дасян, му вӧй, эстӥськон удысъёсмы - ваньмыз Урал улосэн герӟаськемын. Малпасько, Приволжск округе асьмедыс экономикая ӧз, мукет малпанъёсъя пыртӥзы. Шуом, Россиен кивалтонэз капчиятон понна. Собере, губернаторъёсы генералъёсгес ӵектэмын бере, округъёсты соосъя но, дыр, люкылӥзы. - Тау вераськеммы понна. ДАРТ Жуг-жаг пӧлын Кыӵе синъёсын учко выж миськисьёс но жуг-жагез ӵужись-калтӥсьёс шоры - тодӥськоды. Мон алигес ачим сое шӧдӥ, кыӵе возьдаськи. Милемды, студентъёсты, университет дорысь музъем ултӥ выжонэз ӵужыны косӥзы. Ӵын поттыса ужаськом, ява! Но сопала-та пала ветлӥсь адямиос малы ке шорамы кырыж учкыло. Тузонэз ӝутэммы ӧз кельшы, шӧдске. Одигез кышномурт милемды ик, ужась муртъёсты, куаретӥз: "Малы, пе, одно али ӵужиськоды, дӥськутэз нӧдтӥськоды? Ӵукна куать часын потоно вал!" Мылкыдмес куашкатыса кельтӥз. Ми пумитаз номыр ӧм вазе. Ярам, мукетыз кышномурт жаляз милемыз. Кезьыт сюлэмо кышномуртэз возьытэ уськытӥз. Нош кӧня ке улыса, кытысь ке жаг тырон пуйыен вуиз. Шорады учкыса аслам но ужаме потӥз, пе, милемлы юрттӥськыны кутскиз... Уж котькыӵеез чебер, шуиз со. Света Калугина, Удмурт университетын дышетскись. ДАРТ ДАНЪЯЛОЗЫ УСТООССЭ Тӥляд шудо, шулдыр улонды понна, пиналъёс но егитъёс, асьсэлэсь быгатонлыксэс, тодон-валанзэс, ӟырдыт сюлэмзэс, дырзэс сӥзисьёслы республикаысьтымы Егитъёсын ужанъя кун комитет дасяз мӧляын нуллон знак. Со озьы ик нимаське "Егитъёсын азинлыко ужам понна". Шаерысьтымы Егитъёсын ужанъя кун комитет трос ужпумъёсъя Россиез азьланьтэ. Асьме республикаын кутэмын "Егитъёс сярысь закон", нош Россия Федерациын ку табере со кутӥськоз ай? Президент Владимир Путин кулэен ӧз лыдъя Россиысь Егитъёслэн политиказыя кун комитетэз кельтыны, егитъёслэн ужпумъёсынызы табере вырыны кулэ калыкез дышетон удыс. Озьы ке но, шаерысьтымы егитъёсын ужанъя кун комитет ужзэ азьланьтоз, чаклам ужпумъёссэ быдэстон борды татын ӝабыр-ӝабыр басьтӥсько. Россиын нокытын ӧвӧл егитъёсын азинлыко ужам понна мӧляын нуллон данъян знак. Асьмеос та ласянь но азьпал радын. Россиысь Егитъёслэн нуналазы, оло, егитъёсын ужась куд-ог специалистъёслы шуд усёз со знакез басьтыны. "Егитъёсын азинлыко ужам понна" знакез быдэстон бордын ужазы трос художникъёс, шаерысьтымы но вераса, но быръемын вал Константин Мосеновлэн (знаклэн авторез, Химки город) но Роберт Маланичевлэн (художник, москва город) ужзы. Знаке пыртэмын Удмурт Республикалэн символъёсыз - герб но флаг, Россиысь нокыӵе мукет регионъёсын со уз "йыромы". Знак луоз кортлэсь, сое лэсьтозы Москваын. Л.МАЛЫХ. Дарт Воректӥсь кизилиос "Огпол адӟыса синмаськи" Та синмаськымон башкир удмурт пияшез егит лыдӟисьёсмы пӧлын тодмасьёсыз вань, дыр. Бен, бен, ӧд алдаське, шундынылъёс но шундыпиос, кылем но валлян гужем Башкортостанысь Бальзюга гуртысь Валера Сабанчинэн ӵош тӥ "Шундыкар" лагерьын шутэтскиды. Со тӥледды чебер кырӟаменыз, мыло-кыдо луэменыз паймытъяз. Воштӥськем-а бен эшты ар ӵоже? Валера туэ школазэ йылпумъя. Азвесь медален. Сюлэмыз кемалась куриське ни Ижевске - со малпа татысь Гурт удысъя академие пырыны. - Но малы одно сокеме, Башкириын но вузъёс устоесь ук, - юасько Валералэсь. - Вот уг лу ни Ижевсктэк улэме. Огпол адӟи но - синмаськи. Отын эшъёсы но тросгес ни кадь - лагерь бере ялан ог-огмылы гожтэтъёс гожъяськом. - Дышетӥсед - Надежда Уткина тынэсьтыд эстрада удысын усто кырӟамдэ пусъе. Малы малпаськод астэ гурт удысэн герӟаны, экономист луыны? - Мынам улонме сценалы сӥземе потэ, но туала улон сыӵе валантэм. оин ик малпасько - пиосмуртлы рос-прос специальность ноку уз люкеты. - Арлыдыдъя тон "Шундыкаре" туэ уд шедиськы ни. Мынэмед потэ-а, юрттӥз-а со тыныд маин ке? - Коть али ик лобӟысал мынысал. "Шундыкар" мыным туж юрттӥз. Юрттэм гинэ ӧвӧл, йырме берыктӥз. З. Вахрушева. Туспуктэмез М. Егоровлэн. Дышетозы сӧсыръёсты Свердловск областьысь Сысерть городысь "Родник" лицей усьтӥськемын кыкетӥ но куинетӥ группаен инвалидъёс понна. Отын дышетскыны быгатозы шор ёзо образование басьтэм 17-30 аресъем егитъёс. Машинисткае яке ЭВМ-лы операторе одӥг ар дышетскыса, азьланяз басьтыны луоз бухгалтерлэсь специальностьсэ. Дышетсконо озьы ик одӥг ар. Куинетӥ араз дышетскисьёс тодон-валанъёс басьтозы экономикая, пичи но шоро-куспо ужбергатонын бухгалтерской учётъя но контролья, яке программистлэсь специальностьсэ басьтозы. Нош кинлэн вуриськись луэмез потэ, дышетсконо кык ар. Татын ик дышетозы керттӥськыны но пужыятскыны. Дышетскисьёсты дунтэк сюдозы, общежитие висъялозы, эмъялозы. Юанъёсын вазиськоно республикаысьтымы инвалидъёслэн огазеяськоназы яке ёрос ёзъёсы. Л. КИМОВА. Тӧдьы нунал Лобӟисько... Кельтӥсько... Но тӧдьы бурдъёсы вай борды шедьыло, Ӵаш вазись писпуос лобӟыны люкето. Вож ненег куаръёссы бордам лякисько, Зарниям пӧсь тылъёс ымнырме ӵабъяло. Тупаськом Вирӟектэм бурдъёсме синвуэ йӧнатэ, Вӧсез чиданы улыны кужым пыӵатэ. Нош секыт шокасько мон, омыр утчаса, Лобӟыны вырисько, мултэсме шӧдыса. Анна Кузнецова. Пуктӥсько мон азям тусбуйдэ, Туж кема со шоры учкисько. Чагыресь синъёстэ чупаса, Нюрамзэс соослэсь шӧдӥсько. Кутӥсько аслэсьтым тусбуйме Огкадьзэс соослэсь утчасько. Тупаськом, тупаськом, кылӥськод-а? Чагыресь синъёстэ чупасько. Яратон ватскем Урамын тулыс, Сюлэмын нош чус. Ӧз вырӟы на сюлэм Тюрагай гурен. Эшъёсы мынам Пальпото туннэ. Вот, пе, яратон Мертчиськиз сюлме. Нош мыным мӧзмыт Ӝож кырӟа сюлэм. Кытчы яратон Мынэсьтым ватскем? Лариса Якунина, Удмурт кун университетын дышетскись. Мукетсэ синйылтод? Тынад визьмо синъёсыд, Лякытэсь выросъёсыд Ваньмыз сярысь верало... Яратско шуо, оло? Выисько соку тынад Пыдэстэм мур синъёсад. Учкисько но учкисько, Туж валаны тыршисько. Палэнын ке, витисько, Часлы быдэ малпасько. Мар-о луоз азьланяз, Улон ке ӧрзэ вошъяз? Оло, монэ вунэтод, Мукетсэ ай синйылтод... Таня Опоева. Вуж Монья школа, Пичи Пурга ёрос. РОССИЫСЬ УСТООСЫЗ Берлояз вторнике Правительствоын аспӧртэмлыко но тунсыко пумиськон ортчиз. Журналистъёс азе пуксизы 7 пӧлысь куатез (Валентин Жебровский ӧй вал) Россиысь устосыз кивалтӥсьёс. Россиысь Промышленникъёслэн но ужбергатӥсьёслэн огазеяськонзы "Выль даур" конкурслы йылпумъянъёс лэсьтӥз. Со арлы быдэ ортче. Валля арын вормисе потӥзы вал Глазовысь ЧМЗ-лэн азьвыл валтӥсь директорез Николай Ганза но Александр Горяинов (Глазов администрация). Туэ нош (кылем ар понна) асьмелы зориз. Сизьымез валтӥсь тӧроосмы Россиысь устоосыз кивалтӥсьёс луизы. Кинъёс бен соос? Вормисе потӥзы Евгений Богомольный ("Удмуртнефть"), ВикторТолмачев ("Воткинский завод"), Сергей Фомичев ("Удмурт Телеком"), Игорь Валиахметов ("Ижевский радиозавод"), Владимир Мохначев ("Свет" завод, Можга), Даниил Белоголовкин ("Гарант") но Валентин Жебровский ("Буммаш"). Ваньмызлы таослы сётэмын пӧртэм наградаос - дипломъёс, зарни знакъёс но Петр Великийлэн статуэткаез. Кызьы бен конкурс ортчытэмын? Та ужрадэ пыриськизы Россия Федерациысь пӧртэм пумо ваньбурен предприятиослэн но фирмаослэн 1500-лэсь уно кивалтӥсьёссы. Жюрие пыртэмын вал экономика удысысь 36 тодмо тодосчиос но специалистъёс. Соин кивалтӥз усто экономист Леонид Абалкин, нош кенешез нуиз Аркадий Вольский. Пресс-конференциын туж пайдаё вераськон мынӥз. Му вӧй кыскон но та удыслы ӟеч оборудование, "Тополь-М" ракетаос поттон, связь но калыклы кулэ услугаос сётон сярысь. Кылсярысь, Виктор Толмачев меӵак пусйиз, ми, пе, ож тӥрлык дуремен ӵош, одно ик паськытатом му вӧй поттӥсьёслы ӟеч оборудование но установкаос но калыклы вузъёс лэсьтонмес. Сое, зэмзэ но, улон куре. Россиысь Обороная министерство ож тӥрлык басьтэмез понна коньдон йӧскадь уг тыры (400 миллион манет тыронэз), юн ӝегатэ, куронъёсыз (военной заказэз) туэлы но йылаз-пумаз вуттымтэ. Солы оскыса улӥд ке, тыро-пыдо ноку уд ужа. Ваньзэ сое лыдэ басьтыса, предприятие азьланезлы чакла ӝынызэ калык вузъёс поттыны, сомында ик - ож тӥрлык. Но татын выт (налогъёс) тыронэн изъян адӟиськом. Тани военной продукция понна 15 процентозь выт тыриське, нош калык вузъёслы - чылкак 4-5 процент гинэ. Тӥни сыӵе ыштон луэ. Связь сярысь вераса, Сергей Фомичев ивортӥз: "Шаерамы урамъёсын 2 сюрс телефон- автоматъёс пуктэмын но, толэзьлы быдэ 30 сюрс нимаз карточкаос вузасько. Нош "Гарант" берло дыре шӧдскымон кужмоятӥз полиграфической ужзэ, телевизоръёсты тупатъян мырдэм возиське, ӝоген изъян ваись ёз луыны быгатоз". Пусйытэк кельтэме уг поты Ижысь радиозаводэз. Со матысь дыре МПС-лэн (чугун сюреслэн) ялэм конкурсаз вормисе потӥз. Коллектив та аръёсы чугун сюреслы калыкез утёнъя туж устоесь "Клуб" приборъёс поттэ но бадӟым инты висъя продукциезлэсь ӟечлыксэ ӝутонлы. Пайдаез син азьын. Вузъёсыз дуннеысь куронъёслы тупало. Нош Можгаысь "Свет" завод - быдэс Россиын тодмо огазеяськон. Берло куать ар ӵоже со син азьын выльдӥськиз, 20-30 процентлы продукция поттонзэ будэтӥз но кык интые, ньыль буёлэн пияла посуда лэсьтэ. Стеклотарая со Россиын нырысетӥ инты басьтэ, нош 1996-тӥ но 1998-тӥ аре Сарово посудаез дуннеысь адӟытонын зарни кизили премиен пусъемын. Завод туэ 50 процентлы уногес продукция поттыны дасяське. Озьы ик азинлыко нуэ куинетӥ цех лэсьтонзэ. Тӥни огъя вераса, та предприятиослэн кивалтӥсьёссы юнме шорысь пусйымтэ. Россиысь 100 усто кивалтӥсьёс пӧлысь асьме республика понна 7 мурт туж умой ни. Азьланьын соослэн лыдзы уката тросгес мед луоз. Геннадий РОМАНОВ. Книга кузё Августа Михайловна Бобылева 25 арлэсь кема ини Воткинск ёросысь Кукуи библиотекаын ужа. Ачиз со вордскемын Шаркан ёросысь Билиб гуртын, культурая училищеез йылпумъямез бере Кукуие ыстӥзы. Удмурт нылашлы ӟуч гуртын нырысь- валысь секыт йӧтылӥз. Тямыстонэтӥ аръёсы татчы пудо вордон комплекс пуктӥзы, ог сю мында кык квартираем коркаос лэсьтӥзы. Пӧртэм интыосысь калык Кукуие лыктӥз но лыктӥз. Тросгес вуизы удмуртъёс. Озьы ӟуч гурт пумен удмуртомиз, Августа Михайловна но ас калыкез пӧлын капчигес шокчиз. Библиотекаен, школаен, клубен, роноен ӵош ортчытъяло пӧртэм ужрадъёс. Кылсярысь, туэ гинэ татчы ветлӥзы "Кенешлэн" редакцияз ужасьёс но журналэз лыдӟисьёс, Воткинск ёросысь краеведениен дышетӥсьёс. "Дыдыксин" нимо удмурт клубазы но, "Шулдыр мылкыд" нимо кырӟась-эктӥсь ансамблязы но, драмкружоказы но - ваньмаз пыриськыны вуэ Августа Михайловна. - Берло аръёссэ библиотекаямы книгаос ӧжыт вуо, нош удмуртэз чик но ӧвӧл, - ӝожтӥське Августа Михайловна. - Соин ик кусып возиськом Воткинскысь центральной библиотекаен, лыдӟисьёслэсь курем книгаоссэс отысь вайылӥськом. Коньдон ке висъясалзы, берло аръёсы потылэм удмурт книгаосты но басьтысалмы. Лыдӟись шедьысал, школаын нылпиос удмурт кылэз дышето. Туспуктэмез но гожтэмез Владимир Беломорскихлэн. Дарт Яратэ уг яраты Кин уг яраты ушъямез Тӥляд мылкыдды ӧвӧл, номыр уг шумпотты. Нош комплимент верасалзы ке, со умоясал-а? Одно ик. Соку кутске со бордысен - вералэ кинлы ке ӟеч кыл. Пунэмзэ вералоз со но. Асьмеос малы ке дышымтэ ог-огмес ушъяны, нош со куддыр сыӵе кулэ. Ну жаль-а тӥледлы чебер буяськем, чебер туфли басьтэм, ужед ӟеч пӧрмем шуыны? Ӧвӧл, но уд шуиське. Нош интыяз верам умой кыл юрттэ адямилы аслыз оскыны, ӟеч кужым басьтыны, мукетъёссэ гажаны. Но комплиментлэсь но эсэпсэ валаны кулэ - уд вералэ ук тӥ дунтэм костюмен муртлы тузӥ шуыса. Асьмеос дышемын ини - комплиментъёс тросгес сюро нылъёслы. Но пиос но туж кулэясько ук ӟеч кыллы. Утчалэ ай вераса, эсьма, асьтэос шӧдоды. В. Кибардина. Удмурт университетын дышетскись. ДЕПУТАТЭН КЕНЕШОН ВЛАСТЬ КЕ ЮН... Толон милям корреспондентмы пумиськиз Россия Федерациысь Кун Думалэн депутатэныз Светлана Смирноваен но куриз сое куд-ог юанъёслы валэктон сётыны. - Светлана Константиновна, кылем арняе депутатъёс кутӥзы амнистия ялон сярысь постановление. Пытсэт сьӧрысь ог 120 сюрс муртэ, дырызлэсь вазь лэзён асьме обществолы кышкыт ӧвӧл-а? - Та ужпумез ми пыр-поч эскерим. Документын пусъемын, кыӵе адямиос шедьыны быгато амнистия улэ. Нырысь ик, инвалидъёс, висисьёс, пинал возьмась нылкышноос. Котьмалэсь кулэез курон - эрике потӥсь мурт тюрьмае нырысьсэ шедемын медло. Отчы кӧня ке пол сюрылэмъёс, мукетъёсыз понна кышкыт луисьёсты дырызлэсь вазь уз мозмытэ. Мар ватонэз, данак адямиос йыруж лэсьто я дыртэменызы (шуом, водительёс), я чакласькымтэенызы, я югдурез валамтэенызы. Соин ик пытсэт сьӧры куддыр учырто кыӵе ке янгыш лэсьтэм оглом умой адямиос но. Сыӵеос тюрьмаын тупатскем интые, отысь урод сямо луыса но пото. Мон малпасько, ялэм амнистия данак мурт понна ӟечен берытскоз. - Ӵуказе Кун Думалэн депутатъёсыз эскерыны кутско Россилэн Президентэныз ӵектэм законопроектъёсты. Тӥ эскероды странаямы кивалтон удысэз выльдонэн герӟаськем ужпумъёсты. Владимир Путинлэн рад тупатыны тыршонэз ог ласянь шумпоттэ. Но со дыре ик куд-ог эшъёс (сыӵеос вань асьме Удмуртиын но) сюлмаськемзэс верало, со реформаос республикаослэсь статуссэс ыштонэ вуттозы шуыса? Тӥ озьы уд малпаське-а? - Уг. Выль Президент ялан пусъе: Россиын ужаны кулэ закон, котьма лэсьтӥськыны кулэ законъя. Озьыен, оскисько, со Консититуция вамен уз выжы. Нош отын улосъёслэн интызы валамон пусъемын. Федеральной округъёс кулэ луизы Россиын огъя кивалтонэз умоятон понна. Аслаз сизьым ыстэм муртъёсыз пыр Путинлы каньылгес аслэсьтыз политиказэ пыӵатыны, властез юн возьыны. Но республикаослэсь статуссэс сюбегомытон сярысь вераськон уг мыны. Кремль тырше огъя порядокез юнматон пыр экономикаез ӝутыны, озьы калыклэсь улонзэ умоятыны. Тани кылем арняе мон ветлӥ "Единство" партилэн съездаз. Солэн азьветлӥсьёсыз пӧлын Владимир Путинлэн матысь адямиосыз бере, та огазеяськон туала властьлэсь мылкыдзэ возьматэ. Делегатъёслэн вазиськоназы верамын Россиын калык кусыпъёсты азинтон сярысь но. Озьыен, соос валало та ужпумлэсь пуштроссэ. - Светлана Константиновна, кыӵе ужрадъёс пусъемын июньлы? - Инвожо толэзь кысык луыны ӧдъя. Мон верасько трос пумо ужрадъёс сярысь. 8-тӥ июне Москваын ортчоз Россиысь калыкъёслэн ассамблеязылэн кыкетӥ кенешонэз. Со бӧрсьы пырисько Дуннеысь финн-угор егитъёслэн огазеяськонзылы (МАФУН) дас ар тырмонлы сӥзем конференцие. Со луоз Йошкар-Олаын. Ӧтё монэ Селтаын ортчоно Гербере но. Толэзь шорын ужало округын, соку чакламын трос пумиськонъёс. Одӥгаз нуналэ кенешом депутатлэн ёросъёсысь юрттӥсьёсыныз. Отӥяз пусъемын Венгриын ортчоно фестиваль. Отчы люкаськозы фольклор коллективъёс. Но котьмалэсь трос дыр котьку сямен кулэ луоз пӧртэм законъёслы инъетъёсты эскеронлы но документъёсты дасянлы. Уго со милям валтӥсез ужмы. Нялтас пусйыны кулэ: Дума чакла вал 18-тӥ июне йылпумъяны огъя кенешонъёссэ но каникулэ потыны. Озьы уз луы. Президентэн ӵектэм инъетъёсты юнматон вылысь, решение кутэмын 8-тӥ июлёзь ужаны. Ваньмыз сямен депутатъёс югдурез шонер валало но рад тупатонэз ӝогомытыны тыршо. Тодо уго, власть ке юн луиз, улон но ас ӧраз пыроз. И.ЛЕБЕДЕВ. Ветеранъёс уг сётско Аръёс ортчо ке но, калыклэн лэсьтэм ужез одно ик историе кыле. Тани мон алигес киям кутӥ Удмуртиысь ветеранъёслэн кенешсылэсь "Ветераны Удмуртии" книгазэ. Со ньылетӥез луэ ни. Тиражез ӧжыт - сюрс гинэ. Нош пуштросэз туж узыр, тросгес поттыса но урод ӧй луысал. Книгаын бадӟым инты висъямын республикаысьтымы ожысь но ужысь ветеранъёслэн Быдӟым Отечественной война дыръя асьме странамес утён понна улонзэс жалятэк тыршемзы сярысь материалъёслы. Журналист В.Поздеев гожтэ Брест крепостез утисьёс сярысь. Удмуртиын дивизиослэн но полкъёслэн кылдэмзы пумысен маде Удмуртиысь Комсомол нимо 174-тӥ дивизиысь Ветеранъёслэн советсылэн председателез Б.Рогалев гожтэ артдивизионлэсь тыл пыртӥ потэмзэ. Туэ май толэзьлэн шораз Удмурт Республикаысь Кун Кенеш но Правительство, Удмурт Республикаысь ветеранъёслэн кенешсы кайгырыса ивортӥзы Советской Союзлэн кык пол Героезлэн Евгений Масимович Кунгурцевлэн улонысь кошкемез пумысен. Со сярысь книгае умой гожтэм журналист Л.Кошкарова. Республикаысьтымы нылкышноос пӧлысь куинь Геройёс Татьяна Барамзина, Феодора Пушина, Нина Ульяненко сярысь вера М.Каргашина. Нош Сарапулысь ожысь ветеранъёслэн секцизылэн председателез В.Усов лыдӟисьёсыз тодматэ городысьтызы туж дано нылкышноосын - 1812-тӥ арын Отечественной войнаын офицерозь будэм Надежда Дуроваен, Нырысетӥ мировой войнаын со кадьгес ик ож сюресэз ортчем Антонина Пальшинаен но Быдӟым Отечественной войнае пыриськем мукет нылкышноосын. Аслаз 18-тӥ гвардейской дивизияз ожмаськем эшъёсыз сярысь маде Удмурт Республикаысь дано журналист В.Никитин. Та книгае ик поттӥзы мынэсьтым но гожтэмме. Со сӥземын эшелы Владимир Фролович Мерзляковлы, Вормон парадэ кык пол ветлэм муртлы. Туэ солы шуд усиз парадэ куинетӥзэ ветлыны. Ижевскысь 73 номеро школаысь музей сярысь туж умой гожтэм Удмурт Республикаысь дано журналист Л.Федоров. Нош "Удмуртская правда" газетлэн редактрезлэн воштӥсез Е.Ламбин шуныт кылъёсын маде аслаз яратоно дышетӥсезлэн Мария Семеновна Кривилевалэн (али Каргашиналэн) Северо-Западной фронтын ожмаськемез сярысь. Войнаын тушмонэз вормыны бадӟым юрттэт сётӥзы партизанъёс. Соос пӧлысь тросэз тодо генерал-майорез Советской Союзлэсь Геройзэ А.Н.Сабуровез. Со вордскиз азьвыл Ижевск районысь Ярушки гуртын. Войналэсь азьвыл Александр Николаевич сельсоветлэн председателез вал. Азьвыл партизан В.Усов "Ветераны Удмуртии" книгаын маде М.И.Тарасовлэн отрядаз тушмонлы пумит партизанъёсын ӵош Ленинградэз утён понна ожмаськемез сярысь. Мӧйыослы сӥзем выль книгаысь озьы ик тодматскыны быгатоды асьме калыклэн ожлэн мышказ ужамез, куд-ог сӥё-дано адямиослэн улэмзы но ветеранъёслэн организациоссылэн ужамзы сярысь но мукет материалъёсын. Та книгаез тӥ шедьтыны быгатоды асьтэ районъёсады ветеранъёслэн организациосысьтызы. В.ЧЕРНОВ, ужысь ветеран. Кунлэн бюджетэ пырисьтэм фондъёсаз огъя выт тыронъя отчёт лэсьтон пумысен огдырлы радлык сярысь Удмурт Элькунысь Кивалтэтлэн Постановлениез 1998-тӥ арын 31-тӥ июле кутэм "Куд-ог ужъёслы тупатэм табышысь (доходысь) огъя одӥг выт басьтон сярысь" 148-ФЗ номеро Федеральной Законлэн 4-тӥ ёзэтысьтыз 2-тӥ пунктын чакламъя но азьланяз та ужпумъёсын герӟаськем правоя норма луись актъёс кужыме пырытозь, Удмурт Элькун Кивалтэт пуктэ: 1. Ужам стажез лыдъян но эмъяськыны страховой полис басьтон понна, куд-ог ужъёслы тупатэм табышысь огъя выт тырисьёслы поттоно табышысь огъя выт тыремзы дырысен 20 нунал куспын Россиысь Пенсиосъя фондлэн Удмурт Элькунысь ёзэныз оскем та ужъёсты быдэсъясь службаосаз но Эмъяськон понна одно тырон страхованиея удмурт улосвыл фондлэн филиалъёсаз ивортоно тупатэм табышысь огъя выт тыремзы сярысь свидетельствозылэн номерез, тырем коньдонзылэн быдӟалаез, выт тыремзы сярысь квитанцизылэн номерез но тырем дырыз сярысь, выт тыремзы сярысь свидетельствозэс но квитанцизэс возьматоно. 2. Та постановление кужыме пыре сое газетъёсын печатлам дырысен. 3. Постановленилэсь быдэсъяськемзэ эскероз Удмурт Элькун Кивалтэтлэн Тӧроезлэн воштӥсез С.В.Чикуров. Удмурт Элькунысь Кивалтэтлэн Тӧроез Н. А. Ганза. Ижевск город, 2000-тӥ арын 15-тӥ мае. � 477. Архивысь документъёсъя Удмуртия ЪЪ дауре 1915-тӥ ар Германиен ожмаськон кутскем бере, Россия гижысь-пиньысь басьтӥське ож тӥрлык дасян борды. Иж заводын ватсаса выль цехъёс усьтӥсько. Татысь администрация сюлмаське му вӧен ужась дизель-моторъёс басьтон сярысь, пуктэ выль котёлъёс. Куинь толэзь куспын заводысен Гольяны пристанёзь чугун сюрес кыско, пыӵал тӥрлыкез армилы ӝоггес келян вылысь. Воткинск заводын снарядъёс но бомбаос поттыны кутскемен сэрен, музъем ужан машинаосты азьвыл сярысь ӧжытгес дасяло. Паровозъёслэн но пароходъёслэн лыдзы уг кулэсмы. Войналэн нырысетӥ араз правительство янгышаз, ас удыссэс ӟеч валась рабочийёсты фронтэ келяменыз. Озьы заводъёсын ужась киос тырмемысь дугдо. Соин валче рабочийёсты военнообязаннойёс чотэ пыртоно луэ. Таӵе югдурез асьсэ пала берыкто узыр крестьян но купец пиос: армие мынонтэм вылысь, соос заводъёсы лыкто. Иж заводлы юрттыны вуо Москваысь, Петроградысь, Сормовоысь рабочийёс. Тросэз соос революция ортчытон мылкыдын уло. Война вакытэн герӟаса, рабочийёслэсь уждунзэс будэто. Но со дыре ик, вузъёс эшшо трослы дунояло. Со сяна, лавкаысь ышо сахар, сылал, кыскон. Соосты талонъёсъя люкыло. Та аре ышылыны кутске зарни коньдон, собере - азвесез но. Соос итые "берганы" ӧдъя Романовъёслэн юртсылы 300 ар тырмонлы сӥзем марка. Тулыс 1915-тӥ арын рабочийёс бугыръяськыны ӧдъяло, ужзэс уретыло. Озьы соос эксэйлы но ожмаськонлы пумит луэмзэс верало. Администрация соосты кышкатэ репрессиосын, тужгес вожомемъёссэ ужысь улля, фронтэ келя. 1915-тӥ арын Германия Россиез быдэсак киултыны дасяське. Тулыс-гужем ӵоже Россия ыштэ Польшаез, Прибалтикалэсь, Белоруссилэсь но Украиналэсь ог люкетъёссэс. Та ожмаськонын асьме землячкамы Антонида Пальшина, 100 ар ортчыса, Надежда Дуровалэсь адӟем каре. 17 аресъем нылаш, пиосмурт дӥсен пӧрмытскыса, Антон Пальшин ним улын фронтэ кошке. Тушмонэн кужмо но кышкатэк ожмаськемез понна со кык пол пусъемын Георгийлэн киросэныз. И. Зайцева, Удмурт Республикаысь Кун архивысь отделэн кивалтӥсь. Кыкетӥ дор Туэ, апрель толэзе, Пичи Пурга ёросысь Вуж Монья гуртэ люкаськылӥзы шаерысьтымы калык театръёс - асьсэлэсь устолыксэс возьматӥзы татын Алнашысь, Вавожысь, Пичи Пурга ёросысь Вуж Монья но Бобья-Уча гуртъёсысь, Можгалась артистъёс. Лауреатъёс луизы Можгалась но Бобья-Учалась калык театръёс. Вормисьёс 13-тӥ мае вуылӥзы Иже - быгатонлыкенызы шумпоттӥзы на Драмая удмурт кун театрлэн юртаз. Можга калык театрлэн режиссёрез Мария Михайловна Иванова учкисьёслы дэмлаз "Мон яратӥсько тонэ, улон" спектакльзэс. Пьесаез гожтӥз Туфан Минуллин. Нырысь ик сое бигер кылысь ӟуч кылэ берыктӥзы, нош собере Мария Михайловна ӟуч кылысь удмурт кылэ берыктӥз. Солэн верамезъя, пьеса бордаз бинялтӥз ӟеч мылкыдо луэменыз, ӟеч сямъёс пыӵатыны быгатэменыз. Пьесаын бадӟым инты басьтэ быдӟым тылож. Валтӥсь адями, Иван агай, тодаз вае ожын бырем куинь пизэ. Учкисьёсты тужгес паймытӥз спектакльлэн кутсконэз. Инмар Эзелез музъем вылэ келякуз шедьтыны косэ укмыстон ареслэсь мӧйы адямиез. Калык валаз спектакльлэсь пуштроссэ: кужмо кичабонъёсын согиз артистъёсты. Собере сцена вылэ потӥз Пичи Пурга ёросысь Бобья-Уча гуртысь калык театр - "Ньыльдонэтӥ уяз" спектакль но сӥземын вал Быдӟым Вормонлы. Тазэ но учкисьёс ӟеч мылкыдын пумитазы. Можгалась но, Бобья-Учалась но артистъёс учкисьёсты паймыто калыклы матын луэменызы. Бен, соос Удмурт Элькунысь но, Россиысь но дано артистъёс ӧвӧл. Озьы ке но, зол шудо. Мария Михайловна Иванова данъяське аслаз актёръёсыныз, соостэк, театртэк, сценатэк улыны ик уг быгаты. Нош нырысетӥ спектакльзэ пуктӥз кызь ар талэсь азьло - Можга калык театре егит ныл вуиз культурая институт бере. Театр со понна - кыкетӥ улон, кыкетӥ дор, кыкетӥ семья, нош ачиз отын - валтӥсь актриса, кузё, мукет актёръёслы, эшъёсызлы, юрттӥсь адями. Вероника Кибардина, Удмурт кун университетын дышетскись. Кылем дауре ай педагог Каменский шуиз: "Нылпилэн кык кулэяськонэз - будон но кышкытлыклэсь утиськон". Быгатӥськомы-а асьмеос нылпиосмылэсь со кулэяськонъёссэс быдэсъяны, шудо-буро будэтыны? Малы соосын ас тодэммыя кузёяськиськом, косъяськиськом, вӧсь кариськом, нош мӧйымыса котырысьтымы палэнскемзылы паймиськом? Сётэ со юанэз туннэ асьтэлы, анай-атайёс. Йыр пороме - тазалык лябоме Россиын югдур, зэмзэ но, воштӥське, лэся. Тани студентъёс но ини тамак кысконлы пумит султо. Кызьы ивортэ "Красноярский рабочий" газет, тамак кысконэн нюръяськонлы сӥзем нунал азьын Красноярскысь студентъёс огазеяськизы пикетэ люкаськизы. "Наркомания тамак бордысен кутске", "Тамаклы но аракыез вӧлмытонлы - ми пумит!" ӧтёнъёс улсын огазеяськем студентъёс городлэн кивалтӥсьёсызлы куронъёсын вазиськизы: Красноярсклэн ульчаосысьтыз тамаклы рекламаез утялтоно, законэз тӥяса тамакен вузкарисьёсты юн алоно, калыкез нуись-ваись транспортын ужась водительёсты тамак кыскыны лэзёно ӧвӧл. Пикетэ люкаськемъёс лыдъяло: туала вакытэ тамакен нюръяськонъя нимысьтыз кун программа кулэ. Басьтэмын Интернет пыр. "Малы кикы сокем силе?.." Кияса ёросысь Уддядие ми Людмила Кутяноваен татысь Николай Уткин крезьгурчилэн ньыльдон уяз ветлӥм. Мылкыд секыт изэн зӥбиськемын: улонысь туж вазь кошкиз угось Николай. Солэн милям кылъёсмыя кылдытъям кырӟанъёсыз табере кемалы вунонтэм синпельлы кылизы. Н. Уткинлэн алигес гинэ пуктэм выль корказ калык сое буре вайыны люкаськиз. Вӧзам мӧйыгес кышномурт пуксиз но шуиз: - Тон ведь Галина Романова. Тынад таӵе кырӟанэд вань: Вало сьӧрысь сьӧд нюлэскын Малы кикы сокем силе? Кин ке чигем пукет вайзэ, Соин, соин со куректэ... Чебер, небыт куараен сое со быдэссэ кырӟаз. Собере итӥз ӝӧксьӧр калык кырӟанъёсты. Мыным та кышномурт тунсыко потӥз, Сабырлыкеныз бордаз кыскиз. Вераськыны кутским. - Ӝакы апай мон, - капчияк шуз со. - Мукет сямен - Соловьева Ольга Николаевна. - Кытысь бон сомында кырӟанъёсты тодӥськоды - туалаоссэ но, вашкалаоссэ но? - Кин тодэм ини созэ, йырам ваньмыз гожтӥськыса кадь кыле. Монэ Коля Уткинмы улэп компьютер шуэ вал. Огпол дорамы Ольга Мазитоваос доры финнъёс ветлӥзы. Кырӟам-вераммылы синмаськыса, доразы куное ӧтизы. Мынӥмы ведь, тямыс кузя ветлӥмы. Ой, синмаським ке синмаським улэмзылы!.. Ӝакы апай котькудӥзлы капчияк, мылысь-кыдысь вазиське, уд но малпа, со туж трос пӧсьсэ но кезьытсэ чидано-адӟоно луиз шуыса. Война вакытэ дас арескысен куинь аресъем сузэреныз анай-атайтэк кылизы. Сиськыса но сиськытэк, маке-со пӧсьтэм дӥсен-кутэн быдэ вуизы. Нокыӵе колхоз ужлэсь ӧз палэнскылы - бригадирын но, фермаын но тыршиз. Берло аръёссэ почтаын ужаз. Ньыльдон кык арескысен кузпалтэк кылем воргорон доры куать нылпиос вылэ кышнолы мынӥз. Ваньзылы пыд йылазы султыны юрттӥз. Ӝакы апаез соос анайзэс кадь гажало. - Али Петя пиеным ӵош улӥсько, шуэ Ӝакы апай. - Доразы лыктыкум, солы дас ньыль арес вал ини. Умой, туапаса улӥськом, кенэ но туж кельышлы. Мон учкисько та вирсэрлы кышномурт шоры, син шорам пуктӥсько Николай Уткинэз, но тодам лыкто "Малы силе кикы?" кырӟанысьтым берло чуръёс: Ортчоз нунал, ортчоз аред, Йырси вылад пуксёз пужмер. Сюлмад ӧз лу ке кырӟанэд, Юнме ортчоз вань дауред. Галина Романова. Туспуктэмез В. Беломорскихлэн. Со вал Лудорвайын Быдӟым Вормон нуналлы дасяськыкузы, Завьял ёросысь вань гурт библиотекаосын ужасьёс Лудорвае люкаськылӥзы. Отын соос кенешизы шаермес тодон (краеведение) удысын тыршемзы сярысь. Та удысэз библиотекарьёс асьсэлэн туж кулэ уженызы лыдъяло. Юнме ӧз быръе та гуртэз. Солэсь тужгес узыр историзэ лыдэ басьтӥзы. Кылзӥзы Лудорвай школаын кема ужам ветеран-дышетӥсьлэсь А. Е. Евсеевалэсь гуртсы сярысь мадемзэ. Тодмо краевед тыршиз 1928-тӥ арын ортчем "Лудорвай уж" шуыса нимаськись учырлэсь историын интызэ возьматыны, ас сяменыз дунъет сётыны. Лудорвай школаын гуртлэн историезлы сӥзем музей кылдытӥз. Али солы 82 арес ини, тазалыкез лябӟемен, берло аръёсы та ужзэ куштӥз ни вал, кӧня ке аръёс ӵоже школаысь музей "кузётэк" кыльылӥз. Али отын выль кивалтӥсез, оскыны луоз, музейын ужъёс выль кужымен ӧръяськозы шуыса. Школаен огкылысь ужа библиотекалэн кивалтӥсез Татьяна Цигвинцева но. Солэн юрттӥсьёсыз вань школаысь коллективын но, гуртысь мӧйыос пӧлын но. Библиотекае люкаськылыны, кырӟаны-вераны ярато "Ошмес гуръёс" фольклор ансамбле ветлӥсь ветеранъёс. Книгаез калык пӧлы вӧлмытыны но библиотекарь тунсыко амалъёс утча. Библиотекаын туала вакытэ ужан амалъёс сярысь эшъёссылы мадизы Завьялысь шор библиотекалэн директорез Татьяна Тенсина, отысь шаермес тодонъя люкетлэн кивалтӥсез Ольга Красноперова, Национальной библиотекаысь шаермес тодонъя отделлэн кивалтӥсез Надежда Лимонова. Тунсыко ужъёссы, Завьял черкогуртлэсь историзэ пыр-поч тодыны но калыклы валэктыны тыршемзы сярысь вераськиз библиотекаын кема ужам мурт Э льза Алексеевна Галичанина. Собере ёросысь библиотекарьёс мынӥзы Ильинка гурт интые, инбам улысь музее, отын та музейлэсь туэ ужан сезонзэ усьтӥзы. Экскурсиез нуиз Удмурт Элькунысь сӥё-дано ужась Серафима Лебедева. Л. Федоров. Михаил ШАКЛЕИНЭЗ буре вайыса Ныпъетэз секыт вал Дас ар но ӧз ортчы на Михаил Шаклеин сярысь нырысьсэ гожтэме дырысен. Сямызъя укыр сэзь вал бере, веранме йыръяй тазьы: "71 аресъем пияш". Ма, выросъёсызъя зэмен ик ерпечка выллем потылӥз. Вылаз ик, ог 90 аресъем мамиез чупрес вал на. Озьы ке но, со трос азьлозэ но адӟемын. Михаил Гаврилович Шаклеин тодылӥз на колхоз кылдытэмез, кулакъёслэсь гуртын сьӧсьяськемзэс, большевикъёслэсь городын эрказъяськемзэс. Солэн син азяз уськытэмын Ижысь Александр Невский собор йылысь кирос. Ижысь суреданъя училище бере, 1939-тӥ�1941-тӥ аръёсы со художникын ужаз "Дась лу!" газетын но Удмурт книга издательствоын. Войнаын огпол гинэ кулонэн ваче син ӧз султылы. Огласянь, сое шымыръязы немецъёс, мукет ласянь лэчыт кылыз понна - особистъёс (особнякъёс шуылӥз ачиз). Но артиллерист улэп кылиз, орденъёсын но медальёсын бертӥз. Бертӥз оло ӧз - Москвае "кугӟаз". Ужаз Мосгософормлениын, Россиысь худфондлэн комбинатаз, ВДНХ-ысь павильонъёсын. Кутэмын вал Суредасьёслэн калык куспо (международной) союзазы. Трос аръёс ӵоже Михаил Гаврилович шоказ на ожмаськон омырен. Суредаз фронтэ ветлэм дано бӧлякъёсмес Федор Фалалеевез, Филипп Кедровез, Тамара Тепляшинаез, Аркадий Завойскихез но мукетъёссэ. Юнме шорысь шат СССР-ысь омырез утись (ПВО) войскоослэн музейзы 1981-тӥ арын радъяз солэсь возьматонзэ (выставказэ). Юнме шорысь шат Шаклеинлэн данак суредъёсыз утисько Удмурт музейын. Берло аръёсы Михаил Гаврилович ужаз удмурт калыклэн тужгес визьмо нылъёсызлы но пиосызлы сӥзем уж бордын. Жанрзэ вераны уг валаськы. Нош эскизъёсызъя мон сое кыӵе ке эпопея нимасал. Короленко, Герд но мукет дано адямиос отын. - Вормоды на-а сыӵе секыт ныпъетэз? - юай огпол. "71 аресъем пияш" пальпотӥз: - Мон ичизэ кызь ар уло на. Нош мемие шокалоз сю ар. 90 сьӧры потэм мемиез пыдзэ шуккиз. Больницае чик пырамтэ муртэ врачъёс катьяны ӧз быгатэ. Пиез кулӥз та нуналъёсы. Тямыстоназ вуыса. Ӟеч кӧл, Михаил Гаврилович. Алексей ШКЛЯЕВ. Усьтӥсько милицилэн нуналъёсыз Туннэ усьтӥсько "Правопорядок-2000" нимын Удмуртиысь милицилэн нуналъёсыз. Солы сӥзьыса, Пичи Пурга ёросэ люкаськылӥз УР-ысь МВД-лэн коллегиез. Ужрадэ пыриськизы Удмуртиысь кун пуш ужъёсъя министр милициысь генерал-лейтенант Владимир Щербаков. МВД-ысь службаослэн но уравлениослэн кивалтӥсьёссы, Пичи Пурга ёросысь гурт администрациослэн но мукет кивалтэт ёзъёслэн кузёооссы. Эскеремын-чакламын милициысь туала кадръёслэсь тодон-валанзэс, быгатонлыксэс будэтон ужпумъёс. МВД-ысь Кадръёсъя управление РОВД-ысь кивалтӥсьёслы солы дасяськон ужрадъёсты радъянэн но юрттӥз. Милициын ужасьёслэсь сямзэс эскеронъя тест ортчытэмын, ужась коллективлэсь сюлэмшугъяськонъёссэ но шумпотонъёссэ шараямын. Кунпуш ужъёсъя министр Владимир Щербаков, РОВД-ысь сотрудникъёслэн ужаменызы ӟечгес тодматскон вылысь, Пичи Пурга калыкен телефон пыр меӵак вераськиз. Жингыртӥсьёс пӧлысь тросэз тау карыса вераськизы районысь участковойёслы, уголовной розыскын но паспортно-визовой службаосын ужасьёслы. Та мылкыдъёсты лыдэ басьтыса, министр куд-ог сотрудникъёсты кузьымен пусъён сярысь приказ дасяз. Нош шараяськем тырмымтэослэсь палэнскемзэс эскеронэз-чакланэз ас ки улаз басьтӥз. Уж ужен, нош шутэтскон шутэтсконэн. Пичи Пурга РОВД-ын но МВД-ын ужасьёс кужымзэс мертазы спортын. Пумиськонъёс ӟырдыт ортчизы. Волейболэн шудонын куноос шӧртчиесьгес луизы, 2:0 счётэн соос азьпала потӥзы. Футболын вормисьёс ӧй вал, счёт 1:1 луиз. Ӝытазе пичи пурга музъем вылын улӥсьёсты шулдыртӥзы УР-ысь МВД-лэн Культурая центраз ветлӥсь творческой коллективъёс. Дасямын вал концерт. С.КЛИМОВ. АЗЬМЫНӤСЬ ХОЗЯЙСТВО ЧИПЫ НО КУРЕГ ЛУОЗ АЙ Сыӵе валтӥсь ужпум огазея Уваысь тылобурдо вордӥсьёсты. Уваысь тылобурдо вордон хозяйстволэн азбараз нуналлы быдэ палэнысь вуэм машинаос сыло, совхозлэн валтӥсь зоотехникез Татьяна Васильевна Маркова валэктӥз: - Кык ар талэсь азьло предприятимылэсь ужамзэ дугдытыны медо ни вал. Но выль директормы тыршемен, поставщикъёсмы но, басьяськисьёсмы но выльысь ми доры берытскизы. Чипыосмес туж умой басьто Татарстанысь но Киров улосысь быдэн куинь хозяйствоос. Бигеръёс меӵак куро: "Вае милемлы удмурт чипыосты!" Маин бен висъяське "Увинский" тылобурдо вордон совхозлэн продукциез Удмуртиысь та выллем хозяйствоосын поттэм курег пуз, чипы но курег сӥль сярысь? Одӥг кылын вераса, ӟечлыкеныз. Продукцилэн ӟечлыкез нырысь ик потэ усто курег выжы уськытон бордысь. Татын синмаськиллям "Родонит" выжылы. Та выжы туэ Россиын уката но паськыт вӧлмемын, мукет курег выжыос пӧлын со вӧлмемезъя 45 процент басьтэ. - "Родонит" выжыысь курегъёс туж пузасесь, - шуэ Татьяна Васильевна. - Одӥг куреглэсь ар ӵоже 300 пала курег пуз басьтыны луэ. Кылем арын сомында ик курег пуз басьтӥм, туэ но озьыгес ик луоз. Куреглэн сӥльыз но урод ӧвӧл, кӧё, ческыт. Секталаезъя курег 1,5 килограмм кыске. Ӵем дыръя пудо вордон удысын таӵе учыръёс пумиськыло, шуом, тросэз хозяйствоос одӥг выллем парсь, скал, курег вордон борды басьтӥсько. Нош пайдаез пӧртэм луэ. Озьыен, продукцилэн ӟечлыкез усто выжы уськытонэн гинэ герӟаськемын ӧвӧл, со понна эшшо мар ке но кулэ на. - Пудоез ӟеч сюдоно, - шуэ зоотехник. - Мукет пудо вордон хозяйствоосысь ми доры вуыло ке, паймыса кошко. Кызьы, пе, тӥ сиёнэ нокыӵе ватсэтъёс тырытэк, сыӵе чипы будэтӥськоды. Зэмзэ но, татын концентратъёс басьтыса уг уло, "Рябушка" шуонъёсын уг выро, курегъёссылы сиён асьсэос дасяло. Сюдо музъем вылын будӥсь сиёнъёсын: ю тысен, кӧс вӧйын, пушнерен но мукет турынъёслэсь изэм пызен, кеньырен. Пушнер сярысь ке верано, калык солэсь пайдазэ кемалась тодэ ни. Пушнер асьме палан огез дунтэм сиён луэ, отын туж трос витаминъёсыз, соин ик со сиськыны мылкыдэз ӝутэ. Чипыосты умой сюдон сярысь сюлмаськыса, совхозлэн директорез Мария Ивановна Кунгурова таӵе вамыш лэсьтӥз: бырон калэ вуэм пичи Чемошур гуртысь колхозэз совхоз борды кариз. Отын улӥсь калыклы но, тылобурдо вордӥсьёслы но умой луиз. Чемошурын скал, парсь вордо. Табере совхозын 300 пала ужасьёсты дунтэмгес сюдыны луонлык усьтӥськиз, нош курегъёсты ялан обратэн сектало. Тӥни озьы "Увинский" племптицесовхозын, кызьы шуо ӟучъёс, экология ласянь чылкыт продукция потто, нокыӵе нитратъёсыз отын ӧвӧл. Коллективлэн таӵе азинсконъёсыз ӧй луысалзы, дыр, ӟеч кивалтӥсьтэк. Совхозлэн туала директорез Мария Ивановна Кунгурова талэсь азьвыл "Нива" колхозэн кивалтэмын. Кык ар талэсь азьло сое татчы ужаны пуктӥзы. Кык ар - со туж вакчи дыр, уката ик куашкатэм производствоез ӝутон понна. Но выль кузё быгатӥз, соин но со сярысь татын туж гажаса верало. Коллективлэсь ужамзэ таӵе лыдпусъёс возьмато: Россиысь тылобурдо вордон хозяйствоос пӧлын "Увинский" совхоз 3-тӥ-4-тӥ интыын возиське, кылсярысь, курег пуз поттонъя, чипыослэсь лыдзэс будэтонъя. Кылем арын татын 75 сюрс чипы будэтыны быгатӥзы. Татчы ужаны выжемез бере ик Мария Ивановна коллектив азе таӵе валтӥсь курон пуктэм: вань кужыммес таза чипы будэтонлы сётоно. Угось сотэк таза курег но уд будэты, ӟеч курег пуз но уд басьты. Кызьы адӟиськом, ваньмыз ог-огеныз герӟаськемын. Выль директор быдэс коллективез одӥг бадӟым уже кыскиз. Мар пӧрмиз озьы ужам бордысь, вера татысь специалист Любина Людмила Семеновна, инкубатор цехлэн кивалтӥсез: - Директормы быгатӥз выль инкубатор басьтыны. Азьло аръёсы ужам "Универсал-55" инкубаторен. Со туала вакытлы уггес ни тупа. Отчы одӥг партиен быдэн 6-12 сюрс гинэ курег пуз тырыны луэ. Озьы ке но, сыӵе инкубаторен ужало на Глазовысь, Ижысь тылобурдо вордӥсьёс. Милем удалтӥзгес. Выль "ИУП-Ф 45" инкубаторе одӥг кутскемен быдэн 27 сюрс курег пуз тыриськом. Мартысен кутскыса инкубатормы дугдылытэк ужа. Бригадаын 7 нылкышно ужа. Котькуд курег пузэз соос шкафъёсы киын тыро. Вераны кулэ, таяз арын инкуабторын ужасьёс, выль технологиез уже кутыса, вакчи дыр куспын туж трос чипы поттыны быгатӥзы. Асьсэ улӥсьёссылы гинэ тулыс ӵоже 100 сюрс пала чипы вузазы. Зайцева Ираида Николаевналы кивалтыны оскемын мукетыныз бригадаен, егит чипы будэтӥсьёсын. - Уж ке мынэ, ӟечгес ужам потэ, - шуэ бригадир. - Бригадаын 3 слесарь но 9 тылобурдо утись. Одӥг суткаем чипыез 120 нуналозь будэтӥськом, собере соосты курегъёс пӧлы поттӥськом. Али гинэ вордӥськем "ӵуж бугоръёсты" нырысь нуналъёсаз уин но эскероно луылэ. 20 нуналзэ соосты киын сюдӥськом. Тӥни озьы чипыос будэмзыя одӥг киысь мукет кие выжо. Соин ик татын туж ӟеч валало, продукцилэн ӟечлыкез адями кусыпъёс бордысь но потэ шуыса. Коллективлэсь мылкыдзэ ӝутӥсь, адями кусыпъёсты радъясь татын ачиз директор. Со ик шулдыр ӝытъёслы кичӧлтӥсь но усто тыршисьёсты премиосын пусйылӥсь луэ. Тылобурдо вордонын тросгес кышномуртъёс ужало. Сое валаськод кабинетъёсты ортчыса но - котькыны сяськаос будо. Валтӥсь зоотехниклэн кабинетаз паймымонэсь кактусъёс будо, нош актовой залзы сяськаос пушкы выемын. Татьяна Васильевна Марковалэн верамезъя гужем фабрикалэсь гид азбарзэ быдэсак сяськаос шобырто. Озьы сяськаоа будэтыса но татын адямилэсь мылкыдзэ ӝутыны выро. Мылкыдзэ гинэ-а бен? Оло, куд-ог валанъёслэсь пуштроссэ но соос вошто. Кыӵе ке гид сярысь вераськон мыныку, асьмеос син азямы ум-а пуктӥське меда кыедэз, нӧдэз. Нош татын сое уд адӟы. Тӥни сыӵе чылкыт интыын поттэм курег пузъёс, ненег нылкышно киосын сюдэм-утялтэм чипыос басьяськисьёс доры вуо. Т.БАННИКОВА. Тани со "Родонит" выжысь курег. Чеберлык вӧзтӥ... адӟытэк Вашкала Сарапул городын 19-тӥ дауре ик вӧё буёлэн суредась усто художникъёссы вылэм ни. Соос пӧлысь огез - Африкан Беркутов. Тодмо ужъёсыз пӧлын - "Курбатовлэн вукоез", "Обинь", "Пиелэн тусбуез", "Ангел", "Выльысь улӟон", "Благовещение". Ваньмыз соос лэсьтэмын 1880-тӥ-1890-тӥ аръёсы. Беркутов черкез чеберъян бордын но тыршиз, кылсярысь, Мазуниноысь черкез, святойёсты суредалляз. Тае адӟыны быгатӥзы туэ март толэзе, кин пыраз республикаысьтымы изобразительной искусствоосъя музее. Буёлъёс дыр ортчемен кӧня ке ломдылэмын-пилиськылэмын ке но ини, умой адӟиськиз, ма бордын ужаллям ог 100-150 ар талэсь азьвыл суредасьёс, кызьы адӟиллям дуннеез но пуктыны быгатӥллям холст вылэ. Сыӵе ик вуж дуннелэн шокамез шӧдӥське А.И.Огородовлэн, О.В.Орловалэн, А.А.Першаковлэн, В.В.Пузаковлэн, П.А.Сведомскийлэн но мукетъёсызлэн ужъёсазы. Нош выль дуннелэн, туала улонлэн буёлъёсыз воректо, кыкетӥ этаже тубиськод ке. Татын, куинь люкето бадӟым залын, туала суредасьёсмылэн кибревылзы. - Тау пыремдылы. Туннэ нокин ӧз возьматъяськылы на вал. Толон кык-куинь мурт вуылӥз ик, - лулскыса пумитазы суредъёсыз утисьёс ( смотрительёс). Талы паймод, оло, уд - малы ке шуоно, туала адями нырысь ик магазинэ, базаре мынэ: кӧтсэ маин ке "кышъяно". Собере, оло, татчы дыртонэз ӧвӧл: таиз выставка сӥзьылозь луоз ай. Иське, "синсьӧр" (заочно) гинэ ортчом татӥ, вакчияк тодматскон вылысь. Тодмо нимъёс, тодмо суредасьёс, асьмелэнъёсыз. С.Виноградовлэн "Кибашлы пересез", А.Ложкинлэн - "Удмуртиысь колхозницаез", С.Орловлэн "Выль арез", П.Ёлкинэн М.Гариповлэн "Витя-пастушоксы", П.Медведевлэн "Гуртысь пияшъёс" пу скульптураез. Ваньмаз пыӵамын ас шаердэ, калыктэ гажан. Таиз но сыӵе ик - "Шуныт пумиськон", Вячеслав Михайловлэн ужез. Автор - ачиз кадь ик "шундыяськем" эшъёсыныз - Менсадык Гариповен но Владимир Владыкинэн. Отӥяз - Ткачев агай-вынъёслэн "Зарни сӥзьылзы", И.Бехтеревлэн "Нырысетӥ лымыез", Ф.Матанцевлэн "Бусы сяськаосыз", В.Кононовлэн "Натюрмортэз"... А.Олин Надежда Дуровалэсь пинал но мӧйы тусбуйзэ одӥг суредаз ик адӟытэ. Нош ик - В.Гарипов, С.Виноградов, В.Михайлов. Суредъёссы - чылкак удмурт шӧмо: "Тулыс" (курег пузэз шунды шорын учкись ныл), "Гырон быдтон", "Пельнянь кутӥсьёс", "Синучкон азьын", "Пинал дыр крезьгур". Потӥськом коридоре. Татын ини - графика. В.Любарец, В.Окунь, В.Веретенников, М.Гарипов, И.Нурмухаметов, Е.Русанов, И.Безносов... Музейлэн фондысьтыз кӧняез ке гинэ ужъёс та. Соосыз уг вырӟыты нокыӵе омыр. Чалмыт. Одӥг-ог гинэ учкись адямилэн шуныт шокчемез вуэ отчы. Нош Киров ураметӥ жингыр-куангыр ортчыло трамвайёс. Адямиос весь кытчы ке дырто. Чеберлыкез адӟытэк, со сярысь тодытэк. Т.ПЕТРОВА. БАЛЕЗИНОЫСЬ ИВОРЪЁС Чупчи кузя чузъяськозы на гуръёс Кылем арын Балезино паськыт пусйиз 70 ар тырмонзэ. Таӵе шулдыръяськон татын кемалась ӧй вал ни. Соин балезиноос районзылэсь нуналзэ арлы быдэ пусйыны кенешизы. Дырзэ но тупатӥзы - котькуд июньлэн нырысетӥ шутэтскон нуналъёсаз. Туэ со 10-тӥ июне тупа. 71 ар тырмон борды эшшо кык лыдпусъёсты итӥзы на: Россилэсь эриксэ утён нуналэз но районын арлы быдэ спортъя пичи олимпиадаез. Иське, шулдыръяськонлэн мугез вань. Дасямын тунсыко программа. Районысь котькуд хозяйство татчы ас кузьымъёсыныз, быгатонлыкъёсыныз лыктоз. Пиналъёслы пӧртэм аттракционъёс ужалозы. Нош шунды пуксён азьын балезино калык Чупчи шур дуре люкаськоз - ческыт пӧрам ӝук веръяны. Л.ЛЮБИМОВА. Бурдо ӟечыранъёс лобо, лобо... Тани нош ик вуиз гужемед. Соин валче сюлмаськыто пиналъёсмылэн каникулъёссэс кызьы ортчытонзы. Балезино ёрос администрацилэн тӧроез нылпи площадкаосты выльдыны- тупатъяны курон постановление поттӥз. 15-тӥ июнёзь пичиосты шумпоттозы ни выль ӟечыранъёс, луоен шудон интыос но мукет. Районысь котькуд организация, гуртъёсысь администрация пыриськозы та ужрадэ. Куронэз соос ас кужыменызы быдэстоно луозы - бюджетын коньдон уг тырмы. Но нылпиос пӧнна ма но уд лэсьты! Л.ЛЮБИМОВА. Синмаськи... немецъёслы Кин вал та нуналэ Ижысь "Аксион" культура юртын, кыдёкысь немец шаере вуылэм кадь луиз, дыр. Татын ортчиз немец культурая ньылетӥез фестиваль. Двореце пырон азьын ик куноосты немец кылын ӟечкыласа пумитало немец дӥсен пӧрмытскем егит пиос. Котыр чузъяське немец гур, та кылын вераськем куараос. Нош зал тыр люкаськем калык - ваньмыз немец дӥсен. Вожъяськымон чебер адӟисько соос: кечато басмалэсь юбкаосын, чильтэро тӧдь-тӧдь айшетъёсын, кильтро изьыосын... Шаерамы улӥсь сизьымдон пӧртэм нациен калык пӧлын кык но ӝыны сюрслэсь ятырез - немец выжыысь. Асьсэлэсь кылзэс, культуразэс, йылолъёссэс утён вылысь, соос Ижын ньыль ар талэсь азьло кылдытӥзы огазеяськонзэс. Со арысь аре юнма, котыраз эшшо но трос люка выжы калыксэ. Тани таяз фестивале но люкаськизы Ижын, Сарапулын, Воткинскын, Можгалан, Глазовын, Играын, Уваын улӥсь немецъёс. Фестивале лыктэмъёсты ӟечкыласа но ӟеч мылкыд сӥзьыса вераськизы Кун Кенешлэн Тӧроезлэн нырысетӥ воштӥсез Павел Вершинин, нациосын ужан политикая министрлэн воштӥсез Светлана Смирнова, Россиысь немецъёслэн республикаысьтымы центрзылэн кивалтӥсез Нина Ромащенко-Альгайер, Германилэн Москваысь представительствояз ужась Даниэль Зайберлинг но мукет куноос. Собере кутскиз бадӟым концерт. Вань ёросъёс солы мылысь-кыдысь дасяськиллям. Мӧйыез но, егитэз но, покчиез но чик могатэк, шалтыр гинэ кырӟало-верало немец кылын, капчиен поръяло эктон гуръя. Нош Ижысь немецъёслэн огазеяськонзы возьматӥз немец сюанэз. Туж шулдыр, чебер соослэн та йылолзы. Жаль, мон одӥг кылзэ но ӧй вала отысь. Вӧзам пукись нылаш валэктӥз ини куд-ог интыоссэ. Аспӧртэм номер дасяллям можгаос но. Соос возьматӥзы "Колобок" ӟуч калык выжыкылэз. Тумошо ик кылӥське гондырлэн, ӟичылэн, мукет пӧйшуръёслэн немец кылын "вераськемзы". Зал юн кичабонъёсын пумитаз вить аресъем кыктоосты - Наташа но Марина Тройниковаосты. Макем мусо кылӥське соослэн немец но англи кылын кырӟамзы. Кыкназы ик та покчиос ветло воскресной школае. "Туж кельше милемлы отын, - шуо соос. - Немец кылэз капчиен дышетӥськом, трос кырӟанъёс, кылбуръёс тодӥськом". Немец выжыысь сяна, фестивале лыктӥллям та калыклэсь кылзэ, культуразэ гажасьёс но. Тани Мария Миронова Удмурт кун университетын нырысетӥ арзэ дышетэ немец кылэз. "Пичиысен ик тунсыкъяськисько ини соин, - шуэ со, - малы ке со мыным туж матын потэ. Шумпотыса ветлӥсько немецъёслэн огазеяськоназы. Отын вань эктонъя но кырӟанъя группаос. Туннэ ми но возьматом асьмелэсь быгатэммес". Глазовысь куноослэн сцена вылэ потамзы бере ӧй чида соосын вераськытэк. Уго тросэз соос пӧлын - мӧйыос. Кызьы меда соос та дырозь вунэтӥллямтэ на вордскем кылзэс? Тамара Адольфовна Карачарова-Беккер вордӥськемын Поволжьеын, мумы-бубыосыз немецъёс. Война вакытэ улӥллям Тюмень областьын. Нош 1956-тӥ арын нылаш ӵыжы- выжыосыз доры Глазове лыктэм. Дышетскыны пырем совхоз-техникуме. Татын ик пумитам вуоно кузпалзэ, вордскиллям нылзы, пизы. Ужам техник-строитель луыса. 62 аресэз шоры учкытэк, со, ылысь-кыдысь пыриське ай пӧртэм ужрадъёсы. - Туж но туж шумпотӥськом городамы выжы калыкмылэсь огазеяськонзэ кылдытэмлы. Ас вордскем кылмес но вунэтыны кутским вал ини. Валаны валаськом ик, нош вераськыны шуггес. Соин ик ми понна нимысьтыз курсъёс усьтӥзы. Лӧптэм мылкыдын отчы ветлӥськом. Немец кылын вераськизы ук анай-атайёсмы. Милемыз но ас сямъёссыя-йылолъёссыя будэтӥзы-вордӥзы. Нокызьы но соосты вунэтыны уг яра. Туннэ та фестивальын кӧня кырӟанъёсты, йылолъёсты адӟим. Быдэс улонмы син азямы пуксиз, кӧня тодэ ваёнъёс сюлэмез бугыртӥзы. Нош Германие улыны кошкон мылкыдзы пумысен тани ма шуиз немец кыллы дышетӥсьсы Оскар Федорович Кельм: - Мынам быдэс улонэ ортчиз ӟуч музъем вылын. Кытын гинэ ми ӧм улэ, берло аръёссэ - Пермь областьын. Ньыльдон ар ӵоже нылпиосты немец кыллы дышетӥ. Нош кык ар талэсь азьло кузпалэным лыктӥм Глазове, пиосмы доры улыны. Ӵем вуылӥськом Германиысь ӵыжы- выжыосмы доры. Но отчы улыны кошкон мылкыдмы чик ӧвӧл. Милям сюлэмъёсмы ӟуч музъем, ӟуч калык борды бурмемын. Россия - милям Родинамы, татын ми вордским, будӥм. Милям улэммы ик уз луы ни ӟырт кезьыт толъёстэк, кырсь, пеймыт урамъёстэк, шулдыръяськыны яратӥсь адямиостэк, ӟуч калык сямъёстэк... Но со дыре ик ми - немецъёс. Со милям луламы, вирамы. Куспамы но ми немец кылын гинэ вераськиськом. Кырӟанъёсты, гуръёсты кылзыку, сюлэм ик позырске. Озьыен, ми - удмурт музъем вылысь ӟуч немецъёс. Макем шумпотоно: пичи гинэ шаерамы эшъяськыса уло уно пӧртэм нациен калыкъёс. Утё, калык пӧлы вӧлмыто асьсэлэсь сямъёссэс, пыӵато ог-огдэ гажаса, валче, одӥг семья кадь улон мылкыд. Жаляса верано луэ, та ужрадэ туж ӧжыт пыриськизы мукет нациен калыкъёс. Тае азьланяз одно ик лыдэ басьтоно. Ог-огмылэсь историмес, сямъёсмес, йылолъёсмес тодон юрттоз огъя культурамес эшшо но узырмытыны. Е.КАМАШЕВА. бигеръёс потто самолёт но Казантьысь авиацияя огазеяськонын лэсьтэм Ту-214 кык самолёт Хабаровскысь "Дальавиа" предприятилы сётэмын луоз, ивортэ "Время и Деньги" газет. Газет верамъя, та самолёт омыре нырысьсэ ӝутскиз 1996-тӥ арын февраль толэзе. Со Ту-204 самолётлэн выльдэм вариантэз луэ. Таизэ поттэ Ульяновскысь "Авиастар" огазеяськон. Казаньысь специалистъёс малпамъя, выль машина техника ласянь тодметъёсызъя чик но бере уг кыльы Боеинг-767 но 777 самолётъёслэсь. Сое басьтыны чаклало Россиысь авиакомпаниос ("Аэрофлот", "Трансаэро") но Азиысь кунъёс (Иран, Китай, Пакистан). Та пумысен Татарстанлэн кивалтӥсьёсыз кенешонъёс нуэ ни. Ту-214 кык лайнер лэсьтыны 32 миллион доллар кулэ луоз (двигательёслэсь дунзэс лыдэ басьтытэк). Самолётъёсы Пермьын лэсьтэм моторъёс инъяны чаклало. Коньдон тырмыт луиз ке, нырысетӥ самолёт куать толэзь ортчыса дась луоз ни, кыкетӥез - тямыс толэзь ортчыса. Ваньмыз рос-прос радъяськиз ке, огазеяськон араз кызь ньыль пала авиалайнеръёс поттыны быгатоз. Басьтэмын Интернетысь. Школае - пумиськонэ Шаркан ёросысь Вортча починка гуртысь (Малый Казес) школалы тырме 50 ар. Школалэсь ӝыны дауръем юбилейзэ пусйыны чакламын 10-тӥ июне 12 часын. Кин дышетскиз та школаын яке куке но дышетӥз, ваньдэс возьмало пумиськонэ. Пайдаё пумиськон Валлян Москваын Кун Думалэн депутатэз Светлана Смирнова пумиськиз химической ож тӥрлыкез быдтонъя нимысьтыз федеральной программалэн кивалтӥсеныз генерал- лейтенантэн Валерий Копашинэн. Соос рос-прос вераськизы асьме республикаын утиськись кышкыт оружиез быдтон пумысен. Эскеремын Кизнер ёросысь Бемыж черкогуртын эмъяськон юрт лэсьтонэз йылаз-пумаз вуттонэн но Камбарка городэ газопровод кысконэз ӝогомытонэн герӟаськем ужпумъёс. Пумиськем эшъёс кенешизы туэ июльлэн кутсконаз уртче вуылыны Удмуртие но татын пыр-поч тодматскыны ож тӥрлыкез быдтон котырын кылдэм югдурен. Пумиськонэ пыриськиз Кун Кенешлэн депутатэз Анатолий Марченко. И. Лебедев. Ожмаськыны юрттэ му вӧй Ингушетилэн уй пал люкетэз "сьӧлтамын" му вӧез уже кутонъя лушкем ужась заводъёсын, кудъёсыз юртто чечен боевикъёслы, шуиз Россия Федерациысь Экология удысын утиськонъя управленилэн кивалтӥсез генерал-майор Борис Алексеев. Солэн верамезъя, ӵапак таӵе заводъёс - террористъёслэн капчиен узырмон удыссы. Одӥг гинэ скважина уй-нунал куспын 200 тонна му вӧй сётэ. Сыӵе лушкем ужась заводъёсты капчиен синйылтыны луэ. Но соосты быдтыны кулэ Ингушетиысь югдурез утён удысын ужасьёс. Та пумысен Ингушетилэн президентэз Руслан Аушев малпанзэ ӧз вера на. Басьтэмын Интернетысь. Секыт-а "секыт" му вӧй? Удмуртиын му вӧй поттон кутскиз но паськыт вамышъёсын азьлань мынӥз Валентин Иванович Кудинов кивалтэм улсын. Б.М.Сучковен, Ю.В.Желтовен но Г.Е.Малофеевен ӵош со гожтӥз куать монография. Та монографиосыз калык азе поттон-презентация 26-тӥ мае ортчиз шаерысьтымы национальной библиотекаын. Россиысь мукет регионъёсын ӵошатыса, Удмуртиын му вӧй поттон секытэнгес сётӥське. Вань запасъёс пӧлысь ог 70 процентэз со кылле музъемлэн пыдлось сӥосаз, химической составезъя но трослы висъяське. - Таӵе "секыт" нефтез, - шуиз В.И.Кудинов, - быдэс дуннея но басьтоно ке, поттыны кылдэ 25-27 процентсэ гинэ. Та технология туж дуно усе. Соин ик али ог дас миллиардэз "сьӧд зарни" кылле на месторождениосын. Нош быдэс музъем пушкамы... тодӥськоды-а, кӧня та узырлык? 40 миллиард тонна пала. Быдэс зарезь. Паймыто таӵе лыдпусъёс. Но матэгес кариськыса учкоме. Акциосын "Удмуртнефть огазеяськон, выль технологиосыз уже кутэменыз, ватсаса поттӥз 8 миллион тонна му вӧй, озьы со 2 миллиард манетлы пайда ваиз. Дуннеын 25-27 процентэз "секыт" му вӧй поттӥське шуимы ке, "Удмуртнефть" огазеяськонын та лыдпус 40-45 процентозь вуэ. Музъем валлин портон технологиез уже кутыса, куинь пол-дас пол ятыргес му вӧй кыскыны луэ. Таӵе технологиос - нефть поттон удыслэн туж бадӟым азинсконэз. Россилэн му вӧез тырме аслыз но, кунгож сьӧры келяны но. Солэсь куинь арлы кулэяськонзэ ас кожазы быдэстыны быгато тужгес бадӟымъёсыз выль усьтэм месторожениос. Соос пӧлын бадӟым инты басьто асьмелэнъёсыз. Али Удмуртиын 26 буровой бригада тырше. Тужгес выль технологиосъя кыскизы одӥг миллион сю сюрс тонналэсь уно му вӧй. - Туннэ "Удмуртнефть" огазеяськонэз ӵошатыны луэ та удысысь тужгес бадӟым предприятиосын, - шуиз Кун Кенешлэн Тӧроезлэн нырысетӥ воштӥсез Павел Вершинин. - Быдэс дуннеысь учёнойёс али лыкто ни асьме доры выленыз тодматскыны. Удмурт кун университетын кӧня ке ар талэсь азьвыл усьтэмын нефтяной факультет. 50-лэсь уно егит специалистъёс-выпускникъёс табере ужало "Удмуртнефтьын". Ваньмаз та нефть поттон сӧзнэтын "генератор" луэ академик, технической наукаосъя доктор, профессор Валентин Кудинов. Солэн кивалтэмез улсын "секыт" нефтез кысконын выль, вылӥ пайда сётӥсь технологиос кылдытэмзы но промышленносте пыӵатэмзы понна кӧня ке авторъёслы сётэмын Россия Федерацилэн наука но техника удысысь кун премиез. Евгений Богомольныйлэн, Владимир Шмелевлэн, Юрий Желтовлэн, Валентин Колбиковлэн, Борис Сучковлэн, Николай Зубовлэн но Михаил Дациклэн сыӵе вылӥ награда басьтэмзы вера удмурт нефтяникъёслэн наука но производство удысын бадӟымесь вормонъёссы сярысь. Му вӧй поттон удысын уно аръем эскеронъёс, утчаськонъёс адӟиськизы библиотекаысь выставкаын. Монографиосын артэ татысь адӟыны луиз патентъёсыз, авторъёслэсь свидетельствооссэс. Презентацие пыриськизы, вылӥ верам адямиос сяна, Кун Кенешысь Наукая, дышетонъя, культурая но егитъёсын ужанъя комиссилэн кивалтӥсез А.Г.Красильников, Правительствоысь Наукая, вылӥ но средней профессиональной образованиея комитетлэн кивалтӥсез С.М.Решетников, эстӥськонъя, энергетикая но связья министр В.А.Савельев, мукетъёсыз. В.И.Кудиновлы сётӥзы Россиысь инженерной академилэсь медальзэ. Т.ПЕТРОВА. Тужгес кужмоез но йӧноез Эгра (Игра) ёросысь Сундур гуртысь "Ӟардон" фольклор ансамбльлэн ортчем сюресэз туж тунсыко но адӟем карымон. Сундурын азьвыл аръёсы ӟеч культура юрт ӧй вал. Клуб нергеын егитъёс кинофильмъёс учкылӥзы, арган шудэмъя шулдыръяськылӥзы. Егит калык ик дасялляз пӧртэм спектакльёс но соосты сьӧрлось гуртъёсын шудылӥз. Но сундуръёслы кулэ вал выль клуб. Малпанзы быдэсмиз 1975-тӥ арын - соку гуртын бадӟым, югыт но чебер культура юрт ӝутскиз. Татчы кивалтӥсе лыктӥз соку ай егит нылмурт Нина Леонидовна Ившина. Выль интые вуэм муртлы мыло-кыдо юрттылӥзы гуртоос. Тужгес но пусйымон Ольга Макаровна Кожевникова. Выль клуб усьтӥськем бере ик та кышномурт татчы ужаны лыктӥз. Огинэ люкаськылыкузы, вашкала кырӟанъёсты но эктонъёсты быдэсъян сярысь мылкыдзэ усьтӥз. Кутскон сётӥз "Ӝыт пуконъёс" сузьет. Адямиос кыстӥськизы выль коллективе. Вашкала дӥськут люкан борды басьтӥськизы. Сундурысь арлыдоос шыкысъёсазы вунэтэм дэремъёссэс, айшетъёссэс поттылӥзы. Ансамбльлы ним сётон сярысь ужпум ӝутскиз. Ӵук ӟардонэн ӵош уж дуразы вамышъясь адямиос асьсэлы "Ӟардон" ним басьтӥзы. Пӧртэм аръёсы пӧртэм адямиос ветлӥзы ни "Ӟардонэ". Тужгес но мыло-кыдоосыз луо О.М.Кожевникова, Т.И.Чиркова но А.С.Поздеева. Та нылкышноос вань пӧсь сюлэмзэс, задор мылкыдзэс сётӥзы ансамбльлы, трос ӟеч сямъёсты но чебер кырӟанъёсты выльысь улӟытӥзы но соосты учкисьёслы кузьмазы. Кузь улон сюресэз ортчемын соос. Жаляса верано луэ: Александра Сидоровна Поздеева улонысь кошкиз ини. Нош Ольга Макаровна но Татьяна Ильинична Чиркова вить арзэ ини уг ветло коллективе: угось арлыдъёс чик жалятэк люкасько но люкасько. Но та кык шаплы песянайёс ансамблен кусыпъёссэс уг ышто. "Ӟардонлэсь" гуртын ортчылӥсь концертъёссэ котьку мылысь-кыдысь учкыло, ӟеч визь-кенеш сётъяло. "Ӟардонэ" ветлылӥзы семьяосын но. Кылсярысь, М.Е.Емельянова репетициосы Лена но Галя нылъёсыныз ӵош вуылӥз. Озьы ик кырӟан-веран уже семьяеныз ӵош пыриськылӥз Г.Р.Русских. Таӵеесь ик Н.Г.Касаткина, М.И.Белых, Н.В.Лекомцева, С.Н.Данилова, Л.А.Корепанова, Э.В.Клементьева, И.В.Ившин... Ма, ваньзэ вераса быдтод шат? Ортчем дыр ӵоже коллектив трос калык сямъёсты-йылолъёсты сцена вылэ вуттӥз ини. Соос пӧлын - сюан, армие келян, турнан дыр, шулдыр ӝыт но мукетъёсыз. Та бадӟым уж - кырӟанъёсты, йылолъёсты люкан но соосты сцена вылэ поттон - Сундурысь культура юртлэн кивалтӥсез Н.Л.Ившина вылын. Нош 1989-тӥ арын ансамблен кивалтонэз но сое азьлане валтонэз ас вылаз басьтӥз дышетсконзэ соку гинэ йылпумъям егит пи Анатолий Чирков (али со - Эгра (Игра) кивалтэтысь культура ёзлэн тӧроез). Шаерысьтымы пӧртэм ёросъёсы концертъёсын потазы ни "ӟардонъёс". Коллективез озьы ик ӟеч тодо Чебоксарыын, Москваын, Санкт-Петербургын но мукет интыосын. Ӝоген "Ӟардон" нош ик кузь сюрес вылэ потоз. Таяз учыре - кыдёкысь ӵыжы-выжыосмы доры - мадьяр шаере, финн-угор калыкъёслэн тямысэтӥ калык куспо фестивалязы. Алигес ансамбль бадӟым юбилейзэ пусйиз - солэн кылдэмез дырысен кызь вить ар тырмиз. Таин валче культура юртэ Сундурысь но ёросысь трос калыкез люказ, репертуарысьтыз тужгес но устооссэ кырӟанъёссэ учкись азе поттӥз. Ансамблез дано лыдпусэныз ӟечкыланы ветлӥзы Удмурт Кивалтэтлэн Тӧроезлэн воштӥсез В.Е.Шудегов, "Удмурт кенеш" огазеяськонлэн тӧроез В.К.Тубылов, Удмурт Элькунысь Кун Кенешлэн депутатэз С.Э.Широбокова но мукет кивалтӥсьёс. Соос юбиляръёслы уно ӟеч кылъёс веразы но соосты дуно кузьымъёсын пусйизы. Ӧтем куноос пӧлын вал Ижысь "Инвожо" но "Бускельёс" фольклор ансамбльёс но. Ӝыт та коллективъёс Эгралась (Игралась) "Рябинушка" кафеын уртче шутэтскизы. Ог- огенызы ӟечгес тодматскизы, кырӟазы, эктӥзы, маскаръяськизы. Уйшор уин кык час бере гинэ люкиськизы. Адямилэн улоназ кызь вить ар бадӟым ик вакыт ӧвӧл. Нош "Ӟардон" коллективлэсь кын корт куртчон вакытэ вуэмзэ яркыт возьматэ та лыдпус. Туннэ со - элькунысьтымы огез кужмоез но йӧноез. Уно тунсыко пумиськонъёс, эшъёс, концертъёс азьланяз возьмало на ансамблез. Шудо паськыт сюрес, дан но сӥ-бур тыныд, "Ӟардон"! А.КЛЕМЕНТЬЕВ, Удмурт кун университетын дышетскись. Н.ИВШИНА, "Ӟардон" ансамблез кылдытӥсь, Сундурысь культура юртлэн директорез. Правительствоын Гурт удыслы - бадӟым саклык Президиумлэсь кенешсэ кутскыса, Правительстволэн Тӧроез Николай Ганза ивортӥз но дунъет сётӥз Россилэн Правительствояз та вакытэ ортчись воштӥськонъёслы. Асьме Правительствоын матысь куинь толэзьёсы нокыӵе воштӥськонъёс чакламын ӧвӧл. Соос луыны быгатозы федеральной структураез быдэсак кылдытэм бере гинэ. Николай Ганза умой дунъет сётӥз агропромышленной удысын кылдэм югдурлы. "Июльское" учхозын администрациослэн кивалтӥсьёсынызы кенешон дыръя сётэм дэмланъёсъя, ӵектонъёсъя ужрадъёс кутыны чакламын но азьветлӥсь хозяйствоослэн выль технологиоссы паськыт вӧлмытэмын луозы. Гуртъёсын ньыль-вить ар куспын югдурез чутрак воштыны кулэ, шуиз Николай Ганза. Базаръёс йыло, коньдон потто Республикаын та вакытэ ужа 47 базар но 63 вузкарон зона, ваньмыз - 8400 вузкарон инты. Кылем арын та удыс 1,5 миллиард манет коньдон ваиз, республикаысь быдэс вузкарон удыслэн со 17 процентэз луэ. Правительстволэн Президиумез базаръёсты но вузкарон интыосты 2003-тӥ арозь азинтонъя нимысьтыз программа юнматӥз. Соя усьтыны чакламын дас выль базар, укмыс вузкарон инты, тямыс павильон. Азьланяз тупатэмын-выльдэмын но паськытатэмын луозы уноез базаръёс. Со луонлык сётоз ватсаса кык сю ужан инты кылдытыны. Усыкмытӥсь арбериослы пумит Выльысь эскерыны сётэмын наркоманиен но наркотикъёсын законэз тӥяса вузкаронэн нюръяськонъя программалэн инъетэз. Та йырез поромытӥсь арбериос берыктоно луонтэм изъян ваё нимаз адямиослы но быдэс республикалы. Наркотикъёсын герӟаськем адямиослэн лыдзы берло аръёсы туж ӝог йылэ. 1987-тӥ-1989-тӥ аръёсы 13 уголовной уж ӝутэмын вал, кылем арын та лыдпус 1020 луиз. Дас ар ӵоже наркотикъёсын герӟаськем йыружъёс 78 пол йылӥзы, милициын учётын сылэ 5200-лэсь ятыр адями. Наркотикъёсын нюръяськонъя программаез быдэстон понна висъяны чакламын 68 миллион манет коньдон. Спортъя фестиваль 30-тӥ июньысен 2-тӥ июлёзь Завьялово черкогуртын ортчоз гуртъёсысь пиналъёс пӧлын спортъя фестиваль. Со герӟаськемын быдэс Россиын ялэм "Президент ӵошатсконъёс" спортивно-оздоровительной программаен. Та аспӧртэм ужрадлы висъямын луоз 688 сюрс манет коньдон, со сяна, 480 манетэз - Завьялово ёрослэн бюджетысьтыз. Таиз коньдон кошкоз спортъя базаез дасянлы. Ужрадэз радъя Калыкез дышетонъя министерство. Тылобурдоослы юрттэт Можгалась тылобурдо вордон фабрикалы республикалэн бюджетысьтыз 200 сюрс манет коньдон висъямын. Со мыноз бурдоослы сиён басьтыны, тупатъян ужъёсты быдэстыны. Фабрика пунэм тыронзэ берыктыны кулэ туэ ик 1-тӥ декабрёзь. Удмурт Республикаысь Правительстволэн пресс-службаез. ЖУРНАЛИСТЪЁСЫН ПУМИСЬКОНЪЁС Гуртоос пенсилы медаз ёрме Гурт хозяйствоос Пенсиосъя фондэ выт тыронзэс берло толэзьёс ӝегатыны кутскизы. Гуртын улӥсьёс понна сыӵе югдур номыр умойзэ уз сёты, таӵе мылкыдзэс веразы журналистъёсын пумиськонын республикаысьтымы Пенсиосъя фондлэн кивалтӥсезлэн воштӥсез Виталий Зелинский но координация отделлэн кивалтӥсезлэн воштӥсез Людмила Камолкина. Пенсиосъя фондэ коньдон люкаське выт вуэм чотын. Макем со трос но ӝеганъёстэк вуэ, со бордысь ик потэ пенсиез дырыз дыръя басьтон, озьы ик луонлыкъёс усьтӥсько пенсилэсь быдӟалазэ будэтыны. Гурт хозяйствоос азьланяз но тыронъёслэсь палэнскизы ке, гуртын улӥсь пенсионеръёс, оло, солэсь емышъёссэ ас вылазы но шӧдозы, нош шонергес вераса - емыштэм луэмзэс. Шаерамы 453 гурт предприятие. Быдэс республикая огъя выт та дырлы 96 процентозь ке тыриське, гуртын ужасьёслэн со 23 процентозь гинэ вуэ. 30 процентэз предприятиос выт тыронзэс ӝегато. 2000-тӥ арын 1- тӥ апрельлы гурт предприятиослэн пунэм тыронзы люкаськиз 213,2 миллион манет, со луэ огъя тыронъёслэн 13,7 процентэз. Быдэс республикая пунэм тыронъёс люкаськемын 1558,2 миллион манет. Пенсиосъя фондэ выт тыронэн тужгес но ӝегало: Кияса ёросын - 31 процентэз гинэ тыремын; Кизнерын - 42 процентэз; Юкаменскын - 42,7 процентэз; Селтаын - 39,4 процентэз. Оло, гурт хозяйствоосты гырон-кизёнэн герӟаськем шуг-секытъёс пачкато? Та юанлы Пенсиосъя фондысь специалистъёс таӵе валэктон сётӥзы. Гуртоослэсь секыт югдуре шедемзэс лыдэ басьтыса, нимысьтыз капчиятонъёс (льготаос) сётэмын. 1-тӥ январьысен 30-тӥ сентябрёзь соос тупатэм вытлэсь 70 процентсэ тырыны быгатозы. Нош 1-тӥ октябрьысен 30-тӥ декабрёзь лыдэ басьтӥськоз ни тупатэм вытлэн огъя быдӟалаез. Озьы, гуртоослы сӥзьылозь дыр сётӥське хозяйствоосазы поттэм продукцизылэсь пайда сётэмзэ возьманы. Огъя верано ке, таяз арын нырысетӥ кварталэ выт тыронъёсъя ӝеганъёс 2 процентлы йылӥзы. Азьло сямен ик тужгес но трос пунэм тыронъёссы "Ижмашлэн", Ижевскысь механической заводлэн, Воткинскысь заводлэн, 17-тӥ но 18-тӥ лэсьтӥськон управлениослэн. Пунэм тыронъёссы йылӥзы куд-ог мукет удысъёслэн но: электроэнергетика удыслэн - 12 процентлы; химилэн но нефтехимилэн - 40 процентлы; пул поттон предприятиослэн - 9-лы; нюлэс хозяйствоослэн - 12-лы; транспортлэн - 26- лы, нош чугун сюрес транспортлэн - 63 процентлы. Соин валче куд-ог предприятиослэн но удысъёслэн пунэм тыронъёссы ӧжытомизы: андан поттӥсьёслэн - 58 процентлы; тазалыкез утёнын - 39-лы; калыкез дышетон удысын - 31-лы, связь удысын - 20 процентлы. Пенсиосъя фондэ пунэм тыронъёслэн люкаськем мугзы: удысъёс но предприятиос ӝегало уждун тыронэн, куд-огез коньдонэз вошто вузъёсын, озьы ик предприятиос банкрот луо. Выт тыронэн май толэзе ӝеганъёс луизы ке но, республикаямы пенсиос тыронэн югдур урод ӧвӧл. Кылсярысь, кылем арын ньылетӥ кварталаз Пенсиосъя фондлэн казнаяз 92,4 процентэз чаклам выт пыриз ке, таяз арын нырысетӥ квартлэ - 95,6 процентэз. Та ласянь бадӟым уж нуо Пенсиосъя фондлэн удмурт ёзысьтыз выт бичась уполномоченнойёс. Пенсиосъя фондын ужасьёслэн верамзыя, июнь толэзьлы пенсиослы коньдон висъяны кутскемын ни 19-тӥ мае. Нош 22-тӥ июньлы шаерысьтымы вань пенсионеръёс пенсизэс басьтозы ни. Л.МАЛЫХ. Инвожо Июнь: тодмо нимъёс но нуналъёс Пн 5 12 19 26 Вт 6 13 20 27 Ср 7 14 21 28 Чт 1 8 15 22 29 Пт 2 9 16 23 30 Сб 3 10 17 24 Вс 4 11 18 25 1. Северной флотлэн нуналэз. - Нылпиосты утёнъя калык куспо нунал. 4. Агрессия улэ шедем нылпиослэн калык куспо нуналзы. 5. Котырысь инкуазез утёнъя калык куспо нунал. - Вордскемез дырысен 95 ар тырме Михаил Алексеевич Коноваловлы (1905-1938), тодмо удмурт прозаиклы, драматурглы, критиклы. Вордскиз Можга ёросысь Акаршур гуртын. - 75 ар тырме Виктор Федорович Татариновлы (1925), ӟуч писательлы. Вордскемын Можга ёросысь Рябчики гуртын. 6. Россиын ортчытӥське Пушкинлэн нуналэз. 6-11. 80 ар талэсь азьло (1920) Сарапулын ортчиз удмурт коммунистъёслэн И Всероссийской конференцизы. 8. Вознесение. 11. Капчи промышленностьын ужасьёслэн нуналзы. - 65 ар талэсь азьло (1935) УАССР-ысь калык комиссариатъёслэн советсы (САК) Ижевскын драмая ӟуч театр усьтон сярысь постановление кутӥз. Али В. Г. Короленко нимо драмая ӟуч кун театр. 12. Россия Федерацилэн кун суверенитетэз сярысь Декларация кутон нунал. 14. 90 ар талэсь азьло (1910) Воткинскын кылдытэмын шор ёзо механико- технической училище. - 25 ар талэсь азьло (1975) Воткинскысь машина лэсьтӥсьёс "Вятка" мотороллерлы миллионэтӥзэ цилиндр поттӥзы. 15. 75 ар талэсь азьло (1925) Ижевскысь рабфакез йылпумъяз нырысетӥез 61 студент. Рабфак кылдытэмын вал 1921-тӥ арын. 15-21. 80 ар талэсь азьло (1920) Сарапулын ортчиз калыкез дышетон но социалистической культура удысын ужась удмуртъёслэн И Всероссийской съездзы. Отчы ветлӥз 245 делегат. 17. Пустыняосын но кӧс куазен нюръяськонъя калык куспо нунал. 18. Троица. 19. 100 ар талэсь азьло (1900) Сарапулысь музыкально-драматической кружоклэн уставез юнматэмын. Со инъет сётӥз крезьгуръя нырысетӥ школа (1909) но драмая театр (1910) усьтонлы. - 85 ар талэсь азьло (1915) Сарапулын усьтӥськиз крезьгуръя училище. 21. 75 ар талэсь азьло (1925) Удмурт областной Советско-партийной школаез йылпумъяз нырысетӥез 95 мурт. - 70 ар талэсь азьло (1930) Сарапулын усьтӥськиз медициная техникум. 22. Буре ваён но куректон нунал. Быдӟым Отечественной война кутскон нунал. 23. Олимпиадая калык куспо нунал. 24. Изобретательлэн но рационализаторлэн нуналзы. 25. Славянъёслэн эшъяськонъя но огазеяськонъя нуналзы. - 60 арес (1940) тырме техника наукаосъя кандидатлы, доцентлы, Удмуртиысь тодосчиослэн ассоциацизылэн президентэзлы Василий Павлович Беркутовлы. 26. Наркоманиен но наркобизнесэн нюръяськонъя калык куспо нунал. 27. Чорыганъя калык куспо нунал. - Россиысь егитъёслэн нуналзы. - 80 арес тырме Владимир Васильевич Сулинлы (1920), медицина наукаосъя докторлы, профессорлы, Удмурт Республикаысь наука удысын дано ужасьлы. 29. 80 ар талэсь азьло (1920) Ижевскын усьтӥськизы калык пӧлын гожтэт тодӥсьтэмъёсты дасянъя курсъёс. 30. 65 ар талэсь азьло (1935) Удмурт кун педагогической институтэз (али университет) йылпумъяз нырысетӥез 65 дышетӥсь. - 60 ар талэсь азьло (1940) Сарапулын кутскиз электрогенераторной заводэз лэсьтон. - 30 ар талэсь азьло (1970) Ижевскын усьтӥськиз архитектурая зал. Бӧрысь со луиз РСФСР-ысь архитекторъёслэн огазеяськонзылэн Удмурт ёзэзлэн архитекторъёсызлэн юртсы. Е. Ушакова, Удмурт Республикалэн туала историезлы сӥзем центрысь ёзлэн кивалтӥсез. ЖУРНАЛИСТЪЁСЫН ПУМИСЬКОНЪЁС Кин быгатэ диплом сётыны? Правительство берло дыре бадӟым инты висъя калыкез дышетонлы но та ужез умоятонлы. Со понна Правительствоын кылдытэмын Дышетон удысын лицензиос сётонъя аттестация но кун аккредитация ортчытонъя нимысьтыз комитет. Та ёзлэн кулэез юн шӧдиське. Солэн ужамез но азяз сылӥсь ужпумъёс сярысь кылем вторнике журналистъёслы мадиз комитетлэн кивалтӥсез Алла ЕРЕМЕНКО. Куд-огез зэмзэ но, оло, малпалоз, малы таӵе мултэс ёз кулэ, куке вань Калыкез дышетонъя министерство. Со та ужез уг быдэсъя шат? Та ёзъёслэн ужзы висъямын. Министерство аттестация, лицензирование но аккредитация нуэ огъя школаосын гинэ, нош профессионально-технической училищеосын, техникумъёсын ужа комитет. Вылӥ дышетсконниослы (институт академия, университет) аттестация лицензирование но аккредитация ортчытонэ пыриське Россиысь Калыкез дышетонъя министерстволэн куремезъя гинэ. Кыӵе бен югдур та удысын? Комитет ужа кун но кун луисьтэм дышетскон заведениосын. Ватсаны кулэ, кинлэн лицензиез ӧвӧл, аттестация но аккредитация ортчымтэ, со калыкез дышетыны уг быгаты, нош 2001-тӥ арын 1-тӥ январьысен кун диплом сётыны уз лэзе. Та ласянь ушъяськыны уг луы. Тани шаерысьтымы 18 кун дышетон заведениос пӧлысь витез гинэ аттестация но аккредитация ортчемын. Соос гинэ кун диплом сётыны быгато. Отчы пыро Восточно-европейской университетысь 3 колледж, Глазовысь но Ижысь финансово- экономической колледжъёс. Кылемъёсыз 13-ез аттестацилы уг кулэясько, шӧдске. Алла Васильевналэн ивортэмезъя, та ужын шекъёс трос на. Куд-огез дышето лицензиос басьтытэк, нош анай-атайёс нылпиоссы понна токма коньдон тыро. Соос муресь тодон- валанъёс уг сёто. 46 учреждениосты эскерем бере, 15-ез соку ик дышетон ужлэсь куштӥськиз. Нош куд-огез быдэ вуымтэосын, законэз тӥяса, огкылъёс гожтыса, уксёзэс ниё. Тужгес но тырмымтэос трос вузкаронъя удысын. Соослэсь лиценизоссэс талало, прокуратураен ӵош ужало. Кылсярысь ужбергатонъя бигер институт быдэс ар бумагаос (документъёс) дасяны выриз. Нош Аксеновлэн школаез 3 ар ӵоже коньдон бичаса улӥз но пытсаськиз. Али лицензиоссы ӧвӧл Бизнесъя дуннеысь академилэн, Сарапулысь авиационной техникумлэн Можгаысь ёзэзлэн но музонэзлэн. Комитет озьы ик нуэ эскерон уж. Куд-ог заведениосын дышетон ужзэс тыро-пыдо уг чаклало, йылпумъянъёс уг лэсьтыло. Вылаз ик, коньдонзэс кулэтэм интые куто но тус- тас каро. Сыӵе учыръёс, жаляса верано луэ, пумиськыло на. Дышетон но палдурес мынэ. Тросэз дасяло, рынокез чаклатэк, экономистъёсты, бухгалтеръёсты но мукетсэ. Берло соос асьсэлы уж уг шедьто. Дышетон заведение усьтоно, рыноклэсь куронъёссэ тодыса. Соку егитъёсты юмоке уз вутты. Г.РОМАНОВ. Вавожын ортчиз "Удмурт кенешлэн" нуналэз Газетмы ивортылӥз вал ни, Вавож ёросын "Удмурт кенеш" ӟеч ужрад ортчытӥз шуыса. Аслэсьтыз нуналзэ удмуртъёслэн огазеяськонзы радъялляз ни Шаркан но Якшур-Бодья ёросъёсын. Куӟебай Гердлэн дор палъёсаз люкаськылӥзы огазеяськонлэн ёросъёсысь ёзчиосыз. Гурезь-Пудгаын "Удмурт кенешлэн" ужамезлы сӥзьыса, семинар ортчиз. Шонергес вераса, вавожъёс асьсэлэн ужамзы сярысь мадизы. Ёрос администрацилэн тӧроез Т. В. Иноземцева валэктӥз ёросын экономикаын но улон-вылонын кылдэм югдур пумысен. Люкаськемъёслы ӟеч кылъёсын вазиськиз гурт адяминистрацилэн тӧроез Н. Г.Меньшикова Вавожын "Удмурт кенешлэн" ёзэз кылдытозь, одӥгез но ужрадзы удмурт кылын ӧз ортчылы. Нырысь вамышсы со бордысен кутскиз. Кичӧлтонэз Выль ар луиз. Калык трос люкаськемен, ёзчиослэн мылкыдзы бурдъяськиз. Туэ ӟучомем удмурт нылпиослы анай кылын Выль арлы сӥзем ужрад нырысьсэ ортчытӥзы. Али ёросысь 32 процентэз пиналъёс удмурт кылэз дышето. Тямыс ар талэсь азьло 28 гинэ вал. Котькуд дышетскон ар кутскыку, вавож дышетӥсьёс сюлмасько: быгатомы-а кельтыны удмурт школаосты? Школаын ужасьёс шонер верало: туннэ нуналлы тупась методикая пособиос ӧвӧл. Асьме шаерез тодонъя дышетскон книгаос лябесьгес. Ар но ӝыны ӵоже ёросын удмурт кылын "Герд" газет потӥз. Табере толэзьлы одӥг пол гинэ потто на. Соиз но "Авангард" газетлэсь одӥг бамзэ гинэ басьтэ. Ӧжыт ке но, мылысь-кыдысь лэсьто. Тырше Валентина Богатырева. Вавож палан удмуртъёсты огазеян вылысь, ӟеч ужало Маргарита Новосёлова, Виктор Шутов, Римма Борисова, Владимир Ганеев, Анатолий Егоров. Со нуналэ ик "Удмурт кенеше" пыриськисьёс пумиськылӥзы ёрос администрациын ужасьёсын. Огазеяськонлэн тӧроез Валентин Тубылов мадиз республикаямы политика удысын кылдэм югдур сярысь. "Удмурт кенеш" Президент быръёнлы пумит уг сылы. Юнме сое пыкыло оппозициын сылэ шуыса. "Удмурт кенеш" пумит вал властьлэсь выльзэ куинетӥзэ структуразэ кылдытонлы. Чакламзыя, президент одӥг вакытэ ик правительстволэн тӧроез луыны кулэ вал. Озьы ик огазеяськон пумит вал одӥг юанэ сомында ужпумъёсты пыртыны. Вылӥын верам "Иные органы госвласти" мар со сыӵе? Туннэ рос-прос та пумысен нокин но валэкытын уг быгаты. Конституцие воштонъёс но ватсанъёс пыртонъя ужась группа но. Юан кылдэ Конституцияя Суд пумысен но. малы со кулэ? Конституциез тӥясез суд улэ кыскыны? Ма, со понна ик валтӥсь закон кылдытэмын, сое тӥянтэм вылысь. Вань Вылӥ Суд, со но быгатэ таӵе ужпумез эскерыны. Ӝоген быръем республикамылэсь нырысетӥ Президентсэ. Шуо, сое быръёно одӥг турен. Со понна ик чакламын, кызьы сое вакчияк нимало, "Кызь витьысь кызь витьсэ" сярысь закон но. Кыкетӥ тур чакламын ӧвӧл. Дуно, пе, усе. Соин Президентэз ӧжыт калыкен но бырйыны яра. Озьы валэкто. Нош табере Кун Кенеш, Правительство вӧзы Президент но солэн структураез ватсаськоз на. Выль чиновникъёслэн армизы кӧня сылэ? Кыкетӥ тур дуно-а, ӧвӧл-а - со бордын ужпум ӧвӧл. Асьмелы Президент быръёно. Со кыл кутоз котькуд адямилэн, республикалэн вуоно улонэз понна. Емышсэ 3-4 ар ортчыса сиём. Озьыен, бырйись ачиз быръёз аслэсьтыз улонзэ. Сыӵе мылкыдыз Валентин Тубыловлэн. "Удмурт Республикалэсь Президентсэ быръён сярысь" Законлэн проектэзлы пумит луиз Кун Кенешлэн Тӧроезлэн нырысетӥ воштӥсез Павел Вершинин. Та пумысен валэктонъёс сётӥз со "Удмурт кенешлэн" но Вавож ёросысь администрацилэн ӵош пумиськонзы дыръя. Президент трос ужпумъёс понна одӥгназ кыл кутоз. Соин солы данак калык мед дурбасьтоз. Озьы президент возьматоз юн луэмзэ, калыклэсь оскемзэ. Озьыен, нырысетӥ муртэ быръёнэ 50 процент бырйисьёс пыриськыны кулэ. Соиз кандидат вормисе потэ, кудӥз 50 процент + 1 куара люкалоз. Проектэ 70 пала тупатъянъёс пыртыны ӵектэмын вал. Жаляса верано, нырысетӥ лыдӟонын законлэн проектэз инъет карыса кутэмын. Зэм, отчы ватсанъёс но воштонъёс пыртозы. Но али ик тодмо ни кыӵе вамыш лэсьтыны турттозы. Быръёнэ пыриськемъёслэн лыдзы озьы ик кылёз - 25 процент. Но вормон понна табере 50 процент куараос люканы кулэ луоз. Мукет сямен вераса, вань бырйисьёслэсь 12 но ӝыны процент луэ. Тырмыт-а со калыклэсь мылкыдзэ возьматыны? Ӧвӧл, дыр. Кызьы шуиз Павел николаевич, таӵе закон юромо дасямын. Нимысьтыз адямиослы. Туртто вал Президентэ быръёнэз одӥг кандидатэн ортчытыны, но озьы уз пӧрмы. Шонер пыкылӥз "Удмурт кенешез", "Дэменэз" но "Шундыез" Можга ёросысь "Удмурт кенешлэн" ёзэзлэн кивалтӥсез Анатолий Комаров. Удмурт огазеяськонъёс быръёнъёс дыръя пӧртэм пала ужало. "Кенеш" одӥг муртлы дурбасьтэ, "Шунды" мукет пала ӵуже. Тазьы ужамы ке, одӥгезлэн но пайдаез уз луы. Али ик малпаськыны кулэ ни Федерацилэн Кенешаз асьме адямиез ӵектон пумысен. Зол йӧттӥз А. Комаров Культурая министерстволы. Алигес театръёслэсь быгатонлыксэс эскеризы. Можгалась калык театрез но ӧтиллям. Пумитамзэ пумиталлям, нош йылпумъянъёс лэсьтыку вунэтӥллям. Калык театр спектакльзэ возьматэм, но министерствоысь сцена вылэ нокин потымтэ дунъет сётыны. Ӟучъёс асьсэлэсь возьмато - соосты удмурт адями данъяны потэ. А удмуртъёсты малы палэнэ кельто? Кызьы шуиз Комаров, калык театрлы ас кисыысьтызы уксё сёто. А министерство кытын? Ма понна со? Кытын удмурт ужасьёс? Сыӵе юанъёс сётэ "Удмурт кенешлэн" Можга ёросысь ёзэзлэн кивалтӥсез Анатолий Комаров тӥледлы, Николай Михайлович но Аверьян Трофимович. "Тазьы ужаны уг яра", - шуэ со. "Удмурт кенешлэн" ужрадэз пайдаё ортчиз. Вал йылпумъянъёс но ӵектонъёс. Политикаын но улон-вылонын кылдэм югдурез калык шонер валаса кошкиз кадь. А. Андриянов. П. Вершинин. В. Тубылов. А. Комаров. Кенеш дыръя. Туспуктэмъёсыз В. Беломорскихлэн. Учкемъя учкем, кылзэмъя кылзэм потэ Ижысь Азин нимо библиотекаын мон нырысьсэ адӟи Юля Кузьминаез, Надя Уткинаез, Зоя Трухинаез. Татын ик нырысьсэ кылӥ кык сузэръёслэсь Юлия Кузьминалэсь но Светлана Яковлевалэсь гитараен шудэмъя кырӟамзэс. Шоразы учкыса, туж востэмесь, дӥсьтӥсьтэмесь кадь, нош кыӵе куараоссы. Кылзэмъя кылзэм потэ. Юан но кылдэ: кытысь, кинлэн, кыӵе анай-атайлэн таӵе визьмоесь, чебересь нылъёссы? Та пумиськонын ик милемлы кузьмазы асьсэлэсь книгаоссэс: Ю.Кузьмина "Вордски мон кырӟанэн", Н.Уткина "Песни Надежды", З.Трухина "Быгато-а тонтэк" но "Уй пал сяськаос". Со дырысен кема возьмам малпанэ быдэсмиз: Кузьминъёслэн семейной ансамбльзы нырысьсэ потӥз сцена вылэ. Собере - эшшо но эшшо... Кызьы чидалод соосты кылзытэк, адӟытэк? Вань на меда кытын ке тазьы семьяен кырӟасьёс, эктӥсьёс, кырӟан гожъясьёс? Олокӧня сюрс семьяос пӧлын таӵеос одӥг гинэ, дыр. Туж бадӟым гурезьысь шара потэм зарни комокъёсын ӵошатыны луоз соосыз. Ӟуч сямен вераса - самородокъёс. Юлия ачиз кылбура, крезьгур гожъя, ачиз кырӟа, программазэ лэсьтэ. Нош кыӵе дӥськутъёссы соослэн! Ваньзэ ачиз: басма басьтэ, модельзэ малпа, вуриське. Паймемысь уд дугды, ку гинэ вуэ меда. Таӵе востэм гинэ нылкышнолэн сомында быгатонэз - ваньмыз со инмарлэн- инкуазьлэн сётэмез, дыр. Ведь кылбураны, крезьгур гожтыны, кырӟаны куараед ке ӧвӧл, нокытын, нокин уз дышеты - аслад лул пушкад мед луоз. Нош кытысь адӟод на меда анаенызы артэ кырӟась но эктӥсь мунё кадесь кык пичиесь нылъёсыз, атайзы баянэн шудэмъя кырӟасьёсыз. Юлиялэн ансамблез тулыс писпуослэн чеберскемзы музэн пушъе, золоме. Калык солы оске: ансамбльзы уката юнмалоз, ворекъялоз али. Будэмзы шӧдскиз 19-тӥ апреле выль программаенызы потэмзыя но, 26-тӥ мае "Мылысь-кыдысь" концертэ пыриськемзыя но. Та коллективлы Культурая министерство бадӟым саклык мед висъялоз вылэм, "Удмурт кенеш" огазеяськон но медаз вунэты, луэмезъя мед юрттоз. А.ИВАНОВА, Ижевскын улӥсь. Крезьгуро семья Одӥгаз эркын, шуныт тулыс ӝытэ Удмурт театре асьмелы туж тодмо, мыло-кыдо семьяен пумиськыны лыктӥз уно калык - буш интыос ик ӧй вал. Юлия но Виталий Кузьминъёслэн вань ини асьсэлэн учкисьёссы, концертысь концертэ соослэн лыдзы будэ. Быдэс семьяен сцена вылын эктӥсьёс-кырӟасьёс ӧжыт ӧвӧл, нош удмуртъёс пӧлын Кузьминъёс - тужгес но дӥсьтӥсьёсыз, яркытъёсыз. Асьсэ быгатонлыкенызы соос быдэсак усьтӥсько. Юлия - уката ик, котькуд концертсылы дася выль кырӟанъёс, выль дӥсьёс. Ачиз ик режиссёр но со. Нош та ӝытэ Юлия Кузьмина паймытӥз эшшо одӥг быгатонлыкеныз: концертсэ узырмытӥз драмая люкетъёсын. Аслаз гожтэм сценариезъя концерт-спектакль туж удалтӥз. Синмаськымон шудӥзы рольёссэс удмурт калык театрысь артистъёс Виталий Агбаев но Нина Пахомова. Соослы юрттӥзы егитъёс - Культурая училищеын дышетскисьёс Михаил Бегишев но Валентина Поздеева. Милемыз, нылпиосын ужасьёсыз, тужгес но шумпоттӥз Юлиялэн анай ролез. Тодӥськомы ук, ӟечсэ но, уродзэ но нылпиослы семья пыӵатэ. Улоназы нырысь дышетӥсьёссы анай- атайзы луо. Таос сярысь ке верано, Юлия но Виталий кык мусо нылъёссэс быгатыса будэто. Бадӟымез нылзы, Светазы, сизьым аресысен ик дышетске ни усточиослэн школаязы, пианист луыны дасяське. Али ик ини со пыриськылэ конкурсъёсы, дышетӥсьёсыз солы оско. Пичиез нылзы, Люба, ветлэ 8 номеро крезьгуро школае, фортепиано но эктон классъёсы. Со сизьым аресысен А.Пушкинлы сӥзем конкурслэн лауреатэз. Тӥни озьы та егит кузпалъёс нылъёссэс пичи дыръязы ик валто бадӟым искусствое нуись сюрестӥ. Капчиен уг сётӥськы концерт сётон, улон секыт луэмен, пӧсяса тыршоно. Аслыд ик утчано уксёен юрттӥсьёсты. Бен, коньдонтэк туннэ одӥг ужрадэз но уд бергаты, одӥг вамыш но уд лэсьты. Та берпум концертсы бере трос гинэ вазиськисьёс луиллям, нош ик калык азе потыны, та ужрадэз возьматыны курыса. Соин ми соосын ӵош туж шумпотысалмы юрттӥсьёс шедемлы. Егит шудо семья! Азьланяз но таӵе ик задор мылкыдо, чырткемесь, выль пушъетъёсын адӟоно мед луомы тӥледыз! Анна САПОЖНИКОВА, Юлия РАЗИНА, "Дэмен" огазеяськонлэн ёзчиосыз. Кырӟанэн ваче ки Библиотекаямы "Пумиськон" клуб ужа. Тыршиськомы лыдӟисьёсмес тунсыко адямиосын тодматыны. Озьы огаз нуналэ Галина Романовалэн ӵектэмезъя ӧтимы кырӟасез Светлана Яковлеваез. Ачиз но Галина Васильевна ветлӥз, кылбуръёссэ лыдӟиз. "Инвожо" журналын ужъёссы сярысь мадиз. Кырӟаменыз Светлана шумпоттӥз лыдӟисьёсмес. Таӵе адямиен синмысь синме пумиськон, ӟуч сямен вераса, "бальзам на душу". Милям туж потэ вал удмурт кырӟанъёсыз кылзэммы, соослэсь жингыртыса ворекъясь чеберлыксэс шӧдэммы. Та ласянь осконмы зэмаз. Быгатэ Светлана кылзӥсьёслэсь сюлэмъёссэс бугыртыны-вырӟытыны. Туж шонер лэсьтэ, удмуртсэ но, ӟучсэ но кырӟанъёссэ быдэстыса. Шӧдӥське, кылзӥсьёссэ гажа. Угось ачиз но Светлана будэмын удмурто-ӟучо гуртын. Библиотекаысь ужасьёс но лыдӟисьёсмы сӥзё Светлана Яковлевалы концерт удысаз выль вормонъёс басьтыны но тазьы, кырӟан пыр, культурамес утёнэ, азинтонэ мургес пыриськыны. утьыны. Удмуртиын сяна, кырӟанъёсыз паськытгес мед вӧлмозы шаермылэн палэназ но. Н.УЧАНОВА, "Пумиськон" клублэн кивалтӥсез, Л.СИБАГАТУЛЛИНА, И.Наговицын нимо библиотекалэн кивалтӥсез. Библиотекалы премия Республикаысьтымы Национальной библиотека асьсэлэн сӧзнэтазы (системаязы) тужгес усто ужась коллективъёслы арлы быдэ сётылоз премиос. Пӧртэм амалъёсты быгатыса кутэмез но лыдӟисьёслэсь куронъёссэс лыдэ басьтыса ужамез понна сыӵе премиен - куинь сюрс манетэн - туэ пусъемын Ижевскысь А.Н.Некрасов нимо централизованной библиотечной система. Солэн кивалтӥсезлы Татьяна Тимофеевна Мартыновалы Россиысь библиотекарьёслэн нуналазы лауреатлэсь дипломзэ но коньдон премиез сётӥз Национальной библиотекалэн директорез Нелли Михайловна Собина. Т.ННИКОЛАЕВА. КИВАЛТОН Янгыш понна кыл кутӥсь одӥг Алигес Удмурт Правительстволэн Тӧроез Николай Ганза пумиськиз выль кивалтӥсьёсын. Соос тодон-валан басьто асьме кунын, мукет странаосын, озьы дышетско рынокен экономикаен кивалтыны. Сотэк уго уд быгаты калык хозяйствоез ӝог азинтыны но валаса нуыны. Али пӧртэм ваньбурен предприятиос ужало, котькудӥзлы соослы визьмо но быгатӥсь кивалтӥсь кулэ. Соин валче Николай Ганза люкаськемъёслы шуиз: - Мон ачим США-ын кык пол, 1988-тӥ но 1992-тӥ арын, тодон-валанме муромытӥ. Но со вакытэз туннэеныз нокызьы уд ӵошаты. Соку куронъёс музонэсь вал - кузёяськиз косъяськон дыр. Тӥ егитэсь, тӥледлы удалтӥз, тӥледлы, оло, капчигес луоз. Нош кивалтон самой секытэз уж, дыр. Тӥ ваньзэ вормоды. Солы юн оскисько. Выль кивалтисьёслы ӟеч мылкыд сӥзьыса, Н.Ганза пальпотыса ватсаз на, вормон борды, пе, уноез няняське, нош янгыш понна кыл кутӥсез одӥг. Г.РОМАНОВ. Пыдкутчанэз воштӥз... самолётэн Китайлэн шор люкетысьтыз Вуян городысь суд вань улытозязлы пытсэт сьӧры пуктӥз та тужгес но узыр адямиез - Моу Цыжонэз. Сое янгыше уськытӥзы коньдонэн герӟаськем йыружъёсыз понна. Со дас ар ӵоже кивалтӥз коньдонъя одӥгеныз бадӟым управлениен. Та адямиез туж яратӥзы журналистъёс, лыдъязы сое Китайын ортчись бадӟым воштӥськонъёслэн кичӧлтӥсенызы. Тужгес но узыр миллиардер луыса, со пӧртэм удысъёсы уно коньдон висъялляз. Шумпоттылӥз со футболэз яратӥсьёсты но, аспӧртэм экспедициосы ветлӥсьёсты но, ёрмыса улӥсьёсты но. Моу Цыжон уката ик тодмо луиз 1989-тӥ арын, куке со пыдкутчанэн, носкиосын но мукет со выллем арбериосын тырмытэм вить сю грузовикъёсты воштӥз Россиын поттэм ньыль ТУ-154 самолётъёслы. Озьы со аслаз кисыяз пыртӥз 25 миллион доллар. Моуэн луэм учырез тросэз герӟало социалистической сӧзнэтлэн (системалэн) тырмымтэосыныз. Басьтэмын Интернет пыр. Осконэз - Россия Британилэн разведкаяз азьло ужам мурт Ричарт Томлинскон трос аръёс ӵоже турттэ ини аслэсьтыз мемуаръёссэ поттыны. Но котькытын солы пумит луо. Осконэз чылкак бырем бере, со куронэныз вазиськыны малпаз Россилы. "Паймымон ке но, ӵапак отын али гожъяськыны, ас малпандэ шара вераны эрик сётэмын", - шуэ со. Томлинсон разведкаысь 1995-тӥ арын кошкиз. Соку ик со ивортӥз "шпион" луыса ужан вакытысьтыз тодэ ваёнъёссэ гожтыны мылкыд каремез сярысь. Тае тодыса, Томлинсонлэсь котькуд вамышсэ эскерыны кутскизы. Книгазэ поттыны юрттӥсь утчаса, со вуылӥз Великобритание, Францие, Австралие, Америкае, Швейцарие, Германие. Вить ар куспын сое дас одӥг пол ӝегатылӥз полиция, кӧня ке дырлы пытсэт сьӧры но пуктылӥзы. "Та учырез йылаз-пумаз вуттыны одӥг гинэ амал вань на - дасям книгаме поттыны", - ивортӥз со Западысь одӥг газетлы. Басьтэмын Интернет пыр. ВАЛЭКТЭ ЮРИСТ Сэрегез дася адвокат Лилия ШКЛЯЕВА Юрт ӝутыны люкетэ плита Валля арын ноябре мон басьтӥ музъем кесэг аслым корка пуктыны. Азьло кузё татчы огдырлы кельтӥз вӧлдэтлы арась плитаоссэ. Кенешим: соосты нуоз 1999-тӥ арын январе. Татчыозь плитаос кыллё азьло интыязы но люкето юрт ӝутыны. Мынам таӵе юанэ: азьло кузёез кызьы косоно нуыны плитаоссэ? В.АКБОРИСОВ. Россия Федерацилэн Граждан кодексысьтыз 226-тӥ ёзэтын (статьяын) вань 2-тӥ люкет (пункт). Отын верамын асваньбур (собственность) лыдъяськись музъем кесэге яке вуэ кельтэм арбери сярысь. Со, металлолом, брак луэм ваньбур, выем коръёс, музъем узырлыкъёсты поттэм бере кылем-мылемъёс вить пичи уждунлэсь укыр дунтэмесьгес ке, кузё быгатэ соосты аслыз карыны, соосты уже кутыса яке асваньбурлы мукет сямен пӧрмытыса. Озьыен, куштэм мае ке аслыд карон вылысь тодыны кулэ солэсь дунзэ. Закон висъя вить пичи уждунлэсь дунтэмгес арбериосты но солэсь дуногес арбериосты. Дуноссэ аслыд карон понна вазиськоно судэ. Таиз плитаосты кузётэмен лыдъяз ке, соос выжозы музъем кесэглэн кузёез доры. Улон инты понна компенсация Мар со сыӵе улон инты понна (жилищной) компенсация но кызьы сое лыдъяло? И.СУРНИН. Улон интылы дунъёс будэмен валче, куанер адямиослы табере висъяське компенсация (яке субсидия). Сое лыдъяны законын огъя норма тупатэмын ӧвӧл. Котькуд учыре котькуд адями понна компенсациез нимаз чотало. Сое сёто 3-6 толэзьлы, куддыръя - 1 арлы (ялан ужась но уждун басьтӥсь муртъёс понна). Та дыр ортчем бере выльысь люкано улон интылэн, семьялэн, уждунлэн быдӟалазы сярысь бумагаос. Субсидилы правозэс ышто улон интызэс арендае сётӥсьёс, быдэ вуыса юри ужасьтэмъёс но уж сётон ёзэ лыдэ басьтымтэос (та курон уг вӧлмы 8 аресозь нылпи будэтӥсь кышноос вылэ). ШӦКЫЧ Владимир КОТКОВ Ачид ке ӧд... Ляб гожтэмзэ Ачиз шӧдэ, дыр, Шуэ бере: "Таиз - шедевр!" Ас коньдонэн Кагазэз понна тыриз, Типографилы тыриз. Рецензентлы дуноен, Критикезлы - уноен. Кылиз Лыдӟисьсэ гинэ Шедьтыны Дуно дунэн. Данэн кудӟон Данэныз со воксё тудӟиз, Данэныз со воксё кудӟиз. Ас нимзэ но уг вай ни тодаз. Сазьтӥськиз ке бен, ӝогак тодоз: Лякиськем ни выль ним - Тордос. Туала лозунг Зулиськом, зулим, зулём - Дано мед луоз Зулён! Йыромем кивалтӥсьлы "Кытӥ пырид, отӥ ик пот", - Шуо вал удмуртъёс. Мукет ӧсэз ке утчаськод, Кулэ мукет бурдъёс. Депутат Сётэм кылзэ Келя тӧлъя-буръя. Только тӧлзэ Ачиз ик со быръе. ВАЛЭКТЭ ЮРИСТ Сэрегез дася адвокат Лилия ШКЛЯЕВА Люкиськон Картэным люкиськыны но солэсь алимент басьтыны малпасько. Кыӵе документъёс кулэ со понна? О.ВАХРУШЕВА. Люкиськон сярысь ужпумез суд эскере, кузпалъёслэн быдэ вуымтэ огъя нылпизы вань ке, яке соос пӧлысь огез браксэс быдтыны пумит ке. Зэм, куддыръя судтэк гинэ, загс пыр люкиськыны луэ огез кузпал курон (заявление) сётыса, соослэн огъя нылпизы вань ке но. Сыӵе учыръёс таӵеесь. Мукет кузпал: - суд пыр лыдъямын ивортэк ышемен; - суд пыр лыдъямын йӧн-йӧн улыны быгатӥсьтэмен (дееспособностьсэ ыштэмен); - йыртэмамез понна куинь арлэсь кемалы пуктэмын. Суд адямиосты люке, соос огазьын улыны уг быгато ни шуыса тодмо луэ ке. Огез кузпал люкиськыны соглаш ӧвӧл ке, судлэн правоез вань соослэсь кусыпсэс тупатон вылысь ужрадъёс кутыны но югдурез берло эскерыны, уръяськыны куинь толэзёзь дыр сётыса. Огъя нылпиен кузпалъёс кыксы ик люкиськыны соглаш ке, суд браксэс быдтэ, тупамтэ мугъёсты юатэк. Судэ вазиськыкузы, кузпалъёс сьӧразы вайыны быгато таӵе тупанкыл (соглашение): кинэн улозы быдэ вуымтэ нылпиос, соосты вордэм понна кӧня но кызьы дун тыриськоз, кызьы люкиськоз огъя ваньбур. Сыӵе ужпумъёсъя соос огъя кыл уг шедьто ке, яке тупанкыл нылпиослэсь яке кузпаллэсь кулэяськонъёссэс тӥя ке, югдурез суд сэрттэ-пертче ни. Люкиськем бере адями мылкыд каре ке алимент басьтыны, та пумысен гожтэ курон (заявление), судэ озьы ик вуттэ улон интыысьтыз нылпи вордэмез сярысь справка но пиналызлэн вордскем сярысь свидетельствоезлэсь копизэ. Кыӵе документъёсты кызьы гожъяны валэктэ улӥын сётэм образец. СПОРЫ ПО ДЕЛАМ, ВЫТЕКАЮЩИМ ИЗ БРАЧНО-СЕМЕЙНЫХ ОТНОШЕНИЙ В______________районный (городской) народный суд ________ ______области (края, республики) ИСТЕЦ:_____________________________ (ф.и.о., адрес) ОТВЕТЧИК:_________________________ (ф.и.о., адрес) ИСКОВОЕ ЗАЯВЛЕНИЕ о расторжении брака (число, месяц, год) я вступил(а) в брак с ответчицей(ком) (ф.и.о.) и проживал (а) с ней (ним) совместно до ( месяц, год) От данного брака имеется(ются) ребенок (дети) (имя, число, месяц, год рождения ребенка (детей) Совместная жизнь с ответчицей(ком) не сложилась: (указать причины) Брачные отношения между нами прекращены с (месяц, год) общее хозяйство не ведется. Дальнейшая совместная жизнь и сохранение семьи невозможны. Спора о разделе имущества, являющегося нашей совместной собственностью, нет. Соглашение о содержании ребенка (детей) между нами достигнуто. В соответствии со ст. 21 Семейного кодекса РФ ПРОШУ: расторгнуть брак между мной и ответчицей(ком) (ф.и.о.) зарегистрированный (число, месяц, год) в (наименование) загсе, актовая запись (номер) Приложение: 1. Свидетельство о заключении брака. 2. Справки о зарплате истца и ответчика. 3. Марка (квитанция) госпошлины (83 руб. 49 коп. восемьдесят три руб. сорок девять коп). 4. Копия искового заявления (2 экз.). Подпись Дата Куазь Синоптикъёслэн ивортэмзыя туннэ ӧжытак пильмаськылоз, уз зоры. Тӧл лымшор но шунды пуксён палась секундскын кык метре пельтоз. Нуназе 29-33 градус пӧсь луоз. Ӵуказе но куазь таӵе ик улоз. ПУМИТЪЯСЬКОН УЖРАД Луоз-а пайдаез шыпыт сылонлэн? Кун Кенешлэн юртэз азьын 31-тӥ мае пумитъяськон ужрад ортчиз. Огазелюкаськыса, калык мылкыдзэ возьматыны тыршиз Россиысь Правительстволэн но парламентлэн кутыны чаклам решениоссылы. Тани мар валэктӥз со пумысен республикаысь профсоюзъёслэн уженызы кивалтӥсь Е.Орлов: - Калыклэн улонэз вадьсын нош ик кышкытлык кылдӥз. Малпамын предприятиос но организациос понна электротыллы но чагыр эстӥськонлы тарифъёсты будэтыны. Электрокужымлы чакламын 35 процентлы, газлы - 16. Соин валче, валамон ини, огшоры улӥсьёслэн но тыронъёссы йылозы. Со сяна будозы бензинлы дунъёс, одӥг литрез 10 манет пала сылоз. Нош бензинлэн дуныз йылэ ке, будэ вузъёслэн, сиён-юонлэн дунзы. Выт бичан сярысь кодексын чакламын огъя налоглэсь быдӟалазэ одӥг процентлы будэтыны но вань адямиослэсь огкадь бичаны. Узыръёс ас доходъёссэс ватыса воземен но налог тыронлэсь палэнскемен, соос понна, пе, калык мед тыроз. Серем ӧвӧл-а со? Кун Кенеш азе предприятиосын ужасьёс берло дыре пумитъяськыны шергес поталлязы, угось асьме республикаын заводъёс пумен ужаны-ӝутскыны кутскизы ни кадь вал. Но таяз учыре татчы вуэмын вал бадӟым предприятиосысь делегациос но. "Ижсталь" огазеяськонысь егит ужась А.Рудин ас мылкыдзэ тазьы вераз: - Мон али отпускын, озьы ке но, та ужрадлэсь палэнэ кылеме ӧз поты. Электрокужым кыскон ласянь "Ижсталь" - одӥгез бадӟымез предприятие. Электролы сомындалы дунъёс будӥзы ке, рабочийёслэн улонзы туж секыт луоз. Али гинэ шумпотӥськом ни вал дыраз уждун тыремзылы. Мар возьмасько та ужрадлэсь? Мын вал гань-гань уже но ӟеч мылкыдын отысь доре берты, кытын тонэ номырлы ёрмисьтэм семьяед возьма. Подшипникъёс поттон заводысь профкомлэн председателез но выль налог тупатонлы чутрак пумит: - Сыӵе налог юнматэмын луиз ке, вань уксё люкаськоз федеральной бюджетэ. Мон уг оскиськы, ужасьёслэн налоглы кошкем уксёзы берен предприятие ик берытскоз шуыса. Соин ик путёвкаос басьтыны но секытгес йӧтоз. Тӥяськоз страхованиея удыс. Та удыс гинэ шат асьмелэн куашкатэмын ӧй вал на? Заводын югдурмы сярысь ке верано, лякытгес луиз. Алигес, май толэзе, вань ужасьёслы уждунзэс будэтӥм. Татчы бадӟым делегациен лыктӥм. Кун Думае берло быръёнъёс дыръя куараосмес Ю.Маслюков понна сётӥм вал. Солы юн оским. Малпасько, Кун Думае быръем депутатъёсмы калыклэсь мылкыдзэ валалозы но улонэз уродмытӥсь законъёсты уз кутэ. Туннэ та ужрадысь туж адӟеммы потэ вал А.Волковез. Со но Федерацияя Советлэн ужаз пыриськылэ, озьыен, Тӧромы но отын эскероз выт бичан сярысь кодексэ пыртыны чаклам ватсанъёсты. Мед шӧдоз вылэм калыклэсь мылкыдзэ. Туж жаль, Кун Кенешлэсь Тӧрозэ адӟыны ӧз кылды. А.Волковлэсь выль законъёс пумысен малпанъёссэ озьы ик тодэмзы потэ вал му вӧй поттӥсьёслэн но. Мукет пумитъяськисьёс сямен ик соос но одӥг депутатлэсь но вылӥ кивалтӥсьлэсь вераськемзэс кылытэк кошконо луизы. Пумитъяськон ужрад час пала кыстӥськиз. - Туж возьыт асьме кивалтӥсьёсмы понна, - лек мылкыдын шуиз арлыдо воргорон И.Серов. - Кызьы калыкен уд вераськы! Озьыен, мар быгатод соослэсь курыны?! Профсоюзъёслэн кичӧлтӥсьсы Е.Орлов буйгатӥз: вань куронъёс, пе, тупен-тупен гожтэмын но Москвае келямын луозы. Ужрад туж шыпыт ортчиз, югдурез тӥясьёс, ог-огед вылэ узатӥсьёс ӧй вал. Т.БАННИКОВА. И.Серовлэн мылкыдыз бугыръяське. Шӧкыч Серем пыр Узырмиз Педор бускельзэ паймытӥз. Пунэмен коньдон куре ке, ноку но уг берыкты вал. Нош таяз учыре, кыл вератэк, 50 манет сётӥз. - Узырмид шат? - юа бускелез. - Оло, лотереяен коньдон утӥд? - Кышноелэсь ватскыса, гаражам вина юылӥ но, лачак буш ӟенеликъёс люкаськизы. Дунъёс будэм бере, суменак сдать кари но, юыны сюрс манет уксё люкай. Соин пунэмам коньдонме берыктӥсько, - валэктӥз Педор. Ӧд ке гыры... Эркемей кышнояськиз. Ӝытазе юиз, кышнозэ кылиськыны косӥз но вӧзаз выдӥз. Кузпалызлэсь кӧтсэ маялля но шуэ: - Вот таиз бусы ке бусы ини. Туж чебер... Мукет пала берытскиз но соргетыны кутскиз. Кыкетӥ уе но кышноезлы мусо кылъёс вераз но бабиз. Куинетӥ уе нош ик трос ӟизтӥз, кышнозэ кылиськытӥз но кӧтсэ маялля. - Вот та бусы ке бусы ини. Туж чебер... Кышноез ӧз чида ни, меӵкытӥз: - Эркемей, туннэ та бусыез ӧд ке гыры, мон сое фермерлы кузьмало... С. Широбоков. АРХИВЫСЬ ДОКУМЕНТЪЁСЪЯ Удмуртия ХХ дауре 1916-тӥ ар Германиен ожмаськон кутскем бере ик Россиысь крестьянъёслэн улонзы уката секыт луэ. Пиосты армие келян ласянь Вятской губерния, мукетъёсыныз ӵошатыса, куинетӥ интыын сылэ. Оже келямъёс пӧлысь ог 90 процентэз крестьянъёс луо. Озьы толэзь куспын гуртысь 100 сюрс пала мурт кошке. Фронтэ басьто тужгес чырткем валъёсты но. Крестьян хозяйство куашкан калэ вуэ. 1916-тӥ арын Вятской губерниын сю сюрс десятин мында музъем утялтытэк кыле, трослы кулэсме пудолэн лыдыз. Со сяна, гуртысь калыкез кужмысь кыско нюлэс коранэ, сюресъёс лэсьтонэ. Тужгес секыт югдурзы Сарапул, Глазов, Малмыж, Елабуга уездъёсысь крестьянъёслэн. Уго соос матын луо Иж но Воткинск заводъёслы, та вакытэ лэсьтӥськись Казань-Екатеринбург чугун сюреслы. Пу дасяло гужем куазен но. Нюлэскы кужмысь келяло, ужаны быгатӥсьёссэ сяна, пересьёсты, арлыдзы тырмымтэ егитъёсты, пичи нылпиё анайёсты. Секытлы чидатэк, тросэз крестьянъёс отысь пегӟо. Озьы, 1916-тӥ арын Елабуга уездысь волостьёсын тросэз улӥсьёс ас мылкыдзыя берытско гуртазы. Тольён волостьысь Норымской гурт обществоысь крестьянъёс чутрак пумит луо нюлэскы потыны, волостьысь старшинаез улляло. Пуромем калыкез буйгато-кышкато полициен. Та вакытэ ик властьлы пумитъясько Игра волостьысь куд-ог гуртъёсын улӥсьёс. Бугыръяськись крестьянъёслэн лыдзы син куспын йылэ. Соосын нюръяськыны интыысь властьлэн кужмыз уг тырмы ни. Глазов уездын гинэ 1916-тӥ арын кызь пол крестьян бугыръяськонъёс пуромо. Гурт калыклэсь улонзэ эшшо но шугомыто будӥсь вытъёс. Война кутскон аре соос шӧдскымон йыло, кылдо выльёсыз. Ожмаськон но соин валче калыклэн куанермемез матэктыто революциез. И.ЗАЙЦЕВА, Удмурт Республикаысь Кун архивысь отделэн кивалтӥсь. Ижысь пыӵал поттон завод. ИЖЕВСКЛЫ - 240 АР Кинлэн карез узыргес? Москваысь ВДНХ-ын ортчоз Россиысь городъёслы сӥзем выставка. Со радъямын, странаысьтымы улосвылъёс куспын эшлыко кусыпъёсты юнматон вылысь. Ижысь предприятиосын поттэм куд-ог вузъёсын вагон отчы келямын ни. Удмуртилы ваньмыз-ӧвӧлэз одӥгаз залысь 85 метр кузьда инты висъяське. Ижевсклы 240 ар тырмон азьын та ужрад ӵапак дырыз дыръя тупаз. Выставкае пырисько шоркарысь ваньмыз сямен интыысь (муниципальной) предприятиос. Векчи вузъёс сяна, отчы нуэмын машинаос, мотоциклъёс но. Мукетъёсыз азьын данъяськымон луоз ву тудӟонэз компьютерен эскерон системаен адӟытонмы. Мукет городъёсын таӵе выль амал уже уг кутӥськы на. Выставкаез учкыны мылкыд карисьёс Москвае мыныны быгатозы 7-тӥ�10-тӥ июне. Э.КУМАЧЕВА. ФУТБОЛ Вылӥе ӝутскизы Секытэн сётскиз вал туэ сезон понна Ижевскысь "Газовик" командалы куатетӥез вормон. Асьме футболистъёс Санкт-Петербургысь "Локомотивез" 2:1 лыдын "коказы". Нева дурысь спортсменъёс татчыозь пумиськонъёссэс ыштонъёстэк ортчытъязы вал. "Газовик" командаын тужгес но висъяськизы Амиров но Курилов. Нырысетӥ июне Удмуртиысь команда шудӥз Калининградысь "Балтикаен". Таяз учыре асьмелэнъёс вормизы 2:0 лыдын. Голъёсты пыртӥзы Эдуард Кобозев но Юрий Четеков. Табере "Газовик" нырысетӥ дивизионын куинь кужмоосыз командаос пӧлы пыриз. *** Футболэз яратӥсьёслы тодазы вайытӥськом тунсыко пумиськон сярысь. Туэ 12-тӥ июне 18 часысен "Динамо" стадионын пумиськозы Россилэн но Удмуртилэн огазеям командаоссы. Билет сылэ 20 манет. Н.ЛЯЛИН. ЖУРНАЛИСТЪЁСЫН ПУМИСЬКОНЪЁС Марсысь кузёос мед басьтозы вал Кыӵе асваньбурлы (собственность), али соос данак пумо но пӧртэм кузёос киын, туала экономикаын бадӟымгес саклык висъяно? Соизлэн яке таизлэн асваньбурлэн кулэлыкез герӟаськемын луыны кулэ экономикалэн куронъёсыныз, шуиз Кун Кенешысь Экономикаын политикая, инвестициосъя но асваньбуръя комиссилэн кивалтӥсез Раиль Галиахметов. Солэн верамезъя, адямиослы сокем зол ӧвӧл сюлмаськоно, кин киын асваньбур, сюлмаськоно кӧня коньдон пыртэ бюджетэ соиз яке таиз асваньбур. Ӵошатон понна депутат тодэ вайытӥз автозаводлэсь югдурзэ. Россилэн асваньбураз пыртэм бере автозавод ӟечгес ужаны, пе, кутскиз. Асьмелэн урод сяммы вань, шуиз Р.Галиахметов, ялан возиськиськом куашкан калэ вуэм предприятиосмы борды. Цыӵе югдуре вуэм предприятиосты коть Марсысь вуэм кузёос мед басьтозы, нош асьмеос пайдатэм асваньбурмес но палэнысь кузёослы вузаны ум дӥсьтӥське. США-ын но Китайын кунгож сьӧрысь вуэм кузёослэсь уг кышкало. 31-тӥ мае Кун Кенеш азе калык люкаськылӥз, озьы со соглаш луымтэзэ возьматӥз электротыллы но газлы дунъёсты будэтыны чаклам пумысен. - Кун Кенешысь депутатъёслэн со малпанзы ӧвӧл, Кун Думаысь депутатъёслэн. Соин ик асьме юрт азе-а меда лыктоно вал калыклы, - серекъяса сямен шуиз Р.Галиахметов. - Но дунъёсты будэтон пумысен тазьы шуысал: со - ӟеч уж ӧвӧл. Озьы ке но, та ужпум шоры котыр ласянь учконо ке, электрокужымлы дунэз будэтонлэн пайдаез но вань. Асьмеос чик но ум тыршиське электрокужымез шыръяны. Мон кӧня ке жалясько, Немцовлэн жилищно- коммунальной удысын ортчытыны чаклам воштӥськонъёсыз быдэсмытэк кылизы шуыса. Отын, кылсярысь, туж шонер малпамын вал, вуэз, газэз, электрокужымез шыръян вылысь, котькытын счётчикъёс но мукет приборъёс пуктылыны. Раиль Галиахметов пусъемъя, дунъёсты уг яра ӝутыны уждунэз будэтытэк. Арлэн пумозяз сиён-юонлы но вузъёслы дунъёс 30-35 процентозь будыны быгатозы, шуиз со. Трос коньдон кулэ луоз федеральной округъёсты кылдытонлы но, угось огез но губернатор уз быгаты ужаны аслаз чиновникъёсызтэк. Т.БАННИКОВА. "Вож тулкым" лагере конкурс Гажано пиналъёс! Йылпумъяськиз дышетскон ар, ортчизы экзаменъёс. Табере тӥледыз возьмало ини тунсыко пумиськонъёс но шулдыр шутэтскон нуналъёс. Кин сюлэмшугъяське аслаз гуртэзлэн, вордӥськем интыезлэн инкуазез сярысь, удмурт егитъёслэн "Шунды" дэменлыксы туэ но ӧте экологияя "Вож тулкым" лагере. Со ортчоз 20-тӥ июльысен 1-тӥ августозь Пичи Пурга ёросын. Шутэтскем сяна, лагерьын дышетозы экология удыслы, эскерозы-чаклалозы инкуазез, тодматскозы будосъёсын но пӧйшуръёсын, гурт калыклэн инкуазез утён йылолъёсыныз. Лагере кутӥсько 8-тӥ�11-тӥ классъёсын дышетскисьёс кутӥсько. Конкурсэ пыриськон понна таӵе юанъёслы валэктоно: 1. Кыӵе шер пумиськылӥсь будосъёс но пӧйшуръёс пумиськыло тӥляд гурт котырады? 2. Кыӵе пиоспуосты удмуртъёс сӥлы каро но малы? 3. Пумиськыло-а тӥ котырын лобась шыръёс (урткыӵъёс)? Малы соосты утёно? Гожтэтъёстэс ыстоно 30-тӥ инвожоозь. Адресмы: 426000, Ижкар, Советская урам, 1. Удмурт егитъёслэн "Шунды" дэменлыксы, "Вож тулкым" конкурсэ. "Шунды" дэменлыклэн правлениез. ШКОЛАЛЫ - 100 АР УЛОН ВОШТӤСЬКЕ, ДЫШЕТӤСЬ КЫЛЕ Туэ 11-тӥ июне 100 арессэ пусъе Можга ёросысь Комак школа. Ми апаеным но выныным татын 1948-тӥ�1955-тӥ аръёсы дышетским. Со тужгес секытэсь аръёс вал. Сокугес гинэ Быдӟым ож дугдӥз. Уноезлэн (милям но) дышетскисьёслэн атайёссы войнаын быремын. Улон но кулон одӥг радын сылӥзы. Дӥсяны дӥськут ӧвӧл, кутчаны - пыдкутчан. Сиён сярысь малпано ке, туннэ но пуш тыре, синкылиос пото на. Ярам, бакчае пыш кизё вал - солэсь кужзэ дӥськут, кенэмзэ вӧй карылӥзы. Уй-нуналэз валатэк, пичиос но, мӧйыос но гужем колхозын тыршизы, нош толалтэ нылпиос дышетскизы. Со аръёсы гуртын улӥсьёс ог- огзылэсь ӧз ик висъяськылэ кадь: узырез ӧй вал, ваньмыз одӥг выллем улӥз, шуысал. Котькудӥз 7-8 аресъем пинал, нокин косытэк, школае ветлӥз. Отӥяз кин ке дышетсконзэ куштоно луылӥз, семьяын ужась ӧвӧл шуыса. Нош тодон-валан басьтыны котькуд нылпилэн мылкыдыз туж бадӟым вал. Пичиысен ик ӟуч кылэз валась пинал капчиен дышетскиз. Секыт улон дышетсконлы бадӟым сюрес усьтӥз - котькудӥз валаз, дышетскытэк улонэд уз воштӥськы шуыса. Со сяна, школаын но жиль-жиль муртъёс дышетӥзы - войнаысь вуэмъёс. Котькудӥзлэн гадь тыраз орден-медальёсыз вал. Соос - улонлэсь курытсэ но, кузьытсэ но тыраз адӟем зэмос воргоронъёс. Со дышетӥсьёс ик гуртын - нырысетӥ интеллигенция, ваньмызлы адӟем карымон адямиос, уноез анай-атайёс луылӥзы. Кӧня валэктон уж нуизы соос калыкын но анай-атайёсын! Кӧня концертъёс, спектакльёс возьматъязы! Сыӵеен милям син азямы но сюлэмамы кылизы Комак школаын дышетэм дышетӥсьёс В.Е.Бельтюков, А.Г.Григорьев, В.М.Акмаров, М.Ф.Беленков, Г.Н.Тройников, А.Ф.Шмидт, А.И.Макаров, П.С.Степанов, Ф.А.Тюкалин, А.И.Миникаев, И.Г.Герасимов, А.Т.Богатырев но трос мукетъёсыз. Жаляса верасько: одӥгез но соос пӧлысь улэпез ӧвӧл ни. Нимысьтыз пусйысал со вакытэ ужам дышетӥсьёслэсь чидамзэс. Котькуд пиналлы соос "усьтон" шедьтыны тыршизы - урокын гинэ ӧвӧл, - улонын но: ведь уноез нылпиос дышетсконзэс но куштылоно луылӥзы. Сыӵе дыре но визьмо дышетӥсь быдэ вуымтэ пиналлы юрттылӥз. Та аръёсы пиналъёс школаямы удмурт но ӟуч классъёсын дышетскизы. Унозэ предметъёсты ми удмурт кылын дышетӥмы. Туж яратӥськом вал вашкала даурлэсь историзэ (дышетӥз Т.Н.Осипова (Будзиманова)), ботаникаез но географиез (дышетӥз А.Г.Григорьев), удмурт но ӟуч кылъёсъя урокъёсты дышетӥзы Вахрушев Юрий Павлович но Морозова Раиса Яковлевна. Ӟуч кылъя 6-тӥ-7-тӥ классъёсын М.Ф. Беленков дышетӥз. Ачиз - ӟуч, нош удмурт кылын ӟеч вераське вал. Паймымон дышетӥсь! Удмурт пиналъёсты ӟуч кыллы дышетонъя аслаз методикаез вал (нокытысь таӵе амалэз ӧй пумиталля ни дышетон удысын 40 ар ужатозям!) Котькуд нылпилэсь тодон-быгатонзэ ас сяменыз чакласа дунъет сётэ но, пинал кык кылэз тодэ шуыса, быдэс баллы вылӥ оценка пуктэ вал. Таӵе амал, валамон ини, котькуд дышетскисьлэсь мылкыдзэ ӝутэм сяна, юрттэ солы: пинал яратыны кутске та предметэз, солэн тросгес но ӟечгес тодэмез потэ неродной (ӟуч) кылэз. Нош кыӵе чебер гожъяське вал ачиз Михаил Филиппович! Ваньмыз солэсь адӟем карыса чебер гожъяськыны тыршиз. Дышетӥсь милемыз но, удмурт пиналъёсты, ӟучъёс азьын котьку ушъялляз, чебер но янгыштэк гожъяськыны быгатӥськом шуыса. Вералом на: та дышетӥсьёс милесьтым поколенимес ас шаердэ, атай музъемдэ гажаны дышетӥзы, соин данъяськон но солы юрттон мылкыд пыӵатӥзы. Таин ик герӟаськемын мӧйыосты, анай-атаез гажан но. Вордскем но будэм инты мӧйымыса но милемыз бордаз кыске, пичи дырысен гольык пыд бызьылэм интыосмес туннэ но адӟем потэ на. Лек война вылтӥ быдэсмем нылпиос покчи пушъемесь - чаляк ӝожомисесь, жалянэз валасесь будӥзы. Кӧня куректон но бӧрдон ваиз ми понна 1951-тӥ арын май толэзе арифметикаен дышетӥсьмылэн Сычугова Ираида Васильевналэн, 25 аресъем нылмуртлэн, сюлэмыз висьыса (порок сердца шуизы) кулэмез! Сое ми ноку ум вунэтэ. Нош кӧня кужымзэс но быгатонлыксэс сётыса тыршизы дышетӥсьёс милемлы коллективизм - ог-огдэ валаса ӵош ужан но дышетскон - мылкыд пыӵатон бордын! Арлы быдэ Можга городэ тулыс каникул дыръя художественной самодеятельностья смотре ветлӥськом вал. 12-14 аресъем пиналъёс 25 иськемез пыдын ортчылӥм! Комак школаысь дышетӥсьёс общественной улонэ ӟырдыт пыриськон мылкыд пыӵатӥзы. Бӧрысьгес, 1958-тӥ арын, та школаысь ик педагогической коллектив Поршурысь но Комакысь интеллигенциен но колхозысь егитъёсын ӵош, Можга районлэсь данзэ ӝутыса, республиканской смотре пыриськиз. Отын, мукет районъёсын ӵошатскыса, куинетӥ инты басьтӥз но смотрлэн лауреатэз луиз. Ваньмыз со Комак школаысь коллективлэн кичӧлтэмезъя вал! Жаляса верано луэ, туннэ улон урод пала воштӥськиз. Но оскыны кулэ, со ортчоз шуыса. Комак школаысь коллективез сю ар тырмон юбилееныз ӟечкыласа, визьмоесь, трос тодыны тыршись дышетскисьёс, ас удыссэс ӟеч тодӥсь дышетӥсьёс но бадӟымесь азинсконъёс сӥзиськом. Мед луоз куке но та школа авторской (В.Караковскийлэн, И.Тубельскийлэн выллем!) - гуртлы вылӥ интеллектэн калыкез будэтӥсь школа. А.ЖУРАВЛЕВА, 1953-тӥ арын сизьым классъем Комак школаез йылпумъям адями, Удмурт Элькунысь дано дышетӥсь, Кун премилэн лауреатэз. ВЫЖЫОСМЫ Чаня-Бияысь ватос Кемалась ӧвӧл быдэс шаерамы вӧлмиз Вавож ёросысь Зядлуд-Какся гуртысь вашкала коньдонэн ватос шедьтэм сярысь ивор. Тужгес вазез коньдон 1753-тӥ арын поттэмын, берез - 1812-тӥ арын. Но туннэ лыдӟисьёсты тодматэме потэ талэсь вазенгес шедьтэм ватосэн. Со вал Селта ёросысь Чаня Бия гуртын 1954-тӥ арын. Куинь егит нылъёс Клавдия Романова, Нина Кузнецова но Галина Фоминых толлы жалем пудо сиён дасяны гу копазы. Шӧдтэк шорысь Клавдиялэн лопатэз корт банка шоры мырӟиз. Пасяськыны шедем ватосысь бирды кадь чилясь коньдон жильдӥськиз, тросгес - азвесез. Нылъёс дуно шедьтосэз ӝегатскытэк сётӥзы соку гурт хозяйствоенызы кивалтӥсь И.А.Логиновлы. Соиз вашкала коньдонэз Гурт удысъя министерствоысь колхозъёсын лэсьтӥськон ужъёсты нуонъя инспекторлы Н.П.Новоселовлы возьматӥз. Нош нылъёсты оскытӥзы, соосты тау карон кузьымен пусъёзы шуыса (но верам кылзэс озьы ик ӧз быдэстэ). Та учыр сярысь пыр-почгес тодматскон вылысь пумиськылӥ Нина Логиноваен, Клавдиялэн сузэреныз. (Табере со Татаркина луэмын, улэ Ижевскын). Ниналэн верамысьтыз тодӥ, вашкала коньдон ньыль толэзь (!) ортчыса ке но, Краеведческой музее сётэмын вал. Ниналэн песятайёсызлэн верамзыя, Чаня-Бия дорысь ог кык иськем котырын гинэ 1500- тӥ аръёсы Мырза гурт интыяськиз. Татын сюй коркаосын удмуртъёс улӥзы. Кылемъёсызлэсь шӧдскымон висъяськиз гурт кузёлэн-язычниклэн пу коркаез. Отын со бадӟым семьяеныз улӥз, ваньзы ог 20 кузя лыдъяськизы. Кузё трос скал, вал, парсь, ыж, чипы-курег будэтӥз. Со выжыысь ик пиос, Чаня шур дуре яна потӥзы, луоз, Чаня-Бия починка кылдытӥзы. Кун архивысь черк книгаосын та гуртлэн нимыз нырысьсэ 1716-тӥ арын пусъемын. Ужме азинтыны юртто Национальной кун музейын ужасьёс, тужгес тау карем потэ татысь валтӥсь научной сотрудниклы А.Ю.Ардашевалы. Чаня-Бияын шедьтэм вашкала коньдон туннэ нуналозь та музее кельтэмын. Ваньмыз-ӧвӧлэз отын 193 коньдон лыдъяське. Тужгес вашкалаез 1525-тӥ арысь, Иван Грозный (1537-1584) вакытысь луэ. Одӥгез коньдон Михаил Федорович эксэй кивалтон дыре поттэмын. 11-ез - Петр И но эшшо одӥгез Петр ИИ вакытъёсысь луо. Вань ЪВИИ даур пумын но ЪВИИИ даур кутсконын поттэмъёсыз азвесь коньдон, 1701-тӥ�1705-тӥ, 1708-тӥ, 1711-тӥ аръёсын пусъемъёсыз. Национальной кун музейысь ужасьёслэн малпамзыя, та узырлык Михаил Федорович яке Петр И эксэйёс кивалтон вакытэ музъеме копамын. Селталы 400 ар тырмонэз пусйыку, 1996-тӥ арын, тросэз уг но оско вал, райцентрлэн такем вашкала луэмезлы. Чаня-Бия дорын шедьтэм ватос таӵе малпан- сюлэмшугъяськонъёсты сайя. Шедьтэм коньдон вера, Селталэн выжыосыз ӧжытсэ Иван Грозный вакытозь кыстӥсько шуыса. Озьы дауръёс ӵоже музъемын кыллем ватос шаермылэсь историысьтыз эшшо одӥг бамзэ усьтэ. В.ЛОГИНОВ, Чаня-Бияысь 1954-тӥ арын шедьтэм вашкала коньдон. 1954-тӥ арын мае ватосэз шедьтӥзы: Г.Фоминых, Н.Кузнецова, К.Логинова. Черк возьма юрттэт 1996-тӥ арын Иж Удмурт Епархиен кивалтӥсь архиерейлэн Николай Архиепископлэн кичӧлтэмезъя, Ува посёлокын пуктыны кутскемын святой Иоанн Кронштадскиез данъяса выль черк. Но коньдон ӧвӧлэн, сое лэсьтон дугдытэмын. Черклы туж кулэ лэсьтӥськон материалъёс: кирпич, цемент, ПГС, корт но мукет. Ӟеч уж борды кутскем муртъёс юн оско, юрттэт одно ик вуоз шуыса. Черклэн реквизитъёсыз: Иоанн Кронштадский храм, УРФ АКБ "Золото-Платина- Банк", г.Ижевск, БИК 049401723, р/с 40703810994790000902, ИНН 1821003476. Ой, шудо егит дыр! Гужемез нырысетӥ июнь мытэ ке но, со уно сюлмаськонъёс вае. Тужгес но школаез йылпумъясьёслы, уго соку кутско нырысетӥ экзаменъёс. Нош со бӧрсьы витё уно шугъяськонъёс - кыӵе сюрес быръёно азьланяз? Ӵапак 1-тӥ июне ми потамы Пичи Пурга ёросысь Баграш-Бигра но Норья гуртъёсы. Нырысетӥяз гуртын туэ 11-тӥ классэз йылпумъяло 13 егитъёс, нош Норьяын соос 48 кузя. Экзаменъёс кутскизы сочинение гожтон бордысен. Сётэмын вал укмыс тема. Уноез басьтӥськизы Бадӟым ож сярысь гожтыны. Уноез егитъёс дышетсконзэс азьланьтыны чаклало Удмурт университетын, медициная, техникая но гурт удысъя академиосын. Куд-огез пырыны малпало Можгаысь предучилищее, ветеринарияя колледже, Асанысь совхоз-техникуме, Ижысь вузкаронъя училищее. Мар бен, егитъёс, быръем сюресты шонер мед лёгиськоз, малпанды мед быдэсмоз, улонады ваньмыз мед пӧрмоз! Туспуктэмъёсыз В.Беломорскихлэн. ЖУРНАЛИСТЪЁСЫН ПУМИСЬКОНЪЁС Дурбасьтэм ӧвӧл дунтэм Таяз учыре журналистъёсын пумиськылӥз Удмурт Республикаысь Быръёнъя комиссилэн тӧроез Дмитрий Талантов. Та уже со быръемын туэ апрель толэзе гинэ ай. Соин со меӵак шуиз: "Пресс-конференция ортчытӥське юромо, журналистъёсын тодматскон понна". Быръёнъя комиссия выльдӥськиз. Табере татчы 7 юрист пыртэмын. Азьлояз кык гинэ вал. Тӧролэн кылъёсызъя, законэз тӥян учыръёсты шаплыгес но капчигес эскерыны луоз ни. Комиссилэн куинь кенешез ортчиз ни. Отын чаклазы вуоно ужпумъёссэс, эскеризы ивор вӧлмытӥсь ёзъёсын кусып радъянзэс. Комисси туж трос дырзэ висъяло "Удмурт Республикалы президент быръён сярысь" Законлэн инъетэзлы дунъет сётыны. Документэз депутатъёс нырысетӥ лыдӟонын кутӥзы. Чакламын быръёнэз 25 процентэн ортчытыны. Вормисе потэ сыӵе адями, кудӥз быръёнэ пыриськемъёслэсь одӥг ньыльмос куараоссэс люка. Вань мукет вариантъёс но. Но, кызьы ивортӥз Талантов, "кызь витьысь кызь витьсэ" процент нокыӵе законлы пумит уг луы. Тани Россилы президент быръёнын со ужпум чакламын. Отын лыдпусъёс 50 но 50 каремын. Нош улосвылъёсын нокыӵе лыдпусъёс пыртэмын ӧвӧл. Дмитрий Талантов пумиськылӥз Россия Федерациысь Быръёнъя валтӥсь комиссилэн тӧроеныз Александр Вешняковен. Соку Удмуртилы президент быръён сярысь законэ 14 ватсанъёс но воштонъёс пыртыны ӵектӥзы. Но соос бадӟымесь ӧвӧл. Президент бырйыку, бадӟым саклык висъяськоз газетъёслы, радиолы но телевиденилы. Котькудӥз ивор вӧлмытӥсь ёз нырысь ик тодматыны кулэ дунъяны. Дунъёсты вератэк статьяез печатлазы ке, газетэз ворсаны но быгатозы. Журналистъёс юан сётытэк ӧз чидалэ. Кызьы-о, пе, табере журналист котькудзэ аслэсьтыз малпанзэ уксё тырыса возьматыны кулэ-а? Быръёнъя комиссилэн тӧроез нырысь ма вераны ёрмиз. Собере гинэ валэктӥз: "Материалды кин ке понна дурбасьтэмлы кельше ке, соку тыроды". Азьвыл комиссилэсь вылезлы кык ужпумъёс кылизы. Огез - Кун Кенеше быръёнъёс 33-тӥ округъя. Кызьы тодмо, Октябрь ёросысь суд та округын быръёнэз умойтэмен лыдъяз. Но Россия Федерацилэн Вылӥ судэз ёрос судлэсь решенизэ дугдытӥз, выльысь эскерыны косӥз. Мукетыз учыр - 73-тӥ округъя. Отысь депутатэз Александр Фокинэз янгыше уськыто, быръён дыръя, пе, со трос кузьмаськыса ветлэм. Бадӟым уж усе комиссилэн пельпум вылаз. Тросэз со бордысь потэ уго: законэз тӥятэк ортчоз-а, уз-а Удмурт Республикалы президент быръён. Со бордын кужым -ваньзэ зэмлыко ортчытыны. А.АНДРИЯНОВ. Пӧсь нуналъёс вуизы Зэм, Удмурт кун национальной театрысь актёръёс понна пӧсь нуналъёс вуизы. Гужем гастрольёсы потан - со одӥгез тужгес умой сям. Ёросъёсын улӥсь калык уг быгаты уго пырак театре ӵем вуылыны: али коньдон, машиналы бензин ласянь секыт луиз. Соин ик гуртъёсысь сцена вылын шудон учкисьёс понна праздниклы пӧрме. Вераны кулэ, театрлы ортчем тол вылтӥ ужан капчиен ӧз сётӥськы. Азьвылгес дасям спектакльёсын потэм сяна, куинь выльёсыз бордын ужазы, куинь концерт программа дасязы: Выль арлы, 8-тӥ Мартлы, май праздникъёслы. Тол каникулъёс дыръя пиналъёс шумпотыса учкизы шунды ӝужан пал калыкъёслэн выжыкылъёссыя "Чудесный горшок" постановкамес, нош ёлка котырын соосты шулдыртӥзы Тол Бабай но Лымыныл. Актёръёс но, быдэсак пуктӥсьёс но уно кужымзэс сётоно луизы "Кикы нош силе но силе" но "Айна" спектакльёслы. Драматург Егор Загребин эпической драмазэ сӥзиз удмурт калыклэн быдӟым пиезлы Куӟебай Гердлы. Режиссёр-постановщик Александр Вершинин, суредась Валентин Белых, крезьгурчи Евгения Копысова, балетмейстер Владимир Мингалев но актёръёс сцена вылын возьматӥзы секыт адӟонэн пумиськем национальной героез. Та спектакль сярысь малпанъёс туж пӧртэмесь. Но умой соиз: нокыӵе кариськытэк, гань-гань гинэ учкисьёс ӧй вал; Гердлэн улон сюресэз котькудӥзлэн сюлэм пыртӥз ортчиз кадь. валтӥсь ролез шудӥсь Геннадий Бекманов сяна, оскымон образъёс кылдытӥзы Россиысь калык артистка Вероника Садаева, Удмуртиысь калык артистка Раиса Нефедова но артистка Ольга Зорина. Ас героинязылэсь лул пуштроссэ учкисьлы усьтыны тужгес но быгатӥзы кадь потэ В.Садаева но Р.Нефедова. Соос возьматӥзы: К.Гердлы тужгес секыт вакытъёсаз юн возиськыны юрттӥзы анаезлэн визьмась-нодъясь шуныт кылъёсыз но кырӟанъёсыз. Нош нырысетӥ удмурт нылкышно кылбурчилэсь Ашальчи Окилэсь образзэ мукет сямен усьтӥз О.Зорина. Куке Куӟебай бордысь "оскымон" эшъёсыз палэнскизы, Ашальчи пумозяз сылӥз, солы дурбасьтыса. Со небыт но лякыт гинэ ӧвӧл - кышкасьтэм но юн, зэмос интеллигент. Кызьы пусйиз литературовед З.А.Богомолова, "аслаз пьесаеныз Е.Загребин нырысьсэ поттӥз К.Гердэз дуннеысь сценической искусствое: солэн быдӟалаез туж син шоры йӧтымон". Та ортчем сезонмы вунонтэм кылёз "Айна" спектаклен но. Т.Чернова но В.Ушаков пьесазэс И.Гавриловлэн "Аннок" драмаезъя гожтӥзы шуэмын ке но вал, учкись адӟиз копак выль, номырин сурантэм спектаклез: "Анноклэн" кӧня ке гожъёсыз гинэ татын шӧдӥсько на кадь. Спектакльлэн режиссёр-постановщикез Удмурт республикаысь искусствоосъя дано ужась Василий Ушаков, суредасез республикаысьтымы искусство удысын дано ужась Владислав Анисенков, крезьгур гожтӥсез Николай Шабалин, эктонъёссэ пуктӥсез Ксения Русских, шудӥсь актёръёс, техника бордын тыршисьёс вань быгатэмзэс сётӥзы, та уж яркыт но сюлэме пыӵась, ас бордаз кыскись мед пӧрмоз шуыса. Пьесаын, озьы ик спектакльын, мылкыдъёс, пумен-пумен пуромыса, ваче вожмин шуккиськыса кошко, бадӟым кайгуозь вутто - мон шуысал, Шекспирлэн трагедиосаз выллем. Ноку вужмисьтэм тема - яратон но вожан, яратон но сое пумозяз утён - выль сямен усьтэ геройёслэсь характеръёссэс, соослэсь мукетъёсынызы ваче кусыпъёссэс. Спектакль быдэсак крезьгур пушкы выемын, геройёслэн мылкыдазы векчи силэн дырекъямез кадь шӧдӥське лопырскемзы но, ас пушказы шымырскемзы но. Трос калыко сценаос озьы ик усто пуктэмын. Ушъямон соиз но: режиссёр В.Ушаков рольёсты оскем егит актёръёслы - ӵапак татын соос куд-огез нырысьсэ асьсэды быгатӥзы зэмос возьматыны. Алексей Ложкин, Валентина Моисеева, Елена Сунцова, Наталья Тур, Валерий Мадзеков ас геройёссэс яратыса шудӥзы. Учкись синмаськиз Игорь Моисеевлы. Солэн героез ӟеч сямо геройлы пумит сылэ, ассэ вормонтэм мылкыдыныз сэрен виро уж ке но лэсьтэ, та героез валаськод но жаляськод, оло, яратӥськод но - сокем быгатӥз актёр роляз пырыны. Котьку сямен ик синмаськымон шудӥзы тодмо но сӥё-дано артистъёсмы Валентина Загуляева, Раиса Нефедова, Леонид Романов. Шудэм но крезьгурен улӟытэм борды туж тупаса "лякисько" на удалтэм дӥсьёс, быдэсыз оформление. Со лэсьтэмын условной шуон амалэн, странаысьтымы бадӟым театръёсын кадь. Нош дӥськут - синмез кыскись, удмуртлы тупась, ас вакытэзлэн тодметъёсыныз. Мон шуыны быгатӥсько: таӵеез асьме театрын ӧй вал на. "Айна" спектакль кӧня ке пол гинэ мынӥз ай, но мон оскыса верасько: солэн сюресэз чаляк уз уриськы - национальной театрмылэн историяз пыроз зарни букваосын. Тани кыӵе дунъет сётӥзы солы Венгриысь куно тодосчи Йожеф Орбан, Челябинск университетысь профессор, технической наукаосъя доктор профессор Л.Д.Загребин, технической университетлэн проректорез В.А.Никулин: "Артистъёслэн шудэмзылы синмаськыса бырим, соослэн школазы - столицаынлэсь улын ӧвол. Озьы ик медло!" Театр катанчизэ возъяз. Нош гуртын улӥсьёс понна со усьтӥськиз гинэ ай. Кӧня ке бригадаос пӧртэм ёросъёсы потӥзы, толэзен ӝыныен ужалозы соос отын. Асьме учкись яратэ комедиез. Сое лыдэ басьтыса, сюрес вылэ поттӥм "Парсьпи но эмеспи", "Яратон уг пересьмы" спектакльёсыз. Та берлоез ужмы, лирической комедия, уно учкисьёслэн куремзыя берыктэмын ӟуч кылэ, сое туж шуныт пумитало республикамылэн палэназ но. Озьы ик кельшымон пуктэмын Т.Ардашевалэн но Е.Загребинлэн пьесазыя "Тӧдьы льӧмпу улын" мелодрама. Г.Бекманов кивалтэм улсын дасямын нимысьтыз концерт программа. Гастрольёсмы туэ ортчозы асьме республикаысь Каракулино, Вавож, Воткинск районъёсын, озьы ик Башкортостанын, Татарстанын, Марий-Элын, кытын уло удмуртъёс. Шонерзэ вераса, питранъёс вылын улон, гуртысь гуртэ кӧчылыса ветлон - капчи уж ӧвӧл. Но куке артистъёсмы адӟо учкисьёслэсь чилясь синъёссэс, сюлэмазы тылгизьы кенжытыны быгатэмзэс, соку шуг-секытэз но вунэто кадь, асьсэлэсь малы но кинлы ужамзэс дунъяны кутско. Городэ кылем артистъёсмы али ужало нылпиослы спектакль бордын. Гужем лагерьёсын шутэтскисьёс понна пуктэмын луоз ӟуч кылын "Все мыши любят сыр" вжыкыл, со берыктэмын венгер кылысь. Режиссёр кариськыса татын кужымзэ эскере актёр Андрей Сергеев. Собере ини коллектив шутэтскоз, выль кужым люкалоз. Вуонояз сезонэ уго кутскоз ни театрлэн юбилеезлы ӟырдыт дасяськон. Анна ЕВСЕЕВА, Удмурт кун национальной театрлэн литературая люкетэныз кивалтӥсь. ИСТОРИЫСЬ ЧУРЪЁС Гитлер, Сталин но сникерс Ваньмызлы тодмо: Быдӟым Отечественной война 55 ар талэсь азьло йылпумъяськиз. Асьмеос трос дышетӥм ни историез. Солэн урокъёсыз юртто секыт югдурысь потыны. Озьы ке но, кыкетӥ мировой войналэн тросэз чуръёсыз шараяськемын ӧвӧл на. Тани огез гинэ: 1939-тӥ арын фашистской Германия асьме кунлы кредит сётэм. Берло дас вить ар ӵоже трос гожъязы ни Германия но СССР вискын вузан-басьтон сярысь огкыл тупатэм пумысен. Нош кредит сярысь шыпыт улӥзы. Весь вераллязы: Гитлер Сталинэз пӧяз, нош соиз войналы кулэ луись вузъёсты фашистлы келяз. Кызьы тодмо, граждан ож ортчем бере, егит Кенешо властьлы туж кулэ вал кредитъёс. Но сое нокин но ӧз сёты. 20-тӥ аръёсы СССР, Версаль огкыллэсь рос-прос луымтэзэ лыдэ басьтыса, юн кусыпъёс возиз Германиен. Соку немецъёс асьме кунлы ӟеч техника но технологиос вузаллязы. Гитлер властез киултэм бере тодмо луиз: Германиез паськытатыны туртто Кенешо Союзлэн музъемез чотын. Соку СССР немецъёсын вузкаронэз дугдытӥз. Шунды пуксён палась кунъёс агрессорез дугдытыны ӧз выре, пумит но ӧз кариське. Мылкыдзэ гинэ небӟытыны турттӥзы. Угось капиталистъёслэн СССР-ез кекатэмзы потэ вал, но фашистъёслэн киынызы. Огшап улыса, Гитлерлы кулэ луиз кӧня ке дырлы коммунистъёсын кусыпъёсты улӟытыны. Сталин ӟеч валаз, со огдырлы гинэ шуыса. Вань кужымзэ понӥз та югдурысь кунлы пайда поттыны, войналы дасяськыны. 1939-тӥ арын 15-тӥ августэ фашистъёс СССР-лы вазиськизы ог-огзы вылэ урдскылонтэм пумысен пакт юнматыны. Ӟуч правительство соглаш луэмзэ вераз, но со понна немецъёс асьмелы кредит сётыны кулэ вал. Кык нунал ортчыса ини Германия СССР-лы кредит висъяз. Та пунэмаськон асьмелы зол юрттӥз, малы ке шуоно, араз 4,5 процент гинэ тыроно луиз. Кредитлэн быдӟалаез 200 миллион марка вал. Соку ик странаос вузкаронъя огкыл гожтӥзы. Соя немецъёс асьмелы кык ар куспын 120 миллион марка тыр оборудование келязы. Кытчы со уксёез кутыны малпамын вал? Та юан туннэ тужгес но лэчытэз. Угось али басьтэм кредитъёсмес быдэсак сямен сникерсъёслы, курег макесъёслы, тампаксъёслы быдтӥськом. Нош кӧнязэ лушкало? Вузкарон сярысь документъёсын адӟиське, Германия асьмелы вылӥ ӟечлыко техника вуза вылэм шуыса. Вераны кулэ, со тросэн ӧз поттӥськы. Ваньмыз сямен со пыӵал тӥрлык дасян материалъёс яке ожмаськон арбериос луо. Нырысетӥ августозь 1940-тӥ арозь немецъёс кредит чотын СССР-лы 44,9 миллион марка тыр пыӵал тӥрлык но ожмаськон техника сётӥзы. Соос пӧлын самолётъёс: "Хенкель- 100", "Мессершмитт-109", "Мессершмитт-110", "Юнкерс-88", "Дорнье", "Бюккер- 131", "Бю-133", "Фокке-Вульф". Со сяна - самолёт лэсьтон арбериос, 211 миллиметръем секыт гаубицаос - кык комплект, 105 миллиметръем зенитной пушкаос - одӥг батарея, шоро-куспо "Т-3" танк, "Лютцов" крейсер но мукет. Ваньмыз та юрттӥз Горд Армилы вуоно тушмонэзлэсь быгатонлыкъёссэ эскерыны, ожмаськон тӥрлыксэ дышетыны. Озьы ик юрттӥз на асьме ожмаськон техникалэсь ӟечлыксэ будэтыны. Ватонэз ӧвӧл, СССР-лэн инженерной базаез ляб вал. Ӧз тырме конструкторъёс, технологиос лябесь валоин сэрен СССР ожмаськон тӥрлык поттон понна кунгож сьӧрысь лицензиос басьяз. Конструкторъёс но технологъёс дышетскизы капиталистъёслэн техниказы вылын. Табере куашкало асьмелэн тодмо конструкторской бюроосмы. Инженеръёс но конструкторъёс китай но турция ӟустыриен базаръёсын вузаськыса сыло, ыштӥськомы тужгес но визьмо "йыръёсмес", вылӥ квалификациен ужасьёсмес. Ваньзэ выльдыны трос аръёс кулэ луоз, оло, выльысь кутскыса но лэсьтоно луоз ай. Таин гинэ вань кусыпъёс ӧз быре. СССР Германиен вузкарон сярысь эшшо огкылъёс гожтӥз на. 1941-тӥ арозь 22-тӥ июнёзь немецъёс асьме кунлы 409,1 миллион марка тыр оборудование келязы. Со пӧлысь 81,5 миллион тыр - ожмаськон тӥрлыкъёс. СССР фашистъёслы трос гинэ улонлы кулэ луись вузъёс (стратегической сырьё) келяз. Но сое Германилэн озьы ик мукет кунъёслэсь но басьтэмез луэ вал. Одӥгзэ пусъёно, дыр. Куке дуннеын войналэн зыныз вӧлдӥське вал ни, кинлэсь ке кредит басьтыны - со подвиг. Уката но вуоно тушмонэдлэсь. Озьыен, Сталин немецъёслы пумит дасяськиз войналы немецъёслэн юрттэменызы валче. Со историысь учыр. Сое качыен уд ванды. 1959-тӥ арын И.В.Сталинлэн вордскемез дырысен 80 ар тырмонлы сӥзьыса, Уинстон Черчиль Лордъёслэн палатаязы вераськиз. Тани ма со шуиз: "Сталин со сыӵе адями, кудӥз аслэсьтыз тушмонъёссэ быдтылӥз аслаз тушмонъёсызлэн киосынызы ик. Милемды но пыриськытытӥз империалистъёслы пумит ожмаськонэ. Со вакытэ ик асьмемыз шара шуэ вал "империалистъёс". История трослы дышетэ, туннэ но соя кариськыны косэ. И.ОБРАЗЦОВ, история наукаосъя кандидат. Можга кар. Парадын - сэзьёс, кышкасьтэмъёс Милицилэсь нуналъёссэ пусъён шаерамы выль ужрад ӧвӧл ни - туэ со витетӥзэ ортчытӥськиз. 1-тӥ�4-тӥ июне шоркарамы улӥсьёс синйылтытэк ӧз кыле, луоз, пӧртэм- пӧртэм формаосын дӥсяськем егит пиослэсь, воргоронъёслэсь ульча кузя йыг-йыг вамышъямзэс. Озьы соос возьматӥзы кадь: котькыӵе кышкыт учыре но ми тӥледлы юрттыны дась, ми тӥледын артэ. Нырысь нуналаз ӝыт Шор площадьын МВД-лэн Ижысь гарнизонэзлэн но правоосыз утёнъя нимысьтыз техникалэн парадзы вал, татын ик ортчиз спортлэн служебно-прикладной удысъёсызъя эстафета. Кышкасьтэмъёсты, сэзьёсты адӟыны уно калык люкаськиз: соос пӧлын тросэзлэн пиоссы, агайёссы-вынъёссы вань. Парадлы дась луэмзэс возьматыса, Правительстволэн юртэз азе чеберак султытӥзы "коробкаоссэс" Россиысь МВД-лэн юридической институтэзлэн Ижысь филиалэз, Сюрес вылын кышкытлыклэсь утиськонъя кун инспекция (ГИБДД), Патрульно-постовой служба (ППС), Тылпуэз алонъя но кысонъя кун управление (УГПС), Россиысь Юстицияя министерстволэн пытсэтын пукисьёсты кыл кутытонъя Удмурт Республикаысь управлениез, Удмурт Правительствоысь Шугадӟонъёслэсь утиськонъя министерство но мукетъёсыз. Та нуналэ пӧсь шунды шорын тужгес сэзь, батыр пиосмылэн гадь вылазы воректӥзы орденъёс, медальёс. Правительстволэн Тӧроез Н.А.Ганза, Россилэн Президентэзлэсь Указзэ лыдӟыса, Можга городысь майорлы Александр Земцовлы гадь вылаз бырттӥз Мужество орден. Кышкасьтэм луэмзы понна медальёс басьтӥзы Юрий Михайлов но Игорь Бессольцын. Данъян грамотаос сётэмын Василий Перевощиковлы, Владимир Зяблицевлы, Александр Касьяненколы, Алексей Кузнецовлы но Виктор Баймаковлы. Удмурт Республикаысь дано юрист луиз Владимир Алексеев. Культурая дано ужась луэменызы ӟечкылазы Лариса Чистяковаез но Любовь Аюповаез, МВД-лэн культурая учреждениосаз ужасьёсты. Та нунал тупаз Нылпиосты утёнъя калык куспо нуналэн. Соин ик нылпи суредъёсъя конкурслы йылпумъянъёс лэсьтэмын вал. Ож темаез тужгес умой возьматӥллям Таня Галямова, Наташа Петрова, Павел но Артём Сазоновъёс. Соослы кузьымъёс сётӥзы. Та ӝытэ ик парадын сылӥсьёс азьын "дымка шудонъёс" кариськыса туж чебер эктӥзы "Пинал принцессаослэн школаязы" ветлӥсь нылъёс. Республикамылэсь Конституциезлэсь но Законъёслэсь быдэсъяськемзэс чакланы-эскерыны дась луэмзэс веразы 15 судебной приставъёс. Присягаез кутӥз юстицияя министр В.С.Осипов. Маршен, чот-чот вамышен ортчизы Пушкинской ураметӥ милицилэн вань ёзъёсаз службазэс нуись пиос. Кӧня ке улыса, соос бӧрсьы вырӟиз техника... Нош тужгес но калыкез бугыртӥз эстафета-ӵошатскон. Сизьым команда нюръяськиз, вормисе потон понна. Правительстволэн юртэз дорысен кутскыса котыръязы Арсеналэз. Бызьылӥзы противогазэн, нимысьтыз дышетэм пуныосын, "куасэн", велосипедэн... Машиналэсь питранзэ ӝоггес воштыса гылӟыны дыртылӥзы... Милициысь шӧртчиослы юрттӥзы тодмо спортсменъёс, калык куспо классъем мастеръёс но. Самой шаплы бызьылӥсь шуыса ялэмын Елена Богданова. Солы "кузьым" - 5 сюрс манет. Ӟырдыт нюръяськыса вормисе потӥзы пытсэтын пукисьёсты кыл кутытонъя полкысь пиос. Кыкетӥ интыын - патрульно- постовой служба, куинетӥ - ДПС. Кунпуш ужъёсъя министр В.Ф.Щербаков вормисьёслы кузьмаз телевизоръёс но магнитофон. 3-тӥ июне нуназе Ижысь урамъёсын, площадьёсын, летний садын гудыръязы духовой оркестръёс. Шудӥзы Екатеринбургысь, Казаньысь, Тюменьысь но шоркарысьтымы военной музыкантъёс. Нош Шор площадьын Лондонысь дирижёр Джеффри Брэнд кивалтэм улсын вал плац-концерт. Ньылетӥ нунал йылпумъяськиз "Газовик-Газпром" стадионын "Милям уг поты ыбылэммы" шуыса нимаськись бадӟым, шукырес праздникен, фейерверкен. Т.СИДОРОВА. ЖУРНАЛИСТЪЁСЫН ПУМИСЬКОНЪЁС Партия вань, лэсьтоно политика "Единство" огазеяськон кужымзэ юнматэ но юнматэ. Май толэзьлэн пумаз Москваын солэн ӧтчамез ортчиз. Отын огазеяськонэз партия каризы. Нимыз ӧз воштӥськы. Но воштӥськиз солэн ужан радэз. Россилэн котькуд улосвылысьтыз ыстэм адямиосыз отчы пыриськизы. Удмурт Республикаысь ӧтчаме дас адями ветлӥз. Вераны кулэ, ньылез соос пӧлысь удмуртъёс. Та ужрадэ пыриськемзы сярысь журналистъёслы мадизы "Единстволэн" Удмуртиысь ёзэзлэн азьмынӥсез Николай Хохлов, солэн воштӥсьёсыз Сергей Беркутов, Энвиль Касимов но Леонид Гонин. Н.Хохлов республикаысь Правительстволэн тӧроезлэн воштӥсез луэ, Беркутов но Касимов - Кун Кенешлэн депутатъёсыз. Озьы ик малпамын со: "Единство" властьлэн партиез мед луоз. Со сярысь вера Россилэн Президентэзлэн Владимир Путинлэн ӧтчамлэн ужаз пыриськемез но. "Единство" огазеяськонлэн азьмынӥсез Сергей Шойгу вал. Нош "Единство" партиен кивалтоз Борис Грызлов. Но со вакыт ик министр Шойгу партилэн азьмынӥсез кыле. Кун ужез солы уг лэзьы партиен кивалтыны. "Единство" пумен огазея ни пӧртэм кужымъёсты. Партия борды итӥськизы ни НДР, ПРЕС но "Вся Россия". Огкадь мылкыдзы ӧй вал НДР пумысен. Солэсь адямиоссэ партиен кивалтон удысэ бырйыкузы, "Единстволэн" ог люкетэз пумит луиз. Кызьы пусъемын вал ӧтчамын, партилэсь радъёссэ ялан чылкытатыса возёно. Зол пуктоно дисциплинаез. Тае кылыса, журналистъёслэн юанзы кылдӥз: уз-а лу "Единство" КПСС-лы укшась партия? Кызьы валэктӥзы, КПСС кадь нокин но ужез радъяны умой уг быгаты на. Соин солэсь ӟеч палъёссэ "Единство" аслыз басьтоз. Йылаз-пумаз вуттымтэ на партие пыремъёслэсь уксё (взнос) басьтон пумысен ужпум, уго кун бюджетысь партилы одӥг манет но уз висъяськы. Вносъёсты тыроно шуизы ке, таиз ласянь "Единство" КПРФ-лэсь лябгес луоз. Россиысь 127 сюрс адями партие пырыны куриськон гожтӥ ни, Удмурт Республикаын сыӵеос кык сюрс пала. Ӧтчамын кенешизы "Единстволэсь" аслэсьтыз газетсэ печатланы. Потоз со Удмуртиын но. Кыӵе со луоз - али потӥсь газетэз басьтозы-а яке выльзэ поттозы-а - таизэ эскерозы на. Но республикаысь ёзэн кивалтӥсьёслэн малпамзыя, соку гинэ газет пыр зэмлыкен тодматыны луоз. "Единство" быдэс Россиын али нырысетӥ интые потэ. Оло, Удмурт Республикалы но президент быръёнын та партилэн мылкыдыз валтӥсез луоз. Али шуг вераны: асьсэлэсь адямизэс ӵектозы-а соос яке кинлы ке дурбасьтозы-а, но, кызьы ивортӥз та ужпумез тодӥсь адями, "Единство" дась аслэсьтыз муртсэ ӵектыны. Со Удмуртиын туж тодмо кивалтӥсь. Аслаз данэзъя Кун Кенешлэсь Тӧрозэ Александр Волковез быръёнын ортчыны но быгатоз, дыр. Юанъёс кылдо ай Павел Вершинин пумысен. Сётэм дыр куспын "Единстволэн" ӵектоно кандидатэз ассэ рос-просгес возьматӥз на ке, республикалэн азьвыл премьер-министреныз ӵошатскыны быгатоз. Ужпум мукетыз бордын: "Единстволэн" адямиез президент быръёнэ пыриськон сярысь мылкыдзэ нокытын ӧз поттылы на. Партилэн республикаысь ёзэзлэн кыкез азьмынӥсьёсыз Кун Кенешлэн депутатъёсыз луо бере, журналистъёс Удмуртилы президент быръён сярысь закон пумысен юалляськизы на. Сергей Беркутовлэн кылъёсызъя, "Единстволэн" политикая кенешез 50 но 50 процентъёс вариант понна сылэ. Вань партилэн дисциплинаез, со понна кыл кутоно. Та вакытэ Кун Кенешын депутатъёслэн группазы усьтӥське. Но депутатъёс "Единство" фракциысь уг пото. 25 но 25 процентъёсты С.Беркутов властьлэн "висёнэз" шуиз. Куке калык уг лыкты быръёнэ, со властьлы уг оскы, уг адӟы солэсь калык понна сюлмаськемзэ. Котькудӥзлэн кандидатлэн азьпалан сылӥсь ужпумез - огазеяны но ас палаз карыны бырйисьёсты. Калык оскиз ке, 50 процентлэсь уно пол тросгес лыктозы. Таиз законлэн проектэз - со син вотсан гинэ. Туэ ик ноябрь толэзе "Единство" партилэн кыкетӥ ӧтчамез ортчоз. Отын эскерозы ужан программаез. Али эскеро пӧртэм ӵектонъёсты, радъяло быдэстоно ужпумъёссэс. А.АНДРИЯНОВ. Пумиськон Пичи Пурга районысь Чемошур гурт быриз 1979-тӥ арын. 1925-тӥ арын кылдэм гуртын куке-соку 25 юртъер вал. Отын улэмъёс туэ пумиськозы 18-тӥ июне. Люкаськон инты тодмо - Чемошур бервылэ пуктэм цинк юбо. Таӵеез - нырысьсэ Удмурт Республикаысь Кун Кенешлэн Тӧроез Александр Волков но Правительтсволэн Тӧроез Николай Ганза сюлмысьтызы ӟечкылало но шумпотэмзэс верало Россиысь Наукаосъя академилэн Урал люкетысьтыз прикладной механикая институтлэн директорезлы Алексей Матвеевич Липановлы. Нырысьсэ асьме шаерлэн историяз тодмо учёноез, техника наукаосъя докторез, профессорез такем вылӥ дунъязы. Со луиз Россиысь Наукаосъя академилэн действительной членэз (академикез). Ракетаос поттон удысын А.М.Липанов нимо-дано адями луэ. Бадӟым быгатонлыкъёссэ со возьматӥз Ижысь механикая институтлэн ректорез но Россия Федерациысь вылӥ тодон- валанъёс басьтонъя министрлэн воштӥсез луыса ужакуз. Россиысь Наукаосъя академилэн Урал люкетысьтыз но республикаысь вылӥ кивалтӥсьёслэн ӧтемзыя, дас кык ар талэсь азьло учёной берытскиз Удмуртие, кылдытӥз Наукая бадӟым центр. Та дыр ӵоже республикаысь академической учреждениослэн лыдзы куинь пол йылӥз. Туж кулэ, валтӥсь программаосты дасянын со валаса огазеяны быгатэ шаерысьтымы уно учёнойёслэсь тодон-валанъёссэс. Кун Кенешлэн но Правительстволэн нимынызы А.Волков но Н.Ганза Алексей Матвеевич Липановлы тау каро вань сюлэмзэ, мылкыдзэ сётыса тыршемез понна, сӥзё бадӟым шудбур, юн тазалык, ужаз выль азинсконъёс. Е.НИКОЛАЕВА. Суредъёс пачылмо шунды сиосын Суреда Даша. Пичи ки улысьтыз пазьгисько ненег шунды сиос. Музъемез быдэсак шобырскемын сяськаосын: гордъёсыныз, ӵужъёсыныз, чагыръёсыныз. Одӥгаз со сяська пушкы интыяськемын нылашлэн вордӥськем дорез, Удмуртиез. Суреда Алеша... Кин-о уз шумпоты, пияшлэн аслаз дореныз инкуазез лыдъямезлы. Тӥни кыӵе муспотон пӧрме солэн кузь пелез. Суредало Лена, Костя, Артем... Кун Кенеш азьысь площадь нылпиослэн турлы малпанъёсынызы, осконъёсынызы шобырске. Удмурт Республикаысь Кун Кенешлэн депутатъёсызлэн "Единство" фракцизылэн нылпиос понна радъям ужрадэз зэмос праздниклы пӧрмиз. Сюрес вылын суреданъя конкурсэ пыриськизы шаерысьтымы ог 200 пала нылпиос. Нылпиосты утён нуналэн пичи суредасьёсты ӟечкылазы "Единство" фракцилэн членъёсыз Даниил Белоголовкин, Наталья Харина, Олег Кузьменко, Юрий Кайгородов, Юрий Соболев, Энвиль Касимов. Пиналъёсты соос небыт шудонъёсын шумпоттӥзы. Нош "Ижмолокоын" ужасьёс нылъёсты но пиосты мороженоен утялтӥзы. Тужгес ӟеч суредъёслэн авторъёссы нимысьтыз синпель кузьымъёсын пусъемын. Суредало Денис, Алена... Ӧвӧл суредъёсын ракетаос, гомась тыл, вир кисьтон. Пиналъёслэн суредъёссы чылкытэсь но чебересь. Соос кема дыр ӵоже депутатъёсты тодазы вайытозы на кин понна ужаны кулэ луэмзэс. Э.КУМАЧЕВА. Гербер луоз Селталан Удмуртъёслэн инмарзы инкуазь вал бере, валамон ини, соос вӧсяськылӥзы- шулдыръяськизы, быдӟым инмарлы кузьым но сётъязы инкуазьлэн берытскон, синмаськымон чебер вакытаз, куке кутско яке йылпумъясько бадӟым ужъёс. Тани, верано ке, тулыс луэ Вӧй дыр (скалъёс кунян ваё, гуртын выль вӧй потто), Дӧдьы куштон, Йӧ Келян. Но тужгес бадӟымез праздник - Гуждор, Геры поттон. Со нуналъёсысен, сюлмысь рос-прос вӧсяськем-шулдыръяськем бераз гурт калык потэ гырыны-кизьыны. Гырон-кизён ӵемысь кыстӥське быдэс толэзь ёрос. Собере гурт калыклэн пичияк кысык ужез быре, малы ке шуоно, турнаны потон дорозь кыле на кӧня ке арня. Удмуртъёс бадӟым тулыс ужъёсты пусъё Геры бер, Гербер, Гырон быдтон праздникен. Нош бигеръёсын артэ улӥсь удмуртъёс сое Сабантуй шуыса но верало. Та бигер шулдыръяськонлэн пуштросэз сыӵе ик. Та нуналэ быдӟым инмарлы сӥзьыса вандо оштрак яке мукет пудо-живот, пӧзьто сӥлен ӝук. Нуназе котыр, сӥлен ӝукез Бадӟым вӧсясь вӧсям бере, ваньмыз ик Вӧсяськон лудэ (Кереметэ) люкаськемъёс сиё-юо, ог-огзылы шудбур сӥзё. Кӧня ке улыса, палэнын кылӥсько ини кырӟам но арган куараос. Шулдыръяськон умойгес пӧрме, эктон-кырӟан-шудонъёсты кутске ке вӧсясь, нош ӵошатсконъёсты - солэн матысь эшъёсыз. Огдыре Герберлэн вашкала шӧмыз бырыны кутскемын вал ини. Сое одӥг кадь ортчытъязы удмуртъёс, бигеръёс, ӟучъёс, нимазы но одӥг сямен бездыт - Вылазка шуыса. Табере сое быдэс республикаен ортчытъяськом, вашкала сяменгес. Герберлэн аслаз кырӟан-эктонъёсыз но вань, соосты возьматъяло "Инвожо", "Ожо-вожо", "Ягдор, "Гуждор" удмурт ансамбльёс. 1998-тӥ арын элькун Гербер ортчиз удмуртъёслэн быдӟым пизылэн Куӟебай Гердлэн вордскем палъёсаз - Вавож ёросын, ортчем арын тодосчилэн Георгий Архиповлэн будэм дораз - Пичи Пурга районын. Нош туэ праздник луоз Селталан. Кытын вордскизы тодмо адямиосмы композитор Герман Корепанов но суредась Леонид Прозоров. Николай ВОЗИСОВ. Потэ-а мынэмед Анапае? Вуизы пиналъёсмылэн кема возьмам каникулъёссы. Кызьы соос ортчозы? Со тросэз мӧйыос бордысь но потэ. Пиналъёслэсь тазалыксэс юнматон понна туэ Ижевск городлэн бюджетысьтыз ньыль но ӝыны миллион манет висъямын. Со сяна, социальной страхованиея ёзъёс июнь толэзе та ужрадъёсты ортчытонлы 6 миллион манет сётӥзы. Кӧня сётозы на июль но август толэзьёсы - со сярысь вераськыны вазь на. Та дыре Ижысь 14 нылпи лагерь пиналъёсты дораз кутыны дась. Пиналлэн отын шутэтскон нуналэз 131-189 манет тыр усе. Та мында коньдон висъяны луонлык шедьтӥсьтэм анай-атайёс, нылпиоссэс Ижысь школаосын нуназе ужась лагерьёсы интыяны быгатозы. Нылъёсты но пиосты возьмало лымшор лагерьёс - Краснодарын, Анапаын, Гелинджикын. Отын тазалыксэз юнматозы пиналъёс, эмъясьёслэн курон-гожтон кагазъёссыя келямъёсыз. Анай-атайёс путевкалэн дунызлэсь 10 процентсэ гинэ тырозы. Озьы Анапае но Геленджике шедён 5,5-6,5 сюрс манет сылэ ке, шыръяно луоз 500-600 манет гинэ. Анай-атайтэк будӥсь нылпиос азьло аръёсы лагерьын одӥг толэзь ӵоже шутэтскылӥзы ке, туэ соос куинь толэзьзэ ик улозы. Э.ВАСИЛЬЕВА. Пӧсь сюлэм Алнаш ёросысь Туймыйыл гуртысь Михаил Федорович Перевощиковез пичиез но, мӧйыез но тодэ. 1938-тӥ арын Мишаез эшеныз Василий Майшевен ӵош келязы Киров чугун сюрес лэсьтонэ. Нош 1942-тӥ арын 21-тӥ августэ со вамыштӥз ӟырданы кутскем музъеммес утьыны. Кык толэзь куспын Ярославльысь лагерьын тодматскиз станковой пулемётэн но мукет пыӵал тӥрлыкен. Музъем-анаймес утьыны кыл сётӥз но вуиз 71-тӥ Гвардейской Краснознамённой стрелковой дивизилэн 6-тӥ армиысьтыз кыкетӥ Белорус фронтэ. "За отвагу" нырысетӥ медальзэ басьтӥз Сталинград ожын. Бератаз Михаил Федорович уно гинэ ожъёсы пыриськылӥз. Оскылӥзы солы разведкаен но кивалтыны. 1943-тӥ арын 14-тӥ январе со тодӥз, Слава, Горд кизили орденъёсын но "Гвардеец", "Отличный пулемётчик", "Отличный разведчик" гадьпусъёсын данъямын шуыса. Кужмоесь но кӧшкемытэсь вал нюръяськонъёс. Огпол гинэ ваче ӧз вуылэ. Мыжыкъёсын но шонаськылӥзы. Зэм, немецъёс кышкало вылэм таӵе учыръёсы. Нош асьме солдатъёслы соослэн куалекъясь ымдуръёссы эшшо но трос кужым пыртылӥзы. *** 21-тӥ апреле ӵукна ньыль часын Михаиллэсь ротазэ куризы чугун сюрес дурысь станциез басьтыны. Татысь ожгарчиос быръемын кадь вал - тросэзлэн медальёссы но орденъёссы гадьёсазы "чилекъяло" ни. Станциез котыр ортчыса, кӧт вылазы нюжак кыстӥськизы батыръёсмы "кыйпиослэн" гуоссы доры. Ӵукна пал станция киултэмын вал. Немецъёс вань орудиосысьтызы ыбылӥзы. Ваньмыз ӝуа, ӵынэн котырез ик адӟыны шуг. Гудӟиськем интыосын сэрен вамыштыса вуттоно ӧвӧл - нюке-гопе сюриськод. Укыр коскамын ке но, ӟардыку витетӥ контратакаез пырпотӥзы ни. Та ожын Перевощиков нырысьсэ сӧсырмиз: паллян суяз пуртэн бышкалтӥзы. Вылаз ик, пыдаз но кӧтаз тушмон пуля интызэ шедьтӥз на. Кык толэзь госпитальын улэмез бере, 28-тӥ июне сое ӧтизы дивизилэн штабаз. Отысен ик комдив Тихон Андреевич Сельченко мӧля вылаз бырттӥз Отечественной войналэсь ИИИ степенё ордензэ. *** Гужемлэн тужгес но чебер вакытэз. Кык нунал ведра дурысь кадь кисьтэм бере, шуныт кариськиз. Тани шунды но, бамалэз льӧльмаса, нюлэс сьӧры ватске, лэся, ни. Дивизия дугдэмын Витебск котыре. Дасясько Полоцкез киултонлы. Покчи лейтенантлэн Лобытовлэн интыяз пукемез уг луы: разведчикъёсыз одно ик бичано но "кыл" утчаны лэзёно. Лобытов пырак вамыштӥз ялкарись солдатъёс доры. - Перевощиков! - кеськиз лейтенант. - Мон! - инвис пала жальмаса учкись Михаил тэтчыса ик султӥз. - Лыктэ ай дорамгес: вераськон вань. Перевощиков вӧзысьтыз эшезлы кырмыштӥз но Лобытов пумитэ вамыштӥз. Покчи лейтенант ӝужыт мугоро солдатэз йырысеныз пыдозяз эскериз но веранзэ азьланьтӥз: - Мон сямен, ожмаськонын быгатонлыкты трос пол гинэ шараяськылӥз ни. Озьыен, фашистъёсты но синазькыль каронды бадӟым, луоз. Курадӟыны но, сӧсырмыны но сюрылӥды ни. Та кылъёсты кылыса, Перевощиковлэн ӟырдась сюлэмыз, йыг-йыг! жугиськыса, йыраз тэтчиз кадь. Зэм но, изьверпиослы вожпотонэз быдэс вирсэръёсыз тыр пачылмемын. - Мынам тани мае тодэме потэ, - вис кариз Лобытов. - Тӥ куке вал-а ни разведкаын? - Бен, мынам "Отличный разведчик" значоке но вань. - Ӟечкыласько. Озьы бере, тыныд разведчикъёсын кивалтонэз но оскыны луоз. - Мон соглаш, - оскемлы шумпотӥз Перевощиков. - Басьтӥськод дас кык эштэ. Сэзьёссэгес. Мынӥськоды "кыл" утчаны. Интыен тӥ тодматскиды ни. Азинсконъёс сӥзьыса, Лобытовлэн мугорыз ӧс сьӧры ышиз. Перевощиков ӵектэм лыдпусъя эшъёс бырйиз но быдэстоно уж сярысь ивортӥз. - Ваньмыз-а валамон? - юаз куажгес куараеныз. - Ваньдылэн ик-а пыӵал тӥрлыкъёсты, пуртъёсты умой утялтэмын? Пӧлады висисьёс ӧвӧл-а? Командирлэн та юанъёсызлы одӥгез но солдат пумит ӧз вазьы. Ӝомал усемез возьматэк, чакласькисьёс ужез быдэстыны кошкизы. Перевощиков бинокленыз ӝог синйылтӥз немецъёслэсь блиндажзэс. Кӧсаны вуымтэ музъем вылтӥ, вуэз но дэриез шӧдытэк, нюж кыстӥсько соос "кыйпиослэн" гуоссы котыре. Тём-тём уй но лэзиськиз ни. Миша, одӥгзэ эшсэ басьтыса, блиндаж вӧзы интыяськиз. Мукетъёсыз гуосы кылизы. Возьмаськыса пуконъяз, уй куспын командирлэн тодаз лыктӥзы дор палъёсыз, калыкез, тодмоосыз. Гуртын али кысык дыр. Пӧсятозь ужало, луоз. Гужемлэн тужгес шулдыр но секыт нуналъёсыз возь турнанэн, пудо сиён утялтонэн герӟаськемын уго. Эх! кутысал али кусозэ, лезвиез кадь лэчыт шерысал но, турын зынэз шокчыса, шоналскыса ик жич-жач! турнасал. Нош вылӥын, шунды вадьсын, тюрагай гуреныз бурдъя вал на... У-ух, каргам фашист, ваньзэ сураз! Убиръёс! Тӥледлы со понна ӟечлыкез одӟоно луоз шуыса эн но малпалэ... - Мынэ, ялкаре, - кылӥськиз немец куара. Михаил Федоровичлэн малпанъёсыз но соин сэрен шуак тӧлӟизы. - Ах-а, часовойёссы воштӥсько. Дас вить минут ортчыса, уж борды кутсконо луоз. Огдырлы нош чалмыт кариськиз. Инбамын олокытысь бугырес пилемъёс поръяны кутскиллям. Перевощиковлэн сюлмыз юнгес жугиськыны кутскиз: дыр малы ке каллен ортче. Эшез берлань сылӥсь часовой пала мертаське. Тани командирзы ог кык вамыш лэсьтӥз но, часовой вылэ пуртэныз тэтчыса, сое пыд йылысьтыз погыртӥз. Эшъёсыз но, косэмез витьыса улытэк, мукетъёссэ но возьмасьёссэс тазьы ик ожалтӥзы. Ваньмыз ортчиз шыпыт. Ыбылоно ӧз луы. Пулемётчиксы но кыл-куаратэк выдыса ик кылиз орудиез вӧзы. - Так, эшъёс, кылиз на блиндажез басьтыны но отысь "кылэз" кутыны. Татын шумприч выроно луоз. Я, азьлань! Перевощиков бызьыса пыриз блиндаже. Отын сизьым-тямыс немецъёс пуко вал. Юри дасям ӵындытӥсь шашказэ выж шоры сапкыса, пурӟись омырлэн юрттэменыз, Михаил Федорович но эшъёсыз немецъёслэсь вань пыӵал тӥрлыксэс октӥзы. - Нош тон чалмыт ул, "зӧк бӧчы"! - офицерлэн ньылоназ кепказэ туйназ Перевощиков. Кылемъёссэ нош интыязы ик чыртытэк кельтӥзы. Кык час ортчыса, разведчикъёс асьсэ гуоссы доры вуо ни вал. Кырын жаль зоре. Соос тяпыль-тяпыль сачырмизы, дӥсьёссы но горд сюен напырӟемын. Озьы ке но, батыръёслэн мылкыдзы шунды кадь - тужгес но дуноосыз "кылъёс" сюризы уга. *** Нырысетӥ Прибалтийской фронт ожъёсыныз Новосокольники палась улосъёстӥ вамышъя. Сентябрьысен ноябрь толэзёзь кыстӥськиз Курск дугаез мозмытон. Кезьыт. Шинельёс йӧӟузыри кадь кынмо но шатрак! тӥясько. Нош кӧня солдат кынмыса быриз?! Кык-куинь ӵошен улазы мае шедем сое тырыса выдо ке но, уй куспын ӟонгырмемъёсты лымы пельтэмъёс улысь копаса поттоно луэ ни. Зэм, котьмае чидано луиз - сютэм улонэз но, кезьытэз но, вӧзтӥ шуласа ортчись пуляез но, пуштӥсь снарядэз но... Вань оскиськон Вормонлы. *** Та дыре, тулыспалэ, педлон кезьыт на. Паськыт Двина йӧ шобыр улын кӧлэ. Сопал ярдурез эскерыны Перевощиковлы кызь вить адями сётэмын. Сержант синъёсыныз туж чакласькыса котыръя шур сопалась вырйылъёсты. Ярдурысь ваньзэ сӥсъяны тырше кадь. Стрелковой командалы азьлань мыныны шуг луоз. Вылаз ик, шурез выжыны кулэ на. Угось пуштытъям интыос рос-прос кынмыса вуттэмын ӧвӧл ни. Усем лымы соосты ӵоксам, соин ик укыр чакласькыса вамышъяно. Умойтэм азе лёгиськыны шедьтӥд ке, йӧ улэ кылёд. Ӝыт сизьым час котырын пияшъёс ас сюрестӥзы кошкизы. Мырдэм но кызьы, шурез ыштонъёстэк выжыса, кӧт вылазы "нискыласа" вуизы тушмон гуос доры. Шыпыт. Сержант вить эшеныз ӵош ӵап вадьсаськиз утиськон инты доры. Ярам, немецъёс ӧз синйылтэ кадь. - Кылӥськоды-а? - шоканзэ ик пытсаз Миша - О-о. Ӟабыльто "сьӧд куакаос"! - Танкъёссы но ӵашето. - Так, эшъёс, - пулемётсэ бордаз ӝиптыса, малпанзэ шуак усьтыны дыртэ сержант. - Мон али тушмонлэсь интызэ чакланы кошко. Тодо, мар бордын ужпум, кыӵе омырен соос отын шокало. Кусказ кык граната понӥз но веранзэ азьланьтӥз: - Уже ӧз удалты ке, горд ракета лэзё. Нош азьлань ке мыныны малпай, немецъёс пала тӧдьызэ сёто. Ӝоген эшсылэсь мышсэ пеймыт уй ньылӥз. Кӧт вылын кыстӥськыку, пыдъёс но киос кезьытлы чидатэк куректо. Нош Михаил Федоровичлы сыӵе чыры-пырыен йырин ӧвӧл ни ай. Матэгес вуыса, со кылӥз но синйылтӥз: танкъёс пичи газэн ужало, мукет орудиос ӧвӧл. Одӥгез гуретӥсь "кортсы" котырын кызь пала адями люкрак сылэ. - Мелэ, басьтэлэ, гадинаос! - тӧдьы ракетазэ лэзиз сержант. Из лэзьыса кышкатэм куакапиос музэн, сьӧсьёс кушетскизы, бызьылыны кутскизы. Ӝогак гуосазы ватскизы. - Сержант, ми вӧзад, - кыксэ танкез огдыре пезьгытэменызы шумпото артиллеристъёс. Пиньзэ куртчыса, Перевощиков пулемётсэ вырйылэ пуктӥз но, шонер мертаськыса, танкистъёс пала кузь очередь лэзиз: тра-та-та-трат!.. собере эшъёсыз автоматэн итӥиськизы на. Соку ик Перевощиковлэн паллян палаз ура-а-а! кеськемъёс кылӥськизы. Фашистъёс ӧз чидалэ ни. Гуысь потылыса пегӟыны кутскизы но сётсконо луизы. - Киостэс ӝутъялэ, гадъёс! - зол куараен бусы тыр кеськиз Перевощиков. Эшшо одӥгез вырйыл басьтэмын. Таяз операциын кызь вить немецлэсь ятырез пленэ басьтэмын, со сяна, куать офицер, укмыс танк, куамын пала миномёт киултэмын на. Ӵукна ӟардыку, дивизия но вуиз. Комдив ваньзэс строе султытӥз но данъетъёс сётӥз, тау карон кылъёссэ вераз. Со сяна, данъясь кагаз вылэ гожтӥз: "Родинамылэн оскымон пиез, Перевощиков эш, тушмонэз синазькыль карись адями, ожъёсын кышкасьтэм луэмзэ возьматӥз. Перевощиков эшлы "За боевые заслуги" медаль сётыны курисько". Та вырйылэз басьтэмен, дивизия нош дас вить иськемлы азьлань сётскиз. Тӥни сыӵе ожъёсын батыръёсмы матэктытылӥзы Вормон нуналэз. *** 1944-тӥ арын июнь пумын ожъёс кыстӥськизы Белоруссия, Литва, Латвия котыръёстӥ. Отын но татын кылӥсько шумпотонэн пачылмем малпанъёс. Асьмеос вормом шуыса, чик кышкатэк верасько ни солдатъёс. *** ...Пулемётчикъёс, сиськемзы бере, нюлэс куше люкаськизы. Кин но со ненег ӝужам турын пӧлы выдыса шутэтске ни, лэся. Одӥгъёсыз лӥял вылын бинялтонзэс пурккето. Нош Перевощиков воксё кыз йылэ инты шедьтэм. "Вылӥын пукисько, кыдёке адӟисько", - шуэ, лэся. Сельченко комдивлэн кеськем куараез соку ик чалмытӥз но пыд йылазы тэтчытӥз. - Эшъёс, - вазиськиз комдив. Котырак учкемез бере, вис кариз но, портупеяен езэ тупатъяса, вераны кутскиз. - Тани татын, монэным артэ, сыло армилэн генералэз Рокоссовский но мукет командиръёс. Соослы кулэ зэмлыко нюръяськись, троссэ адӟем, чидам, орденъёсын но медальёсын солдатъёс. Пулемётчикъёс, комдивзылэсь озьы верамзэ кылыса, ог-огзы шоры учкылыны кутскизы. Нош Перевощиков, Рокоссовскиен пумиськемезлы оскытэк, кечырскем интыысьтыз зып! карыса тэтчиз но эшъёсыз котыре биниськиз. - Строиться! - команда сётӥз покчи лейтенант Лобытов. - Бен, вань милям сыӵе, данэ потэм батыръёсмы. Старшой сержант Перевощиков, пот стройысь! Генерал но мукет командиръёс синъёссэс пулемётчик шоры берыктӥзы. Комдив юаз: - Анай-атаед вань-а? - Вань. - Ожмаськыса ӧд жадьы на-а? Мар бен вералод командиръёслы. Эшшо ке ачиз Рокоссовский татын на ке... - Ой, Родинаелэн улонэз понна жадьыны возьыт луысал, - валэктӥз сержант. - Мон азьланяз но дась котькыӵе ужез быдэсъяны. Генерал кырымпыдсаз кызйиз но чылкыт куараеныз вераз: - Мон шумпотӥсько знамямылэсь но Горд Армилэсь данзэ вылэ ӝутыны тыршемедлы, озьы ик - ожын выль ӟеч ужъёс лэсьтыны дась луэмедлы. Рокоссовский Перевощиковлэсь кизэ кужмо кырмиз но, Родинамес утёнын кышкасьтэм, шаплы луэмез понна, И.В.Сталинлэн но М.И.Калининлэн нимынызы юнматэм грамота мычиз: - Ӟечкыласько но данъяськисько таӵе батыръёсын. Сержант соку ик ӧз вала кадь генераллэсь кылъёссэ. Кузьмам грамотаезлы но уг оскы на, лэся. Ма, со мукетъёсыз артиллеристъёс сямен ик ожмаськиз кадь. Малы сое гинэ висъяса дунъяло?.. *** Ож ялан мынэ на. 13-тӥ июле стрелковой дивизие солдатъёс эшшо ватсаськизы на. 19-тӥ июле удалтӥз фашистъёсты кульчое пыртыны. Тушмон урмемын. Котькуд вись музъем борды ӝабырскыны турттэ. Ӝыт пал убиръёс люказы паймымон трос техника - танкъёс, пехота. Малпаллям тупаса улӥсьёсты пехота азьын нуыны. Ыбылыны уг луы: Перевощиковлэн расчётаз вить адямиез кылиз на. Укыр уноез солдатъёсмы та нуналэ быризы. Сержант пограм эшъёсызлэсь гранатаоссэс бичаз. Ваньмыз сизьым люкаськизы. Станковой орудизэ ӟыгыртӥз но возьмаса улэ танкъёслэсь матэгес вуэмзэс. Та музъем вылын гурт вылэм. Али со куашкамын. Шимес. Сьӧдэктэм гуръёс но ӝуам кор сэрегъёс сержантлэн сюлэм вылаз зӥбисько кадь потӥз. - А-а, гызмыль ведь лыкто, тараканъёс! Дас-дас одӥг танк пырак сержант шоры матэктэ. - Чале, чале... Ог кызь метр кеме вуэмзы бере, со гранатаоссэ шоналтӥз. - Так, так. Кыкез дась. Куинетӥез танк, лёганы турттыса кадь, бурсыса вуэ ни. Старшой сержант гудэм гуаз гылӟыса сямен васькиз. "Луло корт" со вамен потӥз. Кыдёке ӧз вуы - гуысен лэзем граната чаляк лэсьтӥз ужзэ: танк ӝуа ни, пушкысьтыз сьӧд ӵын потэ. Табере пехотаез турнано. Нош со весь лыктэ но лыктэ. Перевощиков, матэгес лэзьыса, ыбылэ но ыбылэ. Уноезлы фашистъёслы быдтырлы валес но, музъем но сюриз татын. Нош данакез али сыӵе "шуд" ӧз шедьтэ на. Пулемёт тачыртэ но тачыртэ. Котырын ваньмыз вузэ, ӵашетэ. Но тани шуак "тра-та-та!.." куара каньсыраз. Ымнырзэ кык киыныз ик кутыса, йырзэ пулемёт вылэ уськытӥз сержант. Пилоткаез но киыз вирын наштаськемын... Пӧсь пуля синмаз йӧтӥз. Немецъёс шакалъёс музэн котыртӥзы боецез. Перевощиков ланьырак кылле. Йырситӥз кутыса, тыбырлань сапкизы. Сержант ӧз но шокчы. Вирен орсмем ымнырзэ адӟыса, кулэмын кожазы но азьлань кошкизы. Ӧз йӧтылэ. 1944-тӥ арын 19-тӥ июле тушмон выльысь контратакае потӥз. Та ожын старшой сержант Перевощиков немецъёслэн вить контратакаенызы нюръяськиз, куинь танкез пуштытӥз, витьтон пла тушмонэз быдтӥз, нош бератаз йырсазьзэ ыштыса келямын санчасте. "Ожын кышкасьтэм луэмез понна сётӥське Горд знамя орден", - ивортӥз комдив Сельченко. Дас куинь сутка ортчыса гинэ лулъяськиз сержант. 12-тӥ сентябре со выльысь берытскиз частяз. Малпалляз меда Перевощиков, куке но, сьӧсь пинь улэ шедьыса, туж зол курадӟон пыр потоно луоз на шуыса?.. Ыштэм синмыз шоры учкытэк (зэм, протез пуктэмын вал ке но, со туж висъяськылӥз), сю куамын эшеныз ӵош нош вамыштӥз оже. Таяз учыре мозмытыны чакламын вал Освенцим концлагерьысь кызь сюрс адямиез. Та уж быдэстэмын вал. Тушмон кульчо улысь потӥз вынлыко кунмылэн дас тямыс сюрслэсь ятыр калыкез. Фашистъёс соосты Германие улляны малпаллям вылэм. Часовойёсты басьтыса, нырысь ик чугун сюрес вылысь составез пазьгизы, собере ини изьверъёслэсь пузкарзэс но "ӵышкизы". Отысь туж дуноесь бумагаос утиськизы. Котыртэмъёсты ӵукна куинь часын мозмытӥзы но нюлэс куше ватӥзы. Перевощиковлэн дивизиезлы оскизы мозмытэмъёсты возьманы. Дас-дас одӥг час котырын пуны утэм куараос кылӥськизы. "Ма, соос воксё матэкто, лэся, ни ук!" - куалектӥзы солдатъёс. - Хлопцы, бызим бусы пала! - кеськиз сержант. - Вис карыны уг яра - калык. Асьмелы нуоно соосты та дуннеысь. Медам гинэ шӧдэ вал котыртэмъёсты. - Овчаркаос! - бур палась кушетскем куара кылӥськиз. Зэм но, кызь-кызь вить метр кемысь, лоп гинэ тэтчаса, кунян быдӟаесь пуныос матэкто. - Ӝоггес паллян пала, эшъёс, ӝоггес! - сержантлэсь куаразэ но киыныз возьматэмзэ кылзыса, азьлань сётскизы солдатъёс. Сӥзьыллэн урод возиськеменыз, сюресъёс но нӧдэн сыръяло. Пукись вуэ лёгиськыны шедьтӥськод ке, йырысен пыдозь дэриен наштаськиськод. Мышпалан бызись немецъёс матэгес вуо ни. Вож дӥсен, каскаосын соос. Ӧжыт улыса, тушмон солдатъёс ыбылыны кутскизы. Пуляос куара сётыса ортчо. Со вакытэ ик Перевощиков но автоматсэ улӟытӥз. Ӧз йӧтты. - Азьлань, эшъёсы, азьлань. Озьы гинэ ум сётске, - шок-пуль ке но бызе ини, сержантсы мылкыдзэс но ӝутыны вуэ на. Ог сизьым-тямыс иськем бызьыса, соослэн ӟигарзы воксё быриз. Суй-пыдэз ӝуткам уг поты ни. Немец овчаркаос нош воксё вӧзын ыргето ни. "Дас кык муртлы вить пуны", - адӟонэз йыраз чилектӥз кадь. Тани ньыль пыдо сьӧсь сержантэз ланьырак зӥбиз. Ӝужыт пужымез погыртэм кадь, зуч! усиз со дэрие. Вожомем кион таман куаса ук ини пыдъёссэ, мугорзэ... Перевощиков пуныез прикладэныз тыш-таш жуге ке но, таиз зӥбем лулэз кельтыны уг ик малпа. Эшшо но лекомиз на. Табере паллян суйзэ кесяны кутскиз ни. Нош тани, одӥгеныз гинэ ӧз тырмы, кыкетӥез урдскиз на вылаз. Кузь гижыосынызы пыд бордаз мертчиськыса, мугорзэ куртчыло. Та вискын солдатлэн киулаз пурт сюриз. Вань кужымзэ бичаса кадь, сое кырмаса улӥз но, огпол шонаскемен, кык пунылэсь но чыртызэ кыриз. Соосыз кӧня ке кыстаськизы на, собере чоньдыны валазы, лэся. Жуммем йырзэ вӧсь луэмезлы чидаса ик сержант ӝутӥз. Бус пыртӥ кадь адӟе: одӥгез эшез пуныен жугиське. Тани-тани чыртыяз ӝабырскоз меда ни?! Автоматсэ шедьтӥз но куроксэ зӥбиз. Пуны солдат вылэ ик усиз. Чалмыт луиз. Кык овчарка ыбемын, нош куинез чыртытэк кылиз. Куакъёс пӧлысь гитлеровецъёс мычиськизы. Мар карод на - пегӟыны уз луы, эн но малпа ни, луло шӧй кадь кылид бере. Соосты вуттӥзы кыӵе ке землянкае. Борддор борды кечат-вамат думылӥзы но курадӟытыны кутскизы: - Уг тодӥськы. Тодӥсько ке но, уг вера, - таӵе кылъёс веразы пияшъёс. Перевощиковлэсь протеззэ но татысен пезьгытӥзы. Берпалаз пурт но бышкалтыса возизы. Ыме сиён-юон но ӧз сюры. Йырсазьзэс ышто но, йӧ кадь ӟар кезьыт вуэн пылатыса, чаляк сайкато. "Мон татысь улэпкын уг поты ни, дыр, - ас понназ малпаз Перевощиков. - Кыӵе секыт курадӟемдэ валаса но шӧдыса кулыны. Нош Вормон тани-тани гудыртоз. Уг, уг сётскы! Кӧня сӧсырмонэз пырпотӥ ни! Ваньмыз понна юри чидало! Дунне вылысь калык понна ожмаськыны инмар одӥг пал гинэ сётэм". Шораз кесяськись кузь ныро фашистлэсь куаразэ уг но кылы кадь сержант. со али ас малпанъёсаз выемын. "Мар бен дырдэ юнме быдтӥськод меда тон, ыжйыр?! - Мае вералом, уг тодӥськы бере! - шораз кеськиз Перевощиков. Куаразэ будэтэмез понна, кема мыжгазы сое. Куинь нунал чидано луизы таӵе пӧртмаськонъёсыз. Дас кык мурт пӧлысь ньылез гинэ пырпотӥзы адӟонзэс. 27-тӥ феврале соосты эшъёссы утизы но госпитале келязы. Отын Михаил Федорович 24-тӥ апрелёзь улӥз. Мугорзэ вурысъёс копак гожмазы. Ожез со Эльба городын йылпумъяз. Берлинэ пырыны ӧжыт гинэ ӧз кылды. Озьы вуиз 9-тӥ май - Быдӟым Вормон! Кӧня шумпотон синву кисьтӥськиз меда? Осконтэм но кадь, ваньмыз ортчемын шуыса. Нош кӧня меда легаськизы бусыос, возьёс, нюръёс но зарезьёс, тодмотэм гуртъёс, городъёс?! Сюрс иськем гинэ ӧз ортче пудэн, кӧт вылын. Одӥг куз гинэ пыдкутчан ӧз быры кесяськыса но сурыкмыса. Тыл но ву пыр потоно луизы. *** Тулыс. Шуныт тӧл ымныр шоры пельтэ. Гадь тыр шокаса вамышъя гурт ульчаетӥ ужысь но ожысь батыр. Музъем шупамын, кузёзэ возьма ни кадь. Кӧня ке нунал ортчыса, колхозникъёс кизёнэз быдтозы ни. Михаил Федорович Перевощиков но гурт калыклэн сюлмаськонъёсыныз улэ. Ярато сое котырысьтыз эшъёсыз. Со сяна, вуттӥське на пиналъёс котыре но. Нянь будэтӥсьёслэсь нылпиоссэс музъем ужез гажаны но шаермес яратыны дышетэ. Светлана НИКИТИНА, Удмурт кун университетын дышетскись. Кинъёс вылӥллям выжыямы? Кытысь кылдэмын фамилимы? Луоз-а сое пумозяз сэрттыны-пертчыны? Таӵе юан сётӥ мон алигес песятаелы. - Тодӥськод-а, - шуиз со, мыняк потыса, - ӵапак таӵе юанэн вазиськи вал мон пичи дыръям песянаелы. Уг вунэтӥськы солэсь кылъёссэ: выжыямы, пе, туж-туж вашкала дыръя улэм Кубаш нимо воргорон, мон пе, со сярысь кылӥ на вал ай песятаедлэн Микаля песятаезлэсь. Вӧсьёс дыръя Алнашысь милям туж бадӟым выжымы нырысь ик буре ваёз вылэм со Кубашез. Солэн Пичи ураме (али Садовой урам) куке-соку каръяськем юртысьтыз яна потӥллям ваньмыз Кубаш выжыос. Отын али уло Орина апаймы но Нина апаймы, Нина апайлэн Алексей пиез аслаз семьяеныз. Ас выжымы сярысь веранме каньылгес карон понна кутско ачим бордысен. Мон, Андрей, улӥсько Иж карын, дышетскисько 16 номеро школаын. Саша выны вань. Милям анай-атаймы - Андрей Петрович но Надежда Юрьевна - врачъёс, песянае но, Мария Григорьевна, врач, со кемалась пенсиын ке но ни, ужа на. Песятае, Петр Николаевич, дипломезъя - дышетӥсь, али пенсиын (тросэз сое тодо "Ой, тӥ, чебер нылъёс" крезьгурезъя). Песятаелэн атаез, Николай Лаврентьевич, 1901-тӥ арын вордскемын. Куамынэтӥ аръёсы со юристэ дышетскем но дас тямыс ар ужам Алнашысь прокуратураын следователь луыса. Солэсь ужзэ Удмурт АССР-ысь Вылӥ Советлэн Президиумез Почёт грамотаен данъям, нош СССР-ысь Генеральной Прокурор час кузьмам. Часлэн мышпалаз гожтэмын: "Кубашеву Н.Л. За хорошую работу. От Генерального Прокурора Союза ССР. 1947 г.". Со чассэ Николай Лаврентьевич Андрей внукезлы, мынам атаелы, кузьмаса кельтэм. Мынэсьтым сюлэмме бугыртӥзы Николай Лаврентьевичлэн но солэн вын-агайёсызлэн егит дыръязы граждан ож сюресэз ортчемзы. Алнаш черкогуртэ тулкымен-тулкымен куинь пол вуылӥллям я гордъёс, я тӧдьыос. Котькудӥз со тулкымъёс гылтыса кадь нуо вылэм арлыдзыя киязы пыӵал кутыны вуэм пиосты. Николай Лаврентьевич Владимир агаеныз сюриллям Азинлэн дивизияз. Сарапулэз тӧдьыослэсь мозмытэмзы бере, Кам но Волга шуръёс кузя мынӥллям Царицын понна нюръяськыны. Туж шимес ожъёс вылӥллям отын. Владимир агаез бырыны шедем. Нош Роман нимо двоюродной вынзэ, Елабугаын "Гудыри" газетын ужась муртэ, Колчак армилэн тулкымез, ас сьӧраз басьтыса, Казанёзь вуттэм но, отын ик со бырем. "Ивор люкась" журналист Роман Алексеевич Кубашев ассэ пыраклы кельтэм ас нимыныз гожтэм кӧня ке гинэ чуръёсаз. Со вакытэ, шуэ песятае, газет-журналъёсы гожъясьёс туж ярато вылэм псевдонимъёс сьӧры ватӥськыны. Умой-умой бугыръяськысалыд ке, Роман Алексеевичлэн мукет гожъямъёсыз но сюрысалзы, оло. Нош "Гудыри" газетлэн 1919-тӥ арын 8-тӥ феврале потэм номераз солэн таӵе иворез вань: "Алабго уездысь черко гурт Алнаш. Алнашын ымусьтон дыръя удмурт спектакль лэсьтӥллям. Спектакль туж шулдыр вылэм. Ёрос гуртъёсысь но уно адямиос ветлӥллям. Кубашев". Удмурт культураез эскерисьёслы, озьы ик Алнаш калыклы та туж кулэ ивор, шуэ песятае. Но милям выжыосмы тӧдьыос пӧлы сюрем агайзылэсь, "ивор люкась" Роман Кубашевлэсь нимзэ поттылыны татчыозь кышкаса улӥллям. Нош ик вераме потэ на песятаелэн атаез - Николай Лаврентьевич сярысь. Со туж яратэ вылэм крезьгурез. Царицын дорын ожмаськыкуз эшъяськем скрипкаен усто шудӥсь егит солдатэн. Ожъёс вискын крезьчи солдатъёслы быдэс концерт сётылэм. Огаз ожын сое туж секыт сӧсыртӥллям. Кулон азяз скрипказэ Николайлы кузьмам. Песятае шуэ: "Мон умой тодӥсько на атаезлэсь скрипкаен шудэмзэ. Быдӟым ожлэсь азьло Алнаш коллективен ӵош со ветлӥз художественной самодеятельностья олимпиадае но. Война вакытэ улон-вылон мукетгес луиз, скрипка но кытчы ке ышиз-быриз". Николай Лаврентьевичлэн атаез - Лаврентий Ефимович. Сое алнашъёс Лялёк шуо вылэм. Солэн пушъетъёсыз - Лялёк Миклай, Лялёк Дарья, Лялёк Петя (таиз мынам песятае, Петр Николаевич). Тӥни со Лялёк, Лаврентий Ефимович, 1908-тӥ арын сьӧдкылен (тифен) висьыса кулэм. Вить кузя векчи нылпиос атайтэк кылиллям - бадӟымезлы, Иванлы, дас кык арес вылэм, пичиезлы, Марфалы, кык арес. Сизьым аресъемез, Николай, кизе вылэм юри солы лэсьтэм пичигек кудыысь, нош дас арескын гырыны но, усыяны но дышем. Толалтэ, школаысь бертыса, бигер вузчилэн лавкаяз юрттӥське вылэм, отын ик бигер кылэз но тодэм, ассэ дӥсяны-кутчаны быгатэм ини. Лялёк песятайлэн секыт учыре шедем семьяезлы вань ӵыжы-выжымы юрттӥськем, тужгес но Лаврентийлэн куинь выныз: Василий, Алексей но Пётр. Тани Пётр вынзэс гинэ басьтом. Солэн тямыс нылпиез вылэм. Огъя кужымен та тыршись семья тысь вӧй поттон но ыж гон тугон кылдытыны йӧндырем. Яна потӥсь пиоссылэн йыг-йыг юрт пуктыны луонлыксы кылдэм. Коллективизация вакытэ та семьяез быдэсак пыд йылазы кельтӥллям. Атайзы, Пётр, кулэм вылэм ини, нош солэсь Егор пизэ семьяеныз (нонӥсь нуныенызы ӵош!) товарной вагонын Сибире келяллям. Семьязы отысь бертэм кынтэм киосын но пыдъёсын, нош атайзэс, Егор Петровичез, Соловки шормуӵе келяса, война азьын ыбиллям (та сярысь семьяезлы ивортэмын кылем арын реабилитацияя документын). Лаврентийлэн атаез - Ефим Михайлович. Солэн вылэм ньыль пиез но куинь нылыз. Пиосыз сярысь верай ини: ужез радъяны быгатӥсь но ог-огзылы юрттӥськись воргоронъёс. Мукетсэ пусъеме потэ: Ефимлэн гыроно-кизёно музъемез бадӟым вылымтэ, соин ик нылпиоссэ ас бордысьтыз люкыны шуг-секытъёс кылдӥллям. Ог вакытэ одӥг липет улын кызь ньыль мурт улоно луиллям: ньыль пиосыз асьсэлэн семьяосынызы но вордскись нылпиосынызы, куинь бызьымтэ сузэръёс. Озьы ке но, шуэ песятае, со семьяын ноку но керетонъёс, ог-огзы вылэ урттылӥськонъёс вылымтэ. Песянайзы, Лаврентийлэн кузпалыз, вера, пе, вал, кыӵе соос огкылысь ю кизизы но аразы, пудо вордӥзы, черсӥзы- куиськизы, атайзылы, Ефимлы, ку посыны юрттӥзы. Выжыямы тужгес пыдлон - эшшо одӥг мурт - Михаил (Микаля песятаймы). Со сярысь туннэ нуналлы туж ӧжыт тодӥськом. Конечно, со крестьян адями вал, озьы ик гыриз- кизиз, пудо вордӥз, нылпи будэтӥз. Со сяна, номыре вераны ум быгатӥське. Тодӥськом огзэ гинэ. Самой та адями песятаелэн песянаезлы шуэм: туж-туж вашкала аръёсы улэм- вылэм Кубаш нимо воргорон, со бордысен ик выжыяськиз, луоз, милям фамилимы. Ватытэк верасько: мынам туж тодэме потэ, кин адями вылэм со Кубаш. Оло, мыным шуд усёз выжымы сярысь тодонэз муромытыны? Андрей КУБАШЕВ. Ижевск, 16 номеро школа. Журналистъёсын пумиськонъёс Владимир ГУСЕВ: "Восточный" совхоз августэ пыд вылаз султоз! Завьял ёросысь "Восточный" совхоз сярысь трос вераськизы но гожъязы ни. Республикаысьтымы самой бадӟымез парсь вордон комплекс куашкамын. Но нокин сое банкрот карыны ӧз дӥсьты. Арбитраж судлэн решениезъя совхозэн кивалтыны палэнысь мурт (внешней управляющий) пуктэмын. Озьы 15-тӥ февральысен парсь вордон хозяйствоез ӝутыны турттэ Владимир Гусев. Журналистъёслы со мадиз, кыӵе ужрадъёс кутӥсько "Восточныез" улӟытон понна. Владимир Гусев Вершининлэн Правительствояз премьер-министрлэн воштӥсез луыса ужаз. Кыл кутӥз гурт хозяйство понна. Бӧрысь со Гурт хозяйствоя научно-исследовательской институтлэн директорез луиз. Табере Правительстволэн Тӧроезлэн ӵектэмезъя басьтӥськиз парсь вордон комплексэз секыт югдурысь поттон борды. Со понна кулэ 43 миллион манет. Удмурт Правительство бюджетысь 18 миллионзэ гинэ висъяз. Кылемзэ асьтэос шедьтэ, пе. Республикаысьтымы одӥгез банк но хозяйстволы кредит сётыны соглаш ӧз луы. Палэнысь утчаськоно луиз. Умой кусыпъёс тупатэмын Екатеринбургысь "Золото-Платина Банкен" . Со 20 миллион манет пунэмен сётыны оскытӥз. Югдур сярысь ке верано, ньыль ар талэсь азьло совхоз 4,3 миллион манет ыштыса ужаз. Миым со лыдпус 11-озь будӥз. Уксё ӧвӧлэн парсьёслы сиён пырак "питран вылысь" сётъязы. Озьы ужанлык куашканыкутскиз. 1996-тӥ арын 78 сюрс парсьёссы вал, 1999-тӥын 61 сюрс кылиз. Нуналлы быдэ 250-300 йыр вандыны кулэ. Пудолэн секталаез 100-120 килограмм мед луоз. Нош берло аръёссэ одӥг парсь 60 килограмм пала гтнэ кыскылӥз. Умой ужаса, совхоз толэзяз 20 миллион манет пайда поттыса ужаны кулэ. Жаляса верано луэ, малпамъя ваньмыз уг пӧрмы. "Восточныйлэн" 80 миллион пала пунэм тыронэз. В. Гусевлэн кылъёсызъя, хозяйство кык муген таӵе калэ вуэмын. Одӥгез - лыдъян-чотан уж чик нуэмын ӧвӧл. Мукетыз - продукциен вузкарон куиньметӥ адямиос пыр радъямын вал. Сӥльзэс но асьсэос меӵак ӧз вузалэ, сиёнъёс но соослы вутто вал дуногес дунъёсын. Но ӟечезлы оскон вань. Туэ парсьёсты 17 сюрс йырлы будэтӥзы ни. Одӥг парсь шорлыдын кыске 94 килограмм. Озьы ик будэтыны быгатӥзы колбаса поттонэз но. Одӥг ужан нунал куспын табере 6 тонна колбаса дасяло. Ӟызы парсьёсты вандэмысь дугдӥзы. Ӧжытгес кылизы бырон учыръёс но. Кык ар ӵоже совхозын уждунзэс ӧз тыре ни вал. Январьысен кутскыса, табере котькуд толэзь сётъяло. Адямиос асьсэлэн кужымзылы оскизы, ужан мылкыдзы выльысь ӝутскыны кутскиз. Али совхоз ён-юонъёсыныз меӵак ачиз вузкарыны турттэ. Татчыозь солэн аслаз лавкаез ӧй вал на. Продукцизэ Ижевске интыяны ӧз быгатылы. Табере "Восточный" Ижысь Т. Барамзина урамын аслэсьтыз вузкарон юртсэ усьтыны турттэ. Малпало, 12-тӥ июнёзь юрт дась луоз ни шуыса. Татын вузъёссы дунтэмгес луозы, угось ватсаса дун уз пуктэ. Секыт югдур сиён дасянъя. Республикалэн аслаз ю тысез уг тырмы. Кусыпъёс тупатоно мукет улосвылъёсын. Кенешонъёс мыно Оренбург улосэн. Со юрттыны дась. Но ю-нянез ачиз совхоз араны кулэ. Октэмзылэн 30 процентэз парсь вордон комплекслы мыноз. 2000-тӥ�2001- тӥ аре "Восточныйлы" 18 сюрс тонна ю тысь кулэ. Нош тырмыт мед луоз шуыса, 50 сюрс тонна сиён дасяно. Та малпанэз быдэстон понна, совхозэн кивалтӥсьёс вазиськизы республикаысь Кун Кенешлэн но Правительстволэн президиумъёссылы. Соос куро 10 "Доминатор" комбанъёсты "Восточныйлы" висъяны. Соосты ик лэзёзы Оренбург бусыосы но. Кызьы тодмо, Удмуртиын 32 "Доминаторъёс" вань. Но соосты гурт хозяйствоослэсь талазы. Курон пумысен Правительство шыпыт улэ ай. Озьы ик совхоз туэ Яр ёросын торф дасялоз. Торф парсьёслы ӟеч сиён луэ. Уго отын 50 пумо витаминъёсыз вань. Владимир Гусев оске: "Восточный" совхоз августэ-сентябре пыд вылаз султоз ни. Совхозэн палэнысь муртлы кивалтыны оскемын одӥг ар ӵоже. Берло дыре туж зол ужамын кадръёс бордын. Вераны кулэ, одӥг адями но ужысь кулэстэмын ӧй вал. Кивалтонэ пайдаё радъян вылысь, хозяйствоын управлениос кылдытъямын. Оскем потэ вал, кык-куинь толэзь ортчыса, "Восточный" совхоз рос-прос ужаны кутскоз. Аслаз продукциеныз Удмуртиысь но мукет улосъёсысь лавкаосты тырмытоз. Солэн сиён-юонэз кунгож сьӧрысь ваемезлэсь олокӧня поллы ческытгес. А. АНДРИЯНОВ. БЫДӞЫМ ВОРМОНЛЫ - 55 Сюлмысь потэм чуръёс 1941-тӥ ар, июнь толэзьлэн 22-тӥ нуналэз. Мӧйыослы но улонэз валаны кутскем егитъёс понна та нунал вань улытозязы вунонтэм кылиз. Вазь ӵукна, ческыт уммен кӧлон вакытэ кунмылэн шунды пуксён палаз "гудыръям" кылӥськиз. Ӧвӧл, инмысь гудыри ӧй вал со, трос аръёс ӵоже ини "пиньзэ шерыса" улӥсь фашистской Германия асьме музъем вылэ лёгиськиз. Гитлерлэн, Гебельслэн но соослэн гыжкалъёссылэн "кудӟытӥсь" кылъёсынызы пӧям солдатъёс, шуръёс, лудъёс вамен потыса, асьме калыклы пумит султӥзы. Сутско городъёс но гуртъёс, синву но вир кисьтӥське. Война! Нокинэн ялымтэ война. Кӧня калыклэн, бен калыклэн гинэ-а, быдэс кунлэн улонэз та кылын герӟаськиз. Ӝоген, шонерзэ вераса, кык ар ортчыса, та шимес арлэн кутскемез дырысен куатьтон ар тырмоз, нош та нуналъёсы пусйим Вормонлы 55 ар тырмемез. Трос дыр ортчиз ини Рейхстаг вылэ вормон Знамя ӝутэм нуналысен. Аръёс ортчо, войнаен сӧсыртэм яраос бурмизы шуиськом ке но, сюлэмез чепыллясь тодэ ваёнъёс выльысь синвуосты потто. Ма, кызьы уз. Тросэз армие басьтэм пиос но нылъёс вордскем городъёсазы но гуртъёсазы ӧз берытске ни. Соос кылизы ожмаськон лудъёсы, нюлэсъёсы, сыръясь нюръёсы. Зэм ӧвӧл шат со? Тани асьме республикаысь следопытъёс арлы быдэ Ленинградской областе ветло. Татысь нюръёсысь соос шедьто бырем солдатъёслэсь медальонъёссэс. Нош Белоруссиысь огаз памятникын зарни букваосын гожтэмын Николай Герасимович Смирновлэн нимыз. Войналэн нырысетӥ нуналъёсаз ик сержант Смирнов тушмонлы пумит лек султӥз. Но ожлэн аслаз синмыз, аслаз кужымез. Воин кылиз пырак азелы белорус музъем вылэ. Кӧня пиосмы но нылъёсмы герой сямен ожмаськизы кырсь сапегъёсын лыктэм тушмонлы пумит. Тросэзлы ӧз кылды ни Вормон нуналэз пумитаны. Со сярысь верало фронтъёсысь но фронтэ ыстэм гожтэтъёс, тодэ ваёнъёс, песятайёслэн но песянайёслэн мадёнъёссы. Тани май толэзь азьын Связья Удмурт Республикаысь управление ортчытӥз "Военной гожтэт" конкурс. Солы вазиськизы данак ожъёсы ветлэм воргоронъёс, нылкышноос, соослэн нылпиоссы но дышетскисьёс. Гожтэтъёс верало солдатъёслэн секытэсь ож сюресъёсты ортчемзы, мылкыдзы, войналэсь шӧгзэ-кузьытсэ ас вылазы шӧдэмзы сярысь. Тани Алнаш ёросысь Медведко гуртысь Григорий Спиридонович Пермяков фронтысь трос гожтэтъёс келяз. Соос пӧлысь унозэ нылыз утьыны быгатэм. Кызьы сотэк! Арлыдо луыса но со гожтэтъёс пыр атаеныз вераське, солэсь куаразэ кылэ кадь. Фронтэ мыныкуз, Григорий Иванович семьяезлы ивортӥз: "Поезд ялан азьлань мынэ, ортчим ини Ярославль городэз. Фронтэ вуытозь, кузь сюресэз ортчоно на. Мылкыд урод ӧвӧл, мон серемес учыръёс сярысь мадисько. Солдатъёс гур! серекъяло. Но тани уй палась лыктӥсь поездъёс ӵем но ӵе пумитамы шедьылыны ӧдъязы. Соос лек ожъёсын сӧсырмем ожгарчиосты шунды ӝужан пала нуо. Серекъян мылкыд пумен лапканы шӧтаз. Уката ик передовой кыдёкын ӧвӧл ни. Григорий Иванович отӥяз гожтэ, фашистъёсын ваче син луон дыръя кышкн тӧлӟе шуыса. Со зэмзэ но тушмонэн уно пол ваче учконо луылӥз. Буш киын ӧз, кияз пыӵалэн. Нош огаз секыт ожын... синъёсыз пырак азелы кысӥзы. Кылизы гожтэтъёс. Атайзэ тодэ ваён вылысь, нылыз выльысь но выльысь кутэ соосты. Мукетыз гожтэт. Конкурс ялэмен валче, сое ыстэм ожлэсь пӧсьсэ-кузьытсэ адӟем мурт - Мария Петровна Федорова. Новгородысь дошкольной педучилищеез быдтыса, 1939-тӥ арын сое ыстӥллям Сальцы-2 городысь детсадэ ужаны. Отын ик со пумита войнаез. "5-тӥ июле, - гожтэ со, - гарнизон вылэ нырысьсэ бомбаос усьылӥзы. Уд но малпа: самолётъёс вылын горд кизилиос, асьмелэн кадь адӟисько, нош соос аэродромез сэсто. Ой! мар вал. Детсадэ кылемын на кык пиос-вынъёс, анайзы роддомын, атайзы самолётэн лобаны кошкемын. Бызисько детсадэ пиналъёс доры. Уг лэзё ай, мырдэм пыри. Отысен кык пичиесь пиосын азьвыл дасям траншеяе пыри. Бӧрысь соосты доразы нуи. Атайзэс витёно луиз кык сутка". Войналэн нырысетӥ нуналъёсаз, толэзьёсаз таӵе учыръёс данак вал. Витьымтэ шорысь кутскем ож трос калыкез шуге-леке вуттӥз, соос пӧлысь одӥгез Мария Петровна Федорова. Конкурсэ пыриськыса, аслаз секыт сюресэз ортчемез сярысь гожтэ Алнаш районысь Сьӧд Ошмес гуртын улӥсь ветеран Григорий Иванович Иванов. "Тигр" танкен ожмаськон" нимам со аслэсьтыз гожтэтсэ. Григорий Иванович ожмаськиз 102 номеро стрелковой дивизиысь 30-тӥ стрелковой полкын. Со вал миномётчик. Батареязы вылэ лыктэ немецъёслэн "Тигр" танксы. "Тушмон лек ыбылӥське, меӵак батарея шоры мертаса. Валъёс но солдатъёс пазямын, шур кадь вир бызе. Мон тэтчи сюреслэн мукет палаз. Собере писпуос пӧлы пыри. Ярам, асьмелэнъёс юрттӥзы. "Тигр" чигнаны медэ вал, асьме солдатъёс пегӟыны ӧз сётэ солы. Танкысь 5 фашистъёс пленэ сётскизы", - гожтэ запасысь старшой лейтенант. Григорий Иванович дораз бертэ куинь орденэн но медален. Вань солэн Кёнигсбергез басьтэм понна сётэм медалез но. Конкурсэ пыриськыса, аслаз песятаез сярысь вера писатель Алексей Ельцов но. "34 ар ӵоже песятае Алексей Никитович Ельцов ивортэк быремын шуыса тодмо вал. Утчаськон, гожтэтъёс ысъян шонер сюрес вылэ вуттӥзы. Аръёс ортчыса, Дагестанысь гожтэт вуиз. Юн сӧсырмемлы чидатэк, со кулэм татысь госпитальын". Тӥни озьы, аръёс ортчыса но герой сярысь ивор вуэ, солдат чиптэм-чаптэм уг быры. Гожтэтъёс, кӧня соос, кытысь гинэ вуымтэ! солдатъёслэн, командиръёслэн батыр кужымен тушмонлы пумит ожмаськемзы городъёсын, гуртъёсын улӥсьёслэн, войнаез каргаса, уй но нунал ужамзы сярысь иворто фронтысь вуэм но фронтэ келям гожтэтъёс. Тросэз со гожтэтъёс, аръёслы сётскыса ӵужектэмын ни яке утьыны быгатымтэ. Туннэ песятайёссылэн лек ож пыр потэмзы сярысь тодэ ваёнъёссэс мадё ини мӧйыос но туала егитъёс. Ӵапак со сярысь верало конкурсэ вуэм гожтэтъёс. Тани Алнаш районысь Мукшур гуртын улӥсь Татьяна Ивановна Петрова. Солы 13 арес гинэ вал, нош ужано луиз мӧйыосын одӥг радын. "Валъёс адямиос сямен ик фронтэ басьтэмын вал. Гуртэ кылемын скалъёс но кылзӥськисьтэм ошъёс гинэ. Гырон-усыян понна соосыз кытконо луылӥз", - верало солэн гожтэт чуръёсыз. Тросэзлы сямен ик туж секыт йӧтӥз Глазов ёросысь Дураково починокысь Анна Сергеевна Ушаковалы. Войнаез пумитаз со 15 арес дыръяз. Сыӵе вакытэ но дышетскон сярысь малпанэн улэ вал. Ӵапак со вакытэ агаезлы повестка вуэ, военкоматэ, пе, мыноно. "Армие кошкыкуз, - пусъе Ушакова, - вынылы верасько: мынам дышетсконме азьланьтэме потэ. Нош со шуэ: кенакедлы огназ секыт луоз гуртын. Война кема уз кыстӥськы. Тушмонэз вормыса бертӥм ке, соку дышетскод. Озьы кутскиз мынам вормон понна ужаны кутскеме". Анна Сергеевна кивалтӥсьёс пӧлысь ӧй вал, ужаз отын, кытчы ыстӥзы. Со тыршиз нюлэс коранын, Ижевск-Балезино чугун сюресэз лэсьтонын. Тазьы ик ужаз вормон понна, тушмонэз асьме музъем вылысь уллян понна Пичи Пурга ёросысь Буран черкогуртысь Вера Николаевна Зарбатова. Сюлмысь потӥсь чуръёс гожтэм Можга районысь Ст.Какси гуртысь Катя Сорокина. Со вера Афганистанын ожмаськем мурт сярысь. Военной гожтэтлы конкурс йылпумъяськиз ке но, сюлмысь потӥсь кылъёсты веран бырымтэ. Почтальонъёс нош ик выль конвертъёсты вутто. Быдӟым войналы 55 ар тырмиз ке но, куректон, бӧрдон буйгамтэ. Пересь анайёслэсь, сузэръёслэсь, вынъёслэсь, агайёслэсь сюлэмзэс позырто тодэ ваёнъёс, уйвӧтын адӟем суредъёс. Уг вуно, уз но вунэ ож лудын бырем солдатъёс. Соос сярысь гожтэмын луозы на выль книгаос, очеркъёс но веросъёс. В.СМИРНОВ. Москваын кенешон Туннэ Москваын ортче Россиысь калыкъёслэн ансамблеязылэн кыкетӥ съездэз. Страналэн вань сэрегъёсысьтыз вуэм эшъёс эскеро Кун национальной политикая концепцилэсь быдэсъяськемзэ, Ансамблеялэн хартиезлы инъетэз, огазеяськонлэн интыосысь ёзъёсызлэсь кызьы ужамзэс. Удмурт калыклэн нимыныз та ӧтчамлэн ужаз пырисько Россиысь Кун Думалэн депутатэз Светлана Смирнова, филология наукаосъя кандидат Юрий Семенов, "Шунды" огазеяськонлэн кивалтӥсез Татьяна Прокопьева но Удмурт Республикалэн Россиысь Президент борды ыстэм муртэзлэн воштӥсез Валентин Лебедев. Делегатъёс оско, та ужрад калыкъёс куспын уртче ужанэз умоятыны юрттоз шуыса. И.КРИЧЕВ. Иворъёс Лагерьын шутэтскозы Августэ шаерысьтымы 240 нылпиос дунтэк шутэтскозы "Лесная страна" лагерьын. Соос пӧлы шедёзы тужгес ёрмись гурт семьяосысь пиналъёс. Ужрад ортчытӥське Кун Думалэн депутатэзлэн Светлана Смирновалэн кичӧлтэмезъя. Со вазиськиз Удмуртиысь пӧртэм предприятиослэн кивалтӥсьёссылы, нылпиослэсь шутэтсконзэс радъяны коньдон курыса. Асьмелы юрттыны мылкыд каро Москваысь но куд-ог ужбергатӥсьёс. Лагере мынӥсьёсты быръён вылысь, котькуд ёросын нимысьтыз комиссиос кылдытэмын луозы. Отчы пыртэм эшъёс пыр-поч эскерозы вань куронъёсты, пиналъёслэсь кызьы улэмзэс но дышетскемзэс. Кивалтозы комиссиен депутатлэн интыосысь юрттӥсьёсыз. И. Лебедев. Мултэсэн быдэстэмын Правительство эскериз "Республикалэсь 1999-тӥ арлы бюджетсэ быдэстэм сярысь" Законлэсь инъетсэ. Та пумысен вакчияк ивортӥз коньдон ужпумъёсъя министр Владимир Бельтюков. Бюджетлэн доход люкетаз юнматэмын вал 2438200 сюрс манет, нош расход люкетаз - 3202229 сюрс манет коньдон. Бюджет но бюджетэ пырисьтэм фондъёсты лыдэ басьтыса, доход люкетэз быдэстэмын 4280091 сюрс манетлы, расход люкетэз - 4259138 сюрс манетлы. Ас кужымен поттэм табышлэн быдӟалаез 173 процентлы быдэстэмын. 1998-тӥ арен ӵошатыса, со 78 процентлы йылӥз. Бюджетэз выт чотын узырмытыны юртто акциосын "Удмуртнефть", "Белкамнефть", "ЧМЗ", "Удмуртэнерго", "Удмуртгеология" огазеяськонъёс, Сарапулысь но Глазовысь аракы поттон заводъёс. Му вӧйлэсь дунзэ будэтэм чотын васаса 272 миллион манет коньдон басьтэмын. Экономикая министерство сэрттыны-пертчыны ӵектӥз на эшшо одӥг инъетэз. Со герӟаськемын инвестициосын ужанэз радъянъя законэ куд-ог воштонъёс, ватсанъёс пыртонэн. Кылсярысь, отын ужпум ӝутэмын инвесторъёсты кун ласянь утён, соослы ватсаса юрттэт сётон но правооссэс утён пумысен. Кыкез ик та документъёс эскеремын луозы Кун Кенешлэн сессияз. Удмурт Республикаысь Правительстволэн пресс-службаез. Муское - асьсэ автобусэн Алигес, 11-тӥ куартолэзе, газетамы печатламын вал Асан совхоз-техникумлы сӥзем бам. Азьланьтӥськом та коллективын ужась адямиослэн малпанъёсынызы, мылкыдъёсынызы тодматонмес. Л. Цыпленкова, техникумлэн директорезлэн воштӥсез: - Техникумысьтымы устоосызлы студентъёслы кыл сётӥм вал, Россилэн столицаяз нулломы шуыса. Ветлӥм. Совхоз-техникумлэн автобусэныз. Ми, дышетӥсьёс но воспитательёс, студентъёсты пӧртэм общественной ужъёс сётъяса дышетӥськом соосты кивалтӥсь но организатор луыны. Усто ужа милям егитъёслэн центрзы, кытын студентъёс асьсэос ортчытъяло пӧртэм ӝытъёс, пумиськыло мукет интыосын дышетскись студентъёсын. Ужрадъёс озьы ик ортчыло техникумлэн юртаз, "Юность" культура юртын, общежитиосын но спортплощадкаын. Педколлективмы тырше, студентъёсмы ас кожазы ужаны мед дышозы, асьсэ кужымзылы мед оскозы шуыса. Студентъёслэн улоназы бадӟым инты басьтэ звеньевойёслэн советсы, отчы пыро вань дышетскись группаослэн звеньевойёссы. Солэн банкын вань аслаз расчётной счётэз. Общежитиосын но ужало студентъёслэн советъёссы. Дышетскисьёслы туж умой юртто классъёсын кивалтӥсьёс: Т. В. Красноперова, Т. В. Левукова, С. И. Мечин, Н. П. Пушина, З. В. Югова, Н. М. Тупикова, Р. А. Николаева, Н. Г. Федотова. Г. Заколюкина, "Зоотехния" отделенилэн кивалтӥсез: - Отделениямы кылдытэмын парсь вордонъя учебно-производственной лаборатория. Вань дышетон уж татын ортче практика дыръя. Студентъёс ужало мастерен ӵош, звеноослы люкиськыса. Котькудаз ужан интыын вань технологической карта, справочникъёс, кулэ инструментъёс, материалъёс но ужан дӥськут. Лабораторимы ужа ни ньылетӥ арзэ. Студентъёс парсьпи басьто, соосты будэто но вузало, кӧнязэ ке куайыто. Н. Федотова, "Агрономия" отделенилэн кивалтӥсез: - Данакез дышетӥсьёсмы но воспитательёсмы - асьмелэн выпускникъёсмы. Уноез вылӥгес кивалтон уже но ӝутскизы ни. 1964-тӥ арысен лыдэ басьтӥськем техникуммес горд дипломен быдтэмъёсты. Стенд быдэс борддорез басьтэ ни, берло 35 ар ӵоже соос 300-лэсь ятыр люкаськизы ни. Усто дышетскисьёсмы кивалто нянь будэтонэн, пудо вордонэн, техникаез ужатонэн. Кӧня специалистъёсты поттӥськомы ми арлы быдэ? 1997-тӥ арын -199, 1998-тӥ арын - 185, 1999-тӥ арын - 203. В. Шабалина, экономист: - Куазь кӧс ке но вал, миым ми 895 сюрс манет прибыль басьтӥмы. Рентабельностьмы 10 процент луиз. 675 гектар вылысь 22,5 центнер ю тысь басьтэмын (республикая - кык поллы ичи, картофка - гектарысь 130 центнер пала. Ма чотын? Ми котьку вылӥ ӟечлыко кидысэз кизиськом, бусые кыед но сылалъёс поттӥськом, ядохимикатъёсты уже кутӥськом. Но самой ушъямонэз - совхозын тыршо ас ужзэс ӟеч тодӥсь агрономъёс Д. В. Петрова, Т. В. Санникова, директорлэн воштӥсез Н. А. Катаева. Туэ малпаськом котькуд гектарысь 138 центнер ю тысь но 138 центнер картофка басьтыны. Радик Каримов, 641-тӥ группаысь студент: - Доре гожтэт гожтыны но дыр уг шедьы, сокем улонмы но дышетсконмы тунсыко потэ. Мыным татын соиз туж кельше: трос дыр висъяське практикалы. Асан совхоз-техникумын усто дышето шуыса, пӧртэм интыосын тодмо. Тани мон вордски но будӥ Татарстанын. Нош дышетскыны татчы лыктӥ, со понна анай-атайёсы коньдон тыро ке но. Шумпотӥсько но данъяськисько мон Асанэ дышетскыны шедемелы. П. Скобелев. Вормонлы - 55 Улонын пытьы кыле Тросэз ужысь но ожысь ветеранъёс ноку но уз вунэтэ егит дыръязы комсомольской задор мылкыдынызы ужамзэс но Быдӟым ожын тушмонлы пумит ожмаськемзэс. Ӝыны даур талэсь азьло Ижевскысь 4 номеро ремесленной училищеез быдтэме бере, мон вань улонме герӟай "Ижсталь" огазеяськонэн. Мылысь-кыдысь тодматски та заводлэн историеныз но отысь ужасьёсыныз. Соос сярысь газетъёсы но журналъёсы гожъяны кутски. Та предприятие аслаз ӟеч анданэныз гинэ ӧвӧл, трос умой адямиосыныз но данъяське. Солэн будон сюресаз бадӟым инты басьтӥзы егитъёс но комсомолецъёс. Юнме шат куинь ордено объединенилы 225 ар тырмонэныз валче, егитъёсты будэтыны бадӟымесь азинсконъёс басьтэмез понна предприятилэн комсомольской организациезлы ВЛКСМ-лэн ЦК-езлэсь Памятной Горд Знамязэ сётӥзы. Та знамяез сётыкузы,трос калык люкаськиз "Металлург" культура двореце. Отын вал Вера Павловна Михалёва но. Вераськисьёсты кылзыса, аслэсьтыз егит дырзэ тодаз ваиз. Солэн ялан син азяз витетӥ блюминг станэз лэсьтон. Соку заводысь нырысетӥ комсорглы Вера Михалёвалы кыл вылын гинэ ӧвӧл, ужын но ассэ возьматоно луиз. Солэсь горд кышетсэ котьку адӟыны луылӥз пӧртэм участокъёсысьтыз. Котькытчы вуыны кулэ вал уго: дыраз маке но валэктоно, тырмымтэосты палэнтоно, егитъёслэн улэм-вылэменызы тодматсконо. Тани ми учкиськом кыдёкысь 1934-тӥ арысь туспуктэмез. Снимок вылын блюминг станысь нырысетӥ операторъёс. Соос пӧлын Алексей Засыпкинлэн Горд Знамяен пусъем бригадаысьтыз строительёс. Пиосъёс пӧлын огназ сылэ егит нылаш Вера Михалёва. 1934-тӥ арын Ижысь блюминг страналы нырысь продукция сётӥз. Кунгож сьӧрысь специалистъёс уг оско вал, блюмингез дыраз лэсьтозы шуыса. Нош асьме лэсьтӥськисьёс жадёнэз валатэк тыршизы. Озьы страна дырызлэсь вазь металл басьтӥз. Ортчизы аръёс. Ӝыны даур ӵоже цехын трос пол воштӥськизы ини ужасьёс. Но блюмингын уг вунэто нырысь операторъёслэсь нимъёссэс. Станэз уже лэземзы бере, 1935-тӥ арын Вера Павловна асьсэ дорысь ик операторлы бызиз. Нош куинь ар ортчыса, техникумлэн ӝыт ужась отделенияз дышетскыны пыриз. Вордскиз нылзы. Кузпалзэ 1942-тӥ арын ожтылэ басьтӥзы. 1944-тӥ арын сое Литвае ысто. Вера Павловна но со сьӧры нылыныз мынэ. Но улон сое ас сяменыз жуге. Ӝоген нылыз кулэ, картэз но бырыны шеде. Сыӵе секыт куректонъёсыз солы огназ вормоно луиз. Мынам киям 1949-тӥ арын потэм "Советская Литва" газет. Одӥгаз статьяын верамын волостьысь коммунистъёс сярысь. Соку, та республикаын колхозъёс кылдытыку, калык пӧлын бадӟым валэктон уж нуиз Вера Павловна но. Тани ма гожтэмын отын: "Калночайын бадӟым кенеш ортчиз. Гуртоос кык лагерьлы люкиськизы. Одӥгъёсыз ӵектӥзы колхозэ огазеяськыны, мукетъёсыз ӧз дыртэ, учконо на шуизы". - Вера Палвовна лыктӥз! - вазись луиз кин ке. Ваньзы капчиен шокчизы. Гуртын улӥсьёс соку ик котыртӥзы лапеггес мугоро кышномуртэ. Со пӧртэм юанъёслы валэктонъёс сётъяны кутскиз. Собере мадиз на Поливитинской волостьысь "Тарибу Велява" нырысетӥ колхозэз кылдытэмзы сярысь. Калыкез тужгес но паймытӥз огшоры колхозницалэн Петрядокенелэн 456 люкаськем трудоденьлы, 4100 килограмм тысь, ог 3 тонна фураж, картофка, ыж гон басьтэмезлы. Кенешон бер ӝытозь ортчиз. Со йылпумъяськиз быдэс Калночай гуртлэн колхозэ пырыны мылкыд каременыз". Дуно, кема возьмам куноез кадь шуныт пумиталлязы Вера Павловнаез мукет гуртъёсын но. Со нылкышноослы юрттӥз общественной улонэ пыриськыны, женсоветъёс кылдытыны. 1962-тӥ арын Вера Павловна берен Удмуртие бертэ но Воткинскын улӥсь нэнэез доры интыяське. Адямилэн улонэз арлыдызъя гинэ уг лыдъяськы, чотэ понӥське обществолы мар сётэмез но. Блюмингез лэсьтӥсьёс малпаны но ӧз быгатэ, татын ар ӵоже миллион тонна прокат нуйтозы шуыса. Та вормонэз басьтон понна Вера Павловна но трос лэсьтӥз. Андан ӵыжатон заводысь егит дуриськисьёслэн ӵектэмзыя, предприятие пырон азьын лэсьтӥзы Быдӟым ожын бырем металлургъёслы сӥзем памятник-обелиск. 1941-тӥ арын феврале комсомоллэн заводысь комитетаз секретаре бырйизы чырткем пияшез Адольф Шарпиоез. Ӟырдыт мылкыдын со басьтӥськиз выль уже. Цехъёсын кылдӥзы фронтовой комсомольско-молодёжной бригадаос. Андан пӧзьтӥсьлэн Леонид Тебеньковлэн бригадаез нюръяськыны ӧдъяз ӝог амалэн андан ӵыжатон понна. Та кичӧлтонэз мукет бригадаос но кутӥзы. Комсомоллэн завкомез Вормонлэн фондаз коньдон но пӧртэм кузьымъёс люказ. Заводысь тросэз ужасьёс фронтэ кошкизы. Соос интые султӥзы быдэ вуымтэ егитъёс, пересьёс но нылкышноос. 1941-тӥ арын сӥзьыл завкомысь ваньмыз сямен ужасьёс но фронтэ куриськизы. Адольф Шарпио фронтэ ноябрь толэзе шедиз. Нырысь-валысь со рядовой стрелок вал. Собере сое дышетскыны танковой училищее келязы. Училищеез быдтыса, со нырысетӥ танковой гвардейской армилэн взводэзлэн командирез луиз. 1945-тӥ арын 19-тӥ мартэ Адольф Викентьевич аслаз взводэныз уин маршен ортчемез бере, Гдыня город дорысь нюлэскы вуиз. Танкистъёс Польшаысь портовой городэз басьтыны дасясько вал. Наступление кутскиз ӵукна 9 часын. Тушмон вырйыл сьӧры интыяськемын. Гитлеровецъёслэсь азьпал радъёссэ ыбылыса, Шарпио командной люкысен перископ пыр нюлэс пала учкылэ. Ог ӝыны иськемысь Адольф Викентьевич адӟиз немецъёслэсь ватэм пушказэс. Командир ыбыны косыса ӧз вутты, асьме танк вылэ снаряд усиз. Танкын ӵын бугыръяськыны ӧдъяз. Танкистъёс ӝегатскытэк ыбизы но пушкаез пазьгизы. Люкез усьтыса, танкистъёс адӟизы: беразы ӝуало кык самоходкаос. Асьме солдатъёс тушмонэз Гдыня городысь уллязы. 1945-тӥ арын нырысетӥ май праздникез Шарпио Берлинын пумитаз. Та нуналэ ик со секыт сӧсырмыны шедиз. Госпитальын йӧнатскемез бере, выльысь заводэ берытскиз. Жаль, со улонысь вазь кшкиз. Войнаысь ӧз бертэ тросэз заводын ужасьёс. Озьы ке но, улон азьлань мынӥз, предприятиез выльдыны кутскизы. 40 ар талэсь азьло 21 номеро цехын сю тоннаем мартен гурез лэсьтыны ӧдъязы. Ужан дырлэсь ортчемзэ шӧдыны уг луы. Вуиз сӥзьыл. Выль гурез лэсьтон ӝоген быдэсмоз. Тани труба пуктыны кутскозы. Огез но мукетыз но йырзэ чатыртыса выллань учкылэ, синъёсыныз мертаны тырше, лэся, ма кеме ӝутскоз со. Труба син азьын ӝутскыны кутскиз. Огпол ӵукна труба ӝутӥсьёс доры райкомлэн секретарез но старшой мастер лыктӥзы. Дэмлало: - Кылзэлэ, эшъёс. Таӵе ӵектон вань. Тӧдьы кирпичъёсты тырыса, труба вылэ таӵе кылъёсты гожтоно вылэм: "ВЛКСМ-лы 40 ар. 1959 ар". Быгатоды-а? - Быгатом, лэсьтом, - шуизы егит пиос. Веразы - лэсьтӥзы. Аслаз азьлоосыз, куинь вынъёсыз, вӧзы йӧн-йӧн ӝутскиз ваньмызлэсь вылӥ труба но ӟечбур карыса вазиз: "Вӧзады кутоды-а?" Выль ар азьын мартен ужаны кутскиз. Егит эшъёсыныз ӵош та гурын нырысь плавка пӧзьтӥз удмурт воргоронлэн Александр Петрович Бабкинлэн бригадаез. Азьвыл данэ потэм андан пӧзьтӥсьёслэсь кутскем ужзэс та нуналъёсы ялан азинто электрометаллургъёс. Пӧртэм шуг-секытъёс шоры учкытэк, соос улоназы выль пытьыос кельто. В. Чернов. Чайковский - пиналъёслэн синмынызы Воткинск огазеяз Россиысь ог кык сюрслэсь ятыр пичи суредасьёсты. 87 улосъёсысь: Москваысь, С.-Петербургысь, Сибирьысь, Уралысь, Крымысь, озьы ик Америкаысь, Украинаысь но Эстониысь - пиналъёс пыриськизы Чайковскийлы сӥзем выставкае. Пичиослэн но егитъёслэн ужъёсынызы ИИИ калык куспо выставка-конкурс паськыт ортчиз. Вормисьёс пӧлы шедизы асьме шерамы кыдась пичи суредасьёс но. Ижысь 10 аресъем Люда Вахрушева пусъемын И степенё дипломен. Ужъёсынызы озьы ик висъяськизы Лена Кузнецова (Глазовысь), Денис Гумиров (Воткинскысь), Ксюша Касаткина (Глазовысь) но трос мукетъёсыз. Конкурсэ пыриськем ужъёсын выставка возьматэмын луоз Россиысь но кунгож сьӧрысь куд-ог городъёсын. Э.ВАСИЛЬЕВА. Пинал будэ... тӧдьы льӧмпу сяськаяськемъя Малы меда асьме улонын пумиськыло сомында лек адямиос? Нылпи будэтонын лэсьтэм янгышъёсмы асьмелы пумит ик озьы уг берытско-а меда? Тодады вае ай, улытозяды кӧня пол тӥледды мылкыддылы пумит мар ке лэсьтыны косылӥзы. Кӧня луыло на сыӵе учыръёс школаосын! Сыӵе косонъёслэсь адями чигиське: огез ас пушказ вые, мукетыз пыриськисьлы пӧрме, куинетӥез эшсэ вуза, ӧжытэз гинэ пумитъяськыны дӥсьтэ. Кужмысь косыса будэтонлэн но дышетонлэн пайдаез ӧжыт. Валамон уго: обидем мурт, пыд йылаз султэмез бере, пунэмзэ берыктэ. Берыктэ ваньмызлы, соин ик сыӵе адямилэсь курадӟо чик но янгыштэм адямиос. Кыӵе шудо будэ нылпи, визьмо воспитательёслэн но дышетӥсьёслэн ки улазы сюрыса! Таӵе малпанъёсын пуконо луиз огаз ӟеч радъям ужрадын - Октябрь ёросысь удмурт нылпи садъёслэсь ужамзэс возьматонын. Нылпиосты будэтонын адӟем карымон амалъёсын тодматон вылысь, туэ дышетскон ар ӵоже Ижысь нылпи садъёсын ужасьёс понна пӧртэм ужрадъёс радъямын вал ини. Соос ортчизы Нылпиосты школае мынытозь дышетонъя но будэтонъя управленилэн кивалтэмез улсын. Берлоез ужрад сӥземын вал Октябрь ёросысь нылпи садъёсы ветлӥсь ӟучомем удмурт нылпиосын ужан амалъёслы. Октябрь ёросысь ньыляз нылпи садын ужало удмурт покчиослы усьтэм группаос. Тодмотэм уж борды кутскыны капчи ӧй вал. Тани ма со сярысь вераз 207 номеро нылпи садысь воспитатель Татьяна Алесандровна Маркова: - Удмурт нылпиосты бичам, нош кызьы соосын ужано - ум тодӥське. Нокыӵе программамы ӧй вал. Мар кароно? Кӧня ке малпаськеммы бере ми, кык воспитательёс, куспамы юри удмурт сямен вераськыны кутскимы. Пумен пиналъёслэн тодэмзы потӥз, мар сярысь, кыӵе кылын ми вераськиськом. Озьы соосты дасямы удмурт кылэн тодматонэ выжыны. Нырысь- валысь тодмотэм кылъёс соослы тумошоесь потылӥзы, серекъяллязы. Собере нылпиос ог- огзылэсь юалляськыны кутскизы: "Тон удмурт-а?" 207 номеро нылпи садын табере удмурт кыллы, культуралы дышетон ньылетӥ арзэ мынэ ни. Удмурт кылын гожтэм книгаослы, нылпи кырӟанъёслы, шудонъёслы уг ни ёрмо. Нош мукетаз, 112 номеро нылпи садын, удмуртлыкез пыӵатон ар сяна уг на мыны, озьы ке но татын та ужез мургес радъяны быгатӥллям. Валэктонэз огшоры: нылпи садлэн кивалтӥсез Капитолина Павловна Цыбина - удмурт адями, соин ик со ас коллективаз удмурт воспитательёсты но мукет специалистъёсты кыскыны быгатӥз. Кылсярысь, пиналъёсты удмурт кыллы дышетэ Галина Аркадьевна Корняева, кыкетӥ классын дышетскисьёслы "Удмурт кыл" учебниклэн огез авторез. Куд-ог мумы-бубыослы нырысь туж валантэм потэ вал, малы соослэн нылпиоссылы удмурт кылэз тодоно. Но Галина Аркадьевналэсь пиналъёсын ужамзэ адӟыса, сыӵе споръяськонъёс пумен быризы. Ма, кыӵе визьмо анай пумит луоз пиналлэн кык кыл тодэмезлы! Мумы-бубыослэн мылкыдзы уката но буйгаз, пиналъёслэсь бадӟым сцена вылын удмурт кылын кырӟамзэс-верамзэс, эктэмзэс адӟыса. Та нылпи садэ ветлӥсь удмурт пиналъёс концертъёс возьматъязы культурая "Дэмен" огазеяськонлэн ужрадъёсаз, пыриськылӥзы "Мылысь-кыдысь" передачае. Макем шумпотон вал со ваньмызлы! Анай-атайёслы, оло, уката но. 112 номеро нылпи садын табере вань асьсэлэн удмурт психологзы. Со - Татьяна Ивановна Алексеева. Туж тунсыко но аспӧртэмлыко адями - со сярысь верало нылкышнолэн ӝуась синъёсыз но. Картэз военной бере Удмуртилэн палэназ пӧртэм интыосын 25 ар улэмын, но удмурт кылзэ вунэтымтэ, кузпалыз, нылпиосыз - ваньзы удмурт кылын верасько. Ужрадэ люкаськемъёслы Татьяна Ивановна валэктыны тыршиз, малы удмурт пиналъёслы тужгес но кулэ психологлэн юрттэмез. - Удмурт нылпиослэн лулпушсы (психологизы), мукет нылпиосын ӵошатыса, туж зол висъяське: соос шымырскыса кадь уло. Мар ке но соосты ялан пачкатыса возе. Сыӵе сямзылы соос асьсэос но ёрмо. Удмурт пиналъёс палэнско ӵашетон кылдытӥсь шудонъёслэсь. Таиз потэ, дыр, мӧйыос бордысь, соос котьку но умойтэм учко вал ӵашетон шоры. "Шыпыт пук. Зол куараен эн вераськы", - тазьы алылӥзы, али но озьы ик ало пиналъёссэс. Удмурт пинал шӧдэ дӥсьтӥсьтэм луэмзэ, - шуэ психолог, - соин ик солы кыӵе ке уж сётыку, удмурт нылпи шуэ: "Мон кышкасько. Мон уг быгаты". Сыӵе мылкыдзэ вормон бордын ваньмылы ӵош ужано. Кышкасьтэм луыны, улонлэсь чеберзэ валаны дышетэ ас занятиосаз Татьяна Ивановна. Ужрадэ люкаськемъёслы со возьматӥз нылпиосын вераськон амалъёсызлэсь одӥг пичи люкетсэ гинэ. Ӝӧк вылын сылӥсь чебер вазае пуктэмын льӧмпу сяська. Крезьгурлэн каллен шудэмезъя, Татьяна Ивановна чебер пуктэм но туж шыпыт куараен лыдӟе чуръёсты: "Тӧдьы льӧмпу сяськаяське, Тӧдьы льӧмпу сяськаяське Таӵе дыре уд пук коркан". Собере куара но крезьгур каллен чалмо, но адямиос вырӟылытэк пуко... льӧмпу сяська шоры учкыса. Тӥни озьы психолог шедьтэ лулпушез эмъясь амалъёс... Ваньзэ ачиз малпа. Пӧртэм ужрадъёс пыр нылпи садысь коллектив тырше удмурт нылпиослэсь пыдло ватэм быгатонлыкъёссэс усьтыны. Сотэк дӥсьтон сям пыӵатод шат. Малпалод, нылпиос шудо, нош зэмзэ ке верано, удмурт сямъёсын но йылолъёсын тодматско. Та уже быдэс коллективез кыске ачиз кивалтӥсь Капитолина Павловна Цыбина. Сӥзьыл ортчыто выль нянез данъян праздник, толалтэ тодматско удмуртъёслэн "пӧртмаськон" йылолэнызы, тулыс - йӧ келянэн, нош гырон быдтон вакытэ гуждор праздниклы дасясько. Котькуд праздниклы пӧрало удмурт сиёнъёс, озьы нылпи садысь сиён пӧрасьёс но табере тодо ни мар со сыӵе удмурт кокрок, табань, ӝуко мильым. Татысь педагоглэн Светлана Геннадьевна Зубаревалэн верамезъя, нылпи садын вакчи дыр куспын кылдытэмын удмуртъёслэсь улэм-вылэмзэс возьтонъя комната, юн кусыпъёс тупатӥзы национальной библиотекаен, шаерез тодонъя музеен. Нылпиослы ас ужъёссэс возьматылӥзы тодмо удмурт суредась Ю.Морозов но архитектор К.Галиханов. Нылпи садысь коллектив пыриськиз удмурт кырӟанлы сӥзем фестивале. Тӥ милемыз оскытӥды, макем зол яратӥськоды ас калыктэс - таӵе кылъёсын дунъямын вал Октябрь ёросысь воспитательёслэн но педагогъёслэн удмурт нылпиосын ужамзы. Ваньзы соос ас ужазы валтӥсь интые пукто нылпилэсь мылкыдзэ валанэз. Со ик пусйымон. Котькытын - нылпи садын, школаын - ваньзы ик ужасалзы ке пиналлэсь лулпушсэ вӧсь карытэк, оло ,бӧрысь соослэсь ноку ӧй пӧрмысалзы адямиез валасьтэм ужасьёс, кивалтӥсьёс, эшъёс. Т.БАННИКОВА. ГУРТ УЛОН Правительство дырез азьпалтӥз Туннэ "Удмуртилэсь экономикая кулэяськонъёссэ утён понна" огазеяськон но республикаысь Колхозъёслэн кенешсы Кун Кенешлэн юртэз дорын пикет ортчытыны кулэ вал. Соос Удмурт Республикалэн туэлы бюджетаз тупатъянъёс пыртыны косо. Гурт удыслы 2000-тӥ ар понна висъям коньдон куинь толэзь куспын быриз. Нош азьпалан пудо сиён дасян, ю-нянез аран, бакча сиёнъёсты утялтон. Солы 83 миллион манет пала кулэ. Гурт удысын тыршисьёслэсь куаразэс мед кылозы шуыса малпамын вал пикет но. Югдурез политикаен шудонэ вуттонтэм вылысь, Правительство гурт удыслы юрттэт сётыны дась луэмзэ вераз. Со сярысь ивортӥз Правительстволэн Тӧроезлэн воштӥсез Михаил Назаров. 5-тӥ июне ас дораз ӧтчаз кык огазеяськонъёслэсь кичӧлтӥсь группазэс но ивортӥз: Правительство Кун Кенеш азе ӵектонэн потоз, туэлы бюджетэ тупатон пыртыны курыса. Ужрадэ пыриськемъёс азьын тулыс бусы ужъёсъя вакчияк йылпумъянъёс лэсьтӥз гурт удысъя но сиён-юонъя министр Петр Першин. Валэс юос чакламлэсь 96,8 процентэз киземын, миым 91-ез гинэ вал. Картофка 91,4 процент мерттэмын, ортчем арын та лыдпус воксё 63 вылэм. Одӥг аръем турынъёс 87,3 процентэз киземын. Республикаын 450 хозяйство лыдъяське. Гурт удысын уно сюрс адями ужа. Калыклэн тыршемезъя гинэ тулыс бусы ужъёсты умой радъяны быгатӥзы. Правительство сое вала. Н.Ганза но гурт удыслы юрттоно шуиз. Но малы ке министр та кык огазеяськонъёсты политикаен шудон шуэ. Огазеяськонэ пырись муртъёсты со политикае пыриськонлэсь алӥз. Вань асьтэлэн удысты - гурт - сое нуэ, политикаен выроно ӧвӧл, индылӥз П.Першин. Но ачиз но Петр Александрович аслэсьтыз верамзэ валатэк кылиз кадь. Политикалэсь алыса, ачиз политикае пыриське. Огазеяськонъёс нокин пала дурбасьтыса уг верасько на. Нош министр соосты янгыше уськытэ ни. Котькуд огазеяськон но адями быгатэ власть азе куронъёс пуктыны. Кивалтӥсьёслэн ужамзы ке уг кельшы, политика-а со? Нош кельше ке? Першинлы вань кельшисез - Агросоюз. Таиз огазеяськон кемалась кылдытэмын вал ни, но малы ке куаразэ кылыны ӧйлась. Табере сое шуак "улӟытӥзы". Огшоры тупаз-а со, яке ӧз-а, но ӵапак туннэ, сессия нуналэ, кытын депутатъёс гурт удыслы юрттон пумысен ужпумез эскерыны кулэ, Агросоюз конференцизэ ортчытэ. Ӵапак туннэ оппозициын сылӥсь огазеяськонъёс пикетэ потыны кулэ вал. Конференциен сэрен Кун Кенеш азе ӧжыт калык люкаськысал. Соку ини шуысалзы: "Кыӵе кужмыз вань огазеяськонъёстылэн? Учке ай, пикетэ вить адями пыриськиз". Но пикетэз ортчытоно ӧз кариське. Правительство дырез азьпалтӥз. Назаров оскытӥз, гурт удыслы уксё висъямын луоз шуыса. Кун Кенеш туэлы бюджетэ воштон пыртӥз ке, гуртоослы ватсаса 200 миллион манет пала висъялозы на. Соин "Удмуртилэсь экономикая кулэяськонъёссэ утён понна" огазеяськон но Колхозъёслэн кенешсы пикетэз июньлэн пумаз выжтӥз. Уксё висъязы ке, сое кытчы кутыны малпаськозы ёрос администрациослэн тӧрооссы но гурт удысъя управлениослэн кивалтӥсьёссы. Ваньмыз-а со уксё колхозъёсы вуоз - али шуг вераны. Дыр возьматоз. Одӥгез тодмо: оппозициын сылӥсь огазеяськонъёслэн куронъёссы быдэсмо. Шонерзэ вераса, гуртын огшоры ужасьлы мынэ со юрттэт. Озьы ик министрлэн Першинлэн но мылкыдыз быдэсмиз: пикет ӧз ортчы. А.АНДРИЯНОВ. Президентэз быръём сӥзьыл Туннэ усьтӥськиз Кун Кенешлэн сессиез. Удмурт Республикалэн историяз со бадӟым инты басьтоз. Уго депутатъёс юнматыны кулэ "Удмурт Республикалэсь президентсэ быръён сярысь" Законэз. Кыӵе со луоз, сыӵе ик президентмы но, улонмы но луоз. Угось президент вань калыкен бырйиськиз, со ужалоз сыӵе югдурын, кытын кузёяське рынок. Ваньмыз пыкъяське юан борды: куара сётыны быгатӥсьёслэсь кӧня самой ичи процентсы пыриськыны кулэ быръёнъёсы? 18-тӥ мае ортчем сессиын законэз инъет карыса кутӥзы. Отын 25 но 25 лыдпусъёс чакламын. Но куд-ог депутатъёс со процентъёсты будэтыны куризы 50-озь. Сессиын кылдытэмын вал одӥг кылэ вуонъя комиссия. Комиссия кӧня ке нунал ӵоже эскериз законэ 236 ӵектонъёсты. Соос пӧлысь самой сюлэмшугъяськытӥсезъя нокыӵе воштонъёс пыртэмын ӧй вал. Озьы ик 25 но 25 кылиз. Кун Кенешысь Правоя управленилэн кивалтӥсезлэн К.Глуховлэн кылъёсызъя, быръёнэз одӥг турен кык толэзь куспын ортчытоно. Нокыӵе но политика "шоу" лэсьтоно ӧвӧл. Глуховлэн таӵе мылкыдыз паймытӥз. Законлы дурбасьтӥсьёс ялан чӧлско мукет улосъёс вылэ - 25 процент куараосын гинэ быръёнъёс ортчо шуыса. Нош малы дыртод таӵе вакытэ. Али, шуом, ортчытом быръёнэз ӝогак одӥг турен 12 миллион манет тыр. Нош берло, оло, республика соин сэрен ыштонъёс адӟоз. Паймытӥз на Глуховлэн эшшо одӥг верамез. Удмурт Республикаын ӧвӧл, пе, сыӵе политикъёс, кудъёсыз быръёнын 50 процент куараосты люкасалзы. Нош Александр Волковез кыӵе интые со пуктэ? Нош Павел Вершининэз? Законэз дасясьёс оско, туннэ сессиын документ юнматэмын луоз ни шуыса. Соя юанъёс уг кылдо. Данакез депутатъёс асьсэлы кандидат бырйизы ни. Туннэ юнматозы, нош ӵуказе законэз газетъёсын печатлалозы. Соку 20-тӥ июне яралоз ни президентэз быръён нунал но юнматыны. Со октябрь толэзе ортчоз, дыр. Нош 4-тӥ ноябре, Удмурт Республикалы 80 ар тырмыку, нырысетӥ президентмылы иннаугурация ортчозы ни. А.АНДРИЯНОВ. Офицеръёс Ижевскын улэ офицеръёслэн семьязы. Металлург городокын тросэз тодэ сое. Атайзылы, запасысь майорлы Николай Петрович Малекинлы, туэ 15-тӥ декабре сизьымдон арес тырмоз. Со Октябрь ёросысь ветеранъёслэн "Милосердие" огазеяськонзылэн кивалтӥсез. Николай Петрович трос сюлмаське мӧйыослэсь куронъёссэс быдэсъян сярысь. Тани 7-тӥ Подлесной ульчаысь буш кылем интые мӧйыос ветлыны ярато. Соос отӥ коляскаосын калго нылпиоссылэн нылпиосынызы, чылкыт омырен шокало. Но городысь кивалтӥсьёс, бюджетэ коньдон пыртон понна, лэся, татчы автомобильёсты возён инты лэсьтыны малпало. Автомашинаосты возёнлы пумит кылзэс вераса, М.П.Малекин ветеранъёсты кагазъёсы гожтӥськытӥз. Собере соосты ёросысь кивалтӥсьёслы ыстӥзы. Кин тодэ, кылем арын сямен ик татын улӥсьёс митингъёсы люкаськылӥзы ке, оло нош быгатозы чылкыт омырен шоканы. Буш интые писпуос мерттозы на. Н.П.Малекин вордскиз Горький областьысь Княже-Лукяново черкогуртысь крестьян семьяын. Школаез йылпумъяса, 1949-тӥ арын Николай Малекин дышетскыны пыриз Саратовысь военной училищее. Татын дышетскыкуз, курсантъёсты ысъязы Карпат гурезьёсы но Прибалтикаысь тыос котыре ож бере кылем тушмонъёсты зӥбломытыны. Капчи ӧй вал убиръёслэсь кивалтӥсьёссэс но соослэсь юрттӥсьёссэс шедьтыны, ыбылӥськонъёс но пуромылӥзы. Но армия � со армия ни, кытчы ыстӥзы, отчы мынод. Училищеез быдтэмез бере 1952-тӥ арын Малекинэз ГДР-ысь Советской войскоослэн группаязы келяло. Нош 1956-тӥ арын ысто Азербайджанысь пограничной округе. 1960-тӥ� 1967-тӥ аръёсы Николай Петрович ужаз Саратов областьысь партийной но профсоюзной организациосын. 1968-тӥ арын сое нош ик басьто армие лэсьтӥськон войскоосы. Кызь ар ӵоже Малекин Ижевскысь строительёсын ӵош лэсьтӥз автомобильёс поттон заводэз, "Нефтемашез", чугун сюреслы выль вокзал, андан поттон заводлэсь "250" станзэ но мукет объектъёсты. Трос аръёс ӵоже Удмуртиын улыса, Малекинъёслэн семьязы татчы ик улыны кылиз. Кышноеныз Клавдия Матвеевнаен Николай Петрович пумиськиз, Саратовысь военной училищеын дышетскыкуз. Солэн офицер кузпалыз медицина удысын 29 ар тыршиз, ачиз сямен пенсиын ни. Атайзылэн сюрестӥз мынӥзы нылпиоссы но. Бадӟымез пизы Игорь Свердловскысь вылӥ военной училищеез быдтӥз, службазэ нуэ Кыргызстанысь войсковой частьын пограничникъёсын ӵош. Полковник Игорь Малекин армилы ог куамын арзэ сётӥз ини. Раиса нылзы старшой прапорщикозь будӥз. Сергейзы йылпумъяз Свердловскысь Суворовской училищеез, Ижевскысь механической институтэз но Ленинградысь военно- инженерной академиез. Али подполковник Сергей Малекин студентъёсты дышетэ Ижевскысь техникая кун университетлэн военной кафедраяз. Тӥни сыӵе со - офицеръёслэн семьязы. Быръем сюрессэс соос данэн нуо. Атай музъеммес утёнлы Малекинъёс 120 арлэсь кема улонзэс сӥзизы ини. Соослэн дано ужзы пӧртэм наградаосын пусъемын. В.ЧЕРНОВ. Сюрес вуттэ Сизяшуре Шаерысьтымы ваньмыз городъёс но ёросъёс вазенгес ик герӟамын ни асфальт сюресъёсын. Республикамы пыр потыны луэ Россилэн но дуннелэн пӧртэм сэрегъёсаз. Ӝоген Сюмси, Селта, Игра, Дэбес районъёс пыр усьтӥськоз Кировез но Пермез герӟась сюрес. Нош гуртъёс сярысь верано ке, ваньмыз ик соос чурытэсь сюресъёсын огазеямын ӧвӧл на. Ӧжыт ӧвӧл соос Пичи Пурга ёросын но. Но районысь сюресъёсты лэсьтонъя но тупатъянъя управлениын ужасьёс тэк уг пуко. Тани май толэзе 15 нуналскын гинэ кыскемын Норья�Сизяшур сюреслэн люкетэз. Солэн кузьдалаез 2 иськем 336 метр. Туннэ- ӵуказе сое сӥё-дано усьтыны чаклало. Кызьы вераз Норья гурт администрацилэн кивалтӥсез Вячеслав Родионов, сюрес лэсьтыны бадӟым юрттэт сётӥз Удмурт Республикаысь Кун Кенешлэн депутатэз Валентин Тубылов. Матысь дыре пургаос выжозы Ижевск�Можга трактэз выльдонэ. Н.ЛЯЛИН. Прораб Николай Андриянов, валтӥсь инженер Анатолий Николаев но гурт администрацилэн кивалтӥсез Вячеслав Родионов. Тани со выль сюрес. В.Беломорскихлэн туспуктэмъёсыз. МИХАИЛ КОНОВАЛОВЛЭН ВОРДСКЕМЕЗ ДЫРЫСЕН - 95 АР Сяськаос но йырзэс мыкырто... Кылем удмурт арня нуналэ, 2-тӥ июне, шундыё кӧкыын веттаськыса кадь, чебер сюрес кузя ми вуимы со гуртэ, кытын вордскиз удмурт литературалэн классикез Михаил Коновалов. Ми - со Удмуртиысь Писательёслэн огазеяськонзылэн кивалтӥсез Егор Загребин, М.Коновалов сярысь "Удалтэм аръёс" книгалэн авторез Петр Кубашев но та чуръёсыз гожтӥсь. Акаршуре вуэммылэсь азьло сюрес вожын милемды дышем сямъя сылалэн- нянен пумитазы "Пычасский" совхозлэн директорез С.Г.Чаузов, Можга ёросысь культурая ёзэн кивалтӥсь А.М.Латыпова, ёрос библиотекалэн кивалтӥсез Н.П.Загуменнова но мукетъёсыз. Соос пӧлын вал писательлэн котьку но шунытэныз-чебереныз бордаз кыскись нылыз Ж.М.Баранова. Нош тужгес шумпоттӥзы милемыз Бадӟым Сибы гуртысь фольклор ансамбльысь нылкышноос. Дырызлэсь вазь, 33 арескын ик, сюлэмаз бадӟым кайгуэн улонысь кошкем пизэс татын уг вунэто. Со сярысь верало Акаршурысь памятник, котыраз мерттэм сяськаос. Та нуналэ но писателез буре вайыны лыктӥллям гуртысь ваньмыз, кин быгатэ. Татын ик вал Федосья песянай но, М.Коноваловлэн огъёзэз, со тодэ на ӵош шудэмзэс, гольык пыд бызьылэмзэс, ӟечырамзэс. Памятник дорын шыпыт луиз, сяськаос но йырзэс мыкыртӥзы кадь. Кутскиз митинг. Нырысь ик чузъяськизы Ф.Васильевлэн вордскем дор сярысь кылбуръёсыз. Гурто калыклы тау карыса вераськиз Е.Загребин, книгаез бордын ужамез сярысь мадиз П.Кубашев. Татын ик вал Можгалан улӥсь кылбурчи Анатолий Леонтьев но Писательёслэн огазеяськонзылэн тӧроезлэн воштӥсез Никвлад Самсонов. Аспал пизы сярысь шуныт кылъёсын, данъяськон мылкыдын вераськизы "Удмурт кенешлэн" Можга ёзэзлэн кивалтӥсез А.А.Комаров, совхозлэн директорез С.Г.Чаузов но мукетъёсыз. Нош Пычасысь музейлэн кивалтӥсез Новосельцев писательлы сизьыса дасям туспуктэмъёсын бордгазет. Кылзӥсьёслэн уката но сюлмазы пыӵаз, дыр, М.Коноваловлэн нылызлэн Жанна Михайловналэн верамез. Со син азе пуктӥз, кыӵе лякыт, вазиськись вал атаез, кызьы со быгатыса бергатӥз гурт куспысь ужез. - Мыло-кыдо муртлы котькыӵе удыс но капчиен кадь сётӥське, - шуиз со. - Но атае ас понназ гинэ ӧз улы - со улӥз вань калыклэн, страналэн сюлмаськонэныз. Тодӥсько на, кызьы со сюлмыз вӧсь луыса ик вералляз Испаниын мынӥсь ожъёс сярысь. 1936-тӥ арын поттэм гонорарзэ ыстӥз республиканецъёслы, Франкоез но солэсь гыжкалъёссэ ӝоггес мед вормозы шуыса. Ваче син вераськыкумы, Жанна Михайловна тодаз ваиз анай-атаезлэсь гожтэтъёссэс. Соос ӵош дышетскиллям Можга педучилищеын, бӧрысь анаез асьмелы кельтӥз туж умоесь тодэ ваёнъёссэ (соосты мон уже кутӥ 1971-тӥ арын потэм "Михаил Коновалов" книгаям). Жаляса верано, классикъёсмес улэпен тодӥсь адямиос пумен ӧжыт но ӧжыт кылё, соин ик котькуд кылзы соослэн асьме понна туж дно. Пӧсь, сутӥсь шунды шоры учкытэк, "Марӟан" ансамблысь нылкышннос усто концерт сётӥзы. Кырӟаса-вераса ик возьматӥзы дэра гужатон сямез - озьы соос писательлэсь улэм вакытсэ ӝамдэлы ке но берыктӥзы кадь. Соку, мыным висъям дыр куспын, мон ӧй вутты вань малпанъёсме усьтыны. Соин ик газет пыр кӧня ке вераме потӥз на литературамылэн инбамаз яркыт тылын ӝуатскем та адями сярысь. Михаил Коноваловлэн-писательлэн ӟырдыт тыршон-пӧсян вакытэз дасо аръёс мында гинэ кыстӥськиз. Озьы ке но, со куспын ассэ возьматӥз романист, публицист, веросчи, драматург, критик, журналист луэменыз. Зэм, со тодмо - "Вурысо бам", "Гаян" романъёсынызы гинэ ӧвӧл - "Вормись кужым", "Пугачев" пьесаосыныз но, заводын "Андан понна", Юкаменскын "Ударник" газетъёс поттэменыз но, литератураез азинтон ужпумъёсъя ӟырдытэсь статьяос печатламеныз но, азьмынӥсьёс сярысь очеркъёс гожъяменыз но. Удмуртиысь писательёслэсь огазеяськонзэс кылдытонлы трос кужымзэ сётӥз, оргкомитетын вал. 1934-тӥ арын М.Коноваловез кутӥзы СССР-ысь Писательёслэн союзазы. Егит писатель но солэн эшъёсыз - Григорий Медведев, Кедра Митрей понна, вунонтэм луиз СССР-ысь писательёслэн И съездазы ветлэмзы, М.Горькиен пумиськылэмзы. Та гожъясьёсын ӵош ик Михаил Коновалов удмурт литератураын инъет кылдытӥз роман жанрлы. Москваын "Советская Россия" издательствоын печатласькемез сое поттӥз Емельян Пугачев сярысь устоосыз гожъясьёсын оградэ. "Гаян" исторической романаз Пугачев - кужмо, кышкасьтэм, батыр, но со дыре ик туж улэпен син азе пуксись, курадӟись адями. Писательлэн валтӥсь героез но - Гаян, удмурт калыклэн вань курадӟемъёсыз понна пунэмзэ берыктӥсь - туж оскымон возьматӥське. Озьы, калыклэсь ортчем сюрессэ, вунонтэм вакытъёссэ усьтон кутскиз М.Коновалов бордысен. Со сьӧры кыстӥськизы Д.Бор-Раменский "Данило Шатов", М.Петров "Вуж Мултан" романъёсынызы, нош берлогес ини П.Куляшов кылдытӥз "Медвежий угол" повестьсэ но "Шалые люди" романзэ. Ӟырдыт ӝуась сюлэм ар мында курадӟиз пытсэтын. Н.Кузнецовлэн "Из мрака" книгаысьтыз туспуктэм шоры учкыса, йӧӟектэм кадь луоно. Егит, чебер, пӧсь виро писатель... ӧвӧл, со гольык ӵышкем йыро, кузь будэм тушо, синъёсаз кайгу пыӵамын... Лагерьысь кык гожтэт кесэгез гинэ вуиз кышноез но нылыз кие. "Михаил Коновалов" книгаме дасякум, репрессиос, Сталинлэн эрказъяськемез сярысь гожъяны лэземын ӧй вал ай. Книгалэн пумаз, валэктонъёсын гинэ мон сётӥ пытсэтысь потэм кӧня ке чуръёсты: "Оня но Жанна, ӟечбуресь!!! Жанналы тырмиз 7 арес. Тужгес но кысык вакыт кутске - школае мынон. Мед со луоз шудо но йӧно. 1938-тӥ арын 18-тӥ мартэ". Та улонэзлэн берпум арез. Шудо луон но адями нимдэ чылкыт возён - та валанъёс писатель понна люконтэм герӟаськемын вал. Зэм, со ачиз понна гинэ ӧз улы - со шудо вал ас калыкеныз гинэ. Вакчи улонэз ӵоже лэсьтӥз ваньзэ, мар быгатӥз. Трос потаз шаерысьтымы ёросъёсы, ӟырдыт вераськылӥз калык азьын. Сюлэмыз висиз гуртысь улонэз умоятон, коллективизация пумысен. Можгалась нырысетӥ удмурт школалэн директорез вал. Со крезьчи но: арганэн, фортепианоен но мукетыныз шудылӥз. Со ик усто спортсмен: футбол команда кылдытӥз... Вылӥ образование басьтытэк но - туж вылӥ тодон-валанэн, ӟуч но удмурт кылын тысез куадам кадь капчи вераськись, тодэ на вал эсперанто кылэз но. Киям возисько М.А.Коноваловлэн допросын вераменыз кагазэз. Гердъя "пӧрам уж". 1933-тӥ арын 1-тӥ феврале. "Гердэз тодӥсько нюръяськонын гинэ", - шуэ со. "Тодӥськод-а вал солэн лушкем уж нуэмез сярысь" юанлы вера: "Тодӥ со бере гинэ, ку арестовать каризы". Улонэзлы кышкытлык сярысь малпатэк, "гердовщина" сярысь шуиз: "Мон малпасько, со огшоры консервативной ӧр гинэ". Сыӵе солэн "тужгес кышкыт преступник" сярысь малпанъёсыз. М.Коновалов тодэ вал К.Гердлэсь зэмос дунзэ. Ньыль ар ортчыса, со шедиз пытсэтэ... *** Акаршурлэсь шуныт ӟыгыртэтысьтыз ми потӥм та палась ик Выль Бия гуртэ. Валля арын пӧсьтолэзе татын, вордскемез дырысен 90 ар тырмонэзлы сӥзьыса, синпелет-памятник усьтэмын вал калык писательлы Трофим Архиповлы, "Лудӟи шур дурын", "Адямилэн чеберез" романъёслэн но мукет произведениослэн авторзылы. Татын озьы ик пумитазы сылалэн-нянен, кырӟанэн, кылын-бурен, куноятӥзы асьсэ пӧзьтэмен-пыжемен. Нош памятник выжыын - туж уно сяськаос... Пӧсьлы чидатэк пыроно луиз клубе. Вань писательёслы кыл сётэмын вал. Собере кутскиз сцена вылын шулдыртон. Гуртысь нылкышноос милемыз шумпоттӥзы Трофим Архипович сярысь асьсэос малпаса гожтэм кырӟанэнызы. Ас устолыксэ возьматӥз на Б. Сибыысь калык ансамбль но. Артэ та гуртъёс - Акаршур но Выль Бия. Артэ соослэн кизилиоссы но. Ваньмызлы сыӵе шуд уг усьы. Та пумиськон дыръя малпан кылдӥз: писательёслэсь вордскем нуналзэс арлы быдэ пусйыны. Сое умоен лыдъяз совхоззылэн кивалтӥсез С.Г.Чаузов но. Та адямилы оскыны луэ, со тодэ уго: адямилы, кӧттыро луон понна, нянь гинэ кулэ ӧвӧл... Зоя БОГОМОЛОВА, критик, литературовед, филология наукаосъя кандидат. Татын вордско принцессаос Кин меда огпол ке но ӧз малпаськылы выжыкылэ шедьыны, принцесса кариськыса пур-пур чебер дэремен кыӵе ке балэ сюрыны. Но мон сямен тӥ но, егит эшъёсы, лулӟылӥды гинэ, луоз, - принцессаос вал кылем дауре. Али нош тӥледды паймытыны дыртӥсько - нылъёс, принцессаос вань! Пиос, нош тӥ кылӥськоды-а? Конечно, соос чурен ульча кузя уг ветло, но тӥ пыралэ ай Ижевскысь "Пинал принцессаослэн школаязы", адӟоды. Отын соос огезлэсь пӧртэм мукетыз - чебересь, веськресэсь, шоголесь. Табере нош асьмелэн чеберайёсмы уката трос луозы - городысь администрация луонлык шедьтӥз нимысьтыз "Эстетикалы дышетонъя центр" усьтыны. Центрлэн вордӥськем нуналаз мэр Анатолий Салтыков шуиз: - Экономикаысь гинэ югдурез тупатыса, улонмы уз пушйы. Калыкез нырысь ик дунъяло солэн культураезъя. Нош принцесса луыны нылъёсты дышетоз туж сюлмо адями - Елена Николаевна Молчанова. Чеберлыкез яратон мылкыдзэ со ваньмызлы пыӵатыны быгатэ: пичиезлы но, бадӟымезлы но, дышетскисьлы но, бадӟым политиклы но. Кун Кенешлэн Тӧроезлэн воштӥсез Павел Вершинин тани школае гожтӥськыны мылкыд кариз: - Мынам татын кивалтӥсь сямен вераськеме уг поты, - шуиз со, - малы ке шуоно, аслам нылпиосы, внуке вань, соин ик туж шумпотӥсько таӵе центрлэн кылдэмезлы, вожъяськисько туала пиналъёслы - соослэн пичиысен асьсэды котыр ласянь возьматыны, дышетскыны луонлыксы вань. Амалы луысал ке, ачим но школаяды гожтӥськысал. Ӟечкыланэз вошто та школаысь эктӥсь принцессаос. Соослэн сцена вылтӥ уямзы- поръямзы шоры учкыса ваньмыз вунэ, астэ, зэмзэ но выжыкылын кожаськод. Хореограф Ксения Малых трос дырзэ но мылкыдзэ сётэм, шӧдске. Нош синмальдымон удмурт костюмъёсын нылъёслэн композицизы залын пукись ӟучъёсты но паймытӥз. Таиз тыныд атлас дэрем но сьӧд айшет гинэ ӧвӧл. Тӧдьыен гордо чибориё дэремъёс туж валаса вуремын. Нош ужам соос бордын художник Людмила Молчанова. Солэн мукет коллекциез но синмаськымон пӧрмем. Профессиональной манекенщицаос вылын туж тузӥ адӟиське. Шумпотоно, табере асьме чеберайёслы подиумъёс утчаса москваостӥ ветлоно ӧвӧл, соос вань асьме дорын но. З.ВАХРУШЕВА. Туспуктэмез В.Беломорскихлэн. Вячеслав АР-СЕРГИ Святой Педорез буре ваён кыл Пичи гинэ удмурт гуртын Оло, ас аръёссэ ик вунэтса Улӥз ас дуннеяз со - Палкышно. Лавка дорын ӧз сылылы Кылзэ шерса бускельёсын. Куке но колхозын ужаз - Куке... Оло, ортчем дауръёсын. Улэ со чол гинэ огназ Пичи гинэ корказ. Лусьтро пуны но сьӧд коӵыш - Артысь матысь лулъёс. Ӝуйяськемын ини солэн Липет дранча. Нош азбараз пукись вуын Гужем ӝужа, дыр, купанча. Нимзэ солэсь вунэтӥзы ни гуртоос - Педор кышно гинэ шуо. Палэнскыло солэсь гурт нылпиос, Сипыртыса "вегин" нималляло. ...Гурт урамын огпол, кык пол Пумиськылэм мынам но вань соин: - Ӟечбур, кенак! - вазиськемлы Со янгышам кадь, востэмак Пальпотылон вужер Ымдуръёсаз суредалляз но Дыртылӥз, векчи вамышъяса, Тылыс тусо корка дораз. Оло, ӧвӧл со - Оло, вань... ...Кулэм шӧйзэ солэсь Куинетӥ нуналаз гинэ Шӧдӥсь луиз - Лусьтро пуны шимес вузӥз, Капка вылын нош сьӧд коӵыш пукиз. Огбӧлякысь луса, Анай монэ ыстӥз бускель гуртэ, Оло, соин, таин-а юрттоно луоз Ватон радын? ...Возъяллямын синучконъёс Пӧртэм басмаосын. Ӝомо-югдо Корка пушкын. ...Пересь кышномуртъёс Лыдын дас кык кузя Пуко но верасько, Ӝикыт гинэ корос котыр Кыштыр пуксьылыса. ...Кирос пуктон сямен, Ӝутӥ вал бур киме, Ӧй вутты кымесозь - Киы лаӵак усиз. Мыдор сэргын уг адскы Инмармылэн сайкыт юг тусбуйыз, Ӧвӧл! Отын мукет муртлэн Егит но мыйыко тусыз. ...Ог кызь арес луоз солы, Пилоткаез дэмӟем паллян пеляз. ...Сьӧд лентаез думылӥллям Со портретлэн выл сэрегаз. Зӧк букваос экто ефрейторлэн гадяз: "Мусо кышноелы, яратыса! Сталинградын тонэ уйвӧтъёсам адӟылыса". Нош со улэ гожтӥськемез - Чигем тури бурдлы укша... ...Шӧдтэк шорысь киы ӝутскиз Кымес дорам, кӧт вадесам, Пельпумъёсам. Кирос пуктӥ - Ӧз пайме калыкъёс. Святой Педор нош Пальпотӥз шорам. Микта агай Пурккетэ чильыменыз Азбараз Микта агай. Уг адӟиськы мон бускелез, Уг адскы со - но син азе пуксе Бездэм куфайкаен, Галифеен. Губрес ныр кускозяз Мур пуксемын вож картузэз. Микта агай улэ Туж огшоры, Солы мултэс маке Кулэ уг лу ноку. - Микта агай, дунъёс, пе, будӥллям Пызьлы но сакырлы. Кулэ ке - городысь ваё. - Ӧвӧл, бускель. Кулэ ӧвӧл. Сакыр ӧвӧл - чечы воштоз. Пызьмы вань на ӝыны мешок, Быриз ке - кышноен киын изом! - Микта агай, пограм ук кенеред, Арня нунал лыкто, юртто! - Ӧвӧл, бускель. Мон дыртытэк Сое ачим тупатъяло. - Микта агай, дырыз вуиз ни Картофкаез но гожъяны. Арня нунал валэн вуо! - Ӧвӧл, бускель. Мон каньылля Сое мотыгаен но гожъяло. ...Микта агай - югыт сямо. Тӧдьы тушаз котькуд муртлы Дасяллямын сюлмысь кылъёс. Туж возьдаське кин ке азьын Аклес тусо возьматскыны, Маке сое кураськыны. ...Туннэ нош вазь ӵукна Микта агай дорам Ӵуш-паш бызьса вуиз: - Бускель, оло, юрттод? - Куронэныз со паймытӥз, Оло, кылме ик ньылытӥз? Микта агай кылиз куфайказэ, Гадяз чиляк адскиз Гвардейской значокез. - Ыштӥ мон чильымме! Лешак басьтон! Уг валаськы - кытчы пыриз, Шӧдске, синмы лябӟиз. Утчаломы азбар котыр, Бакча берысь но учкылом. Ведь чильымтэк улон - бырон. Чильым пурккетыны Комбатэлэсь дыши Кёнигсбергын. - Э-э, тумошо тон адями, Микта агай, дунне утись, Мыном но утчалом... ...Тодмо суред адскиз со ӝытазе - Нош пурккетэ чильыменыз Азбараз Микта агай. - Микта агай, маке юрттэт Кулэ луиз ке - вазь, ява! - Эн сюлмаськы, бускель, Улэп кыльса - улом ай каньылля! Ыштэм пальпотон Лади яратылӥз серекъяны Лэчыт анекдотэз кылса - Со куасалскоз но посыса кӧтсэ, Синвуосыз потмон гороз. Чылкыт сюлмо адямиос гинэ Озьы, пе, быгато серекъяны. Котькуд муртлы Лади Кыӵе ке но шуныт кылъёс Быгатылӥз шедьтылыны. Шораз ӧз утэ пуныос, Вешась кизэ витьылӥзы коӵышпиос. Егит мылкыд, Ӝужыт мугор, Паськыт пельпум, Пальпотылӥсь чагыр синъёс... Тӥни сыӵе со - Милица Лади. Бен, мар-о ватонэз - Солэсь юлтошъёссэ сокем ик яратӥсь Калык пӧлын ичи. Нош марлы ке но милица Лади Вал ваньзылэсь пӧртэм... Оло, мыным гинэ-а Потылӥз озьы? ...Тани уг адскы ни Лади Иж кар урамъёсын Ог куинь толэзь... Собере шуак пумиським Сенной базар дорын. Чиньыосы кӧдэктытозь, со Кырмалтӥз, ӟечъяськыса, киме... Артэ сылӥм, маке вераськыса: - Кытчы ышид-бырид, Лади? Со вакчияк вераз: - Чечня. Ож бусые Командировка вал... Соку ик гылтӥмы сурен Вирен но дэриен чопкетылӥсь Вакчи, шимес кылэз. ...Тумошолэсь но тумошо Соку мон Ладилы Анекдотъёс кисьматъялляй. Серекъятны тырши, Огвись кузя коть ӝутыны Сумбрес мылкыдъёссэ. ...Мырдэм гинэ кырыжтылӥз Лади ымдуръёссэ - Ӧз горылы сюлмысь. Ымдурысьтыз кисыриос Пальпотонзэ кортналлязы. ...Мед ӵашйысал йыр вадьсазы Со муртъёслэн - Егит казакпилэсь пальпотонзэ Таласьёслэн! Трактордэс выльдоно ке Кӧня ке толэзь талэсь азьло Иж карысь Южной автостанция вӧзын усьтӥськиз выль магазин. Отын вузасько тракторъёслы воштос ёзъёс. Нимаське со "Трактор Авто Запчасть" шуыса. Выль вузкарон инты алигес гинэ кылдӥз бере, солэн вывескаез син шоры соку ик йӧтэ. Утчаны ик кулэ ӧвӧл, лызэн чебер гожтэмез автобус витисьёслы умой адӟиське. - Милям кадь магазинъёс али гинэ кылдыло, - вера магазинлэн директорез С.В.Корепанов. - Ми таӵе уж борды басьтӥським республикаысьтымы нянь будэтӥсьёслы но пудо утисьёслы юрттэт сётон вылысь. Зэм но: одӥг адями но сиськыны уг пуксьы няньтэк. Ӝӧк выл узыр, йӧлэз-сӥлез вань ке, нош техникатэк ю-нянь но уд будэты, пудо но уд ворды. Выль магазинын вузасько ДТ-75, МТЗ но ХТЗ тракторъёслы, зерноуборочной комбайнъёслы, пӧртэм сельхозтехникалы ёзъёс. Отысь озьы ик шедьтыны луоз КамАЗ, ЗИЛ но ГАЗ грузовой, УАЗ легковой машинаослы но автобусъёслы ёзъёс. Иж карын сяна, складъёссы вань Сарапулын но Можгаын. Вазиськыны луэ отчы но, татчы но. Секыт но бадӟым вузъёсты, заявка сётэмын ке, магазин ачиз ик дунтэк аслаз машинаеныз вуттоз коть республикаысьтымы эштосэ, предпрятие яке фермерлы, коть Татарстанысь Агрыз ёросэ. Дун тырон сярысь вераськоно магазинэн. Таиз ласянь газетмы матысь дыре нош ик ялон печатлалоз. Жингыртыны луэ 30-77-75 номеро телефонъя. П.СКОБЕЛЕВ. Туспуктэмъёсыз В.Камашевлэн. ВЫЖЫОСМЫ Вань сыӵе дунне Дас ар талэсь азьвыл дуннеысь финн-угор егитъёс асьсэлэсь огазеяськонзэс кылдытӥзы. Мар бордын ужа, кыӵе ужпумъёсты сэрттэ-пертчэ МАФУН? Со сярысь вераськиськом МАФУН-лэн Кенешаз пырись муртэн, республикаысьтымы Нациосын ужан политикая министерствоысь специалистэн Л.Н.БУРАШОВАЕН. - МАФУН егит финн-угоръёсты огазеяса, соослэсь сюлэмшугъяськонъёссэс сэрттыны- пертчыны выре. Нош соос тырмымон. Малы асьмеды асьмеос ялан ултӥямен шӧдӥськом, общественно-политической улонэ пыриськыны, асьмелэсь визьмес но быгатонлыкмес возьматыны ум дӥсьтӥське? - Сяммы сыӵе... - Вот ӵапак со сям шоры учкыса улоно ӧвӧл. Астэ ачид вормыны дышетсконо - мукетъёсызлы адӟем карымон, визьмо но дӥсьтӥсь луыны, азьветлӥсь кариськыны тыршоно. Ми пӧртэм программаос ужрадъёс пыр сюлмаськиськом пиналъёслы но егитъёслы асьсэлы оскон пыӵатыны, тодон-валанзэс но быгатонлыксэс кулэ азе ӧръяны. - Тӥ шуиськоды, вань финн-угор егитъёслэн огкадь "висёнъёссы". Кунгож сьӧрысь финн-угоръёс сярысь мон озьы ӧй шуысал. Собере малы астэ финн-угорен шӧдыны? - Бен, соосын али асьмеды уд ӵошаты. Эстонъёс, финнъёс, мадьяръёс паймо Россиысь национальной ужпумъёслы, пичи калыкъёслэн улыны право понна нюръяськемзылы, валаны куремзылы, малы ке шуоно, соос странаязы асьсэос валтӥсь калык луо. Соос ӟеч тодо финн-угор дуннеын улэмзэс, нош асьмелэн али но уг валало на, сыӵе дунне вань шуыса. Нош астэ одно финн-угорен шӧдыны нокин но уг косы. Тани мон - удмурт, удмуртэн ик асме шӧдӥсько но. Но вашкала ӵыжы-выжыосмес матысьгес тодыса, соосын пумиськылыса, валче ужаса, зэмзэ но, одӥг семья кадь потӥськод. Со юрттэ астэ кужмогес, дӥсьтӥсьгес шӧдыны, кусыпъёс тупатыса, кунгожъёсты паськытатыны, озьы капчиенгес бадӟым Дуннее потыны. - Россиысь финн-угоръёслэн сюлмаськонъёссы - одӥг, кунгож сьӧрысьёслэн - мукет. Та пумысен ужады шугъяськонъёс уг кылдыло-а? - Сотэк уг луы. Но финн, эстон, мадьяр эшъёсмы милемлы юртто. Эстониын вань нимысьтыз "Финно-угрия" фонд. МАФУН-лэн президентэз но - Эстониысь тодмо егит азьветлӥсен Яак Прозесэн ми юн кусып возиськом. Но ассоциация та дырозь нокытын пусйымтэ (регистрировать карымтэ), малы ке шуоно, отчы пӧртэм странаосысь калыкъёс пыро. Соин ик али Россиысь гинэ финн-угоръёс понна нимысьтыз программа дасям. 9-тӥ� 12-тӥ июне МАФУН-лэн Советаз сое эскером. Умоен лыдъязы ке, сое Правительствое поттом, пусъём. Ассоциацилы нимысьтыз коньдон висъясалзы ке, бадӟым ужрадъёс ӵемгес ортчытъяны, интыосын ужаны быгатысалмы. - Кыӵе тунсыко ужрадъёс ортчытоз МАФУН матысь дыре? - Арлы быдэ ортчыло этнофутуризмъя семинаръёс, бадӟым классъёсын дышетскисьёслэн конференциоссы, усточи пиналъёслы лагерь сменаос. Туэ усточи пиналъёслы сменаос ортчозы Коми, Ханты-Манси, Марий Эл Республикаосын. Азьвыл вань удысъёсты огазеяськом ке вал, туэ национальной школаен, культураен но фольклорен тунсыкъяськисьёс нимаз люкаськозы. - Удмуртиысь кыӵе огазеяськонъёс пыро ассоциацие? - "Шунды" дэменлык, Ижевскысь кылъёсты дышетонъя 44-тӥ лицей, пор егитъёслэн "Ужара" огазеяськонзы. - Шӧдскымон-а инты басьто соос финн-угор егитъёслэн движениязы? - Бен, асьмелэн трос адӟем карымонэз, данъяськыны, калыке вӧлмытыны гинэ ум быгатӥське. Огвакытэ МАФУН-эн кивалтӥз Кун Думаын асьмелэн туала депутатмы Светлана Смирнова. Вераны кулэ, со кивалтон вакытэ ассоциация тужгес ӟеч ужаз. - Иське, МАФУН кивалтӥсьёсты но будэтыны юрттэ? - Ӵапак озьы. Малы, малпаськоды, азьвыл комсомоллэн ужез туж вылэ пуктэмын вал? Ӟеч кивалтӥсьёс будэтон понна. Огазеяськонын адями кужмогес, дӥсьтӥсьгес луэ, аслэсьтыз кулэлыксэ шӧдэ. Зэм, МАФУН-э озьы но азьветлӥсьёс вуо, но пӧртэм удысъёслэн (политикалэн но) азьпал радаз потыны, дипломатилы дышетскыны со ӟеч школа луэ. Светлана Константиновна Смирнова сяна, Кун Думалэн депутатэз луиз ассоциацимылэн одӥгез азьветлӥсез - Коми Республикаысь Валерий Марков. Алексей Конюхов Коми Республикалэн кивалтӥсезлэн воштӥсез луэ. Ми данъяськиськом сыӵе эшъёсынымы. Бадӟым кивалтонэ вуыса но соос уг вунэто милемыз - МАФУН-лэн ужъёсыныз тунсыкъясько, юртто. З.РЯБИНИНА. ОСКОН Куректонлы уг йыбыртто Республикаысьтымы инвалидъёслэн ёрос огазеяськонъёссы пумен пыд йылазы султо. Кылдо асьсэлэн ужан интыоссы, кусып тупато ёрос администрациосын, юрттэт сётыны быгатӥсь предприятиосын, ужбергатӥсьёсын. Шуге-леке сюремъёс шӧдӥзы огазеяськонлэсь пайда сётэмзэ: отчы пыремъёс дунтэменгес вузъёс басьтыны быгато угось, бытовой юрттэт понна но дун ӧжытгес куро, тужгес ёрмисьёсызлы коньдонэн яке мукет маин ке юртто. Мукет ласянь но пусйыны луоз огазеяськонъёслэсь кулэлыксэс. Адямиос асьсэ куректонзы пӧлы гинэ выйыса уг уло ни, асьсэлэсь кулэлыксэс шӧдо, ог-огенызы кусып тупато, ӵош пуко, шулдыръясько. Ужзы ӟеч пӧрме Глазовысь, Воткинскысь, Можгаысь, Якшур-Бодьяысь огазеяськонъёслэн. Нош берло дыре ужзы радъяськиз Уваын, Шарканын, Ярын, Грахын. Огъя верано ке, шаерысьтымы Инвалидъёслэн огазеяськоназы та дырлы 10 сюрс пала адями пыремын. Со ӧжыт. Республикаысьтымы огазеяськон ас азяз ужпум пуктэ тросгес адямиосты котыраз кыскыны. Со понна ужано но ужано. Асьтэос чаклалэ: Ижевскын гинэ инвалидъёс 50 сюрслэсь ятыр лыдъясько, нош шаермыя со лыдпус 90 сюрслэсь но трос. Валамон, отчы ик пыро синтэмъёс, ляб адӟисьёс, Чернобыле ветлэмъёс, Афганистанын, Чечняын ожмаськемъёс. Тросэз соос мукет огазеяськонъёсын герӟаськемын. Но таосыныз ӵошатыса, огъя висёнъёсын курадӟисьёс, сӧсыръёс уката но тросгес. Озьы ке но шуге- леке сюремъёс инвалидъёслэн огазеяськоназы кыстӥськыны уг дырто. Асьсэос но ёрос ёзъёс та ласянь лябгес ужало. Кылсярысь, Юкаменск ёросын пыриськыны быгатэ 459 мурт, нош огазеяськонэ пыремын 56 мурт; Красногорск ёросын 575 мурт пӧлысь огазеяськонэ пыремын 106-ез; Каракулиноын 607 пӧлысь - 35-ез; Кизнерын 1035 пӧлысь - 60-эз. Со понна ваньмызлы адӟем карымон тыршо можгаос: 1977 адями пӧлысь ёрос огазеяськонэн пусъемын 1350 мурт. Радъёссэс йылэтон борды можгаос рос-прос басьтӥськизы 1998-тӥ арын. Отчыозь тросгес саклык висъяллязы производство удыссэс ӝутонлы. Зэмзэ но, коньдон поттыны уд ке быгатӥськы, юрттэт сётэмед уг луы ке инвалидъёслы, кинэ бордад кыскыны быгатод? Нош шонерзэ верано ке, Можгаысь инвалидъёслэн огазеяськонзы улӟиз Нина Андреевна Светлова кивалтэм улсын. Егит кышномурт та уж борды басьтӥськиз 1996- тӥ арын. Али Можгаысь огазеяськонлэн дас куинь пичи ёзъёсыз ужало, сизьымез - гуртын, куатез - городын. Но Нина Андреевналэн верамезъя, городысь куд-ог ёросъёс, озьы ик гуртъёс палэнэ кылемын на. Ужез вырӟытон понна котькудаз шедьтыны кулэ сьӧразы валтыны быгатӥсь муртъёсты. Можга городысь али пусйыны луоз "Дубитель", "Красная звезда", "Авторемзавод" ёзъёслэсь ужзэс. Адӟем карымон ужало Бадӟым Кибья селоын но. Татысь пичи ёзэ (первичной организация) дас сизьым мурт пыре, нош инвалидъёслэн огъя лыдзы кызь тямыс мурт. Кибьялась ёзэн кивалтэ Валентина Созонова. Огазеяськонлэн вань пыдкутчан тупатъянъя, дӥськут вуронъя, йырси ӵышконъя мастерскоез. - Кивалтон удысэ ми тросгес кыскыны выриськомы егитъёсты. Соос ик пыро огазеяськонлэн правленияз, - шуэ Нина Андреевна. - Таос сьӧразы валто ни мукетъёссэ ас ёзъёссэс. Огазеяськонамы та дырлы 300 пала куамын аресозь егитъёс пыро. Но шуге- леке сюремъёс пӧлын тросгес мӧйыос, соослы саклык висъятэк нокызьы уг луы. Ортчытъяськом пӧртэм ужрадъёс: чай юонъёс, пӧртэм ӵошатсконъёс, юбиляръёсты ӟечкыланъёс. Толэзь ӵоже асьсэды ӟеч возьматэм ёрос кивалтӥсьёслы 50 манет коньдон премия висъяськом. Ӵошатсконъёс ортчо ёрос ёзъёс куспын но. Устооссэ нош ик маин ке но пусйиськом. Усто ужасьёс пӧлы пыртыны луоз Ильсур Нуриевез. Со кивалтэ Можгаысь "Авторемзавод" ёрос ёзэн. Дышетскиз Сарапулысь колледжын телемастере, ужаз Можгаысь бытовой юрттэт сётонъя комплексын. Егит муртлэн огазеяськонлэн ужаз чырмыт пыриськемез синйылтытэк ӧз кыльы, Н.А.Светловалэн дэмламезъя бырйизы кивалтӥсе, огдыре ик со дышетскиз пыдкутчан тупатъян ужлы. - Милям огазеяськонамы 72 мурт пыремын ни, - шуэ Ильсур. - Адямиосты бордамы кыскон понна ялан ужаськом. Та аре нырысетӥ квартал ӵоже гинэ дас ньыль мурт куриськиз дорамы. Тросгес ужаны турттӥськом егитъёсын, утчаськом кырӟаны-вераны быгатӥсьёсты, кибашлыосты. Огазеяськонамы пырем котькуд адями доры мон ачим ветлӥ, тодматски улон интыенызы. Юрттэт курыса вазиськисьёс луизы ке, тодо ни кинлэн кыӵе югдурез. Мӧзмыса ум улӥське, пӧртэм ужрадъёс ортчытъяськом, кусыпмы умой 10 номеро школаен. Ёрмисьёс понна кулэтэм луэм дӥськутъёсты басьян борды басьтӥським, кулэяськисьёс понна эмъюм турынъёс бичаськом. Алигес Киров улосын инвалидъёс пӧлын КВН ортчиз. Кировысь, Пермьысь эшъёсынызы ӵошатсконэ ветлӥз Можгаысь егитъёслэн командазы, Ильсурлэн ёросысьтыз куинь мурт отчы пыриськиз. Котькуд нунал ортчылӥзы репетициос, юрттӥськыны басьтӥськизы "Дубитель" но "Спутник" культура юртъёсын ужасьёс. Шаерысьтымы команда КВН-ын басьтӥз кыкетӥ инты, кузёослы бере кыльыны уг яра вал угось. Можгаос Кировысь ӝутскем мылкыдын берытскизы. Асьме дорын но, пе, таӵе ужрадъёс ортчытъяно, со юрттоз егитъёсты огазеяны. Республикаысьтымы инвалидъёслэн огазеяськонзы та кичӧлтонэз умоен лыдъяз, можгаослы ик оскизы та ужрадэз дасян борды басьтӥськыны. Л.МАЛЫХ. Кырӟанлэн сюресэз аслаз Азин нимо библиотекаын огаз пумиськон дыръя мон тодматски Ильин кузпалъёсын: Семен Андреевичен но Лидия Андреевнаен. Со дырысен таосын эшъяськисько ни куамын ар пала. Соос кыксы ик туж ярато кырӟанъёсты, тужгес но удмуртъёссэ. Мынам но соослэн кадь ик мылкыды. Соин ик оград библиотекаын пумиськонэ Семен Андреевич сьӧрам басьтыны косӥз куинетӥ изданиен поттэм "Вай кырӟалом, эшъёс!" сборникмес. Лыдӟисьлы валэктон понна, пичильтык мадё али. Мон кема гинэ ужай книгапоттонниын. Котькинъёсын эшъяськыныкылдӥз. Лидия Васильевна Перевощиковаен (Осотоваен) ваньмызлэсь кема ӵош улӥмы но, ужамы но. Куинь метр кузьдалаем, метр но ӝыны пасьталаем коридор но векчи борддор гинэ люкылӥз семьямес. Огмы доры ӧсъёсмы кӧлыкумы гинэ пытсалляськизы. Лидия Васильевна кык апайёсыныз но Васса апаезлэн пиеныз ӵош улӥзы пичи гинэ комнатаын. Праздникъёсыз но ми ӵош пусйылӥм. Лидалэн Васса апаез туж чебер кырӟа вал. Мон соослэсь нырысьсэ кылӥ "Кытӥ, кытӥ лыктӥды..." калык гурез. Куддыръя кырӟаны кутскиськом но кылъёссэ пумозяз ум тодӥське. Оло, со но луиз, дыр, мугез, кырӟанъёсыз люкаса сборникен поттыны. Та вакытэ ик издательствое уно гожтэтъёс вуылыны кутскизы, песенник курыса. П.К.Поздеевлэн 1960-тӥ арын нотаосын поттэм 2000 тиражъем "Жингырты, удмурт кырӟан" сборникез кема ик ӧз кылльы уго. Лидия Васильевнаен кырӟанъёс люканы кутским... Озьы 1962-тӥ арын, кисыын нуллымон гинэ векчи 10000 тиражен 16 копейкаем "Вае кырӟалом, эшъёс" сборник потӥз. Кӧня ке ар ортчыса, издательствое нош гожтэтъёс вуылыны ӧдъязы, кырӟанъёсын выль книга курыса. Озьы, 1977-тӥ арын, кӧня ке выльдыса, сомында ик тиражен, азьвылэзлэсь ӧжыт пичигес форматэн, 31 копейкаем "Вае кырӟалом, эшъёс" сборник кыкетӥзэ потӥз. Мон пенсие потӥ, уг ужаськы ни вал. Лидия Васильевна шуэ: нош ик, пе, гожтэтъёс вуыны кутскизы, кырӟанъёс печатланы курыса, табере нотаосын, пе, куро. Азьло но, али кадь ик, издательствоын коньдонэн ӟоскыт вал. Нотаос понна нимаз коньдон тыроно суредасьёслы. Нош ик нотаостэк поттоно луиз сборникез. Тазэ, куинетӥзэ, изданиез поттон борды ми "кыткимы" Семен Андреевич Ильинэз. Мон тодӥсько: со, оло, вань удмурт кырӟанъёсыз люка вал. Таиз бичетмы - "Вай кырӟалом, эшъёс" - потӥз 1993-тӥ арын 20000 тиражен, зӧк, бадӟымгес форматэн, дуныз книгаын пуктэмын ӧвӧл. Тӥни озьы, Семен Андреевичлэсь косэмзэ быдэстыса, библиотекае сьӧрам берло потэм сборникмес ваи. Та книгамы мон понна визитка кадь луиз. Татын Семен Андреевич милемыз ваньмес ог-огенымы тодматӥз. Туж тау карисько Ильинъёслы, тазалык сӥзисько, али кадь ик чырткем ужаны, калыкез огазеяны мед быгатозы. А.ИВАНОВА, Ижын улӥсь. ВАЛАНТЭМ УЧЫР Югдурез умойтэм возьматӥз Туэ 18-тӥ апреле ТВС телеомпанилэн "ТВС иворъёс" ӝыт передачаяз валантэм но умойтэм ивор сётэмын вал. Со герӟаськемын заводмылэн поттэм продукциеныз. ТВС телекомпаниысь журналистъёс уг оско газ юонъёслэн ӟечлыксылы, напитокъёсмы, пе, тазалыклы кышкытлык ваё. Кылсярысь, вераськон мынӥз сиён-юон (пищевой) ватсэтъёс пумысен. Соос, пе, тырисько емышо газ вуосы (напитокъёсы). Дуннеысь Тазалыкъя Огазеяскьонысь (ВОЗ-ысь) экспертъёс, Россиысь Тазалыкез утёнъя министрерстволэн санитарно-эпидемиологической ёзысьтыз спецалистъёс, Стандартизацияя, метрологияя но сертификацияя центрысь ужасьёс трос пол эскеремзы- чакламзы бере таӵе йылпумъян лэсьтӥзы: кудӟытӥсьтэм юонъёс поттонын кутӥськись пищевой ватсэтъёс милям но заводмы соосты уже кутэ, басьяськисьёслы нокыӵе кышкытлык уг кылдыто но адямилэсь тазалыксэ уг лябӟыто. Милям емышо газ юонъёсмылы ӟечлыклы тупась сертификатъёс сётэмын но гигиена ласянь умой дунъет сётэмын. Ижысь минерально-фруктовой вуос поттонъя завод республикаямы одӥгез устоез предприятие луэ6 со вылӥ ӟечлыкен минерал ву но газ юонъёс лэсьтэ. Емышо юонъёс ми 1971-тӥ арысен поттӥськом, со понна вань условиос кылдытэмын: ужа усто лаборатория, тыршо бадӟым опытэн специалистъёс, пуктэмын туала выль оборудование но автоматъёс. Матысь кык ар ӵоже эскерись организациослэсь заводлэн ужамез, газ юонъёсмы вылэ одӥг рекламация но ӧз вуы на. Та югдурез лыдэ басьтыса, предприятилэн кивалтӥсьёсыз решение кутӥзы: ТВС телекомпания умойтэм но валантэм иворъёс сётэмзэ но изъян лэсьтэмзэ шара вераны, калыклы ивортыны но шонертон сётыны кулэ. Сыӵе вамыш ке ӧз луы, "Ижевский завод минерально-фруктовый вод" ТПАОЗТ-лы судэ вазиськоно луоз. Николай ПОЛЯНСКИЙ, огазеяськонлэн валтӥсь директорез. Журналистъёсын пумиськонъёс Улон тупатскоз оскытӥз нылкышно-подполковник Кун Кенешысь ялан ужась комиссиослэн кивалтӥсьёссы котькуд четверге журналистъёсын пумиськыло. Таяз учыре газетчиосын вераськонэ вуылӥз Улон-вылонэз радъян политикая, ужъя, тазалыкез но инкуазез утёнъя комиссилэн кивалтӥсез Фания Федорова. Пумиськон аспӧртэмлыкогес пӧрмиз, угось депутат ас сьӧраз ваем на куд-ог удысъёсысь кивалтӥсьёсты. Таӵе вамышсэ тазьы валэктӥз: Кун Кенеш, пе, законъёс кутэ, нош сое улонэ быдэсъясь ёзъёс пыӵато. Озьы журналистъёсын вераськонэ пыриськизы на Тазалыкез утёнъя, Калыкез улон-вылонын утёнъя министерствоосысь но Калыкез уже интыянъя кун комитетысь кивалтӥсьёс. Огъя верано ке, вераськон мынӥз таӵе ужпум котыртӥ: мар лэсьтӥське ветеранъёслэсь, трос нылпиё семьяослэсь улон-вылонзэс капчиятон понна. Ветеранъёс сярысь федеральной закон кутэмын вал 1995-тӥ арын. Но со уг быдэсъяськы, меӵак шуиз Ф. Фёдорова. Асьме депутатъёслэн Сычёвлэн но Дементьевалэн ӵектэмъёссыя ветеранъёс сярысь законэ кӧня ке ватсанъёс пыртыны чакламын. Мар соос ӵекто, Ф. Федорова ӧз иворты, Кун Кенешлэн вуоно сессияз лыктыса пыр-почгес тододы, шуиз. Но вераз, туннэ нуналлы ожысь, ужысь ветеранъёслэн но огшоры пенсионеръёслэн улэм-вылэмзы ог-о__гзылэсь туж зол висъясько шуыса. Кин ке 1540 манет пенсия басьтэ, нош кин ке - улыны тупатэм ичи коньдонлэс кык пол ӧжыт. Сыӵе югдурез умоен лыдъяны уг луы. Улонзы капчи ӧвӧл трос нылпиё семьяослэн но. Соослы котькуд нылпи понна кун али 192 манет гинэ тыре. Таӵе югдурез воштон вылысь, комиссиысь депутатъёс дасям законазы ӵекто котькуд нылпи понна 450 манет пала тырыны. Тазалыкез утёнъя министрлэн воштӥсезлэн но, Блохинлэн, ивортэмезъя, асьме республикаын кык но куиньмос люкетэз улӥсьёс кулэясько дунтэм эмъяськонлы. Но бюджетын ваньмызлы юрттыны чакламын ӧвӧл. Соин ик таяз арын, Вормонлы 55 ар тырмонэз лыдэ басьтыса, бадӟымгес юрттэт висъяськоз ветеранъёслы дунтэмен пинь эмъяны, кылзӥськон аппаратъёс басьтыны но синъёссэс эскерыны. Республикаямы 166 кун аптека лыдъяське, ваньзылэн ик соослэн правозы вань, шуиз Ю. Блохин, дунтэмен эмъюмъёсын вузкарыны. Но асьме аптекаосын законэз тӥян учыръёс данак на, шуиз Ф. Федорова. Со оскытӥз, эмъюмъёсты вузан котырын кылдэм югдурез ялан син азяз возёз шуыса, озьы ик пыр-поч эскероз, кыӵе монополистъёс кузёясько та удысын. Сётэм кылззэ Фания Федорова быдэстоз, вылды. Угось дышетскемезъя со - юрист, подполковник званиен, депутатэ быръемзылэсь азьло ужамын радъям йыружъёсын нюръяськонъя управлениын. Нылпи пособиосты тыронэн герӟаськем ужпумъя валэктонъёс сётӥз калыкез улон- вылонын утёнъя министрлэн воӥсез Г. Липина. 1999-тӥ ар понна тырымтэ пособиосты анай-атайёс басьтозы 2001-тӥ арын, шуиз со. Но Коньдон ужпумъёсъя министерство луонлыкъёс утча ортчем аръёсъя тырымтэ пособиосты вакчи дыр куспын. Али коньдон висъяське туэ арлэн нырысетӥ кварталэз понна. Пособиосты тыронын, пусйиз Г. Липина, лыдэ басьтӥськозы нырысетӥ категорие пыртэм семьяос, мукет сямен вераса, тужгес но кулэяськисьёс. Т. Банникова. Журналистъёсын пумиськонъёс Нырысетӥ президент быръён азьын Кун Кенешлэн берлоез сессияез юнматӥз Удмурт Республикалы президент быръёнэн герӟаськем куинь законъёсты. Валтӥсез, валамон ини, луэ "Удмурт Республикалэн Президентэз сярысь" Закон. Со кутэмын но 9-тӥ июне газетын печатламын. Табере, печатлам дырысен 10 нунал ортчыса, закон кужыме пыроз. Документъёс капчиен ӧз вордске. Соин ик со пумысен кема вераськылозы на, дыр, политикъёс, юристъёс, ужаса улӥсьёс. 13-тӥ июне журналистъёсын пумиськылӥз республикаысьтымы Прокурорлэн азьвыл воштӥсез, нош табере Быръёнъя комиссилэн тӧроезлэн воштӥсез Гарифей Ахметов. Со эшшо но эшшо пусйиз на: "Удмурт Республикалэн Президентэз сярысь" Закон дасяку лыдэ басьтэмын вал Россилы Президент быръён сярысь закон. Удмуртилы Президент быръён нуналэз пусъёз Кун Кенешлэн вуоно сессиез. Со усьтӥськоз 20-тӥ июне, валэктӥз Г. Ахметов. Со нуналэз депутатъёс юнматозы, президент быръён сярысь закон вылэ чӧлскыса. Отын тазьы учкемын: президентэз быръён нунал тупатӥське депутатъёслэн со сярысь решение кутэмзы дырысен 180 нуналлы бере кыльытэк но 70 нуналлэсь вазьгес. Озьыен, туэ сӥзьыл ик ортчоз республикаысьтымылы президент быръён. Кӧня адями нюръяськоз президент луон понна. Ӝоген соослэсь нимъёссэс тодомы, вылды, но Г. Ахметовлэн малпамезъя, 5-6 мурт сяна, пе, уз луы. Быръёнъя комиссилэн адямиез журналистъёслы озьы ик тодэ вайытӥз, кандидатъёс сярысь гожъяку чылкыт, адямиез сьӧдмасьтэм, амалъёсты гинэ уже кутоно шуыса. Солэн верамезъя, иворъёсты вӧлмытӥсь ёзъёсты быръёнъёс вакытэ чаклан вылысь оло, пе, нимысьтыз ужась группа но кылдытоно луоз. Угось Кун Кенеше берлояз быръёнъёс дыръя дасо пала газетъёс алэмын вал быръёнъя законэз тӥямзы понна. Таиз малпан умойтэмгес кадь потӥз. Журналистъёсты чаклан пумит уг-а меда луы прессалэн эрикезлы. Президент быръёнэн герӟаськем ужпумъёсты озьы ик мукетаз пумиськонын журналистъёс азьын сэрттӥз-пертчиз Конституция бордын ужась комиссилэн муртэз, юстицияя министр Вячеслав Осипов. Нялтас пусъём: журналистъёслэсь ужпумзэс чакласа возёнлы со пумит. Удмуртилэн Конституциез табере Россилэн Конституциезлы матэ каремын. Озьыен, комиссия ас азяз пуктэм ужзэ быдэстӥз, шуиз министр. 79 статьяе 236 ватсанъёс но воштонъёс пыртэмын. В. Осиповлэн верамезъя, законъёс бордын ужанэ, пе, куд-ог дыръя политикаен герӟаськем ужпумъёс чуртнаськылӥзы. Соин ик, политикае шоналскылыку, чидан но ӧз тырмылы. Президент быръемен лыдъяськоз со понна куаразэс сётэмъёс пӧлысь ичизэ 25 процентэз бырйисьёс мылкыдзэс ке веразы. Президент луон понна со туж пичи лыдпус кадь. Озьы ке но, кыказ ик пумиськонын Г. Ахметов но В. Осипов журналистъёслы осконзэс веразы, Удмуртиын улӥсьёс асьсэлы нырысьсэ президент быръён понна туж мыло-кыдо пыриськозы шуыса. Соин ик законъя тупатэм 25 лыдпус бадӟымгес но (60-70 процентозь) луыны быгатоз. Министрлэн верамезъя но президентэ кандидатъёс вить муртлэсь трос уз луэ. Соос асьме шаерын улӥсьёс луозы. Бен, асьмеос асьмедыз гажаны кулэ. Кыӵе ке палэнысь кандидат понна куарамес сётоно меда, сыӵе кандидатъёс законъя луыны быгато ке но? Т. БАННИКОВА. Ува ёрослы - 65 ар Кылем шутэтскон нуналъёсы уваос пусйизы районзылы 65 ар тырмонэз. Зоро куазь шоры учкытэк, стадионэ калык трос люкаськиз. Отын ортчизы гуртысь спортсменъёс пӧлын ӵошатсконъёс. Ёрос кивалтӥсьёс юбилеез пусйыны ӧтьылӥзы Ижысь куноосты. Соос пӧлын -районлы пӧртэм аръёсы юрттэм адямиос, писательёс, суредасьёс. Лыктэмъёс вуылӥзы Уваысь искусствоосъя школалэн выль юртаз, адӟизы отысь пинал усточиослэсь быгатэмзэс. Тодмо крезьгурчи Пантелей Кузнецов мадиз ёросысь культуралэн туннэ нуналыз сярысь. Вуылӥзы куноос "Увадрев" огазеяськонэ но, тодматскизы отысь пила пызьлэсь плита лэсьтӥсьёсын, мукет ужасьёсын. Праздник ӝикытак но пайдаё пӧрмиз. И. Кричев. Увае куное ветлэмъёс ёросысь кивалтӥсьёсын. Президентэз но витё Шаерысьтымы сизьымез предприятиос мылкыд каризы асьсэлэсь вуззэс взьматыны "Урал Экспо Армс - 2000" выставкаын. Со 11-тӥ-15-тӥ июле ортчоз Нижний Тагилын. Отын возьматӥськоз пыӵал тӥрлык но ожгар техника. Адӟытонын Удмуртилэсь данзэ утёзы "Ижмаш", "Аксион", электромеханикая завод, Сарапулысь но Ижысь радиозаводъёс. Воткинскысь машина лэсьтонъя завод но Ижевскысь механикая кун предприятие адӟытонэ уг пырисько. Кызьы верало, выставкае вуыны кулэ Россилэн Президентэз Владимир Путин. О. ЛОМОВ. ШОКЫЧ Галина Ларионова Депутат Сценка Шудӥсь муртъёс: Депутат Пересь Егит мурт Мынэ кенеш. Люкаськемъёс азьын вераське депутатэ кандидат. Мон Поздеева А.Г. депутатэ кандидат луисько. Ачим мон рабоче-крестьянской семьяысь. Кык вылӥ образование басьтӥ: институтской но коридорной. Али кивалтӥсь луыса ужасько. Соин ик асме депутатэ дэмласько. Нош программа аслым мон гожтӥ туж бадӟым. Лыдӟыны трос дыр кулэ. Собере огшоры ужась калык ваньзэ уз но вала. Одӥг кылын вераса, мынам программае нимаське: "Ваньмызлы ӟеч улон". Залысь султэ пересь. Пересь. Кен, кен, тон, пе, депутат луыны медӥськод? Пенсия ласянь юртты вал. Депутат. Юртто, только монэ гинэ бырйы. Пересь. Э-э-э, кен, мон кыӵе бырйись на? Уг но мыны бырйыны. Кинэ бырйыны но уг валаськы. Депутат. Бырйыны одно мыноно. Кыӵе кивалтӥсь асьмелы быръём, сыӵе ик луоз улонмы. Нош кинэ ке быръён понна, котькуд депутатлэсь программазэ тодоно. Тани мынам программае. (Возьматэ.) Пересь. Мар бен гожтэмын программаяд? Депутат. Ваньмызлы ӟеч улон понна тыршо шуыса гожтэмын. Пересь. Я, я, оскисько. Тонэ ик быръём. Депутат залысь егит муртлы вазиське. Депутат. Нош тон, эше, кин понна куарадэ сётод? Егит мурт. Кин улон инты но тросгес коньдон сёто шуиз, сое ик быръё. Депутат. Ваньмыз со мынам программаям вань: гожтэмын кызьы но ма кароно бусьтыр улон понна. Егит мурт. Я, соку тонэ ик быръём. Крезьгур. Депутат котырске, пуксе, кияз газет кутэ. Чыртыяз ялон оше: "Лыктэ ӵуказе". Депутат. Мон табере депутат. Сётӥзы кабинет но личной секретарь. Табере мон креслоям вез-вез пукисько, нош со ужа. Потэ пересь, ялонэз лыдӟе но кошке. Кык пол егит мурт пота на, ялонэз лыдӟе озьы ик но кошке. Пересь куиньметӥзэ потэм бераз уг кошкы. Пересь. Мон туннэ та депутатэн пумиськытэк уг кошкы. Куинь нунал ветлӥ ни. Ялан ӵуказе лыкты шуэ. Депутат. Ой, вить час ни, доре бертыны дыр вуиз. (Кошке вал ини но пересез адӟиз.) Пересь, мар татын кариськод? Пересь. Тонэ витисько, господин депутат. Улонэз ӟеч каро шуыса, программаяд гожтэмын вал ук. Депутат. Нош тон программаме лыдӟид-а? Пересь. Ӧй, но тон ачид шуид вал ук... Депутат. Ӧд ке лыдӟы, мар табере ветлӥськод на. Азьло учконо вал, кинэ депутатэ бырйиськод , программаоссэс но тупен-тупен лыдӟоно вал. Нош табере бер ни. Мон улӥсько ӟеч, тон но ӟеч ул, пересь. (Кошке). Пересь. Э-э-э, пересь кобы ик вань мон. Татчыозь улыса дышыны кулэ ни вал кӧё-вӧё вераськонъёслы - зумытэз кыл йылэ но уг йӧты. Быдӟым Вормонлы - 55 ар Сюлэм пияла ӧвӧл Война дугдэм сярысь иворез мон кылӥ школаысен. Ваньмыз огыр-бугыр бызьыло. Дышетӥсьёсмы ӟыгыръясько, бӧрдо, милемды но ӟыгыръяло: "Пиналъёс, война дугдӥз! Война быриз!" Урокъёсын пумозяз ӧм пуке ни, милемды гуртамы лэзизы. Школамы Кионгуртын вал, ньыль иськемзэ пыдын ветлӥм. Гуртамы вуим гинэ но, урам тыр кесяськыса ортчим: "Война быриз! Война быриз!..." Нокин номыре уг тоды на вылэм, гуртамы радио но, электричество но ӧй вал ай соку. Пичиез но, бадӟымез но ураме потӥзы. Кудӥз туж юн тышкаське милемды, кудӥз оскиз, ӟыгыръяло шумпотон ивор ваеммы понна. Мон та чуръёсме гожтӥсько син ву пыр, туж ӝож луэ, со ортчем улонэз малпаса. Кыӵе но курадӟонэз ӧй адӟы со аръёсы. Гуртамы кышномуртъёс, пиналъёс но пересьёс гинэ кылемын вал. Валъёсты гинэ но ожмаськон лудэ басьтӥзы. Ошъёсты дышетӥмы ужаны. Соосын гыро но, усыяло но, кутсасько но вал. Милемды, пиналъёсты, кыткем ошъёсты уллято вал. Соос кӧня ке мыно, собере ганьырак гинэ выдо. Быжзэс позыръяськом, пелязы кесяськиськом но каллен гинэ султо. Сюлоен шлач! шуккыса, нош ик гызмыль гинэ азьлане валтӥськом ошъёсты. Одӥг мол монэ но эшме Серафима Красильниковаез ошъёсын усыяны лэзизы. Нуназеян вакыт ошъёсты юскимы но, вылазы пуксьыса, вал г_Еид пала вамыштӥм. Куазь пӧсь, ошъёс котыре кытӥ ӧвӧл мар ке быдӟа лузьёс вуизы. Соос быжзэс урдӥзы но, ну вортто ук, ну вортто! Ми Серафимаен музъем вылэ ик пуксьыса кылим. Тодам ваисько тулыс вуэмез но. Лудъёс, возьёс вылын турын-куар потэ. Ми нуналлы быдэ вамыштӥськомы ӵушнялы, кызьпу гурылы, кызаузылы... Мае гинэ ӧм октэ, али ваньмызлэсь нимъёссэс тодэ ваёд на шат. Гуртын куро но, пе, турын, ми ваньзэ чидалом, оже кошкемъёс гинэ сютэм медаз улэ. 1945-тӥ арын тулыс вераны луонтэм секыт вал. Тудву басылскем бере ми, пиналъёс, тыбырамы дэра сумка ошыса мынӥськомы луд вылэ пешник бичаны. Пыдъёсмы гольыкесь. Отын но татын адӟисько на шунаны вуымтэ лымы люкъёс. Нош музъем небыт ини, куддыр пыдесозь выиськом. Озьы ветлэммы бере пыдъёсамы "чипыос" пото вал. Мар карод, чидано луылӥз со вӧсь луонэз но. Луд выл кӧня ке шупам бере лопата кутыса мынӥськом картофка лудэ. Кылем картофкаез утчаса, сюез бугыръяськомы. Огзэ-кыксэ шедьтӥськод ке, кыӵе бадӟым шуд ни со ми понна. Лумбыт гудӥськыса, гуртэ одӥг ведра ваиськом ик. Со картофкаез вуштыса, крахмалзэ висъяськом но табань пыжиськом. Макем ческыт кошке, номыр солэсь ческытсэ ӧд сиылы кадь. Кӧня аръёс ортчизы ни со дырысен, нош сюлэмысь уг кошко тодэ ваёнъёс. 55 ар ортчыса, малы дышимы асьмеос. Луимы-а визьмогес, ог-огмес валасьгес. Яке вань ортчемез ӵушиськиз, вунӥз. Кызьы валано Россиысь солтъёслэн туннэ нуналэ ас музъем вылазы вир кисьтэмзэс. Ф. Королева. Ижевск город. Дыртод - мултэссэ куасалтод Удмурт республикаысь тазалыкез утёнъя министрлэн воштӥсеныз Владислав Яковлевен кенешон Владислав Степанович, аппаратэн одӥгаз кенешонын Правительстволэн Тӧроез Николай Алексеевич Ганза пусйиз: тазалыкез утён удысын воштӥськонъёс (реформаос) ляб азинско. Мар верасалды со пумысен? -Тазалыкез утён удысын воштӥськонъёсын дыртыны уг яра - мултэссэ куасалтыны медад шедьты. Милям удысмылы бюджетысь коньдон котьку но висъяськылӥз кулэяськонъёсмылэсь трослы ӧжытгес. Нош калыкез эмъян радъямын вал, адямилэсь лыдзэ чакласа. Соя уже кутӥськылӥзы врачъёс, усьтӥськылӥзы койкаос. Кытчы вуттӥз сыӵе амал? Вань мукет странаосын ӵошатыса, Россиын котькытынлэсь но трос врачъёс но эмъяськон койкаос. Азинлыкез таӵе амаллэн туж улӥын. Со герӟаськемын калыклэн улон-вылонэз улӥе лэзиськемен но, экономика куашкамен но. Рынокен кивалтонэ выжыса, кунмылы секыт луиз сыӵе амалэн радъям удысэз возьыны. Сокем трос врачъёсмы но эмъяськон койкаосмы луыса, азинлыкъя Россия быдэс дуннеын 74-тӥ интыын сылэ. Соин ик удыслэсь ужзэ радъянын кулэ выльдӥськонъёс. Но буш киын сое нокызьы уд лэсьты, кулэ коньдон. Социальной удысэз быдэсак басьтоно ке, тазалыкез утён удыс, культура удысэн но калыкез дышетон удысэн ӵошатыса, тужгес но дуноез луэ. Арысь аре выльдӥсько эмъян амалъёс, техника. Соосты улонэ пыӵатытэк, азинлыкмыя трослы бере кылём. Россиез вератэк ини, азьмынӥсь странаос но тазалыкез утён удыслы коньдон уг тырмыто. Умой ужан понна, бюджетлэсь 20 процентсэ висъяны кулэ удысмылы, нош али со 12�14 процент луэ. Озьыен, кулэяськонъёсмы 40�45 процентлы гинэ быдэсмо. Со бордысь ик вань шуг� секытъёс пото. - Кыӵе вамышъёс чакламын шаерысьтымы тазалыкез утён удысэз ӝутон понна? - Коммунистъёс кивалтон вакытэ эмъяськыны быгатӥзы ваньмыз, но ӟечлыкез солэн улӥын вал. Соин ик вуж амалъёслэсь куштӥськоно. Кызьы верай ини, удысэз азинтыны кулэ тырмыт коньдон. Но со коньдон медаз висъяськы врачъёслэн но эмъяськон койкаослэн лыдзы вылысь. Чакланы кулэ кужамзылэсь пайдалыксэ. Эскеронъёсъя тодмо луиз, эмъяськон койкаос буш ке но сыло, коньдон соос понна висъяське. Бюджетэз кутыку чакланы кулэ алыклэсь лыдзэ но. Нош асьмелэн али но коньдон висъяське бюджетлэн быдэсмемезъя - кӧня коньдон кутӥськиз сояз арын, сомындагес ик висъяно таяз аре. Дотациос чотын улӥсь ёросъёс котьку но коньдонлы ёрмылӥзы. Табере коньдон висъян мукет сямен радъяськоз. Дотациос чотын ёрос улэ яке уг, чакламын луоз калыклэн лыдыз. Шуом, Игра, Каракулино ёросъёс коньдоноесь, нош Грахын но Киясаын ёрмон калэ вуэмын. Ваньмызлы сётыны кулэ одӥг кадь луонлыкъёс. 1974-тӥ арын Алма-Атаын ортчиз дуннеысь тазалыкез утён удысын ужасьёслэн конференцизы. Валтӥсь интые отын пуктэмын вал участокъёсъя врачъёслэн ужзы, амбулатриёсын, поликлиникаосын эмъяськонэз азинтон ужпум. Быдэс дуннеын со сюрестӥ вамыштӥзы, нош асьме правительство басьтӥськиз стационаръёсты ӝутон борды. Озьы поликлиникаос кыкетӥ интые кылизы. Быдэс дуннеын поликлиникаослы бюджетысь коньдон висъяське 40 процент, асьмелэн - 20 процент. Стационаръёслы мукет странаос висъяло 60 процентсэ бюджет коньдонэз, асьмелэн - 80 процентсэ. азинтӥськом дуно сылӥсь эмъяськонэз, кудаз тросэзлы сюрес пытсаськемын. Нош шуиськом - удыслы коньдон уг трымы. Ужез мукет сямен радъяно. Висисьёсты тросгес эмъяно поликлиникаосын. Но та амалэ выжемлэсь азьло быдэстоно луоз на трос мукет ужпумъёсты. Нырысь ик радъяно улӥ ёзъёсы врачъёсты дасянэз � участокъёсы, амбулаториёсы. Со понна воштоно врачъёсты дышетон амалэз. Терапиез гинэ медаз тодэ соос, тодон-валанъёссэс котыр ласянь будэтоно. Со понна выльысь но дышетсконо луоз. Медициная академиын вань диплом басьтэмъёсты дышетонъя факультет, квалификациез будэтонъя институт но выль тодон- валанъёс сётоз. Поликлиникаослэсь ужанзэс радъяса, валтӥсь интые пуктоно участокъёсъя врачъёсты. Вань ужпумъёсын висись со доры вазиськыны кулэ, нимаз специалистъёс доры но со ик мед ыстоз. Али кызьы луэ? Ас тодэммыя мыниськом невропатолог, окулист доры. Участокъёсын ужась врачъёс висисьёслы 60 процентозь юртэт сётыны кулэ. Али соослы усе 1800 адями. Кинэ со ӟеч-ӟеч тодыса вуттоз, кулэезъя йӧнатоз? Туала вакыт кулэ каре семьяез эмъясь врачъёсты дасянэз но. Вань та воштӥськонъёсын валче эскероно луоз коньдон ужпумъёсты но. Котькуд врачлы поликлиникаын усьтоно нимаз счёт (субсчёт), пыртоно сое бюджетэ. Уждун тырон сярысь но малпаськытэк уг луы, со бордысь потэ угось врачлэн ужазинлыкез. - Кызьы радъяськоз стационаръёслэн ужзы? Эскеронъёс возьмато, 50 процентэз койкаын кыллись висисьёс сыӵе эмъяськон амаллы уг кулэясько. Стационаръёсын кылльыны кулэ секыт висисьёс гинэ, кудъёссэ ялан эскерыса возёно. Улонамы ӟеч выжыяськем та сямлэсь адямиослы куштӥськыны секыт луоз. Эмъяськон койкаослэсь лыдзэс кулэстыса, уже кутоно мукет йӧнатон амалъёсты. Поликлиникаос вӧзын тросгес усьтоно нуназе ужась стационаръёс. Та уж борды басьтӥськимы ни. 1998-тӥ арын 407 эмъяськон инты усьтэмын вал, 1999-тӥ арын - 512, 2000-тӥ арын нырысетӥ кварталэ - 537. Нош таяз ар пумын чакламын 1400 нуназе ужась койкаос усьтыны. Эмъюмъёс висисьёслы озьы ик дунтэмен висъяськозы. Адямиосты уй- нуналэн уз возе ни больницаын, куинь час ӵоже сомында ик юрттэт сётозы. Нылпиосты но куд-ог висисьёсты сюдозы, шуом, сахарной диабетэн курадӟисьёсты. Выль сямен радъяськоз стационаръёсысь койкаосын эмъяськон. Одӥгез но койка юнме медаз сылы. Луозы интенсивной терапияя койкаос; вакчи дыр ӵоже эмъяськонъя - кризысь, комаысь поттыны; аръёсын кыстӥськись висёнъёсты эмъянъя; реабилитацияя койкаос. Эмъяськон дыр ваньмаз пӧртэм. Висисез поликлиникаын эмъяны луэ ке, малы сое койкаын возёнэз? Койкаын эмъяськонэз радъянъя дасямын медико-экономической стандарт: кызьы эмъяно, кӧня дыр ӵоже, кыӵе амалэн. Врач ужаны кулэ соя. Шуом, висисез чакламлэсь ятыр ке койкаын возё, больница со понна штраф тыроз. - Кыӵе мукет выльдӥськонъёс та вакытлы пыӵало ни тазалыкез утён удысэ? - Россия арысь аре пересьме. Кулон учыръёс йыло, нылпиос ӧжыт вордӥсько. арлыдоослэн лыдзы озьы пумен йылэ, соин валче кылдо выль ужпумъёс. Арлыдоосты ялан чакласа, эмъяса возёно. Арысь аре та ужлы тросгес но тросгес коньдон кошке. Учатокъёсысь больницаосын висись арлыдоос понна усьтӥсько эмъяськонъя (медико- социальной) койкаос. 1998-тӥ арын куиняз ёросын 26 сыӵе койка вал, али со лыдпус 138-озь будӥз. Та койкаосты возьыны коньдон висъяське бюджетысь, висисьёс асьсэос но пенсизылэсь кӧня ке люкетсэ тыро. Арлыдоосты чакласа возё врачъёс но калыкез улон- вылонын утён удысысь ужасьёс. Арлыдоослы эмъяськон койкаос усьтӥськемын ни Селта ёросысь Копки больницаын, Дэбес ёросысь Тыловай больницаын, Глазов ёросысь Парзи больницаын. Нош огъя верано ке, тазалыкез утён удысэз матысь аръёсы азинтонъя но выльдон ужпумъёсъя милям министерствоенымы дасямын нимысьтыз программа. Республикаысьтымы Кун Кенеш но Правительство ӝоген сое эскерыны кулэ. программаез умоен лыдъязы ке, со улонэ пыӵаны кутскоз. Л.МАЛЫХ. Вань кузьымъёс - шоркарлы Шоркамылы 240 ар тырмонэн валче "Галерея" музейно-выставочной комплексын "Ижевск но отын улӥсъёс" адӟытон усьтӥськиз. Ӵапак соку ик ӟеч сям вордӥськиз: отын предприятиос, учреждениос но нимаз адямиос Ижевсклы асьсэлэсь кузьымъёссэс сётӥзы. "Развитие" ассоциация (отчы укмыс предприятие пыре) городлы кузьмаз медициная ӝог юрттэт сётонъя автомобиль. "Ижмаш" висъяз тылпу кысыны чаклам мотоциклзэ. Пинал техникъёслэн станцизы - М. Т.Калашниковлэн музеезлы дасям винтовкалэсь макетсэ. "Удмурт Телеком" акционер огазеяськон но ИПОПАТ сётӥзы компьютеръёс. Озьы ик кузьымъёссэс сётӥзы мукет предприятиос но учреждениос. Н. Александров. Варни вадьсысь Чупчи дурын Асьсэлэсь ёроссэс, калыксэс данъяса, 12-тӥ инвожоез шулдыр ортчытӥзы дэбесъёс. Татчы кык автобусэн Ижысь аспал адямиоссы но ветлӥзы. Соос пӧлын - Россиысь Кун Думалэн депутатэз Светлана Смирнова, "Байгурезь" огазеяськонлэн тӧроез Иван Кропотин, "Байгурезь" вузкарон юртлэн кивалтӥсез Леонид Семендуев, журналист, кылбурчи Милитина Гаврилова, Национальной библиотекаысь шаертодонъя ёзлэн кивалтӥсез Надежда Лимонова, тодосчи Надежда Ураськина но мукетъёсыз. Варни вадьсысь Чупчи дурын ӝуаз тылскем, пӧзьтӥзы сӥлен ӝук. Ческыт пӧрам сиён-юонлы конкурс вал, отчы Дэбесысь вань огазеяськонъёс пыриськизы. Спортсменъёс но, такмак (частушка) кырӟасьёс но куспазы ӵошатскизы. Огъя вераса, калык умой шутэтскиз. Т. Сидорова. Ишан палэнтӥ мед ортчоз Асьмелэн республикамы пичи гинэ кадь, нош кӧня солэн узырлыкез - нюлэсъёс, шуръёс, тыметъёс но ошмесъёс, музъемъёс, гыбед, му вӧй... Адямиос сярысь ум вералэ ни. Со ик ачиз инмар но, кузё но. Но инмар шуэмысь улнын оломаиз но луэ: я малпамтэ шорысь тылпу ӝутске, я тудву тудӟе, я нефтен но газэн гумы пуштэ, я урод висён вӧлме... Бен, котьмаиз но луэ. Но дасесь-а асьмеос со шукрес учыръёсты тупатыны, быгатӥськомы-а дыраз юрттэт сётыны ог-огмылы? Ӵапак сое тодон вылысь ик алигес республикаямы ортчизы командно-штабной дышетсконъёс. Вазь ӵукна ик Пичи Пурга черкогурт дорысь Постолка шур дуре вуо автомашинаос, тракторъёс, нимысьтыз техника. Лопыръясько Россия Федерацилэн Удмурт Республикалэн но Россиысь Кышкыт учыръёслэсь утиськонъя (МЧС) министерстволэн флагъёссы. Дышетсконъёсты (учениосты) усьтэ республикаысьтымы Граждан оборона ужпумъёсъя но кышкыт учыръёслэсь утиськонъя комитетлэн кивалтӥсез генерал-майор Тамази Габричидзе. Ужрадлэн кутсконэз сярысь со ивортэ Удмурт Правительстволэн Тӧроезлы, республикаысьтымы граждан обороналэн начальникезлы Николай Ганзалы. Дышетсконъёслы инты юнме шорысь Пичи Пурга быръемын ӧвӧл. Уго та ёрослэн музъем ултӥз ортчо нефтен но газэн уно гумыос. Нош республикамес басьтоно ке, асьме пыр потэ 14 газопровод но 4 нефтепровод. Бен, со шудон уж ӧвӧл. "Чагыр" но "сьӧд" зарниен гумыос ӵем гинэ пуштыло. ... Пичи Пургаысь кышкыт учыръёслэсь утиськонъя комиссилэн кивалтӥсезлы, ёрос администрацилэн тӧроезлы Леонид Шишкинлы кышкыт ивортон вуэ: "Пугачёво посёлок дорысь 86696 воинской часть вӧзтӥ ортчись газэн гумы пуштэмын. Тылпу уно гектар нюлэсэз басьтӥз. Кышкытлык кылдэмын военной городокын улӥсьёслы..." Ӝогак гинэ люкаське комиссия. Кышкыт учыр сярысь ивортон сётэмын быдэс ёросэ, Ижевске. Юрттэт курыса вазиськемын Агрызысь тылпу кысӥсьёслы, республикаысьтымы вань кивалтон ёзъёсы. Комиссиын ужасьёс кивалтӥсьлы иворто кылдэм югдур сярысь. Кутске шудтэм учырен нюръяськон. Кызьы пусйизы бӧрысь, пургаос ужзэс ӝог но вылӥ ӟечлыкен быдэстӥзы. Котькудӥз ёз ужзэ ӟеч тодэ. Собере лыктэмъёслы возьматэмын вал газэн гумы пуштон учырез палэнтон. Специалистъёс рос-прос возьматӥзы, кызьы кысоно сыӵе учыре тылпуэз, кыӵе амалъёс но техника кутӥське сыӵе шудтэм учырен нюръяськыку. Комиссие ивор вуэ: Постолка шуретӥ нефть ваське. Ӝоген вуэ вертолёт. Со шур кузя лобыса эскерон ортчытэ. Та интые ӝегатскытэк лыктэ Пичи Пургаысь авариосъя служба. Отын ужасьёс шур вамен золто нефтез ӝегатӥсь бонъёсты (шланг выллем макеос), пазяло му вӧез кыскись сарбентъёс, ужаны кутско моторъёс. Со дыре ик мукетыз бригада пасяськем гумыез тупатъяны кутске. Мукетыз дышетскон инты радъяськиз нюлэскын гыбедо интыын тылпуэз кысонъя. Та уже пырисько Яганысь лесхоз, войсковой часть, Пичи Пургаысь но Ижевскысь тылпу кысӥсьёс. Огъя кужымен "горд атас" вакчи дыр куспын лапкатэмын вал. Медикъёс ӟеч возьматӥзы адямилы ӝогак нырысетӥ юрттэт сётыны быгатэмзэс. Дышетсконъёсы ветлӥзы ёрос но город администрациослэн кивалтӥсьёссы (соос ик кивалто граждан обороная комиссиосын), министерствоосын, организациосын, ведомствоосын ужасьёс, кинъёс герӟаськемын кышкыт учыръёслэсь утиськонэн. Унояз районъёсын но предприятиосын граждан обороная уж ӟеч пуктэмын. Соослэн кивалтӥсьёссы пусъемын дуно кузьымъёсын, данъян грамотаосын. Вераны кулэ: дышетсконъёсы ветлӥзы ньыль вылӥ офицеръёс - генерал-майор Тамазан Габричидзе, республикаысьтымы военной комиссар, генерал-майор Геннадий Барсков, югдурез утёнъя министр, генерал-лейтенант Владимир Щербаков. Вал на Москваысь куно. Со - Сергей Маев, Россия Федерациысь Вооружённой Кужымъёсын пыӵал тӥрлык техникаез кутонъя ёзлэн кивалтӥсез, валтӥсь автобронетехникаез кутонъя управленилэн начальникез, генерал-полковник. Со дышетсконъёсты ӟечен пусйиз. Таин валче та генерал сярысь пыр-почгес вераны кулэ. Сергей Александрович ачиз вордскемын Грахово палъёсын, анаез али улэ Можгаын. Маев озьы ик луэ Москваын улӥсь удмуртъёслэн землячествозылэн президентэз. Дышетсконъёслы йылпумъянъёс лэсьтыса вераськиз Николай Ганза. Малы ортчытӥм та ужрадэз - валамон, шуиз со. Республикаямы уно гинэ кышкытлыэсь интыос - нефть но газ гумыос, химия пыӵал тӥрлыкен арсеналъёс... Асьмеос адямилы дыраз юрттэт сётыны быгатыны кулэ. Туннэ ваньмыз службаос ӟеч ужазы. Пусйыны кулэ МВД-ез, воинской частез, Пичи Пургаысь кивалтӥсьёсты но ёзъёсты. Шуръёсты нефтьлэсь чылкытатон ласянь куд-ог юанъёс кылдо ик. Зэм, со ласянь югдур ушъямон ӧвӧл быдэс дуннеын. Журналист синмын учкыса верано ке, дышетсконъёс зэмзэ но умой ортчизы. Соос быгатыса радъямын вал. Ужрадэз ортчытыны коньдонэн юрттӥзы "Удмуртнефть" но "Белкамнефть" огазеяськонъёс. Бен, ноку но уд тоды, кытысь потоз кышкыт учыр. Инмар мед утёз ини со адӟонлэсь. Но асьмеос котьмалы котьку дась луыны кулэ. Кызьы шуо, ишан вӧзтӥмы мед ортчоз. Н. Байтеряков. Дышетсконъёс дыръя. Олег Слюсарлэн туспуктэмъёсыз. ШӦКЫЧ М.КИБАРДИНА Кытын Наговицын урам? Юмореска Можга город. Центрысь одӥгаз автобус дугдылонтӥын сыло кык пиос, соос доры лыктэ пиосмурт. - Пиос, кытын ай татын Наговицын урам? - Можгалась ӧвӧл тӥ, шӧдӥське? - Ма, Можгалась, Красной посёлокысь мон, но шер потасько городэ. - А-а, валамон. Со урамез озьы гинэ шедьтыны уд быгаты. Кылзы, эше. Та-ак... Тани татысь али гинэ 1 номеро автобус кошкиз консерва поттон завод пала. Тӥни ук, быжыз адӟиське на ай. - О-о, адӟисько... - Со автобусэн мынысалыд ке, пырак роддом вадьсы но дугдылысалыд. Эх, эше, кыӵе выль роддом пуктӥзы Можгала! Алигес кышноелэн сузэрез отын кыкто пинал ваиз. Ярам али, Валюш, шуисько, (Валюш - со мынам кышное). Так вот, ярам али, Валюш, шуисько, вуж роддомын нылпи ваид, выляз, оло, тынад но кыкто луысал, нош туннэ нуналэ, ачид тодӥськод, коньдонэн секыт. Выль роддомын арнялы быдэ кышноос пӧлысь кин ке но одно ик кыкто ваё, оборудование уго отын импортной. Собере... - Мон, марым... - Тодӥсько, тодӥсько, ӧй вунэты на юамдэ. Умой кылзы, ява. Наговицын урам - со, ачид тодӥськод, городамы туж тодмо урам. Педколледж, ветколледж, кылэмед вань, дыр, соос сярысь, ӵапак со урамын сыло. Собере, художественной школа, крезьгуръя школа, Можгаысь калык театр тожо Наговицын урамын. Ну, тумошо со артистъёс! Алигес спектаклязы ветлӥ... - Мон Наговицын урамез... - Тодӥсько, Наговицын ураме сюремед потэ. Так вот, калык театрлэн аслаз юртэз ӧвӧл соин соос я "Спутникын", я "Дубительын" шудо. Нош али верано спектакле "Спутникын" ортчиз. Нош "Спутник" ӵапак Наговицын урамын сылэ. - Ма, тӥни сюрес огпалан тӧдьы юрт адӟиське, "Спутник" гожтэмез но вань. Со ӧвӧл- а? - А-а, точно, самой со. Табере учкы, эше, паллян пала. Адӟиськод-а, 5 номеро автобус лыктэ? - Адӟисько. - Тон, эше, отчы пуксёд, мынод кык остановкаез, васькод, собере та пала лыктӥсь 3 номеро автобусэн мынод "Пентагон" магазин дорозь, автобусысь васькыса, 6 номеро автобусэз утчалод. Пуксёд отчы, мынод парк дорозь. Тодӥськод-а паркез? - Ма, тодӥсько... - Конечно, тодӥськод, сое котькин но тодэ. Тол Бабаез келяны, тулысэз пумитаны ветлӥськод, дыр, Сабантуе но. Так вот, парк вадьсы васькод но 4 номеро автобусэз утчалод. Отчы пуксьыса мынод "Зверохозяйство" дорозь. Васькид ке, пыра "зверохозяйствое", оглыктэмен учкод, кыӵе изьверъёсты вордо отын, маин сюдо, кышноедлы воротник но чакламед луоз. Экскурсия бере нош ик 4 номеро автобусэ пуксьы. Эн вунэты, эше, 4 номеро, со посёлоке та автобус гинэ ветлэ. - Мон... - Пуксьы, пуксьы, номырлэсь эн курда. Билет басьяны эн вунэты, Можгаямы автобусэ билет кык манет сылэ, ачид тодӥськод. Собере, эше, дас вить минут ортчыса, тон вуод ини центре, ӵапак Наговицын ураме. Уд вунэты-а, эше? - Уг. Тани ваньзэ верамдэ гожтӥ - кыӵе автобусэн кытчы мыноно. - Туж умой. Э-э, кылзы ай, марлы ай тыныд Наговицын урам кулэ вал? - "Торговый дом" магазинын, пе, шуныт кальсонъёс вань, сое басьто шуисько вал. - Я, ӟеч лу, эше. Тани 5 номеро автобусэд вуиз, пуксьы, сюресэд мед удалтоз. - Тау. Пиосмурт автобусэ пуксьыса кошкиз. Та дырозь чал-чал сылӥсь эшез паймыса юаз: - Тон, Миша, мар солэсь йырзэ бергатыса лэзид? Асьмеос так но Наговицын урамын сылӥськом ук? - Наговицын урамын сылыса вылысь медаз юалляськы, кызьы отчы мыноно: аслэсьтыз городзэ ӟечгес тодыны кулэ. Шӧкыч Лидия Чернова ИО гинэ... Басня Ишак шедиз кивалтӥсе. Сие-юэ гинэ, изе. Али ке но Ӧз на вырӟытылы воззэ. - Азьтэм вылэм тамы кабзэ, - Куке-соку нодсаськизы (Асьсэос но, лэся, сазьтӥськизы). - Лобатоно! Лобатоно! Гын тыбырзэ но ниёно. Ишак валаз, лэся, мазэ-созэ. Вазиз: Мон, пе, ИО, ИО гинэ... Мораль: Таӵе Ишакъёсмы Асьме пӧлын но трос гинэ. Уждун мынэ, басьто сумен. ШӦКЫЧ Лыосты посӥсь Гуртын улӥсь Ограпай пайме: осто, со гонродскойёс - нунал-лумбыт азьтэмъяськыса уло но хандразэз, радикулитэз верам каро, массаж утчаса бызьыло. Мынам Петыре сямен огпол тыбыр ваментӥзы васькытӥсь луысал ке... Массаж утчаса адями тэк уз ик бызьылы, дыр, - соглаш ӧвӧл мон ограпаен , - мугорез посон туала арын дуно сылэ: дас вить минут понна 50 манеттэс сёт ай. Вӧзаз ик посӥсь, котькуд люкиськыкуз, эшшо кӧня ке пол лэсьтоно на, тани татӥ ӧз небӟы на, отӥ кырыжскыны быгатоз шуэ ке. Эриктэм нош но нош мынод. Зэмзэ но умой небӟытысалзы ке, а то ведь Петыр кадьёс но сюро. Тани Ижевскысь Басьяськисьёслэсь правооссэс утёнъя комитетэ одӥг сӧсырмем нылкышно вазиськиз. Озьы но озьы, пе, ялонъя массажист шедьтӥ, утж тыбыры висьылэ. Ай эшшо эшъёсы индылӥзы, пиосмурт доры, е, мын, нылкышно со чиед киосыныз нокызьы но йӧназ посыны уз быгаты. Озьы ик малпай. Лыктэм мугме вераса ӧй вутты, кылиське но выдэ шуиз. Котыр учкисько: нокыӵе диван но, кушетка но ӧвӧл. Посӥсе выж вылысь пичи ковёр вылэ возьматӥз. Туж ик шулдыр ӧвӧл бен но, тыбыры ӵуказеяз ӧжыт лэзиз. Но куинь пол дораз ветлэме бере шугомыны ӧдъяй: давление ӝутӥськиз, мугоры тӧрназ, кӧтурдэсъёсы ӵогъяны кутскизы. Посӥсьлы верай но, со нокыӵе ӧз кариськы, озьы, пе, мугорысьтыд висёнэд потэ. Эшшо кык сеанссэ мырдэм но кызьы чидаса больницае мынӥ. Врач воксё паймиз, соку ик рентгенэ ыстӥз. Арня ӵоже чигиськем урдлыен ветлӥсько ни вылэм. нылкышно тодмотэм муртлы оскиськемез понна трос дырзэ но коньдонзэ быдтӥз. Ярам, вылӥын верам комитет юрттӥз изъян адӟемез понна массажистлэсь коньдон курыны. соин тунсыкъяськыны кутскизы пӧртэм эскерисьёс - посӥсьлэн лицензиез чик но вылымтэ. З.РЯБИНИНА. 12 номеро ССП Дэбес ёрослэн улосвылаз быдэстымтэ сервис комплексэз вузанъя вузкаронъёс ортчытон сярысь ялэ. Куриськонъёс кутӥсько 12 номеро ССП-ын 19-тӥ�25-тӥ июне таӵе адресъя: Дэбес черкогурт, Советской ульча, 85 номеро юрт, тел. 2-13-41. Нырысетӥез взнос � 10.000 манет. Ёрмон уг бырйы нациез Ар талэсь азьло кылдытэмын вал Нациосын ужанъя министерство. Выль министерстволэн со дыр ӵоже ужамезлы алигес йылпумъянъёс лэсьтӥз коллегилэн паськытатэм кенешез. Солэн ужаз пыриськизы Кун Кенешлэн, Правительстволэн, районъёсысь но городъёсысь администрациослэн кивалтӥсьёссы, пӧртэм калык огазеяськонъёссылэн тӧрооссы, тодосчиос но Кун Думаысь депутатмы С.Смирнова. Нациосын ужанъя министрлэн Н.Мусалимовлэн лэсьтэм докладаз бадӟым инты басьтӥз "Удмуртия-2000" ужпумъя лэсьтэм йылпумъянъёс. Министерстволэн куремезъя, асьме республикаын этнополитикаын пыр-поч югдурез тодон понна эскерон ортчытэмын вылэм. Та ужез нуиллям Удмурт кун университетысь историяя факультетысь преподавательёс но студентъёс. Поттэмын нимысьтыз брошюра. Со кузьмамын вал котькудӥзлы та ужрадэ пыриськемлы. - Огъя верано ке, - шуиз министр, - Удмуртиын улӥсь пӧртэм калыкъёслэн кусыпъёссы умоесь. Но ужпумъёс вань. Тросэзлэн семьяослэн улонзы тыро ӧз луы. Кыӵе семьяос я начаргес, я узыргес уло: ӟучъёс-а, удмуртъёс-а, бигеръёс-а - пӧртэмлыкез ӧвӧл. Узырмонлэн но начармонлэн национальной тодметэз ӧвӧл. 17 процентэз улӥсьёс азьланезлы осконтэк уло. Уж, уждун но тазалык - та валтӥсь ужпумъёс сюлэмшугъяськыто республикаямы вань улӥсьёсты. Шаерамы улӥсь калыкъёслэн кылъёссы сярысь законлэн инъетэз дась ини, валэктӥз Н.Мусалимов. Матысь дыре Правительство сое эскерыны кулэ. Министрлэн верамезъя, 56 процентэз улӥсьёс школаосын удмурт кылэз дышетонэз умоен лыдъяло. Нош калыкез дышетонъя министр Л.Захарова шуиз: котькуд куинетӥез удмурт семья ас кылзэ дышетонлы пумит луэ. Соин ик со ӵектӥз удмурт кылэз дышетонын выль ужан амалъёс утчаны, нош мумы-бубыос пӧлын паськытгес валэктон уж нуыны. Тросэз национальной школаос ужало на вашкала кабъя, учебникъёс но улонлэсь бере кылё. Кылдытоно сыӵе удмурт учебникъёс, кудъёсыз юнматозы нылпилэсь тодон-валан басьтон мылкыдзэ, пусйиз Л.Захарова. Н.Мусалимов озьы ик пыр-поч валэктӥз, кызьы ужа министерство религияя огазеяськонъёсын, мар лэсьтӥське ивор вӧлмытӥсь ёзъёслы юрттон вылысь. Со дыре ик со алӥз, та ужрадэз нокин но, пе, медаз герӟаны выры Удмуртилы президент быръёнэн но политикаен. Кун Кенешлэн Тӧроез А.Волков министрлэсь Н.Мусалимовлэсь докладзэ вылӥ дунъяз но оскемзэ вераз, вуоно быръёнъёсын нациосын ужанъя политикаез нуисьёс йыг-йыг пыд йылазы султэмзэс но будэмзэс возьматозы шуыса. Т.БАННИКОВА. ТУГОКО Ӵош луим ке, пӧрмоз Алигес Москваын ортчиз Россиысь калыкъёслэн ассамблеязылэн кыкетӥ съездэз. Отчы пыриськизы асьме республикаысь но ыстэм муртъёс. Тани ма вераз соос пӧлысь одӥгез � Юрий СЕМЕНОВ. � Совето Союзэз куашкатӥсьёс ӧз но малпалэ, дыр, кӧня но кыӵе секытэсь ужпумъёс султозы калык азьын. Мон верасько Горбачев, Ельцин, Шеварднадзе, Алиев но мукетъёс сярысь. 80-тӥ аръёслэн кыкетӥ ӝыныязы калык кусыпъёс пӧлын тужгес но кышкыт югдур кылдӥз. Соку тӥни кылдытэмын вал Сенеж форум шуыса нимаськись огазеяськон. Кивалтыны соин ӵектӥзы туж тодмо политиклы Рамазан Гаджимурадович Абдулатиповлы. Та организация син азьын юнмаз но кыдаз. Со ик кутскон сётӥз Россиысь калыкъёслэн ассмблеязылы. Кылем арын ортчиз солэн нырысетӥ съездэз. Отын кутэмын вал устав но программа. Нош туэ ортчиз кыкетӥез ӧтчам. Удмуртиысь делегацие пыризы Кун Думалэн депутатэз Светлана Смирнова, "Шундылэн" исполкомезлэн кивалтӥсез Татьяна Прокопьева, Удмурт Элькунысь нациосын ужан политикая министрлэн воштӥсез Наталья Смирнова, Москваысь асьме представительствоын ужась Владимир Лебедев. Делегацимы, асьтэос адӟиськоды, пичи ӧй вал, но Саратовысь 40 кузя лыктӥзы. Губернаторенызы ӵош. � Маин висъяськиз та кенеш мукет ужрадъёслэсь? � Вераськон ӟырдыт вал. Тужгес но � Северной Кавказ пумысен. Соиз валамон, уго со Россилэн тужгес но "висись" интыез. Со сяна, мукет но ужпумъёс вал: Трос вераськон мынӥз Национальной политикая министерстволэн ужез сярысь. Эшъёс ӵектӥзы солы бадӟымгес кивалтон луонлык сётыны. Президент, озьы ик Федерацияя Кенешлэн но Кун Думалэн кивалтӥсьёссы ӟечкылазы милемыз ыстэм муртъёссы пыр. Но одӥгез но соос пӧлысь ӧз вера, кызьы со вала туннэ национальной политикаез. Сыӵе малпан кылдэ � соос пӧлысь нокинлэн но та ужен выремез уг пот. Ярам коть, Россиын вань адямиос, кудъёсызлэн чик но дун басьтытэк маке со лэсьтэмзы потэ. Сыӵеослэн сюлэмзы, зэмзэ но, висе та уж понна. Соин ик таӵе съездъёс туж кулэ луо. Кенешонэ пыриськизы тодмо адямиос: наукая докторъёс, профессоръёс, кудъёсызлэн вань туж бадӟым опытсы, калыкъёс пӧлын кусып тупатон быгатонзы, азьланьзэ адӟыны-валаны тыршон мылкыдзы. Та съездын кутэмын вал Россиысь калыкъёслэн хартизы. Со туж кулэ документ. Бӧрысь та хартия учкемын луоз Кун Думаын, Федерацияя Кенешын. Малпасько, со кутэмын луоз, закон яке Президентлэн указэз карыса. Делегатъёс ӵектӥзы 8-тӥ июнез Россиысь калыкъёслэн эшъяськон нуналэнызы ялыны. Азьло съездъёсын туж ӵем кутылӥзы "толерантность" валанэз. Со асьме кыл ӧвӧл. Берыктӥське "чидан, ог-огдэ чидан" шуыса. Нош туэ кутэмын ни вал "Дружба народов" ӧтён. Мон котьку та понна вал, малы ке шуоно, калыкъёслэн эшъяськонзылэсь номыр но кужмоез, юнэз ӧвӧл. Соин ик, ку сьӧд кужымъёс куашкатыны малпазы Совето Союзэз, кутскизы калыкъёслэн эшъяськонзы бордысен. Адямиос али гинэ валаны кутскизы, та югдурез тупатыны кулэ шуыса. Но мыным ӧз кельшы тани маиз. Тросэз газетъёс, телевидение та ужрадэз кызьы ке но урод ласянь возьматыны выро. Яке соос озьы валатэк лэсьто, яке юри озьы каро. Трос кыл верам потэ Светлана Константиновна Смирнова сярысь. Та съездын со кенешонэз нуисьёс пӧлын вал, возьматӥз ассэ туж визьмо, валась адямиен. Со али потӥз Думаын "Дружба народов � единство России" огазеяськон кылдытон сярысь ӵектонэн. Отчы пырыны мылкыд каризы трос фракциосысь депутатъёс. Азьланяз но тазьы ик ужам ке, ваньмыз усто пӧрмоз. Кенешиз Иван ШИХОВ. Гожъяськон но гожтӥськон... Вань районъёсысь но городъёсысь газетъёслэн но радиоослэн редакторъёссы люкаськылӥзы Печатья но иворъёсъя министерствое, кенешизы азьланьын быдэсъяно ужпумъёс сярысь. Кун Кенешлэн Тӧроез Александр Волков люкаськемъёсты тодматӥз Россиын но Удмуртиын кылдэм югдурен. Со Нижний Новгородын пумиськылэм президентлэн асьме федеральной округе ыстэм адямиеныз Сергей Кириенкоен, Пермьын � Россиысь огъя энергосистемалэн кивалтӥсеныз Анатолий Чубайсэн. Кыксы ик соос Александр Волковен пуктэм ужпумъёсты шонер валало. � Федерацияя Советэз выль сямен радъямзы бере мон отчы ӧй шедьы ке, монэ со уг паймыты, � шуиз со. � Мон сизьыметӥ арзэ ни отын. Азьвыл но Советын быдэс нунал пукыны ӧй ваньмылы � Москваын ужъёсы тачак. Быръёнъя комиссилэн тӧроезлэн воштӥсез Григорий Ахметов тодматӥз Удмуртилы президент быръён сярысь законэн. Та бадӟым ужрадэн валче преса азьын но сюлэмшугъяськонъёс кылдо. Комиссиын ужась группа юри эскероз газетъёсысь, телевидениысь, радиоысь материалъёсты, соос законлэн куронъёсызлы тупало-а шуыса. Кун Думалэн депутатэз Светлана Смирнова вераз выль законъёс бордын ужам сярысь. Кенешын эскеремын газетъёсты вӧлмытонэн, рекламаез радъянэн но мукет удысъёсын герӟаськем ужпумъёс. А.ПЕТРОВ. Пурга кизилиос "Пурга кизилиос". Чеберез яратӥсьёслэн Пичи Пурга черкогуртлэн шораз ик интыяськем центрзы сярысь ӟеч тодо, дыр, лыдӟисьёс. Литературая факультативе ветлӥсьёс занятиосын ӵемысь эскерыло юмор амалэн гожтэм ужъёссэс. Ми кылбурчиен А.Н.Уваровен талы трос дыр висъяны тыршиськом. Одӥг сыӵе сэрттон-пертчон дыръя Анатолий Николаевич ӵектӥз кык чур: "Гурт палаз вуэ Серга: "Ӟеч но бур, Пичи Пурга!.." Собере пиналъёслы дэмламы пӧртэм сюжетъёсын (кин кызьы быгатэ) кылбуръёс гожтыны. Куд-огезлы юрттытэк но ӧйлась. Туннэ лыдӟоды пинал литераторъёслэсь аспӧртэмлыко амалэн кылдытэм "пӧрамъёссэс". Никвлад Самсонов, писатель. Пурга но Серга Дор палаз вуиз Серга: "Ӟеч но бур, Пичи Пурга!" Йырзэ вылэ ӝутыса Вамышъя йӧнъяськыса. Учке паллянэ, буре - Ымнырзэ кисыр каре: "Эх, Пурга, Пурга, Пурга: Бере кылемед уга. Тани мон тыныд юртто - Супер-выльлы дышето. Мар ӧй лыдӟы, мар ӧйтӧд - Пумаз чик уд ву - паймод..." Ушъяське, лӧптэ Серга, Шумпотса йырыз берга. Со дортӥ котыръясько, Верасько, юаллясько. "Вот улон ке та улон", - Мынектӥз Серга мудрон. Шуак вазиськись луиз - Пияш сак-сак кариськиз: "Вера вал на ай, эше, Тон ӧд ву-а Париже?" Тань татын Серга могӟиз, Мар вераны со паймиз. "Мар каром на, мар шуом?" - Пирсэкъя сюлмыз оглом. Кыл йылаз маке шедиз, Сое вераны кутскиз: "Мар Парижез веранэз, Ӧвӧл солы паймонэз. Сыӵе гинэ гурезез, Адӟоды тӥ ..." Вераса ӧз ву Серга - Серекъян кутскиз Пурга. Серга ӵыж-ӵыж гордэктӥз, Ымнырзэ ватны кутскиз. "Эх, Серга, Серга, Серга, Алдаса куштӥд уга..." Надежда Пименова. Гожня школа. *** Дор палаз бертэ Серга: "Ӟеч но бур, Пичи Пурга!" Мылкыдыз лоба, берга - Дор палаз вуэ Серга. Ульча кузя вамышъя - Ваньмызлы со йыбыртъя. Шумпотэмын бурдоос: Солдатэз витё соос. Эх! Вуиз пияш дораз - Анаез гуртаз - валаз. Ӟыгыртӥз ӝип-ӝип бордаз - Анай синкыли питраз. Ӧз, ӧз адӟиське кык ар: Пияшез - тып-тып бадяр, Юн батыр луэм Серга - Тодмалоз на-а Пурга?.. Елена Гагарина. Вуж Монья школа. *** Гурт палаз вуэ Серга: "Ӟеч но бур, Пичи Пурга!" Ас понназ маке малпа: "Мар шуоз ини Марпа? Оло, нош ик уллялоз, Донгаса берен поттоз? Оло, али жалялоз - Пырыны корка лэзёз?" Пырыса ӧз ву дораз - Эшсэ чакланы малпаз: Бер ӝытозь лабыртӥзы, Кенешизы, пукизы. Сюлмыз шӧдӥз Марпалэн: "Мар луиз та Сергаен? Ойдо, бертом, Сергае, Тонэ возьма коркаед". Снежана Волкова. Куреггурт. *** Гурт палаз вуэ Серга: "Ӟеч но бур, Пичи Пурга!" Малы ке йырыз берга, Оло ке, музъем берга? Кытысь-о бен со бертэ? Кин меда сое тодэ? Оло, ветлэм Миндэре? Вуылэм-а Биграе? Кызьы-о Серга тодоз - Котыр гуртъёс укыр трос! Людмила Чернова. Гожня школа. *** Гурт палаз вуэ Серга: "Ӟеч но бур, Пичи Пурга!" Йырам юан весь берга: "Малы-о нимыд Пурга?" Надежда Яковлева. Вуж Монья школа. *** Гурт палаз вуэ Серга: "Ӟеч но бур, Пичи Пурга! Кема ветлӥськиз уга - Луиськиз пересь карга..." Секытэн шокче Серга - Ымысьтыз тамак кирга, Серекъя, горе, берга, Иса Сергаез Пурга: "Эх, Серга, конглё Серга, Эктэмед уг ни быга, Мон бергась, нош тон шаньга, Уг ни тод тонэ Пурга, Со уг яраты уга Соосты, кин весь пега!" Вероника Кириллова. Гожня школа. Педор-пӧйшурась Одӥг гуртын кышноеныз но нылпиосыныз ӵош улэм-вылэм Педор агай. Солы куамын вить пала арес вылэм. Туж яратылэм пӧйшуранэз. Уката ик - кыр парсьёсты уйылонэз. Ӵукна кошке - ӝытазе вуэ. Кышноез тышкаське: "Вазь кошкиськод, бер бертӥськод. Нош коркан номыр но уд лэсьтӥськы!" Нош Педор солэсь юа: "Нош сӥль кин-о вае? Тани возьма: Кыр парсез кутӥ ке, мукет сямен кырӟаны кутскод". Каллен вуиз сӥзьыл. Писпуос зарни дэремъёссэс дӥсязы. Тылобурдоос уллёен-уллёен шуныт палъёсы лобӟо. Быдэс шаер мукет луэ. Пӧйшуран вакыт вуиз гинэ - Педор агай, пыӵалзэ но патронзэ поттыса, нюлэс пала вамыштӥз. Кышноез кеськиз: "Ушъяськыны тон туж усто быгатӥськод. Учком, кыӵе пӧйшурась!" Педор, номыр но вератэк, озьы ик шуласа азьлань вамыштӥз. Тани со тэльын. Кыӵе гинэ буёлъёс син азьын ӧвӧл! Губиос серекъяса кадь сыло турын пушкын. Куакъёс пӧлы ӵушъял ватскем. Нош пӧйшурасьлэн син азяз бер вуэм мульыос гинэ вал. Ӵапак та вакытэ агай ӧз но кылы, кызьы со доры берласянь кин ке вамыштӥз. Витьымтэ шорысь небыт интыяз туж юн мырӟиз. Педор тэтчиз ук! Музъем вылэ усьыса, ту-у-у-ж каллен берытскиз. Бадӟым, туж кӧшкемыт, ӵуж пинё кыр парсь шораз учкыса сылэ. Пӧйшурась, мазэ-созэ валатэк, шимес куараен кеськиз но, пыдыз музъем борды йӧтылытэк, азьлань бызиз. Кыр парсь, одӥг вамышлы но кыльытэк - сьӧраз! Коньылэсь но капчи агай нырысь сюрем писпу вылэ "лобиз". Кышкаса уллань учкиз. Гурезь быдӟа кыр парсь, синъёссэ ӝутыса, Педорлэн йыр йылтӥз учкиз. Пӧйшурась йырзэ сопала ик берыктӥз: сизь кока вылэм агайлэсь пукем вайзэ. Тук-тук, тук-тук! Витьымтэ шорысь вай ӝотырак вазиз но пӧйшурасен валче кыр парсьлэн йыр вылаз усиз. Педор, номыре но валатэк, гурт пала бызиз, нош пӧйшур - мукет пала. Агай сыӵе чаляк бызиз - оло, вань рекордъёсты ортчиз?.. Огшокчемен ик, оло, капка азяз вуиз. Шузимем мурт кадь, сопала, та пала учкиз. Коркась кышноез бызьыса потӥз но кышкаса юа: "Мар тонэн? Нош пыӵалэд кытын?" Пӧйшурась солы ваньзэ вераз. Картэзлэн таӵе маскара учыре шедемез сярысь тодыса, кӧтсэ кутыса серекъяз. Бератаз, серекъяны быгатытэк, ӝуштӥз гинэ на. Та учыр бере Педор агай пӧйшураны ӧз ветлы ни. Нош ыштэм пыӵалзэ мукет нуналаз ик писпу улысь шедьтӥз но син азьысьтыз кыдёкегес ватӥз. Нош кышноез куддыръя ёртэ: "Педор, кыр парсез кут ай!" Нош тӥледын тазьы ӧй вал на-а? Алена Шеметова. Пичи Пургалась 2 номеро школа. Серемес чуръёс *** Пичи Владик анаезлэн кияз куриське: - Анай, ӝут монэ: пыды жадиз. - Асьмеос адямиос, асьмелэн пыдмы кык, соин ик пыдын ветлоно... Пияш вӧзтӥз кошкись ӵӧжпиосыз адӟиз но вазиз: - Ӵӧжъёс но адямиос-а, мар-а? Вероника Кириллова. Гожня школа. *** Анаез нырысетӥ классэ ветлӥсь Алешалэсь юа: - Пие, ӟуч кылэз дышетыса, малы ке дышид-а ини? - Дыши... - Монэ ас дорад ӟуч сямен ӧть ай. Алеша нод-нод вераз: - Анай, чаль мон доры ӟуч сямен... *** Малпаськыса пукись Женя апаезлэсь юа: - Апай, тон зэмзэ ик-а мынам апае? - Ӧвӧл, косвенной. Елена Гагарина. Вуж Монья школа. Дуныз - вить сюрс доллар Удмурт Элькунысь Шаертодонъя юртысь сюсьлэсь мугоръёсъя музей, татын ужзэ йылпумъяса, Можгала мынӥз. Собере, оло, Удмуртиысь мукет каръёсы но вуоз ай. Солэн шыкысаз кызь сюсь мугор. Быдӟым Петр � пӧлысьтызы тужгес адӟиськисез, дыр. Малы ке шуоно, со вылысь нырысьсэ лэсьтэмын вылэм сюсь мугор. Кулэмез берегес ик. Эксэйлэн залаз ӝужыт пукон вылэ пуктэмын вылэм со. Дораз пырись мурт нимысьтыз интые султэ ке, мугор, кизэ ӝутыса, ӧс шоры возьматэ вылэм. Берло тӥяськем, нош кенешъёс сюсь мугор сярысь вунэтӥллям. Дас ар талэсь азьвыл та сям выльдӥськем. Али Санкт-Петербургын сюсь мугор лэсьтонъя быдэс институт ужа. Котькуд адями аслэсьтыз мугорзэ дауръёслы кельтыны быгатэ � 5-6 сюрс долларед гинэ мед луоз. Бен, дуно. Но ужез лякыт ӧвӧл. Киос но мугор гинэ сюсьлэсь лэсьтӥсько, отӥыз � папье-маше. Котькуд йырси одӥген-одӥген бырттылэмын йыре, улэп муртъёслэсь басьтыса. Синъёс � тодмо офтальмологлэн Святослав Федоровлэн синъя клиникаысьтыз протезъёс... Татысь ик адӟоды Иосиф Сталинэз, Адольф Гитлерез, Георгий Жуковез, Михаил Горбачевез, Иван Грозныез, Владимир Высоцкиез, Филипп Киркоровез но мукетъёссэ. Но мугоръёс уг вузасько, басьтыны мылкыд карисьёс вань ке но. С.ПЕТРОВА. Паймымон пужыос Чебер киужъёсъя юртын ужасьёс кема дасям адӟытонзэс усьтӥзы. Нылпиослэн устолыксылы сӥземын со. Таӵеез нырысьсэ ай. Татын - дас кык ёросысь укмыс-дас ньыль аресъем нылпиослэн киужъёссы: горд сюйлэсь, куролэсь, туйлэсь но пулэсь лэсьтэм ужъёс � куэм, пужыятэм, чильпам арбериос но трос мукетыз. Пичи Пурга ёросысь Вуж Монья гуртын куроез яратогес бере, татысь нылпиос но солэсь лэсьтэм арбериоссэс ваиллям. Дэбесын туез "киултӥзы" но солэсь пӧртэм паймымон арбериос кылдытъяло. Нош Эгралась усточиос коклюшен чильпам чебер пужыос пӧрмытӥллям. Тросаз нылпи ужъёсын пиналлы юрттӥсь адямилэн кибервылыз шӧдӥське на. Та юртлэн кыкетӥ залаз Вотка ёросысь Новый посёлокысь кибашлыос асьсэлэсь киужъёссэс интыяллям. Соослэн пулэсь, туйлэсь дасям но куэм инкуазь суредъёссы синъёсты бордазы тужгес кыско но шумпотто. Пӧсьтолэзе Дэбесысь кибашлыослэн ужъёссылы сӥзем адӟытон усьтӥськоз. Дэбесъёс кызьпу туез гажало бере, татысь сарваосты, лянэсъёсты, шыкысъёсты, суредъёсты адӟоды. Со сяна, куэм суредъёсты (гобеленъёсты). Дэбесъёс Иже ньылетӥзэ лыктозы ни. Нош сӥзьыл, Удмурт Элькун кылдэм дырысен тямыстон ар тырмонлы сӥзьыса, вашкала амалъёсын пужъятэм ужъёслэсь адӟытон дасяськоз. Та ар быдэсак сӥземын вашкала удмурт пужъятон амалъёслы. Со понна оштолэзе одӥг арняем дышетскон но радъямын вал. Улонмы воштӥськемен, пужыосты вунэтыны кутскизы. Вашкала удмурт дэремъёсын гинэ кылемын на соос. Соосты улӟытоно, выльдоно но калыклы возьматоно. Малы ке шуоно, котькуд пужы калыклэсь визьзэ но лулпушсэ, узыр яке куанер, тодӥсь-валась яке взьнодтэм луэмзэ возьматэ. Нош удмуртъёслэн паймымон пужыоссы трос гинэ. С.ПЕТРОВА. Финн ныл Удмурт шаерын Та нимез удмурт калык пӧлын тодӥсьтэмез ӧвӧл, шуыны луоз. арлы быдэ со кык пол- куинь пол вуылэ Удмурт Элькунамы. Марья Картано... Удмурт калык понна, солэсь кылзэ утён, осконзэ юнматон удысын вань сюлэмзэ, ӟеч мылкыдзэ, гажанзэ-яратонзэ поныса ужась финн ныл. Марья (тазьы нимало сое анай-атаез, эшъёсыз) ужа Хельсинкиын � Библиез берыктонъя институтлэн финн-угор ёзаз, удмурт кылэ Священной Гожтэмез берыктонлэн эскерисез-чакласез луыса. Наука кылын вераса, со � богословияя редактор. Вашкала грек, еврей, англи кылъёсты тодэм сяна, Марья быгатэ чылкыт удмурт кылын вераськыны. Али ми Марьяен ужаськомы "Нылпиослы Библия" книгаез дасян бордын. Библиез берыктонъя институтлэн таӵе куронэз вань: тодоно, берыктэм книгаосты калык лыдӟе-а, лыдӟе ке - вала-а? Уг ке вала, кыӵе интыоссэ, кыӵе кылъёссэ, предложениоссэ воштоно, тупатоно? Тае эскерон понна, шоркарамы улӥсь калыкен, ёросъёсысь гуртъёсын улӥсьёсын пумиськылӥськомы но соослы Библиысь текстъёсты лыдӟыны сётӥськомы. Табере таосты волятон бордын эшшо тыршиськомы на. Туэ потамы Удмурт Элькунлэн тужгес лымшор ёросаз � Грах районын улӥсь удмуртъёс доры. Татысен кожылӥмы артысь Татарстанлэн Меделеевск ёросаз интыяськем Тэремшур (енабердино) гуртэ. Толон гинэ бертӥмы Пичи Пурга ёросысь Нӧръя вылэ пырись удмурт гуртъёсысь. Тазэ гожтэмме сӥзисько вордскем Грах ёросам вуылэммылы. Кык нунал куспын вуылӥмы Пангуртэ, Бадӟым Вожое, Вуж Эграла, Вильгуртэ, Пуклёе. Котькытын но туж шуныт, туж мыло-кыдо пумиталлязы. 3-тӥ июне Вуж Эгралан ортчиз гуртмы кылдэм дрысен 305 ар тырмемлы сӥзем праздник. Эгра выжыысь удмуртъёс татчы вуиллям Удмуртилэн уй палысьтыз � чебер Лоза шур дуре интыяськем Эгра гуртысь, туала Игра посёлоклэн интыысьтыз. Вужгуртысьтызы кошкемъёс нырысь-валысь (кыӵе муген меда вордскем гуртысьтызы кошконо луиллям мынам вашкала- вашкала песятайёсы?) интыяськиллям туала Пичи Пурга ёросэ пырись Аксакшур гурт интые (отын али но Эгра воршудэ пырись кӧня ке семьяос уло; татысь археологъёс гудӥзы эграослэсь вашкала шайзэс, сое Эграшай шуо). Аксакшурысь ог люкетэз кошкем Пичи Пурга ёросысь ик туала Уром станция вӧзы, гуртсэс Алганча-Эгра шуиллям. Кӧня ке семьяос вуиллям туала Ува ёросэ но Евгралуд гуртэз кылдытӥллям (али та гурт быремын ни, шуо кадь). Нош Чупчи котырысь кошкем песятайёсы Аксакшурысен (кӧня меда улӥллям отын?) вуиллям Йыраш шурлэн Туймые усён вожаз но отчы гурт пуктӥллям. Та гурт бервылын али уло поръёс, со Татариысь Менделеевск город вӧзын ик, бадӟым сюрес дурын, Карманково нимаське, нош пор уромъёсмы ас сяменызы Ӟэгра (Эгра) ик шуо. Куинь сю вить ар талэсь азьвыл эгра пиос кыӵе ке но муген интызэс нош ик воштоно луиллям. Йыраш шур кузя тубыса, ньыль выль гурт кылдытӥллям. Тужгес вашкалаез � Вуж Эгра (сое Вужгурт но шуо); Пуклё, Вильгурт, Муркемыр. Табере арлы быдэ Грах ёросысь Эгра вылын, гырон-кизёнзэс йылпумъям бере, гурт кылдэмзэс сӥлы-дано карыса, праздник ортчыто. Со луэ Ческыт ошмес гоп дурын, гурезьёс вискын. Одӥгзэ гурезез вашкалаос Каргурезь шуо вал. Зэм но, отын карез (крепостез) вылэм. Та нимез тодэме бере, университетын дышетскыкум, эшъёсме-археологъёсты ӧти. Гудӟизы Каргурезь (али сое Мачыгоп гурезь шуо) йылэз но трос тунсыкозэ тодӥзы: та крепостез кылдытӥллям 1500- 1600 ар талэсь азьло татчы вуэм вашкала удмурт выжыос. Озьыен, гуртмылы кӧня арес: оло куинь сю вить, оло � сюрс вить сю? Мар эшшо тунсыкоез � грах эграос кӧня ке ар талэсь азьло кусып кылдытыны быгатӥзы вашкала дор музъемазы улыны кылем эгра калыкен. Тани туэ но Вуж Эгралэн гурт кылдон праздниказ автобусэн Эгра (Игра) посёлокысь фольклор ансамбль вуылӥз. Сю аръёсын ёзнаськем кусыпсэс уй пал но лымшор эграос выльдыны быгатӥзы. Паймымон! Азьланяз, оло, мукет удмурт выжыос-воршудъёс но (соос асьмелэн сизьымдон) огазе люкаськыны быгатозы? Эгра выл али туж узыр. Выльдӥсько гуртъёс, арлы быдэ дас вить-дас куать выль корка ӝуто, газ кыско. Толэзьлы быдэ уждун тыро. Оло, соин но та пала ӵем гинэ вуылыны кутскизы удмурт фольклор, профессиональной коллективъёс? Та праздникез но, эграос сяна, туж шулдыртӥзы Ува ёросысь Узей-Туклялась вуэм артистъёс. Асьсэос веськресэсь, кырӟаны-вераны устоесь. Эгра калык тау карыса шулдыр кырӟан гуръёсын келяз уй палась Эгра ӵыжы-выжыоссэ, Калмез ёросысь тукля пиосты, нылъёсты. Нош ик лыктэ! Сюрестэс эн вунэтэ, шуо! Аспалме ачим гинэ медам данъя, ушъя шуыса, ӵош ужано эшелэсь, кыдёкысь Финляндиысь вуэм мусо, визьмо, йӧно, инмарлы мур осконэн улӥсь Марья Картанолэсь юалляськи но, та пумысен трос вераськимы. Марьялэсь юай: мар шуысалыд удмурт калык сярысь, маиз понна тон сое сокем гажаськод, яратӥськод; калыкмылэн кыӵе сямыз тыныд тужгес но яра, вань-а калыкмылэн азинскон сюресэз?.. Трос мукет юанъёс-веранъёс но одӥг пол гинэ уг ӝутскыло "котырес ӝӧкмы" сьӧрын... Михаил АТАМАНОВ, Библиез удмурт кылэ берыктӥсь протодиакон. Отец Михаил Эгра калыкез пӧлын. Люкаськем калыкез ческыт тари ӝукен куно каризы Эгра кенакъёс. АРХИВЫСЬ ДОКУМЕНТЪЁСЪЯ УДМУРТИЯ ХХ ДАУРЕ 1918-тӥ ар Совето власьтлэн ӝужанэз Вятской губерниын секытэн ортче: солэн палэнтӥз уг ортчо граждан ож но, Антанталэн войскоосыныз нюръяськон но. Вятка губерниез киултыса, тушмонлы Москвае но Петроградэ вакчи сюрес усьтӥське. Ижевскын ужа пыӵал поттон завод. Губерниын трос калык улэ, ог 4 миллион мурт лыдъяське. Большевикъёслэн огазеяськонзы татын соку гинэ кужымзэ люканы кутске. Ваньмыз со губерниын бугыръяськонъёсты матэктытэ. Уката ик, большевикъёс куремъя, крестьянъёс мултэс луись няньзэс сяна, мукет тӥрлыксэс но государстволы сётоно луо. Кулакъёс талы пумитъясько, Совето власть вылэ урдскыло. Балезино волостьын съезд дыръя кулакъёс кенешез пытсаны комбедъёсты куштыны куро. Глазов уездысь Быково волостьысь узыръёс волость исполком вылэ урдско. Святогорьеын (али Краногорье черко гурт) большевикъёслы пумит лек бугыръяськон ӝутске. Озьы Глазов уездын гинэ 1918-тӥ арын гужем-сӥзьыл кулакъёс ог 60 пол бугыръясько. Губернилэн улоназ бадӟым инты басьто эсэръёс. Июль кутсконлы соос уездъёсысь исполкомъёсын ог 70 процентэз лыдъясько. Соос кие шедё тросэз кивалтон удысъёс. 1918-тӥ арын 7-тӥ июле эсеръёслэн фракцизы Вятка губернилэн исполкомысьтыз потэ, аслыз Глазове комитет кылдытэ. Таӵе вамышезлэсь мугзэ со валэктэ, Вяткаын Большевикъёслэн лушкаськись ньыль красноармеецъёсты быдтэменызы. Пумитазы большевикъёс ӝегатскытэк губерниысь исполкомлэсь азьло чакламтэ кенешсэ ортчыто. Поповлэн кивалтэмез улсын Военно-революционной штаб кылдыто. Та нуналэ ик печатласькемысь дугдо эсэръёслэн, анархистъёслэн, максималистъёслэн газетъёссы. 2-тӥ августэ губерниын яло ож вакыт, пиосты Горд Армие кыскало. 6-тӥ августэ белочехъёс киулто Казанез. Соосын нюръяськон вылысь, Азинлэн кивалтэмез улсын Вяткаысь революционной батальон кылдэ. Азьланяз со Азин дивизилы инъет сётэ. 8-тӥ августэ Ижевскын большевикъёслы пумит бугыръяськон пурӟе. Солэн мугез, Советлэн куремезъя, пиосты армие келян луэ. "Фронтовикъёслэн союззы", вуж армиысь офицеръёсын кивалтэмзы улсын, Советлэсь ож тӥрлык куре. Куронзэс быдэстымтэысь, бугыръяськисьёс заводэз котырто, отысь активез, кивалтӥсьёсты пытсэт улэ кыско. Та дыре Советын 200 большевикъёс, максималистъёс но красноармеецъёс лыдъясько ке, повстанецъёс 7 сюрс лыдъясько. 12-тӥ�13-тӥ августэ Ижевскысь военной отделлэн юртаз большевикъёслэсь но максималистъёслэсь кивалтӥсьёссэс лек жуго. Гуртъёсысь кулакъёс асьсэлэсь армиезэс кылдыто, октябрёзь отын кӧня ке дасо сюрс адями лыдъяське ни. 17-тӥ августэ киултэмын воткинскысь завод, 31-тӥ августэ - Сарапул. Совето власть быдтэмын. Кулак армия дасяське Малмыжез киултыны, но уг быгаты. Озьы Святогорье черко гуртын, кужымзэ выльысь юнматыса, табере со Чепца станция вылэ урдске. Ижевскын но Воткинскын пуромем бугыръяськонъёсты чусомытон вылысь, губернилэн шоркарысьтыз отчы 8 сюрсъем нимысьтыз дивизия ысто. Соин кивалтэ Медведев. Та дивизия пыре Восточной фронтлэн 2-тӥ армияз. 28-тӥ сентябре Горд Армия киултэ Елабугаез, 5-тӥ октябре - Сарапулэз, 7-тӥ ноябре - Ижевскез, 13-тӥ ноябре - Воткинскез. Ноябрь шорын Совето власть губерниын выльысь кивалтыны кутске. 1918-тӥ арлэн пумаз кылдэ выль кышкытлык: Архангельск палась матэкто интервентъёслэн, Колчаклэн войскооссы. Со вакытэ Вятка губерние келямын вал Уралысь ЧК, кудӥз мытэ Горд террорез. Ӵапак соин огазеяськыны чакла Колчак. 15-тӥ декабре со киултэ Пермез. Та аре... 23-тӥ февраль - Горд Армилэн нырысетӥ частьёсыз лек ожмаськонэ пырисько. Бӧрысь 23-тӥ февралез Горд, собере Советской Армилэн но Военно-Морской Флотлэн нуналэнызы лыдъяны кутско. Германиысь войскоослэн асьме музъеммес киултыны ӧдъяменызы валче, 21-тӥ феврале 1918-тӥ арын "Социалистической Отечествомы кышкыт югдуре шедемын" декрет кутӥське. 13-тӥ июне - Пермьысь рабочийёс, Мясников чекистлэн кивалттэмез улсын, Николай ИИ- лэсь братсэ Михаилэз виё. Князь та вакытэ татысь кунокуаын (гостиницаын) улэ. 16-тӥ июле - Москваын виемын Германилэн посолэз граф Мирба. Эсеръёс киулто ЧК-ез но Шор телеграфез. Огыр-бугыръяськон чусоме 7-тӥ июле гинэ, Латыш дивизилэн кичӧлтэмез улсын. 10-тӥ июле - Кутэмын РСФСР-лэн нырысетӥ конституциез. 17-тӥ июле - Екатеринбургын 16-тӥысен 17-тӥ июле выжон уе Ленинлэн но Свердловлэн кичӧлтэмзы улсын быдтэмын Николай ИИ эксэй, кузпалэз Александра Федоровна императрица, соослэн пиналъёссы 14 аресъем Алексей, нылъёссы Ольга, Татьяна, Мария, Анастасия но котырысьтызы адямиос. Та нунал сярысь тросэз тодмо. Тодмо Ленинлэн династилы пум понӥсь чуръёсыз но: "Англия кадь странаын но "данэ потэм" йыртэмасьлэсь йырзэ ӵогоно луиз бере, Россиын ӧжытсэ сю Романовъёслы пум пононо". 30-тӥ августэ - Ленинлэн улонэз вылэ урдско но Петроградысь ЧК-лэсь кивалтӥсьсэ Урицкиез виё. 11-тӥ декабре - Вордскиз тодмо ӟуч гожъясь Александр Солженицын. * Василий Федорович Овчинников, Воткинскысь РСДРП (б)-лэн комитетэныз кивалтӥсь. 1918-тӥ арын со Ижевскын но Воткинскын белогвардеецъёсын лек ожмаськонэ пыриськиз. Гожъясьёслэн кунокуазы Витетӥ арзэ ни Калык куспо Урал инженер университетын ужа гожъясьёслэн кунокуазы (литературая гостиной). Со усьтэмын, наука но техника удысын ужасьёс литература, искусство удыслэсь палэнэ медам кыле шуыса. Пӧртэм пумиськонъёс вал татын, кылсярысь, К. Гердъя, М. Петровъя, А. Пушкинъя, писательёслэн съездзыя, удмурт кылбурчиосъя. Люкаськемъёс азьын вераськизы, кылбуръёс лыдӟизы Вероника Садаева, Анна Верина, Милитина Гаврилова, кырӟанъёсыныз тодматӥз Светлана Белых, крезьгуро удысъя мадиз Елена Красновская. Алигес нош тунсыко вераськон вал. Кызьы книгаен тымиськем "зарезьысь" быръёно аслыд кулэзэ - та ласянь дэмланъёссэ вераз кунокуалэн кивалтӥсез Зоя Богомолова. Тодэ ваёнъёсын литература пӧлын бугыръяськыны юрттӥз Милитина Решитько. Та вакытэ городын радъям адӟытонъёстӥ валтӥз Георгий Решитько. Т. НИКОЛАЕВА. Гастрольёсы - шаермы кузя. Сарапулысь драмая театрын ужась актёръёс понна гужем - кысык вакыт. Соос, кык огазеяськемлы люкиськыса, шаерысьтымы городъёс но гуртъёс кузя гастрольёсы потэмын. Лымшор пала потэмъёсыз актёръёс учкисьёсты "Кот в сапогах", уйпал районъёсыз "Коза лупленная" спектакльёсын шумпотто. Кунооссэс тужгес но шуныт пумитало пиналъёс. Ваньмыз ог 60-лэсь ятыр спектакльёс возьматэмын ни. В. Лагунов. Сьӧд узвесь уз луы весь Печатья но иворъёсъя министерстволэн коллегиез тодматскиз Можга типографиын ужез радъянэн но адямиосты кышкытлыклэсь утёнэн. Типографилэн директорез М.Н.Никитин ивортэмъя, отысь 19 мурт пӧлын берло сизьым ар куспын одӥг шудтэм учыр но ӧй вал. Котькуд ужан интыын вань вӧсь луэмлэсь утиськонъя дэмланъёс. Та удысэ валля арын висъямын 10 сюрс 200 манет, миым � 6 сюрс 500. Ужъя кун инспекция но, санэпидстанция но типографиысь тырмымтэосты ӧз шараялэ. Озьы ке но, печатникъёсты юн сюлэмшугъяськытэ вужмем оборудование. Отын сяна, республикаысь одӥг городын но пӧсь сьӧд узвесен (свинецен) уг ужало ни. Коллегия ужрадъёс пусйиз Можгала выль ужан тӥрлык басьтон пумысен. С.ИВАНОВ. Удмурт Республикаысь Тазалыкез утёнъя министерство, психиатрияя больница кайгыро тазалыкез утён удысысь дано ужась, врач-психиатр ГУКОВ Юрий Петрович улонысь кошкемен валче но мур куректэмзэс верало солэн ӵыжы-выжыосызлы, матысь адямиосызлы. Галина Романова Рай Куинь суредэн сценка Шудӥсь муртъёс: Орина - пересь Дима - пичи пияш Дасэтӥ классын дышетскись пиналъёс Нина - бускель кышномурт Нырысетӥ суред Городын огназ улӥсь пересьлэн корка пушез. Ваньмыз вуж. Пуконъёс кылямын, ӝажы кырыжскемын, ӝӧк - ӝӧккышеттэк, укно - возъетъёстэк. Орина кровать вылын кӧлэ. Укноетӥ шунды пиштыны кутске но Ориналэсь ымнырзэ бичатэ. Орина (сайкаса). Осто, нунал нош вордскиз, лэся. (Вушйылэ, мырдэм-мырдэм султэ, ӝуштэ.) Ой, кускы, ой, тыбыры! (Со куспын шунды быдэс корказэ югыт, сайкыт каре.) Нуналэд чебер луоно. Ох, мынам но улонэ сыӵе ик чебер луысал ке!.. (Сэрегысь мудор дораз мынэ но вӧсяське.) Осто, Инмаре, малы монэ таӵе кема курадӟытӥськод та сьӧлыко музъем вылад? Басьты ни вал монэ дорад, Инмаре, жади ини улыса, басьты... (Радиоез лэзе. Отысь шулдыр гур чузъяське. Орина шундыен сайкытомем корка пушсэ но, чебер гурез но уг кылы кадь.) Эх шу, чебер гурен кӧт ке тырысал!.. Нянь басьтоно тани, йӧл, нош пыдессинъёс жильнаськемын. Кӧня иськемез бызьылӥды тӥ, дуннеез котыръяды, табере магазинэ гинэ но уд нуиське ни монэ... (Йыгаськись луэ.) Кин со? Дима. Мон со, бабуш, мон. Орина. Мар нош ик кулэ? Дима. Мама магазинэ няньлы мыныны косӥз но, тыныд но маке кулэ ӧвӧл-а шуыса пыри. Мон басьтысал. Орина (ас понназ). Басьтод тон, басьтод, шпана, нош ик коньдонме таламед потэ ни. (Ӧс пала кариськыса вазе.) Ӧвӧл, кулэ ӧвӧл, ачим ветло. Дима (зол йыгаськыса). Эн кышка, бабуш, усьты, ачим басьто. Орина. Эх шу, кытчы пырод та ерпечкалэсь. Ӧд ке усьты, ӧсэз но тӥялоз, ява. (Ӧсэз усьтэ.) Дима (Ориналэсь коньдонзэ басьтыса). Мон али ик, бабуш, сю пол но лыдъяса уд вутты - вуо ни. (Ориналэсь сётэм коньдонзэ лыдъя.) Йӧл но басьтом-а, бабуш? Соку йылты на. Орина (лулскыса). Ме, ме, ерпечка, шпана! Кыӵе мумы-бубы тӥ кадьёсты вордэ- будэтэ медам?! (Синкылизэ ӵушылэ.) Дима. Бабуш, эн бӧрды, мон али ик вуо. (Бызьыса кошке.) Орина (мудор азяз мыныса). Осто, Инмаре, малы монэ дорад уд басьтӥськы? Кытын тон? Кыӵе жади ини мон! Осто, Инмаре, осто! (Викышъяса бӧрдэ.) Ӧсэ йыгасько. Дима (ӧс сьӧрысен). Мон со, бабуш, мон. Тыныд йӧл, нянь ваи. Орина (ӧсэз усьтэ но Дима шоры оскытэкгес учке). Мар-о нош кулэ луиз, ерпечка? Дима (сумкаысьтыз ӝӧк вылэ поттылэ). Тани, бабуш, йӧл но, нянь но, коньдонэд печеньялы но тырмиз на... Орина. Осто, пие, осто, мусое! Бадӟым мурт кадь рос-прос луэмед ук ини. Ойдо али ӵошен чай юом. Дима. Юом, бабуш, юом. Орина. Кӧняетӥ классын дышетскиськод ни ай тон, пие? Дима. Куинетӥе потӥ. Орина (чай лэзья). Нош мон малпай вал: нырысетӥе ветлӥськод? Али гинэ ведь азбарын луо пӧлын шудӥськод вал ай. Бадӟым будӥськод ини, пие, бадӟым. Будэмед бере кин луэмед потэ, пие? Дима. Уг тодӥськы на. Ӵошен печеньяен чай юо. Ог-огзы шоры учкыса пальпото. Орина. Лэзём на-а, пие? Ӵашкаосы пичиесь, куиньзэ-ньыльзэ юытэк, мынам кӧты уг тыры. Дима. Юо. Ческыт тынад чаед, бабуш. Орина. Со угось кырын, тэльын будӥсь турын-куарлэсь паремын. Со адямилы кужым сётэ, эмъя но. Дима. Ма тон, бабуш, ку-о тэле ветлыны вуид? Орина. Быгатыкум отысь ӧй поталля, пие. Азьвыл люкам турын-куаре та. Дима. Бабуш, котькуд турын-куарлэн, пе, аслаз кужымез вань - озьы шуэ милям дышетӥсьмы. Орина. Озьы, пие, озьы. Тани, пыдъёсы мынысалзы ке, мон тыбырме, кусме эмъясьсэ шедьтысал, бичасал, собере, оло, йӧнасал но. Дима. Тон, бабуш, мыным вера вал соосты. Ми мамаен, папаен гужем кыдёкысь нюлэскы ветлӥськом, узы-боры, эмезь, губи бичаськом. Мон тыныд соосты вайысал. Орина (Димаез ӟыгыртэ, чупа).Ой, ӟечоке, мусокае! Ярам, лыкты, пыра дорам. Мон тыныд соос сярысь тупен-тупен мадё. Нош али анай-атаед ыштозы ини, гуртад берт. Дима (ӧс куспысен). Бабуш, табере тыныд магазинысь сиён-юон мон нулло, ява. Орина. Ярам, пие, ярам. Дима кошке. Орина (мудор азе кариськыса). Осто, Инмаре, дунне бырымтэ на вылэм! Тыл кысэ. Кыкетӥ суред Азьвыл интыын ик. Орина кӧлэ. Укноетӥ нош шунды пиштэ но Ориналэсь ымнырзэ бичатэ. Орина каллен султэ, пичияк ӝуштэ. Мудор азяз мыныса вӧсяське. Собере радиоез лэзе. Отысь нош ик чебер гур чузъяське, коркаез шунды быдэсак югдытэ. Орина (корка пушсэ котырак учкыса). Осто, Инмаре, туннэ но нуналэ кыӵе чебер вордӥськод! Тау со понна тыныд. Озьы ке но, Инмаре, вождэ эн потты, мон жади ини таяз дуннеын улыса. Ӧсэ йыгаськись луэ. Орина шуак луэ, ӧс пасетӥ учке. Орина (понназ). Осто быри, пиналъёс! Пенсия басьтэмме тодӥзы, луоз. Мар кароно? Ӧд ке усьты, ӧсэз тӥялозы. Уть, кыӵе ослопъёс!.. Пиналъёс. Ми со, ми, бабуш, куамынэтӥ школаысь пиналъёс. Орина. Мар-о кулэ? Пиналъёс. Усьты, бабуш, эн кышка, ми коркадэ октыны-калтыны лыктӥмы. Орина (коньдон пуйызэ валес улаз ватэ, ӧссэ усьтэ). Пыре, пыре. Тани учке, номыри но мынам ӧвӧл. Шыр, таракан гинэ но номыр уз шедьтэ. Коньдонэ но ӧвӧл. (Валес вылаз ватэм коньдонэз вылэ пуксе.) Пиналъёс. Кытын-о, бабуш, ведраед, мучолоед? Орина. Ма, кытын-о соос луозы - туалетын, ваннаын. Нылпиос корказэ окто-калто, пуконзэ, ӝажызэ тупато, укнояз возъет ошо, ӝӧк вылаз ӝӧккышет вӧлдо. Пиналъёс (ӝӧк вылэ сумкаысьтызы сиён-юон тыро). Бабуш, тани та ческыт саламъёсты тыныд сётыны косӥзы милям дышетӥсьёсмы. Нош соослы сыӵе куронзэс вераллям Кун Кенешмы, вылӥысь кузёос. Орина. Тау, мусоосы, тау. Бадӟым будэ, шудо луэ. Пиналъёс. Я, ми кошким. Туннэ эшшо кык пересь доры вуыны кулэ на. Нылпиос кошко. Орина паймеменыз озьы ик валес вылаз пуксьыса пуке. Собере каллен султэ, корка шораз вуэ но котырак учке: шундыё, югыт коркаез эшшо но сайкыт, шулдыр луэм, ӝӧк вылын - конфетъёс-преникъёс, пӧртэм сиён-юонъёс, апельсинъёс, яблокъёс. Радиоез лэзе. Отысь чебер гур кисьтӥське. Орина (малпаськыса). Дугды ай, дугды. Мар-о та таӵе? Оло, мон кулӥ? Оло, мон рае вуи?.. (Мудор дораз мынэ.) Осто, Инмаре! Тау тыныд! Кылӥд монэ, дорад рае басьтӥд... (Корка шораз потэ но каллен бергаса кырӟа): Вуиз, лэся, вуиз, лэся, Кема малпам дыръёсы. Кема малпам дыръёсы но Сяськаян вакытъёсы... Тыл кысэ. Куинетӥ суред Отын ик. Орина кӧлэ. Укноетӥ шунды пыре, Ориналэсь ымнырзэ бичатэ. Орина сайка, капчияк султэ. Радио лэзе. Шулдыр гур кисьтӥське. Орина сандыксэ усьтэ но отысь льӧль дэремзэ, вож кашамир кышетсэ поттэ. Соосты дӥся, керттэ но синучкон азьын чеберъяськыса сылэ. Ӧсэ йыгасько. Орина. Осто, Инмаре. Ачид дорам куное лыктӥськод, дыр. Али ик, али ик - усьтӥсько. Нина пыре. Нина. Кытчы-о сыӵе чеберъяськиськод, Орина апай? Орина. Таӵе чебер нуналэз чеберен пумитам потэ, Нинук... Дугды ай, дугды, ма, тон но кулӥд шат, Нинук? Нина. Оломар эн супыльты, Орина апай. Тани пӧраськи но тыныд веръяны ваи. Орина. Тау, Нинук, тау. Кемалась ни вал выль пӧрам сиеме. Нина. Эх, шулдыр луэм тон дорын, Орина апай! Пересьмон вакытад ке но ӟеч улонэз адӟиськод на ай. Орина. Райын мон улӥсько, Нинук, райын. Нина. Бен, рай ик луиз улонмы. Орина. Нинук, вера ай, ассэ Инмарез адӟид ини-а тон? Нина. Адӟи, Орина апай, адӟи. Ачиз огшоры гинэ, нош вераськыны кутске ке, сюлэмез вӧйтэк шунтэ. Пальпотэ ке, котырак югектэ. Таӵе ӟеч улон ваиз вал выль кузёмы. Орина. Дугды ай, Нинук, дугды. Кыӵе кузё сярысь тон вераськод? Кыӵе улон сярысь? Нина. Огнад кыльыса, вактад вуиськод, лэся, ини тон, Орина апай. Революция вал ук. Орина. Нош ик революция! Кыӵе революция? Нина (Оринаез ӟыгыртэ). Вань асьме вирмес юыса тордэм урбо мафиез сэрпалтӥмы, уллямы. Нош кузёе пуктӥмы кылбурчиез. Орина. Осто, шу! Оломае но кылод, ява! Нош инмар, нош рай?! Нина. Инмаред но, раед но коркад, Орина апай. Я, мон кошки, пӧраськемме гуре поныса кельтӥ вал - сутскоз я мар. (Кошке.) Орина (мудор азе пыдесъяське). Осто, Инмаре! Ӝамдэлы ке но сёт на мыным та музъем вылын улондэ! Катанчи. Гуртоослы юрттэ завод Можга ёросын валэс тысё культураосыз кизёнъя план быдэстэмын. Етӥн чакламез сярысь 300 гектарлы тросгес киземын. Етӥн сэстон завод хозяйствоослы 110 тонна удобрениос, 20 тонна эстӥськон, воштос ёзъёс висъяз. Етӥн бусыосы пазяны гербицидъёс вань. Со сяна, завод малпа кык лентооборачиватель басьтыны. Соин валче етӥнэз утялтыку вань амалъёс уже кутэмын луозы. Ёросын 620 гектар картофка мерттэмын, со планэн чаклам мындагес. 74 гектар вылэ кушманъёс мерттэмын. Котькуд гектар гыроно-кизёно музъеме 31 килограмм удобрение пыртэмын. Колхоз но завод люконтэм Можга ёросысь "Совет" колхозлэн Карашурысь вӧй поттон заводаз нуналлы быдэ 10�12 тонна йӧлвыл вуэ. Отысь 3�4 тонна вӧй потэ. Ваньмыз со продукция мынэ тулыс бусы ужъёсыз ортчытыны эстӥськон басьтэм понна дунъёсыз берыктыны. Коньдон ӧвӧлэн уг быгато на напчытэм йӧл поттон линизэс уже лэзьыны. Выль продукция поттыны нимысьтыз тодон-валанъёсын ужасьёссы но вань ини. Вӧй поттон заводэз колхоз лэсьтӥз бере, пайдаеныз но со кузёяське. Предприятиын ужасьёс колхозникъёсын огкадь условиосын уло. Музъемез валаса куто Можгаысь агрохимлабораториысь агрономъёс таяз аре шӧдӥзы асьсэлэсь туж кулэ луэмзэс. Быдэс тулыс адямиос весь кулэяськизы соослэн юрттэтсылы. бакчаысьтызы сюйзэс эскерыны нуллӥзы. Агрономъёс кулэ визь-кенешъёс сёто, музъемлы кыӵе удобрениос, микроэлементъёс кулэ шуыса. Улон дунояз, но адямиос лыдъяло: мар музъеме понэмын визьмын, со пайдаен берыктӥськоз. Вормизы пычасъёс Можга ёросысь администрацияз люкаськылӥзы сельсоветъёсысь администрациослэн кузёоссы. Соос йылпумъянъёс лэсьтӥзы Быдӟым Вормонлы 55 ар тырмонлы сӥзем ужрадъёсъя смотр-конкурслы. Интыосын вано ужрадъёс ортчытэмын сельскохозяйственной предпритяоислэн коньдонэнызы, юрттӥзы кӧня ке ужбергатӥсьёс но крестьян хозяйствоос. Огъя вераса, та ужрадъёсы кутэмын 196,1 сюрс манет. Вылӥ дунхет сётэмын вал та ужрадлы дасяськонъя оргкомитетлэн, калыклэсь социальной улонзэ утёнъя отделлэн, ветеранъёслэн районной советсылэн ужамзылы. Смотр-конкурсын нырысетӥ инты сётэмын Пычас поссоветлэн администрациезлы (данъямын грамотаен но 600 манет премиен), кыкетӥ интыын Бадӟым Уча сельсовет (500 манет), куинетӥын � Ныша (450 манет). Ужтэк уг пуко Гурезь-Пудгалан Алексей но Василий Золотаревъёслэсь килы усто луэмзэс тодӥсьтэмез ӧвӧл. Ма гинэ уг лэсьто пиос ас визьмынызы, быгатэменызы. Шкатулкаос, гардинаос, кухняын кулэ луись пӧртэм пумо арбериос... Гуртооссы шумпотыса басьто кибашлыослэсь вузъёссэс. Пиослы асьсэлы но кӧня ке но табыш луэ, уката ик Висили йлы. Али со ужтэк пуке. Соин но яратоно удыссэ эшшо паськытатыны малпаз: табере со пичи ӝӧкъёс лэсьтон борды басьтӥськиз. Алексей Вавожысь РОВД-ын водитель луыса ужа. Егит на ке но со, улонэз адӟиз ни, шуыны луоз. Со кык пол пыриськиз Чечен музъем вылын бугыръяськонъёсы. Алексей но Василий ЗОЛОТАРЕВЪЁС. Туспуктэмез В.Беломорскихлэн. АРХИВЫСЬ ДОКУМЕНТЪЁСЪЯ Удмуртия ХХ дауре 1919-тӥ ар Январь толэзе нырысь Вяткае нош бӧрысь Глазове вуэ Москваысь партийно-следственной комиссия, кудӥныз кивалто Ф.Дзержинский но И.Сталин. Со тодыны кулэ вал Пермез Колчаклэсь сётэмлэсь мугъёссэ. Лыктэмъёс ужзэс радъязы Глазов пиосмурт гимназилэн юртаз, отчы ик интыяськемын вал Восточной фронтлэн 3-тӥ армиезлэн штабез. Комиссия пыр-поч сэрттӥз-пертчиз армилэн куашканэзлэсь мугъёссэ, ӝегатскытэк ужрадъёс кутэмын сое юнматон ласянь. Ӵектонъёс пумысен ивортэмын Ленинлы. Революцилэн вождез гожтӥз: "Глазов. Сталинлы, Дзержинскийлы. Басьтӥ но тодматски ивортонэныды. Кыкнадэс но туж курисько кутскем уждэс быдэсъян борды, сотэк вормонэз ум адӟе. Ленин". 1919-тӥ арын тулыс Колчак выльысь Урал дорысен Волга пала омырскиз. Та вакытэ асьме шаерын ожмаськизы 3-тӥ но 2-тӥ Горд Армиос. 3-тӥ армия утиз Глазове нуись чугун сюресэз но Воткинске но Дэбесэ мынӥсь трактъёсты. Нош 2-тӥ армия интыяськемын вал солэн лымшор палазгес. Март йылпумъяськытозь, колчаковецъёс фронтэз тӥяны ӧз быгатэ. Тужгес юн пумитъяськиз Восточной фронтысь 2-тӥ армия, со ожмаськиз Воткинск но Сарапул палъёсын. Тӧдьыос вань кужымзэс сётыса кортнаны туртто вал Глазов�Ижевск� Сарапул пала нуись сюресэз. Кышкытлык будэмен валче, Ижевскысь Революционной Совет дасяськыны кутскиз заводъёсты, учреждениосты но коммунистъёслэсь семьяоссэс мукет интые выжтыны. 8-тӥ апреле 2-тӥ армилэн штабысьтыз телеграмма вуэ: "Заводъёсты выжтоно" Сутка куспын тужгес кулэ станокъёс, машинаос сэрттэмын но вагонъёсы интыямын вал. Кылемез оборудование оскымон итые ватэмын. Ӵукна 9-тӥ апреле 46 вагонэн состав Казань пала вырӟиз. Секытэсь но уно вир кисьтыса ожмаськонъёс бере, Тӧдьы армия Воткинскез басьтӥз, 11-тӥ апреле сётскиз Сарапул, 13-тӥ апреле � Ижевск. Ижевскысь пыӵал тӥрлык лэсьтон заводлэн цехъёсаз шыпыт. Ижевскын кык толэзь ӵоже улытозязы, тӧдьы гвардеецъёс заводэз лэзьыны таки ӧз быгатэ. Радъямын вал вуж пыӵал тӥрлыкез тупатъян гинэ. Киултэм музъемъёс вылын революцилэсь азьло тупатэм ужпумъёсты ӝутӥзы, коммунистъёсты но соослы дурбасьтӥсьёсты казнить каризы. Глазов но Сарапул уездъёс кык пол киысь кие выжылӥзы, отын быдтэмын но сӧсыртэмын вал 22 сюрслэсь уно адями. 1919-тӥ арын мае Восточной фронтысь 2-тӥ армилэн частьёсыз наступление выжизы. 27- тӥ мае соос мозмытӥзы Елабугаез, 3-тӥ июне басьтӥзы Сарапулэз, 7-тӥ июне � Ижевскез, 11-тӥ июне � Воткинскез. Зэм, 3-тӥ июне колчаковецъёс нош ик Глазовез киултӥзы, но отын соос 10 нунал гинэ возиськизы. 20-тӥ июньлы Вятской губерния быдэсак колчаковецъёслэсь мозмытэмын ни вал. Граждан ож губерниез шал-шал буш кельтӥз. Заводъёсын но фабрикаосын ӧз тырме ужась киос, оборудование, сырьё. Куанермизы гуртъёс: соосты я тӧдьыос, я гордъёс качазы, ӧз удалты нянь, кулэсмиз пудолэн лыдыз. Коммунистъёс калык пӧлын паськыт валэктон уж нуизы. 1919-тӥ арын гужем, соослы юрттон вылысь, "Красная звезда" агитпароход вуэ. РСФСР-ысь ВЦИК-лэн ӵектэмезъя, со Волга но Кама шуръёстӥ уя. "Красная звездалэн" одӥгез кивалтӥсез вал Надежда Константиновна Крупская. Агитпароход ортчиз тӧдьыослэн вуылэм интыостӥзы, валэктон уж нуизы Советской властез юнматон вылысь. Пароход кыскиз бадӟым баржаез, отын вал кино, радио, типография, книгаен вузкарон магазин. 25-тӥ июльысен 2-тӥ августозь агитпароходын ужасьёс вуылӥзы Каракулиное, Камбаркае, Ижевске, Воткинске, Гольянэ, Галевое, Сарапулэ. Пумен ӝутскыны ӧдъязы заводъёс но фабрикаос, лэсьтӥськон удыс радъямын вал "военной коммунизм" кутыса, улонэ пыӵазы чакламлэсь мултэс ужан, субботникъёс, месячникъёс, уно калыкез кыскылӥзы нюлэс коранэ, бусы но мукет ужъёсы. И.ЗАЙЦЕВА, Удмурт Республикаысь Кун архивысь отделэн кивалтӥсь. Восточной полкысь 2-тӥ армилэн 28-тӥ стрелковой дивизиысьтыз командиръёс. ЭКОНОМИКА Куашкам завод улӟе Правительстволэн пресс-службаез ужзэ выльдӥз, шуыны луоз, журналистъёсты интыосы нуллыны кутскиз. Алигес нырысез сыӵе ужрад ортчиз Ижысь подшипник заводын. Журналистъёс пыр-поч тодматскизы предприятилэн ужаменыз, ортчизы цехъёстӥ, учкизы, кызьы вордско подшипникъёс. Малы бен та предприятие быръемын вал? Юнме шорысь вылымтэ. Кык ар талэсь азьло усьтэм амалэн ужась "Ижевский подшипниковый завод" акционер огазеяськон банкрот луиз. 1998-тӥ арын 12-тӥ январе палэнысь кивалтӥсьёс юнматэмын вал. Куашкам заводэз улӟытон борды кышкатэк басьтӥськиз Ижысь механикая заводын кыдам но будэм усто специалист, производстволэн кивалтӥсезлэн воштӥсез Александр Черных. Выль кивалтӥсь ужезлы трос кужымзэ, быгатэмзэ но визьзэ сётӥз. котыраз люказ оскымон воштӥсьёс, умоесь кусыпъёс тупатӥз поставщикъёсын. Ӝоген выльдӥзы оборудованиез, подшипникъёслэсь ӟечлыксэс ӝутӥзы. Табере продукцизы кунгож сьӧры но кошке ни. Нош "АвтоВАЗ" акционер огазеяськон миым "ИПЗ" ОАО-ез усто поставщикъёс пӧлы пыртӥз но дипломен пусйиз. Мар шуод, со пичи ке но, вормон. Тӥни озьы подшипник лэсьтӥсьёс каллен-каллен пыд йылазы султӥзы, шуг-секытысь потӥзы. Миым 15-тӥ июле палэнысь кивалтон быдтэмын вал. Быръемын валтӥсь директор но директоръёслэн кенешсы. Отчы пыртэмын кун кивалтонысь адямиос но. Валтӥсь директор луиз Александр Геннадьевич Черных. Предприятилэсь улӟемзэ тужгес но яркыт возьмато лыдпусъёс. Кылсярысь, валтӥсь фондъёсты выльдыны 1,5 миллион манет коньдон кутӥзы. Али выль цех пукто. 1997-тӥ арын огазеяськон 8,8 миллион подшипник поттӥз (толэзяз 734 сюрс), 1998-тӥ арын 9,7 миллион (805 сюрс), миым 17,7 миллион (1475 сюрс), нош туэ 5 толэзьскын - 8 миллион (толэзяз 1618 сюрс) яке быдэс 1997-тӥ арын мында. Пусйыны кулэ, "ИПЗ" ОАО Россиын подшипникъёсты 9 процентсэ поттэ. Продукцизэ басьто ни Франция, Испания, Бразилия, Араб Эмиратъёс но музон кунъёс. Огазеяськон табере дыраз сётъя уждун. 1997-тӥ арен ӵошатыса, со кык поллэсь уно йылӥз но толэзяз шорлыдын 1,5 сюрслэсь трос усе. Нош ужасьёслэн лыдзы кык сюлы будӥз. Та вакытэ предприятиын 1085 мурт тырше. Выль цехсэс вуттӥзы ке, эшшо ужан интыос ватсаськозы на. Завод корт басьтэ Первоуральск, Череповец городъёсысь, озьы ик кӧнязэ ке � "Ижстальлэсь". Азьло Совето Союзын 32 таӵе завод ужаз, али Россиын 20 кылемын. Асьмелэн предприятимы "Металлист" заводлэн инъетэз вылын 1956-тӥ арын кылдэмын. Табере со йыг-йыг пыд йылаз султэ ни. Огъя вераса, подшипник поттӥсьёс сямен ик Удмуртиысь мукет промышленной предприятиос но туэ умой ужало, йылэ ваньбур поттон. Тужгес но адӟем карымон азинско, огсыр тыршо пияла, химия тӥрлык поттӥсьёс, андан ӵыжатӥсьёс, вырӟо машина бичасьёс но калыклы дӥськут вурисьёс. Соин ӵош ик шаерамы вордӥське кабзэ выль удыс - тазалыкез утён оборудование но эмъюм поттон. Ваньмыз со пайдаен берытске: казнае уногес уксё вуэ, дышетӥсьёс, врачъёс но музон ужасьёс дыраз уждун басьто ни. Нош кыӵе югдур ож тӥрлык поттэм понна коньдон тыронэн? Москва тыронзэ уг вунэты, каллен берыктэ. Туэ 1-тӥ январьлы одӥг миллиард манетлэсь трос тыронэз ке вал, али 860 миллион манет кылемын на. Республикаямы уждунъя тыронмы 800-900 миллион манет ке вал, та вакытэ 200 миллион манет лыдъяське. Г.РОМАНОВ. Кык полэс кужым 19-тӥ июне люкаськылӥзы "Единство" партилэн но "Союз правых сил" огазеяськонлэн Удмуртиысь ёзъёссы. Валче ужан понна соос кылдытӥзы Консультативной Совещание. Ас азяз со бадӟымесь ужпумъёс пуктэ. Кылсярысь, нюръяськыны малпа Удмуртиын улӥсьёслэсь интересъёссэс но правооссэс утён, кунлыкез юнматон но республикамылэсь луонлыкъёссэ быгатыса уже кутон понна. Со сяна, та кык огазеяськонъёс ӵош кариськыса ужаны чаклало, калыклэн улонэныз герӟаськем законъёсты Кун Кенешын дасяку но кутыку. Консультативной Совещание озьы ик чакласа возёз вань быръёнъёслэсь мынэмзэс, Удмуртилы Президент быръёнэз вераса но. СПС-лэн огез азьветлӥсезлэн Д.Шумковлэн лыдъямезъя, Удмуртилы президент быръёнэз умойгес, пе, луысал бергес, 3-тӥ декабре ортчытыны. Сыӵе малпанэзлэсь мугъёссэ со тазьы валэктӥз. Нырысь ик, ӝог ортчытон быръёнъёслы калык дась ӧвӧл на. Адямиос югдурез пыр-поч валаны кулэ. Собере адямиослэн сӥзьыл туж трос ужъёссы люкасько, толлы но умой дасяськоно. Т.БАННИКОВА. Та нуналэ соос шудоесь вал Калыкез дышетонъя министерство 19-тӥ июне люказ нылпи юртъёсысь но школа- интернатъёсысь выпускникъёсты. Туэ соос дас укмыс кузя вал. Вань сирота нылпиослы 11 класэз йылпумъяны шуд уг усьы. Мар возьма таоссэ? Быгатозы-а соос дышетсконзэс азьланьтыны? Калыкез дышетонъя министрлэн Л.Захаровалэн верамезъя, вузъёсы но техникумъёсы пырыны, пе, соослэн луонлыкъёссы вань, экзаменъёссэс сётыкузы "кык" гинэ медаз басьтэ. Мумы-бубытэк кылем егитъёс понна вузъёсы пырыны юрттэт (льгота) тупатэмын. Азьланяз дышетскем сяна, та нылпиос усто семья но кылдытыны мед тыршысалзы, шуиз Кун Кенешлэн Тӧроезлэн воштӥсез Н.Харина, семьятэк уго шудбур ӧвӧл. Мумы-бубытэм нылъёс но пиос валало, улонын соослы капчи уз йӧты шуыса. Нош та нуналэ егитъёс пичильтык ке но шудлэсь шӧмзэ веръязы. Уно шуныт кылъёс кылэм сяна, соос кузьымъёс басьтӥзы, "Кама" ресторанынын утялскизы, нош собере Иж тымет кузя катерен уязы. Т.МИРОНОВА. Кык Петровъёслэн юБилейзылы туэ сӥзьыл тодмо удмурт писательёслэн Михаил Петровлэн но Михаил Покчи-Петровлэн юилейзы: одӥгезлэн вордскемез дырысен 8-тӥ ноябре 95 ар тырмоз, мукетызлэн � 4-тӥ октябре 70 ар. Шаерамы но, вордскем палъёсазы но, соослы сӥзьыса, пӧртэм ужрадъёс ортчылозы. "Удмуртия" издательство но аслэсьтыз кузьымъёссэ дася: М.Петров сярысь тодэ ваёнъёсын книга (люкасез З.Богомолова) но М.Покчи-Петровлэн кылбуръёсыныз сборник. Т.НИКОЛАЕВА. Редакцилэсь. "Ой, тӥ, чебер нылъёс" кырӟанэз "На-на", ас сяменыз тупатыса, быдэс дуннее вӧлмытэ ни, шуо, со понна, пе, Петр Кубашевлы гонорар но вуэ. Та сярысь юано кариським аслэсьтыз Петр Николаевичлэсь. Со шуиз: � Зэм вераськоды. "На-на" кырӟа мынам гурея ик. Нош кылъёссэ воштӥллям, "Самоволочка" нималлям. "Колхоз" кылэз, пе, ум валаське... Эшшо Петр Николаевич вераз на таӵе учырез. Ог куинь ар талэсь азьло, "Железнодоржник" культура юртын Татариысь бигер ансамбльлэсь концертсэ учкемез бере, Петр Кубашевлы вазиськем одӥг кышномурт. � Кызьы тӥледлы возьыт ӧвӧл бигер кырӟанэз асэстыны? Мон весь малпаса улӥ, "Эх, сыз, матур кызлар" ("Ой, тӥ, чебер нылъёс" � Ред.) тӥляд гожтэмды шуыса. Али концертын веразы, та Оренбург палась бигеръёслэн калык кырӟанзы, пе. Озьы "визьмаллям" тодмо кырӟанлэсь авторзэ. Ринат БАТТАЛОВ Одӥг шурлэн кык ярдурез Тӧдьы Камлэн тулкымъёсыз Кужмояло, паськытало, Куке Ижлэн ярдуръёсыз Соин огъя, валче луо. Одӥг шурлэн кык ярдурез � Удмурт, бигер эльёс-кунъёс. Шунто лулэз но мугорез, Пельто ке эшъяськон тӧлъёс. Тукай* кырӟан анай гурен Монэ веттаз кӧкыысен. Нош пумиськи удмурт кылэн Голюшурма палъёсысен. Монэ возе удмурт музъем, Гожъяськисько бигер кылын. Шунды но кадь анай тусъем � Татын капчи, шуныт мыным. Тӥ пиштэ весь, шунды, толэзь, Эн жалялэ ас тылсидэс. Бигер, удмурт кусыпъёслэсь Медам шӧдэ чигиськемзэс. Чингиз МУСИН Ваче ки кутӥськыса Сарсак-Омга, Варзи-Пельга � Бускельёсмы, удмурт гуртъёс... Кин ке татын улэ-берга, Шуд-дэлетэз, ужез но трос. Тӧлӧ, бугрес вакытъёсы Канжаськылӥм, йыромылӥм, Но ваче ки кутӥськыса, Кык батыръёс кадь ик сылӥм. Шумпотонмес но кайгумес Ог-огмылы вераллямы. Эшъяськонмы будӥз-юнмаз, Юн пушъетъёс � выжыямы. Кин ке сайя улон азьмес, Яраосмес куректытэ. Но � пытсантэм улон ошмес, Азьлань, азьлань гинэ дыртэ. Динар АБДУЛЛИН Яратонлэн тылыз Мон тодыса весь улӥсько: Кысоз улон тылы. Нош чик уз кысы, тодӥсько, Яратонлэн тылыз. Яратӥсько та музъемме, Пельтӥсь ыртӧлъёсыз, Нюлэсъёсме но возьёсме, Будӥсь сяськаосыз. Яратӥсько турлы пумо Тылобурдо гурез. Яратӥсько мон, куке нош Гужем ӧраз пыре: Уйлэн чалмыт пеймытэныз, Ӵукна ӟардонэныз, Лымшорезлэн югытэныз, Шунды пуксёнэныз. Ошмесъёсыз но шуръёсыз, Зарезь пальккаськемез, Тулкымъяськись бусыосыз, Нюлэс шаугетэмез, � Мон гажасько та улонэз, Солэсь пӧртэмлыксэ: Башкиръёсыз, ас выжымес, Ӟучез но удмуртэз. Сюлэмылы ваньмыз матын, Дуно мыным туннэ. Яратонэн пачыламын Быдэс югыт дунне. Берыктӥз Татьяна ЧЕРНОВА. _________________ * Габдулла Тукай � бигер калык кылбурчи. Номыре ум вунэтэ Асьме калык сӥё-дано пусйиз Быдӟым Вормонлы 55 ар тырмонэз. Та праздник азьын трос калык тодматскиз Ижевскысь "Россия" кинотеатр дорын усьтэм выставкаен. Кызьы тодӥськом, али лэсьтӥське быдэс дуннеысь дано конструкторлы Михаил Тимофеевич Калашниковлы сӥзем музейлы бадӟым юрт. Но сое вуттытозь, та лэсьтӥськон комплекс вӧзы конструкторлы 80 арес тырмемен валче усьтэмын вал выставка. Одӥгъёсыз экспонатъёс возьмато, кызьы со аслэсьтыз автоматсэ кылдытӥз. Америкаысь историк Эдвард Клинтон Изел Михаил Калашников сярысь книга поттэм бере гинэ асьме странаын со сярысь чик танытэк газетъёсын гожъяны кутскизы. Солэн кылдытэм автоматэзлэн данэз тужгес но будӥз, Вьетнамын ож мыныку. Улонэн кулон ваче пумиськыку, котькуд адямилэн улэп кылемез потэ уго. Калашниковлэсь автоматсэ кема эскеремзы бере тросэн поттыны кутскизы Ижевскын. Ачиз конструктор ӝыны даурлэсь кема Ижын улэ ини. Солэн автоматэзлы 50 ар тырмемен валче, бадӟым музей юртэзлэн инъетаз Михаил Тимофеевич капусла понӥз. Отын гожтэмын: "Гажано эшъёс! Ӝыны даур улыса, вань ортчем сюресмы историе кылёз. Инмар мед утёз, асьмелэсь улонмес нылпиосмы историяя гинэ мед тодысалзы. Мон данъяськисько ортчем сюресэным. Отечествомес мозмытон понна быгатонозэ ваньзэ лэсьтӥ. Тӥляд улонады ноку но медаз пумиське ожъёс. Музъем вылын улӥсьёслы сӥзисько тупаса улон, яратон но шудбур". Выставкаын озьы ик син азям сюриз Калашников сярысь гожтэм чуръёс. Отын шуэмын: со ассэ шудоен лыдъялоз, быдэс дуннелы кулэ уз луэ ни ке солэн автоматъёсыз но мукет пыӵал тӥрлыкез. Татын ик возьматэмын кунгож сьӧрысь кузьмам пӧртэм арбериос. Соос пӧлын � Япониын поттэм автомат макет. Михаил Тимофеевич музейлы сётӥз азьвыл мебельзэ. Сое басьтӥз вал 1949-тӥ арын автоматсэ поттэмез понна Сталинской премиеныз. Та пуконъёс но ӝӧк ваньзэ адӟизы, бадӟым праздникъёсыз но, шыпытэсь ӝытъёсыз но. Туж умоесь пӧрмиллям Калашниковлэн егит дыръяз кышноеныз но нылпиосыныз пуксем портретъёссы. Тани солэн 1939-тӥ арын соку гинэ армие вуэм бераз тусбуез. 1941-тӥ арын ож дыръя секыт сӧсырмемез бере сое дораз лэзизы. Тани солэн лэсьтэм нырысетӥ автоматэз. 1948-тӥ арын сое Ижын тросэн поттыны ӧдъязы: нырысь ик мотозаводын, собере машиностроительной заводын. Война бере Калашников трос ветлӥз воинской частьёсы пыӵалэныз кызьы ыбылӥськемзэс эскерыны. Тулаын, Вятской Полянаын но мукет интыосын поттӥзы автоматъёсты. Михаил Тимофеевич яратэ азьвыл поттэм пыӵал тӥрлыкез люканы. Соос пӧлысь адӟиськом Кавказысь сабляосты, кинжалъёсты. Колумбиысь обороная министр солы кузьмам тростникъёсыз вандылон пурт. Финляндиысь со ваем пӧйшуран пыӵалъёслэсь пӧртэм калибръёсын патронъёссэс. Калашников пӧйшураны но чорыганы яратэ. Со ӵем дыръя нуллэ Америкаысь М-16 винтовка кылдытӥсь Юджин Стоунерлэсь но со сярысь нырысь ик гожтӥсь историклэсь Эдвард Изеллэсь солэн нимыныз пусъем картузъёссэс. Выставкаын возьматэмын Быдӟым Ож тыл пыр потэм мукет дано адямиос но. Соос пӧлын � Вормон парадэ куинь пол ветлэм Воладимир Фролович Мерзляков, 73 номеро школаысь Советской Союзлэн Геройёсызлы сӥзем музейлэн кивалтӥсез Раиса Михайловна Сонина но мукетъёс. Тужгес но син шоры йӧтымон Советской Союзлэн Героезлэн Г.С.Томиловскийлэн ортчем сюресэз. Георгий Сергеевич Минскын вордскиз. Война бере Ижевскысь 7 номеро профтехучилищелэн директорез луыса ужаз. Пенсие потэмез бере, сюлэмыз висемен, врачъёс сое ужаны ӧз лэзе ни. Озьы ке но, со дораз пукыны чидатэк ветлӥз аслаз училищеяз. Георгий Сергеевичез егитъёс туж яратӥзы. Нош республикаысь пионеръёс сое тодӥзы "Зоринча" ож спортивной шудонъёсын кивалтӥсь луэменыз. Соос али ваньзы мӧйымизы ни. Но оскыса вераме потэ: кин та Героен одӥг пол ке но пумиськылӥз, со ноку но мукет адямилы урод уз лэсьты. Жаляса верано луэ, ошоры адямиос сямен ик Геройёс но куло. Томиловский пыдын мыныны потӥз дышетскон ар кутскон нуналэ. Кӧня ке вамыштӥз но �весяклы усиз. Таӵе адямиос вань быгатонзэс сётӥзы, асьме калык шудбуро мед улоз шуыса. Малы ке мынам тодам лыктӥз тодмо кылбурчилэн верамез: кортӵогъёс лэсьтысалыд ке таӵе адямиослэсь, соос тужгес но юнэсь луысалзы. Оскем потэ, асьмелэн будӥсь кивоштӥсьёсмы ожысь но ужысь ветеранъёслэсь улэм сюрессэс выль усто ужъёсын азинтозы шуыса. В.ЧЕРНОВ. Вормон парадъёс 1945-тӥ арын 24-тӥ июне Москваын куазь ӧжытак зориз ке но, военной парад ортчиз. 200 воинъёс Гитлерлэн армиезлэсь 200 знамяоссэ барабанъёслэн жугемзы улсын В.И.Ленинлэн мавзолеез азе куязы. Парад бере Правительствоын пумиськон ортчиз тужгес сӥё-дано адямиосын. Асьме командование ӵектӥз американецъёслы, англичанъёслы но французъёслы фашистъёсты быдтэмзы пумысен ӵош парад ортчытыны. Берлинын войскоослэн парадзы ортчиз 1945-тӥ арын 7-тӥ сентябре. В.ЧЕРНОВ. Нунал берытске Туннэ - тужгес кузь нунал:со кыстӥськоз 17 час 33 минут.Шунды ӝужаз 4 часкын 45 минутэ,пуксёз 22 часкын 18 минутэ. Ӵуказе нунал одӥг минутлы вакчиялоз ни:кыстӥськоз 17 час 32 минут.Шунды ӝужалоз 4 часкын 46 минутэ, пуксёз 22 часкын 18 минутэ.Озьыен, каллен - каллен выжиськомы тол вакытэ. Мултэс кузёяськыны уг лэзьы Лыдӟисьёсмы телевизор пыр синйылтытэк ӧз кыле, луоз, кылем арняе Сергей Кириенколэсь но Александр Волковлэсь пумиськонзэс. Отын Сергей Кириенко умоен пусйиз республикамылэсь Конституцизэ. Россилэн 21 субъектъёсыз пӧлысь асьмелэн гинэ Валтӥсь Законмы тупа Россия Конституцилы. Нош 16-тӥ июне Закон бордын ужамзы сярысь журналистъёслы мадизы Удмурт университетысь правоя институысь учёнойёс Семен Бунтов но Маргарита Мокшина. Тупатъянъёсын выль Конституцилэн одӥг нуналскын кутэмын вал. Тупатъянъёс пыртылыку чакламын Россилэн Конституциез, Адямилэн правоосыз сярысь декларация, урод югдурен валче улон интыысьтызы пегӟем муртъёс сярысь конвенция. Конституцимы Россиысезлы тупа ке, малы соку нимысьтыз Конституция кулэ на? Семен Бунтовлэн верамезъя, та кык законъёсын пӧртэмлыкез вань. Субъектъёслэн Конституциосазы лыдэ басьтӥсько отын улӥсь калыкъёслэн интересъёссы, интыысь кивалтэтлэн аспӧртэмлыкъёсыз. Федеративной кунын республикаослэн вань луонлыксы куд-ог ужпумъёсты ас тодэмзыя сэрттыны- пертчыны. Со сяна, Россилэн Конституцияз Президентлы мултэс трос полномочиос сётэмын, Удмурт Республикалэн конституцияз сыӵеез ӧвӧл. Асьмелэн лыдэ басьтӥсько пӧртэм кивалтон ёзъёслэн секталазы. "Удмурт Республикаысь Президент сярысь" Законэз но тодосчиос вылӥ дунъязы. Соя президент быръёнъёсын котькуд кандидатлэн трос эскерисьёсыз луыны быгатозы, иське, ичигес луозы ог-огзылы оскымтэос, "куараосын" шудонъёс. Президент луон понна 25 процент куара бичанэз тужгес тупамон лыдъяло. 50 процент сярысь вераськонъёс вал ке но, 25-сэ КУАРАОСТЫ но бичаны асьме дорын шуг луоз, дыр. З.ВАХРУШЕВА. "Мурӝолысь" поттэм чеберлык Быдӟым ожлэн быремез дырысен 55 ар тырмонлы сӥзьыса, "Утем дунне тодэ" ("Помнит мир спасённый") нимо адӟытон ужа Ижысь искусствоосъя музейын. Тодмо, Удмуртиысь тросэз кибашлы суредасьёс дырзэс но кужымзэс жалятэк ужазы та тема бордын, туж усто произведениос кылдытъязы. Татысь адӟемды луоз П.Кривоноговлэсь "Никонор Федорович Сидоров �тямыс бырем пиослэн атайзы" суредзэ. Улонысь зэмос учыр со, Можга ёросысь Пичи Сюга гуртын вылэм, али отын вань Сидоров агай-вынъёс нимо бусы. Батыр пиос сярысь фильм но пуктэмын. Ачиз Кривоногов быдэс войнаез пырпотӥз но вань суредъёссэ адӟись сямен гожъяз. Соин ик ужъёсыз туж тунсыкоесь. Нош тросэз-а меда тодо, Россиысь та тодмо суредась Кияса ёросысь гуртын вордӥськемын шуыса. П.Семеновлэн "Похоронка" ужез семьялэсь мур куректэмзэ возьматэ. Г.Репин кышномуртъёслэсь но быдэ вуымтэослэсь фронт мышкын улэмзэс суреда "Совинформбюролэн сводкаез" но "Ижысь пыӵал тӥрлык поттӥсьёс" ужъёсаз. Ветеранъёслэн ымныръёссы учко асьме шоры П.Ёлкинлэн но А.Холмогоровлэн суредъёссы вылысь. Туж аспӧртэмлыко нылпиослэн суредъёссы, соослэн ож тылӝу шоры учкемзы, малы ке шуоно, со вакытэз соос ӧз ни адӟе, мадемъёсысь но книгаосысь, телевизорысь гинэ тодо. Вуоноез адӟытон сӥземын луоз Изобразительеной искусствоосъя музейлэн 20 ар тырмонэзлы. Со усьтӥськоз сӥзьыл. Татысь адӟемды луоз музейлэсь тужгес дунооссэ но данооссэ арбериоссэ: сюлэсь трос пӧртэм чильпаськемез, кык венчальной дэремез (1912- тӥ ар), маскарад костюмез (1892), фарфор но азвесь тусьты-пуньыез, вашкала бирюльки нимо шудонэз, зарниен но азвесен чеберъяса лэсьтэм ож тӥрлыкез. Татын ик луозы асьме художникъёслэн суредъёссы. Али музейын 7 сюрс ёрос экспонат чаклаське-возиське. Интызы туж пичи луэмен, арбериос мурӝолын кыллё, сисьмо но сыномо. Соосты выльдыны нимысьтыз дышетскем ӧнерчиос уждунзы пичиен кошко. (Татын со шорлыдын 350 манет усе. Зэм но, культура удыс асьмелэн тужгес но куанерез.) Музейын ужасьёслэн вӧсьсы-сюлмаськонзы: усточиослэсь киужъёссэ, быгатонлыксэс, малпаськон дуннезэс калыклы усьтон. Одӥгзэ "потон пасез" шедьтӥзы � арбериосты телевидение пыр возьматыны, передача озьы ик нимаське: "Мурӝолысь". Котьма ке но, сомында узырлыкез калыклэсь ватыса возьыны � сьӧлык. Нош кин вылэ со усе? Ку быдэсмоз музейын ужасьёслэн вӧл-вӧл юрт сярысь кемалась малпанзы? Пыӵал-тӥрлык утись музейёсмы ӟеч ужало но улыны уксё потто ук... Бен, сыӵе ини асьмелэн улонмы � технократия кузёяське: машина, мотоцикл, ож тӥрлык... Нош культура палэнэ кыле. Одӥг радын соос луысалзы ке. С.ПЕТРОВА. Улон интыос луозы Берло дыре Удмурт Республикаын лэсьтӥськон ужъёс умойгес мыныны ӧдъязы. Туэ нырысетӥ кварталэ та удыслы коньдон висъян, ортчем арын сярысь, 2,6 поллы будӥз, лэсьтӥськон ужъёс 1,5 поллы йылӥзы. Паськыта улон юртъёсты ӝутон но. "Улон инты" программаез быдэстон чакламлэсь ӝоггес мынэ. Бюджет туэ 20 миллион манет висъяны кулэ ке, нырысетӥ кварталэ уже кутэмын ни 6 миллионэз. Эшшо куать миллион манет сётэмын запасэ кошкем военнослужащийёслы улон сертификатъёс басьтыны. Ужало чакламзыя Шоркарамы азьланьтӥське выль даур понна бадӟым лэсьтӥськон - циркез ӝутон. Али уж мынэ дренажез дасянъя, бызись вуосты лэзён коллекторъёсты лэсьтонъя. Озьы ик дасяське Красноармейской ульчаысь 82-тӥ юрт доры шуныт лэзён. Гидроспецстрой цирклэсь борддоръёссэ ӝутонъя монтаж лэсьтэ. Ужъёс мыно чаклам графикъя. Лэсьтӥськон материал дыраз вуэ, уждун тыро толэзьлы быдэ. Татын али ужа 607-тӥ управление. Трос юрттэт сёто 43003 воинской частьысь военнослужащийёс. Н.ЕГОРОВ. ПОЛИТИКА Узыр улосъёс � кужмо Россия Россия нокызьы но шонер сюрес уг шедьты, ялан солань-талань шонаське. Меӵак вераны возьдаське, со пунэмаськыса но музъем пуш узырлыкъёссэ вузаса улэ шуыса. Уката но берло толэзьёсы, куке дуннеын электрокужымлы но эстӥськонлы дунъёс малпамтэ шорысь кык поллы будӥзы, юри ӝутэмын вал национальной валюталэн дуныз но. Бюджетэ коньдон 1,5 поллы тросгес люкаськиз ке но, калыклэн улонэз ӧз умоя. Со дыр ӵоже ик мукет странаос экономиказэс юнматыны быгатӥзы. Алигес Дуннеысь валютая фонд ивортӥз: берло 12 ар ӵоже туэ нырысьсэ дуннелэн экономикаез азинскыны кутскиз. Но Россилэсь сыӵе азинскемзэ матысь дыре возьманы уз на луы. Россиез сюдо улосъёс. Отысь тросэз му вӧй, газ кыскон интыос быръемын-вузамын ни. Му вӧез вузаса гинэ Россилэн казнаяз кык триллион доллар пала уксё люкаське. Нош улосъёсысь калык ялан курадӟыса улэ. Кин кузё та бадӟым юртын? Малы улосъёслэн узырлыкенызы кузёясько капчиен узырмыны вырисьёс? Малы вунэто адямиосты, пӧртэм нациен калыкъёсты, кудъёсызтэк ӧй кылдысал Россилэн федерациез. Меӵак верано ке, ичи лыдъем калыкъёс одӥг кунын ӵош улыны мылкыд каризы, умой кусыпъёслы, ог-огедлы юрттыса улонлы, барышез шори люкылонлы но со дыре ик ас музъемедлы зэмос кузё луонлы оскыса. Зэм, таӵе куронъёс вылын ик кылдытэмын вал Совето Союз, кудӥз бӧрысь Россилэн кичӧлтэмезъя пазьгиськиз республикаослэсь зэмлыко куронъёссэс тӥямез сэрен. Республикаос социалистической шуыса лыдъясько вал бумага вылын гинэ, нош зэмзэ республикаослэн кивалтон ёзъёссы кужымтэмесь вал. Югдурзы пӧртэм ӧвӧл али Россилэн автономиосаз но, азьло сямен ик соослэн ас коже кивалтон луонлыкъёссы сюбегатэмын. Политикаен, экономикаен, улон- вылонэн герӟаськем валтӥсь ужпумъёс али но вашкала сямъя Москваын быдэсъясько. Нош автономиослэн куд-ог кивалтӥсьёссы дӥсьто ке калыкенызы ас сяменызы ужаны, соосты соку ик ало но сепаратистъёс пӧлы пырто. Номыр ӧз воштӥськы. Озьы вал 10 ар талэсь азьло, озьы ик али но. Кремльысь кошкыкуз, Ельцин Путинлы вераз: "... Уть Россиез...". Москва ыштыны кышка экономикалэсь валтӥсь удысъёссэ, узыр улосъёсты, угось соосын сэрен Россиез гажало на дуннеын, узыр улосъёслы оскыса малпало на берыктыны Россилы висъям кредитъёссэс. Автономиослэсь узырлыксэс лыдэ басьтыса гинэ Запад асьмелы висъялляз но азьланяз но висъяны малпа на кредитъёс. Туннэ Россия куд-ог республикаос вылэ, кудъёсызлэн конституцизы но законъёссы уг тупало федеральнойёсызлы, чурытэсь куронъёс пуктэ ини. Нош тодэ ваёно ке, республикаослы сыӵе эрико луыны сюрес усьтӥз вал ачиз Москва, Ельцин. Тани кызьы со шуылӥз: "Эрик басьтэ сомында, кӧня кулэ..." Басьтӥзы. Россилэн 1993-тӥ арын кутэм Конституцияз но автономиослэн правооссы кулэстэмын ӧвӧл. Чечняын выллем югдур нокытын но медаз ни кылды шуыса, ми ӵектӥськом ичи лыдъем калыкъёслэсь бадӟым кенешсэс люканы. Уката ик та вакытэ, куке Кремль кӧлыса уг улы. Солэн кичӧлтэмезъя, али кылдытэмын ни нимысьтыз институт, кытын дасямын кунэз радъянъя выль амалъёс. Та уж нош ик нуиське, выжы калыкъёслэсь мылкыдзэс лыдэ басьтытэк. Куд-ог улосъёсты туртто Россилэн огшоры областьёсызлы пӧрмытыны. Солы нырысетӥ вамышъёс лэсьтэмын ни: Россия 7 федеральной округлы люкемын. Федерацияя Кенеш но табере мукет сямен кылдытэмын луоз. Нош отчы адямиосыз калык бырйылӥз ук. Ма, табере власть ас калыкезлы оскемысь шат дугдӥз? Кунэз выль сямен радъянъя, туэ сӥзьыл чакламын референдум ортчытыны, нош бӧрысь соя � Россилэсь Конституцизэ выльдыны. Кремльын пукисьёс туж дырто, лэся, США сямен выль гражданской общество кылдытыны. Но США-ез озьы кылдытӥзы палэнысь лыктэм калыкъёс. Мурт музъем вылын соос ваньзы огкадесь вал. Асьмелэн югдурмы мукетгес. Кунлэсь улонзэ чутрак мукет сямен воштонлы калык дась ӧвӧл на. Россилэн выль президентэз но солы дась ӧвӧл на. Мур малпаськоно Россия но Беларусь куспын огъя союз кылдытон пумысен но. Сыӵе огкылэз Кун Дума юнматӥз. Но кызьы со союзэ пырыны кулэ туала автономиос? Кыӵе интыез отын луоз Беларусьлэн? Та но мукет ужпумъёсты эскерон вылысь, одно ик люкано Россиысь ичи лыдъем калыкъёслэсь ассамблеязэс. Выль Россиез улӟытон понна улон косэ ни асьмеды мыло-кыдогес луыны. Валамон ук: калыкъёс пыд йылазы йыг-йыг султӥзы ке, странамы но ӝутскоз. Владимир ТАШТАМЫШЕВ, дуннеысь ичи лыдъем но выжы калыкъёслэн фондзылэн президентэз. БЫДӞЫМ ВОРМОНЛЫ 55 АР 25 ар талэсь азьло 1975-тӥ ар. Быдӟым Вормон нуналлы 30 ар тырмиз. УАССР-ысь военной комиссар полковник Ю.А.Савченко Ижевск горсоветлэн исполкомезлэн заседаниос ортчытъян залаз городысьтымы дано адямиослы медальёс сётъя. Шоркармылэн знамяосыз дорын геройёсмылэсь но кӧня ке кивалтӥсьёсмылэсь тусбуйзэс синпельлы пукто. Тани соослэн нимъёссы. Нырысетӥ радын (паллян паласен буре) - КПСС-лэн Ижевск горкомезлэн ужъёсты радъясь ёзэзлэн кивалтӥсез Валентин Сергеевич Логинов; куинь Слава орденэн пусъемъёс Петр Ильич Бельский но Тарас Федорович Емельянов (ньылетӥез); Советской Союзлэн Геройёсыз Никифор Савельевич Павлов (куинетӥез) но Сергей Семенович Фионин (витетӥез). Кыкетӥ радын: УАССР-ысь военной комиссар полковник Юрий Александрович Савченко, Советской Союзлэн Героез Александр Андреевич Девятьяров. Со трос аръёс ӵоже Элькунысьтымы ДОСААФ-лэн комитетэныз кивалтӥз, Ижевск горсоветлэн исполкомезлэн предсадателез Борис Владимирович Шишкин, Советской Союзлэн Героез, егитъёслэн "Зоринча" но "Ӧрӟипи" военно-спортивной шудонъёсынызы кивалтӥсь Георгий Сергеевич Тамиловский, Горисполкомлэн тӧроезлэн воштӥсез Маргарита Семеновна Торопцева. Ветеран В.С.Логинов со нуналъёсты уг вунэты. Снимокез семьязылэн архиваз ӝикыт утьыса возе Советской Союзлэн Героезлэн Н.С.Павловлэн кузпалыз, ужысь ветеран Зоя Федоровна. Тани кӧня сӥё-дано геройёс, Зарни Кизили нуллӥсьёс, озьы ик соослы ӵошась Слава орденэн пусъемъёс вал Ижевскын кызь вить ар талэсь азьло. Ӧвӧл ни соос пӧламы. Али шоркарамы асьмеос тодӥськом на одӥгзэ гинэ сӥё-дано аспалмес Советской Союзлэсь Геройзэ, нылкышно-лётчикез Нина Захаровна Ульяненкоез. Со азьвыл улӥз но ужаз вал Воткинскын. Л.ФЕДОРОВ. Бигер уром, валче гыром Удмурт кылын "эш" шуэмез веран понна трос гинэ кылъёс кутӥсько: эш, юлтош, уром, дус, эптэш, юртош но туган. Соос пӧлысь тужгес но ӵем кутӥське эш кыл. Октябрь революция бере партиын лыдъяськисьёсыз ниманы ӵемгес юлтош кыл кутӥське вал. Соку газетъёс Ленин юлтош, Троцкий юлтош шуыса гожъязы. Али юлтош кылэз нуналмысь потӥсь изданиосысь ум ик адӟылӥське ни. Юлтош пыремын булгар (чуваш) кылысь, эш - бигер кылысь. Башкортостанысь удмуртъёс пӧлын пумиськылэ на эптэш кыл. Таиз но бигерысь. Татарстанын вылэм на дус кылзы. Та кыл шедемын Б. Гавриловлэн калык пӧлысь гожъям кырӟанъёсаз. Таиз но кыл бигерысь. Б. Мункачи аслаз кылсузьетаз пыртэм на юртош кылэз. Сое со шедьтэм алабго но кузон диалектъёсысь. Но со гожтэ, та кыл, пе, кутӥське кыӵе ке сьӧд ужен вырись адямиосыз ниман понна, соос ог-огенызы юн кусып возё ке. Удмуртъёс пӧлын озьы ик кутӥське на уром кыл. Та кыллэн кудпалан но кинэ ниманы кутӥськемез сярысь ми трос ум тодӥське. Выжыкылъёсысь персонажъёс уно дыръя ог-огзэс уром шуо: Кион уром, Гондыр уром но мукет. Ӵемгес уром шуыса нимало бигер пӧлысь эшъёсыз. Соин таӵе веран но кылдэмын: "Бигер уром, валче гыром". Мукет сямен вераса, та веран бигерез ӧте валче эшъяськыса, тупаса улыны, дунне кутыны. Вазен удмуртъёс бигеръёсын, нош бигеръёс удмуртъёсын куспазы семьяосын эшъясько вылэм. Одӥгъёсыз эшъёссэс бигер уром шуиллям, мукетъёсыз - удмурт уром. Удмуртъёс пичи пиоссэс толэзьлы ке но бигер семьяе нуозы вылэм, собере бигеръёс - удмурт семьяе. Нош мӧйыос дырын-дырын ог-огзы доры куное, шулдыръяськонъёсазы ветлӥллям. Сыӵе кусыпъёслы луыса та кык калык ог-огезлэсь марлы ке но дышем, огезлэсь огез мае ке но асэстэм. Таӵе кусып возён туж юрттэ вылэм кыдёкысь сюрес вылэ потыны. Удмуртъёс бигер гуртъёс пыр капчиен Арча, Кузон каръёсы но Макарья ярмаркае ветлӥллям, нош бигеръёс удмурт но сьӧрлось гуртъёсы турлы пумо векчи вузъёс вуттылӥллям: буёлъёс, лентаос, горд сюй шуланъёс, зундэсъёс, сынъёс но мукетсэ. Та сярысь трос удмурт кырӟанъёс верало. Арлыдо адямиослэн верамзыя, бигеръёсын уромъяськон сям вӧлмемын лымшор удмуртъёс пӧлын, тужгес но Алнаш, Пичи Пурга, Кизнер, Грах, Можга, Вавож ёросъёсын. Башкортостанысь бигеръёс но артысь удмуртъёсын уромъяськыса улӥллям. Кылсярысь, туала Янаул районысь Ватка гуртысь удмуртъёс бускель Гутбур бигер гуртысь куд-ог семьяосын ӟеч кусыпъёс тупатӥллям. Бигеръёслэсь адӟем карыса, артысь Вуж Уртаул гуртысь башкиръёс но удмуртъёсын уромъяськыны кутскиллям. Вашкала песятайёсмылэн таӵе амало эшъяськонзы Совето власть дыръя бырыны ӧдъяз, тужгес но колхозъёс кылдэм бере: соку крестьянъёс валтэк кылизы, асьсэ мылкыдзыя кыдёкысь сюрес вылэ потаны ӧз ни быгатэ. Эшшо берытском та кылъёс борды. Удмурт кылын уром кылэз куто бигер эшъёссэс ниман поннагес, нош эш но юлтош шуо, ас выжыоссылы вазиськыса. Перм кылъёслэсь историзэс эскерисьёс малпало, уром кыл иран выжыысь калыкъёслэн кылысьтызы вуэмын шуыса. Кызьы тодмо, гуннъёс вуытозь, лымшор удмуртъёс улӥллям туала Татарстанлэн лымшор палаз но. Нош Башкортостанлэн улосвылаз соослэн музъемзы вӧлмемын вылэм Уфалэсь трослы лымшор палангес. Вань на уръяськыны кыл. Со уром кылэн одӥг выжыысь луэ. Уромъяськыны- эшъяськыны кыллэн синонимез. Таджик кыл одӥгез иран кыл луэ. Таджикъёслэн вераськемазы вань ором, ороми кыл, вылтусызъя со туж тупа уром кыллы. Соос та кылэз куто "тупаса улон" пуштросэн. Озьы бере, ог-огзылы уромъёс луэм удмуртъёслэн но бигеръёслэн улонзы лачмытгес, каньылгес вылэм шуыса малпаны луэ. Р. Насибуллин, кылтодон наукаосъя доктор. Банкын осконэз юнматоно Кредит организациосъя агентстволэн кун корпорациез но экономикаез азинтонъя "Евразия" банк куспын гожтэмын ужаса улӥсьёслэсь коньдонзэс (вкладъёссэс) утён пумысен тупанкыл. Банкъёсъя дасям нимысьтыз программаын нырысь интыын сылэ таӵе ужпум: выльысь берыктоно но юнматоно нимаз адямиослэсь Удмуртиысь но быдэс Россиысь банкъёслы осконзэс. Тупанкыл гожтэм бере, Москваысь кредит организациосъя кун корпорацилэн валтӥсь директорез А.В.Турбанов, солэн воштӥсез В.А.Мирошников но калыкен кусыпъёсъя департаментлэн директорез А.Л.Вознесенский журналистъёслэн юанъёссылы валэктонъёс сётӥзы. Собере соос пумиськизы шаерысьтымы промышленной предприятиослэн кивалтӥсьёсынызы. Вераськон мынӥз банкъёслэсь ужан амалъёссэс выльдон сярысь. Москваысь куноос озьы ик вуылӥзы Ижысь механикая заводэ, "Ижмашлэн" музеяз, тодматскизы Ижысь но Сарапулысь тодмо интыосын. Е.НИКОЛАЕВА. КУН КЕНЕШЛЭН СЕССИЯЗ Президентэз быръём октябре Валлян Кун Кенешлэн сессиез ортчиз. Сое ваньмыз тужгес но сюлэмшугъяськыса витизы. Но депутатъёс юнматыны кулэ вал президент быръён нуналэз. Газетъёслэн гожъямзыя но тодӥсь муртъёслэн верамзыя, быръён сентябрь-октябрь толэзьёсы луыны кулэ. Озьы ик луиз. Ужпумъя вераськиз Кунэз радъянъя, калыкъёс куспын политикая но интыысь аскивалтонъя ялан ужась комиссилэн тӧроез Жанна Дворцова. Со депутатъёсты тодматӥз Кун Кенешлэн президиумезлэн ӵектонэныз. Со президентэз бырйыны дэмлаз 15-тӥ октябре. Бур кужымъёс политика юанъёсъя Кун Кенешлэн Тӧроезлы туж ик дур уг басьто. Соослэн мылкыдзы но вал президент быръёнэз декабрь толэзе ортчытыны. Но сессиын бур кужымъёс небытгес кариськизы. Сергей Беркутов депутатлэн ивортэмезъя, "Единство" партилэн шаерысьтымы ёзэзлэн Политсоветэз умоен лыдъяз быръёнэз 15-тӥ октябрь но 3-тӥ декабрь вискын ортчытыны. "Аграрийёслэн но горожанъёслэн" фракцизы ӵектӥз 3-тӥ декабрез юнматыны. Но кивалтӥсез Евгений Одиянков фракцилэсь мылкыдзэ юн ӧз утьы. Соку ик вераз "Единство" партилэн но СПС-лэн огазеям Консультативной Совещанизылэсь малпанзэ: быръёнэз редъяно 15-тӥ октябрь но 3-тӥ декабрь вискын. Озьы декабрь толэзь каллен "сылмиз". Зэм, гуртысь депутатъёс куаразэс поттылӥзы ик вал, 15-тӥ октябрь гурт калык понна уггес тупа шуыса. Быръёнъя кампания ӵапак вадьсаське ӟырдыт гурт ужъёсын. Но Кун Кенешлэн Тӧроез Александр Волков но гурт хозяйствоя но сиён-юонъя министр Петр Першин депутатъёсты оскытӥзы, со нуналлы гурт ужъёс быдэстэмын луозы ни шуыса. Куараосты шара сётыса тодмо луиз: 15-тӥ октябрь понна дурбасьтӥз 64 депутат, пумит � 12-ез, 5 мурт мылкыдзэ ӧз вера. Удмурт Республикамылэн 80 ар тырмон нуналаз аслаз президентэз луоз ни. Республикамылэн сӥё-дано нуналэз туж пусйымон ортчоз, дыр. Октябрьлэн шораз президентэз бырйимы ке, инаугурация 4-тӥ ноябре луоз. Татчы ӧтёзы мукет улосъёсысь кивалтӥсьёсты. Оло, Россилэн президентэз но лыктоз. Сессиын данакез ужпумъёс сӥземын вал экономика удыслы. Депутатъёс кутӥзы "Удмурт Республикаез азинтонъя бюджет сярысь" но Удмурт Республикаын аракыез розницаын вузаны лицензия сётэм понна дун басьтон сярысь" Законъёсты. Берпуметӥезъя аракы вузасьёс республикалэн бюджетаз куинь ар ӵоже 1085 манет тыроно луозы. Инъет чотын кутэмын Музъем сярысь программа но. Та пумысен ӝыны ар пала ни пӧртэм вераськонъёс но керетонъёс кыстӥсько. Депутатъёслэн но пӧртэм мылкыдъёссы вал. Таӵе программа кутэмын но ужа ни Татарстанын но Саратов улосын. Соослэн ужан опытсы вылэ пыкъяськыса вераськиз ке но музъемъя но музъем кутонэз радъянъя министр Вячеслав Куншин, депутатъёслэсь зэмлыкэз ватэмез ӧз луы. Татарстанын но, Саратовын но программа экономика ласянь пайда ӧз вайы. Но кызьы оскытыны турттӥз Александр Волков, музъем сярысь программаез кутытэк, Россилэн бюджетысьтыз та удысъя республикалы одӥг манет но уз висъяськы ни. Павел Вершинин шуиз, программалэсь таӵе вариантсэ кутыны уг яра, пе. Сое тупатъяно. Но выльысь эскероно на сӥзьыл. Нырысетӥ лыдӟонын 64 депутат программалы дурбасьтӥз. Выльысь та ужпумез депутатъёс эскерозы на гужем каникулъёссы бере. Озьыен, нырысетӥ вамыш республикаын музъемез вузанъя лэсьтэмын. Кун Кенешлэн сессиез выльысь эскериз ю тысь дасян но йӧл басьтон ужпумъёсты. Кызьы депутатъёслы ивортӥз Удмурт Республикаысь Правительстволэн Тӧроезлэн воштӥсез Михаил Назаров, чабей пызь одӥг толэзьлы люкамын, ӟег пызь � октябрь толэзёзь. Переработчикъёс гуртоослэсь одӥг тонна йӧлзэс 2500 манетэн басьтыны кутскизы. Нош йӧллэн асдуныз � 2700 манет. Правительство, ужрадъёс кутыса, йӧл басьтон дунэз 3 сюрсозь будэтыны быгатӥз. Депутатъёс мукет ужпумъёсты эскеризы на. Таин Кун Кенешлэн 11-тӥ сессиез ужзэ йылпумъяз. А.АНДРИЯНОВ. Дӧдьыдэ дася гужем... Правительстволэн Тӧроезлэн нырысетӥ воштӥсез Юрий Питкевич та нуналъёсы ортчытӥз Президиумлэсь кенешсэ. Отын пыр-поч эскеремын калык хозяйстволы 2000-тӥ�2001-тӥ аръёсы сӥзьыл-тулыс пайдаё ужаны луонлыкъёс кылдытонъя ужрадъёс. Соин валче ужпум пуктэмын, котельнойёсты кык толэзь ӵоже вис карытэк ужатон понна, 1-тӥ октябрёзь тырмыт дасяны чурыт но кизер эстӥськон. Со понна "Удмуртлестоппром" кун предприятилы дасяны чакламын 70 сюрс тонна эгыр, азьпаллы дасямез со 1-тӥ январьлы 40 сюрс тонна пала кыльыны кулэ. Нош акциосын "Удмуртэнерго" огазеяськон косэмын ТЭЦ-лы 150 сюрс тонна эгыр но 40 сюрс тонна кизер эстӥськон дасяны. "Удмуртрегионгаз" радъялоз ТЭЦ-лы дыраз газ сётонэз. Ваньзэ та чаклам ужез кулэезъя радъян понна, нимысьтыз комиссия кылдытэмын. Соин кивалтоз лэсьтӥськонъя, архитектурая но улон инты политикая министр Валерий загайнов. Президиумлэн кенешаз эскеремын мукет ужпумъёс но. Удмурт Республикаысь Правительстволэн пресс-службаез. "Ой, нылы лыктэм..." Можга ёрос писательёсыныз данъяське. Нош тужгес но � "Пычасский" совхоз. Солэн директорез Сергей Георгиевич Чаузов сюлмаськемен, татысь кык гуртъёсын � Акаршурын но Выль Бияын � пуктэмын памятникъёс: Михаил Коноваловлы но Трофим Архиповлы. Табере та палась адямиос тодо: котькуд ар, инвожо толэзь вуыса, соос чебер удмурт дэремъёссэс дӥсялозы но Ижысь вуэм кунооссэс сылалэн-нянен пумиталозы, собере дэмен памятник доры вамыштозы. Туэ но озьы ик вал. Акаршуре писательёс лыкто шуыса тодэмез бере, укмыстонлэсь ортчем Федосъя песянай но памятник доры конгыляса бодыен вуиз. � Ой, нылы лыктэм, � шумпотэмзэ ватытэк сипыртӥз, куке но ӵош шудэм эшезлэсь Миша Коноваловлэсь Жанна нылзэ калык пӧлысь тодмаса... Жанна Михайловна Баранова вань улонзэ сӥзиз дышетон удыслы. Ленинградысь Герцен нимо пединститутын дышетскыса ужаз Глазовын. Татысь педучилищеез пытсамзы бере � школаын, роноысь методкабинетын. Собере � Можгаысь методкабинетын, школа- интернатын. Пенсие потытозяз, 26 ар тыршиз Можга педучилищеын, педагогика но психология предметъёсыз нуиз, педпрактикаен кивалтӥз. Барановъёс Можгала выжыяськизы. Жанна Михайловналэн пиез Сергей Петрович Баранов пияла поттӥсь "Свет" огазеяськонлэн директорезлэн лэсьтӥськонъя воштӥсез (заместителез) луэ, солы Удмурт Республикаысь дано лэсьтӥськись ним сётэмын. Нылыз Ирина Петровна Федорова та заводын ик ужа. Та сузэр-агайёслэн будо пиоссы. Алексей Глазовысь пединститутын дышетске. Игорь 8-тӥ классэз йылпумъяз, нош Антон туэ кыкетӥ классэ мыноз. Ириналэн пиосыз, Дима но Саша, 11-тӥ но 6-тӥ классэз быдтӥзы. Вить пиос, вить пинал пушъетъёс Михаил Коноваловлэн выжыяз. Одӥгез малпа историк луыны, мукетъёсыз � лэсьтӥськись, спортсмен... � Внукъёсты уг данъясько-а, соослэн песятайзы (ой, кыӵе шуг М.Коноваловез сыӵеен син азе пуктыны! - Т.П.) дано писатель, классик шуыса? � юай Жанна Михайловналэсь. � Ӧвӧл, таӵе мылкыд соослы ӧз пыӵа. Укыр вазь но укыр кемалась уретэмын вал атаелэн улонэз. Собере ачим но данъяськон мылкыдме пичиысен ас пушкам ӝокатоно луи, нимзэ поттылыны лэземын ӧй вал уга... Выжыысьтыз ке ӧз, мукет пушъетъёс азинтозы М.Коноваловлэсь сюрессэ. Солэн гуртысь памятникез доры сюрес табере уг пашмы. Та синпелетэз, озьы ик Т.Архиповлэсьсэ но, чакласа возё ёрос библиотекаын ужасьёс, кивалтӥсьсы Нина Павловна Загуменнова. Памятник котыре сяськаос мертто но утялто кузпалъёс Черепановъёс, Черняевъёс. Нош Бадӟым Сибы гуртын улӥсьёс, соосын ӵош � "Марӟан" калык ансамбль, кудӥз шулдыртӥз-кырӟаз туэ аксакшур но бия калык азьын, жаляло: малы милям гуртамы ӧвӧл сыӵе памятник, шуом, Вера Васильевна Толстаялы, Игнатий Гавриловлы, Михаил Покчи- Петровлы?.. Т.ПЕТРОВА. Михаил Коноваловлы Акаршурысь памятник дорын писательёс но мукетъёсыз. Можга педучилищеысь дышетӥсь Т.С.Иванова, Федосья песянай но М.Коноваловлэн нылыз Ж.М.Баранова. ВОРМОНЛЫ - 55 АР "Одно ик выль ивор кулэ..." (Тушмон мышкысь з кылды берытскыны) Яр ёросысь Володино гуртын вордӥськем но будэм Трефилов Василийлэн Сталинград дорын геройлыко подвигез Ленин орденэн пусъемын. Ортчем аре мыным выльысь архивын ужаны но 124-тӥ стрелковой бригадалэн ожмаськемез сярысь документъёсын тодматскыны кылдӥз. Архивын утиськись документъёс вылэ чӧлскыса ик гожтӥсько асьме палась солдатмы- разведчикмы сярысь веранме. *** Батальонъёс Волга дуре пеймытэн потылӥзы, омырын самолётъёслэн гуретылэмзылы но бомбаослэн но снарядъёслэн пуштылэмъёссылы ӧжытлы ке но вис луиз вал. Солдатъёс но, командиръёс но шӧдӥзы - дыртоно, Волга сьӧрын шурдыт югдур кылдэмын. Нырысетӥяз пароме Ткаленко старшой лейтенантлэн батальонэз пуксиз. Отчы ик интыяны тырше на вал развечикъёслэн командирзы Таренков лейтенант взводзэ но. Нош батальонлэн командирез артиллеристъёсыз пуктыны косэ на вал. Кык лейтенантъёслэн куспазы пыриськоно луиз переправаен кивалтӥсь. - Разведчикъёс, тодӥськод ук комбат, котьку азьпалан луыны кулэ. - Тодӥсько, - калленгес вераз комбат. - Тодӥськод ке, малы пумитъяськиськод? - кеськыса ик косӥз переправаен кивалтӥсь капитан. Александров лейтенантлэн взводэзлы паром вылын кызьы но озьы инты сюриз ик. Разведчикъёслы паромзы туж каллен но мынэ кадь, мотор гуретэм но ву вылтӥ кыдёке кылӥське: "Чалякгес потоно шур сьӧры. Чалякгес!" Алигес гинэ кутскем уйлэн чалмытэз кема ик ӧз кыстӥськы. Немец артиллерия улӟиз, снарядъёс паром котырын ик пуштыло. Та уе ваньмыз ик паромъёс татчы эшелонъёсын туж ӝог вуттэм 124-тӥ стрелковой бригадалы висъямын вал. Озьы 28-тӥ августэ выжон уе батальонъёс вуизы Сталинградлэн уй пал люкетаз но трактор заводэз но со вӧзысь посёлокъёсыз утён понна оже пыриськизы. Александров лейтенант разведчикъёсыныз, куашкатэм юртъеръёс вискытӥ но бадӟымесь сьӧд гуосыз-воронкаосыз котыръяса, мырдэм потӥзы кирпич люк сьӧры окопаськылэм- ватскылэм боецъёс доры. Трактор заводысь ужасьёс куинь нунал возисько ини, доразы вуэм воштӥсьёссылы шумпотӥзы соос. Разведчикъёсыз пумитаса, мылкыдзэс шара вератэк ӧз чидалэ. - Табере фашистъёс татчы уз потэ. Александров тае кылӥз ке но, солдатъёссэ весь дыртытэ. - Сержант Осипов, Трефилов но Цыплаков, пумиталэ батальонэз. Комбатлы возьматэ татчы потон сюрес. Боецъёсыныз ротазылэн командирезлы ивортон ыстыса, лейтенант кылемъёсыныз разведчикъёсыныз чакласькон инты дасяны кутскиз. Но ӝытозь ӧз кылды соослы та интыын возиськыны, Таренков разведчикъёсыз дораз ӧтиз. Бригадалы азьлань мыныны косэмын вал. - Александровлэн взводэз нош ик нырысетӥ батальонэн мыноз! - разведчикъёслэсь ужпумзэс валэктӥз роталэн командирез. - Дырмы ӧжыт. Туннэ одно ик одӥгзэ ке но немецез пленэ басьтоно. Асьмелы али "кыл" туж кулэ луоз, тодоно кыӵе часть пумитамы сылэ. Лейтенантлы ваньзэ рос-прос валэктыны но кулэ ӧй вал, дыр, солэн азяз сылӥсьёс пӧлын тросэз куинетӥ арзэ армиын. Командирлэсь косэмзэ быдэстон сярысь туж умой тодо. Озьы ке но, со ватсаса вераз на: - Тӥ бригадамылэн подразделениоссылэн азьпалазы луоды, тӥлесьтыд адӟем карозы мукетъёсыз. Разведчикъёслэн ӟырдыт нуналъёссы кутскизы. Бригадалэн командирез Горохов полковник тодыны косӥз азьысьтызы тушмонлэн кужымез сярысь ваньзэ но чакланы нуналлы быдэ воштӥськонъёсты. Соин ик разведчикъёслы тушмонлэн мышказ но потылоно луиз. Арлыдо лейтенант Александров ас понназ вала взводысьтыз куинь солдатлэсь огазьынгес возиськемзэс, нырысь нуналъёсысен ик эшласькемзэс. Солы валэктыны кулэ ӧй вал, кыӵе дуно ожын солдатъёс куспын эшласькон, нимысьтыз ик озьы вераны кулэ разведчикъёс сярысь. Трефиловез нырысетӥзэ разведкае ыстыкуз, лейтенант ньӧмыз понна гинэ юаз, кинэ со бӧрсяз басьтысалыз, тушмон мышкы ке мыноно луиз. Лейтенант ӧз янгыша, Трефилов нимаз Цыплаковез но Усачевез. Нырысетӥез лейтенантлы умой валамон вал - соос огъёзъёс, куинетӥ арзэ ини огазьын, одӥг подразделениын. Нош Усачев соослэсь егитгес ке но, Цыплаковлы бӧляк луэ, кыкназы ик соос Казахстанысь огысьтыз ӟуч гуртысь. Разведчикъёс уй но нунал чакласькизы, уин немецъёслы матэгес но кариськылыны тыршизы. Нырысетӥзэ пото ук тушмон мышкы, соин ик ваньзэ, чыры-пырызэ но, эскероно, дасяно. Но самой кулэез - немецъёслэн мышказы потон инты бырйоно. Трефиловлы сапёръёсын но кенешоно луиз. Сержант сапёр ик потон инты ӵектӥз. Сапёръёс угось уйлы быдэ немецъёслэн окопъёссы доры ик вуылыса минаос пуктыло. Сержант ик келяз соосыз асьме мина пуктылэм бусымы вамен но немецъёслэсь минаоссэс но октӥз. Нырысетӥзэ тушмон мышкы потам разведчикъёслы удалтӥз. Куинь суткалэсь кемагес ортчытӥзы соос немецъёслэн ки улазы кылем интыосын. Берытскыкузы соосыз лейтенантэн ӵош сапёр но пумитаз. - Кыкетӥ уймес ортчытӥськомы ини та гуын, - шуиз сапёр. - Ӟечкыласько берытскеменыды. Нош азьланяз малпаськоно но луомы, дыр, потэм интыетӥды ик котьку берытскылыны уг яра. Огпол, шуом, удалтӥз, нош мукет радаз... валаськоды. Немецъёслэн сапёръёссы татчы вуылӥзы ини. Соос мае ке шӧдӥзы кадь потӥз мыным. Нош лейтенант разведчикъёссэ дыртытэ ини. - Я, чалякгес, чалякгес, штабамы тӥледыз возьмало. Полковникмы но юалляськиз ини. Разведчикъёслэн вуттэм иворзы кык нунал ортчыса ик зэмаз. 15-тӥ октябре немецъёс бадӟым кужымен выльысь наступление выжизы. Трактор заводэз басьтыса, фашистъёс Волга дуре потыны быгатӥзы. Озьы соос Рынок но Спартановка посёлокъёсын возиськись асьме частъёсмес люкизы городын ожмаськисьёсызлэсь. Кык посёлокъёсысь частьёсыз огазеяса нимазы Гороховлэн группаез шуыса. Оборона возись частьёс та нуналъёсы туж секыт югдуре сюризы, йӧэн шобырскыны кутскем Волга вамен катеръёс ветлыны шугомизы. Сиён-юон но, боеприпасъёс но самолётъёсысь уин десантной контейнеръёсын вуттылоно луылӥз. Озьы ке но, асьмелэн частьёсмы ӧз чигналэ. Немецъёслэн огез генералзы Гитлерлэн штабаз дыртыса ивортӥз: "Спартановка рабочий посёлокын пытсам ӟуч соединениос быдтэмын. Нош мукетъёсыз немец офицеръёс асьмелэнъёслэсь оборонамес нимазы "Басьтыны быгатонтэм борддор кадь гурезь" шуыса. Бригадае вуиз армилэн командующеезлэн ыстэм офицерез. Со Горохов полковниклы вераз командующейлэсь косэмзэ: разведчикъёсыз тушмонлэн мышказ ыстоно но туж ӝог тодоно фашистъёслэн выль частьёссылэн вуэмзы сярысь тодоно, кытын интыяськемын 16-тӥ бронетанковой дивизизылэн штабез. Туж кулэ ужпумез быдэстыны ыстоно чик ӝегасткытэк. Старшой лейтенант Таренков но Мясоедов политрук блиндажын кыкназы гинэ пуко. "Кинэ ыстоно?" - ас понназ гинэ вераське лейтенант. - Мон тодӥсько, нырысетӥ взводысь куинь эшъёсыз ыстоно, - шуиз Мясоедов. - Соос интыосыз но тодо, тушмон пала потан сюрессы но дасямын. - Зэм, мон тӥледын соглаш. Соосыз дасялом. Нош Цыплаков та нуналэ сӧсыр луыны шедем вылэм, соин ик роталэн командирезлэн блиндажаз кыкназы Трефилов но Усачев гинэ лыктӥзы. - Кинэ ке куинетӥзэ сьӧрады басьтоды на-а? - юаз ик политрук. - Кыкнамы мыномы, - чутрак шуиз Трефилов. Бригадаысь разведкаен кивалтӥсь Рукавцев капитан эскериськысагес учкиз блиндаже пырем боецъёс шоры. - Туж кулэ ужпумез быдэстоно, туж кулэ ужпумез. Командующеймы Чуйков генерал ӝог тодыны косэ. Тани сыӵе вакчи гинэ вераськон вал кык пиосын та нуналэ. Мясоедов разведчикъёслы таяз учыре ӵектӥз граждан дӥсен мыныны. - Капчигес луоз, Орловка гуртысь калык пӧлы нуназеен но потылоды. Озьы ик лэсьтӥзы разведчикъёс. Кык нунал но уй ортчытӥзы соос тушмон мышкын. Тодӥзы: немец дивизилэн штабез Городище селоын, нош полкъёслэн штабъёссы Орловка гуртын, огаз мур нюкын, интыяськемын. Берытскыкузы Трефилов егит эшезлы ӵектӥз. - Выль инты утчано луомы шуыса малпасько. Куинетӥзэ одӥг интыетӥ... малы ке туннэ осконэ ӧвӧл. Озьы, Трефиловлэн ӵектэмезъя, разведчикъёс берытскон интызэс воштоно кариськизы. Та нуналъёсы ик Усачев Орловкаын тодматскыны быгатӥз огеныз егит пияшен но. Котыръёсыз умой тодӥсь мурт со ик юрттӥз выль инты бырйыны но. Разведчикъёс берытскыкузы бӧрсязы ваизы на немец сапёрез но. Берлогес Пауль Минерт асьмелэн окопъёсысьтымы эшъёсызлы вазиськылыса вераськылӥз но. Со ик возьматӥз разведчикъёслы мина пуктылэм интыоссэс но. Разведчикъёслэн ваем иворъёссы зэмазы. Нунал ортчыса, асьмелэн штрумовикъёсмы немецъёслэн штабъёссы вылэ бомбаоссэс куязы. Эшшо кӧня ке нунал ортчиз на. Разведчикъёслы тэк улыны уг кылды. Соос котьку но тыл пушкын азьпалан луыны кулэ. Соослэн ужзы, армиын кызьы верало, сапёръёслэн сямен ик, самой кышкытэз. Тае разведчикъёс умой тодо но, солы дышо но. ...Али гинэ берпуметӥез снаряд пуштӥз. Омыре ӝутскем сюй комокъёс но ӵын музъем вылэ усьылыны ӧз на вуэ, омырын выльысь моторъёс гурето ни, "юнкерсъёс" лобо. - Нош ик лобо! - кеськись луиз разведчикъёс пӧлын. Бомбаос пуштылӥзы ярдурысь переправа дорын, озьы ке но, разведчикъёслы командирзылэн блиндажаз пуштылэмъёсыз чаклатэк ик мыноно луиз. Трефилов тодэ ини, командирзы дораз ке ӧте, дасяськоно луоз выль ужпумез быдэстыны. Старшой лейтенант ӧтемъёсыныз кема ӧз вераськы. Ӝӧк вылаз вӧлдэм картаез вылын валэтӥз кытчы вуылыны кулэ, мае отысь эскероно, тодоно, кытысен чакласьконо. - Нош ик кыкнады мыноды, Усачевен. Жаль, Цыплаков йӧнаса ӧз на вуы. Берлозэ Орловкае вуылыкуды, тӥ отын улӥсьёсын кусып тупатӥды шуиды вал. Нош ик шедьтэ азьло тодмоостэс. Оло, соос нош ик юрттыны быгатозы тӥледлы, - кӧня ке кылын ӵектонъёссэ вераз на Александров лейтенант но. Политрук ӧжытлы ӝегатӥз на разведчикъёсыз. - Пукселэ татчы, азям пуксе. Кылзэ мар верало, - мӧйы мурт азьвыл дышетӥсь, мылысь-кыдысь юрттыны тыршиз та егит пиослы. - Мар но уз луы улонады-вылонады. Я, шуом, ортчемъёсаз разведкаосады тӥледлы удалтылӥз. Со понна мылазяды наградаос но бырттылом, дыр, малпасько. Ӵектон бумагаос армилэн штабаз келямы ини, но асьтэос валаськоды, штабен кусыпмы али умой-умой тупатэмын ӧвӧл на. Я, мар ай мон палэнэгес нуисько кадь тӥледыз. Пырак верало ни. Кызьы валэктоды, я, шуом, Гордищеын яке Орловкаын немецъёсын ке пумиськиды? Малпалэ, малпалэ со сярысь но, оло, котыртэмысь потӥськомы, шуоды, частьмылэсь кылимы, яке заводэнымы чигнаськомы вал но эшелонмылэсь кылимы, озьы-а, мар-а, шуоды ини. Малпаське, малпалське та сярысь но... Политруклэн ӵектонэз-верамез Трефиловез малпанэ уськытӥз: "Нош зэмзэ но сыӵе учыре ке тупазы соос?.." Кык пиос-разведчикъёс, ог ёзо ӧй вал ке но, та война нуналъёсы ог-огзылы дышемын вал ини. Кыкетӥ толэзьзэ соос огазьын. Куспазы ваньмыз ик верамын но вал кадь ини: тодӥзы кытысь луэмзэс, кытын будэмзэс, дышетскемзэс. Кыкназы ик кышнояськыны ӧз на вуэ вал, ӵыжы-выжыоссы гуртъёсын уло, Трефиловлэн удмурт шаерысь Володино нимо гуртын, Усачевлэн Казахстанысь ӟуч гуртын, Викторовкаын, музъем вылын тыршо, ю-нянь будэто, пудо-живот вордо. Тодо - анай-атайёссы, ӵыжы-выжыоссы пиоссылэсь фронтысь иворъёссэс-гожтэтёссэс туж возьмало. Асьме окопъёсмы азе нюжтӥськыса потэмзы бере ик Трефилов, немец ракеталэсь кысэмзэ возьмаса, шӧдтэк шорысь эшезлы матэгес кариськыса юаз. - Миша, гуртад та нуналъёсы гожтэт ыстӥд-а? - Ӧй вуы, берытскеммы бере гожто, - шуиз Усачев. - Мон но озьы малпасько, - куаразэ поттӥз Вася но азьлань нюжтӥськиз. Ноябрь толэзьлэн нырысетӥ нуналъёсаз музъем вылын лымы ӧжыт на ке но, бӧрсязы пытьызы медаз кыльы вылэм. Василий сюлэмшугъяськыны кутскиз. Нырысетӥяз уе ваньмыз ик малпамзыя ортчиз. Кезьыт куазен, шӧдӥське, немецъёс шуныт интыосы ватскылыны кутскиллям, блиндажъёсы но мукет интыосы пыремын. Куд-ог интыосын гинэ часовойёс сыло, кыкен-куинен патрульёс солань-талань ветло. Разведчикъёслы туж чакласьконо луиз, куд-ог интыын кемалыгес но ӝегатскылӥзы, озьы ке но, югытозь Орловка гуртысь тодмооссы доры вуыны быгатӥзы. Тодмооссы, нылашен пияш, немецъёс сярысь вань тодэмзэс-чакламзэс разведчикъёслы рос-прос веразы. Трефилов но Усачев асьсэос но ӵуказеяз кытчы кулэ ветлӥзы. Огшоры ужасьёс сямен дӥсяськемын: вужмем пальтоосын, йыразы картуз, пыдкутчанъёссы но вылэм-адӟем ботинкаос. Разведчикъёс тодо вал ини кытын интыяськемын вылезлэн мотопехотной полклэн штабез, кытчы люкасько выльёсыз танковой подразделениос. Озьыен, немецъёс та нуналъёсы нош ик дасясько бригадазы вылэ омырскыны. Нимысьтыз ик трос выльёсыз танкъёс интыямын вал Сухая Мечетка нимаськись нюкъёсы. Ӝомытан вакытэ кык разведчикъёс асьсэ пала берытсконзы сярысь малпаськыны кутскизы. Усачев кошкиз тодмооссы доры гуртэ, Трефилов кылиз вал ватскем интыяз ик. Кема ик ӧз ортчы со дортӥ матэтӥз ик кык немец солдатъёс кесяськыса но донгаса Усачевез нуо. Эшезлэн киосыз керттылэмын, немецъёс сое ӵыжало, автоматъёсынызы тышкало. Трефилов кушетскиз: "Мар та?.. Мар луиз? Кырмиллям ук! Кызьы Мишалы юрттоно?.." Беразыгес кыльыса но ватскыса, Трефилов бӧрсязы мыныны ӧдъяз. "Пеймытэ гинэ медаз ыше вал". Кисыысьтыз гранатазэ но кутылӥз ини со. "Уз пӧрмы, эшсэ но сӧсырмытоз". Парабеллумзэ поттыса, немец шоры мертаны кутскиз вал но бертӥз йыраз шуккись луиз... Озьы Трефилов но немецъёс кие сюриз. Кыкназэс ик бӧрсе Городищеысь 189-тӥ немецкой дивизилэн штабаз вуттӥзы. Корка пушкын югыт. Ӝӧк сьӧрын офицер пуке, вӧзаз ик формаен солдат - ӟуч кылэ берыктӥсь сылэ. Огез немец бумага листэн пуке, таиз гожъяськыны дасяськемын. Ӧс дорын кыкез солдат автоматъёссэс гадь азязы ӝиптыса сыло. Юанъёс, юанъёс, огзэ бӧрсьы мукетсэ сётэ офицер. Нырысь ик Трефиловез эшсэ тодманы косо. - Тӥ ӵошен, кыкнады ик одӥг частьысь! Трефилов чалмыт сылэ. Табере солы возьмато ини гранатаез но парабеллумез шоры. Нош ик Трефилов чалмыт сылэ. - Кылиське! - кеськиз офицер, пуконысьтыз султыса. Немецъёс кыкназэс ик кужмысь кылиськытӥзы. - Тӥни, учке, - шуиз немец кылысь берыктӥсь. - Кыкназылэн ик ул дӥсьсы ӟуч солдатъёслэн кадь. Разведчикъёс соос. Асьме пала ыстэм советской разведчикъёс. Трефилов тодаз ваиз политруксылэсь ӵектэмъёссэ но солэсь кылзӥсь уз луы шуыса валаз. Солы весь чал-чал улоно. Нош офицерлы одно ик тодоно, кыӵе частьёс сыло соослэн азязы, кытын юнматэмын обороназы, кытын артиллеризы. Ваньзэ туж кулэ тодыны туннэ ик! Но малы ке номыр но уг пӧрмы, пленэ сюремъёс юанъёсызлы пал кыл но уг верало. Жугизы немец солдатъёс Трефиловез, маин сюрем шуккылӥзы йыраз, мугораз, ымныраз. Одӥг кыл но ӧз потты со. Эшез сярысь но кыл но ӧз вера. Номыр но тодыны луонтэмзэ валаса ик офицер косӥз: - Ваньмыз валамон, азямы советской разведчик. Сое ыбоно! Офицерлэсь косэмзэ солдат быдэстӥз, кыре потыса, Усачевлэн син азяз ик Трефиловез ыбиз. Усачевез уйлы сарае пытсазы вал, но со пегӟыны быгатӥз. Пеймытэн ик берытскиз Орловкаысь тодмоосыз доры. Нош мукетаз уе выль эшъёсыз келязы сое асьме пала, фронт вамен выжыны но юрттӥзы. Озьы 1942-тӥ арын 3-тӥ ноябре куатьтон тямыс нунал ӵоже Сталинградлэн уй палаз ож тыл пушкын ортчытэм кызь куинь аресъем егит удмурт пимылэн-разведчиклэн улонэз кысӥз. Йылпумъяса эшшо кӧня ке кыл вераломы на аспал солдатмы, Сталинград ожын герой сямен бырем удмурт пимы сярысь. Вордӥськиз Василий Ильич Трефилов 1919-тӥ арын Яр ёросысь Володино гуртын. Садинскын 7 классэз быдтэмез бере, сое ыстӥзы Ижевске ФЗУ-е дышетскыны. Берло со ужаз металлургической заводын токарь луыса. Арлыдыз вуыса, армие басьтӥзы, Шунды ӝужан палась огаз стрелковой часте. Война кутскем бере гожтэтъёсаз весь вералляз оже мыныны дасяськемзы сярысь. Нош Сталинградэ вуэмзы бере, Володиное одӥгез гинэ гожтэтэз вуиз. Отын солдат анай-атайзэ оскытӥз, фашистъёсыз одно ик вормомы шуыса. Нош атаез со вакытэ ик Ижысь заводэ ужаны ыстэмын вал ини. Пиезлэн ожын быремез сярысь бумага 1943-тӥ арын мартэ гинэ вуиз. Отын гожтэмын: "Быриз ожын 1942-тӥ арын 6-тӥ ноябре, ватэмын Орловка гуртын". Озьы ик пыриз шаерамы потэм "Буре ваён" книгае но. Разведчиклэн быремез сярысь штабысь бумага ыстэмын вал вить толэзь ортчем бере гинэ, Сталинградын ожмаськонъёс бырем бере. Соку 124-тӥ бригадасСмоленск музъем вылын ожмаське вал ини. Орловка гурт Волга дурысен дас иськем ёросын. Гурт понна кема ожмаськон вал, отын быризы тросэз асьмелэн солдатъёсмы, озьы ик фашистъёс но. Соослэн тросэзлэн нимъёссы но тодмо ӧвӧл, шайгузы но ӧвӧл. Нош асьме шаерысьтымы Володино гурт бырон калэ вуэмын ини. Куинь корка гинэ кылемын на, Трефиловъёслэн буш кылем азбаразы али ке но будэ на Василий Ильичлэн синпельлы мерттэм кызьпуэз. В.ГОЛУБЕВ. Огмылкыдзы огазеяз Тодмо литературоведлэн Зоя Богомоловалэн кивалтэмез улсын укмыс ар люкаськыло ни творчество удысын ужась нылкышноос. Гужем шутэтскон азьын берлоез пумиськон вал Операя но балетъя театрын. Солэн директорез Анетта Сидорова шуныт пумитаз кунооссэ, ӝӧк вылэ сиён-юон пуктӥз. Таяз учыре воргоронъёс но татын вал, соос пӧлын � тодмо адямиос Геннадий Корепанов-Камский, Олег Поскребышев, Петр Кубашев, Кузьма Куликов. Баянэныз шудыса ас кырӟанъёссэ кузьмаз кылбурчи Василий Глушков. Со кырӟанъёс но гожъя, алигес Ижлы сӥзем конкурсын вормисьёс радэ шедиз. Та ӝытэ люкаськемъёс гужемозь ужамзылы йылпумъянъёс лэсьтӥзы, азьланезлы планъёс чаклазы. Вераны кулэ, нылкышно федерацие огазеяськемъёс шоркарысьтымы культура удысын ортчись одӥг бадӟым ужрадлэсь но палэнэ уг кылё. Озьы соос огмылкыдын пыриськизы О.Поскребышевлэн, В.Ар-Сергилэн выль книгаоссылы презентацие, Москваысь писателен Лидия Либединскаяен, Удмуртиысь гожъясьёсын Валерий Болтышевен но Вениамин Морозовен, художникен Вячеслав Костылевен пумиськонэ, Флор Васильевлы сӥзем ӝытэ. Суредасьёслэн, кибашлыослэн адӟытонзы ке луэ, федерациысь нылкышноос одно вуттӥськыны тыршо. Озьы тодматскизы Алексей Холмогоровлэн, Виталий Воловичлэн, Ирина Зориналэн, пинал усточиослэн творчествоенызы, озьы ик П.И.Чайковскийлы, Быдӟым ожлы, Ижевсклы сӥзем ужъёсын. Дэмен ветлӥзы В.Короленко нимо Ӟуч драмтеатре но Удмурт театре "Я жду тебя, любимый" но "Айна" спектакльёсыз учкыны. Таӵе тунсыко пумиськонъёс ортчыло пӧртэм интыосын. Кӧняез ке вал калык куспо Восточно-Европейской университетын. Татын, Урал инженер университетын сямен ик, усьтэмын гожъясьёслэн кунокуазы. Таӵе ик гостиной ужа Изобразительной искусствоосъя музейын. Нылкышно федерация ас пушъетъёссэ но сётэ ни. Куке но татын эскеремын вал Анна Вериналэн рукописез. Табере со ужа ӟуч кылбурчиослэн "Радуга" литобъединениенызы, люкаськыло И.Пастухов нимо библиотекае. Асьсэлэсь "Многоцветье" нимо огазеяськонзэс кылдытӥзы Удмурт университетысь профессор филология наукаосъя доктор Анна Зуева но ӟуч культурая дэменлыклэн кивалтӥсез Нина Евсеева. Т.СИДОРОВА. Экты, поръя, Кызьпу арама Шулдыресь кырӟан гуръёс но шоу-дискотека, витьымтэ шорысь пумиськонъёс, футболэн но волейболэн шудонъёс, бызьылыса ӵошатсконъёс � ваньмыз со тӥ понна, гажано егитъёс. Россиысь Егитъёслэн нуналзылы сӥзьыса, Авангардной урамысь Кызьпу арамаын 25-тӥ июне луоз бадӟым шулдыръяськон. Кутсконэз 11 часын. Люкаськемъёсты кырӟанъёсынызы шумпоттозы но эктытозы Ольга Зорина, Алефтина Корепанова, Сава Сергей, Иван Григорьевых, Анатолий Эркишев, Валериан Исламгареев, Алексей Ложкин. Егитъёслэн "Эрик" но "Шунды" огазеяськонъёссы. Туннэ - Буре ваён но кайгырон нунал Ӝужыт мугоро, чылкыт тусо, чагыр синмо вылэм песятае � Артемий Емельянович Попов. Ӧз кылды мыным сое адӟыны. 1941-тӥ арын август толэзе бырем со Ленинград дорын. Куамын арес вылэм соку песятаелы... Витьтон укмыс ар талэсь азьло 22-тӥ июне кутскиз Быдӟым ож. Азьвылгес кутэм вань огкылъёсты тӥяса, Германиысь фашистъёс ожалскизы Совето Союз вылэ. Туннэ, ӝыны даур ортчыса, тросэзлэн юамзы потэ, дыр: нош кӧшкемыт войнаез кенжемезлэсь азьло кысыны луысал-а меда? Дуннеын со вакытэ кылдэм югдур яркыт возьматэ: ӧй луысал. Странаослэн кусыпъёссы тугаськем бугорлы кельше вал угось. Азьмынӥсь кунъёс США, Англия но Франция лек убирлэсь сямен кышкало коммунизмлэсь. Озьы бере, мед урдскозы фашистъёс Советъёс вылэ. Кык пуныос ог-огзэс пурозы-сэстозы, кужымзы лябӟиз ке, соосты жильыяны но капчигес луоз. Та странаослэн ымазы ву ӟузем кадь улэмзы Гитлерез лӧпкытэмлы укшаз. Огез бӧрсьы мукетсэ пыдесъяськытӥз немец армия Западысь странаосты. Войналэн ваньзэ сутӥсь тылыз пумен араз-гомӟиз. Лопырскиз со СССР вылэ но, уно аръёслы куректон-бӧрдон вӧлмытыса. Калыкмылэн кужмыз тырмиз лек тушмонэз дугдытыны. Ма юрттӥз солы батыр ожмаськыны? Оскон, ӟечезлы, шудо нуналлы оскон. Укыр дуно сылӥз Вормон. Лек верамын ке но, мертаськом ук сое адями улонлэн, бырем муртъёслэн лыдынызы. Мед луоз вылэм таиз война берпуметӥез. Но озьы уг пӧрмы ай. Нош ик кошко пиосмы ож тылӝуэ. Нош ик синву, нош ик куректон... Нош мынам песянае тодаз ваёз вал, фронтэ кошконэз азьын песятае солэсь курем: "Пиосмес умой будэты, Марья". Ю.АЛЕКСАНДРОВА. Егит мылкыд эктоз уйбыт 27-тӥ июне Россиысь егитъёс асьсэлэсь нуналзэс пусъё. Та праздниклы сӥзьыса, шаерысьтымы городъёсын но гуртъёсын пӧртэм ужрадъёс, пумиськонъёс ортчозы. 23-тӥ июне Удмурт Республикаысь Правительствоын данъялозы шаерысьтымы егит азьветлӥсьёсты. 25-тӥ июне Ижевскын скалолазъёслэн турнирзы но концертъёс, дискотекаос ортчозы. Узыр программа дасяло воткинскъёс, можгаос, сарапулъёс, балезиноос, каракулиноос, селтаос, якшур-бодьяос но яръёс. Отысь егитъёс "котырес" ӝӧк сьӧрын сюлэмшугъяськытӥсь ужпумъёсъя вераськыны, телефон пыр пӧртэм специалистъёслэсь визь-кенеш басьтыны, фестивальёсы, спортъя ӵошатсконъёсы, выставкаосы пыриськыны быгатозы. Мукет ёросъёсын но шулдыръяськон ӝытъёс ортчозы. Егитъёс ӵукнаозь эктыны-кырӟаны быгатозы. Асьтэлэн районады ортчись ужрадъёс сярысь юаны быгатоды интыысь администрациысь егитъёсын ужанъя ёзысь. З.ВАХРУШЕВА. ЖУРНАЛИСТЪЁСЫН ПУМИСЬКОНЪЁС Егитъёс вамышто выль дауре Луоз яке уз Россиысь егитъёслэн нуналзы? Луоз, шуиз Россия Федерацилэн Президентэз Борис Ельцин. Озьы 1993-тӥ арысен 27-тӥ июне странаысьтымы егитъёс пусъё асьсэлэсь нуналзэс. Нош шаермы пусъёз-а Россиысь Егитъёслэсь нуналзэс? Пусъёз, шуиз журналистъёсын пумиськонын республикаысьтымы Егитъёсын ужанъя кун комитетлэн кивалтӥсез Андрей Гальцин. Ижевскын сяна, шаерысьтымы вань мукет городъёсын но ёросъёсын егитъёс пусъё асьсэлэсь нуналзэс, со сямлы пӧрмиз ини. Шулдыръяськон ужрад гинэ ӧвӧл со. Нылъёс но пиос асьсэ ужпумъёссэс шарае потто, кивалтӥсьёс азе юанъёс пукто. Егитъёслы сӥзем ужрадъёс кӧня ке нунал кыстӥськозы. Дышем сямъя, таяз учыре шаерысьтымы егитъёсты уз шулдыртэ Москваысь "кизилиос". Малы? Андрей Гальцинлэн верамезъя, асьмелэн но трос гинэ яркыт пиштӥсь кизилиосмы. Вань соос Сарапулын но, Воткаын но, Глазовын но, Ижевскез вератэк ини. Со ласянь эктыны, кырӟаны яратӥсьёслы мӧзмыт уз луы. Россия Федерациын егитъёслэн комитетэнызы тупен сямен шудон пумысен но Андрей Иванович аслэсьтыз мылкыдзэ вераз. Куатетӥзэ ни егитъёсты "быдтыны" туртто. Россия Федерацилэн туала Президентэз Владимир Путин нырысетӥ указэныз ик Егитъёслэн политиказыя кун комитетэз калыкез дышетон удысэн огазеяз. Комитетэз быдтон сярысь берлоез сыӵе ужпум кутэмын вал 1998-тӥ арын апреле, но со аре ик сӥзьыл выльысь улӟытӥзы. Сыӵе шудонъёслы егитъёс дышемын ни бере, таяз учыре но, оло, инмар уз кушты нылпиоссэ. Нош асьме шаермы сярысь ке верано, егитъёс пыд йылазы зол сыло, соосты уте "Удмурт Республикаысь егитъёслэн кун политиказы сярысь" Закон. Вылӥ кивалтӥсьёсмы но вуоно кивоштӥсьёссы шоры атай синмын учко. Ма, озьытэк-а? Кызьы бен валэктод Россиын кылдэм югдурез: 1998-тӥ арын апрельысен сентябрёзь 10-аз субъектъёсын егитъёсын ужась ёзъёс быдтэмын вал. Та ласянь но, азязы пуктэм ужпумъёсты быдэстон ласянь но республикаысьтымы Егитъёсын ужанъя кун комитет азьпал радъёсын мынэ. Озьы ке но, Россия ласянь юрттэт ӧвӧлэн шуг-секытъёс кылдо. Со нырысь ик потэ егитъёслэн политиказыя Россия Федерациын закон кутымтэ бордысь. Шаерысьтымы Егитъёсын ужанъя кун комитетлы бюджетысь коньдон висъяське ке но, со тырмыт ӧвӧл. Быдэстоно ужпумъёс трос. Комитет огназ сое уз вормы, соин ик пӧртэм министерствоосын но ведомствоосын одӥг кылысь ужало. Собере, быдэ вуымтэос но егитъёс сярысь сюлмаськон � со ваньмызлэн ужез. Нош та вакытлы нырысь интыын сыло быдэ вуымтэослэсь гужем шутэтсконзэс радъян, соосты уже интыян ужпумъёс. Госкомитетэ пырись дас куинез ик общественной огазеяськонъёс нылпиослэсь шутэтсконзэс радъялозы, кусып тупатэмын мукет ведомствоосын но министерствоосын. Шутэтскон лагерьёс усьтӥськозы ёросъёсын но. Кылем арын нырысьсэ радъямын вал "Кузьма аслыд улон" ужрад. Агитпоезд вуылӥз Игра, Балезино, Глазов, Яр ёросъёсысь но Глазов городысь быдэ вуымтэос доры. Таза улонэз вӧлмытон ужрадъёсы пыриськиз 5 сюрс пала адями. Нош туэ чакламын кӧня ке ёросъёс пыр автобусъёсын ортчыны. Азинсконъёс вань быдэ вуымтэосты уже интыян ласянь но. Кылем арын шаерысьтымы 24 сюрс пиос но нылъёс пӧртэм ужъёсы интыяськыны быгатӥзы ке, туэ та лыдпус 26 сюрсозь будыны кулэ. Пусйымон соиз, 40 процентэз быдэ вуымтэос уже интыяськыны быгатӥзы предприятиос чотын. Туэ йылпумъяське 2000-тӥ арозьлы кутэм "Удмуртиысь егитъёс" программа. Чаклам ужпумъёс 90 процентозь быдэстэмын ни. Дыр вань на со бордын ужаны. соин валче дасямын ни 2001-тӥ�2003-тӥ аръёслы ужан программа. Удмурт Республикаысь Правительство но Кун Кенеш сое умоен лыдъязы ке, шаерысьтымы егитъёслы ӧс усьтӥськоз вуоно дауре вамыштыны. Л.МАЛЫХ. Ӟечбуресь, "Удмурт дунне" газетэз лыдӟись эшъёс! Туннэ ми туж шумпотӥссьомы самой гажано удмурт газетлэн куноез луэммылы. Удмурт но бигер калыкъёс трос дауръёс ӵоже артэ, одӥг музъем вылын уло, огъя ужез быдэсъяса, туж бадӟым странаын ас ымныр туссэс но кылзэс ыштытэк. Ми шумпотӥськом: тужгес секыт вакытъёсы но Татарстанын но Башкортостанын удмурт школаос возиськизы, со школаосыз йылпумъям адямиосын Удмурт Республика данъяське. Дасэтӥ арзэ ини Удмуртиын печатлаське "Янарыш" бигер газет, эфире пото теле- но радиопередачаос � таиз но асьмелэн огъя данъяськонмы. "Янарыш" та дыр ӵоже будӥз иворъёсын одӥг бам бордысен тямыс полосаен арнялы быдэ потӥсь газет дорозь. Али сое 7 сюрс семья басьтэ. Милям темаосмы � нылпи рубрикаос бордысен политика дорозь, милям ужпуммы � асьме калыкмес утён. Асьмелы огазьын улыны капчигес, ӵошен кариськыса, асьмеос кужмогес, куарамы юнгес луэ. Тӥни сыӵе муген ик ӵош поттоно кариськимы газетлэсь одӥг бамзэ. Ирек Шарипов, "Янарыш" газетлэн валтӥсь редакторез. Ог-огмылы сётом емышъёсмес "Янарыш" нырысетӥ вамышъёссэ лэсьтыкуз ик гожъяськон удысэ кыстӥськисьёсыз ас котыраз люказ. Газетлэн арысь аре тиражез будэм сямен, "кылбурчи лулъёс" ялан ватсасько. Али татысь литературая кружоке но Огырчиысь (Агрызысь) "Мылкыд ошмесъёс" огазеяськонэ ветлӥсьёслэн лыдзы 60-озь вуиз ни. Газетмылэн кужыменыз Удмуртиысь 17 бигер кылбурчилэн но 2 крезьгурчилэн "Ямзышлар авазы" ("Адӟонлэн куараез") сборниксы но Огырчи музъем вылын улӥсь 23 гожъясьлэн "Мылкыд ошмесъёс" книгазы быдэн 2500 тиражен потӥз ни. Ӝоген Иж карын печатласькоз Динар Абдуллинлэн "Ӵук лысвуос" кылбур бичетэз. Та газетлэн бамъёсаз перозэс волятэм поэтъёс Чингиз Мусин но Габдулла Галиев кутэмын Татарстанысь Писательёслэн огазеяськоназы. Таос радэ кыстӥсько Риза Шафи, Ринат Батталов, Динар Абдуллин, Ибрагим Биектауры но мукетъёсыз. Таӵеос тырмыт люкаськизы ке, Удмуртилэн шоркараз но, Альметьевск, Чалды (Набережные Челны) каръёсын выллем, йӧн-йӧн гожъяськисьёслэсь огазеяськонзэс кылдытыны луоз. Туннэ "Удмурт дунне" газетэз лыдӟисьёслы куинь бигер кылбурчиослэсь "кисьматэм емышъёссэс" веръяны сётӥськом. Кырӟанлэн кыктэтӥ улонэз "Ой, тӥ, чебер нылъёс" кырӟан удмуртъёслы туж яра. Солэсь кылъёссэ гожтӥз тодмо журналист, кылбурчи но прозаик Николай Васильев. Эшъёсыз сое Никвас гинэ шуозы вал. Та кылбурезлы крезьгурчиос кӧня ке гур гожтӥзы. Нош тужгес устоез, мон сямен, Пётр Кубашевлэнэз. Тазэ гурез туж яратыса кырӟало бигеръёс но. "Тӥляд яратоно кырӟанъёсты" нимо сборникын та кырӟан бигер кылын кык пол потӥз ни. Бигер радио пыр но со куддыръя нуналаз кӧня ке пол чузъяське. Асьме кырӟанэз мукет калык сокем яратэ бере - со асьме понна бадӟым данъяськон, нош берыктӥсь понна - шумпотон. Тросэз удмуртъёс тодо, та кырӟанэз мон берыктӥ шуыса. Соин ик та вӧзы малпанъёсме ватсаме потэ. "Ой, тӥ, чебер нылъёс" кырӟан бигеръёслы туж яраз кык муген. Огласянь, берыктӥсь солэсь кылъёссэ туж матын кариз бигеръёслы, соослэн кылрадзыя кариськыса. Нош мукет ласянь, П. Кубашевлэн гураз шӧдӥське бигер шӧмыз. Соиз валамон: удмурт гур кылдытӥсь лымшор удмуртъёс пӧлысь потэмын, бигер гуръёсыз кылзыса будэмын. Асьмеос, удмуртъёс, тыршиськомы кырӟанъёсмес ӟуч кылэ гинэ берыктыны. Мукетъёсыз сярысь чик ум сюлмаськиське. Нош мукет бускель но ӵыжы-выжы калыкъёсыз асьме кырӟанъёсынымы тодматӥськомы ке, соос асьсэлы ярамонзэ быръё, кырӟало. Кырӟанэз одӥг кылысь мукетаз берыктон - туж ик капчи уж ӧвӧл. Со понна, кылэз сяна, тодыны кулэ на калыклэсь огъя культуразэ, малпаськон сямзэ. Та куронэз быдэстыны мон дась вал. Азьло но трос берыкъяй удмурт кылысь бигер кылэ, бигер кылысь - удмуртаз. Одӥг ар ӵоже Башкортостанысь Татышлы ёрос газетын берыктӥсь но вал. Студент дыръям Г.Красильниковлэсь "Куиньметӥез мултэс" вероссэ берыктыса Башкириысь райгазетъёсын печатлай. Собере шӧдӥ аспал удмуртъёслэсь бигер кырӟанъёсыз удмурт кылэ берыктыны турттэмзэс. Куд-ог ньыльчуръем кырӟанъёсыз сяна, соослэн туж ик ӧз пӧрмылы. Сюжетэн кырӟанъёсыз озьы ик бигер кылын кырӟаллязы. Тӥни соин малпай таӵе кырӟанэз огзэ берыктыса эскерыны. Бырйи "Кечсин сяськаез". Кылъёссэ гожтэм Ахмет Файзи. Гурзэ калык кылдытэм. Кӧня ке кагаз вылэ гожъяй но Янаул котырысь тодмоосылы кузьмай. Толэзь но ӧз ортчы, котькытын сое яратыса нёжъяны кутскизы. Отӥяз мон эшшо ог кызё бигер но башкир кырӟанъёсыз асэстӥ но Нефтекамскын потӥсь "Коммунизмлэн ӟардонэз" удмурт газетын печатлай. Школаын ужакум, удмуртъёс пӧлысь бичай удмурт но бигер кырӟанъёсыз. Люкам материалъёсыным тодматскыса, монэ башкир профессор Кирей Мерген Уфае аспирантурае ӧтиз вал. Но мон фольклорист ӧй луы. Кырӟанъёс бордын ужаме берло юрттӥз удмурт кырӟанъёсыз, озьы ик Ашальчи Окилэсь но Куӟебай Гердлэсь кылбуръёссэс бигер кылэ берыктыны, Казаньын, Уфаын но Иж карын печатласа поттыны. "Ой, тӥ, чебер нылъёс" кырӟанэз бигер кылэ берыктон сярысь малпан кылдӥз 1974-тӥ арын августлэн кутсконаз. Соку ми кузпалэным турпутёвкаен вал Ленинградын. Улӥмы студентъёслэн общежитиязы, 8-тӥ этажын. Бер ӝыт, концертысь бертэммы бере, укноетӥ кырӟам куара кылӥськиз. Улӥын, куакъёс вӧзысь скамья вылын, кык нылъёс кырӟало. Кыдёкысь палъёсын, Россилэн кыкетӥ шоркараз тодмо гурез кырӟамзы мыным туж мусо потӥз. Сыӵе мылкыдын ик каллен берыктӥ та кырӟанэз. 1976-тӥ арын кырӟамон вал ини. Но мон сое ялан тупатъяй, волятъяй на. Шедьтӥ нотазэ. Каллен, дыртытэк ачим ик суредай. Келяй Кузонэ "Азат хатын" ("Эрико нылкышно") журналэ. Печатлазы сое 1986-тӥ арын ноябрь толэзе "Эшъёслэн творчествозы" рубрика улын. Тӥни озьы удмурт кырӟан улыны кутскиз кыкетӥ улонэн. Алигес бигер эшъёсы веразы: та кырӟанэз турокъёс асьсэ кылазы, пе, берыктӥллям. Стамбулысь радио туж ӵем, пе, сое эфире сётъя. Но мон сое ас пельыным ӧй кылы на. Риф НАСИБУЛЛИН. Мозмыты сьӧлыкъёслэсь! Россия выльдӥське. Одӥгез солэн тужгес но яркыт тодметэз � черкъёслэн выльысь улӟемзы, ялан йылэмзы. Та ласянь палэнэ уг кыльы асьмелэн шаермы но. Тросаз гуртъёсын, городъёсын ӝутско выль черкъёс, выльысь ӧсъёссэс усьто вужъёсыз. Уго черк, православие, вӧсьлык юртто адямилэсь лулпушсэ чылкытатыны, узырмытыны, кырсьсэ, уродзэ вормыны. Талы уката ик кулэясько йыружъёсын герӟаськем, сьӧлыкъёсын наштаськем муртъёс, пытсэт сьӧры шедемъёс, осконзэс ыштэм адямиос. Тае лыдэ басьтыса ик республикаысьтымы унояз колониосын усьтӥсько черкъёс, нимысьтыз вӧсяськон интыос, воскресной школаос. Тани кылем арня вискын но ӧсъёссэ усьтӥз Азино посёлокысь 7 номеро колониысь выль черк. Инмарлы оскисьёс понна со вераны луонтэм шумпотон. Нош черкез лэсьтӥзы асьсэос пытсэт сьӧрын пукисьёс. Юртэз сӥё-дано усьтонэ ветлӥзы Россия Федерациысь Юстицияя министерстволэн Удмурт Республикаысь Кыл кутытонъя управлениезлэн кивалтӥсез генерал-майор Г.В.Желудов, Правительстволэн Тӧроезлэн воштӥсезлэн вӧсьлык ужпумъёсъя юрттӥсез С.И.Ильинский, Иж-Удмурт Епархилэн секретарез архимандрит Матфий но мукетъёс. Ваньмыз та ӟеч ужъёс пото Кыл кутытонъя управленилэн черкъёсын матысь кусыпъёсыз бордысь. Соос ӵем вуыло ог-огзы доры, уртче сэртто-пертчо шуг-секытъёсты. Юртто шуге-леке шедемъёслы азьланезлы оскон кылдытыны, улон шоры чылкыт сюлмын, мукет синмын учкыны. Нош ӟеч иворъёсты вӧлмытыны, пытсэт сьӧрын пукисьёслэн ог-огзылэн улэм-вылэменызы тодматыны юрттэ управленилэн аслаз "Ступени" газетэз. Та материалэз дасяны но юрттӥзы отын ужасьёс. Калыкен быръем власть ужаны кулэ калык понна Россилэн Президентэзлэн кун властез выльдонъя нырысетӥ ӵектонъёсыз возьмато, странамылэн одӥгез бугрес вакытэз йылпумъяське. Мукет улосъёс сямен ик Удмуртия но ас вылаз умой шӧдӥз, макем ляб вал Федерацилэн центрез. Округысьтым бырйисьёсын пумиськонъёс дыръя яркыт адӟиське: калык сураськем-пожаськем улонлэсь акыльтэмын ни. Жаляса верано, Россиын люкаськем уно ужпумъёсты нимаз одӥг улосын нокызьы но уд быдэсты. Со понна вырӟытоно центрез. Дас ар ӵоже асьмеос выльдӥськыны вырим. Воштӥськонъёслэсь кышкатэк, азьвылзэ куашкатыны кутским. Странамес рынок экономикаен, зэмос демократиен кун карыны мылкыдмы бадӟым вал. Озьы мултэс адӟем карыны кутским Западлэсь. Лыдэ ӧм басьтэ тани мае: асьмелэн туж зол азинскемын вал пыӵал тӥрлык поттон удысмы, нош калыклы вузъёс поттон шӧдскымон бере кылиз, рынокын со ас интызэ ӧз шедьты. Экономикаын югдур секыт бере, кун властьлэн ёзъёсыз кивалтонэз ас киязы кырмыны, вань кужымъёсты, луонлыкъёсты огазеяны кулэ вал. Но озьы ӧз пӧрмы. Реформаосты быдэсъян амалъёс калыклэн малпанъёсызлы, осконъёсызлы ӧз тупалэ. Берло аръёс ӵоже странамы лябӟиз экономика ласянь. Мукет кунъёсын кусыпъёсыз но трослы сюбегазы. Бен, асьмелэн ӧвӧл лек тушмонъёсмы, но соин ӵош эшъёсмы но ӧз кыле ни. Коррупциен, "сьӧд" ужъёсын вырисьёслэн, олигархъёслэн ёзъёссы странамылы зэмос кышкытлык вайыны кутскизы. Калыклэн улонэз начармиз, соин ик тросэз ужаса улӥсьёс реформаослы пумит кариськизы. Страна куашкан калэ вуиз. Таӵе кӧшкемыт югдурысь потыны юрттӥз кун властез выльдон. 1999-тӥ арын 19-тӥ декабре парламентэз быръёнын вормиз "Единство" огазеяськон. Кун Думаын кылдӥз "Единство" фракция. Вань ужпумъёсты со быдэстыны тырше, кун властен кенешыса. Туэ март толэзе Россия бырйиз выль егит кужмо президент. Со � Владимир Владимирович Путин. Озьы луонлык кылдӥз югдурез чутрак воштыны. Кун власть аслаз решениосаз лыдэ басьтыны кулэ ужаса улӥсьёслэсь мылкыдзэс. Нош история возьматэ: калык но власть куспын кулэ герӟет: со ужез быдэсъя партия. Демократия пыӵан вакытэ Россиын уно партиос кылдылӥзы. Но соос ужамъяськылӥзы быръён кампаниос дыръя гинэ. Нош азьмынӥсь кунъёсын кивалтӥсь ёзъёс одно ик кыӵе ке партия вылэ пыкисько. Россиын та вакытэ ӵапак сыӵе партия выллем луыны быгатэ "Единство". Пусйыны кулэ, со аслэсьтыз кужымзэ, юн луэмзэ возьматӥз ни. Нырысь ик кылдытэмын вал быръён блок. Кызьы верам ни, парламентэ быръёнъёсын со вормисе потӥз. "Единство" движение президент быръён дыръя дурбасьтӥз В.Путинлы, угось умоен лыдъяз кандидатлэсь ас азяз пуктэм ужпумзэ � калыкен быръем власть ужаны кулэ калык понна, котькуд адями утемез, со сярысь сюлмаськемез мед шӧдоз. Россиын политика удысын пайдаё ужась радлык кылдытыны кулэ. Асьмеос кивалтӥсь ёзъёсын кенешыны мед быгатом. Сыӵе луонлык сёто политической партиос, кылсярысь, "Единство" партия. Со нюръяськоз калыклэсь кулэяськонъёссэ быдэстон, правоя улӥсь кун кылдытон, экономикаез, калыкез улон-вылонын утён удысэз, наукаез но культураез азинтон понна. Та ужпумъёсты быдэстыса гинэ Россия пырыны быгатоз дуннеысь азьмынӥсь странаос пӧлы. А.ПЕРШИН, Удмурт Республикаысь Кун Кенешлэн депутатэз. ВОРМОНЛЫ - 55 АР Ку бертод, дядие? Кытын гинэ ӧз ожмаське Быдӟым Отечественной война вакытэ асьме шаерысьтымы батыръёс! Удмуртиын кылдытэм 313-тӥ стрелковой дивизия пыриськиз Карелиысь ӝуась нюлэсъёсын ожъёсы. 357-тӥ стрелковой дивизия ӟырдыт ожмаське Калинин фронтын, 49- тӥез - Западной фронтын. 1942-тӥ арын май толэзе москваез утён вылысь кошко Кизнерысь 110-тӥ, Пичи Пургалась 108-тӥ но Ижевск дорысь 112-тӥ бригадаос. 1943-тӥ арын тулыс, Курск ожмаськон азьын, 108-тӥ но 110-тӥ бригадаосты огазеяса, 97-тӥ дивизия кылдытэмын. Та сярысь мон тодӥ СССР-ысь Обороная министерстволэн архивысьтыз. Бӧрысьгес пумиськылӥ ветеранъёсын Емельян Касаткинэн, Леонид Камаевен, Григорий Злобинэн. 97-тӥ дивизия 1943-тӥ арын сӥзьыл мозмытэ Смоленскез но Белоруссилэн музъем вылаз выже. Ӟырдыт жугиське Витебск дорын. Кышкасьтэм луэмез но куронъёсты дырыз дыръя быдэсъямез понна, 1944-тӥ арын 2-тӥ июле та дивизилы Витебской дано ним сётэмын, нош 1945-тӥ арын солэн знамя вылаз Горд Знамя, Суворов но Кутузов орденъёс бырттэмын. Белоруссия но Прибалтика музъемъёс понна нюръяськонын тужгес висъяськиз Григорий Злобинлэн 233-тӥ Неманской нуллӥсь полкез. Григорий Злобин ачиз куинь пол Горд Знамя орденэн пусъемын. Вордскемын со Красногорск ёросысь Новочурино гуртын. Удмуртиысь трос пиос быризы Прибалтика музъем вылын. Соос пӧлын Якшур-Бодья районысь Кыква гуртысь Филипп Григорьевич Вахрушев но. Войналэсь азьвыл со татысь колхозэн кивалтӥз. "Пие, яраты музъемез, вӧзысьтыд адямиослы кулэ дыръяз юрттыны быгаты", - тазьы вералляз лыз синмо Митреезлы запасысь лейтенант Филипп Вахрушев. Огнуналэ Митрей вазь ӵукна ик бусые гырыны потӥз, берытскиз бер ӝыт гинэ. Анаез сое синкылиосын пумитаз: атайзэ военкоматэ ӧтиллям. Вахрушевъёслэн семьязы чидатэк возьмаз кузпалзылэсь но атайзылэсь ожысь берытскемзэ. Офицер гожъялляз лек жугиськонъёс сярысь: "Куакаос лобало но лек зор музэн музъем вылэ усё". Та сярысь мыным вераз солэн пиез Дмитрий Вахрушев. Кыкваысь кышкасьтэм ожгарчи 1944-тӥ арын сӥзьыл Юрьев (али Тарту) понна ожын бырыны шеде. Кузпалъёс Дмитрий Филиппович но Серафима Васильевна туж куро вазиськыны Филипп Григорьевич Вахрушевлэсь ӵош ожмаськем эшъёссэ. В.ПОЗДЕЕВ. * Ф.Вахрушев. ШӦКЫЧ Ю но эн кудӟы Кылӥськиз вал, ӝоген машина нуллыны ӧжытак юэмъёсты но лэзёзы шуыса. Зэм-а со? Семен К. Ува. Бен, сыӵе вераськонъёс вань. Али Кун думаын эскериське административной йыртэманъёсъя выль кодекс. Отысь огаз проектын чакламын ӧжытак ӟуземъёслы руль сьӧры пуксьыны. Тазалыкез утёнъя министерство уг алы водителез, вираз 0,2 промилля (яке 1 кубометр шокыштэм омырлы 100 миллиграмм) спиртэз вань ке. Кӧня со луэ, чаркаен вераса-а? Одӥг ӟенелик лябгес сур. Зэм но, люкаське ук адямилэн вираз со 0,2 промилля кык кобы кужмо сюкась юыса но. Ма, чик юисьтэм муртлэн но мугораз спирт вань, пе. Ох, усто закон малпаллям ай таос, молодцы! Озьы-а, Семон? Эн шумпоты. ГИБДД ӵемысь куак пӧлын ке но улэ, ваньзэ кылэ-адӟе. Вуоно законэ со аслэсьтыз ӵектонъёссэ пыртыны дэмла. Кылсярысь, али юэм йырын ворттылэм понна нырысетӥзэ 8-12 пичи уждун мында тыриськон сёто ке, выляз сое 20-Ёзь вуттыны чаклало. Ма, али но зол сэзъяло ни, выльысь правоосты "сӥслы" пормытыны ӧдъяло. Укылтэмъёсызлэсь бен. Нош сыӵеос тырмо. Тани туэ вить толэзь ӵоже гинэ шаерысьтымы сюресъёс вылын 435 шудтэм учыр луиз. 59-эз � юэм йырын. Со "йыръёсын" йырин 17 адями быриз, 66-ез шуккиськиз. Табере малпалэ, кыӵе луыны быгатысал та лыдпус, законъя 0,2 промилле лэземын луысал ке. Ми туж оскиськом, визьмо Дума ноку но сыӵе закон уз куты шуыса. Я, кинлэн адӟемез вань асьме воргоронлэсь одӥг кружка сурен кӧт тыремзэ? З.РЯБИНИНА. Мар та улонэ вуим! Кызьы валано на та улонмес? Ваньзэ вузало, лавка вылын лавка усьямын. Кинъёс отын вузкаро, кин кузё? Кытчы кошке соослэн вузкарем уксёзы? Оло, Удмуртилы кӧня ке налог тыремъясько но кылемез кунгож сьӧры кошке? Ваньзэ, мар гинэ умоез вань, палэнэ келяськом. Нош собере татын дунъёсты ӝутӥськом. Дуноя газ, электротыл � пумыз но, йылыз но ӧвӧл. Газ понна мон тырисько 206 манет, улӥськом кык кузя, пенсионеръёс, ожысь но ужысь ветеранъёс. Пенсия будэ, но кызьы сое будэто � 20 яке 15 процентлы � ум валаське. Кивалтӥсьёс ялан вошъяськыло. Куд-огез, ваньбурзэ кунгож сьӧры вузаса, ас кисызэ зӧкатэ. Соосыз нокин уг иса. Кытын бен со Чубайс шуонзы вордскемын, кин со, кыӵе нациысь потэмын? Ваньбурез весь келяло но келяло. Мар бен Чубайсэз нокинэн но-а воштыны уг луы? Монэ туж сюлэмшугъяськытэ музъемез вузан сярысь вераськонъёс. Музъем � со лавка ӧвӧл ук. Музъем � со анаен, атаен оградын сылӥсь мар ке. Сое нокызьы вузаны сётоно ӧвӧл. Музъемез вузан � со асьме удмурт калык понна самой кышкыт адӟон. Сютэм улон луоз. Музъемлэн одӥг медло кузёез � калык. Инмарлэсь сётэм ваньбурзэ утёно! Музъем ке луиз, калык но ужтэк уз пукы, вина но ӧжытгес юозы, наркоманъёс но бырозы. В.Путин, оло, юрттоз шуг-секытэз вормыны. Ужась калыклы уж ке луиз, ваньмыз умой луоз. Чечняен война но мед дугдоз. Ми но, пенсионеръёс, выль Президентлэсь Владимир Путинлэсь калык сярысь сюлмаськемзэ возьмалом. Юрттэт мед сётозы вылэм репрессия улэ шедемъёслы, ветеранъёслы, группаен инвалидъёслы. Возьмалом умойзэ. Е.КАМАШЕВА, Завьялово черкогуртын улӥсь. Лыдӟисьёссэ пумита дораз Раиса Камашева библиотекарь луиз кызь вить ар талэсь азьвыл. Миым гужем солы сётэмын "Удмурт Элькунысь культура удысысь дано ужась" вылӥ ним. Шумпотоно: Кияса ёросысь но адямилэсь тыршемзэ синйылтӥзы. Кызь вить ар туж ӝог ортчиз. Табере выльысь � нуналмысь сюлмаськонъёс. Туннэ нош ик � Вордӥськон � Ужаны кутски Карамас-Пельга гуртам, � тодаз вае Раиса Алексеевна. � Али улӥсько Выль Тӥгырменын. Аслам семьяе. Нылпиосы будо. Выль коркамес каллен-каллен быдэстӥськом. Кызь вить ар ӵоже, валамон ни, вань лыдӟисьёсы матысь эшъёс луизы. Тодӥсько соослэсь яратоно удысъёссэс но, яратоно книгаоссэс-журналъёссэс но. Выль Тӥгырмен гуртын улӥсьёслэн асьсэлэн библиотеказы ӧвӧл. Нош книгатэк кызьы? Раиса Алексеевналэн гуртоосыз ӵемысь лыкто дӥняз. Зэм, сюлмаськонъёс туж уно. Нош лыдӟись тон доры лыктэ ке, весь вань гурт ужъёстэ вунэтӥськод. Адями вуыны быгатоз шутэтскон нуналэ но, бер ӝыт но, шулдыръяськон дыръя но. Вордӥськонъёсы Р.А.Камашева ужа гуртысь школаын. Выль Тӥгырменын лыдӟисьёс ичи ӧвӧл. Соосты валаны тыршоно. Пуксён Кӧня ке ар ӵоже ни уг шунтӥськы Пуппы (Лутоха) гуртысь библиотека. Соин ик кезьыт юртын кема ик уд пукы. Нош гурт калык тодэ: пуксёнъёсы усьтӥськылэ библиотека. Лыдӟиськисез данак. Азьвыл дышетӥсь Анна Емельяновна Гавшина мылысь-кыдысь тунсыкъяське Удмурт шаерысь гожъясьёслэн ужъёсынызы. Тупатэм нуналэ библиотекае лыктозы ветеранъёс Л.С.Костенкова, Г.Т.Гавшин, пудо утись Р.А.Бузанова но мукетъёс. Вир нунал � Та нуналэ монэ возьмало гаражын, � шуэ Р.А.Камашева. � Тодӥсько: пиосмуртъёс тужгес ярато юри малпам учыр, ож сярысь гожъямъёсты лыдӟыны. Тупатэм дыре ик вуозы механизаторъёс Александр но Николай Анисимовъёс, Герман но Николай Никоновъёс. Покчи арня Та нуналэ библиотекарь дыртэ Вуж Тӥгырмен фермае. Мылысь-кыдысь лыдӟисько пудо эмъясь Нина Никонова, скал кыскисьёс Галина Атеева, Валентина Никонова, Валентина Камашева, арлыдо апай М.М.Камашева. Нош Валентин Заренков сюрес лёгиз ини Киясаысь библиотекае � Выль Тӥгырменысь вань книгаез лыдӟем ини. Удмурт арня Туннэ Раиса Алексеевна интыяз � шор ёзо школалэн юртаз. Куазь кезьыт бере, кӧня ке книгазэ школае ваиз. Татын со понна шедьтӥзы пичи гинэ сэрег. Зэм, ӟоскытгес ик. Но лыдӟисьёс понна умой: уноез Вуж Тӥгырменын уло ук. Урокъёс вискын татчы дырто дышетӥсьёс но, дышетскисьёс но, нылпи садын ужасьёс но. Р.А.Камашева ӟеч кылъёс вера пинал лыдӟисьёсыз сярысь. Таня Байбатурова, Нэля Танаева, Оля Шараборина, Венера, Саша но Алёша Никоновъёс, Толя Камашев но мукет пиналъёс мылысь-кыдысь вамышъяло тодон-валан дуннее. Кӧс нунал Котьку сямен библиотекарь доры туннэ лыктоз колхозысь азьвыл валтӥсь экономист Лилия Васильевна Котова. Со яратэ гурт сярысь гожъямъёсты. Нош ӝытазе дыртоно культура юртэ � "Купанча" ансамбльлэн одӥг но концертэз Раиса Алексеевнатэк уг ортчы. Нош кыӵе тунсыко вал Удмурт шаерысь гожъясьёсын пумиськон! Уз вунэтэ тӥгырменъёс аспал эшсылы кылбурчилы Г.М.Камашевлы сӥзем буре ваён ӝытэз но. Ӟеч концерт дасязы "Ашальчи" ансамбльлэн юбилеезлы. Р.А.Камашева котьку ик улонлэн бергась-поръясь кожаз. Котьку � аслаз лыдӟисьёсыныз артэ. Арня нунал. Мае лыдӟоно? Зэм, туэ выль книгаос ичи вуо. Кылем арын басьтӥзы покчиослы сӥзем кӧня ке гинэ книга. Туэ одӥг но вылез ӧвӧл. Ярам ай: журналъёс лыкто. Тужгес яратоноосыз � "Семья", "Крестьянка", "Сельская новь". Соос пӧлын ик � "Знамя труда" газет. Сое доразы но нулло. Одӥг номерзэ гинэ уг, быдэс вурӟетсэ. Ми, журналистъёс, шумпотӥськом таиз понна. Со вакытэ ик ӝожомиськом но: тросэз уг быгато ни яратоно газетсылы гожтӥськыны. Соин тодматскон вылысь, черодъёс но кылдыло. ... Нош ик вордӥськоз выль нунал. Нош ик кылдозы выль сюлмаськонъёс. Соосты шумпотыса пумиталоз Кияса ёросысь Выль Тӥгырмен гуртысь библиотекарь Удмурт Элькунысь культура удысысь дано ужась Раиса Алексеевна Камашева. Г.ПАРФЁНОВ. Удмурт Элькунысь культура удысысь дано ужась Р.А.Камашева. Владимир Беломорскихлэн туспуктэмез. Укноос чильпырало гажан-яратонэн Яр педучилищеез 1988-тӥ арын йылпумъямез бере, Анатолий Аркадьевич Попов Вавож ёросысь Гурезь-Пудга школае физкультурая дышетӥсь луыса вуиз. Ужез туж кельшиз. Кызьы сотэк? Тынад син азяд векчи чиед пиналъёс юнмало- кыдало, спортысь огаз ке но удысын асьсэды одно шедьто: волейболын-а, баскетболын-а, капчи атлетикаын яке куасэн бызьылонын-а? Кузпалъяськемез бере Анатолий Аркадьевич ас улон сэрегез сярысь но малпаськыны кутскиз. Аслыз со корка ӝутыны ӧдъяз бадӟым, югыт. Самой соку ик пу вылэ вӧлыса суредъёс пуктылон мылкыдыз пуромиз. Ачиз дасяз та удысын кулэ луись арбериос, станок. Нош куке корка укнооссэ чильтро наличникъёс чебермазы, корка пушказ ас киыныз ӝӧк-пуконъёс лэсьтӥз - гуртоосыз но солэсь быгатонлыкъёссэ синйылтӥзы. Соослэн но ас юртъёссэс Анатолий Аркадьевич кадь ик чебермамзы потӥз. Гуртоосыз бӧрсьы кыстӥськизы бускель гуртъёсын улӥсьёс. Ас ужез понна Анатолий Попов трос уг басьты. Но дышетӥсьлэн пичи уждунэз вӧзы со но барыш луэ. Уката ик пиналъёс будо. Бадӟым пиез армие кошкиз ни, нылыз тямысэтӥ классэ ветлэ. Собере ачиз но Анатолий Аркадьевич ужан висказ ик дышетскыны малпаз на - гурт удысъя институтысь зоотехникъёсты дасянъя факультетэз йылпумъяз. Огкылын вераса, та адями котькыӵе удысын ассэ шедьтӥз. Гажало сое гуртоосыз, ма ватонэз сое. Уго Анатолий Аркадьевич улэ таӵе веранъя: "Лэсьты мыным ӟеч, мон ӟечен ик берыкто. Лэсьты уродзэ - мон куинь пол умой лэсьто тыныд". А. А. Попов. Туспуктэмез В. Беломорскихлэн. ВАЛЭКТЭ ЮРИСТ Сэрегез дася давокат Лилия ШКЛЯЕВА Улон интылы кузё луэме уг поты Мон � куинетӥ группаен инвалид. Улон юртэ но пропискае ӧвӧл. Пенсия басьтӥсько Ижысь Индустриальной районын, Калыкез улон-вылонын утёнъя (социальной обеспечениея) министерстволэн татысь райсобесэ ыстэм гожтэтэзъя. Ӝоген та районын пенсия сётэмысь дугдозы. Малпасько кузпалъяськыны. Кышно луонэ улэ Индустриальной районысь ик приватизация пыр аслыз басьтэм кык комнатаен квартираын быдэ вуэм пиеныз ӵош. Кышно луонэ монэ ас дораз прописать карыны соглаш, мон сое гожтыса оскытӥ ке, улон интыезлэсь люкетсэ аслым уг куры шуыса. Сыӵе гожтэт дасяй, нош нотариатъя контора сое уг юнматы. Ма кароно? П.НИКОЛАЕВ. Валэктон утчано Россия Федерацилэн Граждан кодексысьтыз. 288 -тӥ ёзэт (статья) ивортэ: квартираын улэ яке ачиз кузё яке семьяысьтыз адямиос. Квартираяз музон муртъёсты лэземез луэ огкылъя (договоръя). Озьыен, кышно луонды тӥледды дораз пыртыны быгатэ яке семьяысьтыз адямиез сямен, яке огкылъя. Семьяысь адямиос квартираысь интыосты уже кутыны быгато кузё сямен, та пумысен кыӵе ке музон радлык пусъемын ӧй вал ке. Музон радлык (кытчыозь улоно, квартираез кызьы кутоно) пусйиське регистрацилы (пропискалы) куронын, тазэ нотариатъя контора юнматыны кулэ ӧвӧл. Квартираез кутон радлык пумысен лэсьтыны луэ огкыл но. Сое куспазы гожто кузё но со доры куриськись. Тазэ озьы ик нокытын юнматоно ӧвӧл. Озьыен, кышно луонды тӥледлы прописка лэсьтӥз ке но, тӥляд квартиралы кузё кариськыны праводы уз кылды... Ӧлексы пи вордӥсько Ӧлексы (инвалид) пиелы дас арес. Солы басьтӥсько юрттэт (пособие). Эшшо кыӵе ке льготаос вань на меда? А.КОРЕПАНОВА. Вань. Соос таӵеесь: врачлэн рецептэзъя дунтэк эмъюм; эмъяськон интые мынэм но бертэм понна ӝыны дунын билет (соку дунтэк путёвка висъяське нылпиез келясь мурт � анай, атай, опекун яке попечитель); дунтэк вело- но кресло-коляска, протез но мукет тӥрлык; нылпиез утьыса ужатэк улӥсьлы компенсация. Судэ лыктымтэ понна Одӥг мурт монэ мукетъёсыз азьын кырсь кылъёсын мыскылляз. Мон сое судэ сётӥ. Нош со отчы уг мыны, олокыӵе но ньӧм шедьтыса. Кӧня пол со милемды алдалоз на? И.ВОРОПАЕВ. Кыл кутӥсь (ответчик) судъяськон нуналэз тодэ ке, но кыӵе ке муген отчы лыктыны уг быгаты ке, та сярысь азьвыл ик судэ ивортыны кулэ. Озьы лэсьтытэк судэ ӧз вуы ке, судлэн правоез вань сотэк решение кутыны. Но тӥ (истец) соглаш луэмдэс вераны кулэ ужпумдэс таӵе радлыкен учкон пумысен. ШӦКЫЧ Шӧкыч уромлы аслэсьтыз ужъёссэ ыстӥз Вотка городын улӥсь Валентин ГОРБУНОВ, ачиз ик суредъёс но лэсьтэ. Матысь дыре со чакла серемес ужъёсыныз книга поттыны. Автор ӵушка туала улонысьтымы тырмымтэосты, серем пыр суреда вӧзысьтымы адямиосты. "Улыно-вылыно атас" (осконтэм вӧт) Инкуазез утён � шаерез утён. М.ПРИШВИН. Алигес мон паймымон вӧт адӟи. Ӧвӧл, ӧвӧл, юэмын ӧй вал. Асьтэос но тодӥськоды ук, мар но уг вӧта адями. Иське, вӧтасько мон тазьы. Асме ачим кызь кыкетӥ дауре выжиськем ини кожасько. Гужем. Куазь шулдыр. Луть-лать гинэ вамышъясько вордскем гуртам, Вотка палъёсы. Мӧзмоно угось вордӥськем палъёслэсь. Муӵогуртысь мон. Бертонэ кык иськем гинэ кылиз на вал. Гурт дорысь сикез потыкум, куакъёс пӧлысь витьымтэ шорысь кык йыро скал потӥз. Огез йыр айы, мукетыз � мес. Таӵ гинэ бер вылам пукси. Ак но, бак но ваземе уг луы ни. Соку айы йыр месэзлы бӧксӥз, Маня, эн кышкаты, пе, востэм адямиез юнме шорысь, асьме гуртысь Бикенэй со. Бикенэй � со мон, нош кытысь кык йыро скал мынэсьтым нимме тодэ? Собере кызьы соос адями кылын верасько? Уг-а изиськы шуыса, таӵ! кымесам чабки. Синъёсысь тылгизьыос ик пазьгиськизы. Уг изиськы вылӥськем. Усьтыр-табыр султӥ но дуй не стой гурт пала бызисько. Гурт пуме вуыса, лулме воштон вылысь, тыпак интыям дугдӥ. Кер- кор шокасько. Со вие капка ултӥ сяла курег потӥз, нош со сьӧры кык йыро атас бызе. Курегез сутӥз ведь. Лёга ук, лёга ук. Нош кыкетӥез, атаслэн тыбыр вылысьтыз атас йыр, улӥысьсэ кокча ук, кокча ук. Вожъяськиз, дыр, улӥ йырлы. Мынам синъёсы лыз-вож адӟыны кутскизы. Кык йыро скал, кык йыро атас... Юртты, кылчинэ, шуыса ӧй вутты, корка кузё потӥз но бурдооссэ азбаре кыштыр улляз. � Ма, Бикенэй, тон ук, лэся, та? Адскыны бертӥськод-а, пие? Озьы, озьы, мӧзмоно угось ӵыжы-выжыослэсь, вордскем палъёслэсь. Кӧня ке сазьтӥськеме бере, корка кузёлы мырдэм шокаса шуисько: � Мӧзми, мӧзми, Коныр агай, марым, сикысен кык йыро скалэн пумиськи, татын улыно- вылыно атасэн, эшшо мар ке ӧвӧл ни-а кыӵе ке кык-куинь йыро-пыдо пудо-животъёс? � Как ӧвӧл, как ӧвӧл! Пӧйшураны мынӥськод ке, кык йыро койыкъёсты, вить бурдо ӵӧжъёсты, лобась кионъёсты но пумитано луэ. Оломалы но паймиськод! Ми кемалась дышим ни сыӵе пӧртмаськонъёслы. Кемалась ӧд бертылы ни вал, дыр, ми пала, пие. � Кемалась, кемалась, � шуисько, кымесысьтым быльыр-быльыр потэм кезьыт ву шапыкъёсты ӵушылыса. � Кык сю ар ортчиз вал ини. Озьы Коныр агаен бӧтьыртон сямен дорамы бускельмы Нитуп агай визнанъёсын вуиз. Корзинаяз тачак чорыгъёс сыпыль-сапыль сапыръясько. Мон корзинае йырме мыкыртӥ но... тьфу! Вань чорыгъёс кык йырроесь. Нош чипей воксё ӟудымон. Огез йырыз � чипейлэн, мукетыз � паялэн. Мынам ӝуше ик куасалъяськыны ӧдъяз. � Эн паймы, Бикенэй, чорыг трос али. Только визнаны шуг луиз. Одно ик кык курико визнан кулэ. Огаз курике чипейлы чукырна бырттӥськод, мукетаз � нянь. Сотэк уг ик зыгато. Татын но коррупция адямиослэн кадь, ява. � Таӵезэ адӟылэме ӧй вал на! � шуисько на пумам вуыса. � Мар ишан та? Мар луиз тӥледын? Выжыкыл но выжыкыл ук та! � Тӥни солэсь, Одуп агайлэсь юа ай, со ваньзэ пыр-поч, тупен-тупен валэктон сётоз. Милям пастухмы со. � Ма, Бикенэй, тон ук, лэся, та! Чырткем на-а? Адскыны бертӥд-а? � дорамы вуыса, Одуп пастух монэ ӝик-ӝик ӟыгыртӥз, киме кырмаз. � Оломалы но эн паймы, Бикенэй. Тӥни тэль сьӧрысь курень-горд ӵын поттӥсь гумыез адӟиськод-а? Мон йырме кыдёкысь сик пала берыктӥ. Ӵынэз адӟи. � Тӥни со заводэз пуктэмзы бере милям улон чутырак воштӥськиз! � шуиз Одуп пастух. � Кылем-мылемъёсты суто отын. Кызьы ай шуо вал, утилизировать каро, пе. Тӥни со ӵынэн сэрен кылдӥз модифицированной выль выжы скал но, атас но, чорыг но, сьӧсь но, мукетыз но продукт! � Нош адямиос, адямиос кызьы татын уло на? � Кыӵе адямиос? Ми татчы куинь пересь кузпалъёс гинэ кылемын на. Огъёсыз ваньмизы, мукетъёсыз кӧчизы. � Ма, кытчы ке но ӝожтӥськонэн мыноно, дыр? � Кытчы туэ мынод на? Парткомъёс ӧвӧл ни. Та ӟырдыт вераськонмес йылаз-пумаз таки ӧм вуттэ. Кин ке но пельпумам сюл-кал донгась луиз. Сайкай но... кышное вылэм. Чар-чар кесяське: � Султы ини, кулэм мурт кадь изиськод. Али гинэ радио пыр ивортӥзы. Быръёнъёсын тон вормемед. Табере тон депутат! Ур-р-р-ра! шуыны ымме куалак усьтӥсько вал но син шорам улыно-вылыно атас пуксиз но дыльдыеным гуньдӥ. Валентин ГОРБУНОВ. Чача костаськиз азбарын Кышкыт учыр луиз та нуналъёсы Владивостокын. Чачалэн (оспалэн) эмъяськонэ кутон дырыз ортчем вакцинаеныз ампулаосты пиналъёс шедьтӥллям санитарияя но эпидемиологияя центрлэн азбарысьтыз. Покчиос нокыӵе кышкытлыкез валатэк, со ампулаосты усьтӥллям, вуэн сураллям, сыӵе суретэн ог-огзэсты пазяллям. Кема ик дыр ӧз ортчы, соос шедизы городысь паласькись висёнъёсъя больницае. Пусйыны кулэ, чачалэсь вакциназэ туж сак утёно, дырыз ортче ке, сое быдтыны кулэ. Нош Владивостокын ампулаос костаськыны кутскиллям. Суп-сап ужась медикъёс вылэ уголовной уж ӝутэмын. Бастэмын Интернет пыр. Медаз гинэ пот керетон Та гожтэтэз печатланы "Удмурт дуннелэн" редакциез соку ик ӧз дырты. Ужпум тани ма бордын. Туала югдурлы "Удмурт дуннелэн" редациез, "Удмурт кенеш" но "Дэмен" огазеяськонъёс пӧртэм дунъет сёто. Озьы ик пӧртэм сяменгес адӟо азинскон сюресъёсмес но. Валамон ини, со бордысь куддыръя пото ог-огдэ валамтэос. Таосыз шараясько пӧртэм ужрадъёсын, ӧтчамъёсын, пумиськонъёсын. Улон возьматэ: огполаз шонергес вылйллям газетчиос, мукетаз � "кнешъёс", куинетйяз � "дэменъёс". Отын номыр но паймымонэз ӧвӧл. "Удмурт дунне" понна "Удмурт кенеш" но, "Дэмен" но, "Шунды" но, "Эрик" но (Ижысь егитъёслэн огазеяськонзы) огкадесь � матынэсь но дуноесь. Вуэмезъя ваньмызлэсь ужъёссэс возьматыны выре. Луэмезъя берло аръёсы весь сюлмаське кусыпысьтызы тупамтэос сярысь гожъянлэсь палэнскыны. Куд-ог огазеяськонъёс ассэ "Удмурт дуннеез" пыкыло ке но (шонерезъя но, янгышаса но), редакция таин валче газет бамын пезьдэт сётыны уг дырты. Тӥни малы "Удмурт кенешлэн" но "Дэменлэн" вожвылъяськонзылы сӥзем гожтэт милемды малпаськонэ уськытӥз. Печатлано ке, газетлэн татын судья кариськемез уг поты. Печатлано ӧвӧл ке, ассэ вӧсь каремен лыдъясь огазеяськон ас малпанзэ удмуртъёс доры мукет сямен вуттыны уг быгаты. Котьма ке но, гожтэтэз шараяно кариським. Соин чош ик "Удмурт кенешлы" но сюрес усьтӥськом со пумысен ас малпанзэ вераны. Медаз Шара гожтэт Гажано Петр Константинович! "Герд" газетлэн 2000-тй ар понна 4-тӥ номераз печатламын "Емышез чуказе адзиськоз" нимо статьяды. Солэн уно интыеныз мои соглаш бвбл шуыса, "Гердэ" шонертон гожтй вал. Тй сое малы ке ӧд поттэ. Табере шара гожтэтэн вазиськисько "Удмурт дунне" пыр. Статьяды сӥземын "Дэмен" огазеяськонлэн 10 ар тырмонэзлы. Та ужрад ортчиз туж зол, ваньзы Удмурт драмтеатре люкаськемъёс ушъязы, шумпотыса бертӥзы. Тае Тӥледлы газет бамын озьы ик возьматоно вал. Собере, Петр Константинович, тани мае пусъеме потэ на. Тӥледыз К.А.Пономарев профессорен ӵош, азьвыл куке но "Дэменлэн" тӧроез вал шуыса, Евгений Андреев сцена вылэ ӧтчаз. Карл Александрович тубиз но вераськиз, "Дэменэз" данъяз, нош Тӥ малы ке шыпыт сылӥды но берен васькиды, огазеяськонлэн юбилеез пумысен номыр ӟеч кыл ӧд вералэ, тодэ ваёнъёстэс но ӧд шараялэ. Малы? Дас ар ӵоже "Дэмен" син шоры йӧтымон ужез быдэстӥз ук: дасяз но ортчытӥз удмуртъёслэсь нырысетӥ ӧтчамзэс (съездзэс), кылдытӥз "Удмурт кенеш", "Шунды", "Удмурт вӧсь" огазеяськонъёсты, улӟытӥз "Гербер" но мукет калык праздникъёсты, сэбедъёсты. Али но удмуртлыкез утён понна "Дэмен" уно ужрадъёс ортчытъя. Тани мон ачим но дэменчи бере, Удмурт университетын, 16 но 52 номеро школаосын, Глазов пединститутын, "Ударникын" но мукет интыосын тазалыкез эмъюмъёстэк юнматонлы ( сӥзем конференциослэн ужазы уно пол пыриськи. Кивалтэ соосын котьку ик А.А.Разин, вераськон радъяське удмурт кылын. Ветлэмъёс котьку тау карыса кошко. Правленимы гуртъёсы но пота, вашкала узыр культурамес улӟытон сярысь пӧртэм амалэн сюлмаське. Тае одно ик калыклы возьматоно вылэм, уноез тодытэк но уло. Альберт Алексеевич юбилейын туж визьмо вераськиз Кун Кенешлэн Тӧроеныз. Тодады вайытӥсько, со тазьы шуиз: � Та залын пуко ас калыксэ гажась йӧно удмуртъёс. Элькунмылэн Конституцияз гожтэмын ке но кун кылъёс кык, удмурт но ӟуч шуыса, та залысь но куд-огез семьяяз ӟуч кылын вераське, озьыен, нылпизы анай кылзэ уг тоды. Туннэ элькунысьтымы ӝыныез пиналъёс вордскем кылзэс уг тодо. Озьыен, кун кылъёс сярысь закон кутытэк, мынам яратоно калыкелэн ӵуказе нуналэз уз ни луы. Курисько тӥледыз вуоно даур кутскемлэсь азьло ик Кун Кенеш югдурез выльдоз шуыса кылдэс сётыны. Пукисьёслы но кельшем таӵе вераськон: кужмо кичабонъёс чузъяськизы, "Усто, Разин!" шуэм куараос кылӥськизы. А.А.Волков люкаськем калык азьын кылзэ сётӥз: кун кылъёс сярысь закон туэ кутэмын луоз. (Нош ик, Петр Константинович, газетады кырыжтыса гожтэмдэс шонертӥсько: вераськон мынӥз кун кылъёс сярысь, котькуд школаын ӟуч но, удмурт но, ваньмыз мукет пиналъёс но удмурт кылэз мед дышетозы шуыса). Нош А.А.Волковен ченгешыны сцена вылэ юнме потады. Чик чебер ӧз адӟиськы. Соку Тӥ мьнэсьтым мылкыдме воксё куашкатӥды. Юбилей дыръя, праздник дыръя керетон удмурт сямлы пичи но уг тупа. Шулдыръяськонэз сурась-пожасьёсыз удмуртъёс синазькыль каро, пӧлысьтызы палэнто. Калык люкаськемын ке, шуом, вордскем нуналэ яке сюанэ, котькыӵе гажамтэ адями, котькыӵе окты-калты мед пыроз, ноку сое уз уллялэ, уз куаретэ, жӧк сьӧры но пуктозы, вина но удозы, кырӟан ке мытӥз, сьӧраз нёръялозы � уз уретэ. Сыӵеесь со удмуртъёсыд. Ма, уно мукет калыкъёслэн но сямазы пыӵамын мылкыдзэс кунолы усьтон, куноез сюлмысь кадырлан, тушмонъёсызлэсь утён. Сокем но даллашемед потэ ке, мукет интыез бырйы, учырзэ шедьты. Кызьы озьы Тӥ омырскиды ӟечкыланэн но кузьымен лыктэм ӧтем куно вылэ. Тӥ огшоры адями ӧвӧл ук, Тӥ шоры учкыса, мукет калыкъёс удмуртъёслэн сямзы но культуразы сярысь мар шуозы? Кызьы нош, Петр Константинович, ымды пыриз асьмеды ӟечкыланы лыктэм поръёсыз курланы? Алама, пе, кырӟазы-эктӥзы. Ма-ма-ма... Юбилеез нуись Анна Максимовна Сапожниковаез но юнме пыкылӥллямды. Бобья-Учаысь арганчиослэн шудэмзы бере со шуиз: � Соослы Финляндие фестивале ветлыны Волков коньдон висъяз. Чик но "Александр Александрович нам помогает, так помогает" шуыны ӧз "ыла", Волковлы ӧз йыбыртъя. Огласянь, Анна Максимовнаез ушъяно вал сценариез понна, мукет ласянь � артист выллем ик быгатыса вераськемез понна. Евгений Андреевен ӵош соос туж чебертӥзы юбилеез. Быдэсак статьяды кыӵе ке дыго-мого гожтэмын � оло пероды мыркомиз, яке сыномиз шат? Газетэ мыдланьтыса гожтӥллямды: Александр Александрович "Дэменлы" 10 сюрс манет сётӥсько шуиз вал нырысетӥ потамаз. Нош тӥляд "тыршеменыды" валче со сӥзем коньдон али но счётамы вуэмын ӧвӧл на, пунэмаса ортчытэм юбилейлэн долгез али ке но тырымтэ на. Оло шумпотӥськоды-а? Куд-огезлы "Дэмен" люкетэ, лэся, данзэ сайя кожа, лэся. Сыӵеослэсь ке кылзӥд, "Дэмен" ке ӧй луысалыз, удмуртлык кемалась туж вылӥе ӝутскысал ни, кожалод. Гажано Петр Константинович, тани асьмеды, удмурт калыклэсь азьветлӥсьёссэ пыкыло: куспады, пе, бекчее тырем комакъёс выллем йырйиськыса улӥськоды. Зэм но, малы озьы дауртӥськоды? Газетэ гожтыны син шоры йӧтымон материал уд шедьтӥське шат? Соку адӟем карелэ комиослэсь но бигеръёслэсь. Владимир САВЕЛЬЕВ, Ижысь Медициная академиысь профессор, "Дэменлэн" правлениезлэн членэз. Пиос кыдато кужымзэс Быдэ вуымтэос понна кутскизы шутэтскон нуналъёс. Та вакытэ Пироговоысь "Призывник" лагерьын зэмос пиосмурт луэмзэс возьмато гуртъёсысь кызь пиос. Ваньзы сос учётын сыло быдэ вуымтэосын ужанъя инспекциосын. Ваменэс но секыт сямо пиос татын кык арня ӵоже асьсэды вормыны дышетскозы, солдатъёслэн улонзылэсь ческытсэ но кузьытсэ веръялозы. Нош дас кык нунал ортчыса, тросэз данъяськыса вераны быгатозы ни парашютэн тэтчаны быгатэмзы сярысь. Соослэсь кышкасьтэм луэмзэс бадӟым эшъёссы пусъёзы удостоверениосын. Гужем ӵоже "Призывник" лагерьын кужымзэс кыдатозы 150 пала быдэ вуымтэ пиос. Республикаысьтымы Егитъёсын ужанъя кун комитет та ужрадэз ортчытэ военкоматэн но Югдурез утёнъя министерствоен ӵош. Россия Федерацилэн программаезъя секыт сямо быдэ вуымтэосты тазьы кыдатон ужрад грант басьтӥз. Республикаысьтымы сяна, табере лагерьлы палэнысь но коньдон вуоз. Туэ та выллем лагерьёс усьтӥськозы Воткинскын, Сарапулын но Можгаын. Л.МАЛЫХ. Огазеяз бигер шаер Миым Ижевскын ортчиз быдэс Россиысь ивор вӧлмытӥсьёслэн ИВ фестивальзы. Ӵапак соку люкаськемъёс кенешизы выльысьсэ бускельёсмы дорын, Казаньын, пумиськыны. Сыӵе дыр вуиз. Та нуналъёсы Татарстанлэн шоркараз прессаын ужасьёслэн В фестивальзы мынэ. Пӧртэм пумиськонъёсын, кенешонъёсын "котырес ӝӧк" сьӧрын вераськонъёсын журналистъёс эскеро удысысьтызы, озьы ик быдэс странаысьтымы ӟырдыт ужпумъёсты. Ю.МИХАЙЛОВА. Фашистъёслэн лагерьёсазы быремын... Дахау. 250 сюрс мурт курадӟытэмын. ог 70 сюрсэз виемын. Заксенхаузен. 100 сюрслэсь уно узникъёс быдтэмын. Освенцим. 4 миллиОнлэсь трос адями курадӟытыса виемын. Татын вань музей. Маутхаузен. Музъем вылысь "ӵушемын" 335 сюрс пала адями, соос пӧлысь 32 сюрсэз � советской гражданъёс. Пӧлазы � генерал Д.М.Карбышев. Татын кылдытэмын музей, ӝутэмын памятник. РАвенсбрюк. 130 сюрслэсь уно узникъёс � нылкышноос но нылпиос. 93 сюрсэз быдтэмын. Майданек. Одӥг но ӝыны миллион адями ад тылӝуын быриз. Требменка. Варшава дорысь ужан лагерьын чидатэк кулӥз дас сюрс пала адями. Бухенвальд. 1937-тӥ�1945-тӥ аръёсы татын улонэн люкиськизы 56 сюрс пытсэтэ шедемъёс. 1944-тӥ арын 18-тӥ августэ виемын Германиысь Компартилэн кивалтӥсез Эрнст Тельман. Фашизмлэн "сьӧд списокысьтыз" та ваньмыз ӧвӧл на. Сыӵе "сьӧд чумаез" Европае вӧлдӥз 1941-тӥ арын 22-тӥ июне кутскем Быдӟым Отечественной война. Л.СТРЕЛКОВА. Удмурт Республикаысь Юстицияя министерстволэн заявлениез "Герд" газетын туэ 22-тӥ мае печатламын вал "Удмурт Республикалы � удмурт законъёс" нимын статья. Солэн авторез Олег Гусев малпанзэ вера Кун Кенеше депутатъёсты но республикалы президент быръён дыръя удмурт депутатъёслы мултэс лууонлыкъёс кылдытонлэн кулэлыкез пумысен. Республикаысь Юстицияя министерство пусъемъя, та выллем веранъёс пумит луо Россия Федерацилэн но Удмурт Республикалэн 29-тӥ ёзэтъёссылы, кудъёсыз ало кыӵе ке одӥг нациез мукетызлэсь вылӥегес пуктонэз. Со луэ "Россия Федерациысь гражданъёслэн референдуме пыриськон правооссы но бырйисьёслэсь правооссэс утён сярысь" Федеральной Законлэн 3-тӥ ёзэтэныз чаклам огъя принципъёсты тӥян. Статьяын шӧдӥсько экстремизм мылкыдъёс, кудъёсыз вуттыны быгатозы пӧртэм нациен калыкъёс пӧлын тупамтэосы. Юстицияя министерство оске, "Герд" газетэз поттӥсьёс но отын ужасьёс нациослэн кусыпъёсынызы герӟаськем ужпумъёсты пыр-почгес эскерозы но та ивортонмес лыдэ басьтозы. Удмурт Республикаысь Юстицияя министерстволэн пресс-службаез. БЫДӞЫМ ОЖЛЭН КУТСКЕМЕЗЛЫ � 59 АР Смородник гуртын быриз Июнь. 1941-тӥ ар. Адями секыт мылкыдын улэ: уго гитлеровской Германия Европаысь троссэ государствоосты киултӥз ни. Вераськонъёс кылӥськыны кутскизы: Германия, пе, Советской Союз вылэ омырскыны кужым люка. Калык оскылӥз но, ӧз но. Ма кызьы озьы? 1939-тӥ арын гинэ, кусыпмес юн тупатон вылысь, дас арлы договор гожтэмын ук! Июньлэн кутсконаз ик Удмуртиысь пиосъёсты военной лагере басьтылӥзы. Камбарка ёросысь Шолья разъезд дорысь тэле интыяськем лагере. Гондыркушысьтымы калык та лагере кыксэ воргоронзэ бӧрдыса келяз. Со Стрелков Егор Демидович но Корепанов Александр Яковлевич. Егор агаймы келясьёслы серем пыр вазиз: "Мар-о бӧрдӥськоды, куное гинэ мынӥськомы ук. Толэзь ортчоз � бертомы". Егор агае дуриськись вал кужмо, пезьгыт мугоро. Маке борды басьтӥськиз � одно быдэстоз. Котьма уж солэн ки улаз шудыса кадь пӧрмылӥз: дуриськонэз но, пуэн выронэз, лэсьтӥськонэз но, сад будэтонэз, муш вордонэз но. Лагере басьтыкузы, 25 муш семьязэ кельтӥз. Толэзь ортчыса ӧз вуы � кутскиз ож. Гурт калык та шимес иворез кылыса гуньдӥз кадь, суй-пыдъёс юскиськизы. Нош кин-о малпаз соку, война ньыль арлэсь ятыр кыстӥськоз шуыса? "Гожтӥсько зӧк пужым лӥял вылын. Кошкиськом фронтэ. Эн сюлмаське, эн бӧрдэ. Арня- кык ветло, бертом. Фашистъёсты пазьгытом..." Тӥни сыӵе вакчи гожтэт вуиз Егормылэсь. Собере... ышиз-быриз. Кудпала вуттӥз сое ож сюрес? "Э, пие, сук война понна шат мон тонэ вордӥ?" � кӧня меда синкылизэ кисьтӥз Манё кенак. Одӥг гинэ ук пиез, одӥг гинэ осконэз! Радио пыр берло иворез кылзыкуз, шоканэз ик дугдэ кадь: оло, ӟеч ивор вералозы, оло, ожлы пум понэмын? Оло, шумпотон пыроз ик войнаен кекатэм гуртэ? Ӧвӧл, ӧвӧл! Тӧлкыӵез сямен, оло, пизэ сабиз ож сильтӧл? Ивор возьма анай сюлэм. Тазьы котькуд нунал... "Гожтэт! Гожтэт!" � Егорлэн Вара нылыз педлось тэтчаса пыриз. Анайзы (бадӟым нэнэзы) гожтэт тодӥсьтэм ке но, киям ке но возё шуыса куриз. Синкылиос шыпыкен- шапыкен пылатӥзы пиезлэсь гожтэтсэ. "Улэп, улэп! Пие улэп!" - дунне тыр но кесяськысал та вие анайзы. Тани со кема витем куинь сэрего гожтэт (монэ, пинал муртэ, лыдӟыто вал, почерксэ валасько шуыса): "Ой, дуноосы, толэзь ортчоз, берто шуи вал. Уз пӧрмы ни озьы. Нырысь нуналысен ик туж пӧсь тылӝуэ ӝимим. Тушмон туж кужмо, му вылысен, омырысен кулон кизе... Ми пумитъяськиськом. Вормом сьӧсез! Оске!" � дыртӥд-вуттӥд гожтэм чуръёс. Кыӵе фронтысь со, кудпалась? Шумпотонлэн вакытэз туж вакчи вылэм. Нош ик ышиз Егормы. Бугырес тудвуэн нуэм шелеп музэн. Оло, быдэс ар ортчиз. Корка шунды пыриз: гожтэт! "Пленысь пегӟи. Одӥг гуртын, ӟеч муртъёс дорын, толэзь пала ини ватскыса улӥсько. Сӥльвир ӧжыт ке но люкай ни. Партизанской отрядэ кошкисько..." Собере, ӝыны ар пала ортчыса, Сталин нимо партизан отрядысь вуиз на гожтэтэз. Та луиз берпуметӥез иворез. Кытын меда вал та отряд? � малпанэлэсь ӧй ни люкиськылы. Отӥысь партизанъёслэн ожмаськемзы сярысь трос книгаосты бугыръяй, тодматски. Но таки йылаз-пумаз ӧй вуы. Уго таӵе нимо отрядъёс пӧртэм-пӧртэм ёросъёсын вылэм. Нырысь-валысь вазиськи Черниговысь дано гражданинзылы Федор Иванович Коротковлы. 1943-тӥ�1944-тӥ аръёсы со Сталин нимо партизан отрядлэн командирез вылэм. Вуиз ответ: "Списокамы ӧвӧл". Украинаын но Белоруссиын, пе, трос вал таӵе отрядъёс. Вазиськелэ Витебск обкомлэн военной архиваз. Озьы кутскиз утчаськон. Ӝоген Витебскысь вуиз гожтэт: Минске, пе, вазиськоно. Татчы вазиськонэ номыр пайда ӧз сёты. Гожтэтлэн пуштросэз таӵе: "Партархивлэсь документальной материалъёссэ эскерыса, Стрелков Егор Демидовичлэн Белоруссиысь партизан движение пыриськемез но быремез сярысь номыре тодыны ӧм быгатэ". Но ведь похоронной извещенияз, кудзэ кури Игра райвоенкоматысь, гожтэмын: "Стрелков Егор Демидович (1909-тӥ арын вордскемын) быриз, спецзаданиез быдэстыкуз 1943-тӥ арын 8-тӥ августэ Витебск улосысь Меховской районысь Смородник гуртын". Та извещениез ыстӥ Городок райвоенкоматэ (Меховской район быдтэмын). Нош Смородник гуртэз 1943-тӥ арын немецкой карательёс быдэсак сутӥллям. 1980-тӥ арын 5-тӥ мае Городок райвоенкоматысь ыстэм чуръёс: "Стрелков Е.Д.-лэн быремез сярысь извещениез лыдэ басьтыса, рядовой Стрелков Егор Демидович пыртэмын Витебск улосысь Городок котырын быремъёслэн но ватэмъёслэн списоказы. Со Городок районысь Бычихинской сельсоветэ пырись Меховое гуртлэн воинской шайвылаз ватэмен лыдъяське, быремын 1943-тӥ арын 8-тӥ августэ. Нырысь ватэм интыысьтызы, Смородник гуртысь, воинъёс отчы выжтэмын, шайгуоссэс тупатъямен". Бадӟым тау вынлыко Белоруссилы, война вакытэ трос ёрмонэз, ултӥянэз чидам калыклы. Уно шуг-секытъёс, войналэсь кӧшкемыт палъёссэ адӟем калыкед гинэ валаны быгатоз муртлэсь вӧсьсэ, куректонзэ. Нош вордскем дорам, Зураын? Быремъёслэн списоказы но пыртэмын ӧвӧл Егор агаймы. Озьы ик мылем мурт луэмын Александр Яковлевич Корепанов но. Бен, таос Родинамес утён понна сьӧсь фашистъёс пумитэ ӧз султэ шат? Яке, кыӵе ке капчи шулдыръяськонэ мыноно луизы? Война � сук, сьӧд вуберган � лулдэ ньылоз, сыскоз... Таӵе адӟонэ ик кемдӥз дас тямыс аресъем Федя агае, Стрелков Федор Тимофеевич. 1941-тӥ аре декабре ивортэк быремын. Документъя. Но Федямылэн кык гожтэтэз вуылӥз котыртэм Ленинградысь. Госпитальысь. "Нуналаз 115 грамм нянь сёто, уг чида, дыр", � мон ноку та гожтэмзэ ӧй вунэты. Федямес но котьку син азям возисько: маскаръяськыны яратэ вал. Коӵышсэ пельпум вылаз тэтчаны дышетӥз. Война егит пилэсь улонзэ уретӥз. Бен, солэн но сайкыт малпанъёсыз вал ук! Зуриос сое но вунэтӥллям. Э, бен та вылӥ верам адямиосты гинэ-а, вылды... Оло нош ужпум воштӥськиз ни. Берлозэ мон Зуриям 80-тӥ аръёсы бертылӥ. Лидия ЧЕРНОВА (СТРЕЛКОВА). *** � Июнь толэзьлэн нырысетӥ нуналъёсаз, 1941-тӥ арын, сюрсэн-сюрсэн военнообязаннойёс люкаськизы Шолья станцие. Мон но соос пӧлын. Милемыз татчы ваизы, 45 нуналъем дышетсконъёсы шуыса. Собере, 98 номеро дивизиез эшелонъёсын нуизы шунды пуксён пала. Дивизилэн командирез генерал-майор милемлы вераз, бадӟым манёвръёсы мынӥськом шуыса. Нош милям, чебер гужем куазен шулдыр мылкыдын "огдырлы" гинэ мынӥсьёслэн, адӟонмы таӵе вылэм. Белоруссиын ожъёсы пыриськем боецъёс но командиръёс нырысь толэзяз ик тросэз бырыны шедизы. Куд-огез пленэ сюризы. Ӧжыт ӧй вал партизанъёс пӧлы итӥськемъёсыз но. Озьы ик луиз монэн, пленысь пегӟеме бере. 1943-тӥ арын гужем милемлы лек ожмаськоно луиз карательёсын. Тӥни соку ик, дыр, Витебск дорын бырыны шедиз Зура пи но, Егор Стрелков. Таӵе малпанзэ гожтэт пыр милемлы вераз Пичи Пурга ёросысь Улын Кечол гуртысь ветеран, трос орденъёсын но медальёсын пусъем адями Иван Федорович Очеев. Нош солэсь иворзэ вуттӥз шаерчи Виктор Поздеев. Серем пыр Выль удмурт эшезлы вазиське: - Петрован, кышноелы чайылэсь шуба басьтыны 1000 доллар уг тырмы. Пунэма вал. - Мынам 800 доллар сяна ӧвӧл.. - Яралоз, чальгес вай, нош 200 доллар пунэдэ 2000-тӥ арын сётод ни. *** Лӧпшо Педунь универмагын кузпалэзлы дэрем быръе. - Сокем шат пӧрасьтэ яратӥськод? - юа Пересь Шамардан. - Уг, адӟеме ик уг поты, но куинь нунал улыса, судэ мыноно. Вуж дэремен со уз мыны, нош выленыз ушъяськон-чеберъяськон понна, судэ нырысетӥзэ лыктоз. *** Америкаысь бизнесменлэн гожъямысьтыз. "30-тӥ декабрь, вуи Люм гуртэ". "31-тӥ декабрь, быдэс уй ӵоже удмуртъёс кумышкаен куноятӥзы, ӧжыт гинэ ӧй кулы". "1-тӥ январь, 2000-тӥ ар. Туннэ люмъёсын макмырме веськатӥ, собере ширтӥм Глазове. Нош макмыръяським. Малы мон ӧй кулы толон?.." *** Выль ар азьын Коӵышбамовлэн кышноез куинь пинал ваиз. Шудо атай йырберзэ кормыштӥз но роддомын ужасьёслы шуиз: -Пумит ӧд ке луэ, мон али куинь пӧлысь одӥгзэ быръё". ЧУРЪЁС, ЧУРЪЁС... Тросгес ушъясько Ортчизы Вормонлы 55 ар тырмонэз пусъён нуналъёс. Трос ушъяськизы лэсьтэм ужъёс сярысь. Зэм но, ичи лэсьтэмын ӧвӧл, дыр, но сыӵе дыръя лэсьтымтэез золгес ӝожомытэ. Мон оже ветлэм адями, ИИ группаен инвалид. Кышное секыт висе, юрттӥсьёсмы ӧвӧл. Вормон нунал азьын пумитай тодмоме. Со Устинов ёросын улэ. Вераськон куспын юаз, тӥлесьтыд, пе, квартирадэс тупатъязы-а? Мон ӧй но тодылы, шуисько. Мынӥ Октябрь ёросысь ветеранъёслэн Советазы, но вазиськемме ӧз ик кылэ кадь. Отысь мынӥ ёросысь администрациысь калыкез улон-вылонын утён ёзэ, собере - заказъёсъя службае. Нокытын но юрттэт сётэмзы ӧз поты, ум быгатӥське, шуизы. Кыӵе но муг ӧз шедьтылэ, берло шуизы, коркады, пе, мебель лэсьтон фабрикалэн, со ик мед тупатъялоз. Туж ӝож ветеранъёсты озьы люкемысьтызы. Г.КОРЕПАНОВ. Ижевск. Кин узыргес улэ? Кызьы тодӥськод,ы Россия Федерация табере люкемын 7 округлы. Асьмеос пыриськомы Приволжской округе. Маин бен та улосъёс ог-огзылэсь висъясько? Ӵошатон понна басьтом таӵе лыдпусъёсты: Улӥсьёсыз % Промышленностьлэн быдӟалаез % Адямилы быдэ уждун (манетэн) Центральной 25,5 21,2 1428 Северо-Западной 9,8 12,7 1578 Северо-Кавказской 14,4 6,3 1013 Приволжской 22,1 23,9 1039 Уральской 8,7 16,6 1695 Сибирской 13,4 14,5 1794 Дальневосточной 5,0 5,7 2016 Калыклэн лыдыз но промышленностьлэн быдӟалаез верамын огъя Россиез лыдэ басьтыса. Б. Никитин. ШӦКЫЧ Очей Толилы � пӧсь салам Кин сииз тысь? Арлыдо нылкышно-кондуктор, трамвай вагонысь шундыберган тысь кӧмлэсь люкез синйылтыса, куашетон ӝутӥз. Та вакытэ соин артэ кемдӥз кунгож сьӧрысь вуэм егит мурт. Шӧдтэк шорысь со лёгиськыны шедьтӥз кондукторлэн пыд вылаз. � Ай эм сорри, � шуиз егит мурт (англи кылысь удмурт кылэ берыктыса � вождэс эн вае). � А-а, озьыен, тӥ жагтӥськиды? � юаз нылкышно, чиньыеныз тысь кӧм шоры возьматыса. � Ноу, � вазиз соиз. "Ноу" "ну" кыл луэ кожаса, кондуктор шуэ: � Адӟиськод-а, ачид но уд сьӧськиськы жагтӥськемед пумысен. Ойдо, гыдыке, ачид ик утялты бервылдэ! � Ноу, ноу! � пумитъяськиз сьӧрлось мурт. Ӧйтӧд, кызьы, вылды, йылпумъяськысал та учыр, егит мурт вӧзын ӧй луысал ке англи кылэз тодӥсь ӟуч студент. Бен но ӧвӧл Кӧня ке ар талэсь азьло шутэтскыны кылдӥз Болгариысь одӥгаз курортын. Пырисько пичигес магазинэ но юасько: � Вань-а тӥляд кремплен басмады? (Со вакытэ модаын вал та басма). Ӧвӧл шуыса, вузкарись йырыныз шоназ но малы ке но вазиз: � Бен. � Пожалуйста, возьматэ вал мыным сое, � шуисько. Мар карыны паймыса, нылаш кизэ ик вӧлъяз: � Бен, бен! Номырзэ валатэк потӥ магазинысь но мукетаз пыри. Сыӵе ик юанэн вазиськисько. Вань шуыса, вузкарись йырыныз шоназ но вазиз: � Ӧвӧл, ӧвӧл. Собере возьматӥз ӝажыын кыллись вуз шоры. Дэремлы тырмымон басма басьтӥ но, паймыса ик вамыштӥ. Мар та таӵе валантэм югдур? Ӵуказеяз ини гидмы валэктӥз: болгар кылын "бен" ӧвӧл шуэмез возьматэ, нош "ӧвӧл" � со бен. Г.ЖУКОВСКАЯ. Ижевск. Кыӵе тазалыкед, ветеран? Россиысь ожысь ветеранъёслэн госпитальёсысьтызы валтӥсь врачъёс но валтӥсь медсестраос 27-тӥ�28-тӥ июне люкаськозы Ижевске семинар-совещание. Тазалыкез утён удысын ужасьёс эскерозы ожысь ветеранъёслы медико-социальной юрттэт сётон но эмъян амалъёсты выльдон ужпумъёсты. Ужрад сӥземын республикаысьтымы ожысь ветеранъёслэн госпитальзылы 10 ар тырмонлы но Быдӟым Вормонлы 55 ар тырмонлы. Семинар-совещание ортче Удмурт Республикаысь Тазалыкез утёнъя министерстволэн чаклам планэзъя. Л.КИМОВА. "Я+Я " Воргоронъёс Аб.592. 33/180/78. Телец, удмурт, шофёр, дышетскеме шор ёзо. Люкиськемын. Пиелы 6 арес, улэ анаеныз. Вань нимаз квартирае, хозяйствое, мотоциклэ. Курытсэ праздникъёсы гинэ оскаллясько. Учкымон тусо, лякыт сямо, вераськись, сьӧд йырсиё, курень синмо. Яратӥсько корка котырын берганы. Улыны лыктоно дорам. Аб.584. 61/170. Козерог-Тигр. Плотник, столяр. Пенсиын, кышное кулэмын. Нылпиосы нимаз уло. Лякыт сямо, вераськись. Улон интыме воштыны соглаш. Аб.501. 24/167/56. Удмурт. Механик. дышетскеме средне-специальной. Улӥсько анай- атаен ӵош. Лякыт сямо. Яратӥсько чорыганы. Улон интыме воштыны соглаш. Пумит ӧвӧл одӥг нылпилы. Аб.110. 28/175. Учкымон тусбуё. Электрик. Улӥсько анай-атаен ӵош. Пытсэт сьӧрын пукылымтэ. Тодматскысал нылкышноен, пумит ӧвӧл одӥг нылпиезлы. Аб.153. 44/171/71. Техник-строитель. Дышетскеме средне-специальной. Вань аслам юртэ, улӥсько атаеным. Юонэз уг гажаськы. Яратӥсько сад-бакча котырын вырыны, лыдӟиськыны. Тодматскысал шоро-куспо мугоръем кышномуртэн, пумит ӧвӧл нылпиезлы. Нылкышноос Аб.0558. 18/168/63. Чорыг-Обезьян. Удмурт. дышетскеме шор ёзо. Улӥсько анай-атаен ӵош селоын. Йырсие пеймыт-горд, синъёсы куренесь. Улыны мынысал селое яке городэ. Аб.0583. 18/154/44. Весы. Дышетскеме шор ёзо. Ужасько. Тӧдьы йырсиё. Яратӥсько спортэз, керттӥськисько. Улон интыме воштыны соглаш. Аб.0338. 47/168. Веськрес мугоро. Козерог-Кролик. Удмурт. Товаровед. дышетскеме средне-специальной. Картэ кулэмын. Кык нылъёсы: 28 но 24 арес. Вераськись. Пеймыт йырсиё, синъёсы пурысьмыт-чагыр. Яратӥсько гурт котырын ужаны. Улыны мынысал селое. Аб.01000. 43/169/67. Сьӧд йырсиё. Синмаськымон, учкымон тусбуё, чылкыт, урод сямъёстэм. Яратэ чылкытлыкез, гажа оскымон но лякыт сямо луэмез. Семья кылдытон вылысь тодматскысал городын яке селоын улӥсь пыд йылаз йыг-йыг сылӥсь, визьмо пиосмуртэн, урод сямъёсыз медаз луэ. "Я+Я" служба пыр тодматскыны мылкыд карисьёс гожтэттэс "Удмурт дунне" газетэ эн келялэ. Ыстоно таӵе адресъя: 427630, Удмурт Республика, с. Юкаменское, а/я 10, "СЗ" аб. �... Гожтэтады одно ик понэ маркаен буш конверт, сотэк тӥледлы вазиськись уз луы. "Я+Я" служба ужа ке но Юкаменскын, гожтэтъёс отчы вуо быдэс республикаысьтымы, озьы ик Россиысь но солэн палэнысьтыз. Юрттэт сёто дунтэк. АРХИВЫСЬ ДОКУМЕНТЪЁСЪЯ Удмуртия ХХ дауре 1920-тӥ ар Кызетӥ аръёслэн нырысетӥ ӝыныязы ӝутоно вал куашкатэм хозяйствоез. Ӟеч инъет дасяно, социализм кылдытон вылысь. Зэм, огсыр улонэ выжон капчи ӧй вал. Ӧз тырмылэ корт, эстӥськон, улон-вылонын кутӥськись тӥрлык, сиён-юон. Граждан ож мыныку куашказы заводъёс, фабрикаос, улон юртъёс, электростанциос. Бадӟым изъян ваемын чугун сюреслы. Чутрак кулэсмиз городъёсын но гуртъёсын улӥсь калыклэн лыдыз, кӧня ке сюрсэз быриз Нырысетӥ дунне но граждан ожъёсын. Уноез кошкизы вордскем шаерысьтызы, большевикъёсты валатэк. Секыт югдур кылдӥз ваньбур поттонын. 1920-тӥ арын кык гинэ заводмы вал � Ижын но Воткалан. Ужазинлык туж усиз. Чигнакуз Колчаклэн армиез Сибире нуиз станокъёсыз, пӧртэм ужан арбериосыз. Туж уно тӥрлыкез Кам шуре выйтӥз. Тӧдьыосын ӵош кошкизы ас ужзэс тодӥсь-валась, быгатӥсь рабочийёс но. Чылкак куашказ гурт улон-вылон. Ӧз тырмылэ ужась киос, валъёс, ужан арбериос, кидысъёс, чутрак ичиёмизы гыроно-кизёно муос. 1920-тӥ арын, ожлэсь азьвыл вакытэн ӵошатыса, соос кулэсмизы 40,8 процентлы. Крестьянъёс бугыръяськылӥзы, соослэсь сиён- юонзэс "талалляку". Городын туж ӧз тырмылэ нянь, сӥль, дӥськут. Заводъёсысь рабочийёс соослы сётӥськись сиён-юонлэсь одӥг куиньмосъем гинэ люкетсэ басьтылӥзы. Соин ик уноез ужзэс куштылӥзы. Чылкак сютэм кылёнтэм вылысь, гуртъёсы кошкылӥзы. Со сяна, асьме палан кылдӥзы мукет но шугадӟонъёс. Удмуртъёслэн азьпал сюрессы сярысь сюлмаськыны дэмламын вал кунысь Пӧртэм нациослэн ужъёссыя Калык комиссариатлы. Кенешъёслэн исполкомъёссылэн Наркомнацлэн куремезъя Глазкарын, Сарапулын, Алабгоын (Елабугаын), Малмыжын кылдэм удмурт ёзъёссы бадӟым уж нуизы удмурт калыклы автономия сётон удысын. 1919-тӥ арын Наркомнацын кылдӥз удмуртъёслэн ужъёссыя Шор комиссариат. Иосиф Сталин кивалтэм улсын со удмуртъёсты политикае, культурае ӝутонэ кысконын, котькуд удысын тодӥсь-валась адямиосты шараянын, книга поттонын бадӟым уж нуиз. Комиссариатлэн валтӥсь печатлась ёзэз вал "Гудыри" газет. Солэн вить сюрс мындаез ик кошкылӥз сюрс куать сю удмурт гуртъёсы. Удмурт калыклэн улоназ бадӟым учыр луиз быдэс Россиысь удмуртъёслэн- коммунистъёслэн нырысетӥ конференцизы. Ортчиз со 1920-тӥ арын 6-тӥ �11-тӥ июне Сарапулын. Конференцилэн ужаз пыриськиз куатьтон кык адями. Пусъемын вал: удмурт калык чик уг пыриськы Кенешо кунмес кылдытонэ. Солэн валтӥсь мугез � улонлэсь бере кылён. Туж уноез гожтэт уг тодо. Секыт югдурысь потон амал одӥг гинэ: кылдытоно нимаз Удмурт кун. Зэм, та ужпумъя одӥг малпанэ ӧз вуэ. Нокыӵе йӧн шедьтытэк, конференция делегациез кельтӥз но та ужпумез эскерыны куриз партилэн Центральной Комитетаз но Правительствоын. Берлогес кылдӥз удмурт кивалтон ёзъёслэн РКП(б)-лэн ЦК-ез азьын кыл кутӥсь Шор люкетсы. Отчы пыризы Т.Борисов, И.Наговицын, Г.Гусев, Г.Трефилов. Та адямиос калык пушкын бадӟым визьнодан но валэктон уж нуизы. 15-тӥ июне Сарапулын ортчиз быдэс Россиысь дышетӥсьёслэн-удмуртъёслэн нырысетӥ ӧтчамзы. Татын но лулысь-сюлмысь эскериськиз удмуртъёслы кунлык сётон сярысь ужпум. Кема дасяськем бере, 1920-тӥ арын августэ йылпумъяськиз удмуртъёслы кунлык сётон сярысь ужпумъя гожтэтъёс дасян. 2-тӥ ноябре Калык Комиссаръёслэн Кенешсы пуктӥз: кылдытоно калмык, пор, вотяк калыкъёслэсь кунъёссэс. ВЦИК та постановлениез юнматӥз 192о-тӥ арын 4-тӥ ноябре. Вотской автономной областе пыризы Вятка губерниысь Глаз, Алабго (Елабуга), Малмыж, Сарапул уездъёслэн люкетъёссы. Озьыен, Удмурт шаер вордӥськиз 1920-тӥ арын. И.ЗАЙЦЕВА, Удмурт республикаысь Кун архивысь отделэн кивалтӥсь. Быдэс Россиысь коммунистъёслэн-удмуртъёслэн нырысетӥ конференцизылэн делегатъёсыз. 1920-тӥ ар, июнь. ДАРТ Кыӵе луыны кулэ азьветлӥсь? (егит азьветлӥсьёслэн малпанъёссы) Юрий Перевозчиков, республикаысьтымы Кунъёсын кусыпъёсъя министерствоын ужась, удмурт егитъёслэн "Шунды" дэменлыксылэн тӧроезлэн воштӥсез. - Егитъёсты огазеян понна кык пӧртэм азьветлӥсь луыны кулэ. Одӥгез � харизмат (туж мыло-кыдо, визьмо, кусыпъёс тупатыны быгатӥсь, ужзэ ӟеч быдэсъясь, аслыз оскытыны быгатӥсь адями), мукетыз � быдэсъясь. Таосызлэн ужъёссылыгес оско. Харизмат тросгес вераське, ӟырдыт мылкыдыныз мукетъёссэ ӝутыны быгатэ, но ӵемысь ужзэ мукетъёсыз вылэ куштэ. Умой азьветлӥсь пӧрмысал, куке но сям (харизмат но быдэсясь) одӥг адямиын луысалзы ке. Но сыӵеос туж ӧжыт, удмурт егитъёс пӧлын али чик ӧвӧл. Надежда Уткина, кырӟась, "Шунды" дэменлыклэн правлениезлэн членэз. - Мон малпасько, адями азьветлӥсьлэсь вань сямъёссэ огазеяны уз быгаты. Кулэ уго визьмо малпан, ӵектон сётӥсь � кичӧлтӥсь но, быдэстӥсь но, дунъясь но. Аслам ужам мон тыршисько ваньзэ соосты огазеяны � со туж секыт, но уж усто пӧрме, азьланезлы оскон сётэ. Кудӥз ке та сям адямилы инмарен сётэмын, кудӥзлы ке дышетсконо, астэ ачид вормыны тыршоно. ДАРТ ЯРАТЭ, УГ ЯРАТЫ... "Яраты монэ гинэ!" "Дартмылэн" кылем номераз поттӥм вал Алнаш ёросысь Олялэсь "Яраты монэ гинэ!" гожтэтсэ. Нылаш отын аслаз талам шудэныз ушъяське. Со сярысь малпанъёстэс гожтыны курим вал тӥледыз, егит лыдӟисьёсмы. Но редакцие кык гожтэт сяна ӧз вуы. Оло, азьланьтом та пумысен вераськонмес? Вуонояз бамын аслэсьтыз малпанзэ вералоз психолог Ирена Горбунова. Туннэ сётӥськом вуэм гожтэтъёсысь люкетъёсты. "Лыз чулка" Мон тодӥсько сыӵе учыръёсты. Аслам но вань кӧня ке пол вормытъяськеме. Малпасько, Оля золгес ассэ яратэ: со мукетъёс азьын данъяськыны быгатэ � Алёша сое бырйиз! Малы со сокем бызьылэ Алёша сьӧры? Яратыса гинэ уг, солэн аслыз осконэз ӧвӧл: сямыз но ушъяськымон ӧвӧл, шӧдске, тусыныз но, оло, туж уг висъяськы (вожзэ медаз вайы, янгышасько ке), соин ик кышка мукетъёсыз шораз уз учке ни, огназ кылёз шуыса. Нош тугантэм нылъёс шоры кызьы учко, асьтэос тодӥськоды. Ӟучъёс сыӵеосты "лыз чулка" шуо. Кин тодэ, кӧня кыстӥськоз та шудон, но шудо со ноку но уз луы. Яратӥсь муртъёс ог-огзэсты шудо карыны кулэ, нош Оля ассэ гинэ тодэ. Куке но со туж "ӵуштаськоз". Ирина ЛАРИОНОВА. Завьял ёрос. Пиос асьсэос сьӧрад мед бызьылозы Лыдӟи Олялэсь нырысетӥ яратонэз сярысь гожтэмзэ. Быдэс нунал но, ӵуказеяз но йырысьтым ӧз кошкылы. Нокызьы но ӧй быгаты, аслэсьтым малпамме гожтытэк. Кӧня арес тыныд, Оля? Мон малпасько, тон егит на шуыса. Оло, Алёша тынад улонад нырысетӥез, кин шуныт кылъёс вералляз, ӟыгыръяз? Соин тон астэ шудоен лыдъялляд, йыр поромытӥсь дуннее вуылӥд. Тыныд соин умой вал. Нош солы тонэн умой-а, кельшиськод-а тон солы, уз кельты-а куштыса со тонэ � ваньзэ пыр-поч тодыса вуымтэед. Тон егит ке но, туж урод адями. Кыӵе гинэ кырсь малпанъёс уг лыкто йырад! Нош малпаськид-а анаед сярысь? Оло тон семьяяды одӥг нылпи. Анай-таед тонэ вордӥзы, будэтӥзы, дышетӥзы, асьсэлы юрттӥсь луод шуыса малпаллязы... Нош тон? Эмъюмъёс юиськод. Нош улонысь пыраклы кошкысалыд ке? Тон малпаськид-а, кӧня со куректон анай- атаедлы? Уд быгатӥськы тон, Оля, данъяськыны нылмурт луэменыд, вуоно анай луонэныд! Кин ачиз пиос сьӧры бызьылэ? Пиос сыӵеосты лушкем серекъяло. Берыктӥд тон Алёшаез. Нош кызьы? Кышкатыса. Пумиськылӥды быдэс гужем. Собере со кошкиз. Тон нош кышкатӥд: "Асме но, сое но маке каро. Янгыш тон луод!" Алёша нош берытскиз тон доры. Нош кемалы-а меда? Оля, умойтэм шудонэн шудӥськод. Куинетӥ арзэ тон шудо ни. Шудо меда? Муртлэн шудтэмез вылын шудо уд улы, шуо. Аазьпалан улонэд сярысь малпаськид-а? Шулдыр сюан... Зундэсъёс... Нылпиос... Ваньмыз умой кадь. Но маиз ке но умойтэм. Картэд уж дураз ӝега, уйзэ олокытын ортчытэ, мукет кышномуртэн, пе, кушласькем... Оля, пиналъёсын огнад кылёд ук! Мар карод соку? Нош ик шузи малпанъёс борды ӝабырскод? Нош пиналъёсыд? Оля, мынам тонэ кышкатэме уг поты, азьпал улонэд сюлмаськытэ. Мед шедьтысалыд тон зэмос шуддэ. Г.В. Вавож ёрос. Нянь будэтӥсьёслы кадь ик пӧсь йӧтэ Зэмзэ но, музъем ужасьёслы сямен ик милемлы но гужем пӧсь йӧтэ. Сюрес лэсьтон но выльдон та вакытэ гинэ мынэ ук. Нош гужеммы, зэмзэ но, туж вакчи. Озьы ке но, ужъёсмы арысь аре тросгес луо, ватсасько. Созэ но, тазэ но дыраз но ӟеч лэсьтэм потэ. Кызьы пӧрме, сое калык дунъя, водительёс адӟо. Али тани Можгае нуись сюресэз паськытатӥськом. Со 18 метр луоз. Асфальт тыриськом ГИБДД-лэн Иж дорысь постысеныз. Уже кельше. Татын 8 ар тыршисько ни. Арлы быдэ шорлыдын 40 сюрс тонна асфальт вӧлдӥськом. Техникае но туж ӟеч, Англиысь басьтэмын. Туж визьмо машина, чылкыт но вольыт асфальт тыре. Ужмес бен капчи уд шуы, тузон пӧлын, пӧсь азьын ужаськом. Заказчиклэн куремезъя, 5 сантиметр асфальт тыриськом. Али та сюрес вылын 13 мурт ужаськом. Кык катокен лёгаськом. Юрттӥсе Аркадий Шиляев � чырткем адями. Мастермы Александр Чумаков егит ай, куинетӥ арзэ гинэ ужа. Нуналаз 10-11 час ужаськом. Секыт шуыса нокин уг ӝожтӥськы. Уждун толэзьлы быдэ дыраз басьтӥськом. Василий ВОТЯКОВ, асфальтоукладчиклэн машинистэз. Чеберлык кутске сюрес бордысен Предприятиысьтымы сизьым участок пӧлысь милямез, Завьяловоысез, уродэн уг лыдъяськы. Татчы лыктэме дырысен туэ ноябре сизьым ар тырмоз. Азьло татын ик водоканал ёзын тырши. Со лябӟыны, куашканы ӧдъям бере, татчы ачим куриськи. Табере уг жаляськы. Участоклы оскемын 80 иськем сюресэз, выжъёсты возён, утён но тупатъян. Ваньмыз � Гольяны черкогурт котырын. Туннэ нырысь ик шумпотонме вераме потэ. Алигес ӵыжак выль "Газель" автомашина басьтӥм. Со сюрес мастерлэн транспортэз луэ. Ми сое асьмеос ужаммы чотын быгатӥм шедьтыны. Юрттӥз ёрослэн кивалтӥсез Галина Баталова. Нош ми райцентрын сюресъёс лэсьтӥм-выльдӥм. Табере со машинаен котькытчы вуиськом, ужъёсмы уката ӟечгес радъяськизы-ӧръяськизы. Валля арын тодон-валан басьтӥ, Владимир городын дышетски. Отын сюрес лэсьтонъя выль амалъёсын тодматӥзы. Кылсярысь, сюрес вылэ векчи кӧльы вӧлдыны дышетӥзы. Озьы сюрес шакрес кадь луэ, но транспорт уг гылӟы, ӝабыр-ӝабыр возиське. Ми азьын одӥг ужпум сылэ � сюрес ноку медаз пытсаськылы: тол но, гужем но, тулыс но, сӥзьыл но. Со сяна, сюрес дурысь куакъёсты векчи писпуосты сайконо, турынзэ утялтоно, сюрес пусъёсты, кенеръёсты, юбоосты буяно. Милемды озьы ик сюлэмшугъяськытэ сюрес вылын шудтэм учыръёс. Соос трос но секытэсь луо. Угось сюрес вольыт луэ, машинаослэн ветлон ӝоглыксы будэ. Участоке ялан юнма. Али 12 нимаз техникамы. Сое тупатъяны мастерскоймы вань. Ваньмыз 19 мурт ужасьсы. Вераны кулэ, сюресъёсмы син азьын чеберско. Сое калык адӟытэк уг улы. Кызьы шуо, культура кутске сюрес бордысен. Тани тодэ лыктэ, кызьы гуртъёстӥ асфальт тырем бере, пиналэз но, пересез но резина пыдкутчанзэ куштӥз. Гуртэтӥ сюрес лэсьтон � со зэмос праздник луэ. Калык дорожникъёслы котьку тау каре. Александр МОИСЕЕВ, Завьяловоысь участоклэн мастерез. ДАРТ СЮЛЭМШУГЪЯСЬКЫТӤСЬ УЖПУМ Нуны шудэ... кулон венен 26-тӥ июне - наркоманиен нюръяськон нунал. Сыӵе ик нуналэн лыдъяське 1-тӥ декабрь но. Нош мон малпасько, али котькуд нуналэз наркоманиен нюръяськонъя ялыны кулэ. Югдур уго нуналмысь шимесгес луэ. Тӥляд тодады на-а кык толэзь талэсь азьвыл Глазкарын луэм учыр? Отын огдыре 40 пала ВИЧ-ен паласькем егитъёсты шараязы. Тросэз соос наркоманъёс. Туннэ отын 70 мурт сыӵеос ни. 70 мурт нуналлы быдэ улон минутъёссэ лыдъя. Нош кӧня сыӵеос мукет интыосын? Шаерысьтымы СПИД-эн нюръяськонъя центр мукет городъёсы но эскеронъёс ортчытъяны потаз. Ваньмаз ик шараяськизы ВИЧ нуллӥсьёс, сифилисэн, гонореяен, гепатитэн висисьёс. Паласькем мугъёссы тросэзлэн огкадесь: наркотикъёс, радызтэм кусыпъёс. Нош Ижевскын эскериськыны лыктӥз 7 аресъем пияш но. Со подъездысь шприц бервылъёсын шудэм, наркоманъёслы адӟем карыны вырем. Малы ӧвӧл 7 аресъем пиналлэн мукет, умоезлы адӟем карымон адямиосыз? Наркотик утчам пиналъёс та мугез нырысетӥосыз пӧлы пырто. Нырысь ик анай-атай адӟем карымон луыны кулэ кадь ук пиналлы. Но тросэз соос асьсэос юо, кыско, куспазы керӟег уло. Умой семьяослэн туннэ асьсэлэн сюлмаськонъёссы. Таосаз пиналъёс уг ёрмо коньдонлы, анай-атайёссы оско нылпизылы. Нош шузимытӥсь суретъёсты вузасьёслы со ик кулэ. Огпол-кык пол ӵекто, пумитъясько ке, ултӥяны выро. Пинал нырысь оскалтон понна гинэ басьтэ. Собере кык поллэсь номыр но уз луы, малпа. Куинетӥяз эшъёсыз азьын "умойяськемез" уг поты, нош собере дыше но ассэ ачиз буйгатыны выре, мукетъёссэ янгыш карон мугъёс утча, соос монэ валасалзы ке, мон ноку но тазьы ӧй дауртысал... Берло наркоманлы нуналаз огполэн гинэ уг тырмы ни, со шузиме, суретъёс вылын гинэ улэ. Наркотикез ке быре, курадӟе � быдэс мугорзэ коскатэ, "тӥя". Нош "доза" дуно, солы коньдон кулэ. Асьсэды валамысь дугдэм муртъёс коньдон понна шимес йыруж лэсьтонлэсь уг кӧберало ни. Озьы кылем арын Ижевскысь 13 аресъем пияш нокыӵе кариськытэк пересь муртэ вииз. Со быдӟагес ик арлыдо Марина нылъёслэсь зарни угыоссэс кыскалляз. Лэсьтысалзы-а та пиналъёс, законъёсты тодысалзы ке? Али вераны шуг. Огласянь со дугдытыны кулэ кадь, нош мукет ласянь висись мурт (наркомания � со висён) ассэ кутыны уг быгаты ни, вылаз ик, наркотик шедьтыны луэ котькуд сэрегысь. Югдурез чакласьёс ивортыло отын яке татын наркокурьеръёс, вузчиос ӝегатэмын шуыса. Но со нялтас шедемъёсыз. Кулэ вылэм нимысьтыз утчаськонъёс ортчытъяны. Городысь дискотекаосын ӝыныез егитъёс "сурымӟыса" экто, но соосты алӥсь ӧвӧл. Пермьын, кылсярысь, дискотекае пырись котькуд пиналэз врач эскере (со синъёссыя вала). Нош дискотека радъясьёс, пиналъёс пӧлын наркотик веръямъёсыз шудё ке, юн кыл куто � 500 пичи уждун мында штраф тыро, лицензизэс ышто. Али асьме республикаын но Егитъёсын ужанъя кун комитет "Дискотекаос ортчытъян сярысь" положение поттӥз. Оло, табере югдур ӧжытак воштӥськоз � егитъёс наркоманъёслэсь кышкатэк шулдыръяськыны быгатозы. Югдурез чакласа возёно школаосын но. Али дышетӥсьёс асьсэос уг валалляло пиналлэсь вотэсэ шедемзэ. Шӧдыса но уг нюръясько, школаысь кошкемзэ возьмаса уло. Соин ик уг паймо ни, коридор сэрегъёсысь шприцъёсты адӟо ке. Санкт-Петербургысь школаосын пиналъёсты эскерон понна нимысьтыз тестъёсты уже куто, ӵемгес медосмотръёс ортчытъяло, эмъяськыны ысто. Но та ваньмыз � "берло мар на?" нимаське. Соин ик бадӟымгес саклык но тросгес коньдон висъяно та кылез алонлы. Но пинал ачиз валаны ӧз тыршы ке та кышкытлыкез, вераськыны шуг. Тодэ, наркомания ӵемысь кутске огшоры сигарет бордысен. Собере со юылыны ӧдъя, анаша утча. Таиз бере вень вылэ пуксе. Нош мар вень йылын � тодмо: со быдэсмымтэ чебер малпанъёс, ужтэк кылён, семьятэк улон, ёрмон, бырон. З.РЯБИНИНА. Анай-атайёслы Пиналъёс наркотикъёсын ӵемгес эшъясько быдэ вуон вакытазы. Сыӵеос ужлэсь, дышетсконлэсь пегало, азьтэмъясько, школаын дышетӥсьлы урок нуыны люкето. Куддыр вакчи дыр ӵоже эшъёссэс суто (ялан куаретэмысьтызы, юмшаны лэзьымтэысьтызы) но кӧня ке улыса нош ик аналско. Огназы улыны уг быгато � мар карыны ёрмо. Кыстӥсько группировкаосы. Соослэн "законъёссыя" уло. Кышкасесь, анай-атайёсынызы ӵем пумиськонлэсь пегало, шаплы огъёзъёссылэсь кылзӥсько, соосъя карисько, йыртэмало. Ярато "шулдыръяськыны" � кыско, юо, йыртэмало. Кепыратэк лушкасько, школазэс аналто, гольтырес луо. Вань урод сямъёсты асьсэлы басьто � соин данъясько. Керӟег, лек луо. Адямиез юнме шорысь серем каро, обидё. Вазь эрказъяськыны кутско, яратонэз кӧланэн вошто. Анай-атайёссэс кӧттыр, дӥськут но коньдон кулэ дыръя гинэ тодазы вайыло. Искусствоен, спортэн уг тунсыкъясько. Гитара кылзыло, картаен шудо, горыса, сяласькыса пуко. Одӥг нуналэн уло, азьпал улонзы сярысь уг малпасько. Укмысэтӥзэ ӵошатскизы 22-тӥ�25-тӥ июне Юкаменское черкогуртын ортчизы гуртысь спортсменъёс куспын укмысэтӥ ӵошатсконъёс. Котькудысьтыз ик 25 районысь 30-60 муртъем командаос пыриськизы отчы. Соос пӧлын вал пӧртэм ӵошастконъёсы уно пол вормисе потылэм дано спортсменъёс, ветеранъёс, озьы ик трос егитъёс. Футболъя, бызьылонъя, кузьдалае тэтчанъя, гира ӝутъянъя, ки кужымез мертанъя, волейболъя, теннисъя, триатлонъя ӵошатсконъёс сяна, туэ нырысьсэ программае пыртэмын вал спорт амалэн ветлон но. Ньыль нунал ӟырдыт ӵошатскем бере тодмо луиз: огъя зачётын нырысетӥ интые потӥз Завьял ёросысь команда, кыкетӥын � Игра ёросысь, куинетӥын � Ува. Кыкетӥ группая вормисьёс луизы асьсэос юкаменскъёс, соос бӧрсьы � дэбесъёс но яръёс. Эстафетаын кужмо луэмзэс возьматӥзы Як.-Бодьяысь нылъёс но Пичи Пургаысь пиос. Семьяос куспын ӵошатсконын нош ик вормизы Завьял ёросысь Григорьевъёс. Шумпотымон вормонъёссы пинал спортсментъёслэн. Як.-Бодьяысь Яна Максимова вить зарни медален, нош Играысь Денис Трофимов куинь зарниен бертӥзы. Юкаменское черкогуртын ӵошатсконъёс туж умой радъямын вал. Соос сярысь пыр-почгес гожтэмез лыдӟоды газетмылэн вуоно номерысьтыз. Т.НИКОЛАЕВА. Гуртысь шудонъёсын. Фотоосыз Н.Глуховлэн. Быдӟым Вормонлы - 55 ар Улэме потэ вал... 1954-тӥ арын мон Посадова луи. Выль Алнаш гуртысь йӧно семьяослы - кен. Туж синмаськыса но кепыр вайыса учкисько вал песятаймы, Кузьма Васильевич, шоры. Нош улэм-вылэмез сярысь тодӥ но, туж жаль потылӥз: вить нылпиез пӧлысь огезлы но анайзэ-атайзэ утьыны кылдымтэ. Ваньмыз понна янгыш война. Дышетскем, визьмо пиосыз интые кылемын ӵужектэм кагазъёс гинэ. Тани соос, сюлэмез вӧсь карись чуръёс. Иван Кузьмич Посадов армие ӧтемын 1941-тӥ арын Пычас райвоенкоматэн. Лейтенант. Ожын быриз 1942-тӥ арын 25-тӥ августэ. Ватэмын Сталинград улосысь Котлубань гуртын. Григорий Кузьмич Посадов армие ӧтемын 1941-тӥ арын Можга райвоенкоматэн. Гвардиысь лейтенант. Ожын быриз 1943-тӥ арын 27-тӥ декабре. Ватэмын Витебск улосын. Василий Кузьмич Посадов армие ӧтемын 1940-тӥ арын 28-тӥ октябре Алнаш райвоенкоматэн. Военфельдшер. Ивортэк ышемын 1941-тӥ арын августэ. Федор Кузьмич Посадов армие ӧтемын 1942-тӥ арын 25-тӥ декабре. Сӧсырмыса лэземын 1945-тӥ арын 1-тӥ июне. Кулӥз дораз. Геннадий Федорович Посадов армие ӧтемын 1944-тӥ арын 20-тӥ ноябре. Владимир Егорович Охотников армие ӧтемын 1942-тӥ арын. Рядовой. Ожын быриз 1942-тӥ арын 28-тӥ мае. Ватэмын Смоленск улосын. Владимир Егорович Охотников Кузьма Васильевичлэн эмеспиез вал. Одӥг гинэ вордэм нылызлэн картэз. Та чуръёсты лыдӟыса гинэ но сюлэм чутрак чиге. Нош кыӵе луыса басьтылӥзы та иворъёсты Евдокия Ермолаевна но Кузьма Васильевич Посадовъёс? Мар веранэз, таӵе семьяос со вакытэ ӧжыт ӧй вал. Но созэ но вераме потэ на. Кузьма Васильевич, ачиз бадӟым, дышетскем адями ке но вылымтэ, улонлэсь кудпала но кызьы бергамзэ вала вылэм. Соинтэк-а солэн котькуд ортчем вамышез гожтэмын? Дышетскем мурт гинэ синмо луэ шуыса дышетӥз вал, дыр, пиоссэ. Тани Иван но Григорий - дышетӥсьёс, ужамын Вуж Юбери но Пычас школаосын. Федор пиез - пудо эмъясь, Василиез - фельдшер. Нылызлэн картэз но - дышетӥсь. Ноку но ӧз малпалэ, дыр, песятайёсмы, соосты быдӟым кунмы куштоз шуыса: ведь нылпиоссэс война понна ӧз будэтэлэ, пересьмон-уймон нуналазы оскон интызы мед луоз шуыса утялтӥзы. Но кунмы та пересь анайлы но атайлы, пиосты фронтын быризы шуыса, одӥг коньы но пенсия ӧз тыры: нылды вань, со ик мед сюдоз шуизы. Нош нылзылэн аслаз куинь нылпиез. Атайзы фронтын быремын. Валамон ни: пиоссы ӧз вунэтэлэ сюдӥсьсэс-вордӥсьсэс.Но мар карод: война ваньзэ чукинтӥз-берыктӥз. Тани мар гожтэ гвардиысь лейтенант Григорий Кузьмич Посадов 1943-тӥ арын 1-тӥ июле кузпалэзлы, Ольга Алексеевналы (писательлэн М. А. Коноваловлэн сузэрезлы): "Родина шуыкум тодам лыкто матысь ӵыжы-выжыосы... Собере тодам ваисько анайме. Со монэ синкылиен келяз, калыке шудбур утчаны кошкыкум (кулак радэ поттон вакытазы дорысьтызы кошконо луиллям угось та визьмо пиос - Л. П.). Пыдам - кут, пельпумам - дэра котомка, одӥг куз дӥськутэ. Бен, мон шедьтӥ шудме, потӥ калык радэ. Но сокем ӝог вунэтӥ кадь анайме, сюдӥсьме- вордӥсьме. Мон со понна номыр но ӟечсэ лэсьтыса ӧй вуы на ук, пичиесь гинэ кузьымъёсты лыдъялод шат? Табере со пересь ни, ожын быриз кык пиез. Нош улэме потэ, улэме туж потэ. Нылпиосме будэтысал, возьмасал. Тон тодӥськод монэ: мон - востэм адями, но урод ужась ӧвӧл. Туж юн яратӥсько нылпиосыз, тонэ, но сое возьматэме уг луы. Мынам, кызьы шуо, ваньмыз сюлэм пушкам". 1943-тӥ арын 26-тӥ декабре ыстэм берпуметӥ гожтэтаз но со тазьы вазиське: "Улоно. Улэм туж потэ. Быгатыса улэм потэ. Улоно умой, ӟырдыт!" Ӵуказеяз парторг Григорий Кузьмич Посадов быриз Витебск город дорын. Тӥни озьы Кузьма Васильевич но Евдокия Ермолаевна ыштӥзы куинь пизэс, куинь сюдӥсь-вордӥсьсэс. Бадӟымез пизы но, Фёдор, армиысь бертыса, атаезлэсь азьло кулӥз, тазалыкез лябӟыса. Тазэ пизэ келямез бере, катьяськыны ӧз ни быгаты Кузьма Васильевич, чутрак чигиз сюлэмыз, быриз ӟигарыз. Кык-куинь толэзь ортчыса, лулыз кошкиз вордэм пиосыз доры. Кылиз кузпалыз, Евдокия Ермолаевна. Гуртын сое гажаса Нунык апай шуо вал. Дораз кузьымен вуылӥз Григорий Кузьмичлэн Валерик пиез, атаезлэсь куронзэ быдэстыса. Мыным ӧз кылды песятаймылэсь ожын бырем пиоссэ адӟыны. Но одӥг нунал но ӧз ортчы, дыр, соосты буре вайыса верам кылъёсты кылытэк. Людмила Посадова. Алнаш черкогурт. Вормонлы - 55 ар Чебер кенак Война вакытэз арлыдоослэн синвутэк тодазы ваемзы уг луы. Озьы ик анае но, Алнаш ёросын Чумолё гуртын улӥсь Евдокия Григорьевна Христофорова. 12 аресысен, война кутскон аре, кыле со анайтэк. Нош кык ар ортчыса, висьыса кулэ атаез но. Анайме, солэсь вынзэ, сузэръёссэ будэтэ атаезлэсь ньыль аресысен кылтэм кылем Насьта апаез. Войналэн секытэз усиз ке усиз ини пичиос но пересьёс вылэ. Ошъёсты кыткыса гыроно луылӥз, пу вайыны но вал ӧй вал - дӧдьыен нуллӥзы. Корказы тыро-пыдо ноку ӧз шуналля, ваем вузы ведрае кынмылӥз - силёлэн мар пӧсез? Анай-атаез ӧй вал ни бере, 5 класс бере дышетсконзэ куштоно луэм. Дышетскыны мылкыдыз вылэм, али ке но математикаез ӟеч вала, немец кылын кылбур но тодэ на. Нош 15 арессэ тырмытыса, анайме Иж-Балезино сюрес лэсьтонэ келяллям. Алнаш ёросысь отын ужам Зыкин уполномоченной. Со анайме жаляллям - мугорыз пичиысь жаляса вал возьманы косылэм. Жаляны валась адями вылэм со. "Няньды ке ӧвӧл ни, валлы висъям сезьы пызен кисаль шуккыса сие. Вал турын но сиёз", - шуылоз вылэм со. Сюрес вуэм бере, нюлэс кораны лэзиллям. Норма бадӟым вылэм, соин ик пеймытозь но ужано луылӥллям. Жадьыса кытӥяз кылиськытэк ик кӧлаллям. Кыӵе но кынмыса, сием потыса ужаллям, сиён уродэн но дыраз мисьтӥськымтэен тэйӟо но вылэм - озьы но чидаллям, пегӟиллямтэ. Анаелэн война вакытэ ужамез медален пусъемын. Пичиысен анай-атайтэк будыса но, секыт войнаез но со бере аръёсты чидаса но, кузпалыз кулэм бере куать нылпиосын кыльыса но, кык пиоссэ ватыса но анаелэн сюлэмыз ӧз чурыта. Мон уг тодӥськы солэсь кинэн ке керетэмзэ, милемыз урод кылъёсын тышкаськемзэ. Со котьку лякыт, котьку адямилы ӟеч гинэ лэсьтыны тыршись адями. Соин но, дыр, атае ласянь ӵыжы- выжыосмы солы "чебер кенак" шуыса гинэ вазисько. Л. Гирбасова. Азамат гурт, Алнаш ёрос. СПОРТ Шахмат Ог 70 пала мылкыд карисьёс пыриськизы шахматэн ӝог шудонъя Удмуртилэн чемпионатаз. Кужымзэс мертазы Ижевскысь сяна, Шаркан, Можга, Якшур-Бодья ёросъёсысь спортсменъёс но. Вормисьёс пӧлы шедиз мастере кандидат, технической университетысь студент Максим Озолин (11 очко пӧлысь 10,5-сэ люказ). Кыкетӥ луиз мастере кандидат, УдГУ-ысь студент Андрей Быков (9 очко). Гуртоос пӧлысь ассэ ушъямон возьматӥз Якшур-Бодья черко гуртысь эмъясь Сергей Горбунов (7,5 очко). Нылкышноос пӧлын вормиз 6-тӥ номеро ДЮСШ-ысь тренер Любовь Митрошина (7 очко). Солэсь ӝыны очколы гинэ бере кылиз солэн ӵош ужась эшез Наталья Брылова. Кыксы ик соос Удмуртилэн трос пол чемпионкаосыз луылӥзы. Нимысьтыз синпель кузьымен пусъемын Кыкваысь пудо эмъясь Евгения Менылова, кыкетӥ разрядэн шахматистка. Школаын дышетскисьёс пӧлын вормисьёс пӧлы шедизы 6 номеро ДЮСШ-ысь Александр Кочуров но Анастасия Павлова. *** Киров улосвылысь Вятские Поляны городын шахматэн шудонъя Россиысь чемпионатлэн полуфиналэз ортчиз. Кужымзэс мертазы ог 30 улосвылъёсысь спортсменъёс, пӧлазы вал Ижысь шахматистъёс но. Удмуртилэн чемпионэз УдГУ-ысь студент Андрей Быков, нюръяськонъёсы пыриськыса, огъя куинетӥ интые потӥз. Озьы финалэ ӧжыт гинэ ӧз шедьы, отчы нырысетӥосыз кык вормисьёс кутэмын. Нырысетӥ дас кужмоосыз пӧлы озьы ик шедиз Ижевсклэн чемпионэз, технической университетысь студент Максим Озолин. И.ВЕЛЬТМАНДЕР. ДАРТ Шудо � шудзэ утчась Шулдыр, пӧсь вакытэ пусъё асьсэлэсь праздниксэс Россиысь егитъёс. Асьсэос но сыӵеесь уго: чебересь, ӟырдытэсь. Юнме курлало арлыдоос соосты. Ваньзэс сьӧлыктэм бен уд шуы, но вань ук, пинал арлыдзы шоры учкытэк, бадӟым вормонъёс басьтэм мыло- кыдо егитъёс. Ӵапак сыӵеоссэ азьветлӥсьёсты: гурт удысын но промышленностьын тыршисьёсты, спортсменъёсты но ожгарчиосты, ужбергатӥсьёсты но культураез азинтӥсьёсты � пусйизы Егитъёслэн нуналзы азьын Республикаысьтымы Правительствоын. Кун Кивалтэтлэн Тӧроез Александр Волков ӟечкыласа тужгес устоосызлы Данъян грамота сётӥз. Татчы ӧтем котькудӥз егит мурт сярысь шуныт кылъёс вераны шедьтӥз шаерысьтымы Егитъёсын ужанъя кун комитетлэн кивалтӥсез Андрей Гальцин. Улытозяз котькуд адями аслэсьтыз сю пол-а, сюрс пол-а юа, дыр: мар со шуд? Тӥ нош валэктон шедьтӥды ни-а? Соку ойдолэ юалом та егит эшъёсмылэсь. � Тани со, � шуэ Грах ёросысь "Мамаевской" хозяйствоысь егит тракторист Виталий Павлов. � Мыным толон гинэ веразы, Иже ӧтё шуыса. Ӧй но малпалля, монэ, трактористэз, сыӵе сӥлы карозы, кузьым сётозы шуыса. Зэм но, шуд ӧвӧл шат со � возьмамтэ шорысь ужамед понна ӟеч кыл кылыны, кузьым басьтыны? Виталийлы 22 арес гинэ ай, но солэн вань ини семьяез, кык муспотон нылъёссэ будэтэ. Куинь ар клубын ужаса со товариществое кошкиз, трактор куриз. � Но клубын капчигес, дыр, ук? � юасько солэсь. � Озьы, дыр, но котькудӥзлэн аслаз интыез. Мынам сюлэмы бусыын. Кырӟаны нош тракторын но луэ. Концертъёсы ветлӥсько ик бен, арганэн шудӥсько. Районысь спортъя ӵошатсконъёсы но куддыр вутскисько, но тракторе � сюлэмъягес. Сюлэмъя ке ӧз луы, азинсконъёс уд басьты, соиз зэм. Нош Ижевскысь Алексей Чайников � ожгарчи. Со берло дыре гинэ куинь пол "пӧсь" интыосы вуылӥз ни. Спецназ, огкылын. Отын оломае но адӟоно луэ, шуэ со, но тужгес секытэз вылэм эшъёстэ ыштон. Берпуметӥзэ ветлыкумы кыкез бырыны шедизы. � Тыныд "шудо" кыл уг тупа, дыр Алексей. Ужед � кышкыт. � Но туж кулэ, � ӝотрак вера со. � Атай музъемез утён � тужгес дано уж. Берло дыре югдур уродмемен, сое валаны кутскизы ни. Мон быгатӥсько утьыны шаермес, калыкез. Завьяловоысь Вера Буториналэн ужез матын но герӟаськемын ӧвӧл вылӥ верамъёсыныз. Но со но адямилы шуныт мылкыд кузьма, шудзэс берыктыны юрттэ, визь-кенеш сётэ. Вера � психолог. Улонамы психологъёс кемалась ӧз кылдэ ай, но соослэн кулэлыксы сярысь ченгешисьёс ӧй ик вал. Калык валаз, ваньзэ пушкын возьыны уг яра шуыса, вазиськыны кутскиз. � Тӥ доры пӧртэм мылкыдын лыкто, дыр, кызьы буйгатӥськоды? � юасько Вералэсь. � Пӧртэм сямен. Но нырысь ик � адямиез кылзыны, кылыны быгатоно. Мыным кельше адямиосын ужаны, пичи дырысеным малпалляй таӵегес тунсыко уж сярысь. Туж шумпотымон, Вера егит ай ке но, калык солы оске, вазиське шуыса. Солэн небыт кылыз котьку мед юрттоз адямилы ӧжыт ке но шудогес луыны. Шаерысьтымы эшшо 50 пала егитъёс та нуналэ асьсэды туж шудоен шӧдӥзы � соослэн ӟырдыт мылкыдзы но сюлмо тыршемзы юнме ӧвӧл, иське. Кызьы шуиз Андрей Гальцин, соос лэсьтозы Россилэсь выль вакытсэ. З.РЯБИНИНА. Туспуктэмъёсыз В.Камашевлэн. ВОЗЬМАТӤСЬКОМ УСТО УЖАСЬ КОЛЛЕКТИВЪЁСТЫ Валентин ЛЕВИН: "Сюресъёс � со улон вирсэръёс" Ижысь сюрес лэсьтонъя кун предприятиен тямысэтӥ арзэ быгатыса кивалтэ ни Валентин Левин. Городын, тужгес но аслаз удысаз, со тодмо адями. Быдэс улонэз герӟаськемын сюрес лэсьтонэн. Вордскиз 1958-тӥ арын Чувашиын Алатырьысь автомобиль сюрес лэсьтонъя техникумез йылпумъямез бере, егит специалистэз ужаны ыстӥзы Удмуртие. Со вал 1980-тӥ арын. Озьы Валентин Левин шаерамы 20 ар улэ но ужа ни. Кутскиз мастерысен, собере луиз прораб, валтӥсь инженер, кивалтӥсьлэн воштӥсез. Вань "тубатъёсты" ортчиз. Тодон-валанзэ будэтӥз Удмурт кун университетын, экономикая факультетэз быдтӥз. Огдыре ужаз но, дышетскиз но. Выльдӥськонлэн самой пӧсь вакытаз, кужымезлы оскыса, предприятиез ас вылаз басьтӥз. Коллектив шуг-секытъёслы ӧз сётскы, арысь аре юнмаз, ужъёссэ паськытатӥз. � Валентин Сергеевич, ойдолэ вераськонмес аспӧртэмлыко мытом. Тӥ понна мар со сюрес? � Сюресъёс � со улон вирсэръёс. Юнме шорысь озьы уг верало. Быдэс улонмы сюресъёсын герӟаськемын, уката ик Россиын. Сюрес � со улон, сюрес � со производство, сюрес � со котькуд улосвыллэн экономикаез. Берло дыре со уката бадӟым инты басьтэ, Западын сямен ик трос грузъёс автомашинаосын ворттӥсько ни. Сюресъёс вылтӥ кыӵе гинэ кунъёсысь машинаос уг ширто. Улон огинтыяз уг сылы. Воштӥсько кивалтӥсьёс но правительствоос, нош сюресъёс кылё. Та ёзэз, зэмзэ но, калыклэн удысэз, шуыны луоз. Ортчемзэ тодэ ваёно ке, сюрес вылтӥ ветлэм понна вашкала дырысен дун тыриське, сюрес выт шуыса нимаське. Со чотын кылдытӥське интыысь сюрес фонд. Отысь уксё кутӥське сюресъёс, выжъёс, кенеръёс, пусъёс лэсьтыны, соосты тупатъяны но возьыны. Ваньмыз лэсьтӥське, сюрес вылын шудтэм учыръёс медаз луэ, калык медаз быры. � Мар бен со туннэ � Ижысь сюрес лэсьтонъя кун унитарной предприятие? � Одӥг кылын уд валэкты. Ми али чакласа возиськом 512 иськемлэсь уно сюресъёсты, со пӧлысь 414 иськемез асфальтэн шобыртэмын, кылемаз кӧльы (пыргытэм из) вӧлдэмын. Выжъёсмы 31, ваньмыз сямен бетонлэсь но кортлэсь лэсьтэмын. Куинь гинэ пу выжмы кылемын на. Сюрес вамен ву лэзьыны 495 гумы понэмын, яке 8,6 сюрс метр. Огъя пусйыса, сюресъёс, выжъёс лэсьтонын, соосты выльдонын 7 участокмы ужа, куинез Ижевскын, со сяна Завьяловоын, Изгуртын, Якшур-Бодьяын но Старые Зятцы черкогуртын. Пӧртэм пумо 150 автотранспортмы, со пӧлысь 60-эз нимаз техника (бульдозеръёс, катокъёс, асфальтоукладчикъёс но музонэз). Со сяна, вань 2 лэсьтӥськон участокмы, 2 асфальтобетонной заводмы но Поймаын Ижын кужмо котельноймы ужа. Али 7-тӥ иськемын шуныт гараж пуктӥськом. Отчы 50 машина тэроз. Отын ик луоз техникаез тупатъянъя цех. Татын ик али котельноймес выльдӥськом. Нош кык ар талэсь азьло 7-тӥ иськемын ик чебер административной юрт ӝутӥм. Пушкыз но учкымон, ужан кабинетъёс вӧл-вӧлэсь. Предприятиямы ужа 550 мурт. Соос котькыӵе куазен сюрес вылын � пӧсь нуналэ но, кезьыт ӵукна но, зорыку но. Тӥни озьы берло укмыс ар ӵоже вуттэмын 100 иськем ёрос сюресъёс, нош "Удмуртавтодор" лэсьтӥз 1100 иськем. Тӥни озьы милям предприятимы дас процент ужъёсты быдэстӥз. Шуг-секытъёс шоры учкытэк, планъёсмес арлы быдэ мултэсэн быдэсъяськом. � Валентин Сергеевич, туэлы кыӵе малпанъёсты? � Бадӟымесь. Нырысь ик, ми конкурсын вормим Воткинск�Кельчино выль сюрес лэсьтонэз. Кузьдалаез � 15 иськем. Со шаермес герӟалоз Пермь улосвылэн. Соку Ижысь Пермь городэ мынон сюресмы 90 иськемлы вакчигес луоз. Та сюресэз вуоно арын августэ вуттыны чакласьком. Али отын ужъёсмы ӧръясько. Но со секыт интыетӥ ортче, трос вырйылъёс шедё. Озьыен, уно сюй нуллоно луоз, кык выж ӝутоно. Туэ 5,5 иськемзэ вуттыны малпаськом. Кыкетӥез бадӟым сюлмаськонмы � вашкала Сибирь сюресэз выльдон. Али ми отын кык сменаен, вахта амалэн ужаськом Выль Зятцы дорысь Сектыр гуртын, Играе сюрес кыскиськом. Ужасьёсмы шутэтскон нуналъёстэк тыршо, нуналаз куинь пол сюдӥськом. Музъем ужасьёс соос шоры паймыса учко, кизён-аран вакытэ кадь, пе, ужаськоды. Гужем нянь будэтӥсьёслы сямен ик сюрес лэсьтӥсьёслы но пӧсь йӧтэ. Вакытэз сыӵе. Кезьытэн, зор-котэн сюрес уд ӝуты. Ӵапак татын тырше одӥгез усто мастермы � машинист- экскаваторщик Евгений Ермокин. Солэн нимыз пыртэмын элькунысьтымы Данъян пулэ. Евгений Александровичлэсь вань эшъёсыз адӟем каро, со кадь ужаны тыршо. Предприятимы озьы ик ужа Шаберды�Люкшудья сюрес лэсьтонын. Туэ сое, 3,1 иськемез вуттыны кулэ, асфальт кисьтоно. Али кӧльы вӧлдӥськом но выж лэсьтӥськом ни. Милемлы кемалась оскемын Киясово�Ермолаево сюресэз вуттон. Со куинь иськем. Огъя вераса, ГУДП туэ ичизэ 16 иськем асфальт сюрес вуттыны чакла. Со пичи лыдпус шуыса эн малпалэ. Предприятие азьын эшшо бадӟым ужпум сылэ � сюресъёсты выльдон но возён. Со герӟаськемын Ижевск�Игра сюресэз тупатъянэн. Укмыс иськемысен дас куать иськемозь сое паськытатоно. Со сяна, сюресэз выльдоно Якшур-Бодья черкогуртэтӥ но Якшур гуртэтӥ. Предприятимы ас вылаз басьтӥз Ижевск�Аэропорт сюресэз. Али Позимь шур вамен выжез тупатъяськом. � Секытэн-а сётске сюресъёсты возён? � Каньыл ӧй шуысал. Сюресъёс но адями кадь пересьмо, пӧсьто. Тани предприятимы нырысетӥ асфальт кисьтӥз 1963-тӥ арын Якшур-Бодьяе нуись сюрес вылэ. Соку вань ужъёсты киын, лопатаен быдэсъязы. Нош кык ар ортчыса6 дорожникъёс нырысьсэ одӥг асфальтоукладчик басьтӥзы. Со вал 1965-тӥ арын. Тӥни озьы предприятие ялан юнма, ужъёссэ паськытатэ но быдэс республикаямы сюрес лэсьтэ ни. Кызьы солы уд шумпоты?! Табере кунгож сьӧрысь но ӟеч техника басьтыны быгатӥськом. Зэм, улон вирсэръёсты усьтыэк, соос син азьын куашкало. Со уката умой адӟиське городын. Соин ик предприятие бадӟым инты висъя отысь сюресъёсты выльдонлы-утёнлы. Тани водительёслы туж кельшиз ни Можга сюресэз термопластик амалэн шори люкон. Со котькыӵе куазен умой адӟиське. Озьы ик лэсьтӥськом кортлэсь но бетонлэсь кенеръёс. Со шудтэм учыръёслэсь уте. Сюресъёсты тупатъянъя 6 пукнт кылдытэмын. Соослы тырмыт техника висъямын. Но сюресъёсты возьыны тужгес но секыт толалтэ. Озьы ке но, ортчем тол вылтӥ одӥг машина но ӧз дугдылы, сюрес вылын нокыӵе ӝеганъёс ӧй вал. Лымыез дыраз сузяллям. � Валентин Сергеевич, кин тӥляд матысь юрттӥсьёсты? � Ваньмыз юртто. Но нимысьтыз пусйысал нырысетӥ воштӥсьме, валтӥсь инженерез Виктор Леонтьевез. Со вань ужъёсты, быдэс производствоез валаса радъя. Дорамы лыктӥз "Дормострой" трестысь 1987-тӥ арын. Со � сюрес лэсьтонысь тодӥсь-валась специалист. Озьы ик шуыны луоз 1-тӥ участоклэн кивалтӥсез Фаниль Салиханов сярысь. Со 1978-тӥ арысен ужа. Пусйыны кулэ, со вакытэ Виктор Григорьевичлэн но Фаниль Фаузеевичлэн гинэ вылӥ образованизы вал. Воштӥсьёсын но, шор ёзо кивалтӥсьёсын но огкылысь ужаськом. Мыным трос юрттэ сюресъёсты возёнъя воштӥсе Виктор Довбня. Нош экономист луыса 30 ар пала ужа ни Раиса Корепанова. Со ваньзэ вить чиньызэ кадь тодэ, предприятилэсь азьлане вамышъёссэ ӝог адӟе. � Нош азьланезлы кыӵе малпанъёсты? � Нырысь ик, ӝоггес вуттоно вал Иж котыртӥ сюресэз. Со западной шуыса нимаське, мыноз Иж тымет вӧзтӥ Шаберды черкогурт дортӥ но потоз можга сюрес вылэ Юськи черкогурт котырын. Сюрес 38 иськем кыстӥськоз. Та уж борды басьтӥським ни. Со луоз кыкетӥ категориен. Али Ижевск�Можга�Казань сыӵе сюресэн лыдъяське. Но мынам уката ӟеч малпанэ � лэсьтоно вал уката усто, нырысетӥ категориен сюрес (Москва котыртӥ кадь). Со понна луонлыкъёсмы тырмыт. Иж котыртӥ кыкетӥез но сюрес ӝутӥське ни. Со герӟалоз Як.-Бодья, Сарапул но Можга сюресъёсты. Кошкоз аэропорт дортӥ но потоз воткинск сюрес вылэ. Соку Иже данакез грузовой атомашинаос уз пыралэ ни, город чылкытгес луоз. Водительёслы но капчигес луоз � светофоръёс ӝог ширтыны уз люкетэ ни. � Валентин Сергеевич, малы сюресъёсмы кема уг чидало, ӝог куашкало? � Дорожникъёслэн вань сюрес дӥсь (одежда) шуонзы. Со сюреслэн инъетэз луэ. Сюреслэн "улонэз" но соин герӟаськемын. Валамонгес валэкто. Тани Финляндиын 80-100 сантиметр сюрес "дӥсь" тыро, нош асьмелэн � 20-25 сантиментр, яке ньыль пол ичи. Со одӥг мугез. Кыкетӥез, асьмелэн куазь туж ӵем вошъяське: я кезьыт, я пӧсь луэ. Куинетӥез, сюресъёс лэсьтӥськом вуж амалъёсъя. Азьло автомашинаосты сюресъёсъя лэсьтылӥзы, соос секытэсь ӧй вал, нош котькыӵе урод сюрестӥ пото-ветло вал. Сюрес яке выж ЗИЛ-130 автомашинаез ворме ке, туж умой вал ни. Туннэ экономика азинске. Сюрес вылэ пото бадӟымесь, секытэсь машинаос. Сюрес "дӥсь" соослы уг чида, ӝог куашка. Соин ик улон вирсэръёсмы медаз быре, кемагес мед чидалозы шуыса, воштоно сюрес лэсьтон амалъёсты. Со Россиысь сюрес агентстволэн ужез. Тӥни озьы сюрес лэсьтон туннэ нуналлэн, экономикалэн куронъёсызлы уг тупа ни. Сое выльдыны кулэ. Вылӥ категориен сюресъёсмы тросгес мед луозы. � Мар тӥледды, тужгес сюлэмшугъяськытэ? � Удмуртия сюрес лэсьтонэн юн ӝегаз. Кызьы верай ни, асфальт тырыны кутским 60-тӥ аръёсы гинэ. Ачим ужаны ӧдъяй Нылга сюресэз ӝутонын мастер луыса. Соку вал мукет ужпумъёс. Али тужгес сюлэмшугъяськытэ техникаез выльдон. Со арысь аре вужме, басьтыны уксё уг тырмы. Сюрес выт мукет азе кутӥське, техникаез выльдыны уг кыльы ни. Со мынэ сюрес, выж лэсьтыны, сое возьыны но утьыны. Музонэз сюлэм висёнэ герӟаськемын Ижен. Интыяськемын татын, предприятие выт тыре городлэн бюджетаз. Ми шоркарысь уродэсь сюресъёсты адӟыса, администрацилы ӵектӥськом сюресъёсты выльдыны, нош кивалтӥсьёслэн милемды валамзы уг поты. Соослэн одӥг кырӟанзы, милемлы, пе, кулэ "улэп"коньдон. Мар бен пӧртэмез, ми со выт коньдонэн ик городысь сюресъёсты син азьын выльдысалмы. Нош город сӥзьылозь сюресъёсты выльдыса уг вутты. ДАРТ КЫТЫН? КУ? МА? Эшъяськом 29-тӥ июньысен 6-тӥ июлёзь Удмурт Республикаысь Егитъёсын ужанъя кун комитет но "Шунды" дэменлык шаерамы улӥсь пӧртэм выжыысь пиналъёс понна "Эшъяськон" лагерь смена радъяло. Удмурт, ӟуч, бигер, пор, немец, еврей, азербайджан пиналъёс арня ӵоже ог-огенызы тодматскозы, пӧртэм калык культураен тодматскозы. Котькудӥз нунал сӥземын луоз кыӵе ке калыклы. Кылсярысь, еврей нунал ке, соослэсь яратоно сиёнъёссэс пӧралозы, нуналзэс еврей сямъёссыя, йылолъёссыя ортчытозы, ӝытазе шулдыр концерт возьматозы. Озьы ик татын национально-культурной огазеяськонъёслэн азинскон сюрессы сярысь кенешозы, пӧртэм ужпумъёсты сэртозы-пертчозы. З.ВАХРУШЕВА. Салам, Сабантуй! Кылем арняе Казань город Россилэн шоркарезлы пӧрмиз кадь. Бигер калыкен ӵош Сабантуез адӟыны татчы вуиз странамылэн президентэз Владимир Путин. Соин ӵош куно луизы Сергей Кириенко, Сергей Шойгу, Муртаза Рахимов нор мукет тодмо адямиос. Удалтӥз журналистъёслы но. Уго 21-тӥ�24-тӥ июне Татарстанлэн столицаяз ортчиз Россиысь ивор вӧлмытӥсь ёзъёслэн витетӥ фестивальзы. Пӧртэм улосъёсысь вуэм 500 пала гожъясьёс-верасьёс, книга-газет поттӥсьёс кенешизы соос азьын сылӥсь ужпумъёс сярысь, эскеризы ог-огзылэсь кызьы ужамзэс, вераськизы странаямы прессалэсь данзэ ӝутон пумысен. 24-тӥ июне журналистъёс, соос пӧлын Удмуртиысь лыктэмъёс но, шулдыръяськизы Сабантуй праздникын. Отын ик пумиськизы бадӟым куноосын. Фотоосыз И.Лебедевлэн. Владимир Путин но Минтимер Шаймиев Сабантуй праздникын. Асьме журналистъёс верасько "Комсомольская правда" газетлэн валтӥсь редактореныз Владимир Супгаркинэн. Люкаськемъёсты быгатэменыз шумпоттэ бигер нылаш. Удмуртиысь вуэмъёслы возьматӥзы бигер юртэз. ДАРТ Егитъёсын ужанъя кун комитет 1999-тӥ арын Егитъёсын ужанъя кун комитетэ пыре: 10 кун учреждение; быдэ вуымтэослы но егитъёслы юрттэт сётонъя 23 служба; быдэ вуымтэослэн но егитъёслэн 13 общественной огазеяськонзы. Пӧртэм предприятиос, министерствоос, ведомствоос юрттэмъя уже интыямын 27 952 быдэ вуымтэос, 1998-тӥ арен ӵошатыса � 148,7 процент. Калыкез дышетонъя министерствоен ӵош ортчытэмын "Профессиосъя парад", ужрадэ пыриськиз Ижевскысь 17 училищ. Промышленной предприятиосысь ужась егитъёсты уже кысконъя сюресъёс пусъемын. Воткаын ортчиз егит специалистъёслэн но егитъёслэн огазеяськонъёссылэн нырысетӥ слётсы. Удмуртиысь творчествоя коллективъёс пыриськылӥзы Россиын ортчись пӧртэм фестивальёсы но конкурсъёсы. Одӥгаз сыӵе фестивальын Ижевскысь "Воздушный Змей" рок-группа дипломен пусъемын вал. Сямлы пӧрмиз ини модая фестивальёс ортчытъян. Сояз арын со сӥземын вал А.С.Пушкинлэн вордӥськемез дырысен 200 ар тырмонлы. Отчы пыриськизы Шаерысьтымы 11 модая театръёсысь но студиосысь пинал модельеръёс. Глазовысь, Воткаысь ужъёс котьку сямен тужгес но пусйымонэсь вал. Югдурез утён удысысь егитъёс пӧлын ортчытэмын смотр-конкурс. Куинез ОМОН-ын служить карись пиос, следовательёс но участковойёс пусъемын вал кун комитетлэн премиосыныз. Быдэ вуымтэос но егитъёс пӧлын таза улонэз вӧлмытон ужрадъёс ортчытэмын. Таяз арын нимысьтыз площадкаос усьтӥськозы Сарапулын, Ижевскын, Глазовын, Воткаын, Игра но Дэбес ёросъёсын. Егитъёсын ужанъя кун комитетлэн ӵектэмезъя, 1999-тӥ арын республикамылэн бюджетаз нырысьсэ коньдон висъямын вал егит семьяослэсь улон интызэс умоятонъя 30 процентъем кредитлы. Коньдонэн юрттэмын шерысьтымы 58 егит семьялы, 1350 сюрс манет тыр. Шаерамы ужа "Егит семья" центрлэн 5 ёзэз, соос юрттэт сёто егит кузпалъёслы. 1999-тӥ арын "Егит семья" центрлэн экология ужпумъёслы сӥзем "Берегиня" лагерез 1 степенё грант басьтӥз Россиысь конкурсын. Егитъёсын ужанъя кун комитетлэн председателез вӧзын кылдытэмын Студентъёслэн советсы. Со нырысетӥ арзэ гинэ ужа али, но шаерысьтымы пӧртэм вузъёсысь студентъёс огъя ужпумъёссэс эскеронын бадӟым вамыш лэсьтӥзы. Каникулъёс дыръя студентъёслэсь лэсьтӥськон отрядъёссэс кылдытон ужъёс мыно. Арысь аре выльдӥське студентъёслэн "Дождались" фестивальзы. Кутскемын "2001-тӥ�2003-тӥ аръёслы студентъёслы юрттон" программаез дасян. УЧЫРЪЁС Виталий АГБАЕВ Ӟукыртӥсь писпу Котькуд адямилэн аслаз сямыз, манерез, выросэз. Огез, шуом, вӧен нянез ке яратэ, выросыз укыр сумбрес. Мукетызлэн сямыз ӟег нянь кадь ке, курытэныз ашкынэ. Нош куинетӥезлэн манерез голькыт, выросыз � шоккес, сямыз � коть нош кут но лаш-лаш тыр. Одӥг апоклэн (ма, ньыльдон вить пала шукке ини) мылкыд ялан голя. Ассэ весь гӧгӧрсин кожа, лэся. Пиосмуртъёс уго шораз укыр долкало. Со понна арлы быдэ одӥг кырӟанэз: "Вуж тодмое тынылиз ке, выль туганэз алдалом". Вылтӥяськон йылолыз аслэсьтыз вазьгес вордскем, лэся. Коть озьы, коть тазьы, нош улонэз бергатыны кулэ. Ӟудэм ӵӧж сямен, весь ужез вылэ чӧлскоз. Вот, пе, ӝегатӥзы. Пеймыт луэмен бертыны кӧшкемай, шуэ. Чӧльы пум быдӟа но уг ӵыжекты. Нош ачиз выль туганэз дорын сюлэмзэ буйгатэ, улон-вылонзэ кисьматэ. Кузпалыз, ма, визь тыриз ик но, пайдаез ӧз луы, лэся. Ӟичы но, курег лушкаса, тэле пегӟе. Со но озьы ик. Синкылиез трос мед луоз шуыса, синъёссэ сугонэн зыра но быдӟияськыса дусымез доры кӧче. арня пала шоккетэ выль тодмоез дорын. Бӧрысь туздыро. Апоклы нокытчы кариськыны. Алдаськон йӧн шедьтыса, дораз бертэ. Нош отын?.. Картэз уг ужа, анаезлэн пенсиез вылын улэ. Покчи нылыз школае уг ветлы � дышетӥсьёс ӟудэмын. Пиез кышноеныз люкиськем, табере дораз акырӟанъяське. Кышноез уго Быдӟым Инмарлы оске вал, кыкетӥ карт но "вӧсяськисьсэ" шедьтэм. Бадӟым нылыз вик-вак шока ик, картэз командировкаын дыръя. Отӥяз � ӧйтӧд. Нош семья, кышномурт ке тю-тю, выись корабль сямен чукинске. Ассэ шонере поттон понна кутскиз ук апокмы тылобурдо выллем чингетыны-пиккетыны: "Ваньмыз мон вылын. Мон, кышномурт, быдэс возэз нуисько. Тӥ ке � дась тыкосъёс! Кин выжые мынӥды тӥ?!" Чик кепыратэк покчи нылыз ымзэ ваяк усьтоно кожаз: "Тон выжые, мамулька". Сьӧд но, тӧдьы но вазьытэк, апокмы ульчае потӥз. Синйылтэ йӧно пиосмуртъёсты. Уз- а, пе, басылатэ каръян сюлэмзэ. Озьы луэ ини: кионэз котькӧня дышеты, визьма, со ялан нюлэскы учкоз. Бен, ӟукыртӥсь писпу сылытозяз ӟукыртоз. Ӝожомон Тӥ, эшъёсы, туганъёсы, Ойдо валче уломе. Бубыли сямен, лӧй-лӧй бергаса, сюлэм гурзэ кисьтэ кышномурт. Эктыкуз уг тыпырты. Мамыке лёгиськем кадь, капчияк ӝутка пыдъёссэ. Котыртэме мукетсэ ӧтьыса, киоссэ вӧлъя но ӧжытак мыкырске. воштэлэ, пе. Калык шулдыръяськыку, шуэ, бере эн кыле. Чабо, киоссы пульдымон чабо адямиос, пӧртэм такмакъёсты мыто. Голятӥсь кылъёсын но дырын-дырын нёръяло: Чебер марӟан инӟыез Тӧдьы изэн эн сура. Вордэм мсзо нылпиез Мукетыныз эн сура. Кышномурт ӝожомиз. Бен, мар кароз со? Улонэзлэн эсэпез сыӵе, дыр. Яратоно пиезлы сюанэн бызиз вал. Шудо улон, уно нылпи вордыны сӥзьыса, атаез мудорез но чупатӥз. Ваньмыз выжыкылын кадь вал: юртъер � сандык выллем, пудо-живот � бусьтыр. Бызем интыяз сое вордэм нылзэс кадь возизы. Секыт ужъёс палэнтэмын вал. Вот нылпи пумысен ӧз удалты. Коть виро синкылиен бӧрд! Инмарлэн кылыз куинь, шуо. Со но куинь пинал вордӥз. Куинез ик ар но уг уло � дуннеен люкисько. Кыӵе, мар сьӧлыкъёсыз понна сыӵе адӟон? Ӧйтӧд ини. Нылпи юртысь кыктоосты басьтӥзы берло. Картэз индылӥз, луоз. Табере соос бадӟымесь: огез бызиз, мукетыз дышетске на. Шат со шумпотон ӧвӧл? Кӧня ке могамез бере, кышномурт выльысь эктонэ "ышиз". Кӧтӝожзэ буйгатыса выллем мытӥз одӥг гурзэ: Инмын уясь сьӧд пилемъёс Люкен-люкен ортчыло. Пинал дырысь, ой, туганъёс Малы меда пыкыло? Бен, котькуд муртлэн адӟонэз аслаз. Сое валэн но, машинаен но уд ортчы. Со адӟонлы ик кузё луиськод ачид. Нош калык пӧлын соин уд данъяськы. Сое котьку тыршод гадь пушкад нуллыны. Соку малы куд-огез яра вылэ сылал пызьна на?А? Кыл лӧдон-тодматскон Туп кадь быглес йыро пиосмурт но мунё выллем кузь йырсиё кышномурт артэ пуко но кылзэс лӧдо: верасько, чирдо, ӟабылто, супыльто, бӧтьырто, ӟильырто, шыпырто, сачырто, лачырто, зульымӟо. Сурзэс каллен чамырто. Кылӟэс куинь час посӥзы, нош одӥг кадь малпанэ ӧз вуэ. Кенешсэс кельтоно луизы мукет дырлы. Валамон ини: огезлэн кышноез � висён вӧлдӥсь, мукетызлэн картэз � чер вайылӥсь. Нош асьсэзыз чылкытэсь кожало, лэся. Соиз но озьы: чумер шыд ке тыныле, пушнерензэ веръям потэ. Адями но пашпу Адями � пашпу кадь. Нош мульыпу огшоры будос ӧвӧл � урод музъем вылэ уз ӝутскы. Куд-огезлэн пашпу выжыысь но кӧё-вӧё музъем шедьтэмез потэ. Витьтон ар улытозяз, Пал Ладьмерыч трос интые вуылӥз. Пӧртэм улосъёсын шудзэ утчаз. Починкаяз бертыны кепыраз, вылды. Отын солы мӧзмыт потӥз. Тыметсы ӧвӧл, нюлэссы кыдёкын. Юртсы гурезь бамалын сылэ. Толалтэ, шуэ, лымыен пумӟоно. гужем, пе, шунды пыжемлы уг чидаськы. Мугорыз сутӥське, лэся. Вот ведь, адямилы сё уг яра: кезьыт � кынтэ, шуныт � какалмытэ, сӥзьыл � эбылятэ. Икуазьлэн аслаз эсэпез уго. Пал Ладьмерыч кыр палъёсы но вуылӥз, андан но ӵыжатӥз, нюлэс но кораз, пудо возьмась (чабан) но вал. Ньыль-вить ар ужа но мукет азе кӧче. Отын но маиз ке уг яра. Выльысь сюрес вылэ дасяське. Пуан чер йӧтэм, кожалод. Берло ини, тазалыкез лябӟыса, дуно потӥз, лэся, починкаез. Кепыранзэ вормиз но, пумита, пе, монэ, вордӥськем музъеме. Нош вордскем улосаз ӧй вал ни солэн корка бервылыз но. Бакча берысьтызы пашпу гинэ някыръяськиз на. Бен, пашпу мульызэ ялан сётӥз, бичаськисьёс сое утялтӥзы. солэсь узырлыксэ ӧз дунъя пуась гинэ. Пересьмыса амалтэк лулскод на: "Мурт калыкетӥ ветлыса, умойзэ ӧй адӟы. Нош ас вордскем музъемме, анай-атайме кадь, нокытысь ӧй шедьты". Сизьым пол мерта Эх, яратон, яратон! Одӥгзэ мышъяк, сулема юытэ, мукетсэ мур коже тэтчытэ, куинетӥез поезд улэ мекалске, ньылетӥез... Ма, ваньзэ вераса быдтод-а? Синмаськиськод, яратӥськод, огазьын улыны кариськиськод, нош собере? Огезлэн со, таба вылын кадь, ӵошкыт но могӟетъёстэк мынэ, мукетызлэн, пияла вылын сямен, вольыт гылӟе. Бӧрысь тэшка, пырге. Бен, улон азьзэ нокин уг тоды. Ог-огдэ гажаса кышнояськон гинэ улонэз валаны дышетэ. Нош вормытъяськон дорысь пегӟыны дыртытэ. Казахстан улосысь вуиз пияш. Оло шудзэ утчаса, оло маке ярамтэысь лыктоно кариськем удмурт шаере. Мугорыз таза: пельпумъёсыз � вӧш пасьтаесь, кык метр ӝуждалаем, киосыз сандал кадесь. Нош пыдъёсыз � ой-ёй, берпуметӥ размер. Сыӵе муртлы мугор утись луоно вал, дыр. Со ке заводэ интыяськиз. Рабочийёс пӧлын, пе, сюлэмлы ыркыт. Уж ужен, нош пинал мылкыд шуныт инты утча. Утчась мурт шедьтэ, шуо. Синйылтӥз одӥг нылмуртэз. Мугорын, ма, тэшкыльтымон ӧвӧл, но ымнырын укыр кильтро. "Мынам роза сяськае", - шуылоз вал. Со роза сяськалэн эшшо пичильтык "розаез" вылэм на. Мар карод? Яратон � картошка ӧвӧл, укноетӥ уд сэрпалты. Кутӥз но нотариус пыр солы атай кариськиз. Уже мынон-ветлонэз герӟаськиз нылпи садэн. Укыр шумпотэ, пичи кикыос ӟыгыртэмысь. Сюлмыз ик лычсузе. "Тырмоз общежитиын улыны, - шуэ кышноез. - Квартира басьтоно". Улон инты понна песьтэред пульдэмын мед луоз. Та уж борды итӥськиз пияшлэн анаез. Аслаз ук, одӥг гинэ пиез. Кык комнатаен квартира кузьмаса кошкиз со Казахстан палъёсаз. Ул но шумпот вал егит семьялы. Ӧвӧл, озьы вылымтэ ай. Ческытэзъя ческытсэ веръям потэ, шуо. Ӝыны ар ортчыса, "роза сяська" музонэзлы синмаськем. Эсьма, пичи нылзэ но дышетэм пыртоссэ "папонька" шуыны. Табере пияш мултэс. Нош кыӵе потэ вал солэн калык радъя улэмез!.. Вот ведь: шуак-дуак лэсьтэм ужъёс кыӵе могӟетэ вутто! Бен вал ик-а отын яратон? Оло, яратэмъяськон гинэ со? Ӧйтӧд ини. Созэ ачиз шайтан но вераны уз быгаты, дыр. Соин ик сизьым пол мерта, огпол ванды, шуо. Берло дыре город сьӧрысь сюресъёсмы шӧдскымон умоязы, вольытэсь но паськытэсь луизы. "Удмуртавтодор" кун предприятилэн 28 ёзэз пӧлысь устоез, огсыр умой ужасез луэ Ижысь сюрес лэсьтонъя кун унитарной предприятие (ГУДП). Со интыяськемын город вӧзы 7 иськеме. Сое сюрес лэсьтӥсьёслэн посёлоксы шуо. Предприятие ужа Завьялово но Якшур-Бодья районъёсын. Ӵапак татын котькытынлэсь тросгес лэсьтэмын чебер асфальт сюресъёс, татӥ ортчо федеральнойёсыз но (72 иськем). Предприятие 512 иськемлэсь уно сюресъёсты чакласа возе, туапатъя но выльёссэ лэсьтэ. Со сяна, эскере кортлэсь но бетонлэсь 36 выжез. Предприятие син азьын будӥз. 1970-тӥ арысен ваньзэ 360 иськем асфальт сюрес лэсьтӥз ке, со пӧлысь 100 иськемез вуттэмын берло дас ар ӵоже, секыт выльдӥськон дыре. Со узыр туала техникаен, тракторъёсын, бульдозеръёсын, самосвалъёсын но мукет автомашинаосын. Предприятие ваньзэ оскымон, ӟеч быдэсъя. Соин ик "Удмуртавтодор" солы бадӟымесь ужъёс оске. ЖКХ-ЫН ВЫЛЕЗ Кинлы дуно дворец � кинлы начар юрт Ижевске люкаськылӥзы "Уралысь городъёс" ассоциацие пырем городъёслэн жилищно- коммунальной хозяйствоосынызы кивалтӥсьёс. Та огазеяськонэ туннэ люкаськемын Уралысь но Западной Сибирьысь 25 городъёс. Ужрадэ пыриськизы 15 городысь лыктэм адямиос. Ассоциацилэн кивалтӥсез А.Ярошевский люкаськемъёслы валэктӥз, малы та кенешонэз ортчытоно кариськизы Ижевскын. Жилищно-коммунальной хозяйствоен кивалтонын Ижевскын, пе, аспӧртэмлыко амалъёс шедьтэмын. Со сярысь пыр-поч валэктӥз Ижевск городлэн администрациеныз кивалтӥсьлэн воштӥсез, Ижевскысь ЖКХ-лэн кивалтонъя компаниезлэн тӧроез Сергей Александрович Трухин. Азьло аръёсы городысь данакез улон юртъёс предприятиослэн ваньбуренызы лыдъяськылӥзы. Табере тросэз соос муниципалитетлэн ваньбурез луизы. Озьы берло аръёсы городлэн ЖКХ-ез верантэм паськытаз. Соин кивалтонэз но выль сямен радъяно луиз. Табере кылдытэмын ни, шуыны луоз, ЖКХ-лэн кивалтонъя нимысьтыз компаниез. Огкылъёс гожтыса, со кусыпъёс юнматӥз городысь банкъёсын, бюджет организациосын, субсидиос висъянъя центрен, ведомствоослэн улон юртъёсынызы но мукет организациосын. Мукет сямен вераса, та удысъёсын кусыпъёс тупатыса, ЖКХ-лэн компаниез уногес коньдон люканы амал шедьтӥз. � Коммунальной услугаослы дунъёсты будэтыса гинэ городысь юртъёсын улӥсьёслэсь улэм-вылэмзэс уд умояты, � шуиз С.Трухин. � Мукет амалъёс но утчало. Городысь юртъёсты возён понна трос коньдон кулэ. Нош бюджетысь коньдон коркаосы шуныт сётон понна гинэ висъяське. С.Трухинлэн верамезъя, али Ижевскысь куд-ог юртъёсын пуктылэмын ни шуныт сётонэз мертанъя приборъёс. Кылсярысь, "Север" микрорайонын сыӵе приборъёс пуктылэмен, кылем арын 6 процентлы шуныт шыръямын вал. Нош Холмогоров урамысь 18 номеро юртын пуктэмын шунытэз чакласа возись автоматикая ёз � соин валче татын кылем арын шунытэз 22 процентлы утьыны луиз. Таӵе амалэз, оло, паськытгес но кутыны луысал, но Россиын сыӵе оборудованиез одӥг предприятие но уг потты, дуно дунын кунгож сьӧрысь басьтоно луэ. Зэмзэ но, городын улӥсьёслы туж тодмо таӵе югдур: кезьыт куазен квартираосысь батареяос туж ляб шунто, нош шуныт дыръя малы ке соос пӧсесь луо. Кӧня лек кылъёс соку сӥзиськом ЖКХ-ын ужасьёслы. Но соос бордысь гинэ со уг поты вылэм. Ижевскысь ЖКХ-лэн кивалтонъя компаниез туэ февраль толэзьысен квартиралы тырон дунъёсты 30 процентысен 40 процентозь будэтӥз. Кыкетӥ паларысен кутскыса, соос 50 процентозь будэтэмын луозы. Таӵе вамыш лэсьтоно луэ, "Удмуртэнерго" ОАО-лэн электрокужымлы но шуныт сётонлы тариф дунъёсты будэтэменыз. Зэм, калыклы но, предприятиослэн кивалтӥсьёссылы но со уг кельшы. Но тани мар паймытэ, пусйиз С.Трухин: макем пичиесь луо коммунальной дунъёс, сокем лябгес адямиос соосты тыро. Нош услугаослы дунъёс будэмен, югдур воштӥськиз, табере квартиралы тыронъёссэс городын улӥсьёс сокем уг ни ӝегато. Ма, кызьы бен ӝегатод, 2-3 толэзь пала ке ӧд тыры, квартиралы тыронъёс йырвылозь тубозы ук. Шонерзэ верано ке, "Удмуртэнерголэсь" дунъёссэ туэ уг ни вормо куд-ог предприятиос но организациос. Соин ик асьсэ коже ужась котельнойёс пуктыло. Россиын огез валтӥсь монополист РАО ЕЭС луиз. Кенешонын вераськон мынӥз вуэз чылкытатӥсь приборъёс пуктылон сярысь но. Сыӵе прибор асьме дорын лэсьтэмын ни, сое эскерон городын 13 ар кыстӥське ини. Кыӵе микрорайонъёсы соос пуктылэмын, отын со дыр ӵоже огпол но ву гумыос воштэмын ӧй ни вал. Кислород вуэ уг сюры, соин ик гумыос уг сыномо. Табере сыӵе приборъёсты данакен поттыны кутсконо. Ужрадэ пыриськемъёслы возьматӥзы Ижысь эксперимент амалэн лэсьтэм юртъёсты, кытысь соос адӟыны быгатӥзы выль приборъёсты. Вуылӥзы К.Марк нимо урамысь 208 номеро юртэ, кытын интыямын шуныт сётонэз чакланъя управление. Куноос озьы ик тодматскизы Ижысь ЖКХ-лэн кивалтонъя компаниезлэн ужась ёзъёсыныз. Асьме городын азьланяз выль юртъёс ӝутскозы, вань туала куронъёсты чакласа. Соку, оло, Уралэз гинэ ум, Европаез но азьпалтомы адӟем карымон юртъёс пуктонъя. Но та ужлы, валамон ини, асьме кисыысь но коньдон кошкоз. Нош та дыре Ижын улӥсьёс пӧртэм юртъёсын уло, кин пулэсь коркаосын, кин "хрущевка" шуонын, кин "ульрасовременной" юртъёсын. Кылсярысь, та кенешонын улонмылы ёрмисьёслэн ужпумзы ӧз ӝутскылы. Вуоно даурын городмес чебермалозы ке но дуно юртъёс, ваньмызлы отын улыны шуд уз усьы, вылды. Т.БАННИКОВА. Йыр висён дышетӥсьлэн ужез урокен уг йылпумъяськы Туж сюлэмшугъяськытӥсь югдурез эскеризы асьсэлэн коллегиязы калыкез дышетон удысэн кивалтӥсьёс. Быдэс обществомес сямен ик соосты туж сюлмаськытэ но кышкатэ пиналъёс пӧлын наркотикъёслэн вӧлмемзы. Россиын кылем арлэн кутсконаз 315 сюрс наркоман вал. Со пусъемъёсыз гинэ. Зэмос лыдпус дас поллы тросгес луыны быгатоз. Тросэз 12 аресъем пиналъёс наркотикез шӧмъяло ни. Соос уг малпасько та шузияськонлэн бервылъёсыз сярысь. Медикъёслэн эскеремзыя, берло дыре гинэ та муген кулон учыръёс 7-14 поллы йылӥзы, соос пӧлысь данакез � быдэ вуымтэослэн асьсэды быдтон учыръёс, аляло СПИД, ӵужектон, туберкулёз но мукет висёнъёс. Кызьы нюръяськоно та кылен? Валче, шуизы коллегилэн ужаз пыриськемъёс. Кемалась огазеяськоно ни вал югдурез утёнъя, тазалыкез утёнъя но калыкез дышетонъя ёзъёслы. Нимаз наркомания вормонтэм. Наркоманъёс тросгес дышетскисьёс пӧлын. Соос кышкыт йыружъёс лэсьто, эмъяськонлэсь пегало. Собере, эмъяса но сыӵе пинал выльысь со вотэсэ шеде: со ик эшъёс, со ик валасьтэм анай-атайёс, дышетӥсьёс. Вить ар ортчыса, югдур туж кышкыт луыны быгатоз, соин ик тросгес саклык висъяно наркоманиез алонлы: иворез вӧлмытон ёзъёсын ужано тросгес, нимысьтыз педагогъёсты но психологъёсты дасяно, пиналъёс пӧлын валэктон-алон уж нуоно. Котькуд ронолы косэмын школаосын наркотикъёслы пумит нюръяськонъя но алонъя ужрадъёс кутыны. Коллегиын калыкез дышетонъя министр Любовь Захарова шараяз на эшшо одӥг умойтэм югдурез. Прокуратураен ортчытэмын вал республикаысьтымы профессиональной училищеосын эскерон. Законэз тӥян учыръёс данак шараямын. "Азьветлӥсьын" � Ижевскысь 4 номеро училище. Та дышетсконтӥын кивалтӥсьёс ас тодэмзыя пиналъёслэсь документ (заявление, справка) гожтэм понна дун курылӥллям, дышетскыны пырон куронъёсты чурытатӥллям, уроксэс келлясь, юылӥсь пиналъёсты стипендитэк келляллям но трос мукет. 132 сюрс манет коньдонэн ас тодэмзыя кузёяськиллям 26 номеро училищеын: дышетскисьёсты сюдонлы висъям коньдонэн холодильникъёс басьтӥллям, шулдыръяськон ӝытъёс ортчытъяллям. Сыӵегес ик сьӧлыксы Сарапулысь 5 номеро училишеысь кивалтӥсьёслэн. Трос юанъёс училищеослэсь интызэс, Ваньбуръя кун комитетэн вераськытэк, арендае сётэм пумысен. Ваньмыз кивалтӥсьёс законъя кыл кутӥзы, шуиз министр. Вуонояз коллегиын чакламын "Гуртысь дышетонэз азинтон" федерально-региональной программая кенешыны. З.РЯБИНИНА. ДАРТ Кытын "дуро" зарни медаль? Учалан но Ӟатчалан "Инкуазь-анай! Таӵе нылпиостэ Тон дуннелы ыстылыны вунэтысал ке, Чалмысалыз улон ӧрмы". Кыӵе нылъёс-пиос сярысь вера быдӟым поэт, тодмо. Ӵапак соослы � визьлюкъёслы луыса, азинске улонмы. Котькӧня мед вераськозы обществолэн деградациез сярысь, платонъёс но сократъёс котьку вал но, луозы но. Одӥг Удмуртиын гинэ арлы быдэ данак пиналъёс школазэс зарни медален йылпумъяло. Туэ соос 230 кузя. 230 нылъёс-пиос пусйизы асьсэлэсь "Кизили чассэс" 21-тӥ июне. Удмурт Республикаысь Кун Кенешлэн Тӧроез Александр Волков но калыкез дышетонъя министр Любовь Захарова соослы 11 ар "пӧсяса" тыршемзы понна зарни медаль сётъязы. Ӵок, медаль чылкыт зарнилэсь ке ӧвӧл, солэн данэз дуно. Кӧня уй-нунал кӧлытэк потэмын, кӧня тунсыко футбол матчъёс, шулдыр дискотекаос кельтэмын � со сярысь тодо асьсэос визьпогъёс, соослэн атайёссы но дышетӥсьёссы. Табере тани капчи шокчы ни кадь. Кытын, пе, со? Кутске уката "пӧсь" вакыт. Институтъёсы, академиосы пырон понна медалистъёс вступительной экзаменын но ӟеч тодон-валанзэс возьматыны кулэ. "4" соос понна � бадӟым кайгырон. Алнаш ёросысь Варзи-Ятчи школаысь Андрей Зиновьевлэн но Лена Китовалэн анайёссы нылпиоссылэсь зол сюлмасько. Любовь Григорьевна Китова, нылы экзаменъёс сётыку, уйме но ӧй кӧла, шуэ. Лена солэсь сюрессэ бырйыны � экономист луыны � малпа. Вузэ пыронлэсь ӧжыт кышканзы вань ке но, оско, малпамзы одно быдэсмоз шуыса. Нош Андрей ассэ юриспруденцилы сӥзьыны ӧдъя. Тунсыкъяське экономикаен но. Школаын дышетскыкуз со районын но республикаын ортчылӥсь олимпиадаосы пыриськылӥз, ӵемысь вормисе потаз. Андрейлы туж вожъяське Борис выныз. Солэн ай ваньмыз азьпалан на. Табере, пе, мон но сюлмысь тыршо. - Секыт-а бен медаль басьтыны? � юасько Андрейлэсь. Ӧвӧл, шуэ. Астэ жалятэк тыршыны гинэ кулэ. Дасэтӥ классозь, пе, дышетсконэз ӧй ик шӧдылы, капчи потылӥз. Берло кык арзэ ини тросгес сюлмаськоно луиз. Юрттӥзы семьяосы но, (анаез � дышетӥсь), мукет дышетӥсьёс но. Та школаысь ик Гаранькина Надя но зарни медаль басьтӥз. Паймод но, шумпотод но � гурт школаосын дышетон ляб пуктэмын шуо. Озьы ке, поттыны быгатысалзы-а соос араз куинен-ньылен зарни визьёсты? Паймытӥзы на тани Можга районысь Бадӟым Уча школа (медалист) но Шаркан районысь Быги школа (кык медалист). Со пумысен малпанзэ тодэммы потӥз республикаысьтымы калыкез дышетонъя министрлэн 1-тӥ воштӥсезлэсь Галина Васильевалэсь. � Мон туж шумпотӥсько, гурт школаосысь сомында медалист поттыны быгатэмзылы. Тау дышетӥсьёслы, директоръёслы, асьсэлы пиналъёслы. Ваньмыз, нырысь ик, соос бодысь потэ: огез бӧрсьы мукетыз кыстӥське, малы ке-а одӥг классын кык-куинь медалист луэ, мукетаз � чик ӧвӧл. Гуртысь но городысь пиналъёслэн (медалистъёслэн) тодон-валанъёссы чик уг висъясько, шуысал мон. Гуртысьёс эшшо етӥзэсьгес луо ай, капчиенгес интыясько но � соослэн шӧдонзы-валанзы бадӟымгес, чиданзы юнгес, муртлы осконзы ичигес. � Уг кулэсмы-а, кылем аръёсын ӵошатыса, визьмо пиналъёсмылэн лыдзы но кыӵегес югдур бускель республикаосын? � Уг, уг кулэсмы. Кудӥзлы та лыдпус трос потэ, вань на ук ай ньыль сюлэсь трос азвесь медален школазэс йылпумъям пиналъёс. Мукет реаспубликаосын ӵошатыса, лыдпусъёс огкадесьгес. ...Ӵузъясько школа сярысь кырӟанъёс. Берпуметӥзэ бугырто на соос пиналъёслэсь сюлэмъёссэс. Отӥяз � институт аудиториос, лекциос, сессиос, наукаез "йыръён" - огкылын. Нош Нобель преми доры нырысетӥ вамыш соос туннэ лэсьтӥзы ни. З.РЯБИНИНА. Ушъямон нылъёс но пиос Дас одӥг классэз йылпумъяса, Юкаменск ёросысь 184 нылъёс но пиос потӥзы азязы усьтӥськем сюрес вылэ. Соос пӧлысь 91-ез � Юкаменск шор ёзо школаысь. Таос пӧлын ӟеч дышетскеменызы висъяськизы вить нылъёс: школаез зарни медален быдтӥз Ольга Сысоева, азвесен � Наташа Арасланова, Таня данилова, Марина Васильева но Маша Ходырева. Тросэз пиналъёс басьтӥзы ушъян (похвальной) грамотаос: кыӵе ке предметъя тужгес ӟеч тодон-валанъёссы, спорт удысын тыршемзы яке кибашлы луэмзы понна. Т.ПОЗДЕЕВА. ЭКОНОМИКА Ӵыжатэм кортлэн ошмесэз Берло журналистъёсын пумиськонъёс ортчо предприятиосын. Сыӵе ужрад ортчиз ни Ижысь подшипник поттон заводын. Алигес журналистъёслы возьматӥзы акциосын "Ижевский литейный завод" огазеяськонэз. Газетъёсын, радиоын но телевидениын ужасьёс тодматскизы предприятилэн ужаменыз, ваньбур поттэменыз. Предприятилэн улон сюресэз бадӟым ӧвӧл на. 16 ар гинэ. Кылдӥз вал со Оборонной промышленностья министерстволэн бурд улаз. 80-тӥ аръёсы быдэсъяз бадӟымесь заказъёсты. Уго обороная предприятиослы трос кулэ вал алюминий, магний, бронза � соку завод Ижысь ЭМЗ-лэн ёзэныз лыдъяське вал ай. Выльдӥськон вуэм бере, литейной завод быдэс кунысь предприятиослэн "азинскон" сюресэтӥзы ортчоно луиз. Тужгес но секыт югдур 1996-тӥ арлы кылдӥз. Соку АО араз 6 миллион манет тыр гинэ продукция поттӥз. Нош пунэм тыронэз 26 миллион люкаськиз. Заказъёс быризы. Завод султӥз. Вылаз ик, электротылэз кысӥзы на. Озьы предприятие банкрот калэ вуиз. 1997-тӥ арын август толэзе палэнысь кивалтӥсь юнматэмын вал. Заводэз улӟытыны оскизы Ижысь "Нефтемаш" предприятиын 30 ар ӵоже ужам муртлы Викетор Овечкинлы. Выль кивалтӥсьлы кылдэм югдур туж шимес потӥз. Но ӧз кышка. Мылкыдыз вал заводэз куинь толэзь куспын интыысьтыз вырӟытыны. Овечкинлы кивалтон удысэз выльдон бордысен кутсконо луиз. Котыраз люказ оскымон воштӥсьёссэ, ужпумез валась муртъёсты. Радъязы заводэз утён удысэз, юнматӥзы дисциплинаез. Дуно кортэз лушкан учыръёс ичиёмизы. 1997-тӥ арын дасязы кинлы сётэм акциосын пакетэз вузанъя программа. Озьы 16,6 миллион манет инвестициос басьтыны быгатӥзы. 8 миллионзэ предприятиез выльдонлы висъязы, кылеменыз пунэмзэс тыризы. 1996-тӥ арын шорлыдо уждун 400 манет вал, сое но ӝыны арлы ӝегатыса тыризы. Табере кык ар ӵоже ни уждун ӝегатэк сётъяло. Солэн быдӟалаез туэ 1900-озь вуиз. Миым завод пайда вайыса нырысетӥзэ ужаз. Озьы ик нырысетӥзэ сётъязы акциослы дивидендъёс. 1999-тӥ арын 29-тӥ мартэ Удмурт Республикаысь Вылӥ арбитраж судлэн решениезъя палэнысь кивалтон быдтэмын вал. Валтӥсь директор луиз Виктор Иванович Овечкин. Пунэм тыронзэс туэ быдтыны быгатӥзы. Нош продукция поттонзы, 96-тӥ арен ӵошатыса, 1650 процентлы йылӥз. Огазеяськонын дасям арбериосты басьто Татарстан но Москва. Соослы тужгес но кельше татын поттэм ӟусъёс. Жаляса верано, Ижевсклэн администрациез заводлэсь пуконъёссэ сӥлы уг кары, мукет интыосысь вае. Туж устоесь но чебересь ӧсъёс, укно янакъёс лэсьто заводын ужасьёс. Улон-вылонын кулэ луись арбериосты басьяло Россилэн котькуд сэрегъёсаз. Заводын кисьтэм дуно кортъёс кулэ нефть поттӥсьёслы, обороная предприятиослы, химияя промышленностьлы, автомобиль поттонлы. Кылсярысь, Ижевскысь ЭМЗ-ын потӥсь ТОР-ёслы татын 500 ёзъёс дасяло. Умой кусыпъёс тупатэмын Башкортостанэн, Сибирь улосъёсын, Москва котырысь заводъёсын. Али акциосын огазеяськон выль ужасьёсты кутэ. Со пумысен котькытысь лыдӟыны, кылыны но адӟыны луэ. Соя валаськом: "Ижевский литейныз завод" ваньбур поттонзэ паськытатэ. А.АНДРИЯНОВ. Заводлэн валтӥсь директорез В.И.Овечкин. Ӵыжатэм алюминиез формае кисьто. Туспуктэмъёсыз В.Камашевлэн. НАТАЛЬ Мон янгыш, таӵе дуннее вордӥськемысьтым, яке Сьӧлыко муртлэн ӧпкелёнэз Пӧсь, окыт. Шунды сиос жалятэк пыжо. Музъем эгырӟиз ини. Ой, кыӵе юэме потэ. Анай, вай мыным ву. Но куремме со уг кылы, кышкаменым куарае быриз. Йырме ошыса, луть-лать вамышъясько анае сьӧры. Мыным возьыт луыны кулэ анай азьын, но мон уг возьдаськиськы. Нош лул пушкы вӧсь луэмысь уг чидаськы, кытчы пырон инты уг шедьтӥськы. Инмаре, бен, сьӧлыкай, со понна ик вӧсяськисько али. Вань янгышъёсы понна лэзь сьӧлыкъёсме. Анай азьын гинэ вӧсьме возьматыны уг яра, солэн вожез потоз. Куара поттытэк вамышъясько сьӧраз. Анае, вож нуныме пыдтӥз кутыса, йырин уллань нуэ, собере лек шунды шорын пӧсям изъёс шоры сэрпалтэ. Бӧрдонэ гадь тырам, синкылиосы бам кузям. Анайлэн ымнырыз измем, оло, одӥг вирсэрез но ӧз вырӟы, со озьы ик азьлань кошкиз. Нош мон сэрпалтэм пиналы доры бызи, оло, утьыны вуо на малпай. Пӧсь шунды соку ик ненег луиз, азям юзмыт вуэн ошмес но салкымез кузьмась куакъёс кылдӥзы. Бӧрдонэ пӧсьтӥз. Нылпиме киям кутӥ, нош со лултэм мунё кадь. Шуак сайкай, кыллисько больница койкаын... Алёна азьло ик малпаз, пинал шедиз ке, абортэ мыноз. Озьы ик лэсьтӥз. Солы кызь арес ини, яратӥсь пиосмуртэз но вань. Но мар муген нылпиезлэсь куштӥськоно кариськиз? � Алёна, нылпитэк кылёд шуыса уд кышаськы-а? � Кышкасько. Нылпиме утьыны уг быгаты шуыса ик абортэ но мынӥ. Кыӵе мынэсьтым анай луоз � валанэ ик ӧвӧл. Мон пиналэз кӧтам ӧй нуллысал, соку ик кык-куинь аресъем мед луысал со. Собере, нылпие луоно шуыса тодысал ке, анае монэ гуртысь уллясал. Малы мон солэсь сокем кышкасько? Уг валаськы. Секытэн луэмме тодыса, пиосмуртме но яратэмысь дугдӥ... � Нош малы секытэн луэмедлэсь сокем кышкаськод? � Ӧйтӧд, со анайлэн кылъёсыз бордысь но потэ, дыр. Мон ӧй кылылы солэсь секытэн луон сярысь умоен вераллямзэ. Йырыз кур дыръя шуылӥз: "Оскалты гинэ мирошка вайыны, кытысь шедьтӥд, отчы ик улляло". Анаелы верасько сое гинэ, ма понна мыным уз йӧты, соин ик троссэ ватоно луэ. Яратон сярысь ми соин ноку но ӧм вераськылэ. Со монэ али но пичиен лыдъя яратон но пиосмуртъёс сярысь умой-умой вераськыны. Вань малпанъёсы но мылкыдъёсы пушкам, эшъёсылы но ваньзэ уг вераськы. � Нош яратоно муртэд тодэ-а малпанъёстэ, ма каремдэ? � Секытэн шуыса верай вал, нош абортэ мынонме ӧй поттылы. Куке пумиськимы ке, алдай вал шуо. Ма солы но курадӟыны кулэ? Мед аслыз умойзэгес кышно шедьтоз. Мон пиосмуртэн ӵош улыны уг быгаты, дыр. возьыт семья кылдытыны. Кылем улонам монах яке монахиня вал, дыр, мон. � Аборт лэсьтӥсьёсты сьӧлыко адямиен лыдъяло, кулэм беразы инмар азьын кыл кутоно луозы, шуо. � Асьмелэн улонмы сыӵе: ожъёс, адямиез виён учыръёс. Чечняын бырем пиос сярысь шуо: "Погиб доблестно, с честью". Кулон ноку но умоен ӧз лыдъяськы, уз но лыдъяськы � адями шудо улыны вордӥське. Дырызлэсь вазь кулэм мурт инкуазьлэсь огъясь кужымзэ быдтэ. Чакла ачид, оже пыриськытэк, кӧня адями ассэ ачиз быдтэ. Нош наркотикъёслэсь но водкалэсь кӧня мурт нуналаз быре? Сомында ик, кӧня нуналаз аборт лэсьто нылкышноос. Кулон но курадӟон киземын адямиос пӧлы. Мукет сямен улыны уг валало ни, лэся. Али ке но пель сьӧрам кулон сярысь таӵе кылъёс. Песянае шуоз вал: "Ку гинэ кулом на? Кулыны но уг валаськы. Кулон уг вуы дорам". Ӵужапаелэн верамез: "Ярам, дырызлэсь вазь кулӥз, курадӟонэз ӧз адӟы ни..." Мамалэн кылъёсыз: "Чатран люкетъёс, ма понна гинэ мон тӥледыз вордӥ? Пичи дыръяды ик виылоно вылэм". Мынам малпанъёсы: "Озьы даллашид на ке, кутско но куло". Нылпиелэн малпаськемез: "Кулӥ". Мон янгыш, таӵе дуннее вордӥськи шуыса. Монэ озьы будэтӥзы. Нош мон, шузи, попугай сямен быдэсъяй вань косонъёсты, ӧй ик малпаськылы улон сярысь. С.ПЕТРОВА. УДМУРТ РЕСПУБЛИКАЫСЬ ПРАВИТЕЛЬСТВОЫН Бюджет выльдӥськоз Экономикалэн валтӥсь удысъёсаз ваньбур поттонлэн будэмез, му вӧйлы, чагыр эстӥськонлы но мукетызлы дунъёслэн йылэмзы луонлык сётӥзы бюджетэ чакламлэсь трос коньдон пыртыны. Республикалэн бюджетэзлэн ас доходъёсыз 5 толэзь куспын 159 процентлы быдэстэмын, планлэсь вылтӥ 371 миллион манет люкамын. Со сяна, вуиз на берыктонтэм вылысь 392 миллион манет. Ваньмыз со Правительстволы луонлык сётӥз 2000- тӥ арын бюджетэ воштонъёс но ватсанъёс пыртон сярысь ужпумез эскерыны. Сыӵе ӵектонъёсын тодматӥз коньдон ужпумъёсъя министр Владимир Бельтюков. Тужгес трос коньдон � 201,8 миллион манетлэсь трос � ыстыны чакламын интыосысь кылдосъёслы (образованиослы) коммунальной услугаос понна но мукет тыронъёссэс берыктон понна. Озьы ик коньдон висъямын луоз гурт удыслы: кылсярысь 11-тӥ июнёзь одӥг тонна йӧл понна 110 манет дотация сётӥське ке вал, табере гуртын тыршисьёс басьтозы 337 манет. 43,1 миллион манетлэсь трос мыноз бюджет удысысь организациослы но учреждениослы коммунальной юрттэт понна тыронъёссэс быдтыны. Нылпи пособиослы чакламын 20 миллион манет ыстыны. Со сяна, 60 миллион манет инвестициос чотын висъямын луоз калыкез улон-вылонын утён удысысь программаосты но проектъёсты улонэ пыӵатыны. Ватсаса юрттэт вуоз жилищно-коммунальной комплекслы, транспортлы но калык хозяйстволэн мукет удысъёсызлы. Правительствое пырись муртъёс Коньдон ужпумъёсъя министерстволэсь ӵектонъёссэ умоен лыдъязы. "Удмурт Республикалэн "Республикалэн 2000-тӥ арлы бюджетэз сярысь" Законаз воштонъёс но ватсанъёс пыртон сярысь" законлэн инъетэз сессиын эскерон понна ыстэмын луоз Кун Кенеше. Со сярысь ивортэмын 26-тӥ июне Правительстволэн кенешоназ. Ужрадэз нуиз премьерлэн нырысетӥ воштӥсез Юрий Питкевич. Мед кужмоялоз вожвылъяськон Россиысь Правительство 1997-тӥ арлэн пумаз жилищно-коммунальной юрттэт сётонъя рынокын монополистъёсты быдтон но вожвылъяськонэз (конкуренциез) азинтон сярысь постановление кутӥз вал. Ӵапак со сярысь вераськон мынӥз Правительстволэн кенешоназ 26-тӥ июне. Отын пусъемын вал: шаерамы та удысын вожвылъяськон вань ини. Куд-ог предприятиослэн кивалтӥсьёссы валазы но шӧдӥзы коммунальной юрттэт сётонлэсь пайда ваемзэ. Правительстволэн постановлениеныз юнматэмын 2000-тӥ�2003-тӥ аръёсы вожвылъяськонэз азинтонъя валтӥсь удысъёс. Отын, кылсярысь, верамын, улон юртъёслы кузё луись организациос пӧртэмесь луыны быгато шуыса. Соин ик улон коркаослэсь кузёоссэс эштосъёсы (товариществоосы) огазеяны луысал. Соос асьсэос кивалтон амалъёсты, соизэ яке таизэ подрядчикез бырйысалзы. Ӵапак со бордысь потэ ук жилищно- коммунальной юрттэтлэн дуныз но ӟечлыкез. Ма лэсьтэмын миым "Удмуртавтодор" кун унитарной предприятилэн кивалтӥсез Александр Соловьев Президиуме пырись муртъёсты тодматӥз сюрес фондлэн бюджетэзлэн 1999-тӥ арын быдэсъяськеменыз. Республикаысь сюрес фондэ миым 406 миллион манетлэсь трос коньдон вуиз. Ӵапак сомындалы ик ужъёс быдэстэмын. Федеральной сюрес фондлэн доходъёсыз 70 миллион манет люкаськизы. Коньдон мынӥз сюресъёсты но выжъёсты тупатъянэ, пӧртэм ужан тӥрлык басьтонэ, Казань�Малмыж�Пермь�Екатеринбург сюресэз лэсьтонэ но мукет ужъёсы. Собере эскеремын Правительстволэн "Удмурт Республикалэсь сюрес фондзэ кылдытон но уже кутон радлык сярысь" Постановленияз воштонъёс но ватсанъёс. Соос чакламын "Удмуртавтодор" ГУП-лэсь ужзэ умоятон понна. Институт юрттэт басьтоз Пыӵал тӥрлык поттон удыслы вылӥ квалификациен специалистъёсты дасян вылысь, кун ласянь юрттэт сётыны чакламын М.Т.Калашников нимо институтлы. Кылдытэмын но юнматэмын нимысьтыз план. Соя специалистъёсты дасяны кун заказ сётӥськоз, озьы ик азьвыл ик чакламын луозы наукая ужъёс, конструкторъёслэн разработкаоссы, дышетонлы коньдон но кулэ луись тӥрлык висъян. Правительстволэн Президиумезлэн кенешаз мукет ужпумъёс но эскеремын. Удмурт Республикаысь Правительстволэн пресс-службаез. НАТАЛЬ Шумпотылӥ ӝыны шорем няньлы Толалтэ. Ӟырт кезьытлы чидатэк, коръёс пилиськыло. Укноос тӧдьы шубаен шобырскемын. Анаймы нюлэс коранын, ми гуртэ песяенымы кылемын. Пинал маослэн ке бызьылэм но потэ. Песяймы корт гурт вылысь пӧзись шыдэз пол вылэ пуктэм. Выны сьӧры уиськыкум, соиз быректэм вуэн тусьтые лёгиськиз. Ой, мар вал соку! Выны вӧсь луэмысьтыз чир! поттэ кесяське, нош мон сэндрае пегӟи. Песяе, оло, визьтэммиз куалектэменыз... Йыгаськем куараез кылыса, корказь ӧсэз усьтӥ. Анае нюлэс коранысь, олокӧня иськемысь, пырак пыдын бертэм. Сокемын луыса но сюлэмыз шӧдэм милемын умойтэм луэмез. Ӵукна нош ик йыгаськем куара кылӥськиз. Потӥсько но, азям воргорон сылэ, нэнэме юа. Озьы сое, нюлэскысь пегӟиз шуыса, пӧсьвуаськем пиеныз ӵош конюховкае ӵогазы. Песяе картофка пыжиз но монэ доразы келяз. Пыреме уг луы, укноос тан-тан кынмемын, номыр уг адӟиськы. Пелляса шунтӥ лымыез, учкисько, анае кесяськыса бӧрдӥсь пиеныз сэргын пуке. Одӥг сутка пукиз со отын но, нош ик нюлэскы лэзизы. Инкуазь но, инмар но юрттӥзы, лэся, вынылы - пыдъёсыз бурмизы. Таӵе курадӟонъёсты война вылтӥ адӟиз вань калык. Сием потонэз тодӥсьтэмез трос ик ӧй вал соку. Куд-огез соос пӧлысь ватӥськыса сиськиз, нош кудӥз кепыранэз но ӧз тодылы. Озьы ке но, вал адямиез валасьёсыз. Мон улытозям тау карисько кышноослы, кудъёсыз, туж сием потыкум, ӝыны шорем ке но няньзэс сётылӥзы. Сыӵе шумпотонэз маин ӵошатысалыд со дыре. Али со кышноос улонысь ваньзы кошкемын ни. Дырыз дыръя тау карыны но ӧй вала, но соос сярысь ӟеч малпанъёсы али но сюлэмам. Котькыӵе секытлы чидам, уно синву кисьтэм пал кышноослэн даурзы ортчиз, нылпиоссэс пыдйылтыны турттыса но бырем кузпалъёссэс возьмаса. Али соос чиньы вылын лыдӟымон гинэ. Амалы ке луысал, мон соосты геройлыко картъёсынызы оградэ пуктысал. Соостэк но вань мукет нылкышноостэс, оло, вормон но ӧй луысал. В.ВАСИЛЬЕВА. Пичи Пурга. Удмурт Республикаысь Быръёнъя комиссилэн ивортонэз Удмурт Республикаысь Быръёнъя комиссия валэктэ: "Удмурт Республикалэсь "Удмурт Республикалы Президент быръён сярысь" Законзэ лыдэ басьтыса, бырйыны ӧтён-ӝуткан кутске кандидатэз пусъем (регистрировать) нуналысен но йылпумъяське быръён нуналаз суткалы вазьгес ноль часын. (Законлэн 44-тӥ ёзэтысьтыз 1-тӥ люкетэз). Удмурт Республикалы Президент быръён сярысь пуктэтэз (решениез) газетъёсын печатлам нуналысен (21-тӥ июне 2000-тӥ арын) канидатэз пусъён дырозь, озьы ик быръёнъёс нуналэ но одӥг нуналлы солэсь азьвыл ӧтён-ӝуткан уж нуыны уг яра ни. (Законлэн 44-тӥ ёзэтысьтыз 2-тӥ люкетэз.) Удмурт Республикалы Президент быръён пумысен калык пӧлын юалляськонлы йылпумъянъёсты газетъёсын печатлаку, иворъёсты вӧлмытӥсь ёзъёс одно ик вераны кулэ юалляськонэз ортчытӥсь организация, ужрадэз ортчытон дыре, интые, юалляськонэ пыриськемъёслэн лыдзы но кыӵе амалэн иворъёс люкамзы сярысь. (Законлэн 45-тӥ ёзэтысьтыз 1-тӥ люкетэз.) Быръёнъёс дырозь куинь нунал ӵоже но быръён нуналэ иворъёс вӧлмытӥсь ёзъёсын печатланы уг яра Удмурт Республика Президент быръён пумысен калык пӧлын ортчытэм юалляськонлэн но мукет эскеронъёслэн йылпумъянъёсты. (Законлэн 45-тӥ ёзэтысьтыз 2-тӥ люкетэз.) Газетъёсын но телерадиокомпаниосын быръёнъёс азьын ӝуткан ужез нуонъя огъя куронъёс сярысь пыр-поч валэктэмын вылӥ верам Законлэн 47-тӥ, 48-тӥ, 49-тӥ изэтъёсаз. Тужгес но бадӟым саклык висъяно Законысь таӵе люкетъёслы: кандидатлы газетын инты но эфирын дыр сётӥське дунтэк яке дун тырыса; кун но интыысь (муниципальной) изданиос пусъем кандидатъёслы ӝуткан ужез нуыны огкадь луонлыкъёс кылдытыны кулэ; кун телерадиокомпания азьвыл ик чакланы кулэ пусъем кандидатъёслы дун тырыса эфирын дыр висъянэз. Вань кандидатъёслы огкадь дун тупатоно; республикаын печатласькись кун газетъёс азьвыл ик чакланы кулэ пусъем кандидатъёслы дун тырыса инты висъянэз. Вань кандидатъёслы огкадь дун тупатоно; кун луисьтэм телерадиокомпаниос но газетъёс озьы ик быгато кандидатъёслы дун тырыса инты но дыр висъяны. Вань кандидатъёслы дун огкадь тупатоно; кун луисьтэм но интыысь телерадиокомпаниос но газетъёс палэнскыны но быгато ӝуткан-ӧтён ужъёслэсь. Пусъем кандидатъёслы дунтэк дыр но инты висъяське республикаысь кун телерадиокомпаниосын но кун газетъёсын гинэ. Иворъёс вӧлмытись ёзъёс Удмурт Республикалы Президент быръён сярысь решениез печатьын поттэм бере кызь нунал ортчытозь (туэ 11-тӥ июлёзь), Удмурт Республикаысь Быръёнъя комиссилы ивортыны кулэ пусъем кандидатъёслы эфирын дыр но печатьын инты сётыны дась луэмзы но со понна дунъёслэн быдӟалазы (Россия Фередацилэн валютаеныз) сярысь. Иворъёс вӧлмытӥсь ёзъёс, кудъёсыз та куронэз ӧз быдэстэ, уг быгато пусъем кандидатъёслы эфирын дыр но печатьын инты висъяны. Удмурт Республикалэн "Удмурт Республикалы Президент быръён сярысь" Законэзлэн 46- тӥ ёзэтысьтыз 3-тӥ люкетэз вылэ чӧлскыса, Быръёнъя комиссия печатла республикаысь кун телерадиокомпаниослэсь но кун газетъёслэсь списоксэс: 1. "Удмуртия" ГТРК 426069, Ижевск город, Песочной ульча, 13 2. "Удмуртская правда" газет 426057, Ижевск город, Бородина ульча, 21 3. "Известия Удмуртской Республики" газет 426074, Ижевск город, Октябрьлы 50 ар площадь, 15 4. "Удмурт дунне" газет 426039, Ижевск город, Воткинск шоссе, 10 км, Печать юрт 5. "Долг" газет 426074, Ижевск город, Октябрьлы 50 ар площадь, 15 6. "Иднакар" газет 427600, Глазов город, Белов ульча, 3 7. "Янарыш" газет 426000, Ижевск город, Ленин ульча, 30 8. "Ӟечбур!" газет 426039, Ижевск город, Воткинск шоссе, 10 км, Печать юрт. Удмурт республикаысь Быръёнъя комиссия. Пенсиос � дырыз дыръя Туннэ песяй-песянайёсмес буйгатыны быгатӥськом: июль толэзьлы пенсизэс соос дырыз дыръя басьтыны быгатозы. Пенсиосъя фондлэн Удмуртиысь люкетэныз кивалтӥсьлэн воштӥсез И.М.Ибрагимов верамъя, та вакытэ коньдон шедьтонэн шуг-секытъёс уг кылдо. Тросэз предприятиос фондэ сое дырыз дыръя келяло. Та ласянь тужгес шумпотто акциосын "Электромеханический завод", "Чепецкий механический завод", "Нефтемаш", "Буммаш" огазеяськонъёс, нефтяникъёс, энергетикъёс. Пунэм тыронъёсын югдурзэ тупатыны чалка "Ижмаш" АО. Та нуналъёсы ик коньдон келямын луоз городъёсысь но со ёросэ пырись гуртъёсын пенсия басьтӥсьёслы. 3-тӥ июльысен шумпоттом Вавож, Дэбес, Завьял му вӧй поттӥсьёс, Камбарка, Каракулино, Кез, Пичи Пурга, Шаркан, Ува ёросъёсысь песяй-песятайёсты. Бӧрысьгес коньдон вуоз кылем районъёсы но. Пенсия сётъянъя юн радлык тупатэмын. Табере со толэзьлы быдэ чакласькыны кулэ. Котькуд пенсионер числоен тодоз пенсия басьтон дырзэ. Э.ВАСИЛЬЕВА. СИНУЧКОНЫН � РОССИЫСЬ СЕМЬЯ 2. Куанермон куашкатэ семьялэсь улонзэ но тазалыксэ "Нылкышноос но азинскон" калык куспо ассоциацилэн президентэз, философия наукаосъя доктор, профессор, Нью-Йоркысь наукаосъя академиысь академик, социолог Г.Г.Силласте Куинетӥез. Куанермон вакчиёмытэ улон аръёсты, кулон учыръёс нылпи вордӥськонлэсь ортчо, озьыен, нацилэн генофондэзлы но огъя улонэзлы кышкытлык кылдэ. 1992-тӥ арысен 1997-тӥ арозь Россиын калыклэн лыдыз кулэсмиз 4,2 миллионлы. Та лыдпус ӵоша Норвегиын улӥсьёслэн лыдзылы. 1996-тӥ но 1997-тӥ аръёсы кулон учыръёс нылпи вордӥськонлэсь 1,6 пол тросгес вал. Россиысь калыклэн аспӧртэмлыкез � кулэсме нылпиослэн но быдэ вуымтэослэн лыдзы. Мукет сямен вераса, странамы арысь аре пересьме � будэ пенсионеръёслэн лыдзы. 1998-тӥ арын пиосмуртъёслэн улон арлыдзы, шорлыдын вераса, 61,3 ар вал, нылкышноослэн � 72,9 ар. Ӵошатон понна: США-ын пиосмуртъёслэн улон арлыдзы � 75 ар, нош Япониысь нылкышноослэн � 88 ар. Бен, улонлэсь вакчиёмонзэ куанермон вылэ гинэ погыльтыны уг луы. Экономикаын ортчись реформаос зӥбо мылкыдэз, куашка улон дунъет, пуромо ожъёс, калыкъёс куспын тупамтэос, йыружъёс. Котькуд ар сюрсъёсын адямиос бырыны шедё. Адямиослэн пуш дуннезылэсь сӧриськемзэ возьмато асьсэды быдтон учыръёс но. 1985-тӥ арысен со лыдпус 150 пол будӥз. Асьсэды быдтонъя Россия дуннеын нырысетӥосыз пӧлы пыре. Куанер семья утемын ӧвӧл висёнъёслэсь но. Эмъяськон но эмъюмъёс тросэзлы уг йӧто ни. Больницаын кыллисьёс асьсэос эмъюмъёс басьтоно луо, быгатӥськод-а, уд-а � созэ юась ӧвӧл. Озьы тросэз куанер семьяос эмъяськонлэсь палэнтӥсько. 90-тӥ аръёсы демографиын кылдэм югдур � Россилэн историяз ноку вылымтэ вакыт. Со � берло тямыс ар ӵоже странаямы экономикаын но социальной удысын ортчем выльдӥськонъёслэн бервылзы. Ньылетӥез. Ужтэк кылён куашкатэ семья улонэз, соин валче нылпиос но ӧжыт вордӥсько. Выльдӥськонъёс вуттӥзы ужтэк кылёнэ, со уката ик шуккиз нылкышноосты. Быдэс дуннеен ӵошатыса, Россиын ужтэк кылёнлэн аспӧртэмлыкез со бордын но � ужтэк кылё вылӥ образованиен адямиос. Ужез вошъян странаямы паськыт вӧлмемын, нылкышноос пӧлын но. Матысь дыре югдур уз воштӥськы. 1999-тӥ арын ужзэс воштоно луизы 43 процентэз нылкышноос, пиосмуртъёс � 38 процентэз. Берло аръёсы Россиез шуккиз ужтэк кылёнлэн выль тулкымез. 1998-тӥ арын гужем но сӥзьыл Москваын гинэ 400 сюрс адями ужысь мозмытэмын вал. Соос пӧлын тросгес банкъёсын, кредитъя но страхованиея фирмаосын ужасьёс, рекламая, туризмъя агентъёс. Ужзэс ыштэмлэсь азьло соос нылпи вайыны ӧз шугъяськылэ. Мар сярысь со вера. Нырысетӥез: куанеръёс пӧлы пыризы али гинэ ӟечгес улыны кутскисьёс, туала идеологъёс соосты лыдъяло вал Россиез капитализме валтӥсь кужымен. Кыкетӥез: ужтэк кылён Россиысь троссэ улӥсьёсты нылпи ваёнлэсь палэнтэ. Витетӥез. Куанермон кылдытэ выль семья кусыпъёс но кузпалъяськон шоры выль сямен учкон. 90-тӥ аръёслэн пумазы Россиын ваньбур кылдытон амалъёс гинэ ӧвӧл, семья кусыпъёс но пӧртэм сямен кылдыны кутскизы. Озьы ке но, юалляськонэ пыриськем нылкышноос пӧлысь тросэз нырысетӥ интые пуктӥзы семьяез, нылпиосты но яратонэз (92 процентэз), 90-тӥ аръёслэн кутсконазы со лыдпус 78 процент вал. Азьло сямен ик, семья кусыпъёс Россиын азинско кылдэм сямъёсъя � кусыпъёсты загс пыр пусйыса. Но берло дыре тросгес но тросгес егитъёс (арлыдоос но) гожтӥськытэк уло, "гражданской брак" шуонэз быръё. Котькуд ньылетӥ нылпилэн анай-атаез гожтӥськымтэ. Пусйымон соиз но, нылпи ваёно арлыдъем нылкышноослэн лыдзы будэ ке но, пиналъёс странаямы ӧжыт но ӧжыт вордӥсько. Нош ик вазиськом адямиослы. Нылпи вордонъя Россиын кулэ-а кыӵе ке амалъёс кутыны? Юамъёс пӧлысь 47 процентэз пиосмуртъёс но 52 процентэз нылкышноос шуизы, кутоно нылпи ваёнэз будэтон ужрадъёс. 1 процентэз гинэ пумит луиз таӵе малпанлы. Кӧня нылпи луыны кулэ семьяын? Юаськонъёс возьматӥзы: 2,8 процентэз нылкышноос вылэ пукто нылпитэм семьяез, нош 71,2 процентэз 2-3 нылпиен семьяез дунъяло. Нош азьланезлы малпанъёссы таӵе: 12 процентэз семья одӥг но нылпи вордыны уг чакла (1996-тӥ арын 9 процент вал); 13 процентэз � одӥг нылпи; 21 процентэз � кык нылпи; 3 процентэз � куинь нылпи; 1,5 процентлэсь � куиньлэсь трос. 42 процентэз нылкышноос пусйизы: нылпи ваён арлыдзы ортчемын ни. 38,5 процент пӧлысь 7 процентэз гинэ нылкышноос матысь 2-3 ар ӵоже нылпи ваёзы, нош 66 процентэз чутрак пумит луизы матысь 2 аръёсы ӵоже пинал вордыны. Мукет сямен вераса, семьязэс будэтон сярысь тросэз нылкышноос малпасько, нош луонлыкъёссы та вакытлы туж ӧжытэзлэн вань. НАТАЛЬ Арлыд но яратон Кызь аресозь нылкышно пиосмурт сярысь малпа: кыӵе со визьмо но чебер. Кызь вить арескын нокыӵе мугъёстэк вожа яратоно муртсэ, валамез но уг поты � мукет нылкышноослы тӥляд кужымды уз тырмы. Куамын вить арескын нылкышно быгылес луэ, уждун басьтэмды сярысь уг юа ни. Ньыльдон вить арескын йырсизэ буяз, дышиз ческыт пӧраны. Ӧжытгес вуӵыртэ. Куатьтон арескын уг порты ни кытӥ ветлэмды сярысь. Сизьымдон арессэ ортчыса, нылкышно уг мерскы ни котырады вераськонъёсын, ас понназ но со туж ӟеч кенеше. Верасько нылпиос Троллейбусэ пырем песянайлы пичи Лади интызэ сётэ. Соиз номыр вератэк пуксе. � Нош мар вераны кулэ? � юа пиёк. *** � Ксюша, кин тон луод бадӟым будӥд ке? � юаз пичи сузэрезлэсь Оля. � Натаса Кололева, � йӧн-йӧн вазиз нылаш. Г.ЖУКОВСКАЯ. Ижевск город. Куинь зарни "Кама рецордс" студия, солэн тӧроез Александр Юмиов сюлмаськемен, югыт дуннеез адӟизы шаерысьтымы тодмо удмурт крезьгурчилэн, Удмурт Элькунысь но Россиысь Крезьгурчиослэн огазеяськемъёсысьтызы адямилэн Марина Ходыревалэн зарни киужъёсыз � Кияса ёросысь Уддяди (Карамас-Пельга) гуртысь удмуртъёслэн куно пумитан гуръёсынызы, Юкаменск ёросысь Баггуртысь бесерманъёслэн Юлия Сергеевна Лялиналэн, Зоя Антоновна Абашевалэн, Нина Сидоровна Караваевалэн, Наталья Игнатьевна Абашевалэн вашкала йылолъёссылы сӥзем кырӟанъёсынызы но Балезино ёросысь Карсовай черкогуртысь ӟучъёслэн кырӟанъёсынызы компакт-дискъёс. Нош огазьын соос � вашкала музъемлэн выль кырӟанъёсыз. "Зарни киужъёсты" поттӥсьёс яло: улӟытоно, утёно но азинтоно вашкала йылолъёсты. Нош асьсэос компакт-дискъёс туж бадӟым юрттэт сётозы шаерысьтымы крезьгурчиослы но фольклор ансамбльёслэн кивалтӥсьёссылы. Компакт-дискъёсты поттыны юрттэмзы понна, "Кама рецордс" студия сюлмысьтыз тау каре "АСПЭК" огазеяськонлы, солэн тӧроезлы Виктор Хорошавцевлы, озьы ик � Удмурт Элькунысь Кун Кенешлэн депутатэзлы Евгений Одиянковлы. Е.РОМАШОВА. Кыкетӥ ӧтчам Куартолэзьлэн шораз, 17-тӥ�18-тӥ мае, Башкириын ортчиз та улосвылысь удмуртъёслэн кыкетӥ ӧтчамзы. Со сӥземын вал та шаерысь удмуртъёслэн огазеяськонзылэн кылдэмез дырысен ньыль ар тырмонлы. Ортчем дыр ӵоже трос ӟеч ужъёсыныз шумпоттӥз со: Нефтекамск педучилищеын усьтэмын удмурт ёз, вуылэмын Башкириысь весь вань удмурт гуртъёсы, Башкириысь удмуртъёс понна кылдытэмын "Ошмес" удмурт газет. Ӧтчаме люкаськылэмъёс азьланяз трос ужпумъёсты быдэстыны чаклазы. Соос пӧлысь одӥгез � егит удмуртъёслы вылӥ тодон-валан сётыны турттон. Та удысъя вазиськыны чакламын Удмурт но Башкир Элькунъёсысь Кивалтэтъёсы. Башкириысь удмуртъёслэн ӧтчамазы вуылӥзы "Удмурт кенеш" огазеяськонлэн тӧроез Валентин Тубылов, Удмурт Элькунысь нациосын ужан политикаяминистр Николай Мусалимов, озьы ик � та шаерын вордӥськем но будэм тодмо тодосчиос, гожъясьёс, ужбергатӥсьёс. Та нуналъёсы чузъяськылӥзы трос удмурт кырӟан-веранъёс. ? Ӧтчам дыръя. Мударис Менладшинлэн туспуктэмъёсыз. Удмурт Республикалы Президент быръён понна республикаын кылдытӥськись быръёнъя комиссиос Республикаысьтымы Быръёнъя комиссия Удмурт Республикалэсь "Удмурт Республикалы Президент быръён сярысь" Законзэ но шаерамы интыяськем но ужась автоматизацияя "Быръёнъёс" ГАС комплексэз лыдэ басьтыса, решение кутӥз Удмурт Республиалы Президент быръён понна быръёнъя таӵе комиссиос кылдытыны: - Индустриальной ёросысь быръёнъя комиссия; - Ленин ёросысь быръёнъя комиссия; - Октябрь ёросысь быръёнъя комиссия; - Первомай ёросысь быръёнъя комиссия; - Устинов ёросысь быръёнъя комиссия; - Воткинск городысь быръёнъя комиссия; - Глазов городысь быръёнъя комиссия; - Можга городысь быръёнъя комиссия; - Сарапул городысь быръёнъя комиссия; - Алнаш ёросысь быръёнъя комиссия; - Балезино ёросысь быръёнъя комиссия; - Вавож ёросысь быръёнъя комиссия; - Воткинск ёросысь быръёнъя комиссия; - Глазов ёросысь быръёнъя комиссия; - Грах ёросысь быръёнъя комиссия; - Дэбес ёросысь быръёнъя комиссия; - Завьялово ёросысь быръёнъя комиссия; - Игра ёросысь быръёнъя комиссия; - Камбарка ёросысь быръёнъя комиссия; - Каракулино ёросысь быръёнъя комиссия; - Кез ёросысь быръёнъя комисси; - Кизнер ёросысь быръёнъя комиссия; - Кияса ёросысь быръёнъя комиссия; - Красногорск ёросысь быръёнъя комиссия; - Пичи Пурга ёросысь быръёнъя комиссия; - Можга ёросысь быръёнъя комиссия; - Сарапул ёросысь быръёнъя комиссия; - Селта ёросысь быръёнъя комиссия; - Сюмси ёросысь быръёнъя комиссия; - Ува ёросысь быръёнъя комиссия; - Шаркан ёросысь быръёнъякомиссия; - Юкаменск ёросысь быръёнъя комиссия - Якшур-Бодья ёросысь быръёнъя комиссия; - Яр ёросысь быръёнъя комиссия НАТАЛЬ Улонлэн сяськаосыз Кылтэчы кырӟаны но усточи Одӥгаз ужан нунал пумын редакциямы шулдыр кырӟам куара чузъяськиз. "Кык юсьёс но парлы пар но, одӥг ярат-о-он", � жингыртэ редакция тыр. Ма, Пудова лыктэм ке шат шуыса, ваньмыз кабинетъёсысьтызы мычиськизы. Ӧжыт гинэ алдаськиськеммы: кырӟасьмы Шарканысь ик, куараез но, ачиз но синмаськымон чебер, только пиналгес вылэм. Оля Федорова, пе, мон. Оля апаезлэсь ужзэ адӟыны лыктэм. Апаезлэн но Оля ик нимыз. Со "Удмурт дуннеын" корректор луыса ужа. � Малы бен ӵукнаысен чалмыт улӥськод � шулдыргес ужасалмы? � юаськом Олялэсь. � Ӵукна ик кырӟаны уг яра, бӧрдод, � ӝотрак вераз со. Ми пумитаз номыр вазьыны ӧм шедьтэ ни. Чупрес ке чупрес таид. Пиослэсь но, пе, уг кышкаськы. Оля туэ 2-тӥ классэ йылпумъяз. Оценкаосыныз анайзэ но, дышетӥсьёссэ но шумпоттэ. Но али каникул, мар со сярысь вераськонэз. Оля Иже кунояны лыктӥз ке но, малпанъёсыныз песянаез-песятаез дорын, Вукогуртын ни. Сое отын кемалась возьмало. "Пудовае" тон мынам шуыса веша песятаез Олиез. Нош соиз лӧптэм мылкыдыныз нош но нош шулдыр кырӟан кисьтэ. � Кытысь бен тынад сыӵе куараед?� паймиськом ваньмы. � А мон мамалэн кӧтаз дыръя трос сюанъёстӥ ветлӥськем, соин, дыр сыӵе куараен вордӥськи. Зол! йырмес гинэ сэзъяськом на нылаш пумитэ. З.РЯБИНИНА. НАТАЛЬ Кызьы улӥськод, егит семья? Республикаысьтымы "Егит семья" центр газет лыдӟисьёсмылы тодмо ни, со пӧртэм юрттэт сётэ шаерысьтымы егит семьяослы. Семинаръёсын, фестивальёсын, шутэтскон лагерьёсын егит кузпалъёс трос тодон-валанъёс басьто, пӧртэм удысъёсысь специалистъёсын пумиськылыса, мукет семьяосын тодматско, асьсэлэсь быгатонлыкъёссэс возьмато. "Егит семья" центрлэн ёзъёсыз ёросъёсын но кылдо ини. Шаерысьтымы егит семьяослы юрттон уж азьланяз уката но паськыталоз. Центр со бордын ужа. Шаерысьтымы егит семьяосъя огъя югдурез син азе пуктон понна но валтӥсь ужпумъёсты пусъён понна "Егит семья" центр 1999-тӥ арын ноябрь толэзьысен 2000-тӥ арын февраль толэзёзь ортчытӥз республикаысьтымы егит семьяосъя нимысьтыз эскеронъёс. Юалляськонъёс ортчытэмын Глазовын, Глазов Вотка, Балезино, Алнаш, Як.-Бодья ёросъёсын. Юалляськемъёс пӧлысь 76 процентэз � гуртын улӥсь егит семьяос, 24 процентэз � городысь. Юалляськонэ пыриськиз 184 семья, 146-ез соос пӧлысь анай- атайёсынызы нимаз уло, куд-огаз семьяосын нылпи анаеныз яке атаеныз гинэ улэ. Юалляськемъёс пӧлысь 45,9 процентэз одӥг нылпи вордо; 22,8 процентэзлэн � кык нылпизы; 22 процентэзлэн нылпизы ӧвӧл; 2,17 процентэзлэн куинь нылпизы. 74,4 процентэз егитъёс гожтӥськемын, нош 16,8 процентэз гожтӥськытэк уло; 3,5 процентэз нимаз уло ке но, люкиськымтэ, 4 процентэз люкиськемын � нылпи улэ анаеныз яке атаеныз. Юалляськонэ пыриськемъёс пӧлын тросгес вал куинь арлэсь ятыр ӵош улэм семьяос, нош арлыдзыя: 48,5 процентэз � 26-29 арес; 33,4 процентэз � 22-25 арес; 17,1 процентэз � 19-21; 05 процентэз � 18 аресозт. Нош кыӵе огъя югдур демографияя туннэ нуналлы Удмурт Республикаын? Берло дыре нылпиос ӧжыт вордӥсько, кулэсмиз нылпиослэн лыдзы нимаз семьяосын (1998-тӥ арын вордӥськиз 16130 нылпи, 1999-тӥ арын � 15904, со 30 процентлы ӧжытгес та аръёсы кулон учыръёслэсь). Калыклэн лыдыз будӥз Глазов, Игра, Камбарка, Селта, Алнаш, Вотка ёросъёсын гинэ. Будо люкиськон учыръёс � 1998-тӥ арын � 3625, 1999-тӥ арын � 4080, йылэ кузпалъяськытэк нылпи ваисьёслэн лыдзы � 1998-тӥ но 1999-тӥ аръёсы шаерысьтымы котькуд ньылетӥ нылпи вордӥськиз гожтӥськымтэ анай-атайёслэсь. Соин валче шаерамы йылэ ӝыныё семьяослэн лыдзы � нылпи будэ анаен яке атаен. Вань та лыдпусъёс пӧлысь нимаз висъясько егит семьяос � тросгес люкисько вить ар ӵоже улэм кузпалъёс, нылпиос но тросгес вордӥсько егит семьяосын (30 аресозь). Озьыен, кун ласянь нимысьтыз саклык висъяны кулэ егит семьяослы. Эскеронъёс ортчытыса, азьланезлы сюресъёс пусъёно егитъёслы юрттон пумысен. 2000-тӥ арын 1-тӥ январьлы Удмурт Республикаын егит семьяосъя югдур таӵе: 1. Егитъёслэн лыдзы (14 аресысен 30 аресозь) 391.498 2. Егит семьяослэн лыдзы 91.962 3. Загсын гожтӥськемъёслэн лыдзы (гожтӥськисьёслэн шоро-куспо арлыдзы � 18-24 арес) 9.464 4. Люкиськем егит семьяослэн лыдзы 4.080 5. Ваньмыз нылпиос вордӥськизы 15.904 соос пӧлын быдэ вуымтэ анайёслэн 274 6. Кузпалъяськытэк вордӥськем нылпиослэн лыдзы 3.976 7. Анай-атайёсынызы улӥсь егит семьяослэн лыдзы 46.901 8. Басьтӥськыны яке улон юрт ӝутыны ссуда басьтэм егит семьяослэн лыдзы 44 Л.МАЛЫХ. Юкаменск палась кырӟанъёс "За околицей. "Гурт сьӧрын". Озьы нималлям крезьгурчи Рафис Закиров но журналист Николай Бушмелев удмурт но ӟуч кырӟанъёсын сборниксэс. Лыдӟисьёсмылэн кылылэмзы вань, дыр, Удмурт радио пыр та авторъёсыз. Соослэсь кырӟанъёссэс асьсэлы каро тодмо артистъёс но, самодеятельносте ветлӥсьёс но. Сборнике пыризы Ашальчи Окилэн, Зоя Трухиналэн но мукетъёсызлэн кылъёссыя гожтэм кырӟанъёс, Николай Бушмелевлэн ӟуч кылэ берыктэм "Ортчо аръёс", "Чебере мынам", "Вай, ошмесэ" тодмо удмурт кырӟанъёс но удмурт кылэ берыктэм "В этой деревне огни не погашены" ӟуч кырӟан. Пичигес книгаын инты шедьтэмын культура удысын ужасьёс сярысь заметкаослы но Венгрие ветлэмез тодэ-ваёнъёслы, озьы ик калык кусыпъёслы сӥзем материалъёсты. Сое но верано: та авторъёс ӟуч но бигер. Книгаез вузало М.Горький нимо ульчаысь "Инвис" магазинын. А.ИПАТОВА. ШӦКЫЧ Шиё пул Янгыш-а Христофор Колумб? Тамак будэтон но тамак кыскон индеецъёс бордысен кутскиз. Чильымзэс соос ӵындылӥзы тупан понна. Индеецъёс озьы ик оскылӥзы тамаклэн эмъясь кужымезлы. Америкае нырысьсэ сюрес лёгыса, Христофор Колумб но оскиз, дыр, тамаклэн пайда ваемезлы. Озьы дас куатетӥ дауре Европае но вӧлсмиз тамак. "Горд атас" бурдъёссэ вӧлъямысь, табере кинлэсь бен кылзэ юаны кулэ шаерысьтымы тылпу кысӥсьёс: Америкаысь вашкала индеецъёслэсь, Христофор Колумблэсь? Оло нош "вож кыез" кыл кутытоно? Ма, сотэк кин-о йырзэ сураз Ижевскын улӥсь Геннадий Пиминовлэсь? Тамакен ӵош со кенжытӥз арлыдо апаезлэсь улон корказэ. Соиз 2 сюрс манетлы ыштон адӟиз. Нош Воткаын улӥсь Юрий Симаков атаезлэн сад-бакчаысьтыз лапассэ ӵынлы но пеньлы пӧрмытӥз. Нылкышноос но бере уг кылё вылэм воргоронъёслэсь. Ижевскын улӥсь Пескунова Татьяна юэм йырыныз сад-бакчаысь корказэ гинэ ӧвӧл, ассэ но ӧжыт гинэ "горд атаслы" ӧз сӥзьы. Ярам, бускелез ӧз куалекты, утиз тамак кыскыны яратӥсез. Никотинэн эшласькемез Нина Мышкиналы но мыддорин берытскиз. Кизнер ёросысь Вуж Омга гуртын улӥсь ӵыжы-выжыезлы 5 сюрс манет тыр ыштон ваиз. Ньылез ик тылпу потон учыръёс 16-тӥ июне вал. Нош быдэс ар ӵоже кӧня пол бурдъяськылоз меда тамак пумысь улӟем "горд атас"? Асьсэос ик индеецъёс мед кыскысалзы вылэм со тупан чильымзэс. Л.ПЕТУХОВ. ШӦКЫЧ Лёгор но улон бугор Юмореска Бер сӥзьыл. Омырын куддыръя кильтыръяны кутскизы ини лымы бубылиос. Пересь Лёгор но кузпалыз Лукер, сад-бакчаязы ужъёссэс йылпумъяса, корка пыризы. Лёгор кияз бумага, ручка кутӥз но ӝӧк сьӧры пуксиз. Лукерез но вӧзаз ик инъяськиз. "Гажано эшъёс!" � гожтӥз Лёгор бумага вылэ. � Кыӵе сыӵе соос тыныд эшъёс!? � чабкиськиз Лукер. � Озьы ик гожты, гажано воръёс! Лушкаськисьёс! Корка сузясьёс! � Озьы уг яра, дыр, Лукер, � пумит луиз Лёгор. � Лушкаськисьёслэн вожзы потоз. Коркаез но ӵушкаса кельтозы. Зӥбыт луоно. Асьмеос пересесь ни. � Соку тодэмед кияд! � шуиз Лукер но гур азь пала кошкиз. Лёгор гожтонзэ азьланьтӥз: "Сад-бакчаысьтымы корка нергемылэсь ӧссэ ум ӵогаське, тунгонзэ сёровно тӥялоды. Нош огшоры тунгон туэ 80 манет сылэ. Сыӵе тунгон басьяны таяз улонын ми ум быгатэ ни, дыр. Соин ик ӧсэз пась кельтӥськом. Чыры-пыры сиён-юон шкапысь шедьтоды. Сылалтэм огреч, варенья, кӧня ке аракы... Солэсь ятырзэ ум быгатӥське ни. Ма, ми Лукереным валче 900 манет пенсия басьтӥськом. Йӧл но нянь вылын улӥськом. Сӥлез ӝыны ар ӧм веръяллялэ ини. � Быдэс ар, быдэс ар гожты! � со вие гур азь палась Лукерлэн куараез кылӥськиз. Лёгор гожтэмзэ тупатӥз но будэтӥз на: "Квартира понна дунъёсты нош ик будэтӥзы. Азьланяз кызьы улыны воксё палёмиськиз ини. Тӥ мар ай-ко, гажано воръёс, вождэс эн вае милемлы. Тӥ, иське, мукет коркаосы пыралэ. Ма, милям коркамы курег гид кадь гинэ. Корказез но тани куинь ар пала липымтэ ни. Дранча басьтыны уг быгатӥськы. Пенсия уг тырмы. Татын милемын артэ ик Сан Саныч, коммерсант улэ. Со куинь этажъем корказэ гужем куспын вуттӥз. Корка пушказ но солэн ваньмыз чиля. Мебелез но итальянской. А милям мар-о, пукон кукъёсмы гинэ но шальтрамын. Аслам но паллян пыды тыро-пыдо уг ветлы. Липет йылысь уси вал ук, сисьмем пул вылэ лёгиськыны шедьтӥськем. Таин гожъянме йылпумъясько. Вождэс эн вае. Гажаса Лёгор но Лукер". Толлэсь вуэмзэ шӧдылыны ик ӧйлась. Выль ар азьын Лёгор но Лукер дэра куыны сӥзьыс пӧлэстыса пуко вал. Йыг-дым гинэ участковой пыриз но повестка мычиз. Милицие следователь доры, пе, мыноно. Уин пересьёс урод кӧлӥзы. Выль арлы кузьым, пе, вуттӥзы. Вазь ӵукна султыса, Лёгор но Лукер вӧсяськизы, сюсьтыл пуктӥзы, вань кулэмъёсты тодазы ваизы. Собере Лёгор милицие шонтӥз. Милициын сое шуныт пумитазы. Следователь Лёгор песятай шоры мыр-мыр со ласянь но, та ласянь но учкиз, учкиз но шуиз: � Осконтэм та воксё, нош фактъёс пумит султэм уг луы! � собере Лёгор азе буёло бадӟым фотография понӥз но юаз: � Та коркаез адӟылэмед вань-а, пересь? Лёгор чебер бадӟым куинь этажъем коркаез учкиз но ӝотрак вераз: � Вань гинэ ӧвӧл, пыраме но вань. Со Сан Саныч коммерсантлэн кот... кот... кот... котежез. Соку следователь Лёгор азе мукет фотография поттӥз но юаз: � Нош таиз кинлэн гидэз? Лёгор аслэсьтыз корказэ адӟыса, пальышак потӥз но шуиз: � Гид ӧвӧл со, мынам коркае со! Собере мар? � Нош тол вылтӥ сад-бакчаяд вуылӥд-а? � нош ик юаз следователь. � Ма, ма каром мон отын толалтэ? Мон сюрес вылтӥ но мырдэм ветлӥсько. Лымы отын кускын ӵош. Соку следователь Лёгор азе куинетӥ снимок понӥз. Пересь Лёгорлэн синъёсыз кымесаз тубизы. Со аслаз пичи корка пушкысьтыз Сан Санычлэсь небыт диванзэ, туйвуам сервантсэ но лэйкась пуконъёссэ адӟиз. Нош сэрегысь комод вылын � туж бадӟым "Сони" телевизор но магнитола. � Кинлэн-о та ваньбурез? � юаз следователь. Кызьы со ваньмыз тынад курег гидад шуод ай, коркад вуиз. Пыдъёссы-а, мар-а соослэн вань, а? Пересь Лёгор куаляк луиз но соку гинэ тодаз ваиз сӥзьыл сад-бакчаысьтызы кошкыкузы, лушкаськисьёслы гожтэт "пӧраса" кельтэмзэ. Следовательлы со сярысь ваньзэ рос-прос валэктытэк ӧйлась. Следователь йырберзэ ӵаж-ӵаж кормаз но жаляса шуиз: � Ма карод на, Лёгор песятай, мукет кораосы лушкасьёсты пыраны косэмед понна штраф тырытэк уз луы, дыр. Я, мын, суд учкоз ни, кызьы-мар дауртыны. Лёгор мур лулскиз но дор палаз вамыштӥз. Валентин ГОРБУНОВ. Вотка город. Нош вуиз гужем... Шор Кеч вашкала удмурт гурт кемалась ини Иже пыремын. Татын али ужа элькунысьтымы одӥгез азьмынӥсь предприятие � радиозавод. Нош удмуртъёсты та палась интыос доразы кыско шутэтскон нуналъёсы. Ог вить ар талэсь азьло "Удмурт кенеш" огазеяськон татысь Кызьпу арамаын мылкыд кариз Удмурт культурая центр усьтыны. Табере татын ӵем ортчыло удмурт йылолъёслы сӥзем шулдыръяськонъёс. Алигес гинэ асьме калык татчы, Кызьпу арамае, люкаськылӥз гужемез пумитаны � Гербере. Нош алигес, 25-тӥ инвожое, егит удмуртъёс ортчытӥзы асьсэлэсь праздниксэс. Вуо ини музъем ужасьёслэн кысык нуналъёссы, пудо сиён дасян, вузъёсын дышетскись егитъёслэн шутэтскон нуналъёссы кутско. Соин но, дыр, нырысь пал парке ӧжытгес калык люкаськиз. Праздникез радъясьёс � "Удмурт кенеш", "Эрик" но "Шунды" огазеяськонъёс � сюлмаськыны кутскизы вал ини. Кӧня ке улыса, туж трос калык вуиз. Праздник кутскиз шулдыр концертэн. Кырӟазы, веразы, шудӥзы удмуртъёслэн яратоно усточиоссы Ольга Зорина, Алефтина Корепанова, Валерьян Исламгареев, Иван Григорьевых, Сергей Сава, Ада Диева, Ирина Габитова, мукетъёсыз. Соослэсь куараоссэс "юнматӥз" "220 вольт" фирма. Праздникез чебер каризы батыръёсмы но. Ортчизы тунсыко ӵошатсконъёс. Вормисьёслы сётэмын дуно кузьымъёс. Бӧрысь кема мынӥзы на эктонъёс. Ӝожтӥськонъёс уно ӧй вал. Кудӥз-огез веразы, кӧня ке фольклор ансамбльёс но мед кырӟалозы вал шуыса. Шумпотоно соизлы: удмурт егитъёслэн выль огазеяськонзы, "Эрик", одӥг кыл шедьтӥз "Шундыен". "Удмурт кенеш" но "Эрик" огазеяськонлэн Ижысь ёзэз Кызьпу арамаын кыкетӥзэ ини ортчыто таӵе бадӟым праздник. Зэм, калык возьма ини мукет синмаськымон ужрадъёссэс но. Нош вуиз гужем. Мед удалтоз со, мед шумпоттоз ю-нянен, таза пудоен. Н.ВОЗИСОВ. ЖУРНАЛИСТЪЁСЫН ПУМИСЬКОНЪЁС Малы дуноя нянь? Та юанлы нокин тыро-пыдо уг валэкты. Сыӵе югдур вал журналистъёсын берлояз, 27-тӥ июне, пумиськонын но. Шаерысьтымы Тарифъёсъя но дунъёсъя кун комитетлэн кивалтӥсез Олег Белобоков няньлы дун будэтонэз кык муген валэктыны выриз. Кыӵеесь бен соос? Нырысь ик няньлы дун, пе, йылэ, ю тысез кеносын (элеваторъёсын, нянь кутон складъёсын) возьыса. Кыкетӥез, электрокужымлы тарифъёс будэмен. Кин бен солы оскоз? Ю тысь октэмын но кеносэ кисьтэмын кылем сӥзьыл. Соку музъем ужасьёс ю тысьлэсь асдунзэ лыдэ басьтыса вузазы. Ӧз вунэтэ нуон-ваёнын транспортлы быдтэм уксёез. Нош туэ ӝыны арскын кеносын ю тысь возёнлы трос-а коньдон кутэмын? Валамон, уно ӧвӧл. Нош электрокужымлы дун кемалась ӧз йылы. Татын одӥгез эшшо чик валантэм на. Кык арня талэсь азьло (няньлы нырысетӥзэ дун йылэтэм бере � Г.Р.), Правительстволэн Тӧроезлэн воштӥсез Сергей Чикуров ивортӥз но оскытӥз вал, туэ, пе, няньлы дун уз буды ни. Таӵе ужрад кутӥське арлы быдэ, выль нянь вуон азьын гинэ. Но чик но озьы ӧз луы. Малы соку Сергей Витальевичлы калыкез юнме буйгатоно но эрекчано вал? Кышкатэк шара верано вал, няньлы дун кык пол будоз шуыса. Нырысь ик � июнь толэзьлэн кутсконаз, кыкетӥез � та толэзьлэн пумаз. Ӵапак таӵе мылкыдын валлян вераськиз Олег Михайлович. Со эшшо ватсаз на, ми, пе, элькунамы Россиысь оптовой рынокез радъяны ум быгатӥське. Федерациысь ёзъёс озьы ик ужало электрокужымъя но мукет эстӥськонъя: дунъёсты будэто но ужзы быре, нокинлэсь юась- верась ӧвӧл. Асьмеос соослэсь решениоссэс улосвылъёсын быдэсъяськом гинэ. Но малы ке бускель Татарстан Республикаын нянь но солэсь сиён-юонъёс, аракы но музонэз дунтэмгес. Валамон, шаермы нянь пыжыны ю тысь, пызь палэнысь басьтэ. Шат сое уг луы вал, кылем сӥзьыл дунтэм дунын тырмыт басьтыса, кеносъёсы кисьтыны? Луэ вал. Малпалськись ӧз шедьы, калык сярысь сюлмаськон уг тырмы. Ведь Правительствоысь одӥгез бадӟым, егит кивалтӥсь ялан ассэ тазьы пусъе, мон, пе, макроэкономикаен гинэ вырисько. Калыкез дунтэмгес нянен сюдон шат нокыӵе экономикаен но политикаен герӟаськымтэ? Мае бен возьмалод меда Кун Кенешын 51 куараен ортчем кивалтӥсьлэсь? Вераськон мынэ Сергей Чикуров сярысь. Маин бен со элькунамы данэ потӥз, калыклы мар ӟечсэ лэсьтӥз? Со сярысь нокин уз вера. Тӥни сыӵе кивалтӥсьёсын сэрен асьмеос ялан куанермиськом, куд-огез адямиос кӧт тырмоназы нянь но сиыны уз быгатэ, пенсизы, пособизы но уждунзы уз тырмы. Олег Белобоковлэсь журналистъёс юало, туэ, пе, няньлы огъя дун будоз на-а? Пичиесь воштӥськонъёс, пе, луозы, но Правительство уз лэзьы ни дунъёсты али кадь йылэтыны. Улыса адӟом, мар луоз азьланьын. Но та кылъёсты ум вунэтэ. � Еош сурлы малы дун будэ? � Та вузэн государство уг выры. Пӧсь дыръя сур дуногес луэ, кезьытскиз ке, дуныз усёз. Автобусын ветлэм понна тарифъёсты йылэтон ласянь Олег Михайлович номыр ӧз вера. Г.РОМАНОВ. ЧУРЪЁС, ЧУРЪЁС Нылпи вордон � лулӟылон Ӟечбур, гажано редакция! Анае жаль потэмен кутӥсько киям ручка. Гуртысьтымы мукет нылкышноослэн но ӝож мылкыдзы та гожтэтын. Нылпи пособиосты кутскизы вал почта пыр сётъяны. Ваньмыз басьтыса ӧз вуттэ, гуртысь сберкассаысь ужасьёсты ваньзэсты отпуске лэзиллям, соин коньдонэз Алнаш сбербанкысь басьтоно, пе. Ми семьяямы ньыль нылпиос, атаймы колхозысь йӧназ коньдон уг басья, анаймы одӥг уждунзэ ваньмылы уг тырмыты, соин ик пумтэм шумпотӥм ни вал. 2000-тӥ арлэн куинь толэзезлы милям 800 манет люкаськыны кулэ уго. Но анаймы Алнашысь буш бертӥз � сбербанкын пособиосты нуназеозь гинэ сётъяло, пе. Буш бертӥз кыкетӥзэ но � черод, пе, укыр кузь. Нош Алнаше вазьгес вуыны нокызьы но уг луы � милям колхозысьтымы Алнаше транспорт шер пота, нош отчыозь 20 иськем, 7-зэ пудэн вамышъяно ай. Туж жадьыса бертӥз анай, ас понназ лулӟылэ, милесьтым лушкем синкылиоссэ ӵушылэ. Толэзьзэ возьмалэ но асьтэ дорысь капчияк басьтоды, шуэм кассир. Нош коньдон туннэ ик кулэ ке? Милям агаймы туэ школазэ йылпумъяз, выпускнойлы костюм басьтом шуиськом вал... Я, коньдонэз, оло, куке басьтом ик. Но милям одӥг юанмы вань на: малы милемлы 600 манет лыдъяллям, ньыль нылпилы 800 луыны кулэ ук? Анай юаськем, но рос-прос валэктӥллямтэ. Мыным туж ӝож анае но, мукет нылкышноос понна но. Малы кивалтӥсьёс ялан тыбырынызы берытско Анайлы, соос но ас кожазы ӧз будэ, дыр,ук. Лена СИНИЦЫНА. Актэмыр гурт, Алнаш ёрос. Редакцилэсь. Леналэн гожтэтэз сюлэмез вандэ. Школаын дышетскись пинал сюлмаськытэк шудон-сеекъян интые анайзэ утьыны, бугйатыны выре, соин ӵош куректэ. Тау тыныд, Лена. Но вылаз вуыса, потоз на-а та нылашлэн трос нылпи вордэмез? Леналэн юанъёсыныз ми вазиськылӥм Алнашысь Калыкез улонвылонын утёнъя ёзэ. Отын валэктӥзы, Синицынъёслы пособие лыдъякузы янгышаса одӥг пиналзы понна коньдонэз Утчан сберкассае келяллям, соин Алнашын басьтонзы 600 манет. Но Синицыналы Утчанэ коньдонзэ утчаса ветлонэз ӧвӧл, сое куро Калыкез улон-вылонын утёнъя ёзысь (райсобесысь) бухгалтерие жингыртыны. Матысь дыре анайёс пособие ас гуртазы басьтыны быгатозы ни � сбербанкын ужасьёслэн отпусксы йылпумъяське. Чидалэ, огкылын. Малпаськом, Алнашысь Калыкез улон-вылонын утён ёзын ужасьёс асьсэос Синицынъёслы кылдэм югдурез ӟечгес валэктозы. Нырысетӥез Россиысь Наукаосъя академия кылдэмез дырысен миым 275 ар тырмонзэ пусйиз. Таин валче амалтэк тодэ лыкто Михаил Ломоносовлэн, Иван Павловлэн, Мстислав Келдышлэн, Андрей Сахаровлэн но мукет тодмо учёнойёслэн нимъёссы. Нош та дырозь Удмуртиын одӥгез но тодосчи академик ним ӧз басьтылы на вал. Алигес сыӵе дан вуиз Россиысь Наукаосъя академилэн Урал люкетысьтыз Удмурт центрен кивалтӥсезлы Алексей Матвеевич Липановлы. Шаерысьтымы нырысетӥез академик тодмо луэ механика удысын, тужгес но � ракета лэсьтонъя. Алигес Липановлэн ужъёсыныз тодматскыны быгатӥзы Ижысь Национальной библиотекае пырасьёс. М.КУЗЬМИН. ЖУРНАЛИСТЪЁСЫН ПУМИСЬКОНЪЁС Чорыг утча мур интыез "Али ӝутскись предприятиослы юрттон" акция чотын Журналистъёслэн огазеяськоназы арнялы быдэ пресс-конференциос ортчыло. Берлоез таӵе пумиськон тужгес аспӧртэмлыко ортчиз. Угось куное ӧтемын вал тунсыко адямиос � Ижевскын авангард модая лаборатория кылдытӥсьёс. Нылашты синучкон азьын кильтыръяське, синкашъёссэ гордэн, ымдуръёссэ чагырен буя ке � эн пайме, эн кышкатске. Авангард модая "Фасх Фисх" ("Модная рыба") лабораториез кылдытӥсь Юлия Иванчей но Макс оскыто: иське, та апок вала модаез, улонлэсь бере уг кыльы. Ижевске кузпалъёс-модельеръёс вуизы Ростовысь ар талэсь азьло. Та дыр ӵоже, секытэн ке но, шедьто кадь соос ар ӧрзэс. Туннэ нуналлы Юлия но Макс кӧня ке пумо дӥсьёс дасязы ни. Ужъёссы ӟечен пусйылэмын егитъёслы модая калык куспо фестивальёсын но дизайнеръёслэн конкурсъёсазы. Кузпалъёс ас удысазы, ӟуч сямен вераса, зэмос "асъёс" луо. Юлия � дышетскемезъя художник-модельер, Макс � художник-конструктор, дас арлэсь кема ку дӥсь вурон удысын ужамын. Кузпалъёслэн асьсэлэн пичи салон-ательезы ужа. Соос сюлэмшугъяськыса учко, огманер пӧрмытскем егитъёс шоры. 2,5-3 сюрс манет коньдон тырме ук вить-куать пумо валаса, ас шӧмъя дӥсь вуронлы. Туннэ Юлия Иванчейлы но Макслы сёт 8 сюрс доллар коньдон � соос ӝогак Ижевскысь китай но турция дӥсез палэнтысалзы. Но та дыре "Модной чорыгъёс" "сюпсё" чиньызэс. Э.КУМАЧЕВА. ТАЗАЛЫК ЧАКЛАСЬКЕ! Ческыт-а химия? ... Туннэ асьмеос ӟеч валаськом, кыӵе югдурын Россимы. Азьвыл асьмеды но, мукет кунъёсты но сюдӥсь странае табере зарезь сьӧрысь сӥль, нянь ваё. Ярам, со сиён-юон ӟечлыко луысал ке. Но ӵемысь кунгож сьӧръёс ысто асьсэлэсь мылем-куштӥськем сиёнзэс яке воксё но сиён суретъёссэс. Со суретъёссэс ушъяса-ушъяса ӵекто, висёнъёслэсь ӝог бурмон но кулон учыръёслэсь лыдзэс кулэстон сӥзё. Сиён-юонъя институт со суретъёсты (биоватсэтъёсты) кыклы люке: нутрицевтикъёслы но парафармацевтикъёслы. Нутрицевтикъёс � со ваньмызлы тодмо витаминъёс, микроэлементъёс но сылалъёс. Но азьвыл соосты аптекаосын врачлэн рецептэзъя гинэ сёто ке вал, али куанер сиёнмес "узырмытон" понна йӧлэ, мороженое, няне ватсало. Матысь дыре, Наукая но технической политикая министерстволэн чакламъёсызъя, сыӵе амалэн "узырмытыны" малпало сӥльлэсь сиёнъёсты, колбасаосты. Валантэм огез: кин лыдъям кӧня С витамин, йод яке эшшо маке кулэ соизлы яке таизлы адямилы. Малы лыдэ уг басьтӥськы котькуд адямилэн арлыдэз, тазалыкез, мылкыдыз, малпанэз... Валамон, сыӵе эскерон (анализ) лэсьтыны луоз компьютерен гинэ. Но со туж дуно � котькудӥз тырыны уг быгаты, соин ик, мар малпаськонэз? Нош кунгож сьӧрысь ивортонъёсъя тодмо, 1991-тӥ арын Америкаысь Массачусетс штатын 8 мурт уродмем, Д витамин ватсэтэн йӧл сиыса. "Корнфлейкесэн" � витамин ватсэтъёсын кукурузаен сюдыса комакъёс висьыны кутскизы: начармизы, вирзы уродмиз, давленизы тэтчаны ӧдъяз. "Корнфлейкес" вузаське асьме дорын но. Витамино сиён � умой, но сиён-юонэ витамин мултэс ватсало ке, адями изъян гинэ адӟе. Мугорын А витамин ке мултэс � йыр висьылэ, С, Д, Е ке � пинь сӥльысь вир кошке, сюл урод ужа. Мукет биоватсэтъёс � парафармацевтикъёс. Соос пӧлы пырто пудолэсь, будослэсь, минералъёслэсь пӧрмем яке синтетика амалэн кылдытэм биологической веществоос. Соос зэмзэ но адямилы ӟеч юрттэт сётыны быгато: иммунитетсэ ӝуто, жадемлэсь, кӧлыны быгатымтэлэсь юртто, мугорысь ядъёсты быдто. Кудӥз-огез вирысь холестеринэз кулэсто, мугорез чылкытато, начармыны юртто. Биоватсэтъёсты вузало магазинъёсын но, аптекаосын но. Нош тодӥськоды-а тӥ, биоватсэтъёс пушкы наркотиклы укшась веществоос пыро шуыса? Соин ик адямиос дышо сыӵе ватсэтъёслы, нош но нош басьто. Вузкарисьёслы со ик кулэ: "Нью Вейз" фирма биоватсэтъёсын араз 400 миллион доллар барыш поттэ, пе. Мар сярысь татын вераськонэз на? Биоватсэтъёс эмъюм ӧвӧл бере (со сиён вӧзы ватсэтъёс), пуштроссэ рос-прос уг эскеро. Соин уг шараяло соослэсь адямилы изъян ваемзэс. 1998-тӥ арын Америкаысь сиён-юонъёсъя но эмъюмъёсъя управление таӵе лыдпусъёсты шараяз: 1997-тӥ арын 2,5 сюрс адями биоватсэтъёслэсь курадӟем, 79-эз � кулэм. Тазалыклы изъян ваиллям "ма- хуана", "гербал экстази", "энертрим", "слендер пауэр" ватсэтъёс. Тужгес кышкыт луо эфедринэн ватсэтъёс. Соос вузасько асьме странаын но. Тросгес басьяло нылкышноос � вузкарисьёс уго син куспын начармон сярысь верамысь ик уг дугдыло. Вань туж но туж тодмо "Гербалайфлэсь" но уродмылон учыръёс. Французъёс сое асьсэлэн странаязы вузаны алӥзы ни. Син куспын бурмон, чеберскон понна адямиос оско, басьто олокыӵе но суретъёсты. Асьсэлэсь тазалыксэс быдтыса, кинлэсь ке кисыоссэ зӧкомытэ. Адями сиыны-юыны кулэ инкуазен сётэм сиён-юонэз гинэ. Зэмос сиёнын витаминъёс, микроэлементъёс но сылалъёс ваньзы ог-огенызы герӟаськемын, соин ик мугорлы пайдаё луо, умой пыӵало, нош пӧртэм ватсэтъёс но суретъёс � "кезьыт визьёсын" лэсьтэм кӧтпӧетъёс. Басьтэмын "Православная Москва" газетысь. Ӵуказе � Дуннеысь кооперацилэн нуналыз Кооперация вордӥськиз кык сю ар талэсь азьло. Рабочийёс, крестьянъёс, ремесленникъёс соку ини огазеяськылӥзы кооперативъёсы, огъя кужым, уксё (пай) чотын радъяны дунтэмгес вузъёс, сиён-юон поттонэз, юрттыны тужгес куанер улӥсьёслы. Декабристъёс, сютэм кулонтэм вылысь, Забайкальеысь казематъёсын 1831-тӥ арын кылдытӥзы "Бадӟым артель". Огазеяськыса бакча сиён будэтӥзы, пудо-живот вордӥзы. Дуннеын та вакытэ ог 120 удысъёсъя кооперативъёс ужало. Соос кылдытэмын вузкаронын, лэсьтӥськонын, транспортын, калыклы юрттэт сётонын но мукет. Дунне вылын соос 740-лэсь ятыр. Отын сю миллион ужасьёс, тямыс сю пала пай тырисьёс. Огкылын вераса, музъем вылын котькудӥз кыкетӥез улӥсь озьы яке тазьы герӟаськемын кооперациен. Кооперацилэсь нуналзэ али ваньмаз сямен странаосын пусъё. 1923-тӥ арысен асьсэлэсь праздниксэс пусъё Удмуртиысь кооператоръёс но. Соос чидазы экономикаын берло дас аръёс ӵоже луэм вань зурканъёсты, юнматӥзы, выльдӥзы асьсэлэсь удыссэс. Берло аръёсы кооператоръёс бадӟым юрттэт сёто республикалэсь огъя бюджетсэ узырмытонын. Ялан паськытало солэн удысъёсыз. Россия Федерациысь 77 потребсоюзъёс пӧлысь Удмуртпотребсоюз одӥгез устоез луэ. Кылсярысь, асьмелэн кооператоръёсмы колбаса поттонъя берло аръёсы 45-тӥ интыысь 14-тӥ интые ӝутскизы, консерваос поттонъя � 30-тӥ интыысь 6-тӥ интые, кудӟытӥсь юонъёс дасянъя � 43-тӥ интыысь 3-тӥ интые. Нош Россиез но лыдэ бастыса, Удмуртпотребсоюз вузъёс поттонъя 37-тӥ интыысь 12-тӥ интые ӝутскиз. Калыклы вузаськись вань сиён-юон пӧлысь ас кужымен поттэмез 37 процент луэ. Кооператоръёс асьсэос ик нянь пыжо, колбаса потто, кудӟытӥсьтэм ву, ческыт пыжиськем дасяло, чорыг ӵынато... Асьсэлэсь производствозэс ялан паськытатэмзы, выльдэмзы, азинтэмзы юрттэ шаерысьтымы узырлыкъёсты уже кутыны. Калыклэсь сӥльзэ басьтонъя асьмелэн кооператоръёсмы 37 интыысь 5-тӥ интые ӝутскизы, картофка басьтонъя � 31-тӥ интыысь 7-тӥ интые, бакча сиёнъя � 51-тӥ интыысь 13-тӥ интые. Озьы ик бадӟым саклык висъяське та удысын ужасьёсты дасянлы. Кема аръёс ӵоже ини товароведъёсты, бухгалтеръёсты, экономистъёсты дася кооперативной техникум. 1997-тӥ арын ужаны кутскиз Москваысь потребкооперацияя университетлэн Ижысь ёзэз. Вуоно арын сое йылпумъялозы нырысьёсыз специалистъёс: бухгалтеръёс-аудиторъёс, финансистъёс, коммерсантъёс. Нимаз предприятиослэсь но акциосын огазеяськонъёслэсь кооперативъёс пӧртэм луо ас азязы пуктэм ужпумзыя: нырысьёсыз сюлмасько тросгес коньдон поттон сярысь, нош кооперативъёс � пай тырисьёссылэсь но вань калыклэсь улон-вылонзэ умоятон, капчиятон сярысь. Кооперативъёслэн азинсконъёссы бордысь пото гурт хозяйствоослэн, гуртын улӥсьёслэн вормонъёссы. Соос куспын � юн герӟет. Дуннеысь кооперацилэн нуналаз шаерысьтымы кооператоръёс пӧртэм ужрадъёс ортчытозы, ужзылы йылпумъянъёс лэсьтозы, азьланяз быдэстоно ужпумъёсты чаклалозы. А.П.СИНЮШКИН, Москваысь потребкооперация университетлэн Иж ёзысьтыз кафедраен кивалтӥсь. ТАЗАЛЫК Шунды-мумы пот, пот..? О, гужем вуэм � ураметӥ "ӝуам" адямиос ветло. Толон ӝыт йӧлвыл-кӧсвӧй зыраса но юрттымтэ, шӧдске, кинлэн ке бордазы йӧтскемезлэсь кышкаса трамвайын шымырско � сутскем бервыл няськыт уг пот уго. Нош тодысалзы ке пӧсь шунды улын пыжыны яратисьёс, кузэс сутэмзы 10-12 ар ортчыса кышкыт адӟонэн берытскыны быгатоз шуыса... Бен, мултэс ультрафиолет сиослэсь рак луыны быгатэ. Со сяна, ку вазьгес кисырске, пересьме. Но адями эсэпсэ валаса шундыен эшъяське ке, тазалыкезлы пайда гинэ вае. Шунды сиос Д витаминлы кылдыны юртто. Со быгытъёсты, лыосты юнматэ, мугоре фосфор но кальций пыӵатэ. Шунды озьы ик шоканэз, вир ветлонэз умоятэ. Кӧня бен яра шунды улын улыны, тазалыклы изъян ваёнтэм понна? 10 минутысен ӝыны часозь ӵукна 10-11 часозь но 4 час бере. Нуназе шорын пыжыны туж кышкыт. Умой луысал сутскемлэсь утись кремъёсын зыраськыса, али соос магазинъёсын вузасько. Нош мар кароно, адями сутскиз ик ке? Туж огшоры � йӧлвылэн зыраськоно. Нош вӧен уг яра � со ку пасьёсты пытса. Ӟырдады ке, аспирин юэ но кӧня ке нуналлы салкым коркаяды жалясьтэм шундылэсь ватскыса пуке. ТАЗАЛЫК ЮАЛЭ � ВАЛЭКТОМ Пиелэн нырысьтыз ӵем вир кошке. Кызьы солы юрттоно? Пиналлэн нырысьтыз вир пӧртэм мугъёсъя кошке. Нырысетӥез � укыр матын вирсэръёсыз, соин ик кызыку, кизьнылыку со пилиське, яке пинал нырзэ копаку кузэ ньылдыны шедьтэ. Таӵе дыръя вазиськоно ЛОР-врачлы. Кыкетӥез � вир кема орсмыны выре. Со кышкыт мукет учыръёсы но: шуккиськыку, сӧсырмыку адями трос вирзэ ыштыны быгатэ. Врач тӥледлы ӵектоз анализ лэсьтыны, вирысь тромбоцитъёсты эскерыны. Куинетӥез � бадӟым вирзӥбет (давление). Пиналлэн вирӟибетэз нормая 90х60 яке 100х70 луыны кулэ. Ньылетӥез � йыр пушкысь зӥбет. Со ӵемгес луэ йырзэс шуккылэм муртъёслэн. Таӵе дыръя пиналэз невропатолог дорын эскероно. Нырысь вир кошкыку нырысетӥ юрттэт: ныре водородлэн перекисеныз коттэм вата пононо; чиньыен нырпелесэз зӥбыса возёно; нырвыжые 3-4 минутлы кезьыт тыроно. Ноку но уг яра йырез сьӧрланьтыса возьыны! Озьы вир кошкемысь уг дугды, ньылонтӥ кӧтпуше шеде. С.КОРСУНСКИЙ, нылпи врач. Йыр ке пороме Нылылы 11 арес. Туж курадӟиськом соин сюрес вылын транспортын: соку ик кӧдэктэ, йырыз берганы, ӧскыны кутске. Кыӵе ке висён ӧвӧл-а со, кызьы эмъяно? И.Снегирева. Валэктэ медицина наукаосъя доктор О.Полякина: � Кыӵе ке кышкыт висён шуыса сюлмаськонэз ӧвӧл. Нылпиос тросэз лэйкамлэсь, бергамлэсь курадӟо. Тужгес ик со шӧдӥське быдэ вуон вакытазы. Сыӵе дыръя "Торекан", "Дедалон" эмъюмъёс юыны ӵекто. Но пинал мурт сыӵе курадӟонлэсь мозмытскыны быгатоз, спортэн эшъяськыса но. Ӵемгес аттракционъёсы ветлэ, ӟечыралэ, уяны дышетске. ТАЗАЛЫК Шумпотымон-а пересьмон? Нуналлы быдэ арлыдо муртъёслы саклыкмы уг тырмы бере, соос чидатэк витё юбилей аръёсты: оло, тодазы ваёзы? Зэм но, туэ тани Вормонлы 55 ар тырмон аре арлыдоос вунэтэмын шуыны уг луы. Правительство но Тазалыкез утёнъя министерство быгатэмзыя ветеранъёслы сюлэм стимуляторъёс, кылон аппаратъёс пуктылӥзы, пиньзэс эмъязы. Но со тырмымон ӧвӧл. Туннэ отысь ветеранъёслы 75 ареслэсь тросгес ни. Ваньыз сямен кулэясько котыр ласянь эмъюрттэтлы. Туала медицина ӟеч азинске, но со уг кулэсты висёнъёсты, уг вормы пересьмонэз. Пересьмон бен со висён ӧвӧл, адямилэн улонысьтыз одӥгез, жаляса верано луэ, йылпумъясь вакытэз. Но кызьы сое шудо, каньыл кароно? Сое эскеро геронтологъёс. Тани валлян гинэ соос люкаськылӥзы Ижевске арлыдо муртъёслы ӟечгес юрттэт сётон сярысь ккенешыны. Семинаре пыриськизы Россилэн мукет улосвылъёсысьтыз медикъёс но. Югдур уго котькытын огкадьгес: калыкмы вазь пересьме. Улӥсьёс пӧлын но али тросгес арлыдо муртъёс. Кӧня ке ар ортчыса, соослэн лыдзы уката йылоз. Иське, эшшо тросгес саклык висъяно луоз. Тазалыксэс утён, эмъян сяна, арлыдо муртъёс кулэясько социальной юрттэтлы. Районъёсын, городъёсын ужась нимысьтыз сыӵе юртъёс вань мылкыд карисьёсты уг тэрыто. Республикаысьтымы ожысь ветеранъёслэн госпиталязы но арлыдо ветеранъёс аръёсын черод возьмало. Та госпиталь сярысь ке6 солэн ужез туннэ быдэс Россилы ушъяськымон. Отын ужасьёс вакчи дыр ӵоже ветеранэз эскеро, эмъяло. Котькудӥз татын эмъяськем мурт тау кылъёссэ вера. Арлыдо но пересь муртъёсты чакласа возён, эмъян понна Ижевскын туэ усьтэмын нимысьтыз геронтологияя центр. Но, валамон, отчы туж ӧжыт шедёзы ёросъёсысь, кыдёкысь пичи гуртъёсысь адямиос. Соин ик медикъёслэсь ужзэс нырысь ик интыосын умоятыны кулэ. Медсестра яке фельдшер котькуд пересь муртэ син азяз мед возёз. Асьмеос ӵемысь адӟиськом таӵе суредэз: пересь дыго-мого валэктыны выре врач доры лыктэм мугзэ, нош соиз йырзэ но уг ӝутъя, кыӵе ке вӧсез зӥбломытӥсь эмъюмлы рецепт мыче но келя. "Тӥни сыӵе учконэн нюръяськыны кулэ асьмеос нырысь ик, � шуиз министр Сергей Шадрин но. � Асьмеос ваньмы куке но пересьмомы, медаз пӧрмы со куректон- курадӟонлы". З.РЯБИНИНА. ВЫЖЫОСМЫ Брангурт калык сюлмаз возе Кайта сӥзьыл, 11-тӥ октябре, 150 ар тырмоз нырысетӥ удмурт кылбурчимылэн, прозаикмылэн но драматургмылэн, быдэс дуннелы тодмо этнографмылэн Григорий Егорович Верещагинлэн вордскемез дырысен. Кызь сизьым арзэ, туж пайдаё ужан вакытсэ, со улӥз Пичи Пурга ёросысь Брангурт черкогуртын. Улӥз, котырысь калыкез югдытыса, визьлы, ӟечезлы дышетыса, инмарез сюлмазы мур пыӵатыны юрттыса, культураез вӧлмытыса. Баӵко гинэ вылымтэ со, огдыре ик нылпиосты дышетэм татысь земской школаын. Со вакытэ дышетскемъёс табере ӧвӧл ни, соослэн нылпиоссы но песянайёс-песятайёс луэмын ини. Нош Брангурт калык, котырысь гуртъёсын улӥсьёс уг вунэто усто дышетӥсьсэс, али ик дасясько ини та бадӟым нуналэз данэн пусйыны. Со понна кылдытэмын Г.Е.Верещагинлэсь вордскем нуналзэ умойгес ортчытонъя нимысьтыз комитет. Отчы быръемын татысь кивалтӥсьёс, дышетӥсьёс, удмурт культурая огазеяськонысь эшъёс, писательёс, шаерысьтымы куд-ог тодмо тодосчиос. Комитетэ быръем эшъёс ас азязы пуктэм ужпумъёсъя кенешыны, планзэс эскерыны алигес люкаськылӥзы Брангуртысь культура юртэ. Вераны кулэ: вуоно арысь 11-тӥ октябрёзь пӧртэм-пӧртэм ужрадъёс ортчытыны чакламын. Ваньмыз со быдэсмысалыз ке, туж усто луысал. Мыным отысь тросэз яраз. Кылсярысь, та нуналэн валче, брангуртъёс асьсэ селозэс шӧдскымон чылкыт но чебер карыны малпало. Брангурт школаын чакламын научно- практической конфереция ортчытыны. Таӵе ик пайдаё ужрад радъяны учкемын ёросысь дышетскись пиналъёс пӧлын. Эшъёс ӵекто Г.Е.Верещагин нимо премия кылдытыны. Таиз но, мон сямен, туж шонер. Нырысетӥ писательмес, тодосчимес, калыкез югдытӥсьмес весяк буре вайыса возён вылысь, Бранугрт школалэн юртэз борды Г.Е.Верещагинлэсь татын ужамзэ возьматӥсь пул юнматоно. Тросэз ӵекто черкогуртлэн музеяз Г.Е.Верещагинлэн ужъёсыныз бадӟым экспозиция усьтыны: таиз но туж кулэ егитъёслы. Кызьы тодмо, Григорий Егорович вордскемын Кез ёросысь Полом черкогуртын, ужамын Сосновка, Ляльшур, Шаркан черкогуртъёсын. Соин ик комитетлэн ужрадъёсаз пусъемын та школаосысь коллективъёсын Брангуртын пумиськыны. Со сяна, юбилеен валче пусъемын ужась коллективъёсын, учреждениосын Г.Е.Верещагинлы сӥзем лыдӟонъёс ортчытыны, та пумысен газетъёслэн редакциосазы, Удмурт радиоын но телевидениын ужась журналистъёсын пумиськылыны. Туж усто луысал, шуизы кенешонэ люкаськылэмъёс, Григорий Егоровичлэн ӵыжы- выжыосыныз адскыны, вераськыны. Озьы ик та ужрадэн валче чаклало Брангурт сельсоветын вордскем но будэм артистъёсын, журналистъёсын, писательёсын но музон тодмо муртъёсын пумиськылыны. Юбилей нуналъёсы радъямын луоз киужъёсты возьматонъя "Брангурт усточиос" выставка. Туэ, 27-тӥ августэ, ӵапак сизьымдон ар тырме дано удмурт пимылэн кулэмез дырысен. Куд-ог мукет азьветлӥсьёсмылы сямен, солы но трос кылоно луиз пӧртэм ултӥян кылъёсыз. 1927-тӥ арын баӵколэсь духовной санзэ но, эсьмаса, куштӥзы. Соин валче брангуртъёс малпало августлэн пумаз асьсэ дорын Григорий Егоровичез но мукет сантэмамъёсыз буре ваён ӝыт ортчытыны. Кызьы адӟиськомы, ужрадъёс бадӟымесь. Но соосты ортчытыны ӟечгес мед юрттозы вал научной учреждениосмы, пресса, шаерысьтымы Национальной политикая но Культурая министерствоос, Удмурт Республикаысь Кивалтэт но Кун Кенеш. Оло, сюрозы нимысьтыз спонсоръёс но маин ке юрттыны мылкыд карисьёс? Г.Е.Верещагинлэн вордскемез дырысен 150 ар тырмонэз паськыт пусъёзы республикаямы но. Таин валче вунэтыны уг яра Брангуртысь но мукет интыосысь ӟеч кичӧлтонъёсыз. Брангуртъёслы одно юрттоно! Кирилл ЛОМАГИН. ВАЛЭКТЭ ЮРИСТ Сэрегез дася адвокат Лилия ШКЛЯЕВА (телефон 25-33-70) Общежитие понна дун Кылылэме вань: адями общежитиын нимаз комната возе ке, дун тыронын солы компенсация висъяське. Мон нимаз комната уг возиськы ке но, уждунэлэн 12 процентэзлэсь ятырез со понна кошке. Сётыны кулэ-а мыным компенсация? Л.СОСНОВА. Та юанлы валэктон шедьтыны луоз Иж городын улон инты но коммунальной юрттэт понна гражданъёслы компенсация сётон сярысь положениысь. Юрттэт басьто: кунлэн, муниципалитетлэн но обществолэн фондысьтыз юртъёсын улон инты возисьёс но соосын ӵош ялан улӥсьёс; улон юрт возись кооперативе пыремъёс; общежитиын улӥсьёс. Гостиница выллем общежитиын улӥсьлы социальной нимаськись норма тупатэмын 10 квадрат метр, комнатае пыртэмлы � 6. Адями нимаз комната уг возьы шуыса, солы компенсация тырытэк кельтыны уг яра. Сое уг сёто ке, адями рос-прос валэктонэн справка курыны быгатэ. Татын лыдпусъёс пыр возьматоно: малы компенсация ӧвӧл. Сыӵе валэктон ӧвӧл ке, судысь юрттэт курыны луэ. Чиньы бервылъёс Мынам квартираям лушкаськисьёс пыразы. Ӧс кал вылэ чиньы пытьызы кылем. Капыръясьёсты утчам интые, милиционеръёс монэ кыӵе ке кабинетазы пыртӥзы но вань чиньы бервылъёсме нимысьтыз бумага вылэ выжтӥзы. Пумитъяськыны выри, нош мыным шуизы: ми, пе, законъя ужаськом. Кыӵе сыӵе закон вань меда? И.СИЛИНА. Паймоды оло уд, нош сыӵе закон зэмен ик вань. Нимыз таӵе: "Россия Федерациын дактилоскопияя кун ласянь пусъён (регистрация) сярысь". Зэм, сыӵе ужез кужмысь лэсьтыны уг яра, адями ачиз мылкыд мед кароз. Сыӵе уж оскемын югдурез утёнъя ёзъёсысь паспортъя но визая удыслы. Малы бен кулэ чиньы бервылъёсты пусъён? Та пытьыос утисько Югдурез утёнъя министерстволэн Иворъёсъя центраз. Котькуд адямиез инмар мед утёз, но со шуге-леке шедьылэ сюрес вылын но, тылпуын но, нюлэскын но, ожмаськонын но. Куд-огзэ арняосын тодманы уг луы. Адями фамилизэ, нимзэ, атай нимзэ, вордскем интызэ воштӥз ке, та сярысь центре гожтыса мед ивортоз. Чиньы бервылъёссэ центрын утемысь дугдытэмез потэ ке, озьы ик гожтыса курон (заявление) сётэмез луэ. Пуась атай Люкиськем картме суд косӥз алимент тырыны. Воргорон интыысь интые пуаз но копак ужтэк кылиз. Нылпи садын мынэсьтым алимент пумысен справка куро. Суд сое уг сёты. Ма кароно? И.ВОЗИСОВА. Куд-огез амало кышномуртъёс пуась картъёссэс алимент тырыны косо банке усьтэм счётазы. Тӥ но озьы кариды ке, справка курелэ банкысь. Ужасько но пенсия басьтӥсько... Мон пенсия басьтӥсько но ужасько. Матысь ӵыжы-выжыме ватыны юрттэт (пособие) кури райсобесысь. Ӧз сётэ: ужан интыяд вазиськы, пе. Мар вера та пумысен закон? С.АФАНАСЬЕВ. Ватыны юрттэт басьтыны кулэ ужан инты пыр социальной страхованиея фондысь. Со ӵоша дас пичи уждунлы, вӧзаз ватсало на районъя коэффициентэз. Озьы валэктэ "Ватон но ватон уж сярысь" Россия Федерацилэн Законэз. *** Пенсие потӥ ке но, больницаын выж миськисько. Пенсие но уждунэ уг вуо улыны ичизэ кулэ луись лыдпусозь � прожиточной минимум шуонозь. Вылаз ик, монэ курдато: ужась пенсионеръёс вылэ кыӵе ке тырон пуктэмын, пе. В.НИКИТИНА. Ужась пенсионеръёслы песия лыдъяське вуж законъя. Таиз кутэмын 1990-тӥ арын 20-тӥ ноябре. Уже пыремез но отысь кошкемез сярысь адями ивортыны кулэ райсобесэ. Со озьы уг лэсьты ке, пенсия мултэс басьтэ � нимаз коэффициентэз но вераса. Та учыр шараяськем бере, мултэс тырем пенсизэ кельто, законлэсь куронзэ чакласа. *** Быдӟым оже ветлэмъёслэн пенсиоссы туж пӧртэмесь. Тодэме потэ вал: самой бадӟымез пенсия кыӵе меда? И.КАМЕНЩИКОВ. Туэ 11-тӥ январе Россия Федерациысь Правительство юнматӥз шоро-куспо уждун сярысь постановление. Соя ик 1-тӥ февральысен лыдъяло пенсиез. Тужгес ӝужытэз "вӧлдэт" � 1410 манет. Эмъюм Ноку но сураськемез ӧй вал на Матрон Анналэн. Нош аракы дуноям бере, та уж борды но басьтӥськытэк ӧйлась. Бускельёсэсь юалляськыны керпотӥз. Шуозы: таӵе арлыдэ вуыса но сокем кулэ ужлы дышымтэед на. Кызьы пӧрмытӥз, озьы ик сураськиз. Юись картэзлэсь лушкемак гинэ. Картэз ужын дыръя огпол флягазэ усьтӥз, оло, пе, кӧня ке сакыр ватсано на. Корка тыр чырс зын вӧлскиз. Нырез ик чатыртэ. Со куспын ӧсэз кин ке но усьтӥз. Матрон Анна учке - ас синъёсызлы уг оскы, картэз ужысьтыз вазьгес ваньмем. Соку ик пуны сямен зынъяськыны кутскиз. Гур сьӧрысь флягаез адӟыса, ымныраз пальпотон кылдӥз. - Кызьы озь тодад лыктӥз ай? Сиськемлэсь азьвыл талы экспертиза кароно. Кышномурт пумит куаретыны ӧз дӥсьты. Картэз лекос йӧнтэм сямо. Корка пушкын брага зын уката но кужмояз. Кык кобы мекалтыса, Семон ачиз но валесаз бекмыльскиз. Нош Анна пудозэ утялтыны потӥз. Час ортчыса, корказ пыре но... Мар та таӵе? Туж уно горд тараканъёс вуиллям. Брагазэ но шӧмъяллям ни, шӧдске. Кудӥз гаӵ кылле, кудӥз пыдзэ выретэ на. Нош сьӧд тараканъёс кытысь? От, шайтанъёс! Манялэн пудо-животъёсыз чырс зынэз шӧдыса потӥллям ук. Мар ишан та? Айы кибыос пограллям ни, мумыосыз султыны выро на. Анна кенак вань тараканъёссэ ӵужиз но банкае пытсаз. Со куспын картэз но ӝуштыса султӥз. Кобы кутыса, выльысь брага омыртӥз, гуч-гуч юиз. Кышномуртлы со лекос синазькыль потӥз. Синазькыл но юрӟым. Бадӟым таракан кадь. Йырыз кур луыса, вань люкам кибыоссэ сэрпалтӥз фляга пушкы. Семонлэн сямен ик, таосызлэн но кӧтсы мед тыроз. Семон сайказ. Вамыштӥз юлтошез пала - фляга доры. Кобыяз брага омыртӥз. Сьӧд но горд виштыосты бусаськем синмыныз варенья пыры кожаз. Юиз. Сялскиз. Синъёссэ паськыт усьтӥз. Эшшо сялӟиз. Собере ӧскыны кутскиз, сюлъёсыз ик педлань пото ни кадь. Та дырысен юись Семон луиз Семен Алексеевич. Кышноос Анналэсь весь юаллясько: - Кызьы эмъяд? - Гипнозэн, - вакчияк вера кышномурт. Галина Баженова. Турын дасян кутскиз Гурт ужасьлэн ӟырдыт вакытэз вуиз. Толлы турын дасяно. Но куазь эрик уг сёты � ялан зоре. 28-тӥ июньлы ке верано, Камбарка сяна, республикаысь ваньмаз ёросъёсын турын турнало ни. Вавожъёс 9,4 процентсэ аразы ни, шарканъёс но можгаос � быдэн 8,7 процентэн. Но Вавож ёрос со пӧлысь 1,1 процентсэ утялтыса вуиз, Шаркан � 3,8 процентсэ. Вить ёросъёс сенаж дасяны кутскизы. Ужзэс умой мытӥзы вал балезиноос. Ёросъя чакламлэсь 2,8 процентэз дасямын. Огвакыт ик гуртоос гуосы силос тырыны ӧдъязы ни. Тани Вавож палан туэлы планзылэсь 12,4 процентсэ быдэстӥзы. Оглом элькунъя ке верано, туэ турын дасян миымлэсь умойгес кутскиз. А.АНДРИЯНОВ. ТАЗАЛЫК Сэпты медаз пӧсьты Малы кылдо висёнъёс? Адямилэн сӥльвирыз, лулпушез но, мылкыдыз ог-огенызы туж юн герӟаськемын. Нош мылкыдъёсмы асьмелэн туж трос но пӧртэм. Мылкыд эсэпезъя ке, иназ мынэ, мултэс ке � висёнэ вуттэ. Кылсярысь, адями трос йыркуръяське ке, мусэныз, сэпеныз курадӟе. Тодады вае ай, кызьы сыӵеос сярысь калыкын шуо: йыркуръяськыса, пе, сэпез мед пӧсьтоз. Та веран юнме шорысь малпамын ӧвӧл. Чакламды вань, дыр, нылпидылэсь малэсь ке юн кышкаса валесаз "уямъёссэ". Кышкан угось герӟаськемын пекляосын но кызь пуйыен. Пекляос лябӟо, адями ялан малэсь ке кышкаса, куалектыса улыку. Нош мӧзмыт, улонэз пӧрмымтэ муртлэн ӵемгес кӧтпушыз висе. "Здоровье" газетысь. ПОЛИТИКА "Единство" Удмуртиен кусып возе Кун Думае депутатъёсты быръён дыръя Удмурт Республикая ваньмызлэсь трос куара люказ "Гондыр" огазеяськон. Но озьы луиз: "Гондырлэн" элькунысь люкетэз депутатэ нокинэ но ӧз ӵекты. Ӧпкелемзы дунтэм ӧз усьы. Кун Думае партийной списокъя Удмуртилэсь нокин ӧз сюры. Юмоке шедем республикалы Думаысь "Единство" фракция кылкутӥсь депутат юнматӥз. Со � Владимир Коптев-Дворников. Ачиз со Москваысь ке но, бордаз юнматэм шаере депутат ӵем вуылэ. Та нуналъёсы нош ик адӟытъяськиз удмурт шаерын. Сьӧраз лыктӥзы ужбергатисьёс. Сиён-юон но капчи промышлленность удысын огкыл тупатыны туртто Шарканысь эшъёсынызы. Юнме веран уз луы, дыр, озьы Коптев-Дворников республикае инвестициос кыске шуыса. Шарканэ вуылэм сяна, Москваысь куноос пумиськылӥзы на Кун Кенешысь депутатъёслэн "Гондыр" группаенызы. Журналистъёсын пумиськыкуз, Коптев-Дворников ивортӥз, Кун Думалэн Кун Кенешен кемалась кусып тупатэмез потэ вал ни шуыса. Али со вань ни. Кылемаз сессиын элькун депутатъёс кылдытӥзы "Гондыр" группа. Али отчы пыре 15 депутат. Малпанзы вань фракция карыны. "Единство" али, КПРФ бере, кыкетӥез бадӟым партия. Республикалэн котькуд районаз партилэн ёзъёсыз кылдытэмын. Озьы ик депутатъёслэн ёрос кенешъёсазы группаос усьтӥсько. Соос куиняз гинэ ӧвӧл на. Кызьы шуиз Коптев-Дворников, Удмуртилы президент луоз соиз кандидат, кин пала дурбасьтоз "Единство". Али эскеро ньыль фамилиосты. Котькудӥныз вераськонъёс мыно. Валамон, соослэн нимъёссы шараямын ӧй вал на. Ӝоген Ижевскын партилэн люкетэзлэн конференциез ортчоз. Отын тодмо луоз: потозы-а асьсэ адямиен яке кин ке пала дурбасьтозы-а. Депутатлэн кылъёсызъя республикалы удалтӥз Приволжской округе сюременыз. Сизьымез пӧлысь С.Кириенко гинэ гражданской адями. Со Россиысь Правительстволэн Тӧроез луыса ужамын. Асьмеос гинэ ум, быдэс удннеын тодо. Солы капчигес округе инвестициос кыскыны. Матысь дыре Сергей Кириенко Ижевске вуылыны чакла. Ӝоген кутскыны кулэ вал ни депутатъёслэн гужем каникулъёссы. Но Правительстволэн но Президентлэн куремъёссыя Кун Дума ужзэ июльлэн шорозяз азьланьтоз. Бадӟым уж нуиськоз Административной кодексъя. Депутатъёс эскерозы кун властез выльдонъя законъёсты. Воштонъёс но ватсанъёс пыртыны кулэ Россилэн "Интыын аскивалтон сярысь" Законаз. А.АНДРИЯНОВ. Кизнер но палъёсын Та вакытэ шаерамы улӥсьёслы котькудӥзлы пӧсь йӧтэ, дыр. Тулыс ужъёс йылпумъяськыса вуизы гинэ но, кутскиз мукетыз кысык вакыт � пудо сиён дасян. Вераны кулэ, туэ турын ӟеч удалтӥз, ю-нянь но чебер гинэ тэлеӟемын. Нош кыӵе улэ-вылэ калык гуртъёсамы? Соин тодматскон понна та нуналъёсы Удмурт Республикаысь Кун Кенешлэн Тӧроез Александр Волков вуылэ шаерысьтымы ёросъёсын улӥсьёс доры. Кылем арняе со ветлӥз Кизнер палъёсы, Юкаменске, Можгае. Кизнер районын со нырысь ик пумиськиз Короленко черкогуртын улӥсьёсын. Та селое али 28 иськем асфальт сюрес кыско. Кылиз на 3 километрзэ вӧлдыны. Но, кызьы пусйиз республикалэн кивалтӥсез, улонмы сокем ушъямон ӧвӧл. Кылсярысь, Кизнерын туэ сюрс гектарлы ӧжытгес юос киземын, трос гинэ ужтэк кылемъёс. Но со дыре ик Вичурка гуртын, кытын кивалтӥсь луыса ужаз вал Кун Кенешлэн депутатэз Аркадий Малков, югдур чылкак мукет. Татын улон интыос но ӝуто, пинал но вордо, выль школа но пукто, уждун но дыраз басьто. Озьыен, тросэз интыосын кивалтыны быгатон бордысь но потэ. Кизнер палъёсын улон-вылон сярысь мадём газетмылэн вуоно номеръёсаз. Н.БАЙТЕРЯКОВ. Н.Глухов (фото). Копашин генерал � Удмуртиын Та нуналъёсы асьме шерын ужаз Россиысь химической ож тӥрлыкез быдтонъя программалэн директорез генерал-лейтенант Валерий Копашин. Со вуылӥз Кизнер но Камбарка ёросъёсы, учкиз кышкыт оружиез отын кызьы утемзы, вераськиз куд-ог ужпумъёсты быдэстонэз ӝогомытон сярысь. Генерал Удмуртие ветлӥз Кун Думалэн депутатэзлэн Светлана Смирновалэн куремезъя. Уго быръён вакытэ Светлана Константиновналы вазиськизы уно адямиос, химической ож тӥрлыкез быдтонэн герӟаськем ужрадъёсты ялан син азьын возьыны дэмласа. И.ЛЕБЕДЕВ. Вормонъёс тӥледлы, покчиос Туннэ Завьялово черкогуртэ люкасько шаерысьтымы пинал спортсменъёс. Гурт нылпиослэн гужем шудонъёссы шулдыр, ӟырдыт ортчыны кулэ. Ӵукна 9 часысен кужымзэс мертало ни волейболэн, баскетболэн, футболэн шудонъя командаос. Тужгес паськыт радъямын луоз капчи атлетикая нюръяськон. Отчы пыриськыны кулэ вань 25 ёросъёсысь пичи спортсменъёс. Завьялово черкогурт ог 500 пала нылъёсты но пиосты шуныт мылкыдын пумита. Ӟеч ӵошатсконъёслы ӟеч-ӟеч дасямын стадион, шутэтскон сэрегъёс. Пиналъёс кужымзэс мертанэн артэ ог-огенызы тодматскозы-эшъяськозы. Шудонъёс йылпумъяськозы арня нуналэ. Соослэн кызьы ортчемзы сярысь иворез газет бамысьтымы лыдӟыны быгатомы на. Н.НИКОЛАЕВ. СПОРТ Куазь люкетӥз Инкуазь туэ паймытъя но паймытъя: я йӧзор усе, я лек сильтӧл ортче, юртъерез тарка, писпуосты погыръя. Я отысь, я татысь урод ивор кылӥське. 28-тӥ июне Ижысь "Динамо" стадионын ортчыны кулэ вал футболъя пумиськон. Но люкетӥз ведра дурын кадь кисьтӥсь зор. Таӵеез туж шер луэ, футболистъёс уго котьку сямен зор-кот шоры учкытэк шудо. Табере "Газовик" Сочиысь "Жемчужинаен" нюръяськоз ни берлогес, нимысьтыз тупатэм дыре. Нош 1-тӥ июле асьмелэн командамы кужымзэ мерталоз Нальчикысь "Спартакен". Куазь гинэ медаз люкеты ни вал. М.КУЗЬМИН. ВАЛЭКТЭ ЮРИСТ Сэрегез дася адвокат Лилия ШКЛЯЕВА (телефон 25-33-70) Люкиськон Гожто тӥледлы Шаркан районысь Быги гуртысь адямиос. Одӥг семьяын уло бубы, мумы, пизы но солэн кышноез. Соос лэсьто люкиськон (раздельной) запись шуон � музъем понна. Мумызэс пери (паралич) шуккиз, со корка пушкытӥ но мырдэм ветлэ. Бубизы но пересь ини. Нош соослы нимаз музъем сёто. Шонер-а лэсьтэ сельсовет? В.П. Юанысь валаны шуг: кыӵе удысын сыӵе бумага лэсьто � куспазы-а люкисько, ваньбурзэс-а люко? Соин ик таӵе юанлы меӵак валэктон сётыны уг луы. Нош ик юрттэт сярысь Валэктэ вал мынам юанэлы. Милемлы, бубытэк кыльыса будэмъёслы, пенсия ӧз йылы. Соос ожын быремын. Ӧвӧл-а ватсаны кулэ ми кадьёслэсь пенсизэс? Фаина ПЕРЕВОЗЧИКОВА. Шаркан районысь Сурон-2 гурт. Жаляса верано луэ: нокыӵе законын но верамын ӧвӧл ожын быремъёслэн нылпиоссылы пенсия будэтон сярысь. Пенсионеръёслы юрттонъя берло кутэм документ тазьы нимаське: "1941-тӥ�1945-тӥ аръёсы Быдӟым атыкай музъем понна ожын Вормонлы 55 ар тырмонэз пусъёнэн валче одӥг пол тырон сярысь". 438 номеро сыӵе Указ поттӥз Россия Федерацилэн Президентэз 2000- тӥ арын 25-тӥ феврале. Туэ апреле коньдонэн юрттэмын оже пыриськемъёслы, отын быремъёслэн кышнооссылы, соос выльысь ӧз бызе ни ке, ожъёсын сэрен сӧсырмыса пиналысен ӧлексы (инвалид) кылемъёслы. *** Шонер-а мон валасько меда законэз? Пенсионеръёслы район коэффициент (уральской шуон) уг тыриськы шат? В. НИКОЛАЕВ. Якшур-Бодья район. Валэктон сётэ "Кун пенсиосты лыдъян но будэтон сярысь" Россия Федерацилэн 113 номеро законэз. Кутэмын 1997-тӥ арын 21-тӥ июле. 1998-тӥ арын 1-тӥ февральысен тупатэмын выль радлык. Отын лыдэ басьтӥське пенсионерлэн нимаз коэффициентэз � индивидуальной коэффициент пенсионера (ИКП). Соя район коэффициент тырыны чакламын ӧвӧл ни. *** Картэ кулӥз. Кыкез ик пие быдэ вуымтэ. Кин мыным юрттыны кулэ картме ватэмен валче? Кызьы лыдъяське та коньдон � картэлэн уждунэзъя-а, кыӵе ке мукет лыдпусъя-а? Н.ИСУПОВА. Иж город. Та ужпумъя закон нимаське "Ватон но ватон уж сярысь" ("О погребении и похоронном деле") Карттылэн ужам интыысьтыз тӥледлы тырыны кулэ дас пичи уждун мында коньдон. Карттылэн уждунэз санэ уг басьтӥськы. Пӧрасьлы уждун Мон 1985-тӥ арысен школаын пӧрасько. Лыдъяськисько 4-тӥ разрядэн ужась. Уждунэ туж ичи. Кылем арын май толэзьысен басьтӥсько 260 манет (будэтэмзы бере). Азьло вал 170 манет. Ужаськомы кык кузя. Эшелэн 3-тӥ разряд, басьтэ 225 манет. Школамы шор ёзо, нылпиос 142 кузя. Ваньзы соос но дышетӥсьёс столовойын сисько. Сиён пӧзьтэм сяна, нянь но асьмеос пыжиськом, выж но миськиськом (125 квадрат метр). Нимаз та ужъёслы коньдон уг тыро. Картошка но киын паласьком. Вань сиён-юонэз асьмеос ик тыбыр выламы нуллӥськом. Завхозмы ӧвӧл. Собере милемлы чик уг тыриськы стаж понна но урал коэффициент. Нош больницаысь сантирака стаж понна басьтэ. Со но ми сямен ик бюджетын ук. Малы озьы? Городысь нылпи учреждениысь пӧрасьлэн уждунэз кӧня меда? Нокызьы но милям мында гинэ ӧвӧл, дыр. Мон 15 ар ужасько ни. 1985-тӥ арысен 1992-тӥ арозь колхозын лыдъяськи, озьы ик нылпиосты сюдӥ ке но. 1992-тӥ арысен монэ выжтӥзы калыкез дышетон ёзэ. Огъя ужам стаже 22 ар. Л.ГИРБАСОВА. Алнаш районысь Азамат гурт. Тямыс ар талэсь азьвыл, 1992-тӥ арын, Россиысь Правительство юнматӥз бюджет удысъёсын ужасьёс понна огъя тариф система (единая тарифная система � ЕТС). Со валэктэ час, нунал, толэзь ужам понна кӧня дун тыронэз. Уж сярысь зконъёсын кодексысь 18-тӥ ёзэт (статья) 1992-тӥ арысен куре уж сётӥсь но ужась куспын огкыл (договор) лэсьтыны, одно ик гожтыса. Отын луэмезъя пусъёно адямилэсь профессиезъя но должностезъя быдэсъяно ужъёссэ. Собере лэсьтыны луэ на квалификацияя характеристика, ужан интылы карта, должностья инструкциос. Уждун тыриське огъя тариф системая, район коэффициент асьме дорын 15 процент. Уждундылэн быдӟалаезъя юанды кылдэ ке, праводы вань ведомость курыны, отын уждундэс люкетэн-люкетэн возьматыса. Уждун умойтэм тыремын ке, вазиськыны быгатӥськоды вылӥысьгес организацие. Ижысь нылпи садын 6-тӥ разрядэн пӧрась сюдэ 200 муртэ, уждунэз 449 манет 86 копейка, кияз туэ май толэзе вуиз 356 манет 89 копейка. Вузэз ушъямлы оски Коньдонэ трос ӧвӧл бере, бызён азям муртлэсь фатазэ басьтӥ. Телевидениысь рекламалы оскыса, лекос ушъям порошокен сое миськи но � копак ярантэм луиз. Кин кыл кутэ сыӵе алдаськись ялонъёс понна? Ирина. Данакез газетъёс лыдӟисьлы иворто: ялонлэн пуштросэз понна кыл кутэ сое сётӥсь. Телевидение но радио озьы уг верало ке но, законъя татын но кыл кутэ со ик. Озьы шуэ "Басьяськисьёслэсь правооссэс утён сярысь" Россия Федерацилэн Зконэз. Реклама сётӥсь кыл кутэ ялонэз дасянын но суреданын законэз тӥямез понна, ялонэз вӧлмытэм дыр, инты но амал понна. Умойтэм ялон сётэм понна, монополизмлы пумит нюръяськись ёзъёслы ивор вуттымтэ понна луэ административной амалэн алыны яке 200-озь пичи уждун понна штраф тупатыны. Барыш поттон вылысь юри алдаськись ялон понна янгыш муртлэсь уголовной амалэн кылзэ юаны луэ. Нянь... зарезь кубистаен Кизнерысь нянь пыжон комбинат ялан паськытатэ тазалыклы пайда ваись вузъёс поттонзэ. Басьяскисьёс ӟеч дунъязы ни ю тысьлэсь пыжем сукыриез. Табере потто ичи кислотаен булка, со чакламын гастритэн но язваен курадӟисьёслы. "Троицкая" ческыт сдоба пайда сётоз куайыны кутскисьёслы, диабетэн, атеросклерозэн, сюлэм ишемиен висисьёслы. Тужгес но саклык висъяны кулэ зарезь кубистаен пыжем няньлы. Та будосын йодэз вань бере, няньлэн но шӧмыз аспӧртэмлыкогес. Кызьы шуо врачъёс: курыт эмъюм юытозь, эсьма таӵе нянез сиёд. Н.СЕРГЕЕВ. Ӧте "Анастасия" Ужтэк кылем егитъёс котькытын ик пумиськыло. Ичи ӧвӧл соос Сюмси ёросын но. Соин валче татысь администрацилэн егитъёсын ужанъя ёзэз но республикаысьтымы егитъёслэн биржазылэн филиалэз покчи ужез бергатонъя программа дасязы. Сое быдэсъян борды басьтӥськиз "Анастасия" пичи предприятие. Чакламъя выль ужан интыос кылдозы ужтэк кылем егитъёслы, дышетскисьёслы, быдэ вуымтэослы. Огдыре соос быгатозы дышетскыны но, ужаны но. Нырысь-валысь усьтӥськоз магазин. Отын вузкарозы Европаысь ваем вуж дӥсен-кутэн. Сое тупатъялозы, выльдозы, виштыоссэ утялтозы, та арбериослэсь небыт шудонъёс но мукетсэ вурозы. "Анастасия" ужа ни. О.ИВАНОВА. Наградаос � даноосызлы Мар быдӟа шумпотон со адямилы, куке ужам уждэ адӟо, данъяло ке. "Кизили" вакыт кин ке доры вазь вуэ, кин ке доры � бер. Алигес нош ик Кун Кенешлэн Президиумезлэн залаз, ӟеч тыршемзы понна, 34 адямиез наградаосын пусйизы. Соосты ӟечкылаз Кун Кенешлэн Тӧроез Александр Волков. Россиысь обороная министрлэн нимыныз со именной пистолетъёс кузьмаз Владимир Гродецкийлы, Василий Чугуевскийлы но Геннадий Кудрявцевлы. Вераны кулэ, Макаровлэн пистолетъёсыз дасямын Ижысь механической заводын, валтӥсь директорез � Василий Чугуевский. Туннэ одӥг нылпиез но будэтыны секыт. Нош кӧня кужым кулэ тямыссэ вордыны но будэтыны? Вань на асьме пӧлын сыӵе кышкасьтэм адямиос но. Со Завьялово ёросысь Ирина Копысова. Россия Федерацилэн Президентэзлэн Указеныз со пусъемын Почёт орденэн. Республикаын ваньмызлы тодмо Трошковъёслэн семьязы. Соос Воткинск палась луо. Та семьяын, асьсэлэн нылпиоссэс сяна, мурт нылпиосты будэто. Анайзылы � Алевтина Петровналы � ИИ степенё "За заслуги перед Отечеством" орденлэн медалез сётэмын. Уно аръёс ӵоже тодон-валанзэс, быгатонзэс кунлы сётэмзы понна, калыкез данъязы орденъёсын но медальёсын. Уноезлы сётэмын "Дано" ним: дышетӥсь, юрист, вылӥ школаын ужась, мелиоратор но мукет. Соос пӧлысь самой егитэз � Костя Соболевлы � мӧля вылаз бырттӥзы "За спасение погибавших" медаль. Соин луэм учыр ар талэсь азьвыл вал ни ке но, кун ӟеч ужъёсты уг вунэты. Соку Степан Разин нимо урамысь одӥгаз коркась квартира ӝуаны кутскиз. Укмыс этажъем юртэ соку ик ӵын зын вӧлскиз. Дыр � уйшор. Ӝуась квартираын ньыль мурт изе вал. Одӥг пиосмурт но куинь кышномурт, огез соос пӧлысь � анайзы, пересь маке. Костя куиньзэ поттӥз, ньылетӥзэ поттыкуз ачиз ӵынэн ӝоканы кутскиз. Ярам, ӵапак тылпу кысӥсьёс вуизы. Егит пи ужа "Удмуртнефть" акционер обществоын грузчик- стропальщик луыса. Адямилэсь ӟеч ужамзэ тодыса, солэсь шумпотэмзэ адӟыса, аслад но ӟеч ужъёс лэсьтэмед потыны кутске. А.АНДРИЯНОВ. Лужан выжыысь Игра ёросысь Лужан гурт. Мар сярысь со вера? Нырысь ик син азяды пуктэ удмурт баснялэсь кузёзэ Афанасий Лужанинэз (Корепановез). Вордскем гуртэзъя со аслыз псевдоним кутӥз. Нош Федор Корепанов? Ма тодӥськомы таиз сярысь? "Гудыри" � "Удмурт коммуна" � "Советской Удмуртия" � "Удмурт дунне" газетлэн историяз таӵе чуръёс вань: 1937-тӥ�1940-тӥ, 1944-тӥ�1955-тӥ аръёсы редакциын практикант, литературной ужась, редакторлэн воштӥсез но отделэн кивалтӥсь луыса ужаз Федор Васильевич Корепанов. Удмурт радиолэн 1-тӥ номеро приказаз штатэ кутэмъёс пӧлын та адямилэн нимтулыз. 1931-тӥ�1933-тӥ аръёсы со радиовещаниын ужаз. Александр, Федор, Афанасий, Андриян, Алексей. Тыпы кадь юнэсь пиосыз вордӥзы- будэтӥзы Василий Игнатьевич но Екатерина Демидовна. Огез бӧрсьы мукетыз ӵашъем кадесь погразы соос улонлэн паськыт но бугырес пилемо бусыяз. "А"-ос пӧлысь "Ф" гинэ, бусые огназ кылем пересь писпу кадь, 91-озь веказ улонзэ. Туэ куартолэзьлэн пумаз Федор Васильевич улонысь кошкиз. Семьяысь кыкетӥез пи вордскиз 1909-тӥ арын 20-тӥ мае. Со бӧрсьы куаразэ поттӥз вуоно кылбурчи Офонь � Афанасий, собере � эшшо но эшшо пиос вордскизы. Соос шоры учкыса, нэнэзы бӧрдылоз вал: кытысь тырмытод таослы дӥсь но кут? Одӥг пол вань секытос азвесьсэ-чигвесьсэ, атайзылэсь Георгий кироссэ кутыса, Торксин шуон базарын вузаз. Со понна пиос пась кӧтын, вылысьтыз вылаз кышъям штаниен ӧз ветлэ. Бубызы кема ӧз улы: Герман ожын кык пол газэн шоканэз пытсаськылӥз. Но Георгий нимо киросэн бертӥз. Бадӟым Пурга волостьын мукетыз сыӵе дано адями ӧй вал ни. 1919-тӥ ар. Калык "синтэм" на, кышкатскемын. Гордъёс вуыса, ваньзэ, пе, таркалозы, шуо. Лужанысь Николаевкае, ӟуч гуртэ, школае нокин уг ветлы ни. Офонен Федя гинэ дас вить иськемез олань-талань лёгало. Таос но огнуналэ аналскизы. Атайзы дораз ӧтьыса визьмаз: � Пиосы, кылзэ, ма верало. Гордъёс-а, ӵужъёс-а, лызъёс-а вуозы � нош грамота кулэ луоз. Тодэм песьтэр уг куры... Газет усьтӥз синзэс. "Виль синь" вуылӥз гуртазы. Собере 1922-тӥ арын Василий Игнатьевич "Гудырилы" гожтӥськиз. Пиналъёс лыдӟисько, мукетъёсызлы но дэмлало. Укыр етӥзъяськись Федяез почтае ӧтизы. � Тон газет вӧлдыны туж быгатоноед. Ойдо ветлы коркась корка, мед гожтӥськозы... Зуриысь почта пияшлэсь ужамзэ ушъяз. Солэн гожтӥськисьёсыз тросгес луо вал. Со вакытэ "Гудыри" газетын ужась Федор Ложкин татчы вуиз но лӧпкытӥз паньтэмзэ: � Тӥ доры 300 экземпляр газетмы лыктэ ни. Быгатӥськод ужаны. Ми тонэ редакцие басьтом. Соку басьтыса ӧз вуэ. Но Федор Корепанов селькор вал. 1931-тӥ ар. Ижын радио усьтыны ӧдъяло. Федор отын ни � ӧтизы. Тросгес кылзӥсьёсты, пе, утчано. (Соку радиоверанъёсыз наушникен кылзо вал, вуоно араз гинэ громковорительёс кылдӥзы.) Татын но Корепановлэн лыдпусэз вылынгес луылӥз. Мултэс етӥз вал со. Радио но кинлы ке ӧз яра. Куинь кылэз ӟеч тодӥсь, передачаоссэ удмурт, ӟуч, бигер кылын нуыны быгатӥсь редакторзы Василий Егорович Бутаев отпуске кошкиз но... вуэ, пе, выем (берло тодмо луиз: кулакъёс выйтӥллям). Выль уж тодэмез куре. Корепанов ӝыны ар ассэ дасяз радиолы редакторе, Москвае курсэ ветлыса. Нош газет бордаз кыскизгес, лэся. Материал бичаса ветлэ ни Федор, корреспондентъёслы юрттэ... Сӥзьыл рабселькоръёслэсь ӧтчамзэс люказы. "Гудырилэсь" нимзэ, пе, воштоно. � Степан Бурбуров вал соку "Гудырилэн" редактрез, � тодам лыктэ Федор Васильевичлэн мадемез. � Мон но вераськи со ӧтчамын: "Гудыри" ӵашъе � вань удмурт калыклы ивортэ выль улон вуэм сярысь. Вань кырсь-пожез гылтэ-сузя. Тазьы ик кельтоно солэсь нимзэ. Ӧз кылзӥське. "Удмурт коммуна" каризы. Удмурт улослэн партийной конференциез. Трибуна сьӧрын � нырысетӥ секретарь Сергей Ельцов. Куӟебай Гердэз янгыше уськытэ, озьы но тазьы пож вуэн кисьта. � Кузьма Павлович монэн артэ пуке вал, � тодэ ваёнзэ азьланьтӥз Фёдор Васильевич. � Ветлон вис гинэ милемды люке. Интыысьтыз пӧсектыса султӥз. "Сергей, тӥ нырысь коть лыдӟиськыны дышетске вал, собере янгыше уськытоды", � куараез Гердлэн векчигес, кӧня ке дырекъя. Ельцов чурыт вераз: "Ми тодӥськом, мар лэсьтӥськом". Ельцов ачиз но берло националист карыса пытсэт сьӧры пуктэмын вал. "Эшъёсыз" сое коӵышпиез кадь погмаллям, йырсизэ ишкаллям. Эшшо со Можгалан ужаз на, атеист вал. Федор Васильевич пинал задорлыкен тодаз ваиз мукет эшъёссэ но: � Син азям соос мынам... Йыгын Курбат. Ох, чебер, ӝикыт дӥсяське вал. Олокытчы пыриз, чиптэм-чаптэм. Алксандр Эрик укыр етӥз вал, туж кышкасьтэм. Гожъямме вистэм- вожтэм тупатъя. Быдэс бам тыр гожтэ: переписать! со бертӥз ожысь, пленын вал. Вералляз: тубисько, пе, Парижын Эйфель башня йылэ ик, котыр син сузёнтэм дуннеез учкисько, мӧзмем сюлэмме пичи ке но буйгатӥсько... Одӥг-ог юылэ вал ни. Арестовать каризы сое, быдтӥзы... 50-тӥ аръёсы. Тӥни озьы, пож ву тулкым кыкетӥзэ но, куинетӥзэ но нуиз тужгес визьмо пиосмес. (Кылемез вань на). (Кутсконэз газетлэн 82-тӥ номераз.) 1932-тӥ ар. Та дырысен Федор Корепановлэн сюресъёсыз герӟасько Алнашен. Татын со пумита вуоно кузпалзэ но, эмчи Машаез. Кӧня ке гинэ "Гудыриын" ужаса вуэ но, сое Алнашысь почталы кивалтӥсе пукто. Собере быръё комсомоллэн райкомаз кыкетӥ секретаре. Тӥни озьы, пуксеттэм сямызлы луыса, егитысен пӧртэм ужъёсы вуттӥське Федор. Но адӟонлэсь уд пегӟы, шуо. Газет уж сое бордаз думиз ик. "Егит большевик" газетын соку ужа вал алнаш пи Семен Петрович Колесников. Комсомоллэн областной конференцияз со нырысетӥ секретарьлы Корнил Шибановлы вазиськиз, Алнашын, пӧй, вань газетын ужаны быгатоно адями, туж чупрес маке. Корнил Ильич партилэн обкомаз ваиз Федор Корепановез. Татын ужало вал со вакытысь туж йӧно, визьмо удмурт пиос (писатель луон талантсэс быдэсак усьтыны вуымтэ адямиос � репрессия тулкым соосты пож вуэныз сьӧраз нуиз) Йыгын Курбат но Александр Эрик. Таӵе "тузъёсын" артэ кызьы мон, дышетскымтэ адями? � аслэсьтыз пиртэш луэмзэ ялан шӧдылӥз Федор. Соку ӵапак син шораз йӧтӥз ялон: Ленинградысь Воровский нимо институтэ журналистэ дышетскыны куто. Куинь ар дышетскыса берытскемез бере, сое "Егит большевик" газетлы редакторе юнматӥзы. Но кутскиз финн ож. Федор Корепановез военкомат пыр ысто Сарапулэ запасын сылӥсь полке. Татысь военком шуэ: винтовка ум сётэ, штабын уж тырмоз. � Грамотаез тодӥсьёс ӧжыт на вал соку, � тодаз ваиз Федор Васильевич. � Воинъёс присяга куто, нош гожтӥськыны уг быгато. Соос интые мон киме нюртылӥ. Политрук шуизы монэ. Мобилизация кӧня ке кулэсмиз но, сӧсырмемъёсыз вайыны ыстылӥзы. Выборге ветлӥ. Маннергеймлэн линиез дорын, ой, кӧня бырем солдатъёс кыллё вал!.. Быдӟым ож ӧз кутскы на вал � Федор Корепановез обком пыр "Удмурт коммуна" газетэ редакторлы воштӥсе каризы. Соку ик Кузнецов военкомлэсь йӧтӥз: кызьы озьы, милемын вераськытэк... Ог 200 муртэз люкаса, вагонъёсы туйназы, Мари Республикае, пе, келяно. Но Агрызлэсь кыдёке вуыны ӧз кылды Федорлы: то поезд вагон, то паровоз ӧвӧл. Олокытын но кӧлано луиз дас нуналзэ. Тиф кутӥз. Эмъяськыса-эмъяськыса пельёсыз кылэмысь дугдӥзы. Службалы ярантэм луиз. Берло ини Федор Васильевич ӝожтӥськыса шуылӥз: � Озьы мон кыли: оже ветлэм мурт но, инвалид но ӧвӧл. Старшой лейтенант вал ини, но выль воинской билет сётыса ӧз вуттэ. Ачим сярысь ӧжытгес сюлмаськи. � Нош тӥледыз со аръёсы янгыше уськытон вылысь ӧз кыскалэ-а? � юай Федор Васильевичлэсь. � Кызьы ӧз � кысказы, � шуиз со. � Монэн ӵош Ленинградын дышетскиз Мария Поздеева. "Егит большевикын" гожтэтъёсын ужаз. Сое малы ке янгыш каризы, ышиз- быриз адями... Монэ но органъёсы ӧтьылӥзы Поздеева пумысен. Озьы но, озьы, ӵош ужады, дышетскиды, ма сярысь вераськиськоды вал... Ваче син вуттылӥзы. "Асьмеос маке вераським-а? � Ӧм". Вот озьы... Финансъёсъя министерствоын вылэм агентсы, машинистка. Соку, 50-тӥ аръёсы, арестовать каризы Афонинэз, Зоринэз, Эрикез... Со агентсы тожо быриз. Асьсэос ик быдтӥзы, дыр, вераськыса ветлоз на шуыса... Аслаз верамезъя, Федор Корепанов "Советской Удмуртия" газетын дас куать ар но ӝыны ужаз. Семьяен улонэз вайяськиз: кышноез доры Муроме ветлоно луэ вал (таиз чугун сюрес станциысь больницаын главврачын ужаз). Со вакытэз сярысь Федор Васильевич тазьы тодаз ваиз... � Муромын уж утчасько � нокызьы уг шедьы. Кык толэзь пала ужтэмаса ветлӥ. Горкоме, райисполкоме но пырай � уж уг шедьто. Шуисько: мынам правоя но тодон- валанэ вань. Индылӥсь луиз-а: тон, пе, шу: вить класс гинэ дышетскемын. Озьы монэ заводэ кутӥзы, кык толэзь распредмастер вал. Отын партилэн историезъя но мукет дышетсконъёс радъямын вал. Мон гожтӥськи политэкономиез дышетонэ, кивалтӥсьёс пӧлы. Син шоразы йӧтӥ, лэся: распредмастерысь валтӥсь инженер-технологе каризы. Чертежъёсыз ваё � мон соосты лыдӟыны дыши. Кык ар ужаса вуи... 1966-тӥ арын Афанасий Лужанин кулӥз (жаль, та выныз сярысь Федор Васильевичлэсь трос юалляськыса ӧй вутты). Та дырысен газет уж нош ик ас бордаз герӟаз, табереяз ини Можга городын. Но кузпалызлэсь берытскемзэ Федор Васильевич эшшо ар витёно луиз на... Ӝабырес вал сямыз та адямилэн. Котькытчы вутскылӥз. Можгалан сое тодӥсьтэмез ик ӧй вал ни. Сельхозотделын ужатозяз, котькуд гуртэ огпол гинэ ӧз вуылы, дыр. Пенсие потыса, вуж туспуктэмъёсыз-патретъёсыз выльдыны-бадӟыматыны шуыса, гуртъёстӥ ветлӥз, суредасьлэн-ретушёрлэн юрттӥсез вал. 90 аресаз вуыку но ветлӥз на чорыганы. 42 килограммъемзэ огпол кутӥ визнанэн, ушъяськиз со. Ватка шур дуре но поездэн вуылэм. Тэльысь ӧз ваньмылы. Можгаос сое ӵемысь кияз корзина тыр губиен адӟо вал. Губитэм дыръя но мон шедьтылӥ, шуылӥз. Кызьы ке газетэ ялон сётӥз, губи вузасько шуыса. Соин валче юмоке, пе, сюри. Телефон жингыртэм: "Тӥ-а губи вузаськоды?" � "Бен, мон". � "Нош налог тыриды-а?" � "Ӧй". Со дырысен губи вузанэн ӧй выры ни, шуиз Федор Васильевич. Озьы туала закон шуккиз пересез. Кема улонлэн кыӵе "секретэз" юанэлы валэктыса, Федор Васильевич ӝажыысь чечы васькытӥз, (сое, пе, одно вылӥын возёно), лимон, водка поттӥз. Тани таосыз, пе, котькуд ӵукна сиськемлэсь азьло сиёно-юоно: лимонэз � вандэт гинэ, мукетъёссэ � пуньыен-кыкен. Собере ӵукналы быдэ физзарядка лэсьтӥсько на, шуиз. Озьы улӥз-вылӥз Лужан выжыысь огез юн пушъет. Ас бӧрсяз пизэ-нылзэ кельтӥз, таос кыксы но механической институтэз быдтӥзы. Виктор Ижын улэ, бытовой техникаез тупатъясь акционер огазеяськонэн кивалтэ. Римма пенсиын ни. 18 ар индустриальной техникумын дышетӥз, завуч вал. Внукъёссы пыд йылазы султэмын. Мария Яковлевна огназ кылиз Можгалась квартираязы. 88 арес ни солы. Медициная службаысь майор, быдэс Европаез пырпотэмын, Франциозь вуэмын. Ашальчи Окиез но со умой тодэ. Вуылоно на вылэм та кышномурт доры... Татьяна ЧЕРНОВА. ? Федор Корепанов (бур пал дураз) война бере аръёсы "Советской Удмуртиысь" эшъёсыныз. ШӦКЫЧ Николай НИКИФОРОВ Уйвӧтысь капкаос Серемес верос Выжыкылысь сюрес воже шедьыса сокем секыт ӧвӧл кадь тунаськыны � азьпал адӟонэд тодмо. Бураз вамыштод � шуддэ шедьтод, палляназ кожод � ас эзельдэ пумиталод. Нош мон, йыромем така музэн, кык капкаос азе лыктыса пыкъяськи. Огез, удмурт гуртъёсын музэн чебер пужыослэсь чильпамын, мукетыз � огшоры гинэ лэсьтэмын. Жальмаса сылӥсько: кудаз-о йыгаськыса ас шудме шедьто? Огшап утчалляськеме бере, лабрес бадяр бордысь тӧдьы-сьӧдо кнопкаез синйылтӥ. Чиньыеным зӥби но капкаос йылэ кык атасёс ӝутскизы. Собере тӧдьы атас апостол Петрлэсь, сьӧдэз � Иуда Исариотлэсь тусбуйёссэс басьтӥзы. Кыксы ик сабырлы мылкыдось, тунсыкъяськисесь адско. � Нимтулдэ вера, � кияз ӟазег тылы но зӧк журнал кутыса ӵектӥз тӧдьы дӥсенэз. � Ильпиев Александр Серапионович, � дыректӥз куарае. � Эрекча со, � мыньпотӥз Иуда. � Ас гумыраз со шоры нокин нимын-тулын ӧз вазиськылы. Илька Сандыр со. Кушем нимыз � Маймыл. � Малы сыӵе пӧрмостэм но ултӥясь кушем ним сётӥзы? � юаз апостол Петр. � Удмуртъёс ӟеч адямиоссэс Койыкен, Пужеен, Дыдыкен... нимало кадь. � Тусбуен удалтӥськымтэ. Ныры нушы кадь, кымесы � такыр бусы, синъёсы сюбегесь... � Нош ик эрекчаськод, � сынэм ӟиры куараеныз вазе Искариот. � Тонэ ведь аракы юыса, ымнырад сурон керттэмысь озьы нимазы гуртоосыд. Чаль, чаль вӧзам. � Улонад маке-маке ӟеч ужъёс лэсьтӥд-а? � сӥсьяса ик шорам учке капка кузё. � Ма, ма, � йырберме комрасько. � Сизьым нылпиослэн тайзы луисько. � Хи-хи-хи! Ха-ха! � горе ни Иуда. � Нылпи лэсьтыны пыӵ но йӧндыре. Шедьтэм маин ушъяськыны. Кымесам быльыраса ву шапыкъёс потӥзы. Йырвизьме тусьысь макняез сямен сурасько- бергатӥсько. Номыр йӧнлыез тодам уг лыкты. Олома сямен куке но лыдӟем кылбурысь чуръёсты тодам ваи. Ӝегатскытэк пӧлэсьтӥсько: � Писпу мерттӥ, корка ӝутӥ, нылпиосме будэтӥсько... Ӟеч малпанъёсме тӧлпери музэн туга Иудалэн горемез. � Вот ведь, алдарчи Сандыр! Кылыныз вӧямтэ табаысь но табанез уськытоз. Нош мынам книгаям воксё мукет пусъемын. Ас дораз одӥг писпу но мерттымтэ со. Школаын дышетскыкуз гинэ, дышетӥсез косэмысь кӧжыпу мерттэм вылэм. Сое но ву киськатэ аналтэм. Корка но ӝутымтэ, колхоз квартираын улэ. Зэм, кык ар талэсь азьло мунчо ӵупем, ӝутэм. Озьы ке но муръётэк сылэ на. Куинетӥ мадёссэ но мыдланьтэ. Со сизьым нылпиослэн гинэ атайзы ӧвӧл, дас одӥг нылпиослы югыт дунне вылэ вордскыны юрттӥз. Тодад вай ай Гучык Насьтаез, Опинь Вараез, зырой Петырлэсь кышнозэ... Мугорысьтым вире ик быркетӥз, кожалод. Оломае но тодэ, лушкем ужъёсты но шарая сьӧд атаслэсь пӧрмытскем адями. � Инмарез сӥлы карид-а? Анай-атайёстэ, ӵыжы-выжыостэ, калыкез гажад-а? � Кисьтонъёс дыръя гадям кирос тырылӥ ик. Черкын но пылатэмын. Анай-атайме но сӥлы кари, калыкез но гажай вал. � Та кылъёслы но эн оскы, � юн вазе Иуда. � ас дыраз вал со пионер, комсомол, коммунист."Ӟу-кы-ыр-р!" кӧшкемыт куара сётыса усьтӥськись сьӧдалэсь буям капка. Соку ик синйылтӥ шайтанъёслэсь сирен пурты улэ тыл понэмзэс... � Мар-ось вандыны ёртэм парсь кадь черккъяськод? � кӧтурдэсам мырӟиз кузпалэ. � Ада пырто, Наталь. Утьы монэ, � шарак усьтӥсько синъёсы. � Нунал пӧрат юыса но рае шедемед потэ, оло? � меӵкытэ Наталь. Кышкыт вӧтамме валатскыса, гадям кирос тырисько но капчияк лулскисько. Выль вордскем нуналлы ужъёс но пусйисько ни: писпу мерттоно, мунчо гурез сюроно, палэнысь нылпиосылы кузьымъёс ыстоно. Усьтӥськозы выль удысъёс Телевизор учкисьёс усьсэ ни тодматско вуоно арнялы программаен. Куд-огез синйылтӥзы ини, дыр, 10-тӥ каналын кык выль "Основной вирус" но "Госказна" темаосъя передачаос усьтӥсько. "Телекомпанилэн ужаз со выль уз но луэ. Соосты учкыны луоз понедельникъёсы "Удмуртия" информационной каналын. Со герӟаськемын адямиослэсь туннэ но ӵуказе нунал сярысь сюлмаськонъёссэс возьматонэн, шонер но ӝогак информациос сётонэн, туннэ нуналлэсь куронъёссэ сэрттон- пертчонэн. Та передачаосы асьсэос учкисьёс но пыриськыны быгатозы. "Удмуртия" информационной канал ужаны кутскиз ни, экран вылэ шонерак телефон номеръёс но передачаослэн темаоссы потозы. Отчы ӧтьылозы тодосчиосты но ас ужазы кивалтӥсьёсты, ӧнерчиосты. Нош "Госказна" передача чылкак паймымон луыны кулэ. Арняяз кык пол республикамылэн бюджетэз сярысь тупен-тупен иворъёс сётъямзы. Со сяна, городъёслэн но районъёслэн бюджетъёссы сярысь но иворъёс луозы. Кытчы но кӧня манет нуналлы быдэ кулэ луиз, кошкиз, кутӥськиз но мукет со выллем информациос. Кыӵе луозы со передачаос, улыса адӟом ини. Нош передачаос умоесь, мур пуштросъемесь мед луозы шуыса, телевидениын ужасьёс мылысь-кыдысь сюлмасько ини. Сое ӟеч возьмато "С добрым утром" но мукет выль передачаос но. Со сяна, выль программаос но паськыт сюрес шедьтӥзы ини, кылсярысь, "Песочные часы. ХХ век" но мукет. Учке милемды, гажано эшъёс, пыриське милям выль передачаосамы. Иван Басов. Шӧкыч Серем пыр Шудтэм учыр бере машиналэн кузёез автомобильзэ мастерское вуттэ. Ӧте мастерез: - Вералэ вал, мар ке карыны луоз-а машинаеным? - Луоз, конечно! Азьпалысьтыз но берысьтыз бамперъёссэ басьтыса, висказы выль автомобиль пуктӥд ке... х х х Автосалонын басьяськись аслыз оскымон но чидась машина быръе. - Нош мар луоз монэн, часлы 120 иськем ӝоглыкен юбо борды мырӟиськи ке? - О, эн сюлмаське! - шуэ вузкарись.- Адӟиськоды-а азьпал укно вӧзысьтыз мудорез? - Бен, но со мырӟиськонлэсь юрттоз шат? - Уз. Со тӥледлы рае черодтэк шедьыны юрттоз... х х х Воргорон машинаезлэсь ӧссэ кышноезлы усьтэ ке, озьыен, яке машина выль, яке кышно выль. х х х Ӟуч воргорон япон техникаез возьматонъя выставкае шеде. Дораз японец лыктэ но мыжыксэ возьматыса юа: - Тод, мар татын? Воргорон малпа: "Кутчало ай мон тае" - но шуэ: - Телевизор! - Шонер. Нош кӧня? х х х Купеын шоро-куспо арлыдо кузпалъёс мыно. Картэз кышноезлы вазе: - Микроба, ву вай. Соиз кошке. Купея бускелез юа: - Зэмзэ но солэн нимыз сыӵе-а? - Ӧвӧл. Калык азьын гинэ микроба со, нош гуртын со зараза,- шуэ картэз. х х х Кык картъёс верасько: - Мынам кышное шуэ, ваньзэ, пе, ыльын сиыны кулэ. - Мынамез но пӧраськыны уг яраты. х х х Мыным ноку но кышноос ласянь уг удалты. Нырысетӥез монэ улляз, кыкетӥез ачиз кошкиз, нош куинетӥез улэ но улэ, улэ но улэ... х х х - Малы мон солы бызи-а? Малпасько, адями нуналлы быдэ юэ бере, озьыен, уно уждун басьтэ. х х х Висись врачлы сьӧд-сьӧд кылзэ возьматэ. - Мар луиз? - юа врач. - Малпамтэ шорысь водкаен ӟенелике али гинэ вӧлдэм асфальт вылэ усиз. х х х Барын ужась милиционерлы ӝожтӥське: - Та воргорон мынэсьтым дунтэк водка куре. Нуэлэ сое отделение. - Малы? Ми дорын но сое дунтэк уг лэзьяло. Республикамылы азьмурт быръён нунал кыдёкын ай. Та пумысен законъёсъя пӧртэм СМИ-ослы но, нимысьтыз фракциослы но, оген адямиослы но калык пӧлын нокыӵе ужрадъёс нуыны, кыл вӧлдыны лэземын ӧвӧл на. Озьы ке но, законъёсты тӥян учыръёс одӥг-одӥг пумиськыло ини. (гожтэтысь) Миквор: � Галя, мон тыныд шуи ук, вазьнагес ай, вазьнагес! Галя: � Скотина, вань верамез пеляз понӥськод! Отӥяз бер луоз! Суредэз В.Шиловлэн. Почта нуллӥсь � шуд вуттӥсь Бен, почтаын куддыр луыло ӝож иворъёс но. Озьы ке но, газетысь, гожтэтысь асьмеос ӵемгес тодӥськом ук ӟечсэ, сюлэмез шумпоттӥсьсэ. Туннэ асьмелэн луонлыкмы вань дорамы почта вуттӥсьёсыз соослэн праздникенызы ӟечкыланы. 1993-тӥ арын Росссилэн президентэз указ поттӥз: июльлэн кыкетӥ арняяз пусъёно почтаын ужасьёслэсь нуналзэс. Али Удмуртиын связья 500 ёз ужа. Дасмос люкетэз со пӧлысь � Ижын. Ми тау кариськом вань эшъёсмылы, управленилэн кивалтӥсез Юрий Кайгородов бордысен кутскыса газетмес тужгес пыдло гуртын улӥсьёс дорозь вуттӥсь почтальонозь, "Удмурт дуннеез" вӧлмытыны юрттэмзы понна. Таза луэ, шудо луэ, вань малпанъёсты мед быдэсмозы! "Удмурт дунне" газетын ужасьёс. Ӝук вӧсян, кушын юмшан Егитъёслэн огъя шулдыръяськонъёссы Алнаш ёросын кемалась ортчыло ни. Нош туэ Кузёбай гурт мылкыд кариз быдэс республикаысь нылъёслэсь но пиослэсь быдэ вуонлы сӥзем ужрадзэс ас дораз пумитаны. Тодады вайытӥськом: Удмурт шаерын нырысетӥез Гербер но 1993-тӥ арын татын вал. Быдэ вуисьёслэсь пумиськонзэс радъязы "Нырысетӥ май" колхоз, Алнаш Татьяна Прокопьева), Нылпиосын ужан политикая министерство, Егитъёсын ужанъя кун комитет но музон организациос. Ортчем сямъя, кузёбайёс уно сю куноосты гурт кузя пыдын вамышъятӥзы но данак капкаос азьын куноятӥзы. Нюлэс кушын вӧсям ӝук сием бере пуромизы ӟырдыт ӵошатсконъёс. Быдэ вуись пиос возьматӥзы бугро ӵупемзэс, нылъёс � карнанэн ву нуллэмзэс, чильпаськемзэс, керттӥськемзэс. Вал кыткыны усто пӧрмытӥзы кузёбайёс, кармыжъёс (Кизнер ёрос), баграш-биграос (Пичи Пурга), пушнер салат коранын � бадӟым сурдъёс (Можга).Тунсыко пӧрмиз куноосын тодматскон. Алнашысь асанъёслэн арганчизы ӧвӧлэн соослы юрттӥз ни районысь егитъёслэн йырзы Владимир Соловьев, озьы ик шуге-леке сюрем бадӟым сурдъёслы � Киясаысь арганчи Николай Самсонов. Вавожысь Выль Бияысь туж пинал куноос ваиллям гуртсы сярысь кырӟан. Баграш-биграос абдратӥзы аспӧртэм шуланъёсын. Котькуд команда сярысь трос мадьыны луысал. Та кылъёс трос пол вераса лекос волямын ке но ни, выльысь тодэ ваёно луэ: пӧртэм пумо нюръяськонъёсын вормиз эшъяськон. А.ПЕТРОВ. Туспуктӥз В.Камашев. Ӝутскоз-а "Ижмаш"? Та пумысен оскон мылыдзэс уг ышто предприятилэн кивалтӥсьёсыз. Оскон пыӵато туэ ӝыны ар куспын "Ижмашъя" басьтэм лыдпусъёс но. Озьы продукция поттон миым та вакытэн ӵошатыса 89 процентлы будӥз. Удмуртиысь одӥгаз бадӟым заводын 32 сюрс винтовка-карабин, 92 станок, 13 сюрс мотоцикл бичамын. Тужгес но шумпотымонэз � автозаводлэн "сайкамез", 6 толэзь ӵоже татын 9,5 сюрс машина лэсьтӥзы (кылем ӝыны ар куспын � 6,6 сюрс вал), со пӧлысь июнь толэзе � 2,9 сюрс. Толэзьысь толэзе продукция поттон татын йылэ, будэ уждун, юнма дисциплина. Ар талэсь азьло "Ижмаш" шорлыдын 8 толэзьлы уждунэн ӝегатылӥз. Али со 4 толэзёзь кулэстӥз ни. Кунгож сьӧры туэ предприятие 5 пол тросгес продукция келяз. М.КУЗЬМИН. "Югыт Бемыжын" югектэ Кизнер ёросысь "Югыт Бемыж" акционер огазеяськон азьвыл аръёсы нуллэ вал Мичуринлэсь нимзэ. Котькытын сямен ик татын но нимзэс воштӥзы. Воштыны воштӥзы ке но, улон-вылон азьло сямен ик мынэ � гыро, кизё, кутсало, йӧл-сӥль потто. Та нуналъёсы гуртоослэн ужзы пӧсь. Кутскиз турнан дыр. Но люкетӥсь зоръёс кӧс турын дасяны луонлык ӧз сётэ. Табере сое силосэ тыро. Дасямын ни 300 тонна пала. Хозяйство вуоно ю-нянь сярысь но сюлмаське. Алигес гинэ гидъёссы котырысь вань кыедзэс бусыосы ворттӥзы. Мынэ пар бусыосты гырон. Огазеяськонлэсь тӧрозэ Михаил Зайцевез та дыре интыысьтыз шедьтыны шуг. Комбайнъёслы воштос ёзъёс утчаса, олокытчы но вуылэ � Иже, Можгала, Кизнере... Вузам продукция поттэм понна вань коньдон хозяйствоез возьыны мынэ. Нош государство кредит сётыны уг дырты, лэся. Унояз гуртъёсын столовойёссы кемалась пытсамын ни. Нош татын со гужембыт ужа. Нуналаз кык пол сюдо. Сиськемзы понна тыро ӝыны дунзэ гинэ. Калык трос ветлэ. Бен, "Югыт Бемыж" пумен пыд йылаз султэ. Гуртоос бадӟым осконэн уло: татын но куке-соку улон югектоз. Фоторепортажзы Николай БАЙТЕРЯКОВЛЭН но Владимир Камашевлэн. ? Скал кыскисьёс (паллянысен буре): Татьяна Санникова, Елена Баграшова, Елена Андреева, Людмила Атаманова; скалъёсты возьмась Владимир Кубаков; Оля Емельянова туэ 8-тӥ классэз йылпумъяз, гужемзэ анаезлы кунянъёсты утялтыны юрттэ; механизаторъёс Александр Слесарев но Михаил Калягин. Данъяськиськом! Та нуналъёсы тросаз вузъёсын шумпотон ужрадъёс ортчыло: студентъёс дышетсконзэс йылпумъян сярысь дипломъёс басьто. Огез сыӵе ужрад кылем арняе Ижевскысь техникая кун университетын радъямын вал. Татысь приборостроительной факультетэз 126 егитъёс йылпумъязы. Табере соос инженеръёс. Пӧлысьтызы 17-ез уката но шудоесь адӟискизы � дышетсконзэс горд дипломен йылпумъязы. Шумпотыса но данъяськыса вераськом, "витьёслы" гинэ дышетскисьёс пӧлын � Иван Банников но, редакциямы ужась Татьяна Михайловна Банниковалэн пиез. Иванлэн будон сюресэз: школаез йылпумъямез, ИжГТУ-э дышетскыны пыремез, табере сое йылпумъямез � ваньмыз син азямы ортче шуыны быгатӥськом. Ваня, тросэз пияшъёс сямен, пичи дыръяз лётчик луыны малпалляз. Но малпанэз огдырлы гинэ вылэм. Макем куректӥз ньылетӥ классэ ветлӥсь пияш, тазалыкез лябен лобаны уз быгаты шуыса тодэмез бере. Анаез гинэ буйгатӥз сое. Лётчик ке ӧд, инженер луыны быгатод, самолётъёсты тупатъянэ но, оло, вутскод, шуиз со. Со дырысен Ваня аслыз сюрес бырйиз. Школаын но, университетын но дышетскытозяз, пияшлэн "ньылез" но ӧз кылдылы. Солэсь умой дышетскыны уг луы ни, шуо Ванялэн эшъёсыз. Нош солэн покчи Маша сузэрез данъяськыса но радъяськыса учке шораз (Маша Удмурт кун университетын дышетске). Тодам лыктэ, алигес Татьяна Михайловна паймемзэ вераз. Тодӥськод-а, шуэ, мон малпалляй Вание дипломзэ утёнлы ялан дасяське, нош со ужа ни вылэм. Ноку ӧз вералля. Анайлэн ӟудэмезлы пиез верам гинэ, малы, пе, дырызлэсь вазь ушъяськод. Уждун басьтӥ � табере тани ӟечкылалэ. Дышетсконзэс йылпумъясьёс пӧлын Миша Лебедев но. Миша редакциямы озьы ик тодмо луэ. Со Иван Ивановичмылэн выжыысьтыз потэ, Ува палъёсын будэм пияш. � Миша, вузын дышетскыны секыт потӥз-а? � Котькыӵе дыръёс вал. Уйёссэ кӧлатэк но ортчытъяськиз, уката ик сессиос дыръя. � Нош инженер луон мылкыдыд ку лӧптӥз? � Школаын дышетскыкум, пичи классъёсын ик кельшизы физика, математика. Ас валамея тупатъяны турттылӥ радиоосты, телевизоръёсты. Соин ик та удысэз малпамтэ шорысь бырйи шуыны уг быгатӥськы. � Азьланьын Ижевске кыльыны чакласькод-а? � Малпасько Увае кошкыны. Тодӥсько, Ижевскын но уж шедьтыны луоно, но сюлмы кыске дор палъёсам. Валаськом Мишаез, солэсь малпанъёссэ ӟечен лыдъяськом. Таӵе специалистъёс гуртын мултэс уз луэ. Иське, сӥзём Ваняен Мишалы но, соослэн ӵош дышетскем эшъёссылы но выль вормонъёс. Улоназы тужгес бадӟымзэ, дунозэ вамышсэс соос лэсьтӥзы. Но таин буйгатскыны уг луы. Кызьы вераськом, азьпалан усьтӥсько выль инвисъёс. Кызьы тон улондэ радъялод, кытысь тыныд гинэ тупась ӧрдэ шедьтод � ваньмыз ачид бордысь потэ. Уката ик туала вакытэ. Пусйыны кулэ: ИжГТУ-ысь егит инженеръёслы берло кык аръёсы уж шедьтыны капчигес луиз. Куинетӥ курсысен ик соосты ас доразы "курало" пӧртэм заводъёсысь кивалтӥсьёс. Соин ик та факультетысь егитъёс но ваньзы сямен ик тодо ни, кытчы соос ужаны мынозы. Озьы мед луоз вылэм азьланяз но. Э.КУМАЧЕВА. Туспуктэмъёсыз В.Беломорскихлэн. Сиднее сюрес Москва котырысь Мытищи городын ортчиз ыбылӥськонъя Россилэн чемпионатэз. Воргоронъёс пӧлын пневматической пистолетысь шонер ыбылыса азвесь медаль басьтӥз Глазовысь Сергей Бармин. Ижысь Мария Феоклистова та ӵошатсконын кык пол куинетӥ интыез басьтылӥз. Вераны кулэ, азьвыл олимпиадае Мария висеменыз мыныны ӧз быгаты. Австралие солы сюрес усьтэмын, шуо тренеръёс. Кулэ луоз на эшшо одӥг сӥсъетэз ортчыны � вуонояз ӵошатсконъёсы пыриськыны. М.КУЗЬМИН. Тубоно 40 минутскын Кизнер палъёсын улӥсьёс уно аръёс ӵоже учкыны уг быгато вал Удмурт телевиденилэсь передачаоссэучкыны. Ретрансляорез лэсьтон кема дыр ӵоже мынӥз. Кылем арын гинэ, Удмуртилэн кунлык басьтэм нуналысеныз, со ужаны кутскиз. Табере тулкымъёсты ыстӥсь 5 киловатъем аппарат соосты вуттэ 70 иськемозь. Передачаосты учкыны луэ ДЦМ (дециметровой) каналъёсъя гинэ. Удмуртия ужа 35-тӥ каналын, ОРТ � 22-тӥ каналын. Кутыны луэ татарстанлэсь передачаоссэ но. Вышкалэн ӝуждалаез 198,5 метр. Кызьы шуэ татысь электромеханик Игорь Алексеев, нормая солэн вылӥяз тубыны чакламъя 40 минут дыр сётэмын. Н.БАЙТЕРЯКОВ. В.Беломорских (фото). ? Вышка инбаме ик вуэ кадь. ? Электромеханик Игорь Алексеев. Грахъёс чабеен гинэ уз данъяське ни Республикаямы Грах ёрос огез пичиез луэ. Татын 12 сюрс пала гинэ улӥсьёсыз лыдъясько. Оло, соин но бадӟым кивалтӥсьёс татчы ӵем уг вуыло. Тани Кун Кенешлэн Тӧроез А.Волков но Грах ёросэ куинь ар талэсь азьло вуылэм. Мар воштӥськиз со дыр ӵоже ёрослэн улоназ? Лымшор ёрослэн ужпумъёсыныз тодматскон вылысь, Кун Кенешлэн Тӧроез депутатъёсын А.Марченкоен но А.Соловьевен ӵош алигес татчы вуылӥзы. Ёрослэн огез висись яраез � куашкан калэ вуэм больница. Соин ик, вылды, администрацилэн тӧроез А.Белов куноосты нырысь ик татчы ваиз. Больница 17 ар талэсь азьло гинэ пуктэмын но сое лэсьтӥсьёс уно куронъёсты чакламтэ, проектэз но со нерге гинэ вылэм. Соин ик больницалэн юртэз ӝог куашканы кутскем. Нокыӵе веран кылъёс уд шедьты операциос лэсьтон кабинетэз возьматон понна: выжез но, борддоръёсыз но пилиськылэмын-куашкамын. Таӵе югдуре вуэм больницаез городын кемалась пытсасалзы ни. Нош татын мискинь врачъёс но медсестраос ужало. Коллективын 195 ужась, со пӧлысь 25- ез � врачъёс. Соослэн тыршеменызы кылем арын кулонлэсь утемын вал вань вордӥськем нылпиос. Валтӥсь врачлэн М.Зыряновлэн верамезъя, кылем арын коллективлэн ужамез ёрос больницаос пӧлын нырысетӥ интыен пусъемын вал. Но малы ке калыкез эмъянын басьтэм азинсконъёссы сярысь Тазалыкез утёнъя министерствоын но вунэто, медицина удысын ужасьёслэн нуналзы дыръя гинэ но ӟечкылан кылъёссэс жалязы. Сыӵе кӧт ӝожзэ вераз валтӥсь врач. Больницаын ужасьёс мукет ӝожтӥськонъёссэс но усьтӥзы. Кылсярысь, командировкаосы потам коньдонэз берыктон сярысь. Тодон-валанзэс будэтон понна, эмъясьёсты ӵем гинэ дышетскыны ыстыло. Но "командировочной" шуонлы коньдон висъяськымтэен, ваньмызлы ас коньдонэнызы сюрес вылэ потоно луэ. Озьы куинь ар ӵоже командировкалы тырымтэ расходъёс татын 45 сюрс манет пала люкаськиллям ни. Больницаын ужасьёслэн уждунзы сокем бадӟым ӧвӧл, шорлыдын вераса 500-700 манет. Уждунзы май понна тыремын ни. Но отпуске потыкузы пичи уждунзэс быдэсак басьтэмзы уг луы. Кун Кенешлэн Тӧроез но депутатъёс та куронъёсты быдэстыны кыл сётӥзы. Тазьы шуизы: больницаез лэсьтыны кутскозы вуоно арысен, нош али одӥг толэзь куспын ӝегатскытэк тупатъяно больницалэсь "сюлэмзэ" � операциос лэсьтон интыез. Та ужлы ас фондысьтызы быдэн 100 сюрс манет коньдон висъялозы А.Волков но А.Марченко, нош ёрослэн администрациез � 200 сюрс манет. Командировкаосы потам дунэз берыктонлы Кун Кенешлэн Тӧроез 10 сюрс манет висъяло шуиз. Грах ёрослэн улэм-вылэмез 80 процентозь дотациос вылын возиське. Кызьы утёно татысь калыкез палэнэ кошкемлэсь? Валамон: кылдытоно ӟеч улон условиос. Больница сярысь верам ни � со туж кулэ. Но со сяна, умой мед луозы сюресъёс, нылпиос шумпотыса мед ветлозы школае, ӟеч сюресъёсын но та дырозь ёрос ӧз висъяськылы. Но "Сюресъёс" кун программа кутэм бере "Удмуртавтодор" лымшорлэн кыдёкысь ёросаз но сюресъёс но выжъёс лэсьтыны вутске. Кун Кенешлэн Тӧроез пыриськиз кык выж усьтонэ. Юрашка но Ультеранка шуръёс палан интыяськем гуртъёсы табере машинаосын но ветлыны луоз ини. Вань сыӵе нокытын гожтымтэ закон: школа ке быре, гурт но быре. Быдэсмытэк мед кылёз вал та "закон" Порым но Лолошур-Возжи гуртъёс понна. Порым гуртысь пу школалы 100 ар тырмем ни. Школалэн директорез Г.Епонешникова юн сюлмаськемзэ вераз. Куинь ар талэсь азьло ик Кун Кенешлэн Тӧроез татчы вуылыса оскытӥз вал, выль школа пуктыны юрттэт сётоз шуыса. Со дыр ӵоже номыр воштӥськымтэ. Паймод эке: городысь куд-ог школаос даурез азьпалтыса ужало ни, нош татын туала вакытысь вашкала дауре выжиськод кадь. Ма, озьы ик со вань � школа революцилэсь азьло ик пуктэмын ук. Коллектив куре, 192 нылпиез дышетон вылысь, кык этажо школа пуктыны. Азьлогес ик Кун Кенешысь татчы гожтэм вуэм. Лэзиськом, пе, школа пуктыны, но... 125 нылпиез дышетон понна. Директор паймемын. Угось школа чакламын вал трос нылпиосты дышетонлы. Та гуртын нылпиослэн лыдзы уг кулэсмы ай. Озьы учкыса ик вить ар талэсь азьло вуоно школалэсь фундаментсэ кисьтӥллям ни вылэм. Порымысь дышетӥсьёсты оскытӥзы школа пуктонэз, пе, 2001-тӥ арысен радъяломы, юрттозы Глазовысь лэсьтӥськисьёс. Нош туэ йылаз-пумаз вуттоно Лолошур-Возжиысь шор ёзо школаез. Таиз школа лэсьтэмын луиз ке, татын компьютер класс но усьтозы. Грах ёрослы кема, дыр, возиськоно луоз на республикалэн дотациосыз чотын, угось татын нокыӵе бадӟым предприятиосыз ӧвӧл. Но умоесь музъемъёсыз � луэ вылӥ сортъем чабей будэтыны. "Родина" хозяйствоын (кивалтӥсез М.Крестьянинов) ю тысез куасьтон КЗС линия юнматӥллям, хозяйство быгатэ быдэс республикалы усто кидысъёс вузаны. Эшшо ёрос данъяське на вал вордон кун заводэныз. Кин тодэ, ёрослы азинскыны, оло, му вӧй юрттоз. Туэ татын кык скважинаысь му вӧй поттыны кутскиллям. Выль арозь 6 сюрс тонна му вӧй кыскыны малпало. Нош вуоно арын чакламын 17 скважинаысь 30 сюрс тонна поттыны. Валамон, коньдон люкаськоз республикамылэн огъя пуйыаз. Но ёрослэн администрациез но татын улӥсьёс куро му вӧй чотын поттэм барышлэсь бадӟым люкетсэ та ёросэ ик висъяны, социальной удысэз ӝутон понна. Тӥни соку гинэ, дыр, луысал Грах ёросын но выль улон юртъёс, школаос, клубъёс пуктыны. Грах калык улэ. Улэ озьы, кызьы улэ ни со ас ёросаз 70 ар ӵоже. Татын улӥсь ӟучъёс, удмуртъёс, бигеръёс, чувашъёс, азербайджанъёс ог-огзэс валаса уло. Вылӥ кивалтӥсьёслэн вошъяськемзы шоры учкытэк, озьы ик азьланяз но улозы, асьсэ кужымзылы оскыса. Казахстанысь кӧня ке вуэм семьяос но татын асьсэлы шуныт инты шедьтӥллям. Ижевскысь вуылэм кивалтӥсьёсты ӟеч пумитазы-келязы, куноосты пумитан сямез чакласа. Т.БАННИКОВА. Туспуктэмез Н.Глуховлэн. Ижын � Грециысь министр Туннэ Ижевскысь "Купол" электромеханической завод кун предприятие вуыны кулэ Грецилэн обороная министрез Акис Цохадзопулос. Удмуртиысь предприятие ньылетӥ арзэ ни юн кусыпъёс возе Грециысь армиен. 1997-тӥ арын та лымшор странае ракетаосын нырысетӥ "ОСА-АКМ" зенитной комплексъёс келямын вал. Эшшо ар ортчыса, Грециысь ожгарчиос мукет комплексъёсты � "ТОР"-ёсты басьтыны мылкыд каризы на. Ижъёслэн продукцизы вылӥ дунъямын вал. Сое усто возьматӥзы Грециысь полигонын ортчытэм ыбылӥськонъёс но. "Оса"-ысь но "ТОР"-ысь лэзем ракетаос ваньмыз кулэ интыосы вуизы. Татын ик эскерем франуцуз но немец комплексъёсты соос унолы азьпалтӥзы. Та сярысь паймыса но шуныт гожъязы-веразы Грециысь газетъёс но телевидение. "Купол" ИЭМЗ-лэн пресс-службаез. Ивортон "Герд" газет ивортэ: редакция президентэ кандидатъёс понна ӝуткан вакытэ материалъёсты дун тырыса печатланы дась. Квадрат сантиметрез понна тыроно луоз 15 манет. Юанъёсты кылдӥзы ке, вазиськыны быгатоды 75-53-29 телефонъя. "Герд" газетлэн редакциез. ШӦКЫЧ Ву-у-у-у-зэм потэ. Вутэк. Шонерак лыдӟыса, берло дыре мон мылысь-кыдысь калтыртӥсь пуныослы вожъяськыны кутски. Оглом комласа ке верано, мон вань пуныослы вожъяськисько. Кыӵе умой соослэн улон! Сием ке потэ, кобаса � жуг-жаг куян интыын, юэм ке потэ, ву � сюрес вылын, педло потам ке потэ, юбооос � сюрес урдсын. Тылпу но соослы кышкыт ӧвӧл. Корказы ӧвӧл бере, мае кысод, о-ведь? Нош мискинь адямиослы мон уг вожъяськиськы. Мар но кулэ ӧвӧл соослы. Вутэк гинэ но соослэн улэмзы уг луы. Мукетыз сярысь поттылонэз ик ӧвӧл. Нош тылпу потэ ке, тылэ пырем кадь бызьылыны кутско. Гульым тыразы ву вае, ву вае шуыса кесясько. Нош кытысь сое шедьтод, ву аракы ӧвӧл ук, ӟенеликын уд возьы. Вуэз бекчеосын возьыны кулэ яке нимысьтыз колодчаосын. Таиз ини мукет ужпум. Берло кык-куинь аръёсы асьме шоркарамы, Ижевскын, вуэн секыт югдур кылдӥз. тылпу потэ ке, адямиосыд зэмзэ но тылэ пырем кадь бызьыло. Нош автомашинаослэн бекчеосазы ваем ву куинь-ньыль минутлы сяна уг тырмы. Одӥг ӝуась коркаез но кысыны со уг тырмы. Та нуналысен секыт югдур гуртъёсын но. Ижкарын, шуом, юри лэсьтэмын гидрантъёс, чугун колодчаос. Ижысь урамъёсын соос ог кык сюрс пала. Соосты нимысьтыз чакласа возьыны кулэ "Водоканал" но бадӟымесь промышленной предприятиос. Нош туннэ со гидрантъёс, кык сюрс пӧлысь котькуд витетӥез уг ужало. Устинов районын гинэ соос куамын процентэз аналтэмын. Тылпу потон учыръёсы тылпу кысӥсьёсыд соин ма карыны ик ёрмо. Ленин районын туж трос на пу коркаос. Татын тылпу потон учыръёс но данаклы уногес луыло. Нош гидрантъёс, ог кызьы процент палаез сӧриськемын. Татысь "Водоканаллэн" районной участокезлэн кивалтӥсез Г.Феофилатов ӝыны ар куспын ньыльдон гидрантъёсты сяна тупатъяса ӧз вутты. Таяз паларе Ленин районын куамын сизьым пол гидрантъёс ужатэк сылӥзы. Соин ик тылпуэн нюръяськон ужрадъёс но Ижын аналтэмын шуим ке, ум алдаське, дыр. Карысь администрация но та уж шоры чиньы пыртӥз гинэ учке. Соинтэк-а, тылпу потэ ке, машина утчаса, сюл-кал бызьылоно луэ. Благоустройствоя комбинат но, сюресъёсты уже кутонъя управление но ялан ог-огзы вылэ чӧлляськыса уло. Сыӵе сям асьмелэн вирамы пыӵамын ини, лэся. Собере мукет учыр но паймытэ. Сюресъёсты асфальтэн шобыртэмлы асьмеос укыр шумпотӥськом. Нош малы гидрантъёсты сюрес вылын ужасьёс асфальт улэ согыса кельто, чылкак валантэм. Малы соослэсь сыӵе нырултэм ужамзэс эскерисьёс ӧвӧл. Серекъялод оло бӧрдод, ява, тылпу потон учыръёсы со гидрантъёсты асфальт улысь копаса поттоно луэ. Нош "горд атас" адямиослэсь гызмыльтэмзэс витьыса уг улы. Ижысь мэриысь кивалтӥсьёслы та сярысь одӥг пол гинэ верамын ӧвӧл ни. Адямиослэн вутэк улэмзы уг луы ни, уз но луы, дыр. Соин ик тылпу потэ ке, ву утчаса какалмоно но ву-у-у-у-зэм потыны ӧдъя. Вутэк. А.ЕМЕЛЬЯНОВ. Янӥен Серги, тӥ шоры радъясько мукетъёсыз! Завьяловоын ортчизы гурт пиналъёслэн гужем шудонъёссы. Кужымзэс мертаны ог-огенызы тодматскыны татчы вуылӥзы шаерысьтымы Сюмси сяна, вань ёросъёсысь покчи спортсменъёс. Ӟырдыт нюръяськонын котькинлэсь шаплы, кужмо луэмзэс возьматӥзы кузёос � Завьяловоысь команда. Кыкетӥ но куинетӥ интыез куспазы люкизы Як.-Бодьяысь но Играысь командаос. Футболын шудыса, азьпала потӥзы алнашъёс (пиос), баскетболын � можгаос (нылъёс) но уваос (пиос), волейболын � завьяловоос (нылъёс ) но можгаос (пичиос). Кызьы пусйытэк кельтод капчи атлетикаын тужгес шумприч-шаплы луэмъёссэ? Тани соос: Денис Трофимов (Игра), Яна Максимова (Як.-Бодья), Сергей Журавлёв (Воткинск), Дима Данилов (Юкаменское), Надежда Чунарева (Шаркан), Денис Иванов (Красногорское), Настя Корепанова (Алнаш) но мукетъёсыз. Нош Яна Максимова но Сергей Журавлев кык "зарни" басьтӥзы. Яна � 800 но 300 метре, Сергей � 800 но 400 метре бызьылонын. Валамон, тужгес ӟырдыт, тунсыко ортчиз эстафета.Таяз учыре но азьпала пото завьяловоос. Пусъёмы на командаысь спортсменъёсты но. Алёна Хисматулина, Венера Мансурова, Алексей Беляев, Виталий Мохов. Кыкетӥ но куинетӥ луизы шарканъёс но пичи пургаос. Ма бен, оском покчиосмылэн шудонъёссы котыр ласянь пайдаё ортчизы шуыса. Татын басьтэм вормонъёс ӝоген паськыт ӧрен вуозы гурт спортсменъёслэн шудонъёсазы. Пусйыны кулэ, кыкетӥ но куинетӥ интыосты чырмыт киултылӥзы Яр, Пичи Пурга, Юкаменск, Воткинск, Шаркан, Дэбес ёросъёсысь спортсменъёс. Иське, вормисьёс шоры радъясько трос мукетъёсыз. П.ИВАНОВ. АРХИВЫСЬ ДОКУМЕНТЪЁСЪЯ Удмуртия ХХ дауре 1923-тӥ ар Экономикаысь выль политикалэн (НЭП-лэн) "емышъёсыз" таяз аре син шоры йӧто ни. Но умоеныз ӵош выль шуг-секытъёс кылдӥзы. Гурт хозяйство но промышленность куспын тупамтэос кылдо. Вылезлы ӟеч-ӟеч ӧръяськыны люкетэ большевикъёслэн кузёяськемзы но. Странаез тушмонъёслэсь утён вылысь кулэ вал нырысь ик промышленностез ӝутыны, тужгес но � секыт промышленностез. Таин валче гуртын улӥсьёсты кык ласянь пачкатыны кутскизы, налогъёсын но промышленной вузъёслы дунъёсты юромо будэтыса. Нош сиён- юонлы но сырьёлы дунъёсты кулэстӥзы. Крестьян калыклэн моӵез басьтӥськыны ӧз тырмы ни. Сӥзьыл пал дуно но ляб ӟечлыко вузъёс складъёсы тымиськизы. 1923-тӥ арын кизёно муос, азьвыл арен ӵошатыса, 70 процентлы йылӥзы. Гурт хозяйствоя басьтэм азинсконъёс возьматэмын вал областьысь нырысетӥ сельхозвыставкаын. Озьы ке но, сютэм улэмлэн, укыр начармемлэн бервылъёсыз кылизы. Предприятиосын поттэм вузъёс складъёсын толэзьёсын кыллизы. Ӝегалляз уждун сётон, йыркуръяськизы рабочийёс. 1922-тӥ�1923-тӥ аръёсы дасямын вал Удмуртилэн нырысетӥ бюджетэз. Доход люкетэз тырмымтэен, правительство луонлык шедьтӥз коньдонэн юрттыны. 1923-тӥ арын декабре ортчиз областьысь советъёслэн В съездзы. Со огъя хозяйствоез улӟытон, калыклы тодон-валан, культураез ӝутон ласянь ужпумъёсты эскериз. Тужгес бадӟым саклык висъямын вал школаослэсь материальной базазэс юнматонлы, дышетӥсьёслы уждун тыронэз радъянлы, профессиослы дышетонэз азинтонлы. Ужпум тазьы сылӥз: вань калыкез лыдӟиськыны дышетоно. (Удмурт автономия кылдыку, вань улисьёс пӧлысь витетӥ люкетэз гинэ чирдыны-чотаны быгато вал.) Съезд эскериз национальной ужпумъёсты. Чакламын вал советъёслэн ужазы тросгес удмурт адямиосты кыскыны, нимысьтыз школаос, курсъёс пыр удмурт кадръёсты дасяны, удмурт кылын газетъёс, книгаос поттонэз азинтыны. 10-тӥ феврале Ижын усьтӥськиз удмурт клуб. Валтӥсь инты басьтӥз со калыклы социализм мылкыдо удмурт шӧмо культура пыӵатонын. Татын дасяны кулэ вал "пеймыт сэрегъёсты югдытӥсьёс" но. Соин ик клубын лыдӟылӥзы лекциос, ортчылӥзы пӧртэм кенешонъёс, ужазы политикая кружокъёс. Октябре областьлэн быдэсъясь комитетэз архивъя бюро кылдытон сярысь постановление кутӥз. Кивалтӥсе бырйизы азьвыл красногвардеецез Андрей Иванович Галановез. Архивын ужасьёс вань луонозэ лэсьтӥзы документъёсты утён но соосты радъян ласянь. Уноез документъёс Удмуртилэн палэнысьтыз шедьтэмын-ваемын вал. Н.КРАСИЛЬНИКОВА. Удмурт Республикаысь Кун архивын ужась. ? Партия но совет ёзъёсын ужасьёс. Паллянысез � архивен кивалтӥсь А.И.Галанов. 1923-тӥ ар. Востэм лулпу Лулпуэз чебер писпу котькин уз шуы. Озьы ке но, солы синмаськем адямиос ӧжыт ӧвӧл. Та писпулэн тужгес бадӟым чеберез ас пуэз бордын. Со гордалэс-курень. Солы паймыса, Ягулысь коркаелэсь укношалъёссэ (наличникъёссэ) но лулпулэсь лэсьтӥ. Озьы укно котырме нокыӵе буёлтэк учкымон кари. Лулпу будэ котькуд гурт дорын. Тужгес � нюр интыосын. Та писпуя тодманы луэ пичи шурез яке ошмесо нюкез. Лулпуо интыосын чик кышкатэк гудыны луоз колодча. Отысь туж трос музъемез ӝутытэк ик ву дорозь вуод. Удмурт шаерамы кык пӧртэм лулпу будэ... пурысялэс суло но сьӧдалэс суло. Сьӧдалэс сулоезлэн куаръёсыз но сьӧдэсьгес, пинал дыръязы лякиськисесь луо. Таиз писпу зӧк но ӝужыт. Будэ куамын вить метрозь. Вордӥськем гуртысьтым лулпуом одӥг кадесь пото вал азьло. Иж вӧзысь Ягул гуртын улыкум гинэ валай: лулпуос пӧртэмесь вылӥллям. Корка вадьсысьтым тэле пырыса адӟи сьӧд суло, зӧк, ӝужыт писпуосты. Соку ик ӧй вала, кыӵе писпуос. Куаръёссэс учкеме бере гинэ тодӥ - лулпуос. Лулпуос сяськаясько апрель толэзе. Сяська ӟускиоссы курень буёло луо. Писпулэсь сулзэ эмъяськон понна бичало тулыс, нош мульызэ � сӥзьыл но, толалтэ но. Мульыосыз но сулэз узыр дубилен, кислотаен, алкалоидъёсын. Соосты вуын пӧзьтыса яке спиртын возьыса пӧрме усто эмъюм. Со дугдытэ азыны кутскем висёнъёсты но вир потонэз. Сулзэ яке мульызэ парем чаез юыса, кӧт виямысь дугдэ, юнмало зӧк но векчи сюлъёс. Нош сяськаоссэ тӧдьы винаын возем вуэз юыса, эмъяны луэ геморроез. Лулпулэн пуэз чебер, небыт но шуныт. Усто но шонер пилиське. Соин ик солэсь котькыӵе арбери лэсьтыны луэ. Со сяна, валась адямиос лулпуэз сутыса ӵынато сӥлез, чорыгез, кӧез. Озьы пӧрме ческыт но кема изъянмисьтэм сиён. Коркаез шунтыку но лулпу трос пӧсьсэ сётэ. Республикаямы та писпулэн нимыз сётэмын ньыль гуртлы но уно мукет интыослы. Паймымон кадь: солэн нимыз кылдэмын лул кыллэсь. Нош лул - улон. Удмуртъёс шуыло: лулзэ жалятэк сётӥз, лулзэ воштыны дугдылӥз. Озьыен, асьме калык понна со туж дуно писпу. Зэм, лулпулэн пайдалыкез сярысь али, оло, вунэтэмын ини? Кулэ ӧвӧл та востэм писпу шоры кырыж синмын учкылыны. Н. Возисов. Республикаысьтымы туберкулёзэз эмъянъя 10-тӥ клинической больницае быдэс шаерысьтымы висисьёсты вутто. Жаляса верано луэ, соослэн лыдзы арысь-аре йылэ. Татысь рентгенологияя кабинетын ужасьёслы нуналаз уно гинэ снимокъёс лэсьтоно луэ. Соосъя ик специалистъёс шонер диагноз пукто, врачъёслы висисез эмъяны дэмланъёс сёто. Нош ик одӥгез висись вуиз. Снимок дась. Сое эскеро рентгенологияя кабинетлэн кивалтӥсез Виктор Байтеряков, лаборант Мария Миронова (паллянысез) но медсестра Татьяна Хмелевская. Владимир Камашевлэн туспуктэмъёсыз. "Чугун сюрес-2000" конкурсэ Кусыпъёссэс юнматыса Горький чугун сюреслэн Иж ёзэз одӥгез огсыр но усто ужасез луэ. Со бен капчиен уг сётӥськы. Татын адӟиське быдэс коллективлэн, чугун сюрес вылын 13 сюрс ужасьёслэн дэмен тыршемзы, тужгес но та ёзлэн тӧроезлэн Клементий Антонович Роговецлэн удысэз. Ӟеч радъяны быгатэмез, алык сярысь сюлмаськемез. Шаерамы со тодмо кивалтӥсь, МПС-ын но данэз пичи ӧвӧл. Со уго быдэс улонзэ чугун сюреслы сӥзиз, тодэ ку но кыӵе гозыез юнгес кыскыны. Но чугун сюреслэн кивалтӥсьёсыз но ваньмыз железнодорожникъёс трос сюлмасько шудтэм учыръёсын нюръяськон но сюрес вылын адямиез утён сярысь. Тӥни соин ик чугун сюрес бадӟым инты висъя научкаысь но техникаысь азьмынӥсь амалъёсты пыӵатонлы но предприятиосын кусыпъёссэ юнматонлы. Тани сюрес вылын волоконной связез нырысьёсыз пӧлын пыӵатӥзы. Собере со музон ёзъёсы но вӧлмиз. Нош ачиз чугун сюрес юнэсь кусыпъёс возе ни "Ижсталь" огазеяськонэн (АО-ен) но Ижысь радиозаводэн. Таӵе эшъяськон юнме шорысь ӧвӧл, со герӟаськемын адямиосты утёнэн. Нош солэсь дуноез номыр ӧвӧл, улон котькинлы одӥг пол сётӥиське. Та ужез уката юнатӥз Москва областьын Бекасово станция дорысь чугун сюрес вылын валля арын шудтэм учыр. Отын 4 мурт бырыны шедиз. Мугез тодмо: пичи поездъёсы (соосты самоходкаос шуо � Г.Р.) утиськонъя приборъёс пуктымтэ, соин светофорысь горд тылэз машинистлы чакланы секыт вал. Югдурез лыдэ басьтыса, адямиосты утёнъя МПС нимысьтыз кун программа кутӥз. Соя вань самоходкаосы, нырысь ик асьме дорын, утиськонъя приборъёс пуктылэмын. Табере машинист горд тылэз ӧз ке но адӟы, поездэз прибор дугдытэ. Таӵе визьмо приборъёс лэсьтэ Ижысь радиозавод огазеяськон. Солы заказ сётӥз Россиысь быдэс чугун сюрес. Нош Ижысь ёзмы миым 50 сыӵе прибор басьтӥз, туэ � 177 чакла... Одӥгез со 150 сюрс манет ёрос сылэ. Предприятие но чугун сюрес сётэм кылзэс дыраз но ӟеч быдэсъяло. Озьы ик нимаз пусйыны кулэ железнодоржникъёслэсь "Ижсталь" акционер огазеяськонэн юнэсь кусыпъёссэ. АО 70 процент продцукцизэ чугун сюресэн келя но арлы быдэ 4 сюрс вагонъёс но 1 сюрс контейнеръёс кутэ. Одӥг куиньмосэз автотранспортэн кошке. Огазеяськон чугун сюреслы поттэ противоугонной устройствоос. Со понна предприятиын нимаз бадӟым цех усьтэмын. Солэн кузьдалаез 1,5 иськем пала. Тӥни соин ик Горький чугун сюреслэн выль кивалтӥсез Хасян Шарифжанович Зябиров нырысь ик та кык предприятиосы ветлӥз, ужъёсынызы тодматскиз. � Ми чугун сюреслы трос юрттӥськом, � шуэ Ижысь радиозаводлэн валтӥсь директорез Игорь Валиахметов. � Предприятие МПС-лы поттэ пассажирской поездъёсын калыкез утёнъя прибор (сое КЛУБ шуо). Миым 1500 сыӵе арбери лэсьтӥм, нош туэ кык пол трос поттыны чакласьком. Соос туала выль амалъя поттӥсько, машинистлэн самой бадӟым но оскымон юрттӥсез луо. Со 40 градус кезьытэз но, сомында ик пӧсез но чида. Завод приборез лэсьтэ ӟечлыкъя дуннеын тупась сертификатъя. Ватсаны кулэ: предприятие огинтыяз уг сылы, та приборез эшшо умоятэ-выльдэ. Соосын туэ апреле тодматскизы чугун сюресысь технической кивалтӥсьёс. Заводын семинар-кенеш ортчиз. Огъя вераса, машинистлэн табере луоз радиомодемез, диспетчерен кусып возёз но сое ассэ адӟоз. Нош диспетчер син азяз возёз поездлэсь сюрессэ, кытӥ мынэмзэ. Пыӵалоз спутник пыр кусып тупатон. Предприятие туэ 1,5 поллы тросгес приборъёс поттоз. Заводлы со сётэ ватсаса ужан интыос, нош чугун сюреслы � калыкез шудтэм учыръёстэк нуон-ваён. Кыкезлы ик умой лэсьтӥське. Ӵугун сюрес берло дыре син азьын улӟе. Со огсыр умой ужа. Железнодоржникъёс дыраз уждун басьто, выльдӥсько чугун сюрес станциос но вокзалъёс. Туэ тани грузъёсты нуон- ваён 20 процент палалы йылӥз. Озьы ик быдэстэмын калыкез нуллон задание. Нош матысь дыре, производствое выльзэ пыӵатыса, ӟеч амалъёс (технологиос) кутыса утемын Амзя� Нефтекамск, Ижевск�Воткинск, Армязь� Сайгатка, Люкшудья�Кильмезь чугун сюресъёс. Азьло соос изъян гинэ вайылӥзы, табере пыд йылазы султӥзы, пайда сёто ни. Ижысь чугун сюреслэсь трос ӟеч ужъёссэ вераны луоз. Со юрттӥз "Увадрев" акционер огазеяськонлы ӟеч смолаос поттонэз радъяны. Умоесь кусыпъёс тупатӥз ни нюлэс корасьёсын, гурт хозяйствоосын, йӧл но сӥль басьтӥсьёсын-переработчикъёсын. Кызьы бен пусйытэк кельтод Алнашын спирт пӧзьтон заводэз. Чугун сюрес сое ӝутыны юрттэ. Клементий Роговецлэн туэ сое вуттыны мылкыдыз вань. Малпанды мед быдэсмоз. Г.Романов. Кырӟась егитъёс пӧлын Калык та нылмуртэ тодэ солэн крезьгуръёсызъя, кырӟанъёсызъя. Кырӟанэзлэн шунтӥсь кылъёсыз небӟыто сюлэмез. Яркыт пиштӥсь "кизили", лобӟыса кадь пыриз удмурт эстрадае 90-тӥ аръёслэн шоразы. Со сяна, Надежда Уткина тодмо мукет ужъёсыныз но. Тужгес но удмурт егитъёслэн "Шунды" огазеяськоназ пыременыз. Визьмо но задор мылкыдо егит кышномурт пӧртэм ужрадъёслэн кичӧлтӥсьсы луэ. Солэн дышетэмез улсын, будо ке но ай, быдэс республикалы тодмо луизы ни Татьяна Ишматова но Марина Галичанина. Алигес Надежда Уткиналы сётэмын "За активную работу с молодёжью" мӧля вылын нуллон пус. Элькунысь Егитъёсын ужанъя кун комитет та пусэз али гинэ поттӥз ай. Таӵе пусэн данъям тямыс мурт пӧлысь огез гинэ удмурт. Со � Надежда Уткина. А.АНДРИЯНОВ. Туспуктэмез В.Камашевлэн. Кызь ар ортчиз тур-пар Ӵапак 20 ар талэсь азьвыл, 1980-тӥ арын июле, республикаысьтымы ваньмыз сямен редакциос выжизы выль юртэ. Адресэз туж абдрамон: Иж, но Воткинской шоссе, но 10-тӥ иськем. Адресэзъя интыез: зэмен ик город пумысь 10-тӥ иськем. Сыӵе усто "кузьым" дасязы милемлы Удмуртиысь коммунистъёслэн йырзы Валерий Марисов но музон кивалтӥсьёс. Кун Кенешлэн Тӧроез Александр Волков Москваысь "Четвертая власть" журнал пыр ялӥз: "Ужрадъёс кутом, вань изданиосты городлэн шораз воштон вылысь. Нокинлы но ӝож медаз лу". Улыса-вылыса мукет редакциос зэмен ик кошкизы. Кылизы удмуртъёсыз гинэ - "Удмурт дунне", "Кенеш", "Ӟечбур". Редакциосты выжтон ужпумен выризы Правительство, Ижысь мэрия, Печатья но иворъёсъя министерство. Яке ми укыр тэргаськисесь, яке дэмлам сэрегъёс ярантэмесь вал, но ми, удмуртъёс, туннэ но 10-тӥ иськемын. Авторъёсмы, гожтэтсэс вайыса, быдэс нуналзэс быдто. Газетчиос кыӵе ке ужрадэ пото ке, кык- куинь чассэс сюрес вылын ортчыто. Тӥни озьы тур-пар ортчиз кызь ар. Матэ вуэ Удмурт автономилы 80 ар тырмон нунал. Соин валче асьмеды данак шумпотонъёс витё. Ижын лэсьтӥське выль цирк. Александр Волков Кун Кенешын ужасьёсын толон пумиськыкуз ивортӥз: - Москваын ӝутскоз Удмурт Республикалэн представительствоезлы выль юрт. Москвалэн мэреныз Юрий Лужковен кенешим сое дунтэмгес лэсьтыны. Удмуртилэн вузкарон юртэз усьтӥськиз сентябре ик. Тӥни сыӵе ӟеч иворъёс. Нош азьвыл кылдэм юанъёс весь кылё юанэн ик. Ку выжозы выль интые удмурт редакциос? Ку выль юрт пуктозы Удмурт театрлы? Ку данаказ министерствоосын но ведомствоосын улӟоз удмурт кыл? Тӥни озьы пумита вордскем нуналзэ удмурт калыклэн дуннеысь одӥг гинэ кунэз - Удмурт республика. Алексей Шкляев. ЭКОНОМИКА УЖПУМЪЁС В.НИКИТИН: "Нюръяськытэк уз валалэ" Паськыта но кужмоя "Удмуртилэсь экономикаын кулэяськонъёссэ утён" огазеяськон. Туннэ солы дурбасьто ни промышленность, гурт удысын тыршисьёс, тодмо учёнойёс но пӧртэм огазеяськонъёс. Солэн тӧроез Валерьян Арсентьевич НИКИТИН газетмылэн корреспондентэзлы Т.Банниковалы мадиз та огазеяськонлэн экономикаын югдурез тупатонэ пыриськемез сярысь. � Валерьян Арсентьевич, нырысь валэктэ вал, кызьы кылдӥз тӥляд огазеяськонды? � Сыӵе малпан кемалась гинэ бугыръяське ни вал. Гурт удысэз ӝутонын зэмос кужымзэ возьматысал ке "Аграрной союз", оло, та огазеяськон но кулэ ӧй луысал. Но улонлэн умоямез уг шӧдӥськы. колхоз тӧроослэн, куд-ог промышленникъёслэн, "Удмурт кенешлэн" куремзыя, кылем арын сӥзьыл кылдӥз та выль огазеяськонмы, туэ со лыдэ басьтэмын ни Юстицияя министерствоын. Ачим мон депутат но огдыре ик колхоз тӧро луисько бере, соин кивалтонэз мыным оскизы. Со сяна, "Удмурт кенешлэн" исполкомаз мон экономика ужпумъёсъя секциен кивалтӥсько на. "Удмуртилэсь экономикаын кулэяськонъёссэ утён" огазеяськон, мон сямен, кемалы кылдытэмын. Малы ке шуоно, 1-2 ар куспын гинэ экономикаез нокызьы уд ӝуты. Нырысь-валысь Правительство но Гурт хозяйствоя но сиён-юонъя министерство огазеяськонмы шоры эскериськысагес учкылӥзы. Мар, пе, со меда дауртоз. Но ми меӵак шуимы: соос но ми азьын сылӥсь ужпумъёс огкадесь � экономикаез ӝутон. Соин ик валче ужано. � Мар ӟечсэ лэсьтӥз ни тӥляд огазеяськонды? � Юрттӥм хозяйствоослы мултэс сюлэмшугъяськонъёстэк тулыс бусы ужъёсты ортчытыны. воштос ёзъёсын, эстӥськонэн туэ соос зол ӧз курадӟелэ. Правительство бусы ужъёслы ватсаса 30 миллион манет висъяз. Озьы ке но, котькуд ёросын 1-2 хозяйство бусы ужъёсын берытскыны ӧз быгаты. Туж кема оскытоно луиз Кун Кенешез но Правительствоез йӧллэсь басьтон дунзэ воштыны. Йӧллэн басьтон дуныз асдунызлэсь дунтэмгес вал. Сыӵе югдур хозяйствоослы трос ыштонъёс вае. Озьы огъя-валче одӥг литр йӧллэсь басьтон дунзэ 3 манет карим. Со сяна, кыкетӥ паларысен йӧллы дотациос но будозы, али котькуд литр кыскем йӧллы 11 копейка гинэ тыриське вал. Огазеяськонлэн адямиосыз али тросаз гуртъёсын вань ини. Нош исполкоме быръемъёс олокыӵе но ужпумъёсты сэртто-пертчо, шуом, кредитъёс, лизинг, поттэм прОдукциез вузан пумысен. Жаляса верано, луыло на сыӵе учыръёс, куке асьме дорын но тырмыт луись продукциез татчы палэнысь вае. Кылсярысь, Россие кунгож сьӧрысь ваемын вал скал вӧй, соин ик асьме вӧез туж шуг вал вузаны. � Огвакыт йӧллы дотациос басьто вал трос йӧл кыскись хозяйствоос гинэ. Туэ озьы ик-а луоз? � Уз. Дотациос ляб хозяйствоос но басьтозы. Юрттэт сётозы ваньмызлы. Собере йӧлъя гинэ, дыр, учконо ӧвӧл, малы ке шуоно, куд-ог хозяйствОосын скал воксё но уг возё. Туэ республикаямы 400-лэсь уно хозяйствоос мырдэм ужало. Дотациостэк соослы уката но секыт луоз. 80 процентэз техника куашкамын ини, нош выльзэ басьтыны туж ӧжытэзлы удалтэ. Вань странаосын гурт хозяйстволы государство дотациос висъя. Малпасько, та ужпумен асьмелы Россилэн Президентозь но Федерацияя Кенешозь вуоно. Туэ быгатӥм, Правительствоен, министерствоен огкылэ вуыса, ю-няньлы но басьтон дунъёсты будэтыны. Кылсярысь, одӥг килограмм чабейлэн дуныз 3 манет 70 копейка луоз. Азьло аръёсы ю- няньлэн дуныз рынокын сярысь дунтэмгес возиськылӥз. � Валерьян Арсентьевич, Кун Кенешлэн сессиез инъет луыса кутӥз музъем сярысь программаез. Россиын музъем сярысь кодекс кутымтэ на, сое чакламын паРламентын туэ сӥзьыл гинэ эскерыны. Удмуртиысь депутатъёс та программаен ӧз-а дыртэ? � Мон но куд-ог гурт депутатъёс та ужпумез сессилэн ужан радлыказ пыртыны пумит вал. Но тросэзлэн депутатъёслэн мылкыдзыя кариськыса, музъем сярысь ужпумез сессиын эскеризы. мон тазьы малпасько: программа умой, со кулэ, но отын музъемез Вузан- басьтон сярысь люкетэз вань. Со ласянь тросэз валантэм ай. Соин ик музъем сярысь кодеКсэз Россилэн парлампентаз кутэмлэсь азьло, Удмуртиын музъем вузан ужъёсын ӧвӧл выроно. Нош Программалэсь мукет люкетъёссэ, малпасько, уже пыӵатоно, со понна бюджетысь уксё висъяно. Кемалась кулэ ни вал басьтӥськыны музъемъёслэсь картограммазэс лэсьтыны, вань муосты чакласа возьыны. � Кылем арын кӧс гужем сэрен куд-ог хозяйствоослэн юоссы сутскизы. Юрттэт соослы та дырозь вуымтэ на. � Та ужпумез огазеяськонмы ялан син азяз возе. Зэмзэ но, юоссы сутскем хозяйствосы 20 миллион манет коньдон вуымтэ на. Но Правительстволэн Тӧроез Н.Ганза оскытӥз: ю-нянь утялтытозь коньдон луоз. Мар будэтэмын � октоно. Со понна Правительство чаклаз на 68 миллион манет висъяны. *** Выль огазеяськон пыд йылаз али гинэ султыны выре. Но солэн тӧроезлы В.А.Никитинлы адямиос оскемзэС верало. угось депутат Никитин Кун Кенешлэн сессиосаз но шып уг пукы � гурт калыклэсь кулэяськонъёссэ утьыны выре. Со сяна, со быгатыса кивалтэ на ас хозяйствоеныз � кылем арын Завьялово ёросысь "Путь Ильича" колхозлэн поттэм барышез 3 миллион манет тыр люкаськиз. Гуртоосыз улонлы ӝожтӥськытэк но бусьтыр уло. Соин но, вылды, гурт калык сое куинь пол тӧрое бырйылӥз ни. Табере со сюлмаське, одӥг гуртлэсь гинэ ӧвӧл, быдэс республикамылэсь экономиказэ улӟытон понна. Кинлэн кӧтыз тыр, сютэмъёсты уз вала. Соин ик нюръяськоно, шуэ воргорон. Т.БАННИКОВА. Политика Маялляса гинэ уд улы Кылем арня куспын Кун Кенеше люкаськылӥзы ёросъёсысь но городъёсысь быръем ёзъёслэн кивалтӥсьёссы. Вераськон мынӥз ӝыны ар ӵоже ужамлы нырысетӥ йылпумъянъёс, Конституциямы пыртэм воштонъёс, вуоно быръёнъёс но трос мукетыз сярысь. Промышленностьын ваньбур поттон туэ ог куиньмос люкетлы йылӥз. Уноез предприятиос пельпумъёссэс шонертыны ӧдъязы, рынокын асьсэ интызэс шедьтыны быгатӥзы ни. Соин ик бюджетэ но табере коньдон уногес люкаське. Социальной ужпумъёс но ӝоггес быдэсъясько. Республикалы куке но висъяське вал ужтэк кылемъёслэн лыдынызы. Берло дыре югдур тупатске. Али ужаны вань быгатӥсьёс пӧлысь 2,5 процентэз гинэ биржаын пусъемын на. Ижын сю мурт пӧлысь огез сяна уг ёрмы ужан интылы. Ӟечгес луиз автозаводын но. Выль директор лыктэмен но мукет мугъёсын сэрен, татын туэ толэзь ӵоже машина поттон 4,5 сюрсозь вуыны кулэ. Озьы ар ӵоже конвейерысь 30 сюрс авто васькоз. Кылем арын сярысь, со кык пол трос. Нош вуоно арын машина поттонэз эшшо кык пол йылэтыны малпано. Озьы ӝоген ини автозавод пайда вайыса ужаны кутскоз. Тодады вайытом. Удмуртилэн бюджетэз куке но 40 процентлы "Москвич" чотын тырме вал, нош али быдэс "Ижмаш", кытчы пыре автозавод но, бюджетэ 6 процент сяна уг сёты. Асьме правительство сюлмаське нимаз адямиослэн улон юрт лэсьтонэз ӝогомытон сярысь но. Калыклы та уже кредит висъян понна, туэ бюджетысь ог 15 миллион манет сётэмын ини. 10 миллион манет кошкоз лэсьтӥськонэ "Евразия" банк пыр. Вераськон мынэ та ласянь Сбербанкен. Туэ сюрс муртлэсь трос адямиос кредит басьтӥзы ни. Азьланьын сыӵеослэн лыдзы уката йылоз. Шугъяськытэ гурт хозяйствоын югдур. Республикаысь бусыос арысь аре сюбегало. Туэ тани 41 сюрс гектарлы ичигес киземын валэс юос. Картофка 411 гектарлы ӧжытгес мерттэмын. 203 гектарлы кулэсмиз бакча сиён будэтон бусы. Ярам коть, ог ӝыны сюрс гектарлы уногес киземын етӥн. Пудо вордонын но ӟечез трос ӧвӧл. Скал уллё 1348 йырлы кулэсмиз. Соин ик йӧл но али нуналскын 188 тонналы ичигес люкаське. Та сярысь люкаськемъёслы ивортӥз Кун Кенешысь ялан ужась комиссилэн тӧроез депутат Леонид Фролов. Пумиськонэз нуиз Кун Кенешлэн кивалтӥсез Александр Волков. Та вакытэ со котькытчы вутскыны тырше, пӧртэм ужрадъёсы пыриське. Ёрос кузёос азьын но ӟырдыт вераськиз. - Умой тазьы тани пумиськыны, мыньпотыны, тужгес но - Герберын, Сабантуйын яке гурт шудонъёсын, - шуиз со. - Но дыр вуиз ужаны. Асьмеос дас ар ӵоже ни йыръёсмес маялляськом, куд-огез воксё пилеш луизы ини... Залын пукисьёс пӧлысь ог куиньмос люкетэз йырсизэс ыштыны кутскемен, лэся, куд-ог ымныръёс ӵыжыт лузы. Мынам но мугор юзырскиз. Умой коть, вӧзам ватсаз аппраратын ужась: кивалтӥсь, пе, тон вылтӥ ӧз ортчы, чылкак мукетсэ адямиез син азяз пуктӥз. Я, ӵок. Котьма мед шуозы. Улонмы гинэ мед умоясал. И. ЛЕБЕДЕВ. Чидась кема улэ Пичи дыр кытчы кылиз? Мон вордски 1924-тӥ арын Иваново-Самарск гуртын шоро-куспо семьяын. Семьяямы вить нылпи будӥмы. Ньыль класс дышетски но, шуизы: колхозын ужано. Мае быгатӥ � лэсьтылӥ, "уг" ӧй шуылы. Огпол силё сайкыны Можвае лэзизы. Ваньмы пиналъёс, пӧламы кык гинэ мӧйыос вал. Мӧзмиськом, бӧрдӥськом. Дӥськутмы куасьмыса уг вутты, сиён начар. Толэзь ӵоже отын ужамы. Бертӥм гинэ но, нош кытчы ке пужым мерттыны ыстӥзы. Олокытын нюлэс шорын, туж шимес азьын улӥмы. Кӧшкемыт. Милемлы соку 11-12 арес вал. Чидамы. Гужемзэ гырим, усыям, турын дасям... Ужам чугун сюрес лэсьтонын но. Уробоен сюй нуллытӥзы, аналскыны уг сёто вал, начальникъёс учкыса улӥзы, жадид-а шуыса юась ӧй вал. Собере Можга сьӧрысь аэродром, нюлэс коран... ужлэн пумыз но, йылыз но ӧвӧл, озьы ик пичи дырлэсь майбыр дырзэ шӧдылытэк ортчиз вакыт. Мон � трактористка 1939-тӥ арын тулыс гырон-усыян вакыт вуиз. Ми пар валэн гыриськом. Огпол бригадирмы монэ конторае ыстӥз: мын, пе, тонэ трактористэ дышетскыны ысто. � Уг быгаты, - шуисько, - кышкасько. Нырысь прицепщикын ужай, 40-тӥ арысен ачим руль сьӧры пукси. Кӧня ке улыса дышетски на Можгалан газогенераторной тракторен ужаны. 1944-тӥ арын тулыс монэ старшой трактористэ пуктӥзы. Со быдӟа газогенераторной тракторе нылъёс кожысь. Кызьы, мар заводёно? Туж секыт � бергатыны вормоно ӧвӧл. Бӧрдӥськом но нош турттӥськом. Директормы Воробьев А.И. тыл кадь лек вал, номыр но юаны уг луы. Нокин но уг тоды со курадӟеммес. Табере тыбыры но, кускы но висё чидантэм. Кык полэс анай 1946-тӥ ар вуиз. Бызьыны малпай. Ноку но адӟылымтэ-тодылымтэ муртлы мынӥ. Кызьы ке тракторысь мозмытсконо. Огшоры гинэ уг лэзё вал. Я, табере мар-о � мынӥ бере, улыны кулэ. Сием потэ � нянь ӧвӧл, пыжоно ке � пызь ӧвӧл. Бертӥсько мемей доры. Пыжем нянь но, пызь но ваисько. Нош соин но таин улӥськом, тулыс крахмалэн суралтылӥм. А ведь соос сирота кылемын, вить кузя. Дядяйзы войнае бырем, мемейзы кулэм. Бадӟымез Сергей, собере Митрей, Лёгор, Миколай. Самой пичиез � Зина, сизьым аресъем пиналъёсын пересь мемейзы улӥз, 75 аресъем маке. Мон мынэм бере, со шуиз: � Я, кен, мон шутэтско табере. Султӥз но гуртаз кошкиз. Дӥсяно ке � дӥськут ӧвӧл, басьтоно ке � уксё ӧвӧл. Маин ветлод? Ужаны кулэ, гольык уд мыны. Нош ик мемей доры бертӥсько. � Ойдо, нылы, � шуиз мемей, � черсон веме лэсьтом, тани шорт, сое куод, лызмалод, вурод. Озьы дӥсь луоз. *** Мон та сирота нылпиосме асламъёссэ кадь ик яратӥсько. Соос но монэ уг кушто. Больницае сюрыкум, ваньзы ик ветло, саламен лыкто, эскеро. Туж шумпотӥсько. Ми Сергееным кема ӵош улӥськом ини. Вить нылпи будэтӥм. Утисьмы ӧй вал. Али соос ваньзы ас семьяосынызы уло ини. Асьсэлэн нылпиоссы, юртъёссы вань. Озьы ке но, весь мон соос понна сюлмаськисько. Дас кузя внукъёсы но внучкаосы будо, правнуке но вань ини. Умой мед улозы ваньзы. Редакцилэсь: Ирина Игнатьевна но Сергей Федорович Овчинниковъёс уло Пичи Пурга ёросысь Кулай гуртын. Бадӟым юрт возё, бакча утё, пудо вордо, али ке но нылпиоссылы юрттыны тыршо. Милемлы туж тунсыко потӥзы Ирина Игнатьевналэн тодэ ваёнъёсыз. Норья МТС-ын война аръёсы ужам нылкышноос сярысь ми гожъям вал туэ 16-тӥ мартэ. Отын сётэмын Ирина Игнатьевналэн но нимтулыз (гожтэмын Вера Игнатьевна), малы ке шуоно, Вера ним солы черкын сётэмын, нош калык сое умойгес Ирина, Орина нимызъя тодэ. Ирина Игнатьевна пыр-почгес вераны тыршем аслаз улонэз сярысь. Шонер лэсьтэм � туала егитъёслы мӧйы адямиослэн улэмзы, секытъёс пыр потэмзы, котьмае чидамзы сярысь одно вераны кулэ. Тау тӥледлы, Ирина Игнатьевна. Ирина Игнатьевналэсь гожъям тодэ ваёнъёссэ газетэ поттыны дасяз пиез � Александр Сергеевич Овчинников, Удмурт Элькунысь Кун Кенешлэн Аппаратаз ужась. Цирк - чаклам дыре Ижын азьланьтӥсько Казань Инмар Анайлэсь черксэ лэсьтон ужъёс. Нырысетӥ октябрёзь кирпич борддоръёс ӝутэмын луозы ни. Циркез лэсьтон но пусъем планъя мынэ. Татын ужъёс лачак на. Строительёс юртлэсь фундаментсэ юнмато, ву, шуныт сётон гумыос кыско. Алигес кыказ но та лэсьтӥськон интыосы вуылӥз Кун Кенешлэн Тӧроез Александр Волков, тодматскиз кылдэм югдурен, лэчыт ужпумъёсты сэрттыны-пертчыны юрттӥз. Кызьы ивортӥз со, вуоно арын циркез лэсьтонэ федеральной бюджетысь 50 миллион манет вуоз. Со мындагес ик коньдон шедьтыны луоно, шуо строительёс, спонсоръёс чотын. Соин ик куинь ар куспын цирк вуоз шуыса оскон кылдэ. Удмурт Республикаысь Кун Кенгешлэн пресс-службаез ивортэмъя. Шӧкыч Галина Романова "Бертом, пие, бертом..." Серемес верос Перестройка кутскем берегес ик Иванлэн семьяяз куректон вуиз: ужан заводысьтызы цехсэс ворсазы. Кышноеныз быдэс улонзэс отын тыршизы бере, кытчы, кудпала кариськыны ик ёрмизы. Пенсие потонзы вуэмын ӧвӧлгес на, кыӵе ке выль профессия басьтыны бергес ни. - Оло, асьмелы но маин ке вузкароно? - ураметӥ ортчыкузы вузкарон палаткаос шоры кышноезлы возьматӥз Иван. - Фу! - нырзэ чатыртӥз Марья.- Шедьтэм ук. Мон заводын инженерын ужай, табере воксё вузкарисёзь усём-а. Пыд йылазы кызьы но озьы сылӥсь мукет заводъёсы но йыгаськылӥзы кузпалъёс - нокытын но инженеръёс кулэ ӧвӧл, пе. Озьы йыг-йыг, гурезез но куашкатымон кужмо, задор кузпалъёс гуртын пуконо луизы. Ярам али нылзылэн вить аресъем пиез вань, со котырын выронъязы, кӧтӝожзэс кытӥ-отӥ вунэтыло. Кузпалъёс нылпиоссылы вылӥ образование сётыны быгатэменызы туж данъяськизы вал. Пизы - врач, нылзы - дышетӥсь. Нош берло соослы но уждун тыремысь дугдэм бере, малпаськыны кутскизы: оло соос воксё дуннелэсь кудпала бергамзэ уг валало ни, оло нылзэс но пизэс кытчы ке кунгож сьӧры келяса умойгес луысал. Мар-о табере бер сайкась атас сямен чоръянэз на - кунгож сьӧрын но ӟеч интыос басьтэмын ни луозы. Толэзен-толэзен картошка вылын пукемзы бере, одӥг ӝыт быдэс семья ӝӧк сьӧры кенешыны пуксиз. - Вова,- пиезлы вазиськиз Иван,- тыныд уждэ воштоно луоз, терапиысьтыд пинь эмъясе выж. Соос, пе, коньдонэз дуро. Тон мар, атай, визьтэммид-а, мар-а? Со ведь воксё пӧртэм профессиос. Азьвыл малпаськоно вал. Ачид ведь отчы мыныны ӧд лэзьы, калыклэсь сисьмем пиньёссэ кысканы монэ тонэ ӧй ворды, шуид. - Шуи вал, дыр, - йырзэ лэзиз Иван. - Соку Элялы ужзэ воштоно,- нылызлы вазиз Марья. - Анай, оломар эн вераськы, кытчы кельтом мон классме. Соос сыӵе ежесь, визьтэмесь на. - Ачид тани соос сьӧры визьтэммод,- вожез потӥз Марьялэн. Кыл-куара поттӥсь ӧз луы ни - котькудӥз ас понназ малпаське, пеймыт гуысь, сыръясь нюрысь потыны амал утча. Чалмыт омырез пичи пизылэн чангес куараез сӧриз. - Анай, анай, учкы ай, кин-о та? - вуж фотоосын альбомез шедьтэм, Эля доры вайыса юа. - Пересь-пересь мемеед со, пие. - Кытын-о нош со али, кулӥз-а ана? Ваньзы пичи пизы шоры, собере ог-огзы шоры учкизы, ымныразы пумен пальпотон кылдӥз: тӥни кин соосты та пеймыт гуысьтызы, сыръясь нюрысьтызы поттоз! - Улэп, дыр ай, пие, улэп! - лӧптэм куараен шуиз Марья. - Ӧйтӧд,- оскытэкгес вазе Иван.- Солы ведь укмыстон арес пала луоз ини. - Кулысал ке, ивортысалзы,- шуэ Эля. - Кытчы-о ивортозы, квартирамес воштӥмы ведь,- шуэ Марья. - Кытын-о нош пересь мемемы? - пичи пизы уг буйга. - Бадӟым, ӝужыт, чебер из юртын,- шуэ Иван. - Нош мар-о со отын каре? - Сиське, ветлэ, изе, дыр,- пичи пизылы валэктэ Марья но ваньзылы вазиське:- Али ик со пересь сюдоназы ветлоно, тодоно, шедьтоно, ваёно. - Нош кытын сое возём? - юало пиналъёсыз. - Тынад комнатаяд сое интыялом,- пиезлы шуэ Марья.- Кӧланы залэ потод. Мукет дыръя Вова пештырскысал, куамын арескам но улон сэрегме басьтӥськоды шуысал, нош али пал кыл но ӧз вера. Марья ури-бери дӥсяськиз но Иванэныз пересь сюдон корка мынӥзы. Со городлэн пумаз, нюлэс вӧзы ик интыяськемын. Зэмзэ но, Иванлэн верамезъя, ӝужыт, чебер, югыт. Марьялэн угось татчы ноку но ветлэмез ӧвӧл. "Кӧня ар ортчиз ини ай со дырысен? - малпаське Марья.- Дас, кызьы, куамын? Пиез но нылыз бӧрсьысь бӧрсе вордскем бере, Иванэзлэн анаезлы инты ӧз сюры ни. Ма, соку чырткем вал на. Ачиз угось янгыш ужаз: гуртысь йыг-йыг сылӥсь корказэ Иванэз вузаны косӥз - анайзэс доразы басьтӥзы. Коньдон кулэ луиз уга... Нош пенсиез али солэн кӧня меда луиз ини? Укмыстон аресъемъёслэн бадӟымгес луоз. Ӵок ини - кӧня луоз, няньлы но йӧллы тырмоз. Ой, сюлмы-кӧты, улэп гинэ мед луысал!" Пересь сюдонлэн кузёез кузпалъёс шоры паймысагес учкиз, документъёссэс эскериз но буйгатӥз: улэп на али, пе, анайзы, бодыен каллен-каллен ветлэ на. - Пенсиез нош ассэ сюдыны, дӥсяны тырме-а? - юатэк уг чида Марья. - Трос-а кулэ ини пересь муртлы - тырме. Табере ведь солы бадӟыматыса тыро - аресэз мӧйы. Милемлы мултэсэз кулэ ӧвӧл - кылемзэ сберкассае тыриськом, ассэ ватыны коть яралоз. Пересьсы комнатаын огназ улэ вылэм. Котырак ӝикыт, чылкыт. Ӝӧк сьӧрын понназ маке нукыртыса пукись анайзэс адӟыса, Марьялэн сюлмыз ик путӥське вал. Дораз лыктӥз, вань мылкыдз поттыса ӟыгыртӥз, чупаз. Пересь йырзэ ӝутӥз, кузпалъёс шоры мыр-мыр учкиз но юаз: - Кинъёс-о тӥ? - Мама, уд тодмаськы шат, тынад нылпиосыд. - Мар-о пересь муртэ исам кариськоды. - Ма, тодад вай али Иван пидэ кендэ. Пересь киыныз шонтӥз - оломар кулэтэмзэ эн вераське, пе. Соос кытчы ке туж кыдёке кошкемын. Оло, улэп но, пе, ӧвӧл ни - со палан музъем зуркан вылэм. - Пие понна бӧрдыса синъёсы кӧсамын ни,- шуэ пересь.- Сюлэм гинэ бӧрдэ, куректэ на - синкылиосы уг ни пото. Одӥгез гинэ пие улэп кылиз вал, со но тӥни быриз. - Кин-о нош тыныд соос Ижысь козкизы шуиз? - юа Иван. - Татчы лыктэм берамгес кузёмылэсь юалляськи. Верам адресъя ветлӥзы но отын муртъёс, пе, уло. Пие но кенэ соослы кыдёке, шуныт пала кошкиськом шуыса гожтэт кельтӥллям. Кузпалъёс ог-огзы шоры учкизы но ӵыжектӥзы - ваньзэ валазы угось. Улонзы соку бадӟым, паськыт шурен визыласа бызиз. Асьсэос егитэсь, чебересь, ужзы умой - заводын гажамон адямиос. Анайзы люкетыны кутскиз. Синазькыльлы кылемзэ шӧдыса, анайзы ачиз ик пересь сюдонэ куриськиз вал. Егитъёс шумпотӥзы... Пересь сюдонысь буш киын бертоно луизы кузпалъёс, ӧз тодма соосты анайзы. - Иван, ойдо ваньмы ӵош мыном. Оло, мае ке тодаз ваёз,- шуиз Марья. - Мае-о со тодаз ваёз? Эляен Воваез нуны дыръязы гинэ адӟылэмын. Куспазы пичи пизы пыриз. - Адӟиды-а пересь мемеме? - юа. - Адӟим, пие, адӟим. - Мынам но адӟеме потэ. - Тон пичи на, отчы уз лэзе. - Лэзёзы, лэзёзы, адӟеме потэ! пыдъёссэ тапыр карыса бӧрдыны кутскиз, нокызьы уг буйга ни. Мар карод на - корказы одӥг гинэ пичилэн куронэз - закон. Сое басьтыса, ваньзы пересь сюдонэ мынӥзы. Пересьсы кытын ке садын, пе, юмша. Иван сое кыдёкысен ик тодмаз но пичи пизылы шуэ: - Тӥни со, пие, тӥни. Пичи пизы бызьыса пересьсы пала кошкиз. Дораз вуиз но ӟыгырскиз. - Ой, пие, мусое, кыттысь тон потӥд?! - пересь пияш доры мыкырскиз, ымнырзэ бам бордаз лякыса мусоя.- Чылкак мынам пичи Иванэ кадь ук тон. - Иванэдлэн ик выжыез со,- дораз шок-пуль вуо бадӟымъёсыз но. - Пересь меме, ойдо бертом,- бордысьтыз уг лэзьы ни пичи пизы. - Бертом, пие, бертом,- йырзэ маялляса шуэ пересь. Шумпотэм семья пересьсэс ӟыгыръяло, чупало. Ваньзы сые шудоесь!.. Серемды потӥз-а, та мадёнэз лыдӟыса? Со тодмо но тодмотэм "Альва" "Альва" телекомпания аслэсьтыз пуштроссэ ӝоген воштоз. Татын кылдозы выль тунсыко передачаос - туалаосыз огдырлы шутэтскон отпускъёсы кошкозы. Таӵе малпанэ-огкылэ вуизы "Альва" ТК но "Продторг" ОАО. Республикаысьтымы та предприятие но телекомпания ӵош ужан сярысь огкыл гожтӥзы. Вань кужымзэс, быгатонлыкъёссэс соос сётозы туала куронъёслы тупась телекомпания кылдытонлы. "Альва" ТК-лэн кивалтӥсезлэн Василий Шаталовлэн верамезъя, ас интызэ со оске али тодмотэм но туж визьмо адямилы. Но телекомпаниен кивалтон удысысь ачиз но уг палэнтӥськы. Тодмо луэм "Не могу молчать" передачаез, ӧжыт вис карем бере, вылысь эфире потоз. Телекомпаниын таӵе воштӥськонъёс матэктӥсь быръёнъёсын герӟаськемын ӧвӧл. Зэм, кыӵе партиос пала дурбасьтонзэс соос ӟеч тодо. Э. Кумачева. Ӝӧкед ке тыр, тазалыкед бусьтыр 75 ар тырмиз Туберкулёзэз эмъянъя кун диспансерлы. Та кышкыт висёнэн черламлэсь утиськыны куанер, ёрмон вакытэ шуг. Туберкулёз потэ калыклэн улон-вылонэз бордысь. Кунамы паласькись висён аляз революция бере, Быдӟым Отечественной война аръёсы. Берло дас ар ӵоже но лыдпусъёс шумпотымонэсь ӧвӧл. Туннэ Россиын ог 24 сюрс 500 адями солэсь курадӟе. Сюлмаськыто амнистиен пытсэт улысь потӥсьёслэн пӧламы вуонзы � тросэз соос висён вӧлмытӥсьёс луозы. "Туала" туберкулёз тыэз гинэ уг, мукет пуш тӥрлыкъёсты но сӧре: мусэз, сюлъёсты, сэпез, лыэз но мукет. Калыклэн огъя тазалыкез лябӟемен, висёнъёслы пумитъяськемез уг луы. Жаляса верано, паласькись чер "уг висъя" та удысын тыршись фтизиатръёсты но. Туннэ ог 3 процентэз эмъясьёс асьсэос та висёнлэсь курадӟо. Кызьы, кыӵе амалъёс шедьтоно кылдэм югдурысь потон понна? Та но мукет ужпумъёс эскеремын Туберкулёзэз эмъянъя диспансерлы 75 ар тырмонлы сӥзем конференциын. Люкаськонэз мытӥзы ӟечкыланъёс бордысен. Секыт быръем удысазы шӧдскымон азинсконъёс басьтэм эмъясьёс пусъемын син-пель кузьымъёсын. Одӥгъёсыз Удмурт Республикаысь тазалыкез утён удысысь дано адямиос луизы, мукетъёсыз Кун Кенешлэн, Правительстволэн но Тазалыкез утёнъя министерстволэн грамотаосыныз пусъемын. Тужгес дуно кузьым � "Ода" автомобиль � Ижевскысь автозаводын нимаз куронъя бичамын. Кун Кенешлэн Тӧроез Александр Волков тау карон кылъёс вераса вазиськиз Гипппократлэсь кылзэ сётэм но сое тыро-пыдо быдэсъясьёслы. А.Волков оскытӥз: вылӥ кивалтӥсь ёзъёс тыршозы лэсьтыны ваньзэ, ма юрттоз эмъясьёслэсь ужан мылкыдзэс ӝутыны-бугыртыны. Кӧня ке лыдпусъёс ватсалом на. Диспансерын ужась 82 врач пӧлысь 42-ез вылӥ квалификациен эмъясь луэ. Жаляса верано, ӝыныезлэсь ятырезлэн фтизиатръёслэн пенсие потон вакытсы вуэмын. Егитъёс тазалыкез утён удысэ туала арын сокем уг кыстӥсько. Соосты валаны луэ: котькинлэн тырмыт, ёрмытэк улэмез потэ. Нош эмъясьёстэк улэммы уг луы на. Э.КУМАЧЕВА. Россия Федерацилэн кун наградаосыныз пусъён сярысь Россия Федерациысь Президентлэн Указысьтыз Адямиосты утьыку кышкасьтэм но сэзь луэмзэ возьматэмез понна "За спасение погибающих" медален пусъёно. Корепанов Сергей Владимировичез - Свердловск чугун сюреслэн "Пермь- Сортировочная" депоезлэн Чепца станциысьтыз вагонъёсты эскерисез, Удмурт Республика. Россия Федерацилэн Президентэз В. Путин. Москва, Кремль, 2000 ар, 27 июне. � 1194. Вормонлы - 55 ар Ӝыны даурзэ - ӵошен Удмуртиысь дано дышетӥсьёсын, кузпалъёсын Людмила Георгиевна но Иван Федорович Семакинъёсын пумиськыны ӵектӥз Красногорье ёрос газетын ужась Надежда Георгиевна Ашихмина. Со верамъя, соос синмаськымон адямиос, алигес зарни сюанзэс пусйизы. Пумиськи. Вераськонмы ӝог ӧръяськиз. Иван Федорович тодаз ваиз кемалась ортчем аръёсты. Война азьын йылпумъяз со дышетӥсьёсты дасян институтэз. Малпа вал лётчик луон сярысь, но тазалыкез лябен сое отчы ӧз кутэ. Ужаны кутскиз Яр ёросысь Елово школаын. Отысь ик 1942-тӥ арын армие басьтӥзы. "Кузь сюресме мытӥ артиллерист луыса Ясной Поляна котырын. Ӵемысь тодам вайылӥ Лев Толстоез, кудӥз егит дыръяз офицер-артиллерист вал", - вера И. Ф. Семакин. Визьмо, сэзь, ужзэ йылаз-пумаз вуттыны быгатӥсь Иван Семакин ӝоген сержант луиз. Орловск но Курск котырын ӟырдыт ожмаськонъёс азьын сое Горькийысь артиллерийской училищее дышетскыны ыстӥзы. Курсант Иван Семакин гижысь-пиньысь басьтӥськиз военной ужен тодматскон борды. 1944-тӥ арын гужем егит лейтенант келямын И Прибалтийской фронтысь 20-тӥ бригадае. Та бригада тушмонлэсь Восточной Пруссие пегӟемзэ чакласа возиз. Кык орденъёслэн кавалерзы, отставкаысь лейтенант И. Ф. Семакин кема возьмам Вормон нуналэз Балтийской зарезь дурын пумитаз. Дор палъёсаз берытскиз со бӧрсьы ар ортчыса гинэ. Татысен басьтӥськиз Красногорье роноен кивалтыны. Эшшо кык ар ортчыса кышнояськиз синмаськымон нылмуртэн, ӟуч кылъя но литературая дышетӥсен Людмила Георгиевна Чувашовен. Ӵошен соос куинь пинал будэтӥзы. Светлана нылзы табере Ижевскын улэ, пиоссы Михаил но Алексей вордскем Красногорье черкогуртазы ик кылизы. Ваньзы соос данъяськымон адямиос луизы. Песятайзылэсь но песянайзылэсь ӟеч мытэм ужъёссэс азинто соослэн нылпиоссылэн нылпиоссы. В. Поздеев. Кузпалъёс Иван Федорович но Людмила Георгиевна Семакинъёс Иван внукенызы. Дунтэк вылӥ образование � 3 ар куспын Ваньмаз вылӥ дышетскон заведениосын сямен ик Глазовысь кун институтын но али кысык вакыт. Татын 10 факультетъёсы пырыны мылкыд карисьёс документъёссэс сёто. 6-тӥ июльлы тужгес но трос мылкыд карисьёс вал математика но информатика специальносте: 50 интые 140 адями, педагогикая факультетлэн ӟуч отделенияз � 25 интые 91 заявление. Удмурт группаосы лыктыны мылкыд карисьёс туэ но ӧжыт лыдъясько. Филологияя факультетлэн удмурт отделенияз 25 интые 32 заявление гинэ сётэмын ай. Нош педагогикая факультетлэн удмурт отделенияз, кытын национальной школаосысь начальной классъёслы дышетӥсьёсты дасяло, 25 интые 13 гинэ абитуриент лыктӥз. Берлоезлэн мугез но вань: со герӟаськемын удмурт абитуриентъёсты кутонын воштӥськонъёсын. 1986-тӥ арысен та группае шор ёзо школаез быдтэмъёс но лыктыны быгатылӥзы ке, туэ нырысьсэ отчы педучилищеосты йылпумъямъёсты гинэ люкало. 5 ар интые таос 3 арскын институтэз йылпумъялозы. Глазовысь педагогикая факультетэз педучилищеез йылпумъямъёс таӵе вакчиятэм дышетон амалэн 4 ар потылӥзы ни, нош соос ӟуч группаос понна гинэ вал. Туэ нырысьсэ таӵе амалэн удмурт группаез но дышетыны басьтӥсько: озьыен, педучилищеез йылпумъямъёс, институтэ пырон экзамен сётыса (удмурт кылъя вераськыса, математикаез гожъяса но ӟуч кылъя � изложение), 3-тӥ курсэ пуксьыны быгато но 3 ар куспын дунтэк вылӥ образование басьто. Глазов пединститутысь абитуриентъёс понна азьло лэзем документъёсын янгышаса гожтэмын вал, воштӥськонъёс пусйымтэ. Соин ик педучилищеосты йылпумъямъёслы нимысьтыз вазиськиськом: кинлэн 3 ар куспын дунтэк вылӥ образование басьтэмез потэ, лыктэ дорамы. Документъёсты (диплом, 8 фотография, медицинской справка, семья сярысь справка, паспорт) кутӥськом 15 июлёзь (12 часозь), нош 17 июльысен экзаменъёс кутскозы. Б.И.Каракулов, доцент, Глазов пединститутысь удмурт филологияя кафедралэн кивалтӥсез. Дунъёс кышкато Та толэзьлэн кутсконаз "Ижсталь" но дворецын регионъёс куспын ньылетӥез "Автомир" в Удмуртии 2000" выставка ортчиз. Сое радъязы "Удмурт экспоцентр" акционер огазеяськон, Удмурт Республикаысь Госкомспорт, Ространсинспекция, "Удсмуртавтотранс", ГИБДД на "Ижмаш-Мото" акционер огазеяськон. Возьматонэ ветлӥзы Москваысь, Павловоысь, Егорьевскысь, Пермьысь, Уфаысь, Вятские Поляныысь, Ковровысь, Ярославльысь, Тольяттиысь вуз поттӥсьёс. Асьме республикалэсь данзэ утизы "Ижмаш-Мото" АО, Транстех-Сервич, Сарапулысь "Мак", "Ижавто ГАЗ сервич", "Удмуртавто УАЗ сервис", "Рен Авто", "Автореммашсервич" огазеяськонъёс, "Сапсан" автосалон но мукет фирмаос. Уно адямиос бергазы "ВАЗ-11113", "Ока", "Соболь", "Волга", УАЗ автомобильёс котыртӥ. Трос вал кунгож сьӧрын поттэм машинаос. Нош асьмелэн автозаводмы одӥг автомобильзэ но малы ке вайымтэ. Со понна данак вал мотоциклъёсын тунсыкъяськисьёс. Но та машинаослы дунъёс басьяськисьёсты кышкатзы, лэся. Кылсярысь, кузятэм кузовен грузъёс нуллонъёс мотоцикл сылэ 69 сюрс 200 манет, егитъёслы чаклам "Юнкер" мотоциклэн дуныз 42 сюрс 750 манет. Б. НИКИТИН. Венгриын фольклоръя фестиваль Вань делегациос ӝыт тямыс часэ вуизы Секешфехервар городысь шор площаде. Сцена вылэ потӥзы мадьяр кышноос - фестивалез нуисьёс. Кутӥськиз кык кыл - мадьяр но ӟуч. Тани чузъяське венгер Президентлэн Арпад Гёнцлэсь вуэм ӟечкылан телеграмма. Финн-угор калыкъёслэсь культуразэс азинтонъя правленилэн фондаз ужась Эмилия Колпакова лыдӟе фондлэн президентэзлэсь Николай Гавриловлэсь ӟечкыланзэ. Ӝоген дыр вуиз фольклор коллективъёслы сцена вылын поръяны. Мон пайми: фестивалез усьтыны, Удмуртиын сямен ик, дан усизХанты-Мансийск автономной округысь делегацилы. Юатэк ӧй чида фольклоръя тодосчилэсь Ласло Фельфюльдилэсь та пумысен. Со шуиз: - Ми малпамъя, та ансамбль фольклорлы тужгес матысез луэ. Шулдыр ӝытэз йылпумъяз "Ӟардон" ансамбльмы но Анна Плотникова. Игра районысь Сундурысь "Ӟардон" ансамбль сярысь ке верано, кылдытӥз сое Нина Ившина. Али ужа Сундурысь культурая юртлэн директорез луыса. Нош ансамблен кивалтэ Анатолий Чирков, Игра районысь культурая отделлэн кивалтӥсез. Фестивальын соос возьматӥзы удмурт йылолъёсты. Зол кичабизы Анна Плотниковалы но. Кызьы уз экты адями, солэсь гурзэ кылыса. Верано на: Венгриысь телевидение, фольклорлы историе шуыса, куд-ог коллективъёсыз плёнка вылэ гожтӥз. Татчы шедизы "ӟардонъёс но. Вератэк кельтэме уг поты тани мае но: национальной ӝытын асьме делегация туж ческыт удмурт сиён пӧраз, со � сӥлен, губиен перепеч. Фестивале ӧтемын вал кибашлыос но. Вера Александр Кардапольцев, Игра районысь калык творчествоя центрлэн директорез: - Огъя фестиваль умой ортчиз. Но мукет интыосысь мастеръёсын пумиськем- кенешем потэ вал. Адӟытонын возьматӥмы туйлэсь арбериос, кускерттонъёс, ӵушконъёс, сю ар возем ӝӧккышетъёс. Таос туж яразы фольклоръя тодосчилы Ласло Фельфюльдилы. Нош венгеръёслэн ваньмыз сямен ужъёссы сюйлэсь (керамикалэсь) лякылэмын. Шор площадьын Удмуртиысь адӟытон тужгес даноез вал. Троссэ кузьмамы фестивалез радъясьёслы но вузамы. Пумиськонъёс ӧз ортчылэ Секешфехервар городын гинэ. Куноос вуылӥзы Будапешт, Дунауйварош но мукет городъёсы. Ваньмыз сямен ужрадъёс ортчылӥзы Эктон коркан. Отын луэ мылкыдэз вӧлъяны, эктыны, эшъёсын шутэтскыны... Татын ик, Эктон коркан, мон кырӟай. Нош Дунауйварош городын, "Дунай кузя" пичи фестивальлэсь концерт программазэ усьтӥ. Удмурт Республикаысь делегациен кивалтӥз Удмурт Республикаысь Правительстволэн Тӧроезлэн воштӥсез Виктор Евграфович Шудегов. Со шуиз: � Ми, фестивале пыриськемъёс, туж шумпотӥськомы асьме ӵыжы-выжыосмылэн музъем вылазы вуылэммылы. Татын интыяськемын дуннеысь самой чебер столица - Будапешт, татын пӧртэм шимес вакытъёс ке но вал, вашкала узырлыкъёс утемын. Тямысэтӥ фестиваль, финн-угор калыкъёслэсь культуразэс азинтон понна, эшшо одӥг вамыш лэсьтӥз. Со луонлык сётӥз возьматыны но тодматскыны финн-угор калыкъёслэн культураенызы. Тямысэтӥ фестиваль нош ик куриз: утёно традиционной культураез, со ышон-бырон калэ вуэмын. Соин дэмен ужъёс нуоно, Европалэсь огъя культурая вылтуссэ утён вылысь. Пумиськонъёс, пумиськонъёс Мед луозы эшшо но трос. Ӟечкыласько мон тӥледыз - Умой медло асьмен ваньмыз! Светлана ЯКОВЛЕВА. Эшмес буре вайыса Толон люкиським газетлэн бадӟым эшеныз Софья Васильевна Куклинаен. Лек гижло солэсь улонзэ куспетӥ кариз 67-тӥ аресаз мыныкуз. 50-тӥ аръёсы Софья Куклина Шаркан районлэсь данзэ утиз "Советской Удмуртия" газетлэн кубокез понна куасэн бызьылонын. Со дырысен улонзэ герӟаз гуртысь спортэн но "Удмурт дуннеен". Милям ӵошатсконъёсамы олокӧня ар ӵоже судья вал. Ужаз "Уропал" но "Спартак" спортъя обществоосын, физькультурая диспансерын. Гуртысь одӥг спортсмен но сое тодматэк ӧз кыльылы, гуртысь одӥг спортсменэз но со тодматэк ӧз кыльылы. Софья Васильевна � Удмурт Республикаысь физкультурая дано ужась. Ӟеч кӧлэлэ! Тӧльъя-буръя кошке ваньбур Калык хозяйствоез выльдонлэн одӥгез мугез � ыштонъёсты кулэстон. Электрокужымез, вуэз, шунытэз шыръян огазе герӟаськемын наука, техника, право но мукет удысысь ужпумъёсын. Соосты сэрттыны-пертчыны тыршизы "Улон юртъёсты возёнъя хозяйство но энергетика" семинаре пыриськемъёс. Кенешыны Иже вуылӥзы Урал городъёсысь, озьы ик Казаньысь но Санкт-Петербургысь та удысын тыршисьёс. Семинарез радъясьёс � Иж городлэн Администрациез � возьматӥзы Ижысь К.Маркс ульчаысь 208 номеро юртэз. Татын, эскерон вылысь, пыӵатэмын выль технология: пияла пакетъёсын укноос, шунытэз возись борддоръёс, квартираосысь шунытэз, вуэз чаклась-лыдъясь приборъёс но мукетыз. М.КУЗЬМИН. Ӟеч выжы кожаз уг лу Завьяловоын ортчизы пудоез бызьылытӥсьёслэн ӵошатсконъёссы. Аръёсын люкам тодон- валанъёссэс, быгатонлыксэс возьматыны ветлӥз районъёсазы вормисе потэм 32 оператор. Ас удысаз ваньмызлэсь шаплыгес, ӟечгес ужаны быгатэ вылэм Ува ёросысь "Авангард" СПК-ысь Юлия Маркова. Кыкетӥ инты сётэмын Игра ёросысь "Чутырский" эштосысь Нина Корепановалы, куинетӥ интые потӥз Балезиноысь Мичурин нимо СПК-ысь Августа Никифорова. Ваньзы соос коньдон премиосын пусъемын. Н.ИВАНОВ. Таиз чорыг ке чорыг! Та нуналъёсы Ижын улӥсь Дима Никитинлы удалтӥз ке удалтӥз ни. 20 номеро школаез йылпумъямез сярысь аттестат басьтэмез бере, со туж бадӟым чорыг кутӥз. Нош учыр тазьы вал. Атаеныз ӵош соос, визнан котырзэс бичаса, Иж шур дурысь тодмо интыязы мынӥзы. Куазь зор-кот но пӧсь улэмен, чорыг ляб кысказ. Оло, ӵукна пал удалтоз шуыса малпазы. Кылизы уйлы. Никитинъёс та интыосты кемалась тодо. Соос огпол гинэ ӧз адӟылэ вал ни мур кожъёсысь потась ӟейымъёсты (сомъёсты) но. Соин ик бадӟым чорыгез кутыны Дима азьвыл ик пыр-поч дасяськиз. Курег макесъёсты пыжиз. Нырысь ик эскериз, Америкаысь курег макесэн чорыгаса. Сомлы зарезь сьӧрысь ваем маке ӧз кельшы, шӧдске. Соку пияш куриказ дэмӟытӥз Глазов тылобурдо фабрикаысь курег сӥлез. Ӵукна шунды ӝужан вакытэ миллиметр зӧкта сизэ (лесказэ) кин ке но зуркак-зуркак кысканы ӧдъяз. Дима валатскиз: курике сом шедем. Чорыгез яр дуре каллен-каллен кыскыны кутскиз. Соиз пумитъяське. Час пала озьы выремез бере, пияшлэн ӟигарыз быриз. Юрттыны атайзэ Владимир Егоровичез ӧтёно луиз. Кужмо чорыген кык кузя эшшо час пала нюръяськизы на. Поттӥзы но ас синъёссылы уг оско: сомлэн секталаез 20 килограмм пала, кузьдалаез � 140 сантиметр вылэм! Удалтӥз Никитинъёслы. Алексей ЕЛЬЦОВ. Тамак ӵын но сюлэм Тамак кыскисьлэн даурез вакчия. Тае котькин но тодэ кадь. Нош солэн вӧзаз кыскисьтэм адямиос ке... Тамак ӵынэн шокан уродгес кыскемлэсь но. Таӵе малпанзэс веразы Америкаысь Гарвард университетын ужасьёс. 10 ар ӵоже соос 36-60 аресъем 32 сюрс нылкышнолэсь тазалыксэ чакласа возизы. Одӥгез но соос пӧлысь ноку ӧз тамака, эскерон кутскыку котькудӥз таза вал. 10 ар куспын 152-ез инфаркт кутӥз, со пӧлысь 25-ез кулӥз. Тодмо луиз: нуналмысь ӵынэн шокась нылкышноос сюлэменызы курадӟо 88 процентлы уногес. Та верам кылъёс озьы ик воргоронъёслы но укша. Специалистъёс верамъя, США-ын арлы быдэ тамак ӵынэн шокаса, 50 сюрс кыскисьтэм адями быре. Соос ӵемгес сюлэменызы курадӟо. Басьтэмын Интернет пыр. Гужем кышкыт лемтэен Оло, улонэдъя куазед но кариське. Вылысьтыз вылаз шуккетъёс кылдо. Гурт хозяйствоез куашкатыны юрттыса кадь азьвыл аръёсы кӧс улӥз. Но аран вуэ ке, ведра дурын кадь кисьтэ. Гуртын улӥсьлы нюлэс � со кыкетӥ дор. Тужгес но гужем. Но табере адями тэле шергес ветлыны кутске ни. Тодмо ӧвӧл уго: оло тон висись лэмтэй ваёд, оло уд. Но огез тодмо: лемтэй куртчиськоз одно ик. Таиз ӝыны куректон гинэ ай. Со нымы-кибыез эскерыны лабораторие нуоно. Кызьы тодмо, соос республикаысь городъёсын, Уваын но Играын гинэ вань. Нош пыдлось гуртъёсын улӥсьёслы ма кароно? Географиез учконо ке, республикалэн уй палаз лысо писпуос тросгес, соин лемтэй но ӧжытгес. Лымшорын уногес бусыос � нымы-кибыез озьы ик ӧжыт. Шор ёросъёсысь нюлэсъёс узыресь вир сюпсисьёсын. Тужгес но беризё интыосын. Но беризез шыръёс ярато. Нош соос паласькись висён нулло. Шыръёслэсь палаське лемтэйёслы. Берпуметӥосыз дыльдыенызы адямиослы висёнэз пыӵато. Сьӧд лемтэйёс кузёясько мартлэн пумаз но апрельлэн кутсконаз. Нош гордъёсыз, апрель шорысен кутскыса, быдэс гужемез вир сюпсё. Самой трос нымы-кибыос пумисько май пумын но июньлэн кутсконаз. Соин но, дыр, санэпидемстанциосы али трос адямиос вазисько. Июль толэзьлы 16 сюрслэсь трос адями республикаысь лабораториосы лемтэйзэс ваиз. Соос пӧлысь сюрсэз � нылпиос. Куртчем лемтэй пӧлысь 15 процентэз висён нуллэ. Специалистъёслэн верамзыя, калык ачиз янгыш висисьёслэн лыдзылэн будэмезлы. Котырмес кырсь возиськом. Жуг-жаг висъям интыосы уг кисьтаськы. Кытчы сюрем, отчы ик потто. Азьвыл нюлэсэз чылкытатыса корало вал (санитарной рубка), табере соиз но вунэтэмын. Писпуос пограло, сисьмо. Котырмес чылкыт возим ке, соку гинэ висёнэн нюръяськон сярысь вераськыны луоз. Лемтэй висись ке, куртчем адямилы иммуноглобулин пукто яке йодантипирин дас нунал ӵоже юо. Берпуметӥез эмъюм 27 манет сылэ, нош нырысетӥез � 65-100 манет. Иммуноглобулинэз куинь ампула пукто. Озьыен кулэ 300 манет. Гуртын улӥсьлы дунтэм ӧвӧл со. Но вань мукет амал но. Лемтэез лабораторие но нуоно ӧвӧл, дунтэмгес но усе. Со понна аспирин но йӧл гинэ мед луоз. Лемтэй куртчиз ке, 10 нунал ӵоже кык таблеткаен нуналаз куинь пол юоно. Но юоно сиськем бере йӧлэн. Соку нокыӵе но лемтэй висён кышкыт ӧвӧл ни. А.АНДРИЯНОВ. ГУРТ УЛОН Гуретэ Кӧльы луд Репортаж Вӧл-вӧл паськыт клевер луд. Белокен узыр таӵе удалтэм пудо сиёнэз кемалась ни вал адӟем. Турын нап-нап будэм, ӝыны метрлэсь но ӝужыт: вылаз выдӥд ке, уд но выйы кадь. Чебер Кӧльы луд тэль дорозь кыдёке кыстӥське. Малпаське ай, Балезино палъёсын одӥг бусы 260 гектар басьтэ. Нош куке син шорад ог-огзы сьӧры бергало куинь кужмо КСК-100 пудо сиён дасясь комбайнъёс, Т-150 тракторъёс но КамАЗ автомашинаос, сюлэм шумпотонэн пачылме. Шулдыр ужгурен гуретэ Кӧльы луд! Бусые ми лыктӥм нуназе бере, "Балезинский" гурт кооперативлэн тӧроеныз Людмила Никитинаен. Шоро-куспо арлыдо кышномурт � гуртын гажано адями. Туэ солы быдэс хозяйствоен кивалтыны оскизы. Вавож районысь Зямбай гуртын вордӥськем но будэм нылашез, Сарапулысь совхоз-техникумез йылпумъямез бере, 1985-тӥ арын Пыбьяе ужаны ыстӥзы. Людмила Сергеевна татчы выжы лэзиз, бызиз, татысь шудзэ шедьтӥз. "Балезинский" гурт кооператив (СПК) районын одӥгез усто но огсыр умой ужась хозяйство луэ. Татын муш кадь тыршись калык улэ. Со тужгес но яркыт адӟиськиз клевер бусыын. Музъем ужасьёслэн тыршемзы ӟеч жалем сиёнэн берытске. Трос аръем турын нырысь араз ик котькуд гектарысьтыз ичизэ 250 тонна люкаське. Механизаторъёс куспазы вожмаськыса турнало. СПК-ын пудо сиён дасянъя нимаз звено кылдытӥзы. Ваньмыз соос отчы пыро. Ужзэс радъя хозяйствоысь валтӥсь агроном, усто специалист Галина Ивановна Князева. � Ми палан сокем трос уг зорылы ай, � шумпотэ Людмила Сергеевна. � Инмар пудо сиён дасяны дыр сётэ. Гужемлэн али тужгесшулдыр вакытэз. Котькуд нуналэз кузь тол понна ужа. Тани лудын кенешиськом механизаторъёсын. КСК-100 комбайнлэн кузёез Петр Азарьевич Князев пичиысен гуртын ужа, 18 арескысен со техникаен эшъяськиз. "Беларусе" но пуксе, тулыс валэс юос кизиз. Арам но векчи юдэм клевер турынэз Т-150 тракторен силос гуэ нуллэ Николай Робертович Волков. Эшъёслэн мылкыдзы капчи, таиз но 25 ар техникаен ужа ни. Уробоез туж ӝог тырме турынэн. Звено смена ӵоже 300-400 тонна вож сиён дася но куинь нуналскын 1000 тоннаем силос гуэз пытса. Туж умой со, усто сиён пӧрме, ваньмыз наукалэн куремезъя быдэсъяське. Кӧльы лудын уж пӧзе. Татын ик КСК-100 комбайнъёсын чырткем ужало Владимир Митрофанович Корепанов но Геннадий Юрьевич Мальшаков. Турынэз Т-150 тракторен нулло Валерий Андреевич Корепанов, ношВладимир Пименович Князев � КамАЗ-эн. Берлоез 1984- тӥ арын шофёр луиз, ГАЗ-51 автомашинаен но ветлӥз. Нош Владимир Митрофанович быдэс улонзэ техникаен герӟаз. 1962-тӥ арын, армиысь бертыса, Глазовысь механизацияя школаын трактористэ дышетскиз. Со дырысен техникаен ӧз люкиськылы. Туэ пенсие потон дырыз вуиз. Огъя вераса, со 36 ар механизаторын ужа ни. Тыршемез пусъемын Данъян грамотаосын но дипломъёсын. Пыбьялан озьы ик усто радъямын кӧс турын дасян. МТЗ-80 тракторъёсын чылкыт турнало Вячеслав Мухачев, Жуйков но Ушаков Владимиръёс. Кӧс турынэз тракторен мажсало Юрий Князев но Александр Волков. Пресс-подборщикен чырткем тыршо Александр Салтыков но Владимир Волков. Тырон-ӝоктонын нокинэ уг ӝегаты Николай Золотарев. Кӧс турынэз нулло шофёръёс Александр Князев но Юрий Корепанов. Сое кеносэ стогомётэн тыре Николай Золотарев, нош машинаосты киын ӝокто Леонид Князев, Николай Селухов но Константин Князев. Нокин секыт шуыса уг ӝожтӥськы. Турын дасясьёс кык сменаен ужало. Нырысетӥез лудэ вуэ 4 часын ӵукна, кыкетӥез ужа 13 часысен ӝытазе 10 часозь. Кооперативлэн туэлы малпанъёсыз бадӟымесь. Соос чаклало 1155 тонна турын, 5500 тонна силос но мукет пудо сиён дасяны. Туннэ ужъёсынызы тодматскыса, юн оскон кылдэ: пыбьяос ӟеч малпанъёссэс одно ик быдэстозы. Соослэн уго ваньмыз радызъя мынэ. Али 200 скаллы гидзэс ӟеч-ӟеч тупатъяло. Гуртъёсын нимаз лэсьтӥськон мынэ. Отын но татын чебересь коркаос пуксё, гуртъёс выльдӥсько. Пыбьяослэн туж чебер, вӧл-вӧл столовойзы, огдыре сю мурт сиськыны быгатэ. Пӧрасьёс пудо сиён дасясьёсты нуналаз куинь пол сюдо. Ужасьёслы пӧрамзы кельше. Хозяйство сӥль, йӧл но мукет сиён сётэ. Пӧрасьёслэсь ужзэс валаса радъя Светлана Волкова. Со татын 1972-тӥ арысен ужа ни. Ческыт сиён пӧрало Римма Никитина но Татьяна Ушакова. Нош кӧт ке тыр, мылкыд но умой. Геннадий РОМАНОВ. ? Пудо сиён дасяло. ? КСК-100-лэн кузёез ? КамАЗ-ысь водитель Владимир Князев. Туспуктэмъёсыз Владимир Камашевлэн. Арня ӵоже - дуннеын странаын шаерын Ортчиз пӧсьтолэзьлэн нырысетӥ арняез. Таиз арняе дуннелэн историяз пыртымон бадӟымесь учыръёс ӧй вал кадь. Северной Ирландиын гинэ шат. Татын жугиськон мынэ протестантъёс но католикъёс куспын. Шор дауръёсысен кутскыса, соос куспын нюръяськон, дыры-дырын дугдылыса, ялан пуромылэ. Таяз учыре протестант бандитъёслэсь мукет религилы пумит урмемзэс дугдытон понна, Северной Ирландие Британиысь солдатъёслэн отрядъёссы но пыртэмын вал. Дуннеез паймытэ инкуазь. Грециын витьымтэ шорысь 48-50 градус пӧсь луиз. 500 пала адями больницае нуэмын. Нош Россиын мынэ мукет "жугиськон": Кун Дума но Федерацияя Кенеш вискын. Кылем арняе сенаторъёс умойтэмен лыдъязы В. Путинлэсь Федерацияя Кенешез выль амалэн кылдытон сярысь законзэ. Президентлэн законэз ӧз ортчы. Таяз арняе кылдытэмын огкылэ вуонъя комиссия. Демутатъёс сенаторъёслэсь законлы пумит луэмзэс (ветоез) вормыны ик тыршозы. Та ужпум выльысь эскеремын луоз 19 июле. Лыдӟисьёслы тодэ вайытон понна валэктом на: В. Путинлэн законэзъя Федерацияя Кенешез учкемын кылдытыны отын ялан ужась адямиослэсь. Нош та дырозь Федерацияя Кенеш ужа вал котькуд улосысь лыктэм быдэн кык адямиослэсь (властьлэн законъёс кутӥсь но законъёсты быдэсъясь ёзъёсысь кивалтӥсьёслэсь). Россия - бадӟым страна. Солэн улосъёсаз ялан кыӵе ке но шудтэм учыръёс луыло. Жаляса верано, таяз арняе но кӧня ке адями бырыны, сӧсырмыны, кышкыт висьыны шедизы. Челябинскын ватӥзы Чечняын бырем милиционеръёсты. Татысь Чечняын 22 милиционер быриз. Омскын, бензинэн цистернаос пуштэмен, трос адями сӧсырмиз, Магаданын адямиосыз сопал дуннее туберкулёз нуэ. Президентлэн указэзъя Кун орденъёсын пусъемын вань адями, кин пыриськиз Чернобыльысь АЭС-ын пуштэм бервылэз утялтонэ. Удмуртиын соос кык сюрс пала. Наградаос басьтӥзы нырысьёсыз 21 мурт. Асьме шаерын июльлэн кутсконаз куазь сокем пӧсь ӧй ке но вал, шӧдӥськиз политикаын температуралэн ӝутскемез. Со герӟаськемын Удмуртилы президент быръёнъёс мытэктэмен. 3-тӥ июле Правительстволэн Тӧроез Н. Ганза министерствоослэн но ведомствоослэн кивалтӥсьёссылы ивортӥз, со президентлэн постэз понна нюръяськонэ пыриськонэ мылкыдзэ арня ортчыса гинэ вералоз шуыса. Но Н. Ганза Правительстволэн адямиосызлы нимысьтыз тодаз вайытӥз, соослы ужан вакытэ быръён ужъёсын вырыны уг яра шуыса. Т. Банникова. Вормонтэм "песьтэраз" книгаос тыраз Лыдъяны но уд быгаты ни, кӧня книгаез потӥз калык кылбурчилэн Олег Поскребышевлэн. Тани туэ гинэ со кык пӧртэм кылбур сборниксэ кузьмаз лыдӟисьёсызлы. Нырысез нимаське "Чтоб лился к свету свет". 608 бам тыр кылбуръёсыз люкамын татчы, поттэын 3000 экземпляр тражен, "Отечество" огазеяськонлэн коньдонэз чотын. Та книгаен тодматскон вал шаерысьтымы Национальной библиотекаын. Трос мурт малпанъёссэ вераз О.Поскребышевлэн поэзиез пумысен, татын чузъяськизы солэн кылбуръёсыз но. Та нуналъёсы Олег Алексеевичлэн нош ик выль кылбур бичетэз вуоз лыдӟисьёс кие. Со нимаське "Круг жизни над полями". Таиз 480 бамен, сюрс экземплярен потӥз. Таяз книгаяз люкамын 60-тӥ�70-тӥ аръёсы гожъям кылбуръёс, но соос шоры автор выль, туала синмын учкиз на. Гожъямъёссэ висъяз вить люкетлы, котькудаз ик адӟиське кылбурчилэн дунне шоры аспӧртэм учконэз, шаерзэ юн гажамез, калыксэ яратэмез. Сборниклы азькыл гожтӥз Вячеслав Захаров, Глазов пединститутысь дышетӥсь. Редакторез (соизлэн но, таизлэн но книгалэн) Наталья Русанова. Суредъёсын чебермаз Василий Мустаев. Коньдонэн юрттӥз "Удмуртия" общественно-политической огазеяськон. "Росинка", "Застолица", "Вдали от больших городов", "Песня колосьев", "Как черный хлеб", "Страда", "Жизнью всё было" но мукет книгаосыз сямен ик, таосыз но возьмато авторлэсь тубатысь тубатэ ӝутскемзэ, зэмос калык кылбурчи нимзэ вылӥын воземзэ. Таӵе бадӟым "песьтэреныз" Олег Алексеевич Поскербышев нош ик калык пӧлын. Солэн ӟырдыт куараез котькуд адямилэсь сюлэмзэ вырӟытыны быгатэ. Лыдӟисьёсыныз ӵош ми но, редакциын ужасьёс, ӟечкыласьком сое та дано юбилееныз. Кылбурчилы � сяьскаос Толон республикаысьтымы Кун Кенеш Удмуртиысь калык кылбурчиез, Удмурт Республикалэсь дано гражданинзэ Олег Алексеевич Поскребышевез ас дораз сӥлы кариз. Залэ люкаськизы пӧртэм общественной но творческой огазеяськонъёслэн кивалтӥсьёссы, культура но мукет удысъёсын ужасьёс, кылбурчилэсь творчествозэ гажасьёс. Кун Кенешлэн Тӧроез Алесандр Волков ӟечкылан кылын вазискыса вераз: кылбурчи понна солэн юбилеезлы кузьым луэ берло книгаоссэ поттыны юрттэммы. Олег Поскребышев � Россиысь одӥгез бадӟым поэт. Со кадь кылбурчиос быгато улонмес чылкытгес, гытгес карыны, таӵе адямиос али, та вакытэ тужгес но кулэ. Музыковед, крезьгурчи Евгения Копысова дунъет сётӥз кырӟанэ куриськись кылбуръёсызлы. "Удмуртия, жаркой кровинкой ты в сердце России горишь", � таӵе чуръёс, шуиз со, соку ик сюлэме пыро, кырӟанлы пӧрмо. Олег Алексеевич ӟуч кылын ке но гожъяське, сое будэтӥз удмурт музъем, соин ик кылбуръёсаз но, веросъёсаз но шӧдӥське удмурт калыклы матын луэмез, солэн улонэныз шокамез, солэсь сямъёссэ валаса гожъямез. Калык кылбурчилы шулдыр сузъетсэ сӥзиз "Эктон корка". Со сяна но вал трос ӟечкыланъёс, сяськаос, кузьымъёс. Т.ПЕТРОВА. ??Удмуртиысь калык кылбурчи Олег Поскребышев лыдӟисьёсыз пӧлын. АРХИВЫСЬ ДОКУМЕНТЪЁСЪЯ Удмуртия ХХ дауре 1924-тӥ ар Ар кутскиз бадӟым куректонэн. 21-тӥ январе улонысь кошкиз В.И.Ленин � коммунизме валтӥсь партия но Совето кун кылдытӥсь. Быдэс странаын сямен, Удмуртиын но та кайгырон нуналъёсы митингъёс ортчылӥзы. 23-тӥ январе В.И.Ленинэн люкиськыны Москвае Удмуртиысь делегация кошкиз. Отчы быръемын вал Ижысь заводъёсын ужасьёс но Завьялово волостьысь крестьянъёс. Нош удмурт шаерын ортчыло конференциос, азьланяз выль улон сярысь кенешонъёс. Агитация ужын бадӟым инты висъямын вал "Ленин арнялы". Вань та ужрадъёс чакламын ужазинлыкез ӝутыны. Азьмынӥсь ужасьёслэсь нимъёссэс печатлало "Ижевская правда" но "Гудыри" газетъёс, предприятиос соосты Горд пулъёс вылэ ошыло. Партия но профсоюз кивалтэм улсын цехъёсын "устоез мастер" ним понна конкурсъёс радъяло. Азьмынӥсьёсты дано нимъёсын пусйыло, коньдон премиос сётъяло. 1924-тӥ арын Ижысь рабочийёс пӧлын 300-лэсь уноез "Ужысь герой" ним басьтэ. Гуртын батракъёс но куанер улӥсьёс пӧлын валэктон уж пумен паськытаз. Выль власть кулакъёсты шымыртыны, сюрес урдсы палэнтыны тыршиз, 1923-тӥ арысен басьтӥсько Ленинэн пусъем кооперацияя планэз быдэстон борды. Гуртъёсын кылдыто тодон-валанэз будэтонъя нимысьтыз курсъёс, ортчыло крестьян конференциос. 1924-тӥ ар ӵоже гинэ кооперативъёслэн лыдзы Удмуртиын 3 поллы йылӥз. Тужгес бадӟымъёсыз пӧлы пыро вал "Пионер" но Ленин нимо артельёс, "Заря" но "Трактор" коммунаос. Та сютэм аръёсы секыт йӧтӥз дышетон удыслы но. Правительство трос тыршиз, сюлмаськиз, школаос медаз пытсаське шуыса. Озьы ке но, 1923-тӥ арозь соослэн лыдзы ялан кулэсме. 1924-тӥ аре гинэ йылыны ӧдъяз. Та дыре Ижын ог 30 пала школа лыдъяськиз, уноез соос огшоры улон коркаосы интыяськемын вал. Туала куронъёслы тупась школа пуктыны малпазы Ижысь Сенной рынок пала. Казна коньдон тырмымтэен кылдытӥзы нимысьтыз фонд. Отчы бичазы городын улӥсьёслэсь коньдонзэс. 18-тӥ июне лэсьтӥськон интыын ортчиз митинг. Школа фундаментлэн котькуд сэрегаз горд кизили понӥзы. Соя бератаз школаез но "горд" шуыса нимазы. 1924-тӥ арысен кӧня ке умояны кутске эм юрттэт сётон. Областьын ужа ни 19 больница, 20 аптека. Уногес луо врачъёс, висисьёслы юрттӥсь шор ёзо ужасьёс. 1923-тӥ арын усьтӥськиз медсестараосты дасясь школа, кӧня ке улыса сое медучилищелы пӧрмытӥзы. Азьланьтӥськиз областьлэсь люкетъёссэ радъян, соослэсь быдӟалазэс, котыр гожъёссэс пусъён. Вылтӥз учкыса, городъёс но завод посёлокъёс огшоры гуртъёслы укшазы: пеймытэсь ульчаос, урод сюресъёс, озьы ик карнанэн ву нуллӥсьёс. Ижын но Глазкарын куиньмос люкетаз гинэ электротыл кыскемын вал. 20-тӥ аръёслэн шораз Ижын улон интыя лэчыт ужпум кылдӥз. Революцилэсь азьло рабочийёслы висъям юртъёс уродмизы, выльёссэ пуктыны кужым ӧз окмы. Луэмезъя калык одӥг этажо пу коркаос ӵупылӥз. Озьы ке но, калленэн бадӟымесь юртъёс лэсьтонъя кооперативъёс кылдо. Кемалы висъям ссудаос чотын юрттэ государство но. Калыклэн табере азьланезлы осконэз юнма. Н.КРАСИЛЬНИКОВА, Удмурт Республикаысь Кун архивын ужась. ? Таӵе юртэ интыяськемын вал "Гудыри" газетлэн редакциез. Футбол Вормонэн! Кылемаз кӧс нуналэ Ижысь "Газовик" пумиськылӥз. Новотроицкын "Ностаен" но кузёосты 1:0 лыдын вормиз. Гол пыртӥз одӥгез егитэз футболист Эдуард Кобозев. Озьы ке но, "Газовик" ньылетӥ интые ик кыле. "Газовик" интыын мынӥсь Казаньысь "Рубин" уго ас дораз вормиз Саратовысь "Соколэз". Берпуметӥез туэ нырысьсэ келяз ай. Таин валче амалтэк тодэ лыктэ ньыль ар талэсь азьло "Газовиклэн" вылӥ лигае "йыгаськемез". Соку командамы ӟечгес шудӥз ас дораз, быдэс чемпионатын 4 очкозэ гинэ ыштӥз. Туэ турнирлэн ӝыны люкетэз но ӧз ортчы на, дораз командамы 5 очкозэ келяз. Со понна ӧжытгес ыштэ очкозэ куноын. Туэ палэнын со куинь пумиськонзэ вормиз ни. Туннэ "Газовик" шудэ Тольяттиын "Ладаен". М. Кузьмин. Николай Никифоров Йӧӟектэм шу каросъёс Верос Куазь ӵажгес кариськиз ни: ӝоген пыдул но юг-тӧдьы шобырен валиськоз. Писпуосын кӧня ке куаръёс возисько на. Бичамын ни шупу но палэзьпу емышъёс. Вылӥе, ки сузьымтэ вайёсы гинэ кылемын горд тылсиосын ворекъясь ӟускиос-каросъёс. Соосын тол кезьыт нуналъёсы кунояськозы кайсыос, шушыос... Гурт шорын улӥсь Бучы Катьырналэн сад-бакчаез пала учки но, воксё паймытски. Лабрес шупу вайёсысьтыз емышъёсыз чылкак исамтэ на. Бырдамын, йӧӟектэмын ни шу каросъёс. Мылпотытэк пиштӥсь шунды тылсиос улын ӵыж-горд тылсиосын кисьтаськыло соос. Ӵапак ошмес ву вайыса бертӥсь Бучы Катьырна апаез пумитасько. Куке но кыллы шаплы, серем пыр вераськыны яратӥсь кышномуртлэн ымнырыз ик мӧзмылэс тусо адскиз. Чиль-сьӧд сутэр синъёсаз но уг тылсиясько шумпотон тылсиос, кышет улысь мычиськем йырсиосыз но азвесь гӧрен сураськемын. - Кыӵе улон-вылон, Катьырна апай? Кыӵе тазалыкед? - ӟечбуръяськыны дыртӥсько мон. - Каллен-каллен шокасько ай, Геня, - лулске со карнанзэ ог пельпумысьтыз мукетаз вошъянъяз. - Куное-а бертӥд? - Дор палъёслэсь сюлэмы мӧзмиз тани, Катьырна апай. - Озьы, озьы. Шур дурамы вордскем уӵыпиос гинэ но тулысъёсы выльысь ас гуръёссэс чирдыны берытскыло. Со но та сярысь вераськыса сылэммы бере, киыным сад-бакчаез пала шонтыса юасько: - Али но шуостэ ӧд окты на шат? Укыр удалтэмын ук. Шӧдытэк ик кылёд, бурдоос кокчалозы. Гуртоелэн тусбуез ик воштӥськиз кадь. Кожалод, мон солы олокыӵе урод кыл вераны шедьтӥ. Яке, арлыдзэ вунэтыса, возьытлык юанме сётӥ. - Юраелэн мерттэм емышо писпуэз со, Геня, - ӝожмыт вазиз кышномурт. - Ог аре но бичаме-октэме ӧвӧл. Бурдоос мед кокчалозы но быдэс ёросэ выль уд сётӥсь кидысъёс мед пазялозы, вӧлмытозы. Эх, кыӵе ӧпкели мон кышномуртлы кулэтэм юан сётэмысьтым. Монэ но валаны луэ: тодӥ шат Юралэн мерттэм писпуэз шуыса? Нош ма каром на? Ым четлыкысь турак лобӟем кыл- бурдоез выльысь уд пытса. *** Бучы Юралэн службаысь куспетӥ берытскемез быдэс гурт калыклы йыртӥян ватсаз. Трос вал вераськонъёс, супыльтонъёс, тунаськонъёс... Нош егит пи юасьёслы вакчияк валэктылӥз: "Тазалыке уродмемысь комиссовать каризы". Мон кадь "пулёсиръёслы" пальпотыса вазёз вал: "Военной секрет!" Бератаз солэсь тыро-пыдо юалляськись, выжыятӥсь ӧз шедьылы ни. Егит пи "Беларусь" тракторен ужаны кутскемен валче, службаысь куспетӥ берытскемез сярысь воксё вунэтӥз, кожалод. Ма, Юра сыӵе вераськон ӝутыны муг но ӧз кылдытъя кадь. Тыршыса ужамен валче ик усто арганчи, туслы чебер, кыллы шаплы егит пи вал. Таза мугоро, пельпумъёсыз паськытэсь. Сьӧд йырсиоссэ ӵемысь Пушкинлэн бабляосыныз ӵошатъязы. Чеберлык ватсаллязы на гордпыръем бакенбардъёсыз но пуштырес мыйыкез. Синъёсыз, анаезлэн выллем туривесь кадь учкылӥзы. Ӝыт шудон пӧлын арганчи кузё егитъёсты жадьытозязы шулдыръяськытылӥз. Ки, чиньы жадемезлы ӝожтӥськон сямыз ӧй вал. Нош эктон круге Серай Оля потыку, солэн киысьтыз арганэз олокыӵе усто, чингыли куараен крезьгураны кутскылӥз. Мукет нылъёс со понна арганчилы ӧз йыркуръяськылэ. Валазы: кызьы-о ас гажанэз понна тыршытэк, мукетъёс пӧлысь висъятэк, чебер нылмуртлы шумпотон кузьматэк?! Школаын дышетскыкузы ик огъя кыл шедьтӥзы вал соос Ольгаен. Кылъёссы, мылкыдзы тупаз, лэся. Ог-огзэс гажан бератаз яратонлы пӧрмытскиз. Гуртооссы но валатскизы: огпаръёс, ведраезъя ик борӟетэз. Егитъёслэн анай-атаёссы, ӵыжы-выжыоссы сюан сярысь кенеш ӝутэмзылы, но нокин ӧз паймытскылы. Нош курам бере, кык арня ортчыса, йырсиосты пежыртытӥсь ивор вӧлмиз: Бучы Юра, пе, шур дурысь тополь вае ошиськем. Быдэс гурт калык келяз берпуметӥ сюресаз егит пиез. Туж чигиськыса, калыклэсь кӧбератэк бӧрдӥз Серай Оля. Бучы Катьырналэн синдуръёсыз кӧсамын ни вал: кык нунал но уй ӵоже уго ӧз кошкылы пиезлэн коросэз вӧзысь. Маке шыпыртыса, киоссэ маялляса, ымнырзэ, кымыссэ чупаса пукиз. Бучы Юралэн югыт дуннелэсь люкиськемез эшшо одӥг йыртӥян ватсаз. Ма, со, эсьмаса, одӥг кыл гинэ но гожтыса кельтымтэ. Берло ни, кык ар ортчыса, Серай Оля пыр гинэ со но та кылӥськиз ик. Ма, Катьырна апай но тодэ, дыр, мугзэ. Нош кызьы со сярысь юалод? Кин-о дӥсьтоз висись анай сюлэме сылал пызьнаны?! Вордскем нуналзэ пусйыны эшъёссэ ӧз ӧтча Юра. Анаезлэн юанэзлы вакчияк гинэ валэктӥз: - Трос сиён-юон эн дася, анай. Куинь муртлы тырмымон ке луиз - йырвылтӥз ни. - Оля лыктэ-а? - пальпотыса пиез шоры учкиз Катьырна. - Со, - ӧз танӥськы пиез. - Ӵошен ваньмылы умой луоз. Вераськыны, кенешыны люкетӥсьёс уз луэ. Егитъёс вуыку, Бучы Катьырналэн ӝӧк вылэз дась ни вал. Сиыса-юыса, олома сярысь но вераськыса пукемзы бере, Юра ӵемгес суйпосысьтыз часэз шоры учкылыны кутскиз. Анаез сактӥз: ураме дырто. - Пие, кут ай аргандэ. Эсьмаса, вордскем нуналыд понна одӥг ке но кырӟан нёжъялом. Юра ӧз пумитъяськы. Тодмо гуръя, ачиз кырӟан мытӥз. Вань эшъёсы шудон пӧлын, Мон гинэ огнам. Малы меда уд юаське, Мар мынам сюлмам. Юра гажанэзлы синмыныз кыньыртӥз. Валатскиз анаез но. Табере куинь кузя нёжъяло ни соос: Ой, тӥ, чебер нылъёс, Малы сыӵеесь? Жаляны уд валаське Тӥ егит пиез... - Удмурт кырӟанъёс пӧлысь таиз тужгес лул-мылкыдме бугыртэ, - арганэз вӧзаз поныса, чаркаосы горд аракы лэзьянъяз вазиз Юра. Кӧня ке улыса, егитъёс потӥзы ураме. Лабрес бадьпуос вӧзы интыяськизы. - Сюанмы матэктэмъя, маке кунэрес кариськиськод кадь, - вераськон мытӥз Оля. - Адями синъёслэсь ватскон инты утчасько мон, Ольга. - Огшап чус пукемез бере, кытчы ке кыдёке учкыса лулскиз Юра. - Нокин утчаса медаз шедьты, нокыӵе юан медаз сёты. - Ма-ось олома лабыртӥськод? Кудӟид ке шат? - Мон улонэн кузьмам сьӧд адӟонлэсь кудӟи ни. Нош та дырозь нокинлы шараяме ӧвӧл. Ольга пумитаз ӧз вазьы. Шӧдӥз, Юра сюлэм висёнъёссэ мадьыны малпа. - Службаын дыръям, милемды Казаньысь Рашид Габдрахмановен валче уин возьмаськыны ыстӥз вал. 7-тӥ объект нималлязы сое. Оло кыӵе ке склад, оло мукет - вераны уг тодӥськы. Нош уин отысь маке но киськыны, сӧриськыны шедьтэм, лэся. Солэн зыныныз ми кыкмы ик усыкмыса усиськеммы. Ярам ай, разводящий сержант дыраз синйылтыны вутскем. Госпитале вуттӥллям. - Нош ма луэм отын, Юра? Ӧд юалляське шат? - Кин-о рядовой солдатлы шонерзэ вералоз? - сигаретсэ сэрпалтӥз Юра. - Ӧм, ӧм тодэ. Эшеным гинэ малпаським. Кыӵе ке химической оружие вал, дыр, отын. Я радиациялэн адскисьтэм тылсиосыз ӵушказы милемды. - Ярам ай улэп кылиллямды. - Э-э, - киыныз шонтӥз егит пи. - Мар ужасько мон улэп кылеменым? Эсьма, соку ик мед чоньдом вылэм, - лекак вазиз со. - Анае куректысал но, дыр, ортчемъя буйгатскысал. - Воксё мыдланес вераськиськод ук. Ма, кин-о аслыз эзель куроз? Тьфу, шуыса сялӟы. - Казаньысь эшеным гожтэт пыр кусып возисько вал. Таяз арняе вынызлэсь гожтэтсэ басьтӥ. Ассэ ачиз быдтэм, мискинь лул! Толэзь югытын егит пилэн синъёсыз ик чилектӥзы. Ки мышкыныз шӧдонтэм улсын гинэ йӧтскиз со синдуръёсаз. Чаркае аракы лэзиз но шара вазиз: - Лулыд рае мед интыяськоз, Рашид. - Нош мар-о сыӵе мыдланес дауртэм эшед? - вӧзаз кариськыса ик пуксиз Серай Оля. - Мугез одӥг гинэ, муспотонэ. Ми угось со ӝытысен пиосмуртлэн сульдэрезлы гинэ пӧрмытским. Тон азьын возьдаськытэк верасько. Соин ик татчы ваи. Сыӵе воргоронлы ма улэм на? Дунне вылэ ас нылпиосыд ноку уз вордӥське, нокин но тон шоры атай шуыса уз вазиськы. Зэм, малы-о югыт дуннеез арамтонэз на? Шонер лэсьтэм Рашид. - Сокем эн чигиськы, Юра, - йырсизэ маялтӥз гажанэз. - Туала дыре олокыӵе усто эмчиос вань. Быгатозы, эмъялозы. Ӟечлы оскондэ гинэ эн ышты. - Оло мон больницаосы, госпитальёсы ӧй ветлы кожаськод? Иже но, Москвае но вуылӥ. Пайдаез ӧвӧл. - Э-э, кунгож сьӧрын но эмъясько адямиос, - буйгатыны выре на нылмурт. - Бен, вань на мынам одӥг оскон сие. Туж векчи но туж ненег со. - Кыӵе? - Туннэ ӝыт тынэсьтыд гольык мугордэ мусояса утчаме потэ. Пӧрмиз ке, мон шудолэсь но шудо адями карисько. Коть ӵуказе ик сюанмес шудыны дась. Тон эн курда, Оленька, асьмеос ӵошен улоно адямиос. Секыто ке кариськид, тон мон понна Инмар интыын луод. Серай Оля, таӵе кылъёсты кылыса, йырсазьзэ ик ыштӥз кадь. Пумитъяськыны гинэ но уг йӧндыры. Нош чырткем киос вылысьтыз дӥськутсэ куяло ни, пумен гольык мугорзэ маялляло. Кема мусояз Юра гажанэзлэсь мугорзэ. Чупамтэ, вешамтэ, маяллямтэ интыоссэ ик ӧз кельты кадь. Олялэсь ныл данзэ гинэ таланы ӧз быгаты. Гуртэ вуытозь, пал кыл но ӧз поттылэ соос. Мотоциклэз Серайёслэн капка выжыязы дугдытыса нылмуртлы шыпыртӥз. - Мӧзмыкуд, монэ тодад уськытыкуд, бакчаысьтымы шупу шоры учкылы. Шудэд медло, Оля. ... Бучы Катьырналэн бакчаяз шупудъёс йӧӟектэм емышъёсызлы чидатэк уллане някырскемын. Шунды тылсиос улын горд инӟыосын ворекъяло соос. Шумпотыса ӟабыльто отын шушыос, кайсыос. Куноясько. Бератаз шупу тысьёслэсь трос выль удъёс ӝутскозы. Котькуд юртэ РЕН-ТВ Глазовысь Левобережье ульчаын улӥсьёслы удалтӥз, шуыны луоз. Кабель пыр телевидение огдыре 7-8 каналъёсты сётыны быгатэ. Нош мукет ульчаосын но ёросын улӥсьёс солы вожъяськоно луо. Но та нуналъёсы соос доры но шумпотон вуоз. Ӝоген соос учкыны быгатозы РЕН-ТВ программаез. Куамын дециметръем каналын солэсь тулкымъёссэ вӧлмытоз "Гарант" огазеяськонлэн "Глазов" телерадиокомпаниез. Али ужъёс мыно ни сое лэзьыны дасянъя. Телетулкымъёс вуозы 30 иськемозь. Куазь умой дыръя передачаез учкозы ёросысь уноез улӥсьёс. Н. СЕРГЕЕВ. Ваче ки кутскыса Мон ӝыны даур ӵоже Ижевскысь андан пӧзьтон заводын ужай. Али сое "Ижсталь" огазеяськон шуо. Ас синмыным адӟи, кызьы улӥзы но будӥзы рабочийёс. Киме сюлэм вылам поныса вераме потэ: Быдӟым Отечественной война ортчем бере кык арскын Советской Союзлэн кужмыз тырмиз нянез калыклы карточкатэк вузаны. Вань республикаосысь но областьёсысь пӧртэм калык ог-огзылы юрттыса ужамен, вакчи дыр куспын ӝутӥз куашкатэм городъёсыз но предприятиосыз. Граждан ож бере Удмуртиын но паськыт сюрес усьтӥськиз индустриализацилы. Кызетӥ аръёсы асьме дорын поттыны кутскемын вал нырысетӥосыз мотоциклъёс, станокъёс, инструментъёс но мукет арбериос. Удмуртия вакчи дыр куспын луиз индустриально- аграрной республика. 1940-тӥ арын промышленностьлэн огъя продукциез, 1913-тӥ арын сярысь, будӥз 21 пол, нош машиностроениын но металлообработкаын � 28 пол. 1926-тӥ арын республикаысь вань калык пӧлын рабочийёслэн но служащийёслэн лыдзы 10,5 процент вал ке, 1939-тӥ арын со 42,3 процентозь вуиз ни. Нош война аръёсы рабочий класс фронтлы келяз пыӵал тӥрлык, дӥськут, сиён-юон. Уноез рабочийёс оже мынӥза татын кылдэм подразделениосын. Завод трос саклык висъяз наукаез но техникаез азинтонлы. Жаляса верано луэ, рыноке выжемен тросэз йырчукин берытскиз. Машинаос но станокъёс дуноямен сое басьтӥсьёслэн лыдзы кулэсмиз. Озьы ке но, завод нуналмысь пыд йылаз султэ. Кылдо выль ужан интыос, юнма экономика, будэ рабочийёслэн уждунзы. В.ЧЕРНОВ. Кез н Дэбес возьмато Ижевскысь Сивков урамысь Кибашлыослэн юртсы толэзьлы быдэ сямен аслэсьтыз выставкаоссэ-адӟытонъёссэ вошъя. Таяз толэзе отын возьматӥсько Кез но Дэбес ёросысь усточиослэн киужъёссы. Пыриды ке, адӟыны быгатоды куиськем но кутам, пужъятскем но чильпам, пуэз вӧлыса лэсьтэм но мукет арбериосты. Выставка толэзь пумозь ужалоз. Т. Захарова. "Вуж Мултан" - чуваш кылын Алигес басьтӥ бандероль. Шубашкарысь. Роза Николаевна Петровалэсь (Ахтариева). Та ним тросэзлы удмурт лыдӟисьёслы тодмо, дыр. Удмурт культуралэн Чувашиын ас адямиез шуыса нимаськом ми сое. Чуваш радио но телевидение, газетъёс но журналъёс пыр со трос ӟечсэ мадиз ини удмурт калык, литература но быэс культурамы сярысь. Удмурт писательёслэсь произведениоссэс ачиз но вордскем кылаз берыктыса поттылэ, музон чуваш писательёсыз но та удысэ кыске. Солэн кивалтэмез улсын кӧня ке ар талэсь азьло чуваш кылын потӥз удмурт литературалэн антологиез. Трос кужымзэ пононо луиз Роза Николаевна та книгаез поттон понна. Кун издательствозы берыктыса дасям рукописез поттыны ӧз басьтӥськы. Колхоз, завод кивалтӥсьёслэсь, узыр адямиослэсь коньдонзэс курыса ветлоно луиз. Но книга потӥз. Ар-кык талэсь азьло Роза Николаевна мыным ыстӥз выль берыктэмзэ - Куӟебай Гердлэсь веросъёсын книгазэ. Табере тани нош ик выль уж - удмурт литературалэн классикаысьтыз туж тодмо луэм произведение, Михаил Петровлэн "Вуж Мултан" романэз, чуваш кылын лыдӟись доры вуиз. Берыктӥз, трос аръёс ӵоже удмуртт калыклэн шумпотонъёсыныз но куректонъёсыныз шоказ-улӥз Роза Петрова. Текстысь кырӟан чуръёсты чуваш кылэ берыктэм Георгий Ирхи. Книгаез поттэм Чуваш кун издательство 1999-тӥ арын. Лыдӟись доры со алигес гинэ вуиз. Тодӥськомы, роман, удмурт кылын сяна, трос пол потылӥз ни ӟуч кылын - Ижевскын но, Москваын но. Бигер кылэ но со берыктэмын. Табере романысь мадись мурт но геройёсыз верасько ни чуваш кылын но. Михаил Петровлэн вордӥськемез дырысен туэ 95 ар тырме. Удмурт классиклэн юбилеезлы та книга - туж ӟеч кузьым. Василий Ванюшев. Италмас ӝужан дыре Крезьгурез Пантелей Кузнецовлэн Кылъёсыз Александр Белоноговлэн Арама но дуръёсын италмас ӝужан дыре Ӧз-а усьтӥськы мыным возьвыллэн вань чеберез? Ӧз-а воректы меда шаерлэн но шулдырез? Арама но дуръёсын италмас ӝужан дыре Ӧз-а лыкты вал мынам сяськаяськон дауре? Ӧй-а вала нырысьсэ улонам яратонэз? Арама но дуръёсын италмас ӝужан дыре Ӧз-а вордӥськы мынам мылкыдме ӧръясь гуре? Ӧз-а пуксьы ымнырам мӧзмонлэн сьӧд вужерез? Арама но дуръёсын италмас ӝужан дыре Ӧй-а шӧды лулыным лобыса кошкись дырез? Ӧз-а усьтӥськы соку улонлэн паськыт ӧрез? Вылезлы дасяськон кутске Республикаысьтымы Госкомспорт Юкаменскын ортчем гурт шудонъёслы йылпумъянъёс лэсьтӥз. Солэн кивалтӥсез Гарий Кремер пусйиз, та ужрад ӟеч радъямын вал шуыса. Умой лэсьтӥмы, шуиз со, туэ ӵошатсконъёслы ёросъёсысь судьяосты ӧтьыса но валтӥсь судья пуктыса, соин валче пӧртэм янгышъёсты но тупамтэосты капчигес вал палэнтыны. Шудонъёслэн огъя мынэмзы сярысь ивортӥз соослэн быдэсъясь директорзы Вячеслав Беляев. Мандатной комиссилэн ужамез сярысь вераз солэн кивалтӥсез Вячеслав Жалюк. Та кенешонэ ӧтемын вал ёросъёсысь спортъя комитетъёслэн кивалтсьёссы. Ӵошатсконъёслэн кызьы ортчемзы пумысен соос пӧртэм малпанъёссэс но комнадаоссылэсь мылкыд каронъёссэс веразы. Таӵе шудонъёсы, шуизы, тросгес мед шедёзы музъем бордын ужасьёс, ӧжытгес � служащийёс, студентъёс, городысь пропискаен адямиос. Азьпалан умойгес шутэтскыны луонлыкъёс кылдытоно спорт семьяос понна. Кӧня ке пыкылонъёс вал Юкаменск ёросысь культура удыслы, шуом, праздникез усьтыку, ӝегатсконъёс но мукет пумозяз вуттымтэ ужъёс син шоры йӧтылӥзы. Татын ик вераськон потӥз тол шудонъёслы дасяськон пумысен. "Удмурт дунне" газетлэн кубокез понна ӵошатсконъёс туэ 50-тӥзэ луозы ни. Соос ортчозы Якшур- Бодьяын, али отын дасяло, паськытато куасэн ортчоно сюресъёсыз, спортзалэз, ӝоген люкаськоз оргкомитет. Августлэн кыкетӥ кӧс нуналаз � Физкультурниклэн нуналыз. Та дырлы чакламын вылӥ азинсконъёс басьтэм спортсменъёсыз но гуртын спорт удысэз валтӥсьёсыз нимысьтыз данъяны. Т.НИКОЛАЕВА. Кыедэд "зарниен" берытскоз Зэмзэ но нянь будэтӥсьёс кыедэз зарниен ӵошатылӥзы. Азьдыл аръёсы со гидъёс котырын гурезьёсын люкаськыса уг кылььы вал. Гужем но, толалтэ но сое бусыосы ворттӥзы. Нош берло вакытэ кыедэз поттон ачиз зарни дунлы ӵошаз. Соин ик унояз хозяйствоосын бусыослэсь удалтонлыксэс будэтон сярысь сюлмаськонэз аналтӥзы. Но кызьы шуо, кыӵе музъемдэ сюдод, сомында ик байлык басьтод. Сое уноез кивалтӥсьёс ӟеч валало. Та нуналъёсы "Кизнерагрохим" ТОО-лэн автомашинаосыз ёросысь эштосъёсын кыед потто. Та уж быдэстэмын ни "Югыт Бемыж", "Гигант", Тельман но Мичурин нимо хозяйствоосын. Туннэ нуналлы 11 сюрс тонналэсь кыед поттэмын. Азьланяз ужъёс мынозы "Васильево" но "Бемыжский" эштосъёсын. Н.БАЙТЕРЯКОВ. ? Уж пӧзе � "уралъёслы" маза ӧвӧл. Водитель Георгий Поташейв но кыед тырись Павел Киселев. В.Беломорскихлэн туспуктэмъёсыз. Министерство экономики Удмуртской Республики объявляет конкурс на централизованный закуп для лечебно-профлактических учреждений республики вычислительной техники. Справки по вопросам участия в конкурсе и приобретения конкурсной документации можно получить по тел. 25-00-22 или по адресу: г. Ижевск ул. Пушкинская 214, Дом Правительства, Министерство экономики УР. Комната 78. Со шырыт сюлэмо господин Чайковский Ӝог юрттэт сётонъя куинь машина кузьмазы Ижевсклы Кёльн немец городын улӥсьёс. Соослэсь усьтонъёссэс кузпалъёс Анти но Фолькер Дильёс сӥё-дано сётӥзы городлэн мэрезлы А. И. Салтыковлы. Ӵыжак выль машинаос висисьёс доры потыны али ик дась. Кыкез соос пӧлысь ужалозы Пичи пурга но Алнаш ёросъёсын. Куинетӥез - тужгес тузӥез - кылёз Ижевске. Реанимацияя юрттэт сётыны чаклам машина туала куронъёсъя бичамын. Солэн дуныз 325 сюрс манет луэ. (Бӧрысь та лыдпус 340 сюрсозь но вуиз - Э. К.) Диль кузпалъёс Россиысь городъёсын дасо арлэсь кема кусыпъёс возё ини. Берло кык арзэ ӵемгес вуыло Удмуртие. - Ми валам, Россия - со Москва гинэ ӧвӧл. Татын вань на Удмуртия, Ижевск, кытын синмаськымон адямиос уло - вера госпожа Диль. Анти Диль улонысьтыз бадӟым люкетсэ висъя вӧзысьтыз шуге-леке вуэмъёслы юрттонлы. Со Кёльнысь благотворительной фондлэн президентэз луэ. Фолькер Диль та городысь медициная клиникаен кивалтэ. - Кузьымез дасяз Кёльнысь калык. Марка вӧзы маркаен люказы соос машинаосты басьтон понна. Тужгес тау кариськом господин Чайковскийлы (Дильёс уг тодо: кыстӥсько-а господин Чайковскийлэн выжыосыз асьме музъем вылозь. Кин тодэ...). Солэн кузпалыз бурмыны луонтэм, секыт висе, Удмуртиын улӥсьёс кышноезлэсь курадӟонзэ ас вылаз медаз шӧдэ шуыса, госпдин Чайковский вань люкам коньдонзэ жильдӥз. Солэн ваньбурез ӵапак одӥг машиналы тырмиз - азьланьтэ веранзэ госпожа Диль. Диль кузпалъёс шаерамы ӝоген выльысь вуозы. Соос Ижысь медициная кун академиен кусыпъёссэс юнматыны чаклало. Э. Кумачева. Николай Ганза малпаське на Правительстволэн Тӧроез Н. Ганза ивортӥз вал президентэ кандидатэ луон сярысь мылкыдзэ арня ортчыса вералоз шуыса. Арня ортчиз. Но премьер министр нокыӵе малпанэ вуымтэ ай. Та ужпум мон понна туж секыт вылэм, шуиз со журналистъёслы, умой-умой малпаськыны дыр ӧз тырмы. Николай Ганза мукет кивалтӥсьёслэсь висъяське таӵе сямыныз: ас малпанъёссэ меӵак вераны быгатэ. Журналистъёсын таяз пумиськонын но со чималиен шудыса ӧз улы. Меӵак вераз, куд-ог эшъёс, пе, сое ӵекто А. Волковлэн кандидатураез понна дурбасьтыса ужаны. Соин ик таӵе малпан кылдэ: Н. Ганза со эшъёслэсь кылзӥськиз ке, аслэсьтыз кандидатуразэ президентлэн постэз понна нюръяськонэ уз потты. Луыны быгатоз таӵе учыр но. Шуом, Н. Ганза Правительстволэн Тӧроез луыса ик ужалоз, нош солэн вань министръёсыз быръён кампания дыръя отпускъёсы кошкозы я Вершинин, я Волков, я эшшо кин ке понна агитация нуон вылысь. Быгатоз-а соку Николай Алексеевич огназ кыльыса Правительство азьын сылӥсь ужъёсты быдэстыны? Быгато, ужаны тыршо, шуиз Н. Ганза. Т. Миронова. Удмурт Республикалэн "Удмурт Республикаын кудӟытӥсь юонъёсын розницае вузкаронлы лицензия понна дун басьтон сярысь" ЗАКОНЭЗ 1-тӥ ёзэт. Огъя валатонъёс Та закон юнматэ кудӟытӥсь юонъёсын розницае вузкаронлы лицензия понна дунлэсь быдӟалазэ но сое басьтон радлыкез, лицензия басьтыны куронэз (заявлениез) эскерем понна дун тыронэз. Кудӟытӥсь сиён-юон пӧлы пыро сыӵеосыз, кудъёсаз вань 1,5 процент этил спиртэз. Сыӵеен лыдъясько кудӟытӥсь юонъёс, аракы. Соослы одно ик лицензия сётӥське. 2-тӥ ёзэт. Дун тырисьёс Дун тырисьёсын лыдъясько юридической адямиос но нимаз ужбергатӥсьёс, кудъёсыз кудӟытӥсь юонъёсын розницае вузкаронлы лицензия сярысь курон гожтӥзы но со лицензиез тупатэм радлыкъя басьтӥзы. 3-тӥ ёзэт. Дунлэн быдӟалаез Лицензия понна дунлэн быдӟалаез � федеральной законэн тупатэм дас пичи уждун мында, нош лицензия басьтон сярысь куронэз эскерем понна � куинь пичи уждун мында. Тупатэм дун сыӵе ик кыле, дун тырисьлэн кӧня вузкарон интыез шоры учкытэк. 4-тӥ ёзэт. Дун тырон радлык Куронэз эскерем но лицензия понна дун тыриське куронэз сётэмлэсь азьло. Лицензиез мукетыныз воштыку, дунлэн быдӟалаез выльзэ басьтыны тупатэм мында ик. Нош лицензия воштӥське ке солэн кузёезлэн мугъёсызтэк, соку дун уг басьтӥськы. Ыштэмез интые выль лицензия понна дун басьтӥське та законлэн 3-тӥ ёзэтэныз тупатэм радлыкъя. Лицензия сётыны пумит луыку, со понна тырем дун берыктӥське, со пӧлысь куронэз эскерем понна чаклам дунэз куштыса. 5-тӥ ёзэт. Дун басьтон радлык Лицензия сётэм но куронэз эскерем понна тыронъёс мыно республикалэн бюджетаз. 6-тӥ ёзэт. Коньдон висъян. Лицензия сётъянэн герӟаськем ужрадъёслы коньдон висъяське та ужен вырись ёзъёсты возьыны республикалэн бюджетаз чаклам коньдон чотын. 7-тӥ ёзэт. Та законлэн кужыме пыремез. Та закон кужыме пыре сое печатлам нуналысен. Удмурт Республикаысь Кун Кенешлэн Тӧроез А.А.Волков. Ижевск город, 2000-тӥ арын 20-тӥ июне. � 197-ИИ. Быдӟым Вормонлы - 55 ар "Мон "Казмаска", кылӥськоды-а?" Ижевскын улӥсьёс тодо: Хохряки шайвылэ пырем бере ик асьме республикаысь тужгес тодмо азьвыл кивалтӥсьёслэсь шайгуоссэс адӟоно, син шоры сослэн бадӟымесь памятникъёссы йӧто. Берло аръёсы татчы ватыны инты шедиз кык дано аспалъёсмылы (землякъёсмылы) но - Советской Союзлэн Геройёсызлы Георгий Сергеевич Томиловскийлы но Никифор Савельевич Павловлы. Вунонтэм кылиз Никифор Павловез берпуметӥ сюрес вылаз келян нунал. 1995-тӥ арын пӧсьтолэзе шулдыр, шундыё но пӧсь нунал кемдӥз. Геройлэн пыралы кӧлон интыяз соин люкиськыны, ӵыжы-выжыосыз сяна, заводъёсын ӵош ужам уно эшъёсыз, ожысь но ужысь ветеранъёс, трос огшоры адямиос лыктӥзы. Война бере трос аръёс ӵоже рабочийёсын оградын тыршиз со, подвигъёсыныз ушъяськыса ӧз ветлы. Ачимъяськон сямзэ но нокин ӧз адӟылы, лякыт вал. Быдӟым ож сярысь мадьылӥз 73 номеро школаысь калык музейын, Геройёслэн слётъёсазы гинэ. Ми В. П. Поздеевен дышетӥсь-журналистэн ӵош 1995-тӥ арын апреле Павловъёслэн семьяязы вуылӥм вал, Геройлэн подвигъёсыз, улэмез сярысь трос тунсыкозэ тодӥм. Висёнъёс лябӟытӥллям ни вылэм Никифор Савельевичлэсь мугорзэ, операция бере тыосыз ӝыны сяна кельтэмын ӧй вал ни, пе. Кык толэзь ортчыса, со улонэныз пыраклы люкиськиз. ... Быдӟым ожмаськон азьын удмурт шаерысьтымы данакез пиос служить карыны шедьылӥзы шунды ӝужан пала. 1940-тӥ арын Дальний Востоке мынӥз Завьял ёросысь Вуж Казмаска гуртысь 19 аресъем Никифор Павлов но. Ожгарчилэн ужезлы сабырлы удмурт пи сюлмысь дышетскиз. Вань боецъёс сямен ик туж ӝог тревогая султылӥз, мишеньёс шоры шонер ыбылыны дышиз, командиръёслэсь ыстэм-косэмъёссэс шаплы быдэсъялляз. Сое связистэ пуктӥзы. Павловлэн частез шунды ӝужан палан кунгожъёсмес возьмаса кема гинэ улӥз, кунмы вылэ немецкой фашистъёс урдскем бере но. Шунды пуксён палан югдур туж уродмем бере, фашистъёс быдӟым Волга доры туж матэ вуизы вал ини - соку Дальний Востокысь 204-тӥ стрелковой дивизиез Волга дуре ӝогак вуттӥзы. 1942-тӥ арын пӧсь гужем вал со. Комдив воинъёслы тазьы вазиськиз: "Атай музъеммес утён понна, котькуддылы кышкасьтэм луоно, ожмаськыны быгатоно. Дасялэ асьтэды! "Сталинград вадьсы Волгалэн ярдураз уйлэн пумаз интыяськизы. Ӵуказеяз ӵукна, 9-тӥ августэ, дивизя нырысетӥ оже пыриз. Со 64-тӥ армилэн ударной группаяз шедиз. Полклэн штабысьтыз Павлов сержантлэн связья отделениезлы нырысетӥ батальонэн ӟеч кусып возьыны косэмын вал. "Зэмос связист луд кеч кадь бызьылыны, кенӟали кадь нюжтӥськылыны, косэмез ӝог валась, кышкасьтэм но йырсазё луыны куэ, ужзэ трос вераськытэк быдэсъясь н ӧжытак дипломат луоно, связьлэсь сӧриськем интызэ узвесь пуляос ултӥ но тупатъяны мед быгатоз. Бӧрысь удмурт пи связист сярысь, солэн Зарни Кизили орден басьтэмез бере тазьы гожъяз Г. Миронов. "Линия Никифора Павлова" очерказ. Сталинград бере Н. С. Павлов сержантлэн гадь вылаз "За боевые заслуги" медаль бырттӥзы. Канонада дыръя но связез тупатъяны ӝог бызьыса мыноно луэ вал. Отделениысьтыз тросэз боецъёс бырыны шедьылӥзы. Нош Павлов чакласькыса но шаплы ужалляз. Тушмон нуналлы быдэ атакае потылӥз. Лек ожмаськон пуромылӥз городысь ульчаосын, кварталъёсын тушмонэн ваче вуыса, киын но жугиськылоно луылӥз. Немецъёс урмем кионъёс кадь мерскизы. Никифор Савельевич вералляз Сталинградын ожмаськем бере, пе, быдэс толэзь ӵоже быремъёсты, вал шӧйёсты ватылоно луиз. Ыштонъёс туж трос вал. Отын 62-тӥ, 63-тӥ, 64-тӥ армиос ожмаськизы, нош Плешков майорлэн кивалтоно полказ кылиз на 17 мурт гинэ. Собере быдӟым ожмаськон Курск но Белгород городъёс котырын кутскиз. - Нырысь милемыз тушмон 5 иськеме берлань улляз, - тодаз вайылӥз Н. С. Павлов. - Связь нуналаз олокӧня пол сӧриськылӥз. Езъёсмес шедьтылыса фашистъёс тӥяллязы. 1943-тӥ арын сентябре 225-тӥ гвардейской стрелковой полк ожмаськыса Днепр доры, Кременчуглэн юго-восток палаз, вуиз. Тани гвардеецъёс Днепрлэн ярдураз дугдӥзы. Мур вулы туж матын сыло вал кенос кадь кык юртъёс. Связистъёс отчы интыяськизы. Порсков ефрейтор борддоре мелэн бадӟымесь букваосын таӵе кылъёс гожтӥз: "Даёшь Днепр!" Шур вамен выжыны кулэ ни. Связистъёслэн отделенизылэсь командирзэ Павлов сержантэз полклэн командирез доры ӧтё. Плешков майор азьын сыло ини комбат Блинов капитан но полкысь устоез Иванов сапёр. Таослы куиньназылы полк азе пуктэм ужпумез быдэсъяны кутсконо. Нош али сьӧразы кыӵе тӥрлык но кӧня басьтон сярысь кенешоно. - Та операциын тон, Павлов, аслад связеныд нырысетӥ интыын азьветлӥсь луод, - валэктэ майор, - Я, табере уж борды кутске. Уй вуыку, ярдуре полклэн командирез лыктӥз, связистъёслэсь дасям пыжзэс котыр ласянь учкыса эскериз: - Быгатоды-а, пиос, сопал ярдуре потыны? Одно быгатоно. Ми чакласа-учкыса улом, ку тушмон шоры ыбылыны луоз. Быгатом! - куиньназы ик вазизы. Павлов езлэсь пумзэ азьло ик дасям юбо борды думиз, пыже проводэн катушкаос тыриз, аппаратсэ пельпум вылаз ӝутӥз. Пыж вырӟиз. Блинов шаплы но шыпыт полысаз, вулэн чакыльтэмез медаз кылӥськы шуыса тыршиз. Иванов провод борды кирпич керттылӥз, Павлов соосты каньылэн гинэ, чакласькыса шуныт ву пыдсы лэзьылӥз. Кӧня ке улыса, немецъёс кылӥзы, лэся, полысам куараез. Меӵ ярдурысь ыбылӥськемзы доразы вуиз - пуляос пыжлэн урдсаз мертчылӥзы но сое пась карылӥзы. Пыж каньылля вуэ выйыны ӧдъяз. Кышканы дыр ӧй вал. Павлов телефон аппаратсэ йыр йылаз ӝутӥз, мукет кияз катушкаез кутӥз но вуэ вамыштӥз. Сокем мур вылымтэ ни - чыртыозяз гинэ. Бызись ву пыд йылысь погыртыны турттэ, тани-тани усёз. Озьы ке но, юрттэт курыса ӧз кесяськы, чалмытэз ӧз сӧры. Кызьы но озьы ярдурозь вамышъяса потӥз, куак вӧзы выдӥз но эркынак шокчиз. Сьӧраз уяса, суч-суч котмыса эшъёсыз Блинов но Иванов вуизы. Мылкыдзы умой. Павлов аппаратсэ пуктӥз но каллен гинэ ӧтиз: - "Волга", "Волга"! Мон "Казмаска", вераське "Казмаска", кылӥськод-а? - Кылӥсько, кылӥсько, - шумпотэм куараен вазиз "Волга". - "Казмаска", иворты ньыльдон кыкетӥлы, самоваръёсы ву мед дасялозы, - Плешков майорлэн куараез туж умой кылӥськиз, татын, куакъёс пӧлын, ик вераське кадь. Павлов капитанлы ыбылыны приказ сярысь ивортыса вуттӥз гинэ, куакъёс пӧлысь автоматъёс тачыртыны кутскизы. Блинов трубкаез кутӥз, кӧня ке лыдпусъёс вераз. Асьме палась орудиос уез югыт карыса гудыртӥзы. Куакъёс выремысь дугдӥзы. Уй ортчыку, шур вамен выжыны вутскизы полклэн стрелковой но пулемёт ротаосыз. Тушмон артиллериысь вожомыса ыбылыны кутскиз, собере кужмо контратакае потӥз. Быдэс нунал ӵоже асьмелэнъёс вылэ зӥбамысь ӧз дугдылы. Немец автоматчикъёс асьме ротаосты кӧня ке пол вормыны турттылӥзы, асьме боецъёс, выльысь атакаос лэсьтыса, югдурез тупатылӥзы. Связь олокӧня дасо пол сӧриськылӥз. Ез ярантэм чигылӥз. Сое пуляос улын ик итылоно луылӥз, Ярдурысь полклэн КП-ысьтыз жингыртӥзы, выль телефон аппарат но проводъёсын кӧня ке катушка вайыны солдатэз мед ыстозы шуыса. Уй вуон азьын ыбылӥськон шыпытгес луэм бере, Павлов огзэ телефонистэз полке ыстӥз вал - ӧз вуы, бырыны шедиз. Аппаратсэ, катушкаоссэ кутыса, Павлов вань кужмысьтыз полклэн КП-ез пала бызиз. Отчы вуиз но шоканэз пытсаськыса усиз, окопе пыриз. Тушмон снарядъёс усьылыны кутскизы. Час ортчыса, немецъёс кык батальонъёс вискы мерскыса пыризы, КП-лы матэ вуо ни. Связистъёсын интыяськем блиндажез тушмон висъяны вуиз. Патронъёсыз бырытозь, Павлов соос шоры "МТ" трофеен вакчи черодъёсын ыбылӥз, собере автомат кутӥз. Артэ ик кылӥськиз "Рус, сдавайсь!" шуэм куара, собере вӧзаз граната пуштӥз. Сержант чигнатскиз, блиндаже пырыса, телефонистлы али ик асьмелэнъёс соос пала мед ыбылозы шуыса ивортыны косӥз. Немецъёс мазэ-созэ валаса медаз вуттэ, пе. Гранатаос дасяз, запас дисксэ, пуртсэ эскериз. "Одӥг вамыш берлань эн чигна!" - аслыз ачиз кыл сётӥз, Сталинград дыръя поттэм приказэз но ведь нокин ӧз вошты на. Сержант ӧз кылы сьӧраз вутскисез - кыӵе ке но шаплы фриц пельпум вылаз тэтчиз. Павлов сое ас вылтӥз погыртӥз, вакчи черодэн шораз ыбиз. Вадьсысьтыз эшшо мукетъёссэ тушмон автоматчикъёсты адӟиз. Сак мертаськыса, кузь черодэн шур пала бызись офицер шоры ыбиз. Фриц усиз но ӧз ӝутскы ни. Со куспын паллян пал ярдурысь асьме артиллерия ыбылыны кутскиз. Гудыръясь "катюшаос" ӝуась кометаоссэс келязы. Тушмонлэн мерскемез ӧз луы ни. Асьме солдатъёс кылемъёсыз сьӧры бызизы. Нош связь та вие ӧз сӧриськылы! Днепр дорысен 15 иськемысь Михайловка гурт пала наступление мыныку, ӝыт пал ини Павлов сӧсырмыны сюриз. Мырдэм гинэ полевой санчасте вамышъяз. Юрттэт басьтэмез бере, отын кема ӧз ӝегатскы, госпитале но ӧз мыны: ӵош ожмаськись эшъёсызлэсь кылемез ӧз поты. 1943-тӥ арын 26-тӥ октябре гвардиысь Н. С. Павлов сержантлы Советской Союзлэн Героез ним сётэмын. Мугез тазьы гожтэмын: "Днепр вамен ожмаськыса выжонэз азинлыко радъямез шурлэн шунды пуксён палаз юнматскон дыръя плацдармез паськытатыку, кышкатэк но геройлыко ожмаськемез понна!" Украинаысь кунгож сьӧры потэм бере но Никифор Павлов троссэ ож сюресъёсты азинлыко ортчиз. Вормон нуналэз Берлин палан, Бранденбургын, пумитаз. Куинь пол сӧсырмылӥз, контузие шедьылӥз... Никифор Савельевичлэн кузпалыз, матысь эшез Зоя Федоровна нош вань улонзэ ужлы сӥзиз. Та нылкышноез ужан фронтын Герой шуыны луоз. Война дыръя но, берло аръёсы но ялан тыршиз обороная заводъёсын, армилы пыӵал тӥрлык поттонын. 1942-тӥ арысен Механикая завод Тулаысь асьме доры пыӵал тӥрлык поттӥсь заводэз вуттэмзы дырысен отын ужаз. Фронтын шимес нуналъёс дыръя, шуэ Зоя Федоровна, армимылы пулемётъёс, танкъёсты быдтон пыӵалъёс но мукетсэ тырмыт келян понна, уй-нунал, кытӥяз, кӧлаллятэк но ужано луылӥз. Ужан фронтысь ветеран пенсие 50 ар стажен потӥз. Кылем арын Зоя Федоровна Павлова 80 арессэ пусйиз. Леонид Федоров, Удмурт Элькунысь дано журналист. Ёрос тӧроос вазисько Кызьы тодмо, 15-тӥ октябре луоз Удмурт Республикалы президент быръён. Кыӵе адями шедёз та интые? Со бордысь потоз элькунмылэн ӵуказе нуналыз. Та сярысь вераськон мынэ иинтыосысь аскивалтонъя ёзъёслэн тӧроссылэн вазиськоназы. Президент луыны быгатӥсь муртъёслэсь быгатонзэс чакласа, шуэмын отын, ми лыдъяськом: та должносте тужгес но тупа Александр Волков. Ёрос тӧроос вазиськизы солы, Президент луон понна нюръяськонэ пыриськыны курыса. Е. Пермяков. Удмуртлык - лулазы-виразы Гуртын калык доры выль тодонъёс вуттон ласянь трос тыршо дышетӥсьёс но библиотекарьёс. Ӵапак сыӵе ужез нуо Можга ёросысь Бадӟым Учалась библиотекаын ужасьёс Галина Николаевна Романова, Нина Матвеевна Санникова но Зоя Николаевна Небрасова. Та нылкышноос туж ярато асьсэлэсь ужзэс, нош ужзылэсь но юнгес - асьсэ калыксэс, улон иинтызэс. Соин ик соос пӧртэм амалъёс бырйыса тыршо возьматыны удмурт адямилэсь лулчеберзэ, шаермылэсь узырлыксэ. Кылем арын, кылсярысь, трос ужъёссы сӥземын вал Можга ёросмылэн 70 ар тырмонэзлы. Радъязы ёросысьтымы усточиослэсь ужъёссэс возьматонэз. Учкыны ветлӥсьёслы соос сярысь мадьылӥзы. Бадӟым Учаысь Лидия Евдокимовна Витвиноваез ӧтчазы удмурт пужыосыз ковер вылэ пуктэмзэ вераны. Трос ужез бергатоно луизы, Ф. Я. Фалалеев маршаллэн вордскемез дырысен 100 ар тырмонэз пусйыку. Республикамылэн нуналэзлы сӥзьыса, "Мусо вордскем шаер" праздник ортчытӥзы. Та библиотекарьёс удмуртлыклы сӥзем котькудзэ выль книгаез лыдӟисьёс доры вуттыны сюлмасько, соин ик библиотекаын усьтэмын шаертодонъя сэрег. Бадӟым Уча черкогуртсы, "Россия" колхоззы, Можга ёросмы сярысь материал бичаса-люкаса кылдытӥзы ини 14 альбом. Сюлмысь, вань лулзэс, кужымзэс поныса ужало та нылкышноос. Ужам сяна, шулдыръяськыны но быгато. Туж ярато удмурт кырӟанэз. Та соослэн улоназы бадӟым инты басьтэ. Егит агитбригадаен "Россия" колхозысь мукет гуртъёсы но ӵемысь потало. Зоя Николаевна но Галина Николаевна кырӟало на "Чибори" ансамбльын. Кинлэн ке выль удмурт кырӟанлэсь кылъёссэ тодэмез потэ, мынэ библиотекае. Отын одно ик юрттозы. Нош Нина Матвеевна "Удмурт кенеш" огазеяськонлэн Бадӟым Учаысь ёзэныз кивалтэ. Соин ик удмуртлыклы сӥзем ужъёссэс валче лэсьтыны тыршо. Ужамзэс эскерыса, та библиотекаын тыршисьёсыз дэмламы "Шаертодон удысын уж нуонъя гуртысь устоез библиотека" элькун конкурсэ пыриськыны. Оскиськомы, соослэсь ужзэс кулэезъя дунъялозы шуыса. Н. Бурина, Можга ёрос библиотекаын ужась. Чечен калык тау каре Чечен компание пыриськемзы но азязы пуктэм куронъёсты тыро-пыдо быдэсъямзы понна, Удмуртиысь МВД-лэн ОМОН но СОМ ёзъёсызлы тау карон гожтэтъёс вуизы. Республикаысьтымы СОМ чечен музъем вылэ куинь толэзьлы ветлӥз (2000-тӥ арын). Нырысетӥ нуналъёсысен ик та отрядэз Чечня Республикаысь Надтеречной ёросысь Знаменское черкогурт вӧзы интыязы. Татын "Северный" лагерь усьтэмын вал. Улон интытэк кылем ог 2 сюрслэсь ятыр адями огдырлы сэрег шедьтӥз татын (Чечен Республикаын али 7 таӵе лагерь ужа, отын ог 17 сюрс адями улэ). "Северный" лагерь одӥгез устоез лыдъяське. Со сярысь верало асьсэ гожтэтазы Надтеречной ёросысь военной комендант генерал-майор В. А. Ковров но ёрос администрацилэн кивалтӥсез А. Г. Завгаев. Лагерьлэн адӟем карымон луэмез тросэз потэ Удмуртиысь СОМ-лэн тыршемез бордысь (кивалтӥсез милициысь подполковник В. М. Андриянов). Удмуртиысь пиос соку ик огкыл шедьтӥзы огшоры калыкен. Соос тужгес висъяськизы зӥбыт, вазиськись луэменызы. Отрядысь пиос трос пол юртылӥзы татын улӥсьёслы сиён-юонэн, эмъюмен" - верамын гожтэтын. Чечен Республикаысь Правительство бадӟым тау каре УР-ысь МВД-лэн СОМ ёзэзлы, та улосвылысь йырвандӥсьёсты улляны юрттэмез но огшоры калыкез кышкытлыклэсь утемез понна. Соин валче та отрядысь пиослы коньдон премиос висъяны со куре. Удмурт республикаысь МВД-лэн ОМОН-эзлы тау карыса гожтэ Россиысь МВД-лэн подполковникез А. В. Мешовкин. Удмуртиысь нимысьтыз учыръёслы дасям отряд Чечен Республикаын туэ ньыль толэзь пала вал. "Отрядысь пиос ас кожазы но, РФ-ысь МВД-лэн войскоосыныз ӵош но трос пол пыриськылӥзы йырвандӥсьёслэсь огазеяськонъёссэ кыре поттон ужрадъёсы, законэн лэзьымтэ ож тӥрлыкез возисьёсын нюръяськонэ" - гожтэ милициысь полковник. Кыказ ик гожтэтын пусъемын Удмуртиысь МВД-лэн шуг-секытъёслы дась луэмез. Э. Васильева. РЕСПУБЛИКАЛЭН ЮБИЛЕЕЗ АЗЬЫН ГУРТ УЛОН Чутырь кузё Петр Перевощиков � Игра районын тодмо адями. Со вис карытэк 10 ар кивалтэ ни интыысь властен. Ньыль ар вал гурт кенешлэн быдэсъясь ёзэзлэн тӧроез, куатетӥ арзэ луэ ни интыысь администрацилэн кузёез. Районын таӵе кивалтӥсьёс трос ӧвӧл. Петр Ильич быгатэ огкыл шедьтыны "Чутырский" гурт кооперативлэн директореныз Валерий Митрофановен но трос сюлмаське гурт калык сярысь. Соин ик солы юн оско. Юнме шорысь та кылъёс верамтэ. Гуртысь администрацилэн сюлмаськемез-тыршемез вамышлы быдэ шӧдӥське. Тӥни соин ик Чутырь черкогурт но со котырысь гуртъёс районын ваньмызлэсь висъясько. Нош таӵе ӟеч воштӥськонъёс кутскизы гуртэз азинтонъя программа кутэм бере. Отын чаклазы 3 начальной школа, 2 медпункт, аптека, нылпи врачлы (педиатрлы) квартира пуктыны, 2 иськем асфальт сюрес лэсьтыны но мукет. Программа чакламын вал 2000 арозь. Дыр ӝог ортчиз, табере йылпумъян но лэсьтыны луэ ни. Мар пусъемын вал, ваньмыз быдэстэмын. Кык интые, 3,5 иськем асфальт сюрес кыскемын. Чемошурын школа но медпункт вуттэмын, Вылӥ Нязь гуртын � школа, Удмурт Лозаын � медпункт. Татын ик начальной школа ӧсъёссэ усьтоз на. Аптеказы но ужа, врач выль квартираын улэ ни. Администрация гурт калык сярысь трос сюлмаське, уката ик тазалыксэс утён сярысь, Чутырьын пичи поликлиника ужа, шуыны луоз. Отын адямиос массаж басьто, пиньзэс эмъяло, кышномуртъёслы нимаз кабинет усьтэмын. Вань физиопроцедураос, лабораторизы, педиатр нылпиосты эмъя но музон. Адями висьыны ӧдъя ке, соку ик Играе мыныны уг дырты. Программаын чакламлэсь но ватсаса мукет ужъёс быдэстэмын. Кылсярысь, 10 иськем водопровод кыскемын, 7 иськем электрокужым ез золтэмын, гуртъёсты паськытатыны 3 подстанция пуктэмын, выжъёс выльдэмын, Чутырь черкогуртэтӥ пыдын ветлон сюрес (тротуар) асфальтэн шобыртэмын но мукет. Одӥг лыдпусэн вераса, та ужъёсты быдэстыны дас ар ӵоже 1 миллион манет коньдон кутэмын. Ваньмыз со хозяйственной амалэн, асьсэ кужымен вуттэмын. Гуртлы юртто на му вӧй кыскисьёс. Администрация юн тупаса, огкылысь ужа "Чутырский" гурт кооперативлэн тӧроеныз Валерий Митрофановен, отделениослэн кивалтӥсьёсынызы Вячеслав Кожевниковен, Александр Корепановен но Николай Широбоковен. Тани берлояз Вылӥ Нязь гуртын школа ӝутӥз, сюресъёсты выльдӥз, водопровд кыскиз но музонзэ лэсьтӥз. Гурт кооперативлэн кивалтӥсьёсыз калыклэсь куронъёссэ валало, лэсьтӥськыны, пудо вордыны, бакча возьыны юртто. Николай Широбоков трос пол вал гурт кенешлэн (сельсоветлэн) депутатэз. Нырысь- валысь со ӧз оскы вал егит депутатъёслэн ужаны быгатонзылы. Но Петр Ильич вань кутскем ужъёссэ йылаз-пумаз вуттыны тыршиз. Ньыль ар со кивалтӥз гурт кенешлэн быдэсъяно ёзэныз (исполкомен), куатетӥ арзэ Чутырь администрацилэн тӧроез луэ. Депутатъёс, калык солы оско. � Сельсовет азьын азьло мукет ужпумъёс сыло вал, � тодаз вае Петр Перевощиков. � Нош администрация али интыын зэмос кузё луэ. Солы оскемын быдэс социальной удыс. Выльдӥськон кутскем бере, 1999-тӥ арын гурт кенешъёслы ватсаса музъем сётэмын. Со кулэ луиз гуртъёсты паськытатыны, личной подсобной хозяйство нуыны, пудооосты возьманы, турнан интыос висъяны, ву гумыос, очистной сооружениос лэсьтыны но музон. Озьы интыысь администрацилэн сюлмаськонъёсыз данаклы ватсаськизы. Калыкмы будэ. 1991-тӥ арын 1900 ке вал, али 2060 мурт улӥсьёсмы ни. Кошкем адямиосмы но каллен берытско. Ваньмызлы юрттӥськом. Мар бен тужгес сюлэмшугъяськытэ Чутырь кузёез? Кӧня ке малпаськемез бере, Петр Ильич мур лулскыса шуиз: "Монэ котьмалэсь юн сюлэмшугъяськытэ егит калык. Соос та вакытэ асьсэды ышто кадь, ужамзы уг поты, сюлэмъязы уж но уг шедьто. Таӵе югдур быдэс Россиын. Асьмеос но номырин ум висъяськиське. Но самой кышкытэз � кылдэм югдурез тупатон сярысь нокин уг сюлмаськы, УР-ысь Егитъёсын ужанъя кун комитетлэн кужымез уг шӧдӥськы, комсомолэз номырин уд вошты. Огъя вераса, егитъёсын ужась ӧвӧл. Данакез соос юон вылэ чӧлско, нош дискотекаысь ӧй поталлясалзы, эктыса гинэ улысалзы. Вылаз ик, егитъёслэн семья кылдытэмзы уг поты". Тӥни, зэмзэ но, югдур мылкыдэз уг ӝуты. Егитъёслэн улон интызы ӧвӧл. Соос лэсьтӥськыны мылкыд каро, но, осконтэм кадь, музъем уг тырмы, вань гуртъёсмес му вӧй кыскисьёс котыртӥзы-пачкатӥзы ни, одӥг качалкаос гинэ уй-нунал бергало. Силё-сюрно куян инты но лэсьтыны музъем уг шедьто. Петр Ильичлэн верамезъя, 1994-тӥ арын одӥг семьялэн гулбечаз нефть пырем. Собере сыӵе выллем учыръёс ӧй вал ни. Оглом чутырь калык урод уг улы. Кооперативын шорлыдын 850 манет уждун усе, нош дояркаослэн � 1100 пала. Со сяна, хозяйство калыклы трос юрттэ, пудо сиён, ю тысь, чечы но музонзэ сётэ. Бускель "Рассвет" гурт кооперативын 5 манетлы уногес уждун басьто, но соослэн вань юрттэтсы отчы пыре. Чутырьын трос дышетскем калык улэ. Петр Ильич али быдтэ Кивалтонъя кун службая Урал академиез, калыкез социально утёнлы сӥзем диплом гожтэ. Ватсаны кулэ на, татын 400 мурт нефтяникъёс луо. Соос умой уждун басьто. Чутырь кузёлэн тыршемез-сюлмаськемез куддыръя валантэмен берытскылӥз. Урамъёсты юатэк-вератэк югдытэмез, тыл кыскемез понна районын выговор ялӥзы. Озьы ик трос кыл кылоно луиз тыметэз выльдэм но Чемошурын проекттэк школа пуктэмез понна. Гуртысь кивалтӥсь ваньзэ чидаз, калык сярысь сюлмаськон сямызлэсь ӧз куштӥськы. Туж умой со. Геннадий РОМАНОВ. ? Петр Перевощиков. Туспуктӥз Владимир Камашев. Бускельёсмы дорын Вашкала Казань мынэ азьлань И. Озьы луиз: кӧня ке ар ӵоже Казане вуылыны ӧй быгаты. Ивор вӧлмытӥсьёслэн фестивалязы мынон муг сюлэмез шумпоттӥз. Бигеръёслэн шоркаразы ортчытоно бадӟым ужрад луонлык сётӥз уго татын дышетскем дырез тодэ вайыны, азьлозэ туалаеныз ӵошатыны. Поездысь васькыса ик син азе пуксе тодмотэм суред. Огласянь ваньмыз азьлоез ик кадь: горд кирпичлэсь вашкала юрт, пиялалэсь корпус, сквер... Мукет ласянь - вокзалысь кытчы ке ышиллям кык этажъем коробкаос, почта нуллӥсьёслы но музон службаослы куке но висъям коркаос. Соос интые ӝутэмын туала куронъёслы тупась шукрес юртъёс. Одӥгаз билет вузало, кыкетӥяз шутэтскон залъёс тупатэмын. Городысь транспорт табере вокзал дортӥ уг котыръяськы ни - вӧзтӥз ортче. Мынӥськом Казаньлэн шораз. Бауман урам Москваысь Арбат кадь каремын. Отӥ азьло вистэм-вожтэм ветло вал троллейбусъёс, автомашинаос. Али ульча шорын ик будо палэзьпуос но мукет писпуос. Отын но татын - пукон-шутэтскон интыос. Бигер пӧрамъёсты сиён юртэз турокъёс выльдо. Со вадьсын усьтэмын чай юон корка. Котькытын - бигер но ӟуч кылын ӧтёнъёс, реклама. Лавкаослэн пиялаоссы пӧртэм буёлъёсын ворекъяло. Шутэтскись калык гань-гань ветлэ урам кузя. Сюлэм амалтэк пачылме шулдыръяськон мылкыдын. Мар шуод, синмаськымон но вожъяськымон. Ижевскын тани тыро-пыдо бульвар гинэ но ӧвӧл. Кӧня верасько ни Горький яке Советской урамез пыдын ветлон интылы пӧрмытон сярысь - воштӥськон ӧвӧл. Шор площадьмы ӧй луысал ке, кытӥ калгыны чылкак ёрмысалмы. Чылкак выльдӥськем Казаньысь Кремль но. Татын али выльысь ӝуто кыдёке адскись бадӟым мечеть. Со дыре ик тупатъяло Кремльысь ӟуч православной черкъёсты но. Тодмантэм воштӥськемын Спортъя дворец. Азьло со огшоры вал, асьме столицаын кадь. Нош табере копак выльдэмын. Быдэсак шобыртэмын сьӧдмам чилясь пияла дэремен. Паськытатэмын йӧ бусыез. Отын али быгатозы ни Европалэсь но дуннелэсь чемпионатъёссэ ортчытъяны. Дворец вадьсын ик - Египетысь пирамида выллем выль юрт ӝутӥське. Таиз но егитъёслэн центрзы луоз. ИИ. Казань - вашкала город. Тодӥсько на, 70-тӥ аръёслэн пумазы отысь киоскъёсын тросэн кылё вал солэн 800 ар тырмонэзлы сӥзем значокъёс, синпель кузьымъёс. Соку Татарилэн кивалтӥсьёсыз дасяськизы городлэсь юбилейзэ пусйыны. Но... ӧз пӧрмы. Москваысь историкъёс (кинлэн ке косэмезъя, вылды) пумит кариськиллям: кызьы, пе, озьы кыдёкысь Казанез сокем мӧйы городъёс пӧлы пыртод? Но бигеръёс соос бигеръёс ик вань ни. Кылем арын кызьы ке но быгатӥзы Россилэсь кивалтӥсьёссэ "куасалтыны". 1-тӥ сентябре Борис Ельцин указ поттӥз: 2005-тӥ арын августэ пусъёно Казаньлы... 1000 ар тырмонэз. Тӥни озьы, ява! Юбилеез пусъён понна кылдытэмын нимысьтыз кун комиссия. Кивалтӥсе юнматэмын Россиысь Правительстволэн соку тӧроез Владимир Путин. Комиссие пыртэмын Валентина Матвиенко, Александр Починок, Владимир Рушайло, Игорь Иванов, Зураб Церетели но трос мукет дано адямиос. Сюрс арез пусъёнлы дасяськон пумен ӧръяське ни. Та уже коньдон висъя кызьы ке Москва, озьы ик республика но. Со чотын выльдӥсько вужмем юртъёсын кварталъёс, ӝутско выльёсыз, кутскемын метро лэсьтон. Городын син шоры йӧто ини юбилеез данъясь турлы ӧтёнъёс. Издательствоын вордско но потыны дасясько уно дасо выль книгаос, буклетъёс, суредъёсын альбомъёс. Историен вырисьёс дыртыса пырто воштонъёс учебникъёсы, пӧртэм справочникъёсы. Огъя вераса, вуоно юбилейлэн пӧсь шокамез али ик шӧдӥське ни. Ма луоз ӵуказе, усьсэ? ИИИ. Кылылэмды вань-а Волжской Булгария нимо государство сярысь? ИЪ-Ъ дауръёсы со туж тодмо вылэм. Туала Татарстанлэн музъемъёсыз вылэ интыяськем кун пыр ортчизы Китаез н Индиез Европаен герӟась сюресъёс. Ӵапак со ик юрттӥз, вылды, булгаръёслы (бигеръёс соосты асьсэ выжыосынызы лыдъяло) культуразэс азинтыны, вузкаронэз радъяны. Сокугес ик кылдэм Казань крепость. Бигеръёс сое Казан шуо. Пурты - асьме сямен вераса. ЪИИИ дауре городлэн историез герӟаське Зарни Ордаен. Со дыре булгаръёс, кыпчакъёс, огузъёс но исламе выжем куд-ог финн-угоръёс чотын нимаз калык луыса кылдэ бигер нация. 1552-тӥ арын, кызьы тодмо, Иван Грозныйлэн войскоосыз киулто Казанез. Татчы выжы лэзьыны кутске ӟуч культура. Быдӟым Пётрлэн кивалтон вакытаз Казань луэ бадӟым губернилэн шоркарез. Сыӵе воштӥськон городлэсь данзэ уката ӝутэ. Совето аръёсы Казань шӧдскымон будэ. Война дыръя татчы выжто обороналы ужась трос заводъёсты. Берло дыре город, кызьы верам ни, син азьын выльдӥське. Туннэ татын улэ 1 миллион 200 сюрс адями. Ӝыныяз пала - бигеръёс. Ичи ӧвӧл татын мукет ыжыосысь потэмъёс но. Городын кылдытэмын 22 национально-культурной огазеяськонъёс. Казань люкемын сизьым ёрослы. Отын ужало 70 сюрслэсь ятыр пӧртэм предприятиос. Татчы интыяськемын вить зарезез огазеясь порт. Городын ужало 15 вылӥ дышетсконниос, Татарстанлэн наукаосъя академиез. Бигер шоркарен герӟаськемын В. Ленинлэн, Г. Державинлэн, Ф. Шаляпинлэн, Н. Лобачевскийлэн, М. Джалильлэн но трос дасо мукет дано адямиослэн нимъёссы. Умой азинске татын спорт. "Ак Барс" команда валля арын луиз Россилэн хоккеен шудонъя чемпионэз. Данэ озьы ик потэмын баскетболэн но футболэн шудӥсьёс. Городын огкыл шедьтыса уло пӧртэм религиослы дурбасьтӥсьёс. Татын ужало 23 мечеть, 16 православно храм, лютеранъёслэн кирхазы, католикъёслэн часовнязы, иудейёслэн синагогазы, андвентистъёслэн, кришнаитъёслэн но мукет оскисьёслэн вӧсяськон юртъёссы. ИВ. Али ик тодмо ни: сюрс аръем юбилейзэ Казан зол пусъёз. Городлэн но республикалэн кузёосыз огъя уже кыско ни ЮНЕСКО-ез но, быдэс Россиысь тодосчиосты но, дуннеысь вань бигеръёсты но. ... Татарстан сярысь вераськон потыку, куд-ог эшъёс уретыны выро: мар, пе, тӥ весь Казань шоры учкиськоды. Асьмелы, удмуртъёслы, солэн сюресэз уг тупа. Калык но, сям но мукет, историзы но туж аспӧртэмлыко. Кин тодэ ини. Мон сямен, бускельёсмылэсь адӟем каронлэн номыр умойтэмез ӧвӧл. Кызьы ке но дышетсконо ук улыны. Оло, асьмелэн но куке-соку луоз ай Шаймиев кадь азьмуртмы но городэз сярысь уен сюлмаськись Исхаконов кадь мэрмы. Иван Лебедев. Казанка шур вамен выж. ЪИЪ даур. Кремльлэн бадымез башняез. Университетлэн вашкала юртэз. Бигер ныл. Татастранлэн нырысетӥ президентэз Минтимер Шаймиев. Ой, чебер нылъёс Июнь толэзе Чебоксары городын чебер нылъёслэн "Мис Волга" конкурссы ортчиз. Куамын дыдыос нюръяськизы отын. Ижевскысь Галина Гавриленко кыкетӥ интые потӥз но "Вице-мисс Волга" ним басьтӥз. Солы дӥсь вуризы городысьтымы "Ирина" но "Егитъёслэн модазы" ательеос. Жюриын, кылсярысь, вал Россия Федерациысь Кун Думалэн культурая но туризмъя комитетэзлэн кивалтӥсез Станислав Говорухин. "Русский силуэт" фондлэн директорез, Никита Михалковлэн кузпалыз Татьяна, "Подиум дАрт" телевизионной проектлэн директорез Нина Арифуллина. Модельёсъя "Ижевск" агентство туэ сӥзьыл "Мис Удмуртия" конкурс ортчытыны чакла. Сое радъяны лыктозы Москваысь режиссёръёс, хореографъёс, модельёсъя агентствоос, тодмо политикъёс. Н.ЛЯЛИН. Дан поттод - сереме усёд 6-тӥ июле люкаськылӥз Удмурт Республикаысь Быръёнъя комиссия. Со эскериз но юнматӥз быръён нунал азьын ӝуткан-ӧтёнъя, куара сётэмез возьматӥсь но Удмурт Республикалэсь Президентсэ быръёнъя мукет документъёсты. Комиссилэн заседанияз эскеремын "Ижевск вечерний" газетын ӝуткан-ӧтёнъя куронэз санэ басьтымтэзы. Газетлэн редакторез янгыш лэсьтэмез понна алэмын. Удмурт Республикаысь Быръёнъя комиссия тодазы вайытэ газет редакциослэн но телерадиостудиослэн кивалтӥсьёссылы ӝуткан-ӧтён ужез тупатэм дыре но дунэн возьматонозэ-сётонзэ пусъем кандидатъёслэн фондысьтызы сётон сярысь. Президентэз быръён пумысен калыклэсь юалляськонъя материалъёсын пусъемын луыны кулэ законэн чаклам нимысьтыз тодметъёс. Та радлыкез тӥяса ивор сётӥсьёс "Удмурт Республикалэсь Президентсэ быръёнъя" Законлэн 52-тӥ ёзэтысьтыз 6,7 люкетэзлэн куронъёсызъя но Россия Федерацилэн законъёсызъя кыл кутоно луозы. Удмурт Республикаысь Быръёнъя комиссия. Соин артэ ми но кыдам Чагыр инбамо шулдыр гужем, векчи зорен пужнӥськись пурысь сӥзьыл, лымыен пелляськись тол ӵукнаосы задор мылкыдо воргоронъёсты азьло "Зенит" стадионын котькуд нуналэ пумиталод вал. Соосты огазеяз но физкультураез яратон мылкыд пыӵатӥз Ижысь кыкетӥ элькун больницаысь спортъя врач Василий Андреевич Бехтерев. Кык-куинь толэзь куспын пӧртэм кивалтон удысын тыршисьёслэсь из-кӧльы кадь юн коллектив кылдӥз. Куд-огез малпало: воргоронъёсты, пе, юнгес огазея юон, чорыган, пӧйшуран, инкуазе шутэтскыны ӵош ветлонъёс. Нош милемыз ваче герӟаз физкультураез яратон, ӵукналы быдэ стадионэ бызьылон, арняяз огпол ке но басссейнын уян, саунаын-мунчоын тазалыкез кыдатон. Та огазеяськонамы нокинэн бырйымтэ но юнматымтэ азьветлӥсь луиз Алнаш ёросысь Ромашкино гуртысь удмурт пи Владимир Никифорович Савельев. Туж лякыт сямо, улонэз яратӥсь, юморез валась адями ваньмынымы огъя кыл шедьтӥз но пичи коллективмылэн шор сюлмыз луиз. Кыӵе гинэ юанэн эн вазиськы Савельевлы, со ноку но уз аналскы, яке со юанэз тодӥсьтэм уз кариськы. Котьку но мылысь-кыдысь, лад-лад валэктоз, усто визь- кенеш сётоз. Милям уноез юанъёсмы ужпумъёсъя вал. Со аръёсы угось Владимир Никифорович медицина наукаосъя кандидат вал ни, элькунысьтымы Тазалыкез утёнъя министерствоен кивалтӥз. Эн малпалэ, ми Савельевен кыӵе ке, кызьы шуо калыкын, блат кылдытыны малпамы. Ӧм, кызьы верай ини, ми ваньмы сямен кивалтон удысын тыршисьёс, ӟеч эмъюмъёслы но, больницае интылы но ӧм ӟудылэ. Нош Савельев кадь визьмо, улон-вылонэз ӟеч валась адямиен, усто специалистэн вераськем бере сюлэм буйга, усто ужаны мылкыд кылдэ. Владимир Никифорович но пӧртэм ужпумъёсъя вазиськылӥз милемлы. Соку Владимир Никифорович ужа вал кыӵе ке выль аппарат кылдытон бордын. Пӧлысьтымы огеныз эшенымы Борис Федорович Ларин инженерен соос кема выризы со научной но технической ужзы бордын. Бӧрысь ини Савельев, медициная академие ужаны лыктэмез бере, со ужзэ азинлыко быдэстӥз но патент басьтӥз. Ӝоген Владимир Никифорович ас удыссэ эшшо но золгес азинтӥз, медицина наукаосъя доктор луиз. Али со Ижысь медициная академилэн сӥё-дано профессорез луэ. Татын пусъеме потэ: министр луыса ужакуз но со, хирурглэсь профессизэ вунэтонтэм вылысь, Владимир Савельев арнялы быдэ, скальпель кутыса, операциос лэсьтылӥз. Со-а яркыт уг возьматы Владимир Никифоровичлэсь лул пуштроссэ, кыӵе адями луэмзэ. "Удмурт дунне" газетысь алигес мон лыдӟи дано профессормылэсь "Удмурт кенеш" огазеяськонлэн "Герд" газетэз поттӥсезлы шара гожтэтсэ. Шонер но кулэ ужпумез ӝутэм Владимир Никифорович та гожтэтаз. Сое асьмелы, "Удмурт кенеше" огазеяськемъёслы, санэ басьтоно но азьланяз малпаськыса ужано. Вераны кулэ, Владимир Никифорович, медицина удысын бадӟым уж нуэменыз ӵош ик, дыр шедьтэ удмуртлыкмес утёнэ пыриськыны, со понна кужымзэ, визьзэ уг жаля. Сюлмысьтым ӟечкыласько тонэ, гажано эше, юбилееныд но медицина удысын ӝыны даур тыршеменыд! Азьло кадь ик кужмо, тазалыко но шудо лу, Владимир Никифорович! Леонид Емельянов. Депутат юрттэ пиналъёслы Россиысь нылпи фондын вань "Решётка сьӧрын - нылпи синъёс" федеральной программа. Сое быдэстон юрттыны кулэ тюрьмаын пукись нылкышноослэн куинь аресозь нылпиоссылы. Туннэ асьме странаын сыӵеос 500 пала. Данакез ёрмо дӥськутлы, эмъюмлы, ӟеч сиёнлы. Программаез быдэсъян понна, нылпи фонд радъяз мылкыд карисьёслэсь коньдон люканы. Солэн ӧтёнэзлы вазиськиз Россия Федерациысь Кун Думалэн депутатэз Светлана Смирнова но. Уждунысьтыз 2,5 сюрс манетсэ со фондэ сётӥз. Коньдон мыноз тюрьмаосысь нылпи юртъёсын курадӟись пиналъёслэсь улонзэс умоятонлы. Депутатлы тау карыса, солы нимысьтыз гожтэт ыстӥз Россиысь нылпи фондлэн кивалтӥсез Альберт Лиханов. Тодмо ӟуч писатель оскемзэ вераз, мукетъёсызлы юрттыны дась луись адямиос вань на бере, улон но тупатскоз ай шуыса. И. ЛЕБЕДЕВ. Эх, та мӧйыос! Завьялово ёросысь Подшивалово черкогуртын кыкетӥ арзэ ни ветеранъёслэн хорзы ужа. Отчы мылысь-кыдысь ветло дас кык песяй-песянайёс. Усточиосын быдэстэм удмурт но ӟуч калык кырӟанъёсты, такмакъёсты, эктон- тыпыртонъёсты, сценкаосты учкисьёс котьку шумпотыса пумитало. Табере соосты ас гуртазы гинэ ӧвӧл, вӧзысь гуртъёсын но тодо. Мӧйыослы сӥзем нунал-а, 8-тӥ Март-а, Вормон нуналэз пусъён ӝыт яке Гырон быдтон � огез но уг ортчы ветеранъёслэн тузӥ мылкыдзытэк. Усточиослы мылысь-кыдысь юртто культура юртын ужась Людмила Яковлева но Юрий Пронькин (таиз баянэн шудэ). Нош гуртысь ветеранъёслэн огазеяськонэнызы кивалтэ задор мылкыдо А.Е.Тетерин. Александр Егоровичлэн кичӧлтэмез улсын ик ветеранъёс, хоре ветлэм сяна, гурт котырысьтызы ошмесъёсты но шайвылэз утялтыса возё. Вутско на песяй-песянайёс пудо сиён дасянэ но. Азьпалан соослэн эшшо трос малпанъёссы. Н.ЗЕЛЕНИНА. Тазалык � байлык Нылпиосмы 100 аресозь улозы! Таӵе малпанэ вуоно адями мугорлэн клеткаосыз сярысь умой-умой валаны кутскем бере. "Пыдлось ватосэз" шедьтыны-усьтыны быгатӥзы Англиысь учёнойёс. Таин валче оскон кылдэ: ӝоген вань висёнъёс ки пыдэсын кадь адӟиськозы. Висись клеткаосты тазаосыныз воштыса вормыны луоз ракез, сюлэм висёнъёсты но мукетсэ. Басьтэмын Интернет пыр. СПОРТ "Грандъёсты" ижъёс шымырто 80-тӥ аръёсы хоккейя "Ижсталь" команда "гудыръяку" йӧ вылын адскылӥз Сергей Тепляков но. Егит спортсменэз синйылтӥзы но... басьтӥзы армие Ленинградысь (али Санкт-Петербург) СКА-е. Вылӥ лигаын хоккеист Тепляков уно аръёссэ шудӥз. Бератаз Питере ик выжыяськиз. Йӧ вылын нискыланзэ воштӥз спорт удысысь ужбергатонэн. Ӵапак Ижын вордскем-будэм Тепляков малпаз-радъяз покчи футболистъёс пӧлын калык куспо ӵошатсконъёсты. Тодаз ваиз ижъёсты но, ӧтиз Швецие лыктыны, быгатэмезъя юрттӥз. Кунгож сьӧры ноку потамтэ асьме 13 аресъем пиос сьӧр калыкез паймытӥзы. Нош турнирын нюръяськизы Швециысь, Польшаысь, Германиысь но мукет кунъёсысь командаос. "Динамоысь" футболистъёс (тренерзы Сергей Соломенников) ӧз куалектэ, огезлы но ӧз сётске. Финалын немец пиосты 1:0 лыдын вормыса, нырысетӥ интые потӥзы. М.КУЗЬМИН. БЫРЪЁН-2000 Гуртоос оскемзэс верало Дасэтӥ июле Завьялв ёросысь "Путь Ильича" колхозын-племзаводын ужасьёслэн кенешсы ортчиз. Отчы пыриськемъёс люкаськылӥзы Удмуртилы президент быръён пумысен. Соос шугъяськемзэс веразы, асьме элькунын гурт хозяйствоез азинтон сярысь туж ик уг сюлмасько шуыса. Гуртоос Кун Кенешлэн Тӧроезлэн нырысетӥ воштӥсезлы Павел Вершининлы вазиськон кутӥзы, солы Удмурт Республикалы президентэ кандидат луыны соглаш кариськыны ӵектыса. Та выллем кенешонъёс али мыно мукет интыосын но. О.СТЕПАНОВ. Асьме республикаын куинь гинэ рабочей посёлокъёс: Балезино, Игра, Ува. Сыӵе аспӧртэмлыксы ас вакытаз юрттӥз соослы азинскыны. Ӝог ӝутскизы адямиослэсь улон-вылонзэс капчиятӥсь юртъёс, улон коркаос. Но берло та посёлокъёслэн аспӧртэмлыксы вуныны кутскиз, государстволэсь юрттэт басьтытэк, отысь предприятиослы азинскыны шуг луиз. Ува районлэн ужпумъёсыныз тодматскон вылысь, али отчы вуылӥз Кун Кенешлэн Тӧроез А. Волков. Гуртъёсын али туж кысык вакыт. Котькытын пудо сиён дасян мынэ. Районысь тросэз хозяйствоос скал вордон бордын возисько. Зоро куазь сэрен пудо сиён дасян туэ арнялы бере кыльыса кутскиз. Соин ик, лэся, адямиос ортчем дырез уйыны вырыса сямен ужало. - Адямиос кион кадь ужало, - шуиз "Дружба" СПК-лэн тӧроез Василий Леонидович Гореев. Та хозяйство кема аръёс ӵоже ни районын огез умоез лыдъяське. Скал вордон сяна, татын дуно пӧйшуръёсты будэто. Муш вордо. Нош кин уг тоды булай валъёсты. Булайын ик радъямын вал кыткон котыръёсты вурон. Етӥн будэтонлэсь но хозяйство ноку ӧз куштӥськылы. Туэ етӥн 125 гектар музъем вылэ киземын, кылем арын 50 гектар гинэ вал. Булайёслы улон-вылонзылы ӝожтӥськыны мугъёс но шедьтоно ӧвӧл кадь. Вань йӧн- йӧн пуктэм клубзы, школазы, мунчозы, прачечной шуонзы. Озьы ке но, бусыын ужась механизаторъёс лек йыркурзэс веразы. Вазь ӵукнаысен бер ӝытозь, пе, ужаськом, нош уждунэз ум адӟиське". "500 быдӟа гинэ уждунэн мон но озьы ӧй ужасал, - шуиз А. Волков. Нош мар кароно? Та ужпумез кивалтӥсьёс бусыысь воргоронъёсын озьы но, тазьы но бергатыны выризы. Ӟечгес, пе, ужано, ӧвӧл лушкаськоно, вина ӧвӧл юоно. Ваньмыз со шонер, вылды. Но со бордысь гинэ ке потысал уждун... Э-ке-ке... Гурт хозяйствоя министрлэн П. Першинлэн верамезъя бусы ужъёслы туэ коньдон тырмыт висъямын. Но гуртысь специалистъёслы но, колхозын ужасьёслы но валамон: вань со коньдон кошке ГСМ-лы но воштос ёзъёслы. Нош калык "улэп" коньдонэз адӟоз урожаез октэм-калтэм бере гинэ. Эшшо быгатоно на сое умой дунын вузаны. Туэ ю-няньлы но, йӧллы но закупочной дунъёс будэтэмын. Озьы ке но, улонэз умой валась предъёс ю-няньзэс со дунъёсъя вузаны уз дыртэ. Бер сӥзьыл дунъёс мукетгес луыны быгатозы. Озьыгес ик малпаське "Дружбалэн" кузёез но. Кылем арын Ува районын но юос куасьмизы. Сыӵе ыштонъёс понна хозяйство та дырозь юрттэт ӧз на басьты. Ярам, кыдёке учкись кузёлэн В. Гареевлэн чакламезъя, хозяйство вань ю- тысьсэ государстволы вузаны ӧз дырты, тӥни озьы куинетӥ арзэ азьвыл люкам запасэз чотын улӥз. Тросаз гуртъёсын колхозын ужасьёс асьсэлы корка пуктыны уг быгато, 2-3 семья сяна та уж борды басьтӥськыны уг дӥсьты. Лэсьтӥсько ке но, я палэнысь лыктэмъёс, я мукет удысын ужасьёс. Таяз арня куспын турын дасянэз йылпумъяны малпало Ленин нимо хозяйствоын. Предлэн А. Сырыхлэн верамезъя, туэ татын клеверзы туж удалтэм. Пудо-сиён тырмыт луиз ке, йӧл кысконэз уз кулэстэ, али татын одӥг скаллэсь 11,5 литр йӧл кыско. Хозяйство озьы ӟеч пыриське "Етӥн" кун программаез быдэстонэ. 312 гектар музъем вылын етӥнзы тулкымъяське. Вуоно арын эшшо но тросгес етӥн кизьыны малпало. Та колхозын ужасьёслэн уждунзы 900 манетлэсь вылӥын. Озьы ке но, кема аръёс ӵоже предын ужам муртэз но туж паймытэ воштос ёзъёслэн бадӟым дунъёссы. Сыӵе югдур районысь азмынӥсь хозяйствоосын. Нош мар веранэз ни ляб хозяйствоос сярысь. "Авангард" СПК-ын, кылсярысь, колхозникъёслэн уждунзы 400 манет пала гинэ. Соин ик лэсьтӥськыны ӵектэм кредитъёсты но адямиос уг басьто. Нош мар сюлмаськытэ гуртысь интеллигенциез? Булайысь медсестраос туж куректо адямиослэн огъя тазалыксы лябӟемзы пумысен. Вань нылкышноос висисесь ини. Нокин уг эмъяськы. Ма, кытысь мултэс коньдон шедьтод дуно эмъюмъёс басьтыны. Вишур больницалэн валтӥсь врачез О. Кадерова бӧрдыса ик мадиз больницазылэн куашкан калэ вуэмез сярысь. Куазь зорыку, липетэз вия, висисьёс ведраосын ву поттыло, электроезъёс ӝуало. Ува ёрослэн администрациез та ужпумез кылэм-адӟем уг кары. Дышетӥсьёслы туж кулэ компьютеръёс. Кыйлудын улӥсьёс куро шутэтскон юртсэс улӟытыны. Калыклэн ӝожтӥськонъёсыз Кун Кенешлэн но Правительстволэн Тӧрооссылы гинэ сӥземын ӧй вал, тужгес но районысь кивалтӥсьёслы. (Куд-ог интыосын ай соосты уг но тодмало на вылэм.) Соин ик калыкен таӵе пумиськонъёс, оло, кыӵе ке ик пайда ваёзы. Кун Кенешлэн Тӧроез вуылӥз на Уваысь чипы вордон фабрикае но "Увадрев" предприятие. Татын усьтэмын вал фанера поттон производство. Россиын со огез нырысетӥез луоз. Удмуртиын туж ужась калык улэ. Котькуд районысь мае ке но выльзэ, ӟечсэ адӟиськод. Данъяськиськод. Нош кивалтӥсьёслэсь ялан возьмаськод адямиос сярысь сюлмаськемез. Т. Банникова. Инмысь гудырипузъёс Та туспуктэмлы ӵапак ньыльдон ар ини... Июнь толэзь пумын, арня нуналэ, Ижевск котырысь Восточный посёлок сьӧрысь садамы- бакчаямы кисьманы ӧдъям узы бичаськом вал. "Ческыт" уже мылысь-кыдысь пыриськыса ӧм но шӧдылэ, кызьы олома быдӟа сьӧд пилем ӵоктам вылтырез ӵушкась шундыез. Гудыръяны кутскемлэсь азьло кин ке йырбере но тыбыр кузя бодыен шуккылыны ӧдъяз кадь. Липет улэ дасо вамышъем сюрес быдэс иськем кузьда потӥз. Тышкам интыос пушнер кадь висё. Йыр вадьсысь тӧл пельтэмъя ветлӥсь липет пулемёт выллем "ыбылэ...". Йӧзор шӧдтэк шорысь кызьы кутскиз, озьы ик ӝог быриз... Нош ваньзэ тарканы быгатӥсь кужымзэ йӧскадь возьматӥз, чигтылэм улвайёс, пияла пырыос, берыкъям убоос кельтыса. Курег пуз быдӟаесь йӧ шаръёс люкен-люкен кыллё. Котькызьы ке но, бордам "Кристалл" фотоаппарат луэмлы туж шумпотӥ. Кузпалме но нылме кури инкуазь кузьымъёсты киосазы басьтыны... Калык верамъя, йӧзор, пе, интыен-интыен гинэ усьылэ. Огшоры зор выллем, ваньзэ котыр уг басьты. Нош городэ вуыса адӟимы: Пушкин ульчаысь трос юртъёслэн укноосазы пиялаос ӧй вал... Удмурт музъем вылын улытозь-вылытозь, гужемъёсы кыӵе гинэ зор улэ ӧй шедьылы: куакакеньыр, кӧжы выллемъёсы улэ... Зэм, таӵееныз ӝыны даур пала ӧй пумиськылы вал... Леонид ДАНИЛОВ. РЕПОРТАЖ Кисло-кусло утча чылкыт вуэз Шундыед туннэ ӵукна ик ӵушкес ӝутӥське кадь. Небыт ыр тӧлэд гинэ сопалась, я та палась пельтылэ. Иж пруд вылын чорыгасьёс тэбинемын. Киосазы визнанъёсын пумем кадь пуко ява. Тани чусэз сураса-пожаса Воложка пала ортче кашир-куараез быдэс улосэ чузъяське. Солы мытылыны соку ик кутскизы ярдуръёсын шудӥсь ву тулкымъёс. Огъя гуре итӥсько чайкаос. Пруд вылын кышкытлыклэсь утёнъя отряд пыласькисьёсты пумитаны кемалась дась. соослэн сэзь, чырмыт луэменызы, трос гинэ адями шудтэм учыре шедемлэсь утемын. Жалява верано, туэ 5 мурт выйиз но ни (Но улонэд сярысь аслыд но сюлмаськоно ук!) Прудысь будосъёс вуэз кырсь адӟыто. Но солэн вожалэсь лызпыръем тусыз пыласькисьёсты медам кышкаты. Госсанэпидемнадзорлэн ортчытэм эскеронъёсызъя, ву пыласькыны ярамон луэ. Пляже кыскем юон вуос но вань куронъёсты тупало. Пыд улысь луо гинэ туэ быдэсак воштымтэ. Та уж дуно усе. Ярдурысь кыз улэ интыяськем чорыгась шӧдтэк шорысь бугыръяськыны ӧдъяз. Кисло-кусло, пе, кисло-кусло! Зэмен но, визнан сьӧраз лыктэм "чорыгез" гызмыль выре. Дораз соку ик люкаськизы артэ пукись визнасьёс. Пӧлысьтызы тужгес егитэзлэн, шунды шорын пыжем мертчан йырсиё пияшлэн синъёсыз "бызьылыны" ӧдъязы. Табере вань солы эшъёсыз азьын маин ушъяськыны. Та куспын шундыед вылэ но вылэ ӝутӥськем. Пляже, пыласькыны шуыса, векчи пиналъёс вуиллям ни. Тӥни ву дуре васькон тубатъёсыз кузя бабля йырсиё мусокаенызы егит анайёс матэкто. соос бӧрсьы ньыль-вить кузя егитъёс васько. Кузпазы маке серекъяло-бӧтьырто. Гужемед туэ пӧсь-шунытэныз сокем уг шумпотты. Но пӧласькыны яратӥсьёс асьсэлы вис шедьто. Э.КУМАЧЕВА. Туспуктэмез В.Камашевлэн. ШӦКЫЧ С-с-с... (сценка-скетч) Шудӥсь муртъёс: Кивалтӥсь - Ижевск городысь. Фермер - Камбарка районысь Сцена вылысь бадӟым ӝӧк сьӧрын кивалтӥсь пуке. Борддорын, йыр вадьсаз, "Приёмной" гожтэмын. Улӥязгес таблица ошемын. Кивалтӥсь (ӝӧк сьӧрысь султыса но таблица шоры учкыса. Нумыр сие койыкез, Нош турынэз сие койык. Чорыг сие адямиез, Нош адями сие чорыгез! Фермер. Пырыны луоз-а? Кивалтӥсь (ӝӧк сьӧраз пуксе). Пыре! Фермер. Чырткемесь! Кивалтӥсь. Усто! А-а-а, тодмо мурт кадь! Пуксьы! Фермер. Кинэн ке вераськем-а кырӟам-а кылӥське вал кадь? Кивалтӥсь . Ас поннам мон озьы, ужъёс урод мыно, пудо сиён дасяно, аран дыр но вуэ ини. Сюлэм шуг дыръя озьы мон лулвирсэръёсме буйгатӥсько. Чорыг сие адямиез, нош адями сие чорыг шуисько. Фермер. Мар отын шуонэз? Озьы ик со вал, озьы ик луоз но. Тани милям тыметамы Пронька Петыр усиз но, ӧз ни шедьтэ. Инъетсэ сяна. Нальымъёс сииллям. Кивалтӥсь (вукылъяськыны кутске). Тьфу! Таӵе чылкыт кабинетын юрӟым вераськиськод. Сыӵе сием потэ вал... Фермер. Сием потэ угось. Соин мон татчы лыктӥ. Турнан машина кулэ вал. Кивалтӥсь. Турнан ӧз на быр шат? Я-а-ко, учком! Тон кыӵе районысь? Фермер. Камбаркаысь. Кивалтӥсь. Так, так!.. Камбарка. (Таблицая учке.) Ёлы-палы! Дак тӥ вообще уд ужаське-а, мар-а? Толалтэ мае сиыны малпаськоды? Пудодэс маин сюдоды? Пудо сиён-то ноль целых, хрен десятых мында гинэ дасямын ук! Фермер. Шуисько ук, техника, турнан машина кулэ! Кивалтӥсь. Государстволэсь кур. Фермер.Со али ӧвӧл ни. Кивалтӥсь. А мар-о вань на? Фермер. Губерниос, княжествоос, фракциос, кык сюрслэсь ятыр огазеяськонъёс но мукет со выллем люкъёс. Кивалтӥсь. Тон мар озьы вераны турттӥськод? Фермер. Номыр но уг! Шуисько, али котькудӥз ас понназ тырше. Капитализм нерге ӝутӥськомы. Кивалтӥсь. Тон мар озьы вераны турттӥськод? (Султэ.) Фермер. Адями адямилы кион. Кивалтӥсь. Тон мар, тон мар озьы?.. Тон тодӥськод-а витьтон тямысэтӥ шуткаез шуод ай, шудонэз, тьфу, ёзэз... тьфу... с...с...с... Фермер. Да тодӥсько мон со с... с...с...-ез. Си-и-ием потэ, сием! Соин турнан машина кулэ. Турын дасяно, юэз погыртоно шуисько ук. Кивалтӥсь (зурк пуксе). Тьфу, фу, та такыр-такыр кымесам кезьыт ву шапыкъёсты ик поттӥд. (Бумагаен ӵуш иське.) Турнан машина кулэ шуиськод? Фермер. Озьы. С...с...с... сием толалтэ потоз. Кивалтӥсь. С... с... с... суда басьты. Фермер. Банкир уг сёт ни. Кивалтӥсь. Маин ке вошты. Фермадэ вуза но турнан машина басьты. Али капитализм шуиськод ук. Фермер. Уг тырмы. Кивалтӥсь. Быдэс ферма вузаса но уг тырмы-а? Фермер. Уг. Кивалтӥсь. Азьло кызьы ке улӥзы ук. Фермер. Азьло одӥгез герыен, сизьымез гинэ пуньыен вал. Кивалтӥсь. Нош али мар пӧртэмез? Фермер. Али одӥгез герыен, дас сизьымез пуньыен., с... с... с... статистъёс шуэмъя. Кивалтӥсь. Учкисько ке, тынад вань ужъёсыд с... с... с... шоры лыдӟисько. Фермер. Озьы! Отчы мынӥськод, с... с.. соиз доры мын шуо, с... с... соиз... с... с... соиз доры ыстэ. Своло... шуыны шедьтод ай, тьфу! Озьы с-с-сизьымдон ар пӧяса возё ини мон кадьёсты. Кивалтӥсь. Кызьы сизьымдон? Выльдӥськон кутскиз вал... Фермер. Куамынэтӥ аръёсысен мынэ ни со. Кивалтӥсь. А-а-а. Фермер. Тӥни со дырысен гуртын ужасез пӧяса, сизьым кузэ, нош али дас сизьым кузэ ниыса возё ини. Табере тӥ нииськоды. Кивалтӥсь. Мон-а? Ах, да! Шонер! Мон тыныд юртто. Али ик мон жингырто. Возьма. (Жингыртэ.) Алё, али мон дорын фермер пуке, юрттэт кулэ, турнан машина... Валай! (Трубкаез понэ. Кӧдэктэ.) Фермер (лӧптыса). Мар-о, пе? Кивалтӥсь. (Мырдэм нёръя). Г... г... г... с... с... с.., пе, мон, ачид малпаськы. Фермер. Гов...гов...гов... сво...сво...сво..! Асьмеос-а, пе. (султэ.) Кивалтӥсь. Ӧвӧл, ӧвӧл! Гомо сапиенс, пе, мон. Фермер (пуксе). Ато мон малпай вал... Тьфу, сюлэм ик каньылак луиз. Соку малпаськоно луоз. Кивалтӥсь.Мон малпай ини. Давай, тон мар татын супыльтӥсько пукиськод, калыкез ӝутоно, кусо, сюрло кутоно, веме кароно! Фермер. (пукон вылысь усе) Г...г...г...с...с...с... Гомо сапиенс! (Султэ.) Кызьы шуиды вал?.. Ха-ха-ха! Чорыг сие адямиез, Нош адями сие чорыг! (Кошке.) ПУМЫЗ. Гожтэтъёсъя сценкаез дасяз Ф. СУВОРОВ. Выль дауре - выль календарен "Шунды" калык куспо ассоциация кема дыр ӵоже ни выль календарь кылдытон бордын ужа. Со, пе, арлы быдэ вошъяськисьтэм мед луоз. Валэктом: туэ 1-тӥ январь понедельнике тупа ке, вуоно но, со бӧрсьы аръёсы но со озьы ик тупаны кулэ. Таӵе календарь малпамын, со "ООН-лэн ялан ужась календарез" шуыса нимаське. "Шунды" ассоциацилэн ӵектэмезъя, улонэз выль сямен лыдъяны кутсконо матэктӥсь 2001-тӥ арын 1-тӥ январьысен. Та ужрад тупен-тупен (кӧня ке этапен) ортчыны кулэ. Вуоно арын - выль календарез юнматоно. 2024-тӥ арын - арлэсь кутсконзэ 1-тӥ мартысен чотаны кутсконо, вашкала дыръёсы музэн. Огъя календарьлэн данэз быдэс дуннеын дунъяськыны кулэ. Соин валче, "Шунды" вазиське государствоослэн кивалтэт ёзъёсызлы, дуннеысь вань калыклы соослы кизэс мычыны курыса. В. РОГАЛЕВ. КОНЬДОН УЖПУМЪЁС Я куске шукке, я сюлэмез няськатэ Кык ар талэсь азьло, август толэзе, 6 манет котырын возиськись доллар шуак инме кадь ӝутскиз но вакчи дыр куспын 24 манетозь вуиз. Та югдур вылын кин ке "киоссэ посӥз", нош уноез начар улӥсьёс эшшо но куанермизы. Манетлэсь шуак лэзиськемзэ, мукет сямен вераса девальвациез, куд-ог экономистъёс умоен лыдъяло. Ӵапак та югдур, пе, гыбдаса улӥсь производствомес улӟытыны юрттӥз. Кунгож сьӧрысь вузъёсты уго басьтыны укыр дуно луиз. Соин предприятиос лазег шурысь паськыт зарезе потэм кадь луизы. Тани нош ик август вуэ. Коньдон биржаосын кемалась барометр "шыпыт" куазез возьматэ. Но озьы луэ сильтӧл азьын но. Уз гудырты-а нош ик? Улон дышетӥз: берло аръёсы Россиын улӥсьёс сак чаклало долларлэсь солань-талань позыръяськемзэ. Ма луоз ӵуказе, осконо-а манетлы? Ар кутскыку вераллязы гужем-сӥзьыл ӵоже нефть но газ дунъёс кулэсмозы но доллар 35 манет пала вуоз шуыса. Та сярысь поттылӥзы вылӥ кивалтӥсьёсмы но. Соин ик бюджет но кутэмын вал, долларлэсь та вакытэ 30 манетэз ортчонзэ чакласа. Но озьы ӧз луы. Валады, луоз, вераськон мынэ быдэс Россия сярысь. Таӵе дыръя шуиськом: инмар юрттӥз. Озьы-а, тазьы-а но, югдур зэмен ик асьме пала умоен берытскиз. Нырысь ик, нефтьлэн дуныз дуннеын азьло кадь ик вылӥын. Озьыен, Россия му вӧй вузаса уно зарни но валюта люка. Ар кутсконысен та ваньбур 7,1 миллиардлы йылӥз ни. Но шуо, бодылэн кык пумыз. Озьыгес луыса кошке татын но. Доллар каллен лэзиське, манет юнма. Америкалэн валютаез понна тулыс 29 манет сёто ни вал, али 27 манет 90 копейка. Сое басьтӥсь ӧвӧл ни, шуыны луоз. Мултэс доллар понна Центробанк выль манетъёс печатланы кутске (кызьы шуо эмиссия лэсьтэ). Нош таиз ини "вож тыл ӝуатэ" дун будонлы, инфляцилы. Зэмен но май, июнь толэзьёсы инфляция ӝутскиз, кык но ӝыны процент пала вуиз. Солэсь азьло толэзяз одӥг процентэз гинэ ортчылӥз. Та сярысь сюлэмшуген ивортӥз Россиысь Правительстволэн Тӧроез Михаил Касьянов но. Со лыдъя, ар пумын нефтьлэн дуныз кулэсмоз но доллар ӝутскоз шуыса. Но кык ар талэсь азьло луэм учыр, манетлэн куашкамез � дефолт, Россиын уз луы ни, оскытӥз премьер. Нош Центробаклэн кивалтӥсез кескич Виктор Геращенко телеэкран азьын кызьы но озьы "усьтӥськиз". Али, пе, долларлэн дуныз 25 манет котырын луыны кулэ. Озьыен, секыт адӟонлы дасяськыса, сое "серметаса" возё, марысь мар ке доллар шуак уз тэтчы, валюта уно люкамын. Москваысь профессор экономика наукаосъя доктор В.Веснин "Экономика и жизнь" газетын пусъе, долларлэн дуныз, пе, али 17-18 манет луыны кулэ. Та гажано газет ик ивортэ Госкомстатлэсь лыдпусъёссэ. Соя проимышленной производство берло кык толэзь куспын 10 процентлы кулэсмиз. Нош Правительстволэн вице-премьерез, Коньдон ужпумъя министр Алексей Кудрин, тае адӟымтэ улэ кариськыса, алигес ивортӥз экономикалэн юнмамез сярысь. Тӥни сыӵе пӧртэм веранъёс. Валамон, кытӥяз кивалтӥсьёсмы сьӧдэз тӧдьыен адӟемзы потэ, югдурез куд-ог дыръя чеберъяса возьмато. Калыклэсь мылкыдзэ сӧремзы уг поты, лэся. Коньдон ужпумъёсъя тодон-валанзы журналистъёслэн бадӟымесь ик ӧвӧл. Ми учкиськом пӧртэм малпанъёсты, соосты ог-огенызы ӵошатӥськом. Улонлэн мырк палъёсыз милемыз но нырко. Соосты шӧдыса-вераъяса но та удысэз тодӥсь-валась адямиослэсь верамзэс лыдэ басьтыса, милям но малпанмы вордске. Котькудӥзлэн сямен ик. Кивалтӥсьёслэн веранъёсынызы кытӥяз уг но тупало. Тӥляд но, гажано лыдӟисьёс, ӝутэм вераськон пумысен выль малпанды вордскоз, дыр. Манетлэн но долларлэн кусыпсы уго я куске шукке, я сюлэмез няськатэ. Берпуметӥез умойгес ик. Г.ЮСАЕВ. ПАРВИТЕЛЬСТВОЫН Мурт пиналъёсты вордӥськод ке Правительстволэн кенешаз 10-тӥ июле эскеремын "Мурт нылпиосты вордӥсь анай- Атайёслы уждун тырон но соослы льготаос сётон сярысь" законлэн инъетэз. Та Законэз Кун Кенешысь депутатъёс кутӥзы ке, нылпиос но семьяос понна кыл кутӥсь органъёс мурт нылпиосты вордӥсь анай-атайёсын котькуд толэзьлы быдэ уждун тырон сярысь огкыл гожтозы. Со тупаны кулэ бюджетысь уксё басьтӥсьёслэн уждун тыронъя огъя тарифъёсъя сеткалэн 7-тӥ разрядэзлы. Одӥг пиналэз вордэм понна тыриськоз 0,25 ставка, кыкез понна � 0,5, куинез понна � 0,75, ньылез понна � 1, витез понна � 1,25 ставка, отӥяз нылпиослэн лыдзыя со лыдпус пумен бадӟымалоз. Со сяна, мурт нылпиосты будэтӥсь семьяослы санаторийёсы, лагерьёсы, шутэтскон юртъёсы дунтэк ветлыны путёвкаос сётӥськозы. Вить нылпи вордӥсь анай-атайлы дунтэк сётӥськоз улон инты. Правительстволэн Тӧроез Николай Ганза законлэн инъетэзлы вылӥ дунъет сётӥз. Калыклэсь узырлыксэ утён вылысь Со нуналэ ик Правительстволэн Президиумезлэн заседаниез ортчиз. Та дыре шаерамы архологияя, архитектурая, историяя, искусствоя кык сюрслэсь уно памятникъёс лыдъясько. Удмуртиысь калыклэсь культурая узырлыкъёссэ кун ласянь утёнэз кужмоятон вылысь, Правительстволэн постановлениезъя культурая министерстволы косэмын 1-тӥ сентябрёзь программа дасяны. Ужалоз нимысьтыз комиссия военнослужащийёслэсь, запасэ келям адямиослэсь, соослэсь семьяоссэс улон-вылонын шуг-секытъёслэсь утён вылысь, Правительстволэн постановлениезъя кылдытэмын нимысьтыз комиссия. Соин кивалтэ Правительстволэн Тӧроезлэн воштӥсез Виктор Шудегов. Президиумын эскеремын мукет ужпумъёс но. Удмурт Республикаысь Правительстволэн пресс-службаез. ШӦКЫЧ Узыри Серемес верос Узырмеме потэ, ой, потэ. А кинлэн туала арын уз поты? Тӥляд но потэ, дыр, о-о ведь? Куинь нунал толэзь шоры учкыса сылӥ. Куинь нунал Занчура ошмесысьтымы гинэ ву юыса улӥ. Юрттӥз. Ӟеч малпан йырам лыктӥз. Кунгож сьӧры дефицит поттоно. Тараканъёсты но урбоосты. Но та дефицит асьмелэн но туэ сюрес вылын уг костаськы вылэм. Вань тодмоосы дортӥ ортчи, нокинлэн ӧвӧл. Кыдёкысь гуртэ потӥ. Татын но буш, сютэм улонлэсь ваньзы пегӟиллям, адямиослы асьсэлы но номыре сиыны, пе. Гуртоос убиръёссэс ульча пумозязы ик келяса ветлӥллям, соосыз горд ныркышетъёсынызы шонаса кошкиллям. Но мыным удалтӥз. Сю аресъем Офонач сомында ар ӵош улэм бускельёссэ бӧрдыса но кызьы кошкыны ӧвӧл лэзем. Соосын ӵош одӥг тусьтыысь сием, одӥг ӵашаысь юэм. Ачиз гур вылын, соосыз гур сьӧрын улӥллям. Озь но тазь валэктӥ Офоначлы, туж, пӧй, эшъёсыд кулэ вал кунгож сьӧры поттыны, вож коньдон жильдыны. Вот куасалскем карнан, тӧл шорын сылӥсь пурысьтам писпу кадь ӟукыртэ, а отчы ик. - А мыным со понна кӧня процент усёз? - Кӧня кулэ? - Кулӥ ке, мраморлэсь гробын ватэ, нумыръёс медаз сие. Шайвылам но мрамор плита пуктэ. Ӟеч улонэз ӧй адӟылы, сопал дуннее коть узыр мед кошко. Дас арганчиез вае, шудыса-кырӟаса мед келялозы. Пересьлэн йыр зол ужа... Соглаш луи, кытчы пырод. - Я, соку Урбиез но Урбаез кут, со сяна, Тариез но Ториез. Кышноен картъёс соос. Егитэсь на. Пиналъёссы но сэзесь. Кер уд пот кунгож сьӧрын. Кема ужано луиз гур сьӧрын улэмъёсын. Югыт дуннее поттоно ук. Валэктӥ, кытчы мыномы, ма отын каромы. Кызьы астэ возёно, кыӵе отын уло. Сак луоно, шуи. Политикаын югдурез валэктон вылысь, телевизорме ӧй ик кысылы. Радио но кылзытӥ. Арня ортчыса кылӥсько: тараканъёсын урбоос даллашо, жугиськыны дась. Пӧртэм партиос понна луиллям. Кин вож флаген бызьылэ, кин гордэн... Радио-телевизорез кысоно луи. Культуралы но дышетӥ. Сиськемзы бере ымдуръёссэс ӵушылыны косӥ, коробка сэргы, одӥг интые педло потаны кури. Штора отчы оши. Ческыт сюдӥ, быгыль-быгылесь медло. Ваньзылы костюм вури. Одӥг пол вераськемзэс кылӥсько. Тараканъёс лабырто: - Ку-о меда кунгож сьӧры поттозы ин. Сервалат, окорочка сием, коньяк юэм потэ. - Тори, кылзы, отчы вуим ке, политической убежище куром, ятэ. Нош пиосмурт урбо коробка котыртӥ данъяськыса вамышъя: - Всё, кунгож сьӧры гинэ потом, соку ик тонэн люкисько. Окмоз сисьмем коркаосын улыны. Отын ӟечсэ быръё, ваннаен, унитазэн, газэн... Кышно векчи кускозэ шедьто. Тынад шумес пасьта кӧтыд сяна, номырид ӧвӧл. Кукъёсыд сушка кадь кырыжесь, векчиесь. Нокыӵе причёска... Што за нылкышно тон. Ялан горд тусо. Я, кунгож сьӧры вуылӥ чудо-юдоосме возьматыны. Зверинеце кадь ветлӥзы адямиос. Трос доллар жильдӥ. Долларъёс гинэ ӧй, торикъёсы-урбикъёсы но трос гинэ люкаськизы. Оло кунгож сьӧры потыкузы-а кӧтоесь вал ни, оло отын-а иностраннной кибыосын кушласькизы? Кин тодэ на. Кудӥз мумы-бубыосынызы, политической убежище курыса, отчы ик кылизы. Мыным жаль ӧвӧл, маке шат. Кӧняез ке берытскизы, гуртын, пе, начар ке но, умойгес. Офоначлы но процентсэ сётӥ, мрамор басьтыса нуи. Арганчиослы но азьлогес ик доллар сётӥ. Олексанэным ӝӧк сьӧрын пукиськом, окорочка, икра, колбаса сииськом. Кӧё-вӧё улӥськом. Кылемзэ долларъёсмес кышъям гын сапеге понӥм но гур улэ зӥргытӥм. Кин валатскоз отысь утчаны? Одӥг лушкаськись но уз шедьты. Кӧня ке улыса, коньдонмы быриз. Доллар кулэ луиз. Олексанэ гур улысь кочергаен гын сапегез мырдэм кыскиз. Кизэ сапеге донгиз но, синъёссэ золтыса, шорам учке, ымзэ, вуысь поттэм чорыг кадь, выретэ. - Ха-на, ха-на... Ӝогак дораз мынӥ, гын сапегысь ваньзэ куртки но... урбоос но тараканъёс куашказы. Гимзит... Кӧтъёссы вож-вожесь. Одӥг доллар но ӧвӧл. Одӥгез тужгес зӧкез киоссэ кусказ кариз но огзэ пыдзэ азьпала пуктыса шуэ: - Ми дармоедъёс ӧвӧл, мумы-бубыосмылэсь ужам коньдонзэс сиимы. Асьмелэсь паймес! - Рабовладелецъёс! Рабовладелецъёс! - кесяськыны кутскизы ук! Йыры курен ваньзэ ӵужонэн ӵужыса пезьгытъяй. - Мынэ мумы-бубыосты доры! Котькызьы мед потозы кунгож сьӧры. Нош ми кызьы рубыленымы улӥмы, озьы ик улом. Картош мерттом, пызь басьтыса нянь пыжом. Озьы ик улом, Олексанэ, улом... Эмма ЗАГРЕБИНА. Шудтэм учыръёсты алон вылысь Удмурт Правительстволэн Тӧроез Николай Ганза 12-тӥ июле городъёсысь, районъёсысь, МВД-лэн ёзъёсысьтыз кивалтӥсьёсын селектор пыр кенеш ортчытӥз. Отын со мур сюлмаськемзэ вераз республикаямы террористической актъёсты алонын кылдэм югдур но та удысын нюръяськонлэн кылямез пумысен. Сое умой возьматӥз Завьял, Пичи Пурга но Якшур-Бодья районъёслэсь ужамзэс эскерон но. Кызьы пусйиз тӧро, сюрс ньыль сю корка сигъёс но гулбечъёс куалак пась уло. Трос ӧвӧл ке но со, шудтэм учыръёслы тырмыт. Озьы ик калык хозяйстволэн мукет валтӥсь удысъёсаз но данак тырмымтэос шараямын. Соин ик Николай Ганза интыосысь аскивалтонъя органъёслэн йыръёссылы вазиськиз, террористической актъёсты алон вылысь миым сенятбре Правительствоен кутэм постановленилэсь куронъёссэ одно ик быдэъсяны кулэ шуыса. Озьы ик со куриз администрацилэсь йыръёссэс пӧртэм предприятиослэн но организациослэн турлы ваньбур возись кивалтӥсьёссы азе та пумысен чурытэсь куронъёс кутыны. МВД-ын ужасьёслы ӟеч но ужез умой радъяса ужамзы понна тау каремзэ вераса, тӧро кенеше лыктэмъёслы вазиськиз калык пӧлын валэктон удыслэсь иворъёс вӧлмытӥсь ёзъёс пыр нуонлэсь кулэзэ. Та ӵектон умоен лыдъямын. Малы ке шуоно, террористъёс амалъёссэс воштӥзы но котькыӵе ужрадлы дась. Террористической амалъёс луыны быгатозы трос калык интыосын � рынокъёсын, вокзалъёсын но нылпи учреждениосын. Уй пал Кавказын югдур ӟырдамен, террористической актъёс луыны быгатозы Россилэн мукет регионъёсаз но. Соин Правительстволэн тӧроез МВД-лэсь министрзэ Владимир Щербаковез куриз та пумысен кык арня куспын одӥг пол иворъёс сётъяны. СООБЩЕНИЕ ИЗБИРАТЕЛЬНОЙ КОМИССИИ УДМУРТСКОЙ РЕСПУБЛИКИ "О выдвижении и регистрации кандидатов на должность президента Удмуртской Республики" С 21 июня 2000 года началась избирательная кампания по выборам президента Удмуртской Республики. С этого момента началось и выдвижение кандидатов на должность президента Удмуртской Республики группами избирателей, избирательными объединениями, избирательными блоками. Порядок выдвижения и регистрации кандидатов подробно регламентирован ст. ст. 32-38 Закона Удмуртской Республики "О выборах президента Удмуртской Республики" (далее - Закон), а также принятыми во исполнение названного Закона разъяснениями порядка выдвижения и регистрации кандидатов на должность президента Удмуртской Республики (утв. Постановлением Избирательной комиссии Удмуртской Республики � 5.9. от 26 июня 2000 года), которые содержат образцы документов, представляемых инициаторами выдвижения и кандидатами на этапе выдвижения и регистрации. В связи с многочисленными обращениями Избирательная комиссия Удмуртской Республики разъясняет, что инициаторами выдвижения кандидатов на должность президента Удмуртской Республики могут выступить: группа избирателей, избиратель, сам кандидат, избирательное объединение, избирательный блок. С целью выдвижения кандидата на должность президента Удмуртской Республики от группы избирателей, граждане Российской Федерации, постоянно или преимущественно проживающие на территории Удмуртской Республики и достигшие возраста 18 лет, проводят собрание, на котором принимают следующие решения: об образовании инициативной группы избирателей; о выдвижении кандидата на должность президента Удмуртской Республики; о назначении уполномоченных представителей инициативной группы избирателей. Указанные решения должны быть оформлены протоколом собрания группы избирателей. Уполномоченный представитель инициативной группы избирателей не позднее чем за 60 дней и не ранее чем за 70 дней до дня голосования (6.08.2000 г. - 15.08.2000 г.) передает в Избирательную комиссию Удмуртской Республики следующие документы: - письменное уведомление инициативной группы о выдвижении кандидата на должность президента Удмуртской Республики; - протокол собрания инициативной группы избирателей; - оформленные в простой письменной форме доверенности на уполномоченных представителей инициативной группы избирателей; - заявление кандидата о его согласии баллотироваться. Сбор подписей избирателей в поддержку кандидата начинается со дня уведомления инициативной группы избирателей о выдвижении кандидата Избирательной комиссии Удмуртской Республики. Выдвижение кандидатов непосредственно избирателями производится также путем самовыдвижения и по инициативе одного избирателя не позднее чем за 60 дней и не ранее чем за 70 дней до дня голосования. Об инициативе выдвижения кандидата избиратель письменно уведомляет Избирательную комиссию Удмуртской Республики и представляет заявление кандидата о его согласии баллотироваться. Сбор подписей в поддержку выдвижения кандидата одним избирателем начинается после представления в Избирательную комиссию Удмуртской Республики вышеуказанных документов. При самовыдвижении кандидат лично передает в Избирательную комиссию Удмуртской Республики уведомление о начале сбора подписей и заявление кандидата о его согласии баллотироваться. Сбор подписей в поддержку самовыдвижения кандидата начинается со дня представления в Избирательную комиссию Удмуртской Республики вышеуказанных документов. Выдвижение кандидата избирательным объединением, избирательным блоком производится после 21 июня 2000 года. Решение о выдвижении кандидата избирательным объединением принимается тайным голосованием на съезде (конференции) избирательного объединения либо на конференции (собрании) регионального отделения общероссийского, межрегионального избирательного объединения и оформляется протоколом. Уполномоченные представители избирательного объединения не позднее чем за 60 дней и не ранее чем за 70 дней до дня голосования представляют в Избирательную комиссию Удмуртской Республики следующие документы: протокол съезда (конференции) избирательного объединения (конференции (собрания) регионального отделения общероссийского, межрегионального избирательного объединения), содержащий решение о выдвижении кандидата, нотариально удостоверенную копию свидетельства о регистрации политического общественного объединения, нотариально удостоверенную копию действующего устава политического общественного объединения, список уполномоченных представителей избирательного объединения, заявление кандидата о согласии баллотироваться, согласие уполномоченных представителей осуществлять соответствующую деятельность. Кандидат может дать согласие баллотироваться только одному избирательному объединению, избирательному блоку. Сбор подписей в поддержку выдвижения кандидата начинается со дня регистрации уполномоченных представителей избирательных объединений. Уполномоченный представитель избирательного объединения - лицо, уполномоченное решением съезда (конференции) избирательного объединения либо решением органа, уполномоченного на то съездом (конференцией) избирательного объединения в соответствии с Законом представлять избирательное объединение по всем вопросам, связанным с участием избирательного объединения в выборах президента Удмуртской Республики. Уполномоченные представители избирательного объединения подлежат регистрации Избирательной комиссией Удмуртской Республики. Избирательный блок - добровольное объединение двух и более избирательных объединений для совместного участия в выборах президента Удмуртской Республики. Решение о вхождении в избирательный блок принимается на съезде (конференции) каждого из избирательных объединений (с указанием наименований тех избирательных объединений, с которыми предполагается создать избирательный блок), после чего представителями этих избирательных объединений подписывается совместное решение о создании избирательного блока. Для регистрации избирательного блока его уполномоченный представитель представляет в Избирательную комиссию Удмуртской Республики следующие документы: нотариально удостоверенные копии уставов политических общественных объединений, вошедших в избирательный блок; нотариально удостоверенные копии свидетельств о регистрации политических общественных объединений, вошедших в избирательный блок; протоколы съездов (конференций) избирательных объединений с решениями о вхождении избирательных объединений в избирательный блок; совместное решение о создании избирательного блока, подписанное представителями избирательных объединений и заверенное печатями этих избирательных объединений. Избирательный блок подлежит регистрации в Избирательной комиссии Удмуртской Республики не позднее чем в пятидневный срок после представления соответствующих документов. Данные документы могут представляться одновременно с представлением документов о выдвижении кандидата, но не позднее указанного представления. В соответствии с п.2 ст.30 Закона уполномоченные представители избирательного блока назначаются решением съезда (конференции) представителей избирательных объединений, вошедших в избирательный блок, или представителей избирательных объединений, вошедших в избирательный блок. Порядок регистрации уполномоченных представителей избирательного блока аналогичен порядку регистрации уполномоченных представителей избирательных объединений. При выдвижении кандидата избирательным блоком лицо, намеченное к выдвижению кандидатом от избирательного блока, должно быть поддержано тайным голосованием на съезде (конференции) каждого из избирательных объединений, вошедших в избирательный блок. На указанном съезде (конференции) утверждаются также представители, уполномоченные принять решение о выдвижении кандидата от избирательного блока. Решение о выдвижении кандидата избирательным блоком принимается на съезде (конференции) представителей избирательных объединений, вошедших в избирательный блок и оформляется протоколом. Уполномоченные представители избирательного блока не позднее чем за 60 дней и не ранее чем за 70 дней до дня голосования представляют в Избирательную комиссию Удмуртской Республики следующие документы: решение съезда (конференции) избирательного блока о выдвижении кандидата, протоколы съездов (конференций) избирательных объединений, вошедших в избирательный блок, с решениями о выдвижении лица, намеченного к выдвижению кандидатом от избирательного блока; список уполномоченных представителей избирательного блока; заявление кандидата о согласии баллотироваться. Избирательная комиссия Удмуртской Республики в пятидневный срок рассматривает представленные ей документы и принимает решение о регистрации уполномоченных представителей избирательного блока либо мотивированное решение об отказе в регистрации уполномоченных представителей избирательного блока. Сбор подписей в поддержку кандидата, выдвинутого избирательным блоком начинается со дня регистрации уполномоченных представителей избирательного блока. В соответствии с пунктом 1 статьи 35 Закона кандидат, избирательное объединение, избирательный блок, инициативная группа избирателей, избиратель, выдвинувшие кандидатов, обязаны собрать в поддержку кандидата не менее десяти тысяч подписей избирателей. Форма подписных листов для сбора подписей в поддержку кандидата приведена в приложениях �� 1 - 4 к Закону. Формат подписного листа -Ә (стандартный машинописный лист). В соответствии с п.1 ст.36 Закона для регистрации кандидата кандидат, уполномоченный представитель избирательного объединения, избирательного блока, инициативной группы избирателей, избиратель, выдвинувший кандидата, не позднее чем за 30 дней до дня голосования (не позднее 14.09.2000 года) до 18 часов представляет в Избирательную комиссию Удмуртской Республики следующие документы: а) подписные листы с подписями избирателей в поддержку выдвижения кандидата; б) протокол об итогах сбора подписей избирателей в двух экземплярах по форме, установленной Избирательной комиссией Удмуртской Республики; в) информацию об изменениях в сведениях о кандидате; г) первый финансовый отчет кандидата; д) сведения о доходах и об имуществе, принадлежащем кандидату на праве собственности, в порядке, предусмотренном Федеральным законом "Об основных гарантиях избирательных прав и права на участие в референдуме граждан Российской Федерации". Подписные листы, представляемые в Избирательную комиссию Удмуртской Республики, должны быть сброшюрованы и пронумерованы. Количество подписей избирателей в поддержку кандидата, содержащееся в подписных листах, представляемых в Избирательную комиссию Удмуртской Республики, может превышать необходимое для регистрации количество подписей (10000 подписей избирателей), но не более чем на 15 процентов (не более 11500 подписей избирателей). Избирательная комиссия Удмуртской Республики проверяет соответствие порядка выдвижения кандидата, избирательных документов, представленных на регистрацию кандидата, требованиям Закона, а также достоверность сведений, содержащихся в подписных листах в поддержку кандидата по каждому кандидату, избирательному объединению, избирательному блоку, инициативной группе избирателей, избирателю, представившим документы на регистрацию кандидата. В соответствии с п.3 ст. 37 Закона проверку достоверности подписей избирателей и соответствующих им сведений, содержащихся в подписных листах, проводит созданная по решению Избирательной комиссии Удмуртской Республики рабочая группа из числа членов Избирательной комиссии Удмуртской Республики, работников ее аппарата и привлеченных специалистов. По результатам проверки достоверности подписей и сведений, содержащихся в подписных листах, подпись избирателя может быть признана достоверной либо недостоверной. Избирательная комиссия Удмуртской Республики не позднее чем через 5 дней после приема подписных листов и иных необходимых для регистрации кандидата документов принимает решение о регистрации кандидата либо мотивированное решение об отказе в регистрации кандидата. Каждому зарегистрированному кандидату Избирательная комиссия Удмуртской Республики выдает удостоверение о регистрации с указанием даты и времени регистрации. Суредаз паллян киын но Кин тодэ, азьланяз умойгес улыны кутскимы ке, тӥ но Россилэн пӧртэм сэрегъёсаз ветлоды. Ми, мӧйы ветеранъёс, азьвыл аръёсы коть шутэтскыны ветлыны быгатӥмы. Малы ке шуоно, соку билетъёс дунтэм вал. Шуд усиз Санкт-Петербурглэн пӧртэм интыосаз экскурсие ветлыны. Мон ноку но уг вунэты Репино курортной посёлоке вуылэмме. Татын тодматски суредасьлэн И. Е. Репинлэн "Пенаты" музей-усадьбаын улэм иинтыеныз. Татын Илья Ефимович улэм 1900-тӥ арысен 1930-тӥ арозь. Отчы ик сое ватӥллям. Художниклэн шайвылаз бюст пуктэмын. Экскурсовод милемлы Репинлэн улэмез но солэн суредъёсыз сярысь пыр-поч мадиз. Вуоно художник вордскем 25 июне 1844 арын Украинаысь Чугуевоын. Солэн атаез, Уланской полкысь валъёсын вузкарем. Пичи дыръязы Репин яратэ вылэм кагазлэсь валъёс вандылыса, укнояз лякылыны. Солы буёлъёс кузьмазы бере суредан борды туж мылысь-кыдысь кутскем. Илья Ефимович суредась луыны малпанзэ быдэстон понна художественной Академие мыныны малпаз. 1863-тӥ арын со Петербурге лыктыны быгатӥз, пыриз И. Н. Крамскойлэн школаяз. Нош январе 1864-тӥ арын сое академие кутӥзы. Баржаез кыскись бурлакъёс сярысь суредзэ Репин малпаз Нева шур дурын соослэсь секыт ужзэс адӟемез бере. 1871-тӥ арын Репин художествоя академиез быдтӥз. Конкурсын "Воскрешение дочери Иаира" ужезлы Илья Ефимовичлы бадӟым зарни медаль сётэмзы юрттӥз кунгож сьӧры мыныны. Куинь ар ӵоже Парижын улэмез бере, дораз, Чугуевое, бертӥз. Татын уно суредъёс кыдытӥз. Репинлэсь "Крестный ход в Курской губернии" ужзэ туж вылӥ дунъяз художник но критик В. В. Стасов. Калыклы тужгес но кельшо солэн "Иван Грозный и сын его Иван", "Запорожцы пишущие письмо турецкому султану", но мукет суредъёсыз. Репин кема улӥз. Котькуд минутсэ со яратоно ужезлы сётӥз. Трос ужаменыз, пересьмем бераз солэн бур киыз куасьмыны кутскиз. Соку Илья Ефимович дышиз паллян киыныз суреданы. 29 сентябре 1930-тӥ арын Репин кулӥз. Солэсь трос ужъёссэ адӟыны быгатоды Третьяковской галереяысь но Ӟуч Музейысь. В. Чернов. Журналистъёс - "Ижстальын" Андан ӵыжатӥсьёслы - 240 ар Тӥни таӵе муген журналистъёс алигес вуылӥзы усьтэм амалэн ужась акционер огазеяськонэ. Солэн валтӥсь директорез Валерий Моисеев люкаськемъёслы рос-прос мадиз предприятилэн ортчем сюресэз но туннэ ужъёссы сярысь. Пумиськонэ озьы ик ветлӥзы нырысетӥ воштӥсез Геннадий Колесников но заводысь музон кивалтӥсьёс. Зэмзэ но, оло, уд но оскы, нош 1760-тӥ арын Иж шур дурын, Елизавета Петровна Эксэйлэн указэзъя, кутскиз корт поттон завод пуктон. Та дыр куспын со луиз усто туала нимаз ӟеч андан ӵыжатӥсь предприятие. Со лэсьтӥське плазма амалэн но металлургия удысын одӥгез валтӥсь огазеяськонлы пӧрмиз. Продукцизэ Россиын гинэ ӧвӧл, быдэс дуннеын яратыса басьто. Мугез тодмо: андан ӵыжатӥсьёс котьку ӟеч продукция потто. Та уж кутскиз Андрей Дерябин бордысен. Со пуктӥз Ижын ож тӥрлык поттонъя завод. Тӥни со дырысен татысь металлургъёс ож тӥрлык поттонлы тыршо. Революцилэсь азьло но, собере но Россиысь ож тӥрлык лэсьтӥсь заводъёслы ӟеч корт сётэ "Ижсталь". Огазеяськонын вордскизы выль цехъёс. Отысь оборудование тупа наукалэн но техникалэн куронъёсызлы. Завод войналэсь азьло ик машина бичасьёслы ӟеч андан сётэ, нош война вакытэ обороналэсь вань куронъёссэ дыраз но умой быдэсъя. Тӥни со понна 1944-тӥ арын Ижысь андан ӵыжатӥсьёслы Ленин орден сёто. Предприятие ялан азинскиз, выль амалъёсты пыӵатӥз. 1960-тӥ арын со 200 ар тырмонзэ сӥё-дано, выль вормонъёсын пусйиз. Заводлы сёто Трудовой Горд Знамя орден. Металлургъёс юн кусып возё наукая учреждениосын. Татын нырысьёсыз пӧлын ужаны кутске дугдылытэк андан ӵыжатон установка. Соин ӵош ик заводлэн одӥгаз цехын вордске электрошлаковой амал. Завод котькинлэсь азьло поттэ синтетитческой шлакъёс, пыӵатэ андан ӵыжатон кабзэ выль амалъёс. Соос пӧлысь одӥгез - АСУТП (производствоез радъяло автоматъёс). Куатьтонэтӥ аръёсы завод странаямы нырысьсэ ӝутэ ӟеч ёз но волятэм "серебрянка" поттонъя цехъёс. Со лэсьтӥське юн ӟеч, сыномисьтэм анданлэсь. Озьы ик вуттэмын 20 тоннаен но электроконтактной станъёс. Выль азинсконъёсыз заводлэн пусъемын Октябрь Революция орденэн. Со 1971-тӥ ар. Та дыре металлургъёс вутто моторъёслы паньгатэм корт лента поттонъя цехсэс но "250" станзэс. Странаямы татын нырысьсэ дугдылытэк корт ӵыжатон (прокат) кутскиз. Тӥни со ваньмыз юрттӥз 80-тӥ аръёсы странаын 30 процентсэ ӝог вандоно маркаен андан, 20 процент "серебрянка" но 70 процент андан фасонъёс поттыны. "Ижсталь" умой потӥз выльдӥськон аръёсты. Кунгож сьӧрын шедьтӥз рынок. Со понна огазеяськон "Даннэли" фирмалэсь басьтӥз вакуумно-кислородной установка. Таӵе оборудование юрттэ уката ӟеч продукция поттыны но мукет кунъёсы вузаны. Кӧня ке ар талэсь вуттэмын 30 тоннаем электродуговой гур. Со постоянной токен ужа. Россиын со нырысез гур. Огазеяськон ӟеч андан озьы ик лэсьтэ му вӧй поттӥсьёслы, Россиысь чугун сюреслы (МПС-лы) но мукет удысъёслы. Со вуттӥз электродъёс поттон участоксэ. Соин сыномисьтэм кортэз но ӵыжатыны луэ. Туннэзэ вераса, Урал улосвылын азьло 250-лэсь уно андан ӵыжатӥсь заводъёс вал, али 80 пала кылемын. Асьмелэнэзлэсь вамышъёссэ возьматӥм. "Ижсталь" уката ик зол азинскон сюрес вылэ султӥз (оло, осконтэм потоз - Г. Р.) 1990-тӥ арын. Али со арлы быдэ 1 миллион тонналэсь уно андан ӵыжатэ. Котьку дыраз уждун, вань бюджетъёсы но фондъёсы выт тыре. Предприятилэсь вань ӟеч ужъёссэ вераса но уд быдты. Со ялан огсыр умой ужа. Производствозэ паськытэмен ӵош уг вунэты социальной удыссэ. Ӟеч-ӟеч тупатъяз "Ижсталь" йӧ дворецсэ. Умой ужало медико-санитарной частез, "Металлург" санаторий-профилакториез но музонэз. Кызьы верам ни, огазеяськон поттэ нимаз ӟеч андан промышленностьысь валтӥсь удысъёслы, паськытатэ номенклатуразэ, пыӵатэ выль маркаен корт лэсьтонэз. Солэсь продукцизэ данак странаосын ӟеч тодо. Нош 1998-тӥ арын предприятилы "Удмурт Республикаысь устоез экспортер" ним сётэмын. Со озьы ик пусъемын дуннеысь "Зарни Меркурий", Бриллиантовой кизили но музон кузьымъёсын. Али "Ижсталь" огазеяськонэз азинтонъя, сое выльдонъя программа дасямын. Предприятие азьлане оскыса вамыштэ. Та нуналъёсы, Металлургъёслэн нуналзы азьын, андан ӵыжатӥсьёс 240 ар тырмонзэс пусъё. Со Ижен ӵош вордскемын. Предприятиын кивалтӥсьёс пумиськыло андан ӵыжатӥсьёсын, кузьымъёс (часъёс) сётъяло, ужысь устооссэ пусъё. - Одӥг адямиез но уг вунэто. Алигес "Ижстальлэн" дано ужась ним сётон тупатӥзы. Дас мурт сыӵе ним басьтӥзы ни. Соослы сётӥське чебер значок свидетельство но пенсизы вӧзы толэзьлы быдэ 1000 манет коньдон. "Металлург" культура дворцеын бадӟым кенеш орчтоз 14-тӥ июле. Н. Кадышева концерт сётоз. Трос ужрадъёс, шудонъёс луозы Металлург микрорайонын, "Аврора" кинотеатрын но быдэс городын. Предприятиын уго али 14 сюрс мурт ужа. Солэн анданэз кошке США-е, Китае, Малайзие но данак мукет кунъёсы. Газет пыр Ижысь андан ӵыжатӥсьёсты ӟечкыласькомы выль вормонъёсынызы, Металлурглэн нуналэныз но 240 ар тырмонэн, мылкыд кариськом уката ӟеч азинсконъёс басьтыны, сӥзиськом капчи мылкыд, таза но шудо улон. Геннадий Романов. Аполлонъёс но лобало Алигес Удмурт кун университетысь биологъёс Красногорье ёросын ужазы но солэн инкуазеныз тодматскизы. Соос отын аспӧртэмлыко бубылиез пумитазы. Сое нимало "аполлон обыкновенный" шуыса. Бубыли пыртэмын Россиысь Горд книгае. Коллекция люкасьёс сое кутылыны юромо Таджикистанэ ветло. Ёросын озьы ик вань мукет шер пумиськылӥсь бубылиос но � "перламутровка болотная", "желтушка", "голубянка"... А.КАМНЕЕВ. Россия � 62-тӥ интыын Огазеям Нацоислэн Организацизы аспӧртэм эскерон ортчытӥз: азинскемезъя (уровень жизни) кыӵе калык тужгес но азьпалан мынэ? Нырысетӥ вить интыосты басьто Канада, Норвегия, США, Австралия но Исландия. Япония огъя списокын укмысэтӥ интыын сылэ, нош азиат странаос пӧлын � нырысетӥ интыын. Нош СНГ-ысь странаос пӧлын котькинлэсь вилӥе шедиз Белоруссия (57-тӥ интыын), котькинлэсь улӥын � Таджикистан 110 (110-тӥ инты). Россия басьтэ 62-тӥ интыез. Улӥысь 24 чуръёсты басьто Афирка кунъёс, нош берпуметӥ интыын сылэ Сьерра-Леоне. 71 нылпи больницае вуттэмын Сизьымдон куать адями вуттэмын Брянск областьысь одӥгаз больницае. Соос пӧлысь сизьымдон одӥгез � нылпиос. Ваньзы соос шутэтско вал Щебенец посёлокысь "Искорка" лагерьын. Нырысь эскеронъёс возьматӥзы: висёнлэн мугез герӟаськемын улӥ ӟечлыкен сиён-юонэз уже кутэмен. Басьтэмын Интернет пыр. ШӦКЫЧ Вань улытозям малпаськыса улӥ: тани выль нунал вордскоз но, огсыр улон вуоз. Ортчизы аръёс, дасо аръёс, нош ӵуказе нуналлы осконэ, майтал пульы выллем, пусыр-пусыр пилиськылӥз. Мынам гинэ ӧвӧл, дыр, сыӵе улонэ. Мон тодэмъям гинэ, асьмелэн арлы гинэ ӧвӧл, нуналлы быдэ, дыр, мар ке но вылез вуэ. Я уксё воштӥське, я доллар сулятэм выллем дыр-дыр куалекъяса улэ, я выльдӥськон кутске, я дунъёс ӝакы йырез сием бере кадь тордо, я соиз, я таиз... Калык юнме шорысь уг шуы, дыр, я асьмелэн кӧт вия, я коӵыш пия!.. Пумыз луоз-а, уз-а таӵе шулдыр улонлэн? Кин мыным та пумысен валэктон сётоз, а? Е. Наумовалэн гожтэтысьтыз. Майор: - Сержант, тон адямиосты автоматэн кышкатӥд-а, мар-а? Малы базарысь вань калык пегӟе? Сержант: - Ӵукна ик монэ кышно пуриз! Йыркурез кин ке вылэ лэзёно ук. Ка-а-а-ак базар тыр дефо-о-о-лт шуыса кеськи но, мискиньёсыд ог-огзэс лёгаса кӧчизы. Кышкаменым ачим но кыз сямен пограськем. Суредаз В. Шилов. Валтӥсь дэменчи Солы та нуналъёсы 60 арес тырме. Солэн котькуд вамышез мертамын удмурт калыкезлэн ортчоно сюресэныз, ӝоженыз но шумпотонэныз. Сӥзёме солы: осконъёсыз сайкытэсь мед луозы, малпанъёсыз мед быдэсмозы. Альберт Разин быръёнъёс азьын одӥг удмурт кандидат сярысь шуиз вал: "Ӧвӧл солэн уно коньдонэз, ӧвӧл коттеджез, иномаркаез, озьы ке но, та адями туж бай (узыр). Со бай аслаз эшъёсыныз, ӟырдыт мылкыдыныз, ӝот-ӝот басьтӥськыса ужаны быгатэменыз, ас калыксэ гажаменыз". Та кылъёсыз вераны луэ ачиз Альберт Алексеевич сярысь но. Ку, кыӵе югдурын кылдӥз Альберт Алексеевичлэн ас калыксэ ӟырдыт яратон мылкыдыз? Оло нош Кузьымгуртлэн луд бамалтӥз, Балтач урамлэн гуждор вылтӥз гольык пыд бызьылыкуз, оло нош бӧлякъёсын, иськавынъёсын ог-огедлы мылысь-кыдысь юрттыса улон вакытэ, оло нош выль шыд сиыны ог-огдэ ӧтчан дыръя... удмурт сям пыӵаз, зэмос удмурт воргоронэз будӥз. Секыт ож вакытэ но со бере начар улон вие будӥз пичи Алюк (озьы шуо вал сое Кузьымгуртын). Нош юады ке али пичи дырыз сярысь, со шуоз: "Туж шулдыресь вал та аръёс". Угось солы шуд усиз яратыса утись анай вӧзын будыны. Ирина Ивановна котькинлы вань лулзэ-сюлэмзэ сётыса юрттэ вал. Синме потэм йыдыез но, син усемез но пельтыны быгатэ, ӟеч кидыс но уськытэ (вань ёрос тодэ вал, кидысэзлэсь ӟечлыксэ), пудоез но солэн удалтылӥз, вуриськыны, куиськыны но йӧндыре. Пичи Алюк ваньзэ сое адӟыса будӥз, отысен ик ӧръяськыны кутскиз аслаз но кужымез. Атаез но угось Олексей агай, туж йӧно выжыысь вал. Зэмос крестьян адями. Туж умой юртъер но пуктэ, дуриськыны но быгатэ. Кабан сюриз ке, дас ар ортчыса но отчы ву уз пыӵа. Улон радэз тӥясьёс азе � начальник-а со, огшоры адями-а � меӵак куронъёс пуктылӥз. Ас нылпиоссэ но озьы ик будэтӥз. Чурыт куронъёс пуктыса, но ӟеч юртъерын, сӥлен, чорыген сюдыса будэтӥз нылпизэ, нош ачиз 57 арескын чылкак жумммыса кулӥз (быдэс войнаез пыдын пырпотэмын вал со). Сьӧд кужымъёс угось адямилэсь улонзэ урето, тужгес но улон радэз утьыны тыршись муртэ зӥбо. Анаен-атай юн утизы удмурт сямъёсыз. Вашкала дырысен удмурт адямилы туж мур пыӵамын тупаса улон мылкыд. Отысь ик потэ мукет калыкъёсыз гажан но. Олексей агай но Ирина апай ӟеч тодо вал ӟуч но бигер кылъёсыз. Кузьымгурт пыртӥ Ӟачча базаре мынӥсь Базака, Мукшур, Чукырча но мукет гуртъёсысь бигеръёс одно ик дугдо вал та удалтэм удмуртъёслэн юртсы доры, угось соос тодо вал: куно луытэк уз кошке. Зэм но, та коркан соосыз бигер кырӟанэн пумитаса утялтылӥзы. Со ик вань зэмос интернационализм � пӧртэм калыкъёслэн ог-огзэс гажаса, валче улонзы. Но со потэ, уно дауръёс пыр юнмам калык культураез, сямъёсыз утьыса. Тае туж ӟеч вала Альберт Алексеевич. Али со Удмурт кун университетлэн Удмуртлыкез эскерон институтэныз кивалтэ. Ужъёсыз книгаосын поттэмын. Гожтэмъёссэ лыдӟыса потӥды ке, валалоды: ваньмыз со сӥземын калыклэсь самой дуно байлыксэ � зэмос культуразэ утёнлы Удмуртъёслэн вань "дунне адями" шуонзы. Нош кинэ тазьы, таӵе бадӟым кылын ниманы луоз? Инкуазен но, пӧртэм калыкъёсын но огкыл шедьтыны, рос-прос, радызъя ужаны, лэсьтэм ужзэ утьыны, котырзэ чылкыт возьыны, нылпизэ адями карыны, мӧйыосыз гажаны, соослэсь визь-кенеш басьтыны быгатӥсь муртэ. Ас улонзэ со радъя, калык сямъёсыз утьыса. Мукет калыкъёс но дунне адямиез гажало. Кык но ӝыны сюрс ар талэсь азьвыл китай калык сое "жень" шуиз. Таин ик герӟаськемын дышетӥсьсылэн улон рад тупатон амалэз. "Пиез атаезлэсь ужзэ азинтыны кулэ", � шуэ Конфуций. Туннэ нуналын но Конфуцийзэс туж гажало китайёс, солэн дышетэмезъя тыршо улыны. Пӧрме. Али улонзы туж зол азинске. Капитализм шуон но уг куашкаты соосыз, асьмемыз сямен. Угось соос мыно ас сюрестӥзы. Вашкалазэ утьытэк азинскон ӧвӧл шуыса валазы ни Западын но. Оло, соин но тунсыкъясько Альбер Алексеевичлэн ужъёсыныз Финляндиын но, Венгриын но, Германиын но, Америкалэн Конгрессаз но. Нош финн-угор дуннеысь тодосчиос та ужъёсъя рефератъёс гожъяло, диссертациосазы пырто. Гажало Альберт Алексеевичез. Калыкын кемалась тодыса верамын ни: писпу кужмо выжыосыныз. Котькуд калыклэн, адямилэн вань аслаз выжыосыз � со калык сямъёс, йылолъёс, сэбедъёс. Нош ӵуказе нуналыз вань сыӵе калыклэн, сыӵе адямилэн, кин утиз выжыоссэ. Лек сильтӧлъёс ӵем гинэ ортчыло улон вадестӥмы. Тани граждан ож быдтӥз туж унозэ адямиосыз. Отын бырыны шедизы Олексей агайлэн куинез агайёсыз � Микаль, Трока но Вася. Микаль агай вылэм Петроград Советлэн депутатэз, Трока агай � Ӟачча волостьысь одӥгез азьветлӥсь, Вася агай � дышетӥсь. Куиньназы ик соос вылӥллям удмуртъёслэн нырысетӥ ӧтчамазы делегатъёс. Колчаклэн гыжкалъёсыз та куинь агай-вынъёсты но мукет етӥз, дӥсьтӥсь, рос-прос воргоронъёсты ыбылыса, одӥг гуэ куяса кельтӥллям. Власть понна нюръяськон арам каре ӟырдыт сюлмо, сайкыт визьмо, кышкасьтэм адямиосыз, нош бадӟым пукон вылэ ӵем дыръя пуксё ас калыксэс чик но гажасьтэмъёс. Угось идеология но политика Россиын огдышем сяменыз берытске кыӵе ке чиновниклэн кӧттыр понна, бадӟым пукон вылын пукыса дан поттон понна нюръяськонэзлы. Нош быдэс Россиез басьтоно ке, огыр-бугыр улонлэн мугез татын кутскиз ни туж кемалась дырысен. ИЪ дауре славян калыклэн чылкыт культураяз пож ву сямен пыриз варяг культура. Варягъёс пӧртэм калыкъёс пӧлысь потэмын. Огазея соосыз асьсэ калык культуразылэсь палэнскон. Нош кин ке культура дуннеысь усе, со йыртэманы, жугиськыны, ужась адямилэсь ваньбурзэ таланы гинэ но быгатэ. Та пож ву туж мур пыӵаз Россия улосвылэ. Дасез вылэ чӧлтӥськем мурт калыклэн ӵуказе нуналэз сярысь сюлмаськон ӧрысь потэ. Ассэ со туж йӧно, гажано адями кожа (сыӵе вал дворянъёс, чиновникъёс, эксэй). Нош ужась калыкез юнме шорысь курадӟытэ, ӝоже уськытэ. Крестьян калыкед секыт зӥбет улысь потыны тыршиз ке но, ӧз ни быгаты. Угось варяг культура государство кужым луыса юнмаз. Туннэ ке но крестьян калыклы ас мылкыд каремезъя улыны сётэмын ӧвӧл на. Секыт ужаса поттэм сиён-юонзэ солэсь дунтэм дунын качало но, техникаез, лэсьтӥськон арбериосты, тыл кужымез туж дуно дунын вузало. Отын ик политика лэсьтӥсьёс кыл вӧлдо, Россиысь крестьян калык, пе, ужаны уг быгаты, соин начар улэ. Ваньмыз та секыт югдур Альберт Алексеевичлэн сюлэм пыртӥз потэмын. Инмар тазалык мед сётоз солы. Валаса со ӵектэ В.А.Чаяновлэн дышетэм амалъёсыз пала берытскыны. Гуртэз, шуэ со, таркано ӧвӧл. Нош котькуд семья кинэн мылыз потэ, соин огазеяськыны мед быгатож. Кинэн ӵош кариськыса ю-нянь, бакча-сиёнъёс будэтоно, пудо, муш вордоно, асьсэос мед чаклалозы, нош возьёс, нюлэсъёс, шуръёс мед луозы быдэс гурт калыклэн. Озьы ваньмызлы каньыл луоз. Гурт калыклэн самой вылӥ кивалтон органэз гурт кенеш мед луоз. Гурт калык возе на зэмос калык культураез. Татын угось вань на капчи вазиськон, ог-огдэ гажан сямъёс, ог-огедлы юрттыса улон йылолъёс. Гуртын ик адями кырӟась- верась, ужась луыса будэ на. Нош варяг культура выжы лэземын каръёсын. Соин ик татын адямиос ог-огзылэсь кышкаса, дурем ӧсъёс но корт решёткаен возъям укноос сьӧрын уло. Уродэз туж чаляк вӧлме. Жаляса верано, гуртъёсы но вӧлмиз ни каръёсысь жаг. Та пумысен Альберт Алексеевичлэн сюлмыз туж шуг. Будӥсь нылпиосмы, азинскиськом кожаса, эктыны дышетскем интые, эктыны быгатӥсьтэмъёслэн тэтчанъёсазы (дискотекаосы) ветло. Нош улон возьматэ, дискотекае ветлон наркотикъёсын эшъяськонэ, юонэ, йыртэманэ нуэ шуыса. Удмурт калык туж кырӟась. Нош туала гуръёс удмурт шӧмзэс уноез ыштӥзы ни. Ӵем дыръя кырӟан гольтырес нёръянлы берытске. Нош кырӟан со � кыре потэм ӟан (лул) шуэм луэ ук! Удмурт калыкедлэн лулыз тӧлӟиз ке, луоз на-а солэн ӵуказе нуналэз? Удмурт калык � туж мур яратон дуннеын улӥсь калык. Соин ик со "яратӥсько" шуытэк но яратэмзэ шӧдытыны быгатэ. Нош нёръянлы пӧрмем кырӟанын "яратӥсько" шуонэз сяна номыриз но ӧвӧл ни ке, поэзия ыше. Лул поэзимес ыштонмы асьмелэн пырак герӟаськемын Западлэн масскультура шуонэз шоры мальдэменымы. Нош шонерзэ верано ке, отӥын асьсэос тынылӥзы ни (акыльтӥзы) та вульгарной культуразылэсь. Валась адямиос али Западын но, Востокын но тунсыкъясько зэмос культураен. Тани али "Эктон коркамы" ветлӥз Чуваш улосэ. Отын вал быдэс Россилэн фестивалез � "Родники России". Лицейын дышетӥсь турокъёсын одӥг теплоходэ тупаны кемдэм соослы. Туж сак кылзӥськизы, пе, соос удмурт кырӟанъёсыз. Тужгес но кельшем соослы "Марлы тӥяй..." калык кырӟан. Нош эстрада кырӟанэз кылӟиськемзы потымтэ. "Эктон коркаос" сцена вылэ потталлям Кузёбай гуртысь 8 пар эктонэз. Вань люкаськем калык чылкак мальдэм та эктонэн. Сцена вылысь васькемзы бере асфальт вылын но кема эктытӥллям на. Нош асьмеос валаськомы меда, та дунне культуралэн яркыт пиштӥсь марӟанэз шуыса? Альберт Алексеевич сое туж ӟеч вала. Соин ик одно нуыны тыршиз удмурт чеберлыкез Россилэн фестиваляз. Дырзэ но, тазалыксэ но жалятэк тырше со утьыны ас выжыяз будыса волям но юнмам зэмос культурамес. Со ик вань угось удмурт калыклэн ӵуказе нуналэз понна нюръяськон. Со нырысетӥ радын вал, "Дэмен" удмурт культурая огазеяськонэз кылдытыку. Нош "Удмурт кенеш" кылдытон быдэсак солэн нимыныз герӟаськемын. Устав, программа гожтонэз, ӧтчам радъянэз со ас вылаз басьтӥз. Бӧрысьгес удмурт егитъёслы "Шунды" кылдытыны юрттӥз. С.Н.Виноградовен ӵошен Кам дурын вӧсяськонэз но радъязы, "Удмурт вӧсьлэсь" уставзэ гожтӥз, ӧтчам люкаса, сое юнматӥз. Гербер праздникез улӟытӥсь, солы сценарий гожтӥсь но Альберт Алексеевич вал. Котькуд лулсэрез солэн удмурт калыклы ӟеч улон сӥзёнэ кыстӥське. Котькуд вирсэрыз тырмемын ас эшъёсызлы, тодмоосызлы, калыкезлы ӟеч улон сётон мылкыдын. Анна САПОЖНИКОВА, дэменчи. "Удмурт дуннелэн" кубокез понна Куас, куак, чабак, кабак... Люкаськылӥз 2001-тӥ арын гуртысь спортъя тол шудонъёсты дасясь оргкомитетлэн кенешез. Удмурт Республикаысь Правительстволэн тӧроезлэн воштӥсез Виктор Шудегов сое ортчытӥз Якшур-Бодьяын, вуоно ӵошатсконъёсты радъян интыын. Таосыз шудонъёс аспӧртэмесь. Куноос, 1952-тӥ арысен кутскыса, 50-тӥзэ нюръяськозы "Удмурт дунне" газетлэн азвесь кубокез понна. Якшур-Бодья районысь администрацилэн йырыз Юрий Широбоков, республикаын Физкультурая но спортъя комитетлэн тӧроез Гарий Кранер, "Удмурт дуннелэн" валтӥсь редакторез Алексей Шкляев но мукетъёс сётӥзы данак дэмланъёс. Шуом, ужрадэз усьтонэ но ворсанэ пыӵатоно вылэм удмурт шӧм (музон интыосын со сокем ӧй вал). Оло, ӵошатсконлэн программаяз пыртоно йӧ вылын чорыганэз но. Огез кутэ куас, мукетыз - чабак. Омыр али юн ӟырдамын ке но, туннэ ик малпаськоно ни лымы сюрес сярысь. Со ӧжытсэ 4-6 метр пасьта медло. Одӥг интыетӥ паркысь кӧня ке куакез кораны кулэ. Нош со понна, оло, вазиськоно луоз пырак Москвае, нюлэс утисьёс доры. Огъя вераса, чыры-пырыос татын ӧвӧл. Шудонъёсты дасян сярысь рос-просгес ивортом вуоно номеръёсын. Бадӟымесь ужпумъёс сыло милиция азьын. Туннэ ик вераны яра ни: кабакез яратӥсьёслы Якшур-Бодьяын эрик уз луы. А. Сидоров. Архивысь документъёсъя Удмуртия ЪЪ дауре 1925-тӥ ар ВКП(б)-лэн 14-тӥ съездэз ужпум пуктэ аграрной странаез индустриальной карон ласянь. Нырысь ик кулэ вал секыт промышленностез азинтыны, тужгес ик солэсь шорсюлэмзэ - машина лэсьтонэз. Таӵе выль вамышлы Удмуртия дась ӧй вал. Зэм, автономия басьтэм дырысен 5 ар ортчыса, куашкам хозяйствоез пыд йылаз ӝутыны тыршонъёс вал ик. Ӟеч азинскиз интыысь промышленность, тужгес но кирпич шуккон. Нош андан, чугун ӵыжатӥсь предприятиос векаса улӥзы. Ижысь чугун пӧзьтӥсьёслэн ужъёссы вис луылӥзы. Шарканысь таӵе ик завод чугун сюреслэсь кыдёке интыяськемен азинскыны ӧз быгаты, пятилетка пумын та предприятилэн ужазинлыкез, войналэсь азьвылэн ӵошатыса, 70 поцентозь гинэ вуиз. Нош Воткаысь 1922-тӥ аре ворсаськем завод, куинь ар ортчыса, выльысь усьтӥськиз. "Красное Прикамье" газет гожъяз: "Гудок куара 20 версталы шуккиськиз, улосысь калыкез ӧтьыса, мылкыдзэ бугыртыса". Гурт калык ёрмисез гырон-кизён тӥрлыклы. Соин ик заводлы юнматӥзы та ужез. Азьланяз чакламын вал предприятиез паровозъёс но экскаваторъёс поттон вылысь выльдыны. Озьы областьлэн бюджетэз кышъяськыны кулэ вал кадь. Но озьы луыны ӧз быгаты. Удмурт шаере интыяськем выльысь Вотка заводэн Москваысен кузёясько. Оглом шаермы пичиен-пичиен, вамышен-вамышен социализм сюрес кузя мынэ. Выль улонэз радъянын бадӟым инты висъяське егиъёслы. Областьысь комсомол организациын 1925-тӥ арын 8 сюрс пала нылъёс но пиос лыдъясько ни вал. Та вакытэ трос сюлмасько газет-журналъёс но дышетскон книгаос поттонэз умоятыны, 1-тӥ мартэ усьтӥське "Удкнига" кун издание. Ар йылпумъяськытозь, со 11 пумо книга дасяз. "Гудыри" газет потэмен ӵош эшшо выль газетъёс вордско - Алабгоын - "Горд гырлы", Глазкарын - "Азьлань". 14-тӥ декабре республикалэн улоназ вунонтэм учыр вал - областьысь административной ужасьёслэн И съездзы. Горд милициын ужасьёс 8 ар куспын нырысьсэ ужамзылы дунъет басьто. Соос законъёсты быдэсъянъя, йыружъёсын нюръяськонъя ужпумъёсты эскеризы. Н. Красильникова, Удмурт Республикаысь Кун архивысь ужась. Вотка заводэз выльысь усьтыку, митинг дыръя. 1925-тӥ ар. Агитбригадаос, азьлань! Республикаысьтымы эстрадая театръёс но агитбригадаос пӧсьтолэзьлэн 7-тӥ�9-тӥ нуналъёсаз люкаськылӥзы Играла. Куинь нунал ӵоже соос ӵошатскизы асьсэ куспын, быгатэмзэс возьматӥзы ёрос культура юртлэн сцена вылаз. 21 творческой коллектив пӧлысь 8-эзлы калык ним сётэмын. Берлоез таӵе фестиваль ортчытэмын вал 1997-тӥ арын. Соку асьсэды умоен адӟытӥзы Селтаысь, Алнашысь, Сарапулысь, Воткинскысь агитколлективъёс. Туэ Гран-приез нош ик утӥз Селтаысь "Прометей" агитбригада. Озьы ик вормисьёс луизы Уваысь, Дэбесысь но Сарапулысь агиттеатръёс. Та ӵошатскон возьматӥз: агитбригадаос асьме вакытэ но туж кулэ. Но соослэн пуштроссы сярысь мургес малпаськоно, быгатӥсь специалистъёсыз та уже кысконо. Уката ик удмурт коллективъёслы шугъяськоно луэ сценарийёс ӧвӧлэн. Таяз учыре алнашъёс но кезъёс гинэ асьсэды возьматыны быгатӥзы. Т.НИКОЛАЕВА. Кема витем эрик. Мар тон ваёд - шумпотон-а, куректон-а? Амнистия сярысь малпанъёс Тросэз адямиос тодо: Быдӟым Вормонлы витьтон вить ар тырмемен валче амнистия ялэмын. Таин йырин трос юанъёссы но кылдо. Калык та ужрад пумысь оглом висъяське куинь люкетлы. Нырысетӥезлы амнистия кельше, ӵыжы-выжыоссы бертылозы. Кыктэтӥез кышка, малы ке шуоно, пукемъёстэк но гуртын-а, городын-а шуг-секытъёс трос. Куиньметӥезлы маке шат: матысь тодмооссы пытсэт сьӧрын ӧвӧл. Нош мар малпало та югдур сярысь асьсэос право утисьёс? Кылдэм юанъёсын вазиськи Якшур-Бодья районысь прокурорлэн воштӥсезлы Буторин Сергей Николаевичлы. - Мон малпамъя, одно кулэстыны кулэ амнистия улэ сюрись ужъёсты. Соос лекос трос на. Тодам ик уг лыкты таӵе трос йыртэмасьёсты мозмытэммес. Пӧлазы сюро секыт но укыр секыт йыруж лэсьтӥсьёс но. - Кинъёс-кинъёс? - Куинь-вить арлы пуксьылэмъёсын ӵош доразы берто ожмаськонъёсы пыриськемъёс. Наградаен пусъемъёс но Афганистанэ ветлэмъёс пӧлын сыӵеос трос. Вань адями виисьёс но маньякъёс. Ог люкетэз соос потылозы. - Тӥленыды пумиськон азьын юри учки районысьтыды куд-ог лыдпусъёсты. Миым ӝыны арскын 308 умойтэм учыр вылэм, таяз арын сыӵе дыр куспын ик - 252. Амнистиен валче та лыдпусъёс чутрак уз будэ меда? - Будозы. Улон возьматэ: дырызлэсь вазь лэземъёс пӧлысь ваньмыз сямен ик берытско азьло интыосазы. Кык учыр вань ни. Огез пиосмурт меӵак судын амнистие шедиз. Отысен дораз бертыкуз, автобусын одӥг инвалидлэсь паспортсэ но уксёзэ поттэм. Кырмизы. Мукетыз учыр. Лушкаськемез понна 158-тӥ статьяя пуксись пиосмуртэ мозмытӥзы. Эрике потэм нуналаз ик баре пырыса пусъем эрикаськемзэ. Татын, одӥг адямиез кышкатыса, уксёзэ талам. Озьы кыкназы ик колоние пуктэмын. Табере соосты уз ни лэзе. - Условной амалэн пытсамъёс мозмозы-а? - Ваньмыз сямен ик потозы. Нош ми дорын сыӵеос ӧвӧл на. - Малы? - Кыл кутонэз быдэсъянъя ёзын пуке одӥг адями гинэ. Соиз но ялкаре. Уж дуре потӥз ке, ваньмыз ӧръяськоз. - Кӧня адями районады озьы жалямын ни? - Следствие мыныку ик дугдытэмын 23 уголовной уж, мозмытэмын кызь куать адями. - Шумпото-а семьяоссы? - Ку кызьы. Кинлэн пиез йыртэманэ сюрыса пуктэмын вылэм, со туж возьма. Нош тани 119-тӥ статья ке (виыны курдатон), шуг вераны. Адями кышнозэ жугыса, кышкатыса, виёз шуыса возиз ке. Вите меда сое мискинь пал кышно. Оскоды, оло, уд: огезлэн но мыдызлэн асьсэлэн колониен люкиськемзы уг поты. Соослы татын капчигес. Изён инты вань. Сюдо. Ма кулэ на, нокин уг ке витьы. - Зол-а та амнистия шӧдӥськоз ёросты вылын? - Тазэ дыр возьматоз. Гурт - со город ӧвӧл. Городысь адями берытске ке тросэз ик уг тоды азьвыл кырсь ужъёссэ. Нош милям ваньмыз кипыдэс вылын кадь. Бертэм адями шоры кырыж учко. Вераськемзы уг поты. Огъя улон ӧрез шедьтытэк, куд-огез выльысь йыртэмало. Георгий Желудов таӵе лыдпусъёс вераз на. Туннэ пытсэт улын 13 сюрс 628 адями, эрике потыны дасясько 2 сюрс 722-ез. 445 муртлэн пукон дырыз вакчиятэмын. Ӵошатон понна: азьвыл аръёсы амнистия улэ сюрылӥз 150-200 йыртэмась гинэ. *** Быдэ вуымтэос пӧлысь туннэ одӥгез гинэ берен пуктэмын. Нырысетӥез адями лэземын вал 28-тӥ мае, табере соос 325 ни. Озьы оскытӥз огаз пресс-конференциын Югдурез утёнъя министерстволэн кыл кутонэз быдэсъяны управлениезлэн кивалтӥсез Григорий Желудов. Со озьы ик пусйиз: секыт йыруж лэсьтэмъёс (азьло виисьёс, эриктэмасьёс но мукетъёсыз) эрике уз потэ. Григорий Желудов но Якшур-Бодьялась прокурорлэн воштӥсез Сергей Буторин амнистия пумысен пӧртэм кылъёс верало. Нырысетӥез - каньылъёс, кыкетӥез - сюлэмшугъяськытӥсьёссэ. Нош кызьы огшоры калык соосты валаны кулэ? Мон ачим но уг ятвылтӥськы: кинлы ӟеч лэсьтыны выре асьме кун сыӵе амнистия пыр? Эрике потӥсьёслы-а, мукетъёсызлы-а? Йыртэманъёслэн лыдзы будытэк уз кыльы. Соин калыклы секыт йӧтоз. Нош законэз выльысь тӥясьёслы нош ик йыртэмаса шедемзы бере пукон дырзэс йылэтозы. Кин но со шуоз: законъёсты медаз тӥялэ ни. Секыт ужпум. Куд-огезлэн со эрказъяськон сям пушказ, кемалы выжыяськемын, наркотик выллем. Котьма ке но, огшоры адямиосты алэм потэ: эн гочатэ азьвыл йыртэмамъёсты. Ваньбурмес сак чаклам ке, асьмеды асьмеос утён вылысь ужрадъёс кутӥм ке, соослэн но, оло, кизы уз лыды ни. Ольга Кожанова. Иван Пастуховез вунэтоно ӧвӧл Ижевскысь Карл Маркс ульчаысь Горд площадь но революционеръёслы памятник сярысь али тросэз уг тодо ни, дыр. Октябре 1917-тӥын кезьыт тӧл пелтӥз. Ижевскысь завод Уралысь мукет предприятиос сямен ик уен-нуналэн ужаз, азьланяз секыт ожмаськонлы дасяськыса. Мастерскойёсы ӵем ветлӥзы Ижевскысь партийной организациослэн кивалтӥсьёссы И. Д. Пастухов, И. С. Холмогоров но мукетъёсыз. Рабочийёс соосыз ӝутскем мылкыдын пумиталлязы, гажазы умоесь визь-кенешъёс сётэмзы понна. Ог сю ар талэсь азьло 13 арес тырмем бераз заводэ ужаны лыктӥз Иван Дмитриевич Пастухов. Агаезлэн Александрлэн ӵектэмезъя,со мылысь-кыдысь пыриськиз революционной уже. 1905-тӥ арын сое быръё заводысь уполномоченнойёслэн огазеяськоназы. Тани кызьы гожтэ А. М. Фомичев "Ижевская сталь" книгаяз Иван Дмитриевич Пастухов сярысь. 1910-тӥ арын агай-вынъёсыз кыкназэс ик тюрьмае пытсазы. Отын ог ар пукемез бере Иван Дмитриевич Уралысь заводъёсын ужамез бере лыктӥз Петербурге, ужаз Путиловлэн заводаз но мукет предприятиосын, революционной ужлэсь но ӧз люкиськы. Ижевске толэзе Ижевскысь большевикъёс меньшевикъёслэсь люкиськизы, асьсэлэсь огазеяськонзэскылдытӥзы. Большевикъёслэн комитетэнызы кивалтыны оскизы И. Д. Пастуховлы. Июле заводын 500 большевик лыдяськиз. Нуналлы быдэ соослэн данзы рабочийёс пӧлын будӥз но кыдаз. Сентябре- октябре Ижевскысь рабочийёс уллязы временной правительстволэсь комиссарзэ. Власть советлэн кияз выжиз. Ужаны кутскизы рабочийёслэн комитетъёссы. 1918-тӥ арын тӧдьы гвардеецъёс мятеж ӝутӥзы, комендатураез киултӥзы, заводысь нокинэ но потыны лэзёнтэм вылысь проходнойёсы солдатъёсыз пуктӥзы, советской властьлы дурбасьтӥсьёсыз троссэ курадӟытӥзы, виылӥзы. И. Д. Пастухов городэ кылиз. Дораз бер ӝыт вуыса, Воложка палась нюлэскытӥ калгиз. Тӧдьыос сое синтэм-пельтэм утчазы, кутэм понна дас сюрс манет коньдон сӥзизы. Иван Дмитриевич тымет со пала потыны малпаз. Но лодкалэн кузёез тодмаз Ижевскысь большевикъёслэсь кивалтӥсьсэс, соку ик тӧдьыослы со сярысь вераз. Пастуховез нюлэскын кутӥзы но тюрьмае ворсазы, зол жугизы. Сое няньтэк но вутэк селёдкаен гинэ сюдӥзы. Юн большевик соослы номыр но ӧз вера, соин ик тӧдьыос сое, мешоке поныса, улэпкын ватӥзы Карлуткаысь шайвылэ. Солэсь шӧйзэ бератаз ватӥзы революция понна быремъёслэн интыязы. 1933-тӥ аре Ижевскын И. Д. Пастуховлы памятник пуктэмын. Но берло аръёсы ваньмыз сураськиз-пожаськиз. Та памятникез радиолэн юртэз доры ышыг интые пуктӥзы. Со куспын Пастуховлэн кисысьтыз кин ке но штыксэ вандыны вуттӥз. Ӧйтӧд, ма понна нюръяськизы большевикъёс но Быдӟым Отечесвтенной войнаын фронтовикъёс. Мон малпасько асьмелэсь эрикмес но шудмес утён понна. Историез вунэтыны уг яра! В. Чернов. Кылдэмлэсь уд ортчы вылэм "Эх, малпамъя" улыны быгатысал ке, гурезе но берыктысал! Кылдэмлэсь ортчыны уг луы вылэм". Ортчемзэ жаляса тазьы верамез ӵемысь кылоно. Зэмзэ но, тросэзлы мылкыдзыя ужаны, улыны уз кылды. Тани Ува ёросысь Ӝужгес гуртысь Надежда Леонидовна Кудрявцева но кырӟась луыны малпа вал. Со понна солэн котьмаиз вань: Инмар жингрес куара но, йӧно вылтус но сётэм. Но дырыз дыръя кытчы вазиськыны, кытчы дышетскыны пырыны ӧз тоды. 1985-тӥ арын ини, 28 арес дыръяз, "Советской Удмуртия" газетысь адӟиз "Италмас" ансамбльлэсь конкурс сярысь. Мылкыдыз лопырскиз, Иж каре вуиз. Одӥг интые 40 мурт пыриськиз. Надежда Леонидовна конкурсэз капчиен ортчиз, "Италмаслэн" кивалтӥсез Анатолий Васильевич Мамонтов ужаны дораз ӧтиз. Нылкышно шумпотэменыз "инмын лобаса" ветлӥз-сюлмаз кема нуллэм малпанэз быдэсмиз. Но... ваньмыз йырчукин берытскиз: квартира, пе, ӧвӧл, гостиницаын улоно луоды. Кык пиналэн, кузпалэн - гостиницаын! Ма, улон сэрегтэк мурт - со выжытэм писпу кадь ук! Кытӥ ӧвӧл някырскыны но, тӥялскыны но шедёз. Кышномурт сюрес воже кылиз: кудпала вамыштоно? Четлыкын кадь тэтчась сюлэмзэ кырмиз но берен Ӝужгесаз, нылпиосыз, кузпалыз доры бертӥз, столовояз ик ужаны кылиз. Сюлэмзэ буйгатон понна, ваньмон дыръяз клубе поталляз, кырӟам-вераменыз гурт калыксэ шумпоттылӥз. Озьы аръёс ортчизы. Нылпиосыз но быдэ вуизы. Но луыло сыӵе вакытъёсыз, ваньзэ куштыса, гуртысьтыз синтэм-пельтэм пегӟысал, бадӟым сцена вылын вл-вӧл кырӟасал... Кышномурт четлыке сюрем тылобурдо сямен тэтчась сюлэм вылаз кизэ понэ но йырзэ мыкыртэ. Бер ни табере лопыръяськыны - кылдэмлэсь уд ортчы. Галина Романова. Владимир Беломорскихлэн туспуктэмез. Галина Романова КЫЛЧИН ТАКЪЯ Серемес верос Мемей вера вал, мон кылчин такъяен вордӥськемын шуыса. Собере кулытозяз монэ жаляса ӧбкелёз вал: - Э-э, пие, пие, кылчин такъядэ ыштӥ угось мон. Соин таӵе шудтэм луид, дыр, тон. Такъяен ӵош утись-вордӥсь кылчинэд куштӥз, луоз. Зэм но, туж шудтэм мон. Пуклёк зӧкта пасьтала будӥськем. Школаын Токолё Семи гинэ шуо вал. Парта сьӧрын огнам пукылӥ, отын эшъёсылы инты уг тырмы ни вал угось. Нош собере Питрес Сенька луи. Нылъёс шуылӥзы, вӧзад кӧлыны валес, пе, уз тырмы. Озьы ик кышнотэк кыли. Мемей-дядяй пуктэм вӧл-вӧл коркан варгаз ӟазег сямен огнам улӥ. Гуртмы милям пичи, курег гинэ но сое нуналаз дас пол котырытыса вуоз. Соин ик йырам таӵе малпан шуккиз: оло, со такъяме утчано. Мемейлэсь мон юаны вунэтӥськем ку но кытчы ыштӥз со кылчин такъяме. Кин тодэ, оло, сое шедьтысал ке, утись-вордӥсь кылчинэ но берытскысал. Кузьыли кар кадь городысь но милицаос бандитъёсыз куто бере, неужели мон та пичи гуртысьтымы сое уг шедьты. Вень ӧвӧл ук но - такъя. Гуртысьтымы самой мӧйы пересь туно-пеллёмы, Груня апай, доры мынӥ. Озьы но озьы, шуисько, кылчин такъяме шедьтоно вал. - Шедьтом, - шуэ Груня апай, - только нырысь пушкысьтыд убирзэ улляно. - Ма, мар тон, Груня апай, кыӵе убире мынам луоз? - Убир каръяськем пушкад, убир. Уйёсы толэзь шоры учкыса вузэмед потэ, нуназезэ кыӵесэ пыремед потэ. - Кытысь-о тон тодӥськод? - паймыса юасько. - Дунне вылын мон мында улӥд ке, тон но тодод али, - шуэ. Инмар мед утёз ини, малпасько, тон мында улыны. Пыд вылаз куасьмем дауръем писпулы кельшеме уг поты. Со кокырмем мугорад кытыназ медаз лулыд возиське на. - Тазьы лэсьтом, пие, - шуиз Груня апай но кутскиз ук котыртӥм пинал мурт сямен бызьылыны. Колёса сямен питыра, ява. Ачиз пумен киоссэ уллань-выллан лопыръя, бур пала но паллян пала сялӟылэ. Кытысь ке чильымзэ поттӥз. Кыскем ӵынзэ ымныр шорам пельтылэ. - Шорам учкы, пие, шорам. Синмыд но, мугорыд но монъя мед бергалоз. Берганъям-берганъям, синмы бус пыртӥ адӟыны кутскиз, собере тюак кытчы ке гуэ уси кадь. Мур, пеймыт гуысь потыны нокызьы уг быгатӥськы. Адӟисько: мыным кин ке кизэ сётэ. Со ки борды ӝабырски ук! Поттӥз. Учкисько ке, гуртысьтымы Ирка вылэм. Тьфу! Тодысал ке, гуам ик кылльысал. Самой солэн капчи кылызлы луыса мон Питрес Сенькалы пӧрми вал. Гуртысьтымы вань пиослы ним тыриз. Исаськемез понна ми но пунэме ӧм кыле - одӥгмы но кышно ӧм басьтэ. Тужгес но монэ адӟемез уг луы - кыдёкысен мумы курег кадь котканы кутске. Коть пыддэ кияд кутыса пегӟы. Тьфу! Синмы но медаз адӟы вал! Нош али адӟемпотостэм Ирка киме кутӥз, мусо учкиз, ымдуръёсыз тани-тани мынамаз вуозы. Мон но малы ке уг пумитъяськиськы. Мугортӥм таӵе ик пӧсь тулкым ортчиз. Собере Иркалэн небыт ымдурыз мынамаз вуиз. Сыӵе капчи луиз кадь, кутӥ но лобӟи. Иркаен ваче ки кутскыса лобӟим. Ну бергаськом ук, ну лобаськом инбамын! Котырак номыр но ӧвӧл � чагыр инбам � но Иркаен ми! Шарак сайкай, синме усьтӥ - азям кокрок Груня апай. - Сайкад-а, пие. Умой-а вал, пие? - юа. - Умо-ой! - лулскыса шуисько. - Я, султы табере, гуртад берт. Ӵуказе нош лыкты. Груня апай дорысь потыкум адӟисько: урам кузя Ирка лыктэ. Берен берытскыны медӥсько вал ини но, Ирка кеськиз: - Сеньки, мар-о со питрес кӧтыд-о, мар-о виськыны кутскиз? Груня апай дорын эмъяськид? Мукет дыръя, таӵе кылъёсыз кылыса, мон айы ӟазег сямен шиетысал ини. Ачим но уг валаськы, оломар луиз: Ирка вадьсы вуи но шораз учкыса пальпотӥ. Ирка пельпумъёссэ ӝутъяса кылиз. Гуртэ бертыса, котьку сямен ӝӧк сьӧры картошен нянь сиыны пукси. Одӥг ымтыр куртчисько, кык - уг мыны, чыртыям дугдэ. Бакчае потӥ. Оло, выль кияр яке ӵужкушман йыръёно, малпасько. Уг, уг мыны, таосыз но чыртыям дугдо. Озьы ик сиськытэк кӧлоно луиз. Ӵуказеяз нош Груня апай доры лыктӥ, ӝожтӥськисько, сиён уг мыны, шуисько. - Умой, туж умой, - шуэ. - Иське, эмъяськеммы иназ мынэ. Пушкад убиред озьы басылске, сиён уг куры ни. Табере, пие, тазьы каром. Ачид адӟиськод, мынам коркае ачим кадь ик губырскемын ни, гурез но тэшкамын. Берло тани муръёез ӵынэз кыскемысь дугдӥз. Сузяно вал сое, пие. - Сузяно ке, сузяно, нош кызьы? - Липет йылэ тубыса. Векчи кузь зыр йылэ ӵужон думылӥськод но муръё кузя кыскаськод. Мынам ӟуслэсь, корказьлэсь вылӥе ноку но тубаме ӧвӧл бере, малпаса ик йырсиосы выллань ӝутскизы. - Уг быгаты мон, Груня апай, - мыр-мыр пыкиськисько. - Кылчин такъядэ шедьтэмед потэ ке, быгатод, - шуэ. Кытчы пырод, шуд понна мар но уд лэсьты. - Тубыкуд уллань эн учкы, - шуэ Груня апай. - Пиштӥсь шунды шоры учкы. Липетлэн самой йылаз вуисько вал ини, шунды шоры учконъям, синмы мальдӥз, пыд азьме ӧй адӟы ни. Туп кадь уллань питырски. Кыӵе ке небыт куро вылэ усемме, чильымысь ымныр шорам пельтӥсь ӵынэз тодӥсько на. Собере... собере кытысь ке нош Ирка кылдӥз. Куро вылысь монэ ӝутӥз но кыкнамы лобӟимы. Мугор капчи, мылкыд шукыяське... Сайкам берам Груня апайлы кема гинэ ваземе ӧз луы, асме весь чагыр инбамын али кожасько. - Султы, пие, - шуэ Груня апай. - Ӝытозь кӧлӥд ини. Учкисько но, мон липет улысь небыт куро вылын кыллисько, нош шунды берпум тылсиоссэ пазя ини. Ури-бери султӥ. Урамысен нош со Иркаен пумиськи. - Учкы ай, учкы, Сеньки, кӧтыд тыбырад кыстӥськем ук ини, - шуэ. Ачиз нош шорам мыскыл карыса уг учкы, пальпотэ. Мон но пальпотӥ. Гуртам вуи но чик сиськытэк нош кӧлыны выдӥ. Ымам угось пыры но нянь понэме уг поты. Куинетӥ нуналаз Груня апай доры шундыен ӵош лыктӥ. - Умой, пие, умой, - кескич пальпотыса шуэ Груня апай, - пушкысьтыд убиред чылкак басылске ини, ӝужась шундыез но адӟемед луэ ни. Шудэз угось валес вылысь уг утчало. Зэмзэ но ведь, малпасько, ӝужась шундыез адӟеме вунӥз вал ини. Уин кӧлымтэ бере, нуназеозь валесын погылляськисько вал. - Пот ай, пие, бакчае, - шуиз Груня апай. - Ӝужась шунды шоры учкыса пук. Эмез- юмез мед луоз. Нош мон татын ма но со бергало. Учкисько шунды шоры но паймисько: сыӵе со чебер! Нырысь пӧсь-пӧсь гурын ӟырдатэм таба кадь инвис сьӧрысь горд-горд ӝутске, собере пумен ӵужектэ, Иркалэн ӵуж пиштӥсь кышетэзлы кельшыны кутске. Тьфу! Нош ик со Ирка! Йыры кур луыса, шунды палась ик берытски. - Пие, - шуиз Груня апай, - пыр али. Пыри но - коркан Ирка пуке. Груня апайлэн ӝӧк сьӧраз тӧр сэргы пуксем. Шунды кадь пальпотыса пуке. Нош ӝӧк вылын - курег пуз пуштэм, кӧмеч, перепеч, шаньги... - Ортчы, пие, ортчы, - шуэ Груня апай. - Ӧс куспын шудэз уд куты. Кепыраса ортчи. Тани, малпасько, Ирка нош котканы кутскоз. Быдэс мугорыным дасяськи мыскыл кылъёсыз кылыны. Ӧвӧл, Ирка номыр уг вера, шорам учке но пальпотэ. Синъёсыз нош кыӵе чиляло, кӧяло-вӧяло! Амалтэк дораз кыстӥськод. Ӝӧк сьӧры пукси, киосме ал вылам понӥ. Кӧты нош кытчы таӵе бырем? А то пуксьыкум, ӝӧк котьку люкетэ вал. Ирка озьы ик шорам пальпотыса учке, номыр уг вера. Груня апай кытысь ке векчи виятэмзэ поттӥз, котыртӥмы кикыр-кокыр берга-ветлэ. - Юэ-сие, пиосы-нылъёсы, - шуэ. - Шудды кымесады ик гожтэмын. Эн гинэ сое ыштэ. Мар сярысь та Груня апай таӵе вера? Кылчин такъяме шедьтӥз, луоз, малпасько. Сое кутыны дасяськи. - Семи, - синъёссэ кӧё-вӧё кыньыръяса шуэ Ирка, - мон тани тыныд вордскем нуналад кузьым дасяй. Вордскем нуналы? Ма, зэмзэ но ведь. Пушкысьтым убир югыт дуннелэсь кудпала бергамзэ но сайяз вал бере, тодын но со ӧвӧл ни. Ирка нош, Ирка, ӵук шунды кадь ӵыжектӥз, айшет пиысьтыз лемлетэн ворекъясь кыӵе ке арбери поттӥз. - Тани, Семи, тыныд керттӥ, - шуиз но йырам понӥз. - Тулыс-сӥзьыл со йырдэ кезьытлэсь, урод тӧллэсь утёз, нош лемлетэныз шунтоз. Груня апай дорысь ми Иркаен ӵош кунулскыса потӥм. Дунне тӧдьы, ӵуж, горд, лемлет такъяосын ворекъя, нош пушкам утись-кылчинэ шуэ: - Такъяед кияд, эн ышты сое. Журналистъёсын пумиськонъёс Кытчы "ышо" коньдон пытьыос? Чернобыль АЭС-ын пуштэм бервылэз утялтонэ трос адями пыриськиз. Удмуртиысь гинэ отын кык сюрс мурт адями ужаз. Макем кышкыт вал со уж, отчы пыриськемъёс берло гинэ валазы. Радиация улэ сюремъёслэн лыдзы республикаямы арлы быдэ 40 муртлы кулэсме. Чернобыле ветлэмъёслы берло дыре Россиысь уксё республикае дыраз вуэ. Но малы меда сое дыраз уг басьто куд-ог ёросъёсысь чернобылецъёс? Сыӵе ӝожтӥськонэн Эскеронъя кун комитетэ вазиськиллям "Чернобыль союзлэн" Можга ёзысьтыз адямиос. Матысь дыре та ужпумез комитет эскероз, шуиз журналистъёслы солэн кивалтӥсез Александр Владимирович Кузнецов. А. Кузнецовлэн верамезъя, Эскеронъя комитетэ вуись ӝожтськонъёс пӧлысь 80 процентэз зэмало. Вераны кулэ, Кун Кенеш туэ юнматӥз гражданъёслэн вазиськонъёссыя законэз. Ӝоген со кужыме пыроз. Россия Федерациын сыӵе закон кутымтэ. Озьыен, калыклэсь ӝожтӥськонъёссэ Россиын эскеро на СССР-ын кутэм законъя. СССР-лэн 1980-тӥ арын кутэм законэз огласянь чурытгес вал, шуиз А. Кузнецов. Кылсярысь, отын адямиослэн вазиськонъёссыя ужан понна вань кивалтӥсьёслы огкадь дыр тупатэмын вал: пятница, Удмуртилэн законэз со ласянь лябгес. Но кивалтӥсьлэн калыкен ужан нуналэз чакламын ӧвӧл ке, со понна ми солэсь кылзэ юаськом. Нош гожтэтъёсты-ӝожтӥськонъёсты эскерон азьло сямен ик кылемын: котькуд сыӵе гожтэт лыдэ басьтэмын но толэзь куспын эскеремын луыны кулэ. Эскеронъя кун комитетлэн кыкетӥ кварталлэн ужамезлы йылпумъянъёс лэсьтыса А. Кузнецов пусйиз: шараямын бюджет уксёез тус-тас карон. Кулэтэм ужъёссы 6,5 миллион пала уксё кошкемын. Сыӵе учыръёс тужгес но трос шараямын калыкез дышетон удысын (3,5 миллион манет). Азьвыл кивалтӥсьёслэн лэсьтэм янгышъёссы понна кыл кутоно луэ, жаляса верано, выль министрлы. Кыкетӥ кварталын 34 эскерон ортчытэмын. Куинь предприятиосъя лэсьтэм эскеронъёс югдурез утись ёзъёсы келямын. Огез соос пӧлын Кизнерысь нянь басьтон предприятие (ХПП). Кузнецовлэн верамезъя, ХПП-лэсь кивалтӥсьсэ ужысь, дыр, пе, куштоно вал, но выговор сётонэн гинэ буйгатскизы. Предприятиез тямыс ар ӵоже нокин эскерылымтэ, соин но, лэся, татын вань куронъёсты тӥяса ужало вылэм, бухгалтериез нуонын но нокыӵе радлыкез ӧвӧл. Жаляса верано, бюджет коньдонэз умойтэм кутэмзы понна, кивалтӥсьёслэсь кылзэс зол юаны уг луы - законъёсмы сыӵеесь. Соин ик Эскеронъя кун комитет ӵектэ со пумысен депутатъёс азе нимысьтыз законопроектэн потыны. Азьланяз комитет малпа Удмуртиын кутэм программаослэсь быдэсъяськемзэс эскерыны, пыр-почгес учкемын луоз "Удмуртиысь егитъёс" программа, угось со одӥгез бадӟымез луэ. Выль Президентлэн ӵектэмезъя, Лыдъян палатаен али Россилэн азьвыл премьер- министрез С. Степашин кивалтэ. Эскеронъя кун комитетлэн кивалтӥсез алигес соин пумиськылӥз. С. Степашин умой мылкыд кылдытӥз, шуиз А. Кузнецов. Лыдъян палата али куд-ог эскерон ужъёсты нуоз В. Путинлэн куремезъя. Кылсярысь, чакламын эскерыны "Росвооружение" но "Газпром" огазеяськонъёсты, озьы ик Ижевскысь ЭМЗ ("Купол") предпритяиез. Т. Банникова. Нош нылпиос вордӥськозы-а? Кема аръёс ӵоже Россилэн экономикаез мырдэм-мырдэм возиськыны турттӥз. сыӵе ик югдур Удмуртиын но вал. Табере со улӟыны кутскиз. Республикаын но промышленность 130 процентлы будӥз. Кыӵе ужрадъёс табере чаклало экономикаез уката но золгес азинтон понна? Та ужпумез сэрттон-пертчон вылысь, Кун Кенешлэн юртаз люкаськылӥзы экономистъёс, политологъёс, культура удысын ужасьёс, партиослэн но огазеяськонъёслэн кивалтӥсьёссы. Кун Кенешлэн Тӧроез А. Волков ӵектӥз "Удмуртиез азинтон" программа кутыны. Россиысь Правительство экономикаез азинтонъя федеральной программа кутӥз ни, Удмуртилы но бере кылёно ӧвӧл, шуиз А. Волков. Удмуртилэн бюджетаз мултэс коньдон люкаськиз, соин ик быгатӥськом ни кӧнялы ке азьпала учкыны. А. Волковлэн малпамезъя, со программа сӥземын луыны кулэ Удмуртилэн 80 ар тырмонэзлы. Огъя вераса, котькуд удысъя чаклано матысь дыре быдэстоно ужрадъёсты. Шуом, мар пусйымонзэ, бадӟымзэ лэсьтыны луоз куинь толэзь ӵоже промышленностьын, калыкез дышетонын, сюресъёс лэсьтонын но мукет удысъёсын. - А. Волков оскытӥз, вунэтэмын, пе, уз луэ иворъёсты вӧлмытӥсь ёзъёс но. Но нырысь юрттэт сётэмын луоз кунлэн СМИ-осызлы. Ужрадэ люкаськемъёс Удмуртиез азинтонъя программаез кулэен лыдъязы. Огъя ӧрез кӧня ке сураз. Лэсьтӥськонъя 17-тӥ управленилэн кивалтӥсез А. Курбатов гинэ. Сыӵе программаосъя, пе, асьмеос коммунизм лэсьтӥм ини. Кинлы, пе, кулэ быдэстыны луонтэм малпанъёс. Куд-ог вераськисьёс ӵектӥзы ке но, сыӵе программа дасянэз осконо Правительстволы но учёнойёслы шуыса, кенеше люкаськемъёс та ужен кивалтыны куризы А. Волковез. Нош программаез дасяны нимысьтыз кылдытэм группаен кивалтоз Правительстволэн Тӧроезлэн воштӥсез С. Чикуров. Иське, выль программа луоз! Нош ӟеч улонлы оскыса, Удмуртилэн юбилеезлы тросгес вордӥськозы-а меда нылпиос? Т. Банникова. Лушканы, оло, капчигес Туннэ нуналлы Якшур-Бодья ёросын ужтэк кылемен лыдъяське 51 мурт, арлэн кутсконаз вал 94. Районысь кызьлэсь уноез предприятиос вазисько уже интыянъя центре: ужась киос кулэ. Но уж сётӥсьёслы лыктэм адямиос пӧртэм мугъёсъя уг тупало, я соослы толэзяз 200-300 манет уждун уг кельшы. Куд-огез чик кепыратэк шуэ: "Со коньдонэз мон лушканы но быгато". Н. Сергеев. "Мушъёс чурытаськисьёсты уг ярато" Шаерысьтымы ветеринарияя врачъёслэн алигес ортчем семинарзы сӥземын вал кемаласен вунэтэм удыслы - муш вордонлы. Та вакытэ республикаямы 120 сюрс 745 муш семьяос лыдъясько, со пӧлысь 60 сюрс 100-эз нимаз адямиослэн. Но та лыдпуслы оскыны шуггес. Уго берло аръёсы та удысэз умой-умой чаклась ӧвӧл ни. Уг эскеро мукет улосъёсысь ваем муш семьяосты но. Кызьы лыдъя Якшур-Бодья ветстанциысь врач-эпизоотолог Михаил Вахрушев, пӧртэм паласькись висёнъёсты вӧлмытэ Ижевскысь "Пчеловод" магазин. Отын вузъёсты басьто ветеринарлэн документъёсызтэк. Семинаре ветлэмъёс озьы ик тодӥзы, дасямын ни, пе, "Удмуртиын муш вордон сярысь" законлэн инъетэз. Сое кутыны чаклало вуоно арын. Якшур-Бодьяысь валтӥсь нюлэсчи Юрий Вавилов пусйиз: "Муш вордонын сиёнлы но эмъюмлы коньдонэз жаляны уг яра. Мушъёс чурытаськисьёсты но дыртӥсьёсты уг ярато". Бодьяослэн нюлэс хозяйствозы куинь пасека возе. Кылем арын котькинлэсь ӟеч тыршиз мушкась Андрей Демышев. Со котькуд семьяезлэсь 40 кило чечы басьтӥз. Лесхозъя ваньзэ 3 тонна чечы кыскемын. Чаклало на эшшо одӥг муш бакча усьтыны. Со муш палэпъёсын вузкарыны малпа. Уго берло дыре муш вордыны мылкыд карисьёслэн лыдзы ялан йылэ. К. Загребина. "Сибирь тракт кузя" Селтаысь ёрос музейын ортчиз Россиысь художникъёслэн союззылэн членэзлэсь Владимир Зворыгинлэсь "Сибирь тракт кузя" суредзэ возьматон. Художник со бордын ог кык ар ужаз. Отын возьматэмын вашкала сюреслэн ог люкетэз. "Адӟисько пинал кызьпуос. Сӥзьыл, дэри. Куролэсь липетъёсын Чаня-Бия гурт. Сюрес кузя мыно каторгае келямъёс. Пӧртэм нациен адямиос. Азьпалазы удмурт. Ваньзы соос вамышъяло азьланезлы, ӟечезлы осконэн. Соос дась азьланяз но нюръяськыны", - вера Владимир Зворыгин выль ужез сярысь. А. Семакин. Батыр тыпы Оскымон, кужмо, юн тазалыко адями сярысь удмуртъёс шуо: "Со тыпы кадь". Соин но, дыр, та писпу туж трос уг ке но буды, асьме палан улӥсьёс сое гажало, ярато шаерамы. Нимзэ но юнме ӧз сётэ, дыр, дас сизьым гуртлы. Тыпыен мон тодматски-эшласьки пичиысен ик. Сюмси ёросысь Вылынгуртысь бускельмылэн Лади Педорлэн (Владимир Федорович Ивановлэн) бакчаяз будӥз паськыт но ӝужыт пересь тыпы. Солэн вайёсаз ми огпол лэсьтӥмы шудон корка. Отчы котьку шумпотыса тубаллямы, отын шудылӥмы, ӟабыльтӥсь тылобурдоос шоры матысен синмаськыса учкылӥмы. Нош мульыосыз вуо ке, соосты, кузял шӧмзы шоры учкытэк, пушмульыез сямен сиылӥм. Бӧрысь асьме бакчае но мерттӥм. Али но соос ӵыжы-выжымылэн садаз будо, кужым люкало. Сюмси ёросын тыпыос ӵемгес адӟиськыло Калмез шур дурысь Пумси но Удмурт Вишур гуртъёс дорын. Отын улӥсьёс солэн мульыосыныз парсьёссэс сюдо. Асьме республикаын та кужмо писпу уногес будэ Кам шур дурысь Сарапул, Камбарка, Каракулино ёросъёсын. Озьы ик ӧжыт ӧвӧл Можга, Пичи Пурга, Кизнер районъёсын но. Соин но, дыр, тапалась тэльёсын кыр парсьёс но ӵемгес пумиськыло. Соос угось туж зол ярато со улысь мульыосты но губиосты сиыны. Тыпы вӧзын будӥсь пӧртэм мульыё писпуос но губиос туж юнэсь, чебересь, ыме асьмеос пыроно кадесь луо. Та кужмо писпу будэ ньыльдон метрозь. Куаръёсыз но туж чебересь, чиляло. Нош куаръяське-сяськаяське бер, ӵужалэс-пурысь, чурыт кӧмо мульыез 2-3 сантиметр луэ. Кырын вӧл-вӧл будӥсьёсыз котькуд ар уно мульы ваё, нош ӝокыт тэльын таӵеез шергес пумиськылэ. Тыкмылиос (тыпы мульыос) кӧт тырымон луо. Дубилез сяна, отын трос белокез но крахмалэз. Солэсь туж ческыт но адямиез эмъясь кофе лэсьто. Ӵужектыку, коскаку, дэй курадӟытыку, ӟызымыку тыпылэсь кофе умой юрттэ, мугорез юнматэ. Сурет лэсьтыку, туж ческыт кофе пӧрме, отчы ӟеглэсь, йыдылэсь, сезьылэсь, цикорийлэсь но пуныжильылэсь выжызэс понӥськод ке. Та суретэз ӵыжатоно гордэктытозяз. Сьӧдэктытозь возёно ӧвӧл, соку пайдаез ышоз. Кофеез возёно пергаментлэсь лэсьтэм кагазын яке пияла банкаын. Юоно, йӧл, сакыр поныса. Туж ческыт чечы ватсаса но. Тыпылэн пинал сулэз но зол эмъюм луэ. Сое вуэ поныса пӧзьтоно. Кӧня ке пукетыса, ньылонэз гылтоно. Гиндивит, стоматит, ангина соку умой эмъясько. Сул вулэсь лэсьтэм ванна но трос висёнъёслэсь уте. Уката ик ку борды алямъёсызлэсь. Со вуэз юыны туж умой мус, ты висьыку, туберкулёз дыръя. Тыпы куар мынэ бакча сиён, губи сылалтыны. Соин сылалтэм сиён-юон кема уг изъянмы, ческыт зыно, чорк-чорк луэ. Асьме шаерын тыпылэсь юн нокыӵе писпу ӧвӧл. Солэсь лэсьтэм арбериос музъемын но, вуын но уно сю аръёс ӵоже чик сисьмытэк уло. Соосъя асьмеос тодӥськом, кызьы, ма лэсьтыса, ма карыса улӥзы вашкала ӵыжы-выжыосмы. Ма, ачиз но со сюрс арлэсь но кема улэ. Валась тодосчиос Калмез но Вало шуръёс дурысь шедьтысалзы, дыр, сюрс ар ӵоже будэм тыпыез. Малпасько: тунсыко луысал эскерыны-шедьтыны шаерысьтымы тужгес чебер но пересь тыпыез, пужымез, кызэз, кызьпуэз, беризез, бадярез но мукет писпуосты. Озьы адямиос золгес гажаны кутскысалзы инкуазьмес, со сярысь сюлмаськысалзы. Н.ВОЗИСОВ. Шуд сярысь кырӟаз Адямиез ӟеч тодӥськод, уката ик аръёсын одӥг пуртыысь ӝук сииськод ке, со сярысь гожтыны шуг кадь потэ мыным. Оло, кин ке шуоз: кызьы шугомоз, тынад кикур вылад пуктэмын ваньмыз. Пуксьы но гожты. Озьы гинэ ӧвӧл ай. Туж кулэез вератэк кылемлэсь кепырано. Тани мон Илья Андриянович Зорин сярысь азьло аръёсы но верай-гожъяй вал. Нош туэ, вордскемез дырысен 80 ар тырмон нуналъёсы, нош ик киям ручка кутытэк ӧй чида. Илья Андрияновичен мон пумиськи Вавожын. Силкино гуртысь чупырес пияш соку ик син шорам йӧтӥз. Дышетӥсь кыӵе ке юан сётэ ке, со котькинлэсь азьло кизэ ӝутэ вал. Дышетскиз умой, чебер кылъёс веран понна уг гожтӥськы та чуръёсты. Аръёс ортчемъя, ми но будӥм. Мае ке дунъяны, сэрттыны-пертчыны дышим. Огпол мон кие шедиз Михаил Петровлэн "Ошмес син" кылбур сборникез. Жингыртӥсь чуръёс кельшизы, лэся, вожмыт выло книгаен ӧй люкиськылы ни. Со котьку мынам дэра сумкаям вал. Со сярысь кинлы ке но верано ук, сюлэмез вырӟытӥсь кылбур чуръёс пиналъёсты но малпаськыто. Одӥг нунал, урокъёс бырон азьын, Ильялы сипыртӥ: бертыны эн дырты, кенешон вань. Мынам куронэ пияшлы витёнтэм шорысь луиз, шӧдске. Кызьы, пе, мон эшъёслэсь кылём, огнам бертом-а? Озьы шуиз ке но, Илья кылиз. Классын шып-шып ини, дышетӥсь но учительское кошкемын. Ми пуксим солэн ӝӧк сьӧраз. � Малы кыльыны косӥд? � питырес синъёсыныз меӵак учкыса юаз Илья. Мон поттӥ "Ошмес синэз". Тани, шуисько, кыӵе чуръёс гожтэм кылбурчи. Зорин мон киысь книгаез басьтӥз но кема лыдӟыса пукиз. � Сётод-а, мон сьӧрам басьто та книгаез? � куриз со. � Ӵуказе но асьмеос лыдӟом сое. "Ошмес синэз" ми вожмин нуллӥм, я со, я мон сумкаямы понӥськом вал. Нош огпол книга ышиз. Кин кие шедиз со � шарае ӧз поты. Илья со пумысен кема шугъяськиз на. Школа бере сюресъёсмы люкиськизы ке но, кусыпмес ӧм ыштэ. Газетъёсысь лыдӟим ини ог-огмылэсь гожтэм кылбуръёсмес. Илья ӟырдыт сюлэмо адями вал. Со ӧз яратылы вожъяськисьёсты, адями вылэ пож ву кисьтаса чагиськисьёсты. Ӧй вал со вуысь ышыгын кыллись чукырна. Зорин кык удысэз ӵош нуиз, шуыны луэ. Со вал врач, медицина наукаосъя кандидат но кылбурчи. Ӵемысь студентъёслы лекция лыдӟемез яке операция лэсьтэмез бере пуксьылӥз ӝӧк сьӧры кылбур чуръёс "кутаны". Тани кызьы висисез буйгатэ: Валесын кылле висись Операция бере. Нош кин ке шуэ кадь: "Изь, Юнмалоз вань сӥльвиред". Быръем ужзэ гажамез сярысь верало солэн мукет кылбуръёсыз но, соос пӧлын "Госпитальын", "Врачъёс", но мукетъёсыз. Илья Андриянович вань улытозяз капчи сюрестӥ ӧз вамышъя. Военно-медицинской академиез йылпумъямез бере ик лек тушмонлы пумит ожмаськонэ мынӥз. Фронтын солы, хирурглы, трос солдатъёслы но офицеръёслы юрттэт сётоно, пыд йылазы пуктоно луиз. "Госпитальын" кылбурлэн героез оске: Коть мылкыды али � сильзор пилем, Мон йӧнало, "быри, лэся", уг шу. Султо на ай мон пыдъёсы вылэ, Та улонын лыктоз мыным но шуд! Вожъяськон-а, мултэс "синмо" луон-а, шӧдытэк лобӟем кылъёсты мыддорин берыктон-а � Илья Зоринэз курадӟонэ, мӧзмонэ, лек ултӥянэ вуттӥзы. Бен, чагиськеменызы, ӧвӧлзэ вань карыса гожъяменызы врач но кылбурчи кыдёкысь шаеръёсы келямын вал. Отын но со адямиослы юрттӥз. Сюлэмзэ мӧзмон сюпсьыны ӧдъя ке, нош ик гожтэт гожтыны пуксьылӥз, туж сюлмаськылӥз кузпалэз сярысь. Оскиз шаерамы бертонэзлы. Кузпалэзлы, Мария Андреевналы, гожтэтаз со вераз: "Тыршы валаны" мон тонэ утьыны вырисько. Тыныд гинэ умой мед луоз. Вань шуг-секытъёсты вормо. Аслэсьтым но та тазалыкме вуоно шудмылы утён понна, тонэ шудо карон понна, ваньзэ сёто". Бышкись езъёс сьӧрын шулдырез ӧвӧл, дыр. Сое кылбурчи ас синмыныз адӟиз, лек синъёс шоры кышкатэк учкиз. Адӟиз со улонлэсь котькыӵе сэрегъёссэ: шонерзэ но, кырыжзэ но. Соин Ижевске берытскемез бере гожтӥз: Мон улонэз адӟи, Ӧжыт ке но улӥ. Адӟи сое азен но мыддорин. Чидай мон, курадӟи, Керпотонэ но вуылӥ, Нош мон борды ӧз лякиськы дэри. Ӧз, Илья Зоринлы кема улыны ӧз кылды. Улонысь кошкиз со витьтон вить аресысен. Нош туэ 14-тӥ июле тырмысал ни тямыстон арес. Ӧвӧл ни удмурт кылбурчи. Солэн киыныз, визьмыныз гожъям кылбуръёс но поэмаос уло. Калык кырӟа кылбур чуръёсызъя гожтэм кырӟанъёсыз, соос пӧлын "Берен вай сюлэмме" кырӟан. Василий СМИРНОВ. Шудо луэ, "Шундыкаръёс"! Газетмылэн 11-тӥ июле потэм номераз сётӥмы вал туэ "Шундыкар" лагере мынӥсьёслэсь нимтулъёссэс. Та вӧзы ватсаса кӧня ке ивортонмы вань на. Ижевске вуэм пиналъёс гожтӥськыны кулэ "Шунды" огазеяськонын (Советской ульча, 1 номеро юрт) 9 час но 30 минутысен 11 часозь. Пиналъёс сьӧразы кутыны кулэ котырзэс чылкытатон, мисьтаськон арбериос (майтал, шампунь, пинь сузян щётка но мукетсэ), спортивной дӥсь, шуныт дӥськут, удмурт дэрем, чеберъяськонъёс, крезьгуро инструмент (вань ке), медициная справка. Анай-атайёс "Шундые" тыроно луозы 280 манет коньдон. Нош "Сюймунё", "Архитектура", "Суредасьёс", "Дизайнер" но "Куиськон" отрядъёсы мынӥсьёс понна - быдэн 350 манет. Вазиськемды луоз таӵе телефонъёсъя: 51-07-96, 51-14-06. Егитъёслэн "Шунды" огазеяськонзы. Прокурорлэн куронъёсыз быдэстэмын Удмуртиысь Инкуазез утёнъя межрайонной прокуратура алигес эскериз республикаысь но Ижевск городысь санитарно-эпидемиологической югдурез чакланъя центръёслэсь ужрадъёссы понна коньдон бичанлэсь законъёслы тупамзэс. Соку шараямын, Удмурт Республикаысь главной государственной врачлэн миым 22-тӥ сентябре 229 номеро приказэзъя государственной ужрадъёс понна законъёсты тӥяса коньдон басьтон учыръёс. Озьы, со приказъя чакламын вылэм, промышленной но улон коркаос пуктыку, санитарно- гигиенической эскеронъёс ортчытэм но документъёс гожтэм понна коньдон басьтыны. Коньдон басьтыны чаклмын вылэм пӧртэм ужъёс: радиотехничесокй объектъёсты уже кутэм, ион пазясь приборъёсты ужатэм но микроорганизмъёсын ужам понна. Коньдон тыриське вылэм лицензиосъя санитарно-эпидемиологической эскеронъёс ортчытыку, документъёс гожтэм понна, кылсярысь, буёл но сьӧд кортъёсты дасясь, кисьтӥсь но вузась удысын тыршисьёслэсь. Та приказъя ик ятвылтэмын вылэм лэсьтӥськон интые музъем бырйыку, санитарно- эпидемиологической ужъёс быдэстэм понна, пӧртэм объектъёсты лэзьыку, комиссиослэн ужазы пыриськон, калыклэсь ӝожтӥськонъёссэ эскерон учыръёсы но. Нош ваньмыз вылӥ верам ужрадъёс луо государстволэн функциосыз. Соин ик ваньмыз со коньдон бсьтон учыръёс законъёсты тӥяса быдэтэмын. Та пумысен Удмурт Республикалэн прокурорез протест ялӥз. Прокурорлэн куронъёсыз быдэстэмын. О.Богатырева, Удмуртиысь Инкуазез утёнъя межрайонной прокурорлэн старшой юрттӥсез. Футбол Пумиськоз Волгоградын "Роторен" Валлян "Газовик" ас дораз пумиськылӥз Стерлитамакысь "Содовикен" Россиысь кубок понна нюръяськонлэн 1/32-тӥ люкетаз. Куноос шудо кыкетӥ дивизионын, турнир таблицалэн шораз интыяськемын. "Газовик" шудэ нырысетӥяз, татын ньыль кужмоосыз пӧлы пыре. Соин ик, лэся, тросэз валтӥсь футболистъёсмы шутэтскыны келямын, нюръяськонэ пыриськизы запасын пукисьёс. Шудонлэн нырысетӥ люкетэз мӧзмыт ортчиз. Футболистъёс капка пала шер вуылӥзы. Кыкетӥ периодын куноос жадизы, ӝог бызьылӥсь пиосмес ӝегатъяны кынарзы ӧз тырмы ни. Одӥгаз лэчыт учыре "Содовикысь" защитникъёс асьсэлэн штрафноязы лэзьымтэ амалэз куто. Пенальти. Тупез ӵыже Сергей Пятиконов - 1:0. Кӧня ке улыса гол пыртэ на Андрей Иванов. Табере кубок понна "Газовик" нюръяськоз вылӥ дивизионысь "Роторен". М. Кузьмин. Дас куатьлэсь но ортче Якшур-Бодья ёросысь Фрунзе нимо эштосын пудоооэс гужем лагерьёсы поттӥзы ни майлэн шораз ик. Ужзэс ӟеч радъяло Альман лагерьысь возьмаськисьёс Валентин Холмогоров, Дмитрий Меркурьев но Николай Шафар. Июнь толэзе отын скаллы быдэ 16,6 килоозь йӧл кыскизы. Мукет лагерьёсын но лыдпусъёс уродэсь ӧвӧл � Соловьиын � 15, Бабашурын - 13,2 килограмм. Дояркаослэн ӝыны ар ӵоже ӵошатсконазы азьпала потӥзы Надежда Загребина, Светлана Васильева но Надежда Вахрушева. Хозяйствоысь валтӥсь зоотехниклэн Нина Широбоковалэн верамезъя, ваньмыз скал кыскисьёс ӟеч тыршо, ужан дисциплинаез тӥясьёс ӧвӧл. Звеньевойёс котькуд ужам нуналэз табеле гожъяло. Толэзьлы быдэ люкаськылэ фермалэн кенешез (советэз). Отын йылпумъянъёс лэсьто, тодмато басьтоно уждунзылэн быдӟалаеныз. Быдэс ёросъя ке верано, али скаллы быдэ 10,7 кило йӧл кыско. Кылем арын та лыдпус вал 11,8. Н.ЯКОВЛЕВ. Объявление "Во исполнение постановления Правительства Российской Федерации от 11.10.97г. �1298 "Об утверждении Правил организации системы государственного учета и контроля радиоактивных веществ и радиоактивных отходов" и Распоряжения Правительства Удмуртской Республики от 18 мая 2000 г. � 253-р проводится первичная инвентаризация радиоактивных веществ и радиоактивных отходов по состоянию на 1 июля 2000 года. Руководителей организаций всех форм собственности, имеющих в организации радиоактивные вещества и изделия, содержащие радиоактивныс вещества, в том числе хроматографы, укомплектованные радионуклидными источниками, а также радиоактивные отходы, в т. ч. не пригодные для дальнейшего использования датчики пожарной сигнализации необходимо до 20.07.2000 года направить информацию об их наличии в Министерство промышленности и транспорта Удмуртской Республики, г. Ижевск, ул. Пушкинская, 214. После получения информации Вам будут направлены методические рекомендации по проведению первичной инвентаризации радиоактивных веществ и радиоактивных отходов в системе государственного учета и контроля. Примечание: изделия защитной техники, в которых обедненный уран используется в качестве конструкционного материала для радиационной защиты, подлежат учету и контролю как радионуклидные источники. Отказ в предоставлении информации влечет за собой дисциплинарную, административную или уголовную ответственность в соответствии с действующим законодательством Российской Федерации (ст. 61 Закона Российской Федерации "об использовании атомной энергии"). Телефоны для справок: 25-90-09, 78-29-79. ДЕПУТАТЛЭН УЖЕЗ Сергей БЕРКУТОВ: "Парламентын юристъёс мултэс уг луо" Депутатъёслэн каникулъёссы кутскизы. Шутэтскыны потон азяз Кун Кенешысь депутат Сергей Георгиевич Беркутов ас ужамез сярысь вераны мылкыд кариз. Та депутат тросэзлы тодмо чырмыт но дӥсьтӥсь луэменыз. � Сергей Георгиевич, котькуд депутат нырысь ик ужаны кулэ бырйисьёсыз понна. Кызьы быгатӥськоды соослэсь куронъёссэс быдэстыны? � Туж ӵем вазиськыло мон доры ветеранъёс, анайёс, ужтэк кылемъёс. Но жаляса верасько, ваньмызлы юрттыны уг луы: туж трос туэ соос, юрттэтлы кулэяськисьёс. Вормон нуналлы 55 ар тырмонэн валче, Ижысь 34 номеро школаын но Старки посёлокысь 92 номеро школаын ветеранъёсты данъян праздникъёс ортчытӥм. Со сяна, 800 пала ветеранъёс дунтэк концерт учкыны быгатӥзы "Металлург" культура дворецын. Тазьы ке но асьме ветеранъёслэсь сюлэмзэс небӟытӥм. Туж куректоно, ӧлексы нылпиосты адӟыса. Секыт висись нылпиезлы юрттэт курыса вазиськиз вал Ижысь Сабуров нимо урамысь кышномурт. Кун Кенешлэн Тӧроез А.Волков та семьялэн куректонэзлэсь палэнтӥ ӧз ортчы � эмъяськыны коньдон висъяз. Нош Старки посёлокын улӥсьёслы телефонъёс уг тырмо. Буш телефон номеръёс ӧвӧлэн, та ужпумез али йылаз-пумаз вуттыны уг луы. Озьы ке но, "Медведь" группаысь депутатъёс али мыр-мыр ужало городлэн кыдёкысь районъёсаз телефонъёс пуктылон программаез дасян бордын. Та ужпумен вазиським ини Кун Думаысь "Единство" фракцие, Россия Федерациысь но Удмурт Республикаысь Правительствоослы. Малпасько, 2002-тӥ арын Старкиын улӥсьёслы телефонъёс пуктылэмын луозы. Депутатлы туж трос дырзэ быдтоно луэ таӵе юанъёсын вазиськисьёслы юрттон понна: малы пӧсь ву ӧвӧл, ку корка липетэз тупатозы, ку лифт ужаны кутскоз но мукет. Та ужпумъёсты сэрттоно луэ домоуправлениосын ӵош. Кема бызьылэм-вырем бере, Смирново посёлокын кезьыт ву сётонэн кылдэм югдурез тупатыны луиз. Табере посёлоке ву гумы кыскон пыртэмын городлэн программаяз. Но туж секытэн мыно посёлоке газ кыскон ужъёс. � Депутат � со калыклэсь куронъёссэ быдэсъясь гинэ ӧвӧл. Депутатлы законъёс дасян бордын но ужано. Мар пусйымонзэ лэсьтэмын тӥ та ужын? � Мон юрист. Соин ик законъёсты дасяку, куд-ог ӵектонъёсын но потылоно луэ. Мыным шуд усиз Кун Кенешлы Тӧро быръён сярысь радлыкез (регламентэз) дасяны. Депутатъёс сое нокыӵе ватсанъёс пыртытэк юнматӥзы. Мон ик дасяй вал Кун Кенешлэсь Эскеронъя палатазэ кылдытон сярысь законэз. Но депутатъёс сыӵе палата кылдытонлы пумит луизы. Ярам коть, Удмуртилэн выльдэм Конституцияз Кун Кенешлэн эскерон функциосыз кельтэмын. Нялтас верано ке, мынам ӵектэмея асье Конституцие 30 ватсан пыртэмын, сомында ик "Удмурт Республикалы Президент быръён сярысь" Законэ. Мукет депутатъёсын ӵош кема ужано луиз, общежитиослэсь статуссэс воштон сярысь законлэн инъетэз бордын. Табере общежитиын улӥсьёс быгато улон интызы понна ордеръёс басьтыны но ас мылкыд каремзыя бӧрысь сое приватизировать карыны. � Сергей Георгиевич, тӥ мыло-кыдо пыриськиськоды политикае но. Берлояз сессиын тӥ куд-ог депутатъёсын ӵош кылдытӥды "Медведь" группа. Кыӵе ужпумъёс со ас азяз пуктэ? � Депутатъёслэн "Медведь" огазеяськонзы юрттоз асьме Правительстволы Удмуртилэсь экономиказэ ӝутонэн герӟаськем законъёсты ӝоггес улонэ пыӵатыны. Куд-ог дыръя Кун Кенеш Правительстволэсь куронъёссэ лыдэ уг басьтылы. Кылсярысь, "зарни акциосты" уже пыӵатыса, Правительство малпа вал акционер предприятиослэсь ужамзэс чакласагес возьыны. Но озьы ӧз луы. Кун Кенешысь депутатъёс пумит луизы. Мар ватонэз: куд-огез депутатъёс асьсэос акционер огазеяськонъёсын кивалто ук. Собере, бюджетэз дасяку но Правительстволэн ӵектонъёсыз ӵем дыръя лыдэ басьтытэк кылё. Со шонер ӧвӧл. Кун Кенешлэн огаз берло сессияз музъем сярысь законэз эскерыку, мон ӵектӥ вал, музъем кузёос ас участоксэс банке залоге сётыса кредит басьтыны мед быгатозы шуыса. Правительство та ужпум шоры умоен учкиз. Озьы ке но, законлэн инъетаз со ӵектон пыртэмын ӧй вал. Экономикаын Правительстволэсь политиказэ нуон сяна, "Медведь" асьме парламентын турттоз на "Единство" партилэсь решениоссэ быдэстыны. Кун Думае берло быръёнъёс дыръя Удмуртиын улӥсьёс уката но трос куара "Единство" понна сётӥзы вал. Удмуртилэн парламентаз но депутатъёслэн "Единство" фракцизы кылдытэмын. Ми мылкыд кариськом соин ӵош ужаны. � Бадӟым тау, Сергей Георгиевич, вераськеммы понна. Калыклэсь правооссэ но куронъёссэ утёнын эшшо но чырмытгес ужаны сӥзиськом. Берыктӥз Т.БАННИКОВА. Сояз даурысь Глазов районысь Поршево гуртысь Залькиза Кадыровна Абашевалы туэ май толэзе 105 арес тырмысал. Но кылем сӥзьыл 80 аресъем воргоронъёслэн анайзы улонысь кошкиз. Туннэ районын самой мӧйыез Уракын улэ. Со 1899-тӥ арын вордскем Татьяна Сергеевна Захарова. Шуд усиз Чагыр экранын мынӥсь "Играй, гармонь" передачаез калыкын туж ярато. Сое дасясь Геннадий Заволокин алигес Глазове вуылӥз. Одӥгаз передачае Ярысь Руслан Дюкин но пыриськиз, аслэсьтыз гожтэм кырӟанъёссэ шудӥз но мадиз. Нош 14-тӥ июле Геннадий Заволокин артистъёсыныз Ижысь "Динамо" стадионын концерт возьматоз. И.СИДОРОВ. Та турынэз турнаны туж секыт вылэм Ӧз, вашкала удмуртъёс азьвыл озьы ӧз кырӟаллялэ. Турнан дыр гурт калык понна праздник кадь вылэм. Нылкышноос возь вылэ потылӥзы, самой чебер дэремъёссэс дӥсяса. Бен, соку но турнан капчиен ӧз сётскылы. Ваньзэ быдэстоно луиз киын но валъёсын. Бӧрысь ужась киосты воштӥзы турнан машинаос, мукет техника. Но улонмы мыдланес луыса кошкемен, югдур воштӥськиз. Ваньмыз сямен техника "пересьмиз", шальтраз. Нош выльзэ басьтон сярысь малпанэз ик ӧвӧл ни. Югдур пӧртэм ӧвӧл Якшур-Бодья палъёсын но. Пудо сиён дасянлэсь кызьы мынэмзэ тодон вылысь ми нырысь ик пырим ёросысь гурт ужъёсъя управлениысь диспетчер доры. Вань эштосъёсысь лыдпусъёс отчы вуо уго. Та гожтэмамы лыдпусъёс сётэмын 12-тӥ июльлы, но соос ялан вошъясько. Бен, татын но туэ турынъёс буй-буй ӝужамын. Киос асьсэос кусо дуре курисько кадь. Вылаз ик, районын туж бадӟымесь ас эрказы будӥсь возьёссы. Тужгес но уно соос "Старозятцинское", "Родина", "Путь Ильича" эштосъёсын. Ичи киземын ӧвӧл трос аръем турынъёс но. Соос но удалтэмын. Зэм, нырысь-валысь пудо сиён дасяны люкетӥзы вис карытэк усись зоръёс. Но тани куазь тупатскиз. Вань кужымдэ сётыса, куаж-куаж ужа вылэм, но... Нош ик люкетэ Россиын вӧлмем секыт "висён" � коньдонлы но эстӥськонлы ёрмон. Техниказы вань вылысь кӧня ке нунал ужтэк пуконо луизы Киров нимо но "Путь Ильича" хозяйствоосын. Матысь дыре эстӥськонтэк "пуксёзы" мукет эштосъёсын но. Кыӵе бен югдур та эштосъёсын вал 12-тӥ июльлы? Ӵошатом гурт ужъёсъя управлениысь басьтэм лыдпусъёсъя. Нырысетӥяз возьёс турнамын 70 гектар вылын, турын дасямын 75 тонна, яке 15 процент. Сенаж но силос люкамын � ноль. Ильичъёс тазьы ужаллям: турнамын 160 гектар, кӧс турын дасямын 36 тонна, яке 8 процент, силос люкамын 690 тонна. Нош ужъёссы тужгес но ляб мыно "Дружба" колхозын. Татын турнамын ай чылкак 2 гектар возьёссы, пудо сиёнзы люкамын 6 тонна, яке 5 процентэз. Сенажзы но силоссы одӥг грамм но дасямын ӧвӧл на. Районын азьланьтӥське кын улэ гырон. Со быдэстэмын ни вал 60 процентлы. Котькинлэсь уно � 800 гектар гыремын "Старозятцинское" хозяйствоын. Вератэк кельтыны уг луы йӧл кысконлэн мынэмез сярысь но. Та дыре скаллы быдэ со 10,7 килограмм усе, кылем арын та лыдпус вал 11,8 килограмм. Ваньмаз сямен хозяйствоосын та лыдпус усиз. Йӧл поттонзэс будэтӥзы "Восток" (12 килограмм), "Ошворцинское" (12,5 килограмм), "Знамя" (12 килограмм), "Путь Ильича" (11,1 килограмм) эштосъёс гинэ. Валамон ини, йӧл синэ сиён тырмымтэен. Кылем арын уго ӧзгес удалты вал. Но со понна пудо сиёнэз тырмыт дасяны туэ вань луонлыкъёсты ачиз инмар сётӥз кадь. Табере вуыломе Фрунзе нимо колхозлэн возьвылъёсаз. Татын турнан зэмос праздник кадь. Тани асьтэос ӵошатэ. Районысь одӥг хозяйство но сенаж дасян борды ӧз кутскылы на, татын со дасямын ни 100 тонна. Кӧс турын люкамын 36 процентэз, силос тыремын 980 тонна. Умой шӧдӥське, правление но, гуртоос но ӟырдыт тыршо шуыса. Турнанын ужась механизаторъёслэн мылкыдзы ӟеч. Турын туэ нап, ӝужыт. Одӥгез трактор турна, мукетыз турынэз валокъёсы тыре, куинетӥез рулонъёсы люка. Бӧрысь сое соку ик складъёсы вортто. Механизаторъёс вазь ӵукнаысен ог 10 час ӝытозь � возь вылын. Соосты кык пол пӧсь сиёнэн сюдо � нуназе но ӝытазе. Пудо сиёнтэк уз кыле гуртоос но. Та палан возьёс бадӟымесь. Соослы но турнан инты шеде. Ваньмон дырзы шеде ке, кусооссэс кутыса, соос возь вылэ дырто. Нош возьёс туэ, турынэн сяна, узыресь узы-борыен, нюлэсъёсын кисьма эмезь, потыны кутске губи... Озьыен, адямилэн азьланезлы осконэз вань на. Бен кызьы сотэк? Улон ас интыяз ялан уз пукы ук. Нош азьпалан � аран дыр. Нош юос туэ удалтэмын. Инмар гинэ мед юрттоз ини инкуазьлэсь но адямилэсь узырлыксэ дыраз но ыштонъёстэк октыны-калтыны. Н.БАЙТЕРЯКОВ. В.Беломорских (фото). ??Тани со � турын. Трактористъёс Владимир Вахрушев но Сергей Шкляев. ? Луоз турын но, губи но, узы но. Редакцилэсь. Толон ми жингыртылӥм Якшур-Бодьяе. 17-тӥ июльлы лыдпусъёс тазьы воштӥськиллям. Ваньзэ ёросъя турнамын 2135 гектар возьёс, кӧс турын дасямын 1853 тонна (45 процент), сенаж 518 тонна (14 процент), силос � 10212 тонна (27 процент). Фрунзе колхоз азьвыл сямен ик азьпал радын. Таӵезэ адӟеме ӧй вал на Ижевск вӧзысь Вараксино посёлок кылем кӧс нуналэ 11 часысен кутскиз аслэсьтыз праздниксэ. Вылласянь учконо ке, посёлок туж умой улэ кадь: данакез тылобурдо вордон фабрикаын тыршо, ужан интызы артэ, уждун умой басьто. Но ужась калык пудо вордон сярысь но сюлмаське. Посёлок дорысь вырйылэ уно гидъёс пуктылэмын. Куазь али пӧсь улэ. Тани ог кык час котырын одӥг-кык сарайысь сьӧд ӵын ӝутскыны кутскиз. Бӧрысь веразы, кин ке, пе, машинаен ортчыкуз, тамак пумзэ куштэм. Пудо вордӥсьёс гидъёссы котыре турын зуродъёс дасяллям ни вал. Пӧсь куазен тылпу ӝог аляз. Одӥг интыын ӝуаны кутскыса, "горд атас" ӝогак мукет интыосы тэтчиз. Чебересь но юн коръёслэсь гидъёс чаГ выллем ӝуаны кутскизы. Табере тыл Истомино гуртлэн коркаосыз борды вутскиз. Егит пиос колонкаысь шланген кыскем вуэн быгатӥзы ӝуаны кутскись юртсэс утьыны. Тылпу кысӥсьёс вуытозь нюръяськизы. Нош югдур туж кышкыт вал. Гидъёсын жието ӝуаны шедем парсьёс. Мукетъёсыз ӝуась гидъёсысьтызы парсьёссэс, кунянъёссэс, кечъёссэс палэнэ улляло, кудӥз чыры-пыры ваньбурзэ утьыны выре, нош тылпу паськыта но паськыта. Сыӵе кышкыт югдур вӧлмем бере гинэ вуизы ни ог дасо пала машинаос. Уно сарайёс вакчи дыр куспын пеньлы пӧрмизы. Быриз уно пудо. Вараксинолы артэ ик чебер ӵыпетын город калык но пылаське. Но тылпу кысӥсь машинаос беромыса вуизы. Ваньбурзэс ыштӥсь калык тышкаське. Уго ӝуаз турын зуродъёссы но, пӧртэм мукет ваньбурзы но. Ӝог лыктӥсь горд машиналэсь палэнскыкуз, огез легковой машина электро юбо борды мырӟиськиз. Кызьы эшшо езъёсыз чидазы на? Тылпу утисьёс пӧлысь огез катьтэммыса, лэся, супрак пограз. Улон возьматӥз: таяз учыре асьмелэн тылпу кысӥсьёсмы ӝог юрттэт сётыны беромыса вуизы. Нош интыосын солы воксё дась ӧвӧл. Зэм, юрттэт эшшо но беромысал ке, Истомино гурт но ӝуасал, из коркаосы но тылпу вуысал, дыр. Соин ик ялан чаклаське. П.СКОБЕЛЕВ. "Грач", "Варяг", "РЭКС" но мукетыз Берло дыре Россиысь кивалтӥсьёс умой валазы, пыӵал тӥрлыкен вузкарон бадӟым барыш вае шуыса. Та дырозь пыӵал тӥрлыкен но военной техникаен мукет кунъёсын вузкарыны быгатэ вал "Росвооружение" гинэ. Алигес кылдӥз эшшо одӥг выль ёз � "Промэкспорт" предприятие. Та нуналъёсы "Промэкспортлэн" офисаз ортчиз мукет странаосысь военной атташеослы Россиын поттэм вооружениез возьматон. Отчы асьсэлэсь вуззэс нуллӥзы "Ижевскысь механикая завод" кун предприятие но "Ижмаш" акционер огазеяськон. Россиысь кивалтӥсьёс пӧлысь солэн ужаз пыриськизы экономикая, наукая но технологиосъя министр Александр Дондуков но солэн нырысетӥ воштӥсез Григорий Рапота. Механикая завод возьматӥз аслэсьтыз вань пистолетъёссэ. Нош "Грач", "Варяг", "Скиф-мини" пистолетъёс но МР-421 "РЭКС" револьвер армие алигес гинэ кутэмын. Озьы ик ваемын вал кузь гумыё выль пыӵалъёс но. Асьмелэн кибашлыосмылэн ужъёссылы вылӥ дунъет сётэмын. Оскон кылдӥз, "Промэкспорт" предприятие кунгож сьӧрысь басьяськисьёсын кусыпъёссэ уката но паськытатоз шуыса. Н.ЛЯЛИН. ЗАКОН Удмуртской Республики О МИРОВЫХ СУДЬЯХ УДМУРТСКОЙ РЕСПУБЛИКИ Статья 1. Предмет настоящего закона 1. Настоящим законом устанавливается правовое регулирование деятельности мировых судей, отнесенное к компетенции Удмуртской Республики федеральным законодательством. Статья 2. Мировые судьи Удмуртской Республики 1. Мировые судьи Удмуртской Республики (далее - мировые судьи) являются судьями общей юрисдикции и входят в единую судебную систему Российской Федерации. Статья 3. Гарантии статуса мировых судей 1. На мировых судей и членов их семей распространяются гарантии независимости судей, их неприкосновенности, а также материального обеспечения и социальной защиты, установленные федеральным законодательством. 2. Законами Удмуртской Республики мировым судьям могут быть установлены дополнительные гарантии материального обеспечения и социальной защиты. 3. Компетенция мирового судьи определяется законодательством Российской Федерации и Удмуртской Республики. Статья 4. Судебные участки и должности мировых судей 1. В административно-территориальных единицах Удмуртской Республики создать следующие судебные участки: Алнашского района; �1, �2 Балезинского района; Вавожского района; �1, �2, �3, �4 города Воткинска; Воткинского района; �1, �2, �3, �4 города Глазова; Глазовского района; Граховского района; Дебесского района; �1, �2, �3 Завьяловского района; �1, �2 Игринского района;�1, �2, �3, �4, �5, �6 Индустриального района города Ижевска; Камбарского района; Каракулинского района; Кезского района; Кизнерского района; Киясовского района; Красногорского района; �1, �2, �3, �4, �5 Ленинского района города Ижевска; Мало-Пургинского района; �1,�2 города Можги; Можгинского района; �1, �2, �3, �4, �5, �6 Октябрьского района города Ижевска; �1, �2, �3, �4, �5, �6 Первомайского района города Ижевска; �1, �2, �3, �4 города Сарапула; Сарапульского района; Селтинского района; Сюмсинского района; �1, �2 Увинского района; �1, �2, �3, �4, �5, �6 Устиновского района города Ижевска; Шарканского района; Юкаменского района; Якшур-Бодьинского района; Ярского района. 2. В соответствии с частью 1 настоящей статьи создать должности мировых судей соответствующих судебных участков, включающих слова "мировой судья" и название судебного участка. 3. Мировые судьи осуществляют свою деятельность в пределах соответствующих судебных участков. Статья 5. Создание и упразднение судебных участков и должностей мировых судей 1. Судебные участки и должности мировых судей создаются и упраздняются законом Удмуртской Республики. 2. Схемы расположения судебных участков, территория и границы соответствующего судебного участка с учетом численности населения утверждаются представительными органами местного самоуправления и направляются в Государственный Совет Удмуртской Республики. На их основе принимается соответствующий закон. 3. Границы судебных участков могут определяться законом об отдельном судебном участке либо о нескольких судебных участках, либо обо всех судебных участках мировых судей Удмуртской Республики. 4. Судебные участки создаются из расчета численности населения на одном участке от 15 до 30 тысяч человек. В административно - территориальных образованиях с численностью населения менее 15 тысяч человек может быть создан один судебный участок. 5. При определении размера и границ судебных участков учитываются количество рассматриваемых судебных дел в административно-территориальных образованиях и территориальная расположенность населенных пунктов. 6. Судебный участок или должность мирового судьи не могут быть упразднены, если отнесенные к компетенции этого мирового судьи дела не были одновременно переданы в юрисдикцию другого судьи или суда. 7. Упразднение существующих судебных участков и должностей мировых судей, создание новых судебных участков и введение должностей мировых судей осуществляется в пределах количества мировых судей, определенных федеральным законодательством. Статья 6. Требования, предъявляемые к мировому судье 1. Мировым судьей может быть гражданин Российской Федерации, проживающий на территории Удмуртской Республики, достигший возраста 25 лет, имеющий высшее юридическое образование, стаж работы по юридической профессии не менее пяти лет, не совершивший порочащих его поступков, сдавший квалификационный экзамен и получивший рекомендацию квалификационной коллегии судей Удмуртской Республики (далее - квалификационная коллегия судей). 2. От сдачи квалификационного экзамена и представления рекомендации квалификационной коллегии судей освобождаются лица, имеющие стаж работы в должности судьи федерального суда не менее пяти лет. 3. Мировыми судьями не могут быть лица, имеющие психические заболевания, препятствующие осуществлению правосудия. 4. Мировой судья обязан неукоснительно соблюдать законодательство Российской Федерации и Удмуртской Республики и при исполнении служебных полномочий, а также во внеслужебное время должен избегать всего, что могло бы умалить авторитет судебной власти, достоинство судьи или вызвать сомнение в его объективности, справедливости и беспристрастности. 5. Мировой судья не вправе быть депутатом представительных органов государственной власти или органов местного самоуправления, принадлежать к политическим партиям и движениям, осуществлять предпринимательскую деятельность, а также совмещать работу в должности мирового судьи с другой оплачиваемой работой, кроме научной, преподавательской, литературной и иной творческой деятельности. Мировой судья, пребывающий в отставке, вправе работать в сфере правосудия на условиях и в порядке, определяемых федеральным законом. Статья 7. Отбор кандидатов на должность мирового судьи 1. Подготовка к отбору кандидатов и отбор кандидатов на должность мирового судьи осуществляется управлением Судебного департамента при Верховном Суде Российской Федерации в Удмуртской Республике (далее - управление Судебного департамента) после принятия Правительством Удмуртской Республики постановления о материально-техническом обеспечении соответствующего судебного участка в пределах бюджетного финансирования. 2. Отбор кандидатов на должность мирового судьи осуществляется на конкурсной основе. 3. Каждый гражданин Российской Федерации, отвечающий требованиям для кандидата на должность мирового судьи, предусмотренными статьей 6 настоящего закона, имеет право обратиться в экзаменационную комиссию при управлении Судебного департамента с заявлением о принятии у него квалификационного экзамена. 4. Кандидат в мировые судьи, успешно сдавший квалификационный экзамен, вправе подать в квалификационную коллегию судей заявление о рекомендации его к назначению на должность мирового судьи того судебного участка, где эта должность вакантна. 5. Квалификационная коллегия судей в пределах своей компетенции рассматривает заявление лица, претендующего на должность мирового судьи, и с учетом результатов квалификационного экзамена дает заключение о рекомендации данного лица на должность мирового судьи либо об отказе в ней. Повторное обращение в квалификационную коллегию судей допускается не ранее чем через год со дня дачи заключения об отказе в рекомендации. 6. Квалификационная коллегия судей представляет в управление Судебного департамента заключение на рекомендованного кандидата в мировые судьи. Статья 8. Порядок наделения полномочиями мировых судей 1. Мировые судьи назначаются на должность Государственным Советом Удмуртской Республики по представлению управления Судебного департамента, согласованному с председателем Верховного Суда Удмуртской Республики и основанному на положительном заключении квалификационной коллегии судей. 2. Назначение на должность мирового судьи соответствующего судебного участка производится постановлением Государственного Совета Удмуртской Республики. 3. О назначении на должность мирового судьи соответствующего судебного участка население оповещается через средства массовой информации. 4. Отклонение представления о назначении на должность мирового судьи не препятствует повторному представлению этой же кандидатуры. 5. До назначения на должность мировых судей в пределах созданных настоящим законом судебных участков дела, относящиеся к их компетенции, рассматриваются районными судами. Статья 9. Присяга мирового судьи 1. Мировой судья, впервые назначенный на должность, приносит на заседании Государственного Совета Удмуртской Республики присягу следующего содержания: "Торжественно клянусь честно и добросовестно исполнять свои обязанности, осуществлять правосудие, подчиняясь только закону, быть беспристрастным и справедливым, как велят мне долг мирового судьи и моя совесть". 2. Мировому судье выдаются соответствующее удостоверение, подписанное Председателем Государственного Совета Удмуртской Республики, являющееся основным документом, подтверждающим его полномочия. 3. Форма удостоверения утверждается Государственным Советом Удмуртской Республики. Статья 10. Срок полномочий мирового судьи 1. Мировой судья назначается сроком на три года. По истечении указанного срока лицо, занимавшее должность мирового судьи, вправе вновь выдвинуть свою кандидатуру на данную должность. Отбор и назначение производится в порядке, предусмотренном статьями 6-9 настоящего закона. 2. При повторном и последующих назначениях на должность мировой судья назначается сроком на пять лет. Статья 11. Прекращение и приостановление полномочий мирового судьи 1. Полномочия мирового судьи прекращаются по истечении срока, на который он был назначен. 2. Полномочия мирового судьи могут быть приостановлены либо прекращены досрочно в случаях и порядке, предусмотренных законодательством Российской Федерации. Статья 12. Организационное обеспечение деятельности мировых судей 1. Районный суд является непосредственно вышестоящей судебной инстанцией по отношению к мировым судьям, действующим на территории соответствующего судебного района. 2. Координация деятельности мировых судей осуществляется председателем соответствующего районного суда. 3. Районный суд при временном отсутствии, самоотводе и иных объективных случаях, препятствующих рассмотрению дела мировым судьей, обязан принять к своему производству любое дело, находящееся в производстве мирового судьи или поступившее на рассмотрение этому мировому судье. 4. Вопросы организационного обеспечения деятельности мировых судей и их аппаратов подлежат урегулированию на основании соглашения Правительства Удмуртской Республики с Судебным департаментом при Верховом Суде Российской Федерации или иным путем в соответствии с законодательством Российской Федерации и Удмуртской Республики. Управление Судебного департамента осуществляет организационное обеспечение деятельности аппаратов мировых судей, разрабатывает и представляет в Правительство Удмуртской Республики предложения о финансировании их деятельности, ее совершенствовании, ведет статистический и персональный учет работников аппаратов и иные вопросы в соответствии с установленной компетенцией. Статья 13. Аппарат мирового судьи 1. Аппарат мирового судьи обеспечивает его работу. Структура и штатное расписание аппарата мирового судьи, должности технического персонала устанавливаются Правительством Удмуртской Республики. В аппарат мирового судьи включается секретарь судебного заседания, а при необходимости секретарь канцелярии и иные должности. 2. Назначение на должность работников аппарата и прием на работу технического персонала, освобождение от должности и увольнение с работы осуществляет управление Судебного департамента на основании соглашения, заключаемого Правительством Удмуртской Республики с Судебным департаментом при Верховном Суде Российской Федерации. 3. Работники аппарата мирового судьи являются государственными служащими Удмуртской Республики. 4. Работники аппарата и технический персонал действуют в соответствии с обязанностями, возложенными на них правовыми нормативными актами и должностными инструкциями, разработанными в установленном порядке. 5. На аппарат мирового судьи распространяются положения действующих инструкций по делопроизводству в районном суде, применительно к его функциональным обязанностям. Статья 14. Материально-техническое обеспечение деятельности мирового судьи 1. Материально-техническое обеспечение деятельности мирового судьи осуществляется Правительством Удмуртской Республики из бюджета Удмуртской Республики. 2. Материально-техническое обеспечение деятельности мировых судей может осуществляться через управление Судебного департамента на основании соглашения, заключаемого Правительством Удмуртской Республики с Судебным департаментом при Верховном Суде Российской Федерации. 3. Расходы на материально-техническое обеспечение деятельности мировых судей указываются отдельной строкой в бюджете. Размер выделяемых средств устанавливается Государственным Советом Удмуртской Республики при рассмотрении проекта закона о бюджете с учетом расчетов и предложений Правительства Удмуртской Республики и управления Судебного департамента. 4. Финансирование деятельности мировых судей осуществляется согласно утвержденной сметы расходов в соответствии с законом о бюджете на соответствующий финансовый год. Если бюджет на текущий финансовый год не утвержден, деятельность мировых судей финансируются ежемесячно в размере одной двенадцатой суммы, предусмотренной на их содержание законом о бюджете на истекший год. Статья 15. Размещение мирового судьи и его аппарата 1. Мировой судья и его аппарат размещаются в надлежащем для деятельности помещении и доступном для населения судебном участке. 2. Помещение для размещения мирового судьи и его аппарата выделяется в безвозмездное пользование Правительством Удмуртской Республики по согласованию с управлением Судебного департамента. Статья 16. Символы судебной власти мировых судей 1. В зале судебных заседаний мировых судей помещаются Государственный флаг Российской Федерации и Государственный флаг Удмуртской Республики и изображение Государственного герба Российской Федерации и Государственного герба Удмуртской Республики. 2. При осуществлении правосудия мировой судья заседает в мантии. Статья 17. Печать мирового судьи Мировые судьи имеют печать с изображением Государственного герба Российской Федерации и своим наименованием. Статья 18. Вступление настоящего закона в силу Настоящий закон вступает в силу со дня его официального опубликования. Председатель Государственного Совета Удмуртской Республики А. А. Волков. г. Ижевск, 20 июня 2000 года. � 201-ИИ. Арня ӵоже дуннеын странаын шаерын Франция 14-тӥ июле арлы быдэ пусъе буржуазной-демократической революцилэсь нуналзэ. Соку 1789-тӥ арын француз калык буржуазилэн кивалтэмез улсын корольлэсь Бастилия тюрьмазэ басьтӥз. Озьы кутскиз Францилэн феодализмысь капитализме выжон сюресэз. Туэ но та нуналэз бадӟым праздникен пусйыны чакламын: зарезьын ӵошатсконъёс радъямын парусо корабльёс куспын. Отчы пыриськыны ӧтемын вал Россиысь "Седов" парусник но. Но малпамтэ шорысь "Швейцариысь огез фирма "Седовез" арестовать кариз... Россилэн трос тыронъёсыз люкаськем понна. Франциын но, лэся, дырын-дырын тодазы вайыло на сэрпалтэм эксэйзылэсь Людовик ЪИВ кылъёссэс "Государство - со мон". Мукет сямен вераса, мар кареме потэ, со ик карисько. "Седов" - дуннеын огез бадӟымез парусник. Озьыен, сое зэмзэ но туж дуноен басьтыны луэ. Арнялэн пумаз корабльлы ӵошатсконъёсы пыриськыны лэзизы ик, но арест улысь со быдэсак мозмытымтэ на. Россилэн Президентэзлэн В. Путинлэн Федерацияя Кенешлэсь ужзэ выль сямен радъян сярысь дэмланъёсыз пумысен эчешонъёс нокызьы но ӧз йылпумъяське на. Сенаторъёслэн но парламентарийёслэн огкылэ вуонъя комиссизы нокыӵе решениос ӧз на куты. В. Путин арнялэн пумаз кык нунал ӵоже Сочиын шутэтскиз. Собере со кошкоз Пекинэ. Россия но Китай кусыпъёсты В. Путин малпа выльысь юнматыны но азинтыны. Странаын кылдӥз на эшшо одӥг выль огазеяськон � "Россия". Соин кивалтоз Г. Селезнев. Солэн ивортэмезъя, "Россия" огазеялоз паллян кужымъёсты, валтӥсез кужым луоз КПРФ. Озьы ке но, "Россилэн" учредительной конференцияз Г. Зюганов малы ке ӧз пыриськы. Россиын куд-ог лидеръёслэн данзы ӝутске, нош куд-огез сай улэ кариськыны туртто. Озьы "Газпромен" кивалтонысь кошкиз В. Черномырдин. Политикае пыриськон мылкыдыз но, шӧдске, солэн ӧвӧл ни. Чечняын ожмаськонлэн пумыз уг адӟиськы кадь. Ялан кыӵе ке но шудтэм учыръёс но терактъёс луыло. Ханкала котырын асьме миномётчикъёс асьме танкез ыбӥзы. Снаряд, пе, тыро-пыдо лэсьтымтэ вылэм. Куинь мурт сӧсырмыны шедиз. Нош Аргун-Гудермес чугун сюрес вылын поезд пуштӥз. Одӥг адями быриз. Асьме солдатъёслэсь улонзэс Чечняын йӧскадь утьыны тыршымтэез понна обороная министр главнокомандующийлэсь Т. Трошевлэсь кылзэ юаны кутскиз. Ижын андан ӵыжатӥсьёс пусйизы "Ижсталь" заводлы 240 ар тырмонэз. Соослы ӟечкыланъёс ыстӥзы Россилэн Президентэз В. Путин но шугадӟонъёслэсь утиськонъя министрез С. Шойгу. Нош Алнаш ёросысь Асан совхоз-техникумын туж усто пусйиллям шундыез данъян нуналэз (Петров день). Кылдычин зэмзэ ик пӧсь нуналъёс сётӥз. Вашкалаос та нуналэ турнаны потыло вылэм. Татчы вуылӥз Кун Кенешлэн Тӧроез А. Волков. Нош макем пӧсь нуналъёс али президентэ кандидатэ кариськыны малпасьёс понна, соос асьсэос гинэ, дыр, тодо. Но та уж шаерамы мынэ. Т. Банникова. Азбаръёсын � рулонъёс Пичи Пурга. Гурт калык сюлмаське нырысь ик ас пудозэ толйытон сярысь. Тае ӟеч валало, шӧдске, "Родина" эштосысь кивалтӥсьёс. Соин ик рулонъёсы бинем кӧс турынэз выль моньяос ворттӥзы азбаръёсы. Пудо возисьёслы кык рулон, мукетъёсызлы � одӥг. "Родинаын" оскыто: висъяно пудо сиёнлэн та оглюкетэз гинэ, азьпалан луэмезъя эшшо турын но фураж сётозы на. Турын утчаса гуртоос огыр-бугыр уг бызьыло. Вань кужымзэс сётыса табере соос фермаосы пудо сиён дасяны тыршозы. В.Тронина. АРХИВЫСЬ ДОКУМЕНТЪЁСЪЯ Удмуртия ХХ дауре 1926-тӥ ар Удмурт автономия промышленностьын куд-ог азинсконъёс басьтыса, кыкетӥ вамыш лэсьтӥз � гурт хозяйствоез ӝутон борды кутскиз. Нимаз пичиесь бусыосын крестьянъёс, сюрлоен араса, куссэс тӥязы. Механизациез пыӵатон понна музъем кесэгъёсты огазеяно вал. Эшшо одӥгез ужпум � ёрмылӥзы гыроно-кизёно музъемлы. Россилэн правительствоез кӧчыны лэзиз Сибирьысь буш музъемъёсы. Озьы Удмуртиысь но уноез адямиос Омск, Томск, Ново-Николаевск но Иркутск губерниосы улыны кошко. Интыысь властьёс музъем висъянэз юн чакласа возизы. Соос кивалтэмъя, гуртъёсын музъемез выльысь но люкылӥзы, начар но шоро-куспо улӥсьёслы будэтыса пай сётъязы. Та ужрадэ правительство кредитэн коньдон висъяз. Огъя учкыса, 1926-тӥ арын Удмуртилэн улоназ пеймыт гуысь шыртыл кадь югыт адскиз, калык выль улонэ вамыштӥз. Та арысен уногес саклык висъяське ни нуналмысь улон- вылонэзлы. 4-тӥ октябре Красный посёлокез городлы пӧрмыто, 16-тӥ декабре со Можга город луэ. Татчы пыре Сюгинск завод но. Яганысь нюлэс пилён завод котыре но посёлок ӝутске. Таӵе воштӥськонъёсын валче Удмуртиысь городъёс но посёлокъёс азе султэ ужпум коммунальной хозяйствоез радъян пумысен. Азинско телефон кыскон ужъёс. Область кылдытон вакытлы Ижын 90 телефон номер вал, Глазовын � 74. Городъёс куспын телефон герӟет ӧй вал на. Нош со туж кулэ вал, уката ик лымшор но уй пал районъёсты валчеян вылысь. Итыысь вань луонлыкъёсты уже кутыса, телефон линиос кыскизы Глазовысь Пониное, Люме, Лудошуре, Юкаменске, нош Ижысь Завьялово черкогуртэ. Уже мынӥз граждан ож вакытысь кылем бышкись ез. Бӧрысь аръёсы уно кужым сётэмын вал Ижез областьлэн уй пал но лымшор люкетъёсыныз герӟан вылысь. Н.КРАСИЛЬНИКОВА, Удмурт Республикаысь кун архивын ужась. ? Вотка заводлэн продукциез � турын мажсан агрегат. Кин кытын шутэтске Кызьы тодмо, Удмуртиын химия пыӵал тӥрлык возиське Кизнерын но Камбаркаын. Специалистъёслэн чакламзыя, со ёросъёсын улӥсьёслэн, пе, тазалыксы уродме. Та малпанэн ваньмыз ик соглаш уг луы, малы ке шуоно, арсеналын ваньмыз ӝикыт возиське. Озьы ке но, калык куспо Вож Кирос национальной организацилэн Россиысь отделениезлэн удмурт ёзэз та ёросысь пиналъёслы Варзи-Ятчи курортын гужем лагерь усьтӥз. Дунтэк путёвкаос сётэмын 75 нылъёслы но пиослы. Санаторийын эмъясько но тазалыксэс кыдато анай-атайёсынызы пиналъёс но. Вералом на: та нуналъёсы Варзи-Ятчиын ваньзэ шутэтске 500 мурт. Нош кӧня ке ар талэсь азьло курортын та вакыт чус-чус вал. Но путёвкалы дунъёс сярысь ке верано, соос ичи ӧвӧл: мӧйыослы � 7200 манет, пиналъёслы � 3800. *** Витетӥ арзэ ни усьтӥськоз туэ Каракулино ёросысь Зуевы Ключи гурт дорын палаткаосын городок. Дас нунал ӵоже, 5-тӥ�14-тӥ августэ, бадӟым классъёсын дышетскисьёс но студентъёс улозы но ужалозы "Экология тынад профессиед" программая. Отчы лыктыны кулэ вуоно юристъёс, медикъёс но журналистъёс. *** Сочиын кык арня ӵоже шутэтскизы Россия Федерациысь Культурая министерстволэн стипендиатъёсыз � пиналъёс. Кибашлы пиналъёс вал Удмуртиысь но. Со кутскись крезьгурчиос Алёша Макшаков (Сарапул), Лейла Исмаилова (Селта), Артём Семеновых (Ижевск) но балалайкаен шудӥсь виртуоз Павел Волков (Воткинск). Пиналъёс тау карон гожтэтъёс басьтӥзы Россиысь культурая фондлэн кивалтӥсезлэсь Никита Михалковлэсь. Н.ЛЯЛИН. Вормись тыршоз Кизнерын Июнь толэзе Кизнер посёлокысь арсеналын химия пыӵал тӥрлыкез быдтонъя лэсьтӥськон объектъёсты кылдытонъя подрядчикъёс пӧлын конкурс ортчиз. Заказчикез луэ Россия Федерациысь Обороная министерство. Конкурсын нюръяськизы "Купол" кун предприятие, Можгаысь лэсьтӥськонъя управление, Россиысь спецстройлэн нимысьтыз лэсьтӥськонъя 6-тӥ управлениез (Ижевск). Та ужез радъяз "Прикампроект" акционер огазеяськон. Конкурсын вормисен лыдъямын лэсьтӥськонъя 6 номеро управление. Б. Никитин. Котьма сярысь Ортчемаз пятницае Лымшор Кореяез зуркатӥз секыт ивор. Шоркарлэсь 215 иськемын нылпиосты нуись 4 автобус шуккиськиз бадӟым секыт автомобилен. 3 автобусын тылпу потӥз, ньылетӥез вуэ усиз. Та шудтэм учырын 21 мурт быриз, тросэз сӧсырмизы. *** Франциысь властьёс кужмысь ӝегатӥзы Россиысь вуэм "Седов" тӧлпо пыжез. Со вуиз вал "Брест-200" зарезь празднике. Кызьы тодмо луиз, "Седовез" киултӥзы Швейцариысь "Нога" компанилы Россилэн кӧня ке дасо миллион доллар тыронэз люкаськемен. Дуннеысь одӥгез бадӟымез тӧлпо пыж празднике пыриськоз ик, дыр, нош Францилэн вуосысьтыз кошкыны лэземын ӧвӧл. *** Берло вуэм иворъёсъя тодмо луэ: Россиысь коньдон берган удысэ 500-лэсь уно йыружен вырись группаос пыриськемын. Мукет сямен вераса, законэз уг быдэсъя 4,5 сюрс адями. Ӵапак соос 2000-лэсь уно коммерциен герӟаськем предприятие но 700 банк кылдытӥзы, 40 сюрслэсь уно предприятиысь асьсэлы барыш кельто. Та сярысь ивортӥз Россиысь Югдурез утёнъя министерствоысь одӥгез валтӥсь специалист. Дас ар улыса Африкаысь 28 миллион нылпи яке анайтэк, яке атайтэк кылёз. Солэн мугез: СПИД-лэн ӝог вӧлмемез. Та сярысь ивортӥзы США-ысь учёнойёс кышкыт висёнлы сӥзем калык куспо конференциын. Туннэ нуналлы СПИД-эн черласа бырем мумы-бубыослэн 16 миллион пиналъёссы сюдӥсь-вордӥсьтэк кылемын. 2010-тӥ арлы Намибиысь, Зимбабвеысь котькудӥз куинетӥез нылпи та муген анай-атайтэк кылёз. (Басьтэмын Интернет пыр). Гурт улон Вало но возь вылын Инбамысь огзэс-огзы уйылӥсь сьӧд-куӵо пилемъёс шоры учкыса, Мария Николаевна капчияк шокчиз: "Инмар утиз, лэся, зорытэк ортчиз". Солэсь кылъёссэ зэматыса кадь Вишур ураметӥ тузонэз пурӟытыса-бергатыса, ӟырдам мугорез маялтыса, тӧл ортчиз. Тузон пырыос липетъёс валлин шудыса вылӥе ӝутскизы. Ӵук лысвуэн пыласькем пилемъёс, таӵе кырсь ӧтьымтэ куноослэсь кышказы, лэся, кык пол гудыртӥзы но город пала ышизы. - Тани арня ӵоже ни кӧс улэ, - шуэ ӟеч кидыс уськытонъя Можга кун станциысь валтӥсь агроном М. Н. Киршина. - Куазь кема зоремен турын дасяны ӝегаса кутским. Али ужъёсмы умой ӧръяськизы. Валэктон вылысь: вераськон мынэ Можга районысь азьвыл "Гигант" колхоз сярысь. Кӧня ке ар талэсь азьло со статуссэ воштӥз, станцилы пӧрмиз. Азьвыл председатель директор луиз. Нош калыклэн сюлмаз озьы ик "колхоз" улэ. Азьлозэ жалямен ӧвӧл, огшоры дышем сямъя. Хозяйстволэн котькыӵе дыръёсыз вал. Кивалтӥсьёс ӵем гинэ вошъяськылӥзы, одӥгъёсыз калыкез серметаны вырылӥзы, мукетъёсыз преникен лӥятылӥзы. Колхоз вал азьмынӥсьёс пӧлын но, уногес - шоро-куспоос пӧлын. Берлоез кивалтӥсь Юрий Петрович Рябов сярысь ӟеч кылъёс гинэ верало. Гектарлы быдэ 50-60 центнер ю-нянь люкан - со выжыкыл ӧвӧл, шуэ Ю. П. Рябов. Та малпанзэ улонэ пыӵатыны сюлмаське кыдёке азьлане учкыны быгатӥсь директор. Хозяйствое вуылыкум, директорен вожвыл луим. Юрий Петровичез та кысык вакытэ, турын дасян сяна, мукетыз но сюлмаськытэ вылэм - лэсьтӥськон удыс. Ӵапак та ужен ик али со бызьылэ-ворттылэ. Вераськеммес азьланьтӥськом валтӥсь агрономен. Вань малпан-сюлмаськонэз солэн али возь вылын бере, со пумысен ик кенешиськом. - Туннэ нуналозь 300 тонналэсь уно кӧс турын люкаськиз ни, чакласьком 480 тонна. Ми сое ваньзэ рулонэ биниськом. Зуродъёсы люкаса ум выриське, ыштонъёс гинэ адӟоно. Ма, собере муртлэн ваньбурезлы гочасьёс но сюро. Паймод но бырод, возь вылысь турнам турындэ син улысьтыд кокчалтозы, лушкаськон алямын. Вишур но Удмурт возьёсты утялтыса, али Чумой котырысь Вало дур турынэз октӥськом. Та гуртын пенсионеръёс гинэ уло на. Вишурысь механизаторъёс техникаез котыр город пыр нуллонтэм вылысь татчы ик возь вылэ кельто - возьмасьёсын. Турын туж удалтэмын. Соин ик планэз тырмытонтэм сярысь вераськыны ик возьыт. Малпасько, мултэсэн быдэстом, куазь ке ӧз люкеты. Шуг-секытъёс сярысь ке верано, кытчы пырод, вань соос. Техника вужмемын. Ярам механизаторъёсмы "кышъяло-вуро" но, нош бызьыло тракторъёс-комбайнъёс. Та кысык вакытэ котькудӥз ӟеч тырше кадь. Турынэз погыртэ Яков Рыбаков. Пресс-подборщикен ужа бадӟым опытэн механизатор Иван Федоров. Мылысь-кыдысь ужало комбайнеръёсмы но: Василий Романов, Петр Осипов, Григорий Безенцев. Сенажъя планмес тырмытӥм ни. 3000 тонналэсь уно силос тыримы. Гуосты люцернаен но клеверен согиськом. Кукуруза но шундыберган берло аръёсы ум будэтӥське. Та культураос куазь тупамъя гинэ удалто. - Миым 138 тонна вылӥ репродукциен кидыс вузам. Вожмаськыса басьто. Курисьёс трос - уг тырмы, музъеммы ичигес, вераськонэ пыриське экономист Т. Н. Степанова. - Ӟеч кидыс будэтэммы-вузаммы понна государстволэсь дотация вуэ. Мукетыз юрттэт - уно йӧл кыскем понна. Кылем арын котькуд скаллэсь шорлыдын 3960 килограмм йӧл люкаськиз. Та нуналъёсы ӧжыт кыскиськом, пудолы быдэ 10 литр но уг люкаськы, скалъёслэн кунян ваён вакытсы тупаз. Хозяйствоын 722 йыр сюро таза пудозы, со пӧлысь 290-эз - кысконо скалъёс. 230 парсь вордо-будэто на. Вишуръёс понна со ӧжыт ӧвӧл. Вылаз ик, котькудӥз семья трос пудо вордэ на. Соослы рулонъёсын кӧс турын висъязы ни. Туэ июнь толэзе гинэ кык гуртын улӥсьёс фермае 32 тонна йӧл вузазы. Умой гуртоослы, мултэс продукция понна соку ик киязы коньдон басьто, фермалы но барышез кыле. Йӧл, сӥль вузан бордысь пото хозяйстволэн азинсконъёсыз. Вишуръёс тае умой тодо-валало. Соин ик, ӟеч кидыс уськытэм сяна, пудо выжыез но ялан умоято. Нош йӧл, сӥль люкаське, пудо сиёнэд ке тырмыт. Та бордын ик али уен-нуналэн тыршо вишуръёс. Г. Юсаев. Котькуд скаллэсь4 сюрс 500 килограмм кыскиз миым Таня Федоровских. Егит кышномурт одӥг но ӝыны ар ӵоже ни тырше скал кыскись луыса. Аслыз группа люказ Киров палась ваем ӟеч выжыё ветылъёслэсь. Вераны кулэ, со 14 ветылъёсты Асан совхоз-техникуме ваемзы бере сюдыны косӥзы Таняез. "Эшъёсыныз" кышномуртлэн люкиськемез ӧз поты ни. Соосыз но Танялэн сюлмаськемез понна ӟечен "берыктӥзы". Одӥг ар ӵоже сомында йӧл кыскыны � трос ужаны кулэ. Ӟеч ужъёс синйылтытэк уг кылё. Егитъёслэн нуналзы азьын Т.Федоровскихез синпель кузьымен данъязы Удмурт Республикаысь Егитъёсын ужанъя кун комитетын. Скал кыскись шумпотэмын но, паймемын но, малы одно ик сое бырйизы шуыса. Ведь солэсь но егит нылъёс вань на ук. Но кышномуртэ огшоры муген ӧз быръе. Танялэн верамезъя, ужаз ассэ жалятэк тырше. Уго гуртаз пукыны но дыр уг сюры. Кык пиналъёсыз но анайзэс ӵем ик уг адӟо. А.АНДРИЯНОВ. Туспуктэмез В.Камашевлэн. Куашкам предприятие пыд йылаз султӥз Александр Черных: "Кужымелы оскыса лыктӥ" Промышленность удысысь бадӟымесь предприосмылэн кивалтӥсьёссы шаерамы гинэ ӧвӧл, быдэс Россиын тодмо луо ни. Соос пӧлы пыре ни "Ижевский подшипниковый завод" акционер огазеяськонлэн валтӥсь тӧроез Алексаендр Черных. Ньыльдон кык ар талэсь азьло Селта черкогуртын вордӥськыса, Ижысь механической институтэз йылпумъямез бере, егит специалистэз ужаны ысто Ижысь механикая заводэ. 20 ар ӵоже отын, улӥысен кутскыса, вань тубатъёсты ортчиз. Пуктӥзы сменной мастере собере луиз валтӥсь мастер, цехлэн кивалтӥсезлэн воштӥсез, цехлэн тӧроез, производстволэн кивалтӥсезлэн воштӥсез. Александр Геннадьевич огинтыяз ӧз сылы, ялан дышетскиз тодон-валанзэ будэтӥз но обороная министерствоын солэн кивалтоно цехез устоез луиз. Сыӵе ним уго ваньмызлы уг сёто. Со вал валтӥсь бичан (сборочной) цех (куинь огшоры цех быдӟа). Ялан утча выльзэ. Селта музъем, инмар Александр Черныхлы ваньзэ сётэм: мугор но (кык метр ӝужда ёрос), визь но, кужым но... Тӥни таӵе адямиен, валтӥсь директорен туннэ вераськонмы. - Александр Геннадьевич, кытын вордӥськемды сярысь юанэлы малы ке кепыраса кадь валэктӥды. Малы меда? - Туж огшоры. Кожай, тӥ но шорам паймыса учкоды. Нокин уг оскы, мон селта пи шуыса. Котькудӥз малпа Украинаысь яке кытысь ке сопалась лыктэмын. Асме бен сокем ӝужыт но шуэме уг поты. - Я бен, ӵок, мар инкуазен сётэмын, тыпы кадь луэмлы шум гинэ потоно. Со кенешонмылэн кутсконэз. Табере ужъёсты сярысь кӧня ке вераськом. Тӥ вакчи дыр куспын, меӵак пусйыса, 2 ар ӵоже кылын верантэм бадӟым уж лэсьтӥды. Гаӵоло кыллись предприятиез улӟытӥды. Кызьы озьы быгатӥды, рос-прос маде вал? - Номыре уг ватӥськы. Татчы ужаны лыктӥ, ас кужымелы, быгатонэлы оскыса. Заводэн тодматскеме бере, туж кельшиз калык, предприятие юн аспӧртэмлыко потӥз но уже кутымтэ бадӟымесь луонлыкъёссэ адӟи. Нырысь ик умой-умой тодматски ужъёсын, заводысь югдурен, собере лэсьтӥм шуг-секытысь (кризисысь) потонъя нимаз план, чаклам туж умоесь ужрадъёс. Со 20 страница пала луиз. Тросэз со герӟаськемын вал коньдон поттонэн, производствоез паськытатонэн, бадӟымесь тыронъёсты пытсанэн, калыклы уждун сётонэн но мукетыныз. Ваньзэ лыдъям-чотам, кызьы шуо, чыры-пырызэ но ӧм вунэтэ. Кылсярысь, буш ужан интыосты арендае сётонэз. Со но уксё вае. Но главноез вал производство-продукциез вузан но корт (сырьё) шедьтон. Юнматӥм азьло ыштэм вань кусыпъёсмес: кызьы ке поставщикъёсын, озьы ик подшипникъёсмес басьтӥсьёсын. Тужгес но трос ужано луиз поставщикъёсын. Уно заводъёсы ачим ветлӥ. Одӥгъёсызлы меӵак шуим: таӵе дунын корттэс ум басьтэ, мукетъёсыз азе музон условиос пуктӥм, куспамы тупанкылъёс гожтӥм но та уж каллен вырӟиз. Коллектив азе бадӟым ужпум пуктӥм: толэзьлы быдэ ичизэ 1 миллион подшипник бичано яке производствоез кыкпол ёрослы будэтоно. Калык оскиз, йӧ вырӟиз. Толэзьысь толэзе производство йылӥз, табере со лыдпусэз 1800-2000 сюрсозь вуттӥм ни. Азьланьын чакласьком 2,5 миллионэз ортчыны. Со быдэстымон ужпум. Эшшо одӥгзэ ватсало на. Кивалтӥсь ке воштӥське, сьӧраз, пе, асьсэ адямиоссэ вае, выль команда кылдытэ, шуо. Мон озьы ӧй верасал. Сьӧрам кык мурт гинэ лыктӥз. Ужаны ӧдъякум, предприятие дасо пала пичиесь заводъёслы люкылэмын вал. Нырысь ик сое быдтӥм. Кадръёсын бадӟымесь воштӥськонъёс ӧй вал. Вань кивалтӥсьёс азе юнэсь куронъёс пуктӥм. Та ужлы азьлогес ик дасяськи, Н. И. Сапожников (али Кун Думалэн депутатэз) милемды, заводъёсысь кӧня ке производственникъёсты- кивалтӥсьёсты, дырын-дырын мукет предприятиосы нуллӥз, отысь ужъёсын тодматскылӥм. Со юнме ӧз луы. Кивалтон амалъёсты ӟечгес валаны кутски. - Александр Геннадьевич, нош туэ кызьы ужаськоды? Мар вылез вань? - Буйгатскыса, гыбдаса ум улӥське, ялан азинскиськом, ваньбур поттонэз будэтӥськом. Соин ӵош ик выль цех но ӝутӥськом. Отчы туала выль оборудование пуктом. Вамышъёсмес лыдпусъёс яркыт возьмато. Тани ӝыны арскын 9,9 миллион подшипник бичам, яке быдэс 1997-тӥ арынлэсь трос. Кылем арын та дырен ӵошатыса 30 процентлы тросгес луиз но толэзьлы быдэ шорлыдын 1650 подшипник люкаськиз, яке миым та дыре сярысь 1,5 поллы ятыргес. Ваньбур поттон йылэ бере, уждунмы но будэ. Шорлыдын вераса, со 740 манетлы тросгес луиз но 6 толэзьскын котькудӥз 1614 манет басьтӥз, нош июне 2070 усиз. Али бадӟым опытэн ужасьёслы, кибашлыослы нош ик уждунзэс будэтӥськом. Со умоен берытскоз. Вить толэзьскын 15,7 миллион манет пайда басьтэмын. Пайдалы вытэз куштыса, со 11,7 миллион кылиз на. Со пӧлысь асьме кулэяськонъёслы 2 миллион 705 сюрс манет кутэмын. Отысь 1 миллион 235 сюрсэз социальной удысэз возёнэ мынӥз. Туэ ваньбурмы 6,9 миллионлы йылӥз, со пӧлысь дась продукция - 2,9 миллионлы. Тӥни та лыдпусъёс туж умой возьмато, предприятие шуг-секытысь (банкротысь) быдэсак потӥз ни шуыса. Табере азьланьын уката ӝоггес азинскыны ватсаса умоесь условиос кылдытэмын. Со шумпоттэ. Вылез сярысь вераса, ушъяськыны уг быгатӥськы. Но кызьы шум уд поты, куке предприятие лыкто Германиысь ужбергатӥсьёс но асьсэос бадӟым заказ лэсьто. Вераськон мынэ кык бадӟымесь "Лёфлер" но "Фишер" фирмаос сярысь. Алигес дорамы вал ачиз Ганс Фишер. Со куриз кабзэ выль подшипник поттонэз радъяны, куспамы огкыл кутӥм. Вуоно арын куронзэс быдэстом. Со умой луоз огазеяськонлы но, республикалы но. Ватсаськозы выль ужан интыос, интыысь но кун бюджетэ тросгес уксё пыроз. - Шуг-секытысь потыны эшшо кин юрттӥз на? Кинэ нимысьтыз пусйысалды? - Валамон, конечно, Удмурт Правительствоез. Со огазеяськонэз улӟытон вылысь туж трос лэсьтӥз. Нырысь ик, валаса кылдытэмын вал директоръёслэн кенешсы. Отчы пыртэмын Правительстволэн адямиосыз - промышленностья министрлэн воштӥсез Леонид Курочкин но Ижысь мэрлэн воштӥсез Андрей Армянинов. Кенешлэсь ужзэ радъя Первоуральскысь новотрубной заводлэн директорезлэн воштӥсез Александр Зак. Со "ИПЗ" огазеяськонлэсь уно акциос возись адямиез луэ. Нялтас верало, предприятилэн 15 процент акциосыз государство киын, сомындаез ик предприятилэн но 70 поцентсэ нимаз адямиос но ужасьёс возё, но тросгес Свердловск улосын. - Александр Геннадьевич, кытысь корт басьтӥськоды но кытчы поттэм ваньбурдэс вузаськоды? - Та сярысь вакчияк поттылӥ ни вал. Поставщиикъёсын кусыпъёсмес выльысь умоятӥм. Азьло металл басьтылӥм данак интыосысь Магнитогорскысь, Украинаысь Новолипецкысь, али тросгес - Первоуральскысь. Кусып тупатӥськом ни "Ижсталь" огазеяськонэн. Но пусйыны кулэ, ми поставщикъёс азе асьмелэсь условиосмес пуктӥм. Озьы трос коньдон ширъяны быгатӥм. Нош 1998-тӥ арын 17-тӥ августэ долларлэн кужымез будэм бере, продукцимес кунгож сьӧры вузаны ӧдъям. Табере со ӝыныез отчы кошке, нош кылемез Россиысь вань автозаводъёсы - ГАЗ, ВАЗ, КамАЗ, УАЗ н музонэ. Кусып тупатӥськом ни Ижысь автомобиль поттӥсьёсын. Июне "Ижавтолы" 300 сюрс манет тыр подшипникъёс вузам. Продукцимес озьы ик яратыса басьто Франция, Италия, Австрия, Испания, Латинской Америка, Германия, Араб Эмиратъёс но мукет кунъёс. Ваньмыз со валютаен лыктэ. - Тӥледды трос дышетӥзы шуиськоды Василий Чугуевсский, солэн воштӥсьёсыз Виктор Мулин но Петр Екимов. Нош асьтэлэн кин самой матысь юртӥсьёсты луо. - Котыръяса вератэк, быдэс коллектив юрттэ. Но ужзыя котьку мыным матын луо поизводствоя воштӥсе Александр Поробов, ваньбурен кивалтонъя отделлэн кивалтӥсез Сергей Митрошин, токарно-заготовительной но энергоцехлэн кивалтӥсьёсыз Василий Демеев но Виталий Угрюмов, ОТК-лэн кивалтӥсез Александр Назаров, планово- экономической отделлэн кивалтӥсез Алевтина Трубицына. Озьы ик трос юртто кадръёсъя отделлэн кивалтӥсез Евгений Ильин но валтӥсь металлург Наталья Орлова но уно мукетъёсыз. Ваньзэ уд но вера. Коллетивмы бадӟым ӧвӧл, 1085 ужасьёсмы, ваньмыз лулысь-сюлмысь тырше. Нокин сярысь урод кыл вераме уг поты. Тӥни таӵе адямиосын шуг-секытысь потыны быгатӥм. Котькуд толэзе соосын кенешылӥм, собрание ортчытъям. Трос умоесь ӵектонъёс но дэмланъёс сётъязы. Озьы огъя кужымен, дэмен луэ котькыӵе секыт ужпумез быдэстыны, кызьы шуо, кулэ дыръяз гурезез но берыктозы. Кужым, улӟон - ужасьёс бордын, соосты шонер гинэ ӧръяно. Социальной удысты вань-а? - Кызьы бен сотэк. Адями одӥг ужен уг улы. Арлы быдэ ужа нылпи шутэтскон "Радуга" лагерьмы. Возиськом 12 номеро медико-санитарной часть. Озьы ик вань жилищно-коммунальной хозяйствомы. Али улон интыосмес городлы сётыны дасяськом. Солы но трос коньдон кулэ. - Валамон, куашкам предприятиез бурмытон валтӥсь директорлы но капчи ӧз йӧты. Кин тӥледлы сыӵе сям, ужан мылкыд пыӵатӥз? - Конечно, анай-атае. Со пыӵа нылпилы анайлэн йӧлыныз, атайлэн ассэ кызьы воземеныз. Геннадий Тимофеевич 25 ар кивалтӥз районысь связъя ёзэн. Анае доры толэзьлы быдэ Селтае бертылӥськом. Анай-атаелы котьку тау карисько. Табере бен ачим атай ни. Кузпалэным кык нылпи будэтӥськом. Нылмы юрфакын дышетске, куинетӥ курсэз быдтӥз, пие - 8-тӥ классэз. - Александр Геннадьевич, кызьы тодмо, валтӥсь директорлэн ваньмон дырыз трос ӧвӧл, отпуске но тыро-пыдо уд потаське. Озьы ке но, кызьы шутэтскиськоды? Вань-а кыӵе ке яратоно ужды? - Гуртын корка возисько. Отын музъем уж. Яратӥсько машинаен ворттылын, лыдӟиськыны, уката ик кылбуръёсты, туж шер ке но, пӧйшураны ветлӥсько. Школаын, институтын спортэн выри. Поэтъёс пӧлысь юн матынэсь Олег Поскрёбышев, Маяковский, Вознесенский, Рождественский, Гамзатов но мукетъёсыз. - Кыӵе яратоно сиёнды, сяськады? - Пельнянь, борщ. Вань сяськаос чебересь, но тужгес кельше хризантема. Вераськиз Геннадий Романов. Футбол Вылӥе сюрес пытсамтэ на Нырысетӥ дивизионысь футбол командаос чемпионатлэсь ӝыны люкетсэ ортчизы, быдэн 19 пол пумиськизы. "Газовик" одӥг шудонлы ӧжытгес ортчытӥз - куазь зол зоремен Сочиысь "Жемчужинаен" пумиськонэз берлолы кельтӥзы. Озьы ик Читаысь "Локомотив" но Москваысь "Спартак-Чукотка" чемпионатлэн кыкетӥ люкетаз кык пол нюръяськоно луозы. Кызьы нюръясько командаос, кин кужмогес, кудӥз лябгес возьматэ турниръя таблица. ш в н к т о 1. "Сокол" (Саратов) 19 14 4 1 29-7 46 2. "Торпедо-ЗиЛ (Москва) 19 12 3 4 28-16 39 3. "Рубин" (Казань) 19 11 5 3 30-12 38 4. "Газовик-Газпром"(Ижевск) 18 10 2 6 32-23 32 5. "Шинник" (Ярославль) 19 8 6 5 27-22 30 6. "Амкар" (Пермь) 19 7 5 7 26 22-26 7. "Спартак"(Нальчик) 19 7 5 7 17-16 26 8. "Жемчужина" (Сочи) 18 7 5 6 25-27 26 9. "Кристалл" (Смоленск) 19 7 4 8 23-21 25 10. "Балтика" (Калининград) 19 7 4 8 15-18 25 11. "Локомотив" (Чита) 18 7 4 7 20-23 25 12. "Лада" (Тольятти) 19 6 7 6 26-25 25 13. "Волгарь-Газпром" (Астрахань) 19 6 6 7 24-20 24 14. "Томь" (Томск) 19 6 6 7 11-12 24 15. "Носта" (Новотроицк) 19 6 5 8 21-23 23 16. "Арсенал" (Тула) 19 5 8 6 22-22 23 17. "Металлург" (Липецк) 19 4 6 9 17-26 18 18. "Спартак-Чукотка" (Москва) 18 4 4 10 29-51 16 19. "Металлург" (Краноярск) 19 4 3 12 14-31 15 20. "Локомотив" (Санкт-Петербург) 19 2 4 13 19-38 10 Азьпалан мынэ Саратовысь "Сокол". Туэ со берпуметӥ турын Казаньын гинэ келяз. Волга дурысь футболистъёслэн, тренеръёссылэн, "висисьёссылэн" кемалась малпанзы быдэсмоз, шӧдске - командазы пар валэн кадь вылӥ дивизионэ ворттэ. Кыкетӥ интыын мынӥсь "Торпедо-Зил" кужмо футболистъёсын юнматэмын. Озьы ке но, куноын берло кык шудонзэс Москваысь спортсменъёс келязы Нальчикын но Сочиын шоро-куспо командаослы. Соин ик вылӥ лига сярысь кыл поттылыны вазь на. Со бӧрсьын шокаса мынӥсь "Рубинлэн", мон сямен, луонлыкез бадӟымгес. Берло куинь пумиськонзэ вормемез бере (кыксэ куноын) "Газовикмы" сярысь трос ӟеч кыл верало. Али командамы ньылетӥ интыын мынэ. Азьланьын со 11 шудонзэ дораз ортчытэ, 9-сэ гинэ палэнын. Соин кык кужмоосыз пӧлы шедьыны луонлыкъёссэ ӧз шедьты на. Валамон, азьпалан мынӥсь командаос очкоссэс тросгес ыштӥзы ке. "Газовик" кыкетӥ интыын мынӥсь "Торпедо-Зил" командалэсь 7 очколы кыле ("Жемчужинаен" дораз ортчоно пумиськонэз вормоз шуыса лыдъяно ке - воксё ньыль очколы гинэ). Тренеръёсмы вылӥ лига сярысь туэ сокем уг поттыло, шуо, коньдонмы, пе, ӧжытгес, стадион но вуттымтэ. Но пусъё: вылӥ лигае матысь дыре ӝутском. Оло, та веран кескич амал - финиш азьын лушкемак азьпала потыны луонлык. Улыса адӟом ни. "Газовик" дивизионын мурт капкае ваньмызлэсь трос гол пыртӥз - 32. Ляб интыез - защита, аслазаз но туп уно гинэ пыра - 23. Ӵошатон понна, "Соколлэн" капкаяз 19 пумиськонын 7 пол гинэ тупез ӵыжыны быгатӥзы. Умоез со но, командаямы трос егитъёс шудо, ӟеч кусыпъёс тупатэмын Ижысь "Динамоен" но. Футболистъёсмы мукет командаосы ӧз пазьгиське ке, туэ ке ӧз, зэмзэ но матысь дыре вылӥе ӝутскыны быгатозы. Таизлы мон оскисько, клублэн президентэзлэсь Владимир Тумаевлэсь малпам ужзэ пумозяз вуттыны тыршемзэ тодыса. Г. Юсаев. Выжыысь выжые Предприятиын одӥгез кема ужась, дыр, луисько ни. Татчы лыктӥ 1965-тӥ арын. Со пӧлысь 31 ар электрик луисько, ньыль ар мукет цехын ужай. Кышное но 25 ар татын тыршиз, али Ижысь механикая заводын пистолетъёс бича. Уже кельше, али электрикъёслэн бригадазы оскемын. Тямыс кузя электрикъёс куинь участокын (штамповка, шерон инструментъёс но токарной автоматъёс) ужаськом. Ми азьын одӥг ужпум сылэ � цехын вань оборудование ӟеч мед ужалоз, одӥгез но тэк медаз сылы. Тӥни соин герӟаськемын заводын ужазинлыкез ӝутон но ваньбур поттонэз будэтон. Гуртын будэм удмурт пияш, осконтэм кадь ке но, заводэ выжыяськи. Пичи Пурга районысь Гожня гуртын 1947-тӥ арын вордӥськыса, агроном луыны малпасько вал. Дас классэз йылпумъяме бере, Ижысь гурт хозяйствоя институтэ пырыны выри, ӧй быгаты, конкурсэз ӧй ортчы. Тӥни озьы улон сюресэ татчы вуттӥз. Уг жаляськы. Огазеяськонын пыд йылам султӥ. Завод куинь комнатаен квартира сётӥз. Можга сюрес кузя Пугачёвоын сад-бакчае вань. Отчы "Москвич" автомашинаен ветлӥськом. Музъеме тырмыт, 8 сотка луоз. Заводлэн ветеранэз луисько бере, со монэ уг вунэты. Тани Чехословакие ветлыны путёвка сётъяз. Сое мон бадӟым наградаен лыдъясько. Табере сыӵе данъянъёс ку луозы на � шуг вераны. Предприятимы бен бадӟымесь заводъёс пӧлы уг ке но пыры, кулэ продукция поттӥськом, милям подшипникъёстэк одӥг машина но уг ветлы. Ужасьёсмылэн лыдзы берло дыре пумен йылэ, али сюрслэсь трос ни. Заводамы семьяосын трос ужало. Тани ОТК-ысь контролёръёслэн бригадирзылэн Надежда Аитовалэн нылыз доразы контролёрын тырше. Профкомлэн кивалтӥсезлэн Алевтина Ивановалэн пиез. 22 номеро цехын полировщик луэ, нош ИИ-тӥ отделлэн кивалтӥсезлэн Леонид Веревкинлэн пиез 21 номеро цехын ужа. Нокызьы вератэк кельтэме уг поты кузпалъёсты Галина Черемныхез но Павел Червяковез. Кышноез сборочной цехлэн кивалтӥсезлэн воштӥсез луэ, нош картэз � 22 номеро цехын электрик. Выжыысь выжые семьяосын ужасьёсмы зэмзэ но ичи ӧвӧл. Тани токарной цехлэн кивалтӥсезлэн Василий Демеевлэн кузпалэз но заводын ужа, распределитель луэ. Бригадае сярысь вераса, куспамы тупаса, огкылысь трышиськом, ог-огмылы пыдмес ум пуктӥське. Тужгес но синмаськымон ужало Виталий Потапов, Николай Суворов но мукетъёсыз. Одӥгез сярысь но урод кыл вераме уг поты. Али тани вылӥ квалификациен кык электрикъёсмылы уждунзэс будэтыны чакласьком. Кышноеным ныл но пи будэтӥськом. Нылы ЭМЗ-ын инженер луыса ужа, нош пие автозаводын, техникумез быдтӥз. Бакчамес возьыны чупыр-чупыр юртто. Соос но та вакытэз, рыноке потонэз, валаны кутско ни. Туж умой со. Михаил МЕРКУШЕВ, электрикъёслэн бригадирзы. "Мон кивалтӥсе мынысал..." Удмуртия 1920-тӥ�1930-тӥ аръёсы Кызьы тодӥськоды, 1920-тӥ арын 4-тӥ ноябре удмуртъёс кунлык басьтӥзы � кылдӥз Вотской автономной область. Асьсэлэн автономной областязы удмуртъёс зэмос эрик басьтытозязы, со вал ай нырысетӥ вамыш гинэ. Но со вамыш туж секытэн сётскиз. 1920- тӥ�1930-тӥ аръёсы кунэн кивалтонын трос гинэ тырмымтэос вал. Соку удмуртъёсты валаллямзы ӧз поты, потылӥзы ваче пумит луонъёс но. Та вал туж секытэсь аръёс. Зэмос удмуртлыкез басьтон ортчиз лэчыт нюръяськон пыр. "Мон начальник луысал", � сыӵе малпанэн улӥзы гожъяськыны-лыдӟиськыны быгатӥсь удмуртъёс. Со ӟеч малпан. Нош ма кароно со понна? Нырысь ик удмуртъёсты пыртыны кулэ вал кивалтон аппаратэ. Но со туж но туж секыт вамыш вал. Ведь революцилэсь азьвыл кивалтон аппаратын ужазы ӟучъёс гинэ. Табере сое удмурт карыны кулэ луоз. Озьы РКП(б)-лэн ХИИ съездэзлэн но РКП(б)-лэн ЦК-езлэн ИВ совещаниезлэн национальной ужпумъя решениосынызы валче Удмуртиын но 1923-тӥ арын ноябрь толэзе РКП(б)-лэн обкомаз кылдытэмын вал удмуртъёсты ӵектонъя комиссия. 1923-тӥ арын декабре ортчиз Советъёслэн В областной съездзы. Отын Удмуртиын национальной политикаез нуонъя паськыт программа дасямын вал. Нош 1924-тӥ арын мартэ РКП(б)-лэн пленумаз, укомъёслэн но райкомъёслэн секретарьёссылэн совещаниязы национальной политикаез улонэ пыӵатонъя со ужпумъёс эшшо ӝутэмын вал. Нош ма лэсьтыны кулэ вал? Нырысь ик юнматоно советской аппаратэз. Кызьы гинэ ӧз нималлялэ со ужпумез: "удмуртизация", "коренизация", "национализация", озьы ик "овотячивание советского аппарата" но. Соя партийной но советской органёс 1920- тӥ�30-тӥ аръёсы пумтэм-йылтэм решениос кутылӥзы. Та ужпумез умойгес сэрттон-пертчон вылысь басьтомы 1924-тӥ арез. Областьысь 25 учреждениосын соку 14 процент удмуртъёс ужазы, кивалтон удысын 3,2 процент, технической ужын � 11 процент. 1928-тӥ арын облисполкомлэн аппаратаз удмуртъёс вал 19,4 процент, озьы ик кивалтон ужын 38 процент. 1932-тӥ арын та лыдпусъёс вуизы 38 но 47,4 процентозь. Та лыдпусъёс гинэ. Но соос возьмато мукетсэ но. 1927-тӥ арын областьысь учреждениосын удмуртъёс вал 12,2 процент, уездъёсын � 26,1 волостьёсын � 28,9, сельсоветъёсын � 53 процент. 1932-тӥ арын 18 ёрос исполкомъёсын удмурт лыдъяськиз 61,1 процент, гурт кенешъёслэн председательёссы луыса ужазы 65,3 процентэз. Вераны кулэ, 1932-тӥ�33-тӥ аръёсы советской аппаратэ удмуртъёс самой трос кыскемын вал. Отӥяз лыдпус пумен улӥе усе. Кылсярысь, 1939-тӥ арын июль толэзьлы лыдпусъёс возьмато: 35 ёрос исполкомъёслэн кивалтӥсьёссы пӧлысь удмуртъёс вал 15 мурт. Татын тужгес но паймымонэз тани ма бордын. Удмурт районъёсын, шуом, Алнашысь, Бадӟым Учаысь, Пичи Пургаысь, Бемыжысь, Селтаысь, Ярысь, Тыловайысь но Юкаменскысь исполкомъёсын кивалтӥзы ӟучъёс. Ваньмаз горсоветъёсын председательёс вал ӟучъёс. Кызетӥ аръёсысен но куамынэтӥ аръёслэн кутсконазы трос гинэ лэсьтэмын ни вал. Но уж ӟукыртысагес мынӥз. Удмуртъёсты советской но партийной органъёсы кутылӥзы, дэмланъёс сётысагес. Озьы 1923-тӥ арын мартысен 1924-тӥ арын апрелёзь областе ужаны ӵектэмын вал 14 удмурт, уездъёсы � 14 но волостьёсы � 10 удмурт. Ӵектон-дэмлан уж тужгес но золгес шӧдӥськиз 1925-тӥ арысен. Со аре кутэмын 170 мурт. Нырысетӥ декабрьлы областьысь учреждениосын тырше ни вал 674 адями яке вань ужасьёс пӧлысь 27,1 процентэз. со аре кивалтон удысын ужазы 40-лэсь уно удмуртъёс. Соос отчы шедизы, рабочийёслэн но крестьянъёслэн ӵектэмзыя. Кадръёсты ӵектон бордын вис карытэк тыршизы партийной но советской органъёсын ужасьёс. Партилэн обкомаз но облисполкмын кылдытэмын вал нимысьтыз комиссиос. Удмуртлыкез пыӵатонъя дасяськизы нимысьтыз планъёс, поттэмын "Удмуртъёсты ӵектонъя ӝегатӥсь мугъёс сярысь" методичка но. Палэнысен учкыса малпан кылдылӥз, шор область органъёс та ужен гинэ выро шуыса. Нош уж вылын со ӵем дыръя ньӧмыз понна гинэ лэсьтӥськылӥз, кызьы шуо, питран буш бергаз, кызьы пусйылӥзы асьсэос комиссиос, удмуртлыкез пыӵатон ляб мынӥз. Огъя лыдпусъёс бен уродэсь ӧй вал кадь. Но со лыдпусъёс возьмато, кун учреждениосын удмуртлыкез пыӵатон ляб мынэ шуыса. Уездъёсын но волостьёсын та ласянь югдур умойгес вал, нош ёросъёс кылдэм бере югдур тупатскиз. Областьысь куд-ог учреждениосын удмуртъёс чик ӧй вал яке кык-куинь гинэ лыдъяськизы. Мар бордын солэн мугез? Малы удмуртлыкез пыӵатон каллен но секытэн мынӥз? Кылсярысь, удмуртъёсыз куд-ог уже ӵектылӥзы, адямилэсь быгатонлыксэ ляб шӧдыса. Соин ик соос уноен кошкылӥзы кивалтон ужысь, тросэз азьло интыосазы ик берытскылӥзы. Нош малы кошкылӥзы? Куд-ог ӵектэм адямиос оскем ужез ӧз вормылэ. Со сяна, уждун но ӧз тупалля соослы. Вылаз ик, специалистъёс но кун учреждениосысь администрациос лыктэмъёсты кезьыт пумиталлязы, кышкаллязы, соос интыязы пуксёзы шуыса. Собере вылӥ партийной но советской органъёс адямиосын чачаен кадь шудылӥзы. Соин ик кадръёс туж ӵем вошъяськылӥзы, одӥг ужысь мукет интые выжылӥзы. Ар куспын адями 3-4 уже вуылӥз. Басьтом 1932-тӥ арез. Соку ёрос исполкомъёсын 185 мурт воштӥськиз, со пӧлысь 105- ез � удмурт, сельсоветъёсысь 304 кивалтӥсьёс кошкизы ке, со пӧлысь 190-эз удмурт луэ, секретарьёс воштӥськизы 276-ез, 179-эз � удмуртъёс. Адями ужзэ валаны гинэ ӧдъя, сое соку ик палэнто вал ини. Совето Союзын партилэн но государстволэн кадръёсын таӵе амалэн ужан политикаез туж кема кыстӥськиз на Быдӟым Отечественной война бере но. Берытском 20-тӥ аръёсы. Советской аппаратын удмуртлыкез пыӵатон кутскиз ужез удмурт сямен нуонэ выжтон бордысен. 1923-тӥ арын Советъёслэн В областной съездзы ужпум кутӥз: 34 волисполкомъёс пӧлысь 11-аз ужез нуыны (делопроизводство) кутсконо удмурт кылын. Но со улонэ ӧз пыӵа. 1928-тӥ арын ХИ партийной конференция но облисполком выль ужпум куто: 1929-тӥ арын январьлы вань областной, уездной но волостной учреждениосын, кытын тросгес ужано луэ удмуртъёсын, ужаны кутсконо удмурт кылын. 1930-тӥ арын та ужпумез выжтӥзы 1932-тӥ арлэн пумызлы. Озьы ужез удмурт кылын нуон ужлы ялан выль но выль дыр тупатылӥзы. Та ужез быдэстымтэ понна учреждениослэн кивалтӥсьёссылы чурытэсь куронъёс пуктэмын вал. Зэм, та ужлы куд-огез юн могӟет кылдытӥзы. 1930-тӥ арлы центрысь но интыосысь куд- ог советской учреждениос выжизы ик ужез удмурт кылын нуыны, уж нуиськиз ӟуч кылын но. Но 1932-тӥ�33-тӥ аръёслы таӵе "азинскон" куашканы но бырыны ӧдъяз. Мар бордын бен солэн мугез? Янгыше уськытыны кулэ областьысь учреждениосты, соос уго циркуляръёсты, косонъёсты но вань бумагаосты келяллязы ӟуч кылын. "Вылӥослэн" удмурт кылын выремзы ӧз потылы. Вылӥос но, улӥос но удмурт кылэз кулэтэм макеен лыдъязы. Озьы но луылӥз: областьысь ӟуч учреждениосы бумагаос вуылӥзы удмурт кылын, соосты отын ӧз валаллялэ. Кыкетӥез: удмурт кылын бумагаосты гожъян секытэн сётскиз, соку кылмы умой-умой эскеремын ӧй вал на уго. Ӝоген, ӟучъёс гинэ ӧвӧл, удмуртъёс но, ужез асьме кылын нуыны ӧз басьтӥське ни. Кенешъёс, съездъёс, конференциос удмурт калык пӧлын но ӟуч кылын ортчылыны кутскизы. Удмуртъёс пумен ӟуч кылэ выжо. Улӥ учреждениосын ужасьёс ужез удмурт кылын нуон пумысен тазьы вераллязы: "Олома удмурт сямен гожъяськон шедьтӥзы. Коть ми удмуртъёс ке но, номырзэ ум валаське". Валамон ини, таӵе дыре ӟучъёс шуылӥзы: "Удмуртъёслы асьсэлэн кылзы кулэ ӧвӧл бере, милемлы со воксё но кулэ ӧвӧл". Табере, гажано эшъёс, уд паймелэ, кожасько, малы вань кун учреждениосын быдэсак куашказ удмуртлыкез пыӵатон, удмурт кылэз дышетон. Ачиз кичӧлтон умой уж вал: удмуртлыкез пыӵатыса, кун аппаратын, удмуртъёс сяна, асьме кылэз тодӥсь ӟучъёс но мед ужалозы. Озьы 1923-тӥ арын декабрьысен партилэн обкомез но облисполком та ужез интыысьтыз вырӟытӥзы. Нырысь областьысь ответственной ужасьёс пӧлын удмурт кылэз дышетонъя школа радъямын вал. Но сое дышетыны мылкыд карисьёс ичи шедизы. 1926-тӥ арын та школаын 20 мурт гинэ дышетскиз. Бӧрысь чаклазы 6 толэзьем курсъёс, 2 арняем ӝыт ужась но 1 аръем курсъёс усьтыны. 1928-тӥ арын 4 группаын дышетскиз 160 адями, со пӧлысь кыллы дышиз 2 мурт гинэ. Озьы пӧртэм школаосы но курсъёсы адямиос воксё ӧз ветлэ, шуыны луоз. Но со дыре ик партилэн обкомез но облисполком зол йӧттылӥзы удмурт кылэз дышетыны пумит луисьёс ласянь, кышкатъязы ужысь уллянэн но. Эшшо одӥг учыр. 1931-тӥ арын ВКП(б)-лэн обкомезлэн бюроез национальной политикаез улонэ пыӵатонъя зэмос "революционной" ужпум кутӥз: бюроын вань ужасьёс но быдэс обком 1931-тӥ арлэн пумозяз одно ик дышетыны кулэ удмурт кылэз. Жаляса вераны кулэ, кызьы мынӥз удмурт кылэз дышетон, кызьы мынӥз ужез удмурт кылын нуонэ выжон, со сярысь 1932-тӥ арысен номыр тодмо ӧвӧл ни. Со нокинлы но кулэ ӧз луы ни. Малы озьы луиз? Малы ке шуоно, кутсконысеныз ик котькытын удмуртлыкез пыӵатонлы пумит лушкем нюръяськон мынӥз. Учреждениослэн кивалтӥсьёссылы со уж нокыӵе ик ӧз потылы. Нош заводъёсын ӟуч рабочийёс удмурт кылэз мыскыл карылӥзы: "Табере удмурт кыл вӧсяськыны сяна уг яра ни". Удмурт уже лыктэ ке, ӟучъёс шуылӥзы: "Тани "кузё" лыктӥз". Берытском учреждениосы. Отын ужась ӟучъёс кышкаллязы ужтэк кылёнлэсь. Зэм, ужтэк нокинэ ик ӧз кельтылэ, но соослэн мукет интые выжемзы уг поты вал. Соос йыркуръяськизы, удмуртъёсын вошто шуыса. Нош асьсэ понна уж утчась удмуртъёсты кутэмзы ӧз потылы. Удмуртъёсыз серем карыны, ултӥяны тыршылӥзы. Кылсярысь, 1930-тӥ арын 15-тӥ январе партилэн обкомезлэн бюрояз эскеремын Удмуртторге ӵектэм Тугбаевлэн ассэ ачиз быдтэмез сярысь ужпум. Сыӵе югдуре сое вуттӥзы торгын ужасьёс, соос шара серем карылӥзы адямиез, ӧз кылзылэ косонъёссэ, куронъёссэ. ХИ партконференциын обкомлэн секретарез Егоров таӵе учырен тодматӥз. Со таӵе гожтэмез адӟем: "Рак чорыг ӧвӧл, вотяк адями ӧвӧл". Та ӵошатон тупа "Курег тылобурдо ӧвӧл, нылкышно адями ӧвӧл" шуэмлы, пусйиз секретарь. Огъя вераса, кун аппаратэ удмуртлык пыӵатон ужпум шонер но пайдаё луыны кулэ вал. Со пыртэмын вал партилэн но кунлэн национальной политика нуонъя программаяз. Соя 1920-тӥ�1930-тӥ аръёслэн кутсконазы партийной но советской органъёс бадӟым уж нуизы. Озьы ӝутскиз удмуртъёслэн асваланзы (самосознанизы), политика удысын тодон- валанзы, улонэ мургес пыриськонзы. Но та ужлы вылӥос ӧжытгес дурбасьтӥзы, улӥ органъёс но сое валаны ӧз тырше. Озьы ке но, 1920-тӥ�1930-тӥ аръёсы эксэйлэсь кылем бадӟымъяськон (шовинизм) Удмуртиын юн шӧдӥськиз. Вылӥ партийной но советской органъёс удмуртъёс понна ӟеч лэсьтыны сюлмаськизы ке но, ӟучъёс ласянь пумитъяськон зол гинэ вал. Соин ик кун аппаратэ удмуртъёсты ӵектонъя, ужез удмурт кылын нуонъя, кылэз дышетонъя программа 1930-тӥ аръёслэн шоразы куашказ. Леонид ВАРГИН, история наукаосъя кандидат. Скал вордӥськод � турын басьтӥськод Азьвылгес куазь ӵем зорыса улӥз, турынъёсты утялтыны люкетӥз Пичи Пурга ёросысь "Родина" эштосын но. Та кооперативын зоръёс кутскытозь, ог 70 гектар кизем турынъёссэс погыртыса вуттӥзы ни вал. Соин ик ужпум кутэмын вал солэсь кӧня ке люкетсэ сенаже тырыны, кӧня ке люкетсэ ужасьёслы сётыны. Зор улэ шедьымтэ турынэз рулонъёсы люказы. Кин тырше эштосын но скал вордэ, сётӥськоз кык рулон турын, пудо вордӥсьтэмъёслы висъяськоз одӥг рулон. Пенсие потэмъёс но сомында ик пудо сиён басьтозы. В.ТРОНИНА. Бер уёзь сюрес вылын Чырмыт тыршо та вакытэ Селтаысь сюрес лэсьтӥсьёс но тупатъясьёс. Выль Монья гурт дорын умой-умой тупатъямын 2 иськем 400 метр асфальт сюреслэн улӥ сӥез но 1 иськем вылӥ сӥез. Табере кутскизы ёрос центрысь Ленин ульчаез выльдыны. Азьланьтӥське Казань�Малмыж�Екатеринбург трактэз лэсьтон. Отчы али ву лэзён 4 гумы пуктӥзы. Лэсьтӥськонэз ӝогомытон вылысь выжизы кык сменаен ужаны. Тыршо ӵукна 8 часысен уин 2 часозь. Ужасьёс тырмо. 120 адямиос пӧлысь 90-эз механизаторъёс луо. П.КИСЛИЦЫН. Пусйизы орденэн Пермьысь одӥгаз колледжын дышетскись Василий Селезневез армие басьтӥзы Оренбурге. Бертонэз вуон азьын быдэс частьсэс келязы Чечняе. Кез районысь Чепца посёлокын вордскем-будэм пияш ас вылаз шӧмъяз войнаез, куректон-кайгуэз, сӧсырмыны но шедиз. Алигес Василиез Кезысь военкоматэ ӧтизы. Татын солы Грозный городэз басьтонэ пыриськемез понна Мужество орден бырттӥзы. Н.КНЯЗЕВ. Нырысь интыын � ӟечлык Предприятие котькыӵе вакытэз адӟиз ни. Тужгес но секыт йӧтӥз рынокен экономикае выжон дыре. Сое выльдӥськон шуо ке, кызьы соин соглаш луод. Заводлэн ӝутсконэз но, куашканэз но мынам син азям ортче. Трос-а, ӧжыт-а шуод, но татын 26 ар ужасько ни. Нырысь огшоры рабочий вал. Собере мастер луи, цехлэн кивалтӥсезлэн воштӥсез, берлогес быдэс цехез оскизы. Али кыкетӥ арзэ технической контролья отделэн кивалтӥсько. Быдэс коллективлэсь но ОТК-лэсь тыршемзэ туннэ нимысьтыз пусйысал. Малы ке шуоно, "ИПЗ" огазеяськон нырысьсэ пыриськиз Россиысь 100 устоесь вузъёс конкурсэ. Улосвылъёсын ми вормисе потӥм, табере возьмалом октябрь толэзез. Документъёсты Москвае келямын ни. Йылпумъянъёс лэсьтозы Ӟечлыкъя нунал азьын. Сю усто вузъёс пӧлы шедьыны луонлыкъёсмы вань. Но улыса адӟом. Меӵак верано ке, предприятимы Россиысь ми кадь заводъёс пӧлысь урод продукция уг потты, куд-огезлэсь шӧдскымон умойгес но. Ведь "АвтоВАЗ" акционер огазеяськон миым заводмес усто поставщикъёс пӧлы пыртӥз но дипломен пусйиз. Со подшипникъёслэсь ӟечлыксэс юн чакласа возе. Мар шуод, со пичи ке но, вормон. Оглом, берло дыре одӥг рекламация но ӧм басьтэ на. Предприятимес бен пересь но, егит но уд шуы. "Металлист" заводлэн инъетэз вылын 1956-тӥ арын кылдӥз 13 номеро шарико-подшипниковой завод. Огазеяськонлэн ӝыныезлэсь тросэз ортчем сюресэз син азям. Со дыр куспын уно кивалтӥсьёс вошъяськизы. Но арлыдо ужасьёс тужгес гажаса тодазы ваё Алексей Иванович Комлевез. Алигес азьвыл визьмо директорлы 80 арес тырмиз. Озьы ик умой ужам Николай Ефимович Мироновен. Таиз но кивалтӥсьмы Александр Геннадьевич Черных туала куронъёсъя, дырзэ, кжымзэ жалятэк тырше. Соинтэк-а куашкам заводэз улӟытыны быгатӥз но Россиын усто но огсыр ӟеч ужась предприятиос пӧлы пырим. Подшипник басьтӥсьёс табере асьсэос дорамы лыкто но куронъёссэс верало ни. Кӧня ке ортчемзэ пусъеме потэ. Азьло Совето Союзын милям кадь 32 завод ужаз, али Россиын 20 кылемын. Соос пӧлысь золъёсыз луо Москва, Самара, Курск, Омск, Минск городъёсысь заводъёс. Ми но соос сьӧры уиськиськом, нош куд-ог изделиосмыя, оло, азьпала потӥськом ни. Кызьы сое умоен уд лыдъя. Огазеяськонын ӟеч подшипникъёс поттонлы нимысьтыз инты висъяське. Оло, ӝоген дуннеысь куронъёслы тупась сертификатъёс но басьтом. Та ужпумез быдэстон бордын вис карытэк ужаськом � вань цехъёс, отделъёс но специалистъёс. Пайдаез син азьын. Продукциенымы тунсыкъясько ни кунгож сьӧрысь бадӟымесь фирмаос. Шумпотымон со. Александр НАЗАРОВ, ОТК-лэн кивалтӥсез. ЖУРНАЛИСТЪЁСЫН ПУМИСЬКОНЪЁС Виктор ШУДЕГОВ: "Лэсьтэмез син азьын" Журналистъёсын пумиськылӥз Правительстволэн тӧроезлэн воштӥсез Виктор Шудегов. Со вакчияк йылпумъянъёс лэсьтӥз ар ӵоже ужамезлы но возьматӥз социальной удысын югдурез. Экономикалэн юнмамез татын но шӧдӥське. Со туж умой. Нырысь ик, ӟечен пусйыны кулэ уждунэз дыраз тыронъёсты. Азьло дышетӥсьёс, врачёс кӧня ураме Кун Кенешлэн юртэз азе потазы, лек мылкыдзэс возьматъязы. Табере югдур воштӥськиз. Уждун гинэ ӧвӧл, дышетӥсьёслы отпусксы понна коньдон сётэмын. Кӧня ке районъёс гинэ бере кылё. Соос пӧлы пыро Алнаш, Грах, Сюмси но куд-ог мукет ёросъёс. 1997-тӥ арысен тыронъёс люкаськемын дышетскон книга поттэм понна. Со пичи лыдпус ӧвӧл � 82 миллион манет. Вуоно арлы кун бюджетэ сое нимаз чурен пыртоно луоз. Школаосты но музон культура учреждениосты толалтэ эстыны уксё висъямын ни. Табере эстӥськонэз ворттоно гинэ. Кызьы тодмо, 1-тӥ сентябрь праздник кадь луэ. Но миым со озьы ӧз луы, быдэс ар ӵоже одӥг выль школа но ӧсъёссэ ӧз усьты. Нош туэ югдур умойгес. Чакламын 8 выль школа вуттыны. Ижын сяна, выль школаос усьтӥськозы Тыловыл-Пельга (Вавож), Бадӟым Ошворцы (Як.-Бодья), Сеп, Удмурт Лоза (Игра) гуртъёсын но мукет интыосын. Гуртысь школаосын арысь аре паськыта бакча сиён, картофка будэтон. Правительство соослы юрттэ техника, кидыс басьтыны. Соин ӵош ик гурт школаос азьын лэчыт ужпум сылэ компьютер классъёс кылдытонъя. Та ласянь бере кылиськом. Соинтэк-а гуртысь нылпиослы лябесь тодон-валанъёс сётӥсько но соос вылӥ дышетскон заведениосы пырыны уг быгато, конкурсэз уг пото. Но берло соос, 2-3 ар дышетскемзы бере, огкадь луо, золъёсыз азьпалто но. Гуртысь выпускникъёслы одно ик юрттоно. Но туэ азьло кадь инты (квота) висъямын уз луы. Экзамен сётэмзы бере, районъёсысь кивалтӥсьёслэн куронъёссы лыдэ басьтэмын луозы. Спорт сярысь вераса, Виктор Шудегов ивортӥз, Правительство, пе, берло дыре бадӟым инты висъя гурт шудонъёсты ортчытъянлы. Егитъёсты спортэ кысконо, соос урод сямъёслы медаз дыше. Тани гуртысь школаос пӧлын Завьяловоын спортъя шудонъёс ортчытэмын. Соос арлы быдэ мед луозы. Гужем шудонъёс туэ ортчизы Юкаменскын, вуоно арын Играын луозы. Со котькуд районлы бадӟым пайда сёто. Выльдӥсько стадионъёс, школаос, спортзалъёс, площадкаос но музонэз. Гурт шудонъёсты доразы ортчытыны озьы ик мылкыд каро Каракулино, Дэбес, Кизнер, Вавож районъёс. Як.-Бодьяын тол шудонъёс ортчозы. Отын нырысьсэ йӧ вылын чорыганъя ӵошатсконъёс луозы. Палэнэ кылё городъёс. Соос куспын но шудонъёс малпано. Куать городъёсын куать пол спартакиада ортчытоно. Нош районъёсын 10-тӥез луоз. Эшшо 15 ёрос кыле на. Озьыен, 15 ар кыстӥськоз. Гужем ӵоже 25 сюрс нылпиос лагерьёсын тазалыксэс юнматозы-шутэтскозы. Со понна туэ 2 пол трос уксё висъямын. Пиналъёс отын ужалозы но кӧня ке коньдон поттозы. Сюлэмшугъяськытэ дышетскисьёслы атыкай музъемез яратон мылкыд пыӵатонъя ужлэн лябӟемез. Азьло военной ужъя часъёс нуисько вал. Со понна США асьмеды юн пыкылӥз. Табере соос асьсэос школаосын военной ужлы дышето, нош асьмеос солэсь куштӥським. Со ӟечен уз берытскы. Асьмелэн но мед луозы военной лагерьёс. Егитъёс мед быгатозы военнойёс кадь вамышъяны, ыбылӥськыны но мукет. Матэ вуэ Удмуртилэн кылдэмез дырысен 80 ар тырмон. Соин валче партиотъёсты дасянлы сӥзем научно-практической конференция ортчоз. Нош Воткинскын Суворовской училище усьтэмын. Со лэсьтэмын мэрлэн Валерий Фридрихлэн кичӧлтэмезъя. Правительствоез али озьы ик сюлэмшугъяськытэ ни, кытыны ортчытоно юбилеез. Операя но балетъя театрын ке шуоно, сое выльдыны ичизэ 4 миллион манет уксё шедьтоно, нош йӧ дворецез йылаз-пумаз тупатъяны кык пол уно коньдон висъяно луоз. Умоен пусйыны кулэ тани мае. Рынокен экономикае выжон вакытэ тужгес но секыт йӧтэ егитъёслы. Соин ик шаерамы егит семьяослы улон инты лэсьтыны ссуда сётъяны ӧдъязы. Нош Воткинскын пуктӥзы туберкулёзэн висисьёсты эмъянъя туж усто больница. Таӵеез элькунамы ӧвӧл на. Ялан секыт на югдур нылпиос понна пособие сётъянын. Со 1997-тӥ арысен кыстӥське. Правительство огдыре предприятиослэсь тыронъёссэс ас вылаз басьтӥз вал, но быдэстыны кужымез ӧз тырмы. Али ваньбур поттон каллен улӟе, азьланьын ужасьёссылэн нылпиоссылы пособие тырыны быгатозы ни. Оглом, вуоно арын Правительство тая тыронзэ пытсасал ке, туж умой луысал. Нош али со 270 миллион манет пала люкаськемын. Веранэз ӧвӧл лыдпус бадӟым, быдэстыны капчи уз луы. Ведь быдэс кун бюджетамы араз 3 миллиард манет гинэ уксё пыре, нош тыронэз берыктон дас процент ёрос луэ. Син медаз усьы, но бюджетамы берло дыре уксё вуэ. Соин ик 6 толэзь бере бюджет выльысь учкемын. Югдур ӧз ке воштӥськы, куинетӥ кварталэ со эшшо выльдэмын луоз но нылпи пособиослы уксё эшшо ватсаськоз на. Шаерамы пумен вӧлме СПИД висён. Али 145 муртлы инфекция паласькемын ни. Соин ик золгес нюръяськоно наркоманъёсын. Соосты эмъяны больница кулэ. Одӥгзэ нылпи садэз со понна висъязы, но сое выльдыны ӧжытсэ 15 миллион манет коньдон утчано. Социальной удыс туж паськыт. Соин герӟаськем вань ужпумъёсты бергатэ-радъя Виктор Шудегов. Г.РОМАНОВ. БЫДӞЫМ ВОРМОНЛЫ - 55 АР Котыртэмъёс Капитализм сюрес вылэ султэммы дырысен ӵемысь кылылӥсько егитъёслэсь калык пӧлын яке радио пыр тазьы вераськылэмзэс: "Вань фронтовикъёсты быдтоно - кулыны но уг валало. Эшшо ушъясько на ожмаськеменызы. Асьсэос юонэз сяна уг тодо. Гитлерлы сётсконо вал: кин косӥз соосты ожмаськыны? Табере асьмеос ФРГ-ын кадь улысалмы ни". Зэм, егитъёс пӧлын туннэ тазьы вераськись адями чик уг малпа, асьмеос ӧм вормысалмы ке, дунне вылын со чик ӧй луысал шуыса. Гитлерлэн малпанэз кыӵе вал? Сталинградозь гинэ вуоно. Советской Союзлэн шунды ӝужан палаз улӥсь калыкез но пичи выжыосты кык толэзьскын газэн усыкмытоно. Чылкак славян выжыысь дас вить аресъем чебер пиосты люкано но Германие поттоно. Озьы немец но славян адямиослэсь выль арий выжы кылдытоно. Нош мар лэсьтӥськиз война вакытэ? Котькуд ужын азьлань вамышъязы коммунистъёс но комсомолецъёс. Тӥни озьы... Вань малпамез вераны уг луы. Нош сюлэмысь номыр но уг кошкы. Быдӟым Вормонмы сярысь малпаса, тодмо ӟуч гожъясьлэн Григорий Баклановлэн "Военные повести" книгаысьтыз "Июль 41 года" романысь оглюкетсэ берыктӥ. Со ӵапак вера калыкмылы курадӟон ваем аръёс сярысь. Валентина Кузнецова, лыдӟись. Немецъёсты асьмелэнъёс та гуртысь толон уллязы. Нош туннэ ӟарпотыку ик тушмон выльысь татчы пыриз. Бомба усьылэм бервылъёсысь гуосы интыяськем артиллеристъёс пушкаоссэс куалектыса берыкъязы. Ӵукна куазь кымырес вал. Бус вӧлскиз. Батареялэн командирез Гончаров, гу дуре султыса, биноклен чаклаз вуись немецъёсты. Толло ожын сутскем урам паськыт луэм. Огпалтӥз гинэ одӥг-ог юртъёс кылемын на, мукет палыз быдэсак пеньӟемын. Черк но, шунды ӝужанэз нырысь ик адӟись маке, азьвыл кыдёкын кадь потэ вал, табере выжыысеныз ик вӧл-вӧл адӟиське, азьпалаз сайясез ӧвӧл ни. Бус пыртӥ Гончаровлэн син азяз йӧто сюй но кирпич гуръёслэн бервылъёссы, ныр улаз ньыс-ньыс лыктэ ӵуштаськем, сутскем ыж гон, ӝуам ю-нянь зын. Со котькытчы пыӵамын: музъеме но, омыре но, солдатъёслэн дӥсязы но. Командирлэн бинокль возись киысьтыз но сутскем зын нырзэ бичатэ. Тани черк сьӧрысь потӥзы коляскаосын мотоциклъёс. Тачыртэмзы пумен матэктыны кутскиз. Соос ураме пыризы. Палэнынгес разведчик юзмыт сюй вылэ выдыса эскериське, пулемётсэ дась возе. - Огонь! - кеськиз Гончаров, киыныз шонтыса. Ньыль орудиё батарея соку ик ыбиз азьпаласьсэ но берпуметӥзэ мотоциклэз, пыд улысьтызы музъемез бугыртыса. Разведчик доры Гончаров тэтчиз но, пулемётсэ басьтыса, азьлань бызиз: - Ура-а-а! Со сьӧры вырӟизы красноармеецъёс. Тыбыръёссы гинэ уӵерак адскизы на. Одӥг ӝутскемен, ваньмыз йылпумъяськиз, чалмиз... Полклэсь люкиськем Гончаров табере куинь солдатэн ӵош кылиз. Сӧсырмем эшсэс ӝутыса, соос нош ик бусые потӥзы, бомба усем бервылысь гуэ ватскизы. Вӧзтӥзы ортчись тушмон танкъёс ӧз синйылтэ. Со виын таос доры куатетӥез вуиз. Пехотинец пырак нюжтӥськыса лыктэм... Гуын нуназеозь шып пукизы. Мар малпазы - тодӥсь ӧй вал. Вылласянь шунды пыжыны кутскиз. Сӧсырмем Старых ас понназ уйбыртӥз. Куать муртлы куинь карабин но одӥг наган кылиз. Гранатазы воксё ӧй вал ни... Гу дуре шуак вуизы асьме солдатъёс, соос бӧрсьы кияз автоматэн немец султӥз. Автоматэныз котыртыса возьматӥз: "Потэ!" Гончаров немец кылъёсты тодаз кужмысь вайыны турттэ - одӥгез но йыраз уг лыкты... Гуэз тушмон эскериз но сӧсырмем Старыхез оп! шуытозь ыбиз. Пленэ кутэмъёсты сюрес вылэ поттӥзы, бронетранспортёр азьпалан нуизы. Сюрес вылтӥ таос быремъёсты но сутскем машинаосты учкыса кошкизы. Вуттӥзы нюлэс дуре. Татын но соос ог кызё мурт вал ни. Тазьы люкаса, нош ик кытчы ке нуизы... Пленэ кутэмъёс быдэс уллё люкаськизы. Пытсазы соосты возьмасьёсын котыртэм вал гидэ. Адямиос уйбыт вераськизы, тодмооссэс, службаын ӵош вылэм эшъёссэс утчазы. Гончаров ӵукна пал гинэ кӧня ке минут ӵоже нырулӥз. Бровалський нош умме ӧз ик усьылы. Борддор борды тыбырыныз пыкъяськыса пукиз, ас понназ ӟеч-ӟеч малпаськиз, сӧсырмем пельпумызлэсь зугетэмзэ кылзӥз: пӧсектэмез гимнастёрка пыр но шӧдӥське ни. Та вие Бровальскийлэн сюлэмвисёнэз пельпум висёнэзлэсь ортчыт вал. Йырысьтыз уйбыт ӧз пота со: малпаськиз агаез сярысь. Таиз войналэсь азьло дано адями вал. Кин ке но сое пыд улаз лёгыны малпаз - тюрьмае пуктӥз. Отысь бертэмез бере пыриз выныз доры. Война кутскемлэсь азьло соос ӵош улӥзы. Ӵукна кыӵе вакытэ гинэ уг султы Бровальский, агаез пыд йылаз ни, дӥсяськемын. Тупатъям кроватез вылын пуке. Толалтэ уй кузь. Ӵукна со вазь султэ но, тыл ӝуатытэк, пеймытын малпаськыса пуке. Бровальский малпа вал: агаез тюрьмаысь бертӥз, шонере поттӥзы, табере ӝот-ӝот ужалоз. Сое пуктэм, ӟеч нимзэ саптам муртлы возьматоз кыӵе луэмзэ. Зэм, таиз витьымтэ шорысь шутэтскыны кошкиз. Табере газет лыдӟе, радио кылзэ, вань выль иворъёсты тодэ. Озьы но улон шоры учке шурдыт маке шоры кадь. Солэсь адӟемзэ адямиос уг тодо. Соин ик выныз шӧдэ: быдэсак со отын на, отысь ӧз берты на. Одӥг пол Бровальский агайзэ тазьы эскериз: сылэ со укно дурын, калыкез чакла. арня нуналэ адямиос семьяосынызы потэмын, крезьгур чузъяське; вераськыса, серекъяса ортчыло. Нош агаез соос шоры сюлэмшугъяськыса учкылэ. Озьы выныз нырысьсэ шӧдӥз: агаезлэн сюлэмаз маке "мертчемын". Ачиз Бровальский спортсмен: вал вылын ворттылэ, куасэн ветлэ. Кузьымъёсыз но трос ни. Адямиос но солэсь адӟем каро. Нош дораз бертэ ке, агаез азьын мугорыз малы ке но шымырске, ассэ кызьы возьыны уг вала. Тюрьмаын улон, дыр быдтон сярысь со ноку ӧз мадьылы. Тазьы малпаськыса пуконъяз, комиссар ӝуштыны кутскиз. Но сое вал кызь зынэн тырмем гидын кылӥсь ӧз луы. Котькудӥзлэн аслаз сюлмаськонэз вал... Иземез ӧз луы: сӧсыр пельпумыз пӧсин потэмен, пиньёссэ куртчыса пукиз. Ӵукна ваньзэс гидысь поттӥзы. Ӧс вискы тулъяськыса азьлогес вамыштыны турттыкузы, котькудӥзлэн сюлмыз шуак луылӥз: пыӵал тӥрлыкен тушмон со азьын табере кузё но, югыт дунне вылысь улонзэ вис карись но. Адямилэн азьвыл улоназ кыӵе ке но радыз вал ке, табере ваньмыз тӧлӟиз: закон но, малы ке дышем но, кыӵе ке быгатонлык но, астэ ачид быронлэсь утён но. Таӵе югдурез кызьы вормыны валэктӥсь таос пӧлын ӧй вал на, та кӧшкемыт минутэ "таӵе улонэз но чиданы луоз" шуись адями ӧз шедь на. Котыразы кузёяськизы каскаен, автоматэн сылӥсь немецъёс. Строй пыр поттыкузы, котькудӥз солдат шымырскылӥз, син шоразы сокем медаз йӧт шуыса. Бадӟым уллё пӧлын потыкуз, Бровальский пельпумзэ шуккемзылэсь кышказ. Озьы но строен сылӥсь немецъёс шорысь синзэ ӧз вошъя. Котыртэме шедемъёсты кык радэн артэ султытӥзы. Соку комиссар адӟиз, макем воштӥськиллям адямиос одӥг уй куспын. Кин кызьы быгатэм - кутчаськем. Одӥгезлэн шнурокез керттылымтэ, мукетызлэн ботинка пушкысьтыз бинялтонэз мычиськемын, куинетӥезлэн дӥськутэз ярантэм погмаськемын. Калык пӧлысен со эскериз командиръёсты но. Котыртэме шедемъёс пушкын соос ӝик-ӝик адӟисько, асьсэды оскымон, веськыт возё. Кыкез-куинез комиссарез паймытӥзы ик - вылазы дӥсяллям ёркыт солдат дӥськут. Соку ик малпаськод: дӥсьсэс воштӥллям, кин луэмзэс ватон понна. Ваньмыз та воштӥськонъёс, адями синэз паймытонъёс кылдӥллям уй куспын. Ӟеч улэмлэсь ӧвӧл со. Вал гидысь поттэмзы бере, адямиос тужгес кышкытсэ возьмазы. Одӥгезлэн но лякыт малпанэз ӧй вал. Дыр ортчиз, калыкез нош ялан урам шорын возизы. Шунды выллань тубемъя, шоканы секыт луиз, йыр висьыны кутскиз. Котькудӥзлэн сюлмыз пыжиз. Котькудӥз ас понназ куалекъяз. Ульчалэн сопалаз, гурт калыклэн азьвыл люкаськылон интыяз, котыртэме шедемъёс вадьсын - немецъёслэн кухнязы. Повар пӧзись сиёнзэ сура, отысь бус ӝутске. Татын ик - кыкетӥ тылскем. Одӥгаз, куро вылэ поныса, парсь ӵушкало. Мукетаз кӧня ке немецъёс сӥлез юдэсэн-юдэсэн пыжо. Отысь ӵын но сӥль зын котыртэме шедемъёс вылэ вӧлско. Сютэмъёс йырзэс огпала берыкто, учкыны уг туртто. Та люкамъёс тушмон понна ваньзы одӥг тусоесь. Толло лек ожын бырытэк кылем немецъёс та куашкатэм ӟуч гуртын туннэ эркын шокало, асьсэды праздникын кадь возй. Йыр вадьсысь пӧсь шунды нош сӧсырмемъёсты тыпак жуммытӥз. Соос усьылыны кутскизы. Бровальский фашистъёслэсь ужъёссэс тодэ, соин ик туж ӟеч вала: солэн, еврей комиссарлэн, улонэз ваньмызлэсь вакчи кылиз ни. Зэм, со понна тужгес дуно солдатъёслэн улонзы. Соостэк комиссар мар кароз?! Сӧсырмем пельпумыз нош быдэс мугорзэ ӟырдатэ ни, пыд йылаз мырдэм возиське. Куд-ог вакытэ умме усьылэ кадь. Сыӵе дыръя куаляк потыса сайка... Мугорыз юзырак луэ. Солдатъёс солэсь някырамзэ адӟозы кадь потэ. Ӵуштаськем парсь кӧйлэн зыныныз сюлэмыз вукак луэ, соку ик ву шедьтон сярысь малпаськыны кутске. Парсь ӵушкам интыын колодча вань. Ӝутскем сюрыез йылын пу бадья адӟиське. Нош отчы мынэм уг луы. Колодча котырез немецъёс нӧд кариллям. Пытьыосын ву пуке. Со шоры тросэз учкыло. Нош Бровальский ассэ отчы учкемлэсь кужмысь возе: синмы, пе, медаз адӟы. Тазьы сылыкузы, котыртэме шедемъёс пӧлы туж чупрес немец пиос вуизы. Чебер вылдӥсьёсын, фотоаппаратъёсын, кинокамераосын. Калык шуэрскиз... Адямиосты асьсэос бырйыса поттыло. Одӥгез комиссар вадьсы дугдӥз, сое йырысеныз пыдозяз эскериз. Собере малы ке но азьлань вамыштӥз. Гырпумтӥз кутыса поттӥз сьӧд куо пичи красноармеецез. Таизлэн йыраз пилоткаез ӧвӧл, гимнастёркаез курмемын. Немец, ӟеч арбериез шедьтэм музэн, азьпалаз донгиз сое, урдэсысьтыз аппарат ящиксэ усьтӥз. Бырйыса поттэмъёс пӧлысь кӧняез ке колодча доры люкамын ни вал. Тазэ но немец палэнэгес султытӥз. Озьы но, тазьы но пуктӥз туссэ. Собере лэзиз. Лапег солдат, жуммытозяз ужам мурт сямен, шонаськыса лыктӥз интыяз. Матэгес вуиз но, Бровальский учыртӥз: та адями монгол выжыысь вылэм. Ымнырыз шуш, мычиськем бамлыосыз бадӟымесь, нырыз паськыт, йырыз кырыж. Йыркобыез юнмамлэсь азьло, йырзэ небыт дыръяз паллян пала кырыжтыса пачкатӥллям кадь. Нош али та шуш ымныро солдатлэн сьӧд синъёсыз шумпотонэн пачылмемын вал. Соин ик со чебер адӟиське. "Улэп кельтӥзы ук, улэп!" - малпа, дыр... Туссэс пуктэмзы бере, интыяз берытскись котькуд адямиез Бровальский табере умойгес чакланы кутскиз. Котькуд солдатлэн ымнырысьтыз маке шӧтэмез син шоры йӧтэ. Зэм, соос асьсэос тып-тып мугороесь, кужмоесь, секыт ужез быдэсъяны юри вордскемын кадь. Адямиосты бырйыса басьтэмзэс комиссар ӟеч-ӟеч валаз. Пӧртэм странаосты пыд улаз пачкатӥсь машинаез син азяз пуктӥз. Та чупырес немецъёс валэктон ужъя ротаысь. Соос адямиосты уг ыбыло, уг курадӟыто. Но, асьсэлы кулэзэ утчаса, нимысьтыз плёнка вылэ пукто. Пӧртэм кунъёсты пыд улазы пачкатӥсь машинаослы бензин дасяло. Со машинаос нокытчы но дыгатэк-могатэк мед кошкозы. Калыксы, солдатъёссы мед адӟозы: советской республикаосын пӧртэм выжыос уло ке но, тросэз адямилы уг кельшо, соосты немец выжыен артэ уд ик пукты. Соин ик со шӧтэм калыкез быдтоно. Озьыен, Гитлерлы йыбыртъясьёс ӟеч уж лэсьто, адӟемпотостэм, шуш адямиосты виылыса. Югыт дунне вылэ мед кылёз чебер, таза, кужмо калык гинэ. Бровальский сюлмыз пыжыса сылӥз. Со вакыт гурт сьӧрын мотоцикл тачыртэм кылӥськиз, одӥг-ог пол ыбем чузъяськиз. Куашкам коркаос вискытӥ красноармеец бызе. Со сьӧры мотоцикл уиське. Тани адями бусые потӥз. Мотоцикл нош ялан со сьӧры. Пулемётэн ыбылэ. Ыбемлы быдэ красноармеец огпалась огпала тэтча. Тыбырыз тяп-тяп котмемын, пыдъёссэ шуген ӝутъя. урдэс ласянь табере кыкетӥез мотоциклист жуммем солдатэз паллян пала кожытӥз. Адямиез соос кык кузя курадӟытыны кутскизы. Парсь ӵушкасьёс, колодча дорын сӥль миськисьёс, ужзэс быдэстыса, мотоциклистъёсты учко. Одӥгез, зӧк кӧто ӝужыт немец, парсез бер кукъёстӥз кутэм но йыринуллань ошыса возе. Со вие Бровальский ӧз но шӧды немецъёс доры капчи машиналэсь дугдэмзэ, отысь офицерлэсь потэмзэ. Таиз пыдъёссэ шер-шер пуктӥз, киоссэ сарвылаз тыриз но "циркез" учкыны кутскиз. Со дыре тапала ӵаш! серектэм вӧлскиз: красноармеец усем но, берпалзэ учкыса, султыны выре. Уиськись мотоциклъёс кык вал, табере куинь луиллям. Ӟуч солдатэз отчы- татчы котыръяло. Немецъёс гур! серекъяло, стадионын сямен кесясько, шулало. Котыртэмъёс азьын тазьы "шулдыръяськон" соосты уката но узатэ. Бровальский, вӧзаз сылӥсь адямиос шоры учкыса, синъёсыныз котырскиз. Тросэз соос мугорзэс шымыртӥллям. Сюлэмзы путоно кадь луыса, бусые учко. Мыскылляно солдат пыр асьсэды адӟо. Кудӥз-огез нош йырзэ ошыса сылэ, мон вылэ коть сыӵе адӟон медаз ву шуэ, дыр. Озьыен, таосыз курадӟись солдатэз сюлмысьтызы палэнтӥллям ни: маке луоз - лу. Кыклы люкиськон, огкылысь луонлэсь палэнскон - котыртэмъёс пӧлын туж шурдыт маке. Таӵе адямиос муртлы ноку но уз юрттэ, тушмон асьсэды но ӵогыса куштоз... Красноармеец кыкетӥзэ усиз. Усьтыр-табыр султӥз но котыртэмъёс пала лыктэ. Мотоцикл нош эрик уг сёты. Серекъясьёслы эшшо но "ӟечгес номерзэ возьматэ". Ӟуч солдат лулзэ уг шедьты ни, кӧдэктэмын, пумаз вуттэмын. Табере со возьмасьёс ки улэ меӵак ачиз лыктэ. Со минутэ кыкетӥез мотоциклист азьпалаз ваменак султӥз но солдатэз берлань бусые улля. Самой со вакытэ Бровальский интыысьтыз потэ но, сӧсыр бур кизэ мугорыз борды шымыртыса, часовой вӧзтӥ немецъёс пала кошке. Ыбозы яке дугдытозы шуыса уг малпа. Бызьысал яке дӥсьтытэк утчаськыса вамышъясал ке, часовой сое, оло, ыбысал. Но комиссар быронлэсь пегӟыны уг туртты: эзельзэ утчась мурт сямен, офицер шоры шонерак мынэ. Автоматэн конвоир бӧрсяз вамышъя. Немецъёс учкыса шып сыло. Соос огазе люкаськемын, ваньзы пыӵал тӥрлыкен, комиссар нош огназ, кӧс киын, вылаз ик - сӧсыр. Озьы ке но, тушмон пала огназ мынӥсь командир немецъёслэн но, котыртэмъёслэн но сюлмазы шурдон пыртэ. Синмаз шонерак учкыса, офицер доры мынэ. Сопалан но, тапалан но ваньмыз возьмало: маке но луоз. - Дугдытэ "шулдыръяськондэс!" - каллен гинэ шуэ Бровальский немец кылын. Тушмон солдатъёс пушкын, ӵаштыртэм выллем, маке вырӟиз кадь. Бровальский сюлмыныз шӧдӥз: солэн улон даурез та минутэ чигоз. Автоматэн часовой азьпалаз потӥз но командирлэн паллян пал урдэсаз улӥысен выллань быдэс обоймазэ лэзиз. Бровальский конвоир шоры чорк-чорк учкиз - солэн син шораз адями быдтӥсь ӧз пуксьы, адӟиз инбамез но бусыез... Озьы командир музъем вылэ пограз. Валентина КУЗНЕЦОВА (ӟуч кылысь берыктэмын).. Огазеяськонъёслэн лыдзы кулэсмоз Удмурт Республикаысь Юстицияя министерство туэ пыр-поч эскерыны кутскиз калык огазеяскьонъёслэсь ужамзэс. Туннэ нуналлы 81-ез законлэсь куронъёссэ тӥяса ужало. 47-ез пумысен министерство Ижевскысь ёрос судъёсы вазиськиз ини сыӵе огазеяськонъёслэсь ужзэс дугдытон сярысь. Озьы судъёслэн учкемзыя дугдытэмын Гуманитарной наукаосты но дышетонэз азинтонъя республиканской фондлэн (Шаталовлэн фондэз), Удмурт Республикаысь автоспортъя спортсменъёслэн но судьяослэн ассоциацизылэн (АССА), Удмурт Республикаысь военнослужащийёслэн ассоциацизылэн ("Авантаж"), Ижевск городысь трос нылпиё семьяослэн огазеяскьонзылэн ужамзы. Удмурт Республикаысь Юстицияя министерстволэн пресс-службаез. Инкуазь но адями Эмезен но, борыен но, губиен но... "Музъемлэсь удалтонлыксэ умоятон-тупатон яке мелиорация шуон Сюмси ёросысь лудъёслы, инкуазьлы, калыклы но ке нокыӵе пайда ӧз вайы. Отчы трос миллионъёсын коньдон но уно кужым куштэмын вал. Нюръёсты куасьтон, писпуосты коран пумен куасьтӥзы Калмезэ усись шуръёсты. Та чебер, чылкыт вуо шур лазегомиз, шуэ та ёросысь Вылынгуртын улӥсь, инкуазез яратӥсь адями Евгений Возисов. Гурт котырын корамын-быдтэмын шулдыресь арамаос. Отын калыкез шумпоттыса будӥзы пашпу, шупу, сутэрпу, льӧмпу, палэзьпу, боры, ягмульы, пыштурын но мукет будосъёс. Кизем юослы та интыос ӧз тупалэ, ю-нянь отын рос-прос ӧз удалтылы. Табере Сюмси ёросысь Парин нимо эштослэн сю гектарлэсь уно умоятэм лудъёсаз уг кизё ни, отын бадьпу, серыпу но пушнер гинэ будэ. Адями ӧз ке юртты, татчы пашпуос кематэк уз выжыяське, дыр. Тэльёсты корамен сэрен кулэсмиз пӧйшур-тылобурдоослэн лыдзы, быриз чорыг. Со сярысь ик вераз мыным Евгений Романович. Туэ колхозлэн 1680 гектар гыроно-кизёно лудъёсыз пӧлысь 1112 гектараз гинэ юосты будэто. Со но туж секытэн сётске. Евгений Возисов - Сюмси районысь одӥгез мӧйыез но шаплыез пӧйшурась, али пенсионер. Со пичи дырысеныз тэле потатэк, пӧйшуратэк улонэз ик уг тоды-вала. Евгений Романовичлы тужгес удалтэ коньыосты, ву чайыосты (бобр), сялаосты, витьыосты, шудӥсь шыръёсты, туръёсты кутылон ласянь. Куд-ог аръёсы 160 коньы ваемез но вань, сялаез 50-лэсь уно кутылӥз, мудӥсь шырез - 500 пала, витьыез, турез, ву чайыез даслэсь уно. Озьы ик кутылэ ӟичыез, сёрез, ву но мувыр чайыез, луд кечез, сьӧд быжез (горностаез), енот тусъем пуныез. Кияз шедьылӥз ни кион но. Вылынгурт палан пумиськыло нырдосъёс (барсук), ву комакъёс (ондатра), мыйёс (выдра), балянъёс, кыр парсьёс, гондыръёс, койыкъёс. Но Евгений Возисовлы соосын пумис_иькылыны ӧз кылды на. Берло аръёсы ӧжытгес пумиськыло пайда ваись тылобурдоос. Со дыре ик унолы алязы кучыранъёс, душесъёс. Соос уноен быдто туръёсты, сялаосты, кыр курегъёсты (куропатка), бӧдёноосты, нурканъёсты, куажыосты. Та тылобурдоослэн каръяськон, яратоно интыоссы "мелиорация" ортчытыку быдтэмын вал. Табере соослы сьӧсьёслэсь пегӟыны шуг луиз, шуэ. Евгений Романович тэле ӵемысь ветлэ кузпалэныз Антонида Дмитриевнаен ӵош. Сэзь, чупрес кышномурт туж яратэ инкуазь узырлыкъёсты бичаны. Соин ик толбытлы тырме ягмульызы, нюрмульызы, кудымульызы, пушмульызы, узы-борызы, эмезьзы, пӧртэм губизы. Кузпалъёс будэтӥзы кык пи но кык ныл. Володя йылпумъяз гурт удысъя академиез, Галя - культурая училищеез, самой пичиез Таня ужа Вылынгурт администрациын секретарь луыса, тулыс йылпумъялоз Удмурт университетэз. Кя ке ар талэсь азьло семьяе вуиз бадӟым куректон: кулӥз кышнояськыны вуэм Валера пизы. Али кузпалъёс кыкназы уло Вылынгуртын. Соослы монэн йырин ӧвӧл. Доразы ӵемысь вуыло пиналъёссылэн семьяоссы. Ижысь выль эшъёссы но та пала вуыкузы пыратэк уг кылё. Соос ваньмыз сямен удмуртлыкез яратӥсьёс. Я, озьы ик кема, шудбуро тазалыко мед улоды, возез, тэлез, быдэс инкуазез яратӥсьёс. Калмез шур тӥледды азьланяз но чорыген мед шумпоттоз. Нош тӥ палась тэльёс, возьёс, лудъёс пӧйшурен, тылобурдоен, мульыен но ю-нянен мед узырмозы. В. Кальянов. Евгений Возисовен вераське Удмурт радиосысь корреспондент Надежда Боброва. Г. Юсаевлэн туспуктэмез. МИХАИЛ ПЕТРОВЛЭН ВОРДСКЕМЕЗ ДЫРЫСЕН 95 АРЕС ТЫРМОНЛЫ Егит гожъясьёслэн кирос атайзы Асьмеос ум янгышалэ, уноез писательёсмы Михаил Петрович Петровез литератураын дышетӥсен лыдъяло шуим ке. Со вордскиз 1905-тӥ арын 21-тӥ ноябре Татарстанысь Монашево (Вандэмо) гуртын. Пичи дырысеныз анай-атайтэк кылеменыз дас кык аресысен пудо возьмасе медъяське но трос шуг-секытэз адӟе. Михаил Петровлы 90 арес тырмемен валче, тодосчиослэсь, эшъёсызлэсь но ӵыжы-выжыосызлэсь со сярысь тодэ ваёнъёссэс люкаса, Фома Ермаков "Воспоминания о Михаиле Петрове" книга поттӥз вал. Татын со аслаз кык статьяосаз Петровлэн улэмез но творчествоез сярысь маде. Пичи Миша, начальной школаын дышетскыкуз ик, Некрасовлэсь "Школьник" кылбурзэ удмурт кылэ берыктӥз. Школа бере со дышетскиз областной совпартшколаын но Ульяновскысь военной училищеын. Куать ар армиын но ОГПУ-лэн органъёсаз служить каремез бере, "Удмурт коммуна" газетлэн редакторезлэн воштӥсез луэ. Пединститутын тодонлыксэ будэтыса, 1941-тӥ арозь "Молот" журналлэн редакцияз секретарь луыса ужа. Фронтын дыръяз поэт шудбур но эрик понна ожмаськись солдатъёсты данъяз. Армиын со взводлэн командирез, нош Кёнигсбергын дыръяз, ож йылпумъяськыку, полклэн командирезлэн юрттӥсез вал. Зол ожмаськемез понна солы Горд Кизили орден но ньыль медаль сётӥзы. Война бере М.П.Петров Удгизлэн директорез но "Молот" журналлэн редакторез луыса ужаз. Витьтон арес тырмеменыз валче Михаил Петровичлы удмурт писательёс пӧлын нырысь ик Трудовой Горд Знамя орден сётӥзы. Удмурт лыдӟисьёслы туж яраз М.Петровлэн "Италмас" поэмаез. Соя композитор Г.Корепанов-Камский нырысьсэ "Италмас" нимо удмурт балет гожтӥз. Удмурт театрын возьматӥзы солэсь "Батрак", "Вуж Мултан", "Тыл пыр" пьесаоссэ. Берлогес пуктэмын вал "Италмас" поэмаезъя спектакль но. Мон тодӥсько на, кызьы писательлэсь 50 арес тырмонзэ пусйизы Дзержинский нимо клубын. Михаил Петрович ортчем сюрессэ тодаз вайыку но азьланяз выль произведениос гожтыны мылкыд каремзэ вераку, пукисьёс адӟизы солэсь лымы кадь тӧдьы бамзэ. Нош ӵукна радио пыр ивортӥзы яратоно писательмылэн сюлэмыз дугдэм сярысь. Солэсь коросын мугорзэ драмая Удмурт театре ваизы. Ноябрь толэзьлэн пумаз куазь пилемо ке но, шуныт вал. Гробез поттыса киязы нуизы партилэн Удмурт обкомезлэн нырысетӥ секретарез М.С.Суетин но республикаысь мукет кивалтӥсьёс. Советской ульчаетӥ трос калык берпум сюресэ келяз дано писателез но ӟеч адямиез. Али кадь ик син азям пуктӥсько лякыт сямо улэп Петровез. Михаил Петрович улонэн ӵош вамышъяз. Солэсь "Урымтэ чабей" статьязэ лыдӟыса, Вениамин Ившин гожтӥз: Мон выльысь лыдӟисько Михаил Петровез. Вандэмо гуртысь пи ма сярысь ай вера? Син азям со ветта урымтэ чабеез � Йӧнызэ, порнизэ со зӥръя луд дураз. Нош Герман Ходырев Михаил Петровичез литератураын киросатаеныз лыдъяз. Петровез тодэ ваён книгаын со гожтӥз, кызьы Пушкин ульча пала вамыштыкузы писатель Николай Васильев каллен вераз: "Михаил Петрович улэп ке луысал, выль авторъёс будэм понна шумпотысал. Озьы ведь?" Петровлэн дышетскисьёсыз лыдъяны ӧдъязы писательлэсь будэтэм пиоссэ: Николай Байтеряков, Евгений Самсонов, Михаил Покчи-Петров, Даниил Яшин, Семен Перевощиков, Петр Поздеев, Александр Белоногов... Нылпиослэн вуоно кылбурчизы Герман Ходырев Михаил Петровлэн кылбуръёсыныз нырысь ик тодматскиз "Удмуртия" издательствоын 1940-тӥ арын потэм "Золотые гусли" нимо книгая. Сое удмурт писательёслэсь гожъямъёссэс ӟуч кылэ берыктыса поттӥллям автономилы 20 ар тырмемен валче. Герман Ходыревез ик, Можгаысь педучилищелэн нырысетӥ курсаз дышетскыкуз, 1949-тӥ арын март толэзе ӧтчазы Удмуртиысь писательёслэн конференциязы. Отын со кыкетӥзэ пумиськиз Михаил Петровен. Нош нырысетӥзэ, 10-тӥ январе, пумиськыкуз, писатель автографен солы кузьмаз "Улон понна" книгазэ. Германлэсь "Дурись" нимо нырысетӥ кылбурзэ поттӥзы 1949-тӥ арын 9- тӥ апреле "Советской Удмуртия" газетын. Соку та газетын литературая консультант вал Михаил Петров. 40-тӥ аръёслэн пумазы Михаил Петров мынэсьтым но "Малпанъёс быдэсмо" но "Тулыс уй" веросъёсме "Кизили" альманахын поттыны юрттӥз. Со валэктылӥз: произведениосыз дыртытэк гожъяно. Но милям егит дыръямы чиданмы ӧзгес тырмылы, гожтэммес ӝоггес печатьысь адӟеммы потӥз уго. Огъя вераса, Михаил Петрович Петровлэн трос егит гожъясьёслэн киросатайзы вал. Улэп ке луысал, али но, дыр, солэсь дышетскысалмы. Владимир ЧЕРНОВ. Тэль но нюлэс Та кылъёсты асьмеос али вераськонамы но, гожъяськонамы но одӥг пуштросо синонимъёс шуыса кутӥськомы. Озьы соос сётэмын Серафим Соколовен Виктор Туганаев тодосчиосмылэн куать ар талэсь азьло поттэм "Биологической нимкылъёсын кылбугоразы" но. Кыдёкысь-кыдёкысь вашкалаосмес тодэ ваёно ке, соос тэлез нюлэслэсь висъяны кулэ шуыса малпало вылэм. Таӵе валанэ мон вуи, Ленинградысь профессорлэн Д.В.Бубрихлэн кивалтэмез улсын 1929-тӥ арын люкам диалектологияя материалъёсын тодматскеме бере. Д.Корепанов � писатель Кедра Митрей � соку Зури (Зура) черкогуртысь 75 аресъем Будянь Сидор Мишалэсь та пумысен тазьы валэктэмзэ гожтэм: "Векчи писпу будэ ке, ӝужа ке, тэль луэ; мӧйы писпу (луэ) ке � нюлэс". Озьыен, тэль но нюлэс � тыпак огкадь макеос ӧвӧл. Гожъяськыку но, вераськыку но сое одно ик тодын возьыны, чакланы кулэ, эке (пияш), воргорон яке кунян (ветыл), скал кылъёсты гожтыку-вераку сямен ик. П.ПОЗДЕЕВ. Етӥнлы � паськыт сюрес Кун Кенешлэн Тӧроез Александр Волков берло дыре ӵем вуылэ шаермылэн пӧртэм ёросъёсаз. Котькуд пумиськонын вераськон ӝутске асьме дорын етӥн будэтонэн герӟаськем ужпумъя но гуртын улӥсьёслы юртъёс лэсьтыны кредит висъян пумысен. Етӥн будэтон удысын тужгес но мыло-кыдо тыршо Алнаш ёросысь "Прогресс" колхозын улӥсьёс. Ӵапак татчы алигес вуылӥз Александр Волков. Со пумиськылӥз Социалистической ужысь Героен, етӥн будэтонын тодмо луэм адямиен Иосиф Ефимович Семеновен. Соин ӵош но колхозлэн тӧроеныз Петр Серапионовен А.Волков ортчиз та хозяйстволэн бусыостӥз, тодматскиз Удмурт Тоймобаш селоын улӥсьёслэн ужъёсынызы. И.Е.Семеновлэсь бадӟым опытсэ лыдэ басьтыса, Кун Кенешлэн Тӧроез солы дэмлаз "Удмуртиез азинтон" программаез дасянэ пыриськыны. Ӝоген Ува ёросысь Ленин нимо колхозын ортчоз "Етӥн" программаез эскеронъя нимысьтыз кенеш. Удмурт Тоймобашын улӥсьёс Александр Волковлы вазиськизы, президент луон понна нюръяськонэ пыриськыны курыса. Удмурт Республикаысь Кун Кенешлэн пресс-службаез. Ӟеч арбурз� быдэсэз Базарын али гинэ арбузъёс вузаны кутскизы. Соос синмез бордазы кыско, гочато. Бен, дунзы куртчылӥське ик. Но сое шори вандыса но сёто. Вераны кулэ, вузкаронын чаклано куронъёсты лыдэ басьтытэк. Ай 1998-тӥ арын Ижевскысь валтӥсь санитарной врачлэн косонэзъя, арбузъёсты быдэсэн гинэ вузаны лэземын. Малы? Чаклалэ ай асьтэос. Будӥз та емыш музъем вылын. Кисьмамез бере ваизы сое асьме пала (кин тодэ, маин), ӝоктӥзы лапас улэ (кин тодэ, кыӵе). Табере тани арбуз вузкарон ӝажые шедиз. Сое шори вандӥзы, шунды шоры кельтӥзы. Озьыен, микробъёслы татчы каръяськыны вань луонлыкъёс дась � шуныт, ческыт, мускыт. Таӵе арбузэз сием бере, кылёд меда эмъяськонние шедьытэк? Малпаське. Чаклаське! Э.ВАСИЛЬЕВА. Азинскоз-а энергетика? Кун Кенешлэн Тӧроез Александр Волков, Правительстволэн Тӧроез Николай Ганза, эстӥськонъя, энергетикая но связья министр Виктор Савельев ужазы Нижний Новгородын ортчем округъя совещаниын. Отын сэрттӥзы-пертчизы Приволжск федеральной округе пырись улосъёсын энергетикаез азинтон ужпумъёсты. Та улосъёсысь кивалтӥсьёс сяна, совещанилэн ужаз пыриськизы Россия Федерациысь Правительстволэн ужаз валтӥсь инты басьтӥсь министерствоослэн кузёоосы (Г.О.Греф, экономикаез азинтонъя но вузкаронъя министр, А.С.Гаврин, энергетикая министр, И.А.Южанов, монополилы пумит нюръяськонъя но ужбергатонъя министр, А.Ф.Задернюк, Федерациысь энергетикая комиссилэн кивалтӥсез, А.В.Улюкаев, коньдон ужпумъёсъя министр). "ЕЭС России" РАО ласянь солэн ужаз пыриськизы "ЕЭС России" РАО-лэн правлениезлэн кивалтӥсез А.Б.Чубайс, Приволжск федеральной округысь улосъёслэн энергосистемая ёзъёслэн кивалтӥсьёслы. Совещание ужаку, Россия Федерацилэн Президентэзлэн Приволжск федеральной округъя оскем адямиез Сергей Кириенко Приволжск округысь кивалтӥсьёсын пумиськон ортчытӥз. Удмурт Республикаысь Кун Кенешлэн пресс-службаез. Адӟем каро гуртоослэсь Гуртысь пудо-сиён дасясьёсын ӵошатскыса музэн, киосазы кусоос кутӥзы Можга городын улӥсьёс но. "Жилкомхозлэн" кичӧлтэмез улсын, соос кыкетӥзэ ни городысь урамъёсты жуг-жаглэсь утялто. Можга син азьын пиналме кадь. Вераны кулэ, городлэсь чылкытлыксэ чакласа- эскерыса гужембыт возе на ужтэк кылемъёс но пиналъёс. Та удысэ соосты кыске Калыкез уже интыянъя служба. Э. Васильева. Юбериысь дышетӥсь Сюмси ёросысь Юбери школаын гажаса верало дышетӥсьсы Иван Иванович Караваев сярысь. Та удысын со 36 арлэсь кема ужа ини. И. И. Караваев. Суредаз Леонид Прозоров 1999-тӥ арын августэ. Вож сиён ватсаса Пудоез возь вылъёсын сюдон вакытэ скаллы быдэ 1400 килограмм йӧл люканы басьтӥськизы туэ Завьялово ёросысь Холмогоров нимо акционер огазеяськонын ужасьёс. Сое быдэстон вылысь котькуд скаллы ватсаса висъяло 15 килограмм вож сиён но 1,5 килограмм фураж. Та нуналъёсы хозяйстволэн Ягул фермаысьтыз дояркаос скаллы быдэ 13,5 килограмм пуж-пуж йӧл кыско, кӧня ке гинэ ӧжытгес - Ӟуч Вожойысь пудо утисьёс. Пинал пудоез вордонын синмаськымон тырше Любовь Прокопьевна Некрасова. Солэн кунянъёсыз суткаяз 762 граммлы йыло. Азьмынӥсьёс пӧлысь пусъёно на Ягулысь дояркаез Ирина Пантлеевна Тухмачеваез. Ӝыны ар куспын нырысетӥ кунян ваем скалъёсызлэсь со 2065 килограмм йӧл люканы быгатӥз. В. Лагунов. Судысь Ваньбур люкон Та чылкыт удмурт кылын дасям гожтэт ыстэмын вал "Валэктэ юрист" сэреге. Жаляса верано луэ: вазиськисьёслы юрттыны ӧм пишмытэ. Адямиослэсь кусыпъёссэс радъянын редакция уг быгаты судья кариськыны. Гожтэтъя валаны шуг, кин татын шонер, кин янгыш. Кинэ ке сьӧлыке уськытоно ке, азьло сое ассэ кылзыны кулэ. Редакцилэн сыӵе луонлыкез ӧвӧл. Гожтэтэз печатласьком, кытысь вуэмзэ ватыса. Отын верам муртъёслы ке ӧвӧл, куд-ог лыдӟисьёсмылы семьяен улон ласянь со визьнод мактал медло. Газеттэс басьтӥськом ини трос аръёс ӵоже. Туж яратыса лыдӟиськом. Но нырысьсэ гожъясько, малы ке шуоно, улон косӥз. Ужпум тани ма бордын. Туж вӧсь кариз милемды азьло кенмы. Кинлы вазиськыны но ум тодӥське ини. Куинь пол судэ ветлӥм. Милесьтым но, пимылэсь но, адӟисьёслэсь но верамзэс судьяос лыдэ уг басьто, справкаосты уг эскеро, быдэсак дурбасьто кенмылы гинэ, пиналъёсыз вань шуыса. Сое нокин ӧз улля ук. Ачиз дорысьтымы кошкиз. Собере пимы пиналъёсызлы алимент но тыре 1995-тӥ арысен, кузьымъёс сётъя. 1987-тӥ арын Алексей кузпалъяськиз Надяен. Ӵош улӥзы 8 ар. Кык нылпизы. Нылзы 6-тӥ классэз быдтӥз, пизы - 2-тӥ классэз. Надя ужа вал больницаын. Кутскиз пиосын (врачъёсын) калгыны. Ужысьтыз куштӥзы. Собере вузаськыны ӧдъяз. Татын но тэк ӧз луы, шедьтӥз мукет воргоронъёсты. Кыкетӥзэ улляз. Али улэ куинетӥеныз. Соин Надялы Алексей кулэ ӧз луы ни. Соос люкиськизы лыдъяське 1995-тӥ арын январе. Улӥзы ӵош 1997-тӥ арын июнь толэзёзь. Та дыр ӵоже Надя алимент но басьтӥз, пимылэсь уждунзэ но аслыз карылӥз. Пимы ӵош ик улом шуыса, лэся, оскиз. Ужаз электростанциын, уждунэз ӧжыт ӧй вал. Алексей дорысь Надя кошкыку, ӵош люкам ваньбурзэс люкизы ас понназы гинэ, нокинлы вазиськытэк. Ма куриз Надя, Алексей ваньзэ сётӥз. Надя нуиз диван, вуриськон но мисьтаськон машинаос, телевизор, трюмо но мукетсэ - ваньзэ 15 сюрс 405 манетлы. 1997-тӥ арын декабре Алексей мукет кышно басьтӥз пиналэн. Али пиеным кыкетӥ нылзы вордскиз ини. Надя лыктэ Алексей доры но адӟе, корка пушкын нош ик маке- маке вань ини шуыса. Алексейлы агаез сётӥз вал диванзэ, кык креслозэ, ковёрзэ, дядяез - ӝӧк, пуконъёс, шкаф. Надя вожпотыса вазиське судэ, выльысь ваньбур люкыны малпаса. Табере куре ини ваньзэ, ма кылемын вал Алексейлэн паяз. Азьвыл кенмы дунъя ваньзэ, ма гинэ вань - сыномем бочкаосты, корт ящикъёсты, емышо куакъёсты. Таоссэ мон но дядяез кузьмамы, коньдон ӧм басьтэ. Квартираысь шуныт сётӥсь гумыосты но огъя ваньбуре пыртэ. Соос Алексейлы ваемын ужысьтыз - подстанциысь. Солэн бере, коньдон со понна тыремын ӧвӧл. Озьы ик Надя куре милесьтым басьтэм арбериосмес. "Италмас" стенка басьтыны сётӥм 2 сюрс манет, "Саратов" холодильниклы - сюрс. Пуктӥм гид но мунчо. Асьмелэн тазалыкмы ӧвӧл ни. Мон астмаен висисько, картэлэн - гастрит но бронхит. Соин пимы доры улыны мыном шуыса, ваньзэ соослы сётъям. Гидлы но мунчолы кор ми дорын коразы но ӵупизы, пуктӥзы Алексей, атаез, агаез. Судын ӧз эскере Алексейлэсь справкаоссэ, списоксэ, Надялэсь мае нуэмзэ. Адӟисьёслэсь (свидетельёслэсь) верамэс лыдэ ӧз басьтэ. Ваньзэ Надялэн куремезъя гинэ лэсьтӥзы. Адвокат дэмламъя, ми судэ сётӥм ваим курон, милемыз 3-тӥ лицоен мед лыдъялозы шуыса. Тае но санэ ӧз понэ. Ум валаське, малы суд азьло кенмылы гинэ дурбасьтэ? Алексей но адями ук. Табере солэн кык нылпиез. Кышноез декретын, уг ужа. Пимы кык нылпиезлы алимент тыре. Маин со улыны кулэ? Ми но пересесь ини, юрттыны табере ум быгатӥське. Малы меда озьы обидё милемыз? Законъя ваньбур шори люкиськыны кулэ кадь ук? Суд юрттэ шуыса, Надя табере куинетӥзэ отчы мынӥз ваньбур люкон пумысен. Дун пуктылӥз азьвыл кенмы озьы, кызьы аслыз кулэ. Надялы сётӥзы на гид, мунчо, пылесос, ковер, мукет телевизор - ваньзэ 9 сюрс 560 манетлы. Нырысетӥ нуэменыз ӵош ваньмыз люкаськиз 25 сюрс манет тыр. Алексейлы кельтӥзы гараж, теплица, телефон аппарат, куакъёс, сӧриськем бензопила, "Нива" машина. Ваньмыз 19 сюрс 870 манет тыр. Тӥни озьы, Алексейлэн но Надялэн пайёссы огкадесь кадь. Нош пиелэн номыр йӧно арбериез ӧвӧл, машина сяна. Со но вуж, ветлэм маке басьтэмын вал. Кызьы ваньбурез шори люкизы шуод? Вылаз ик, азьвыл кенмы 3 сюрс 950 манет коньдонмес нуиз. Ӵош улон дыръязы, вузаськыса улэ бере, ми солы вузаны сётъямы 70 килограмм чечы, 345 манетлы дорожка, воргорон дэремъёс. Копейка но ӧз берыкты. Вераськемын вал, вузамез бере коньдонзэ сётоз шуыса. Нокыӵе документ ӧм лэсьтэ, кыллы оским. Йырамы но ӧз лыкты, со озьы карыса кошкоз шуыса. Собере кызьы-о аслад пиедлэсь-кенэдлэсь расписка яке мукет документ курод? Сётъямы судэ. Куронмес ӧз быдэстэ, гожтэм документмы ӧвӧл шуыса. Милям адӟисьёсмы вал. Соослэсь но, милесьтым но вераммес лыдэ ӧз басьтэ. Надялэсь, свидетелез ке но ӧвӧл, весь кылско. Вылӥ судэ но вазиськылӥм. Отын веразы: ми, пе, кельтӥськом ни районысь судлэсь кутэм решенизэ. Ваньмыз та веран газетэ поттыны трос. Мон рос-прос гожъяй, тӥледлы валамон мед луоз шуыса. Тодэм потэ: Кинлы вазиськоно на, юрттэт курыса? Шонер-а люкизы ӵош люкам ваньбурзэс? Шонер-а каризы, милесьтым вузъёсмес вузам коньдонэз Надя кие кельтыса? Кызьы люкозы соос квартиразэс? Квартиразы азьло подстанцилэн вал, сётэмын Алексейлы. Табере лыдъяське ини коммунальной. Семьяязы кыксылэн ик кык нылпизы. Озьыен, Алексейлэн семьяяз ньыль адями, Надялэн - куинь. Алексейлэн кыкетӥ кышноез улэ пропискатэк, малы ке шуоно, Надя дорысьтымы выписка ӧз лэсьты на. И. Черных. *** Тӥни сыӵе гожтэт. Авторлы вазиськыны дэмламы Россиысь Вылӥ судэ но Кун Думаысь адямилэн правоосызъя уполномоченнойлы. Учком, мар луоз азьланьын. Шахмат Вуоно гроссмейстеръёс Костромаын ортчиз дышетскись пиналъёс пӧлын шахматъя калык куспо фестиваль. 55 команда пӧлы пыртэмын вал Ижысь 6 номеро спортшколаысь шахматистъёс но. Арлыдзыя пиналъёс куинь группаосъя нюръяськизы. Командалэн очкоосыз лыдъяськизы кужмоосызъя. Озьы Ижевскысь нырысетӥ команда (Александр Кочуров 9 пӧлысь 6 очко, Иван Ежов - 7 очко, Павел Корнаухов - 7 очко), 20 очко люкаса, нырысетӥ интые потӥз. И. Ежов, П. Корнаухов но Анастасия Банникова (нылъёс пӧлын нырысетӥ инты) вуоно арын Россиын нырысетӥ инты понна финал люкетаз пыриськозы. Ижысь кыкетӥ команда 18 очкоен витетӥ интые потӥз. И. Вельтмандер. ЖУРНАЛИСТЪЁСЫН ПУМИСЬКОНЪЁС Куазь юрттэ Тулыс кузь но кезьыт ке но вал, куазь музъем ужасьёслы зол юрттэ: зор но усе, шуныт но улэ. Соин ик чебер будэмын кизем но возь турынъёс, сыӵе ик пушъё валэс юос, ӟег но бакча сиёнъёс. Со азьланезлы умой оскон кылдытэ. Калык шуэ, пыд йылаз сылӥсь ю-нянь со, пе, нянь ӧвӧл на, сое арано-кутсано но кеносэ ӝоктоно. Гурт хозяйствоя но сиён-юонъя министрлэн Пётр Першинлэн ивортэмезъя, шаерамы котькуд гектарысь шорлыдын 12-13 центнер ю тысь люкаськыны кулэ. Нош утялтоно юосмы 540 сюрс гектарлэсь уно. Со пӧлысь 135 сюрс гектарез - ӟег. Одӥг комбайнлы быдэ 160 гектарлэсь трос юос усё, нош кулэ вал 80-100 гектар гинэ. Соин ик аран капчиен уз сётскы, уката ик ӟегез утялтон. Республикалэн кулэяськонъёсызлы 160 сюрс тонна ю тысь кисьтоно, но чабеймы асьмелэн уг тырмы, сое лымшор улосъёсысь басьтоно луоз. Кызьы бен мынэ пудо сиён дасян? Туэ одӥг но ӝыны арлы тырмымон чурыт но жалем сиёнъёс дасяны луонлыкъёс вань. Оглом вераса, умой радъямын турнан. Быдэс республикая ӝыныезлэсь уно турын утялтэмын ни. Та уж тужгес но умой мынэ Шаркан, Ува, Можга, Юкаменск, Дэбес но музон районъёсын. Татын 70-80 процентэз турнамын. Миым та дырен ӵошатыса, 12 процентлы уногес дасямын сенаж, нош силос � 17 процентлы. Сенаж тырон планзэс мултэсэн быдэстӥзы ни Каракулино, Кез но Алнаш районъёс, нош Можга, Вавож, Игра но Сюмси районъёс 60-70 процент силос дасязы ни. Пумен кужмоя выль урожайлы дасяськон. Пар бусыоссэс гырыса быдтӥзы ни Алнаш, Камбарка, Грах но Можга районъёс. Нимаз хозяйствоос пӧлысь пусйыны кулэ Игра районысь "Рассвет" кооперативез. Со кык план мында силос люказ ни. Пудо сиён дасянэз быгатыса радъязы Балезино районысь "Балезинский" (кивалтӥсез Людмила Никитина), Шаркан районысь "Луч" (Валерий Чазов), Вавож районысь "Колос" (Владимир Красильников) кооперативъёс но данак мукетъёсыз. Пудо вордонын югдур сокем ушъяськымон ӧвӧл. Кылем арын та дырен ӵошатыса, али скаллы быдэ нуналаз 1,3 килограммлы ичигес йӧл потэ. Кык районъёс гинэ � Вавож но Балезино � миымлэсь трос йӧл кыско. Кык килограммлы ӧжытгес йӧл кыско Игра но Як.- Бодья районъёс. Миым соос та вакытэ котыр 12 килограмм люкало вал. Республикаямы, ортчем арен ӵошатыса, туэ 1 июльлы скалъёслэн лыдзы 4 сюрслэсь унолы синӥз. Пудозэс тужгес но кулэстӥзы Сарапул, Воткинск, Завьялово, Киясово но музон районъёс. Шаерысьтымы данак ёросъёсын калыклэсь мултэс йӧлзэ кабзэ уг окто. Нош Можга районын 15,7 сюрс центнер бичазы, Пичи Пурга но Глазов районъёсын � быдэн 2 сюрс центнер. Соос сьӧры уисько Яр но Красногорск районъёс. Нош 13 районъёс та ужен чик уг выро. Гурт удыслы Правительство юрттэ, но ӝыныез хозяйствоос изъянэн ужало на, пайда уг басьто. 9,9 миллион манет ыштонъёс адӟизы, но кредит берыктонзы 1,5 миллион манет люкаськемын. Гурт хозяйствоя но сиён-юонъя министерствоез юн сюлэмшугъяськытэ удыслы кадръёс дасян. Уг тырмо кооперативъёслы усто кивалтӥсьёс, специалистъёс со уж борды уг басьтӥсько. Мугез одӥг � пичи уждун тыро. Тани Вавож районысь одӥг "Колос" гурт хозяйствоын гинэ миым уждунзы шорлыдын 1200 манет луиз, нош быдэс элькунъя со лыдпус 3-4 поллы ӧжыт. Али аранлы дасяськон но мынэ. Правительство ватсаса уксё висъяз 35 КСК-100 пудо сиён дасян комбайнъёс басьтыны. Гуртысь механизаторъёс та вакытэ техниказэс выльдо- тупатъяло. Соос ӵем но ӵем кисьмась ю бусыос шоры учкыло но куд-огезлэн сюлэмыз вӧсь луэ, шымырске. Комбайнъёссы угось вужесь ни, выльёссэ басьтыны уг быгато, дунъёс инмозь вуттэмын. Гурт удысэз озьы ик пачкато газлы, электрокужымлы дунъёс. Тӥни озьы гуртын улон капчи ӧвӧл. Соос пӧртэм ваньбурзэс дунтэм вузало, нош асьсэос дуно дунын техника, сылалъёс, эстӥськон но мукетсэ басьто. Геннадий РОМАНОВ. ШӦКЫЧ Куддыръя телевизор пыр Госдумалэсь кызьы ужамзэ возьматыло. Мынам соку малы ке но туж зол йыры кур луэ. Малызэ таки ачим но уг валаськы. Нош мудрон песятаймы кӧтсэ ик посыса, гор-гор серекъяны кутске. Тӥни, пе, учке ас киосыныды- йыръёсыныды быръем адямиосты шоры, мар даурто соос отын. Зэмзэ но, мар вераны ик ӟудоно. Государство куашкан калэ вуэмын, нош соос отын ваче гадь кырмаськыса уло, кылъёссэс шерыса пуко, ай мыр-мыр нырулӥсез но вань. Озьы шат государственной ужпумъёс сэрттӥсько-пертчисько, пуктэм ужрадъёс лэсьтӥсько, бырйисьёслэн куронъёссы быдэсъясько. Ӧйтӧд. Г. Елампиевлэн гожтэтэзъя Депутат: - Пудо азбарын кадь луиз ни татын! Вот, скотина, трибуна улэ пузам ук! Нош ми татын галстукен... Суредэз В. Богоградлэн. Кузёзэ шедьтӥз 54 ар ортчыса Дэбес ёросысь Сеняшур гуртын вордскем пияшез Валентин Серебренниковез Быдӟым Отечественной войнае басьтӥзы 1942-тӥ арын. Ожмаськиз Ленинград дорын, вал миномётчик, разведчик. Кык пол сӧсырмыны шедиз. Берлояз пыдыз но сӧсырмиз. Узвесь пырыез мугорысьтыз потӥз 48-тӥ арын гинэ. Солдат гуртаз вуиз ӵапак 20 арес тырмон нуналаз 1944-тӥ арын 30-тӥ мартэ. Фронтовик татчыозь ӧз тодылы, со куинетӥ сетепенё Слава орденэн пусъемын шуыса. "Ма, мон сое утачаса но ӧй ветлы, ожмаськи ваньмыныз огкадь", - шуэ Валентин Никитич. Али Серебренниковъёс уло Ижевскын. Та нуналъёсы квартираязы городысь Октябрь ёрос военкоматысь жингыртӥзы, вителэ, пе, ми тӥледлы ордендэс ваём. Толон валлян фронтовик вылӥ наградазэ басьтӥз. 54 ар ортчыса гинэ Слава орден кузёзэ шедьтӥз. Н. Байтеряков. В. Н. Серебренников пиналъёсызлэн нылъёсынызы Надяен но Ульянаен. В. Беломорскихлэн туспуктэмез. Йылпумъянъёс лэсьтэмын Удмуртиысь Печатья но иворъёсъя министерство журналистъёслэн огазеяськонэнызы ӵош Быдӟым Вормонлы 55 ар тырмонэн валче республикаямы, ёросъёсын, заводъёсын потӥсь газетъёс куспын конкурс ялӥз вал. Солы алигес йылпумъянъёс лэсьтэмын. Нырысетӥ инты сётэмын "Удмуртская правда" газетлы, кыкетӥез � ветеранъёслэн но мӧйыослэн "Долг" газетсылы, куинетӥ интыен пусъемын "Удмурт дунне". Али городъёсын уно гинэ пӧртэм газетъёс пото. Но уноез редакциос Быдӟым Вормонэз возьматонлэсь палэнскизы. Умоен пусйыны кулэ Глазовын потӥсь "Красное знамя" но "Калина красная", Сарапулысь "Красное Прикамье" газетъёсты. Удмуртиын али пото 23 ёрос газетъёс, предприятиос печатлало 14 газет. Нош конкурсэ пыриськиз 3 ёрос газет но кык многотиражка гинэ. Редакциос сюлмаськизы авторъёсын ужан сярысь. Та ласянь ӟечен пусъемын "Наша жизнь" (Сарапулысь электрогенераторъёс поттӥсь завод), "Знамя труда" (Кияса), "Буммашевец" ("Буммаш" АО). Н.ЛЯЛИН. Н ы р ы с е з т а ӵ е о г а з е я с ь к о н К ы л е м с у б б о т а е Г л а з о в ы н о р т ч и з б е с е р м а н ъ ё с л э н б а д ӟ ы м к е н е ш с ы . О т ы н ю н м а т э м ы н Б е с е р м а н н а ц и о н а л ь н о - к у л ь т у р н о й а в т о н о м и л э н У с т а в е з . Б е с е р м а н ъ ё с Р о с с и я Ф е д е р а ц и ы с ь П р а в и т е л ь с т в о л э н п о с т а н о в л е н и е н ы з п ы р т э м ы н и ч и л ы д ъ е м к а л ы к ъ ё с л э н о г ъ я п е р е ч е н я з ы . " Р о с с и я Ф е д е р а ц и ы с ь и ч и л ы д ъ е м к а л ы к ъ ё с л э с ь п р а в о о с с э с у т ё н с я р ы с ь " Ф е д е р а л ь н о й З а к о н э з с а н э б а с ь т ы с а к ы л д ы т э м а в т о н о м и я а з я з у ж п у м п у к т э б е с е р м а н к а л ы к л э с ь и с т о р и з э , к у л ь т у р а з э , к ы л з э у т ё н н о а з и н т о н у ж п у м ъ ё с т ы . Б е с е р м а н н а ц и о н а л ь н о - к у л ь т у р н о й а в т о н о м и е з У д м у р т Р е с п у б л и к а ы с ь Ю с т и ц и я я м и н и с т е р с т в о ы н п у с ъ е м б е р е , т а о г а з е я с ь к о н л у о з н ы р ы с е з , к у д ӥ з к ы л д ы т э м ы н " н а ц и о н а л ь н о - к у л ь т у р н о й а в т о н о м и я с я р ы с ь " Ф е д е р а л ь н о й З а к о н э з л ы д э б а с ь т ы с а . Н а ц и о с ы н у ж а н п о л и т и к а я м и н и с т р Н и к о л а й М у с а л и м о в к е н е ш е л ю к а с ь к е м ъ ё с т ы ӟ е ч к ы л а з т а в у н о н т э м н у н а л э н н о в ы л ь к ы л д ы т э м о г а з е я с ь к о н л ы с ӥ з и з б а д ӟ ы м е с ь а з и н с к о н ъ ё с , к а л ы к ъ ё с к у с п ы н о г - о г д э г а ж а с а т у п а с а у л о н . У д м у р т Р е с п у б л и к а ы с ь П р а в и т е л ь с т в о л э н п р е с с - с л у ж б а е з . Валэктэ юрист Сэрегез дася адвокат Лилия Шкляева Телефон 25-33-70 Ыштӥ... ... ужан книжкаме 60-тӥ аръёсы Шаркан районлэсь ог люкетсэ огазеяллязы Якшур-Бодья район борды, кылемзэ - Вотка район борды. Отӥяз Шаркан район выльысь кылдӥз. Со вакытэ мон огдыре (временно) ужай промкомбинатын. Та предприятие берлогес ас нимзэ олокӧня пол вошъяз. Пенсие потонэ вуиз но, мыным отын ужаме сярысь бумага кулэ луиз. Малы ке шуоно, нырысетӥзэ ужан (трудовой) книжкаме ыштэм вал. Табере одӥг архивын но справка уг сёто. Ум шедьтӥське, пе. Ма кароно мыным? Г. Кардапольцев, Ижын али улӥсь. Валэктон сётэ Россия Федерацилэн кун пенсиос сярысь законэз. Ужан книжкадэс кызьы ыштэмдэс тӥ ӧвӧл гожтӥллямды. Со тус-тас луиз ке тылпуэн, тӧлпериен яке музон шудтэм учырен сэрен, тӥляд осконды вань ужан дырдэс мукет амалэн юнматыны. Кулэ бумагаез архивын зэмен ик уг шедьто ке, утчалэ кык яке тросгес муртэ, кинъёс тодо на промкомбинатын ужамдэс. Соос верамъя, суд быгатоз ышем стаждэс берыктыны. Собере куддыръя адями (тӥ но) шедьтэ уже куриськонзэ (заявленизэ), анкетазэ, автобиографизэ но музон документъёсты. Соосты верамдэс зэматӥсь бумагаосын лыдъяса, суд, озьы ик ужан дырзэс кузёмытыны быгатоз. ... квартиралы документме Улон интыме (квартираме) миым приватизация пыр аслым кари. Нош документме ыштӥ. Малпасько, сое азьвыл картэ капыртӥз шуыса. Табере выль документ лэсьтоно- а? Монэ курдатӥзы: дуно усёз, пе. С. Петрова. Вотка город. Азьвыл картты яке мукет адями пыр сыӵе документтэс уд шедьтӥське ке но, нырысь-валысь учкыса татын номыр кышкытэз ӧвӧл кадь. Кин ке быгатоз шат тӥледды асьтэ квартираысь улляны? Но... Улон-вылон, оло, тӥледыз косоз улон интыдэс вузаны, воштыны, кузьманы, кельтос (наследство) карыны. Нош квартирадылэн аспӧртэм паспортэз ӧвӧл бере, тӥляд номыр лэсьтэмды уз луы. Вылаз ик, тӥледды юнме курдатӥллям, кыкетӥ документ (дубликат) лекос дуно усёз шуыса. Тӥ уд куриське ук квартирадэс выльысь асьтэлы вузаны но асваньбур (собственность) карыны. Дубликат чарак дунтэмгес. Округ но уждун Вераськонъёс мыно Удмуртиез, Башкириез, Пермь областез Урал округе берыктон сярысь. Нош озьы ӧз луы ке? Асьмеды Приволжье округе ик кельтӥзы ке, уральской шуон тыриськоз на-а? В. Привалов. Удмуртилэн Урал яке Приволжье округе сюронэз пумысен номыр вераны, малы ке шуоно, Россиез сизьым округлы люкон сярысь закон ӧвӧл. Та уж лэсьтэмын политикаысь мугъёсъя. Кызьы гожъяз огез газет, таин валче Удмуртилэн интыез (географиез) но, куазез но шунытгес ӧз луы. Нокин но ӧз вошты СССР-ысь Ужъя но улон-вылонъя (социальной ужпумъёсъя) кун комитетлэсь 1987-тӥ арын 2-тӥ июле юнматэм 403/20-155 номеро постановленизэ. Отын нимаз-нимаз верамын будэтэм уждун басьтӥсь республикаос но областьёс. Асьме республикаын со ватсаське 15 процентлы. Азбар ӵужи квартира понна Вить ар талэсь азьвыл домоуправлениын (жилучастокын) азбар ӵужыны кутски. Кышноеным ӵош нылмес будэтӥськом. Одӥг комнатаен квартираын улӥськом. Табере мукет азе выжыны медӥсько вал. Нош монэ кышкатӥзы: квартираысь уллялом, пе. Закон монэ уг утьы шат? А. Андреев. Иж город. Гожтэттыя валаны луэ: ЖЭУ (жилучасток) тӥледлы сётэм, шӧдске, служебной нимаськись квартира. Тӥледын герӟаськем ужпумъя валэктэ Россия Федерацилэн Улон инты сярысь кодексэз. Отысь 107-тӥ ёзэт (статья) ивортэ: предприятиен, учреждениен, организациен ужан кусыпъёссэс дугдытэм муртъёсты служебной квартираысь потто ӵош улӥсьёсынызы ӵош, мукет улон инты висъятэк. Зэм, 108-тӥ ёзэт озьы улляны уг лэзьы таӵе муртъёсты: та предприятиын, учреждениын, организациын ичизэ 10 ар ужамъёсты; предприятие, учреждение, организация быремен яке штатэз кулэстэмен сэрен ужысь мозмытэмъёсты; пенсие потэмъёсты; быдэ вуымтэосты огназы вордӥсьёсты. Гожтӥськон- 2001 "Удмурт дунне" зӧкомоз Гажано эшъёс, газетмылы вуоно арлы гожтӥськон ӧз кутскы на ке но, вераны дыртӥськом шумпотымон ивормес. "Удмурт дунне" газетэз вуоно арлы ньыль пол поттыны чакламын, но редакциын ужасьёс таӵе малпанэ вуизы: ньылетӥ номер чотын "зӧкомытоно" пятница нуналэ потӥсь газетэз. "Удмурт дуннеен" вуоно арын но ӧд ке люкиське - телепрограммаен газет дорады вуоз 16 бамен. Та чотын ик кулэстыны быгатӥм вуоно арлы гожтӥськыны чаклам дунъёсты: огъя дун луыны кулэ вал 145 манет 80 копейка, табере гожтӥськыны луоз 127 манет 68 копейкалы. Куд-ог адямиос понна талэсь но ӧжыт дун тупатэмын. Озьы ик толэзьлы одӥг пол потоз "Твой дом и сад" газет. Нимаз гожтӥськыны луоз пятница номерлы. Озьыен, гажано эшъёс, коньдондэс пичиен-пичиен шыръялэ ни газетлы гожтӥськон нуналозь. Ганза улэ малпаськыса Кӧня ке арня талэсь азьло Правительстволэн Тӧроез Николай Ганза ялӥз вал: кӧня ке организациос сое куризы, Удмуртилы президент луон понна нюръяськонэ пыриськыны. Мон та пумысен малпасько на, ивортӥз со. Правительстволэн аппаратаз ужасьёс азьын берлозэ вераськыкуз, президент луон понна нюръяськонэз сярысь Николай Алексеевич номыр ӧз вера. Но алӥз: - Куд-огез должностен адямиос та уже пырисько ни, законэз тӥяса. Тодэлэ: сыӵеосты мон ужысь улляло. Ачиз Ганза весь улэ малпаськыса. Чуръёс, чуръёс Утьы милемыз, инмаре Ми, Алнаш ёросын улӥсьёс, туж яратыса кылзӥськом нуназе радиопередачаосты. Туж кельшо удмурт кырӟанъёс, песяйёслэн вераськемзы но туж мусо потэ. Ми соослэсь визь басьтӥськом кадь, ортчемзэ но ализэ но тодамы вайыто соос, ӵем дыръя бӧрдытэк кылзӥськыны но уг луы. Туж кельшо на милемлы инмарлы оскисьёслы сӥзем передачаос. Диакон Отец Михаил инмарез туж яратыса, данъяса, милемыз визьманы турттыса тырше сьӧлыко лулъёсмы понна. Бӧрдыса кылзӥськиськом солэсь визьмо верамъёссэ. Алнаш ёросысь православной калыклэн нимыныз тау кареме потэ Отец Михаиллы. Газет пыр вазиськисько радиоын ужасьёслы: уз луы меда со передачаез кузьгес карыны. Шуом, кыӵе ке но крезьгурез яке рекламаез кулэстыса. Со рекламаосты кылзӥськыса ми акыльтӥм ини, номыр соослэсь умоез ӧвӧл. Отец Михаил, кылэ вал милесьтым куронмес, ми тӥледлы туж бадӟым тау кариськом, тазалык тӥледлы, кузь арлыд сӥзиськом. Ю. Егорова. "Белагро-200" Тазьы нимаськиз сиён-юон бинян тӥрлыкез возьматонъя Минскын ортчем калык куспо выставка. 198 фирма татчы пыриськиз. Адӟытонэ лыктэмъёс туж тунсыкъяськизы Ижысь механической заводын поттэм оборудованиен. Предприятиысь специалистъёсын кенешизы дунъёс пумысен, бускель странаын вузкарон интыос усьтон ласянь дэмланъёс-ӵектонъёс но сётӥзы сиён бинян автоматъёсты комплектэ пырись ёзъёсын келян-вузан пумысен. М.КУЗЬМИН. БЫРЪЁН-2000 Дэмлало Вершининэз Республикамы дасяське Президентэз быръёнлы. Та нуналъёсы ужась коллективъёсын кенешъёс ортчыло: калык вера аслэсьтыз мылкыдзэ. Алигес люкаськылӥзы Вавож районысь Гурезь-Пудга, Уё-Докья, Пужмоил, Большая Докья, Малиновка гуртъёсын улӥсьёс. Гуртоос огмылкыдын веразы президентэ Павел Николаевич Вершининэз дэмламзы сярысь. Оско, гуртын вордскем но ужан сюрессэ мытэм мурт крестьянъёслэсь сюлмаськонзэс мургес валалоз шуыса. А.ВАСИЛЬЕВА. Алексей Шкляев Газет уг ул нунал гинэ Мӧзмыт очерк Выль газет потэм бере, ми, редакциын ужасьёс, нуналлы быдэ сямен кенеше люкаськиськом. Нимаз материалъёслы дунъет сётӥськом: лыдӟисьёс тазэ уно аръёс ӵоже сюлмазы возёзы, тазэ ӵуказе ик вунэтозы, тазэ копак уз учке. Калыке потаса валаськод: газетчиослэн но лыдӟисьёслэн дунъёссы куддыръя укыр пӧртэмесь луо. Сое возьматэ улӥын мадем таӵе учыр но. Куинь но ӝыны ар талэсь азьвыл, 1996-тӥ арын 10-тӥ декабре, "Удмурт дуннелэн" куинетӥ бамаз печатламын "Пиос бертӥзы Чечняысь" - кузь ивор (корреспонденциен интервью вискысь жанр). Авторез - милям корреспондентмы Т. Банникова. Ӵапак та материал сярысь вераськон потӥз туэ июле Шаркан районысь Шуӟадвӧль (Кельдыш) гуртын (автормы сое малы ке Кельдыши гожтэм). Мыным сётӥзы газет бамез но. Ижысен сое аслыз Т. Банниковалы возьматӥ но, таиз соку ик тодаз вайыны ӧз быгаты: мар ай мон отын умойтэмзэ гожтӥськем? Милям улон-вылон сыӵегес уга: туннэ кенешиськод, Кун Кенешын вылӥ кивалтӥсен, ӵуказе - кыдёкысь гуртысь пыдйылчиен. Ваньзэ пумитам адямиосты йырын возьыны шуг. Редакциысь кенешын но та гожъям сокем ушъямын ӧй вал. Дежурной Фёдор Суворов со пумысен пал кыл но ӧз поттылы. Мар бен, Чечняын соку нырысетӥ ожмаськон мынӥз, пиос бертӥзы но бертӥзы. Инмар утиз - улэп кылизы. Ма отын абдранэз? Милям йырмы висе вал вуоно номер понна. Озьы вакчи газет выдӥз мукет номеръёс вискы. Котьма ке но, корреспонденциез вакчияк тодамы ваёме (валамон ини: туннэ тодэммес быгатыса). Кельдышысь Олег Кардапольцев но Иван Вахрушев Чечняе шедемзэс гуртазы ӧз ивортэ. Мугзэ вераны шуг, но малпазы, вылды: малы кышкатод мемиосты? Кулон ветлӥз артэ ик. Чечен воргоронэз вылласянь уд тодма ук: оло, со нуназе бакчаяз гудӥське, нош уин пыӵалэн калтыртэ. Кызё аресъем пиослэн син азязы бырылӥзы эшъёссы. Али гинэ тонэн бӧтьыртэ вал улонысь чыры-пыры сярысь. Нош тани пограз. Ноку но, ноку но уз лулъяськы ни. Вылаз ик, улэп тушмон вӧзын вал на лултэмез но. Олег верамъя, солдатъёс доры кытысь ке вуылӥзы аракы но, наркотикъёс но. Кардапольцев огшоры пехотаын вал. Пӧлазы олокинэз но вань. Иванлы та ласянь удалтӥзгес. Со шедиз Югдурез утёнъя министерстволэн ёзаз. Адямиосты татчы сакгес чакласа бырйылӥзы. Корреспондент мадёнзэ йылпумъя таӵе малпанэн. Чечняын ожмаськемъёслы нокыӵе юрттэт сётыны чакламын ӧвӧл (тодады вайытӥськом: вераськон мынэ 1996-тӥ ар сярысь - соку зэмен ик озьы вал). Со ик кышкыт. Чечняын жугиськонъёс кӧня ке улыса уз сюре меда Афганистанэн сэрен асьсэды ыштэм муртэн лыдъясьёс радэ? *** Иван Вахрушев туннэ каньылля улэ-вылэ. Зэм, кышноез ӧвӧл на. Нош Олег? Та нуналэз Нина Павловна Кардапольцева ноку но уз вунэты. Олегез армия бере Кельдышаз одӥг ар но ӧз улы ни. 1997-тӥ арын 30-тӥ июне со выиз, гурт сьӧрысь тыметын пыласькыкуз. Калык вераз: утись (яке инмар) куштэ сое, кинлэн улэмез уг поты. Олег сюлэмзэ нокин азьын ӧз усьтылы. Корреспондентмылэн юанъёсызлы но одӥг-кык кылын гинэ валэктон сётылэм. Шуг вераны, макем кельше вал солы улон-вылонмы Чечня бере. Михаил Лермонтовлэн вань "Фаталист" веросэз. Ӟуч армиысь офицер (серб) оскытэ: адями быре-кулэ солы гожтэм кулонэн. Верамезлы мед оскозы шуыса, зарадам пистолетсэ кутэ но, аслаз йыраз мертаса, куроксэ зӥбе. Пистолет уг ыбы, малы ке шуоно, офицерлы музон сямен бырыны кылдэмын вал. Та ӝытэ ик сое кудӟем казак палашен (шашкаен) коралтыса вие. Амалтэк озьы ик малпалод Олег Кардапольцев сярысь. Сыӵе кышкыт тылӝу пыр потӥз. Бертыса комбайнер луиз. Аран машиналэн питранъёсыз улэ ӧз пачка - юзмыт вуын косказ. Озьы-а, тазьы-а - кулон кайгу капчигес уз луы. 1996-тӥ арын 10-тӥ декабре печатлам газетмес Нина Павловна киыз куалекъяса мыче: - Та сяна, пиелэн одӥг фотоез но ӧз кыльы ук. Оло, тӥляд фотографты шедьтоз на газетэ сётэм снимоксэ. Жаль, ужасьтылэсь нимзэ вунэтӥ. Фотокорреспондентмы Владимир Беломорских та вакытэ ури-бери бугыръяське вуж плёнкаосаз. Кулэм муртэ фотокор уз ӝуты ни. Олеглэн вужерез уз вошты сое ассэ. Но суред ӧжыт коть буйгатоз синвуэн тымиськем меми сюлэмез. *** Куинь пинал будэтӥз Нина Павловна - кык пи но ныл. Сюлэмыз нокыӵе куректон сярысь ӧз алылы. Инмарлы оло оске, оло уг - меӵак уг тоды. Огпол, Ижысь больницаын кыллись картэз доры ветлыкуз, вокзал дорысен пумиськиз чиганъёсын. Соос удмурт кышномуртэз вӧсь каризы. Со дырысен Нина Павловналэн тодаз но уг лыктылы азьвыл улонзэ тунан сярысь. Котькыӵе чиганъёслэсь кыдёкегес палэнске. Мар бен верасал чиган Кардапольцевъёслэн адӟонзы сярысь? Олегез ыштон секыт ке но вал, воргоронъёс пӧлын со гинэ дырызлэсь вазь уг быры. Нош Сергей пиез. Кык ныл яратэ вал пияшез. Матысез - удмурт, кыдёкысез - ӟуч. Сергей бырйиз кыкетӥзэ. Кузпалъяськон ужрад (сюан ӧвӧл - шулдыръяськон мактал) ортчиз Пермьын. Сергей ӧз ӝожтӥськылы улон-вылонэзлы. Меми сюлэм но номыр умойтэмзэ ӧз шӧдылы. Нош пиез - ошкиз. Олег но, Сергей но али кыллё Зюзяысь шайгуын. Ӟуч кен Нина Павловнаез сокем ик мурт ӧз кары кадь. Нунызы ӧй вал ке но, Сергей кулэм бере гожтэт ыстӥз на: дорады, пе, бертылэме потэ. Нина Павловна нокыӵе ивор ӧз сёты. Соос отын коньдонтэмгес уло бере, кенэзлэн лыктон мугез таин герӟаськымтэ меда? Витьтон сьӧры потэм кладовщицалэсь но заправщиклэсь Нина Павловналэсь аслэсьтыз но улэмзэ зарниен уд ӵошаты. Колхоззы лябӟемын. Туэ кык пол сяна уждун ӧз басьялэ на. Со но ньӧмыз понна гинэ. Тысь уг сёто, пудо вордыны секыт. Пунэмен тыронъёс трос люкаськемен, скалэз вузано луиз. Мемизэ Сергей, Олег сярысь, ӵемгес вӧтатъя. Нина Павловна лулске: - Куректонэ сомында ке но, весь улэм потэ. *** Газет, пе улэ одӥг нунал гинэ. Со зэм ӧвӧл. ШӦКЫЧ "Сюрс но ӝыны иськем" (Юмореска) Алигес монэ командировкае ысъязы. котьку озьы, мар ке пумысен шуге-леке вуо ке, котькытчы монэ келяло. Тынад ваньмыз умой пӧрме, пе. Кызьы уз пӧрмы, лумбыт бызьылӥськод, созэ-тазэ утчаськод, пӧртэм кагазъёс, документъёс вылэ кивалтӥсьёслэсь киоссэс нюртытӥськод, огезлы-мукетызлы бискыли кузьмаськод, собере гостиницае кылдэ вись кузьда ошыса вуиськод но пограськод. Таяз учыре но озьыгес ик вал. Берпуметӥ кагаз вылэ гожтӥськон вылысь директорлэн воштӥсез доры пыри. Учкисько но ӝӧк сьӧрын институтын ӵош дышетскем эше пуке. Ӟечбуръяським, ӟыгыръяським, ӟузим, ӟабыльтӥм. � Я, кыӵе улӥськод, вера! � юаз эше. � Азьло сямен ик, огшоры менеджерын тыршисько. � Жаль, жаль. А кылзы ай, лык ми доры, милям кивалтӥсьмы � умой адями. Туж ӝог вала. Мон тани огшоры маклер, нормировщик, агент вал. Табере тани ачид адӟиськод, директорлэн воштӥсез! Тӥни озьы мон ог толэзь ортчыса, ужме воштӥ но эше дорын огшоры коммивояжерын ужаны кутски. Дыр ортче, нош мон сярысь эше вунэтэм, лэся. Юась-верась но ӧвӧл. Нош одӥг нуналэ вазь ӵукна и телефон жингыртӥз. Трубкаез кутӥ но директорлэн воштӥсез вылэм. Ну малпасько, йӧ вырӟиз, монэ ӧвӧл вунэтӥллям на. � Ӟечбур! � кылӥськиз трубкаысь эшелэн жингрес куараез. � Тон монэ ыштӥд, дыр, озьы-а? Я, я, вождэ эн вай. Мон Бельгиын, командировкаын вал. Монэ сак кылзы. Туннэ нуналысен кутскиськом асьмелэсь программамес быдэстон борды. Ӵуказе ӵукна ик ог вить час котырын стадионмы дорын лу. Ӝегатскыны уг яра. Спортивной диськут басьтыны эн вунэты. Мон мар ке юаны ӧдъясько на вал но, трубкаысь пи-пи-пи сяна номыр но ӧз кылӥськы ни. Со монэ стадионлы директоре пуктыны ӧдъя шат, малпасько ас поннам. Отын ведь премиосты но, прогрессивность но, поясной коэффициентъёсты но, мукетсэ но дз адӟылы. Уг, уг мыны мон сыӵе уже. Нош ӵуказеяз ӵукна, кызьы косӥз эше, вить часын мон стадионын вал ини. Мон бӧрсьы ик "Вольво" машинаен эше вуиз. Собере шуак юаз: � Кӧня пол туштэ мычиськод? � Одӥг пол, ӵукнаосы. � Туннэысен кык пол мычиськод! Ӵукна но ӝытазе, ятэ! Умой. Табере сак кылзы. Тӥни, вож-вож спортивной костюмен ӝужыт адямиез адӟиськод-а? � Адӟисько. � Мын со доры. Со ваньзэ тодэ. Мон вераськи соин. Самой кулэзэ вераны вунэтӥсько вылэм ини. Директормы со, вылӥе ӝутскон понна ог сюрс но ӝыны иськем соин ӵош бызьылоно луоз. Эн малпа сое азьпалтыны. Йырыз кур луоз. Мон но сомында ик бызьылӥ. Вить сю иськем бызьылэме бере отделэн кивалтӥ, тямыс сю иськем сётэме бере, быдэс фирмалэн кыл кутӥсь секретарез вал ини, нош сюрс но ӝыны иськем сётэме бере, генеральной директорлэн воштӥсез луи. Сотэк уг луы, брат! Давай, азьлань! Мар со, сюрс но ӝыны иськем, трос-а, мар-а? Бызьыло ай мон соин ог сю сюрс иськем пала, отӥяз улыса адӟом, малпай мон ас поннам. Ог витьтон сюрс иськем пала бызьылэммы бере, малы ке мон уллань но уг васькиськы, выллань но уг тубиськы. Та пумысен эшелэсь юано кариськи. Ог ӵукна жингыртӥ но озьы но озьы шуисько, ог интыям ужасько. Ог витьтон сюрс иськем пала бызьылӥ ини. Эшелэн малы ке йырыз кур луиз но шуэ: � Тон эшшо витьтон сюрс бызьылод на ай, мудрон адями вылэмед тон. Мон тыныд мар шуи, сюрс но ӝыны баксы, баксы! Валад-а? Така йыр! Мынам киысьтым телефон трубка ӝӧк вылэ усиз, нош ачим кысмыляк пукон вылэ лэзьки. Сазьтӥськеме бере, мынам зэмзэ но скал сямен бӧксэме потыны кутскиз. Кызьы ай скал бӧксэ вал, му, му-у, му-у-у! Валентин ГОРБУНОВ. ШӦКЫЧ Сопал дуннеысь гожтэт (йӧспӧртэм вӧт) Ӟечесь но буресь гажано господаос, сударыняос, огъя вераса, луло муртъёс но адямиос. Та гожтэтме келяны мон кема малпаса улӥ. Сопал дуннеысь тапалаз потыны эшшо но секытгес вылэм уга. Тапалысьтыз сопалаз кӧчыны данаклы лякытгес. Малы ке шуоно, адямиосты ватыны азьло ик дасясько. Корос но шуэм сямен, азьло ик дасяло, сэбет карыны уксё дасяса возё но мукет. Асьтэос тодӥськоды, мон вератэк но. Нош сопал дуннеын воксё мукет югдур. Отысь озьы гинэ, коросысь усем кадь, потыны уг луы. Оломаиз но вань, ява. Та гожтэтэз тӥледлы келян понна гинэ но олокӧня апостолъёс дортӥ ветлоно луиз. Одӥгзэ апостолэз йыры курен бюрократ шуыны ӧй-а шедьты. Льӧмпу сяська кадь пурӟиз. Тонэ, шуэ, одӥг пол ватӥзы ини, эмез-юмез, эсэпез, йӧныз, пайдаез... эшшо мар ке шуиз вал но вунэтӥ ини... Ӧвӧл ке, пе, эшшо огпол ватом на. - Эн ни, эн ни шуисько, кирос тырыса, тырмоз. Адями одӥг пол улыны но кулыны но кулэ. Мынам мукетъёсызлэсь висъяськеме уг поты. Тани, шуисько, таӵе гожтэт пӧрай мон адямиослы. Нырысь лыдӟы но сӧре гинэ монэн мар ке кар. Лул уг чида ни, чидан ӧвӧл ни луло адямиос шоры жальмаса улыны. Копак визьтэмесь-а мар-а соос? Сюез но сюй кадь ӧвӧл ини. Оломаин но саптало, суто, ӵакмыто сое. Нош ми, сыӵе сюйын кылльыны кулэ. Тае кылыса, апостол буйгатскиз кадь. Бен тӥ но тодматске, луло но визьмо адямиос та гожтэтэным, дорады вуиз ке, уске. Югдур тани ма бордын. Тӥляд укыр ӵем кыӵе ке коллегиос, заседаниос, сессиос, кенешъёс, сэбетъёс ортчыло. Пусйыны кулэ созэ но, ай ужан дыръя сое ваньзэ ортчыто, кабинетъёсы пытсаськыса. Тӥни сыӵе коллегия алигес вал Удмурт республикамылэн прокуратураяз. Юн кенешизы отын, нош пайдаез луоз-а, уз-а? Ӧйтӧд. Тани мар! Миым октябрь толэзе Сарапулысь НГДУ одӥг гектар но сизьым дасмос музъемез му вӧен орсмытӥз. Нош кӧня сюрс долларлы, ма быдӟа изъян ваемын инкуазьлы но сюйлы - туннэ ке нокин но ӧз лыдъя на. Кыл пумысь вералом на, чылкак сыӵе ик югдур Шаркан районысь Бородулино администрацилэн музъем вылаз. Нош Дэбес районын таӵе учыръёс куать пол вал ини. А мар-о? Нокинлы номыр но кулэ ӧвӧл. Луло но визьмо адямиос, кивалтӥсьёс, ымазы ӵыжатэм вӧй кисьтэм музэн, чал- чал уло. Сокем ческыт потэ, лэся, ужам бервылзы. Нош милемлы? Сопал дуннеын улӥсьёслы кыӵе? Изъянтэм музъемъёсты выльдон понна кӧня ке коньдон висъяло ик. Нош соиз но кулэезъя уг кутӥськы. Красногорск районын со уксёез - кызьы тӥ чебер вераны яратӥськоды - социальной удысэ висъяллям. Сарапул районын со уксёез улон корка пуктыны кутӥллям. Нош Кезын пырак автобус басьтӥллям но ужез бырем. Кылемзэ кытчы меда каризы. Бен, та пумысен чылкак ужрадъёс ук куто шуыны ым уг вайяськы. Ньӧмыз понна вань ик соос. Тани районъёсысь прокуроръёсын дас вить учыръёсы ужрадъёс кутэмын, арбитражной судъёсы сизьым материалъёс келямын, кык миллион манет тыр. Озьы ке но, уробо али ке но отын. Музъемез кырсьмытон учыръёс уг кулэсмо. Я отын, я мукет районын, я городъёсын шимес учыръёс луыло. Уката ик му вӧй поттонэн, газ кысконэн вырись предприятиосын. Штраф тырон - со умой ужрад ке но, пайдаез ичи угось. Музъемез штрафен чылкытатыны бер луэ. Шонерак вераса, республикаысьтымы прокуратура та удысэз син азяз ялан возьысал ке, чурытэсь ужрадъёс кутысал ке, музъемез изъянтон учыръёс данаклы кулэсмысалзы, дыр. Тӥни сыӵе гожтэт мон келясько тӥледлы, луло но визьмо адямиос. Тапал дуннеын гинэ ӧвӧл, сопал дуннеын но карасинэн зынмем сюйын кыллем уг поты, ява. Асьтэос но валаськоды, дыр, мар сярысь вераны турттӥсько мон. Сопал дуннеысь гожтэтэз вуттӥз А. Емельянов. Туннэ пузъёс дунтэмпсь, но тютюпиё Ӵуказе � дуноесь, но тӧлоесь Туэ сентябрьысен базаръёсын шӧдскымон воштӥськонъёс ортчыны кулэ. Журналистъёслы со сярысь мадизы мэриын радъям пресс-конференция дыръя Иж администрацилэн тӧроезлэн воштӥсез Валерий Кузьмин, Госторгинспециысь но Санэпидемнадзорысь специалистъёс. Али Ижевскын 4 бадӟым рынок, 1 авторынок но 38 пичи вузкарон инты лыдъяське. Но "Сиён-юонъёслэн ӟечлыксы сярысь" Федеральной Закон кутэм бере, матысь дыре та лыдпусъёс кулэсмозы, шӧдске. Валэктом радызъя. Асьмеос кемалась дышим ни городысь урамъёсын сиён-юонэн вузкарон "сэрегъёслы". Магазинэ нимаз кожатэк гинэ басьтӥськом созэ я тазэ вузэз. Дунъёс но татын пичиесьгес. Но Госсанэпидемнадзорысь валтӥсь специалистлэн Ираида Шиховалэн верамезъя ӵемысь со сиён-юон сиыны ярантэм луэ. Туннэ базарын вузаны яра бакалейной луись вузъёсты � пызь, сахар-песок, кеньыръёс но пӧртэм пумо емыш гинэ. Кылемъёсызлэн, шунды шорын кылльыса, ӟечлыксы ыше. Кылсярысь, майонез чиданы быгатэ 20 градус шунытэз, 35 градус пӧсен со сиыны ярантэм лыдъяське. Нуналлумбыт ӵоже ӟырдам курег пузъёс ӵоген "чипкетыны" но кутскозы кадь. Пряник-печення басьтыку ум малпаське, кытын, кыӵе интыын сое возё. Нош ӵемысь озьы луэ, со костаськемын улон коркаосын, кырсь лапасъёсын. Соинтэк-а уг кулэсмо шыр висёнэн курадӟисьёслэн лыдзы, вӧлмемын туберкулёз. Жаляса верано, вузкаронын чаклам куронъёсты тӥян учыръёс вамышлы быдэ пумисько. Соин валче, Санэпидемнадзорысь но Госторгинспекциысь специалистъёс табере "чурытгес" кариськозы. Котькуд ужбергатӥсь вузэзлэн ӟечлыкез понна кыл кутыны одно кулэ. Озьы вузчиослы кык сюрес гинэ кыле � яке сӧриськись сиён-юонэз возён понна ас кужыменызы холодильникъёс басьтоно, яке ужан удыссэс воштоно. Специалистъёслэн лыдъямзыя, Ижевскысь али 8 но ӝыны сюрс вузкарисьёс пӧлысь ог 2 но ӝыны сюрсэз "выль" куронъёсты быдэсъяны шугъяськозы. Пресс-конференция бере пумиськылӥ "Центр" трамвай дугдылонни вӧзысь "Атлантида" вузкароннилэн сэрег администратореныз Георгий Сепашвилиен. Вузкарон удысын воштӥськонъёс пумысен со тодэ ни. Бен, ас кужыменыз та рынок холодильникъёс басьтыны уз быгаты. Но Гиялэн мылкыдыз уг куашка. Сиён-юон интые та рынокын табере дӥсен вузкарыны чаклало. Чупрес мурт аслыз котьку сюрес шедьтэ, пе. Тӥни озьы. Шумпотоно кадь сиён-юонлэн ӟечлыкез, оло, табере тупатскоз шуыса. Но мынам мылкыды пуксемын. Котькыӵе чупрес лу, но дунъёслэн будэмзы сьӧры уиськыны котькудӥзлэн кужымез уг тырмы. Нош базаръёсын выль воштӥськонъёс дунъёс вылын одно шӧдӥськозы кадь. Уз меда? Э.КУМАЧЕВА. ЭКОНОМИКАЫСЬ УЖПУМЪЁС Азьпалан � республикалэн юбилеез. Кызьы сое пумиталом? Кылем арняе Кун Кенешлэн Тӧроез А.Волков ивортӥз, Удмуртиез азинтонъя выль программа дасямын луоз шуыса. Куд-огезлы, оло, со малпамтэ шорысь кадь потӥз, угось алигес гинэ асьме Правительство юнматӥз вал улон-вылонэз но экономикаез азинтонъя программаез. Соягес ик бюджет сярысь закон но кутэмын вал. Соин ик юан кылдэ, малы асьме республикамылы эшшо одӥг сыӵе программа кулэ на? Выльдӥськон кутскем бере Удмуртия быдэс Россия сямен ик гопо-выро сюресэз ортчиз. Дас ар ӵоже сэрттоно-пертчоно луиз Совето власть дыръя люкаськем секыт ужпумъёсты. Али югдур пумен тупатскыны кутскиз. Реформаос мынон вакыт асьмеос улонлэн ярдураз гинэ мырдэм-мырдэм возиськыны турттӥм, табере кӧня ке луонлыкъёс кылдӥзы азьлань вамыштыны. Нырысь ик шумпотоно экономикалэн ужаны кутскемезлы. Выльысь улӟизы пыӵал тӥрлык лэсьтӥсь предприятиос, машина поттон удыс. Табере мар но со лэсьтыны луоз ни калыклэсь улон-вылонзэ умоятон понна. Президентлэн указэзъя Удмуртия пыртэмын Приволжск регионэ. Отчы асьме республикаен валче пыре на 14 улос. Кызьы адӟиське республикамы соосын артэ? Сокем урод уг. Кылсярысь, экономикая сылӥськом 4-тӥ интыын, Башкортостан, Татарстан, Самара улосъёс бере. Калыклэн улон-вылонэзъя шоразгес возиськиськом � 8-тӥ интыын. Куд-ог дыръя кылоно луэ, Удмуртилэн экономикаяз туж ляб инвестициос кутӥсько шуыса. Но Россилэн вань улосъёсыныз ӵошатыса, инвестициосъя республикамы 16-тӥ интыын сылэ. Тунсыко адӟисько таӵе лыдпусъёс но. Йӧл кысконъя но сӥль поттонъя Удмуртия Россиын � 17-тӥ интыын, курег пуз поттонъя � 8-тӥ интыын, нош гурт удыслэн огъя продукция поттэмезъя � 26-тӥ интыын. Ӟечгес азинско, бере кылись удысъёсмес азьпала поттон понна, Удмуртилы кулэ выль программа. Кун Кенешлэн Тӧроезлэн верамезъя, та уже, пе, кысконо экономистъёсты, политологъёсты, вань удысъёсысь визьмо адямиосты. Удмуртиез азинтонъя программа лыдэ басьтыны кулэ республикаын улӥсь вань калыкъёслэсь куронъёссэс. Та уж борды ӝоггес басьтӥськоно, шуиз А.Волков. Республикалэсь 80 ар тырмонзэ выль программаен пумитано ни. Республикамылэн юбилеез сэрен гинэ-а меда дыртоно та программаез дасянэн? Мон сямен, мукет мугъёс но вань. Татын шӧдӥське Россилэн политикаез но. Кызьы тодӥськом, В.Путинлэн ӵектэмезъя, Россиысь Правительствоен кивалтыны юнматэмын вал М.Касьянов. Солэсь кандидатуразэ Кун Думаысь депутатъёс но умоен лыдъязы. Огкылысь луизы депутатъёслэн вань фракциоссы: "Единство", КПРФ, "Отечество � вся Россия", "Союз правых сил", Яблоко", "Россиысь регионъёс" но мукет. Михаил Касьяновлы депутатъёс дурбасьтӥзы ке но, со азе одӥг бадӟым курон пуктӥзы: ӝыны ар куспын Россилэсь экономиказэ умоятыны. Валамон ини, Россилэн премьерез та ужпумез огназ быдэстыны уз быгаты. Вань улосъёсысь кивалтӥсьёсын ӵош ужалоз. Уката ик али, куке Центр власьтлэсь вертикальзэ юнматон ласянь чурыт политика нуэ. Нош мар малпало меда Удмуртиез азинтонъя программаез дасян сярысь республикаысь тодмо адямиос? Г.Кудрявцев, "Аксион" АО-лэн валтӥсь директорез: � Программа дасянэз ыстоно Правительстволы но учёнойёслы. Отын тужгес но зол чаклано доход люканэз но сое пӧртэм удысъёслы шонер люкылонэз. С.Чикуров, Правительстволэн Тӧроезлэн воштӥсез: � Пыкъяськоно Президентлэн Россиысь калыклы вазиськонэз вылэ. Отын валтӥсь быдэстоно ужъёс учкемын. Дасяно сыӵе программа, кудӥз косысал котькуд ёрос администрациез коньдон поттон сярысь сюлмаськыны. Али ваньмызлэн озьы ужамзы уг на пӧрмы. Тыршемзы но уг поты. З.Степнова, "Сактон" АО-лэн валтӥсь директорез: � Программаын валтӥсь инты басьтыны кулэ калыклэсь улон-вылонзэ умоятон сярысь сюлмаськон. Соя ик мукет ужпумъёсты но чаклано. Вань удысъёс калык понна ужаны кулэ. М.Шишкин, экономика наукаосъя доктор: � Сыӵе программа туж кулэ. Но отын медаз тӥямын луэ экономикалэн законъёсыз. Бадӟым программаос дасяку, ялан одӥг янгыш лэсьтӥськом: пусйиськом быдэстоно ужъёсты гинэ, но ноку ум чаклаське, кызьы, кыӵе амалъёсын соосты уже пыӵатоно. О.Сергиенкова, страховой компанилэн директорез: � Республикалэн коньдонэз палэнэ медаз кошкы шуыса, программаын умой-умой чаклано инвестициосты кутонъя проектъёсты. Республикаез азинтонъя программа сярысь малпанъёссэс озьы ик веразы вузъёслэн ректоръёссы но. Ужрадэ пыриськемъёс сыӵе программа дасянлы пумит ӧз луэ. Со бордын ужась группаен кивалтоз Правительстволэн Тӧроезлэн воштӥсез С.Чикуров, нош огъя ужен кивалтоз Кун Кенешлэн Тӧроез А.Волков. Иське, республикалэсь юбилейзэ асьмеос выль азинскон программаен пумиталом. Т.БАННИКОВА. ШӦКЫЧ Визьтэчетъёс Самой юн кужым - коньдон, уката ик со зарни ке. *** Дэремен вордскыны умой, сберкнижкаен - эшшо но умойгес. *** Ужпумез быдэстыны вань кивалтосъёс умоесь, уката ик со кивалтос коньдон ке. *** Уксёлэн зыныз ӧвӧл шуо соос, кинлэн уксё зынъяны дырыз ӧвӧл. *** Шудбурез дурыны кулэ шуо ке но, малы ке но кебитын уг ужало - тросэз базарын пуко. *** Адями кыл дано вазе ке но, аслам адямие шуыку, кӧт каньылгес луэ. *** Государствоез пӧяны секыт ӧвӧл, уката ик "отын" тодмоосыд вань ке. *** Шонер сюрес вылысь но куддыр кожыны кулэ, зэмлыкез адӟиськод ке. *** Ужпум со бордын ӧвӧл, кытчы гылӟиськод, со бордын, кин вылын нискылтӥськод. *** Урод сям - со уродлы урод ӧвӧл, уродлы урод сыӵе дыръя возьдаськон. *** Мар сюлэм пушкад - юась ӧвӧл, кин мышкад сылэ, таиз ини мукет ужпум. *** Йырын тӧл шула ке, куазь но тӧло кадь потэ. Лӧпшо Педунь. Вордскемзэс та нуналъёсы пусъё: Волков Виталий Андреевич - Удмурт Республикаысь Вылӥ судлэн членэз. Петров Юрий Павлович - Пичи Пурга черкогуртысь администрацилэн йырыз. Архивысь документъёсъя Удмуртия ЪЪ дауре 1927-тӥ ар Таяз аре кутэмын вал калык хозяйствоез азинтонъя нырысетӥез 5 арлы чаклам план. Соя пусъемын бере кылёнысь потыны, тушмонъёслэсь утиськон вылысь странаез кужмоятыны. Промышленностез ӝутон борды кутскизы, выль заводъёс но фабрикаос пуктылыса. Ижын чакламын вал станокъёс, мотоциклъёс, инструментъёс поттон производствоосты усьтыны, пӧйшуран пыӵалъёсъя фабрикаез паськытатыны. Лэсьтӥськон материал тырмымтэен кулэ вал цемент поттӥсь завод пуктыны. Со сяна, чакламын вал Ижын, Можгаын но Глазкарын кирпич шуккон заводъёс лэсьтыны. Можгалась дубильной экстракт поттыны чаклам заводэз таяз аре вуттоно ни вал. Озьы ик быдэсмыны кулэ вал Ижысь лесокомбинат но хими завод. Уно кужымез но ваньбурез кулэ кариз городъёсын, районъёсын гуртъёсын элеткростанциосты ӝутон. Нош нырысетӥез пуктэмын ни вал Селта волостьысь Халды черкогуртын ортчемаз аре. Март толэзе ортчиз Удмуртиысь Советъёслэн ВИИИ съездзы. Со ужпум пуктӥз: ваньбурез шыръяса туж кулэезъя гинэ кутыны. Мылпотэмзыя гинэ уже ветлӥсьёслы ужысь уже пуасьёслы пум поныны косэмын вал. Съездын бадӟым вераськон вал ужан дисциплинаез юнматонъя производствоысь кибашлы ужасьёслэсь движенизэс паськытатонлы. Удмуртиысь промышленность удысын та аръёсы бадӟым инты басьтӥз "Ижсталь" завод. Татын 1927-тӥ арысен кылдэ станокъёс поттон производство. Соку ик заводысь потӥзы нырысетӥ "Беккер" фрезер станокъёс но "Леве" выллем токарнойёсыз. Но налогъёсын пачкатэм гурт калык пумитъяськыны выриз, ю-няньзэ ватылӥз. Озьы городъёсын улӥсьёс секыт югдуре вуизы. Странаысь вылӥ кивалтӥсьёс тодазы ваизы "военной коммунизм" вакытэз. Крестьянъёслы ас тодэмзыя нянен вузкарыны лэземын ӧй вал ни, ю тысьлы чурыт дунъёс тупатӥзы. Соя вузкарыны соглаш луисьтэмъёсты, кужмысь косылӥзы, пытсэт улэ но кысказы, ваньбурзэ талаллязы. Нимысьтыз "оперуполномоченнойёс" мултэс нянез гинэ ӧвӧл, вань ю тысез ӵужыса сямен поттылӥзы. Таин валче гурт калык ӧжытгес кизьыны кутскиз. Декабре ВКП(б)-лэн ЪВ съездэз ортчиз. Со историе пыриз коллективизация пумысен ужпум ӝутэменыз. Вераськон отын мынӥз кооперацилэн вань формаосыз сярысь, музъем бордын огазьын ужаса выль техникаез кутон пумысен. Ку но кыӵе амалъёсын огазеяно крестьянъёсты - таиз сярысь съездын верамын ӧй вал. А. Красильникова, Удмурт Республикаысь Кун архивын ужась. Вотка заводысь баржаос лэсьтонын. 1927-тӥ ар. Наталь Синучконын - Россиысь семья Куанермон куашкатэ семьялэсь улонзэ но тазалыксэ (Кутсконэз "Натальлэн" 93-тӥ, 94-тӥ номеръёсаз). Куатетӥез. Куанермон - семья улонэз но семьялэсь нылпи вайыны луонлыкъёссэ али но кема аръёслы куашкатӥсь кышкытлык. Калыкез кышкытлыклэсь утён быдэс дуннеысь кун конституциосын тужгес но вылӥе пуктэмын. Кызьы со быдэсъяське Россиын? 1998-тӥ арын ортчытэм юалляськонъёсъя 6 процентэз гинэ веразы, кунэн туала амалъёсын кивалтон соосты кышкытлыклэсь уте шуыса: 16 процентэз та малпанлы копак пумит луэмзэс веразы (92 процентэз юалляськемъёс кун утетлы оскымтэзэс веразы). Россиысь семья зӥбись кышкытлыклэсь дораз но утемын ӧвӧл, матысь адямиос гинэ но семьязэс "ожмаськон бусылы" пӧрмыто. Обществолэн куанермемез но эрикрадлэн тӥяськемез меӵак выжемын семья улонэ но. Эскеронъёс возьмато, 90-тӥ аръёсы 30-40 поцентэз тужгес но секыт йыружъёс Россиысь семьяосын лэсьтэмын вал; котькуд ньылетӥез семьяын воргоронъёс нылкышноос вылэ урдскыло. Йыртэман учыръёслэн мугъёссы Россиын одӥг выллемесь, ӵемысь соос герӟаськемын ӧвӧл узырмыны, бусьтыр улыны турттонэн, адямиос кӧттырлы ёрмо. Уката ик озьы шуыны луоз пиналъёс но нылкышноос сярысь. Пиналъёс ӵемгес но ӵемгес кыстӥсько юыны, наркотикъёсын йырзэс поромыто, мугорзэс вузало, пӧртэм йыружъёс лэсьто, озьы, ас быгатэмзыя, соос уксё поттыны туртто сыӵе амалъёсын. Пыд йылазы султыны турттонъязы лулчеберлыксэс ышто. Нылкышноос но нылпиос, уката ик ёрмыса улӥсь семьяосысь, вузлы пӧрмизы ни кунгож сьӧрысь шырмачъёсын радъям бизнесын. Мар чотын бен возиське Россиысь семья дауръёс пумиськон вакытэ? Банкъёсысь счётъёс но, синэз палёмытӥсь лимузинъёс но, ёрмытэк улон но (берлоез одно ик кулэ ке но) кужмо уг каро сое. Семьялэн юнлыкез возиське лулпуш узырлыкез чотын, отын ик вашкала йылолъёсты-сямъёсты утён, историез, культураез гажан. Пиналъёслы но егитъёслы та узырлыкез пыӵатыны юртто шоро-куспо арлыдо анай-атайёс но мӧйыос. Будӥсь пиналъёсмылы ӟеч сямъёсты пыӵатон туннэ возиське семья бордын. Соин ик обществолы, кунмылы, валаны кулэ, семьялэн улонэз но лулпуш узырлыкез, озьы ик нацилэн тазалыко азинсконэз понна кыл кутыны кулэ. Г. Силласте. ТАЗЬЫ НО ЛУЭ Кыйёс � чаклаське Паймымон учырен пумиськоно луизы Кияса ёросысь Подгорное посёлокын улӥсьёс. Соослэн улон интыосазы туж уно сьӧд йыро кыйёс (гадюка) вуизы. Тужгес но трос соос нюлэслы матын юртъёсын. Зэм, азьвыл но соос одӥг-ог адӟиськыло вал. Но таӵезэ пересьёс но уг тодо. Кыйёс автогараже но пыраны уг кепырало. Кытысь вуизы соос? Иж шур сярысь ке верано, отчыозь 3-4 иськем на. Кыйёслэн кузьдалазы 25-50 сантиметрозь вуэ. Куд-огезлэн верамезъя, та гадъёс (соосты азьвыл озьы нимало вал) уно алязы, луоз, куазь шуныт но мускыт улэмен. Сьӧд йыро кый кышкыт маке. Соин но, дыр, калык та вакытэ нюлэсъёсы ветлыны но кышка. Н.ЛЯЛИН. Нижний Новгородын пумиськон Нижний Новгородын ортчиз Россия Федерациысь Правительстволэн но "ЕЭС Рссии" РАО-лэн Приволжск округысь быдэсъясь (исполнительнай) но законъёс кылдытӥсь (закондательный) ёзъёслэн кивалтӥсьёсынызы кенешсы. Вераськон мынӥз Россиысь электроэнергетикаын кылдэм югдур но та удысэз азинтон амалъёс сярысь. Бадӟым кенешлэн ужаз пыриськизы республикаысьтымы Кун Кенешлэн Тӧроез Александр Волков, Правительстволэн Тӧроез Николай Ганза но эстӥськонъя, энергетикая но связья министр Виктор Савельев. Пумиськонэз усьтыса, Россия Федерацилэн Президентэзлэн Приволжск округын оскем адямиез Сергей Кириенко пусйиз, котькуд улос (регион) понна электрокужымен герӟаськем ужпум тужгес но валтӥсез луэ шуыса. Соин ик та удысэз, - шуиз С. Кириенко, нимаз республикаосын но областьёсын гинэ ӧвӧл, быдэс Россиын азинтон- выльдон сярысь сюлмаськоно. Люкаськемъёс азьын доклад лэсьтӥз "ЕЭС России" РАО-лэн, правлениезлэн кивалтӥсез Анатолий Чубайс. Со пыр-поч мадиз энергетика удысын кылдэм шуг- секытъёс сярысь, тодматӥз РАО-ын ортчытыны чаклм выльдӥськонъёсын. Уго та вакытэ Россиын энергетика удысын чидантэм югдур кылдэмын. Тырмымтэосты дыраз ӧм палэнтэ ке, туэ сӥзьыл - толлы чылкак шуныттэк кыльыны быгатом, - шуиз А. Чубайс. Толлы дасяськон вакытэ, "ЕЭС России" РАО-лэн предприятиосыз тырмыт но дыраз дасяны кулэ эстӥськон но электростанциослы оборудование. Но ваньмыз со ӝега, энергия понна тыронъёсты дыраз берыктымтэен, интыысь бюджетъёслэн тыллы коньдонзы ӧвӧлэн. Соин ик РАО чурытэсь куронъёс пуктоно луэ электрокужымез кутӥсьёс азе. Анатолий Чубайс пусйиз: пунэм тыронъёсты берыктонъя ужпум берло дыре трослы умояз. 1998-тӥ арын шуныт но электрокужым понна тыронъёс пӧлысь 8 процентэз гинэ коньдонэн берытске вал, мукетыз тыриське вал бартер яке мукет амалъёсын, нош туэ 68 процентэз коньдонэн берытске. Приволжск округысь улосъёс, мукетъёсыныз ӵошатыса, та ужпумез ӟечгес сэрттыны- пертчыны быгато, - пусйиз Анатолий Чубайс. Озьы ке но, татын но югдур капчи ӧвӧл. Электростанциос ужало 1938-тӥ арын поттэм турбинаосын, самой вылез пуктэмын ог куамын ар талэсь азьло. Соин ик котькуд ньылетӥ тонна мазут, газ, уголь юнме ӝуаса быре. Ваньмыз со вуттоз секыт югдуре, странамылы шуныт но электрокужым палэнысь утчано луоз. Соин ик ӝегатскытэк ужрадъёс кутоно, та удысэз чылкак выль сюрестӥ ӧръян понна. Нош кытысь коньдон шедьтоно? Государстволэн кисыез "пась". Тарифъёсты ньыль- вить поллы йылэтон но уз юртты югдурез тупатыны. Удысэз луоз нимаз организациослэн инвестициоссы чотын гинэ, - ивортӥз Анатолий Чубайс. - Кылдытоно ас кожазы ужась, электрокужым поттӥсь ог дас-дас вить компания, диспетчер ёзъёс, кудъёсыз асьсэос кивалтӥсько шунытэз но электрокужымез кытчы келян-нуонэн. Удысэз выльдонъя асьсэлэсь малпанъёссэс, ӵектонъёссэс веразы Россия Федерациысь Правительствоын ужасьёс, кылсярысь, шунытъя но энергетикая министр Александр Гаврин. Со сюлэмшугъяськемзэ вераз электрокужым понна дунъёслэн нош ик будонзы пумысен, кудӥз юн шуккоз улосъёсысь жилищно-коммунальной хозяйствоосты. Соин ик, программаез дасяку, нырысь ик лыдэ басьтоно республикаосын но областьёсын кылдэм югдурез. Нижний Новгородын ортчем кенешлы йылпумъянъёс лэсьтыса, Кун Кенешлэн Тӧроез Александр Волков пусйиз: огъя программа умоен лыдъямын. Со бордын азьланьын трос ужано на, уката ик - калыклы тарифъёс сярысь люкетэз бордын. Нижний Новгородын пумиськон дыръя Анатолий Чубайс Александр Волковлы малпанзэ вераз электрокужымен герӟаськем ужпумъёсты сэрттон-пертчонын ӵош ужан сярысь тупанкыл гожтыны дась луэмез пумысен. *** Бадӟым кенеш бере Сергей Кириенко люкалляз Приволжск округе пырись улосъёслэсь кивалтӥсьёссэс. Кенешын бадӟым инты висъямын вал республикаослэсь Конституциоссэс Россия Федерацилэн Конституциезъя тупатонлы. Кун властез юнматонъя аслэсьтыз малпанъёссэ вераз Кун Кенешлэн Тӧроез Александр Волков но. Удмурт Республикаысь Кун Кенешлэн пресс-службаез. "Мон шумпотӥсько завод понна" Тазьы вераны быгатозы "Ижсталь" огазеяськонын али но азьвыл ужасьёс. Завод кылдӥз 240 ар талэсь азьло нюлэс но нюр интыын. Петр И вакытэ Урал гурезьёс дорын Россиын андан поттон понна нюръяськон пуромиз. Ваньмызлэн ассэ кузё каремез потӥз. Татысь гурезьёсын соку трос люкаськем корт рудаез поттыны кутскизы. Соку ик ӧдъязы чугун дасяны но. 1754-тӥ арын Елизавета Петровна эксэй Уралысь заводъёсын кивалтыны ыстэ П.И.Шувалов графез. Шувалов ик Воткинскын (1759-тӥ арын) но Ижевскын (1760-тӥ арын) завод лэсьтонэз гурезь ужъёсъя кибашлы Александр Сергеевич Москвинкс оске. Ижевскысь заводэз лэсьтыны кутскем бере сизьым ар ортчыса, отын 137 сюрс 437 пуд корт поттэмын ни вал. Татын поттӥзы судноослы якорьёс. Соос пӧлысь огез али ке но сылэ Сочиысь Приморской бульварын. Сыӵе ик якорез адӟыны луэ Воткинскысь музейын. 187-тӥ арын Ижевскысь корт поттон фабрикаен артэ А.Ф.Дерябин пыӵал поттон завод ӝутэ. Татын поттэм ожмаськон пыӵал тӥрлыкъёс юрттӥзы французъёсты ас гуазы келяны но Быдӟым Отечественной война дыръя вормонэз ӝогомытыны. Металлургъёс кемалась данъясько ӵыжатэм анданэнызы. 1882-тӥ арын Москваын ортчем одӥгаз выставкаын заводлы нырысетӥ разрядъем диплом сётэмын вал. Вить ар ортчыса, Сибирмысь но Урал котырысь промышленностьлы сӥзем выставкаын со зарни медален пусъемын. Нош 1900 арын Парижын ортчем Дуннеысь выставкаын та предприятие, ӟеч андан поттэмез поннф, Памятной медален сӥлы каремын. Совето власть аръёсы завод тодмантэм воштӥськиз. "Ижсталь" огазеяськон али трос ӟеч анданзэ келя кунгож сьӧры. Оскем потэ, вуоз сыӵе дыр, ку Россия выльысь кулэяськыны кутскоз аслаз поттэм вузъёсызлы, кунсьӧръёсысь ваемъёсц палэнтыса. В.ЧЕРНОВ. "Ижсталь" огазеяськонысь ужысь ветеран. АЗЬМЫНӤСЬ ХОЗЯЙСТВООС: ИГРА РАЙОНЫСЬ "ЧУТЫРСКИЙ" СПК Нӧкы но му вӧй Чутыр калыклэн сыӵе адӟонэз ни: пудо вордон, ю-нянь будэтон, му вӧй кыскон татын ваньмыз юн герӟаськемын. Хозяйстволэн азинсконаз но улон-вылоназ котькудӥз ас лёгетсэ лёге. Му вӧй кыскон ласянь мылкыдъёс пӧртэмесь ке но, со чотын асфальтэн шобырскизы сюресъёс, юнма бюджет, дыраз тыриське уждун. Но крестьян калык понна валтӥсь интыын котьку сылӥз но сылэ йӧл-сӥль поттон, нянь будэтон. Му вӧез уго нянь вылэ зыраса уд сиы, котькыӵе пайдаен со мед берысткоз, котькӧня узырлык мед ваёз. Снимокъёс: 1-3. Таӵе чебер коркаос ӝутско "неперспективной" радэ пыртэм Чемошурын. 4. Чемошур фермаысь скал кыскисьёс. Зоотехник-селекционер Т.С.Скрябина ужзылы йылпумъянъёс лэсьтэ. 8. Вань ма сярысь кенешыны азьмынӥсь фермалэн кивалтӥсезлы но районысь валтӥсь зоотехниклы. 6. Пичи кунянъёсты ас пиналъёссэс кадь утё Людмила но Маиса Леконцеваос. Бамез дасязы Людмила МЕДВЕДЕВА но Владимир Камашев (фото). Наталь Визькылъёс Кузпалъяськон мынэ яратон бӧрсьы, кызьы ӵын-тыл бере. Н. Шамфор. Кузпалъяськыку ваньмыз шудоесь. Шуг-секытъёс кутско ӵош улыку. Ф. Саган. Яратонлэн матын луэмез котьку но вакчиёмытэ дырез. И. В. Гете. Ӟырдыт мылкыдлэн кылыз вакчи, но мур. Г. Р. Державин. Огъя яратонэз юнмато нылпиос. Менандр. Улэп кадесь - пиялалэсь Та сяськаос, нымы-кибыос, писпуос, пудо-животъёс пӧртэм тылсиосын кисьтасько- ворекъяло, чильпырало. Уд но малпа, но соос лэсьтэмын пиялалэсь. Таӵе мудрон арбериоссэ Калык куспо Восточно-Европейской университетлэн "Грифон" залаз возьматэ Москваысь усточи Алексей Зеля. Таӵе тунсыко адӟытонэз усьтон понна художниклы трос тыршоно луиз. А. Зеля пичи дырысеныз яратӥз инкуазез, соин ик ужъёссэ но сӥзиз та темалы. Нырысетӥ арберизэ, кечпизэ, лэсьтӥз 27 арес дыръяз. Капчиен ӧз сётӥсько таӵе ужъёс, ки улаз ӧй вал кулэ инструментъёсыз. Вамыш бӧрсьы вамыш, нунал бӧрсьы нунал А. Зеля весь волятӥз ас быгатонлыксэ, лыдӟизз нимысьтыз литература, ветлӥз пӧртэм музейёсы, пӧсяса тыршиз ас мастерскояз. Озьы лыктӥзы нырысетӥ вормонъёс. Алексей Зелялы сётэмын дасо дипломъёс, грамотаос, ВДНХ-лэн зарни медалез. Кыкез ужъёсыз возьматэмын вал Государственной Эрмитажын. Та выставкаез адӟемды луоз ИИ часысен 18 часозь. Е. Кудрявцева, Национальной музейын ужась. Чемошурлэсь уд ӵыд Бадӟым сюреслэсь палэнэ пуксем пичигес гинэ удмурт гурт дунне вылэ кыкетӥзэ вордскиз, шуод. Син азьын вакчи дыр куспын со, бызьыны дасяськись нылмурт выллем, олокызьы гинэ чеберскиз ульчаосыз, тып-тып коркаос ӝутскизы, огез бӧрсьы мукетыз пичи пиналъёс вордскизы. Кинлы кызьы, нош чемошуръёслы выль вакыт зэмен но ыркыт омыр, эркын улон сётӥз. Гуртоос дэменак "Чутырский" СПК-ын ужало, му вӧй поттонэ кошкемъёс � чиньыен лыдъямон гинэ. Нош Чемошурлэн тужгес но данъяськымон интыез � ферма. Кема аръёс ӵоже татысь дояркаос шаермыя котькинлэсь трос йӧл кыско. Ойдолэ кылзоме кыӵе малпанъёсын, сюлмаськонъёсын соос уло но ужало, ма шугъяськытэ та вакытэ. Кенешиськом шутэтскон сэрегын ӵукназэ йӧл кыскемзы бере. Любовь Дмитриевна ЛЕКОНЦЕВА: � Чемошурмы перспективной луисьтэм гуртъёс пӧлы пыртэмын вал ни, нош со, ӧчкарыса выллем, будыны, лэсьтӥськыны ӧдъяз. Со понна тау карыны кулэ азьвыл управляющиймылы Александр Аркадьевичлы, калыкез возьыны быгатӥз, пазьгиськыны ӧз сёты. Арлыдызъя егит ке но, ас котыраз адямиосты огазеяз. Со дыръя ик вылӥ ферма пуктэмын, школа- сад, клуб понна но зол гинэ выриз. Жаляса верано, малы ке но ужысьтыз кошкиз. Коллективмы милям туж умой, куспамы тупаса, кырӟаса, одӥг семья кадь улӥськом. Кинлэн ке шумпотонэз-а, куректонэз-а луэ � ваньзэ ӵош ортчытӥськом. Милям тросэз Чемошурын вордскемын, татчы ик быземын, нэнэйёсмы фермаын вань улонзэс ужамын. Мынам но нэнӥе Екатерина Павловна аръян но шуккиз, нянь но пыжиз � пенсие совхозысь потӥз. Кытчы-о ас выжыедлэсь палэнэ кошкод? Ирина Матвеевна СИДОРОВА: � Мон татын вордскемын. Школа бере городэ кошки, бызи. Кузпалэным Петр Васильевичен, ачиз со Ува районысь, кыкмы ик лэсьтӥськонын ужам. Квартира но сётӥзы вал ини. Но картэлэн гуртэ лыктэмез потӥз. Тӥни озьы выльысь Чемошурам берытски. Городэ улыны туннэ ӧтьысалзы ке, ӧй, дыр, мынысал ни. Куддыръя юало, бадӟым город бере пичи гуртын улыны мӧзмыт ӧвӧл-а шуыса. Ӧвӧл. Семьяед, хозяйствоед, ужед вань ке, мар кулэ на? Милям ньыль пимы будэ. Сюлмаськон тырмыт. Ваньмон дыръямы концертэн но ветлӥськом, сьӧрлось гуртъёсы потаськом. Нина Аркадьевна КОРЕПАНОВА: � Фермаын мон 23 ар ужасько ни. Та дыр ӵоже куинь гид воштӥськиз-выльдӥськиз. Нэнэе 11 ар пудо вордонын ужаз. Шораз учкыса, сое туж жалясько вал: кызьы меда сокем секыт интыын тамында чидалод? Неужто мынам но кужыме тырмоз? Табере тани кык поллы ятыргес ужасько ни. Эшеным Елена Никитьевнаен ӵош 14 арзэ ваче скал кыским. Бадӟым опытэн доярка шоры паймыса но вожъяськыса учкылӥ. Аръёс ӝог ортчо вылэм � сое но сутылӥ ни. Уже мыным туж кельше, огез урод: пиналъёсмес шергес адӟылыны кылдэ. Ӵукна соос автобусэн кошко, ӝытазе бер берто. Школамы асьме гуртын луысал ке, сюлмаськонмы кулэсмысал. Чемошурын 4 классозь гинэ дышетско, отысен Чутыре ветло ни. Огъя улон-вылонмы сярысь ке верано, ӝожтӥськыны номырлы. Совхоз котькуд ласянь юрттэ, уката но корка пуктӥсьёслы. Пудо сюдыны турнан инты но, техника но сётэ. Кыштыр ужаськом, Чемошурмылэсь чебер но шулдыр инты ӧвӧл ни, кожаськом. Валентина Анатольевна ГРИГОРЬЕВА: � Али гинэ кадь фермае лыктӥ вал � тани 17-тӥ арыз мынэ ни. Огдыре кык сменаен но ужаса эскерим. Солэсь ӟечсэ-уродэ валаса ӧм вуттэ, малы ке но дугдытӥзы. Молокопровод но малы ке ӧз яра, али ваньзэ суй вылын нуллоно. Чемошурысь дояркаос ваньмыз сямен егитэсь, задор мылкыдъемесь. Кыӵе соос кырӟало, кыӵе шулдыръясько! Тӥни малы ужгурзы но пумен кужмогес ӧръяське, данзы быдэс шаер пасьтана шуккиське. Вожъяськоно но шумпотоно таӵе ӟеч коллективъёслы. Уж дуразы ваньмыз умой ке но, куд-ог юанъёс сюлэмзэс чепылляло ик. Соослы валантэм: кыскем йӧлзэс малы сокем дунтэмен басьто? Нина Аркадьевна Корепанова озьы ик шуиз: "Мынам ялан йыры висе ужам ужмес дунъяны быгатымтэзы понна. Неужто государство ласянь гурт шоры учкон ноку но уз воштӥськы? Сыр но, йӧлвыл но, вӧй но, мороженой но йӧлтэк уд лэсьты, озьы бере, пудо вордӥсь, скал кыскись эшшо но мыло- кыдогес мед ужасал, со понна тырмыт уждун ке тыроно. Сиёнъёслы дунъёс туж бадӟымесь. Соосты ик кулэстыса, кӧня коньдон бергасал. Азьвыл озьы ук улӥм но ужам. Ми валаськомы, переработкалы но коньдон кулэ шуыса, но соос эсэпсэ ортчо. Асьсэ понна гинэ мултэс сюлмаськыса, колхозникъёсты копак вунэто. Вунэто, лэся, йӧл гурт калык курадӟем чотын потэ шуыса. Малы тае уг вала меда туала Правительство но? Трос нылкышноос фермае вуизы анайёссылэн лёгем сюрестӥзы. Нош кин соосты воштоз? � Пиналъёсмес дышетэммы потэ, тодон-валан мед басьтозы. Зэм, коньдон тырыны ваньмыз уз шедьты, но асьсэлэн йырзы луиз ке, озьы но пырыны быгатозы. Ми воксё пумит ӧвӧл соосты гуртэ кельтыны, но фермаын уж котькудӥзлы уз шедьы. Музон удысъёс ке усьтысалзы на. � Гужем вуэ ке, кепыр ваёно, пиналъёсты кытчы интыяны. Азьвыл ваньмызлы совхозын уж тырме вал, табере техника турна но, мажса но. Туж кулэ вылэм ужанъя но шутэтсконъя лагерь, школалы шуыса, кушман, кубиста но кизьыны луысал. Одӥг арын семьяен-семьяен кушман утялтӥм, сӥзьыл сое совхозлы келям, ӟеч коньдон басьтӥм. Милемлы туж кельшиз вал озьы ужаны. � Россилы выль президент бырйыса, ваньмыз оско умой улонлы. Удмуртия но палэнэ уз кыльы, шуо. Ми республикамылы президентэ Вершининэз бырйысалмы кадь. Огшоры адямилэн но сюлэм туж висе ӟеч кивалтӥсь понна. Политикаез ми троссэ, оло, ум валаське, но та улонын кинлы ке но, малы ке но осконо. Правительство тыро-пыдо ӧз ке ужа, инмарлы котькӧня вӧсяськы � уз юртты. � Ӝоггес дугдытоно вал ини Чечняын вир кисьтонэз. Кӧня-о калык отын быроз на? Чемошурысь али нокин но отчы шедемын ӧвӧл, нош Удмурт Лозаысь басьтэмын. Анаез туж бӧрдэ. � Милемлы туж уг кельшы пинал ужась огазеяськонъёсты быдтон но. Пионерын, комсомолын кыӵе умой улӥм, олокыӵе но ужъёсы пыриськиськом вал. Табере номыр но ӧвӧл, нылпиос воксё буш, ас понназы куштэмын. Сыӵе малпанъёсын, сюлмаськонъёсын уло Чемошурысь скал кыскисьёс. Ужен гинэ адямилэн кӧтыз уг тыр уго, странаысь, республикаысь югдурез но тодэмез потэ, ачиз но сое воштонэ мыло-кыдо пыриськысал. Неперспективной шуонысь потыны кужымзы тырмиз ук! БЫДӞЫМ ВОРМОНЛЫ 55 АР Ӵужектэм газетъёсты лыдӟыса... (удмурт фронтовикъёслэн куд-ог сямъёссы сярысь) "Защита Родины" � озьы нимаське вал милям 18-тӥ гвардейской стрелковой дивизимылэн фронтын потӥсь газетэз. Умой соиз но, война йылпумъяськем бере но солэсь нимзэ ӧз воштэ. Калининград областьысь Гусев городысь мотострелковой дивизие кылем арын служить карыны вуэм ог дасо асьме палась солдатъёс озьы иворто, кунмес утьыны дасяськемзы сярысь гожтыса. Шумпотӥсько фронтысен печатлам газетысь куд-ог вандылэм материалъёссэ утьыны быгатэмелы. Вормонлы 55 ар тырмон азьын Ижкарысь 67-тӥ, 8-тӥ но Завьял ёросысь Первомайской посёлокысь но мукет школаосы берло дыре фронтовикъёслэн пумиськоназы ӧтчакузы, мыным юртто та документъёс. Тани та тодэ ваёнме "Удмурт дуннее" гожтыкум но ӵужектыны вуэм газетъёсты выльысь лыдӟи, нырысь ик асьме землякъёсмылы сӥзем заметкаосты, статьяосты. Западной, Брянской, 3-тӥ Белорусской фронтъёсын ожмаськыкумы, дивизиямы уго Удмуртиысь уно гинэ солдатъёс, сержантъёс но офицеръёс тушмонэн нюръяськизы. Ожын тужгес сэзьёсыз сярысь "Защита Родины" газетэ но гожъяллязы. Та вуж материалъёсты туннэ лыдӟиськод но куд-ог малпанъёсы вуиськод. Паймымонэсь вылӥллям фронтын тросэз солдатъёс. Востэм удмуртъёс кужмоесь луо. Кулэ ке, мукет эшъёссы сямен ик тушмонэз пӧяны амалъёс но шедьто. Землякъёсмы пӧлын вал шутэтскон дыръя маскаръяськыны быгатӥсьёс, шудон-серектон поттылӥсьёс но. Та сярысь ик гожтэме потӥз газетэ печатлам материалъёсты лыдӟеме бере. Отысь документъёс уго туж шонер возьмато соиз яке мукетыз луэм учыр сярысь. Востэм но, кышкасьтэм но Тани 1945-тӥ арын оштолэзе печатлам зарисовка. Огшоры гинэ гожтэмын. Солдатлэн тусбуйыз возьматэмын но ӧвӧл кадь, нош улонысь сямъёсыз сярысь валамон верамын. "Кышкасьтэм удмурт артиллерист", � нимаське со. Александр Васильевез армие келякуз анаез таӵеесь кылъёс верам вылэм: "Туж востэм, керпотӥсь, туж лачмыт ук тон, пие. Бере уд кыльы меда эшъёсыдлэсь, тужгес ик ик фронтэ вуид ке". Отӥяз газетын верамын удмурт пилэн ожын кыдамез, Москва дорысен ожмаськыны кутскыса, тушмон музъемозь вуэмез, батареяяз усто наводчик луэмез сярысь. Вералом одӥг ожын гинэ учыр сярысь. Белорус гуртэз басьтон понна кутскиз секыт лек ожмаськон. Асьмелэнъёс пала тушмон пазя но пазя кулон-бырон. котыр дугдылытэк пуштыло снарядъёс но минаос. Немецъёслэн самолётсы но вуылӥз ини: батареямы вадьсы кык-а, куинь-а бомба куштӥз. Таӵе дыръя но артиллерийской расчётмы дугдылытэк ыбылӥз. Одӥг секундлы но пушка дорысьтыз ӧз кошкылы Васильев но. Тушмонэз батареялэн пазьгемез но стрелковой батальонлэн гуртэ пыремез бере, артиллерийской расчётлэн командирез сержант Викторов шонерак верам, куд-ог солдатъёс, пе, огдырлы ыбылэмысь дугдыны но матэгес ватскыны малпало ни вылэм шуыса. Нош Васильевлэсь батыр ужамзэ адӟыса, эшъёсызлэн но кужымзы, оло, будэм, лэся. Землякмылэн командирез сярысь вераса, пусйыны кулэ на таӵе учырез. Вормон нунал бере армиысь солдатъёсты доразы келяку, со Александр Васильевен люкиськыны Черняховск городысь вокзалэ но мынэм. Мукетъёссэ Казармаысен гинэ келя вал. Та учыр сярысь дивизиысь газетамы кылбур но гожтэмын вал. Отын возьматэмын командирлэн удмурт солдатэн люкиськемез. Та кылбурез берлогес мон удмурт кылэ берыктӥ но "Советской Удмуртия" газетэ ыстӥ. Умой ик берыктэме ӧз луы кадь, озьы ке но Иже берытскисьлы сӥзем кылбурез 30-тӥ апреле 1947-тӥ арын сое Ижысь газетын печатлазы. Тани солэн нырысь чуръёсыз: "Солдатлэсь бур кизэ Командир юн кырмиз, Учкыса берпумзэ, Со сое ӟыгыртӥз. Войнаын огазьын Та муртъёс ветлӥзы. Тушмонэз лек ожын Ӝутӥзы кыкназы... Визьнодо луытэк тушмонэз уд вормы Тазьы шуылозы вал разведчикъёслэн взводысьтызы солдатъёс. Уж вылын но сое возьматыны тыршизы. Асьмелэн землякмылэн быгатэмез сярысь "Защита Родины" газетэ но огпол гожтэмын вал. Орел областьын ожмаськыкумы немецъёс гуртъёс вискынгес трашеяос, окопъёс гудылӥзы. Соослэсь обороназэс эскерыны огпол усто разведчик Григорий Бурков ыстэмын вал. Армие мынэмезлэсь азьло Можгаысь Короленко ульчаысьтыз пиналъёсын-эшъёсыныз войнаен шудыны яратылӥзы. Разведкаын кулэ интые, кык пичи чуръёс вискы вуэмез бере, Бурков телефон кабелез адӟем. Куакъёс вискытӥ ортче, ватэмын. Ӝоген взводаз берытскем но командирезлы ваньзэ верам. Аслэсьтыз малпамзэ но дӥсьтэм поттылыны. "Ваелэ, пеймытгес луэм бере, проводэз вандомы, отын ӧжыт ке но возьмаськыса уломы, � шуэм со. Ӝыт пал озьы ик каремын вал. Ужзэс быдэстыса, группалэн кивалтӥсеныз Бурковен куинь разведчикъёс асьсэос куаке ватскизы. Кема возьмано ӧз луы, проводэз тупатыны ыстэм тушмон телефонист вуиз татчы. Асьме батыръёс сое кутыны но полказы вайыны быгатӥзы та ӝытэ ик. Кык гуртъёсын немецъёслэн батальонъёссылэн штабзы интыяськемын вылэм. Валамон ни, куспазы телефон пыр вераськытэк соослэн ожмаськемзы но луымтэ ни, соин проводэз тупатӥсез ыстӥллям. Асьмелэн землякмылэн азьло ик та сярысь малпамез визьмо вылэм. Таӵе со � мӧйы солдат Кёнигсберг городын тушмонэн нюръяськыку вал со. 1945-тӥ арын южтолэзе, 7 числое. Полигонысь "Защита Родины" газетлэн редакторезлы И.А.Локощенколы ивортӥзы аспӧртэмгес иворез, карысь Помарт районэ отит из кортэз секыт ожын басьтэм бере, солэн ульча палысен борддораз кыӵе ке Кузнецов тазьы гожтэм: "Ми � Удмуртиысь". Таӵе автографъёс выллем вераськылонъёсты дивизиямы азьвыл шер кылылод вал. Толэзь ортчыса гинэ Берлинысь Рейхстаг вылысь автографъёс сярысь трос поттылыны кутскизы уго. Валамон ни, Кёнигсберглэн ӝуась Понартэ учкыны монэ но мыныны косӥзы. Редакторлэн воштӥсеныз А.С.Борисов капитанэн пулэ юртэз ӝоген шедьтӥмы, нош автографсэ гожтэм Ф.Т.Кузнецовез быдэс нунал утчано луиз. Ӝыт пал гинэ тодмо луиз, стрелковой батальонлы, артиллеристъёслы татын ожмаськыкузы юрттыны ыстэмын вылэм дивизилэн мышкысьтыз подразделениос но. Езоровой Кузнецов но эшъёсыныз снарядъёс, гранатаос ворттылэм передовое. Тӥни ӵапак соку, стрелокъёслэн кык этажъем из кортэз басьтэмзы но азьпала, кар шоры ожмаськыса кошкемзы бере, езговой кытысь ке складысь буйлэн банка шедьтэм. Юртэ пырон ӧслэн бур палаз бадӟым букваосын борддоре "Ми � Удмуртиысь. Кузнецов Ф.Т." гожтэм. Ачиз уго со Алнаш ёросысь Гондыргуртын вордскемын. Федор Тимофеевич мӧйыгес солдат вал. Тон кобылалэн водителез шуыса куд-огез серекъяны но выриз. Кышкасьтэм мурт вал. Нош землякмы секыт ожъёсын тылӝу улын боеприпасъёс нуллыны быгатӥз передовое. Нош малы юрт вылэ озьы гожтӥськиз шуыса юамлы, пырак шуиз: "Уралын улӥсь пичигес тодмо удмуртъёслэсь тушмон музъеме вуэмзэс возьматэме потӥз". Зэм но, войналэсь азьло Гондыргуртаз, собере Можгаын ужакуз, Федор Тимофеевич улонэз валаны дышемын ни вал. Егитъёслэсь соин висъяськылӥз, дивизиын служить карыкуз. Выль солдатъёс лыкто ке, соосын кенешыны но туж яратылӥз. Сое фронтын ярато вал. Ф.Т.Кузнецов сярысь дивизиысь газетэ гинэ ӧвӧл, мон "Удмурт правдае" но соку ик война дыръя ик огпол гожъялляй. Бергес Можгаысь газетэ. Шулдыръяськыны-маскаръяськыны но быгатэм кулэ Алексей Худолей но сержант Дмитрий Скворцов куспазы туж тупаса улӥзы. Кыксы ик уго шулдыръяськыны-маскаръяськыны быгатӥзы. Дивизиез шутэтскыны, вуоно ожъёслы дасьяськыны, выль солдатъёсты басьтыны передовойысь потто ке, таос котыре соладатъёс люкаськыло ни вал. "Защита Родины" газетын соос сярысь гожтэмын вал: "Худолей но Скворцов � кунмылэн пӧртэм палъёсысьтыз армие вуэмын. Огез � Сибирьысь Новосибирск карысь, мукетыз � Татариысь Удмурт Тэремшур гуртысь. Ныл куспазы огазеяськемзы бере, юморлы, сатиралы сӥзем пӧртэм-пӧртэм материалъёс дасяло ни. Дивизилэн мышказ люкаськем солдатъёслэсь мылкыдзэс ӝутылыны быгато, соосты маскаръяськыто". Мынам адӟылэме вань Юхнов, Орша, Каунас каръёс дорысь тэльёсы пӧртэм аръёсы шутэтскыны поттылыкузы, кыксылэсь ик, украинецлэсь но удмуртлэсь часталы гинэ лэсьтэм сцена вылын но художественной самодеятельносте пыриськылӥсьёсын ӵош солдатъёсты шулдыръяськытэмзэс. В.НИКИТИН, азьвыл "Защита Родины" газетлэн корреспондентэз, ожысь но ужысь ветеран. Наталь Кызьы улӥськод, егит семья? Тон одӥг палаз шурлэн, мон - мукет палаз Удмурт Республикаысь Егитъёсын ужанъя кун комитет вӧзын ужась "Егит семья" кун учреждение шаерысьтымы егитъёслэн улэм-вылэмзы пумысен ортчытӥз эскеронъёс. Азьланьтӥськом егит семьяослэн ужпумъёссылы сӥзем вераськонмес (29-тӥ июне потэм "Наталь" бамын). Егит семьяос пӧлын юалляськонъёс ортчытонын валтӥсь ужпум вал семья кусыпъёсты психология ласянь эскерон. Кузпалъяськонлы дунъет сётон понна тодоно, мар со семья егит муртлы, кыӵе солэн кулэлыкез? Юалляськисьёс пӧлысь ӝыныезлэсь тросэз (54,6 процентэз) пусйизы: семья соос понна - шумпотон. 18,7 процентэз семьялы висъяло нылпи ваён кулэлыкез. 8,7 процентэз лыдъяло: семья - со дышем сям. Куд-огез понна семья ӵоша шутэтсконэн (5,2 процентэз). Мар муген егитъёс семья кылдыто? Юалляськонъёс таӵе суредэз шараязы: яратон огазея 69,9 процентсэ егитъёсты; мылкыдзы вылэ 14,4 процентэз пыкъяське; югдурез лыдэ басьтыса, семья кылдыто 6,9 процентэз егитъёс; вашкала сямъёсты чаклан 3,1 процентэзлы сюлэмзыя; ваньзэ лыдъяса-чотаса, семья кылдытонлы дурбасьто 1,8 процентэз; валэктон сётыны шугъяськиз 4,1 процентэз. Кызьы адӟиськом, кузпалъяськонын валтӥсь инты басьтэ яратон но мылкыд. Но палэнэ кельтыны уг яра югдурез лыдэ басьтыса семья кылдытонэз. Таиз тросгес герӟаськемын, дыр, нылмуртлэн нылпи ваёно луэменыз но анай-атайёслэн косъяськеменызы. Семья ӵем дыръя таркаське: нылпи шедьыса кузпалъяськемен; пинал арлыдын бызьыса-кышнояськыса, семья улон шоры шудыса сямен учкыку, кузпалъёс пӧртэм улонлэн пӧртэм тубат вылаз сыло ке но мукет. Шонер-а бен лэсьтӥзы кузпалъёс ог-огзэс бырйыса? Та юанлы егитъёс таӵе валэктонъёс сётӥзы. Семья улонзэс удалтэмен лыдъяло 38,3 процентэз, удалтэм палагес ик карисько 37,5-ез, удалтымтэгес - 8,4-ез, удалтымтэ - 2,9-эз, вераны шугъяськизы 9,8-эз. Шудо улонзылы осконъёссы но пӧртэм сямен быдэсмизы. Кылсярысь, 28,7 процентэз пиосмуртъёс семья улонзэс шудоен лыдъяло, нылкышноос та ласянь муресьгес куронъёс пукто. Асьсэды шудоен лыдъяло 20,3 процентэз. Семья улонын егитъёс нырысетӥ интые пукто ог-огдэ валанэз (39,7 процентэз); собере ини мыно улон инты ласянь куронъёс (12,8); коньдонлы ёрмытэк улон (11,9); аслаз куронъёсызъя, малпанъёсызъя улыны турттон (10,7); нылпиосты будэтон (8,2) шутэтскыны луонлык (6,1); ужез шори люкон (4,9). Куд-огез валэктыны шугъяськизы, мар соослы кулэ шудо улон понна (5,6 процентэз). Люкиськон сярысь кузпалъёслэн малпанзы кылдылэ ке но, ӵем дыръя соосты та вамышлэсь утё нылпиоссы. Таӵе малпанзэс веразы юалляськемъёс пӧлысь котькуд ньылетӥез егитъёс. Нош люкиськон сярысь малпанъёссы кылдылӥзы 43,4 процентэзлэн. Озьыен, семья улонзы туала егитъёслэн пилемтэм ӧвӧл. Со сярысь верало статистикая эскеронъёс но. Тани 1999-тӥ арын котькуд кузпалъяськемлы 4-6 люкиськон усиз. Куиньмосэз соос пӧлысь вить арлэсь ӧжытгес ӵош улэм егит семьяос. Егитъёс пӧлын юалляськонъёс тани мае но шараязы. Тросэз семья кылдытыны уг дырто - улон интызы ӧвӧл. Та муген ик кузпалъёс возисько нылпи ваёнлэсь, шуг- секытъёс кылдо люкиськон ласянь но. Семья улон таркаське мукет трос пӧртэм мугъёсъя. Кылсярысь, уноез туж умойтэмен лыдъяло кузпалъёслэсь паллянэ кожанзэс. Юалляскьемъёс пӧлысь 39,7 процентэз шуизы, сыӵе учыр соослэн семьяязы луысал ке, одно ик люкиськысалзы. 24,3 поцентэз картъёсынызы но кышноосынызы люкиськыны ӧй дыртысалзы. Визь тырон понна 14,1 процентэз бырйысалзы кыӵе ке но мукет амал. Чутырын калык чырмыт Вжик!.. вжик! чуъясько возь кузя кусо шуккем куараос. Читыр-чутыр бызись шур дуртӥ нылъёслэн, нылкышноослэн жингрес куараоссы кыдёке кылӥсько. Пыжись шунды соослы нокыӵе ик уг йӧты: серекъяло, кырӟало, вуэн пазясько. Гужемлэсь та вакытсэ кытысь шедьтод на? Троссэ ужъёсты али воштӥз техника, турын ӝутонэз но. Озьы ке но, нюко-гопо интыос, нюр нёжалъёс витё кусоен турнамез. Нош удалтэм пудо сиёнэз кызьы утялтытэк кельтод? Игра районысь "Чутырский" СПК турын дасян ласянь котьку висъяське. Малы ке-а татын тол вылтӥ но гужем шорын кадь йӧл кыско. Пӧсь куазен шутэтсконэз валатэк калык ужа, со понна толалтэзэ майбыр улэ. Ёрослы быдэ пумиталод экономика ласянь пыд вылазы юн сылӥсь хозяйствоез, "Чутырский" - сыӵеос пӧлысь. Туэ со пусйиз ньыльдон ар тырмон юбилейзэ. Вить колхозъёсты огазеяса кылдытэм хозяйство 1960-тӥ арысен лёгем сюрессэ лад-лад возе, солань-талань шонаськытэк, кир-тур пазяськытэк. Районаз гинэ ӧвӧл, быдэс шаерамы азьветлӥсез луэ. Ушъямонэз трос ке но, туала вакытэ котькуд вамышед секытэн сётске. Соин но, вылды, Чутырын улӥсьёс пӧлысь огез но: кивалтӥсь-а со, рядовой-а - басьтэм вормонъёссы сярысь шокпотыса уг вера. Пусъём тани мае: пудо вордон удыс татын валтӥсез луэ. Скалъёссы но, парсьёссы но вань, но шугъясько сӥлез вузан ласянь. Тӥни ма понна сюлмыз ӵогъя хозяйстволэн кивалтӥсезлэн. Али тросэз валазы ни: коньдонэн ке улэмед потэ, ужа ӟеч выжы пудо уськытон бордын, будэты элитной луись культураосты. Сотэк гурт удысын номыр уд басьты. "Чутырский" СПК-ын скал гинэ уг, племенной вал но вордо. Пайдаен берытско на муш возён но асьсэ понна кирпич шуккон пичияк заводзы. Дас куинь ар ӵоже кивалтэ та хозяйствоен Валерий Серафимович Митрофанов Удмурт Республикаысь гурт удысысь дано ужась. Та дыр куспын соин трос лэсьтэмын но лэсьтӥське, азинскон вамышсы эшшо но кузьгес луысал, улон-вылонэз мыдланьтӥсьёс ӧй ке шедьысалзы. "Чутырский" СПК арысь аре ӟеч йӧл кыске, тол вылтӥ но скаллы быдэ ог 12-14 килограммозь вуэ, нош гужемзэ 16-18 килограмм кыскисез но вань. Тӥни кытысь потэ уждун но азьланезлы оскон. Таин ӵош ик - кышкан. Ас эрказ лэзем дунъёс, электрокужымлэн, эстӥськонлэн дуноямез, налогъёс СПК-лэсь казназэ жалятэк сюпсё. Митрофанов меӵак шуэ: "Гурт ласянь нуиськись политикаез мон меӵак экономической диверсиен герӟасько. Озьытэк-а крестьян калык ас валамезъя но кужымезъя гинэ удыссэ нуэ, государство ласянь юрттэтэз адӟытэк. Рынок юри малпаса тырмытэмын кунгож сьӧрын поттэм сиён-юонэн, нош дорамы будэтэм сӥлез кытчы интыяны ум тодӥське. Мясокомбинат толэзьёсын коньдонзэ уг берыкты". Гурт хозяйствоос туэ тупало меӵ гурезе тубыны вырись секыт ужын жуммем валлы: кужмоомызгес - ӧжытак вылӥын, начармемъёсыз берлань чигнало. Туж ӧжытэз йылозяз вуэ. Ӝожтӥськон со ӧвӧл, шокандэ валаса вылысь пытсало ке, улон-вылонмы зэмен но умойтэм кожетӥ кошке. Валерий Серафимович гинэ тазьы уг малпа, котькудӥз кивалтӥсь сое ас вылаз чида. Игра районлэн вань на музон но йыр висёнэз: тросэз соос, "Чутырский" СПК но, ёрмо йыг-йыг ужась кужымлы - со кошке му вӧй поттонтӥе. Отын ватонэз ӧвӧл, уждунзы шӧдскымон ятыр, нош гуртын со сюрсозь но уг вуы. Председатель тырше ни мукет ласянь калыкезлы юрттыны: кытын ке техникаен, кытын ке лэсьтӥськон материалэн. Сотэк кызьы-о? Ӧжыт ӧвӧл ук музъем ужез зэмос яратӥсь адямиос. Соослэн улон шоры учконзы но музонгес: "нефтаос" котькыӵе коньдон мед тырозы, нош нянь будэтонлэсь, пудо утялтонлэсь умоез ӧвӧл. Соос вылын возиське коллективной хозяйство. Чутырын данъяськыса но гажаса верало Алексей Ильич Злобин сярысь, Игра районлэн со сӥё-дано адямиез, РСФСР-ысь но УАССР-ысь пудо эмъян удысысь дано ужась, али кивалтэ профсоюзной комитетэн, пусъемын Горд Знамя орденэн. Нош кин уг тоды Леонид Иванович Загребинэз? Сӥё-дано механизатор быдэс улонзэ сӥзиз егитысен быръем сюресэзлы. Кӧня сюрс гектар муосты со гыриз-кутсаз, кӧня сюрс тонна ю тысь люказ меда сомында аръёс ӵоже? Юнме шорысь ӧз сётэ ук Октябрь Революция но Горд Знамя орденъёссэ. Елена Никитьевна Григорьева, Елизавета Михайловна Широбокова, Нина Аркадьевна Корепанова, Геннадий Петрович Агафонов, Александр Федорович Малых, Тамара Васильевна Исупова, Елизавета Ивановна Перевозчикова... Кӧня соос "Чутырский" совхозлэсь но СПК-лэсь выжыоссэ юнматӥсьёс! Семьяен-семьяен ужало но юнмато хозяйствозылэсь басьтэм азинсконъёссэ. Таос радэ ик пыро Лекомцеваос: Нина Андреевна, Юлия Ивановна, Татьяна Константиновна, Перевозчиковаос - Валентина Михайловна но Валентина Сергеевна, Широбоков Николай Никонорович, Кожевникова Нина Федоровна, Корепанова Маргарита Даниловна, Степанова Анна Максимовна но трос мукетъёсыз. Соослэн кема аръёс ӵоже сюлмысь тыршемзы пусъемын пӧртэм наградаосын. Хозяйстволэн кивалтӥсез ас интыяз зэмос кузё ке, сыӵе сям пыӵатоз калыкезлы но. Валерий Серафимович егит на. Витьтон арес воргорон понна арлыд шат? Котькыӵе шуг-секытъёс ужаз мед пумиськозы, со оске, гурт ласянь но политика одно ик умой пала воштӥськоз шуыса. Учке ай, куазед но туэ крестьян калык пала кыӵе дурбасьтыны выре: кӧня кулэ зорзэ сётӥз, турын ӝутыку жалятэк пӧсьсэ кисьтӥз, ю тысь кутсан вакытэ но шундыё нуналъёссэ медаз жаля вылэм. Луоз соку йӧлыд-нӧкыед но, аръянэд-картофкаед, чечыед-мусуред но. Юнме шорысь уг шуо ук: гужем дася, тол сие. Нош чутыръёс чырмыт ужало. Л. Медведева. Программа бордын уж азьланьтӥське Кун Кенешлэн юртаз люкаськылӥзы республикаысь ас коже кивалтон ёзъёслэн, администрациослэн кивалтӥсьёссы, учёнойёс но мукет специалистъёс. Удмуртиез азинтонъя программалэсь вуоно люкетъёссэ дасян сярысь вераськон понна. Та ужпумъя ивортон лэсьтӥз Правительстволэн тӧроезлэн воштӥсез С.Чикуров. Солы оскемын программаез дасянъя группаен кивалтыны. Куд-ог люкаськемъёс программалэн пуштросэз пумысен дэмланъёссэс сётӥзы. Отын валтӥсь саклык висъяськыны кулэ калыклэсь улон-вылонзэ умоятонлы, дышетонлы но тазалыкез утёнлы. Тодосчилэн О.Боткинлэн верамезъя, азьвыл программаосын лыдэ чик ӧз басьтӥськылэ ёросъёслэн куронъёссы. Табере ёрос кивалтӥсьёслы луонлык сётэмын ас куронъёссэс та программае пыртыны. Озьы ке но, ваньзэ, мае курозы ёросъёс, программае пыртыны уз луы. Соин ик пыр-поч малпаськоно, кыӵе бадӟым, быдэстоно ужъёсты чаклано луоз документын. Кун Кенешлэн депутатэз Р.Галиахметов малпамъя, программаез дасянэ калыкез паськытгес кысконо, мед со луоз калыклэн программаез. Документлэн инъетэз дась луыны кулэ сентябрь пумын. Программалэн кулэлыкез сярысь ужрадлэн пумаз вераськиз Кун Кенешлэн Тӧроез А.Волков. Т.БАННИКОВА. Наталь Ойдолэ кенешом Узыр пиосмуртлы - чебер мунё Бен, валамон ини, тӧдьы вал интые али "мерседес" луиз. "Мерседеслэн" руль сьӧраз пукись пиос сярысь лулӟыло нылъёс. Куд-огез "тӧдьы вал" борды йылто корка, дача, бассейн но трос мукетсэ. Малпаськон нокинлы но уродзэ уг вайы. Нош малпанъёс быдэсмо-а, уг-а - соиз мукет ужпум. Лулысь-сюлмысь оскид ке, оло, мар ке пӧрмоз но... Университетской ульчаетӥ мыныкуз, кин ке но Лизаез куаретӥсь луиз. Тодмотэм мӧйы пиосмурт нимысьтыз сое возьмаса-а, мар-а йӧно машинаяз пуке вылэм. Лизаез адӟыса, машинаысьтыз потӥз но ныл доры лыктӥз... - Олома но эн малпа вераме сярысь. Лык дорам улыны, бызид ке - мон шумпото. Квартирае мынам вань. Ужамед потэ ке, ужалод, но гуртын пукид ке, сюдыны кате тырмоз, анай-атайёсыдлы но кылёз на. Ӵуказе ик машина нуллон понна дышетскыны документъёсты лэсьтом. Арлы огпол кыдёке шундыё палъёсы шутэтскыны ветлом. Кин ке шуиз вал ук: "Инбаме кема учкид ке, солэн чагырез синъёсад пыӵалоз". Озьы но, дыр. Нош Лиза та учырлы чик но ӧз паймы. Пиосмуртъёс со шоры учкыло, нош таиз зӧк кӧто, пересь, пыльтчем синъёсын. Ма шуозы гурт калыкез, анай-атаез? Котьма ке но, сётэм телефон номерез басьтӥз но малпасько на шуыса кошкиз. Лизалэсь юасько: - Ӵем-а узыр пиосмурт сярысь малпалляд? - Ӧй кадь. Но соин пумиськон азям, туж узыр но коньдоно луэме потэ вал. Сыӵе малпан маза ӧз сётылы. Нош бадӟым осконэ вал, коньдон одно ик шедёз шуыса. - Ӵем-а малпанъёсыд быдэсмыло? - Котьку, азьлогес-а, берлогес-а, но быдэсмыло. - Мынод-а со пиосмурт доры улыны? - Уг тодӥськы. - Малы? - Пересь. Гуртын олома но шуозы, анае но ма вераны пайме. Со ӵем гинэ вералляз, ас кадьзэ утча, огшоры улӥсьсэ. - Ӵем-а тонэн пиосмуртъёс тодматскыло? - Ӵем. - Кыӵеосыз? - Ёрмемъёсыз (серекъя). Котькыӵе_�осыз. Кудӥз огшоры тодматскыны, кудӥз эшъяськыны. - Озьы асьсэос дорад лыкто? - Асьсэос. Кин таӵе учыръёсын ӵем гинэ пумиськылэ, та югдурез дунъяны но уз вала, дыр. Нош тросэз нылъёс но пиос, кинэн мон вераськи та учыр сярысь, узыр пиосмуртэн улыны пумит ӧвӧл. Лена, 18 арес. Со ныл ӧз ке мыны пиосмурт доры - шузилэсь но шузи. Оло, ултозяд сыӵе учыр одӥг пол луэ! Мон одно ик мынысал. Акыльтӥз ини мыным котькуд копейкаез шыръяны. Сергей, 20 арес. Кытысен со сыӵе муртэн пумиськиз? Оло, со адӟонэз? Татьяна, 23 арес. Ӧз ке но яраты, ма бызёнтэмез? Отӥяз узыръёс пӧлысь яратонозэ но шедьтоз, егитсэгес... Иван, 34 арес. Оло, со яратон ик вань но. Шуо ук калыкын, шудтэм кышномуртъёс ӧвӧл, вань толыктэм пиосмуртъёс. Лида, 63 арес. Улоз но куштоз. Катя, 20 арес. Оло, со кыӵе ке сутенёр, чебер нылъёсты вузась? Кытчы вуэмдэ но уд вала Николай, 25 арес. Узыр пиосмуртлы чебер мунё кулэ луиз. Асьме дуннеын котькуд учырлэн, бодылэн выллем, кык пумыз. Нош адямилы кыксэ ик ӵош кутыны луонлык инмар сётыны вунэтэм. Соин гумырез ӵоже адямилы весь бырйиськоно луэ. Нош бырйыны валасьтэм мурт ӵем дыръя ачиз но валатэк шудзэ ыштэ. Соин но, дыр, песянае весь уретъяз: "Эн бырйиськы!" Нош мон шуысал: "Бырйы, сюлэмыд косэмъя!" Светлана Петрова. НАТАЛЬ Умой адямиос Секыт ке но, шулдыр улӥм Арлыдо нылкышноос но воргоронъёс дышемын ни вазен сямен ик шундыен ӵош султыны. Тужгес но сыӵе сям виразы юн пыӵамын гуртын улӥсьёслэн. Тани Юлия Викторовна Волкова но кемалась пыд йылаз ни. Нокытчы табере солы дыртыны, кемалась пенсиын. Котьку сямен туннэ но со укно дораз пуксиз. Учке фермае вамышъясь дояркаосты. Котькудзэ со нимын-тулын тодэ. Ачиз но отын соосын ӵош кадь потэ. Фермаын ужакуз, куд-огез пыдын ветло вал ай. Кӧня ке дыр ортчыса, кышномурт бакчаяз потӥз. Сюлмаськон котькуд нуналлы тырме. Сюрмем киосыз шоры учкыса, ас поннам малпасько: кыӵе гинэ ужъёсты быдэстоно ӧз луы та нылкышнолы. Али но быгатэмезъя шулдыр гужем нуналъёсы бакчаысьтыз жаг турынзэ утялтэ. Тырше пӧртэм вож сиён будэтыны. � Озьыен, улэме но ужаме сярысь тодэмды потӥз? � Кӧня ке чалмыт пукемез бере вазиз Волкова. � быгато на меда ваньзэ син азям пуктыны? Ӧжыт малпаськемез бере азьлантӥз: � Вань улонэ Чупчи дурысь Пичи Чепца гуртын ортчиз. Мыным одӥг арес тырмыса, анай-атае, та шулдыр интылы синмаськыса, Глазов районысь татчы улыны кариськиллям. Нош вордскем гуртме туннэ ке но уг тодӥськы. Быдэ вуыса, ачим но ӧй юалляськы, мумы- бубые но ӧз поттылэ. Юнме та интыез соос ӧвӧл бырйиллям. Бакча бертӥ ик бызе шур. Урамын но, азбаръёсын но будӥсь куаро писпуос эшшо но чебер каро улосэз. Нош гужем вазь ӵукнаосы пӧртэм тылобурдоос ас гурзэс чирдо. Трос дышетскыны мыным ӧз кылды. Дас ньыль арес тырмыса, колхозын ужаны кариськи. Войналэн лек сильтӧлэз одӥг коркаез но палэнэ ӧз кельты. Гурт калыклэсь азьланезлы ӟеч малпанъёссэ сураз-пожаз со. Умой-умой юнмамтэ мугорыным нюлэскы ужаны сюри. Пиналэсь ке но, туж умой валамы � фронтлы но, заводъёслы но кулэ трос лэсьтӥськон но эстӥськон писпу. Дорамы бертылытэк, вазь ӵукнаысен бер ӝытозь нюлэскысь ӧм поталэ. Киос но, пыдъёс но тӧрнало вал. Арлыд шоры ӧз учкылэ � тупатэм нормадэ одно ик быдэстоно. Дӥсь но куашка, сиён но быре. Одӥг нунал эшъёсыным лумбыт сиськытэк кораським. Мукет араз милемды келязы Ижевск�Балезино чугун сюрес лэсьтонэ. Татын но уж капчи вылымтэ. Носилкаосын сюй но из нуллӥмы. Лумбыт солань-талань ветлыса, ӝыт пал быдэс мугор чидантэм висьылӥз. Гужем шалашын улӥмы, зоре ке, суч-суч котмылӥмы, чибиньёс но кӧлыны эрик ӧз сётылэ. Одӥг гужеме милемды, гуртысьтымы куинь нылъёсты, ужаны келязы Кез районэ. Чугун сюреслэсь кыкетӥ линизэ, пе, лэсьтоно. Татын шулдыргес потылӥз. Угось нунал куспын шунды пуксён пала пӧртэм техникаен но солдатъёсын кӧня составъёс син азьтӥмы ортчылӥзы. Ӟеч мылкыд сӥзьыса, соослы киосмес шонаськомы вал. Али но пель сьӧрын кадь кылӥське усьтэм вагонъёсын фронтэ кошкись солдатъёслэн кырӟам куараоссы. Со милесьтым ӟеч ужаны мылкыдмес ӝутылӥз. Озьы нуналысь нуналэ, толэзьысь толэзе дырлэсь ортчемзэ ик валаны ӧз луы. Вуиз кема возьмам нунал, йылпумъяськиз война. Ог-огмес ӟыгыръяськом, чупаськом. Оже ветлэмъёс но куд-огез бертылыны кутскизы. Нош атаелы Виктор Павловичлы ӧз кылды дорзэ адӟыны, Ленинград блокадаын сьӧсь тушмонлэн пуляез улонзэ быдтӥз. Атае колхозын кивалтӥз бригадаен, бӧрысь бырйизы председателе. Калыкен ужаны быгатэмзэ лыдэ басьтыса, война кутскон азьын юнматӥзы партилэн райкомаз инструкторе. Шутэтсконэз валатэк, весь гуртъёстӥ ветлоз вал. Анае Евдокия Михайловна вань улон сюрессэ сӥзиз пудо вордонлы. Пенсие потытозяз ужаз дояркаын. Тӥни озьы пичи дырысен монэ соос дышетӥзы вань секытэз вормыны. Война дугдэм бере кыкетӥ араз валэс юосты кизёнын ужасько вал. Одӥг нуналэ бусые колхозлэн председателез лыктӥз но шуэ: � Тыныд, Юля, кунян сюдӥсе мыноно луоз. Тодӥськом: нокыӵе ужлэсь уд пыкиськиськы. Возьматы быгатэмдэ мукетъёсызлы. � Нырысь мар бордысен кутскыны чылкак пайми. Кунянъёс мырдэм пыд вылазы сыло, лек тӧл пельтӥз ке, погралозы. Малпай: малы татчы лыктӥ? Ярам, анае ваньмон дыръяз дорысьтым ӧз кошкылы, ялан юрттылӥз. Дышетӥз пӧртэм турынъёслэсь чай парыны, мешокен вож турын ворттыса сюдылӥ. Кык-куинь арня ортчыса, пинал пудоос син азьын тупатскыны ӧдъязы. Бӧрысь председатель но паймиз. Озьы куинь ар соосты сюдӥ но утялтӥ. Сюлмысь тыршемме пусйизы "Знак Почёта" орденэн. Кӧня шумпотон вал соку егит сюлмам. Собере парсьёсты куайытонын ужай. Соосты мукет бригадае келяменызы, мыным оскизы скалъёсты утялтыны. Татын но эшъёсылэсь бере ӧй кыльылы. кно вератэк мынӥ. Быгатонлыке вал бере, ӧй кышка секытлэсь. Районын огпол гинэ азьпал радэ ӧй потылы. Со понна гадям кыкетӥзэ "Знак Почёта" орден бырттӥзы. Тӥни озьы, пенсие потытозям, пудоослэсь ӧй люкиськылы. Нылы Алевтина но фермаын техник-осеменатор луыса ужа. Азьло Ленин нимо колхозмы районын азьмынӥсез вал. Ми ужан аръёсы паськыт вӧлмемын вал ӵошатсконъёс. Дорамы огпол гинэ ӧз вуылэ Калинин нимо колхозысь дояркаос. Асьмеос но соослэн кӧня йӧл кыскемзы, пудоосты кызьы сюдэмзы сярысь тодматскылӥмы. Ваньмыз со юрттылӥз ог-огмылэсь тырмымтэосмес палэнтыны, тросгес йӧл но сӥль поттыны. Табере нокин со пумысен вераськись ӧвӧл ни. Кӧня ке ар талэсь азьло колхозмес огазеязы "Сельхозхимиен", нимазы Агрокомбинат. Нош умой ласянь югдур ӧз воштӥськы. Люкиськыкумы Волковалэсь юано кариськи. � Кызьы тӥ ӵошатӥськоды азьло улонэз алиеныз? � Ма ватонэз, вазен секыт ке но вал ужаны, умой улӥмы ук. Шат ӵошатод туннэзэ толлоеныз? Ми ужамы, югытэз пыр-поч адӟытэк. Егитъёс кырӟаса, арганэн шудыса уин куро люкаллязы. Сокем трос ке но лэсьтыны ӧм вуылэ, пайдаез шӧдскылӥз. Али улон понна кинэ янгыш карыны но уд вала ни. Куашкам техникаен арамен юос вож-вожен ӝужало. Басьты вал выльзэ, со понна фермаысьтыд ӝынызэ скалъёстэ вузано луоз. Музъемез кинлы кызьы шедем люкылӥзы. Одӥг интыын турын окто, мукетаз жуг-жаг ӝужа. Колхозник дышемын ни ог-огеныз ӵош ужаны. Фермеръёслы но оскон ӧвӧл, соос калыкез уз сюдэ. Али асьмеос ум валаське ни, мар со шудбур, шумпотон. Радиоез кылзӥськод, телевизорез учкиськод ке, кыӵе секыт мылкыд кылдэ: лушкаськон но наркомания вӧлме, юнме егит пиос быро. Паськыт сюрес сётэмын ужбергатӥсь шуонъёслы (спекулянтъёслы). Палэнысь басьтэм вуззэс кык пол дуногес ӵекто. Ма карод, азьло сямен дэра ум куиське бере. Пась штаниен но гольык пыдын уд ветлы ук. Тӥни сыӵе ӟеч сюлэмо, пӧсьсэ но кезьытсэ адӟем, улон шоры ас синмыныз учкись огшоры кышномурт улэ Дэбес ёросысь Пичи Чепца гуртын. М.МОСОВ. Гурезьысь вуэм куректон Кабардино-Балкариысь Тырнауз городлэн кык ульчатӥз шуръёс ӧръясько. Озьы кужмо зоремен гурезьёс йылысь тыос ӧрысьтыз потӥллям. 7 адями быремын, 8-эз сӧсырмемын. Вуэн куашкатэмын кык корка, одӥгез укмыс этажъем, мукетыз - вить. Бырем муртъёслэн лыдзы йылыны но быгатоз на. Россиысь Кышкыт учыръёслэсь утиськонъя министерствоысь 200 адями юрттыны лыктэмын. Ташкент - дуно город Городъёс адямиос кадесь ик: огъёсыз узыресь, мукетъёсыз начаресь, огаз кӧня ке коньдонэн но улод, мукетаз зӧк кисыед но уз тырмы. Великобританиын ивортэмын дуннеысь самой дуно городъёслэн нимъёссы. Куинь азьмынӥсьёсыз пӧлы пыро Токио, Осака но Гонконг. Ньылетӥ интые потӥз Ташкент, Москва - 39-тӥ интыын. Европаысь бадӟым городъёс пӧлын самой дунтэмез луэ Будапешт, нош дуннеын 127 чаклам городъёс пӧлын Тегеран, Дели но Кито. Пӧсяськод - сӥятскы универмагын США-ын лымшор палъёсаз 10 нунал ӵоже ини чиданы луонтэм пӧсь возиське. Таӵе ӝокытлэсь Техас штатын 19 адями быриз, 7-эз - Луизианаын. Таин валче Техасысь кивалтэт ёзъёс калыкез куро ӧжытгес дорысьтызы потаны. Нош доразы кондиционерзы ке ӧвӧл, соос быгато огъя интыосын дырзэс ортчытыны. Вераськон мынэ библиотекаос, бассейнъёс, универмагъёс, биллиарднойёс сярысь. Та верам интыосты нимысьтыз сӥятыса возё. Та пӧсь куазен соос уй но нунал усьтэмын. Коньдон но йыруж Нью-Йоркын кырмизы наркотикъёсын вырись 20 адямиез. Та шырмачъёслэсь талазы 20 миллион доллар тыр "экстази" нимо усыкмытӥсь "эмъюмъёссэс" (миллион таблетка), озьы ик дасо килограммъёсын марихуаназэс, кокаинзэс. Ӝегатэм муртъёслэсь басьтӥзы пыӵал тӥрлыксэс, 250 сюрс доллар коньдонзэс, 3 "Мерседессэс" но 2 "Джипсэс". (Басьтэмын Интернет пыр). Гуртлэн казнаез � луд но ферма Гуртын улӥсь мурт котькудӥз ас понназ экономист. Сотэк кызьы-о семьядэ, хозяйстводэ вордод? Матысь аръёсты чакласа но учке ай, крестьян семьяос ведь тросэз йӧн-йӧн возисько, выль юртъер пуктӥсез но вань гинэ. Нош маин, кыӵе коньдонэн лэсьтӥсько шуоды? Асьсэ поттэмен, пудо вордэмен-вузамен. Одӥг уждун вылын гинэ нокин но ӧз узырмы на: бордаз ялан маин ке но вузкароно. Тӥни ма вылын улэ гурт калык. Чутыр палъёсын пудо-живот тросэн вордо: турын тырмыт, возьёс вань, кытӥ но отӥ соос саптамын-бугыръямын ке но. Арез котькыӵе секыт мед луоз, улон сое ачиз возьматэ, тыршись муртлэн ужамез одно ик пайдаен берытскоз. Чутыръёс та ласянь � тросэзлы адӟем карымон. Малы ке-а доразы дугдылытэк дышетскыны, учкыны ветло. Туэ тулыс татын ортчиз Кун Кенешысь Экономикая но бюджетъя комиссилэн огез кенешез но. Озьыен, вань мае возьматыны, маин данъяськыны. Вылаз ик, ялан ужась комиссилэн кивалтӥсез асьсэлэн депутатсы � Софья Эльфатовна Широбокова. Бырйисьёсыз верамъя, "Чутырскийлы" юрттонын дырзэ, кужымзэ со уг жаля. Колхозъёс, кооперативъёс пӧлысь кин али ӟечгес улэ? Кин трос йӧл кыске, сӥль вуза. Зоотехник-селекционер Татьяна Сергеевна Скрябина верам кылъёсты юнматэ лыдпусъёсын. Чутыръёс 1968-тӥ арысен кутскыса, пудо выжызэс воштон бордын выро, нош 1994-тӥ арын вань фермаоссы племенной статус басьто. Холмогор выжыысь скалъёсты будэтыны, вузаны лицензия сётэмын. Рынокен экономика вакытэ озьы ик ужаны кулэ, дыр. Сотэк-а "Чутырский" СПК районын гинэ ӧвӧл, республикаын но скал кысконъя валтӥсь интыез басьтэ, сое азьпалтэ Воткинск районысь "Пихтовский" совхоз гинэ. 1999-тӥ ар понна скаллы быдэ люкаськиз 4139 килограмм, совхозъя ваньмыз � 3311 тонна (валля арен ӵошатыса, 12,2 тонналы ятыр!). Продукцилэн 96 процентэз келямын нырысетӥ сортэн, наплыкез � 3,74 процент. Фермаос пӧлын нимысьтыз висъяське Чемошур, татын скаллэсь 5 сюрс килограммлэсь трос йӧл кыско ни. Кыкетӥ интыын мынэ Удмурт Лоза � 4201, куинетӥ � Чутыр ферма � 4033, со бере � Верх.Нязь � 3418. Котькуд скалъя нимысьтыз учёт нуиське, тодмо луо рекорд пуктӥсьёс. Кылсярысь, кылем арын 5 сюрс килограммез ортчиз 43 скал, 6 сюрсэз � сизьым, огез вуиз ни 7 сюрсозь. Ваньмыз соос вордскемын но будэтэмын асьсэ дорын. Котькинлэсь трос кылем ар понна йӧл кыскиз Чемошур фермаысь доярка Раиса Дмитриевна Силина � скалэзлы быдэ 5558 килограмм. Эшезлэсь ӧжытаклы гинэ кылиз Валентина Анатольевна Григорьева � 5056 килограмм. Соос бӧрсьы мыно Любовь Дмитриевна Леконцева, Нина Аркадьевна Корепанова но мукетъёсыз. Ӟеч выжы ветыл басьтыны Чутыре вуо быдэс республикаысь, тодо ни та хозяйство сярысь шаермылэн палэназ но. Миым вузазы 144 йыр, туэ но нуисьёс шедё. Басьтӥсез эшшо но тросгес мед луоз вылэм: вордӥсез-вузасез понна со пайдаен берытскоз, нош басьтӥсез йӧл кысконъя ӝоггес калык радэ потоз. Ӟеч выжы скал уськытонын нокызьы но вератэк уд кельты осеменаторъёсты. Татын умой ласянь гинэ пусъё Чемошурысь Светлана Владимировна Григорьеваез. Берло кык ар ӵоже 100 скал пӧлысь огез но кунян вайытэк ӧз кыльы. Хозяйстволэсь казназэ юнматыны туж юрттэ вылэм пудо куайытон, сӥль понна коньдонзэ дыраз но быдэсак берыкто ке. Миым, шорлыдын верано ке, ошпиоссы сутка ӵоже 531 граммлы будӥзы, кунянъёссы � 554-лы. Нош Чутыр фермая лыдпус вуиз 630 граммозь. Озьы ужа Вячеслав Аркадьевич Васильевлэн звеноез. Азинсконъёссы вань парсь утялтӥсьёслэн но. Шаерысьтымы данакез хозяйствоос, бадӟым комплексъёс кылдытэмен, та удыслэсь куштӥськизы, "Чутырский" � ӧз. Миым арлы лэсьтэм йылпумъянъёсъя вормисе потӥз Удмурт Лоза. Татын 2 сюрслэсь ятыр парсьпи басьтӥзы. Фермаен быгатыса кивалтэ Нина Ивановна Корепанова. Ужасьёсыз но ачиз кадь ик: котьмалы мыло-кыдо. Ужан висказы кырӟаса но лэзё. Озьыен, ужгурзы пӧзе, визыласа-визыласа Нязь шур сямен ӧръяське. Гурт удыслэн казнаез фермаын но лудын дуриське шуиськом ке, кызьы уд вера ю-нянь будэтӥсьёсты, турын-куро дасясьёсты, картофка утялтӥсьёсты. Механизаторлэн ужез нуналлы быдэ син шоры сокем ик уг ке но йӧты, сӥзьыл мертаськом ю тысен кисьтэм кеносъёсын, пудо сиёнэн тырмытэм гуосын, лач-лач люкам кабанъёсын но зуродъёсын. Тани соос, "корт" валэн бусыосты "кортнасьёс", хозяйстволэн азьветлӥсьёсыз: Чутырысь Александр Михайлович Леконцев но Александр Борисович Загребин, Чемошурысь Николай Михайлович Леконцев но Сергей Иванович Леконцев, Петр Семенович Боталов, Удмурт Лозаысь Николай Витальевич Кожевников, Иван Ильич Широбоков, Верх-Нязьысь Александр Николаевич Корепанов но мукетъёсыз. Вазь тулысысен кутскыса, лымы усьытозь уг чалмыло соослэн тракторъёссы, уж шеде тол вылтӥ но. Калык тырше бере, улон азьлань мынэ. Озьы ик луыны кулэ ук. Инмар ке ӧз кушты... "Возьлэсь шулдырзэ али уд шедьты ни, чебер дэремъёссэс дӥсяса, дэмен турнаны потэм калыкез уд адӟы, кырӟанъёссэс но уд кылы", - тазьы шуэмлы Можга ёросысь "Родина" колхозлэн тӧроез Владимир Викторович Головашов вера: - Туала дыре возь вылын трос калык ке, мон сое умоен уг лыдъяськы. Со возьматэ, техника уг тырмы шуыса. Милям та ласянь ӝожтӥськонэз ӧвӧл кадь. Кылем арын тани вить МТЗ трактор басьтӥм. Мар ласянь ӝегатскон луэ? Косилкаос турнаса уг вуо, пресс-подборщикъёс соосыз возьмало. Туэ уго Вало дурысь турын вакчигес кылиз: возь вылын тудӟем ву кема пукиз, собере кезьыт улӥз. Али пӧсь куазен милям пиос ӵукна вить часысен уйшорозь но ужало, нуназе бере кык часысен витёзь вис каро. Асьсэос озьы мылкыд каризы ужаны. Колхозысь турынэз чаляк быдтӥм ке, асьсэлы ворттыны кутскозы. Бусыын 200 гектар висъямын колхозникъёслы. Возь вылын но вань. Куазь сӧриськиз ке но, турынтэк уз кыле, колхоз юрттоз. Инмар ке ӧз кушты, парсь уз сиы - юнме тазьы уг шуо калыкын. Зоръёс усемен, турын шуак ӝутскиз, табере кӧс куазь юрттэ нуналаз сюлэсь но трос тонна кӧс турын дасяны. Тани та пӧсьтолэзе 11-тӥ числое 132 тонна люказы-ӝутӥзы, 15-тӥ числое - 124 тонна, 18-тӥе - 118 тонна. "Родина" колхозын пудо йырзэс будэтон сярысь сюлмасько. Сюро таза пудозы 2000 котыре вуэ, со пӧлысь 800-эз - скалъёс, ар куспын соосыз 900 йырозь вуттыны малпало (колхозлэн барышез йӧл поттон бордынгес уго). Та мында пудолы планъя 1400 тонна кӧс турын дасяны чакламын. Ваньмыз со рулонъёсын, тюкъёсын фермаос котыре, липет улэ ворттӥське. Та пӧлы ик пыре 700 йыр парсьёслы дасяноез. 45 тонна тюкъёсын лачак кӧс люцернаез толалтэ пызь карозы, изозы. - Пазялан 528 тонна турын рулонэн тыремын ни скалъёслы, эшшо 63 тонна талэсь азьвыл тюкен тырим ни кунянъёслы. Ӵужъемын та дырозь 224 тонна бинем турын дасямын. Ключиын 70 тонна тыремын куайытоно ошъёслы. Нош огъя вераса, туннэ нуналлы 881 тонна лэсьтэмын ни, - таӵе лыдпусъёсыз арня талэсь азьвыл шумпотыса вераз пудо сиён дасянэз-сётъянэз эскерыса возись зоотехник Вера Ивановна Кремлёва. Валамон, кӧс турынэн гинэ толэз пыр уд поты. Планъя 14 сюрс тонна чакламын на вож турынэз гуосы тырыны. Со пӧлысь 8 сюрссэ - Пазялысь комплекслы. Та дырозь 12 сюрс тонна котыр дасяса вуттӥзы. Лыдпус вылэ лыдпус - озьы ик план быдэстон пала вуэ. Та нуналъёсы кӧс турын дасянзэ "Родина" колхоз тырмытоз. Озьы бере, азьпалан йӧл но, нянь но тырмытэ ни. Эшшо одӥг бадӟым осконзы кылдӥз "родинаослэн". Алигес, огъя ӧтчаме люкаськыса, колхозлэн уставаз законодательствоя воштонъёс пыртӥзы. 1-тӥ июльысен "Родина" колхоз луиз кооператив (СПК). Иське, тӧролэн верамезъя, котькудӥзлэн ас ужамез понна кыл кутон, кузё луон мылкыдыз будоз. Пайда поттон вылӥегес ӝутскоз, угось адями валалоз: тяп-ляп ужад - астэ шуккид, ас кисыдэ куашкатӥд. Т. Петрова. Кизнер ёросысь "Югыт Бемыж" эштосын пудо вордӥсьёслэн та нуналъёсы мылкыдзы умой: механизаторъёс толлы тырмыт дасязы ни кӧс турын но, сенаж но, силос но. Тани-тани дыр вуоз юосты утялтыны. Специалистъёслэн чакламзыя, туэ нянь удалтыны кулэ - ӟег но чабей шепъёс умой гинэ тысяло. Нош кооператив та дыре коньдон но пайда поттэ йӧл чотынгес. Скал кыскисьёс Татьяна Санникова, Елена Баграшова, Елена Андреева но Людмила Атаманова. В. Беломорскихлэн туспуктэмез. КЕМАЛАСЬ... Адями быдэс даурзэ ортчытэ, аслыз улыны пӧртэм луонлыкъёс кылдытыса, соос пӧлысь кельшымонзэ, капчизэ-чеберзэ бырйыса. Нош кызьы радъя ваньмон дырзэ? Та юанлы валэктыса, мадеме потэ инвожо толэзьлэн сизьыметӥ нуналаз (нош со арня нунал вал) Жужгес гуртын ортчем праздник сярысь. Эх, лыдӟисьёсы, тӥ адӟысалды ке! Мыным шуд ӧз усьы шулдыръяськонэз пумозяз учкыны: дышетскисько уго мон, огпӧртэм дуно городам дыртоно. Шулдыръяськон "Ульчалэн нуналэз" шуыса нимаськиз. Та ужрад сӥземын вал Жужгес урамъёс пӧлысь одӥгезлы - тужгес егитэзлы. Арня ӵукна. Капка азе потӥ но, ӟус вылэ пуксьыса, ортчем кӧснунал ӝытме малпасько - инмын лобасько. Котыр паймымон инкуазь: яркыт шунды пиштэ, дырын-дырын капчи тӧл пельтылэ, сирень сяськая, бурдоос чирдо, кырӟан гур быдэс гурт вылэ кытысь ке вӧлме. "Дугды ай, кытысь та? - шуак малпаськисько.- Оло, ӵукна ик кинъёс ке Трочин каро ини? Озьы, дыр", - буйгатски но берен ас дуннеям уси. Нош крезьгур уг чалмы. Маке ӧвӧл та. "Ма, кызьы сыӵе пась йыр луод ни?! Толон гинэ апае вераз ук: урамазы праздник ортчытыны ӧдъяло", - тодам лыктӥз. Сузэрме ӝоггес ӧти но, тупал ульчае дыртӥмы. Огшоры буш интыын пулъёслэсь но токлёкъёслэсь ӝӧк но кузь ӟусъёс "пӧрамын" ни. Соос котыртӥ пиналъёс бергало: шудо, кесясько, бызьыло-тэтчало. Кыдёкын ик ӧвӧл - крезьгурез чузъяськытӥсь аппаратура. Калык люкаськемъя, ӝӧквыл утыр ик тырмиз сиён- юонэн: выль но сылалтэм киярен, тӧдьы но сьӧд нянен, помидорен, пыжиськемъёсын. Нош омырын чорыг лымлэн но сутэр, вишня куаръёсын пӧзьтэм чайлэн ческыт зынъёссы лӧсъясько. Собере - чорыг лым сиён, турлы шудонъёс, ӵошатсконъёс, кузьымъёс... Быдэс урам шулдыръяське! Вань ужъёс огдырлы вунэтэмын. Таӵе дыре тау карем потэ та ужрадэз малпасьлы. Нош кин со адями? Светлана Григорьевна Мышкина, культура юртын ужась. Ваньмыз сярысь сюлмаськем. Ма, ачиз но та ульчаын ик улэ. Потӥськод, пе, ураме, одӥгез, мукетыз ӝожтӥське: ум тодӥське, кин кытын улэ. "Ачиз колхоз председательмы но умой-умой уг тоды,- шуэ Светлана Григорьевна.- Ульча егит на, бускельёс но ог-огзэс "эскеремын" ӧвӧл на. Ма, собере огинын но огшоры ӵыдэтскем потэ ук. Уката ик - Трочин тупаз. Праздникмы пӧрмиз ке, мукет урамъёсын но таӵе ужрадъёс ортчытом". Эшшо паймымон на соиз: праздник ортчытон инты чылк-чылк октэмын-калтэмын. Кытчы пыризы костаськись шелепъёс, кема кыллем коръёс, токлёкъёс но мукет жуг-жагъёс? Кин сюлмаськиз? Секытэз нош ик Светлана Григорьевна вылын. Со шуиз: - Ялылӥм октӥськон-калтӥськон ӝыт. Пиналъёс туж юрттӥзы - кылзӥськизы. Собере малпаськом на вал, попез ӧтчаса, та интыез вӧсяны. Коньдон ӧвӧлэн, сыӵе малпанлэсь куштӥськоно кариським. Сӥзьыл ӧдъяськом татчы писпуос мерттыны, нош азьланяз - пиналъёслы шудон площадка усьтыны. - Нош таизлы коньдон кин висъяз? Яке улӥсьёс асьсэос сюлмаськизы-а? - Кузьымъёслы коньдон сельсовет сётӥз - 200 манет. Озьыен, праздник азьланьтӥське. Тани калыкед но "капчиямын" ни. "Капчиян" пумысен. Кызьы учко та шоры пиналъёс? Валя (12 арес): - Укыр трос юо. Ваньзы юо. Акыльтӥз ни сыӵе суред шоры учкыны: юытэк ик умойгес луысал. Оля (12 арес): - Аракытэк умойгес. Огдыре ик шимес: калык конкурсъёсы уг пыриськы ни - возиське. Талы туж ик пумит уг луиськы, но тырмемзэ мед шӧдозы вылэм: погратозязы медаз юэ. Вераськонысь валай: Валя ӝотак пумит, нош Оля шугъяськегес та пумысен кенеш мытыны. Озьы уго - уд но вала: одӥг ласянь, тазьы шулдыргес кадь. Мукет ласянь - чебер ик уг адӟиськы. Зэм вераз Оля: тырмемзэ мед шӧдозы вылэм. Соку кырсез но ӧй луысал. Котьма ке но, шулдыръяськон ӧраз. Котькудӥзлэн - пичиезлэн, арлыдоезлэн, шоро- куспо аресъемезлэн - "кӧтъёссы тыремын". Мыным гинэ ӧжыт мӧзмыт: городэ ширтоно, экзаменъёслэн матэктэмзы капчи мылкыдэз зӥбе. Сыӵе уго студентлэн улонэз: ялан сюрес вылын, арлы кык пол - сессия. Озьы ке но, та праздник, мынам малпамея, егит урамын улӥсьёслэн сюлэмъёсазы кемалы кылёз. Сотэк-а, ма? Ведь ульчалэн праздникез нырысьсэ ортче милям гуртамы. Кемалась таӵе кужмо ӧз шулдыръяськы ни валжужгес калыкед огазеяськыса. Кемалась гинэ гуртын праздникъёс дыръя конкурсъёсы но ӧз ни пыриськылы. Кемалась ӧй вал ни таӵеез гуртамы... Оксана МОСКОВА, Удмурт кун университетын дышетскись. Юнме супыльтон Ижын потӥсь "День" газет алигес гожтӥз, Кун Кенешлэн Тӧроез Александр Волков та нуналъёсы Сочиысь одӥгаз пансионатэ отын шутэтскись Светлана Смирнова доры лобаз шуыса. Соку, пе, вераськон мынӥз Кун Думалэсь депутатсэ Удмуртилы президент быръён уже меӵак кыскон сярысь. Депутатлэн пресс-службаез таин валче ивортэ: нокыӵе пумиськон но президентэ кандидат луон сярысь кенешон ӧй вал. Газетын гожтэм малпанъёс - Сергей Щукин редакторлэн номырин юнматымтэ мылкыдъёсыз. Ӟечбур, бесерман дунне! Азькыл Асьмелэн "Удмурт дунне" газетысьтымы, туэ тулыс потэм номерысьтыз, лыдӟи бесерман кышномуртлэсь, дышетӥсьлэсь, аслаз пичи гинэ калыкезлэн мурт калыкъёс пӧлы ватӥськыса, аслаз бесерман луэмезлэсь возьдаськыса, дунне вылын кепыраса улэмез сярысь синву пыр гожтэм чуръёссэ. Сюлмы вӧсь луиз. Уго та висён мыным туж тодмо - мынам но зӥбыт-востэм, кепырась удмурт калыке та алясь висёнэн висе, нош уката ик - ӧжытак дышетскем, но бадӟым, зэмос культура басьтытэк кылем, ас кылызлэсь, удмурт луонэзлэсь возьдаськись интеллигенцилы, служащий нергеослы. Али Удмурт Элькунмылы йыр, калыкмылы азьветлӥсь быръён понна пӧсь нюръяськонъёс кутско ини. Татын туж-туж яркыт адӟиськоз асьме калыкмылэн тужгес но ляб палъёсыз: уго сю, сюрс аръёсын мурт калыкъёслэн пыд улазы раб интыын улэм калыклэн психологиез мыдланьтӥськемын. Со бадӟым агайлэн-кузёлэн син шораз гинэ учкыса улыны дышемын: мар шуоз кузё-агай. Нош раб кышнолы, раб пиосмуртлы кузё-агай кизэ сётӥз ке, 60 арес тырмонэныз ӟечкылаз ке, корт медаль яке Удмурт Элькунлэн нимо-дано ужасез ним сётӥз ке, уката ик улонни сёто шуыса оскытӥз ке, гажано эше, тод: раб кенакмы, раб ӵужмуртмы ас калыксэ синзэ кырмыштытэк вузалоз. Сыӵе мурт пушкын Инмарлэн духез уг улы, со тӧлъя-буръя шонаськись писпу кадь, сыӵе муртлэн возьытлыкез, шонерлыкез, чеберлыкез валанэз йырин-чукин берытскемын. Соослы та дуннелэн данэз, узырлыкез гинэ кулэ. Кыл вылын сыӵе мурт патриот но луыны быгатоз, нош куке ас калыкез понна улондэ сётытозь нюръяськыны кулэ, со палэнын, ӵем дыръя со калыкезлэн тушмонэныз огкыл шедьтыса сие-юэ но ас калыксэ вуза. Туж жаль, но сыӵе примеръёс пумтэм трос, али ик, быръёнъёс азьын сыӵе адямиос шарае потӥзы ини. Тушмон кескич, со вань амалъёсты уже кутэ аслыз кузё луон понна. Со киын коньдон, нош али дыре сьӧлыко дуннеен коньдон, коньдон бордысь поттэм кужым кузёяське. Гажано бесерман эшъёсы! Вождэс эн вае удмурт калыкме пыкылэме понна, солэн ас выжыысьтыз матысьёссэ утьыны тыршымтэез понна та пыкылонэ. Та асьмелэн - удмуртъёслэн но, бесерманъёслэн но огъя висёнмы. Соинтэк-а йӧнтэм адямиослэн юрттэменызы 1929-тӥ арын бесерман ним бумагаос вылысь ӵушиськиз, вань калыкез оглом удмурт шуыса гожтӥзы. Огшоры калык кӧтӝожзэ пыдлон сюлмаз нуллӥз, нош дыр вуиз, со куаразэ поттыса шуиз: "Мон удмурт ӧвӧл, мон - бесерман". Бесерман... бесерман калык.., бесерман кыл.., бесерман дунне... Тросэз-а Удмуртиын улӥсьёс тодо та калык сярысь? Уг, шуыны луоз. Уй пал удмуртъёс сярысь уг вераськы, уго соос артэ кема дыр ӵоже уло ини. Нош лымшор но шор районъёсын улӥсьёслэн чик кылэмзы ӧвӧл, яке кылэмзы вань но уг тодо кинъёс соос. Одӥг тодмое Юкаменск ёросэ вуылэм но шуэ: "Тодӥськод-а, татын кыӵе ке но бесерман калык улэ, асьме палан кадь "анай", "атай", "аби" шуыса верасько. Но вань верамзэс валаны уг луы". Ӟуч тодмое юа: "Телевизор пыр кыӵе ке но бесерман ансамбль кырӟаз-вераз. Уд тодӥськы-а, кинъёс со?" 70-тӥ-80-тӥ аръёсы трос ёросъёстӥ экспедициен ветлӥ. Киров улосвылысь Уни, Зуевка, Слободской ёросъёсысь удмуртъёс тодо бесерман калыкез, но соослэн та калык сярысь асьсэлэн валанзы: "Ӝыныё удмуртъёс, ӝыныё бигеръёс. Вераськемзэс валаны луэ но, ваньзэ уг". Бесерманъёслэсь асьсэлэсь юаськод ке кытысь потэмзэс, валэктыны уг ни быгато. Бесерман калык - удмурт калыклэн пичи люкетэз - кытысь тӥ потэмын, кинъёс тӥ? Мар бордын тӥляд аспӧртэмлыкты, кылдон но азинскем сюресты, кыӵеесь сюлэмшугъяськонъёсты? Та юан бордын сю арлэсь кема ини малпасько асьме кунысь гинэ ӧвӧл, кунгож сьӧрысь но, уката ик Венгриысь, Финляндиысь, Эстониысь тодосчиос. Мыным но та калыклэн кылдэм азинскп сюресэз туж тунсыко потэ. Ӝоген, 7-тӥ-13-тӥ августэ, Эстониысь сӥё-дано Тарту городын ужаны кутске быдэс дунне вылысь финн-угор учёнойёслэн конгрессы. Отчы трос удмурт тодосчиос мыно. Та уже мон но пыриськисько. Татын мон мылкыд кари бесерман кылэн удмурт диалектъёсын кусыпъёсыз сярысь доклад лэсьтыны. Эскерон сямен, трос тунсыко малпанъёсы вуи. Аслэсьтым тодон-валанъёсме тӥледлы но удмурт, бесерман эшъёсы, тодытэме потӥз. Научной сборникъёсмы туж ичи тиражен пото но огшоры лыдӟисьёс кие соос уг вуо. Соин ик калыкмы аслэсьтыз историзэ уг тоды, шуыны луоз. Нош газетмес дас сюрслэсь но трос мурт басьтэ, лыдӟисез куинь пол-ньыль пол но тросгес. Нош кутсконэз тазьы вал. 1978-тӥ арын экспедицие потӥ Грах ёросысь удмуртъёс доры. Трос тунсыко материал люкай. Соос пӧлысь одӥгез уката но паймытӥз: Вуж Ӟатча гуртысь одӥг мӧйы воргоронлэн верамезъя, Кизнер районэ пырись бускель Сарамак гуртэз вашкала дыръя "бесерман", пе, шуо вал. Осконтэм кадь потӥз та веран. Юасько: мар тодӥськод туала бесерманъёс сярысь? Туалаосыз сярысь кылэмез но ӧвӧл, но шуэ: Сарамакен Ӟатча вискын бесьмен калык улэм, чукынӥськытэк (черке пырытэк) улӥллям. Татысь, пе, соос Башкирие кӧчиллям. Кыллэсь, палэн- палэн вераськонъёслэсь (диалектъёслэсь) аспӧртэмлыксэс эскерыкум, таӵе малпанэ но вуи: Удмуртилэн самой лымшор сэрегаз улӥсь грах удмуртъёс но уй палась бесерманъёс вискын вань трос гинэ одӥг кадез. Но та сярысь берлогес. Дуннеысь тодосчиос бесерман калык сярысь Кутсконаз ик мынам тау кареме потэ одӥгезлы мӧйыезлы, сӥё-дано удмурт учёноймылы Т. И. Тепляшиналы. Со трос ужъёс гожтӥз, но таиз зарни пероен гожтэмын, солэн нимыз - "Язык бесерман". Потэмын 1970-тӥ арын Москваын. Та уженыз Тамара Ивановна пырак ӵожелы нимо-дано учёнойёс пӧлы пыриз. Та ужезлы тодосчиослэн дуннезы вылӥ дунъет сётӥз. Т. И. Тепляшина котыр ласянь эскере бесерман кыллэсь удмурт кылэн огъя луись люкетъёссэ но, аспӧртэмлыко палъёссэ. Кутсконаз ик со сётэ бесерман калыклэн кылдэмез сярысь пӧртэм-пӧртэм учёнойёслэсь веранъёссэс, малпанъёссэс. Татчы мон пыртӥсько Т. И. Тепляшиналэн сяна, мукет тодосчиослэсь но ужъёссэс. Берло дыре бесерман калыклэсь культуразэ, осконзэ, кылдон но азинскон сюрессэ эскерон борды басьтӥське та калык пӧлысь потэм шаплы, ас калыктэ яратӥсь егит учёной - Елена Васильевна Попова. Со трос ужъёс гожтӥз ини, но ялан со экспедициосы потаса тырше выль материал люканы. Егит учёной ӟеч мылкыдын сётӥз бесерман калык пӧлын лэсьтэм туспуктэмъёссэ. ... Паймымон та улон-вылон сюрес. История... Монголэн татарен сураськем ожгарчиос кужмо тӧлпери кадь, ваньзэ вормыса, пыд улазы лёгаса, Монгол кырысен Дунай шур дурозь вуизы. Пумтэм трос калыкъёсты асьсэлэн вормонтэм армиязы кутӥзы, кылемзэ выт (дань) тырись каризы. Дунне куалектӥз та шимес, кышканэз, жалянэз валасьтэм ожгарчиослэсь. Римысь Иннокентий папалэн ыстэмезъя, монголъёслэн шоркаразы Чингизхан доры 1245 арын ыстэмын вал доминиканской монах. Плано Карпини. Кык ар ӵоже мынон-бертон сяменыз трос калыкъёсын пумиськылӥз, адӟемзэ-кылэмзэ кагаз вылэ гожтыса кельтӥз. Самой паймонэз татын со: нырысьсэ шарае потэ бесерман калык! Плано Карпинилэн верамезъя, бисермин калык улэ Шор Азиын туркменъёсын артэ, Хорезм город котырын, Арал зарезьлы матын. Бесерманъёслэн Шор Азиын улэмзы сярысь верало соослэн дӥськут чеберъянъёссы, куд-ог сямъёссы но. Та сярысь гожто А. И. Попов историк, С. П. Толстов археолог, этнограф, К. М. Климов искусствовед; антропологъёс но шуо бесерманъёслэн, пе, виразы бызе, тусбуязы шӧдӥське иран калыкъёслэн пичи ке но пытьызы. 12-тӥ-14-тӥ дауръёсы гожтэм летописьёсъя тодыны быгатӥськом бесерман калык Камлэн Волгае усён вожаз тюрк калыкъёс пӧлын улӥз шуыса. Но нырысь ик вераны кулэ тае но: туала мадьяр (венгр) выжыос ог 1500 ар талэсь азьвыл Уралэн Волга вискытӥ кӧчыса ветлӥзы. Соос трос калыкъёсты пушказы сылмытӥзы, соос пӧлы сюризы бесерманъёслэн но ог люкетэз: Уралысь туала Венгр музъеме кошкыкузы, сьӧразы мынӥзы бесерманъёс но. Та сярысь верало куд-ог венгр хроникаос но инты нимъёс. Паймод, оло, уд, но Будапештын вань Бесерман урамзы, Венгриын вань "бесерман" этнонимлэсь пӧрмем городлэн но гуртъёслэн нимъёссы, кылсярысь: Берекбёсёрмень, Хайдубёсёрмень но мукет. Волга но Кам дуре кылем бесерманъёс матын кусып возизы лымшор удмуртъёсын, булгаръёсын - чувашъёслэн ӵыжы-выжыосынызы. Та сярысь верало кылзы, дӥськутсы. Дӥськут чеберъянъёссы, уката ик такъязы, кашпузы чувашъёсын чылкак одӥг кадь. Сӥё-дано акаяшка праздниксылэн нимыз но булгаръёслэн-чувашъёслэн кылысьтызы вуэмын, асьме кылэ со "геры ӝук" шуыса берыктӥське. Ӟуч летописьёс бесерманъёсты "чуваша арская", яке "чуваша" шуыны кутскизы. Казаньысь Мамадыш, лымшор Удмуртия пыр туала Агрыз ёросэ мынӥсь выт бичан сюресэз Зюрей сюрес яке Чуваш сюрес шуо вал. Бесерманъёслэн-чувашъёслэн тросэз гуртъёссы интыяськемын вал туала Кукмор, Грах, Алнаш, Огырчи удмуртъёсын сураськыса. Та сярысь ӧжыт берлогес. Тюрк-монгол калыкъёслэн Булгар кунэз куашкатэмзы бере, бесерманъёс лымшор удмуртъёсын ӵош, сюро Зарни Урдо (Золотая Орда), бӧрысь - Кузон ханствое. Та дыре но бесерманъёс кужмо калык вал на, соос туж матын кусып возизы тюрк бекъёсын, ханъёсын. Таиз но паймымон ивор: Софийской шуыса нимаськись летописьлэн ивортэмезъя, 1380-тӥ арын Куликово бусыын ожмаськон дыръя бесерман ожгарчиос нюръяськизы ӟучъёслы пумит Мамай-ханлэн армияз. Кузон бигеръёсын, мордваосын ӵош 1319-тӥ арын Москва эксэйлэн Юрий Даниловичлэн войскоеныз ӵош соос ожмаськыны ветлӥзы Тверь карын улӥсьёслы пумит. Вань ожмаськонъёс дыръя соос бигеръёсын валче вал. Соин ик та дырозь но бесерманъёс бигеръёсын эшъяськыса, родняяськыса уло. Туж тросэз бесерманъёс исламе потыса бигер калык пӧлы сылмизы. 15-тӥ-16-тӥ дауръёсы, кыӵе ке но муген, бесерманъёс "чуваш" нимын вуо уй палась удмуртъёс доры, уката ик туала Киров областьысь Слободской ёросэ интыяськем Карино бигер гурт котыре. 1615-тӥ арын лэсьтэм переписьын соос "чуваша" шуыса гожтэмын, нош 17-тӥ даурлэн пумаз соос вуо туала Глазов, Юкаменск, балезино ёросъёсы но гожтӥсько ини "бесерман" шуыса. Кыӵе выжыысь тон, бесерман эше? Бесерман калык пӧлысь потэм удмурт калыклэн яратоно пиез, та улонысь вазь кошкем кылбурчи Михаил Федотов ас калыкезлэсь, аслэсьтыз кытысь потэмзэ тодэмез потыса шуэ: "Али но уг тодскы кинме, Пыдло кошкемын выжыос... Кинъёс бызьыло виръёсын, Кытысь мон таӵе бесерман" (Вӧсь, 1991:19) Та пумысен трос пумо веранъёс вань, но соосты таӵе группаослы луысал люкыны:1) тюрк - булгар, туала чувашъёслы, этнографъёс, куд-ог кылчиос: С. Н. Южанов, Б. Н. Белицер, Н. И. Гаген Торн, Н. П. Штейнфельд, И. Н. Смирнов но мукетъёсыз; 2) удмуртмем бигеръёс яке крашине пыртэм бигеръёс (Ю. Вихманн, И. С. Михеев, С. Перевощиков, И. Н. Смирнов); 3) бигер но ӧвӧл, чуваш но ӧвӧл - нимысьтыз калык, но вань улон котырзы, кылзы удмуртъёслэн кадь (М. М. Хомяков); 4) удмурт но ӧвӧл, бигер но ӧвӧл - кыӵе ке вашкала тюрк выжыысь потэм калык, но соос зэмос удмурт кылын верасько (протонерей Г. Дьяченко); 5) тюрк (булгар,бигер) выжыосын сураськем финн-угор выжыысь калык (Р. Г. Кузеев); 6) вашкала удмуртъёс, финн-угор выжы калык (Д. К. Зеленин, Д. А. Золотарев, А. П. Смирнов); 7) булгаръёслэсь азьвыл улэм тюрк выжы (В. Ф. Генин); 8) иран выжыосын герӟаськем калык (К. М. Климов); 9) булгаръёсын (чувашъёсын) артэ улэм лымшор удмуртъёс, Камаен Волга котырысь бигеръёсын ӵош, яке соослэсь азьвылгес, Чупчи котыре улыны выжемъёс (Д. И. Корепанов, В. Е. Владыкин, М. В. Гришкина, В. К. Кельмаков). Берпуметӥ группаысь учёнойёс выллем ик малпало та удысын самой трос ужам адямиосмы - Т. И. Тепляшина но Е. В. Попова. Озьы ке но, Т. И. Тепляшиналэн вань мукетгес малпанэз но: бесерманъёс, пе, удмуртмем булгар выжы калык. Пичи гинэ калык, но кызьы адӟиськоды, котькудӥз тодосчи ас сяменыз вера та калыклэн кылдэмез, вашкала выжыосыз сярысь. Малы меда озьы луэ? Нырысь ик, вашкала документъёс ӧжыт, соос но уг верало бесерманъёслэсь кытысь потэмзэс; кыкетӥез муг: жаляса верано луэ, та дырозь бесерманъёсын герӟаськем одӥг но вашкала археологической памятник, уката ик Камен Волга котырысь, шедьтэмын ӧвӧл на (сое нимысьтыз ӧз но утчалэ на) соин ик та калыклэн кылдэмез пумысен сокем трос веранъёс, малпанъёс. Но татын огзэ пусйыны кулэ: ваньмыз сямен ик тодосчиос, ӟуч летописьёс бесерманъёслэсь вашкала улон интызэс Камен Волга котыре интыяло. Нош та чуръёсты гожтӥсь мар меда малпа бесерман калыклэн кылдэмез сярысь? Кыл - калыклэн шорсюлмыз, солэн историез Вашкала документъёс ӧжыт бере, вашкала каръёс, гуӵинъёс, шайёс шедьтэмын, утчамын ӧвӧл на бере, кыле кылэз, этнографиез, тусбуез эскеронъёс гинэ. Али дыре бесерманъёслэн кылзы пыр-поч эскеремын ни, соин ик капчи сое мукет удмурт диалектъёсын ӵошатыны. ... Пӧртэм ёросъёсын улӥсь удмуртъёсын пумиськиськод ке, пель сьӧры кылӥсько кыӵе ке но тодмотэм кылъёс, кыл формаос, аспӧртэмлыко букваос (наукалэн куонъёсызъя, соосты асьмеос куараос яке фонемаос шуомы). Тани кема ик ӧвӧл радио пыр вераськиз Грах ёросысь Бадӟым Вожой гуртысть кышномурт, малпасько, тросэз шӧдӥзы, кызьы со литературной кылын лыктыку, мыныку, пӧлын, пуны интые шуэ: лӧктӧкӧ, мӧнӧкӧ, пӧлӧн, пӧнна выллем ик верасько Алнаш ёросысь Варзи-Ятчи, Кузёбай, Муважи котыре интыяськем гуртъёсын, Кияса ёросысь Салья - вылын, Карамас-Пельгалан, кыдёкысь уйпал Глазов, Юкаменск, Красногорье, Яр ёросъёсын улӥсь удмуртъёс но бесерманъёс, нош озьы ик Татариысь Кукмор, Мамадыш, Агрыз, Башкириысь Татышлы, Имиш ёросъёсысь удмуртъёс. Кемалась ини йырам малпан кылдӥз: Малы лымшор но уйпал удмуртъёс, нош озьы ик бесерманъёс пӧлын гинэ пумиське та аспӧртэмлыко гласной куара, дышымтэ муртлы шуш но кылӥське, кадь, кытын интые кӧтӧн шуо ке. Со вакытэ ик, вань шор районъёсын, Татариын но Башкириын, Удмуртиысь лымшор но уй пал ёросъёсысь тросэз удмуртъёс литературной кылын кадь ик чузъяськись ы куараен верасько. Туж аспӧртэмлыко та ласянь Грах ёросысь удмуртъёслэн вераськемзы: артысь гуртын ик та гласной куараез пӧртэм сямен верало. Бесерманъёслэсь вашкала улон интызэс эскерыса, малпан кылдӥз: ӧвӧл-а та калыклэн удмурт кылэ кылем пытьыосыз? Кин утча, со шедьтэ. Малпанъёсыным бергатозям, егит тодосчимы Л. Л. Карпова монэ азьпалтӥз. Со гожтэ: ӧ куара кадь кылӥськись сьӧр радысь шоро-куспо ӝутскем ы куара Глазов котырын улӥсь удмуртъёслэн вераськоназы пыриз бесерман вераськетлэн (диалектлэн) влияниез улсын. Зэм но, лымшор удмуртъёс пӧлын вашкала дауръёсы кытын улӥзы чуваш шуыса нимам бесерманъёс, отын ик кутӥське но аспӧртэмлыко ы (ы,ъ) куара. Кылсярысь, Кам кузя кыстӥсько Зюрей сюрес, ортче вал туала Кукмор, Мамадыш, Грах, Агрыз ёросъёс пыр. Та котыръёсын 16-тӥ-18-тӥ дауръёсы пумисько вал чуваш (бесерман) гуртъёс. Иж шурлэн Каме усён вожаз 16-тӥ-17-тӥ дауръёсы удмуртъёсын, бигеръёсын валче улӥзы бесерман калыклэн ог люкетэз. Ӵапак татысь ик удмуртъёс пӧлын кутӥське та аспӧртэмлыко гласной куара. Шуом, Омга выжыос (соос уло Кузебай, Муважи, Сьӧд Ошмес, Чумолё, Варӟыл, Сарсак-Омга гуртъёсын) та котыре вуэмын Вятка шур дурысь туала Вятско-Полянской районэ пырись Дым-дым-Омга, Камдор-Омга гуртъёсысь; Кияса ёросысь Салья выжыос вуизы Калмез шур котырысь; Варклеть- Бӧдьяла вуизы Пичи Пургалась но Пичи Бодьялась - котькытын но кутӥське литературной кылын кадь ик ы куара. Мон малпасько, та воршуд выжыос Иж шур котырын улӥсь чувашъёсын (бесерманъёсын) кусып возьыса, родняяськыса улэмен, вераськон кылазы пыртӥз та аспӧртэмлыко куара. Соин ик мыныку шуэм интые, Омга, Бӧдья, Салья, Пельга, Ӟумъя воршудысь удмуртъёс мӧнӧнӧ шуыны кутскизы. Бесерман кыллэсь аспӧртэмлыкъёссэ эскерыса шӧдыны луэ тае: та кыллэн тодметъёсыз тужгес но матын Вятка дурысь Кукмор но Грах ёросъёсын улӥсь удмуртъёслэн кылзылы. Мон ачим Грах ёросын вордскемын бере, мыным тодмо ас калыкелэн вераськонысьтыз аспӧртэмлыкъёсыз, капчи соосты бесерман но мукет удмурт вераськонъёсын ӵошатыны. Вылӥ верам ъ куара сяна, бесерманъёслэн но грах удмуртъёслэн вань мукет огъя тодметъёссы но, кылсярысь, бесермянъёслэн ӧ фонемазы ышемын, со интые кутӥське э яке о: бесерман вераськет грах вераськет литература кыл эвэл эвол (ЛВ) ӧвӧл этьън этьън-этьын ӧтьыны кэня кэня (ЛВ) кӧня полън полън-полын пӧлын посьтън посьтън-посьтын пӧсьтыны шонгъль шэнгъль-шэнгыль шӧнгыль Вашкала у фонема интые туала литературной кыламы кутӥське у, нош бесерман кылын, озьы ик грах удмуртъёслэн, куд-ог мукет лымшор вераськемъёсын у куара интые кутӥське ы (талэсь сьӧр радысь шоро-куспо ӝутскем вариантсэ кыл бордын ужасьёс таӵе пусэн возьмато - ъ): бесерман вераськет грах вераськет литература кыл пънъ пънъ-пыны пуны йъбо йъбо-йыбо юбо зъндэс зъндэс-зындэс зундэс ъгъ ъгъ-ыгы угы Бесерман, кукмор, грах, куд-ог мукет лымшор вераськетъёсын (диалектъёсын) и фонема интые кутиське ы (ъ): бесерман вераськет грах вераськет литература кыл гънэ гънэ-гынэ гинэ жъльъ жъльъ-жыльы жильы йъбор-йъвор йъбор-йывор ивор Лымшор удмуртъёслэн сямен ик бесерман кылын но небыт согласнойёс азьпалась ы(ъ) куара выже и куарае: бесерман вераськет грах вераськет литература кыл виль виль выль пизь пизь пызь тӥсь тӥсь тысь Бесерманъёслэн кадь ик, грах удмуртъёслэн но вераськоназы глаголлэн инфинитив формаысьтыз пумысь гласной куара ӵем дыръя усе: бесерман вераськет грах вераськет литература кыл ужан ужан ужаны гожтън гожтън-гожтын гожтыны курън курън-курын курыны Бесерманъёслэн но лымшор удмуртъёслэн вань огъя кылъёссы, кудъёсыз уг пумисько шор но уйпал ёросъёсын улӥсьёс пӧлын, кылсярысь: бесерман вераськет грах вераськет ӟуч кылын анай анай мать атай атай отец аби аби бабушка; грах: теща акаяшка акашка весенний праздник; Пасха бесерман вераськет грах вераськет ӟуч кылын алача алача петредь, холст бутьмар бутьмар чрезплечное украшение карт карт муж, супруг къйъ куйъ-куйы колодец оиг-ойик оиг-ойик (ЛВ) один алла! алла! аллакайым! эх ма?! вот да?! вот те(бе) на?! Бесерманъёслэн но лымшор удмуртъёслэн вераськоназы тросэз та кылъёс пыремын тюрк кылъёсысь (оиг) кыл сяна. Но та удмурт группаос трос сю аръёс ӵоже ини булгар-чуваш, бигер, башкир калыкъёсын артэ, кусып возьыса улӥзы, уло но та дырозь. Кызьы пусйимы ини, Чупчи дуре улыны кошкытозязы, бесерманъёс "чуваш" нимын улӥзы Кукмор, Грах, Иж шур котырысь удмуртъёсын артэ. Тросэз соос исламе потыса бигер, крашинь луизы, кӧня ке но люкетэз удмуртмиз но. 1710-тӥ арын лэсьтэм переписьысь тодыны луэ: Выль Эгра гуртын кык семья чувашъёс (бесерманъёс) улӥллям на. Туннэ нуналын но Грах ёросысь Вылӥ Эгра (Пуклё) гуртын вань Чуваш-Чуаш выжы ним. 17-тӥ даурозь чуваш (бесерман) гуртъёс вал туала Мамадыш, Кукмор, Агрыз ёросъёсын, Можга ёросысь Можга черкогуртэз Басурман-Можга шуыса гожто вал. "Басурман" кыл "бесерман" кылэн герӟаськемын ӧвӧл меда? Озьыен, кыл со калыклэн шорсюлмыз, солэн историез. Вылӥ верам примеръёс но туж яркыт возьмато али дыре уй палан улӥсь бесерманъёс куке но лымшорын улӥллям но татысь удмуртъёсын кусып возиллям шуыса. Бесерман эшме буре вайыса Жаляса верасько, но та паймымон, вашкала туж тунсыко, йӧно калыкен трос ик кусып возьыны мыным ӧз кылды на. Та калык сярысь пинал дыръям ик кылӥ вал, но нырысьсэ зэмос бесерман адямиен пумиськи университетын дышетскыкум. Со вал Миша Федотов. Сокем со кыӵе ке но яратоно кадь адями вал: чебер, йӧно, зӥбыт, удмуртлыкен тунсыкъяськись, кылбур гожъясь, котькинэн кусып кылдытыны быгатӥсь егит пи. Бесерман луэмзэ ноку но ӧз ваты, куспамы Федотов Миша, яке бесерман Миша шуиськомы вал. Туж лякыт сямыз понна сое дышетӥсьёс но, студентъёс но огкадь ярато вал. Миша пыр мон бесерман калыкез тодӥ но туж мур яратӥ. Та калык сярысь урод малпаны, уродзэ вераны тодам но уз лыкты, малы ке шуоно, та калык пӧлысь Миша Федотов потэмын вал. Эх, Мишае! Малы меда сокем вазь кулӥд! Кӧня лэсьтоно ужъёсыд кылизы... Бесерман кыллэсь словарьзэ дасяны кутскем вал... Кӧня кылбуръёс, поэмаос гожтысалыд на. Астэ ӧд жаля, ӧд малпа ас калыкед понна кыӵе тон кулэ адями вал шуыса. Мишаез кӧня ке пол кури вал вордскем анай - бесерман - кылыныз кылбур гожтыны. Бӧрысь кык кылбур лыдӟиз вал, но огез но возиськемын ӧвӧл. Рукописьёсыз пӧлысь кузпалыз одӥг кылбурзэ шедьтӥз, но таизэ со берлогес гожтэм вылэм ни. Та кылбуръёс оло нош бесерман кыллы письменность кылдытыны инъет луысалзы? Кыӵе жаль, Миша пӧламы ӧвӧл ини, туж пиналысен улонысь кошкиз, дырыз вуытэк. Гажано бесерман калык, солэн азьветлӥсьёсыз, кызьы малпаськоды та мыдланьяськись-бугыръяськись улонамы кылдэс утьыны? Кыл - со калыклэн лулыз- вирыз, кыл ке быре, калык но быре, уката ик солэн гожъяськон культураез ке ӧвӧл. Малы меда Юкаменск ёросысь, кытын самой трос бесерманъёс уло, удмурт филологияя факультетэ туж ӧжыт, яке арен-арен одӥг мурт но дышетскыны уг пыры? Сотэк, кылэз тодӥсь дышетӥсьёстэк, кызьы азинтод кылдэ, культурадэ, татын сяна, кытын дышетод калыкедлэсь историязэ? Ӧй луысал меда Юкаменск ёросын бесерман кылын ёрос газет поттыны? Али элькунамы трос пумо калыкъёслэн эштосъёссы (обществооссы) кылдытэмын, Правительство соослы юрттэт сётэ. Ӧй луысал-а асьмелэн самой матысь, вашкала, бырон калэ вуэм калыклы, нимысьтыз юрттэт сётыны? Ӝоген быръёнъёс. Гажано бесерман калык, ойдолэ, ваньмы ӵош, огкылысь кариськыса, асьме дорын вордскем, асьме калык пӧлысь потэм йӧно, визьмо, дышетскем, асьмелэсь сюлэмшугъяськонъёсмес тодӥсь удмуртэз воргоронэз Удмурт Элькунмылы тӧро быръёме. Соку бесерман калык, удмурт калык кема аръёс улоз кылзэ, культуразэ азинтоз, музъемзэ уз вузалэ, ас музъемезлы ачиз кузё луоз. Вашкала дауръёсы но, та виын но азинскем, визьмо калыкъёс - ваньмыз ас калыкез пӧлысь быръе аслыз кивалтӥсь, азьветлӥсь, йыр. Кыӵе йырыд, сыӵе ик улонэд. Бесерман калык кема мед улоз! Михаил Атаманов, филология наукаосъя доктор Быръён-2000 Ас калыксэ гажаны быгатэ Туэ сӥзьыл ортчоно бадӟым ужрад нокинэ но малпаськытэк палэнэ уг кельты, дыр. Шаермылы нырысетӥ президент быръёмы. Милям малпаммыя П. Н. Вершининлэн нимыз одно ик луыны кулэ элькунмылэн президент кариськыны дасяськисьёс пӧлын. Сое угось котькытын ӟеч тодо, гажало, ярато. Вордскемын со удмурт семьян, йыг-йыг воргорон, туж умой тодэ гурт улонэз, огшоры ужез быдэясьлэсь но кивалтӥсьлэсь сюлмаськонъёссэ. Озьы ик Павел Николаевич ас калыксэ но туж гажась адями. Солэн кандидатураез президент луыны котыр ласянь тупамон. Павел Николаевич, ми Тӥледлы вазиськиськом вуоно президент быръёнъёсы асьтэлэсь кандидатурадэс поттыны курыса. Оскиськом Тӥледды но гажаськом. Балезино ёросысь Орос гуртысь бырйисьёс. Кин кужмогес, шаплыгес? Шаерысьтымы шор ёзо дышетскон заведениослэн улоназы бадӟым инты басьто арлы быдэ ортчылӥсь спартакиадаос. Туэ студентъёс 7 удысъя кужымзэс мертазы: куасэн бызьылонъя, аэробикая, ки кужымез мертанъя, волейболъя, баскетболъя но мукет. Та ӵошатсконъёсы 1000 пала егитъёс пыриськизы. Огъя зачётын пиос пӧлын вормисе потӥзы Ижысь монтажной техникумын дышетскисьёс. Кроссын но куасэн бызьылонын вормыса, огъя кыкетӥ интые потӥзы Сарапулысь радиоэлектроникая колледжысь студентъёс. Куинетӥ луизы Асан совхоз-техникумысь пиос. Нылъёс пӧлын вормизы Ижысь вуоно дышетӥсьёс, кыкетӥ но куинетӥ интыосын Сарапулысь колледж-совхозын но Ижысь торгово-экономической техникумын дышетскисьёс. М.КУЗЬМИН. КЕНЕШОНЪЁС Картофкаез бананэн уд вошты Ортчем арня пумын дорамы люкаськылӥзы Россиысь ӟеч выжы картофка будэтон бордын ужась учёнойёс. Кенешон кык нунал ӵоже мынӥз Гурт удысъя удмурт кун научно- иследовательской институтын. Ортчытӥз сое Россиысь сельскохозяйственной наукаосъя академилэн Северо-Восточной научно-методической центрез. Картофкаез нянь бере кыкетӥ интые пуктӥськом ке, солы саклык но собыдӟа ик висъяське. Та культураен ужанъя странаын 10 центр кылдытэмын, котькудӥз тырше ас улосэзлы тупась но висёнъёслы сётскисьтэм кидыс уськытыны. Азинсконъёссы вань. Со сярысь кенеше люкаськемъёс азьын вераз А.В.Коршунов, картофка будэтонъя Россиысь научно-исследовательской институтлэн кивалтӥсез, сельскохозяйственной наукаосъя академилэн член-корреспондентэз. "Удачалы" � вож сюрес Александр Васильевич селекционеръёсты тодматӥз тужгес но удалтонлыко выжыосын. Соос пӧлын: вазь вуисьёсыз "жуковский ранний", "удача", "фреско, бергес вуисез "резерв", "лукьяновский, "ресурс", "никулинский". "Удача" аслэсьтыз нимзэ зэматэ. Тужгес но вазь вуись картофка удалтонлыкезъя ваньзэ азьпалтэ, соин ӵош висёнъёслы но сокем уг сётскы. "Фреско" Голландиын поттэмын. Нырысетӥ кык аръёссэ со но ассэ умой возьматэ, но отӥяз кужымез лябӟе, пумен пашме. Учёнойёс верамъя, асьме дорын удалто но висёнъёслы уггес сётско Россиын будэтэм кидысъёс гинэ, сьӧрлось ваемъёсыз быро. Тӥни малы эшшо но бадӟымгес саклык висъяны кулэ селекционной ужез азинтонлы. � Картофкалэсь шӧдскымон пайда басьто Чувашиысь, Брянск областьысь хозяйствоос, � пусйиз А.В.Коршунов. � Чувашъёс кидыс будэто теплицаын, питомникын, вирусъёсын нюръяськонъя пӧртэм утчанъёс-эскеронъёс нуо. Интыосын выль выжы картофка уськыто, Вужъёсыз вылэ пыкиськыса. Со сяна, арлы быдэ вошъяськиськом Белоруссиысь эшъёсынымы, юн кусып возиськом Перуысь учёнойёсын. Мерттон материал отысь басьтӥськом. Берло аръёсы поттэмъёсыз пӧлысь Александр Васильевич синмаськемзэ вераз "ильинский ранний" горд картофка сярысь. Сое куинетӥ арзэ будэто Липецкысь ОПХ-ын. Нокыӵе пӧсь кышкыт ӧвӧл, модосысьтыз 12-16 картофка шеде. Шӧмыз ческыт, ӝог пӧзе. "Брянская новинка" алигес гинэ поттэмын Брянскысь учёнойёсын. Та картофкаез колорад бӧчыос уггес басьто, 50-70 процентэз чылкыт кыле. Селекционеръёс киын али эшшо сыӵегес ик 2-3 выжы картофка вань на. А.В.Коршунов шугъяськемзэ ӧз ваты пӧртэм пумо фирмаослэн кидыс будэтон удысэ мерскемзы пумысен: � Соослэн малпанзы одӥг: дорамы поттэмъёссэ быдтон но кунгож сьӧрысь кидысэз вӧлмытон. Ленинград областьысь огаз опытной участокын соос нимысьтыз адӟытон ортчытӥзы. Туж возьматэмзы потэ вал сьӧр картофка выжыослэсь вылӥынгес луэмзэс, но выставказы пӧрмиз антирекламалы: кезьытэн эскеронэз соос ӧз чидалэ � пудъёссы супыляк лэзькизы. Асьме дорын уськытэмъёсыз вож борддор кадь сылӥзы. Мыным туж кельше "удача" вазь вуись картофка. Фитофторлы со уг сётскы. Таин артэ ик пуктысал Украинаысь селекционеръёсын поттэм "луговской" выжыез. Жаляса верано, таизэ сортэз парша басьтэ ни. Вылӥ урожай басьтонын туж валаса но быгатыса кутоно минерал сылалъёсты. Та вакытэ самой ӟечен лыдъясько Финляндиын поттэм гранулаос � кемира, асьмелэнэз нитроаммофоска. Но кемираен сое уд ӵошаты. Соин ик, кин малпа вылӥ урожай будэтыны, коньдондэс эн жалялэ: кемира пайдаен берыктоз. Данакез хозяйствоос селекционеръёслы вазисько, "лорх" выжы картофкаез выльысь берыктыны курыса. Жаляса верано, сое вӧлмытон бордын али кык ОПХ сяна уг выры ни. Но, куронъёс вуо бере, ми одно ик берытском вуныны кутскем культура борды. Бӧчыез машина бича Колорад бӧчылы пумит нюръяськонын кыӵе но амал ӧз утчалэ ни, нош огез но та тушмонэз пумозяз уг быдты. Со арысь аре ӧчкарыса сямен йылэ, калык хозяйстволы бадӟым ыштон вайыса. Кунгож сьӧрын кемаласьгес та ужез ас вылаз быдэсак сямен басьтӥз техника: нимысьтыз машинаос бусыосты изъянтӥсьёслэсь сузяло. Басьтоно ке, туж дуно: одӥгез ог 30 сюрс доллар. Кызьы шуиз Россиысь картофка будэтонъя НИИ-ысь отделлэн кивалтӥсез В.И.Старовойтов, асьме дорын дасям техникалэн дуныз 8 сюрс доллар. Огшоры культиватор борды юнматӥське пылесос выллем агрегат, чуръёс вискытӥ ортчыса, изъянтӥсьёсты пушказ "ньылэ". Дуно ке но, басьтӥсь вань, машина вакчи дыр куспын асдунзэ берыктэ. Удобрениос пӧлысь Виктор Иванович дэмлаз на биогумусэз уже кутыны. Эскероно участокъёсын со 20-30 процентлы урожаез ӝутӥз. Зэм, дуныз дуно. Сое пононо мерттоно картофкаен ӵош, быдэс бусые пазятэк. Гектарезлы быдэ мынэ 2 тонна. Картофкаез уте нюлэс "Кыкетӥ няньлэн" тушмонэз трос гинэ. Огез соос пӧлысь, тужгес но кышкытэз � вожтэй (тля). Та висён алямын ни лымшор палан, Татарстан но соин валче трос ыштонъёс адӟе. � Удмуртие вожтэй ӧз каръяськы на, бусыосмес утё нюлэсъёс, � шуиз асьмелэн учёноймы, картофка будэтонъя тодмо специалист Н.В.Донец. � Висёнъёсъя ке учконо, Удмуртиын солы уггес сётско "невский" но "лорк". Таиз гужем картофка понна секыт ортче, шуыны луоз. Кык арня ӵоже дугдылытэк кисьтӥсь зоръёс, кезьыт уйёс дыраз уд лэзьыны люкетӥзы. Бергес мерттӥм но: 27-тӥ, 28-тӥ мае, нош кулэ вал майлэн кыкетӥ декадаяз муэ согыны. Урожай вылын одно ик шӧдӥськоз пыжись июль. Опытной участокъёсын картофка шер потэмын: тросэз музъемын сисьмыны шедиз. Кыӵе выжы асьме палан тужгес но умой будэ? Соос пӧлы пыртыны луоз "весна", "жуковский", "свитанок", озьы ик "луговской", "невский", "зарево", "италмас", "жёлтый ранний" сортъёсты. Удмуртиын улӥсьёс пӧлысь тросэз та картофкаосты тодо ни, ӟеч урожай басьто. Учёнойёс туннэ но азинто ӟеч выжы кылдытонъя удыссэс. Бадӟым инты басьтэ висёнъёсын нюръяськон, тупаса удобрениос утчан. Та ласянь Удмуртия бере уг кыльы. Ачиз инкуазь но "кыкетӥ нянез" будэтыны юрттэ бере, озьыен, пайда ваись культураез возьыны киыз но пыдыз. *** Кенешонэ лкюаськылӥзы Брянскысь, Костромаысь, Якутиысь, Марий Элысь, Татарстанысь, Москваысь, Пермьысь но куд-ог мукет регионъёсысь учёнойёс. Соослы кельшиз сюлмысь вераськон, ӝутэм ужпумъя ог-огедлэсь дышетскон. Та выллем пумиськонъёс кулэ, малы ке шуоно, гурт удысэз ӝутытэк, асьме дорын элита выжы уськытытэк, кунгож сьӧрысь ваеменыз кӧттэ уд тыр. Л.МЕДВЕДЕВА. "Купол" ужа мукет кунъёс понна Президентлэн В. Путинлэн куремезъя, та нуналъёсы "Купол" ЭМЗ-лэсь ужамзэ эскере Лыдъян палаталэн аудиторез А. Ножников. Та заводлэн югдурез милемлы тодмо ни вал эскерон кутскемлэсь азьло ик, шуиз А. Ножников. Завод зол ужа, ужасьёслэн мылкыдзы туж умой. Но одӥгезлы туж паймоно: малы заводлэн вань продукциез кунгож сьӧры кошке? Солэсь ож тӥрлыксэ данакен басьто Китай, Греция. Нош асьме государстволэн ЭМЗ-лы нокыӵе заказъёсыз ӧвӧл. Татын поттӥськись техника али туж кулэ луысал Чечняысь солдатъёсмылы. Александр Ножников верамъя, Россиын асьме ЭМЗ сямен ужась предприятиос мукет улосъёсын но вань. Кылсярысь, Тулаысь патронъёс поттӥсь заводлэн продукциез но быдэсак кунгож сьӧры кошке. Таӵе заводъёслы кунмы ӧз ке юртты, асьме армия куашкалоз, меӵак шуиз аудитор. Жаляса верано, туннэ куд-ог обороная предприятияос гинэ тазьы уг ужало. Му вӧй, чагыр эстӥськон поттӥсь предприятиос но меӵак кусыпъёс тупато палэнысь кунъёсын. Лыдъян палатаысь специалистъёс, вань та учыръёсты огазе карыса, ас йылпумъянъёсынызы вазиськыны кулэ Федерацияя кенеше, Правительствое но Президентлы. Вераны кулэ, Лыдъян палатаен али кивалтэ, С. Степашин. Солэн кивалтэмез улсын 12 аудитор гинэ ужа... Быдэс Россиез эскерыса возён понна со туж ӧжыт, соин ик палата матысь кусыпъёс возе улосъёсысь Эскеронъя комитетъёсын. Т. Банникова. Кылдэ сётӥд но солэн ужез Кылдэ сётӥд быдэсты Тазьы ужаны тырше Кун Кенешлэн депутатэз Валерий Сергеевич Суркин. Талы дышетӥзы сое, КГБ-лэн институтаз дышетскыкуз. Пусйыны кулэ, ӵапак та институтэз йылпумъяз Россилэн Президентэз Владимир путин но. - Валерий Сергеевич, Кун Кенешлэн берпуметӥ сессияз тӥ депутатъёслэн "Медведь" группаязы пыриды. Вералэ вал, кыӵе ужпумъёс азяз пуктэ та выль огазеяськон? - "Медведь" группа кылдӥз "Единство" партилэн кивалтӥсь ёзъёсызлэн кичӧлтэмезъя. Вераны кулэ, партия тужгес но бадӟым ужпумен лыдъя закон кылдытъясь но быдэсъясь ёзъёсын кусып возёнэз. Ӵапак соос пыр ук со юнматыны но улонэ пыӵатыны быгатэ политикаын курссэ. "Единство" дурбасьтэ рынокен экономикалы но правоя улӥсь кунэз юнматонлы. "Медведь" депутат группа та удысын эшшо одӥгез вамыш луэ. Ми тыршиськом партиен ӝутэм ужпумъёсты асьме улосын быдэсъяны. Туннэ кулэ ӧвӧл ни, Отын котькудӥз ик огкадь мед быгатоз. Асьмеос юрттыны кулэ пичи но шоро-куспо ужбергатонлы. Страналэн но элькунлэн кивалтӥсьёссылэсь та ласянь кичӧлтонъёссэс "Медведь" группа котьку но умоен лыдъялоз. Пусъеме потэ, огазеяськонмы мукет фракциосысь депутатъёсын валче ужа. Угось куд-ог журналистъёс милемды янгыше уськытыны дыртӥзы, Кун Кенешын али ужась фракциосты пазьгыны выриськом шуыса. Ми тыршиськом фракциослэсь ӵош, пайдаё ужзэс радъяны, солы люкетӥсь токма керетонъёсты палэнтыны. Озьы гинэ угось ӟеч законъёс кутом. - Озьы ке но, тӥ - нимаз депутат, тӥляд асьтэлэн бырйисьёсты. Парламентын ужды сярысь пыр-почгес вералэ вал. - Мон ачим ужасько бюджетъя, вытъёсъя но коньдон ужпумъёсъя комиссиын. Та вакытэ комиссия тужгес бадӟым саклык висъя коньдон ужпумъёслы. Туэ республикалэн бюджетаз вуись доходъёс нырысьсэ азьвыл пусъемлэсь тросгес люкаськизы. Озьы ке но, со тырмыт ӧвӧл на улосысь быдэс экономикаез улӟытыны. Юрттоно интыысь ваньбур поттӥсьёслы. Соин ик, мон малпасько, дорамы поттэм вузъёслы вытъёсты будэтоно ӧвӧл, кылсярысь, соосты вузамысь басьтӥськись вытэз ик. Мукетсэ но вераны кулэ: калыклэн уно коньдонэз токма, пайдатэк кылле, экономикаез азинтонэ но уг кутӥськы. Угось адямиос кышкало уксёзэз кытчы ке палэнэ сётыны. Та ласянь ӟеч ужаны кутскиз, шуыны луоз, "Евразия" банк, со басьтӥськиз вкладчикъёслэсь коньдонзэс берыктонъя гарантиоссэ юнматон борды. Мукет ужъёс сярысь верано ке, куд-ог мукет депутатъёсын ӵош ми быгатӥм бюджетэ пыртыны Ижевсклы 100 миллион манет висъянэз. ваньмыз со кутӥськоз улон юртъёсты возёнэ но тупатъянэ. - Валерий Сергеевич, иворъёсъя ёзъёсын ӝутскылӥз тӥляд округады быръёнъёсъя йылпумъянъёсты выльысь эскерон пумысен ужпум тӥледды янгыше уськъязы, кузьмаськыса котькинлэсь трос куара люкады шуыса. - Тау та ужпумез ӝутэмды понна. Азьланяз таӵе супыльтонъёс медаз ни луэ шуыса, ивортӥсько: Россия Федерациысь Вылӥ Судлэн Граждан ужъёсъя коллегиез быръёнъёсъя йылпуъянъёсты туэ май толэзе шонерен лыдъяз. Оппонентъёсылэсь законодательствоез тӥян сярысь верамъёссэс Вылӥ Суд санэ ӧз басьты, угось соос зэмесь ӧй вал. - Тау, Валерий Сергеевич, кенешемды понна. Депутат ужады азинсконъёс сизиськом. Выль сиён веръялом Котькуд аре удмурт калык чидатэк возьма тулысэз-гужемез. Бадӟым ужрад кутскыку яке йылпумъяськыку, огазе люкаськыса, инмарезлы куриськыса-вӧсяськыса, шулдыръяськыса синмаськымон праздникъёс ортчытъя. Таӵе дыръя возь вылэ лыктэ пересез но, пиналэз но. Огдыре та сямъёс вуныны кутскизы вал ини, уката ик городъёсамы. Нош берло аръёсы Иж карысь удмуртлыкез яратӥсьёс тодазы вайыны кариськизы вашкала йылолъёсмес. Озьы пусйиське Вӧйдыр, Дӧдьы куштон, Гуждор, Гербер... Туннэ нимаз вераме-гожтэме потэ Выль праздник сярысь (трос интыын сое Виль шуо). Ижын сое ортчытъян борды сюлмысь басьтӥськиз удмуртлыкмес ӝутӥсь тодмо адями Семен Андреевич Ильин. Уноез удмурт парздникъёсмы огдыре тупало ӟучъёсыныз, соин ик соос огнуналэ ортчытъясько. Виль нуналэ гужемлэн пумыз кыдёкын ӧвӧл ни. Та дыре бакча сиёнъёс, юос, пӧртэм мульыос вуо-кисьмало, пинал пудо юнма. Котькинлэн кӧс-пӧсь гужем бере веръямез потэ выль ческыт сиён, соин ик праздниклэн нимыз но Виль. Пырак та дыре ик, 2-тӥ гудырикошконэ, Иисус Христос инмарлы оскисьёслэн Ильин нуналзы. Туэ инкуазь, инмар, шуыны луоз, асьмеды та дырозь уг кушты: дыраз зоре, дыраз пӧсь улэ, соин ик будосъёс удалтэмын. Ю-нянь, турын-куар умой ке, пудоослэн но пайдазы уногес луоз. Али сое дыраз утялтыны гинэ кулэ. Ивортӥськом, инкуазьмес, удмурт сямъёсмес гажасьёс-яратӥсьёс нош ик пумиськозы 2- тӥ гудырикошконэ Игерман шур дурысь сяськаё возь вылын. Виль дыръя кырӟанъёс Ми пукимы, веник керттыса Ми пукимы, веник керттыса, Веник, веник, веник керттыса. Веник керттыса, Москвае лэзём. Москва, Москва, Москвае лэзём. Москвае лэзём, солы дун басьтом. Солы, солы, солы дун басьтом. Чебересь нылъёс ӝӧк сьӧрын пуко, Ӝӧк сьӧр, ӝӧк сьӧр, ӝӧк сьрын пуко. Ӝӧк сьӧрын пуко, сяськаен шудо, Сяська, сяська, сяськаен шудо. Сяськаен шудо, изьы лэсьтыса, Изьы, изьы, изьы лэсьтыса. Шушесь экеос ӧс дорын сыло, Ӧс дор, ӧс дор, ӧс дорын сыло. Ӧс дорын сыло, сюмык возьмаса, Сюмык, сюмык, сюмык возьмаса. (Котькуд чурез кык пол кырӟано.) Оринае, лык дорам 1. Оринае, лык дорам, Сутэр-эмезь кудыям, Пушмульые кисыям. Припев: Пӧяськод ке, Педоре, Мышме адӟод табере, Котьма кар ни собере, Ӧд ке пӧя, Педоре, Ӟыгырском ни табере, Котьма кар ни собере. 2. Оринае, лык дорам, Сяла-дукъя песьтэрам, Нош коньые кисыям. 3. Оринае, лык дорам, Горд кышетэ сумкаям, Зарни зундэс кисыям. 4. Оринае, лык дорам, Выль катае пуйыам. Чырты весе кисыям. 5. Оринае, лык дорам, Шудо луод мон вӧзам, Шунды луод коркаям. Дарт Чеберина Йырсиосме лӧсъяло - ваньзэс-ваньзэс гочато Пинал эшъёсмы, чебер йырсилы сӥзем конкурсмы азьланьтӥське. Чеберайёсты ар пумын возьмало йырсиез утялтон синпель кузьымъёс. Я, кинлэн гочатэмез потэ на йырсиосыныз? Оло, йырси пунэттылы синмаськыса ик кин ке эшъяськыны но мылкыд кароз. Таиз чебераймы Пичи Пурга ёросысь Яган-Докья посёлокысь Надежда Посадова. Надялы 14 арес, йылпумъяз 8-тӥ классэз. Ачиз сяряысь со гожтэ: - Яратӥсько суреданы, уката ик пӧртэм дӥськутъёсты. Тунсыкъяськисько экологиен, тыршыса дышетскисько. Нош йырсиме будэтыны юрттӥз анае, таӵе кылъёс вераса: "Буд-буд, йырсие, кикур зӧкта, карнан кузьда". *** Влада Митрофановалы ньыль арес гинэ ай. Улэ со Алнаш черкогуртын. Яратэ кырӟаны, эктыны. Йырсизэ утялтэ анаез, нылпи садысь воспитатель. Ачиз но Влада синучкон азьын чеберъяськыны яратэ. Нокин адӟымтэ дыръя одӥг пол йырсизэ ачиз качыен вандылӥз, собере анаезлы ушъяськиз, мон, пе, йырсиме ачим чебер кари ни. ДАРТ Кытын тӥ, ломоносовъёс? Арня талэсь азьло йылпумъяськиз абитуриентъёслэсь вылӥ дышетскон заведениосы куриськонзэс кутон. Кылем ар сярысь туэ дышетскыны мылкыд карисьёслэн лыдзы трослы будӥз. Кылсярысь, Медициная академиын � 50 процентлы, мукетъёсаз кӧня ке ичигес. Ваньмаз ик собеседованиос валтӥсь экзаменэн воштэмын вал � медалистъёс угось йылӥзы. Со сяна, туэ Гурт хозяйствоя академиын удмурт кылын гожтэм ужъёсты кутэмысь дугдӥзы. Кутӥсь комиссилэн валтӥсь секретарез тае валэктӥз, Калыкез дышетонъя министерстволэн куронъёсыз вылэ пыкъяськыса. Али абитуриентъёслэн ӟырдыт вакытсы. Со кык-куинь арня пала кыстӥськоз на. Экзаменысь потэмъёс шоры учкыны серем но, ӝож но. Кыӵеез гинэ соос пӧлын ӧвӧл! Вылтуссыя валаны но шуг, кыӵе дунъет сётӥллям. Куд-огезлы "вить" но секытэн сётӥськем, лэся, шулӟектыса пото. "Куинь" басьтэмъёс ӵемысь асьсэды пыкыло: "Подготовительной курсъёсы ӧй ветлы но тӥни..." Одӥг нылаш йӧлвыл сием коӵыш кадь гань-гань мыняса потӥз. Соин вераськыса тодӥ, подготовительной курсъёсы ветлэм. Дышетӥсез но та нылэз ушъяз. Ваньмыз пӧлысь тужгес но тыршисез, пе. Бен угось, кызьы шуиз тодмо ӟуч полководец, секыт дышетскыку, лякыт ожмаськыку. Кышкыт-а? Кышкыт. Билет басьтон азьын но, сое кияд кутыку но, йыр буш бекче кадь тырттэм, сюлэм ымтӥ потымон ик йыгаське. Ӧжытак буйгаса, билетысь юанлэсь пуштроссэ валаны кутскиськод, пумен валэктонэд но кылдэ. Бен, ӵемтылӥсьёс но вань. Университетэ пырон экзаменъёс сётыку, ми пӧлысь одӥгез "Гаян" романлэсь валтӥсь геройзэ вераны ӧз быгаты, сое гожтӥсьсэ вератэк ини. Кин ке деепричастиез причастиен сураз-пожаз... Со кышканэн сэрен ма гинэ уг луы, "сазь йырын" ноку но озьы ӧд верасал, нош со адӟемпотостэм кышкан сям... Вашкалаосмы шуо вал, кышканлэсь дунне вылын бадӟымгес сьӧлык ӧвӧл ни. Тани экзаменысь потэ нылаш. Туж визьмо тусо, но ымнырыз кӧдэктэмын, синъёсыз гордэктэмын. Кыӵе юрттэм потэ вылэм солы. Но кызьы, кылъёсын гинэ шат? Валасько мон со нылашез. Туж секыт. Экзаменъёс бырем бере гинэ дышетскыны пыремзэ тодыса, лякыт потэ. Ачим но школаез быдтон но университетэ пырон аре тямыс экзамен сётӥ. Ох и жади! Гуртам вуыса, сумкаме куштӥ но, пумиталэ шудтэм абитуриенттэс шуыса, гольык выж вылэ пукси. Бӧрдэме но, серекъяме но уг поты, уг но луы, йырын одӥг малпан: кӧлоно. Кинлы кызьы, трос уксёё муртъёслэн нылпиоссы сыӵе уг курадӟо, шуо. Нош мыным потэ, со нылпиос ӝӧк вылысь няньлэсь ческытсэ но дунзэ уг валало. Вузъёсы пырон ласянь берло дыре бадӟым эрик сётэмын. Дышетӥсьёс но преподавательёс арысь аре визьмо луо: йыразы "кеньырен" адямиосты дышетон понна пӧртэм амалъёс шедьто, уго сыӵеосын ужаны но тодон-валан сётыны, кызьы асьтэос тодӥськоды, капчи но лякыт. Нош коньдон вылэ гинэ чӧлскыса улӥсьёс коньдонзэс пыдэстэм бекчее куяло � ньӧмыз понна диплом басьтон понна. Москваысь сое дунтэм дунын но шедьтыны луэ, пе. Шуо ук, зэмос визь понна лыктэм муртлэн ымнырыз ик мукет луэ, визьмо дышетӥсь соосты ачиз шедьтэ. Тодады вае ай Ломоносовез. С.ПЕТРОВА. Удмурт Республикаысь Югдурез утёнъя министерство ИВОРТЭ: Удмурт Респуликаысь Югдурез утёнъя министерствоын йылпумъяське Россиысь МВД-лэн учреждениосаз дышетскыны мылкыд карисьёсты быръён ужрад. 1-тӥ августысен кутско экзаменъёс. Россиысь МВД-лэн учреждениосаз дышетскыны пырись абитуриентъёслэн тодон-валанзылы шонер дунъет сётон вылысь, "Абитуриент- 2000" пӧсь телефон ялэмын. Москваысь телефонъёс: (8-095) 239-50-91, 239-63-77 но 239-50-89. Ижевскысь оскон телефон ужа уен-нуналэн � 55-73-73. Мылкыдзэс веразы Волков понна Кысык вакыт али гуртын улӥсьёс но политикъёс понна. Гурт калыкез тужгес но сюлмаськытэ пудо сиён дасян, нош политикъёсты - республикамылы нырысетӥ президент быръён. Таяз арняе Ижевскысь куд-ог коллективъёслэн кивалтӥсьёссы огинэ люкаськыса кичӧлтонэн потӥзы президентэ кандидатэ А. Волковез ӵектыны. Соос пӧлын вал Ижевскысь радиозаводлэн валтӥсь директорез И. Валиахметов, Ижевскысь медициная кун академиысь профессор К. Серебрянникова но Удмуртиысь калык артистка В. Пудова. Александр Волковлэн кандитатураез понна озьы ик дурбасьтэ Удмуртиысь нылкышноослэн огазеяськонзы. Т. Миронова. ДАРТ Уй ас сьӧраз кыске Акшан вакыт. Пеймыт но ӧвӧл на, нунал но ортчемын ни. Та дыре, пиналъёс сое тодо, омырын номырин ӵошатыны луонтэм шӧм вӧлме. Со сьӧраз кыске. Малы егитъёс, ог-кык ӝыт урамъёстӥ поръямзы бере, мумы-бубыоссылэсь алэмзэс пелязы уг ни поно? Шуоды яратон? Нылъёс? Пиос? Соин гинэ ӧвӧл. Соосты уйлэн зыныз кыске, кутонтэм зол шӧмаськемзы потэ. Ӧвӧл, наркотик сярысь вераськон уг мыны. Но уй со � висён. Ваньмыз сямен висёнъёс эмъясько. Нош таиз? Тросэзлэн ортче кузпал шедьтэмзы, нылпи ваемзы бере. Озьы ке но, вань пӧлазы йӧнамтэосыз, "вож кыен" герӟаськем сямен ик. Соку та аспӧртэмлыко висён адямиез быдэсак капыртэ. Таӵеос пӧлы пыро "уй бубылиос" но юыса, шулдыръяськыса сюрес кузя ветлӥсь нылъёс. Ойдолэ тодматском соосын. Черко гуртысь огшоры урамын вож буям пуллэсь корка сылэ. Кузёосыз кошкемын бигер шаере. Улон интызэс Агрызысь ньыль нылъёслы кельтӥллям. Кык ар улэмзылы дун басьтыса. Та нылъёс "тыршо" черко гурт вӧзтӥ кошкись сюрес вылын. Куд-ог дыръя пиосмуртъёс доразы но ветло. Юрт штакетникен котыртэмын. Капкаез усьтыса пыриськом азбаре. Син шоры йӧтэ утялтымтэ бакча. Гидкуазьын костасько презервативъёс, сигарет пумъёс, спичкаос. Корка пушкысь мебель � диван, телевизор изён интыос,� корка кузёзылэн. Нылъёс чылкыт уло шуыны уг луы, кунооссы уг буырыло угось. Соин ик утялтӥськыны но ял карыны дырзы "вузаськисьёслэн" трос ӧвӧл. Али но тани тэк уг кыллё, уже дасясько. Огез синкаӵъёссэ буя, мукетыз вакчи юбказэ дӥся. Тӧрозы дыртытэ. � Чалякгес, кӧня клиентъёсты ыштом! Нылъёс шаплыяськизы. � Кошким! Куиньназы но вакчи дэремъёсын но тӧдьы пыдкутчанъёсын. Огпол но адӟеме ӧвӧл ужазы сьӧд туфлиен потэмзэс. Ульчаын тём-тём луиз ни. Нылъёс вуизы милиция пост доры. Ӟечбуръяськизы югдурез утисьёсын. Кулэ дыръяз соосты нылъёс уксётэк "куноято". Пост дурын кыдёке мынӥсь машинаослы кӧлон инты тупатэмын. Тӥни татын "ужало" ньыль тодмоосмы. Наташа � "мамазы" � утча клинетъёсты. Ачиз уг ужа, кивалтэ гинэ. Черко гуртысь мукет пинал нылъёс но "шутэтскыны" татчы потало. Дырын-дырын "лобась" (пӧртэм городъёсын "ужась") нылъёс вуыло. Ваньзы соос арнялы быдэ рекетлы "дань" тыро. Та пост дурын мылкыддэ огпол веськатэмлы сизьымдон манет тыроно. Нош Москва пала мынӥсь трасса вылысь дунъёс витьтон манетысен сю витьтонозь тэтчало. Удмуртиетӥ кошкись сюрес вылын но вань вылӥ дунъёс. Тани шаерысьтымы Татарстан пала нуись сюрес дурын кафе-бар пумиське. Татын трос гинэ "бубылиос" поръяло. Бырйы, кыӵеез тыныд кулэ: сьӧд йырсиёзэ яке мертчан кадьзэ, сьӧд синмозэ яке чагыр пиштӥсьсэ, тазазэ яке веськрессэ. Шутэтскон понна сауна но, бассейн но пуктэмын. Соин дунъёс татын вылӥгес. Берытском черко гуртын улӥсь нылъёсмы доры. Наташа огез машина дорысь мукетаз вамыштэ, нылъёсты ӵектыса. � Альбина, лык дорам. Та пияшъёсты "куноятод". Собере "КамАЗ" доры вамыштӥз. Усьтӥз ӧссэ. � Нылъёс кулэ-а? � Кӧня басьтӥськоды? � Дунъёсмы кемалась ӧз ни вошъяське. Сизьымдон. � Ойдо веръялом вуздэ. � Адӟиськод-а, кык кузя тӧдьы туфлиен сыло. Кудзэ бырйиськод? � Тазазэгес. Солэн ма борды кырмиськонэз вань. Со вие артысь машинаын керетон кылдэм. Ченгешемез кылыса, "мамазы" утыр вуиз. � Таня, ма татын? � Презервативтэк утялтӥськемез потэ. � Мусое, висемед ке потэ, сюреслэн мукет палаз пот, отын "костаськись" нылъёс трос. Нош мынам нылъёсы чылкытэсь, тон кадьёслэсь мон соосыз утисько. Та гуртын ик уло кык сузэръёс. Соос но асьсэзыс вузало... водка, сур, шоколад яке кӧня ке манет коньдон понна. Асьсэды чакланы уг валало, юрӟым соос шоры учкыны. Пото та нылъёс сюрес дуре, нырысь дугдытэм машинае пуксё. Кутско шофёр борды биниськыны. Кудӥз васькытыса кельтэ, нош кудӥз шумпотэ дунтэм "вузлы". Одӥгез кыдёкысь вуз нуллӥсь шофёр шуэ: � Пуктӥ мон со нылэз. Кабинаын шоканы луонтэм зын вӧлмиз. � Малы дугдӥды? � Кытысь тодӥ кин со. Малпай, егит ныл дораз бертэ яке дышетскыны мынэ. Пӧртэм муген адямиос сюрес вылэ пото ук. Нош со: "Ондӥ, мынам юэме потэ, ойдо бар доры дугдом, вай уксёдэ". Сюрес вылэ кельтӥм. Пачка тамакмес капыртыны вуэм. Тӥни та калэ вуыны быгато уй висёнэн курадӟисьёс. Туж сюлэмшугъяськытэ трасса вылын ӝыт пал. Укыр трос егит нылъёс калго. Пиналъёслэн та висёнэн нюръяськыны кужымзы уг трымы, улонзэс киязы кутыны уг быгато. Егитъёслэн гинэ шуг-секытсы ӧвӧл со. Быдэс нацимылэн данэз куашкамын. Малы азьло, коммунистъёс дыръя, таӵе сюлэмшугъяськонъёс ӧй вал? Адямиос улонзылы оскизы. Омырысь пуктэм корка куашказ. Соин валче быриз адямиослэн умоезлы осконзы. Странаямы паськыт вӧлмиз лушкаськон, адямиез виён, астэ вузан. Лябомиз адямиез кырыж пушказ возись строй. Сӧриськиз адямилэн лулпуш дуннеез. Паськыт вӧлмизы газетъёсын, телевизорын секс сярысь пелез вандӥсь веранъёс. Западысь фильмъёсты учкыса, пиналъёс малпазы, асьсэды но озьы возёно. Пинал поколение улон шоры мукет синмын учкыны кутскиз. Асьмеос туэ оскалтӥськом "выльдӥськон" писпулэсь емышъёссэ. О.КОЖАНОВА. Чакласькись муртэ инмар но уте Та вакытэ гурт калыклэн кысык дырыз: пудо сиён дася, юосты октэ-калтэ. Нош кызьы меда та будэтэм ваньбурзэ утялтыны сюлмаське? Алигес шаерысьтымы тылпуэн нюръяськисьёс вуылӥзы Воткинск районысь хозяйствоосы. "Двигатель" акционер огазеяськонлэн гаражаз кык воргорон техниказы котырын берга вал. Артэгес сылӥсь тылпу кысон машинаез интыысьтыз ӧд вырӟытысалыд � эстӥськонтэк кельтэмын. Ӧм шедьтэ телефонзэс но. Зэм, тупатэмын рация, кудӥз я ужа, я уг. 2 ар талэсь азьло таӵе ик пӧсь куазен хозяйствоысь одӥгаз фермаын тылпу ӝутскиз. Электроен ужась тӥрлык кулэ куронъёслы тупамтэен, пудо сиёнлэн ог люкетэз сутскиз. Ярам, бадӟым тылпу ӧз поты. Оло, соин кивалтӥсьёслэн иназы мынымтэ, шӧдске. Со сярысь вера ю тысь куасьтон комплексын но тылпулэсь утиськон куронъёсты быдэсъямтэзы. Кытчы эн учкы � ошылӥськем электропроводъёс, рубильникъёс пу инъетъёс вылын ӵашъёнлэсь утиськон ӧвӧл, тылпу кысон тӥрлыксы ньӧмыз понна гинэ возиське. Уно юанъёс сётэм потэ вал "Двигательлэн" кивалтӥсезлы А.Сусловлы. Но жаляса верано, утчаса сое ӧм шедьтэ. Та выллемгес ик суред усьтӥське "Мир" хозяйствоын. Кивалтӥсьсэс Д.Калининэз ӧм пумиталэ. Но кенешим агрономен И.Перевощиковен. Со веранзэ ас палаз куасалтӥз, хозяйстволэн секыт югдурез вылэ. Нош милемыз уногес сюлэмшугъяськыто тылпулы пумит кутэм ужрадъёс. Таиз зэмзэ но куашкатэмын. Тылпу вакытлы чаклам автоцистерна сэрттэмын, ку сое тупатозы, агроном вераны ӧз тоды. Ю куасьтон-шертон комплексын вузы ӧвӧл, шуыны луоз. Бытовкаын тыл ӝуа "жучокъёс" пыр, нокыӵе куронъёслы уг тупа асьсэ киын лэсьтэм гурзы. Нош тылпу кысон баллонъёс сярысь кылэмзы-адӟемзы но, оло, ӧвӧл. Агроном верамъя, хозяйствоын 200 тонна турын люказы ни. Возё сое лапасъёс улын, возьмаськисьёс уен-нуналэн эскеро. Озьы ке но, кышкытлык возиське: артэ ву ӧвӧл, нош тӥрлыксы � лопата но ведра. "Позимское" акционер огазеяськонлэн кивалтӥсьёсыз А.Илемков но В.Майер шумпотыса ивортӥзы, 497 тонна витаминэн узыр вож сиён дасязы шуыса. Уйёсы, пе, возьмало, автомашина но ки улазы. Пудо сиёнэз арам луэмлэсь утемзы � соиз умой. Нош тылпу кысӥсьёслэн куронъёссы татын но уг быдэсъясько вылэм. Зэм, "горд атасэз" кортнан вылысь автоцистерна возё, отысь бензинзэ гинэ малы ке мукет ужъёсы куто. Матысь тыметозь 4 иськем, эстӥськонтэк, кызьы валаськоды, машина интыысьтыз но уз вырӟы. КЗС сярысь ке верано, таиз ӝоггес бакча сульдэрлы укша. Со, пе, куинь пол ужан дырзэ ортчем ни, озьы ке но, бадӟым кужымен ужато. Ӧвӧл тыл кысон арбериоссы. Нош ӵап татын миым 2 комбайнзы гомӟиз вал. Огнетушительёсын кысӥзы. Та учыр сокем ӝог вунӥз шат? Татын но электропроводъёс ошылӥськемын. Вань телефонзы. Но возьмаськисьсы шуэ, тылпу потыку, нырысь жингырто кладовщиклы, собере управляющийлы. Котькудаз та хозяйствоын тылпу потыны быгатоз. Вылтӥз чакласа-учкыса гинэ син шоры трос тырмымтэос йӧто. Кин янгыш? Нырысь ик хозяйствоослэн кивалтӥсьёссы но энергетикъёс. Пудо сиён возён интыос сузямтэ, турын-куро пазяськемын. Азьланяз но таӵе югдур возиськиз ке, "горд атас" чаляк лопырскоз. А.ЕМЕЛЬЯНОВ, А.ЛЕЩЕВ. Питрало поглянъёс Тросэз уг тодо, ма со маутинбайк. Нош Удмуртиысь спортсменъёс тодэм гинэ ӧвӧл, та удысъя Россиын кужмоосыз луо. Сое нош ик возьматӥзы Санкт-Петербургын Россилэн кубокез понна велокроссъя ортчем ӵошатсконъёс. Вань вылӥ интыосы асьме шаерысь пиос потӥзы. Воргоронъёс пӧлын Кубокез утӥз Александр Стрелков. Колёсаез пасяськиз ке но, огъя кыкетӥ интые потӥз Максим Гоголев. Пиналгес спортсменъёс пӧлын ас арлыдзыя нырысетӥ интыосы потӥзы озьы ик асьмелэнъёс: Алексей Медведев, Евгений Печенин, Алексей Боталов. Уй пал столицаын ик ортчизы егитъёс пӧлын шоссе вылын ӵошатсконъёс. Ижысь 2 номеро спортшколаысь велосипедэн ворттылӥсь Елена Шалаева, нырысетӥ интые потыса дуннелэн чемпионатаз Францие мыныны путёвка утӥз. Дарт Гужем-2000 Пургаын улон берга Калыкез дышетон удыс пыр туэ Пичи Пурга ёросын гужем каникулъёс дыръя шутэтскозы, ужалозы но тазалыксэс юнматозы 8117 пиналъёс. Ваньмаз сямен дышетскон учреждениосын усьтэмын нылпи площадкаос. Пиналъёс отын нуналаз 30 манет тыр сисько. Со сяна, бадӟым классъёсын дышетскисьёс понна радъямон ужанъя но шутэтсконъя лагерьёс, производственной бригадаос, лесничествоос, лэсьтӥськон бригадаос. Пиналъёс озьы ик ужало школалы бакча-сиён будэтонын. Куд-огез дышетскисьёс ас мылкыд карезыя - гурт предприятиосын. Спортсменъёслы, усточи нылпиослы, кружоке ветлӥсьёслы, "витьлы" дышетскисьёслы усьтэмын нимаз лагерьёс. Пиналъёс отын ик кӧлало, сюдо соосты нуналаз 50 манет тыр. Пурга пиналъёс шутэтско шаерысьтымы нылпиослы радъям "Сосновый", "Дружба", "Юность" лагерьёсын. 30-эз ужало но шутэтско Краснодар улосын. Вунэтэмын ӧвӧл ӧлексы, анай-атайтэк кылем покчиос. Соос но быдэс нуналъёсын шутэтско лагерьёсын. Участокъёсъя ньыляз больницаосын лагерьёс усьтэмын ляб тазалыко пиналъёслы. Нош Яган-Докьяысь шор ёзо школаысь бадӟым классъёсын дышетскисьёслы Удмуртилэн палэназ вуылыны турпоход радъямын. 10-тӥ классэз йылпумъям пиос тазалыксэс юнматӥзы но сӥльвирзэс кыдатӥзы Пугачёвоысь воинской частьлэн базаяз. Нылпиослэсь гужем шутэтсконзэс радъяны коньдонэн юрттӥзы: ёрос бюджет - 80 сюрс манет, республикаысьтымы бюджет - 107 сюрс манет, Социальной страхованиея фонд - 873 сюрс манет. Азьло аръёсын ӵошатыса, Удмурт Республикаысь Правительствоен туэ кылдытэмын нылпиослэсь гужем дырзэс пайдаё радъянъя пӧртэм ведомствоосты огазеясь комиссия. Кивалтэ соин Правительстволэн тӧроезлэн воштӥсез В. Е. Шудегов. Ёросысьтымы нылпиослэсь шутэтсконзэс радъянъя коньдонэн ӝеганъёс туэ ӧй вал. Оборонно-спортивной лагерез радъяны коньдон висъямын ёросысь. Республикаысьтымы бюджетэн висъям коньдонэн усьтэмын нылпи площадкаос, кӧня ке люкетсэ кутэмын пӧртэм кулэяськонъёслы. Ёросмылы юрттэ Удмурт Республикаысь Социальной страхованиея фондлэн 2 номеро филиалэз (директорез В. Н. Знаев). Ужаськомы огкыл пыр. Фондысь кивалтӥсьёс но специалистъёс ёросысьтымы ужасьёсты дышето, озьы ик эскерыса возё коньдонлэсь кутӥськемзэ. Нылпиослэсь гужем ужамзэс но шутэтсконзэс радъяло интыосысь кивалтӥсьёс, дышетӥсьёс, воспитательёс, школа столовойёсын ужасьёс. Анай-атайёс, озьы ик асьсэос нылпиос, ӟеч мылкыдын вазисько таӵе сюлмаськонлы - со сярысь верало июль толэзьлы вуэм куриськонъёс но. Июнен ӵошатыса, со кык поллы тросгес. Ноябрь толэзе ёрос слётын нылпиослэн гужем шутэтсконзылы йылпумъянъёс лэсьтом. Отын ик пусъём тужгес но ӟеч юрттӥсьёсмес. Нош али нимысьтыз тау кареммы потэ ёрос предприятиослы но организациослы: Пугачёво посёлокысь воинской частьлы но военторглы (кивалтӥсьёссы Т. М. Мраков, А. М. Маликова), райполы (Н. И. Гальцина), Кечёвоысь школа-интернатлы (Н. Ф. Быков), сельхозпредприятиослы. Оскиськом, нылпиоссылэсь шутэтсконзэс но ужзэс радъян ёросысь ведомствоослэн но учреждениослэн огъя ужзы но сюлмаськонзы луоз. И. Екимов, роноен кивалтӥсь. Быръёнъёс-2000 Дэмламын Владимир Забильский Удмурт Республикалы президентэ дэмлано адямиослэн лыдзы пумен йылэ. Александр Волков, Павел Вершинин, Владимир Забильский... В. В. Забильскиез ӵекто Россиысь Наукаосъя академилэн Урал отделениезлэн физико-технической институтаз ужасьёс. С. Ильина. Правительствоын Эмъюм вузан сярысь Правительстволэн Президиумезлэн берло ортчем кенешаз учкемын сьӧрлось гуртъёсын эмъюм вузанлэсь радлыксэ тупатонъя ужпум. Нимысьтыз вераськон мынӥз контрольно-кассовой машинаостэк вузкарон сярысь. Со юрттоз гурт калыклы дунтэмгес эмъюм вузаны. Юнматэм списоке пыртэмын 460 гурт. Геологилы - 300 ар 300 ар талэсь азьло Пётр И Указэзъя кутскон сётэмын вал музъем пушкысь узырлыкъёсты утчанлы. Озьы Россиын вордскиз геологияя выль удыс. Тае санэ басьтыса, Правительстволэн Постановлениеныз кутэмын решение 22-тӥ сентябре юбилейлы сӥзем ӝыт ортчытыны. Солы дасяськонъя кылдытэмын организационной комитет, кивалтӥсе юнматэмын Правительстволэн Тӧроезлэн нырысетӥ воштӥсез Юрий Питкевич. Киясаослы юрттэт 21-тӥ июньысь 22-тӥяз выжон уе Кияса районтӥ сильтӧл ортчиз. Куашканы шедизы юртъер липетъёс. Районлы юрттон понна, Президиумлэн кенешаз вераськемын 300 сюрс манет коньдон висъяны. Президиум эскериз музон но ужпумъёсты. Кенешонлэн пумаз Правительстволэн Тӧроез Николай Ганза журналистъёслэн юанъёссылы валэктонъёс сётӥз. Инмарлы оскисьёс понна Инмарлы оскисьёслэн огазеяськонъёсыныз валче ужанъя Экспертно- консультационной советлэн кенешез ортчиз. Сое нуиз Правительстволэн Тӧроезлэн воштӥсез Виктор Шудегов. Люкаськемъёс пыр-поч эскеризы черк но государство куспын кылдэм туала югдурез, йылпумъянъёс лэсьтэмын ИИ кварталэ ужамзылы. Удмурт Республикаысь Правительстволэн пресс-службаез. Архивысь документъёсъя Удмуртия ЪЪ дауре 1929-тӥ ар Таяз аре НЭП шуонлэсь быдэсак куштӥськизы. Пятилетка планъёсты выльысь учкыса, быдэстыны луонтэм ужпумъёс чакламын вал. Нош ужась адямилэсь мылкыдзэ кызьы бугыртоно? - Кужмысь косыса но одӥг ог ӟеч кыл вераса. Тарифъя реформа вань луонлыкъёсты быдтӥз ӟеч ужасез ужезъя дунъяны. Городъёсын нормаосъя висъяськись паёкъёс но умой тыршыны мылкыдэз ӧз лӧпкытылэ. Быдэс странаын сямен Удмуртиын но пятилетка планэз дырызлэсь вазь быдэстон вылысь нюръяськон ӧръяськиз. Предприятиос ог-огзы доры маке выльзэ тодон вылысь делегациос ыстыло. Озьы Ижстальзаводысь рабочийёс но инженеръёс Москвае АМО заводэ, Ленинградысь "Электростале", Днепропетровскысь андан ӵыжатон заводэ ветлӥзы. Мотоцикл поттон азинске, пумен паськыта. 18-тӥ сентябрьысен 20-тӥ октябрёзь Ижысь 5 мотоциклъёсын Ижевск-Москва-Ленинград-Харьков-Москва кузь сюресэз та эскерон возьматӥз: Удмуртиын поттэм "Иж-4" мотоцикл - умоез. Секытэн мынӥз гуртэз выльдон. Арлэн пумаз ужпум кутӥзы крестьян хозяйствосты ӝегатскытэк но ваньзэсты огазеян сярысь. Октябрь толэзёзь Удмуртиын 520 колхоз кылдытӥзы. Вал на эшшо одӥг "висён" - укыр бадӟымесь хозяйствоосы огазеян. Та аръёсы лэчыт ужпум сылӥз калыкез дышетон пумысен. Предприятиосын ӧз тырмылэ шор ёзо специалистъёс гинэ но, вылӥ дышетскемъёс сярысь вератэк ини. Соосты дасян вылысь Удмуртиысь рабочийёс келямын вал Москваысь, Нижний Новгородысь, Ленинградысь, Пермьысь институтъёсы. 1929-тӥ арын Ижевскын усьтӥськиз калык университет. Кык люкетэ вал отын: общественно-экономической но технической. Нырысетӥ араз ик татын 180 адями дышетскиз. Ноябре Ижын ӧсъёссэ усьтӥз индустриальной техникум, нош декабре калыкез дышетонъя нырысетӥ областной съезд ортчиз. Н. Красильникова, Удмурт Республикаысь Кун архивын ужась. Калыкез дышетон курсъёсын. Сцена вылын но ӵош Таисия но Геннадий Кузнецовъёс кызь арлэсь кема ини артэ вамышъяло, куректон- шумпотонзэс ӵош люко. Сцена вылын но соос ӵош. Таисия крезьгуръя училищеез йылпумъяз, нош Геннадий � культпросветэз. "Айкай" фольклор театр кылдон вакытэ кузпалъёс отчы ужаны выжизы. Таисия Павловна домраен но ымкрезен шудэ, нош Геннадий Васильевич кырӟа-эктэ, ки улаз котькыӵе крезьгуро инструмент чебер куаразэ поттэ: чирдэ-гурла, чипсэ-бӧрдэ. Таисия вордскемын но будэмын Вотка городын, ӟуч семьяын, Геннадий � Татарстанысь удмурт. Нош али сцена вылын шудэмзэс-кырӟамзэс адӟыса малпалод, кузпалъёс удмурт сюан-бӧрысьёсын, нергеосын ветлыса, шулдыръяськыса ӵош будэмын. Коллективысьтызы кыӵе ке кырӟась-эктӥсьсы висьыны я ар усе ке, Таисия Павловна домразэ куштэ но сое воштэ: сцена вылтӥ юсь сямен лэйкыт ортчоз, чылкыт, чебер куараен кырӟалоз. Нош Геннадий Васильевич берло аръёсы кужымзэ эскере крезьгур кылдытон-гожтон удысын но. Али солэн ог кызь пала аслаз кырӟанъёсыз вань ни. "Айкайысь" та кузпалъёслы учкисьёс гинэ уг синмасько, быгатэмзэс синйылтӥзы вылӥ кивалтӥсьёс но: Геннадий Кузнецовлы сётэмын Россиысь дано артист ним, нош Таисия Кузнецова алигес луиз Удмуртиысь дано артистка. Г.ВАСИЛЬЕВА. ? Таисия но Геннадий Кузнецовъёс. Туспуктэмез В.Беломорскихлэн. "Саф-Ислам" юн алэмын Уноез газетъёс гожъязы ини печатья но иворъёсъя министрлэн С.Ф.Васильевлэн "Саф- Ислам" газетлэн редактореныз И.С.Хисамутдиновен пумиськылэмез сярысь. Соку ик Хисамутдиновлы тодаз вайытэмын вал законэз тӥяса ужамез сярысь. Нош куд-огез та газетын печатлам материалъёс келямын вал Россия Федерациысь печатьлэн, телерадиовещанилэн но коммуникация ёзъёслэн ужъёссыя министерствое. Тани ма ивортӥзы отын та публикациос пумысен: "Министерство пыр-поч эскериз И.Хисамутдиновлэсь "Саф-Ислам" газетын туэ 31-тӥ мартэ 7-тӥ (32) номераз печатлам "Поражение наступает за шаг до победы" статьязэ. Со нациосын куспын вожвылъяськон, ог-огдэ ултӥян мылкыд пыӵатэ, сура-пожа конституциен тупатэм радлыкез. Озьыен, со тӥя Россия Федерацилэсь "Иворъёс вӧлмытӥсь ёзъёс сярысь" Законэзлэн 4-тӥ ёзэтэныз тупатэм куронъёсты. Соин валче "Саф-Ислам" газетлэн редакциез юн алэмын. Е.НИКОЛАЕВА. СПОРТ Турнир йылпумъяськиз Ижысь "Динамо" но "Торпедо" стадионъёсын арня ӵоже кыстӥськизы Россиысь егит футболистъёслэн турнирзы. 15 аресъем пиос пӧртэм улосвылъёс понна нюръяськизы. Финалэ потӥзы Поволжьеысь (ӝыныез Ижысь фтуболистъёс) но "Центрысь" (Москва котырысь футболистъёс) командаос. Шумпотон вуиз нырысь Ижысь пиос понна, гол пыртӥз Александр Маслов. Огдыре ик та гол азьпалэ потэмъёсты дырызлэсь вазь буйгатӥз, лэся. Москваысь футболистъёс бӧрсьысь бӧрсе Поволжьелэн капкаяз тупез 3 пол пырто. Соиз ке но шумпоттытэ: та шудонъёсын устоез полузащитник луиз Ижысь Александр Маслов. М.КУЗЬМИН. Тыметэз утялтозы чорыгъёс Воткинскын азьланьтӥсько тыметэз выльдон но тупатъян ужъёс. Городлы бадӟым юрттэт сётэ Россиысь Кун Думалэн депутатэз Юрий Маслюков. Азьвылгес лэземын ни форель но карп. Нош та нуналъёсы ваемын на тӧдьы амур чорыглэн 200 сюрс пиосыз. Малы бен одно ик тӧдьы амур? Чорыг вордонъя "Пихтовка" совхозлэн директорез Г. С. Крымов верамъя, тӧдьы амур гинэ сиыса быдтэ ву будосъёсты. Али тыметлэн вылланяз камышез турнало. Трос ужъёс чакламын сӥзьыллы. Тыметэ усись шуръёсы форельлы мызь лэзён интыосты дасяно, кӧльы вӧлдоно. Озьы ик радъяно луоз чорыгез лушкаськисьёслэсь утён вылысь возьмаськонэз. Б. Никитин. ДАРТ Гужем-2000 Егитъёс, нылпиос, студентъёс! Тӥлесьтыд шутэтскондэс пайдаё, тунсыко, аспӧртэмлыко карон понна, ӝадёнэз валатэк, шутэтскон нуналъёсты адӟылытэк тыршо "МДС-тур" кун учреждениын ужасьёс. Кылдытэмын со Егитъёсын ужанъя кун комитет вӧзын. Кӧня ке аръёс ӵоже ини та учреждениен кивалтэ Татьяна Платунова. � Татьяна Михайловна, кыӵе шутэтскон амалъёс туэ гужемлы ӵектыны быгатэ "МДС- тур"? � Котьку сямен ик таяз гужем но егитъёслы, студентъёслы, семьяен шутэтскыны мылкыд карисьёслы утчаны тыршимы дунтэмгес шутэтскон интыос. Нылпиос, егитъёс тазалыксэс юнмато Азов но Сьӧд зарезь дурын. Шутэтсконэз радъян понна коньдон уг висъяськы бере, дунтэмгес лагерьёс утчаса, асьмелы потано луэ та улосъёсы. Нимысьтыз видеоматериал дасяса ваиськом. Ӵошатон понна: шаерысьтымы "Дзержинец" лагерьын шутэтскыны путёвка сылэ 3700 манет, нош Азов зарезь дуре мынӥсьёслы путёвка дэмласьком 30-50 манетэн. Егитъёслы но егит семьяослы кельше палаткаослэсь лагерьёсын шутэтскыны. Туэ ньыльдон муртлэсь куинь группа Сьӧд зарезьын пӧсь шунды сиос улын пыласькоз. Таӵе амалэн дас ньыль нунал ӵоже Геленджикын шутэтскон сылэ 1450 манет. Крымын шутэтскон дуногес усе, поездэн мыноно угось. Таиз лагерь усьтӥськоз 5-тӥ августысен. �Ёросъёсын улӥсьёслэн мылкыдзы вань-а зарезь дурын шутэтскыны, яке город калык мыло-кыдогес? � Ёросъёслэн но бере кылемзы уг поты. Туэ трос вазиськонъёс вуизы Якшур-Бодья, Вотка, Сюмси ёросъёсысь. Но татын тани мае пусйыны кулэ. Кудаз ёросын егитъёсын ужанъя отдел калык пӧлын валэктон уж нуэ, дырыз дыръя иворъёсмес вӧлмытэ, милям учрежденимы пыр шутэтскыны мылкыд карисьёс но тросгес луо. Жаляса верано, тросэз ёросъёс "бабыса" уло. � Сыӵе дыръя, оло, асьсэлы егитъёслы, анай-атайёслы, дышетӥсьёслы егитъёсын ужанъя отделъёсы вазиськоно? � Бен, возьмаса улыны ӧвӧл кулэ, ку дорад вазиськозы. Шутэтскон нуналъёстэс тунсыко ортчытэмды потэ ке � юалляське. Ми доры но вазиськыны луоз. Но таяз гужемлы зарезь дуре путёвкаос ваньмыз сямен кузёоссэс шедьтӥзы ни. � Мар ӵектыны быгатысалды на пиналъёслы гужем каникулъёсазы? � Радъямын Удмуртиысь шуръёс кузя байдаркаосын уянъёс. Куриськонъёс кутӥськом нимаз адямиослэсь, семьяослэсь. Куинь нунал шутэтскемзы понна дышетскись пиналъёс тырыны кулэ 250 манет. Соосын ӵош уялозы инструкторъёс. Пиналъёслы туж кельшо Дэбес ёросэтӥ вал вылын ортчоно сюресъёс. Кинлы куинь нунал тырме, нош кин дас нунал но солэсь тросгес шутэтскыны быгатоз, мылкыд каремзыя. Пиналъёс уло палаткаосын. Дуныз сярысь ке, шуом, ньыль нуналлы дышетскисьёс 520 манет тыро, студентъёс 600 манет. Мылкыдзы вань ке, арлыдоослэн но вал вылэ пуксьыны луонлыксы вань. Ӵектыны быгатӥськом на Россиысь городъёстӥ экскурсиос. Якшур-бодьяос июне вуылӥзы Казане, Башкортостанэ, Санкт-Петребурге, вавожъёс тодматскизы Зарни кульчое пырись городъёсын. Вераны кулэ, туж трос куриськисьёс Санкт-Петербурге. Туэ тямыс группалы эскскурсия радъяны быгатӥм, интыос ӧвӧл ни. Путёвкаос дуноесь ӧвӧл. Сюрес дунэз но сиськонэз вераса, вить нуналъем экскурсилэн дуныз (со вӧзы ватсалэ на кык нунал сюресэз) 1560 манет. � Гужем каникулъёс ортчозы, но таин тӥляд ужды уз йылпумъяськы. Оло, лыдӟисьёсмес азьланез пумысен но малпаськонэ уськытом? � Сӥзьылысен кутскыса, шутэтскон нуналъёсы, праздникъёсы, каникулъёсы нылпиослы ӵектӥськом Ижевск, Вотка, Сарапул, Пермь, Казань, Елабуга городъёсын тодматскыны, Кунгурысь пещераосы вуылыны. Басьтом Удмуртилэсь шоркарзэ ик. Гуртысь тросэз пиналъёс Ижевске вуылытэк уг уло, дыр. Но мае соос ӵем дыръя адӟо. "Детский мир" магазинэз но базарез. Нош экскурсие потаса, классэнызы яке нимысьтыз группа люкаса, пиналъёс тодматско Ижевсклэн историеныз, вуыло пӧртэм театръёсы, музейёсы, предприятиосы, Пионеръёслэн дворецазы, пинал лётчикъёслэн школаязы. Таӵе экскурсиос учрежденимылы пайда уг ке но ваё, гуртысь пиналъёслы со туж кулэ. Городысьтымы мукет турагентствоос та ужен уг ик выро. � Мон тодӥсько, гуртысь пиналъёс понна тӥляд вань на "Абитуриент" программады. � Бен, та программая ми кӧня ке арзэ ужаськомы ни. Но пиналъёслэн асьсэлэн куремзыя, ужан радмес туэ ӧжытак воштӥм � тросгес саклык висъяськом дышетонлы, тодон-валан сётонлы, шутэтскон ужрадъёсты ӝытлы кельтыса. Дышетскон ар ӵоже каникулъёсы ньыль сессия ортчытӥм, пиналъёс дышетскизы 9 часысен ӝытазе 5 часозь. Тодон-валанъёс соослы сётӥзы Удмурт кун университетысь но Гурт хозяйствоя академиысь преподавательёс. Дышетскон дун вошъяське. Кылсярысь, толалтэ 600 манет котырын ке вал, гужем 200 манет луиз. Дунлэн быдӟалаез улон инты бордысь но потэ, озьы ик капчигес луэ коньдонэн палэнысь юрттэт ке вань � гужем сессилы туэ 25 сюрс манет коньдон висъямын вал. Нош ик вераме потэ, куд-ог ёросъёс нылпиосты дышетон сярысь уг сюлмасько. Туэ тани 25 ёрос пӧлысь 14-ез гинэ куронмылы вазиськиз. Отын ик Вотка ёросысь роно 19 муртэ ыстӥз дышетскыны. Оло, тӥляд лыдӟисьёсты пыр гуртын улӥсьёсын кусыпъёсмы матысьгес луозы. Юанъёсты кылдӥзы ке, вазиське таӵе телефонъёсъя: 43-06- 13, 43-00-30. Нош интыяськемын ми Пушкин урамысь 270 номеро юртын. Л.МАЛЫХ. Ӟеч кивоштӥсь будэто Чутыр школа Ижевсклэсь кыдёкын ке но, матысь кусып возе гурт удысъя академиен. 1992-тӥ арысен со колледж шуыса нимаське. Татын азьвыл но ужъя урокъёсын котьмалы дышето вал, али луонлыкъёссы эшшо но паськытазы. Дышетӥсьёс бадӟым тау каремзэс верало "Чутырский" СПК-лэн кивалтӥсезлы В.С.Митрофановлы. Хозяйство школалы быгатэмезъя ялан юрттэ. Картофка будэтыны кык гектар музъем висъяз, ачиз ик жаг-турын, кибы басьтэмлэсь уте, сӥзьыл октонэз гинэ нылпиослы кыле на. Озьы школа ас понназ пичияк коньдон поттэ. Сое куто нылпиослы кузьымъёс басьтыны, пӧртэм пумиськонъёс, ӝытъёс ортчытыны. Нош кӧня уксё кулэ буёлъёслы, тупатъян-выльдон ужлы? Маин пӧртэм колледж огшоры школалэсь? Нимысьтыз дышетон программая бадӟым саклык висъяське ужлы дышетон но профессия басьтонлы: нылъёс улонэ пото гурт котырысь пӧрлы дышыса, пиос басьто фермерлэсь сертификатсэ. Тросэз умой-умой быгато ни тракторен ужаны. Сыӵеосты школа бере ик механизаторъёслэн семьяязы куто. Мылкыд карисьёсыз дышетсконзэс азинто гурт дуысъя академиын. Куд-ог школаосын пиналъёсты сюдон ласянь но шуге-леке вуо. Татын асьсэлэн бакча сиёнъёссы чотын толэзьлы быдэ кык арнязэ дун тырытэк столовое ветло, дышетскисьлы быдэ нуналаз 1 манет 20 копейка государство висъя на. Татчы котырысь гуртъёсысь 180 пиналъёс ветло на, соосты возьыны интернатлэн юртэз вужгес ини, туала улонлы уг тупа. Нылпиос но гуртсылэсь мӧзмо, нуналлы быдэ бертэмзы потэ. Соин но районысь администрацилэн калыкез дышетонъя отделэз школалы нимысьтыз автобус висъяз. Чутырысь дышетӥсьёс, мумы-бубыос газет пыр тау карон кылъёссэс вераны куризы гажано адямизылы, Кун Кенешлэн депутатэзлы Софья Эльфатовна Широбоковалы. Кивоштӥсьёсты будэтонын со бадӟым юрттэт сётэ. Котькыӵе куронэн мед вазиськозы � одно ик пумаз-йылаз вуттыны сюлмаськоз: школа юртэз выльдон, компьютер яке вуриськон машина басьтон � котькытын шӧдӥське депутатлэн ас бырйисьёсыз понна зэмос ужамез. Сермет юнма Вуоно арнялэн кутсконаз, понедельнике, шаерамы лыктэ Сергей Кириенко, Россия Федерацилэн Президентэзлэн Приволжск округъя оскем муртэз Тодады вайытом, Владимир Путин вылӥ кивалтӥсь луэмез берегес ик странамес сизьым округлы люкон сярысь указ кутӥз. Озьы Удмуртиен ӵош Приволжск округе пыризы Башкортостан, Марий Эл, Мордовия, Татарстан, Чувашия Республикаос, Киров, Нижегородск, Оренбург, Пенза, Пермь, Самара, Саратов, Ульяновск улосъёс, Коми- Пермяк автономной округ. Кивалтӥсе юнматэмын вал Сергей Кириенко. Куд-ог аналитикъёслэн чакламзыя, Приволжск округлы удалтӥз. Ваньмаз сямен округъёсы ыстэмын вал генералъёс, политикаын но экономикаын бергамтэ муртъёс. Нош Сергей Владимнович та удысъёсын выль адями ӧвӧл. 1998-тӥ арын тулыс Борис Ельцинлэн ӵектэмезъя, со ужаны лыктӥз Россиысь Правительствое. Тросэз понна Президентлэн таӵе вамышез шӧдтэк шорысь луиз. Угось малпало вал: премьер- министрлэн пукон вылаз пуксёз со вакытысь вице-премьер, Кириенколэн аспал адямиез Борис Немцов. Азьвылгес соос Нижний Новгородын ӵош ужазы вал. Немцовез Москваын вазьгес синйылтӥзы. Ельцин сое бурд улаз басьтӥз, нош Правительствоен кивалтыны оскиз егит но тодмотэм Кириенколы. Кун Дума пыр солэн кандидатураез туж секытэн ортчиз, депутатъёс куаразэс куинь пол сётэм бере гинэ. 1998-тӥ арын август толэзе манет шуак дунтэмаз. Кириенко Правительствоысь кошконо луиз. Но бадӟым политикаен ӧз люкиськы. Бур кужымъёслэн огазеяськонзылэн, собере партизылэн азьветлӥсьсы вал. Бӧрысь Кун Думалэн депутатэз луиз. Табере оскисьёс вань, Приволжск округын югдурез тупатыны кужмыз тырмиз ке, пе, со азьланьын Россилы Президент быръёнэ но пыриськыны быгатоз. Нош мае вите шаермы Кириенколэн дорамы кык нуналлы лыктэмезлэсь. Нырысетӥез, кинлы дурбасьтоз Сергей Владимнович 15-тӥ октябре Удмуртилы йыр быръёнын. Оскон ӧвӧл, Президентлэн оскем муртэз та пумысен мылкыдзэ усьтоз шуыса. Кыкетӥез, кызьы шуккиськозы шаерамы Москваын мытэм выльдӥськонъёслэн тулкымъёссы. Ӵапак та сярысь кенешоз, дыр, Кириенко Ижевскын пумиськонъёс дыръя. Угось али но тыро- пыдо валэктэмын ӧвӧл на, маин вырыны кулэ округъёс. Озьы ке но, валаны луэ ни, выль кылдытэм ёзъёс чакласа-эскерыса возёзы улосъёсты. Юнме шорысь шат округъёсы асьсэ адямиоссэс чик ӝегатскытэк ыстӥзы ни Генеральной Пркуратура но Вытъёсъя министерство. Озьы тӥни, Москва округъёс пыр кивалтоз улосъёсын. Та сермет азьланьын юнмалоз. Сое возьмато берло дыре кутэм законъёс но. Кылсярысь, Федерацилэн Кенешез валлян юнматӥз Вытъёсъя кодекслэсь кыкетӥ люкетсэ. Соя данакез коньдон Москвае кошкоз. Иське, центрлэн улосъёсты биньгозыяны кужымез будоз. Нош Удмуртия Москваысь дотациос басьтыса улэ бере, федеральной властьлы пумитъяськыны уз дӥсьты. Керетӥськод ке, коньдон ум сётэ, шуозы. Владимир Путинлэн странаен кивалтон амалъёсыз, кылсярысь, округъёсын оскем муртъёсыз пыр ик, улонэ пыӵало ни. Ас вакытаз Борис Ельцинлэн улосъёслы сётэм эрикез сюбега. Сермет юнма. Ӵапак сое возьматоз, малпаськом, Сергей Кириенколэн шаерамы ужамез но. Алигес Сергей Владимнович вордскем нуналзэ пусйиз, солы 38 арес тырмиз. Ӟечкыласьком сое, выль удысын азинсконъёс сизиськом. Ю. Александрова. Валэктэ юрист Сэрегез нуэ адвокат Лилия Шкляева Телефон 25-33-70 Музъем кулэ-а сокем? Атаелэн музъем паез луиз кельтос (наследство) но асваньбур (собственность). Рос-прос свидетельство сётӥзы. Быдӟалаез 5 гектар, дуныз 140 баллогектар, пе. Ачим колхозник ӧвӧл, но колхозэн арендая огкыл (договор) гожтӥ. Табере солэсь куронъёссэ воштэм потэ. Чурытаса тыро кадь музъемме кутэмзы понна. Шуом, гектарысь ӧжытсэ 15 центнер басьтозы ю-нянь. Ваньмыз 84 центнер луэ. Нош мон басьтӥсько И центрлы дунзэ гинэ. Гуртын уггес улӥськы бере, хозяйстволэсь ӵектэм юрттэтсэ уг кутӥськы. Кенеши председателен колхоз 467 манет тыр ю сётоз, шуиз. Трос аръёс ӵоже та дун уг воштӥськы малы ке. Кызьы тырыны кулэ соос мыным? 1 гектарлы одӥг пичи уждун мында ке, таиз ялан йылэ кадь ук. Уже мынам сыӵе: вашкала ведакатъёсты удмурт кылэ берыктӥсько, университетын дышетсконме азьланьтӥсько. Соин ик музъеме мыным туж юрттысал, дыр. Ужаме понна коньдон али уг ик басьтӥськы. Кызьы но озьы возиськиськом. Кышное нылын пуке дорын. Нылпи пособизэс но марлы ке уг тыро. В. П. Огкылдэс (договордэс) учкыку, син шоры йӧтэ тани ма. Тӥ, сое лэсьтыкуды, палэнэ кельтӥллямды туж кулэ лыдпусъёсты, кылсярысь, дун тыронэз. Отысь куронъёсты (условиосты) вошъяны луэ выль тупанкыл (соглашение) лэсьтыса. Граждан кодекслэн 452-тӥ ёзэтэз (статьяез) валэктэ: огкылэз воштон яке быдтон сярысь тупанкыл дасяське сыӵе амалэн ик, кызьы лэсьтӥське ачиз огкыл. Озьыен, тӥ хозяйстволэн кивалтӥсезлы гожтэтэн вазиськыны кулэ, огкыллэсь условиоссэ воштыны курыса. Со пумит луиз ке, тӥ сётэлэ огкылэз тӥян сярысь курон. Кивалтӥсь дась ке огкылэз воштыны, тӥ выльысь лэсьтэлэ огкыл яке тупанкыл. Ужасьтэм кышномурт вите нуны Ужай совхозын 1995-тӥ-1999-тӥ аръёсы. Ужтэк кылеме бере монэ лыдэ басьтӥзы 2000-тӥ арын 16-тӥ феврале. Нуны ваёнэн валче отпуске лэзизы 8-тӥ июньысен 25-тӥ октябрёзь. Кытысь мон басьто отпуск понна дун? И. С. Ужасьтэм кышноослы секытэн но нуны ваёнэн валче юрттэт (пособие) сётӥське, предприятие, учреждение, организация быремын ке. Солэн быдӟалаез - одӥг пичи уждун мында. Вазиськоно улон интыысь шугадӟонлэсь утись (социальной обеспечениен вырись) ёзэ. Музон учыръёсы юрттэт уг сётӥськы. Атай уг юртты ке Картэным люкиським. Со йӧн-йӧн уг ужа. Алимент басьтӥсько арскын одӥг-кык пол. Нош пие будӥз ке, со атай нерге шуонзэ сюдоно уз лу-а? Кызьы меда сыӵе "нергелэсь" копак мозмоно? Елена. Анай-атайёс асьсэ нылпизылы воспитание сётыны, солэсь правооссэ но кулэяськонъёссэ утьыны кулэ. Сыӵе сюлмаськонъёслэсь палэнскыны уг яра. Озьы косо Россия Федерациысь Семья сярысь кодекслэн 63-тӥ но 64-тӥ ёзэтъёсыз (статьяосыз). Атай та ужлэсь палэнске ке, солэсь атай луись правоссэ таланы луэ (69-тӥ ёзэт). Озьы лэсьтыны кулэ судын, отчы одно пырисько прокурор, опекая но попечительствоя ёз (орган). Шуом, тӥ выльысь бызиды. Кыкетӥ картты малпаз нылпидэс аслазэн лыдъяны. Нырысетӥ картты соглаш луиз. Соку таиз воргорон атай правозэ ыштэ но нылпи будэтонэн герӟаськем сюлмаськонлэсь мозме. Корка дортӥ кыско электроез Олокӧня ар вераськон мынэ ни корка вадьсытӥм вылӥ напряжениен электроез кыскон сярысь. Зэм, та пумысен нокыӵе решение но бумага ӧй басьты на. Озьы ке но, али ик тодэме потэ: соин валче коркаме куашкатоно шуизы ке, мар куреме луоз? С. Корепанов. Игра черкогурт. Нырысь ик интыысь администрациын тодоно: юртты котырысь музъемез басьтэ-а, уг- а электрокужымен вырись организация. Та пумысен одно ик бумага куроно. Музъемез басьто ке, тӥледлы но семьяысь вань адямиослы висъяло нимаз ӟеч (благоустройствоен) квартира. Норма тупатэ администрация (адямилы быдэ 18 квадрат метр огъя площадь, кык муртлэсь семьялы 42, огназ улӥсьлы - 33). Уг яра одӥг комнатае карыны укмыс ареслэсь бадӟымгес нылэз но пиез, кузпалъёсты вератэк. Квартира сяна, корка кузё басьтэ на куашкатоно юртъерлэсь дунзэ яке та юртэз сэрттыса люкам материалэз. Ченгешонъёс кылдо ке, соосты сэрттэ-пертче суд. Озьы валэктэ Россия Федерацилэн Улон инты сярысь кодексэз. Мар но уг даурты юэм йыр? Вераны ӟеч ӧвӧл ке но, атае психобольницаын лыдэ басьтэмын вал. Сое ӵемысь мон ик утялтӥ. Нош агае сое весь сектаса возиз. Атае кулӥз. Тупатэм дыр ортчыса, завещанизэ лыдӟи но аслам синъёсылы ӧй оскы: приватизация пыр аслыз басьтэм квартиразэ атае кельтэм агаелы гинэ. Табере югдурез тупатыны бер ни-а? О. Главатских. Глаз район. Гожтэтъя шуг валаны, кинэн ӵош улэм атайды - тӥленыды-а, агаеныды-а. Яке тӥ ваньды огазьын вал-а? Нош кытын анайды? Тӥни малы юандылы меӵак валэктыны шуг. Озьы ке но, огъя визь-кенеш сётыны амал вань. Тӥ, шуом, лыдъяськоды тазьы: агайды атайдэс кужмысь гожтытӥз завещание, вылаз ик, атайды тазалыкез лябен мар лэсьтэмзэ валатэк кылиз. Соку тӥ судэ вазиськыны быгатӥськоды завещаниез умойтэмен лыдъям пумысен. Россия Федерацилэн Граждан кодексысьтыз 171-тӥ ёзэт зэмосэн уг лыдъя сыӵе ужъёсты (сделкаосты), кудъёссэ лэсьтэ лул (психической) висёнэн правооссэ быдэстыны быгатӥсьтэм мурт. Сыӵе завещание умойтэм шуыса оскытыны шуг йӧтоз. Оло, судын ужпум пуктоно луоз кулэм муртлы психиатрической экспертиза лэсьтон ласянь. Удалтэмзэ дыраз утялтоно Вань киземез-мерттэмез туэ удалтэмын. Правительство ласянь дыраз юрттэт вуэмен, тулыс ужъёс ӝегатэк ортчизы. Со ик инъет кылдытӥз ӟеч урожай будэтыны. Но туннэ котькудзэ кивалтӥсез шугъяськытэ мукетыз ужпум: чидалоз-а техника ю-нянь октон- калтон вакытэ? Та муген ю бусыос аратэк уз кыле-а? 1992-тӥ арысен кутскыса, техникалэн лыдыз трослы кулэсмиз, вылаз ик, ужаны куазь ке люкетӥз. Ю-нянь утялтон азьын гуртысь югдурез ӟырдато на электрокужым сётӥсьёс. Ас тодэмзыя, соос фермаосты, мастерскойёсты, музон ужан интыосты тылтэк кельто. Данакез хозяйствоос туннэ ик ёрмемын ни техникалы эстӥськонлы, уг быгато басьтыны воштос ёзъёс, нош машинно-тракторной парк 85 но солэсь ятырез вужмемын. Огъя вераса, ю-нянез дыраз но ӝегатскытэк утялтон понна, республикая кулэ луоз ог 200 миллион манет. Ми вазиськиськом Правительстволы, юрттэт курыса, туннэ вань луонозэ лэсьтоно на, ыштонъёс адӟонтэм вылысь. В.НИКИТИН, УР-ысь колхозъёслэн СПК-лэн огазеяьсконзылэн кивалтӥсез, Кун Кенешлэн депутатэз. ШӦКЫЧ Али кинлэсь ке пырак юад ке, малы асьмелэн улон-вылонмы такем кыляз шуыса, нокин но шонерак валэктон сётыны уз дӥсьты, дыр. Нош кудӥз-огез тодыса вылысь но талэсь мугзэ уз вера. Зэмзэ но, паймод угось. Самой бусьтыр но узыр музъем вылын улӥськомы, нош куанер улӥсь странаос пӧлы пыриськомы. Одӥг мудрон адями та пумысен, асьмеды ултӥяса, тазьы шуэм: кыед вылын уло, гыбедлы ёрмо. Мукетыз тодосчи мукет сяменгес верам, асьме адямиез Сахарае ыстӥд ке, солы луо но уз тырмы. Соиз но, таиз но шонер кадь. Малы ке шуоно, зэмзэ но, асьмелы номыр но уг тырмылы. Нюлэс кораськом � корлы ёрмиськом, му вӧй кыскиськом � эстӥськонэн курадӟиськом, ю тысь шертӥськом � кураськыса ветлӥськом но мукет. Нош юам потэ. Нош кинлэсь юано? Мар бордын ужпум? Кин отын янгыш? Дыр вуиз ини та пумысен ӝот-ӝт йылпумъянъёс лэсьтыны, со понна кинлэсь ке куаӵ- куаӵ кылзэ юаны, янгыш ке, меӵак-еӵак ужрадъёс кутыны. Сотэк асьмеос ноку но пыд йыламы ум султэ. Соин ик бусьтыр но узыр улон сярысь, чурытэсь ужрадъёс кутытэк, юнме супыльтыны кулэез но ӧвӧл, дыр. Суредэз В.Лебедевлэн. Илья Зоринлэн вордскемез дырысен 80 ар тырмонлы сӥзьыса Мария, Маруся, Марина... Огъёзоос - Анна, тон, лэся, ук? Уд тодмаськы ни шат? Мон со, Сэдык Дыдык... Озьы, пинал дыр эшезлэн тодмамтэезлы паймыса, 81 аресъем Анна Андреевна Александровалы вазиське соин огъёзо адашез Анна Владимировна Петрова. 1918-тӥ-1921-тӥ арын вордскемъёс Вавожысь шор ёзо школаын одӥг классын дышетскизы. Таос пӧлын вал Ӝыжолгуртысь (Силкиноысь) пиналъёс но. Илья Зорин, зорись синмо чебер пияш, тужгес чырткем, "чулимчи" луэменыз висъяськиз. - Куинь иськеме Вавоже валэн ветлӥськом вал, - тодаз вае Анна Андреевна. - Толалтэ мынон-бертон сяменымы нискыласьком, лымыын погылляськиськом. Илля милемын ӵош вал, сизьым классэз быдтытозь, собере со кытчы ке кошкиз. Мон ас тулыным дышетскыны мынӥ, дас классэз ик быдтӥ. Гуртысьтымы ас ёзъёсы пӧлын нылъёс ӧй вал, Оксиння сяна... Нош Оксиння апайлы, Ксения Егоровна Сидоровалы, одӥг класс гинэ дышетскыны кылдӥз. Солэн шузи-мази пичи дырыз ортчиз Илья Зоринэн ӵош, Кенервырын (сикбамалын) шудыса-бызьылыса. - "Карт" карисько вал мон сое, нокинлы уг сётӥськы, - ымпумаз пальпотэмзэ ватыса вера Оксиння апай. - Берло ини аслам мукет туганэ вал, солы ик бызи. (Илья Зоринлэн нырысетӥ яратонэз Вавоже кылиз, али но отын улэ. - Т. Ч.) Кузпалэныз Мария Андреевнаен ӵош нырысьсэ бертыкузы, Илля шуиз: "Тодматскы, Маруся, та мынам нырысетӥ "кышное". Со вал 1947-тӥ арын куартолэзе. Илья Зорин вордскем гуртаз бертэ Украинаысь ваем чебер, мусо кышноеныз Мария Андреевнаен. Кызьы соос пумиськизы 1944-тӥ ар, южтолэзь. Асьме войскоос фашистъёсты асьсэ пузкаразы улляло. Одӥгез полк дугдӥз Украинаысь огаз хуторе. Одӥг семьяын ӟырдаса кылле вал анайзы - тыоссэ кынтэм. Солэн нылыз, Маруся, ӝогак мынӥз апаезлэн корказ интыяськем военврач доры: юрттэ, пе, вал кызьы ке анайме йӧнатыны. Ог-огзы шоры учкыса, кыксы но синмаськизы. Илья ог куинь ареслы бадӟым. Удмурт гуртын будыса, ёрмонэз пичиысен адӟемын, дорысьтыз пыдын, кутъёсын потэм маке, Горькийысь фармацияя техникумын, Ижысь медициная институтын, Куйбышевысь военно-медицинской академиын дышетскиз, секыт фронт сюресэз ортчиз ни. Мария... Дас классэз йылпумъям эшъёсыныз ӵош 22-тӥ июне аттестат басьтыны кулэ вал. Но со нуналэ вазь ӵукна ческыт уммен изись калык вылэ фашистъёс омырскизы. 28-тӥ июле Марусяослэн гуртазы но резь-куаж пыризы быжо киросэн танкъёс... "Та мынам кышное луоз", - малпаз ас понназ Илья. Мылкыдзэ вераз Марусялэн атаезлы: "Лэзе сое монэн ӵош фронтэ". Таиз пурӟиз: "Мон кык пиосме но, эмеспиосме но келяй ни - тӥ сямен уз луы". Ар но ӝыны гожтэт пыр кусып возизы. Илья Зорин Берлинозь вуиз, куинь пол сӧсырмыны, кык пол контузие сюрылӥз, пӧртэм боевой наградаос басьтӥз. Йыраз малпанэз вал: чалякгес яратонэз доры берытскыны. Чехословакиысен отпуске куриськиз. 1945-тӥ арын 12-тӥ сентябре соос гожтӥськизы. Но Марусяез Илья сьӧры ӧз лэзе: оло, пе, удмурт шаерын украинка кышноез чик но кулэ уз каре. Вуоно араз 16-тӥ январе Москва дорысь Козельск городысь воинской частьын, кытын служить каре вал Илья, соос пыраклы люкиськонтэм вылысь пумиськизы. Татчы украин гуртысь дышетӥсез ваиз частьысьтызы юромо ысъям солдат. Марусяен ӵош вал мумиз но, Украинаысь нокытчы потамтэ кышномурт. Солы туж кельшизы удмурт палъёс, куно пумитаны быгатӥсь калык. Берло Мария Андреевналы ас ӵыжы-выжыосыз шуизы: "Маруся, тон туж шудо, удмурт калык пӧлы сюрыса. Татын адямиос шырытэсь, капчиесь". Мария Андреевна ачиз но ноку ӧз ӧпкельы такем дуннее шедемезлы. Куддыр сюлэмыз гинэ вӧсь луылӥз, удмурт калыкез ас музъем вылаз сантэм карон шӧдӥське шуыса. Зэм но, та кышномурт ассэ туж шудоен лыдъяны быгатэ: солэн сюрес вылаз кемдӥз удмурт калыклэн огез тужгес но усто пиез. Илья Андриановичез со котьку Илюша гинэ шуылӥз. Ӝыжолгуртын Силкино табере нимаз гурт уг лыдъяськы ни - Вавоже Советской урам луыса пыремын. Туэ пӧсьтолэзлэн шор нуналаз, ас пизылэсь Илья Зоринлэсь вордскемез дырысен 80 ар тырмонзэ пусйыны шуыса, гуртоос огазе люкаськизы Ижысь кунооссэс пумитаны. Медициная академия горд киросо машиназэ сётэм таосыз нуыны-вайыны. Дуно куноос пӧлын - Илья Зоринэн ӵош ужам эмчиос Виктор Городсков но Фридрих Ившин, Вавожын одӥг классын дышетскем эшез тодмо журналист Василий Смирнов. Но тани ёросысь культурая ёзэн кивалтӥсь Виктор Геннадиьевич Шутов тӧдьы сяськаоссэ кузьма тужгес кема витем адямилы. Со Мария Андреевна Зорина. Кыӵе тэтчаз солэн сюлэмыз, татчы вуытозяз, азьло ик син азяз пуктӥз та пумиськонэз. Машинаысь потӥз но - озьы ик вань: шумпотыса пумитась тодмо ымныръёс. Синкылизэ ӧз луы кутэмез кышномуртлэн: "Дорогие мои, как я вас всех люблю". Отын ик удмурт сямен но дышем кылъёссэ вера: "Туж ческыт, тау, пӧсятэм но юом". Калык пӧлысь соку ик синйылтӥз Оксиння апаез, ӟыгыртӥз... Вырӟизы урам выллане. Укно улъёсазы сиён-юонэн ӝӧккышетъёс вальыса, калыкез куноятӥзы Журавлёвъёс: Василий Иосифович нылъёсыныз но Василий Николаевич ас семьяеныз. Нырысетӥ юрт бордысь син шоры йӧтӥз туспуктэм: тӧдьы дэремен выль кен но эмеспи - Иван Зорин, семья кылдытыкуз. Ижысь сельхозинститутын нюръяськонъя тренер, физкультурая дышетӥсь (жаль, вазь кошкем со улонысь). Илья Зоринлэн Степанида апаезлэн пиез, дас куать ар ас пизы чотын возизы сое Илья Андрияновичен Мария Андреевна. Асьсэлэн нылпиоссы ӧй вал. Озьы ик пыд йылазы ӝутскыны юрттӥзы мукет вынмуртъёслы-сузэръёслы но. Федя агайзы ивортэк быриз фронтын, нылпиослы атай интыын луиз Илья. "Та коркан 1920 арын вордскиз удмурт кылбурчи медицина наукаосъя кандидат Зорин Илья Андрианович." Таӵе гожтэмен пул соку ик син шоры йӧтӥз. Юртэз чебер буяса, утялтыса возе столярын ужам кышномурт Нина Кирилловна Васильева. Эшшо урамлы (яке библиотекалы) Зоринлэсь нимзэ сётысалзы на ке - таӵе мылкыд каремзэс веразы куд-огез. Гурто калык буре вае дано адямизэ. Вавож гурт администрацилэн тӧроез Семен Ильич Колзин но солэн юрттӥсез Людмила Михайловна Коротаева ӧз жалялэ вить сюрс манетсэс та юбилейлы, чылкытатон-утялтон-куноятонлы. Ёрос библиотекаын дасязы И. Зоринлэн туспуктэмъёсыныз, книгаосыныз выставкаос. Шаертодонъя музейын но солы сӥзем сэрегзэс паськытатӥзы. Пӧсь турнан вакыт шоры учкытэк, калык тачак люкаськиз дано юрт азе. Асьсэос ӝыжолъёс сяна, лыктӥллям Ӝуё-Можгаысь чебер апайёс, Бадӟым Можгаысь "Вуюись" фольклор ансамбль, школаысьтызы нылпиос но мыло-кыдо кырӟазы-веразы (но малы ке ӟуч сямен). Та нуналэ калык ӧтем куноосыныз ӵош кема шулдыръяськиз на Ува шур дурысь возь вылын. Турнан дыр ке но, ма карод: котькуд гуртын таӵе дано адями уг вордӥськы. Огез бурд ке чиге... Илья Зоринэз ӝутӥзы-валтӥзы кык кужмоесь бурдъёс: поэзия но медицина. Огзэ чигтэм бере, мукетыныз лобаны уг луы ни вал. Кыӵе усто эмъясь, тодосчи вал Илья Андрианович, сое туж умой тодо акушер- гинекологъёс В. И. Городсков но Ф. Н. Ившин. Виктор Иванович тазьы тодаз вае ӵош ужам эшсэ: - 1956-тӥ аре мединститутэ дышетсыны пыреме бере, со мыным атай но, дышетӥсь но, собере, ужаны кутскыса, юрттӥсе но вал. Институт бере Марий Элын ужай. Вить-а, куать-а гожтэт ыстӥз, берты, пе, тыныд аспирантураын дышетскыны кулэ. Солэн котьку визьнодо валэктонъёсыз вал. Ачиз сярысь Илья Андрианович трос ӧз сюлмаськы. Ломоносов урамын вуж пу коркан кынмыса, шубаен пукыса но кылбуръёссэ гожъяз, озьы ик йылпумъяз наукая кандидат луон диссертацизэ. Вылӥ дунъет басьтӥз та ужезлы. Доктор но луыны малпа на вал - ӧз кылды ни. Таӵе визьмо, валась кышноез ӧй ке луысал, Илья Андриановичлы эшшо но секытгес йӧтысал. Кылбурчиез сямен но мон сое валаны тырши: ачим уго вордӥськемын Грах ёросын, Ашальчи Окилэн, Даниил Майоровлэн дор палъёсазы. Мария Андреевналэн кузпалыз сярысь верамез сайкыт но югыт, ӝож но курыт. Таӵе суред пуксиз, со мадемъя. Илья Зоринлэн анаез Прасковья Ивановна Куӟебай Гердэн одӥг выжыысь. Соин ик соос доры Кузьма Павлович ӵем пыралляз. Илюшалэсь бабля йырсизэ маялтыса шуылӥз: "Тыныд поэт луоно". Та кылъёс пыӵазы Ильялэн йырвизьмаз. Кылбурчиос - Пушкин но, Есенин но - бабылесэсь бере... - Федя, оло, мон но кылбурчи луо-а? - юалляз со бадӟым агаезлэсь. Федор Андрианович (ожын бырем агаез) - дышетӥсь, тазьы индылыны нодсаськиз: - Мын ай тон Кенервыре, васькы шур дуре - кылзы, мар сярысь со вера. Мынэм Илья, но, шур жильыртэмез сяна, номыре кылымтэ. Кӧтыз ӝожен бӧрдэмез ик, пе, потэ. Агаез валэктэм, шурлэсь куаразэ кылзыны дышетсконо шуыса. Озьы ик со чакласькыны косэм, кызьы лушкем вераське ю бусы, ма сярысь вера-куашетэ нюлэс... 14 арес дыръя Илья Зоринлэсь нырысь кылбурзэ ёрос газетазы печатлазы. Гонорареныз со тетрадьёс-карандашъёс басьтӥз, лӧптыса гуртаз бертӥз. Но соку зол йӧтӥз анаезлэсь, пиез уксё лушкам шуыса. Сэндраын бӧрдыса кыллись пияшез буйгатыны нош ик Федя агаез вуиз. Анайлэн сюлэмыз чигиськиз, мазэ-созэ тодыса. Одӥг пол пиос Пасха нуналэ ик шурын пыласькыны яра ни кожаллям. Касьян кынмыса кылтэм-ымтэм кылем. Илья катьяськем Ида апаез шунтэмен-пӧсятэмен. Со дырысен, эшсэ эмъян вылысь, Илья фармацевт, врач луыны малпаз. Нош атаез чутрак пумит: кык пиосыз дышетӥсьёс ини, юртэз кутӥсь кулэ, таиз, пе, бухгалтер мед луоз. Илья ӧз кылзӥськы, пырак пыдын Иж пала вамыштӥз... Кызьы ке но дышетскон понна, сьӧд ужлы дышем крестьян пи пож ву кисьтан интыосыз утялтыса улӥз. Воштон дӥськутэз ӧй вал. Одӥг пол факультетлэн кузёез сое дораз ӧтиз: озьы но озьы, пе, ӝожтӥськонъёс вань, котырысьтыд зын потэ шуыса. Илья верано луиз... Солы соку сётӥзы юрттэт: дӥськут но мукетсэ. Удмурт радиоын ужась Гай Сабитов эшсэ ӧтиз дикторын ужаны. Пиезлэсь куаразэ громкоговорительысь кылыса гинэ Андриан буйгатскиз, ас понназ данъяськиз но, дыр. Ваньзэ тае ас синмыныз адӟем кадь вераса, Мария Андреевналэн шумпотонэз ӝожен сураське, тулкымъяськыны кутске. - Туж визьмо вал со, ваньзэ йыраз возиз. Горькийысь фармацевтической техникумын дышетскон сяменыз аптекаын ужаз, дас класс понна экзаменъёсыз экстернэн сётӥз. Фронтэ ачиз куриськыса улӥз, мединститутлэн ньылетӥ курсаз дышетскыкуз. Пӧсь тылӝуэ шедемезлэсь азьло сое Куйбышевысь академие ыстӥзы... Демобилизация бере Илья Андрианович соку ик научной ужез борды кутскиз. Аспирантуразэ йылпумъяз, берпум экзамензэ сётӥз гинэ - со нунал ик, 1951-тӥ арын 6-тӥ июле, сое арестовать каризы. Вуоно араз 28-тӥ апреле судэз вал - Дальний Востоке келязы. Кӧня кылбуръёсыз но, наука удысъя гожъямез но таламын, тус-тас каремын вал. Озьы сое янгыше уськытӥзы, националист, Куӟебай Гердлэсь адӟем каре шуыса... Верамезъя Мария Андреевналэн сюлэмыз кайгуэн тымиське. Али но со валаны уг быгаты, кызьы сокем ултӥяны луэ сыӵе ӟеч, ассэ номырин саптамтэ адямиез. Кызьы луэ возьыттэм кариськыса асэстыны гожъямъёссэ, ӟуч кылысь берыктэмъёссэ (вераськон мынэ "Полтава" но "Медный всадник" сярысь - тодӥсез тодэ, луоз). Ӝожъёсыз уртчыса пото. Мария Андреевна амалтэк малпано луэ: оло, али но кузпалзэ тушмонэн лыдъяло? Малы Илья Зорин сярысь гожъямъёсыз адӟыны уг луы газет- журналъёсысь? Яке - потэмзэ но уг возьмтао? Кылбурчи, тодосчи, военврач сярысь ас дыраз гожтыны дасяськизы вал Степан Зубарев, Михаил Федотов. Ӧз вуттэ... Берло но мукетъёс юалляськизы, редакциосысь ветлӥзы, туспуктэмъёссэ, гожтэтъёссэ куризы - ӧз но печатлалэ, ӧз но берыктэ. Бадӟым рукописьсэ, ӟуч кылын кылбуръёссэ дасяз картэзлэсь. Кин соосты печатлалоз? Кин юрттоз сӧсыр пал бурдыныз кылем кышномуртлы? Илюшаез солы сӥзиз вал "Валерий но Марина" поэмазэ. Тани отысь берло чуръёс: - Кыӵе умой, Марина, Шунды ӝужан дыръя. Со пилемез улля, Вирен кадь гордмаса, Нош тынэсьтыд бамдэ Пӧсь чупаса буям. Егит сюлмысьтымы Юн яратон понна, Мусо но шуд сётӥсь Родинамы понна, Вай герӟалом шудмес... Тазьы вылӥын луысал ке вань улытозяд возиськыны! Сюлэмзэ няськатэ на огез: таӵе ӝуждалаез адӟо на Ӝыжолгуртысен. Вавожъёс но уго вырйылэ пуксемын. Татьяна Чернова. Илья Андрианович ЗОРИН кузпалэныз Мария Андреевнаен. 1965-тӥ ар. Агай-вынъёс Степан, Илья (шораз) Фёдор но Клава сузэрзы. ШӦКЫЧ Визьгердъёс Кырсез ӵушыны капчи, Нош улонысь � уд ӵушы ни. *** Кӧттырмостэм нылкышнолэсь Уг мыльы номыр но. *** Муртлы шайгу гудод � Ачид усёд. *** Возьдаськонэз � ведраын, Керпотонэз � сюмыкын. *** Коридор � синмо, Кабинет � пелё. *** Пӧяськон � выж вылын, Зэмлык � йыр йылын. *** Пельыдлы эн оскы, Оскы синмыдлы. *** Тылтэк ӵын уг поты, Тӧлтэк писпу уг выры. *** Чечы ке вань, Кут но вань. *** Кин соку ик юрттэ, Со кык пол юрттэ. Лӧпшо Педунь. Вордскем нуналзэс туннэ пусъё: Скобкарев Александр Николаевич - Правительствоысь управлениен кивалтӥсь, "Удмурт дунне" газетлэн редколлегияз пыртэм мурт; Овчинников Александр Сергеевич - Кун Кенешысь валтӥсь специалист, "Удмурт дунне" газетлэн редакцияз ужам мурт. Ижевскысь винтовкаен � Турцие Туэ 17-тӥ июльысен 27-тӥ июлёзь Турциын ортчиз военной спортъя калык куспо огазеяськонлэн чемпионатэз. Та союз 1959-тӥ арысен ни дуннелэсь чемпионатсэ ортчытъя. Отын нюръясько военной спортсменъёс. Асьмелэнъёс со ӵошатсконъёсын ӧз вормылэ, малы ке шуоно, ӝог ыбылӥсь винтовкаосмы ӧй вал. Со пыӵалэн одӥг но ӝыны минутскын 10 пол ыбыны кулэ. 1995-тӥ арын ӵошатскон сӥземын вал Дуннеысь кыкетӥ войнаын вормем дырысен 50 ар тырмонлы. Армиен кивалтӥсьёс Ижевскысь но Тулаысь пыӵал поттӥсьёс азе ужпум пуктӥзы: одно ик лэсьтоно ӝог ыбылӥсь винтовка. Озьы ЦСКА-ысь спортсменъёс 1995-тӥ арын "Рекорд-СИСМ" винтовкаен Италие дуннелэн шудонъёсаз кошкизы но отысь киысь кие вошъяськись кузьымен бертӥзы. Вуоно араз вормизы Швециын, 1999-тӥ арын � Хорватиын. Озьы ӝог ыбылӥськонъя нырысьсэ вормиз асьмелэн спортсменмы Николай Антонов. Туэ но ЦСКА-ысь спортсменъёс вормонлы оско. Команда юромо отчы ӧтиз "Рекордэз" кылдытӥсьёс пӧлысь одӥгзэ инструкторез, "Ижмаш" Концерн" акционер огазеяськонысь спортъя пыӵал тӥрлык поттонъя бюролэсь кивалтӥсьсэ Владимир Стронскиез. Б.НИКИТИН. Веме азьын Югыт дунне вылын олокыӵе но шурдыт учыръёс луыло. Куке но кемалась вылэм ини таиз но учыр. Мыным та сярысь Трокай песятае пичи дыръям вераса кельтӥз вал. Кызьы ке но, Дунне кузё удмуртъёсты люкам но веме карон азьын зэмлык утчаны косэм. Асьтэос но тодӥськоды, веме карон - со туж бадӟым ужрад вылэм азьло дыръя. Али но озьы ик, дыр. Удмуртъёс мур малпаськонэ усиллям. Озьы ке но, самой визьмооссэ но кужмооссэ бырйыса, сизьым кузя удмуртъёс зэмлык утчаны сюрес вылэ потӥллям. Далай гинэ мынӥллям соос. Зэмлык дорозь кыдёкын ик вылымтэ ни. Со вие азьпалан вамышъясьсы пӧйшурлы согем гуэз адӟымтэ. Сизьым кузя удмуртъёс лук-лак гинэ отчы усиллям. Пуко, пе, ини соос кезьыт гуын куректыса. Кызьы отысь потыны амал утчало. Одӥгез удмурт нодлыкогес вылэм. Кызьы но озьы гу дуре ӝабырскем. Тае адӟыса, мукетъёсызлэн кӧтсы ӝож луэм. Ур-вар кесяськыны кутскиллям. Малы солы татысь огназлы потоно. Ми татчы сютэм быром. Йырзы курен сое бер куктӥз берлань гуэ кыскиллям. Огыр-бугыр луэм гуын. Малы тон ми дорысь пегӟиськод вал, пе. Милемды огнамес татчы сисьтыны малпаськод вал. Кутӥллям но выремез луонтэм куаӵ-куаӵ тышкаллям. Тупаны но кулэ, бен. Сыӵе макталгес учыр вылэм бигеръёс пӧлын но. Сизьым кузя бигеръёс но зэмлык утчаны потӥллям. Зэмлык дорозь матын вылэм ини. Гондырлы ватэм гуэз азьветлӥсьсы ӧвӧл ятвылтэм. Сизьымназы ик лурк-ларк гуэ куашкаллям. Пуко, пе, куректыса. Амал утчало гуысь потыны. Одӥгез бигер визьмогес вылэм. Ойдолэ, пе, монэ нырысь поттэ. Собере мон тӥледды гуысь черодэн поттыло. Озьы ик кариллям. Кылзӥськиллям визьмо адямилэсь. Усьтыр-табыр сое гуысь ваньзы ӵош донгиллям. Нош соиз бератаз, кузь зырен но курен эшъёссэ гуысь ӝутъям. Отын ик гу дурын бигеръёс сэбет кариллям, огазьын улон вылысь кыл вераллям. Озьы-а, тазьы-а но Трокай песятаелэсь верамзэ мон туннэ ке но уг вунэтӥськы. Пӧяз-а, ӧз-а со монэ, ужпум со бордын ӧвӧл. Ужпум мукетыз бордын уга... Тани ӝоген веме луоз. Ф. Суворов. "Изложение гожтысал ке..." Пӧсь вылэ пӧсь али Удмурт кун университетын. Мыно выль дышетскисьёсты кутонъя экзаменъёс. Шонерзэ вераса, соос йылпумъясько ини. Ӝоген тодмо луоз, кыӵе шудоос шедизы туэ студентъёс радэ. Но солэсь азьвыл куд-ог йылпумъянъёс лэсьтыны луоз ни. Эскером, кызьы утиське туннэ татын анай кылмылэн данэз, юрттэ со, яке уг абитуриентъёсмылы. Озьы бере, нырысь ик поръялом удмурт филологияя факультет котыртӥ. Борддоре ошемын уно списокъёс - экзаменъёсын басьтэм оценкаос. Та факультетэ пырыны 72 мурт мылкыд карем. Удмурт кылъя но литературая (устно) экзаменын 15 мурт "2" басьтэм, 4-ез - "5", 22-ез - "4", отӥосыз - "3". кызьы адӟиськомы, шумпотымонэсь ик ӧвӧл таӵе тодон-валанъёс. Приёмной комиссилэн членъёсыз верамъя, удмурт но немец, удмурт но англи группаосы пырисьёслэн оценкаоссы вылӥынгес луо, татчы конкурс бадӟымгес. Нош журналистикая факультетлэн удмурт люкетаз туэ но, азьвыл аръёсы сямен ик укыр вожмаськон уз луы: одӥг интые 1,7 мурт. Удмурт филологияя факультетлэн предметъёсъя комиссиезлэн кивалтӥсез А. С. Зуева шумпотэмзэ вера: - Берло аръёсы ми доры пырыны капчигес луиз. Толалтэ каникулъёс дыръя ортчыло удмурт кылъя но литературая олимпиадаос. Кин нырысетӥ интые потӥз, соос милям факультетамы экзаменъёстэк пыро. Кыкетӥ, куинетӥ инты басьтэмъёс специальностья гинэ экзамен сёто на. Озьы мон шумпотыса вераны быгатӥсько Лариса Широбокова (медалистка), Милана Тимирзянова, Надя Пименова сярысь. Тазьы ик нимын-тулын верано ке, Шаркан ёросысь Быги школаез зарни медален йылпумъям Алена Хохрякова историяя факультетэ пыремен лыдъямын ни, собеседование дыръя "5" басьтыса. Алнаш ёросысь Варзи-Ятчи школаысь медалист Андрей Зиновьев юридической факультетэ пыриз, шуыны луэ ни, собеседованиын но специальностья экзаменын "5" басьтэмез бере. Юристэ пырисьёс Жанна Рыбакова, Александр Аляшев но Сергей Камашев, искусствоосъя факультетэ мылкыд карись Татьяна Ускова удмурт кылын изложение понна "5" басьтӥзы, табере соослэн бадӟымгес осконзы конкурс пыр ортчыны. Приёмной комиссилэн условиосызъя филологической луисьтэм факультетъёсын удмурт абитуриентъёс ӟуч кылын сочинение интые гожтыны быгато удмурт кылын изложение. (Та чуръёс борддорысь берло малы ке ышизы.) Ӵапак та пумысен журналистикая факультетын дыго-мого берган кутскиз. Конкурсэ пыриськемъёс пӧлысь ӝыныез, дас мурт, гожтӥзы изложение. Ӝыныез - тодытэк яке асьсэос мылкыд карыса - сочинение. Озьы, приёмной комиссия дыраз но умой ивортымтэен, куд-ог пиналъёс шуге-леке сюризы, сочинение понна оценкаос, изложениен ӵошатыса, улынгес луизы (нош списокын ваньмыз оградэ пуктэмын). Озьы луэм бере, устогес быгатӥсьёсыз дышетскыны пырытэк уз кыле меда? - Ми нырысь ик сюрес усьтыны тыршиськом творческой мылкыдо, аспӧртэм малпаськыны быгатӥсь пиналъёслы, - шуэ журналистикая кафедралэн кивалтӥсез А. Г. Шкляев. - Нош ӵапак таӵеос ик ӵемысь грамматика ласянь "чутогес". Соин ик кылем арын творчествоя конкурсэз дас баллъем системая тупатӥм вал. Огдырлы кивалтыны оскем адямиосмылэн туэ озьы лэсьтэмзы ӧз поты. Туэ но та факультетын умойтэм югдур кылдӥз, предметной комиссиез удмуртлы но ӟучлы люкыса. Литературая вылӥ тодон-валанъёсын удмурт преподавательёслы "оскытэк", ӟуч кылын сочинениеосты эскерыны ӟуч филологияя факультетысь дышетӥсьёсты ӧтизы. Азьланяз таӵе асныро кивалтон вуттыны быгатоз журналистикая факультетысь удмурт люкетсэ ӟученыз ӵошкатонэ. Соку татысь удмурт журналистъёс уз потэ ни. Нош соос тырмо шат ёросъёсысь газетъёсын? Таосыз но тросэз ворсаллямын ини. Ӟуч кылъя но литературая предметной комиссия нокинэ йырси кузяз уг маялля, уг юа - кыӵе факультетэ пыриськод, гуртысь-а тон, городысь-а, ӟеч-а тонэ дышетӥзы, лябгес-а? Ӵапак ӟуч кылын сочинениен сэрен ик тросэз куашкало. Сыӵе дыръя удмурт кылэз дышетымтэ пиналъёсмы амалтэк жаляно луо: "Эх, изложение гожтысал ке!" Соос интые пуктысал ке калыкез дышетон удысын кивалтӥсьёсыз. Оло, валасалзы таӵе висёнмес. Т. Петрова. ШӦКЫЧ Кудмы меда шаплыгес? Сценка Сцена вылын ӝӧк сьӧрын Тылмурт пуке, мукетаз � Вумурт. Пыдлояз пӧртэм оргтехника пуктылэмын, секретарьёс мар ке но печатласа пуко. Борддоре Удмурт Республикалэн картаез ошемын. Тылмурт � горд дӥсен, Вумурт � вож дӥсен. Ӝӧк вылъёсын � тачак микрофонъёс. Мынэ селектор пыр кенеш. Тылмурт (микрофонзэ чиньыеныз кокаса.) Балда, кылӥське-а, уг-а? Вумурт (пукон вылысь выж вылэ усе.) Ачид тон Балда! (Пельёссэ чиньыосыныз чуласа.) Мар сокем кесяськиськод? Пельдыжъёс ик пилиськизы, лэся. Уд адӟиськы-а, мар-а, японской усилительёс пуктэмын шуыса? Тылмурт. Ё, п, р, с, т! Мон тон шоры уг кесяськиськы! Республикаямы кызь вить районъёс, кызь вить администрациос, кызь вить йыръёс, нош кӧня воштӥсьёс, юрттӥсьёс, уполномоченнойёс, заведующийёс но мукетъёсыз � ваньзы мед кылозы шуыса, куараме бадӟыматӥ вал. Вумурт. Озьы-а ма? Ӟырдамед, лэся, ини уж дурад. Вай ай мон тонэ кезьыт вуэн чызъё! (Чызъе). Тылмурт (бӧрдысьтыз ӵаш-ш-ш! пар потэ.) Тырмоз! Уж дурын уг яра юыны. Как никак, асьмелэн селекторной кенеш мынэ. Вумурт. Шонер. Ойдо уж борды. Тон-а, мон-а нырысь кутском? Тылмурт. Мон! Укыргес ӟырдай ке, нош ик пызъёд. Вумурт. Ярам. Ойдо ӝоггес! Калык вите. Тылмурт. Сыл ай, укыр пыӵ кадь эн керӟегъяськы. Адямиослэн мугоразы тямыстон процент ву бере, тон ик азькыл интые мар ке пичи кыл вера. Тонэ умойгес валалозы, дыр, кызьы шуо, чорыгась чорыгасез кыдёкысен адӟе, пе. Вумурт (микрофонэз дораз кыскаса.) Гажано эшъёс, господаос, бомжъёс но моржъёс! Ми али селекторной кенеш ортчытӥськом. Мынам уже трос. Шуръёсты чаклано � медаз куасьме, тыметъёсты утялтоно � медаз сумедаське, чорыгъёсты будэтоно � медаз ичиёме, адямиосты выйтылоно шуыны шедьтод ай, син улын возёно � медаз вые... Та пӧсь куазен укыр жомбылляськыны ярато. Тылмурт (микрофон пыр.) Кылӥськоды-а, уд-а, адямиос, Чупчи но Кам, Кильмезь но Вало, Ита но Ува шуръёс но мукет тыметъёс дурын улӥсьёс, мар вераз Вумурт? Вумурт. Селектор пыр вераськиськом бере кыло, дыр. Туэ гинэ мон куатьтонлэсь ятыр адямиосты... Тыломурт (кыл висказ пыре.) Стоп! Дугды! Сыл ай, табере мон верало, туэ гинэ вить толэзь куспын, ӝыны арлы йылпумъянъёс ӧй на лэсьты, сю куатьтон куать тонна пудо сиёнэз пень кари ини! Тодӥськоды-а сомында турынэн кӧня толэзь пудо сюдыны луысал? То-то! Кылем арен ӵошатыса, со ньыль поллы уногес. Кивалтӥсьёс тылпулы дышемын ини, шӧдске. Нош вераса, быдэс республикаямы, ӟуч сямен но верало ай, ситуация пожарной! Вумурт (визьтэммыса султэ но Тылмуртэз вуэн пазяны кутске.) Пожар, пожар, пудо сиён ӝуа! Тылмурт (Вумурт вылэ омырске.) Возьмато мон тыныд али пожар! (Нюръясько). Вумурт. Возьмато, возьмато!.. Мон туэ гинэ куатьтон муртлы возьматӥ ини... Тылмурт. Нош мон, мар со куатьтон, сю куамын ке луысал, мукет ужпум. (Шуак нюръяськемысь дугдо). Вумурт. Ойдо тупаса улом. Асьмелы мае люконэз? Тылмурт. Озьы! Шонер! Тон выйтӥськод, мон сутӥсько � емышез одӥг, адями лул! Кудмы меда шаплыгес? Вумурт. (Тылмуртлэсь ымзэ пытса.) Калленгес тон! Адямиос кылозы! (Микрофонэ). Таин селекторной кенеш йылпумъяське. Выльысь пумиськытозямы, эшъёс. Тылмурт но Вумурт кунулскыса эктыса кошко. Пумыз. Сценкаез дасяз А.ВАМПИРОВ. ШӦКЫЧ Николай НИКИФОРОВ Кин юртын кузё? Серемес верос Сяла Зоя чебер нылмурт, таза. Городын ужа ке но, кузпаллы бызьыны уг дырты. Мон сямен ик кельшымонзэ уг шедьты, луоз, мискинь лул, весь бырйиське. Ог нунал ӝыт шудонысь бертыкум, шорам вазись луиз. - Ма-а, Донды Веня, тон, лэся, ук? Мар-ось горд нырдэ инме йӧтымон ӝутыса ортчиськод? Чаль ай вӧзам, огшап пуком. Вожпотэмен пыдпыдэсы лыдыны кутскиз, сюлэмы шори пилиськоз кожасько вал. Кин-о чебер казакпи шоры сыӵе йӧнтэм вазиськоз? Озьы ке но, дораз вамыштӥ. - Фильтрен сигаретэд ӧвӧл-а? - керпотытэк сутэр синъёссэ шорам мырӟытӥз.- Ӵындэме потыса, сюлэм викышъя ни. "Вот, мировой нылмурт! - малпасько поннам.- Кер но уг поты. Нош милям гурт нылъёс, мултэс синъёслэсь ватскыса кыско". Син азям Сяла Зоялэн данэз лабрес сирень йылозь ӝутскиз, ява! - Мынам "Прима" гинэ. Мукетызлы кытысь-о коньдон? - Яралоз, вай огзэ,- брюки кисыысьтыз зажигалказэ поттӥз мертчан йырсиё нылаш. "Вот, дунне адями! Артистка! Чебер мунё!" - олокыӵе ӵошатонъёс но бергало ни йырвизьмам. - Донды Веня, курытсэ юэмед потэ-а? - воргорон музэн ӵынзэ ныртӥз пельтыса юа со. Ачиз уйшорысь толэзь музэн мыньпотэ. - Пӧзьтэм кумышкаед, яке чырсалэс бражкаед вань-а? - Мон сыӵе пож вуосын ымпушме уг саптаськы. Сьӧрам коньяк вуттӥ, вить кизилиензэ. - О-о, ништяк! Пумит ӧвӧл. - Ойдо сьӧрам,- кенос пала вамыштӥз нылмурт. Кунояны ӧтемзэ, сьӧраз кеносэ пыртэмзэ малпаса, Сяла Зоялэсь данзэ соку ик капка выжыын будӥсь ӝужыт тополь йылозь ӝутыны вутски. Шумпотэмме шӧдытыны, малпанъёсме вераны гинэ уг дыртӥськы на. Коньяк юыса, сигарет ӵындыса, олома сярысь но лабыртыса пукеммы бере, маке сюлэм гиз-з! карыны кутскиз. Мынэсьтым мылкыд воштӥськемме Сяла Зоя дыраз синйылтӥз, лэся, валес котыръёссэ дасяны ӧдъяз. - Мар-о, Донды Веня, мугорад пиосмурт кужымед бультыртыны кутскиз, оло? Озьы луэ со. Коньяк котьку ас ужзэ лэсьтэ,- кит-кит серектэ нылмурт кылчин куараеныз. Мон долкай, пал кыл но вазьыны уг быгатӥськы ни. Шӧдӥсько: мугорысьтым вире тани- тани самоварысь ву музэн быректоз. Сяла Зоя, валессэ дасяса, вылдӥсьёссэ куяны кутскиз. Шоканме ыштыса, ӧс пала ог вамыш гинэ лэсьтыса вутски но, пельпумам лэчыт кучыран гижыос мертчиськизы, оло. - Ох-хо,- лулскиз нылмурт.- Йӧнтэм ик вылэмед тон, Донды Веня. Кеносам кунояськид но быжтэм ӟичы музэн пегӟыны турттӥськод. Уз пӧрмы. Ӟучъёс верамъя: "Долг платежом красен", - визьноданъяз Сяла Зоя, дӥськутме муз вылэ сэрпалля. Мон воксё пуми, интыям кортӵогам музэн сылӥсько. Сяла Зоя, пичи нуныез сямен капчияк ӝутыса, валес вылаз интыяз. Вить ар куайытэм ошлэн мында, лэся, кужымез. Шоканме ыштыса кыллисько ӟазег мамыклэсь дасям валес вылын. Сяла Зоя ас ужзэ уг вунэты: ымдуръёсме нюлэ, пичи нонок йылъёсме вӧсь каронтэм гинэ куртчылэ, гогы шорме луч-луч чупа, кулэтэм интые ӝужам бабля гонъёсме маялля... Мылкыд - вераны-гожтыны луонтэм. Ми Сяла Зояен юг-тӧдьы юсьёслы пӧрмытскыса, инсьӧрын поръяськомы кадь. Ӵукна пал валатски: таки эриктэмаз монэ, лулбасьтӥсь! Киыным шонтӥ, казакпи данме ыштэмысьтым ӧй куректы ни. Инмарен кымесам пусъем адӟонэ сыӵе, вылды. Соиз тумошо: ачиз монэ кужмысь эриктэмаз, ачиз ик секыто кариськиз. Амалтэк, загсэ ветлыса, сюан нерге ортчытытэк ӧз луы ни. Таки картлы басьтӥз монэ. Кин табере юртамы кузё? Зоялэн кылыз одӥг: - Мон тонэ, Донды Веня, картлы басьтӥ. Озьыен, мон кузё! - Ӧвӧл, - шуисько, - Сяла Зоя. Мон пиосмурт, йырам изьы-картуз нуллӥсько бере, озьыен, юртмылэн кузёез мон луыны кулэ! Ваче гадь кырмиськеммы бере, сьӧлтаса уськытыны быгатӥ ик. Гань-гань, небыт валес вылын сямен кылле кышное выж вылын. Ӵап соку Вася ӵужмуртэз пыриз. Ӝуждалаез но, пасьталаез но огкадь. Квадрат. Огпол мыжгиз ке, пень кароз.Лулы ик пыдтышкам лэзькиз. Выж вылын кыллись кузпалме адӟыса бурсӥз: - Ма луиз, Зоенька? Оло, Донды Веняед обидиз? - Ӧз, ӧз,- киыныз шонтӥз кузпалэ. - Шутэтскисько тани. Мон юртлэн кузёез ук, кытын шутэтскеме потэ, отын ик кыллисько. Квадрат кема ӧз ӝегатскы - кошкиз. Нош мон ӝӧк сьӧры интыяськи но выж вылын шутэтскись кузпалэ шоры учкыса, мур малпаськонэ уси. Кин кузё юртамы? Валэктэ юрист Сэрегез нуэ адвокат Лилия Шкляева Телефон: 25-33-70 Нош ик ваньбур люкон сярысь Гажано адвокат, нош ик тӥледлы гожтоно кариськи. Кылем аре вазиськылӥ ни вал тӥледлы. Ужпум таӵе. Мынам картэ кулӥз 1999-тӥ арын 15-тӥ апреле, мусэз ракен висьыса. Улӥмы солэн анаеныз ӵош. Таиз кулӥз 2000-тӥ арын 15-тӥ мартэ. Кылем арын мон ӧй быгаты юртэз ас вылам карыны. Со картэ вылын вал Страховой уксёзэ но сельхозналогзэ тыри ачим - инвалид понна басьтэм пенсиысьтым. Картэ кулэм бере, юртъерез мон вылэ кароно, шуизы сельсоветын ик. Нош музъемлы свидетельство сётэмын картэлэн анаез вылэ. Музъемъя комитетын индылӥзы: нокызьы но тон вылэ выжтыны уг луы картэдлэн анаез вылысь. Кулэ документъёс бичай вал ини. Сомында бызьылэме но коньдон быдтэме юнме луиз. Кин-о янгыш одӥг хозяйствоын кык кузё луэм понна? Мон малпамъя: сельсовет. Отын уг ик малпало юрттыны. Ул, кызьы улӥськод вал, шуизы. Оски сельсоветлы, законэз тодэ кожай. Али, картэлэн анаез кулэм бере, монэ юртысь поттыны шӧтазы. Малы ке шуоно, со завещание гожтэм: ваньмыз мед выжоз правнукезлы - мынам вордэм нылылэн пиезлы. Озьы ик пусъем: мынам та юртын чик ӧвӧл пае, кельтосэ, ваньбуре. Малпалэ ай. Мон картэным улӥ 25 ар. Бракмы вал. Вань ук мынам но та юртын сомында ар ӵоже ужам уже. Табере монэ пересьмон уй-нуналам пыдйылчие кельтыны медо. Сельсовет шуэ: пропискаед вань бере, тонэ нокин но уз улля. Зэм, кулыны уг малпаськы ай. Мыным али 45 арес, внукелы - 6. Курдасько: внукелы 18 арес тырмиз ке, монэ юртысь поттоз но лэзёз. Мон, пересь мурт, мар каром на? Уг быгаты ни мон асме ачим утьыны. Кеӵевыл потӥмы нылыным но. Уг валаськы кызьы улыны. Асме ачим быдтыны выри ни, соку инвалид кыли. Инмар азьын сьӧлыко кулэме уг поты вал. Астэ ачид быдтон - бадӟым сьӧлык ук. Туж ӝож мыным, али но бӧрдӥсько. Весь тазьы улыны уг чида ни. Уз-а луы мынам интыяськеме пересьёслэн юртазы? Ӝоген монэ комиссие ӧтёзы, уг тодӥськы, кыӵе группа кельтозы. Инвалидысь куштӥзы ке, кызьы улом? Тазалыке ляб. Так ке мон поръясько, нош ужаме уг луы, пыдъёсы лябесь. Мыным юртто юнме муртъёс. Пудо сиён но, пу но соос дасяло. Юанъёсы таӵеесь. Луэ-а юртэз кулэм мурт вылысь кулэм мурт вылэ карыны? Мон ачим улэп ук ай. Завещаниен луэ-а монэ юртысь поттыны? Внукелы 18 арес луэм бере, быгатэ-а со монэ коркась улляны? А. А. Можга район. Тӥляд юанъёстылы пумит мынам но кӧня ке юанъёсы кылдо. Ужпумез сэрттон-пертчон вылысь, нырысь ик тодоно: картты кулэм бере, юртъердэс кыӵе муген выжтӥзы солэн анаез вылэ? Собере: тӥляд семьяяды кин но кыӵе дунын басьтӥз вал сое? Юртъерез картэныды ӵош бракен улыкуды басьтӥды ке, солэн ӝыныез тӥледлы кыльыны кулэ. Куинетӥ юан: малы юртъер гожтэмын вал карт вылэ, нош со улысь музъем -картлэн анаез вылэ? Картты кулэм бере, тӥ весь улӥды ке та коркан, пропискады отын ке, вытъёс (налогъёс) тыриды ке, вазиськелэ судэ, кельтосэз (наследствоез) басьтэмды сярысь учырез пусйыны курыса (ӟуч сямен: об установлении факта принятия наследства). Судлэн таӵе решениез луонлык сётоз юртлэсь ог люкетсэ тӥледлы кылем ваньбурен лыдъяны. Та юртын пропискады вань ке, нокинлэн но правоез ӧвӧл тӥледды улон интытэк кельтыны (Россия Федерацилэн Конституциысьтыз 40-тӥ ёзэт). Улон интылы право луэ ваньбурен герӟаськымтэ право но ыше адями кулэмен валче гинэ. Озьыен, внуктылы 18 арес тырмем бере но тӥ вань улытозяды сыӵе правотэк уд кыле. Асьтэды утён но пересьёслэн юртазы выжон пумысен вазиськыны кулэ улон интыысьтыды шугадӟонъёслэсь утёнъя ёзэ яке республикаысьтымы Калыкез улон- вылонын утёнъя (Социальной защитая) министерствое. Кыӵе ке юанъёсты кылизы на ке, вазиськелэ судэ. *** Люба нырысетӥ картэныз вордӥз кык ныл. Картэз кулэм бере, со бызиз Васялы но пи ваиз. 1970-тӥ арын Люба шудтэм учыре шедьыса быриз. Вася кышнотэк кылиз. Мынам но улон-вылонэ сыӵегес кошкиз. Нырысетӥ картэлэсь кык ныл вордӥ. Сотэк кыльыса, 1972-тӥ арын бызи огназ кылем Васялы. Таиныз нуны ӧй вай ни. 1983-тӥ арын Вася кулӥз. Солэн атаез войнаын бырем. Анаез кулӥз Вася бере. Мынам огез нылы мукетыз кулӥз. Васялы бызьылэмезлэсь азьло Любалэн ваем нылъёсыз ас семьяосынызы нимазы уло. Любалэн но Васялэн огъя пизы озьы ик ас понназ улэ- вылэ. Васяен ӵош улэм юртъермес приватизация шуон пыр аслым ӧй басьты. Тодэме потэ: кинлы со кылёз кулэме бере? Мыным 74 арес ини. Юртто мыным нылы но солэн пиналъёсыз. Ӝоген мон гуртысь юртъерысьтым выжо соос доры. Ватсаме потэ созэ но. Васялэн вань на выныз. Войналэсь азьвыл ик гуртысьтымы кошкиз, ныл но пи вордӥз. Басьтоз-а нылы маке? Судэтӥ со уз ветлы, мар сётозы-сётозы. Мон тазьыгес малпасько: ваньбур кыльыны кулэ, дыр, Васялэн но Любалэн огъя пизылы гинэ. Нёшто Любалэн нырысетӥ картэныз ваем нылъёслы но маке усёз? Орина. Нырысь ик шонер тодыны кулэ юртъерлэсь но со улысь музъемлэсь кыӵе асваньбур (собственность) луэмзэс. Соос нимаз (частной) лыдъясько ке, нокыӵе приватизация кулэ ӧвӧл. Нялтас пусъём приватизацилэсь аспӧртэмлыксэ. "Россия Федерациысь улон интыын фондын приватизация сярысь" Законлэн 1-тӥ ёзэтэз (статьяез) валэктэ: улон интыын приватизация - со кунлэн но муниципалитетлэн фондысьтызы улон интыез гражданъёслы ас мылкыд каремзыя дунтэк сётон. Адями улон интызэ озьы аслыз басьтыны быгатэ огпол гинэ. Сыӵе ик куронъёсъя ортче музъем кесэгъя (участокъя) приватизация (Россия Федерацилэн Музъем кодексысьтыз 80-тӥ ёзэт). Юртъер нимаз адямилэн асваньбурез лыдъяське ке, тодоно: ку, кин но кыӵе огкылъя (сделкая) басьтӥз сое. Тӥ сое басьтӥды ке бракен улыкуды, ӝыныез тӥляд лыдъяське ни. Татын уг учко, кин вылэ гожтэмын документъёс. Табере тодоно, кинлы но кинлы кыльыны быгато юртъерлэн люкетъёсыз. Завещание ӧвӧл ке, котыр огмында люкет басьтыны быгато: нырысетӥ черодъя - нылпиос (вордыны басьтэмъёсыз но), кузпал но анай-атайёс; кыкетӥ черодъя (нырысетӥ черодын нокин ӧвӧл ке) - вын-агайёс но сузэр-апайёс. Озьыен, Васялэсь кельтоссэ басьтӥсьёс пӧлы пыриськоды: тӥ, Васялэн но Любалэн ӵош вордэм пизы. Кельтослэн люкетэз тӥляд медло шуыса, сое басьтыны (принять карыны) кулэ, та ужез тӥ ӧд ке лэсьтэ, кельтос шараяськем бере куать толэзь ортчыса. Шуом, Вася кулыку, солэн но Любалэн пизылэн но Васялэн анаезлэн та юртын прописказы ӧй вал, собере та юртъерлэсь люкетсэ соос асьсэлы каронъя (наследствое басьтонъя) ужрадъёс ӧз кутэ. Нош тӥ та коркан улӥды, вытъёс (налогъёс) тыриды яке кельтосэз асьтэлы карон пумысен нотариатъя конторае вазиськиды. Соку Васялэн анаезлэн но пиезлэн люкетсы тӥледлы ик выжыны кулэ. Тӥледлы мон дэмласько юртъеръя бумагаостэс али ик радъяны. Озьы-а, тазьы-а, но кельтосэз асьтэлы карон сярысь куронэн кудаз ке нотариатъя конторае яке судэ вазиськоно луоды. Сибирьысь ваньбур Азьвыл калыкез Сибирен кышкатъяллязы, йӧнтэмъяськисьёссэгес отчы кужмысь келяллязы. Табере Сибире ас мылкыдзыя ветло. Кылсяырсь, "Удмуртнефть" акционер огазеяськон пыр. Ӵапак со уго Новосибирск областьын алигес нефть кыскон вылысь музъемез портыны ӧдъяз. Кызьы верало геологъёс, Вылӥ-Тарск котырын, татын тыршо удмуртиысь лыктэмъёс, 24 миллион тонна му вӧй люкаськемын. Кык ар ортчыса, татын арлы быдэ 1 миллион тонна дуно ваньбур поттозы. А.ЕФИМОВ. Кунокуа "кунооссэ" вите Воткинскын ужа улон интытэк кылем адямиосты возён корка-гостиница. Отчы огдырлы улыны куто секыт югдуре шедем муртъёсты. � Секыт югдур кылдӥз 1996-тӥ�1997-тӥ аръёсы, � вера Воткинскысь администрацилэн калыклы улон-вылонын юрттэт сётонъя управленилэн кивалтӥсез Александр Гурьянов. � Уноез пыдйылчие кылизы квартираоссэс умойтэм вузам адямиос. Али городын соос ог 50 пала лыдъясько. Гостиницаын улӥсьёс пӧлысь ог 90 процентэз пытсэт сьӧрын азьвыл пукемъёс, юисьёс. Вань ужтэк кылемъёс но. Шоро-куспо арлыдзы 40-50 арес. Уно гинэ дорысьтызы нылпиосынызы уллям пенсионеръёс. Уже интыяны но улон инты утчаны чакламъя 6 толэзь дыр сётӥське. Дисциплина ласянь татын чурыт. Туэ юэмзы но ужаны пумит луэмзы понна уллямын 18 мурт. Толалтэ гостиница быдэс калыкен тырмытэмын. Али татын 7 адями улэ � ньыль воргорон но куинь нылкышно. Кунокуа чакламын 19 муртлы. Та юртын чылкыт но шуныт. Вань телевизор, электроплита. Уноез пенсия яке уждун басьтэ. Асьсэос ик сиён-юон басьто, пӧрасько, комнатаосазы утялтӥсько. Гостиница ӵуказе нуналлы оскон кылдытэ. Туэ со пыр потӥз ни 39 мурт, 9 адями ужаны интыяськиз, 12-ез огдырлы уже кутэмын. Али 25 адямилы документъёс дасясько. Дунтэк сиськонлы кутэмын ни 25,7 сюрс манет коньдон. Мар бен, кунокуа "кунооссэ" вите. Но сыӵе куноос ичигес мед луысалзы вылэм. Н.НИКИТИН. Удмурт Республикаысь Правительстволэн 1999-тӥ арын 28-тӥ июне юнматэм "Удмурт Республикаын вузъёслы дунъёсты кун ласянь радъян сярысь" 580 номеро постановленияз воштонъёс пыртон сярысь Удмурт Республикаысь Правительстволэн постановлениез Няньлы но мукет пыжиськемъёслы дунъёслэн ялан будэменызы валче но калыкез улон-вылонын утён вылысь, Удмурт Республикаысь Правительство пуктэ: Удмурт Республикаысь Правительстволэн 1999-тӥ арын 28-тӥ июне кутэм "Удмурт Республикаын вузъёслы дунъёсты кун ласянь радъян сярысь" 580 номеро постановлениезлэсь 2-тӥ люкетсэ тазьы лыдӟоно: "2. Няньлы но пыжиськемъёслы нянь пыжись предприятиосын тупатэм дун вӧзы йылтыса вузкарон дунлэсь быдӟалазэ кызь процент тупатоно". Удмурт Республикаысь Правительстволэн Тӧроезлэн нырысетӥ воштӥсез Ю. С. Питкевич. Ижевск город, 2000-тӥ арын 30-тӥ июне. � 648. Кызьпуос сипырто Кодилын Якшур-Бодья ёросын улӥсьёс ӟечен гинэ верало татысь музеен кивалтӥсь Валентина Иванова сярысь. Со котьку зӥбыт сямо, вазиськись. Аслэсьтыз ужзэ гажа но ӟеч тодэ. Соитэк-а якшур-бодьяос ӵемысь дораз лыкто: я таизлэн гуртлэн улон сюресэныз тунсыкъясько, я соизлэн. Тани алигес Кодил гурт кылдэмез дырысен 265 ар тырмонзэ пусйиз. Та ужрадэз радъянэ но Валентина Иванова мылысь-кыдысь пыриськиз шуыса вера "Восток" колхозысь валтӥсь специалист Петр Широбоков. Солэн юрттэмезлы луыса но бырон калэ вуэм гуртэ калык тыраз люкаськиз. Пӧлысьтызы уноез вордскем палъёсазы ог дасо аръёс ӧз вуылэ ни вал. Мӧзмизы соос татысь жильырась ошмесъёслэсь но, куке но ас киынызы мерттэм писпуослэсь но. Чебер инкуазь Кодил котырын. Удмуртлыклы азинскон сётӥсь Григорий Верещагин юнме ӧз синмаськылы, дыр, та интыослы. Тужгес яратылӥз со Кыква но Кодил вискысь бамалэ вуылыны, Сосновка школаын ужакуз. В.ПЕТРОВ. Ялкар, "Шундыкар"! Усьтӥськиз визьмо удмурт нылпиослэн "Шундыкар" лагерьзы. Туэ со ужа Иж вӧзын ик � "Дзержинецын". Удмурт егитъёслэн "Шунды" дэменлыксылэн тӧроез Татьяна Прокопьева верамъя, туэ отчы данаклы уногес пиналъёс ваемын. Лагерез сӥё-дано усьтонын пӧртэм интыосысь куноосын ӟечкылазы нациосын ужан политикая министр Николай Мусалимов, "Удмурт дунне" газетлэн валтӥсь редакторез Алексей Шкляев, Егитъёсын ужанъя кун комитетлэн тӧроезлэн воштӥсез Галина Юсупова, культурая министрлэн воштӥсез Сергей Мутерко но мукетъёсыз. Пинал литераторъёс, журналистъёс, суредасьёс, артистъёс но мукетъёсыз огдыре ик ӟеч тодон-валан люкало но ялкаро (шутэтско). А.СИДОРОВ. Туспуктэмез В.Беломорскихлэн. Молдавиысь демократической кужымъёслэн партизылэн азьветлӥсез Валериу Матей Россиысь политической партиосты янгыше уськытӥз, соос странаезлэн ужъёсаз пырисько шуыса. Ма ӧз кельшы солы? Бендеры городын "Единстволэн" ёзэзлэн учредительной съездэз ортчиз. Кичӧлтӥсьёс пӧлын бадӟым предприятиослэн директоръёссы вал. Нош ёзлы кивалтӥсе андан ӵыжатон заводлэн директорез Анатолий Белитченко юнматэмын. Азьвылгес улосын ужаз ини ЛДПР-лэн ёзэз. Молдавиысь тодмо политиклы Валериу Матейлы дурбасьтӥз Юстицияя министерство. Солэн представителез Наталья Издебски шуиз, Россиысь политической партиослэн ёзъёссы, пе, республикалэсь законодательствозэ тӥяло, угось соя Молдавиын мукет кунъёсысь партиослэсь ёзъёссэс кылдытъяны уг яра. "Единство-Преднестровье" движенилэн кивалтӥсез А. Белитченко пусйиз, "Единствое" пырем муртъёс - ваньзы ик Россилэн гражданъёсыз, озьы бере, Молдавилэсь законодательствозэ соос уг тӥяло. Чечняын югдур сярысь. Федеральной ёзъёслэн тыршеменызы Чечня администрацилэн йырыз Кадыров но солэн воштӥсез Гантамиров куспын пумитъяськон сӥяз. Гантамировез суд улэ кыскон уж но дугдытэмын, югдурлэн ӟырдамез понна со виноват ӧвӧл, пе. Нош ожмаськонъёс сярысь верано ке, соос кемаласен паськыт уг мыно ни. Боевикъёс ватскизы, йырзэс уйёсы гинэ мычыло, фугасъёс, минаос пуктыло. Соин ик сапёръёслэн ужзы ӧжыт ӧвӧл. Лобыса кадь Москва�Петербург чугун сюресэз тупатъяны кутскизы. Кайта выльдэм сюрестӥ бадӟым ӝоглыкен (часкын 250 иськемозь) "Сокол" поезд ширтоз. Мынӥсь-ветлӥсьёслэн дырзы шыръяськоз. Табере соос 4 час куспын Москваысь уй пал столицае вуозы. Поезд 6 вагонлэсь луоз. Улмопу Марсын уг буды на Куинь ар талэсь азьло США-ысь космос аппарат "Пасфайндер" Марсэ пуксиз но Музъем вылэ сюрс пала туспуктэмъёс келяз. Матысь дыре Америкаысь космосъя агентство (НАСА) Горд планета пала одӥг яке огдыре кык аппарат лэзьыны малпа. Марсэтӥ ветлӥсь робот нуналскын 100 метр вамыштоз, котькуд вамыш адӟемез сярысь НАСА-ысь кивалтӥсьёслы ивортоз. Ӟырдам табаын кадь Таджикистанын кӧня ке толэзь ӵоже ини зорытэк ӵушкась пӧсь улэ. ООН-ысь эскспертъёс лыдъямъя, азьвыл совето республикаысь ог 3 миллион адями сютэм кылёз. Странаын уг тырмы кидыссы, сӧриськылэмын вуэз бусыосы лэзён техника. Та вылэ ватсаське на экономикаын кылдэм секыт югдур. Бастэмын Интернет пыр. Москвае келяло Та нуналъёсы Можга ёросысь "Можгинское" акционер огазеяськонын тыршисьёс кема возьмам уждунзэс басьтӥзы. Кассае коньдон вуиз, садысь 4 тонна узыез но 15 тонна эмезез "Экопродукт" фирма пыр Москвае келямен. Эмезь но сутэр садын тырмыт ай. Озьыен, уждунъя пунэм тыронъёсты кулэстыны луонлыкъёс вань. Можгаос мылысь-кыдысь тыршо пудо сиён дасянын но. Кӧс турын чакламъя 350 тонна интые 428 тонна люкамын, силосъя но план быдэстэмын. Г.ЮСАЕВ. БЫДӞЫМ ВОРМОНЛЫ - 55 АР Москваысен Берлинозь НиколайЛуковников капчи сюрес ӧз утча. Вордскиз Вятка губерниысь Елабуга уездысь Бадӟым Кибья волостьысь Туташево гуртысь крестьян семьяын. Шӧмъя курытсэ но, кезьытсэ но. Дас тямыс аресъем пияш Туташево сельсоветын секретарь луыса ужаз, сютэм но куанер улонэн нюръяськон ялӥз. Вал Самараысь веоннйо гарнизонлэн политотделэзлэн инструкторез, ВЛКСМ-лэн Можга уездъя комитетэзлэн секретарез, Можга уездлэн военной комиссарез, ВКП(б)-лэн Глазов уездъя комитетэзлэн секретарез, ВКП(б)-лэн Удмут обкомезлэн отделэзлэн валтӥсь но инструкторез но секретар лэн воштӥсез, Саратов областьысь "Коммунар" но "Первомайский" совхозъёслэн политотделъёсызлэн начальниксы. Одӥг кылын вераса, ужаз отын, кытчы ыстэ вал партия. Война кутскыск Николай Григорьевич Москваын ВКП(б)-лэн Фрунзенской районаз парткабинетлэн косультантэз луыса ужа вал. Тушмон туж ӝог столица доры дыртэ. Партийной организациос калыкез тушмонлы пумит нюръяскьыны ӝуто. Луковников 7-тӥ июле ас мылкыдызъя столицаез утьыны мынэ но нырысетӥ ожъёсы пыриське. Озьы со ас отрядэныз шеде 33-тӥ армилэн 113-тӥ стрелковой дивизияз. Адямилэсь быгатэмзэ адӟыса комнадование Луковниковез ӝоген политотделлэн инструкторезлы, собере 183-тӥ полклы парторге юнматэ. Боецъёс гажазы визьмо но кышкасьтэм эшсэс. Фашистъёс Москвалы туж матын вал ини. Солэсь ураоссэ бинокль пыр эскерылӥзы. Луковников майор пусйылэмын Вылӥ Главнокомандующийлэн И.Сталинлэн тау каронъёсыныз. Соосты Николай Григорьевичлэн семьяяз утьыса возё. Со пусъемын 1943-тӥ арын 31-тӥ августэ Ельня городэз, 1943-тӥ арын 25-тӥ сентябре Смоленскез мозмытэм, Днепр но Неман шуръёсты выжем понна. собере офицер ожмаське побьшаын но Германиын. Николай Григорьевичлы сётэмын Горд Кизили но Отечественной война орденъёс, "За отвагу", "За оборону Москвы", "За победу над Германией", "За осовобождение Варшавы", "За взятие Берлина" медальёсын. Сӧсырмемез бере 1946-тӥ арын феврале Луковников запасэ кошке. Бӧрысь дышетыны кутске Удмурт научно-исследовательствон институтын, собере Удмуртилэн кун архивезлэн директорез луэ. Со уно научной ужъёс гожтӥз. Туташевоысь гуртоосыз уг вунэто асьсэ палась адямизэс. Луковников вал усто тодосчи, кышкасьтэм воин, ӟеч адями. Тутайгуртъёс данъясько асьсэлэн пиенызы. В.ТАТАРИНОВ, журналист, Туташево гуртын вордскем мурт. Нырысетӥ радын пуко (паллянысен буре): Николай Григорьевичлэн нылыз Васса, атаез Григорий Дмитриевич, анаез Мария Петровна; кыкетӥ радын сыло: Николай Луковников но солэн кузпалыз Ксения Васильевна. Умой адямиос Нунал кутске ӵук ӟардонэн Котькуд адямилы мусо но дуно пото вордӥськем палъёсыз, соослэн чеберзы, шур нёжалъёс, гурезьёс, нюлэс кушъёс, вож арамаос. Михаил Иванович Даниловлэн пинал дырыз ортчиз Шор Пыхта гуртын (али со ӧвӧл ни). - Гуртмы туж шулдыр интые пуксемын вал, - вера Данилов. - Котырак нюлэс, отын бичаса быдтонтэм вал эмезез но губиез. Егит дыръям арлыдо воргоронъёс но тодазы вайыны ӧз быгатэ гуртлэсь ку кылдэмзэ, кин отчы нырысь ик выльвыл корка пуктӥз. Кылем арын урамысен пумиськыкумы, Михаил Иванович вожъяськыса сямен пусйиз мукет гуртъёслэсь пумиськон праздникъёс ортчытъян сямзэс. Нош алигес шумпотыса ивортӥз. Милям но, пе, туэ сыӵе шулдыръяськонмы вал. - Празднике люкаськемъёс шунытэсь кылъёс веразы Улӥ Пыхта культура юртлэн кивалтӥсезлы Надежда Михайловна Нецветаевалы, - пальпотыса шуэ Данилов. - Ми но кузпалыным ветлӥмы. Син азямы пуктӥ гольык пыдын лёгам вож гуждоръёсты. Тодамы ваимы ӵош шудэм эшъёсынымы колхозын ужаммес, школае дышетскыны ветлэммес. Та праздникез ортчытыны пыр-поч дасяськиллям. Нецветаева люкаськемъёсты тодматӥз гуртлэн историеныз, кӧня вал юртъеръёс но отын улӥсьёсыз, поттылӥз пудоослэсь лыдзэс но кӧня ю тысь киземез. Бӧрысь кырӟамы, эктӥмы но пӧртэм пыжиськемъёсын утялтӥзы. Котькытын сямен ик, татын но вал куанеръёс но узыръёс. Ӟеч музъемъёсты но турнано возьёсты киултылӥзы кулак выжыос. Соос ик колхозъёс кылдытон вакытэ пӧртэм сьӧд ужъёс лэсьтылӥзы: тӥяллязы аран машинаосты, котькызьы кышкатыны выризы дышетскымтэ калыкез. Даниловлэн бубиз но мумиз ваньмызлэсь азьло гожтӥськизы колхозэ. Атаез Иван Иванович нырысетӥ механизатор вал. Паськытэсь бусыосты азьло гыриз но кизиз СТЗ тракторен. Бӧрысь солы оскизы со вакытэ тужгес кужмо ЧТЗ тракторен ужаны. Огпол гинэ пизэ но бордаз ӧз басьтылы. Тыбырзэ тап-тап вешаса ӵем гинэ вералляз: - Дышетскы, пие, машинаен ужаны, трос аръёс ортчыса, котькыӵеосыз соос луозы. Бен, эшъёсызлэн сямен ик Мишалэн но азьлане малпанъёсыз туж умоес вал. Нош война ваньзэ сураз-пожаз. Сизьым классэз быдтыса гуртоосыныз ӵош келязы Кезэтӥ ортчись чугун сюреслэсь кыкетӥ линизэ лэсьтонэ. Собере юнманы вуымтэ мугорзэ посӥз Ижевск-Балезино чугун сюресэз вуттонын. - Милемлы гинэ соку секыт ӧз йӧты ук, - ортчемзэ тодаз вайыса шуэ Михаил Иванович. - Котькыӵезэ адӟоно луиз, ваньзэ чидам но вормим. Секыт аръёс ортчыса, Данилов атаезлэсь индылэмзэ тодаз ваиз, дышетскиз шофёре. Ужаны интыяськиз ёросысь машинно-тракторной станцие. Кивалтӥсьёс егит специалистэз шумпотыса пумитазы, угось дышетскемъёс со вакытэ туж ичи вал ай. Озьы ке но, сое пуктӥзы вуж автомашина сьӧры, эскером, пе, быгатонлыктэ. Арня ортчыса, егит пияш нырысьсэ сюрес вылэ потӥз. Уж бере машиназэ гараже пуктыны ӧз дыртылы. Вань ёзъёссэ пыр-поч эскерылӥз, лябомем гайкаоссэс юнматъяз, вӧялляз. Бер ӝыт гинэ дораз бертылӥз. Механикъёс егит шофёрлэсь сюлмо тыршемзэ адӟытэк ӧз кельтэ, оскизы выль автомашинаен ужаны. Егит, таза сӥльвиро водительлэн мылкыдыз эшшо но бурдъяськиз. Табере со республикалэн палэназ но огпол гинэ ӧз пота ни. - Машина выль ке но, ужаны капчи ӧй вал, - тодаз вае со дырез, Михаил Иванович. - Куатьтонэтӥ аръёсы сюресъёс уродэн ӵем гинэ бусыын но кӧлано луылӥз. Тужгес но секыт йӧтылӥз толалтэ. Озьы ке но шофёръёс ог-огзэс ӧз куштылэ: юрттылӥмы воштос ёзъёсын, поттылӥмы нӧдэн канавае яке лымые чукиськем машинаосты. Михаил Ивановичлы руль сьӧрын кема пукыны ӧз кылды. Ужаменыз ӵош ялан будэтӥз тодон-валанзэ, быгатонлыксэ. Озьы огшоры шофёр луиз автомеханик. Та удысын дас арлэсь ятыр ужаз. - Даниловез мон кемалась тодӥсько, - вера В. Д. Фролов. - Мыным одӥг ар гинэ соин ӵош ужаны ӧз кылды. Ма шуод, туж зибыт, уг вылтӥяськы. Ноку солэсь уд кылы вал лек верам кылъёссэ, тужгес но егит шофёръёслы саклык висъялляз. Ваньмыз сое гажазы, кылзӥськылӥзы. Ачиз ӟуч ке но, удмурт сямен туж чебер вераське. Азьланяз техника котырын ужаны Даниловлы эрик ӧз сётэ ни. Соку дырыз сыӵе вал, коммунистъёсын трос ӧз вераськылэ. Михаил Ивановичез но райкомын уно пол кышкатъязы вылэгес ӝутонэн. Дэмлазы калыклы бытовой юрттэт сётонъя комбинатэн кивалтыны. Выль интыен пыр-поч тодматскыса, Михаил Иванович нырысь ик басьтӥськиз выль юрт пуктон борды. Ужан инты люкытэн, материал тырмымтэен планъёс туж ляб быдэсъяськизы угось. Директорлы трос гинэ бызьылоно луиз. Н кык ар ортчыса, вуриськисьёс но мукет специалистъёс пыризы кирпичлэсь ӝутэм куинь этажо юртэ - вӧл-вӧл, югыт но шуныт комнатаосын. Со дыре ик Данилов басьтӥськиз котькуд колхозэ комплексной приёмной пунктъёс усьтон борды. Телевизоръёсты, мисьтаськон машинаосты, магнитофонъёсты тупатъясьёс, парикмахеръёс нимысьтыз графикъя гуртъёсы потазы. Таяз удысын но сюлмо адямилы кема ужаны ӧз кылды. Калыклы бытовой юрттэт сётон удысэз улӟытэмзэ адӟыса, Даниловез ӵекто РСУ огазеяськонэ. - Чылкак выль удысэз оскизы, - тодаз вае Михаил Иванович. - Кутсконо луиз тӥрен умой ужаны быгатӥсь рабочийёслэсь бригадазэс кылдытон бордысен. Музъем кынмыса нюлэс дасям, нош гужемзэ кулэяськисьёслы пуктылӥмы улон юртъёс, пудо вордон гидъёс но мунчоос. Бӧрысь предприятимы паськытаз, кылдытӥмы лэсьтӥськисьёслэсь пӧртэм бригадаоссэс. Михаил Ивановичлэсь вань ужъёссэ вераса но уд быдты. Пенсие потыса но дораз пукыны уг яраты. Тани "Андан" огазеяськонын пуктӥзы ю тысь изонъя вуко. Огез лыктэ, учке но кошке, мукетызлы уг кельшы дӥсь вылаз тузонлэн пуксемез. Соку вазиськизы Даниловлы. Нунал ужаз-кык. Ваньмыз кельшиз солы. Табере арлыдо воргоронлы селоын улӥсьёс кӧня шунытэсь кылъёс верало. - Ма, ужтэк пукид ке, ӝог пересьмод, - пальпотыса вера Михаил Иванович. - Калык пӧлын бергаса, дырлэсь ортчемзэ ик валаны уг луы. Ӵукна дорысьтыз ужъёссэ быдтыса гинэ вуиз но капкае йыгаськись луиз. - Михаил Иванович? - вазиськиз пересь кышномурт. - Тани одӥг мешок чабее вань, сое пызь кароно вал, оло, юрттод? - Ӧжытак возьма, чай юо но дӥсьме воштыса мыномы, - буйгатӥз сое Данилов. - Нош мешокед кытын? Я, машинаен кема ум ветлэ. Изом но дорад ик келяло. Тӥни озьы нунал бӧрсьы нунал. Ваньмызлы юрттыны дась со. - Калыклы ӟеч лэсьтыны быгатӥськод ке, аслад но мылкыд капчи луэ, - вера Михаил Иванович. - Адями ог-огедлы юрттыны вордскемын ук. Азьло дыре бускеледлы корка ӝутыны яке гур шуккыны веме лэсьтыло вал. Нокин дун ӧз басьтылы, ӝытазе одӥг-кык стопка аракы юиськод но жадем ик быре. Табере со йылолъёс вунэмын ни. Нылпиосыз но ачиз кадь ик ужасесь. Кенэз Зар Медла школаын ужа. Куасэн бызьылонъя ӵошатсконъёсын Нина республикаямы но солэн палэназ трос пол вормисе потылӥз ни. Ачиз кадь ик сэзь бызьылыны дышетэ нылпиосты но. Улонын вань сыӵе адямиос - чидасьтэм сюлэмъёс. Соос юнме дыр быдтонэз уг валало. Быгато куректӥсь эшсэс буйгатыны, сюлэмзэс вырӟытыны. Соос ярато ӵук ӟардонэз, шунды ӝужанэз пумитаны. Та воргоронлэн но котькуд нуналыз кутске ӵук ӟардонэн ӵош. Сыӵе со Дебес селоысь одӥгез пенсионер. М. МОСОВ. Дауръёс вискын: нунал бӧрсьы нунал Август 95 ар талэсь азьвыл (1905-тӥ) 6-тӥ августэ кутэмын Кун дума сярысь положение, солы тупатэмын кенешон (совещательной) право. 23-тӥ августэ США-лэн президентэз Теодор Рузвельт юрттэмъя, Россия но Япония гожтӥзы тупан сярысь огкыл (мирной договор). Россия Японилы сётӥз Порт-Артур городэз но Сахалин шормуӵлэсь лымшор палзэ. 85 ар талэсь азьвыл (1915-тӥ) Кун думаын кылдӥз прогрессивной нимаськись блок. Отчы пыризы ог люкетэз националистъёс, октябристъёс, кадетъёс но мукетъёсыз. Император бордын кылдӥз "нимысьтыз кенеш". Ожъёсын сэрен Варшаваын университет выжтэмын Ростов-на-Дону городэ (1931-тӥ арысен � Ростов университетлы). 80 ар талэсь азьвыл (1920-тӥ) Августэ Горд армия вуиз Львов но Варшава доры. 16-тӥ августэ Польшаысь ожгарчиос (войскоос) шуак контрнаступление выжизы. Историе со кылиз Висла дорын паймымон учыр нимын. Августэ Тамбов но Воронеж губерниосысь крестьянъёс А.С.Антипов кивалтэмъя, бугыръяськон пуромытӥзы. Вуоно араз соосты М.Н.Тухачевский кивалтэм улсын пазьгизы Горд армилэн частьёсыз. 70 ар талэсь азьвыл (1930-тӥ) 14-тӥ августэ СССР-ысь ЦИК но Совнарком кутӥзы вань калыклы одно ик дунтэк улӥ (начальной) образование сётон сярысь постановление. 65 ар талэсь азьвыл (1935-тӥ) 31-тӥ августэ Донбассысь шахтёр Алексей Стаханов эгыр коранъя нуналлы нормаез 14 пол быдэстӥз. Кутскиз ужазинлыкез ӝутонъя бадӟым уж. 60 ар талэсь азьвыл (1940-тӥ) 2-тӥ августэ кылдӥз Молдовия союзной республика (Молдавия ССР). Азьло со вал Украинае пырись Молдавия автономной республика (Молдавия АССР). 3-тӥ�6-тӥ августэ Латвия, Литва но Эстония СССР-е пыртэмын союзной республикаос карыса. 55 ар талэсь азьвыл (1945-тӥ) 8-тӥ августэ СССР ялӥз Японилы пумит война. 9-тӥ августэ асьме войскоос наступление выжизы Маньчжуриын, Кореяны, Сахалинын, Курил шормучъёсын. 14-тӥ августэ гожтэмын Китаен эшъяськон сярысь огкыл (договор). 40 ар талэсь азьвыл (1960-тӥ) СССР-ысь Китае ыстэм специалистъёс августэ берен асьме доры берыктэмын. 30 ар талэсь азьвыл (1970-тӥ) 12-тӥ августэ Федеративной Германиен огкыл гожтэмын, кужымез кутонтэм сярысь пусъемын, Польшалэн кунгожез Одер�Нейс кузя юнматэмын. 10 ар талэсь азьвыл (1990-тӥ) Августэ кутскыса эрик (независимость но суверенитет) сярысь ялӥзы Армения, Татарстан, Карелия, Якутия, Коми, Удмуртия, Башкирия но мукетъёсыз. Театр пыр лобӟисько азьлань Актриса луон мылкыдыз Ольгалэн пичи дыръяз ик бугырскиз. Со эшъёсыз пӧлын мылысь- кыдысь лыдӟылӥз пӧртэм выжыкылъёсты, тужгес ик яратылӥз Андерсенлэсь "Дюймовочка" выжыкылзэ. Дюймовочка сямен ик, со но яратылӥз огназ сикетӥ, бусыостӥ, возьёстӥ ветлыны, чебер ворпоё бубылиослы но сяськаослы синмаськыса, тылобурдоослэсь но ошмеслэсь куараоссэс кылзӥськыса, нюлэслэн саюлаз малпаськыны. Семьяенызы городэ улыны выжемзы бере, Оля воксё мукет дуннеен пумиськоно луиз. Татын инкуазез воштӥзы адямиос но коркаос, ӟуч кыл. Нылашлы ньыль арес тырмем бере, Москваын дышетскись атайзы бырыны шедиз. Со дырысен Олялэн кутскиз "мӧйы" улонэз. � Соку мынам тужгес но бадӟым малпанэ квартира яке кыӵе ке улон сэрег сярысь вал. Ми улӥмы общежитиосын, куштэм коркаосын, муночоосын. Малы озьы улӥм, анае техучилищеын директорлэн воштӥсез ке но вал? Уг тодӥськы. Туж потэ вал мынам кытчы ке но книгаосме но шудонъёсме интыяме. Шудонъёсы ичи, соосты бичаны коньдон но, шудыны дыр но ӧй вал. Эшелэн шудонъёсызлы вожъяськылӥ, � тодаз вае Ольга Яковлевна. � Ноку но балерина луон малпанэ ӧз бырылы. Пыдчиньы вылын ветлыны тыршылӥ. Эшъёсме но чуръя султытъяй. Туж тодӥсько на "Октябрь" культура юртэ мынэмме. Соку нылашлы сизьым арес вал. Нош ньыль ар ортчыса, соослы пичияк комната висъязы. Шумпотонэзлы сюлэмаз инты ӧз тырмы, дыр, соку. Вань предметъёсъя "вить" бичаны кутскиз. Мылысь-кыдысь пыриськиз школа уже, отрядлэн но дружиналэн советъёссылэн председтельёссы вал. Ньылетӥ классысен Диккенслэсь вань проиведениоссэ лыдӟыса потӥз, витетӥ-куатетӥ классъёсын Петраркаен тунсыкъяськиз, искусствоосъя но историяя трос книгаосты лыдӟиз. Кыӵе ке выль нимез кылэ ке, соку ик библиотекае мыныса утчаське ини вал: кин со, кытысь но маин дано луэм? � Котькуд ар ветлылӥмы гуртэ. Отын мон тодматски удмурт сямъёсын, кылын. Со вал чылкак мукет культура, туж тунсыко, � маде Ольга Яковлевна. � Но соку ӧз яратылэ ачид сярысь "мон � удмурт" шуыны. Акцентэн вераськонтэм но "вотячка" луонтэм вылысь, мон ӟуч кылъя но литературая школаын умойёсыз пӧлын шедьыны тырши. Удмурт пединститутэ экзаменъёс сётыкуз, сочинениен филологияя факультетэ пырисьёс пӧлысь огназ "вить" басьтэм. Но актриса луон мылкыдыз вормиз. Куинь ар со ветлӥз Москвае, нош отын шуо: "Тон актриса уд луы, уд тупаськы". Нош со ваментэ: "Луо". Актрисае уг куто бере, со малпаз режиссёр луыны. Кыӵе ке тодмо мурт шуиз вал: "Талант шуя сяська кадь, со вылэ котькуд нунал ву ӧд ке кисьта". Шӧдӥськод ке, пӧрмоз шуыса, пумозяз мын, кожылытэк но дугдылытэк, азьлань но азьлань, вань пыкетъёс, бышкылэмъёс пыр. Нош ӵемысь сыӵе шӧдон вуэ, секыт сюрес вылтӥ мыныку гинэ. Сыӵе вал Ольга Александровалэн пинал дырыз. Режиссёр луэмез бере, со сярысь трос гинэ гожъяллязы пӧртэм изданиосын. Али Ольгалэн вань ини аслаз нимыз но, театрез но, сое умой тодо кунгож сьӧрын. Быдэс дуннеын тодмо режиссёр луон малпанзэ со быдэстӥз, шуыны луоз. Ма меда сюлэмшугъяськытэ сое али? Азьланяз ма карыны малпа? � Ужаны, ужаны, ужаны, � шуэ со. � Театр � со тӥляд быдэс улонды, дыр. Тӥ ваменскыса ик мынӥды отчы. Мукетыз киыныз гинэ шонтысал: уг пӧрмы бере, ӵок ни шуысал. Тӥ сыӵе пӧлысь ӧвӧл. Тӥ азьын яркыт пиштӥз театр, ас бордаз кыскиз. Театр тӥ понна со ма? � Театр пыр гинэ мон лобӟисько азьлань. Со монэ валтэ. Мон сое туж умой валасько. Мукет ласянь, со вормыны луонтэм бадӟым кирос кадь, но солэсь уд куштӥськы, уг луы (оло, уг но поты), со киросэз нуоно но азьлань вамышъяно. Но инмар шуг-секытъёсты юнме шорысь уг сёты, дыр? � Кин но ма тӥледыз буйгатэ, шугысь-лекысь потыны юрттэ? � Вань улытозям инмар мыным юрттэ шуыса шӧдонэ ӧз бырылы. Атае но весь вӧзам кадь, ваньзэ адӟе но валэктэ кадь. Ӵемысь солэсь лёгем сюрессэ азинтӥсько потэ. Студент дыръям мон шуак валай: атаелэн лыдӟылэм книгаосыныз тунсыкъяськисько. � Ма верасалды атайды сярысь? � Со улонам туж бадӟым инты басьтэ. Паймымон адями вал. Вань улонзэ дышетскыны тыршиз. Туж визьмо вал, эшъёсыз но шораз Яков Кузьмич шуыса гинэ вазьылӥзы. � Кызьы тӥ валаськоды инмарез? � Туж трос валэктонъёс... Инмар � со быдӟым лул но визь люконтэм маке. Солэн мылкыдызтэк одӥг йырси но уз усьы. Мон валай, вань куректонъёс, адӟонъёс адямилы инмарен бурмон вылысь ыстӥсько шуыса. � Оскиськоды-а дуннелы тодмо режиссёр луэмдылы? � Ӧйтӧд. Соиз зэм, малпанэ быдэсмиз. Но мон ваньзэ ачим, ас киосыным лэсьтӥ, номыр шоры учкытэк. Маке туж потӥз ке лэсьтэмед, котьку быдэстод. Сыӵе со улон. � Секыт, мон валасько. Тужгес ик кышномуртлэн ужез улонамы уг дунъяськы ке. Тросэз пиосмуртъёс шуо: курег � тылобурдо ӧвӧл, кышномурт � адями ӧвӧл. Тӥ ма малпаськоды та пумысен? � Нылкышноосты урод карем со. � Ма малпаськоды туала кышномуртъёс сярысь? � Нылкышно тырше улонлэсь бере кыльытэк ужаны, улон сюрессэ лэсьтыны, соин зол, кужмо, ӵем дыръя лек луоно. Но со дыре ик кышномуртлэн пушкыз ненег, мусояськись, гурт котырез яратӥсь мед луоз. Но кызьы та кык чылкак пӧртэм сямъёсты огазеялод? Нокытчы но уд кары со ненегез, небытэз, мусояськись мылкыдэз, кинлы ке но кузьмам потэ, нош некинлы, басьтӥсь ӧвӧл. Соин сэрен туж трос ни огназы улӥсь кышномуртъёс... � Нырысь адӟыса кенжем яратонлы оскиськоды-а? � Мукетыз уг луы, соку ик валано, кин тон азьын сылэ. Мон аслэсьтым яратонме, адӟи но соку ик шуи: тани со. Со мынэсьтым вань улонме воштӥз, али но воштэ. Нош шудо яратон котьку уродэн йылпумъяське. Со бырыны шедиз. � Ку со вал? � Дас сизьым арес дыръям. � Инмар, шуо, тужгес яратоно нылызлы-пиезлы тросгес курадӟон лэзе, нош вормонтэмзэ ноку но уз ысты... Мон тодӥсько, тӥ туж яратӥськоды инкуазез. Нош арлэсь кыӵе вакытсэ? � Гужемез гинэ! Соку шуныт, яркыт, мусо пиштэ шунды. Соку кышномурт сяськаяське, чебертӥське, вань паймымонэз но синмаськымонэз кыре потэ. Гужем милемыз эркия, мусоесь, ненегесь, небытэсь каре, инкуазьлы матэктытэ. Кышномурт, мӧзмыт тол дӥськутсэ кыльыса, шыкысысьтыз вань чеберзэ поттэ... � Ма сӥзьысалды кышномуртъёслы? � Мылкыддэс шара вералэ, эн возьдаське. Зол луэ но малпанъёстэс быдэстэ... Нош мон йылтысал на: нуналысь нуналэ, арысь аре чебергес но синмаськымонгес луэ. Тӥ бордысь кутске улон, семья кусыпъёс но карттылэн тазалыкез но. Туж яратэ Ольга тём-тём пеймыт сикез, кытӥ одӥг адями но ӧз ветлылы, туж яратэ удмурт перпечез, чеснокен сьӧд нянез но трос мукетсэ. Уг яра солы Ижкармы, малы ке шуоно, татын туж ичи саклык висьяське культура удыслы, выльдӥськонлы. Эксэй бодыез кияз луысал ке, со та ужпумез воштысал, но бодыез вакчигес на... Зэмзэ но кин: инмар косэ-а яке адями ачиз ас улонзэ дуре-а? Соиз но таиз но вань, дыр, инмар но косэ, адями но дуре. Сыӵе улон уга. Светлана ПЕТРОВА. ВОРМОНЛЫ - 55 АР Нырысетӥез герой Ӝыны даур ортчемъя но уг вуно, уг бездо ожмаськон бусыосын басьтэм вормонъёс, отысь геройёслэн но огшоры солдатъёслэн тусбуйёссы. Нош фронтлэсь палэнын, заводъёсын но колхоз бусыосын, басьтэм азинсконъёс, отын кужымзэс жалятэк тыршемъёс тросэзлы тодмо меда? Жаляса верано, берло аръёсы калленэн вунэтӥськом. Малпасько, улонмы радъяськемен, тӧр шоры инты таосызлы но сюроз. Яркыт праздникез пумитаны дасяськон нуналъёсы мынам выльысь тодам лыктӥз Сарапул районысь Шевырялово гуртысь туж дано колхозникен Зарни Кизилилэн кавалереныз - Афанасий Федорович Пальшинэн - 37 ар талэсь азьло пумиськеме. Солы 70 аресэз тырмон азьын Россилэн пӧртэм сэрегъёсысьтьыз трос телеграммаос, гожтэтъёс вуо вал. Вуись юбилееныз ӟечкыласа, ужысь алигес гинэ вуэм Афанасий Федоровичез мон кури праздникъёсы нуллон костюмзэ дӥсяны. Со кема гинэ пыкиськиз: мон кадьёс, пе, Россиын гинэ ӧвӧл, Удмурт музъем вылын но уно. Озьы ке но дӥсяз ик. Шуак егитомем адямилэн мӧля вылаз пиштыны ӧдъязы 1467 номеро Зарни Кизили, Ленин орден, Быдӟым Отечественной война аръёсы ӟеч ужъёсыз понна сётэм мукет медальёс. Странамылэн самой бадӟымез наградаез Афанасий Федорович Пальшинлы сётэмын войналэн туж секыт вакытаз вылӥ удалтэм ӟег, чабей будэтэмез понна. Солэн кивалтоно звеноез син сузёнтэм паськыт бусыысь гектарысьтыз 30 центнерлэсь уно ӟег но чабей кутсалляз. "Россия" колхозын гинэ ӧвӧл, будэс Сарапул райнын но Удмурт музъем вылын сыӵе удалтонлыкез ӧз тодылэ. Война аръёсы фронтысь геройёс сярысь вераку, одно ик санэ басьто секыт но кузь сюресэз ортчемзэс. Ужысь геройлэн но со вакчи, капчи ӧй вал. ...Вирсэръёсын басьтэм но нярӟем киоссэ алвылаз тырыса, Афанасий Федорович дыртытэк гинэ вера улон сюресэз мертамез сярысь... Нырысетӥ империалистической война... Румын фронт... Пленэ шедьыса, Франциын улэм аръёс... Германиысь городъёс но гуртъёс пыр ортчем сюресъёс... Вордскем гуртаз 1921-тӥ арын бертыса, Пальшин кикур пасьта гинэ бакчазэ кечат- вамат гыриз-кизиз, дышем но дышымтэ мукет ужъёсты быдэстӥз... Вуоно аре ик ини ӟегез котькинлэсь умой удалтӥз. Колхоз кылдон аре Пальшин Шевырялово гуртын котькинлэсь азьло выль артеле пыриз. Огазеяськем хозяйстволы вань пудозэ сётӥз. Колхозлэн нимыз вошъяськемен ӵош воштӥськиз Афанасий Федоровичлэн улонэз но. Ужаз со яровизатор луыса но. Таза кидыс будэтӥз. Социалистической ужысь Герой, ассэ гинэ ӧвӧл, гуртсэ, колхоззэ, районзэ - быдэс республикамес данэ поттӥз нырысетӥ Зарни кавалерез луыса. Пальшинлэн но солэн эшъёсызлэн киосынызы будэтэм няньзы кӧня меда полкъёсысь но дивизиосысь ожгарчиослы кужым сётӥз тушмонлы пумит атакаосы ӝутскылыны? Ку но кин тае лыдъяны быгатоз? Асьме армилэн вормоназ солэн но дунъяны луонтэм кужымез сётэмын. Война бере Афанасий Пальшин, ю-нянь будэтэм сяна, бускельёссэ сахар кушман но кубиста, мукет выль сортъёс будэтыны дышетӥз. Оскем потэ, Пальшинлэн вордскем дырысеныз 107 ар ортчем бере но туэ, Вормон нуналэ, сое данэн буре ваисьёс луозы шуыса. Леонид ДАНИЛОВ. Улон виштыос Быдэс нуналъёсын Таня апай питыранысь коньы выллем берга но берга: ӵукна султэ, кечсэ сюдэ, кыске но лудэ нуэ. Кечсэ возьман сямен кырӟа, улонзэ тодаз вае. Кема гинэ улэ ини со городын. Егит дыръяз заводын ужаз. Бызиз гуртэ. Собере нош городэ вуиз. Тэк пукемез уг луы, весь маке но каре. Сотэк со уг быгаты кытчы ке дыртэ, дыртэ, дыртэ... Сиськыкуз но, кӧлыкуз но бере кылемезлэсь кышка, лэся. Куддыръя ассэ серекъяса "заводной машина" шуылэ. Пичи гинэ мугоро шубырес кышномурт. Ымнырыз кисыриос пӧлы выемын, кык-одӥг пиньёсыз. Киосыз но мугорыз кокырес мажес кадь. Котыр ульчаосысь вань жуг-жаг но куянтӥосты мажаса сямен ортче: куштэм дӥськут-а со, пияла посуда яке кыӵе ке мукет котыр, ёзъёс, пулъёс, ма гидкуазяз ярано кадь, ваньзэ утялтэ-сузя. Пияла но судаослэсь нуналаз 30-40 манет поттэ. Ярано Люкам Дӥськутэз черк дорысь кураськисьёслы кулэ, тодмоосызлы сётэ, выжлёгет керттэ. Кылзэ радио, учке телевизор. Политика сярысь трос гинэ тодэ. Солы 66 арес. Улэ огназ, нылпиосыз юрттӥськыны вуыло куддыръя. Валантэм ик та Тоня апай. Оло висеменыз, оло улон секытэн-а адямиослэсь урод палзэс гинэ адӟе. Тазэ ке но лушкалозы, нуозы кадь потэ. Ваньмыз сое ултӥяло, нылпиосыз гинэ но. Вань со кӧтӝожзэ, аслэсьтыз улэм-вылэмзэ пумиськем муртлы соку ик кисьтыны дась. Сыномем ӟезьылэн ӟукыртэмез выллем огпӧртэм кока но кока. Секыт ик, дыр, таӵе адямиен улыны. Со дорысь мыштэ учкылытэк пегӟем потэ. Соин но ӧз кыльы меда Тоня апай чылкак огназ. Картэз но, нылпиосыз но дорысьтыз кошкизы. Малпасьылӥз меда песянай куке но со сярысь? С. Петрова. Шара гожтэт П. Н. Вершининлы Павел Николаевич, вазиськисько тӥледлы "Независимой газетэз" лыдӟеме бере. Отын тӥ вераськоды Удмуртилы президентэз быръёнъя Николай Ганзалэн штабеныз кивалтыны дась луэмзы сярысь. Тазьы вераськемды тросэзлы бырйисьёстылы уз кельшы. Зэмен но, кызьы-о луыса кошке? Тӥ асьтэос трос пол пусйылӥды, республикалы кивалтӥсе одно ик удмурт адямиез пуктыны кулэ шуыса. Неужто вакчи дыр куспын малпанды чутрак воштӥськиз? Мыным валантэм, кызьы но малы тӥ дурбасьтӥськоды вить ар талэсь азьло гинэ дорамы вуэм муртлы Республикаез одӥг заводъя гинэ учкыны но дунъяны уг яра. Мон но данакез тодмоосы ӟеч мылкыдын пумитамы вал президентэ кандидатэ мынон сярысь пресса пыр сётэм ивортондэс. Оскиськом: шаерамы улӥсь калык ас выжыысьтыз потэм пизэ, республикамылы тодмо адямиез, одно ик президентэ быръёз шуыса. Неужто политической шудонъёс малпандэс мукет пала берыктӥзы? Павел Николаевич, умой-умой кутскыса, эшшо малпаське на. Солы дыр тырмыт ай. Эн оске чебер сӥзёнъёслы. Тӥ сьӧрын сылэ вань удмурт калык. Ф. Козьмин. Удмурт Республикаысь Калыкез эмъян удысын 1991-тӥ-1995-тӥ аръёсы ужам министр. Шуккетъёс уг кышкато Та нуналъёсы 10 ар тырме Газпромбанклы. Со Россиын одӥгез бадӟымез луэ. Быдэс дуннеысь коньдон бергатӥсьёс та банкез гажало. Уг кышкато сое пӧртэм шуккетъёс но. Кык ар талэсь азьло манетлэн доллар сярысь шуак начармеменыз странаысь уноез банкъёс куашказы. Нош Газпромбанк та кужмо тулкымез ӧз на шӧды кадь. Банк уго герӟаськемын промышленностьысь туджгес кулэ удысэн � эстӥськонэн, газ поттонэн. Таизлэн дуныз котьку вылӥын. Россиысь 26 городын банклэн ёзъёсыз ужало. Одӥгез соос пӧлысь Ижевскын усьтэмын. Ӵапак таиныз ик редакцимы но уно аръёс ӵоже юн кусыпъёс возе. Соин ик банкысь эшъёсмес ӟечкыласьком но азьланяз эшшо но бадӟымесьгес азинсконъёс сӥзиськом. М.КУЗЬМИН. Булай но, ой, палъёсын Котькудӥз кылбурчи аслэсьтыз вордскем гуртсэ котьмалэсь но зол яратэ, дыр. Та нуналъёсы кылбурась Галина Романова Ува ёросысь Булай починка гуртысь калыкеныз пумиськылӥз. Поэт матысь дыре пусъёз зарни вакытсэ - 50 арессэ. "Удмуртия" ГТРК соин валче кылбурчи сярысь телеочерк дася. Со бордын ужало журналист Семен Карпов, режиссёр Николай Куклин но оператор Равиль Аитов. Очерк дасян дыръя пумиськонъёс - Галина Романова гуртоосынызы кенеше. Шулдыр ик вылэм Булай Починка. Кылбурчиен кенеше Семен Карпов. Камера сьӧрын Николай Куклин но Равиль Аитов. Н. Лялин. В. Беломорскихлэн туспуктэмъёсыз. Шулдыр ӝытэн, лыз беретъёс! 70 ар тырме Воздушно-десантной войскоос кылдэм дырысен. Соин валче, туннэ Ижевскын тунсыко ужрадъёс ортчо. 14 часэ десантникъёс люкаскылӥзы Ялан ӝуась тыл доры, вуылӥзы Александровской шайвылэ, Афган но Чечня ожъёсын бырем эшъёссэс буре ваён вылысь. Ӝыт юмшан радъямын Гужем (Горький нимо) паркын. Татын дасямын тунсыко программа. Шулдыр концерт, пӧртэм пумо ӵошатсконъёс трос егитъёсты бордазы кыскозы, вылды. Бер ӝытозь кыстӥськоз эктон (дискотека). Э.ВАСИЛЬЕВА. Быремъёс уз вунэ "Алнаш" землячествое ветлӥсьёс уг вунэто ожъёсы бырем гуртооссэс. Быремъёсты но кулэм ӵыжы-выжыоссэс буре вайыса сюсьтыл пуктыны но вӧсяськыны ветло. Мон но алигес бырем сюратаелы Андрей Семенович Красновлы сюсьтыл пуктӥ. Со Алнаш черко гуртын бригадирын ужаз. Гужем вазь ӵукна бусые кошкылӥз. Ваньмон дыръяз гинэ сиськыны пыралляз. � Атай, атай бертӥз, � шумпотыса валесысь султылӥ мон соку. Со сюрмем киыныз тыбырме вешаса, ӵош сиськыны чортылӥз но кытӥяз бусые сьӧраз басьтылӥз. Пичиысен ик яратӥсько вал колхозлэн паськытэсь лудъёсаз атаеным ӵош ветлыны, пӧртэм машинаос котырын берганы. Ма, соку ӧжыт на вал тракторъёс, автомашинаос, соин соос котыре биниськизы пиналъёс. Велосипедъёс дуноесь вал, собере соосты магазинэ но шер вуттылӥзы. Озьы ке но, мыным велосипед басьтӥзы. Макем шумпотӥ! Ӵуказеяз ворттылыны потӥ, кыдёке ик ӧй мыны � юбо шоры мырӟиськи но верлосипедлэсь рульзэ куасалтӥ. "Ну бен йӧтоз ни!" � малпай. Атае ужысь бертэм бераз куасалскем рулез адӟиз но, куаретэм интые буйгатӥз: � Я, эн куректы. Шонертом, вылезлэсь но умой луоз. Озьы ик лэсьтӥз, куасалскем рулез шонертӥз но серекъяса вераз: � Юбоослэсь утиськы. А то кыместэ пилёд... Та учыр сярысь со берло ӧз но поттылы ни. Соку, оло, уката но юнгес яратыны кутски сюратайме. Андрей Семеновичез ӟеч сямыз, зӥбыт сюлэмо луэмез понна калык яратӥз. Соин ик бригадирын сое кема возизы. Андрей агай монэ инженер луытозям дышето шуэ вал. Но куинь классозь дышетыса вуиз, возьмамтэ шорысь война кутскиз. Аран вакытэ сюратайме армие басьтӥзы. Фронтысь лэзем гожтэтъёссэ сюранаеным ӵош шумпотыса лыдӟылӥмы. Ӝоген гожтэтъёс шер вуыны кутскизы. сЦобере быремез сярысь ивор вуиз. Национальной библиотекаын вань "Книга памяти" горд книгаос. Буре ваён книга со. Нырысетӥ томлэн азькылаз РСФСР-лэн калык тодонлыкъя отличникез, ужысь ветеран В.П.Борисов гожтэ, война аръёсы Алнаш ёросысь Горд Армие кошкиз 7925 мурт. Соку котькуд коркась одӥг ке но адями фронтэ сюриз. Удмурт Тоймобаш гуртысь Василий Семенович Кутузовлэн бадӟым семьяысьтыз оже кошкиз 5 мурт, нош Петр Петрович Петровлэн � 4. Удмурт Вишур гуртысь Карп Николаевич Молчанов но ньыль пиоссэ армие келяз. Лек ожъёсын соос улонзэс жалятэк тушмонэз жугизы. Ӝыныезлэсь тросэз соос пӧлысь бырыны шедизы. Тани Рожденственской гуртысь фронтэ сюрем 39 мурт пӧлысь одӥгез гинэ улэп берытскиз. Нош уноез сӧсырмыса бертэмъёс визьыса сопал дуннее вазь кошкизы. Тушмонэн зол нюръяськиз Юртошур-Какси гуртын вордскем пи И.Т.Майшев но. Со вал Крымысь партизанъёслэн 3 номеро отрядазы. Сержант-пулемётчик быриз Алушталы матысь Зуйской районлэн нюлэсказ, 17-тӥ декабре 1942-тӥ арын. Жаль, та югыт дуннеын малы ке асьме калык туж ӧжыт улэ. Тани буре ваён книгаын Краснов фамилиен гинэ 41 мурт быремын. Кӧня умой малпанъёссэс соос быдэстытэк кельтӥзы. Нош али ке но, асьме доры пӧсь интыосын быремъёс сярысь секыт иворъёс вуо но вуо. Малы меда чик войнатэк улыны ум быгатӥске. Уката ик асьмеос. В.ЧЕРНОВ. Пӧсь ву сярысь Толзэ пӧсь вуэн шуг-секытъёс медам кылдылэ шуыса, ву бызён гумыосты араз кык пол эскероно луэ: тулыс но сӥзьыл пал. Ижысь 2 номеро ТЭЦ та ужъёс борды али басьтӥськиз ни. Соин 24-тӥ июльысен 11-тӥ августозь шуныт вутэк кылёзы городысь Аэропорт, Шунды ӝужан (Восточной), Буммаш, Уй пал, Уй пал но Шунды пуксён (Северо-Западной), Металлург микрорайонъёс. 7-тӥ августысен гумыосты эскерон борды басьтӥськоз 1 номеро ТЭЦ. Соин валче 20-тӥ августозь пӧсь вутэк кылёзы Центр, Лымшор (Южной), Соцгород микрорайонъёс. Э.ВАСИЛЬЕВА. Даур ӵоже Кияса ёросысь Уддяди гуртын школа усьтӥськем дырысен ӝоген 100 ар тырмоз. Та ӟеч ужлы инъет сётӥзы 1901-тӥ арын куинь вынъёс Кадровъёс: Иван, Олексей но Семон. Кужымзэс, дырзэс жалятэк басьтӥськизы соос гуртооссылэсь тодон-валанзэс будэтон борды. Школалы юрт шедьтымтэен, Олексей солы улон коркасьтыз улӥ этажзэ висъяз. Пиналъёс татын 7 ар ӵоже дышетскизы. Со бӧрсьы школаез выжто Иванлэн улон юртаз. Таиз 1964-тӥ арозь ужаз на. Жаляса верано, асьсэос кичӧлтӥсьёс ужзылэсь емышъёссэ ӧз адӟе ни. Кадров выжыосты кулак чотэ пыртӥзы. Паймод, гуртысь уллямзы бере но, 1936-тӥ арын, соос кытысь ке вуыса, школалы выль юрт ӝутыны кутскизы на вал. Но 1931-тӥ арын сӥзьыл пал соос чиптэм-чаптэм ышизы. Ӧз берытске ни. Пиосъёслэн кыӵе дуннее кылемзы али но тодмо ӧвӧл. Соослэн ӟеч мытэм ужзы гинэ ялан пушъе но чеберске. Табере Уддяди школаын дышетскизы но дышетско уно сю пиналъёс, татысен соос бадӟым улонэ сюрес мыто. П.МИШИНА. Сергей Кириенко � Удмуртиын Толон дорамы ужаз Россия Федерацилэн Президентэзлэн Приволжск округъя оскем муртэз Сергей Кириенко. Аэропортын сое пумитазы Удмурт Республикалэн кивалтӥсьёсыз Александр Волков но Николай Ганза. Сергей Владиленович татысен ик вакчияк валэктонъёс сётӥз журналистъёслэн юанъёссылы. Нунал ӵоже со пумиськылӥз Удмурт таможняын ужасьёсын, республикаысь но интыосысь кивалтӥсьёсын, вуылӥз "Ижмаше", выль циркез ӝутонэ, Александр Невский Соборе. Сергей Кириенколэн Удмуртиын ужаменыз пыр-почгес тодматом вуоно номерын. Л.МЕДВЕДЕВА. Дасясько Футболъя Россилэн чемпионатаз нюръяськись командаосмы али шутэтско. Шонергес вераса, кужымзэс люкало, быгатонлыксэс волято вуоно пумиськонъёс азьын. Ижысь "Газовик" но "Динамо" валлян эшлыко шудон ортчытӥзы. 4:1 лыдын вормиз "Газовик". Та команда 4-тӥ августэ ас дораз пумиськоз Смоленскысь "Кристаллэн". Огнуналэ пыже, мукетаз кынтэ Кызьы тодӥськом, Латин Америкаын шуныт возиське, Россиен нокызьы уд ӵошаты. татын пичи кезьытъёс но улон бырон выллем луо. Туэ июль толэзьлэн шораз татысь куазьлэн йӧнтэмъяськемез абдартӥз дуннелэн пӧртэм сэрегъёсаз улӥсьёсты. Озьы Парагвайлэн шор караз, Асунсьонын, сутка ӵоже 45 градус пӧсьысен 7,5 градус кезьытозь вуиз. Кӧня ке мурт кынмыса кулӥз, тросэз эмъюмъяськонние шедиз. Куазез эскерисьёс верамъя, таӵе учыр Америкаын ӧй вал на. А. Глебов. (Ивор вуиз Интернет пыр). Ыргон коньдон тодэ вайытӥз Тулыс лымы шунан вакытэ вал со. Дышетскись пиналъёс каникулэ потэмын, школае мыноно ӧвӧл. Сурен Машаджатян пизэ Гельбертэз сайкатыны ӧз дырты. Мед, пе, изёз, уммез бырытозь. Нош Зязлуд Какся гуртлэн ульчаостӥз тулыслэсь вуэмзэ ивортыса сямен канаваостӥ ву бызе ини. Шунды сӥос сузьтӥсько гопъёсы но, выръёсы но. Кытысь удмурт гуртэ армян фамилияен семья вуиз? Колхозлы гидъёс, мукет юртъёс лэсьтыны лымшор палась лыктэм мурт асьме доры кылем. Семьязэ но татчы ваиз. Табере тани пиез Гельберт удмурт нылпиосын шудэ, соосын ӵош школае бызьылэ. Туннэ со султыны гинэ вуиз, атаез уж дэмлаз: "Пие, - шуиз со, - лымы ӧз акыльты на-а? Уть ай вадьсамы быдэс гурезь, шуна ке но, шундыё нуналлы сётскемез уг поты. Гельберт лопата кутӥз но ульчае потӥз. Кытӥ бергаса, кытӥ пичи тулкымен ӧръяськыса бызе тудву. Гельберт йӧӟектэм лымыез пазя но пазя. Кутске но палдылэм люкъёсты ульча шоры зӥръя. Наштаськем кизэ миськыны канава доры мыкырскиз. Отысь маке валантэм "корт" шедиз. Котырес, вылзэ вожмыт буёл басьтэм. Мар со? Пияш шедьтосэныз корка бызиз. Сурен но шуак мар шуыны ӧз тоды. Я солань, я талань бергатӥз. Валатскиз - вашкала коньдон. - Та гинэ-а? - юаз со пиезлэсь. Гельберт ма шуыны ӟудӥз. Выльысь потӥз ульчае. Копалтӥз но трос коньдон жильдӥськиз, туй сарваен ватэмын вылэм со. Выль ивор гуртэ ӝог вӧлмиз. Котькинлэн уго ватосэз адӟемез потэ. Со сярысь кылӥськиз Вавож ёросысь мукет гуртъёсы но. Кытысь кыӵе адями ульча шоры ыргон коньдонзэ ватэм? Трос пол таӵе юан сётылӥ аслым. Собере тодам лыктӥзы кемалась ортчем аръёс... Дӥнь ласянь сисьмыны кутскем кыз сильтӧллы пумитъяськыны чидатэк пограм. Вез- вез кылле со ӝужытэсь кызъёс, пужымъёс вискын. Тихон Павлович (Кайсы), мынам атаелэн агаез, тӥр тышкын йыгаса, кӧня ке пол йырзэ сэзъяз. - Даурез ортчем талэн, пулы сяна ярано ӧвӧл ни, - шуиз со, тӥяськем улвайёсты кораса. Со азьвыл синйылтэм ини пограм кызэз. Нюлэсэтӥ ветлон сямыз вал уго солэн, я губияны кожаз, я пӧйшураны. Одӥг-ог тӧдьы кечен яке коньыен бертылӥз. Нош таяз учыре пограм кыз доры юнме шорысь кузь уробоен ӧм лыктэ. Кемаласьгес ини пересь сюлмыз шуген улэ: корка улысь одӥг корез воштыны кулэ, со пеньӟыны ӧдъям. Бушкын бертоно уз луы, сузям корез уробое ӝутӥм. Мон соку дас куиням гинэ ветлӥсько вал. Зэм юрттӥсь вал-а, табере шуг вераны. Бен, кӧня быгатӥ, кӧня кужыме тырмиз - юрттӥ кадь. Гожтӥськем сюрес уробоез позыръяз, вылды, гуртэ вуытозь ӟукыртӥз. Капка вадьсы вуыса, малы ке азбаре пыремез ӧз пот пересьлэн. Татчы гинэ, пе, куштом корез, ӝоген вандылом сое. Ӵуказеяз ик, пила но тӥр кутыса, ульчае потӥм. Каллен ке но, уж мынӥз, пуклёос люкаськизы. Тани огез, пила улысь мозмыса, уллане питраз но музъемысь мычиськем юбо? пуме мырӟиськиз. Ма со, юбо пум-а, сисьмем лӥял-а - музъеме ватскемез потытэк гуртоослы люкетэ на? Со шоры мон трос пол таӵе юанэн учкылӥ ини. Нокинлэсь юаны нодэ ӧз тырмылы. Уробое кыткем валэн ортчоно луэ ке, палэнэ кожылӥ. Пуклёлэсь мырӟиськемзэ синйылтыса, пересьлэсь юано кариськи. - Э... э... - шуиз со, - вераны кутски ке, та кормес туннэ вандылыса ум быдтэ. Куке но верало, дыр шедёз. Мон ялан вити со дырлэсь вуэмзэ. Нош огпол луд вылысь бертыса, нуназе понна сиськыны пуксим. - Шутэтскыны выдод-а, мынэсьтым мадемме кылзод-а? - юаз пересь. - Мадемез кылзыны пумит ӧй луы. - Гуртмес тодӥськод, - кутскиз со, - ветлымтэ, лёгамтэ сэрегез ӧвӧл ни, дыр. Ачим но озьы ик, татын вордски, татын ик пересьми. Котькыӵе дырзэ адӟылӥ солэсь. Ӟозлуд шуиськом ке, вуж ульчаез син азямы пуктӥсько, Нюрсьӧрез, Загибалэз вератэк ини. Мон тодӥсько на ай гуртмылэсь мукет дырзэ. Таӵе ӧй вал со. Ульчаен пуксён сярысь нокинлэн тодаз ӧз лыкты. Кинлы кызьы яраз, озьы пуксьылӥзы. Ог- огзылы (туала сямен вераса), 200-250 метр вис кельтыса. Яна потоно луэ ке, со буш кылем интые пуксьылӥзы люкиськисьёс. Мон тодэм дыръя ини ульчаос кылдыны кутскизы. Нырысь ик ошмес дуре васькись урам кылдӥз. Табере сое Вуж ульча шуиськом. Пересь кема мадиз на кинлэсь кытчы пуксемзэ. Бӧлякъёсты но тодаз ваиз. Куинь бӧлякъёс, пе, асьме гуртын Вавожысь, Куашкамысь, Каксяысь лыктэмъёс гурт кылдытӥллям. Собере тӥни вашкала сямъёсъя пуксиллям. Кӧня ортчиз ини со дырысен, даур-а, кык-а, оло, солэсь но трос, нокин лыдъямтэ. Кытын ке, оло, пусйыса кельтэмын кыӵе нуналэ, кыӵе аре нырысетӥ ӵог шуккемын вал гуртмылэн интыяз. Ӝытазе, ужысь бертэм бере но, мон кема малпаськыса кыллим на. Пересь мыным быдэс дуннеез усьтӥз кадь. Тӥни озьы, Вавож ёросысь Ӟозлуд гуртлэн но (мукет гуртъёсын сямен ик) аслаз ортчем сюресэз, историез вань. Пересьлэн мадемез дырысен ой! трос аръёс ортчемын, сизьымдон пала вуэ ини. Алигес цо выльысь тодэ лыктӥз, Ӟозлудлэн вуж ульчаысьтыз ватос шедьтэм сярысь иворез кылэм бере. Кызьы, малы ульча шоры ватэмын со? Лыдӟись валатске ини: юртъёс али сямен пуксемын ӧй вал ук. Кытысь шедиз ватос, отын сылӥз, дыр, кинлэн ке коркаез яке мукет юртъерез. Коньдонзэ ватӥсь мурт чаклатэк-эскериськытэк ӧз гудӥськы музъеме, юртэзлы матэ согиз сое. Россиен кузёяськиз Петр И-лэн нылыз Елизавета Петровна. Со властез басьтытозь, дворянъёс асьсэ сярысь мултэс сюлмаськизы. Соослы право сётэмын вал крестьянъёслэн но музъеменызы кузёяськыны. Таӵе югдур Петербурглы кыдёкысь гуртъёсы но кылӥськытэк ӧз улы, дыр, коньдонзэс шара ӧз возе. 1812-тӥ арын поттэм коньдон сярысь но кӧня ке кыл вераны луоз. Ӵапак со аре асьме музъем вылысь уллямын вал Наполеонлэн армиез, Бородино дорын лек ожмаськон бере, Наполеон сэрытак пегӟиз. Та ож сярысь но гуртъёсын, оло, тодытэк ӧз улэ. Кытчы берытскоз улон, ма луоз азьланьын? Таӵе малпанэн узыргес улӥсьёс дуно ваньбурзэс калык син азьысь ватылӥзы. Оло ӵыжы-выжыоссылы вераны ӧз быгатэ, оло мукет муген ватос дауръёсын музъемын кылле. Гуртъёсын гинэ озьы ӧвӧл, городъёсын но выль юртъёс пуктыны музъемез бугырто ке, одӥг-ог ватос потэ. Ог аре Глазовын но зарни коньдон жильдӥськиз ук. Ӟозлудысь ватосъёслэн арлыдъёссы пӧртэмесь: 1753 но 1812 аръёс. Одӥг мурт-а соосты люказ яке киысь кие сётэмын вал-а. Табере сое нокин уз вера ни, укыр трос аръёс ортчемын. В. СМИРНОВ. Август: тодмо нимъёс но нуналъёс 1. 35 ар талэсь азьло (1965) Ижевскын усьтӥськиз Чугун сюрес вылын ужасьёслэн культурая юртсы; - Воздушно-десантной войскоослэн нуналзы. 6. Чугун сюрес вылын ужасьёслэн нуналзы (августлэн нырысетӥ арня нуналэз); - Хиросималэн нуналэз. Ядерной оружилы пумит нюръяськонъя калык куспо нунал; - вордскемез дырысен 80 ар тырме Елизавета Ивановна Белослудцевалы (1920- 1986), экономика наукаосъя кандидатлы, Удмурт кун универстетысь доцентлы, Удмуртиысь наука удысын дано ужасьлы. Вордскемын Кез ёросысь Вуж Гыя гуртын. 7. 70 арес тырме Георгий Ефимович Даниловлы (1930), медицина наукаосъя докторлы (физиологлы), Ижысь медициная академиысь профессорлы, Удмуртиысь но Россиысь наука удысын дано ужасьлы. Вордскиз Яр ёросысь Улын Чура гуртын. - Данилов 1975-тӥ-1987-тӥ аръёсы мединститутын ректор луыса ужаз. Со ог 150 научной уж гожтӥз; - 50 арес тырме Николай Анатольевич Родионовлы (1950), история наукаосъя кандидатлы, Россиысь наукаосъя академилэн Урал ёзэзлэн историяя, кылъя но литературая Удмурт институтысьтыз ужасьлы. Вордскемын Кез ёросысь Тамаченки гуртын; - Выжы калыкъёслэн нуналзы. 10. 70 арес тырме Евгений Михайлович Николаевлы (1930), удмурт нылпи кылбурчилы, дышетӥсьлы, журналистлы, Удмурт телевидениысь редакторлы. Вордск__емын Якшур-Бодья ёросысь Бодья гуртын. 11. 50 арес тырме Геннадий Николаевич Никоновлы (1950), пыӵал тӥрлык бичан удысысь конструкторлы, АН-94 автомат кылдытӥсьлы. Вордскемын Ижевскын. 12. Физкультурникъёслэн нуналзы; - Военно-Воздушной Кужымъёслэн нуналзы. 13. Лэсьтӥськисьёслэн нуналзы (августлэн кыкетӥ арня нуналэз). 15. 130 ар талэсь азьло (1870) Ижысь заводын пыӵал тӥрлык бичасьёсты дасянъя школа усьтэмын. 20. 65 ар талэсь азьло (1935) Вотка посёлок пӧрмытэмын городлы. - Россиысь Воздушной Флотлэн нуналэз (августлэн куинетӥ арес нуналэз). 22. Россия Федерацилэн Кун кышетэзлэн (флагезлэн) нуналэз. - 50 арес тырме Галина Васильевна Романовалы (1950), удмурт кылбурчилы, Удмуртиысь культура удысын дано ужасьлы, Ашальчи Окилэн премиезлэн лауреатэзлы. Вордскемын Ува ёросысь Сухая Видзя гуртын. - 65 арес тырме Пимен Леонидович Касаткинлы (1935), Удмуртиысь дано артистлы. Со кема аръёс ӵоже Удмурт радиоын диктор луыса ужаз. 27. Шахтёрлэн нуналэз (августлэн берпум арня нуналэз); - Россиысь кинолэн нуналэз; - 65 ар талэсь азьло (1945) Ижевскын усьтӥськиз библиотекарьёсты дасянъя техникум. 1961-тӥ арын со культпросветшколалы пӧрмытэмын, нош 1974-тӥ арын - культпросветучилищелы. 1990-тӥ арысен со Культурая училище нимаське. 29. 85 арес тырме Павел Тимофеевич Кривокорытовлы (1915), Советской СоюзлэГероезлы. Вордскемын Вавож ёросысь Орлой гуртын. Ожмаськиз со Ленинградской, Северо-Западной но 2-тӥ Прибалтийской фронтъёсын. Лек сӧсырмыны шеде. Августэ - 115 ар талэсь азьло (1885) Варзи-Ятчиын курорт усьтӥське; - 40 ар талэсь азьло (1960) Ижевскын ужаны кутске коркаос ӝутонъя комбинат. Е. Ушакова, Удмурт Республикалэн туала историезлы сӥзем центрысь ёзлэн кивалтӥсез. Министерствоын кенешон Мылкыдыд ке урод, дорад пук Юстицияя министерство ӝыны ар ужамезлы йылпумъянъёс лэсьтӥз. Та министерство сярысь азьло аръёсы тросэз адямиос номыр тодытэк улӥзы. Малы сокем ватскыса ужано вал? Оло, солэн соку зол кулэлыкез ӧй вал? Тазьы учконо ке, зэмзэ но со вакытэ законъёс чутрак ӧз вошъяськылэ. Нош судъёслэн решениоссы умойгес быдэсъяськылӥзы. Берло дыре республикаысьтымы Юстицияя министерство, калыклэсь ватскытэк, шара ужаны кутскиз. Татын шӧдӥсько, лэся, выль министрлэн В. Осиповлэн дӥсьтыса ужаны быгатэмез но. Удысэзлэсь ужамзэ паськытгес возьматон понна со матысь кусыпъёс тупатӥз иворъёсты вӧлмытӥсь ёзъёсын. Таяз арын министерствоысь специалистъёслы вань кужымзэс сётыса ужано луиз Удмуртилэн Конституция ватсанъёс но воштонъёс пыртон бордын. Табере асьме законъёсмы Россилэн Конституциезлы пумит уг мыно. Удмуртилэн Законэзлы Москваын вылӥ дунъет сётэмын. Куд-ог тырмымтэос вань 13 но 32 статьяосъя гинэ. Нош Татарстанлэн но Башкортостанлэн Конституциосазы быдэн 60 пала Россилэн вылӥ законлы тупамтэос шараямын. Озьы шуиз Кун Кенешысь правоез утёнъя управленилэн кивалтӥсез К. Глухов. Со озьы ик пусйиз, таяз арын, пе, министерство отчы сётэм законъёсты пыр-поч но туж чаляк эскерылӥз. Ӝыны ар куспын гинэ 200 пала эскеронъёс ортчытэмын пӧртэм законъёслэн, актъёслэн, постановлениослэн пуштроссыя. Нош 1999 арын быдэс ар ӵоже 300 документлы гинэ дунъет сётэмын вал. Министр В. Осипов таӵе учырез но пусйиз, куд-ог кивалтӥсьёс, пе, законъёсы юри асьсэлы тупась ёзэтъёсты пыртыны турттыло. Ярам, сыӵе учыръёсты юристъёс синйылтыны но палэнтыны быгато. Коллегилэн кенешаз бадӟым вераськон мынӥз кадръёслэн ужамзы сярысь. Ӟеченыз валче меӵак верамын вал судья приставъёслэн, ас кожазы ужась нотариусъёслэн мыдлань ужамзы сярысь. Мар бордысь со потэ? Оло, куд-огезлэн дышетскемзы уг тырмы? Министрлэн верамезъя, али Юстицияя министерствоын 423 адями ужа, ужасьёс тырмо, но со пӧлысь 98-эз гинэ вылӥ образованиен юристъёс. Отӥосыз 325-ез - огшоры чиновникъёс. Оло, со бордысь но куд-ог янгышъёс пото. Трос курлан кылъёс верамын вал судья приставъёс пумысен. Огласянь соос бадӟым уж лэсьто: республикалэн бюджетаз берыкто организациослэсь но предприятиослэсь люкаськем выт но мукет коньдон тыронъёссэс. Кылем арын гинэ соослэн юрттэменызы бюдежтэ 2,5 миллиард манет коньдон пыртэмын (со вань бюджетлэн ӝыны люкетэз луэ). Тужгес но пусйымон ужаллям Алнаш, Красноярск но Ижысь Первомай ёросъёсысь судья приставъёс. Но куд-ог дыръя приставъёс асьсэдыз туж умойтэм возё, урод выросъёссэс возьмато. Зол шӧдӥське законъёсты тодымтэзы но. Туэ министерстволэн огаз коллегияз пыр-поч эскеремын вал Глазовысь судья приставлэн В. Яговкинлэн "сьӧд" ужъёсыз. Кӧня ке пол кузьым басьтылэмез понна со вылэ уголовной уж ӝутэмын. Та судья пристав пумысен уд вера, со дышетскемез тырмымтэен озьы дауртӥз шуыса. Подполковник званиен адями табере лейтенант званиозь "васькытэмын". Туннэ министерствоын 135 судья пристав ужа. Соослэн кивалтӥсьсы В. Семенов вераз, котькуд приставлы, пе, быдэн 220 пала пӧртэм бумагаосты эскероно луэ. Сомында ужъёсты ваньмыз эскерыны уг вуы. Туэ нырысетӥ январе учкымтэ ужъёслэн лыдзы 58 сюрс мында люкаськемын вал, нош нырысетӥ июльлы со лыдпус 60 сюрсозь вуиз. Тужгес но ляб ужало Грахово, Каракулино, Пичи Пурга но Ижысь Ленин но Устинов ёросъёсысь приставъёс. Луыло чидантэм учыръёс но. Кылсярысь, Красногорск ёросын кылем арын 194 учкымтэ ужъ кылле вал, нош туэ - одӥг уж гинэ. Сыӵе югдур ӟеч ужамез уг возьматы вылэм. Кызьы валэктӥз В. Семенов, татын вуэм гожтэтъёсын воксё ужамысь дугдӥллям. Тӥни сыӵе тырмымтэос судья приставъёслэн ужазы. Соин но, вылды, министерствое вуись котькуд куинетӥ ӝожтӥськон приставлэн уженыз герӟаськемын. Кадръёс бордын ужез умоятон понна бадӟымгес саклык висъяно аттестациез ортчытонлы, шуиз В. Семенов. Нош министр В. Осипов аслэсьтыз ужасьёссэ тазьы алӥз: сӧриськем мылкыдын уже но эн ветлэ, сыӵе ужасьлэн пайдаез ӧвӧл. Зэмзэ но, со туж умой курон. Угось котькуд ужась бордысь потэ министерстволэн но данэз. Законъёслэсь быдэсъяськемзэс чакласа возись министерстволы мукет сямен ужаны уг яра. Соин ик ог-огзы азе татын вылӥ куронъёс пуктыса ужаны тыршо. Т. БАННИКОВА. Казна узырме выт чотын Таяз арын но шаерысьтымы вытъя полиция Россиысь дас тужгес но умой ужасьёсыз пӧлы пыре. Арлы быдэ вытъя полиция республикаысьтымы бюджетэ берыктэ сю миллион манет пала. Та службалы казнаысь котькуд висъям манетлы 1999-тӥ арын витьтон куать манет берыктэмын вал. Таяз арын апрель толэзе Россия Федерацилэн уголовной кодексысьтыз 126-тӥ статьяяз воштӥськонъёс пыртэмын. Та выльдӥськонъёс вытъя полицилэсь ужан удыссэ паськытато. 27-тӥ июле ортчем пресс-конференциын республикаысьтымы вытъя полицилэн тӧроез генерал-лейтенант Владимир Лепихин вераз: � Нырысетӥ паларе кун бюджетэ 22 миллион манет берыктӥм ни. 1999-тӥ арен ӵошатыса, со дас поллы тросгес. Выт бичанэз эскерись управление но вытъя полиция азьло ӵошен лыдъязы пунэм тыронъёсты. Нош табере та ужъёсты интыосы потаса эскерыны быгатэ вытъя инспекция гинэ. Законэз тӥян учыръёсты шараяса, документъёсты со ыстэ вытъя полицие, ми яке уголовной уж усьтӥськом, яке бумагаосты берен келяськом. Законъя кыл кутоно луизы ини музъемен вузкарисьёс, алдаськыса кредит бастэмъёс, сертификаттэк вузаськисьёс, "кузьым" басьтӥсьёс но мукетъёсыз. Кылсярысь, одӥг кивалтӥсь аслыз 10о арлы 600 сюрс манет кредит басьтӥз. Али та йыружез эскериськом. Уголовной ужъёслэсь лыдзэс будэтон сярысь ум сюлмаськиське. Йыртэмась аслэсьтыз янгышсэ вала но уксёзэ государстволы берыктэ ке, законъя сое кыл кутытонлэсь мозмытыны луэ. Ужаны тыршиськом валэктон амалъёс пыр, адямиослы тодазы вайытӥськом выт тыронзы сярысь. Озьы ик эскериськом пенсиосъя, сюресъёсъя фондъёсы выт тыронэз. Россиез сизьым округлы люкылэмен, милям но воштӥськонъёсмы вань.Котькуд округын кылдытӥськозы выт бичанъя полицилэн управлениосыз. Уже кутэмын луоз 20-30 адями. О.КОЖАНОВА. Вазиськон Республикаямы нырысетӥ президентэз быръён сярысь ялэмын. Тодмо ни солэн нуналэз, соин ик нюръяськон нуналысь нуналэ кужмоя. Валамон ини, та туж кулэ политической ужрадлэсь политической огазеяськонъёс палэнэ кыльыны уг быгато. Туэ 13-тӥ июле Алнаш но Можга землячествоослэн огазеям кенешсы ортчиз. Вуоно кандидатъёслэсь ужаны быгатэмзэс, адямилыко луэмзэс лыдэ басьтыса но эскерыса, землячествоослэн ӵош кенешсы огъя малпанэ вуиз: президентэ быръёно республикамылэсь экономиказэ ӟеч тодӥсь муртэ, ас шаерезлэсь зэмос патриотсэ, Удмуртиын вордскем адямиез. Собрание Удмурт Республикалы Президентэ кандидат луыны соглаш луэмзэ вераны куриз Кун Кенешысь Тӧролэсь нырсетӥ воштӥсьсэ П. Н. Вершининэз. Ми лыдъяськом, со та бадӟым но дано ужез быдэстыны быгатоз, со та ужлы дась. Собранилэн куремезъя, М. Ф. Махнюк, Можга землячестволэн кивалтӥсез, А. Г. Поляков, Алнаш землячестволэн правлениезлэн членэз. Удмурт Республикаысь Правительстволэн распоряжениез Автомобиль сюресъёсты утёнъя куронъёсты (юнматэмын 2000-тӥ арын 5-тӥ мартэ РСФСР-ысь Министръёслэн Советсылэн постановлениеныз) лыдэ басьтыса но Воткинск город - Кельчино черкогурт сюресэз лэсьтыку ӝеганъёсты палэнтон: 1. Вылӥын верам сюрес вылтӥ вань машинаослэсь мынон-ветлонзэс дугдытоно 2000- тӥ арын 1-тӥ августысен туэ 1-тӥ декабёрзь но 2001-тӥ арын 1-тӥ апрельысен 1-тӥ ноябрёзь. Сюресэз пытсам дыръя машинаос ветлозы Дэбес-Игра-Ижевск маршрутъя. Та распоряжение кужыме пыре сое печатлам дырысен. Удмурт Республикаысь Правительстволэн Тӧроез Н. А. Ганза. Ижевск город, 2000-тӥ арын 25-тӥ июле. � 371-р. "Иднакар", браво! � Милям "Иднакар" театрмы Финляндиын туж умоен ассэ возьматӥз. "Тристан но Изольда" спектакльмес кык пол пуктӥмы, кык полаз ик куать пол-а, мар-а йыбырттыны потамы учкисьёс азе. Декорациез сьӧрамы ӧм басьтэ, но татын ӝамдэ дыр куспын ваньзэ лэсьтӥзы, кызьы милемлы кулэ. Туж ӟеч радъямын вал шутэтсконмы но: ты дурын коттеджын улӥм, саунаын пылаським, пӧртэм ӝытъёс ми понна ортчылӥзы. Огъя вераса, выжыкылын кадь вал. Тазьы шумпотэмзэс верало Ижевскысь Егитъёслэн юртысьтызы "Иднакар" театрысь артистъёс Ольга Ганева, Алексей Ложкин, Игорь Люкин, Кадим Галиханов, Петр Денисов, Светлана Кибардина, Надежда Уткина, Маргарита Кожевникова но мукетъёсыз. Нурмес городын соос возьматӥзы удмурт улонэ выжтэм "Тристан но Изольда" романтической драмаез-легендаез. Асьсэос верамъя, кылъёссэ валатэк но спектакль ваньмызлэн сюлэмазы пыӵаз, яркыт, туала, выль амалэн но фольклорез уже кутыса, пуктэменызы. Финн-угор театръёслэн фестивальзы Финляндиын арлы быдэ ортчытъяське. 1994-тӥ арын отчы "Эбга" спектакленыз ветлӥз Удмурт национальной театр но. Соку Россиысь пӧртэм финн-угор республикаосысь театръёс пыриськизы фестивале. Берло аръёсы сыӵе луонлыксы ӧвӧлэн одӥг коллективез гинэ ӧтё. Туэ сыӵе шуд усиз Удмуртиысь "Иднакар" театрлы. Со сяна, фестивальын трос вал асьсэос финнъёс, эстонъёс, Норвегиысь, Финляндиысь саамъёс. Театръёс гинэ ӧвӧл, фолк-, рок-группаос, эктӥсьёс, нылпиослэн коллективъёссы. "Иднакар" театрлэн кивалтӥсез, режиссёрез, со ик "Тристан но Изольдаын" валтӥсь ролез шудӥсь Ольга Александрова финн-угор дуннеын туж тодмо луэмын ни. 1994-тӥ арын со Финляндиын нырысьсэ возьматӥз "Куинь сюан гуръёс" моноспектакльзэ. Собере Суоми шаере мукет программаосыныз вуылӥз 1995-тӥ, 1996-тӥ аръёсы. Асьме артистъёслэн Финляндиын выступлениоссы котьку вылӥ дунъет басьто. Туэ 18-тӥ�22-тӥ июле ортчем фестивальын "Иднакарез" туж шуныт пумитазы Надежда Уткиналэсь но Иван Григорьевыхлэсь удмурт кырӟанъёссэс. Асьсэос Финляндие ветлэмъёс туж тау каро сюрес усьтӥсьёссылы, кин коньдонэн юрттӥз: Удмурт Республикаысь Кун Кенешлы, Нациосын ужанъя министерстволы, Егитъёсын ужанъя комитетлы, Егитъёслэн юртсылы, озьы ик ужбергатӥсьлы Николай Соловьевлы. Т.НИКОЛАЕВА. АРХИВЫСЬ ДОКУМЕНТЪЁСЪЯ Удмуртия ХХ дауре 1930-тӥ ар Страна азинске одӥг адямилэн кивалтэмез улсын. Обществолэн вань удысъёсыз эскерисько-чакласько вылӥысен. Выль улонлэн тодметаз пыро ужан книжкаосты сётъян но. Та вакытэ ӝог азинске промышленность. Пятилеткалэн кыкетӥ арез йылпумъяськемен, Ижысь заводъёсын 1-тӥ октябре ялэмын вал "ударниклэн нуналэз". Со ортчиз ударной бригадаослэсь лыдзэс йылэтыны, ӵошатсконэз кужмоятыны ӧтёнъёс улсын. Озьы "Ижсталь" заводысь лекальной мастерскойысь коллектив кыл сётӥз: вань рабочийёс ударной бригадаосы гожтӥськозы. Ноябре ужпум пуктэмын вал Воткаысь заводэз гурт техника поттонысь машина лэсьтон удысэ выжтыны. Предприятиез косӥзы экскаваторъёс лэсьтыны. 1931-тӥ-1932-тӥ аръёслы план тупатӥзы � 25 машина. Кылдӥзы выль ужан интыос, производствое пыӵатоно луиз 5000 пала инструментъёсты. Удмурт писательёслэн нырысетӥ конференцизы ортчиз. Куноос пӧлын вал Венгриысь писатель Матэ Залка. Конференцие пыриськемъёс пусйизы Гердлэсь, Тимашевлэсь, Воронцовлэсь янгышамзэс но соосты юн алӥзы. 8-тӥ январе печатьысь потӥз "Дась лу!" пионер газетлэн нырысетӥ номерез. Ар пумын ваньмыз сямен дышетскись удмурт пиналъёс солы гожтӥсько ни вал. 1930-тӥ арысен вань нылпиос одно ик покчи классъёсты ке но йылпумъяны кулэ вал. Соин ик кулэ луизы дышетӥсьёс. Ноябрь толэзе Дэбесын усьтӥське педучилище. Н.КРАСИЛЬНИКОВА, Удмурт Республикаысь Кун архивын ужась. ? Воткаысь машина лэсьтон заводлэн одӥгаз цехын. Вази но ӧд вазьы Вази но ӧд вазьы, ӧти но - ӧд лыкты, Малы тон сокем ваменэс? Вазёд на - уг вазьы, ӧтёд на - уг мыны, Тодод сюлэм вӧсь луонэз. Эн малпа - сьӧрад мон ветло, тэльмыро, Уз луы озьы: пыд азяд йыбыртто. Луиз ке но вӧсь сюлэмы чидантэм, Вато мон сое, нокинлы шӧдсконтэм. Эн оскы солы... Мон укыр кужымтэм, Ӧвӧл кӧтӝожез но копак валасьтэм. Кулэ ке луиз, потто шиосме, Пазьго тынэсьтыд сураськем мылкыддэ. Калык верамъя, яратон, пе, синтэм, Оло, монэным но озьы со пӧрмем. Кожай вал тонэ мальдытсь пӧсь шунды, Нош тон вылэмед ук бышкись кыйбоды. Венгрие - ӟуч спектаклен Удмурт Республикалэн кун премиезлэн лауреатэз, Россиысь но Удмуртиысь культура удысын сӥё-дано ужась Олег Олегович Никитин мунё театрлэн директорез луыса 11 ар ужа ини. Отчыозь со Короленко нимо Ӟуч театрын артист но вал, директорлэн воштӥсез но, удмурт филармониын но ужаз. Олег Олеговичез котькытын гажало калыкен ӟеч, тупаса, быгатыса ужамез понна. Мунё театрлэн репертуараз али 33 спектакль. Троссэ туэ 11 ёросысь нылпи садъёсын, школаосын, лагерьёсын возьматӥзы. Но Олег Олеговичез сюлэмшугъяськытэ, нылпиослы удмурт кылын пьесаос ӧвӧл шуыса. Венгрие мунё театръёслэн фестивалязы но мыноно луиз, пе, М. Садовскийлэн ӟуч кылысь удмурт кылэ берыктэм пьесаезъя "Терёшечка" спектаклен. Г. Васильева. Туспуктэмез В. Беломорскихлэн. Выль нянез � сукыри нянен Нырысетӥ нянь � музъем ужась понна бадӟым шумпотон. Ӝутскем мылкыдын пумитало сое нянь басьтӥсьёс но. Соин Грах ёросысь ю тысен нырысетӥ вуэм машинаез Кизнерысь элеваторын буй-буй пыжем сукыриен пумитазы. Ю-нянь вуттӥзы ни Грахысь конезавод (10 тонна) но та ёросысь ик "Мари-Возжай" эштос (8 тонна). Туэ элеватор 3000 тонна ю тысь кутыны чакла. Та пумысен огкылъёс гожтэмын, предприятилэн вань ёзъёсыз ӟеч ужаны дасямын. Г.ИВАНОВ. Выль цирк ӝутӥське Удмуртилэн столицаяз азьланьтӥське выль циркез ӝутон. Та дыре бадӟым ужъёс мыно солэсь инъетсэ дасян ласянь. Циркез лэсьтонэ пырисько шаерысьтымы уноез бадӟымесь лэсьтӥськон ёзъёс. Кык но ӝыны ар ортчыса, цирк вуыны кулэ ни. Коньдон висъяське Россилэн бюджетысьтыз, озьы ик асьме Правительстволэсь, быгатэмзыя юртто шаерысьтымы предприятиос но. Таӵе вал азьвылэз цирк. Таӵе луыны кулэ вылез. Лэсьтӥськон интыын огыр-бугыр. Шофёр Валентин Тронин. Сварщик Равиль Фатыхов. В. Беломорскихлэн туспуктэмъёсыз. Выжымы уз быры Туннэ Ижевскын усьтӥське бадӟым классъёсын дышетскись финн-угор пиналъёслэн ВИ слётсы. Слёт ужалоз арня ӵоже. Отчы люкаськозы пӧртэм финн-угор улосъёсысь: Эстониысь, Коми Республикаысь, Марий Элысь, Мордовиысь но асьме шаерысь ас калыксы но культуразы понна сюлмаськись визьмо пиналъёс. Чакламын пӧртэм ужрадъёс: котырес ӝӧк сьӧрын кенешонъёс, кивалтӥсьёсын, тодосчиосын пумиськылонъёс, деловой шудонъёс ортчытыны. Слётэз ортчытыны юрттэт сётӥзы республикаысьтымы Егитъёсын ужанъя кун комитет, Нациосын ужан политикая но Калыкез дышетонъя министерствоос. Та вакытэ ик Ижевскын ужалоз МАФУН-лэн Советэз. З.КИРИЛЛОВА. Ляльчиос "Ступени" газетлэн редакциез вуылӥз Завьялово ёросысь Хохряки посёлокысь 8 номеро колоние. Татын пытсэт сьӧрын пуке ВИЧ-ен черлам дас куать мурт. Ньылез амнистия улэ сюремъёс дор палъёсазы бертыны дасясько вал. Озьы ик ньылез матысь дыре пытсэт сьӧрысь потозы. Куд-огеныз соосын вераськоно кариським. Валамон мугъёсъя нимъёссэс соослэсь шарае ум поттӥське. С. та колоние вуиз 1999-тӥ арын 17-тӥ июле. Нимаз инты ӧвӧлысь, ворсано луиз огъя камерае. Сюлэмшугъяськонъёс вал ик. Кызьы пумиталозы та кышкыт висёнэн черламъёсты пытсэт сьӧрын мукетъёсыз пукисьёс? Уз луэ-а кыӵе ке зӥбонъёс администрация ласянь? Паймоно кадь, но ваньмыз вольыт ортчиз. Пытсэт сьӧрын пукисьёс ВИЧ-инфекциен паласькем мурт шоры ӧз урдъяське, валазы солэсь кышкыт югдуре сюремзэ. Пукисьёс пӧлын но ужасьёс пӧлын валэктон уж ортчытэмын. Озьы, ВИЧ-инфекция нуллӥсьёсын нырысетӥ нуналъёсысен ик огъя кыл шедьтэмын вал. Соос колонилэн улонэзлэсь палэнэ ӧз кыле, ваньмыныз ӵош огъя ужрадъёсы пыриськылӥзы. Но кызьы соос таӵе югдуре сюризы? С. кызь арескысен наркотикъёсын эшласькиз. Эскеремез потӥз, мар со сыӵе? Кутскиз лябъёсыз бордысен � турын кыскылӥз. Собере ини мултэс ӧз луы героин но. Укол пуктыны нырысь-валысь кулэ луылӥз 150 манет, йырзэ шузимытӥсь мае ке басьяз базарысь. Берло наркотикъёстэк улэмез ӧз луы ни, тросгес но тросгес кулэ луылӥз. Коньдон но 100 долларъёсын бырылӥз поромытӥсь вузэс басьтон понна. Лушкаськытэк амалыз ӧз луы ни. Озьы сюриз колоние. Наркотикен кык-куинь пол кунояськем бере, адямилэн лулмугорыз сотэк улыны уг быгаты ни, шуэ С. Мар вал улонын ӟечез, чылкытэз, азьланезлы малпанъёсыз, ваньмыз пыд улаз лёгаськизы. Пытсэт сьӧры сюремез солы эмъюм выллем, пе, луиз, йырпоромон дуннеысь потыны юрттӥз. Но мукет эзель табере сюпсе мугорзэ, лулзэ. Наркотикен йырин таӵе югдуре вуиз мукетыз но пукись. М. йырез поромытӥсь суретэз нырысьсэ оскалтӥз 1998-тӥ арын. Куинь толэзь куспын со пӧрмиз ляльчилы, мылкыдызъя гинэ улыны кутскиз. Вунӥз гуртэз, семьяез, ужез, адями ымнырзэ гинэ но ыштыны ӧдъяз. Озьы кыстӥськиз одӥг но ӝыны ар. М. пумен но пумен уллане лэзиськиз, йыртэман сюрес сое ӧз кышкаты ни. Сюриз пытсэт сьӧры. Одӥгез сое али туж сюлмаськытэ: кырыж сюреслэсь кызьы ке но утёно Москваын улӥсь дас вить аресъем сузэрзэ. Дискотекаослэн кырмышъясь тылъёссы медаз поромытэ вал солэсь йырзэ. А.МАРЧУКОВ. ОЛИМПИАДАЕ КАНДИДАТЪЁС Мальдыто медальёс Та нуналъёсы Россиысь велосипедэн ворттылӥсьёслэн сборной командазылэн валтӥсь тренерез Николай Горелов ивортӥз Австралие мынӥсьёслэсь нимъёссэс. Со Атлантаын ортчем олимпиадалэн чемпионкаез Новочеркасскысь Зульфия Забирова но Россилэн 120 иськеме ворттылонъя чемпионкаез Ижысь 25 аресъем Светлана Бубненкова. Матысь дыре Бубненкова пыриськоз "Тур де Франс" нимаськись трос нуналъем тужгес дано ӵошатсконъёсы. Ижысь мукетыз дано спортсмен Павел Танков (али со Италиысь одӥгез клуб понна ворттылэ) Олимпийской шудонъёсы сюрес ӵогиз, кунгож сьӧрысь кужмо спортсменъёсын нюръяськыса. Али со дасяське Испаниын ортчоно трос нуналъем ӵошатсконъёслы. М.КУЗЬМИН. Улон виштыос Мар вералозы картоас? Сайка инкуазь. Турын вылын лысву шапыкъёс чиляло. Сайкыт, омыр нап-нап. Бус каллен тӧлӟе ни. Горд шундылэн либыт сиосыз вож сик дурез маялляса эшшо чебергес каро. Кыӵе чебер суред. Вазь ӵукна ик Наталля песяй мерттэм будосъёсыз пӧлтӥ ветлэ ини, я созэ тупатэ, я тазэ чакла, уре, керттэ, маке шыпыртэ но кыштыр мукетыз доры мынэ. Сад- бакчаын солэн яратоно ужез. Мае гинэ уг тоды со бакча сиёнъёс сярысь. Солэн ваньмыз удалтэ: будосэз но, куакез но. Пичи гинэ мугоро, чупырес ветлэ, кыштыр гинэ ужа. Быгатэ со лякыт вераськыны, сюлэме пыӵась кылъёс шедьтыны. Тямыстон куиняз мынэ ини, нош улэмъя весь улэм потэ, шуэ со. Озьы ке но, тӥр кутыса, улвай кора, гурт ужез быдэсъя. Вань ёзвиослы, сиён-юон сяна, кулэ на уж. Ужасьтэм мурт сэрыт висьыны усе. Кӧня аръёс ӵоже, шудон картаоссэ кияз кутыса, ӵукнаоссэ пумита ачиз но вераны уз быгаты ни, дыр. Картаосыз но пересесь, ӝот-ӝот суредъёсыз но уг адӟисько ни. Кинлы мар, кинлы Инмар, нош Наталля песяйлы - картаос, вӧсяськыны сое ӧз дышетэ. Бен, шонерзэ вера со. Картаоссэ кияз кутыкуз, тодэмез потэ, луоз, ма вылез луоз туннэ? Тужгес сюлэмшугъяськытэ, дыр, кин дораз лыктоз. Кинэ со возьма? Пичи пиез нылпиосыныз но кышноеныз бордаз уло. Соосты яратэ. Бадӟым пиез кулэмын ини. Солэсь нылп_йиоссэ чакланы ветлӥз - самой матын, Ягиноын уло. Пиезлэн нылыз Ижевск сьӧрысь Пироговое быземын. Отын Наталля песяй война дыръя вал вылын бекчеен эстӥськон нуллӥз. Шоретӥез пиез кызь арлэсь ятыр Сосновкаын улэ ини. Куинь пиналзэ будэтӥз. Сосновкаетӥ Наталля песяй война вылтӥ Кекоранэ чугун сюрес лэсьтонэ ветлылӥз. Уж туж секыт, сиён-дӥськут ӧй вал. Тросэз уг чидало, пегӟо вал. Нылыз кыдёкысь Кизнере бызиз, соин туж шер бертылэ. Куинь нылпиоссэ будэтӥз. Нылзэ жаляса куд-ог дыръя синвуосыз ик потыло. Ваньзэсты вите со. Оло, картаосыныз пукыкуз, аслэсьтыз улонзэ тодаз вае? Вордӥськиз со гужем 1918-тӥ арын. Атайзэ - Широбоков Иван Артемьевичез - со ӧз адӟылы ини - граждан оже быриз. Анаез огназ будэтӥз. Соин но, дыр, Ижысь медучилищее дышетскыны нылзэ ӧз лэзьы. Али но жаля Наталля песяй, оло, городын улонэз воксё мукет лусал?! Котьма ке но, кема улӥсьёс кыӵе ке мукетэсь луо, дунне шоры мукет синмын учко. Пичи дырысеныз ик киызъя адямилэн кӧня ар улонэз тодмо, шуо. Адями сямзэ воштэ ке, киысьтыз гожъёс но кузёмо, дыр. Нунал каллен берзэ возьматӥз. Шур дурысь тӧл салкымез тубтэ ини. Горд пуксись шунды кенер висъёсты лыдъя но кырмышъя: "Нош ӵуказе мукет нунал..." Нош пытсаськись ӟезьы куара солы пумитаз вазе кадь: "Выльзэ ваёз, выльзэ ваёз". Кин тодэ. Светлана Петрова. Чикуров Сергей Витальевич вордскиз 1965-тӥ арын 20-тӥ октябре Сарапул городын. 1983-тӥ арын йылпумъяз Ижевскысь 22 номеро шор ёзо школаез. Та арын ик басьто армие. Службазэ ортчиз Германиын. Армиысь бертыса, 1989-тӥ арозь ужаз Удмуртиысь МВД-ын. Собере 1999-тӥ арын май толэзёзь тыршиз пӧртэм предприятиосын. Соос пӧлысь тужгес но тодмоез � акциосын "УНГС-город" огазеяськон. Соин кивалтӥз С.В.Чикуров. 1999-тӥ арын май толэзе республикаысьтымы Кун Кенеш сое юнматэ Удмурт Республикаысь Правительстволэн Тӧроезлы воштӥсе. 2000-тӥ арын 31-тӥ июле Россилэн Президентэзлэн Приволжск округъя оскем муртэз С.В.Кириенко С.В.Чикуровез юнматэ Удмурт Республикаын валтӥсь федеральной инспекторе. 1995-тӥ арын С.В.Чикуров йылпумъяз Удмурт кун университетэз "правоведение" специальностья. 1998-тӥ арын гожтӥз "Экономика строительства" темая диссертация. С.В.Чикуров кык пол бырйылэмын Удмуртиысь Кун Кенеше депутатэ (1995-тӥ но 1999-тӥ аръёсы) но кык пол � Ижевск городысь Думае депутатэ (1994-тӥ но 1998-тӥ аръёсы). Ижевск городысь Думаын С.В.Чикуров кивалтӥз бюджетъя комиссиен. Кышнояськемын, будэтэ пизэ. С.В.Чикуровлэн вань дзюдоя разрядэз. Усто чорыгась но пӧйшурась. Ваньмон дыръяз яратэ теннисэн шудыны но гурезьтӥ куасэн нискыланы. Архивысь документъёсъя Удмуртия ЪЪ дауре 1931-тӥ ар Крестьян хозяйствоосты колхозъёсы огазеян тулыс тудву сямен ӧръяськиз. Кылдӥзы нырысетӥ машина-трактор возён станциос Ярын, Глазовын, Балезиноын, Можгалан. Арлэн кутсконаз 27 сюрс начар улӥсь крестьян семьяос 2253 колхозэ пыртэмын вал. Таин ӵош пудолэн йырыз но гыроно-кизёно муос кык поллы кулэсмизы. Таӵе кышкыт югдурез адӟем карытэк, партилэн Удмурт обкомез январь пумын ортчем конференциын ортчыт шумпотыса ивортӥз коллективизация пумысн. Таяз аре 5000-лэсь уно семья кулаке поттэмын, миым сярысь кык поллы трос палэнэ келямын. Кулак радэ сюризы шоро-куспо улӥсьёс но куд-ог куанеръёс. Юрттэк, музъемтэк кельтэм крестьянъёс городъёсы кошкизы. Озьы коллективизация чотын луонлыкъёс кылдӥзы промышленностез ӝутыны-паськытатыны. Удмурт шаерын бадӟым инты басьтэ машина лэсьтон удыс. Та вакытэ уно саклык висъяло вашкала предприятиосты выльдонлы, соин ӵош ик выльёссэ но пукто, Ижысь машина лэсьтӥсьёс ас дырызлы юн умой "Удмурт" станок поттыны кутско, нырысетӥ блюмингез лэзё, пистолет бичан борды басьтӥсько. Воткаысь машзаводын 31-тӥ декабре нырысетӥ экскаватор бичамын. Ужаны кутскизы Ижысь пул пилён но Можгалась бадьпу суллэсь экстракт дасясь заводъёс. Берлоез выллемез быдэс Совето Союзын ӧ__й вал ни. Промышленностьын кылдӥзы выль удысъёс. 1931-тӥ арын огъя производстволэн ньыльмос люкетэз таосыз вылэ усе вал. Промышленной удысэз азинтонын бадӟым инты басьтӥз 181 иськем Яр-Фосфоритная чугун сюресэз усьтон но. Нырысетӥ поезд 7-тӥ ноябре ортчиз. Ижын туж вакчи тулкымъёс вылын ужась радиостанция пуктӥзы. Улонэ калленэн техника пыӵа, нош валась специалистъёс уг тырмо. Соин Ижын усьтӥзы нырысетӥ вылӥ дышетскон заведение - пединститут но Удмурт научно- исследовательской институт. 4-тӥ ноябре Октябрь праздникъёс азьын ужаны кутскиз Удмурт кун театр. Сое усьтон-радъян ужын кичӧлтӥсьёс вал Москваысь театральной техникумын дышетскись Кузьма Ложкин но нырысетӥ пьесаос гожтӥсь Игнатий Гаврилов. Артистъёсты дасян вылысь усьтӥзы туатрально-художественной техникум. Та арын ик Удмурт облисполкомлэн Президиумез областьлэн 10 ар тырмонэз азьын автоном республика кылдытон сярысь кылпум ӝутӥз. Но удмурт кивалтӥсьёслэн малпанзы ӧз быдэсмы. Соос уго ӧз но тодылэ И. В. Сталинлэн 1922-тӥ арын 22-тӥ сентябре В. И. Ленинлы ыстэм гожтэтэзлэсь пуштроссэ. Нош отын тазьы верамын вал: "Суверенитет котырын шудонъёсты интыосысь егит коммунистъёслэн нокызьы уг пот шудонэн лыдъямзы, эрик сярысь веранъёсты таки зэмлыкен лыдъяло". Т. Василькеев, Удмурт Республикаысь Кун архивлэн иворъёсъя отделысьтыз валтӥсь специалист. Та кранэз Вотка заводысударной бригада кылем-мылем кортлэсь лэсьтӥз. Чаклаське - СПИД Эн изь - эзель уг изь! Шаерамы туннэ нуналлы шараямын ини СПИД вирусэз нуллӥсь 152 адями. Соос пӧлын 118 воргорон, 34 нылкышно. 26-езлы 15-18 арес гинэ, 77-ез 19 аресысен 24 аресозь. 112-ез нокытын уг но ужало, уг но дышетско. Та дырлы ВИЧ-инфекция шаерамы вӧлмемын ини 4-яз городын но 7-аз ёросын. Тужгес но секыт югдур кылдэмын Глазовын, Балезиноын но Ярын. СПИД-лэн вирусэз ӝог вӧлме наркоманъёс но соосын матысь кусып возисьёс пӧлын - секс пыр. Йырез усыкмытӥсь суретъёс (наркотикъёс) пӧлысь ӵемгес кутӥсько героин, винт но эфедрон. Одӥг шприцез, венез чылкытатытэк трос пол уже кутыса, 139 адями СПИДлэн вирусэныз черлаз ини. Вераны кулэ, шприц яке вень чылкытатэмын ке но, вирус наркотик пушкы сюрыны быгатоз. Туннэ шуге-леке сюремъёс пӧлысь 20 процентэз наркотикен эшъяськисьёс. Тужгес но сюлэмшугъяськыто егитъёс, школаын дышетскисьёс. Ижын али шараямын ини 6 ВИЧ-ен черлам дышетскись, Глазовын - 7, Шаркан но Яр ёросъёсын быдэн 2. Туж сюлэмшугъяськытэ, егитъёс, быдэ вуымтэос малпаськытэк, матысь кусыпъёс тупато, йырез усыкмытӥсь суретъёсын эшъясько. Соос пӧлын тросгес ужтэк кылемъёс. Та улонын маке но ӟечез борды ӝабырскем интые, нылъёс но пиос асьсэос гуэ уськытско. Наркотиклы коньдон шедьтон понна, кырыж сюрес вылэ султо: лушкасько, мугорзэс дунын вузало, уксё понна вирзэс сётыны туртто. Озьы инфекция мукетъёсызлы но палаське. Вылӥ верам суредэз узырмыто на пытсэт сьӧрын 50 пукись, соос пӧлысь 12-ез ВИЧ- ен черлам наркоманъёс асьме пала вуэмын Москваысь, Москва областьысь, Грузиысь но Украинаысь. Вылтусызъя уд но вала, адями ВИЧ-ен черламын шуыса. Тросэз висисьёс асьсэос но со сярысь уг тодо, уг валало. Висён палам бере, солэн нырысетӥ тодметъёсыз шараясько 3-4 арня ортчыса, яке со дыр кыстӥське 5-6 арозь, но СПИД-лэсь вируссэ нуллӥсь адями кышкыт висёнэз мукетъёсызлы вӧлмытэ. Нырысь-валысь адями кынман висён дыръя кадь курадӟе. Собере вирус "ватске", куддыръя пыраклы. Инфекциез нуллӥсь мурт нокыӵе воштӥськонъёсты уг шӧды. Но мугорыз берло утиськыны уг быгаты ни, сое пӧртэм висёнъёс курадӟытыны, лябӟытыны кутско. Инфекция пыдло вӧлмемъя, адями чаляк жаде, укыр зол пӧся, температураез ялан вошъяське, ымдураз пӧсьлулъёс пото, тӧдьы вирсэръёс (лимфатической узелъёс) зӧкомо, кызон шугмытэ, ку висёнъёс аляло. Берлогес адями борды ӝабырско лек висёнъёс, кылсярысь, ты висён. Озьы тӥни висись кулэ. СПИД-лэн вирусэз ачиз адямиез шонерак уг быдты. Со вие вутто мукет инфекциос, уго адями мугор соослэсь утиськыны уг быгаты ни. Туэ март толэзе кулӥз нырысетӥ шараям СПИД-эн висись воргорон, со вал 56 аресъем гомосексуалист - пиосмуртэн матысь кусып возись. Черлам бераз висёнэз кык ар кыстӥськиз. Июле СПИД-лэсь кулӥз 22 аресъем пинал пияш. Асьсэды асьсэос быдтӥзы (ошиськизы) 19 но 23 аресъем куинь пинал пиос - ВИЧ- ен черлам наркоманъёс. Кызьы огшоры адями ассэ но, пиналъёссэ но ВИЧ-инфекция паласькемлэсь утьыны быгатоз? Нырысетӥез, нюръяськоно наркоманъёсын но наркотикъёсты вӧлмытӥсьёсын. Кыкетӥез, пиосмуртъёсын но нылкышноосын матысь кусыпъёсты эскериськыса тупатоно, нош осконтэм муртэн тупады ке, кисыяды одно ик мед луоз презерватив. Куинетӥез, калык пӧлын, тужгес ик школаосын, училищеосын, вузъёсын валэктон уж нуоно, СПИД- лэн кышкытлыкез но пӧртэм венерической висёнъёслэсь утиськон амалъёс сярысь верано. Котькудӥз адями аслаз тазалыкез, ӵыжы-выжыосызлэн тазалыксы понна ачиз кыл кутэ. Чаклаське. Нош вылӥ верам тодметъёсты ас вылады шӧдӥды ке, эн кышкалэ, соос уго мукет висёнъёслы но тупало. Но ӟечгес луоз, врачъёс доры вазиськыса. Тӥледлы котьку ик юрттыны дась шаерысьтымы СПИД-эн нюръяськонъя центрын ужасьёс. Центр интыяськемын таӵе адресъя: Ижевск, Труд ульча,17 номеро юрт. Телефонъёс: 21-15-94, 21-09-48. Л. Кузелин, республикаысьтымы СПИД центрын ужась. Биньгозы юнма "Ижмаш" акционер огазеяськон, секыт югдурысь потон вылысь, пӧртэм ужрадъёсты кутэ-чакла. Одӥгез соос пӧлысь - кивалтон удысэз вылӥысен улӥозь юнматон. "Ижмашлэн" сизьым ёзаз валтӥсь директорлэн воштӥсьёсыз луозы. Мотоциклет, станок поттон, корт ӵыжатон производствоосын выль кивалтӥсьёс юнматэмын: Александр Звонов, Константин Куликов, Игорь Скрынников. Арлыдзыя соос егитэсь, ужаны быгатонлыксэс возьматӥзы ни. Ӵапак таос ик тужгес оскымон ӵектонъёс сётӥзы. Выль кивалтӥсьёс малпамъя, ар но ӝыны куспын продукция поттонэз 7-8 пол будэтыны луоно. Мукетъёсаз предприятиосын кылизы азьлоосыз ик кивалтӥсьёс. М. Кузьмин. Банкрот � кулӥсез улӟытон Секыт югдуре шедиз Завьялово ёросысь "Восточный" совхоз. Ыштонъёс вылэ ыштонъёс люкаськизы. Муртъёслы пунэм тыронэз 62 миллионлэсь уно луизы. Ас кожаз "уяны" хозяйство ӧз пӧрмыты ни � банкрот каризы. Палэнысь кивалтӥсь пуктыса, "Восточнойлы" кӧня ке "шокчыны" сётӥзы, пунэмъёссэ берыктыны берлолы кельтӥзы. Юрттӥз Удмурт Правительство но 18 миллион манет кредит висъянэн. "Золото-Платина банк" пыр пудо сиёнлы хозяйство эшшо кӧня ке миллионлы пунэмаськиз. "Восточный" калленэн улӟиз. Луонлык кылдӥз пудо йырез 10 сюрслэсь унолы йылэтыны, уждунэз но вытъёсты дыраз тырыны. Али италмасъёс ыштонъёстэк ужало. Кӧня ке улыса, оскыто, барышез но люкаськоз. П.АНДРЕЕВ. Бакча емыш но эмъюм куар Пичи Пурга ёросысь Улын Юриысь 110 пиналъёс школа бордазы усьтэм лагерьын кык смена ӵоже шутэтскизы. Шутэтскизы кыл, оло, уг но тупа. Нылпиос школа бакчаязы тыршизы, колхоз ужъёсы пыриськизы. Сутэр бичаса, нылъёс, пиос асьсэлы толалтэлы варенья пӧзьтӥзы. Асьсэлэн луоз киярзы кушманзы но мукет емышсы. Пайдаен берытске эмъюм будосъёсты люкаса куасьтэмзы. Таӵе паросэз юыса, дышетскисьёс пӧлын шӧдскымон кулэсмизы пыэдэн курадӟисьёс. В. Тронина. Асьме шаерамы ог 20 сюрс пала морякъёс лыдъясько. Кылем шутэтскон нуналэ данакез соос шулдыр шутэтскизы, ог-огенызы пумиськылӥзы. Озьы пусйизы Военно- Морской Флотлэсь нуналзэ. Ижевскын та праздникез пусъён паськыт ортчиз. Трос калык люкаськылӥз тымет дуре, Гужем парке. Куазед уго удалтӥз. Собере тунсыко дасям программа но бордаз кыскиз адямиосты. Ву вылын куасэн нискыланъёс, пӧртэм ӵошатсконъёс, эктон (дискотека) - ваньмыз со вал та ӝытэ. Н. Липина. Спорт Шудонъёсы - ветеранъёс Санкт-Петербургын ортчиз ветеранъёс пӧлын капчи атлетикая Россилэн чемпионатэз. Татчы пыриськизы кунгож сьӧрысь спортсменъёс но. Удмуртиысь ветеранъёс пӧлын яркыт кизили кадь ворекъяз Зоя Дедюхина. Со 100, 1500 но 5000 метре бызьылонын зарни медальёс басьтӥз. Спорт амалэн ветлонъя 5 но 20 иськем сюресъёсты котькинлэсь шаплы ортчиз ветеранъёс пӧлын дуннелэн рекордсменэз Ижысь Борис Олеров. Кузьдалае тэтчанын азвесь но куинь пол тэтчонын зарни медаль утӥз Глазовысь Иван Власов. Та городысь ик Василий Гавшин куинетӥ луиз 200 но 400 метре бызьылонын, нош Вячеслав Кафа бронза медаль басьтӥз, 100 метре бызьылыса. 12-тӥ августэ Москваын ортчозы ветеранъёс пӧлын спортъя шудонъёс. Мӧйыос ӵошатскозы вылӥе но кузьдалае тэтчанъя, спорт амалэн ветлонъя, ортчозы командаослэн эстафетаоссы но. Павел Тонков - кужмоез Велосипедэн шоссе вылын ворттылӥсьёс пӧлын арлы быдэ дуннеысь кужмооссэ спортсменъёсты пусйыло, мукет сямен вераса, рейтинг ортчытъяло. Нырысетӥ интые потӥз Италиысь спортсмен. Кыкетӥ но куинетӥ интыосын Германиысь велосипедистъёс. Дас укмысэтӥ интые потӥз Ижын будэм-юнмам спортсмен Павел Тонков. Россиысь велосипедистъёс пӧлын со самой вылӥ рейтинген мынэ. Тодады вайытӥськом, Тонков али Италиын улэ, татысь одӥгез команда понна нюръяське. Кӧня ке ар талэсь азьло Павел трос нуналъем калык куспо ӵошатсконъёсын вормиз вал. Быдэс Италия соку Тонковез героез сямен данъяз. М. Кузьмин. Вужез пала эн кыле. Опочей. Ну-ну, кинлэн бакчаяз изъёс лэзяськод? Матрон. Кырӟан со, Опочей. Опочей. Озьы ке но, чебер уг кылӥськы. Милям братва табере выль кылъёсын кырӟа. Баблес чебер сьӧд йырсие Тулкым кадь ик сынамын. Фосфоритэн ю удалтӥз, Атай шуэ: "Вӧсямен". Марья. Ми но бере ум кылиське. Милям но выльёсыз вань. Сутэрпуын эмезь уг буд, Эмезь сутэр уг луы. Милям колхозын паськыт луд, Трактор "ӟоскыт" уз шуы. Леким. Шонер, Марёк. Опочей, лэзь ай эктон гурез. Пыдпыдэсъёс лыдо. Леким эктэм бераз Олёшез ӧте. Соиз пумитъяське, но эктыны потэ. Шок-пуль шокаса Дарья вуэ. Дарья. Эктӥськод? Олёш. Егит мылкыд - кӧльы пырдытон вакыт. Ойдо, сузэре, тон но юртты агаедлы. Дарья. Атаез нуыны лыктӥзы. Олёш. Кинъёс? Дарья. Миличаос. Олёш. Кытчы? Дарья. Ӧйтӧд. Олёш. Малы? Дарья. Козьма агаез, пе, ушъяса вераськем. Олёш. Ку? Дарья. Кытысь мон тодӥсько. Ойдо ӝоггес. (Кошке.) Олёш (лекен Опочеез учке, соиз йырзэ мыкыртэ). Тон? Опочей. Мар мон? Олёш. Чагиськид? Опочей. Висён чердэ мурт вылэ эн погыльты. Олёш. Ну, гижы вискы шедем шырпу. Мон ведь тодо. (Кошке.) Опочей. Мын, мын. Мае тон тодод? Егитъёсыд мыд-мыд пала кошко. Надёк (Опочейлы). Тынад ужед? Тынад? Опочей. Мар тон люгы кадь бордам лякиськид? Надёк. Эх, тон, ышем тӥрлэн ныдыз. Эшшо ке... Опочей. Мар эшшо ке? Надёк. Кылкоскы. Опочей. Калленгес тон, ӵоксузёд я мар. Дышетскын пырид но астэ визьмо кожаськод-а ни? Ми но ум тяпайтӥське. Надёк. Кык пал дуро пурт пурт ӧвӧл. Опочей. Ой-ёй, кыӵе со? Куанеръёсыз жалясь луэм. Надёк. Со куанеръёс ик тыныд сюлэм шунытсэс сёто. Дышетскыны но пырид, Кузьма агай юрттэмъя. Нош тон азязы кидэ сётӥськод - мышказы пыддэ пуктӥськод. Эн вунэты, бодылэн пумыз кык. (Кошке.) Опочей. Бадярез ӵогыны чурыт, вузэ юыны ческыт. (Кырӟаса кошке). Азвесь дуно потӥз-а но, Зарни дуно потӥз-а? Улдӥ-малдӥ начар пиед Сокем сюлмад кельшиз-а? Диктор. Очей, Куӟебай Гердлэсь кылбуръёссэ лыдӟыкуз, соин вераськем кадь потылӥз. Кожаз, лэся, сыӵе визьмо адямиос тылын но уг сутско, вуэ но уг выё. Ялан оскиз: пумиськонзы шудо но чебер луоз. Нош Герд, Яковлев, Бурдюков Соловки шормуӵын пукизы. 1937-тӥ аре шуркынмон толэзе соосыз ыбизы. Со вакытэ ик пӧртэм интыосын ыбемын вал Тимашев, Маркелов. Очейлэн атаез сярысь но ивор ӧз кылӥськылы. Вуэ выем кадь адями чиптэм-чаптэм ышиз-быриз. Сцена шорын, ӝутӥське тылын гомась кадь горд плакат: "Родина-мать зовет!" Гудыртэ "Вставай страна огромная" кырӟан. Катанчи. Кыкетӥ люкет Калык потэ. Пиос котомкаосын. Кышноос бӧрдо, сектасько, вормон сӥзё. Ошмес дорын Лукер, Дарья но Олёш. Лукер. Шузие, чакласькы отын. Дышмон пуля улэ йырдэ дуак-дуак эн донгы. Ку меда со шаян мылкыдыд зӥбломоз. Олёш. Пуля - шузи. Со уг чакла, кин шаян но кин визьмо. Ваньзэ одӥг кадь турна-погыртэ. Лукер. Отӥ, оло, атаеныд пумиськод? Олёш. Козьма агайлэн но, атайлэн но иворзы ӧвӧл. Ӧйтӧд. Лукер. Кин тодэм. Дарьюшен ми тӥледыз чидатэк витём. Пумиськиды ке, ог- огдылэсь эн люкиське ни. (Ӟенеликез ошмес вуэн тырмытэ.) Юэмед ке потӥз, ошмес вуэн сюдэ юзматы. Асьмелэн та святой, вӧсям ву. (Котомкае интыя). Олёш. Анай, книгаме эн котты. Лукер. Нош ик со чирдон кинижкаеныд? Мар вог адями тон? Астэ ачид кыӵесэ донгиськод, шузие. Калык тушмон кинига бере, дышмонъёслы дурбасьтэ шуозы. Кельты, пие, ачим интыяло. Олёш. Уг, анай, уг. Оло, войнаын сое пумитало. Ӧз ке тодма, книгазэ возьмато. Кыӵе со шумпотоз. Лукер. Ой, шузие, ой, визьтэме. Козьма агаедлэн лыосыз но сюй луизы, дыр, ини. Тон ке ялан... Олёш. Ӧвӧл, анай, ӧвӧл. Со адями сярысь ноку уродэн эн малпа. Со сюй улысь но, ву пыдсысь но потыны быгатоз. Лукер. Ӧйтӧд ини мар кароно тонэн? Йырвизьмыд ке сураськем шуоно, ваньзэ валаськод кадь. Яке мон визьтэмми, яке тон мыдланес. (Ошмес дорысь сюез ныркышет пуме керттэ, пиезлы сётэ.) Анай-атай музъемед мед утёз тонэ адӟонлэсь. Эзелед палэнтӥ мед кошкоз. Убирез туздырыны музъеммы кужымзэ мед сётоз. Инмар тонэ, атайдэ но, быдэс на ке, медаз кушты. Котькыӵе секыт югдуре мед юрттоз. Утчаськыса Марья потэ. Ошмес доры ваське. Марья. Вождэ эн вай, Олёш, али Можгалась. Ужъёс тымиськемын. Та войнаен сэрен вань чебер малпанъёс тугаськизы. Тани синпельлы пичильтык кузьым дасям вал. (Пужъятэм ныркышет сётэ.) Сокем эн курла. Укыр чебер ке но ӧз пӧрмы, сюлэм шунытэ татын, та саламе бордын. Ӟеч ветлыса, ӟечкын бертоно медло, Олёш. Олёш. Тау. (Чупаны ӧдъя, дугдэ. Дарья соос шоры долкамын. Лукер тае синйылтэ, нылызлэсь йырзэ мукет пала берыктэ.) Лукер. Колӟо, синъёсыд кылёзы. Егитъёс чупасько. Дарья шуак берытске, адӟе. Дарья. Ой, кыӵе тумошо. Марья. Ми чидалом, татын ожгар ӧвӧл. Чидан чигымтэ, пе. Гожтэтъёстэ ӵем ысъя. Оло, Лекимез, Опочеез адӟыны кылдоз. Ӟырдыт салам вера. Олёш. Пумитай ке, мар ке но со иворто ик, дыр. Куара. По машинам! Олёш. Ӟеч луэ, дуноосы. Бертыны ке ӧз кылды, огпол тодады ваиды ке, соин но тырмоз. Герд озьы шуиз вал. Лукер. Ой, шузие. (Олёшлэн тыбыраз чабке.) Калык кошке. Пиез сьӧры, кирос тырыса, Лукер вамышъя. "Кыткы, дядяй, пар валъёстэ" кырӟан кужмояса чузъяське. Тылъёс кысо. Прожектор Очей вадьсын. Очей. Гудыръя Отын-татын выль гудыри: Уно калык кутса бертӥм, Керттылозы сьӧд дышмонъёс, Собере, туж кузь гозы кутса, Ӝужыт, ӝужыт юбо борды Ошылозы серекъяса, Кырныж сины кельтылозы. Мугорысьтым вир шапалоз Шап! Шап! Шап! Шап! Азьлань мыноз Улэм кылем андан калык, Андан калык, ужась калык Дунне ӝуа, дунне сутске!.. Паллян палан, прожектор пиштон интыын Лукер черсэ. Куараосты кылыса, сак кариське. Кышкасагес укно пала учкылэ. Лукер. Нош ик шаян тӧл, лэся, йыгаськиз. Оло, пӧй, Прохор-а бертэ? Яке Олёше? Ой-ёй, кытӥ меда ветлӥськоды? Кыӵе музъем меда тӥледыз уте. Прохор, кытын тон? Малы гожтэт но уд ыстӥськы? Олёше коть ачиз сярысь ивортылэ. Таныкист луэм, лэся. Меканик-водитель, пе. Ма, тракторист вал но, соин, дыр, корт машинаязы кемдӥз. Инмар мед утёз тӥледыз. (Султыса ик кирос каре, мыкырске. Выльысь черсыны пуксе.) Улэп ке бертӥзы, ветылме уг жаля. Пересьёслы йыр-пыд сёто. Сценалэсь бур пал люкетсэ прожектор югдытэ. Лымы вылэ Олёш гаӵолске. Олёш. Анай! Анае! (Вылаз сутӥськем комбинезон, танковой шлёмез кияз.) А-ана- ай. (Позыръяське.) Лукер. Пие? (Шуак султэ, черсонэз усе. Гадь бордаз кутӥське.) Кытын тон? Шат убир пуля улондэ уретӥз? Оло, юрттэмме возьмаськод? Бон, кытын тон, шузие? (Кынмем кадь сылэ.) Олёш. К танку, к танку... Наводчик, на артиллерию... Быстрей, а то нас подобьют. (Лулӟе.) Ах, да танк же сгорел уже. (Кисыоссэ эскере - бушесь.) Герд? Где Куӟебай Герд? (Гырпумъяське. Ымнырыз сутӥськемын. Пал киыныз котырзэ утча, шедьтэ.) Ах, вот ты где? Шедьтӥ мон тонэ, Козьма агай. (Синпель ныркышетэн книгаез маялтэ.) Азьлон мынам мемие Уйбыт пукоз вал черсса, Монэ, пичи нуныез, Выжыкылэн лӥятса. Олёшлэн йыраз тон-н! вазе, кысмыляк погра. Бур палан пеймыт луэ. Ӧсэ йыгаськем кылӥське. Лукер абдрамын. Куара. Усьты ӝоггес. Лукер югытысь ышылэ, Сидорен вуэ. Сидор. Мар лэсьтӥськод? Лукер. Чулкалы ыж гон черсӥсько. Фронтын мискиньёслэн пыдзы медаз кынмы. Оло, киуже гуртоослы сюроз. Сидор. Харошо, пересь. (Котыр учке.) Лукер. Осто,осто, опичер эш. Мар бон уйшор уин но зынъяськиськод ай? Сьӧлыкъёсыд но ӧвӧл, дыр, но. Сидор. Молчать. Лукер. Мар бон ай мурт дорын кузёяськиськод? Сидор. Знать нэ положено. Лукер. Инмаре-куазе! Мар улон та? Узыръёс уг ачимъясько вал. Сидор (Лукерез гурултӥз кутэ). Гердовщина. Кытын со. Лукер. Кин? Сидор. Кинэ ватӥд? Лукер. Нокинэ. Дарёк изе. Ми ӵошен гинэ. Сидор. Сидор Филаретовичез пӧяны малпад? Уз пӧрмы. Лукер. Улонэз ик йырчукин луэ-а, мар-а ини. Сидор. Молчать. Юанэлы валэкты. Кытчы ватӥд? Лукер. Кинэ ватом? Малы? Сидор. Прохордэ, карттэ. Герд пала дурбасьтӥсьтэ. Лукер. Ой, инмаре, кытын со? Лэзизы-а? Сидор. Дизертир со. Руда поттонысь пегӟем. Лукер. Картэ сярысь ямсыз кылъёсын эн вераськы. Та солэн коркаез. Сидор. Со Советской властьлы пумит ямсыз кылъёс вӧлдэ. У-у, гердовщина. Табере пега. Но ничего, ничего. Прохор кадьёсты гинэ ӧм тӥялэ. Ачиз Гердды ми азьын кисальӟиз. Нош кузпалдэ шедьтӥмы ке... Лукер. Юнме сое пытсады ук. Калык азьын сьӧлыкез ӧй вал. Сидор. Молчать. Сидор Филаретович вераку, ымдэ ваяк эн усья. Так-с. Кузпалдэ шедьтӥм ке, шуисько, пуныез сямен интыяз ик ыбом. Война мынэ. Чесной калык улонзэ уг жаля. Вождьмы понна, Родина понна ожмасько. Со ке - пега. Оло, тынад пиед но атаезлэн пытьыетӥз мынэ. Улмо улмопулэсь кыдёке уг усьы. Учти. Врагов и дизертиров с лица земли стереть. Так говорит Великий учитель и вождь - Иосиф Виссарионович Сталин. Вуиз ке пегась картэд, ми доры с повинной мед лыктоз. Оло, соку улонзэ жалялозы. (Милиционер пыре.) Ну, мар? Милиционер. Сарай, гид, йӧгу, кенос учкемын. Пытьы ӧвӧл. Сидор. Хорошо. (Лукерлы.) Уин вуылэммы сярысь - кылдэ пинь сьӧрад возь. Гу- гу, нокин медаз тоды. Пошли. (Кошко.) Лукер бӧрдыса сылэ. Бӧрысь пыдесъяськыса вӧсяське. Диктор. Уез, нуналэз валатэк сямен жургетӥзы заводъёс но фабрикаос. Уез, нуналэз тодытэк выллем тыршизы колхозъёс. Гуртэ кылем кышноос, покчиос кусъёссэс шонеръятэк ужазы лудъёсын, фермаосын. Ваньмыз со убирез вормон понна! Ваньмыз со шудо улон понна! Со вакыт Куӟебай Герд сярысь одӥг кыл но ӧз поттылэ. Оло, тодазы вайылӥзы ик, но шып улӥзы. Кызетӥ аръёслэн кутсконазы сирота нылпи юртын со кивалтӥсь вал. Отысь но уноез егитъёс ож ӝуысь ӧз потэ ни. Пыраклы кылизы дас тямыс, кызь одӥг аресъемесь. Война кутскон аре ик "лобась кортаз" ӝуаз лётчик Леким. Пудо першал Матрон, гажанэзлэсь быремзэ тодыса, снапёръёсты дасян курсъёсын дышетскиз. Солэн одӥг малпанэз вал: Леким понна пунэмзэ берыктоно. Сэзь снайперлы Вормон нуналэз пумитаны ӧз кылды. Котыртэме шедьыса, гадяз штыкен бышкамын вал. Тылпу дыръя сӧсырмем солдатъёсыз утьыкуз, военврач Надёк ӝуаз. Опочей Балтийской зарезе вуиз ик, нош капитанозь ӧз буды. Корабльзы ыштэмын вал. Олёш сярысь но иворъёс ӧз вуылэ. Жильыртӥз, жильыртӥз Бадӟым Докья ошмес. Ӝож гурен бӧрдӥз, дыр, бертымтэ нылъёсыз, пиосыз понна. Тылъёс ӝуатско. Кылӥсько: "Ура!" "Победа!" кесяськемъёс. Ошмес дорын погылляськыса бӧрдо Лукерен Дарья. Дарья. Ой, Тятяе, ой, агае. Лукер. Ой, Инмаре, малы таӵе адӟондэ сётӥськод? Маин ми тон азьын янгыш? Инмаре-кылдысинэ. Дарья. Тятяе вуэ выем кадь ышиз. Нош агаелэн гожтэтъёсыз коть вал ук, ва-ал. Кытын тон, агае? Лукер. Олёш, малы тыныд со Козьмалэсь кинишказэ нуоно вал? Оло, соин но йырдэ мекалтӥзы. Мискинь, Прохоре! Э, шузи, пие! Пал син-а, пельтэм-а бертэ вал ук. Суйтэм-пыдтэм ке но, сюресты бертыны вольыт мед луысал. Ӧвӧл ук со, ӧвӧл. Юртъер ведь пиосмурт учкемез кулэ каре. Дарья. Ой-ёй, сюлмы, лулы-кӧты. Лукер. Я, нылы, табере асьмеос пиосмурт интые но, кышномурт интые но. Котькӧня синвумес мед кисьтомы, быремъёсты уд берыкты ни. Буйгатскы, Дарьюше. Суй-пыдмес тыпак ум юске ай. Инмар ке ӧз кушты, тазалыкмы ке луиз, каллен уломы. Инмар кунян ӧвӧл, оло, пичияк шуд юдэссэ но сётоз. Быдэ вуид ке, шуисько. Диктор. Война бырем бере Олёш япон милитаристъёслы пумит ожмаськиз на. Соку гожтэтъёс пумысен алэмын вал. Соин но, вылды, ӧз ивортылы. Чутыса бодыен потэ Очей. Тусбуяз ӵуштаськем бервылъёс. Очей. Анай. Лукер (чоркак луэ). Мар та, ишан-а? Дарья. Агае кадь ук. Очей. Анай, сузэре, пумиталэ. Ми бертӥм. Лукерен Даръя оскытэкгес учко, ӟыгырто, бӧрдо. Лукер (палэнэ учкылэ). Кытын? Кинэн бертӥд? Очей. Козьма агаен бертӥм, анай. Тани со. (Ӟепысьтыз книга поттэ.) Со но монэн ӵош пӧсьсэ но, кезьытсэ но чидаз. Лукер. Нош мон кожай атаеныд. Очей. Ӧз кылды соин пумиськыны. Лукер. Прохор... Очей. Я-я, анай, улэп ке, бертоз ай. Мон но ар пала госпитальёстӥ костаськи. Тау врачъёслы. Кышъязы-вурӟизы, пыд йылам султытӥзы. Вуи тани. Лукер. Сюлмы шӧдэ, уд пӧя. Умойтэм соин. Марья потэ. Тыпак дугдэ. Марья. Олёш, лэся, но. Очей. Марья. Марья. Зэм но. Лукер. Инмар вылэм на, инмар вылэм на, Марьюш. Бертӥз, бертӥз пие. Марья. Ӟечбур, солдат. (Кепыраса ӟыгырско.) Дарья (мыньпотыса учке). Кыӵе мусоесь? Дыдыкъёс кадь. Лукер. Нылы, синъёсыд уг мальдо-а? Дарья. Анай, мон бадӟым ини. Марья. Ой, кыӵе шудо нунал. Ойдолэ ми доры. Солдат бертэм понна пичи сябась каром. Туннэ сьӧлык уз луы. Лукер. Э, беда ук, э, беда. Ӝӧк сьӧрын утялтэм интые, кылыным сюдӥсько. (Кык милиционеръёс пото.) Нош ик сьӧд кырныжъёс. Сидор. Здоровеньки булы! О-о, старшина. Бертӥд, иське. Очей. Так точно, Сидор Филаретович. Сидор. Нимтулме уд сураськы ни. Ушъямон. (Эскериськемез бере синъёсыз котомка вылысь книга шоры мертчо.) Нош со мар? Лукер. (валатске). У-у, та Дарьюшез, мисьтаськон доры но лыдъян-чотан кинишкаен ветлэ. Ужам-а со. (Книгаез гадь айшетаз ватэ.) Арипметик кожа, лэся, ассэ. Дарья. Мар тон, анай... Лукер. Шып ул. Шедем татчы визьмо мурт. Гылъям дӥсез кут но доре мын. Ӝӧк выл дася. (Дарья кошке.) Ойдолэ дорамы. Пие тани бертӥз! Сидор. Тау. Кунояськыны дырмы ӧвӧл. Служба. Лукер. Озьы уго, озьы. Бадӟым адямилэн дырыз уг тырмы. (Дӥськутэн выре.) Туж ик кулэды вал. Марья. Вай, нуыны юртто. Огнадлы секыт. Лукер. Кема эн ӝегалэ. Ӝӧк выл дуком дась луоз. (Кышноос кошко.) Сидор. Так-с, старшина. Медальёсыд тырмыт, орденэд но вань. Очей. Мон наградаос понна ӧй ожмаськы, шудо улон понна. Сидор. Шонер. Соку ойдо пырак но меӵак вераськом. Очей. Мон дась. Но... нырысь тӥ вералэ, кытын мынам атае? Тӥ сое куамын сизьыметӥ аре нуиды. Татчыозь иворез ӧвӧл. Тылэ куштэм кадь луиз. Сидор. Молчать. Кто старше по званию? Очей. Тӥ, тӥ. Сидор. Так вот. Пленын вал? Очей. Ӧй. Инмар утиз, дыр. Сидор. Окружениын вал? Очей. Котыртэмын? Шедьылӥмы. Сидор. Вот-вот. Собере? Очей. Ньыльдон кыкетӥ арын толсуре вал со. Дас сизьым кузя вить уй но вить нунал Брянской музъемтӥ сьӧсьёслэсь пегам. Сютэмесь вал. Кызьпу но бадяр сулъёсын кӧтмес алдамы. Берло партизанъёс сюризы. Сидор. Кин отрядэн кивалтӥз? Очей. Пехотаысь лейтенант Зыков. Сидор. Но сыӵе учыр вал? Очей. Мар вал - со вал. Сидор. Мынӥм. Очей. Бен, бен, ӝӧк выл дась, дыр, ини. Сидор. Ӧвӧл. Тон ми сьӧры мынод. Отделэ. Очей. Мар понна? Сидор. Отын тодозы. Кызьы тон, фашистъёслы дурбасьтыса, агитация нуид. Кызьы пехота быриз. Очей. Пехота? Соос монэ асьсэос быронлэсь утизы. Сидор. Тонэ утизы - соос быризы. Очей. Пуля ӧз басьты бере, ӧй кулы бере, янгыш шат мон со понна? Сидор. Оло нош... гердовщина. Очей. Тӥляд сюлмады из. Шӧг но, кузьыт но одӥг. Сидор. Ничего, ничего, сьӧрамы мынод. Отын кема уз ӝегатэ. Кошко. Милиционеръёс вискын Очей вамышъя. Диктор. Ӝӧк вылэ дасям сиён солдат верьятэк ик сӥяз. Бызьыны дасяськем Марья сюан дӥсез шоры учкылӥз гинэ. Сӧсыртэм тылобурдо сямен ялан улӥз атыкай юртаз. Шелеп быдӟа ке но шудэзлы оскиз. Толэзьлы огпол басьтылӥз Олёшлэсь гожтэтсэ. Шумпотэм вылаз нуналлэсь ортчемзэ но ӧз шӧдылы. Прожектор ӝуатске. Нюлэс. Ӝомыт. Лӥял вылын кык воргоронъёс пуко. Огез бычкы (пила) шере, мукетыз - тӥрзэ. Очей. Шуг-секыт луыку, адями улэп кылён сярысь малпа. Кызьы потыны со адысь? Кыӵе амал вань? Фашистъёсыз пӧяны ӧдъяськом вал, ӧз пӧрмы. Ӧжыт гинэ соослэн ки улазы ӧм ӝиме. Митрич. Тон маин янгыш? Очей. Выж ултӥ потыса, шур кузя кошкыны ӵектӥ вал. Нуназе куштӥськем вукоын шутэтскыны но уин азьлань мыныны. Малпай, фронтлэн линиез отын. Янгышаськем. Немецъёс ки улэ мынӥськомы вылэм. Митрич. Собере? Очей. Мар собере? Валамон. Война бырыса тодазы ваизы. Мон, пе, дас сизьым муртэ пленэ сётскон понна юри нуисько вылэм. Мон вылэ ик лякизы пехотаысь лейтенантэз но. Отрядэн валтон понна юри, пе, ыбид. Ӟудэм ӵӧж берлань уя, шуо. Адямиен но озьы ик. Улэмед ке потӥз, котькыӵе амал утчалод. Нош со амалъёс пӧртэмесь луо. Митрич. Бен, Алёша. Страналы дунтэк ужасьёс кулэ. Куашкам городъёсты, гуртъёсты ӝутоно. Нюлэстэк мар карод? Соин ик ыбыны пуктэмъёс но дас арлы воштэмын, лагерь режимен. Ужась киос уг тырмо. Очей. Фу-у, укыр кезьыт та Красноярск палъёс. Татын улон понна дышем кулэ. Митрич, а, Митрич? Ачид нош кытысь? Митрич. Одессаысь. Очей. Танкеным ортчи, нош Одессазэ ӧй адӟы. Чебер город, шуо. Митрич. Чебер вал. Мон отын вордӥськи но дышетски. Быдэ вуэм берам партилэсь куронъёссэ быдэсъяй. Пӧртэм интыосын улӥ но ужай. Очей. Тунсыко. Кивалтӥсьын вал-а? Митрич. Вал но, ӧй но. Очей. Кызьы озьы? Пыд ниръясьын вал-а, мар-а? Митрич. Озьы но, ӧвӧл но. Войналэсь азьло мон шпионъёсты но калык тушмонъёсты кутылӥ. Берло тынэсьтыд сямен ик мынэсьтым но сьӧлыкме шедьтӥзы. А мар понна? Очей. Тазэ куасаськод. Александр Дмитриевич Антоновский калык тушмонъёсты кутылӥз? Ӧй оскысал. Пӧяськод, дыр. Митрич. Оскод-а, уд-а - ачид тодод. Нош приказэз быдэстон понна уйёсме ӧй кӧла. Партилэсь вань куронъёссэ быдэсъяны тырши. Сёто вал приказ: утчано, шедьтоно калык тушмонэз. Нунал пумын отчёт лэсьтӥськом. Огпол гынтулъёсы дышетӥсь интые сантехникез ваизы. Соиз пегӟыны вуэм. Нош отчёт лэсьтэмын. Мар кароно? Сантехникез дышетӥсь интые келямы. Со понна калган быдэс кылиз. (Йыраз кока.) Та улонын гондыр кадь но луиськиз, ӟичы выллем но кариськытэк ӧйлась. Очей. Сыл ай, сыл! Милям удмурт шаерамы туж визьмо адями вал. Атайме уг вераськы ни. Вот со чебересь кылбуръёс гожъяз. Мынам книгаез но... кузьма вал, но ӧй басьты. Табере со муртэ калык тушмон каризы. Оло, сое токма шорысь ватӥзы? Фамилиез но ачиз кадь ик чебер вал. Чайников Кузьма Павлович. Митрич. Кызьы, кызьы? Очей. Чайников. Псевдонимез - Куӟебай Герд. Митрич. Куӟебай Герд? (Синъёсыз золтӥсько.) Очей. Тодӥськоды-а вал? Митрич. Инмар мед утёз. Очей. Кинэ? Митрич. Мон... мон ас поннам... аслым ачим. Очей. Мар-о тӥледын? Митрич. Но-номыр но. Очей. А мар шулӟектӥды? Митрич. Ой, кӧты чутыръя. Кытын ай сартир? Куара. Встать. Шапки долой. Умер Сталин. Султо, изьызэс кушто. Прожектор кысэ. Диктор. Чиед но лапег мугоро адямилы Олёш ӧз оскы. Малпаз: со алдаське. Нош Герд сярысь веракуз, солэсь кӧдэктэмзэ адӟыса, пушказ маиз ке вырӟиз кадь. Берло но Антоновский Гердэз уг тодӥськы шуылӥз. Соин вераськонъёс чалмизы. Нош зэмзэ ке, "Софин" ужез А. Д. Антоновский следователь нуиз. Берло ачиз но кыл кутӥз. 1939-тӥ арын военной трибунал сое "заговоре пыриськемез но сьӧсьяськемез понна" ыбыны пуктӥз вал. СССР-ысь прокуратураын вань материалъёсты пыр-поч эскеремзы бере дас арлы тюрьмае келязы. 1958-тӥ арын, Куӟебай Гердэз реабилитировать карыку, А. Д. Антоновский нюлэс коранын ужа на вал. Тылъёс ӝуатско. Потэ Лукер бодыен, синъёсыз лябӟемын, губырскемын. Ошмеслы тау каре, вузэ юэ, ымнырзэ пылатэ. Ошмес жильыртэмез кылзыса, кырӟан гурлы сямен йырыныз мыкыръя. Лукер. Тау! Тау музъеме утемед-вордэмед понна. Тау, ошмесэ, дун вуэд понна. Нош кема улэмысьтым эн тышкаськы, шундые. Дуннеез саптаса ӧй улы. Та улонэз калык радъя улыны тырши. Пичияк шуд кесэгъёсы но вал. Нош куректонэз уногес. Мар карод? Инмарлэн гожтэмез, дыр, озьы вал. Пиналысенгес ыштӥ лул-гажанме. Эх, Прокоре, Прокоре! Кытын меда тон? Кыӵе музъем меда тынэсьтыд мугордэ шобыртӥз? Кытын кыллемдэ тодытэк ик та дуннеысь кошко, акыр. Нуныкайме но адӟыны уз кылды ни. Инкуазе! Аслым номыр уг куриськы ни. Мар кури - ваньзэ сётӥд: кузпал но, пи но, ныл но. Тау! Выльысь Инмаре! Сёт Олёшлы бертон сюрестэ. Дарьюшелы но шуддэ югдыты. Нош мыным, улонэз адӟем муртлы, вай мамык кадь небыт музъемдэ. Дарья потэ. Дарья. Анай, мон тонэ ыштӥ. Мар ке сипыртӥськод кадь? Лукер. Инкуазьлы тау карисько. Дарья. Мар тон, анай? Лукер. Эн люкеты. Инмаре, вай басыл кулондэ. Дарья. Анай. Лукер. Нылы, агаед бертӥз ке, вера: анай туж но туж возьмаз, шу. Дарья. Вазь на со сярысь малпаны. Лукер. Шып кариськы. Веракум кылзы. Улытозям туж кузь сюресэз ортчи. Табере пумыз адӟиське. Олёшлы ватосэз сётод. Дарья. Ватос? Зарни-а, мар-а? лукер. Со понна зарни, дыр. Оброс улын, ӝажыын, пужъятэм ӵушкон вискын вань кинишка. Козьма агаедлэн со. Синпельлы шуыса пус пуктэмез но вань. Нокинлы эн возьматъя. Олёшлы кияз сёт. Я, ваньмыз кадь. (Кирос каре, йыбырттэ.) Шуныттэ сёт, шундые. Дун вуэныд жильырты, ошмесэ. Дарья анайзэ кунултэ, кошко. Диктор. Анаез кулэм бере ар но ӝыны ортчыса бертӥз Олёш. Нош вордӥськем юрт мумы-бубытэк кыле ке, со йӧӟектэм коркалы укшаны кутске Очей потэ. Ошмес доры интыяське. Мышкытӥз лыктэ Марья. Синъёсынызы пумисько, кылъёс пумысен - ӟудэмын. Марья. Ошмесэд возьмаз тонэ, Олёш. Очей. О-о, бертӥд-а? шуыса вазе. Марья. Анаед тани... Очей. Тодӥсько. Дарья гожтӥз. Марья. Со... пинал возьма. Очей. Умой. Марья. Мон но... ошмес сямен возьмасько... Очей. Марья. Марья. Олёш. Ог-огзэс кепыраса ӟыгырто. Етӥз нылаш потэ. Сылӥсьёсты адӟыса, юбо сямен тып дугдэ. "Ой" кеськыса ымнырзэ ватэ. Марья (Олёшлы). Сузэредлэн бадӟым нылыз. (Нылашлы.) Матэ кариськы, дыды. Куаламы бадӟым, уд люкеты. Нылаш матэктэ. Очей ымдуръёссэ куртче, синъёссэ ватэ. Нылаш. Марья Ананьевна, кин та? Сьӧрлось гуртысь-а? Марья. Ӧвӧл. Татысь. Нылаш. Асьме гуртын шадра адямиос ӧвӧл. Очей. Мон та. (Синвуаське.) Анаедлэн агаез - Олёш. Нылаш. Мар со жоб адями алдаське? Марья. Со зэмзэ вера, дыды. Та адями тыныд Олёш нюньы луэ. Нылаш. А-а, кудӥз ке тюрьмаын вал? Марья. Со янгыш ӧвӧл, ӧй но вал. Нылаш. Патретэзъя егит на шуыса малпай. Очей. Дыды, ӟечбур! (Пыдесъяське, ӟыгыртэ, чупа, синъёссэ ӵушылэ.) Нылаш. Олёш нюньы, Марья Ананьевна, мынам выны вордӥськем. Атае али больницаысь вуиз. Таза, пе, сыӵе. Марья. Зэм шу. Мар быдӟа шумпотон? (Лушкемен синвуаське, йырзэ Очейлэн тыбырыз вылэ лэзе.) Очей. Кызьы нималоды? Нылаш. Тодмо ини: Олег, Сергей, Иван, Артур. Очей. Малы сыӵе нимъёс? Нылаш. Соос - Краснодонысь геройёс. Очей. Асьмелэн но адӟем карымон адямиосмы вань. Нылаш. Кинъёс? Очей. Кылсярысь, Куӟебай Герд. Асьме гуртысь адями. Нылаш. Сыӵе нимез кылэме ӧвӧл. Очей. Со адями удмуртъёс понна трос умойзэ лэсьтыны медэ вал. Ӧз, ӧз вуы. Сое буре ваён понна вындэ Кузьма шуыса нималом. Нылаш. Кузьма? Со туж вашкала ним ук. Очей. Кузьма - шумпотон кузьма. Туэ дырлы но матын. Нылаш. Ӧйтӧд. Анай мар шуоз. Атаен но кенешоно. Марья. Кенешомы, дыды. Кузьма Павлович Чайников удмурт интеллигенция пӧлысь самой адӟиськымон мурт вал. Нылаш. Марья Ананьевна, тӥ ке озьы шуиськоды, мон пумит ӧвӧл. Тылъёс кысо. Диктор. Пумиськизы гӧгӧрсинъёс, пумиськизы кык мӧзмем сюлэмъёс. Со пумиськон ик луиз ортчытымтэ сюан но, вордӥськем пилы шумпотон но. Марьы дышетӥсьын ужаз, Олёш трактораз пуксиз. Ю-нянь будэтонлэсь номыр дуноез ӧвӧл. Кӧт сюман дыръёссэ тодаз вайыса, вож пильысэн ӝужам юэз со ӟыгыръяны дась вал. Нырысь пиезлы ик Кузьма ним сётӥз. Табере гуртын вить-а, куать-а Кузьмаос луизы. Атай нимтулъёссы гинэ пӧртэмесь. Олёшлэн дэмламезъя, Куӟебай Гертэз сӥлы каризы, луоз. Егит эшъёсмы пересьмизы. Уноез улонысь кошкизы ини. Нош Олёш ошмес дурын пуке, ортчем дыръёссэ син азяз пуктэ. Гердлэсь кузьмам книгазэ, ышемлэсь кышкаса, дыр, мӧля кисыяз нуллэ. Ошмес дорын тыл югектэ. Очей нырысетӥ люкетын кадь книгаен пуке. Очей (лыдӟе). Вошкы, чебер дыдые, Лыкты, мусо Сандӥе, Лыкты чаляк таганэ, Ӟыгырты туж юн монэ... Пыдлон югектэ. Отын Надёк. Надёк. Таӵе чебер вакытэн, Горд-горд пиштӥсь нуналэн Малы коркад пукиськод, Укноетӥ учкиськод? Пинал дыръяд визьмо улӥд, Олёш, пересьмыса уд куректы. Надёк ыше, со интые Опочей султэ. Опочей. Адӟиськод-а? Йыр вылын - Чебер, лыз-чагыр инмын - Шунды пиштэ, серекъя, Мынам сюлэм дырекъя. Трос улод тон, Олёш, трос адӟод. Опочеез воштэ Леким. Леким. Сьӧд дуннеын асьмеос, Шудтэм, куанер калыкъёс, Кема улӥм, курадӟим, Уно бӧрдонэз адӟим... Эх, Олёше! Улон зарнилэсь но дуно. Лекимез Матрон воштэ. Матрон. Эн возьдаськы нокинлэсь, Эн кепыр пот калыклэсь, Вӧзам пуксьы, гажанэ, Ӟыгырты туж юн монэ. Аслад визьмыныд ул, Олёш, уженыд данъя астэ. Матрон бӧрсьы - Микаль. Микаль. Табере шунды ӝужаз, Сьӧд дунеез со улляз: Куанеръёсыз улӟытӥз - Выль кужым, выль бурд сётӥз... Улон, юлтоше, со - нюръяськон. Микалез Кузьма воштэ. Кузьма. Тужгес, эшъёс, ӟечыртэ, Шунды вылэ ыбыштэ?.. Ми но шунды кадь луом, Выль кужымен ӝуалом!.. Улон, егит эше, дано ужъёслы сётэмын. Прожектор кысэ. Тылъёс ӝуатско. Очей. Эшъёсы, дуноосы! Мон тӥ понна но улӥсько. Быдэстымтэ малпанъёстэс быдэстыны турттӥсько. Сайкыт уждэс егит калыклы пыӵатыны тыршисько. Медаз вунэтэ... (Гадь бордаз кутӥське.) Ой, мар ай та? Сюлмы, эн дугды жугиськемысь. Сюлмы, тон вань секытсэ чидад, чида на эшшо. Марья но нылаш пото. Марья. Олёш, тон мар кема? Очей. Кема? Ӧвӧл. Час но ӝыны гинэ ошмес дурам пуки. Марья. Ойдо ай, тыныд шутэтсконо. Очей. Шонер, ӧжытак кыллёно. Очеен Марья пыдло вамышто. Сыло. Пумен Очей пыдесъяське. Со дыре нылаш ошмес йыр азьысь книгаез ӝутэ. Лыдӟе. Нылаш. "Сяськаяськись музъем" Ижкар-1927 ар. (Книга бамез берыктэ.) Гажан эше... Вольыт сюрес тыныд. Юн дышетскы. Куӟебай Герд". Бен та мыным сӥземын ук. Ошмес жильыртэм кужмоя. Очей кымин погра. Покчиос витё книга Гуртын улӥсьёс та вакытэ котьма ласянь шуге-леке шедемын. Коньдонзы ӧвӧлэн, уг быгато газетлы-журналлы гожтӥськыны. Дыраз дун тырыны быгатымтэенызы, кысо телефонъёссэс, радиоссэс. Таӵе югдур тужгес но юн шӧдӥське нылпиос вылын. Городын пиналъёс быгато музейёсы, нылпи клубъёсы ветлыны, гимназиосын дышетскыны. Нош гуртын кытчы мыноз? Дуннеен тодматскыны, тунсыко иворъёсты тодыны соос быгато книгаос пыр гинэ. Но библиотекаосын нылпи книгаос ярантэм урод луэмын ини. Нош выльёссэ басьтыны коньдон ӧвӧл. Гуртысь библиотекаослы туж кулэ энциклопедиос, покчиослы книгаос, пӧртэм удысъёсъя тодон-валан сётӥсь изданиос. Глазов ёросысь библиотекаосын ужасьёс юн оско, соослы юрттыны мылкыд карисьёс луозы, нылпиослы книгаос одно ик вуозы шуыса. Книгаосты ыстыны луоз таӵе адресъя: 427600, Глазов город, Первомай ульча, 53 номеро юрт яке жингытыны луоз таӵе телефонъя: 7-13-97. 02 ивортэ Пыласькизы Та пӧсь нуналъёсы амалтэк ву доры кыске. Кык воргоронъёс, агаен вынъёс, но кылемаз кӧс нуналэ шутэтскыны малпазы. Позимь шур дурын, арня ӵоже жадем мугорзэс веськатыса, "ӟырдам" йырзэс коттыны вуэ пыризы. Кӧня ке уямез бере 52 аресъем воргорон из сямен ву пыдсы кошкиз. Выныз юрттыны ӧз быгаты. Ма луиз мискинен, таизэ тодӥсь ӧвӧл ни. Губиязы Пичиосты ӵем дыръя кышкатъяло тэльёсын улӥсь кионъёсын. Но та вакытэ кык пыдо сьӧсьёс кышкытэсьгес. Оген нюлэскы пырыны но шимес. Соин ик, лэся, 20-25 аресъем кык нылъёс губияны ӵошен потӥзы. Но доразы ӧз берытске ни. Соослэн мугорзы шедьтэмын Ижысь Якшур-Бодьяе мынӥсь сюрес вӧзысь нюлэскын. Нылъёсты кин ке вииз шуыса, меӵак вераны уг луы. Та пумысен нокыӵе пытьыос ӧвӧл. Озьы ке но, милициын ужасьёс та ужез йылаз- пумаз вуттозы ик, дыр. М. Кузьмин. БЫДӞЫМ ВОРМОНЛЫ � 55 Сталинград, тон котьку сюлэмын Шонерзэ вераса котькуд адями шудо улон понна вордске. Но куд-огез уг тоды сое кызьы лэсьтыны. Мон сямен астэ шудоен лыдъян понна тонэ анай-атаед, ӵыжы-выжыосыд но эшъёсыд мед яратозы. Собере пичи дырысен ӝужам малпандэ быдэстыны кулэ на. Мон егит дырысеным яратӥсько вал странаысьтымы пӧртэм интыосын тодмасткыны. Соин ик Ижевскысь андан ӵыжатон заводын ужакум пыри Удмурт институтлэн история факультетаз дышетскыны. Огдыре ужай но дышетски. Заводын соку пӧртэм пансионатъёсы но шутэтскон интыосы дунтэм путёвкаос сётъяло вал. Озьы луонлык кылдӥз Совето Союзлэн пӧртэм сэрегъёсаз ветлыны. Нош огпол аслам ужея командировкае келязы Волгоградэ. Котькуд городлэн но грутлэн вань аслаз историез. Солэн ортчем сюресэныз тодмасткыса, уката но мургес валано, кыӵе шуг-секытъёс пыр ортчиз асьме калыкмы шудо луон понна. Волгоград город-герой сярысь одӥг кылбурчи тазьы гожтӥз: "Луоез гудӥд ке, со ӵуж уз луы, геройёслэн кисьтэм виренызы сьӧдо-гордо луоз". Туж шонер верамын. Совето власть аръёсы сое тушмонъёслэсь кык пол утёно луиз. Немец фашистъёсын йырин отын ӧжыт кылизы вашкала архитектурая памятникъёс. Нош вань на уно историен герӟаськем интыос, городэз утёнъя ожъёсын кылдэм мемориал пулъёс но шайгуос. Город кылдӥз 1589-тӥ арын. Азьвыл со данъяськиз садэн но чорыген гинэ. Россиын капитализм азинскемен валче татчы чугун сюрес кыскизы, тросгес пароходъёс ветлыны ӧдъязы. Озьы город кызь даурлэн кутсконаз бадӟым портлы пӧрмиз. Чугун сюрес сое герӟаз Донэн, Кавказэн, Россилэн центреныз но уй палэныз. Уралысь корт, нюлэс, музъем эгыр � котьма но та город пыр ортчылӥз. Город будӥз, воштӥськиз. Тужгес но выльдӥськиз со Быдӟым Отечественной ож бере. Али отын миллионлэсь уно адями улэ. Война кутскыку, Сталинградын (али Волгоград) лэсьтӥзы танкъёс, снарядъёс, миномётъёс, автоматъёс но мукет пыӵал тӥрлык. Сталинградлэн ожмаськон тылӝуэз быдэс странаез зуркатӥз-ӝутӥз. Асьме Удмурт шаерын но ужаса улӥсьёс секыт ожлы юрттон понна коньдонзэс но дӥськутсэс сётӥзы. Кылсярысь, Киевысь "Арсенал" заводысь рабочийёс но служащийёс Воткинске лыктэмзы бере, заводысь кивалтӥсьёслэн пушкаосты но миномётъёсты поттонэз будэтыны ӧтёнзылы вазиськыса, Сталинградлы сӥзем ужан вахтае султӥзы. Рабочийёс улыны выжизы цехе. Контораосын ужасьёс станокъёс вӧзы султӥзы, комсомолецъёс ужам беразы куштӥськем корт бичазы. Ижевскысь андан ӵыжатон заводын металлургъёсты ӧтизы уката вылӥ ужазинлыкен тыршыны, азьмынӥсь амалъёсты производствое кутыны. Озьы усточиослэн радзы эшшо но йылӥз. Со ӟырдыт нуналъёсы дуриськон цехысь коллектив фронтлы юрттонъя декада ялӥз. Уно сю рабочийёс, Сталинградлы сӥзем вахтае султыса, ужазинлыкез ӝутӥзы но уката ӟеч продукция поттӥзы. Декадалэсь кызьы мынэмзэ газетъёсын ивортылӥзы. Война йылпумъяськем бере, ньыльдонэтӥ аръёслэн пумаз Сталинградлэн лымшор палаз кутскизы Волга�Дон канал лэсьтыны. Ӝоген городын выль ульчаос кылдо. Одӥгезлы ульчалы Удмуртской ним сётӥзы. Кызьы тодмо луиз, Сталинград ожын 90 процентэз улон юртъёс куашкатэмын вал. Ваньзэ выльысь лэсьтоно луиз. 1948-тӥ арын феврале, комсомоллэн ӧтемезъя, странаямы кутскиз Сталинградэз ӝутон понна нюръяськон. Та кичӧлтонлы Удмуртиын нырысь ик вазиськизы Кизнер лесопунктын ужасьёс. Соос, феврале, кык нуналзэ дунтэк ужаса, Сталингардэ 600 кубометр нюлэс келязы. Озьы ик муке коллективъёс но юрттӥзы. Сталинградэ ыстӥзы уно оборудование, инструментъёс но материалъёс. Волга вӧзысь городэз лэсьтонын сюлмысь тыршизы Удмуртиысь лыктэмъёс но. Тужгес но висъяськиз Грах районысь нылашлэн Мария Суслопаровалэн бригадаез. Егит строительёс нуналлы быдэ нормазэс одӥг но ӝыны поллы мултэсэн быдэсъязы. Родина вылӥ дунъяз Сталинград понна ожмаськисьёсты но сое лэсьтӥсьёсты. Удмуртиысь но тросэзлы орденъёс но медальёс сётэмын. Нош 1965-тӥ арын Сталинградэз Ленин орденэн но Зарни Кизили медален пусъё. 1968-тӥ арын кылдытэмын "Волгоград город-геройлэн дано гражданинэз" ним. Нырысь ик таӵе дунъет сётэмын Царицынэз но Сталинградэз утисьлы, Совето Союзлэн куинь пол героезлы С.М.Будённый маршаллы. Быдӟым Отечественной ож вакытэ ортчем дырмы туж яркыт возьматэмын нимысьтыз музейын. Отысь мон адӟи война дыръя асьме республикамылэн редприятиосаз поттэм пыӵал тӥрлыкез но. Удмуртиысь кибашлыос понна соку сюлэмы шумпотонэн пачылмиз. Волгоградэн али но асьмеос умой кусып возиськом. Отчы келяськом: корт, нюлэс, автомобильёс. Татчы ваиськом: тракторъёс, алюминий но мукет вузъёс. Историяя асьмеос тодӥськом та городысь универмаглэн гулбечысьтыз 31-тӥ январе 1943-тӥ арын Паулюс фельдмаршалэз штабеныз ӵош пленэ басьтэмзы сярысь. Со сярысь вера Универмаглэн ӧс дораз шуккем пул. Бырем ожгарчиослэн площадязы Ялан ӝуась тыл дорысь одӥгаз шайгуын ватэмын Сталинградэз утисьёс Совето Союзлэн Геройёсыз ӟуч генерал-майор Владимир Каменщиков, Испаниысь коммунистъёсын азьвыл кивалтӥсезлэн Долорес Ибаррурилэн пиез, пулемёт роталэн командирез гвардиысь капитан Рубен Ибаррури, бигер артиллерист капитан Хофиз Фаттяхутдинов. Кин бен учкытэк кошкоз панорама-музей доры интыяськем "Павловлэсь юртсэ" но снарядъёсын, бомбаосын сузмытэм вуж вукоез. Котькинлэсь сюлэмзэ вырӟытэ городлэн 102 метръем вылӥяз Мамаев вырйылэн тодматскон. Татын война дыръя тужгес но ӟырдыт ожъёс ортчизы. 104 уй-нунал ӵоже та вырйыл понна нюръяськон мынӥз. Отын ик ожаськизы аспалъёсмы "Ижевская сталь" книгаез гожтӥсь А.М.Фомичев, "Ижсталь" огазеяськонысь азьвыл ужась П.С.Мамаев, Совето Союзлэн Героез П.И.Колпаков но мукетъёсыж967-тӥ арын 15-тӥ октябре. Мамаев вырйылын, Сталинград ожысь геройёсты данъяса, памятник-ансамбль усьтэмын вал. Дуннеысь пӧртэм сэрегъёсысьтыз бырем батыр ожгарчиослы йыбырттыны трос адямиос ветло. Ваньзэ та суредъёсты адӟеме бере, Волгоградысь куд-ог мӧйы улӥсьёслэсь мон юай: "Малы бен выль микрорайонысь одӥгезлы ульчалы "Удмуртской" ним сётӥзы?" Соос вакчияк шуизы: "Ми ноку ум вунэтэ, кызьы странаысьтымы мукет республикаос но областьёс сямен ик Удмуртия но бадӟым юрттэт сётӥз Сталинградэз утёнын, сое ӝутонын". В.ЧЕРНОВ. Вормонлы-55 ар Дӥсен вордскем ожгарчи Ӟуч писатель Константин Симонов гожтӥз, солдат, пе, со самой секыт дыре, самой секыт интыын, самой секыт ужез быдэсъясь адями луэ шуыса. Та верам быдэсак тупа мынам тодмоелы ожын сӧсырмем Николай Хохряковлы. Армие басьтӥзы сое атыкай музъеммылы тужгес секыт вакытэ, 1941-тӥ арын сӥзьыл. Кунгурысь 170-тӥ стрелковой дивизиез, кытын со но вал, келязы фронтысь тужгес секыт интыяз, Волхов шур дурысь (Новгородлэсь кыдёкын ӧвӧл) сыръясь интыосы. - 1942-тӥ арын тулыс татын ветлыны луонтэм вуос пукизы, - маде Николай Павлович. - Ми вакчи кунчиё пыдкукъёсын, пыдесозь вуэ коласькыса ветлӥм. Куасьтӥськыны нокытын, улон интыосмы вуэн тырмизы. Сюресъёс ӧвӧлысь, сиён но вайыны ӧз луы ни: суткаяз ньыль сю грамм сукыриен кӧтмес пӧяллям. Тросэз солдатъёс висьыны кутскизы. Мон котыре но огдыре алязы цинга но пыэд. Но висёнлы ӝожтӥськыны дыр ӧй вал: тушмон уз жаля. Николай Хохряков миномётной расчётэн кивалтӥз. Оскем ужез сокем бадӟым ӧвӧл ке но - капчи уд шуы: огдыре ик тон солдат но, кивалтӥсь но луиськод, шорад учко-радъясько мукетъёсыз. - Тулыс пумын вылӥ кивалтӥсьёс жалязы, луоз, милемыз, - азьланьтэ веранзэ азьвыл солдат. - Дивизимес Демьянск доры келязы, городын соку тушмон кузёяськиз. Толалтэ секыт ожъёс дыръя, Демьянск котырысь гуртъёс быдэсак куашкатэмын. Тушмон соосты 1941-тӥ арын сӥзьыл ик киултӥз. Та дыр куспын сьӧсьёс ӟеч-ӟеч интыяськизы татчы. Угось Москваез чигтыны быгатымтэзы бере, со вылэ выльысь урдскыны татысен вакчи сюрес ортчиз ? Демьянскысен Москваозь 200 иськемлэсь кылемын вал. Соин сэрен немецъёс ас интызэс гижысь-пиньысь утизы. Ожъёс лек пурӟылӥзы. Одӥгаз таӵе жугиськонын мон секыт сӧсырмыны шеди - снарядлэн чалепез йырам сюриз. Соин валлин ньыль толэзь ӵоже куинь эмъяськон интыме воштоно луи. Госпитальысь потэм бере ыстӥзы монэ 17-тӥ стрелковой дивизиысь пехотаен кивалтыны. Оскем ужелы дышыса гинэ вуттӥ кадь, пыды сӧсырмиз. Толэзь ӵоже нош ик госпитальын кыллӥ. Январе 1943-тӥ арын келязы монэ со 171-тӥ дивизие ик, но мукет полке. Толалтэ дивизимылы тушмонэз Старой Русса пала улляны косэмын вал. Сьӧсьёс интызэс кужмо утизы. Со сяна, толшоре иськем пала музъеммес кайпалтӥзы на. Оло куректыса, оло кынмыса мынам пиньы висьыны кутскиз. Самой соку, вӧсьлы чидатэк, мон огдырлы эмъясь доры кошки. Кулэ ук тупаны, ӵапак та вискын тушмон полкмес котыртэм. Трос эшъёсы быризы со ожмаськонын. Бӧрысь трос пол мыным вераллязы на: "Тон сержант дэремен вордскемын". Та бӧрсьыгес ик секыт ожмаськон пурӟиз Ловать дурын. Тушмонэз мукет ярдуре уллям ке но, асьмеос берлань шур вамен берытсконо луим. Тол дӥсен, гын сапегъёсын сое ортчим. Мон ӧжыт гинэ выйытэк кыли. Собере ик секыт висьыны кутски - тыосы кынмизы. Та ожмаськон понна, мынам гадям "За отвагу" медаль бырттӥзы. Но фронтэ мыныны уг яра ни шуизы. Николай Хохряковез ысто Октябрьской чугун сюрес вылысь Медведево станцие. Татын со вакытэ запасысь полк иинтыяськемын вал. Ӵапак отын со егитъёсты ожмаськыны, солдат улонлы дышетӥз. Но азьланьын ма луонзэ шуг адӟыны, шуо. 1943-тӥ арын июне та полкез стрелковой карыса, фронтэ келяло. Северо-Западной фронтлэн 22-тӥ армиез борды итыса, сое Рига город доры интыяло. Озьы Николай Хохряков выльысь оже шеде. 1944-тӥ арын Ригаысь немецъёс ки улысь мозмытонэ пыриське, бӧрысьгес - Курлянск дорысь тушмон огазеяськонъёсты пазьгонэ. Та вакытэ асьме солдатъёслэн мылкыдзы бурдъяськемын ни вал - вормонлэсь матэктэмзэ шӧдӥзы. Тани ма сярысь вераме потэ на, - ватса Николай Палвович, - Фронтын ожмаськизы пӧртэм калыкъёс. Милям отделениямы гинэ но, дас мурт пӧлын вал ӟучез но, удмуртэз но, украинецъёс, бигеръёс, башкиръёс, белорусъёс, вал таджик пи но. Ваньмы огинэ, эшъяськыса улӥм. Анаймы но одӥг вал уго - Вордскем музъем. Сое ми яратӥм, утим, улонмес жалятэк. 1945-тӥ арын апреле Николай Хохряков вуэ Германие, нош 9-тӥ маез со пумита Румыниын. Но дор палъёсаз солдат 1945-тӥ арын октябре гинэ берытске, кыкетӥ группаен сӧсыр луыса. Тушмон кибервылъёслэсь кема бурмыны со ӧз быгаты на. Бен, улон позыръяз Николай Хохряковез. Но со ӧз сётӥськы курадӟонлы. Война бере кема аръёс ӵоже ужаз бухгалтер луыса лэсьтӥськон трестын, собере "Нефтемаш" заводын. Улонзэ юнме ӧз ортчыты. Н. Веприков. "Стелла" юрттоз коньдонэз чакланы Ижысь радиозаводын кылдытэмын спутникен герӟаськонъя "Стелла" нимо станция. Та уж борды завод басьтӥськиз, Россиысь Центробанклэн куремезъя. Нош асьме дорын солэн валтӥсь заказ сётӥсез Удмуртиысь национальной банк луиз. Кызьы шуиз заводлэн валтӥсь директорез И.Галиахметов, станцилэсь ужамзэ эскерон туж умой ортчиз, соин ик табере завод Россиысь банкъёслы гинэ уз, мукет удысъёслы но юрттыны дась. Россиысь Центробанклэн кивалтӥсезлэн воштӥсез М.Сенаторов вераз, Центробанк радиозаводлы сыӵе станциос лэсьтонъя туж трос заказъёс сётӥз ни шуыса. Удмуртия � Россиын кыкетӥ улос, кытын уже кутӥське спутникен герӟаськонъя станция. Матысь дыре Россиысь вань банкъёслэсь, выт бичанъя ёзъёслэсь, коньдон ужпумъя министерствоослэсь, Пенсиосъя фондлэсь ужамзэс сыӵе станция пыр чакласа возьыны луоз. "Стелла" станциез али ик уже кутыны быгатозы Россиысь тросэз улосъёс. Барыш поттэмлэн 23-25 процентэз радиозаводлэн фондаз кылёз. "Стеллалэн" валтӥсь конструкторез В.Читвиркин. Туэ та уже кыскемын Удмурт кун университетэз но Ижысь техниая кун университетэз йылпумъям 130 пала визьмо специалистъёс. Т.МИРОНОВА. Сьӧраз уд ортчы Нырысетӥ августысен чугун сюрес кузя грузъёсты нуон-ваён шаерамы 18 процентлы будэ. Та лыдпусэз чугун сюрес вылын ужасьёс 26-ёзь вутыны куро вал. Нош Экономикая министерстволэн лыдъямезъя, дунъёсты 56 процентозь но будэтыны луоно вылэм. Чурыт кылзэ вераз монополиосты (кузё луыса оген ужась предприятиосты) эскерись комитет, 18 процентлэсь вылӥе ӝутыны ӧз лэзьы. Нош будозы-а дунъёс пассажир поездъёсын? Ӵапак та ужпумез бергато али чугун сюрес вылын ужасьёс. Пичиесь дунъёс соослы ыштонъёс ваё, тужгес но пригород маршрутъёсын. Будэтоно ке, куанер калыкез эшшо но секыт шугадӟонэ вуттоз. Та дунъёс пумысен берпуметӥ кылзэ вераны кулэ Удмурт Кивалтэт. А. Максимов. Удмурт Республикась Быръёнъя комиссилэн ивортонэз Удмурт Республикалы Презид__ентэ кандидатъёсты быръёнъя группаос, огазеяськонъёс, блокъёс ӵектыны быгато, 2000-тӥ арын 21-тӥ июньысен кутскыса. Удмурт Республикалы Президентэ кандидатъёсты одӥг бырйись ӵектыны, озьы ик астэ дэмланы луэ 2000-тӥ арын 6-тӥ августысен 15-тӥ августозь. Та дыр куспын ик кандидатъёсты ӵектӥсьёс кулэ документъёсты вуттыны кулэ республикаысь Быръёнъя комиссие. Удмурт Республикалы Президентэ кандидатъёсты ӵектон но пусъён вакытэ документъёсты кутон но эскерон радъяське, "Россия Федерациысь гражданъёслэсь быръёнъёсы но референдуме пыриськыны правооссэс утись гарантиос сярысь" Федеральной Законлэсь 28-32 ёзэтъёссэ (отӥяз федеральной закон), Удмурт Республикалэн "Удмурт Республикалы Президент быръён сярысь" Законэзлэсь 28-38 ёзэтъёссэ (отӥяз Закон) лыдэ басьтыса. Удмурт Республикалы Президентэ кандидатъёсты ӵектӥсьёслэсь документъёссэс куто Быръёнъя комиссиын ужасьёс. Удмурт Республикалы Президентэ кандидатъёсты бырйисьёслэн кичӧлтӥсь группаенызы ӵектыку, соослэн оскем адямизы Быръёнъя комиссие вайыны кулэ таӵе документъёс: 1) Кичӧлтӥсь группалэсь Удмурт Республикалы Президентэ кандидат ӵектон сярысь гожтыса ивортонзэ; 2) бырйисьёслэн кичӧлсь группаенызы ортчытэм кенешлэсь протоколзэ; 3) бырйисьёслэн кичӧлтӥсь группазылэн оскем муртэз сярысь гожтыса ивортон; 4) кандидатлэн быръёнъёсы пыриськыны соглаш луэмез сярысь куриськонзэ (заявленизэ) Удмурт Республикалы Президентэ кандидатэз одӥг мурт ӵектыку, Быръёнъя комиссие со вае таӵе документъёс: 1) кандидатэз ӵектон пумысен уведомление; 2) кандидатлэсь быръёнъёсы пыриськыны соглаш луэмез сярысь куриськон. Ассэ кандидатэ ӵектӥсь мурт Быръёнъя комиссие ачиз вае таӵе документ: 1) ассэ кандидатэ ӵектон но кинюртэмъёсты (подпись) люканы кутскемез сярысь куриськон. Удмурт Республикалы Президентэ кандидатэз быръёнъя огазеяськонъёс ӵектыку, соослэн оскем адямизы Быръёнъя комиссие вае таӵе документъёс: 1) быръёнъя огазеяськонлэн, Россилэн улосъёсысьтыз ёзъёслэн кандидат ӵектон но оскем адямиосты юнматон пумысен съездъёсын, конференциосын кутэм решениосын протоколъёс; 2) та калык (общественной) огазеяськонэз пусъем (регистрировать) сярысь свидетельстволэсь нотариусэн юнматэм копизэ; 3) та калык огазеяськонлэн уставезлэсь нотариусэн юнматэм копизэ; 4) быръёнъя огазеяськонъёслэн оскем адямиосынызы список; 5) кандидатлэн быръёнъёсы пыриськыны соглаш луэмез сярысь куриськон; 6) оскем адямиослэн ужзэс нуыны соглаш луэмзы сярысь ивортон. Удмурт Республикаысь Быръёнъя комиссия вуэм документъёсты вить нунал куспын эскере но решение кутэ быръёнъя огазеяськонлэсь оскем муртъёссэ пусъён яке пусйыны пумит луэмез сярысь. Соосты пусйыны пумит луонлэн мугез герӟаськемын документъёсты кулэезъя быдэстымтэен яке законэн тупатэм радлыкез тӥямен. Быръёнъя блок Удмурт Республикалы Президентэ кандидат ӵектыны быгатэ, со блокез Быръёнъя комиссия пусъем бере гинэ. Быръёнъя блокез пусъён понна, солэн оскем муртэз Быръёнъя комиссие сётыны кулэ таӵе документъёс: 1) быръёнъя блоке пырем калык огазеяськонлэн уставезлэсь нотариусэн юнматэм копизэ; 2) быръёнъя блоке пырем калык огазеяськонэз пусъем сярысь свидетельстволэсь нотариусэн юнматэм копизэ; 3) быръёнъя огазеяськонъёслэн быръёнъя блоке пыремзы пумысен съездъёсын, конференциосын кутэм решениосын протоколъёсты; 4) быръёнъя огазеяськонъёслэсь быръёнъя блок кылдытон сярысь огъя решенизэс. Быръёнъя блоклэсь оскем муртсэ Быръёнъя комиссиен юнматон понна, вылӥ верам документъёсын ӵош со сётэ на таӵе документъёс: 1) быръёнъя блоклэн съездаз, конференцияз оскем муртъёсты ӵектон сярысь решение. 2) быръёнъя блоклэн оскем муртъёсыныз список, Законлэн 30-тӥ ёзэтысьтыз 3- тӥ люкетсэ лыдэ басьтыса, соос сярысь ивортон; 3) оскем муртъёслэн ужзэс быдэстыны соглаш луэмзы. Быръёнъя блоклы оскем муртъёсты ӵекто быръёнъя блоке пырем огазеяськонъёслэн съездазы, конференциязы. Быръёнъя блокез Быръёнъя комиссиын пусъё, документъёсты сётэм дырысен вить нуналлэсь бере кыльытэк. Кандидатэз быръёнъя блок ӵектыку, быръёнъя блоклэн оскем муртъёсыз Быръёнъя комиссие сёто таӵе документъёс: 1) быръёнъя блоклэн съездэз, конференцияз кандидатэз ӵектон но оскем муртъёсты дэмлан сярысь решение; 2) быръёнъя блоке пырем огазеяськонъёслэн кандидат ӵектон пумысен съездъёсын, конференциосын кутэм решениосын протоколъёс; 3) быръёнъя блоклэн оскем адямиосыныз список, Законлэн 30-тӥ ёзэтысьтыз 3-тӥ люкетсэ санэ басьтыса, соос сярысь ивортон; 4) оскем муртъёслэн ужзэс быдэстыны соглаш луэмзы; 5) кандидатлэн быръёнъёсы пыриськыны соглаш луэмез сярысь куриськон. Удмурт Республикаысь Быръёнъя комиссия вить нунал куспын эскере сётэм документъёсты но решение кутэ быръёнъя блоклэсь оскем муртъёссэ юнматон яке юнматыны пумит луэмез сярысь. Быръёнъя блоклэн оскем муртэз, удостоверение дасян понна, Быръёнъя комиссие сётыны кулэ 3х4 быдӟалаен кык туспуктэм (фотография). Удмурт Республикалы Президентэ кандидатэ ӵектэм муртъёс сярысь документъёсты кутыку, Быръёнъя комиссиын ужасьёс со кагазъёсты сётӥсьлэсь курыны быгато паспортсэ яке сое воштӥсь документсэ. Кандидатлы дурбасьтыса кинюртэмъёсты люкан кутске быръёнъя блокъёслэсь, огазеяськонъёслэсь оскем муртъёссэс пусъем нуналысен. Законысь 35-тӥ ёзэтлэн 1-тӥ люкетэзъя кандидат, быръёнъя огазеяськон, быръёнъя блок, бырйисьёслэн кичӧлтӥсь группазы, бырйись кандидатсылы дурбасьтыса, бырйисьёслэсь ӧжытсэ дас сюрс кинюртэмзэс люканы кулэ. Кандидатлы дурбасьтыса люкам кинюртэмъёсын кагазлэн вылтусыз сётэмын Законлы 1-4 номеро ватсанъёсын. Кинюртэмъёсын кагазлэн форматэз - Ә (машинкаен печатлам кагаз). Котькуд кагазын пусйиське кандидатлэн фамилиез, нимыз, атай нимыз, вордскем дырыз, ялан ужан интыез, должностез (ялан ужан интыез ӧвӧл ке - кыӵе ужез быдэсъямез), улон интыез, озьы ик кандидатэз ӵектӥсь. Кандидатлэн суд улэ шедем сярысь ужез дугдытэмын ӧвӧл ке, кинюртэмъёсын кагазын пусйиськыны кулэ Россия Федерацилэн Уголовной кодексысьтыз ёзэтлэн (ёзэтъёслэн) номерез (номеръёссы) но нимез (нимъёссы), кудӥзъя кандидат суд улэ кыскемын вал, озьы ик СССР-лэн но союзной республикаослэн уголовной законодательствозыя кутэм уголовной кодексысь ёзэтл (ёзэтъёс), мукет кунлэн законысьтыз ёзэт (ёзэтъёс), кандидат суд улэ та вылӥ верам законодательной актъёсъя кыскемын но солэн ужез Россия Федерацилэн Уголовной кодексаз йыружен лыдъямын ке. Кандидатлэн, Россия Федерацилэн гражданствоез сяна, мукет кунлэн гражданствоез вань ке, та сярысь верамын луыны кулэ кинюртэмъёсын кагазын, озьы ик пусйиське мукет кунлэн нимыз но. Кинюртэмъёсын кагазын возьматӥське кандидатлэн общественной огазеяськонэ пыремез, кудӥз сярысь со ивортӥз вал быръёнэ пыриськон сярысь куриськоназ. Кинюртэмъёсты люканы быгатэ Россия Федерациысь быдэ вуэм но ужась гражданин. Кандидатлэн правоез вань бырйисьёслэсь кинюртэмъёссэс люкась муртэн кинюртэмъёсты люкан сярысь огкыл гожтыны. Та уж понна дун тыриське кандидатлэн быръёнъя фондэз пыр гинэ. Бырйисьёслэсь кинюртэмъёссэс люканэ пыриськыны уг быгато пӧртэм амалэн ваньбур возись организациослэн, учреждениослэн кивалтон ёзъёссы. Кандидатлы дурбасьтыса бырйисьёслэсь кинюртэмъёссэс люкан дыръя уг яра бырйисьёсты кужмысь карыны но кузьмаськыны, озьы ик лэземын ӧвӧл бырйисьёслэсь кинюртэмъёссэс люканы уждун сётъян, мукет коньдон басьтон, благотворительной юрттэт сётон дыръя. Кандидатлэн улон сюресэз сярысь, озьы ик мукет иворъёсын печатлам материалъёсты сяна, бырйисьлы уг яра сётъяны коньдон но мукет ваньбур. Кужмысь карем чотын лыдъяны луоз бырйись вылэ зӥбонэз, сое кинюртэмзэ пусйыны косыса. Озьы ик уг яра бырйисьлы люкетыны Удмурт Республикалы президентэ кандидат понна кинюртэзэ пуктыны, сое кужмысь карыса но кышкатыса. Тае быръён правоосты тӥянэн лыдъяны луоз но сыӵе муртэ кыл кутон улэ Россия Федерацилэн Уголовной кодексэзлэн 141- тӥ ёзэтэзъя кыскыны луоз. Та куронъёсты ялан тӥян учыръёсы люкам кинюртэмъёсты умойтэмен лыдъяны но кандидатлэсь регистрацизэ куштыны луэ. Бырйисьёслэсь кинюртэмъёссэс люкан ортчыны быгатэ ужан, дышетскон, улон но мукет интыосын, кытын кинюртэмъёсты люкан, озьы ик быръён азьын агитациез нуон Федеральной законэн, Законэн алэмын ӧвӧл. Кандидатлы дурбасьтыса бырйисьёслэсь куаразэс ужась коллективъёсын люкан сӧрыны кулэ ӧвӧл ужан правилоосты но дисциплинаез, люкетыны кулэ ӧвӧл технологической процессъёслы. Кинюртэмъёсты трос калыко интыосын, ульчаосын, улон интыын люкан тӥяны кулэ ӧвӧл общественной правопорядокез, сюрес вылын мынон-ветлон правилоосты, гражданъёслэсь шутэтсконлы но улон интылы правозэс. Удмурт Республикалы Президентэ кандидатлы дурбасьтыса кинюртэмъёсын кагазъёсы гожтӥськыны быгато Россия Федерациысь 18 но солэсь трос аресъем гражданъёс, кудъёсыз ялан яке кема дыр ӵоже Удмурт Республикаын уло. Кинюртэмъёсты люканэ пыриськыны уг быгато судлэн решениезъя ужаны быгатӥсьтэм (недееспособной) но судлэн решениезъя пытсэт сьӧрын пукись гражданъёс. Бырйисьёс пӧртэм кандидатъёс понна кизэс нюртыны быгато, но одӥг кандидат понна - одӥг пол гинэ. Бырйись ачиз ас киыныз кинюртэмзэ но дырзэ гожтэ, озьы ик вакчиятытэк пусъе ачиз сярысь ивортонъёсты: фамилизэ, нимзэ, атай нимзэ, вордӥськем арзэ (18 арес ке - ватсаса вордӥськем нуналзэ но толэзьзэ), улон интызэ, паспортэзлэсь яке сое воштӥсь документлэсь серизэ, номерзэ но сётон дырзэ. Бырйись сярысь та ивортонъёсты кинюртэмъёсын кагазэ пыртыны быгатэ кандидатлы дурбасьтыса кинюртэмъёсты люкась мурт. Кинюртэмъёсын кагазэ гожтӥськоно ручкаен. Бырйись аслэсьтыз кинюртэмзэ кагазэ пуктэ паспортсэ яке сое воштӥсь документсэ (военной билетсэ яке удостоверенизэ, югдурез утёнъя ёзъёсын сётэм справкаез яке юнматэм формаен документэз, моряклэсь паспортсэ). Бырйисьёслэсь кинюртэмъёссэс кагазлэн кыкнапалаз ик пуктылыны луэ. Соку нырысетӥ бамысь кинюртэмъёслэн лыдпусъёссы азьланьтӥсько кыкетӥяз, кыкетӥяз баме ик пуктӥсько кагазэз юнматӥсь кинюртэмъёс. Кинюртэмъёсын кагаз юнматӥське кинюртэмъёсты люкам муртэн, со ас киыныз пусъе фамилизэ, нимзэ, атай нимзэ, улон интызэ, паспортэзлэсь яке сое воштӥсь документэзлэсь серизэ, номерзэ но сётон дырзэ, гожтӥське но дырзэ пуктэ, озьы ик - кандидатэн, быръёнъя огазеяськонлэн, быръёнъя блоклэн, бырйисьёслэн кичӧлтӥсь группазылэн оскем муртэнызы, кандидатэз ӵектэм бырйисен, со аслаз фамилиез, нимыз но атай нимыз вадьсы ас киыныз гожтӥське но дырзэ пуктэ. Бырйисьёслэсь кинюртэмъёссэс люкам бере, быръёнъя огазеяськонлэн, быръёнъя блоклэн, бырйисьёслэн кичӧлтӥсь группазылэн оскем муртъёсы, кандидатэз ӵектэм бырйись лыдъяло люкам кинюртэмъёслэсь лыдзэс. Соя лэсьтӥське бырйисьёслэсь кинюртэмъёссэс люканъя йылпумъянъёс сярысь протокол. Со улэ гожтӥсько кандидат, быръёнъя огазеяськонлэн, быръёнъя блоклэн, бырйисьёслэн кичӧлтӥсь группазылэн оскем муртъёссы, бырйись. Удмурт Республикалы президентэ кандидатлы дурбасьтыса люкам кинюртэмъёсын кагазъёслэсь но мукет документъёслэсь ӟечлыксэс шонер но дыраз эскерон вылысь. Удмурт Республикаысь Быръёнъя комиссия Ужась группа кылдытэ, отчы пыро комиссилэн членъёсыз, комиссилэн аппаратаз ужасьёс, озьы ик палэнысь ӧтем мурт. Ужась группа кандидатлэсь, бырйисьлэсь, быръёнъя огазеяськонъёслэсь, блокъёслэсь, кичӧлтӥсь группаослэсь документъёссэс кутэ ужан нуналъёсы 9 часысен 17 часозь, шутэтскон нуналъёсы (суббота но арня нунал) 10 часысен 15 часозь. Ужась группа: 1) документъёсты эскере; 2) кинюртэмъёсын кагазъёсты чакла; 3) протоколъёсты эскере; 4) быръёнъя огазеяськонлэн, быръёнъя блоклэн, кичӧлтӥсь группалэн оскем муртъёссылы, бырйисьлы, кандидатлы гожтыса (справка) ивортэ документъёсты кутон сярысь. Законысь 39-тӥ ёзэтлэн 1-тӥ люкетэзъя кандидатэз пусъён понна кандидат быръёнъя огазеяськонлэн, быръёнъя блоклэн, кичӧлтӥсь группалэн оскем муртъёссы, кандидатэз ӵектӥсь бырйись быръён нуналлэсь 30 нунал азьло (14.09.2000 арлэсь бере кыльытэк) 18 часозь Удмурт Республикалэн Быръёнъя комиссияз сётыны кулэ таӵе документъёс: а) кандидатлы дурбасьтыса бырйисьёслэн кинюртэмъёсынызы кагазъёс; б) бырйисьёслэсь кинюртэмъёссэс люканъя йылпумъянъёс сярысь протокол, кык экземплярен, Удмурт Республикаысь Быръёнъя комиссиен юнматэм формаен; в) кандидат сярысь ивортонъёс воштӥськем сярысь иворъёс; г) кандидатлэн коньдон ужпумъёсъя нырысетӥ отчётэз; д) кандидатлэн доходъёсызлэн быдӟалазы но кызьы кылдэмзы сярысь ивортонъёс; е) кандидатлэн ваньбурез сярысь ивортонъёс. Федеральной законлэн 32 ёзэтысьтыз 1-тӥ люкетъя доходъёслэн быдӟалазы но кызьы кылдэмзы сярысь ивортонъёс возьматӥсько гражданинлэн доходъёсыз сярысь декларацилэн копиез пыр. Россия Федерациысь законодательствоя кандидат луэм гражданин сыӵе декларация уг лэсьты ке, со ар ӵоже доходъёсыз сярысь справка сётыны кулэ. Удмурт Республикалы президентэ кандидатэ пусъем кандидатлэсь удостоверенизэ лэсьтон понна Удмурт Республикаысь Быръёнъя комиссие сётэ 3х4 кык туспуктэм, озьы ик 9һ2 кык туспуктэм - пусъем кандидат сярысь материалъёс дасян понна. Удмурт Республикаысь Быръёнъя комиссие сётэм кинюртэмъёсын кагазъёс огазеямын но лыдъямын луыны кулэ. ЖУРНАЛИСТЪЁСЫН ПУМИСЬКОНЪЁС Аслад коркаед оскымонгес Дась пуктэм квартира-а басьтоно яке ас поннад юртъер-а ӝутоно � кудӥз оскымонгес? Таӵе юан пуктӥз журналистъёс азе В.Ф.Загайнов, Удмурт Республикаысь лэсьтӥськонъя, архитектурая но улон инты политикая министр. Ачиз ик валэктӥз: умойгес, дыр, кыкетӥез. Малы? � Берло аръёсты учконо ке, со туж усто адӟиське Ижевск городъя но, улон инты ӝутон трослы кулэсмиз, � шуиз министр. � 1987-тӥ арен ӵошатыса, 3 поллы ӧжытгес квартираос лэсьтӥськом. Зэм, туэ кутскыса, пичияк азинсконъёс вань: кылем арен ӵошатыса, 35 процентлы ятыргес ужъёс быдэстэмын, квартираосъя � 60 процент. Татын шӧдӥськиз кредит висъянлэн ӟеч палыз � декабрь толэзьысен кутскыса висъямын 17 миллион манет. Та вакытэ мынэ ни сое берыктон. Пунэмен сётыса коньдонэз бергатон, мон чакламъя, калык понна туж пайдаё амал. Ваньмыз радъяськиз ке, ог 40 процентсэ улон юртъёсты кредит чотын лэсьтыны луоно. Валерий Загайнов верамъя, Удмуртия азьланяз озьы ик ужалоз: тросгес кредит сётыса, юртъёсты выльдонэ-пуктонэ семьяосты кыскоз. Уката ик гуртын улӥсьёсты. Коньдон висъяськоз 7 процентэн, нош республикалы сое сёто 17 процентэн. Озьен, пунэмен берыктонлэсь 10 процентсэ ас вылаз басьтэ Правительство. Бюджетын нимысьтыз коньдон висъямын вужмем коркаосты, "хрущевкаосты" тупатъянлы. Городъёсын соос трос гинэ, дыр но, коньдон но лачак кошкоз. Дунтэк улон инты али висъяське на ожысь ветеранъёслы, "пӧсь интыосын" ожмаськемъёслы, юрттэт сётӥське Северын ужамъёслы но улэмъёслы. Ма вераны луоз жилищно-коммунальной хозяйство сярысь? Министр пусйиз солэсь азинсконъёссэ, огез но предприятие та вакытэ уг сылы. Город дасяське толлы. Районъёсын мынэ газ кыскон. Зэм, куд-ог интыосын алэмын ни выль котельнойёсты усьтон � со герӟаськемын чагыр эстӥськон понна дунъёсты дыраз тырымтэен. Министр нимысьтыз пусйиз социальной удысэз. Каллен ке но, со выльдӥське. 2000-тӥ арын, кылсярысь, республикамыя 10 школа юрт усьтӥськоз. Можгаын 415 интылы лэсьтӥське больница, нылпи ваён юртлэсь быдэсмемзэ витё пургаос. � Азьвыл данмес одно ик берыктыны сюлмаськом , � шуиз В.Ф.Загайнов. � Со понна луонлыкъёс вань. Квартира дунъёс ласянь ке верано, соос будозы азьланяз но. Тӥни малы ас лэсьтэм коркад улыны оскымонгес. Л.МЕДВЕДЕВА. Редакцилэсь: вуоно шутэтскон нуналъёсы лэсьтӥськон удысын ужасьёс пусъёзы асьсэлэсь праздниксэс. Сӥзём соослы юн тазалык но выль азинсконъёс! Удмурт Республикась Быръёнъя комиссилэн ивортонэз Удмурт Республикалы Президентэ кандидатъёсты быръёнъя группаос, огазеяськонъёс, блокъёс ӵектыны быгато, 2000-тӥ арын 21-тӥ июньысен кутскыса. Удмурт Республикалы Президентэ кандидатъёсты одӥг бырйись ӵектыны, озьы ик астэ дэмланы луэ 200__0-тӥ арын 6-тӥ августысен 15-тӥ августозь. Та дыр куспын ик кандидатъёсты ӵектӥсьёс кулэ документъёсты вуттыны кулэ республикаысь Быръёнъя комиссие. Удмурт Республикалы Президентэ кандидатъёсты ӵектон но пусъён вакытэ документъёсты кутон но эскерон радъяське, "Россия Федерациысь гражданъёслэсь быръёнъёсы но референдуме пыриськыны правооссэс утись гарантиос сярысь" Федеральной Законлэсь 28-32 ёзэтъёссэ (отӥяз федеральной закон), Удмурт Республикалэн "Удмурт Республикалы Президент быръён сярысь" Законэзлэсь 28-38 ёзэтъёссэ (отӥяз Закон) лыдэ басьтыса. Удмурт Республикалы Президентэ кандидатъёсты ӵектӥсьёслэсь документъёссэс куто Быръёнъя комиссиын ужасьёс. Удмурт Республикалы Президентэ кандидатъёсты бырйисьёслэн кичӧлтӥсь группаенызы ӵектыку, соослэн оскем адямизы Быръёнъя комиссие вайыны кулэ таӵе документъёс: 1) Кичӧлтӥсь группалэсь Удмурт Республикалы Президентэ кандидат ӵектон сярысь гожтыса ивортонзэ; 2) бырйисьёслэн кичӧлсь группаенызы ортчытэм кенешлэсь протоколзэ; 3) бырйисьёслэн кичӧлтӥсь группазылэн оскем муртэз сярысь гожтыса ивортон; 4) кандидатлэн быръёнъёсы пыриськыны соглаш луэмез сярысь куриськонзэ (заявленизэ) Удмурт Республикалы Президентэ кандидатэз одӥг мурт ӵектыку, Быръёнъя комиссие со вае таӵе документъёс: 1) кандидатэз ӵектон пумысен уведомление; 2) кандидатлэсь быръёнъёсы пыриськыны соглаш луэмез сярысь куриськон. Ассэ кандидатэ ӵектӥсь мурт Быръёнъя комиссие ачиз вае таӵе документ: 1) ассэ кандидатэ ӵектон но кинюртэмъёсты (подпись) люканы кутскемез сярысь куриськон. Удмурт Республикалы Президентэ кандидатэз быръёнъя огазеяськонъёс ӵектыку, соослэн оскем адямизы Быръёнъя комиссие вае таӵе документъёс: 1) быръёнъя огазеяськонлэн, Россилэн улосъёсысьтыз ёзъёслэн кандидат ӵектон но оскем адямиосты юнматон пумысен съездъёсын, конференциосын кутэм решениосын протоколъёс; 2) та калык (общественной) огазеяськонэз пусъем (регистрировать) сярысь свидетельстволэсь нотариусэн юнматэм копизэ; 3) та калык огазеяськонлэн уставезлэсь нотариусэн юнматэм копизэ; 4) быръёнъя огазеяськонъёслэн оскем адямиосынызы список; 5) кандидатлэн быръёнъёсы пыриськыны соглаш луэмез сярысь куриськон; 6) оскем адямиослэн ужзэс нуыны соглаш луэмзы сярысь ивортон. Удмурт Республикаысь Быръёнъя комиссия вуэм документъёсты вить нунал куспын эскере но решение кутэ быръёнъя огазеяськонлэсь оскем муртъёссэ пусъён яке пусйыны пумит луэмез сярысь. Соосты пусйыны пумит луонлэн мугез герӟаськемын документъёсты кулэезъя быдэстымтэен яке законэн тупатэм радлыкез тӥямен. Быръёнъя блок Удмурт Республикалы Президентэ кандидат ӵектыны быгатэ, со блокез Быръёнъя комиссия пусъем бере гинэ. Быръёнъя блокез пусъён понна, солэн оскем муртэз Быръёнъя комиссие сётыны кулэ таӵе документъёс: 1) быръёнъя блоке пырем калык огазеяськонлэн уставезлэсь нотариусэн юнматэм копизэ; 2) быръёнъя блоке пырем калык огазеяськонэз пусъем сярысь свидетельстволэсь нотариусэн юнматэм копизэ; 3) быръёнъя огазеяськонъёслэн быръёнъя блоке пыремзы пумысен съездъёсын, конференциосын кутэм решениосын протоколъёсты; 4) быръёнъя огазеяськонъёслэсь быръёнъя блок кылдытон сярысь огъя решенизэс. Быръёнъя блоклэсь оскем муртсэ Быръёнъя комиссиен юнматон понна, вылӥ верам документъёсын ӵош со сётэ на таӵе документъёс: 1) быръёнъя блоклэн съездаз, конференцияз оскем муртъёсты ӵектон сярысь решение. 2) быръёнъя блоклэн оскем муртъёсыныз список, Законлэн 30-тӥ ёзэтысьтыз 3- тӥ люкетсэ лыдэ басьтыса, соос сярысь ивортон; 3) оскем муртъёслэн ужзэс быдэстыны соглаш луэмзы. Быръёнъя блоклы оскем муртъёсты ӵекто быръёнъя блоке пырем огазеяськонъёслэн съездазы, конференциязы. Быръёнъя блокез Быръёнъя комиссиын пусъё, документъёсты сётэм дырысен вить нуналлэсь бере кыльытэк. Кандидатэз быръёнъя блок ӵектыку, быръёнъя блоклэн оскем муртъёсыз Быръёнъя комиссие сёто таӵе документъёс: 1) быръёнъя блоклэн съездэз, конференцияз кандидатэз ӵектон но оскем муртъёсты дэмлан сярысь решение; 2) быръёнъя блоке пырем огазеяськонъёслэн кандидат ӵектон пумысен съездъёсын, конференциосын кутэм решениосын протоколъёс; 3) быръёнъя блоклэн оскем адямиосыныз список, Законлэн 30-тӥ ёзэтысьтыз 3-тӥ люкетсэ санэ басьтыса, соос сярысь ивортон; 4) оскем муртъёслэн ужзэс быдэстыны соглаш луэмзы; 5) кандидатлэн быръёнъёсы пыриськыны соглаш луэмез сярысь куриськон. Удмурт Республикаысь Быръёнъя комиссия вить нунал куспын эскере сётэм документъёсты но решение кутэ быръёнъя блоклэсь оскем муртъёссэ юнматон яке юнматыны пумит луэмез сярысь. Быръёнъя блоклэн оскем муртэз, удостоверение дасян понна, Быръёнъя комиссие сётыны кулэ 3х4 быдӟалаен кык туспуктэм (фотография). Удмурт Республикалы Президентэ кандидатэ ӵектэм муртъёс сярысь документъёсты кутыку, Быръёнъя комиссиын ужасьёс со кагазъёсты сётӥсьлэсь курыны быгато паспортсэ яке сое воштӥсь документсэ. Кандидатлы дурбасьтыса кинюртэмъёсты люкан кутске быръёнъя блокъёслэсь, огазеяськонъёслэсь оскем муртъёссэс пусъем нуналысен. Законысь 35-тӥ ёзэтлэн 1-тӥ люкетэзъя кандидат, быръёнъя огазеяськон, быръёнъя блок, бырйисьёслэн кичӧлтӥсь группазы, бырйись кандидатсылы дурбасьтыса бырйисьёслэсь ӧжытсэ дас сюрс кинюртэмзэс люканы кулэ. Кандидатлы дурбасьтыса люкам кинюртэмъёсын кагазлэн вылтусъыз сётэмын Законлы 1-4 номеро ватсанъёсын. Кинюртэмъёсын кагазлэн форматэз - Ә (машинкаен печатлам кагаз). Котькуд кагазын пусйиське кандидатлэн фамилиез, нимыз, атай нимыз, вордскем дырыз, ялан ужан интыез, должностез (ялан ужан интыез ӧвӧл ке - кыӵе ужез быдэсъямез), улон иинтыез, озьы ик кандидатэз ӵектӥсь. Кандидатлэн суд улэ шедем сярысь ужез дугдытэмын ӧвӧл ке, кинюртэмъёсын кагазын пусйиськыны кулэ Россия Федерацилэн Уголовной кодексысьтыз ёзэтлэн (ёзэтъёслэн) номерез (номеръёссы) но нимез (нимъёссы), кудӥзъя кандидат суд улэ кыскемын вал, озьы ик СССР-лэн но союзной республикаослэн уголовной законодательствозыя кутэм уголовной кодексысь ёзэтлэн (ёзэтъёслэн), мукет кунлэн законысьтыз ёзэтлэн (ёзэтъёслэн), кандидат суд улэ та вылӥ верам законодательной актъёсын кыскемын но солэн ужез Россия Федерацилэн Уголовной кодексаз йыружен лыдъямын ке. Кандидатлэн Россия Федерацилэн гражданствоез сяна мукет кунлэн гражданствоез вань ке, та сярысь верамын луыны кулэ кинюртэмъёсын кагазын, озьы ик пусйиське мукет кунлэн нимыз но. Кинюртэмъёсын кагазын возьматӥс кандидатлэн общественной огазеяськонэ пыремез, кудӥз сярысь со ивортӥз вал быръёнэ пыриськон сряысь куриськоназ. Кинюртэмъёсты люканы быгатэ Россия Федерациысь быдэ вуэм но ужась гражданин. Кандидатлэн правоез вань бырйисьёслэсь кинюртэмъёссэс люкась муртэн кинюртэмъёсты люкан сярысь огкыл гожтыны. та уж понна дун тыриське кандидатлэн быръёнъя фондэз пыр гинэ. Бырйисьёслэсь кинюртэмъёссэс люканэ пыриськыны уг быгато пӧртэм амалэн ваньбур возись организациослэн, учреждениослэн кивалтон ёзъёссы. Кандидатлы дурбасьтыса бырйисьёслэсь кинюртэмъёссэс люкан дыръя уг яра бырйисьёсты кужмысь карыны но кузьмаськыны, озьы ик лэземын ӧвӧл бырйисьёслэсь кинюртэмъёссэс люканы уждун сётъян, мукет коньдон басьтон, благотворительной юрттэт сётон дыръя. Кандидатлэн улон сюресэз сярысь, озьы ик мукет иворъёсын печатлам материалъёсты сяна, бырйисьлы уг яра сётъяны коньдон но мукет ваньбур. Кужмысь карем чотын лыдъяны луоз бырйись вылэ зӥбонэз сое кинюртэмзэ пусйыны косыса. Озьы ик уг яра бырйисьлы люкетыны сое кужмысь карыса но кышкатыса, Удмурт Республикалы Президентэ кандидат понна кинюртэзэ пуктыны. Тае быръён правоосты тӥянэн лыдъяны луоз но сыӵе муртэ кыл кутон улэ Россия Федерацилэн Уголовной кодексэзлэн 141- тӥ ёзэтэзъя кыскыны луоз. Та куронъёсты ялан тӥян учыръёсы люкам кинюртэмъёсты умойтэмен лыдъяны но кандидатлэсь регистрацизэ куштыны луэ. Бырйисьёслэсь кинюртэмъёссэс люкан ортчыны быгатэ ужан дышетскон, улон но мукет интыосын, кытын кинюртэмъёсты люкан, озьы ик быръён азьын агитациез нуон Федеральной законэн, Законэн алэмын ӧвӧл. Кандидатлы дурбасьтыса бырйисьёслэсь куаразэс ужась коллективъёсын люкан сӧрыны кулэ ӧвӧл ужан правилоосты но дисциплинаез, люкетыны кулэ ӧвӧл технологической процессъёслы. Кинюртэмъёсты трос калыко интыосын, ульчаосын, улон интыын люкан тӥяны кулэ ӧвӧл общественной правопорядокез, сюрес вылын мынон-ветлон правилоосты, гражданъёслэсь шутэтсконлы но улон интылы правозэс. Удмурт Республикалы Президентэ кандидатлы дурбасьтыса кинюртэмъёсын кагазъёсы гожтӥськыны быгато Россиы Федерациысь 18 но солэсь трос гражданъёс, кудъёсыз ялан яке кема дыр ӵоже Удмурт Республикаын уло. Кинюртэмъёсты люканэ пырыны уг быгато решениезъя ужаны быгатӥсьтэм (недееспособной) но судлэн решениезъя пытсэт сьӧрын пукись гражданъёс. Бырйисьёс пӧртэм кандидатъёс понна кизэс нюртыны быгато, но одӥг кандидат понна - одӥг пол гинэ. Бырйись ачиз ас киыныз кинюртэмзэ но дырзэ гожтэ, озьы ик вакчиятытэк пусъе ачиз сярысь ивортонъёсты: фамилизэ, нимзэ, атай нимзэ, вордӥськем арзэ (18 арес ке - ватсаса вордӥськем нуналзэ но толэзьзэ), улон интызэ, паспортэзлэсь яке сое воштӥсь документлэсь серизэ, номерзэ но сётон дырзэ. Бырйись сярысь та ивортонъёсты кинюртэмъёсты кагазэ пыртыны быгатэ кандидатлы дурбасьтыса кинюртэмъёсты люкась мурт. Кинюртэмъёсын кагазэ гожтӥськон ручкаен. Бырйись аслэсьтыз кинюртэмзэ кагазэ пуктэ паспортсэ яке сое воштӥсь документсэ. военной билетсэ яке удостоверенизэ, югдурез утёнъя ёзъёсын сётэм справкаез яке юнматэм формаен документэз, моряклэсь паспортсэ). Бырйисьёслэсь кинюртэмъёссэс кагазлэн кыкнапалаз ик пуктылыны луэ. Соку нырысетӥ бамысь кинюртэмъёслэн лыдпусъёссы азьланьтӥсько кыкетӥяз, кыкетӥяз баме ик пуктӥсько кагазэз юнматӥсь кинюртэмъёс. Кинюртэмъёсын Котьмалы усто, быгатӥсь киосты юнме зарниен уг ӵошато, дыр. Ма гинэ уг лэсьто соос! Тодэ вал кыӵе чебер дӥсьёс керттэ но чильпа туспуктэм вылысь нылаш. Адӟе ай кыӵе быгатыса со мудрон причёскаос лэсьтылэ. Со - Вавож ёросысь Алена Зайцева. Ар талэсь азьло, нылпи садын ужакуз, Алена "сокращение" шуон улэ шедиз. Ӧз ӧпкельы соку нылаш, мылкыдзэ ӧз куашкаты. Йырси ӵышкисе дышетскыны малпаз. Озьы ик лэсьтӥз. Бен, та удысэзъя но нокытын уже интыяськыны ӧз кылды. Но Партчи гуртоосыз юрттэт курыса ӵем гинэ вуо дораз. Вералэ собере, туала егитъёс номыр уг быгато шуыса... Туспуктэмез В. Беломорскихлэн. Емыш будэто пӧсяса "Метталлург" совхозлэн теплицаяз кызь кык арлэсь кема ужа ини В. И. Мурмина. Со татчы лыктӥз Пермьысь гурт ужасьёсты дасянъя училище бере. Вера Ивановналы оскизы бакча емышъёслэсь ужъёссэс калыклы вузаны. Та теплицаын ог дасо аръёс ӵоже озьы ик сюлмысь тыршыса ужало Л. Н. Паньгина, Г. Т. Семенова, К. Н. Красноперова но мукетъёс. Ужасьёсын быгатыса кивалтэ Ижевскысь Гурт удысъя академиез алигес йылпумъям агроном О. А. Ардашева. Пусйыны кулэ теплицаын ужасьёслэсь куронъёссэс но. Соос ӝожтӥсько нюлам омырен но пӧртэм удобрение зынэн шокаса тазалыксэс быдтэмлы. Нош пенсие вазьгес потыны соослы тупатэмын ӧвӧл. Озьы ик та совхозысь выль юртъёсын улӥсьёслэн арлы быдэ гужем вакытэ куинь-ньыль толэзен пӧсь вузы уг луы. В. Чернов. Валэктэ юрист Сэрегез дася адвокат Лилия Шкляева Ужын сӧсырми но... Мыным группа сётӥзы, ужан интыям шуккиськеме бере. Врачъёс шуо: арлы быдэ курортэ ӧд ветлы ке, висёнэд уката кужмоялоз. Заводын валэкто: тонэ эмъяны гинэ ӧвӧл, адямиослы уждун тырыны но коньдон ӧвӧл. Кызьы портоно путёвкалы коньдон? С. Зеленин. Адями ужын шуккиськыку, завод солы тырыны кулэ ыштэм уждунзэ, эмъяськем дунзэ, эмъясь (лечебной) сиён-юон басьтэм дунзэ. Озьы валэктэ "Россия Федерациын ӧлексыосты (инвалидъёсты) улон-вылонын утён сярысь" Россия Федерацилэн Законысьтыз 29-тӥ ёзэт (статья). Отысь 4-тӥ люкет ивортэ: шуккиськем мурт санаторие ветлыку, солы тыроно эмъяськыку отпуск басьтэм дунэз, сюрес вылэ быдтэм дунэз (сое келясьлы сямен ик), улэм но сиськем дунэз. "Ужын шудтэм учыре шедемлэсь но висён кутэмлэсь одно ик страхование ортчытон сярысь" Россия Федерацилэн Законэзъя вылӥ верам коньдон люкаське уж сётӥсьёслэн тыронъёссы (взносъёссы) чотын. Ӧлексы адямилы путёвкалэсь дунзэ завод уг тыры ке, меӵак вазиськоно кун соцстрахъя фондэ. Таиз ини заводэз косоз сыӵе ужпумез одно быдэстыны. Нылпи вордыны юрттэт Нуны ваемен валче басьтэм документъёсме валля арын ик нуи уже интыян центре. Коньдонзэ татчыозь ӧй басьты на. Нош куд-ог тодмооссылы Со понна судлэн нокыӵе решениез кулэ ӧвӧл ни. __________1а аьА_хэАя__�___Во_ББ_юА��яА___П____хмэА____�з_А_А&п��__8о_Б`__ нАб_дУ БА___________яяяя________яя_В_______А&п��_Р_____АлпҤ__ПяСМБ2____�__________Ш ___ИЭ_____ _б___ _7___б_Б_б___м_`#______^______________________________________________________ ________________________________________________________________________________ ________________________________________________________________________________ ________________________________________________________________________________ ________________________________________________________________________________ __________________________________________________СРРПРРСРППСПРРПРРСРОППНООРПООО НОПНМЛЛЛЗЕВ�ё��Ӧ� рСЦ?@БДФДФХХ\Ӧ��ГЙЛНООРППТСТУССУТТРРРПТУУТТУУФТТУУФФУРСУФУХЧЧЧУХЦФЦФЦЩШЧШЧФХШЧФУ ХЩШФХФТФТРРТТУРППРСРРУУФХХХФФЧЩШЩЩШЩЩЩЩЪЩЪЪЪЫЬЭЬЮЯЭЭЮЮЬЭЮЯаЮЭЮЭЯЮЭЮЭЮЯЯЬЭЭЬЮЭЮЭЬ ЯаЮЯбаЯЯввббвбббЯаЯабаабвбааааЯааббаЮЮабааЯбббаабббббавввбабввввбаббвббвбвбввввв ввбввббаббЯЯаабббавбвввббббвбвввввввввббвбабЯаббвбввбЫОМГРктурпоопрропрррсфхффуф фхфуфуууфххфууутффтсмШ�ӧёё�БПЪЬЮЮЮЮЮЮЭЯЭЬЬЫЬЮЮЮЫЫЭЭЮЬЪЪЭЭЭЭЫЫЬЫЫЭЮЭЮЫЬЬЭЬЬЬЬЪЬЭЬ ЬЭЯЮЭЮЬЫЭЮЮЯЯЮЯЯвжаЮЭЬЭЭЭЯЯЭЮЭЭЮЬЬЭЭЭЭЮЭЮЭЭЬЫЬЫЬЬЮЮЬЫЫЭЭЮЭЬЫЫЬЭЭЬЬЬЬЬЬЬЫЬЫЫЩЩЪЪЩ ЩЪЩЧЧЩЩЧШЧШШШЧЦЧЧЧШЧЩЩЧЧШЩЧЦШШШЦУХЦТФФУУТТСПОЛГВ����"мПА?БДГГХХСъ��ЕЙНРССУЧУФШЧШ ЧЧЦЩШЧШЦЦФЧЧШЩШШЧЧЧЧЧЧЩЩЩЧШЧЧЩЩЩЩШЦШЩЩШЧШЩЩШШЧШЧЧХУЦХЩШЦХФСФХУТФСТУТСРППП Удмурт университетэ дышетскыны пырем пияш, чылкытлыкез яратӥсь, улон инты утча. Вазиськоно 25-42-69 (ӝыт) яке 44-42-58 (нуназе). Шӧкыч Дуэ но мон Кыӵе улэм та дуэлэн? Быдэс арня тырше, ужа. Быдэс арня, майбыр, уг ю. Малы озьы Мынам уг лу? Огкутскемен арня ӟизтӥ, арня изи катьяськытэк. Тулыс калык гыриз, мерттӥз. Ӧз адӟылы мынам бакча геры, мажес. Йӧны, сьӧд пот согиз сое. Курыт юон Люказ монэ анай-атай музъемелэсь. Мон кадьёсты уг учко ни егит нылъёс, нылкышноос... Кыӵе улэм Та дуэлэн! Аслым ачим жаль потӥсько, малы ӧвӧл дуэ уго. А. Степанов. Бурдо ӧрӟиос тютёмизы Валлян шаерысь десант войскоос пыр ортчемъёс асьсэлэсь нуналзэс пусйизы. Туэ со тупаз та войскоослэн кылдэмзы дырысен 70 ар тырмонэн. Ужрад кутскиз Ижысь ялан ӝуась тыл дорын митинген. Десантникъёс, службаын сямен ик, султӥзы строе. Первомай ёрослэн администрациезлэн кивалтӥсез А. М. Кулигин пиосты праздникен ӟечкылаз. Митингын озьы ик вераськиз афган ветеранъёслэн огазеяськонзылэн тӧроез Н. П. Серебряков, пинал десантникъёслэн клубзылэн кивалтӥсез Р. М. Гатауллин, отысь ик курсант М. Курсавин. Тыл доры сяська тугоко понэмез ожгарчиос пыдесъяскьыса пумитазы. Буре ваён Александрово шайвылын но ортчиз. Ӝытазе Горький нимо паркын ог вакытлы инлэн чагырез музъем вылэ васькиз кадь - сомында вал "чагыр беретъёс". Но нунал кӧня ке пожаськиз ӟенелик пильылэмен, уно вал десант дӥсен кудӟем егитъёс. Шулдыръяськонэз котькуд ласянь эскерыса возиз милиция. Кӧняез меда ожгарчиос уйзэс сазьтӥськонниын ортчытӥзы? Бурдо гвардеецъёслы митингын синмаськем кышномуртэз ноку но уг вунэты. Выль тодмое, Людмила Михайловна Ломаева, 1982-тӥ-84-тӥ аръёсы Афганистанын ортчытэм медсестра вылэм. Али ужа Ижысь 6-тӥ медсанчастьын, егитъёсты армие дася. Аслаз но куинь ӧрӟиосыз будо. Вань веран-малпанзы одӥг: армие мынон, чагыр инмен эшъяськон. "Десантникъёс - бурдо пехота, - шуиз Людмила Михайловна. - Кинэ адӟисько формаен, ваньзэс ӟыгыртӥсько". Тани кин кадь юн сюлэмо луыны кулэ. Нош "чагыр беретъёсты" котьку но адӟеме потэ кужмоен но сазен. А. Ионина. ШӦКЫЧ Алла КУЗНЕЦОВА Подоходной налог Тон ужан интыяд копейка басьтӥськод. Ай сое но дыраз кин сётоз?!. ... Подоходной налог амалтэк тыриськод - Бухгалтерия одно капыртоз. Вузкарись вуз понна налогъёс ке тыре, Басьтӥсьлэсь со дас пол коньдонзэ шымыртоз. Спекулянт нимало вал сое со дыре, Со понна суд шуон пытсэтэ но пыртоз. Табере спекулянт коммерсант нимаське. Зӧк тӧрнам кисыез законэн утиське. Со векчи коммерсант ук - ойдо, мед выроз... Трослы-а озьы узырмоз? Нош вылӥ коммерсант шаермес юдыса Пичиен ик быдтэ вузаса. Чик ӧвӧл ук солэсь доходзэ лыдъясез, Подоходной налог басьтӥсез. "Удмурт дунне" Павел Вершинин: "Мыным удалтӥз кужмо правительствоен кивалтыны" Павел Николаевич Вершининэз асьме республикаын тодӥсьтэмез ӧвӧл. Правительствоен кивалтыкуз, солы син азяз возёно вал быдэс калыкмылэсь улонзэ. Экономикаын, культураын, дышетонын но данак мукет удысъёсын сылӥсь ужпумъёсты солы бергатоно вал. Таяз учыре Павел Николаевичен пумиськыны капчи ӧй вал. Ужъёсыз трос вылӥллям. Тодмо адямилэн улэмез, ужамез, малпанъёсыз берло дыре, оло, калыклэсь ватысагес возисько. Соин ик вераськонмы тазьы кутскиз: - Павел Вершинин - кин-о со туннэ? - Мынэсьтым но куд-огез меӵак юало: кытын тӥ, мар кариськоды? Арлэсь трос ужасько ини Кун Кенешлэн Тӧроезлэн воштӥсез луыса. Оскизы социальной удыс азьын сылӥсь ужпумъёсын вырыны. Ӝутскем мылкыдын басьтӥськи дышетӥсьёслэсь, врачъёслэсь, культура удысын ужасьёслэсь куронъёссэс эскерыны. Быгатэмея соослы юрттыны тырши. Озьы гуртысь нылпиос понна усьтӥмы школа-интернатъёс. Табере соос ужало ини Можгаысь, Уваысь, Ижысь педучилищеосын, Ижысь ик 41 но 56 номеро школаосын. Та уж азьланьтӥськоз на. Туэ пӧртэм гуртъёсысь нылпиос дышетскыны быгатозы Завьял ёросысь Италмас школаын. Чакламын вал Ильинка починкаысь инбам улын ужась музейлы юридической статус сётоно, оло, озьы асьме республикаын паськытгес луысал туризмез азинтыны. Туж жалясько, та ужез мон йылаз-пумаз ӧй вутты шуыса. Но оскисько: сыӵе музей асьме дорын одно ик луоз. Социальной удысэн герӟаськем ужъёслэсь палэнсконо луиз. Табере мон вылын мукет ужъёс: калыклэсь правооссэ утён, правопорядокез юнматон, ас коже кивалтон ёзъёсын ужан. Мукет сямен вераса, табере мыным тросгес ужано луэ законъёс кылдытон бордын. - Валамон. Озьы ке но, ужады сыӵе воштӥськонъёс тӥляд мылкыдыныды-а герӟаськемы вал? - Кивалтӥсь ачиз, вылды, умойгес адӟе, кызьы ужъёсты солэн воштӥсьёсыз куспын люконо. - Павел Николаевич, кемалась ӧвӧл тӥ вал асьме Правительстволэн премьерез. Табере тӥ Кун Кенешын, нош тросэз министръёсты озьы ик ужало Правительствоын. Оло, куддыръя ӝож но луылэ? Кызьы тӥ учкиськоды туала Правительстволэн ужамез шоры? - Правительстволэн Тӧроез, пе, министръёсты юнматэ. Но озьы со лыдъяське гинэ. Шонерзэ верано ке, министръёсты вылӥ должностен адями ӵектэ, солэн решениез улэ премьер гожтӥське гинэ. Озьы вал мон дыръя но. Котьма ке но, мыным туж удалтӥз сыӵе зол но усто правительствоен ужаны. Отчы сюризы визьмо, быгатӥсь, ужзэс гажась адямиос. Котькудӥныз луэ вал секыт ужпумъёсты эскерыны, споръяськыны но валче ужаны сюресъёс шедьтыны. Но тужгес но пусйымонэз тодӥськоды-а мар вал? Соос быгатӥзы политикае пыриськытэк ужаны. Соин ик, малпасько, соос выль правительствое но сюризы. Оскисько, правительствоын лэсьтэм янгышъёсмес, соос али тупатыны быгатозы. - Политикае пыриськытэк туала правительстволы уг луы, лэся? - Шумпотӥсько, тросэзлы, "мынам" министръёсылы, удалтэ шуыса. Но туж жалясько выль премьерез: солэн куд-ог воштӥсьёсыз но министръёсыз политика пала шонскизы. - Мынам малпамея, тӥ Николай Ганзаен трос ужпумъёс шоры огкадь учкиськоды. Тодэ лыкто солэн таӵе верамъёсыз: "Правительство политикаен уз шуды" яке "Ноку уг курласькы мынэсьтым азьло ужам адямиосыз". - Со ӧз лэзьы куд-ог адямиослы монэ курланы. Со понна али но солы тау карисько. Но тодӥсько: туала правительствоын вань сыӵе адямиос, кудъёсыз монэ сьӧдманы выро. Ярам коть, сыӵеослэн политикае сюрессы туж вакчи луэ. Николай Ганза - умой хозяйственник. Но котькуд адямилэн сямен, солэн но, вылды, ляб интыосыз вань. Россиын экономика ӝутскыны кутскиз. Тазьы учкыса, выль правительстволы али, оло, ужаны но капчигес. Нош ми ужамы туж секыт вакытэ. Озьы ке но, огъя хозяйствоез куашканлэсь утимы. - Иське, тужгес но секытсэ асьмеос ортчимы ни? - Котькыӵе революция улон радлыкез куашкатэ. Берло аръёсы лэсьтэм реформаос - со революция нерге ик, дыр, вал. Но Россиын (котьку сямен ик) со воштӥськонъёс мур малпаськытэк ортчизы. Соин валче ик калык уно курадӟонъёс адӟиз. Но со вакытэ ваньмыз куашказ шуыны шонер уз луы. Кадръёсты, производстволэсь фондъёссэ кир-пазь карыны ӧм сётэ. Со сяна, асьмелэн вал но вань чидась калыкмы. Али тани котькытын выль технологиос уже кутӥсько. Сыӵе азинсконъёсмылы али шумпотоно гинэ. - Гурт удыслы туэ правительство умой кадь юрттӥз. Но вылӥ кивалтӥсьёс ик куд- ог дыръя ӝожтӥсько, отчы, пе, пыдэстэм бекчее кадь коньдон куштӥськод. Озьы медаз луы шуыса, оло, гуртын но чутрак воштӥськонъёс ортчытоно ни? - Асьме даурез таӵе ӧтён улсын кутским: "Вань музъем - крестьянъёслы". Нош собере музъемен кыӵе гинэ шудонъёс ӧй вал. Ярам, уно эскеронъёс ортчытэм бере даурмес нош ик, лэся, нырысь ӧтён улсын йылпумъялом. Музъем луоз крестьянъёслы! 1995-тӥ арын гурт удысысь кооперациос сярысь закон потӥз. 1998-тӥ арын отчы куд-ог ватсанъёс пыртэмын. Гуртын улӥсьёслэсь куронъёссэс лыдэ басьтыса, выльысь улыны право сётэмын колхозъёслы но совхозъёслы. Вань колхозъёс, СПК-ос (соос туннэ 290 пала) туэ 1-тӥ июлёзь асваньбурзэс, музъемзэс пусйыны кулэ ни вал Лыдъян палатаын. Сотэк музъемзылы кузё луыны соос уг быгато. Но пусйиськон понна трос коньдон тыроно. Соин ик та ужез ӝоггес радъян понна, гурт хозяйствоослы кыӵе ке льготаос учконо. Музъемлэн кузёез луиз ке, кун но сомында ыштонъёс уз адӟы. Али трос верасько огъя музъем налог сярысь. Кулэ-а, ӧвӧл-а со? Эскерон ортчиз Белгород областьын. Законлэн кулэлыкез валамон луиз. Ма, кин пумит луоз музъемлэн ӟечлыкезъя налог тырыны! Но пумит луиз Кун Дума. Нырысетӥ лыдӟемъя но закон ӧз ортчы. Малпасько, та законэз кутыны юрттоно улӥысен, калыкысен. Зэмзэ но, гурт удыслы коньдон ӵем дыръя пайдатэм кошке. Малы? Туж ӝог дунъёс будо ГСМ-лы, нош одӥг литр йӧллэн дуныз дунтэм возиське. Тыршоно вал одӥг литр ГСМ-лэсь но йӧллэсь дунзэс огмында карыны, соку шуг-секытъёс ӧжытгес луысалзы. - Павел Николаевич, тӥ премьер луон дыръя асьме республикае Германиысь "Доминатор" комбайнъёс" вуизы. Кулэ-а соос асьмелы? - "Доминаторъёсты" басьтыны лизинг амалэн луонлык кылдӥз вал. Солэн дуныз 1 миллион 100 сюрс манет вал, асьме "Дон" комбайнлэн - 850 сюрс манет. "Доминаторлэсь" ӟечлыксэ адӟыса дӥсьтӥм басьтыны. Вить ар ӵоже правительство солэсь дунзэ процентъёсын берыктыны кулэ лизинг сётӥсь компанилы. Ваньзэ коньдон тырем бере со комбайнъёс луозы Правительстволэн кияз. Туэ малпамъя та техникаен ог 30 сюрс гектар ю-нянь октэмын луоз. Комбайнъёс, сельхозтехника туннэ уг тырмы. Югдурез тупатыны луысал асьме республикаын но лизингъя компания ке кылдысал. Но таӵе ӵектонэз Кун Кенеш малы ке умоен ӧз лыдъя. Озьы ке но, малпасько, Россиын сыӵе компаниос кылдозы. Малы ке шуоно, вакчи дыр куспын вань хозяйствоослы техникаен юрттыны уз луы. Гурт хозяйствоослы юрттон понна, пӧртэм амалъёс шедьтыны луэ. Вераны кулэ, Россиын сярысь, асьме республикаын гурт удыс сокем зол берлань ӧз чигна. ПС.: Россилэн сюресаз начар улон вакытъёс тырмыт гинэ вал ини. Нош луэ-а меда Россиез начар странаен лыдъяны? Уг. Специалистъёслэн лыдъямзыя, странамылэсь вань узырлыксэ котькуд адямилы быдэ люкид ке, со 2 поллы тросгес луоз США-ын, 6 поллы тросгес ФРГ-ын но 22 пллы тросгес Япониын сярысь. Учке ай, кыӵе асьмеос узыресь! Нош асьме узырлыкмес кузё сямен уже кутон понна Правительствоын но, Кун Кенешын но калык понна сюлмаськись адямиос, дыр, ужаны кулэ. Т. Банникова. Тазалык Ӧжыт тодод - кема улод Тӥ гожтӥськиды-а... школае? 6-7 аресъем нылпиослэн анай-атайёссылэсь юасько мон. Сотэк кызьы, паймоды тӥ пумитам, ӝоген сентябрь ни. Соку кыӵеяз? Вот татын валэктонъёс туж пӧртэмесь луыны быгатозы. Гуртын улӥсьёслэн быръёнзы ӧвӧл бере, сюлмаськонэз но ӧвӧл. Нош городъёсысь, ёрос центръёсысь анай-атайёслэн йырзы нунызылы 3-4 арес дыръя ик висьыны кутске: котькудӥзлэн уго пиналзэ аслэсьтыз визьмогес адӟемез потэ. Соин ик мудрон лицейёс, гимназиос, частной школаос утчало, со дыре ик асьсэлэн тодазы но уг лыкты кыӵе программая дышетсконзы сярысь юалляськыны. Но али сыӵе заведениосысь дышетонлэн ӟечлыкез сярысь вераськыны уг турттӥськы мон, асьсэос нылпиос сюлмаськыто. Сыӵе школаосы шедьыса, тросэз соос уг чидало секытлы. Огшоры школаосын дышетскисьёс тырмыт сиськымтэенызы ӵемгес кӧтпуш висёнъёсын ке курадӟо, гимназистъёс лулсэр висёнъёсын. Ӝыныез соос пӧлысь дышетскон нунал пумын мултэс жуммемзы сярысь верало. 55-83 процентэз лулсэр висёнъёсын курадӟо, керӟегъясько, эшшо ӝыныезлэн висёнъёссы хроническое выжо. Кӧня ке ар талэсь азьвыл акселерация (ӝог таза будон) сярысь ке вераськиськом вал, али ваньмыз мыддорин луыса кошке. 25 процент нылпиослэн секталазы уг тырмы, кужымзы лябӟе. России_ысь Тазалыкез утёнъя министерстволэн эскеронъёсызъя, 15-17 аресъем быдэ вуымтэос 94 процентэз висисесь 30 процентэз азьланяз кыӵе ке ужлы дышетскыны ярантэм луо. Компьютеръёс но шӧдӥськытэк уг кылё пиналлэн тазалыкез вылын: берло дыре гинэ вить поллы йылӥз ляб адӟись дышетскись пиналъёслэн лыдзы. Визьмо школаосысь дышетӥсьёс визьмо дышетскисьёссылы тросгес визь сётыны выронъязы вунэто шутэтсконлы, физкультуралы тросгес дыр висъяны. Соин валче уродмо тыос, кырыжске сюрлы. Я, воксё ӧлексыосты кадь суредай шуиськоды-а? Но со озьы ик вань. 25 процентэзлэн быдэ вуымтэослэн психиказы курадӟе, кӧняез ке соос пӧлысь воксё но инвалид луо, армие мыныны уг ярало. Таӵе югдурез ватӥсь ӧвӧл, со сярысь шара верасько шаерысьтымы Калыкез дышетонъя мнистерствоысь специалистъёс, врачъёс. Али огшоры школаосын кулэсъяло ни пичиысен кунгож сьӧр кылэз но куд-ог мукет предметъёсты муромытыса дышетон классъёсты. Туала школаын ортчоно реформаос, оло, югдурез тупатозы. Но тӥляд пиналды школае туннэ дасяське ни, соин ик малпаське, мар тӥледлы дуногес: солэн "витьёсыз-а", тазалыкез-а? Зэмзэ- а вормоз кадь тӥляд пиналды секыт программаез, яке тӥ сое гимназие чуртнаськоды эшъёсты, бускельёсты азьын ушъяськон понна? Асьмелэн уго ӵемысь озьы луэ, но малы одно пиналэз курадӟытонэз, мын но ачид институтэ, академие, аспирантурае пыр, кыӵе ке выль инвисъёс усьты. Нобель премия баты... Уд вормы? Вот уго. Малпаське ӧжыт, кӧня шуг-секытъёс пумиськозы на пичи дыдыдылэн-этедылэн улоназ, нош вормозы-а соосты азьланяз али ик пачкатэм ляб пельпумъёс? З. Рябинина. Озьы ужано! Шуиз шарканъёслы Кун Кенешлэн Тӧроез Асьме шаермы сокем бадӟым ӧвӧл ке но, котькуд ёрослэн кыӵе ке но аспӧртэмлыкез вань. Тани Шаркан район туж узыр му вӧй поттон интыосын. Быдэс республикаын соос тямыс ке, витез интыяськемын татын. Тросэз улос кивалтӥсьёс со понна шарканъёслы вожъясько. Ма, кыӵе, пе, соослэн сюлмаськонъёссы луыны быгато, соосты му вӧй сюдэ ке. Огласянь со озьы, дыр. Нош Шаркан ёрослэн администрациеныз кивалтӥсь Александр Аркадьевич Прохоров тазьы лыдъя: - Ёрослэн азинскемез меӵак герӟаськемын депутатъёслэн кенешсылэн но администрацилэн ог-огзэс валаса но быгатыса ужаменызы. Районэз азинтонъя программаос кутыку, ваньзэ чакламы, нокыӵе янгышъёс ӧм лэсьтэ. Соин ик ваньбур поттон кылем арын сярысь 146 процентлы будӥз. Ӵошатон понна ке верано, Россиын - 110 процентлы, Удмуртиын - 130 процентлы. Депутатъёс но администрация кык но ӝыны ар ӵоже ужамзылы йылпумъянъёс лэсьтыны малпало кык арня ортчыса асьсэлэн сессиязы. Нош таяз арняе, 1-тӥ августэ, шарканъёс ас улэм-вылэменызы тодматӥзы Кун Кенешлэсь Тӧрозэ Александр Александрович Волковез. Удмуртилэн вылӥ должностен адямиез та ёросэ ужан визитэн нырысьсэ вуылӥз. Соку ик вераны кулэ: шарканъёс вылӥ кивалтӥсь борды уно ӝожтӥськонъёсынызы ӧз тэбине, лэчыт ужпумъёссы вань ке но. Нырысь ик со - школаын югдур. Шарканысь шор ёзо школаын дышетскон интыос чакламын вал 520 муртлы, нош туннэ татын 1430 нылпи дышетске. Покчиос дышетскыны нылпи садъёсы ветло. Туала лыдзы ёросын уг кулэсмы. Тае лыдэ басьтыса, 10 ар талэсь азьло али сылӥсь школа вӧзы мукетсэ пуктыны кутскизы. Школалэн директорез Орлов Дмитрий Леонидович татчы ужаны кариськыкуз юн осконэн, дыр, улӥз, солы выль школаын ужаны кылдоз ни шуыса. Но 9 ар ӵоже директорын ужаса, солы ялан та секыт ужпум котыртӥ бергано луэ - 864 дышетскисьлы чаклам школалэн юртэз вылӥе уг ӝутскы. 1994-тӥ арозь лэсьтӥськон ужъёс кӧня ке мынӥзы, собере тыпак дугдӥзы. Кылем арын Чепца управлениысь лэсьтӥськисьёс ужзэс выльысь азьланьтӥзы, но коньдон тырмымтэен нош ик куспетӥ каризы. Республикалэн бюджетысьтыз та "долгострой" шуонлы туэ 2800 сюрс манет висъяны чакламын - вуэмын 791 сюрс манет гинэ. Но та коньдон быдэсак кошкиз кылем ар понна тыронъёсты ворсаны. Кун Кенешлэн Тӧроез Шарканын школа лэсьтонэз чакласа возёз шуиз. Валамон, туэ дышетскон арлы сое вуттыны нокызьы уз луы ни. Но вуоно арын кӧня ке классъёсты усьтыны тыршоно ни. Мукетыз Быгиысь шор ёзо школа, сокем вашкала ӧвӧл на кадь, 36 ар гинэ сылэ ай, но пулэсь лэсьтэм юрт малы ке туж ӝог куашканы кутскем. Туала куронъёсын дышетон-ужанлы понна со уг ни тупа. Му вӧй поттӥсьёс тупатъян ужъёслэсь уг палэнско, юртто. Но та гуртлы туж кулэ выль школа. Быги - Шаркан ёросын огез бадӟымез но йыг-йыг пыд йылаз сылӥсез черкогурт. Егитъёс нокытчы палэнэ уг кошко, дышетскыса берен татчы ик берытско. Дышетӥсьёс но золэсь. Тани туэ кык дышетскисьсы школаез зарни медален йылпумъязы, кыксы ик медальёссылэсь но школазылэсь данзэс утьыны быгатӥзы. Ольга Шамаева Пермьысь университетэ пыриз, нош Алена Хохрякова - Удмурт кун университетлэн историяя факультетаз. Сое туж возьмалозы ас школаязы ик, угось историен дышетӥсьёс татын уг тырмо. - Мон но та школаысь потӥ, визьтэм ӧй луы, - данъяськыса сямен шуиз "Восход" колхозлэн кивалтӥсез Анатолий Григорьевич Хохряков. Кивалтон уж борды басьтӥськыкуз солы 29 арес гинэ вылэм ай, шӧдтэк сямен 10 ар ортчем ини. Солэн верамезъя, Быгиысь му вӧй поттӥсьёсын школа пуктон сярысь огкыл гожтэмын ни вал. Жалясагес верано... бумагаос кытчы ке ышизы. Но ёрослэн кивалтӥсьёссы оскытӥзы, куинь ар куспын Быгиын выль школа луоз шуыса. Шаркан ёросын "Восход" колхоз огез устоез хозяйство. Колхозын 143 пала ужасьсы. Кыӵе ужасьёсын гинэ татын ӧм пумиськылэ - ваньзылэн синъёссы ӝуало. Арня талэсь азьло араны потӥллям. Вань комбайнёръёс ӵошатскыса сямен ужало, угось тодо соослэн арам-кутсамзы бордысь потоз колхозын вань ужасьёслэн уждунзы. - Кураськытэк улон понна милем гектарысь 19 центнер ю-нянь басьтоно - шуэ А. Г. Хохряков. - Кылем арын 16 центнер потӥз. Туэ малпаськом 20 центнер басьтыны. Оскиськом, чабеймы но туэ удалтоз. Сое тросэз хозяйствоос будэтыны уг дӥсьто, чабейлэн асьме дорын сыӵе сямыз вань: вить арлы одӥг пол удалтэ. Туэ быгатӥм парсьёслэсь лыдзэс но будэтыны. Корка пуктӥсьёслы кредитъёс кулэ ик вал. Тросэз семьяос огдыре лэсьтӥськыны быгатӥзы, но табере внукъёссы будо ни. Ми, журналистъёс, гуртъёсы потаса ляб но зол хозяйствоосты ӵемгес адӟылӥськом, соин ик милемыз, оло, шуггес ни паймытыны. Озьы ке но, таяз учыре ми но кивалтӥсьёсын ӵош абдраса кадь тодматским ёросысь фермерлэн Николай Иванович Собинлэн хозяйствоеныз. Кыӵе ужъёс борды гинэ уг вутскы 45 аресъем воргорон! Со зэмос кузё луэ 500 гектар музъемлы. Будэтэ картофка, горд кушман, ӵуж кушман, кубиста. Жуг-жагез нокытысь уд адӟы. Но туэ солэн тужгес но зол удалтэм чабеез. Николай Иванович вылӥ образованиен адями, пӧртэм кивалтон ёзъёсын ужамын, фермере райпоысь кошкем. Солэн хозяйствояз 25 тодмоосыз, ӵыжы-выжыосыз ужало. Гужемлы дораз ужаны ужтэк кылемъёсты кутылэ. Фермерлэн хозяйствояз тыршисьёс 1000 манет пала уждун басьто. Вань ужъёсты технологиез чакласа, одӥг нуналлы но ӝегатскытэк лэсьто. Музъем ужъёсын вырон сяна, фермер трос пудо но вордэ на, туннэ солэн 150 парсез но 100 скалэз вань. Техникаез тырмыт. Арысь аре фермерез одӥг ужпум сюлмаськытэ: кытчы кароно будэтэм-поттэм продукцизэ. Александр Волков сое тазьы буйгатӥз. Москваын, пе, ӝоген усьтӥськоз "Удмуртия" выль бадӟым магазин. Отчы ас вузъёссэс но сиён-юонзэс ужбергатӥсьёс но, фермеръёс но нуыны быгатозы. Али республикаын дасяське Удмуртиез азинтонъя программа... Котькуд ёрослы луонлык сётэмын отчы кыӵе ке куронзэ пыртыны. Шарканъёслэн одӥг куронзы герӟаськемын луоз из поттон карьерен. Бюджетысь коньдон тырмыт сюрылысал ке, туннэ ик ужатыны луысал республикаысьтымы эшшо 6 сыӵе каръеръёсты. Соос вань Дэбес, Алнаш, Селта, Як.-Бодья, Грах, Балезино ёросъёсын. Но туннэ нуналлы изъёсты поттон тыро-пыдо радъямын Шаркан ёросын гинэ. Карьерлэн быдӟалаез - 14 гектар. Туэ ӝыны ар куспын 2554 сюрс тонна из поттэмын. Со мынэ сюрес шобыртонэ но муослэсь удалтонлыксэс ӝутонэ. Муосы изваска поттон понна, Россилэн бюджетысьтыз кылем арын шарканъёслы 197 сюрс манет висъямын, туэ 145 сюрс манет чакламын. Но та дырозь коньдон ӧз вуы. Туж кулэ изъёсты пильылон машина. Сыӵе машина басьтыны юрттомы, шуиз Кун Кенешлэн Тӧроез. Нунал куспын А. Волков вуылӥз на Шаркан - Як. Бодья сюрес лэсьтонэ, трикотаж фабрикае. Нош ӝытазе Шарканысь кивалтӥсьёсын но депутатъёсын пумиськылӥз. Шарканъёслы тау кариз адӟем карымон ужамзы понна. Т. Банникова. ёТужгес но паймытӥз фермер Н. Собин. Солэн пиез Иван атае кадь ик луо шуэ. Туспуктмэъёсыз Н. Глуховлэн. Кин гожтоз устогес? Дэбесысь инкуазез утёнъя комитет но нылпи библиотека Удмурт Республикалэн 80 ар тырмонэныз валче конкурс ялӥзы. Конкурсэ ыстыны куремын кылбуръёс, зарисовкаос, веросъёс, мадёнъёс. Озьы уно адямиослэн сюлэм шунытэнызы кылдытэм чуръёслэсь ёрос сярысь книга вордскыны кулэ. Конкурсэз радъясьёслэн адӟемзы потэ инкуазьлы сӥзем гожтэмъёсты но. Йылпумъянъёс луозы 25-тӥ октябре. Вормисьёсты кузьымъёсын пусъёзы. Н. Павлов. Виль нуналлы - выль емышъёс Завьял ёросысь Ильинкаысь архитектурая но этнографияя музейын ужасьёс Виль шуыса нимаськись вашкала йылолэз ортчытыны ӟеч дасяськиллям. Гуртоосын пӧзьтӥллям выль чабей кеньырен така сӥлен ӝук. Ӝӧк вылзэс шулдыртӥзы асьсэлэн будэтэм картофказы, горд помидоръёс, жалем кияръёс, кушманъёс... Татын ик пӧраса кунооссэс утялтӥзы перепечен, мильымен, табанен, сяртчы но ӵуж кушман нянен, пӧсятэмен. Удмурт кырӟанъёсын, шудонъёсын шулдыртӥзы кунооссэс. Кунооссы нош сӥё-даноесь вал: нациосын ужан политикая министр Н. Н. Мусалимов, "Удмурт кенешлэн" тӧроез В. К. Тубылов, культурая министрлэн юрттӥсез А. Т. Христофоров, Татарстанысь Сарсак-Омга гуртысь лыктэмъёс но газет-журналъёсын, чагыр экранын ужасьёс. Виль нуналэз тужгес но шулдыртӥзы, удмурт шӧм пыӵатӥзы Пироггуртысь но Лудорвайысь кырӟась-верась чебер кенакъёс. Г. Васильева. Туспуктэмъёсыз В. Беломорскихлэн. ШӦКЫЧ Владимир КОТКОВ Петыръёслы Со висёнэн быдэс вошке ымныр. Со висёнэз умой тодэ Петыр. Сыӵе дыръя уд кӧлӥськы уез, Сыӵе дыръя уйылӥськод дырез. Со висёнэз уг шуо кадь палась, Сыӵе дыръя ӝуа пырак мылазь. Сыӵе висён улэ йыр котырын, Нош выжыез солэн ӟенеликын. Валад ни, дыр, мадиськонме, Петыр? Со висёнэз шуиськомы... макмыр. Одӥг гинэ малпан соку йырад, Нош мон тани, пинь висёнэн нерад. Бекче дурын � Я, лэзь на ай отӥ оген. � Уз лэзьы, дыр, Со � Диоген. Уть ай, бекче пушкы пегӟе. � Ма-а... Вань улонэз солэн � бекче. � Кӧтыз тырем бере потоз, Со Диоген ӧвӧл � Тордос. Лӥятӥз � Скалэз сямен, Тонэ, шуо, � ӝыны юртъер. � Кышноезлы вазе со йыркурен. � Ачид но тон, Пороз выллем мекей. Только... Сюро пужей. Святой Аслыз куре со мукет ним: Йырез, пе, висьытэ ни нимб. Валэктэ бокро � Малы югыт Адямилы? Шунды солы малы? � Мудӥсь шыръёс паймо, Мудӥсь шыръёс дэймо. Талы тазьы вера бокро: � Сьӧд ужъёсын соос выро. Шунды шорын чылкытатско. Шунды шорын Чылкыт адско. Атас Тазэ но ӵукнаез данъяз, Гульым тыраз чоръяз... Куно ке нош, Атас лымез дунъяз � Ах! шуыса ӟузьяз. Атас кылбурчилы укша, Кулон чассэ ке но ушъя. Макня Вал доры Сезьы мынэ ке, Со сезьы шат? Со � макня! Пыриськись Тӧлбер макня! Тазалык Вазь кисьман кизьнон кузьма: Британиысь тодосчиосын аллергилы эскеремын вал вить сюрс адями. Ӝыныезлэсь тросэз нылкышноослэн но 28 процентэз пиосмуртъёслэн та висёнзы шараямын. Таӵе дыръя тодосчиос эскеро выжыез. Соя тодмо луиз, аллергиен курадӟись пинал ӵемгес вордо вылэм вазь "кисьмась" нылкышноос. Кылсярысь, 12 арескысен быдэ вуэм нылкышноослэн азьланяз ваньмызлэн сямен нылпиоссы аллергиен вордско, 13-14 арескысен ке - 30-32 процентэзлэн, арлыдоенгес ке - ичигес. Доктор Кзу тае валэктэ эстроген нылкышно гормонлэн огъя иммунитет вылын шӧдӥськеменыз. Угось 40-50 аресъем нылкышноослэн вир воштӥськонзы дугдэм бере, соос пӧлын аллергиен курадӟисьёслэн лыдзы чутрак кулэсме. Алексей ЕЛЬЦОВ Нюлэс кушын Басня Одӥг пол нюлэс кушын Вераськон потӥз таӵе: Кин золгес луэ кужмын, Интыез сикын кыӵе?.. Котькинлэсь азьло коӵо Кыӵыртӥз кыӵыр-коӵыр-р! Мон, пе, котькинлэсь куӵо, Озьыен, визьмо укыр. � Кар-р! � вазиз шораз куака, � Тон пичи, шыпыт ул ай. Мон вылынгес пукисько, Кеськисько � чиге улвай. � Крок! � пуксиз вӧзаз кырныж, � Пырыны мон азьпала Гижыды укыр на ныж, Тӥ шоры сяла сяла. � Дугдэ тӥ, ишкам быжъёс, Кылем гондэс пурӟыто. Шат луо кужмо бурдъёс? Коньы пиньзэ ӟар поттэ. Собере вуиз на нӥзь, Сьӧраз ик тэтчиз балян. Гондыр но мар ке уг изь � Гуысьтыз потӥз чаляк. Лушкемак лыктӥз ӟичы, Луд кечъёс, койык, мушыр... Кион лекция лыдӟиз, Кесяськыса нюлэс тыр. Нунал, кык ӵашетӥзы, Курлазы одӥг-огзэс... Кокчаськизы, йырйизы, Но ӧз шедьтэ кужмозэ. Кыстӥськысал, дыр, кема Кенешон нюлэс кушын. Котькинлэн кӧтыз сюма � Сиськытэк уз лу кужым. *** Нош кин кинэ сие � Тодӥськоды сое! АРХИВЫСЬ ДОКУМЕНТЪЁСЪЯ Удмуртия ХХ дауре 1932-тӥ ар ВЦИК-лэн Президиумез 1-тӥ январе кутэм постановлениеныз Вотка автономной областез татын дауръёс ӵоже улэм выжы калыкъя нима. Областьысь Святогор, Нылга-Жикья, Выль Мултан районъёсты быдто. Сӥзьыл область 18 ёрослы люкиське. Ижын азьланьтӥсько мотоцикл заводэз лэсьтон ужъёс. Озьы странаын выль удыс кылдэ. Адӟылымтэ ӝоглыкен тыршо Ижысь ТЭЦ-ез лэсьтонын. Сое 7 толэзь куспын йылпумъяло. Пыӵал поттӥсьёс производствозэс паськытатэм сяна, продукцизэс умоятыны но сое пӧртэм пумо карыны тыршо. Можгалась нюлэс комбинатын йылаз-пумаз вутто пул пилён цехсэс. Уваысь та выллем комбинат но нырысетӥ продукцизэ сётэ. Ижын но Глазовын ужаны кутско кирпич шуккон но мебель поттон заводъёс. Воштӥськонъёс ортчизы нимаз ужасьёс пӧлын но. Уноез артельёсы огазеяськизы. Зура районын одӥгез артель усьтӥз пияла поттон завод. Шарканысь чугун кисьтон завод интые кылдытӥське "Металлист" артель. Глазовын ужаны кутске "Металлопром" артель. Май-июнь толэзьёсы лыдъяны-чотаны дышетонъя ужрад ортчиз. Гуртъёсы потӥзы ударной бригадаосысь рабочийёс, культура удысын но пӧртэм организациосын тыршисьёс. Нимысьтыз школаосы 55 сюрс адями гожтэмын. 7-тӥ ноябре йылпумъяськиз Ижысь Горький ульчаысь специалистъёсты дасянъя юртэз лэсьтон. Отын ужаны кутскизы Ижстальзаводлэн вылӥ курсъёсыз но индустриальной техникум. Гужем Иже вуиз нырысетӥ автобус. Со герӟаз городлэсь шор люкетсэ Казань вокзалэн но Сенноез Карлуд площаден. Гурт калыкез огазеянлэн урод пытьыез адӟиськиз ни 1932-тӥ арын � уно адямиос сютэм кылизы. Быронлэсь утиськыса, куд-огез лушкаськыны кутско. Августэ кутэмын закон, кудӥзъя колхоз ваньбурез киултэм понна адямиез ыбыны яке 10 арлы тюрьмае келяны лэземын. Бусыосысь кылем ю шепъёсты бичамзы понна гинэ сюрсъёсын адямиосты эриклэсь люкылӥзы. 2110 муртэ суд ыбыны дэмлаз. Коллективизацилэн йылсо дуръёсыз крестьянъёслэсь гинэ ӧвӧл, мукетъёсызлэсь но огсыр улонзэс мырӟытъязы, политикаысь пӧртэм кужымъёсты вырӟытӥзы. Май толэзе паськыт вӧлмиз "СОФИН" уж (финн выжыысь калыкъёсты мозмытонъя огазеяськон). Пытсэт улэ кыскемын вал Куӟебай Герд но мукет удмурт интеллигентъёс. 27-тӥ декабре потэм постановлениея СССР-ын паспортъёс сётъяло, адямиосты улон интыоссыя пусъё. Озьы гурт калыкез, паспортъёстэк кельтыса, эшшо но юнгес серметало. Т.ВАСИЛЬКИВ, Удмурт Республикаысь Кун архивысь валтӥсь специалист. ? Воткинскысь дышетӥсьёслэн конференцизы. 1932-тӥ ар. Кылӥськоды-а гырлыез? Та нуналъёсы Япониысь Хиросима но Нагасаки городъёсын шуккиськозы гырлы куараос. Соосты кылыса, котькуд адямилэн сюлмыз дыректоз, огдырлы ке но йыраз малпан чилектоз: шонер-а улӥськомы, мар луоз ӵуказе, ар ортчыса... 55 ар талэсь азьло США, быдэс дуннеез кышкатон вылысь, Хиросима вылэ уран инъет вылын лэсьтэм атом бомба куштэ. Сутскыса, пуштэм тулкымлэсь но радиацилэсь 141 сюрс адями быре. Та шимес учыр бере кык нунал гинэ ортче - атом бомба Нагасаки городэз пазьге. Нош ик уно сюрс адями бырыны шеде. Та вакытысен атом бомба дуннеын закон мактал луэ, пӧртэм кунъёсы вӧлме. Нош Хиросима гырлы 55-зэ ни чузъяське. Со нош но нош тодамы вайытэ: таӵеез ноку но луыны кулэ ӧвӧл. Г. Юсаев. 1� � Г = Д Д Е Ф Ф � Г а=Р/яя 2 А! 8 Ё9Р Р Йылпумъянъёс лэсьтэ министр Удмурт Республикаысь югдурез утёнъя министр милициысь генерал-лейтенант Владимир Щербаков алигес ортчем пресс-конференциын йылпумъянъёс лэсьтӥз удысэзлэн ӝыны ар ӵоже ужамезлы. Лыдпусъёсты учкыса адӟиськод, йыружъёслэн лыдзы асьме дорын кӧнялы ке кулэсмемын, яке 9,8 процентлы. Огъя йыружъёс лэсьтэмын 14 сюрс 838, со пӧлысь тужгес но секытъёсыз 8980. Кылем арын куать толэзь ӵоже милиция шараяз 71,2, туэ 74,5 процентсэ. Уногес йыружъёс лэсьтӥсько ваньбурез лушканъя но киултонъя, адямиез вӧсь каронъя. Адямилэсь ваньбурзэ талан будӥз Ижевскысь Первомай но Октябрь ёросъёсын. Нуназе куазен талало зарни арбериосты - пель угыосты, жильыосты, кульчоосты. Тулыс уно гинэ вал мӧйыослэсь пенсиоссэс киултон учыръёс. Трос гинэ улон интыосы пыраса лушкаськон учыръёс. Йыртэмасьёс квартираосты качало тунгонъёсы усьтон бырйыса, форточкаостӥ пыраса. Али МВД утча 741 йыртэмасез. Нош 442 мурт ивортэк быремен лыдъяське. Огъя югдурен тодматскон понна таблицаез ӵошатом. Удмуртиын йыружъёсъя югдур пусъемын кулэсмиз яке будӥз ужъёс шараямын ваньмыз (процентэн) эскеремын 1999 2000 Огъя йыружъёс 14838 - 9,8 11014 71,2 74,5 Виён учыръёс 169 - 19,1 177 93,7 94,1 Адямиез вӧсь карон 306 + 1,7 243 84,7 86,2 Эриктэмаҥ - 14,2 85 91,3 93,4 Таласькон 1001 - 2,1 627 51,7 56,9 Ваньбур лушкан 6599 - 14,3 3877 52,3 58,0 - улон интыосысь 1750 - 20,6 1750 40,4 54,2 - транспортысь 206 - 22,8 49 43,8 39,2 Транспортэз лушкан 104 - 24,1 67 86,6 72,8 Пӧяськыса коньдон поттон 492 - 8,7 324 78,1 80,6 Юромо тыл понон 28 - 22,29 53,8 52,9 Сюрес вылын шудтэм учыръёс 193 - 21,5 164 88,6 90,6 - адямиос быризы 54 - 23,9 39 81,5 83,0 Эрказъяськон 774 - 18,4 700 94,1 93,6 Кивалтӥсьёс пӧлын йыртэман 74 +34,5 65 - - - со пӧлын кузьмаськон 26 +36,8 17 Выт тыронъя йыружъёс 102 + 72,9 88 - - Пӧяськыса коньдон лэсьтон 19 - 42,4 2 - - Наркотикен герӟаськем йыружъёс 541 + 18,9 526 - - Экономика удысын йыружъёс 897 +11,4 675 - Лыдпусъёс умой возьмато югдурез. Берло дыре улонэ мургес пыӵа кузьмаськон, выт тыронлэсь палэнскон, наркотикъёсын вузкарон. Зэмзэ но, наркобизнес "сяськаоссэ" зол гинэ лопыръя кадь. Туэ 18,9 процентлы йыружъёс уногес вал. Министерство та висёнэн нюръяськонзэ кужмоятэ. Ортчытэмын нимысьтыз "Мак" но "Допинг" ужрадъёс. Мае гинэ усыкмытӥсь вузэн кырмемын 38 мурт, нош ӝыны ар ӵоже 681 адями. Сюлмаськытэ дуно но сьӧд кортэн вузкарон-басьтон. Лицензитэк ужамзы понна ворсамын кортэз кутон 68 инты. Выжыоссэ кужмогес лэзе аракы юон. Туэ гинэ юонэн ӝегатэмын ни 69767 адями, со кылем арынлэсь 4,1 процентлы уногес, сазьтӥськонниын "кунояз" 42885 мурт, 11,1 процентлы уногес. Милиция штраф сётӥз 49675 юисьлы. Юон вӧлме быдэ вуымтэос пӧлын. Ульчаосын юыса ветлэмзы понна 557 протокол гожтэмын. Быдэ вуымтэос пӧлын йыружъёс кык поллы будӥзы Воткинск, Сарапул, Дэбес, Кизнер, Пичи Пурга ёросъёсын. Бадӟым изъян гинэ ваиз кун ласянь кудӟытӥсь юонъёслы дунъёсты будэтон. Адями утчаны кутске дунтэмгес кабак, юэ одеколонэз, лосьонэз, мукет суррогат шуонъёсты. Выльысь будӥз аракы пӧзьтон. Сое шӧдыса ик сахарен вузкарисьёс дунъёсты шӧдскымон будэтӥзы. Уно гинэ урод аракыез юыса кулӥсьёс. Январе-июне гинэ таламын 45 сюрс литр лушкем поттэм кабак, со ог 2 миллион манетлы. Шараямын лушкем ужась 6 цех. Одӥгез вузкарись предприятие апреле ӝегатэмын лицензитэк вузкаремез понна. Солэсь 16 сюрс 400 доллар таламын. Коньдонзэ та вузкаронни Германие келяны дасяське ни вылэм. Туэ тылпуос 13,1 процентлы кулэсмизы ке но, соос ӧжыт, шуыны уз луы. Тани лыдпусъёс: Тылпуос но лыдпусъёс - 1999-тӥ-2000-тӥ аръёс 1999 2000 Будӥз яке кулэсмиз (процентэн) Ваньмыз тылпуос 1038 1136 - 13,1 - со пӧлысь Ижевскын 516 394 - 23,6 - гуртъёсын 529 479 - 9,5 Изъян адӟемын (миллион манетэн) 11864 681 - 42,5 Тылпуын быризы 61 78 + 27,9 - со пӧлын нылпиос 4 4 - Сутскизы но сӧсырмизы 77 78 + 1,3 Тылын быдтэмын: - коркаос но юртъер котыръёс 461 500 + 8,5 - пудо 94 118 + 25,5 - ю тысь (тоннаен) 4 - - - чурыт пудо сиён (тоннаен) 42 176 4,2 поллы - техника 36 17 - 52,7 Тылпуослэн мугъёссы: - юромо тыл понон 38 31 - 18,4 - электрокужымен ужась приборъёслэн тӥяьскемзы 333 270 - 18,9 - сваркая ужъёс 18 14 - 22,2 - урод гуръёс 124 128 + 3,2 - чакласькымтэлэн мугез но тамак кыскон 433 413 - 4,6 - пиналъёслэн тылын шудонзы 192 140 - 27,1 - тодмотэм мугъёс 27 14 - 48,1 - юонэн герӟаськем тылпуос 183 199 - 8,7 Тылпуосын нюръяськисьёс кылем арын быронлэсь утизы 170 муртэ, туэ 64 адямиез. Ваньбур кылем арын утемын 82 694 сюрс манетлы, туэ 76442 манетлы. Куать толэзьскын сюресъёс вылын 591 шудтэм учыр пусъемын, со пӧлысь 217-ез вал Ижевскын. Ёросъёс но городъёс пӧлын та ласянь висъясько Завьялово (44 учыр), Можга ёрос (27), Ува (23), Сарапул город (29), Глазов (25), Воткинск (31). Сюресъёс вылын быриз 95 мурт, сӧсырмиз 666 адями. Уноез авариос пото юэм водительёслэсь но. Туэ правилоосты чакламтэзы понна штраф тыроно луз 176490 водитель, правоеныз люкиськиз 2472 адями. Озьы ик штраф улэ кыскемын 8883 пыдын мынӥсь-ветлӥсь. Ӝегатэмын 435 лушкам транспорт. Удмуртиысь сюресъёс вылын шудтэм учыръёс пусъемын таӵе мугъёсъя: 1999 ар 2000 ар - пыдын мынӥсь-ветлӥсез лёган 324 315 - транспортэн ваче шуккиськон 146 112 - АМТ-ен кымалскон 105 83 - могӟетэн шуккиськон 82 20 - велосипедистэз шуккон 16 19 - сылӥсь транспортэз шуккон 9 9 Нош кызьы нюръясько йыружъёсын шаерысьтымы ёросъёсын но городъёсын? Нош ик лыдпусъёс Городъёс но Ваньмыз Кӧнялы будӥз Йыружъёс ёросъёс йыружъёс яке кулэсмиз шараямын пусъемын (процентэн) (процентэн) Устиновъёс ёрос 1014 - 21,1 74,4 Индустриальной ёрос 1333 - 1,5 71,7 Ленин ёрос 1113 - 13,8 69,4 Октябрь ёрос 1335 - 18,6 65,1 Первомай ёрос 1430 - 0,3 66,8 Ижевск 6127 - 11,5 66,1 Воткинск ёрос 1313 - 15,1 74,9 Воткинск 1023 - 20,1 73,8 Глазов ёрос 237 - 14,7 79,9 Глазов 1024 - 2,6 69,2 Можга ёрос 460 + 2,9 83,4 Можга 200 + 2,8 80,1 Сарапул ёрос 330 - 6,5 74,2 Сарапул 1218 - 14,5 67,7 Алнаш ёрос 175 + 11,6 85,5 Балезино ёрос 260 + 20,4 78,7 Вавож ёрос 139 + 29,9 93,7 Грахово ёрос 78 - 2,5 86,8 Дэбес ёрос 136 - 10,5 95,2 Завьялово ёрос 592 - 26,5 70,1 Игра ёрос 291 - 14,2 87,8 Камбарка ёрос 245 - 9,6 87,4 Каракулино ёрос 140 - 10,8 83,1 Кез ёрос 189 + 19,6 93,7 Кизнер ёрос 236 + 10,3 92,8 Киясово ёрос 123 + 9,8 94,0 Красногорье ёрос 108 + 17,4 93,5 Пичи Пурга ёрос 265 + 8,2 89,1 Селта ёрос 111 + 2,8 97,4 Сюмси ёрос 170 +34,9 81,5 Ува ёрос 354 - 9,5 77,8 Шаркан ёрос 120 - 24,5 94,1 Юкаменск ёрос 78 - 10,3 87,1 Якшур-Бодья ёрос 252 - 18,2 83,9 Яр ёрос 111 + 3,7 95,2 Табере ӵошатоме бускель улосъёсысь но республикаосысь лыдпусъёсты. Кызьы нюръясько йыружъёсын отын но асьме дорын? Улосвыл Ваньзэ пусъемын Кӧнялы будӥз яке Йыружъёс йыружъёс кулэсмиз (процентэн) шараямын (процентэн) Россия 1495709 - 1,5 77,0 Удмуртия 14838 - 9,8 74,5 Пермь улос 40296 - 8,7 67,9 Киров улос 15619 +6,3 78,2 Татарстан 34032 - 2,8 77,2 Ульянов улос 11821 + 16,5 77,1 Оренбург улос 21441 - 3,5 81,8 Башкортостан 23947 +5,8 86,6 Йыружъёс со улон-вылонмес возьматӥсь аспӧртэмлыко барометр выллем. Экономикаын югдур умой ке, улон но ӟеч пала воштӥське, йыружъёслэн лыдзы но кулэсме. Кызьы верало тодӥсь адямиос, югдур та выллемгес вылэм Быдӟым Отечественой война бере аръёсы. Страна пыд вылаз ӟеч-ӟеч султэм бере гинэ йыружъёс кулэсмиллям. Оскем потэ вылэм, Россимы но, Удмуртия но матысь дыре со нюрысь потыны быгатозы шуыса. Н. Байтеряков. Республикаысьтымы югдурез утёнъя министр, милициысь генерал-лейтенант Владимир Щербаков. � ӧ ъ 3 у б р С о ц л Б и Г ф � ӧ q а q Ё q С q ь q # q О q q q � q А q н q q Б q т q ӝ q П q ш q q - �ь<ьг К q о q � q В q х q q Ё q q q Ь q 3 q а q Ӟ q � q Ф q р q # q @ q - �ь<ьг @ З q } q Ӥ q ӧ q Р q к q q 0 q Г q и q Ё q Ж q г q q Ф q ф q � q " q - �ь<ьг " б q т q � q В q Э q ъ q q : q � q � q г q q ) q Н q к q Ӝ q � q В q - �ь<ьг В в q э q q 2 q М q ц q � q ӝ q q Х q с q q ) q И q д q � q � q � q - �ь<ьг � Ы q ш q q : q У q п q ҥ q � q Д q ж q ю q р q � q Ь q ч q q / q К q - �ь<ьг К г q � q � q Е q С q ц q � q Б q Г q Д яя - �ь<ьг - ИА�.яяб ";0 Й- Е ?Р Р И( Д " Е яяяя Тимес Неw Роман Цыр ТимесУЦД Гурт улон Музъем - со бадӟым политика Юрий Аркадьевич Чураков - егит председатель, вордскемын крестьян семьяын. Йылпумъяз Москваысь Тимирязев нимо гурт удысъя академиез. Валтӥсь агроном луыса, куинь ар ужаз вордскем гуртаз "Ленин сюрес" колхозын, 1997-тӥ арын июль толэзьысен кивалтэ "Россия" колхозэн. Спортсмен. 8-тӥ классэз йылпумъямез бере басьтэмын вал Москваысь Олимпийской резервез дасянъя школае. СССР-лэн сборнояз шедьыса, ӝыны Европаез адӟиз, вуылӥз ваньмаз сямен азьвыл социалистической странаосы. Гуртын будэм муртэ, вуоно агрономез, отын но бордаз кыскылӥз музъем. Вань кылэмез-адӟемез юрттэ солы туннэ туала ужаз. - Юрий Аркадьевич, трос гинэ вераськонъёс бергало музъем котыртӥ. Дауръёсын калыксэ сюдӥсь-вордӥсьмы шедиз политикъёслэн лэчыт шаерзы улэ. Егит председатель, дуннеез адӟем мурт, кызьы учкиськоды югдурез юромо ӟырдатыны вырисьёс шоры? - Мыным со чик но уг кельшы. Европаен ӵошатоно ке, асьмелы но удмурт музъем выламы вылӥ урожай басьтыны, ӟеч пудо вордыны луонлыкъёс шедёзы. Отын бусыоссы пичиен-пичиен люкылэмын, фермеръёслы, кооперативъёслы сётэмын. Бадӟым хозяйствооссы ӧвӧл. Будэто пайда ваись культураосты. Зэм, отын куазь небытгес, техниказы золгес, ужан дисциплиназы юнгес, продукцизылэн ӟечлыкез вылӥынгес. Со понна асьмелэн кӧня гыроно-кизёно муосмы! Ужа но ужа, вӧл-вӧл бусыостэ "Зарни пуйылы" берыкты. Тӥни ма бордын странамылэн, республикамылэн улон ӧрез но кужымез. Соослэн сыӵе луонлыксы ӧвӧл. Мон лыдъямъя, музъеммылэсь котькуд гектарзэ быгатыса кутоно ке, техника асдунзэ одно ик берыктоз. Асьме хозяйствоосын шӧдскымон улӥын муослэн удалтонлыксы, сое ӝутыны номырин - государство ласянь юрттэт (дотация) быриз. Нош Европа, Америка, дуннеысь гурт удыс быдэсак сямен улэ но азинске ӵапак та амалэн. Басьтом Голландиез ик. Музъем ужанэ бюджетысьтызы 70 процентэз кошке вал, берло дыре - 50 процентэз, со но туж шӧдскымон. Нош Россилэн бюджетаз та лыдпус 5 поллы ӧжытгес, вылаз ик, куазьмес лыдэ басьтоно на. Тӥни малы музъем арысь аре начарме, пудолэн йырыз кулэсме, техника 80-90 процентэз вужмемын. Гурт удыслы 2-3 арзэ ӧз ке юрттэ, отӥяз мар луоз, вераны секыт. - Та бордысь ик уг пото-а гыроно-кизёно муосты нимаз кузёослы вузан сярысь вераськонъёс? - Сыӵе политикалы мон чутрак пумит ӧвӧл. Кин быгатэ - мед басьтоз, мед ужалоз. Но вань музъемез юдэсъёслы вандылыны уг яра. Зэм, приватизация улсын со быдэсак сямен пайёслы люкылэмын ни. Ми дорын но вань нимазы потыса ужасьёс. Мыным со уг кельшы, малы ке шуоно, ӟеч интыос пашмо. Мукет ласянь ке учконо, музъемез вузлы пӧрмытыса, кин гинэ сое басьтыны быгатоз? Крестьян калыклэн моӵез уз сузьы - дуныз вормонтэм луоз. Та сярысь тросэз али уг тоды на, нош батраклы пӧрмытӥсь сюрес кемалась дасямын ни. Кышкатон понна гинэ озьы уг верасько, музъемтэк кылем мурт, батраке сяна, кытчы-о мыноз на? Россилэсь узырлыксэ, музъемез киултоз Валютая дуннеысь фонд (МВФ). - Юрий Аркадьевич, музъемез пайёслы люкылыса, калыкты ӟечгес-а улыны кутскиз? - Та уж лэсьтэмын вал мон лыктытозь, 1982-тӥ арын Указ потэм бере. Милям 600 пайщикъёсмы ладъясько, котькудӥныз огкыл гожтэмын. Но пай понна коньдон ӧм тыре на - хозяйстволэн поттэм пайдаез сомында уг люкаськы. Но - керӟегъяськонэз, шугъяськонэз тырмыт гинэ. Вань ни дивидент курыса кышкатъясьёсыз, пайзэс вузаны вырисьёсыз но. Пайщикъёс сярысь ке верано, музъемзэс ас мылкыд каремзыя колхозэ берыктэмзы уг поты ни, нош соос пенсие кошкизы ке, нылпиоссы тросэзлэн городын яке Играын уло, ужась колхозниклы ма кылёз на? - Югдурез воштон вылысь, асьтэос ма дэмласалды? - Берен колхозлы сётыны, коллективной хозяйство гинэ шуг-секытысь потыны быгатоз, социальной удысэз возёз. Шонер, соос пӧлын но банкрот улэ шедемъёсыз вань. Тани ми бордамы басьтӥм бускель совхозэз, югдур умой пала воштӥське кадь. Но техникаез выльдон ласянь секыт. Кылем арын одӥг МТЗ-80 трактор, жатка, силос утялтон комбайнлы воштос ёзъёс басьтӥм. Ваньмыз туж дуно. Одӥг ошез туннэ вузаськом ке 3 сюрс манетэн, 1 комбайн понна гинэ быдэс ферма пудо будэтоно, тӥни малы нимаз люкиськыса ужан асьме дорын пайдаен уг берытскы. 1999-тӥ арын ик "Чутырский" СПХ-ысь но Киров областьысь басьтӥм трос йӧл сётӥсь скал выжы, шорлыдын йырызлы быдэ 8 сюрс манет тырим. Ӝыны миллион тыр элита ю тысь кидыс ваим. Мынам малпанэ одӥг: племенной но селекционной уже кӧня коньдон понод - сомында ик пайда басьтод. Сотэк туннэ банкрот луод. Тысё культураос пӧлысь тужгес но удалтэ йыды, шумпотто чабей, сезьы, сьӧдчабей, кӧжы, етӥн. Етӥн сярысь нимысьтыз вераны кулэ, дыр. Сое будэтонъя республикаын кутэмын целевой программа. Озьыен, луонлык вань тросгес кизьыны, со чотын коньдон поттыны. Зураысь етӥн сэстӥсь комбинат продукция понна уксёзэ соку ик берыктэ. Лыдъяно- пертчоно ке, сӥль будэтон гинэ колхоз понна ыштонъёсын берытске, тысё культураос, йӧл кыскон ужало экономика вылэ. Тӥни малы вань сюлмыным мон коллективной амалэн ужан понна. Колхоз ке ӧз луы, кин дунтэк яке дунтэм дунын сётоз пенсионерлы ю тысь, транспорт но мукетсэ? Кинлы кулэ луоз на быдэс улонзэ музъем ужлы сётэм мурт? - Шедёзы му вӧй чотын, приватизация улсын узырмемъёс... - Музъемлэн туала кузёезлэсь ӟечгес кузё уд шедьты ни. Выль "кузёос" ӝог сюрозы, дыр. Соос бодыен, урысэн жугыса, крестьянъёсты ас вылазы ужатозы. Нош колхозлэн председателезлэн урысэз одӥг: ог-огдэ валаны тыршон, государство понна тросгес продукция поттон. Адями ас интызэ дунъяны быгатэ ке, талэсь умоез ӧвӧл ни. Му вӧй поттӥсьёс сярысь кылпум ӝутскиз бере, мон меӵак верало: колхозлы соослэсь номыр но уг кыльы, саптам, бугыртэм возьёс но лудъёс сяна. Штрафъёс чотын гинэ коньдон кассае пыре. Нош ӟеч ужасьёсмес, специалистъёсмес соос качазы, колхозэз та ласянь гольык кельтӥзы, шуыны луоз. Отын уждун сюрсъёсын тыро, ми дорын ай алигес пунэмаськемъёсмес кызьы но озьы пумаз-йылаз вуттыны выриськом. Котьма ке но, ужась киослы ми ум ёрмиське. Дорамы лыкто леспромхозын ужасьёс, отын воксё номыр уг тыро, НГДУ-ысь кулэстэмъёс яке уллямъёс. Ма карод, ми котькудзэ кутӥськом, сотэк нокинэн ужаны луоз. Адями валасез вала. - Асьмелэн улонмы музъем бордын бере, тӥ малпамъя, кулэ-а та вераськонэз калык пӧлын нуыны? - Одно ик. Городын улӥсьёс гинэ ӧвӧл, гуртоос но уг валало, кудпала берыктозы Музъем сярысь кодексэс выль законъёсты кылдытӥсьёс. Мон огзэ верало: музъем ласянь республикаямы юалляськон ортчытӥзы ке, нош сыӵе вераськон кемалась ӝутъяське ни, калыкмы ассэ ачиз музъеменыз ӵош вузалоз. Тӥни кытчы вуттоз туж валаса, визьмо дасям референдум. - Юрий Аркадьевич, тӥ егит кивалтӥсь, вуоно даурын самой кын куртчон вакытты. Кыӵеен син азяды пуксё "Россия" колхозды? - Ужаны ке ӧз люкетэ, дотация басьтытэк но пыд выламы султыны кужыммы тырмоз. Но музъем пӧрмоз, со али ик шӧдӥське, туж бадӟым политикалы, малы ке шуоно, Россилэн талэсь бадӟым узырлыкез ӧвӧл ни. Соин ик ваньзэ быгатонозэ лэсьтоно, сюдӥсьмес-вордӥсьмес ас киямы возён понна. Старанамылэсь ортчем сюрессэ тодэ ваёно ке, котькуд вапумез одно ик герӟаськемын музъемез люконэн-басьтонэн. Тодмо ӟуч писатель Ф. М. Достоевский огаз статьяяз гожтӥз: "... кто в стране владеет землей, те и хозяева той страны во всех отношениях". Мукетыз быдӟым классикмы Л. Н. Толстой меӵак но вакчияк гожтӥз: "Продавать землю - великое свинство". Соослэн верам визьмо кылъёссы туннэ нуналлы, туала политикъёслы тупатыса кельтэмын кадь. Гурт удыс, номыр шоры учкытэк, ялан выльдӥське. Дасяно но ӟеч, оскымон кивалтӥсьёсты. Азьланез, мон солы юн оскисько, туала егитъёс киын. Соослэн быгатонзы но, кужымзы но тырмоз, Европалэсь бере кыльытэк ужаны, кин тодэ, оло, азьпалтыны но. Ушъяськон, ас дандэ ӝутыны вырон понна мон сое уг вераськы, гуртын улэ чылкыт сюлэмо, тыршись сямо калык. Соин ӵош котьмае вормыны луоно. Людмила Медведева. Игра районысь "Россия" колхозлэн председателез Ю. А. Чураков. Туспуктэмез Владимир Камашевлэн. Шудэн шудо шудоос? Шудо луэмез но, улэмез но ваньмызлэн потэ, дыр. Нош шудэз котькудӥз ас сяменыз вала. Асьме пӧлын али ӵем дыръя кылод тазьы верамез: ""оньдонэз вань ке - адями шудо, соку квартира но, машина но, яратӥсь кышно но луозы..." Коньдоно муртлэн шудэз сярысь вераны шуг ай. Коньдонтэк, кызьы Омар Хаян, ёрмисезлы чебер дунне но пеймыт четлык кадь". Коньдон, коньдон, шудбур... Амалтэк Чечня тодэ лыктэ. Отын котрактъя ожмаськисьёслы куинь толэзь куспын 40-60 сюрс манет, кытӥяз тросгес но коньдон тыро. Ваньмыз-а меда отчы мынысалзы? Валамон ини, кузь коньдон куртчылӥське, но ӟучъёс шуэмъя, уксёлэн зыныз уг поты. Мукет сяменгес улэмед потэ ке, берга, эскеры". Чечняын кылдэм югдур сярысь асьмеос рос-прос ноку номыр но ум тодэ, дыр. Шонерак вераса, со бадӟым политикъёслэн выронзы. Шуо, нефть, газ, национализм. Кавказ калыклэн виразы ожмаськон сям пыӵамын, пе. Нош одӥгез тодмо: ваньмыз со коньдонэн, долларен чечня музъемен герӟаськемын. Нош ми маин янгыш? Ужаськом, ужаськом но уждунмес ум адӟиське... Яратэ-а, уг-а калык ожъёсты но вир кисьтонэз, нош оже одно мыноно луэ. Мукет сямен учкыса, таӵе малпанэ вуоно: калык ожъёстэк одӥг минут но улыны уг быгаты кадь. Адямилэн кылдэмез дырысен лыдъянтэм-чотантэм вир кисьтонъёс в_ӟал ини. Вашкала дырысен ожгарчиосты дунъяло но данъяло. Нош малпано ке, ма понна? Адямиосты быдтэмзы понна? Толсур толэзе "Металлург" культура юртэ ОМОН-ысь егит пиосты ватыны трос калык люкаськемын вал. Малы асьмеос адямилы ӟеч кылъёсмес вераськомы улонысь кошкемез бере гинэ. Улэп дыръяз верасалмы ке, оло?.. Люкаськем калык азьын кивалтӥсьёслэн вераськемзы пу мунёоослэн чеберъяськемзы кадь мыным потӥз, геройёс сямен, пе, кулӥзы... Нош куанер егитъёслэн дор палазы тырмыт коньдон поттэмзы луысал ке, Чечняе, оло, ноку но ӧй мынысалзы. Берло шуо на, асьсэос, пе, янгышесь. Озьы но, дыр, нокин но янгышамлэсь та дуннеын алэмын ӧвӧл. Вань егитъёслэн потэ, дыр, ӟеч улонэз адӟемзы, эрикез ас вылазы шӧмъямзы, улонзылы кузё луэмзы. Со понна ик егит дыр адямилы сётӥське. Та сярысь ик алигес телевизоретӥ вераськизы Чечняысь солдатъёсмы. Зэмос улонэз валаны мукет амалъёс шат ӧвӧл ни? Малы асьмеос улонэз ум дунъяське? Адями улыны вордӥське, корка, сад-бакча возьыны, нылпиосызлэсь нылпиоссэ адӟыны, утьыны-вордыны. Шудо но буро улон понна лыктэ со та Музъем вылэ. "Тулкымъяське, тулкымъяське" кырӟанысь пересь кадь, пужым улын бӧрдӥськом, пиосмы "эрико улон понна" быро шуыса. Кин понна, ма понна пиосмы быро - ӧйтӧд, нош одӥгез тодмо: "эрико улон" соос понна уз ноку но лу ни. Улон, улон... Кин тодэ меда, мар сыӵе со улон? Нош кин ке но шуэм ук: дунне лэ адями шудбуро улон понна вордӥське. Ӧйтӧд!? Светлана Петрова. ГИБДД-лэн вань сыӵе одӥг ёзэз � со техникаез штраф тырытыса возён инты. Яке калыкын сое штрафной стоянка шуыса нимало. Отчы вутто умойтэм документъёсын шедем яке юэм водительёслэсь транспортсэс, ваё лушкам но пазьгиськем техникаез. Ми вуылӥм "Буммаш" дорысь стоянкае. Кенешим ДПС-ысь инспекторен Алексей Елышевен. Солэн верамезъя, отын котьку уно техника сылэ. Куд-огез аръёсын но. Али автомашинадэ одӥг сутка кӧлытэмед понна тыроно 100 манет. Нош куд-огез техниказэс возё толэзьёсын, аръёсын. Лыдъялэ ай, кӧня манет тыроно луоз. Соин, лэся, куд-огез авто-, мототранспортэзлы уг но лыкты ни. ? Татын "кӧло" штрафникъёс. ? Инспектор Алексей Елышев. В.Беломорскихлэн туспуктэмъёсыз. Алексей ШКЛЯЕВ Алдаськись гожтэтлэн кузёез Паймымон адями со: Геннадий Калашников. 1951-тӥ арын вордскиз Пермь областьын. Пичи дыръяз улӥз Ю.-Ӵабъя гуртын, егит дыръяз � Кезын. Свердловскысь дано Юридической институтэ йыгаськыкуз, шуак висьыны усиз. Котьма ке но, армия бере отчы пыриз. Йылпумъяз. Удмурт сямен вераськем гинэ ӧвӧл, со ӟеч лыдӟиське но. "Удмурт дуннеез" олокӧня ар басьтэ ни. Ачиз сярысь шуэ: мон шудтэм, но утисе вань. Бадӟымез нылыз висьыса кулӥз. Куинь пи будэтэ. Пӧртэм районъёстӥ вошъямзы бере, сое бератаз дугдытӥзы (кемалы меда?) Пичи Пургала. Али Геннадий Аркадьевич � прокуратураысь следователь. Егит дыръяз сямен ик, законъя юн-юн ужаны турттэменыз сэрен, кивалтӥсьёсын ваче пумит вуылэ. Азьвылгес Калашниковез райкомъёс пыжылӥзы югдурез валасьтэмгес коммунист шуыса. Табере сыӵе сӥзьдӥсьёс огзы но компартиын ӧвӧл. Нош Геннадий Аркадьевич весь оске коммунизмлы. Сое кылзыса жадёно ӧвӧл. Йыружез сэрттэм-пертчемзэ мадьыны кутске ке, коть одӥг кылзэ воштытэк ик газетэ сёт. Озьы кылдӥз "Алдаськись гожтэтлэн кузёез" мадён но. Огсямен улӥмы ке, Геннадий Калашниковлэсь музон верамъёссэ но "Удмурт дуннее" печатлалом ай. Та районэ мон соку гинэ вуи вал. Пуктӥзы прокурорез воштӥсе. Ӧй тодылы, компартилэн райкомез но прокуратура вискытӥ сьӧд коӵыш потэмын шуыса. Прокурор ас гожзэ нуэ вылэм. Нош райком весь сое зӥбыны вырем. Ваньзэ тодытэк-валатэк, мон тэк ас кожам ужъёсме быдэсъяй. Ижысь одӥгысьтыз редакциысь мыным келязы нимтэм гожтэт (анонимка). Тодмотэм мурт ивортэм: сыӵе-сыӵе ульчаысь Иванов пӧртэм нылъёсты но кышноосты мунчояз яке коркаяз кужмысь пыртылэ но сантэма, пе, нош прокуратура но милиция солы пумит ужрадъёс уг куто. Районысь прокурор (али республикаысь прокуратураын ужа) шуиз: � Куинь-ньыль нуналскын шедьты гожтэт кузёез. Тодӥ: сыӵегес ик бумага вуэмын районысь газетлэн редакцияз. Сое мыным уг сёто: архиве кельтоно, пе. Ксерокс соку ӧй вал. Лумбыт сюлвори: � Мыным гожтэтлэн пуштросэз кулэ ӧвӧл � кулэ гожъясьлэн кибервылыз � почеркез. Мырдэм басьтӥ. Вылаз ик, тодӥ на: судэ но сыӵе чагиськон вуэм. Куинь гожтэтэз артэ понӥ но сак чакласько. Шуак синйылтӥ: конвертъёс огкадь суредэн, котькудӥз вылэ кык марка лякемын. Кин-о сыӵе узыр меда? Оло... Оло, гожтэтъёс вуэмын кыӵе ке организациысь? Гожтэтъёслэн пуштроссыя валаны луэ: соосты ыстэм кадь районысь огъя югдурез тодӥсь мурт, дышетскем но кивалтон удысын йӧндырись маке. Колхозысь ӧвӧл, дыр. Оло, райкомысь адями? Оло, райисполкомысь? Куинь-ньыль нунал куспын кыӵе гинэ учреждениосы ӧй пыра меда? Кыӵе но документъёсты ӧй учкы? Кинлэсь гинэ кибервылзэ ӧй ӵошаты? Бератаз фотолабораториысь фотобумага вылын музэн аспӧртэм суред пуксиз. Нырысь-валысь бус пыр кадь, отӥяз � яркытгес но яркытгес. Районысь граждан обороналэн штабеныз кивалтӥсь Азовкин? Зэм-а, даур-а? Бератаз Азовкин но мон ваче син вуимы. Шуисько: � Олокыӵе но ужен выроно луисько. Партия тани ялӥз ужатэк барыш басьтонэн нюръяськон. Сюрес вылэ потэм шофёр нялтас дугдэ магазин доры, куре аракы. Сое автоинспекция кырме ни: юнме бензин сутыса, пе, татчы вуид. Мон туж пумит сыӵе "ожмаськон" шуонлы. Но мар карод? Вераськонмы пумен ӧръяськиз кадь. Азовкинлы алигес из коркан квартира сётӥзы. Нош солэн вал аслаз юртъерез. � Соин мар-о кароды? Вузалоды-а? Кин но со уз-а шуы: ужатэк барыш жильдыны малпаськоды? Ваньзэ тани валэктэлэ ай, та бумагае гожтыса. Ӵапак соку кабинетам пукиз бускель районысь прокуратураын ужась. Со аслаз уженыз выре, милемлы уг люкеты. Соин ик кошкыны ӧй куры. Азовкин кузесь букваосын валэктон ӵабъяз но мычиз: � Тани. Нокыӵе барыш уг потты мон. Коркаме пиелы кельто. Куинь гожтэтэз но али пӧрам бумагаез артэ понӥ. Ньыльмоос кадь огкадесь. Юасько: � Ваньзэ-а тӥ дасяды? � Та гожтэтъёс пӧлысь огзэ мон келяй, кыксэ уг тодӥськы. Кенешонмы выжиз музон ӧре. Валэкты, шуисько, мазэ-созэ. Азовкинлэн пиез дасяськем одӥг нылэз кышно вайыны. Кылдымтэ: пияш сюанэз азьын сюрем пытсэт улэ. Дыдызэ пумитам Иванов шуон, пыртэм ас дораз. Бадӟымез Азовкин тае адӟем но каргам Ивановлы пунэмзэ берыктоно кариськем. Гожтэтъёс пӧрам. � Кужмысь-а Иванов нуиз нылашез? � Ӧз. Азовкин кошкем бере, ваньзэ ивортӥ прокурорлы. Таиз, районын будэм адями, туж абдраз: кызьы сыӵе ӝог шедьтӥд? Собере документъёсме басьтӥз. Берлогес тодӥ ни: четверге прокурор жингыртэм райисполкомлэн тӧроезлэн воштӥсезлы: кырмим, пе, урттылӥськисез � тӥлесьтыд ужасьтэс. Та аръёсы трос нимтэм чагиськонъёс вал райисполкомлэн тӧроез вылэ но, мукет кузёос вылэ но. Тӧролэсь воштӥсьёссэ тодмотэм автор сьӧлыке уськытэм: одӥг юртлэн гулбечаз, пе, граждан обороная тӥрлыкез тырыны кулэ, нош со, кивалтӥсь, отын ас картошсэ возе. Сыӵе нимтэм гожтэтъёс трос вал бере, отын саптам муртъёс туж йыркуръяськизы ватӥськем урттылӥськисьлы. Кивалтӥсьёс туж шумпотӥзы сое шараямлы. Пятницае райисполкомысь кивалтӥсьёс лушкемак огинэ люкасько но Азовкинэз доразы ӧтё. Дунне вылысь одӥг кырсь кылэз но солы вератэк уг кельто. Субботае Азовкин быдэс пачка кыӵе ке эъюм юэ. Нош кулон сое уг вормы. Кышноез кошке пу юртъеразы парсь сюдыны. Воргорон огназ кыле но кыӵесэ пыре. Партилэн райкомысьтыз адями шок-пуль вуиз мон доры: � Гожты валэктон: кызьы тон адямиез вуттӥд ассэ быдтон калэ. Асме туж шудтэм лыдъясько. Нош мур вукыреме усён азям кин ке мыным пыкет пуктэ но монэ уте. Туннэ но абдрасько: Азовкинэн ваче син пукыкумы, кызьы меда артэ районысь прокуратураын ужасез потыны ӧй куры? Валэктонам пусйи: мон Азовкинэз ӧй курдатъя, вераськеммес кылӥз мукет мурт. Райкомысь адями машинае пуксе но артысь районэ ширтэ. Прокуратураын ужасьлэсь валэктонзэ курем. Таиз гожтэм ӵапак мон сямен ик. Озьы монэ кыл кутонлэсь мозмытӥзы. Ашкынэм кузёос но калгись пуныос Берло аръёсы котькуд гуртъёсын (коть удмуртаз, коть ӟучаз...) одӥг суред: урам кузя бызьыло лыдтэм пуныос. Тросэзлэн кузёоссы вань, жильыяса возён сярысь гинэ тодазы уг усьы. Ачид пуны вордӥськод, возиськод ке но, тодмотэм пуныослэсь курдаськод ик. Уго соос котькуд ортчись адями сьӧры утыса уисько. Уд но шӧды, кызьы дӥськутэд, я мугорыд борды лэчыт пиньёсыз мертчиськозы. Газет бамын та сярысь вераськон ӝутон сярысь тодам но ӧй вал. Нош алигес, ӵукна уже вамышъякум, пичи гинэ карлик пуны пыдъюмылам пинь бервылъёссэ кельтӥз. Пичи дыръям ик аслым шудыны ньыль пыдо эш ваён сярысь кылпум ӝутэме бере, анае визьнодаз вал: "Пуны вордоно ке, пие, сое думетын жильыяса возёно. Озьы бере, дыраз сюдон, утялтон, кырын юмшатон сярысь но вунэтоно ӧвӧл". Таӵе верамез йырвизьмам гумырлы пыӵаз, лэся. Нюлэскы, возь вылъёсы потакум гинэ сьӧрам бызе Тузик пуные. Кузёезлы ас пуныез котьку лякыт сямо йӧтэ. Ӵемысь мугзэ соос огкадь шараяло: "Мӧзмыт соослы жильыын. Собере вузо но, азбарез кыедэн но саптало на". Кыромем пуныос укыргес но трос гуртысь фермаос вадьсын. Ур-вай жугиськыса кесяло, качало соос кулыны шедем кунянэз, парсьпи шӧйёсты. Озьыен, паласькись висён вӧлмытӥсьёслы но пӧрмытско на. Пумит ӧвӧл та гурт изьверъёс улэп пудоен гусъяськыны но. Алигес ёросамы потӥсь газет ивортӥз вал: "Пестерово, Дамаскино фермаосысь улэп кунянъёсты" качазы" калгись пуныос. Кузёоссылы пумит чурыт ужрад кутыны кулэ". "Комсомольская правда" газет но 18-тӥ январе гожъяз: "Эстониысь Тарту городын калгись пуныос виизы дас аресъем пияшез. Ымнырыз, мугорыз сокем куртчылэмын-кесямын, кин луэмзэ тодыны, тодманы но шугъяськоно". Газетъёсысь таӵе ивортонъёсты лыдӟыса, йырсиос ик пежырско. Та югдур сярысь гуртоослы валэктыны, мадьыны ке кутскиськод, шуо: "Улон-вылонмы секыт уго. Асьсэлы кӧттыр кырысь мед шедьтозы". Амалтэк юан кылдэ: ньыль пыдо эштэс сюдыны уд быгатӥське бере, малы-о лулэз тэльмыртыса вордыны басьтоно вал?" Кемалась-кемалась Антуан Сент-Экзюпери француз писатель та выллемгес кылъёсты гожтӥз, вераз вал. "Асьмеос кыл кутыны кулэ соос понна, куд лулосъёсты кыралысь кутыса вӧзамы вуттӥмы, вордыны кутскимы". Озьыен, пуныез возем понна но нырысь ик кыл кутыны кулэ солэн кузёез. Асьмеос кыӵе жаляса, лулӟылыса учкиськом Г. Тренопольскийлэн "Белый Бим, чёрное ухо" повестезъя пуктэм картинаез. Со дыре ик жаляны, утялтыны вунэтӥськом асьме азбарамы улӥсьсэ. Зэм, таӵе югдурысь потон понна, пӧртэм ужрадъёс кутӥсько. Куд-ог городъёсын, гуртъёсын ыбыло калгись пуныосты. Тани бигер шаерын та ласянь мукетгес сюрес бырйизы. Соос "лобась" шприцъёсын ыбыло кузётэмъёс шоры. Шприце басьтӥське "Адилин-Супер" препарат, пуны мугоре шедьыса, сое "изьытэ". Бускель республикаысь предприятиос милям ёросысь администрацие но вазиськизы вал: "Юрттомы та препаратэз шедьтыны, уже кутыны". Нош ёросысь тӧромы коньдон ӧвӧл вылэ чӧлскиз. Мон та амалъёсты ёрмемысьтым гинэ поттылӥсько. Нош одӥгзэ быдэстыны трос кужым но, коньдон но кулэ ӧвӧл. Котькудӥз кузё ас пунызэ жильыяса гинэ мед возёз вылэм. Йылпумъяса ӟуч кылбурысь чуръёсты гинэ тодады вайытэме потэ (удмурт кылэ берыктыса уг улӥськы ни): "Собака бывает кусачей, только от жизни собачей". Н. Турин, Киров улос вылысь, Кильмезь ёрос. Котькуд ар - кык книга Леонид Кудрявцевлэн нырысетӥ книгаез потӥз 1990-тӥ арын. Табере соос 21 лыдъясько ини. Котькуд ар - кык книга. Ачиз сярысь писатель вакчияк тазьы вера: - Вордӥськи Можга городын. 1981-тӥ арын Красноярске кошки. Мыным удалтӥз, шуыны луоз. Фантастикая школае ветлӥ. Отын мыным юрттӥзы гожъяськыны, быгатонлыкме азинтыны. Азьвыл ведь фантастикаез "вылӥос" сокем ик ӧз гажалэ, кырыж учкылӥзы. Нош али гожъямъёсы понна басьтэм коньдонэн улыны быгатӥсько ини. Конечно, зарни жильы нуллыны но "Мальборо" сигарет кыскыны со ӧжыт, но няньлы тырме. Нош со дырозь кытын но, кин но луыса ӧй ужа: станок сьӧрын но сылӥ, возьмаськись но вал, музъем но гудӥ... Леонид Кудрявцев вордскем шаераз. Зэмос писатель-фантаст луыса бертӥз 1998-тӥ арын. Солэн ужез дунъямын В. Астафьев нимо премиен. Алигес книгаез потӥз Польшаын. Шунды пуксён палась мукет кунъёсын но синйылто ини та аспӧртэмлыко гожъясьлэсь ужъёссэ. Галина Романова. Туспуктэмез В. Беломорскихлэн. Кыӵе дунъёс базарын Асьмеос дышим ни, созэ я тазэ сиён-юонэз базарысь гинэ басьтыны, магазинэ кожатэк. Одӥг интыысь ми мае быръёнэз но вань, дунтэмгес но. Тани туннэ нуналлы Ижын базаръёсысь куд-ог дунъёс: Сӥль - 45 манет 50 коньы (скал но парсь сӥль); колбаса - 42-56 манет (пӧзьтэм); - 75 манет (ӝыныё ӵынатэм); -115 манет (ӵынатэм); чорыг - мойва - 18 манет (ыль); - минтай - 26 манет (ыль); - сельдь - 16 манет (ыль); 29 манет (сылалтэм); - скумбрия - 71 манет (ӵынатэм); - горбуша - 75 манет (ӵынатэм); сима (кӧс) вӧй - 15-25 манет; курег пуз - 7-13 манет; рис кеньыр - 10 манет но 50 коньы - 11 манет; макарон - 9 манет но 50 коньы - 10 манет; пызь - 9 манет (Сарапул, вылӥ сорт); Сахар-песок - 13 манет но 50 коньы; чечы - 50 манет (0,5 литръем банка). Шуныт шаеръёсысь ваем куд-ог емышъёслы дунъёс: груша - 23-30 манет; банан - 14-16 манет; арбуз - 5-6 манет; Нялтас вералом, виноград сиыны яратӥсьёслы туэ бусьтыр карыны уз кылды, дыр. Грузиын, пе, 45 градуслэсь вылӥ пӧсен но куинь толэзь ӵоже зор-кот чик усьымтэен, та емышез дорамы туэ ӧжытгес вуттозы, шӧдске. Июль-август - бакча сиёнъёс кисьман вакыт. Со соку ик адӟиське базаре пырыку но. Сад-бакча возисьёс чурен сыло, будэтэм емышъёссэс ӵекто: ӵуж кушман - 3 манет (ог ӝыны килограмм); горд кушман - 6 манет; кабачок - 5-6 манет; кубиста - 6-7 манет; картошка - 6-7 манет; помидор - 8-12 манет; кияр - 6-7 манет (таизлэн дуныз выльысь ӝутскыны кутскиз ни); чия - 40 манет (5 метръем ведра); укроп - 1 манет (пичи бинет); сугон - 7 манет, 2 манет (шильыез). Пусъём, райцентръёсын вузано емышъёслэн дунъёссы вылӥ сётэмзылэсь бадӟымесь ӧвӧл. Оло, пичиесьгес но ай. Э. Васильева. Туспуктэмъёсыз В. Беломорскихлэн. Футбол "Кристалл" куашказ "Газовикез" Соленскысь "Кристалл" туэ ӝоже уськытӥз вал. Нырысетӥ шудонын ик асьме футболистъёс соку куноын 0:2 лыдын келязы. Соин ик таяз пумиськонэ Ижысь спортсменъёс ӟырдыт мылкыдын потӥзы. Куноос но сётскон сярысь уг малпало вылэм. Тужгес но лэчыт шудэ нападающийзы Валерий Соляник. Нырысетӥ дивизионын со котькинлэсь трос 10 гол пыртӥз ни. Пумиськон азьын но шудон дыръя "Газовиклэн валтӥсь тренерез футболистъёсызлы сак чакланы косэ кышкыт форвардэз. Кык-куинь футболистъёсмы ёриськем кадь сьӧраз бызьылӥзы. Таӵе "серметысь" но гылӟылӥз Соляник, соку командалы юрттылӥз ни вратарьмы Алексей Степанов. Но пенальтиысен ӵыжем тупез со но ӧз быгаты кутыны. Та дырозь "Газовик" 2:0 лыдын азьпалан вал ни. Голъёсты пыртӥзы Юрий Гетиков (пумиськон бере солы, устоезлы шудӥсьлы, Кун Кенешлэн Тӧроез Александр Волков кузьым сётӥз) но Сергей Топоров. Эшшо одӥг гол пыртӥз на Александр Семянов. Озьы "Газовик" 3:1 лыдын пунэмзэ берыктӥз. М. Кузьмин. ПУМИСЬКОНЪЁС Ивановъёстэк улон мӧзмыт луысал Кылем арняе Кун Кенешлэн Тӧроез А.Волков Якшур-Бодья районэ вуылӥз. Татын со нимысьтыз саклык висъяз лэсьтӥськонэн герӟаськем ужпумъёслы. Вылӥ кивалтӥсен ӵош журналистъёс таӵе сюресэз ортчизы: Чур�Якшур-Бодья�Якшур�Старые Зятцы�Лынга� Ӵошкыт (Большие Ошворцы)�Варавай. Чурысь селикат кирпич поттон завод азьло аръёсы аслэсьтыз продукцизэ котыр улосъёсы но узаны быгатэ вылэм. Табере предприятпе куинь поллы лябӟем кужымен ужа. Кун заказъёс ӧвӧл. Кирпичез вузаны нокытчы � курисьёс-басьтӥсьёс уг шедё. Со дыре ик мукетаз предприятиын, Якшур-Бодьяысь пу пилён комбинатын, пулэсь вӧлэм лэсьтӥськон арбериос лапасъёс улын кема уг кыллё. Котьма ке но, асьсэлы корка пуктӥсьёс республикаын уг быро. Та ужпумез Кун Кенеш но син азязы возё. Правительство но Лэсьтӥськыны мылкыд карисьёслы берло аръёсы кредитъёс но висъясько, нимысьтыз программа но кутэмын. Таин ик валэктыны, дыр, луоз комбинатлэсь азинскемзэ. Со сяна, асьме толэсэз, пуэз котьку но кунгож сьӧрын ӟеч басьто. Комбинатлэн куд-ог продукциез но отчы кошке. "Якшурский" совхоз � туннэ нуналлы банкрот калэ вуэм хозяйство. Куке-соку со данъяськылӥз парсь вордонэн, пудоослэн лыдзы 6000 йыр вал. Но дуноязы пудо сиён, электрокужым хозяйство лябӟиз. Туннэ татын парсь гидъёс бушесь сыло, 200 парсьсы сяна ӧвӧл ни. Нош ужасьёсыз 37 мурт. Секыт югдурысь потон амалъёсты утчаса, татчы туэ май толэзе палэнысь кивалтӥсез В.Лукинэз юнматӥзы. Югдурен тодматскыны, ужан сюресъёс шедьтыны солы куинь толэзь дыр тупатӥзы. Озьыен, ӝоген солэсь кылзэ юалозы. Старые Зятцы черкогуртэ нуись сюресэз туж кулэ асфальтэн шобыртыны. Гурт бадӟым. Татчы дышетскыны матысь гуртъёсысь нылпиос ветло, нӧдэз коласа. Но тужгес но трос курадӟонъёссы Лынга посёлокын улӥсьёслэн. Кема аръёс ӵоже татын одӥг бадӟым производство вал � леспромхоз. Та посёлоклэн кылдэмез но соин ик герӟаськемын вал. Калыклэн улонэз нюлэс котырын возиськылӥз. Выльдӥськон кутскемен, леспромхоз кулэтэм луиз. Посёлоклэн улонэз чалмиз. Ужтэк кылемъёс ик предприятизылэсь ваньбурзэ но тус-тас каризы. Кӧня кыстӥськысал на меда леспромхозлэн озьы вакаса улэмез, татчы выль кузё ке ӧй сюрысал. Со � "Ижмебель" предприятилэн валтӥсь директорез П.Кишкан. Озьы мебель поттӥсь предприятие но леспромхоз одӥг кивалтӥсь улсын ужаны кутскизы. Петр Михайловичлэн одӥг куронэз: туж кулэ, пе, вал леспромхозэз огдырлы налог тыронъёслэсь мозмытыны. Дуно басьтэм станокъёслэсь дунзэс озьы капчигес берыктыны луысал. Директорлэн сюлмаськеменыз сизьым ар ужатэк сылэм "Дружба" пионерлагерь ас ӧсъёссэ усьтӥз. Мебель лэсьтыны трос кужым кулэ. Но малы ке сое кораны кыдёке нюлэсъёсы лэзё, кытчы нокыӵе техникаен но пырыны уг луы. Тазэ ӝожтӥськонзэ П.Кишкан нюлэс удысъя министрлы Буераковлы сӥзиз. Лынгаын улсьёс дас ар возьмало ини выль больницалэсь усьтӥськемзэ. Коньдон тырмымтэен лэсьтӥськон ужъёс уг мыно. Больница шуонзы интыяськемын аптекаын, нош амбулаторизы � леспромхозлэн контораяз. Кун Кенешлэн Тӧроез коньдонэн юрттэт луоз шуыса вераз ке но, зол пыкылӥз Як.-Бодья ёрослэсь администрацизэ. Лэсьтӥськон ужъёсын, пе, мыло-кыдогес выроно. Лынга посёлокын улӥсьёс озьы ик туж курадӟо телефон ӧвӧлэн. Больницаын гинэ со вань. Та ужпумез Кун Кенешлэн Тӧроез матысь дыре ик эскеро шуиз. Паймоно кадь, но Лынргаын улӥсьёс нюлэс пушкын улыса но леспромхоззы вань вылысь, асьсэлы выль коркаос уг пуктыло. Ваньзы уло леспромхозлэн азьло аръёсы дунтэк пуктылэм коркаосаз. Корка пуктыны али мылкыд карисьёс вань, соос 40 пала луозы, но юрттэтлы оскытэк та уж борды басьтӥськыны уг дӥсьто. Кредит басьтыны луэ шуыса посёлокын улӥсьёс уг тодо. Выль дышетскон ар матэктэмен, берло дыре ёросъёсы вуылыса, А.Волков уката но бадӟым саклык висъя школаослы. Озьы вал Якшур-Бодья ёросын но. Туж чебер школа пуктэмын (Ижысь но, дыр, сыӵезэ уд адӟы) Ӵошкыт черкогуртын. Но лэсьтӥськисьёслэн верамзыя, туэ нырысетӥ сентябре сое, пе, усьтыны уз на луы � пуш ужъёсыз трос на. Собере кабинетъёсы мебель басьтыны но коньдон кулэ. Лэсьтӥськисьёслэн сыӵе мугъёс вылэ чӧлскемзы Кун Кенешлэн Тӧроезлы ӧз кельшы. Котькызьы, пе, тырше, но нырысетӥ сентябре 267 нылпи дышетскыны выль школае мед мыноз. Уждунлы но лэсьтӥськон материаллы коньдон луоз, шуиз А.Волков. Варавай гуртын но выль школа лэсьто. Но ӧсъёссэ со туэ уз на усьты. Нош куке усьтӥськиз ке, Кун Кенешлэн Тӧроез солы компьютеръёс кузьмалоз. Ёросъёсы вуылыку, котьку но пумиськыло тунсыко адямиос. Соос мылкыдэз ӝуто но оскон пыӵато. Малпаськод: сыӵе адямиос вань бере, ум быгатэ шат шуг-секытъёсты вормыны. Огез сыӵе адями � Варавай школалэн директорез Геннадий Павлович Иванов. Кылъёс утчаны ӟепаз уг пыры. Василий Тёркинэн но, Василий Шукшинэн но сое ӵошатыны выри. Ачиз сярысь шуиз Ивановъёс вылын, пе, быдэс Россия возиське. Школаяз олома но шедьтыны, басьтыны быгатэ. Кураськыса уг ветлы, но пӧртэм амалъёс кутыса, коллективзэ я компьютеръёсын, я техникаен шумпоттэ. Егит дыръяз удмурт пияшлы Москваын улыны кылдэм. Артист луэмез потэ вылэм. Александровлэн ансамбляз но кырӟаллям. Нош 1967-тӥ арын кырӟанъя фестивальлэн лауреатэз вылэм. Эктэ, кырӟа, крезьгуръя инструментъёсын шудэ, вылаз ик, спортэн эшъяське � тӥни сыӵе со Варавай школалэн директорез. Сыӵе кивалтӥсьсы луыса, дышетскисьёс но школазылэсь данзэ уг уськыто. Кылм арын но, туэ но школаязы медален йылпумъямъёс вал. Вуоно арын но луозы, шуиз Геннадий Павлович. Мукетыз паймымон адями Вячеслав Кузьмич Рыгалов � запасысь полковник, лётчик, нош табере � ёросысь ужбергатӥсьёслэн правленизылэн фондэнызы кивалтӥсь. Ужбергатӥсь луыса, со выре парсь вордонэн. "Якшурский" совхозын парсь вордон удыс шуге-леке вуэмын, нош В.Рыгаловлы со уж ик пайда вае. Кызьы? � Фонд басьтыны быгатӥз ссуда. Со коньдонэн парсьпиос басьтӥм, � вера Вячеслав Кузьмич. � Собере парсьпиосты будэтыны кулэяськись семьяослы оским. Котькуд семьялы быдэн куинь парсьпи сётӥм. Ӝынызэ пудо сиёнэз соослы ужбергатӥсьёслэн фондзы ик висъя. Бӧрысь огзэ парсез соос асьсэлы кельто. Ужбергатӥсьлэн верамезъя, та ужез нуыны умой юрттэ районлэн администрациез, нырысь ик солэн кивалтӥсез Юрий Михайлович Широбоков. Тӥни сыӵе пумиськонъёс вал Якшур-Бодья ёросын. Огъя верано ке, та ёрос азинске, республикалэн бюджетысьтыз дотациос басьтытэк, вань ужъёсты бодьяос му вӧй поттӥсьёслэн но ас кужыменызы вормыны тыршо. Т.БАННИКОВА. Гангут мукож дорын пуромем ожмаськон Александр Невский князьлэн кивалтэмез дырысен ӟуч государство зарезь дуре потон сюресъёс утча. Но та малпан быдэсме Петр И эксэй кивалтон вакытэ гинэ. Со вал 1696-тӥ арын. Ӟучъёс турокъёс киулысь Азов городэз талало. Та луэ ӟуч армилэн но флотлэн нырысетӥ вормон вамышез. 1696-тӥ арын 20-тӥ октябре Россиысь Бояр Дума зарезь кужымъёсты кылдытон сярысь решение кутэ. Бӧрысь та нуналэз ӟуч флотлэн нуналэныз лыдъяло. 1697-тӥ�1698-тӥ аръёсы Петр И вуылэ Голландиысь но Англиысь устоосыз судно лэсьтӥсьёс доры. Отын со пыр-поч дышетске та ужлы, басьтэм быгатонлыкъёссэ вуттэ Россие. 1705-тӥ арын гужем Кронштадтын дасямын ни вал нырысетӥосыз куинь мачтаен 8 корабль, кык мачтаен 6 судно но 4 голер. Ӵапак соослы луыса, ӟуч морякъёс утисько шведъёслэн дугдылытэк урдскылонъёссылэсь. Бӧрысь аръёсы финн зарезьын тушмон синмын учкылӥсь шведъёс адӟиськыло на, но Нева шур дорозь сузьтӥськыны уг дӥсьто ни. 1713-тӥ арын мае ӟуч голеръёс матэкто Хельсинки город доры но, десантъёсын ӵош кариськыса, сое киулто. Та ожмаськонэ пыриськем вань 200 судно тол куспын дасямын вал. 1914-тӥ арын швед армия лябӟе (тужгес но Полтава жугиськон бере), но флотэз солэн озьы ик зол возиське на. Июне 1714-тӥ арын ӟуч голеръёс матэкто Гангут мукож доры но отысь Або город доры сузьтӥськыны чаклало. Но малпам ужрад уг пӧрмы, ӟуч флотлэсь сюрессэ шведъёс пытсамен валче. 18 июле татчы вуэ Петр И. Югдурез со пыр-поч эскере-чакла. Озьы ачиз эксэй кивалтэм улсын шведъёс но ӟучъёс куспын лек ожаськон пурӟе. Но вормон берытске ӟучъёс пала: Гангутын ӟуч флот эшшо одӥг пол ас кужымзэ возьматэ, данзэ ӝутэ. Соин егит ӟуч флот Балтика зарезь вылын бадӟым вормон басьтӥз. Та вормонлы сӥзьыса ик бӧрысьгес нимысьтыз медаль дасямын, нош 1871-тӥ арын ож бервылэ храм ӝутэмын. Та вакытысен ӟуч флот Балтика зарезь вылын кузёяське. Со выльдӥськыны но паськытаны ӧдъя. 1715-тӥ арын Петербургын кылдэ Зарезь Академия. Гангутын ожмаськон бере Петр И-лэн данэз ӝутске но Россилэн историяз пыраклы кыле. Солы сӥзьыса уно памятникъёс пуктэмын, граждан ож но, революция но ӧз куашкатэ. Туннэ соос шулдырто Санкт-Петербург, Кронштадт, Петрозаводск, Архангельск, Таганрог, Тула, Полтава но мукет городъёсты. Данак городъёсын Петр И-лы сӥзьыса музей-юртъёс ужало. Н.ВЕПРИКОВ, отставкаысь капитан. БЫРЪЁН-2000 Ӵектэмын Ганза Удмурт Элькунысь Правительстволэн Тӧроез Николай ганза толэзь пала журналистъёсы оскытыса возиз: тани-тани, пе, верало ни президент луон понна нюръяськонэ пыриськемез яке солэсь палэнскемез сярысь. Арня бӧрсьы арня ортчиз. Но дыр вуиз. Кылем понедельнике "Удмуртия" кинотеатре люкаськизы николай Алексеевичез шаермылы вылӥ кивалтӥсь карыны тыршисьёс. Кичӧлтӥсь группа ӧтиз отчы пӧртэм интыосын улӥсьёсты, политикаен вырисьёсты, журналистъёсты. Пумиськонэз усьтӥз Виктор Балакин, арня солэсь азьло бадӟым ужлэсь мозмытэм мурт. Кызьы тодмо, со кӧня ке ар ӵоже вал Россиысь Президентлэн Удмурт республикая оскем муртэз. Виктор Васильевич кыл сётӥз Кун Кенешлэн депутатэзлы Виталий Соловьевлы. � Николай Алексеевич ӟеч тодэ экономикаез, солэн тыршеменыз ӝутскыны кутскиз асьме автозавод. Со ачиз ветлӥз Тольяттие, кенешиз отысь эшъёсын. Табере конвейер ужа. Тодэ ни табере Ганза гуртэз. Монэ Кун Кенеше Вавож калык бырйиз бере, премьерез тодӥсько со районъя. Отын шуг югдур кылдэмын лэсьтӥськонэн. Ганза ветлэм бӧрсьы югдур тупатскыны ӧдъяз. Оскисько, республикамес со азьлань валтыны быгатоз шуыса, � пусйиз Виталий Соловьев. Ганза сярысь ӟеч кыл веразы озьы ик егитъёслэн азьветлӥсьсы Александр Кравченко, Ижысь ветеранъёслэн кенешсылэн тӧроезлэн воштӥсез Аркадий Мерзляков, "День" газетлэн редакторез Сергей Щукин но мукет эшъёс. Тани трибуна сьӧры потэ Николай Ганза: � Решение соку ик кутыны ӧй быгаты куинь таӵе муген. нырысетӥез: Россиын тодмо ӧй вал берло вакытозь огъя югдур. Табере ваньмы валамы ни выль Президентлэсь кытчы мыныны тыршемзэ. Кыкетӥез шугъяськонэ герӟаськемын вал али ужано интыеным. Уго Удмуртиысь правительствоен мон 14 толэзь гинэ кивалтӥсько. Та шаере вуэме дырысен но трос дыр ӧз ортчы ай. Куинетӥез муг � экономикаын кылдэм секыт югдур. Кӧня ке басьтэм азинсконъёс нокинэ но буйгатыны кулэ ӧвӧл. Улонэз умоятон понна, котькудмылы зол ужано. Чебер кылъёсын гинэ номыр уд лэсьты. Саесэз пужалляса ужано. Мынам одӥг мылкыды: Удмуртилы кивалтӥсь быръён медам пӧрмы вал жугиськонлы. Ойдолэ ялан тодамы возём, быръён нунал бӧрсьы мукетыз нунал вуоз. Нокинлы но соку, кинэ ке адӟыса, урамлэн музон палаз выжоно медам луы. Собере Николай Ганза журналистъёслэн но мукет эшъёслэн юанъёссылы валэктӥз. � Берло нуналъёсы ачим сярысь туж трос выльзэ тодӥ, � мыньпотӥз Николай Алексеевич. � Мон валасько, сыӵе кырсь ужен мукет адямилы ӟеч ымныр кылдытӥсьёс выро шуыса. ганза соглаш луиз президентэ кандидат луыны. Солэн шатбеныз кивалтоз Виктор Балакин. Павел Вершининэн ӵош ужан сярысь валэктыкуз, со пусйиз: дыр возьматоз ай, матысь вакытэ луозы пӧртэм воштӥськонъёс. И.ЛЕБЕДЕВ НАТАЛЬ Улон виштыос Четлыкысь шедьтэм яратон Таня Сергеез нырысьсэ адӟиз, эшезлэн гуртаз ветлыса. Соку ик валаз: Сергей � со зэмос яратонэз, сыӵе пиосмуртэн со дась вал мыныны дунне пуме но. Но куран дорозь вуыса, нылмурт берлань чигназ, вазь ай, пе, нырысь дышетсконо, профессия басьтоно. Кошкиз Москвае. Дышетскиз. Ужаны кутскиз. Тодмо пиосыз но вань, нош малы ке сюлэмаз уг лякисько. Дырын-дырын тодаз лыктылӥз нырысетӥ яратонэз � Сергей. Верамъёссыя тодэ, Сергей тюрьмаын пуке. Семья кылдытыны малпа вылэм ини, но сюан нуналазы кышно луонэзлэсь мукет пиосмуртэн чупаськемзэ адӟем. Кыкназэсты ик пуртэн вием, табере тани тюрьмаын пуке. Таня та учырысь аслэсьтыз но янгышсэ адӟиз. Весь ассэ ачиз тышкаськиз, малы пумит луи юакуз, Сергей таӵе югдуре но ӧй шедьысал. Таня дор палъёсаз бертӥз но Сергеен адӟиськыны мынӥз. Пумиськыны ӧз лэзе, тон кышноез ӧвӧл, пе. Соку Таня пӧртэм справкаос люказ но, загсэ мыныса, паспортазы штамп пуктытӥз. Озьы пытсэт сьӧрысь картэз доры пырыны лэзизы. Кӧня кыл кылоно луиз гуртоосызлэсь, "тюремщик кышно", пе, тон. Чидаз. Картэзлэсь потэмзэ витиз, пизэс будэтӥз. Нырысь-валысь Сергей уг оскы вал Танялэн яратонэзлы. Эрике лэземзы бере но вожаса сямен юалляз, мынам ик-а та пие. Сергейлэн вордӥськем гуртаз соос улыны ӧз быгатэ: калык кырыж учкылӥз адямиосты виись шоры. Соин Танялэн гуртаз мыноно кариськизы. Татын соосты сылалэн нянен ӧз пумиталэ ке но, улляны турттӥсьёс ӧз шеде кадь. Дыр яраосты бурмытэ шуо ке но, номыр но пыраклы уг быры, уг ӵушылӥськы. Гырпумдэ куртчы вылэм но, сузьыны уг луы. Кӧня куректӥз, дыр, ачиз но Сергей. Нош макем бадӟым кайгу со анай-атай понна. Кинэ янгыш карод на, ваньмыз озьы луиз шуыса? Таня ке ӧй луысал, кин тодэ, ма карысал али Сергей. Нош кышнозэ со али улонэзлэсь но золгес яратэ. Кык пиоссы будо кузпалъёслэн: шаплыесь но визьмоесь. С.ПЕТРОВА. Басма, басма... (вуриськисьёслы) Шундыё гужем нуналъёсы чебер дӥсяськыны котькин яратэ, дыр. Тросэз адямиос базарысь басьтэм одӥг кадь дӥсен ветло. Нош дӥсь отын синмез туж ик шум уг потты: чагыр-лыз дэремъёс, джинс басмалэсь вурем дӥсьёс... Дӥсь вурыны, керттыны быгатӥсьёслы али бадӟым эрик, басма кыӵезэ кулэ, сыӵезэ ик бырйы. Туж трос турлы басмаос ваемын Кореяысь но Индонезиысь. Со � синтетика. Му вӧйлэсь ке но лэсьтэмын, тодӥсь-валась муртъёс оскыто, адямилэн тазалыкезлы, пе, уг люкеты. Соос дэмлало пӧсь дыръя нуллоно дӥсьёсты солэсь вурыны: миськыны капчи, туж ӝог куасьме, ӵемысь уг безды, уг пуксьы. Мынам тодмое синтетика басмалэсь � креплэсь � вурем брюкизэ куятэк кыкетӥ арзэ нуллэ ини. Но гольык мугор та басмалэсь жаде. вылтыр лыдыны кутске. Малы ке магазинъёсамы ичигес искусственной но натуральной басмаос. Искусственной пӧлы вискоза пыре, сое целлюлозалэсь куо асьме дорын. Озьы ке но, вань басмаос пӧлысь мон натуральнойёссэ бырйысал, соос дуногес ке но. Ичигес сэректӥськод. Европаысь калык али хлопок, етӥн но ыж гон вылэ выжиз. Россиын соосты вузан данаклы йылӥз. Котьма ке но, лавкаысь басьтӥды ке натуральной яке искусственной басмаосты, тодэ: миськыку соос пуксё. Соин ик азьло басмадэс коттэ, куасьтэ но вандылэ яке йылтэтъёс кельтылэ. Ас киын лэсьтэм арбериос дунъясько ке но, ураме яке уже мыныны соос чебер вуремын медло. Басмаез мугоръя умой ӝикыт вандылон сяна, сое чебер вуроно но оверлокен ӟумыртоно вурысъёссэ утюген волятоно. Дӥсьты мед пӧрмоз. Тӥляд ӝуждалады 160, кусты 60 сантиметр пала ке, басма тазьы басьтыны быгатоды: брюкилы � 1 метр (пасьталаез 150 см), вакчи платьялы � 80-90 см, кузь платьялы � 135-140 см, пиджаклы � 135-140 см. С.ПЕТРОВА. Ар талэсь азьло, Сюмси ёросысь "Лактан" огазеяськонэ вуылыкуз, художникмы Леонид Прозоров суредаз вал отысь йӧл тӥрлыкез тупатъянъя слесарез Сергей Панфиловез. Портрет соку газетэ малы ке но ӧз поты. Алигес, Леонид Алексеевичлэсь архивзэ учкыкумы, суред син шор йӧтӥз. Учкымон, тыпак удмурт шӧмо потӥз со милемлы. ? Сергей Панфилов. Оскымон эшъёсы, юрттӥсьёсы Удмурт Республикаысьтымы тужгес устозэ писательмес Геннадий Красильниковез асьме палан гинэ уг тодо � солэн нимыз кемалась тодмо "Тӧлсяська", "Арлэн кутсконэз", "Вуж юрт", "Кылисько тонэн" но трос мукет произведениосызъя Украинаын, Коми Республикаын, Венгриын, Чехиын но трос мукет кунъёсын. Мон туж умой тодӥсько та данэ потэм писателез. Солэн сузэреныз Мария Дмитриевнаен ӵош ужай Завьял ёросын потӥсь "Ленинец" газетын. Геннадий Дмитриевич ӵем вуылэ вал редакцие. Трос юрттӥз со сузэрезлы но, мыным но яркытэсь, син азе пуксьымон статьяос, репортажъёс, информациос но мукетсэ гожъяны. Со вал куамын ар талэсь азьло. Мынэсьтым огпол Красильников юаз: � Пиёшка, ӵем-а вуылӥськод колхозъёсы но совхозъёсы? � Ӵем, � шуисько, � котькуд нунал кадь. � Усто, � шуэ пумитам. � Трос-а ваиськод отысь материалъёс но пӧртэм информациос? � Котькыӵеез вань, � верасько Геннадий Дмитриевичлы. Собере Красильников редактор пала берытскиз но,"Ленинец" газетлэн туннэ потӥсь номерез шоры возьматыса, веранзэ азьпалтӥз: � Маша, критической статьяосты газетады, гыдые, ӧжытгес на. Ну, да, ничего-о-о! Собере паськыт, секыт бур киыныз пельпумам чабкыса серектӥз: � А ведь "Молотэ" поттэм "Инкуазь суредъёс" сузьетэд мыным кельшиз! Давай азьлань! Гожъя на трос со выллем веросъёстэ, ява! Бадӟым таланто писательлэн тазьы бурдъямез мынэсьтым мылкыдме лӧпкытӥз. Собере но мон инкуазьлы сӥзем трос новеллаос но пичиесь веросъёс гожъяй на. Удмурт телевидениын дас вить арлэсь ятыр "Гуртъёсын улон" 30-40 минутъем бадӟым программалэн но "Нунал бӧрсьы нунал" иворъёсын программалэн авторез луыса тунсыко иворъёсты дасякум но, пӧртэм гожтэтъёсын ужакум но мон котьку тодам вайылӥ но али но ялан йырвизьмам возисько Геннадий Дмитриевич Красильниковлэсь но солэн сузэрезлэсь 1968-тӥ�19990-тӥ аръёсы "Ленинец" газетлэн редакторез, собере редакторлэн воштӥсез луыса ужам Мария Дмитриевна Ишматовалэсь верамъёссэс: Евгений, гожъя вакчияк но син азе пуктыны луымон яркытэсь иворъёс. Гожъя озьы, лыдӟись син азяз мед пуктоз геройдэ, кудзэ возьматӥськод газет яке журнал бамын. Со индылэм али но мыным юрттэ на гожъяськыны, коть пенсие но потыса, тани дасэтӥ арлэсь кема ялан йӧндырисько на гожъяны районысьтымы "Рассвет" но "Ошмес" газетъёсы. Нош гожъяны мон кутски 1944-тӥ арысен. Нырысь ик лӧпкытъясе вал атаелэн выныз Афанасий Иванович Николаев, со 1946-тӥ�1960-тӥ аръёсы ужаз Якшур-Бодья районысь "Красное знамя" ("Сталинъя") газетын нырысь ик кылкутӥсь секретарь, собере редактор луыса. Собере мынам юрттӥсьёсы вал Василий Григорьевич Широбокв, Михаил Сидорович Воронцов, Семен Александрович Самсонов, Флор Иванович Васильев, Семен Андреевич Перевощиков, Виталий Петрович Ложкин, Николай Николаевич Евсеев, Петр Петрович Любомиров, Александр Григорьевич Потапов но трос мукетъёсыз. Мон соослы котьку тау карон кылъёсме верасько но музъем дорозь йыбырттӥсько. Редакцилэсь. Туннэ тодмо удмурт тележурналистлы, кылбурчилы Евгений Михайлович Николаевлы 70 арес тырме. Ӟечкыласьком сое та юблиееныз. Сӥзиськом шуд но тазалык. Евгений НИКОЛАЕВ. ФУТБОЛ "Газовик" келяз Ярославльысь "Шинник" туэ выльысь вылӥ лигае берытскыны малпаз вал. Но турнир таблицаез ке учконо, сыӵе луонлыкъёсыз туж ичи. Вылӥегес интыяськем "Сокол", "Торнадо-Зил", "Рубин" кужмо нюръясько, ас интызэс озьы гинэ уз сётэ. Ньылетӥ интыын мынӥсь "Газовиклэн" но вылӥ лигае сюрыны луонлыкъёсыз вань... азьпал командаос ке ӵемтылӥзы. Но канжаськиз ачиз "Газовик" � дораз шудонын. "Шинникез" командамы нырысь-валысь пачкатыны вырылӥз ик. Куноослэн капказы дорын лэчыт учыръёс ог 10 минут ӵоже кылдылӥзы. Куалектэмзэс вормыса, Ярославльысь футболистъёс "биньгозыез" асьсэос кырмо, вож бусылэн котькуд люкетаз пумозяз нюръясько, пас сётэм тупез шаплыгес кырмо. Футболистъёсмы керӟегъяськыны кутско, янгышало. Одӥгаз учыре "Газовикысь" защитник эшезлы сётонъяз тупез пырак куноослэн нападющийзылы куштэ. "Шинник" азьпала потэ. Шудон пумын Ярославльысь футболистъёс эшшо гол пыртӥзы на. Озьы "Газовик" Ижын 0:2 лыдын келяз. М.КУЗЬМИН. НАТАЛЬ Нылкышноос сярысь веранъёс Сюлэмысь потэм кырӟан Кин луон сярысь Катя ноку но ӧз малпаськылы � артист но тӥни. Соин ик нокыӵе кенешъёстэк атаез сое 8 класс бере пырак Ижысь культпросветэ нуиз. Кыӵе ке конкурсъёслэсь ваньзэс-ӧвӧлзэс озьы ик ӧз тодылы: жингрес куараё тунсыко нылашез соку ик училищее кутӥзы. Дышетскыны со ӧз шугъяськы, городлы дышыны кема курадӟиз. Тодэ на, огпол ульча вамен выжыкуз паймиз балконъёсын будӥсь сяськаослы. Нокызьы но уг вала, малы соос отын будо, солэн Юриысьтыз ик сяськаослы эркын, дыр: быдэс возьвыл тыр пазьгиськемын. Озьы долкаса сылонъяз урод кылын тышкаськемез кылӥз, кӧня, пе, пипкетыны кулэ, пельтэм-а, мар-а, � киыныз сэзъя кытчы ке дыртӥсь шофёр. Соку гинэ Катя валаз, сюрес шорын ик кытчы ке дыртӥсь машинаос вискын сылэмзэ. Тӥни малы атаез ялан со сярысь сюлмаське вылэм. Дышетсконзэс йылпумъякузы, эшъёсыз огыр- бугыр выро, тодмо-дано ансамбльёсы кырӟаны курисько, нош Катя сюлмыныз но малпанъёсыныз кемалась гуртын ни. Удмурт театре Бакишева вӧзы кырӟаны курамысьтызы кӧня вожъяськизы эшъёсыз, нош со нокыӵе ӧз кариськы, "тау" шуиз но гуртэ кошкиз. ...Мар бордысен кутсконо? Калык бен клубе юмшаны пота, но луоз-а творческой коллектив кылдытыны, концертъёс дасяны? Оло, нырысь агитбригада гинэ кылдытыса эскероно, училищеын та ласянь трос визьнод сётӥзы. Отӥзэ ни тодмо муртъёсын каньылгес луоз бадӟымгес уж борды но басьтӥськыны. Озьы ик луиз: кӧня ке мыло-кыдо муртъёсты егит нылаш агитбригадае люказ, вань матысь гуртъёстӥ, бусыостӥ, фермаостӥ ортчизы. Тодмооссэс сцена вылысь адӟыса, зэмзэ но огез бӧрсьы мукетыз клубе лыктыса меӵак Екатерина Леонидовна доры кожылӥзы: гожты монэ но! Ужезлэсь емышсэ кема возьмано ӧз луы: вуоно гужемаз ик Казаньын ортчем агитбригадаослэн фестивалязы 17 коллектив пӧлысь соос вормисе потӥзы. Мылкыдыз уката лӧптӥз, но малпанъёссэ шуак зӥбиз висён � тыбырыз чидантэм ӵогъялляз, азьвыл мамык кадь потылӥсь баянэз пинал муртлы пумен секыт йӧтылӥз, репетициос бере бӧрӟылытӥз. Врачъёс ӵектӥзы ужзэ воштыны � Катя куректӥз ке но, кызь аресысен ӧлексы кылемез ӧз поты, вуриськон цехе ужаны кошкиз. Сюрлызэ эмъяз кадь, но интыяз сюлэм висён шедьтӥз � одӥг нунал но ӧз ортчылы, клубзэ, баянзэ, эшъёссэ малпатэк. Ӵап со вие Бобья-Учалась колхоз тӧрозы клубазы художественной кивалтӥсь утчаса ветлэ вылэм. "Курась" вуиз Катя доры но. Со нуналэ нош бурдъёс кылдӥзы солы. Бобья-Учалан но нырысь агитбригада люканы малпаз: калык тодмотэм, бадӟым коллектив кылдытыны малпалод но, адямиос оло лыктозы, оло уз. Катяез мурт ӧз каре, нырысь ӝытаз ик куать мурт гожтӥськиз. Соос бӧрсьы мукетъёсыз но кыстӥськизы, армиысь бертэм пиос но пырак дораз лыктылӥзы: кут бригадаяд! Егит специалист нош малпаз агитбригадаеныз ӵошатсконэ пыриськыны. - Ой, таяз инты уз сётэ ни, дыр, � сюлмаськылӥз со. Нош эшъёсы юнме такеме ваид уз шуэ-а? Но осконэз кужым пыӵатъяз. Берлогес ни со тодӥз, "Культурно- просветительская работа" журналлэн валтӥсь редакторез сое выльысь адӟыса паймем, туж ушъям. Озьы солэн агитбригадаез нош ик устоез луиз. ...Поезд дурк-дурк нуэ пассажиръёсты Ижевск пала. Жадем адямиос, простыньёсын шобырскыса, чус кӧло. Станциосысь пичи тылъёс гинэ огдырлы югдытъяло соослэсь ымныръёссэс. Катя паймыса учке � кызьы соослэн кӧлэмзы потэ? Мон али дунне тыр кырӟасал, дыр. Со уе кӧлон ӧз лыкты вагонысь эшшо одӥг муртлы. Дӥсьтытэкгес пуксиз со Катялэн пыд азяз. Нырысь вормемысьтызы шумпотэмзэ вераз, собере � гажамзэ. Катя алигес армиысь бертэм сьӧдкысъем чебер Паримонлэсь шуныт учкылэмзэ азьлогес ик шӧдылӥз ни вал, но ачиз кылпум поттылыны ӧз дӥсьтылы. Нош ӝоген со Антонова луиз, кузпалыз шоры туж небыт Пари шуыса вазьылӥз. Бӧрсьысь бӧрсьы куинь ныл вордӥзы соос. Одӥгзэ, Ниназэ, оскоды оло уд, Екатерина Леонидовна аслаз вордӥськем нуналаз но часаз вордӥз. Сыӵе укшанлы со ачиз но туж пайме: улонэз аслам кадь радъяськоз шат? Озьы ке, отысь шудо вакытъёссэ гинэ мед асэстысал. Но нылпиос шаплы кышномуртлы ужаны ӧз люкетылэ. Со вакыт со Бобья-Учалан хор кылдытӥз ни. 120-130 (!) мурт люкаськылӥз отчы. Али со вераны капчи ни, нош соку... Кӧня кужым но чидан кулэ луылӥз одӥг кырӟан понна гинэ. Тани со хорез азе султэ, йырзэ сэзъялтэ но баянзэ кыскыса и-и!.. шуэ. Нырысетӥ чураз ик кин ке паллянэ, кин ке буре коже, кыкетӥяз кыӵе куараен кырӟамзэс вунэто, куинетӥяз воксё кылъёссэ сурало ни. Екатерина Леонидовна пайме вал, кызьы-озьы "Дано лу, партиез" гинэ но уд тоды? Бӧрысь ваньмыз вӧй вылтӥ кадь кошкиз, нош Антонова йырзэ тӥяны кутскиз: мар ай выльзэ малпано? Сыӵе со � ужез усто пӧрме ке, тунсыко уг поты ни. Люказ фольклор коллектив, бӧрысьгес � театр. Калыклэн сюлэмаз ик пырылӥзы солэн геройёсыз. Ма, али ке но куд-огез шораз "Аннок" шуыса вазисько. Сокем усто пӧрмытылӥз. Огдыре ик малпаз дышетсконзэ азинтыны. Ай училищезэ йылпумъяку ик ӵектӥзы вал солы Челябинскысь культурая институтэ мыныны, мӧзмемысьтыз гуртаз берытскиз. Табере тани дышетскон мылкыд нош пурӟиз. Но мар кароно, пиналъёс пичиесь. Аресъем нылзэ песянайлы кельтыса, кузпалыз ужын дыръя записка гожтӥз но кошкиз. Со вал 1983-тӥ арын. Кӧня ке арня ортчыса бертэ но ваньмыз ӟечкылало. � Кытысь тодӥды ни, пырыны быгатӥ шуыса? � О-о, иське, эшшо ӟечкыласьком! � Маин? � Россиысь культура удысысь дано ужась ним басьтэменыд! � Тӥни ма! Умой ик вылэм шӧдтэк шорысь ӟеч ивор кылыны, шудо луыны. *** ...Адямилы крезьгурез валан инмарен ке сётэмын, со куке но одно кыре-буре потоз. Но кулэ-а сое пушкын кема ӝокатыса возьыны? Екатерина Леонидовналэн тодаз на, кызьы солы туж кема куремез бере арган кузьмазы. Мае ке, мае ке сямен ӟыгыртӥз сое, но кызьы шудыны уг вала. Дышетскы, курид бере, шуиз атаез. Озьы, номырзэ валатэк, кенсы ватскыса кысказ со арганзэ. Дасо кнопка зӥбе но, кыкез-куинез нота кузъяське ик. Дышиз ведь. Соин дораз шудыны дышетскыны курыса лыктэмъёслы шум гинэ потылӥз. Нырысь огез, собере кыкетӥез: "Катяпай, дышет!" Пӧлазы тросгес нылъёс. - Ма, тазьы маке но туж тунсыко пӧрмоно кадь ук, � лыктӥз солэн йыраз. Ну-ко, нылъёс, соку-соку ваньды ӵош лыктэ ай, сьӧрады эшшо мылкыд карисьёсты вае. Вань на-а сыӵеос? � Ма, Рита но кыска кадь. � Таняен Света но. Тӥни со вал туала тодмо "Арганчи" калык ансамбльлэн кылдэмез. Нырысь дасо пала люкаськизы, собере � тросгес. Туннэ соос кызь кык кузя. Зэм, огез кошке, мукетыз лыктэ. Нылъёс уго туннэ татын, ӵуказе � палэнын. Быдэс коллективен бӧрысь гур кырӟало кудзы ке бызьыку. Выль мурт гинэ ӧвӧл, эмеспи но бӧрдоз. Та аспӧртэмлыко нылкышно ансамбль сярысь кызьы ке ваньмыз туж ӝог тодӥзы: отчы-татчы ӧтё, учкыса чабкисько: ма, нёжто зэмзэ ик ваньды арганэн шудыны быгатӥськоды? � Ум, тэк киямы возиськом, � меӵкыто соос. Ма, огшоры калык гинэ ӧвӧл, алигес Ижевскысен Заволокин но озьы юаз. Воксё осконтэм потӥз, лэся, солы, быдэс Россиез, пе, котыртӥ ни, таӵезэ ӧй адӟылы на вал. "Арганчиослы" передачаяз тросгес дыр висъяло, шуиз. "Играй, гармоне" шедён бен оломар инӧсэн ӵошатымон ӧвӧл та нылкышноос понна: троссэ паймытъязы ни. Зол кичабизы соослы Москваысь Чайковский нимо концерт залын но, Финляндиын но. Арлы быдэ турлы фестивальёсы пырисько, пӧртэм шаеръёсы вуыло. Но кытын гинэ соос медаз луэ: кунгож сьӧрын-а, Москваын-а, бускель колхозын-а � котькытын огкадь сюлмысь кырӟало, вань лулзэс, мылкыдзэс калыклы сёто. Озьы верало тросэз артистъёс сярысь, но оске, таосыз самой нимо-даноосыныз но ӵошатонтэм. Май толэзе мыным шуд усиз арганчиосын Башкирие командировкае потаны. Мынытозязы быдэс сюресэз кырӟазы, отын дасо пала концерт сётӥзы, уйёссэ кӧлонэз тодытэк, калыкез шулдыртӥзы, озьы но куаразы ӧз пуксьы. Ай эшшо сцена вылэ потыкузы ик Екатерина Леонидовна нырысь микрофонэз палэнтэ, ми, пе, таӵе силёосын ум выриське, кырӟано ке кырӟано, нош таин куаратэмъёс мед вырозы. Зэм но, кисьто ке кисьто ни удмурт гурез таосыд, нош арганъёссы кызьы меда чидало на � кӧня кысказы ни соосты шаплы нылкышно киос! Оло, уд но оске, но мон ачим адӟи Екатерина Леонидовналэсь чиньыоссэ � берпум нуналаз соос вир потытозь пӧсьтӥзы. Тӥляд адӟылэмды вань-а туала кырӟамъяськисьёслэсь асьсэды со сямен жалятэк тыршемзэс. Ӧвӧл, дыр. Нош Катяпай (озьы вазисько со шоры гажаса) арганзэ куштыны уг ик малпа: кияз кутэ, кыске но вӧсез вунэ. Мар со вӧсь, мукетыныз ӵошатыса. Ар ӵоже ини куддыр кырӟан сяменыз шуак тодаз лыктэ Паримонэз, шудо вакытъёссы, ньылонэ маке но люкаське, синвуосты матэктытэ, но со тодэ: али уг яра, бӧрысь, уин бӧрдоз. Сэзъялске но выль гурзэ мытэ. Шӧдтэк шорысь пал кельтӥз сое кузпалыз. Кыкез нылъёссы быземын, асьсэ семьяен уло ни, покчиез, Надя, Ижын культурая училищеын дышетске. Каникулъёсаз но шутэтскон нуналъёсы гинэ бертылэ, анаеныз ӵош ансамбльын кырӟа. Нош туннэ Катяпаез кузь сюрес вылысь нокин уз пумита. Скалэз ке шат куняназ (сое эскерылыны бускель песянаез куриз вал). Пумитасьёс бен шедьысалзы, Катяпай ачиз палэнтэ. Сыӵе со � вань ке вань, ӧвӧл ке ӧвӧл, пе, медло: кырӟано, яратоно ке � вань сюлмысь. З.РЯБИНИНА. 02 ИВОРТЭ Син азьын кокчалтозы Августлэн нырысетӥ кык нуналъёсаз гинэ шаерамы 147 пол законэз тӥян учыръёс вал, 122-аз йыртэмась адямиос шараямын. Милициын ужасьёс 866 кудӟем муртэ ӝегатӥзы, со пӧлысь 427-зэ сазьтӥськон интые келязы. Ульчаосын но шутэтскон интыосын асьсэды умойтэм воземзы понна 265 муртлы штраф сётэмын. Погонэн адямиос 116 пол пыриськизы кудӟем семьяосты буйгатонэ. Ижысь Позимь шурысь поттэмын 39 аресъем воргоронлэн мугорыз. Киосыз думылэмын, жугем интыосыз адӟисько. Та учыръя ӝегатэмын 33 аресъем тюрьмаын пукем мурт Олег Б. но Автозаводын ужась Валерий С. Нырысетӥезлэн улон интыысьтыз шедьтэмын РС-22 револьвер. Та "шудон" тупатэмын вылэм пичи калибрен патронъёсын ыбылӥськыны. Удмуртиысь но Саратов областьысь уголовной ужъёсты эскерисьёс огъя кужымен кырмизы Саратов областьысь Самойловка гуртын улӥсез 37 аресъем Юриез Я. Та гуртын ик ӝегатэмын азьвыл пытсэт улэ сюрылэм 30 аресъем Ижын улӥсь Сергей А. Соослэн дорысьтызы шедьтэмын но таламын граната но кык гумыё вакчиятэм пыӵал. Мынэ следствие. Завьяловоысь РОВД-ын ужасьёс 500 граммъем мак куро понна кырмизы Ижысь 17 аресъем Александрез М. но 20 аресъем Денисэз В. Соослэсь талазы эмъюмен шприцъёссэс. Таосыз экспертизае келямын, нош асьсэос � кечат-вамат укноен юртэ. Нуназе куинь часын Ижысь Максим Горький ульчаын тодмотэм воргорон 24 аресъем нылкышнолэн Т. чыртыысьтыз кык зарни жильыоссэ кыскыса пегӟиз. Шуге-леке сюрем адями милицие вазиськиз. Ӝог ужрадъёс кутэмен, ашкынэм пиосмурт кырмемын вал. Со Ижысь монтажной техникумысь 23 аресъем мастер Денис З. Улон но ужан интыяз азьло лушкам ваньбурзэ утчало. Нырысетӥ августэ уин Балезино районысь Юлдырь гуртлэн магазинысьтыз поттэмын кудӟытӥсь ӟенеликъёс, 400 манет коньдон но сиён-юонъёс. Кӧня тыр ваньмыз, тодмо луоз следствие ортчыса. Со ик вералоз, дыр, мурт чотын улыны яратӥсьлэсь нимзхэ. Ижысь Вормонлы 40 ар ульчаысь 93-тӥ юртлэн азбараз ӝегатэмын 42 номеро школаысь 15 аресъем Михаил К. но та школаын ик дышетскись 14 аресъем Антон К. Кыксы но эшъясько вылэм наркотикъёсын, героинзы таламын. Ижысь Халтурин ульчаын улӥсь 41 аресъем Сергейлэн З но солэн 19 аресъем вордос пизылэн Дмитрийлэн куспазы сьӧд коӵыш, лэся, ортчем. Ог-огзэс адӟонтэм каризы. Сергей трос пол виёнэн кышкатъяз вал ини. Таяз учыре шимес малпанзэ быдэстӥз � Димаез пӧйшуран пыӵалысь ыбиз. Йыружез понна кыл кутонлэсь пегӟон вылысь ассэ но быдтыны малпаз, ӧз пӧрмы � сӧсырмиз гинэ. Пичи Пурга ёросысь Выль Монья гуртысь 61 аресъем пенсионер Иван Б. но солэн 20 аресъем вынмуртэз Сергей куспын керетон ӝутскиз. Егит муртлэсь мытылыны дӥсьтэмзэ нырысез ӧз чида, "дышетоно" кариськиз... пуртэн. Кызьы улыны табере ассэ дышетозы. Удмурт Республикаысь МВД-лэн пресс-службаез. Секыт йыруж лэсьтэмзы понна Ижысь милицилэн Индустриальной ёзэз утча 1959-тӥ арын 21-тӥ январе вордскем Чернов Николай Николаевичез но 1965-тӥ арын 23-тӥ январе вордскем Ершов Сергей Юрьевичез. Кин быгатэ юрттыны та адямиосты утчанъя, вазиськоно таӵе телефонъёсъя: 29-80-11, 29-52-33, 29-70-20, 29-58-00. УЛОН НЮЖАОС Тӧдьы куака Аръёс ортчемъя, шергес но шергес поттылӥськом афган музъем вылын ожаськемъёс сярысь. Нош соос тросэзлы дышетысалзы чечен войнаысь бертӥсь пиосмес. Кылсярысь, Афганистанысь Горд Кизили орденэн вуэм Сергей Гапонов вань улонэныз возьматэ, кызьы шуг-секытъёсты чидано-вормоно, азьланезлы оскондэ возёно. Ростов-на-Дону городысь Фиолетов ульчаысь одӥгез юрт музонъёсызлэсь висъяське. Тӧдьы кирпичлэсь кык этажо юрт азьыныз учке артэгес сылӥсь черклэн зарнивуам йылъёсыз шоры. Юртлэн пушказ вить комната, вань ваннаез, саунаез, котькуд этажын туалет. Котырскыса тубон пагӟаос чебер корка пушез эшшо но узырмыто. Талы, оло, ӧд но паймысалыд, но солэн кузёез коляскаысь уг султылы. Юрт лэсьтонысь туж трос ужъёсты со ас киыныз быдэстӥз. Коляскаын пукыса, Сергей цемент суралляз. Ки кутӥськон вылэ пул тупатыса, 20-25 кирпичез азбар вамен юрт ӝутӥсьёслы ворттылӥз. Ачиз укно рамаосы пияла вандылӥз. Шуныт сётон гумыосты буяз. Ву лыктон гумыослы 50 метр кузьда музъемез гудӥз. Малпалляз-а таӵе адӟонэз сярысь куке но Сергей. Матэ вуэ вал ни дембель. Толэзен ӝыны ортчыса со дасяське ни вал ӵыжы-выжыосыныз, тодмоосыныз пумиськыны. Дембель вуиз вазьгес, чылкак малпамтэ шорысь � мугораз мертчиз санйперлэн пуляез. Ярам, пияшез госпитале ӝог вуттӥзы, кӧня ке минут куспын. Узвесь кугӟам Сергейлэн сюрлыяз. Хирург йырыныз гинэ шоназ: "Улӥсь уз луы ни, дыр". Гапонов улӟиз ньылетӥ нуналаз, реанимациын. Вордскем Сальсказ сое ваизы носилкаос вылын. Эх, таӵеен-а малпалляз со армиысь бертонзэ. Аслыз ачиз Сергей кыл сётӥз, анай-атайёсызлэн чырты сьӧразы уз пукы. Котькыӵе уж борды басьтӥськылӥз: пыдкук вуриз, корзинаос кутаз. Тае адӟыса, одӥгез тодмоез, Жора, юрттыны куриз куарая студиын. Ужез борды Сергей кион кадь басьтӥськиз. Коляскаезлэсь возьдаськыса, кассетаос сётъялляз атаезлэн машинаысьтыз укно пыр. Казане, Украинае, Москва котыре вуылӥз. Куддыр сутка ӵоже, "дефицит" шуон кассетаосты утчаса, сюрс иськемъёсты котыръяз. Сокем зол ужез "пӧзиз", ужбергатонэз ас кияз басьтӥз. Вераськон куспамы котырамы берга ньыль аресъем Рома, атаез кадь ик чагыр синмо сьӧд синкашъем мусо пияш. Ира ӝӧк вылзэ дася кофе юыны. Ӝужыт, веськрес мугоро нылкышно чебереныз амалтэк синмез кыске. Эшъёсыныз нырысьсэ Сергейлэн выныз Юра доры куное лыктыкуз, солы 17 гинэ вал ай. Паськыт пельпумо сӥльвиро пияшез адӟыса, интыяз ик кынмиз кадь: "Кыӵе чебер". Коляскаын шуыса валаса но ӧз вутты. Сергей шудыса- серекъяса вераськылӥз, капчи мылкыдэныз нылэз эшшо но бордаз думиз, кусыпъёссы люконтэм кадь луизы. Иралэн анаез, та сярысь кылыса, чутрак вандӥз: яке со, яке мон. Ира Сергей доры кошкиз. Таӵе вамыш лэсьтэмзэ уг жаля. Нылкышно сямен малпанзэ бергатэ: эшъёсылэн картъёссы тазаесь, озьы ке но, урод кылъёссэс но тордэм ымныръёссэ сяна умойзэ уг адӟо. Нош со Сергеен ӝыны Россиез котыръяз, кык пол кунгож сьӧры потаз. Пизы но будэ. Ростове вуизы нырысь Сергейлэн анай-атаез. Город пуме пичигес корка басьтӥзы. Юрт вӧзысь нюко-гопо кыралэз бӧрысь егитъёс ӵошкатӥзы, 45 "КамАЗ" музъем вӧлдӥзы, собере выль корка борды кутскизы. Ма, луысал, дыр, улон инты курыны, но Сергей выллемъёс странаын сюрсъёс, котькудӥз юрттэт возьма. Гапонов ас кужымезлы, быгатонлыкезлы оскиськиз. Ужаса люкам но кык машинаосты (аслэсьтыз но атаезлэсь) вузаса поттэм коньдонэз лэсьтӥськонэ кутӥз. Уксёен юрттӥзы на анай-атаез, лэсьтӥськон материалэн � городысь мэрия, укноос, ӧсъёс, фанера висъяз. Вуоно корказэс Ирина но Сергей асьсэос суредазы, сое чаклазы ӧс лёгетъёстэк, коляскаен аньыль ветлоно каризы. Коркаысен ик гараже васькыны луэ, пеймыт горд буёло "Форд" кузёзэ возьмаса сылэ. Ворттылэм машинаез Сергей но Ирина басьтӥзы Германиысь, эшсылэн ӧтемезъя отчы ветлыкузы. Немецъёс коляскаен муртэ адӟыса, машина дунэз трослы кулэстӥзы. Но шумпотон палдурес вылэм. Таможня выт куре, машина дунлэсь трослы бадӟымгес. Сотэк машинае пуксьыны уг лэзё. Таможнялэн Ростовысь но Москваысь ёзъёсаз ыстэм гожтэтъёс пайда ӧз сётэ � "льготаос ӧвӧл", � шуизы Гапоновлы. Паймымон учыр. Нырысетӥ группаен сӧсыр муртлы кунмы машина висъяны кулэ. Сергей басьтэ ас уксёеныз. Нош табере кун сӧсыр мурт чотын узырмыны тырше. Нош пенсиез Сергейлэн 800 манет. Корказэ вуттыса, Сергей нош ик ужбергатонэн вырыны малпа. Коляскае думиськемез дырысен 18 ар ӵоже Сергей огпол но нокыӵе компенсациос ӧз басья. � Калыклэсь пӧртэм, лэся, мон. Таӵеослы асьме странаын 8 метръем коммунальной квартираын улыны кылдэмын. Самой умоез, мар дэмлало � "Запорожец". Соин ик мон киме мычыса уг ветлы. Людмила Карамышева. ("Труд" газетысь). Ӟенеликлэн дуныз куашка Адямиос туж ярато милициын ужасьёсты тышкаськыны. Кызьы но уг шуо: "кырсь мент", "жаг". Син азе пуксё адямиез валаны быгатӥсьтэм пурысь дӥсен лек пиосмуртъёс. Зэмзэ ик-а соос сыӵеесь? Нош ми, огшоры адямиос, туж-а умоесь? Июль. Ӝыт. � Петровка? Кылӥськоды-а монэ, Петровка? Татьяна Барамзина урамын лушкаськон. Пиосмуртлэсь басьтӥллям зарни жильызэ. Йыртэмасьёс вал куинь кузя. Кыкез гарамӧля, куиньметӥез тӧдьы дэремен, кельшо наркоманъёслы. � Валай, � сак кылзӥськыса вераз пульт сьӧрын пукись диспетчер. Тазьы кутскиз Иж карысь Устинов ёросысь Петров урамысь кызь сизьым номеро юртэ интыяськем РОВД-лэн уин ужанэз. Тямыс часын вуизы ГНР-ысь (группа немедленного реагирования) пияшъёс. Соос куинь кузя. Юра � шофёрзы. Шоро-куспо арлыдъем кӧто пиосмурт. Саша сержант � кивалтӥсьсы. Чебер пинал милиционер. Кирилл тужгес но егитэз, солы кызь арес гинэ ай. Ӝужыт мугоро, куӵо дӥсен, пыдкутчаназ дуретъёс шуккылэмын. Солы автомат оскемын. Ворттыло воргоронъёс 1626 номеро УАЗ-эн. � Эшъёс, тӥледын ӵош туннэ рейдэ потоз корреспондент. нылашез уте, умойтэм учыре медам шедьы. � Яралоз, начальник эш. Котькуд ужан ӝыт пиосъёслэн кутске, ёросысь сазьтӥськон коркае ветлыса. Татын шофёрлэсь тазалыксэ эскеро, давленизэ мертало. Ваньмыз умой ке, мыно нырысетӥез ӧтёнъя. � 1626-тӥ, учкелэ Коротков урамысь школа котырез, йыртэмасьёс отчы пегӟыны быгатозы. � Мынӥськом. Утчаны кутским зарни жильы лушкасьёсты. Эскерим дышетскон инты котырез, артэ ульчаосты, синйылтӥськом мынӥсь-ветлӥсьёсты. Кирилл: � Табере соос, трамвае пуксьыса, центр пала кошкизы ни, дыр. Саша палэнынгес сылӥсь корка шоры возьматӥз. � Ойдолэ учком та юртэз. Куке но татын наркотик вузан инты вал. Машина дугдӥз. Ми вамыштӥм корка пала, вуим подъездозь. Татӥяз пиос монэ ӧз ни возьмалэ. Кык-куинь пагӟа вамен вамышъяса, вылэ бызизы. � Учкы, Оля, тани укол пуктэм шприцъёс костасько. Мукет номыр ӧвӧл. Таиз ӧс сьӧрын вузаськон интызы. Отчы пырыны мугъёсмы ӧвӧл. Озьы вераськыса, куиньнамы васькиськом витетӥ этажысен. � Та выллем юртъерын ужамы вал ни. Наркотик вузан интыосты тодыса, котыртӥзы ӵемгес ветлӥськом. Синйылтӥськом басьяськисез, вераськиськом соин. Собере сётӥськом кык сю манет тодмостэм коньдон. Соин адями мынэ выль "вуз" басьтыны. Возьмаськом потэмзэ. Ӧс усьтӥськыку, шуак пыриськом. Уксёзэс но вуззэс унитазысь вуэн гылтыса уг ке вуо, удалтэ. Одӥг кышномурт ваньзэ куштыса вуттӥз. Юртъерзэ эскерыса, холодильник кукъёсы спичка коробкаен ватэм наркотик шедьтӥм. Машина пала вуыкумы, Юра дыртытӥз: � Труд урамысь кышномурт жингыртэм, подъездазы вуриськон машина, пе, сылэ. Оло, пуштон арбериез вань бордаз. Вуим ӧтем интые. Куатетӥ этажысь жаг куян дорын сылэ киын вуриськон вуж машина. Адске, сӧриськемын. � Кыӵе пуштон татын луоз? � пайми мон. � Косэмын бере, учконо, � Саша усьтӥз пушсэ. Со дыре артэ квартираысь потӥз песянай. Кушетскемын. � Ой, пиосы, татын эн усьялэ, пуштоз ук. � Эн курда, меми, пушказ солэн номыр ӧвӧл. � Ярам, иське, кышкай вал ни. Тау лыктэмды понна. "Пуштоно арбериез" Кирилл кияз кутӥз. Кошким. � Ма кароды та машинаен? � Оперативникъёслы кузьмалом, соос мед малпаськозы ни. Кинлэн ке жаглы куян дорозь ветлэмез потымтэ, луоз, кулэтэм арберизэ подъездаз ик куштэм. Таӵе ӧтёнъёс трос луо. Москваын луэм учыръёс бере адямиос пуштонлэсь курдало. Нош ми тани жуг-жаг утялтӥськисьёс сямен ветлӥськом. Машинае интыяським. Рация шып улэ. Пиосмуртъёс ӧз чидалэ тэк пукыны. Молодёжной ураме кошким. Отын "комокъёс", пе, трос, куашетонъёс но ӵемгес луыло. Ширтӥмы азьлань. Татын пукон интыос лэсьтэмын. Адямиос ялкаро. Кырӟа бард. Улмолы усён инты ик ӧвӧл кадь � сомында калыкез. Милиционеръёс адямиос пӧлтӥ ортчизы, йыртэманъёсты алон понна, пе. Со куспын рация но "улӟиз". � "1626"-тӥ, вазиське Петровкалы. � Кылзӥсько. � Барамзина урамын кышномуртэз дораз уг лэзё. Эскере, мар отын. Урамъёсын пеймыт ни. Шедьтӥм кулэ юртэз. Дорамы лыктӥз нылкышно. � Мар тӥляд луиз? � Картэ пытсаськем. Пырыны уг лэзьы. Толон но нылыным уин кык часозь калгим. � Возьматэ ӧстэс. Пырим подъездэ. � Табере вераське картэныды. � Володя, лэзь милемыз пырыны. � Уг. Тонэ уг лэзьы. Нылмес гинэ. Куаразэ кылыса валай, пиосмурт зол кудӟемын. � Мон но адями ук, ялкареме потэ. Ӧс усьтӥськиз. Пиосмурт мазэ-созэ валаса но ӧз вутты, милиционеръёс квартираын вал ни. � Мар луиз? Мар тӥледлы кулэ? � юаз со пыремъёслэсь. � Мон ӧти. � Визьтэм кышномурт. Та юрт � мынам. � Тӥни озьы милемыз возе, � шуэ кышноез. � Ваньмыз татын солэн. Нерад кариз ни. Нуэлэ сое. � Ум быгатӥське. Со аслаз юртаз. Ченгешонзы нокызьы уг быры. Саша ӧз чида. � Картты вылэ яке ӝожтӥськон гожтэ, яке милициез алдаськыса ӧтемды понна ми тӥледыз кыл кутытом. � Огпол гожъяй ни, улонэ гинэ шугомиз. Саша воргоронлы вазиськиз: � Кытын ке ужаськод-а? Кыӵе уксёен ымпуштэ гылтӥськод?! � Мон Севере ветлэмын. � Пенсия басьяськод-а? � Озьы но луоз вераны. � Нокытын но уг ужа со. Тэк юыса ветлэ, � ӧз чида вазьытэк нылкышно. Саша: � Я, дӥсяське чаляк. Керетӥсь семьяез РОВД-е нуыса кельтӥм. Рация пыр нош ик ӧтизы. Азбарын, пе, черекъяло. Мынӥськом Труд ураметӥ. Котыр шыпыт. Нокинлэн куашетэмез уг кылӥськы. Дугдӥм скамья вылын пукись пиосмуртъёс но кышномурт доры. � Тӥ ченгешиды-а? � Ӧм. � Ма сыӵе юиськоды? � Номыр но ум. � Нош малы рюмкады сылэ? Пукон улысь пинь гылтон "Леда" сурет шедиз. � Кызьы тӥ тае юиськоды? � Дунтэмгес усе. Водка ньыльдон манет сылэ, нош таизлэн ӝыны литрез ик кызь ньыль манет луоз, градусэз но тросгес. � Кытын улӥськоды? � Татын ик. � Чаляк дорады пырелэ. Ӧд ке кылзӥське, сьӧрамы нуом. Выльысь потӥм бадӟым ураме. Автобус дугдон интыын шонаськыса сыло пияшен нылмурт. Дугдӥм. Кыкназы ик лы но ку. Нылмуртлэн нырыз горд-горд, ымнырыз лымы кадь тӧдьы пакетазы кык ӟенелик одеколон. Кытчы мынэмзэс вераны ӧз быгатэ. Юрттоно луиз машинае пуктыны. Сюресъёс аламаесь, уазикмы тэтча. Юисьёс тышкасько. � Лэзелэ милемыз. Милям пропискамы вань. Вуим сазьтӥськонние. Формаен пиосмурт ӧз паймы: � Эшъёсмес ваиды-а? Кыкназэс ик эмъяськон коркае пыртӥзы. � Документъёстэс возьматэ. Юэмъёс погмаськем бумагаоссэс � паспорт нергеоссэс поттазы. Бомжъёс. Огдырлы Чур гуртэ интыяськемын. Документъёссы пӧлын ик тӧдьыё-гордо бумагаос, кыкназылэн но туберкулёз. � Э-э-э, эшъёсы, тӥледыз татчы интыяны ум быгатӥське. � Нош ми мар соосын каром? Приёмнике но, больницае но уз басьтэлэ, � табере ини паймизы мынам эшъёсы. � Уз. Поттэлэ татысь, мед доразы бертозы. Номыр вератэк, юэмъёсты ураме поттыса кельтӥм. Ми но адямиос, милям но висеммы уг поты. Машиналэсь вань укнооссэ усьям, эмъяськонниын ужасьёс валэктӥзы, чылкыт омыр, пе, туберкулёзлэсь инфекцизэ вие. Нош ик ӧтись луиз. Автозавод урамысь шӧй шедьтӥллям. Трос этажъем из коркаос вӧзысь пичи сюрес вылын зор ву люкаськем. Отын кылле адями. Тыбырыз гинэ адӟиське. Выем. � Учкелэ умойгес, уд тодмаське-а? � люкаськем калыклы вазиськизы эшъёсы. Ваньмыз шып уло. Йырынызы шонало. Милиционеръёс ог-огзы шоры учкизы. � Солэн документъёсыз сьӧраз вань, дыр. Шӧез берыктыса, кисыоссэ эскеризы. Вӧсяськон книга гинэ сюриз. Кӧня ке дыр ортчыса вуизы следовательёс. Юасько соослэсь: � Мар луэм? Судмедэксперт валэктӥз: � Юэмын вал, дыр. Канжаськыса вуэ усем. � Кин ке, оло, усьыны юрттӥз? � Уг адӟиськы. Жугемын ӧвӧл. Дӥськутэз но кесяськымтэ. Син палтӥз гинэ шуккиськемын. Усьыкуз асфальт борды вӧсь кариз, луоз. Адямиос жингыртэмен тазьы быдэс уй ветлӥм. Ӵукна пал синъёс асьсэос ворсасько ни вал. Нош рация улӟиз. � "1626", вазиське Петровкалы. � Кылзӥсько. � Ворошилов урамысь пиосмурт вазиськиз. Кин ке, пе, ӧсаз йыгаське. Эскере. � Валай. Вуим ӧтем интые. Пыдъёс мырдэм вамышъяло. Милиционеръёс жингыртӥсь доры кошкизы. Кӧня ке улыса пото. Соосын ӵош � пурысь штаниен но кечат-вамат горд дэремен пиосмурт. � Бергес вуиды. Пегӟизы ни. Тани татын пукизы, � возьматэ лапег куакъёс пӧлы. � Кӧня кузя соос вал? � Куамын пересьёс. � Нырысь кызь шуид вал. Нош мар соослы тынэсьтыд кулэ? � Уг тодӥськы. Ойдолэ корка сьӧры, отын ватскемын, дыр. Мынӥм. � Кытын? � Кошкиллям ни. � Тон али дорад пыр но ворсаськы. Нокытчы эн пота. Ми юрттэт ваём. Куинь кузя куамын пересьёсыз ум ворме. � Яралоз. Пытсасько. Одно лыктэ. Бызьыса подъездаз пыриз. Нош Саша рацизэ кутӥз. � Ворошилов урамысь пиосмурт выльысь жингыртӥз на ке, тямысэтӥ бригадаез ыстоно. � Валай. � Трос-а пумиськыло йырсазьзы сураськем таӵе адямиос? � Ӵем ик. Огпол жингыртӥзы, подъездтӥ, пе, тодмотэм гольык пиосмурт бызьылэ. Квартираосы йыгаське. Ӧм оске. Вуим но � зэмзэ ик гольык. Монэ, пе, дорам уг лэзё. Нош ачиз та юртын уг но улы вылэм. Сазьтӥськонние нуыса кельтӥм. Кирилл: � Юон быдтэ адямиез. Таиз но тани толон одеколон оскалтэм. Артэ улӥсь кышномурт вераз. Соин ик йырыз сураськем. Киосысьтыз вирсэръёсыз но куке вандылэмын вылӥллям ни. Аракы юисьёслэсь трос луэмзэс тодӥсько ке но вал, ӧй малпа, одеколонэз яратӥсьёс сомында луозы шуыса. Юонлы дунъёс будэмен, юисьёс но ӧжытгес луыны кулэ кадь, кытысь сомында уксё тырмытод. Нош "вож кыйлэн" кыӵесаз сюремъёс олокызьы но амалъясько � водкалы уг тырмы ке, мукетызлы одно сюроз. Уй куспын одӥг песянайлэн гинэ жингыртэмез юонэн герӟаськемын ӧй вал, пуштонлэсь курдам. Нош ваньмыз мукетъёсыз... Асьмеос малпаськом, малы сомында милиционеръёс кулэ. Уй возьматӥз, юнме ӧвӧл соослэн лыдзы будэмын. Ужась адямиос та дыре ческыт уйвӧтъёс адӟо. Калго юисьёс, йыруж лэсьтӥсьёс, лушкаськисьёс гинэ. Макем трос шаерамы законэз тӥясьёс. О.КОЖАНОВА. Туспуктэмез В.Беломорскихлэн. "Карелиез кема вӧтало на..." Автономия басьтэмез дырысен Удмуртия 4-тӥ ноябре пусъёз 80 ар тырмонзэ, Карелилэн таӵе юбилеез ортчиз июньлэн кутсконаз. 1920-тӥ арын 8-тӥ июне кылдытэмын вал Карелия трудовой коммуна, куинь ар ортчыса, Карел АССР. 1940-тӥ�1956-тӥ аръёсы � Карело- Финской ССР. 1991-тӥ арысен � Карелия Республика. Пусъём на, татын улӥсь калык, удмуртъёс сямен ик, пыре финн-угор дуннее. Одӥг выжысь луиськом бере, сюлмаськонъёсмы но огвыллемесь, дыр. Со понна вакчияк тодатскоме Карелия Республикаысь Правительстволэн Тӧроезлэн Сергей Катанандовлэн "Российская Федерация сегодня" журналлы сётэм интервьюеныз. � Сергей Леонидович, кыӵе со � Карелия? � Кык ар талэсь азьло, ӵош ужаны кутскыса, ми но комнадамы азе таӵе ик юан пуктӥм вал. Карелия � котькудмы понна самой дуноез, самой матысез музъем. Ми сое яратӥськом вордэм анаймес кадь. Шаермы быдэсак ышемын пумтэм-йылтэм нюлэсъёс но тыос пӧлы, соос милям ог 70 сюрс пала. Эшшо ми сярысь тодо на "Долго будет Карелия сниться" кырӟанъя. Республикамылэн со аспӧртэмлыко визитной карточкаез, шуыны луоз. Ватсало на: музъемъёсмы интыяськемын Россилэн границаез валлин. Валтӥсь инты басьтэ нюлэс промышленность. Азямы ми чылкак выль ужпум пуктӥм. Карелия пӧрмыны кулэ вылӥ социально-экономической республикалы, кибашлыосынызы данъяськись шаерлы. Кык ар куспын, шумпотыса пусйисько, та ласянь азинсконъёсмы шӧдӥсько ни. � Тӥ асьтэос кытын вордскемын? � Татын, Карелиын, вордски но, дышетски но. 45 арес тырмонме пусйи ни. Нош мумы- бубыосы лыктэмын пӧртэм интыосысь: анае � Ленинградысь, атае � Северной Кавказысь. Соос кыксы но егит специалистъёс луыса вуизы вал, кузпалъяськизы. � Сергей Леонидович, кык ар ӵоже тӥ кивалтӥськоды ни Правительстволэн уженыз. Кыӵе воштӥськонъёс ортчизы та дыр куспын? � Ушъяськыны умой ӧвӧл ке но, верало: чаклам программаез ми быдэстӥм. Республикалэн улон-вылоназ со котыр ласянь шӧдӥське. � Промышленностез азинтонын кыӵе удысъёс азьпала пото? � Экономикаез юнматонын валтӥсь инты азьло сямен ик басьтэ нюлэсэн ужан но вузкарон, со бере � бумага, машина лэсьтон, алюминий поттон. Россиын поттоно бумагалэн 23 процентэз усе Карелия вылэ, ог 10 процент пала сётӥськом железной руда, сомында ик целлюлоза, 4 процент лэсьтӥськон кор. Промышленность, трос шуг-секытъёсты но ыштонъёсты адӟыса, али азинске. Зэм, Москваысь юрттэт басьтытэк, ас кожамы улыны уггес пӧрмы на, но солэн быдӟалаез пумен кулэсме, бюджетын 11-12 процентозь усиз ни. Кылемзэ коньдонэз республика ачиз поттэ. � Нош кык ар талэсь азло кыӵе дотация вуэ вал? � 30 процентозь. � Россиысь улосвылъёслэн данакез шугъяськонъёссы огвыллемесьгем. Карелилэн аслыз гинэ тупась сюлэм висёнэз вань-а? Кызьы со шоры учке федеральной центр? � Карелиез узыр республикаосын артэ уд пукты. Милям му вӧймы но, зарнимы но ӧвӧл. Зэм, вань алмазмы но уранмы. Но соосты поттыны кулэ туж трос коньдон. Ми шедьтӥм мукетгес амал: границаен артэ улэмысьтымы пайда поттыны. Но со туж шуген сётске, малы ке шуоно, кунгожмес утисьёс асьсэос туннэ туж ёрмо, нош таможнялэн поттэм коньдонэз быдэсак кошке центре. Со туж умойтэм. Москвалы огпол гинэ ӧм вазиськылэ ни та пумысен: малы республика вылэ усе границаез возён, нош кытын федерацилэсь юрттэт? Россилэн выль президентэз мукет сямен учкоз, дыр, кылдэм югдур шоры. Вераны кулэ, Карелиын туннэ одӥг федеральной программа но уг быдэсъяськы, нош нырысетӥосыз пӧлын сылыны кулэ вал "Граница" нимаськисез. Эшшо огез висьытӥсь ужпум: партия кивалтон аръёсы граница аспӧртэмлыко заповедниклы пӧрмытэмын вал. Отын номыр выльзэ ӧз лэсьтэ, ӧз азинтэ. Соин сэрен кунгож вылын туннэ йӧскадь посёлокмы но, сюресмы но, связьмы но ӧвӧл. Финнъёс, дорамы вуыса, тайгае кадь шедё. Карелия со быдӟа ужез, центр басьтӥськытэк, огназ уз вормы. � Тӥ 8 ар кивалтӥды Петрозаводскысь мэриен, али � быдэс республикаен. Кызьы учкиськоды кивалтон удысэз вертикаль амалэ выжтон шоры? � Владимир Владимирович Путин Карелие вуылыку, та ужпумъя ми кенешим. Вуж сюрес вылэ берытскыны капчи уз луы ни, нош учконо ке, соку но вылӥысен пуктэм кивалтӥсьёс ваньмыз-а умой-умой ужазы? Мон малпамъя, интыосын ас коже кивалтонъя ёзъёсты быръён- воштон ужез мур малпаськыса ортчытоно, со понна оскымон закон кылдытоно. Федерациез 7 округлы люкон � бадӟым ужлэн кутсконэз. Мон малпамъя, котькудӥз кивалтӥсь: пичи- а, бадӟым-а � мед шӧдоз сое чаклась-эскерись вань шуыса, та радэ пырыны кулэ центральной власть но. Конституциез тӥясьёсты, законэз быдэсъясьтэмъёсты кивалтон удысысь ӝегатскытэк мозмытоно � озьытэк улонлэсь радлыксэ уд шонерты. � Одӥг пол коть Карелие вуылэм мурт шаердэс вань улытозяз тодаз ваёз. Зэмен но, кырӟанын верам кадь, со туж чебер, бордаз кыскись. Трос-а туристъёс дорады вуыло? � Туризм � со быдэс индустрия. Азьвыл аръёсы Карелия пыртэмын вал 300 всесоюзной маршрутъёс радэ. Али но дорамы сюрес пытсамтэ. Кунгож сьӧрысь вуылӥсьёс сярысь ке верано, татын ужано нимысьтыз программа бордын. Самолётысен гинэ Кижи шормуӵез уд возьматы, кулэ сюрес но мукетыз. Куноослэн одно ик вуылэмзы потэ на Валааме, Соловецкысь монастыре. Мон уг вераськы ни пӧйшуран-чорыган, заповедникъёсы вуылон сярысь. Данъяськымон, возьматымон интыосмы трос, соин ик туризмез азинтон бордын федеральной властен ӵош ужаны кулэ. � Республикаяды пӧртэм выжыысь калык улэ. Озьы ке но, социальной но политической югдур ӧрысьтыз уг пота. � Быръёнъёсы пыриськыса, калык азьын мон кыл сётӥ калык кусыпъёсты, культураез азинтон сярысь. Мон, ӟуч адями, вань луонозэ лэсьтыны тыршо, финн-угор культура вылӥын мед луоз шуыса. Со понна кутэмын нимысьтыз программа, усьтэмын национальной школаос, кадръёсты дасянэ мылысь-кыдысь пырисько институтъёс. Карел гурт огез но бырыны кулэ ӧвӧл, отын улӥсь калык ӟеч уждун мед басьтоз но мед азинскоз. Дасяз Л.МЕДВЕДЕВА. Кураськисьёс но сётъясьёс Ог-огедлы юрттон � со ӟеч сям, куке кисыяд жингыртӥсез вань. Чаклалэ ай ульчаосын кӧня кураськисьёс. Ваньмызлы сётылыны кутскид ке, ачид но гольык кылёд. Магазинэтӥ пыдъёссэ кыскаса бомж ветлэ. Шӧмыз кыдёкысен ик шӧдӥське. Басьяськисьёс доры лыктэ но куре. Ымнырыз кескич, ымдуръёсыз мыняло кадь. "Сётэ мыным, шузиос..." Калык тросэз палэнске сыӵе адямиослэсь, нош ваньзы уг. Зэмос кураськисьлэн тусыз секыт луэ, нош таизлы, валамон, таӵе кураськыса улонэз туж кельше, шӧдске. Малы сыӵе муртлы ужаса поттэм копейкадэ сётод. Ачиз мед ужалоз, дышем угось дасез вылын улыны. Йыр но кур луэ. Сыӵе кураськисьёс городамы али туж трос. Ужаны быгатӥсь пиосмуртъёс, чик возьдаськытэк, кураськыса сыло. Алигес сыӵе пиосмурт саестӥм кутӥз но "вай коньдондэ" шуыса вазиз. Сыӵе муртлы дас копейка но жаль. Дышиллям ини капчиен коньдон жильдыны. Ай вылаз ик шуэ: "Ӧд ке, пе, сёты, али ик куло!" Больницаын но вытрезвительёсын сыӵе бомжъёслэсь акыльтӥзы ини.. Адямиез бурмытыны уг луы угось, аслаз мылкыдыз ӧвӧл ке. Озьы улэ бере, солы озьы кельше. Нош ми, солы сётъясьёс, соослэсь сьӧлыксэс эшшо но, оло, бадӟыматӥськом... Юрттэм улсын адямилэсь данзэ быдтӥськом, сое ултӥяськом, нялтас асьмеды но, малы мон яке тон соослы юрттыны кулэ? Одӥг кышномурт, поездэ дыртыкуз, билетсэ ыштэм. Одӥг пиосмурт солы юрттӥсько шуыса, солы аслэсьтыз билетсэ жаляса сётэм. Нош со поезд аварие сюре но кышномурт бырыны шеде. Со ӧй ке "юрттысал", кышномурт, оло, улэп кыльысал. Соин ик юрттон азяды малпаське, оло, адямилы сыӵе юрттэт чик но кулэ ӧвӧл. Ӵем дыръя асьмеос нылпиосмес дышетӥськом: "озьы кар, тазьы кар". Номыр карыны валасьтэм муртэз сямен, со интые ваньзэ лэсьтыны дыртӥськом. Нош со интые милемлы улоно уз луы ук. Соин но, дыр, куд-ог нылпиос зэмзэ но номыр карыны уг быгато, кураськыны сяна. Кураськисьёслэн дуннеязы улон ёзнэтъёс туж шырытэсь. Кин кужмогес, кин мукетсэ ӝоггес ӝокатыны быгатӥз, со ик вормиз. Лыдӟе ай П.Блиновлэсь "Улэм потэ" повестьсэ. Отын со сярысь туж яркыт верамын. Инмар мед утёз сыӵе адӟонлэсь. Адями улон сюрессэ ачиз быръе. Соин, дыр, тросэз егит дыръязы ик куанер улӥсьёс улон сӧзнэтъёсты валаны ӧдъяло. Ёрмыса улонтэм вылысь, пумен байлык люкало но калыке пото. Светлана ПЕТРОВА. "Удмурт кенеш" � Вершинин понна Арня талэсь азьло ортчиз Павел Вершининэз президентэ кандидатэ дэмланъя бадӟым кенеш. Но ивор вӧлмытӥсь куд-ог ёзъёс та ужрадэз воксё мыдланьтыса возьматӥзы, собрание, пе, куашказ, нокыӵе решение кутэмын ӧй вал, люкаськемъёс номырзэ валаса ӧз вуттэ. � Туннэ асьмеос меӵак пумит султыны кулэ сыӵе вераськонъёслы, калыкез возьдаськытэк пӧяны турттонлы, � "Удмурт кенеш" огазеяськонлэн тӧроез Кун Кенешлэн депутатэз Валентин Тубылов, исполкомлэсь заседанизэ валлян усьтыкуз. � Павел Вершининэз дэмланъя группа соку кылдытэмын, али кутскиз ни со понна кинюртэм люкан. Югдурез тодыса верасько: Павел Николаевич нюръяськонлэсь уз куштӥськы, Ганза понна, нокин мукетыз понна уз кариськы, быръёнэ ачиз пыриськоз. Республикаысь элькунын кылдэм югдурез котыр ласянь эскерыса, исполкоме быръем эшъёс тазьы кенешизы: Павел Вершининэз президентэ кандидатэ пусъемзы (регистрировать каремзы) бере, кӧня ке нунал ортчыса ик люкано Пичи кенешез, отын пыр-поч вераськоно быръён вакытэ кызьы ужан сярысь. Нош со дырозь вань активез уже кутоно подпись люканэ. Пичи кенешын ик эскерозы финн-угор калыкъёслэн Финляндиын ортчоно конгрессазы делегат быръён ужез. Исполкомын вераськон потӥз президентэ мукет кандидатъёс понна ужаны мылкыд карисьёс ласянь но. Тани "Дэмен" огазеяськонлэн кивалтӥсез Альберт Разин та нуналъёсы жадёнэз тодытэк ужа Александр Волков понна. Нош со пыре исполкоме. Кызьы сыӵе дыръя кароно? Валентин Тубылов шуиз: котькудӥзлэн йырыз аслаз, котьма мед карозы, дыр ваньзэ ас интыяз пуктоз ай. И.КРИЧЕВ. Ӵуказе - Россиысь Физкультурниклэн нуналыз Гурезьёстӥ бызьылӥсь Пишмымтэ адями ӵошкыт интыын но канжаське-усе. Нош кин ке понна нокыӵе гопъёс- выръёс но, нюръёс но ӧвӧл - бурдо вал кадь: "тылын но, тӧлэн но, вуэн но уд куты... уд возьы сое четлыкын, думетын..." Кылбур чуръёс но тодэ лыктӥзы, та пияшлэсь аспӧртэмлыко спорт удыссэ малпаса. Трос ик тодматскыса, вераськыса ӧм вуэ, но со сярысь верало таӵе вормонъёсыз. Россилэн Санкт-Петербургын ортчем чемпионатаз кыкетӥ инты басьтӥз. Туэ Москваын Россилэн кубокез понна ӵошатсконъёсын нырысетӥ интые потӥз, рекорд пуктӥз. Франциын 42 иськемъем калык куспо марафонын кыкетӥ инты басьтӥз. Туэ июне Польшаын Европалэн чемпионатаз... (Тазэ берлогес вералом.) Али дасяське дуннелэн чемпионатэзлы. Со луоз туэ сентябре Германиын. Кин сярысь вераськон мытӥм, со Николай Константинов - спортъя мастер, азьвыл - уно иськемъем марафонын бызьылӥсь, али - странаысьтымы тужгес кужмоез гурезьёстӥ бызьылонъя спортсмен. Гурезьёс шуэмысь, син азям син сузёнтэм тӧдьы йыло гурезьёс пуксизы... - Ма, асьмелэн гурезьёс вань шат? Кызьы тӥ, удмурт пияш, гурезьёстӥ бызьылонъя сыӵе кужмо, валтӥсь спортсмен луиды? - паймысагес юай выль тодмоелэсь. - Кызьы, пе, ӧвӧл? - шуиз Николай. - Милям бакча берамы, Пичи Кизьна гуртын (Дэбес ёрос), сыӵе ӝужыт гурезьмы вань. Пинал дырмы отын ортчиз: кӧня шудӥм- бызьылӥм, куасэн нискылам отӥ. - Тӥ шуиськоды, сборной командаяды ньыль кузя: Санкт-Петербургысь, Ярославльысь, Удмуртиысь. Лымшор паласьё пӧлады ӧвӧл. Котьма ке но, паймоно ик: сыӵе секыт, гурезё-гопо-вуо сюрестӥ бызьылонын азьпала пото удмурт пиос... - Удмурт пиос - секытэз вормисесь, чидасесь, - валэктӥз Николай. - Юкаменскын гурт шудонъёсын тӥ ӧй вал. Но мон синйылтӥ соку Игралась эштэс Александр Болтачевез, кинэн ӵош тӥ сборнойын. Отын со вить сюрс метре бызьылонын кыкетӥ вуиз. Шӧдӥське, кузь дистанциын со ассэ золгес возьматыны быгатэ. Озьы ик шӧдӥ, та спортсмен туж амало, трос адӟемын, кыдамын ни шуыса. - Зэм вераськоды. Александр Болтачевен ӵош ми али Польшаын ӵошатсконъёсын вал. - Нош маин валэктоды, татын тӥледлы сокем ӧз удалты шуыса? - Пырак вералом ини. Милемды маин ке умойтэм сюдӥзы. Асьтэос валаськоды, кызьы вормод на сыӵе дыръя. Берло малпамы, оло, юромо озьы лэсьтӥзы. Таин али уретом 37 аресъем чебер, ӝужыт спортсмен сярысь веранмес. Ум люкетэ солы дуннелэн ӵошатсконъёсызлы дасяськыны. Со дырозь толэзь сяна ӧз кыльы ни. Сӥзёме удмурт пиосмылы вормонзы доры тӧлэз азьпалтыса ворттыны. Т. Петрова. Тӧллэсь капчи Рекордсменка, спортсменка... Россилэн но Урал зоналэн кроссэн бызьылонын чемпионказы. Кылем арын Як.-Бодьян ортчем гурт шудонъёсысь ньыль зарни медален бертӥз. Туэ Юкаменскын вить зарни медаль басьтӥз. 400, 800, 1500, 3000 метръем дистанциосы бызьылонын вань эшъёссэ азьпалтӥз. Та вӧзы ватсаськиз на эстафетаын вормонэз. Солы шедиз Николай Феофилактовлэн призэз, "Золото-Платина-Банклэн" кузьымез. Туэ ик гурт пиналъёслэн Завьялын ортчем ӵошатсконазы кык зарни медаль утӥз на. Огъя вераса, Яна Максимова, туэ дас одӥгетӥ классэ дышетскыны мынӥсь нылаш, али ик "зарниен" котыртэмын ини. Йырыз уз поромы-а меда, таӵе ӝог, тӧллэсь но шаплы гурезе тубыса? Вераны гинэ капчи, но со вормонъёс нуналлы быдэ, иськем бӧрсьы иськем бызьылыса, куддыр синкыли пыр сётӥсько. Но Яналэн сямыз ваменэс, сётскисьтэм, вормон понна вожомись - сыӵе ик, кыӵе луыны кулэ зэмос спортсменлэн. Капчи ӧвӧл ке но таӵе нылашен ДЮСШ-ысь тренерезлы Олег Нефедовлы, со понна вормонлэсь емышсэ оскалтыны солы но усьылэ. Т. Николаева. Як.-Бодьяысь нырысетӥ разрядэн спортсменка Яна МАКСИМОВА. Туспуктэмез В. Камашевлэн. Шара гожтэтэн Удмурт шаерысь тодмо адямиос конструктор М. Т. Калашников, Ижысь андан ӵыжатон но машина лэсьтон заводъёслэн азьвыл директорзы В. С. Тарасов, Пыӵал поттон заводлэн азьвыл директорез В. П. Ионов, история наукаосъя доктор Удмурт кун университетысь профессор Е. Ф. Шумилов, Ижысь Александр Невский соборысь баӵко Виктор шара гожтэтэн вазиськизы Удмурт Республикаысь Кун Кенешлэн депутатэзлы, Ижевск городлэн мэрезлы А. И. Салтыковлы. Соос куро историен герӟаськем интыосты утьыны. Вашкала тодметъёсты кельтон вылысь, выль юртъёсты туж чакласа пуктылоно, культурая памятникъёсты нырысь пуктэмазы кадь тупатъяно-выльдоно, гожто соос. В. СОЛНЦЕВ. Валэктэ юрист Сэрегез нуэ адвокат Лилия Шкляева Бызисько. Нош люкиськи ке?.. Арлыды вань ке но, выльысь бызёно кариськи на. Дасяськисько квартираме приватизация пыр аслым басьтыны но собере гинэ картэлы прописка лэсьтыны. Кин тодэ, улонмы пӧрмоз оло уз ай. Нош ик люкиськоно луи ке, картэ квартираме но уз куры меда? Л. Меньшикова. Карттылы сокем уд оскиське бере, умойгес луоз, квартирадэс быземдылэсь азьвыл асьтэлы басьтыса приватизация пыр. Улон нош инты соку лыдъяськоз браклэсь азьвыл люкам асваньбурен (собственностен). Россия Федерациысь Семья сярысь кодексъя сое люкыны уг яра. Татын лыдэ басьтыны кулэ тани мае. Карттылы тӥляд квартираяды регистрация каризы ке, тӥ лэземъя со отын улыны кутскиз ке, тӥляд семьяысьтыды адями сямен басьтоз улон интыдэс уже кутонъя право (право пользования квартирой). Сыӵе правоез кылёз люкиськемды бере но. Шуг-секытъёс медаз кылдэ шуыса, тӥ али ик картэныды гожтыны луозы квартира пумысен огкыл (договор). Со бордады улэ, дун тырытэк. Россия Федерацилэн Граждан кодексысьтыз 699-тӥ ёзэт (статья) куремъя, тӥ та огкылэз дугдытыны быгатӥськоды котькыӵе дыре, та сярысь карттылы одӥг толэзьлы вазьгес ивортыса. Кошкыны со пумит луиз ке, судэ вазиськыны быгатӥськоды уллян пумысен куронэн (искен). Куд-огез лэсьто кузпалъяськон сярысь огкыл но (брачной договор). Тазэ гожтыны луэ семьяез загсын пусйыку но, берлогес но. Отын карт но кышно верало ваньбур пумысен правооссэс но обязанностьёссэс. Изьые нуллыны ярантэм Юкаменскысен Глазове ветлыкум, огаз ательее сётӥ пӧйшур ку. Изьы вурыны кури. Мастер сое сокем урод лэсьтэм - изьызэ но нуллыны уг луы, кулэсь но номыр ӟечсэ уд пӧрмыты ни. Аслаз монэным тыро-пыдо вераськемез но уг поты. Чагисько шуи но, кӧберыз ик ӧвӧл: мон, пе, нимаз адямилэн фирмаяз ужасько, номыр каремед уз луы. Глазовысь огез юрист шуэ: ӝожтӥськондэ, пе, сёт улон интыысьтыд судэ - Юкаменске. Нош Юкаменскын веразы: Глазовысь суд мед выроз та ужен. Ма кароно? Т. Арасланова. "Басьяськисьёслэсь правооссэс утён сярысь" Россия Федерацилэн Законэзлэн 17- тӥ ёзэтэз лэзе сыӵе ужпумез эскерыны адямилэн улон интыяз но, солы изъян ваем интыын но. Озьы бере, Юкаменскын но, Глазовын но судъёс тӥлесьтыд курондэс (исктэс) басьтыны кулэ. Зэм, судъёс али пӧртэм куронъёсын согемын но, вождэс эн ваелэ, тӥляд кадь бумагаосты палэнтыны выро. Тӥлесьтыд чагиськондэс басьтыса но чаляк учкозы шуыса оскон пичи. Соин ик тӥ вань бумагаостэс люкалэ но оскалтэ на мастерен пумиськыны. Валэктэлэ: ателье котькинлэн медло, нош пӧйшур кулэсь дунзэ берыктыса, солы ик умойгес луоз. Малы ке шуоно, судэ вазиськиды ке, ателье яке мастер тӥледлы берыктыны кулэ кулэсь, экспертизалэсь, адвокат юрттэмлэсь дунзэс но тӥледлы мораль ласянь лэсьтэм изъянлэсь дунзэ. Нылпиез сюдоно, пе... Кышное быжыныз шудӥз но, люкиськоно луи. Табере мынэсьтым алимент басьтэ. Ма, нимаз кариськеммы понна со гинэ янгыш ук. Мужикъёс веразы: кинэ но сое, пе, алимент тыронлэсь мозмыто. Озьы ик тодэм потэ вал: кыӵе но кыӵе уждунъёсысь сое уг кельто. В. П. Нырысь ик санэ басьтоно тае. Воргоронлэсь басьтӥськись алимент - со кышнолы чаклам коньдон ӧвӧл, со - пиналэз утялтыны юрттэт. Сое кулэ дыръяз тыре бубы- мумы но, сюрбубы-сюрмумы но, песянай-песятай но, апай-агай но. Озьы валэктэ Россия Федерациысь семья сярысь кодекс. Кинэ ке сюдӥсь-вордӥсь мурт алиментсэ тыре ас мылкыдызъя. Та ужлэсь пегакуз, коньдонзэ кыско суд пыр: одӥг пинал понна - уждунысьтыз 25 процентсэ, кыкез понна - 33-зэ, куинь но ятыргес нылпи понна - ӝынызэ. Алиментлэсь быдӟалазэ суд кулэстыны быгатэ таӵе учыръёсы: сюдӥсь-вордӥсь луэ ке нырысетӥ яке кыкетӥ группаен инвалид; солэн вань ке музон пиналъёсыз но таосыз уло ке алимент басьтӥсьёс сярысь начаргес; нылпиосты быдэсак кун утялтэ ке; пиналъёс ужало но тырмыт уждун басьто ке. Алимент басьтӥське уждунысь, пенсиысь, стипендиысь, ужатэк улэм понна юрттэтысь (пособиысь), ужбергатонын но фермер хозяйство нуонын поттэм барышысь. Сое уг кельто огпол гинэ тыриськись премиысь, тазалыклы изъян ваись интыын ужам понна ватсам уждунысь. Куд-огез сюдӥсь-вордӥсьёс алимент келяло ас мылкыдзыя, нош уждунзэс пичигес возьмато. Соку югдурез тупатыны луэ, судэ вазиськыса. Пегась муртлэсь кылзэ юало Уголовной кодексъя. Сое одӥг арозь эриклэсь люкыны луэ. УСТО СПЕЦИАЛИСТЛЫ - 50 Пӧйшуръёсты эмъясь Иван Фоминых - пудоосты эмъясь врач. Вазен соосты пудо першал шуо вал. Берло дыре, оло, таӵе специалистъёслэн данзы уката будӥз. Иван Макарович вордскемын Свердловск улосвылысь АрТЕмовский городын. Армиысь бертэмез бере, Красноярск крайысь Дудинка городын ветеринарной техникумез йылпумъяз, горд диплом басьтӥз. Собере одӥг экзамен сётыса (химиен "5" пуктӥзы) дышетскыны пыриз Москваысь Скрябин нимо ветеринарной академие. Ӝынызэ огдыре ужаса тодон-валан басьтӥз. 1986-тӥ арын академиез йылпумъямез бере, ужаны ыстӥзы Челябинск улосвылысь "Петровский" совхозэ. Сизьым ар валтӥсь врач вал. Хозяйство уго трос скалъёс вордӥз но бкча сиёнъёс будэтӥз. Иван Фоминых усто специалист луэмзэ возьматӥз. Шаерамы Иван Макарович сокем кемалась ӧз ке но вуы, ас удыссэ ӝог шедьтӥз. Одӥг ар "Удмуртпушнина" огазеяськонын ужамез бере, сое ӝог синйылтӥзы, Ижысь ветстанцие басьтӥзы. Ньыль ар вал валтӥсь ветврачлэн воштӥсез. Кык ар талэсь азьло выльысь ӧтизы "Удмуртпушнинае", валтӥсь ветврач но директорлэн воштӥсез луиз. Иван Макарович туж востэм, зӥбыт сямо адями. Туннэ солы 50 арес тырме. Кытысен пӧйшуръёсты яратӥзы шуыса юамелы дыртытэк валэктӥз: - 1976-тӥ арозь Уй палан (Северын) улӥм. Отын яратӥ пужейёсты, полярной ӟичыосты (песецъёсты). Ветлӥсько вал пӧйшураны, чорыганы. Со дырысен 26 ар ортчиз ни. Озьы ке но, пӧйшуръёсты яратон мылкыды ӧз кысы, ноку уз быры. "Удмуртпушнина" огазеяськон арысь аре кужмоя. Туэ солы кылдэмез дырысен 10 ар тырме. Со кык интыын пӧйшуръёс будэтэ. Одӥг фермаез Балезино районысь "Труд Ленина" хозяйствоын, мукетыз - Якшур-Бодья ёросысь Фрунзе нимо эштосын. Трос-а, ӧжыт-а шуод, но солэн 6 сюрс чайыосыз (норкаосыз) быдэн 200 йыр сьӧд тусо ӟичыосыз, песецъёсыз но кыр чайыосыз (хорёкъёсыз). Ваньмыз соос турлы буёлоесь (пеймыт-курень, лызмыт гоноесь, азвесь тусоесь но). Тӥни валтӥсь ветврачлы Иван Макаровичлы ваньзэ пӧйшуръёсты син азяз возёно. Соос уго висёнъёслы ӝог сётско. Соин ик пӧйшур вордонын нимысьтыз инты басьтэ висёнъёсты алон. Профилактикатэк соос одӥгтэм бырыны шедёзы. Валтӥсь ветврач сое туж ӟеч тодэ но, висёнъёс медаз алялэ шуыса, ваньзэ лэсьтэ. Нош со уж нокинлэн син азяз уг йӧты. Иван Макарович сое юн валаса быдэсъя. Тани Россиысь ваньмаз пӧйшур фермаосын чайыос курадӟо алеут висёнэн. Со асьме доры но вуыны быгатоз. - Кызьы верай ни, туннэ тӥледлы, Иван Макарович, ӝыны даур тырме, оло, профессидэс воштэмды потэ ни? - Сыӵе малпан йырам ик ӧз пыра на. Пӧйшуръёсын ужаны дышетски Северын. Быдэс улонме яратоно ужелы сӥзё. Иван Макарович, ӟечкыласьком вордӥськем нуналэныдЫ, сӥзиськом шудо улон но юн тазалык. Г.РОМАНОВ. ? Иван Фоминых. Туспуктӥз В.Беломорских. Ӝоген Америкаез азьпалтом... Туннэ Россиын 53 сюрс ВИЧ-ен паласькемъёс лыдъясько. Туэ ӝыны ар ӵоже гинэ соослэн лыдзы куинь поллы йылӥз. СПИД-эз тросгес вӧлмыто наркоманъёс. Удмуртиын али 167 мурт кышкыт через нуллэ. Висисьёсты эмъяны туэ гинэ Россия Федерацилэн бюджетысьтыз 48 миллион манет висъямын, но со но уг тырмы. Туннэ СПИД эмъясьёсты гинэ ӧвӧл, котькинэ: экономистъёсты но политикъёсты но сюлмаськытыны кулэ. США-ын, Великобританиын, Франциын СПИД-эн нюръяськон ужрадъёсын кивалто государствооссылэн Тӧрооссы. Ми но оскиськом, Удмурт Республикаысьтымы Кивалтэт талы нимысьтыз саклык висъялоз шуыса. Республикаысьтымы СПИД-эн нюръяськонъя центр. ШӦКЫЧ Улонысь учыр Азьмурт Петька Милям Уӵыгуртамы вашкала дырысен адями борды пинал дырысен ик лякиське кушем ним. Сое пуртэн но вуштыса, майталэн но миськыса уд быдты ни. Умоез умой ни, уродэз � урод. Милям гуртамы гинэ-а кожаськоды вань таӵе сям? Ма, ветлэ ай котыр ёростӥ одно ик шедьтоды пужым сирен кадь, тач-тач лякем нимъёсты! Инмарен но мемей-дядяен сётэм нимъёсты но, эсьмаса, ява, уг поттыло ни. Пенси басьтыны мынкузы гинэ ог-огзэс укно ултӥ чортозы: � Эй, Васильевна!", "эй, Васьлей Митрофаныч, пенси, пе, ваиллям! Азьмурт Петькаез но юнме озьы ӧз нималэ, дыр. Вал мукет но кушем нимъёсыз: Чупрес Петька но шуылӥзы куд-огез, Вузчи Петька но. Нош Азьмурт ним сётӥз солы "Льӧль ӟардон" колхозлэн председателез Антон Гордеич Звонков (Уӵыгуртамы уго трос гинэ Звонковъёс уло). � Азьло аръёсы азьмурт шуиськомы вал колхозысьтымы усто ужасьёсты. Ударник шуонъёслэсь яке стахановецъёслэсь патретъёссэс Горд пул вылэ юнматъямы, �колхозлэн огъя кенешаз вераськонзэ тазьы мытӥз колхозлэн кивалтӥсез Антон Гордеич. � Та умой сямез асьмеос али но ум вунэтӥське. Азьмынӥсь ужасьёсты данъяськом. Соослэн тыршеменызы колхозмы али но шуг-секыт вакытэ зол возиське. Озьы ке но, эшъёс, вань на асьме усто ужасьёсмы пӧлын колхоз ужлэсь пегась кескич адямиос но. Соос олокызьы но колхоз ваньбурез капыртыны тыршо. � Антон Гордеич, огъя кылын гинэ тон эн вера, вера шонерак! � огез но мыдыз кесяськыны кутскизы. � Верало бен, � лек куараен кесяськисьёс пумитэ вазиськиз Антон Гордеич. � Тани Игнат Петькаез ик верасал, то есть Сидоркинэз! Вузчи Петька, лэся, сое шуиськоды. Нош малы сое озьы шуизы? Ортчем арын со колхозлэн делянкаысьтыз сюсьтыл кадь чебересь вольыт ньылпуосты но пужымъёсты лушкемен палэнэ келяз. Озьы Вузчи Петька узырмыны малпаз! Ведь солы леспромхоз но, колхоз но коньдон тыриз ужамез понна, нош со колхозлэн осконэз вылэ сялаз. Корка бугроосты вузаса, комбикорм но, тракторъёслы запчастьёс но басьтыны быгатскомы ук. Вузчи Петька эшеныз Федул Митькаен выль коръёсты лымшор палась "куноослы" вузаллям... � Мон витьсэ гинэ вузай, � председателез куспетӥ кариз Митька. � Вот мар, � председатель Звонков куспетӥ кариз Федул Митькаез. � Куинь нунал дыр сётӥськом тыныд Вузчи Петькаен вузам коръёсты вуттыны. Ӧд ке вутты, тани вӧзам пуке ёросысьтымы участковой милиционер Байков Степан. Со тонэ вуттоз отчы, кытчы кулэ. Нош азьланяз медаз ни йыртэмалэ шуыса, та кор вузасьёсты самой пичи уждунэнудысъёсы выжтоно кык-куинь толэзьлы. Всё! Мон кызьы верай, озьы ик луоз, � вераз колхозэн кивалтӥсь. � Шонер, шонер, Гордеич! � кенеше люкаськемъёс огкылысь шуизы. � Нош тодӥськоды-а, эшъёс: Вузчи Петька нюлэс делянкаысь, ӝомытэн янгышаса, янгышен аслэсьтыз но мунчо коръёссэ вузам. Тае кылыса, люкаськем калык гурак серектӥз. Петькалэн кышноез Сандра ури-бери султӥз но Петькаез гыб-гыб мыжганы кутскиз. � Албасты басьтон! Соин ик монэ ӝыны ар пӧяса возе ни тани. Ӝоген выль мунчо пуктом, ӝоген дворец кадь вӧл-вӧл эркын мунчоын пыром-пыласьком! Мунчо пырыкум, та сотонаен сэрен вӧлдэтэ йырыным йыгаськыса потӥсько. Петька ош сямен маке нукыртэ, нош мазэ уд вала. Евгений НИКОЛАЕВ. В продаже имеется, например, от марли (по цене 3 руб. за 1 метр) и ситца (10 руб.) д о мебельной ткани (82-165 р.) и пальтового драпа (290-345 руб.), полотно вафельное, в т. ч. набивное (11-13 руб.), ткани плательно-костюмные (68- 200 руб.) и легкие блузные ткани (86-150 руб.), утеплители: ватин (20 руб.) и синтепон (22-26 руб.). Готовая женская одежда: пальто демисезонное (1500-3000 руб.), плащи (1000- 1500 руб.), ветровки (900-1900 руб.), платья (300-2000 руб.), костюмы брючные, с юбкой, двойка, тройка (500-2000 руб.). Костюмы, сорочки мужские и для мальчиков, отдельно - пиджаки, брюки. И разнообразная фурнитура. Гурт шудонъёсысь кылем суредъёс "Мон дурись гинэ..." Пичи пургаослэн кыл йылазы вал солэн нимыз. Паша, Павел Збитнев... Ма, кин меда со сыӵе? Тодэме потӥз. Юкаменскысь кошкон азьын ини тодматскыны кылдӥз. Гуртысь спортсменъёслэн укмысэтӥ гужем шудонъёссы йылпумъясько ни. Пургаослэн мылкыдзы умой ик ӧвӧл: командазы кужмоосыз пӧлы сюрымтэ. Но очкоосыз выльысь лыдъям бере тодмо луиз: таос витетӥ интые потӥллям. Со сярысь шумпотыса ивортӥз спорткомитетсылэн кивалтӥсез Василий Трошкин. Вормисьёсыз данъян крезьгур чалмиз. Ваньмыз асьсэ автобусъёсы интыяськизы. Люкиськыны жаль, но котькудӥзлэн син азяз ини гуртэз. Пургаос матынгес бере, мон соос борды кариськи. Нош кытын ай, пе - "юкаменъёсыд" озьы гинэ уг лэзё вылэм. Автобусмы кыкез но паллянэ кожиз. Бусыетӥ кӧня ке мыныса, тэль дуре дугдӥмы. Кин ке со пичи сюрес кузя чакланы пыраз, мар дасяллям таосыд. Берен потӥзы: татын, пе, асьмеды уг возьмало вылэм - мукет ёросэз, мукет командаез пумитаны дасяськиллям. Эшшо тэль дуртӥ мыныса, пусъем интые вуим. Выжыкылын кадь суред! Чылкыт ты - пыдэсыз адске. Вадьсаз чарланъёс лобало. Исамтэ инкуазь. Но кин ке татчы, мисьтаськыны шуыса, дыр, пулъёслэсь выж лэсьтэм. Паймымонэз со но: ты дурысь ожо вылэ кузяз ӝӧккышетъёс вальыса, кыӵе гинэ сиён-юон отчы тыриллямтэ. Чорыг мызь гинэ но вань. Валамон, чорыг лым но пӧзьтыса дасяллям. Сомында пӧсь ӵошатсконъёс бере луоз ини ёзвиостэ но веськатыны. Татын ик - телекамераен бергасьёс (пичи пургаос таосызлы но кельшиллям - сьӧрысьтызы ӧз кыльы машиназы). Калык гужла вал ини. Соку тӥни тодматски юнме кыл шерыны яратӥсьтэм егит пиен Павел Збитневен. Солы 26 арес. Ӝужыт ӧвӧл, огшоры кадь тусо, бам вылаз пужыосыз но, дыр, адскысалзы, но копак шунды пыжемен шӧдыны уг луы. Тазьыгес ӧръяськиз вераськонмы. - Паша, кытысь тынад сыӵе йӧспӧртэм фамилиед? - Болгаръёслэсь адӟем карыса пӧрмем. Сбитнев шуэмысь. - Кин луыса ужаськод Аксакады? - Дурись. - Тон доры трос, дыр, лыкто пӧртэм куронъёсын... - Трос. Мон лэсьтӥсько, дун но, мар но курыса уг улӥськы. - Вань-а ини семьяед? - Ӧвӧл. - Малы? - Аслэсьтымзэ ӧй пумита на, дыр. Собере дыры но ӧвӧл нылъёс котырын берганы. Паша улэ пересь нэнэеныз. Со ик будэтӥз пияшез - вож нуны, дас толэзь дырысеныз... Паша пичиысен ик дышиз гурт куспысь вань ужъёслы: выж миськонэз но, скал кысконэз но, бакчаын копаськонэз но, лэсьтӥськонэз но - ваньмыз ас вылаз. Кӧня ке гинэ вераськытозямы, мон валай: Пашалэн зарни сюлэмыз, зарни киосыз. Таӵе муртлы удалтыны кулэ семья ласянь но. Павел Збитнев сярысь туж гажаса вера Аксак гурт администрацилэн тӧроез Валерий Тихонов. Ачиз но со спортсмен, кузпалэныз ӵошен ик нокыӵе ӵошатсконъёслэсь уг кылё, тол шудонъёс ке, куас вылэ султо. Таяз шудонъёсын, Юкаменскын, Валерий Иванович ёрос кивалтӥсьёслэн командаязы футболэн шудӥз, шальы лэзяз, ыбылӥськиз. Гурт калыкез, тужгес но егитъёсыз, тросгес кысконо спортэ - сыӵе малпанэз Тихоновлэн. Соку гуртэ выжыяськем урод сямъёслэсь, уката ик - вина юонлэсь - куштӥськыны капчигес луоз. Оскыны луэ, таӵе пиосмы гуртъёсын вань дыръя, калыкмы пыд йылаз юн возиськоз. Нош кыӵе вал Павеллэн со чидантэм пӧсь нуналэ аслаз вормонэз? Триатлонын ӵошатскыса (тымет вамен уяса, велосипедэн 12 иськемез ворттыса но 3 иськемез пыдын бызьыса), 39 аресозь воргоронъёс пӧлын со куатетӥ интые потӥз. "Призовой" уд шуы, нош адӟысалды ке, кӧня пӧсям ву потыса сётӥське котькудӥз иськем, берло вамышъёс... Солэн профессиез спортсмен ӧвӧл. Иське, тренироваослэсь ӧй ваньмылысал, дыр. Гуртын пумтэм-йылтэм уж - тренировкалэсь но ортчыт. Соин ик гуртысь пиос сокем юнэсь, чидасесь. Котькыӵе учырын вормисесь. Татьяна. Чернова. Кинлы тон кельшиськод? - Чебоксары городын ӵошатсконъёс дыръя монэ чуваш пи кожазы. Чебер чуваш пи шуизы... Юкаменскын гурт шудонъёсын гира ӝутъясь спортсменлэн Виталий Александровлэн тазьы верамез выльысь тодам лыктӥз, Михаил Атамановлэсь алигес газетамы потэм чуръёссэ лыдӟыса. "Иж шурлэн Каме усён вожаз 16-тӥ-17-тӥ дауръёсы удмуртъёсын, бигеръёсын валче улӥз бесерман калыклэн ог люкетэз... Чупчи дуре улыны кошкытозязы, бесерманъёс "чуваш" нимын улӥзы... Тросэз соос, исламе потыса, бигер, крашинь луизы, кӧня ке люкетэз удмуртомиз но". Зэм но, Алнаш ёросысь Варӟыл (Варзибаш) гуртын вордскем, будэм пиез нокыӵе нация пумит ӧй луысал, дыр, аслыз карыны. Ӝужыт, веськыт, йыг-йыг мугоро, котькуд вамыштэмаз кужымез шӧдӥське. Россиысь пӧртэм городъёсын ӵошатсконъёс дыръя аслаз весовой категорияз - 90 килограммозь спортсменъёс пӧлын - со вормисьёс радэ сюрылӥз. Нош Юкаменскын ньылетӥ интые кылиз. 24 килограммъем гираосыз ӝутъянын сое азьпалтӥзы Игра, Дэбес пал пиос Михаил Шутов, Владимир Опарин но Михаил Емельянов. - Больницаын кыллеме шӧдӥськиз, операция бере мон быгатӥсько вал таӵе ӵошатсконъёсы воксё но пыриськытэк, - шуэ Виталий Александров. - Но кужымме эскереме потӥз. Вуоно арын таӵе шудонъёсын одно ик вормо. Эшъёсылы озьы ик шуи. Сыӵе со, аслыз ачиз оскись... Эшшо мар шуыны луысал Виталий Александров сярысь? Тусбуйзэ, выросъёссэ, вераськемзэ чакласа, мон сое Удмурт театрысь огезлы артистмылы укшатӥ. - Тӥ Игорь Люкинлы кельшиськоды. Учке ай со шоры, зэм но ведь? - вазиськи командаысь эшезлы гира ӝутъянъя укмыс пол чемпионлы Николай Семеновлы (со артистлэн Сергей Семеновлэн агаез). Таиз йырзэ ӧжытак кырыжтыса учкем кариз но шуиз: - Ӧвӧл, Люкин солы кельше. - Зэмос спортсменъёс тодо асьсэлэсь дунзэс,- малпай ас поннам. Виталий Александровез Юкаменскысь бесерманъёс асьсэлэн кадь каризы куноятӥзы. Нош Игорь Люкин, - ӧйтӧд ай... Вузасько Вал дӧдьы. Дуныз вераськемъя. Воштыны луоз мукет вузэн но. Вазиськоно Степанов Вениамин Павловичлы. Адресэз: Игра район, Пежвай гурт, Играысен 15 иськем. Тел. (8-234)6-57-70. "Нялтас сюрес тӥледлы, нылъёс" Гуртын улӥсьёсты сюдэ бакча но пудо. Нош уксёез тросгес адӟо пенсионеръёс. Озьы пенсия чотын улэ быдэс семья. Нош дышетскисьёссы городын вань на ке, гуртоослэн улонзы тужгес шугоме. Егитъёслы но каньыл ӧвӧл. Городын транспортэн ветлон понна тыроно, нянь басьяно. Ческытсэ но утчам потэ, дӥсяськысалзы но чебер. Соин ик котькуд манетэз жаляса возёно луэ. Арня йылпумъяське, гуртэ бертоно. Кисыын дас манет сяна кылемын ӧвӧл. Автобусэн кошкыны уз тырмы - билет куамын вить манет сылэ. Утчано ке шат сюрес вылэ потыса, нялтас мынӥсь машинаосты дугдытъяны? Нош нуозы-а тамында уксёеным? Собере курдыт ук, мар ке каризы ке? Виёзы но, эриктэмалозы но. Тырмоз! Тазьы малпаськыса улӥд ке, гуртад бертытэк кылёд. Нош кызьы улоно? Стипендия дорозь быдэс арня на. Дышетскыны ветлон понна гинэ но дас манет уз тырмы. Мар ке луоз - лу. Тазьы малпаськыса, Юля Ижысь Александр Невский собор дорысь дас одӥг номеро автобусэ пуксиз. Город пумын солэн берлоез дугдон интыез, татчы ик Юлялы но кулэ. Потыкуз ик адӟиз сюрес дурын машина дугдытъяса сылӥсьёсты. Соос дортӥ ортчыса, Юля палэнэгес дугдӥз. Учке, адямиос киоссэс ӝутъяло. Кудӥз машина дугдэ, кудӥз ширтыса кошке. Тани кык нылъёс "Волгае" пуксьыса кошкизы. Ӝыны час кышкаса сылэмез бере, Юля но кизэ ӝутъяны кутскиз. Ачиз возьдаське. Адямиос со шоры кырыж учко кадь потэ. Вӧзтӥз ортчись машинаосысь пиосмуртъёс гинэ но йырзэс берыкъяло кадь. Серекъяло, мар ке аламазэ верало, дыр. Нылаш гордэктӥз ни. Юбказэ кыске, кофтазэ тупатэ. Лобӟыса кошкись "жигулиын" пукись пияш шор чиньызэ возьматӥз. Ныллэн сотэк но куашкам мылкыдыз берыктонтэм бездӥз. Ма карыны уг ни тоды. Кошкыны турттыса берытскиз ни вал, дугдӥсь машина куара кылӥськиз. КамАЗ. Шофёр ӧссэ усьтӥз. - Пуксьы, чебер ныл. - Мон?! - Тон. Кин на эшшо. - Тау. Сумказэ кабинае куштыса, Юля ачиз но тубиз. - Умоесь. - Ӟечбур. Кызьы улӥськод. - Умой. Шоро-куспо арлыдъем пиосмурт туж вераськись вылэм. Кӧня ке дыр ортчыса, ныллэн возьдаськонэз но, кышканэз но быриз. Тазьы Юля нырысьсэ нялтас мынӥсь машинаен гурт дорозяз вуиз. Пиосмурт дышетскись ныллэсь берпум уксёзэ ӧз басьты. Ялкарон нуналъёс ортчизы, выльысь городэ мыноно. Нылаш кӧня ке кышкасагес ик выльысь сюрес вылэ потӥз. Табере ни солэн йыраз мукет малпан: кызьы ке но куамын вить манетсэ утёно. Та дырысен ортчиз ар. Нош ик пятница. Тодмо нылаш сюрес дорын сылэ. Табере со бырйиське. КамАЗъёсты уг ни дугдытъя, бадӟым машина каллен мынэ, зуркатэ. "Москвичъёсты" но "жигулиосты" уг яраты. Та машинаосын ветлӥсь шофёръёс уксё куро. Ӧвӧл шуид ке, уксё интые мугордэ курозы. Ваньмыз сыӵеесь шуыны уг лу, но пӧлазы соос ӵемгес пумиськыло. Юля чебер машиналэсь лыктэмзэ адӟыса гинэ кизэ ӝутэ, пальпотэ. Пиосмуртъёс дугдо. Соослэн чебер нылмуртэн бӧтьыртэмзы потэ. Оген бертэмлэсь умойгес. Та шофёръёс уксё уг басьто. Умойтэм малпанъёссы но уг кылдыло. Соос - улонлэн кузёосыз, номырлы уг ёрмо. Яратоно нылмуртъёссы но кык-куинь кузя. Юля тодэ ни соосын кызьы вераськыны, кышкатэк кизэ ӝутэ, машинаын огназ пукисез адӟыса. Нош Алёналы ӧз удалты машина дугдытъянэн. Нырысьсэ со БМВ машинаен гуртаз бертӥз. Пуксиз кык кузя пиосмуртъёс доры. Ӵышкиськемын гольык йыро, сурон курткаосын, чыртыязы зарни жильыос ошылэмын. Сӥзьыл. Салонын музыка шудэ. Пиосмуртъёс серекъяса верасько. - Тон азьын мукет нылашез пуктӥм. Ачиз егит, мусо. Яке матэгес тодматскемез потӥз милемын, яке со шоры ӧжыт учкиськом шуыса, кыиӥськыны кутскиз. Учкелэ, пе, мон шоры, кыӵе чебер. - Тон но гадьёстэ потта ай, учком-кельшозы-а, уз-а. Алёна курданы кутскиз: - Дугдэлэ, курисько. Мон татчы кылё. Нош пиос серекъяло: - Эн курда, номыр но тыныд ум лэсьтэ. Сюрес вылын тросэз со нылаш кадьёсыз сюрыло, тонэ но сыӵе малпам. - Ойдо ресторанэ пыралом. Отын умой сюдо. Я, эн кышка. Кыдёкысь мынӥськом, сиськеммы потэ ни. Озьы Алёна байёслы чаклам ресторанэ вуылӥз. Берло пияшъёс сое корка дорозяз ик келяса кельтӥзы. Та учыр Алёнаез номырлы ӧз дышеты, умой быриз ук. Нош мукетыз... Толалтэ. Кынмеменыз нылашлэн пиньёсыз "эктыны" ӧдъязы ни. Пыдъёс чатрамын. Транспорт ӧжыт ветлэ. Алёна куиньметӥ чассэ машинаосты дугдытыса сылэ ни. Кытысь ке КамАЗ потӥз. Дугдӥз. Кык кузя пиосмуртъёс Кавказ палась. Нылаш нырысь курдаз пуксьыны, нош кынмыса сылонзэ малпаса, кабинае ӝутскиз. Вань сюресэз вераськыса мынӥзы. Кышкамез но ортчиз. Тани солэн яратоно гуртэз. Дугдыны куриз. Нош пиосмуртъёс ӧз кылзӥське. Шофёр пыдзэ газ вылэ понӥз. Мукетыз серекъя, ми тонэ нокытчы ум лэзе, пе, сьӧрамы нуом. Пук, а то алама луоз. Озьы нылашез улон интыезлэсь кыдёке палэнэ нуизы. Ӧжыт мынэмзы бере ялкарыны малпазы. Шашлычной доры дугдыса, одӥгез сиён басьтыны потӥз. Нош мукетыз Алёналэсь киоссэ думылӥз но эриктэмаз. Берло кытчы ке кошкиз. Со куспын Алёна мырдэм но кызьы машиналэсь ӧссэ усьтӥз. Йырыз берга, дӥсез кесямын, погмаськемын, киосыз озьы ик мышказ думемын. Тём-тём пеймыт. Кыдёкын ик ӧвӧл кошкись машинаослэн тылсиоссы адӟисько. Пыдъёссэ шӧдытэк Алёна бызиз сопала. Сюрес доры вуыкуз шӧдӥз кинлэсь ке сьӧраз уиськемзэ. Султӥз сюрес шоры ик. Нырысетӥез ик ортчись машина дугдӥз. Нылашез пуктӥзы, жалязы. Шуныт дӥсен бинялтӥзы. Меми-бубыосыз доры ик нуизы. Табере Алёнаез нокыӵе кампетъёсын уд кос сюрес доры потыны. Кык нылъёс шоры учкыса валано - сюрес вылын витьымтэ югдур луыны быгатоз. Соин ик чаклаське, нылъёс. Котькудаз машинаын луыны быгатозы умой но алама адямиос. Ваньзэ умойзэ тӥледлы, нялтас сюрес утчасьёс. Шӧкыч Манет но бинет Ваньмыз асьмелы паймо. А мар отын паймонтэмез? Мон ачим но уг яратӥськы огшоры адямиосты. Огшоры - со огшоры! Огшоры кор кадь. Нош куке сюсьтыл кадь лусъем но вӧлэм корез ӝик-ӝик мунчо пулы вандылӥськод но пильылӥськод - со ини огшоры ӧыӧл. Со мыным туж йӧспӧртэм тунсыко потэ. Кызьы шуо куд-ог адямиос "ни в какие ворота не лезет!" Озьы улыны кулэ. Быдэс дунне, вань адямиос сыӵе дыръя, мед паймозы, асьме шоры чиньыенызы мед возьматозы но мед шуозы, аналогов нет, пе. Эсьмаса, абдраса кӧтазы мед йӧтоз. Тани, шуом, пукисько мон тымет дурын, нош вулы ёрмисько. Эшшо шуом на, кӧльы корасько, нош сюрес вылтӥ дэри коласа ветлӥсько. Мукет сяменгес но вераны луоз на. Зарни вылын пукисько, нош уксёлы ёрмисько... Эх калтак, калтак, эн пайме кин сярысь мон озьы котыръяса вераны турттӥсько. Ма асьмеос сярысь со ваньмыз. Асьмеос сыӵеесь, учкыса, учкыса кӧт тыронтэмесь, кӧт веськантэмесь, кӧт таразъясьтэмесь, кӧт лыч сузёнтэмесь... А кытчы-о пырод, вордским бере сыӵе, сыӵеесь ик улод ини. Кӧня улӥськомы ини, весяк уга ыммес куака сямен усьтыса, кинлэсь ке но отчы кыӵе ке манет яке бинет донгемзэс витьыса улӥськом. Нош манет но бинет сётъясьёс асьмеды тужак ик уг жаляло. Манет яке бинет понна яке мазут, яке му эгыр, яке соин ке уг тырмы, Крым шормуӵез курыны кутско. Ай вуоз, уть инмаре, сыӵе дыр но, зэмзэ ик со инвестор шуонъёс шормуӵез гинэ ӧвӧл, быдэсак ёросэз но курыны ӧдъялозы. Соос тодо ини кадь асьмелэсь синъёсмес тёпак пытсаса, нош ыммес куал- куал усьтыса воземмес. Ӧйтӧд, ӧйтӧд! Котьма ке но, уть инмаре!.. Мэрлы телеграмма Удмурт Республикаысь Кун Кенешлэн Тӧроез Александр Волков Москвалэн мэрезлы Юрий Лужковлы телеграмма ыстӥз. Отын шуэмын: "Гажано Юрий Михайлович! Быдэс Россиен, Москваын улӥсьёсын ӵош Удмуртия но юн кайгыре террористъёслэн кырсь киоссылэсь сӧсырмыны но бырыны шедем адямиос пумысен. Уката но сюлэм вӧсь луэ: йырвандӥсьёс асьсэлэсь шимес малпанъёссэс быдэстон понна уг лыдъясько адямилэн самой дуноеныз - солэн улонэныз, тазалыкеныз. Ваньмылы асьмелы, обществолы, страналы, кунмылы, бадӟым кышкытлык кылдыто. Оскисько, эрказмемъёсты таяз учыре одно ик шедьтозы но сьӧд ужъёссы понна закон азьын кыл кутытозы шуыса. Удмуртиын вань улӥсьёслэн нимынызы мур куректэммес вераськом та шимес нуналэ сӧсырмыны шедемъёслэн но быремъёслэн семьяоссылы". Удмурт Республикаысь Кун Кенешлэн пресс-службаез. Архивысь документъёсъя Удмуртия ЪЪ дауре 1934-тӥ ар 26-тӥ февральысен 10-тӥ февралёзь Москваын ортчиз партилэн ЪВИИ съездэз. Историе со кылиз на вормисьёслэн съездзы шуыса. Сьӧд тодметэз но вань солэн: "Съездэ ветлэм 1966 мурт пӧлысь 1108-сэ быдтӥзы, ЦК-е 138 быръемъёс но кандидатъёс пӧлысь 98-сэ улонлэсь люкизы. Удмуртиысь та съездэ 3 адями ветлӥз: партилэн удмурт обкомезлэн кыл кутӥсь секретарез Аконян Сурен Петрович, Ижстальзаводлэн директорез Максимов Петр Андреевич, Удмурт облисполкомлэн тӧроез Иванов Григорий Александрович. Съездысь соос бертӥзы вормисьёс луыса. Нош кӧня ке улыса, Аконянэз но Максимовез репрессия улэ кыско. Съезд юнматӥз кыкетӥ пятилеткалы план. Соя Удмуртиысь ужаса улӥсьёс бадӟым заводъёсты выльдон ужъёсты йылпумъяны кулэ вал, нимаз кылем ужасьёсты (кустарьёсты) огазеяса, вань экономикаез социализм сюрес вылэ выжтыны чакламын. Экономикаез но культураез бере кылёнысь поттыса, калыклэсь улон-вылонзэ умоятыны пусъемын. Укыр бадӟым ужпумъёс чакламын бере, секыт соосты быдэстыны но. Та вакытэ тужгес бадӟым саклык висъяське областьысь бадӟымезлы предприятилы, Ижстальзаводэз выльдонлы. 1934-тӥ арын та заводын усьтӥсько кӧня ке выль цехъёс. Трос кужымез висъяно луэ корт нуйтон цехез лэсьтонэ но отчы __блюминг пуктонэ. Декабре блюмингез ужатыса эскеро. СССР-ын со витетӥез луиз. Уй-нуналэз валатэк тыршыса, 1934-тӥ арын январе йылаз-пумаз вутто Ижысь ТЭЦ- ез. Табере пеймыт сӥзьыл уйёсы город квартираосын югыт вӧлъяське. Ижысь пыӵал поттон фабрика кык гумыё пыӵал поттыны кутске. Ар кутсконын Ижысь Красноармейской но Красногеройской ульчаос сэргы мунчо ӝутыса вутто. Татчыозь городын одӥг мунчо гинэ ужаз, Иж шур вылысь Кузь выж дорысь революцилэсь азьло пуктэмез. 6-тӥ августэ городысь сюресъёсын адямиос пароходъёсын, катеръёсын яке пыдын бадӟым празднике дырто - культурая но шутэтскон паркез усьтонэ. Воткаысь машина лэсьтӥсьёс партилэн ЪВИИ съездэз азьын зарни поттӥсьёслы техника дасяло. Городысь азьвыл Благовещенской соборлэн выльдэм юртаз ужаны кутске драмтеатр. Воткаын улӥсьёс понна тодмо нуналэн кылиз ФЗО школаез усьтон (али 3 номеро Пушкин нимо школа). Городын уго со нырысетӥез кирпич юрт вал. 1-тӥ декабре Ленинградын вио Сергей Миронович Кировез. Сталинлэсь матысь эшсэ пыраклы тодэ кельтон вылысь, тодмо большевиклэсь нимзэ ульчаослы, школаослы, зарезьын уясь судноослы сёто. Ижын усьтэм выль парк С. М. Кировлэсь нимзэ басьтэ. 28-тӥ декабре шӧдтэк шорысь ВЦИК-лэн президиумезлэн постановлениез потэ. Соя Удмурт автономной область пӧрме Автономной социалистической республикалы. Та документ бере ик потэ мукетыз, кудӥзъя Удмурт АССР-ез пто Киров крае. Т. Василькив, Удмурт Республикаысь Кун архивысь валтӥсь специалист. Воткаысь экскаваторъёс поттӥсь завод. 1934-тӥ ар. Кыӵе вал тон, Иж кармы? Шоркармылэн 240 ар тырмонэзлы сӥземын "Ижевск но отын улӥсьёсмы" выставка. Со возьматӥське Муниципальной выставочной галереяын, Ижлэн Шор площадяз. Та выставкае экспонатъёс басьтэмын Национальной музейлэн фондъёсысьтыз. Ог люкетэз � тужгес вашкала арбериос, Ижевск интыын вылэм шай бервылъёсысь шедьтэм макеос. Мукетыз возьматэ Иж кармылэсь Октябрь революция дырозь будэмзэ, ӝутскемзэ: П.И.Шуваловлэн корт поттон завод но А.Ф.Дерябинлэн пыӵал тӥрлык поттон завод лэсьтэмзы. Со вакытысь кивалтӥсьёслэн, мастеровойёслэн улэм-вылэмзы, ужамзы сярысь верало архивысь документъёс, туспуктэмъёс. Заводъёсыз пуктон, ужатон юрттӥз мукет удысъёслы но азинскыны. Усьтӥзы ремесленной, оружейной школаос, нылкышно гимназия. Ужаны кутскиз театр. Отын ужаз суредась И.Н.Ситников но, кудӥз кылдытӥз А.Ф.Дерябинлэсь бюстсэ. Иж заводлэн вал аслаз аскивалтон ёзъёсыз: шурсьӧр но нагорной волостной правлениосыз, земской старостаосыз, городской управаез. Октябрь революция бере со интые кылдӥзы рабочий, крестьян но солдат депутатъёслэн Советъёссы. Ижевск луиз город, нош 1921-тӥ арысен � Вотской автономной областьлэн шоркарез. 1930-тӥ аръёсы кутскыса, Ижевсклэн тусыз выльдӥськыны ӧдъя: пӧртэм юртъёс ӝутӥсько, урамъёс паськытало но чеберско. Та ужлы трос кужымзэ сётэ архитектор В.П.Орлов, Ижлэн дано гражданинэз. Кыӵе вал шоркармылэн революцилэсь азьло тусбуез, сое асьме вакытэ улӥсьёслы кельтӥз туспуктылӥсь Н.Г.Пономарев. Берло дасо аръёсы Ижлэн Россиысь мукет городъёсын но кунгожсьӧрен кусыпъёсыз юнмало, заводъёсын ӵош поттӥське пӧртэм продукция. Со адӟиське та выставкаысь но. Татысь озьы ик адӟыны луэ, кыӵе луоз Удмуртилэн шоркарез азьпал дыръёсы. Е.КУДРЯВЦЕВА, Национальной музейын ужась. Люкаськозы Украинае Дуннеысь огъя календарь кылдытыны ӵектӥсь "Шунды" ассоциация та уж борды Ижысь пиньысь басьтӥське. Туэ сентябрь-ноябрь толэзьёсы Украинаысь Чернигов городын паськыт ортчоз калык куспо семинар. Со сӥземын огъя календарез ӝоггес улонэ пыӵатомы, компьютерез уже кутыса. Семинарлэн ужаз пыриськыны быгатозы вань мылкыд карисьёс ӟуч но англи кылын. Отчы шедён понна гожтӥськон (регистрация) кыстӥськоз 30-тӥ сентябрёзь. Ватсаса юанъёслы валэктонъёс шедьтыны луоно таӵе адресъя: 14000, Украина, Чернигов город, Урецкой урам, 39. В.РОГАЛЕВ. ЖУРНАЛИСТЪЁСЫН ПУМИСЬКОНЪЁС Александр ВЕШНЯКОВ: "Мон � чылкыт быръёнъёс понна" Кылем арня пумын дорамы вуылӥз Россия Федерациысь Центральной избирательной комиссилэн кивалтӥсез Александр Альбертович Вешняков. Лыктон мугез тодмо: Удмуртилэсь президент бырйыны дасяськемзэ эскерон но сое радъясьёслы юрттон. Кык нунал ӵоже ужатозяз пумиськылӥз республикамылэн кивалтӥсьёсыныз, политической но общественной огазеяськонъёслэн представительёсынызы, журналистъёсын. Прессаын ужасьёслы вазиськыса, со шуиз: � Мон туж курысал тӥледыз эсэпсэ чакланы, чылкыт киын гожъяськыны. Журналистъёслы сётэмын бадӟым оружие, сое быгатыса кутэ. Быръёнъёс сярысь ке верано, туэ соос Россилэн 33 улосвылаз ортчо. Удмуртия пӧлазы тужгес но висъяське нырысьсэ президент быръеменыз но республикаысь куинь кивалтӥсьёслэн та инты понна нюръяськонэ пыременызы. Россиын сыӵеез ӧй вал на. Александр Вешняков пусйиз Быръёнъёсъя комиссилэсь (кивалтӥсез Д.Н.Талантов) умой ужаны кутскемзэ, законъёсты чакламзэ. Мылкыдзэ вераз, азьланяз но ваньмыз умой мед пӧрмоз шуыса, ЦИК-лы отчы пыриськыны мугез медаз луы. � Кызьы возьматоно президентэ мынӥсь адямиосты? � Ваньзэ огкадь, одӥгзэ но висъятэк, мултэс ушъятэк, данъятэк. Ми тае одно ик син азямы возём, озьы ик чаклалом коньдонэн герӟаськем ужпумъёсты. Законэз тӥян учыръёс пумиськизы ке, кандидатлэсь резидент луон понна нюръяськонзэ куспетӥ кароно луоз. Республикалэн кивалтӥсьёсыз А.А.Волков но Н.А.Ганза кыксы но президент луыны мылкыд каро бере, законъя соос та вакытэ отпуске но потыны, ужаны но быгато � кыӵе луоз асьсэлэн мылкыдзы. Россиысь ЦИК-лэн кивалтӥсез пыр-поч валэктонъёс сётӥз журналистъёслэн юанъёссылы. � Александр Альбертович, тӥ оскиськоды-а быръёнъёслэн нокыӵе янгышъёстэк но пӧялляськонъёстэк ортчонзылы? � Удмуртилы президент быръёнъя законды федеральноезлэсь уг висъяськы, тупамтэ интыосыз ӧвӧл. Маиз уггес кельшы? Шуге-леке вуон учыр луыны быгатоз "25 процентэн" бырйисьёслэсь. Сомында куара сётыны кулэ кандидатсы понна. � Нош люкаськиз ке 24,5 яке солэсь но ӧжытгес процент? � Югдур озьы кылдӥз ке, бырёнъёсты кык пол ортчытоно луоз. � Берло аръёссэ чылкыт амалэн ортчись быръёнъслы оскон ӧвӧл ни кадь. Кызьы ЦИК тае эскере? � Со � милям ужмы. Та муген ик вуимы Удмуртие но. Законлэн куронъёсыз быдэсъяськизы ке, быръёнъёс чылкыт ортчозы, одӥг интыын коть тӥязы ке, ЦИК ваньзэ пыр-поч кутскыса эскероз. Озьы вал Карачаево-Черкесиын, Санкт-Петербургын, куд-ог музон регионъёсын. Мылкыд карысал, Удмурт Республика соос радэ медаз шедьы шуыса. � Нюръяськон зол луоз, солы кутскон сётэмын ни. Прессалы кызьы ужано? � Законэз чакласа. Али ӝожтӥськонъёс вань ни, куд-ог кандидатъёсты мултэс трос возьматӥськоды шуыса. Янгыштэс тупатыны дыр вань на. Ужалэ озьы, быръёнъёс бере ог- огды шоры учкыны возьыт медаз луы. Л.МЕДВЕДЕВА. Музъем палэнэ медаз кошке Толон ӵукна Правительствое люкаськылӥзы министерствоослэн, ведомствоослэн, федерацилэн ёзъёсызлэн кивалтӥсьёссы. Вераськон мынӥз соос азьын туэ но вуоно арын сылӥсь ужпумъёс сярысь. Правительстволэн Тӧроез Николай Ганза ивортӥз: � 26-тӥ июле Россия Федерациысь Правительство юнматӥз 2000-тӥ�2001-тӥ аръёсы социальной политикая но экономикаез выльдонъя программа � дасяз Герфан Греф. Партилэсь но правительстволэсь кыӵе гинэ нимъёссэс ӧй лыдӟылы � таӵе рос-прос документъёсты ӧй адӟылы на. Отын мылкыд каронъёс (декларациос) ӧвӧл � отын нимаз- нимаз ужрадъёс. Куд-ог ужпумъёсты Николай Алексеевич рос-прос пусйиз. Вазь-а, бер-а, нош музъем пӧрмоз вузано-басьтоно макелы. Со олокин кие медаз кошкы шуыса, ваньмыз сярысь туннэ ик рос-прос малпаськоно. Министръёс политикаен медаз выре � ужен мед вырозы. Азинсконъёсын ушъяськиськом ке но, югдур сокем ик ӟеч ӧвӧл. Пунэмен тыронъёс тачак. 8-10 ар кулэ луоз на, экономикаез огсыр азинтон вылысь. Николай Ганза вазиськиз прессалы но. Программаез быдэсъян вӧсь кароз данак удысъёсты но адямиосты. Соин ик калыкен пыр-поч ужано, ваньзэ рос-прос валэктоно. Нылпиослы шумпотон Тодмо кылбурчи, фольклорист, тодосчи Даниил Яшин удмурт калык выжыкылъёсты бадӟым чебер книгаен поттон сярысь малпа вал. Малпанзэ быдэстыса ӧз вуы - солэсь кутскемзэ азӥнтӥз кузпалыз Роза Ивановна. Издательствоын кема кыллемез бере та рукопись туэ печатламын нимаз книгаен, 208 бамен. Сое чебермало улонысь дырызлэсь вазь кошкем усточилэн Менсадык Гариповлэн суредъёсыз. "Удмурт калык выжыкылъёс" тужгес но шумпотозы нылпиос. Соос кемалась возьмало ни вал таӵе книгаез. Пиналъёслы усто кузьым луоз Елена Глебовалэн "Шаньги" талась атас" книгаез но (суредъёсыз Василий Мустаевлэн). Гожтӥсез кема аръёс ужаз "Дась лу!" газетын но "Кизили" журналын. Со сямен люкаськизы нылпиослы веросъёсыз. Т. Николаева. Уй пал городын заводъёс тэк уг сыло Правительстволэн Тӧроез Николай Алексеевич ГАНЗА кылем арняе ужаз Глазовын. Татын со тодматскиз акциосын огазеяськем предприятиослэн ужаменызы. Со вуылӥз ЧМЗ, "Реммаш", "Химмаш" но ЛВЗ предприятиосы. Нош ужан нуналэзлэн пумаз городлэн мэрияз со Глазовысь активен пумиськылӥз. Николай Ганза нырысь ик тодматскиз городысь предприятиослэн туэ ӝыны ар пала ужаменызы но эскериз соослэсь толлы эстӥськонэн дась луэмзэс. Чупчиысь механикая завод (ЧМЗ) � Николай Алексеевичлэн отын директорын ужакуз улӟытэм предприятиез. ЧМЗ-ен али озьы ик быгатыса кивалтэ Владимир Рождественский. Заводлэн азинсконъёсызлы Н.Ганза шумпотӥз. Производстволэн валтӥсь ёзъёсыз � цирконийлэсь, кальцийлэсь ваньбур но уранлэсь ракетаослы эстӥськон поттон � дугдылытэк ужало. Уранэн ужась цехъёс татын кемалась гинэ, 1949-тӥ арын усьтэмын ке вал, цирконийлэсь продукция поттон кемалась радъямын ӧвӧл на. Туэ дуннеын куинь гинэ предприятиос цирконийлэсь вузъёс потто. ЧМЗ-ын ужасьёсын вераськыса, Н.Ганза шуиз, уг но, пе, валаськы, мар понна тӥледыз курланы. Ӟеч ужаськоды. "Реммаш" АО-ын Правительстволэсь Тӧрозэ тодматӥзы выль кизён агрегатэн (АКПП-3,6 м). Предприятилэн коллективез гырон-кизён агрегатэз туж вакчи дыр куспын, куинь толэзь ӵоже, кылдытыны но лэсьтыны быгатэм. Дас сыӵе агрегат поттэмын ни. Гурт хозяйствоослы со туж кулэ. Специалистъёслэн лыдъямзыя, сыӵе техникаен ужаса, ю тысьлэсь асдунзэ 1,6 поллы дунтэмгес карыны луэ. Но быгатозы-а меда АКПП-3,6 м агрегатэз хозяйствоос басьтыны? Солэн дуныз 96 сюрс манет. Валамон, сое колхозъёслэн басьтыны кынарзы уз тырмы. Николай Ганза оскытӥз, правительство та ужпумез одно ик эскероз но коньдонэн юрттыны тыршоз шуыса. Солэн малпамезъя, 3-4 ар куспын, пе, 400 пала сыӵе агрегат поттыны луоз. Коллективлэн азинскыса ужамез понна "Реммашлэн" валтӥсь директорезлы Николай Веретенниковлы Николай Ганза правительстволэсь Почёт грамотазэ сётӥз. Глазовысь ликёр но аракы поттӥсь заводлэн (ЛВЗ) продукциез тросэзлы тодмо ни. Узыр со ас историеныз но. Туэ завод пусйиз кылдэмез дырысен 100 ар тырмонзэ. Кемалась ӧвӧл татын сур поттонэз но радъяллям. Глазовысь ЛВЗ барыш поттыса ужа. Коллективлэн мылкыдыз умой. Уждун дыраз тыро. Со сяна, адямиослэн осконзы бырымтэ на дунтэк квартира басьтонлы но. Квартиралы черодын сылӥсьёслэн лыдзы трос гинэ. Но адямиос ас черодзэс тупен-тупен тодо, ваньмыз бумага вылэ гожтыса адскымон интые ошемын. Трос сюлмаськонъёсыз мукетаз предприятиын � "Химмашын". Ас кивалтӥсьсэс ужасьёс татын туж шер адӟыло. Банкрот шуонлэсь правительство та предприятиез кык ар талэсь азьло утиз ке но, солы, шӧдске, пыд йылаз султыны туж секыт ай. Предприятилэн заказъёсыз туж ӧжыт. "Химмаш" югдурзэ тупатыны быгатысал, дыр, Ижысь "Буммаш" заводэн ӵош ужаса. Но "Химмаш" малы ке сыӵе амалэз кулэтэмен лыдъя. Правительствоен но ӟеч кусыпъёс возьыны уг малпа. � Мынам тодэмея, � шуиз татын ужасьёслы Н.Ганза, � одӥг предприятие но правительстволэн юрттэмезтэк куашкан калысь потыны ӧз на быгатылы. Заводысь кивалтӥсьёслэн вылтӥяськись сямзы мыным уг кельшы. Ойдолэ ӵошен эскером, кызьы луоз тӥляд секыт югдурысь потэмды. Оло, тӥляд коммунизме мынон лушкем сюресты вань? Соин нимаз возиськиськоды? Глазовысь актив азьын, Правительстволэн Тӧроез сяна, вераськизы Калыкез дышетонъя, Тазалыкез утёнъя, Калыкез улон-вылонын утёнъя министерствоосысь кивалтӥсьёс. Нырысетӥ сентябрьлы Глазовысь вань школаос нылпиослы ас ӧсъёссэс усьтыны дась луозы, шуиз калыкез дышетонъя министрлэн воштӥсез Г.Васильева. Тазалык сярысь ке верано, Глазовын кылдэм югдур чакласькытэ. Республикаын сярысь, татын тросгес ӧлексы нылпиос, нылпилэсь куштӥськон учыръёс (абортъёс), пыктосэн висисьёс но ВИЧ-инфекциен курадӟисьёс. Огъя вераса, кезьытэз пумитаны город дась. 718 улон юртъёс пӧлысь 200 палаез городлэн асваньбурез лыдъяське. Калыкен пумиськылонъёс дыръя Правительстволэн Тӧроезлы адямиос пӧртэм юанъёс сётъязы. Тросэз соос герӟаськемын вал республикамылэн улонэныз. Валамон ини, адямиосты сюлмаськытэ республикамылы президент быръён ужпум но. Кемалась ӧвӧл, президентэ кандидат луон мылкыдзэ Н.Ганза ивортӥз ни вал. Но та юанлэсь Глазовын пумиськылонъёс дыръя Правительстволэн Тӧроез ялан палэнскыны турттылӥз. � Агитация нуонлы дыр вуымтэ. Правительстволэн адямиосыз но со ужен али ик вырыны кутскизы ке, ужысьтызы улляло, � шуиз Николай Алексеевич. � Быръён ужъёсын мон тӥ доры нимысьтыз вуо ай. Но законъя дыр вуиз ке. Т.БАННИКОВА. ? Н.Ганза "Реммаш" заводын. Туспуктэмез С.Чирковлэн. Умой адямиос Чиньы воштэ рентген сиез Оскиськоды-а тӥ туно-пеллёослы, ки-пыд тупатъясьёслы? Соос сярысь мадисьёсты сак кылзӥськом, нош шуге-леке сюрытозь вунэтӥськом. Умоезлы оскон пичиёме ни ке, калык эмъясьёс тодэ лыкто. Озьы, ымысь ыме, пельысь пеле вераса, та воргоронлэн чигем-вольтчем интыосты тупатъямез сярысь кытын гинэ уг тодо. Со доры вуо матысь но кыдёкысь гуртъёсысь, Ижысь, Можгалась, Башкортостанысь. Ваньмызлы кулэ юрттэт. Таӵе паймымон адями улэ Пичи пурга ёросысь Баграш-Бигра гуртысь вож садъёс пӧлы ышем одӥгаз юртын. Азбараз - вож-вож ожо, турлы сяськаос, улмопуос. Кузё яратэ губияны но чорыганы. Пумтэм синмаське нюлэс шулдырлы. Толалтэ сапег лэсьтэ. Зэм, Устинов Александр Саввич "тӧдьы куака" ӧвӧл. Аслаз быгатэменыз уз ушъяськы, нош вазиськисьёслы одно юрттыны тыршоз. *** 1935-тӥ арын 9-тӥ октябре Орлой гуртын сезьы аран вакытэ Ольга Андреевна кузпалэзлы Саня пизэ кузьмаз. Собере... Савва Павлович ожын быриз. Таӵе секыт адӟон вакытэ мемеез кык пиосыныз кылиз, нылыныз секытэн на вал. Санялэн пичи дырыз секыт вал. Еж мугоро пияшлы тӥр кутоно луиз. Школаысь бертэмез бере пу ворттӥз, гырон-кизён дыръя ошез кыткыса усыяз (валъёсты ваньзэ сямен фронтэ нуизы), пудо возьмаз. Соин ик дышетскиз ньыль класс гинэ. Пыдлось лул-сюлэмаз нуллэм малпанэз ӧз быдэсмы: туж потэ вал пудо эмъясь луэмез. Семьяяз со воргорон интые кылемын вал бере, мемеезлы оскымон кивоштӥсез луиз, Костя вынзэ но Онись сузэрзэ будэтыны юрттӥз. Колхозын ужакуз ик ӝытъёсы школае ветлӥз. Озьы тямыс классэз йылпумъяз. 1960- тӥ аръёсы Бобья-Учалась МТС-ын трактористэ дышетскиз. Со дырысен быдэс улонзэ герӟаз бусы ужен. Сюлэмыз ырак луытозь кылзӥз трактор-комбайн гуретэмез. Ӵук ӟардонэз пумиталляз лудын. Уж дорын ик шедьтӥз ас шудзэ - Катя кузпалзэ. Ӵошен вить нылпи будэтӥзы, Баграш-Биграе сандык кадь ӝик-ӝик корка пуктӥзы. Бӧрсьысь бӧрсе вить сюан жингыраз. Туннэ Александр Саввичез но Екатерина Иосифовнаез нылпиоссылэн дас кузя нылпиоссы шумпотто. Пенсие потыса но чик тэк уг уло, гурт котырын ужъёссы тачак, Вова пизылэсь нылпиоссэ утё на. Адями улытозяз корка пуктыны, нылпи будэтыны писпу мерттыны кулэ, шуо. Саня агайлэн но вань малпам ужъёсыз пӧрмизы. Муш гинэ вордыны ӧз быгаты ке шат? Со понна ачиз тани муш сямен кинлы гинэ уг юртты тодӥсь-шӧдӥсь киосыныз. Чиньы- пӧлыосыз ку пыртӥ шараяло вӧсь луэмез: вольтчем ёзвиез интыяз пукто, рентгентэн возьматымтэ лы пилиськемез адӟо, чигем интыос но Александр Саввич кутылэм бере гипс пушкын чалякгес бурмо. Таӵе быгатонлыксэ инмар ваньмызлы уг сёты. Адӟе, дыр, адямилэсь шуге-леке вуэмзэ. Паймымон кужымез сярысь Саня агайлэн мемеез но ноку ӧз тодылы. Адӟон пыд улысь потэ, шуо. Озьы ик вань. Ньыль-вить арес дыръяз пичи Саня кутсаськон лапасын культоос йылысь усем. Соку ньылез ик киыз-пыдыз интыысьтыз потӥллям. Ольга Андреевна быгатэмезъя пизэ эскерем, кызьы ке тупатъям-вырем но - йӧнатэм. Со дырысен Оля апай доры кинэз гинэ ӧз вуылы, кышномурт одӥгезлы но юрттэт сётытэк ӧз кельты. Пиез котыраз бергаз-учкиз. Мумиз кулэм бере, Саня агай та уж борды соку ик ӧз кутскы. Оло кепыраса, оло кышноез алыса. Нош одӥг пол гуртысьтызы ик мӧйы нылкышно Юляпай вазиськем, со бере - мукетыз. Озьы каллен-каллен юрттылӥз гуртоосызлы. Табере котькуд нуналэ лыкто, уин но сайкато, куддыръя черодэн но возьмало. Висисьёсты эмъясь кыӵе ке пуш кужымзэ сётэ, соин ик, лыосты тупатъякуз, пиосмурт пӧсям вуэн шобырске. Аслам но чиньые кемаласьгес вӧсь луиз вал. Биграла соку ик мыныса ӧй вуы, ас понназ ик ортчиз кадь. Нош куазь воштӥськыку, сӧнэз тӧрна, вӧсь луэм интызэ тодэ вайытэ. - Э-э, - шуэ Саня агай, - кӧня ке зӥбылэмез бере, ма, таид чигем вылэм ук. Табере ас кожаз бурмем ни. Чигем лылэн йӧнам интыяз вурыс кадь кылдэ. Синпӧртман ӧвӧл та. Кӧня адямиез меда эмъясь берыктӥз улон ӧре? Нуналаз ог дасо адями вуи ке, ар куспын соослэн лыдзы куинь сюрслэсь ортчоз! Кыӵе гинэ вӧсь луэмъёсты солэн шуныт киосыз уг шӧдо. - Пугачёвоысь ныллэн ветлэмез ик уг луы вал. Сюрлызэ тупатъяй. Табере ужа ни. Анаез нош шумпотэмзэ вераны весь кузьымъёсын ветлӥз, - вера Александр Саввич. Эмъяськон ужезлы дун пуктымтэ, инмарлэн сётэмезлы уго нокыӵе мертэтъёс ӧвӧл. Таӵе быгатонлыксэс Устиновъёс мед кельтысалзы выжыысь выжые. Тятяез котыртӥ туннэ Вовалэн Ксюша нылыз берга. Юрттэт курисьёс вуо ке, эмъясьлэсь учке, юа. Киосыз гинэ шӧдӥсесь мед луозы нылашлэн. Пурысь синкашъёсыз улын Санягайлэн синъёсыз пальышало кадь. Кӧня учкыны турттыса но, мон соосын ваче ӧй вуы. Оло, шӧдӥсь чиньыосыз сяна, синъёсыз но солэн пыр адӟо. Усто хирурглэн яке музыкантлэн чиньыосыз, пе, векчиесь но кузесь луо. Нош Александр Саввичлэн ужась киосыз юнэсь. Кӧня шунытэз солэн чиньыосаз. Мон понна та воргорон котькыӵе хирурглэсь дуно, вылӥ тодон-валан басьтэмъёслэсь но визьмо. Угось туннэ нуналэ шер пумиталод адямилы ӟечсэ гинэ лэсьтӥсь муртэ. Алёна Ионина. Ӵошен гурезез но берыктыны капчи Та амалэз лыдэ басьтыса ик луоз, шаерысьтымы калык огазеяськонъёс ӵош, огинэ ужан сярысь мылкыдзэс веразы но комиссия кылдытӥзы. "Единство ради созидания" шуыса нимазы сое. Туннэ нуналлы со 94 калык огазеяськонъёсты герӟа. Пӧлазы луо "Народный долг" ОПОД, ужбергатӥсьёслэн, локальной ожъёсысь ветеранъёслэн огазеяськонъёссы, "Дэмен" но "Якташлар" калык кичӧлтӥсьёс, данак мукетъёсыз. Кыӵе куронъёс азяз пуктэ выль кылдытэм коалиция? Асьсэос ӧнерчиос верамъя, калык сюлмаськонъёты кивалтӥсьёс дорозь вуттон. Та ужез ас вакытаз нуыны кулэ вал Общественной палата, но кужымез ӧз тырмы, шӧдске. Сюлмаськонъёс ӧз кулэсме. Кылсярысь, "Дэмен" огазеяськонлэн азьветлӥсез Альберт Разин куректэ гуртъёслэн бырон калэ вуэмзылы, удмурт кыллэн ас интызэ ыштэмезлы. Локальной ожъёсысь ветеранъёслэн огазеяськонзылэн кивалтӥсез Андрей Глухов жаляса учке афган но чечен ожъёс пыр потэм пиос шоры. Соос, пе, ас вакытаз гинэ кулэ луизы, табере - вунэтэмын. Тросэз уже интыяськыны но уг быгато. Ма бен, оло, выль коалиция-огазеяськон та но мукет ужпумъёсты ӝоггес сэрттоз- пертчоз. Возьмалом, чаклалом. Э. Васильева. Пуштон тулкым вуиз Калмезозь Ивортӥмы ини: Москваысь Пушкин площадь ултӥ потон-ветлонын пуштытонэ сюмсиос но шедизы. Кинъёс бен соос? Та пумысен редакцимы телефон пыр герӟаськиз Сюмси ёросысь депутатъёслэн кенешсылэн тӧроеныз Людмила Ивановна Пескишеваен. Людмила Ивановна верамъя, Федоръёслэн семьязы туж ушъямон. Пӧлазы лякытэсь, шунытэсь кусыпъёссы. Анатолий Германович, семьялэн кузёез, Россия Федерациысь дано лэстӥськись. Ужа сюрес лэсьтон-тупатон удысын мастер луыса. Зэм, сюлэмыз ляб, кык пол инфаркт вал ини. Соин кышноез Тамара Анатольевна сюлэмшугъяське, таӵе секыт кайгу картсэ выльысен зӥбоз шуыса. Тамара Федорова ачиз "Золото-Платина-Банклэн" филиалэныз кивалтэ. Федоровъёс кык ныл будэтӥзы. Покчиез тямысэтӥ августэ бырыны шедиз. Анечкалы, чебер но мусо нылашлы, туэ кызь арес тырмиз. Быземын ӧй вал. Светлана апаез али, секыт сӧсырмыса-ӝуаса, реанимациын кылле. Педучилищеез йылпумъяса ужа нылпи садын воспитатель луыса. Светланалы 26 арес. Кык сузэръёс, ваньмон дыр шедьтыса, Кизнерысь песянаенызы ӵош Москвае кошкизы. Анайзылэн Москваысь выныз Александр Анатольевич Колбин дорын ӧжытак кунояськом, пе. Сьӧд нуналэ Анечкаез но Светланаез агайзы Москваез адӟытыны чортэм. Бабушсы тазалыкез уродэн йырин нокытчы ӧз поты. Ма, _Гмӧйы муртлэн пыдъёсыз но чаляк жадёзы, йырыз но сомында калык пушкын поромыны кутскоз. Анечкалы но Александрлы кылдэмын вылымтэ ни юмшамысь берытскыны. Ӵапак тямысэтӥ августэ Пушкин площадьысь потон-ветлонын сюлэмъёссы йыггетэмысь дугдӥзы. Кыӵе бадӟым куректон но кайгу вуиз Федоровъёслэн семьяязы. Нош Аня но Александр интыын луыны быгатысалмы ми но, тӥ но, соос но. Уд но тодӥськы ини, мае возьмано йырвандӥсьёслэсь. Соин ойдолэ ваньмы ӵош сюлэм висеммес вералом Федоровъёслы, нош Светланалы ӝог бурмон сӥзём. Анна Федороваез но Александр Колбинэз ватӥзы субботае. Сюмсие таин валче трос калык люкаськиз. Ватонэ пыриськизы Россиысь Кун Думалэн депутатэз Светлана Смирнова, Удмуртиысь Кун Кенешлэн Тӧроезлэн воштӥсез Наталья Харина, "Золото-Платина- Банклэн" кивалтӥсез Игорь Останин но мукет эшъёс. *** Та кысык нуналъёсы милициын ужасьёс подъездъёсты но корка сигъёсты эскерыны выро ик. Нош Ижысь музъем ултӥ потон-ветлонъёс чылкак аналтэмын. Пыдйылчиос-бомжъёс весь отӥ калтырто, югдытэмын ӧвӧл, жуг-жагез уг утялто. Эскериськоно асьмелы. Милицилы но сакгес луоно. Кин тодэ, оло йырвандӥсьёс та интыосты синйылтозы. Марина Костылева. В.Беломорскихлэн фотосуредъёсыз. Редакцилэсь. Газэтэз дасян вакытэ тодмо луиз: Москваысь больницаын толон вазь ӵукна кулэм Светлана Федорова. Солэн анай-атаезлы, матысь адямиосызлы кайгуэз вормыны кужым сӥзиськом. Чеберлэн дуныз аслаз, нош ямсызлэн � аслаз Котькуд дауре чеберлыклэн аслаз тодметэз луэ. Басьтоно ке Мона Лизаез, солэн вылтусыз номырин ӵошатонтэм чебер лыдъяськиз. Чеберлыксэ будэтон понна нылмурт кымес вылысьтыз йырсизэ ӵышкылӥз. Таӵе Мона Лиза Ижлэн урамъёстӥз туннэ ортчиз ке, одӥг пиосмурт но шораз уз учкы. Дэймыса сяна нюръясько ултӥянъёсын. Нюръясько воргорон яке кышномурт луэмъя, сьӧд яке тӧдьы куо луэмъя, ӟуч яке удмурт луэмъя. Озьы ке но, пӧртэмлыкъёс но соосты валамтэос уг быро. Нош тӥ тодӥськоды-а дискриминация ( мыскыллян) шуон кылдэ копак абдрамон удысын � чеберез-шушез валанын. Зэм, та ужпумъя нокыӵе закон ӧвӧл. Валэктом радызъя. Лыдӟисьёслы тужгес ик кельшо, дыр, "журналист воштэ удыссэ" йыръянэн мадёнъёс. Анатолий Гудимов ужаз шофёрын, Лариса Рейснер Германиысь Гамбург городын коркась корка йӧл вузаса ветлӥз. Нош "Комсомольская правда" газетысь Ярослава Танькова одӥг нуналэ Москваетӥ юмшаз туж чебер буяськыса-дӥсяськыса, мукетаз � бомж выллем кариськыса. Меӵак вераса, мон солэн гожъямъёсызлы сокем ӧй оскы вал. Нёжто чебер дыдыез ваньмыз ки вылазы нуллыны дасесь, нош шушсэ, куштэм пуныез сямен, котькудӥз ӵыжаны гинэ турттэ? Котьма ке но сыӵе аспӧртэм "опытэз" ас вылам лэсьтоно кожай. Ачим мон синэз кыскись дыды ӧвӧл. Сокем учконтэм но шуэме уг поты кадь. Огшоры шоро-куспо егит маке. Чебер кариськон амалъёсты тодэ котькудӥз кышномурт, нош шӧтэм луыны... Кутском чебер нылмурт бордысь. Чебер Чебер нылкышноослэн нуналзы кутске синучкон азьын. Татын одно ик пуктылэмын луозы пӧртэм кремъёс, духиос, лакъёс... Ваньмыныз таин быгатыса выроно ке, котькыӵе "пурысь шырлэсь" пӧрмоз примадонна. Кык час мында синучкон дурын тэтчай, синкашъёсме но ымдурме буяй. Йырсиме фенэн но лакен чеберъяй. Вакчигес юбка, мугорыя лач-лач пукись кофта дӥсяй. Вылӥгес каблукен туфлиме кутчай. Тазьы вань чебереным потӥ ульчае. Потыкум подъезд дорын ужтэк пукись кышноос лек шиетыны кутскизы. Соин тодӥ: вылтусы усто! Пиосмуртъёс тӥ шоры гожеръяло ке � умой, нош кышномуртъёслэн вожзы ке потэ, тӥ туж чебер адскиськоды. Инкуазьлэн кемалась дырысен шараям законэз. Автобус дугдылон пала мыныкум, кык пиосмуртъёс дортӥ ортчи. � Кыӵе пыдъёс! Таӵе пыдъёс понна кулыны но жаль ӧвӧл. Ойдолэ тодматском. Мынӥсько ас сюрестӥм, нош соос уг буйгатско. � Вае пакеттэс ке но нуом. Вамышъёсме кузятӥ. Городысь транспортлэн дугдон интыяз вуыса, автобусэ пукси. Адямиез лачак. Пукон интыос пала мынӥсько. Воргоронъёс радэн палэнско, сюрес сёто. Азям ик пуко кык таза пиосъёс, нош бакчаысьтызы тыро ведраосын но сумкаосын бертӥсь песянайёс но песятайёс пыд йылазы сыло. Малпамтэ шорысь сумкае одӥгезлэн ослоплэн ымныр палаз вуиз. Пиосмурт вожез потыса берытске, синъёсыз ӝуало, ымыз усьтӥське ни, отысь кырсь кылъёс кисьтӥськыны дась. � Ой, татӥ донгасько! Номыре валатэк сямен, синкашъёсме выретӥ, пальпотӥ. Шорам учкыса, йыркуръяськисьлэн ымнырыз воштӥськиз. � Эн шугъяське, номыр кышкытэз ӧвӧл. Тӥляд пуксемды потэ-а? � Умой луысал. Воргорон, интыысьтыз султыса, мыным пуксьыны юрттӥз. Ачиз шумпотэ: малпамтэ шорысь тодматскыны кемдӥз, пе, кельшымон нылашен. Вуи рынок пала. Лякиськем воргоронлэсь мырдэм но кызьы мозмытски. Емышъёсын вузкарисьёс пала вамыштӥ. Тани кытын чебер ныллэн вуэмез ваньмызлэн син азязы йӧтэ. Арбуз-банан эксэйёс туж ӝог вунэто вузаськыны медъям нылъёссы сярысь. Асьсэос вуз доразы ӧтьыло: � Чебер нылаш, лык татчы. Ма тыныд кулэ � помидор, виноград, банан, яблок? Учкы кыӵе арбузъёс! � Дуно лекос. � Кызьы дуно? Дунтэмгес уд шедьты. � Вить манетсэ ке но куштэлэ. � Кытчы дунтэматом на? Кызьы тынад нимыд? � Ой, уг басьты, дуно. � Сыл. Тон понна гинэ дунтэмгес. Кыӵе пыдъёс. Вах! Кылмес шерон куспамы, кошкемме адӟиз ке но, пакетам кӧня ке емыш донгыны вуиз. Вить манетысьтым ньыль но ӝыны манет сдача сётӥз. Вах! Чао! Секыт сумкаме пыдын нуом шат? Тачка кулэ! Потӥсько сюрес вылэ. Азям арлыдо кык нылкышноос сыло ни. Озьы ик машина возьмало. Нырысетӥез ик "Жигуль" машина соос вӧзтӥ кошкыса дугдэ мон пала. Кулэ интые вуон понна, тодӥсько, кызё манет тыроно. Машинае пуксён азям мыньпотыса дас манет ӵектӥсько. � Ичигес луоз, нылаш. � Вождэс эн вае, но мынам ӧвӧл ни. � Мар тӥледын карод на? Пукселэ. Ширтӥм. Берпуметӥез малпанэ: уже интыяськоно. Одӥгетӥ, витетӥ но сизьыметӥ троллейбусъёслэн берпум дугдылон интыязы чурен комокъёс сыло. Одӥгаз укно дорын ялон: "Кулэ вузкарись". Ӧтисько вузчиез, юасько ужан инты сярысь. Кытысь ке азям кузё потэ. � Басьтӥськом, басьтӥськом. Нош ма карыны быгатӥськоды? � Номыр но. � Умой, � шуиз кузёез но шашлык оскалтыны ӧтиз. Шуш Шуш кариськыны, серем ке но, чебер пӧрмытсконлэсь капчи ӧвӧл. Синучкон азьын кема лэсьтыны выри визьтэмгес но жальгес тусо ымнырез. Синкашъёсты быдэ вуымтэослэн амалзыя буяй, ныре но ымпушкы вата тыри. Штани, кыстаськем кофта, свитер ошылӥ ас вылам. Йырме лэзьыса � тодмоосы гинэ медаз синйылтэ � улон палтӥм бызьыса кошки. "Пурысь куака" мон: эн йӧтылэ бордам, а то виё! Вамышъясько озьы: кырыж-конгыль кукъёсы пӧртэм пала лики-ляки шонасько. Мыныкум нокин вазьылӥсь ӧз луы. Пукси автобусэ. Озьы ик трос адямиез. Шорам нокин уг учкы. Донгаськыса вуи пукон интыос пала. Гань-гань нырулӥсь пиосмуртъёс но шӧдӥзы. Озьы ик одӥгезлы ымныр дораз сумкаен вуттӥ. Пиосмурт берытскиз. Монэ сиыны дась: � Визьтэм... ёк-к-л-м-н... (отӥяз бурсэм кылъёсыз нокыӵе словарьын ӧвӧл). Ма кариськод? Монэ синтэм кельтыны малпад шат?! Гордэктӥ, ма вераны тодытэк, автобусысь потӥ. Базар дорозь пыдын мыноно луиз. Шорам нокин уг учкы. Толон гинэ бордам биниськем вузчи шорам уг учкы. Соин ик вузэзлэсь дунъёссэ ачим юано луи. � Яблокты кӧняен? � Кызь витен. Трос-а басьтоды? � Дуногес. Вить манетсэ ке но куштэлэ. � Уг, � вандыса сямен вераз. Кытчы пыриллям солэн "тон понна гинэ, вах!" кылъёсыз? Мон сярысь соку ик вунэтӥз. Артэ сылӥсь пиосмуртэн серекъяны кутскизы. Маке ас кылынызы верасько. Пальпотыса монэ мыскыллямзэс ас вылам выжтӥ. Али ик та "маскарадэз" миськыны дась! Но уг яра. Ужез йылаз-пумаз вуттоно. Мынӥсько такси дугдытыны. Тани шуш ныллэн улонысьтыз тужгес но шуг учырез. Шофёръёс вӧзтӥм адӟытэк сямен кошко, вылаз ик, дэриен пазяса кельто на. Мырдэм но кызьы дугдӥз вужалэс "Москвич". Толон гинэ дас манет тырыса ортчем сюрес понна туннэ куризы куамын. Сётӥ кызь. Даллашыса келязы. Берпум кужымъёсме люкаса, комокъёс доры вуи. � Мынам тӥ доры ужаны интыяськеме потэ. � Нош кӧня арес тыныд? � нылаш шорам лек учкиз. � Кызь. � Возьмалэ... � ачиз кытчы ке ышиз. Кӧня ке дыр ортчыса, ымнырыз "комоклэн" укнояз адӟиськиз: � Буш интымы ӧвӧл ни. � Нош ялонды малы уже ӧте? � Куштом. Зэмзэ вераса, та дыр куспын кузёез монэ синйылтӥз, луоз. Вылтусы кельшымтэ. Одӥг нунал куспын, шуш кышнолэсь рользэ шудыса, чебер "мунёосты" весяклы адӟонтэм кари. Нош кӧняез сыӵе шушалэс нылкышноос быдэс даурзэс тазьы уло. Шуг! Соосты сокем чидамзы понна данъяны кулэ. Пиналысен ик адямилэн чебер яке шуш луэмез быдэс улоназ пусъет луэ. Чебер нылпиосты мӧйыос ӵемгес вешало, тросгес чачаос басьяло. Нош "урод ӵӧжпиосты" уг ярато. Кузпал быръёнын вылтус нырысетӥ интыын луэ. Уже интыяськыку но тусбуй валтӥсь инты возе. Пичиды шушгес ке, эн вералэ, со ваньмызлэсь чебер шуыса. Пыӵатэ солы таӵе малпан: чеберлэсь вылӥынгес астэ муспотон возьыны быгатон. Тодаз вайытэ таӵе вераськонэз: "Чебергес ке � визьтэмгес". Со кылъёс кытысь ке но потэмын ук. Чеберъёслы номыр понна нюръяськыны. Лыктӥд, возьматскид, синъёсыныд кырмыштӥд � ваньмыз дась. Озьы соослэн вань улонзы лякытак ортче. Семьязы но тазьы кылдэ. Яратон сям ӵемысь уг шӧдӥськы. Сое воштэ шуг, дасьсэ возьман. Нош сюроз-а муш сямен дугдылытэк ужась карт? Шедиз ке но, кин тодэ, тырмоз-а солэн яратонэз, адӟылытэк улыны кужымез? Уз-а пегӟы шӧтэм но сое яратӥсь кышномурт доры? Чебер нылкышнолэн вань улонэз пӧрмыны быгатоз аспӧртэм ролез шудонлы. Нош "куӵоос" дышемын ваньмыз понна нюръяськыны. Нылпиоссы но яратыса-учкыса будозы, кырсь дӥсен но сютэм уз луэ. Мар бен кароно милемлы, чеберъёслы? Коштанъяськоно ӧвӧл. Учкымон луон понна ми чик ӧм тырше-пӧсялэ. Со � инкуазьлэн кужымез, анай-атайлэн емышез. Ми кадьёс мукетъёсызлы шумпотон вайыны вордӥськемын бере, воргоронъёсты медаз вожаты, кышноосты медаз вожъяськыты. Вунэтоно ӧвӧл: чеберлык кема уг возиськы, макем вылтӥгес астэ карод, сокем юнгес сабкиськод. Мар бен кароно милемлы, шушань кышноослы? Нырысь ик лукыр-лакыр ветлоно ӧвӧл. Туала косметика но мода котькудзэ огшоры дыдыез эксэй ныл кадь карыны быгатоз. Кин но со, оло, шуоз таӵе секыт вакытэ буяськонэн йырин ӧвӧл � кӧттыр сярысь малпано, солы пумит мынам песянае шуылоз вал, кӧт сюмамдэ уз адӟе, ӟустыр-ӟастыр ветлэмдэ синйылтозы. Возь вылысь сяська пӧлын кыйбоды йыр но чебер, шуо. Озьы ик котькуд кышномурт маин ке но бордаз кыскыны быгатэ. Ольга КОЖАНОВА. ? Оскоды оло уд: та ньыль суред вылын � одӥг адями � мадёнлэн авторез. Шудон - миндэр улын, эрик - уйвӧтын - Эшелэсь вордскем нуналзэ пусъёнысь бертӥсько вал. Кисыям - пурт. Тодмо пияшез пумитай. Ченгешим ми туж юн. Нош мугез кыӵе огшоры гинэ. Али уг но тодӥськы ни. Визьтэм шуыса-а, мар-а исаз со монэ. Гараж сьӧры кожим. Отысен ик сое вандӥ. Укыргес шӧмъяськемын вал ачим. Мар дауртэмме ӧй вала ни. Виён сярысь малпан йырам ӧз но лыктылы. Сизьым пол бышкалтӥськем пуртэн. Эмъясьёс берло куаретӥзы, куинь-ньыль минутлы ӝегасалзы ке, катьяны пияшез ӧз быгатысалзы, пе. Сизьым ар табере пуконо. Пигонъёс ик ӝутско: эрике потыкум 23 арес тырмоз ни. Тазьы маде Б. Дима, Можгалась егитъёслэн колониысьтызы одӥгез йыртэмась. Йыртэмась шуиськом но, яра-а меда пинал пияшъёсты-нылашъёсты соку ик йырвандӥсьёс пушкы пыртыны? Соос пичиесь на ук ай. Тани Можга колоние вуылыкум учкисько соослэн ымныръёссы шоры. 14-18 аресъем пиос. Котькыӵеез вань - чеберез но, шӧтэмез но, мусоез но, лек тусоез но. Ымныр вылазы гожтэмын ӧвӧл, лушкаськиз я адямиез жугиз шуыса. Нош малы меда егитъёс йыртэман сюрес вылэ султо? Трос пол сётъясько мон аслым таӵе юан. Керӟегъяськон сям котьку анай йӧлын ӵош уг пыӵа. Йыртэмась луыса уг вордско, йыртэмась луо. Бадӟымъёс, мумы-бубыос но татын янгыш. Бен даурмы но кыӵе ке суро-пожо. Туэ уката но урод сямлы пушйыны эрик сётэмын. Америкаысь ваем боевикъёс умоезлы дышетозы шат нылпиез? Шутэтскон интыос егитъёс понна али туж ичи. Нокыӵе кружок выллемъёс но уг ужало. Ужан инты ӧвӧл. Соин ик йыружъёс йыло но йыло. Куддыръя нылпиослэн бадӟымъёслэн сярысь ятыргес керӟегъяськонзы, лексы люкаське. Йыружъёссы но кӧшкемытэсьгес луыло. Тӥни озьы сюро нылпиос бышкаськись ез сьӧры. Можгалась колоние мон ӵемысь вуылӥсько. Нылпиосын бӧтьыртӥсько. Та улон интызэс пияшъёс "нылпи сад" шуыса нимало (тюрьмаен но следственной изоляторен ӵошатыса). Пытсэт сьӧрын соосты уг тышкало. Ужаны сяна дышетскыны косо. Куддыръя КВН-эн но шудо соос. Ваньмыз умой луысал, дыр, но бышкаськись ез, ӝужыт борддор быдэс гадь тыр чылкыт омырен шоканы уг сёто. Эркын улӥсь адями сое валаны уз быгаты. Ас вылад шӧдоно - пытсэт сьӧрын пукон туж секыт маке. Ма, йыртэмась но бышкись езлэсь кужымзэ валаны кутске, куке со мугорзэ пачкатыны, зыраны ӧдъя. Куд-огез пиналъёс пытсэт сьӧрын улыны уг чидало - пегӟыны туртто. Но татын лек пуныос трос - куртчозы. Озьы ик бышкаськись ез дуртӥ аспӧртэм "убоос" гудэмын, мажесэн ӝикытак тупатъямын? Отын одӥг пичи будосэз но ӧвӧл. Малы? Пегӟисьёс та чылкыт убо вылэ асьсэлэсь пытьызэс мед кельтозы шуыса. Одӥг пол адӟи, кызьы пиналъёс гудэм музъемысь ас киынызы жуг-жагзэ ишказы, ас киынызы асьсэлы "капканъёс" лэсьтӥзы. Сарапулысь Д. Виталий кадьёслы маза уг сёто. Угось та пияшез уно пол ини бышкаськись ез борды кеськем штаниен вайылӥзы. Кема сое лӥятыса возизы, малы ке шуоно, бадӟымъёслэн колонизы со азьын пиштэ вал. Сыӵе керӟег сямоез отын чаляк интыяз пуктысалзы. Угось пияш егитъёслэн колониязы но эшъёссэ ӵемысь жугылӥз. Одӥг пол аслэсьтыз кылзэ пырак пась луытозяз куртчиз. Нокинэн но, пе, вераськеме уг поты. Адямиосты уг яратӥськы, нылпиосы но уз луэ, шуэ. Кыӵезэ гинэ уд пумита пытсэт сьӧрысь. Тани учкисько куд-огезлэсь личной ужъёссэс. Кык пияшъёс мар ке понна керетӥллям. Одӥгез тодмо шофёрзэ чортэм, пияшез шайгу пала нуиллям. Дӥсьсэ-кутсэ кыльыса, писпу борды керттылӥзы. Та учыр толалтэ вал. Ӝыт пал гинэ шедьтӥллям чонграм пияшез. Эшшо одӥгез учыр. Пияш эшъёсыныз ӵош аслэсьтыз сузэрзэ сантэмам. Йырсиос ик пештырско. Но малпаськыса-малпаськыса валаськод: та йыртэмасьёс воксё нылпиос на. Асьмелы осконо - ваньмыз ортчемын ӧвӧл на, чылкак бырем-йыромем адямиослы соос пӧрмемын ӧвӧл на. Оло, воштӥськозы ай? Ведь ӵапак та йырвандӥсьёс, уд но оске, ярато... выжыкылъёс лыдӟыны, тужгес но принцъёс но принцессаос сярысь. Кудӥз- огез шудонъёссэ но лушкемен миндэр улаз возе. Одӥг пол нылпиослэсь юай: - Кыӵе уйвӧтъёсты адӟиськоды? Тросгес лыкто вылэм чебер уйвӧтъёс, анай но яратон сярысьгес. Кӧшкемытъёсыз но луыло. Воткинскысь Д. Николай ас йыружзэ уйвӧтаз адӟем. Огпол Коля керетэм Дима нимо эшеныз. Пунэмзэ берыктыны ӧдъям. Димаез чортэм липет йылэ. Туж зол жугем, ӵош дышетскем эшъёсызлы дэмлам Дима вылэ асьсэ котырзэс лэзьыны. Пияш, таӵе мыскыллямез чидатэк, укмыс этажъем коркалэн липет йылысьтыз тэтчиз. Юасько: - Мар-о Дима уйвӧтад кариз? Мар ке вераз-а? - Ӧз. Мон шоры шып учкыса гинэ сылӥз. Мон соку ик сайкай. Одӥгез пияш шуэ: - Мон быдэс нунал возьмасько, ку милемды кӧлыны выдтозы. Угось уин эрикез адӟисько. Ваньмыз умой. Вӧзам - анай, атай, эшъёсы. Тӥни озьы уло-выло егит йыртэмасьёс. Азьланяз гинэ умой сюрессы мед удалтоз соослэн. Шудо но ческыт уйвӧтъёссы зэмослы мед пӧрмозы, нош кырсь малпанъёссы весяклы пытсэт сьӧры кылёзы. А. Емельянов. Эктӥсь Фольклор кырӟанъя "Айкай" театрысь егит эктӥсь Валерий Келарев мылысь-кыдысь шумпоттылэ калыкез. Эктон со понна � быдэс улон. "Айкайысь" шӧртчиос пӧлын нош � тужгес етӥзэз: фольклор кырӟанъя театрлэн концертэз мыныку, учкисьёс соку ик синйылто сцена вылын туж шаплы поръясь пияшез. Задор мылкыд, етӥз сям, улонлы шумпотон кузьмаз Валерийлы вордӥськем Сьӧлта музъемез. Владимир Камашевлэн туспуктэмез. Сюлэм дыректэ учкыку Буре ваён книгалэсь котькуд томзэ кутӥсько киям, сюлмы дыректыса. Укмысэтӥез том мукетъёсызлэсь аспӧртэмлыко. Татчы пыртэмын 1938-тӥ арын Владивосток вӧзысь Хасан ты дорын но, ар ортчыса, Монголиысь степьёсын Халхин-Гол шур дурын ожмаськемъёслэн нимъёссы. Со сяна, ватсаса сётэмын Быдӟым Отечественной ожын азьло книгаосы пырымтэ бырем солдатъёслэн нимъёссы. Таяз томе сюремын Афганистанын, Дагестанын, Чечняын но азьвыл Совето Союзлэн мукет "пӧсь" интыосаз вуылэм ожгарчиос. Куд-ог солдатъёс но офицеръёс, присягазэс быдэсъяса, африка музъем вылын но ожмаськылӥзы. Соос но лыдэ басьтэмын. Удмурт шаерысь быремъёс но ивортэк ышемъёс 10 ар талэсь азьло 124780 мурт ке вал, буре ваён книгалэн берпуметӥ томаз пусъемын 133032 адями. Лыдпус будӥз, валамон, та вакытэ ожъёс мынэмен, озьы ик Быдӟым ожысь вуымтэ солдатъёс сярысь выль иворъёс шедьтэмен. Бырем солдатъёсты утчан-шедьтон - секыт но туж кулэ уж. Тросэзлэн нимъёссы татчыозь тодмо ӧвӧл на. Кылсярысь, мон ачим Горд Армилэн ог 1000 пала азьвыл тодмотэм солдатъёслэсь но командиръёслэсь нимъёссэс шараяй. Куд-огез сярысь гожъяй "Они защищали Брестскую крепость" но "По следам подвига" книгаосам. Буре ваён книгалэсь берпуметӥ томзэ гожтыны юрттӥзы Россиысь__ обороная министерстволэн шор архивысьтыз вуэм но поисковой отрядъёслэн шедьтэм медальонъёсъя иворъёс. Озьы табере тодмо луиз, Юкаменск ёросысь Ибрагим Абашев быриз Сталинград ожын 1943-тӥ арын январе, ватэмын Волга дорысь та городэ ик. Нош удмурт калыклэн дано пиезлэн Степан Барышниковлэн бӧлякез Яр районысь Бармашур гуртысь Иван Данилов ивортэк ышиз 1944-тӥ арын май толэзе. Туж ӧжытэз тодэ, луоз, та гуртысь ик Василий Барышников улонзэ сётӥз япон ожын 1939-тӥ арын августэ. Со ватэмын Халхин-Гол шур дурысь одӥгаз вынлыко шайвылэ. Кыдёкысь шаерын, Анголаын, шудтэм учыре сюрыса быре вертолётэн лобась Можга ёросысь Ӵожйыл гуртысь лейтенант Александр Яковлев. Таизлэн но нимыз книгае пыртэмын. Таяз томын нырысьсэ ивортэмын Чечняын, Дагестанын но мукет "пӧсь" интыосын ожмаськыса бырем но сӧсырмыса кулэм пиосмылэн нимъёссы. Тодам лыктэ туэ 9-тӥ феврале 97-тӥ Витебск стрелковой дивизилэн азьвыл комбатэз доры пыраме. Кемалась тодмоелы Емельян Васильевичлы верай автовокзал вӧзтӥ Игра школаез но Пермьысь военной училищеез йылпумъям Николай Логиновлэн мугорыныз коросэз шайвылэ келямзы сярысь. Майор Н. Г. Логинов Грозный городын мина вылын пуштыса быриз. - Мар понна вирзэс кисьтоно луо егит пиос? Ми коть ожмаським фашист Германия пумит, вордэм музъеммес сюпсись гыжкалъёслэсь сузян понна, - дырекъясь куараен вераз трос орденъёслэн кавалерзы Играысь ветен Е. В. Касаткин. 9-тӥ книгалэн бамъёсысьтыз шорамы учко йӧно егит пиос, воргоронъёс. Соосын ноку но ум пумиське ни. Буре ваён книга - со Атыкай музъеммес утисьёслы синпелет (памятник), туала улӥсьёсты нодлыкась-визьмась. В. Поздеев, отставкаысь капитан. Крезьгурчи Геннадий Ганьков кырӟанъёс гинэ уг гожъя, серемес чуръёс но пӧрмытъяны быгатэ. Таяз учыре печатласькомы тужгес аспӧртэмлыко мадёссэ. Удмурт кылэз дышетӥсько Борис Ельцинлы пышкылыса Али мон, шутэтскисько ке но, тэк уг пукиськы: удмурт кылэз дышетӥсько. Мон кызьы ке, понимаешь, Ижевске ветлӥ вал. Калашниковез юбилееныз ӟечкыланы. Ленин ураметӥ ширтыкум, кудӟем воргорон мыжык быдӟа из лэзиз мон шоры. Ярам коть: машина укно ворсамын вылэм. Соин ик, изэн медаз лэзьяське шуыса, удмурт кылэз дышетыны малпай, понимаешь. Мон ведь Удмуртиысь туж трос калыкез тодӥсько: Сан Санычен ӵош но юэме вань, Пашка Галяен ӵош но. Больницаын висьыса кылльыкум, удмурт делегация дорам удмурт аракы вайылӥз, чалякгес мед йӧналом шуыса. Якшурысь Валерьян Арсентьевичез но тодӥсько. Туж ческыт кумышкаен утялтӥз со монэ. Таиз сизьыметӥ иськемысен гинэ кутӥз. Белоруссиын Лукашенколэн мунчояз сайкай. Со монэ шорам немец сямен кесяськыса парить каре вал, понимаешь. Сюлэмы бӧрдымон ик тодам ваисько Сибыысь Атас Гириез, дорам Москвае брашка юыны ветлэмзэ. Ӵукнаозь ик вераськыса но кырӟаса пуким сад-бакчаын. Кырӟанъёсыз нош кыӵе шулдыресь вылӥллям! Тужгес но яраз вал сьӧд палэзен брашка сярысь кырӟанэз. Мынам но сюлэмы ӧз ни чида но, тани гожтӥ ай сьӧд палэзь сярысь кырӟан. Кытчы ке мыныкум, тӥледыз весь тодам вайыса, тазьы кырӟасько ас поннам: Нюлэскы но ветлыкум, Сьӧд палэзь бичакум, Сьӧд палэзь брашкаме Юыса кудӟисько... Геннадий ГАНЬКОВ. Тулыс сяськаос ӝужаку Крезьгурез Геннадий Ганьковлэн Кылъёсыз Александр Белоноговлэн Сое ӵошатъяд шундыен, Чебер льӧль пиштӥсь сяськаен, Шуид, со кенже сюлэме, Тылпу кадь, ялан пуроме. Озьы но, тазьы но шуид, Ялан выль кылъёс бырйылӥд. Нош кыӵе аслад гажамед � Али но уг лу валаме. Тулыс сяськаос ӝужаку, Шулдыр возь вылтӥ ветлыку, Трос пол вералляд мыным тон, Кыӵе со луэ яратон. Кинэн ӧй пумиськы Крезьгурез Геннадий Ганьковлэн Кылъёсыз Александр Белоноговлэн Ачим но мон соку ӝужай, Турын пӧлысь сяська выллем. Мон кин сярысь соку малпай, Кинэ меда утчаз сюлэм? Пумиськомы, дыр, кожаса, Возез лёгай, лэся, юнме. Быриз сяська но тӧлӟыса, Ӧй шедьты мон но ас шудме. Соку сямен ик мынӥсько Зарни тыло возьёс вылэ. Кинэн меда ӧй пумиськы, Кинэ на весь утча сюлэм? Ӧй луы кивалтӥсь мон Крезьгурез Геннадий Ганьковлэн Кылъёсыз Алла Кузнецовалэн Ортчоз толэзь но, ар но � Мон армие кошко. Эшъёсыным отын мон Гитараен шудо. Гитара но, баян но, Я огшоры арган, Эшъёс но, юлтошъёс но, Яратоно туган. Ӧй луы кивалтӥсь мон, Ӧй луы тракторист. Сцена вылын шудӥсь мон, Пичи гинэ артист. Котькыӵе куазь медло но � Мон тӥ доры дырто, Аръёс пыр, нуналъёс пыр Кырӟанъёсме вутто. Кырӟало ай Крезьгурез Геннадий Ганьковлэн Кылъёсыз Яков Майковлэн Куарае нош кельшымон-а, Тупалоз меда гуре? Коть нош мар но, кырӟало ай, Сюлэмы куре бере. Кайгуме пыдло вато мон � Кинлы кулэ кӧтӝоже? Одӥгнам берло лулӟи ке, Медло со аслам уже. Мылкыдме буйгатыны мон Кырӟанысь кылъёс шедьто. Ӧй ке шедьты, кызьы ке но Сюлэмъям кырӟан гожто. Улонын валче ветло ук Шумпотон но куректон. Гуръёсы ӝожесь медаз лу, Мед улоз ӟечлы оскон. Политика Арня ӵоже дуннеын, странаын, шаерын Дуннеысь азьмынӥсь кунъёслэн азьветлӥсьёссылэн Япониын пумиськонзы дыръя Владимир Путин вераськон поттылӥз ислам фундаментализмлэн паськыт вӧлмемез пумысен. Карта вылэ сое аспӧртэм гож выллем пуктыны луоз - Югославиысен кутскыса Кавказ но Шор Азия пыр пырак Филиппины шормуӵъёс дорозь. Таяз арня вискын Афганистанысь вуэм боевикъёс Узбекистанлэн лымшор гурезьёсаз чуртнаськизы. Секытэсь ожмаськонъёсын узбек армия ыштонъёс адӟиз, но исламистъёсты одӥгтэмак улляны ӧз быгаты. Гурезё интыосын моджахедъёс кема дыр ӵоже ватӥськыса улыны быгато. Фундаменталистъёс бадӟым кышкытлык кылдыто Россилы но. Ӵапак тае Чечня возьматэ ни. Татын югдур уг воштӥськы. Боевикъёс пыӵал тӥрлыкенызы люкиськыны уг малпало на, шӧдске. Нуналлы быдэ сямен федеральной кужымъёслэн машинаоссы одӥгаз яке мукетаз ёросын фугас вылэ шедё. Республикаысь администрацилэн кивалтӥсез Ахмад Кадыров вазиськиз Махадовлы но мукет командиръёслы, ожмаськемысь дугдыны курыса. Соку, пе, соос быгатозы азьланьын Чечняын ик улыны. Тодады вайытом, 20- тӥ августэ республика бырйыны кулэ Кун Думае депутат. Та нуналъёсы куд-ог интыосын, кылсярысь, армиын, быръён мынэ ни. Депутат луыны мылкыд карисьёс ог дасо пала. Паймытъямысь уг дугд_ӟы Борис Березовский. Туала Президентлы пумит луэменыз со Кун Думаысь кошкиз ни, табере выль общественно-политической огазеяськон кылдытэ. Котыраз литература но искусство удысысь тодмо муртъёсты кыскыны быгатэм, кылсярысь, писателез Василий Аксёновез ик. Борис Абрамович пӧртэм ужпумъёс шоры ас сяменыз учке Чечня сярысь верано ке, со шуэ: кулэ, пе, ваче ккенешон, пыӵал тӥрлыкен, ог-огдэ виылыса одӥг кылэ ноку но уд вуы. Владимир Путинлэсь ужамзэ чылкак мукет сямен дунъя СССР-лэн берпуметӥез Президентэз Михаил Горбачев. Ортчем арняе соос пумиськылӥзы Кремльын. Кенешемзы бере Михаил Сергеевич журналистъёслы вераз, Владимир Владимировичлэсь, пе, диктатор сямзэ ӧй шӧды, соин ик демократилы пум вуиз шуыны уг быгатӥськы. Кун Кенеш (Госсовет) кылдытонъя уж азьланьтӥське. Кылем арняе Федерация Кенешлэн куд-ог адямиосыз огазе люкаськылӥзы. Соос эскеризы, кыӵе быдэстоно ужъёс (полномочиос) ас вылаз басьтоз выль кылдытӥськись ёз. Кылсярысь, ӵектӥсьёс вань солы бюджет юнматонэз оскыны. Политика - кырсь уж. Тае возьматӥз тодмо биатлонистлэн Александр Тихоновлэн ужез но. Олимпийской чемпион пытсэт сьӧры келямын Кемерово улослэсь губернаторзэ Аман Тулеевез быдтыны дасяськемез понна. Таӵеез ноку ӧй вал на - спортсменэз кырмизы Россиысь Олимпийской комитетлэн юртаз. Пусйыны кулэ, кемалась ик ӧвӧл со пыриськиз вал Подмосковьелы губернатор быръёнэ, но кез генераллы Борис Громовлы. Александр Тихоновен ӵош арест улэ кыскемын мукет муртъёс но, озьы ик выныз Виктор. Шаерамы президент быръён кампанилэн питранъёсыз ӝоглыксэс будэто ни. 11 мурт вылӥ должносте пуксьыны мылкыд каро ни. Та нуналъёсы кандидатъёслэн оскем муртъёссы кинюртэмъёс бичало. Тодады вайытом, котькуд кандидат понна ичизэ 10 сюрс кинюртэм люкаськыны кулэ. Шаерысьтымы Быръёнъя комиссилэн тӧроезлэн Дмитрий Талантовлэн верамезъя, ваньзы ик кандидатъёс та ужез быдэстыны уз быгатэ. Соин ик соослэн радъёссы ӝоген шеромозы, пе. Ю. Александрова. Политика но экономика Кин асьмеды начар шуоз? Одӥг даурысь мукетаз выжон азьын амалтэк малпаськод: кыӵе кӧос вискы шедёз меда странамы дуннелэн выль вакытаз? Берло 100 ар куспын уго со ортчиз ваньзэ, мае ортчыны луэ, вылды, одӥг кабен улыны чидасьтэм кунлы. Вал туж шудо но туж шудтэм аръёс, туж бадӟым вормонъёс, сомында ик ыштонъёс. Россия улэ быръёнысен быръёнозь: кудпала валтозы - отчы ик мыноз, калыксэ нелькыса, толло лэсьтэмзэ куажгетыса. Нош кыӵе сюрес вите асьмеды ЪЪИ дауре пыронын? Политикъёс верамъя, Россия азе усьтэмын кык ӧс. Одӥгез, куашкам промышленностен но производствоен вуттоз туала цивилизацилэн пыдэсаз, кыкетӥез ӝутоз дуннеен кивалтыны быгатӥсьёс радозь. Таизлы юрттоз инкуазен сётэм узырлыкмы. Котьма шоры учкытэк, Россия туннэ но дуннеын огез тужгес но баез лыдъяське. Музъем узырлыкъя США-ез кык пол ортчиськом, Германиез - 5-6 пол, Япониез - 18-20 пол. Калык хозяйство араз али но 60-80 миллиард доллар пайда поттыны быгатэ, бюджетэн чаклам лыдпуслэсь - 3-4 поллы ятыр. Сыӵе лыдпусъёс сётэ статистика. Ужпум мукетыз бордын: кызьы но кытчы кошке сомында коньдон! Малы инкуазьлэн "шыкысъёсыз" чотын кӧй-вӧй пӧлын пыласько олигархъёс, Россиын улӥсьёс пӧлысь 5-10 процентэз? Валэктонэз одӥг: соос киын быдэсак экономика, страналэн улон сётӥсь вирсэръёсыз. Тӥни малы узыр Россия начармемын но жуммемын, кынарзэ кыскисьёс сое уен-нуналэн сюпсё. Дуннеысь азьмынӥсь странаос пӧлын самой пичиез уждун вал СССР-ын, али - Россиын. Талэсь мугзэ валэктылӥзы но валэкто Запад сямен ужаны пӧрмымтэенымы. Соиз шонер. Ужан дисциплиная асьмеос самой улӥын. Нош мукет ласянь ке учконо, Россиысь рабочий, США-ен ӵошатыса, 3 поллы тросгес продукция поттэ. Асьме быдӟа уждунэн отын нокин но куссэ уз тӥя. Тӥни кытысен кутске политика но экономика. Юнме шорысь уг верало ук, США-ысь ужтэк кылем мурт, пе, ӟуч рабочийлэсь ӟечгес улэ. Со озьы ик вань: толэзьем пособиез асьме уждунмылэсь 5-7 поллы бадӟымгес. Соослэн юнматэм стандартсыя 1 час ужам понна 3 доллар уг ке усьы, адями шеде ёрмисьёс радэ. Асьме дорын тужгес но кибашлы рабочий 3-4 поллы дунтэмгес ужа. Партия кивалтон аръёсы вань калык огвыллемгес улӥз бере, дунъёс но ог интыязы пукизы, общество узыръёслы но куанеръёслы ӧз люкиськы. Инкуазен сётэм узырлык пайдаез (рентаез) ваньмызлы тырмылӥз. Законъя со озьы ик луыны но кулэ - асьмеос одӥг инбам, одӥг музъем вылын улӥськом ук. Нош али ма луыса кошке? Одӥгъёсыз зарниен азвесен пыласько, кылемезлы сурым ӵын сяна уг кыльы. Берлоосыз радэ шеде Удмурт Республика но. Сомында му вӧй поттыса, уждун тыронъя но, гурт удысэз, промышленностез азинтонъя но, бускель республикаосын ӵошатыса, шаермы шӧдскымон бере кыле. 2000-тӥ ар - ЪЪ даурез йылпумъясь ар. Сое пумитам но аспӧртэмлыко осконэн: выль даурен герӟась выжмы юн луыны кулэ. Озьы капчигес луоз азьлане вамыш лэсьтыны. Ортчиз 7 толэзь. Россиысь Госкомстатлэн ӝыны арлы йылпумъянъёсызъя адске: берло 10 арез чаклано ке, гурт удыс но, промышленность но туэ интыысьтыз вырӟизы. Кулэсмиз ужтэк кылемъёслэн лыдзы, бюджет удысын дыраз уждун тырыны кутскизы. Кылем арен ӵошатыса, 9,5 процентлы йылӥз огъя продукция поттон. СССР-е пырись республикаос пӧлысь Россия Федерация туннэ сылэ нырысетӥ интыын. ВВП-лэн быдӟалаезъя кыкетӥ интыын - Казахстан (9,1 процент), куинетӥез - Азербайджан (6,5), Ьелоруссия (6,0 - ньылетӥ интыын. Отӥяз мыно Украина (5,6), Грузия (4,4), Таджикистан (3,8), Киргизия (1,0) но Армения (0,3). Озьыен, вуись даурез Россия пыд вылаз йыг-йыг султыса пумитаны дасяське. Кызьы со пӧрмоз, вераны шуг, малы ке шуоно, август толэзь (историе со пыриз ни сьӧд буёлэн) ӝыныез но ӧз ортчы на: кудпаласен шуккоз - тодмо ӧвӧл. Но шуккоз одно ик. Вераськонъёс мыно му вӧйлы, эстӥськонлы дунъёсты ӝутон сярысь, таин ӵош дуноялоз ваньмыз, уждунмы сянаез. Соин ик, политикъёсты но экономистъёсты кылзытэк, асьме кужыммылы оскыса но чиданлыкмы вылэ пыкиськыса, ЪЪИ даурез тыро ӝӧк вылэн пумитан понна, дыраз утялтом садын, бакчаын кисьмась емышмес, бакча сиёнмес, картофкамес, ю-няньмес. Ваньмыз со удалтэмын. Кошкись даурмы, вылды, сыӵе кузьым лэсьтӥз на секыт ужын губырскем калыкмы понна. Людмила Медведева. Кизён дыр вуэмын Можга. Али ӵапак тол юосты кизён вакыт. Специалистъёс верамъя, та дыре муэ согем ю тысь ӟеч выжы, пе, лэзе, кезьыт толэз но капчиен чида-ворме, тулысаз умой уда-пушъе. Можга ёросысь хозяйствоос туэ кизён ужъёсын ӝегатско, кидыссы тырмыт ӧвӧлэн. Оскиськизы вал туэ кутсано кидыслы, но бусы ужъёслы куазь люкетэ. Районысь кызь хозяйство пӧлысь туннэ ӝыныез гинэ кизьыны быгато. Ёросысь ю тысез эскеронъя инспекциын улӥ дунъязы "Рассветысь" ваем кидыссэс. Ӟеч кидыс люкаське "Трактор" но "Победа" эштосъёсын. М.СОРОКИНА. Кызьпу туйлэсь, куролэсь... Та нуналъёсы Ижысь калык киужъёсъя юртын возьматӥсько Можга ёросысь кибашлыослэн ужъёссы. Адӟытон сӥземын Удмурт автономилэн 80 ар тырмонэзлы. Выставкаын тодматскыны луоз усточиослэн Мария Морозовалэн, Ирина Александровалэн, Вероника Сажиналэн, Зоя Щепиналэн лэсьтэм арбериосынызы. Бадӟым Сибыысь нылкышноослэн куэм ковёръёсынызы. Кызьпу туйлэсь, пулэсь, куролэсь но мукет материалъёслэсь дасям ужъёс бордазы кыско чеберенызы, паймыто аспӧртэмлыкенызы. Выставка ужалоз толэзь ӵоже. Ю.ЧЕРНОВА. Лыдӟись вера малпанзэ Воксё уг валаськы Пинал дыръям мон политикаен туж ик ӧй тунсыкъяськы: маке даурто ке, мед лэсьтозы. Берло дыре (пенсие потэмен, лэся) ваньзэ син азям возьыны тыршисько. Ай учырез но тупа ук. Та паларлы почта ящикам дунтэк (вань ик, шӧдске, ӟеч адямиос) тырыны кутскизы "Известия Удмуртской Республики" газет. Ма но отын уг гожъяло! Ганза, пе, Березовскийлэн эшез вылэм. Ӧй но тодылы, ява. Мон весь сое украин выжыысь потэм мурт кожасько вал. Чылкак паймисько кузёмылы. Кытчы но уг вуы со. Туннэ кыдёкысь ёросын школа лэсьтонэ пыре, ӵуказеяз покчиосын пумиське, отӥяз цирклы инъет дасянэ лыктэ... Кытысь меда солэн сомында кужымез? Нош кытысь сомында коньдон? Котькуд школалы компьютер сӥзе ук. Дунтэм маке ӧвӧл кадь со. Оло, ӧй но гожтысал тӥледлы... Но малы ке нокытысь адӟыны уг луы музон кузёосты. Оло, соос уг но ужало ни?.. М. Корепанова, Ижысь Труд урамын улӥсь. Кенешо вузан-басьтонъя Ижысь механической завод 12 ар ӵоже ни кизер сиён-юонэз полиэтилен пакетъёсы бинянъя тӥрлык дася. Кутскизы йӧлэз кисьтон М6 - ОРЗ - Е автомат бордысен. Берло аръёсы конструкторъёс, азьлозэ выльдыса-кужмоятыса, выль модель поттӥзы - АО - 111. Туэ предприятиын ужасьёс порошок выллем но мукет пумо сиён-юонэз полимер плёнкае лэзьянъя автомат кылдытӥзы. Предприятилэн продукциез кельшиз картофка будэтӥсьёслэн кылем толэзе Ижын ортчем конференциязы ветлэмъёслы но. Заводлэн продукциеныз соос кемаласьгес тодмо ни. Сиён тырон-лэзьян автоматъёсты ас удысазы уно аръёс ӵоже куто. Соин ик предприятилэн выль вузэз туж тунсыко йӧтӥз. Али заводысь специалистъёс автоматъёсты басьтыны мылкыд карисьёсын огкыл гожто. А. Лаптев. Ю-нянез утялтон 14-тӥ августлы Районъёс Кутсамын (га) Удалтонлыкез (ц) Вузамын (процент) Етӥн утялтэмын (процент) Ӟег киземын (процент) 1. Алнаш 36,2 19 30,9 44,8 11,3 2. Грахово 32,6 15,6 24,3 - 7,7 3. Кез 32,2 11,0 19,7 42,9 51,2 4. Вавож 31,8 18,5 27,1 - 1,4 5. Можга 31,1 16,0 39,1 18,1 3,3 6. Каракулино 29,6 16,3 - - 6,5 7. Як.-Бодья 27,1 14,2 4,6 87,0 5,7 8. Пичи Пурга 25,4 16,9 3,4 - 4,9 9. Юкаменск 25,3 10,6 13,4 36,0 33,1 10. Сюмси 24,8 7,5 1,3 - 2,0 11. Балезино 24,7 10,9 7,5 12,9 33,1 12. Кизнер 24,3 11,0 5,3 20,0 7,1 13. Шаркан 24,2 14,1 5,1 23,3 16,6 14. Дэбес 23,6 10,3 2,5 1,7 39,5 15. Камбарка 23,0 8,7 - - 6,5 16. Сарапул 22,9 16,4 2,4 - 13,6 17. Глазов 22,5 13,6 20,0 26,3 35,4 18. Игра 21,3 13,3 - 40,5 21,4 19. Ува 19,0 13,6 3,8 38,1 8,0 20. Селта 18,8 10,4 - 5,8 13,8 21. Воткинск 18,6 16,5 - - 6,5 22. Красногорск 18,5 9,9 - - 24,6 23. Яр 17,9 11,9 6,1 2,8 23,0 24. Завьялово 16,9 17,1 5,3 - 6,1 25. Киясово 14,0 12,8 4,6 - 11,4 Республикая 24,4 14,4 8,4 24,0 16,3 Кылем арын 13,8 12,8 - 8,9 8,1 Миым арен та вакытэн ӵошатыса, ю-нянь октон-калтон сокем урод уг мыны. Озьы ке но, акыльтымон усись зоръёс сюлэмез сэректыто. Тросэтӥ юос пограмын, сое араны секыт луоз. Август шорозь ужъёссэс ӟечгес радъяны быгатӥзы Алнаш, Грахово, Кез, Вавож, Можга районъёс. Арня куспын шӧдскымон ӝегазы но уллане васькизы Завьялово но Кияса ёросъёсысь хозяйствоос. Республикая оглом вераса, соос кылизы берпуметӥ интые. Тысё культураослэн удалтонлыксы кык центнерлы мималалэсь вылӥынгес. Шумпотто алнашъёс. Соос гектарезлы быдэ 19 центнер кутсало, ӝыны центнерлы гинэ ӧжытгес � вавожъёс. Самой урод юослэн удалтонлыксы Сюмси палан. Та нуналъёсы отын 7,5 центнер гинэ басьто. Етӥнэз утялтонъя котькинлэсь чупрес ужа Якшур-Бодья. Ӟег кизёнэн югдур умойгес Кезын. Отын ӝыныез бусыос кидысэн согемын ни. Туж ӝегало Вавож, Можга, Сюмси, Пичи Пурга районъёс. Л.ДМИТРИЕВА. Азбарысь пиос Кылем шутэтскон нуналъёсы Ижысь футболъя школалэн стадионаз кужымзэс мертазы 500-лэсь уно нылпиос. Ӵошатсконъёсы пыриськиз 80 команда. Арлыдзыя куинь группалы люкиськыса, азбар командаосысь пиос ог-огзы азьын тупен ужаны быгатэмзэс возьматӥзы. Финалэ 12 команда шедиз. Матысь дыре соос ваче шудозы на. Ӵошатсконъёсы пыриськем вань футболистъёслы синпель кузьымъёс сётэмын. М. Кузьмин. Азьпала пусъёно сюресъёс Кун Кенешлэн Тӧроез Александр Волков кивалтэм улсын Удмуртиез кема дырлы азинтон программа кутыны чаклаське. Со понна Ижевскын кылдытэмын ужась группа, нош ёросъёсын � штабъёс. Соос доры али пӧртэм дэмланъёс, куронъёс вуыло ни Удмуртиын улӥсьёслэсь. Ваньмыз со эскеремын, огазеямын луоз но лыдэ басьтӥськоз, программая пӧртэм удысъёсты азинтонэз эскерыку. Та программалэн котькуд ёзэз пыр-поч малпамын луиз ке, сое лыдӟыса ик тодыны луоз ни, кылсярысь, кыӵе райцентрын кыӵе дырлы выль школа пуктозы, ку ужаны кутскоз нылпиослы йӧллэсь сиёнъёсын кухня. Республикамылэн парламентысьтыз депутатъёс, Удмуртилэсь выль бюджетсэ кутыкузы, озьы ик син азязы пуктыны мед быгатозы, кыӵе социальной программаосы "ӧръяськыны" кулэ уксё, кыӵе удысъёсты нырысь ик азинтоно. "Удмуртиез азинтон" программа ас пӧлаз кутыны кулэ элькунысьтымы устооссэ социально-экономической проектъёсыз, шуом, таӵеоссэ: "Етӥн", "Улон инты", "Анай луон но пинал дыр", озьы ик Россия Федерациын кутэмъёссэ. Александр Волковлэн верамезъя, азьпалан куинь ар куспын республикаямы вуттэмын луоз 140 юрт: школаос, больницаос, культурая, спортъя комплексъёс. Туэ 50 процентлы будӥз сюрес лэсьтонлэн ӝоглыкез, сезон бырытозь, 120 иськем сюрес лэсьтэмын луоз на. Та нуналлы Юрий Маслюков, Александр Волков но Александр Соловьев ("Удмуртавтодор") федеральной центрысь курыны быгатӥзы Ижевск котыртӥ сюрес лэсьтыны уксё. "Удмуртиез азинтон" программаез дасян йылпумъяськыны кулэ 2001-тӥ арозь, нош солэн валтӥсь ёзъёсыз � Удмуртилэн кунлыкезлы 80 ар тырмытозь. Т.АЛЕКСАНДРОВА. ЖУРНАЛИСТЪЁСЫН ПУМИСЬКОНЪЁС Кин уксё тыре висись понна? Юнме шорысь таӵе юан ӧй пукты. Калыкез эмъян пумен уродме но дуноя. Малы? Кун та ужлэсь каллен-каллен палэнске ни. Тани быдэс Россиын сямен ик Удмуртиын но кылдытэмын медицинаын страхованиея фонд. Солэн быдэсъясь директорез Валентина Златкис журналистъёслы мадиз ужамез сярысь. Фондлэн сизьым ёзэз: городъёсын, Ува но Игра посёлокъёсын. Котькудӥз борды вить район юнматэмын. Фондлэн одӥг ужпумез � медициная страхование сярысь Зконэз быдэсъян. Али шаерысьтымы 1630 сюрс улӥсь пӧлысь 1577 сюрсэз страховать каремын, со пӧлысь 1242 сюрсэзлы полис сётэмын. Отчы шедьымтэ ужасьтэм калык (нылпиос, дышетскисьёс, ужтэк кылемъёс но пенсионеръёс). Ижын гинэ таӵе адями 337 сюрс лыдъяське. Али соосты городысь администрация страховать каре ни. Котькыӵе ваньбурен уж сётӥсьёс (кун предприятиос, гурт хозяйствоос, фермеръёс, огазеяськонъёс) уждун фондысьтызы 3,6 процент уксё тыро страхованиея фондэ. Со ужасьлэн кисыысьтыз уг кошкы, нош ачиз ужась уждунысьтыз 1 процентсэ висъя. Республикаямы медициная тямыс страховой компания кылдытэмын � "Кредо", "Удмуртия", "Стелла", "Спасские ворота" но мукет). Фонд взносъёс но люка. 1994-тӥ арын 30,6 миллион манет ке уксё октэмын вал, миым со лыдпус 320 миллион луиз, яке дас поллэсь ятыр. Фондлэн коньдонэз кун бюджетэ пыре. Фондлы тыронъёс трос люкаськемын. Соосты быдтӥзы ни Ижысь радиозавод, Механикая завод, ЧМЗ (Глазов), "Воткинский завод", "Купол" (ЭМЗ) но Сарапулысь электрогенераторной завод. Нош "Ижмашлэн" туэ 1 январьлы 26 миллион манет тыронэз вал. Озьы ик уно гинэ Горький чугун сюреслэн Иж ёзэзлэн, 18 номеро лэсьтӥськон управленилэн но музонэзлэн. Кытчы бен кошке бичам коньдон? Бадӟым люкетэз � адямиослы эмъяськыны юрттэт сётонлы (висисьёсты йӧнатыныны, сюдыны, поликлиникаосын кутыны, небыт мебелез выльдыны но мукет). Кызьы мынэ республикаямы страхования уксё бичан? Пӧртэм. Кизнер районын ужасьлы быдэ 117 манет октэмын, Ижын � 416, нош Глазов городын � 625 манет. Г.Романов. Журналистъёсын пумиськонъёс Коммунистъёс ас кылзэс веразы Та нуналъёсы журналистъёсын пумиськылӥз Россия Федерациысь Кун Думалэн депутатэз, КПРФ-лэн Удмурт рескомезлэн нырысетӥ секретарез Н. И. Сапожников. Со вакчияк тодматӥз Россиысь парламентлэн Законъёс бордын ужаменыз. Николай Иваночич умоен пусйиз выт октонъя выль Кодексэз: вытъёслэн лыдзы шӧдскымон кулэстэмын. Озьы ик коммунистъёслэн фракцизы огкылысь луэмзэ вераз Федеральной кенешлэсь ужзэ мукет сяменгес радъян пумысен, трос воштонъёс пыртэмын но быдэсак сямен выльдэмын "Административной нарушениос сярысь" Кодексэ. Кызьы учке Кун Дума В. В. Путинлэн кивалтоно амалъёсыз шоры? - 100 нунал ӵоже ужатозяз, Президент ӧжыт ӧз лэсьты, - шуиз Николай Иванович. - Россиын улӥсьёс пӧлысь 65 процентэз солы дурбасьто бере, озьыен, калыклы со яра. Мон пусйысал котьма борды дӥсьтыса кутскемзэ, "вунэм" странаосын кусып тупатэмзэ: котькытчы вутскемзэ. Умоен лыдъясько ПРО-2 программаез но. Маиз уг кельшы? Чечняын кема дыр ӵоже кыстӥськись вир кисьтон, терроризм, соин сэрен янгыштэм адямиослэн юнме шорысь быремзы. Ку уйёсмес гань-гань кӧлыны быгатом? Кун Думаысь коммунистъёс озьы ке соглаш луо В. В. Путинлэн вакчи дыр куспын кивалтон ёзъёсты вылӥысен улӥозь юнматон сярысь верам__еныз. Озьытэк югдурез уд тупаты. Журналистъёсын пумиськонэ пыриськиз Удмурт Республикаысь Кун Кенешлэн депутатэз Вячеслав Николаевич Ануфриев но. Н. И. Сапожников прессаын ужасьёсты тодматӥз республикаысьтымы коммунистъёслэн президентэ кандидатэнызы: - Та вакытэ Вячеслав Николаевич кивалтэ "Удмуртпродконтракт" управлениен. Партилэн радъёсаз 1967-тӥ арысен. Ассэ котыр ласянь умоен возьматӥз. Удмуртиысь коммунистъёс оско, солэсь ӟеч президент пӧрмоз шуыса. Таин валче журналистъёс юан сётӥзы Ю. Д. Маслюков пумысен. Малы со соглаш ӧз луы та нюръяськонэ пыриськыны? - Юрий Дмитриевич сётэм ӵектонлы тау каремзэ вераны куриз, но - солэн али но нуоно удысэз бадӟым. Удмуртилы юрттэт отысь но ӧжыт уг вуы, уката но промышленность ӝутонъя. - Николай Иванович, тӥляд но нимды пыртэмын вал кандидатъёс радэ... - Мон алӥськи, малы ке шуоно, вазь-а, бер-а - но президентъёсын шудонлы пум понэмын луоз. 10 ар ӵоже мон ог 100 пол вералляй ни, странаын одӥг президент луыны кулэ шуыса. Сотэк быдэс Россия Чечнялы пӧрмоз. - Кызьы тӥ учкиськоды "25 процент" шоры? Удмуртилы президент одӥг кутскемен быръём-а? - Со интые пуксьыны мылкыд карисез туж трос. Президент быръёнэ калык но мыло- кыдо пыриськоз, али вераны луэ ни, бырйисьёс пӧлысь ӝыныезлэсь ятырез одно ик куаразэ сётоз. Ми ӵектӥм юнматыны 50 процент, но Кун Кенеш законэз ас палаз берыктӥз. Валамон, одӥг п кутскемен быръёнъёс уз ортче. Л. Медведева. Вормиз нодлыкоез Ижын улӥсьёслэн яратоно шутэтскон интыязы, А. М. Горький нимо Гужем садын, алигес вал усто шулдыръяськон - Ижысь хладокомбинат вить аръем юбилееныз валче радъяз туж ческыт сиёнэз, мороженоез, яратӥсьёслэсь праздниксэс. Люкаськемъёсты пумитаса вераськиз хладокомбинатлэн директорезлэн воштӥсез светлана Валентиновна Сареева. Со ик усьтӥз праздникез но. калыкез шумпоттӥзы эктонъя "Розовый слон" калык ансамбль", эктонъя "Вдохновение" ансамбль. Вис дыръя шулдыртылӥзы клоунъёс. Собере вал пӧртэм ӵошатсконъёс. Котькудаз мылысь-кыдысь пыриськылӥзы кызьы ке арлыдоос, озьы ик пиналъёс. Тужгес аспӧртэмлыко вал ӝог ческытаськыны быгатӥсьёслэн ӵошатсконазы. Вал серемес шудонъёс но. Ваньмызлэсь зол висъяськизы "Купол" заводын ужась Александр Плетнев. Вормемез понна басьтӥз со комбинатын пыжем торт. Таин валче туж бадӟым шумпотон ваиз атаез сярысь юн сюлмаськись Кирилл пиезлы Владимир Беломорскихлэн гожтэмез но туспуктэмъёсыз. 2001-ТӤ АРЛЫ ГОЖТӤСЬКОН "Кенеш" уз шонаськы "Молотлэн" (али "Кенеш") журналлэн редакторез луыса дас ар пала ужам писатель Трофим Архипович Архипов ас вакытаз шуылоз вал: "Та журнал удмурт калыклэн "Октябрез" но, "Крокодилэз" но, "Новый мирез" но, "Пионерез" но, "Юностез" но, "Огонёкез" но, "Мурзилкаез" но. Али ни асьмелэн вань пиналъёслы "Кизили", егитъёслы "Инвожо", дышетӥсьёслы "Вордскем кыл" нимысьтыз журналъёсмы. Ваньзы соос азязы сылӥсь ужпумъёсты ас быгатэмзыя быдэсъяны тыршо, уногес лыдӟисьёсты котыразы огазеяны сюлмасько. Покчи пиналъёс "Кизили" журналэз киязы куто но анай кылмес тодонын, валанын нырысетӥ вамышъёс лэсьто. Егитъёсызгес лыдӟисьёс "Инвожо" котыре бинисько но отысь утчало ас сюлмаськонъёссылы матын гожтэмъёсты. "Вордскем кыл" журнал но эшъёссэ шедьтэ: дышетӥсьёс угось сое пӧрмытӥзы ни кивоштӥсьёсмес котыр ласянь ӟеч будэтон пумысен куспазы кенешон интылы. "Кенешлэн" сюлмаськонъёсыз та выль журналъёс кылдэм бере ӧз но кулэсме, ӧз но лазегоме. Пиналъёслы но, егитъёслы но, арлыдоослы но, туж мӧйыосызлы но нылкышноослы но, воргоронъёслы но кельшымон ужъёс журналамы потылӥзы но, потылозы но. Ми табере тросэнгес печатланы быгатӥськомы туала чеберлыко удмурт литератураысь ӵыжак выльёссэ, устооссэ, синмаськымонъёссэ произведениосты: романъёсты, повестьёсты, веросъёсты, выжыкылъёсты, поэмаосты, кылбуръёсты. Тани туэ но калык пӧлы азьвыл вӧлмымтэ трос выль ужъёс журналмы пыр лыдӟисьёс доры вуизы ни. Соослы ярам писательлэн Кирилл Ломагинлэн "Вир" повестез. Та выль ужен номеръёсмес семьяен-семьяен лыдӟылӥллям, бӧрысь ни огинэ люкаськылӥллям но повесть пумысен малпанъёссэс ог-огзылы вераллям. Со сярысь "Удмурт дунне" газет но гожъяз ни, редакциямы но данак гожтэтъёс вуылӥзы. Нош Удмуртиысь калык писательлэн Генрих Перевощиковлэн "Шелеп" выль повестез ваньмызлэсь сямен лыдӟисьёсмылэсь сюлэмъёссэс бугыртоз. Бомжъёс радэ лэзиськем писательлэн шуг-секытъёсты чидамез сярысь произведение та толэзьёсы потэ. Лыдӟисьёсмы туэ ик тодматскозы на Галина Романовалэн, Николай Никифоровлэн повестьёсынызы, Константин Емельяновлэн, Виталий Агбаевлэн, Михаил Ивановлэн, Римма Игнатьевалэн веросъёсынызы. Поэзиез яратӥсьёсты но ум вунэтӥське. Данак выль поэмаос, кылбур сузьетъёс "Кенеш" пыр калыке вуозы. Нош таиз ни куд-огзэ паймытоз но, вылды: туэлы берпуметӥ номерын печатламын луоз удмурт калыклэн эпосэз. Озьы луиз: историк но тодосчи М.Г.Худяков "Удмурт батыръёс сярысь кырӟан" эпосэз ӟуч кылын гожтӥз. Кылтодосъя доктор, кылбурчи Василий Ванюшев та бадӟым ужез удмурт кылэ берыктон борды басьтӥськиз. "Кенешен" эшъяськисьёс удмурт эпосэз киязы котькинлэсь азьло кутыны быгатозы. Ми оскыса вераны быгатӥськом: журналмылы гожтӥськисьёс, лыдӟиськыны яратэм сяна, кырӟаны, эктыны, мадьыны-вераны но дыр шедьто. Солы паймыны уг яра. Берло аръёсы гинэ ми куатьсэ номермес удмурт кырӟанъёслы сӥзим. Нош туэ потэмез, милям малпаммыя, нимысьтыз верамон, пусйымон пӧрмиз кадь. "Жингырты, даур кырӟан!" шуыса нимаське со. Россиысь но дунне вылысь калыкъёслы удмуртъёс асьсэ кырӟанъёсынызы ХХ даурын умой-умой тодмо луизы. Ӵапак соос пӧлысь тужгес устоосыз, жингресъёсыз но шулдыръёсыз та бадӟым ужамы пыризы. Соослэн та синмаськымон данзы вуоно даурын но медаз кулэсмы. ХХ дауре азвесь гырлыос кадь жингыртыса, шулдыртыса улэм кылбуро крезьгуръёс удмурт калыкмес азьланьын но мед шумпоттозы. Та кулэ ужмес ми вуоно даурын но азинтом. "Кенешлэн" котькуд номераз ӵыжак выль кырӟан потоз. Журналмылы туэлы гожтӥськытэк кылем муртъёс та нуналъёсы сайкаллям, лэся. Малы ми озьы вераськом? Асьтэос чаклалэ: Удмуртиысь но, Татариысь но, Башкириысь но, мукет шаеръёсысь но уно гожтэтъёс вуылыны кусткизы, ваньзы ик куро "Жингырты, даур кырӟан!" номермес. Тани Татарстанысь Чабья черкогуртын улӥсь Любовь Петровна Кунаева шуэм: "Гожтӥсько тӥледлы одӥг куронэн: лэзьыны уд быгатэ меда удмурт кырӟанъёсын кык журналдэс?" "Кенешлы" гожтӥськем муртъёс "Жингырты, даур кырӟан!" бичетэз огшоры номер чотын басьтӥзы ни. Соин ик туэ милемын кусып возьымтэ адямиослы та номерез шедьтон дуногес усёз � 15 манет тыроно луозы. Почта пыр кыкен-куинен ысъян ми понна но капчи уж ӧвӧл. Ойдолэ тазьы лэсьтом: кырӟан номерез басьтыны мылкыд карись адямиос (гуртысьтыды яке ёросысьтыды), коньдондэс одӥг кие люкалэ но со муртэ дорамы келялэ. Та ужез ик студентъёс но быдэстыны быгатысалзы. Дыртэлэ! "Жингырты, даур кырӟан!" бичетъёсмы сокем трос кылемын ӧвӧл ни. Нимысьтыз чаклам номеръёс сярысь верано ке, та ужамы кӧня ке воштӥськонъёс луозы. Тани пӧлысьтымы уноез уг тодо ни удмурт сямъёсты но йылолъёсты. Вунэтӥмы ук. Озьы ӧвӧл шат? Нош удмуртъёслэн сямъёссэс, йылолъёссэс ортчытонъя нимысьтыз календарьзы но вылэм. Котькуд йылоллэн ас дырыз, ас эсэпез вал, пе. Тужгес но тодмозэ, матынзэ басьтом. Тани удмурт сюан шуиськом, нош сое ӵемысь мукет калыкъёслэн сямъёсынызы малы ке но сураськом-пожаськом ни. Та вуоно номерысьтымы тодосчилэсь асьме сюан сярысь мадёнзэ но лыдӟыны, сое ортчытон сценариен но тодматскыны быгатоды. Луозы на эшшо но эшшо мукет сямъёслы, йылолъёслы сӥзем ужъёс � тодосчиослэн веранъёссы, ӧнерчиослэн сценарийёссы. Сыӵе номерен тодматскыны мылкыдды бурдъяськиз-а? Озьы ке, ӝоггес почтае дыртэлэ но "Кенешлы" гожтӥськелэ. Туала мертэтъёсъя чаклано ке, журналмес басьтон сокем дуно уз усьы. Удмурт Элькунамы улӥсьёс, почта пыр басьтон понна, 65 манет но 40 коньы тыроно луозы. Вань на мукетыз амал � редакция пыр гожтӥськон. Шаркан, Пичи Пурга, Ува, Якшур- Бодья, Можга ёросъёсын улӥсьёс пырак редакциын ик коньдон тыро но журналмес толэзьлы быдэ асьсэос басьтыло. Соос вуоно ар понна 43 манет но 20 коньы гинэ тыроно луозы. Ӟеч-ӟеч чаклано ке, журнал газет ӧвӧл ук. Сое киысь кие сётылыны но лыдӟылыны луэ. Шуом, бускельёсыныды, ӵыжы-выжыосыныды кенешиськоды но та удмурт журналлы шори вылэ тыриськыса гожтӥськиськоды. Таӵе амал уката дунтэмгес усёз. Вуоно даурлэн кутсконаз "Кенеш" 75 ар тырмон юбилейзэ пусъёз. 1926-тӥ арын тулыспал толэзе удмурт журналлэн нырысетӥ номерез потӥз. Удмурт журнал дуннеысь удмуртъёслы чакламын. Милемды чылкак паймытэ берло аръёсы кылдэм куд-ог журналъёслэн отчы-татчы шонаськемзы. Тани "Инвожоын" ужасьёс егитъёслы чаклам изданизэс ӟуч- удмурт карыны малпало. Сыӵе мылкыдъёссэс шараяса, ӟуч кылын юалляськон но поттӥзы (сое 5-тӥ, 6-тӥ номеразы чуртналлям). Соин тодматскыса, милям таӵе юанмы кылдӥз: ӟуч кылын потӥсь журналъёс но газетъёс кулэсмыны кутскиллям ни шат? Оло, ми улонлэсь берегес кылим но ваньзэ ӧм шӧдэлэ? Ойдолэ бен "Информпечатьлэн" кудаз ке киосказ кожалом. Ӝажыоссы тӥяськымон-чигиськымон уно ӟуч журналъёс но газетъёс кыллё ук, нош удмуртъёсыз чиньыен лыдъямон гинэ. Удмурт егитъёслэсь малпанъёссэс но гожтэмъёссэс одно ик ӟуч кылын поттыны кулэ-а? Кулэ, вылды. Но со понна Удмуртиын потӥсь "Луч" журнал вань ук. Удмурт журналэз вольыт но чебер удмурт кылын поттоно. Тӥни ма сярысь сюлмаськоно "Инвожолы". Нош али озьы вераны ым уг усьтӥськы на. Тани соос котькуд номеразы журналзы пумысен гожто: "Егитъёслы мерлыкъя но политикая, чеберлыко литературая суредъёсын но туспуктэмъёсын журнал". Шонер-а со? Чеберлыко литературая суредъёсты адӟиськом ик кадь. Но быдэс журнал суредъёсын гинэ тырмытэмын ӧвӧл ук. Умойгес луысал тазьы гожтыны: "Егитъёслы суредъёсын но туспуктэмъёсын, мерлыкъя но политикая, чеберлыко литературая журнал". Табере учком, кин дася журналэз. Тӧро, пе. Нош тӧро � со председатель яке директор ук. Пинал муртъёсты асьмеос лыдъяськомы кивоштӥсьёсынымы. Нош редакторлэн заместителез � со воштӥсь, редактор ужамтэ дыръя, сое воштыны быгатӥсь мурт. Ум вералэ ни согласование сярысь � кылъёслэн радъяськемзы пумысь. Тани 1-тӥ, 2-тӥ номерлэн 3-тӥ бамысьтызы лыдӟиськом: "Байлыко кунъёслэн одӥгез тодметэз таӵе..." 72-тӥ бамысьтыз: "Завьял ёросысь калык творчествоя центрысь ёзэзлэн элькун фестивальёслэн лауреатэз..." Та номерын ик чысны-пыснылэсь туспуктэмзэ возьматӥллям но гожтӥллям: "Чысны-пысны". Сыӵе гожтэтъёсты туж трос вераны луысал. Шуэм потэ: удмурт сямен вольытгес но валасагес гожъяськоно. Алигес ивортӥзы, ӟуч гожъяськисьёслэсь ӟуч кылын детективъёссэс поттыны чаклало шуыса. Нош со детективъёс (ӟуч кылын ик) нимысьтыз книгаосын печатламын ни. Со книгаосты басьтыны капчигес луысал, дыр, ук. Реклама понна, коньдон кыскон вылысь шуоно ке, ӧйтӧд, сыӵе ужан амаллэн пайдаез луоз меда? Учком ни, кыӵе адямиослэсь но макем пайдаё материалъёссэс "Инвожо" журнал печатлалоз. Нош ми юн мылкыдын вераськом: "Кенеш" уз шонаськы, удмуртъёслы чаклам журнал удмурт кылын ик потоз, удмуртъёслэн сюлмаськонъёссы, мылкыдъёссы но малпанъёссы сярысь яркытгес но валамонгес гожъяны тыршоз. Со понна кылдытэмын но поттӥське ук 75 ар тырмонэзлы дасяськись "Кенеш" журнал. Петр КУЛИКОВ, "Кенеш" журналлэн валтӥсь редакторез. Кышкытлыкез дыраз алоно Александр Волковлэн кивалтэмез улсын ортчиз Калыкез кышкытлыклэсь утёнъя кенешлэн ужрадэз. Отын вераськон мынӥз калыкез терроризмлэсь, мукет кышкыт учыръёслэсь утён но тужгес кулэ луись объектъёсты эскерыса сак возён пумысен. "Вихрь-антитеррор" ужрадлэн кызьы мынэмез сярысь ивортӥзы югдурез утёнъя министрлэн нырысетӥ воштӥсез Михаил Воробьев, граждан оборона ужпумъёсъя но кышкыт учыръёсъя комитетлэн тӧроез Тамази Габричидзе, Россия Федерациысь ФСБ-лэн Удмурт Республикая управлениезлэн кивалтӥсез, кышкытлыклэсь утиськонъя министр Николай Арзамасцев, Правительстволэн Тӧроез Николай Ганза, Приволжье округлэн Удмурт Республикая валтӥсь федеральной инспекторез Сергей Чикуров. Кенешез йылпумъяса, Александр Волков куриз калыкез кышкытлыклэсь утёнъя ӝегатскытэк ужрадъёс кутыны. Уго МВД-лэн но МЧС-лэн ужазы со трос тырмымтэосты пусйиз. Матысь дыре вылӥ верам ужпумъя ик вераськон мыноз бадӟым предприятиосысь но организациосысь оперативной штабъёслэн кивалтӥсьёсынызы. Сыӵе ик кенешъёс ортчозы республикаысьтымы ёросъёсын но. Удмурт Республикаысь Кун Кенешлэн пресс-службез. ГУЖЕМ-2000 Нюлэс куш люказ нылпиосты Толон пумитай кемалась тодмоме. Соиз-таиз сярысь вераськон выжиз нылпиос пумысен кенешонэ. Июле пие "Дзержинеце" ветлӥз, кылем толэзе анаеныз санаторийын шутэтскиз, табере тани "Орлёноке" кошкиз, данъяськон мылкыдзэ ватытэк маде юлтоше. Ма бен, шумпотымон. Но данакез нылпиос лагерез адӟыны уг быгато. Мугез ӵем дыръя коньдон ӧвӧлэн герӟаськемын. Куд-ог предприятиос, организациос ужасьёссылы страхованиея фонд пыр но мукет амалъёсты уже кутыса юрттыны выро ик, но путёвка дунлэсь 10-15 процентсэ но тырыны котькуд семьяын луонлык уг шедьы. Тае лыдэ басьтыса, Россия Федерациысь Кун Думалэн депутатэз Светлана Смирнова ӵектӥз одӥгаз лагерьын нимысьтыз смена радъяны. Со вазиськиз Удмуртиысь бадӟым заводъёслэн, фирмаослэн кивалтӥсьёссылы, Москваысь но мукет интыосысь ужбергатӥсьёслы, пиналъёслэсь шутэтсконзэс радъяны тырмымон коньдон висъяны курыса. Таосыз кичӧлтонэз умоен лыдъязы. Котькуд ёрослы 5-10 путёвка висъязы. Депутатлэн интыосысь юрттӥсьёсыз администрациен ӵош шедьтӥзы тужгес но начар улӥсь семьяосысь нылпиосты. Соос азе одӥг гинэ курон пуктэмын вал � пиналъёс дышетскыны бере кылисьёс пӧлын луыны кулэ ӧвӧл. Озьы кылем арняе Якшур-Бодьяе нуись тракт доры интыяськем "Лесная страна" лагере 240 нылъёс но пиос вуизы. Пӧртэм арлыдоесь соос. Кин туэ кыкетӥ классэ гинэ мыноз ай, кин бадӟымаз ветлэ ни. Субботае лагерьын ортчиз сменаез сӥё-дано усьтон. Вожатойёс нылпиослы шулдыр праздник дасяллям. Ма, соосыз асьсэос но быгатэмзэс возьматӥзы ни. Куд-огез кырӟаз, мукетъёсыз эктӥзы, кылбур лыдӟизы. Нылпиосты ӟечкыласа вераськиз Светлана Смирновалэн юрттӥсез Геннадий Климентов. Ми куд-ог пиналъёслы юанэн вазиським: мар тӥледлы тужгес но кельше татын? Тодӥськоды-а, ма шуизы соос? Лагерьын туж ӟеч сюдо, пе. Тӥни озьы. Воспитательёслэн верамзыя, нырысь нуналъёсаз покчиос чылкак паймиллям. Кызьы озьы, шуо, нуналлы вить пол сиськыны луэ? Та но возьматэ ук нылпиослэсь ёрмыса улэмзэс. Ватсаса вералом на. Дунтэк шутэтсконэз радъяны туж юрттӥз "Доброе дело" благотворительной фонд (кивалтӥсез � Кун Кенешлэн депутатэз Алексей Чуршин). Смена ужалоз 24-тӥ августозь. Та дыр ӵоже нюлэс куше интыяськем лагере вуэмъёс пӧртэм-пӧртэм ужрадъёсы пыриськозы. Соосты нуллозы Ижысь дано интыосы но. Озьы ик чакламын визьмо адямиосын пумиськонъёс. Али ик вераны луэ ни: вань нылпиос понна лагерьын шутэтскон вунонтэм луоз. И.Лебедев. ? Сменаез усьтон дыръя. ? Депутатлэн юрттӥсез Геннадий Климентов, фондлэн быдэсъясь директорез Виктор Янцен но лагерьлэн кивалтӥсез Галина Валова кенешо шутэтскон программа пумысен. Фотоосыз авторлэн. Россиысь геологилы - 300 ар Мон вадьсын - ӵушкась шунды, тон вадьсын - юг-юг лымы Геолог шуо ке, син азе пуксе интыяз пукыны чидасьтэм, тыбыраз бадӟым котомкаен, кияз киркаен яке бодыен гурезьёстӥ, тайгаетӥ калгись адями. Мылкыдыз ялан лопыръяське, тодмотэм интыосы ӧте, музъем пушкысь ватосъёсты утча, огкылын вераса, романтик. Тӥни кинъёс киын инкуазьмылэн зарниен-азвесен тырмытэм шыкысъёсыз, чагыр эстӥськонэн, му вӧен пачылам сӥосыз. Ортчемзэ тодэ вайыса Тодӥськоды-а кин усьтӥз геологилы сюрес? Петр И. Солэн Указэныз 300 ар талэсь азьло август толэзе Россиын нырысьсэ кылдӥз горно-геологической служба. Эксэй косэмъя, выль ужлы дышетыны шуыса, Саксоние нимысьтыз быръем визьмо воргоронъёс келямын вал. Усьтӥсько выль заводъёс, кылдо рудникъёс. Казнаысь коньдон кошке музъем узырлыкъёсты поттонэ. Туж чурыт куронъёс пуктэмын соосты шараясьёс азе: государстволэсь секретъёссэ ваньмызлы тодыны уг яра. Со сярысь верамын Горной манифестын. Та документъя лэсьтӥськон ужъёсты нуыны лэземын Сибирьын, Тобольск, Иркутск но Енисей котырын музъем узырлыкез поттӥсьёс но страна пушкын сое вузасьёс 10 арлы казнае налог тыронлэсь мозмытско. Озьы ик документын пусъемын, промышленникъёслэн-предпринимательёслэн рудникъёссы но заводъёссы нылпиоссылы кылёзы шуыса. Музъем понна дун тырозы, огкыл вылэ пыкиськыса. Таиз решение туннэ но Сибирьын, Дальний Востокын, Северын интыен-интыен ӧз воштӥськы на. Петр И ужзэ азинтӥз императрица Анна Иоановна. 1739-тӥ арын гожтэм манифестаз, азьвыл кутэм законъёсты утьыса, со пӧртэм льготаос сётэ на. Кылсярысь, кулэстэ музъем понна тыроно вытлэсь быдӟалазэ, луонлык сётэ ссуда висъяны, руда поттонэз эшшо но паськытатыны, вытъёслэсь 3-4 арлы мозмытыны. Со вакытэз Россилэн туннэ нуналэныз ӵошатоно ке, отысь вань мае адӟем карыны. Соку но вераськонъёс мыно вал ини горной предприятиосты огъя приватизация улэ кыскон яке быдэсак государство кие сётон сярысь. Екатерина ИИ кивалтон аръёсы музъем узырлыклы кузё юнматъязы ассэ музъем возисез, Павел И кивалтон дыръя берыктӥзы государстволы, нош Николай И геологиез но горной ужез быдэсак выжтӥз военной ведомствое. Котькызьы ке но, горно-геологической служба азинскиз. Солэн уженыз кивалтӥз Берг-коллегия, туала сямен вераса, геологияя, горной ужъёсъя но металлургияя министерство. Та удыс тужгес но ӝог пыд вылаз султӥз но юнмаз, выт тыронъя политикаез визьмо радъямен сэрен. Государство юрттэмен, ужбергатӥсьёс вакчи дыр куспын Ураллэсь но Сибирьлэсь ватосъёссэ экономикае кыткиз. Со герӟаськемын Удмуртилэн но будон сюресэныз. 1760-тӥ арын Елизавета Петровна Иж заводэз усьтон сярысь Указ гожтэ, со ик луэ Ижевск городлэн вордсконэз. Промышленность азинскемен, пумен паськыта интыысь инкуазь узырлыкез уже кутон. Кылдо ыргон ӵыжатонъя, корт кисьтонъя цехъёс. Эстӥськон интые мынӥз нюлэс. Кӧня сюрс гектар со корамын вал! ЪЪ даурын, промышленность дыртыса но туж ӝог азинскемен, гуртын улӥсь калык городэ улыны кошке. Нимысьтыз висъясько Быдӟым Отечественной война бере аръёс. 1945-тӥ арын, Иж шур котырысь му вӧез утчан понна, СССР-ысь Обороная кун комитетлэн распоряжениеныз но УАССР-ысь СНК-лэн постановлениеныз кылдытӥське геологияя предприятие (туала "Удмуртгеология" АО. Та арын ик август толэзе нырысетӥ скважина портэмын вал ни Алнаш районысь Голюшурма гуртын. Со кутскон сётӥз Удмуртиысь геология удыслы. Нош 10 ар ортчыса шедьтэмын нырысетӥез му вӧй кыскон инты - Вятка месторождение. Республикалэн улоназ бадӟым воштӥськон пыртӥз геофизикая экспедиция кылдытон. Со вал 1958-тӥ арын, кивалтӥз Москваысь "Геофизнефтеразведка" трест. Туннэ со "Удмуртгеофизика" ОАО. "Сьӧд зарни" - Удмуртилэн валтӥсь узырлыкез Му вӧй кыскон шаерамы кутскиз 1968-тӥ арын, Архангельской месторождение бордысен. Дас кык толэзь куспын гинэ нырысетӥез 100 сюрс тонна нефть поттэмын. Нош та вакытлы шаермыя шедьтэмын 11 месторождение - 179 миллион тонна "сьӧд зарни". Собыдӟа удысэз нуон понна, огез бӧрсьы мукетыз кылдо "Удмуртгеофизика", "Удмуртгеология" но "Удмуртнефть". Ужаны быгатэмзыя Россия Федерациын соос туннэ куинез но устоосыз радэ пыро. Нырысетӥ сюрес лёгисьёс пӧлын - "Удмуртгеофизика" ОАО. Огшоры вераса, валтӥсь разведка. Солы оскемын инкуазен сётэм узырлыкез шараян, сейсмразведкая ужъёсты нуон. Геологъёс киын - ӟеч оборудование, берло куронъёсъя лэсьтэм техника, спутниковой связь. Табере вань эскерон-чакланэз нуыны луэ космос пыр, сомында калыкез гурезьёстӥ, нюръёстӥ, потыны луонтэм нюлэсъёстӥ курадӟытытэк. Топогеодезияя служба ужа американской системая, трос пумо компьютеръёсын юнматэм центрлэн ог люкетэз луыса. "Удмуртгеофизика" ОАО-лэн "контораез" - ин ул. Куазь шоры учкытэк, геологъёс ужало шунаны валаллясьтэм лымы пӧлын но зорез адӟылӥсьтэм степьёсын. Шаермы маин узыр? Музъем эгырен, гыбедэн, изваскаен. Тужгес но бадӟым узырлыкез - му вӧй. Солэн запасъёсыз - ог 900 миллион тонна. Шедьтэмын 104 месторождение, со пӧлысь уже кутэмын 38-эз, 40-эз дасямын. Тужгес но трос му вӧй поттэмын 80-тӥ аръёсы. Ар ӵоже шорлыдын кыским 12 миллион тонна. Кылем арын - 7718 сюрс тонна. Му вӧй поттонэн туэ выре 9 предприятие. Нырысетӥ паларын котькинлэсь трос "сьӧд зарни" кыскиз "Удмуртнефть" ОАО - 2618600 тонна, "Белкамнефть" ОАО - 819600 тонна, "Удмуртторф" ГП - 154100 тонна, "Удмуртгеология" ОАО - 96077 тонна. Ас луонлыксыя озьы ик ужазы "Уральская нефть", "УННК", "УНК", "Чепецк НГДУ" но "Нева-Сайгас". Ваньмыз поттэмын 3820100 тонна. Берло аръёсын ӵошатыса, туэ нырысьсэ улӥе ӧм ваське. Му вӧй сяна, Удмуртиын трос шедьтэмын азот газ - 262 миллиард кубометр. Сое кытын но отын куто ни картофкаез, емышъёсты, бакча сиёнъёсты толйытонэ. Азьланяз таиз но узырлыкмы аслэсьтыз интызэ рынокын одно ик шедьтоз. Матысь дыре... Правительствоен чакламын 2003-тӥ арозь аукционъёс пыр 26 месторожденилы конкурс ортчытыны но соосты ужатыны. Соос пӧлысь ньылез туэ ик аслэсьтыз кузёзэ шедьтыны кулэ. Сенятбрь толэзёзь пумаз-йылаз вуттӥськозы конкурслэн условиосыз, арлэн пумаз ялӥськоз конкурс яке аукцион. Вералом на: Удмуртилэн шунды пуксён но уй пал ёросъёсыз та дырозь умой-умой эскерымтэ на. Кыӵе узырлыкъёсмы отын ватскемын, кыӵе пайда ваёзы соос республикалэн казнаяз - тодмо ӧвӧл. Геологъёс азьын сылӥсь ужпумъёс пӧлысь со валтӥсез луоз. 2-6 октябре Санкт-Петербурге асьсэлэн бадӟым кенешазы люкаськозы быдэс Россиысь музъем узырлык утчасьёс. Отын вераськон мыноз странамылэсь минералъёсын но музон сырьёен запасъёссэ уже кутон сярысь. Удмуртия та ласянь но узыр улосъёс пӧлы пыре. Всероссийской съезд дорозь республикаямы ортчоз юбилейлы сӥзем ужрад. Геологъёслы вань ма сярысь кенешыны но кинэ пусйыны. Л. Медведева. Тани со - шаермылэн валтӥсь узырлыкез. Гырлыос ӧтё улыны Юнме уг шуо: адями улытозяз одӥг ке но писпу мерттыны, корка пуктыны но нылпи будэтыны кулэ. Пичи пургаос та веранэз ӟеч валало-тодо, шӧдске. Со адӟиськиз, Кун Кенешлэн Тӧроез отчы берлозэ ветлыку но. Нюлэсъёс сярысь верано ке, соос татын ӧжыт ӧвӧл. Басьтом кызьпу арама пӧлы выем Яган гуртэз ик. Татчы вуылэм мурт куке вунэтоз на меда тӧл шорын эркиясь "тӧдь апокъёсты". Огезлэн йырсиез пуштресгес мукетызлэсь. Нош кӧня ай соос! Юнме ӧз интыяськы, луоз, татчы лесхозлэн юртэз но. Со ачиз но туж синпӧртмась ӝутэмын уга. Кык этажъем пу корка чылкак выжыкылысь вуэмын кадь. Укно наличникъёсыз ик кыӵеесь солэн! Нош ужало татын ваньмыз 34 адями. Со пӧлысь 20-ез � нюлэсчиос. Таос арлы быдэ ог 150-160 гектар музъем вылэ пичи вож кызъёс но пужымъёс мертто. Районын ог 30 сюрс гектарлы со ӧжыт ӧвӧл. Лесхозлэн вань аслаз питомникез. Со сяна, татын парсь, кунян будэто, ас ужасьёссы сӥльлы медаз ёрме шуыса. Адӟиське, уженызы данъясько нюлэсчиос. Мылкыдзы гинэ берло дыре огыр-бугыръяське. Россиысь нюлэс хозяйстволы пум понон сярысь вераськонъёс уг кельшо соослы. Но Александр Волков буйгатӥз кадь нюлэсчиосты. Со шуиз, Удмуртилэн 46 процент музъемез нюлэсъёсын шобырскемын, пе. Соосты тарканы-быдтыны уг яра. Соин валче нюлэс хозяйствоя ёзъёслы ужаны луонлык одно сётоно. Сётоно, уго нюлэсъёстэк шальк-шальк выль корка гинэ но уд пукты угось. Нош Пичи Пургалан юртъёссэс выльдӥсьёс данак. Туннэ нуналлы 1 сюрс 70 семья выль корка потыны дасяське. Районысь пичи гуртъёсын гинэ табере быдэс ульчаос усьтӥсько. Ачиз Пичи Пурга черкогуртын таӵе урам одӥг гинэ ӧз кылды ни. Районысь кивалтӥсьлэн воштӥсез Михаил Шишкин верамъя, тросэз лэсьтӥськисьёс ссуда басьто. Солы луыса татысь 58 семья корка пырон лэсьтӥз ни. Эшшо ог 60-эз мылкыд каро на. Малпаськом, таосызлэн но малпанзы быдэсмоз. Уго Удмуртияя юрт пуктӥсьёслы висъямъм 20 миллион манет ссуда быдэскын быдтэмын, но матысь дыре солы эшшо 30 миллион висъяськоз на. Та коньдонлэн кулэлыкез уго син азьын. Тани кыӵе шумпотэ Людмила Мираева выль корказылы. � Асьме кужымен гинэ сое ӝутыны ӧм быгатысалмы, � вера кышномурт. � Ачим районысь санэпидемнадзорын ужасько, картэ � колхозын механизатор луыса. Нырысьсэ ссуда 1995-тӥ арын басьтӥм вал. 1997-тӥ арын эшшо 20 сюрс кутӥм на. Отысь 5 сюрссэ соку ик коркаямы газ кысконлы висъям. Уго тазэ но кисыысьтымы гинэ ӧм люкасалмы. Ярано, пичиез пие армиысь бертыса ужаны кутскиз. Кышнояськиз но ни. Пичильток внучкамы будэ, муспотон, арес гинэ ай солы. Соин ик кенэ али дорын пуке. Юртъер котырмес учке-утялтэ. Трос гинэ пудо-животмы, чипы-курегмы, бакчамы но тырмыт. Гуртын сотэк уг луы. Бадӟымез пие нимаз улэ, вуж коркаямы. Соизлэн ньыль пиналъёсыз будо. Людмила серектыса вера, соослы но ссуда басьтыса юрт пуктысалзы ке, макем ӟеч луысал. Район висъялоз, вылды, таяз учыре но коньдон. Уката ик семьяын сомында пинал будэ бере � туала арын таӵе вамыш лэсьтыны ваньмыз уз дӥсьты. Шумпотыса верано, пичи пургаос та ласянь шӧртчиесь ай. Нылпи вордсконъя район республикаямы нырысетӥ интыын мынэ. Соин ик туэ октябре усьтӥськыны чаклам нылпи ваён юрт татысь семьяос понна ӟеч кузьым луоз. Кык этажъем вӧл-вӧл юрт кылем арын ӝутыны кутскемын вал. Отысь аппаратура но туала куронъёсъя дасямын луоз. Тӥни озьы. Пичи Пурга улэ но сяськая. Отысь калык эшшо одӥг пол вера: ӟеч, кужмо семья ворме вань зоръёсты. Чидамон, урамъёсысь сюресъёс дэриен наштаськемын ке. Мед, уждун сокем ушъяськымон уд басьтӥськы ке. Кылзэ-ай, черк гырлыос ӧтё улыны. Улыны. Э.КУМАЧЕВА. Улонэ сюрес бырйисьёслы Бӧрдоно ӧвӧл - дышетсконо! Редакциын. Туала лыдӟисез эрекчаны уд быгаты. Шӧдэ: газетчи ньӧмыз понна-а гожтэ, мадемзэ сюлэм пыртӥз-а поттэ, учыръёсты кин ке верамъя-а маде, ас синмыныз адӟыса-а. Редакцилэн косэм ужез туж огшоры вал: мон пырыны кулэ Ижысь огаз техникуме. Бен-бен - дышетскыны пыроно. Нокыӵе "блат" шуонтэк экзаменъёс сётыса. Юаны дӥсьтӥ ик: - Малы-о тӥледлы кулэ? - Редакцилы кулэ ӧвӧл, - шуизы. - Гуртысь лыдӟисьёслы кулэ. Отын будэм но дышесткем нылашъёслы-пияшъёслы туж шуген сётӥське городысь вузъёсы, училищеосы но техникумъёсы пырон. Сое мон но валасько. Городысь ӟыбыльгоос пӧлын гуртоос асьсэды етӥз возьыны возьдасько. Тодон-валанзэс ӟуч кылын чебер вераны уг быгато. Эшшо ке куд-огез дышетӥсьёс таос шоры вылӥысен учко - кишлакын дышетскемын бере, туж лябесь шуыса малпало. Ваньзэ сое мон ас вылам эскерыны кулэ, пе. Косэмын-лэсьтэмын. Школаысен кылем тодонъёсме сӥсъяй. Нялтас тодмо пияшелы Васильев иванлы экзаменъёс дыръя юрттоно кариськи. Аслаз возьдаськон сямыз ваньгес, ӟуч кылын трос янгышъёс лэсьтэ уга. Мар-о меда пӧрмоз? Ӧжытак шурдӥсько, кыӵе ке йыруж лэсьтыны ӧдъясько кадь потэ. Кышкаса но кышкатэк, укмысэтӥ классэз йылпумъям аттестатме кутыса, Ваняен ӵош мынӥм Ижысь огаз техникуме. Техникумын. Нырысь ик шумпоттӥзы: техникум выльме, пе. Но со понна, ас мылкыдъя заявление гожтыса, 75 манет тыроно. Экзаменъёсты сётонъя коньдон тыронэз озьы шуо, лэся. Собере бумага вылэ гожтоно улон сюрестэ (биографидэ). Амалтэк алдаськись луод татын. Мар йырам нырысь ик лыктӥз, сое гожтӥ. Кызьы ке но валэктоно ук, кызь одӥг арескозь нокытын но ӧй дышетскы шуыса. Гожтӥ тазьы. "Укмыс классэз йылпумъяй но анай-атаеным кошки Украинае улыны. Техникумъёсын но училищеосын огшоры предметъёсты дышетэм сяна, одно ик украин кылэз тодоно. Мылкыды куашказ. Соин вуриськись луыса кӧня ке ужай. Нош али семьямы Удмуртие берытскиз. Мон выльысь дышетсконо кариськи". Мадеме зэмос пӧрмиз кадь, мыным номыр ӧз куаретэ. Я, мар луоз - луоз ини. Музъем вылын одӥг пол улӥськом. Дасяськонын. Математикаез вунэтыны вуттӥськем ик. Учебникысь вань примеръёсты лэсьтӥ - быдэс зӧк тетрадь тыр луиз. Экзаменэз устно сётоно бере, алгебраысь но геометриысь вань юанъёсты дышетоно луиз. Шпаргалка но ӧжытак ӵабъяй. Кисыын кыллиз ке, коть сюлэмез ӧжытак буйгатоз. Йырам маиз-соиз кылиз ик кадь. Уй шорын сайкатыса юады ке Пифагорлэсь яке Герронлэсь теоремазэс чик но янгыштэк верало. Консультациын. Пиналъёс пӧлын арлыдэным туж уг висъяськиськы кадь. Угось тросэз адямиос мыным 16-17 арес гинэ сёто. Мугорыя лапег, соин-а, мар-а. Математикая консультациын доска дуре но потай - дышетӥсь ушъяз. Юри пумтэм трос юанъёс сётъялляй. Консультация бере соин ваче син луыса, куд-ог задачаослэсь решениоссэс валэктыны кури. Мон сяна, нокин но мылкыд ӧз кары нимаз консультацие кыльыны. Ӟуч кылъя консультациын нырысетӥ парта сьӧры пуксьыны кемдӥ. Тодонъёсмес эскерон понна, кӧня ке предложение гожтӥм. Тетрадьме дышетӥсь йырин-чукин ке но адӟиз, котькуд предложение бере ушъяз, ваньмыз шонер шуыса. Математикая экзаменын. Быдэс уез кӧлтэк потӥськиз, синъёс улын мар ке быдӟа ик мешокъёс. Со понна вань юанъёс дышетэмын. Нош дыр-р-р! куалекъян уг ортчы. Угось аслэсьтым билетме лэсьтоно, Ванялы но юрттоно. Кабинетэ нырысь Ваня пыриз, собере - мон. Бӧрсьысь бӧрсе пуксимы. Ваняе ӝынызэ гинэ тодэ. Мар каром? Записка пыр лушкемен-лушкемен решенизэ сётоно луиськиз. Аслэсьтымзэ нош, дыр тырмымтэен, дыртӥд-вуттӥд гинэ лэсьтӥ. Дышетӥсьлы билетме чаляк гинэ бӧтьыраны кутски. Со монэ тодмаз, нимтулме но вунэтымтэ. Кельшиськем, лэся, солы: юанъёсме туж ик умой ӧй ке но вера, "ньыль" пуктӥз. Нош мукет пиналъёс пӧлын "куинь" басьтӥсьёс лачак. Сизьымезлы "кык" пуктӥзы. Я, кызьы меда Ваня вералоз? Солэн ваньмыз шонер, куинетӥ заданияз пичи янгышез вань. Нош керпотыса умой валэктыны ӧз быгаты - "ньыль" гинэ лякизы. Ӟуч кылъя экзаменын. Ваняен одӥг ӝӧк сьӧры пуксим. Аслам бумагае вылэ Ванялэсь нимзэ гожтӥ, нош Ваня - мынэсьтымзэ. Диктантэз дыртытэк, эскерыса гожтӥм. Нош дышетӥсьмы туж сак, партаос ултӥ учкылыса ветлэ. Мукет группаысь, пе, кык пияшез шпаргалкаенызы ӵош ульчае калгыны келяй. Кышкатӥз ик, ява. Киосме но парта вылын гинэ вози, оломар медаз малпа шуыса. Вӧлдэт дорозь ик тэтчай шумпотыса: Ванялэн - "вить", мынам - "ньыль". Табере монэ но дышетскыны пыртозы ук. Нылъёс ӧжыт бере (ньыль группаын 6-7 адями), соосты дунъяло, сизьым баллэн дышетскыны басьто. Валамон ини: умой дунъет басьтэмъёс пӧлын - Ижысь гинэ пиналъёс. Нылъёсын-пиосын мон умой кусыпъёс герӟаны вуттӥ, ӧз но малпалэ, мон соослэсь куать арлы бадӟымгес шуыса. Журналистэ дышетскеме сярысь йыразы но ӧз шуккы соослэн. Паймозы ини сентябре, малы мон соос пӧлын ӧвӧл шуыса. *** Тӥни озьы гуртысь дышетскыны пырисьёслэн ку пушказы пыроно луиськиз мыным та нуналъёсы. Зэмзэ но техникуме пырисько кадь потӥз. Выльысь экзаменъёс, выльысь вирсэръёстӥ визьтэммыса вир бызе, выльысь уйёсты кӧлытэк потон, шумпотӥсь но куректӥсь ымныръёсты адӟон. Малпасько: гуртысь пиналъёс ӧжыт дӥсьтӥсьгес луизы ке, дышетскыны пырыны быгатозы. Номырлэсь кышкано ӧвӧл, умойгес дышетоно но - ваньмыз удалтоз. Бӧрдоно ӧвӧл - дышетсконо! Марина Костылева, Москваысь Калык эшъяськонъя университетысь журналистикая факультетын дышетскись. СПОРТ Дасэтӥез Ижысь Первомай районлэн кузьымъёсыз понна ӵошатсконъёс ӟеч сяме пыӵазы ни. Туэ соос 19-тӥ августэ ортчозы. Бызьылонъёсы пыриськыны мылкыд каризы ни Уфаысь, Пермьысь, Кировысь, Омскысь, Чебоксарыысь, Казаньысь, Пензаысь, Москваысь но мукет городъёсысь спортсменъёс. 20 иськем сюрес вылэ потыны дасясько дуннелэн куинь пол чепионэз Анатолий Корепанов, Европалэн чемпионэз Фарид Гиниев, Ижысь спортъя егит мастеръёс Сергей Александров, Александр Краснов, ветеранъёс Зоя Дедюхина, Вячеслав Иванов, Борис Олеров, Зоя Николаева но мукетъёсыз. Бызьылыны мылкыд карисьёслы 5 иськем сюрес но чакламын. Озьыен, кин яратэ спортэз, кин гажа ассэ, шӧдэ кужымзэ � люкаське стартэ. Отысь анайёслэн кизы шуныт Мон ноку но йӧскадь уг вала Америкалэсь Россиенымы кусыпъёссэс. Но огез понна соос азьын йыбырттысал. - Кӧня мултэс луэм нылпиосмылы анай-атайзэс воштӥзы ни отысь шырыт сюлэмо адямиос. Нылпи юртъёсысь тужгес висисьёссэ, ӧлексыоссэ асьсэлы карыса, соослы яратонзэс кузьмало, пинал сюлэмъёсы азьланезлы оскон пыӵато. Тани Огайо штатысь Гей Павлайклэн аслаз но нылпиосыз вань, но "Сунсхине" благотворительной огазеяськонэн Россиысь нылпи юртъёстӥ ветлыкуз, сюлэмыз ӧз чида соослэн жальзылы, огзэ тужгес висись нылашез аслыз кариз. Али со бадӟым ни, улэ бадӟым шулдыр коркан, номырлы уг ёрмы. Выль анаез-атаез но сузэр- вынъёсыз но сое туж ярато. Валамон, нылаш соослэн кылынызы вераське, но тодэ аслаз выжыосыз сярысь. "Сунсхине" огазеяськонысь адямиос та нуналъёсы Удмуртие вуылӥзы. Соосты ӧтем республикаысьтымы мукет кунъёсын кусыпъёсъя министерствомы. Огазеяськон ёрмись нылпиослы эмъюрттэт сётонэн выре бере, вуылӥзы Ижевскысь, Глазовысь но Воткинскысь нылпи юртъёсы, больницаосы. Америкаысь врачъёсты паймытӥллям асьме врачъёслэн быгатэмзылы но сюлэм шунытсылы, висисьёсты умой эмъяны, утялтыны тыршемзылы, но Россиысь врачъёс туж вужмем тӥрлыкен ужало, эмъюмлы ёрмо, жалямзэс веразы соос. "Сунсхин" огазеяськон шаерысьтымы нылпи больницаослы 100 сюрс манет тыр эмъюм кузьмаз. Стивен Ремайн - группалэн кивалтӥсез, врач-хирург азьланяз но эмъюмен, пӧртэм эмъян тӥрлыкен юрттом, тужгес секыт висисьёссэ Америкаын бурмытом шуиз. Ижевскын со операция лэсьтыны чакла вал, но кынмамез люкетӥз. Стивен азьланяз но Удмуртилы юрттыны мылкыд каремзэ вераз, матысь дыре чакламын российско- американской консультационной центр кылдытыны, со понна Америкаысь эмъюм но, тӥрлык но вуэмын ни. Пусйыны кулэ, благотворительной ужен выремзы понна, соослы нокин но коньдон уг тыры. Ветло ас мылкыд каремзыя. Асьмелэн ке сыӵе шырыт адямиосмы луысалзы... З. Рябинина. Футбол Гол бере - пурӟизы "Газовиклэн" туэ дораз кыкетӥзэ келямез бере, футболэз яратӥсьёслэн мылкыдзы воксё сӥялскиз. Нош таиз ивор осконзэс ыштэмъёсты но выльысь бурдъялоз, дыр. Читаысь "Локомотив" дораз очкооссэ уг пазя. Куд-ог командаос миым отчы ӧз ик ветлэ: сюресэз дуно усе, куноослы вормон уг донгиськы. "Газовик" туэ паймытӥз, шуыны луоз. "Читаын" шудонын нырысетӥ люкетаз гинэ командаос огкадьгес нюръяськизы. Бератаз "Газовик" быдэсак кузёяськыны ӧдъяз. Читаысь Галимовлэн капкаямы гол пыртэмез бере, ижъёс кузьыли карез таркам кадь луизы - пурӟизы, бӧрсьысь бӧрсе куинь гол пыртӥзы (кыксэ Александр Марцун, одӥгзэ Николай Сидоров). Кузёослэн капказы дорын лэчыт учыръёс эшшо трос вал на. Озьы "Газовик" юн "Локомотивез" 3:1 лыдын вормиз. М. Кузьмин. КИВАЛТӤСЬЁС КАЛЫК ПӦЛЫН Ганза уг сёт маза Кивалтэтмылэн Тӧроез яратэ, шӧдске, алнашъёсты. Валлян со воштӥсеныз Михаил Назаровен, коньдон ужпумъёсъя министрен Владимир Бельтюковен но гурт хозяйствоя но сиён-юон поттонъя министрлэн воштӥсеныз Александр Коробейниковен ӵош кивалтонэз ӵоже куинетӥзэ вуылӥз ни Алнаш ёросэ. Огпотэмен тунсыкъяськиз котыр ёросъёсысь югдурен но. Грах, Можга, Кизнер, Пурга, Вавож ёросысь администрациослэн тӧрооссы но колхозъёслэн кивалтӥсьёссы ӧтемын вал огазеям кенеше-совещание. Кивалтӥсез сюлмаськытэ гуртын толлы дасяськон но ю-нянь утялтон. Совещание кутскыку ик мылкыдзэ куашкатӥз колхоз кивалтӥсьёслэн ю-нянь басьтӥсьёс вылэ ӝожтӥськемзы: ӟеч ю тысез, пе, фураж дунын дунъяло. Николай Алексеевич котьку сямен ик чурыт вераз: уг гыро, уг кизё, коньдонзэ лыдъяло. Ужаны ке уг валало, интыязы пуктоно! М.Назаровлы та ужпумез туннэ-ӵуказе ик сэрттыны-пертчыны косӥз. Нош та районъёсысь огъя югдурен Николай Алексеевичлэн мылкыдыз умой кылиз. Толлы пудо-сиён дасян та вакытэ йылпумъяське ни. Та районъёсын со 12 кормовой единица мында дасямын. Куазь уродъяське ке но, итымъёсы ю тысь вуэ. Туэ со кылем арынлэсь йӧнгес. Алнаш районын гектарысьтыз 20 центнер пала люкаське (республикая � 14 центнер). Пусйыны кулэ созэ: туэ гырон-кизён кутскем дырысен одӥг хозяйство но эстӥськон ӧвӧлэн тэк ӝыны нунал но ӧз сылы на. Кивалтэт та югдурез син азяз возе. Зэм, али ГСМ-лы дунъёс будэмен, ёрос кивалтӥсьёс шугъяськыны кутскизы, аранэз быдтытозь, котькудӥзлы 300-400 тонна пала кулэ на. Но Ганза буйгатӥз, шонергес ке, куаретӥз шуод-а: "Ужалэ, эстӥськонэн йырин бусые одӥг шеп но уз кыльы". � Нош кызьы ваменэс энергетикъёсын � толэзь ӧз йылпумъяськы на, соос чиньызэс сэзъяло ни, хозяйствоысь тылэз кысонэн кышкато? � Тыре, соку уз кышкатэ. Ми энергетикъёсын огкылэ вуим ни вал кадь выль арозь озьы "шудытэк" ужаны, но соос но ас сяменызы ёрмо, шӧдске. Вунэтэ зачётъёс сярысь, мон котькуд колхоз понна йыбыртъяны кутски ке... Кык аръёс талэсь азьло гинэ ай хозяйствоос лапас улъёсысьтызы геры-сюрло поттон калэ вуэмын ни вал. Али но техникаен югдур ушъяськымон ӧвӧл ай ке но, куд-ог бусыосын адӟисько ни лизинг амалэн басьтэм "чеберинъёс". Та амалэн азьланяз но ужалом, нокин но тӥледлы "ми" шуыса уз сёты, но сюлмысь тыршиды ке, ньылё ар ӵоже машина-трактор паркты выльмоз. Председательёс чус пуко. Иське, ваньмыз валамон. Кытысь ке зал шорысь дӥсьтыса но дӥсьтытэк султэ егит пияш (тусыныз пиналлы кельше ай, но лач пукись костюмезъя но кхм! каремезъя � зэмос воргоронлы): � Нош кызьы ми кадьёс � куштӥськем хозяйствоос? Буш азьын мон колхозэз ӝутыны уг быгаты: гужем шорын скаллэсь 5 килограмм гинэ йӧл кыскиськом... � Ну-ка, начальник, трибуна сьӧры, � ӧтиз Кивалтэтлэн Тӧроез. � Тодматском. � Владимир Ильич Сергеев, 21 арес, Алнаш районысь "Кама" колхозлэн кивалтӥсез. � Валамон, � шуиз Ганза егит председательлэсь бур кизэ кырмыса. � Но тон, Владимир Ильич, куинь ар ортчыса хозяйствозэ азьпал радэ поттӥськод. Быдэс кенеш ӵоже нырысьсэ кичабонъёс чузъяськизы. Мон шумпотӥ егит муртлэн сыӵе дӥсьтонэзлы. Нош Вавож Ёрос администрацилэн тӧроез Татьяна Иноземцева пияшлы туж оскемзэ вераз: милям, пе, озьы ар но ӝыны ӵоже куштӥськем хозяйствомес егит нылаш ӝутӥз. *** Алнаш ёросысь усто хозяйствоостӥ ветлыкуз но, Асан совхоз-техникумын кенеш ортчытыкуз но калык Николай Алесеевичлэсь Быръёнъёс азьын вераськемзэ витиз вал кадь. Но пал кыл но ӧз чузъяськы мылкыдъёсыз сярысь. Со гинэ ӧвӧл, ӧз чузъяське нокыӵе "лэсьтом, пуктом, шедьтомъёс" но. Ужано! � шуиз со йыг-йыг. З.РЯБИНИНА. Сандормохе мынысал... Санкт-Петербургысь "Мемориал" научно-информационной центр политической репрессиосын быремъёсты буре ваён нуналъёс ортчытӥз. 5-тӥ августэ Карелиысь Сандормох шайвылэ люкаськизы юнме шорысь янгыше уськытэмъёслэн ӵыжы-выжыоссы. Кызьы тодӥськом, татын 1937-тӥ арын 27-тӥ октябрьысен 4-тӥ ноябрёзь ыбемын но огъя шайгуэ согемын вал Соловки тюрьмаысь 1111 заключёной, соос пӧлын ик � удмурт калыклэн дано пиез Куӟебай Герд. "Мемориал" огазеяськонлэн огез кивалтӥсез Вениамин Иофе татчы ӧтьыса гожтӥз вал Юрий Андреевич Чайниковлы. Жаляса верано, К.Гердлэн вынмуртэзлы туэ та сюрес вылэ потыны ӧз кылды ни: 20-тӥ апреле со улонысь кошкиз. Т.НИКОЛАЕВА. Татын будо визьпогъёс Ижысь 275 номеро "Италмас" нылпи садын туннэ лачак калыкез. Нылпиос доры лыктӥллям Калыкез дышетонъя, Нациосын ужанъя министерствоосысь ужасьёс, Первомай ёросысь дошкольной но воспитательной ужез радъясьёс, Дышетӥсьёслэсь тодон-валанзэс будэтонъя институтын ужасьёс, городысь удмурт нылпи садъёсысь воспитательёс. Нылпи сад люказ соосты аслаз тунсыко ужрадаз. Дасо аръёс талэсь азьвыл та нылпи садэн Ольга Григорьевна Коновалова кивалтӥз (жаль, со улонысь кошкемын ни). Солэн кивалтэмез улсын ик удмурт группаос кылдылӥзы. Нырысь отчы ветлэм пиналъёс табере тросэз лицейёсын но пӧртэм школаосысь удмурт классъёсын дышетско. Нош 1998-тӥ арын, городын будӥсь удмурт нылпиосты люканы шуг шуыса, пӧртэм группаосысь пиналъёс понна удмурт кылъя факультатив (кружок) кылдытоно кариськизы. Шумпотымон соиз: котькыӵе выжыысь анай-атайёс чик уг пумитъясько талы. Туннэ люкаськонзылэн мугез но уго та удмурт факультативен ик герӟаьскемын. Аслэсьтыз тодэм-валамзэ, нылпиосын быгатыса тыршемзэ возьматӥз Елена Петрова Калистратова. Ӟеч пӧрмиз уроксы, тыро-пыдо дасяськем дышетӥсьсы. Пиналъёс, котькуд вамышсэс чакласа, асьсэ куспын лякыт вераськыса, кунооссылы оломар но возьматыны тыршизы. Пӧртэм амало шудонъёс, удмурт кылын__ лыдъяськонъёс, мадиськонъёс но пышкылонъёс... Ваньзэ тае быръе-утча, пиналъёслэн сюлэмазы пыӵатыны тырше егит дышетӥсь. Нылпиос ваньзы удмурт кылын вераськыны уг ке но быгато, соос валаны тыршо. Мар сярысь мынэ вераськон, валамзэс асьсэос ик возьматыны быгато. Анай кылын ортчытэм уроклы куноос ӟеч дунъет сётӥзы. Азьланяз Елена Петровналы ваньзэ умойзэ сӥзизы. Ижысь педучилищеез горд дипломен йылпумъям нылашлы, дышетсконзэ УдГУ-ын мед азинтоз шуыса, ӵектонъёс сётӥзы. Зэмзэ но, егит дышетӥсьлэн ваньмыз азьпалан ай: вылесь малпанъёс, вормонъёс, нылпиосты удмурт кылын чебер вераськыны дышетон урокъёс... Оглом нылпи садэз басьтоно ке, макем тунсыкоесь но паймымонэсь татын ужасьёсыз. Куд-ог анай-атайёслэн нылпизэс англи кылын дышетыны мылкыдзы ке вань, отчы сётыны быгатозы, татын но асьсэ удыссэс ӟеч тодӥсь адямиос ужало. Крезьгуръя кивалтӥсен но удалтӥз: туж быгатыса но валаса ужзэ нуэ Ольга Александровна Телегина. Та нылкышно сярысь нимысьтыз гожтыны луысал: со туэ "Арлэн адямиез" но "Арлэн воспитателез", озьы ик "Зарни италмас" ӵошатсконын со И степенё дипломант луизы. Ужам ужзы юнме уг ортчы, емышез адӟиське ини, юнме-а 31 но 39 номеро школаысь дышетӥсьёс соослы ушъян кылъёс верало, нылпиоссэс ӟечен гинэ пусйыло. Нылпи садлэн азбараз ӵукна ик люр-ляр бызьыло ни нылпиос. Бадӟымъёсызгес ӝоген школае кошкозы. Садысьтызы соос визьпогъёс луыса то ини. Азьпалан трос шедёзы на шуг-секытъёс но, шумпотонъёс но. Соос уз вунэтэ та садзэс, отысь ужасьёсты, эшъёссэс, угось весяклы татчы кыле пичи дырзы. Л. Яковлева. БЫДӞЫМ ВОРМОНЛЫ � 55 АР Тыл ӧз суты, тӧл ӧз погырты Быдӟым Вормонмылэн юбилеез азьын Ижысь 66 номеро шор ёзо школаысь А.В.Суворов ордено 357-тӥ стрелковой дивизилы сӥзем музей выльдӥськиз. Нош быдӟым тылож йылпумъяськем бере, музеез кылдытонлы трос кужымзэс сётӥзы Удмуртиысь калык писатель Михаил Андреевич Лямин но дивизилэн уноез ветеранъёсыз. Михаил Андреевич 1941-тӥ арын гудырикошкон толэзе ик Камбарка ёросысь Шолья станцие вуиз но мылысь-кыдысь басьтӥськиз 357-тӥ дивизиез кылдытон борды. Писатель луэмзэ тодыса, вордскись дивизилэн командирез полковник Д.А.Киршев но комиссарез А.Е.Кожев (азьлогес ужаз партилэн Удмурт обкомаз) Ляминлы ӵектӥзы штабазы ужаны но гожъяськон ужзэ азьланьтыны. Михаил Андреевич соослэсь куронзэс валаз но мылысь- кыдысь басьтӥськиз дневникъёс гожъяны. Собере солдатъёс но офицеръёс сярысь очеркъёс кылдытъяз, печатлалляз соосты дивизилэн газетаз, мукет газетъёсын, журналъёсын. Печатлалляз сооств ожлы сӥзем "Тыл пыртӥ", "Вунонтэм аръёс" сборникъёсаз. Нош бӧрысьгес писатель люкам материалъёсыз бордын рос-прос ужаны кутскиз. 1963-тӥ арын потӥз дивизиысьтызы ик ветеранлэн писательлэн Алексей Никитинлэн "Четыре года в шинелях" бадӟым повестез. Вить ар ортчыса, 1970-тӥ арын потӥз бадӟыматэм книгаез. Повестяз писатель возьматэ 357-тӥ дивизилэсь ож сюрессэ. Фашистъёсын нюръяськизы, тросэз удмурт пиосмы, син азе яркыт пуксё соослэн тусъёссы. Майор Чирков, капитан Скобелев, покчи политрук Попов, политрук Перевощиков, комиссар Веретенников, старшой лейтенант Воронцов, лейтенант Зайнаков, лейтенант Поздеев, комиссар Самсонов но уно мукетъёсыз яркыт малпанъёс кельто. Автор гожтэ А.А.Фадеевен, Б.Н.Полевоен но удмурт кылбурчиен врачен Ашальчи окиен (Л.Г.Векшинаен) пумиськылэмъёсыз сярысь, тодаз вае удмурт писательёсты П.А.Блиновез но Ф.Г.Кедровез. Тӥни озьы, Михаил Лямин быдӟым ожез зэмос возьматӥсь луиз. Та кузьмадёслы (повестьлы) вылӥ дунъет сётӥз Советской союзлэн Маршалэз И.Х.Баграмян но. Валамон ини, писательлэн книгаез дивизилэн музеяз тужгес дуноез но вунонтэмез кузьым луиз. ... Ожысь ветеранъёслэн Удмурт Элькун комитетсылэн тӧроезлэн воштӥсеныз В.Н.Никитинэн вуылӥм выльдэм музее. Пумиськылем солэн кивалтӥсеныз дышетӥсен Ирина Петровна Бажинаен, 357-тӥ дивизиысь ветеранъёслэн элькун кенешсылэн тӧроеныз Николай Михайлович Кадыровен. Вакчияк � И.П.Бажина сярысь. та школаын ик куатетӥ классын дышетскись Ирина музейын экскурсовод луыса ужаны кутскиз. Глазкарысь пединститутэ дышетскыны пырытозя, татын тыршиз. Ирина Бажина ветеранъёсын ӵош вуылӥз Белоруссиысь Лежль городысь, Литваысь но Великие Луки городысь школаосы � 357-тӥ дивизилы сӥзем музейёслэн ужъёсынызы тодматскыны. � Сыӵе шудо дыръёс но вал улонамы, � шуэ бажина. � Нош демократия но выльдӥськон шуон вакытамы Шольяысь, Глазкарысь но Сарапулысь музейёсы гинэ мыныны коньдонлы ӟудӥськом. Глазкарысь пединститутэз йылпумъяса, Ирина берытскиз аслаз школаяз ик. дышетыны кутскиз покчи нылпиосты. Огдыре ик музейлэн кенешезлэн кивалтӥсез луиз. Кызь ар пала ини вань сюлэмзэ но мылкыдзэ сётыса, Ирина Петровна Бажина музейлэсь ужзэ ӧръя. Татчы вуэммы бере ик мыным возьматӥзы туж чеберъям альбомез. Со сӥземын 357-тӥ дивизилэн сӥё-дано ветеранъёсызлы. Отчы интыямын куамын вить ожгарчиослэн туспуктэмъёссы, соослэн батыр сямен ожмаськемзы но улэм-вылэмзы сярысь гожтэтъёс. Пусъем потэ та музеез кылдытӥсьёслэсь нимтулъёссэс. Соос � М.А.Лямин, М.Ф.Булдаков, Н.М.Кадыров, С.И.Зайнаков но уно мукет ветеранъёс. Собере учким музейысь экспозициез. Со сӥземын Быдӟым Вормонлы витьтон вить ар тырмонлы, дивизилэсь ож сюрессэ возьматӥсь материалъёслы. Одӥг шкафысь Ирина Петровна поттӥз зӧк папка. Отчы люкамын дивизия сярысь пӧртэм газетъёсын, журналъёсын печатлам кылужъёс, очеркъёс, туспуктэмъёс. Элькунамы гинэ ӧвӧл, Москваын, Белоруссиын, Литваын, Псковын, Великие лукиын, Тверьын, Ржевын, Сычёвкаын потэм газетъёсысь материалъёс но. Ваньзэ огазеяса, быдэс зӧк книга поттыны луысал. Но туала вакытэ таӵе малпан быдэсмонтэм. Дивизилэн Удмурт шаерамы улӥсь ветеранъёсыз сярысь мадиз милемлы татысь ожгарчиослэн кенешсылэн кивалтӥсез Николай Михайлович Кадыров. Веранэз туж ӝожмыт вал. � Дивизиямы ожмаськемъёс пӧлысь кык сю тямыстон одӥг мурт вал на 1963-тӥ арын, � вера фронтовик. � Нош быдэс кунамы сюрслэсь уно ветеранъёс улӥзы. Со дырысен ортчиз куамын сизьым ар. Быдӟым Вормонмылы витьтон вить ар тырмонэз туэ пумитамы вить кузя гинэ. Нош вуоно 9-тӥ Майёсыз ум адӟе ни, дыр... Кадыров ачиз но пусъёз ни туэ тямыстон арессэ. Со вордскемын Бигер шаерысь Огырчи ёросысь Терси черкогуртын. Армие басьтӥзы 1940-тӥ арын. Ож кутскон арын огаз тулыс уе "боевойлы" укшась тревога дыръя шудтэм учыре шеде. Госпитальын эмъямзы бере, армиысь лэзё. Бертыса эшшо эмъяське на. Бурмеме бере Ижысь калыкез сюдэ-вордэ. 1942-тӥ арын 24-тӥ ноябре военкоматэ ачиз мынэ но армие куриське. Сое ысто Арзамасысь военной училищее. Отын тодматске Ижысь пияшъёсын (бӧрысьгес таосыз асР, радиодикторен Виктор Баглаевен. Училищеысь вакчиятэм курсэз йылпумъяса, старшой сержант Кадыров 357-тӥ дивизие шеде но война йылпумъяськытозь, секыт сӧсырмытозяз ортче ож сюресъёсты. Михаил Лямин маде Николай Михайлович Кадыровлэн Великие Луки город дорын ожмаськыкуз лэсьтэм бадӟым дано ужез сярысь. Тани со чуръёс: � Нокин но малпаны ӧз быгаты, кыӵе кӧшкемыт уж дасяло вылэм немецъёс, � гожтэ писатель. � Сое быдэстон вылысь, авантюрист Фон Засс шефъёсызлэсь танкъёс куриз. Фон Засслэн малпамезъя, котыртэм гарнизон со танкъёслэн юрттэмзы улсын мозмытскыны быгатоз. Гитлерлэн гыжкалъёсыз та кӧшкемыт малпанэн огкылысь луизы но, котыртэмъёсты мозмытон вылысь, кызь танк висъязы. Кужмо техника вылысь тодмо пусъёсты мукет буёлэн шобыртӥзы. Нош интыязы суредазы горд кизилиос. Колонналэн азьпалаз "Т-34" трофейной танкъёсты лэзизы. Ӝомал усён вакытэгес танкъёс, ог куинь иськем ортчыса, город доры вуизы. Нош фашистъёс, сьӧраз ортчыса, крепость вӧзысь блиндажъёсы ватскем артиллеристъёсмес пулемётъёсысьтызы ыбылыны кутскизы. Зэм, таосыз нырысь ӧз валалэ: танкъёс асьмелэн кадь, нош ыбыло шоразы. Асьмелэнъёс валатскытозь, егит эсэсовецъёс ыбылыса азьлань вырӟизы. малпазы, луоз: нокин но ӧз шӧды, дыр, танкъёсын фашистъёс пуко шуыса. Ачиз сямен валаз та учырез противотанковой пушкалэн расчётэзлэн командирез старшой сержант Николай Кадыров. Валамез бере ик, нокыӵе приказэз возьматэк, аслыз оскыса, пушкаысьтыз ыбиз азьысьтыз ик танк шоры. Снаряд шедиз танклэн гусеницаяз. таиз огинтыяз котыръяськыны кутскиз. Мукетыз танк лымы вылтӥ сӧриськемез вӧзтӥ кошкыны вырӟиз. Дыртэменыз оло валамтэеныз, танкист машиназэ бур палтӥз ӧз, паллян палтӥз вырӟытӥз. Старшой сержант кыкетӥ снарядзэ лэзиз. Таиз но танк могӟиз. Немецъёс пӧлын огыр-бугыр луиз. Табере ини артиллеристъёсмы валазы, кинъёс пуко танкъёс пушкын. Блиндажъёсысь но землянкаосысь потэмъёс ыбылыны кутскизы фашистъёс шоры. Лымыен шобыртэм бусы вылтӥ сьӧсьёс Новосокольники пала пегӟыны кутскизы. Сьӧразы дыртӥзы автоматчикъёсмы но. Нош Кадыров но солэн эшъёсыз быдтылӥзы кылем танкъёсыз. Та вал туж шер пумиськылӥсь учыр. немец танкъёс, куажгамъёссэ котыръяса, азьпала потыны тыршизы. Артиллеристъёс дугдылытэк ыбылӥзы шоразы. Огез сьӧры мукетыз сӧриськизы. Бронетранспортёръёс но нелькиськизы. Отысь немецъёс тэтчазы но автоматчикъёслэн ыбылэмзы улсын бусыысь лымыез "гордмазы"... ...66-тӥ школаысь музейын но ортчизы но ортчыло на Быдӟым Вормонлэн юбилеезлы сӥзем пӧртэм ужрадъёс. Усто радъямын вал "Зоринча" шудон, суреданлы но кырӟанлы, ож сярысь сочинениослы, рефератъёслы сӥзем конкурсъёс, мукет ужрадъёс. Вань ужъёсты радъяны трос юртто школалэн директорез Валерий Викторович Сосунов но ваньмыз сямен дышетӥсьёс. Ми Василий Никитичен ӵош тау кариськом В.В.Сосуновлы, И.Т.Бажиналы, Н.М.Кадыровлы, усто экскурсия ортчытэмзы но егитъёс пӧлын бадӟым валэктон уж нуэмзы понна. Л.ЕМЕЛЬЯНОВ, Удмурт Элькунысь Ожысь но ужысь ветеранъёслэн кенешсылэн президиумаз быръем мурт. ? Ижысь 66-тӥ школаысь музейлэн кивалтӥсез Ирина Петровна Бажина. Владимир Беломорскихлэн туспуктэмез. Президент быръён азьын Андрей Солуянов - 14-тӥез кандидат Шаерамы Андрей Владимирович тодмо адями, тужгес но Вотка городын. Со вал Кун Думалэн азьвыл созывезлэн депутатэз. Али луэ "Купол" огазеяськонлэн ож тӥрлык поттон ёзэзлэн директорез. Та нуналъёсы Андрей Солуянов Быръёнъёсъя комиссие Удмуртилы президентэ кандидат кариськон ласянь мылкыдзэ вераз, курон гожтӥз но журналистъёсын пумиськиз. Андрей Владимирович азьланезлы оскыса веранзэ тазьы кутскиз, мыным, пе, удалтӥз: 14-тӥ августэ 14-тӥез кандидат луи, нош та лыдпус кык полэс шудо. Малы ке шуоно, сизьым вылэ сизьым ватсад ке, сомында луэ. Но ужпум со бордын ӧвӧл. Республикамылэн президентэз мае нырысетӥ интые пуктыны кулэ? Мон сямен, промышленностез, сое йыг-йыг пыд йылаз пуктытэк, нокыӵе удысын вамышъёсмы уз кузёме: лэсьтӥськонын но, гурт удысын но. Али предприятиос кӧня ке улӟизы, продукция поттон будэ. Валля арын 17-тӥ август бере, странаямы поттэм вузъёслы кулэяськон кылдӥз. Жаляса верано луэ, данакез ужпумъёс йылаз-пумаз вуттымтэ. Ож тӥрлык вузаммы понна Москвалэн тыронъёсыз юн трос на. Куд-ог предприятиосын быдэс арлы уждун тыронзы люкаськемын. Сиён-юон поттон уг йылы. Музъем ужанэз, пудо вордонэз но переработкаез азинтыны государство уксё уг шедьты, узыр юрттӥсьёс но ӧвӧл. Инвесторъёс дорамы уг лыкто. Элькунысьтымы уно гуртъёсы вуылыса, одӥг малпанэ вуиськод - та удысэз зэмос юрттытэк уд ӝуты. Монэ озьы ик тани мар сюлэмшугъяськытэ. Татарстан улостӥ одӥг газ гумы кошке, нош асьмелэн - куинь. Озьы ке но, чагыр эстӥськонэз кутонъя бускельёсмылэсь юн бере кылиськом, уката ик гуртъёсын. Шат со интыысь кивалтӥсьёс бордысь уг поты? Котькинлы со валамон. Россиын таӵегес ик куӵо югдур бюджет удысын тыршисьёслы юрттон ласянь. Куд-ог улосъёсын уждунзы вӧзы ватсаса коньдон сёто, нош Москваысь пенсионеръёс кемалась будэтэм пенсия басьто ни. Кызьы сое валано? Валэктон одӥг. Кун но интыысь бюджетэ ялан ичи уксё вуэ, отчы пыремез но куддыръя мукет ӧретӥ бызе. Андрей Владимирович бадӟым инты висъяз егитъёсын ужанэз умоятонлы, соослы юрттонлы. Республикаысьтымы кивалтӥсьёс та лэчыт ужпумез адӟымтэ улэ аналско. Соослэн егитъёс понна сюлэмзы уг висьы, лэся. Соин ик син азямы будо наркоманъёс, СПИД-эн висисьёс, йыртэмасьёс, адямиосты сантэмасьёс но виисьёс. Шат сое умоен лыдъялод? Нокызьы уд. Техучилищеослэсь (ПТУ-ослэсь) ужзэс вакчи дыр куспын ӧм ке умоятэ, предприятиосын ужась киослы, уката ик вылӥ квалификациен, туж ёрмом. Сыӵе суред адӟиське ни Москваын но музон бадӟымесь городъёсын. Кылсярысь, ЭМЗ-ын ("Купол") куд-ог ужъёс киын быдэсъясько, но со понна юн быгатэм но дышетскем кулэ. Кин соосты туннэ дася? Егитъёсын ик герӟаськемын мукетыз юн кулэ ужпум - соослы улон инты сётон. Егит семьяос асьсэ кужымен квартира басьтыны уг быгато, уксёзы ӧвӧл. Соин сэрен уноез люкисько, анай-атаёсынызы уг тэро, одӥг кыл уг шедьто, ог-огзылы люкето. Егитъёс сярысь вис карытэк сюлмаськыны кулэ. Нош туннэ со уг шӧдӥськы. Лэсьтӥськыны кредит сётон йӧскадь радъямтэ. Егит семьяослы дасо-кызё аръёс ӵоже берыктон вылысь коньдон висъясал ке, улон юртъёс пуктон син азямы кужмоясал. Лэсьтӥськон музон удысъёсты но вырӟытысал. Соку ваньмызлы умой луысал: ватсаськысалзы выль ужан интыос. Андрей Солуяновлэн озьы ик сюлэмыз висе преступностен, кузьмаськонъёсын нюръяськонэз умоятон понна. Оглом вераса, Россиын кивалтон амалъёс воштӥсько. Улосъёсысь кузёос нырысь ик сюлмаськыны кулэ экономикаез юнматон, калыклэсь улон-вылонзэ умоятон сярысь. Соя ваньмызлы дунъет сётӥськоз. Вылӥ кивалтонэ али егитъёс лыкто. Интыосын но со озьы луыны кулэ. Г. Васильев. Юн тыпылэн мульыез Бергаса ӵуж куаред, Поръяса усьылоз, Нош ортчоз ук аред, Арлыдэд нош йылоз. Тӧл тӧла, лопыръя, Лисъяське календарь. Гужемед ортчемъя, Нош вуэ ни сентябрь. Нылпиос шулдырак Ортчозы сяськаен. Нош кин ке но ӵапак Йыгаськоз укное: - Дмитриевна, чырткемесь! Кыӵе-мар улонды? Бичады-а эмезь, Тыр-а бен ӝӧк вылды? Бам кузя шапырак Васькозы синвуос. Сюлэмыд ик - ырак, Ӵыжекто бам йылъёс... Кӧня дыр, кӧня ар Сӥземын школалы. Матэктэ ни сентябрь, Дыр вуиз лыдъяны, Кӧня ар тон валтӥд Чеберлык дуннее Ож бере тэлеӟем Муспотон нылпидэ. Газетэ но гожъяд, Уйёстэ но ӧд кӧл... Арлыдэд йылэмъя Ул вылэм ни вӧл-вӧл - Коркаед ёмыра, Тӧл шула корказьын. Но кин ке но пыра, Йыбырттэ тон азьын... Сизьымдон сизьым арессэ тырмытӥз туэ куартолэзьлэн 5-тӥ нуналаз Клавдия Дмитриевна Загребина. Як.-Бодья ёросысь Кекоран гуртысь та дышетӥсь быдэс шаермылы тодмо луиз, дыр, газетамы гожъямезъя. Вылысьтыз вылаз гожтэтъёсын тыме вал со редакцилэсь почтазэ. Номыр сярысь гожтытэк уг кельты: кыӵе ке выль книга лыдӟе-а, спектаклез учке-а, радиопередачаез кылзэ-а, яке ас котырысьтыз кыӵе ке суред сюлэмзэ чепыльтэ - одно ик чуръёссэ кисьтыса лэзёз. Писательёслэн но журналистъёслэн лачак гинэ гожтэтъёссы люкаськизы. Соослэсь копизэс Як.-Бодьяысь музее сётӥз. Аслаз сыӵе мылкыдыз вал бере, нылпиослы но мед паласькоз шуыса тыршиз. Одӥгезлэн дышетскисезлэн тодэ ваемезъя, нунал ке вордске, удмурт кылъя (яке литературая) уроказ пырыса шуэ: "Туннэ асьмелэн программая сочинение". Мукет уроказ нош тазьы ик... Собере нош но нош... Но ваньмыз ик пиналъёс таӵе кыл пӧрез уг ярато ук. Акыльтымон луэм. Соку та етӥз нылаш вератэк чидамтэ: "Клавдия Дмитриевна, возьматэ ай со программадэс, кытын весь сочинение гожъяны косэмын..." Соку йырыз кур луиз ик вал, дыр, дышетӥсьлэн (али но со сярысь гожтэм понна вожзэ медаз потты), нош табере пальпотыса тодэ вайыны луэ ни. Вераны кулэ: тыршемезлэсь емышсэ адӟиз ини дышетӥсь. Со нодъясь ныллэн апаез ик, Надежда Гильманшина, кылбурчи луиз, табере нылпиосын литкружок нуэ. Школаын ужакуз, Клавдия Дмитриевна кӧня ортчытъяз писательёсын пумиськонъёс. Одӥг пол, 80-тӥ аръёсы, ми но отчы поездэн мынӥм: Анатолий Перевозчиков, Рашид Хайдаров, Галина Романова но мон. Владимир Котковмы малы ке ӧз вуы. Со интые но кырӟаны, шулдыртыны вырим... Кӧня ке нунал ортчыса, Клавдия Дмитриевналэсь гожтэтсэ басьтӥм, отын таӵе чуръёсыз вал: "Вераськонады трос ӟуч кылъёсты пыртылӥды". Озьы со милемлы но дышетӥсь луиз. Собере та ласянь чакласькытэк ӧйлась ни. Пельыз сак, синмыз лэчыт Клавдия Дмитриевналэн. Берло пумиськонмы дыръя, кылем арын толсуре, ёрос музейысен со ӵушказ Кун Кенешын кылдытэм нимкылъёсъя ӧриез (комиссиез), ортчыт троссэ ӟуч кылъёсыз удмурт кылэ берыктӥзы ни шуыса. Соку Клавдия Дмитриевна ас выжыосыз сярысь кӧня ке вераз (дышетӥсез та ласянь уг тодӥськы на вал): - Мынам дядяе гуртын вӧсясь вал, Быдӟым куаын улэмын. Вӧсяськыса йыр-пыдъёс кушто вал. Син азям на лачак мудоръёс. Кык бадӟым изъёс... Ваньзэ соосыз сутоно- быдтоно луиз, вӧсяськыны уг лэзё вал уго. Сыӵе "тыпылэн мульыез" та нылкышно, чурыт кӧмо. Кышномурт шудзэ инмар сётымтэ. Тросэз ёзъёсыз Быдӟым ожын быризы. Ёмырам корказ огназ ортчытэ ни даурзэ. Мугорзэ шунто на нэнэезлэн куэмъёсыз. Аслазэз но вань. Шунды пуксён палан ож гудыри гудыръяку, кузесь ӝытъёсы пӧртэм буё ыжгон кышетъёс куиз. Тӧдьы дэраосыз-бинялтонъёсыз али но лачак. Одӥг-огзэ музее пумен вайылэ. Та пумиськонмы дыръя музейлэн кузёезлы Валентина Никоноровна Ивановалы "куӵо" шуыса нимаськись куэм шобырзэ кузьмаз. Табере, шуиз, ваё чибориё кускерттон, ныпъет кал... Адямилэн шырытэз - пыдэстэм ошмес кадь. Нош ошмес син но кулэ каре дырын-дырын сузямез, солы тау каремез. Клавдия Дмитриевналы сӥзьыса, солэсь калык понна ӟеч лэсьтэмзэ малпаса кылдӥзы та чуръёсы. Татьяна Чернова. Бус пӧлысь тылсиос 16-тӥ августэ Ижысь центральной площадьын ортчиз шаерысьтымы ӧлексы-сӧсыръёслы сӥзем "Милосердие" нимо ужрад. Сое радъяз Удмурт Республикаысь инвалидъёслэн огазеяськонзы. Коньдонэн юрттӥзы Культурая но Калыкез улон-вылонын утёнъя министерствоос. Вазь ӵукна ик ЦУМ котыре трос калык люкаськем ни. Удмуртилэн пӧртэм-пӧртэм сэрегъёсысьтыз вуиллям шуге-леке сюремъёс. Кин ке кырӟа-эктэ, мукетыз арганэн шудэ, куинетӥез эшъёссэ маскаръятэ. Татын ик солдат пиос сцена йӧндырыны выро. Нош одӥгаз ӝӧк дорын гожтӥсько: кин кытын ӵошатскоз. Угось вань мае бырйыны: шахмат, шашки, коляскаен ворттылон, бызьылон, штанга ӝуткан, ки кужымез мертан (армрестлинг). Артэгес ик кырӟась-эктӥсь коллективъёсты пусъё. Кутскиз шулдыръяськон. Котыр гуж-ж-ж! вазе. Кин эктэ, кин кырӟа, кин ӵошатске. Татчы вуиллям сӧсыръёс пӧлын республикаысьтымы тодмо спортсменъёс но. Со Интал Галеев (секыт атлетика), Равхат Атнабаев (нюръяськон) но Алексей Сурнин (капчи атлетика). Инвалидъёслэн огазеяськонзылэн кивалтӥсез Владимир Сковородников тау каремзэ вераз Иж городлэн администрациезлы, Егитъёсын ужанъя кун комитетлы, городысь спорткомитетлы уксё висъямзы понна. Спортъя вань тӥрлык дунтэк сётэмын, лэсьтэмын сцена, вормисьёс понна саламъёс дасямын. Владимир Иванович шуиз: � Вань организациос, кинлэсь юрттэт курим, ӧз палэнске. Нош зоро куазь луысал ке, ужрадэз филармониын ортчытысалмы � пумит ӧз луэ. Республикаямы 80 сюрс пала сӧсыр-ӧлексыос. Витьтон куать сюрсэз соос пӧлысь шуге- леке сюризы уж доразы. Ваньмызлы юрттэт но, коньдон но, шуныт кылъёс но уг тырмо. Ма, Иже но та лыдпус пушкысь кӧня ке люкетэз гинэ вуыны быгатӥз, луоз. Таӵе ужрадъёс ӵемгес мед ортчылысалзы. Секыт адӟонэ вуэмъёс, оло, кӧня ке дырлы ке но кайгузэс вунэтысалзы. Марина КОСТЫЛЕВА. Россия Федерацилэн кун наградаосыныз пусъён сярысь Россия Федерацилэн Президентэзлэн УКАЗЭЗ Дуннеын тупаса улонэз, адямилыкез но лул чылкытлыкез утёнын бадӟым уж нуэмзы понна пусъёно: Почёт орденэн Шкрумко Николай Яковлевичез (Николай архиепископез) � Иж�Удмурт епархилэсь кивалтӥсьсэ. "За заслуги перед Отечеством" орденлэн ИИ степенё медаленыз Атаманов Михаил Гавриловичез � Свято-Успенской черкысь диаконэз, Удмурт Республика, Ижевск город. Дмитриев Василий Николаевичез � евангельской христиан-баптистъёслэн черкысьтызы пресвитерлэсь юрттӥсьсэ. Остроумов Вячеслав Григорьевичез � протоиереез, Воскресенской черкысь настоятелез, Удмурт Республика, Сарапул город. Россия Федерацилэн Президентэз В.ПУТИН. Москва, Кремль, 2000-тӥ арын 11-тӥ августэ. � 1491. ШӦКЫЧ Пус чӧлтоно Куинь кузя чорыгась эшъёс � Опочей, Матюш но Леким � вазь ӵукна ик Скалшур тымет дурын вал ини. Огзытэк огзы одӥг вамыш но уз лэсьтэ. Гогыоссы ик ваче бурмемын, лэся. Нош яратоно шутэтскон дырзы � чорыган. Соин, вылды, гуртооссы кушем ним соя ик сётӥллям: Опочей � Чипей, Матюш � Юш, Леким � Налим. Котькыӵе югдуре сямен ик, чорыганын но котьку уг удалтылы. Одӥгаз нуналэ � чорыген, мукетаз � буш ведраен. Удалтыкуз чорыгась эшъёс лумбыт кылтэм-ымтэм улозы. Нош туннэ тани зыгатӥсь ӧвӧл, пукы ву вылэ лякем кадь кылле. Сыӵе дыръя но эшъёс мӧзмыса уг пуко, оломар но вераськон шедьто. � Ма, туннэ ведӥнлэн нуналыз-а, мар-а, буш ведраен бертоно луоз ни, � мур лулӟыса вазе Опочей. � Эн но вера, � пумитаз шуэ Матюш. � Нош дорын чорыг шыд пӧзьтыны дасясько, луоз. � Падиез ӧвӧл бере, вае бен та лулпу салкыме пуксьыса тамакалом, � ӵектӥз Леким. Озьы соос гуждор вылэ интыяськизы. Кӧня ке минут ӵоже кыл-куара поттылытэк, тамак кыскыса пукизы. � Матюш, кылӥд-а ини, асьме элькунамы, пе, ӝоген президент быръёмы. Сотэк, шуо, улон-вылонмы уз тупатскы, � вераськонэз мытӥз Опочей. Табере пельдэ паськыт усьтыса пук, вераськонзы шунды тэль сьӧры лэзькытозь кыстӥськоз. � Ма, кивалтэтлэсь азьмуртсэ коть президент шу, коть йыркобы, инмысь зарни уз кисьтӥськы, дыр, � шуиз Матюш. � Оло, кисьтӥськоз но, � кыл куспазы пыриськиз Леким но. � Тани Кузон палан калык малы умойгес улэ? Президентсы ванен. Нош асьмелэн со ӧвӧл. Оло, соин ик анайтэм-атайтэм нылпиос кадь улӥськом. � Котькуд быръён � со мултэс уксё кисьтон гинэ, � ӵогем кадь шуиз Матюш. � Тани кӧня миллион кулэ луоз президент бырйыны? � Соиз но чотамын ини, � валэктэ котьмае тодӥсь Опочей. � Нырысь черодзэ ортчытыны ог 12 миллион манет, пе, кулэ. Солэсь трос медаз быры шуыса, быръёнэз одӥг полэн, пе, ортчытыны турттоно. Соин ик, шуо, тырмоз быръёнэ ньыль мурт пӧлысь одӥгез ветлӥз ке. Ветлэмъёсыз пӧлысь нош ик одӥг ньыльмосэз куаразэ кин ке понна сётӥз, со ик луоз ини президент. Уксё сярысь верано ке, 12 миллион � со асьме понна гинэ трос потэ. Нош кин араз уно миллион манет поттыны быгатэ, солы номыр кадь ик ӧвӧл. Тани мон "АиФ Удмуртии" газетысь лыдӟи: асьме элькунамы, пе, миым 19 мурт уно миллион люканы быгатэм, нош огезлэн 14,5 миллион манет люкаськем. Асьме кадьёслы со понна кык сюрс ар ужаны кулэ. � Вот тӥни сыӵеос ик кивалтэтэз но капыртозы. Кисыед зӧк ке, тон депутат но, президент но, � шуэ Матюш. � Бен, асьмеос бырйиськом ук! � Пайме Леким. � Кин понна тросэз куаразэс сётӥзы, со ик вормоз. � Ха-ха-ха! Йырад тынад пул пызь шат, � серем кариз сое Опочей. � Тани ортчем быръёнъёс азьын кин-о ушъяськиз вал, кандидатмы быдэн ӟенелик кузьмаз, куасьтэм чорыген куноятӥз шуыса? Тон ӧй вал-а со? � Ма, куноятӥз ке, мыным со мултэс шат? Одно быръёзы сое, кин кулэ кивалтӥсьёслы. Сыӵе асьмелэн элькунамы югдур. Кин киын власть, коньдон, со ик самой бадӟымез бырйись. Тани учке ай: президент быръён сярысь умой-умой вераськон кутскиз гинэ, асьме телевидение но куд-огез газетъёс асьмеды валатскыто ини, кинэ бырйыны кулэ. Отӥяз кивалтэтлэн вань кужымез кутэмын луоз, асьсэ адямизэс бырйытон понна. � Бен, асьмелэн озьы, � соглаш луиз Матюш но. � Быръёнъёс сярысь законэз тӥясьёс ноку кыл уг куто. Озьы со быдэс шаерамы. Нош учке ай тани Америкаын мар даурто: 1996-тӥ арын президент быръён вакытэ та уже Тӧдьы юртысь телефонэз но служебной комнатаосты кутэмез но Религиозной организациослэсь коньдон басьтэмез понна вице-президентсэс Альберт Горез судэ сётыны малпало. Нош асьмелэн миллионъёсын калык ваньбурез лушкасьёс но тус-тас карисьёс гань-гань уло, кырсь киосынызы кивалтэтэ сузьтӥсько. Быръёнъёс сярысь вераськонзы пыдло но пыдло пыре. Лекимлы со акылес потыны кутскиз. � Асьмеос кенеше ӧм лыктэ, � шуиз со, � чорыганы. Вераськеммес кылзыса, чорыгъёс но паймо, дыр, ини. Ма, тӥни ярдуре люкаськиллям, шӧдске. Шур пала киыныз шонтыса, со интыысьтыз султӥз но пумем киоссэ-пыдъёссэ лосыр-р-р! веськатъяз. Со сьӧры эшъёсыз но султӥзы. � Кылзэ ай, мон таки тазьы дэмласал, � шуиз Опочей ӝамдэлы кенешонзэс ворсаса сямен. � Президент быръён понна трос коньдон медам кутӥськы шуыса, кандидатъёс куспазы пус мед чӧлтозы: кин утӥз, со ик элькунамы валтӥсь йыр но луоз: коть Кион Санко, коть Йылсо Павол, коть Тӧдьы йыр... Сыӵе мылкыдын ик чорыгасьёс визнанъёссы пала дыртӥзы. Бертыны потыкузы, шунды кукъёссэ нюлэс сьӧры лэзья вал ини. Со мыняса келяз визь- нод утчась воргоронъёсты. В.МОНЬИН. "Дандэс эн ыштэ", � куриз журналистъёсты Н.А.Ганза Правительстволэн Тӧроез Николай Алексеевич Ганза пумиськылӥз "Удмурт дунне" газетлэн редакцияз ужасьёсын. Вераськон мынӥз республикаын кылдэм политической но экономической югдур сярысь. Оглом пусъёно ке, промышленностьын но гурт удысын азинсконъёс вань, со шӧдӥськытэк ӧз кыльы бюджетмы вылын но. Туэ тросгес му вӧй но кыскемын. Кема курадӟеммы бере, со шумпотымон ни. Радызъя мынэ ю-нянез утялтон. Куазь ке ӧй люкетысал, тросэз бусыос туннэ нуналлы бушасалзы ни. Правительство ласянь туэ вань луоноез лэсьтэмын но лэсьтӥське, музъем ужасьлы юрттон вылысь. Кысык вакыт шаермы понна вадьсаськиз Удмурт Республикалы нырысетӥ президент бырйыны дасяськонэн. Гуртоослы политикаен вырыны маза ӧвӧл ке но, солэсь нокытчы уд пегӟы. Пӧсь йӧтэ та толэзьёсы иворез вӧлмытон бордын ужасьёслы но: пресса кызьы шуоз, кудпала калыкез валтоз � озьы ик луоз. Тӥни малы Правительстволэн Тӧроез нимысьтыз саклык висъяз журналистъёслэн ужзылы. Сое тужгес но шугъяськыто куд-ог ёзъёслэн юри малпаса дасям пӧяськонъёссы, адямиос вылэ нме шорысь пож ву кисьтамзы, ог-огзы вылэ узатыны выронъёссы. Ваньмыз со герӟаськемын вуоно быръёнъёсын. � Кык толэзь ортчыса, ваньмыз ӧраз пыроз, вуоз ужан нунал, али лӧптэм мылкыдъёс пуксёзы. Соин ик туннэ малпаськоно: кызьы ог-огмы шоры учкомы но ульчалэн мыд-мыд палаз кожоно уз лу меда? � шуиз Николай Алексеевич. Куд-ог газетъёсын номерысь номере пото ни созэ яке тазэ кандидатэз сьӧдмась статьяос. Палэнэ уг кельто Н.А.Ганзаез но. Сое, кылсярысь, янгыше уськытыны выро, Березовскиен кусыпъёсыз вал шуыса, шедьтыны выро музон но "виштыоссэ". � Ваньмыз со пӧяськон, � шуиз Николай Алексеевич. � Котьма мед гожъялозы, котькызьы саптаны мед вырозы, улон ваньзэ интыяз пуктоз. Мон оскисько чылкыт киын, сайкыт визьмын ужась журналистъёслы, соослэн кылзылы. Правительстволэн Тӧроез малпанъёссэ вераз республикамылэн вуоно сюресэз сярысь. Шаермылэсь азинсконзэ со адӟе промышленностез азинтон-выльдон бодысь но музъем узырлыкмес асьме понна ужатыны быгатэмысь. Соку гинэ Удмуртия бускельёсмы сямен улыны-вылыны кутскоз. Но со понна ужано, пусйиз премьер. Л.МЕДВЕДЕВА. Федор БАТАЛОВ Улэм-вылэм Вазь ӵукна ик султыса, Пудоосты поттыса, Конторае васьконо, Кыӵе ке уж юано... Тани мон отчы пыри, Калыкез нош трос ини, Данакез тамак ӵындо � Ӵын пӧлы йыромоно. Каллен тани син дышиз, Пуксьыны инты сюриз, Татысь котьмае тодод, Татын котьмае кылод, Гуртоос газет басьто, Телевизор но учко, Котькыӵе иворъёслы Вань асьсэлэн малпанзы. Кин ке ветлэм базаре, Тросэзлэн тодэм потэ, Кыӵегес ини дунъёс, Уг-а усё на соос, Кин-о кытысь кен ваем, Нош кинлэн нылыз бызем, Кинлэн ке вордскем пиез, Возьмало вылэм нылэз... Картаен тӥни шудо, Кинэ ке "визьтэм" кельто... Кин ке маке мадиське, Серем гинэ кылӥське, Тани бригадир вуиз, Ӝӧк сьӧры интыяськиз. Бригадирмы кышномурт, Туж визьмо но туж чырмыт: � Тон, Степаныч, вукое � Мешок тырись тон луод. Ньыль мурт кулэ пул пильны, Одӥгез � кор кысканы. Скаллы сиён пыртоно, Ужасьёс отын тодмо... Славик, Петя, Валерик, Тӥ луоды куинь кузя, Скалэз туннэ вандоды Городэ келялоды. Колхозэ запчасть ваё, Со понна нош сӥль куро. Вуимы ми скал гидэ, Скал думет йылын сылэ, Ми шоры кырыж учке. Сюръёсаз гозы понса, Бадӟым зыръёс кутыса, Ӟуч кылын тышкаськиськом, Пудоез ми поттӥськом... Анекдот тодэ лыктӥз... Немец, ӟуч но англичанин Верасько, пе, куспазы, Кызьы вандо пудоез Соослэн кунъёсазы. Англиын, Германиын Пудоез лякыт вандо. Вандыны нуыкузы, Крезьгурез соос кылзо, Яке Бах, яке Бетховен, Озьыен, пе, соослэн Небытгес луэ сӥльзы... Ӟуч но верам таослы: � Я не знаю как у вас, А у нас взрывают, Потому что на прилавках Одни кости и рога. Запчасть вуиз колхозэ, Сӥль нош кошкиз городэ. Ӝытазе гуртэ бертса Пукисько малпаськыса: "Сӥльмы милям чурытгес, Водкамы нош небытгес. Тамакмы но курытгес, Сылалмы но кузьытгес. Нош малы милям нылъёс Ваньмызлэсь чебересьгес? Юанъёс но малпанъёс, Нош кытын валэктонъёс? Ӵок, выдо ини изё, Ӵук ӝытлэсь, пе, визьнодо" . Тодэме потэ Ӟеч но бур, "Удмурт дунне", Кылзӥськы али монэ, Яратоно газетэ. Тодэме туннэ потэ, Шедьты мыным тон дырдэ, Ысты мыным гожтэттэ. Мон тынад гожтӥськисед, Пыдлось гуртысь лыдӟисед, Мынам таӵе юанэ, Шугъяськытэ со монэ: Улӥсько бере гуртын, пеймытгес улон татын, Колхозмы ни шальтрамын, Уждун басьтон вунэмын. Нош кыкетӥ номерад, Кыкетӥ страницаяд "Суд гинэ дунъет сётоз", Гожтэм озьы Г.Коряков. Статьяез уг курласькы, Ушъяны уг малпаськы, Тани мае мон лыдӟи, Но аслам йырам пыртӥ: Вань уго Можга ёрос, Нош отын "Заря" колхоз, Колхозын уждун тыро, Котьку но дыраз басьто. Кызьы озьы быгато, Соослы мон паймисько? Таӵе иворен сэрен, Вань таӵе юан-курон: Гажано "Удмурт дунне", Туж мынам тодэм потэ, Кӧня сыӵе колхозъёс, Кудаз тыро уждунъёс, Кудаз уло пунэмтэк, Вань на ужась калыкез? Газет бам ке жаль ӧвӧл, Пукты отчы тон вӧл-вӧл Предъёсмылэсь тусбуйзэс, Мед тодом геройёсмес. Талэсь вазен дыръёсы, Социализм аръёсы, Политбюроез пуктылӥд, Кагаздэ тырмытылӥд. Нош усто предъёсмылы Трос кулэ уз лу инты. Пукты, "Удмурт дуннее", Тусбуйзэс адӟем потэ. Вань таӵе но дэмланэ, Ас поннам малпаськонэ: "Шӧкыч" баме пуктоно, Лыдӟисез тодматоно � Кудаз, кыӵе колхозын Коньдон басьтон вунэмын? Тон, "Удмурт дуннее" соглаш ке, Туспуктэм тыныд лэзё. Вань милям колхозамы Одӥг сыӵе кандидатмы. Только малэсь вот кышкыт: Таӵеесь "геройёслы" Трос кулэ луоз инты, Жаль потоз, дыр, кагазды. ШӦКЫЧ Юрттӥз Верасько юлтошъёс: � Вай ай пунэмен сюрс манет уксёдэ. Нокин но уг сёты. Куинетӥ уйзэ умой-умой уг изиськы ни. Соиз шуэ: � А малы вазьгес ӧд вера? � Сётод-а? � А малы уд сёты ёрмись муртлы. Тани ме кык таблетка но супыр-супыр изёд! Возьдаськись � Кызьы тон шуид, кызьы валэктыны луэ, шонергес вераса, мар пӧртэмлыкез кышкась муртлэн но возьдаськисьлэн? � Мар пӧртэмез! Мон ке кышкасько � со возьдаськон, нош тон ке � со кышкан! Ха- ха-ха! Валад-а? Костюм � Таӵе костюм мон тӥледлы толэзь пала вуро! � Быдэс толэзь?! Ньыль арня! Куамын одӥг нунал! Одӥг костюмез! � О-ко! Сыӵе костюмлэн ужез тачак! � Тачак! Инмар быдэс дуннеез куать нуналскын вуттӥз. Нош тон толэзь! � Вуттыны вуттӥз но учкы ай кыӵе со! Тьфу! Субботник � Микол, субботник, пе. Султы ни. Укноосты миськозы, пе. � Со понна адямиез сайкаты ай. Сёт-а, мар-а кык ведра ву но тырмоз. И.КУЗЬКИН ВАЛЭКТЭ ЮРИСТ Серегез дася адвокат Лилия ШКЛЯЕВА Телефон 25-33-70 Юртъерме гожтӥ вал пие вылэ Картме вазь ыштыса, вить пиналме огнам будэтӥ. Табере соос ас семьяосынызы нимазы уло ни. Мон � гуртын, пропискае но татын, вытъёс (налогъёс) но страхованиея взносъёс ачим тырисько. Пересьмон сярысь но малпаськытэк уг луы. Пие одӥг, солы ик осконэ вал. Кышноеныз ӵош улэ Ижысь куинь комнатаен квартираын, будэтэ кык нылпи. Вузан-басьтон огкыл (договор) пыр хозяйстволэсь ӝынызэ гожтӥ пие вылэ. Берло дыре соин но кенэным кусыпъёсы уродмизы. Соос арняяз огпол дорам вуыло но, кенэ монэ коркась ик улляны турттэ. Табере жалясько, юртъерме пие вылэ выжтӥ шуыса. Сое вань нылпиосылы быдэн огмындаен люконо вал. Янгышме тупатыны амал вань-а? А.ПЕТРОВА. Право кылын вераса, А.Петрова эш турттэ вузан-басьтон сярысь огкылзэ зэмос луисьтэм ужрадэн (сделкаен) лыдъяны но быдэс юртъерлы ачиз кузё (собственник) кариськыны. Россия Федерацилэн Граждан кодексэз озьы лэсьтыны луонлык сётӥсь мугъёс пӧлы пыртэ: огкылэн формаез чакламын ӧвӧл; со алдаськыса лэсьтэмын; огкыл дасямын аслэсьтыз ма каремзэ валасьтэм муртэн, маин ке сэрен йыромыса, кышкаса, пӧяме кыльыса но мукет. Тӥляд но, Петрова эш, сыӵе мугды вань ке, иск сётон дырды ыштымтэ на ке, судэ вазиськемды луоз, огкылдэс умойтэмен лыдъяны курыса. РСФСР-ысь Граждан процессъёсъя кодекслэн 50-тӥ ёзэтэзъя учкыса, умойтэмен лыдъясь мугъёсты валэктон уж усёз тӥ вылэ ик. Вань музон амал но. Юртъерлэсь ӝынызэ тӥледлы берыктон пумысен тӥ пиеныды выльысь огкыл лэсьтыны кулэ. Соку верано: завещанияды тӥ куроды юртъердэс быдэн огмындаен люкыны вить нылпидылы. Бумагаос ӝуазы тылӝуын Юрттэ вал мыным уждунэ сярысь документ лэсьтыны. Пенсие потӥ 1987-тӥ арын библиотекаысь. 1973-тӥ�1980-тӥ аръёсы ужай вал Шаркан школа-интернатын воспитатель но библиотекарь луыса. Ваньмыз уждунэ люкаськылӥз 140 манет � 90 манет воспитательлэн но 50 манет библиотекарьлэн. Шутэтскыны кошкыкум, вань уждунме лыдэ басьтыны ӧй быгаты, малы ке шуоно, азьвыл одӥг уждунъя гинэ пенсия тупато вал. Туэ, 2000-тӥ арын май толэзе, сое ватсазы но, мынам туж ичилы будӥз. Ветлӥ райсобесэ. Веразы: 70-тӥ аръёсы бадӟымгес уждунэн ужам бумага, пе, шедьты. Утчаськыны кутски но, нокытысь но номыр ӧй шарая, школаысь но, роноысь но, архивысь но. 1979-тӥ арын февраль толэзе тылпу вал, соку, пе, ваньмыз сутскемын. Кызьы лэсьтоно сыӵе бумагаосты? Ӵош ужам эшъёсы вань ик, роноын бухгалтер но со ик. Мар кароно пенсиме будэтон понна? Мария ПЕРВОЗЧИКОВА, Шарканын улӥсь. Бен, РСФСР-ысь Калыкез улон-вылонын утёнъя (социальной обеспечениея) министерстволэн 1991-тӥ арын 4-тӥ октябре юнматэм 190 номеро приказэз куре: пенсия тупатыны ужам стажез юнматыны луэ ужам интыысь, вылӥгес организациысь но архивысь басьтэм документъёсъя. Соос малы ке уг сюро ке, ужан дыр юнматӥське адӟисьёс (свидетельёс) верамъя. Соос кык яке тросгес медло, адямиез мед тодозы ӵош ужамезъя. Жаляса вераны кулэ: уждунлэсь быдӟалазэ адӟисьёс верамъя юнматыны уг луы. Группа сётӥзы но... Будэтӥсько куинь нылпи. 1989-тӥ арысен кыкетӥ группаен инвалид луи. Малпай: мон басьто пенсия но, нылпи пособие но. Райсобесын шуизы на: пиостэс будэтыны юрттом. Нош али йылзэ-пумзэ шедьтэме уг луы. Кызьы тыриськыны кулэ пенсия но пособие? Валентина АРАНКУЛОВА, Завьял районысь Ӵӧж гуртын улӥсь. Пичи коньдон басьтӥсьёслы юрттон вылысь, Удмурт Республикаысь Правительство 1998- тӥ арын 30-тӥ апреле юнматӥз 326 номеро постановление. Нимаське тазьы: "Семьяысь адями вылэ шоро-куспо барышез лыдэ басьтыса пиналлы толэзьлы быдэ кун пособие тупатон но тырон радлык сярысь положение". Сое басьтон понна ужан интыысь но вытъя (налогъя) инспекциысь ваёно вань барышъёс сярысь бумагаос. Пособие тупатэмын ке, сое сётыны черод радъяське тазьы. Нырысь ик басьто миым понна улыны ичизэ кулэ луись (прожиточный минимум) коньдонэн муртъёс, собере � та минимум яке 1,5 минимум мында коньдоноос, отӥяз � талэсь ятыр коньдоноос. 1999-тӥ арын минимум вал семьяысь котькуд адямилы 450 манет. Кыӵе ке дыр понна тупатэм пособиез сётытэк кельтыны уг яра. Озьы лэсьтэмын ке, сое курыса вазиськоно судэ. Ӟеч кузё - чырмыт ужасьёс Алигес гинэ Завьялово ёросысь "Камское" ОАО бере кылись хозяйствоос пӧлы пыре вал. Туэ тулыс сое выль кузё ас кияз басьтӥз - Василий Матвеевич Александров, азьвыл ёросысь кивалтон ёзын ужам мурт. Югдур табере ӟеч пала берытскыны кутскиз. Юосты октонлы та хозяйство быдэсак ас кужыменыз дасяськиз: дырыз дыръя шедьтӥз эстӥськон но, техникалы корт тӥрлык но. Али бусыосын вить комбайн ужа. Соос борды итӥськыны дась куатетӥез. Бен, бусьтыр ужаны соослы куазь уг сёты. Но туннэ нуналлы вузаны дась ни 50 тонна ю тысь. Со чылкытатэмын, куасьтэмын. Шӧдскымон вормонъёс басьтӥз ни "Камское" АОН пудо вордон удысын. Туннэ нуналлы татысь скал кыскисьёс йырлы быдэ 9 но ӝыны литр йӧл потто. Кылем арын ӵошатыса, со 2 литрлы тросгес. Районъя та лыдпус 8 литрозь гинэ вуэ. Н. Иванов. Россия Федерацилэн кун наградаосыныз пусъён сярысь Россия Федерацилэн Президентэзлэн Указэз Атом энергетикаез азинтонын бадӟымесь вормонъёссы но трос аръёс ӵоже пайдаё ужамзы понна пусъёно: Почёт орденэн Кузьменко Николай Васильевичез - акциосын "Чепецкий механический завод" огазеяськонысь лабораторилэсь кивалтӥсьсэ, Удмурт Республика. "За заслуги перед Отечеством" орденлэн ИИ степенё медаленыз Никитин Александр Михайловичез - акциосын "Чепецкий механический завод" огазеяськонысь наладчикез, Удмурт Республика. Суднищиков Вячеслав Николаевичез - акциосын "Чепецкий механический завод" огазеяськонысь электрикез, Удмурт Республика. Широков Сергей Алексеевичез - акциосын "Чепецкий механический завод" огазеяськонысь фрезеровщикез, Удмурт Республика. Россия Федерацилэн Президентэз В. Путин. Москва, Кремль, 2000-тӥ арын 26-тӥ июле. � 1383. Шӧкыч Йылпумъяськиз республикамылы президент луыны мылкыд карисьёслэсь куронъёссэс кутон. Сыӵе адямиос трос гинэ вылэм. Вань соос пӧлын тодосчиос но, кивалтӥсьёс но, пенсионеръёс но мукетыз. Нош валало-а меда ваньзы президент луонлэсь йылолзэ? Та пумысен шонерак валэктон сётыны нокин но али уз быгаты, дыр. Малы ке шуоно, кыллэн лыэз ӧвӧл угось. Куд-ог кандидатъёс но, президентъёс но кыл вылын оломае но верало. Кылсярысь, тодэ лыктэ одӥг президентлэн чугун сюрес вылэ йырзэ понынын медэмез. А ӧз поны ведь. Вань калыкез пӧяз. Я ӵок ини, одӥг пол пӧялод, кык пол, куинь пол... Куке но пум вуоз, дыр. Соин ик, асьмеос асьмелы президент бырйиськом бере, асьмелы ик сак но визьмо луоно, дыр. Ато нош ик пилиськем тусь дуре кылёмы уга. С. Зоновалэн гожтэтысьтыз. Лулысь-сюлмысь Балезино ёросысь Дядьпи гуртысь калык яратэ кырӟаны-вераны. Лулысь-сюлмысь ужа татын "Купанча" фольклор ансамбль. Нош кивалтэ соин туж чупрес, туж чебер нылкышно Светлана Иванова. "Купанча" мылысь-кыдысь ужа вашкала сямъёсты-йылолъёсты Удмурт лулчеберлыкъёс дэменлык та гуртэ вуылыку, ансамбльлысь усточиос возьматӥзы корка миськонэз. Ваньмыз сыӵе усто пӧрмиз � кунолыкес лыктэмъёс синвуаськизы. Ансамблен кивалтӥсь Светлана Евграфовна Ивановалы мылысь-кыдысь юрттэ солэн кузпалыз Михаил Германович. Нош вордӥськизы но будӥзы та етӥз адямиос Кез ёросысь Сергейтель гуртын. Балезино ёросысь Дядвнигуртэ вуыса, асьсэлэсь шудзхэс но шумпотонзэс шедьтӥзы Светлана Евграфовна но Михаил Германович сюлмаськемен, Дядькиын удмурт сямъёс-йылолъёс выльысь шедьтӥзы асьсэлэсь туссэс. "Купанчалэсь" "анайзэ" Светлана Евграфовна Ивановаез ӟечкыла Удмурт лулчеберлыкъя дэменлыклэн тӧроез Альберт Разин. Шутэтскыкузы но, шулдыръяськыкузы но � "купанчаос" котьку ӵош. Владимир Беломорскихлэн туспуктэмъёсыз. Удмурт Республикалы Президентэ кандидатъёс � Фамилиез, нимыз, атай нимыз Вордскем арез Ужан интыез Кин луыса ужа Кин дэмлаз Ку ӵектэмын 1. Забильский Владимир Викторович 1948 Россиысь наукаосъя академилэн Урал люкетысьтыз Физико-технической институт (Ижевск город) валтӥсь научной ужась бырйисьёслэн группазы 06.08.2000 2. Вершинин Павел Николаевич 1949 Удмурт Республикаысь Кун Кенеш (Ижевск город) Тӧролэн нырысетӥ воштӥсез бырйисьёслэн группазы 06.08.2000 3. Горбушин Леонид Семенович 1940 Обороная министерстволэн пенсионерез (Глазов город) - бырйисьёслэн группазы 06.08.2000 4. Щуклин Сергей Борисович 1956 Удмуртиын коньдонъя югдурез юнматонъя но банкрот ялонъя Россиысь федеральной службалэн Урал-Сибирь улосвылысьтыз (Ижевск город) Агентстволэн кивалтӥсез бырйисьёслэн группазы 07.08.2000 5. Волков Александр Александрович 1951 Удмурт Республикаысь Кун Кенеш (Ижевск город) Тӧро бырйисьёслэн группазы 07.08.2000 6. Бердников Дмитрий Николаевич 1967 "Законъя улон но ужан" нимо всероссийской общественной движение (Казань город) - ачиз ӵектӥськиз 08.08.2000 7. Сутягина Ольга Павловна 1954 Культурая, вӧсьлыкъя но общественной ужъёсын вырись (Ижевск город) - ачиз ӵектӥськиз 08.08.2000 8. Ганза Николай Алексеевич 1946 Удмурт Республикаысь Правительство (Ижевск город) Тӧро бырйисьёслэн группазы 09.08.2000 9. Трефилов Александр Викторович 1955 "Уралысь егитъёслэн огазеяськонзы" общественной организация (Ижевск город) кивалтӥсь бырйисьёслэн группазы 10.08.2000 10. Ануфриев Вячеслав Николаевич 1946 "Удмуртпродконтракт" кун управление (Ижевск город) валтӥсь директор бырйисьёслэн группазы 10.08.2000 11. Ложкин Анатолий Афанасьевич 1938 пенсионер (Игра пос.) - ачиз ӵектӥськиз 11.08.2000 12. Кокорин Михаил Константинович 1946 Кун Кенешысь законъёсты быдэсъямез чакланъя, калыкез кышкытлыклэсь утёнъя но гражданъёслэн правооссыя ялан ужась комиссия (Ижевск город) Тӧро бырйисьёслэн группазы 11.08.2000 13. Рудчук Сергей Васильевич 1963 военной пенсионер (Ижевск город) ачиз ӵектӥськиз 14.08.2000 14. Солуянов Андрей Владимирович 1959 "Купол" ИЭМЗ ФГУП (Ижевск город) Кема арлы чаклам программаосын кивалтӥсь бырйисьёслэн группазы 14.08.2000 15. Крымский Игорь Геннадьевич 1973 "Авторадио" ЗАО (Ижевск город) Иворъёсын но крезьгурен передачаосты нуись ачиз ӵектӥськиз 14.08.2000 16. Барташевич Андрей Людвигович 1973 "Лесозавод" ОАО (Сарапул город) валтӥсь бухгалтерлэн воштӥсез бырйисьёслэн группазы 14.08 2000 17. Головизнин Леонид Борисович 1955 ТТУ (Ижевск город) контролер ачиз ӵектӥськиз 15.08.2000 18. Козьмин Федор Геннадьевич 1958 Республикаысь кожно-венерологической диспансер (Ижевск город) кивалтӥсь бырйисьёслэн группазы 15.08.2000 19. Тимофеев Владимир Борисович 1939 "Ижевский мотозавод "Аксион- Холдинг" ОАО (Ижевск город) валтӥсь инженер ачиз ӵектӥськиз 15.08.2000 20. Едитарев Андрей Борисович 1962 "Фронт" ООО (Глазов город) валтӥсь редактор ачиз ӵектӥськиз 15.08.2000 21. Стерхов Алексей Николаевич 1943 "Ижсталь" АО, 30-тӥ цех (Ижевск город) термист ачиз ӵектӥськиз 15.08.2000 22. Бусыгина Валентина Алексеевна 1959 дораз пукись (Ижевск город) - бырйисьёслэн группазы 15.08.2000 Чечняе кошкизы Та нуналъёсы Удмуртиысь Югдурез утёнъя министерстволэн патрульно-постовой службаяз но нимысьтыз ужъёсты быдэсъянъя отрядысь (ОМОН) 100-лэсь уно милиционеръёс лымшор кунгожъёсмес утьыны кошкизы. Соос Чечняысь Знаменский посёлокысь эшъёссэс воштозы. Удмуртиысь пиос эрикез яратӥсь республикалэсь уй пал сэрегзэ чакласа возёзы, предприятиосты, складъёсты, сюресъёсты, выжъёсты эскерылозы. Кузь сюресэ потон азязы батыр пиослы шудо сюрес но улэпкын берытскыны сӥзьыса вазиськизы ӵош ужась эшъёссы, анай-атайёссы, кузпалъёссы. М. Кузьмин. Удмурт Республикаысь Правительстволэн аппаратэз кайгыре Правительстволэн Тӧроезлэн секретариатэныз кивалтӥсьлэн Городилов Александр Викторовичлэн атаез Городилов Виктор Павлович улонысь кошкемен валче но ӵыжы-выжыосызлы но матысь адямиосызлы мур куректэмзэ вера. 1� � Я ' ( ( ) * * + а=Р/яя 2 А! 8 Ё9Р Р Вотка котырысь калыклэн ӝожтӥськемез потэ, берло дыре вылӥ кивалтӥсьёс татчы шергес вуыло шуыса. Но тани Кун Кенешлэн Тӧроез Александр Волков � ӵапак та музъем вылын. Шӧдӥське, воткаос бадӟым саклык висъяло культуралы но калыкез дышетонлы. Соинтэк-а Александр Волков ӝыны нуналзэ висъяно луиз татысь школаослы но клубъёслы (таосыз пӧртэм сямен нимамын ай: егитъёслэсь ваньмон дырзэс ортчытонъя центр, гуртысь культурая центр но мукет). Вань та центръёс пӧлын ужасьёсыз но, ӝыныё лэсьтэмъёсыз но. Берлоосыз 90-тӥ аръёслэн кутсконазы ӝутыны кутскемын вылэм. Но рыноке выжон шуон вакытэ соос могамын. Али гинэ шат ужъёс выльысь азинскыны кутскизы. Тазьы луиз Новый посёлокысь культура центрен. Нош йылаз-пумаз вуттӥзы ке, маиз гинэ уз луы татын: спортъя, дискотекаос ортчытъянъя залъёс, бар, библиотека, ужалозы пӧртэм пумо кружокъёс. Ваньмызлы инты окмоз. Учке ай мабыдӟа улыно-вылыно юрт пуктӥське. Новый посёлоке кунояны вуылӥсьёс ас вакытаз вожъяськыса но учкылозы ай, вылды, со шоры. Но Июльское черкогуртын утиськисез центр вылӥын верамезлэсь трослы уг висъяськы. Тазэ йылаз-пумаз вуттон понна 5 миллион манет коньдон кулэ луоз на, пе. Собере гуртоослы шедёз, кытын ваньмон дырзэс ортчытыны. Пусйыны кулэ, Июльское черкогурт пичи ӧвӧл. Татысь 630 дышетскисьёслы чаклам школа пиналъёсын быдэсак тырмытэмын. Гуртын вань асьсэлэн вукозы, нянь пыжонзы, бадӟым стадионзы. Июльское арлы быдэ студентъёс вуыло � татын СХА-лэн подсобной хозяйствоез интыяськемын. Вотка ёрос администрацилэн кивалтӥсез Владимир Варламов оскытэ, выль ӝутӥськись центр та черкогурт понна мултэс бадӟым уз луы шуыса. Собере татын, город сяна, ёрос центр ӧвӧл. Соин ик пӧртэм пумо бадӟым ужрадъёсты татын но ортчытъяно луоз ай. Туннэ куд-ог ужрадъёс радъяськыло Кварса черкогуртын. Кун Кенешлэн Тӧроез вуылӥз татчы но. Пусъём, Кварсаысь гурт культура центрлэн юртэз бадӟым ӧвӧл, ужало ке но татын пӧртэм кружокъёс, вань дискозал, библиотека. Библиотекаен ик тужгес тунсыкъяськиз Александр Волков. Шумпотоно, туала арын но лыдӟиськисьёслэн лыдзы уг кулэсмы: мӧйыос тунсыкъясько газет-журналъёсын, пичиос � нылпи литератураен. Бен, берлоосыз туж ӝог сузмо-быро. Тае лыдэ басьтыса, вылӥ кивалтӥсь ёросысь гурт библиотекаослы 25 сюрс манет коньдон висъян сярысь ивортӥз. (Вотка котырын таӵе библиотека 23 лыдъяське.) Тӥни озьы. Вотка ёрос ваньзэ лэсьтэ-тырше, визьмо кивоштӥсьёс будэтон понна. Азьланез шоры учке, уго быгатӥсь-валась егитъёс нокытын мултэс уз луэ. Районын ваньмыз сямен школаос дасесь 1-тӥ сентябрьлы. Пиналъёслэсь вуэмзэс чидатэк витё ни соос. Паймоно кадь, отысь дышетӥсьёс но ӝутскем мылкыдын, нокыӵе ӝожтӥськонъёстэк витё та нуналэз. Кварса школаысь одӥгез егит дышетӥсь серектӥз но ай, ӝоггес, пе, сӥзьылэд мед вуоз, эсьмаса, ужъёс куды тыр люкаськозы. Нош та вакытэ "куды тыр" ужъёссы люкаськемын Новый посёлоке интыяськем Корт но бетон поттонъя Кам заводын. Шутэтскон нуналъёсы но татысь ужасьёс тэк уг пуко. Уго лэсьтӥськон материалъёслы кулэяськисьёслэн лыдзы берло дыре шӧдскымон йылэ. Табере Удмуртие сяна, соослэн вузъёссы ӝог кошко вӧзысь Пермь улосвылэ, Башкирие. Нош шутэтскон нуналъёсы но уже потэмзылы татын ужасьёс уг ӝожтӥсько. � Кулэ бере, ужаськом, � вера Надежда Юферева, формовочной цехен кивалтӥсьлэн воштӥсез. � Со понна уждун дырыз дыръя басьтӥськом, берло дыре со кӧнялы ке тросгес но луиз. Магазинысь уждун чотын котькыӵе сиён-юон басьтыны луэ. Заводмылэн вань подсобной хозяйствоез, отын парсь будэтӥськом, вань ас музъеммы, теплицамы. Огсыр улӥськом, ужаськом. Кам заводын туннэ корт но бетон бордысен кутскыса полистеролозь потто. Районысь тросэз юртъёс табере ЖБИиК-лэн вузъёсыз чотын пуксё. Завод ужаны быгатэменыз ӟеч мылкыд кельтэ. Ӟеч мылкыд кельтӥз быдэсак Воткинск ёрос но. � Номырлы ум ёрмиське, � шуэ ёрос администрацилэн кивалтӥсез Владимир Варламов, � ваньзэ гинэ утёно вылэм, куашкатыны сётоно ӧвӧл. Йылпумъяса кӧня ке лыдпусъёс: Вотка ёрос 1 сюрс 92 квадрат иськем музъем вылэ интыяськемын. Уй паласен лымшорозь со 64 иськеме кыстӥське. Ог куиньмос пала муос татын нюлэсъёсын шобырскемын. Ёросын 24 но ӝыны сюрс улӥсез, со пӧлысь ог 50 процентэз ужаны быгатӥсен лыдъяське. Пенсиос но пособиос чотын улэ ог 6 сюрс адями. Воткинск котырын 10 промышленной предприятие, 76 автохозяйство, 17 гурт хозяйство, 19 АТС ужа. Тужгес уждуно лыдъясько транспортникъёс, ёрмысагес уло � дышетон, нюлэс но гурт хозяйство удысын тыршисьёс. Нош тодӥськоды-а? Аспӧртэмлыко улэ Новый посёлокысь калык. Та посёлок Воткинск-Чайковский сюреслэсь палэнынгес интыяськемын. Соин ик аспӧртэмлыко улэ Новый посёлокысь алык. Дырез со Пермь улосвылъя чота. Угось та посёлок Воткинсклэсь палэнынгес интыяськемын. Татысь ог 600 улӥсьёс нуналлы быдэ Чайковский городэ ветло. Э.КУМАЧЕВА. � ( ъ � у � р Т о Э л Я и � � q * q 8 q q > q Д q q О q э q � q @ q Д q � q � q Т q Я q а яя - �ь<ьг - ИА�.яя Ҥ6 ы Е ?Р Р И( ` а яяяя Тимес Неw Роман Цыр ХелветицаУЦД Вуж Мултан - Чуваш кылын Та сярысь ивортэ Чебоксарыын потӥсь "Республика" газет. Сое улӥын печатласьком. Кыдёке кылем 1892-тӥ арын быдэс азьмынӥсь Россиез бугыртӥз судебной уж, кудӥз ӝутэмын вал кӧня ке удмурт крестьянъёслы-"вотякъёслы" пумит. Историе со пыриз "Мултан уж" нимын. Та ужез юри пӧразы, малы ке шуоно,, ӟуч миссионеръёслы кулэ вал удмуртъёсты-язычникъёсты быдэс дунне азьын сьӧсьёс, убиръёс кадь возьматыны... Нош котьма ке но, зэмлык вормиз. "Идиотское мракобесие самодержавной власти" шуыса М. Горькийлэн кылыныз нимам уж 1896-тӥ арын дугдытэмын вал, нош удмуртъёс стража улысь мозмытэмын. Та шимес учыр сярысь вера аслаз "Вуж Мултан" романаз удмурт литературалэн классикез Михаил Петров. Книгаын паськыт возьматэмын со вакытысь удмуртъёслэн улэм-вылэмзы, аспӧртэм культуразы. Син азе пуксё пӧртэм адямиослэн сямъёссы, капчи ӧръяське мадён. Романлэн кылыз яркыт, чеберлыко, уже кутэмын калык кырӟанъёс, такмакъёс. Пусйыны кулэ созэ: Михаил Петров (1905-1955) "Вуж Мултан" романэз бордын ог 20 ар тыршыса но трос мукет произведениос гожъяса ӧз вунэтылы бускель республикаысь писательёсын кусып возён сярысь. Чуваш литераторъёслэн бадӟым эшсы вал со. Кылсярысь, редактор сямен бадӟым юрттэт сётӥз Алексей Афанасьев кылбурчиГ_лы, К. Ивановлэсь "Нарспи" поэмазэ 1930-тӥ арын удмурт кылэ берыктыкуз. Со юрттэмен ик удмурт лыдӟисьёс кие вуизы Александр Алгилэн "Шывырмань" ("Вуко") поэмаез, Петр Осиповлэн "Айдар" драмаез. Михаил Петров берыктӥз Педер Хузангайлэсь, Яков Ужайлэсь но мукет чуваш поэтъёслэсь кылбуръёссэс. Ваньзэ тае малпаса ик секыт берыктон уж борды кутскиз, дыр, Роза Петрова- Ахтимирова, кудӥз кема аръёссэ ужа ни Волга но Урал куспысь калыкъёслэсь литератураоссэс эскерон бордын. Со наукаосъя кандидат, Чуваш писательёслэн огазеяськонзылэн ёзчиез, И. Яковлев нимо огъя чуваш премилэн лауреатэз. Талэсь азьло Роза Николаевна чуваш кылэ берыктӥз но печатлаз трос мари но удмурт писательёслэсь гожъямъёссэс. Туж курадӟыса ке но, Р. Петрова-Ахтимирова Чебоксарыын быгатӥз поттыны удмурт литературая "Ошмесо шаерлэн крезьгуръёсыз" антология. Со но мукет ужъёсыз понна Роза Николаевналы сётэмын Удмурт Республикаысь культура удысын дано ужась ним. Табере тани, куинь ар ассэ жалятэк ужамез бере, чуваш кылын потӥз "Вуж Мултан" роман. Та уж мур малпаськыса, пыр-поч быдэстэмын. Тодосчиос пусъё, романлэн чуваш текстэз, ӟуч кылэ берыктэменыз ӵошатыса, трослы умойгес, удмурт кылын асэныз писателен гожтэмлы матын. Роза Петровалы-Ахтимировалы, берыктон бордын ужакуз, быгатэмезъя юрттӥз кылбурчи но журналист Георгий Ирхи, со ик берыктӥз романысь кылбуро чуръёсыз. Шӧдӥське, Удму Республикаын шӧдытэк ӧз кыле удмурт классиклэсь произведенизэ чуваш кылэ берыктэмез. Кылсярысь, тодмо гожъясь но тодосчи, филология наукаосъя доктор В. М. Ванюшев огаз статьяяз пусйиз, "Вуж Мултанэз" чуваш кылын поттон Россиысь кык литератураослэн эшъяськоназы выль выжез вӧлдэм кадь луэ шуыса. Вячеслав Кондратьев. Выль партия Та нуналъёсы Ижысь "Россия" кинотеатрын ортчиз "Единство" движенилэн городысь ёзэзлэн конференциез. Солэн кивалтӥсез Кун Кенешлэн депутатэз Сергей Беркутов вакчияк тодматӥз туала югдурен но Удмурт шаерын ортчоно съездэ делегатъёсты быръён сярысь ужпумез эскериз. Люкаськемъёс мылкыдзэс веразы движениез партилы пӧрмытон пумысен. Табере Ижын � "Единство" партилэн городысь ёзэз ужалоз. Кыӵе шӧмо-тусо со � либерально-консервативной, политикаысь бур кужымъёслы матын, со дыре ик шораз возиськись политикъёслы но дурбасьтэ. Партие огазеяськемъёс чаклало Россилэн Президентэзлэсь политиказэ ас интыосазы улонэ пыӵатыны. О.КОЖАНОВА. Футбол Выро-гопо Сюресэн ӵошатыны луоз туэ Ижысь "Газовиклэсь шудонъёссэ: я кужмо командаез куноын ворме, бӧрсьысь пумиськонэ лябезлы келя. Озьы луиз Читаын но Красноярскын. Бйкал сьӧрысь футболистъёс доразы очкоссэс уг ыштыло, соин ик "Газовиклэн" сое вормемез кӧня ке паймымон йӧтӥз. Лӧптэм мылкыдзэс буйгатыны Удмуртиысь спортсменъёс Красноярскын но ӧз пишмытэ ни. Соин ик шоро-куспо командалы 0:3 лыдын келязы. Бӧрсьысь кык пумиськонэз та дыре "Газовик" уг келлялля. Соин ик Сочиысь "Жемчужинаез" вормыны кулэ вал. Озьы ик луиз. 3:1 лыдын йылпумъяськиз таиз шудон. М. Кузьмин. Дарт Кызьы шутэтскод, озьы ужалод ... Нош ортче гужем. Но малпаськом, туэ со тӥ понна вунонтэм кылёз, озьы-а? Кудды ке тӥ табере студент луиды, кудды ке школае мыныны коньдон поттыны быгатӥды, городэ ветлӥды, лагерьын шутэтскиды... Нош соос туэ тӥ понна данак ужазы: "Шундыкар", "Патриот", "Пинал ужбергатӥсь", "Санта-Лингва", "Скаутъёс", "Шундыберган", "Вож тулкым", "Азьветлӥсь", "Эшъяськон" но трос-трос мукетъёсыз. Со сяна, нимысьтыз шутэтскон но ужан лагерьёс ужазы котькуд ёросысь школаосын. Туризмен эшъяськисьёс вал вылын Сибирь тракт кузя ортчизы, походъёсы ветлӥзы, нош тужгес чупресъёсыз но мыло-кыдоосыз асьсэлэсь быгатонлыкъёссэс "Горд вырйыл" слётын возьматӥзы. Нокыӵе зоро куазь но но ӧз люкеты соослы. Пусйыны кулэ "Долг" огазеяськонысь пиналъёсты. Соос Псков, Смоленск, Краснодар, Мурманск, Карелия улосвылъёсы экспедицие потазы. Инкуазез гажась пиналъёс но трос-тодон валан басьтӥзы, шутэтскизы. Соос понна туэ куинь лагерь ужаз. Ваньзэ та ужрадъёсты дасяз республикаысьтымы Егитъёсын ужанъя кун комитет. Но гужем ӧз быры на. Али шаерысьтымы городъёстӥ ортче "Кузьма аслыд улон" акция. Егитъёсын ужась психологъёс, наркологъёс, врачъёс, юристъёс, артистъёс, журналистъёс егитъёсын пумиськыло, концертъёс возьмато, визь-кенеш сёто. Та ужрад СПИД-эз, наркотикъёсты алонлы сӥземын. З. Вахрушева. Маке сярысь зулён Вал ни поэма, Вань ни роман... Нош мон историе маин кылём? Уд тодэлэ! Мон кылдытӥ выль жанр. Нимыз солэн � Зулён. *** Турлы сяськаос пӧлын Кудӥз меда чебергес? Турлы дусымъёс пӧлын Кудӥз меда мусогес? Турлы сяськаос пӧлысь Туж чеберзэ ишкалтӥ. Турлы дусымъёс пӧлысь Огезлы тужгес оски. Сяськае дантэм вылэм � Туж ӝог бездӥз но тӧлӟиз. Быръем нылы йӧнтэм вылэм � Сьӧр пиосын кушласькиз. А.УЛЯНОВ. Ляльшур гурт, Шаркан ёрос. Магнитофонын � наркотик Россия Федерациысь ФСБ-лэн республикаямы интыяськем ёзаз ужасьёс Ижевскысь чугун сюресэз чакласа возисьёсын ӵош ортчытӥзы Удмуртие наркотик вуттӥсь сюресъёсты пытсанъя нимысьтыз ужрад. Со дыръя ӝегатэмын Саратов палан улӥсь кык кузя наркотик вузасьёс. Нош вуэмын соос Москваысь. Куноосты эскерыку шедьтэмын 1,2 килограмм пала героин. Вуззэс "Шарп" стереомагнитофон пушкы ватӥллям. Та йыруж ласянь ӝутэмын уголовной уж. Наркотик вӧлмытэм понна вузчиосты возьма 15 арозь пытсэт сьӧрын улон. Россия Федерациысь ФСБ-лэн Удмурт Республикая управлениезлэн пресс-службаез. Сётэм кылзэс быдэстӥзы Завьялово районысь Азин нимо акционер огазеяськонын тыршисьёс ваньмызлэсь вазь быдэстӥзы нянь вузанъя чаклам планзэс. Ижысь кыкетӥ хлебоприёмной пунктэ соос 300 тонна интые 320 тонна ю-нянь вуттӥзы. Хозяйствоысь музъем ужасьёс 2200 гектар юос пӧлысь куиньмос люкетсэ утялтӥзы ни. Гектарлы быдэ 21,8 центнер ю тысь люкало. Огдыре казмаскаос юоссэс шерто-куасьто, кидыс кисьто, кын улэ гыро-кизё. Н. Иванов. "Удмурт дунне" вите тонэ! Шумпотыса ивортӥськом: республикаысьтымы почта ёзъёсын 1-тӥ сентябрьысен кутске "Удмурт дунне" газетлы 2001-тӥ ар понна гожтӥськон. Кызьы поттылӥмы ни, вуоно арын газетмы арняяз ньыль пол потоз. Вторнике но средае тӥ басьтоды огшоры номер, нош пятницае дорады вуоз телерадиопрограммаен кык полэс номер (пичи форматэн 16 бамен газет). Толэзьлэн нырысетӥ средаяз потоз "Твой дом и сад" приложение (со вуоз огшоры номер интые). Газетмылы таӵе гожтӥськон дунъёс тупатэмын: 127 манет 68 копейка - Тамында коньдон тырыса, тӥ ар ӵоже 200 номер басьтоды. Индексэз - 54400 108 манет 96 копейка - таиз дун тупатэмын пенсионеръёслы, студентъёслы, гуртын улӥсьёслы. Тӥ доры но вуоно арын 200 номер вуттозы. Индексэз 14402 49 манет 56 копейка - телепрограммаен "зӧк" номермес басьтоды ар ӵоже пятницаосы. Индексэз 54402. Валамон ни, гожтӥськыны луэ одӥг толэзьлы яке ӝыны арлы. Пятница номерлы толэзьем гожтӥськон ӧвӧл, сое басьтыны луэ яке палар ӵоже, яке арбыт гинэ. Гажано лыдӟисьёсмы! Дышем сямъя "Удмурт дунне" тӥ пӧлын нош ик шудытон радъяны малпа. Ош ласянь тодмо ӧвӧл на. Нош мотоцикл шеде ни кадь. Луозы мукет но кузьымъёс. Соиз сярысь ватсаса ивортом. Газетлэн редакциез. "Удмуртъёс ӧвӧл со � чувашъёс" Шубашкар � со Чеберкар. Тазьы шуимы ми Россиысь калыкъёслэн "Поволжьеысь ошмесъёс" фольклор фестивалязы "Эктон корка" ансамблен ӵош ветлэммы бере. Чувашъёслэсь шоркарзэс ӟучъёс юнме Чебоксары шуиллям. Солэсь кылдэмзэ, этимологизэ "чубук" кылын герӟаллям. Удмурт сямен ми сое Чеберкар нимамы. Ма, чувашъёслэн "чебер" кылзы но вань вылэм. Укыр кельшиз милемлы Шубашкарын: чувашъёс туж лякытэсь, асьыкесь, куно карыны быгатӥсесь. Городзы но синмаськымон: вож-вож садо, чылкыт, аспӧртэмлыко архитектураен, тужгес но центрез быгатыса лэсьтэмын. Уката мальдытӥсь каре на Волгалэн город пушкы пырем нырыз, сюмез (заливез). Архитекторъёс, городэз чебермасьёс ярдур котырзэс бордаз кыскись карыны быгатӥллям, праздник дыръя калык татчы лачак люкаське. Шубашкаре пырыку ик валано, кыӵе дуннее, кинъёс доры вуэмез. Отын но татын чуваш флаг, чуваш кылын гожъям транспарантъёс, чуваш дӥськутэн ныллэн суредэз. Уно чуваш геройёслы синпелетъёс (памятникъёс) пуктылэмын. Ваньмыз урам нимъёссы кык кылын гожтэмын, университетсылэн нимыз воксё чуваш кылын гинэ пусъемын. Мӧйыос но, покчиос но � лавкаосын, институтын, урамын � котькытын анай кылынызы верасько. Чуваш ансамбльёс ог 100 пала лыктэмын вал. Ваньзы выль чебер дӥськутэн, нылъёслэн йыразы уксёен чебермам такъя (тухья, огез но гольык йыр ӧвӧл, огезлэн но пыдазы кут ӧвӧл (азьвыл чувашъёс кутэн ветлэмын ке но). Мон тазьы чакласьки но таӵе малпанэ вуи: чувашъёс вирзыя шумеръёс но, тюркъёс но ӧвӧл, соос � финн-угоръёслы, удмуртъёслы матын, асьмемын одӥг выжыысь, одӥг дӥньысь соос. Мон юн оскисько: уло соос асьсэлэн вашкала музъем вылазы, чик но палэнысь лыктэмын ӧвӧл. Сцена вылысь удмуртъёсыз адӟемзы бере, чувашъёс шуо: � Удмуртъёс ӧвӧл со � чувашъёс. Зэм но, огъя кылъёсмы но пумиськыло (кылсярысь, соос но "тау", "кар" шуо), нылкышноослэн дӥськутъёссы но огвыллемесь, пужыоссы но тупало, сямзы но чувашъёслэн удмуртъёслэн кадь ик лякыт. Фестивальын сюлэсь уно ансамбльёс вал. Соос пӧлын тужгес но син шоры йӧтымонэз "Эктон корка". Сцена вылысен соос мальдытӥзы чебер куэм дэремъёсынызы но, пыдъёсынызы "кылбураменызы" но. Вӧзам пукись чуваш пи шуэ: � Ма, со нылъёстылэн пыдъёссы ик музъем вылэ уг йӧто кадь, тылобурдоос кадь поръяло. Зэм но, зол экто. Юнме шат концертэз нуись но микрофоназ черектӥз: � Браво, удмуртъёс! Ваньзэс паймытӥз арганчи Володя Куликов но. Со, арганэзлэн бирдыосыныз сяна, ритм кылдытыны быгатэ на ӵем-ӵем кыскаса, мехсэ ваче шуккытъяса. Нош чувашъёс "Эктон коркалы" синмаськизы но сьӧрысьтызы уг кылё, урамын ик нош но нош эктыны куро. Огез хореографсы отын ик кагазэ гожъя выросъёссэс, эктон суредзэс � бӧрысь асэстыны турттэ, дыр. Пумен калык лачак люкаське, кудӥз юалляське: � Поръёс-а, мар-а экто? � Удмуртъёс, � шуиськом. Уг оско. Удмуртъёсыз тодӥськом, таӵезэ ӧм адӟелэ, пе. Ми шуиськом: � Пӧртэм гуртъёстӥ ветлыса бичамын та эктонъёс. Тани кивалтӥсьсы Андрей Прокопьев. Аспирант со, удмурт эктонъёсыз люкаса, эскерыса, этнографияя диссертация гожтэ. Туж данъяськымон ансамбль та "Эктон корка". Уноез отын вылӥ дышетскем муртъёс, студентъёс. Асьсэды нокытын калык синмысь уг уськыто, вашкала культурамес вӧлмыто, Россиын но быдэс дунне вылын данмес ӝуто. "Эктон коркалэн" артистъёсыз лопыръяськись мылкыдын, кырӟаса, лӧптыса бертӥзы. Нош мынон азязы воксё вуёмизы, коньдон утчаса. Тужгес но "пӧсяно" луиз Татьяна Шкляева. Али соос тау каро Кун Кенешлэн Тӧроезлы А.А.Волковлы фестивале ветлыны аслаз фондысьтыз коньдон висъямез понна. Асьме дорын но та ансамблез сӥ-дан кароно, пӧртэм сямен юрттоно вылэм. Альберт РАЗИН, Удмурт культурая "Дэмен" огазеяськонлэн тӧроез. ? "Эктон корка" Шубашкар урамын. Утиськись муртэ Инмар но уте Туэ 8-тӥ августэ Москваын Пушкин площадь ултӥ потон-ветлонэз пуштытэм бере, со нуналэ ик Удмурт Правительстволэн юртаз террорен нюръяськонъя комиссия люкаськылӥз. Кӧня ке нунал ортчыса, Правительстволэн Тӧроез распоряжение дасяз. Ужпум тазьы пуктэмын вал: кышкыт учыръёсты алон вылысь нимысьтыз ужрадъёс чаклано, та ласянь юнматэмын вал кыл кутӥсь адямиос но. Берло нуналъёсы Граждан оборона ужпумъёсъя но кышкыт учыръёсъя комитетын, Югдурез утёнъя министерствоын, Прокуратураын ужасьёс Ижысь тужгес кышкыт 26 интые вуылӥзы, 7 дискотекаез эскеризы. Уно тырмымтэосты шараязы рейдэ потэмъёс. Янгыше уськытэм кивалтӥсьёслы косэмын югдурез ӝегатскытэк тупатыны. Граждан оборона ужпумъёсъя но кышкыт учыръёсъя комитет ивортэмъя. Вунонтэм гужем Пеледыш пайрем Туэ гужем, сяськаяськон вакытэ, Марий Элысь культурая министерстволэн ӧтемезъя, Ижысь кырӟанъя но эктонъя "Ош пеледыш" ("Тӧдьы сяська") пор ансамбль бускель республикае ас выжыоссы доры ветлӥз. Пор культура ласянь маке со йӧндырисько шуыса, монэ но сьӧразы басьтӥзы. Нырысь ик Мари-Арбор гуртэ пыримы. Вазьгес вуэменымы, кӧня ке эли-кеби луизы. Собере ини, чебересь дӥсьёсын пӧрмытскыса, куно пумитан гурзэс кырӟаса, сылалэн нянен пумитазы. Ас улэм-вылэменызы тодматӥзы. Школазылэн аслаз бусыез вылэм. Трактор-машинаез но аслаз. Трос пудо вордо. Пиналъёсты сюдыны йӧлзы-вӧйзы, сӥльзы тырмыт. Бакча сиёнлы но, пе, ум ёрмиське. Мыле на вузаны. Школалэн мастерскояз пу но корт вӧлон станокъёс пуктылэмын. Нылъёслэназ тямыс вуриськон машина. Вань киын, пыдын бергатоноосыз но, электрическоез но. Борддоръёсы тыремын пиналъёслэсь ужаны но шутэтскыны быгатэмзэс возьматӥсь туспуктэмъёс. Мылкыдэз куашкатэ соиз гинэ: школазы но интернатсы укыр вуж ини, пулэсь. Городын будэм, дышетскем егит педагоглы татын ужаны мӧзмыт, дыр, потысал. Клубзы но вуж. Педласянь пичи кадь адске, нош пушкыз вӧл-вӧл. Сценазы но ӟоскыт ӧвӧл, только югытэз ичигес. Шугъяськиськом вал, концертэ калык ӧжыт лыктэ шуыса. Кӧня ке дыр ортчыса, залэ тыраз люкаськизы. Зыл-зыл шуккиське сцена вылын пор гур. Кема кичабонъёсын келяло асьме артистъёсты. Кырӟан гурез воштэ эктон гур. Таосты но видеокамерае шукко. Концерт бырем бере, ог-огзылы кузьымъёс-синпельёс кузьмазы. Тау карон кылъёс веразы. Собере ини огъя шулдыръяськон кутскиз. Асьсэлэн мызганчизы (арганчизы), асьсэлэн кырӟасьёссы. Асьмелэн но крезьчиос бордазы итӥсько. Мон барабан кутыса шудӥсько. Оло, быдэс борддоръёс зуркало эктон крезьгуръя. Быдэс ӝӧквыл тыр сиён-юонэн возьмаллям милемыз. Маиз гинэ ӧвӧл. Асьсэос куноятон кырӟанъёсынызы шулдырто. Татын ик � пӧртэм удысысь кивалтӥсьёс. Котькудӥз милемлы ӟеч кылъёс вера. Мызганчизы но кырӟасьёссы вуизы на. Эх, лэзё ук крезьгурзэс. Эктыкузы оло тыл потэ выж вылысь. Выжзы кафелен но, ну, малпасько, таос пилиськылытэк уз кыле... Шуак эктон гур чалме. Соку ик кутске мукетыз. Табере ини мугорзэс, кизэс лэйкыт, ву тулкым кадь выретыса, ас котыртӥзы поръяло. Нош ик кисьтӥське крезьгур � переливчатой пентатоникая перебор. Собере � ӝоггес но ӝоггес. Малпасько, быгатод меда та гурез нотае гожтыны, нош гожтӥд ке, быгатод-а шудыны. Поръёслэн кырӟанзы но аспӧртэмлыко вылэм. Кыӵе ке но лирической сопрано куаразы. Кырӟаса эктыкузы пель пыр ик потэ. Кытысь меда собыдӟа куара потэ? Нырысь малпай, татын гинэ озьы. Йошкар-Олаын но со выллем кырӟало вылэм. Ӵуказеяз ньыль часэ ӵукна султӥмы. Автобусэ пуксем бере, кытын ке но чир-чир кырӟам куара кылӥське. Кин, пӧй, озьы вазь ӵукна ик кырӟа. Шуизы: милемыз озьы нылкышноос сюрес вылэ келяло. Тумошо соиз но. Мурт бере мурт ини. Флейтаен но пор крезьгур шудӥ, барабанэн но пӧрмытӥ кадь, эктонэн но сьӧрысьтызы ӧй кыльы � но сёровно юано кариськиллям: та, пе, пор ӧвӧл, дыр. Тусбуйын порлы уг кельшы. Удмурт, пе, со... Йӧшкар-Олае вуимы ӵукнанян (сиськон) вакыт. Асьмелэн Гербер праздник ке, поръёслэн луэ вылэм Пеледыш пайрем (Сяська праздник). Культурая министрество юрт вӧзын кӧня калык... Вань чувашъёс, эстонъёс, Мари-Турекысь удмуртъёс. Ижевскысь "Ош пеледыш" ансамбль. Эшшо ньыль мурт Мари-Возжайысь. Кураторъёслэн киосазы � кытысь лыктэмез возьматӥсь пулъёс. Чурен вырӟимы ульча кузя, кин кырӟаса, кин эктыса. Огезлэсь огез чебересь дӥсьёсын. Нылкышноос но пиос � йыркышетъёсын. Пӧртэмесь соос. Тужгес но аспӧртэм дӥсьёссы Сернур но Моркино ёросъёсысь лыктэмъёслэн. Нылкышноослэн кускерттонъёсазы пиштӥсь тянькаос чорыг сьӧм кадь вурылэмын. Дуртӥз векчи жильыос, пумаз инӟыос, кораллъёс бырттылэмын. Векчи коньдон ошылэмын на. Ветлыкузы чиль-дол пиштэ, жильк шуккиськылэ. Гадь вылтӥзы но чурен азвесь коньдон. Кинлэн уксё тӥрлыкез ӧвӧл, муресазез быдэсак инӟыен пужыятэмын. Вылтӥз эшшо пӧртэм инӟыосын пужыятыса, гадь вылазы шыркама ошемын. Соос шоры учкыса, Пьяноборской культурае вуи кадь потӥсько. Одӥг пор муртэз но колошаен яке кутэн ӧй адӟы � тӧдьы яке горд ку сапегъёсын. Комсомольской ульча кузя мыныку, калыкъёс сюрес урдсын сылыса учко. Кудӥз чабкиськыса кыле паймеменыз. Поръёслэн йырзы выллань ӝутэмын, гадьёссы азьлань мычемын. Вуимы драмая кун театр доры. Таослэн туж бадӟым вылэм искусствоя храмзы. Котькудӥз коллектив куинь-вить минут театр азьын ассэ возьматӥз. Собере шутэтскон паркын праздник вал на. Ӝыт пал Иже вырӟимы ни. Монэ паймытӥз Йошкар-Олалэн чылкытлыкез, ӵошкытэсь ульчаос. Собере сюрес кузя, гуртъёс вадьсы, кылё чебересь автобус дугдылон интыос. Ваньзы соос асьмелэн сярысь куинь-ньыль пол бадӟымесь. Ваньмыз ик кирпичлэсь пуктылэмын, быдэсак мозаикаен чебермамын. Тросэтӥ луоё музъем, паш-паш пужым будэ. Асьмелэн нюлэс но корамын, ю- нянь но сыӵе азьын уг буды. Собере ушъяськон сяммы но ворме: удмуртъёс ужасесь, удмуртъёс гинэ кырӟасесь, эктӥсесь. Эш утчаськом кунгож сьӧрысь, комиосты, Волга котырысь "финнъёсты" вунэтӥськом. Матысь калыкен ик шулдыргес, дыр, улыны. Г.НАГОВИЦЫНА, Ижын улӥсь. Чураын � турын, Дондыкарын � помидор Глаз ёросысь унояз школаосын асьсэлэн машина-тракторзы, гырон-кизён агрегатъёссы вань, эштосъёс-колхозъёс соослы музъем висъяло. Тани Дондыкар школаын сизьым гектар вылын пӧртэм емышъёс будэто. Со сяна, кунянъёсты, скалъёсты возё, теплицаосазы огреч, помидор но мукет бакча сиёнъёс кисьмало. Кожиль школаын бадӟымгес саклык висъяло кубиста но картофка будэтонлы. Музъемзы но татын 10 гектар пала. Парзи школаын курегъёсты вордо, нош Чураын пайдазэ адӟо турын будэтонлэсь. Куреггуртысь пиналъёс но гужемзэ уг мӧзмо: емышъёс вылэ ву киськало, урисько, муэз небӟыто. Туэ соос узы бичазы, варення пӧзтӥзы. Озьы ужаса-пӧсяса, толалтэ школаосын дунтэм сиськыны луэ. Нош сӥлен-йӧлын хозяйствоос но юртто. С.ПЕТРОВ. Дарт Ворекъятӥсь кизилиос Шӧдись сюлэм эшез солэн ... Скамья вылын пуке пичигес мугоро мусо нылаш. Маке туж чиньыоссэ посэ, эсьмаса, ӵыж-ӵыж луиллям ини. Йырсиез люкетэмен, ымнырзэ тодманы ӧй быгаты. Кин со? Оло, маке луэм-а? Дораз кожано кариськи. ... Озьы со нуналэ мон шедьтӥ аслым выль эш. Ваньмыз кадь ӧвӧл Таня. Мукетгес. Гитараеныз шудыса-шудыса, чиньыосыз жадиллям но соин посыса пуке вылэм. Эстрада отрядэ сюриз бере, гижысь-пиньысь ик тыршоно луэ ини: куарадэ но ӝог пуктыны быгатоно, кылъёссэ но йырад кельтоно. Ма, ӧжыт шат ужез?! Ой, секыт ик, дыр, кизилиослы. Таня Романова пичиысен эшъяське ни крезьгурен. Быгатэ гитараен, фортепианоен шудыны. Та быгатонлыкъёсызлы луыса ик, усточиослэн "Шундыкар" лагерязы но вуиз. Таняез, мон "Шундылэн" зэмос фанаткаез шуысал. Кыӵе гинэ конкурсъёс уг ортчытъя та огазеяськон, котькудаз пыриське, вормисе потэ. Ма карод, сыӵе со ваньмыз солы тунсыко та сямызлы луыса ик, дыр, чылкак ӟуч нылаш дышиз удмурт кыллы но. Соин вераськонмес но кутски юанэным: - Кыӵе меда ӟуч нылашлэн удмурт егитъёсын кусыпъёсыз? - Мынам эшъёсы туж трос: ӟучъёс, бигеръёс, удмуртъёс. Но сюлэмы кыске удмуртъёсыз бордыгес. Соос туж сюлэмез, мылкыдэз шӧдыны быгатӥсесь. Озьы кулэ дыръяз юртто, буйгато. - Кызьы малпаськод, мар уг тырмы егитъёслы, асьсэлэсь малпанъёссэс быдэстон понна? - Шаплы луон. Кышкано ӧвӧл азяды пуктэм ужпумъёслэсь. Уг ке но пӧрмы, ӝожтӥськонлэсь палэнтӥськоно. Тыршид ке, вань малпанъёсты улонады пыӵалозы. _ Нош аслад кытысь меда таӵе капчи мылкыдыд? - Пичи дырысеным ик мон туж шаплы, вераськись вал. Учкыса уг улӥськы: огшоры ужась-а со яке тодмо адями-а. Ваньмыныз тодматскеме потэ. Эшъёсы но монэ коньы шуо. Ӝыт сцена вылын кырӟакуз, мон Таня шоры туж шумпотыса учки. Кужмо кичабонъёсын пумитазы но келязы сое сцена вылысь. Таня шедьтӥз нырысь кылзӥсьёссэ. Пумитало дӥсья Ӵукна университетэ мыныкум, тодмоме пумитай. Кыл бӧрсьы кыл потӥз. - Туала вакытэ вылад чебер дӥсед ке ӧз луы, эн ик малпа чебер нылашез ас палад берыктод шуыса, - ӝожке Сергей. Ӵукналы быдэ йыр висе: мар ай туннэ дӥсялом: таиныз толон ветлӥ, таиныз - валлян, бускельёсылэсь но шогользэгес дӥсьсэс курай ни... Ай соос но али "визьмаськизы" ни, дӥсьсэс коньдон тырыса гинэ сётъяло на. Нош плейер, кассета, видеокамера сярысь ке, таосызлы дунъёс эшшо вылынгес. Тӥни сыӵе аспӧртэмлыко "прокат". - Малпаськод, нылъёс пӧлын сыӵе сюлмаськонъёс ӧвӧл-а? - Ой, ӧйтӧд. Сыӵе малпан кылдэ, нылъёс кутэтысь потэмзы бере ик узырлык сярысь малпаськыны ктско шуыса. Нош тӥ кызьы малпаськоды, лыдӟись эшъёсы? Ойдолэ кенешом та пумысен. О. Никитина, Удмурт университетын дышетскись. Ӝужалоз чебер узьымед Музон ёросъёсын сямен ик Сюмси палан но музъем ужасьёс та вакытэ тэк уг уло. Ужъёс тужгес ӟеч радъясько "Уж" ("Труд" эштосын солэн кивалтӥсез Иван Владимиров палэнысь юрттӥсьёсты ноку уг витьы: котьма лэсьтэ ас кужыменыз. Со сяна, соин котьку артэ чупрес эшъёсыз. "Уж" эштосын ӟег быдэсак утялтэмын ни (зэм, пӧртэм мугъёсын сэрен, гектарысьтыз куинь центнер гинэ люкаськиз со). Та вакытэ комбайнёръёс сезьыез утялто. Музъем ужасьёс огдыре ик сюлмасько ини вуоно ар сярысь: Иван Владимиров но солэн эшъёсыз али ӟег кизё. Муэ усем ю сӥзьыл ик ини чебер вож узьымлы пӧрмоз. Ас удысазы чупрес тыршо механизатор Леонид Иванов, кизисьёс Юрий Мартынов, Анатолий Пантюхин. Музъем ужлэсь курытсэ- кузьытсэ али ик ини шӧдыны-валаны сюлмаське вуоно агроном Елена Соловьева. Сюмси ёросысь "Уж" эштосысь адямиос сютэм уз кыле - музъем ужъёс ӟеч ӧръясько. Владимир Беломорскихлэн туспуктэмъёсыз. Пушнерен но эмезен Шарканысь заготконтора туэ вазиськиз вал ёросысь школаослы эмъюм будосъёсты но пӧртэм емышъёсты бичан-люкан сярысь. Тазалыкез юнматӥсь турын-куар октыны мылкыд каризы Мишкиноысь, Карсашурысь, Зюзиноысь школаосын дышетскисьёс. Соос пушнер, бакакуар, лултурын (чистотел) дасязы. Школа-интернатысь пиналъёс кызьпу пучыос люкаса сётӥзы. Заготконторае умоен мынэ пыштурын, эмезь, сусыпу мульы, льӧм. Ӝоген кисьмалозы палэзь но легезьмульы. П.АНТОНОВ. ГАЗЕТ ГОЖЪЯЗ ВАЛ "Яраты монэ гинэ!" гожтэт пумысен малпан Тон мыным синазькыль но, жаль но... Оля, тодӥськод-а, та гожтэттэ лыдӟеме бере ик мон тонэ адӟонтэм кари. Шонерзэ вера ай, гажало на-а тонэ эшъёсыд, тодмоосыд? Олокӧня пол лыдӟи гожтэттэ, но нокызьы но валаны ӧй быгаты, мар вераны турттӥськод. Оля, ачид но валаськод-а, макем тон синазькыль луэмын ни яратоно адямиедлы? Зэм но, мыным Алёша туж жаль йӧтӥз. Мон уг малпаськы вал, пиосын озьы шудыны луэ шуыса. Собере, шӧдске, Алёшаед но ляб лул. Со интыын мон тонэ куштысал ни, шорад но ӧй учкысал. Тон астэ али шудоен лыдъяськод, нош Алёша? Ирина? Соослэн мар сюлмазы? Кыӵе соослэн улонзы, одӥг пол ке но малпаськид-а ни тон? Тон кадь адямиосты ӟучъёс эгоист шуо. Мед луысал мон Ирина интыын, возьматысал тыныд! Туж жаль потӥськод тон мыным, Оля. Зэмзэ ке верано, тон ведь туж шудтэм, малы ке шуоно, Алёша тонэ уг яраты, тон солы уд но кельшиськы, эшъёсыд но тынэсьтыд палэнскемын кадь потэ. Али ке ӧвӧл, озьыен, ӝоген соос тонэ куштозы. Соос ведь адӟо, валало, кыӵе адями тон. Али ке визьмаськыны ӧз туртты, тон чылкак огнад кылёд, нокинлы но кулэ уд ни луы. Алёша сяна, мукет пиос ӧвӧл ни шат? Асьмеос одӥг ёросын улӥськом, оло нош мон тодӥсько но тонэ. Мынам туж потэ вал тонэ адӟеме, вераськеме, маин ке юрттэме. Оло нош ачид ик шедьтод монэ, гожты. Света МИХАЙЛОВА. Алнаш ёрос, Сьӧд Ошмес гурт. ДАРТ Фу, мырдэм но кызьы быризы, лэся, чыртыозь вуэм экзаменъёс. Шонер ик верало вылэм � студент дышетскыны кутске сессия дыръя гинэ. Толалтэ чидалод ик ай, нош гужемзэ... Гужемзэ вӧсяськыны гинэ кыле на. Котькуд студент оске аслаз инмарезлы. Тани кык нылашъёслэн вань асьсэлэн кужымзы. Та писпу соослы шуд кузьма, пе. Экзаменлы со улын дасясько. Мукет ныллэн экзаменъёсы сьӧраз Египетысь, Хеопс пирамида дорысь ваем из нуллэ. Со, пе, дӥсьтонлык сётэ. Пиос таӵе амалъёсын вырыны уг ярато. Соослы зэмос юрттӥсь луэ "бомба", студент кылысь берыктыса � шпаргалка. Нош Люба эшелэн чиньыосаз пӧртэм пумо зундэсъёс ворекъяло. Яшмалэсез яратонын юрттэ, бирюза йырез ужатэ, шуд сётэ. Озьы, аслым но тунсыко потыса, дэмлам амалъёссэ уже кутыны чаклай. Но йырад ырак тӧл ке, номыр уг юртты вылэм. О.НИКИТИНА, Удмурт университетын дышетскись. Дарт Эшкар Одӥг бадӟым шунды сярысь Ӵок, кылдэмын ке пересьмыны - Инкуазь ваньмызлы ачиз кузё. Но ми усьтӥськом выль даурез. Ми - вунонтэм поколение. Озьы кутскиз Дуннеысь финн-угор пиналъёслэн ВИ слётсы. Куатетӥзэ люкаськизы ни визьмо пинал удмуртъёс, поръёс, мордваос, комиос финн-угоръёслэсь туала ужпумъёссэс сэрттыны-пертчыны, вуонозэ кылдытыны. Бен, бен, выль даурысь финн- угор дуннелы проект дасязы таяз учыре слётэ пыриськемъёс. Кыӵе со луыны кулэ? Адямилыко. Котькуд адями ассэ эрико мед шӧдоз, аслэсьтыз дунзэ, ӵошатонтэм луэмзэ мед валалоз, мукет адямиос, калыкъёс ласянь ултӥямез медаз шӧды. 15-17 аресъем пиналъёслэн калыксылэн улэм-вылэмез, азинскемез пумысен умой-умой шугъяськемзы шӧдӥське, соос рос-прос ӵекто асьсэлэсь малпанъёссэс, тодмосто быдэстоно ужпумъёссэс. Конечно, картаын ӧвӧл финн-угор дунне, но со луыны кулэ йырамы, сюлэмамы. Нош нимаз удмуртъёс, нимаз поръёс номыр шӧдскымонзэ лэсьтыны уз быгатэ. Со тылсиос выллем: одӥг тылси шуныт, нош шунды - пӧсьгес. "Калык висён" вормемын Но выль дауре пырон понна, адями нырысь ик ассэ валаны кулэ: кин-о со, кытысь- о? Калыкезлэсь кыӵе дунъетъёссэ, узырлыксэ ӵектоз со выль дуннелы? Сое тодон понна, огласянь, Сыктывкарысь Иже, оло, ветлонэз но ӧй вал, библиотекае мын но лыдӟы. Но таӵе ужрадын, со борды ӝабырскыса пиналлэн мылкыдыз уг кысы ни, со ялан выльзэ утча. Асьмелы будэтоно выль тодосчиосты, эскерисьёсты, калыксэс гажась визьмо адямиосты. Соин ик таӵе слёт юрттэ соосты вордыны. Пӧртэм улосъёсысь егит финн-угоръёс куспазы вераськыса гинэ тани вакчи дыр ӵоже калыкъёсмылэн улонысьтызы трос огкадьзэ но пӧртэмзэ шараязы. Нырысь ик асьмелэн мар? Сиён-юон медло, озьы-а? Та группае люкаськем пиналъёс вашкалаосмылэн трос ческыт сиён-юонэнызы гочатӥзы. Тросэз финн-угоръёс табань, перепеч сиё (со, пе, шунды пус - котырес). Нош гырон-кизён ужъёсты быдтэм бере, огазе люкаськыса, зумыт ӝук сиё вылэм. Таиныз ини быдэс лагерез куноятӥзы пинал пӧрасьёс. Ваньмыз вашкалаосмылэн кадь ик вал: возь выл но, ӝук но, куриськон- вӧсяськон но. Эсьма, куриськемзы бере, пилем сьӧрысь Шунды потӥз - иське, вань ӝук сиёнлэн кужымез. Ӝук ческыт ке, сиськыку туж ик вераськем но уг поты кадь, но со сяна но уж трос. Нош кызьы соосты лэсьтод, ог-огедлэсь вераськемзэ ке ӧд вала? - Тодэ ваёно вашкалаосмылэсь кылзэс - шуизы кылчиос. - Куке но соос ӵош улӥзы ук, вераськоназы трос огкадез луыны кулэ. Зэмзэ но данак тупась кылъёсты шедьтӥзы асьсэлэн вераськонысьтызы финн-угор пиналъёс. Вуоно слётозь со кыллюкамзэс зӧкомытыны вераськизы. Кыл тупа, сям ке огъя. Озьы ик вань: ваньмыз асьмеос зӥбытэсь, чидасесь, ужасесь, куно пумитаны яратӥсесь вылӥськеммы. Возьдаськон сямез вераны вунэтӥ-а? Ӧй, но вунэтысалмы ке, умойгес луысал, дыр. Та ласянь слётын ужась психологъёс нимысьтыз анкета ортчытӥзы. Асьсэды дӥсьтӥсьтэм, возьдаськись шуизы 35 процентэз гинэ пиналъёс. Озьыен, огзэ "калык висёнмес" ӝоген вормом. Кыӵе тон финн яке угор, кырӟам-эктэмед ке уг луы. Огшоры куасалляськоно ӧвӧл, тыбырез шонер возёно, капчи, тэтчатэк эктоно. Кырӟанъёс - муресь, малпаськытӥсесь вылӥллям. Йылолъёсын но вань, дыр, трос огкадез. Но пиналъёслы тунсыко потӥз сюан йылол. Мар бен, 18 арес гурезьёс сьӧрын ӧвӧл ни. Ми - асьмеос! Слётлэн шорсюлэмыз - научно-практической конференция. Ӵапак со бордысен кутскизы вал куать ар талэсь азьло Ижевскысь Гуманитарной лицейысь дышетскисьёс. Озьы тӥни, куатетӥ арзэ соос конференцилэн но, слётлэн но кичӧлтӥсьёсыз луо. Куамынлэсь ятыр тунсыко докладъёс чузъяськизы таяз конференциын. Секциосын кивалтӥзы туж гажано тодосчиос: Удмурт кун университетысь биология наукаосъя доктор, профессор Виктор Туганаев, филологияя наукаосъя доктор Татьяна Владыкина, история наукаосъя кандидат Елена Трофимова. Вань ужъёс туж тунсыкоесь, мур пуштросъемесь, творческоесь, пусйизы тодосчиос. Таяз шӧдӥське ни пиналъёслэн утчаськемзы, темазы бордын мургес бугыръяськемзы. Паймытӥз Комиысь Маргарита Фильевая. Со эскерем песятаезлэсь фронтысь ыстэм гожтэтсэ. Нылашез паймытӥллям аспӧртэм букваосыз. Эскерыса со тодэ: зэмзэ но сыӵе алфавитъя комиос гожъясько вылэм 20-30-тӥ аръёсы. (Молодцовлэн алфавитэз). Но рос-прос научной уж кылдытон понна, кулэ тросгес дышетон пособиос, индылӥсьёс-дышетӥсьёс. Пиналъёс ас понназы тыршо. - Но со огласянь умой. Асьмеос дышим ини пиналъёсмылы ваньзэ кушаса сётыны, сьӧразы ветлыны-бызьылыны, косъяськыны. Нош туннэ соос асьмелы возьматӥзы ас кожазы улыны, кулэ ужрадъёс кутыны быгатэмзэс, - шуэ Коми пиналъёслэн кивалтӥсьсы. - Учке ай, асьмелы (мӧйыослы) быдэс Слёт ӵоже кыл но уг сёто, пиналъёс ваньзэ асьсэос лэсьто - со понна туж шумпотоно. Генийёс бен конференциын ӧз шараяське, но ӟечен пусйизы тросэзлэсь удмурт пиналъёслэсь но ужъёссэс. Соос пӧлын Татьяна Кокорина, Екатерина Щепина, Людмила Петрова, Ольга Цыкова, Ольга Урасинова, Юлия Иванова, Алина Ремнякова, Ирина Ходырева но мукетъёс. Таӵеез ӧй вал на Малпан кылдӥз шуак, котырес ӝӧк сьӧрын вераськыку. - Мар толыкез асьмелэсь сюлмаськонъёсмес, "висёнъёсмес" утчаммылэн? - шуизы асьсэос пиналъёс. - Ваньмыз йылпумъяське таӵе кенешъёсын вераськеменымы, ужмес азинтоно слёъёс вискын. Кылем арын таӵе ик малпанэ вуыса ӵектӥзы вал Интернет пыр кусып возьыны. Йӧскадь ӧз пӧрмы. Иське, утчано выль амалъёс. Кичӧлтӥсь группа ӵектӥз - кыдытоно парламент. Со ик радъялоз слётъёс вискын ужез. Куинь партия: "Коз пу" (инкуазез утисьёс), "Вуоно даурысь школа" но "Дыр машина" зэмос быръёнъёс дыръя сямен ик асьсэлэн программаосынызы тодматӥзы. Кутскиз нюръяськон. Бырйисьёсты ӝутканын тужгес висъяськиз "Дыр машина": калыкен пумиськылонъёс, эчешонъёс, дискотека, бордгазет. Валамон, быръёнъёсын соос ик вормисе потӥзы. Азьветлӥсьсы Светлана Едыгарова ик (Удмурт университетысь студентка) луиз Парламентлэн Тӧроез. Нош ӝытазеяз шаерысьтымы кивалтӥсьёс азьын со мадиз ни быдэстоно ужъёссы, малпанъёссы сярысь. Сыӵе дӥсьтӥсь луэменыз Светланаез ӟечкыланы кулэ, малпасько: асьме пӧлысь тросэз-а куронъёс пуктылыны быгатӥз ни Россиысь Кун Думалэн депутатэз, Республикаысьтымы Кун Кивалтэтлэн аппаратаз, министерствоосын ужасьёс азе? Соин ик оскон кылдэ, таӵе чупрес, визьмо нылаш ас сьӧраз мукетъёссэ но кыскыны быгатоз, уж зэмзэ усто радъяськоз шуыса. Уж - кион ӧвӧл... Мукетъёсыныз ӵошатыса, таиз слёт укыр "визьмо" (интеллектуальной) пӧрмиз. Докладъёс, эчешонъёс, лекциос, мастерскойёс... Валамон, слётлэн ужаз нырысьсэ пыриськемъёс понна секыт йӧтӥз. Соин чидатэк витьылӥзы ӝытэз. Ма ӝытазе? Дискотека, тодматскон, пумиськон. Сотэк кызьы? Ялан визез бугыръяса, укыр вазь кандидат луод, нош синмаськонэз валаллятэк кылёд. Вераськиськом ук асьмеос вань финн-угоръёс огазеяськон сярысь. Тани удмурт Оля (фамилизэ ватӥз) синмаськем Мордовиысь Алёша Чемуденковлы. Алёша тунсыко пияш: шаплы, визьмо, кылбур гожъя, чебер эктэ, Но вераны, пе, уг дӥсьтӥськы, соин ик почта ящике гожтэт куштӥ. Тӥни озьы - улӟытоно ке, ваньзэ. З. Рябинина. Слётэз радъясьёс тау каремзэс верало Удмурт Республикаысь Нациосын ужан политикая, Калыкез дышетонъя министерствоослы, Егитъёсын ужанъя комитетлы, Наукая, вылӥ но шор ёзо профессилы дышетонъя комитетлы, финн-угор егитъёслэн ассоциацизылы, финн-угор студентъёслы юрттонъя фондлы (Хельсинки) но шаерысьтымы Почта кусыпъёсъя управленилы. Саранск возьма эшъёссэ Йошкар-Ола, Эспо, Эгер, Лохусалу, Сыктывкар. Финн-угор кунъёсысь таӵе городъёсын вал ни гожъяськон кылзыя, выжызыя ог-огзылы матын луись писательёслэн пумиськонъёссы. Таӵе ӧтчамъёс кык ар куспатыса луыло. Туэ финн- угор писательёслэн конгрессы люкаське Мордовилэн шоркараз 23-тӥ-26-тӥ августэ. Со сӥземын луоз вынлыко республикаосысь школаосын литератураез дышетон ужпумъёслы. Саранске мынозы Россиысь Писательёслэн огазеяськоназы пырись эшъёсмы Фома Ермаков, Вениамин Ившин, Виктор Шибанов, Татьяна Чернова но нациосын ужанъя министр Николай Мусалимов. Т. Николаева. Адямиос ву пыдсын на Ву пыдсытӥ уясь "Курск" атом лодка Баренцево зарезьын ортчись учениос дыръя 12-тӥ августэ ӝытазе радиосигналъёс сётъямысь дугдӥз. Ӝыны минут ортчыса тревога ялэмын вал. Со дырысен дасэтӥ нуналзэ ни выем лодкаысь адямиосты мозмытонъя ужъёс мыно. Но татчыозь лодкае пырыны луонлыкъёс ӧй вал. Юрттыны басьтӥськизы Норвегиысь водолазъёс. Толон ӵукна одӥгез соос пӧлысь аварийной люкез усьтыны пӧрмытӥз. Шлюзовой камераын вуэз ӧй вал. Ӧз адӟиське адямиосыз но. Табере мукетыз уж кутскоз � 9-тӥ отсеке пырыны тыршон. Северной флотэн кивалтӥсь адмирал Вячеслав Попов ас малпанзэ вераз, 9-тӥ отсек вуэн басьтэмын, дыр, шуыса. Туннэ-ӵуказе тодмо луоз ни, вань на-а лодкаын улэп адямиос. Лодка выем интые толон вуиз на Норвегиысь "Норманд-пионер" корабль. Со ваиз Англиын лэсьтэм ву пыдсы лэзьяськись ЛР-5 лодкаез. Басьтэмын Интернет пыр. ПОЛИТИКА Арня ӵоже дуннеын, странаын, шаерын Быдэс дунне берло нуналъёсы чакласа улӥз: юрттыны быгатӥзы-а ӟучъёс секыт югдуре шедем "Курск" подлодкалы. Ортчем арнялэн нырысетӥ нуналъёсаз Военно-Морской Флотэн кивалтӥсьёс оскытӥзы, милям, пе, морякъёсмес мозмытыны кужыммы тырмоз. Атомоход выемлэсь мугъёссэ но бервылъёссэ эскерыны Правительство нимысьтыз комиссия кылдытӥз. Ивор вӧлмытӥсь ёзъёс часлы быдэ сямен вераллязы, кыӵе ужъёс мыно Баренцево зарезьын. Но... арня пайдатэм ортчиз. Таин валче юанъёс кылдо. "Курск" сярысь тодэмзы бере ик уно кунъёс, кылсярысь, Англия, США, Франция, Норвегия юрттыны мылкыд каризы, нош асьмелэнъёс пумит луизы � малы? Малы уно нуналъёс ӵоже куаразэ ӧз поттылы Россилэн Президентэз Владимир Путин. Бен, "Курск" выллем атомоходъёс дунне вылын ӧвӧл ни, военнойёслэн сое муртъёслы возьматэмзы ӧз поты, шӧдске. Нош адямилэн улонэзлэсь дуно вань на шат маке та дунне вылын. Жаль, югдур нош ик возьматӥз странамылэсь лябӟемзэ. Табере оскон кылиз на Великобританиысь но Норвегиысь вуэм специалистъёслы. Экипажысь 118 мурт пӧлысь, оло, кин ке улэп на. Баренцево зарезьын луэм секыт учыр палэнэ кельтӥз мукет учыръёсты. Тани кылем арня вискын Лос-Анджелесын ортчиз США-ысь демократической партилэн ӧтчамез. Солэн азьветлӥсез, Америкалэн туала Президентэз Билл Клинтон ялӥз, сое та интыын матысь эшез но юрттӥсез Альберт Гор воштоз шуыса, со ик ӝоген Президент быръён кампание кандидат луыса пыриськоз. Демокртъёс оско вормонлы. Угось Билл Клинтон кивалтэм улсын США трослы кужмояз, таӵеез ноку но ӧй вал на. Нош республиканской партилэн ӵектэм муртэз Джеймс Буш нош ик вераз, президент луи ке, пе, ракетаослы пумит радлык (ПРО) кылдытон борды пыр-поч басьтӥсько. Арня нуналэ Чечня округын Кун Думае быръёнъёс ортчизы. Быръён комиссилэн кивалтӥсез арсаханов ивортӥз, отчы 50 процентлэсь ятыр бырйисьёс пыриськизы шуыса. Уин бюллетеньёсты лыдъян-чотан ӧз мыны, терактъёс луозы шуыса кышкытлык вал. Нуназе уж азьланьтӥськиз. Таяз арняе люкаськылӥз Ӟуч православной черклэн Соборез. Валтӥсь ужпум вал � Николай ИИ эксэез но солэсь семьязэ святойёс пӧлы пыртон. Пусйыны кулэ, кунгож сьӧрысь Ӟуч православной черк та ужез кемалась быдэстӥз ни. Инмарлы оскисьёслэн чакламзыя эксэй но солэн матысь адямиосыз быризы инмарлы оскемзы понна. Соос улонзэс ӧз жалялэ Россилэн ӵуказе нуналыз понна. Шаерамы азинтӥське президент быръён кампания. Кылем арняе йылпумъяськиз кандидатъёсты пусъён. Вылӥ должностен мурт луон понна нюръяське 20 мурт. Ю.АЛЕКСАНДРОВА. Аэропортэ лобӟыса сямен Ижысен аэропортэ но Завьялово черкогуртэ мынӥсь сюрес Позимь шур вамен ортче. Но отысь выж туэ потаны ярантэм луиз. "Удмуртавтодор" кун предприятие та лэсьтӥськонэз вакчи дыр куспын быдэстӥз. Выж доры вуттӥсь сюрес кыкна ласянь ик уката ӝутэмын но паськытатэмын. 5-тӥ августысен автобусъёс выльдэм сюрес но юн выж вылтӥ ширто ни. Бен, коньдон трос кутэмын, но со понна уж оскымон быдэстэмын. П.СКОБЕЛЕВ. Инмарен быръем сюрес но вальк-вальк ӧвӧл Михаил протодиаконэн кенешон Та нуналъёсы Михаил протодиакон президентлэн В.Путинлэн указэзъя пусъемын "За заслуги перед Отечеством" орденлэн ИИ степенё медаленыз. Озьы вылӥ дунъямын жадёнэз валатэк ужамез, черк книгаосты удмурт кылэ берыктэмез, удмурт калыклы юрттэмез. Алигес со вуылӥз редакциямы, ми куремъя мадиз улон сюрессэ, собере юанъёслы валэктонъёс сётӥз. � Асанысь совхоз-техникумын дышетскыкум, ки улам кыӵе газет сюриз. Со � "Комсомольская правда" вал, � маде отец Михаил. � Соку инмарлы осконлы пумит бадӟымесь ужрадъёс нуиськизы Совето Союзын. Таяз учыре йӧттӥллям Чижевский профессорлы. Отын гожтэмын: со, пе, калыкез мыдлань дышетэ. Профессор оскытэ: адямиос куспын даллашонъёс кылдо ке, космос бугыръяськыны ӧдъя но лек кужым люка. Собере, синучконысь чальтчись шунды си сямен, Космосысь шимес "тӧлпери" берен Музъем вылэ берытске. Соин дунне вылын пуромо пӧртэм черъёс, музъем зурканъёс, тылпуос но мукет секыт адӟонъёс. Чижевский верамъя, адямилэсь улонзэ зэмен ик космос эскере. Нош космос кыл интые инмар шуид ке, татын ваньмыз интыяз пуксёз. Отец Михаил ас улонзэ черкен меӵак герӟаз 44 арескын гинэ. Нош инмарез Михаил Гаврилович пичи дырысеныз ик тодӥз но гажаз. 1945-тӥ арын 19-тӥ сентябре Грах ёросысь Вуж Эгра гуртысь Гавриил но Вера, Атамановъёслэн вордскизы кыкто пиоссы � Гавриил но Михаил. Атамановъёс, огшоры музъем ужасьёс, нылпиоссэс одно ик туж яратыса будэтӥзы, дышетыны малпазы. � Анае инмарлы оске вал, черке ветлӥз. Милемды но, пичиосты, дышетӥз инмарез гажаны, адямиез, ужез яратыны, керетытэк улыны. Шуылӥз: � Инмарен улэ, милемыз возьытэ эн вуттэ. Ужалэ, дышетске, � тодаз вае отец Михаил. � Нырысетӥ классэ выныным ӵош чыртыямы киросъёсын вамыштӥм. Кык пол сое синьысэныз валче ишкаллязы. Куинетӥзэ асьмеос чыртыямы ӧм оше ни. Октябрёнок но, пионер но, комсомолец но луыны кемдӥз. Нош анаелэсь верам кылъёссэ ӧй вунэты, весяк сюлэмам вози. Улон секыт вал. Калык пиослы пот нянь сиёно луылӥз. Школае кутэн ветлӥзы. Бен, нокин но гуртазы умой дӥсен-пыдкукен ӧз висъяськылы. Куд-ог дышетӥсьёслэн шат пыдазы катазы (туфлизы) вал. Миша пичи дырысеныз ик удмурт кылэз гажаз. Озьы ик юн яратӥз анай-атайзэ, котыр инкуазез, эшъёсэ, гуртсэ. Сыӵе огъя гажан сям сое вуттӥз вань удмурт калыкез, кылэз яратонэ. Гуртысь библиотекаын огез книга весь тузонӟыса кыллиз. Котьмаин тунсыкъяськись Миша сое усьтоно кожаз. Удмурт научно-исследовательской институтын печатлам маке вылэм. Куинь пол одӥг буквазэ но кельтытэк лыдӟиз. Оло, соку ик пичи пияш малпаськыны кутскиз наука сярысь, ас калыкезлэн кылдэм, азинскем сюресэз сярысь. Гуртэ мукетъёсызлы вуись газетъёсты но учкылӥз. Берло асьсэос куд-огезлы гожтӥськизы. Пияшез синйылтӥз удмурт кылын дышетӥсь Клавдия Николаевна Стрижова � Ашальчи Окилэн ӵыжы-выжыез. Педучилищее пырыны дэмлаз. Но вынъёслы кылдымтэ отын дышетскыны. Анай-атаенызы вераськыса, тямыс класс бере пиос Асанысь совхоз-техникуме пыризы. 9-тӥ классэ мыноно ке, мумы-бубызылэн моӵсы уз тырмы, дыр. Нош техникумын стипендия сёткало. Тыршыса дышетскиз ини Миша зоотехнике, сюлэмыз мукет интые кыске ке но вал. Армия бере Гавриил кышнояськиз но ужаны кутскиз. Михаил но кык ар ӵоже колхозын зоотехник вал. Кышнояськыны ӧз дырты � дышетскыны малпаз. Ӵапак та вакытэ гуртазы вуиз Удмурт научно-иследовательской институтысь одӥгез кивалтӥсь � Н.П.Павлов. Михаил ӧз чида соин пумиськытэк. Ӧтчаз дораз. Туж трос вераськизы философия, история но литература сярысь. Учёной шумпотӥз огшоры гуртысь пудо вордонъя шор специалистлэн мур тодонъёсызлы. Ижысь пединститутэ чортӥз. Михаил кема ӧз малпаськы, соглаш луиз. Дышетскыны туж тунсыко вылэм. Дышетӥсьёс, научной ужасьёс пӧлысь аслыз зэмос эшъёс шедьтӥз � В.Е.Владыкинэз но П.К.Поздеевез, М.В.Гришкинаез, В.К.Кельмаковез, И.В.Таракановез, Д.А.Яшинэз, Н.П.Павловез. Арлы быдэ экспедициосы ветлӥзы студентъёс, удмурт улон-вылонэн но фольклорен тодматскизы. Михаил эшъёсыныз ӵош малпаз институтын радъяны удмурт фольклорлы сӥзем ӝытъёс. Ӧтизы композиторъёсты, артистъёсты, кырӟасьёсты. Мар но со йӧндыризы. Та ужрадъёссы йылоллы пӧрмиз. Та луиз фольклор ӝытъёслэн инъетсы. 1973-тӥ арын, куинетӥ курсын, эшеныз Александр Шутовен ӵош Эстоние вуылӥз. Пияшез синйылтӥз академик, финно-угровед Паул Аристэ. Туж ӧтиз аспирантурае. Со вакытэ ик Михаилэз дораз чортэ ни вал Москваысь Ломоносов нимо университетлэн историяя факультетысьтыз этнограф � Клавдия Ивановна Козлова. Кык тылсиос вискын Михаил. Мар-о кароно? Кудзэ быръёно? Эстония вормиз ик. Угось Тарту � финн-угор калыклэн но наукалэн шорсюлэмыз. Туж кельшиз отын Михаиллы. Город чылкыт но сайкыт, Европаын выллем. Ваньзы уло умой, ёрмытэк. Котькуд эстон адями данъяське ас калыкеныз, кылыныз, культураеныз. Михаиллэн сюлэмыз эстонъёс шоры учкыса, удмуртъёс понна куректыны ӧдъяз. Малы меда кылмес, культурамес ум гажаське? Малы удмурт луэммылэсь возьдаськиськом? Диссертацизэ Михаил Атаманов герӟаз воршудъёсын. Тупатэм нуналлэсь куать толэзьлы вазьгес утиз ужзэ. Бертӥз Удмуртие. Дас одӥг ар ӵоже Михаил Гаврилович ужаз УдНИ-ысь кылъя секторын. Пӧртэм экспедициосы потаса, вань удмурт групаос доры со вуылӥз. Трос научной ужъёс гожъяз, но сюлэмаз маиз ке ӧз тырмы. Тодаз лыктылӥз анаез, кызьы со лулӟиськыса шуэ вал: � Э-э, пие, пие, черке ветлӥсько но чирдэмзэс ваньзэ валаны уг быгатӥськы ук. Удмурт кылын ке луысал, кыӵе сюлэм буйгасал. Михаил Гавриловичлэн туж потӥз черк книгаосты удмурт кылэ берыктэмез. Вылаз ик, Эстониысь тодмо профессорез Пауль Аристэ но � оскись адями вералляз: "Библиез ас кылын валаса лыдӟыны". Трос уйёсты кӧлытэк потэмез бере, финн-угор дуннеысь тодмо учёной, кылтодон наукаосъя кандидат Михаил Гаврилович диакон луиз. Та дырысен сое отец Михаил шуо. Соку кин ке валаз меда Атамановлэсь йӧспӧртэм вамышсэ? Черкен кивалтӥсьёслы со таӵе куронэн вазиськиз: � Библиез удмурт кылэ берыктоно вал. Адямиос туж возьмало, туж куро. Но соку ик со бакель карон ӧз басьты. Диаконэз соку капчиен уд куасалты. Лушкемен басьтӥськиз Марклэсь Евангелизэ берыктон борды. Нокинлы ӧз возьматъя ужзэ. 1991-тӥ арын вуиз гожтэт. Пырак Швециысь � Стокгольмысь. Библиез мукет кылъёсы берыктонъя институт кемалась утча ни вылэм финн-угор удысъя тодӥсь-валасьёсты. Тросэз кышкаллязы лекос визьмо книгалэсь. Ярам, отец Михаиллэн мытэм ужез вал ни. Марклэсь удмурт кылэ берыктэм Евангелизэ возьматӥз. Финнъёс сое сьӧразы нуизы, нош 1991-тӥ арлэн пумаз ик печатлазы. 1992-тӥ арын ньыльзэ ик Евангелиез поттон борды кутскизы. Отец Михаилэн ӵош ужаз удмурт кылэз ӟеч тодӥсь финн ныл Марья Картано. Михаил диаконлэсь берыктэмзэ таиз ӵошатӥз грек оригиналъя. Угось черк книгаын одӥг кылэз но воштыны уг яра � со понна карган (анафема) луоз. Финнъёсын ӵош отец Михаил поттӥз ни Псалтирь, Выль Сӥзён (Новый Завет) но мукетсэ. � Михаил Гаврилович, тӥляд ноку но кышноды ӧй вал. Валэктэ вал, малы куд-огез черкын ужасьёс кышноен уло, нош куд-огезлы воксё кузпалъяськыны уг яра? � Шуом, пиосмурт вань улонзэ инмарлы сӥзьыны ӧдъя. Нырысь солы диакон сан сёто. Сан басьтытозяз со кузпалъяськемын вал ке, кышноез бордаз кыле. Нош огназ ке улэ вал, диакон луэмез бере кышнояськыны уг яра ни. � Калык пӧлын шуо: адями улытозяз писпу мерттыны, корка пуктыны но нылпи будэтыны кулэ. Нош тӥляд нылпиды ӧвӧл. Уд жаляське-а, ас выжыдэс нокин уз азьланьты шуыса? � Писпу, корка но нылпи сярысь Библиын гожтэмын ӧвӧл, огшоры калык гинэ озьы вера. Котькуд адямилы инмар ачиз сюрес дася Библиез берыктон � инмарлэн ыным дасям ӟечлыкез. Мынам вань дыры ортче та яратоно уже бордын. Пумтэм тау инмарлы. Инмар законъя улэме потэ. Сюлмы куректыса учкисько туала нылпиос шоры: дискотекаостӥ ветло, тамак кыско, юо, наркотикен выро. Но ваньмыз инмар киын. Ас сьӧлыксэс валазы ке, инмарлы вазиськизы ке, соос но шонер сюрес вылэ султыны быгатозы. Соос понна туж вӧсяськыны кулэ. Нош Атаманов выжыез вынылэн Гаврииллэн нылпиосыз азьланьтозы шуыса малпасько. � Инмар косэмъя улоно шуыса, черке ветлӥсьёслы гинэ уд вераське, дыр. Эшъёстылы но, тодмоостылы но тодазы вайытӥськоды. Озьы-а? � Бен. Мон туж шумпотӥсько, адями, монэ кылзыса, черке мынэ ке. Но ваньзы уг валало. Корка липет йылэ султыса вань калыклы кылӥськымон вераме потэ: "Яратэ инмарез, солэн курон-косонъёсызъя улэ". 1991-тӥ арысен толэзяз кык пол радио передача нуиськом. Сизьым-тямыс минут гинэ кыстӥське. Калыклы, уката ик мӧйыос, тау каро. Туж куро, тросгес дыр мед сётысалзы шуыса. � Москваын улӥсько бере, адӟисько: туж трос егит студентъёс борды ӵемысь ерисько пӧртэм сектаосысь адямиос. Нырысь ик юало: инмарлы оскиськод-а? Кызьы меда валано � умоен-а тыныд вазисько, уродэн-а? � Сектаос али дыре туж паськыт вӧлмемын.туж. Христианствоен герӟаськемъёсыз гинэ ӧвӧл, шунды ӝужан палась вуэм дышетонъёс но алямын ини. Мыдланьёсыз но лачак: баптистъёс, иеговистъёс, саентологистъёс... Уката но кӧшкемытэсь шайтанлы йыбыртъясь сектаос � Москваын соос 30 пала ини. Сюресэз ыштонтэм вылысь, сьӧлыкез пыдло пыӵаны лэзёнтэм вылысь, одно черке ветлоно, вӧсяськоно, Евангелие лыдӟоно. � Язычникъёс шоры кызьы учкиськоды? � Удмурт язычникъёс � асьме калыклэн туж пичи гинэ люкетэз (ог 5-6 %), но улонамы соослэн ужъёссы син азьын: вӧсьёс ортчытъяло, вашкала сямъёсты утьыны тыршо. Татын сыӵе ик уродэз ӧвӧл кадь. Но соос зэм инмарез уг тодо, йыбыртъяло писпуослы, вулы, тылобурдоослы, нош озьы ик нюлэсмуртъёслы, вумуртъёслы, коркамуртъёслы но мукет сьӧд кужымъёслы. Соин ик берло аръёсы удмурт калык пӧлын трос шимес ужъёс ортчо: астэ быдтон, юон, лушкаськон, адями виылон, шудтэм учыръёсы сюрыса быронъёс. Язычество калыкез уз утьы, со быронэ нуись сюрес, бере кылем дышетон. Язычествоен кивалтӥсьёслы кемалась валаны кулэ вал ини кытын зэмлык, кытын утиськон сюрес. Африкаысь, Полинезиысь, Сибирьысь язычникъёслэсь адӟем карыса улыны соос асьмеды косо-а? Но со бырон сюрес ук. Язычникъёслэн одӥгез идеологзы али туж тыршыса ужа удмурт калык пӧлысь президентэ быръёно муртлы пумит. Татын ик адӟиське ини язычникъёсмылэн ас калыксэс "мур гажамзы". Солы улонни ӵектӥллям но со табере палэнысь вуэм, уксё сётӥсь мурт понна ужа. Возьыт. Язычникъёсмы шоры мон учкисько сюлмы вӧсь луыса, жаляса. Инмарелэсь курисько соос но одӥг пол утиськон сюрес вылэ мед султысалзы шуыса. Тани Москваысь Пушкин площадь ултӥ потон-ветлонэз пуштытӥзы. Малы-о? Яратон музъем вылын кытчы ке ыше-быре. Сыӵе дыре улӥськом асьмеос. Тани али асьме республикаямы кузё бырйиськом. Кин милемды утёз, асьме удмурт калык пушкысь потэм мурт сяна? Со гинэ валалоз кӧтӝожъёсмес, куректонъёсмес. Соин вань удмурт калыкез курисько кирос поныса мед вӧсяськозы сыӵе тӧро понна. � Михаил Гаврилович, нош кызьы тӥ учкиськоды уксё шоры? � Уксё вылын али быдэс улонмы пуктэмын. Лавкае потӥськод, я кытчы ке мынӥськод, котькытын коньдон кулэ. Но узырлык сьӧры уиськоно ӧвӧл. Туннэ улыны, сиыны-юыны тырме ке � инмарлы тау. Уксё вылэ вань сюлэмдэ пононо ӧвӧл. Инмарлы оскись адями, туннэ сиыны нянез вань ке, ассэ шудоен лыдъя. Шорем няньзэ кураськисьлы сётэ ке, сюлэмаз каньыллык пыре. Тон коть миллионер, коть миллиардер лу, инмарез уд гажаськы ке � шумпотонэд уз луы. Ваньбуреныд куанеръёслы юрттӥд ке � инмарлы со ярамон. Трос адямиос паськыт но каньыл сюресэз быръё улоназы. Шукрес сиыса-юыса улыны ярато. Байлыксэс будэтонъязы копак "синтэмесь" кылё. Со умойтэм. Инмарен быръем сюрес но вальк-вальк ӧвӧл, отын шедё куректонъёс но шумпотонъёс, куанер улон но тырмыт улон, висён но бурмон. Паськыт сюресэз уг быръё оскисьёс, угось инмар ваньзэ адӟоз, юрттоз. Инмарез яратон, адямиослы юрттӥськон, ваньмыз понна тау карон, сьӧлыко ужъёслэсь куштӥськон � оскись калыклэн сюресэз. � Черк котырын туж трос кураськисьёс пуко, коньдон курыса. Дортӥзы огшоры ортчиськод ке, сялӟисько: улонэд уз удалты. Уксё сётӥськод но кӧня ке вамыш ортчыса адӟиськод: таосыд кисы пушкысьтызы чарка но сылалтэм огреч усьтыр-табыр гинэ потто ини. Мар кароно та учыре? � Соослы нянь но музон кӧттырон сётоно. Уксё мычид ке, оло, зэмен ик юозы, кытчы ке погралозы но ӟонграса кулозы. Со аслыд ик сьӧлык луоз. � Вӧсяськись пересьёс шуо: телевизорез учкон сьӧлык, пе, со. Озьы-а? � "Чагыр ящикын" умоезлы али ӧжыт дышетэ. Быдэс нунал � умойтэм киноос, порнография, Америкаысь вуттэм мультфильмъёс (отын ог-огзэс весь виыло, уксё сьӧры уисько). Иворъёсты, инкуазьлы но улэп макеослы сӥзем передачаосты учкид ке, отысь сьӧлыксэ уг адӟиськы. � Нош кытысь иворъёсты тодӥськоды? � Газетъёсты лыдӟисько, ӵемгес "Удмурт дуннеез", "Советская Россияез" но "Независимая газетаез", черк газетъёсты, журналъёсты. � Михаил Гаврилович, нош кызьы учкиськоды "американизация" шуон шоры? � Америка нуэ бадӟым политика. Со турттэ быдэс дуннеен кивалтыны, кузёяськыны, вылын одӥг культура лэсьтыны, одӥг калык кылдытыны.. Пичи калыкъёс но юнме шорысь али уг курадӟо. Соосты зӥбыны туртто. "Американизация" � со быдэс дуннелэн через. Азьмынӥсь кунъёс � Франция, Германия, Англия � та ласянь шуге-леке сюремын. Егитъёс кыстӥсько Америкаысь вуттэм киноез учкыны, сиён-юонэз сиыны, дӥсез нуллыны, англи кылъёсты вераськоназы кутыны. Америка быдэс дуннеын кузёяськыны турттэ, нош инмарез яратон политика уг нуы. Пӧртэм сектантъёс но США-ысь потэмын. Огшоры адямилы салам-кузьым сёто но, соиз шумпотэ ини. Тодӥсько одӥг удмурт кышномуртэз. Али со Ижын улэ, сектантъёс пӧлын вӧсяське. Огпол мыным шумпотыса вера: "Мыным зарезь сьӧрысь лыктэм муртъёс кофта но, дэрем но кузьмазы. Православной черке ветлыкум нокин но, номыр но ӧз сёты". Тӥни озьы туж капчи ас лулдэ "чачаос" понна вузаны. � Отец Михаил, али асьме элькунлы йыр (президент) бырйыны дасясько. Тӥ пыриськиськоды-а таӵе ужъёсы? Пыриськиськоды ке, кин понна малпаськоды куарадэс сётыны? � Огшоры бырйонъёсы уг ветлӥськы, но таяз учыре одно ик мыно � асьме удмурт калыклэн азьпал улонэз понна луозы та быръёнъёс. Кин луоз йырмы, сыӵе ик улонмы луоз. Кин калыкмылэсь улонзэ валалоз, кин со понна сюлмаськоз � асьме дорын вордскем адями, удмурт воргорон, гурт улонэз, калык ужпумъёсты валась, чылкыт сюлэмо, трос дышетскем мурт. Мон понна � со Павел Николаевич Вершинин. Вань выжы- кумыосме, быдэс удмурт калыкез, вань вӧсяськисьёсты, удмурт шаерын улӥсь но кылмес, культурамез гажась вань калыкъёсты ӧтисько удмурт калык пӧлысь потэм йӧно, визьмо, улон-вылонлэсь бергамзэ валась кивалтӥсь понна куараоссэс сётыны. Марина КОСТЫЛЕВА. Архивысь документъёсъя Удмуртия ЪЪ дауре 1936-тӥ ар Удмурт автономилэн 15 ар тырмонэзлы сӥзьыса, республикаысь Центральной исполкомлэн юбилейной сессиез ортчиз. Та вакытэ партия "Ваньзэ кадръёс лэсьто" ӧтёнэн улэ. Соин ик сессия резолюцияз гожтэ рабочийёс пӧлысь техникаез тодӥсь- валась специалистъёсты дасянэз ӝогомытон сярысь. Заводъёс но фабрикаос ужасьёсты дасян вылысь нимысьтыз школаос усьто. Заводын тыршисьёс пӧлын удмуртъёслэн лыдзы 24 процентозь будӥз. Шаерамы та вакытэ 7 сюрс мурт Стаханов амалъя ужало ни. Иж МТС-ысь комбайнеръёс Михайлов но Петров 1936-тӥ арын быдэн 700 гектарлэсь уногес юосты утялтӥзы. Балезино ёросысь Гордино гуртысь колхозникъёс азьло гектарысьтыз 5 центнер ю тысь кутсало ке вал, туэ та лыдпусэз 15 центнерозь вуттӥзы. 24-тӥ июльысен 4-тӥ августозь "Иж-7" мотоциклъёс вылын 14 нылкышноос, заводысь специалистъёслэн кузпалъёссы, "Ижевск-Москва" сюресэз ортчо. Та ужрадэн кивалтӥз мото поттӥсь заводлэн директорезлэн кузпалыз Анна Андреевна Чекмарева. Мотоциклъёсты поттонъя планзэ завод 1936-тӥ арын 180 процентлы быдэстэ. Со сярысь иворто СССР-ысь секыт промышленностья наркомлы Серго Орджоникидзелы. Азинске Удмуртиын дышетон удыс но культура. Школаос ӝутско районъёсын но, шоркарын но. Кылсярысь, И_Ежевскын та аре йылпумъясько 24-тӥ школалэсь юртсэ лэсьтонъя ужъёс. Глазовысь больница бордын усьтӥське медсестраосты, акушер но фельдшеръёсты дасянъя школа. 1936-тӥ арын кылдэ кырӟанъя но эктонъя "Италмас" ансамбль, та вакытэ со быдэс дуннелы тодмо. Март-апрель толэзьёсы Удмуртиысь гуртъёсы потэ фольклоръя экспедиция, кивалтэ соин композитор Васильев-Буглай. Можгалан, Глазкарын, Алнашын ужаны кутско колхоз театръёс. Таяз аре Ижын но шумпотымон иворъёс вӧлмо: - усьтӥське "Динамо" стадион; - Коммунальной ульчалы (1918-тӥ арысен, азьвылгес - Базарной) улонысь кошкем тодмо писательлэсь Максим Горькийлэсь нимзэ сёто; - июль толэзе культурая но шутэтсконъя парк Сергей Миронович Кировлэсь нимзэ басьтэ; - нырысетӥ сентябрьысен ужаны кутске шаерысь Калык усточиослэн шор юртсы; - 23-тӥ октябре усьтӥське покчи нылпиослэн театрзы. Июнь толэзьысен Удмуртиын улӥсьёс мылысь-кыдысь эскеро страналэн выль конституциезлэсь инъетсэ. Конституция юнматэмын вал 5-тӥ декабре СССР-ысь Советъёслэн лэчыт югдуръя люкам ВИИИ съездазы. Вольыт сюрес вылын могӟетъёс но сюрылӥзы. Партилэн куронъёсызъя Удмуртиын утчало на кулакъёсты. Колхозэ пырисьтэм ас понназы зол ужась крестьянъёсты кулаке поттыса, ваньбурзэс талало. Нош азьпалан эшшо но сьӧдгес пилемъёс бугыръясько - вуоно репрессиос. М. Сабурова, Удмурт Республикаысь Кун архивысь валтӥсь специалист. "Гороскопын но гожтэмын..." Кин ке шоры учкыса, соку ик валаны луэ: та дышетӥсь. Вераськемез лад-лад, эзэр- безэр выремез чик уг шӧдӥськы, синъёсыз адямиез эскерыса, визьмо учко. Дӥсяськемез но ӝикыт, номыр мултэсэз, син ӵогӟымонэз ӧвӧл. Тазьы ик шуысал мон Полина Трофимовна Романова сярысь. Можга ёросысь Бадӟым Уча шор ёзо школалэн директорез луыса со дас арлэсь кема ужа ни. Огвакыт вал внеклассной ужъёсыз радъясь но, директорлэн дышетон ужъя воштӥсез (завуч) но. Аслаз дышетскем школаяз вуиз 1971-тӥ арын сӥзьыл, ӟуч но француз кылъя дышетӥсьлэсь дипломзэ басьтэмез бере. Мурт адямилы востэм но, дӥсьтӥсьтэм но адске кадь вал. Нош солэн пушказ юн золтэм сиез, пезьгытлыкез вылэм. Улон возьматӥз, Полина Трофимовна усто кивалтӥсь, ас азяз но мукетъёсыз азе юн куронъёс пуктыны быгатӥсь, со дыре ик адямиен капчи, лякыт вераськись. Бадӟым Уча школа районын но, республикаын но одӥгез тодмоез, выль амалъёсын ужась школа луэ. Дышетскисьёс татысь умой тодонъёсын пото, арлы быдэ 60-70 процентэз вузъёсы, училищеосы, техникумъёсы пыро. Туэ тани витез пиналъёссы аттестатэн ӵош зарни медаль басьтӥзы. Со но вера школаын дышетонлэсь ӟечлыксэ ӝутонъя умой пуктэм уж сярысь. Юнме шорысь-а 1998-тӥ арын Бадӟым Уча школалы Россиысь устоез школа ним сётэмын вал, нош аслыз Полина Трофимовналы � Россиысь устоез школалэн директорез. Озьы ик со луэ калыкез югдытон удысысь отличник, Удмурт Республикаысь калыкез дышетонысь дано ужась. Таӵе дано нимъёс сьӧрын � астэ жалятэк ужан, вань дырдэ ас коллективедлы, нылпиослы сётон. Дышетӥсь педагогика наукалэсь туала куронъёссэ тодыны, быдэсъяны кулэ, выль методикая ужан амалъёслэсь но бере медам кыльы. Дышетӥсьлы одно ик дышетскыны, ас бордаз зол-зол ужаны кулэ. Тазьы лыдъя Полина Трофимовна. Соин ик берло аръёсы школаязы пыӵатӥзы пӧртэм-пӧртэм амалъёсты артэ пуктыса, ӵошатскыса ужанэз. Котькуд дышетскисьлы нимысьтыз саклык висъяло, мар ласянь быгатоногес, сое азинтыны сюлмасько. Огвакыт чеберлыклы дышетон бордыгес кутскизы вал. Мукет малпанэ вуизы: нылпиос йырсазьзыя, лулсэр шӧдонзыя но семьяын будэмзыя пӧртэмесь � соосты бырйыса-бырйыса, пӧртэм удысъёслы дышетоно. Школаын дышетскытозяз котькудӥзлэн ик мед усьтӥськоз мар борды кыстӥськемез, быгатонлыкез. Будӥсь адями школа бере улонын медаз йыромы шуыса, уже интыяськонъя центрысь специалистъёсын кусып тупатӥзы. Усьтӥзы лицей-классъёс, гимназия-классъёс, муромытэм программаосыз уже кутӥзы. Вылӥ дышетскон заведениосы дасянъя кружокъёс нуо пӧртэм предметъёсъя: физикая, химияя, биологияя, математикая. Школаын аскивалтонэз но кемалась ини пыӵатӥзы. Пиналъёс дышетӥсьёс пӧлын гинэ медаз улэ, пичиысен мед шӧдозы кыл кутонэз но кыл кутытонэз, ас интыязы, ас музъем вылазы кузё луонэз. Быдэ вуэмзыя сыӵе мылкыд юнма, старшеклассникъёслэн кенешсы но вань. Таӵе мылкыд кузёяськемен ик, дыр, та школаысь трос гинэ потӥзы ни шаермылы тодмо луэм бадӟым кивалтӥсьёс. 1993-тӥ арысен ни Бадӟым Уча школа выль сямен нуэ хозяйствозэ. Солэн вань 108 гектар музъемез, пичи фермаез, пӧртэм машинаосыз. Озьы нылпиосыз дышето музъем борды кырмиськыны. � Гороскопъя но мыным гожтэмын, таӵе ужын бергано шуыса, � ас сярысьтыз вера Полина Трофимовна. � Сямы сыӵе: котьма понна сюлэм бӧрдэ. Огшоры ужын ке но, шыпак пукеме уг луы. Маке умойтэм ке, одно ик вератэк чидано ӧвӧл. Собере, ас вылад басьтӥськод ке, аслыд ик йӧтэ но ини. Нош пастух сямен беразы ветлоно ке, со мон ӧвӧл. Со директор но ӧвӧл. Телец но атас со � гороскопъя, Шунды ӝужан пал календарья. Нош огшоры ке � Моторка гуртын 1945-тӥ арын вордскем удмурт нылкышно Полина Витвинова-Романова. Эшшо ватсасал на: мотор нылкышно. Выль дышетскон ар мед сётоз нош ик ӟырдыт кужымзэ. Т.ПЕТРОВА. ? Бадӟым Уча школалэн директорез П.Т.Романова. Ӟечкыласьком Кияса ёросысь Вуж Салья гуртын улӥсь песятаймес Фрол Андриянович Андрияновез 75 арес тырмеменыз. Сӥзиськом кема аръёс ӵоже куректонэз тодылытэк шудо-буро, тазалыко улыны. Ижевскысь Андрияновъёс. "Вихрь-антитеррор"! Удмуртиысь Правоосты утёнъя ёзъёс азьланьто "Вихрь-антитеррор" операцияя ужзэс. Соос нимысьтыз чакласа-эскерыса возе пыӵал тӥрлык но наркотикъёс вӧлмытӥсьёсты. Кылем арня вискын ас квартираяз ӝегатэмын воргорон. Интыысен ик солэсь 69 грамм героинзэ таламын. Йыртэмасьлэн гаражысьтыз утчаськонъёс эшшо куд-ог ватосъёсты шараязы на. Отысь ас киын бичам пистолет-пулемёт но Макаровлэсь 3 пистолетсэ поттэмын. Экспертъёс оскытэмъя, пыӵал тӥрлыкысь куке-соку ыбылэмын. Ӝутэмын уголовной уж. РФ-ысь ФСБ-лэн удмурт ёзэзлэн пресс-службаез. Вераськон кутскоз Самараын Россиез сизьым округлы люкем бере, таӵе малпан кылдӥз вал: Владимир Путин интыысь ужпумъёсты эскероз округъёсысь оскем адямиосыныз ӵош гинэ (таоссэ пресса генерал-губернаторъёс шуиз). Сыӵе сюлэмшугъяськон юнме вылэм. Россилэн Президентэз ӵем пумиськылэ федерацилэн субъектъёсысьтыз кивалтӥсьёсын но. Таӵе кенешонъёс бадӟымгес пайда ваё, малы ке шуоно, Путин лыктэ кудаз ке округе, ӟечгес тодматске ӟечгес тодматске интыысь югдурен. 28-тӥ-29-тӥ августэ Владимир Владимирович пумиськыны медэ Приволжск округысь кивалтӥсьёсын. Ужрад ортчоз Самараын. Отчы мынозы Удмуртиысь вылӥ кивалтӥсьёс но. Президент отын ӝутоз, дыр, таӵе ужпумъёсты но: округен но отысь ёзъёсын кивалтон, областьёслэсь но республикаослэсь кусыпъёссэс юнматон, ю-нянез утялтон, толлы дасяськон, "ЕЭС" но "Газпром" акциосын огазеяськонъёсын кусыпъёс возён. Но Самараын пумиськон азьын ялӥзы: эскероно ужпумъёсты Путинлэн аппаратэз яке солэн ыстэм муртэз Кириенко уз юнматэ, соосты дэмлалозы регионъёсысь кивалтӥсьёс. Удмуртиысь Кун Кенешлэн Тӧроез Александр Волков ӵектыны малпа Россия, округ но республика понна туж лэчыт ужпумъёсты - гурт удысэн но ож тӥрлык поттонэн герӟаськемъёссэ. Гурт удыс вуэмын сыӵе югдуре: техникаез выльдыны ас кужыменыз уз быгаты ни. 1991-тӥ арын отын вал 17 сюрс 500 трактор, туннэ - 5 сюрслы ичигес. Сыӵегес ик суред ю-нянь но картофка утялтон комбайнъёс но музон техника ласянь. Бусые поттэм машинаос но 70-90 процентлы пӧсьтэмын ни. Югдурез умоятон вылысь, Александр Волков оскытэмъя, лизингез азинтоно. Удмуртиын со понна кыдытӥське лизингъя кун кампания. Со юрттоз гуртлы техника сётонэз 2-3 пол будэтыны. Но сыӵе программаез федерация дасяны кулэ. Югдур ушъяськымон ӧвӧл ож тӥрлык дуронын но. Сое кун пумен ичигес куре, озьы ке но, лэсьтэмез но келямез понна но пунэмен тыронъёссэ аръёсын уг берыкты. Удмуртиысь промышленностьлы 800 миллион манет сётымтэ на. Соин сэрен заводъёс азинскыны уг быгато. Сыӵе ужпумез быдэстон понна дун азьвыл ик куроно но тӥрлыкез чот-чот графикъя келяно. Оло, Владимир Путинэн пумиськон сыӵе ужпумъёсты быдэсъяны кутскон сётоз. Вераськон мытӥськоз Самараын, нош ужрадъёс кутэмын луозы Кремльын. Т. Александрова. ВОРМОНЛЫ � 55 АР Курск вӧзын пурӟем ожмаськон Сталинград дорын пӧсь ожмаськонъёс бере но, немец армия кужмоен лыдъяське на. 1943-тӥ арын мартэ со выльысь киултэ Харьковез. Соин валче Курск котырысь музъем мычиськыса кыле тушмон пала. (Фронт линия кузя со 700 иськеме, пасьталаезъя ог 300 иськеме кыстӥське.) Калыкын та интыез Курск дуга шуыса нимазы на. Пайдаё интыяськемзэс шӧдыса, немецъёс та музъемез киултыны чаклало. Озьы Орёл но Белгород дорысен соос Курск вылэ дасясько. Татын умоен пусъёно асьме разведкаез. Со дырыз дыръя шӧдӥз югдурез, тодӥз компанилэсь 5 июле ӵукна кутсконзэ но. Соин ик асьме войскоос матэктӥсь жугиськонлы дась вал, шуыны луоз. Немецъёс наступление потон азьын 2-3 час гинэ кыле на. Ӟучъёс соосты азьпалтыны малпало но, тушмон вылэ асьсэос урдско. Немецъёс понна кылдэм югдур шӧдтэк шорысь луэ но трос ыштонъёс адӟе. Озьы тушмон компанизэс 1-2 часлы беромыса кутске. Асьме оборонаез со танкъёсын ыштыны чакла. Но таиз но малпанэз ӝыныё быдэсме. Асьме музъем вылэ со интыен-интыен гинэ пыре. Курскез чаклам сюресъя киултыны осконзы бырем бере, немец командование выль решение кутэ � та городэз Прохоровка станция пыр кырмоно. Ӵапак та станциын 1943-тӥ арын 12-тӥ июле кӧшкемыт ожмаськон пурӟе. Отчы кыкналасянь ик ог сюрс 200 танк пыриське. Адӟисьёслэн верамъёссыя, музъем зурказ авиабомбаос но снарядъёс пуштылэмлэсь, танк гуретэмлэсь. Инбам сьӧдэктӥз ӵынлэсь но тузослэсь. Кӧшкемыт ожмаськонын немец армия но, ӟучъёс но трос ыштонъёс адӟизы. Нунал куспын гинэ � 12-тӥ июле � тушмон 400 танктэк, 10 сюрслэсь ятыр солдатъёслэсь но офицеръёстэк кыле. Курск дугаын жугиськонэ пырисько Удмуртиысь потэм пиос но. Соос ожмасько 753-тӥ артиллерийской полкын но Удмуртиын ик кылдэм 690-тӥ авиационной полкын. Курск понна жугиськонын тужгес висъяськиз асьмелэн землякмы К.Ф.Бисеров. Со 26 тушмон танк но 1 самоходка быдтэ. 1943-тӥ арын 8-тӥ сентябре Бисеровлы Советской Союзлэн Героез дано ним сётэмын. 1943-тӥ арын 15-тӥ июле асьме войскоос наступление пото но 5-тӥ августэ Орёлэз но Белогородэз мозмыто. Война аръёс ӵоже нырысьсэ асьме солдатъёслэн сюлэмъёсазы вормон гизьы пыӵаз. Курск дугаын ожмаськон Быдӟым Отечественной война аръёсысь одӥгез кӧшкемытэз луэ. Отын кыкналасянь 4 миллион адями жугиськиз. Татчы кыскемын ог 69 сюрс орудие но миномёт, 13 сюрслэсь ятыр танк но самоходной орудие, ог 12 сюрс самолёт. Ожмаськон 37 уй но нунал кыстӥськиз. Немец командование Курск доры ӝыны миллионлэсь ятыр солдатъёссэ ыштэ, сюрс 500-лэсь ятыр танк, 3 сюрслэсь ятыр самолёт, ог 3 сюрс орудизэ кельтэ. Татын пазьгемын ог 30 тушмон дивизия, со пӧлын 7-ез � танк дивизия. Асьме войскоос шунды пуксён пала 120-150 иськем азинско. Вормонлы 50 ар тырмонэз пусйыку, "Прохоровской бусые" ӝутэмын "Пётр но Павел апостолъёслэн храмзы. Со храм вылэ зарнивуам букваосын гожтэмын татын бырем 7 сюрс асьме ожгарчиослэн нимтулъёссы. Со сяна, татын сылэ на Вормонлы сӥзем памятник, ужа музей. Н.ВЕПРИКОВ, ожысь но ужысь ветеран, отставкаысь капитан. Нош вуиз сӥзьыл ӟечкылазы ог-огзэс 22-тӥ августэ Ижевскысь "Металлург" культура двореце люкаськемъёс. Эн пайме, татчы асьсэлэн конференциязы люкаськылӥзы уго дышетӥсьёс, нош соос понна 1-тӥ сентябре зэмзэ но Выль ар кутске. Туссыя, мылкыдзыя туэ соос синмаськымон адӟисько, кылем арен уд ӵошаты: 1999-тӥ арын дышетӥсьёс дышетэмзылэсь трос ужзэс уретылӥзы уго (вожзэс медаз вае), ӧз усьтӥськы одӥг выль школа но. Туэ югдур шӧдскымон тупатскиз. Вуизы ик кадь осконтэм дыръёс: дышетӥсьёс табере дырыз дыръя уждун, отпускной, нош куд-ог узыр районъёсын дышетон литература понна коньдон басьто. Дышетӥсьёслы висъясько улон интылы субсидиос. Республикаысьтымы Кун Кенешлэн Тӧроез Александр Волков та сяна но трос ушъямонзэ пусйиз на, азьланяз эшшо ӟечгес юрттыны сӥзиз. Иське, дыр вуэмын дышетонлэсь ӟечлыксэ вылэ ӝутыны, выль амалъёсты уже кутыса ужаны? Та ласянь рос- прос мадиз калыкез дышетонъя министр Любовь Захарова: � Кылем арын Россиысь дышетон удысын ортчем ужрадъёс: дышетӥсьёслэн совещанизы, Дышетонъя федеральной программа сярысь закон. Кызьы азинскыны кулэ дышетон удыс? Асьмеос индустриальной обществоысь информационное выжыны кулэ: выль тодон-валанъёс, быгатонъёс басьтыса, культураез ӝутоно, котырысьтымы югдурын асьмеды ыштытэк, азинскон сюрес шедьтыны, аламаеныз (наркоманиен, юонэн...) нюръяськыны быгатоно. Дышетонын дышетскись бырйыны мед быгатоз тужгес кулэзэ (туала куронъёсъя информатикаез, кунсьӧр кылъёсты). Шаерысьтымы Калыкез дышетонъя министерство, выль реформаослэсь кулэлыксэс валаса, ас азяз трос ужпумъёс пуктэ, ялан ужа выль проектъёс, огкылъёс кылдытон бордын. Кылем арын тупатэмын Россиысь мукет республикаосын кусыпъёс, эскеремын шаерысьтымы городъёсысь но гуртъёсысь дышетон удысысь югдур, кутэмын книга поттонъя, гуртын дышетонэз радъянъя программаос, национальной образование сярысь концепция но трос мукет ужпумъёс сэрттэмын-пертчемын. Ваньмыз со юрттоз шаерысьтымы дышетон удысэз азинтыны. Пусйыны кулэ, Кивалтэтмылэн юрттэмезтэк тросэз ужрадъёс быдэсмытэк кыльысалзы. Туэ Кивалтэтэн дышетон удысъя вить постановление кутэмын. Соос пӧлын � анай-атайтэк кылем нылпиослы юрттэт сётонъя, котькуд муртлэн огъя образование басьтыны правоосызъя но мукет... Учконо ке, шаерамы дышетон удысын, зэмзэ но трос ушъяськымонэз. Кивалтӥсьёслэн верамзылы оскыса уг шуиськы, дышетӥсьёслэн ужам ужзылэсь емышсэ адӟыса. Сцена вылэ вань дышетӥсьёсты но дышетскисьёсты ӟечкыласа пото шаерысьтымы устоосыз пӧлысь устоосыз пиналъёс: школазэс зарни медален йылпумъямъёс, Россиын но Дуннеын ортчылӥсь олимпиадаосын, конкурсъёсын, спортъя ӵошатсконъёсын вормисьёс. Дворецысь сцена укыр пичи соос понна. Министр Любовь Захарова таӵе дышетскисьёсын сюлмысьтыз данъяськемзэ вера, но малы ке (алдаськыса, дыр) выль секыт дышетскон арен ӟечкыла. Дырыз дыръя уждун басьтыса, таӵе визьпогъёсты дышетонэз секыт шуыны сьӧлык ини, вуоно дауре выжон арысен ке но улонмы каньылгес медло. З.РЯБИНИНА. Туспуктэмъёсыз В.Беломорскихлэн. Выль дауре - выль календарен Калык куспо "Шунды" огазеяськон - календарь воштонъя дуннеысь одӥгез, тужгес но бадӟымез центр. Со малпа Григориан календарез палэнтыны. Со, пе, рос-прос лэсьтэмын ӧвӧл, вашкалагес ини, выльдонэз кулэ каре. Интыяз "Шунды" дэмла дуннеысь вань кунъёслы нуналъёсты лыдъяны "ООН календарья". Нош кутсконо, пе, 2001-тӥ арын нырысетӥ январе. Пӧртэм муген та ужрадэ пыриськыны быгатымтэос кӧня ке улыса воштозы нунал чотанзэс. Озьыен, выль дауре - выль календарен. В. Рогалев. Кырӟан люка эшъёссэ 25-тӥ августэ 16 часын Металлургъёслэн культура юртазы кутскоз афган но чечен кырӟанлы сӥзем концерт. Ортчытэ сое Афган ожысь ветеранъёслэн кенешсы, Афганистанын сӧсыр луэмъёслэн фондзы но мукет ожъёсысь ветеранъёслэн комитетсы. Ужрадэ пыриськозы Оренбургысь "Континент" но Ивановоысь "Мазари-Шариф" группаос. Концертэз радъясьёс нылпиос сярысь но вунэтӥллямтэ. Соос понна нимысьтыз программа дасяллям. Удмурт Республикаысь Кун Кенешлэн пресс-службаез. ГОЖТЭТЛЫ ВАЗИСЬКОН Юн кариськы, Надежда! "Кылдэмезлэсь уд ортчы вылэм" корреспонденция пумысен малпанъёс Нырысь ик - авторез сярысь. Галина Васильевна Романова быгатэм лыдӟисьлэсь мылкыдзэ бугыртыны. Монэ но та гожтэт малпаськыны куриз. Зэм, ачим мон мукет сямен мадьысал: геройме, Надежда Леонидовна Кудрявцеваез, тышкаськысал но, мылкыдзэ ӝутыса, али ик "Италмасын" кырӟаны косысал. Шаерысьтымы, удмурт интеллигенцилэн шорсюлэмыз Ижын бере, со юнмаз, юнма но кема юнмалоз на гуртысь лыктэмъёс чотын. Зэм, городэ гуртысь вуэм удмуртъёс юн курадӟо улон инты ласянь. Тросэзлэсь ортчем сюрессэ тодэ вайыны луоз. Тодмо кылбурчи Людмила Хрулёва Писательёслэн огазеяськоназы кутымтэ на ке но, удмурт литературалы данак пайда ваиз ни. Иже вуэмез бере, улон инты ласянь трос курадӟиз. Озьы ке но, нокытчы ӧз кошкы. Кузпалыз ӧз, ачиз басьтӥз куинь комнатаен квартира. Уно аръёс ӵоже огъякоркан улӥз кылбурчи, тодосчи Виктор Шибанов. Улон инты басьтӥз алигес гинэ. "Италмасын" 1967-тӥ арысен кырӟаны кутскиз но кема улӥз, чидаз туж люкыт сэрегын Зоя, кӧня ке ар талэсь азьло гинэ со патер басьтӥз. Квартира басьтытозяз, мурт дорын улӥз журналист Ульфат Бадретдинов. Табере со � "Кизили" журналлэн валтӥсь редакторез. Таӵе учыръёс пумтэм-йылтэм. Ваньмызлэн сямен удмурт журналистъёслэн, писательёслэн, художникъёслэн но артистъёслэн улон сюрессы тазьы кутскемын. Соин ик, Надежда Кудрявцевалэн кырӟанлэсь куштӥськемез шоры учкыса, суйёс-пыдъёс юскисько. Нош кытчы ышиз нылкышнолэн чиданлыкез? Бен, огназ ке луысал, Иже лыктыса, огъякорка интыясалзы, шуоз мукетыз. Но, картэз вань бере, юрттӥсез но вань. Вань улон юртсы. Озьы ке но, сое вузаса, Ижын корка басьтыны уг луы вал шат? Зэм, гуртын коркаос дунтэмгес. Ижын но дунтэм коркаос шедё. Кылсярысь, миым Позимьын вузазы ньыль сюрсэн. Утчась мурт шедьтэ. Библиын но шуэмын ук: "Йыгаське � тӥледлы усьтозы, курелэ � сётэмын луоз". Галина Романова юнме пыртымтэ корреспонденцияз таӵе кылъёс: "Но луыло сыӵе вакытъёсыз: ваньзэ куштыса, гуртысьтыз синтэм-пельтэм пегӟысал, бадӟым сцена вылын вӧл-вӧл кырӟасал". Ӝож: быгатон но валан ваньмызлы огкадь уг сётӥсько. Асьмеос, удмуртъёс, ляб луимы ке, асьмемыз лёгалозы. П.СКОБЕЛЕВ. Кытын тон, гажанэ Ижысь радиозаводлэн "Связькомплекс" нимо ёзаз ужась конструкторъёс "Радий-301" выль радиостанция кылдытӥзы. Сое уже кутыны быгатозы му вӧй поттӥсьёс, югдурез чакласьёс, кышкыт учыръёсын нюръяськисьёс, транспорт удысын тыршисьёс. Чаклан- эскерон вылысь поттэм 50 станция ӵапак таослы ик сётэмын. Кыр интыосын станция пыр герӟаськыны луэ 12-15 иськемозь, город ульчаосын � 2 иськемозь. Предприятилэн кивалтӥсьёсыз чаклало ар пумын толэзяз 1000 станция бичаны. Выль продукциез басьтон пумысен заводэ трос вазиськонъёс вуизы ни. Умой ик "Радий-301" � кыдёкысь гажанэдлэсь куаразэ соку ик кылод. Л.СЕМЕНОВ. Мынам олигаръёсын кусыпъёсы сярысь Берло дыре унояз ивор вӧлмытӥсь ёзъёсын потӥзы материалъёс, кудъёсаз монэ, Правительстволэсь Тӧрозэ, янгыше уськыто Москваысь олигархъёсын кусыпъёсы понна. Таӵе вераськонъёслэн мугзы туж валамон, но та пумысен мон верало аслэсьтым малпанъёсме. Предприятиосты вузан-басьтон (приватизация) кутскем бере, нырысь-валысь со пӧрмиз монополистъёсын (Москваысь олигархъёсын) акциосын пакетъёсты тросэн киултонлы. Сое мон ас вылам но шӧдӥ-валай, акциосын "Чепецкий механический завод" огазеяськонлэн валтӥсь директорез луыса ужакум. Удмуртилэн но Глазовлэн экономикаязы та предприятие бадӟым инты басьтӥз. Республикалэн бюджетаз тужгес но трос коньдон пыртӥсь "Удмуртнефть" предприятие бере со кыкетӥ интыын сылэ. Соин ик, валамон ини, олигархъёсты та завод "гочатыны" кутскиз. Таӵе югдурез лыдэ басьтыса, мон ас азям ужпум пуктӥ: та предприятиез утёно, сое кунлэн (государстволэн) киулаз ик кельтоно. Озьы ик лэсьтӥмы: 25 поцент акциосты сётӥмы предприятиын ужасьёслы, 24 процентсэ - Удмуртилэн асваньбураз (собственность), кылемзэ - федеральной асваньбуре. бадӟым люкетэз Кунлэн асваньбураз пыриз бере, луонлык кылдӥз производствоез но поттэм продукциез вузанэз кун ласянь радъяны. ЧМЗ-ын поттэм продукция пӧлысь 90 процентэз вузаське сыӵе дунёсъя, кудзэ тупатэ Россиысь Экономикая министерство. Та выллем амалэз ик уже кутыны ӵектӥсько вал, Ижысь электромеханикая заводэз выль кузёлы вузаку. Солэсь азьло малпамын вал тазьы лэсьтыны: 25,5 процент акциосты Удмуртие кельтыны, 25,5 процентсэ федеральной асваньбуре сётыны, нош 49 процентсэ - вузаны. Кин понна со чакламын вал, асьтэос валады, луоз. Нош Россия Федерацилэн Президентэзлэн указэзлэн инъетэзъя ИЭМЗ-лэсь акциоссэ чылкак мукет сямен люкылыны ӵектэмын: 51 процентэз кыле федеральной асваньбуре, 25,5 процентэз - Удмуртилэн асваньбураз, нош 23,5 процентэз - вузаське. Нош акциосты вузаса поттэм коньдонлэн ӝыныез вуэ республикалэн бюджетаз. Правительство чакла асваньбурлэсь кун луись люкетсэ 43 процентысен 51 процентозь йылэтыны. Со сяна, чакламын ю тысь басьтонъя, дасянъя, изонъя но нянь пыжонъя предприятиослэсь холдингъя комплекс кылдытыны. Туннэ нуналлы та удыс секыт югдуре шедемын. Гурт удыслы кунгож сьӧрысь техника басьтыны республикалэн бюджетысьтыз, берыктон вылысь, висъямын вал коньдон. Ӵапак та кредит улэ ик сётэмын нянь пыжонъя предприятиослэн акциоссы. Нянья холдинг кылдытэмын луоз соку гинэ, куке 51 процентэз акциос кылёзы Удмуртилэн асваньбураз. Сотэк сиён- юон поттон удысын ялан шуг-секытъёс кылдылозы. Россилэн берло дас аръёс ӵоже азинскон сюресэз сярысь одӥг кылын вераны луоз: асваньбурез люкон. Удмуртиын кун ваньбурез валатэк вузан быдэсак куашкатӥз республикалэсь экономиказэ. Ми, правительствоын ужасьёс, та ужпумез чылкак мукет сямен быдэсъяны кутским. Соку ик югдур шӧдскымон умояз. Вераме потэ, та ужрадъёсмес умоен лыдъяло интыысь кивалтон ёзъёс но. Тани Воткинскысь администрациен ӵош 7 толэзь ӵоже ужаськом ни РТО заводлэсь огъя акциоссэ республикалы но городлы чаклан вылысь луонлыкъёс кылдытон ласянь. Малпасько, та ужез но быдэстом, кызьы лэсьтӥм вал Воткинскысь винзаводъя. Мукет ласянь, кыӵе предприятиос кун программаосты санэ уг басьто, соос интыысь ваньбуре выжтэмын луозы. Экономикаез государство ласянь чакласа возён - со туж секыт ужпум, уката ик тросэз солы пумит луо ке. Али кылдытэмын выль ужан кусыпъёс. Отын вань государстволэн интыез но со туала законъёсъя ужаны кулэ. Улонын солэсь палэнскон ӟече уз вутты: социальной удыс - экономика - государство гердэз лябӟытоз, кусыпъёсты куашкатоз. Берло дасо аръёс сое яркыт возьматӥзы. Калык сое быдэсак ас вылаз шӧдӥз-валаз. Ваньбурен кивалтэм сяна, кун озьы ик тупатэ тарифъёс но ужрадъёс кутэ, монополистъёс медаз кылдэ шуыса. Выль правительстволэн кутэм постановлениосызъя, республикаямы юн эскерисько эстӥськонлы тарифъёс, аракы поттон но вузан, сьӧд но буёло металлъёс люкан. Со юрттӥз кун бюджетэ тросгес уксё пыртыны. Нош озьы ӧй ке ужасал, бадӟымесь ыштонъёс адӟысалмы но калыклэн улонэз уродмысал. Вылаз ик, аракы вузан кырсь киё адямиос кие шедьысал. Государстволэсь экономикае пыриськемзэ котькин вала ни. Кылсярысь, туэ Россия Правительстволэн 27-тӥ июле кутэм постановлениезъя социальной политикая но экономикаез выльдонъя ужрадъёс учкемын. Отын чакламын 2001-2003-тӥ аръёсы эстӥськон но электрокужым сётон но вузан радлыкез, солы тарифъёс тупатонэз государстволы син азяз возьыны. Сое ваньмыз быдэсъялоз. Миым туж секыт югдур вал выт бичанъя. Шаерамы экономика мырдэм возиськиз, трос люкетӥсьёс вал. Удмуртиын ужаса, со огазеяськонъёслэн выт тыремзы уг поты вал. Выт бичась ёзъёсын ӵош югдурез тупатыны быгатӥм но бюджетэ ватсаса 560 миллион манет уксё вуэ. Со мынэ но мыноз уждун тырыны. Чурыт кылмес верам "Ижмаш" концернлы. Отын "Ижмаш" ОАО-лэсь ӝыныез коньдонэз понэмын. Вылаз ик, "Ижмаш" концернын ӧй вал кун но федеральной ваньбур. Кылдэмын вал сыӵе югдур, куке "Ижмаш" ОАОлэн коньдонзэ бергатӥзы нимаз адямиос, куке акциосын контрольной пакетэз государство киын вал. Кык толэзь ортчыса, "Ижмаш" концернлэн 51 процент ваньбурез государство киын луоз нош мукетъёсызлэн - 76 процентэз. Тужгес но лэчыт ужпум герӟаськемын му вӧй поттонэн. Удмурт Правительство радъяз 12 месторождениосысь му вӧй поттонъя огазеяськон (консорциум) кылдытонъя конкурс. Со луонлык сётоз автозаводэз выльдонлы Япониысь басьтэм кредитэз дыраз берыктыны. Со понна ми уретӥм азьло чаклам фирмаен "Нефть-автомобиль" проектъя огкылэз. Та огкылъя "Ижмаш-Авто" ноку басьтыны ӧй быгатысал 250 миллион доллар. Самой троссэ, оло, 68 миллион доллар куке-соку вуысал ик. Соин ӵош ик правительство палэнтӥз нормаен чакламъя 10 процент му вӧез вузанъя огкылэз, отын лыдэ басьтэмын ӧй вал му вӧйлэн зэмос дуныз. Му вӧез мукет амалъёсын вузан республикалэн бюджетаз ватсаса 380 миллион коньдон пыртӥз. Чурыт куронъёс пуктэмын вал ӵош ужась "Удмуртгеология" предприятие но Москваысь топливно-нефтяной компания азе. Со ик юртӥз республикалы 49 процент акциосты берыктыны. Та пакетлэн рынокын туннэ нуналлы дуныз - 20 миллион доллар, нош азьло со сылӥз 300 сюрс доллар гинэ. Топливно-нефтяной компаниез азинтыны ачиз инвестор висъяз 178 миллион манет коньдон. Табере республикае газ централизованной амалэн сётӥське. Ужез тазьы радъямен, "Газпром" предприятиосысь выт чотын ватсаса 136 миллион манет коньдон басьтэмын. Со ик юрттӥз феврале-мартэ газ ласянь кылдэм секыт югдурысь потыны. Ваньмыз та басьтэм азинсконъёс ас кожазы ӧз лыктэ. Монополистъёслы- олигархъёслы пумит юн сылыса, ми быгатӥм асьмелэсь малпанъёсмес быдэстыны, троссэ удысъёсты выль сямен радъяны. Нош таӵе вамышъёсмы туж ик уг кельшо, дыр, олигархъёслы. Ми ас тодэммыя ум лэсьтӥське, чакласьком законэн тупатэм ужан амалъёсты. Котькытын, котькыӵе удысын мон мед тыршо, нырысь ик лыдэ басьтӥсько монэн артэ улӥсь, ужась эшъёсылэсь малпанъёссэс, сюлэмшугъяськонъёссэс. Удмурт Республикаысь Правительстволэн Тӧроез Н. А. Ганза. Усьтӥське счёт Ву ултӥ уясь "Курск" лодкаын бырем морякъёслэн ӵыжы-выжыоссылы юрттон вылысь, "Евразия" ОАО-лэн Октябрь филиалаз счёт усьтӥське. Тани со: 40603810408362000026, БИК 049401836, к/с 30101810000000000836. Чебер киос, пиньёс но пальпотон... Малы студентъёс уж утчало? Валэктонэз тодмо � уксё кулэ. Нош тыныд 18-20 арес, дышетсконэд йылпумъямтэ на, мукет нокыӵе дипломед ӧвӧл. Уж инты сюлэме кельшисьсэ, трос коньдонозэ шедьтэм потэ, эшшо дышетскыны медаз люкеты. Вань-а таӵе куронъёслы тупась уж? Таӵе "бызгетӥсь" малпанъёсын киям бергатӥсько ялонъёсын газетэз. Кинъёсты гинэ уг ӧтё: дышетӥсьёсты, бухгалтеръёсты, юристъёсты, дизайнеръёсты, менеджеръёсты, инженеръёсты, автослесарьёсты, штукатур-маляръёсты... Нош мон, професситэм адями, пал пыд вылам сылӥсько бере, уж но огшорызэгес утчасько. Тани огаз нылпи садэ воспитательлы юрттӥсь кулэ. Толэзяз 300 манет ӵекто, нош ужано 8 час ӵукнаысен 5 час ӝытозь. Мукетаз 500 манет уждун дэмлало, озьы ик быдэс нунал ужано, дышетскисьёсты кулэ уг каро. Татын ик выж миськисьлы но ёрмо, быдэс нунал утялскод, нош толэзяз 300 манетэн гинэ уд улы ук. Магазинын утялскисез 700 манет оклад возьма, графикъя 2 нунал тыршоно, 2 � шутэтсконо. Озьы 2 нунал ужаса, кӧня урокъёсы кылёзы. Эх, ӝыт гинэ выж миськоно ке луысал! Вузаськисьёс но уг тыршо, шӧдске. 15 ялон сётӥллям. Дышетскеме ке но ӧвӧл, жингыртӥ ик. Татын аслым юан сётъяны кутскизы. "Вузкаронъя техникумез йылпумъяй" шуэме бере, нырысетӥ толэзяз 1000 манет ӵектӥзы. Мукетаз магазинын, дышетскеме сяна, азьвыл ужаме сярысь но юазы. 1500, пе, тыром. Куинетӥяз буяськон но парфюмерия вузаны ӧтё. Ужаськом, пе, 2 нунал ортчыса, уждун арнялы быдэ тыро. Газет нуллӥсь курьерлы арняяз 3 нунал ӵукна 8 часысен ӝытаӟе 5 часозь тыршоно. 300 манет понна-а? Санитаркалы 450 манет тыро, ужано одӥг сутка ортчыса, эшшо уин дежурствоос чакламын. Одӥгез фирма нылъёсты машина миськыны ӧте. Егит пияш соку ик пусйиз: ужано кезьыт азьын, котмоно. Уждунэз � 1500 манет, кык нунал ужаськод, кыксэ � шутэтскиськод. Нош Москваын егит нылъёс машинаез яратыса ческыт зыно шампуньёсын мисько. Таӵе тыршемзэс долларъёсын дунъяло. Ма, ул дӥсен гинэ чебер апайёс автодэ котыртӥзы ке, чылк-чылк каризы ке, кызьы коньдондэ жалялод. Нош асьмелэн? Фу! Эшшо нылкышноослы сыӵе уж дэмлало, ненег мугорез жаляны но уг валало. Асме эскерыны ветлӥ кафее официантка шуон вылысь. Нуналлы быдэ сиён-юон нуллыса бызьылоно ӧвӧл � график тупатэмын. Нуназе ужамлы 30 манет тыро, уинэзлы � 50. Шуныт палъёсысь вуэм кузёзы, синмыныз кырмыштыса шуиз: � Чаевой но луоз ай. Казиное крупье (вань сыӵе ужась но) кулэ луэм. Асьсэос ик дышето, ужаны но интыяло. Та профессиез мон киноосъя гинэ тодӥсько ке но, вераськонэ (собеседование) мынӥ. Татын гинэ нырысьсэ мыным пукон ӵектӥзы. Крупьелэсь ужзэ быдэсъясь Валера быдэс нимтулме, улон интыме, кытын дышетскемме юаз. Собере киосме ӝӧк вылэ поныны куриз. Паймыса синъёсы кымесам тубизы: � Крупьелэн, � валэктӥз Валера, � киосыз, пиньёсыз но пальпотонэз чебер луыны кулэ. Таӵе ужлэн со "визиткаез". Йырвизьме но "сыназ" на пияш. 3-ез 17-лы, 28-эз 6-лы уноятӥз. Калькуляторлы дышем йырвизьмы соку ик ӧз сайка. Озьы ке но, чотам берам, шонер валэктон сётӥ. Уждун сярысь юалляськисе пал кыл но ӧз поттылы. Таӵе тыл но ву пыр потыса, вераськонмы йылпумъяськиз. Валера телефонме куриз, арня пумын ваньмыз тодмо луоз шуиз. Секретарь-референт но луэм потэ: шуныт офисын пукысал, телефон жингыртэмлы вазиськысал, компьютерлэсь клавишаоссэ зӥбылысал, кузёелы чай, кофе ӵектысал. Но "сал" ке ӧй луысал, гур вылэ губи потысал. Таӵе уже вылӥ тодон-валан, пе, кулэ, азьвыл ужамед но 3 ар мында мед луоз, компьютерез мед тодод, минутскын 180 пус печатлано. Вӧзаз ватсалэ на � кулэ чебер ымныр но веськрес мугор. Эшшо одӥгаз фирмае ветлӥ на. Мон сяна, татчы 5 нылаш вуылэм ни. Ваньмес одӥг юан сюлмаськытӥз, луоз: "Кыӵе уж ӵектозы". Улытозям таӵе дырекъяме экзамен азьын гинэ вал. Нош номыр кышкытэз вылымтэ. Анкетаысь юанъёслы валэктэме бере, монэ вераськыны ӧтизы. Кивалтӥсь кӧня ке юан сётӥз: � Малы уж утчаськоды? � Студентъёслэн ноку но коньдонзы уг тырмы, собере кужымме но эскереме потэ. � Кӧня тӥ уждун возьмаськоды? 1000 манет ӧжыт-а? � Тырмоз. Собере уж сётӥсьлэн кылбур кадь вольыт верамысьтыз валай, татын егитъёсты дышето но уж инты сёто шуыса. Ваньмыныз умойгес тодматскон понна монэ ӧтизы кык нуналъем семинаре. Со понна мон тыри 35 манет. Татын ик тодматски Можга педколледжез йылпумъям нылашен. Со уж утчаса ёрмем ни. Нылпи садэ мынэмез уг поты. "Кызьы, � шуэ, � толэзяз 300 манетэн улод? Мон ведь пинал ай, ческыт сиеме но, чебер дӥсяськеме но потэ". Кыкнамылы но та фирма осконтэм потӥз, озьы ке но эскерыны кулэ. Мыным тужгес но тупасал гувернанткалэн ужез. Дышетсконысь но ӧй кыльысал (ӝытъёсы гинэ ветлоно), стипендие вӧзы юрттэт но луысал (мон понна 800 манет туж умой ни). Нылпиез кунгож кылъёслы дышетыны кулэ, нош мон немец кылэн "чутӥсько". Зэм, ужан интыос вань гинэ. Нош солэн куронъёсызлы тон тупалод-а? Университетэз йылпумъяса но тонэ кытчы ке кутозы-а? Берло вӧл-вӧл бурдъёстэ шоналтэмед потэ ке, уксё поттыны али ик кутсконо. Нырысетӥ уж инты � улонын нырысетӥ кирпич. Кузьыли но карзэ одӥг-кык лысэн бичаны кутске, нош берло кудбыдӟа ӝутэ. Мылкыд но кужым гинэ мед луоз, соку ваньмыз пӧрмоз. Алёна ИОНИНА. ВОРМОНЛЫ � 55 АР Боды мугорез жуге, кыл лыос пыртӥ потэ Куать ар но ӝыны ӧз адӟылы вордэм пизэ Ильинична. 1945-тӥ арын 31-тӥ декабре инмарез васькиз ик, лэся � кема аръёс ӵоже ышыса улэм дуно пизэ со выльысь ӟыгыртыны быгатӥз. Сое пумитаны ӵыжы-выжыоссы гинэ ӧвӧл, матысь гуртъёсысь калык но люкаськиз. Кема аръёс ӵоже ож сюресъёстӥ ветлэм адямиен пумиськыны котьку тунсыко уго. Ма, собере сюлмазы лушкем осконэн но лыктӥзы � оло, пумиськылӥз фронтын соослэн агай-вынынызы, кузпалэнызы, атаенызы? Ӝӧк выл туж узыр ӧй вал ке но, нокин но ӧз ӝожомы. Ильиничналэн ӟузёнэз ваньзэс шӧмаськытӥз � пичи коркан куараос ӵукнаозь чузъяськизы. Та аръёсы калык ёрмылӥз ке но, ӧвӧлзэ но вань карыса, дуно куноез коркась корка нуллӥзы. Кӧтыз тырытэк нош но нош учке, купырмем киосыныз веша песянай пизэ. Э-э, пие, анай-атаед ке луысалзы... ...Никита дышетӥсь вал, соин ик сое армиысь но вазьгес лэзизы, школаос дышетӥсьёслы ёрмылӥзы угось. Роно Якшур-Бодья школае немец кыллы дышетыны ыстӥз. Нимысьтыз та кыллы дышетскемез ӧй вал, но пленын амалтэк солы дышиськиз. Валамон, немец грамматикаез нокин ӧз валэкты. Соин ик Никита дышетскыны пырыны малпаз. Экзаменъёссэ умой ке но сётӥз, институтэ сое ӧз кутэ. Мугзэ меӵак валэктӥзы: пленнойлэн институтын дышетскыны нокыӵе правоез ӧвӧл. Ӝыны арзэ вольнослушатель луыса одӥг лекциез но кельтытэк ветлӥз. Егит пиосмуртлэсь дышетскон мылкыдзэ шӧдыса, декан списоке пыртыны косӥз. Но стипендия ӧз сётэ � пленнойёслы закон, пе, уг лэзьы. Мабыдӟа шуккет вал со � мар понна со ас шаераз мултэс луиз? Но йырзэ выллань ӝутыса вамыштӥз азьлань. Кызьы гинэ чидазы соос кузпалыныз но кык нылпиосыныз та аръёсты? Но шуккетъёс вылэм ай. 1956-тӥ арозь репрессия улын улӥз. Котькуд вамышсэ эскерыса возиз НКВД-ысь мурт. Со сярысь тодытэк, кылытэк ӧз улы Никита. "Эскерись" ачиз но кудӟем йырыныз огпол гинэ ӧз ушъяськыны, кытӥяз кышкатъяз но � тынад улонэд мынам кырымам! 1956-тӥ арын репрессия улэ шедемъёслэсь чылкыт нимзэс берыктон сярысь бумага кутӥзы ке но, котькуд адямилэсь ымзэ уд ӵокта ук. Пленын улэменыз меӵак синмаз ӧз вераллялэ ке но, пельысь пеле со доры вуылӥз: фронтэ, пе, кӧня ке толэзьлы гинэ пырамын, пленын ватскыса улэмын. Ожмаськисьёсыз музъемын сисьмо, ватскыса улӥсьёсыз начальникын ветло... Ваньмыз со вераськонъёс солдатлэсь сюлэмзэ чидантэм вӧсь карылӥзы. Пленын ортчытэм кӧшкемыт шимес аръёс нош но нош тодаз лыктылӥзы, Орша котырын бышкись ез кенеръёс сьӧрын сиемез потыса но кынмыса, быдэс октябрь толэзез зор улын костаськыса йырсазьзэ ыштэм луло шӧез сарае кулэмъёс пӧлы куштӥзы, кызьы соосты � сютэм лысьӧмъёсты Лейпцигысь концлагерьын, шахтаысь эгырен тырмытъям вагонъёсты жугыса ӝутъяны косылӥзы (соосты немецъёс юри погыръязы), кызьы пегӟыкуз кутэмзы бере кулымоназ ик жугизы, толалтэ 20 градус кезьыт дыръя коргид сеникын кӧлатӥзы. Сюмамысьтызы эбек сиемъёссы... Соку солэн сюлэмыз выльысь шымырскылӥз, йырсиосыз пештырскылӥзы. Со ваньмыз тушмон ки улын дыръяз вал. Но маин со янгыш � пиналысен войналэн самой лек тылӝуаз ож тӥрлыктэк ыстэмысьтызы-а? Никиталэн ортчем сюресэз туж нырко ке но вал, сюлэмзэ излы пӧрмытскыны ӧз сёты. Нокин шоры лек кылъёсын ӧз вазьылы, киосыныз ӧз шонаськылы, нокинлы ӧз вожъяськылы. Улытозязы одӥг папирос кыскемез, одӥг пол но кудӟытозяз юэмез но ӧй вал. Лулӟылӥз но выльысь сэзъялскыса азьлань вамышъяз. 1956-тӥ арысен солы бадӟым ужъёсты оскыны кутскизы. Ужаз школалэн директорез, ронолэн кивалтӥсез луыса. Огдыре ик быдэсъяз парторганизацилэн секретарезлэсь, профсоюз огазеяськонъёслэн кивалтӥсьсылэсь ужзэс. 1965-тӥ арын КПСС-лэн членэз луиз. Сыӵе муртлэн но тушмонъёсыз луозы шуыса оскыны но шуг кадь. Но тушмонъёс, вожъяськисьёс вал. Соос бурмымтэ яраос вылэ ялан сылал пызьналлязы, вӧсь интызэ утчаса, сьӧд кый сямен шияны выризы. Кытӥяз аслаз луло кылемезлы туж шум но ӧз потылы ни Никита. Со сярысь шара ӧз поттылы ке но, мылкыдыз возьматъяз. Шуылэ вал: пленэ ке ӧй сюрысал, оло, мукетъёсыз сямен ик мон но дырыз дыръя бырысал. Одӥг муртлэсь гинэ войнаын сӧсырмем солдатлэсь кылэме вань пленнойёсыз жалямзэ. Ми сӧсырмыса госпитальёсын толэзьёсын кыстаськылӥм ке но, тодӥськомы вал: ми эркын � асьме шаерамы, ми сярысь сюлмасько, эмъяло. Нош пленэ сюремъёс сьӧсь ки улын, соосты мыскылляло, жуго, виё. ...Дыр тулыс ву кадь � ӝегатыны луонтэм. Йырвизьмысь тросэз потэ, вунэ, но та шимес учыр ӧз вуны. Сюлмысьтыз яраосыз кулытозяз вирӟектыса улӥзы, сутыса висьытӥзы. А.ВАХРУШЕВА. Ижевск. В.АГБАЕВ Жильырты, ошмес Тодэ ваёнъёсын драма Шудӥсь муртъёс Диктор Очей � пересь пиосмурт Олёш � егит дыръяз Лукер � анаез Дарья � сузэрез Кузьма � Куӟебай Герд Микаль � Михаил Тимашев Леким Опочей Надёк Марья Матрон Олёшлэн ёзъёсыз Митрич � А.Д.Антоновский Сидор � милициысь офицер Милиционер Нылаш Гуртысь егитъёс, мӧйыос Нырысетӥ люкет Катанчи азе арлыдо пиосмурт потэ. Кияз огшоры боды. Та арбериез солы кытӥяз вамышъяны юрттэ, кытӥяз � турын куаръёс пӧлын бугыръяськыны. Диктор. Вамышъя, тузон пурӟемлэсь кышкаса кадь, каллен вамышъя арлыдо пиосмурт. Татын уго солэн улонысьтыз самой шудо нуналъёсыз ортчизы: зарни пичи дырыз, быдэ вуонэз. Мынӥсь-ветлӥсь калык куд-огез "ӟечбур" шуыса ортче. Пиосмурт пумитазы йырыныз мыкыртэ. Арлыдо муртъёс кизэс сётыса ӟечъясько. Пиосмурт шляпазэ басьтыса ик мыкырске. Ошмес дуре мынэ, солэсь жильыртэмзэ кылзэ. Бӧрысь, ошмеслы йыбырттыса, дун вуэ векчи коньдон куштэ. Пыдесъяське, азяз кирос каре, сузеныз вузэ юэ. Очей. Эх, ошмесэ, ялан кырӟаськом, шу! Ялан адямиосты витиськод. Тау юзмыт вуэдлы! Я, бызь на, бызь тон, ошмесэ. Я, сёт на, сёт тон куарадэ. (Ошмес йыр азе пуксьыса, пичильтык книга поттэ.) "Сяськаяськись музъем" Куӟебай герд. 1927-тӥ ар. (Учкытэк лыдӟе). Серекъясь шундыез кырӟаны Мон та дуннее лыктӥ. Пеймыт удмурт гуртъёстӥ Серекъясь шундыез кырӟаны. Калыклэсь сюлэмзэ шунтыны Мон быгатӥ, быгатӥ! Серекъясь шундыез кырӟаны Мон та дуннее лыктӥ. Диктор. Очей та книгаысь вань кылбуръёссэ тодэ. Озьы ке но, та сурыкмем книгаеныз люкиськыны уг малпа. Малы меда? Оло отысь кылъёс сюлэмзэ шунто, оло со дуно кузьым. Катанчи усьтӥське. Куамынэтӥ аръёс. Удмурт нылъёс но пиос ӝыт шудонэ люкаськемын. Узыр пиос сапегъёсын, чилясь ныро картузъёсын, пустол но атлас дӥсьёсын. Начаръёсыз кутъёсын, гын шляпаосын. Куд-огезлэн дэремъёссы кышъямын, вурӟемын. Шор юбоен шудо. Нылэн пи бызьыса юболэсь палэнско, ошмес дорын выльысь пумисько. Серекъяло, вуэн пазясько. � Юзматскы, умме эн усьы. � Ачид но чырткем лу. Опочей (узыр пи, шор юбо интыын). Тӥ монэ какалмытоды, ужпиос кадь бызьылӥськоды. Матрон. А тон сэзь кариськы. Опочей. Вот тонэ кутӥ ке, одно куакъёс пӧлы нуо. Матрон. Нуид но, ӧд но... Кукъёсыд вакчиесь. Опочей. Мынам-а? Коть али ик. Леким. Тон мар шудонэз сантэмаськод? Возьытэд ӧвӧл. Опочей. Шып ул, куар улчи. Леким. Тӥни вот. Соос шоры вазьыны ик уг луы, ним-дан каро. Опочей. Мар куаньгетӥськод, зырен шуккыса писэн маялтон люкет. Эшшо пиньгеты ай (Мыжыкъёсын Леким пумитэ мынэ). Надёк (Опочей азе султэ.) Мар откы-калтыос борды кидэ саптамед потэ? Ойдо пӧламы. Милям шулдыргес. Опочей. Ымыд шонер усьяське, но кылыд мыдлань вераське. Надёк. Милям мылкыд майтал шукы кадь. Опочей. Мылкыдды майтал шукы, гадяды кезьыт кыпы. Надёк. Озьы эн вера, Опочей, милям шунтӥсез но вань. Опочей. Тӥляд уго сотэк уг луы. Ӟенелик пушкады йырберыктон турын пызьнамын на, дыр. Надёк. Милемыз сантэманы уг яра. Опочей. Нош мар карыны яра? Надёк. Яратыны, кышнояськыны. Опочей. Мын ай кожой кук Исьтапанэд доры. Надёк. Мыскыл кариськод, ултӥяськод? Опочей. Мар бордам сирпу кадь тэбинид? Пшол татысь! Надёк. Эн вунэты, милям анай-атай бай выжыысь. Гуртын ми кадырлы адямиос, Опочей. Опочей. Ми но бере ум кылиське. Куке но атае староста вылэм. Тынад атаедлэсь одӥг чиньылы вылӥынгес. Надёк. У-у, кылмекей! Берло жаляно медад луы. Опочей. Бӧрдӥ ке но, тон понна синкылиме уг кисьты. Надёк. Укыр эн лӧптылы. Колхозэ ӧд пыре на, нош астэ со пась штаниос кадь активист кожаськод ини. Опочей. Чальтчы! Азьыдлэсь берыд чебер. Надёк вылтӥяськыса но йӧнъяськыса узыръёс пӧлы мынэ. Опочей. Мар шудэмысь дугдӥды? Марья. Ачид ук шудонэз сурад-пожад. Ыжъёс пӧлы сюрем кечтака выллем дауртӥськод. Опочей. Ымдэ бадӟым эн усья, а то шокан пасяд кушман вуоз. Марья. Ой, кышкатӥд. Одӥг пигонэ но ӧз вырӟы. Опочей. Мар шуид? Марья. Йырыд ужа, но пельыд люкетэ. Опочей. Монэ, Гарась пиез, ултӥяны дӥсьтӥськод? Марья. Оло, йыбыртъямез возьмаськод? Укыр эн шоккеты. Мыняк потса гаӵак усёд. Опочей. Ух тон, улдӥ-малдӥ. Марья. Улдӥ-малдӥ ке но, тонэн мон кивалтӥ. Опочей. Ку? Марья. Атасэд чоръяку. Опочей. Э-э, алдаса мунчое ӧтид но ӧсэз пыкъяса кельтӥд. Марья. Вот уго, йӧнтэм ошлэн ныраз кульчо донго. Опочей (шуак Марьяез кутэ). Табере учком, ачид кыӵе гурен чирдод. Марья. Возьыттэм, Инмарлэсь коть кепыра. Опочей. Я, мурдое шедем чукырна кадь эн выры. Пунэм тыронэн чебер. (Марьяез палэнэ валтыны ӧдъя.) Леким. Эшъёс! Мар та луэ? Матрон. Пумит вазьыны ум дӥсьтӥське. Ву ӟузем кадь шып сылӥськомы (Марьяез мозмытон понна Опочей борды мерске). Опочей. Пшол, Матрон-патрон (Донге, соиз усе.) Леким. Олёш! Бекче вутэк шальтра, адями тугантэк купыра. Олёш но Леким Опочей борды мерско. Марья мозмытске. Пиос кыстаськыса ошмес доры вуо. Леким кыдёке пештэм бере, Опочей Олёшез ошмесэ месылэ. Опочей. Ме, ме, ошмес ву анай йӧлыд кадь мед потоз. Тод, кин борды мыжыктэ урдӥд. Олёш кызьы ке палэнске но ӵыже. Опочей кукъёсыз вискы кырмиськыса вузыны шӧта. Надёк. Вот, вот, озьы ик кулэ тыныд. Табере окты-калтыос вылэ атасэд уз чоръя ни. Опочей. Шып ул, потос. Надёк. Йӧттэмзы понна дотово шумпотӥсько. Ой, шумпотӥсько! Олёш. Гогыедлэсь вылӥе эн тэтча. Опочей. Ӟазег чыртыез кадь мекалто. (Саесъёссэ пужалля). Гырлы куара кылӥське. Кузьма но Микаль пото. Кузьма. Мар татын таӵе? Матрон (Опочей шоры возьматыса.) Тӥни, вожомем така, лекаськыны дасяське. Кузьма. Эшъёсы! Егит эшъёсы! Уг яра озьы. Микаль (Опочей азе султэ). Умойтэм со. Жугиськыса данэ уд потэ. Валче, огкылысь кариськыса улыны кулэ. Леким. Улод соосын! (Кисальӟем ымнырзэ кутылэ). Пинез пыргытӥз, лэся, проклятой. Марья. У-у, изьвер! Олёш. Монэ ӝокатӥз. Кытчыям меда тэрысал ошмеслэн вуэз? Матрон. Ма, ма, Кузьма агай, лэся, но. Кузьма. Мон-а, мар-а, егит эшъёсы, ӟечбуресь! Леким. Зэмзэ но ук, Кузьма Павлович. Кузьма. Кемалась вал ини бертаме. Гуртэ пырыкумы ик тани атаелэн ошмесэз доры кожимы. Пиналъёс сое котырто. Палэнын узыръёсыз сыло. Надёк. Со Кузьмазы асьме гуртысь, шуо. Стихотворенняос, пе, гожъя. Нырысетӥез пи. О-о, ёмыртэ, дыр, уксёез. Кыкетӥез пи. Сотэк нош кызьы? Надёк. Оло озьы, оло ӧвӧл � уг тодӥськы. Вераськемзэс кылӥ: со, пе, удмурт калык понна уйёссэ уг кӧла. Тырше, пе... Узыръёс пӧлысь пи. Тырше тыныд. Нош мынам атае шуэ, со, пе, буржуй гожъяськись. Эксэез, пе, весь ушъя. Дӥсез гинэ пролетарьятлэн, нош пушказ кулак выжы. Мукетыз. Вераськы, ойдо, инмарлэсь коть курда, а то ӵашъёз. Кинишкаос но потта бере, выль улонэз данъя, дыр. Микаль (узыръёс доры матэктэ). Бен, задор калыке! Асьмелы али выль сямен улыны кутсконо. Дэмен кутскыса, азьпаллы выль улон дуроно. Кузьма (егитъёслэсь висъяське). Тодматске, эшъёсы. Таиз агаймы "Насьток" драмаез гожтӥз � Михаил Николаевич Тимашев. Марья. Вот тыныд! Сюгайылъёс возьматӥзы уго вераськон концертсэс. Насьтокез жаляса бӧрдӥ но вал. Со таки-а быриз? Микаль. Шудӥсь муртэз ӧз быры, нош Актэмырысь Насьток... вал гуртамы сыӵе учыр. Секыт улонлы чидатэк озьы. Кузьма. Вот, егит эшъёсы, Октябрь революция асьмелы выль сюрес ӵогиз. Со пеймыт но секыт улонлэсь мозмытсконо. Саесъёсмес пужалтыса, уж борды кутсконо. Тӥ но сюлмысь басьтӥськыны кулэ . Вамышъёсты чырмыт мед луозы, пытьыосты кемалы мед кылёзы. Улонмес шудо карон понна, тӥ, егит эшъёсы, милесьтым мытэм ужмес азьланьтоды. Оскисько. Фабрикаосын но заводъёсын рабочийёс кузёясько ини. Отын огкылысь луыса ужало, ог-огзэс валало. Ӟеч мылкыдын лэсьтэм уж ачиз бордаз кыске, синмез мальдытэ. Кылзэ ай: Туж шулдыр завод. Бадӟым из завод. Уен-нуналэн Тон дыбыртӥськод. Дугдытэк ужало: Порто, вандыло, Ӟырдато, бергато � Выль улон юнмато. Туж паськыт усьтэлэ Заводлэсь капказэ! Выль ужась, учкелэ, Вае выль кужымзэ! Леким. Зо-ол чирдэмын. Микаль.Кузьма Павлович озьы быгатэ. Тӥ но солэсь адӟем карысалды ке, умой луысал. Дыртэлэ. Бере кылён � дыр сьӧры уиськон. Та вераськон дыръя узыръёс но куанеръёс сурасько. Опочей. Нош музъем ласянь кызьы? Мынам атай большакъёс вылэ пиньзэ шере. Уг, пе, пыры огазеяськоназы. Колхоз шуонзы, пе, тӧлпери потытозьлы гинэ. Микаль. Умойтэм со вала, юлтоше. Ваньмы колхозэ пыримы ке, дэмен ужамы ке, соку атаед валалоз: кытысь потэ кужым. Оген венез но ӝутыны секыт, дэмен � гурезез берыктод. Огазьын ужам адямилы шуд сётэ. Кузьма. Музъем, егит эшъёсы, со асьмелэн байлыкмы. Крестьянъёс солэн кузёосыз луыны кулэ. Асьмелэн со одӥг, вордӥськем музъеммы. Сое вузаны но, басьтыны но уг луы. Азвесен но, зарниен но ӵошатонтэм. Матысь дыре валъёсты воштозы тракторъёс. Геры сьӧрын курадӟоно уз луы ни. Ми гыриськом, кизиськом! Араны егит муртъёс лыктозы. Уз лёгалэ, аралозы, Луд тыр чумолё пуктозы... Соин ик Ми гыриськом, кизиськом! Олёш. Ку со ваньмыз луоз? Мон тракторчие мынысал. Микаль. Ӝоген вуоз сыӵе дыр. Тӥ сое асьтэос адӟоды, асьтэос лэсьтоды. Пезьдыт кужыменыды шудо улон дуроды. Надёк. Ми но-а? Микаль. Нош тӥ маин пӧртэм? Надёк. Ми начаръёслэсь вылӥынгес. Атай шуэ: "пась штаниосын", пе, эн кушласькы. Соослэсь номыр басьтыны. Микаль. Матысь дыре уз луэ ни узыръёс но куанеръёс. Вожъяськыса, вожмаськыса улон выжытӥз уретэмын луоз. Кузьма. Со понна, егит эшъёсы, дышетскыны кулэ. Удмуртъёс пӧлын дышетӥсьёс, землемеръёс, врачъёс, агрономъёс, учёнойёс мед луозы. Удмурт кылмы каръёсын но ваньмызлы кылӥськымон чузъяськыны кулэ. Прокопьев, Наговицын, Борисов, Барышников сярысь кылэмды вань-а? (Куараос). Вань, иське. Тӥледлы, егит эшъёсы, соослэсь адӟем кароно. Соос удмурт пиос � визьмо пиос. Дышетскон понна кужымез жаляно ӧвӧл. Вань мылкыддэ, быгатэмдэ сётоно визь люканлы. Визь � со шуд. Та пеймыт уй ку быроз? Та курадӟон ку ортчоз? Удмурт калыкъёс доры Шудо улон ку вуоз? Ваньмы ик ке дышетским, Книгаосыз ке лыдӟим, Визьмо, зарни кылъёсыз Верамъёсыз ке кылзӥм, Соку куректонортчоз, Ёрмон, курадӟон быроз. Зарни шунды ӝужалоз, Пеймыт уез уллялоз, Удмурт калык сьӧд тэльысь Паськыт бусые потоз!.. Матрон. Чирдыны быгатӥськод, Кузьма агай. Выжыкылэз кадь. Кузьма. Ӧвӧл, мусо нылы, та выжыкыл ӧвӧл. Эй, зарни эшъёсы! Мынэ тӥ гуртэтӥ, Сайкатэ иземысь калыкез... Султэ! Султэ ӝоггес!.. Мыноме асьмеос, Утчаны мыноме шундыез!.. Олёш. Кызьпу туй кадь чебер лякемын. Кузьма. Кызьпу чебереныз синъёсыз палёмытэ, вераськон кыл радэныз шумпоттэ. Эшшо ик родной удмурт кылын ке. Туннэ, али, Улон ялан воштӥськыку, Социализм юнман дыръя, Малы дуно Та удмурт кыл? Малы, малы Кулэ сокем Удмурт кылэз Юн, ӟеч тодэм? Оло мукет уно кыллэсь Жингрес солэн жингреслыкез? Оло мусо чеберлыкез? Оло мусо куаралыкез? Ӧвӧл, ӧвӧл, Котькыӵе кыл Ас интыяз чебер, жингрес. Марья. Чебер ик вылэм удмурт кылмы. Мон дышетӥсе мынысал. Пиналъёслы, Кузьма агай, тон сямен ик стих чирдысал. Кузьма. Со туж умой ук, мусо нылы. Гудырикошконэ Можгала ветлы. Отын дышетӥсьёсты дасясь школа вань. Пырон понна экзаменъёс сётоно. Микаль. Кузьма Павлович, вераськы егитъёсын. Нош мон мусо апоклы ваньзэ тупен- тупен мадё. Ачим но уго со кебитын дуриськись луи. Кузьма. Шонер, Михаил Николаевич, медаз возьдаськы удмурт нылашмы. Юрттоно. (Микален Марья палэнско.) Вот, егит эшъёсы, ӝоген асьме инбаметӥ но горд кизилиен эропланъёс лобалозы. Леким. Мар кыл со "эр-роплан"? Кузьма. Эроплан? Ӟучъёс самолёт шуо, нош сое лётчик валтэ. Леким. Кыӵе, мар арбери со? Кузьма. Со, егит эше, тылобурдо кадь. Бурдъёсыз но вань, только уг шонасько, уг лопыръясько. Быжыз вань. Ныраз, тӧл вукоысь бергась бурдъёс кадь, пропеллерез жургетэ. Мотор сое ужатэ. Нош эропланын удышетскем адями пуке. Лыз, Сэзь Инмын Туж вылын Эроплан жургетэ, каньылля поръяса... Мугорыз � сталь-корт... Бурдъёсыз бордын Кизили ворекъя, ӵыж-горд пиштыса... Пропеллер берга... Пропеллер зурка, Пилемез турка. Леким. Воксё, воксё абдрасько. Кузьма. Малэсь, егит эше? Леким. Кызьы бон корт лобалоз? Вуын со вые. Табере корт, пе, инметӥ лоба. Э-э, Кузьма агай, алдаськод, дыр. Кузьма. Тӥледыз алдаса, егит эшъёсы, мон бадӟым уг буды. Верасько мар вань. Ваньзэ сое дышетскем адямиос, учёнойёс, лэсьтыны быгато. Со корт ик, егит эшъёсы, инметӥ но лоба, ву вылтӥ но уя. Опочей. Кампет сием кадь ческыт выжыкыл вераськод, Кузьма агай. Кузьма. Выжыкылъёс улонэ берытско, егит эшъёсы. Опочей. Митырка тани улэп адями ке но, уямез уг луы. Шур пыдсы тӥр кадь тюа. Интикресно. Корт мед уялоз ай? Кузьма. Уя, егит эше, уя. Визьмо адямиос уято сое. Бадӟым корабльын кивалтӥсь � капитан, юрттӥсьёсыз � офицеръёс. Соос морякъёсты зарезь ужлы дышето: кужымзэс кыдато, кӧшкемыт тулкымъёсын нюръясько. Опочей. Шурдыт ке но, мон мора вылэ мынысал. Интикресно, дыр, отын. Кузьма. Ма, со туж умой ук, гажан эше. Нырысь Сарапулэ ветлоно вылэм тыныд. Кам кузя но пароходъёс уяло. Учкод, чаклалод. Мылыд ке потэ, кыл вератэк юртто. Опочей. Уд алда-а? Кузьма (кизэ мыче). Вай кидэ (Опочей кизэ сётэ). Вераським, эше. Леким. Мон но лобась кортэз валтысал. Эропланчи луысал. Кузьма. Э, егит эше, дышетскыны мылкыдыд гинэ мед луоз. Быгатэмея ваньдылы юртто. Ваньдылы, удмурт егит калыке! Надёк. Мон эмъяськись луысал. Мыным но юрттод-а? Кузьма. Малы нош уг? Будӥсь егитъёс понна мон котьку дась. Матрон. Нош мон пудо-животэз жалясько. Пудо першалэ дышетскеме потэ. Атайлэсь курдасько. Уз лэзьы, дыр. Шуоз, ужась кулэ. Кузьма. Эн кышка, нылаше. Михаил Николаевичен дорады ветломы. Атаеныд вераськом, кенешом. Матрон. Ой, Кузьма агай, тӥ сое туж но туж либатэ вал. Кузьма. Тыршом, нылоке, тыршом. Олёш. Кин кызьы, нош мон гуртам ик кылё. Тракторен бусыосмес гыро, кизё. Только вот дышетсконо на солы. Кузьма. Дышетскод, егит эше, дышетскод. Кызьы нош нянь будэтӥсьтэк? Олёш. Мон машинаос малпасал. Кузьма. Инженер луод-а? Олёш. Озьы-а, мар-а шуо? Кузьма. Котькыӵе уж, егит эшъёсы, дышетскем-тодэмез кулэ каре. Николаевич, учкы ай, кӧня вуоно кивоштӥсьёс шедьтӥмы. Микаль. Бен. Кортэз пӧсь дыръяз дуро, мылкыдзы вань дыръя удмурт пиналъёсты дышетоно. Только Павлович асьмелы но шутэтскон дыр ӧжыт кылёз. Ветлоно, утчано, техникумъёсы пыртоно. Тыл кысэ. Диктор. Куӟебай Гердэн Михаил Тимашев уно гуртъёстӥ ветлӥзы. Уно адямиосын пумиськылӥзы, трос калыкен кенешизы. Вылӥ дышетскон интыосы пырыны удмурт пиосты но нылъёсты дасязы. Мумы-бубыослэсь жоб кылъёссэс но ӧжыт кылоно ӧз луэ. Милемлы, пе, ужась кулэ. Нош соос йырзэс ӧз оше. Мыкыртэм чырты вылэ уго пуксьыны капчи. Нош со дыре ик йыр вадьсазы возъяськизы бугырес сьӧд пилемъёс. Ох, со сьӧд пилемъёс! Тыл ӝуатске. Очей (ошмесын ымнырзэ пылатэ, кияз книгазэ кутэ). Ой, тӧл тӧла! Ой, тӧл зола! Гуртын буран, Гуртын пурга. Зурка урам, Вуж гурт зурка. Кузьма потэ. Кияз портфель. Чаклаське. Ошмес доры вуыса, копейка куштэ, вузэ юэ. Ӧр выжые пуксе. Гожъяськыны ӧдъя. Олёш потэ. Матэктэ. Кузьма шуак йырзэ берыктэ, кыксы ик пумем кадь луо. Олёш. Вуид-а, Кузьма агай? Кузьма. Бертӥ, егит эше. Ну, ӟечбур-а? Кыӵе улӥськом-вылӥськом? Олёш. Огшоры. Нянь сииськом, ву юиськом, пичияк сылалтӥськом: кӧт тыре � дунне кайгу быре. Кузьма. Дунне кайгу шуиськод? Со, егит эше, уг быры. Адями мышкын вужер сямен ветлэ. Олёш. Ӧйгес вала. Мар ке умойтэм-а, Кузьма агай? Кузьма (сак кариськыса). Ӧвӧл. Али уродэз ӧвӧл на, эше. Олёш. Луоз-а, мар-а? Кузьма. Ӧйтӧд, умоезлы оскем потэ вал. (Шуак.) Вот мар, егит эше. Тимашев тӥледлы ӟырдыт салам вераны косӥз. Тузӥ, пе, мед дышетскозы. Олёш. Тау, дышетсконын бере ум кылиське. Шыдэз ӟузьылэм кадь капчи ӧвӧл ик но � тыршиськом. Милесьтым но солы ӟеч ивор вералэ. Стихъёссэ шумпотыса лыдӟимы. Ачиз нош мар ай сьӧрады ӧз лыкты? Кузьма. Со... со черланы шӧтаз. Олёш. Ой-ё , умойтэм со. (Ӝогак кытчы ке бызьылэ. Буш ӟенеликен берытске, вуэн тырмытэ.) Кузьма агай, сётэ солы та ошмес вуэз. Ӝоггес мед йӧналоз. Та ошмесмы эмъюм кадь. Анае озьы шуэ: юисько ке, висёнэ вунэ. Кузьма (ӟенеликез портфеляз интыя). Озьы, дыр, егит эше. Мынэсьтым но висёнме мед бурмытоз вылэм. Олёш. Йӧнатоз, одно йӧнатоз. (Кузьма шоры учкыса пайме. Соиз ошмес ву шоры долкамын.) Чирды на вал одӥг стихтэ. Азьвыл бертакуд куаныса кылзӥ. Кузьма. Озьы, озьы. Атаелэн ошмесэз. Со гудӟем, чылкытатэм тае. (Бадӟым вис.) А? Мар тон юад? Олёш. Стихотвореннядэс чирдэ на вал, шуисько. Кузьма. Бен, бен. Нош солэн кулэез вань-а? Олёш. Стихлэн-а? Туж чебер пӧрме, кырӟанын кадь. Ваньмыз вӧл-вӧл, радызъя, зэмзэ вераса чирдиӥськод ук. Кузьма. Тау, егит эше. Куд-огез кылбуръёсме уг валало. Палдурес каро. Ӧйтӧд. Тон ачид лыдӟыны куриськод. Кылзы. Мон � удмурт, мон � туж шудо! Эрказ луи, бурдъяськи! Сюлмам горд тылъёс будо, Сьӧд дуннеысь мозмытски! Тани � мон но тӥ пӧлын, Уно пӧртэм калыкъёс, Мынам мылкыд � туж вылын, Котырам � сьӧд пилемъёс. Олёш. Э-э, озьы ӧвӧл, сураськод. Азьвыл чирдӥд вал, котырам выль сюресъёс шуыса. Вунэтӥд-а? Кузьма. Зэм но ук озьы. Вот ведь та... Егит эше, тыныд книгаме кузьмало. Берпуметӥез та. Аслым шедьто на. Бадӟым ӧвӧл со, куарнянь зӧкта гинэ. Синпель мед луоз, ява. (Портфельысь книга поттыса, кыкетӥ бамаз гожтэ.) Шудо лу, гажан эше. Визьмо дышетскы. Ми кадь адямиосыз огпол коть тодад ваид ке, соин но тырмоз. Олёш. Тау. Ачид но трос-трос гожъя. Ми шумпотыса мед лыдӟомы. Таӵе дыре пересь абие берекет кароно шуоз вал. Кузьма. Тау ӟеч кылъёсыдлы. Мыным вырӟоно. Олёш. Кузьма агай, мон келяло. Кузьма. Егит но гажан эше! Туннэ лэсьтоно уждэ ӵуказелы эн кельты. Бер луоз. Мын ас сюрестӥд. (Вамыштэ, дугдэ. Олёш пала берытске, сое ӟыгыртэ. Со вие кӧшкемыт музыка кылӥське, шуак дугдэ.) Удмуртъёсы! Дышетске, весь дышетске. (Кошке.) Олёш книгаен сылэ. Опочей потэ. Олёш мышкын эскериське. Опочей. Мар со? Олёш (куалектэ). Ки-кинишка. Уд адӟиськы-а? Опочей. Адӟисько. Кузьма агайлэн-а? Олёш. О-о, ас киыныз кузьмаз. Тани (гожтэмзэ возьматэ.) Опочей (лыдӟе). Ку-ӟе-бай Ге-ерд. Олёш (данъяськыса). Во-о, мыным гожтэмын. Опочей. Тыныд ке � ме, мыным ке � жаль. Олёш. Мар Кузон майтал кадь шукыяськид? Мукетъят бертӥз ке, тыныд но кузьмалоз ай. Тазэ ӵошен лыдӟомы. Тылъёс кысо. Тыл югдытэ Очеез. Очей (лыдӟе). Огнад тон кылёд та паськыт дуннее, Огнад куректод, куанере, мусое. Уз сяськаяськы ни дорад чебер сяськаед � Уз берытскы ни дорад будэтэм пиед. Диктор. Ӧз тоды Очей, ӧз но малпа, Куӟебай Гердэн адӟиськемез берпуметӥез шуыса. Кузьма Павловичлэн йыр вадьсаз тымиськем пилемъёс укыр шимесэсь луизы. Ноку уз тоды Очей, Бадӟым Докья ошмес вуэз Тимашев ӧз веръя ни шуыса. Сое сизьыметӥ южтолэзе пытсазы. Нош дас куинетӥ куартолэзе Герд ворсамын вал. Дыр ортчемъя, ивор кылӥськиз: соос, пе, калыклэн тушмонъёсыз. "Софин" ужъя кызь тямыс мурт янгыше уськытэмын вал. Соос пӧлын кыкез нылкышноос. Та сярысь Очей номыре ӧз тоды. Со ялан возьмаз гажано муртъёссэ. Газетъёсты но йылысеныз пумозяз лыдӟылӥз. Огпол но ӧз пумита ни тодмо нимтулъёсты. Бен, сюлэмлэн тылыз вань, ӵыныз ӧвӧл. Тылъёс ӝуатско. Погмаськем газетъёсын но кӧня ке книгаосын тур-пар потэ Лукер. Со сьӧры ик Олёш вуэ. Лукер. Ой, мискинь йыры, мар ишан та, мар адӟон та? Олёш. Анай, уг яра озьы. Лукер. Кош син азьысьтым. Олёш. Анай, вала мар лэсьтэмдэ. Лукер. Тырмие шедёмы, визьтэме, тырмие. Олёш. Эн суты соосыз. Лукер. Нош дорысь шедьтӥзы ке � беда. Кузьмалэн гоъямъёсыныз Сибыре вуэмдэ уд вала. Кышкыт ук, пие. Олёш. Анай, ӧжыт ке но валамед луэ-а? Лукер. Уг, уг луы. Мынам сюлмы вирен кисьтӥське. Олёш. Анай, чирдон книжказэ, Кузьма агай, ачиз мыным кузьмаз. Лукер. Котьмар мед луоз. Мынам гуртын улэме потэ. Олёш. Мон понна со дуно синпель. Лукер. Шедьтӥзы ке, тыриськон карозы. Юрттэк, скалтэк кылемед потэ-а? Ой, инмаре, ас йыр вылам пи но вордӥсько ук. Олёш (газетъёс пӧлысь книгаез шуак кыске). Сооссэ котькытчы пон, нош тазэ уг сёты. Эн ик сюлворы, дуно анае. Лукер. Пие, ӟечкын курисько, вай татчы. Олёш. Уг сёт. Лукер. Ваньзэ ӵош сутӥм ке, пытьыез но, маиз но уз луы. Куректон палэнтӥ ортчоз. Ачид но капчиен лулӟод. Олёш. Кырмизы ке, мон кыл куто. Тон номыре ӧд адӟы. Куараос кылӥсько. Лукер. Ой, быри, быри! Пересьмон даурам таки тырмие сюро-а, мар-а ини. Олёш. Мын, анай, мон татчы кылё. Лукер кошке. Олёш книгаез ошмес йыр азьысь из улэ ватэ. Куараос матэкто. Олёш арыкез юри палэнтэ. Кык милиционеръёс вуыку адӟымтэ кариське. Кырӟан нукыртэ: Зарни шунды ӝужалоз, Калыкъёслы шуд ваёз... Сидор. Нэ положено. Олёш. Куанер калык шутэтскоз, Весь курадӟемысь дугдоз. Сидор. Нэ положено (Олёш кылымтэ улэ кариське). Эй, пиёк? Олёш. Мыным-а вазиськод? Сидор. Тыныд. Тон сяна нокин ӧвӧл татын. Олёш. Озьы-а ма. Сидор. Кытысь тодӥськод та кырӟанэз? Олёш. Ма, гурт калыкмы кырӟа но, мон но нёжъяно, кожасько. Сидор. Нэ положено. Олёш. Мар не ложно? Сидор. Нушы. Та кырӟанэз кырӟаны нэ положено. Олёш. Малы? Сидор. Калык тушмонлэн бӧксэмез шӧдӥське. Олёш. Кыӵе тушмонлэн? Кинлэн? Сидор. Знать нэ положено. Валад-а? Олёш. Валай но, ӧй но. Сидор. Молчать! Олёш. Мар? Сидор. Нушы! Кылӥ на ке та кырӟамез бурсэмдэ, пельдэ вандыса ымад кышъяло. Олёш. Мар понна? Сидор. Нэ положено кырӟаны! Нимыд? Олёш (котыр учке). Кинлэн? Сидор. Нушы! Тонэн вераськисько ук! Олёш. Куд-огез Очей шуо, куд-огез Олёш. Сидор. Ах-ха, тон ик кулэ милемлы. Олёш. Мон? Малы? Сидор. Молчать! Юанъёс сёткасько мон � Сидор Филаретович. Так-с, Кузьма Чайниковез тодӥськод-а? Олёш. Милям сое чипыен-куреген тодо, дыр. Покчивукоын сое сӥлы каро. Асьме пиосмурт. Сидор. Со тыныд книгазэ кузьмаз-а? Олёш. Кин вераз? Сидор. Молчать! Юанлы вера! Олёш. Кин вераз, солэсь ик юалэ. Сидор. Молчать! Ми тодӥськом, солэн книгаез тон киын шуыса. Сидор Филаретовичлэсь лексэ эн потты. Вера меӵак, кузьмаз-а, ӧз-а? (Олёш шып улэ.) Мар гырезь картошкаен гуньдэм скал кадь сылӥськод? Олёш. Сидор Пиларетович, ачид молчать шуиськод ук. Сидор. Нушы! Фи-ла-ре-то-вич мон! Нимтулме мыскыл каремед понна каталажкае тупаськод! А ну! (Милиционерлы Олёш пала шонтэ. Соиз зынъяськись пуны сямен Олёшез утча. Кисыысьтыз кагаз шедьтыса, Сидорлы сётэ, палэнске. Соиз туж кышкаса кагазэз сэрттэ � шорем нянь. Йырыз курен сэрпалтэ. Олёш туриж доры мыныку, кыксы ик со вылэ тэтчо.) Пегӟиськод? Олёш. Нянь ук. Со милям зарни интыын. Сидор. Нош книгаед кытчы ватэмын? Олёш. Лэзе, шокаме уг луы! Сидор. Книгаед кытын? Верад ке лэзём. Олёш. Ой, ой лулы! Лукер потэ. Адямиосты адӟыса, пыдес вылаз лэзиське. Лукер. Ой, инмаре, мар луэ та, малы сое озьы? Опичер эш, малы сьӧлыктэм муртэ кыскаськоды? Мар со аламазэ лэсьтӥз? Ведь со шузи на. Сидор. Таӵе шузиос ик тушмонъёслы юртто. Со доблестной Куӟебай Гердды шпион вылэм. Нош тӥ ке со шоры удмурт инмарлы кадь вӧсяськиды. Озьы-а?(Из вылэ пуксе, ошмесэ сялӟе.) Нушыос тӥ. Лукер. Э, опичер, кытчы сяласькод, отысь ик омыръялод ай. Сидор. Молчать! Кытын сӥё-дано Герддылэн книгаез? (Лукерен Олёш ваче учко.) А? Со шпиондылэсь вань сочинениоссэ ликвидировать! Будӥсь поколение кык ымныро муртлэсь нимзэ медаз тоды ни. Врагов с лица земли стереть! Так говорит Великий вождь Иосиф Виссарионович Сталин! Нош тӥ, нушыос, кузьмам книгазэ жаляськоды. Лукер. Ой, бон та кудые мынам. (Йыраз кутӥське.) Ой-ёй, каргам йыры. Чик но ведь визьмы ӧвӧл ини. Куняньмы со чирдон кинижкаез сыскиз. Кылем юдэсэныз учогме кенжытӥ. Сидор. Кызьы вал нимыз? Лукер. Нимыз? Ой, бон кызьы вал ай таӵе. Ой, та тӧл шулась сиге. Олёш. "Сяськаяськись музъем". Сидор. Молчать! Тынэсьтыд уг юало. Лукер. О-о уго, музъем кылыз но вал. Озьы кадь. Сидор. Тон, пересь, уд пӧяськы-а? Лукер. Инмар понна уг куасаськы. Тани, ошмес ву юо. (Сузен ву юэ.) Сидор. Ярам, иське. (Милиционерлы). Пус пукты. Тайное сочинение ликвидировано. (Лукерлы). Тау шуэ агайдылы, Сидор Филаретовичлы. (Гадяз йыга.) сюлмы мынам ӟег нянь кадь небыт. А то мукетыз возьматысал сыӵе кисло-куслоосыз � югыт дуннеын улэмды ӧй потысал. Пошли. (Кошко.) Лукер (пиезлэн йыртышказ чабке). Верай вал, сутоно шуыса. Ужез-маиз бырысал. Олёш. Уг оскиськы. Ноку уг оскы, Кузьма агай тушмон вал шуыса. Соос, анай, пӧясько. Куӟебай Герд ноку но кык ымныро уз луы. Солы вожъяськисьёсыз вал, дыр. Ӧвӧл, анай, соос асьмемыз юри пӧяло. (Ошмесэ учке). Кузьма агай, кытын тон? Малы куарадэ уд сётӥськы? (Пумитаз ошмес гинэ жильыртэ.) Лукер. Бертӥм. (Нянь турижез курткыса айшетаз понэ.) У-у, му ньылонъёс, инмарлэсь но уг кепырало. Нянез шудон кожаллям. (Кошке.) Олёш из улысь книгазэ басьтэ но дэрем улаз ватэ. Ошмес арыкез тупатэ. Ӝутӥське но � азьпалаз Опочей. Опочей. Мар-о мылкыдыд зороно кадь? (Олёш кошке вал.) Соос-а, мар-а лапкатӥзы, шуисько? (Олёш берытске. Опочей доры мыныса пельдоразы васькытэ но кошке.) Пунэмо кеньыр пунэмтэм уг луы. Тылъёс кысо. Прожектор югдытэ Очеез. Очей (лыдӟе). Мон тодӥсько: Дунне вылын Чик ӝужамын шулдыр Ӧвӧл шунды! Отын-татын Ужась куанеръёслэн Бӧрдэмъёссы весь кылӥсько: Шунды ӝужан палан, Шунды пуксён палан Вир сюпсисьёс али ке но ялан Серекъяса пуко. Корт урысэн шукко Куанер калыкъёсыз... Эрик понна сылӥсьёсыз Чик жалятэк виё... Тыбыр кузэс ниё, Кышкыт тюрмаосын сисьто, Курадӟыто.Тӥни сыӵе урод ужъёс, Курадӟонъёс, Из тюрмаос Та дуннеын Котыр. Прожектор пеймытэ югдытэ. Отын Кузьма тюрьма дӥсен. Кузьма. Мар понна монэ татчы пытсазы? Малы? Калыклы номыр уродзэ ӧй лэсьты, нокинэ ямсыз кылъёсын ӧз ӵушка. Будӥсь егитъёс понна, аслам удмурт калыке понна тырши. Малпай: вань калыкъёсын ӵош мынам но удмуртэ пӧлазы йыгмыт мед вамыштоз. Шат со понна монэ националист каризы? Финнъёслэн, эстонъёслэн культуразылы синмаськеме шат ӧз кельшы? Табере ним лякизы: тон, пе, шпион. Ой, дунне! Ой, мискинь удмурт калыке! Мар меда луэ ини удмурт шаерам? Тимашев но кыдёке, дыр, келямын. Оло нош улэп но ӧвӧл ини? Мусо нылы, мусо кузпалы, кызьы меда улӥськоды? Мон тӥледыз уен-нуналэн малпасько. Ох, улон! Сюлэм � пияла, дунне � колёса. Я, кошке! Кошке мон дорысь, Ваньды ик быре котырысь � Синкылиос но бӧрдонъёс, Вань мӧзмонъёс, Вань сяськаос! Нош тон сюлэм?.. Малы чалмыт Тон улӥськод?.. Тон туж небыт, Небыт ыльнянь кадь... Султы, я! Чурыт лу, из кадь, та дыръя! Тон кылӥськод-а? Прожектор кысэ. Тылъёс ӝуатско. Ӝыт. Марья, Леким, Матрон шудон пӧлы пото. Олёш кылбур лыдӟе. Ой, ватэ монэ туж ӝужытэсь вырйылъёсы, Шулдыр но паськыт садо сюрес дуръёсы, Кызьпу улъёсы... Куанер калыклы жадьыкуз шутэтскыны Гу вылам лэсьтэ инты Пукыны... Вырйылысен мон адӟо котырез Уг мӧзмы ни соку удмуртлэсь. Гу вылам котькин мед ӵыдэтскоз, Верам кылъёсме Тодаз мед уськытоз!.. Леким. Кин сое тодэ, кытчы Кузьма агаймы ватэмын? Олёш. Улэп со. Тон умойтэм малпаськод. Матрон. Ӧйтӧд, одӥг но гожтэтэз ӧвӧл. Олёш. Лэзёз ай, дырыз ӧвӧл, дыр. Марья. Котьмар ке но, Олёш, Герд сярысь шара эн вераськы. Олёш. Малы? Со асьме гурт пи ук. Марья. Шып кариськы. Сак пельёс ӧжыт ӧвӧл. ОГПУ-е шедемдэ уд вала. Ӧвӧлтэмзэ вань карозы. Милям педучилищеын солэсь нимзэ нокин уг потта. Дышетӥсьёсмы но сыӵе поэт ӧвӧл шуо. Олёш. Вот тыныд! Адями вал ук: улӥз, ужаз, асьмелэсь синмес усьтӥз. Леким. Мар зэм, со зэм. Асьмеос солы йыбырттыны кулэ. Тон тани тракторист ини. Мон аэроклубе пыри. Марья туннэен-ӵуказеен дышетӥсь ини. Матронмы тани пудо эмъясь. Матрон. Узыръёслы но юрттӥз. Учкы ай, Надёк медицинское пыриз. Йӧно Опочеймы но Пермьысь речное йӧндыриз. (Арган куара кылӥське.) Лек, дыр, та Опочей. Ӵапак сое вераськом вал. Опочей арган шудыса потэ, мышказ Надёк вамышъя. Опочей. Чияпулэсь ой сяськазэ Арлы быдэ бичасько. Сталин эшлэсь гожтэмъёссэ Ӝытлы быдэ лыдӟисько. Надёк. Паськыт бадярлэн куаръёсыз Тӧлъя ӵаштыр сэзъясько. Сталин эшлэн верамъёсыз Дунне вылэ вӧлдӥсько. Матрон. Шур, ой, вамен потыкумы, Яр со пала эн кыле. Выль улон лэсьтон дыръямы. Шимес Данмы выиз зарезь пыдсы Али гинэ Россиын улӥсьёслэн синъёссы чиляны кутско ни вал: выль Президент юн сямзэ возьматэ, висьытӥсь "пӧськыосты" быдтон борды кышкатэк басьтӥське, котькытын радзэ утчаны выре... Бен, соку ик куд-ог ужпумъёсты быдэстыны уг луы ай. Тани Чечняысь йырвандӥсьёсты но шымыртыны кыкетӥ арзэ выро ни. Озьы ке но, сюлэмъёсы ӟечезлы кыӵе ке но оскон пыӵаны ӧдъяз. Озьы вал... "Курскозь". Та шимес учыр странамылэн вылтырысьтыз интыен-интыен та дырозь ворекъясь, куд- ог азетӥ кышъям дӥсез куштӥз. Россия кылиськиз но, ваньмыз адӟизы, асьмелэн улдэреммы вылымтэ ни шуыса. Копак гольык кылиськеммы ук та берло дас вить ар ӵоже... Кызьы уд паймы? Северной флотысь бырисьёсты утьыны чаклам служба чылкак быдтэмын. Туала батискафъёс, зарезь пыдсын ужаны быгатӥсь визьмо арбериос, куштӥськем корт карыса келямын, водолазъёс пенсие кошкытэмын... Кибашлы адямиос вань, соос пӧрмытысалзы выем подлодкаез усьтыны, отчы пырыны, маке коть лэсьтыны. Но ӧвӧл ни тупась тӥрлык. Норвегиысь асьмелы юрттыны лыктэмъёс син азьын быдэстӥзы пуктэм ужпумез. Улӥе но васьказы, видеоплёнкае но суредэз пуктӥзы, лодкаысь висъетъёсты но эскеризы, пытсэтэз ӝутыны аспӧртэмлыко усьтон но асьсэос лэсьтӥзы. Макем возьыт вал тае адӟыны асьме офицеръёслы... Али ваньмыз пыкылыны тыршо Владимир Путинэз. Бен, со ӝегаз Сьӧд зарезьлэн луоё ярдураз. Бен, со ӧз дӥсьты соку иу соглаш кариськыны кунгож сьӧрысь специалистъёслэн юрттыны ӵектонэнызы. Но со гинэ янгыш шат, асьме армия но флот таӵе калозь вуизы шуыса? Кытын туннэ соос, кин тарказ кужмо государстволэсь ваньбурзэ? Кытын депутатъёс, кудъёсыз туж юн сылыны выризы обороналы ватсаса коньдон висъян сярысь ӵектонъёслы? Малы, пе, кулэ сомында уксё армилы сётыны, дуннеын "кезьыт" война быриз ни ук. Одӥгез тодмо политик шуиз: али кулэ ӧвӧл янгыш муртъёсты утчаны, та дыре вань калыклы огазе кариськоно, югдурез тупатыны сюрес шедьтоно. Удмуртиын улӥсьёс шимес учыр сярысь иворъёсты сюлэмзы вӧсь луыса кылзӥзы. Котькытын та пумысен гинэ вераськон но вал. Огдырлы палэнэ луиз кадь вуоно быръён сярысь ӵашетон но. Кемалы меда? Бадӟым ыштон уз-а сазёмыты асьме политикъёсты? Яке соос весь асьсэ сярысь гинэ малпаса улозы-а? Валлян асьме телевидение пыр сётэм сюжетъёсты учкыса, тужгес но - удмурт культура понна уен- нуналэн сюлмаськись адямилэсь верамъёссэ кылыса, мон малы ке но малпай: кузёосмы властез яратон висёнлэсь нокызьы но бурмыны уз валалэ, дыр. Уго данмы асьмелэн, зэмен но, зарезь пыдсын ни кадь. И. Лебедев. Сюлэм бӧрдэ Светлана СМИРНОВА, Россия Федерациысь Кун Думалэн депутатэз: Баренцев зарезьын луэм учыр Россиын гинэ ӧвӧл, быдэс дуннеын улӥсьёсты вӧсь кариз. Кӧшкемыт учыр возьматӥз асьме страналэсь лябомемзэ но. Соин мылкыд эшшо но уродме. Мон понна та катастрофа чылкак витьымтэ шорысь но туж секыт луиз. Мугез тани ма бордын. Кылем арын октябре (Кун Кенешлэн Тӧроезлэн воштӥсез луыса ужасько на вал ай) Удмуртия Северной флотысь одӥгеныз соединениен огкыл гожтӥз. Асьме доры отысь офицеръёс вуылӥзы соку. Озьы кусыпмы муромиз. Туэ апрельлэн кутсконаз ми Егитъёсын ужанъя кун комитетлэн кивалтӥсезлэн воштӥсеныз Галина Юсуповаен вуылӥм Мурманске. Морякъёслэн ӧтемзыя тодматским эшъёсмылэн улэм-вылэменызы, пыр-поч кенешим кусыпъёсмес паськытатон пумысен. Вераським флотэ асьме пиосты келян ласянь но. Уго службаез зарезьын ортчытон егитъёс понна котьку но бадӟым данэн лыдъяськиз. Юн куректӥсько "Курск" подлодкаын геройлыко быремъёс пумысен. Та дыре асьмелы ваньзэ лэсьтоно, азьланьын сыӵе учыръёслэсь утиськон понна. Кызьы шуо, мажес вылэ ялан султыны уг яра. Николай Долгов, ужысь ветеран, Ижын улӥсь: - Витьтонэтӥ аръёсы мон службаме ортчытӥ Тихоокеанской флотысь ву ултӥ уясь одӥгаз корабльын. Бен, соиз туалаосызлэсь туж висъясько: милямез пичигес но, лябгес но вал. Озьы ке но, трос курадӟонэз адӟиськиз-чидаськиз. "Курскен" луэм учыр огсыр улыны маза ӧз сёты ни. Весь пуки телевизор дорын. Туж оскем уг поты вал, туала флотын выем лодкаез утьыны амал уз шедьтэ шуыса. Но... Табере сюлмаськоно ни улэпъёсызлы кызьы ке юрттон сярысь. Мон соглаш Геннадий Селезневен, со ӵектэ вань корабльёсын ревизия ортчытыны, котькудзэ пыр-поч эскерыны. Александр ЛЕБЕДЕВ, Уваысь пудоослэн висёнъёсынызы нюръяськонъя станцилэн кивалтӥсез, 60-тӥ аръёсы флотын служить карем мурт: - Мынам малпамея, "Курсклы" юрттыны луысал. Ӧз тырмы ӝог но югдурез валаса ужан. Котькуд штабын сыӵе учыръёслы дась луыны кулэ ук, тужгес но - учениос ортчытон вакытэ. Адмиралъёс син азязы возьыны кулэ пенсие потэм водолазъёсты но. Секыт дыре соослэн быгатэмзы, визь-кенешсы мултэс ӧй луысал. Туж жаль бырем морякъёс. Син азе ик пуктыны секыт соослэсь кызьы быремзэс. Омыр уг тырмы, ву пумен люкаське, улон ӵогиське... Ку табере соосыз калык радъя ватыны быгатозы? Улон нюжаос Чеберъя астэ ас киыныд Чеберлэн дуныз - аслаз, нош шӧтэмлэн - аслаз. "Удмурт дунне" алигес шонер гожъяз: котькудзэ сямен кышномуртэз буёлъёс но дӥськут эксэй ныл кадь карыны быгато. Нылкышноез уката муспотон каре кадь ас киыныз дасям дӥсь. Мынам вань тодмое. Со туж чебер керттӥське. Лулъясько кадь. Шорт магазинысь уг бича - нуллэм, пӧсьтэм, кесяськем дӥсьысь дася. Надялы кызь одӥг арес гинэ ай. Со дышетске университетын, нош тужгес яратоно ужез - керттон но чильпаськон. - Надя, ма сёто тыныд та сӥньысъёс? - Номыр ик уг кадь. Мыным туж яра аслым пӧртэм дӥсь малпалляны. Нокинлэн но сыӵеез медаз луы. Мон котьку бырйисько. Таиз - чебер, таиз - ӧвӧл, таиз мыным тупалоз, таиз - уз, таӵезэ мынам нуллэме потэ, нош тазэ - чик но уг. - Мын магазинэ но басьты, кыӵеез кулэ. - Коньдонэ тросгес луысал ке, оло, мынысал. Но магазинын одӥг выллемгес дӥсьёс. Мыным кельшымонэз шер луылэ. - Нош кыӵезэ тынад нуллэмед потэ? - Чеберзэ, мыным тупасьсэ но мынӥсьсэ. Туала модая журналъёсын кадь. - Тросэз уг быгато ук магазинын кадь вурыны но керттыны. Кызьы тон сое пӧрмытӥськод? - Нырысь ик, малпаськод, кыӵе дӥсь кулэ. Гужем-а, сӥзьыл-а, тулыс-а, толалтэ-а нуллоно, огшоры-а яке праздникъёсы-а. Вуж дӥсьёсты учкисько буёлъёссыя но сӥньыслэн зӧкталаезъя. Бумага вылэ суредасько, мертэтъёсты пуктылӥсько. Кофталы, шуом, сарвыл, кус, мӧля, пельпум, чырты но музон. Малпасько, кыӵе пужы кытчы пуксёз но кызьы бӧрсьысь бӧрсе со керттӥськоз. - Кӧня дыр кулэ тыныд одӥг огшоры кофта керттыны? - Нунал ӵоже, номыр ӧз ке люкеты. - Сиськытэк но? - Одӥг пуксиськод ке, султэм уг лу ини, быдэстэм потэ. Одӥг -кык нунал ӵоже кофта дась луэ. Кӧня ке улыса, куд-огзэ кофтаосме уг ке ярало, берен сэрттӥсько но выльысь керттӥсько. - Жаль ук! - Кыкетӥез чебергес луэ, нуллыны потымон. - Кин выжые тон сыӵе мынэмын? Анаед-а, песянаед-а керттӥсько вал? - Песянае керттӥськыны, черсыны но дӥськут вурыны дышетӥз. Пичи классъёсын дышетӥсьмы чильпаськыны, бадьлэсь пичи куды пуныны но трос мукетсэ лэсьтыны. Сӥньыслэсь, плёнкалэсь ма гинэ ӧм пунылэ. - Анаед шумпотэ, дыр, таӵе быгатӥсь нылыз вань шуыса. - Озьы но, дыр. Коркан чалмыт луэ ке, соос тодо ини, мон "йыртэмасько", ӟустыриос вандылӥсько, вурисько, керттӥсько шуыса. - Надя, дӥсьёстэ вузаськод-а? - Шер. Дыры тросгес луысал ке, яке часэз кӧня ке калленгес мынтыны быгатысал ке, оло... Мынам бадӟым малпанэ вань: азьло пичияк цех усьтыны, собере - магазин... Светлана Петрова. Зарни медам вайы кайгу Берло дыре Россиын луэм шурдыт учыръёс юн шугъясько Кизнер но Камбарка котыръёсын улӥсьёсты. Тодмо уго, отын кышкыт химической ож тӥрлык возиське шуыса. Сое пуштытӥзы-мар ке, туж кышкыт югдур кылдоз. Кызьы умойгес радъяно люизит, зарни, ВЪ но мукет кышкыт кизер ядъёсты утёнэз? Та ужпумез эскеронлы сӥземын вал толон Кизнерын ортчем кенешон. Ёросын улӥсьёс вуылӥзы воинской часте, тодматскизы ож тӥрлыкез кызьы воземен, пумиськизы Ижысь, Москваысь но мукет интыосысь вуэм специалистъёсын. Соос адӟизы, кышкытлыклэсь утиськон вылысь ужрадъёс кутӥсько ке но, соос тырмыт ӧвӧл на шуыса. Военнойёс но кивалтӥсьёс оскытӥзы: химической ож тӥрлыкез быдтон ужъёс вуоно арын ӝогомытэмын луозы. Ужрадэ пыриськиз Кун Думалэн депутатэз Светлана Смирнова. И. Кричев. Азьпалазы � югыт сюрес Удмуртёслэн но, мукет калыкъёслэн сямен, нимаз адямиос сярысь таӵе веранзы вань: "Улонлэн ӧраз шедиз". Сыӵе адямиосты котькытын данъяло, ушъяло, соос сярысь газетэ гожъяло, телевизорын возьматъяло. Туннэ мон верасал котьма карыны быгатӥсь, визьмо пиосмы сярысь. Та адямиосты умой тодо элькунамы, ужан интыосазы но туж гажало. Кызьы тодмо, Ижысь Авангард ульчаысь кызьпу арамаын али ӵемысь ортчыло удмурт лулчеберетлы сӥзем ужрадъёс. Татысь ик пумитаны луэ удмуртъёслэсь синмаськымон адямиоссэс. Мынам эшъёсы � Аркадий Поляков, Виталий Агбаев, Андрей Соловьев, Мария Шихова но Юргис Алексеев � пӧртэм адямиос. Тужгес вылӥе ӧз ке но тубе на, таӵе муртъёс ванен возиське удмуртлыкмы. Тужгес кемалась тодӥсько Аркадий Ильич Поляковез но Виталий Львович Агбаевез. Та усточиос будэмын асьме шаерысь чебер крезьгуро, усто калыко Кияса но Алнаш ёросъёсын. Синмаськымон сямъёссэс-йылолъёссэс егит пияшъёс ваизы Иже но. Татчы лыктэмзы бере ик сюлмысь пыриськизы "Ижмаш" культура дворецысь калык театрлэн но "Тюрагай" хорлэн ужазы. Чебер вылтусо, жингрес куараё егит пиос та коллективъёсын ик асьсэлэсь шудзэс шедьтӥзы. Кузпалъёссы но � асьсэос кадесь ик паймымон артистъёс. Аркадий Поляков но Виталий Агбаев уно аръёс ӵоже ужамын Ижысь заводъёсын. Виталий Львович али но тырше азьвыл интыяз ик, нош Аркадий Ильич луиз дано "Италмас" ансамбльлэн чебер куараё артистэз. Андрей Соловьев культурая училищеын дышетскыкуз ик лыктӥз "Инвожо" ансамблям. Коллективенымы ӵош концертъёсын вуылӥмы пӧртэм ёросъёсы. Бӧрысь Андрей синмаськымон ужаз "Катанчи" ансамбльын. Мария Шихова но Юргис Алексеев дышетско удмурт кун университетын. Лулысь-сюлмысь пырисько удмурт ужрадъёсы, калыклэсь мылкыдзэ ӝутыны быгато. Юргис режиссёр луыса ужа на Удмурт радиоын. Андрей, Мария, Юргис егитэсь на. Но таӵе адямиос азьланяз асьмелы юн пыкъет луозы. Зэм, Аркадий Поляков но, Виталий Агбаев но туж ик мӧйы ӧвӧл на. Соос но уно кужымзэс быгатонлыксэс сётозы ай калыкмылы. Н.ВОЗИСОВ. Ас кужыммылы осконмы кысэ Ву ултӥ уясь "Курск" атом лодкаысь экипажез утёнъя ужъёс дугдытэмын. Отысь 118 моряк быриз. Таин валче толон быдэс Россиысь кун кышетъёс (флагъёс) лэзиськизы. Авария луэм бервылэ ваемын сяська тугокоос. Татчы, Баренцево зарезь вуосы, пиосынымы ӵош выиз кадь осконмы. Осконмы ӟечезлы, чеберезлы, осконмы ас кужыммылы. Быремъёслэн ог 500 ӵыжы-выжыоссы люкаськизы Мурманске. Татын соос возьмало но эшшо кышкытсэ � мусо пиоссылэсь, яратоно атайёссылэсь мугоръёссэс вуысь поттамзэс. Соосын ӵош возьма быдэс страна... Улон эшшо одӥг пол возьматиӟ: кулон уг вера кудпалась вуонзэ. Военно-Морской Флотлэн историяз ӧжытсэ 507 ӟуч (советской) ним пыраклы кылемын быремъёслэн списоказы. Зарезьёс пыдсы кылемын ву ултӥ 6 уясь атом лодка: 2 американской (Треллер" но "Скорпион") но 4 советской (К-8, К-219, К-278, "Комсомолец", К-27). Вань лодкаос Северной флот киын лыдъяськизы. Иське, вӧзазы ватсаськиз на эшшо одӥгез � "Курск". Мур куректэ Удмуртия но. Быремъёсты буре вайыса, Ялан ӝуась тыл доры тыремын турлы сяськаос. Татын ортчиз митинг. Э.КУМАЧЕВА. ШӦКЫЧ Туночиос но туклячиос Кудӥз-огез шуэ, адями осконэн улэ, пе. Шонер верамын со, кудӥз-огез гинэ угось. Малы ке шуоно, ваньмыз осконэн улыны но кинлы ке яке марлы ке оскыны кутскизы ке, уть Дунне кузё! Соку ю-нянь но уз серела, андан но уз ӵыжатӥськы. Ужаны кулэ угось, ужаны! Эшшо одӥг пол верасько на, пыч-пыч ужаны кулэ шуисько! Куинетӥзэ верасько ини, нуналмысь ужаны кулэ. Ужатэк оскон но уз кылды, уз уда, со кидыс ӧвӧл ук. Кинлы ке яке марлы ке весяк оскыса улӥд ке, вазер пиньёсыдлэсь шильыр-шальыр усьылэмзэс но шӧдылыса уд вутты, уд но шӧдылы. Вераськыны но шуласа кутскод. Омыр угось гульымысьтыд нокытчы но уз могӟылы ни. Ижевскын улӥсь Ольга Дементьева но ялан оскыса улӥз. Улон-вылонэз угось огсыр но умой вал. Нош огсыр улон шорысь, толалтэ но одӥг пол гудыртэ шуо. Озьы ик луиз. Улон солы мӧзмыт потыны кутскиз. Одӥг пичи пиез будэ. Ӧжыт ук со. Эшшо одӥг нылпи вайыны малпаз на, улон шулдыргес мед луоз шуыса. Малпаськиз, малпаськиз но со сярысь эшезлы верано кариськиз. Нош эшез синъёссэ спутниковой антенналэн табаосыз пасьта усьтӥз но нырысь ик туно- пеллё доры ветлыны ӵектӥз. Азьло тодоно, пе, кин вордскоз, ныл-а, пи-а, шудо-а луоз? Собере мукетыз но вань на, тынад пичи пиед будэ бере, одно ик ныл кулэ, дыр, тыныд. Зэмзэ но, Олялы ныл кулэ вал. Табере со воксё паймиз, малы одно ик тунаськись доры ветлоно? Сотэк уз луы шат нылпи вайыны? Та пумысен кенешыны со анаез доры ветлоно кариськиз на. Сюлэмыз мае ке но шӧдӥз, лэся. Нош анаез нылызлэсь шугъяськонзэ валаз. Анай бере, анай ини со, нылзэ туно- пеллё доры мыныны ӧз лэзьы. Нина Ароновна шуом сое, нырысь ик ачиз туно-пеллё доры ветлыны малпаз. Ӧз оскы угось нылызлы но, нылызлэн эшезлы но. Паймымон ук, кытысь тодоз тунаськись, кин вордскоз. Оло, гын сапег потоз ай. Туно-пеллё нырысь ик куриз кизэ зарнивуаны. Нина Ароновна тодэ вал туноослэсь манеръёссэс. Соин ик нырысь-валысь дас манет гинэ сётӥз. Тунась кутскиз тунаны... Картаоссэ шир-р-рак усьтӥз, собере паллян пала сялӟыса, мар ке ас понназ шыпыртӥз, Нина Ароновналэн синъёсаз мыр-мыр учкиз, картаоссэ мыддорин кариз но гульым тыраз витьымтэ шоры шуиз: � Ӝоген ти, мадам, умоятэм планировкаен ӵыжак выль квартира басьтоды! Нина Ароновна пукон вылысь усиське вал, но ӝӧк борды кырмиськыса вуттӥз. Собере мырдэм вазиз: � Милям умоятэм квартирамы вань вал ини!.. Ой, лулы! Эшшо-а, мар-а? Нош туно мадёнзэ азьланьтэ: � Тынад картэд музон нылкышноен кушлаське! Таяз учыре Нина Ароновна ӝӧк борды кырмиськыны турттэ вал но ӧз вуы. Пукон вылысь дыбыр-шалтыр усиз. Кӧня ке сазьтӥськемез бере, ӝӧк борды ӝабырскыны быгатӥз, пукон вылэ ланьырак лэзькиз но шокантӥзэ лаёмытыса мырдэм шыпыртӥз: � Лешак ньылон, сопал дуннеын но дусым шедьтӥз-а, мар-а ини со!.. Тьфу! Собере Нина Ароновна трос малпаськыса ӧз улы ни, читыр-чутыр пырак милицие шонтӥз. *** Беркыл интые яке П.С. Таяз учыре котьмае адӟылэм милиционеръёс но паймизы туно- пеллёлы. Оксана Александровна шуом сое, умой амал шедьтэм ӟеч улыны. Квартираез чильк-вальк кисьтаське. Туно доры шудбур люкыны нуналаз ог 30 пала адямиос ветло вылэм. Озьы гинэ со доры уд шедьы. Азбарын ог 60 адями черодэ гожтӥськыны лыктэмын на вал со нуналэ. Дышетскемез солэн куинь класс сяна вылымтэ. Туэ 22 арессэ тырмытэм ай. Милиционеръёслэн малы адямиосты пӧяськод шуыса юамзылы рос-прос валэктӥз: � Мон нокинэ но эриктэм дорам уг ӧтиськы. Адямиос асьсэос мон доры лыкто бере, мон-а, мар-а янгыш? Кинлы ке но соос оскыны кулэ ук! Озьы-а, ӧвӧл-а? Собере мынам дышетскеме ӧжыт шуыса, одӥгзэ вунэтоно ӧвӧл. Радлыкез инъясьёслэн но мерлыкез радъясьёслэн пайдазы ӧвӧл бере, кин ке но та удысэн вырыны кулэ ук. Озьы-а, ӧвӧл-а? Шонер вера Оксана Александровна. Зэмзэ но, та удысэн кин ке вырыны кулэ, дыр. Малы ке шуоно, озьы ке ӧй луысал, солэн азбараз нуналлы быдэ сомында адямиос черодын ӧй сылысалзы, дыр. А мар-о?!. А.ЕМЕЛЬЯНОВ. Удмурт Республикаысь Быръёнъя комиссилэн ивортонэз 2000-тӥ арын 23-тӥ августэ 16 час 17 минутэ Удмурт Республикалы президентэ кандидатэ пусъемын (зарегистрирован) Вершинин Павел Николаевич, Удмурт Республикаысь Кун Кенешлэн Тӧроезлэн нырысетӥ воштӥсез. Вордскемын 1949-тӥ арын, улэ Ижевск городын. ГАЛИНА РОМАНОВАЛЫ � 50 АРЕС Оло, шупуд гордэктэмъя... Вуиз, лэся, емышъёсыз бичан дыр. Чот весьёсыз кадь сузёно ке, ой-ёй кӧня соос люкаськозы! Но нылкышнолэн, уката ик кылбурчилэн, котырес лыдпусэз сярысь вераськыку, умойгес луоз, дыр, со емышъёсыз сяськаосын валче тугокое бырттылыны. Но пӧрмоз меда таӵе тугокомы? Отын уго киез лексьыны дась кыйбодыос, йӧныос но ватӥськемын луо. Ческыт зынзылы синмаськыса, ачид ишкалтӥськод ке но, соос сюлме но йӧтскыны вуо на лек шиосынызы. Сыӵе ини улон бусы. Солэн сяськаосыз но пӧртэмесь: синэз кыскисесь но алдаськисесь, йырез поромытӥсесь но лексисесь... Нокыӵеезлэсь уг кышка � нылкышнолэн со аслаз шокан дуннеез. Вазь ӵукна ик потыса (уг учкы � дуринчи-а лексёз, шашы-а шырӟоз) лысвуын пыласькоз � тазьы, пе, ин дуннелэсь ыстэм кужымзэ шапыкен-шапыкен аслыд басьтӥськод. Нош быдэсак астэ эркияськод ву тулкымлэн "киосаз". Маин анаед вордэм... Со ик тонэ уте, сайя, сӥсъясь, лекатӥсь синъёслэсь. Кызь аресъем потӥськод аслыд, пинал дырлэн куара-лангаез пель сьӧрад шуккиське. Уд кышкаськы лек черлэсь. Мертчиськем ке � кутӥд но куштӥд. Тэльысь ӟильыртыса бызись вуэз сузен юиськод: ма, кыӵе, пе, амёбаосыз луозы чильпырась вуын... Писпу выжые выдӥськод � куакагырлы кадь ик адскиськод со чагыр шляпаеныд. Лось кадь ветлӥськод нюлэскытӥ аслыд кулэ луись турын-куар, емыш, губи утчаса. Пӧсекчи но пӧсекчи ӧвӧл... Остэ, мар таӵе? Кӧтыд пуэктымон серекъялод, шорад учкыса. Синъёс интые пичи пасьёс гинэ кылиллям. Ой, шӧтэм ке шӧтэм! Ачид серекъяськод гинэ. Шуш адскыны уд кышкаськы. Ми но тодӥськом: чебер муртэ ачиз шайтан но уз вошты. Эшшо ке, патретэ пуксьыны но дась. Юнме-а лул гажанэд, музьыед туспуктылӥсь... Тӥни сыӵе тон, Галимы. Инкуазьлэн нылыз. Нош емышъёстэ лыдъялом, котырдэ лӧдом на арня ортчыса пумиськонамы. Татьяна ЧЕРНОВА. ? Оло, шупуд гордэктэмъя, ортчо, кошко ини аръёс... Туспуктэмъёсыз В.Беломорскихлэн. Зарезь сьӧрысь туган Маин со умойгес асьме пилэсь? Али ӵемысь пумитаны луэ пӧртэм нациослэсь сураськем семьяосты. Кылсярысь, Москваысь Калык эшъяськонъя университетысь мынам группаям дышетске нылаш. Атаезлэн вирсэртӥз 50 процент грузин вир, 50 процент - бурят, анаезлэн - 50 пр_�оцент ӟуч вир, 50 процент - украин. Тӥни сыӵе "чибориё" нылаш. Суро-пожо семьяос шоры адямиос одӥг кадь уг учко. Огласянь шуо: таӵе кусыпъёслэсь чебересь но визьмоесь нылпиос будо. Мукет ласянь, сыӵе семьяосын кытӥяз валамтэ югдур кылдэ но ченгешон гома. Угось кышнолэн но картлэн пӧртэмесь выжыоссы, ӵыжы-выжыоссы, инмарзы, кылзы, культуразы. Эшшо ке юан кылдэ: кыӵе кыллы дышетоно нылпизэс? Шуыны луоз, дыр: суро семьяосын секыт йӧтэ пиналъёслы но. Ӵемысь соос уг валало асьсэзы кыӵе нацие пыртыны. Выжытэм будос кадь асьсэды кожало. Удмуртиын но югдур пӧртэм ӧвӧл. Мар-о карозы анай-атайёс удмурт нылашсы бигер пиез яратӥз ке? Шудо гинэ мед улозы мусо нылпиоссы, шуозы ни. Умоен-а, уродэн-а лыдъяно таӵе семьяосты? Социологъёс вераны уг быгато. Огкадь виро кузпалъёс пӧлын сямен ик, вань удалтэмъёсыз но, пишмымтэосыз но. Туала дыре суро-пожо бракъёс йыло но йыло. 70 аресъемъёс пӧлын сыӵе кусыпъёс копак ичи, 50 аресъемъёс пӧлын - кӧня ке пумисьло ини, 20-25 аресъемъёс копак уг учко ни кадь нация шоры. Куддыр воксё но аспӧртэм семьяос кылдо. Россиысь нылашъёс зарезь сьӧрысь пиосъёслы бызё. Мон Москваын сыӵе кусыпъёсты ӵемысь адӟисько. Нылъёс иностранец шуонлы синмасько пӧртэм муген. Кин коньдон понна, кин - огназ кылемезлэсь кышкаса, кин - умой-умойзэ яратыса. Мон гожто куинь нылъёс сярысь. Асьтэос учкоды, кыӵе пӧрмиз соослэн улон сюрессы, зарезь сьӧрысь "принцез" пумитамзы бере. Маша Туж адӟымон нылаш. Анаез - ненец, атаез - украин. Вань чеберзэс нылпизылы кузьмаллям. Нылаш веськрес мугоро, ӝужыт ик ӧвӧл, ымнырыз толэзьлы укша, нап но кузь йырсиез кускозяз, сьӧд синъёсызлэн сэрегъёсыз ӧжытак выллань учко. Восток палась чебер апайлы кельше. Но улон-вылон сюресэз пичи дырысеныз ик могӟето кшкиз. Нылаш сизьыметӥ классын дышетскыку, атаез керӟегъяськыны ӧдъяз: тынад пыдъёсыд, пе, мынам кадь пичиесь ӧвӧл. Малпаз: та мында аръёс ӵоже мукет воргоронлэсь пиналзэ будэтӥськем. Ух, кыӵе со лек вал соку! Керетон поттӥз. Машалы туж зол йӧтӥз. Со дырысен нылаш улӥз тросгес эшъёсыз дорын. Эктон ансамбле ветлӥз. Атаеныз ӵош кыльыны кышкалляз. 16 арескысен матысь эшез луиз Кавказ палась лыктэм Рашид. Юн яратӥз сое. Анай-атаезлы туганэз сярысь ӧз поталля. Ӧжыт улыса, кыӵе ке йырвандӥсьёс Рашидлэн сюлмаз пуртэн бышкалтӥзы... Нылаш школаез йылпумъяз. Анаез дэмламъя пыриз Москваысь Калык эшъяськонъя университетэ. Со литератураез яратэ. Пичи дырысеныз журналист луыны малпаз. Анаез но газетын ужа уга. Нырысетӥ сентябрёзь, дышетскон кутскытозь, быдэс толэзь. Эктонъя ненец ансамблен ӵош Мексикае ветлыны вуиз на. Фестивале. Отысен сьӧдкысъем латин пияшен тодматскиз. Самбрероен (паськыт шляпаен) пи нуналлы быдэ чебер мексикан гуръёс нёжъяз Машалы. Синвуаськыса кошкиз Маша Москвае дышетскыны. Нош татын кинэз но вылымтэ! Латинъёс, индусъёс, арабъёс, африканецъёс, ӟучъёс, Россилэн пӧртэм республикаосысьтыз лыктэм егитъёс. Оло кавказ пияшез но латинэз тодэ ваён, оло сураськем вир, оло асппӧртэмлыко сям Машаез тодматӥзы негрен. Улонысь котьмае но веръяно, меӵак малпаз нылаш. Маша шӧдылӥз: негръёсын эшъясько но соослы бызё кыӵе ке огшоры гинэ, шушгес нылъёс, одӥгназы кылемъёс, ӟуч пиос пӧлысь ас парзэс шедьтымтэос. Нош африканецъёс тӧдьы дыдыос пӧлысь быръё тазагессэ, етӥн мертчан кадь йырсиёзэ. Экзотика шуон ук. Маша вераны уг вала, маиз понна Съерра-Мониысь пияшлы синмаськиз. Ма, Сэм но бырйиз аспӧртэмзэ: нылаш Африкан синлы дышем тодметъёслы уг тупа ук. Кыксы ик оскизы яратонлы. Кык ар ӵоже соос мурт сэрегъёсын улӥзы кузпалъяськытэк гинэ. Сэм дышетскиз но кыӵе ке фирмаын ужаз. Коньдон тырмыт октӥз. Но кӧё-вӧё улонлы пум вуиз. Фирма куашказ. Сэм но Маша общежитие кошкизы. Малпазы кузпалъяськыны. Сюаназы Машалэн анаез но выныз вуизы. Атайзылы куаретыны ӧз дӥсьтэ. Сэм ласянь ӵыжы-выжыосыз ӧз лыктэ - кыдёкын. Нош эшъёссы быдэс уллё вал. Ӝоген Сесен фамилиен кузпалъёслэн нылпизы вордскиз. Туж мусо пияш. Саша ним понӥзы. Сэм быгатэмъяз семьяезлы юрттӥськиз. Ваньмыз умой луысал, дыр. Но... Сэм мукет нылкышноосын калгыны ӧдъяз. Чебер кышноез ӧз яра ни шат? Оло, африкан "стандартъёс" бордазы кыско? Ӧйтӧд ини. Тае ачиз гинэ валэктыны быгатоз. Маша мыным туж жаль потэ ини. Куректыса-бӧрдыса будэтэ нылпизэ. Картэзлы сермет уг шедьты. Сое яратэ но... чида. Наташа Таиз Башкириын вордскемын. Чебереныз ноку ӧз висъяськылы. Пиос сьӧраз уллёен ӧз бызьылэ. Суд йырсиез котьку пунэмын, бамаз - пужыос, ныр вылаз очки. Туж возьдаськись. Дас вить арес дыръяз анай-атаез быризы, сюрес вылын шудтэм учыре шедьыса. Наташа кузё интые кылиз. Ньыл кузя сузэр-вынзэ утялтӥз. Ортчиз кык ар. Наташалы дэмлазы Москваын дышетскыны. Стипендия, пе, тыром, общежитие но висъялом. Озьы нылаш сузэр-вынъёссэ ӵужапаез доры кельтыса кошкиз Москваысь Калык эшъяськонъя университетэ. Юрист, пе, луо. Пыриз дышетскон ӧре. Эшъёсыз лачак люкаськизы. Нош ас улонэз умой ӧз лякиськы. Ма, ачиз пиослэсь палэнскылӥз. Мон, пе, уг кельшы соослы, мон кадьёс шоры уз но учке. Одӥг пол Наташа общежитилэн азбараз мӧзмыса пуке вал. Вӧзаз ӝужыт, мугоро бадӟым синмо араб пуксиз. Тодматскизы. Кӧня ке бӧтьыртӥзы. Наташалы тунсыко потӥз иностранецен вераськон. Мукет нуналаз Валид чебер сяськаосын вуиз нылаш доры... Ортчиз быдэс ар. - Наташалэн шудэзлэн пумыз ӧвӧл - мырдэм шедьтӥз ас парзэ. Тани, сизьым толэзь орчыса, нылпизы вордскоз. Зэмос семьяен улозы. Ма, Валид али ик Наташаез секыт ужез быдэсъяны уг лэзьы. Кыӵе лякыт но яратӥсь атай пӧрмоз солэсь! Но кышнояськыны Валид ӧз дырты, дышетсконзэ быдтыса но. Вордскем палъёсаз, Пакистанэ, огдырлы бертыны малпаз. Уксё, пе, лэзьяло, собере, Москвае вуыса, аспирантурае пыро но - кузпалъяськом. Наташа оскиз. Возьмаз. Кык толэзь ортчыса вуиз гожтэт. Наташалэн сюлэмыз зол йыггетыны ӧдъяз, мае ке умойтэмзэ шӧдыса, лэся. Валид гожтэ: "Анай-атае Москвае берытскыны уг лэзё. Кышно мыным шедьтӥллям ини. Уксёмы туж ичи, соин ысъяны уг быгаты. Ӟеч лу". Сюлэмыз сӧриськиз нылашлэн. Кытчы-о табере донгиськоно? Кин куректонзэ валалоз? Валид нокызьы йырысьтыз уг кошкы. Соин но, лэся, пичи нылашезлы араб ним понӥз - Рания. Лена Вордскиз огшоры ужасьёслэн семьяязы. Пичи дыръяз солы дунне вал: кампет- шоколад басьто, шудонъёс тырмыт. Мар куэ на нылпилы? Пумен будэмъяз Лена валаны кутскиз: семьяез, мукетъёс сярысь, куанергес улэ. Угось чебер нылашлы дӥськут, пыдкутчан, ымныр буян басьтыны тачак коньдон кулэ. Соку Леналэн визьмаз малпан вордӥськиз: одно ик бызёно узыр муртлы. Оло, соин но Леночка дышетскыны кошкиз Москвае, Калык эшъяськонъя университетысь медициная факультетэ. Уин ужась ресторанэ интыяськиз - официанткаос, пе, трос коньдон басьто. Уно пиосын тодматскиз. Куанерзэгес шӧдыса - палэнтылӥз, коньдоноез борды - ӝабырскылӥз. Лена воксё ӧз шӧдылы, группаысьтыз Гай нимо индуслэсь чилясь синъёсын учкылэмзэ. Ӟуч сямен вераськемез уггес пӧрмы. Лена шоры англи кылын вазиське, математикаен юрттыны куре. Нылаш солэсь тэльмыремзэ лыдэ ӧз басьтылы. Нырзэ гинэ кисыртылӥз: эшшо ке, пе, монэн кыӵе ке индус лабыртоз на. Но Гай чигнаны ӧз дырты. Нылашлы чебер сяськаос, зундэсъёс но пельугыос кузьманы кутскиз. Ресторанэ нуллӥз. Лена воштӥськиз. Сыӵе кузьымъёслэсь синъёсыз мальдӥзы. Ӝоген Гай юн яратэмзэ вераз, кузьмаз дуно изъёсын чебермам зундэс. Леналы кышнояськыны дэмлаз. Москваын кӧня ке улыса, пе, кошком Индие. Угось анай-атаез бай уло, пизылы ужан инты но кемалась возё. Леночка соглаш луиз. Ваньмыз умой кадь. Гай сое яратэ, гажа, ки вылаз нуллыны дась, ужаны уг лэзьы. Кытысь сыӵе карт шедьтод на? Кошкиз Индие. Шудо-а бен улэ? Эшъёсызлы гожъямезъя тодӥсько: Леналэн лулпушкыз малы ке висе. Чиданэз ӧвӧл ни - коть караул кесяськы. Сюлмысь вераськыны нокинэн - Гайлэн ӟуч кылыз ляб. Ма уд но серекъя гор-гор - мыдлань валалоз. Ваньмыз Леналы синазькыль потыны кутскиз. Секыт ик вылэм со - яратонтэк, уксё понна гинэ бызён. *** Та учыръёс сярысь лыдӟемзы бере, нылъёс малпасько, нырысь чакласькозы: астэ синмаськыны лэзёно-а иностранец шуонлы? Уксё сьӧры уиськоно ӧвӧл, дыр. Нылъёс, котыр берытске. Оло, кин тодэ, вӧзады ик яратонды шыпытак ветлэ. Синйылтоно гинэ сое. Мон мади шудтэм семьяос сярысь. Но суро-пожо кузпалъёс пӧлын ӧжыт ӧвӧл удалтэмъёсыз но. Оло таӵеосыз уно пол тросгес. Но вераны шуг, сое лыдъян понна учёнойёс нимысьтыз амал ӧз на малпалэ. Та выллем семьяослы пумит ӧвӧл. Нош кин меда учкоз на асьмелэн юись, кыскись, зӥбем, возьдаськись удмурт но ӟуч пиосмы шоры. Удмурт нылъёс ик воргоронъёсмес ӝутыны ӧз турттэ ке - кинъёс соку соос? Кин юнматоз на асьмелэсь удмурт выжыосмес? Марина Костылева. "Вихрь-антитеррор" Кызьы шӧдӥды ни, луоз, Россиын югдур ӟырдамын, шуыны луоз. Я кытын ке корка пуштэ, я янгыштэм адямиосты югыт куазен ыбыло-виыло, я нылпиосты лушкало. Шаерысьтымы огъя югдурез син азяз возьыны тырше "Удмурт дунне" газет но. Кышкыт учыръёсын но соосты алон вылысь нюръясько правоез утись но мукет ёзъёсын тыршисьёс. Татын луэм учыръёс сярысь тӥледлы ивортылӥськом, азьланяз но соосын тодматылом. Йыружлы дасяськисьёсын уго асьмелы огъя кужымен нюръяськоно. Берло кык нуналъёсы, кызьы ивортӥзы ФСБ-ын ужасьёс, шаерамы оглом шыпыт вал. Нош солэсь азьло, кылемаз вторнике, жингыртылӥзы автозаводлэн одӥгаз цехаз мина ватэм сярысь. Интыысьтызы вырӟытылэмын вал трос адямиос, кыӵе ке пӧрмостэм адямиен йырин уно коньдон быдтэмын. "Вихрь-антитеррор" ужрад, вис карылыса, кылем арысен мынэ ни. Солэн витетӥ люкетэз 9-тӥ�20-тӥ августъёсы ортчиз. Югдурез чакласьёс та нуналъёсы 38 пумо пыӵал тӥрлык, 5735 боеприпас, 4 кило пуштытон тӥрлык, 120 килолэсь уно усыкмытӥсь эмъюмъёс талазы. Та вакытэ сэрттэмын-пертчемын 696 йыруж, законлэсь пегаса ветлӥсь 68 мурт кырмемын. Террорен нюръяськонэ пӧртэм ёзъёс кыскемын, огъя ужен кивалтэ нимысьтыз кылдытэм штаб. Югдурез утисьёс куро вань калыкез сак луыны, маке умойтэмзэ шӧдӥды ке, жингыртэ 02 телефонъя. Озьы ик жингыртэмды луоз Граждан оборона ужпумъёсъя но кышкыт учыръёслэсь утиськонъя комитетэ � 22-70-83, яке терроризмен нюръяськонъя штабе � 55-79-46. Г.ЮСАЕВ. Галина Романова Визьмылы паймисько Серемес сценка Шудӥсь муртъёс: Веруш. Ида. Николай Иванович. Онька. Гуртысь корка пуш. Ӝӧк вылын зӧк книга - вылаз "Сонник" гожтэмын. Веруш укно дурын ураме учкыса пуке. Веруш (ӝӧк вылысь книгаез кутыса чупа). Мусое, визьпоге, чебероке, утись- вордӥсе мынам... (Укное учке.) Уг, уг адӟисько. Тузонзы но уг пурӟы. Та куанер гуртын улыса, тазьы ик-а медам дауре быроз ини. Эх, каръян йыры, каръян йыры! Озьы луэ ини со: визьмоос - тузон пӧлын ужало, дэриен колӟаськыса уло, нош визьтэмъёс ке городын, чебер, ӝужыт юртын уло, небыт пуконын пуко, преник-кампет сиё... Ида пыре. Ида. Мар-о озьы укно дурад пукиськод, Веруш? Кыӵе куноостэ витиськод? Веруш. Витисько, витисько, витьыса вить луо ни. Тӥ коть, гуртоос, отӥ бадӟым кивалтӥсьёслы ивор сётэ вал. Ида. Кинлы, малы, кыӵе ивор? Веруш. Уд тодӥське ни, оло, кинлы но малы, кыӵе ивор. Быдэс гуртлы ӟеч лэсьтӥсько, юрттӥсько, нош пайдазэ гижы быдӟа гинэ адӟисько. Ида. Озьы эн шуы, Веруш. Данэд аслэсьтыд бадӟым ӝутскемын ини. Ӟеч уж - со ӵын выллем, котькытчы вуэ, вӧлске, нош куд-огезлэн синмаз но пыре. Веруш. Синмазы пыремен ик монэ уг синйылто, уг адӟо городысь бадӟым кузёос. Ида. А-а, тӥни мар сярысь тон. Доразы мынэмед потэ, иське, ӝужыт юртын пукемед потэ? Веруш. А мар-о пуконтэмез? Ужелэн пайдаез но бадӟымгес, ӟечгес луысал. Одӥг гуртлы гинэ ӧвӧл, быдэс шаермылы юрттысал. Ида. Уж шуэмысь, кутски ини ай ужез борды. Городэ кошкид ке, кин-о милемды буйгатоз, юрттоз на. Веруш. Жади ини мон та гуртын улыса. Огнын кышномуртлы ведь пу дасяны но, ву вайыны но, турнаны-мажсаны но секыт йӧтэ. Ида. Озьы, Веруш, озьы. Ма, тон милемлы вера гинэ, ваньзэ лэсьтом. Веруш. Скалэз кысконо вал, а то тани пудо возьмасьёс но вуозы. Ида. Мон кыско, Веруш, кыско. Только тон вӧтме вера вал, марлы медам со. Веруш. Мае-о адӟид? Ида. Кыӵе ке буш, номырин кизьымтэ бусыетӥ мынӥсько кадь. Собере музъем зурканы кутскиз ук! Бадӟымесь, муресь кыретъёс, гуос азям кылдӥзы. Кытчы вамыштыны уг тодӥськы ни. Сайкай но - быдэс мугоры дырекъя, пӧсям вуэн котмемын. Туннэ быдэс гурт турнаны потэ но, ӟечлы медам, малпасько, та вӧтэ, ужам уж юнме уз луы-а? Веруш. Мын, мын, скал кыскыны пот, мон со куспын учко-эскеро. Ида ведраен потэ. Веруш (ӝӧк вылысь книгаез кутыса берыкъя, лыдӟе). Музъем зуркан, музъем зуркан, буш бусы, мур гуос, кыретъёс... (Книгазэ палэнтэ.) Мар отысь утчаськонэз? Мон табере вӧтъёс сярысь книгаын гожтэмлэсь но ӟечгес вераны быгатӥсько ни. Эх, та быгатэмме бадӟым кузёос уггес дунъяло на!.. Вуоз, одно вуоз сыӵе дыр, монтэк ай вамыш но лэсьтэмзы уз луы ни... Ида тыро ведраен пыре. Ида (ведразэ пуктыса). Учкид-а, адӟид-а, малы луиз со шимес вӧтэ? Веруш. Шимес вӧт со шимеслы ик луэ, Ида. Ида. Ой, Веруш, эн кышкаты! Веруш (книгазэ усьтэ но отысь лыдӟемъяськыса). Тани кылзы: музъем зуркан - со вань лэсьтэм ужедлэн куашкамез, быремез. Турнаны туннэ эн потэ, пайдаез уз луы. Ида. Ма, быдэс гуртэн потыны дасяськемын ни. Веруш. Быдэс гуртлы ик вера, туннэ турнаны медаз потэ. Ӵуказе но нунал бырымтэ ай. Ида. Озьы, Веруш, озьы. Тау, бадӟым тау. Гурт кузя кошко ай, турнаны медаз потэ. Веруш (мышказ). Вуозы ай, вуозы. Гужем ас гурзэ кырӟа на. Мон но ас гурея улонме лэсьтӥсько. Кызьы ке мыным но ог кабан турын шедьтоно вал. (Укное учке.) О-о, кабан турын ачиз дорам вуэ кадь али - ачиз тӧромы, кузёмы лыктэ. Веруш синучкон шорын йырсизэ, дӥсьсэ тупатӥз но йӧн-йӧн кариськыса пуксиз. Николай Иванович пыре. Николай Иванович (ӧс куспысен). Ӟечбур, Веруш! Веруш. Тон ке ӟеч, мон но ӟеч. Николай Иванович (кӧтсэ кутыса). Мар-о та, Веруш? Веруш. Питырес, котырес бадӟым ӝуш. Николай Иванович. Вот, вот. Нерад луи ини, котькуд уй вӧтасько та кӧтме. Я со кабан быдӟа пульдэ, я корка ӝужда будэ. Шоканме ик пытса кадь. Веруш. Ӧз пилиськы-а? Николай Иванович. Ӧз, ӧз пилиськы. Веруш. Ӧз пилиськы ке, умойлы. (Ӝӧк вылысь книгаез берыкъяса.) Ма быдӟаен кӧттэ адӟид, сомындалы ик узырмод, байкод. Николай Иванович. Ой, Веруш, тау тыныд, капчияк луиз. А то тодӥськод ведь, ужмы милям кыӵе керӟег. Веруш. Озьы, Николай Иванович, озьы. Тынад но, мынам но ужмы керӟег, нош городысь вылӥ кивалтӥсьёслы со маке шат, ӟечтэ уз адӟе. Николай Иванович. Уз адӟе, уз адӟе, уз но дунъялэ... Нош кытысь-о, малэсь-о меда коньдон вуоз? Списать карем техникамес туж пайдаё вузаны амал шедьтӥ вал - солы ке шат? Оло, кӧня ке кабан турынмес вузаны быгато? Веруш. Тон тӧро, тон ик тодӥськод ини... Николай Иванович. Ой, Веруш, та кӧттырмостэм ӝушелы луыса, калыклэн синмаз пень пазясько но - кытчы медам вуо? Веруш. Эн кышка. Ӝушед вӧтад ӧз пилиськы ук. Пилиськысал ке, соку мукет сямен кырӟано луысалыд... Николай Иванович. Тау, Веруш, тау. Веруш. Турын шуэмысь, та керӟег уженым сое аслам но дасяны дыры уг тырмы, ог- кык кабанзэ, оло, сётод? Николай Иванович. Мар вераськонэз, Веруш, ӵуказе ик капка азяд вуттозы. Николай Иванович кошке. Веруш нош укно дораз пуксе, йӧн-йӧн кариськыса, пальпотыса укноетӥ учке. Веруш. Тӥни визьмо адямиос мон кадьёсты кыӵе гажало, дунъяло. Асьме кузё дунъя бере, городын но тодозы али мон сярысь. (Султэ, синучконэтӥ ассэ йӧн-йӧн кариськыса учке.) Тани берло нуналъёсы бӧрсьысь бӧрсе ӟеч вӧтасько: эксэй выжыысь лев пӧйшур вылын ворттылӥсько кадь. Иське, дорам бадӟым-бадӟым тӧро вуоз, дораз ужаны басьтоз. (Укноетӥ учкыса.) Маин медам дорам лыктоз: "Волгаен"-а, "Мерседэсэн"-а? "Медседэсэн", дыр, сыӵеос огшоры "Волгаен" уз ветлэ. Эх, улон луоз!.. Синъёссэ кыньыса, коркатӥз берга. Онька купырскыса, куссэ киыныз кутыса пыре. Кудӟемез шӧдӥське. Мыжыкез кырмемын, синмыз лекен учке. Синзэ кыньыса поръясь Верушез кутэ вал но, кыкназы усё. Веруш. Ой, мар та, кин та? (Дыртыса султэ). Онька. Мон та, алдам Онька, эрекчам Онька. (Султыны турттэ, но уг быгаты). Веруш. Осто, Оньки! Огназ кышномурт доры йыгаськытэк пыро шат? Онька (выж вылысен мыжыксэ сэзъя). Тани та киыным мон тонэ сузмыто, эрекчи Верка. Пичи муртэ сямен монэ пӧяд но куштӥд! Веруш. Юись муртлэн кышноез но дас кык, усем интыез но - тӧдьы сюй. Онька (султыны турттыса). Тӧдьы сюй ке луысал... (Викышъяны кутске, бӧрдэ). Веруш (Онька котыртӥ берга, ӝутыны турттэ). Вай кидэ, кутскы бордам. (Мырдэм ӝутэ). Онька (кикыль но кокыль мыныса, пуконэ пуксе). Ой, кускы, вань визьме ик ведь сура. Тон эшшо мынэсьтым визьме сураськод на. Веруш (лякытэн, небыт куараен). Я, Оньки, вӧтъёстэ радызъя эшшо вера на али. Онька. Кӧня верано на: асме юэмен адӟи. Тон шуид, со, пе, мыным байлы но тазалыклы луоз. Учкод ке - воксё мукет пала кошкиз: кускам шуккиз - одӥг, парсе кулӥз - кык, кышно дорысьтым кошкиз - куинь. Веруш. Тон бон вӧтад вина юыса кудӟид вал-а яке вина юытэк-а? Онька (йырберзэ кормаса). Син шорам вина уг адӟиськы. Винатэк гинэ кудӟи кадь... Вот ведь, улонын но вӧтын сямен луысал ке... Веруш. Ваньмыз валамон. Соку ик мыным тазьы верано вал. Астэ вина юытэк кудӟемен адӟиськод ке, азьвыл лэсьтэм вань урод ужъёсыд понна кыл кутон вакытэ вуэ. Онька. Ма, кыӵе урод ужъёс лэсьтӥ мон, нош табере маке пӧяськод, Верка. Веруш. Вина мултэс ӟизтӥд. Вот кыӵе урод уж лэсьтӥд. Онька. Ма, туала арын парсь гинэ винаез уг юы. Веруш. Юо ке но, тон сямен уг визьтэмъясько. Ваньзэ вунэтӥськод ведь, пыдйылчи сямен, гурт кузя чарка утчаса ветлӥськод. Мыжыкъёстэ но урдылыны мултэс яратӥськод. Онька. Я, я, тырмоз, нош монэ пичи муртэ сямен дышетӥськод, валэктӥськод. Веруш. Вина юондэ кушты но вӧтъёстэ умойгес чакла. Азьпиньёстэ, урдлыостэ чеберен, тӧдьыен, паськытэн адӟид ке, кышноед одно вуоз. Нош йырад сюръёс будэмен ке адӟид, эн кышка - вӧтын ваньмыз йырчукин. Иське, тазалыкед берытскоз, гидад пудо-животэд ляльӟоз. Онька (султӥз, кусказ кутӥськыса, ӧс пала вамыштӥз). Ярам, Верка. Огпол оско на. Нош ик алдад ке, берегись!.. Веруш. Ваньзэ верамъям лэсьты: юондэ кушты, вӧттэ эскеры. Онька кошке. Веруш (залэ). Тӥни тазьы - котькуд нунал. Одӥгзэ, кыксэ буйгатӥсько. Кытӥяз визьмылы аслым ачим паймисько. (Ӝӧк вылысь книгаез кутыса.) Ваньмыз тани та "Сонник" книга бордысен кутскиз. Табере валантэм, суро-пожо вӧтъёсыз но сэрттыны-пертчыны дыши, ява. Соин ик шуисько: мыным городын, бадӟым коркан улоно, небыт пуконын пуконо, калыклы кӧня пайда сётысал... (Укное учке.) Осто, та Онька ӟеч вӧтъёс мед адӟоз вылэм. Инмар мед утёз сыӵе-сыӵе керӟег адямилэсь! Катанчи. Вордскемзэс та нуналъёсы пусъё Малков Аркадий Трофимович - Кун Кенешлэн депутатэз, "Удмурт дунне" газетлэн редакцияз пыртэм мурт; Афанасьев Валентин Петрович - Сюрес вылын кышкытлыклэсь утиськонъя кун инспекцилэн (ГИБДД-лэн) начальникезлэн воштӥсез; Лаптева Римма Серафимовна - "Инвожо" журналысь тодмо публицист но веросчи, "Удмурт дунне" газетлэн азьвыл корреспондентэз; Тепина Людмила Андреевна - "Удмурт дунне" газетлэн авторез, Завьяловоысь нылпи садын ужась. Ужалэ! Удмурт Элькунысь Кун Кенешлэн Тӧроез Александр Волков азьланьтэ гурт калыкен пумиськылонъёссэ. Таяз вирнуналэ со вуылӥз Балезино ёросэ. Соку ик таӵе малпан кылдӥз: лымшор палан сярысь, уй палан улон-вылон начаргес. Со шӧдӥське котькуд удысын. Кылсярысь, лэсьтӥськонын. Йылаз-пумаз вуттымтэ юртъёс туж уно кызьы ке гуртъёсын, озьы ик Балезиноын. Удмурт Элькунысь Кун Кенешлэн Тӧроез, "Удмуртавтодор" предприятилэн валтӥсь директорез Александр Соловьёв, Удмурт Кивалтэтлэн Тӧроезлэн воштӥсез Михаил Назаров но мукет адямиос огдырлы дугдылӥзы искусствоосъя школалэн юртэз вадьсы. Кӧня ке ар ӵоже лэсьтӥське ни со. Уг быдэсмы пӧртэм мугъёсын сэрен: я кирпич ӧвӧл, я цемент, я эшшо маке. Зэм, весь вань кужымзэс поныса, туэ выль арлы вуттыны чаклало дышетскон юртъёсты. Александр Александрович Волков ачиз лэсьтӥськись бере, соку ик синйылтэ котькыӵе шекез. Суп-сап ужам бервылэз адӟиз но эх, сизьдэ ук кӧберсыз ужасез: - Такем дуно арбериез арам кариськоды.Эшшо ке возьмаськоды, дыр, ай нылпидылэн нылпиезлэсь синмаськымон пианист луэмзэ. Янгышам лэсьтӥськись йырзэ ошиз но мар вераны ӧз тоды ни... Отӥяз аспӧртэмлыко пумиськылонъёс вал Балезино ёросысь Мичурин нимо колхозын. Лулысь-сюлмысь кенешон вылысь, адямиос люкаськылӥзы гуртлэн ӧтчамъёс ортчытъян юртаз. Татчы пыремез бере ик Александр Александрович ваньмызлы кизэ сётъяз. - О-о, ӵукна ик ӟечъяськиськоды, - шумпотӥзы егитъёс но, арлыдоос но. - Кызьы нош сотэк? - пальпотыса вазиськиз Ижысь куно. Кӧня ке дыр ӵоже сюлмысь вераськон. Балезино ёрослэн кузёез Рафис Касимов но Мичурин нимо колхозлэн тӧроез Сергей Наговицын тодматӥзы тапалась югдурен. Рафис Зинатуллович но Сергей Рудольфович палэнэ ӧз кельтэ шумпотонъёссэс но, кайгуоссэс но. Шумпотонъёссы таӵеесь: пудоез ӟеч толйытон понна, Удмурт Элькунысь Кун Кенеш Балезино ёрослы висъям 4 миллион манет. Юосты октон-калтон вакытэ шугъяськонъёс медаз луэ шуыса, 20 тонна эстӥськон. Бадӟым пайда вае ёросысь спиртзавод (43 миллион манет табыш поттэмын). Татысь пыды туж ӟеч юрттэ трос йӧл поттыны, озьы ик со - пудо сиёнэ ӟеч ватсэт. Зэм, спирзавод али "шутэтске". Соин валче данаклы кулэсмиз йӧл но. Удмурт Элькунысь Кун Кенешлэн Тӧроез Александр Волков ивортӥз быдэс шаерысь огъя югдур сярысь. Солэн верамысьтыз тодмо луизы кӧня ке шумпоттӥсь лыдпусъёс. Кылсярысь, туэ асьмелэн уже интыямын 22 сюрс мурт (тужгес уно адямиез уже кутӥз Ижысь автозавод), азьло аръёсын ӵошатыса, туэ туж трос егитъёс басьтозы вылӥ тодон-валан (10 сюрс мурт), выльдэмын-тупатъямын, лэсьтэмын 52 школа (60-эз эшшо пуктӥськоз на), юосты дыраз утялтон вылысь, басьтэмын луоз 100 комбайн, гурт калыклэсь улон интылы кулэяськонзэ кулэстон вылысь висъямын 50 миллион манет. Собере - пумтэм-йылтэм юанъёс, йыркуро лулӟылонъёс. Ӟырдам калык пуштӥз: - Корка пуктыку, малы котькуд вамыш понна выт куро?! - Малы нош ик кулэстӥзы йӧллы дунэз?! - Гурт калык туж ӧжыт уждун басьтэ. Нош ужа вазь ӵукнаысен бер ӝытозь. Кытысь шедьтоно йылзэ-пумзэ?! - Александр Александрович, - сюлмысьтыз вазиськиз Кун Кенешлэн Тӧроезлы колхозысь валэтӥсь зоотехник Владимир Никифоров. - Уй палан но улон-вылон лымшор палан кадь ик мед луысал ни: отын котькуд корка газ пыртэмын!.. Кожйылэн люкиськем бере, сюресъёс вуттӥзы Карсовай, Люк черкогуртъёсы. Котькытын - одӥг выллем юанъёс-веранъёс, тышкаськонъёс: одӥгезлы тупатъяно улон юртсэ, мукетызлы кулэ ужан инты, куинетӥез арняосын уг сазьтӥськылы... Ӟырдыт кенешон пӧрмиз Балезино леспромхозын. Данакез ужасьёс татын - нылкышноос. Йыркурзы тымиськемын: - Ми пӧлысь уноез уло ини куашкан калэ вуэм коркаосын - вӧлдэтъёссы тани-тани погралозы. Куд-огезлы висъям уксёез сётоно соослы - мед тупатъялозы юртъёссэс! Ӟырдам югдур ӧжытак сӥяса, Кун Кенешлэн Тӧроез нылкышноослэсь юаз: - Оскиськоды-а тӥ кузёостылы? - Ум! - огымысь кеськизы соос. - Кинлы оскод на туэ?! - ваньмызлы кылымон черетскиз одӥгез. - Аслам картэлы но уг ни оскиськы!.. Тӥни озьы. Отӥяз Кун Кенешлэн Тӧроез кенешылӥз Балезино ёросысь кивалтӥсьёсын, Пибаньшурын улӥсьёсын. Котькуд пумиськон дыръя вал матэктӥсь быръёнъёс сярысь вераськонъёс. Люкаськемъёслы шуылӥзы: 15-тӥ октябре шонер вамыш лэсьтӥды ке, азьланяз улонды ӟеч луоз. Соин ик малпаськелэ! Зэм, калык ачиз быръёз, дыр, аслэсьтыз Тӧрозэ. Котькудӥзлэн йырыз - аслаз. Та нуналэ ик быдэс Россия буре ваиз Баренцево зарезьын быремъёсты. Пумиськылонъёс дыръя но вань люкаськылэмъёс, шукрес учырез тодазы вайыса, шып сылылӥзы. Е. Виноградова. ШӦКЫЧ ПЕЛЬТЭМ ИЛЛЯ Ческыт губи Кызьы меда инмарлэн йыраз лыктэм дунне вылэ губи кылдытыны? Ай одӥг пӧртэм гинэ ӧвӧл � нимзэс вераса но уд быдты. Нош кыӵе соос ческытэсь, м-м-м! � кылдэ ньылод. Губи вань ке � сӥль но кулэ ӧвӧл. Кӧня сиён лэсьтыны луэ солэсь. Коть сылалтыса си, коть пельнянь, перепеч кут, коть пирожки, картошкаен но ческыт, шыдэн но туж усто. Иванме кӧня йырйисько ини: � Мын ни ветлы губияны, сӥзьыл вуиз, нош губи ӧм веръялэ на. Ма, ачим но ветлысал, дыр, уж берпалэ кенӝемын, воксё пуксет уг шедьтӥськы. Тани картошкаез октыса быдтӥм, мукетсэ бакча сиёнъёсты утялтоно. Эшшо ик скал кысконо, парсь сюдоно, курег, ӟазег, ох! Мырдэм валесозь вуисько. Нош тон ӝытлы быдэ юыса бертӥськод, парсь ӝуш! Нош огпол кызьы ке быдэс мешок нингуби ваиз. Губиез, сяртчы кадь, шарк-шаркесь. Шумпотӥ вал но, Иван шумпотэмме быдтӥз. Со губиос, пе, Сьӧд Миколлэн, ачиз куссэ вырӟытэм но монэ вузаны косӥз. Я, табере, мынам Иванэлэсь ик вузаськись. Нош аслам йырам мукет малпанъёс бергало ини, кызьы та губиез кайпалтоно вал. � Кӧняен вузаны косӥз? � юасько. � Литр кабак виналы тырмиз ке � яралоз, пе. � Ма, сыӵе дунтэм? � Уг тодӥськы, � шуэ, � аслэсьтыз юа. Шумпотыса мылкыды ик ӝутӥськиз, удалтӥз, дась бичамын, уксёен ке но, ӵок ини, дунтэм губи инмар сётӥз. � Нокытчы но эн нуллы, � шуисько, � асьмеос басьтом. Ме, тани уксё, Миколэдлы ну. Иван басьтӥз, пал кыл но ӧз вера, кошкиз. Ачим соку ик губи борды кутски: сузяй, миськи. Ӝынызэ сылалтӥ, кылемзэ мар но со пӧраны кельтӥ. Иван бертонлы картошкаен жарить кари. Вазь-а, бер-а вуиз Иванэ � кудӟемын, мырдэм пыд йылаз сылэ. � Пуксьы, � шуисько, � сиськы но кӧлыны выд! Соиз мар ке но нукыртыса, ӝӧк сьӧры пуксиз. Ну, сие, сие, ну, сие, сие � парсь но парсь. Йыркурме кытчы донгыны ик уг валаськы. � Ох, � шуэ, � козяйка, губие ческыт ик вылэм, сиемъя сием потэ. � Кызьы, � шуисько, "губие", Сьӧд Миколлэн шуид ук?! � Миколлэн, пе. Солэн кускыз вырӟемын, кыӵе солэсь губиясь. � Так тон, возьыттэм син, бичам губидэ родной кышноедлы вузаськод-а озьы? Ме, тыныд! � ки улам туӵко сюриз. Как васькытӥ тыбыр кузяз. Ныдыз лосырак! чигиз, Иван туӵырак гуньдӥз. Берло, ой, жаль потӥз � туӵколэн ныдыз ӵыжак выль вал ай. 27-ТӤ АВГУСТЭ � Россиысь Кинолэн нуналэз Бодьялась кино Офонь Туннэ кадь ик тодам лыктэ на киноез нырысьсэ адӟеме. Пичи Бодья гуртлэн шоразгес сылэ вал пересь дядиелэн Иван Иванович Николаевлэн шыкыс кадь чебер коркаез. Азбарез бадӟым бере, лапасэз но туж бадӟым вал � ог куамын-ньыльдон адями тэрымон. Лапаслэн огпал буш борддораз ошо вал кык валес простынь быдӟа тӧдьы басма. Ми выныным Аркашен юаськомы вал: пересь дяди, малы-о борддорад тӧдьы басма ошизы? Соин, пе, татын кино возьматозы. � Нош ма со, кино? � абдраса юаськомы ми Аркашен пересь дядилэсь. � Хм-м-м, кино? Кызьы валэктод ай меда тӥледлы, козлокъёслы? � Иван Иванович чилясь тӧдьы тушсэ маялтэ но милемлы кескич кыньыртыса вераны кутске: "Тӥни � адӟиськоды-а, пиосы, борддорысь бадӟым суредэз? Сое афиша шуэ Кино Офонь (Кино Офонь шуо вал Якшур-Бодья районысь нырысетӥ киномеханикез Афанасий Петрович Кузнецовез. Ачиз но со Пичи Бодьялан ик улӥз). Суред вылысь адӟиськоды-а ӝужыт изьыен, кияз шашкаен вал вылын ворттӥсь воргоронэз? Со � Чапаев. Нош мышказ эшъёсыз, кавалеристъёс, шашкаосын шонаськыса, тӧдьыосты Уралысь улляло. Уть, афишаын Чапаевлэн валэзлэн пыд улаз гожтэмын: "Гулял по Уралу Чапаев-герой..." � Пересь дяди, гулял шуэмын бере, со Чапаев тӧдьыосты но шашкаен кора вал, дыр, о-о-о? � Аркашен ми дэймыса но абдраса учкиськомы вал Чапаевез афиша шуон вылысь. � Э-э-э, козлокъёсы, пиосы, тӧдьыос гордармеецъёсты ыбыло, виыло бере, кызьы-о тӧдьыосты-тушмонъёсты жалялод на?!. Я, ваньзэ уг вера ни. А то ӝытазе тӥледлы кино учкыны тунсыко уз лу ни! Я, мар-о, ымдэс усьтыса, куакапиос кадь абдраса сылӥськоды? Тани быдэс ульчаысь пуконъёс но ӟусъёс вайылӥзы ни азбар шоры. Соосты лапас улэ радэн-радэн пуктылэ ай! Ай сылэ: Нырысь ик лапас улэз векчи шелепъёслэсь но тузонлэсь чылк-чылк утялтэ. Ӝытозь дась мед луоз калыклы пуксьыны. Вот тае быдэстӥды ке, мон Кузнецовлы верало, солэн кузпалыз Маша, билет вузась, тӥлесьтыд коньдон медам ни куры. (Соку одӥг билет мӧйыослы витьтон коньы сылэ вал, пиналъёслы � кызь коньы.) Но кытысь-о шедьтоз кызь коньы нырысетӥ яке кыкетӥ классын дышетскись пияш яке нылаш? Нэнэлэсь яке тятилэсь куроно ке, соос мур лулӟыло вал: э-э-э, пие, пие, сельхозналог тыроно уго! Тани одӥг парсьмес вузамы но ӝынызэ сяна тырыны ӧм быгатэ. Кык арняскын ӧм ке тыре кык сю манет, кунянмес поттозы ни вузаны... Я, кӧня ке чида ни кино учкытэк но! Аркашен ӵош Чапаев нимо киноез нырысьсэ учкеммы бере, вань гурт калыкен ӵош ми но, пичиос, адӟемпотостэм каримы шукрес чебер дӥсяськем офицеръёсты. Соос гордармеецъёс пумитэ лыкто вал угось ымазы ӵындӥсь кузь йӧспӧртэм попиросъёсын. Сюлэммы куалектыса витимы: ку кутскоз ни Анка пулемётэныз адӟемпотостэм тӧдьы офицеръёсты турнаны � Каппель генераллэсь гыжкалъёссэ турнаны? Егитъёсын ӵош ура! шуыса, ми но, пичиос, кесяськыны кутскимы, Анка пулемётэныз тӧдьыосты ыбылыны кутскыку. Кышкасьтэм Чапаев эшъёсыныз ӵош тушмонъёсты шашкаен кораса быдтыны тӧлпери кадь уиз. Вераме потэ сое: войналэсь азьло ӧй вал бензинэн ужась движокъёс шуон двигательёс. Соосты ужатыса, кино возьматыны ток потто вал. Зэм, вал ини кык пудъем секытэсь динамомашинаос. Соосты кык кузя бергатыса, ток потэ вал но, со тырме вал лапас улэз югдытыны, билет вузаны. Билет вузаса быдтэм бере кутско вал ни пиосъёс та динамомашина шуонэз бергатыны. Солэн уго нимысьтыз "Г" буквалы укшась усто кузь кутонэз вал. Со кутонэ гозы думыса бергато вал та машинаез, кино мыныку. Кӧня ке ӝоггес бергатӥськод ке, тӧдьы басма вылын яркыт адӟиське вал кино. Вот малпалэ ай, кино кык час мынытозь, вожен-вожен вошъяськыса, ог куать воргорон бергатэ электротон поттӥсь динамомашинаез. Тдмо ни: соос билетлы коньдон уг тыро ни вал. Ми Аркаш выныным но мукет эшъёсынымы ӵош трос учыръёсы кино дунтэк учкылӥмы. Малы ке шуоно, кино луон сярысь чебересь афишаос кык-куинь нунал ик азьло лякылӥськом вал Пичи Бодьялэн вань ульчаосаз но, пичиесь вольытэсь заборъёсы но, капкаос вылэ. Ӵем дыръя таӵе афишаосты корка кузёос, заборъёс но капкаос вылысь ишкаса чебересь шуыса, корка пушказы лякыло вал. Сыӵеосты Афанасий Петрович кино кутскон азьын тышкаськылӥз но алылӥз: мыдъят тодӥ на ке, киное уг лэзьы ни, коть дас билет басьтэ. Востэм, чупрес киномеханик калыклэсь куронъёссэ быдэстыны котьку дась вал. Войналэн тужгес секыт вакытаз таӵе киноос уго калыклэсь мылкыдзэ умой ужаны ӝутылӥзы, куректонзэ-кайгузэ ӧжытлы ке но вунэтыны юрттылӥзы. Кузнецов ачиз но калыклы юрттылӥз маин быгатӥз. 1941-тӥ�1945-тӥ секыт аръёсты тодаз вайыса, Афанасий Петрович ялан вералляз: "Трос пол куриськылӥ фронтэ, нош военкоматын шуо: тон татын кулэ. Фашистъёсты тонтэк но вормозы-пазьгозы, нош тон киноосыныд калыклы валэкты: ӝоггес мед юрттозы фронтлы шуныт дӥськутэн. Вот тае быдэстӥд ке, туж усто ни! Сталинград дорын фашизмлэсь сюрлызэ чигтӥзы ни � Берлинозь тонтэк но асьме солдатъёс вуозы. Тон дасяськы Берлинэз пазьгем сярысь киножурнал возьматыны. Уд но шӧдылы, отчыозь но ӝоген Горд Армия вуоз! Вуоз, уд но шӧдылы! Так что, Афанасий Петрович, калыклы тросгес кино возьматы, фронтэ куриськонъёс эн гожъя! Сё одно гуре куяло..." 1934-тӥ арысен ик кутскем ни Афанасий Петрович кино возьматъяны. Соку, пе, кино куаратэм на вылэм. Ма дауртэмзэс, ма каремзэс кылын гожъяло вылэм. Чупрес киномеханик, егитъёсты кино возьматыны дышетыкуз, ачиз соосын ӵош гуртъёстӥ ветлылӥз. Вуоно механикъёсын ӵош Афанасий Петрович трос пол вуылӥз Бабашуре, Кекоранэ, Курчуме, ышем Соловьи, Луна, Кечшур, Деньгино, Утор гуртъёсы, Утор Починкае но трос мукет интыосы, лесоучастокъёсы но леспромхозъёслэн посёлокъёсазы. А.П.Кузнецовлэн кузпалыз но, Мария Ильинична, витьтон ар пала улонзэ сётӥз киносетьын ужанлы. Со вал кассир но, контролёр но Бодья клубын. Ужез гажась нылкышно клубез чылкыт ӵужыны-миськыны но вуэ вал. Азьло вуж клубын Барак кузя ньыль гур вал ук. Соосты ваньзэ эстоно, кино учкисьёслы ӝытазе шуныт мед луоз шуыса. Ваньзэ лэсьтэ, вуэ вал Мария Ильинична. Секыт война аръёсы но бӧрысьгес колхозысь нылкышноосын ӵош ӝомытысен ӝытозь араз, турназ, колхоз бусыын етӥн ишкиз, картошка копаз-октӥз но трос мукет ужъёсты быдэсъяз. Чидантэм курыт кайгуэз-адӟонэз но чидано луизы Кузнецов кузпалъёс. Шудтэм учыре шедьыса быриз Юра пизы. Висьыса кулӥз чупрес чебер Аля нылзы. Озьы но та быдӟа кайгуэз чидазы Мария Ильинична но Афанасий Петрович Кузнецовъёс. Нош Геннадий пизы али но ужа калыкез эмъян удысын. Кино возьматон удысын витьтон ар пала ӟырдыт мылкыдын тыршемзы но пусъемын орденъёсын, медальёсын, мукет данъетъёсын, дуно кузьымъёсын. Мӧйы киномеханикъёс али но шуныт мылкыдын тодазы вайыло на кино возьматон удысын ӝыны даур пала тыршем Кузнецовъёсты � Афанасий Петровичез но Мария Ильиничнаез. Мӧйыосыз но, егитъёсыз но киномеханикъёс туннэ кино сярысь сюлмаськыса верало ни: "Туж ичи калык ветлэ ни киное. Гуртъёсын соингес но секыт: толэзен-толэзен коньдон уг сётъяло но, адямилы киноен йырин ӧвӧл ни! Собере телевидение но палэнтыны, ӟарытгес карыны выре ни киноэкранэз. Калык тазьы малпа ни: мырак, со киноез куке но одно ик возьматозы ук телевизор пыр. Озьы ик луэ. Городъёсын но таӵегес ик югдур, шуо..." Пичияк оскон вань ик: кин тодэ, оло, кӧня ке ар ортчыса, югдур тупатскоз? Москваысь бадӟым кивалтӥсьёс, оло, таӵе югдурез чутрак умоятон вылысь, кыӵе ке но ужрадъёс кутозы ик?.. Евгений НИКОЛАЕВ. Ож тӥрлык дурись предприятиосын но организациосын ужасьёсты Россия Федерацилэн кун наградаосыныз пусъён сярысь Россия Федерацилэн Президентэзлэн Указэз Нимысьтыз учыръёслы чаклам выль техника кылдытонын, сое эскеронын но тросэн поттонын басьтэм азинсконъёссы но трос аръёс ӵоже сюлмысь тыршемзы понна пусъёно: Эшъяськон орденэн Сидоров Николай Алексеевиез - акциосын "Научно-исследовательский институт металлической технологии" огазеяськонысь отделлэсь кивалтӥсьсэ, Удмурт Республика. "За заслуги перед Отечеством" орденлэн ИИ степенё медаленыз Афанасьев Андрей Васильевичез - акциосын "Научно-исследовательский институт металлургической технологии" огазеяськонысь дурисез, Удмурт Республика; Войцеховский Владимир Андреевичез - акциосын "Научно-исследовательский институт металлургической технологии" огазеяськонысь консультантэз, Удмурт Республика. Радиоэлектронной аппаратура поттонын бадӟымесь вормонъёссы понна но Акционерное общество "Сарапульский радиозавод-Холдинг" (Удмурт Республика) предприятилы 100 ар тырмонэн валче пусъёно: Эшъяськон орденэн Полусмак Александр Михайловисез - валтӥсь директорез. Дано нимъёс сётоно: "Россия Федерациысь дано конструктор" Лихарев Валерий Максимовичлы - секторен кивалтӥсьлы - валтӥсь конструкторл_Ны. "Россия Федерациысь дано машиностроитель" Калягина Валентина Федоровналы - штамповщицалы. Кобяков Анатолий Александровичлы - слесарь-инструментальщиклы. Россия Федерацилэн Президентэз В. Путин. Москва, Кремль, 2000-тӥ арын 7-тӥ августэ. � 1453. Азьпалан - "Коммунар" Куазь люкетэ ке но, Алнаш районын ялан кужмояло бусы ужъёс - юосты октон, кын улэ гырон, ӟег кизён но пудо сиён дасян. Быдэс ёросъя ӝыныезлэсь тросэз юос утялтэмын ни. Та ужъёс тужгес но умой радъямын "Коммунар" гурт хозяйствоын. Музъем ужасьёс та нуналъёсы юоссэс октыса быдтозы. Бусы ужъёс озьы ик усто мыно Асан совхоз-техникумын, "Молодая гвардия", Суворов нимо но музон хозяйствоосын. Нимаз тыршисьёс пӧлын вормисе потӥз "Молодая гвардия" эштосысь комбайнёр Виталий Морданов. Со 600 тонналэсь уно ю кутсаз ни. Быдэн 450-500 тонна лэсьтӥзы ни Ильич нимо но "Правда" хозяйствоосысь комбайнеръёс Иван Медведев но Петр Федоров. О. Кожанова. Футбол Волга кузя Та вакытэ Ижысь "Газовиклэн" самой секыт нуналъёсыз. Куинь пумиськонзэ со бӧрсьысь бӧрсе палэнын ортчытэ. Валлян футболистъёсмы Казаньын "Рубинэн" нюръяськизы но 0:1 лыдын келязы. 3-тӥ сентябре "Газовик" шудоз Астраханьын "Волгарь-Газпроммен", эшшо кык нунал ортчыса, дивизионысь туннэ нуналлы кужмоеныз командаен - Саратовысь "Соколэн". М. Кузьмин. Вень но ӝуа вылэм Дышетскон ар кутске ини. Нош ик ширто Москвае, Калык эшъяськонъя университетам. Но ӧжытак шурдӥсько. Калык курыт пальпотэ: мынытозяд, пе, Москваедлэсь номыриз но уз кыльы ни. Зэм ик, ма но уг луы отын. Музъем ултӥ выжонэз пуштытӥзы. Валлян "Останкино" телебашняын тылпу потӥз. Табере, пе, Москваын улӥсьёс 2-3 толэзь ӵоже чагыр ящиксэс учкыны уз быгатэ. Мон Москвае вуытозь, оло, передачаосты адӟытон понна музон амалъёс шедьтозы? "Останкиноын" тылпу гомӟиз валлян нуназе ньыль час котырын. Башняын тылпу пуромиз 450 метръем ӝуждалаын. Мугез тодмо ӧвӧл на. Терракт шуонэз но лыдэ басьязы. Тужгес ик оскымонэз: антеннае электрокужым нуись езъёс ваче йӧтӥзы но, тылгизьыос пазьгиськизы. СТС, НТВ но "Культура" канаъёслэн ужамзы ӧз луы ни. ОРТ (нырысетӥ программа) Москваын ас иворъёссэ "ТВ Столица" канал пыр сётъя. Озьы ик радио кылзӥсьёс приёмниктӥзы кутэмысь дугдӥзы "Эхо Москвы" но мукет радиотулкымъёсты. Тылпу туж бадӟым ыштонъёс вае. Угось "Останкино" башня берло дыре аспӧртэм городлы пӧрмиз. Трос ар ӵоже тодосчиос йырзэс тӥязы вуоно лэсьтӥськон бордын. Нырысь-валысь та башняез пуктӥзы вал вить каналлы. Малпазы сяськаез выжыеныз выллань берыктэмлы кельшись юрт пӧрмытылы: улӥыз зӧк, вылӥыз - векчигес но векчигес. Лэсьтэм башня зӧк веньлы укшаз. "Останкин_ыо" кема ар ӵоже дуннеысь самой ӝужытэз но паймымонэз вал. Ӝужалаез 540 метр пала. Сое лэсьтонэн кивалтэм Никитин инженерез данъяса, вышкаез Никитинской ниманы малпало вал. ачиз со соглаш ӧз луы. Кулэмез бере та малпанэз ӧз быдэстэ ни. Алигес Торонто городын 10 метрлы гинэ кузьгес башня йӧндыриллям ай. "Останкиноез" пуктыку котьмае но лыдэ басьтӥллям. Лэсьтэмын юн кортлэсь но бетонлэсь. Вылӥ этажъёс корт езъёсын юнматэмын выжыез борды. Секундскын 50 метре пельтӥсь тӧлпери но кышкыт ӧвӧл. Ватка солань-талань 12 метре люкаськыса но уз куашка. Озьы ик 6 баллозь музъем зурканэз но чидалоз. Аръёс ортчыса, башня борды пӧртэм ёзъёс лякиськыны кутскизы. Усьтӥськиз "Седьмое небо" бергась ресторан. Телеканалъёс сяна, татын али тачак гинэ радио но телефон станциос. Тылпуэз кысонэ трос кужым кутэмын. МВД висъяз 450 мурт. МУС - 100. Вуизы на альпинистъёс, тачак пожарникъёс. Но соос трос кузя ужаны уг быгато. Башняын уд берытскы - инты ичи. Соин адямиос ог-огзэс ялан вошъяло. Ньыль адями больницае нуэмын ини - лек ӵынэн воньдӥзы. Кык, куинь яке ньыль адями ышемын. Соосты утчаны бригада кылдытэмын. Тылпу пумен уллань но уллань ваське. Башня ӟырдамен йырин ужез азьланьтыны туж шуг. Тылпу улӥе васькз ке - телевизорез оло быдэс странаын учкыны уз быгатэ. Соин пӧртэм каналъёс ик малпасько ини Шабалкаысь, МГУ-ысь, Хорошевское шоссеысь башняосын герӟаськемын. Александр Машкин, НТВ-лэн валтӥсь директорез малпа: телеканалъёсты гинэ выльдон понна 3 миллион доллар кулэ. Уголовной уж ӝутэмын ӧвӧл на. Тылпу бере ини йылъёссэ-пумъёссэ утчалозы. Марина Костылева. Куанер пенсионер понна вералэ кыл... Кылем суббота нуналэ Кун Кенешын ӟырдыт вераськон мынӥз Россиысь Президентлэн туэ 10-тӥ июле пенсиосты будэтон сярысь 1272 номеро Указэз пумысен. Кун Кенешлэн Председателез А. Волков отын чурытэсь куронъёс пуктӥз республикаысьтымы социальной политика удысын ужасьёс азе. Пумтэм-йылтэм ӝожтӥськонъёслы, Кун Кенеше но правительствое вуись гожтэтъёслы тупен-тупен но валамон валэктонъёс сётон вылысь, А. Волков куриз вакчи дыр куспын чик ӝегатскытэк ужрадъёс кутыны. Та вие угось пенсионеръёс пӧлын улон огыр-бугыр луиз. Данакез соос уг валало, малы пенсия огезлы ог 125 манетлы будэто, нош мукетызлы - 25 копейкалы? Нош мугез но валантэмез отын тани мар бордын: а) "Вуж законъя" - 1992-тӥ арозь - самой ичи (минимальной) пенсия басьтӥсьёслэн пенсизы уг буды; б) озьы ик пенсизы уг буды ужась пенсионеръёслэн. Тани та кык люкетэ пырись пенсионеръёс Россиысь Президентлэн Указэз улэ уг шедё. Ӵашетон кылдӥз таӵе муген но. Тросэз пенсионеръёс чӧлляськыны кутскизы В. Путинлэн 1-тӥ августысен вань пенсионеръёслэн коньдонзы шорлыдын 125 манетлы будоз шуыса вераменыз сэрен но. Нош В. Путин шонерак вераз, Россиысь 18 миллион пала пенсионеръёс 1-тӥ августысен ог 125 манетлы будэтэм пенсия басьтозы шуыса. Россиын 36 миллион пала пенсионеръёс ке, озьыен, пенсизы будэ ӝыны палаезлэн гинэ. Республикаямы но сыӵегес ик югдур. Россиысь Президентлэн Указэз улэ 60,04 процент пала пенсионеръёс шедё. Мукет сямен вераса, пенсизы будэ пенсионерлэсь индивидуальной коэффициентсэ лыдэ басьтон улэ шедисьёслэн гинэ, яке 1992-тӥ арысен пенсие потэмъёслэн. Тӥни самой со ик трос валантэм тугаськонъёс кылдытӥз, Россиысь Президентлэн Указэз потэм бере. Данакез пенсионеръёс солэсь пуштроссэ ӧз валалэ, дыр. Зэмзэ но, со валантэмгес луэ уга. Соин ик социальной политикая комиссиын ужасьёслы та нуналъёсы туж секыт йӧтэ. Пенсионеръёслэн но куронъёссы огласянь учкыса шонересь. Малы ке шуоно, пенсия будэтон сярысь пӧртэм законъёс, указъёс, ужрадъёс вань пенсионеръёслы одӥг кадь луыны кулэ. Котькуд адями одӥг законъя пенсия басьтыны кулэ, кыӵе арын но ку пенсие потэмзэ лыдэ басьтытэк. Пенсиосты будэтон сярысь выль Указ потэм бере, тросэз пенсионеръёс юмоке но шедизы. Куд-огез угось ӧжыт ужаса но тросгес пенсия басьтыны кутскизы. Азьланяз озьы медаз лу шуыса, Россиысь правительство выль законъёсъя кык ужпум пуктэ: а) Пенсиосты сётъяно выль законъя, пенсионерлэсь индивидуальной коэффициентсэ лыдэ басьтыса, яке ужам аръёс + шорлыдын уждун; б) ужась пенсионеръёслы уждун тырон радъянэз. Ужпум угось тани ма бордын. Огез ужась пенсионер 1000 манет басьтэ, со вӧзы - пенсиез но бадӟым. Нош мукетызлэн ужась пенсионерлэн уждунэз но ичи, пенсиез но минимальной. Соин ик 1-тӥ августысен Указъя ужась пенсионеръёслы пенсия ӧй вал будэтэмын. Таин валче данакез ӧжыт уждун басьтӥсь пенсионеръёс ужысьтызы кошкылыны кутскизы. Валамон угось, мар со пенсия вӧзы 100-200 манет? Нош ужась пенсионеръёслы одӥгзэ вунэтыны уг яра. Данакезлэн пенсионеръёслэн ужысь кошкемзы бере но пенсизы сомындалы яке 125-140 манетлы уз буды. Ваньмыз потэ уга ИКП бордысь: ужам аръёс + уждун. Соин ик, ужысь кошкемлэсь азьвыл, тани мае лыдэ басьтоно: а) Райсобесэ юалляськыны ветлоно; б) Шорлыдын вить ар куспын самой бадӟым уждун сярысь справка дасяно. Соку гинэ куд-огезлэн выль законъя пенсиоссы будыны быгатозы. Берло аръёсы республикаямы пенсиос тырон данаклы умояз. Со герӟаськемын республикаысьтымы кивалтӥсьёслэн Россиысь Президентэн В. Путинэн но Россиысь Пенсиосъя фондлэн кивалтӥсеныз умоесь кусыпъёс воземенызы. Соин ик азьланезлы оскон кылдэ, республикаямы пенсиос сётъянэн нокыӵе но ныркъёс уз луэ шуыса. Гажано пенсионеръёс, почтаосын пенсия сётъясьёсты но, райсобесъёсын ужасьёсты но, Социальной юрттэт сётонъя министерствоын тыршисьёсты но шуге-леке вуттэм, асьмелэсь, пенсионеръёслэсь но тазалыкмес шыръян вылысь, пенсиосты будэтон сярысь юалляськонъёсын, гожтэтъёсын огсыр, дыртытэк, керӟегъяськытэк, ог-огмес валаса ужано. Дыртыса но керӟегъяськыса ужамлэн бервылыз ӝожон кадь пож луэ уга. Ф. Суворов. Кык-куинь мурт - дас адями интыын Ньыль сю пала гурт администрациослэн кивалтӥсьёссы люкаськылӥзы алигес Завьялово черкогуртэ. Шонер пусйиз отын Глаз ёросысь Понино администрацилэн йырыз Нина Геннадьевна Калинина: - Ми тодӥськом котькуд семьялэсь кызьы улэм-вылэмзэ. Милемды ӵемгес огинэ люкаллялэ. Ми шедьтом ог-огмылы но республикаысь кузёослы мар вераны. 10-15 ар талэсь азьвыл гуртын кивалтон возиськиз таӵе лысьӧм вылын: сельсовет, хозяйстволэн йырыз, партия, профсоюз, комсомол. Хозяйствоос но профсоюзъёс начармизы, партия но комсомол быризы. Кылизы гурт администрациос гинэ. Адямиос вань сюлмаськонъёсынызы татчы лыкто. Кызьы шуиз Кун Кенешлэн Тӧроез Александр Волков, отысь кык-куинь мурт тырше дас адями интыын. Ужтэк кылемъёс, трос нылпиен мумы-бубыос, сюдӥсь-вордӥсьтэк кылемъёс, бугырес интыосысь пегӟемъёс - кин но уг вуы котькуд нуналэ но часэ. Администрацилэн вань-а луонлыкез куронъёсты быдэсъяны? Кенеше люкаськемъёс огкылысь шуизы: ӧвӧл. Интыысь аскивалтон кылдытэмын вылласянь. Россилэн Конституциез солы бадӟымесь правоос сётӥз. Удмуртилэн законъёсыз та правоосты талало. Районлэн уставез соосты уката пичиятэ. Озьы администрацилэн нокыӵе кужымез уг кыльы ни. Югдур сыӵе Удмуртиын но, Россиын но. Кин ке ас_/ьме кунэз пушласянь юри куашкатыны выре кадь. Кин ачиз бадӟымесь шуг-секытъёс кылдытӥз промышленностьын но, гурт удысын но, улон-вылонэз радъянын но. Соосты вормон понна администрацилэн ӧвӧл асваньбурез (собственностез) но, коньдонэз но, кужымез но. Со ӧз пӧрмы зэмос аскивалтонлы. Администрация луиз ӝожтӥськонъёсты но куронъёсты люкась но районлэн администрацияз келясь ёз. Нош кылдо гурезь быдӟа ужпумъёс. Югдурез тупатон но аскивалтонэз юнматон вылысь, Кун Кенеш кичӧлтӥз Завьяловоын кенешон радъяны. Александр Волковлэн докладысьтыз дэмланъёсты умоен лыдъяса вераськизы Валентина Пушкарева (Сарапул ёросысь Шевырьялово администрация), Анатолий Суханов (Вотка ёросысь Н. Волково), Татьяна Пастухова (Вавож ёросысь Брызгалово) но мукетъёсыз. Огъя малпан таӵе: кутоно выль законъёс, соос мед юнматозы гурт администрациослэсь статуссэс но быдэсъяно ужъёссэс, юнматоно соослэсь асваньбур но коньдон ласянь инъетсэс, республикалэн бюджетаз коньдон висъяны чаклано администрациосын ужасьёсты дышетонэ. Одно кылдытыны кулэ гурт администрациослэсь общественной амалэн ужась кенешсэс. Каракулино районысь администрацилэн йырыз Леонид Кондаков чурыт но шонер пусйиз: гуртэз ӧм ке азинтэ, со быроз. Александр Волков вераз: озьы медаз луы шуыса, республика Президентлы Владимир Путинлы мед юрттоз адямиос понна ужась но соос азьын кыл кутӥсь власть кылдытыны. С. Шибоков. Кый ядэн ческыт умъёс Мултан (Пакистан) городысь муспотон Шахзади Зарки ляб лулсӧро адямиос пӧлы уг пыры. Малы ке шуоно, чебер егит нылаш ядо кыйёсын ужа. Калык азьын кык кыйлэсь йырзэ ымаз понэ но кема ымпушказ возе. Куд-ог дыръя куртчыло нылэз, кулон ядзэс лэзьяло. Но Зарки понна со кышкыт ӧвӧл. � Мон чик но уг курдаськы, � шуэ нылаш. � Мынам сӥльвиры кужмо ядъёсты уг куты. Куртчылэмзы бере умойгес умме усисько, быдэс уйме туж юн кӧлӥсько. Театр котырын "Миллиарды Боянта" пьесазэ Бернард Шоу гожтӥз 93 аресаз мыныку. Та ласянь Шоу Гиннесслэн рекордъя книгаяз возиське азьпалан. Дуннеын ваньмызлэсь трос пьеса гожтӥз испан драматург Лопе де Вега. Кык сюрс пала. Веднамен (сьӧд кужымен) лыдъяло "Макбет" пьесаез. Кытын гинэ сое уг пукто, одно ик умойтэм учыръёс луо. 1942-тӥ арын Лондонын, спектакль мыныку, ньыль мурт кулӥз. Кӧня ке улыса, ассэ ачиз быдтӥз пьесалэн суредасез. Дуннеысь ваньмызлэсь кузь пьеса гожтӥз Англиысь Джон Андрен Маргарита Дарсиен ӵош, нимаське "Безостановочное Конноямс-шоу". Спектакль, пичи висъёс ялылыса, 26,5 час мынэ. Аръёс уг ӝожомыто Арлыдъем воргоронлы атай луон понна нокыӵе но могӟет ӧвӧл. Нош нылкышноос, 50 арес бере нылпи ваисьёс, чиньы вылын лыдъямон. Америкаысь учёнойёслэн гожъямзыя, воргоронъёс быгато атай луыны быдэс улонзы ӵоже. Иранысь Ассадали Заиди Черкхестани 106 аресысен атай луиз. Льӧль бамо пиналыз вордскиз 3 кг но 51 см. Таиз � Заидилэн ньылетӥ 40 аресъем кышноез вал. Черкхестанилэн эшезлы Бакша Али Мабзилы 140 арес вал (!), куке 30 аресъем кышноез солы пи вордӥз. 1972-тӥ арын берпуметӥ нылпиез вордскиз. Со аре ик бадӟымез пиез 87 арессэ пусйиз. Кемаласьгес ик ӧвӧл, Таньзаниын улӥз Самсон Шакорагоро, вордскемын кылем даурлэн кутсконаз � 1809-тӥ атын. Кема аръёс ӵоже шудо улӥз нырысетӥ кышноеныз. Кузпалыз улонысь кошкем бере, кӧня ке улыса, нош ик кышнояськиз. 126-тӥ аресаз мынэ вал ини. Выль семьяын вордскизы на куинь мусо нылпиос, соос пӧлысь покчиез югыт дуннеез адӟиз 1945-тӥ арын. Чикагоын туж тодмо выжыен лыдъяськиз 105 аресъем Джозеф Бен Абрахим. 1964-тӥ арын кышнояськиз дас кыкетӥзэ. Огъя кышноосыз солы 65 пинал ваизы. Нырысетӥ пиез пичиезлэсь 50 арлы бадӟымгес вал. Дасяз Светлана Яковлева. Басьтэмын "Незримая сила" газетысь. Выль куректон Август толэзь асьмелэн историямы тужгес но кӧшкемытэз луыса пыроз, дыр. Асьтэос тодады вае ай: 1991-тӥ ар - путч, 1998-тӥ ар - доллар тэтчон (экономической кризис шуон). Таиз ар тужгес но кӧшкемыт адӟонъёс ваиз: Москваысь Пушкин площадь ултӥ потон-ветлонэз пуштытон, Баренцево зарезьын ву ултӥ ветлӥсь "Курск" атом лодка выён, "Останкино" телебашняын тылпу потон. Тросэз тае герӟало кузь (високосной) арен, кудӥз - инмарлэн йыркуреныз, мукетыз - странамылэн лябӟеменыз, ньылетӥез - Америкалэн зӥбеменыз. Кин тодэ ини, малы асьмелы август сомында курадӟон вае. Тани нош ик выль куректон сярысь ивор вуиз. 27-тӥ августэ Воткинск водохранилищеын адямиез ворттылытон катер борды секыт груз нуллӥсь баржа мырӟиськем. Шутэтскисьёс Пермьысь Набережные Челны городэ мыно вылэм. 16 мурт сӧсырмыса больницае шедемын. Нош куатез быриз. Та учырез сэрттыны-пертчыны выриз Пермь область. Угось соослэн, пе, кужымзы тырмыт. Музон юрттэт ӧз куре. Марина Костылева. Кырмиськы, Иван! Туж ӟеч тодмо кемалась: Сюмси ёрос ноку уг шумпотты удалтэм ю-нянен. Туэ но юри чаклалэ ай нуналлы быдэ тодмо луись лыдпусъёсты: та палась музъем ужасьёс гектарысьтыз 7,5 центнер гинэ ю тысь люканы быгато, со вакытэ ик алнашъёс � 19 центнер. Кыӵе мугъёсын сэрен сокем курадӟоно луо сюмсиос? Ма люкетэ азьмынӥсь луыны: ялан зорись куазь, начар му яке � мукетыз?.. Ёрос кивалтэтысь гурт улон-вылонъя ёзлэн тӧроез Юрий Соковиков но татысь валтӥсь агроном Галина Пантюхина ивортэмъя, Сюмси вылъёсын кузёяське луо. Вылаз ик, туэ ӧз киськалэ удалтытӥсь сылалъёс но (гектараз 60 килограмм поттазы ик азьвыл). Ёросысь весь вань гыроно-кизёно муослэн быдӟалазы 26 сюрс гектар ке, уже кутӥське со пӧлысь 20 сюрсэз гинэ на. Отӥыз аналтэмын. Со сяна, выль автомашинаос, тракторъёс, комбайнъёс татчы кемалась уг вуо ни. Вужъёссэ тупатъяны-выльдыны воштос ёзъёс ӧвӧл. Шуге-леке вуттӥз туэ пӧсь куазь но: юос ӵапак кисьмаку, туж кӧс улӥз. Озьы ке но, сюлэмы ӧз оскы: ма, чик ӧвӧл ни шат та палан музъем ужлы вань лулзэс- сюлэмзэс сётӥсь адямиос?.. Одӥг ӝыт юри потай бусые. "Лактан" эштослэн ӟегез быдэсак утялтэмын ӧй вал на. Юэз октӥсьёслы-калтӥсьёслы люкетэ ялан усись зор. Озьы ке но, сюлмо адямиос таӵе макеосты кылэм-адӟем уг каро: кот, саптаськись куазь шоры учкытэк, бусые пото. Ӵапак сыӵеесь луо комбайнеръёс � агаен вын Василий но Юрий Пенегинъёс. Котьма ке но, чик ӧвӧл ни шат та палан азьмынӥсь эштосъёс, кузёос? � Вуылэ ай Акил гуртэ, � огез но мыдыз дэмлазы ик. � "Уж" ("Труд") эштослэн тӧроезлы Иван Владимировлы синмаськем вылысь синмаськоды. Сюрес урдсысь гырем му. Кытын ке кыдёкын гуретэ трактор. � Тани вуоз ӝоген, � утчано адямие сярысь кылэмез бере, инвис пала учкылыса шуиз эшъёссэ возьмаса пукись Владимир Силкин. Кужмо трактор утыр ана пуме вуиз. � Тӥ Иван, дыр? � вазиськи трактористлы. � Ӧвӧл, тӥни соиз, � йырыныз шонтӥз воргорон сьӧрпалаз сылӥсь юлтошез пала. Музъем вылэ тэтчиз сьӧдкысъем, шоро-куспо мугоро, ӵап кын корт куртчон арлыдаз вуэм пиосмурт. Тодматским. "Уж" ("Труд") эштослэн тӧроез Иван Владимиров вордӥськем но будэм Пичи Пурга ёросысь Карашур гуртын. Сюмси пала вуэм, Ижысь Гурт улон-вылонъя институтэз йылпумъяса. Бератаз татчы ик выжыяськем. Нокыӵе ужлэсь кышкасьтэм адями пыд йылаз йыг-йыг сылэ. Гуртысь ваньмыз сямен улӥсьёс тыршо та эштосын. Аслэсьтыз ужасьёссэ Иван Спиридонович ноку уг ӝожомытъя. Шоро-куспо уждун татын � 600-700 манет. Кулэяськисьёслы котьку дун курытэк висъя чечы, сӥль, турын, ю тысь. Тулыс бакчаосазы картошка но ачиз ик мерттэ. Зэм, соиз гинэ ӝож: "Уж" эштослэн бусыосыз туэ уг шумпотто: ӟег ӧз удалты, гектарысьтыз куинь центнер гинэ люкаськиз со, тросэтӥ ӝоказ, пурысьтаз. Таӵегес ик адӟонэз чидаз чабей но. Али сюлмасько ини вуоно ар сярысь � ӟег кизё. � Сюреслэн сопалаз эшшо ай кӧня ке гектар муосмы вань, � чуренак будӥсь кызьпуос пала учкалтӥз Иван Спиридонович. � Бускель эштос куашказ но, ми муоссэ ӧм аналтэ. Кемалась озьы: сюлмо адями тэк угулы. Иван Спиридоновичлэн чылкыт малпанъёсын пачылмем синъёсыз шоры пальпотыса учки но ас поннам сӥзи: � Ӝабрес кырмиськы, Иван, шудэд борды! Тынад бадӟым сюлэмыд но лэчыт визьмыд туж кулэ луозы ай ненег киосыз витись удмурт музъемлы! Е.РОМАШОВА. ? "Уж" эштослэн тӧроез Иван Владимиров. Тусбуйзэ пуктӥз Владимир Беломорских. Нянь секытэн сётске Музъем бордын ужась муртлэн сюлмыз интыяз ӧвӧл: шумпотымон удалтэм ю тысь, кытӥ но отӥ интыяз жильдӥськыса, вож-вож ӝужа ни. Секыт зоръёсты чидатэк, гектарен-гектарен му вылаз выдэмын, жаг турынэн суро погмаськемын. Кызьы уд чигиськы, собыдӟа ужам ужед суп-сап луыса кошке ке? Туала аръёсы нокин но нокинэ но уг пыжы ни кутсатэк, гырытэк-кизьытэк кельтэм ю бусы понна, кужмысь уг косо тысь вузаны, созэ яке тазэ культураез будэтыны. Но ваньмыз со шӧдӥське нянь вылын: асьме дорын арлы быдэ дуноя. Мугез валамон, дыр. Нянь пыжонэ мынӥсь ю тысез Удмуртия басьтэ палэнысь, шаерамы будэтэмез трослы ик уг тырмы. Уката но секыт вал та ласянь берло кык аръёссэ. Нош кыӵе югдур туэ? Вуэ-а ю-нянь республикалэн кеносъёсаз? Со сярысь вакчияк вераны курим "Удмуртпродконтракт" кун предприятилэсь валтӥсь кивалтӥсьсэ, Кун Кенешлэсь депутатсэ Вячеслав Николаевич Ануфриевез. - Вячеслав Николаевич, туннэ нуналлы кызьы мынэ ю тысь вузан? - Кылем аръёсын ӵошатоно ке, умойгес, шуыны луоз. Ваньмаз сямен хлебоприёмной предприятиосын ю-нянь тросгес люкаськемын ни, но черодъёс уг кылдо. Тодады вае ай 70-тӥ аръёсы, соку ведь элеваторе пырон понна водительёс часэн-часэн но сыло вал - сомында ю люкаськылӥз. Госзаказлэсь быдэсъяськемзэ партия юн эскерылӥз. Таиз ар гуртоос понна - огез ӟечез. Тысё культураос удалтэмын, миым арен ӵошатыса, гектарлы быдэ кык центнерлы ятыр лыктэ. Озьыен, нянь пыжыны мынӥсь ю но тросгес люкаськыны кулэ. Элеваторъёс уен-нуналэн ужало. - Районъёсъя учкыса, кинэ пусйысалды? - 24-тӥ августлы дасям сводкая ю тысь вузанъя нырысетӥ интыын мынэ Яр район. 1642 тонна ӟегзэс соос вуттӥзы ни шаермылэн кеносъёсаз. Яръёс уй палан ке но уло, аран-кутсан ужъёссэс мукетъёсызлы адӟем карымон радъяны быгатӥзы. Соос понна шумпотоно. Кыкетӥ интыын - Глазов район. Ёросысь хозяйствоос элеваторе 1269 тонна жильк-жильк ӟег вуттӥзы. Пусъеме потэ тани мае: котькудӥз эштос, колхоз тырше кӧс, чылкыт тысь элеваторе вуттыны. Элеваторе нуэмлэсь азьло сое куасьто, шерато. Соин ик машинаосты берлань берыктон учыръёс уг пумиськыло. - Озьыен, ӟег пызьлэн ӟечлыкез вылӥын луэ? - Та ласянь Удмуртия котьку но висъяськылӥз, пызьмес вожмаськыса басьтыны выро трос улосвылъёсы. Огез жаль, ӧжытгес будэтӥськом, удалтонлыкез но сокем ушъяськымон ӧвӧл. Ӟег вузанъя, вылӥ верам кык районэз сяна, пусйысал на Сарапул, Грахово, Завьялово, Юкаменск но куд-ог музон ёросъёсты. Отысь нуналлы быдэ сямен ӟег вуэ. Шугъяськыто воткаос, шарканъёс, Якшур-Бодья палась хозяйствоос. Соос 100 тонна но ӧз вузалэ на, Воткинск район - воксё 11 тонна. - Государстволы вузан ласянь сокем чурыт куронъёс пуктэмын ӧвӧл бере, котькудӥз кивалтӥсь сюлмаське, луоз, тросгес фураж кисьтыны. - Соиз но вань. Та вакытлы йыды но ӟег 311 тонна дасямын Алнаш районын, 232 - Можгаын, 208 - Граховоын. Кылемъёсаз - туж ӧжыт, яке кутскылэмын но ӧвӧл. Берлоосыз пӧлын - Воткинск, Завьялово, Киясово, Камбарка но куд-ог мукетъёсыз. Республикая оглом кеньырлы-пызьлы мынӥсь йыды вуэмын 740 тонна, ӟег - 10461. Кылем арынлэсь со шӧдскымон ятыр. - Вячеслав николаевич, кыӵегес югдур мукет интыосын? - "Продконтракт" кун предприятиос сярысь ке верано, нырысь ик мон пусйысал Краснодарез. Берло кык-куинь ар куспын ю-нянь будэтонэз 6 миллион тоннаозь вуттӥзы! Хозяйствоосы тырмыт вуэ эстӥськон, минерал сылалъёс, выльдӥське техника. Озьыгес ик шуыны луоз Оренбург сярысь. Областьлэн туала кивалтӥсьёсыз гурт удыслы бадӟым саклык висъяло, хозяйствоослы юрттон вылысь дунтэк висъямын 300 комбайн. Асьмемын ӵошатыса, музон сяменгес ужа Татарстан. Отын вань будэтэм ю-няньзы пыре кун планэ, пудо сюдыны кылдытӥське нимысьтыз резерв, районъёс, хозяйствоос ас тодэмзыя соин уг кивалто. - "Удмуртпродконтракт" кызьы юрттэ музъем ужасьёслы? - Правительство ласянь висъямын вал 50 миллион манет. Со ваньмыз сётэмын районъёслы, отысен люкылэмын хозяйствоослы. Та коньдон быдэсак сямен кошкиз техникалы эстӥськонлы но воштон ёзъёслы. Со сётэмын кредит чотын, ар бырытозь, банке берыктон вылысь. Кылем арын ми пыр гурт удысэ вуиз вал 8 миллион манет, со коньдонэз ми быдэсак берыктӥм, куд-ог районъёс пунэмен басьтэмзэс сётыны ӧз быгатэ ке но. Гуртоослэн азьвыл тыронъёссы 5 миллион манет люкаськемын ни. Тросэз хозяйствоос оско вал туэ урожайлы, сое вузаса, коньдон поттонлы. Тӥни малы котькудӥз кивалтӥсь чидатэк вите шулдыр, кӧс нуналъёсты. Валамон ук: макем ӝог ортчоз аран-кутсан вакыт, сокем трос ю-нянь люкаськоз, нош асьме дорын будэтэм ӟег республикамес сюдыны тырме. Вераськиз Людмила Медведева. Фото Архивысь документъёсъя Удмуртия ЪЪ дауре 1937-тӥ ар 14-тӥ мартэ Удмуртиысь советъёслэн ИИ съездзы Удмурт АССР-лэсь нырысетӥ Конституцизэ юнматэ. Таяз аре шаермы паськытаз. Удмуртия борды итэмын вал Вотка, Сарапул, Кияса, Каракулино ёросъёс. Республикаямы ужаса улӥсьёс 4 ар но 3 толэзь куспын йылпумъязы 2-тӥ пятилеткаез. Удмуртиысь промышленность, 1932-тӥ арен ӵошатыса, 2,3 пол уногес продукция сётӥз, производственной фондъёс 3 пол йылӥзы. Ужъёс умой мыно мотоцикл поттон удысын. Иж-7 но Иж-8 мотоосты эскеро уй пал Кавказ но луоё Каракум сюресъёс вылын. 1937-тӥ арын ортчем всесоюзной ӵошатсконъёсын Ижысь мотоциклъёслэн сӧриськытэк кема ворттылэмзы понна нырысетӥ приз сёто. Ижысь пыӵал поттӥсьёслэн но данзы ялан паськыта. Колхоз бусыосын та вакытэ 2,5 сюрс трактор но 700 пала комбайн ужа ни. Гуртысь специалистъёс пӧлын ӵемгес но ӵемгес адӟиськыны кутско ас палазы вордскем-будэм удмуртъёс, пумиськыло нылкышноос но. Балезино МТС-ын нылкышноослэсь 2 бригада кылдыто. Ӵошатсконын соос пӧлысь одӥгезлы МТС-лэсь киысь кие вошъяськись Горд Знамязэ сёто. Удмурт нылаш комсомолка А. Волкова смена ӵоже, нормая вить интые, 7 гектар гыре. Алнаш районысь "1 Май!" колхозын тыршисьёс 1937-тӥ арын котькуд гектарысь 20 центнер чабей но 27 це_ӟнтнер йыды кутсазы. Азинске дышетон удыс но. 4 институтын тодон-валан басьто 1500-лэсь уно студентъёс, 29 техникумын дышетско 7 сюрслэсь уно егитъёс. Азьлане бадӟым вамыш луиз Ижысь Пастухов ульчаын типографиез усьтон но. Нош 10 ар ӵоже лэсьтэм но 30 ар гинэ сылэм архитектурая памятникез, Ижысь Михайловской соборез, 1937-тӥ арын куашкато. Таиз ар историе пыре виро вакытэн. Удмуртиын гинэ 1937 адямиез, янгыше уськытыса, улон интыысьтыз улляло, соос пӧлысь 426 мурт ыбемын вал. Озьы кулак карыса, Бемыж ёросысь Тузьмо-Чабья гуртысь Василий Ионов но Илья Васильев, агай-вынъёс Иван но Николай Антоновъёс НКВД-лэн "тройка" шудонэныз ыбыны косэмын. Янгыше соосты уськытӥзы, калык пӧлын мылкыдэз сӧрись валэктон уж нуэмзы понна. Чик дышетскымтэ адямиослы "агитатор" ним лякизы. Горький областьысь вуэм Алексей Алюков вакчи дыр куспын бере кылись Можга МТС- эз азьмынӥсе поттэ. Таӵе адямиез, колхозъёслы пумит уж нуэ шуыса, УАССР-ысь Вылӥ суд 25 арлы пытсэт улэ келя. Удмурт калыклы бадӟым шуккет луиз Дмитрий Корепановез (Кедра Митрей писателез), Кузьма Чайниковез (Кузӟебай Гердэз) быдтэмзы. Кӧня ке удалтӥз Акулина Векшиналы (Ашальчи Окилы). Кык пол сое пытсаллязы, но кык полаз ик кӧня ке улыса лэзьылӥзы. Таиз ар йылпумъяськиз, шуыны луоз, СССР-ысь Вылӥ Советэ быръёнъёсын. Со вал 12-тӥ декабре. Кызьы верамын, Удмуртиын 99 процентэз адямиос бъёнъёсы пыриськизы. Нош калыклэн тушмонъёсыз пӧлы пыртэмъёслэн лыдзы сярысь шара ӧз поттылэ. М. Сабурова, Удмурт Республикаысь Кун архивысь валтӥсь специалист. Ижысь Михайловской собор. Нунал ортчоз - кино утоз Алигес асьмеос пусйим Россиысь кинолэсь нуналзэ. Та материал соин валче дасямын вал. Нош мӧзмытгес мылкыдын тырмем гожъямез праздник нуналэ сётыны ӟеч ӧй вал кадь. Соин ик печатласьком ни туннэ. Тодэлэ: 1935-тӥ 11-тӥ феврале Горькийысь кинотрестлэн ёзаз кылдытэмын вал Удмуртиын Кино возьматон управление. Соку ик вордскиллям ёросъёсын но каръёсын киносетьёс. Алнашын 1936-тӥ арын кино возьматъяны кутскиллям. Тазьы верамын архивын утиськись бумага вылын. Та удыс сьӧд но тӧдьы нуналъёсыз адӟылэмын. Тужгес но шуг вал билет шедьтыны тямыстонэтӥ аръёсы. Соку адямиослэсь сюлэмъёссэс Индиысь киноос чепыллязы. Алнашын фильм возьматъязы нуналаз кык пол. Билетлэн дуныз 20 копейка. Касса дорын кузесь черодъёс кылдылӥзы. Соосты ӵошатыны луоз "кӧс закон" дыръя ӟенелик понна сылӥсь уллёосын гинэ. Адямиос, чебергес дӥсяськыса, картина учкыны быдэс семьяенызы ветлӥзы. Кино учкон огъя культуралэн бадӟым люкетэз вал. Берлогес, укмыстонэтӥ аръёслэн кутсконазы, улонамы вуиз выль кыл - рынок. Соин валче воштӥськиз югдур. Палас, диван, телевизор басьтон понна черодэ гожъяськон дыръёс быризы. Табере ваньмыз вань. Кисыяд гинэ мед жильыртоз. Отчы ик, рыноке, вуиз пӧртэм видеоаппартура. Выль улон сьӧры кыстӥськыса, киносеть но видеофильмъёс возьматъяны ӧдъяз. Куинё ар ӵоже адямиос отчы шумпотыса ветлӥзы. Берло марзэ-созэ валазы но вуёмизы. Туэ котькуд витетӥ семьяын видик вань: телевизор пыр но котькыӵезэ фильмъёс возьматъяло. Пульт вылэ зӥбылыны гинэ ву. Соин ик киносетьёс куашкамын. Алнаш ёросын но нимаз киносеть быдтэмын. Солэн кылем ваньбурез клубъёслы сётэмын. Районын вань на куинь киноустановка. Шудо интыос - Асан совхоз- техникум, Выль Утчан но Сям-Какси. Зэм, гужем уг возьматъяло. Пӧсь вакытэ калыклэн клубе потаны дырыз ӧвӧл. Туэ гужем техникумын пиналъёслы чаклам лагерь ужаз. Культура удысын ужасьёс отчы темаосъя картинаос нуллӥзы. Учкисез ӧй вал. Толалтэ толэзьлы быдэ дас куинь-дас вить фильм бергатӥське. Туэ Удмурт кинофонд 16 фильм дэмла. Витез нылпиослы чакламын: "Китайский сервиз", "Кадриль", "Русская певица", "Сказка о царе Салтане", "Золотой ключик"... Кино рынокын одӥг картиналэн дуныз 25 сюрс манет, егитъёслы чакламезлэн - 20 сюрс манет. Соин ик троссэ басьяны уг луы. - Кинофондлэн Можга люкетаз ветлыса, огдырлы гинэ бергатыны вылысь октӥськом, - шуэ Алнаш администрациысь культура отделлэн кивалтӥсез Николай Леонидович Софронов. Куд-ог лыдпусъёс таӵеесь. Районысь куинь киноустановка бордын - ог 900 пукон. Миым 1970 адями кино учкыны ветлэм. Билетлэн дуныз одӥг манет гинэ ке но. Николай Леонидович ватытэк вера: кино возьматон пайда уг вайы. Шаерамы ваньмаз сямен ёросъёсын таӵе югдур кылдэмын. Клубъёсын кино возьматъямъёс тросэзлы кулэ ӧвӧл кадь ке но, улон возьматэ: та удысэз быдтыны уг яра. Гуртъёс сярысь вератэк ни, Алнашаз но кино возьматъяны уг луы. Клуб вуж, вӧлдэт куашкан калэ вуэмын. Соин зал пытсамын. - Николай Леонидович, черкогуртын кино бергатъян луонлык шедьысал ке, картина возьматъясалды-а? Кыӵе дунъёс луысалзы? - Одно ик возьматъясалмы. Нош дунъёс Коньдон ужпумъёсъя министерствоен пуктылэмын. Мӧйыослы - кык манет, пичиослы - одӥг. Озьыен, дунъёс уг куртчылӥсько. Котькуд ӝытэ дорын пукем уг пот. Городъёсын тани кинотеатре ветлӥсьёслэн лыдзы пумен будэ ни. Соин оскон кылдэ: вань "видикъёслы" пумит кариськыса, кино возьматон удыс уз быры. Калыклы, чагыр экран шоры жальмам сяна, ог-огенызы бӧтьыртон но кулэ на. Кинотеатръёс но клубъёс таӵе луонлык кылдыто. Ольга Кожанова. Луло ӧвӧл ни Москва улосысь Лунево посёлоке интыяськем воинской частьысь пегӟизы Россиысь МВД-лэн югдурез утёнъя войскоосысьтызы солдатъёс Александр Святкин но Максим Уженцев. Соослэн ыбиськыса сӧсырмем мугоръёссы шедьтэмын Иваново город вӧзысь кооперативын. Йыруж ортчем интые соку ик вуылӥзы МВД-ысь адямиос. Соослэн малпамзыя, солдатъёс асьсэды асьсэос быдтӥзы. Та учырез эшшо эскероз на Россиысь военной прокуратура. Александр Святкин но Максим Уженцев частьысьтызы пегӟизы вал арня нуналэ ӵукна вить часын. Сьӧразы басьтӥзы вал 2 автомат но со вӧзы 300 патрон. Нылпиос шуо: тау! Иж вӧзысь "Лесная страна" лагерьын кык арня ӵоже шутэтскиз начар гурт семьяосысь 240 нылпи. Та ужрад ортчытэмын Кун Думаысь депутатлэн Светлана Смирновалэн кичӧлтэмезъя. Со вазиськиз кивалтӥсьёслы, ужбергатӥсьёслы. Озьы люкаськиз пиналъёслы ялкарыны тырмымон коньдон. Дунтэк шутэтскон сменаез радъянэ мыло-кыдо пыриськизы "Купол" электромеханической завод, "Удмуртторф" предприятие, "Ижмаш", "Сактон" но "Зангари" огазеяськонъёс. Коньдон висъязы Москваысь куд-ог фирмаос но. Лагерез ворсан нуналэ нылпиос возьматӥзы эктыны-кырӟаны быгатэмзэс. Шуныт кылъёс веразы куноос - спонсоръёс. Светлана Смирнова оскытӥз, таӵе шутэтсконэз радъян Удмуртиын сямлы пӧрмоз шуыса. Нылпиос депутатлы тау каро. И. Кричев. Сменаез пытсанлы сӥзем праздник дыръя. Кивалтӥсьёс калык пӧлын Утялтымтэ ю-нянез нянь уг шуо на - Мар ке но люкетӥсез ялан сюре та ужась калыклы: гырид-кизид - шумпотыса утялты вал будэтэм ю-няньдэ, кытын со? Я бусы шорын ик комбайн шальтыра, я солярка быре. Туэ бен та ласянь йӧнгес - Правительство син азяз возьыны тырше гурт удысэз. Но муг сюре. Кылем арня пумын Николай Ганза Якшур-Бодья ёросын куать ёрос администрациослэн Тӧроосынызы но колхоз кивалтӥсьёсын кенеш ортчытыкуз, ваньмыз ӝожтӥськизы: куазь люкетэ. Соиз валамон, Бодьялан, Шарканын, Игралан, Сюмсиын, Селталан но Уваын куазь, зэмзэ но пӧртэм ӧвӧл. Соин ик шорлыдын 40 процентэз ю-нянь утялтэмын, йӧнгес югдур Шарканын но Игралан - ӝыныез ю-тысьсы итымъёсын ни. Но со Правительстволэн Тӧроезлэсь воштӥсьсэ Михаил Назаровез уг шумпотты. Паймымон кадь: малы? - Колхозъёс "Удмуртпродконтрактэн" огкыл кутӥзы: вуоно ю тысь чотын хозяйствоослы висъямын вал гырон-кизён но аран вакытлы эстӥськон, соин ик кивалтӥсьёс пунэмзэс берыктыны кулэ. Сётэм кылзэс ӧз ке быдэстэ, кайта юрттӥсь уз луы. Соин ик асьсэ итыме сяна ю тысез келяно соослэназ но. Та ёросъёстӥ азьветлӥсьёслэн радысьтызы адӟыны уггес кылдылы. Тужгес начар югдур Сюмсиын но Сетлалан. Туэ Правительство кык миллион манет висъяз куашкам колхозъёст_Ны ӝутонэ. Кивалтӥсьёс оско, пайдаез луыны кулэ шуыса. Тани Селта администрацилэн Тӧроезлэн верамезъя, соос та программая быгатӥзы егит специалистъёсты уже кыскыны. Но Уваын специалистъёслы гинэ ӧвӧл, мезханизатонъёслы ёрмо. Вот гурт улон, шу. Азьвыл дас аресъем эте атаез сьӧры лумбыт тракторын ветлэ, нош школазэ быдтыса ачиз музъем уж борды ӝабырске ке вал, али трактор руль сьӧрысь песятайёсты гинэ адӟыны луэ на. Туала егитъёсты Алёша Курбатовен (Г. Красильниковлэн "Тонэн кылисько" повестьысьтыз - З.Р.) матын но уд ӵошаты ни. Кызьы бен соосты будэтоно? Тупатоно гуртысь огъя югдурез, ПТУ-осын дышетонэз, пичиен ке но выльдоно. МТС-ёсты: егитъёс кӧшкемало куашкам техникалэсь, шуизы хозяйствоослэн кивалтӥсьёссы. Та ласянь кенешысен ик уж сётыку, арня-кык улыса кылдэс юало, шуиз. Аслаз верамезъя, со берло дыре ачиз но тросгес саклык висъяны кутскиз гурт удыслы, кызьы шуиз, му вӧй (нефь) - со куке но быре, нош сием ялан потэ. Асьмелэн партия кивалтон дырысен дышемын бадӟым кивалтӥсьёсты усто хозяйствоостӥ нуллыны, ушъяськыны. Николай Алексеевич быръе лябъёссэгес, тунсыкъяське шугъяськонъёсынызы, но кӧё-вӧё улон нокинлы уг сӥзьы, тазьы карыса утчалом, ӵош ужаса эскером, шуэ. Якшурысь пӧйшур вордон фермае, Порва гуртэ вуылыкуз со калыкен ужан интыязы вераськиз. Вот Вуж Ӟатча сьӧрысь Выселькиысь скал кыскисьёс доры нокызьы но ӧз вуы. Кузь сюслэсь ӧз кышка. Ӟатча сьӧрысь вырйылэ дэриен куазен тубыны нокызьы ӧз луы. Часлэсь кема нӧдысь машинаяз донганы выризы пиосмуртъёс - пайдатэм. Трактор вуыса гинэ сюресмес азьланьтӥм ми но. Огласянь усто пӧрмиз, озьы-а? Бадӟым кивалтӥсьлы сюресъёс вылэ ӝожтӥськыса курадӟонэз уз луы - ачиз шӧдӥз-валаз. Итымъёсын ӵош ӧсъёссэс усьто школаос но. 1-тӥ сентябрёзь кылиз на кӧня ке нунал. Бодья ёросысь дышетӥсьёс дась пиналъёсты пумитаны. Николай Ганза ӟечкылаз соосты выль дышетскон арен. З. Рябинина. Жильк-жильк Вавож ёросысь Мичурин нимо эштосысь музъем ужасьёс 80 процент пала ю бусыоссэс утялтӥзы ни. Гектарысьтыз соос 25 центнерлэсь уно ю тысь люкало. Та нуналъёсы механизаторъёс сезьы но йыды бусыосын тыршо. Та валэс культураос эшшо но ӟечгес удалтэмын, сезьы гектарлы быдэ 32 центнер люкаське, йыды � 29. Хозяйствоын аран-кутсан ужъёс ӟеч радъямын-малпамын. Сӧриськем агрегатэз бусыын ик ӝогак "эмъяло", пыд вылаз султыто. Татчы ик механизаторъёслы нуналаз кык пол сиён ваё. А.РОДНИКОВ. Дася, нылы, песьтэрдэ Матэктэ дышетскон ар. Озьыен, егит анай-атайёслэн нош ик йырзы висе ни, кызьы нылпиез дӥсяно, кыӵе книгаос басьтоно. Берпуметӥез пумысен сюлмаськонъёс кӧня ке кулэсмозы, Ижысь "Металлург" культура двореце ветлыса. Отын усьтӥськиз нырысетӥ сентябрьлы сӥзем ярмарка-выставка. Адӟытонэ пырисько пӧртэм издательствоос но дышетскон арбериосын вузкарись ёзъёс. Ма кулэ пиналлы школае мыныкуз � тетрадь, ручка, пӧртэм словарьёс, пособиос � ваньмыз со татын вань. М.КУЗЬМИН. Книга � узырлык Калыкез дышетонъя министерстволэн кичӧлтэмезъя, школаысь библиотекаослы книгаос люканъя акция кутскиз. Та ужрадэз сӥё-дано усьтӥзы Ижысь "Металлург" культура дворецын. Библиотекаосты кӧня ке коть выльдыны министерство 20 сюрс манет висъяз, нош ачиз министр Любовь Захарова уждунысьтыз 500 манетсэ Ярысь ронолы сётӥз. Кун Кенешлэн тӧроезлэн воштӥсез Наталья Харина, Правительстволэн Тӧроезлэн воштӥсез Виктор Шудегов, общественной организацосын кивалтӥсьёс � ваньзы луэмезъя кузьым ӵектӥзы. Юрттыны мылкыд кариз нылпиослы книга поттонъя Москваысь "Дрофа" издательство но � 50 сюрс манетлы дышетскон книгаос кузьмаз. Акция ар ӵоже кыстӥськоз. Озьыен, юрттыны мылкыд карисьёс сюрозы на. С.ВАНЯГИН. Митрофан МОСОВ Ӝыны арлы кузпал Верос Ортчем аръёссэ тодаз вайыса, паисадник вӧзысь скамья вылын пуке Иван Берестов. Тӧл каллен пельтэмъя, пыд азяз усьыло ӵужектэм куаръёс. Дырын-дырын учкылэ часэз шоры: ӝоген, витьтон минут орчыса, электричка вуоз... Инмар солы таза мугор сётэм. Пельпумъёсыз паськытэсь, юн сӥльвиро. Арлыдыз но бадӟым ӧвӧл ай: инвожо толэзе куамын арессэ пусйиз. ...Ванялы куинь арес дыръ, атаез секыт висьыса кулӥз. Пизэ калык радэ поттон понна, анаез номырзэ ӧз жаля: чебер дӥськут но пыдкутчан басьяз. Школаын урод ӧз дышетскы, пӧртэм кружокъёсы пыриськылӥз. Армие кошкемезлэсь азьло шофёре дышетскиз. Службазэ ортчытӥз Байкал ты палан. Эшъёсызлэн лӧпкытэмзыя, отчы ик ужаны но кылиз. � Эх, малы меда та югыт дунне вылэ шудтэм вордскиськем? Мукетъёслы сямен, кузпалэн улон мыным уг удалты. Кыдёкын шофёрын ужакум, ӵем гинэ потано луылӥз кузь сюрес вылэ � арняосын дорам ӧй вуылы. Тӥни сое шӧдыса, Валя кузпалы эшъяськиз курытсэ яратӥсь нылкышноосын. Небыт вазьылэме но, чурыт кылъёсы но ӧз юрттэ ни чылкыт сюрес вылэ султыны. Толалтэ, капка доры вуытэк, кынмыса, югыт дуннеен люкиськиз. Кыкетӥез � культура юртын ужаз. Концертъёсын ӵем потаз районлэсь палэнэ но. Соку, аслыз дусым шедьтыса, дорысьтым кошкиз. Ваньмыз шоры киыным шонтӥ но вордскем палъёсам берытски, � ялан куректэ Берестов. Озьы малпаськыса пукон сяменыз, дораз олокытысь вуизы кык нылкышноос. Вылазы но, пыдазы но � сӥзьыллы тупасьтэм дӥсь. � Учкисько ке, куректӥськод кадь? � вазиз чагыр синмоез. � Кыӵе коштан со � бордаз пуксьыны но уг ӵекты, � ватсаз мукетыз. � Оло, таид бак ай? Ойдо тодматском: монэ Маргарита шуо. Нош Лиза эше Рита гинэ каре. Вакчи но, чебер но, пе, кылӥське. Озьы-а? Рита шуоноез кыллы кисыяз уз пыры. Олома сярысь но бӧтьыртэ. Палэнысен кылзӥд ке, малпалод: оло кузпалыз, оло матысь эшез? Йыраз ма лыктэ � ваньзэ кисьтэ: оскытэк но оскод, ява. Берестов вӧзы пуксьыса, вакчияк юаз: � Кытчы-о, егит кавалер, потӥды? � Тӥни отын, кыдёкысь нюлэс сьӧрын, вань Башмаково нимо бадӟым посёлок � отын улӥсько но ужасько, � шуиз Ваня. Шӧдӥське: Лиза трос вераськыны уг яраты. Эшез доры матэ кариськыса, солэн пеляз каллен гинэ маке шыпыртӥз. Соку Рита Берестов азе султӥз но керпотытэк вазиз: � Тодӥськод-а, Ваня, ми ӵукна тырысь сиськымтэ, оло, рюкзакад милемлы кельшымонэз но вань? Кӧтмы сюрлы борды лякиськиз ни. Берестов трос ӧз малпаськы. Рюкзаксэ пыд азяз пуктӥз но, сое пертчылыса, скамья вылэ тыриз кияр, колбаса, нянь шормаз. Чебер апайёс косэмез возьмаса ӧз улэ: кык- куинь минут куспын ваньзэ маялтӥзы. � Нош асьтэос кытысь но кытчы мынӥськоды? � юатэк ӧз чида ни Берестов но. � Та палась калыкез тодӥсько кадь � тӥледды адӟылэме ӧвӧл. Нылъёс ӧжытак палэнэ кариськизы, Ванялэн юанэзлы ӧз вазьылэ. Со куспын вуиз электричка но. Берестов, рюкзаксэ капчияк ӝутыса, вагонэ пыриз. Нош чебер дыдыоссэ син азьысьтыз чиптэм-чаптэм ыштӥз. "Мар-о мон соос сярысь сюлмаськисько � матысь тодмоосы ӧвӧл ук?" � малпаз ас понназ. Вагонысь потыса, огинтыяз кӧня ке сылӥз но, посёлок пала вамышъякуз, пель сьӧраз кылӥськиз тодмо куара. Берытскыса мышсэ учкиз. � Ми тонэ ыштӥм ни вал, � Берестов вӧзы султыса вазиськиз Рита. � Ум тодӥське кытчы кариськыны. Шунды но тани пуксиз ни, огмылэн но тодмоосмы ӧвӧл. Нош кӧлон инты уд шедьты-а милем? Вераськонзы кӧнялы ке чалмиз. Берестов ма карыны абдраз. "Малы меда эшласьконо вал та сюресчиосын?" � куректэ ни табере ачиз ик. Кизэ Риталэн пельпум вылаз поныса, Лиза Ваня шоры учкыса юаз: � Вань-а татын бадӟым асфальтэн шобыртэм сюрес? � Татысен ӝыны иськеметӥ ортче со. Кытчы мынэмед потӥз � отчы ик вуттоз, � капчияк шокчиз Берестов. � Кулэ ке, ачим ик келяло но. � Мон али ик кытчы ке ширтысал но, эшеным люкиськеме уг поты, � синзэ ӵушылыса вераз Лиза. � Нош мон Ванялэсь уг люкиськы ни, � меӵкытӥз Рита. � Нырысь пумиськыса ик кельшиз со. Таӵе воргоронъёсты сизьым пуныен но утчаса уд шедьты. Берестов ужа лэсьтӥськонъя бадӟым предприятиын. Посёлокын солэн бригадаез гинэ трос улон юртъёс ӝутӥз ни. Эшъёсыныз ӵош улэ кык эатжъем общежитиын. Али комнатаос бушесь луозы. Тросэз сю иськеме быдэс арнялы нюлэс дасяны кошкемын. Малпаськиз, малпаськиз но дыдыослы шуиз: � Ойдолэ соку сьӧрам � одӥг уйлы интыяло. Общежитие доры вуыса, кӧня ке чалмыт сылӥзы. Коридоре пырыса, Берестов Марья апайлы валэктӥз: � Таосты кӧлыны интыяно вал. Тодмооссы ӧвӧл � пумит уд луы, дыр? Марья кенак я Берестов, я чебер дыдыос шоры учкылыса, ӝӧк сьӧраз пуксиз но вакчияк юаз: � Тон доры-а, мар-а соос? Соку тазьы: мон номыре ӧй адӟылы, тонэн ӧй вераськы. Валад-а, Ваня?! Нылъёс артысь комнатае интыяськизы. Койкаос вылысь простыньёсты но шобретъёсты курткизы, огпалзэ берыктыса валиськизы. Со куспын Ваня чай пуктӥз. Ӝӧк сьӧры пуксьыса, ӝытсэ сиськизы. Берестовлэн сюлмаськемез понна тау карыса, ас комнатаязы вамыштӥзы. Рита кема ик ӧз ӝегасткы � берытскиз но ваннае пыласькыны пыриз. Ӧссэ юри кикур пасьта пытсатэк кельтӥз. "Воргорон солэн быгылес мугорыз шоры синмаськыса мед учкоз", � малпаз ас понназ. Отысь потыса, номыр куаретытэк, ас интыяз берытскиз. Нап чай юэмез бере, Ванялэн кӧлэм потонэз ик кытчы ке тӧлӟиз. Нош йыраз пӧртэм малпанъёс бергало. "Оло, Ритаен кузпалъяськон сярысь кылпум поттылоно? Ӵуказе кошкизы ке, со пумысен вераськыны бер луоз. Кышномурт учкымон кадь", � сюлэмзэ пычей сямен портэ одӥг сюлмаськон. Весь огнад уд улы ук. Озьы малпаськыса кыллён сяменыз ӧз ик шӧдылы ӧс дорын Риталэсь сылэмзэ. � Уд-а кӧлӥськы на? � кык вамыш лэсьтыса юаз со. � Азьпал улонэ сярысь малпаськисько ай. � Аслам но синмы уг кыниськы, � шуиз, койка дуре пуксьыса. � Тыныд трос сюлмаськон ваим ни. Чылкыт сюлэмо воргорон тон � сыӵеослы улонын но секыт йӧтэ. Берестов пумит маке вераны ымзэ усьтыса но ӧз вутты � Рита ӝог гинэ вӧзаз шобрет улэ интыяськыны вуиз. Одӥг киыныз Ваняез ӟыгыртӥз, мукетыныз мугорзэ маялля. � Оло, дорад ӧй но лыктысал � Лиза эрик уг сёты: мын, пе, умой ӧвӧл озьы, � каллен гинэ пеляз сипыртӥз. � Ачим янгыш. Берестов пумитаз номыр ӧз вазьылы. Верамезлы но ӧз ик оскы кадь. Солэн Рита сярысь тросгес тодэмез потӥз. Шонерзэ вераса, Ваня азьло но нылкышноослэсь сямъёссэс ӟечгес тодон сярысь трос ӧз сюлмаськылы. Нош али нылкышнолэн бордаз зыраськись мугорызлэсь мӧзмон сое уката но золгес усыкмытӥз кадь. � Я, тырмоз ни мусояськыны, уйлэсь ортчемзэ ик валаны ӧйлась. Ӝоген куазь но ӟардоз, � мур шокчыса шуиз Ваня. � Тынад кыӵе малпанэд? � Уг тодӥськы � Лизаен вераськоно. Со � мынам сюрес возьматӥсе. � Туннэ нуналысен эштэ вунэты. Кытчы мылыз потэ, отчы ик мед ширтоз, � вакчияк но оскымон вераз Берестов. � Ма шуид? Шонер ке валай, Лизаен люкиськыны дэмласькод, � синвуаськыса шуиз Рита. � Нош монэ, оло, татын пытсаса возёд-а? � Эн куректы: асьмелы кузпалъяськыны кулэ � яратӥсько ук тонэ, � ӟыгыртыса чупаз сое Ваня. � Сётозы квартира, собере гожтӥськом. � Кузпалыд тодӥз ке, йырсиме кыскалоз, � шораз учкыса вазиз Рита. � Ӧвӧл ни соос. Огез кулӥз, мукетыз монэ куштыса кошкиз, � валэктӥз Ваня. � Тодэмед потэ ке, мон быземын ук, � палэнэ учкыса шуиз Рита. � Нылылы вить арес ни. Улэ со кузпалы бордын. Вӧсь каремезлы чидатэк, бордысьтыз кошконо луиз. Мон но адями ук: калык сямен улэме потэ. Люкиськеммы дырысен арлэсь ятыр ортчиз ни. � Соку тазьы вераськом, � валэктӥз Ваня. � Ветлом отчы, нылдэ басьтом но будэтом. � Номыр уз пӧрмы, � синвуаськыса шуиз Рита. � Сямзэ ке ӧй тодысал... Комнатаын чалмыт луиз. Ваня султӥз, дӥсяськиз но чай пуктӥз. Вылысьтыз шобретсэ палэнтыса, Рита вакчияк вераз: � Ма бен, мон тыныд кузпал луыны пумит ӧвӧл. Лиза но сюлэмме валалоз, дыр. Лиза мукет нуналаз ик шӧдӥз озьы луонэз. Мар карод: куинетӥез мултэс ук. Ӟеч улон сӥзьыса кошкиз. Берестов кузпалзэ ужаны интыяз столовое. Нуналъёс шӧдылытэк ортчизы. Тани канаваостӥ тулыс ву но жильыртыса бызе ни. Кема возьмаз таӵе дырез Рита. Нош улон солэн сюлэмызъя малы ке но ӧвӧл. Ваня огпол но чурыт кылын ӧз вазьылы. Ваньзэ чидаз. Риталэсь куд-ог "пӧртмаськемъёссэ" но. Берло дыре дораз ӵемгес бертылӥз аракы но тамак зынын. ...Тулыс. Писпуос вож куаръёсын шобырскизы. Льӧмпу юг-юг сяськаяз. Со нуналэ Берестов ужысь беромыса вуиз. Оло, сюлмыз шӧдыса, ӝӧк вылысь соку ик синйылтӥз кикур пасьта кагазэз. Отын вакчияк гожтэмын: "Ваня, мон кошкисько дорысьтыд. Тон умой адями. Эн утчаськы: пайдатэм луоз. Ӟеч лу! Рита". � Вот тыныд ӝыны арлы кузпал, � шара верамзэ шӧдытэк, йырзэ кык киосыныз кутыса, диван вылэ секыт мылкыдын пуксиз воргорон. Политика Арня ӵоже - дуннеын, странаын, шаерын Кылем арняе тодмо луиз: "Курск" атомной подлодкаысь экипаж быремын, 118 мурт понна Баренцево зарезь вынлыко шайвыллы пӧрмиз. Россилэсь Президентсэ Владимир Путинэз та секыт нуналъёсы уно курласьёс вал, странамылэн вылӥ кивалтӥсез ӧз быгаты, пе, вань шуг-секытэз ас вылаз басьтыны, кезьыт уй пал зарезьын морякъёс выё, нош со вакытэ ик верховной главнокомандующей Сьӧд зарезь дурын шутэтске. Бер ке но, Президент кужым шедьтӥз: "Курск" бырем бере дасэтӥ нуналаз Видяево посёлокын подводникъёслэн ӵыжы-выжыосынызы пумиськон ортчытӥз. Ӵапак отын верамын вал соослы коньдонэн юрттон сярысь. Нош кыӵе уксёен дунъялод меда адямилэсь улонзэ? Странаын ялэм траурен морякъёслэн ӵыжы-выжыоссы соглаш ӧз кариське, выем подводникъёсты музъем вылэ ӝутытозь, сьӧд кышетъёс ум керттэ, шуизы нылкышноос. "Курскен" луэм секыт югдурлэсь мугъёссэ эскере Правительствоен кылдытэм нимысьтыз комиссия. Но али ик ини вылӥ кивалтӥсьёс чӧлтӥсько коньдон тырмымтэ вылэ, соин ик, пе, дышетонъёс (учениос) ӧжыт луо, военнослужащийёслэн пыӵал тӥрлыкез но техникаез тодэм-валамзы лябесь. Нош зэмзэ-а югдур таӵе меда? Специалистъёслэн верамзя, СССР-лэн армияз 3,5 миллион мурт вал. Совето Союз дуннелэн пӧртэм сэрегъёсаз, пӧртэм кунъёсын аслэсьтыз данзэ но кулэяськонъёссэ_Е утьылӥз. Россилэн экономика ласянь кужымез ньыль пол лябгес. Озьы бере, совето вакытэн ӵошатыса, со быгатэ 0,8 миллион муртъем армия возьыны. Та вакытэ странамы кунгож сьӧрын ожмаськонъёсы чик уг пыриськылы, нокинлы но уг юртты. Со дыре ик 1,2 миллион муртъем армия возе. Нош экономикаез уд эрекча - Генштаблэн лыдъям- чотамезъя, висъяськись коньдон тырме 600 сюрс муртъем армиез умой-умой возьыны. Вераны кулэ, Советской армиысь генералъёс 10 процентэз Россилы шедизы. Соосты возьыны уно коньдон кошке. Ӵапак соос ик пумитъясько армиез кулэстонлы. Нош странамылэн азинскон сюрес вылаз пӧртэм вакытъёс вал ини. Тани граждан ож бере большевикъёс армиез кулэстӥзы 10 поллы - 5 миллионысен 500 сюрсозь. Соос умой- умой эскеризы, кыӵе армиез возьыны быгатозы. Нош тушмон ичи ӧй вал. Антанты огазеяськонэ пырись кунъёс егит Россия шоры лек учкылӥзы. Кыкетӥ мировой война азьын гинэ армия выльысь 5 миллионозь вуттэмын вал. Котьма ке но, армиез кулэстон - улонлэн куронэз. Генералъёслэн пумитъяськемзы гинэ та ужез ӝегатэ на. Вераны кулэ, куд-ог политикъёс "Курсклэсь" быремзэ асьсэ сямен дунъяны выризы. Кылсярысь, коммунистъёслэн азьветлӥсьсы Геннадий Зюганов морякъёслэсь быремзэс берло дыре нуэм либеральной политикаен герӟаз, ЛДПР-лэн кивалтӥсез Владимир Жириновский янгыше уськытӥз бур кужымъёсты. Августолэзь Россилы зэмзэ но арлы быдэ секыт адӟонъёс вае: я путч луэ, я манет дунтэма, я подводка вые. Нош валлян тылпу ӝутскиз "Останкино" телебашняын. Эриктэм оскыны кутскод, август толэзь шудтэм шуыса веранъёслы. Кылем арняе Удмурт Республикалы президент быръён кампаниын выль вакыт кутскиз, шуыны луоз. Кандидатъёс пӧлысь нырысетӥез - Павел Вершинин кинюртэмъёсын кагазъёссэ Быръёнъя комиссие сётӥз но регистрациез ортчиз. Ю. Александрова. Син но си Чик мылкыдтэк йыгаськиз мединституэ Александр Корепанов. � Мынам военной лётчик луэме потӥз. Тазалыкме но эскеризы со понна. Нош дас классэз йылпумъяме бере, анаен апаен монэ нодъяны ӧдъязы: кин, пе, со военной. Враче дышетскы ай. Александр вордскиз Ува ёросысь Поршур-Тукля гуртын. Дас арес дыръяз семьяеныз Якшур-Бодьяла выжиз. Анаез � агроном, атаез � инженер. Таня нылзэс но малпазы эмъясе дышетыны. Угось нылаш визьмо � химиез но биологиез ӟеч вала. Школаез зарни медален йылпумъяз. Пыриз мединститутэ. Со куинетӥ курсын дыръя Саша выныз школаез быдтӥз. Анаезлэсь но атаезлэсь дэмламзэс кылзоно кожаса, пияш аттестатсэ мырдэм но кызьы нуиз Ижысь мединститутэ. Малпаз: пыри ке пыро, ӧй ке � шайтан мед тодоз. Вань экзамензэ "ньыльёслы" сётӥз. Люказ 16 балл � ӵапак кулэ мында. Дышетскыны кылиз. Нырысетӥ курс бере вань пиосты армие басьтӥзы. Сашалэн службаез ортчиз Германиын. Сантехник вал. Армия бере выльысь институтэ мынӥз, кыкетӥ курсэ. Дышетсконэз пумен тунсыко но тунсыко потыны ӧдъяз. Малпаз хирург луыны. Дышетскон висказы студентъёс ужаны но вуттылӥзы. � Милям институтамы 20-25 пала лэсьтӥськон отряд вал. Мон кивалтыны сюри "Солнце" шуонэ. Котьку азьпалан мынӥм. Кез ёросын Полом черкогуртын парсь гид пуктӥм, куинё иськем кузьда чугун сюрес вӧлдыны юрттӥм. Ньылетӥ курсын дышетскыкуз, Александрез синйылтӥз син висёнъёсъя кафедралэн кивалтӥсез Евгений Николаевич Марков. Ӵектӥз хирург луыны. Со понна, пе, нимысьтыз кружоке ветлоно. Пияш соглаш кариськиз. Угось туж кельшо вал син висёнъёслы сӥзем лекциос. Александр мылысь-кыдысь ветлӥз кружоке, пумен-пумен пыриськиз наукая ужъёс дасянэ. Сюриз студентъёслэн огаз конференциязы. Глаукомаен герӟаськем докладэз туж вылӥ дунъямын вал. Александр 1992-тӥ арын институтэз йылпумъяз. Профессор Маргарита Васильевна Зайкова бакель сётӥз (ӟеч кыл вераз) интернатурае пырон ласянь. Александр дышетскиз офтальмологияя кафедраын. Собере кылиз ординатурае. Визьмо пияшез озьы ик кемалась чаклам ни тодмо хирург Анатолий Николаевич Лямин. Ӵошен ужаны дэмлаз. Ӵапак со дыре Александр выриз выль операция бордын � начармем син пыдэсэз (сетчаткаез) тазамытонэн. Соку пумитаз вуоно кышнозэ � Ольгаез. Ольга но врач, быдтэмын Петрозаводск городысь университетэз. Ӝоген Корепановъёслэн Аня нылзы вордскиз. Семья кусыпъёс ӧз люкетэ Александр Валентиновичлы ас ужзэ азьланьтыны. 1997-тӥ арын вуылӥз Будапештэ. Европаысь офтальмологъёслэн 11-тӥ калык куспо конгрессы ортчиз отын. Александр Корепановлэсь операция лэсьтон амалзэ дуннеысь валтӥсь специалистъёс вылӥ дунъязы. Тумошо учыр но вал: � Докладэз куинь пӧртэм амалэн лэсьтыны дэмлазы � яке стенд йӧндыроно, яке видеофильм бергатоно, яке кылын верано (одно англи сямен). Ачим немец кылэз дышетӥ. Англи сямен дасозь гинэ лыдъяськыны быгатӥсько. Соин ик видеофильм возьматыны вуттӥ. Нош кадр сьӧрын вераськыны ӧй дасяськы. Ваньмыз сотэк но валамон луоз, кожай. Венгриын куалектытӥзы: англи кылын, пе, операцилэсь ортчемзэ мадёно. Мар-о табере каром? Шудэ вылэм на кадь. Тодматски Москваысь медицина наукаосъя докторен Екатерина Иммануиловна Кугоеваен. Англи кылэз оло ӟучлэсь но умой тодэ: лабыр гинэ ӟабыльтэ. Солы операциме валэктӥ. Екатерина Иммануиловна, микрофон кутыса, видеофильм мынон дыр ӵоже ваньзэ англи кылын тодматӥз. Кадр сьӧрын верам сярысь, улэп куараен мадён туж яраз люкаськем калыклы. Султыса ик кизэс чабизы. Вань докладъёс бырем бере, Александр доры Голландиысь профессор амыштӥз. Паймиз: кызьы, пе, сыӵе секыт операциез лэсьтӥськоды? Нош кыӵе ке шудтэм учыръёс пумиськизы ке? Александр шуиз: � Милям сыӵе учыръёс ӧй вал на. Малы ке шуоно, хирургъёсмы котькыӵе операциосын вырыса, асьсэды олокыӵе но учыръёслы дасяло. Западын югдур копак мукет. Медицина дунын бере, ваньмыз коньдонэн герӟаськемын. Операция азьын адями ассэ уно долларъёслы страховать каре. Хирург, сое маке понна янгыше медаз уськыты шуыса, радазтэм чаклаське. Операцизэ видеокассета вылэ гожтыто. Вылаз ик, кык-куинь пумо операциос борды ик уг басьтӥськы. Россиын но озьы ужаны луысал. Но коньдонмы ичиен, быдэс эмъян удыс возиське татысь адямиослэн геройлыко ужамзы вылын гинэ. Александр Корепанов ялан ужаз син сетчаткаез йӧнатон бордын. Кылем арын со понна патент басьтӥз. Зэм, изобретение лэсьтэмез бере, дуно бумагазэ вить ар ӵоже возьмано луиз. Озьыен, али Ижын гинэ сыӵе операция лэсьто ай. Озьы ик Александр Валентинович Корепанов но Анатолий Николаевич близорукость шуонэз эмъяло. "Зеница" очкиен. Та тренажёр � Ляминлэн быдэстэм малпанэз. Ӝоген аптекаос вузкарыны кутскозы дисплей очкиен. Таиз но "Зеница" нимаське. Но ӧжытак аспӧртэмгес. Александр Валентинович валэктэ: � Али котькытын вӧлмемын компьютеръёс. Куд-ог адямиос соос сьӧрысь нуналъёсын уг потало. Тросэзлы пӧртэм тексъёсты туж матысен лыдӟоно луэ. Мар луэ та учыре? Син быгытъёс быдэс нунал ужаса жадё. Куддыръя йырыз пороме, кать быре, ӧскем потэ. Соин ми дэмласьком компьютерен ужаны но лыдӟиськыны дисплей очкиен. Адямилы со номыр аламазэ уг лэсьты. Тренажёр син улмоез буйгатэ. Таяз арын Александр Корепанов утиз диссертацизэ. Со сӥземын сепильной шуиськись дистрофиез йӧнатонлы. Музон сямен вераса � пересьмись синэз утёнлы. Москваын ужзэ ушъязы. Туала офтальмология шоры учкыса, сюлэмыз вӧсь луэ: � Западысь хирургъёслэсь ужамзэс адӟыса вожъяськыны кутскисько. Угось отын ваньзэ машина лэсьтэ. Венгриысен чаклай: висисьлэсь ангессэ аппарат вылэ пукто, син шораз лазер си лэзё но моторын ваньмыз адӟиське ини: кытчыяз чер каръяськем. Асьме дорын висёнлэсь тодметъёссэ валаны вырыса, кӧня дыр быре! Ваньмыз сямен киын лэсьтӥське уга. ЖУРНАЛИСТЪЁСЫН ПУМИСЬКОНЪЁС Толалтэ ум кынме Журналистъёслы озьы шуиз "Удмуртлестоппром" кун предприятилэн валтӥсь кивалтӥсез Анатолий Перевозчиков. Удыс туэ, азьло аръёсы лэсьтэм янгышъёссэ лыдэ басьтыса, июне ик толлы дасяськыны ӧдъяз. Та ужез уката ик вырӟытӥз Удмурт Правительстволэн 19-тӥ июне кутэм постановлениез. Отын ужпум пуктэмын бюджет удысысь организациослы но калыклы тырмыт эстӥськон вуттон ласянь. Кылдытэмын нимаз комиссия. Кыӵе бен та уж мынэ? Оглом урод шуыны уг луы. Нырысетӥ октябрьлы республикая 62 сюрс тонна музъем эгыр вуттыны кулэ. Али 40 сюрс тоннаез вань ни. Кылсярысь, июне но июле быдэн 10 сюрс тонна вуттэмын, августэ 30 сюрс луыны кулэ, нош сентябре � 26 сюрс. Пусйыны кулэ, Правительство удыслы дыраз коньдон висъя, кредит сётэ. Со мынэ, эгыр басьтэмлэсь азьло ик, шахтёръёслы сётыны. Малы ке шуоно, сотэк поставщикъёс продукцизэс уг келяло. Соин ӵош ик шахтёръёс эгырлы ялан дун будэто. Тани июне 35 процентлы тарифсэ ӝутӥзы, июле � 10-лы, августэ � 10-лы, сентябре 20 процентлы чаклало. Вылаз ик, чугун сюрес но грузъёсты нуэм-ваем понна тарифъёсты йылэтӥз. Тӥни озьы шаерамы 1 тонна музъем эгыр 520 манет усе. данакез со вуэ Кузбассысь. Хакассия уката ӟеч эгыр поттэ, музъемез гудытэк, со туж матын кылле, но ваёнэз кыдёкын. Нош ужбергатӥсьёс (коммерсантъёс) республикаямы ик одӥг тонна эгырез 600-700 манетэн вузало. Туэ умойгес радъямын калыклы эстӥськон (пу, эгыр, брикет) сётон. Со понна районъёс но городъёс калыклы юрттэт (дотация) висъяло. Озьы одӥг кубометр пу 110-160 манет интые 40-47 манет усе. Юрттэт сётон тужгес но умой радъямын Иж но Воткинск городъёсын. Уродгес югдур Яр, Кизнер районъёсын но Камбаркаын. Берлояз эстӥськон дасянъя комиссилэн отын нимаз потаса кенешез ортчытэмын но кулэ ужрадъёс чакламын. Кун бюджетысь калыклы музъем эгыр басьтэм понна котькуд тоннаезлы 250 манет юрттэт сётӥське, яке адямиос сое ӝыны дунын басьто. Нош пуэз вандыса но, пильылыса но вайыны быгато. Кун предприятие озьы ик ачиз дася нюлэс, мебель но пулэсь чебер арбериос лэсьтэ. Но берло дыре та ужез каллен азинске. Нюлэс хозяйство тэль кораны конкурсъя гинэ инты висъя, арендае сётэ. Со, веранэз ӧвӧл, дуно усе. Тӥни озьы куашказ Глазовысь леспромхоззы, мырдэм возисько Шольяысь но Сов.-Никольск леспромхозъёс. Предприятилэн али 14 ёзэз. Умоен лыдъяны кулэ Сов.-Никольск ЛПХ борды Люк-Шудьяысь нюлэс дасясьёслэсь огазеяськемзэс. Огъя вераса, республикаямы быдэс толлы 280 сюрс тонна музъем эгыр кулэ. Та эстӥськонэз асьсэос дасяло Глазовысь "ЧМЗ", "Удмуртэнерго" огазеяськонъёс но музонэз. Тӥни озьы толалтэ коркаосамы шуныт луоз, ум кынме. Г.РОМАНОВ. СПИД-лы пумит - ручкаен ВИЧ-инфекция, СПИД туннэ шаерамы бадӟым кышкытлык кылдыто ни - паласькон учыръёс нуналмысь йыло. Врачъёслэсь алонъёссэс егитъёс пелязы уг поно. Соин ик та ужен вырыны кулэ асьмеос ваньмы. Республикаысьтымы Талазыкез утёнъя но Печатья но иворъёсъя министерствоос 2000-тӥ арын ялӥзы "Журналистъёс - СПИД-лы но наркоманилы пумит" конкурс. Оскиськом, журналистъёслэн ужъёссы через алыны, солэсь утиськыны, СПИД-эн висисьёсты валаны юрттозы шуыса. З. Кириллова. Ӟеч амал уг вуны Можга ёросысь гурт удысын ужасьёс пӧлын азьло аръёсы вордскем ӵошатскон улэ-азинске. Татын арнялы быдэ комбайнеръёслэн ужамзылы йылпумъянъёс лэсьто но устооссэ коньдон премиосын пусъё. Аран кутскем дырысен котькинлэсь трос ю тысь кутсаз кидыс эскеронъя станциысь механизатор Л. И. Степанов - 2884 центнер. "Трактор" эштосысь комбайнер Л. Ю. Красильников кыкетӥ интыын - 2840 центнер. Куинетӥ интые потӥз "Россия" эштосысь ю-нянь будэтӥсь В. М. Романов - 2773 центнер. Егит комбайнеръёс пӧлын устоеныз лыдъямын "Рассвет" колхозысь Е. П. Ворожцов. Ю тысь шертон-куасьтон итыме со 2591 центнер ю-нянь келяз. М. Кузьмин. Копейкаезлэсь трос бӧрдонэз Пенси будэтэмзылэсь тросгес йырзэс суразы-пожазы ни куанер пересьёслэсь. Алдаз, шуод-а, мар-а соосты Президент - рос-прос ӧз валэкты, малы огъёсызлы будэ, мукетъёсызлы - уг. Соин ик табере ӝожтӥськонъёссэс, каргаськонъёссэс кисьто почтаын, райсобесъёсын ужасьёс вылэ. Шуг югдуре вуиз Калыкез улон-вылонын утёнъя министерство. Сое тупатон (котькуд пенсионерлы валэктон) пумысен кенешыны олокӧняетӥзэ люкасько ни специалистъёс. Валлян соослэсь кылзэс юаз, шуод-а, мар- а Кун Кенешлэн Тӧроезлэн вштӥсез Наталья Харина. Кызьы бен валэктон уж нуыны чакла министерство? Котькуд вазиськись муртэн ужаса, газетэ гожъяса, радио, телевидение пыр вераськыса, предприятиосы, ветеранъёслэн советазы потаса, домоуправлениосты, социальной ужасьёсты, участокъёсысь врачъёсты-медсестраосты уже кыскыса. Берпуметӥез, конечно, валантэмгес - кызьы врач валэктоз со доры лыктэм висись муртлы, малы солэн пенсиез бускелезлэсь ичигес, солэн ужез эмъян ӧвӧл шат? Республикаысьтымы 400 сюрс пенсионер пӧлысь ватсаса пенсия басьтӥзы 60 процентэз. Кызьы валэктоно кылемезлы, соос мар со индивидуальной коэффициент шуонэз но уг валало ке? Мон малпасько, отын номыр шугез ӧвӧл: кин кема но бадӟым уждунэн ужаз, со ватсэт басьтоз. Нош рос-просгес валан понна лыдӟе на эшшо огпол милесьтым 18-тӥ августэ потэм номермес, яке возьдаськытэк вазиське райсобесъёсады. Оскытӥсько, таяз учыре шорады уз кесяське, министр ужасьёссэ чидасьгес луыны косӥз. З. Рябинина. Пётр Кубашев "Кайсы" повестьысь люкетъёс Кайсы черкогурт 1900-тӥ арлэн Ымусьтон нуналъёсаз Кайсы черкогуртын сыӵе учыр луиз - верай ке, ой! уд оске, серекъяса погралоды. Кытын кызьы, дыр, нош милям Кайсыгуртамы та ӟырт кезьыт нуналъёсы мар гинэ уг даурто! Пӧртмаськонэ, тунаськонэ, алдаськонэ, эктыса-кырӟаса шулдыръяськонэ пыриське али гинэ ветлыны кутскисез но, ветлыны быгатонэныз люкиськыны _�дасяськисез но, огъя вераса - быдэс гурт калыкмы. Тужгес нимо-дано, шуысал мон, мунчо ӝопые киез лэзьян йылол. Солэн данэзлэсь ку но кызьы кылдэмзэ валэктыны уггес быгаты, дыр, но сыӵе-сыӵе мур пуштросъем уж малы ке нылъёс пӧлы гинэ пыӵамын. Быдэсъяське со бер уин, сайкыт инбамо куазен. Кӧня ке нылъёс, кин кинлэн мунчо ӝопыяз кизэ нырысь ик донгоз шуыса кенешемзы бере, мунчо дорысь мунчо доры мыно но, пушказ пыратэк, ӵын поттӥсь пасе суйзэс донго. Донго но чаклало: кизы небыт но шуныт омыре сюриз ке, лякыт сямо картлы бызёзы, мунчо эстымтэ ке - таиз ини бадӟым куректон: улон-вылон гумырзы кезьыт сюлэмо картэн ортчоз!.. Кайсыос мунчооссэс шур дуре яке нюк бамалэ пуктыло. Соин ик нылъёс люкрак- люкрак бадӟым уллёен мунчо дорысь мунчо доры вамышъяно луо. Кыӵе гинэ ивор уг вӧлмы со нуналъёсы Кайсыгуртэ! Тани, шуом, огезлэн нылашн киыз, сьӧд пасе чакласькытэк донгыкуз, суэн саптаськем: табере куректэ ни, пе, тэкит бекчее месылэм кадь сьӧдкысъем картлы бызёз шуыса, нош солы ӵуж мертчан йырсиё пияш кельше вылэм! Мукетыз нылаш, шумпотэмзэ ватыны быгатытэк, ас кизэ, пе, чупа: бадӟым чиньыяз чонари вотэс дэмӟем - чонари котьку ӟеч ивор вае уго!.. Кайсыгуртысь вань пияшъёс пӧлысь одӥгез тужгес шаянэз но маскарчиез - Олексей, шур дурысь мунчозы пала вамышъясь нылъёсты адӟыса, яркыт толэзьлэн югытэзлэсь ватӥськыса, кытӥяз - кӧт вылаз нюжтӥськыса, кытӥяз - коньы кадь тэтчаса, мунчояз пырем но, штанизэ кыльыса, лапча йылэ пыдесъяськем - ӵапак ӝопы вадьсы. Тани вуиллям нылъёс. Кышкало но кадь, пе, тодмотэм сьӧд пасе кизэс мычыны, тодэмзы но потэ кыӵе муртлы бызёнзэс. Огшап кыстаськемзы бере, тур-пар сямо, лэчыт кыло Отялэн куараез кылӥськем: - Тӥледын кӧжы гинэ но уд пӧзьты, фу, чик ӧвӧлтэмъёс!.. Лэзе монэ!.. Кизэ сьӧд пасе донгем но... огдырлы могак кадь луэм. Нылъёс котыраз, пе, тэтчало: - Мар ини отын, мар?!. - Око-ко-о! - мынясь тусын шокчем Отя. - Мунчозы шуныт на ай татын, нылъёс, али гинэ пыласькиллям, луоз... - Я, я, мае шӧдӥськод, Отя? - уг чидало, пе, эшъёсыз. - Чонари вотэс ӧз биниськы-а ки бордад? Отялэн чиньыосыз Олексейлэсь мугорзэ маялляны ӧдъяллям. - Ой, гыдыкъёсы!.. - паймем куараен вазем со эшъёсызлы. - Чонари вотэс гинэ ке луысал татын!.. Осто быри!.. Татын оломар но вань кадь!.. Ассэ кутыны быгатымтэ Олексей гор-гор серекъяны ӧдъям. Тае кылыса, нылъёс кир- пазь луиллям, кин кызьы быгатэ - мур лымыетӥ гушъяса, букосъёстӥ погыльскыса, мунчо дорысь пегӟиллям. Нош ӵуказеяз быдэс ёросэ вӧлмем та учыр, пӧртэм сямен будэтӥськыса-бугыръяськыса но пӧллён амалэн мадиськыса. Олексейлэсь данзэ эшшо но вылӥе ӝутӥллям Отялэн эшъёсызлы туж оскыса но мукетъёслы вераны лэзьымтэ кылъёсыз. "Эх, гыдыкъёсы, - шуэм, пе, со, - кылдысал на ке огпол ке но сыӵе изьы карын бугыръяськыны!.." Эшъёсыз чидаллямтэ, котькудзы кинлы но солы туж лушкемен но кыре медам поты шуыса вераллям Отялэсь кылъёссэ. Нош Ымусьтонэ кин чидалоз серекъятэк но ог-огедлы выль иворез вератэк?!. *** Кайсы черкогуртмы милям туж ик бадӟым ӧвӧл - ньыль урам гинэ. Нимъёссы но соослэн туж огшорыесь - Бадӟым урам, Пичи урам, Бигер урам, Ӟуч урам. Пичияз но бадӟымаз удмуртъёс уло, Ӟучаз - нимызъя ик валамон. Нош Бигераз ... Ой, сылэ ай, сылэ... Вае шокчыны дыр... Верай ке, нош ик пограмон серекъялоды, монэ янгыше уськытоды... Бигер урамамы, тодэмды ке потэ, одӥг бигерез но ӧвӧл, артысь Усмангурт пала кожись выль ураммы со милям. Кайсыос сое палэнысь лыктэмъёс азьын гинэ Бигер урам шуо, кепыр ваёгес кадь Вамен урам шуыны... Ма, Вамен ке Вамен, мар луэм, дыр, ини но... Ӟучъёсмы но, тӥни волостной правлениын пукисьёс, удмуртъёслэсь кылэм карыса, почталэн адресаз сое "Поперечная улица" гожтӥллям. Гожтонзэс гожтӥзы, дыр, ини но, Кайсыгуртамы шаян Олексеймы вань на ай шуыса вунэтӥллям. Тупаны но кулэ ук: Отяослэн Поперечной урамысь корказылы тямысэтӥ лыдпус сётӥллям. Тае кылыса, Олексеймы лобась бубыли кадь луиз: Отя котыртӥ "Поперечная восемь, Поперечная восемь!" шуыса, кырӟаса-эктыса ветлэ. Мар сыӵе кельшем Олексеймылы со нимын герӟаськем лыдпус, али ке но марзэ-созэ умой-умой ум тодӥське-валаське. Озьы ке но, "Отяез серем каре кадь та шаян адями" малпаса, Вамен ураммы Бигер урамлы пӧрмиз. Куд-ог адямиослэсь гинэ кылод на куспазы Вамен урам шуэмзэс. Тужгес кузез ураммы - Бадӟымез. Сое Базар урам но шуисез вань: базар нуналъёсы быдэс ёросысь калык люкаське татчы. Лавкаё коркаос трос гинэ ини татын: Алабгоысь (Елабугаысь) вузчиос, Кайсыысь вузкарыны йӧндырисьёсын огъя кыл шедьтыса, таляк вуз ваё - кисыед гинэ зӧк мед луоз. Та Бадӟым ураммы ик, уй пал ласянь ке учконо, Сюгинск чугун сюрес станцие нуэ, лымшор ласянь ке - Алабгое (Елабугае), милям уезд карамы, вуттэ. Пичиез ураммы - тужгес шулдырез. Со быдэсак льӧмпу, палэзьпу, тополь сад пӧлы ышемын. Куд-огез, укно улзэ котыртыса, сирень сяська но мерттылӥз ини. Адӟем карымон адямимы вань уго: Олексейлэн атаез - Левонь. Та нимо-дано воргоронмы сярысь мон уно гинэ верало на ай, нош али огкутскемен урамъёсынымы тодматонме пумаз-йылаз вутто. Кылиз на одӥгез - Ӟуч ураммы. Таитӥз ветлыны умгес дӥсьтӥське: ӟуч сямен - вераськем но уггес пӧрмы, кивалтон юртысь адямиос но уногес татын - кепыр ваён сям вань бере, кытчы кариськод! Татын ик попъёслэн - батюшкаослэн семьяоссы уло. Мар бен соос азьтӥ астэ ачид синазькыль карыса ветлод шуиськомы, лэся. Озьы ке но, со ураме ветлытэк амалмы ӧвӧл - дышетскон юртэд но, першалэд но, судьяед но татын бере... Ма, дышетскон ласянь ке верано, ӧйтӧд... Милямъёс пӧлысь туж ик кыстӥськисез ӧвӧл кадь со юртэ... Пи нылпиоссылы анай-атайёсмы шуо: тӥляд ужды - гырон-кизён, юрт кутыны дышон, нылъёссылы - куиськон, черсон, пичи нылпиосты утён... Ӧжытак лыдӟиськыны но гожъяськыны валаськомы ке, туж бадӟым дышетскем муртъёс кадь потӥськомы ини. Нош тани тӥледлы тодмо Олексеез ик басьтоно ке, дышетӥсьмы сое нырысетӥ нуналаз ик улляса лэзем. Олексей ачиз янгыш, конечно... Кутӥськыны кулэ вал, дыр... Кызьы сотэк?!. Кык урокез пукыны чидам ик, куиньметӥяз чидамтэ - улаз нуӵ-нуӵ лэзем. Вань эшъёсызлэсь кужмогес кесяське, пе, ай со: "Ой, зын!.. Ой, мар улон та?!." Дышетӥсьмы чакламез-эскеремез бере янгыш муртэ шедьтэм но, ӧс сьӧры поттыса, "Мын, берт, милемлы таӵе зын песьтэръёс кулэ ӧвӧл!" шуэм. Отямылэн но дышетскемез одӥг нунал гинэ. Школае мыныкуз, бадӟым дэра сумкаяз одӥг карандаш, одӥг тетрадь но туж чебер сульдэро кыӵе ке книга понэм, собере - кык шорем вӧйын нянь, куинь пӧзьтэм курег пуз, ӟазег сӥль, лянэсэн ӝожон. Пичи мугорыз мырдэм но кызьы вуттэм ик сыӵе секыт котомкаез школае, но книгаез, тетрадез но карандашез саптаськиллям. Чик ватытэк ке верано, урокъёс кельшиллям солы. Дышетӥсьмы но, чебер ӟуч кышномурт, пальпотыса гинэ вазьылэм шораз. Котькуд урок бере кӧтыз тырымон сиськыса, дораз бертэм. Анаез, пе, юа: "Кельшиз- а, нылы, дышетсконэд?" Соиз, дышетӥсьсы сямен ик пальпотыса, йырзэ сэзъям. "Ме тыныд табере ыж гон, - шуэм анаез, - пуксьы кубо вӧзы но кутскы черсыны. Школаез адӟид - тырмоз..." Ӟуч урамен герӟаськем учыръёсыз вераса уд быдты. Но мынам мукетсэ пусъеме потэ: та куинь урамъёсмы - Бадӟымез, Пичиез но Ӟучез - черк котырын огинын. Черкмылэн юртэз чебер, бадӟым, азбарез вӧл-вӧл, чильпам выллем корт борддорен котыртэмын. Берло аръёсы черке ветлӥсьёсмылэн лыдзы будыны ӧдъяз. Мугзэ тазьы валэктыны луоз, дыр: удмурт батюшкаос вуэмен, инмарлы сӥзем молитваосты удмурт кылын чирдыны луэмен, Кайсыгуртысь калык воштӥськиз. Азьвыл уггес валало вал ӟуч попъёслэсь мар верамзэс. Тодо вал огзэ гинэ: Инмарез яратоно но Инмарлэсь кышкано. Та кылъёс амалтэк асьсэос юан кылдыто ук: кышкатӥсь лек мае ке яратыны луэ шат? Соин ик, черкын вӧсяськем нерге каремзы бере, кайсыосмы, воштӥськон дӥсьсэс дӥсяса но тужгес сӥлы валзэс чеберъям тарантасэ кыткыса, бадӟым песьтэре тырем ческыт пыжиськемъёсын кошко Чебер нюк вӧсе яке Булда вӧсе. Берло аръёсы, улон-вылон бугыръяськемен, Инмарлэн юртаз сюсьтыл пуктӥсьёс уногес луизы. Герман оже келям нылпиосмы бырыны шедем сярысь иворъёс ӵемгес вуыны ӧдъязы уго. Ма, кемалась-а вал кадь японэн ожмаськон?! Али ке но куинь семья синкылизэ кисьтэ кытчы ке, дунне пыдэсэ, чиптэм-чаптэм ышем пиосыз пумысен... Нош таиз ож Кайсыгуртлы гинэ ӧз, ёрос гуртъёслы но кӧня синкыли ваиз ини!.. Батюшка аслаз молитваосаз мылкыдэз бугыртӥсь бадӟым но нап куараеныз черклэн инбамозь ӝутӥськись вӧлдэтъёсыз дорозь вуттэ ке быремъёслэсь нимъёссэс, вӧсяськисьёс амалтэк викышъяны кутско. Вакчияк вераме потэ Кайсыгуртмылэн кылдэмез сярысь. Ми доры палэнысь вуэм адямиез, со сярысь тодытытэк, нокызьы но уг лэзё. Пыр-поч мадё котькуд урамлэн, котькуд бусылэн, сиклэн, нёжаллэн, нюклэн, арамалэн кызьы кылдэм нимыз сярысь. Нош кыӵе паймымон кылъёс кылоды тӥ соиз яке таиз семья, бӧляк сярысь... Озьы ик тододы, кин кинлы уром луэмын, кин кинэн кушласькемын, кин кытчы нылзэ сётӥз, кытысь кен ваиз, кыӵе урамысь кудӥз семья чебергес но небытгес дэра куэ, кинлэн кӧня ю кабанэз, кинлэн кӧня валэз но мукет пудо-животэз. Ваньзэ сое тодэмды бере, тӥляд юлтошты аслэсьтыз но улэм-вылэмзэ возьматоз. Чечыен чай удэмез бере, нырысь ик пыртоз дӥсь возён вылӥ кеносаз. Отын сюрые ошылэмын огезлэсь чебер мукетыз дэремъёс, айшетъёс, базар кышетъёс, киын ӝуткам ковёръёс, чалмаос, айшонъёс, праздник нуналъёсы кутчаны дасям чильк-долк кисьтаськись сурон сапегъёс но кышномурт катаос: кузпалзэ ӧтёз но бадӟым сандыкысьтыз поттыса возьматыны косоз лач-лач тырем кизьыё но алача кесэгъёссэс. Собере вылӥ кеносысьтыз васькытоз улӥяз кеносаз. Татын бадӟымесь вышкыосын но нимаз-нимаз ларьёсын - изэм ӟег, чабей, йыды, сезьы пызь, пӧртэм-пӧртэм кеньыр, дузъёсын - чечы, сюрые ошылэмын тылобурдо но гурт пудо-живот сӥль. Ю возён кеносъёсаз но пырталоз, гидъёсысьтыз пудозэ но возьматоз, собере, ас семьяезлэн кужмыныз люкам узырлыкезлы син медам усьы шуыса, лушкемак кирос кароз яке ас понназ вӧсяськоз. Ваньзэ тае возьматонлэн мугез аслаз: котькудаз семьяын сётоно нылзы яке кышнояно пизы вань. Татчы лыктэм уромзы азьланяз, кин тодэ, оло, усто дэмчи но луоз ай - сое но чаклатэк уг луы... Нош кунозы тодмоезлэсь улэм-вылэмзэ ушъяны кутске ке, таиз ини ӧжытак посӥськыны ӧдъя. Шуэ: ми огшорыгес улӥськом, мукетъёс радозь ӝутӥськыны моӵмы нокызьы но ӧз тырмы ни ай... Улэм-вылэмзэ возьматэмез бере, юрт кузё уромзэ корка пырыны ӧте. Татын ӝӧк выл сиён-юонэн тырмытэмын ини: кыӵе гинэ пыжиськемъёс, кыӵе гинэ шыдъёс-ӝукъёс дасямын ӧвӧл... Ӝӧк пичи миндэро пуконэ пуксе ачиз юрт кузё. Со - солэн интыез. Мукет муртлы отчы пуксьыны уг яра. Ӝӧк урдсысь пумынгес - черык аракы, куно дуногес ке - кабак вина но сылэ. Сябась карыса кӧня ке юэмзы бере, кыӵе ке муген тӧршоры ӧтё быдэ вуэм нылзэс яке пизэс. Соосыз, кепыр ваеменызы дарали кадь ӵыжектыса, атайзы доры кышнопалась лыкто но, косэмзэ быдэстон вылысь, бызьыса кадь берен кошко. Лыктэм кунолы со вакчи дыр но тырме егит муртъёсты синйылтыны. Табере ини со, сябась карыса, чарказэ ӝутэ: паймем но ӝутскем мылкыдын ушъя лякыт сямо, возьвыл сяська кадь чебер нылашез, батыр сӥлё-виро пияшез. Тӥни сыӵе мыло-кыдо калык улэ милям Кайсы черкогуртамы. Туж вашкала гурт шуо сое пересьёсмы. Олокӧня сю аръёс талэсь азьло лыктӥллям, пе, артысь Башур гуртысь туала Пичи урам интыысьтымы сьӧд нюлэскы кык вынъёс - Ишмекей но Кайсы. Кышнооссы но, нылпиоссы но вылӥллям ини соослэн. Огъя кужымен юртъяськиллям. Нюлэсэз сайкыса, кизёно музъемзы пумен паськытам. Ул но ул вылэм ини... Пӧрмымтэ ӵош улэмзы - кышнооссы куспазы тэриллямтэ, нылпиоссэс но ог-огзы вылэ узатыны ӧдъяллям. Соосын ӵош песятайзы вылымтэ ни уго. Со ке луысал, кык кенъёс ӧй ашкынысалзы, кылзэс пинь сьӧразы куртчоно луысалзы. Малпаськиллям, малпаськиллям куректонэ усем кык вынъёс но, кудзылы татысь кӧчоно луоз шуыса, пус чӧлтӥллям. Кошконо луэм Ишмекейлы. Улэм-вылэмзэ кык подводэ тырем, куиньметӥяз семьязэ пуктэм но кошкем Кам сьӧрысь башкир музъемъёсы. Талэсь азьло Башур гурт котырысь уноез семьяос кошкиллям вылэм ини отчы, выль вӧсьлэсь пегӟыса. Кӧня ке дыр ортчыса, Кайсы кытысь ке кылэм: вынзэ тодмотэм музъем вылын умой пумиталлям, башкиръёс асьсэлэн семьязы кадь кариллям, но... выль ним басьтыны косӥллям. Ишмекей пумит луымтэ - ас удмурт кылыныз вераськись Хайдарлы пӧрмытӥськем. Дор палаз со ноку но бертылымтэ ни, Кайсы выныныз кусыпез пыраклы ышем. Таӵе ӝож но секыт учыр семьяяз ноку но медам ни луылы шуыса, лэся, Кайсы кышнояськем пиоссэ соку ик яна поттылэм. Та семья пумен туж бадӟым бӧляклы пӧрмем, нош туж-туж уно аръёс ортчыса, мукет гуртъёсысь но ёросъёсысь калыкен сураськыса, куке-соку одӥг семьяысь потэм нылпиос ог-огзылэсь ӵыжы-выжы луэмзэс но вунэтӥллям. Нош Кайсылэн нырысь каръяськем интыез али ке но улэп. Кайсы черкогуртысь котькудаз юртын сямен ик татын но нылпи куара кылӥське, капка ӧсъёс ӟукырак- ӟукырак усьяськыло-ворсаськыло, валъёс гырдалляло, муръёысь ӵын потэ, праздник нуналъёсы юмшасьёс шулдыръясько... Кайсылэн аслаз лэсьтэм кибервылыз пӧлысь номыриз но кылемын ӧвӧл ни. Озьы ке но, Кайсыгурт калык, Пичи урамысьтызы та юрт вадестӥ ортчыкуз, ӧжытак шонерске, ноку но урод кыл уз вера, уз ӝожтӥськы, нош йыр-пыд сётон, сопал дуннее кошкемъёсыз тодэ ваён нуналъёсы та юртлэн кенос бераз, Кайсыез буре вайыса, куяськонэн лыктэ. Та вашкала юртын улэ Кайсылэн вераны луонтэм кыдёкысь ӵыжы-выжыез - Максим Петрович Семенов. Али солы, 1900-тӥ арлэн Ымусьтон нуналъёсаз, вить арес гинэ тырмиз. Соин ик та мусо пияшез Максим Петрович шуыны вазьгес на, дыр. Нош улон- вылон ортчемъя, асьмеос амалтэк со шоры нимыныз-тулыныз вазиськоно луомы. Редакция алэмын Кылем арняе "Ижевск вечерний" газетын печатлам материалъёсты эскериз Удмурт Республикаысь Быръёнъя комиссия. Соос лыдъямын ӧтись-ӝуткасен (агитациен). Пусйыны кулэ: та редакция юри но ӵем тӥялля "Удмурт Республикалы президент быръён сярысь" Законэз. Редакциысь нокин но ӧз лыкты Быръёнъя комиссилэн кенешоназ. Соин ик таиз вазиськиз правоез утись ёзъёсы, газет понна кыл кутӥсьёс вылэ правоез тӥям сярысь протокол дасяны курыса. Комиссия алӥз президентэ кандидатэз Н. А. Ганзаез. Таиз "Ижевск вечерний" газетлы интервью сётыкуз тӥяз ӧтён-ӝуткан улсын законэн тупатэм радлыкез но дырез. С. Широбоков. Люкаськылӥзы пинь эмъясьёс Ижевскысь медициная академиын стоматологияя факультет усьтӥськем дырысен 20 ар ортчиз. Соин валче Ижевске люкаськылӥзы, республикаысьтымы сяна, Москваысь, Пермьысь но Казаньысь пинь эмъясьёс: татын научно-практической конференция ортчиз. Ужрад дыръя пыр-поч эскеремын пиньёсты пӧртэм висёнъёслэсь утён но эмъян амалъёс, чакламын азинскон сюресъёс. Оском, соос пайдаё луозы асьсэос эмъясьёс понна но. Висисьёс но капчиенгес вамыштозы пинь эмъян кабинетъёсы. Н. Липина. Мон - гуртлэн нырысетӥ пиез! (тодэ ваёнъёс) Кема аръёс ортчыса но пинал дыръя адӟем суредъёс али но син азе яркыт пуксё на. Милям гуртмы бадӟым ик ӧвӧл. Кылдэм со граждан ож йылпумъяськон вакытэ. Атаелэн верамезъя азьло соос улӥллям артысь Сеп гуртын. Одӥгаз кенешын вераськон ӝутӥллям куинь иськеме улыны выль инты висъян сярысь. Бусыос, пе, кыдёкын вал, аран но тулыс валэс юосты кизён дыръя отын ик кӧлаллям. Кулэ бумагаос дасян понна бускельзэс Сергей Александрович Лекомцевез ыстӥллям Зураысь волисполкоме. Вераны гинэ умой, кема аръёс улэм интыысь мукетаз выжыны капчи вылымтэ. Кинлы кытчы корка пуктыны азьло ик ӵог шуккылӥллям, куспазы, пе, керетон медаз ӧръяськы. Ог-огзылы юрттыса, ар куспын выль гурт кылдэм. Солы Михайловка ним сётӥллям. Тӥни отын мон нырысетӥ пи вордскиськем. Гуртмы узыр но нянё-вӧё мед луоз шуыса, монэ коркась корка киязы нуллӥллям. Нырысь ог дасо хозяйство гинэ вылэм. Нош кык-куинь ар ортчыса, эшшо сомында ватсаськем на. Нырысь одӥг коркан атай но солэн кык семьяё вынъёсыз улӥмы. Сиськыны пуксиськом ке, быдэс ӝӧкез пиналъёс гинэ котыртӥськом вал. Вордӥзы куинь вал, скал но мукет пудоос. Куспазы нокыӵе керетон ӧз поттылэ, ваньзэ огкылысь лэсьтылӥзы. Туннэ мынам анае ке сиён пӧра. пудоосты сюдэ ке, ӵуказеяз - мукетыз. Озьы вошъяськыса гур котырын бергаллязы. Быдэс семья ог дас сизьым лул лыдъяськылӥмы. Соин ик нуналлы быдэ сямен нянь но пыжылӥзы. Гуртамы узыръёс ӧй вал. Кинлэн ке нянез выльыз вуытозь ӧз ке тырмылы, сыӵе семьяослы бускельёсыз одно ик юрттылӥзы. Нимаз крестьянской хозяйствоен люкиськонлы нокин пумит ӧз луы. Ваньмыз огкылысь гожтӥськизы колхозэ. Ар кык ортчыса, правлениын вераськизы Сеп шур сьӧрысь тулыс юосты кизем бере куинь гектарлэсь ятыр сикез кораны, лӥялъёссэ порылыса выль ӟеч музъем усьтыны. Вазь ӵукнаысен бер ӝытозь вань гурт калык отын ужаз. Нырысь араз ик колхоз отысь 20 центнерлэсь ятыр чабей кутсаз. Сыӵе няньлы артысь Лудошур гуртысь калык вожъяскьыны ӧдъяз. Солэн музъемез выльвылэн артэ вал. Мукет араз со бусыын кык гуртысь воргоронъёс куспын ӟеч музъем понна жугиськон пуромиз. Одӥгез зырен, мукетыз пуӵен шонасько. Мон пинал мурт но эшъёсыным со "ожмаськонын" вал. Музъемез таламзы пумысен сельсоветэ но, районэ но вазиськылӥзы, нош юрттӥсь ӧз луы. Выльвылэз Лудошуръёслы сётӥзы. Со понна милям колхозмылы висъязы соослэсь Квалуд гурезьзэс. Быдӟалаен со кык поллэсь бадӟым луоз. Отчы гырыны но кизьыны ветлӥзы милям бусымы пыр. Бӧрысь тодмо луиз, Лудошуръёс землеустроителез зол куноятӥллям: пыжем ӟазег, пуд чечы но мукет сиён-юон кузьмаллям. Нош Палым гуртысь нылкышноос гужем котькуд ӵукна бакча берысьтымы шур дурысь возьёсты турнаны ветлылӥзы. Ми дорысенымы соос уло вал вить иськемын. Таиз но-а меда землеустроительлы кузьмаськонэн герӟаськемын вал. Али ке но сое валаны уг быгатӥськы. Пересьёс со пумысен номыр ӧз поттылэ. Гуртысьтымы одӥгез кибашлы воргорон Ефрем Игнатьевич Лекомцев колхоз кылдэмлэсь азьло ик мылкыд кариз кебит пуктыны. Солы юртӥзы бускельёсыз но. Герыосты, усыосты, уробоосты тупатъяз но выльзэ лэсьтылӥз. Бӧрысь сое кебит возиськод шуыса кулаке куштӥзы. Гурт калык кӧня пумитъяськиз, ёросэ но уно бумагаос гожъязы. Ваньмыз пайдатэм луиз. Нокыӵе янгыштэм адямиез палэнэ келязы. Озьы со нокыӵе ивортэк чиптэм-чаптэм ышиз. Нош корказэ колхозлы сётӥзы. кузпалыз куинь нылпиен огназ кылиз. Бускельёсыз солэсь ӧз палэнске, пичигес улон юрт пуктӥзы. Колхозмы арысь аре юнманы кутскиз. Муосты ӟеч утялтэмен, уно ю тысь люкаськылӥз, котькуд трудоденьлы кык-куинь килограмм нянь висъяллязы. Война кутскемлэсь азьло монэ, дышетскемед вань шуыса, счётоводэ пуктӥзы. Одӥг тулыс районысь план сётӥзы 0,30 гектар вылэ, пе, кубиста мерттоно. Нош ми солэсь ӝыныяз гинэ будэтоно кариським. Со котырын берганы пересь нылышноосты юнматӥмы. Музъем висъямы тымет борды. Сӥзьыл туж ӟеч удалтӥз со. Турдоденьлы уд люкылы ук, котькуд семьялэн аслаз вань. Нокытчы но кутӥсь ӧвӧл. Соку вераським промкомбинатэн кызь вышкы сылалтыны. Ву кынмемлэсь азьло соосты тыметэ выйытылӥмы. Нош тулыс йӧзэ кораса поттылӥм но кык автомашина медъяса Иже нуимы. Базарын сое вакчи дыр куспын вузам. Озьы ваньбур ӧз изъянмы, колхозлэн кассаез но кӧнялы ке узырмиз. Улонысь со учыръёсты, адӟем суредъёсты куинь ар талэсь азьло гуртлэсь праздниксэ ортчытонын егитъёслы пыр-поч мади. Табере со аръёсы улэм но ужам пиос но нылкышноос улэпесь ӧвӧл ни. Музъемез гыро но кизё, пудоосты утялто соослэн нылпиоссы. Гуртлы синмаськыса лэся, татчы улыны лыктэмын палэнысь егитъёс но. Котькудӥз асьсэлы кельшымон чебер юртъёс пукто, нылпи будэто. Гуртмы пыре Игра районысь "Родина" колхозэ. Бускельёсылэн верамзыя, хозяйство, пе, азьло сямен ик данзэ уг ышты. Нянь будэтонын, пудо вордонын азьпал радын ветлэ. Соин ик Сеп но Пежвай гуртъёс берло дыре туссэс воштӥзы. М. Мосов. Нош ик - асьмеос? "Курск" подлодкалэсь выемзэ эскеронъя правительственной комиссилэн кивалтӥсез И. Клебанов вераз: бырем морякъёсты сентябре поттылыны кутскозы, нош подлодкаез - ӝыны ар ортчыса. Россия вань ужез ас кужыменыз быдэстыны чакла - кытысь ке кылдӥллям мур вуосын ужась водолазъёс но. Калыкез сурало-пожало Останкино башняын тылӝу но "Курсклэн" быремез - Басаевлэн ужез, ивортэ АФР, Кавказ орг вылэ чӧлскыса. Басаев, пе, 25 сюрс доллар сётэм башняысь технической службаын ужасьлы федеральной войскоослэн Чечен телевиденилэсь юртсэ куашкатэмысьтызы пунэмзэ берыктон понна. Со ик, пе, кыл тупатэм "Курскысь" одӥгеныз морякен. Соиз аслэсьтыз улонзэ жалятэк, Чечен калыклы умой лэсьтон понна лодкаез пуштытэм. Россиысь кивалтӥсьёс нокыӵе но ӧз кариське, таӵе супыльтонъёсты кылыса. Басьтэмын "Интернет" пыр. Мертчан ӵужо, мертчан ӵужо... Етӥн бусыысь репортаж Шаерамы мыно ӟырдыт бусы ужъёс. Куазь мултэс зорылэмен, кысык ужъёс тымиськизы кадь. Ваньзэ огдыре быдэсъяно: юосты арано-кутсано, пудо сиён дасяно, кын улэ гыроно, ӟег кизёнэз йылпумъяно но етӥнэз ишконо. Элькунамы вань районъёс пӧлысь самой трос уй пал буртчин будэто Играысь музъем ужасьёс, сюрс гектар пала. Нош татысь "Рассвет" гурт хозяйстволэн 160 гектар етӥн лудэз. Ваньмыз со ишкемын но суслоосы ӝик-ӝик тыремын. Тани али Мазьги (Лонки-Ворцы) гурт вӧзысь етӥн бусыын вазь ӵукнаысен бер ӝытозь шулдыр ужгур чузъяське. Гурт калыклы юрттыны лыктӥллям Игра черкогуртысь ужтэк кылемъёс но. Соос пӧлысь огез - Елена Краснорудских - туспуктэме но шедиз. Дэмен, чебер куазен вожмаськыса сямен тыршо воргоронъёс но кышномуртъёс, кӧсам етӥн культоосты утялто, трактор тележкае ӝокто. Кысык уж ӧръяськемын. Механизатор Николай Емельянов шумпотэ, ӝутскем мылкыдын ужа. Азьло, пе, пичи Т-40 тракторен гинэ тырши, нош алигес ӟеч МТЗ-82 ("Беларусь") сётӥзы. Кызьы бен таӵе кужмо техникаен урод ужалод. Бадӟым опытэн тракторист дырыныз уг лыдъяськы. Гужем, пе, секыт ке но йӧтэ, ӝожтӥськеме уг поты, вань ужъёсты дыраз быдэстэммы потэ. Со бордысь уго потэ хозяйстволэн азинсконэз но гурт калыклэн улон-вылонэз. Макем ӟеч урожай будэтӥд-утялтӥд, сокем бусьтыргес улод, кассае уногес уксё пыртод. Бусыын тыршисьёс доры ӵем вуылэ хозяйстволэн кузёез Иван Чирков. Чырткем кивалтӥсь нокинэ уг вунэты. Нош етӥн будэтон сярысь нимысьтыз сюлмаське, Зураысь етӥн заводэн умоесь кусыпъёс тупатӥз. Со но хозяйстволы трос юрттэ. Кызьы, пе, сотэк, шуо заводысь кивалтӥсьёс, хозяйствоос милемлы етӥн будэто, ужаны луонлык сёто но ми но соослы кимес дыраз мычиськом-юрттӥськом. Куспазы огкылъя ужало. Г. Романов. Етӥн культоен тырме машина. Механизатор Николай Емельянов. Елена Краснорудских шумпотыса ужа. Туспуктэмъёсыз В. Беломорскихлэн. Нылпиослы шулдыр Сарапулысь А. С. Пушкин нимо горсадын калык уг бырылы. Я нылпиослы концерт, я асфальт вылэ суредаськон. Татысь ик адӟод пиналъёсты серекъятӥсь клоунэз но. Туж шулдыр ортче концерт-марафон. Нылпиослэсь шутэтсконзэс радъяны коньдонэн юртто спонсоръёс - пыдкутчан, ликёр но водка поттон удысъёслэн кивалтӥсьёссы. Горсадын туэ нош ик пусйизы А. С. Пушкинлэсь вордскем нуналзэ. Нылпиос лыдӟизы кылбуръёс, Н. К. Крупская нимо библиотекаын ужасьёс соосын ортчытӥзы викторина. Гужембыт татын шулдыр вал. Пиналъёс понна - ваньмыз: дискотека, спортъя эстафета, шахматъя турнир, крезьгуро кафе, сяськаосыз адӟытон, киужъя усточиослэн ӵошатсконзы, технической творчествоез возьматон. Горсадын ужасьёс кинлэсь ке юрттэмзэ гинэ витьыса уг уло. Кылем арын асьсэ кужымен поттӥзы 104 сюрс манет, со пӧлысь 26 сюрсэз - нылпи аттракционъёс понна. В. Лагунов. Гажано гожъясьёсмы но лыдӟисьёсмы! Россия Федерациысь пенсиосъя фондлэн куременыз валче чик ӝегатскытэк басьтыны куриськом республикаысьтымы пенсиосъя фондлэн отделениысьтыз пенсиосъя страховать карон свидетельствоос но соослэсь номеръёссэс "Удмурт дунне" газетлэн бухгалтерияз 444-265 телефонъя азьланяз гонорар тырон вылысь ивортыны. Лэчыт ужпум - Лыктэ, басьтэ, чорыгмы ческыт: не шӧм, не кузьыт, зарезьын будэмын, вышкыын сылалтэмын... - Арбуз, виноград, дунтэм сервелат... - Басьтэ, эн кошке, мукетъят но коже. Озьыгес вуззэс ушъяса ӧте вал басьяськисьёсты купецъёс азьвыл. Али куараез быдтыса кесяськонэз ӧвӧл -вузкарисьёслы куддыр сиськыны но вис ӧвӧл, пичиез но бадӟымез но туж ӟеч тодо уго городысьтызы яке селоысьтызы тужгес яркыт "достопримечательностез" - рынокез. Чурен мыно отчы арня нунал но, арня вискын но. Малы артысь магазинэ уг пыро-а? Кисыысь векчи манетъёс огпол гинэ лыдъямын ӧвӧл ни уго. Нош со ик кило колбаса рынокын ог дас манетлы дунтэмгес. Колбасаен йырин ӧвӧл? Ма кӧй-вӧй, рожки-лапшалэн но дунъёссы манетлы пӧртэмгес. Кызьы шуо, копейка манетэз, манет дассэ шыръя. Ӵошатон понна ойдолэ ай утчалом ӵуказелы сиён дасяса. Шуом, тон, лыдӟись эше, магазинысь басьяськод, мон - рынокысь. Ӵукна асьмеос мар сииськом? Пӧзьтыны ке мылмы потэ, ӝук, вӧзаз яке кофе, яке чай. Нуназе - салат, шыд но маке ӝот-ӝотсэгес, ну мед луоз чорыген рис. Ӝыт яралоз губиен картошка. Кӧня луиз ай? Магазинын Рынокын греча - 20 манет 17 манет рис - 13 манет 11 манет скал вӧй (пачкаез) - 12 манет 9 манет йӧл - 6 манет 40 копейка 5 манет но 60 копейка кофе (гранд, 100 грамм)- 42 манет 28 манет чай ("Беседа")- 13 манет 10 манет кияр - 6-7 манет 5-6 манет помидор - 12 манет 8-10 манет майонез - 5-6 манет 4 манет сӥль - 52 манет 45 манет чорыг - 29 манет 26 манет Картошез, кубистаез ум лыдъялэ, оскиськом, бакчаяды удалтӥз шуыса. Но сотэк но огпол ветлэмамы 40 (!) манет пала шыръям. Зэм, басьтэм сиёнмес вузкарись бере ик контрольной вес вылын мертасалмы ке, та лыдпус пичигес кыльысал. Но кытын ӟечгес шыръян сярысь тӥ асьтэос но ӟечгес тодӥськоды, озьы-а? Соку малы мон такема базар сярысь одо чирдӥсько? Соин, Ижысь гажано басьяськисьёс - тӥ берпуметӥ нуналъёссэ лычсузьымонады шыръяськоды на, угось 1-тӥ сентябрьысен тӥ мукет шыръян амал утчано луоды. Ӵуказеысен кужыме пыре Ижевск город администрацилэн " вузкаронэз радъян сярысь" 352 номеро постановлениез. Соя ульчаын, липеттэм базаръёсын холодильникъёсын утиськисьтэм ӝог изъянмись сиён-юонэн вузкарыны алэмын. Мар бен пыре ӝог изъянмись сиён-юон пӧлы? Нимысьтыз список лэсьтымтэ ай, но санэпидемстанциысь врачъёслэн лыдъямзыя, нырысь ик: вӧй, майонез, курег пуз, сӥльлэсь но яорыглэсь консерваос, собере - конфет- печення, чай, кофе... Табере валады-а, ӝоген сӥльлы-вӧйлы ӵапак со артысь магазинэ ик пырыса, мултэс даслыктэс кельтоно луоды шуыса? Но эн сюлмаське, со понна тӥледды вузкарись пальпотыса пумиталоз, вуздэс "пожалуйста" шуыса мычоз, черодын но калык сямен сылоды: пыд вылысьтыды пыд вылады тэтчатэк, ӟонгырам чиньыостэк пеллятэк. Со сяна, ичигес алдалозы, (дыр?), ичигес кӧткылен курадӟоды (эпидемиологъёслэн верамзыя, адямиос ӵемгес отравиться кариськыло базарысь басьтэм уродмем сиён-юонэн). "Ӵапак калыклэн тазалыкез сярысь сюлмаськыса кутэмын ук та постановление, оскытӥз монэ пумиськылыкумы Ижевск горолэн администрациысьтыз рынокъёсъя но услугаосъя управленилэн кивалтӥсез Лидия Лукьянчикова. - Вылаз ик, администрация ас тодэмезъя гинэ уг ужа, постановленилы пыкъет луиз туэ 2-тӥ январе поттэм "Сиён-юонлэн ӟечлыкез сярысь" федерально закон но Удмурт Республикаысь СЭС-лэн гожтэтэз". Мон, ӵемгес ачим но рынокысь сиён-юон басьсясь мурт, дурбасьтэм карисько: - Но соку рынокъёс пытсаськон калэ вуозы ук! - Ужамзы потӥз ке, уз пытсасьаке. Ми вузкарыны ум алӥське, но мед кылдытозы ӟеч вузкарон интыос. Малы ужбергатӥсьёс пумитъясько кынтӥсь оборудование пуктыны? Коньдонзэс жаляло, тазьы умойгес ук. - Нош вань-а сыӵе луонлыкъёс? - Вань. Тодӥськоды но-а, куинё ар талэсь азьло колбасаен но тазьы вузкаризы. Кӧня ог-огмылэсь нерваосмес быдтӥм, нош табере учке: котькуд рынокын али колбаса кынтӥс ӝажыосысь гинэ вузаське, сое сиыса уродмыны кышкытлык ичигес кыле, озьы ук? - Озьы ке но, Лидия Георгиевна калыкын пӧртэм малпанъёс ветло: куд-огез татыысь адӟо конкурентъёслэсь (тодмо подкомпаниослэсь) тушмонамзэс но, быръёнъёс азьын "шудонъёсты" но... - Уг тодӥськы, малы котькытысь "копаськон" утчаськоды. Номыр сыӵе-таӵеез татын ӧвӧл. Нош конкурентъёслэн нюръяськонзы ке сое шуиськоды, мед луоз соку зэмос нюръяськон. Тани асьмелэн ньыль валтӥсь продовольственной компанимы: "Городторг", "Аспэк", "Индустриальной" но "Иж". Соос басьяськисьлы вань луонлыкъёс кылдыто: югыт, шуныт магазинъёс, турлы пумо сиён-юон, сое изъянмемлэсь утись оборудование пӧртэм услугаос... Конечно, ваньмыз та понна сиён-юонлы дун кӧня ке ватсаське. Нош мар рынокын? Отын басьяськись но, вузкарись но асьсэды уг дунъяло. Малпаськоно ке, озьы ик вань кадь. Но мар меда та постановление пумысен малпа Ижысь Центральной рыноклэн кивалтӥсез Герман Ким? - Валамон, та постановление монэ ӧз шумпотты. Нокызьы но уг оскы ваньмыз та калык сярысь сюлмаськыса лэсьтэмын шуыса - ну ӧвӧл милям сиён-юонмы вылэ ӝожтӥськонъёс. Бен, милям котькуд вузкарисьмылэн ӧвӧл холодильникез, но рыноке сиён-юон ваиське нуналлы вузамон гинэ. Соос шуо, сиён-юон, пе, гаражъёсын-кытын возиське, нош кин ке эскериз-а? Бен, магазинын сярысь милям уродгес услугаосмы, но со понна дунъёсмы но пичиесьгес, малы ке-а огшоры калык (нош со пӧлысьтымы тросэзгес) рыноке лыктэ? Соин, вылды, сиён-юонэн вузкарись валтӥсь компаниослы уг кельшы соослэн быж вылазы султэммы. Мон валасько, та постановление вӧзы - вузкарисьёсты утён сярысь постановление кутысалды на ке. - Кытчы али мынозы соос? Кузёоссы соку ик холодильникъёс басьтыны уз быгатэ ук. - Неужто тӥледды зэмзэ но со гинэ шугъяськытэ? - Уг, барыш поттон но, конечно, но адямиос но жаль пото. Ну таиз ини "сюлмаськемъяськон". Но вань Герман Петровичлэн верамаз зэмез. Гажаськом ми рынокез, котьма кар. Сотэк ватсам пенсимы данаклы вазьгес бырысалыз, дыр. Ма пенсионеръёс гинэ-а, узыр калык но уг возьдаськы базарысь басьяськыны (домработницаоссэс ысъяло). Туннэ мон нимысьтыз саклык уг висъяськы вузкарисьёслэн но басьяськисьёслэн малпанъёссылы. Соос тодмо: вузкарисьёс кышкало ужтэк кылемлэсь, басяськисьёс - мултэс кисьтанлэсь. Но оскисько, вань та сурым калыкез усыкмытытэк ортчоз: яке ужбергатӥсьёс буйгалозы но холодильник басьтозы ик (уз пытсаськы рынок!) яке асьмеос дышетском туала куронъёсъя ужась магазинъёслэн "гажано басьяськисьсы" луыны. Нош али одӥг нунал вань на 1-тӥ сентябрёзь, сурым кыстӥськоз октябрёзь- ноябрёзь (ужало ук али ке но кассовой аппаратъёстэк), нош мукет городъёсын но районъёсын сыӵе постановление кутозы, оло, уз ай Выль арозь соин ик - шыръялэ! Зинаида Рябинина. ВАЛЭКТЭ ЮРИСТ Сэрегез дася адвокат Лилия Шкляева Улон интыме выльдысал КаРтэным люкиськыса но улон интыме воштыса, нылыным ӵош вуи одӥг комнатаен квартирае. Комнатамы бадӟым, кык укноен. Сое кык висъетлы люкыны луысал. Озьы ик нимаз висъяме потэ ваннаез но туалетэз. Кытысь ке кылэме вань: квартира пушкысь борддоръёсты вошъяны яра, пе, домоуправление лэзьыса гинэ. Улон интые приватизация пыр аслым басьтэмын бере, малы меда мон кинлэсь ке юалляськыны кулэ? И.ПЕРЕВОЗЧИКОВА, Ижын улӥсь. Тӥ умойтэм лэсьтӥськоды, улон интыдэс асьтэ тодэмъя выльдыны дасяськыса. Тӥ шонер лэсьтӥськоды, таӵе юанэн юристлы вазиськыса. Бадӟым юртъёсын улон интыосты но, улонтэм интыосты но выль сямен инъяны лэзе нимысьтыз комиссия гинэ. Тӥни малы тӥ гожтыса куронэн вазиськыны кулэ улон юртъёсты тупатъян предприятие (азьвыл сое домоуправление яке жилучасток нималлязы). Куд-ог ужъёсты лэсьтыны со уз лэзьы. Алэмын юртъерлэсь секталазэ ас вылазы возись ёзъёсты исаны (ӟуч сямен � несущие конструкции). Йӧтскылыны уг яра юртЪерлэсь тусбуйзэ чеберъясь интыосы, тылпу кысон тӥрлык борды. Нялтас вераса, балконъёсты но лоджиосты пиялаен шобыртон пумысен озьы ик гожтэтэн вазиськоно. Зэм, тазэ куронэз адямиос но, улон юртъёсты тупатъян предприятиос но сокем ик санэ уг басьто. Одӥг комнатаез кыклы висъян пумысен но юан кылдэ. Выль висъет (комната) медаз луы 9 квадрат мертлэсь пичи но 2,5 метрлэсь сюбег. Пеймыт команатлэсь, коридорлэсь, ванналэсь, туалетлэсь быдӟалазэс будэтыны уг яра улон инты чотын. Атаелы сётӥзы машина Атае ожын сӧсырмиз. Алигес солы дунтэк "Ока" машина сётӥзы. Тазалыкез начар ни бере, весь малпаське кулон сярысь. Марысь-мар ке, кинлы кылёз автомобиль? Н.П. Юанлы валэктон сётэ "Ветеранъёс сярысь Россия Федерацилэн Законэзлэн 14-тӥ ёзэтысьтыз (статьяысьтыз) 20-тӥ люкет (пункт). Отчы воштонъёс пыртэмын 2000-тӥ арын 2-тӥ январе. Быдӟым войнаын инвалидлы дунтэк сётэм машинаез выжтыны луэ музонэзлы ӧлексы муртлы, таизлэн правоез вань ке сыӵе транспортлы. Таӵе право сярысь верамын "Россия Федерациын инвалидъёсты улон-вылонын утён сярысь" Законын. Со сётӥське ожын сӧсырмемъёслы но, пиналысен инвалид кылемъёслы но, тазалыксыя руль сьӧры пуксьыны быгато ке. Таиз пумысен документ лэсьтэ медико-социальной экспертизая бюро яке врачъёслэн комиссизы. Бызи, люкиськи... Бызи 1965-тӥ арын, люкиськи 1975-тӥ арын. Кузпалъяськем сярысь свидетельствоме люкиськыкумы но ваньбур люкыкумы сётоно луи судэ. Сое берен ӧй басьты ни, ноку но кулэ медаз лу ни шуыса. Янгышаськем. Ӵыжы-выжыосылэсь кылем ваньбур (наследство) басьтонэн валче шуак кулэ луиз кузпалъяськем сярысь документ. Сое кудаз ке загсын сётозы меда? И.ВОРОПАЕВА. Люкиськем муртъёслы сыӵе свидетельство уг гожто ни. Но загсысь курыны луоз кузпалъяськылэм сярысь справка. Солэн кужымез свидетельстволэн кадь ик. Пие дасяське армие Абдарно кадь, пиелэн армие мынон мылкыдыз бадӟым. Солы 18 арес ӧвӧл на, визьмыз но сомындагес. Укыр куриськиз ке, али ик армие уз басьтэ-а? В.СОБОЛЕВА. Эн курдалэ. "Воинской обязанность но военной служба сярысь" Россия Федерацилэн Законэзъя армие нуо 18-27 аресъем пиосты гинэ. Вормонлы - 55 ар Удмуртиысь школьникъёс - фронтлы Война аръёсы тушмонэн ожмаськонэ пырисько пиналъёс но. Дырызлэсь вазь мӧйымыса, толло дышетскисьёс кошко фронтэ, султо заводъёсысь станокъёс доры, пуксё трактор но комбайн руль сьӧры. Соос вошто войнае кошкем атайёссэс, бадӟым агайёссэс но сузэръёссэс. Озьы Сарапулысь ог сюрс пиос но нылъёс ужало кирпич шуккон заводын, нюлэс дасянын, дӥсь но пудкук вурон мастерскойёсын. Воткинскысь 2 номеро училищеысь тросэз дышетскисьёс мыно татысь машина поттон заводэ. Азязы пуктэм куронъёсты соос 2 поллы но солэсь ятыргес быдэсъяло. Ижысь 31 номеро школаысь Лия Филатова, Галя Густенева но мукет нылъёс уй- нуналзэ ортчыто городысь вуриськонъя мастерскойёсын. Ижысь машина поттон заводысь егит нылаш Надя Дюпина, нормазэ 2-3 поллы быдэсъя. Со огдыре кык станокен ужаз. Мӧйыослы ӟеч юртто гурт пиналъёс но. 1941-тӥ арын гужем ик соос пото колхоз но совхоз бусыосы. Нылга ёросысь "Яг" колхозысь пиос фронтэ кошкем бере, татысь бусыын ужаны нокинлы луэ. Гуртысь Екатерина Кардопольцева ю-нянез валъёсын октыны ӝог дыше. Но солы юрттӥсьёс тырмымтэен, ужез ӵемысь уретоно но луылӥз. Соку анаез вӧзы итӥське 15 аресъем Толя Кардопольцев. Пияш ас гуртоосызлы сяна, бускель "1-тӥ Май" колхозлы но 17 гектар вылысь юоссэ октыны юрттэ на. Старо-Зятцинской ёросысь "Авангард" колхозлы но ӟеч юртто пиналъёс. 1942-тӥ арын татысь ог 70 процент муосты дас-дас вить аресъем 30 пиос гыро. Пӧлысьтызы Лёня но Виктор Владыкинъёс, Борис но Толя Ведерниковъёс, Павел Бармин, Коля Попов, Миша Шубин но Якуб Рахматулин но трос мукетъёсыз нормазэс нуналлы быдэ мултэс быдэсъяло. Валъёс лябӟемен, одӥг плуг сьӧры 2-сэ кытконо луэ. Озьы пиналъёс 6 часысен ӝыт 10 часозь бусыын тыршо.. 1940-тӥ аръёслэн пумазы странаямы ужаны кутске тимуровской движение. Нырысетӥ тимур командаос кылдо Ижысь 27-тӥ номеро школаын, Сарапулысь но Киясовоысь шор ёзо школаосын. Война аръёсы соослэн лыдзы трослы будэ. Война аръёсы Удмуртиын 950 Тимур команда лыдъяське. Соос 4 сюрс 730 фронтэ кошкемъёслэн семьяоссылы юрттӥзы. Тани ма гожтэ Сарапулысь Г. Чухланцева: "Бадӟым тау Тимур командаысь пиналъёслы. Соос мыным туж трос юртто. Нуналлы быдэ эскеро-чаклало: выжме мисько, ву, пу пырто, азбар котырме утялто. Картэ оже быриз. Кык пиосы - фронтын, кыкез, пичиосыз, бордам кылемын на". Тимур командаысь пиналъёс юртто фронтэ кошкемъёслэн семьяоссылы пу вандыны- пильылыны, бакчаоссэс утялтыны, пиналъёслэсь дӥсьсэс выльдыны. 1943-тӥ арын Шаркан ёросын 92 таӵе команда лыдъяське. Соослэн кужыменызы 64 семьяослэн кенерзы тупатэмын, 32 корка утялтэмын-сузямын. Со сяна, пиналъёс бичазы 94 центнер эгыр, 29 центнер курег кыед, 219 центнер корт. Дор палъёсазы кылем кышноос но пиналъёс юн кусып возё фронтэн, асьсэлэн ужъёссы сярысь гожъяло кузпалъёссылы но атай-агайёссылы. Ижысь 21-тӥ нылкышно школаысь дышетскисьёс юн кусып тупато фронтысь одӥгеныз артиллерийской полкен. Ог 1000-лэсь ятыр гожтэтъёс ысто соос полкысь ожгарчиослы. Тани ма гожтэ та школаысь 2-тӥ классын дышетскись нылаш: "Милям, ваньмылэн сямен, атайёсмы фронтэ кошкемын. Куд-огъёсыз соос улэпесь но ӧвӧл ни. Дуно ожгарчиос! Берыктэ пунэмзэ тушмонлы бырем агай-атайёсмы понна! Мед тодозы со сьӧсьёс, асьмеос кужмоесь шуыса. Нош ми тыршом "4"-лы но"5"-лы гинэ дышетскыны. Юрттом анайёсмылы гурт котырын". Бен, тыршизы, юрттӥзы... Быгатэмзыя матэктытӥзы Быдӟым Вормонэз. Н. Сандалов, Ужысь ветеран. Жильтыр вазизы гырлыос... Рос-прос адями улоназ огпол сюан ортчытэ. Кузпалъяськон герӟаськемын нылпи вордонэн но сое будэтонэн. Таиз сюан ортчиз Сьӧлт_�а ёросысь кыдёкысь Копки сьӧрын - Аман гуртысь Светлана бызиз Уть-Сюмси гуртысь Игорьлы. Сюан, со шоры палэнысь синмын учкыса, кык малпан кылдытӥз. Нырысетӥез: егит кузпалъёслы оскымон семья кылдытыны юрттыны быгато рос-прос анай-атайёс гинэ. Кыкетӥез малпан герӟаськемын удмуртлыкез валанэн. Та ёросын улӥсь удмурт калык ас улон сямаз мултэс трос ӟуч амалъёсты пыртэм ни. Со озьы луэ, анай кылдэ пичиысен ӟеч дышетонэз ляб радъямен, удмурт книгаосты, газетъёсты лыдӟымтэен, удмурт культура та пала лябгес пыӵамен. Вакчияк тазьы шуыны луысал: кытын уг басьто но уг лыдӟо "Удмурт дуннеез", отын куанерме удмурт калыклэн удмуртлыкез (али одӥг гинэ "Удмурт дунне" вуэ Уть-Сюмсиысь укмыс классъем школае). Калык люкаськылӥз клуб тыр Сюанчиос вуыку, Уть-Сюмси калык - егитэз но, мӧйыез но - клуб азьын но, клубын но тыраз вал ни. Машинаысь васькемъёсты соку ик клубе пыртӥзы шулдыр крезьгур ӧръяськем улсын. Сцена вылын, горд пильысэн но сяськаен ӝӧк сьӧрын - Уть-Сюмси гуртлэн кивалтӥсез В. А. Дряхлов, солэн юрттӥсез М. Л. Виноградова но сюанъёсты ортчытъянэ пыриськись дышетӥсь В. П. Иина. Тани Дряхлов, крезьгур шудэмъя, сцена вылэ эмеспиен выль кенэз ӧте но кузпалъяськонлы сӥзем ужрадэз усьтэ, нош юрттӥсез ортчытэ кузпалъяськон йылолъёсты. Егитъёс гожтӥсько нимысьтыз книгае. Соослы сёто кузпалъяськем сярысь свидетельство, нимтэм чиньыосазы зарни зундэс тырыто, чупаськыто но нырысьсэ, кузпал луэмзы бере, ӵошен вальс эктыто. Табере егитъёсты уно сяськаосын ӟечкылало анай-атайёссы, ӵыжы-выжыоссы но эшъёссы - озьы егит Бияновъёс сяськаос пӧлы выё. Кузпалъёсты ӟечкыланы озьы ик нимысьтыз лыктэм "Уть-Сюмси" эштослэн кивалтӥсез А. Н. Деньгина. Бадӟым сяська керттэт сётыса, со шуиз: - Гажано егитъёс! Ми вунэтӥмы ни вал кадь, ку сюан ортчытъямы та клубамы. Соин ик мон туж шумпотӥсько выль семья кылдэмлы. Ӧтисько мукет егитъёсты но: паръяське но улэ вордскем гуртады. Сотэк ми ёрмиськом ужась киослы. Нош Игорьлы но Светланалы вань сюлмысьтым шудо улон сӥзисько. Ужрад азьланьтӥське. Сое нуэ Уть-Сюмси школаысь дышетӥсь Валентина Поликарповна Ившина. Со егитъёслы, соосты визьнодаса, кузьымъёс сётъя, нош бӧрысьгес мунё сётэ но сое пичи нылпиез музэн биняны косэ. Ужрадлэн та люкетэз пальпотон но ӟеч мылкыд пыртэ. Пичиесь учыръёс вискын азьло ик дасям крезьгур дугдылэ но вошъяське. Крезьгурез ӧръя культура юртлэн чеберлыкъя кивалтӥсез Николай Капачинских. Ваньмыз умой ортчиз, но - ӟуч кылын. Выль ӟуч амалъёсъя. Адямиос куспын ваньмыз сямен вераськылонъёс удмурт кылын вал, егитъёс гинэ куспазы ӟуч сямен вераськылӥзы. Кузпалъяськисьёслэн адӟисьёссы, Сергей Захаров но Светлана Кутявина, кивалтӥзы вань сюан ужрадъёсын. Аманысь ныл бызиз Уть-Сюмсие Шонертоно на тани мае: Игорь, эмеспи, Сьӧлтала Ижысь куноосты пумитаны ветлэмез бере, клубе выль кенэз ваён понна мыноно луэ на Аманэ, отысь Светланаез йырдун тырыса басьтон вылысь. Зэм, сое егит сюанчиос капказьын пумитало но ӝогак гинэ пырыны уг лэзё, олокыӵе но юанъёс сётъяло: - Кытысен нырысьсэ пумитад Светаез? - Кыӵе сяськаосты яратэ выль кенмы? - Тонэ гажаса, кызьы вазиське тыныд Света? - Мае со тужгес но сиыны яратэ? - Кыӵе синмо со?.. Эмеспи, шонер валэктон уг сёты ке, коньдон тыроно луэ. Собере солы выль кенэз утчано луиз. Огшап улыса, вуоно кузпалызлэсь туфлизэ лушказы. Эмеспилы чик уг сёто буйгатскыны - сыӵе ини егит сюанчиос. Тани мукетъёсыз куинь "Москвичъёсты" чебермазы но, "коньдонэн басьтэм" выль кенэз нырысетӥяз машинае пуктыса, Копкиетӥ нуизы Уть-Сюмсие. Асьсэ ёросын ке но, мынонэз ог кызь вить иськем. Тӥни озьы гинэ вуттӥз эмеспи выль кенэз клубе. Клуб Уть-Сюмсиын. Нош ныллэн анай-атаез Аманын уло. Ӟуч сямъя гожтӥськон бере сюанэз кутсконо вал Аманын. Соин сюанчиосты, табере КамАЗ-э пуктыса, шонер сюрестӥ вуттӥзы Аманэ - берыктӥзы ныл ласянь лыктэмъёсты но, пи ласянь вуэмъёсты но. Тунсыко тодмет: эмеспилэн анай-атаез нылэз вайыны дораз ӧз мынэ. Сыӵе, пе, татын сямзы: уг яра. Сюан - со сюан. Сюанчиос умой шулдыръяськизы. Но ӟуч сяменгес. Арганчи Николай Капачинских ик вал. Арганэн туж умой шудэ. Калыкез ульчаын но эктытӥз. Ӟуч кырӟанъёс чузъяськылӥзы. Нош удмурт кырӟанэз дэмлаку чузъяськылӥзы удмуртъёсыз. Сюанчиос-удмурт кышномуртъёс пӧлын вал удмурт дэремен дӥсяськемъёсыз но. Ӝожомыса верано луэ: бӧрысь удмурт сюан кырӟанъёс ӧз ни кылӥськылэ. Таӵе палдурес улон-вылонэнымы сэрен, серемес учыр но кылдылӥз. Сюанчи, Аманын вордскем но али Копкиын улыны кутскем Евдокия Шихова, туж кырӟась но жингрес куараё. Зэм, дышетскемез ичигес. Огъя кырӟан сяменыз пионеръёслэсь кырӟанзэс но мытӥз: Ленин, пе, Мавзолеяз кылзэ ужын вормонъёс басьтэммы сярысь кырӟаммес. Соиз гинэ ярам ни: сюанчиосты серекъятыны быгатэм интыяз луиз. Котьма ке но, сюанчиослэн син азязы котьку вал чебересь эмеспи но выль кен. Игорьлы кызь куинь арес. Со дышетсконзэ ӝоген йылпумъялоз но связист луоз. Светланалы кызь арес. Со - сиён пӧрась. "Уть-Сюмси" эштослэн кивалтӥсез уж но шедьтэм ни: Светлана сюдэ музъем ужасьёсты но пудо утисьёсты. Егит кузпалъёслы трос кузьымъёс сётъямын но уно ӟеч кылъёс верамын вал. "Кыӵе анай-атай, сыӵе ик нылпи", - тазьы шуо калыкын. Светланалэн анай-атаез пенсионеръёс ни. Аманын уло соос. Отын кызь одӥг корка. Удалтэм Дюпинъёслы - Игорьлэн анай-атаезлы. Соослэн куинез ик нылпизы - пиос. Ӝӧк сьӧрысен тумошо веран чузъяськиз: ойдолэ кескич Дюпинъёс понна сюмыкъёсмес ӝутомы! Нош малы соос кескичесь? Пи вордыса, выль кен вайыса, пе, семьязэс паськытатоно кариськиллям. Туж синмаськымон семья та Уть-Сюмсиын. Связистъёслэн семьязы. Атайзы, николай Алексеевич - связист-монтёр: телефонъёсты, радиоез тупатъя. Анайзы - почталэн начальникез. Куинетӥез пизы, Женя, школаын дышетске на ке, бадӟымъёсыз, Игорь но Владик - кыксы но связистъёс ни. Ужась мурт ужтэк уг пукы, утчась мурт шедьтэ. Тани Дюпинъёс атайзылэн кивалтэмез улсын сандык кадь йыг-йыг юрт пуктӥллям. Пудо но муш вордо (дас сизьым уморто). Чебер емышо садзы. Машиназы вань. Куспазы тупаса уло. - Выль кен, Светлана, туж умой семьяе шедиз, - верало адямиос. Озьы, дыр. Зэм, таӵе учырез но вератэк кельтэме уг поты. Оград Светаен Игорь малы ке ченгешиллям. Игорьлы Аманэ мыноно. Нош яратонэныз огъя кыл шедьтоз-а? Пиезлы юрттоно кариське атаез. "Москвичаз" пуксе, ог кызь вить иськем сюрес вылэ огназ потэ. Вуэ Аманэ, вуоно кенэныз но кудо-туклячиосыныз одӥг кыл шедьтэ но Светаез пиеныз пумиськонэ вае Уть-Сюмсие. Гажано анай-атайёс! Тодады вае ай: трос-а меда тӥ пӧлын таӵеосыз? Али Светлана картэзлэн семьяяз выль кен гинэ ӧвӧл, вордэм ныл кадь но. Сое котыр ласянь ярато бере, со но яратэ. Озьыен, выль кен шудо луыны кулэ. Нош шудо семьяын мед вордскозы сыӵе ик шудоесь нылпиос. Огнад уд улы Сюан но аран дыр. Шедиз, дыр, тазьы шуись но: аран дыр ук. Но шедьтӥзы ук машина Аманын но, Уть-Сюмсиын но сюанэ ветлыны. Шедьтӥз ук дыр "Уть-Сюмсилэн" кивалтӥсез клубе кожаны но егит кузпалъёсты ӟечкыланы. Бен, татын юнгес шӧдӥське калык сярысь сюлмаськемзы. Сьӧлталэсь уката кыдёкынгес ке но. Гурт кенешлэн тӧроезлэн В. А. Дряхловлэн верамезъя, гуртын али сю тямыс корка. Уж но уждун ласянь секытгес ке но, уг кошко. Уноез трос пудо, муш вордыны кутскиллям. Трос адямиосын вераськыса, ӟеч валано: кыдёкысь Уть-Сюмсиын но, Аманын но ог-огзылы котыр ласянь юрттыса уло. Тани Аманысь пенсионеркалы Е. Д. Блиновалы куатьтон сизьым арес ни. Со ноку но бызьылымтэ, ньыльдон тямыс ар ӵоже тыршем пудо вордонын но бусы ужъёсын. Али сюлэмшугъяське, ужась киос уг ни тырмо, кивалтӥсьёс чакланы чик уг ветло, телефон гинэ но уг ужа шуыса. Аманын улӥсь ичи бере, вань быгатӥсез пыриськиз сюанэ. Со но Уть-Сюмсие ворттылӥз. Ойдо, линия кыскемын, асьмелы ик огъя кужымен телефон пыртоно вал, шуизы солы бускельёсыз. Но пересьёслэн кивалтӥсьёслэсь ик юрттэт возьмамзы потэ. Уката ик урод сюресъёс. Соин герӟаськемын ук Аман гуртлэн азьпал улонэз. *** Таӵе мылкыд кылиз, Сьӧлта ёросэ сюанэ ветлыса. Копки сьӧрысь ас дуннеяз улӥсь удмурт калыклы юрттэт кулэ вылэм. Тужгес но - удмуртлыксэ берыктон ласянь. П. Скобелев. Туспуктэмъёсты дасяз Владимир Беломорских. Дас укмыс гинэ вылэм Россиысь радио ивортэмъя, Москва улосысь Лунево посёлоке интыяськем воинской частьысь пегӟем солдатъёс пӧлысь одӥгез, Максим Уженцев, вордӥськемын но будэмын вылэм Удмурт шаерын Воткинскын. Армие мынытозяз, ӟеч пияш вылэм со. Озьы ке но... Пегӟем солдатъёс асьсэды асьсэос быдтӥллям, соосты ӝегатыку, Максимлы дас укмыс арес вылэм. Луэм йыружез эскеро на. Вазиськон Та нуналъёсы "Единство" организацилэн Удмурт ёзэз шара гожтэтэн вазиськиз Кун Кенешлэн Тӧроезлы Александр Волковлы но Правительстволэн Тӧроезлы Николай Ганзалы. Отын верамын, ивор вӧлмытӥсь куд-ог изданиосын республикалы президентэз быръёнэн валче югдурез шонер уг суредало шуыса. Кун изданиос, вераське гожтэтын, огшоры калыклэн коньдонзы вылын возисько, соин ик кыӵе ке политик, яке группаос понна дурбасьтыны кулэ ӧвӧл. Газет бамъёсын но телеэкранын мынӥсь та выллем материалъёс саптало-куашкато кивалтон ёзъёслэсь данзэ, быдэс республикамылы изъян ваё. Туэ со сизьымдоназ потысал... Сизьым ар ӧвӧл ни асьме пӧлын одӥгез яркыт кизилимы Семен Александрович Самсонов. Ачиз кошкиз ке но, солэн ӝуатэм тылсиез ялан пиштэ удмурт калыкмылы. Уз кысы со вуись выль дауре но. Алигес "Удмуртия" издательствоын потӥз улонысь вазь кошкем писательмы сярысь "Воспоминания о Семене Самсонове" удмурт но ӟуч кылын книга. Сое печате дасян бордын куинь ар пала тыршиз писательлэн матысь эшез Леонид Емельянов. Малпанъёссэ вераны курыса, солы кӧня ке юанъёсын вазиським. - Улонысь кошкем писательёсмы сярысь данак гинэ тодэ ваёнъёсын книгаос потӥзы ни. Кызьы но мар бордысен басьтӥськиды тӥ та туж кулэ но бадӟым уж борды? - Одӥг ӵукна ужан интыям, "Долг" газетлэн редакцияз, "Удмуртия" издательствоысь жингыртӥзы но доразы лыкыны куризы. Монэн вераськизы книгапоттоннилэн кивалтӥсьёсыз И. М. Васильев но В. Н. Ившин. Соос ӵектӥзы Семен Самсонов сярысь книга дасяны. - Таӵе уж борды кутскылэме ӧвӧл, пӧрмыто меда? - пыкиськыны вырисько. - Мыло-кыдо басьтӥськид ке, одно ик выль книга вордскоз, - шуизы мыным. Со нуналъёсы ик пумиськи писательлэн кузпалыныз Мария Михайловнаен. Рос-прос вераським, чакламы кинъёслы вазиськыны. Мон тодматски С. Самсоновлэн архивысьтыз уно гожъямъёсын, пӧртэм документъёсын, солэн бадӟымесь съездъёсын но семинаръёсын вераськем текстъёсыныз. Собере малпаськи вуоно книгалэн путросэз сярысь. Малпанъёсме верай книга люкан бордын тыршем писательёслы Ф. К. Ермаковлы, З. А. Богомоловалы, Семен Александровичез ӟеч тодӥсь куд-ог эшъёслы. Вуоно книгалэсь сӧзнэтсэ Мария Михайловнаен эскереммы бере, сое сётӥ издательсвоын ужасьёслы. Отын сое умоен лыдъязы. Ваньмыныз авторъёсын вераськи но сьӧрлон улӥсьёсызлы гожтэтъёс ыстӥ Писательёслэн огазеяськонзылэн правлениезлэн нимыныз. Али шумпотыса вераны быгатӥсько: ваньмыз сямен авторъёсы сётэм кылзэс быдэстӥзы. Зэм, бускель республикаосын но Москваын улӥсь, Самсоновез ӟеч тодӥсь писательёс ӧзгес вазиське куронэлы. Коми кунысь Геннадий Юшков гинэ дыраз ыстӥз гожъямзэ. Но мон нокинэ уг пыкылӥськы. Бадӟым писательёслэн ужъёссы тырмыт, дырзы пичи но ӧвӧл, шӧдске, улонысь кошкем эшсы сярысь гожтыны. Таин валче Семен Самсонов сярысь книгамы кӧнялы ке бездытгес луиз, дыр. Но ма карод, кужмысь та борды уд кутскыты ук. Нош книга потэм бере, уноез писательёсмы, творчество удысын тыршись эшъёсмы шуизы: малы, пе, ӧд вазиське милемлы, одно ик Семен Александрович сярысь гожтысалмы ук. Вазиськыса вылысь, куд-огез озьы шуизы. - Но палэнысь писательёстэк но авторъёсты куамын пала. Солэсь но уногес луэ ке, гожъясьёс огкадесьгес малпанъёссэс верало. Лыдӟисьёслы со уг кельшы. Нош асьтэос кинъёслэсь тодэ ваёнъёссэс висъясалды? - Мон сямен, нимысьтыз нокинэ но висъяны уг яра, дыр. Котькудӥз автор ас сяменыз дунъет сётэ ни писательлэн творчествоезлы, улон-вылон сюресэзлы, обществомылэн улоназ пыриськемезлы. Котькудзэ лыдӟыса адӟиськод писательлэн улонэзлэсь кыӵе ке но палзэ, маке но выльзэ, азьвыл тодымтэзэ. Адямилэн улонысьтыз пӧртэм учыръёсыз син азе пуктӥськод. Писатель ачиз но адӟиське: ас сямъёсыныз, мылкыдъёсыныз, малпанъёсыныз. Тодмо тодосчи Ф. К. Ермаков рос-прос эскере зэмос улонысь басьтэм, документальной удысэз. Семен Самсонов та ласянь яркыт суредаз шаерамы вордскем но быдэс дуннелы тодмо луэм сӥё-дано адямиосыз - Антонина Пальшиналэсь, учёнойёслэсь П. К. Ощепковлэсь, В. Н. Паринлэсь но мукетъёсызлэсь тусбуйёссэс. Тодмо кылбурчи Владимир Емельянов уно аръёс ӵош ужаз Семен Самсоновен. "В душе он был поэтом" статьяяз солэн творчествоезлы вылӥ дунъет сётэ но возьматэ поэзия удысэ но егит дыръяз кутскылэмзэ. Солэсь ӟуч кылэ берыктэм куинь кылбурзэ та книгае сётэм. Ожысь, ужысь но журналистикаысь ветеран В. Н. Никитин писательлэн ёрос газетъёсын кусыпъёсыз сярысь вера. "Уг яра вунэтыны: со аръёсы ёросъёсын газетчиос ӧжыт вал, - гожтэ В. Никитин, - Нош сыӵе сӥё-дано писательлэн егит журналистъёсын пумиськонъёсыз соос понна бадӟым юрттэт вал луизы..." Удмурт литературамес ялан азинтон вылысь, Семен Самсонов дырзэ но кужымзэ ӧз жаля. Со уно аръёс ӵоже кивалтӥз "Советской Удмуртия" газетлэн редакцияз ужась литобъединениен. Со пыр ортчизы али туж тодмоесь писательёсмы Вячеслав Ар- Серги, Олег Четкарев, Виктор Шибанов, Анатолий Комаров, Николай Никифоров но уно мукетъёсыз. Семен Александрович паймымон быгатэ вал адямилэсь творческой уже пыриськон мылкыдзэ ӝутыны. Тӥни со сярысь тодаз вае азьвыл бадӟым партийной ужын но наука удысын тыршем адями Л. П. Ураков. Трос шуныт кылъёс писатель сярысь гожто солэн кузпалыз М. М. Самсонова, нылыз О. С. Самсонова, выныз писатель А. А. Самсонов, аспал адямиосыз Вуж Монья школаысь дышетӥсь М. З. Никитина, Баграш-Биграысь библиотекаын ужась А. Ф. Николаева, вань улонзэ нылпиосты дышетонлы сӥзем мурт али пенсионер А. И. Осипов, писательёс С. К. Карпов, К. Е. Ломагин, озьы ик Семен Александровичлэн пинал дырысеныз самой матысь эшез, сӥё-дано колхозник В. Л. Леонтьев. Лыдӟисьёслы кельшозы кадь потэ элькунысьтымы тодмо адямиослэн Егор Загребинлэн, Анатолий Уваровлэн, Фома Ермаковлэн, Зоя Богомоловалэн, Борис Саушкинлэн, Нина Пузановалэн, Милитина Гавриловалэн статьяоссы но тодэ ваёнъёссы. - Семен Александрович Самсоновлэн вордскемез дырысен 1-тӥ сентябре 69 арес тырме. Кызьы малпаськоды, Леонид Петрович, луысал на-а талэсь но ӟечгес кузьым дасяны? - Вераме потэ, данакез книгае поттыны дасям статьяос но мукет материалъёс ӧз печатлаське. Экономикаямы секыт югдур кылдэмен валче, издательство уг быгаты книгалэсь быдӟалазэ но, тиражзэ но будэтыны. Оскисько: азьланяз Семен Самсонов, солэн творчествоез, улэм-вылэмез сярысь статьяос, тодэ ваёнъёс печатласькозы на газетъёсын, журналъёсын, со сярысь вералозы но возьматозы радио но телевидение пыр. Потозы ай мукет книгаос но. Нош веранме йылпумъяса, тау кареме потэ вань авторъёсылы, "Удмуртия" издательствоын ужасьёслы удмурт литературамылэн классикез Семен Самсонов сярысь книга поттыны юрттэмзы понна. Издательствое пырыса, та книгаез басьтыны быгатозы мылкыд карисьёс. Гужем бере тол вуэ на Пичи Пурга. "Дружба" эштослэн Аксакшур фирмаяз пудо гидъёс котьку но тол азьын ӟеч дасямын луо. Соин ик татын алигес семинар ортчиз. Люкаськылӥзы ёросысь энергетикъёс но валтӥсь зоотехникъёс. Вераськон мынӥз толэз пумитан сярысь. Аксакшуръёс умой дасяськиллям. Фермаысь гидъёссы буямын, висёнъёсты алон вылысь эмъюмъёс пазямын. Хозяйствоысь кивалтӥсьёс сюлмаськиллям гидъёсысь выжъёсты выльдыны, липет пасьёсты пытсаны, электроприборъёсты сузяны-буяны. Районысь специалистъёс верамъя, фермаын чыры-пыры ужъёс кылемын на. Оглом пудоез туннэ ик гидъёсы пыртыны луоно ни. В.ТРОНИН. Адскисьтэм тылпу Та нуналъёсы Ижын улӥсьёс ӵукнаосы телевизорез учкыны ӧз быгатэ. Малы ке кӧняез ке каналъёс ӧз ужалэ. Оло, со Останкиноын потэм тылпуэн герӟаськемын? Тае сэрттон-пертчон понна вазиським республикаысьтымы радио но телетулкымъёсты вӧлмытӥсь центрлэн кивалтӥсезлы Виктор Григорьевич Жидковлы. Со валэктӥз: - Та учыр чик но Москваысь тылпуэн герӟаськемын ӧвӧл. Удмуртие "Останкино" башнятэк но чагыр ящикъёсты ужатыны быгатоз. Нош телевизоръёс уг возьмато Ижын гинэ. Мукет интыосын ваньмыз умой. Кык арня пала талэсь азьло куазь юн гудыръяз но Вараксиноысь вышкаез ӵашйыса ӧжытак уродмытӥз. Соин "Удмуртия" ГТРК но "Арсенал" чылкыт возьматыны ӧз быгатэ ни. Соосты тупатон понна ми ӵукналы быдэ кысӥськом программаосты. Ӝытазе вить-куать часын телевизорез учкыны луэ ини. Ӝоген ваньмыз тупатскоз. Нокыӵе кышкытлык милемды уг возьма. Марина Костылева. Азгынмем сюлэмъёс но куасьмем ньӧръёс Утялтӥськомы-а котырысьтымы инкуазез? Шонерзэ вераса, ӵакмытӥськомы гинэ. Нюлэскысь тодмо интыостӥд ортчыкуд синйылтӥськод али гинэ ай сяськаям, собере ик ини чылкак куасьмыны ӧдъям куакез яке адями киосын "вием" писпуэз. Кемалась вунэтоно ини тыро-буро улонмы сярысь зулёнэз. Та суредъёс шоры но учкылэ ай: марлы кельшо соос? Асэрказ будӥсь писпу борды мырӟиськем кыӵе ке уродос маке, таиз ньӧр чылкак чутырмем, нош та сяськаосыз шобыртэм номыре шӧдылӥсьтэм лултэм из. Та суредъёс но уг верало шат туж сюлэмтэм, туж кӧбертэм, туж азгынмем луэммы сярысь?! Удмурт Республикаысь Правительстволэн премиосъя кенешез ивортэ Удмурт Республикаысь Правительстволэсь премизэ сётон вылысь ужъёсты кутыны-басьтыны кутскемез сярысь. Со премиос сётӥськозы промышленностьын, лэсьтӥськон но гурт удысъёсын туэ басьтэм бадӟымесь вормонъёс понна. Премилы ӵектэм материалъёсты ыстоно 2000-тӥ арын 1-тӥ октябрёзь таӵе адресъя: 426007, Иж город, Правительстволэн юртэз, 114-тӥ комната. Юанъёсын жингыртыны луоз 52-53-31, 52-53-38 телефонъёсъя. Гожтӥськон - 2001 Ижын улӥськод ке, мын киоске "Удмурт дунне" газетлэн редакциез, лыдӟисьёсын кусыпъёсты юнматон вылысь, пӧртэм амалъёсты уже кутэ. Берло аръёсы тани пумен паськыт вӧлме "Информпечатьлэн" киоскъёсыз пыр гожтӥськон. Умой ук: кожиськод матысяз киоске, вераськод нимтулдэ - тыныд ӵукна ик мычо выль газет! Ӧд быгаты, шуом, соку ик лыктыны, вуод ӵуказе, коть усьсэ - газетэд нокытчы уз пыры. Почта ящик но эсьмаса кулэ ӧвӧл. Соиз но усто: гожтӥськон дун трослы кулэс, почта уго газетэз киоске вуттэмез понна дун уг басьты. Тани вуоно арлы таӵе дунъёс тупатэмын. 32 манет - тамында тырыса, газетлэсь вань номеръёссэ басьтоды ӝыны ар ӵоже. 64 манет - таиз коньдон тырмоз газетэз ар ӵоже басьтыны. Луэ пятницае потӥсь номерлы нимаз гожтӥськыны. Тодӥськоды ни, дыр, кайта со "куаёз", 16 бамен потоз, телепрограммаез но тазагес шрифтэн печатланы кутском. Таиз понна трос ик тыроно уз луы. 20 манет - тамында гинэ сылэ пятница номерлы ӝыны арлы гожтӥськон. 40 манет - таиз дун быдэс ар понна. Тӥ арнялы быдэ басьтоды телепрограммаен "Удумрт дуннеез". Тӥни сыӵе ужпум. "Информпечатьлэн" вань киоскъёсаз келямын ни тупатэм дунъёсын кагаз. Кытын ке пумит луизы ке гожтӥськон ортчытыны, яке мукет дун веразы-ӵектӥзы ке, ивортэ редакцие яке "Информпечатьлэн" кивалтӥсьёсызлы. Дырты эше, киоске! "Удмурт дунне" газетлэн редакциез. ШӦКЫЧ Очей Толилы - пӧсь салам Кузьым Базартӥ котырскон сямен Горей самоварлы синмаськиз. "Басьто ай праздник понна Насьтӥелы кузьым, мед шумпотоз", - малпаз со. Базарысь потыкуз, пумитаз тодмоез шедиз. Пумиськонзэс юлтошъёс пусйыны малпазы, кемалась ӧз адӟиське ни вал. Ӟузизы пумиськемзы понна, собере самоварез, пе, миськоно, кема мед чидалоз. Кузпалъёссы понна но ӧз вунэтэ лэзьыны: как не как ӵуказе нылкышно праздник. Горейлэн бертон сюресэз вольыт мед луоз шуыса кымалтӥзы на, азьланяз но, пе, мед кылдоз пумиськыны... Ӵуказеяз самоварез но ӧвӧл ни бордаз, коньдонэз но бырем, праздниклы гуртаз но ӧз ву Гореймы. Йырберзэ кормыштӥз, мур лулскиз: гуртэ коньдонтэк уд берты ук, кызь вить иськемез вамыштоно луоз пыдын. Юлтошлэсь ке шат пунэмано сюрес дун? - Осто, инмаре! Юэм йырыным, чатран люкет, тёпак вунэтӥськем адрессэ, толон вераз ведь вал, - ассэ даллаше ма карыны абдрам мурт. - Праздник нунал гурт палась но лыктӥсь уз лу. Коть изьыдэ кияд кутыса сыл ини. Ма возьыт та, ма возьыт! Тазьы малпаськонназ ӧз но валалля Насьтаезлэсь дораз вуэмзэ. - Ма-ма-ма, Горей-ей, висьыны-а, мар-а, кутскид, дэра кадь ӟаректэм? Уйме но ӧй кӧлы сюлмаськыса, - вазиськиз кузпалызлы. - Нырысь автобусэн ик лыктӥ. Горей но шедьтӥз пумитаз ма вераны: - Я, ӟечкыласько тонэ, мусое, нылкышно праздникен - 8-тӥ Мартэн. Котьку но таза, чупырес, азьло кадь ик лякыт сямо лу, ява. Ма но уг луы юэм дыръя Праздникын мултэс юыны шедьтэмен огпол луд кеч сюрес вылэ умме усем. Ӵапак отӥ кион ортчыны кемдэм. Кечез адӟыса, дораз матэктэ но соку ик палэнске: - Парсь кадь юэмын, мед кудӟемед ортчоз, соку кесяло, - озьы шуыса, кион сюрес урдсы кариськем. Со дыре мукетсэ кионэз сюрес кеч шоры вуттэм. Сое адӟыса, нырысез кион шораз тэтчем, мынам, пе, та луд кече. Соизлэн вожпотонэз пуроме: тон, пе, сое ӧд сюды- будэты. Огъя кыл шедьтытэк, ог-огзэс виилям. Кеч сайка, котырак учке, кытын ай, пе, таӵе кӧлӥськем. Вӧзысьтыз кык вием кионъёсты адӟыса, абдра аслаз кужымезлы. Ма но, пе, та кудӟем кырын уд лэсьты, кык кионэз вииськем. Луд кеч йырзэ вылэ ӝутэм но гань-гань гурт палаз вамыштэм. Т.ШИХОВА. Дэбес ёрос, Котегурт. Выль дышетскон арен! Удмурт Республикаысь Правительстволэн нимыныз сюлмысь ӟечкыласько дышетӥсьёсты, нылпиосты но анай-атайёсты выль дышетскон арен но тодон-валан нуналэн! Туэ 20 сюрслэсь ятыр покчиос нырысьсэ вамыштозы тодон-валан сюрес кузя. Ваньмы асьмеос нылпи дуннеысь потэмын. Нырысетӥ дышетӥсьмы, мусо школамы пыраклы кылемын сюлэмъёсамы. Ӵем дыръя выльысь берытскысалмы кадь яратоно классамы, укно дурысь парта сьӧры, кытын ортчизы тужгес шудо 10 армы. Удмурт музъем котьку данъяськиз дышетӥсьёсыныз. Соос тыршем улсын пиналъёс улонысь тужгес кулэзэ: тодон но валан басьто, вормонъёс пумитэ сюресъёс мыто. Школалэсь йылолъёссэ ӟеч чаклало егит дышетӥсьёс но. Та ӵуказе нуналлы оскон пыӵатэ. Удмурт Республикаысь Правительство бадӟым саклык висъя тодон сётӥсь ёзъёслы. Туэ гинэ 8 выль школа усьтӥськиз, ӝутӥсько выльёсыз. Дышетӥсьёс дырыз дыръя уждун басьто, ӝоген пытсамын луозы книгаос понна тыронъёс. Юн тазалык тӥледлы, азинсконъёс чаклам ужъёсады. Дышетӥсьёслы - котьмаин тунсыкъяськись но кылзӥськись дышетскисьёс, пиналъёслы - визьмо но быгатӥсь дышетӥсьёс. Удмурт Республикаысь Правительстволэн Тӧроез Н. А. Ганза. Ми возьмаськом тонэ, сентябрь Дышетскон ар кутскон азьын котькуд городын но районын ортчизы дышетӥсьёслэн конференциоссы. Асьсэлэн вормонъёссы но сюлмаськонъёссы якшур-бодьяослэн но. Районазы вуылыкумы кӧня ке юанэн вазиським калыкез дышетонъя татысь ёзлэн кивалтӥсезлы Н. Г. Пермяковалы. - Нина Григорьевна, кыӵе мылкыдэн пумитаськоды выль дышетскон арез? - Туж умой: школаосмы, дышетӥсьёсмы дась пиналъёсты пумитаны. Кылем арын ми умой ужам, азьвыл аръёсын ӵошатыса, туэ 30 процентлы тросгес пиналъёсмы вузъёсын дышетскозы. Ӧз возьдаськытэ медалистъёсмы но - асьсэлэсь тодэм-валамзэс зэматӥзы, капчиен институтъёсы пырыса. Районамы ӧвӧл дышетӥсьёс ласянь сюлмаськон - соос тырмымон. - Али котькытын Грефлэн системаез (школаосын 12 ар дышетон) пумысен ӟырдыт вераськонъёс мыно. Кыӵе тӥляд малпанды? - Котькуд программалэн вань ӟечез но, уродэз но. Но малы ке нырысь асьмеос одно луоно тырмымтэос сярысь малпаськиськом: нош озьы луиз ке, тазьы луиз ке... Системаын вань ӟечез: нылпиез туала куронъёслы тупась будэтыны, школаын дышетскыкуз ик тодон-валан сётыны гинэ ӧвӧл, профессиослы дышетыны но мукет. Туэ ми Якшур-Бодья гимназиын одӥг сыӵе класс усьтӥськом, учком, мар пӧрмоз. Анай-атайёслэн малпанъёссы, зэм, пӧртэмесь. - Со сяна, маке выльзэ чакласькоды-а ёросысь дышетон удысын? - Чылкак выльзэ - ум. Азьланьтом "Школа-вуз" системая дышетонмес. Ӟеч кусыпъёсмы Глазовысь пединститутэн. Та амалъя ужаса, тросэз выпускникъёсмы но, вылӥ образованитэм дышетӥсьёсмы но институтэ пырыны быгатӥзы. - Кыӵе школаос ӵемгес шумпотто? - Якшур-Бодьялась 1-тӥ школа, гимназия, Чернушки, Лынга, Варавай... Варавайёсты нимысьтыз верам потэ: пичи гинэ школа, но сыӵе тунсыко, ӟеч коллектив. Туэ школазэс 9йылпумъямъёс пӧлысь 7-ез институтэ пыриз. - Нина Григорьевна, дышетӥсьёс дась дышетскон арез кутскыны, нош дышетскисьёс? Туала арын книгаосын гинэ но тани кыӵе югдур... - Югдур, зэмзэ но, ушъяськымон ӧвӧл, но тужгес ёрмисьёсызлы ми книга висъяськом. (Лыдпусъёс но тодметъёс) Шаерамы 2082 дышетон учреждение. Соос пӧлысь 872 - нылпи яслиос, садъёс 894 - шор ёзо школаос 34 - спецшколаос 47 - профессилы дышетӥсь училищеос 115 - нылпиослы ватсаса тодон-валан сётӥсь учреждениос. *** 364,5 сюрс нылпи дышетске школаосын но училищеосын. Дышетон удысын ужа 41,7 сюрс адями. *** 1999-тӥ 2000-тӥ дышетскон арын усьтӥськиз куинь гимназия - Пичи Пургалан, Красногорскын но Ижевскын (Куӟебай Герд нимо). 2000-тӥ-2001-тӥ арын усьтыны чакламын эшшо одӥг гурт гимназия - Завьял ёросысь Италмас школаын. Туэ 1-тӥ сентябре усьтӥське 10 выль школа. *** Дышетонлэсь ӟечлыксэ возьматэ школазэс зарни но азвесь медален йылпумъямъёслэн лыдзы. Туэ соос 774 кузя. Удмуртиысь пиналъёс пырисько Россиын но дуннеын ортчылӥсь олимпиадаосы, ӵошатсконъёсы. Тросэз соос вормисе пото. Ижевскысь 30-тӥ школаысь пияш быдэс дуннеысь дышетскисьёс пӧлын химияя устоез луиз. *** Школаос выжо 1-4 системае (покчи классъёсын ньыль ар дышетонэ). Умоен лыдъямын Л. В. Занковлэн но Д. Б. Эльконин, В. В. Давыдовлэн дышетон программаоссы. *** Кылем арын кылдытэмын лицензиос сётъянъя дышетон учреждениослы но кун ласянь аккредитацияя комитет. *** Кылем арын 408 школаын 33500 нылпиос удмурт кылэз дышетӥзы. Но шумпотымонэз ӧжыт: азьло аръёсын ӵошатыса, кылем арын удмурт кылэз дышетэмысь дугдӥзы шаерысьтымы 13 школаын (Балезино, Глазов, Завьял, Красногорск, Можга, Шаркан, Як.-Бодья, Пичи Пурга, Воткинск ёросъёс). Озьы ик синэ, городъёсысь удмурт классъёслэн лыдзы. Туэ Ижевскысь школаосын гинэ дас класс уз усьтӥськы ни. *** 6505 нылпи дышетске нимысьтыз капчиятэм программая. Соос пӧлысь 1411 - анай- атайтэк кылемъёс. Йылэ нылпи юртъёслэн лыдзы, нош семьяын нылпи юрт возьыны мылкыд карисьёс кулэсмо (али шаерамы 8 сыӵе семья). *** Туэ 5 толэзь ӵоже быдэ вуымтэосын 842 йыруж лэсьтэмын. Оглом со кылем арынлэсь 30 процентлы ичигес, но йыло наркотикъёсын йырин лэсьтэм йыружъёс. Та усыкмытӥсь арбериосты доразы воземзы но вузамзы понна учётэ басьтэмын 231 пинал, 35-ез соос пӧлысь асьсэос "вень йылын пуко". З. Рябинина. Му вӧй поттӥсьёслэн нуналзы азьын Евгений Богомольный: "Калык понна ужаськом" Таӵе кивалтӥсез но Кун Кенешлэсь депутатсэ трос тодматонэз ӧвӧл, дыр. Со быдэс улонзэ сӥзиз та удыслы, му вӧй но газ поттонъя Москваысь Губкин нимо институтэз йылпумъямез бере, ужаны ыстӥзы Играысь НГДУ-е. Отын со юнмаз но кыдаз, му вӧй кысконъя операторысен кутскыса, вакчи дыр куспын луиз му вӧй но газ кысконъя отделлэн но НГДУ-лэн кивалтӥсез. Собере вал усьтэм амалэн "Удмуртнефть" акционер огазеяськонлэн тӧроезлэн воштӥсез но валтӥсь инженерез. Али быдэс огазеяськонлэн валтӥсь директорез. Евгений Исаакович алигес пумиськылӥз журналистъёсын. Та ужрадэ озьы ик пыриськиз Ижысь но Удмуртиысь архиепископ Николай. Куд-огезлы со валантэм кадь потоз. Но озьы малпаны уг яра. Му вӧй поттӥсьёсты инмарлы оскисьтэмъёсын уд лыдъя, соос бадӟым инты висъяло, трос юртто черкъёсты выльдыны но лэсьтыны. Но со гинэ ке луысал. Журналистъёслэн пумиськоназы "Удмуртнефть" огазеяськонлэн трос ӟеч ужъёсыз верамын вал. Нош со уно сюрс коллективлэн лулысь-сюлмысь тыршеменыз герӟаськемын. Сое тужгес яркыт возьмато лыдпусъёс. Туэ 8 толэзь ӵоже планлэсь вылтӥ 38 сюрс тонна му вӧй кыскиз но уно миллион манет тыр пайда басьтӥз. Оглом вераса, огазеяськон 16 улосын ужа, му вӧй кыске. Отчы пыро бускельёсмы - Татарстан, Башкортостан, Пермь республикаос, Тюмень, Иркутск областьёс но музонэз. Туннэ нимысьтыз пусъем потэ му вӧй поттӥсьёслэсь юрттэтсэс. Выт тыремзэс вератэк (кун бюджетэз ӝынызэ пала тырмыто - Г. Р.), уно юрттэт сёто ӧлексы нылпиослы, пересьёслы но куанер улӥсьёслы. Вакытэз, кызьы шуэ калык, уд вошты. Асьмеос улӥськом сыӵе дыре, куке курег пуз пилиськыны кадь кулэ, но со озьы уг луы. Му вӧй поттӥсьёс сое туж ӟеч валало но дунтэк юрттэт сётонзэс уката будэто но паськытато. Вераськон мынэ "Выль вакыт" ("Новое поколение") нимаз программа сярысь. Сое кылдытӥз-вордӥз "Удмуртнефть" акционер огазеяськон, нош ужзэ быдэсъялоз "Милосердие" фонд. Со нырысь ик герӟаськемын ӧлексы нылпиослы юрттонэн, соосты таза будэтонэн но мукетыныз. Та программая 6 сюрс доллар уксё висъяське. Но со 3 люкетлы люкиське яке котькудӥзлы, кык сюрс доллар сётӥськоз. Кинлы уксё висъянэз чакланы комиссия кылдытэмын. Отчы пыро культура, спорт удысысь тодмо адямиос - Любовь Захарова (калыкез дышетонъя министр Анатолий Мамонтов ("Италмас" ансамбльлэн кивалтӥсез Валерий Медведцев (тодмо спортсмен), Евгений Богомольный но мукет адямиос. Кин бен та конкурсэ пыриське яке программаез быдэстэ? Радъяло общественной, кун но интыысь организациос, кудъёсыз герӟаськемын нылпиосты будэтонэн, соослы ӟеч сямъёс пыӵатонэн но таза нылпи будэтонэн. Нош конкурс ортчытонэз, ужъёсты быръёнэз ас вылазы басьто "Удмуртнефть" акционер огазеяськонысь (ОАО-ысь) менеджеръёс но "Милосердие" фондысь кивалтӥсьёс. Кинлы коньдон сётонэз юнматэм "Выль вакыт" программалэн экспертъя кенешез. Нылпиослы юрттэт сётэмез возьматъялозы ивор вӧлмытӥсь ёзъёс. Кыӵе куронъёс бен пуктӥсько быръёно ужъёс (проектъёс) азе? Нырысь ик со мед луоз дунтэк юрттэт сётон, собере со ужез мукетъёсыз мед адӟем карозы. Нош оргтехника басьтыны дас процентлэсь трос уксё быдтыны уг яра, ужан инты возён понна со коньдонэз кутыны уг луы. Та конкурсэ нимаз адямиос пыриськыны уг быгато. Та ужлы висъям коньдон озьы ик медаз кутӥськы пӧртэм кенешъёс, адӟытонъёс но семинаръёс ортчытъяны, тыронъёсты берыктыны-пытсаны но музон. Быръёно ужъёслэсь кулэлыксэс чаклаку, лыдэ басьтэмын луозы быдэ вуымтэ нылпиослы уж сётон, пайда басьтон но мукет организациослы адӟем карон. Шаерамы нырысь ик му вӧй поттыны ӧдъяз "Удмуртнефь". Со вал 60-тӥ аръёсы. Нырысетӥ скважинаос ӝутскизы Ува районысь Красное черкогурт ктырын. Табере огазеяськон быдэс элькунамы "сьӧд зарни" кыске. Али солэн 4 ёзэз, му вӧй но газ поттӥсь управлениосыз (НГДУ-осыз). Соос интыяськемын Иж, Воткинск, Сарапул городъёсын но Играын. Туэ ОАО чакла 5 миллион 200 сюрс тонна му вӧй поттыны. Сизьым толэзьскын 3 миллион тонналэсь уно лэсьтӥз. Быдэн одӥг миллион тонналэсь уно нефть кыскизы ни Ижысь но Играысь му вӧй поттӥсьёс. Нош Воткинскысь нефтяникъёс планлэсь вылтӥ самой трос му вӧй кыскизы - 7 толэзьскын 28 сюрс тонна. Оглом вераса, "Удмуртнефть" огазеяськон му вӧй поттӥсьёслэсь профессиональной нуналзэс умой пумита. Шаерамы "сьӧд зарни" кыскисьёс трос. Соослэн но ужъёссы урод уг мыно. Соин ик туннэ сюлмысьтымы ӟечкыласьком праздникеныды но мылкыд кариськом азьланьын выль азинсконъёс басьтыны, ваньмызлы му вӧй поттӥсьёслы сӥзиськом шудбур но тазалык. Г. РОМАНОВ. Евгений Богомольный. Валэктэ юрист Сэрегез нуэ адвокат Лилия Шкляева Телефон 25-33-70 Музъем но милиционер Тодэме потэ: милиционеръёслы музъем возёнын но лэсьтӥськонын кыӵе ке льготаос вань-а? Л. Кузнецова. Завьялово районысь Гондыр гурт. Валэктон шедьтыны луоз "Россия Федерациын югдурез утёнъя ёзъёсын служба сярысь" положениын. Сое Россия Федерациысь Вылӥ Кенеш юнматӥз 1992-тӥ арын 23-тӥ декабре 42-02-1 номеро постановлениеныз (воштонъёс пыртэмын 1993-тӥ арын 24-тӥ декабре). Югдурез утёнын ужасьёслы льготаос сётэмын музъем понна, интыяз кыллись ваньбур (недвижимость) понна выт (налог) тыронын, нимаз но кооператив пыр улон инты лэсьтыны ссуда басьтонын, юртъер пуктонын, сад-бакча возёнын. Гажано редакция! Вань калыклэсь куронзэ вераса гожтыны косӥзы тӥледлы. Малы ке шуоно, газеттэс басьто милям ӝыны гуртлэсь ятырез, ми но, пе, мед адӟом-лыдӟом валэктондэс. Гожтэт таӵе учырен йырин дасяно кариським. Милям гуртамы вань клуб. Со кыкетӥ арзэ тыро-пыдо уг ужа. Зэмзэ вераса, клубысь адями уг ужа. Ми гожъям ини районысь администрацие, редакцие, культура отделэ, сельсоветэ. Пайдаез ӧвӧл - адями пуке. Токма коньдон басьтыса. Со шуэ: мынам удысэ шутэтскон нуналъёсы дискотека нуон. Соку но усьтонзэ кинлы ке сётэ но кошке. Клубысь вань тӥрлык тӥямын ини. Ми, егитъёс, асьмеос гуртысь магнитофонмес вайылӥськом. Музон нуналъёсы клубмы борды бадӟым тунгон ошемын. Ужасьтэм муртэ улляно ини вылэм клубе ветлымтэез понна КЗоТ-ысь 33-тӥ статьяен. Юрист шуиз: тӥ, пе, вазиськелэ судэ, кулэ бумагаос люкаса. Зэм ик-а адямиез ужамтэез понна судэ вазиськытэк улляны уг луы? И. П. Шаркан ёрос. Уж сярысь законъёсъя кодексын (Россия Федерацилэн КЗоТ-аз) зэмен ик вань ужысь мозмытон сярысь 33-тӥ ёзэт (статья). Отчы пыро кӧня ке люкетъёс: 3-тӥ: адями нокыӵе мугтэк весь уг быдэсъя ужан огкылын (контрактын) яке ужан радъян сярысь правилоосын пусъем ужъёсты, солы азьвыл кыӵе ке наказаниос сётэмын ни ке; 4-тӥ: адями нокыӵе мугтэк уже ӧз поты яке ужысь нунал ӵоже 3 часлы ятыргес кошкылӥз ке; 7-тӥ: адями уже юыса яке наркотикен кудӟыса вуиз ке. Янгыш муртэ кивалтӥсьёс (администрация) улляны уг быгато, со висьыку яке отпускын шутэтскыку. 3-тӥ люкетэз (пунктэз) рос-прос валэктыны кулэ. Адямиез мозмытыны яра, берло ар ӵоже со кыӵе ке взыскание басьям но дисциплинаез выльысь тӥяз ке. Адямиез выльысь уже берыктон учыръёсты нимысьтыз пусйиз Россия Федерациысь Вылӥ судлэн 1992-тӥ арын 22-тӥ декабре ортчем пленумез. Соку эскероно: - уллянэн герӟаськем ваньмыз ик-а взысканиос шонер сётэмын вал; - уллянэн герӟаськем мугын кызьы дисциплина тӥямын; - лыдэ басьтӥзы-а кивалтӥсьёс янгышлэсь быдӟалазэ, мугъёссэ, адямилэсь ассэ кызьы воземзэ но уж шоры учкемзэ; - чаклаз-а администрация взыскание сётон дырез. Шуом, вӧсь карем мурт, юрттэт курыса, судэ вазиськиз. Таиз тодӥз: адямилэн янгышез вань, но со уллямын, умойтэм учырлэсь кызьы но малы луэмзэ лыдэ басьтытэк. Соку суд быгатэ адямиез азьвыл ужаз берыктыны. Ужен герӟаськымтэ умойтэм учыръёс уг лыдъясько ужан дисциплинаез тӥямен. Адямилэсь янгышъёссэ валэктон (доказательствоос утчан) усе администрация вылэ. 4-тӥ люкет сӥземын ужез кельтэм понна уллянлы. Прогул лыдъяське дисциплинаез юн тӥян. Адямиез ужысь мозмытыны луэ трос нунал юмшамез понна но, огпол гинэ сьӧлыке усемез понна но - азьвыл таӵе учыръёсыз ӧй вал ке но. Та люкетэз кутыку лыдэ басьтоно взыскание сётон дырез но радлыкез, адямиез куроно гожтыса валэктон дасяны. Взыскание ялӥське умойтэм учыр шараяськем бере ик - одӥг толэзь ортчытозь. Сыӵе учыр бере куать толэзь улыса (сьӧлык котьку мед шараяськоз) наказание сётыны уг яра. Кыл кутытон сярысь приказ вылэ адями гожтӥськыны кулэ. Кудӟыса уже лыктэм муртэ 7-тӥ люкетъя уллян пумысен Вылӥ судлэн пленумез нимысьтыз валэктон сётӥз. Шуом, юэм мурт ужан интыяз уг лыкты, организацилэн азбартӥз калге. Сое мозмытыны луэ-а? Луэ, вылаз ик, азьвыл взысканиос басьяз-а, ӧз-а шуыса санэ понытэк. Кызьы эскероно, адями кудӟемын-а шуыса? Медикъёс пыр яке музон амалэн. Кылсярысь, ужан интыын юон лыдъяське ни кудӟемен. Пичи кенеш мылкыдзэ вераз Драмая удмурт кун театрын алигес ортчиз Пичи кенеш. "Удмурт кенеш" огазеяськон дасяз но радъяз сое матэктӥсь быръёнъёсын валче. Ӧтчам кутскем бере, огазеяськонлэн тӧроез Валентин Тубылов ивортӥз кӧня ке кылдэм югдур сярысь. Со пусйиз, кӧня ке азьветлӥсь удмуртъёс, исполкомлэсь мылкыдзэ чаклатэк, мукет мурт понна ужало ни шуыса. Озьы асьме огазеяськонэз пильыны туртто. - Асьмелэн адямимы одӥг, - шуиз Валентин Кузьмич. - Со - Удмурт Элькунысь Кун Кенешлэн Тӧроезлэн нырысетӥ воштӥсез Павел Николаевич Вершинин. Матэктӥсь быръёнъёсъя югдур котькинэ туж сюлмаськытэ. Кылдэм учыръя асьсэлэсь малпанъёссэс веразы данак адямиос. Соос пӧлын - "Удмурт кенеш" огазеяськонлэн Можга, Дэри, Балезино ёросъёсысь ёзъёсызлэн тӧрооссы, Анатолий Комаров, Мария Ишматова, Лидия Иванова, "Удмурт кенеш" огазеяськонлэн Ижысь Ленин ёросысь ёзысьтыз адями, Илья Викторов, тодосчиос Галина Никитина, Галина Шумакова, Людмила Христолюбова, Михаил Атаманов, Роза Яшина но мукетъёсыз. Соос сюлэмазы тымиськем мылкыдзэс пушказы возьыны ӧз ни быгатэлэ - ӧръяськизы. Отӥяз кыл куриз Удмурт Элькунысь Кун Кенешлэн Тӧроезлэн нырысетӥ воштӥсез Павел Вершинин. Павел Николаевич вань сюлмысьтыз тау кариз солы дурбасьтӥсь адямиослы. Быръёнъёсын герӟаськем югдурен тодматэмез бере, тодмо луиз: Павел Николаевич Вершинин понна гожтӥськем ини витьтон сюрслэсь трос адями (тамында куара люкаськем дас нунал куспын гинэ, нош ваньмыз-ӧвӧлэз дас сюрс гинэ гожтӥськем кулэ). Собере Пичи кенеш пусйиз матысь дыре ик быдэстоно ужрадъёс. Пичи кенеше люкаськемъёс та нуналэ ик сюлмысьтызы ӟечкылазы Илья Михайлович Викторовез но Галина Васильевна Романоваез - ӝыны дауръем юбилеенызы, Михаил Гаврилович Атамановез - дуннеын тупаса улонэз, адямилыкез но лул чылкытлыкез утёнын бадӟым уж нуэмез понна кун дунъет басьтэменыз валче. Вань калыклы капчи мылкыд кузьмаз Удмурт Элькунысь дано артист Геннадий Ганьков (вань ӧтемъёс пӧлысь со гинэ мылкыд карем калыкез дунтэк шулдыртыны). Та быдӟа возьыт! Сюлэм туж но туж вӧсь луэ: шаерысьтымы азьветлӥсь удмуртъёс чик кӧбератэк вузасько кӧня ке сюрс манет, тужгес ӟеч улон инты понна. Чик уг малпасько шат соос ӵуказе нунал сярысь?! Е. Виноградова. 1-тӥ сентябрь Пичи Маши берпуметӥ арнязэ умой-умой уг изьылы ни. Ӵукна вазь ик султыса календарез учке, маке чиньыяз тыре: 1-тӥ сентябрёзь кӧня нунал кылиз на, лыдъя, луоз. Шкафысь выль костюмзэ, ранецсэ поттэ, синучкон азьын берга. Собере вань сюлмысьтыз кылбур лыдӟе. Ой, кыӵе сюлмаське нылок - со уго туэ нырысьсэ школае мынэ. Тани дышетӥсезлэсь нимзэ но вунэтӥз, школаезлэсь номерзэ но, анай тодэ на меда? Анайлэн нош аслаз сюлмаськонъёсыз: гужем ӵоже тодэмзэ но ӧз вунэты-а нылыз, ӧз алдаськы-а, огшоры школае гожтыса, бускель Вани, пе, тӥни гимназие: мынӥсько. Быгатоз-а школаысь пумитаны, урокъёссэ дасяны юрттыны? Нырысетӥ арзэ тужгес бадӟым саклык висъяно луоз, шуиз собраниын Наталья Сергеевна. Туннэ тани Маши, огаз кияз сяська кутыса, мукетыныз анаезлэн киыз борды кырмиськыса, школае вамыштӥз ни, луоз. Наталья Сергеевна сое но, мукетъёссэ но пальпотыса, шуныт кылъёс вераса пумиталоз. Соку ик кытчы ке тӧлӟоз кышкан- куалекъян. Главноез - таӵе дышетӥсь доры шедьыны, нош школа котькыӵе мед луоз: огшоры-а, лицей-а, гимназия-а. Праздникен тӥледыз, му вӧй но чагыр эстӥськон поттӥсьёс! Му вӧй но чагыр эстӥськон поттонын тыршисьёслэн праздниксы тужгес но гажаноез, дуноез луэ. Республикаысьтымы му вӧй кыскон удысын тыршисьёс нимзэс вылын нулло, мукетъёсызлы адӟем карымон луо вылӥ быгатонлыкъёсынызы, ялан выльзэ утчаменызы. Тӥляд удысты туж аспӧртэмлыко, со одӥг семьяе огазея пӧртэм нациен калыкъёсты но, му вӧй поттӥсьёс тупаса, ог-огзылы юрттыса уло. Сюресъёс но выжъёс, больницаос но школаос, выль улон юртъёс - ваньмыз со герӟаськемын му вӧй но чагыр эстӥськон поттӥсьёслэн быгатыса, югдурез валаса ужаменызы. Республикамылэн пӧртэм сэрегъёсаз улӥсьёс тау каремзэс верало "сьӧд зарни" кыскисьёслы, шаермес узырмытонын вань кужымзэс сётыса тыршемзы понна. Басьтэм вормонъёсыныз тужгес но шумпоттытэ акциосын "Удмуртнефть" огазеяськон. Юнме со сярысь уг шуо: Удмуртилэн экономикаезлэн шорсюлмыз. Татын ужасьёслэн сюлмысь тыршеменызы, туэ сизьым толэзь ӵоже гинэ куинь миллионлэсь ятыр му вӧй кыскемын, со пӧлысь куамын куинь тоннаез - планлэсь вылтӥ. Республикалэн бюджетаз пыртэмын 927 миллион манет коньдон. Данъяськыса верасько, "Удмуртнефтьын" ужасьёс пусъемын Россия Федерацилэн Президентэзлэн В. В. Путинлэн тау карон гожтэтэныз, поизводствоез огсыр ужатыны быгатэмзы но коммерция удысын азинсконъёссы понна сётэмын "Хрустальная Ника" калык куспо награда, наука но техника удысын тыршись коллектив басьтӥз Россилэсь кун премизэ. Арысь аре кужмояло но пыд йылазы юн султо му вӧй кыскон удысын выль кылдӥсь компаниос. Озьыен, му вӧй но чагыр эстӥськон кыскисьёслэн азинлыко тыршемзы азьланяз но валтӥсь интыын луоз шаерысьтымы производствоез улӟытонын но калыкмылэсь улонзэ умоятонын. Праздникен тӥледды, шудбур но тазалык асьтэлы но семьяостылы, ӟечезлы оскон но капчи мылкыд! Удмурт Республикаысь Кун Кенешлэн Тӧроез А. А. Волков. Ӝуаты тылъёстэ, водитель! Выль дышетскон ар кутскон азьын Удмуртиысь сюресъёс вылын кышкытлыклэсь утиськонъя кун инспекция "Чаклаське: пиналъёс!" операция сярысь ялэ. Со чотэ ик пыре 1-тӥ сентябре ортчись "Фары" ужрад но. Та нуналэ шаерысьтымы сюрес вылэ потэм котькуд машиналэн тылъёсыз одно ӝуатэмын луыны кулэ. Озьы школае дыртӥсь пиналъёс сюрес вамен выжыкузы, сакгес кариськозы. Н. Липина. Гажано эшъёс! 1-тӥ сентябрь - дышетскисьёслэн но дышетӥсьёслэн гинэ праздниксы ӧвӧл. Та нунал ваньмызлы дуно. Со сюлэме пыре пинал дырез тодэ ваёнэн но вуонозэ ӟечезлы оскыса витёнэн. Мылысь-кыдысь ӟечкыласько республикаысьтымы школьникъёсты, студентъёсты, дышетӥсьёсты выль дышетскон арен! Таиз ар аспӧртэмлыко - со кутске одӥгаз дауре, йылпумъяське мукетаз. Нырысетӥ классэ туннэ мынӥсь пиналъёс, визьмо дышетӥсьёссылэсь тодон-валанзэс но быгатонзэс басьтыса, выль даурын ини ю-нянь будэтозы, наукаен вырозы, асьме кунэн кивалтозы. Соин ик милемлы, мӧйыослы, ваньзэ лэсьтоно, бӧрсямы вамышъясь нылпиосты умой будэтон понна. Ваньзылы сӥзисько юн тазалык, шуд, выль вормонъёс! Тодон-валан дуннее сюресты мед удалтоз! Светлана Смирнова, Россиысь Кун Думалэн депутатэз. Журналистъёсын пумиськонъёс Огкыл шедьтод - вормон басьтод Кун Думалэн депутатэз Светлана Смирнова алигес журналистъёсын пумиськыкуз мадиз Россиысь парламентлэн нырысетӥ паларе ужамез сярысь. Озьы ик вераз политикаын та дырлы кылдэм югдур сярысь. Сессилэн кутсконаз валамтэос вал ик, пусйиз депутат, куд-ог фракциос, депутатъёс залысь но потылӥзы, соглаш луымтэзэс мукет сямен но возьматъязы. Отӥяз соос валатскизы, закон кылдытон бордын уртче ик ужаны кулэ шуыса. Шуг вал соин но: Думалэн кык куиньмос люкетэз выльдӥськиз. Милемлы отчы нырысьсэ шедем депутатъёслы, дышоно вал ужлэсь аспӧртэмлыксэ валаны. Ярам коть, юрттӥзы эшъёс. Ваньзэ валэктӥзы-возьматӥзы. Тулыс сессия ӵоже Дума ортчытӥз ньыльдонлэсь ятыр огъя кенешонъёс, сомында ик - парламентской кылзонъёс. Ӝыны ар куспын эскеремын 250 законопроект. Укмыстонэз соос пӧлысь юнматэмын. Нимысьтыз пусйыны кулэ депутатъёслэсь Россилэн президентэныз ӵектэм документъёс бордын ужамзэс. Куиньзэ но инъетъёсты соос умоен лыдъязы. Валазы уго, странаын кивалтон ёзъёсты рос-прос юнматыны-кужмоятыны кулэ шуыса. Думаын, кызьы пусъё политологъёс, мӧзмытгес луиз. Ӧвӧл ни отын азьло кадь маскаръяськисьёс, телекамера вадьсын чеберъяськыны яратӥсьёс. Умой со. Депутатъёс уен-нуналэн ужало ӟеч законъёс дасян бордын. Пӧлысьтызы уноез сюлмасько ваньзэ ужпумъёсты быдэсъясь ёзъёсын огкылысь быдэсъяны. Сыӵе валче тыршон ӟечен берытске, Президентлэн но Правительстволэн кичӧлтонъёссы улонэ ӝоггес пыӵало. Уго юнме уг шуо: оскон шедьтод - вормон басьтод. Трос пӧсяно луизы депутатъёс Выт тырон кодексэз выльдон бордын. Солэн кыкетӥ люкетэз табере юнматэмын. Вуоно арлы бюджет выль налогъёсты чакласа дасялозы ни. Нялтас вераны кулэ, Светлана Смирнова (асьме республикаысь огназ) пыртэмын бюджет кусыпъёсъя куинь палъем комиссие. Алигес Россиысь вице-премьерлэн Виктор Христянколэн кивалтэмез улсын ортчиз солэн заседаниез. - Та дыре юн кусып возисько коньдон ужпумъёсъя асьме министерствоен, - пусйиз депутат. - Удмуртилэсь кулэяськонъёссэ утён вылысь, вань луонозэ лэсьтыны тыршиськом. Журналистъёсын пумиськылыкуз, Светлана Смирнова соосты тодматэ странаысьтымы пӧртэм политикъёслэн малпанъёсынызы. Но ёросъёсысь куд-ог гожъясьёс, югдурез пумозяз валамтэенызы, со верамъёсты депутатлэн аслаз мылкыдыз карыса возьмато. - Июне мон поттылӥ вал, Герман Греф министрлэн программаяз пенсие потон дырез кузёмытыны чакланын шуыса, малы ке шуоно, пенсионеръёслэн лыдзы Россиын туж будэ, - вераз депутат. - Но сыӵе ӵектонэн мон нокызьы но соглаш кариськыны уг быгатӥськы. Уго ӟеч тодӥсько адямиослэсь, тужгес но гуртын улӥсьёслэсь курадӟонъёссэс. Тани асьме республикаын котькудӥз кыкетӥез воргорон пенсие потыса уг вуы - улонысь кошке. Кызьы сыӵе дыръя умоен лыдъялод Москваысь но кунгож сьӧрысь тодосчиослэсь дэмланзэс? Светлана Константиновна мадиз Удмуртиысь быръем мукет эшъёсын валче ужамез сярысь. Куспамы нокыӵе валамтэос ӧвӧл, шуиз со, вань ужпумъёсты ӵош быдэсъяськом, республикамылы быгатэммыя ваньмы юрттыны тыршиськом. Трос кужымез но дырез кулэ каре химической ож тӥрлыкез быдтон ужпумен вырон. Тани алигес но со пыриськиз Кизнерын ортчем паськыт кенешонэ. Светлана Константиновналэн ӵектэмезъя, Кун Думаысь депутатъёс, кин быръемын химической ож тӥрлыкез возёно улосъёсысь (Курган, Саратов, Киров но мукет), Россилэн президентэзлы нимысьтыз вазиськон кутӥзы, та ужпумъя программаез быдэсъян вылысь вуоно арын, ватсаса коньдон висъяны куризы. Чакламъя пӧрмиз ке, Кизнерын но Камбаркаын ужъёс шӧдскымон ӝогомозы. Валамон ни, журналистъёс ӧз чидалэ, Удмуртилы президент быръён пумысен юатэк. Кандидатъёс ваньмыз пусъемын ӧвӧл на, та сярысь вераськыны вазь, пусйиз Светлана Смирнова. Котьмалэсь кулэез - быръён мед ортчоз законъя. Та нуналъёсы асьме депутат кошкоз ни Москвае. Думаын кутскоз сӥзьыл сессия. И. Лебедев. 02 ивортэ Огъя кужымен Азьланьтӥське "Анти-террор" ужрад. Граждан оборона ужпумъёсъя но кышкытлыклэсь утиськонъя комитетын, Югдурез утёнъя министерствоын, Прокуратураын ужасьёс республикаысьтымы тужгес кышкыт интыосы вуыло, трос калык люкаськылон интыосты эскеро. Кышкыт учыръёслэсь дырыз дыръя палэнскон вылысь, лыдӟисьёсмес но сос борды итӥськыны куриськом. Кузётэк кельтэм сумкаосты синйылтыку, осконтэм адямиосты пумитаку вазиське таӵе телефонъёсъя: 02-МВД-е, 55-79-46 - терроризмен нюръяськонъя штабе. "Атас" синмаськиз Ижысь Автозавод урам вӧзысь бусыын тылпу вазенгес потылӥзы ни вал. Соку ог 3 гектар вылысь ӟег арам луиз. Ортчем арня вискын тылпуэз кысӥсьёс татчы выльысь берытсконо луизы. Соосын ог 4 гектар вылысь ю-нянь утемын, 50 квадрат метр му ӝуаз. Кыказ ик учыре тылпу пиналъёслэн шудонзы бордысь потӥз. Вань малпанъёс, та бусыез юромо но суто шуыса. Ӧз адӟы "КамАЗ"-эз Ижысь ВЛКСМ-лы 40 ар урамын "ВАЗ-21093" автомобиль сюрес урдсын сылӥсь "КамАЗ" борды шуккиськиз. Куашкам машинаысь водителез но ӵош мынӥсь эшсэ поттыку, нимысьтыз инструментъёс кулэ луизы. Водитель кытӥ-отӥ гинэ шуккиськиз, йырвиымез пазьгиськем эшез эмъяськонние келямын. МВД-лэн пресс-службаез. Тодматскон сэрег Аб. 393. Удмурт нылаш 19/160/50. Ужасько вузкарисьын. Тодматскысал зӥбыт сямо, ужез яратӥсь, коньдонлы но улон интылы ёрмисьтэм пияшен. Витисько буёло туспуктэмен гожтэттэс. Аб. 394. 18/158/50. Дышетскисько воспитателе. Тодмасткысал 22-30 аресъем зӥбыт сямо, ужез яратӥсь, винаен, тамакен эшъяськисьтэм пияшен. Мед луоз аслаз улон интыез. Витисько туспуктэмен гожтэттэс. Аб.378. 38/162. Удмурт посмурт � Овен. Ужасько котельнойын машинист но повар луыса. Улӥсько анаеным, лякыт сямо, курытсэ ӵем уг веръяськы. Яратӥсько чорыганы, спортэн вырыны, крезьгур кылзыны. Лыктоно мон доры. Аб.474. 34/176/67. Улӥсько огнам, кышнояськылымтэ. Ужасько пудо вордонын, яратӥсько нылпиосты. "Я+Я" служба пыр тодматскыны мылкыд карисьёс, гожтэттэс "Удмурт дунне" газетэ эн келялэ. Ыстоно таӵе адресъя: 427630, Удмурт Республика, С.Юкаменское, а/я 10, "С 3" аб �... Гожтэтады одно ик понэ маркаен буш коныерт, сотэк тӥледлы вазиськись уз луы. Редакцилэсь: Лыдӟисьёсмылэсь ялонъёссэс тодматскон сэреге сётӥськомы, дун басьтытэк. Нимзэс, кытысь луэмзэс газет пыр ум шараяське, ваньмызлэн адресъёссы редакциын. Ялон сётӥсен тодматскыны мылкыд карисьёслы ивортӥськом: адресъёсты ми нокинлы ум келяське. Абонентлэсь номерзэ пусйыса, редакцие гожтэт ыстэ. Нош кинлы ке сӥзем гожтэттэс маркаен чылкыт конвертэ понэ - ыстомы кулэ адресъя. Шӧкыч Тӥляд кылылэмды вань-а мар сыӵе со идеология? Нош мон сярысь ке верано, мон со идеологиез пичи дырысеным ик туж ӟеч тодӥсько но, валай но, шӧмъяй но. Одӥг пол курегъёслы пушнер кораны вунэтӥськем. Анай ужысь вуиз но капкаетӥ пырыса вуиз- а, ӧз-а юа ини, малы, пе, курегъёс сюдымтэ. А мон сюдӥ шуисько, соослэн кӧтсы уг ке тырылы, мон-а мар-а янгыш, кокаса тусез пась каризы ини шуисько. Озьы-а ма шуыса, анай монэ сӥльсьӧртӥм кутӥз но шуэ, соку мон тонэ али ик пушнер ӝукен сюдо. Ка-а-ак пушнерен тыбыр кузям но, берпалам но шачыръяз ук! Тӥни со нуналысен мон анаелэсь идеологизэ туннэ ке но йырам возисько. Куд- огез, со идеология ӧвӧл, со - экзенуция. Кин тодэ на мар со. Нош юрттӥз но, визьмаз но, эмъяз но. Мукетыз понна али ке но кӧты уг веська. малы мыным анае ним Адольф сётэм. Черкын но сыӵе нимын ик пылатӥллям. Пичигес дыръям мон нимы пумысен номыр но ӧй малпалля. Нош школае ветлыны кутскем берам, жугыло но вал ява. Ка-а-ак ожмаськонэн шудыны кутскиськом ке, ваньмыз понна мон янгыш луисько вал. Адольфен сэрен, пе, вормонэз келяськиз. Идеологиед, пе, тынад калыклы пумит луэ. Соин келям. Кин тодэ бен? Вал ук пӧртэм идеологиос. Буржуазилэн, марксизмлэн, анархистъёслэн, инмарлы оскисьёслэн но мукетъёсызлэн. Табере идеология сярысь вераськонъёсты но уд кылы ни. А жаль. Идеологитэк асьмеос кытчы меда вуом? Ма вуим, лэся, ини. Табере коньдон жильдон сярысь пичи дырысен ик кутско ини. Ваньмыз табере - нылпиосты будэтон но, дышетон но, быдэ вуттон но, ВУЗ-э дышетскыны пырон но - коньдонэн герӟаськемын. Коньдонэд трос ке, тон гажано адями, нош ӧвӧл ке, тон кураськись. Мар со? Идеология-а, ӧвӧл-а - асьтэос тододы ини. А. Шумихинлэн гожтэтысьтыз. Тодон-валан нуналэн! Кун Кенешлэн нимыныз но аслам нимыным вань дышетскисьёсты но студентъёсты, соослэсь анай-атайёссэс, вылӥ но профессиос сётонъя дышетскон заведениосысь преподавательёсты ӟечкыласько выль дышетскон арен, тодон-валан нуналэн. Дышетскыны быгатон - со адямилэн самой бадӟым шудэз луэ. Асьмеос вань улытозямы дышетскиськом. Но тужгес кулэ тодон-валан басьтӥськом школаын. Бадӟым тау кареме потэ дышетӥсьёслы. Визь-нодъям сяна, пиналъёсмес соос дышето зӥбыт, вазиськись, зэмлыко луыны, вордскем шаерзэс яратыны. Та нуналэ нырысетӥ курсэ мынӥсьёс дышетсконзэс мытозы, нош студентъёс азьланьтозы профессия басьтон сюрессэс. Туала егитъёс шоры ми юн осконэн учкиськом. Оскисько, вуоно кивоштӥсьёсмы визьмоесь но зӥбыт сямоесь луозы. Дышетон ёзъёслы туннэ секыт йӧтэ. Школаосын, тужгес гуртысьёсаз, трос тырмымтэос. Соос пӧлысь куд-огзэ быдэстыны луоно, но одӥг кутскемез ваньзэ уд лэсьты. Жаляса верано, государствомылэн кужмыз уз тырмы. Соин валче мон ӵектӥсько улӟытыны вунэтыны кутскем ӟеч сяммес - школаосты нимаз предприятиос, ужась коллективъёс бурд улэ кыскыны, соослы шефство сётыны. Ӟечен пусъёно: туннэ промышленность пайда сётыны кутске. Мон вазиськисько предприятиослэн, колхозъёслэн кивалтӥсьёссылы, ужбергатӥсьёслы. Ойдолэ школаослы огъя кужымен юрттоме! Котькуд школа сярысь государство сяна, шефъёссы но сюлмаськысалзы ке, кылдэм секыт югдурысь соос капчиенгес потысалзы. Огъя кужымен тросгес лэсьтыны быгатом асьме пиналъёсмы, асьме вуономы понна, туннэ нуналэн ӵошатыса. Школаос, вузъёс, техникумъёс но училищеос 2000-2001-тӥ дышетскон арез мытыса, нырысетӥосыз пӧлын вамышто выль дауре. Мед со даур гуманизмлэн вакытэз луоз! Удмурт Республикаысь Кун Кенешлэн Тӧроез А. А. Волков. Саранск бӧрсьы - Ижевск Финн, саам, карел, эстон, коми, удмурт, мари, эрзя но мокша, озьы ик венгер, ханты, манси писательёс туэ 23-тӥ-26-тӥ августэ люкаськылӥзы асьсэлэн куатетӥ конгрессазы. Кызьы тодӥськом, берлоез таӵе ӧтчам вал кык ар талэсь азьло Сыктывкарын. Отын эскеремын, кыӵе ваче герӟась выжъёс вань асьме куспын но мар лэсьтоно, со огъясь тодметъёс тросгес мед луозы шуыса. Та вераськон азьланьтэмын вал Саранскын но. Но татын пыр-почгес ужпумъёс пуктэмын нылпиосты школаын дышетон азе. Финн-угор литератураез басьтоно ке, кыӵе произведениосын тодмасткыны кулэ асьме пиналъёс школаысен, кызьы, кыӵе амалэн соосты кутоно программае. Та выллем ужпумъёсъя малпанъёссэс веразы асьме писательёс но: Фома Ермаков, Егор Загребин, Анна Зуева, Виктор Шибанов, Вениамин Ившин. Татын ик вал выль книгаосын тодматон. "Удмуртия" издательстволэнэз но син шоры йӧтӥзы. Вуонозэ таӵе конгрессэз Ижевскын ортчытыны вераськемын. Со сӥземын луоз финн- угор юморлы. Нош кызьы ваньмыз та ужрад ортчиз, со сярысь газетысьтымы лыдӟоды вуоно арня куспын. Т. ПЕТРОВА. Шӧкыч Ӟабыльтӥсь вож нуны Мар но уг луы дунне вылын, мае но уд адӟы, мае но уд кылы улытозяд-вылытозяд. Алигес тани радио пыртӥ кылӥ одӥг нылкышнолэн уйшор бере кион кариськылэмез сярысь. Нуназе куазен сыӵе ик чебер огшоры нылкышно, нош уин пурысь гоно кион луэ, пе. Адямиосты кышкатылэ, шимес вузэ, собере кӧтыз каньыл луэм бере, нош ик нылкышнолы берытске. Индустриальной районысь 3 номеро нылпи ваён юртын но алигес паймымон учыр вылэм шуо. Зэм-а, ӧвӧл-а со - мон шонерак вераны уг быгатӥськы. Малы ке шуоно, мон отын ачим ӧй вал бере, кызьы дӥсьтод пырак озьы вал шуыса вераны. Мон кылэмме гинэ мадё. Иське тани тазьы вылэм, пе. Кинлэн ке но пичи нуныез вордскем бераз ик ӟабыльтыны кутскем. Ӟабыль-ӟабыль ӟабыльтэ, пе. Ӟабыльтыны луэ, дыр, нош мар сярысь ӟабыльтод уга. Со вож нуны тылпу кысыны лыктэм муртъёсты чиньыеныз ик донгаса, мыр-мыр пыкылыны кутскем, пе... Тӥ мае учкыса улӥськоды, а-а-а, нылпи ваён юрт тани-тани куашкалоз ини, пе, нош юртэз тупатъян сярысь, нокин но уг сюлмаськы. Нош весяк зулиськоды демография сярысь. Кинлэн таӵе юртын вордскемез потоз. Мынам тани али ик берлань пыреме потэ ини. Тазалыкез утёнъя министерствоын ужасьёс уно аръёс оскытъяса возё, тупатъялом шуо, нош уробо али ке но интыяз сылэ. Та юртын ваньмыз куашкан калэ вуэмын ини. Гумыос но пилиськозы тани, тылпу но потыны быгатоз, вӧлдэт но йыр вылаз дыбыр- шалтыр вайяськоз. Чик татын улэм уг поты. Вож нуныос жаль пото. Вордскем беразы ик югыт дунне пож потыны кутске. Нош АО "Редукторлэн" 6 номеро больницаын юртсы выльдэмын ке но, озьы ик кышкыт татын улыны. Тылпулэсь утиськон тӥрлыкъёс ӧвӧл, сигнализация но арысь аре лэсьтом шуыса уло но уж таки уг вырӟы. Витьыса уло, лэся, ку пурӟоз татын горд атаслэн тылыосыз. Нош тылыос пурӟем бере, бер луэ ини горд атасэз ӝокатыны. Солэн бервылаз пень гинэ кыле на уга. Йылпумъяса мар ке вера на вал но кыл быгыльскиз ини. Одно ик эшшо одӥг пол верано на, вылӥ верам юртъёсты кивалтӥсьёс син улазы мед возёзы. Ато... Кин тодэ? А. Леонов. Ӟечкыласько му вӧй но чагыр эстӥськон поттӥсьёслэн нуналэнызы Удмурт Республикаысь Правительстволэн нимыныз вань сюлмысьтым но шуныт мылкыдын ӟечкыласько му вӧй но чагыр эстӥськон поттонын тыршисьёсты праздникенызы! Туала вакытэ котькуд кунлэн ӟеч улонэз, азинсконэз потэ ву вӧй но чагыр эстӥськон бордысь, соос кылдыто экономикалэсь инъетсэ. Бюджетэз узырмытонын та удыс нырысетӥ интыын сылэ. Со туж яркыт адӟиське асьме шаермыя но. Му вӧй чотын бюджетэ вуиз 1,4 миллиард манет коньдон, ваньмыз пӧлысь со 47 процентэз луэ. Республикамылэн луонлыкъёсыз вань му вӧй поттонэз эшшо но будэтыны. Со герӟаськемын выль технологиос кылдытонэн, поттэм ваньбурез люкылонъя проектэз улонэ пыӵатонэн, УННК, УНК но "Белкамнефть" компаниосты вань кужымен ужатонэн но мукет. Берло дас кык ар ӵоже туэ нырысетӥ паларе гинэ шӧдӥськиз му вӧй кыскон удыслэн огсыр ужаны, азинскыны кутскемез. Му вӧй но чагыр эстӥськон поттон удысын гажано ужасьёс! Республикаысь Правительство тӥледлы тау каремзэ но гажамзэ вера. Тӥляд ужды секыт. Куазь шоры учкытэк, быдэстоно уждэс уретытэк, шаермылы тӥ узырлык ваиськоды. Сюлмысьтым ӟечкыласько тӥляд нуналэныды! Сӥзисько юн тазалык, шаермы понна выльзэ но умойзэ лэсьтон мылкыд. Удмурт Республикаысь Правительстволэн Тӧроез. Н. А. Ганза. Вордскемзэс та нуналъёс пусъё: Афонин Евгений Григорьевич - "Удмурт дуннеысь" ветеран; Орлов Петр Филиппович - "Удмурт дуннеысь" ветеран; Загуляева Валентина Александровна - дано артистка. Тодмо нимъёс но нуналъёс: Сентябрь 1. Тодон-валан нунал. - Тупаса улонлы сӥзем нунал 2. 50 ар талэсь азьло (1950) Ижевскын Е. М. Кунгурцевлы бюст усьтэмын (скульпторез П. П. Козловский). Со Советской Союзлэн кык пол Героез. 3. Му вӧй но газ промышленностьын ужасьёслэн нуналзы (сентябрьлэн нырысетӥ арня нуналэз). 5. 65 арес тырме М. В. Гаврилова-Решитьколы (1935), Удмурт радиоысь тодмо дикторлы, Удмуртиысь культура удысын дано ужасьлы. - 35 ар талэсь азьло (1965) Ижын поттэм "Медведь" карабин зарни медален пусъемын. Таӵе дано пус солы Лейпцигын ортчем выставка дыръя сётэмын. 9. Чеберлыклы сӥзем нунал. - 75 ар талэсь азьло (1925) выльысь ужаны кутске Воткинскысь завод. Граждан ож аръёсы со пытсамын вал. 10. Танкистъёслэн нуналзы (сентябрьлэн кыкетӥ арняяз). - Фашизмлэсь курадӟыса быремъёсты буре ваён нунал. 14. 90 арес тырме Семен Иванович Зайнаковлы (1910), Социалистической Ужысь Геройлы, гурт хозяйствоез ӝутон удысын ужасьлы. Со вордскиз Шаркан ёросысь Вукошур гуртын. 15. Вордскемез дырысен 85 ар тырме Гай Сабитович Сабитовлы (1915-1993). Со вал удмурт кылбурчи, Удмуртиысь кун премиезлэн лауреатэз, Удмуртиысь культура удысын дано ужась, Удмурт радиоысь литературно-драматической передачаослэн редакторзы. - Вордскемез дырысен 85 ар тырме Харлампий Акимович Русскихлы (1915-1975). Со вал Советской Союзлэн Героез. Вордскемын Селта ёросысь Егоровцы гуртын. 16. 60 арес тырме Яков Максимович Вахрушевлы (1940), медицина наукаосъя докторлы, профессорлы, Удмуртиысь тазалыкез утёнъя тазалыкез утён удысын дано ужасьлы. Вахрушев поттӥз 220-лэсь ятыр научной ужъёс, вордскемын Якшур-Бодья ёросысь Верх-Узгино гуртын. - Озон сӥез утёнъя калык куспо нунал. 17. Нюлэс удысын ужасьёслэн нуналзы (Сентябрьлэн куинетӥ арня нуналэ). - 85 арес тырме Вера Семеновна Чудновалы (1915), медицина наукаосъя докторлы, профессорлы, Россиысь дано эмъясьлы. - 105 ар талэсь азьло (1895) Глазовын усьтэмын училище. - 55 арес тырме Михаил Гаврилович Атамановлы (1945), лингвистлы, филология наукаосъя кандидатлы, диаконлы, Ижевско-Удмуртской Епархилэн референтэзлы. Атаманов гожтӥз 56 научной уж. Вордскиз Грах ёросысь Вуж Эгра гуртын. 20. 10 ар талэсь азьло (1990) УАССР-лэн Кун суверенитетэз сярысь декларация кутэмын. УАССР пӧрмытэмын Удмурт Республикалы. 21. 65 арес тырме Анжелина Гулермовна Мизилы (1935), В. Г. Короленко нимо драмая театрысь актрисалы, Удмуртиысь дано артисткалы. 22. 210 ар талэсь азьло (1790) Сарапулын усьтэмын нырысетӥ калык училище. 23. 70 ар талэсь азьло (1930) печатласькыны кутскизы Воткинскысь "Ленинский путь", туэ "Воткинские вести" газет. 24. Синтэм но пельтэм сӧсыръёслэн нуналзы. Машиностроительёслэн нуналзы (сентябрьлэн берпуметӥ арня нуналэз). 220 ар талэсь азьло (1780) Глазово гурт пӧрмытэмын городлы. Со Глазов уездлэн шоркарез луиз. - 220 ар талэсь азьло (1780) Сарапул слобода пӧрмытэмын городлы. Со Вяткаысь 13 уездъёс пӧлысь одӥгезлы шоркар луэ. 26. Вордскемез дырысен 105 ар тырме Владимир Мартинович Азинлы (1895-1920). Со вал граждан ожысь героез, 28-тӥ стрелковой дивизилэн командирез. Азин удмурт музъеме белогвардеецъёслэсь мозмытӥз, 27. Туризмлы сӥзем нунал. - Зарезьёслы сӥзем нунал. 28. 15 ар талэсь азьло (1985) Кырыкмас му вӧй кыскон скважина усьтэмын. 30. - 130 ар талэсь азьло (1870) Воткинск заводын поттэмын нырысетӥез мартэн гур. Таӵе гуръёс Уралын уг дасяло на вал. - 75 арес тырме Порфирий Иванович Килинлы (1925), Советской Союзлэн Героезлы. Вордскемын Ижевскын. Сентябрь - 105 ар талэсь азьло (1895) Глазов уездысь Чебершур черко гуртын усьтӥське гурт хозяйствоя школа. - 85 ар талэсь азьло (1915) Глазовын усьтӥське дышетӥсьёсты дасянъя семинария, 1920-тӥ арын со техникумлы пӧрмытэмын. 1937 арын - училище, 1939 - Глазовысь пединститут луэ. - 80 ар талэсь азьло (1920) Куӟебай Гердлэн но Трофим Борисовлэн кичӧлтэмзы улсын Сарапулын кылдытэмын литературая кружок. Со удмурт писательёслэн нырысетӥ огазеяськонзы луэ. 55 ар талэсь азьло (1945) радиоаппаратура бичанъя специалистъёсты дасян вылысь, Сарапулын электромеханической техникум усьтэмын. - 50 ар талэсь азьло (1950) странамылэн фондысьтыз магнитофон плёнка вылэ нырысьсэ гожтыса кельтэмын удмурт калык крезьгур. - 25 ар талэсь азьло (1975) Глазовысь гандболисткаос РСФСР-ысь Урал зоналэн чемпионатаз шудыса куинетӥ инты басьтӥзы. Е. Ушакова, Удмурт Республикалэн туала историезлы сӥзем центрысь ёзлэн кивалтӥсез. Луозы-а чебер сюресъёс?.. Кылемаз удмурт арня нуналэ Удмурт Элькунысь Кун Кенешлэн Тӧроез Александр Волков вуылӥз Дэри ёросэ. Солэн кузёез Галина Баталова ивортэмъя, Александр Александрович тапала тазьы кенешыны нырысьсэ потаз. Нырысетӥ сентябрь - тодон-валанъёслы сӥзем нунал. Подшивалово гуртэ вуэмез бере ик кузё кожиз школае. Татысь дышетӥсьёс кемалась витё вылэм ини сое. Юртэ пыременыз ӵош Александр Волков тунсыкъяське школалэн сюлмаськонъёсыныз, шумпотонъёсыныз. "Соиз, таиз ӧвӧл", - котькытын сямен ик огымысь ӝожтӥсько улон-вылонлэсь котькыӵе палзэ адӟем но чидам нылкышноос. Зэм, Кун Кенешлэн Тӧроез дышиз ини таӵе ӝожтӥськонъёслы. - Луозы, луозы: компьютеръёсты но, книгаосты но, - ӝогак гинэ оскытӥз со. - Тӥ мыным гожъялэ гинэ. Али мон адӟем карисько Россилэн азьвыл Президентэзлэсь Борис Николаевич Ельцинлэсь. Тодӥськоды на-а, кызьы лыдӟылэ вал со синвуосын тырмем гожтэтъёсты? - Пальпотэмысь гинэ эн дугдылэ, - нош ик азьланьтӥз Тӧро. - Мыньпотон нылкышно ымнырез туж чеберъя. Школалэн юртысьтыз потыса, Ижысь лыктэмъёс но гуртын улӥсьёс соку ик кожизы культура юртэ: татчы люкаськем калык кемалась возьма ни вылэм кема витем кунооссэ. - Туж секыт улон-вылонмы, - таӵе югдурез чидатэк ивортӥз "Подшиваловское" эштослэн тӧроез Анатолий Асанов. - Гурт калык вазь ӵукнаысен бер ӝытозь синмыз адӟытозь ужа, нош уждунэз - вераны возьыт. Со дыре ик куд-огез, уй палан толэзь ӵоже ужаса, сьӧразы ньыльдон-витьтон сюрс манет ваё но гуртысь калыкез булгандыро. Озьы адямиослэн суйзы-пыдзы юскиське... - Уг шумпотто быдэ вуисьёс но, - веранзэ азьланьтӥз Анатолий Владимирович. - Пыд йылазы ӵукна ик султо но бер ӝытозь ульчаостӥ калго. Югдур уката шугоме соин: ми Ижлы матын бере, татчы олокинэз но вуэ. Эштослэсь кузёзэ кылзэмез бере, Александр Волков гурт калыклэн пельпумъёсыз вылысь секыт изэз сэрпалтӥз кадь. - Эн вожъяськелэ уй пала лобасьёслы, - кунэрскем калыклэн Ӝожомем ымныраз пичи ке но пальпотон пыртыны турттӥз со. - Соослэн улонзы асьсэлэн, тӥлядэз - асьтэлэн. Сюлмысь ужаны гинэ кулэ. Мон ачим тани берло сизьым арзэ уй-нуналаз дас вить-дас куать час ужасько. Сотэк кытчы пырод? Улон косэ. Ужась адямиосты данъяса, гурт кенешлэн тӧроез Лариса Быкова шумпотыса ивортӥз: - Туннэ милям тужгес шудо адямиосмы, Антонида Ивановна но Александр Яковлевич Матвеевъёс, пусъё витьтон ар ӵоже ӵош улэмзэс. Ойдолэ ӟечкылалом соосты! Люкаськем калык азе туж кепыраса потӥзы арлыдо кузпалъёс. Соку ик валай: удмуртъёс. Шоразы учкыса но егитъёслы вазиськыса, Тӧро шуиз: - Тани учкелэ, пиналъёс, та чебер адямиос шоры. Учкелэ но вожъяськелэ: Антонида Ивановна но Александр Яковлевич витьтон ар ӵоже ини ог-огзылэсь люкиськылытэк уло. Тӥ озьы быгатоды-а? Турттэлэ но эшшо огпол турттэлэ! Ог-огдэс сю пол тышкаськелэ, ог-огеныды сю пол керетэлэ.Озьы ке но, улэлэ! Собере выльысь - юанъёс, куронъёс: - Пинь эмъян кабинетамы адямиез вӧсь карисьтэм тӥрлык вуттоно вал! - Коркаосамы газ кысконо! Зэм, кема ӝегатскыны дыр ӧвӧл. Автомашинаосамы ӝогак пуксиськом но вольыт асфальт вылтӥ тӧлэн ӵошатскыса ширтӥськом музон интые. Нырко-гопо, чик ӵошкатымтэ сюрес кузя мырдэм-мырдэм вуим Лудӟи гуртэ, татысь школае. Алигес гинэ пуктэм кирпич юрт котькинэ соку ик бордаз кыске. Татын ужась дышетӥсьёслэн верамысьтызы тодӥм: та школаын дышетске кызь одӥг нылпи. Туэ нош покчиос чылкак ӧвӧл, шуыны луоз: нырысетӥ сентябре школае вамыштэм куинь гинэ пинал. Ма бен, синмаськымон лыдпус ӧвӧл. Весь вань кайгуос сярысь тодэмез бере, Кун Кенешлэн Тӧроез вазиськиз юрттӥсезлы: - Ваньзэ-а гожтӥд? - Ваньзэ, - йырыныз шоналтӥз Рашид Газимович Касимов. ... Нош сюресъёс нуо азьлань. Ижысь куноосты кемалась витё ни вылэм Совхозный посёлокын улӥсьёс. Татысь культура юртэ пыримы но - инмаре: юрт пушкын сомында калык! Ӧтчамез усьтыса, гурт кенешлэн тӧроез Михаил Ильич Четкарев вакчияк тодматӥз тапалась югдурен, Удмурт Элькунысь Кун Кенешлэн Тӧроез Александр Волков - шаерысьтымы огъя югдурен. Культура юртэ люкаськем калыклэн сюлмаськонэз тырмыт вылэм. Тани адямиос пӧлысь егит нылкышно султӥз но киысьтыз льӧль сяськаоссэ Александр Александровичлы кузьмаса куриз: - Пуктэлэ милемлы выль школа! Дышетӥсь интыяз вуытозь, Ижысь лыктэм адямиез мукетъёсыз согизы ни пӧртэм юанъёсынызы, куронъёсынызы. Нош соос ялан огвыллемесь: - Выль корка пуктэм адямиос нокызьы но уг быгато юртазы тыл кыскыны! - Вӧзтӥмы кошко газ гумыос, нош ми - газтэк! - Учкелэ вал тӥ нылпи садмес - кӧня ке ар ӵоже ни сое липет улэ пыртыны ум быгатӥське! - Али ик кожало! - Кун Кенешлэн Тӧроез вуоно пумиськон сярысь тодыса но чик ӝегатскытэк вамыштӥз нылпи сад пала. Сюрес вылысен синйылтӥз пумитаз лыктӥсь егит нылъёсты. - Семья кылдытыны малпаськоды-а? - пальпотыса юаз нылпиослэсь. - Кызьы сотэк? - Кун Кенешлэн Тӧроезлы озьы ик сюлмысь мыньпотӥзы пиналъёс. Йылаз-пумаз вуттымтэ из юрт. Посёлокысь адямиос верамъя, кӧня ке ар ӵоже ини липет улэ пырыны уг быгаты со. Куд-огаз укноосын пиялаосыз но ӧвӧл ни. Озьы ке но, ӟечезлы осконо. Отӥяз Удмурт Элькунысь Кун Кенешлэн Тӧроез пумиськылӥз ёросысь кивалтӥсьёсын (пумиськон ортчиз Дэриысь культура юртын). Ӝожтӥськонъёс, куронъёс - котькытын кадь ик: одӥгез кайгыре сюресчиослы липетул ӧвӧлысь, мукетыз сюлэмшугъяське тыл кысылэмысь, куинетӥезлэн ӝоггес адӟемез потэ ини выль сюресэз... Пумиськонъёс, пумиськонъёс... Е. Михайлова. Уж ӧвӧл - кинлы уж? Дышетскон арлэн кутскемез сярысь Правительствоын ортчем кенешын ивортӥз калыкез дышетонъя министр Любовь Захарова. 370 сюрс нылпи али школае ветлэ. 169- эз отчы ӧз мынэ пӧртэм мугъёсын - я шутэтско на, я пегӟемын но мукет. Туэ дас дышетон заведениын выль юртэ пырон кароно. Витяз сыӵе ужрад вал ни. 12-тӥ сентябре шумпотон учыръёс луозы Сарапулын но Вавож районын. Кылемзэ юртъёсты лэсьтон йылпумъяськоз ньылетӥ кварталэ. Озьы чакламын планын. Дышетӥсьёслы отпуск дун но уждун тыремын. Книгаос понна компенсациосъя кылдэм югдурез соос шонер валало. Правительстволэн Тӧроез Николай Ганза министрлы кӧня ке лэчыт юан сётӥз: - Малы гуртъёслы механизаторъёсты тырмыт ум дасяське? Малы та вакытэ ик райцентръёсын ужлы ёрмисьёс вань? Малы Герман Грефлэн программаысьтыз валантэм ужпумъёсъя уж уг мыны? Ку тодмо луоз пичи комплектэн школаосъя югдур? Кӧня верано на улон интылы ссуда басьтонэз капчигес карон сярысь? Ку адямиослы рос- прос валэктон сётом пенсиосты кызьы но кинлы будэтэм сярысь? Та выллемесь ик юанъёс сётэмын вал Наукая, вылӥ но шор профессиослы дышетонъя кун комитетлэн тӧроезлы Сергей Решетниковлы, тазалыкез утёнъя но печатья но иворъёсъя министръёслы Сергей Шадринлы но Сергей Васильевлы. Кенешонын бадӟым инты висъяз экономикаез радъянлы, электрокужым понна дун тыронлы, туберкулёзэз эмъянлы но музон ужпумъёслы. А. Шкляев. "Уз пӧрмы" Ижевсклэн администрациез 1-тӥ сентябрьысен ульчаосын вузкаронэз дугдытон сярысь ужпум кутӥз. Табере вузкарыны уз луы ни сиён-юонэн, мукет вузъёсын. Со понна, пе, кулэ холодильникъёс но касса аппаратъёс. Нимаз вузкарисьёс (предпринимательёс) соин валче толон Удмурт Республикалэн Правительствоез, городлэн мэриез азьын пумитъяськон ужрад ортчытӥзы. Соос куро вузкаронэз выльысь берыктыны. Пикетэ потэмъёс администрацилэн постановлениеныз соглаш уг луо. Огшоры басьяськисьёс но пумит луэмзэс верало. Уго "Продторглэн" но "Аспэклэн" магазинъёсаз вузъёс шӧдскымон дуоноесьгес. Нош монополистъёслэн вань вузкарон интыосты киязы воземзы потэ. "Уз пӧрмы", шуо предпринимательёс. Маин йылпумъяськоз та ужрад, ивортом гезатмылэн вуоно номераз. Н. Лялин. "Шӧтэм ӵӧжпи" Ми соин кемалась матысь эшъёс. Улон-вылон югдуръёс сярысь лабыртӥськом, сюлэм висёнъёсмес ог-огмылы оскиськом. Нош али, ог-огедлэсь тазьы интервью но басьтоно луэ ни шуыса, нырысь серекъямы. Таӵе дыръя "интэрвуэн" йырин ӧй ӧл ай. Галя соку гинэ тыбыраз-пельпумаз мешокен, сумкаосын, ведраен пыриз. Ньыль-вить ведра мында губи бичаса ваем, коньыгубиез, лӥялгубиез гочатымон. Чай юим, телевизор учким, со но та супыльтӥм. Собере гинэ, пеймыт луыку, вераськонмылэн кулэ ӧраз мырдэм кожим. - Галина, тынад али "Удмуртия" издательствоын ӵыж выль книгаед потӥз, юбилеедлы шуыса. Лыдӟисьёсмы понна валэктом: со нимаське "Ӝужыт-ӝужыт гурезе... " Вольыт, чилясь, бусӥр выло, 160 бам тӧдьы чебер кагазэн. Киысьтыд ик уд куштылы кадь таӵе книгаез. Нош усьтӥд ке, огшокчемен лыдӟод. Татчы пыризы тынад берло дыре прозаен гожъямъёсыд: улонысьтыд учыръёслы сӥзем веросъёсын повестед, серемес веросъёсыд, кӧня ке сценкаед но. Тодӥсько, та книгаед эшшо но зӧкгес луыны быгатысал... - Зэм, вань гожъяме татчы ӧз тэры. Дас авторской лист курисько вал, нош мыным тямыс лист гинэ сётӥзы. Быдӟалазэ будэтон понна, аслым но коньдон утчаса бызьылоно луиз... Но ярам ини, таизлы но тау. - Сюрс экземпляр тиражед лыдӟисьёс кие кӧня гинэ вуоз. "Кенеш" журналэз но ваньмыз уг лыдӟо, отын веросъёсыд потӥзы ке вал... Али тонэ йӧно, визьмо кышномуртэн адӟе ни ваньмыз. Ойдо ай син азе пуктом, кыӵегес тон вал пинал дыръяд. - Мон асме "шӧтэм ӵӧжпиен" лыдъялляй. Висъяськылӥ, дыр, укыр ас поннам, ас вактам улэменым гинэ. Но тодӥсько на: тужгес пичи, ньыль-вить арес дыръям, йырсазьы зол вал, кырӟан кылъёс йырам кыльылӥзы. "Тӧлӟизы улмопу сяськаос" кырӟанэз яратӥсько вал... Онька ураме улыны выжим. Соку кыдёкысь роднямы, мӧйы кышномурт, ураме потыса, монэ кужмысь табанен сюдӥз. Ӧйтӧд, оло соин, оломаин кык нунал султылытэк изиськем. Оло, сьӧлык со вылэ малпаны, но йырсазе копак быриз. Школаын, пичи классъёсын, мон ляб дышетски, ураме гинэ учкыса пукисько вал. Оло нош, картошка вылын гинэ улыса, озьы луиз. Шур вамен потыку но йыр пороме вал. - Шӧтэм ӵӧжпи куке но юсьлы пӧрмыны кутске... - Витетӥ классысен малпаськисьгес луи. Удмурт книгаосыз лыдӟыны туж яратӥсько вал. Парсьгуртысь библиотекаысь басьтылӥ, куддыр ыштэменым туж куректӥсько вал. Мон бӧрсьы ньыль пичи сузэр-вынъёсы вал на уго, соос шӧдытэк кесяло вал... Кыӵе книгаос йырам кылизы? Огез - "Вордӥськем палъёсын". Тае лушкем лыдӟоно луи. Оломар сыӵезэ адӟиллям - паймисько вал - лыдӟыны ӧз лэзьылэ. Собере Зур но Ун, соослэн Левзы, пещераын улэмзы син азям кылиз. Вал сыӵе удмурт кылэ берыктэм книга, берло мон сое нокытысь ӧй шедьты ни. Калык выжыкылъёсыз "ньылыса" лыдӟылӥ. Нош кылбуръёсыз уг яратӥськы, уг валаськы вал. Одӥг пол, сцена вылэ потыса, наизусть веранме вунэтӥ - кыӵе керпотӥ со понна. Ас поннам куректыны яратӥсько вал мон. Асме весь берло интыын адӟылӥ. - Нош мар ке но тонэ поттӥз ик берлоос радысь... - Литературая кружок луысал ке, висъяськысал ик, дыр. Сочинениосме класс азьын лыдӟылӥзы. Одӥг пол, 7-тӥ классын, пьеса-выжыкыл гожтӥ но - ваньмыз паймизы. Дунъязы. Василий Ильич, географиен дышетӥсьмы, дядяелы шуылӥз (оломарме шӧдэ вал): "Васьлей, та нылыд кин ке но луоз". Дядяе берло ӵем тодаз вайылӥз солэсь кылъёссэ: "Вот ведь вераз вал..." Классамы нылъёс сыӵе етӥзэсь, кудӥз отличник но вал. Асме соосын артэ ӧй пуктылы. Чебер ӧз шуылэ. (Берло ини вераллязы: тон, пе, соку но синмаськоно кадь вал.) Трос аръёс ортчыса, улонэз шӧмъяме бере гинэ валай: ас йӧнлыкме возьматыны уг быгатӥськы вылэм. Городын чеберски, лэся. Дас тямыс арес дыръям гуртэ бертӥ но - ваньмыз паймизы. Кудӥз "ӧз тодмалэ". Одӥг пол дас кык иськеме бертыны машина возьмасько вал. Шофёр, однокласснике, ӧз пукты - ӧй, пе, тодма. Школаын одӥг пилы туж синмаськемын вал. Зар бӧрдылӥ, уг учкы шуыса. Табере со но, мукетъёсыз но адӟыны кутскизы. Но мынам Владимир Романове вал ни. - "Ӝужыт-ӝужыт гурезе..." книгаяд пыр-поч гожъяд Владимир Романовен тодматскемды, шудо дыръёсты сярысь, кыӵе инты басьтӥз со тынад улонад. Чуръёс вискы кылем малпанъёсыд вань на, дыр? - "Советской Удмуртиын" ужасьёс монэ "Дась лу!" редакцие нуизы. Отын сыӵе- сыӵе тонэн огкадь фамилиё адями вань, пе. Атай нимыз но тупа вылэм. Нош со мыным нырысь-валысь сыӵе шуш потӥз. "Мынам тулысэ" пичи, векчи книгазэ кузьмаз. Ураме потон ӧс дорозь келяз, кытын улэмме юаз... Ма, та сярысь мон зэмзэ но гожъяй ни, ватсаны номыре кадь... Мон али тау карыса верасал "Советской Удмуртия" газетын ужасьёс сярысь. Монэ, куинетӥ разрядэн каменщицаез, редакцие корректоре кутӥзы, чик урод ӧз каре. Кылбуръёсын, веросъёсын тетрадьёсыя валаллям лэся, янгышъёстэк гожъяськисько шуыса. - Галина, тон со дырысен бадӟым ныпъет ас вылад басьтӥд но весь сое нуиськод кадь. Дас ар - газетын, дас ар - "Кенеш" журналын. "Инвожо", "Вордскем кыл" журналъёсыз кылдытонлы, оло, тужгес трос кужымдэ сётӥд. Гожтэт пусйылӥсь-чотась, выпускающий, собере - машинистка, корректор, техредактор, отӥяз - кыл кутӥсь секретарь, куддыръя созэ но, тазэ но ӵош быдэсъясь. "Кенешын" дыръяд ик пӧртэм авторъёслэсь тямыс книгазэс люкад, дасяд, али но та бадӟым ужед ваньмыз поттыны вормымтэ, издательствоын кыкез рукописед кылле на. Тазьы ужаса, нош ик шӧтэм луыны кутскемдэ уд шӧдӥськы-а? - Нош мар карод, кытчы пырод? Пиосмурт интые кариськыса, вормонтэмзэ но возэз кысконо луэ. Туж ёрмон дыре, 1992-тӥ арын, бумагалы ветлон мон вылэ усиз. Таиз ай ярам, выжыкылэ вуылэм кадь вал. Кык сюрс иськем ке но - самолётэн. Калининград дорысь Неман городын бумага поттон комбинатын туж умой пумитазы. Одӥг документ понна - сокеме. Телефон пыр вераськыса гинэ пайдаез ӧй вал уго. Бертӥ но бӧрсям ик, кык-куинь нунал ортчыса, быдэс вагон (54 тонна) вылӥ ӟечлыко бумага вуиз. Кемалы тырмиз... Али тани, августэ, Пермь улосысь Краснокамске, 400 иськеме, грузовой машинаен ветлӥм. Матын ке но, таизлы но куинь нунал быриз. Вераны кутскид ке... олокӧня пол сӧриськылӥм, ӧжыт гинэ ӧм бекырске, сюресэз валатэк, берен Воткинске но вуиськом вал. Уйшоре потонэд сыӵе вылэм. Таяз учыре 36 килограммлы алдазы (кызьы уз алдалэ - грузчикъёссы но толэзяз вить сюрс манет басьтыса уло бере). - Паймизы, дыр, кышномуртэз таӵе секыт ужен, шальтрам машинаен лэзиллям шуыса. Асьмелэн солы паймонэз но ӧвӧл. Кытчы ке палэнэ калык пӧлы потаса гинэ асьмеды йӧноен, визьмоен, чеберен шӧдӥськом на. Сыӵе дыръя мон тонэ ӵошатӥсько Чувашиысь Раиса Сарбиен но Мордвиысь Маризь Кемален. Данъяськымон кадь потэ, милям но Галина Романовамы вань шуыса. Со котьку калык пӧлын. Кӧня книгаез вӧлдӥз меда гуртъёсы, кӧня сайкыт малпанъёссэ "кизиз" калыке. Марисов вакытэ ай кыл-куара поттыны дӥсьтӥз, школаосын удмурт кылэз, удмурт урокъёсыз унь-мань карыны выро шуыса. Со понна Галина Васильевналы йӧтӥз. Али Удмурт нылкышно кенешлэн кивалтэтаз чырмыт куаразэ поттылэ. Писательёслэн огазеяськоназы но правлениын вал. Ӟеч ужъёсыз понна культура удысын дано ужась ним сётэмын. Мар кулэ на кадь нылкышнолы, кылбурчилы? Пиез кышнояськиз, Аннуш нылзылэн песянаез со табере. Шудо но, дыр, ассэ серекъяса "бомж" шуэ ке но... Яратӥсь кузпалыз вӧзаз, огшоры ӧвӧл ай - туспуктылӥсь, газетын ужась. "Проза жизни" шуиськод таиныз улондэ. Нош али тон, Галя, йырдэ ыштымон синмаськыны быгатысалыд на-а? - Уг, визьмы уз лэзьы ни. 45 арес дыръям берлозэ йырме ыштылӥ. Со кыӵе ке уин чилектэм кадь вал. Быдэс дунне огдырлы югектӥз. Ваньмыз соку гожтэмъёсы кырӟанлы пӧрмизы. - Ум вералэ ни, кыӵе кылбурчи Галина Романова... Таин али вераськонмес йылсалом. Татьяна Чернова. Галина РОМАНОВА - вузкарон радын. Туспуктэмез Л. Лихачевлэн. Быриськом! Тазалыкез утёнъя министерство ӝыны ар ужамезлы йылпумъянъёс лэсьтӥз. Кылем арен ӵошатыса, та удысын но югдур шӧдскымон тупатскиз: бюджетэз йылӥз 40 процентлы, ватсаса висъямын на 40 миллион манет тыр ассигнованиос. Эмчиос ужзэс уретон сярысь малпаськытэк кысык ужало. Туэ соослэсь уждунзэс дыраз сётъяло. Быдӟалаез бен вожъяськымон ӧвӧл - шоро-куспоез 986 манет. Кема аръёс ӵоже ӟеч ужамзы понна Удмурт Республикаысь Данъян грамотаосын пусъемын кӧня ке валтӥсь врачъёс. Эмчиосты шугъяськытэ арысь аре калыклэн тазалыкез лябӟемез, демографиеской югдур. Туэ вордскемъёслэн лыдзы куинь но ӝыны процентлы ичигес кулэмъёслэсь. Луыло на вож нылпиослэн, нуны ваись анайъёслэн кулон учыръёссы (4 учыр). Азьвыл аръёслэсь тросгес ӧвӧл ке но, уг кулэсмо абортъёс. Калык ӧжытгес вазиськылэ амбулаториосы. Малы? Врачъёслэн, фельдшеръёслэн эмъюм ӧвӧллы чӧлскемзы, кезьыт пумитамзы уг шӧдскы-а? Но та удысэз арлы быдэ быръё трос егитъёс. Туэ медакадемиез йылпумъяз 354 мурт (ваньмыз сямен уже интыяськемын), медучилищеосысь - 396 мурт (уже интыяськемын ай ӝыныез гинэ). Туэ нырысьсэ медицинаысь тодон-валанэн психологъёсты дасязы ни. Туала нуналлэн куронъёсызъя тросгес кулэ психиатръёс но, районъёсысь больницаосын соос уг тырмо. Нош туэ ӝыны ар ӵоже гинэ психиатрлы юрттэт курыса вазиськылӥз ни 54 сюрс адями. Соос пӧлысь 3 сюрсэз висисен лыдъямын. Стационаръёс выжо нуназе гинэ ужанэ, кулэсто койкаослэсь лыдзэс. Огласянь со туж шонер: больница но шыръя, висись но уг керӟегъяськы - нуназе эмъяськыса ӝыт семьяеныз ӵош улэ. Шорлыдын вераса, али 1000 адями пӧлысь 125-ез койкаын эмъяське. Министерство туэ тросгес саклык висъяны быгатэ гуртъёсысь больницаослы - 9,2 миллион тыр эмъян тӥрлык висъямын, пуктӥсько Кизнер но Игра ёросъёсын участковой больницаос, Пичи Пургалан - нылпи ваён юрт, Можгалан - хирургия корпус. Шимес ӝоглыкен будэ шаерамы наркоманъёслэн но ВИЧ-инфекция паласькемъёслэн лыдзы. ВИЧ-лэсь кык мурт кулӥз ни, куинез ассэ ачиз быдтӥз. Тӥни сыӵе югдур: вамыш азьлань, кык берлань. З. Вахрушева. Ӝог вуттӥз Ар талэсь азьло вал со. Ува ёросысь Поршур гуртэтӥ редакциысь машинаен мыныкумы, автолэн питранэз лэзиз. Дыр ӝыт укмыс час котыр ни. Ма кароно? Шофёр уж борды басьтӥськиз, ми Леонид Прозоровен гуртысь эштослэн мастерскояз вамыштӥм. Пичи гинэ коркаын воргоронъёс тамакаса пуко. - Вай ай мон кинэ ке ӝогак суредало", - шуиз художникмы но автобусэн ужась водитель пала кариськиз. Дас минут ортчиз-а, ӧз-а - шофёрмы пиккетэ ни: дась, пе, сюрес вылэ потыны. Леонид со куспын патрет лэсьтыса вуттэм ни. Бен, кӧня ке ужасал на ке, ӟечгес пӧрмысал, вылды. Но... И. Лебедев. "Поршур" эштосысь водитель Николай Зубарев. Историысь чуръёс Ож тулкым уг лапка Мыным турпоездэн шуд усиз И степенё Отечественной война орденэн пусъем Смоленск городэз адӟыны. Та город ИЪ-Ъ дауръёсы славян выжыослэн огез шор городзы вал. Смоленскын улӥсьёс бигер-монголъёсыз городазы пырыны ӧз лэзе. Юн борддор кадь уте та город Москваез. Сое яркыт возьматэ фельдмаршаллы Михаил Кутузовлы черк вӧзы пуктэм бадӟым памятник. Французъёсыз асьме музъемысь уллямез понна сое князь Смоленский шуизы. Та бюстэз городысь улӥсьёслэсь люкам коньдонэн лэсьтӥз скульптор М. И. Стаховский. Татын трос памятникъёс вань Быдӟым ожлы сӥземъёсыз. Смоленсклэн борддораз мраморлэсь плитаосы гожтэмын бырем воинъёслэн нимъёссы. Соос пӧлын - Берлинын рейхстагез басьтонэ пыриськемъёслэн. Смоленскез утён понна трос землякъёсмы но ожмаськизы. Быдӟым оже ветлэм но собере "Ижсталь" заводысь парткомын инструктор луыса ужам мурт Петр Васильевич Михалев "Металлург" газетэ 25 ар талэсь азьло гожтӥз, кызьы со вуылӥз Смоленске. Мон ачим но татысь Рездовский паркез адӟи. Соку тодӥ, та паркын куинь сюрслэсь уно адями быдтэмын шуыса. Тужгес тросэн калыкез быдтӥзы 1942-тӥ аре гужем но сӥзьыл. 15-тӥ гудырикошконэ тушмонъёс асьмелэсь 60 адямимес музъем вылысь "ӵушыны" малпаллям. Вазь ӵукна тюрьмаысь пукись адямиосын машина потэм. Отын комендант вӧзы пуксем разведкае ветлӥсь партизанка Ася Сашнева. Рездовка доры вуыкузы, та комсомолкалэн куремезъя кырӟазы, ӧрӟиез шундылэсь но вылэ тубыны ӧтьыса. Комендант йыркуръяськыса наганзэ кияз кутӥз вал но - вӧзаз пукисьёс, сое таласа, ассэ быдтӥзы. Озьы ик ӝог сопал дуннее келязы мукет полицейскойёсыз. Шофёр, машинаяз огыр-бугыр луэмез шӧдыса, быдтыны ваемъёсыз автоматэн ыбылыны ӧдъяз. Подпольщикъёс шофёрез "маялтыны" быгатӥзы ке но, татын ыбылӥськемез кылэмзы бере, тушмонъёс ӝог вуизы. Гитлеровецъёс машинаысь вань кылем адямиосты быдтӥзы. Сыӵе со, войналэн сьӧсь ымнырыз. Жаляса верано луэ, та ож тулкым али ке но уг лапка. Асьме калык ялан быре Чечняын но мукет пӧсь интыосын. В. Чернов. Дырызлэсь вазь шумпотон Ӟеч толъем юосты адӟыса, чебер куазез синйылтыса, лэся, туэ гужем вылтӥ куд-ог кивалтӥсьёсмы дыртӥзы ӵашетыны: таиз ар тужгес пусйымонэз луоз, ю-нянь тырмыт люкаськоз, сиён-юонлы ум ёрме... Зэмен но, нырысь-валысь шумпотыны муг вал кадь. Гектарысьтыз ог 18 центнер ю тысь шедиз. Нош табере? Учке ай сводкаез. Гурт хозяйствоын кылдэм югдур пумысен кенешиськом шаерысьтымы та удысъя министрлэн вштӥсеныз В. И. Наговицынэн: - Валерий Иванович, мар луиз асьме урожаен? Лыдпус нуналмысь кулэсме ук... - Бен, та дыре ушъяськымонэз ӧвӧл. Юосты утялтыны кутскеммы дырысен ог 40 нунал ортчиз ни. Но уборкалэн пумыз уг адскы на. Эшшо дасо нунал кулэ юосты аран-кутсан понна. Нош наукалэн куронэзъя чаклано ке, вань тысё культураосты октыны-калтыны кулэ куинь арня куспын. Гызмыльтэммы бордысь ик пото ыштонъёс. Та вакытэ гектарысьтыз ю ог 12 центнер гинэ люкаське на. Отӥяз эшшо но ичигес кутсалом. Ӟеч будэм урожаймес дыраз утялтэммы ӧз луы. Кужмо зор но тӧл юосты погмазы, погыртӥзы. Музозь някырскем шеп табере жаткае уг шедьы ни, вандӥськыса кыле. Чаклам мында ю тысь бункере уг вуы ни. Та югдурлэн мугъёсыз тодмо. Куазь вылэ гинэ чӧлскеммы уг поты. Со котькугес ик аспӧртэмъяське. Ужпум асьме бордын, кин радъяны кулэ гурттхозяйстволы государство ласянь юрттонэз. Уго сюрлоен гинэ (ай соиз но али ӧвӧл ни) туала дауре номыр уд кары. Тани азьло аръёсы вань ю бусыосты химической препаратъёсын утялтӥськом вал, озьы нюръяськылӥм жаг турынэн. Табере та ужез чылкак аналтӥзы. Тодазы но уг ваё ни кадь. Данакез хозяйствоос ӟудэмын, коньдон тырмымтэен, мукетъёсаз валамзы уг окмы, куинетӥосаз жаг будосъёсын нюръяськонэз кулэен уг лыдъяло. Нош йӧны будэ но будэ, сотэк но лябомем юосты зӥбыса. Таӵегес ик ужпум минеральной сылалъёс, ватсэтъёс ласянь. Пӧртэм ӧвӧл техникаен но... - Таиз сярысь паськытгес мадёно вылэм. - А-а, мар веранэз. Тодо ук ваньмыз. Бюджетэз юнматӥсьёс, депутатъёс, югдурез ӟечгес мед валасалзы вылэм. Уго гуртоослэн улэмзы меӵак герӟаськемын государстволэн юрттэменыз. Коньдон вань - техника вань, техника вань - азинскон вань. Азинскон вань - нянь вань. Тӥни сыӵе вашкала эгес. Алигес вуылӥ Селта ёросэ. Отысь "Селтинский" эштосын 1156 гектар ю будэтэмын. Нош комбайнзы ньыль гинэ. Ай соос ужамзылэсь трос сыло. "Арлетьын" одӥг сяна ужась агрегатсы ӧвӧл. Озьы-а ю-нянез тупатэм дыре утялтод? Отделмылэн кивалтӥсез Николай Широбоков ветлӥз Яре. Воксё усем мылкыдын берытскиз. Одӥгаз хозяйствоын, шуэ, комбайнзы син азьын шальтраз-куашказ. Уборка гуньдӥз, пе. Сыӵе югдур данаказ хозяйствоосын. - Вань, дыр, ук адӟем карымонъёсыз но? - Кӧня ке вань, соиз валамон. Тани Вавож ёросысь Мичурин нимо колхозлэн кивалтӥсез Валентин Калинин, Каракулино ёросысь Вормонлы 40 ар нимо эштослэн кивалтӥсез Александр Белослудцев Можгаысь сортоиспытательной станцилэн директорез Юрий Рябов но куд-ог мукетъёсыз вазенгес ик ивортӥзы ни, юосты кутсанэз йылпумъязы шуыса. Отын ю-нянь но трос люкаськиз. Котькытын озьы ужаны пӧрмытысалзы ке, шугъяськонэз ӧй луысал. - Нош кызьы мыно ужъёс етӥн бусыын? - 7,8 сюрс гектар пӧлысь ог 6 сюрсэз со ишкемын ни. Кылем арын та дырен ӵошатыса, югдур умойгес. Но куроез куасьтоно-чылкытатоно на ук ай. Заводэ вуттоно. Сотэк удысэ кутэм коньдон уз берытскы. - Музон но сюлмаськонъёсты ичи ӧвӧл кадь та дыре? - Шугъяськытэ тол юосты кизён. Дырыз ортчиз ни, шуыны луоз. План табере уз быдэсмы. Тани пургаос 6,6 сюрс гектар кизьыны кулэ вал, кидыс согемын 4,3 сюрсаз гинэ. Туннэ-ӵуказе рос-прос ӧз ужалэ ке, отӥяз воксё бер луоз. Кидыс дасянэн но капчи ӧвӧл. Арысь аре выжись фондэ кисьтэмын кулэезлэн 61 процентэз кидыс. Тужгес урод мынэ та уж Камбаркаын, Вавожын, Кизнер но куд-ог мукет интыосын. Огъя верасал тазьы: куазь али гужем кадь шулдыр возиське. Соин ик тыршоно вылэм та дырез пайдаё кутыны, вань луонозэ лэсьтыны, ӝӧк вылмы азьланьын тыр мед луоз шуыса. Кема витем урожай ваньмылы ик шумпотонэн мед берытскоз. Вераськиз И. Лебедев. Та фото лэсьтэмын кызь ар талэсь азьло. Табере таӵе суредэз ӵем адӟыны уг кылды ни. Туж жаль... О. Чирковлэн туспуктэмез. Дарт Зарни - зарни визьёслы Та чебер но визьмо нылашъёс асьсэды али тужгес шудоен шӧдо, дыр. Шаркан ёросысь Быги школаез Алёна Хохрякова но Ольга Шамаева зарни медален йылпумъязы. Нылъёс котьку висъяськылӥзы общественной уже мыло-кыдо пыриськеменызы но. Со сяна, газетэ гожъяськылэ, англи кылэн тунсыкъяське, нош Ольга - спортсменка (солэн бызьылонъя 1-тӥ разряд). Ваньмон дыръяз яратэ на суредаськыны. Али та нылъёс - студенткаос ни. Алёна капчиен пыриз Удмурт университетысь история факультетэ, нош Ольга - Пермьысь технологической институтэ. Со химик луыны малпа. Нылъёсты нырысетӥ бадӟым вормонэнызы ӟечкыласа шудо сюрес сӥзиськом. З. Рябинина. Туспуктэмез - В. Камашевлэн. Политика Арня ӵоже дуннеын, странаын, шаерын Витьтон вить ар талэсь азьло сентябрьлэн нырысетӥ нуналъёсаз кысӥз дунеын сизьым ар ӵоже арам ож тылӝу. Солэн куараосыз туннэ но шуккисько на. Та нуналъёсы Россилэн Президентэз Владимир Путин Токиоын пумиське Японилэн кивалтӥсьёсыныз. Эскероно ужпумъёс пӧлын чузъяське Курил шормуӵъёсын герӟаськем югдур но. Япония уно аръёс ӵоже ини тырше шормуӵъёсты аслыз берыктыны. Но Россия талы чутрак пумит. Бускель кунэ мынон азяз Владимир Путин нош ик вераз: Курил шормуӵъёсты Москва нокинлы но уз сёты. Кенешонъёс дыръя но со та малпанзэ юнматӥз. Шормуӵъёсын герӟаськем ужпум люкетыны кулэ ӧвӧл валче кусыпъёсты радъяны, шуиз Президент. Япониын ужамез бере Владимир Путин вуоз Америкае, кенешоз Билл Клинтонэн. США- лэн Президентэз та пумиськон азьын ӟуч эшезлы ӟеч кузьым лэсьтӥз, шуыны луоз: Клинтон ивортӥз, матысь дыре солэн странаез ракетаослэсь утиськонъя радлык кылдытон борды уз басьтӥськы шуыса. Аналитикъёслэн чакламзыя: США-лэн кивалтӥсез таӵе амалэн юрттыны тырше аслаз кивоштӥсезлы Альберт Горлы. Ӵапак со пыриськоз ук вуоно президент быръёнэ, демократической партилэн кандидатэз луыса. Билл Клинтон но кылем арня вискын странаезлэн палэназ ужаз: тямыс часлы со вуылӥз Колумбие. Пусйыны кулэ, та страналэн туж аспӧртэмлыко тодметэз вань. Со наркотик вӧлмытӥсьёслэн карзы. Ӵапак отысь США-е туж уно кокаин вуэ. Клинтон ивортӥз, солэн странаез ваньзэ лэсьтоз, наркобизнесэн вырисьёсты пачкатон понна. Но таӵе кылъёс Колумбиысь калыклы ваньмызлы ӧз кельше, шӧдске. Уно адямиос урамъёсы потӥзы Америкалы пумит ӧтёнъёсын. Милемлы кыкетӥ Вьетнам кулэ ӧвӧл, кесяськизы соос. Бен, ортчо сыӵе вакытъёс, куке дуннеысь кыкез кужмо кунъёс ас мылкыдзыя чуртнаськылӥзы сояз яке таяз странае, шуом США - Вьетнаме, СССР - Афганистанэ. Мукет ужпум - соослы юрттэт курыса вазисько ке, шуом, Узбекистан - Россилы. Кӧня ке арня ӵоже ини секыт ожмаськонъёс мыно. Узбекистанын но Киргизиын. Исламистъёс Таджикистан пыр мерско Фергана долинае. Татын соос малпало нимаз кун кылдытыны. Россия бускельёсызлы юрттыны дась, уго соос лымшор кунгожзэ ислам фундаментлистъёслэсь утё, но "пӧсь интые" аслэсьтыз ожгарчиоссэ ыстыны уг малпа. Аслаз музъем вылаз но ук, шуом, Чечняын ик, югдур уг тупатскы. Ожмаськонъёс паськыт уг мыно ни, озьы ке но нуналлы быдэ федеральной кужымъёс ышто адямиоссэс но техниказэс. Боевикъёс пумитъяськон тактиказэс воштӥзы, пуштытъян уж борды басьтӥськизы. 6-тӥ сентябре Чечня пусъе эрик басьтон нуналзэ. Федеральной кужымъёслэн чакламзыя, со нуналэ исламистъёс пӧртэм интыосын террористической ужрадъёс ортчытыны чаклало. Со "сьӧд ужлы" дасяло камикадзеосты - асьсэды асьсэос быдтӥсьёсты. Ортчем арня вискын азьпала вамыш лэсьтэмын кун властез вылӥысен улӥозь радъянын. Владимир путин Волга дурын пумиськылӥз но кенешиз Приволжье округе пырись улосъёслэн кивалтӥсьёсынызы. Москвае берытскыса, со кинюртэмзэ пуктӥз Кун Кенеш (Госсовет) кылдытон сярысь указэз улэ. Выль ёз ужан пуштросэзъя консультативной луоз, отчы Россиысь вань улосъёслэн йыръёссы пыризы. Соин кивалтэ ачиз Президент. Секретаре юнматэмын Президент администрацилэн кивалтӥсезлэн одӥгез воштӥсез. Быръемын озьы ик нимысьтыз Президиум. Отчы пыризы ваньмысьтыз ик сизьым округъёсысь муртъёс. Дырыны-дырын ортчыса, Президиумын ротация ортчылоз, мукет сямен вераса, отысь адямиосыз вошъяськылозы. Кылсярысь, та вакытэ Президиумын ужалоз Минтимер Шаймиев. Собере сое воштоз Приволжье округе пырись мукет улослэн кивалтӥсез. Кемалась ик ӧвӧл Россиысь Правительство Кун Думае ыстӥз вуоно арлы бюджетлэсь инъетсэ. Та документлэн тужгес пусйымон тодметэз тани кыӵе: уно аръёс ӵоже нырысьсэ чаклам расходъёс ичи ӧвӧл басьтоно доходъёслэсь. Бен, пӧртэм фракциосысь депутатъёс бюджет шоры пӧртэм сямен учко, соин ик споръяськонъёс луозы, но документ кутэмын луоз шуыса оскон вань. Быдэсмоз-а, уз-а, соиз ини асэныз гинэ Россиен герӟаськемын ӧвӧл. Тодмо ӧвӧл ай, шуом, кыӵе куронъёс пуктозы странамы азе Западысь кредиторъёс. Та дыре нокин но уг вера, кыӵе дуныз луоз му вӧйлэн дуннеысь рынокын. Шаермы дасяське президент быръёнлы. Югдур пумен ӟырда. Отчы пумен паськыт пыриськыны кутско партиос но огазеяськонъёс. Со сярысь тани вера ини "Удмурт кенеш" ассоциацилэн ӵектонэз но. Солэн азьветлӥсез Валентин Тубылов шуэ, ваньмызлы ик кандидатъёслы, пе, вылӥ должностен муртлэсь интызэ басьтон понна, огкадь луонлыкъёс кылдытоно иворъёс вӧлмытӥсь ёзъёсын. Та ужпумез ӝутыны со дэмла Кун Кенешлэн сессияз. Ӵектон сётэмын - эскеремын луоз-а, уз-а, со пумысен решение кутозы асьсэос депутатъёс. Ю. Александрова. Ӟудэм муртэ ӧз куштэ Гожъяськисьёслы ӵемысь сюрес вылэ потано луылэ. Я огаз ёросэ вуоно, я мукетысьтыз кыӵе ке ивор вуттоно. Одӥг пол бер ӝыт Пичи Пурга ёросысь Яган-Докъя гуртэ вуыса кӧлыны кытчы пырыны ёрмеменым бӧрдон калэ вуи. УАССР-лы 10 ар нимо ("Госплемзавод") совхозын ужасьёс Иже "Мылысь-кыдысь" концертэ ветлӥллям. Паймоно кадь, гурт калык но табере дораз озьы гинэ уг чорты ни вылэм. Сюлворыса-мараса ӧй улы - автобусэ берен пукси но, шорам абдраса учкись шофёрлы "монэ городозь нуэ вал" шуисько. Брангуртэ вуим но, юлтоше шуэ: кӧлыны татчы дугдӥсько, бер ини, городын таӵе вакытэ трамвайёс уз ветлэ ни. Мар карод? Автобусысьтыз васьки но, тодмотэм гуртлэн ульча шораз долкаса сылӥсько. Пыд улын ӟукыр-ӟукыр кезьыт лымы, еж палэзез пинь улэ куртчем кадь, юзмыт омыр мугорез юзыр-кезьыр кынтыса лэзе. Инмын нош кӧня кизилиос! Соин ик кезьытлы сётскем уг поты али. Озьы паймыса сылонъям, лыктӥсь адямиослэсь вераськемзэс кылӥсько. Ярам коть, шофёрлэсь аспӧртэм куаразэ тодмай. Нош соин артэ вамышъясь воргорон мыным шуыса, лэся, вазиз: "Ма, ми доры мыноды ини. Ульчаын уд кӧл ук таӵе кезьытэн". Кепыраса но кышкаса сьӧразы вамыштӥ. Кинъёс соос? Чылкак тодмотэм адямиос. Нош мон кин соос понна? Кытчы? Кин доры? Собере асме ачим ик буйгатӥсько: удмуртъёс бере, уз куштэ, дыр. Нош йырам кин ке шукке кадь. Мар шуозы семьяоссы? Кыӵе синмын шорам учкозы ини, инмаре-куазе?! Илья (кузёлэн нимыз) капчияк гинэ йыгаськиз но, "Пумита куноостэ" шуыса, кузпалызлы вазиськиз. Кунокуа кышно - туж капчи мылкыдо вылэм. Соку ик чай пӧсятӥз, матысь ӵыжы-выжыосызлы сямен ӝӧквыл тыр сиён пуктылӥз но милемды ӝӧк сьӧры ӧтиз. Пукыкумы валай, автобуслэн кузёез (Семен) кыкетӥзэ тазьы кӧлыны шуыса пырем ини татчы. Туж мыло-кыдоесь Алевтина но Илья кузпалъёс. Нош кышномуртлэн чылкытэз соку ик адӟиське: котькытӥыз ӝикыт но чебер, сюлэмъя, валаса лэсьтэмын. Илья - туж кибашлы воргорон, ачиз ик мебельзэс но лэсьтэм. Тунсыко. Солэн киыз котьмарлы усто шуыса, ӵуказеяз, сайкам берам, юртъер котырзэ ас синмыным адӟыса валатски. Сандык кадь. "Ваньзэ ачиз пӧръя", - шумпотэ кузпалыз понна Алевтина. Чылкыт но вӧл-вӧл комнатаын пианино сылэ. Юромо со, нылпиос мед дышетскозы шуыса басьтэмын. Миша быгатэ ни шудыны. Ма, кызьы сотэк, со Ижысь культурая училищеын дышетске. Ӝоген режиссёр луоз. Удмуртлык борды жильы кыстӥське, шуо анай-атаез. Нош Надя Глазовысь пединститутын тодон-валан люка. Со но быгатэ шудыны та инструментэн. Эктыны но кырӟаны яратэ. Мылкыдыз вань "Италмас" ансамбле кариськыны. Нош Машизы пичи на, 2-тӥ классэ мынӥз. Озьы ке но, агай-апаезлэсь адӟем каре ини. Бадӟымъёсыз шудо но, Маша, асэныз ӵош эктыны косыса, анай-атайзэ ёртэ. Шудо семья. Таӵе дыръя син гинэ медаз усьы шуоно, дыр. Азьланяз но таӵе ик тыро-пыдо мед луоз улонды. Шуд но тазалык, байлык, вань ӟечсэ тӥледлы, капчи сюлмо, адямиез жалясь-валась Бегишевъёс. Алевтина Геннадьевна "Госплемзаводын" бухгалтер луыса ужа. Ушъяно адями со отын. Нош Илья Иванович кытчы косозы, отчы мынэ. "Уг" шуонэз уг тоды. Ужез яратӥсь адями со. Ас вакытаз шудзэ уй палан но утчаз, но кема ӧз чида, вордӥськем гурт палъёсаз берытскиз (ачиз со Чутожмонысь), шудэз сое гурт котыраз ик возьма вылэм. - Э-э, Брангуртын кадь Яганын ӧвӧл ук калык. Лыктэмъёс отын, лыктэмъёс, - ӵуказеяз магазин дорын вераськизы мӧйы кышноос. - Собере яганъёс, брангуртъёс сярысь, узыргес но, дыр, карисько, нош ми сыӵеесь ӧвӧл. Тани Бегишевъёс доры ик кин гинэ уг пыры - тодмо-а, тодмотэм-а, ваньмыз куно луо. Соослы-а инмар азинлык уз сёты. Шумпотӥз сюлэмы. Зэмзэ но, туннэ кӧлэм кунокуа семьяосы сярысь верало ук. Та улонын тросэз кышномурт бордысь потэ, дыр. Капчи мылкыдо, пальышась ымныро, адями шоры ӟеч вазиськись кышномурт соку ик сюлэме биниське, матысь эшедлы сямен дышиськод солы. Озьыен, сыӵе ӟег нянь кадь муртлэн нылпи но, кузпал но ӟеч луыны кулэ. Тӥни сыӵеесь со выль сюресъёс но выль тодмоос. Пыд улысь потэм чылкытэсь чуръёс. Любовь Тихонова. Алевтина но Илья Бегишевъёслэн семьязы. Крезьгуртэк кыӵе улон? Кылем арлэн пумаз Сарапулысь искусствоосъя 1 номеро нылпи школалы 90 ар тырмиз. Крезьгуро школаос пӧлын со шаерамы огез бадӟымез луэ, чеберлык удысын тыршись трос адямиос потӥзы ни татысь. Али но школаын бадӟым уж нуиське. Туэ тулыс Быдӟым Вормонлы 55 ар тырмон фестивале, "Зарни италмаслэн" концертъёсаз пыриськизы. Скрипачъёслэн ансамбльысьтызы бадӟымъёсыз пиналъёс кыкетӥ степенё диплом басьтӥзы. Дипломен пусъемын вал "Вдохновение" хор, калык инструментъёсъя оркестр но нимаз кырӟасьёс Лёва Быков, Виктория Козында но Женя Шудегов. Татысь пинал пианистъёс но быгатэменызы висъяськизы республикаын ортчем конкурсын. Со Светлана Чухланцева, Катя Окель, Виталий Евсеев, Оксана Глазунова, Наташа Ананьина. Республикамылэн палэназ но потало та усточиос. Россиысь "Хрусталь камертон" конкурсэ пыриськиз Алёша Макшаков. Со татын ньыль кырӟанэз быдэстӥз. Нош Павел Алмазов, гитараен шудыса, умой мылкыд кельтӥз Казаньын ортчем фестивальын. Ӝыны ар куспын гинэ Сарапулын но республикаын улӥсьёс понна пинал усточиос 50 концерт сётӥзы. Куд-огез нимаз но быгато ини, тани Дима Филин Камбаркаын огназ фортепианоне концерт сётӥз. Нылпи садэ но шор ёзо школае ветлӥсьёс понна та искусствоосъя школа крезьгуро абонементъёсъя ньыль концерт-лекция дасяз. Дышетскисьёс кылӥзы улэп крезьгурез. Городысь нылпи филармониын но вал куинь бадӟым концерт: "Тулыс", "Крезьгурез яртыса", "Аръёс но иськемъёс пыр". Таӵе ужрадъёсы шумпотыса ветло мӧйыос, пинал крезьгурчиослэн анай-атайёссы. Соос понна ортчытэмын викторина, ожлы сӥзем кырӟанъёсын концерт. В. Лагунов. Вылӥысен улӥозь. Улӥысен вылӥозь. Августлэн берпуметӥ нуналъёсаз Россиысь политикаын висъяськизы Казань но Самара. Татарстан пусйиз кунлык ялэмез дырысен дас ар тырмонэз. САмараын ортчиз Приволжск федеральной округе пырись улосъёслэн кенешсы. Отын вераськон мынӥз странаямы властез вылӥысен улиӧзь юнматон сярысь. Нош кызьы куспазы герӟасько республикаослэн суверенитэтсы но Россиысь президентдэсь кужымзэ золомытыны тыршон? Конституцияя суд та пумысен нимысьтыз решение кутӥз: одӥг государствоын быдэсак эрико улосъёс луыны уг быгто. Яке тон Россилэн ог люкетэз, яке тон нимаз кун. Татарстанысь Кун Кунешэн юртэз азе люкаськизы адямиос. Ог 500 мурт. Трос ӧвӧл ке но, ӵашетэмзы кыдёке кылӥське.Ужрадэз ортчытэ Россиысь бигеръёслэн общественной центрзы. Бигер кылэз тодытэк но валаны луэ люкаськемъёслэсь куронъёссэс. Одигаз ӧтёнын шуэмын: "Чечняын вирен копак наштаськем киос кыстӥсько Татарстанлэн Конституциез борды". Тӥни озьы пумитазы бигеръёс Конституцияя судлэсь решенизэ. Пусйыны кулэ: милиция ассэ туж зӥбыт возиз. Ваньмызлы лякытэн валэктиз, таче люкаськонъёслэн но ӧтёнъёслэн данзы пумен быре ини, отчы ичигес калык ветлыны кутске шуыса. Валамон со. Тужгес ик, Татарстанлэн дас ар ӵоже азинскемез шоры учконо ке. Та дыр куспын республикаын лэсьтэмын 3 сюрс километр выль сюрес, 15 миллион квадрат метр улон юртъёс, усьтэмын 400 выль школа, 125 больница но поликлиника. Вань шӧдскымон азинсконъёс мукет удысъёсын но. Юбилейлы сӥзьыса, Татарстанлэн Кун Кенешаз сӥё-дано пумиськон радъямын вал. Депутатъёс но куноос азьын вераськиз Минтитмер Шаймиев. Люкаськемъёсты вице-премьер Валентьина Матвиенко пыр ӟечкылаз Владимир Путин. Со но, мукетъёсыз но пусйизы: странаямы югдур шуг ке но, Татарстан огсыр азинске. "Шоковой терапия" шуон интые, кудӥзлэсь Россия али ке но умой-умой шокчыны уг на быгаты, бигеръёс асьсэ сюресъя вамыштӥзы, рыноке дыртытэк выжизы. Республикаын юн шӧдӥське кун валстьлэн кужымез. Соин ик экономикаын, мукет удысъёсын воштӥськонъёс мыно, калыклэсь кулэяськонъёссэ котыр ласянь чакласа. Татарстанын кык арзэ ини ужа Музъем кодекс. Россиын сыӵе документ луысал ке, музъем реформа странаямы ӟечгес радъяськысал. Кенешон дыръя доклад лэсьтыкуз Татарстанлэн кивалтӥсез кӧня ке пол вазиськиз Владимир Путинлы. Калыклы суверенитет пайда сёэ ке, отын номыр умойтэмез ӧвӧл, пусйиз со. Котьмалэсь кулэез со бордын: дас ар ӵоже быдэс Россиын люкам ӟеч опытэз уже кутоно. Та ласянь кык президентъёслэн мылкыдзы тупа, шӧдске. Со яркыт адӟиськиз ӵуказеяз Самараын кенешон дыръя. Владимир Путин ӵапак соку кутӥз Россиын Кун Кенеш кыдытон сярысь решение. Нош кӧня ке улыса ялӥз солэн президиумаз пыртэм муртъёслэнсь нимъёссэс. Соос пӧлын - Минтимер Шаймиев. Россия Федерациысь Кун Кенеш пӧрмыны кулэ старанмысьтымы вань ӟечсэ-умойзэ огазеясь выль ёзлы. Оло, дышом ни оген асьмеос но калык радъя улыны. Нялтас пусйыны кулэ тани мае. Владимир Путин умоен лыдъяз гурт хозяйстволы техника висъян радэз тупатон сярысь ӵектонэз. Та пумысен Россилэн прравительствоез постановление дасяны кулэ. Ваньмыз та возьматэ, Казане но, Самарае но огъя улонмес умоятон понна сюлмаськись адямиос люкаськылӥзы шуыса. Вылӥысен улӥозь, улӥысен вылӥозь - котькытын радыз медло. Сыӵе малпанэз юнматӥзы пумиськонъёсы пыриськемъёс. И. Лебедев. Милям кызьпуосмы самой кырыжесь Куанер пиналъёс, туннэ ньылетӥ нуналзэ школа парта сьӧрын пуко ини. Куд-ог предметъёсъя дорысь ужез но юало тани. Эх, луысал на ке али одӥг арнялы выльысь каникулъёсы берытскыны. Арня талэсь азьло гинэ номыр сярысь сюлмаськытэк шутэтскизы ук ай тани кӧнякеез ке Воткинск ёросысь "Уральсике зори" санаторий- профилакторийын. Мар но ӧз каре соос отын: Америкаез но усьтӥзы, бразильский сериалъёс но малпазы, сюан но шудӥзы... Нунал лумбыт маке но тунсыкоеныз паймытъязы пиналъёсты вожатойёссы. Эсьма лагере пиналъёсынызы адӟиськыны шуыса лыктэм анай-атайёс но кошкыны ӧй ӵыдылэ. Но тужгес шумпотӥзы соос - нылпиоссэс эмъямлы. Тросэз уго татчы сюремын начар улӥсь семьяосысь: куддыр доразы нылпиослы кӧттыр сиён гинэ но уг шедьылы, нош татын адӟылымтэ чечымъёсын сюдо. 50 пала пиналлы профилакторие путёвка висъяз Россиысь "Вож кирослэн" удмурт ёзэз. Воткинск котырын ракетаосты быдтон завод пуктон сярысь вераськонъёс потэм дырысен татысь калык дары вышкы вылын кадь пуке, нылпиоссылэн тазалыксы сярысь шугъяське. Со понна мугез ӧвӧл ке но (медикъёслэн эскеремзыя татысь пиналъёслэн тазалыксы, мукет ёросъёсын ӵошатыса, умойгес но ай), "Вож киросын" ужасьёс воткинскъёслы таӵе кузьым лэсьтӥзы. Соосты туж сюлмаськытэ пиналъёслэн инкуазен эшъяськымтэзы, сое валаны турттымтэзы, изъянтэмзы. Соос уг тодо, мар со "экология", уг тодо вӧзысьтызы ошмесъёсты, нюлэсъёсты, умой-умой уг валало ракетаос пумысен вераськонъёсты, но сокем кышкатэмын -14 аресъем нылъёс азьланяз уг малпало пинал вайыны, соос кышкало урод, ӧлексы нуны вордыны. Экологической лагерьлэн программаезлэн авторъёсыз Ирина Соловьёва но Татьяна Домнина асьсэос пиналъёс доры потаса буйгатыны, зэмос югдурез валэктыны тыршо. Шудонъёс но конкурсъёс пыр пиналъёс инкуазь сярысь тодон-валан басьто, тунсыкъяськыны кутско. Соку тӥни соос вожатойёсынызы, дышетӥсьёсынызы ӵош нюлэскы, возь вылэ пото, асьсэлы ноку адӟылымтэзэ усьто. Тани огпалаз нюлэс кушын пукыкузы, Алёша Вахрушев паймыса учке сюсьтыл кадь веськрес тӧдьы буртчин кызьпуос шоры: - А милям городын таӵеесь ӧвӧл: Воткинскын соос кырыжесь, сьӧдэсьгес, вайяськыса будо, куаръёссы но уг шильырто... Татьяна Валентиновна шумпотэ - зэмос исследователь будэ, но лулскыса валэктэ: - Отын соослы омыр уг тырмы, пиналъёс, соин ик курадӟо. Мукетъят потыкузы нылпиос тросгес юаллясько ини инкуазь суредъёс сярысь, азьло сямен уг тӥяло кыр улмопуэз, уг бугыръяло кузьыли карез. Собере асьсэос ӵекто нюлэс кушез утялтыны. Малпасько, туннэ но школаысь бертыкузы, соос чылкак мукет сямен учкозы сюрес вылысь куинёй ини кузёзэ возьмаса пукись сютэм кучапи, кисырскем пинал палэзьпу шоры. ... Ӵуказе татын луоз шулдыргес. З. Рябинина. Нош ик пенсиос сярысь Кызьы буйгатом на меда тӥледыз, гажано арлыдоос? Россиын пенсиосъя реформа мынэмен араз олокӧня пол йылтыны выро пенсиослэсь быдӟалазэс, но сое котькудӥз вылаз уг шӧды. Берлозэ тани будэтӥзы ӝыныезлы гинэ. Со ватсэтэз уг басьто али ужасьёсыз пенсионеръёс, ичи стажен яке ичи уждунэн ужамъёс. "Ӝож. Соин ик азьланяз ваньмызлы будэтон сярысь ужрад кутом", - шуэ Кун Кенешысь социальной ужпумъёсъя ялан ужась комиссилэн тӧроез Фания Федорова. Но Калыкез улон-вылонын утёнъя министр Светлана Андреева соин соглаш ӧвӧл - малы огкадь пенсия басьтыны кулэ йыружъёс лэсьтэмез понна ӝыны улонзэ пытсэт сьӧрын пукем мурт но "пӧсь цехын" ужась? Шонер, мон но озьы малпасько. Но куд-огез трос аръёс ӵоже сюлмысь тыршемын, но ичи уждунэнызы йырин пенсизэс будэтыны уг луы, тани таӵеосыз сярысь мед малпаськысал правительство. Туэ эшшо огпол пенсиосты будэтон ужрад ортчыны кулэ на, выль арозь быдӟалаез 1000 манет луыны кулэ. Ваньмыз та валамтэос пото огдыре кык законъёслэн ужаменызы (кызьы шуо собесъёсын ужасьёс, пенси лыдъян-чотанъя "вуж" но "выль" законъёс). Но со уг вера, вуж законъя пенси басьтӥсь муртэ уродгес каро шуыса. Специалист лыдъя, кудӥзъя адями тросгес басьтоз. Азьланяз вуж законъя пенси басьтозы на инвалидъёс но тужгес пичизэ пенсия басьтӥсьёс. Ужамъёсызлы лыдъялоды индивидуальной коэффициентэзъя. Калыкез улон-вылонын утёнъя мнистерствое, райсобесъёсы али нуналаз сюрс пала пенсионер вазиське. Котькудӥзлэн тодэмез потэ: шонер-а сётӥзы, кыӵе вакыт понна лыдъязы. Тужгес сюлмасько али ужась пенсионеръёс. Кудӥзлэн уго уждунэз 130-140 манетлэсь уг ортчы, нош пенсиез уг буды. Но вань вылэм арлыдоос пӧлын но "амалоос". Уже интыяськемзы сярысь пенсиосъя но пособиосъя отделъёсы уг иворто. Специалистъёс ало: уже интыяськемды бере вить нунал ӵоже тӥ яке кивалтӥсьты ӧд ивортэ ке, пенсидылэсь 20 процентсэ берыктоно луоды. Август толэзь понна пенсиос басьтэмын, быдтэмын но ни, дыр. Соин ик валэктонэз ӧвӧл кинлы будӥз, кинлы - ӧз (быдӟалаезъя шӧдӥзы), нош валантэмъёсты кылизы ке, возьдаськытэк жингыртэ, пыралэ районъёсысьтызы пенсиосъя отделъёсы. Кӧня ке кылын ке вераса, пенсиос будӥзы индивидуальной коээфициентъя лыдъямъёсызлы. Татын лыдэ басьтӥське бадӟым стаж но ужам аръёсысьтыды тужгес бадӟым уждун басьян вакытты. З. Рябинина Мар чотын чеберске Казань? Татарстан Республикалэн кун ласянь эрик басьтэмез дырысен 10 ар но Казань кылдэм дырысен 995 ар тырмон нуналъёс бадӟым сӥё-дано ужрадлы пӧрмизы. Нош данъяськыны, зэмзэ но, вань маин. Август толэзьлэн пумаз вуылӥ бускель шаере. Котьмалэсь зол синмаськи лэсьтӥськонлы, выль ӝутӥськись юртъёслы. Асьмелэн со кемалась ӧвӧл ни. Нош Казань ялан чеберске. Куд-огезлы уг кельшы, асьме парламентлэн кивалтӥсез выль программаос кылдытон сярысь сюлмаське шуыса. Нош тодо-а соос, кылсярысь, кызьы ужа Минтимер Шаймиев. Со ачиз чакласа возе, кызьы быдэсъяське куашкан калэ вуэм юртъёсты быдтонлы сӥзем программаез. Казаньын выль улон коркаос ӝутон та документлэн ог люкетэз луэ. Мукет люкетэз - бигер шоркарлэсь центрзэ выльдон. Тупатъян ужъёс мынозы, солэсь аспӧртэмлыкъёссэ лыдэ басьтыса, одӥг корка но, одӥг кенер но туссэс уз ыштэ. Казаньын улӥсьёс уго юн гажало историзэс. Тани усьтӥсько республикалэн азинсконэзлы сӥзем статистикая справочникез. Миым гинэ выль юртъёсы улыны выжем 13 сюрс 45 мурт. Азьвыл 122 сюрс 826 квадратной метр интые соос басьтӥллям 253 сюрс 957 квадратной метр ӟеч улон инты. Озьыен, кызьы уд оскы Минтимер Шаймиевлы? Эрик басьтэм сярысь декларацилы 10 ар тырмемез пусъён ужрадын со шуиз: "Эрик басьтэммес, политика ласянь сяна, ми мертаськом на адями ласянь. Дас ар ӵоже 3 сюрс иськемлэсь уно ӟеч сюресъёс лэсьтэмын. Чагыр эстӥськон ваньмаз сямен гуртъёсы вуттэмын. Ми утьыны быгатӥм уно ужан интыосты, кылдытӥм выльёссэ. Ӝутӥм 15 миллион квадратной метр улон юртъёс, 400-лэсь уно выль школаос, 125 эмъяськонниос. Зэмзэ но, Татарстанлэн азинсконъёсыз адӟем карымон луо быдэс кунмы понна. Со сярысь верамын вал Владимир Путинлэн ӟечкыланаз но. Сое люкаськемъёслы ивортӥз Россиысь Правительстволэн Тӧроезлэн вштӥсез Валентина Матвиенко. Куноос пӧлын туж уно вал тодмо адямиос, кылсярысь: Россилэн Президентэзлэн админстрациезлэн кивалтӥсезлэн воштӥсез Владислав Сурков, Башкортостанлэн Президентэз Муртаза Рахимов, Ингушетия Республикалэн Президентэз Руслан Аушев, Кабардино-Балкарилэн Президентэз Валерий Коков, Лымшор Осетилэн Президентэз Александр Дзасохов, Удмурт Республикаысь Кун Кенешлэн Тӧроез Александр Волков но мукетъёсыз. Мар чотын Татарстан синмаськымон вормонъёс басьтэ? Та юанлы Минтимер Шаймиев валэктӥз, экономикаын воштӥськонъёсты радъямы, пе, республикалэсь аспӧртэмлыкъёссэ лыдэ басьтыса, ваньбурез нимаз кузёослы вузан дыръя кунлэн кияз контрольной пакетъёсты кельтыны быгатӥм азьмынӥсь удысъёсын, кылсярысь, эстӥськон, му вӧй но химия, транспорт удысъёсын. Минтимер Шаймиев озьы ик ӟечен пусйиз Владимир Путинлэсь кун властез радъянъя ужрадъёссэ. Воштӥськонъёслэсь кулэлыксэс возьмато шаерамы ортчись ужрадъёс но. Кивалтонэз улӥысен вылӥозь юнматон емышъёс сётыны кутске ни. Жаль, югдурез тупатыны Удмуртилы, Татарстанэн ӵошатыса, тросгес дыр кулэ луиз. Соосыз но улэп, таосыз но кӧттыр Интернатъёсын улӥсь арлыдо муртъёслэсь но ӧлексыослэсь улонзэс умоятон сярысь Россия Федерациысь Президент нимысьтыз Указ поттӥз. Удмуртиын 13 сыӵе интернат. Республикаысьтымы Калыкез улон-вылонын утёнъя министерство но Пенсиосъя фонд та ласянь бадӟым уж нуо. Министерство сиён-юонлы, мебельлы, транспортлы, электрокужымлы но интернатъёслэн мукет кулэяськонъёсызлы лимитъёс дася. Пенсиосъя фонд интернатъёслы коньдон висъя, солы пунэм кылем предприятиослэсь вуззэс басьтон вылысь. Озьы пунэмъёс но ӵушисько, арлыдоос но шумпото. Туэ 1-тӥ сентябрёзь гинэ та амалэн куать но ӝыны миллион манет тыр юрттэт сётэмын ни. Синтегысь лулсэр висёнъёсын курадӟисьёслэн интернатсылы УАЗ- 3962 автомобиль сётэмын, ГАЗ-2705 автомобиль сётӥз Нагорнойысь таӵе ик интернатлы "Инструментальной завод" ОАО. Канифольнойын тупатъямын ву гумыос, канализация. Можга районысь "Трактор" колхоз ӧлексыослы сыр но вӧй висъяз. "Удмуртрыба" ОАО- 400 сюрс манет тыр чорыг. Интернатъёслы сиён-юонэн юртто на Завьял ёросысь "Правда" колхоз, Воткинск ёросысь "Июльской" но "Пихтовка" хозяйствоос, Глаз ёросысь - "Луч", "Балезинской", "Чепца". Арлыдоослэн нуналозязы - 1-тӥ октябрёзь шаерысьтымы Пенсиосъя фондлэн кивалтӥсезлэн Владимир Моряковлэн чакламезъя, юрттэт сётэмын луоз 45 миллион манет тыр. В. Семак. Валентин Карповлэн кырӟанъёсыз висъясько нимысьтыз шуныт, ненег гуренызы. Со туж умой валаса кутэ национальной турлы буёлъёсты но быгатэ соосты одӥг тугокое огсыр либыт бинялтыны, герӟаны. Та тунсыко крезьгурчилэсь кырӟанъёссэ нылпиос кылзылы но, кырӟаны но ярато. Пӧртэм арлыдо нылпиослы гожтэм кырӟанъёсты яратыса басьто нылпи садъёсы, школаосы но мукет нылпи юртъёсы, солэн кырӟанъёсаз чузъясько вордскем шаермылэн дунлыкез, чеберлыкез, узырлыкез. Нылпи композиторлэсь лирической кырӟанъёссэ асьсэлы басьто бадӟым классъёсын дышетскисьёс но. Валентин Карповлэн кылбур но, крезьгур но гожъян манерыз туж яркыт, нылпиослы гинэ тупась крезьгурлэн пасьталаез, пуштросэзъя мур луэмез шуг-секытъёс уг кылдыто соосты дышетыны но, кырӟаны но. Вылаз ик, асьмелэн трос ӧвӧл на пӧртэм арлыдо нылпиослы та выллем кырӟанъёсмы. Журналистъёсын пумиськонъёс Кезьыт тол вуоз Шаерамы вуиз зарни сӥзьыл. Со котьку трос сюлмаськонъёс вае гурт калыклы. Юосты, бакча сиёнъёсты ӝикыт октыса-калтыса, тырмыт пудо сиён люкаса, огдыре фермаосты, эстӥськон гуръёсты толлы дасяно. Таӵе сюлмаськонэн али озьы ик уло коммунальникъёс, энергетикъёс, связистъёс, эстӥськон сётӥсьёс но музонэз. Кызьы бен республикаямы толлы дасяськон мынэ? Таин герӟаськем куд-ог ужпумъёсты журналистъёслы мадиз эстӥськонъя, энергетикая но связья министр Виктор Савельев. Али ваньмыз сямен бадӟымесь котельнойёс, ТЭЦ-ёс толлы дасесь ни. Министрез сюлэмшугъяськытэ на интыосысь пичиесь эстӥськон гуръёс. Соос куд-огез тыро-пыдо тупатъямто на, эстӥськон тырмыт вуттымтэ на. Му вӧй но музон эстӥськон висъянъя тупанкылъёс гожтэмын "Удмуртнефть", "Удмуртгеология" но "Белкамнефть" акционер огазеяськонъёсын. Татын нефтепродуктъёс басьтонъя нокыӵе шуг-секытъёс уз кылдэ. Оглом пусйыса, туэ шаерамы, миым сярысь, югдур умойгес. 15-тӥ сентябрёзь ваньмыз сямен дась луоз. Куд-ог котельнойёсты али музъем эгырен эстонэ выжто, кӧняез ке торфез но уже кутозы. Бускель Киров улосын одӥг ТЭЦ-сэс кемалась Удмуртиысь торфен эсто. Музъем эгыр тырмыт луоз, али со 81 сюрс тонна вуттэмын ни. Котельнойёслы 33 сюрс тонна му вӧй висъяны учкемын. Со одно ик луоз. Секытгес на югдур мазутэн, со уг окмы, нош газ луоз, сое элькунмы (висъям пӧлысь) миым ваньзэ ӧз басьты, туэлы кылемын. Пумиськонын озьы ик вераськон мынӥз эстӥськонлы, электрокужымлы, связья услугаослы тарифъёсты будэтон сярысь. Виктор Алексеевич ивортэмъя, сое, пе, али уд дугдыты, дунъёс туэ ар бырытозь оло эшшо 20 процент пала йылозы на. Нош мукет ласянь учконо ке, предприятиослэн, огазеяськонъёслэн но организациослэн энергетикъёслы 570 миллион манетлэсь уно тыронъёссы люкаськемын. Соин ик электрокужым сётонэз дугдытъяг учыръёс азьланьын но луозы. Туннэ электрокужым кутэмзы понна тыронъёс умойгес мыно, нош азьло тыронъёссэс берыктон чидантэм шуг ужпумлы пӧрмемын. Тани одӥг "Ижмаш" гинэ 78 миллион манет уксё шедьтыны кулэ. Таӵегес ик секыт югдуре вуэмын Сарапул городысь шуныт сётӥсьёс но коммунальникъёс. Кызьы бен радъямын электрокужымез шыръян? Котькытын огкадь ӧвӧл. Кылсярысь, та ужлы бадӟым инты висъяло Глазовысь "ЧМЗ", Ижысь "Купол", "Буммаш" огазеяськонъёс. Но ваньмыз сярысь озьы шуыны уг луы. Шаерамы 12 му вӧй поттон интыя трос огазеяськонъёслэсь бадӟым ёз (консорциум) кылдытэмын. Отчы пыре США-ысь "Сэмсон" компания. Кулэ документъёс дасямын но соосты Москваын пыр-поч учкозы на. Со уго герӟаськемын Федерация но республика куспын ваньбурез люконъя законэз быдэсъянэн. Бен, уд но шӧдылы, тол вуоз. Куазез эскерисьёслэн чакламзыя, туэ тол, миым сярысь, 2-3 градуслы кезьытгес луоз. Соин ик та дырлы ӟечгес но котыр ласянь устогес дасяськоно ӟырт кезьытэн но ужан но улон коркаосамы шуныт мед луоз, шуныт, ву, чагыр эстӥськон сётӥсь гумыосмы медаз пилиськылэ. Ваньзэ сое али эскероно, азьвыл лэсьтэм янгышъёсты лыдэ басьтоно. Г. Романов. Удмуртилы Президент быръён азьын Куинетӥез кандидат вазиське бырйисьёслы Кызьы тодмо, шаерысьтымы Быръёнъёсъя кун комиссия нырысь ик Президентэ кандидатэ юнматӥз Кун Кенешлэн Тӧроезлэсь нырысетӥ воштӥсьсэ Павел Вершининэз, собере - тодосчиез Владимир Забильскиез, куинетӥез кандидат луиз тодмо политик, Кун Думалэн азьвыл депутатэз Андрей Солуянов. Андрей Владимирович та нуналъёсы пумиськиз журналистъёсын. Со тупен-тупен мадиз, кызьы избирком кандидат понна кинюртэмъёсты эскериз но кыӵе шекъёсты шараяз. Солэн ивортэмезъя, быръёнъёсъя кун комиссия, пе, мон азе чурытэсь куронъёс пуктӥз, правоосты утись ёзъёсын ужасьёс куд-ог кивалтӥсьёслэн улон интыосазы ветлӥзы. Таӵе ужез кандидат лыдъя быръёнъёсъя законлы тупамтэен. Андрей Владимирович люкаськемъёслы озьы ик ивортӥз Россиысь Кун Думаын законопроектъёс дасян бордын кызьы ужамез но республика азьын куд-ог лэчытэсь ужпумъёсты, кудъёсыз герӟаськемын ож тӥрлык поттонэн, быдэсъяны юрттэмез сярысь. Вераськон мынэ "ИЭМЗ "Купол" огазеяськон сярысь. Али солэн ужез но та предприятиен герӟаськемын, ож тӥрлык поттонэз азинтэ. Удмуртилы президентэ куинетӥез кандидат Андрей Солуянов та пумиськонын бырйисьёслы нимысьтыз вазиськон лэсьтӥз. Отын со саклык висъяз, бырйисьёс вылэ, пе, зӥбыны уг яра, соос Конституциен сётэм правооссэс быдэстыны мед быгатозы. Быръёнъёсты ортчытоно чик пӧяськытэк, чеберъяськытэк но шара. Тужгес но уг яра быръёнъёсъя законлэсь куронъёссэ тӥяны, соя гинэ ужано. Г. Васильев. Удмурт Республикаысь Быръёнъя комиссилэн ивортонэз. 2000-тӥ арын 3-тӥ сентябре 18 час 30 минутэ Удмурт Республикалы президентэ кандидатэ пусъемын Владимир Викторович Забильский, РАН-лэн физико-технической институтаз ужась. Вордскемын 1948-тӥ арын, улэ Ижын. 2000-тӥ арын 3-тӥ сентябре 19 час 50 минутэ Удмурт Республикалы президентэ кандидатэ пусъемын Андрей Владимирович Солуянов, "ИЭМЗ "Купол" ФГУП-лэн азинсконэзъя программаослэн директорзы. Вордскемын 1959-тӥ арын, улэ Ижын. Кылъёсыз В. Садовскиилэн. Крезьгурез В. Карповлэн. Удмурт кылэ берыктӥз А. Перевозчиков. Ми кема возьмам, витим Школае лыктонмес. Вуиз дыр: парта сьӧры пуксим, Ура! Ми дышетскись луим! Припев: "Милям дышстӥсьмы Либыт, туж ӟеч!" � Верало нылъёс, пиос ваньмыз. Асьмеос ми шӧдӥськом ӟеч: Яратэ со милемыз. 2. Будӥмы, вуим быдэ � Ӧвӧл ни пичиесь. Арысь аре гырлы жингыртэм Милемлы потэ мусогес. Припев. 3. Котькудаз гуртын, оло, Аулын, городын Нылпиос ӟырдыт эчешыло Уно-уно турлы кылын. Припев. Оуг теасхег ис вегу, вегу гоод! � Евегубод саыс ат сцноол. Анд wе кноw^енерытхинг кноw - Теацхер ловес тхт боыс анд гирлс! Припев. Наш учитель самый лучший, В школе спорит часто каждый класс. И мы сами проверяли, Любит он, конечно, нас. Яншек тунсыкъяськиз Ижысь пыӵалъёсын Ижевскысь механикая заводэ вуылӥз Австриысь Ферлах городысь федеральной вылӥ оружейно-технической дышетскон заведенилэн директорез доктор Яншек. Со тодматскиз пыӵал тӥрлык поттонъя инженеръёсты но ужасьёсты поттонъя дасян ужпумен. Австриысь куно пумиськылӥз предприятиысь кивалтӥсьёсын, вуылӥз пыӵал поттон цехъёсы, вылӥ дышетскон заведениосы, пыӵал тӥрлык возьматонъя музейёсы. Заводысь пыӵал тӥрлык лэсьтӥсьёсты дасянъя школаын Яншек семинар ортчытӥз. Б. СЕМЕНОВ. Лялиослэн выжыоссы Уваын Алнаш ёросысь Варзи-Ятчи котырын туж вашкалаез луэ Ляли гурт, кылдэмын со 1560 арлэсь азьлогес. Отчы вуиллям Ува палась Сияг-Ӟуккя гуртысь адямиос. Интыяськиллям соос нырысь Агрыз ёросысь Кырында гуртэ. Удмуртъёс пуксиллям кыр интые, соин ик гуртэз нималлям Кыринты шуыса. 1560-тӥ арын Иван Грозный Казанез басьтэм бере, отысь бигеръёс улыны та интые лыкто. Удмуртъёс татын кӧня ке ар улӥллям. Но удмуртъёс 1590-тӥ аръёсы та интыысь кошко но интыясько Варзи-Ятчи гурезь пала, Усо шурлы матэ. Та интые нырысь лыктэм Ляли нимо пиосмурт, соин ик гуртэз Ляли шуыса нималлям. Та инты гуртоослы кельшымтэ. Вылаз ик, нылпиос висьыло, пудо кулэ. Озьы соос 1680-тӥ аръёсы кошко мукет интые. Отын али сылэ Ляли гурт. Со гурт интыез пересьёс шуо Вуж гурт инты. 1924-тӥ арын тодосчи П. Н. Луппов Вуж гурт интыын эскерон ортчытэ. Отысь со шедьтэ портон, ожон, посуда, сюй горшокъёс, ӟег культо керттэт. Ваньзэ нуэ Ижевске, сётэ музее. Мон 1980-тӥ арын ветлӥ музее, но Лупповлэсь нуэм арбериоссэ ӧй адӟы. Музей олокӧня пол интызэ вошъямен-а, мар-а - соосты утялтӥллямтэ. 1710-тӥ арын ортчытэм переписья Лялиын вылэм 9 корка. Варзи-Ятчи гурт кылдэмын 1680-тӥ аръёсы. Лялиос нюлэскысь адӟыло вылэм егит пиосмуртэ. Со возьматӥське но ачиз пегӟе вылэм. Пиосъёс лушкем возьмаса улӥллям но та воргоронэз кырмиллям. Юало, пе, кытысь но кин тон шуыса. Со верам, мон, пе, эксэй властьлэсь пегасько, ачим Ӟатчалась (Ятчиысь). Со гурт интыяськемын Грахово ёросын. Лялиос нокинлы но нокытчы вераллямтэ. Со воргоронэз одӥгез узыр мурт ляльчие басьтэ. Со кузёлэн вылэм пинал нылыз, соос ляльчиен огазе карисько, семья кылдыто. Атайзы кулэм бере, лялиос соосыз улляло, таос интыясько Варзи шурлэн бур палаз. Шур нимаське Варзи, воргорон Ятчиысь, соин ик гуртэз Варзи-Ятчи шуыса нимало. Переписья 1710-тӥ арын вылэм 13 корка. Шадра-Сак Кибья гуртлэн кылдэмез озьы ик Ляли гуртэн герӟаськемын. Гурт кылдэмын 1740-тӥ аръёсы. Бигеръёс лялиослэсь валъёссэс, пе, лушкало вал. Ӟудэм беразы соос, Бадӟым Кибья гуртэ мыныса, кӧня ке хозяйствоез ӧтё Лялиен артэ гурт пуктыны. Нырысь лыктэм муртлэн Шадра нимыз вылэм, ачиз туж сак вылэм. Соин ик та гуртэз Шадрасак-Кибья нималлям. Пересьёс верало вал, кибьяос лыктэм бере валъёссы ышылэмысь дугдӥзы шуыса. 1761-тӥ арын переписья отын вылэм 8 корка, 28 улӥсез. Никита Байтеряков, шаерчи. Правительствоын Николай Ганза - Балезиноын Удмурт Республикаысь Правительстволэн Тӧроез Николай Ганза азьланьтэ ёросъёсын югдурен тодматсконзэ. Соослэн мугзы - югдурез интыосын рос-прос эскерыса, котькуд учыръя нимысьтыз ужрадъёс пусъён. Правительстволэн Тӧроез Николай Ганза, коньдон ужпумъёсъя министр Владимир Бельтюков, гурт удысъя но сиён-юонъя министр Петр Першин но промышленностья но транспортъя министр Виктор Долгов алигес вуылӥзы Балезино ёросэ. Соку ик лэсьтэмынвал отын ужанлы йылпумъянъёс. Асьсэлэсь малпанъёссэс веразы Глазов, Дэбес, Кез, Красногорск, Юкаменск но Яр ёросъёсысь хозяйствоослэн кивалтӥсьёссы но администрациослэн тӧрооссы. *** "Путь к коммунизму" колхозэн тодматон кутскиз гурт техникаез возён инты бордысен. Колхозлэн тӧроез Вадим Ильин мадиз та вакытэ ужъёссылэн кызьы мынэмзы сярысь. Ёросын соос котькинлэсь азьло йылпумъязы ю-нянь октон-калтонэз, гектарысьтыз шорлыдын 16 центнер ю тысь басьтӥзы. Хозяйство адӟем карымон азинске, кылем арын 500 сюрс манет пайда басьтӥз. Кыскемын 3980 литр йӧл, нош туэ котькуд скаллэсь 4200 килограмм йӧл кыскыны малпало. Со понна али ик сюлмасько ини толлы тырмыт сиён дасяны. Музъем ужасьёс ӟечен пусъё Глазовысь акциосын "Реммаш" огазеяськонын поттэм выль техникаез, ушъяло Балезиноысь ремонтно-технической предприятиысь кибашлыосын дасям агрегатъёсты. Кызьы пусйиз Николай Ганза, нянь будэтонын бадӟым инты басьтэ азьмынӥсь амалъёсты уже кутон. Та ласянь адӟем карымон луэ Воткинск ёросысь "Июльское" учхоз. Мукет ёросъёсын но кылдытоно та выллем хозяйствоос, соос мед юрттозы азьмынӥсь амалъёсты, технологиосты улонэ пыӵатыны. Балезино ёросын та ужез быдэстыны Николай Ганза ӵектӥз "Путь к коммунизму" колхозлы. Ёрос администрацилэн кивалтӥсез Рафис Касимов но колхоз тӧро Вадим Ильин та дэмланэз умоен лыдъязы. *** "Труд Ленина" колхозын паськытгес вераськон мынӥз кооперация сярысь. Татын вань асьсэлэн сӥльлэсь сиён дасянъя цехсы, ӟеч радъямын гуртоослэсь йӧлзэс басьтон. Правительстволэсь Тӧрозэ озьы ик сюлмаськытэ производствоез ужатонэ электрокужымлэн кӧня кутӥськемез. Уго матысь дыре электрокужымлы дунъёс нош ик будозы. Нош тросэзлэн хозяйствоослэн пунэмъёссы али но тырымтэ. Соин ик тросгес пайда басьтыны тыршоно пудо вордонлэсь но музъем кутонлэсь. Колхозлэн вань аслаз пӧйшур вордон хозяйствоез но. Пӧйшур кулы кулэяськисьёслэн лыдзы туж трос. Соин ик та удыслы бадӟым саклык висъяське. Кылдытэмын ини куэз посонъя нимысьтыз цех. Ужа вуриськон цех но. Арлы быдэ отын 50 сюрс манетлы вузъёс потто. *** Быдэс республикаын гурт техникалэн лыдыз ог 15 сюрс лыдъяське. Но со пӧлысь ӝыныезлэсь тросэз уже кутыны ярантэм ини. Техникаез азьло дыръёсы тупатъяло- выльдо вал Сарапулысь но Балезиноысь РТП-ос. Табере соос ужтэк пуко. Номыр ужамтэмысь предприятие выре резина гумыосты, насосъёсты, йӧл кыскон арбериосты, герыосты тупатъянэн. РТП-лэн кивалтӥсезлэн Сергей Хреновлэн техникаез тупатъян ужез выльысь улӟытонъя, выль сямен радъян пумысен трос ӟеч малпанъёсыз. Али одӥг тракторез тупатыны кошке ог 112 сюрс манет коньдон, нош вылез сылэ 340 сюрс манет. Соин ик тупатъян-выльдон ужез дунтэмгес карон понна кулэ выт тыронъя кун ласянь льготаос тупатыны. Промышленностья но транспортъя министерсвоез косэмын РТП-ослэсь ужзэс радъянъя нимысьтыз ужрадъёсын проект дасяны. *** Уй пал ёросъёсысь администрациослэн тӧрооссы пусйизы Правительстволэсь ю-нянь октон-калтонлы но пудо сиён дасянлы коньдонэн бадӟым юрттэт сётэмзэ. Но, кызьы шуиз Николай Ганза, гурт удысэз азинтонлы ӧжытсэ кулэ 10 миллиард манет коньдон. Валамон, республикалэн таӵе коньдонэз ӧвӧл, матысь дыре уз но луы. Соин ик югдурез одӥг кутскемен тупатыны уз луы. Но быгатэммыя пичиен ке но юрттэт сётом. Гуртысь ваньбур поттӥсьёслы висъяны быгатӥм ини 325 миллион манет, со бюджетын чакламлэсь кык поллы тросгес. Матысь дыре ортчытыны чакламын колхозысь вань техникалы инвентаризация. Лыдэ басьтэмын луозы ярантэмен лыдъяськисьёсыз но. Огдыре ик МТС-ёсы вуоз выль техника. Ваньмыз со луоз колхозлэн ваньбурез, нимаз адямилы соин кивалтонэз оскыны уг яра, шуиз Правительстволэн Тӧроез. Удмурт Республикалэсь Правительстволэн пресс-службаез. "Луо часъёс. ЪЪ даур Телевидениея но радиоверанъёсъя "Удмуртия" кун компания "Луо часъёс. ХХ даур" выль проектсэ учкыны дэмла. Дауръёсы выжон азьын кыӵе луыны кулэ адями. Кин со: улонын векчи луо пыры-а со яке историез дурись-азинтӥсь-а? Солы валэктон шедьтоды 10-тӥ канал пыр телевозьматонъёсты учкыса. Дас ньылетӥ сентябрьысен кутскыса сое арнялы быдэ учкемды луоз "Удмуртия" ГТРК-лэн передачаосыз. Ма со логотип но слоган? Со сярысь но тодыны быгатоды чагыр экранъёсты пыр. Озьыен, "Луо часъёс. ХХ даур" котьку тӥледын ӵош. Нырысетӥез передаса эфире потоз 14-тӥ сентябре. Ныл ним но машина ним Мерседес Андриенна Мануэла Ромона вордскиз 1889-тӥ арын Вена городын. Мерседеслэн йыраз ноку ӧз шуккылы, солэн нимыныз куке-соку быдэс даурез нималозы шуыса. Нылашлэн атаез Йелинек уй но нунал Испания сярысь уйбыртылӥз. Адольф но Фернан пиосыз бере вордскем нылызлы сётӥз мудрон испан ним - Мерседес. Вена палан, Баленын, "Мерседес" виллазы вал. Отын семьяен ялкаризы гужемъёсы. Зэмос дворецын. 42 комнатаез вылэм. Котькудаз - обой улын адскисьтэм ӧс. Ванна шуонзы но ӧжыт ӧй вал - 25 гинэ. Озьыен, Мерседес нылпи дырысеныз ик узырлык пушкын пыласькыны дышетэмын. Эшшо ке атаез вань куронъёссэ быдэсъяны тыршылӥз. Принцесса но принцесса, мукет сямен уд но вера ини. Сӥзьыл пал семья лымшор пала ширтылӥз, Ницца городэ. Татын но соослэн вал "Мерседес" виллазы, дышетӥсьёссы, гувернанткаоссы, швейцаръёссы. Йелинекъёслэн улон дырзы ӵапак тупамын сыӵе вакытэ: адямилэн мылкыдыз вань пӧртэм интыосы ӝоген гинэ вуылыны. Улонзэ со питран вылэ пуктыны малпаз. Ӝог ветлон вирусэн котькудӥз висьыны кутскиз. Йелинек господин но палэнэ ӧз кыльы уга. Ки улаз кыӵе ке пичи газет сюрем. Син шораз реклама йӧтӥз: "Моторное общество Даймлера, Канштат, Вюртемберг. Вертикальные и автомобильные моторы". Кинэ нырысьсэ адӟиз, а со вал Мерседеслэн гувернанткаез меӵак юаз: - Кытын со Канштат шуон? - Штутгарт палан, пе. 1896-тӥ арын вал со. Нокин ӧз тоды на: Мерседеслэн даурез кутске ни шуыса. Йелинек вуиз Канштатэ. Учёнойёс, веразы: - Автоез поездэн ӵошатыны уг яра. Огшоры питранъёс часкын 40 километрлэсь чалякгес уз ворттылэ. Йелинек соосын соглаш луысал ке, "Мерседесъёсты" ми, оло, ноку но ӧй адӟысалмы. Нош Йелинек куаретӥз: - Мон татчы машинаен лыктӥ. Часкын 42 километр пала ширтӥ! Машинае ӧз куашка, ачим но улэп кыли. Мыным уг кельшы моторлэн интыяськемез. Машиналэсь шорсюлэмзэ мышкысьтыз басьтыса пуктоно азяз. Нокин но монэ алыны уз быгаты ни. Мыным кулэ куинь цилиндрлэсь йӧндырем мотор". Визьмо немец учёнойёс быгатӥзы ик малпанзэ быдэстыны. 1899-тӥ арын Йелинек Ницца-Маганьон - Ницца ӵошатсконъёсын финише нырысетӥез вуиз. Автоез "Даймлер" нимаськиз. Нош аслыз Йелинек мудрон ним басьтӥз: мистер Мерседес. Тросэз адямиос романтика шуонэн висё вал. Нырысетӥ "Мерседеслэн" моторез 35 валлэз воштӥз. Пӧртэм ӵошатсконъёсын вормылӥз. 1902-тӥ арын выль автолы регистрация лэсьтыны косӥзы. Йелинек куаретӥз Дамлерлы: - Асьтэос тодӥськоды мае вузаны - "Даймлерез" яке "Даймлер-мерседесэз". Но мон вузало "мерседес" гинэ. "Мерседесъёс" чаляк шедьтыны кутскизы асьсэ кузёоссэс. Йелинек амало вузчи вылэм. Со Франциын, Австро-Венгриын, Америкаын машина вузанъя огназ кузё луиз. Парижын 1902-тӥ арын ортчиз витетӥез калык куспо авто но велосипед адӟытон. Йелинек машина бордаз 13 аресъем нылызлэсь маке быдӟа ик портретсэ интыяз. Озьы со валаны быгатӥз басьяськисьлэсь сюлэмзэ. Угось адями машинаен ӵош аспӧртэм мадёсэз (легендаез) но сьӧраз нуэ кадь. Семьяезлэсь фамилизэ но быдэсак воштӥз. Ваньзы луизы Йелинек-Мерседесъёс. Куать ар ортчыса, 1909-тӥ арын, Мерседес аслэсьтыз нимзэ быдэсак атаезлы кельтӥз. Со бызьыса баронесса Шлоссер луиз. Картэз туж узыр ӧй вал. Но зэмос барон ук. *** 1917-тӥ аре 22-тӥ апреле Йелинек вазиськиз Женеваысь полицие. Сое, пе, кык тодмотэм адямиос мыскыл кылъёсын исазы, шпион шуизы но ымныраз мыжгазы. Та дыре Йелинеклэн тачак орденъёсыз вал ни. Оло соин, оло пӧртэм принцъёсын но корольёсын кусып воземеныз, адямиос сое зэмен ик шпион кожаллязы. Ар ортчыса, 1918-тӥ арын, январе Женеваысь одӥг газет ивортӥз: тодмо вузчи Йелинек-Мерседес кулӥз сюлмыз лябӟемен. "Шпионлэн" кышноезлы Аннет Энглерлы Франциын гражданство ӧз сётэ. Сое но нылпиоссэ трос ченгешонъёс бере суд Чехословакилэн гражданъёсыз кариз. Вань котырзэс талазы. Но ӧжыт улыса, виллаоссэс берыктӥзы. Нылкышно отчы пыдзэ огпол но ӧз лёга. Мар луиз Мерседес Шлоссерен? Кызьы со Венаын улӥз? Солы капчи но ческыт вылымтэ. Революция бере ачиз гур эстыны кутскиз, рояльзэ но сиён-юонлы воштӥз. Баронесса но ӧй вал ни. Картэз удалтымтэ чиновник кариськиз. Кыкназы вордӥзы нылпиоссэс - Эльфрида нылзэс но Ханс-Петер пизэс. Мерседес уйвӧтаз гинэ адӟылӥз на бадӟым виллаоссэ, тӧдьы пыжъёссэ, чебер сяськаоссэ. Ортчиз умой но каньыл улон. Мерседес весь мае ке мукетсэ возьмаз. Шлоссерен ӵош дас ньыль ар улэмез бере, картсэ но нылпиоссэ куштыса, гуртысьтыз пегӟиз. Мукет картэз, скульптор, туж куанер но висись вал. Туберкулёзэн курадӟиз. Рудольф Вайгльлэсь ужъёссэ нокин ӧз дунъя. Но Мерседес сое яратӥз. Улонзы кема ӧз кыстӥськы - Вайгль кулӥз. Мерседес ачиз но кулӥз 1929-тӥ арын, лы бордаз гижло (рак) кылдыса. Кин тодэ вал тодмотэм кышномуртлэн испан нимыз кызетӥ даурын весяк кыл йылын ветлоз шуыса. "Мерседес" марка дуннеысь самой тодмоез луиз. Берыктӥз Марина Костылева. Анданэн ӵош кыдаз Малы ке но газетъёсын шер гожъяны ӧдъязы огшоры ужасьёс, ветеранъёс сярысь. шуныт очеркъёс. Ведь соос егит дыръязы кужымзэс жалятэк тыршизы шаермес утьыны, узырмытыны. Мон Ижевскысь Металлург городокын улӥсько бере, ӵем пумиськылӥсько "Ижсталь" огазеяськонын ужамъёсын. Котьку эшеным сямен вераськисько пӧсь ужысь батыръёсын. Таяз учыре пумиськи Трудовой Горд Знамя орденэн наградить карем удмурт воргоронэн Георгий Филиппович Тарасовен. Со сылэ вал Быдӟым ожын бырем воинъёслы-металлургъёслы сӥзем обелиск-памятник дорын. Вормон орденэн чилясь гранит памятник шоры возьматыса, со вераз: - Умой памятник пуктӥмы. Со милемыз ужакумы пумиталляз но, келяз но: обелиск Родиналэн данэз понна выль азинсконъёсы ӧте, котьку сак, юн мылкыдо луыны косэ. Сӥзьыл нюлэс зарни дӥсен дӥсяськыку, со аслэсьтыз шудзэ утчаны потӥз. Вамышъя пияш, йыраз пӧртэм малпанъёс бергало, син азяз пӧртэм суредъёс пуксё. Солэн ас гуртэз сьӧры кыдёке потамез ӧй вал на, нош табере кытчы сое вуттоз та сюрес? Тракт вылэ потыса, со нялтас лыктӥсь машинае куриськиз. Автомашина ӝог ширтэ Ижевск пала... Ӝужыт из юртъёс, паськыт ульчаос, бадӟым заводъёс - ваньмыз паймыто гурт пиез. Ульчаетӥ ортчисьёслэсь юалляськыса, со мырдэм шедьтӥз город пуме интыяськем 4 номеро ФЗО школаез. Дыртытэк пыре, коридоретӥ солань-талань ветлэ: кудаз кабинетэ пыроно меда? Витёнтэм шорысь солы вазизы: - Тыныд кин кулэ, пияш? Георгий азьын сылэ таза мугоро, вальк-вальк сынам сьӧд йырсиё пиосмурт. Очкиез пыр адӟисько пальпотӥсь синъёсыз. - Мон... мон дышетскыны лыктӥ, - могаса вера Георгий. - Кинлэсь юалляськоно меда? - Ма бен, ойдо пырыса вераськом. Кабинетэ пырыса, директор сьӧд форменной картуззэ ӧс дорысь ӵоге ошиз, йырсизэ маялтӥз но ӝӧк сьӧры пуксиз. - Иське, дышетскыны шуиськод? Умой, умой. Огшоры тып-тып мугоро, паськыт пельпумо, котырес ымныро Георгий кельшиз кадь солы. - Кыӵе уже дышетскемед потэ, Тарасов? -Гурт пи ма вераны ик уг тоды. Лыктыкуз со сярысь ӧз ик малпаськы угось: ФЗО-е мынӥсько но тӥни. - Оло, прокатчике дышетскод? Сыӵе ужасьёс али туж кулэ. ... Георгийлы сьӧд гимнастёрка но брюки, картуз но ботинка сётӥзы. Выль формазэ дӥсяса, фотое пуксьыны мынӥз (эшъёсыз но озьы каро уга). Фотокарточказэ басьтӥз но - аслыз ачиз уг оскы. Огзэ гуртэ но лэзиз: адӟе, пе, кыӵе мон луи... Секыт война дыр вал соку. ФЗО-ын дышетскисьёс, городъёсысь но гуртъёсысь лыктэм пиос но нылъёс, пельёссэс репродуктор борды ик карыса, ожысь выль иворъёсты кылзылӥзы. Бугырско пинал сюлэмъёс. Соослэн но ож интыосы,вуэмзы потэ. - Эх, арлыды тырмысал ни ке... - лулскыло пиос. Дышетскон аръёс ортчизы. Егит пиос но нылъёс ужан удысъёсы султӥзы. Мынӥз Георгий но. Цехлэн кивалтӥсез, ӝужыт, таза пиосмурт, со шоры пыдысеныз йырозяз учкиз но пальпотыса вераз: - Ми доры ыстӥзы, значит. Ярам. Моталкае мынод. Кызьы-озьы. Со гуртысь эшъёсызлы но гожтӥз ни вал ук, прокатчикын ужалоз шуыса. Огшоры мотальщик, пе. Возьыт. Анайлы но кызьы вералод? Эх, ку мон ас киыным прокат нуйто меда? Мылкыдыз куашказ Георгийлэн. Со вал пинал шӧмын малпаськон: сое юнме шорысь ултӥязы кадь потӥз. Бератаз Георгийлы пӧртэм интыосын ужано луиз, прокатозь но вуиз. Смена кема кыстӥськылӥз кадь, нош туннэ со шӧдтэк ортчиз. Берло гинэ ини, стан дорысь кошкыкуз, жадемзэ шӧдӥз: дас сизьым аресъем ёзви, оло, нырысьсэ такем жиль-жиль луиз. Узвесь кадь секытэсь пыдъёссэ мырдэм ӝутъяса, пияш пыриз мастеръёслэн комнатаязы. Син шораз йӧтӥз бадӟым букваосын гожтэм плакат: "Ваньзэ - фронт понна, ваньзэ - вормон понна!" Комнатае люкаськемъёс чал-чал пуко. Мастер кияз гожтэт возе. Сое ыстэм фронтовик, азьло татын ужам мурт. - Тани лыдӟисько, - кылӥськиз мастерлэн бозгес куараез. - "Ми тодӥськом, капчи ӧвӧл тӥледлы цехын, нош милемлы уката но секыт йӧтэ. Али фашист сьӧсез аслаз гуаз улляськом. Со туж лек мытылэ. Асьме армилы котькулэсь но тросгес оружие кулэ. Ми, фронтовикъёс, тӥледлы вазиськиськом: уката но уногес андан сётэлэ. Сьӧсь тушмон шокчыны но медаз быгаты". Котькудӥзлэн сюлэмаз пыдло пыризы та кылъёс. Рабочийёс кыл сёто, фронтовой вахтае султыса, сменалы быдэ планлэсь вылтӥ прокат поттыны. Пӧсь цехын эшшо но ӟырдытгес луиз. Туж пӧсь йӧтэ Георгий Тарасовлы но. Со угось выль интыын, дышемез ичи на. Ялан учкылэ, чакла, кызьы мӧйы вальцовщикъёс полосаез валокъёс пыртӥ поттало. Соос сямен ик ужаны тырше. Тыршем юнме уг луы: Георгийлэн ужез ӧръяське, прокатэз ӝоггес нуйтыны дышиз. Ӝоген солэсь быгатэмзэ цехысь кивалтӥсьёс но шӧдӥзы. ... Со нуналъёс али гинэ кадь вал. Нош учконо ке, кӧня дыр ортчиз ини. Кыӵе но шумпотонъёс, шугъяськонъёс, куректонъёс ӧй вал адямилэн улоназ. Георгий Филиппович мастеръёслэн курсазы дышетскиз. Со кемаласен бригадаен кивалтэ. Бригадаезлы коммунистической ним сётэмын. Солэн син азяз ортчизы станын воштӥськонъёс. Тросэз уж капчияз. Ог дасо ар талэсь азьло гинэ но вань металлэз гуре тележкаосын нуллӥзы. Али сое кран нуллэ, соку ик гуре тыре. Гурын ӟырдатэм заготовкаос рольганг вылтӥ мыно. Черновой клетьын вальцовщик педалез зӥбе но, заготовка ачиз кулэ калибре пыре. Чылкыт линие полоса дырды пушкытӥ нуйтӥське. Дась продукциез октонэ но конвейер пуктэмын. Выль техника выль азинсконъёсы нуэ. Семилетка ӵоже "270" станын прокат поттон дас пол будӥз. Со аръёсы Тарасов но трос умоесь ӵектонъёс сётӥз - соос прокат поттонэз ӝогомытыны юртто. Солэн ӵектонъёсыз дас тямыс сюрс манетлэсь трос коньдонэз шыръязы. Тарасовлы бадӟым шуд усиз странаысьтымы коммунистической ужысь ударникъёслэн совещаниязы ветлыны. Соку ик солы Кремльын "За трудовую доблесть" медаль сётӥзы. Москваысь бертэмез бере, со трос малпаськиз: "Малы озьы луэ? Одӥгез бригада азьпалан кошке, нош мукетыз отын ик бере кыле. Ваньмыз огкадь умой мыныны быгатысал ук". Тани соослэн станазы ужа Иван Гуляевлэн бригадаез. Нырысь учкыку, со мукет бригадаослэсь номырин пӧртэм ӧвӧл кадь. Калыкез но сомында ик. Задание но мултэсэн сётэмын ӧвӧл солы. Техника но сыӵе ик. Нош бригада ялан "чутэ", планзэ толэзьысь толэзе уг быдэсъя. Соин ик уждун но ӧжытес басьто. Адямиослэн мылкыдзы сӥя. Бригадир соосты кияз юн кутыны уг быгаты. Георгий, сое адӟыса, Гуляевлы юрттыны кутскиз. Нош Иван Трофимовичлэн йырыз кур луиз, пӧсектӥз: "Тыныд палэнысен дышетыны умой". Та нуналэ Георгий Филиппович дораз мур малпаськыса бертӥз. "Зэмзэ но, оло, со интыын ужано? Пӧрмоз меда, тырмоз-а кужыме соосты ӝутыны?" Малпанзэ кузпалызлы вераз. - Ӧйтӧд, сыӵе бригадаын уждунэд но кулэсмоз, дыр. Нылпиос ук... аслыд секыт усёз, - туж ӧз шумпоты соиз. - Соиз зэм... Но улыны быгатом, Тамара, - юн вераз Георгий, - Быдэс даур ӵоже соосын бере кыльыса уд ветлы ук. Улонлэн шудбурез коньдон бордын гинэ ӧвӧл. Уг быгатӥськы мон ляб бригада шоры огшоры гинэ палэнын учкыса сылыны... Бригадирлэсь мукет азе выжемзэ шӧдыса, эшъёсыз паймизы но ӝожомизы. Выль адями шоры пӧртэм синмын учкыны кутскизы - ужасьёсыз вань выросъёссэ чаклало. Кудӥз шумпотэ, кудӥз пайме, кудӥз лушкем йыркуръяське. Отын но татын сипыртылэмзы кылскье: - Шӧдӥськод-а, таид данэ потыны тырше. - Ӧйтӧд, сотэк но данэз вань ини кадь. - Адӟом, мар пӧрмытоз. Цехлэн начальникез но мастер шумпото. Соос оско та ӟырдыт, юн сюлэмо адямилы. Нырысь толэзяз план ӧз быдэсмы, уждун но ӧжыт басьтӥзы. Бригадир секыт висьыны усиз - больницае понӥзы. Йырысьтыз уг кошкыло цех, бригада. "Кызьы ни меда отын? - лулскылэ со. - Коть одӥгез ке но мед лыктысал". Бригидаысь нокин уг ветлы. Куинь толэзь ортчыса, цехысь быдэс коллектив эскериз выль бригадалэсь ужамзэ. Татын умойгес ужаны кутскиллям. Прокатчикъёслэн уждунзы но будӥз. Ар ортчыса, бригада азьпал радэ потӥз, солы коммунистической ним сётӥзы. Ужасьёсыз ӵукназэ нырысь асьсэос ӟечъяськыны дыртылӥзы. В. Чернов. "Уй пал буртчин" сётоз барыш Алнаш ёросысь "Прогресс" колхоз кемаласен ни тодмо луэ "уй пал буртчин" будэтонын. Ас вакытаз етӥн будэтонын азинсконъёсыз понна хозяйстволэн киватӥсезлы Иосиф Ефимович Семеновлы Социалистической ужысь Герой ним но сётэмын вал. Пусйыны кулэ созэ но: депутатъёслэн ёрос кенешсы алигес та адямилэсь кандидатуразэ ӵектӥз "Удмурт Республикалэн дано гражданинэз" дано ним сётыны. Берло аръёсы эштосын етӥн ӧжытгес кизьыны, кутскизы ни вал. Туэ та дуно культураез будэтӥзы 105 гектар вылын, кылем арын сярысь со 30 гектарлы уногес. Етӥнзы чылкыт но чебер будӥз. Ишкизы сое туж вакчи дыр куспын. Усто ужазы комбайнеръёс Семен Садовников, Леонид Дунаев но Иван Пронькин. Али етӥн курозэс Можгаысь заводэ келяло. Колхоз туэ етӥнлэсь бадӟым пайда басьтыны чакла. Н. Романов. Бородиноёлэн данэз Россия та нуналъёсы пусъе ожын басьтэм данзэ. 1812-тӥ арын сентябре Михаил Кутузов кивалтэм улсын ӟуч ожгарчиос Бородино бусыын жугиськизы французъёсын. Ӟырдыт ож бере Наполеон Москваез басьтӥз ке но, Ӟуч кунэз зӥбыны ӧз быгаты. Россилэн дано пиосыз отӥяз пырак Парижозь вуизы. Шорлыдын - 19 центнер Алнаш ёросын 21 эштосъёс но кооперативъёс лыдъясько. Ваньмаз сямен юосты октон- калтон ужъёс йылпумъяськизы ни. Шорлыдын гектарысьтыз 19 центнер ю тысь кутсамын. Асаново совхоз-техникумын со люкаськиз 31 центнер, "Кизили" кооперативын - 28,5 центнер, "Молодая гвардия" колхозын - 24,7, "Колосын" - 24,5 центнер. Районын толйись юосты кизён йылпумъяськиз. Мынэ кунлы нянь вузан. Туннэ нуналлы вузамын ни 72 сюрс тонна нянь. Эштосъёс пумен кутскизы силос дасяны, картофказэс копаны. Нянь тырмыт люкаськиз бере, хозяйствоосын пудоосты толйытон лякытэнгес ортчыны кулэ. Н. Лялин. Бусыосын Берпуметӥ гектаръёс Сӥзьыллэн кутсконаз куазь сётӥз на нясь-нясь шуныт нуналъёссэ. Аран вакытэ гурт калык понна солэсь вылӥ кузьым ӧвӧл ни. Тӥни малы ӵук лысвулэсь тӧлӟемзэ витьытэк ик дырто комбайнъёс мытэм удысазы. Вужмыны вуэм техника шоры учкытэк, кисьмам ю бусыосты пичиен-пичиен бушато. Игра районын ог 80 процентэз ю-нянь кутсамын ни. Ӟег кизёнэз, етӥн утялтонзэс но та нуналъёсы йылпумъязы. - Куазь тупатскем бере, калыклэн но мылкыдыз бурдъяськиз, - шумпотон мылкыдзэ ватытэк вера районысь гурт удысъя управлениысь валтӥсь агроном Клавдия Витальевна Хозяйкина. - Хозяйствоос пӧлысь тужгес но ӟеч ужазы "Ленин сюрес" (председателез Михаил Викентьевич Хохряков), "Чутырский" (Валерий Серафимович Митрофанов), "Рассвет" (Иван Петрович Чирков). Куинез но кивалтӥсьёс Игра палан - туж тодмо но гажано адямиос. Соос доры лыкто дышетскыны. Ю-нянь будэтонын, музъемлэсь удалтонлыксэ ӝутонын вань мае адӟем карыны. Таяз арын тужгес шумпоттӥзы "Ленин сюреслэн" бусыосыз: гектарлы быдэ 17,4 центнер ю басьтэмын, нош йыдызы 26 центнерозь вуиз. Ӧжытаклы гинэ кылизы вылӥ верам кык хозяйствоос. Ӟег будэтонын ваньзэсты азьпалтӥз Удмурт Лоза, гектарысьтыз шорлыдын 24,5 центнер кутсамын. Играос бадӟым саклык висъяло етӥнлы. Республикая вераса, та культураез соос котькинлэсь трос кизё - 1005 гектар вылын. Ваньмыз бусыос утялтэмын ни августлэн пумаз ик. Зэмен но, шумпотоно кадь агрономлы собыдӟа ужез быдэстыны быгатэмзылы, тани туннэ-ӵуказе йылпумъялозы ю-нянь аранзэс. Но Клавдия Витальевна веран куспазы шӧдтэкак лулскылэ: - Жаль механизаторъёсты. Ужан висказы я соиз, я таиз техника тӥяське. Соин сэрен кӧня дыр быдтэмын. 98 комбайн пӧлысь аранэ потыны быгатӥз 90-эз гинэ, таосыз но ваньмыз тыро-пыдо ӧз ужалэ. Дас ар ӵоже лудъёсты котыръяны соос чакламтэ ук! Вылезлы коньдон ӧвӧл. Комбайн туж дуно сылэ. "Рассветлэн" кык колёсной трактор басьтыны кужымез тырмиз ик. Агроном верамъя тужгес но секыт югдур "Россия" СПК-ын. Калыкез но отысь егит кивалтӥсьсэ но янгыш карыны ым уг берытскы: куашканы вуэм хозяйствоын одӥг арзэ гинэ пӧсь уз йӧты на, уката ик техника ласянь. Бускельёссылэсь шуге-леке вуэмзэс адӟыса, та кысык вакытэ "Россилы" юрттыны вуизы "Рассветысь" комбайнеръёс. Умой ук со! Калык сяммы, озьыен, али но вунымтэ ай. Сундуръёс ӟег кизёнзэс дыраз йылпумъязы. Урожай ласянь учконо ке, бере кылисьёс пӧлы уг пыро. Озьыен, мылкыдзэс-куашкатыны мугез ӧвӧл. Ӟеч бускелед вань дыръя юрттӥсьёс котьку но шедёзы. Л. Медведева. Туспуктэмъёссы В. Камашевлэн но В. Беломорскихлэн. Трос сюлмаськонэз туннэ "Россиысь" валтӥсь агрономлэн Геннадий Андреевич Логиновлэн. Вуоно урожайлы инъет сётэ тракторист Николай Иванович Лекомцев. Бригадир Людмила Анатольевна Корепанова. Вуэм ю-нянез утялтыны юртто "Рассветысь" комбайнеръёс, огез соос пӧлысь - Александр Емельянов. Бышкись ез сьӧрын но улон "пӧзе" Колония шуиськом ке, син азе соку ик пуксе шимес, мӧзмыт суред: бышкись езэн котыртэм огвыллем пурысь юртъёс, ӝужыт вышкаос, улӥе-вылӥе койкаосын тырмем казармаос, отын шимыраса пукисьёс, чус улос... Огдырлы татын улон ик дугдэм кожалод. Но зэмзэ ик озьы меда со? Туннэ татын - КВН! Машинамы ширтэ Хохряки посёлок пала. Ӵапак отчы интыяськемын 8 номеро колония. Мынам ноку вуылэме ӧвӧл та выллем интыосы. Соин, лэся, матэ вуэммыя сюлэмы юнгес но юнгес жугиськыны ӧдъяз, мугоры юзыр-кезьыр луыны кутскиз. Сыӵе мылкыдме шӧдыса, вӧзам пукись эше буйгатӥз: "Ваньмыз умой луоз. Отын асьмеос кадь ик адямиос ук..." Нош колоние мынон мугмы герӟаськемын туж тунсыко ужрадэн: отын туннэ - КВН. Зэм, зэм. Туннэ кужымзэс мерталозы, ог-огзылэсь визьзэс "сыналозы" пытсэт сьӧры шедемъёс. Татчы туннэ лыктозы Сарапулысь, Азиноысь но Можгалась командаос. Милемды но телевидениысь эшъёсты шуныт пумитаз колониен кивалтӥсьлэн воштӥсез И. Ю. Шагвалеев. Пӧсь чаен утялскыса кошкимы клубе. Кыкналасянь бышкись езэн кыскем сюресэз ортчыса вуим бадӟым азбаре. Синъёсмес соку ик мальдытӥзы яркыт буёлэн ворекъясь сяськаос, чылкытэныз паймытӥз ӝик-ӝик сузям азбар. (Вот кинлэсь адӟем кароно, малпай ас поннам). Нош клубын чузъяське ини шулдыр крезьгур. Борддорез но сценаез чеберъяло яркыт суредъёс, лэчыт веранъёс. КВН ялэмын. Командаос возьматыны кулэ гужемлэсь чеберзэ, аспӧртэмлыксэ, вунонтэм нуналъёссэ. Уго нимаське но со "Гужем - шутэтскон вакыт". Тани сцена вылэ пото Сарапулысь егитъёс. Синмаськымон пӧрмытскиллям соос: яркыт сяськаё панамаосын, шундылэсь утись очкиосын, капчи пыдкутчанъёсын. Соку ик валамон: таосыд дырто ты дуре шутэтскыны. Нош пыласькон дыръя мар гинэ уг луы, кыӵе гинэ серемес учыре уд шедьы... Зал гор-гор серекъяз таосты. Синкыли потымон серекъятӥзы можгаос но. Маскаръяськон, серемес веранъёс пыр соос возьматӥзы странаын кылдэм огъя югдурез, вамышлы быдэ пумиськылӥсь тырмымтэосты. Озьыен, та пиос улонэн ӵош вамышъяло, тунсыкъясько кунысь но кунгож сьӧрысь улонэн, луонлыксы вань берло иворъёсты тодыны. Лэчыт визьзэс возьматӥзы Азиноысь куноос но. Залын пукисьёсты но жюриез сос тужгес бордазы кыскизы чебер кырӟанъёсынызы. Татын кемалась ини вань асьсэлэн ансамбльзы. Вить пиос, чебер костюмъёсын, киязы гитараосын быгатыса шудӥзы пӧртэм гуръёсты, сюлэмез вырӟытӥзы кырӟанъёсынызы. Та шулдыръяськонэз, серекъян- маскаръяськонэз кылыса-адӟыса, чылкак вунэтӥськод, тон азьын секыт йыруж лэсьтӥсьёс шуыса. Асьсэос но соос таӵе дыръя чеберзэ гинэ тодазы ваё, дыр. Кырсьсэ вунэтыса, ӟечез сярысь гинэ малпало. Шудонлы зол-зол дасяськем куинез ик команда. Огзылэн но сётскемзы уг поты. Ог- огзэс "пыӵкыло", сереме уськыто, кытӥ-отӥ ушъяло но... Заллы маза ӧвӧл серекъянлэсь вис карыны. Жюри уг вала, кинлы тросгес очко сётыны. Котьма ке но, шудонлэн пумыз вуэ, йылпумъянъёс лэсьтоно. Котькинлэсь трос очко люкаса, нырысетӥ интыез утӥзы Сарапулысь куноос. Кыкетӥ луизы азиноос, соослэсь кӧнялы ке гинэ бере кылизы можгаос. Но та шудонлэн кыкетӥ люкетэз (турез) гинэ ай. Азьпалан пумиськонъёс эшшо луозы. Бере кылем командаос чик ӝоже ӧз усе. Сцена вылэ люкаськыса, ог-огзылы шуныт мынектӥзы, киоссэс сётъязы но синпельлы патретэ пуксизы. Шулдыртэмзы, капчи мылкыд кузьмамзы понна, командаослы тау карыса вераськиз республикаысь Кыл кутытонъя управлениысь (УИН) пытсэт сьӧрын пукисьёсты дышетонэз но шутэтскон дырез радъянъя ёзлэн кивалтӥсез С. О. Максимов. "Командаосысь адямиос ӵемгес мед вошъяськозы, - шуиз со. - Озьыен, пытсэт сьӧрын пукисьёс ӵемгес но тросэнгес эрике мед потозы". Кызьы вераз Святослав Олегович, колониосын мукет ужрадъёс но ортчыло. Кылсярысь, арлы быдэ радъяськом художественной самодеятельностья смотръёс, - маде со. Берло аръёссэ соос сӥземын вал А. С. Пушкинлэн вордскемез дырысен кык сю ар тырмонлы, Куӟебай Гердлэн вордскем нуналэзлы, Быдӟым Вормонлы 55 ар тырмонлы. "Зонаын" пукисьёс мылысь-кыдысь дасясько соослы. Литература люкаськом пӧртэм библиотекаосысь. Озьы ик тросгес калыкез кыскыны тыршиськом спортъя спартакиадаосы. Командаос кужымзэс мертало кроссын, гира ӝутъянын, бызьылонын, футболэн шудонын но мукет. Управленилэн умой кусыпъёсыз республикаысь вылӥ дышетон заведениосын, училищеосын но техникумъёсын. Отысь преподавательёс урокъёс нуо ваньмаз колониосын. Огъя ужрадъёс ортчытъяськом Егитъёсын ужанъя комитетэн но Удмурт епархиен. Пытсэт сьӧрын пукисьёс та выллем ужрадъёсъя ик валало-шӧдо соос сярысь сюлмаськеммес, бадӟым саклык висъяммес, ӟеч лэсьтыны тыршеммес. Нош ӟечез котьку но ӟечен берытске. Инмарен артэ Кыл кутытонъя управление матысь кусыпъёс возе черкъёсын. Уго черк, православие, вӧсьлык юртто адямилэсь лулпушсэ узырмытыны, кырсезлэсь, уродэзлэсь, сьӧлыкъёслэсь куштӥськыны. Соин ик ваньмаз сямен колониосын усьтӥсько черкъёс, вӧсяськон интыос. Сыӵе интызы - чылкыт, югыт сэрегзы - вань 8 номеро колониын но. Чеберъяса, чильпаса лэсьтэм ӝажыос, ӝӧкъёс, пуконъёс - татын "пукисьёслэн" ки бервылзы. Инмарлы оскисьёс понна татчы котькуд нунал ӧсъёс усьтэмын, кулэ книгаоссы но тырмыт. - Вӧсяськыны трос ветло, - маде та пичи сэреглэн кивалтӥсез Сергей А. - Ачим но мон улонам секыт йыруж лэсьтӥ. Укмыс арлы шеди кечат-вамат кортэн дурем укно сьӧры. Кылиз на куинь ар пукыны. Нуналлы быдэ инмарлэсь курисько сьӧлыкъёсме басьтыны, шонер сюрес возьматыны. Молитваос лыдӟыса, инмарен вераськыса, сюлэм ик буйга кадь, быдэс пуш тырме, сайкыт, чылкыт малпанъёсын. Уката ик шумпотӥськом бадӟым праздникъёсы дорамы Удмурт епархиысь ужасьёслэн ветлэмзылы. Ӵем гинэ соос ми дорын службаос ортчытъяло. Тросэз сямен ик, мон но азьло уг оскиськы вал инмарлы. Но татын ӧвӧл бере матысь адямиос (анай-атай, сузэр, вын), кинлы сюлэмдэ, малпандэ усьтод на? Мон малпамъя, со чик урод ӧвӧл. Ми татын ялан вӧсяськыса гинэ ум улӥське ук. Мон шумпотыса шудӥсько-кырӟасько вокально- инструментальной ансамблямы. Нимаське со "Парадокс" шуыса. Сизьым кузя ми отын. Асьмеос ик кырӟанъёсмылэсь кылъёссэ но, крезьгурзэ но кылдытъяськом. Спортъя ӵошатсконъёсы но мылысь-кыдысь пыриськисько. Инмарлы оскон воксё уг люкеты мукетызлы. Анай-атайёслэн нуналзы Тазьы нимало пытсэт сьӧрын пукисьёслэсь анай-атайёсынызы, сузэр-вынъёсынызы, ӵыжы-выжыосынызы, матысь эшъёсынызы пумиськон нуналзэс. Алигес таӵе ужрад ортчиз Сарапулысь 5 номеро колониын. Пумиськонэ ог 50 мурт люкаськиз. Но таӵе пумиськонъёслэн мугзы ог-огеныд адӟиськон гинэ ӧвӧл. Татчы лыктэмъёс ас синмынызы адӟизы ӝужыт кенер но пытсам ӧсъёс сьӧры ватскем улон- вылонэз, уно юанъёсын, куронъёсын вазиськизы татын ужась офицеръёслы, кивалтӥсьёслы. Куноосты чидатэк витиз 8 номеро отряд но. Со татын котьма ласянь адӟем карымон луэ: чылкытлыкъя но, астэ кызьы воземъя но, пӧртэм ужрадъёсы пыриськемъя но. Та нуналлы соос кема дасяськизы. Ас кужыменызы тупатъязы-выльдӥзы улон интызэс. Анай-атайёссэс паймытӥзы ӝикыт утялтэм койкаосынызы, чылкытлыкенызы. Колониын пукисьёсты урод сюдон, эмъян сярысь вераськонъёс но юнме вылэм. Кивалтӥсьёс та ласянь вань луонозэ лэсьтыны тыршо. Араз кык пол флюрография ортчыто, вань мылкыд карисьёс быгато пиньзэс эскерыны-эмъяны. Куноос столовое но пыразы, веръязы отын пӧрам сиён-юонэз. Туж ческыт кошкиз. Троссэ анай-атайёсты сюлмаськытэ таӵе ужпум: мар вите соослэсь пиналъёссэс, эрике потэмзы бере"? Шедьтозы-а соос уж? Та юанъёслы валэктон сётыса, полковник А. Клюев шуиз: - Татчы шедемъёс ваньзы быгато огъя тодон-валанъёс басьтыны. 1980-тӥ арысен колониын ужа 47 номеро училище. Отын дышето трактористъёсты, каменщикъёсты, кочегаръёсты, стропальщикъёсты, автослесарьёсты. Училищеез йылпумъямъёслы сётӥське диплом. Туэ училищеын дышетскыны мылкыд карисьёслэсь сю куриськон вуиз ини. Соос пӧлысь витьтон мурт быръем вуриськисьлэсь ужзэ, кызь витез - кочегарлэсь, сомындаез ик - автослесарьлэсь. Вылӥ тодон-валанъёс басьтыны но мылкыд карисьёс вань. Кылсярысь, Иф Олег, пытсэт сьӧрын пукыса йылпумъяз ини Москваысь Славянской юридической факультетлэсь 1-тӥ курссэ. Но умоеныз ӵош, тырмымтэос но трос. Ёрмиськом методикая литературалы, 10-тӥ класслы учебникъёсты. Собере, куноосты ӧтизы клубе. Шулдыр концерт возьматӥз татысь "Мистер-Х" группа. Нуналлэсь ортчемзэ шӧдыны ик ӧйлась. Вуиз люкиськон дыр. Но азьланяз таӵе пумиськонъёс одно ик луозы ай. Ӟечкылазы выль дышетскон арен Можгаысь быдэ вуымтэослэн колониязы та нуналъёсы ортчиз бадӟым шулдыръяськон. Со сӥземын вал выль дышетскон ар кутсконлы. Нылпиос тау каризы дышетӥсьёссылы, мылкыдзэс веразы эшшо но ӟеч дышетскыны. Празднике ветлӥзы та колониын пукисьёслы юрттонъя нимысьтыз кылдытэм кенешысь адямиос. Соос пӧлын вал Калыкез уже интыянъя департаментлэн кивалтӥсезлэн юрттӥсез Любовь Егоровна Зорина, Нылпи фондлэн кивалтӥсезлэн юрттӥсез Марина Евгеньевна Кривоногова, Егитъёсын ужанъя комитетысь адямиос. Соос буш киын ӧз лыктэ. Кузьмазы дышетсконын кулэ луись котыръёс, чибориё телевизор, компьютер но мукет арбериос. Ӟечкыланъёс, шулдыръяськонъёс бере люкаськылӥз колонилы юрттонъя кенеш. Отын чаклазы азьланяз быдэстоно ужрадъёс. Е. Камашева, А. Марчуков. Туспуктэмъёсыз В. Беломорскихлэн. Пусъемын нимысьтыз дипломен Августлэн пумаз Москваын ортчиз автомобильёсты возьматонъя "МИНС- 2000" калык куспо 6-тӥ выставка. Отчы ветлӥзы Ижевскысь мотоцикл лэсьтӥсьёс но. "Ижмаш - Мото" акционер огазеяськон возьматӥз выль вузъёссэ - кык пумо элетролеръёссэ но тодмо "Иж - Юнкер" мотоциклзэ. Таяз учыре "Ижмаш - Мотоын" ужасьёс ваизы "Юнкер" модель вылын дасям выль мотоциклзэс но. Со чакламын сюресъёс вылын шудтэм учыръёсты алонъя ужасьёслы (дорожно-патрульной служба). Россия Федерациысь Дизайнеръёслэн огазеяськонзы та машинаез пусйиз нимысьтыз дипломен. Н. СЕРГЕЕВ. "Ӧй курласал ас даурме" Кыӵе меда сяська кузьмано Милитина Васильевналы?Туннэ уго эшъёсыз, матысь адямиосыз солэсь Вордскем нуналзэ пусъё.Тодыса но тодытэк кудӥз яратоно астраоссэ сётозы (гороскопын но, пе, озьы пусъемын.). Кудӥз гладиолуслэсь йӧнозэ уз шедьтэ (ачиз сое коштан сяська нима). Зангариез но, оло, вуттозы - пичи дыр сяськазэ. Яке дыдыксинэз (эшъёсыз шуо вал : " Тынад синъёсд, Миля, ӵапак дыдыксин кадесь...") Нош кин ке малпалоз-а, тӧдьы пот - полынь но кузьманы луэ шуыса? Я, ӵок, уз ке, сое со ачиз ӝӧк вылаз пуктӥз ни. Гладиолус но полынь. Коштан сяська но тӧдьы пот. Югытлык-йӧнлык но ӝожомон- чигиськон. Соос улонамы артэ, ваче ки кутӥськыса ветло, ог-огзы пушкы сиосынызы вутскыло. Котьма ке но, югытэз ворме. Сотэк адями кызьы азьлань мыноз? Тани Милитина Гаврилова-Решитько нош ик одӥг гож вамен потэ. Та вамышсэ лэсьтыкуз, йыраз кугӟам малпанъёсыз бугыръясько. - Милитина Васильевна, кельшиськоды-а тӥ асьтэлы асьтэос? - Горд мурт кинлы кельшоз? Но мӧйымемъя, лул чеберлык пушъемъя, тус воштӥське умойлы. Ӧжытак серем пыр верасал: тӥ пӧялэ но, мон оско, эшшо чебергес луо. - Нош туспуктэмъёсысь?.. - Фотое пуксьыны туж ик уг яратӥськы. Вань шекъёс син шорын. - Шедьтӥды-а улонын пиосмурт идеалдэс? - Шедьтӥ, шуыны луэ. Ӝужыт, сьӧд, вазиськись. Аслам но ӝужыт луэме потэ вал. Ми сузэръёсыным мумымес-бубымес ӝуждалая таки ӧм сутэ. - Песянай луыны секыт-а? - Нылпи вордӥськод ке, котькинэ возьма сыӵе адӟон. Пиелэн, нылылэн ньыль пиналъёссы ини: дас куать, дас кык, дас одӥг но куинь но ӝыны аресъемесь. Малы ке ваньзылэн нимъёссы А букваен кутско: Александр, Андрей, Анна, Алена. Пинал дыръям туж потэ вал песянаен улэме. Пересь нэнэосы вазь кошкизы улонысь , мон вордскемлэсь азьло ик. Кулаке поттӥллям соосты. Соин ик внукъёсылы трос дырме сётӥсько: маке но тырмымтэез, буш интыез шӧдыса, мон сямен медаз будэ. - Пиналъёсты тодо-а удмурт кылэз? - Юра пичи дыръяз гуртын улыкуз дышиз, Ольга али дышетэ. Дышетскемзыя огзы инженер, огзы медик. Удмурт кыл пӧртэм югдуръёсын кулэ луылэ. - Милитина Васильевна, нош мукет вакытэ тӥ улысалды-а? Бырйысалды-а асьтэлы мукет уж? - Егитлыке мынам тупаз социализм вакытэ. Ӧй курласал та дырез. Радиоын диктор, редактор луыса ужай. Гожтоно-верано адямиосылы синмаськылӥ - сотэк ужме ӧй яратысал. Радио монэ ӧз кушты. Котьку шумпотыса мынӥсько "Ингуре", арня шорын вакчи тулкымъёсыз мыным сёто. Выльысь мукет уж ӧй бырйысал. Ӵектонъёс бен вал - телевидение, театре, газет поттонэ... - Иське, шуыны быгатӥськоды: малпанъёсы быдэсмизы? - Быдэсак малпанъёсме быдэстыны ӧй быгаты. Но кӧня ке но дышетски. Дышетски улыны. Али но весь дышетскисько: варенья пӧзьтыны, кенешъёсын вераськыны, адямилыко луыны... Лушкем малпанэ вал гожъяськись луыны. Ӧй луы. Но ужан удысэ гожъяськонэн герӟаськемын. - Озьы ке но шуиськоды, тӥ поттӥды ни кылбур сборниктэс - "Кесэго-кесэго малпанъёс". - Зэм, со малпанъёс пилемъёс кадесь, тугаськыса куддыр кошко. Шумпотоно ни, дыр, лэсьтэмезлы, мар вуттӥд. Котьма ке но, шудтэмен асме уг лыдъяськы. Пичи квартираямы огвакыт сизьым кузя ке но улӥм, ужъёслэсь ноку ӧй ке но ваньмылы, вӧзам дунъяны быгатӥсь, матысь адямие вал. Али но. Георгий Андреевиче баянэн, балалайкаен, арганэн шудэ, суредаськыны, пуэз вӧлыны но быгатэ. Удмурт культура борды монэн ӵош кыстӥське. - Нош кышкатэ-а тӥледыз мӧйымон? - Кышкатэ. Уин, ӵукна, тыр толэзь ӝужалляку. Сыӵе дыръя мылкыдъёс кылбуре пыро. Милитина Васильевнаен блиц-интервью - вакчияк юан-валэктон гинэ гожтыны малпай вал. Нош сыӵе тырк-мырк вераськон сабырлы, лад-лад адямилы уг тупа вылэм. Одӥгзэ солы сӥзём на: покчи гужемез вань буёлъёсыныз мед воректоз. Т.ПЕТРОВА. М.В.Гаврилова-Решитько сӥзьыл садын. Туспуктэмез Г.Решитьколэн. Удмурт Республикалы президентэ кандидатэ В. В. Забильскиез пусъён сярысь Удмурт Республикаысь Быръёнъя комиссилэн постановлениез Удмурт Республикалы президентэ кандидатэ В. В. Забильскиез ӵектонъя радлыклэсь Удмурт Республикалэн "Удмурт Республикалы президент быръён сярысь" Законэзлэн куронъёсызлы тупамзэ эскерыса, подписной листъёслэсь но мукет документъёслэсь шонер но зэм луэмзэс лыдэ басьтыса, вылӥ верам Законлэн 17-тӥ, 37-тӥ, 38-тӥ ёзэтъёсызъя республикаысь Быръёнъя комиссия пуктэ: 1. Пусъёно Владимир Викторович Забильскиез, РАН-лэн Урал люкетэзлэн физико- технической институтаз ужасез, вордскемын 1948-тӥ арын, улэ Ижын. Удмурт Республикалы президентэ кандидатэ ӵектэмын бырйисьёсын. Пусъён дыр - 2000-тӥ арын 3- тӥ сентябре 18 час 30 минутэ. 2. В. В. Забильскийлы сётоно пусъем сярысь удостоверение. 3. Та постановлениез печатлано республикаын потӥсь кун газетъёсын. Удмурт Республикаысь Быръёнъя комиссилэн тӧроез Д. Н. Талантов. Удмурт Республикаысь Быръёнъя комиссилэн секретарез Н. А. Глухова. Иж город, 2000-тӥ арын 3-тӥ сентябре. � 20.1. Удмурт Республикалы президентэ кандидатэ А. В. Солуяновез пусъён сярысь Удмурт Республикаысь Быръёнъя комиссилэн постановлениез Удмурт Республикалы президентэ кандидатэ А. В. Солуяновез ӵектонъя радлыклэсь Удмурт Республикалэн "Удмурт Республикалы президент быръён сярысь" Законэзлэн куронъёсызлы тупамзэ эскерыса, подписной листъёслэсь но мукет документъёслэсь шонер но зэм луэмзэс лыдэ басьтыса, вылӥ верам Законлэн 17-тӥ, 37-тӥ но 38-тӥ ёзэтъёсызъя республикаысь Быръёнъя комиссия пуктэ: 1. Пусъёно Андрей Владимирович Солуяновез, "ИЭМЗ "Купол" ФГУП-лэн азинсконэзъя программаослэсь директорзэс, вордскемын 1959-тӥ арын, улэ Ижын. Удмурт Республикалы президентэ кандидатэ ӵектэмын бырйисьёсын. Пусъён дыр - 2000-тӥ арын 3-тӥ сентябре 19 час 50 минутэ. 2. А. В. Солуяновлы сётоно пусъем сярысь удостоверение. 3. Та постановлениез печатлано республикаын потӥсь кун газетъёсын. Удмурт Республикаысь Быръёнъя комиссилэн тӧроез Д. Н. Талантов. Удмурт Республикаысь Быръёнъя комиссилэн секретарез Н. А. Глухова. Иж город, 2000-тӥ арын 3-тӥ сентябре. � 20.3. Инмысь ӝук уз усьы Ваньмыз огшоры кадь. Кык висъето улонни. Телевизор, телефон, шкафъёсын - книгаос. Озьы ке но, татын вань аспӧртэмлыкез. Синъёсты бордазы кыско М. Гариповлэн, Е. Скобелевлэн, В. Боталовлэн бадӟымесь суредъёссы. Мукет кунъёсысь кузьымъёс, котькуд Герберысь ваем чебер киужъёс. Котькудӥз тодэ вайытэ ӟеч адямиосты, сосын герӟаськем ужрадъёссты, пумиськонъёсты. Соос трос вал Надеждалэн улоназ. Культура удысын Надежда Николаевна Бочкарёва ньыльдон вить ар пала ужа ни. 1960-тӥ арын Ижысь библиотечной техникумез йылпумъямез бере, ужаны кутскиз библиотекаын. Кутскиз но ӧз ни люкиськы та удыслэсь. Нырысь ик Шаркан ёросысь Быги гурт вал, собере - Ижысь Михаил Петров нимо библиотека, Камбарка, Ленин нимо, технической библиотекаос... Нош тужгес яратоноез - Национальной библиотекаысь шаер но финн-угор литературалы сӥзем ёз. Ваньмыз кутскиз книгаез яратон бордысен. Выжыосыз юнэсь вал. Тыловай палась Якуня гуртын улӥс бубаез Филипп Васильевич Андреев вить борддоро корка ӝутӥз, кеносъёс пуктӥзы, кадь вить уморто муш врдӥз, пиналъёссэ зол ужаны дышетӥз. Но ӟеч улыны ӧз кыды. Кулаке поттӥзы, ваньбурзэ басьтӥзы. Солэн нылыз, Надялэн мумиз, ӧз дышетскы. Озьы ке но, туж яратӥз ужаз. Нылзэ но туж пукыны ӧз лэзьылы. Эшъёсыз шудыку, Надяез дораз ӧтьылӥзы. Ужано, шуылӥзы. Ма карод? Ужаз. Ож аръёсы мемиез сике ужаны ветлыку, пересь нэненыз ӵош пу вандоно луылӥз. Пичи мурт кык киосыныз ик пила ныдэз кужмысь солань-талань кысканы тыршиз. Со пу вандэмез туннэ ке но син азяз. Улоназ секыт дыр луэ ке, сое тодаз вае, пиньзэ куртче но нош ик пие ужез борды кутске. Школаын но, дышетэм сяна, ужато вал. Отчы Надя дэра дэремен, дэра пуйыен, кутэн ке но мынӥз, дышетсконэз туж яратӥз. Огпол урокъёс бере утӥн урыны ыстӥзы. Дышетӥсьсы Александра Ефимовна чурыт сямогес ке но вал, пиналъёслэсь мылкыдзэс лякытгес коран понна, дыр, шутэтскыкузы "Царевна-лягушка" выжыкылэз лыдӟиз. Надялы со туж яраз. Выжыкыл шаер сюлмаз юн пыриз но Сурон гуртысьтызы пичигес изба-читальная шуонозы сюрес усьтӥз. Туж яратыса лыдӟиз "Туганай но Зара" выжыкылэз, удмурт кылэ берыктэм "Пичи Мух" книгаез, отӥяз бадӟымъёслы чакламъёссэ. Чуланазы ватске но лыдӟе, лыдӟе... Нош гуртын - ужъёс. Анаез соосты быдэстыны косэ. Вутсконо. Кыӵе возьмалляз 1-тӥ куарусёнэз (сентябрез). Школа. Книгаос. Выльзэ тодон. Книгаез яратон ик вуттӥз библиотекаын ужаны дышетӥсь юртэ. Гуртысь лыктэм муртлы туннэ но городысь техникумъёсы, институтъёсы, университетъёсы пырыны шуг, соку но озьыгес ик вал. Ӟуч кылэз ӟеч тодытэк, валамдэ но вераны шуг. Надя вормиз. Дышетскыны пыриз. Нош нырысетӥ каникулозь кӧня синвузэ кисьтӥз мӧзмыса... Туж зол мӧзмиз мумизлэсь. Огпол, гуртаз бертыкуз, автобус ӧй вал. Кыӵе ке машинаын Мишкиноозь мынӥзы. отӥяз - буков. Машина ӧз ни келя. Нош дорозяз эшшо ньыльдон вить иськем. Лӧпе мынӥсь пияшен ӵош потӥзы со сюрес вылэ. Пуйыаз пичигес булка но кӧня ке конфет. Пияш Лӧпе кылиз. Кӧлыны косо вал Надаяез но: гуртозь укмыс иськем ук ай. Мумизлэсь но туж мӧзмиз ни. Ӧз, ӧз кыльы. Сюрес урод, пельтэмын. Пеймыт. Инты гурезё: кытӥ погыльске, кытӥ ньыль пыдыныз тубе. Уин куинь часын вуиз дораз. Инмар но, лэся, утиз, чурыт сямыз но вормиз. Доре вуоно бере - вамыштоно. Картсэ ватэмез бере, улыны но ужаны юрттӥз нылъёссэ пыд йылазы султытон, утялтон, сюдон, дӥсян, дышетон сярысь сюлмаськон. Иже вуэмез бере, В. И. Ленин нимо библиотекаын ужаны кутскиз. Соку ик яратӥз та юртэз, татысь ужасьёсты но. Директорзы, П. Н. Глухов, умой пумитаз. Татын ужаны кутскемезлэсь азьло "Ижмаш" культура дворецын драмкружоке ветлыны кутскиз (таиз бӧрысь калык театр луиз). Соку соин Л. И. Перевощиков кивалтӥз. Кыӵе устоесь эшъёс вал! Пуктӥзы "Прапорщик Орлов", "Выж вылын", "Зангари" пьесаосъя спектакльёс. Рольёс но сётъязы. Татын ик тодматскиз Юраеныз. Бочкарев дворецын крезьгур удысэн кивалтӥсь вал. Баянэн туж ӟеч шудӥзы. Сое тодо вал дворецысь адямиос но, спектакльёсты учкыны ветлӥсьёс но. Туж яратылӥз удмурт кырӟанъёсты, удмурт калыкез, егит кузпалзэ. Тонэ мон кадь яратӥсь ноку уз лу ни шуылӥз. Тон дуннеысь тужгес ӟечез", - буйгатылӥз. Но ки йылаз нуллыны ӧз вуы: улонысь вазь кшкиз. Солэн верамъёсыз зэмазы, лэся: Надялы но нокин кулэ ӧз луы ни. Картэз висьыны усем бере, коньдонлы ёрмон выжтӥз сое технической библиотекае. Кыӵе мӧзмыт но секыт потӥз нырысь-валысь! Озьы ке но, татын но утчаз тунсыкозэ. Со дыре ик та библиотекаысь егит ужасьёс люкаськылӥзы улон интыосазы. Ӧтьылӥзы кылбурчиосты, тодосчиосты, тодмо адямиосты. Вераськылӥзы ӟуч романс, джаз, ? сярысь. Со дыре ик В. И. Ленин нимо библиотекаын но воштӥськонъёс луизы. Кивалтӥсьёс Надялы вазиськизы: оло, берен дорамы лыктод? Ар ӵоже малпаськиз: быгатоз-а? - Мын, - шуизы нылъёсыз. - Та ужад секыт но, мзмыт но. Надежда Николаевна ӧз пӧясьскы: ужез яраз. Кыӵе тунсыко адямиос нош татчы вуыло. Соос - удмурт тодосчиос, гожъясьёс, дышетскись егитъёс. Ас вордскем интыяз вуиз кадь. Татын шаермылы сӥзем Весь ваньмыз удмурт кылын верасько. Нош клуб! Нырысь-валысь кышказ но кадь. Кызьы радъяно ужез. Но со аре Куӟебай Гердлэн, Ашальчи Окилэн, Михаил Прокопьевлэн юбилейёссы вал. Соослы ик сӥзизы клублэсь нырысетӥ кенешъёссэ. Сценарийёс н ачиз гожъяз, выставкаос дасялляз, ачиз ик котьмаин тодматылӥзы. М. П. Прокопьевлэн юбилеез дыръя соосты марие - Кукмор ёросэ ӧтчазы. Ветлӥзы Гай Сабитов, Петр Поздеев, Семён Ильин. Туж зол пумитазы: быдэс ёросын соку туж шулдыр вал. Та вакытэгес ик вырӟизы удмуртъёс. Библиотека сюлмаськемен, национальной центръёс кылдытъязы. Тямысэз усьтэмын вал. Трос интыосы ветлыны кылдӥз. Автобусэн вуылӥзы Башкирие - Янаул ёросэ, Киров улосэ, Казане, Казахстанэ. Берлояз "Удмурт кнеш" ысъяз. Отысь удмуртъёс ӧтчаме но ветлӥзы. Ужлэн шорсюлэмаз - библиотека. Татын - адӟытонъёс, валэктон нуналъёс. Дышетскон ар кутске ке, студентъёсты ӧтё библиотекаен тодматскыны. Кыӵе ке кенеше лыкто ке удмурт дышетӥсьёс, шаерчиос, татчы одно ик вуыло. Ваньмызлы шеде пайдаё но тынсыко литература. Ваньмызлы юртто татын ужасьёс, соос пӧлын - Надежда Николаевна Бочкарёва но. Библиотекаын улон воштӥськемъя, ужъёс но воштӥсько. Али ужано "Удмурт шаермылы - синпель" программая: Удмурт шаерысь но палэнысь удмурт книгаосын тодматско, быдӟым адямиосын, библиотекаосынызы тодматоно. Та ужын адӟиськиз Н. Н. Бочкарёвалэн тыршемез но со пусъемын Удмурт Кивалтэтлэн данъян грамотаеныз, шаерысьтымы культура удысысь дано ужась луиз. Нош тужгес дуноез - Надежда Бочкарёвалы сётэмын Ашальчи Оки нимо премия. Тазьы пусъемын солэн удмуртлыкез утёнын тыршемез. Та уже со кутсконысеныз ик пыриськиз, шуыны луэ. Удмурт лулчеберлыкъя дэменлыклэсь "Удмурт кенеш" огазеяськемлэн Ижысь Октябрь ёросысь ёзэзлэн "Удмурт нылкышно кенешлэсь но палэнэ ӧз кыльылы. Калыкен тодматскон, адямиосын матысь кусыпъёс взьыны быгатон сям солэн вираз пыӵамын, луоз. Со ведь удмуртъёсын гинэ уг эшъяськы. Удмурт шаерын огвакытэ ужазы финн но мадьяр тодосчиос Сара Хосӥникяйкаон но Шитван Козмаг. Соос библиотекаысь та отделын матысь эшъёс луизы. Надеждаен ӵош пӧртэм удмурт ужрадъёсы пыриськылӥзы. Соку удмурт нылкышно инн кылэз но дышетонэ ветлӥз. Шумпотэ: кулэ луз ке, вераськыны йӧндыроз. Нош Сара но Шитван отделзэс финн но мадьяр книгаосын узырмытӥзы. Али библиотекаын нимысьтыз финн-угор фонд кылдытэмын. Отысь книгаосъя "кытчы ке потаны но луэ". Тазэ но туж яратэ Надежда. Таизлы но дышиз пичиысен. Школаын географилы дышетӥсез асьсэ котырысь интыосын тодматылэ вал. Дышетӥз инкуазез адӟыны, солэсь чеберзэ валаны, соин данъяськыны. Будэмъяз Надежда та удыслэсь ӧз ни ӵыды: турист кариське но кошке Курганэ, Ульяновске, Свердловске, Казане, Чебоксарые... Собере - Эстония, Финляндия, Венгрия, Болгария... Али азяз таӵе ужпум пуктӥз: ветлоно Германие, соин ик дышетоно немец кылэз (эмеспиез - немец). Туж нылъёсызлы пересьмытозязы воргоронэн артэ улыны мед кылдоз. Аслыз ӧз кылды. Семьязы пичиысен воргоронтэк вал: атайзэ ляб тодэ. Со ожысь пал пыд бертӥз. Уйвӧтын кадь тодэ на "Три танкиста" кырӟанэз нёжъямзэ. 1946-тӥ арын улонысь кошкиз. Улон Надеждаез котьмалы дышетӥз: керттӥськыны но: пужыятскыны но, вуриськыны но. Кияз журнал кутэ, сое учке, лыдъя-чота но шич-шич гинэ мудрон дӥсь вуре. Ужаны кутскыкуз со 47 манет но кӧня ке коньы гинэ уждун басьтылӥз. Озьы дунъя кунмы культура удысын ужасьёсты, адямиослы лулчеберзэс будэтыны юрттӥсьёсты. Зэм, аслыз дунъет сётыны быгатӥсь адями ноку но ӧз возьматылы ёрмемзэ. Туэ гужемлы но огкутскемен дэрем но, юбка но, кофта но вуриз. Ваньзэ лэсьтӥз модая журналъёсысь учкыса. Пӧрмиз ведь. Калык юмшанъёсысь адӟид ке юг-юг тӧдьы кофтаен, туала модаё кузь юбкаен но одно ик шляпаен, кит-кит серекъясь нылкышноез, тод: со - Надежда Бочкарёва. ... Со уг возьма инмысь ӝукез. Тэк пукыны уг сёты нылъёсызлэн пиналъёссы, удмуртлыкез утён сярысь сюлмаськон. Со ӧте Надеждаез адямиос пӧлы, соос понна ужаны. Удмурт калык но оске солы: нимыз но ук - Оскон. Милитина Гаврилова. Кидыс асьсэос уськыто Алнаш районысь "Решительный" кооперативын ӟеч кидыс уськытонлэсь пайдазэ умой валало. Соин ик арысь аре та ужлы ялан бадӟым саклык висъяло. Хозяйствоын умой удалтэ "тӧрос" йыды, "скакун" сезьы но "красноуфинский-93" кӧжы. Кылсярысь, туэ йыдызэ гектарлы быдэ 26 центнер жильдӥзы, кӧжызы 17 центнер люкаськиз. "Энита" сорт чабей интые кизьыны малпало "Московская-95" пумозэ. Та вакытэ эштосын люцерназэс кидыслы арало. Со киземын 50 гектар вылын. Л. Кузнецов. Кизнерлы юрттоз Норвегия Кызьы тодмо, Кизнерын тросэн возиське химия пыӵал тӥрлык. Арсенал усьтэмын вал 50-тӥ аръёслэн пумазы. Отын возисько ог 6 сюрс тонна суретъёс. Тазалыклы кышкытлык кылдытэ люизит. Посёлокын улӥсьёс соин валче юн сюлэмшугъяськемзэс верало. Кӧня ке ар ӵоже ини Удмуртиысь госсанэпиднадзор но Ижевскысь кун медакадемия ӵош ужало Осло городысь экологияя но висёнъёсты эскеронъя центрен. Соос Кизнер котырысь инкуазез ӵош эскерон сярысь огкыл гожтӥзы. Норвегия кыл сётӥз ялан эскерыса возьыны посёлок котырысь музъемез, вуэз, будосъёсты, арсеналэз. Удмуртиын умой радъямын экологиез лаборатория амалэн эскерон ёз, но асьмелэн уггес тырмы туала аппаратурамы. Соин ик та ласянь юрттэт вуыны кулэ Норвегиысь. Б. Никитин. Кивалтӥсьёс - калык пӧлын Волков шумпоттӥз Сарданэз Вольыт сюреслэн Можга ёросэ выжон интыяз машинаос дугдӥзы. Ижысь куноосты татын возьмало ни вал. Удмурт, бигер, ӟуч дӥсен нылкышноос но воргоронъёс Кун Кенешлэсь Тӧрозэ но соин ӵош лыктэмъёсты нянен-сылалэн, сяськаен, кырӟанэн пумитазы. Эсьма, вожъяськыса ик учконо можгаос шоры. Таосыд ваньзэ озьы гажало, дыр, шуыса малпан кылдӥз. Нырысетӥ дугдон - тракт кузя мучолоен вузкарисьёс вадьсы. Вылӥ кивалтӥсь мылкыд кариз татысь етӥн заводэ пыраны. Бӧрысь машинаос шуласа но турлы буёлъёсын калыкез паймытъяса дыртӥзы Сардан посёлоке. Таизлэн нимыз быдэс шаерамы тодмо. Сарданэ уго интыяськемын республикаысьтымы нырысетӥез психологической больница. татын эмъяське 500-лэсь ятыр адями. Соослы умой луонлыкъёс кылдытон вылысь, уен-нуналэн ужало кӧня ке дасо врачъёс, сестраос, санитаръёс. Шонерзэ верано ке, посёлоклэн вань улонэз герӟаськемын больницаен. Кызьы, шуом, Чепца механической завод луэ быдэс Глазовлэн шорсюлмыз, озьы ик та эмъяськонни но Сарданын улӥсьёс понна туж дуно. Соин ик паймонэз ӧвӧл, татысь валтӥсь врач Василий Реверчук уноезлы кивалтӥсь но, дурбасьтӥсь но, берпуметӥ кыл верась но лыдъяське. Со бордысь уго тросэз потэ. Сарданын вань кык этажен улон юрт. Вуж ни со. Тани-тани куашкалоз. Вазен отын 16 квартира вал. Али 9 семья улэ. Пӧлазы вань нылпиен егитъёс но, пенсионеръёс но. Тол матэктэ. Адямиос уйёссэ но умой-умой уг кӧлало ни, кышкало, вылазы вӧлдэт но улон котыр усёз, пачкатоз шуыса. Ма кароно? Гурт администрацилэн кивалтӥсезлэн Лидия Аркадьевналэн верамезъя, Сарданын но Ӟуч Сюгаил вӧзысь гуртын вить мурт дась вузаны юртъерзэс. Басьтыны коньдон ӧвӧл. Вазиськизы та ужпумен бадӟым кунолы. - Ойдолэ тазьы кенешом, - шуиз соиз. - Со коркаосты ваньзэ ик басьтоно, куашкась юртысь вить семьяез ӝегатскытэк выжтоно. Со понна мон тӥледлы 100 сюрс манет шедьто. Нош кылемъёсыныз вераськоно лэсьтӥськыны яке квартира уськытыны кредит висъян ласянь. Озьы ужпумез быдэстом... Василий Реверчук шумпотэменыз мыньпотэ. Куке Александр Волков ялӥз та решение сярысь калык азьын, клубын, куд-ог нылкышноос ӧз оске. Но соиз шуиз: арня ӵоже, тужгес троссэ дас нуналскын дорады коньдон вуоз. Кунолэсь шырыт сямзэ шӧдыса, лэся, Сардан кузёос тэбиньыны кутскизы мукет куронэн. Юрттэ, пе, автобус басьтыны. Калык ёрме Можгала ветлыны, гурт вӧзтӥ ик ортчись поездъёс нуналаз кык пол гинэ дугдыло. Югдурез озьы но тазьы чакласа, Кун Кенешлэн Тӧроез сарданъёсты нош шумпоттӥз. Та кулэяськондылы 100 сюрс манет шедьто, пе. Сомында ик сётоз ёрос администрация. Юрттоз Тазалыкез утёнъя министерство но. Калык чылкак лӧптӥз. Кызьы гинэ тау уг каро. Олокыӵе но чебер кыл шедьто. Быръёнъя интыысь комиссие юнматэм ветеран Анатолий Пчельников трибуна сьӧры ик потыса оскытӥз: уж нуиськоз, ми тӥледлы юрттом. Александр Волковен ӵош Сарданэ лыктэмын вал мукет тодмо адями - "Удмуртавтодорлэн" кивалтӥсез Александр Соловьев. Вуылэмез юнме ӧз луы. Калыклэсь куронзэ чакласа, со сӥзиз матысь аръёсы посёлоке асфальт сюрес кыскыны. Паськыт кенешон пӧрмиз тужгес висьытӥсь ужпумъя но. Мон верасько больницалы выль юрт пуктонэз. Солы проект дас ар талэсь азьло дасямын вылэм ни. Табере сое выльдоно, коньдон утчано. Шоркарысь куноос оскытӥзы, та уж борды одно ик рос- прос басьтӥськозы шуыса. Тӥни сыӵе пумиськон ортчиз Сарданын. Вакчи дыр куспын эскеремын трос ужпум, шедьтэмын уно сюрс коньдон. Мон малпай ни вал, со быриз шуыса. Озьы вылымтэ. Бадӟым Учаын но (нялтас вераса, Павел Вершининлэн вордӥськем палъёсаз) куронъёслэн лыдзы пумтэм вал. Татысь черклы Кун Кенешлэн Тӧроез сӥзиз 20 сюрс манет. Школа-интернатлы, вуриськон машина но мукет тӥрлык басьтон вылысь, 30 сюрс манет коньдон висъяз. Командировкаысь валлян чылкак ӝутскем мылкыдын бертӥ. Можга калык понна шупотӥ. Нош ӵуказеяз сюлэм висьыны ӧдъяз. Малы меда? И. Лебедев. Сарданын пумиськон дыръя. Н. Глуховлэн туспуктэмез. Петр КУБАШЕВ "Кайсы" повестьысь люкет Максим Бектэр нюк бамалын эшъёсыныз шудыкуз, Максим выль кырӟан кылӥз: огез пияшсы туж лӧпшаса кырӟаз сое. Дораз ӝыт пал гинэ бертӥз � эшъёслэсь люкиськыны ӵыдод шат?! Коркаязы пыриз гинэ но адӟе: ӝӧк сьӧрын чай юыса пуке Гондыргуртысь Микаля кырсиез. Максимез адӟыса, киоссэ вӧлъяз: � О-о, самой дуноез эше бертӥз! Кыӵе-мар улэм-вылэм, Петрович? Вай бур кидэ! Шабала пасьта кизэ мычиз. Максим суралскиз но со ки борды бур киыныз чабиз: � Ӟечбур, Микаля кырси! � Ой-ой-ой, кужым ке кужым шол та егит сӥльвирын! Ма... ма... тон... киме ӧд чигы-а? Ӧб-ӧб-ӧб... � Ха-ха-ха! Мон эшшо кужмогес сальысал ай но, аслам киы вӧсь луэмлэсь курдайгес. � Айда, Петрович, пуксьы вӧзам, ачим тыныд тани калач ваи, кампетэ но вань. Давай, ӵошен чай юом. Микаля кырсизы кыдёкынгес улэ � Гондыргуртын. Озьы ке но, одӥг-ог вуылэ Кайсы черкогуртэ я базаре шуыса, я першал доры, я волость конторае кыӵе ке ужен. Собере тани татын, Максимъёс дорын, кӧлыса кошке. Со � Максимлэн атаезлэн сузэрезлэн картэз. Туж мыло-кыдо адями: котьку капчи мылкыдын вераськись, тумошо учыръёсты мадьыны быгатӥсь. Тусызъя но нокинэн уд сура сое � лап-лап бадӟым тушез быдэс ымнырзэ басьтэ. Дырын-дырын Максим сюлэмыз шуг луыса учке со туш шоры: адӟемез потэ кырсиезлэсь пальпотӥсь туссэ, нош самой со тус ик уго туж улэ ватэмын! Кыӵе ке тумошо учырез веракуз, туш но мыйык вискысь паськытэсь, ӟар-ӟар тӧдьы пиньёс кыре пото. Тӥни соку ини Максимлэн лулысь-сюлмысь серекъян дырыз вуэ � уг, кырсиезлэсь мар верамзэ пеляз уг поны со, витьыса улэ, ку бадӟым туш улысь нош ик адӟиськозы тӧдьы пиньёс. Нош синъёс солэн, синъёс кыӵеесь! Максим шоры ке учко, туж кескичесь луо. Кузесь сьӧд синкашъёсыз улын шутэтско, шутэтско, лэся, но, Максим пала берытскыса, лӧпшамзы, кыӵе ке тумошо учырез верамзы потыны ӧдъя, шӧдске. Нырысь ик кыньырске бурыз синмыз, собере � палляныз, собере кыкез но синъёсыз кыньырско но мынясесь луо. Синъёслэн тазьы кильтыръяськемзы бере, Максим тодэ ини: пельдэ сакгес кар, дасяськы серекъяны! Али но ваньмыз озьы ик луиз. Максимлы синъёссэ кырмышъямез бере, Микаля кырсизы витьымтэ шорысь йыр бордаз кык киосыныз кырмиськиз но туж жалясь куараен вазиз: � Мар улон та, мар улон, Петрови-и-ч!.. Йырси шорад учкыса, сюлэмы пӧсь синкылиен ӵуштаськыны ӧдъяз ук, ой-ой-ой!.. � Ма... ма... малы?.. Кыӵе мынам йырсие? � паймыса, йырзэ маялля Максим. � Кин ӵышкиз сое? Осто быри!.. � Песянае ӵышкиз. � Мар вераськиськоды? � гур вылысь тэтчыса кадь васькиз песянайзы но, пельзэ кышет улысьтыз поттыса, Микаля эмеспиеныз артэ пуксиз. � Мынэсьтым нимме поттылӥды кадь но... � Поттылӥм, поттылӥм, варманай! � берпум кылэз тужгес но небыт вераны тыршиз Микаля, кышноезлэсь анайзэ вань сюлмыныз гажамзэ возьматыны тыршыса. � Вера ай тон мыным: малы Максимлэсь йырсизэ пагӟаё-пагӟаё ӵышкид? Малы таӵе мусо пияшлэсь чебер быгылес йырзэ таракан пагӟалы пӧрмытӥд? � Осто, кыл но бон шедьтоз!.. Таракан пагӟа шуид, лэся, ук? Бон... пичи муртлы кыӵе пӧрмем, сыӵе уз яра шат? � Уз! � чурыт вазиз Микаля кырсизы. � Сое али ик чеберлы ӧд ке дышеты, кин пӧрмоз солэсь, тодӥськод-а? Галак!.. Галак пӧрмоз, валаськод-а! Со борды вашкала улонэз лякылыны уг ни яра. Кӧня верасько мон тыныд: куштӥськы кылем даурысь улонэдлэсь, куштӥськы! � Тон мар вашкала улонэн пыкылӥськод монэ? Ма!.. Пересь песятайёсмы кызьы улӥллям, озьы ик улӥсько. Алама улӥллямтэ соос: инмарлы тау. Озьы улыны быгаты вылэм но... � Умой улӥллямтэ соос, йыр ӵышкыны но уг быгато вылэм бере! � Осто, Микаля, мар тон бадӟым сьӧлыке пырымон кылъёс вераськод ӝӧк сьӧрын!.. Ма... аслад но йырыд пересьёслэн йылолзыя ӵышкемын ӧвӧл шат?.. � Йырме мон ас тодэмея-валамея чылкыт возисько! Вераськисьёсты шыпак кылзӥсь Максим сайкам кадь луиз но, ваньзэс куалектытыса, туж кужмо кеськиз: � Тон ачид ӵышкиськод-а йырсидэ?! � Ачим. � Вот таиз зол!.. Возьматы! � Ма, Петрович, ӝӧк сьӧрын йырме ӵышкыса пуком-а? Микалялэн варманаез кизэ пель бордысьтыз басьтӥз но ас понназ вераськыса пуке: � Вашкала анай-атайёсыз мыскыл каремъяське эшшо ке... Хм!.. Коркан кӧня ке дырлы шыпак луиз. Собере, мур лулӟыса, нош ик ӝӧк пала берысткиз: � Кызьы шуид, Микаля?.. Э-э... м-м... бордамы вашкала улон медам лякиськы, шуид- а? � Озьы шуи, варманай. Вераме ӧзгес кельшы-а, мар-а? � Я, я, песянай, эн люкеты, со йырси кызьы ӵышкемзэс вераны турттэ вал... � Тон, ерпечка, бадӟымъёслэн вераськоназы эн пыриськы! У-у!.. Тани тыныд!.. Кыдёкысь кунозэс утялтыса ӝӧк котырын бергась Мавра, Максимлэн анаез, вераськонлэсь палэнэгес кожемзэ шӧдыса, лачмытак шуиз: � Чаед сӥяз, дыр, ини, Микаль, вай выльдо... Дорады бон кыӵе ини улон-вылонды? Олёнкалэн но, пичи пияштылэн но тазалыксы кыӵе? Пудо-животтэс кыӵе толйытӥськоды? Кунянды вордӥськиз, дыр, ини?.. � Тау, тау, кенак... Вань юанэдлы одӥг кылын вераны быгатӥсько: инмарлэн утеменыз, туннэ нуналлы яраса улэ, ваньмыз умой шуи ке, чик уг сьӧлыка. � Ой, одӥг кылын верасьлэн зулёнэз гозы кузьда кыстӥськиз! � жинграк серектыса, кырсизэ исам кариз Максим. � Я, вера ни, йырсидэ кызьы ӵышкиськод? � Ма, мар тон со йырси ӵышкон борды тэбинид?! � Максим пала киыныз шонтӥз песянайзы. � Уд адӟиськы шат: бадӟымъёс верасько?! Бадӟымъёс вераськыку, пичиос ымазы ву ӟузьыны кулэ, валад-а? � Асьмеос вераськыса вуом ай, варманае. Пияшлэн сыӵе-сыӵе тодэмез потэ бере, валэктытэк амалы ӧвӧл. Озьыен... � Озьыен... � кырсиез бордыгес кариськиз Максим. � Валлэн изнэсэз кузьда будэм йырсиез умой-умой сынаськомы но йыре изьыяськомы горшок... Со вакытэ Максим ӵапак чай ӟузиз вал. Кырсиезлэн йыраз изьыям горшокез син азяз пуктыса ӧз чида, пырсйиз, ӟузем чаез ӝӧк сьӧрын кыдёке пазьгиськиз. � Мар тон чай юыкум серекъятӥськод?! � чангес куараеныз кеськиз. � Собере... � Максимлэсь умойтэм учыре сюремзэ адӟымтэ кариськиз Микаля кырсиез. � Собере кие кутӥськомы качы, кӧня ке пол, омырез вандылыса кадь, квач-квач-квач кариськомы но... � котырак учкыса, Максим доры мыкырскиз. � Отӥяз кызьы-мар луэ � ӧжыт улыса верало: али туж жади. Ачид тодӥськод: мон уно вераськыны уг яратӥськы... � Ой-ой-ой!.. Алдаськись!.. � кунозы борды кырмиськиз Максим. � Вералод, пумозяз вералод! Хе-хе, жади, пе. Кин оскоз тыныд?! � Ярам, иське. Кылзы... Качыеным квач-квач-квач кареме бере, йырам изьыям горшок котыртӥ кузь йырсиме кваш-кваш-кваш вандылӥсько. Умой-умой ӵошкатэме бере, горшокме басьтӥсько но � тани мынам йырсие! Эскеры, одӥг ке но пагӟаез вань-а, тараканлы тубан пагӟаез, шуисько? Максимлэн анаез, ӵашкаосы чай лэзьясь маке, кит-кит серекъяны ӧдъяз, нош варманаез эмеспиез пала тыбырыныз берытскиз: � Кылзы, кылзы, пие, алдар кырсиедлэсь уӵы гуръёссэ... Ой, кыӵе чебер кырӟа � ымыд амалтэк паськыт усьтӥськоз!.. � Тон, варманай, милемлы вераськыны эн люкеты ай, ява... Милям Максимен уно ужпумез сэрттон-пертчонмы вань на. � Туннэ нуналысен, песянай, тон йырме уд ни ӵышкиськы, валад-а? � Оло, тон но йырад горшок изьыяны малпад-а? Луоз тынэсьтыд, выросъёсыд ик калык пӧртэм бере! Микаля, дугды пичи муртэ булгандыремысь! � Шуисько ук тыныд: будӥсь калык вашкала сямъёслэсь куштӥськыны кулэ! Выль даурын выль сямен улоно! Асьмелэн юртъёсамы кызетӥ даур каръяськиз ини: эн вунэты сое... � Ӧйтӧд, ӧйтӧд... Вашкалаослэсь кибервылзэс тодытэк, кыдёке вуомы меда, дуно эмеспие... Со куспын бадӟым капкалэн ӟукыртэмез кылӥськиз. Максим, чукырна кадь куасалскыса, ӝӧк ултӥ кыстӥськиз но, оп! шуытозь, укно доры вуиз: � О-о, атай бертэ! Мон солы юрттыны потӥсько! � Шубадэ дӥся, изьыдэ пон, куазь кезьыт! � вазиз вал анаез но, ӧс куспын Максимлэн бадӟым гын сапеге кутчам пыдыз гинэ адӟиськиз на. � Мын, мын, кен, шубазэ но, изьызэ но потты, кынмоз со ерпечкаед! Валзэ юскем но, сиён сётыса, гидэ пыртэмез бере гинэ Петыр ӧс куспын адӟиськиз. Со сьӧрын атаез сямен ик дӥсьсэ ошыны, сапегзэ кыльыны выре Максим. � Куно вань, иське? � Микаля доры Петыр пальпотыса лыктӥз но бур кизэ сётӥз. � Кемалась ӧд вуылы дорамы: мугез ӧй вал-а, мар-а? � Муг шедьтыны луысал, дыр, но, юрт куспын уж уг быры ук... Огзэ пумаз-йылаз вуттӥськод кадь но, отын ик мукетыз пыдбере куртчиське... Крестьян уж сыӵе уго... � Эн но вера, Микаль. Тани ми но бӧлякъёсын арня ӵоже ни нюлэс кораськомы. Куазь люкетэгес уго тани: ӟар кезьыт кариськиз. � Ойдо пуксьы шаплыгес ӝӧк сьӧры, Петыр, пӧсь шыд ӟузьылы, кынмемед мед ортчоз, � вазиз Мавра но картэзлы пуктӥськыны ӧдъяз. � Мар солы шыд!.. Карттэ утемед ке потэ, кобыен пӧсятэм аракыдэ сёт! � гудыртӥз Микаля но пальпотӥз. Соку ик бадӟым туш улысьтыз тӧдьы пиньёс кыре потӥзы. Соосты адӟыса, Максим пырсйиз, атаезлэн кунулаз ватскиз но эк, серекъя ук, эк, серекъя! � Талы тон чиньыдэ возьматӥд-а, мар-а? � мыняк потӥз Петыр, пизэ ӟыгыртыса. � Мон солы азьчиньыме ке возьматӥсько, серекъян дуннеяз вые. Пичи дыръям ачим сыӵе вал. � Котькыӵе учырысь маскаразэ адӟе вал та пие, � пиньтэм ымзэ кышет пумыныз ӵоксаса, кит-кит серектӥз песянайзы. � Огпол вунэтыса, ява, мурӝолэ пыранэз ворсатэк кельтӥськем. Отчы Сандыр картэ люкмесам. Кытысь ойгетэм куара кылӥське, малпасько. Кыре потыса кылзӥ � нокин ӧвӧл. Ма, пель сьӧрам кылӥськиз-а, мар-а шуыса, корка пыри но ас усьтэм гуам ачим уси. Пась кельтэмме вунэтӥськем. Картэ вӧзы зоньтӥськи но ӵошен кыллиськомы. Султэммы уг луы, кыкмы но ойгетӥськом. Ӧс куара кылӥськиз, кызъемезъя � Петыр. Ӝуштэммес кылӥз но "Кытын тӥ?" шуыса кесяське. Бызьыса сямен мурӝол пась доры вуиз. Ӧз адӟы, лэся, со пасез... � Ма, гур сьӧрын пеймытгес ук! � серектӥз Петыр. � Собере тӥни мон но со гуэ чуай. Куаляк луи нырысь, собере марзэ-созэ валай но, та учыр туж тумошо потӥз. � Кутскиз ук серекъяны! Ми, ӝуштыса кыллисьёс � со сьӧры! � Ма, куинь кузя одӥг гуын зоньтӥськыса кылльы ай � серем ӧвӧл шат со?! � Усиллям ке усиллям, мар бон отын серемез? � атаезлэн кунулысьтыз йырзэ мычиз Максим. � Хе, чик маскара ӧвӧл. Тани Микаля кырсилэн пальпотыкуз туш улысьтыз пиньёсыз ке ӟар-ӟар кыре пото, ой, таиз ини!.. � Мар, мар?! � куаляк луиз Микаля но малы ке тушсэ маялляны ӧдъяз. � Кытӥы ке умойтэм-а, мар-а: малы уд вераське? � Я, мыня, Микаля кырси, � шуиз Максим. Микаля чылкак абдраз, долкаса я соиз, я таиз шоры учке. � Ма..., Максим нуныкае..., мыняны кыӵе ке муг кулэ ук... Огшоры мыняса ке пукид, шузи висисьёс доры вуттозы... � Я, мыня тон, мыня! Ма карыны паймем кырсиез нырысь бур синзэ кырмыштӥз, собере � паллянзэ. Кыксэ ик синъёссэ кыньыртэмез бере, Максим шоры туж кескич учкиз но... Пальпотӥз. Туш улысьтыз адӟиськизы юг-юг тӧдьы пиньёс. Максим серекъяса атаезлэн алвылаз пограз. Мазэ-созэ валатэк, Максимлэн серекъямез шоры учкыса, ваньзы туж кужмо горыны ӧдъязы. Ваньзылэсь кужмо серкъя Микаля. Максим, йырзэ ӝутыса, со шоры учкиз но, эшшо но кужмо серектыса, атаезлэн алвылаз уськытӥськиз. � Дугдэ ни, дугдэ... Ой, жади... Осто, та мусо пичи пие ке ӧй луысал, кин меда егит лул пыртысал мыным?!. � Мар, мар?!. � ӝот-ӝот вазиз Микаля. � Милям пимы сярысь вунэтӥд шат?! Тани, ӧжыт улыса, тынад соид маскаралэсь но маскара пияш луоз! � Ма, аслам но сое адӟеме потэ ни но... Али ик мынысал, лобӟыса мынысал: куазед таӵе кезьыт луиз ук... Вераськонзэ мукет ӧре выжтыса, Максимлы вазиськиз:� Мар бон Микаля кырсиедлэсь сыӵе-сыӵе маскаразэ адӟид, пие? � Эш кариське со Максимлы, � вазиз Мавра, � Ӧжытак чурыт возьысал ке ассэ, сыӵе ӧй лӧпшасал. Пиез доры мыкырскиз но йырзэ маялтӥз: � Умой возь астэ, пие, бадӟымъёс азьын чильтрок кадь эн даурты. � Ярам, ярам, уг ни серекъя... � Малы? � паймиз Микаля. � Ма, со уг акылляськы ук! Я, Максим, учкы ай шорам. Нош ик бур синзэ кырмыштӥз, собере � паллянзэ. Кыксэ но синъёссэ кырмыштэмез бере, Максим шоры туж кескич учкиз но пальпотӥз. Туш улысьтыз нош ик адӟиськизы юг-юг тӧдьы пиньёсыз. Максим нош ик атаезлэн алаз погыльскиз. � Акыльтӥды ни тӥ мыным гильтыръяськеменыды... Гурвылам тубыса шутэтско ай, татын пукытозь... Осто!.. Ку зӥбломоз та шаян сямыд, Микаля?! Ма, семьяё воргорон ини ук тон!.. � песянайзы эмеспиез азьын огшап чабкиськыса сылӥз но, ас понназ маке вераськыса, гур вылэ тубиз. � Выдэ ни тӥ но изьыны, тырмоз лӧпшаны! � нош ик куараез кылӥськиз. Лампа тылэз кысыса, изьыны выдӥзы: Максим аслаз караз � пичи сэндрае � тубиз, Микалялы Мавра ӧс дорысь бадӟым ӟус вылэ валиськиз. Максимлэн умме усемез нокызьы но уг луы: син азяз � Микаля кырсиезлэн туш пӧлысьтыз адӟиськись тӧдьы пиньёсыз. Серемез туж-туж потӥз ке но, ассэ кутыны быгатӥз ик. Но тани, витьымтэ шорысь, пель сьӧраз Бектэр нюк бамалын кылэм кырӟанэз кылӥськиз. Вылысьтыз шобретсэ ӵыжаз но, пыдъёссэ вӧлдэтэ пыкъяса, корка тыр кырӟаны кутскиз: � Асса, аля-ля-а, бадӟым кӧто Микаля-а-а!.. Асса, аля-ля-а, бадӟым кӧто Микаля!.. Пыдъёсыныз вӧлдэтэ тыпыр-тапыр ӵыжаны ӧдъяз гинэ но, гур ласянь йыраз туж кужмо мыжгись луиз. � Ӧб-ӧб-ӧб! Кин жугиське татын?! � йырзэ сэндра пуме мычиз. Отын анаез сылэ но мыжыксэ сэзъя. � Мар луиз, мар жугиськиськод? � Эн ни кырӟа: изисьёсыз сайкатод. Кӧня ке шыпак кыллемез бере, Максим ӧз чида, нош ик туж кужмо нёръяны ӧдъяз. Таяз радэ гурвылысь песянаез кӧтурдэсаз мырӟиз. Максим нош ик "ӧб-ӧб-ӧб!" шуыса кеськиз. � Вӧсь эн каре тӥ пияшез! � ваньзылы кылымон вазиз Микаля. � Со туж умой кырӟа ук! Давай, давай, Петрович, кисьматы чебер гурдэ эшшо огпол! � Асса, аля-ля-а, бадӟым кӧто Микаля! Кема кылӥськиз на та коркан кырӟам но лушкем серекъям куара. Собере жадиз, шӧдске, Максим: супрак умме усиз. Кӧня ке улыса, ваньзы чусомизы... *** Ӵуказеяз ӵукна Максимез сайкатӥсь луымтэ: туж бер сайказ. Сэндра пуме йырзэ мычиз но адӟе: анаен атаез ужаны кошкиллям ини, Микаля кырсиезлэн но изён бервылыз утялтэмын. Максимлэсь сайкамзэ шӧдыса, песянаез вазиз: � Уммед тыриз-а, пие? � О-о.. Юаса-мараса ӧз улы, сэндраысь гылӟыса кадь, гур вылэ васькиз но песянайзэ ӟыгыртӥз. � Малы толон кӧтурдэсам сыӵе зол мыжгид? � юаз. � Кырӟандэ кыӵе мылкыдын кылзӥз меда кырсиед, пие? Тонэ юри, сое серем карыса, кырӟаны дышетӥм шуыса ӧз малпа меда?.. � Ой, песянай!.. бадӟым кӧто Микаля шуыса кырӟай ук! Тодам но ӧз лыкты кырсилэн Микаля нимыз... Со кырӟанэз мон толон Бектэр нюк бамалын нискылакум кылӥ... Вожез потоз-а ни Микаля кырсилэн? � Ма, ӧйтӧд... Уз, дыр... � Песянай, малы солэн тушез сыӵе бадӟым? Малы уг ӵышкы? Мынам шораз учкеме уг луы, туш улысьтыз тӧдьы пиньёсыз ке адӟисько. Солэн мынямез кыӵе ке мукет, ваньмызлэн кадь ӧвӧл... Ымыз кырыжтӥське но, пиньёсыз кыре пото... � Портатуысь со сӧсырмыса бертӥз, пие. Солэн улӥ аныз пыргытэмын. � Кытысь бертӥз? � Портатуысь. � Мар со? Кытын со? � Шунды ӝужан палась туж бадӟым зарезь дурысь кар, пе, со. Ляпонъёслэсь быдэс ар ёрос утьыса возиллям. Туж кужмо жугиськон вылэм со кар понна. Кырсиед сӧсырмем но, першалъёс доры нуиллям. Соку тӥни со карез, ляпонъёслы сётытэк, амалзы луымтэ ни. � Кырси кадь кужмо адямизы ӧз ни кыльы, дыр, оведь? � Озьы но, дыр... Сыӵе чебер, таза сӥлё-виро пияш туж восьмыса, сӧсыртэм ымнырын бертӥз. Тушсэ лэземез бере, адями кадь луиз. Собере тӥни нылме кураны дэмчиос ыстэм. Анаен атаед но, мон но ӧм пумитъяське: умой эмеспи луонзэ тодӥськомы вал. � Со мынам умойлэсь но умой кырсие, оведь, песянай? � Озь сяна!.. Инмар гинэ мед утёз ини улон-вылонзэс... Максим тодаз ваиз кырсиезлэсь пальпотӥсь туссэ но туш улысьтыз адӟиськись тӧдьы пиньёссэ. Али солэн серемез ӧз ни поты, син азяз пуктӥз солы тодмотэм кыӵе ке Портату карез но отын ляпонъёсын ожмаськись кырсизэ. Со ваньмызлэсь батыр, ӝужыт но туж чебер тусо. Тани матаз лыкто вожомем ляпонъёс. Кырсиез котькудзэ ки йылаз ӝутэ но ка-ак сэрпалтэ! Соосыз, "Караул!" кеськыса, зарезь вуэ киргало. Со зарезь Кайсы воӟысь тымет пасьта ик. Мур ласянь, ӧйтӧд, "милям тыметмы мургес, дыр", малпа Максим. Со уго тодэ зымылыса пыласькисьёслэсь" "пыдэсаз ум сузиське" шуэмзэс. � Песянай, � вазиз Максим, � ку табере лыктоз Микаля кырсие асьме доры? � Ӧйтӧд... � Ӵуказе ик мед лыктысал... Мон сое вераны курысал Портату сярысь, ляпонъёсты вормемез сярысь. � Соос, пе, вормиллям уго, пие... Кырсиедлэн верамезъя, туж-туж уно калык бырем отын. � М-м... Песянай, толон вераськыкуды, Микаля кырси кыӵе ке вашкала даур сярысь вераз. Мар нош со, вашкала даур? � Кызьы бон валэктом меда сое тыныд, пие?.. Ы-ы... Тани мон пересь адями ни, оведь? Мынам пичи дыры ту-уж кемалась аръёсы кылемын, со аръёсыз син азям пуктыса гинэ тодам вайыны быгатӥсько на. Тӥни со туж кемалась ортчем аръёсыз но нуналъёсыз вашкала даур шуо. Тыныд али вить арес гинэ бере, вань улонэд � азьпалан. Озьыен, тон выль даурын улод, соин ик тон туж шудо адями. � Малы? � ӧз вала Максим. � Азьпаллы осконэд вань... Мон тани тынэсьтыд улэм-вылэмдэ уг ни адӟы. � Малы? � нош ик ӧз вала Максим. � Асьмеос ӵошен улӥськомы ук! � Ӵошен ке ӵошен но, тынад но мынам улонмылэн пӧртэмлыксы туж бадӟым. � Малы, песянай? � Тон азьлань дыртӥськод, мон берлань кошкисько. � Малы? � чылкак абдраз ни Максим. � Малы берлань кошкиськод тон? � Улонлэн радэз озьы тупатэмын уго... Адямилы кузь сюрес гожтымтэ вылӥысь Инмар. Ас вакыттэ улэмед бере, будӥсь нылпиослы интыдэ бушаты, шуэм. � Умойтэм верам со! � Инмар сярысь озьы вераськыны уг яра, пие, со кылоз но вожзэ поттоз. � Эй, песянай, олокыӵе кылъёсын вераськиськод!.. Лэзь ай � Бектэр нюк йылэ нискыланы потало: эшъёсы кемалась отын, дыр, ини. � Ма, сиськытэк-а? Пуксьы ӝӧк сьӧры, сиён дась: гурысь гинэ потто ачим но... � Бертӥ ке, сисько. � Шубадэ дӥся, иське, куазь кезьыт... Кема эн улы... � Ярам!.. "Ижмашлы" кузьым Алигес "Ижмаш" акционер огазеяськонэ Испаниысь гожтэт вуиз. Отын ивортэмын, та предприятие, пе, ортчись ӟеч аре продукция поттэмез понна калык куспо ЪЪВИИИ "Ӟечлык понна" - Выль дауре приз" пусэн пусъемын. Та пусэз арлы быдэ сётэ "Офис" издательство но вузкарон удысын азьветлӥсьёслэн клубзы. Отчы 110 кунысь 14 сюрслэсь уно адями пыре. Призэз сётыны чакламын туэ 2-тӥ октябре Мадридысь "Мелия- Кастилья" гостиницаын. Отчы лыктозы уно дипломатъёс. Кылем арын таӵе призэн пусъемын вал "Удмуртнефть" акционер огазеяськон. Н. МАРКОВ. Утёзы кунэз но, нимаз адямиез но Туннэ республикаысьтымы Юстицияя министерство пусъе кылдэмез дырысен 198 ар тырмонзэ. Ортчемын кузь, секыт но дано сюрес. Россиын эксэй кузёяськыку но та министерство котьку нюръяськиз огшоры ужась адямилэсь нимзэ, данзэ утён сярысь. Та удысын кыдазы уно тодосчиос (учёнойёс), кунэз юнматон сярысь сюлмаськисьёс. Соос котьку тыршизы Россилэсь калык куспын данзэ утьыны. Туала вакытэ но Юстицияя министерствоын тыршисьёслы уж тырме, шуиз толон ортчем пресс-конференциын министр Вячеслав Осипов. Кыӵе гинэ удысэ эн пыриськы - коть бадӟым предприятие, коть банке, коть нотариальной конторае но мукетаз - Юстицияя министерствоын ужасьёстэк одӥг ужрад но уг ортчы. Малы ке шуоно, законностез утёнын тырмымтэос лачак пумиськыло на. Тани судысь приставъёслэсь ужъёссэс эскерем бере гинэ шараяськизы уно законъёсты тӥян учыръёс. Асьсэлэсь данзэс утён вылысь, шуг-секытэ шедем муртъёс министерствое вазиськоно луизы. Юстицияя министерство али выльдӥськон сюрес вылын. Табере отысь ож тӥрлыкен адямиос утёзы шугадӟонэ шедем адямиосты но, адӟисьёсты но, судъёсын ужасьёсты но. Азьланяз министерстволэн нимыз но мукет ужрадлыкез но ӟечгес но данаклы сӥлы-бурлыгес луоз, шуиз министр удмурт Вячеслав Осипов. Улэ калык Соколын... Ягул но Ӟуч Вожой сьӧры интыяськем Сокол посёлок чылкак ас кожаз, "сьӧд нюлэскы" йыромемын. Татысен со пала но, та пала но сюресъёс ӧвӧл ни. Таиз но, асфальт сюрес пумозяз вуттытэк "чигиське", ог 2-3 иськемзэ дэрие питранъёс нӧдо. Озьы ке но, автобус татчы Ижысь нуналаз кык пол вуылэ. Нош асьсэлэнэз нылпиосыз Ягул школае нуэ-вае. Ӵапак та ерпечкаосын Соколэ мыныны тупаськиз. Монэн ӵош мӧйы кышномурт сылыса мынӥм, эшшо - кӧня ке нылъёс. Вань пияшъёс интыяськемын, но огшоры гинэ пукыны уг быгато - азьысьтызы нылъёслэсь йырсизэс кыскало. Пель позыръям, ымныр кисырскем адӟиське. Быдэс автобусын тыш-таш вазе. Дышетӥсьтэк туж "шулдыр" ветло вылэм таос, пуксьыкузы автобусэз норыса, ӧжыт гинэ питран улэ уг сюро. Таӵе суред - нылпиосты дышетэммылэн пичи гинэ адскись палыз. Соколэ 50-тӥ-60- тӥ аръёсы пӧртэм ёросъёсысь, пӧртэм нациё калык лыктэмын. Соин ик дауръёсын утем сабырлы сямъёс сярысь веранэз ӧвӧл. Озьы ке но, ачиз инкуазь татын адямиез йӧнатэ, ужлы дышетэ. Уно гектаръем картофка бусыосысь али но нылпиосыз адӟод, туннэ но куд-огез ведраосын бертӥзы. Аслаз улонэз Соколлэн. Одӥгез данъяськонзы - бадӟым тымет. Эшшо кыкетӥзэ тымыны малпасько, чорыг вордозы-будэтозы. Котыр куаро, пужымо нюлэсъёс бере, пумтэм татын узы, эмезь, кудымульы, ягмульы. Нош али - губиед лопатаен мычымон. Эн гинэ азьтэмъяськы - трос уксё поттыны быгатод. Иже базаре ӝыны час куспын вуод. Пудоослы но, валамон ини, майбыр. Ыжъёс-кечъёс лумбыт урамъёстӥ-пролкаостӥ юмшало, кӧтсы тыре ке, кенер, капка вӧзы интыясько, корказе тубо. Тани али но контора ӧс азьын ик лӧж-лӧж кыллё. Мар меда ужа татын калык, кыӵе пайда поттэ туннэ нуналлы? Таӵе юанэн пыри "Сокол" торфопредприятилэн (со пыре "Удмуртторф" огазеяськонэ) администрация юртаз. Директорзы Владимир Аркадьевич Вахрушев отпускын вылэм, соин ик вераськи солэн воштӥсеныз Олег Сергеевич Костицынэн. Ачиз со татчы Пичи Пурга ёросысь Найдёныш нимо (бырем) гуртысь вуэмын. Орехово-Зуевоысь торфяной техникумын, Калининысь политехнической институтын дышетскемын. 1961-тӥ арысен татын ужа мастер, механик, табере валтӥсь инженер луыса. - Мар бордысен ваньмыз кутскиз? - 1956-тӥ арысен татын торфлэсь брикет поттыны кутскизы, - юанъёсылы пыр-поч валэктыны ӧдъяз Олег Сергеевич. - 1960-тӥ арысен 1985-тӥ арозь завод ужаз но - ворсано луизы: та эстӥськонлы тупась торф быриз. Со вакытэ ик, 1974-тӥ арын, Ижысь механической завод кортлэсь арбериос лэсьтонъя цех усьтӥз. Ог 40 кузя егитъёс ужазы отын. "Иж-Юпитер" мотоцикллы детальёс поттылӥзы. Металлообработка али но милям вань, кык цех ужа. Мотоцикллы детальёс сяна, гидравликалы шлангъёс, рукавъёс лэсьтӥськом. Заготовкаос вутто коммерцияя ёзъёс. - Кыӵе пайда сётэ кортлэсь арбериос лэсьтон? - Огвакытэ та удыс милям валтӥсь вал. Но экономикаын огъя югдур шугомемен, механической завод сылэмен, ми но "пуксим". Кемалась ик ӧвӧл ар куспын 32 сюрс манет тыр гинэ продукция поттӥм. Нош туэ сентябрёзь 758 сюрс манет поттыны вуим ни, кылем арын та вакытлы - 282 сюрс гинэ. Олег Сергеевич возьматӥз пулэсь вӧлэм арбериоссэс но, кудъёссэ вузало калыклы. - Милям столярной цехмы ушъямон, - шуиз со, - сое шуныт карим. Пилорамамы вань. Борддорлы пулъёс вӧлӥськом, ӧсъёс, укно янакъёс, рамаос лэсьтӥськом. Нюлэскын бригадаос ужало, пиломатериалъёс дасяло. Но нырысь-валысь писпуосыз, лӥялъёсыз порылон, со бервылэз сузян-куасьтон бордын трос ужез. Татын ужась киос уггес тырмо. Пиосъёс-механизаторъёс кулэ. Трос нылкышноос металлообработкаын тыршо. Нош ваньмыз предприятиямы 73 адями. - Кыӵе соослэн уждунзы? - Шоро-куспо уждун туэ 1128 манет луиз, июле 1500 котыре вуиз, кылем арын 764 манет гинэ вал. Но татын ми кык ар талэсь азьвыл магазин усьтӥм, отын вузъёс трослы дунтэмесь. - Калыклы эшшо кызьы юрттӥськоды на? - Быдэс посёлок милям торфопредприятимы вылын возиське (администрация - Ягулын). Электротыл, водопровод, сюресъёс, нылпиосыз нуон-ваён, ваньмыз милемлы оскемын. - Выись мурт нюжы борды но кырмиське. Нош тӥ озьы кырмиськемын ӧвӧл на, шӧдске. Мар бордысь адӟиськоды посёлоктылэсь азьпал дыре азинсконзэ? - Калыклы кулэ луись вузъёс поттон, сое палэнэ вузан бордысь. Милям узырлыкмы- торфмы. Валтӥсь инженер ӝӧк вылэ понӥз сюен тырмытэм куинь пакет, кизер маин ке пластмассаос бутылкаос. Торфен-гуминэн удобрениос со. Кизерез - "Тюльпан 1А" чурытэз (пакетын) - "Тюльпан 3А". Татын ик нимаз пакетъёсын - "Плодородие" нимо торф сюй, компостлы торф. Олег Сергеевич технологизэ но валэктыны выриз. Гумин кислотаос, кудъёсыз вань торфын, ас кожазы пайдатэмгес луо, соосыз кыедэн сурано, компост кароно. Но ми, пе, сураськом калийлэн гидрокисеныз (ву интые) ватсаськом на, фосфорен-азотэн сурамзэ. Озьы туж усто кизер удобрение пӧрме. Таӵезэ асьме палан нокытын уг ни потто. Соколысь торф сюез но солэсь поттэм удобрениосыз странамылэн пӧртэм сэрегъёсаз, чугун сюрес кузя Сахалинозь но вутто. Шаерысьтымы но татчы трос вазисько. Но куд-ог магазинъёс - Ижевскысь, Казаньысь, Уфаысь, Пермьысь - басьтэм понна коньдон сётыны уг дырто, 130 сюрс манет тыронзы люкаськиз ни. Со дыре ик асьме ёросъёсысь хозяйствоос та дуно сюез ас доразы ворттыны уг быгато. Куремзыя торф вузаське-ваиське калыклы, сад-бакчаосы. Сыӵе узырлыксэ дауръёсын ватыса ваем "сьӧд нюлэс шоръёсысь" музъем. Со сюдэ- вордэ ӟуч сямен нимам Сокол гуртысь (посёлокысь) калыкез, таӵе музъемлэн зумытэз-дэлетэз быронтэм мед луоз вылэм. Будӥсь, бурдъяськись нылпиосызлы мед пыӵалозы со бордысь ӟеч сямъёс. Т. Петрова. Шофёрлы шумпотон Берло аръёсы данак интыосын кылдӥзы бензин басьтонъя станциос. Нош Ижевсклэн шораз та ласянь воштӥськонъёс ӧй вал. Югдур табере умояз. К. Либкнехт но К. Маркс урамъёслэн вожазы алигес усьтӥськиз "Удмуртнефтепродукт" огазеяськонлэн выль станциез. Та учыр шумпотон ваиз уно сю водительёслы. И. Петров. Урал траст Банк - калыклы Туэ октябре Урал траст банклы 7 ар тырмоз. Шаерамы со одӥгез огсыр усто ужась банк луэ. Со умоен потӥз 1998-тӥ арын август толэзе кылдэм шуг-секытэз (кризисэз). Урал траст банк услугаос сётэ организациослы но предприятиослы, озьы ик ужа нимаз адямиосын. Огкылын чаклам процент тыронэз юн возьыса, "Срочный" вклад тӥледлы юрттэ ваньбурдэс будэтыны но коньдондэс инфляцилэсь утьыны (уксёды кужымзэ уг ышты). "Пенсионный" вкладъя йылэтэм процент луонлык сётэ, толэзлы быдэ уксё тырыса, коньдондэс будэтыны. Нош "Универсальный" вкладъя, отчы огкылын учкем дыр ӵоже уксё поныса, тӥ быгатӥськоды ӟеч вуз басьтон понна ватсаса коньдон люканы. Урал траст банк калыклы кредит (коньдон) сётэ Ижысь магазинъёсысь вуз басьтыны, дуно бумагаос яке усто ваньбур понна тыронэз пытсаны (залог висъя). Со сяна, банклэн пунктъёсаз басьтыны, вузаны но воштыны луэ кунгож коньдон (валюта), мылкыд каремдыя. Урал траст банк музон банкъёсын кусып возе бере, тӥ быгатӥськоды вакчи дыр куспын кунгож сьӧры валюта келяны но отысь басьтыны. Дуно бумагаостэс, мукет сыӵе выллем арбериостэс дорады, квартираяды возьыны кышкаськоды ке, Урал траст банк тӥледлы арендае сётэ нимысьтыз сейфъёс. Сое нокин уз тоды но ваньбурды оскымон утиськоз. Тӥледды витиськом милям ёзъёсамы: Центральной: Иж, Пушкин урам, 268, тел. 51-01-33; Северной: Иж, Удмурт урам, 267/2, тел. 51-01-33; Воткинскысь ёз Воткинск, Киров урам, 10, тел (245) 5-22-21; Сарапул ёз Сарапул, Горд площадь, 7-а, тел. (247) 4-07-79. Лицензилэн номерез 2523 ЦБ РФ, сётэмын 1993-тӥ арын 5-тӥ октябре. Шутэтскон - секыт уж "Аргументы и факты" газет трос саклык висъя шутэтсконлы. Кызьы бен умойгес шутэтсконо - араз огпол-а, кык пол-а, ӵемгес-а? Ӟеч отпуск бере адямилэн ужан кужымез ӝыны арлы, пе, тырме. Тӥледлы 45 арес котыр ни ке, кык арнялэсь ӧжытгес шутэтскыса пайдаез уз луы. Арлыд йылэмъя уго адямилы воштӥськонъёс пумен секытэнгес сётско. Нош кытын ке палэнын: гурезьёсын, зарезьын шутэтскыны малпаськоды ке, кулэ луоз 3 арня (одӥг арня дышыны выроды ай). Адямилэсь ваньмон дырзэ эскероно ке, улонын со чик но трос уг луы. Кылсярысь, 70 аресъем муртлэн тямыс сюрс нуналыз быре кӧлыса, 1500 нуналыз - сиськыса, 1000 нуналыз - сюрес вылын ветлыса, 9000 нуналыз - дышетскыса но ужаса. 70 арысь - 25 сюрс нуналысь шутэтскыны кыле на туж ичи: 40 ар ужам понна адями 960 нунал гинэ отпуск басьтэ. Малэсь жадиськом асьмеос ужын? Огпӧртэм ужлэсь. Дышем сямъя котькуд нунал огвыллем ужаса асьмеос роботъёслы пӧрмиськом. Солэсь утемын ӧвӧл президентъёс но, депутатъёс но, артистъёс но, журналистъёс но. Таосыз жадё ялан адямиосын ужанлэсь, соослы тупамон кариськыны выронлэсь. Визьмо японецъёс кемалась шӧдӥзы ни - шудо луон понна адями котькуд 7 ар ортчыса улонысьтыз мазэ ке но воштыны кулэ. Со сяна, кулэ выль мылкыдъёс. Кудӥз сое басьтэ инкуазе потаса, кудӥз искусствоен вырыса. Маин бен умой отпуск? Нырысь ик, адями мозмытске ужлэсь, мурт синъёслэсь, косъяськон-куаретонлэсь. Кыкетӥез. Кылдэ аслаз яратоно уженыз вырыны, семьяезлы тросгес саклык висъяны дырыз. Куинетӥез - тазалыксэ тупатыны. Ньылетӥез - корка-мунчо пуктыны, бакча утьыны, мукет дорысь ужзэ быдэсъяны. Витетӥез - ватсаса уждун поттыны. Куатетӥез. Улонзэ воштыны - выль уж, квартира утчаны, кузпал, эш шедьтыны. Сизьыметӥез. Ас вактаз усьыны - мургес ассэ валаны, быгатонлыкъёссэ шараяны, выль ужпумъёс пуктыны. Но жаль, тросэз отпусксэс пайдаё уг ортчыто. Россиын со ӵемгес юон дырлы пӧрме. Оло нош юо но та улонлы паймыса: калык радъя не уж, не отпуск? Валэктэ юрист Сэрегез нуэ адвокат Лилия Шкляева Пенсие - дырызлэсь вазь Вазиськоно кариськи тӥледлы таӵе ужпумен. Мынам апае кылиз огназ куинь пиналэн 5-6 ар талэсь азьло. Картэз шудтэм учыре сюрыса быриз. Али апае ужа колхозын, отын уксё уг сётъяло. Мон кылӥ вал: огназы кылем кузпалъёс пенсие потыны быгато берпуметӥ нылпизылы 14 арес тырмытозь. Апае ветлэм районысьтызы социальной юрттэт сётонъя отделэ, но отын умой-умой валэктон басьтымтэ. Соин ик вазиськисько тӥляд "Валэктэ юрист" сэрегады. Валэктэлэ вал: 1. Ку потыны луэ сыӵе пенсие? 2. Кӧня дырлы? 3. Пенсиын улэм аръёс пырозы-а стаже? 4. Кыӵе документъёс кулэ бичаны? З. Черепанова. Та ужпумъя 340-1 номеро Закон кутэмын 1990-тӥ арын 20-тӥ ноябре, отчы воштонъёс пыртэмын 2000-тӥ арын 2-тӥ январе. Нимыз тазьы: "Россия Федерациын кун пенсиос сярысь". Сюдӥсь-вордӥсез ыштэмен валче пенсие потыны быгато солэн анаез яке атаез (огзы), кузпалыз, яке песятаез, песянаез, вын-агаез яке сузэр-агаез, арлыдэз но ужаны быгатэмез лыдэ басьтытэк, пенсие куриськись адями уг ужа но утялтэ ке кулэм муртлэсь дас ньыль аресозь нылпиоссэ, вын-агайёссэ, сузэр-апайёссэ, внукъёссэ. Озьыен, пенсие потон вылысь кык учыр медло: 1. Утялтоно муртлы 14 арес ӧвӧл на. 2. Пенсие дасяськись мурт ужысь кошке. Пенсие потыны луэ ужысь кошкем нуналысен. Со понна вазиськоно райсобесэ, ваёно пиналъёсъя документ, кузпалъяськем сярысь свидетельство но ужан книжка. Пуныос Городысь куномы - Городысь пунымы - Мукет утэ вылэм, Чангес куара солэн. Столицаысь, пе, мон, Нимы - Лусьтро Семон! Нош ми кутским но утыны, Куно - сяласькыны. *** Асьме кадьёс пӧртэм бере, Адямиос сэре?.. В. Котков. Футбол Ӧз удалты Азьло ик тодмо ни вал, Волга шур вӧзысь городъёсын ортчоно пумиськонъёсыз "Газовик понна секытэсь луозы шуыса. Казаньысь "Рубин" но Саратовысь "Сокол" вылӥ лигае "йыгасько". Нош Астраханьысь "Волгарь" нырысетӥ дивизионэ кылён понна нюръяське. Ӵапак берпуметӥ верам городын "Газовик" одӥг очко басьтыны быгатӥз, шудон нокин вормытэк, 0:0 лыдын йылпумъяськиз. Казаньын асьме футболистъёс 0:1 лыдын келязы. Нош валлян "Газовикез", вераны ик возьыт, 0:5 лыдын "тышказ" "Сокол". Табере асьме командалэн вылӥе ӝутскыны нокыӵе луонлыкъёсыз ӧвӧл ни. М. Кузьмин. Дуннеысь журналистъёслэн огазеяськон нуналэнызы! Сюлмысьтым ӟечкыласько Удмурт Элькунысь журналистъёслэсь огазеяськонзэс Огкылысь луонъя нуналэнызы! Та нунал сӥземын тодмо чех публицистлы Юлиус Фучиклы. Со возьматэ, журналист котьку но ас ужзэ гажаны, ас данзэ утьыны кулэ шуыса. Туннэ Удмуртиысь журналистъёслэн огазеяськоназы пыре 480 муртлэсь трос адями. Пӧлазы вань ветеранъёс но, гожъяськыны туннэ кутскисьёс но. Шумпоттэ соиз: Удмуртиысь журналистъёслэн данзы арысь аре йылэ. Соос пӧртэм ӵошатсконъёсын вормисьёс луыло, быгатонзэс йылэтыны кунгож сьӧры потало. Шаерысьтымы вань гожъясьёслы сӥзисько выль вормонъёс, азинсконъёс но шудбур! Удмурт Элькунысь Кун Кенешлэн Тӧроез А. Волков. В рамку Эшмес буре вайыса Кема но секыт висемез бере, улонысь кошкиз газетмылэн Ува, Сюмси, Селта ёросъёся азьло гожъясез Парамон Иванов. 1939-тӥ арын Можга ёросын вордскем эшмы 1956-тӥ арын пыриз Асанысь техникуме. Бӧрысь ветлӥз армие. Отӥяз со луиз дышетӥсь. Вал Ува ёросысь Удугучин школалэн директорез. Отӥяз сэзь но визьмо адямиез бырйизы "Свобода" колхозысь партийной огазеяськонлы секретаре. Бӧрысь луиз Уваысь школа-интернатлэн директорез. Отӥяз Парамон Иванов улонзэ герӟаз журналистикаен. Нырысь ужаз "Путь Октября" ёрос газетын. Бӧрысьгес луиз "Советской Удмуртия" газетлэн Ува улосъя аслаз корреспондентэз. Парамон Васильевич газетамы кема ужаз. Кема ужаз. Зол ужаз. Чебер но лэчыт гожъяськыны быгатэменыз паймытъяз бӧлякъёссэ но, мукет улосъёсысь лыдӟисьёсты но. Юнме шат солы сётӥзы "Удмурт Элькунысь дано журналист" ним? Ивановлэсь кышказы, Ивановез гажазы, Ивановлы оскизы. Секыт висён куасалтӥз эшмес. Но со весь улӥз, ӟечезлы оскыса. Жаль, ӧз вормы. Кошкиз. Парамон Васильевичлэн лэчыт но кескич синъёсыз, ӵыжыт бамъёсыз, мур визьмыз пыраклы кылёз тодамы. Ӟеч кӧл, Василич! Ӵош ужам эшъёсыд. Атасъёс (Басня) Уло-выло ог Атасъёс, Одӥг кылын - ог паньтэмъёс, Ваньзы, лэся, оргазмемын. Соин лапас аналтэмын. Одӥг курег вордо соос, Соин шуо сутенеръёс. Соослэн одӥг меню, Соос ваньзы "йӧл нюню". *** Мынам ышиз ай Атасэ, Ӧз пыр меда со лапасэ? Бернард Ар-Кондӥ. Капкан Лушкаськисьёс улыны уг сёто. Ладьмер Коля куалектэмын. Телевизорзэ, холодильниксэ поттӥзы ке, басьтыны коньдонэз уз тырмы. Тани вармумизлэсь, кортэн шуккем ӧссэ тӥяса, ваньбурзэ поттӥллям. Нош ЖЭК-лэн кивалтӥсезлэсь гаражысь ӵыж-выль "Жигулизэ" лушкаллям. Кызьы ванбурез утёно? Ладьмер Коля весь йырзэ тӥя, уйёсы но кӧлэмысь дугдӥз. Йыраз визьмо малпан вордскиз кадь. Ӧс доры капканъёс пуктоно. Тодӥсьтэм адями, лушкаськись, ӧсэз усьтоз, вамыштоз но капканэ шедёз. Пуны но басьтоно вылэм. Туж дуно сылэ, рынокын ӝыны миллион пала куро. Так, капканъёс пуктэмын. Табере коркась ваньбур понна куалекъяно ӧвӧл ни. Сад- бакчаез кызьы ке но утёно. Татын капканъёс уз юрттэ. Афганистанын служить карыкуз, пуштылӥсь макеосты дораз ваиз вал. Али соос туж яралозы. Сад-бакча пыронниез минировать кароно. Нош ачиз но кышноез омыре медаз "лобе" шуыса, нимысьтыз карта суредано. Со суредъя гинэ сад-бакчае пырыны луоз. Лушкаськисьёслы но гу копаны уг яра вылэм. Вармаез дорын куноямез бере, капканъёс сярысь вунэтӥз. Лушкаськись интые, ачиз отчы шедиз. Толэзь пала больницаын кыллёно луиз. Оло, кышноез но больницае сюрысал, но инмар утем. Пуштон макеос сыномиллям. Ма кароно? Инмарлы оскиськыса шат улоно... Вордскемзэс та нуналъёсы пусйизы но пусъё: Решитько Милитина Васильевна - Удмурт радиоын ужась, Пчельников Георгий Сергеевич - Быръёнъя комиссиын ужась, Баженова Галина Николаевна - Удмурт радиоын ужась, Сакович Андрей Владимирович - Удмурт Республикаысь Правительстволэн Тӧроезлэн воштӥсез, Россия Федерацилэн Президентэз дорысь Удмурт Республикалэн ыстэм муртэз, Хайдаров Рашит Осипович - "Вордскем кыл" журналысь редакторлэн воштӥсез, "Удмурт дунне" газетлэн редакцияз ужам мурт. Шӧкыч "Вундеркинд" Классын чал-чал. Математикая урокын туж секыт уж мынэ. Пиналъёс, йырзэс но ӝутытэк. книга лыдӟо. Дышетӥсь гинэ сэрегысь сэреге ветлыса куара поттэ. Тани мыным но юанъёс вуизы. Ушъяськем кадь медаз лу, монэ классын "вундеркинд" шуо. Соин чик кышкатэк, доска доры потӥ. "Вундеркинд" тӥледлы возьматоз ай, малпай поннам. Матвей Иванович, малпанъёсме лыдӟыса кадь, нырысетӥ юан сётӥз: - Вася, - шуиз со, - мае шуо треугольник? - Треугольник - со сыӵе арбери, кудзэ лэсьто куинь точкалэсь но куинь гожлэсь! Дышетӥсь кӧня ке могаса вазиз: - Шонер. Нош табере кыкетӥ юанлы вера... Со вие мон кылтэм-ымтэм кыли кадь. Ваньзэ тодӥсько вал, нош Пифагор песятайлэсь теоремазэ вунэтӥськем. Юанлы валэктон утчаса, парта сьӧры но, борддоре но учкисько, нош нокин номыр уг вера. Вылӥегес учки но борддоре ошем суредысь Пифагор песятай ымзэ усьтӥз... Со сьӧры мон но кутски вераны: - Треугольниклэн катетъёсызлэн кузьдалазы одӥг кадь луэ ке... Дышетӥсь верамме куспетӥ кариз... - Пуксьы! "Вить", - шуиз дышетӥсь. - Ӵуказе атаеныд школае лыкты. Шумпотыса доре бертӥ. Атае дорын вылэм. "Вить" басьтӥ шуыса верай но, со монэ вешаны ик кутскиз. Матвей Иванович ӵуказе тонэ мыныны косӥз, шуисько на лӧптыса. Со вие шар-р-рак сайкай. Мар ишан та, вӧтасько вылэм, ява. ... Уйвӧтын уйбыртэмме кылыса, атае шуэ: - Нош "йырин уллань вить" басьтыны-а дасяськиськод, вундеркинд?! Возьмато мон тыныд! Ольга Гильмуранова. Татышлы район. Башкортостан. Кулэ-а Удмуртилы кышкыт жуг-жаг? Та юан кылем арня вискын шаерамы потӥсь газетъёсын куд-ог журналистъёсты малпаськонэ уськытӥз. Соослы тодмо луиз: Николай Ганза, Россиысь Федерацилэн Кенешаз быръем мурт, гожтӥськиз кунгож сьӧрысь ваёно ядерной жуг-жагез Россие (Удмуртие но) ватон сярысь законлы проект вылэ. Ма сётоз асьмелы Николай Ганзалэн кичӧлтонэз? Берло дыре со ассэ пумен ӵемгес хозяйственник но прагматик шуэ ук. Туннэ нуналлы дуннеын 150 сюрс тонналэсь ятыр ядерной жуг-жаг люкаськемын. Соосты возён туж дуно усе. Одӥгез но азьмынӥсь кун табыдӟа кышкытлыкез ас вылаз басьтыны уг дӥсьты, соин ик кылем-мылемъёсты куян инты утчаны выре палэнысь. Амалтэк юан кылдэ: малы Минатом одно ик Россиез куркуянлы (свалкалы) пӧрмытыны турттэ? Малы Удмуртиысь Правительстволэн Тӧроез азьвыл ужам ведомствоезлэсь кулэяськонъёссэ Удмуртиен герӟа? Уг тырмы шат асьме доры интыям химияя тӥрлыкен сэрен кылдэм йыр висёнмы? Оло, пумаз-йылаз вуттэмын ни чурыт эстӥськонэн ужась ракета двигательёсты сутонъя Воткинск дорын пуктыны чаклам завод пумысен ӝутскем ужпум? Николай Алексеевичлэн кӧня ке дасо сюрс тонна кышкыт жуг-жагез Удмуртие вайыны мылкыдыз пумысен, трос юанъёс кылдо. Солы валэктон, жаляса веранолуэ, ӧвӧл. Ӧвӧл йӧн-йӧн валэктон Воткинск дорын пуктыны чаклам заводъя но. Городын но районын улӥсьёс куро юалляськон ортчытыны. Николай Ганза зэмен но, прагматик сямен, лыдпусъёс вера. Заводлэн, пе, кырсез луоз сомында ик, кӧня люкаське Воткинскын ӵындӥсь вань муръёослэсь, но со понна республика но город уно миллион доллар басьтозы. Малпан кылдэ, жуг-жагез Удмуртие интыянъя но премьерлэн мылкыдыз сыӵе ик шуыса: долларъёс люкан, экономикаын барыш поттон, адямиос понна кылдӥсь кышкытлыклэсь палэнскон. Но луэ меда ваньзэ коньдонэн лыдъяны но пайда поттонэн гинэ герӟаны? Со сяна вань на ай туж "огшоры валан" - адями, солэн улонэз но тазалыкез. Сӥльвир ласянь учкыса гинэ ӧвӧл, психологизэ но санэ басьтыса. Федеральной Кенеше Удмуртиысь кык мурт быръемын. Вылӥ верам иворез кылыса, журналистъёс валэктон утчаса вазиськизы Кун Кенешлэн Тӧроезлы Александр Волковлы. Со шуиз: - Та ужпумъя Николай Алексеевич монэным ӧз кенешы. Но мынам малпанэ одӥг: - республикаен кивалтытозям, нокыӵе ядерной жуг-жагУдмуртие уз вуы. Вылаз ик, вань луоноез лэсьтӥськоз, химияя ож тӥрлыклэсь мозмытскон понна. Верам кылъёс борды ма ватсалод на? 9-тӥ сентябре Танкистъёслэн нуналзы Куать геройёс Кызьы тодмо, Быдӟым Отечественной ож кутскыку асьмелэн туж ӧжыт вал танкъёсмы. Гужем 1941-тӥ арын гитлеровецъёслэн механизировать карем армизылы пумит мынӥзы кӧня ке Т-34 усто машинаос. Но тросгес вал одӥг пулемётэн капчиесь танкъёс. Нырысетӥ ожъёсын кыдазы танкистъёс. Аръёс ортчемъя, кужмо танкъёс но вуизы. СССР-ысь Верховной Советлэн Президиумезлэн 1940-тӥ арын 21-тӥ южтолэзе поттэм Указэзъя шаерысьтымы кыкезлы пиосмылы белофиннъёсын ӟырдыт ожмаськемзы понна Советской Союзлэн Героез ним сётӥзы. Кыксы ик соос танкистъёс. Ува ёросысь Пуштовай гуртысь удмурт пи Виктор Пислегин экипажын вал стрелок, нош Каракулино ёросысь Ижболдино гуртысь Павел Кирьянов - экипажлэн командирез. Соос ожын одӥг нуналэ - 1941-тӥ арын 24 пӧсьтолэзе быризы. Пислегинлэн улонэз чигиз Ленинград областьысь Лужской рубежлэн Югостица гурт дораз, нош Кирьяновлэн - Кандалакша городлэн шунды пуксён палаз, Акмакурттӥ станцилы матын. Советской Союзлэн Героезлэн Вадим Сивковлэн пинал дырыз ортчиз Сарапулын, нош берло со дышетскиз Ижевскысь 22-тӥ школаын. Сарапулысь 18-тӥ но Ижевскысь 22-тӥ школаосын усьтэмын Сивковлэн музейёсыз. Со сяна, Сарапулысь школьникъёс куштӥськем корт но бумага бичаса коньдон люказы но геройлы памятник пуктӥзы. Памятникез усьтонлы сӥзем митингын агайзэ буре ваемзы понна тау карыса шуныт кылъёсын вераськиз Геройлэн сузэрез Тамара Александровна Конрад. Вадим Сивков аслаз эшеныз Пётр Крестьяниновен 017 танкен Николаевской областьысь Явкино гуртэ пыризы но гитлеровецъёсын ожмаськыны кутскизы. Соос быдтӥзы ог 250 тушмонъёсты но сю повозкаосты. Но одӥг нуналэ пеймыт куазен танк немецъёслэн дасям гуазы шедиз. Танкистъёсыз котыртӥзы. Оломар вискын Сивков люкез усьтӥз но "Комсомолецъёс пленэ уг сётско", шуыса офицеръёс вылэ граната зӥртӥз. Нош эшсэ пегӟыны косӥз. Петя кыдёке кошкыса ӧз вуы - гитлеровецъёс вуизы. Татысен Вадим дораз берпуметӥ гожтэт гожтӥз. Отын со анай-атайзэ, Родиназэ, вань калыкез тушмонэз вормонлы оскытӥз. Немецъёс азьын Вадим сэзь, кужмо, кышкасьтэм луэмзэ возьматӥз. Пленэ ӧз сётскы. Танкеныз ӵош ассэ но пуштытӥз. Вадим Александрович Сивковлэн нимыз пыртэмын азьвыл служить карем частезлэн списоказ. Солэсь нимзэ нуллэ Удмуртилэн столицаысьтыз одӥгез ульча. Быгатыса ожмаськемез понна Герой ним сётэмын Владимир Павлович Краевлы. Со Киров областьын вордскиз, берло улӥз но дышетскиз Сарапулын, собере Ижын, Воткинскысь машиностроительной техникумын. Воткаысь машиностроительной заводын ужакуз сое Горд Армие басьтӥзы. Отын танковой училищеысь курсант луиз. 1943-тӥ арын сӥзьыл ожъёс мынӥзы Невель палан. Краев лейтенантлэн машинаез разведкае мынӥз. Нырысетӥ гуртэ пырыса, танкистъёс гитлеровецъёсты уллязы, пыӵал тӥрлыкен складэз басьтӥзы. Собере, сюрес вылэ потыса, тушмон автомобильёсын колоннаез быдтӥзы, мозмытӥзы кунгож сьӧры келяны дасям ог кык сю адямиосты. Мукетаз гуртэ вуыса, Краев, машинаеныз тушмонлэсь кык пушкаоссэ быдтэмез бере, нош ик азьпала мынӥз. Озьы тушмонлэн мышказ ньыл нунал ӵоже ог дасо иськем ортчизы. Одӥгаз ожын гитлеровецъёс Владимирлэсь танксэ дугдытӥзы. Ачиз со сӧсырмыны шедиз. Нош эшъёсыныз машиназэ ӧз кушты. Частьлэн командирез приказ сётэм бере гинэ Краевез госпитале келязы. 1944-тӥ арын 10-тӥ тулыспалэ батыр пи пырыны шедиз. Ижевскысь одӥгез ульча солэсь нимзэ нуллэ. Озьы ик тушмонэн ӟырдыт ожмаськизы асьме палась адямиос но герой ним басьтэмъёс: Николай Александрович Козлов, Николай Семенович Савин. В. Чернов. Выль режиссёр лыктӥз Туэ Драмая В. Г. Короленко нимо ӟуч кун театр август толэзьлэн кутсконаз ик уже потӥз. Артистъёсын ӵош сцена вылэ вамыштӥз ни выль валтӥсь режиссёр Михаил Абрамович Солес. Со лыктэмен валче, театрысь кивалтӥсьёс возьмало воштӥськонъёсты. Михаил Солес, Ташкентысь А. М. Горький нимо театрально-художественной институтэз йылпумъяса, артист луыса ужаны кутскиз Ташкентысь Драмая А. М. Горький нимо театрын. Ужаз Кишинёвын, Калининградын, кызь ар ёрос Кировын - драмая театрын артист но чеберлыкъя кивалтӥсь луыса. Татын ик луиз Россиысь дано артист, нош Калининградын - Россиысь калык артист. Собере кошкиз Израиле - Иерусалимын кылдытӥзы "Цилиндр" театр. 1999-тӥ арын выльысь берытскиз Россие. Спектакльёс огвакытэ пуктылӥз Кировысь драмтеатрын. Туэысен, 3-тӥ августысен - Ижын, Драмая ӟуч кун театрын валтӥсь режиссёр. Аристъёсын тодматскемез бере кенешиз соосын театрлэн 15-тӥ январёзь малпанъёсыз сярысь, рольёс сётъяз. Михаил Солес сюлмаське: Ижысь учкисьёс театре мылысь-кыдысь мед ветлозы. Нош со понна пуктылоно тунсыко спектакльёс. - Яратӥсько ӟеч пьесаосты, ӟуч но кунгож сьӧрысь классика бордын ужаны. Соин валче ик вунэтоно ӧвӧл туалаосыз сярысь но, - вера Михаил Абрамович. Театрлэн туала репертуараз вань А. Н. Островскийлэн пьесаосыз. Соосъя таӵе спектакльёс пуктылӥзы ни: "Доходное место" (режиссёрез М. А. Солес, "Волки и овцы" (режиссёрез В. И. Софонов). Ноябре нырысь ик возьматэмын луоз Дмитрос Псафослэн "Требуется лжец" пьесаезъя спектакль. Та уж борды басьтӥськоз ачиз Михаил Солес. Выль ар понна, нылпиос понна дасямын луоз "Василиса Прекрасная" спектакль- выжыкыл. Драмая В. Г. Короленко нимо ӟуч кун театре кылизы азьвыл актёръёс ик. Зэм, вуозы выльёсыз но. Соос - валтӥсь режиссёрлэн кузпалыз Лариса Солес, Александр Медведев. Таиз валтӥсь режиссёрен артэ кызь ар ужаз ни. Вуылӥз пӧртэм городъёсы. Соосын ӵош ужаны кутскоз Григорий Гольдман (таиз Михаил Солесэз тодэ ини, Ташкентын ужамезъя), Томскысь Мунё театрысь азьвыл режиссёр но артист. Драмая В. Г. Короленко нимо ӟуч кун театр 18-тӥ октябре сцена вылэ потоз ини куатьтон витетӥзэ. Калыклы возьматэмын луоз "Доходное место" выль спектакль. Театр учкисьёссэ ӧте. В. Лагунов. Шӧкыч Нуназе куазен городэ потӥськод ке, али лудэ-бусые потэм выллем, одӥг-ог гинэ мыд-мыдлань ветлӥсь адямиосты пумиталод на. Нош уйшор котырын ураметӥ ветлыны ик уг луы. Калыкез тачак. Малпалод, адямиос сураллям иниюгыт нуналэз пеймыт уен. Амалтэк юан кылдэ, ма каро адямиос уин городысь урамъёсын? Та пумысен ми юри ог ӝытазе юэм куен уймем городэ юалляськыны потам. Советской ульчае вуыса, юалляськонэн йырин ӧй вал ини. Вань юанъёсмылы валэктонъёс асьсэос потӥзы. Куд-огъёсыз огшоры юмшало, солань-талань но мыд-мыдлань лёгасько. Нош егит нылъёс бизнесэн выро вылэм. Вузкаро соос... Маин шонерка вузкаро валаны уг луы, сое котькудӥз сюлмыныз шӧдэ уката ик кинлэн коньдонэз вань... Уксёед кисыяд ӧвӧл ке, уин номыр но басьтыны уд быгаты: бутерброд но, пӧсь пирог но, аракы но, тамак но, вень но... Нош уксёед вань ке, ваньмыз сюроз, йырдэ гинэ эн ышты... юэм куен! Воргорон: � Вот с... с... суч... суч... ка... ка... какалмиськиз ини одӥг час тонэныд кӧлон понна кык сю витьтон ӟенелик бичаса! Суредэз Э. Дышаевлэн. Удмуртия ХХ дауре 1939-тӥ ар Удмуртиын азинско промышленностьлэн машина поттон но андан ӵыжатон удысъёсыз. Талы инъет сётэ Ижстальзаводэз выльдон ужъёслэн йылпумъяськемзы. Завод кык нимаз ёзъёслы люкемын - андан ӵыжатонъя но машина поттонъя. Машина поттон удысэ, 1926-тӥ арен ӵошатыса, кык поллы тросгес ужасьёс кыскемын. Соосын поттэм табыш 19 поллы йылэ. Заводысь ужез радъяны кутско конвейер амалэн, куд-ог удысъёсын кутӥсько автоматъёс. Озьы ке но, тырмымтэос но трос. 1938-тӥ арен ӵошатыса, 1939-тӥ арын республикаысь предприятиос вузъёс дасянзэс 78 процентлы гинэ быдэсто. 10 процентлы синэ андан ӵыжатон. Азинсконъёс басьтыны люкето кивалтӥсьёслэн но, огшоры ужасьёслэн но ӵем вошъяськемзы. Та вакытэ заводэ данак колхозникъёс вуо. Тросэз соос татчы кужмысь ыстэмын. Гуртысь потэмъёслы выль профессиос дышон секытэн сётске. Таин валче, тросэз соос ужан интыосысьтызы пегӟо, озьы куд-огез пытсэт улэ шедё. Дышетскем, визьмо адямиос кулэ гурт хозяйствоез азинтонын но. 1939-тӥ арын Удмуртиысь 4 техникумын дасяло агрономъёсты, зоотехникъёсты но ветеринаръёсты. Гуртъёсы специалистъёсты дася ёросъёсысь 20 колхоз школа. Сюрслэсь ятыр егитъёс дышетско комбайнеръёсты но трактористъёсты дасянъя курсъёсын. Механизаторъёс асьсэос пырисько выль техника кылдытон борды. Кылсярысь, Иж МТС-лэн кивалтӥсез Люгаев 1939-тӥ арын тракторлы нимысьтыз прицеп бичаз. Соин огдыре гырыны, усыяны но кизьыны луэ вал. 1939-тӥ арын августэ Москваын усьтӥське гурт хозяйство удыслы сӥзем выставка. Отчы пыриськизы Удмуртиысь куд-ог колхозъёс. Нош Балезино ёросысь "Захаренки" колхоз выставкаын 2-тӥ степенё дипломен пусъемын, мотоциклэн но 5 сюрс манет коньдонэн сӥлы каремын. 1939-тӥ арын Ижевскын цирклы юрт пуктыны кутскемын, усьтӥське "Спартак" кинотеатр. Та аре ик кылдэ СССР-ысь Журналистъёслэн огазеяськонзылэн удмурт ёзэз. Глазовысь дышетӥсьёсты дасянъя техникум пӧрмытэмын институтлы. 1939-тӥ арын Киров областьысь Вятско-Полянской, Кильмезь но Малмыж гурт администрациос Удмуртилэн музъем вылаз пыртэмын. Озьы татын Кизнер ёрос кылдэ. Сарапул ёросысь куд-ог гуртъёс висъяськыса Камбарка ёрос кылдыто. Республикаын будо Ува, Яр, Балезино посёлокъёс. Йылпумъяське 1939-тӥ ар интыысь Кенешъёсы депутатъёсты быръёнэн. Ӝыныез пала депутатъёс удмурт луо, одӥг ньыльмосэз - нылкышноос. М. Сабуров, Удмурт Республикаысь Кун архивысь валтӥсь специалист. 1939-тӥ арын Глазысь педагогической техникумез йылпумъясьёс. Ижын кутскемын цирклы юрт пуктыны. Машина трос, ворттылӥсь ӧжыт Му вӧйлы дунъёс будэмен, бензин но дунояз. Со шуккет выллем луиз автомобиль поттӥсь удыс понна. Озьы ик ыштонъёс адӟо машина тупатъясьёс, вуж автомобильёсын вузкарисьёс. Германиын улӥсьёс машинаен ӧжытгес ворттылыны кутскизы. Эстӥськонлы бадӟымесь дунъёс кышкатӥзы соосты. Соин сэрен автосалонъёсын 1 миллион 400 сюрс машина люкаськиз ни. Иське, матысь дыре автомобиль вузасьёс дунъёсты кулэстоно луозы. Басьтэмын Интернет пыр. В. М. Походинлы - 65 Лек ӧвӧл - юн Вордскем нуналзэ туннэ пусъе Удмурт Республикалэн прокурорез Виктор Походин. Армия но Свердловскысь Юридической институт бере сое ысто Сарапулэ. Вал следователь, луиз Воткаын прокурорлэн юрттӥсез но воштӥсез. Куинь ар кивалтӥз Глазовысь прокуратураен, вить ар - Удмурт Республикалэн прокуратураысьтыз следствие нуон отделэн. 1978-тӥ арын Виктор Михайловичез юнматӥзы республикалэн прокурорезлы воштӥсе, 1983-тӥ арын - прокуроре. Удмуртиысь Вылӥ Кенешлэн сессиосаз депутат Походин, оло, сокем ӵем ӧз вераськылы. Нош макем юн нюръяськылӥз, отын кутӥськись документъёс музон законъёслы пумит медаз султэ шуыса. Кӧня кужымзэ сётӥз, уждун но выт (налог) тырисьтэм предприятиослэн кузёооссылэсь кылзэс юан понна. Али Виктор Михайлович депутат ӧвӧл. Нош законэз чаклан азьвыл кадь ик юн сылэ. Йыртэманлы пумит нюръяськонын прокуратуралэн данэз пумен будэ. Со огазеяны турттэ правоез утись вань ёзъёслэсь кужымзэс. Походин понна огкадь дуноесь кунлэн кулэяськонъёсыз но, адямилэн правоосыз но. Кӧня адями прокуратура пыр утемын вӧсь каремлэсь! Кӧня нылпиослэн правооссы санэ басьтэмын! Кӧня йыртэмасьлэн кылыз юамын! Толлы дасяськон. Шуныт сётон. Пичи ужбергатонэз (предпринимательствоез) улӟытон. Та но музон удысъёс прокуратура борды чик уг йӧтыло кадь. Но соос юн герӟаськемын адямилэн уженыз, улон-вылонэныз, эрикеныз, правоеныз. Ваньзэ таосты утё Виктор Михайлович кадь юн сюлэмо муртъёс. Виктор Походин пусъемын Дан орденэн, медальёсын, гадьпусъёсын (знакъёсын). Россия Федерацилэн валтӥсь (генеральной) прокурорез сое пусйиз нимысьтыз ож тӥрлыкен. Но, Виктор Михайлович лек ӧвӧл - юн. Юн но чеберез валась. Дунъя суредъёсты, чуръёсты, книгаосты. Походинлэн кивалтоно прокуратураез "Удмурт дунне" газетлэн редакциезлы но юрттӥз. Соин ик газетчиослэн ӟечкыланзы борды итӥсько солэн вань лыдӟисьёсыз. Фамилиды сӥземын трос кужымез кулэ карись ужрадлы. Эн жуммелэ, Виктор Михайлович! Ум люкиське, ум люкиське... Табере удмуртъёс но поръёс - кык полэс ӵыжы-выжыос. Вирмыя гинэ ӧвӧл, улон интымыя но. Президентмы уго асьмеды одӥг улосвылэ огазеяз. Кызьы шуо, сьӧлык нимазъяськыса улыны. Нош кусыпъёсмы туж но туж юнэсь но оскымонэсь мед луозы шуыса, Удмурт но Марий Эл Республикаос Эшъяськон но валче ужан сярысь огкыл кутӥзы. 8-тӥ сентябре соин огкылысь луэмзэс зэматыса сӥё-дано кизэс нюртӥзы республикаысьтымы Кун Кенешлэн Тӧроез Александр Волков но Марий Эл Республикалэн Президентэз Вячеслав Кислицын. Огласянь, удмуртъёс но поръёс вискын валамтэос уг кылдыло, таосыз отын умой уло, соосыз - татын: вордскем кылдэ дышетэмед, огазеяськон кылдытэмед яке калыкедлы вашкала сямъёсызъя-йылолъёсызъя шулдыръяськон ортчытэмед потэ - пожалуйста. Соку малы нимысьтыз кыӵе ке огкыл кутоно на вал? Кун Кенешлэн Тӧроезлэн Александр Волковлэн валэктэмезъя, со кусыпъёс туж сюбегесь вал, национальной культура сяна, калык сюлмаськыны кулэ экономика сярысь но. Соин ик та огкыл паськыт инвисъёс усьтэ Марий Элэн военно- промышленной комплексъя, нюлэс хозяйствоя, гурт удысъя но сиён-юон поттонъя, вузкаронъя огкылъёс кутыса ужаны. Зэм, аналтэмын уз луы культура но: йылозы вордскем кылэз дышетонъя классъёс, школаос, литератураен узырмозы библиотекаос... - Ми тыршом: пор музъем вылын но удмуртъёс асьсэды доразы кадь мед шӧдозы, - оскытӥз Марий Эл Республикалэн Президентэз но. Таиз тани - тужгес кулэез. З. Вахрушева. Удмурт Республикаысь Быръёнъя комиссилэн иворъёс вӧлмытӥсь ёзъёслы но правоосты утись ёъёслы вазиськонэз Йылпумъянъёс Удмурт Республикалы президентэ кандидатэ быръёнлэн ог люкетэз. Быръёнъя комиссия куд-ог кандидатъёсты пусйиз ини. Берло дыре Быръёнъя комиссие уно ӝожтӥськонъёс вуо бырйыны ӧтён-ӝуткан ужез тӥяса нуэм пумысен. Комиссие вазисько нимаз бырйиьёс но, калык огазеяськонъёс но. Тросэз ӝожтӥськонъёс ёзъёсын ӧтён-ӝуткан ужез законэз тӥяса нуонэн. Сыӵе учыръёс нуналысь-нуналэ пумиськыло. Нош та ужез нуонъя радлык, законъёс но куронъёс уно пол печатласькылӥзы иворъёс вӧлмытӥсь ёзъёсын. Законэз тӥясьёс кыл кутытэмын вал. Но югдур уз воштӥськы. Соин ик малпан кылдэ: та адямиос юри уг чаклало законэн тупатэм куронъёсты, валаса вылысь мыдлань ужало. Нош куд-огез газетъёс, кылсярысь, "День" но "Ижевск вечерний" ас сяменызы валэктыны тыршо Быръёнъя комиссиен кутэм решениосты но озьы сьӧдманы выро быръён кампанилэсь огъя ужан ӧрзэ. Со сяна, Быръёнъя комиссия озьы ик пусъе кун газетъёс но телерадиокомпаниос ласянь законэз тӥян учыръёсты. Таиз ини чидантэм. Уго калык тужгес но оске кун изданиослы. Удмурт Ресупбликаысь Быръёнъя комиссия быръён уже вань пыриськисьёсты, ивор вӧлмытӥсь ёзъёсты ӧте законэз юн чакласа ужаны. Нош правоосты утись ёзъёсты комиссия куре ӧтён-ӝуткан ужез нуонъя радлыкез тӥясьёсты дыраз алыны но та ласянь ужзэс эшшо юнматыны. Удмурт Республикаысь Быръёнъя комиссия. Йӧспӧртэм малпан Чеберъя-а флагмес сьӧд буёл? Европаысь вань Геральдикая (гербъёсъя) оргнизация. Со Удмуртилэсь флагзэ (куншетсэ) но гербзэ (кунпуссэ) тужгес чеберъёсыз пӧлы пыртӥз. Зэмен ик, музон кунъёслэн пусъёснызы ӵошатыса, асьмелэнъёсыз туж синмаськымон адско. Малпаськомы вал, ваньмыз озьы лыдъяло шуыса. Со озьы вылымтэ. Алнашын вордскем но Москваын улӥсь Михаил Калаев уг яраты сьӧд буёлэз. Солэсь гожтэтсэ печатланы кулэез ик ӧвӧл кадь. Котькуд дас арлы быдэ вошъялод шат республикамылэсь пусъёссэ? Котьма ке но, Москваысь гожтэтэз газетэ сётоно кариським. Адями урод лэсьтыны малпаса ӧз кисьты чуръёссэ. Солэн но правоез вань малпанзэ шараяны. Кинлы кельшоз, кинлы - уз - адӟом ини. Гуртэ бертакум, Удмурт Республикалэсь флагзэ Азаматысь адӟыса, воксё пайми: кытысь-марысь отчы сьӧд буёл вуэм? - Музъемлы сӥземын со, - ивортӥзы адямиос. Тазьы ик шуизы, пе, сое юнматӥсьёс но. Котьма ке но, оскымон ӧвӧл кадь валэктон. Кин бен музъемез сьӧд кожа? Со лыз-вож адӟиське гужем. Толалтэ тӧдьы лымыен шобырске. Космосэ вуылэм адямиос но музъеммы лыз-вож адӟиське, шуо. Туж чебер, пе. Нош сьӧд вишты ватӥськон-келяськон буёл. Сьӧд но горд буёлэз ӵемысь адӟиськод, адямиен берлозэ люкиськыку. Лыдӟисько В. Е. Владыкинлэсь брошюразэ. Со тазьы нимаське: "Ми - удмуртъёс. Ӟечесь-а?!" Профессор оскытэ: удмуртъёс понна котьку дуно вал туж ӵем кутӥськись куинь буёл - тӧдьы, горд, сьӧд., соос ик пыризы Куинь буёл, пе, ӵемысь адӟиськылэ удмурт пужыятскемъёс вылын. Адӟеме вань сыӵе чалмаосты но мукет арбериосты. Зэм, сьӧд но горд буёлъёслэн юн вӧлмем мугзы мукет: секыт улон вакытэ капчигес вал сьӧд но горд сӥньысъёс шедьтыны. Таиз но зэм: сьӧд буёлэз герӟало кулэм муртэ ватонэн. Огпл ми лобаны дасямы лобаны дышетскон самолётъёсты. Соосты ожмаськон машинаосын медаз суралэ шуыса, чуваш эшмы дэмлаз дышетскон самолётъёслэн "быж" палазы ваменак сьӧд гож пуктыны. Со верамъя ик лэсьтӥм. Нош лётчикъёс пыкиськыны кутскизы. Милемлы, инженеръёслы, шуо: - Асьтэос лобалэ траур самолётъёсады. Машинаосты лыз буёлэн - ин буёлэн пусъёно луимы. Таосыз ваньмызлы яразы. Нош мар уг тырмы республикамылэн влагаз? Кыӵе буёлэн воштысал мон сьӧдзэ? Удмуртъёс оско ӵуж шундылы. Шунды ӝужан пала йыбыртъяса вӧсясько вылӥысь инмарлы. Удмуртъёс ярато ӵуж италмасэз. Туж уно кырӟанъёс сое данъяло. Одӥгаз таӵе кылъёсыз вань: "Ӧвӧл, дыр, возь вылын сяськаос италмас сяськалэсь чебергес". Вань асьмелэн "Италмас" ансамбльмы, поездмы, музон организацосмы. Дунне вылын анайлэсь дуно адями ӧвӧл. Нэнэзэс яратыса, удмуртъёс меми выжыоссылы тазьы вазисько: ӵужапай, ӵужанай, ӵужмурт, ӵужатай. "Зарни комоке, зарни нуные", - тазьы вешало пичи нылпиоссэс удмуртъёс. Нош зарни ӵуж луэ ук! Соин ик флагамы но гербамы сьӧд буёлэз ӵужен воштысал мон. Михаил Калаев. Москва город. Масторава - зумыто му Кызьы ивортӥмы ни вал, 23-тӥ-26-тӥ гудырикошконэ Мордовия Республикалэн шоркараз Саранскын ортчиз финн-угор писательёслэн ВИ конгрессы. Отын эскеремын "Школа. Литература. Азьпал улонмы" ужпум. Та ӧтчаме ветлӥзы, вераськонэ пыриськизы асьме писательёс Егор Загребин, Фома Ермаков, Анна Зуева, Вениамин Ившин, Виктор Шибанов но Татьяна Чернова, озьы ик нациосын ужанъя министр Николай Мусалимов. Шор площадьысен тымет вадьсысь ин бусыез чаклай. Туннэ со лыз пилемо, но шундыен дуръямын вал. Сизьым час бере, издательствоысь книгаосыз кутыса, Мордовилэн шоркараз Саранске вырӟим. "Вуом-а ӝытсэ сиськыны?" - кин ке ӵукна ик сюлмаськиз ни. Зэм ик но, вуим. Дас кык час куспын 800-лэсь уно иськемез "Фольксфаген" - сизьым интыен бурдо" машина - каньылэн ортчиз". Европалэн шунды ӝужан пал люкетэз мынэммыя быдэсак син азе усьтӥськиз шуысалмы, но... Татарстан аслэсьтыз паськыт бамалъёссэ нап бусэн ватӥз. Пӧртэм городъёсыз возьматӥсь пусъёс, Морты, Б. Меми (удмуртлы тупась) гурт нимъёс син азе кылизы. Кин ке нырулӥз - зол зоремез но ӧз шӧды. Ульяновск вӧзтӥз ортчыку, чидантэм пӧсь вал ни. Собере кутскизы кыръёс, шал- шал бусыос. Сюреслэн мыд-мыд палаз синэз гочато пумтэм яблокпуос. Дугдылыса, сузен вайыса оскалтӥмы. Кин ке, оло, вузаны сое октэ. Радэн сыло ведраосын. (Бертыкумы васькамы - дуно.) Отӥязгес изо-буро гурезь бамалъёс югектыса кыльылӥзы. Нош бусыос пурысесь, мӧзмытэсь, отын сьӧдпот но мукет жаг турын кузёяське. Номыр киземын ӧвӧл, аналтэмын. Но тани - Мордовия Республика. Сьӧд но тӧдьы кадь пӧртэмез соку ик шӧдӥм. Сьӧд, зумыто музъем, тросэтӥ гыремын, ю-нянь утялтэмын ини, кытын ке машинаос, комбайнъёс адско на. Саникен нылкышноос пумитамы сюризы. Тани кытын ужась калык улэ. Асьмелэн удмурт музъем выламы кадь. Кӧня шуръёс-ӧръёс пумиськизы - ваньмыз тымемын. Чеберчинка - син азям чилектӥз. Мар со шуэм? Берло юай. Со мокша сямен: цеберь (ӟучъёс "чебер" гожтӥллям) - умой, чебер. Асьме выжы шӧдытэ ини ассэ. Зэм, паймытӥз, кыӵе паськыт вӧлмемын вылэм со, финн-угоръёслэн музъемзы. Лапег, кикыр-кукыр писпуос ышизы син азьысь (ми шӧдӥм: сюрес дур юбооссы но соосъя ик кырыжесь вал). Ӝужытэсь, зӧкесь куаро писпуос, тэльёс потӥзы. Ӝамдэ кисьтӥз шуныт зор. Вуэм берамы шуизы: тӥ, удмуртъёс, шундыё куазез ваиды. Саранск ӟыгыртӥз бордаз "Саранск" гостиницае - кунокуае пырыкумы, милемыз нырысь ик пумитаз Коми Республикаысь Писательёслэн огазеяськонзылэн Тӧроез Елена Козлова (Ижевске вуылэмезъя сое туж ӟеч тодӥськом). Шуныт пальпотон соку ик нясь-нясь кариз сюлэммес: татын милемды возьмало. Елена Васильевна шуиз: дыртэлэ, ӝоген выль книгаосын тодматскон кутскоз. Морякъёс-подводникъёс быремен, быдэс странаын траур ялэмен валче, туннэ концертэз ӵуказе луоно презентациен воштӥллям. Саранскын мон нырысьсэ ке но, ас дорам вуэм кадь потӥз. Тодмоос вамыштэмлы быдэ. Троссэ Эстониын Локусалу карын пумиськылэммыя тодӥсько (1996-тӥ арын отчы финн-угор писательёслэн ньылетӥ ӧтчамазы ветлӥ). Коми прозаикен Елена Габоваен Ижевскысен ик эшъяським ни вал. Сыктывкаре вуылыкум, ас дораз нуллӥз, музейлы кельшись квартираеныз тодматӥз, синпельлы "Тайкина, тайна" книгазэ кузьмаз (со ӟуч кылын гожъя). Прокопий Явтысый - Ханты-Манси округысь тодмо гожъясь. Та конгресслы шуыса, юромо быдэс бам поттэм газетазы. "Тӥляд кылбурды но отчы шедиз", - шумпоттыны малпаса ивортӥз со. Лайд Шемьер. Таӵе мудрон псевдонимез пор писательлэн, журналистлэн Владимир Козловлэн. Азьвыл тодэм сярысь йӧн-йӧн луэм ини, туннэезлэсь мозмытскем. Егит ай со, но бадӟым уж нуэ мари калыксэ ӝутон-улӟытон удысын. "Шунды" огазеяськон ласянь асьме доры вуылэмез вань. Али Владимир ас дораз "Кудо-Коду" газет поттэ, сое вань финн-угор дуннее вӧлмытыны сюлмаське. Сое кылдытӥсьёс пӧлын - МАФУН, уксёен юрттэм Хельсинкиысь студентъёслэн огазеяськонзы. Лайд Шемьерлэн бадӟым ужез адӟиське на. Флор Васильевен одӥг дырегес улонысь кошкем писательзылэсь Валентин Колумблэсь музейзэ кылдытон бордын ужамезъя. Шуак луи, наш-наш пор нылкышноез, кемалась тодмоме, адӟыса. Пермьын егит гожъясьёслэн совещанизы бере 1977-тӥ арысен ӧм адскылэ ни вал, кусыпмес но ыштӥм. Нош йырам кылизы кылбур чуръёсыз: "Латкандаше, лийын латкандаше..." Зинаида Ермакова, Марисола школаысь дышетӥсь, аръёс воштӥллямтэ сое. Ужан манерыз но сыӵе ик, кылсярысь, урок кутскон азьын вить минутсэ сӥзе поэзилы, пиналъёс арня куспын лыдӟемзэс верало. Одӥг-ог поттыло бордгазетъёс. Люкаськыло кружоке. Озьы тыршемезлэн емышез син азьын ини. Зинаида Алексеевна возьматӥз аслаз дышетэм пиналъёсызлэсь куд-ог книгаоссэс. Тазьы чаклано ке, бускель финн-угор республикаосын одӥг мындаенгес нылкышно кылбурчиос. Со сярысь вера Эстония ласянь быдэстэм одӥг ӟеч уж. Финн-угор писательёслэн ассоциацизылэн кивалтӥсез Арво Валтон кичӧлтэмъя, эстон, коми, мари, мордва кылъёсын печатламын ни куинь сборник. Кылсярысь, "Ньыль коми кырӟан" сборнике пыризы Александра Мишарина, Галина Бутырева, Нина Обрезкова но Алена Ельцова. Удмурт нылкышно сборник - "Ньыль тылскем" борды Арво Валтон нырысь ик кутскиз. (Азькыл гожтӥз Виктор Шибанов.) Та конгресслы вуттыса, туж потэ ни вал миемды шумпоттэмез. "Издательствомы банкрот луиз, поттыса ӧм вуттэ", - нырысь ӝытаз ик ӝожомем тусын ивортӥз Арво Валтон. Оскытӥз, матысь дыре "янгышсэс" тупатозы но, со книга ӟыгыртэтэн Удмуртие вуоз шуыса. Таӵе ик мылкыдзэ вераз Ева Тулуз, Тарту университетысь бадӟым эшмы. Со туж мӧзмем ни асьме шаерлэсь, К. Гердлэсь ужзэ азьланьтӥсьёслэсь. Соин ик татын но милемыз киоссэ вӧлъяса пумитаз. Кинлэн мар... Нош писательёслэн данъяськонзы - книга. Котькуд республика, издательство та ласянь ымнырзэ возьматӥз. А. С. Пушкин нимо Национальной библиотекае (тросэз ужрадъёс татын ортчылӥзы) нырысь ӝытаз одӥгтэм люкаськемын ни вал ӧтемъёс - ог ӵыжы-выжыысь эшъёсмы. Удмуртъёслэн пыремзы калыкез кӧня ке бугыртӥз: милемыз гинэ возьмало на вылэм. Йыг-йыг, лачмыт, ӵош ветлэммы берло но син шоразы, лэся, йӧтӥз: "компактной удмуртъёс" шуисез вал. Нырысь ӝытаз ик удмурт эшъёсмы малпанъёссэс усьтыны дыртӥзы (тодэм сямен: милемлы уго вазьгес кошконо луиз). "Удмуртия" издательстволэн валтӥсь редакторез Вениамин Ившин ивортӥз, берло кык ар куспын 80 пӧртэм книга поттэмын шуыса. Со пӧлысь 20 пумоез - Калыкез дышетонъя министерстволэн куремезъя. Ньыль книга поттыны юрттӥз Финляндиысь Кастрен нимо общество. Но Суоми шаерысь гинэ юрттэт витьыса улоно ӧвӧл, шуиз Вениамин Никонорович, ас дорад амалъёс утчано книга поттыны. Таин ӵош ик кулэ вылэм финн-угор гожъясьёслэсь огъя книга поттон центрзэс кылдытыны. Ушъяно книгаосмы син азьын вальк-вальк воректӥзы: Куӟебай Гердлэн, Ашальчи Окилэн, "Даур куара..." луозы на, Г. Верещагин но, К. Герд но - быдэн куать томен. "Удмуртская литература" в контексте христианских и языческих традиций". Авторез - Анна Зуева-Измайлова. Та йӧно кышномуртлэсь англи кылын но верамзэ сак кылзӥзы. Солэн книгаез сярысь финн тодосчи Кари Солмамаа ӟеч кылъёс гожтӥз, Райя Бартенсэн, Иван Куратовен, Куӟебай Гердэн но Геннадий Красильниковен артэ пуктыса. Кинлэн мар, нош комиослэн вань мае возьматыны. Издательствозы нош ик "улӟиз" (кылем арын нылпиослы одӥг книга но поттыны ӧз быгатэ). Нош туэ, кылсярысь, дась ни, печатламын коми кылэ берыктэм венгер выжыкылъёс. Лэсьтэмын туж бадӟым уж - коми-ӟуч словарь (1960-тӥ арысен со ӧй вал ни). Дасяське коми энциклопедия (асьмелэн сямен ик). Этнографияя книга: "Кытын тон улӥськод?" - бырем гуртъёсыз но татысь шедьтыны луэ. Тодмо писательлэн Владимир Тиминлэн книгаяз коми калыклэн философиез усьтӥське пичи пилэн учкемез пыр. Нылпиослы гожъясьёс Елена Козлова, Елена Габова туж тупаса ог-огзэс берыкъяло коми но ӟуч кылэ. Матысь бускельёсмы-комиос шумпотыса верало "Арт" ("Лад") выль журналзы сярысь. Татын трос печатласько тунсыко, капчи лыдӟиськись статьяос, кылсярысь, авторъёс пӧлын вал асьме тодосчи Владимир Владыкин но. Та журналлэн валтӥсь редакторез Галина Бутырева шуиз: журналлы гожтӥськыны луоз Интернет пыр. Карел литературной кыл берло дас аръёсы гинэ азинске ай. Та шаерын али мылысь- кыдысь тыршо начальной школаослы учебникъёс, словарьёс кылдытон бордын. Ньылез ик Евангелиос, нылпиослы Библия поттэмын. "Калевала" печатласькиз. Саам литературалэн но сыӵе ик вакчи ай сюресэз. Татын озьы ик юн возиське эпослэн визылэз. Октябрина Воронова - батыр нылзы сярысь мадёс-книга гожтӥз солы сӥзем музеез кылдытӥсь Надежда Большакова (та кышномуртлэн чупрес луэмезлы, туркатӥсь сямзылы огпол гинэ ӧм пайме). Со тыршемен но потэм Баренцево зарезь котырысь писательёслэн веросъёсынызы "Морошкова поляна" туж усто книга. Со сяна, саамъёс сярысь вань гожъямъёсты люкаса поттэмын кык том. Мордовиысь Национальной библиотека, кытын ортчиз книгаослы презентация, кылем арын пусйиз сю ар тырмонзэ. Татын туж бадӟым фондзы - 1 миллион 300 сюрс экземпляр книга. Та нуналъёсы со пӧлысь тужгес устоосыз, лыктэм куноосты паймытоно кадьёсыз, син азе поттэмын вал. "Мордовия: народное искусство", "Мордовский народный костюм", "Со Эрьзя", но мукет альбомъёс, "Масторава" мордва эпос, "Пословицы и поговорки" (удмуртъёссэ но ӵошатыса сётэмын), калык творчествоя сериысь томъёс (ваньмыз 15 том), "Мордовский роман" сериысь книгаос... Паймод но бырод, макем бадӟым уж лэсьтӥллям ни таос калык искусствозэс возьматон ласянь. Нош со дыре ик осконтэм но кадь: кык берло ар куспын издательство одӥг но эрзя яке мокша кылын дышетскон книга поттымтэ. Национальной библиотекалэн директорез Лариса Георгиевна Меркушкина вераз: финн-угор литература но соос доры вис карытэк вуэ библиотекаос куспын радъям абонент пыр. Зэм ик, асьме дорын поттэм книгаос син шорамы йӧтӥзы. Нош кызьы огкылысь радъяно книга поттонэз, финн-угор литератураысь кыӵе произведениосты пыртоно школалэн программаяз - со сярысь ӟырдыт вераськон пуромиз ӵуказе нуналаз. Татьяна Чернова. (Кылемез вань на.) Шуг улонэз ортчиз Селта ёросысь Прой-Болма гуртысь Елизавета Никитична Бельтюкова. Тэль коран, пур келян, пудо вордон - вань секыт удысъёсын ужаны кылдӥз та ӟеч сямо кышномуртлы. Е. Н. Бельтюкова. Суредаз Леонид Прозоров 1999-тӥ арын августэ. Пыриське конкурсэ Удмурт Республикаысь Правительство ялэ инвестициосъя проектлы конкурс. Со ортчоз туэ 25-тӥ октябре таӵе адресъя: Иж город, Пушкин урам, 214. Конкурсэ пыриськыны куриськонъёсты (заявлениосты) куто акциосын "Инвестициосъя но лизингъя агентство" огазеяськонын таӵе адресъя: Иж город, Карл Маркс урам, 219- а, 222-тӥ комната, нуналлы быдэ (шутэтскон нуналъёсы сяна) 10 часысен 12 часозь но 15 часысен 17 часозь. Документъёсты берпуметӥ кутон нунал - 16-тӥ октябрь. Конкурсэз радъян пумысен юанъёслы валэктон сёто акциосын "Инвестициосъя но лизингъя агентство" огазеяськонын ужасьёс, Удмурт Республикаысь Правительстволэсь 1999-тӥ арын 16-тӥ апреле кутэм 396 номеро постановленизэ лыдэ басьтыса. Куриськонъёс кутӥсько таӵе телефонъя: 56-08-11. Оскон ӧз быры на Алнаш район котьку данъяськылӥз дано пиосыныз но нылъёсыныз. Ваньзы соос нырысетӥ вамышъёссэс лэсьтылӥзы школаын. Озьыен, татын дышетон умойгес радъямын, дыр. Ойдолэ учкоме: сокем-а меда улон майбыр Алнаш районысь школаосын? Гужем ӵоже буям-миськем школаос дышетскисьёсты выль омырен пумитазы. Но чильк- вальк ворекъясь боддоръёс но пальпотӥсь ымныръёс сьӧрын пӧртэм шуг-секытъёс ватскылэмын. Дышетскон книгаос басьтыны ронолэн уксёез уг тырмы. Соин ик семьяослы кисыоссэс берыкъяно луиз. Кун висъяз Алнаш ёрослы 82 сюрс манет коньдон, анай-атайёс - 103 сюрс. Нылпиосты сюдон но капчи уг сётскы. Отын 14 процентэз нылпиос школаосын сиськылӥзы. Со понна 500 сюрс манет тырон кылемын на Можга сырзаводлы но Алнаш райполы. Таяз арын но сюдонлы 200 сюрс манет висъямын бюджетын. Ӧжыт. Соин ик школаос асьсэос бергало. Миым 1 миллион 300 манетлы емышъёс бичаллям. - Татын ӧжыт гинэ нырысетӥ инты ӧм басьтэ. - Емыш будэтон милям ужмы ӧвӧл ке но, туала арын сотэк улыны ум быгатӥське, - шуэ ронолэн кивалтӥсез Илья Михайлович Ильин. Вань та шугъяськонъёс экономикаен герӟаськемын. Шумпотонъёс но трос. Соос меӵак герӟаьскемын дышетсконэн. Школаез вить мурт йылпумъяз зарни медален, дас кыкез - азвесен. Вузъёсы дышетскыны пырыны 103 адями, быгатэм 64-ез. Укмыс классэз быдтэмъёс пӧлысь 78-эз малпам СПТУ-осы пырыны, 62-ез пӧрмытӥллям. Туэ ёросын 4 сюрс 351 дышетскись. Котькуд классын шорлыдын 15 мурт. Котьма ке но, шуге-леке шедем удыс возиське юн сюлэмо дышетӥсьёс вылын. Уноез басьтӥзы пӧртэм наградаос. Вань татын Америкаысь тодмо адямилэсь Джордж (Дьердь) Сорослэсь коньдонэн юрттэтэныз ужасьёс но. О. Кожанова. Спорт Оскыны ик шуг: вормизы Футболэз яратӥсьёс та пумиськонэз кема витизы. Валлян Ижын асьме спортсменъёс Россилэн кубокез понна ӵошатсконын кужымзэс мертазы Волгоградысь "Ротор" командаен. "Газовик-Газпром" стадионэ уно сюрс люкаськемъёсты нырысетӥ таймлэн 12-тӥ минутаз шумпоттӥз Юрий Гетиков. Кӧня ке дыр ортчыса, волгоградъёслэн капкаязы туп пыртӥз Рашид Мурадымов. Шудонлэн кыкетӥ люкетаз "Ротор" сэзьгес кариськиз. Куноос таймлэн шораз асьмелы кык гол пыртӥзы. Озьы туж лэчыт югдур кылдӥз. Вормонлы оскон быриз ни вал кадь, куке Сергей Пятикопов матчлэн берпуметӥ минутаз кужмо командаез шуге- леке вуттӥз - шонер ӵыжыса, тупез куноослэн капкаязы пыртыны быгатӥз. Сыӵе кузьым лэсьтӥз "Газовик-Газпром" шаерысьтымы футболэн "висисьёслы". Оскыны ик шуг, ява. А. Лебедев. "Тол яратэ тыршись калыкез" Вуиз сӥзьыл. Ӝоген пудо-животэз лудъёсысь фермаосы пыртон дыр вуоз. Алнаш ёросысь тросэз хозяйствоос силос но сенаж, турын ортчем арын мында ик дасяллям. Миым сямен ик трос пудо сиён дасязы "Мир", "Прогресс", "Молодая гвардия", "Нива" колхозъёсын но Асан совхоз-техникумын. Хозяйство 41 гектар вылын будэтӥз кукуруза но 20 гектар вылын судан турын. Пудо толйытонзы миым сямен ик секытэн сётскоз "Искра" но "Кама" колхозъёслы. Соос али одӥг пудо йырлы 6-8 центнер гинэ сиён дасязы. Толалтэ сюдон тырмымтэен, валамон ини продукцизы ичиомоз, нош скалъёслэн сюмамзы ичи йӧлын берытскоз. Ваньзэ тае лыдэ басьтыса, вылӥ верам колхозъёслэн кивалтӥсьёссылы кутсконо палэнысь пудо сиён утчаны. Районын 135 пудо вордон фермаос, тросэз соос пӧлысь умоесь, огшоры тупатэмъёсты гинэ кулэ каро. Колхозъёсын, кудъёсаз кивалтӥсьёс пудо-вордон сярысь сюлмасько, фермаосты толалтэлы гужем дасяны кутскизы. Умоен пусйыны луоз "Молодая гвадия", Азин нимо, "Кизили", "Нива", Суворов нимо хозяйствоосты. Бадым саклык висъяно луэ кунянъёслы. Нырысь ик соосты кулэ шуныт инты. Со уг тырмы на "Прогресс" колхозысь Удмурт Вишур гуртын кунян юртазы. Татын котьку кот улылӥз но гидъёсын тӧл шудылӥз. Толалтэ фермаез ньыль цехлы люкизы. Борддоръёс огшоры полиэтилен плёнкалэсь лэсьтэмын. Ог-кык нунал куспын гинэ быдэстэм уж бадӟым пайда ваиз. Вишуръёс шоры учкыса "Коммунар" но "Колос" колхозъёс асьсэ доразы сыӵе ик люкетъёс лэсьтылӥзы. Та ужрад тужгес ик умой соин, кунянъёс та амалъя чалякгес будо, ичигес висё, шуг-секытъёстэк одӥг цехысь мукетаз пото. Та амал секыт ӧвӧл, но малы ке но мукет колхозъёс вишуръёслэсь дышетскыны уг дырто. Сюрес бырон вакытлы соослы 4000 тонна куро кулж луоз. Кызьы меда ортчытӥське та уж? Алама. Туннэ нуналлы та т сиён ӧжыт вуттэмын. Мактаны луоз "Молодая гвардия", "Решительный", "Казаково", "Родина" но Асан совхоз-техникумез гинэ. Нош "Правда", "Коммунар", "Кама", "1 Май", Ильич нимо колхозъёсын та ласянь уг дырто. Со шугъяськытэ. Пудо животэз тол вакытэ поттон секыт уж. Со сярысь вунэтоно ӧвӧл колхозъёсысь специалистъёслы но кивалтӥсьёслы. "Алнаш колхозник" газетлэн гожъямезъя. Депутатэн кенешон Огез урод: жалянлыкмы быре Тодматскон понна: А. Д. Чуршин - Удмурт Республикаысь Кун Кенешлэн депутатэз. Вордскемын 1963-тӥ арын 5-тӥ ноябре. Йылпумъяз Ижевскысь медициная институтэз. 1989-тӥ-1994-тӥ аръёсы ужаз татын ик, старший лаборантысен кутскыса будӥз доцентозь, 1994-тӥ-1998-тӥ аръёсы - Ижевск город администрацилэн тазалыкез утёнъя управлениезлэн валтӥсь кардиологез, 1999-тӥ арысен - Ижевскысь 8 номеро медико-санитарной частьлэн валтӥсь врачез. - Алексей Дмитриевич, Кун Кенешлэн депутатъёсыз пӧлы али тросгес шедемын бадӟым предприятиослэн кивалтӥсьёссы, бизнесэн вырисьёс, врачъёс - одӥг-кык гинэ. Кызьы малпаськоды, законъёсты кылдытон бордын ужакыды, профессиды кызьы ке юрттэ-а? - Одно ик. Вань улонме мон сӥзи калыкез эмъянлы, соин ик ӟеч валасько отын кылдэм шуг-секытъёсты. Диагностикая оборудование ваньмаз больницаосын 85-90 процентлы вужмемын, врачъёслэн уждунзы туж ичи - 486 манет, медсестраослэн - 300, санитаркалэн - 210. Озьы но соос асьсэды жалятэк ужало, улонэн но кулонэн вискы шедем адямиослы юрттыны выро. Уг ваты: кылдэм югдурын эмъясьлэн данэз пумен усе. Калыкез эмъян удысэ коньдон тырмыт уг вуы, чакламезлэсь 40 процентэз гинэ. Тӥни малы больницае шедем муртлы данаксэ эмъюмъёсты аслыз басьтоно луэ. Югдурез тупатыны луоно медицинской страхование пыр, но со, жаляса верано, беромыса яке воксё уг вуы. Ижевсклэн администрациез, кылсярысь, УТФОМС-э кылем ар понна 350 сюрс пенсионеръёс но пиналъёс понна келяз 1,5 миллион манет гинэ, яке котькуд адямилы араз быдэн 4 манет. Таӵе учыръёсын сэрен быдэсак сямен куашканы быгатоз калыклы медицинской юрттэт сётон. Берло аръёссэ со озьы но шӧдскымон лябӟиз ни, Россиен ӵошатыса, Удмуртиын висисьёслэн лыдзы 20 процентлы ятыргес. Калыкез эмъян удыс туннэ ачиз туж секыт висисьлы тупа. Кун Кенешын мон ужасько социальной политикая комиссиын. Умоен лыдъясько туэ арлы юнматэм бюджетэ ужасьтэм муртлы медицина юрттэтэз 100 манетозь вуттэмез. Валамон, адямилы эмъяськыны со матын но тырмыт ӧвӧл, Пермьын но Татарстанын висъямын 300 манетлэсь ятыр. Туэ монэ бырйизы медицинской страхованиея Удмурт территориальной фондлы членэ. Страхование удысын ужмы трос, сое быдэстыса гинэ калыклэсь тазалыксэ утьыны луоно. - Алексей Дмитриевич, Кун Кенешын тӥ пыриськоды промышленникъёслэн но ужбергатӥсьёслэн фракциязы, нош берпуметӥ сессиын мылкыд кариды "Медведь" огазеяськонын но ужаны... - "Медведь" огазеяськон ужа правительстволэсь программазэ Удмурт Республикаын нуон бордын. Вужзэ системаез асьмеос быдэсак куашкатӥм, табере ужано выльзэ кылдытон бордын. Выльдӥськонлэн ортчемез куашкатӥз страналэсь экономиказэ, вӧсь кариз калыкез. Асьмелэн республикаямы гинэ адямиослэн лыдзы дасо сюрсъёслы кулэсмиз. Та вакыт секыт йӧтӥз воргоронъёс понна: Ижевскын туннэ нылкышноос 49 сюрслы ятыр. Озьы ке учконо, быдэс город, республика но пал кылем кышноосын тырмемын. Россия каллен-каллен пыд вылаз султыны выре кадь ини, соин ик интыосын вань луонозэ лэсьтоно, федеральной властен пуктэм куронъёсты быдэсъян понна. Мынам малпанэ одӥг: вань кужымъёслы огкылэ вуыса ужано, озьытэк шуг-секытъёсты уд вормы. Кылдытэм законопроектъёс котькуд адямиез утьыны мед быгатозы. - Алексей Дмитриевич, медициная юрттэт курыса бырйисьёсты вазиськыло-а? - Одно ик. Со сяна, мынам юрттӥсьёсы калык пӧлын ужало. Вазиськыло юридической ужпумъёсъя, улон квартираосъя, уже интыяськонъя. Мыло-кыдо пыриськиськом праздникъёслы сӥзем ужрадъёсты ортчытъянэ, быгатэммыя юрттыны тыршиськом ёрмон калэ вуэм семьяослы. Поттӥськомы "Доброе дело" газет, ӵош ужаськом таӵе нимын ик нимаськись фондэн. Фонд пыр нылпиослы висъяськом дуно сылӥсь эмъюмъёсты; операциос ортчытонэ но гужем ужась лагерьёсы путёвкаослы коньдон висъяськом. - Тау, Алексей Дмитриевич, юанъёслы валэктонъёс сётэмды понна. Ужды мед азинскоз. Вераськиз И. Городскова. Сурон сапег - ветлыны дано пыдкук? Чечняын ожмаськонлэн йылыз-пумыз уг адӟиськы. Вань калык сак кылзӥське отысь иворъёсты. Ваньмызлэн сюлэмъёссы бӧрдо отын ожмаськись пиосмы понна. Нош мумы- бубыоссылэсь синкылизэс нокыӵе весэн мертаны уз луы. Быдэ вуись пиослэн но соослэн ӵыжы-выжыоссылэн трос юанъёссы кылдо армиен валче. Мон вазиськи Алнаш ёросысь военкомлы Сергей Дмитриевич Филаткин подполковниклы. - Сергей Дмитриевич, асьме ёросысь армие мынӥсьёс шаермылэн кудпалаз ӵемгес сюрыло? - Быдэс Россиын, Мурманскысен Владивостокозь службазэс нуо асьме пиосмы. Югдурез утись войскоосын, милицилэн кунгожез утёнын, флотъёсын. - Кӧня пиос тӥляд военкоматысьтыды армие кошкыло? - Сизьымдон пала. Комиссие ӧтемъёс пӧлысь 25 процентэз. Мукетъёсызлэн тазалыксы ляб. Ньыль адями гинэ военной вузъёсы йыгаськиз, одӥгез но ӧз быгаты. Миым кыкезлы коть удалтӥз вал. Нош районамы арлы быдэ сыӵеос ог кызь луыны кулэ кадь. - Мур-а эскериське армие мынон азьын пияшъёслэн тазалыксы? - Мур. Нырысь пиосъёсты учко асьме ёросын. Комиссия кутэ решение: яра-а, уг-а та пияш армилы. Куд-огзэ Иже ыстоно луэ. Соослэсь висемзэс-висьымтэзэс чакланы дорамы аппаратура ӧвӧл. Кошкон нуналазы райбольницаысь дежурной врач эскере на. Берпуметӥ кылзэ вера республикаысь комиссия. Собере выль солдатъёсты учко частьысь врачъёс. - Кӧня нунал ӵоже егитъёс, вуоно солдатъёс, республикаысь призывъя пунктын кыллёно луо? - Законъя куинь нуналлэсь кемагес возёно ӧвӧл. - Азьло дыре флотын куинь ар улоно вал. Мукет интыосын - кык гинэ. - Туэ но озьы ик-а? - Ӧвӧл. Служба котькытын кык ар кыстӥське. - Сергей Дмитриевич, кызьы пияшъёс сюрыло Чечняе? Кӧняез асьмелэнъёс отын вал? Кӧняез сюрыны быгатозы на? - Ӝыны ар дышетытэк, пиосты пӧсь интыосы уг келяло. Нырысь ик пияшъёс уло асьсэ частязы. Отӥяз югдур герӟаське ни часть азьын пуктэм ужпумъёсын. Чечняын кыкетӥ ож кампания кутскем бере, Алнаш ёросысь кызь куатез пиос отысь ожмаськыса бертэмын ни. Кыкез сӧсырмыны сюриллям. Одӥгез - пельпумаз. Мукетыз синтэк кылемын. - Мумы-бубыос пияшъёссэс армие лэзьыны курдало кык муген. Нырысетӥез - Чечня, со сярысь вераським ни. Кыкетӥез - дедовщина шуон. Мар тӥ тодӥськоды со сярысь? - 1992-тӥ-1994-тӥ аръёсы армиын ултӥясьёс тужгес зол шӧдскылӥзы. Соку малпаськытэк кутэм законъёсын йырин ӝыныез пиос армилэсь палэнскыны быгатылӥзы. Отчы келяно луылӥм азьвыл йыртэмасьёсты. Кандаын улон сямъёс озьы выжизы казармае. 1995-тӥ арысен сыӵеослы частьёсы сюрес выльысь пытсамын. Озьы ке но, ултӥян сям копак быдтэмын шуыса вераны уг быгатӥськы на. Дедовщина - армилэн гинэ ӧвӧл, быдэс обществолэн висёнэз. Дышетскон интыослэн общежитиосазы со ӧвӧл шат? Отысь вуэ ини армие. Ултӥямъёс чидало но чалмыт уло. Артэ адямиос адӟымтэ улэ аналско. Командир частьысь ваньзэ учыръёсты тодыны уг быгаты. Семьяез вань бере, уен-нуналэн частьын кыллемез уг луы. Ӵукна солдатъёслэсь юа: ваньмыз умой-а? Пиос шып уло ке, кытысь командир тодоз ултӥянъёс сярысь? Вӧсь карись мурт аслыз но йӧтэмлэсь кышка, соин ик курдатэ: чагиськид ке, тыныд уродгес луоз. Сыӵе муртлы огпол пезьдэт сётӥд ке, мукетъят кизэ уз ӝутъя ни. - Сергей Дмитриевич, дырын-дырын кылӥськыло ышем солдатъёс сярысь иворъёс. Алнаш ёросын сыӵеос вань-а? - Кытын но отын вань одӥг-кык сыӵе учыръёс. Но, ӵемысь журналистъёс сыӵе учыръёсты дедовщинаез сямен ик зол бадӟымато. Ми доры вуыло солдатъёслэн мумы- бубыоссы: пимы кемалась ӧз ни гожъя, ӧз ышы меда? Соку ми часте вазиськиськом, отысь вуэ валэктон. Пиос нырысь мӧзмо, гуртазы ӵем гожъяло. Берло дышо, гожъяны номыр сярысь кадь потэ, нуналъёс ваньмыз огвыллем ортчо. Вань музон учыръёс но. Воинъёс Чечняе сюро но, ӵыжы-выжыоссы медам сюлмаське шуыса, та сярысь уг иворто. Уг валало мукетсэ: иворъёс ӧвӧл дыръя шугъяськонъёс эшшо бадӟымесьгес. - Профессиональной армия Россилы кулэ. Мон соин соглаш. Но со понна кунлэн экономикаез мед юнмалоз. Армие мынэм мурт ёрмыса медаз улы. Пияшъёс, малпаське: тӥ ке армие ӧд мынэ, мукетыз кыӵе амал утчалоз шинель дӥсянтэм понна. Куиньметӥез тазалыкеныз сэрен уз быгаты сурон сапег кутчаны. Кин соку милемыз утёз. Кунлэн воинъёсты коньдон тырыса возьыны моӵез ӧвӧл на. *** Одӥг пияш мыным вераз: - Атае армие ветлӥз, старшина луыса бертӥз. Нош монэ лэзьыны курда Чечняен йырин. Солэн верамезлы пумит кариськы: тон аслэсьтыд дано уждэ быдэстӥд, мон но быгато, мон ӟустари ӧвӧл. Шонер сӥзё, дыр, уноез арлыдо адямиос: "Армиысь зэмос пиосмурт луыса бертэлэ". Материалэз дасяку, шумпотон ивор вуиз: Чечняын усто ожмаськемез понна Алнаш ёросысь Писейгуртысь Николай Иванов пусъемын Суворов медален. О. Кожанова. Туспуктӥз Ю. Жаворонков. Быдӟым Вормонлы - 55 ар Тургуртысь гвардеец Ньыльдон ньылетӥ арын гужем нуналъёсы Белоруссиез фашистъёс ки улӥсь мозмытон понна ожмаськон кутскиз. Куинетӥ танковой батальонын ӵем но ӵем кылылӥськиз комбатсылэн огпӧртэмгес но котькуд боецлы но командирлы но туж валамон командаосыз: "Азьлань, танкистъёс! Гвардеецъёс, азьлань!" Березина шурез ваыжемзы бере, гвардеецъёс-танкистъёс Белоруссилэн шоркарезлы, Минсклы, матэктӥзы. Тушмонлэн гарнизонэз вылэ кужмо шуккет лэсьтэмын вал 3-тӥ июле выжон уе. Танкистъёс тушмонлэсь пумитъяськемзэ вормыса, ӟардон вакытэ городэ пыризы. Котькинлэсь азьло городэ пырем танкистъёс пӧлын вал куинетӥ батальон но. Та батальонын одӥгаз ротаын вал механик-водитель гвардиысь сержант Николай Шамшурин, Пичи Пурга ёросысь Тур гуртын будэм мурт. Ёзъёсын ӵош сизьым классэз быдтыса со мынӥз вал Воткинскысь ремесленной училищее. Дышетскемез бере заводын но ужаны кутскиз вал ини. Но война ваньзэ куспетӥ кариз. Солы но дур вуиз атай музъеммес утисьёслэн радазы султыны. 1943-тӥ арын гужем Шамшурин лек ожъёс пыр потоно луиз Курск дорын. Пулемётной отделенилэн командирез данэ потӥз немецъёслэсь контратакаоссэс пазьгылон ожъёсын. Пӧсь гужем нуналъёс сылӥзы соку, пулемётчикъёслы но пӧсь йӧтӥз - немецъёс олокӧня пол атакае потазы. - Нош ик лыкто! - кылӥськиз вӧзысьтызы окопысь расчётлэн командирезлэн куараез. Мар кароно?.. Патронъёс ӧвӧл ни... Со вылэ ик окопсы азьын ик огез бӧрсьы мукетыз немецъёслэн минаоссы пуштыло. Шамшурин соку адӟиз: отделениысьтызы мукетыз расчёт быремын. Со туж чаляк вуиз бырем пулемётчикъёслэн окопазы но ыбылыны кутскиз. Кема-а со ыбылӥз, валаны ӧз быгаты. Но немецъёс одӥгез но окопсы доры ӧз вуы. Вис но кароно капчигес шокчыны но кулэ вал, дыр, но окопез азьын ик пуштэм миналэн чалепез мугораз йӧтӥз. Пулемётчик окопаз ик пограз. Солы "За отвагу" медаль сётӥзы шуыса Шамшурин тодӥз ини госпитальын гинэ. Госпитальын эмъяськемез бере Шамшуринэз ыстӥзы танкистэ дышетскыны. Озьы со луиз механик-водитель но сюриз гвардейской танковой бригадае. Бригадарзы Минске ваньмызлэсь азьло пырем бере, солы городлэн нимыз сётэмын вал. Нырысетӥ Прибалтийской фронт кутскиз азьлане мынон операцизэ. Озьы немецъёслэсь Шауляй котырын возиськись группировказэ быдтыса, Паланга но Мемель участокын вырӟиз Балтийской зарезь дуре. Озьы немецъёслэн бадӟым кужымзылэн Восточной Пруссия пала чигнан сюрессы пытсамын луыны кулэ вал. 5-тӥ ноябре потон уе танкистъёс дась вал ини азьлань мыныны, возьмаса улӥзы командирзылэсь радио пыр сётэм командазэ гинэ. Ӵук ӟардонэз танкистъёс пумитазы зор улын, куазь уродэн тушмон но уг адскы вал. Кӧня ке час ортчыса гинэ ин чылкытгес луиз но нап бус тӧлӟиз. Артиллеримылэн ыбылэмез чалмем бере ик танкистъёслы команда вуиз: "Азьлань!" Огзэ бӧрсьы мукетсэ немецъёслэсь юнматэм интыоссэс басьтыса, шуръёсты, мукет могӟетъёсты выжылыса, танкистъёс потӥзы Мемель город доры. Мемель азьло ик дасямын ни вал обороналы. Городэз котыртӥзы ньыль оборонительной рубежъёс, котькудаз вал куинь чур траншея, соос азьын ез кенеръёс но мина пуктылэм бусыос. Нош городын лэсьтэмын вал кема возиськыны дасям сооружениос - дотъёс. Со сяна, городэз котыртӥзы на фортъёс. Кононов капитанлэн танковой батальонэз, ӝогак ыбылӥз немецъёслэсь артиллерийской позициоссэ. Немецъёслэн одӥгез но орудизы ыбыны но ӧз ву, расчётъёсынызы ӵош куажгатэмын вал. Роталэн командирезлэн Масташев лейтенантлэн танкеныз кивалтӥз механик водитель гвардиысь сержант Николай Шамшурин. Азьпалазы нош ик немецъёслэн артиллерийской позициоссы. - Орудиез атаковать кароно! - сётӥз команда лейтенант. Танклэн пушкаез ыбиз. Гвардиысь сержант Шамшурин маневрировать карыса танксэ артиллеристъёслэн позицизы вылэ ик нуэ. Вань секытэныз танк орудиез музъеме зӥбиз. Та нуналэ танкистъёс эшшо немецъёслэсь кыксэ миномётъёссэ но пулемётъёссэ быдтӥзы на. Тушмон асьме танкистъёсмес дугдытыны ӧдъя вал, но механик-водитель, ас ужзэ умой тодӥсь мурт, немецъёслэн снарядъёссылэсь шонерак шуккылэмзылэсь палэнскыса, азьлань но азьлань мынӥз. Озьы ке но кыкетӥ нуналаз ротаысьтызы кыксэ танкез немецъёс стройысь поттыны быгатӥзы ик. Шоссе вылтӥ немецъёслэн колонназы мынэ вал. - Мынам косэмея гинэ ыбылоно! - шуиз роталэн командирез. - Нырысетӥ снарядъёсын быдтоме немец танкъёсты. Мон азьпалазы мынӥсез шоры ыбылӥсько. Нырысетӥ снарядэнызы ик тушмон "тигрлэсь" гусеницаоссэ тӥязы но танк берытскиз. Кыкетӥез снарядзы бортаз йӧтӥз но танк ӵындӥз. Мату Мазурен дорын танкистъёс ӝуатӥзы на эшшо кыксэ "тигрзэс". Ульчае пырыса куашкам юрт сьӧрысь танклэн командирез тушмон танклэсь гумызэ адӟиз. танк ыбиз но механик-водитель соку ик машиназэ шуак палэнэ кожытӥз. Воин тодӥз, тани-тани ыбозы пумитазы. Озьы ик луиз: боевой машина кожиз гинэ но солэн сылон интыяз снарядъёс пуштылыны кутскизы. Одӥгез танк борды йӧтӥз. Боевой машина дугдӥз. Соку ик кыкетӥзэ но снаряд шуккиз на танкез. Пичиесь корт пырыос мертычылӥзы ымныраз. Шӧдӥськиз ӵын зын. Пӧсь, - танк ӝуаны ӧдъяз, шоканы шуг луиз. Шугъяськыса но мырдэм люксэ усьтыны быгатӥз секыт сӧсырмем Шамшурин. Собере музъем вылэ уськытскыны быгатӥз, йырсазяз пыриз медсанбатын гинэ. 1944-тӥ арын 11-тӥ октябре гвардиысь сержантлэн Шамшуринлэн берпуметӥез ожмаськон нуналэз луиз. Гвардейской танковой батальон Мемель городэ пыриз ни вал. Та нуналысен Николай Шамшуринлэн кутскизы кема кыстӥськись эмъяськон нуналъёсыз. Олокӧня пол операциос лэсьтылыса, госпитальысь госпитале вошъяллязы сое. Пыдтэм кылем танкист ивналид кылиз. Сое Ленин орденэн пусъем сярысь Указэз но со тодӥз ини госпитальысен гинэ. В. Голубев. Кивалтӥсьёс калык пӧлын Адысь омырен шокась рай Нырысетӥ сентябрь чик но ӧз шумпотты Киясаысь дышетӥсьёсты но дышетскисьёсты - выль дышетскон аре соос нош уялозы, пыкмем омырен ӝокаса улозы. Юромо подлодкаен ӵошатон вылысь уг вераськы. Но югдур зэмзэ но матын - "лодкалы" (школалы) 30 ар сяна ӧвӧл ай ке но, СОС сигнал берло 10 арзэ ӧз чалмылы на. Вуылӥз со Россилэн азьвыл Президентэз дорозь но. Куатетӥ классын дышетскись Лиза Павлова нокин индылытэк Ельцинлы сыӵе СОС ысъяз, ӝокаськом, юрттэ! Югдур ӧз воштӥськы. Райцентрысь 625 пинал туннэ но пурысьтам школаын тодон-валан люка, астма утча, синзэ быдтэ. Та суредэз ас синмыныз адӟиз Кияса ёросэ потакуз Кун Кенешлэн Тӧроез Александр Волков. Школае таман пыратозь шокан пытсаське: 30 ар талэсь азьвыл сое ву вылэ пуктэмысь, нюла-пурысьта, нош тулыс нырысетӥ этаже пыдесозь ву люкаське, быдэсак тырмытэ со тужгес кулэ отсекез столовоез но. Борддоръёс номырлы ярантэм - кыӵе ке "Тиккурило" сярысь соос ӧз но вӧталлялэ на, бордазы огшоры изваска но уг возиськы уго: пурысьтаса-перелӟыса вия. Педласянь тэшкам интызэ амало директор Ленинлэн тусбуеныз ӵоктаз. Александр Волков нырысь лэсьтӥськисьёслы йыркурзэ вормымтэен лекъяськиз ке но, (утча на табере соосты!) вить ар ӵоже школалы выль юрт пуктом шуиз, нош али школа гулбечез кӧсатон ужъёс борды басьтӥськыны ӵектӥз. Чылкак мукет мылкыд кельтэ ог кык даур талэсь азьвыл лэсьтӥськемъёслэн ужзы. Тусызъя Данилово селоысь черк сю поллы уродгес ке но, юн сылэ ай вӧзысь гуртъёсысь калыклы оскон пыӵатыса. Свято-Никольской храм пуктэмын 1812-тӥ (!) арын. Лэсьтӥсьёс пӧлын вылӥллям пленэ сюрем французъёс но. Со дырысь оломае но чидаз ни та храм: кык пол ворсаллязы, кенос интыын возизы, но 1991-тӥ арын выльысь усьтӥзы. Быдэс ёрослы одӥг гинэ черк - историлэн памятникез Россиен утиськыны кулэ. Таӵе храмъёс уго трос кылемын ӧвӧл ни. Но историез утисьёс- гажасьёс но, меценатъёс но, кивалтӥсьёс но кизэс ӧз мыче на: вӧлдэт югпыра, борддор куашка, выж лэйка. Черклэн йырйылаз уг жонгето гырлыос. Нуны пыртыны татчы лыкто ик ке ай, венчатьтӥськыны мылкыд карись егитъёс кошко зарнивуамъёсаз. Кун Кенешлэн Тӧроез тунсыкъяськиз лэсьтоно ужъёсын, ачиз но черк пушкы пыраз (осто, кирос понымтэысьтыз Инмар медаз йыркуръяськы вал). Матысь дыре липетлы ке но 100 сюрс манет висъялом шуиз. Кыӵе шугъяськонъёсыз меда "Адмираллэн"? Мар со-а? Нырысетӥ удмурт кетчуп! Алдаськиськем сюлмаськонъёс пумысен, таосыд Кивалтӥсез быгатэмзэс возьматыны, пӧраменызы ушъяськыны ӧтиллям. Егит ужбергатӥсь Михаил Фадеев аслэсьтыз ужзэ туэ гинэ мытӥз ай, но солэсь кетчупсэ тросэз веръязы-дунъязы ни. Азьланезлы но солэн трос тунсыко малпанъёсыз. Ӵапак 8-тӥ сентябре ватсаськиз быдэс Россилы тодмо луись суредасьлэн - Петр Александрович Кривоноговлэн 90 ар тырмонэз. Тодады вае ай "История" учебникысь "Вормон" суредэз (Рейхстаг вылэ знамя юнматон), ӵапак солэн авторез Петр Кривоногов. Вордӥськемын со Кияса селоын. Дано земляксылы сӥзьыса, киясаос усто праздник дасяллям. Ӟеч кылъёссэ, тау каронзэ вераз Александр Волков суредасьлэн вынызлы но аспал муртэнызы данъяськись киясаослы, нош П. Кривоноговлэн музейысьтыз автопортретэз улэ бадӟым сяьска керттэт понӥз. ... Кияса ёросэ пырон гож выль стеллаысь кыӵе ке йыртэмась кык буквазэ ишкалтэм. Киясовский рай пӧрмем. Надежда Шатрова юри ум тупатӥське, шуэ, тазьы, пе, чебергес кылӥське. Эшшо ик! ма, собере райлы пӧрмытскыны но кема ик ӧз кыльы ни. Дыр? З. Рябинина. Политика Арня ӵоже - дуннеын, странаын, шаерын Лек ож йылпумъяськем бере 1945-тӥ арын дуннеын кузёяськыны ӧдъязы кык ваче пумитъяськись кужымъёс: СССР-лэн но США-лэн лагерьёссы. Музъем вылын юнматэм тупаса улон векчи пиялалы укша вал: уд но вала, кызьы тэшкалоз-сӧриськоз. Ӵапак со тупаса улонэз утён но юнматон вылысь кылдытэмын вал ООН (Организация Объединенных Наций). Уно аръёс ӵоже та ёз дуннеысь улонэз сакласа возиз, пумен кужмыз будӥз, данэз паськытаз. Но 90-тӥ аръёсы Музъем вылысь геополитикая югдур чутрак воштӥськиз. Угось СССР куашкамен, социализмлэн лагерез но пазьгиськиз. Европаысь социализм лэсьтӥсь кунъёс Запад пала шоналскизы. СССР-ысь республикаос но, эрик басьтыса, асьсэлы тупась сюрес бырйизы. Кин НАТО-е пырыны куриськиз, кин ислам шоры учкылӥз. Озьы Россия огназ кылиз, шуыны луоз, быдэс дуннеын солэн куараез но кужмыз лябӟиз. Геополитикая куд-ог специалистъёс шуо, Музъем вылын, пе, та вакытэ одӥг кузё - США. Таӵе веран зэма, лэся. Америка кужмо луэмзэ ватыса уг возьы. Тодады вае ай Иракез яке Югославиез. ООН-лэсь но верамъёссэ но со лыдэ басьтэмысь дугдӥз. Соин ик юанъёс чузъяськыны ӧдъязы: кунъёслэн огазеяськонзылэн кулэлыкез вань на меда? Кылем арняе Нью-Йоркын ортчиз ООН-э пырись кунъёслэн пумиськонзы. Сӥземын вал со сюрс ар йылпумъяськонлы. Таӵе ужрадъёс ноку но ӧй вал на - огазе люкаськизы государствоослэн но правительствоослэн 159 кивалтӥсьёссы. Соос пӧлын вал Россилэн Президентэз Владимир Путин но. Странамылэн кивалтӥсез зарезь сьӧрын ассэ ӟечен возьматыны быгатӥз. Со понна ваньмыз лэсьтэмын вал. Кылсярысь, асьме дипломатъёс трос тыршизы, В. Путин саммитын вераськисьёс пӧлын азьвылгес мед луоз шуыса. Озьы ужрадэз усьтӥз США- лэн Президентэз Билл Клинтон, нош Владимир Владимирович ООН-лэн Генассамблеяезлэн заседаниос ортчытъянъя залысьтыз мрамор трибуна сьӧры витетӥ тубиз. Люкаськемъёсты со ӧтиз ядерной ож тӥрлык вӧлмонлы, дуннеысь терроризмлы пумит дэмен нюръяськыны. Пусйыны кулэ, В. Путинэз саммитэ лыктэмъёс рос-прос кылзӥськизы. Солэсь данзэ ӝутыны юрттӥз СССР-лэн экс-президентэз Михаил Гррбачёв но. Нью-Йоркын ортчытэм пресс-конференцияз Михаил Сергеевич Владимир Владимировичлэсь странаенымы кивалтэмзэ вылӥ дунъяз. Нош Горбачёвез Америкаын ӟеч тодо, солэсь кылъёссэ лыдэ басьто. Россилэн Президентэз озьы ик Билл-Клинтонэн пумиськылӥз. США-лэн Президентэз мур куректэмзэ вераз "Курск" подлодка быремен валче но ивортӥз, атомоходын пуштэм куараосъя Америкалэсь сейсмограммаоссэ Россилы сётэ шуыса. Пумиськон дыръя гожтэмын стратегической утиськон удысын валче ужанъя декларация. Билл Клинтон оскытӥз, солэн странаез ракетаослэсь утиськонъя радлык сярысь 1972-тӥ арын кутэм огкылэз азьланьын но быдэсъялоз шуыса. Ортчем арняе гужем Олимпийской шудонъёслэн тылзы вуоно ӵошатсконъёслэн шоркаразы Сиднее вуиз. 27 сюрс иськемлэсь ятыр сюрес ортчемын. Спортъя праздник 15-тӥ сентябре кутскоз. Оскем потэ, Россиысь команда синмаськымон вормонъёс басьтоз шуыса. "Сьӧд" иворъёсты куке но шумпоттӥсь иворъёс но воштыны кулэ ук. Чечняын югдур матысь дыре тупатскоз шуыса оскыны шуг. Москвалы матын луись кивалтӥсьёс но одӥг кыл шедьтыны уг быгато. Тани чечен милиционеръёслэн кивалтӥсьсы Бислан Гантамиров ивортӥз, республикаысь администрацилэн кивалтӥсеныз Ахмад Кадыровен азьланьын ужаны уг меды ни шуыса. Республикаямы ӝоген президентэ кандидатъёсты пусъён йылпумъяськоз. Татчыозь регистрациез ортчизы ньылез: П. Вершинин, В. Забильский, А. Солуянов, Н. Ганза. Ю. Александрова. Кивалтӥсьёс калык пӧлын Котькытчы мын - юрттэт уз мыль Сарапулэ нуись асфальт сюрес валлин кыстӥськись бусыосы я шунды сиос сузьтӥсько, я зор шапыкъёс кисьтӥсько. Ас поннам малпасько, инкуазь юри исам каре, дыр, гурт удысын ужасьёсты: оскон но сётэ бусы ужъёсты ыштонъёстэк йылпумъянлы, бере кылисьёссэ кышкатыны но выре. Бен, гуртын улӥсьёс понна кысык вакыт бырымтэ на. Правительстволэн Тӧроез Николай Ганза соин валче азьланьтӥз республикаысьтымы ёросъёсын но гурт хозяйствоосын тодматсконзэ. Кылем четверге Сарапул ёросысь Сигаево черкогуртын ортчиз Сарапул, Вотка, Завьялово, Каракулино, Кияса, Камбарка ёросъёсысь гурт хозяйствоослэн кивалтӥсьёсынызы но ёрос администрациослэн тӧроосынызы кенешон. Азьло сямен ик татын бадӟым саклык висъямын вал бусы ужъёсты азинтонлы, ёросъёслэн толэз пумитаны дасяськонзылы но электроэнергия понна пунэм тыронъёссылы. Кенеше люкаськон азьын, Правительстволэн Тӧроез тодматскиз ёросысь "Нечкинское", "Россия" хозяйствоосын, Фрунзе нимо колхозэн. Кенешиз та соослэн кивалтӥсьёсынызы, специалистъёсын, пумиськылӥз ужасьёсын. Быдэс республикамы сямен ик, та хозяйствоос но шуг-секытъёслэсь палэнэ кылемын ӧвӧл. Куд-ог ужпумъёсъя Николай Ганза юрттыны басьтӥськиз. Тани "Нечкинское" кооперативысь одӥгаз отделениын шур вамен выжзы куашкамен, трос шуг-секытъёс кылдӥллям. Нош Фрунзе нимо колхозын ужасьёс дас одӥг толэзьзэ уждун басьтыны уг быгато ни. Ужасьёс татын 140 мурт, нош уждунъёссы 300-400 манет пала. Николай Алексеевич оскытӥз, матысь нуналъёсы ик ужасьёслы висъямын луоз 32 сюрс манет тыр кредит коньдон. Гурт удысъя "Россия" кооперативысь кивалтӥсьёсын но специалистъёсын вераськон чурытгес мынӥз. Йӧл кысконъя но, ю тысь басьтонъя но хозяйство азинлыко ужа, Голландиен кусып тупатыса картофка будэтэ, вань колбаса поттон но вӧй шуккон цехез. Озьы ке но, азьлане вамышъёс уг адӟисько, шевыряловоос нефтяникъёслы пунэм тыронъёс пӧлы выемын, шуыны луоз. Малы сыӵе югдур кылдӥз? Та ужпумез Николай Ганза пумаз-йылаз вуттыны куриз гуртысь специалистъёсты, ёрос администрацилэн тӧрозэ но гурт удысъя министрез. Шевыръяловоын озьы ик секыт югдур кылдэмын газ кысконэн, школае шуныт сётонэн. Специалистъёслы ӵектэмын та ужпумез но сэрттыны-пертчыны. Нош школалэн 100 ар тырмонэзлы Правительстволэн Тӧроез коньдонэн юрттыны оскытӥз. Котькытчы мын, коньдонлы но юрттэтлы мычем киос трос. Соиз бен валамон, куашкам улонмес кышъяны но кышъяны кулэ. Но Николай Алексеевич гуртоослы асьсэлы но маза уг сёты, утчаськыны, ужаны косэ. Вамышен-вамышен азьлань мынонлэн пайдаез одно ик адӟиськоз, шуэ со. Нош коньдонэн юрттэм пыдэстэм бекчее выллем медаз усьы, мар ке борды басьтӥськемлэсь азьло ваньзэ лыдъяно-чотано. Пайдаё вал ёрос администрациослэн но гурт хозяйствоослэн кивалтӥсьёсынызы кенешон. Ю тысь октон тросаз хозяйствоосын йылпумъян пала ке вуэмын, бусы ужъёс азьланьтӥсько на - со гырон-кизён, картофка октон. Вань ужъёсты йылпумъян понна, куать ёрослы кулэ луоз на 680 тонна пала эстӥськон. Правительствоын ужасьёс гурт ужасьёслы та ласянь юрттыны дась. Кенешын ӝутэмын на вал мукет но ужпумъёс. Николай Ганза люкаськемъёслы вераз республикаысьтымы промышленность но экономика удысын кылдэм югдурез, юанъёслы валэктонъёс сётӥз. Гурт хозяйствоослэсь кивалтӥсьёссэс туннэ нуналэ туж сюлэмшугъяськытэ поттэм ваньбурзэс рынок пыр вузаны луонлык. Липеттэм, кынтӥсь оборудованитэм интыосын вузкарыны алонъя постановление улонэ пыӵаз ке, нош ик гуртоос секыт югдуре сюрозы - поттэм сиёнзэс вузан сюрес трослы сюбегалоз. Правительстволэн Тӧроез та ужпумез эскерыны но пайдаё амалъёс утчаны косӥз гурт удысъя министерстволы. Правительстволэн Тӧроезлы юанъёс сётэмын вал ядерной жуг-жагез республикаямы интыян пумысен но. Та ужпумъя Николай Ганза валэктӥз, со, пе, иворез вӧлмытӥсь ёзъёс пыр юнме кыл вӧлдон. Талэсь азьло сое пыкылӥзы ни вал юыны яратэ шуыса, собере олигархъёсын кусып воземзэ синйылтӥллям. Кинлы? Нош оскытэк улыны туж секыт. Л. Малых. Кылдоз егитъёслэн огазеяськемзы 5-тӥ октябрьысен 8-тӥ октябрёзь Ижын ортчоз пӧртэм выжыосысь егитъёслэн огазеяськемъёссылэн ӧтчамзы. Люкаськонлэн мугез таӵе: Россиын кылдытоно Егитъёслэсь ассамблеязэс. Со мед юрттоз пинал муртэ таӵе секыт вакытэ утьыны, иворъёсын тырмытэм дунне кылдытыны. Со сяна, ӧтчаме лыктэмъёс тодматскыны быгатозы удмурт егитъёслэн "Шунды" огазеяськемзылэн ужаменыз (туэ со кылдэмез дырысен дас ар тырмемзэ пусъе ни). Ӧтчамлэн кыкетӥ нуналаз калыкез ӟечкылалозы Удмурт Элькунысь Кун Кенешлэн Тӧроез Александр Волков, Удмурт Кивалтэтлэн Тӧроез Николай Ганза. Адямилэсь асваланзэ ӝутонын егитъёслэн интызы сярысь мадёз Россиысь Калыкъёслэн ассамблеязылэн кенешезлэн тӧроез Р. Г. Абдулатипов. Со сяна, нимысьтыз вераськоз Россия Федерациысь Кун Думалэн депутатэз С. К. Смирнова. Та нуналэ ик кутэмын луоз Россиысь Калыкъёслэн ассамблеязылы вазиськон. Ӧтчамлэн куинетӥ нуналаз ужалозы культурая, тодон-валанъя, инкуазез утёнъя, шутэтсконъя секциос. Лэсьтэмын луозы йылпумъянъёс. Собере вань люкаськемъёс пусъёзы удмурт егитъёслэн "Шунды" огазеяськемзылы дас ар тырмемез. Е. Ромашова. Яр палъёсын но улон пӧзе Удмурт Республикаысь Кун Кенешлэн Тӧроез Александр Волков шаерысьтымы ёросъёслэн улон-вылонэнызы тодматсконзэ азьланьтэ. Кылем четверге со но мукет вылӥ кивалтӥсьёс потазы Яр палъёсы. Ёрос одӥгез самой пыдлосез луэ. Отчы вуон понна ог куинь час дыр быре. А. Волков но соин ӵош мынӥсь адямиос нырысь кожазы Глазов районысь "Чура" акционер огазеяськонлэн сӥльлэсь но йӧллэсь сиён-юон поттонъя цехъёсаз Соосты возе "Удмуртэнерго" АО. Солэн генеральной директорез Юрий Боровик луэ Кун Кенешлэн Яр ёросъя быръем депутатэз. Александр Волковен пумиськон ортчытӥзы Чураысь дышетӥсьёс. Соос куро улон интыос тросгес лэсьтыны, культура юртэз пумозяз вуттыны. Улон-вылон пумысен кенешонъя олокыӵе но ужпумъёс ӝутскизы. Кылсярысь, вылӥ кивалтӥсь бадӟым саклык висъяз егит специалистъёслы корка пуктыны ӧжыт процентэн коньдон висъянлы. Республикаямы та ласянь кызь арлы 7 процентэн ссуда сётыны чакламын. Кызьы верамы ни, та гуртын кык цех ужа. Но со кужымзэ ӝынылы гинэ кутыны быгатэ, уггес тырмы сӥль но йӧл. Но со понна кулэ ватсаса музъем. Кенешемын бускель хозяйствоослэсь куштӥськем музъемъёссэс басьтыны. Ватсаса 2 сюрс гектар бусыос кулэ луозы. Тросэз ӝожтӥсько техника тырмыт висъян пумысен. Кивалтӥсьлэн верамезъя, Россия матысь дыре та ужпумъя али нимысьтыз постановление дася. Отӥяз сюрес вуттӥз Яр районысь Байдалино шор ёзо школае. Со ёросысь одӥгез вашкала школа, сылэ ни 43 ар. Со куашкамын ини, ӧвӧл спортъя залэз. Александр Волков школа пуктыны коньдон висъяны кыл сётӥз. Та палан тодмо луэ "Харви-Яр" предприятие. Со ужа кунгож сьӧрысь инвесторен, поттэ нюлэс продукция. Туэ ӝыны ар ӵоже отын 8577 сюрс манетлы вуз поттэмын, барышез луиз 130,5 сюрс манет. Шоро-куспо уждун вуэ 1387 манетозь. Кылем арен ӵошатыса отын ужасьёслэн лыдзы 3 поллы йылӥз. Александр Александрович Америкаен ӵош ужась препдриятилэн ужамезлы туж вылӥ дунъет сётӥз. Удмуртиын али 150 пала йылаз-пумаз вуттымтэ объектъёс лыдъясько. Со школаос, больницаос, культура юртъёс. Укмыстонэтӥ аръёсы кутскем лэсьтӥськон куашказ коньдон тырмымтэен. Озьы луиз Ярысь больницаен. 1992-тӥ арын со липет улэ пыртыны дась ни вылэм. Александр Волков кыл сётӥз больницаез 2002-тӥ арын усьтыны. Озьы ик коньдон висъяськоз выль туала оборудование басьтыны. Уйпал районъёслы партия кивалтон вакытэ котьку но коньдон ӧжытгес висъяськылӥз, малы ке шуоно, отын нянь уггес удалты. Кун Кенешлэн Тӧроез оскытӥз, та пумысен ужпум воштӥськоз шуыса. Та палъёсын ичи саклык висъяськиз сюресъёсты лэсьтонлы но. Нош кыӵе бадӟым шумпотон ваиз Яр но Юкаменск районъёсы сюрес. Сое усьтон пӧрмиз бадӟым праздниклы. Дас иськем сюресэз усьтонэ ветлӥз кыкысьтыз ик ёросъёсысь калык. Созэ но вераны кулэ: Яр палъёсын сюрес лэсьтон пумен азинске. Ӝоген ёрос герӟаськоз Киров ёросэн, асфальт вуоз мукет гуртъёсы но. Районлэн улоназ бадӟым инты басьтэ вал Пудемысь листопрокатной завод. Со усьтӥськиз ини 1759-тӥ арын. Посёлок со чотын гинэ возиськылӥз. Предприятие уноен поттылӥз нянь пыжон формаос, мукет вузъёс. Со арбериосты басьтӥсь луымтэен, завод чылкак пытсаськиз вал ини, уно адямиос ужтэк кылизы. Табере кивалтӥсьёс ужан удыссэс воштоно кариськизы. Лэсьтыны кутскизы гаражын машинаосты ӝутъян техника, яке подъёмникъёс. Озьы выль интыос но кылдӥзы. Директорезлэн Вячеслав Алексеевлэн верамезъя, завод матысь дыре уката кужмоялоз. Калыкен ваче пумиськон возьматӥз - улон интыысьтыз вырӟиз, оскон вань, улонмы пумен умоялоз шуыса. Н. Байтеряков. Удмурт Республикаысь Правительстволэн Тӧроезлэн ивортонэз Республикаысь ивор вӧлмытӥсь ёзъёс берло дыре мон вылэ но монэным кивалтӥськись Правительство вылэ юн алдаськонъя но кыл вӧлдонъя бадӟым уж ӝутӥзы. Монэ янгыш каро пӧяськыса, нокыӵе нимаз учыръёсты вератэк. Мон официальной амалэн ивортӥсько: олигархъёсын но Березовскиен кусыпъёсы воземе сярысь, ядерной жуг-жагез Удмуртиын ватонлы дурбасьтэме сярысь веранъёс зэмесь ӧвӧл. Ядерной жуг-жагез ватон пумысен супыльтонэз ӝегатскытэк умойтэмен лыдъяны кулэ та алдаськонэ пыриськем ваньмыз ивор вӧлмытон ёзъёс. Сыӵе ужрадэз радъясьёс но отчы ёрсаськемъёс валаны кулэ макем умойтэм лэсьтэмзэс. Ядерной жуг-жагез ватон сярысь быдэс республика тыр эрекчаськон юн люкетэ адямиослэн каньыл улон- вылонзылы. Солэн мугез одӥг гинэ - республикаын югдурез шуге-леке вуттон. Мон, Удмурт Республикаысь быдэсъясь (исполнительной) властьлэн йырыз, эшшо огпол ивортӥсько: ядерной жуг-жагез республикалэн улосвылаз (территорияз) ватон яке солы татын переработка лэсьтон кышкытлык ӧвӧл. Правительство та ужпумъя ноку но решениос уз куты, калыклэсь ватӥськыса. Вылаз ик, 1994-тӥ-2000-тӥ аръёсы Удмуртилэн улосвылаз утиськись радиоактивной материалъёслэн лыдзы 30 процентлы кулэсмиз. Вань гражданъёсты мон курисько сюлэмшугъяськытэк улыны. Нош Удмурт Республикаысь Правительство вань кужымзэ сётоз, та алдаськись иворъёсын сэрен бугырскем умойтэм мылкыдъёслэсь бервылъёссэс быдтон вылысь. Удмурт Республикаысь Правительстволэн Тӧроез Н. А. Ганза. 2000-тӥ арын 11-тӥ сентябре. Дас куинь муртлэн ӵектонэз Та ужпумлы кутскон сётэмын ог укмыс ар талэсь азьвыл. 1991-тӥ арын 19-тӥ декабре кутэмын "Котырысь инкуазез утён сярысь" РСФСР-лэн 2060-1 номеро Законэз. Законысь 50-тӥ ёзэт (статья) сӥземын радиоактивной материалъёсты уже кутонын инкуазез утёнъя куронъёс сярысь. Сыӵе веществоосты дасянъя, утёнъя, нуон-ваёнъя, уже кутонъя, кылем-мылем жуг-жагез люканъя, нуллонъя но ватонъя куронъёсты быдэсъяны кулэ предприятиос, учреждениос, организациос, гражданъёс. Озьы куре 50-тӥ ёзэтлэн нырысетӥ люкетэз. Кыкетӥ люкетын вераськон мынэ куронъёсты тӥясьёслэсь кылзэс юан сярысь. Куинетӥ люкет вера: радиоактивной жуг-жагез но материалъёсты утён но ватон вылысь мукет кунъёсысь вайыны, выйтыны, ватон вылысь космосэ келяны лэземын ӧвӧл. Уно музон законъёс сямен ик, таиз но отӥяз кӧня ке вужмиз. Отчы воштонъёс пыртэмын 1993-тӥ арын 2-тӥ июне. Нош улон косэ, лэся, Законэ эшшо выльдонъёс гожтыны. Федеральной Собранилэн вылӥ палатаысьтыз Федерацияя Советысь - как депутат но улӥ палатаысьтыз - Кун Думаысь - дас одӥг депутат дэмлаз 50-тӥ ёзэтэ ватсан пыртыны. Маин сэрен? Россиын но дуннеын атомной энергетика азинскемен валче, ядерной реакторъёсысь шуныт висъясь арбериосты огдыре утёнын но переработка лэсьтонын право ласянь тупамтэос кылдӥзы. Законэ ватсан лэзьыны кулэ сыӵе арбериосты Россие вуттыны. Зэм, вайыны луоз сыӵе учыре гинэ, куке радиация ласянь огъя кышкытлык кулэсмоз. Нош весяк утён но ватон вылысь ядерной жуг-жагез Россие пыртыны азьвыл сямен ик уз лэзе. Таӵе ужпумен валче кылдэм документъёс пӧлын вань "Валэктӥсь гожтэт" нимоез но. Со нырысь ик вера экономика ласянь басьтоно пайда сярысь. Матысь аръёсы ик Россие вуоз ог 20 миллиард доллар. Со быдэсак уз мыны ядерной эстӥськонэн ужанэз радъяны. Валюта юрттоз Россилэн пӧртэм сэрегъёсысьтыз лэчытэсь ужпумъёсты быдэсъяны. Ужпум кӧня ке пол эскеремын Россиысь Минатомлэн Наукая но техникая советаз. Пусъемын: кунгож сьӧрысь ваёно радиактивной арбериосын ужан ласянь Россиын вань опыт но, кадръёс но, наука но, техника но. Тӥни сыӵе валэктон улэ кизэ нюртэ дас куинь мурт. Пӧлазы Федерацияя Советлэн членэз, Удмурт Республикаысь Правительстволэн Тӧроез Николай Ганза но Кун Думалэн депутатэз, КПСС-лэн ЦК-езлэн азьвыл кыкетӥ секретарез Егор Лигачёв. 50-тӥ ёзэтэ ватсан пыртон бордын ужа Федерацияя Советлэн Наукая, культурая, дышетонъя, тазалыкез утёнъя но инкуазез утёнъя комитетэз. Ужпум туэ 18-тӥ июле учкемын Кун Думалэн Советаз но. Отын кутэмын таӵе решение: вылӥ верам депутатъёсын дэмлам законлы проектэз эскерон вылысь ыстоно Россия Федерацилэн Президентэзлы, Кун Думаысь комитетъёсы, комиссие, депутатъёслэн огазеяськонъёсазы, Федерацияя Советэ, Россия Федерацилэн субъектъёсысьтыз кун властьлэн закон кылдытъясь ёзъёсаз, лыдэ басьтоно ӵектонъёсты но дэмланъёсты. Вакчияк вераса, 50-тӥ ёзэтысь 3-тӥ люкетэ яке ватсан пыртозы, яке, сое исатэк, 50-тӥ ёзэтэ ик 4-тӥ люкет гожтозы. Со луонлык сётоз мукет кунъёсысь Россие огдырлы утён но (яке) переработка лэсьтон вылысь вайыны ядерной реакторъёслэсь шуныт висъясь арбериоссэс. Трос мадьыны луысал законэ ватсан пыртонэн валче калыкез кышкытлыклэсь оскымон утись ужрадъёс сярысь. Но... СССР-ысь Наукаосъя академилэн президентэз академик-физик А. П. Александров, ядерной реакторез кылдытӥсь, кӧня пол вералляз: асьме реакторъёс дуннеысь тужгес оскымонъёсыз. Ӵапак солэн проектэзъя дасям энергоблок Чернобыльын 1986-тӥ арысен пуштӥз. Толон-валлян гинэ Челябинск дорысь "Маяк" огазеяськонын, электрокужым сётонын вис луэмен сэрен, ӧжыт гинэ кышкыт учыр ӧй вал. Тодады ваелэ ай Италиын дасям "Спрут" фильмез. Кӧня ке муртъёс малпазы огаз шормуӵе лушкемак интыяны ядерной жуг-жагез. Комиссар Каттани сак кариськемен, быдэс кун ӝутскиз умойтэм ужлы пумит. Асьмеды уз утьы комиссар Каттани. Асьмеды уз утьы сое шудӥсь актёр Микеле Плачидо. Асьмеды утём асьмеос! Глаз палась иворъёс Варзи-Ятчиын шутэтскозы Котькуд ар ёросысьтымы калыклы юрттэт сётонъя отделэ ӧлексы нылпиослы санаторийёсы путёвкаос висъяськыло. Таяз учыре быдэс районъя Варзи-Ятчи санаторие куинь путёвка сётэмын. 6-тӥ сентябрьысен ӧлексы нылпиос мумы-бубыосынызы 12 нунал ӵоже тазалыксэс юнматыны быгатозы. Пиналъёслы путёвка дунтэк усе, нош анайлы яке атайлы ог ньыль сю манет усе. Дышетскисьёс ичиёмо Вуиз выль дышетскон ар. Районъя нырысетӥ классын 203 нылпи парта сьӧры пуксиз. Нош дас одӥгетӥ классын дышетскисьёс ичиёмизы - 172 гинэ. Кызьы тодмо, арысь аре школаосын дышетскисьёс ичигес но ичигес луо. Егит кузпалъёс нуны вайыны уг дырто. Талы мугез но вань: семьяысь кудӥз ке но ужтэк пуке, собере уждунзэс но дыраз уг тыро. Оглом вераса, туала нылпимы семьялы туж дуно усе. Тани, кылсярысь, Дондыкар шор ёзо школаын нырысетӥ классэ одӥг гинэ дышетскись лыктӥз. Нош самой тросэз Понино шор ёзо школаын - 26 нылъёс но пиос тодон-валан дуннее вуизы. Куанер семьяослы юрттэт Карын учётын 218 начар улӥсь семьяос лыдъясько. Верам потэ, ваньмыз дуно луэмен, трос нылпиё семьяос но ичигес луизы ини. Кылем арын соос быдэс городъя 688 вал, туэ - 517. Карысь администрация сыӵе семьяослы пичильтык ке но юрттэт сётыны турттэ. Тани мумы-бубыослы туж умой ивор, туэ администрацилэн кыл кутэмезъя, семьяын куинь яке тросгес нылпи ке, музыкальной, художественной школаосын, искусствоя школаын но мукетъёсаз дышетскемлэсь ӝыны дунзэ гинэ тырозы, кылемез кар бюджетысь мыноз. Озьы ик школаосын трос нылпиё семьяосысь пиналъёс сиськемзы понна витьтон процентсэ гинэ тырозы, нош кулэяськись семьяысь пиналэз дунтэк сюдозы. Озьы ик бадӟым семьяысь дышетскись мынӥсь-ветлӥсь транспортлы витьтон иськемозь дун тырытэк ветлыны быгатэ. Дискотекатэк кылизы Электрокужым ке луиз, гуртын шунытэз но, югытэз но луоз. Тани кык арня пала ини Люм гуртысь клубын тыл кысэмын. Егитьёс кык субботаосы яратоно дискотекаязы потаны ӧз быгатэ. Нош 28-29-тӥ августэ таӵе ик учыр гурт администрациез но витиз. Электрокужым понна уксё тырымтэ. Нош ёрос библиотекаын 3-тӥ арнязэ тылтэк пуко. Ку Ильичлэн лампочкаосыз югыт сётозы, тодмо ӧвӧл. Ярам, коть гурт калыклэсь ӧз кысэ. Собере али сокем пеймыт но уг луы на. Вашкала город пиналме 9-тӥ сентябре Глазов вадьсын быдэс нунал шунды пиштӥз. Нош талэсь азьло бӧрсьысь кык нунал городэз зор миськиз: оло глазовъёслэсь сьӧлыкъёссэс гылтӥз, оло - праздниклы шуыса, тузонлэсь чылкытатӥз. Озьы-а, тазьы-а, но городзылэсь нуналзэ пусйыны Глазовын улӥсьёслы удалтӥз. Куазен гинэ ӧз, трос ӟеч кузьымъёсын шумпоттӥзы угось соосты городзылы 322 ар тырмонэн валче. Таяз арын йылаз-пумаз вуттэмын но вож тыл ӝуатэмын городысь чугун сюрес но автобус вокзалъёсы нуись сюресъёслы. Табеер мынӥсь-ветлӥсьёслы кыдёкетӥ котыръяськоно уз луы ни. Городлэн нуналэзлы выль тупатэм сюресъёстӥ кык автобус лэземын. Выльдыны кутскемын городысь Свобода шор площаде нуись сюрес. Выльмиз Яре-Кирове нуись сюреслэн оглюкетэз но, тазэ лэсьтӥськонэз ас вылаз басьтӥз "Удмуртавтдор". Нош Адам посёлоке нуись сюресэз, Хутор посёлокысен Солдырь гурезёзь, синйылтыса возиз Кун Кенешлэн Тӧроез Александр Волков. Август толэзь ӵоже тупатъян-выльдон ужъёс йылпумъямын вал. Мукетыз кузьым шумпоттоз одӥг аресозь нылпиен анайёсты. Таяз арын 1-тӥ апреле городысь санитарно-эпидемиологической служба ворсаз вал вож нуныослы йӧл сиён дасясь кухняез. Оборудование вужмемен, нылпи сиён улӥ ӟечлыкен дасяськиз. Кухняез выльдон-тупатъян понна уно сюрс коньдон нош городысь бюджетлы со матысь дыре вормонтэм вал. Глазовысь администрацилэн куронэзлы вазиськиз акциосын "Оскон" огазеяськон (президентэз П. И. Касаткин). Вакчи дыр куспын со дасяз но ужатӥз выль оборудованиез. Республикаосысьтымы Кун Кенеш та ужъёслы 200 сюрс манет коньдон висъяз. Вож нуныослы сиён дасясь кухня Городлэн нуналаз выльысь усьтӥз ӧсъёссэ. Городысь тужгес но пичиосыз улӥсьёс кӧтсэс тырытозы ни дунтэм но ческыт лёлёен. Матысь нуналъёсы соослы сётозы на кефир но кисьтэм йӧл. Нылпиослы кухняез усьтонэ пыриськиз Кун Кенешлэн Тӧроез Александр Волков, Глазов городлэн мэрез Владимир Перешеин, озьы ик республикаысьтымы но городысь мукет вылӥ кивалтӥсьёс. Нош кызьы уд шумпоты загслэн юртэзлы. Пушкытӥз ортчыса, синъёс ик мальдо, егитъёслэн амалтэк татчы вамыштэмзы потоз табере. Городысь художник-дизайнер Михаил Шикалов аслэсьтыз быгатонлыксэ жалямтэ. Но таӵе кузьымез кемагес ик возьмано луиз глазовъёслы. - Выльдон-тупатъян ужъёс куинь но ӝыны ар кыстӥськизы, - шуэ загсэн кивалтӥсь Нина Ардашева. - Нош кузпалъяськисьёс милям трос, араз 500 пала выль семья кылдэ Глазовын, ёросысь но дорамы вазисько. Табере алӥсь-кутӥсь ӧвӧл ни, кудаз загсын гожтӥськемед потэ, отчы ик вазиськы. Малпасько, уй пал ёросъёсысь егитъёслэн но ми доры лыктыны мылкыдзы кылдоз. Но ваньзэс кутыны луонлыкъёсмы луозы меда? Зэмзэ но, нылпи сиёнэн капчигес луиз, загс чебереныз мальдытэ Александр Волковлэн верамезъя, таяз арын йӧл сиён сёто ке одӥг аресозь нуныослы, азьланяз со чакламын луоз кык аресозь покчиослы но. Анайёслы но нылпиослы юрттонъя республикаямы кутэм программаез улонэ пыӵатыса, куинь ар куспын Глазовын пуктэмын луоз роддом. Кин тодэ, семья кылдытыны но нылпи вайыны мылкыд карисьёс уй пал городын, оло, тросгес луозы? Глазовысь загс ӧсъёссэ сӥё-дано усьтӥз 8-тӥ сентябре, выльдэм юртын кылдӥз нырысетӥ выль семья. Нош Городлэн нуналаз черод вал ни. Михаил Белослудцевлы но Оксана Волковалы удалтӥз, шуыны луоз. Анай-атайёссы, ӵыжы-выжыоссы но эшъёссы сяна, соосты ӟечкылазы Кун Кенешлэн Тӧроез Александр Волков, Глазов городлэн мэрез Владимир Перешин, город думалэн кивалтӥсез Александр Микрюков... Кинлэн сюан, нош кинлэн карнавал, эктон, кырӟан, шулдыръяськон. Зол ик дасяськиллям глазовъёс городзылэсь нуналзэ пусйыны. Со бордысь но адӟиське городзэс яратэмзы, соин данъяськемзы. Карнавал костюмъёсын дӥсяськем пиос но нылъёс, урамъёсты шулдыртыса, стадионэ люкасько праздникез сӥё-дано усьтонэ. Татын ик асьсэлэсь быгатэмзэс возьматӥзы усточи нылпиос, самодеятельной коллективъёс. Городысь кивалтӥсьёс сяна, Глазов калыкез праздникенызы ӟечкылазы республикаысьтымы Кун Кенешлэн Тӧроез Александр Волков но Правительстволэн Тӧроез Николай Ганза. Люкаськем калык шумпотыса пумитаз городлэсь та аре сӥё-дано луэм адямизэ Надежда Ивановна Пашковаез, калыкез дышетон удысысь отличникез, культура юртлэсь директорзэ. Радъямын вал пӧртэм конкурсъёс, усточиослэн ужъёсынызы, будэтэм бакча сиёнъёсынызы выставкаос-вузкаронъёс. Одӥгаз сэрегын сизьым пӧртэм выжы калыкъёслэн пӧрамъёсынызы тодматскон ортчиз. Отчы пыриськизы Александр Волков но мукет вылӥ кивалтӥсьёс. Лыктэм куноосты ваньзылэн ик ческыт пӧраменызы, кудӟытӥсь юонэнызы утялтэмзы потэ. Асьсэос пумен экто-кырӟало. Город урамъёстӥ ортчыны но Кун Кенешлэн Тӧроезлы маза уг сёто, китӥз ик ӟечъяськемзы потэ. Дӥсьтӥсьёсызгес егит пиос но нылъёс автографсэ куро. Кин кытчы гожтӥськытэ - пиво бутылка вылэ, манетлыкъёссы, одӥгез витьтонлыксэ но ӧз жаля. Та нуналэ городэн тодматскыны луэ вал фотохудожниклэн Александр Ардашевлэн "Мынам городэ" выставкаяз. Фотографиосын возьматэмын республикаысьтымы но Глазовысь тодмо адямиос, инкуазь, городлэн тусыз. Выставкаен тодматскон дыръя город думалэн кивалтӥсез Александр Мюкрюков серекъяса шуиз: быръёнъёс вакытэ кинлэсь туспуктэмзэ лэсьтӥз Александр Ардашев, ваньмыз луизы город думалэн депутатъёсыз. Александр Волков озьы ик серекъяса сямен, оло, пе, мыным но туспуктэме пуксёно. Нимаз пуксемзэ ӧй синйылты, но лыктэм куноос но городлэн кузёосыз огъя туспуксеме пуксизы. Со нош ик пыроз городлэн историяз. 18-тӥ даурын Вятской губерниын кылдэм город 19-тӥ дауре но номырин ӧз висъяськылы. Тодмо ӟуч писатель В. Г. Короленко Глазов сярысь шуиз вал: "Зэмос кар со ӧвӧл" Али озьы шуыны нокызьы уд дӥсьты. Глазов ӝутске, выльдӥське но пиналме. Л. Малых. Велосипедэз потто ижъёс но "Ижмаш-Мото" акционер огазеяськонын уждун понна тыронъёссэ, берыктӥзы велосипедъёсын. Бен-бен, татын но кутскизы велосипед бичаны. Калыклы та пичи машинаос туж кельшизы. Велосипед поттон пумысен вераськон кемаласен кылӥське ни вал. Уго мотоцикллы дунъёс будэмен та вузэз басьтӥсь кулэсмиз. Соин ик машина "лэсьтӥсьёс" выль арберилэсь лэсьтыны басьтӥськизы. Валтӥсь инструкторлэн отделаз дасязы "Викинг" велосипедлэсь модельзэ. Татын бадӟым уж лэсьтӥз участоклэн кивалтӥсез, азьвыл тодмо велосипедист Юрий Харин но валтӥсь конструктор Александр Перевозчиков. "Викинг" огшоры велосипед, чакламын огшоры сюресъёстӥ ветлыны. Но дизайнеръёс солэсь вылтуссэ воштон бордын ужало ни. Н. Никитин. Италиысь куно Алигес Можгалась ожчиосты тодэ ваёнъя "Набат памяти" музейын ортчиз туж паймымон пумиськон. Со сӥземын вал Италиысь священникез Антонио Читачиез пумитанлы. Маин бен тунсыко луиз асьмелы туж кыдёкысь 81 аресъем куно? - Тӥляд шаерды мыным сокем ӧй кельшысал ке, мон куинетӥзэ татчы ӧй высал ни, - шуиз со. - Можгала нырысьсэ мон вуылӥ 1995-тӥ арын, Обороная министерство пыр вынме кытчы ватэмзэс тодэме бере, кудӥз Быдӟым Отечественной война дыръя пленэ шедем но 1944-тӥ арын городысьтызы госпитальын кулэм, нош ватӥллям сое немецъёслы нимаськись шайгуэ. Табере отын бырем пленнойёслы мемориал ӝутэмын. Антонио Читачи куинетӥзэ ни бырем вынызлы йыбырттӥз но Можгалась эшъёсыныз пумиськиз. П. Николаев. Финн-угор писательёслэн ВИ калык куспо ӧтчамзы Масторава - зумыто му Югыт шорын (Кутсконэз газетмылэн 112-тӥ номераз.) Ӝыт синкынёнлы гинэ вуим бере, ӵукна синъёс паськытгес усьтӥсько. Кунокуа- ысь-гостиницаысь ньылетӥ этажысен Анна Сергеевна учыртӥз: - Учкы ай, урамын адямиос кыӵе гань-гань, дыртытэк ветло. Уж дуре бызисез ик ӧвӧл, тӥни огез гинэ... - Зэм но, - шуисько, - машинаос татын ӧжыт. Асьме Ижевскен уд ӵошаты. Саранск олокыӵе бадӟым город ӧвӧл, улӥсез 300 сюрслэсь уногес. Калыкез нуо-ваё троллейбусъёс но автобусъёс, трамвайзы ӧвӧл. Гужем город вашкала туссэ писпуос сьӧры ватэ, котыр сяськаосыныз палёмытэ. Огкабен пуктӥськись выль микрорайонъёс но татын вань, но таоссэ адӟыса ӧм вуэ. Вуоно арын Мордовилэн шоркарез 360 арессэ пусъёз ни. Нырысь-валысь со вылэм Россия кунлэсь лымшор пал кунгожзэ утись крепость. Сара шурлэн Инсар шуре усён вожаз нюро-кото интые пуксемез бордысь потэмын городлэн нимыз. Тодосчиос озьы но, тазьы но валэкто. Куд-огез шуо, крепостьлэн нимыз пӧрмем Саразгурт шуэм бордысь (сараз - курег, куро - люкаськон инты.) Урамын "пыдесозь дэри" шуыса кылем дауре гожъямзы осконтэм кадь потэ. Нош "милям городмы улын быдэс зарезь, вумес хлоркаен суратэк юиськом" шуэмзылы оским. "Вуын фторез трос, соин ик водкамы но, мукетыз но умой пӧрме", - таизлы но оскытэк ӧйлась. (Ма, "Толстяк" сурез но кин ке тодӥсьтэмез вань меда?") Ӧнерчиослэн но вузчиослэн карзы синмаськымон, узыр город луиз Совето власть аръёсы, мордва калыклы автономия сётэмзы бере. Эрзя но мокша калыклэн улонэз югдытскиз, дышетон, культура азинскемен, театр, литература кылдэмен. Промышленность ас выжыоссэ мур но мур лэзиз. Ӝутскизы дасоосын заводъёс. Табере татын потто ини электролампаос, пӧртэм пумо кабель, полупроводникъёс, выпрямитель-агрегатъёс, автосамосвалъёс, экскаваторъёс, железобетон, резина, антибиотикъёс... Югдытӥсь арбериос лэсьтэмезъя, Мордовия Россилэн шорсюлмыз луэ, "Лисма" фирмазы быдэс дуннелы тодмо. Кухняын ужаны комбайн ӧйтӧд... Но чеберак люстра ке но басьтоно вылэм. Яке мордва узорен ӵушконзэс... Таӵе жалян мылкыдмес, ӝыныё кошконмес тодыса- ятвылтыса кадь, котькудмылы дасяллям бадӟым пуйыосын кузьым: отын, ушъяно юонзы сяна, вал "Ламзурь" шоколадэз но "Все о Мордовии" бадӟым книга - энциклопедия-справочник. Татысь, Мордовие ветлытэк но, котьмае тодыны луэ. Нош ас синмыныд адӟемдэ маин ке воштод шат? Азьпалан вал ай бадӟым ужан нунал. Трос тодод - шудо луод Финн-угор кунъёсысь гожъясьёс-литераторъёс 58 кузя люкаськизы (ӧтемын вылэм 80 мурт). Куноятылӥзы Республикалэн юртаз (со борды бадӟымесь букваосын "Глава республики" гожтэмын). Нош ӧтчам усьтӥськиз Госсобранилэн кенешъёс ортчытъян залаз. Депутатъёслэн дышем интыосазы микрофонъёс вӧзын тарад пукизы писательёс. Шӧдӥськиз: финн-угор гожъясьёслэсь конгрессэс вылӥ кивалтӥсьёс асьсэ ужен лыдъяло. Ӧтчамез усьтӥз Правительстволэн тӧроезлэн воштӥсез А. Пыков. Ӟечкылан кылъёс вераз, республикаысь югдурен тодматӥз Госсобранилэн Тӧроез Валерий Кечкин. Асьсэос ӧй вал ке но, ӟеч ужаны мылкыд каронъёссэс ыстӥллям Мордовия Республикалэн Йырыз Николай Меркушкин но Правительстволэн Тӧроез В. Волков. Финн-угор писательёслэн ВИ калык куспо конгрессы, шуэмын ӟачкыланазы, гожъясьёсты огазеям сяна, мед юрттоз ог выжыысь потэм кылъёсмес, искусствомес но утьыны. Литератураосмес матэ кароно, юнматоно, ог-огдэ кылысь кылэ берыкъяса, устооссэ произведениосыз дышетон программаосы пыртыса, гожъясьёслы сӥзем ӝытъёс, нуналъёс ортчытъяса. Тужгес данэ потэм адямиосмес возьматэммы луысал книгаосын серия пыр. Со понна Саранскын усьтоно Эшъяськыса ужан центр. Таӵе ӵектон сётэмын вал вылӥ кивалтэт ласянь. "Литература. Школа. Азьпал улонмы". Эскероно темаез ялӥз Финн-угор писательёслэн ассоциацизылэн кивалтӥсез тодмо эстон писатель Арво Валтон (ватсалом: быдэс дуннелы тодмо, ас кылыныз гинэ 45 книгаез потӥз ни). Асьме азьын туж бадӟым ужпум, шуиз со, ӵыжы-выжы луись кылъёсмылы, литературамылы бырыны сётоно ӧвӧл. Тросэз потоз асьме бордысь: быгатомы-а ас кылмес, культурамес утьыны. Огазеяськыса ог-огмылы юрттӥм ке, оскыны быгатӥськом: будӥсь нылпиос но сое выжыысь выжые вуттыны сюлмаськозы. Школа ке ӧз, кин утёз анай кылмес, школаын ке ӧз, кытын тодматскод ас калыкедлэн писательёсыныз. Финн-угор литературая программаез пыр-поч дасян борды али ик кутсконо ни, шуиз Мордовиысь калыкез дышетонъя министр Василий Кадакин. Та борды дэмланъёссэс мукетъёс но веразы. Писательёслэн огазеяськонзылэн кивалтӥсез Александр Доронин эрзя но мокша литературалэн кудпала азинскемез сярысь мадьыкуз пусйиз, школаын литератураез дышетон нылпиос понна шумпотонэн берытскыны кулэ шуыса. Дышетскон, пе, адямиез шудо мед кароз. Зэм, Монтень сямен: тодон-валанъёс гинэ адямиез эрико но шудо каро. Озьы будӥсь нылпилы шуд кузьмало дышетӥсьёс (куд-огез соос татчы ӧтемын вал). Марий Элын Зинаида Ермакова сямен Мордовиын Полина Алёшина нылпиосыз поэзия дуннее валтэ, ачиз но кылбуръёс гожъя, кырӟа. Тазьы ик шуыны луэ Карелиысь "мӧйы дышетӥсь но егит гожъясь" Тамара Щербакова сярысь. Со кырӟаса ик йылпумъяз ас веранзэ. Огъя сюлмаськонмы, но котькудӥзлэн сюлэм висёнэз аслаз. Б. Игнатово школаысь дышетӥсь Римма Жегалина ӝожтӥськиз, эрзя пиналъёсыз дышетыны книгаос уг тырмо, словарьёс чик но ӧвӧл шуыса. Котькытынгес ик таӵе югдур. Но... Арво Валтон верамъя, Эстониын али, советской вакытэ сярысь, куать пол уногес учебникъёс потто. Нош мар веранэз Финляндиез, кӧня соос юртто Россиысь вынлыко республикаослы, шуом, нырысь ик Кастрен общество пыр. Дышетон югдур шоры ас синмынызы мургес, лэчытгес учко учёнойёс. Мария Малькина, мокша тодосчи, котькуд кылзэ мертаса кадь, лачмыт, нод-нод вераськиз. Со шуиз: программаос, учебникъёс, хрестоматиос мордва школаын туннэ нуналлэн куронэзлы уг тупало ни, писательёслэсь-классикъёслэсь "писпу вае" интыяськемзэс выль сямен чаклано, мултэс теорилэсь, социологилэсь мозмытсконо, литературалы дышетонын выль концепция кылдытоно. Аслаз веран сузьетэз Конгрессэ лыктэм удмурт эшъёсмы пӧлысь котькудӥз, шуыны луэ, куд ке но ласянь герӟаськемын дышетон ужпумъёсын. Анна Зуева Удмурт кун университетысь ӟуч кылъя но литературая кафедраен кивалтэ, вуоно дышетӥсьёсты будэтэ. Вениамин Ившин - "Удмуртия" издательстволэн валтӥсь редакторез. Бускельёсынымы ӵошатыса шӧдӥм: асьме дорын учебникъёс, пособиос поттон кӧнялы ке умойгес радъямын. Фома Ермаков Дышетӥсьёслэсь тодон-валанзэс будэтон институтын национальной программаос дасян бордын тырше. Татын со данъяськыса вераз, Алнаш, Пичи Пурга но мукет ёросъёсмы асьсэ писательёссылы сӥзем книгаос потто ни шуыса. Егор Загребинлы но, асьме писательёслэн тӧрозылы, иназ луиз та вераськон: матысь дыре правленилэн кенешоназ эскеремын луоз удмурт кылъя но литературая учебникъёс, хрестоматиос дасян ужпум. Ӵапак та бордын, 6-тӥ-9-тӥ классъёслы удмурт литератураысь поизведениосты дэмлан, быръён, дасян бордын, али лулысь-сюлмысь тырше Виктор Шибанов. Визьнодо вераськемзэ солэсь сак кылзӥзы. Ваньмыз тодо ини: со огшоры кылбурчи, тодосчи гинэ ӧвӧл, финн-угор кусыпъёсыз инъян, юнматон ласянь со вылын бадӟым оскет, тодмо венгер литературовед Петер Домокош ас пизэ кадь сое адӟе. Та куатетӥ конгрессын Виктор Шибановез нош ик бырйизы Финн-угор писательёслэн ассоциацизылэн правленияз. Сое сяна, Егор Загребинэз. Виктор Леонидовичлэн аслаз малпан-веран радлыкез писатель но школа пумысен: - Макем тросгес писатель гожъялоз школа понна, сокем тросгес сое тодозы, лыдӟозы. Сокем бадӟымгес луоз литературалэн луонлыкез азинскыны, ӵуказе нуналлы оскыны. Та ласянь асьме литератураосыз куинь группалы люкыны луоз. Котькудаз - ас шуг-секытъёсыз. Нырысь ик, Финляндиын, Эстониын, Венгриын - ас кылзэс юн гажась кунъёсын - нылпиос уг тодо финн-угор литератураез, тае улынгес лыдъяло, библиотекаысь книга уг басьяло. Огъя вераса, американизация кутске. Со сярысь Каталин Надь умой вераз. Кыкетӥез, Россиысь коми, удмурт, мари, мордва литератураос ог-огзылы матын ке но, висъяськемын: ог-огдэ кылысь кылэ берыкъян уж пуктымтэ, нимысьтыз фонд вань, но отчы коньдон сопалась но, та палась но уг вуы. Озьы ке но, татысь школаосын классъёс усьтылэмын, дышетскон книгаос печатласько. Куинетӥез, тэтэ карись литератураос - ханты, манси, ненец, кыдёке ик кошкемын ӧвӧл карелъёс, саамъёс но - татын нырысетӥ интыын сылэ ай анай кылдэ дышетон, пужей вордӥсьёслэн нылпиоссылы школаос усьтон. Соин ик отын но татын вордскыло ӟуч кылын гожъясьёссы. Таослэсь "висёнъёссэс" умой тодэ Ева Тулуз. Литератураез дышетон принципъёсты воштоно. Зэм вераз Александр Доронин: финн- угор литература пыр пинал мурт ассэ яратыны, шудоен шӧдыны мед кутскоз. Асьмелэн классикмы - соцреализм. Озьы ке, кызьы дышетоно пиналэз, шуом, Демилэн образэз вылын (Улэм потэ"), солэсь адӟем карыса, со туала улонын ыше ке? Мукет ласянь, кызьы адӟем карод С. Матвеевлэн "шузиезлэсь" яке Л. Нянькиналэн "гетераезлэсь"? Школаын дышетон ужпумъёс котьку но герӟаськемын писательлэн дунне шоры учкеменыз. Соин ик одно кылдо ваче пумит луонъёс, тупамтэос. Но та ласянь малпанъёсме мон "Кенеш" журналэ пыр-почгес гожто ай, - ваче вераськонмес тазьы йылсано кариськиз Виктор Леонидович. (Кылемез вань на.) Мунёос куное кошкизы Та нуналъёсы Челябинскын мунё театръёслэн фестивальзы ортче. Отчы пыриське шаерысьтымы Мунё театр но. Таӵе ужрадэ коллектив кыкетӥзэ мынӥз ни. Артистъёсмы возьматозы Г. Х. Андерсенлэн "Огниво" выжыкылэзъя дасям спектакльзэс. Нош выль сезонзэ театр усьтоз 14-тӥ октябре А. Чеховлэн " Каштанка" веросэзъя пуктэм постановкаеныз. Утӥз грант Шаерысьтымы культура учреждениос дасясько республикамы кунлык басьтэм дырысен 80 ар тырмонэз пумитаны. Матысь дыре аслэсьтыз юбилейзэ пусъёз Национальной музей но. Гужем вылтӥ коллектив аслыз дуно кузьым лэсьтӥз, шуыны луоз: музей Сорос фондлэсь грантсэ утӥз. Со сӥзем калык куспо конференцияз радъянэ. Ужрад ортчоз ноябрь толэзе. Россиысь сяна, отчы лыктозы Венгриысь но Эстониысь тодосчиос. А. Апаева. Архивысь документъёсъя Удмуртия ХХ дауре 1940-тӥ ар Республика дасяське автономия басьтэмез дырысен 20 ар тырмонэз пусйыны. Промышленной предприятиосын но, гурт хозяйствоосын но социалистической ӵошатскон паськыта. Стахановлы адӟем карисьёслэн, огдыре трос станокъёсын ужасьёслэн лыдзы будэ. Ижысь андан ӵыжатон заводын ужась Е. И. Журавлёва нылкышноослы кичӧлтонэн вазиськиз, воргорон ужъёсты быдэсъяны ӧтьыса. Вазиськоназ со гожтӥз: "Музъеммы вылэ тушмон урдскыны дӥсьтӥз ке, кышномуртъёс быгатозы фронтэ кошкем атайёссэс, кузпалъёссэ но вынъёссэс воштыны..." Озьы предприятиысь нылкышноос пӧлын кылдӥзы вальцовщикъёс, дурисьёс, паровоз кранэн ужась машинистъёс, андан ӵыжатӥсьёс. Нылъёслэн-механизаторъёслэн лыдзы но йылӥз, 1940-тӥ арын 976 трактористъёс но 144 комбайнеръёс вал. 1937-тӥ арен ӵошатыса, ужазинлык 140 процентозь ӝутскиз. Шӧдскымон азинсконъёс басьтӥз связья удыс. Ваньмаз ик связья 37 ёрос предприятиосын усьтӥськизы мукет городъёсын вераськон пуктнъёс, 34-яз телеграф ужаз ни. 1940-тӥ арын июне война кутскон кышкытлык матэктэмен СССР-ысь Вылӥ Кенешлэн Президиумез "Тямыс часъем ужан нуналэ, сизьым нуналъем арняе выжон но ужасьёслэсь предприятиосысь но учреждениосысь ас мылкыд каремзыя кошкемзэс алон сярысь" Указ кутӥз. Ижысь предприятиосысь кошкисьёслэн лыдзы 3,5 пол кулэсмиз. 1940-тӥ арын шаерамы ужазы 6 вуз, Удмурт научно-исследовательской институт, 30 техникум но училище. ФЗО школаос интые ремесленной училищеос кылдӥзы. Отысь данакез дышетскисьёс удмуртъёс вал. Азинскиз но кужмояз тазалыкез утён удыс но. Шаерамы та вакытэ ужазы 224 амбулаторно-поликлинической учреждение, 45 нылкышно но нылпи консультация, трахомаез эмъясь 600-лэсь трос пунктъёс, 12 санаторий но 11 шутэтскон юрт. 1940- тӥ арын удыслы 42 миллион манет висъямын вал. Республикаын печатласькизы "Удмурт коммуна", "Удмуртская правда", "Егит большевик", "Дась лу!" газетъёс, "Молот" журнал. Озьы ик потӥзы ёрос газетъёс удмурт но ӟуч кылын. Искусствоез гажасьёс понна усьтэмын ни вал 10 театр, со сяна уже кутӥськиз 159 киноустановка, со пӧлысь 126-ез - гуртын. 1940-тӥ арын 7-тӥ мае быдэс страна пусйиз быдӟым композиторлэн П. И. Чайковскийлэн вордскемез дырысен 100 ар тырмонэз. Арня азьвылгес Воткинскын музей усьтӥськиз. Отчы пырон азьын землякмылэн бюстэз юнматэмын вал. Сое лэсьтӥз заводысь азьвыл рабочий М. Х. Тутынин. Юбилей вакытлы Воткинске уно куноос люкаськизы. 1940-тӥ арын шаермы данъяз мукет землякъёссэ но, Совето Союзлэсь Геройёссэ. Котькинлэсь азьло вылӥ нимъёсты басьтӥзы танк взводлэн командирез Кирьянов но танклэн командирез Пислегин. Соос пыриськизы финъёсын ожмаськонэ. М. Сабурова, Удмурт республикаысь Кун архивлэн информацияя отделысьтыз валтӥсь специалист. П. И. Чайковскийлэн бюстэз. Бумага вылын ваньмыз чебер Кылем вторнике, 12-тӥ сентябре, Правительстволэн Тӧроез Николай Ганза журналистъёслы валэктонъёс сётӥз вылӥ верам вазиськонэныз валче. Удмуртие ядерной кылем-мылемъёсты ваёнэн но интыянэн чик герӟаськымтэ, сыӵе материалъёс элькунамы ноку уз интыяське. Бен, Россиын адямилэн тазалыкезлы кышкытлык ваись ядерной кылем-мылемъёс ичи ӧвӧл. Соос вань Красноярск крайын, Свердловск улосын, Челябинскысь "Маякын", атом электростанциосын но музон интыосын. Соосты ӟеч утьыны но быдтыны кулэ. Куд-ог АЭС-ёсын со уж мынэ. Отӥяз Николай Алексеевич пусйиз: шаерамы химической ож тӥрлык пумысен но конференция юнме шорысь уг ортчы. Люизитын 35 процент мышъякез. Со уката золгес яд. Люизитэз возён но утён уката кышкытгес луоз. Соин ик али малпано мышъякез уже кутон сярысь. Правительство та ласянь ужрадъёс пусъе. Та вакытэ люизитэз возён, мышъякен ӵошатыса, сокем бадӟым кышкытлык уг кылдыты. Мышъякен азьло но, советъёс вакытэ ик ужазы, но сое кутон амалъёс али ке но шедьтымтэ. Воткинскын ракетаослэсь чурыт эстӥськонзэс сутонъя установка пуктонъя нокыӵе решение кутымтэ. Воткинскысь гордума солы пумит. Николай Алексеевич сое музон интые пуктон пумысен Россиысь Правительстволэн Тӧроезлэн нырысетӥ воштӥсезлы Илья Клебановлы гожтэт ыстэм. Кыӵе решение луоз, али тодмо ӧвӧл на. Республикаез азинтонъя программа сярысь вераса, со шуиз: вань программаослэн одӥг "сюбег" интызы - сое быдэстыны кытысь коньдон шедьтоно? Со пусйымтэ ке, чебер малпанъёс бумага вылэ кылё. Пумиськонын озьы ик вераськон вал "ИЭМЗ "Куполэз" вузан (акционировать) карон сярысь. Николай Ганза ивортӥз кӧня акциос кошкозы Россие, кӧняез - Удмуртие, кӧняез эркын вузаськозы. Г. Романов. Быдӟым тодосчиез буре вайыса Национальной библиотека 20-тӥ сентябре выль адӟытоназ ӧте. Со сӥземын ӟуч тодосчилы Д. С. Лихачёвлы. Дмитрий Сергеевич улонысь миым кошкиз. Вань тодон-валанзэ, кужымзэ со культуралы сӥзиз, зэмлыкез но чеберлыкез юнматон понна нюръяськиз. Трос лэсьтӥз Россиысь библиотекаослы юрттон понна, соос уго трос лэсьто культура узырлыкез утён удысын. Адӟытонын люкамын Д. С. Лихачёвлэн ужъёсыз, солэн творчествоезлы сӥзем материалъёс. Ю. Караваева. Тол матэктэ Пу коркаосын но шуныт луоз Озьы шуэ "Удмуртлестоппром" кун предприятилэн Ижысь ёзэзлэн директорез Олег Страх. Та удыс туэ котькулэсь умойгес дасяськиз кезьыт толлы. Тырмымон дасямын чурыт эстӥськон (музъем эгыр) но пу. Та нуналъёсы предприятие вуылӥз, югдурен тодматскиз но Олег Фёдоровичлы кӧня ке юанъёс сётъяз газетлэн корреспондентэз Геннадий Романов. - Олег Федорович, оглом вераса, мар тӥледлы юрттӥз толлы ӟечгес дасяськыны? - Нырысь ик пусъеме потэ тани мае. Удмурт Правительство но Коньдон ужпумъёсъя министерство "Удмуртлестоппромлы" эстӥськон басьтыны дыраз уксё висъязы. Со юрттӥз поставщикъёсын юнэсь кусыпъёс тупатыны но эстӥськон басьтонэз умой радъяны. Эгыр но пу вузасьёслы ми азьло ик коньдон висъяны ӧдъям, нош соос продукцизэс дыраз келяны кутскизы. Нош талэсь азьвыл трос шуг-секытъёсты адӟоно луиз. Ватонэз ӧвӧл, тыршеммэс-сюлмаськеммес яркыт возьмато лыдпусъёс. Тани предприятимы 10 сюрс тонна музъем эгыр но 2000 кубометр пу дасяз. Ми, Ижын улӥсьёслы но учреждениослы сяна, эстӥськон сётӥськом Завьялово, Пичи Пурга, Киясово но Якшур-Бодья районъёслы. Эстӥськонмес басьто социальной удысысь организациос но учреждениос но калык. Юрттӥськом транспортэн, пуэз вандыса но, пильылыса но вузаськом. Кин кызьы мылкыд каре. Пу одӥг ньыльмоссэ асьме кужымен дасяськом, кык комплексной бригадамы ужа, кылемзэ музон предприятиослэсь басьтӥськом. Калыклы эстӥськон понна государство юрттэт (дотация) сётэ. Али одӥг тонна музъем эгырез 200 манетэн вузаськом, нош милемлы со 500 манетлэсь ятыр усе. Одӥг кубометр пу пипу, беризь но музонэз 40 манет луэ, нош кызьпуэз - 45 манет. Льготаос вань ожысь но ужысь ветеранъёслы, инвалидъёслы, войнаын быремъёслэн семьяоссылы. - Нош туэ ужъёсты кызьы мыно? - Верай ни, урод уг. Тани 8 толэзьскын тросгес вузамын музъем эгыр но пу. Мултэсэн быдэстэмын огъя но розничной товарооборот. Нош асьме продукцимес кык поллы уногес вузам, куинь поллы тросгес сётэмын услугаос. Тӥни соин ик "Удмуртлестоппром" кун предприятилэн ёзъёсыз пӧлын ми нырысетӥ классной интые потӥм, кыкетӥзэ люкизы Сарапулысь но Воткинскысь эстӥськон дасясьёс. Ми асьмеос дасяськом пиломатериал, вольыт пул (вагонка) но мукетсэ. Коллектимы шоро-куспо, 100 ужасьмы. Дыраз сётъяськом уждун, шорлыдын со 2200 манет усе. Али август понна сётъяськом. Бюджетэ тыронъёсмы ӧвӧл. Усто ужасьёсмы ӧжыт ӧвӧл. Ми нюлэс ужасьёсын ӵош профессиональной праздникмес пусйиськом. Та нуналъёсы Кун Кенешлэн, Правительстволэн но "Удмуртлестоппромлэн" Почёт грамотаосынызы пусъемын сварщик Владимир Загребин, Мензиль Зарифов но Э. Г. Федусев. Озьы ик мылысь-кыдысь усто тыршо транспорт цехлэн кивалтӥсез Владимир Хохряков, механик Анатолий Федоров, кладовщик Татьяна Мерзлякова но мукетъёсыз. - Олег Федорович, нош кин тӥляд самой матысь юрттӥсьёсты луо? - Валамон. Мыным ваньмыз юртто. Но юн матысьёсыз луо валтӥсь инженер. Виктор Ушков, валтӥсь бухгалтер Светлана Вотинцева, экономист Любовь Родионова но мукетъёсыз. - Праздникты азьын мар верасалды? - Быдэс коллективме, "Удмуртлестоппромын" ужасьёсты, сюлмысьтым ӟечкыласько нюлэс ужасьёслэн нуналэнызы но ваньмызлы мылкыд карисько шудо улон но юн тазалык. Тылӝу Бадӟым но кужекъятӥсь кайгу пыриз Сюмси черкогуртысь одӥгаз туж ӟеч семьяе: банкен кивалтӥсь Тамара Фёдорова но солэн кузпалыз Россиысь дано лэсьтӥськись Анатолий Фёдоров одӥг чебер нуналэ ыштӥзы туж мусо дыдыкъёссэс - Москвалэн шорсюлэмаз, Тверь ульчаын, музъем ултӥ потан пуштыку быризы туж мусо но етӥз нылъёссы - Анна но Светлана Фёдороваос. Соосын ӵош та чебер но ӵыдонтэм дуннемылэсь люкиськиз яратоно ӵужмуртсы но - анайзылэн выныз Александр Колбин... *** ... Сюмси черкогуртысь Возь ульчаысь шоро-куспо юртъер. Адямиос али ӵем кожало татчы: одӥгъёсыз - юртъер кузёосты либатыны, музонъёсыз - кызьы ке юрттыны. Корка пушкын али но шӧдӥсько на кулэммуртэ ватэмлэн бервылъёсыз. Нош пужыё борддорез мӧзмыт чебермало туж чебер кылчинъёс - Анна но Светлана Фёдороваос... ... Ужезлэсь огдырлы мозмытскем нылмурт, Светлана, Москвае вуылыны малпаз. Бордаз итӥськиз Анна сузэрез: но; Россимылэсь шоркарзэ ноку но ӧз адӟылы на ук. Вылаз ик, шумпоттӥсь ивор вуиз Москва вӧзысь Лобня карысь: нылъёслэн ӵужмуртсы, Александр Колбин, алигес гинэ басьтэм выль улон инты. Солэсь пушсэ чеберманы но юрттоно, пе... Егитъёслы бурдъёс кылдӥзы кадь. Бубызы, Анатолий Германович, автомашиназэ улӟытон вылысь, азбараз потӥз. Нош кезьыт корт малы ке туж мыдланьяське: азьлань но, берлань но уг вырӟы. Нуныкайёссэ сьӧрло келяны дасяськись атаймурт мае ке шӧдӥз кадь. Ненег сяськаоссэ алӥз: - Улэлэ гуртын: Москва тӥлесьтыд уг мӧзмы. Озьы гинэ лапкатыны быгатод на, пе, чылкак та вие ик лобӟыны дасяськем бубылиосты? Ассэ кужмысь карыса, Анатолий Фёдоров сюлвориз ӵош ужась эшсэ - сюресъёсты эскерись-тупатъясь эштослэсь кузёзэ Иосиф Дюпинэз. Таиз "Волгазэ" ӧз жаля. Кыдёкысь сюрес вылэ дасяськись Анна малы ке туж вожомыса лыдӟыны ӧдъяз быдӟым ӟуч гожъясьлэсь Лев Толстойлэсь "Анна Каренина" романзэ. - Малы сокем тунсыкъяськиськод ай та адямиен? - паймиз мумиз. - Ӧйтӧд, мае ке туж тодэме потӥз, меми, - пумитаз тазьы гинэ вазьыны шедьтӥз нылыз... Келяськон азьын, мае ке шӧдыса кадь, анаймурт мусокаосызлы дэмлаз мудор. Анна туж куалектӥз: - Нэнэ, тон мар? Кулэ ӧвӧл. Светлана ӧз пыкиськы - басьтӥз. Москва вӧзысь Лобня каре вуэмзы бере кӧня ке нунал ортчыса, вордӥськон ӝыт Анна шумпотыса жингыртӥз мемиезлы: - Анай, ми туж шудоесь! Туж шудоесь! ... Со йӧнтэм ӵукна нылъёс, оло - эзельзэс шӧдыса, оло - кыӵе ке мукет муген туж дыртӥзы Россимылэн шорсюлэмаз. Тужгес лулсэръяськиз Анна: чик дыртӥсьтэм апайзэ, Светланаез, пуконэз вылысь али ик лӧбак ӝутысал ни. Ӧскутон борды оло куинь пол, оло ньыль пол кутскылыса быректылӥз: - Ӝоггес, ӝоггес, ӝоггес!.. Я, табере ваньзы дась кадь. Нокыӵе лек адӟонзэс шӧдӥсьтэм-валасьтэм эшъёс - Анна, Светлана но Александр - туж мылпотыса пуксизы поездэ. Нылъёслэн ӵужнэнэзы, Клавдия Васильевна Колбина, тазалыкезлы оскытэк, сюрес вылэ ӧз поты. ...Тверь ульчаысь та интые егитъёс толон но вуылӥзы ни. Ӧйтӧд - малы сокем кыске бордаз быдӟым ӟуч кылбурчилы А. С. Пушкинлы синпелет вадесысь улос?.. Та вие ик быронзы сярысь чик тодытэк, эшъёс васькизы музъем улэ. Апаезлэсь нылпиоссэ кыӵе ке кузьымъёсын шумпоттон вылысь, егит воргорон кожиз вузчиос дӥне. Со вие музъем улын, пель кандыкъёсты тӥямон, туж зол пуштӥз!.. Уйшор азьын Александр Колбинлэн дораз жингыртӥз тужгес матысь эшез - Лобня карлэн кузёез Владимир Станков. мае ке ӝогак ятвылтыса музэн, Клавдия Васильевналэсь туж шугекъяськыса юаз: - Али но ӧз на вуэ шат мусокаосыд? - ӧз на, - сюлэмыз бырк-бырк тэтчаса, ымдуръёссэ мырдэм выретӥз копак лябӟем кышномурт. Владимир Васильевич мазэ-созэ соку ик анлаз (валаз). Ӝегатскытэк ширтӥз Москвае. Кулэм муртъёсты люкан юртэ вуиз но - копак дэймиз: мугоръёс интые татын костасько на кыӵе ке сӥль юдэсъёс гинэ. Компьютер бичам-радъям бере, Владимир Васильевич соку ик тодмаз эшезлэсь - Александр Колбинлэсь сузмем мугорзэ. Нош Анналэсь лысьӧмзэ бичаны ӧз дырты. аслыз оскытэк ӧтиз нылашлэсь ӵужанайзэ - Клавдия Васильевна Колбинаез. Синвуосыз ӵужыр васькыса, арлыдо мурт пичиен- пичиен мырдэм "сузьйиз" нуноксэ: - Киосыз - Анналэн, пыдъёсыз - Анналэн, пичи бинетэз но - Анналэн... Зэм, веськрес мугор интые, корос пушкы выдӥзы пумозяз ӝуам сьӧд сэрегпумъёс гинэ на... Москваысь лек ивор ӝоген вуиз Сюмсие но. Адямиос, пельзылы оскытэк, ог- огзылэсь ялан юаллясько. Калыкез пыд йылаз нырысь ик ӝутӥз Анатолий Германович Фёдоровен ӵош ужась Людмила Левитских. Кузёезлы, Иосиф Дюкинлы, дораз ӝогак жингыртыса ивортӥз: - "Атаймы" вуиз ке, али ик мед лыктысал... Фёдоровъёслэн бускельзы, Елена Ермолаева, со вакытэ сиён дася вал. Шулӟектытӥсь иворез кылэмез бере, киысьтыз пуртэз ик выж вылэ усиз. Телефон трубкаез кутыса, таиз но ӝогак жингыртӥз Тамара Анатольевна Фёдоровалэн ужан интыяз - банке. Туж ӵем жугиськись сюлэмзэ зӥбломытыны турттыса, мырдэм юаз: - Тодӥськод ни-а мае ке? - Мае меда? - Дорад бертӥд ке, ваньзэ верало. Нуназе вадес Сюмсиысь вань калык "Сайкамын" вал ни. Тамара Анатольевна но Анатолий Германович Фёдоровъёс доры адямиос лыкто валче кайгырыны... Дас кыкетӥ августэ, бер ӝыт, быремъёсты ваизы гуртазы (яратоно эшъёссэ вордӥськем шаеразы вуттон сярысь туж уно сюлмаськиз Александр Колбинлэн матысь эшез - Москва вӧзысь Лобня карлэн кузёез Владимир Станков. Владимир Васильевич туж синмаськем зӥбыт удмурт калыклы)... Шайвыл пала нуись сюрес чалмыт но ӝожмыт вал. Дырын-дырын гинэ кылӥськылӥзы лулӟылэмъёс, викышъямъёс, шыпыртылэмъёс... Гу дорын трос ӧз вераськелэ. Коросъёсты ӧз усьялэ. Нылзэ но вынзэ ватэмез бере, Тамара Анатольевна ӧжытак шокчиз кадь. Музъем ултӥ потан пуштыку сӧсырмем нылзэ, Светланаез, утьыны курыса, калыкезлы сюлмысь вазиськиз: - Вӧсяськелэ, вӧсяськелэ, гыдыкайёсы, берпуметӥ тылсие, берпуметӥ осконэ понна... Данакез малпазы: Светлана улоз. Нош отын, кыдёкысь Москваын, мукетыз лек ивор - сьӧд гижло кемалась дасяськем вылэм ини сотэк но лябӟем мугоръёсты погыртыны: дас ньылетӥ августэ выжон уе, йырсазьзэ шедьтыны быгатытэк, улонысь кошкиз Фёдоровъёслэн кыкетӥез но нылзы - кызь вить аресъем Светлана. Улэп кыльыны ӧз юртты ни анаезлэн сётэм мудорез но... Таяз учыре сюмсиос москваослы ӧз оскиське: Светланалэсь мугорзэ вордӥськем шаераз ваён вылысь, автобус висъяз Сюмси котырысь сюресъёсты эскерись-тупатъясь эштослэн кузёез Иосиф Дюпин. Кӧня ке адямиен ӵош сюрес вылэ потӥз эмъясь Татьяна Фалалеева но. Тамара Анатольевна, нылзэ берпум сюрес вылаз келяны шуыса, туж чебер тӧдьы улдӥсь но льӧль сяськаё дэрем басьтӥз. Зэм, Москваысен сое мусокаез доры пырыны ӧз лэзе. Туж секыт сӧсырмемъёсты йӧнатонъя Николай Склифосовский нимо юрт пушкы вамыштӥз эмъясь Татьяна Фалалеева гинэ. Татьяна Афанасьевна нылмуртэ дӥсяны кутскиз но копак дэймиз: Тверь ульчаысь музъем ултӥ потан пуштыку, нылмуртлэн пельйылъёсыз ӝуаллям, йырсиосыз но синкашъёсыз ӵуштаськиллям... Тамара Анатольевна Фёдоровалэн Сарапулын улӥсь выныз, Николай, апаезлэн кыкетӥ нылыз но улонысь кошкем сярысь секыт иворез тодыса, шайвылэ мынэм но, кияз пурт кутыса, ожоез кырылыны кутскем. Ачиз нош оло уйбыртэ, оло вӧта: Светланалы гу гудӥсько, пе... ... Таяз учыре но Фёдоровъёс доры люкаськылӥз трос калык. Нош ик вамышъязы адямиос шайвыл пала нуись кузь но ӝожмыт сюрес кузя... Светлана Фёдороваез ватӥзы сузэреныз но ӵужмуртэныз артэ. Льӧль сяськаос пинал мугорзэ яплак шобыртӥзы... Сюмси черкогурт пумысь гурезь йылэ тубыса, кыдёкысен адӟисько льӧль, горд, бусӥр, ӵуж, лыз сяськаосын шобырскем выръёс. Артысь артэ кыллё соос, чылкак сьӧлыктэм лулъёс... *** Веськрес мугоро Анна Фёдорова ноку ӧз малпаськылы, дыр, улонысь такем вазь кошкон сярысь. Егит ныл дышетске вал Москваысь вузкаронъя университетлэн Ижысь ёзаз. Туж яратӥз матысь адямизэ - Владимир Лебедевез. Егитъёс кайта огазеяськыны малпало ни вал. Макем ӝож: сюан гырлыос уз жингыртэ... Нылашлэн малы ке оскись мумиз, сюлмысьтыз синвуаськыса, эмеспи луыны кылдымтэ воргоронэз куре: - Ворды вал мыным Аннаелы кельшись ныл!.. Арлыдоос гинэ ӧз, покчиос но туж синмаськылӥзы выжыкылысь лыктэм нылмуртлы. - Анна апай, тӥляд йырсиосты зарни, - шораз трос пол туж мусо пальышалляз пичи эке. - Бадӟым будӥ ке, асьмеос кузпалъяськомы. - Туж бадӟым тау тыныд, нуныкае, - пумитаз тазьы ик ненег пальпотылӥз нылмурт. - Мон тонэ одно ик витё... *** Толэзь кадь югыт, шунды кадь яркыт вал Светлана Фёдорова. Сарапулысь педучилищеез йылпумъяса ужаны кутскиз вордӥськем гуртысьтыз нылпи садын. Егит, кужмо, капчи мылкыдо адямиез пиналъёс но, ӵош ужась эшъёсыз но туж яратӥзы. Улонысь шуак кошкемезлы оскытэк, покчиос весь юаллязы: - Чебер но визьмо апимы дорамы ноку но уз лыкты ни шат?.. Светланаен ӵош ужась арлыдо кышномурт, шутэтскыны кошкыса, покчиоссэ кельтыны медэ ни вал та визьмо но чырткем нылмуртлы. Ӝож: ӧз кылды. Зэм, мугорыз но, лулыз но пыраклы кылёзы, дыр, та юрт пушкы: нылпи садлы сётыны малпало Светлана Фёдоровалэсь нимзэ. Москвае кошкон азяз нылаш кинлы но солы шыпыртыны вуттэм: Россимылэсь шоркарзэ адӟон вылысь, арбыт люкай та вить сюрс манетме... Зэм, со уксё "чакламын" вылэм чылкак мукет муглы... Анаезлэн верамезъя, нылыз туж яратылӥз сяськаосты. Тулыс вуыку, ачиз ик соосты кизьылӥз. Гужем сюлмысьтыз утялтылӥз. Туж ненег будосъёс али но шулдыртыло Фёдороъёслэсь юртъер котырзэс... *** Тамара Анатольевна Фёдоровалэн выныз, Александр Колбин, улэ но ужа вылэм Москва вӧзысь Лобня карын. Туж чырткем но етӥз ужбергатӥсь алигес гинэ басьтэм вылэм выль улон инты. Туж ӝож: отын ӟеч-ӟеч инъет кылдытыны вуытэк, куамын тямыс аресъем воргорон аслыз шедьтӥз музон сэрег. Вылаз ик, мурт музъемын. Вордӥськем палъёсызлэсь кыдёкын. *** Нылъёсыз бырем бере, анаймурт аслыз ӟигар кема ӧз шедьты. Тылтэк ӝуась пушказ соку ик вордӥськизы сюлэмез ӵушкась чуръёс: Кык кылчин вал мынам юртам, Кык вольыт но яркыт буртчин, Шуак тыл но - ышиз марӟан, Шӧдтэкак маялтӥз-а ин? Нош сюлэм весь вите, вите, Кытын ке но нылы бӧрдэ... Кытын ке шат дунне тудӟиз?! Сьӧлыктэм лулъёсме басьтӥз?! Кык тылси югектӥз инмын, Кытын ке, туж пыдлон, кырын... Матысь адямиосыныз люкиськыкуз, нылкышно ӧз керттылы йыраз сьӧд кышет (со понна куд-огез курлазы но, дыр): нылпиосыз но, выныз но пыраклы улэп мед кылёзы! Йырсазь али но уг оскы йырвиымез ик бышкась иворлы: одӥг коркась куинь корос поттӥзы тужгес чебер гужем нуналъёсы. Бен, табере мар?!. Клавдия Васильевна Колбина, Анналэн но Светланалэн ӵужнэнэзы, ас понназ сюлмысьтыз ӧпкеле, дыр. - Малы мусокаосме меӵак бырон дуннеязы валтӥ?!. Иосиф Фёдорович Дюпин, сюресъёсты эскерись-тупатъясь, нуналмысь ялан кайгыре, дыр: - Малы мон та гыдышкоосылы автомашинаме сётӥ?!. Анатолий Германович Фёдоров, Анналэн но Светланалэн бубызы, табере ӵемысь лулӟылэ, дыр: - Алӥ вал ук, алӥ!.. Бен, адӟон пыд улысь потэ, шуо. Тамара Анатольевна но Анатолий германович куке-соку малпаськылӥзы шат, мусо тылсиосынызы такем вазь люкиськоно луоз шуыса? Нош соос, льӧль сяськаос, витьымтэ шорысь лобӟизы нуназе яркыт пальышась шунды доры, уин юг-юг пиштӥсь толэзь вадьсы. Туж ненег кылчинъёс инбамын шуак воректӥзы но асьсэлэсь пӧсь шунытсэс пыраклы кельтӥзы та сьӧлыко дуннемы вылэ улыны кылем адямиослы. Егит анай но атай ас киосынызы вешаса будэтэм нылпиоссэс согизы кот но кезьыт музъеме - талэсь но бадӟым кайгу вань на меда дунне вылын?!. Нылъёссэ ватэмез бере, Тамара Анатольевна малы ке тодаз ваиз одӥг учырез: кузь сюрес вылэ потонзы азьын Анна но Светлана анай-атаенызы ӵош маке туж куанӥзы. "Тӥни малы ми сокем серекъяськеммы вылэм", - луэм учырлэн бервылыз сярысь малпаськыса, сюлмыз вӧсь луыса, берло чалмытак лулӟылӥз нылкышно... Зэм, суйёссэ-пыдъёссэ уг юскы котькыӵе куректонэз чиданы дышем кышномурт. Вылӥысь кужымлы вазиськыса, сюлмысьтыз куре: - Инмаре! Юртты милемлы табыдӟа кайгумес вормыны! - Инмаре! Эн кушты милемыз! *** ... Выль интые юртъяськемзы бере, Тамара Анатольевна но Анатолий Германович, пуштрес йырсиё мусо нылъёссылы сӥзьыса, укно улазы мерттӥзы вал веськрес кызьпуос. Табере сыло соос, ненег мугоръёс, вольыт куаръёсынызы шильыртыса, Анналэсь но Светланалэсь яркыт тусбуйёссэс тодамы вайытыса. Нош ӟырдыт сюлэмзы ялан ӝуа, ӝуа: Мынам уг поты кысэме, Кызьы сэрегпумъёс кысо вуын. Арамаысь кызьпу сямен, Ӵогем бере но Ӝуаме потэ гурын. Ӝуам бере Эгырӟысал. Нош эгыре выльысь мед арасал - Кортэз Со ӟеч ӟырдатысал, Горнлэн мылысь-кыдысь пеллямезъя. Мон собере ке пӧрмысал Гуре кылем пурысь пеньлы, Со пененым но юрттысал Арамаысь покчи кызьпуослы... (Флор Васильев). Йыркуэз выльысь но выльысь лӧпкытъяло на пуштэм музъемлэн бервылъёсыз. Россилэн шоркараз луэм йыружлэн тулкымъёсыз меӵак вуизы ук Удмурт шаерлэн тужгес пыдлось сэрегаз! Кыӵе ке пум лыктоз меда ортчыт эрказмем, уртчись кужымзэс кытчы карыны тодӥсьтэм йырвандӥсьёслы?!. ...Эх, кызьпуос, кызьпуосы!.. Елена Виноградова. Тани соос, югыт дуннелэсь дырызлэсь вазь люкиськем нуныкайёс - Анна Фёдорова, Александр Колбин, Светлана Фёдорова. Анналэн но Светланалэн вордӥськем юртсы. Та коркан котьку югыт мед луоз!.. Владимир Беломорскихлэн туспуктэмъёсыз. Гыро вошъяськыса Алнаш ёросысь нянь будэтӥсьёс аран-кутсан ужъёссэс йылпумъязы ни. "Кама" но "Искра" эштосъёс лябесьгес ке но, соос но аранзэс асьсэ кужымен быдтӥзы. Но со уг вера на, музъем ужасьёс шутэтскыны быгато ни шуыса. Туж кулэ ужъёссы пӧлысь али одӥгез - кын улэ гырон. Но туала арын малпамъя гинэ уг луы: техника вужмемын, эстӥськон но вӧй уг тырмы, кассаын уксё ӧвӧл. Озьы ке но, сюлмаськись хозяйствоосын ваньзэ радызъя лэсьтыны тыршо. Тани Суворов нимо эштос ӟеч радъяз кын улэ гыронзэ. Та уже куто кужмоесь куинь Т-150 тракторъёсты. Механизаторъё вазь ӵукнаысен бер ӝытозь ужало, трактористъёс руль сьӧрын пуко вошъяськыса. Кын улэ гырон озьы ик умой радъямын "Молодая гвардия", "Кизили", "Колос" эштосъёсын но Асаново совхоз-техникумын. Ёросын янгышъёссэс тодытэк уг уло. Куд-ог эштосъёсын миым кын улэ гырыса ӧз вуттэ, соин валэс юоссэс кизизы, лущильникъёсын гинэ небӟытыса. Озьы котькуд гектарысь 10 центнерлэсь гинэ ятыр ю тысь люкаськиз. Н. Кондратьев, "Алнаш колхозник" газетын ужась. Ӟечкылан Завьялово ёросысь Пальники школаын ужась дышетӥсез Ираида Николаевна Покоеваез ӟырдыт ӟечкылало 55 арес тырмонэныз кузпалыз, нылпиосыз но эмеспиез. 35 ар со ужаз ини школаын пиналъёсты дышетон удысын. Ваньмы солы сӥзиськом шудбуро, азьланяз но кема, тазалыко улон, пальпотон но яратон. Ӟеч лу, эшмы Удмурт Республикаысь Культурая министерство но Театр удысын ужасьёслэн огазеяськонзы мур куректыса иворто: 59-тӥ аресаз мыныкуз кема висемез бере улонысь кошкиз республикаысьтымы культура удысын дано ужась, СТД-лэн секретарез Тамара Ивановна Ардашева. Вань улонзэ, кужымзэ, тодон-валанзэ со сётӥз театр удыслы, сое азинтонлы. Ленинградысь А. Островский нимо институтэз удмуртъёс пӧлысь огназ очно пырпотыса, театровед луиз. Удмурт кун драмтеатрын литература люкетэн кивалтӥз, спектакльёслы, актёръёслэн, режиссёръёслэн ужамзылы шонер но оскымон дунъет сётылӥз. Ачиз но пьесаос гожъянын кужымзэ эскериз. Берло аръёсы Удмурт театрын пуктэмын солэн нылпиослы "Золотая птица" но "Тӧдьы льӧмпу улын" ужъёсыз. Тамара Ивановна вань малпанъёссэ быдэстыса ӧз вуы. Солэн сайкыт тусбуез весяк улоз син азямы. Т. И. Ардашеваен люкиськон луоз туннэ 11.30 часысен 13 часозь Удмурт театрын. Ӟеч дышетскид - премия басьтӥд Красногорье ёросысь Барановка школаын но роноын ужасьёс районысь администрацие вазиськонэн потӥзы. Соос куро дышетскисьёслы но дышетӥсьёслы ёрос но шаер олимпиадаосын вормонъёссы понна ватсаса коньдон висъяны. Та пумысен вераськон кема гинэ кыстӥськиз. Но ёрос администрацилэн кивалтӥсез Михаил Матушкин дышетӥсьёс азьын постановление кутӥз. Табере район бюджетысьтыз та удыслы арлы быдэ 80 сюрс манет коньдон висъялоз. Зэм, та удыс воксё выль на. Сое адӟем карыны кулэ, дыр, мукет районъёс но. Табере школаез зарни медален йылпумъямъёслы сётӥськоз 2500 манет коньдон премия. 500 манет висъяны чакламын классэн кивалтӥсьёслы но. Азвесь медаль понна сётӥськоз 1500 но 300 манет (таиз дышетӥсьлы). Озьы ик пусйиськозы нырысетӥ но сизьыметӥ классэз йылпумъясьёс 8-тӥ но 11-тӥ классъёсын дышетскисьёс. Вунэтэмын ӧвӧл дышетӥсьёс но. Республикая олимпиадаын нырысетӥ инты понна дышетскись басьтоз 2500 манет, кыкетӥ инты понна - 1500 но куинетӥ инты понна - 1000 манет. Ньылетӥ но витетӥ интые потэмъёслы висъяськоз 500 манет. С. Петров. Удмуртилы президентэ кандидатэн пумиськон Ас мылкыдзэ калык вералоз Кылем вторнике журналистъёсын пумиськылӥз Удмурт Республикаысь Кун Кенешлэн Тӧроез А. А. Волков. Таяз учыре Александр Александрович вераськиз ини Удмуртилы президентэ дэмлам мурт сямен. Нырысь ик со бадӟым тау каремзэ вераз ваньмызлы кин со понна кинюртэмзэ пуктӥз но со быдӟа ужез пумаз-йылаз вуттон бордын тыршиз. Журналистъёслы вазиськыса, А. А. Волков шуиз: "Пресса азьын али одӥг ужпум сылэ: быръёнъёслы дасяськонэз вуттоно котькуд лыдӟись доры. Юанъёсынызы, дэмланъёсынызы адямиос мед лыктыны быгатозы общественной приёмнойёсы, соос усьтэмын но ужало ваньмаз районъёсын но городъёсын. Калыклэн мылкыдыз одно ик санэ басьтӥськоз Удмурт Республикалэсь экономиказэ азинтонъя дасяськись программаын но. - А. А. Волков валэктонъёс сётӥз журналистъёслэн пӧртэм пумо юанъёссылы. Кылсярысь, тросэз бадӟым предприятиослэн кивалтӥсьёссы тӥ пала дурбасьто, озьыен, сьӧрады оскыса мыно? - Мон шумпотӥсько юрттэмзылы, со понна тау карисько. Кызьы тодмо, министръёслэн кабинетсы, огез министр сяна, быдэсак тӥ палан? - Шонер. Соос дась ужаны премьерен Н. А. Ганзаен но президентэ дэмлало Волковез. - Александр Александрович, кыӵе ужрадъёс кутӥсько наркоманилы пумит нюръяськонъя? - Дасямын но улонэ пыӵатӥське ни нимысьтыз юнматэм программа. - Президентэ тӥледыз бырйизы ке, кин кивалтоз Кун Кенешен, Правительствоен? - Кун Кенешен кивалтыны кулэ, мон малпамъя, республикалэсь улон-вылонзэ ӟеч тодӥсь мурт. Нош премьер интыын ужаны дасям адямимы одӥг гинэ ӧвӧл. Огзэ верало: Правительствоын кадръёс ласянь бадӟым воштӥськонъёс уз луэ. - Александр Александрович, Удмуртилэсь экономиказэ азинтонъя дасяськись программалы тӥ туж трос дырдэс но кужымдэс сётӥды ни. Ма луоз соин, президент мукет мурт луиз ке? - Кинлы оскозы, кинэ быръёзы со ик ужалоз дасям программаез улонэ пыӵатон бордын. Малы ке шуоно, та документэз дасянэ пырисько ни ог 100 валтӥсь специалистъёс, санэ басьтӥсько огшоры адямиослэн верамъёссы но. - Тросэзлы валантэм потэ Ю. В. Шестаковлэн мукет кандидат пала ужаны выжемез. Кызьы тодмо, нырысь ик со тӥ пала дурбасьтэ вал... - Мыным но валантэм. Малпасько, Юрий Владимирович ачиз тодэ, дыр, лэсьтэм вамышезлэсь мугъёссэ. - Президент бырйыса, Удмуртия пусъёз автономия басьтэмез дырысен 80 ар тырмон юбилейзэ. Солы дасяськон кутскиз-а ни? - Ӵапак туннэ люкаське оргкомитетлэн кенешез. Тупатъян-выльдон ужъёс мыно Йӧ дворецын, Операя театрын. Дасяське бадӟым концерт, вуозы трос куноос. Соос пӧлын, оло, луоз Россилэн Президентэз но. *** Юанъёс пумиськонлэсь бадӟым люкетсэ басьтӥзы ке но, огез но палэнэ ӧз кыльы. - Кин луоз Удмурт Республикалэн нырысетӥ президентэз, кинлы сыӵе дан усёз, тодом ни 15-тӥ октябре. Нюръяськон али гинэ кутске ай. Л. Медведева. Инмар утиз, дыр Атомен ужась "Курск" лодка шудтэм учыре шедиз но ву улын 118 моряк быриз шуыса, котькин тодэ ни. Но отын бырыны быгатысал 119 мурт. Тани малы. Отын службазэ ортчытэ вылэм Уваысь пияш Коля Кириллов но. Солэн атаез Михаил Васильевич пенсионной фондэн кивалтэ. Ӵапак та шимес учыр азьын егит моряк куриськыса дораз бертэ, 10 нуналъем отпуске потыса. Со ик луиз пияшлэн быронлэсь утиськемез. Кызьы уд шуы: "Инмар вань?" Инмар утиз, дыр, пияшез дырызлэсь вазь кулонлэсь. Коля Кириллов моряк луон сярысь пичи дырысеныз малпаськыса будэмын, йылпумъяз Сарапулысь механикая техникумез, спортэз яратӥсь, тазалыкез ӟеч, соин шеде морфлотэ. Службазэ йылпумъяса, со кылиз Северной Флотэ ик, озьы шедем "Курске". П. Скобелев. Вож нюлэс - со узырлык Таяз арня нуналэ нюлэс ужасьёс пусъёзы асьсэлэсь праздниксэс. Шаерамы нюлэс ог ӝыны пала музъемез басьтэ. Со кык миллион гектар пала луэ. Пётр И эксэй Удмуртиын будэтэм лыстэм пужымез (лиственница) басьтэ вылэм ӟуч флотэз ӝутонлы, нош 240 ар талэсь азьло Ижевскын но Воткинскын заводъёс кылдэм бере андан кисьтон уже араз кутылӥзы 1300 гектар пала нюлэсэз. Быдӟым Отечественной война аръёсы но нюлэс адямиослы бадӟым юрттэт сётӥз. Соку предприятиос уй-нунал ӵоже гинэ 10 сюрс кубометрозь пу сутылӥзы. 1975-тӥ арозь шаермы нюлэсэз мерттэм сярысь уногес кораз. Но 1994-тӥ арысен нюлэсъя кодекс кутэмен валче, та уж интыысьтыз вырӟиз. Табере нюлэсъёсты выльдонъя Удмуртия Россиысь вить усто улосъёс пӧлы пыре. Та дыре Удмуртиын 170 гектар вылын кедр будэто. Глазов ёросын вань резонансовой шуон кыз, со мынэ пианино но скрипка лэсьтонлы. Туэ Ижевскысь гурт академиез нырысьсэ йылпумъяз 47 нюлэсчи. Соос табере тыршо ни "вож зарниез" будэтон удысын. А. Александров. Шестаков оске Солуяновлы "ИЭМЗ "Купол" огазеяськонлэн валтӥсь директорез, Кун Кенешлэн депутатэз но отысь Промышленникъёслэн но ужбергатӥсьёслэн фракцизылэн кивалтӥсез Юрий Шестаков та нуналъёсы бырйисьёслы ивортӥз Удмуртилы Президентэ Андрей Солуяновлэсь кандидатуразэ умоен лыдъямез, юрттыны дась луэмез сярысь. Та пумысен со иворъёсты вӧлмытӥсь ёзъёс азе вазиськонэн потӥз но вылӥ верам кандидатэн ӵош пресс-конференция ортчытӥз. Юрий Владимирович журналистъёслы шуиз, кин, пе, республика азьын сылӥсь лэчыт ужпумъёсты ӟечгес быдэсъяны но вылӥын калыклэсь интересъёссэ утьыны быгатоз? Сыӵе адями, пе, луэ Андрей Солуянов. Солы юн оскемзэ вераз. Малы ке шуоно, Кун Думаын депутат луыса, Андрей Владимирович та предприятилы но мукетъёсызлы бадӟым ужпумъёсты быдэстыны трос юрттӥз. Президентэ кандидат Андрей Солуянов люкаськемъёслы тупен-тупен мадиз быръён программаез сярысь но кыӵе ужпумъёсты быдэсъяны дасяське. Валамон, кандидат нырысь ик шӧдскымон инты висъя производствоез уката азинтонлы, экономикаез юнматонлы но калыклэсь улон-вылонзэ умоятонлы. Со герӟаськемын кызьы ке егитъёслы улон инты лэсьтонэн, тазалыкез утёнэн, озьы ик дышетонэз умоятонэн, ӟеч ужасьёс дасянэн, кадръёс будэтонэн но мукетыныз. Юрий Шестаковлы но Андрей Солуяновлы журналистъёс трос юанъёс сётъязы. Г. Васильев. Вордскемзэс туннэ пусъё: Хохлов Николай Иванович - Удмурт Республикаысь Правительстволэн тӧроезлэн воштӥсез; Григорьев Михаил Алексеевич - Кун Кенешлэн депутатэз; Перевощиков Генрих Ксенофонтович - калык писатель. Вузкарон базаръёс кулэ Озьы шуэ республикаысьтымы вузкаронъя но бытовой юрттэт сётонъя министр Петр Пономарев. Со уго ӧз вунэты на сентябрьлэн кутсконаз рынокын вузкарисьёслэсь пумитъяськемзэс, асьсэлэсь правооссэс утьыны тыршемзэс. Сыӵе ужрад юнме шорысь ӧз вордскы. Ужбергатӥсьёсты зӥбон, вӧсь карон зэмзэ но шӧдӥське. Соослэсь выт басьтэмзы потэ, нош умоесь вузкарон интыос кулэезъя уг кылдыто. Тӥни соин ик базарын вузкарисьёс миым но пумитъяськизы, выт тыронэз умойтэмен лыдъяса. Но озьы ке но, выт бичан ӧз уродмы, кӧнялы ке будӥз но. Рынокъёсын югдурез чакланъя МВД-ын кылдытэм нимаз ёз ас интызэ ӝог шедьтӥз. Кык толэзьскын со адӟиське ни. Туннэ озьы ик ватсаны кулэ, нимаз вузкарисьёс трос янгышъёс лэсьто, вузкарон правилоосты тӥяло, уг чаклало. Озьы ке но, рынокъёсын вузкаронэз паськытатыны кулэ. Ужбергатӥсьёсты утёно. Соос тодыны кулэ, кыӵе арбериосын вузкарыны быгато, кудӥныз - уг. Ӝог сӧриськись вузъёсты одно ик холодильникъёсын возёно. Министерство магазинъёсын но, рынокъёсын но вузкаисьёс азе огкадесь куронъёс пуктэ. Берло дыре калыкез сюдон уродме, уката ик - школаосын. Азьло отын 90 процентсэ пиналъёсты пӧсь сиёнэн сюдо ке вал, али - одӥг куиньмоссэ. Туж ичи со. Таӵе югдурез тупатыны кулэ, но министр нокыӵе ужрадъёс ӧз ӵекты. Таӵегес ик суред калыклы бытовой юрттэт сётонын. Та уж уката лябӟемын гуртын. Петр Пономарев нош ик оске интыысь администрациослы, соос, пе, югдурез умоятыны кулэ, огкылъёс кутыса. Соку мар карыны кулэ министерство, кыӵе солэн интыез та удысын? Шуг вераны. Улон азинске. Дунъёс будо. Озьы ке но, калык басьяське на. Тани туэ тямыс толэзьскын шаерамы 8 миллиард 800 миллион манет тыр вузкаремын, яке миым та дырен сярысь (ӵошатэм дунъёсын вераса), 10 процентлы уногес. Г. Романов. Бельтюков Владимир Васильевич - республикаысь коньдон ужпумъёсъя министр; Куликов Пётр Васильевич - "Кенеш" журналлэн валтӥсь редакторез, "Удмурт дунне" газетлэн редакцияз будэм мурт. Удмурт Республикалы президентэ кандидатэ В. Н. Ануфриевез пусъён сярысь Удмурт Республикаысь Быръёнъя комиссилэн постановлениез Удмурт Республикалы президентэ кандидатэ В. Н. Ануфриевез ӵектонъя радлыклэсь Удмурт Республикалэн "Удмурт Республикалы президент быръён сярысь" Законэзлэн куронъёсызлы тупамзэ эскерыса, кинюртэмъёсын кагазъёслэсь но мукет документъёслэсь шонер но зэм луэмзэс лыдэ басьтыса, вылӥ верам Законлэн 17-тӥ, 37-тӥ, 38-тӥ ёзэтъёсызъя Быръёнъя комиссия пуктэ: 1. Пусъёно Ануфриев Вячеслав Николаевичез "Удмуртпродконтракт" Кун управленилэсь генеральной директорзэ, вордскемын 1946-тӥ арын, улэ Ижын. Удмурт республикалы Президентэ кандидатэ ӵектэмын бырйисьёсын. Пусъён дыр - 2000-тӥ арын 12-тӥ сентябре 14 час 35 минутэ. 2. В. Н. Ануфриевлы сётоно пусъем сярысь удостоверение. 3. Та постановлениез печатлано республикаын потӥсь кун газетъёсын. Удмурт Республикаысь Быръёнъя комиссилэн тӧроез Д. Н. Талантов. Удмурт Республикаысь Быръёнъя комиссилэн секретарез Н. А. Глухова. Иж город, 2000-тӥ арын 12-тӥ сентябре. � 27.2. Кусыпъёс Оген венез но ӝутыны секыт Удмуртия ноку но мукетъёсызлэсь китай борддорен ватӥськыны ӧз тыршылы. Улосвылаз уно бадӟымесь предприятиос интыяськемын бере, кусып тупатъяно луылӥз матысь но кыдёкысь улосъёсын. Туннэ вераны луэ ни: республикамылэн кивалтӥсьёсыз шонер политика нуиллям. Азьвылгес кусыпъёс юнматэмын вал ини Уралысь экономикая огазеяськонэ пырись улосъёсын. Со юрттӥз шаерысьтымы ож тӥрлык поттӥсь, тылобурдо вордӥсь но мукет предприятиослы ӟечгес азинскыны. Приволжье федеральной округе юнматэмзы бере, Удмуртия татчы ик пырись улосъёсын ваче ужан сярысь огкылъёс гожтылыны кутскиз. Алигес Сарапулын сыӵе документ Марий Эл Республикаен кутэмын. Али Татарстанэн но мукетъёсыныз кенешонъёс ортчо. Та ласянь бадӟым уж нуиз Кун Кенешлэн Тӧроез Александр Волков но Казаньын но Самараын пумиськонъёс дыръя. Сентябрь толэзьлэн пумаз Москваын "Удмуртия" вузкарон юрт усьтӥськоз. Россилэн столицаез али сиён-юон уноен кунгож сьӧрысь вае. Удмуртиын поттэм продукция, кылсярысь, йӧл, ӵынатэм сӥль, сыр, ӟечлыкезъя чик но бере уг кыльы. Шаерысьтымы куд-ог предприятиослэн но хозяйствоослэн мылкыдзы но луонлыкъёссы вань кусыпъёссэс паськытатыны, сиён-юонзэс пырак Москвае келяны. Кылсярысь, "Адмирал" огазеяськон Киясовоын удмурт кетчуп поттыны кутскиз. Азьланьын но сыӵе пичи предприятиос кылдозы. Продукцизылы кулэяськисьёс луозы. Угось сиён- юон нуналлы быдэ кулэ. Удмуртиез азинтонъя программа дасян пӧртэм удысъёсъя мынэ. Мукет улосъёсын кусыпъёс тупатон отын одно ик ас интызэ шедьтоз. С. Геннадьева. ШӦКЫЧ Тон понна вӧсясько мон... (Юмореска) Евлпапьевна песяй, Ижевскысь автовокзалэ вуыса, чемоданъёссэ музэ пуктӥз но мур лулӟиз. Кӧня ке пуко, шутэтско но автобусэ пуксьыса, Вотка пала ширто, пе, нылы возьмаса жадиз, дыр, ини. Кӧня ке пукемез бере, песяй вӧзтӥз ортчись егит пияшлэсь юаз: � Пие, вера вал, кызьы Воткае мыноно. � Мон ӵапак отчы мынӥсько. Легковой машинаен! Соку песяйлэн йыраз шуккиз сюрес вылэ потон азяз бускельёсызлэн сьӧрад сомында уксёен автобусын гинэ ветлы шуыса алэмзы. � Автобусъёс ӵем уг ветло. Бензин ӧвӧлэн, тэк сыло! � пӧяз егит пияш. � Ярам соку, нош кӧня часкын Воткае вуом? � юаз ик песяй. � Час куспын отын луом! � шуиз егит пияш но, песяйлэсь чемоданъёссэ кутыса, машина пала вамыштӥз. Машинаын мынон сяменыз песяй ялан укноетӥ учкылэ, ас понназ мар ке но бӧтьыртэ. � Пегӟид-а, мар-а тон кытысь ке, песяй, мар ке багажед трос? � юаз шофёр. � Пенза палась мон. Коркаме вузай но Воткае нылы доры улыны мынӥсько. Корка басьтыны шедёз-а отын? � Коть корка, коть квартира басьты. � Мыным бакчаен корка кулэ. Яратӥсько му вылын гудӥськыны. � Соку чик ӝегатскытэк басьтэ. Али дунъёс нуналлы быдэ будо, � валэктон сётӥз шофёр. � уксё дунтэма. � Мынам уз дунтэма! Мон кивалтэтын пукисьёс кадь шузи ӧвӧл. Уксёме соку ик долларъёсын воштӥ... � шуиз песяй но тыгак гуньдӥз. Соку гинэ песяй валаз кылзэ мултэс кузь лэзьямзэ но ушъяськемзэ. Э-э-э, мушко йыр, мушко йыр, кӧня монэ индылӥзы, дышетӥзы, нош пересь даурам но визь ӧз пыры. Собере шофёрлэсь юаз: � Тон малы монэ огнаме нуиськод? � А, дыр ӧй вал ни пассажиръёсты витьыны. Мар ке но татын умойтэм, малпаз Евлампьевна, йыр быриз, йыр быриз! Со вие шофёр крезьгур лэзиз но радиоысь мӧзмыт кырӟан кылӥськиз... "Тон понна ас поннам лушкемен вӧсясько мон"... Кырӟан но укшатэ монэ виён азяз, малпаз песяй. Бензин ӧвӧл, автобусъёс уг ветло, муг но шедьтэ ведь, фу, лешак басьтон, киллер, Воткалан Пензаынлэсь но трос, шӧдске, со мафия шуонзы. Виыны дасяське ведь со монэ, виыны... Тон понна ас поннам лушкемен вӧсясько мон, пе. Э, быри, быри... Озьы ас понназ куректыса пукон сяменыз песяй сюрес урдсысь "П.И.Чайковскийлэн вордскем городозяз 10 иськем" гожтэм пулэз адӟиз. Евлампьевна соку воксё шальтраз. Киосыз дыр-р-р куалекъяны ӧдъязы, сюлэмыз йыг-йыг жугиське. Малы со монэ Вотка город интые Чайковские нуэ? Виыны, малы нуоз на со сяна? Долларъёс, долларъёс быдтӥзы монэ! Малы мыным со сярысь ушъяськыны кулэ вал тодмотэм адямилы! Лешак басьтон ик вань мон! Телеграфен келяно вылэм уксёме. Э-э-э, така йыр, перевод келям понна кӧня ке дасо манетъёсме жаляй. Со вие машина городэ пыриз, гурезь йылэ тубиз. Песяй бадӟым букваосын гожтэмез адӟиз. "П.И.Чайковскилэн вордскем шаерез". Собере сюрес вылын сылӥсь автоинспекторъёсты адӟыса, шофёрлы дугды, дугды шуыса кеськиз. Шофёр паймыса, бур пала кожиз но дугдӥз. Песяй машинаысь урмем сямен потӥз но автоинспекторъёс пала юрттэ, виё ини шуыса кесяськыса чычыраз. Автоинспекторъёс но шулӟектӥзы, шӧдске, кин кинэ вие шуыса, песяй пумитэ бызизы. Песяй шок-пуль шокаса валэктӥз: � Тӥни со, шофёр, Вотка интые монэ Чайковские вуттӥз. Таӵе кылъёсты но югдурез валаса, автоинспекторъёс мыняк потӥзы. Шофёрез доразы ӧтизы, песяйлы валэктӥзы: � Песяй, эн кышка, тонэ нокин но уз виы. Шофёр тонэ шонер ваем. Вотка � со П.И.Чайковскийлэн вордскем городэз. � Шузи муртлы вождэ эн вай, пие! � шуиз на песяй но губыр-гебыр машинае пуксиз. Валентин ГОРБУНОВ. Кивалтӥсь калык пӧлын Тугаськем бугорез сэрттыны дыр вуиз Сӥзьыл гудыриез кылэмды вань-а? Инкуазь таӵе кузьымзэ ӵем ик возьматъя. Ми, Кун Кенешлэн Тӧроезлэсь Александр Волковлэсь Сюмси но Селта ёросъёсын ужамзэ возьматыны ыстэм журналистъёс, сое аспӧртэм шумпоттӥсь тодметэн лыдъям. Гудыри омырез, пе, чылкытатэ ук. Нош чылкытлык кулэ котькытын - адямилэн нуналлы быдэ улон-вылоназ но, экономикаын но, бадӟым политикаын но. Кунмылэн азинскон сюрес вылаз гинэ вань калыкез зуркатӥсь "гудыриос" медаз луэ ни вылэм. Дыр вуиз улонмылэсь берло аръёсы тугаськем бугорзэ сэрттыны-пертчыны. Ма бордысен нош со борды кутсконо? Кун Кенешлэн Тӧроез пумиськонъёс дыръя пусйиз: шаермылэн экономикаез улӟиз, данакез предприятиосмы пайда поттыса ужаны кутскизы. Туэ тямыс толэзь куспын ваньбур поттон, миымен ӵошатыса, 30 процентлы будӥз. Республикалэн бюджетэзлэн доход люкетаз коньдон вуыны ӧдъяз. Луонлык кылдӥз со чотын социальной удысэз азинтыны, кылсярысь, ёросъёсысь таӵе учреждениослы юрттыны. Нош юрттэт зэмзэ но кулэ. Тани Сюмсиысь ёрос больницалэн поликлиникаез чылкак супырӟемын ни. Бадӟым куноос ас синмынызы адӟизы, кызьы вуж юртлэн вӧлдэтэз пыр зор ву шапыкъёс тёп-тёп гинэ коридоре вияло. Кызь ар ӵоже ини поликлиникаез выльдон сярысь ужпум эскериське. Нош уж интыысьтыз уг вырӟы. Эмъяськонниын ужасьёс осконзэс чылкак ыштӥллям ни. Выль юрт ӝутыны 100 миллион манетлэсь ятыр коньдон кулэ луоз. Александр Волков выль юрт ӝутонъя документъёс дасяны куриз. Республика сюмсиослы юрттыны дась, пусйиз вылӥ кивалтӥсь. Бускельёссы, селта калыклэсь тазалыксэ утисьёс, но майбыр уг уло. Кӧня ке ар талэсь азьло нуны ваён юрт ӝутыны кутскиллям. Инъетсэ лэсьтӥллям ик. Нош собере ужъёс могӟиллям, валамон ини, нош ик коньдон ӧвӧл. Шедьтоно, пе, 20 миллион манет. Таяз учыре но секыт ныпъетэз Кун Кенешлэн Тӧроез ас пельпум вылаз басьтоно кариськиз. Нылпиос - кунмылэн ӵуказе нуналыз, шуиз со, соин ик соос сярысь сюлмаськон уж вылын мед адӟиськоз. Шаермылы кулэ ӟеч эмъяськон учреждениос, туала улонлэн куронъёсызлы тупась школаос. Тани туэ выль дышетскон арлы республикаын 10 выль школа усьтэмын. Вуоно арын та лыдпус будоз. Со сяна, пыр-поч ужано дышетон учреждениосты, тужгес ик - гурт школаосты, компьютеръёсын узырмытон ласянь. Гуртысь пиналъёс городысь ёзъёссы выллем ик тодон-валан люканы мед быгатозы. Соку вылӥ дышетскон заведениосы пырыкузы но шуг-секытъёсын уз пумиське. Сыӵе мылкыдзэ усьтӥз Александр Волков Селта шор ёзо школаысь дышетӥсьёсын пумиськонэз дыръя. Ватонэз ӧвӧл, котькуд ёрослэсь байлыксэ нырысь ик возьматэ социальной удыс. Та ласянь сюмсиослы но селтаослы трос "пӧсяно" луоз на. Мукетыз тодмет, мон шуысал, чагыр эстӥськон. Сюмсие со вуэмын ӧвӧл на. Гумыос 52 иськем кысконо. 30- эз вань ини. Кылемзэ мар чотын, кин чотын лэсьтозы? Гуртоос оско депутатсылы Миталий Вихайлович Возисовлы. Эшшо одӥгез шӧдскымон тодмет - сюресъёс. Валлян туж пусйымон ужрад ортчиз. "Удмуртавтодор" предприятие быдэстӥз Москва-Екатеринбург федеральной сюреслэсь сюмси люкетсэ. Вашкала Сибирь трактлэн ог вадесыз выльдӥськиз, табере вольыт сюрес кузя машинаос вылӥ ӝоглыкен ширтыны быгато ни. Но Селта ёросэ пырон дорозь гинэ. Отысен гопъёс-выръёс кутско. Но ужъёсты быдэсъянын могӟет кылдӥз. Сюрес лэсьтонэз азьланьтон понна нюлэсэз корано. Нош со федерацилэн ваньбурез. Вераны кулэ, Россиысь Нюлэс удысъя министерство быдтэмын. Жаляса верано, республикаысьтымы таӵе ёзэз утьыны тыршом, шуиз Александр Волков. Соку ужпумез сэрттыны-пертчыны капчигес луоз. Пумиськонъёс дыръя Кун Кенешлэн Тӧроез пусйиз: улонысьтымы тросэз тугаськем бугоръёс кылдӥзы элькунамы но, Россиын но кун власть лябен. Россилэн выль Президентэз югдурез умой вала, сое воштыны тырше. Республикаысьтымы но югдурез тупатоно. Ӵапак соин ик кулэ президент. Со ужамзы понна кылзэс юаны быгатоз ни ёрос администрациослэн кивалтӥсьёссылэсь но. Шуом, малы гыроно-кизёно муос сюбегало? Тани шаерамы арлы быдэ 30 сюрс гектар бусыосты жаг турын басьтэ. Малы арысь аре ялан кулэсме пудо уллё, вужме техника? Огкылын вераса, малы гурт удыс лябӟе? Республика музъем ужасьёслы юрттэ, эстӥськон, кидыс басьтыны коньдон висъя. Нош со му пыр вия кадь, пайдаез уг шӧдӥськы. Кун властез улӥысен вылӥозь радъян юрттоз пӧртэм ёзъёсын кыл кутонэз юнматыны, пусйиз Кун Кенешлэн Тӧроез. Ужаса улӥсьёсын кенешонъёсыз дыръя Александр Волков кылпум ӵем поттылӥз республикамес азинтонъя программа сярысь. Ӵапак со бордын али бадӟым уж мынэ. Отчы музъем ужасьёс но ӵектонъёссэс пыртыны быгато. Кун Кенешлэн Тӧроез вераз: Удмурт автономия кылдэм дырысен 80 ар тырмонлы та документ дась луоз. Озьы ик Александр Александрович ивортӥз, со программалы федеральной статус сётыны тыршозы шуыса. Ӵапак со сярысь вераськон мыноз Россилэн Президентэныз Владимир Путинэн Москваын сентябре пумиськонэз дыръя. Ю. Александрова. Марина КОСТЫЛЕВА Алексей ШКЛЯЕВ ИНКУАЗЬ ТА ВЫЖЫЕЗ БЫДТЫНЫ ВЫРЕ Но уг быгаты. Медаз пишмыты! Та корка Курчум-Норьялась тужгес чеберез. Кузёез - зарни киё архитектор но лэсьтӥськись. Шудо уло, дыр, пужыё из борддоръёс сьӧрын. Но... Та гуртын но, Пичи Пурга ёросын но вань меда сомында кайгу пыр потэм муртъёс? Ачиз инкуазь (дунне, инмар) та выжыез малы ке быдтыны выре кадь. Нош татчыозь ӧз быгаты на. Мадём радызъя. 1. Песятай Выжылэн шорсюлмыз, Яков Петров, вордскиз 1924-тӥ арын Курчумын. Анайзылэн дас нылпиез вал. Ӵапак ӝыныез пичи дыръязы кулӥллям. Быдэсмиз витез - Матвей, Илья, Миша, Семон но берлоез - Яша. Анай-атайзы байгес улӥзы. Соин ик единоос вылӥллям. Вордӥзы вал, куинь искал, уно муш. Йӧл сӥсъян аппарат (сепаратор) басьтӥзы. Вожъяськисьёслэсь курдаса, тазэ лушкемен гинэ бергатъязы. Корказы бадӟым но чебер вал. Улон-вылон вуттӥз "кулэ" учыре. 1936-тӥ арын Петровъёсты кулак каризы. Пудо- животсэс талазы. Тодэ вайытӥзы: атайзы колхозэ пырыны мылкыд ӧз кары вал. Улы (семья) вылэ радазтэм бадӟым выт пуктӥзы. Сое тырыны моӵ уз сузьы. Ма кароно? Дэмлась сюриз: юртъердэс дунтэмен коть вузалэ - ато буш талалозы. Атай тодэ ваиз Курчумысь ик паймымон муртэ - Маштакез. Сое нокин ӧз яратылы: ассэ синазькыль возиз, адямиез кылынызы вӧсь карылӥз. Соин артэ ик сылыны юрӟым. Ӵапак та Маштак ӧз чагиськы меда Петровъёс вылэ? Оло сое кӧяно-вӧяно? Из сюлэмез зарни небӟытэ, шуо. Воргорон вандӥз парсьсэ. Уин сӥльзэ шур кузя лушкемак нуиз Маштак дӥне. Таиз зэм но ик шумпотыса басьтӥз. Ыль но вӧй выриз. Тӥ, пе, мынам нырысетӥ юлтошъёсы, мон тӥледды нокинлы но вӧсь карыны уг сёты. Каньылак сюлмын бертӥз дораз уйшор бере Александр Петров. Ӵуказеяз учке но - дораз Маштак вамыштэ. Толло кенешемдэс "юнматон" вылысь, коньдон портэ. Сётытэк ӧйлась. Кескич Маштак кема сюпсиз кулакъёсты. Зэм, улонэз всёравно ӧз удалты. Нырысетӥ кышноезлэсь люкиськытэк ваиз на кыкетӥзэ. Мулла музэн. Кузпалъёсыз бигер кышноос кадь либытэсь вылӥллямтэ. Куспазы керетыны кутскизы, марзэс ке люкытэк. Ог- огзылы ӧчкарыса, Маштаклэсь уксё кыскам квитанциоссэ быдтӥллям. Соин сэрен картсэс тюрьмае пытсазы. Отын ик эзельзэ шедьтӥз. Петровъёслэн улон гожзы шуген ке но - азьланьскиз. Агайёсыз сямен ик, Яша ньыль классэз быдтӥз. Мишазы гинэ тямыс ар дышетскыны быгатӥз. Туж визьмо вал уга. Ачиз кырӟан гожъяз. Олокӧня тетрадь люкаськиз. Эшъёсыныз ӵош соосты кырӟалляз. Дышетскемез бере кошкиз Ижысь кудаз ке организацие. Городын Миша возьдаськылӥз кыскето шубаен ветлыны. Нош мукет шуныт дӥсез ӧй вал. Толалтэ но уж дураз пенжакен ветлӥз. Кынмыны сюриз. Висьыны ӧдъяз. Толэзь пала лек кылзыса улӥз. Бератаз Курчуме вуиз. Катьяськон вылысь мунчое ветлӥз. Юн-юн париськиз, пыриз корка пушкы, пуксиз койка вылэ. Каллен-каллен лэзькиз миндэр вылэ. Озьы вуиз кулонэз. Яша школа бере йӧ сюрес вылтӥ кор нуллӥз. Мӧйыослэсь бере ӧз кыльы. 1942-тӥ арын Матвей агайзэ оже келязы. Со интые леснике басьтӥзы Яшаез. Таиз дас тямысаз вуиз но - армие нуизы. Куинь толэзь ӵоже дышетӥзы снайпере. Толалтэ нюлэскы ыстӥзы. Пыдкутчан туж алама (урод). Вылаз ик кукыз кор улэ сюриз. Лыэз курег пуз быдӟа пульдӥз. Сое рос-прос учкисез ӧй вал. Врачъёс ӧжыт уга. Пыдзэ бератаз чаклазы но йырынызы шоназы: со сисьме ни, гангрена ӧвӧл меда? Нуизы больницае. Амал одӥг, пе: пыдзэ вандоно. Яке мукет сюрес: мын дорад, нош тазалыкед понна ми ум, ачид кыл кутод. Яша бертоно ик кариськиз. Вордскем палан кыль но капчигес кожаз. Пыд вылаз султэмез уг луы. Пыдчиньы йылаз лёгиськыса вуиз. Дорын зэмен ик каньылгес вылэм. Кинлэсь ке кылӥз: гижлоез ньылпу лысэз пызьнаса эмъяно. Озьы ик лэсьтӥз. Осконтэм ке но - зэм: бурмиз пыдыз. Куинь толэзь ортчыса, Петровез выльысь леснике басьтӥзы. Фронтэ ӧз ни келялэ. Воргоронъёс тырмымтэен, нюлэсчиос но нылкышноос но вал: Матвей агаезлэн Клавдия нылыз но эшез - Александрова Саня. Петровъёслэн дядйзы кулэмын ини. Яша кылиз кузё интые. Агайёсыз фронтын. Матвей но Илья лек ожын бырыны шедизы. Семонлэсь пельпумзэ секыт сӧсыртӥзы Сталинград дорын . Вуиз гуртэ. Корка пуктыны малпаз. Липыны кутскиз ини. Иже шонтӥз лэсьтӥськон маке басьтыны. Гуртэ ӧз берты ни. Сӥзьыл озьы вал. Тулыс пал гинэ шунам лымы улысь шӧйзэ шедьтӥзы. Гуртэ бертыкуз, кинъёс ке машинаен келяллям, нюлэс пала васькытыса быдтӥллям. Кин тодэ малызэ. Сьӧраз кӧня ке ӟенелик аракыез вал - со понна шат? Яша война бырытозь лесникын ветлӥз. Пӧйшураз трос гинэ. Сикъёсын изьверъёс но коньыос тачак вал. Огпол пуныеныз ӵош мынӥз луд кечез кутыны. Кечез адӟизы. Шарик утыны кутскиз, кӧня ке улыса, кыксы ик ышизы. - Пегзиз, шайтан басьтон, - нукыртӥз Яша. Пытьы кузя вамыштӥз но пограм кечез синйылтӥз. Али гинэ кулэм. Малы? Адями ыбыны ӧз вуы ук. Мазэ-созэ мырдэм ятвылтӥз пӧйшурась. Пунылэсь пегӟись кеч, пытьызэ сураса, вылды, шуак палэнэ тэтчем но кымысэныз кызьпу борды шуккиськем, отчы ик вез-вез усем. 1945-тӥ арын пияш кышнояськыны малпаз. Быръем нылмуртлэн нимыз Домла. Малы сыӵе паймымон ним? Ма, азьло олокыӵе но ним тырылӥзы. Тани Удмурт починкаын Коӵо но, Пислэг но, Куака но вал. Кышно луон Яшалэсь дас кык ареслы бадӟымгес. Нылъёс трос ке но, малы меда Домлаез бырйиз со? Шуг вераны. Егитъёс люкаськылӥзы шуныт мунчое. Нылъёс керттӥсько, пияшъёс кырӟало-верало. Вуылӥзы бускель гуртъёсы но. Озьы ке но, мукет гуртысь туган ӧз шедьы. Домлалы ик синмаськиз. Домла азьло бызьылэмын вал ини. Картэз ожын быриз, тямыс аресъем нылпиез кулӥз. Огназ улӥз. Соин Яша ачиз лыктӥз Домла дӥне. Жаль, нылпизы ӧз вордскы ни. Шудзы тыр ӧй вал. Ма кароно? Гурт кузя кураськись нылкышно ветлӥз. Кык аресъем пиез сьӧраз. Петровъёс сюлворизы нылпизэ татчы кельтыны. Кык-куинь толэзь вордӥзы. Кураськись кышно огпол пыриз пияшсэ учкыны. Пичи маке анайзэ шуак тодмаз, бордаз кырмиськиз но уг лэзьы ини. Мар-о карозы на мискинь кузпалъёс? Пиез кужмысь доразы ӧз кельтэ ини, анаез сьӧры лэзизы. Асьсэос Иже ветлӥзы, детдомысь нылпи быръён вылысь. Тае кылыса, Бодьялась кыӵе ке нылкышно вуз. Сьӧраз ваиз бызьытэк ваем пизэ. Таизлы арес но ӧй вал на. Петровъёс басьтӥзы. Нимыз лекос мудрон - Эрнестр, пе. Гуртын калык ӧз дышы солы - капчияк гинэ Коля шуыны кутскиз. Война бере гинэ Яша колхозэ пыриз. Ваньмон дыръяз ас дораз муш вордыны малпаз. Ас понназ ик дышетскиз та удыслы. Нырысь-валысь нюлэскысь пегӟем палэпъёсты кутылӥз. Кыз борды умортоос ошылыса. Пумен муш семьяез йылӥз но йылӥз. 1967-тӥ арын колхозын но сое мушкась луыны косӥзы. Дас кык ар отын тыршиз. Тодаз вае: - Азьло шутэтскыны но дыр ӧз сюрылы. Калык туж ужась вал. Выльдӥськон шуонзы адямиез копак азьтэм но возьдаськисьтэм кариз. Азьло мар ке быдӟа бусыысь люкам ю тысез киын куасьтылӥзы. Тылскем вылын корт листэз ӟырдатыса. Микаля Костя улӥз - ужаса арняосын гуртаз ӧз бертылы. Азьтэмъёсыз туж ӧжыт вал. Али Яша агай юнгес ӝожтӥське тазалыкез вылэ. Уката ик - кенэз кулэм бере. Ортчыт трос шуг-секытъёс усё солэн пельпум вылаз. 2. Атай Аслаз мадамез Аннаелэн улон сюресэз вольыт ӧй вал. Бӧдьялан сое Шӧг Параско шуо вылэм. Егит дыръяз мамаез синмаськем Нестр нимо поляклы. Вордскеме бере монэ черке нуллэм. Отын шуиллям: - Нестр ним ӧвӧл. Монэ гожтӥллям Эрнестр. Одӥг но ӝыны арес дыръям монэ вордыны басьтӥллям Петровъёс. Курчумысен монэ Коля шуыны кутскиллям. Бен удмуртлы шуг ук сыӵе мудрон нимез вераны. Кылдэ тӥялод. Документъёсам Эрнестр ик гожтӥллям. Озьы кык нимын улӥсько. Мынам ваньмыз кык - нимы, мотике, машинае, коркае, кык йӧнтэм пие.Кышное но кык шуыны луоз ини... Яша но Домла мынам анай-атае ӧвӧл шуыса, мон ӧй тодылы. Дас арес дыръям ини бускель вераны шедьтӥз: тон вордос, пе. Малпаськонэ уси: малы, пӧй, Бӧдьялась Шӧг Параско ми доры ӵем гинэ куное ветлэ? Мон сое апай шуылӥ. Али но мон понна апай гинэ. Пересьмиз ини. Огназ улыкуз, сое дорамы вайыны ӧдъяськом вал. Жаль потылӥз. Но али... карт пыртӥз. Таиз но туж алама - астмаен курадӟе. Кыкназэс ум вае ни. Йылпумъяй Курчум школаез, дышетски Сарапулысь совхоз-техникумын . Эрнестр нимы Эриклы пӧрмиз. Отын писпуэн ужаны дышетӥзы. Диплом басьтэме бере ик ыстӥзы Кемерово областьын Киселёвск городэ. Механик, пе, луод. Мар-о карод на? Партия косэ бере - мынӥ. Кӧня ке толэзь ортчиз - армие мыныны повестка вуиз. Дасяськыны - одӥг арня. Курчуме уд бертылы ни. Эшме но, шахтёрез, басьто. Кыкнамы соку паркетӥ калгим, ӧжытак юим, таксиен ворттылӥм. Машина понна со тыриз. Мар-о абдранэз? Мон 90 манет басьтӥсько, шахтёр - 500. Тӥни озьы "дырмес виим" но военкоматэ мынӥм. Мукет пиосты келясьёс зар-р бӧрдо. Ми шахтёрен серекъяськом - милемлы-то мар? Сюри Сахалинэ, копак дунне пыдсы. "Салагаосты" "пересьёс" соку ик визьманы малпазы. Монэ пукон вылэ выдтыса чабкылыны кутскизы. Ӧй чида. Ка-ак тэтчи но пуконэным шонски! Дэймизы кадь - ӧз исалэ ни. Армиын пӧламы йӧнтэм пияш вал - Петров ик фамилиез. Маке дауртэмез понна дисциплинарной батальонэ сюрылэм. Визь пырымтэ. Номырлэсь кӧберыз ӧвӧл. Ӵошен дежурствое сюриськиз на, лекос урод йӧтэ. Со уйшорозь юэ, собере олокытӥ калге. Кыӵе секыт огнын чакласькыны! Аслам но иземе потэ ук, нош воштӥськыны нокинэн. Котьма ке но, шуг-секытъёсты вормыны дыши. Туж куризы весяклы армие кыльыны. Ӧй чида ук, бертӥ. Анай-атае жаль потӥзы. Ма, эшшо ке калык но кыл поттоз: утялтӥзы-утялтӥзы, нош со дорзэ но ӵыжы-выжызэ кулэ ӧз кары. Армие кыльысал ке, пенсие потысал ини. Угось Сахалинскын одӥг арез одӥг но ӝыны арен лыдӟо. 1969-тӥ арын бертӥ. Дышетскемея ужан инты мынам ӧвӧл. Вамыштӥ комсомоллэн райкомаз. "Шумпоттӥзы": егит пиос, пе, туж кулэ Сахалинын, тонэ отчы келялом. Пыкиськи: - Али гинэ отысь бертӥ. Интыяськи передвижной механизированной колоннае (ПМК-е) ужаны. Егоров Мишаен ӵош монэ косӥзы огзэ цехез пиялаяны? Огмылэн но стеклорезэз воземмы ӧвӧл. Кӧня пияла пилим соку! Зэм, ваньбурез шыръян сярысь соку уг ӵашето на вал. Кибервылмы кельшем, вылды. Монэ мастер кароно, пе. Юазы: - Нарядъёс гожтыны быгатод-а? - Ма, дышетӥзы кадь. Озьы мастер луи. Пуныгуртын вордскем Катяез мон арми дорозь тодӥ. Туганэ трос ке но, таиз юнгес кельшиз. Педучилище бере Курчумын вожатой вал. Гожналан дышетыкуз, ӵем гинэ дораз вуылӥ. Огпол пиналъёсты со Пичи Пургала экскурсие ваем. Сьӧраз калъяськем покчи ӵыжы-выжыез - Таняез. Нылашлы серем пыр шуисько: - Апайдэ али ик лушкало но, аслым карыса, Курчуме нуо. Таиз кутскиз ук вузыны! Мырдэм буйгатӥ. Армиысь бертэме бере, Катя вераз: мукетсэ, пе, возьмасько. Дугдӥ дораз ветлэмысь. Дыр ортчыса, кызьы ке пумиським на. Югдур воштӥськем кадь. Спиртка агаен ӵош вал вылэ пуксим но сое кураны Пуныгуртэ лашкантӥм. Нош сюанэ мынӥм ни толалтэ - дизелен. Туала "Волгаен" уд ӵошаты. Жаляса верано луэ: уж дурын семьяын кадь вуюись ӧз ворекъя. Кивалтӥсе косӥз быдэстымтэ ужез нарядэ гожтыны. Йыртэман борды ӧй басьтӥськы. Улляз. Пыри Глазовысь огаз техучилищее. Сокем ик мыло-кыдо ӧй дышетскы. Но экзаменъёсты сётъяны кызьы ке быгатӥ. Собере выльысь ПМК-ын ужаны кутски - азьло кивалтӥсь ик чортӥз. Выжтӥзы райисполкомысь лэсьтӥськон отделэ. Инженер луи. "Тунсыко" удыс - документъёс дасянъя инженер. Пургала улон инты висъязы. Нош пересьёсы ӧз мынэ. Жаль потӥзы. Мон но дорысьтызы ӧй кошкы ни. Курчумысен Пургала ветлӥ ужаны. Одӥг пол милемды партилэн райкомез шымыръяны ӧдъяз. Мугез таӵе, Кутсаськон инты лэсьтон понна, 75 сюрс манет кулэ, шуимы. Райкомъёс олокызьы лыдъяллям: лапасэз инъян чарак дунтэмгес усёз, пе. Соос уг тодо ук: запчастьёс, юри заказтыса, кыдёкысь ваемын, мукет ужъёс но дуногес усизы. Вылаз ик, кин ке вылӥе чагиськем на. Колхоз председателез но, монэ но милициетӥ кысказы. Председательлэн сюлэмыз лябӟиз но, воргорон кулӥз. Кошки ОКС-ысь. Ижысь огаз организацие интыськи. Отчы кин ке гожтэт ыстэм ини, монэ валтӥсь инженере медаз пуктэ шуыса. Уть кыӵе югдур вал азьло. Нош мыным сётӥзы ик умой ужан инты. Квартира висъязы. Зэм, отын ӧй улы. Нуналлы быдэ сямен бертылӥ Курчуме. Пересьёсме кинлы куштыса кельтом? Берло машинаен уже ветлыны кутски - озьы ик сисьтыса быдтӥ. Квартираелэсь усьтонзэ эшъёсылы сётӥ. Аслам пропискае Ижын. Нош ик кин ке чагиськыны вуттэм: пропискаезъя уг улы, пе. Райком выльысь пачкатӥз монэ: яке квартиаряд ул, яке сое нимаз юртэн вошты. Озьы Ижын пу коркае кылдӥз. Собере выльысь Пургалан ужаны кутски. Али - ёросысь валтӥсь архитектор. Улонын секытэз но, маскараез но артэ ветлэ. Мадём-а кыскемысь дугдэмме? 1985-тӥ арын пасха уе Машин Лёняен ӵош картаен шудэмысь бертӥськом. Кисыям - быдэс пачка "Родопи". Лёнялы сое мичисько: - Мон больше уг кыскы ни. Ӧз оскы кадь. Собере бӧлякъёсын юмшаны кутским. Спиридон пурккетыны чортэ. Чидасько: котькуд корка пыракум, тросгес сиськыса буйгатӥсько асме. Собере пумен дыши тамактэк улыны. Али шакшыез адӟеме но уг поты ни. Кызьы меда кыскись пиосъёсты нылъёс ярато? Укыр зын потэ ук ымысьтызы. Кыскытэк каньыл вылэм. Азьло кылзыса лулме уг шедьтӥськы вал - али шоканы но капчи. Улыса-вылыса аслэсьтым папашаме но шедьтӥ. Малы ке Норьяла мынӥм. Машина кузёе монэ возьматэк кошкем - быжзэ гинэ адӟи на. Мар каром? Тухтарев фамилиен фотографез пумитай. Сое, арлыдо воргронэз, кемалась тодӥсько. Татчы аслаз машинаеныз лыктэмын. Монэ гуртэ келяны соглаш луиз. Одӥг юртэ куное кожалом но кошком, пе. Сьӧраз ӧй пыры, возьдаськи. Ачим капчи ботинкаен гинэ, нош куазь кезьыт. Пыдчиньыос чонгыразы. Тэтчаса улӥ-улӥ но, Тухтарев потӥз. Чаляк лавкае шонтӥм. Сур басьтӥ, бордам кынмем медам лякиськы шуыса. Бертыкумы вераськыны кутским. Мынэсьтым улон-вылонме юа. Озьы-озьы, шуисько, вордос пи мон. Со чабкиськиз. Шуэ: 1946-тӥ арын ӧжыт гинэ ӧй кышнояськы. Валаз: мон - аслаз пиез. Зэм ик, ог- огмес чакласькомы но - бам выламы вурыслы укшась гожъёс кыкнамылэн одӥг кадесь. Солэн нимыз Аркадий. Но мемее, нырысетӥ буквазэ гинэ кельтыса, монэ Анатольевич гожтэм. Мон сое ноку но атай ӧй шуылы. Семьяез аслаз. Мынам - аслам. Пиосы но вал ини. Улон сыӵе ини, дыр. Кытын ке но удалтэ, кытын ке но уг. Кыкто пиосмы вордскем бере, ӧлексы луонзэс ӧм тодэ. Кыкетӥ классозь чырткем бызьылӥзы ай. Куддыр канжаськыса усьылӥзы ик. Витямы песятаез доры олокудкеме муш бакчае вуылӥз. Собере пиосы лябӟыны кутскизы. Алёша вазьгес лэзькиз. Пиналъёсмес олокытчы но нуллӥм. Нырысь Евпаторие эмъяськыны мынӥм. Лобӟим самолётэн. Москваын транспортэз воштоно вал. Нырысь азьлане нуисько сумкаосме. Собере ки йылам ӝутӥсько Витюкме. Сумкаос вылэ пуктыса шуисько: - Пие, татысь нокытчы эн кошкы. Собере берытскисько но Алёшаме ваисько. Самолётмы Симферополе пуксиз, ӵапак Брежнев кулэм сярыс ивортыкузы. Буре ваён минут карытэк, трап вылэ потыны ӧз лэзе. Ярам, горд киросо машина вуттӥз милемды куэ интые. Нимаз кузё дорын улӥм. Нуналлы быдэ пансионатэ ветлӥм пиосмес эмъяны. Алёшаме нуллыны прокатысь велосипед басьтӥ. Сьӧрамы сое вайыны йырамы ӧз шуккы. Катялы но мыным шутэтсконэн йырин ӧй вал. Бертон дыр вуиз. Поездын каньылгес вал ини Огырчиозь ик бертӥм. Пиослы капчигес ӧз луы кадь. Туноос доры но пиосмес вуттылӥм - Кутер-Кутонэ, Балезиное, Воткае. Глаз палась пересь кыӵе ке шакаляосын выриз-выриз, толыкез ӧй вал. Воткаысез туно ву вадьсын маке сипыртылӥз. Пиос шумпотӥзы вал: мугор пушкын маиз ке воштӥське, пе. Ӧйтӧд, оломар вал, сёровно пыд йылазы султыны ӧз быгатэ ук. Кыкто пиосме пичи дыръязы ӧй тодмалля. Собере валаны кутски: кытын Витя, кытын Олёш. Сямъёссы соослэн одӥг кадесьгес, Витюк ӧжытак сэзьгес. Алёша - мылкыдтэмгес. Но кыкназы ик визьмоесь. Куддыр монэ дышетыны но выро ини.Кылсярысь, компьютерен вырон ласянь. Малпаським выль корка сярысь. Кытысь коньдон? Приватизация вакытэ визьмо муртъёс косӥзы ваучер басьтыны. 24 манетэн басьтӥ дуно бумагаез магазинысь, черодын сылӥсь кышнолэсь. Сётӥ "Удмуртнефте". Ачим валатэк ик со пӧрмем привилигиен 76 акцилы. Татысь коньдон поттӥм. Ижысь коркамес вузамы на. Коркалы кӧня кирпич кулэ - пиос компьютерен лыдъязы, пужызэ малпазы. Сарык Генко коркамес пуктӥз. Пиос вуж юртысен укноетӥ учко. Маиз ке мыдланьгес ке, анайзылы верало, таиз ини - технадзор соку ик Генколы ивортэ. Йырберзэ кормаса ини йылпумъяз лэсьтӥськонзэ. Та вакытэгес ик пиосы коркалы ӧсъёс но гардинаос лэсьтӥзы. Эн вунэтэ: соослэн ветлэмзы но, сылэмзы но уг луы, пуко шуген. Соослы пул но сое вандон тӥрлык кельтӥсько но, ас понназы йӧндыро ни. Пиослы коркасен азбаре коляскаен васькан выж ӧм лэсьтэ. Ас кужыме вылэ оскытски. Пельпум вылам соосты кыре поттасько. Али но тросгес ужаны тыршисько. Куректон копак медаз зӥбы. Кышное кулӥз, но пиосы вань на ук. Дед но пересьмиз ини. Кин соосты учкоз? Сюлмаськонэн улон но умой ӧвӧл. Азьло калык уно тырше вал. Нош али - "Так щиба". Озьы вералоз вал колхозмылэн азьвыл бигер председателез Тадршик. Оломар дауртӥське ини улонын. Калыкез зӥбо. Ас понназ тыршыны уг сёто. Болгарие вуылэме вань. Отын милиция машинаез ноку огшоры уг дугдыты. Нош ӝегатэ ке - дася ни уксёдэ, мае ке но умойтэм лэсьтӥд. Асьмелэн ГАИ-ез ГИБДД каризы ини - ӟечез ӧвӧл. Шофёръёс вылын кӧтсэс тыро погонэн адямиос, ӧвӧлтэмысь муг шедьто, уксё портон понна. Ужась калыкез малы ке шымыръяло, адӟо, нош эрказмемъёслы - эрик. Огшоры калыклэн улоназ тачак алонъёс. Кузёосмы ваньзэ аналтӥзы. Малы Китайысь олокыӵе но вуз ваё? Асьмелэн чарак умойгес лэсьтыны быгатысалзы ук. Странаез копак куашкатыса быдтӥзы. Зэм верало: Россиез визьмын, пе, валаны уг луы. Тани али Воткаын пуктыны медо ракетаысь эстӥськонэз быдтон завод. Дан потто: калыклы уж сюроз, пе. Нош асьсэос уг валало: берло олокыӵе ӵынэн уз воньдэ меда? Кивалтӥсьёслы абдрасько, "Ижсталь" огазеяськонын кыӵе ке кузёен сад-бакчаын пумиськи. Шуэ: - Чибиньёсын ёрми. Валэктӥсько: - Гуртын соостэк уг луы. Город ӧвӧл ук татын. Город адями абдратӥз: - Мон коркась вань нымы-кибыез пылесосэн октыса быдтӥ ини. Нош коргидысь улляме уг пӧрмы. Коскасько вал ини. Мон ноку но сыӵе маскара амалозь ӧй малпаськысал. Нош бускеле - бадӟым адями. Сыӵеос тӥни асьмемын кивалтыло. Тӥни озьы выро Россиын. Олокытчы гинэ уксё киськаса быдто. Ужъёсты лэсьтыны дунтэмгес амалъёс вань ке но. Анай Екатерина Васильевна Петровалэсь туннэ уд юалляськы ни. Витьтон сьӧры потыса, кема ик ӧз улы ни. Мадё пиосыз: - Мамусьмы вордскем Пужыгуртын. Гожнялан тямыс классэз быдтэм. Ветеринар луэмез потэ вылэм. Кенакез, дышетӥсь, дэмлам педучилищее пырыны. Озьы сюрем Можгалась педучилищее. Дышетскем тодмо писателен Николай Самсоновен ӵош. Курчумын вожатой вал, собере кема аръёс ӵоже дышетӥз пичи классъёсын. Ужамен ӵош дышетскиз институтын. Библиотекаын ужась Наталья Алексеевна Мамина: - Ми Екатерина Васильевнаен туж эшъяськиськом вал. Соин синвутэк вераны уг быгатӥськы. Умой адями вал, котькинлы юрттыны дась. Сыӵе сямыз ини солэн. Пиналъёсты туж яратӥз. Ужен ик быдтӥз ук ассэ. Операция бере но весь бергаз на. Нодтэм пиналъёсын кӧня улонзэ быдтӥз. Вераськом: эн выры соосын, мылзы уг поты бере, медаз дышетске, нервадэ эн шальтраты. Екатерина Васильевна ӧз кылзӥськы. Сыӵе пиналъёс понна сюлэмзэ быдтӥз, адями карыны турттӥз, урок бере но кема нодъяны выриз. Нош ерпечкаослэн анай-атайёссы но кудӥз тау карыны ӧз валалэ, ӧз дунъялэ. Синву пыр вера картэз: - Катяен умой улӥм но тыршим. Быземез бере ини институтэз заочной амалэн быдтӥз. Висемез кемалась ӧз шӧдӥськы. Номыр уг куареты вал ук - весь маке но берга. Лябӟемзэ шӧдыса, сое нуллыны кутски больницае но черке. Куре бере - бензин жаль ӧвӧл. Кылем арын уриськыны потӥз на. Улляй: - Мын ай, дыдые, кошкы. Астэ курадӟытӥськод, адямиос шорам кырыж учкозы ук. Оломалы тачак чеснок мерттэм на. Дедэн бичаны вырим ини берло. Йырвизьмыз ӧз сураськылы. Кӧня ке мыдланьгес вераськемез вал ик. Огпол городысен тапочки басьтыны мынӥм. Пыды, пе, туж кынме. Вузчилэсь юа: - Тӥ кытӥсь-о луиськоды? - Мар-о, Катя, сыӵе вераськиськод? - юасько. Собере гуртэ бертӥм. Мон шутэтскыны выдӥ. Катя парсьёслы куар корам на. Кӧня ке улыса, пиос дорам вуизы. Мамусьлэн, пе, ӝыны час ини куараез уг поты. Катя доры вамыштӥ - катьтэм кылле. Сэрытак бызи Кельман Сашик доры. Со - санитар. Учкиз но валэктӥз: - Шуккем ук тае. Соку ик больницаысь машина ӧтим. Пургала нуим. Кема выризы висёнзэ валаны. Мае ке, пе, умойтэмзэ сиыны шедьтӥз, дыр. Берло гинэ ятвылтӥзы: инсульт. Операция бере Катя ӧжытак бурмиз кадь. Врачъёс но паймизы. Доре ваи. Татчыозь одӥг но ӝыны толэзь султылытэк улӥз вал. Дорын пиос но мон утялтӥм ини. Укно дурын пукыкуз, ульчаысь котькинэ тодма вал. Сое выльысен ветлыны дышетӥм. Ӵуксэ но ӝытсэ кунултыса корка кузя нуллӥ. Нош нуназе, мон ӧвӧл дыръя, пиослэн колясказы борды кутскыса, ӧжыт вамышъяз. Мунчое куинь пол ки вылам нуллыса вуттӥ. Выльысь пери шуккиз ук Катяме. Огназ больницаын медаз кылльы. Мирон Катяез ёртӥ. Кыллелэ, шуисько, ӵош, тыныд уксё но тыро. Угось таизлэн но висёнэз сыӵегес: кыкназылэн чиньыосазы вир ӧжыт лыктэ, сюлэмзы ӵогъя. Кыкназэс больницае выдтӥм. Укмыс нунал гинэ чидаз на Катяе. Уж дурам врачъёс жингыртӥзы... Кышное кулэм бере, ачим пудо сюдӥ. Выжъёсты миськылӥ. Скал кысконо луи. Эшшо парсьпи басьтӥ на. Копак лэзьконтэм понна уж борды ӝабырски. Быдэс нунал бергаськод но жадьыса умме усиськод ни. *** Чебер малпанъёсын вордӥз вал Екатерина Васильевна кыкто пиоссэ 1971-тӥ арын. Лябомемзэс шӧдыса, Ижысь больницае ваиз. Веразы-а солы, ӧз-а, пиналъёсыз ӝоген ветлыны уз быгатэ шуыса - туннэ нокинлэсь уд юа ни. Но мискинь кышномуртлэн амалтэк синкылиез потӥз. Врач шуиз: - Тӥ дышетӥсь, чиданы кулэ. Анай сюлэм та дырысен буйганэз ӧз валалля ни. Нош суй-пыдзэ ӧз юскы. Бадӟым кайгу пушкын но пичи коть шумпотон луэ вылэм. Пиос дышизы пичи шыкысъёс инъяны. Пургалась дано "Зарни шеп", кунгож сьӧры кошкыкуз, соосты кузьым чот басьтэ. Огез утиське Венгриын, мукетыз - Финляндиын. Доразы но пужыятэм шыкысъёссы вань. Екатерина Васильевна шуылоз вал: - Таосты учкыкум, вань куректонэ тӧлӟе. Ӟеч малпан кузьма ӟеч мылкыд. Ӵок, котькудӥз малпан уг быдэсмы ке. Екатерина Васильевна вералляз: - Ваньмыз ик ӟеч малпанъёссэс зэмос ужын быдэсъясалзы ке, котькинлы умойгес луысал. Югыт дуннеын ӧвӧл ни ӧлексы адямиослэн анайзы. Нош пиналъёс солэсь кылъёссэ уг вунэто. Та кылъёс Витя но Алёша понна пӧрмизы улон философилы. Алёша но Витя Вордскизы 1971-тӥ арын 23-тӥ сентябре. 4-тӥ классозь ветлӥзы школае. Нырысь-валысь ву пырыос кадь огкадесь вал. Одӥг газетчи гожъямъя, (песятайзы) пересь мемизы соосты фотосуред вылысь но ӧз тодмалля: - Таиз Алёша кадь. - Мон со, - пумитаз вазе Витя. - Пӧяськод, дыр, - уг оскы песянай. Вити: - Пичи дыръямы милемды ӵемысь ӧз тодмаллялэ. Азьло дӥсьмы но одӥг кадьгес вал. Али мон пеймытгес дэрем нуллӥсько, Олёш - югытгес. Мон бадӟымгес бере, мыным люкыт луэм дӥсь Олёшлы кыле. Яке - дедмылы. Витя Алёшалэсь зэм ик 15 минутлы вазьгес вордскем. Соин, лэся, кивалтон сямыз ваньгес. Доразы пыреммы бере, Алёша залын телевизор учкыса пуке. Кытын-о Витя? - юаськом. - Чортэлэ татчы, со отӥысь комнатаямы. Пыриськом Витя доры. Компьютер сьӧрын пуке. Принтер пушкы буёл донгыны выре. Киосыз лыз-лызэсь. - Ойдолэ залэ потомы. Алёша отчы чортэ вераськыны. - Ачиз татчы мед лыктоз, - ӵогиз Витя соиз. Петровъёслэн корказы пушкын - трос арберизы ас киын лэсьтэмын. Ӧсъёс, гардинаос, чебер шыкысъёс, пужыё миндэръёс - ваньмыз соослэн. Кутским бӧтьыртыны. Пиос соку ик компьютеръёс сярысь мадьыны ӧдъязы: - Азьло милям "Компаньонмы" вал. Соин ужаны дышетским. Собере тятька басьтӥз 386-тӥ модель. Со вужмиз ини. Али - Пентиум 133. Зэм, нырысь-валысь корпусэз гинэ вал. Отчы ёзъёс отысь-татысь басьтоно луим. Шедьтӥм "Нортон коммандер" программаен диск, винчестер, монитор, принтер. Программаосын пӧртэм фирмаос юрттӥзы. Отчы асьмеос вазиськылӥм. Данаксэ милемлы дунтэк кузьмаллязы. Озьы ик ми гожтӥським компьютеръёслы сӥзем журналъёслы. Огпол курим "Мир ПК" издание. Нырысетӥ номерзэ ӧз ыстэ. Нош кыкетӥяз сомында янгышъёсыз вал! Чидатэк редакцие гожтэт лэзим. Ӧжытак асьме сярысь мадим, янгышъёссэс тупатъяны ӵектӥм. Кӧня ке улыса валтӥсь редакторлэсь Алексей Орловлэсь валэктон вуиз. Со милемлы журналъёс дунтэк лэзьяны ӧдъяз. Трос программаос кузьмаз. Озьы ик ми герӟаським "Сорт Маркет" журналэн. Али со быремын ини. Но редакторез Михаил Зырянов али ке но кусып возиськом. Со милемлы ӟечкыланъёс но ысъя. Одӥг пол гожтӥм: мышкаямы маиз ке тӥяськем, запчасть ум шедьтӥське. Со быдэс мышказэ ик лэзем. Озьы ик Интернетэысь милям висёнмы сярысь трос иворъёс люкаса келяз. Зэм, соос англи кылын. Переводчик шуонамы донгим но кызьы-озьы лыдӟыны быгатӥм. Зырянов ик милемлы дышетскыны дэмлаз РОУ - Россиысь шара (открытый) университетысь заочной люкетаз. Отчы ми дун тырыса пырим. Системаосъя программист луысалмы. Нош азьтэммы бадӟымгес ик вылэм, шӧдске. Вылӥ математикаез умой ум валаське. Эшшо ке бизнесэз но бухучётэз, пе, дышетоно. Кызьы гожтыны конспект ӧм валалэ. Ӧм дышетске ини. Али милям интернетэ интыяськеммы туэ потэ. Тодмомы, Ижысь электросетьын кивалтӥсь. Модем но сёто шуиз. Со понна дорамы телефон пыртыны кулэ. Кабельзэ Курчуме вуттӥзы ини. Ми дорозь 350 метр пала уг тырмы, пе. Пургалан шуо: шедьтыны ум быгатӥське. Таӵе югдур быдэс аръёс ини. Тятькамы жадиз ини бызьылыса ветлыны. Интернет эскерыса, отысь уен-нуналэн ӧм потысалмы. Дуннеез адӟыны мукет амалмы ӧвӧл ук. Сотэк но уин 2-3 часозь ум изиське. Телевизор пыр киноос учкиськом. Умойёссэ малы ке туж бер пукто. Собере нуназе пал гинэ султӥськом. Америкаын дасямъёсыз кельшо. Франциын поттэм фильмъёс улонлы матынгес. Валамон но. Кема пукиськом бере: ӵуказеяз нуназе котырын гинэ султӥськом ни. - Книгаос лыдӟиськоды-а? - Вить-куать арзэ ум ни. Азьло мамусь котькыӵе книга вае вал. Ӟучсэгес лыдӟылӥм. История кельше. Кунгож сьӧрысь писательёс пӧлысь Мопассанэз гинэ кӧня ке лыдӟыны вырим. Азьтэмским, лэся, та компьютерен но телевизорен сэрен. - Кыӵе передачаос телевизоретӥ учкиськоды? - Шулдыръяськон программаосты тросгес: "100 к одному", "Пойми меня" кадьёссэ. Озьы ик иворъёсты. - Нош газетъёсты? - Тятя гуртэ "АиФ" но "Маяк" вайылэ. Азьло Москваысь "Известия" басьтылӥм. Али со пӧртэм пумо потыны кутскиз. Дуныз но куртчылӥське, пуштросэз но туж ик умой ӧвӧл ни. Соин ми "Известилы" ӧм гожтӥське. - Иворъёсты учкиськоды но лыдӟиськоды бере, кызьы учкиськоды чеченъёс шоры? - Ма мед улозы кызьы мылзы потэ. Ми соостэк ум быре ук. Ужзы сыӵе - пуштытъянъёс, террактъёс. Нош тятькалэн политикаез мукет. Отчы, пе, атомной бомба куштоно. - Инмарлы оскиськоды-а? - Незнай. Шуо: кудӥз-огез, пе, шуг-секытэ сюремез бере гинэ вӧсяськыны кутско. Ми туж оскисесь ӧвӧл, кадь. -Анайдэс аспӧртэм нимаськоды вал - мамусь. Малы? -Ми сотэк но аспӧртэмесь. Мукетъёсызлэсь висъяськыны турттӥськом. Мамусез яратыса озьы вераськом. Пудоосмылэсь но нимъёссы тумошоесь. Скаллы - Мулька. Писеймы - Кисеёза вал. Пунымы - Дэймон. Удмуртъёслы валэктӥськом, дэймон - со абдрамон. Ӟучъёслы вераськом: Дэймон Хиллы сӥзьыса, сыӵе ним понӥм. Алигес газетысь лыдӟим таӵе ивор. Интернетын аспӧртэм шай выл усьтыны медо. Кулэм адямилы сӥзем ӟеч кылъёсты отчы пыртыны дасясько. Тунсыко малпан. Амалмы луысал ке, ми ӵектысалмы яратоно писэйёслы но пуныослы сыӵе аспӧртэм шайвыл усьтыны. - Пудо-животэз яратӥськоды-а? - Милемды дед писей вордыны уг лэзьы. Уг яраты сое. Ачиз дедмы шыра. Олокытчы но капканъёс пуктылэ. Со милям пӧйшурась вал. Азьло, пе, чорыгез но пыӵалэн кутылыны ветлӥз. Верамез вань. Ву тудӟыку, маке быдӟа ик чипейёсты кутылӥз. Доре соосты вайыку, быжъёссы сюрес кузя ик, пе, лошъяськизы. Милям коркамы лапег интыын бере, гулбече тулыс весяк ву люкаськылӥз. Отчы, пе, чорыгъёсты лэзе но, соосыз чамбыль гинэ потто. Алдаське, дыр. Бадӟым будэмъямы ум оскиське ини. - Дедды сокем вераськись ӧвӧл кадь но... - Мылкыдыз капчи ке, оломае но вера. Мукет дыръя маке умойтэм лэсьтӥськом ке, йырыныз кӧня ке шоналоз но номыр уз куареты. Куке-соку берло гинэ вералоз ни ай. Асьмеос вунэтыны но вуттӥськом ини. - Чик номыр ужаны луэ ке, мар кариськоды? - Картаен, шашкиен, шахматэн шудӥськом. Но аспӧртэмлыко манерен. Тани огшоры адямиос ӵошатсконъёсын вормо ке, кузьым басьто. Ми мыдланес лэсьтӥськом. Кин келяз - солы кампет яке шоколад, яке эшшо маке. Вормисез шуэ: тынад визьмыд будымтэ на, ме си шоколад - оло юрттоз. Пичиысен озьы дауртӥськом. - Кампет понна юри келяны уд выриське-а? - Ум. Ма, милям сиён-юонмы котьку тырмыт вал. - Пу вӧлыны кин-о тӥледыз дышетӥз? - Школаын Юрий Павлович Карпов трудэз нуэ вал. Туж чебер шыкыс лэсьтылӥз. Дорамы дышетыны ветлӥз. Озьы ми пуэн пичи дырысенымы тунсыкъяськиськом. Тятька пулъёс пыртэ, собере асьмеос ини маке лэсьтыны йӧндыриськом. Шыкысъёсты ноку но одӥг кадь ум инъяське. Ваньмыз аспӧртэм. Вузаны? Одӥгзэ гинэ. Али но тодӥськом на: 50 манет тыр луиз вал. - Кызьы пужыятскыны кутскиды? - Ма, пиналгес дыръямы ик. Мамусь возьматӥз вал. Но кин кинэ дышетӥз ай? Ми солэсь умойгес но пӧрмытылӥм. Угось милемлы нокытчы дыртонэз ӧвӧл. Гань-гань тыршыса пужыятскиськом. Нош кышномрутлэн гурт котырын ужез тырмыт ук. Ваньзэ дыртыса лэсьтэ - коткытчы но киез вуттоно. Соин ик, дыр, милям пужыосмы чебергес адӟисько. - Маин эшшо тунсыкъяськиськоды? - Политикаен. Быръёнъёсын. Малы вормиз Путин? Мар луоз Волковен? Со сярысь малпаськиськом. - Музъем реформа шоры кызьы учкиськоды? - Музъемез вузанэн ми быдэсак соглаш. Угось али мар пӧрме? Нюлэсэз капырто, жуг-жагзэс куяло. Ужась калык кие музъем сюриз ке, умой луоз. Угось котькудӥз турттоз ас пайзэ умоятыны. Визьмо адями котьма йӧндырыны выре. Нош азьтэмез шаляй-валяй ветлоз. Кытчы ке палэнэ вуылэмды вань-а? - Ветлӥм Москвае, Симферополе. Удмуртиетӥ трос ворттылӥм. Эмъяськыны но куное. Тятькае милемыз, пельпум вылаз пуктыса, машинае пыртэ но кытчы ке нуллэ. Али малпаськом видеокамера басьтыны. Асьмелэн ветлэммы уг луы бере, тятька видеокассета вылэ гожтысал кырын улон-вылонэз. Ми учкысалмы. - Нош тӥ, ог-огеныды но ӵыжы-выжыосыныды сяна, кинэн ке вераськиськоды-а?- Мамусьлэн но тятькалэн тодмоссы пырало. Нош ми ёзъёс уг. Кышкало-а, мар-а? Заразной кожало, лэся. Мамусьмы шуылоз вал: асьсэлэсь но, тӥлесьтыд но мылкыдзэс сӧремзы уг поты, дыр. Милемлы одӥг кышномурт инвалид нылмуртлэсь адрессэ сётӥз вал. Ирина Семеновалэн но эшъёсыз ӧвӧл, мамаеныз улэ. Тачак гинэ гожтэтъёс ыстӥз милемлы. Фотоез но кытын ке кылле. Ассэ адӟыны ӧз кылды. Кыӵе ке сектае пырем, мыдлань вӧсяськыны кутскем. Ваньзэ сое милемлы ивортӥз. Собере ми гожтэт ысъямысь дугдӥм. Кылэммы вань: Ириналэн мемиез кулӥз но, сое кытчы ке интернатэ келязы. - Мукет висёнъёсты вань-а? - Вань. Ми ӵошенгес висиськом. Нырысь Витя, собере Олёшлы палаське. Гриппен озьы ӵемысь луэ. - Тамак кыскемды но аракы юэмды вань-а? - Пичи дыръямы Визьтэм Миша тамак сётка вал. отӥяз со шакшы борды ӧм кутскылэ ни. Юэммы пичияк вань. Трос ум дӥсьтӥське. Асьмелэсь лябмес шӧдыса. Кутским ке, ум дугдэ ини шуыса курдаськом. - Кыӵе яратоно сиёнды? - Кудзэ асьмеос пӧраськом. Тани туннэ салат сиим. Ми тэргаськисесь ӧвӧл. - Ог-огдылэсь уд акыльтӥське-а? Керетэмды но вань, дыр. - Ум, ум акыльтӥське. Пичи дыръямы чыры-пыры понна дан поттӥськом вал. Керетэмысь кемалась дугдӥм ини. *** Тӥни сыӵе улы (семья) улэ Курчум-Норьялан. Ветлыны копак уг быгато ке но, дуннелэсь люкиськемын ӧвӧл. Оломаин но тунсыкъясько. Трос ярато пӧртэм машинаос сярысь лабыртыны. Валало маскаръяськыны. Асьсэос выремен, пичияк алдасько но. Будэтыса верамзылы оскись шеде ке, пиослы со тупыттэм шумпотон ни. Витяен Лёша - аспӧртэм философъёс. Соослэсь огпол юазы: - Малы меда таза адями куддыръя кужымзэ быдтэ сьӧд ужлы, нош висись мурт, секыт ке но, югыт малпанэн улэ? - Котькуд адямилэн вань кас но ӟеч малпанъёсыз. Кудӥзлэн соиз, кудӥзлэн мукетыз ворме. Улонмес асьмеос сьӧд яке тӧдьы кариськомы. Зэм, куддыръя умой малпан уж но мыдланес кошке. Оло, милям гинэ озьы луэ-а? Котьма ке но, вылезлы ӝог дышоно. Нырысь чабкиськиськом: осто-осто, зэм-а, даур-а? Озьы выль ужъёсы выиськом, лапкаськом, ваньзэ вунэтӥськом - Висёнмес шуак тодэ вайытыкузы гинэ, ми утчаськом жалян кылъёс. Компьютерын узырмытоно асьсэлы сӥзем бамзэс. Кулэм мамусьсы дышетӥз гуртсылэн ортчем сюресэныз тунсыкъяськыны. Азьланьтоно та удысэз. Мургес тодоно Курчум- Норьяез, Кама шурез, Пичи Пургаез. Утчано Эрблэн миопатияез сярысь выль тодон- валан. Нокызьы оскем уг поты, та висён весь азьланьскоз но уката юнгес куасалтоз шуыса. Оло, кытын ке сое кортнаны дышизы ни? Инкуазь (оло нош инмар, оло нош дунне) та выжыез малы ке быдтыны выре. Но уг быгаты. Медаз пишмыты! Кӧт гажамез яратэ Ижевскын 21-тӥ сентябре ортчоз республикаысьтымы гастроэнтерологъёслэн научно- практической конференцизы. Вераськозы кӧтпуш висёнъёсты выль сямен эмъян амалъёс, эмъюмъёс сярысь. Оглюкетэз сӥзеын луоз Россия Федерациысь но Удмут Республикаысь дано врачез - Яков Максимович Вахрушевез 60 аресъем юбилееныз ӟечкыланлы. (Со сярысь материалмес лыдӟе 3-тӥ бамысь). УЛОН ПУЖЫОС Дӧдьы куштон Оштолэзьлэн кутсконаз калык люкаськиз кызьпуо арамае. (Ижысь Авангард ульчаын со). Ӟеч мылкыдын лыктэмъёс сокем трос ӧвӧл, но тырмыт гинэ. Туннэ татын толэз келяло, "Дӧдьы куштон" праздник. Удмурт сямъя шулдыръяське калык. Пӧртэм пумо ӵошатсконъёс. Пиналэз но, мӧйыез но кужымзэ эскероно кожа: пу вандо, куасэн бызьыло, баскетбол шар куяло, гира ӝуткало. Пичиос но бен куано ини. Соос паймемын адямиослэн усьтэм мылкыдзылы. Вылаз ик, чебер дыды-апай ог куинь рад кампетэн утялтыса ортче. Чечым. Анна кенак, эсьма, кышетэн бинялтыса, дорысьтыз пӧсь перепеч но ваем. Кызьы, пе, уд оскалты. Уноезлэн сьӧразы пӧсятэм, пӧраськем. Тазэ но веръятэк уг луы. Адямилэсь ӟеч мылкыдзэ уд куашкаты ук. Куазед ӧз шумпотты. Быдэс нунал ӵоже уязы секытэсь пилемъёс: я сулеп лымы куштэ, я зор шапыкен кыдыртэ. Нош калык уг кошкы. Ог-огзылы шуныт кылъёссэс уг жаляло. Кема адскымтэ муртъёс ӟыгырскыса ик пумисько. Ушъяса омыръяло чорыг лым. Кырын со эшшо но ческытгес. (Праздник понна лым дунтэк.) Жингыртӥзы арганъёс, гудыртӥз барабан. Эстрада вылэ пото уӵы гурен кырӟасьёс, етӥз, мотор пияшъёс. Кырӟало но экто соос. Вӧлмыт но зылмыт гуръёслэсь нырулӥз, лэся, ачиз кызьпу арама но. Лусьтро пилемъёс шоры учкытэк кырӟа, эктэ, вера калык. Кык-куинь полэс котыртэмен шулдыръясько. Кынмонтэм вылысь "шунтӥськемын", нош "супылям губи" кадьёсыз ӧй вал. Вот таиз вашкала йылолъя: кудоен туклячи юонлэсь эсэпсэ валало. Со дыре ик, котыртэмлэсь палэнын сыло кык кышномуртъёс. Кышет улысьтызы мычиськемын азвесям кадь йырсиоссы. Бамысьтызы кисыриос но арлыдзэс шараяло. Мылкыдзы нош лобась тылобурдолэн кадь капчи. Сыло соос дэриен суро сульпам лымы вылын. Кырӟан гуръя пыдзэс лёго, сапег улысьтызы напра пазьгиське. Соос сое уг адӟо, уг шӧдо. Кизэс ӝутыса, бамзэс инбамлы возьматыса кадь кырӟало калыкен ӵош. Усись лымы но, зор шапык но соослы шумпотон кузьма кожалод. Котмем ымнырзэс уг ӵушыло. Нош кырӟало анай кылынызы, куректӥсь сюлэмзэс кыре-буре лэзё кадь. Югытэз соос уг адӟо. Синъёссы тӧдь бӧзэн выллем шобырскемын. Эктӥськом карыса мугорзэс вырето, нош интызэс воштыны курдало, лэся. Сукыр адями, пе, дунне шоры мурт синмын учке. Ӧйтӧд, оло, озьы но. Синтэм уго учкись муртсэ уг адӟы. Солы шунды но сьӧдэн возъямын. Но калык пӧлын ӧлексы мурт но ассэ шудоен лыдъя. Солэн со эмъюмез, сюлэм узырлыкез. Бен, улон ваньмызлы одӥг кадь уг сётӥськы. Инмарлэн гожтэмез, дыр, озьы. Нош шумпотон пачылаку, ӟеч адямиосын одӥг радэ султэм потэ. Сӥзён Инвожо. Кызьпу арама. Егитъёслы сӥзем нунал. Воля лэзем вал сямен эстрадае потӥз егит пияш. Урдсӥн ӵыжаськись чуньы выллем кӧня ке сумбыръяськиз но гырдалтыса кадь нёжтӥз: "Тазэ кырӟанме сӥзисько вань чебер нылъёслы". Егит калык кизэ чабе, гур-р! вазе. Куд-огез гажамзэ омырез чупаса возьматэ. Нош синмаськем нылъёс ысто ини кагаз юдэс. Яратӥськом, пе. Жингыртӥз гинэ крезьгур, егитъёс посо быгатэмзэс. Асьсэдыз гӧгӧрсин кадь чебер кожазы, лэся. Кин, кызьы йӧндыре, озьы ик позыръяське. Гозыез пунэм мактал, чиньыосынызы вырето, берпалзэс голято, гадьынызы гочато. Эх, ул но шулдыръяськы вылэм, пичи но сюлмаськонэз эн тод вылэм! Палэнынгес, кык ваё тополь улын, сыло вить кузя пинал нылъёс. Куспазы маке сипырто. Студенткаос, дыр. Калык пӧлы соос ӧз дыртэ. Кепыразы, луоз. Асьсэос нош мугорын кызьпу кадь вольытэсь. Тусбуен но мак сяська выллем чебересь. Нош синъёссы? Огпол адӟид ке � выёд! Сыло соос, эктӥсьёсты учкыса, сыло но маке возьмало кадь. Шумприч пияш кык кырӟанзэ пычкиськыса ик "лӧдӥз". Ымнырыз но, эсьма, ыргон самовар кадь ӵыжектӥз. Со уго вань чебер нылъёс азьын ассэ вылӥын возьматыны тырше вал. Лыдэ ӧз басьты мукетъёссэ, кудъёсыз кепырало вал "ачимъяськонлэсь". Кырӟасез воштӥз мукетыз. Таиз калыклы йыбырттӥз но пальышаса шуиз: "Гажано апайёс но кенакъёс, кудоос но туклячиос, мусоесь нылъёс, та кырӟанэ тӥ понна". Таиз ассэ йӧн-йӧн возе, мултэс "кӧтаз йӧтэм кунян кадь" тэтчанэз ӧвӧл. Эсьма, калык пӧлтӥ но кырӟаса ортче. Адямиос мыняло, йырынызы мыкырто. Бере ӧз кыле нылъёс-студенткаос но, кырӟась сьӧры эктонэ итӥськизы. Валазы, дыр: соиз кырӟан ке вал чебересь нылъёслы гинэ, таиз ини гажано но мусо адямиослы. Бен, пересьёс юнме шуиллямтэ, дыр: куинь пол йырвизьмад суралты, куинь пол кыл йылад бергаты, куинь пол кустэ куасалты (йыбыртты), собере гинэ кисьты сӥзёно шуныт кылъёстэ. Мае но уд адӟы Мар гинэ уг луы та улонын? Ӟечезлы � шумпотӥськод, уродэзлы � кайгыриськод, осконтэмезлы � паймиськод. Зэм, зэм. Куд-ог дыре аслад пельёсыдлы уд оскиськы. Тамаша ук! Мар, пӧй, со, усто выжыкыл-а, мар-а? Выжыкыл тунсыко пуштросэныз паймытэ, нош улон � кырыж-мерыж учыръёсын дэймытэ. Юмоке шедемдэ ик уд вала. Кылем сӥзьыл, картошка октон вакытэ, одӥг эштослэн бусыяз кык пиосмуртъёслэн кылзы тупамтэ. Огез дуринчи сямзэ возьматэ, мукетыз майсы выллем шизэ мыче. Кыл бӧрсьы кыл, муре но пыдло пыризы, лэся. Котькудӥз ассэ шонерен лыдъя. Огезлэн но сётскемез уг поты. Нош вожпотонэн дыам мылкыдэз озьы гинэ уд басылаты. Оген кылыныз ке "лӧдэ", мукетыз бакоме. Кылызлэсь радзэ ыштэ. Соин, лэся, "изӥсь вукоез" дугдытон понна, лопатаен кышкатӥз. Чалмытскы, пе. Соиз ялан вукозэ изэ. Курдатыса "вешало" ай, малпаз огез но кивалтосэн шоналскиз. Тупаны но кулэ! Зулись палэнэ гинэ тэтче но � ӵапак лопата улэ кемдэ. Йыркобыез пасяське, пал синмыз вирен ӵоксаське. Адями кысмыляк дэрие погра. Нош мукетыз, йыруж лэсьтэмзэ валаса, соин артэ ланьыра. Мон, пе, юри ӧй шуккы. Пумен зар-р! бӧрдыны кутске. Пуны, шуо, шӧй доры дыртэ. Татын но озьы ик, лэся. Кыллись мурт котыртӥ лусьтро бергаз-бергаз но ӵогиськем интыетӥ ӟизырась йырвиымез нюлыны шӧтаз. Пуны уго кион выжыысь. Солэсь номыр уг мыльы. Огзэ милиция валтӥз. Куинь арлы пуктӥзы. Мукетсэ "ӝог юрттэт сётӥсьёс" утялтӥзы. Тӧдьы халатэн муртъёс абдрало: ӧйтӧд, шуо, пуны но вуттӥськем бере, адями уз лу ни, дыр. Нош кузпалыз аслэсьтыз сӥсъя: "Миське, акурат бичалэ виымзэ. Сёромно со монэ тодмалоз". Врачъёс бен Гиппократлэсь клятвазэ куто бере, висисез одно бурмытыны тыршо. Кытӥяз уйёсты но уг кӧлало. Асьсэос но висьыны ӧдъяло кадь. Ортче толэзь, кык, висись уг султылы, мынэ ини куинетӥез. Медсестра уйлы уже потэ но ӝыт солы укол пуктэ. Ӵук сактыку, палатае пырыса эбыля, суй-пыдъёсыз юскисько. Койка буш, кыллись ӧвӧл. Маскара ук. Берло ини висись медсестраез буйгатэ: "... ачим ветлӥ". Со ик луиз, лэся, пыд вылаз султэмез. Паймод но бырод! Адямилэсь йырвиымзэ пуны но оскалтэ, нош со пыд йылаз султэ. Ваньзэ тодэ: пичи дырзэ, дышетскемзэ, кышнояськемзэ. Гурт калыксэ но синучкон пыр кадь тодма. Бускеленыз каршемзэ, больницае шедемзэ гинэ уг вала. Ӧйтӧд, пе. Суйыз, пыдыз ужа, вырись арбериез но "кешыр". Вот вераськон ласянь "эгесэз тэшкамын" � мога. Кырӟакуз вольыт мынэ. Пытсаськем синмыз но кучыранлэн кадь: бускельёссэ ветлэмзыя тодма. Та дыре уже куриське ини. Мӧзмыт, шуэ, тэк улыны. Вот ведь акырӟан, вожвылъяськон кыӵе югдуре вуттэ. Беда. Улӥд-вылӥд ке, мае но уд кылы, мае но уд адӟы, маин но уд пумиськы. Куд-огез уз но оскы. Легенда, пӧй. Асьсэлэн ужзы. Нош вашкалаослэн верамзы зэм, лэся: эзелед вуытэк уд кулы, мугорыныд мурт шайгуэз уд согы. Оло, со озьы ик вань но? Адямиез уд вала "Инмар тӧдьы боды ӧвӧл, солэн пельыз уг кыл", � кайгырыса пуке сюмори выллем векчи мугоро кышномурт. Со али гинэ инмарлы оскыны кутскиз. Улон озьы косӥз-а, мар- а. Нош азьвыл... о-о, солэсь катар адями ӧй вал. Вӧсяськонэз быдтыса куштылӥз, черке ветлӥсьёсты калык радэ ӧз пыртылы. Пумӟемъёс, пе. Табере кылызлы быдэ "инмар адӟоз ай" нёръя. Со гинэ мар? Кузпалзэ но, нылпиоссэ но вӧсь огазеяськонэ нуллэ. Шонерак вераса, "кылыныз сюдыса" валтэ. Черке уг ветло, кытын ке нимысьтыз клубзы вань, лэся. Сыӵе интыосты беслы вӧсяськон шуо кадь. Ӧйтӧд ини, созэ асьсэос тодо, дыр. Йӧнтэм сямыз кышномуртлэн ӧжытак воштӥськиз. Тунаськись мурт сямен нянь пала шонтӥз, лэся. Инмар уз кушты шуыса, мурт вылын улыны ӧдъяз. Тамак ачиз уг окты, пиослэсь "ыбылэ". Эшшо кыӵезэ? Одно ик фильтрен медло. (Картэз ымаз но уг тырылы.) Нош чай юыны пуксе ке, сакыр сомында тыре, голькытэныз мырдэм но кызьы стаканзэ бушатэ. Инмар, пе, уг кушты ай, утялтэ. Оло юри, оло... вот магазинэ мынэмезлы быдэ одно ик копейкаосыз уг тырмо. Ялан муртлэсь витьтон коньыен но, манетэн но пунэма. Кисые, пе, пась, лэся, коньдонме ыштӥськем. Няньлы, шуэ, уг тырмы. Оскисез но оске, сётӥсез но манетэн, кыкен мыче. Эн, пӧй, куректы. Пунэмась муртлы инёк луэ, лэся. Шумпотэменыз ымыз ваяк усьтӥське. Инмар, шуэ, таӵе ӟечтэ, кык полэс мед берыктоз. Кылъёсыз азьвыл ик дасямын, луоз. Нош соя ке ӧз луы, о-о... коть пельёстэ сюсен ӵокта. Ноку кылымтэ кылъёсты кылод. Бадьпу ньӧл выллем куасалскыса ик гульымзэ кеся. Ӵапак ноны утчась кунянлэн бӧксэмезлы укша. Инмар, пе, тӥледыз каргалоз. Инмар, шуэ, йыр вылады мед ӵашъёз. Ой-ёй, амалтэк юзырак луод. Нош ачиз гадь вылаз малы ке кирос уг тыры. Кепыра, дыр. Паймисько: вӧсяськись муртлэн сокем шат кылыз чурыт но лек луэ. Бен, изьверез гонэзъя но мугорызъя тодмаськом, нош адямиез дӥсезъя но кутэзъя ноку уд вала. Ым сярысь (пышкылон) � Мурт дорын сиськы, ымы, кӧт тыронэз эн вала. Соиз но озьы, ым капка ӧвӧл, сое зырен уд пыкъя. � Эшъёсыд пӧлын супыльты, ымы, жадёнэз эн вала. Одӥг ке но ым, укыр трос алдаське. Нош луысал ке кык? � Туклячиед дорын кырӟа, ымы, дугдонэз эн вала. Ыме ноку бирды уз бырттэ. � Куноын ю, веръя, ымы, кепыранэз эн вала. Юисьлэн уго ымпумъёсыз пель дорозяз, коть угыос ошылы. Нош ку меда сыӵе мурт ымзэ сюбегатэ, пельёссэ паськыт возе? Валантэм. Сыӵе ыметӥ ик висён чер уг вӧлмы меда? А? В.АГБАЕВ. Яков Вахрушев: "Шудэз политикаен уг вошто" 16-тӥ октябре 60 арес тырме профессорлы медицина наукаосъя докторлы Яков Максимович Вахрушевлы. Удмурт Республикаысь но Россия Федерациысь сӥё-дано врач, Нью-Йоркысь Наукая академилэн член-корреспондентэз, 450-лэсь ятыр научной ужъёслэн, 4 монографилэн, медициная дышетон книгалэн авторзы юбилеез азьын мыло- кыдо вераськиз милям корреспондентэнымы. - Яков Максимович, профессорлэн ужез туж секыт, дыр? - Секыт, но туж узыр, тунсыко. Шуак тазьы валэктыны но уд вала. - Соку мар бордысен ваньмыз кутскиз, кытын будӥз вуоно профессор? - Мынэсьтым Як.-Бодья ёросысь пичигес Мокалудме трос тодӥсез ик ӧвӧл, дыр. Анаймы ньыль пиналэз огназ будэтӥз, атаймы ожын быриз. Но шуг-секытъёс шоры учкытэк дышетскыны косылӥз. 7 иськеме Кекоранэ дышетскыны ветлӥ, бадӟым классъёсы - Бодьяла. Ялан удмурт сямен вераськемысь, малпаськемысь, лэся, туж шугъяськи ӟуч кылэз дышетыны. Ма, мон гинэ-а? Классысьтымы 46 мурт пӧлысь 17-ез гинэ школазэ йылпумъяз, отӥосыз ӵапак со муген школазэс куштӥзы. Со вакыт туж данъяськылӥзы эмчиос. Апае шуиз, мын, медике дышетскы, туж кулэ уж. Мон кылзӥськись вылӥськем, лэся. Но со сярысь огпол но ӧй жаля. Ижысь медучилищеез отличиен йылпумъяй. Собере - армия. Служить кари Венгриын. Учениос дыръя трос солдатъёс сӧсырмыны шедьылӥзы, мон соослы ӝог юрттыны тыршылӥ. Ужме мыло-кыдо быдэсъямме синйылтыса, лэся, ысто вал Ленинградысь военно-медицинской академие. Но монэ дор палъёсы кыскизы. Пыри Ижысь мединститутэ. - Али медакадемие пырыны туж шуг, шуо. Кыӵегес вал тӥ дыръя югдур? - Уг тодӥськы, но мон баллъёс пумысен сюлмаськыны но ӧй валалля - экзаменъёсме усто сётӥ. Шуг вал коньдон ласянь дышетскыны. Анае колхоз пенсия басьяз, ӟеч юрттыны ӧз быгатылы. Нырысетӥ кык арзэ юрттӥз армиын шыръяме - солдатлы сётӥськись копейкаосы книжкае люкаськизы. Нош куинетӥ курсысен ленинской стипендиат луи (толэзяз 80 манет басьтылӥ), кытын-отын научной ужъёсы но потаны кутскизы ни. Синйылтӥзы профессоръёс, аспирантурае пырыны ӵектӥзы. Дырызлэсь вазьгес диссертациме ути. - Яков Максимович, малы тӥ одно терапия удысэз (шонергес - кӧтпуш висёнъёсты эмъянэз) бырйиды? Пиосмуртлы хирурглэн ужез тупагес кадь. - Терапиез тодытэк ужамез уз луы хирурглэн но, невропатологлэн но, мукет сюбег удысчиослэн но. Милям удысмы тужгес паськытэз, секытэз. Тани учке ай, котькыӵе лулсэр висёнэз бурмытыны кык-куинь пӧртэм эмъюмен ке луэ, терапиын сюлэм висёнлэсь гинэ сю пӧртэм эмъюм. - Тӥ - профессор, кафедраен кивалтӥськоды, дырды кыле-а практикаен вырыны? - Сотэк кызьы? Мон клиникаын ужасько ук, студентъёсты дышетӥсько. Секыт висисьёсты ачим эскерисько, кызьы эмъяны, опреация лэсьтыны ӵектонъёс, индылонъёс сётӥсько. - Берло дыре врачъёслэсь ужзэс капчиятӥз туала аппаратура. Оскиськоды-а тӥ солы? - Быдэсак мон аслым ачим гинэ оскисько. Висёнэз та киосылэсь ӟечгес шӧдӥсь маке ӧвӧл. УЗИ-е яке эшшо кыӵе ке аппаратэ ыстытозь, мон адямиез сизьым пол эскеро. Тани алигес пекляосыныз курадӟись нылкышно ми дорын (4 номеро медсанчастьын) эмъяськиз. Соку ик шӧдӥ - пекляосыз туж улэ лэзиськемын. УЗИ ваньзэ умой возьматэ. Косӥ кыкетӥзэ УЗИ сылыса лэсьтыны - озьы ик вань: кылльыку пекляез интыяз пуксе но шекез уг адӟиськы вылэм. - Медицинаын сомында ужатозь, чылкак янгышатэк уг луы, дыр. Вал-а соос тӥляд ужады? - Бен, янгышъёстэк уг луы. Но мон тыршисько туж чакласькыса, рос-прос ужаны. Тани нош тодам лыктэ таӵе учыр: Одӥгез висисьмы, сэпез урод ужамен, копак ӵужектӥз, уродмиз. Туж кема реанимациын лулъяны вырим. Мон олокӧня пол хирургъёслы верай: сэпаз изэз вань, операция лэсьтоно. Соос УЗИ вылэ чӧлско - ӧвӧл но тӥни. Адями кулӥз. Вандылӥзы но сэпысьтыз иззэ шедьтӥзы. - Али тросэз ӝожтӥсько врачъёслэн кезьыт ужамзылы. - Жаляса верано луэ, сыӵеос вань. Но умойёсыз, сюлэмзэс сётыса ужасьёсыз - тросгес. Ньӧмыз понна гинэ ужась врач кызьы эмъя: вӧсез зӥбломытэ но тӥни, нош рос-просэз - одӥг висёнэз гинэ уг учкы, висисьлэн огъя тазалыкеныз тунсыкъяське, пӧртэм эскеронъёс ортчытэ: малы та адямилэн анемия, кыӵе мугез - озьы копаське, копаське но... пыктоссэ шедьтэ. Мон туала студентъёсме но чакласько. Соку ик адӟисько, кин диплом понна гинэ академие ветлэмъяське (уксёен дышетске), кин - сюлэмыз косэмъя. Шумпотӥсько, берлоосыз тросгес ик шуыса. - Тӥ лек-а дышетӥсь? - Лек шуод-а сое, чурыт куронъёс пуктӥсь-а, ӧйтӧд. Но ас кыл вылам юн сылӥсько. Куд-огез студентъёс олокӧня пол дорам зачёт-экзамен сётыны ветло: ӟеч тодон-валантэк ноку но усто специалист уд луы. Нош эмъян удысын урод специалистъёс луыны кулэ ӧвӧл, соос кортэн уг ужало ук - адямиен! Со понна берло ини тау каро, олокӧня ар ужамзы бӧрсьы но визьнод юаса вазисько, клиникаосазы ужаны ӧтё. - Но медицина пумен дунын луэ, врачъёс адямилэсь тазалыксэ эскеремлэсь нырысь дун тыремез сярысь квитанцизэ учко. - Ваньмыз со умой улонлэсь ӧвӧл. Быгатӥсез мед эмъяськоз коньдонэн, но оглом государство сюлмаськыны кулэ аслаз улӥсьёсыз сярысь. Врачъёс но улэп адямиос, соос но висьылытэк уг уло, соин ик сюлэмо мед кыльысалзы. - Асьме академиын трос гинэ тодмо, дано удмурт профессоръёс, больницаосын - удмурт врачъёс. - Со ваньмыз Георгий Ефимович Даниловлэн (азьвыл удмурт ректорлэн) ужез. Удмурт студентъёслы со нимысьтыз саклык висъялляз, тодосчиозь будэтыны тыршиз. Та паймымон ӟеч адямилэн дышетскисьёсыз шаерысьтымы котькуд улосын эмъяло. Таӵе дышетӥсь азьын йыбырттыны кулэ. Мон ачим но сюлмаськисько ӟеч кивалтӥсьёс будэтыны. Али 7 аспирантэ, 4 докторской диссертация гожъясе. Огвакыт сомындазэ нокин но ӧз нуылы на. Со сяна, мынам 13-ез дышетскисе кандидатской, кыкез докторской диссертациоссэс утизы ни. - Огвакыт научной ужъя проректорлэсь но ужзэ быдэсъяды, али - кафедра, научной ужъёс, висисьёс - улыны дыр шедьтӥськоды на-а, кузпалды уг ӝожтӥськы-а солы ӧжытгес саклык висъямлы? - Шутэтскыны, зэмзэ но, дыр туж ичи. Нуналлы быдэ сямен папкаен ужъёсме доре нуисько. Но кузпалы - Светлана Сергеевна монэ туж вала. Со ачиз но кема аръёс ӵоже эмъян удысын ужа ни - Удмурт Республикаысь но Россия Федерациысь сӥё-дано врач, республикаысьтымы нырысетӥ больницаысь отделениен кивалтэ. Соин ик куддыр ӝытъёсмы но быдэсак ужлы сӥземын луо - со мынам висёнъёсыным тунсыкъяське, мон - солэн. Но дыр шедьтӥськом сад-бакчае вуылыны. Мынам со котькинлэсь умой - шорам учкыса ик ваньзэ вала, керетыса ноку но ум улӥське. Уг валаськы кузпалъёссэс вошъясь адямиосты, огазеяськыкузы улытозязы шумпотонын но, куректонын но ог- огзэс валаса улыны кыл сётэмзэс туж ӝог вунэто. Тани мон туж данъяськисько вал одӥг дано кырӟасенымы, но картсэ воштэм шуыса тодӥ но концертъёсаз ветлэм гинэ ӧвӧл, телевизор пыр но уг учкиськы ни. - Концертъёсы но вутскиськоды-а? - Туж но туж яратӥськом удмурт театре ветлыны. Отын астэ дорын кадь шӧдоно, сыӵе умой, каньыл, нош артистъёсмы кыӵе быгатыса шудо! - Яков Максимович, куатьтон аресады тӥ туж етӥз, чырткем, егит адӟиськиськоды ай. Нылкышноослэсь сямен юано луисько ни: кызьы асьтэды чакласькоды? - Ма, куатьтон арес трос ӧвӧл ук ай. Мынам аресъёсме лыдъяны дыры ӧвӧл, соин ик аслым мӧйы чик но уг потӥськы. Пересьмыны ужъёс уг сёто, нош малпанъёс - тымиськемын. Ваньмон дыръям бен гимнастикаен вырисько, азьвыл бызьылӥсько но вал (вань куасэн бызьылонъя но капчи атлетикая разрядъёсы), муш вордӥсько - соослэсь ӟеч валась но, эмъясь но ӧвӧл. - (Кошкыны дасяськемме шӧдыса, лэся, Яков Максимович шуиз:) - Тӥ мынэсьтым политика сярысь малпанъёсме ӧд юалэ на. Мон туж тунсыкъяськыса ӝытлы быдэ иворъёсты учкисько, газетъёсты лыдӟисько. Кинэн но соин ачим но споръяськыны быгато. Куд-огез юало: тон визьмо, кужмо, малы политикае уд мынӥськы? Такем яратоно уже ӧй луысал ке, оло, мынысал. Но та уже - та шудэ номырин воштонтэм. - Тау. Ӟечкыласьком тӥледыз. З. Рябинина. Профессор Вахрушев висисен кенеше. Туспуктэмез А. Нелюбинлэн. Нюлэс ужасьёслы сӥзьыса Вож-вож пушъё тэльёсмы Владимир Соловьев - Шаерамы, тужгес но Завьялово районын, тодмо адями. Со Ижысь опытной нюлэс хозяйствоен 33 ар кивалтэ ни. Лесотехнической институтэз йылпумъямез бере, ужаны кутскиз Селта лесхозын, нош 1963-тӥ арысен туала интыяез тырше. Удмуртиысь но Россиысь дано лесовод, Завьялово районлэн дано гражданинэз луэ, пусъемын Ужысь Горд Знамя орденэн, медальёсын, ВДНХ-лэн 3 бронза медальёсыныз но уно грамотаосын. Удысын огъя ужамез 43 ар люкаське ни. Элькунамы нюлэс удысын со одӥгез визьмо, калыкен ужаны быгатӥсь усто кивалтӥсь луэ. Нюлэс ужасьёслэн нуналзы азьын соин милям корреспондентмы пумиськылӥз. - Владимир Леонидович, кыӵе мылкыдын пумитаськоды праздникстэс? - Котыр ласянь умой нюлэс хозяйствоын ужасьёс арлы быдэ сӥзьыл пусъё асьсэлэсь профессиональной праздниксэс. Туэ со тупаз 17-тӥ сентябре. Нош Россиысь нюлэс удыслы (департаментлы) 202 ар тырмиз ни. Ижысь нюлэс хозяйство усьтӥськиз 1936- тӥ арын. Али отчы пыре 8 лесничество, яке 80 сюрс гектарлэсь уно нюлэсъёс. Ваньмыз сямен соос пыро Завьял районэ, тямыс сюрсэз гинэ - Ижын. Ӝыныез нюлэсъёс нырысетӥ группае шедё, кылемез - кыкетӥяз. Миым но туэ мерттэм нюлэсъёсмы уно сю гектаръёслы паськытазы. Туж умой со. Нюлэсэз утялтонъя планмы 116 процентлы быдэстэмын. Пинал писпуосты шеромытон 109 поцентлы тырмытэмын, 1000 гектар ёрос лэсьтэмын. Туэ 8 толэзь ӵоже 67,5 сюрс кубометр нюлэс корамын, яке висъямез пӧлысь 62 процентэз. Кылем арын та дырен ӵошатыса, 12 процентлы тросгес. Лэсьтӥськон нюлэс 82 процент басьтэмын. Лесхозлэн доходэз 2218 сюрс манет люкаськиз. Арендаторъёслы кораны 6584 гектар нюлэс висъямын. Аренда понна 276 сюрс манет уксё басьтэмын. Туэ Люкшудъя леспромхозлы 13 интыын 78 гектар коран нюлэс сётӥм. Со отысь 16,3 сюрс кубометр нюлэс кораны кулэ. - Берло дыре нюлэстэс аукционъёсын вузаськоды. Шонер-а со? - Туэ тани 11 аукцион ортчытӥм. Отын вузаське пыд йылаз сылӥсь нюлэс, сое кораны кулэ. Аукционын одӥг кубометр нюлэс 38-83 манет усе. Куаро писпуос (пипу, беризь), валамон, дунтэмгес кошко, нош кыз, пужым, ньылпу - кык пол дуногес. Озьы туэ 41,4 сюрс кубометр тэль вузам ни. Урод ӧвӧл со. - Нош нюлэсэз кызьы утялтӥськоды-утиськоды? - Ми азьын кык бадӟым ужпум сылэ - нюлэс мерттон, сое утён-чаклан. Туэ тулыс но планъя, 145 гектар интые, 147 гектар нюлэс мерттӥм. Нош тэлез утялтонын, сое шеромытонын 7 пичи комплексной бригада ужа. Соослы сётэмын нимысьтыз тракторъёс. Соосын 14 сюрс кубометр ёрос нюлэсэз потто. Выль мерттэм писпуосты шеромытӥськом-кораськом таӵе улвай корась "Хускварина" "Штиль", "Эско" но "Ермак" улвай корась техникае. Оглом вераса, 83 процентэз ужъёс машинаен быдэсъясько. Милям асьмелэн питомникмы вань. Со 35 гектар инты басьтэ. Отысь одӥг жаг турынзэ уд шедьтэ. Озьы быдэс Россиын ми классной инты басьтӥм. Туэ 1 гектар вылэ нюлэс кизим, нош школьной люкетаз - 3,1 гектар, яке, 2500 сюрс интые, 2900 сюрс модос мерттэмын. Ваньмыз сямен кыз но пужым. Питомникын вань ужъёсты быгатыса радъя кивалтӥсез Анатолий Ивнаович Зуев. Солы ӟеч юртто механизаторъёс Н. Ложкин, А. Савин но В. Козлов. Ми озьы ик будэтӥськом городын мерттыны лыз кыз, пирамида кадь тополь, пушмульыё пужым (кедр), тыпы, лыстэм пужым но музонзэ. - Владимир Леонидович, тӥляд хозяйствояды 8 лесничество лыдъяське, Мар соос сярысь верасалды? - Одӥгзэ но курламе, урод кареме уг поты. Ваньмыз азинлыко ужало. Нош выль нюлэс мерттонын тужгес висъясько Майской, Люкшудъя но Завьял лесничествоос. Кивалтӥсьёссы - Рашид Садретдинов, Петр Кузин но Валерий Малышев. Берлоез егит ке но, алигес мастерысь лесничие пуктӥм, ассэ туж умоен возьматэ, ваньзэ быгатыса но валаса лэсьтэ. Тулыс 20 гектар вылэ 3-4 аресъем пичи кызъёс мерттӥз, вуоно арлы но 25 гектар музъем дасяз ни. Ужасьёсыз трос ӧвӧл ке но, 30 тонна турын дасяз, 10 тонназэ аслаз 2 валэ кельтӥз, кылемзэ Люкшудъя лесничестволы вузаз. Лесничестволэн 7 гектар вылын кедрез пушъе-будэ. Кык ар ӵоже коллективез выльмиз, егитомиз, ужасьёссылэн шоро-куспо арлыдзы 30 арес. Алигес соос нюлэс лушкасьёсты кырмизы, изъянэз 54 сюрс манет усиз. Ижын улӥсьёс билет басьтытэк, тэле пыриллям, нюлэсэз тросэн кораны ӧдъяллям. Табере судын кыл кутозы. Озьы ик усто ужа Подшивалово лесничество. соин быгатыса кивалтэ Виталий Леонтьев. Вань планъёссэ арысь аре мултэсэн быдэсъя. Мон уг валаськы, кызьы сётэм заданиез уд тырмыты. Со но озьы ик ужа. Верай вал ини, синмаськымон ужа Рашид Садретдинов. Со 1968-тӥ арысен нюлэс хозяйствоын тырше, 15 ар лесничествоен кивалтэ, ёрос Думае депутатэ быръемын. Коллективез пичи ӧвӧл, асэныз ӵош 21 мурт. Арлы быдэ 15-20 гектар нюлэс мерттэ, 200 гектар вылын шеромытэ. Рашид Кашапович вордскемын Татарстанысь Кукмор районын. Татысь Лубяны нюлэс техникумез быдтӥз. Владимир Леонидович, вань улондэс тӥ нюлэсэн герӟады. Кызьы со луиз? - Чик паймонэз ӧвӧл. Вордски мон Як.-Бодья районысь чебер нимо Соловьи гуртын (али кӧня ке корка кылемын на - Г. Р.). Бырйи атаелэсь сюрессэ. Со лесник вал, песятае но нюлэс хозяйствоын ужам. Атае быдэс войнаез пыр потӥз, нырысетӥ группаен инвалид луыса бертӥз. Озьы ке но, инмар юн тазалык сётэм, 85 ар улӥз. Табере нылы но мынэсьтым адӟем кариз, Нюлэс хозяйствоя управлениын отделэн кивалтэ. - Праздникты азьын эшшо мар верасалды на? - Мадёнэ трос. Но туннэ пусъеме потэ тани мае: ужасьёсмы дыраз уждун басьто, тыронъёсмы ӧвӧл, шуыны луоз. Праздникмес ӟеч мылкыдын пумитаськом. Тани лесхозлэсь али ужан юртсэ но, кытын пукиськом, хозяйственной амалэн ӝутӥм но Россиын устоез луиз. Бен, милям ӟеч, оскымон ужасьёсмы туж трос. Соос пӧлысь одӥгез - Анна Алексеевна Гурьева. Со та удысын бухгалтер луыса 36 ар ужа ни: 10 ар Заречной лесничествоын, 5-тӥ арзэ лесхозын валтӥсь бухгалтер луэ. Тыршемез пусъемын Кун Кенешлэн Данъян грамотаеныз. Шуныт кылъёс верам потэ нюлэс хозяйствоя валтӥсь инженер Елена Михайловна Дорофеева сярысь. Со ас ужзэ вить чиньызэ кадь ӟеч тодэ. Дорамы 10 ар тырше ни. Нюлэс ужасьёсты ӟечкыласько праздникен, мылкыд карисько котькуд коллективлы выль азинсконъёс басьтыны, котькуд адямилы сӥзисько шудо улон но тазалык. Соку шаерамы уката юн куашетозы нюлэсъёсмы. Праздникен, эшъёс! Вераськиз Геннадий Романов. 1) Валтӥсь бухгалтер Анна Гурьева но Владимир Соловьев. 2) Лесничий Валерий Малышев. Лесничий Рашид Садретдинов. Нюлэс хозяйствоя валтӥсь специалист Елена Дорофеева. Туспуктэмъёсыз Владимир Беломорскихлэн. Шӧкыч Молекула... пырем Мынам чик дышетскеме ӧвӧл. Одӥг класс но, одӥг ар но шуэм сямен. Со понна мон уг куректӥськы. Вашкала дыръя но адямиос кызьы ке но дышетскытэк улӥзы-вылӥзы ук. Собере дышетскымтэ муртлы мукет ласянь но умой. Кызьы шуо тодосчиос та пумысен, ай кызьыгес тӥледлы, дышетскем муртъёслы, вакчияк но мур верано со сярысь?.. Самой ӟеч тодонлык - со тодонмылэн ӧвӧллыкез. Зол верай, озьы ведь, о-ко! Дышетскем адямиос но озьы валэктыны уз быгатэ, дыр. А мон коть бы что! Алигес мон макулатура люкакум, кыӵе ке книга шедьтӥ. Вылаз "Химия" гожтэмын, пе. Юлтоше озьы валэктӥз. Туж тунсыко вылэм со химия шуонзы. Пыр чибинь серелъёс но олокыӵе молекулаос сярысь. Ка-а-ак мадьыны кутскиз но ыштан шырыпе ик серекъянтӥям тарс чигиз. Кема-а-а валэктыны турттӥз на ай юлтоше мыным со молекулаос сярысь. Нокызьы но уг оскиськы уга. Ма, мар-о пыр чибинь сереллэсь пичиез луоз на дунне вылын? Ӧйтӧд. Ма карыны ёрмыса, нодтэм-валантэм луэмелы шугектыса, юлтошелы шуисько: тон кыӵе ке учыр вылын возьматы вал. Ярам, пе, соку кылзы. Верамме пеляд пон. Тани, пе, алигес Вавож районысь "Удмуртия" эштосын 504 тонна турын сутскыны шедиз. Изъянэз 280 сюрс манет тыр луэм. Кык склад пеньӟыны шедем уга. Нош тодӥськод-а, мар бордын ужпум, пе. Самой со пичи гинэ молекулаен сэрен. Кӧс турын пӧлы тыллэн молекулаез шедем но, одӥг кылбурчи юнме шорысь "из искры возгорится пламя" ӧвӧл шуэм ук. Остэ быри! Ма, нёшто со пыр чибинь сереллэсь но пичи молекулаен сэрен со быдӟа тылпу потыны быгатэ? А нош дас молекула шедиз ке? Остэ быри! Быдэс дунне но ӝуаса быроз ук! Вот тыныд молекула! Табере со молекулаен сэрен мынам дотово дышетскеме потыны ӧдъяз. Ваньзэ тодэме потэ. Кыӵе ке но амал утчано ук со молекулалэсь утиськыны. А мар-о? Собере алигес ӵан бекчее зырен шуккем выллем, аслам но тырттэм йырам таӵе малпан жон-жон васькытӥз. А нош со молекула пыремлэсь югыт дунне вылэ уг-а меда вордско нылпиос но? Озьы ке ведь, мон наукае туж бадӟым ӧс усьтон азьын сылӥсько. Остэ быри! Мар меда луоз соку? Кион гуртысь Матронлэсь верамзэ гожтӥз Л. Суровый. Архивысь документъёсъя Удмуртия ЪЪ дауре 1941-тӥ ар Калык хозяйствоез азинтонъя куинетӥзэ вить аръем планэз быдэстонын 1941-тӥ ар йылпумъясь луыны кулэ вал. Удмуртиысь валтӥсь предприятиос нырысетӥ кварталэ ик производственной планъёссэс ӟеч быдэстӥзы. Промышленностьын азинскыны кутскизы выль удысъёс: писпуэз но етӥнэз уже кутонъя, лесохимической, торф поттонъя, сиён-юон дасянъя. Ижевскысь андан ӵыжатон заводын ужаны ӧдъяз туж кужмо мартен гур. Йылпумъяськиз пӧйшуран пыӵал поттонъя фабрикалы выль юртъёс ӝутон, выльдӥськизы Ижевск-Глазов но Ижевск-Сарапул трактъёс. Республикаын ужазы пӧртэм клубъёс, лыдӟиськон коркаос, 200-лэсь ятыр киноустановкаос, сюосын библиотекаос, горд сэрегъёс. Кылдылӥзы художественной самодеятельностья кружокъёс, ортчылӥзы шутэтскон ӝытъёс, пӧртэм диспутъёс, спортивной ужрадъёс. Кылсярысь, 16-тӥ феврале "Торпедо" общество куинь маршрутъя (Ижевск-Завьялово, Ижевск-Якшур- Бодья, Ижевск-Пичи Пурга) агитмотопробег ортчытӥз. Со сӥземын вал 18-тӥ Всесоюзной партконференцилы. 15-тӥ-17-тӥ мартэ Ижевскын ортчиз Удмуртиысь писательёслэн нырысетӥез конференцизы. Отчы пыриськизы культура но искусство удысысь 100-лэсь уно адямиос. Конференция удмурт литература азе валтӥсь ужпум пуктӥз - туала улон пала берытсконо. Со - выль адямиез, социалистической ужысь азьмынӥсез, стахановецез возьматон. Та нуналъёсы Ижевскын Леонид Утёсовлэн кун джазовой оркестрез куинь концерт сётӥз - соосты кылзӥсьёс туж шуны пумитазы. 15-тӥ июне Ижевскысь С. М. Киров нимо культурая но шуэтскон паркын выль гужем сезон усьтӥськиз. Ӵукна ик парке кыстӥськизы чебер дӥсяськем адямиос. 12 часлы вань аллеяос калыкен тырмемын вал ни, кужмо шудӥзы оркестръёс. Городысь спортъя обществоос куспын эстафетаос ортчизы. Шутэтскон кыстӥськиз бер ӝытозь. 21-тӥ июне республикаысьтымы вань школаосын ортчизы люкиськон ӝытъёс. Егитъёс дышетӥсьёсынызы но ог-огенызы туж шуныт люкиськизы. Выль шунды ӟардонэз соос пумитазы киоссэс ваче кутыса, нылъёс - тӧдьы дэремен, пиос - костюмъёсын. Соос малпаськизы тунсыко улон, азьланяз дышетскон но ужан сярысь. 22-тӥ июне шундыё шуныт ӵукна вал. Кин ке но дасяськиз нюлэскы яке ӵыпет доры, садаз яке дачаяз ветлыны. Номыр но уродэз луоно ӧй вал кадь... Но тани арня нунал шорын Всесоюзной радио кышкыт ивор вераз: "Туннэ 4 часын ӵукна, номыр ивортытэк, герман войскоос асьме шаер вылэ урдскизы, асьмелэсь кунгожъёсмес тросэтӥ пыр потӥзы но Брест, Киев, Минск, Каунас, Севастополь городъёс вылэ бомбаос куязы". 18 час 35 минутэ республикаысьтымы военком кие мобилизация ортчытон сярысь телеграмма вуиз ни. Со сярысь калыклы ивортон йылпумъямын вал 23-тӥ июне 11 часозь. Одӥг нуналскын ваньмыз воштӥськиз, кышномуртъёс кышкасьтэмесьгес луизы, нылпиос быдэ вуизы, нош пересьёс губырскем тыбыръёссэс шонертӥзы. Ожлэн нырысетӥ нуналъёсаз Удмуртиын ортчизы трос калыкъем митингъёс. Ужаса улӥсьёс республикаысь военкоматъёсы сюрсъёсын куриськонъёс сётӥзы, соосты асьсэ мылкыд каремзыя армие яке партизан отрядъёсы мед келялозы шуыса. Одӥг нуналскын гинэ кутэмын вал 1997 куриськон. Калык хозяйствоез ожмаськонэн валче воштоно луиз. 7-тӥ июле УАССР-ысь Совнарком кылдытӥз вал переселенческой отдел. Со выриз республикае келям адямиосты интыян ужпумъёсын. 8-тӥ июле Воткинске вуиз нырысетӥез эшелон. Со вуттӥз Киевысь "Арсенал" заводэз. Война аръёсы со интыяськиз Воткинскысь машиностроительной заводэ. Августэ рабочийёс ужаны кутскизы ни. Ож аръёсы коллектив артиллерилы 7 пумо ож тӥрлык поттӥз. 1941-тӥ арын Ижевскын кылдытэмын 313-тӥ но 357-тӥ стрелковой дивизиос, 18-тӥ запасной стрелковой бригада, 94-тӥ кавалерийской дивизия, 44-тӥ отдельной стрелковой бригада. Соослэсь ож знамяоссэс чебермало юн луэмзэс возьматӥсь орденъёсын. 10-тӥ июле Сарапулэ вуизы Белосток но Литва пионерлагерьёсысь нылпиос. Соос интыямын вал "Учитель" шутэтскон юртэ. Бӧрысьгес, шуэтскон юртэз шунтыны луымтэен, Белостокысь 193 воспитанник келямын вал Каракулиное, 188 литва нылпиос - Шарканэ, собере - Дэбесэ. Соосты шуныт пумитазы, улыны но дышетскыны условиос кылдытӥзы. 13-тӥ июле Ижевскын кылдытэмын вал хирургияя госпиталь, интыяськиз со 22 номеро школае. Ож аръёсы Удмуртиын ваньмыз 52 госпиталь ужаз. 6-тӥ августэ УАССР-ысь НКВД-лэн приказэзъя аэродром лэсьтонъя управление кылдытэмын. Урал военной округлэн комвандующиез 4-тӥ сентябре Удмуртиын 6 аэродром лэсьтон сярысь решение кутэ. 15-тӥ декабре Завьялово ёросысь "5 лет УАССР" совхозын аэродром вуттэмын ни. СССР-ысь Вооружениея Наркомлэн приказэзъя, Удмуртиысь заводъёс артиллерийской но стрелковой ож тӥрлык поттыны кутскизы. Дыртыса поттыны кутскизы Березинлэсь авиационной пулемётъёссэ, Дегтяревлэсь противотанковой пыӵалъёссэ, Симоновлэсь самозарядной противотанковой пыӵалъёссэ. Басьтӥськизы Шпитальнойлэсь авиапушкаоссэ поттыны. 14-тӥ августэ П. И. Чайковскийлэсь Клин городысь музейзэ Вотскинске ваён сярысь распоряжение сётэмын. 22-тӥ августэ сиёнэз (нянь, сакыр но конфетъёс) Удмуртиын калыклы карточкаосъя гинэ вузаны кутскемын. Соку нуналаз нянь вузанъя таӵе норма юнматэмын: рабочийёслы но ИТР-лы - 800 грамм, служащийёслы - 500, ужасьтэмъёслы но 12 аресозь нылпиослы - 400 грамм. 30-тӥ августэ Сарапул горисполкомез косо, Ленинградысь дворец-музейёсысь ваньбурез кутыны мед дасяськозы шуыса. Августэ-сентябре Глазове вуэ Ленинградысь метростройлэн оборудованиез. 29-тӥ сентябре Сарапулэ вуэ Бакуысь Ф. Э. Дзержинский нимо завод (сое интыяло аракы поттон заводэ). Собере вутто Москваысь Орджоникидзе нимо радиозаводэз. 25-тӥ октябре Ижевске ваемын тазалыкез утёнъя вить научно-исследовательской учреждение, кылсярысь, Москваысь 3-тӥ институт, стоматологической институт. 29-тӥ ноябре Ижевске вуттэмын Москваысь Бауман нимо механико- машиностроительной институт. С. Некротюк, Удмурт Республикаысь кун архивысь валтӥсь специалист. 1941-тӥ арын оже куриськисьёс. Келязы Кылемаз кӧс нуналэ куазь салкым ке но вал, шор стадионын футболистъёслэн пумиськонзы пӧсь ортчиз. "Газовик-Газпром" шудӥз Липецкысь "Металлурген". Ваньмыз умой мынэ ни вал кадь... но шудонлэн берпуметӥ минутъёсаз "Газовик" 0:1 лыдын куноослы келяз. Асьмелэнъёс али витетӥ интыын. Вуонозэ пумиськонзэ командамы 23-тӥ сентябре ортчытоз Санкт-Петербургысь "Локомотивен". Н. Сергеев. Кивалтӥсьёс - калык пӧлын Вуоз меда покчи гужем? Удмурт Республикаысь Кун Кенешлэсь Тӧрозэ Александр Волковез но шаерысьтымы мукет вылӥ кивалтӥсьёсты Камбарка пумитаз кыдырась зорен но тулкымъяськись Камен. Город кыдёкын ик ӧвӧл ни ке но, шур со пала паромтэк уд поты. Уралысь одӥгез вашкалаез город кылдэмын 1761-тӥ арын. Корт ӵыжатон заводлэн кузёез вылэм Григорий Демидов. Солэн кичӧлтэмезъя, татын ужаллям Тулаысь кибашлыос, соос ик дышетӥллям камбаркаосты. Татын лэсьто вылэм туж чебересь уробоос но тарантасъёс. Совето аръёсы данэз бадӟым вал машинаос поттон заводлэн. Татын лэсьтӥзы вагонъёс, мотовозъёс, тепловозъёс, автокузовъёс, лымы сузян машинаос, пилорамаос... Но реформаос кутскемен валче, завод "гуньдӥз". Татын ужасьёс толэзьёсын отпускын улоно луизы, толэзьёсын уждун ӧз басьтэ. Городын шуак йылӥз ужтэк кылемъёслэн лыдзы. Камбарка район али ужтэк кылемъёсъя республикаямы "азьпал" радын мынэ, 5 процентлэсь уногез адями уг ужа. Столицаысьтымы куноос соин ик нырысь кожизы та городысь самой бадӟымаз предприятие, машина лэсьтон заводэ. Та предприятие али возиське Россиысь Президентлэн администрациез чотын. Завод пыд йылаз султытозяз коньдон отысь висъяськоз. Али директорлэсь ужзэ быдэсъя Георгий Шилохвостов. Нош кызьы тодмо луиз рабочийёсын кенешонъёс дыръя, предприятиез куашкатыны "юрттэм" азьвылэз директорзы Виктор Манохин. Зэм, сое ужысьтыз мозмытӥзы аслаз куриськемезъя. Кызьы пусйиз Александр Волков, та господин ачиз араз 22 миллион манет(вашкала дунъёсъя) уждун басьтыса улэм. Нош со дыре ик отын ужасьёс коньдонтэк пукизы. Но кылем арысен югдур каллен ке но, воштӥськыны ӧдъяз. Уже ватсаса 200-лэсь уно рабочийёсты кутӥзы. Али отын 925 ужасез. Цехъёстӥ ортчыку, мылкыд ӟеч ик уг кыльы. Уг шӧдӥськы ужгурлэн пӧземез, цехъёсын тӧл шула, кезьыт. Отын но татын кӧня ке тепловозъёс сыло. Берлоез машина бичамын ни 1998-тӥ арын. Машинаос дасямын вылэм, Ригае келян вылысь. Но дунъёс вошъяськемен, соосты курись ӧвӧл. Зэм, уждун тырыны кутскизы ик ке но, уноез ӝожтӥсько, туж ичи шуыса. Республикалэн кивалтӥсез шуиз: "Тепловозъёс вылын тӥ кыдёке уд кошке. Мукет продукция поттыны но сюлмаськоно. Тани шаерысьтымы уноез предприятиосмы умой- умой ужало ни, уждун но ӟеч басьто". Городын куашкан калэ вуэмын социальной удыс. Ӝожтӥсько урод вулы, шуныт сётонлы. Уноез сюлэмшугъяськемзэс верало улон интыослэн куашкамзы пумысен. Кызьы валэктӥз Кун Кенешлэн Тӧроез, производстводы ӝутскиз ке, коньдон но луоз. Нош дунтэк квартираос сётон сярысь вераськонэз ик ӧвӧл ни. Та ласянь али улон интыос лэсьтыны кун араз 7 процентэн 20 арозьлы ссуда висъя. Вуоно аръёсы коньдон уката тросгес сётӥськоз. Промышленность уг ужа бере, налогъёс но казнае уг вуо. Югдур умойгес газовой оборудование поттонъя заводын. Отын 365 мурт ужа, шоро- куспо уждунзы 1234 манет. Производствоез азинтон вылысь, бизнес-планъя висъямын 4,5 миллион манет. Предприятиын тыршо поттоно вузъёссэс паськытатыны. Лэсьто газ кысконэн герӟаськем туж пӧртэм вузъёс. Али эскерон вылысь поттӥзы интыысь интые вошъяськись котельной. Камбаркаын улӥсьёслэн вань на эшшо куинь висёнзы - химия ож тӥрлыкез возён арсенал, городэ газ вуттон, Кам вамен выж пуктон. Зэм, люизит асьмеды гинэ уг сюлэмшугъяськыты. Сое кызьы быдтон сярысь мукет кунъёсын но трос вераськонъёс мыно, со бордын уно тодосчиос ужало. Дасяло ни сое быдтонъя терминаллы проектъёс но. Кутэмын данак документъёс. Кызьы вераз вылӥ кивалтӥсь, та уж, Россия Федерация ласянь тырмыт коньдон висъятэк, интыысьтыз уз вырӟы. Чагыр эстӥськонэз Камбаркае вуттон пумысен Александр Александрович шуиз: газ тӥ доры ӝоген вуоз, коньдон но тырмыт висъяськоз. Нош Кам шур вамен выж сярысь ке верано, со одно ик республикамылы кулэ. Уго город зэмзэ Удмуртилэсь люкемын кадь луэ. Паромен гинэ кыдёке уд мыны. Но та объектэз ӝутыны туж трос коньдон кулэ луоз. Но пусйыны кулэ, шуиз Волков, выжлы проект но солы инты бырйыны коньдон висъяны чакламын ни. Камбаркаен люкиськон бер гинэ йылпумъяськиз. Нош зор кыдыра но кыдыра. Чик но покчи гужемлы уг кельшы. Азьпалан паром, Кам шур, столица пала нуись сюрес. Н. Байтеряков. Амалтэк паймоно Кызьы тынад нимыд? Вашкалаос ини шӧдӥзы адямилэн адӟоназ, улоназ-вылоназ нимлэсь валантэм кузёяськемзэ. Россиын, кылсярысь, ЪВИИ даурозь анай-атайёс ватыса возизы черкын пылатыкузы пиналзылы кыӵе ним сётэмзэс, озьы соосыз лек кужымъёслэсь утьыны турттылӥзы. Куд-ог калыкъёс пиналзылы юри урод ним сёто - шайтанъёслэсь палэнтыса. Историкъёс но этнографъёс дунне вылысь ваньмызлэсь сямен калыкъёслэсь шедьто ним ватон сямзэс. Вашкалаос оско вал, гожъя история наукаосъя кандидат Александр Горбовский: адямилэн, городлэн, кунлэн адӟонзы солэн нимыныз герӟаськемын. Горбовскийлэн малпамезъя, соин ик, пе, герӟаськемын туала вакытэ ним воштон но. Нылмурт, кузпаллы бызьыса, картэзлэсь фамилизэ басьтэ. Озьы лэсьто писательёс но актёръёс, асьсэлы кушем ним малпаса; нимзэс вошто черкын сан басьтыса яке монахиня луыса, лушкем обществое пырыса. Одӥг кадь нимез нуллӥсьёслэн сямъёссы огкадьгес луо шуыса, гожъяз асьме даур кутскыку ӟуч исследователь С. Р. Минцлов. "Власть имен" пичигес книгаяз тодмо адямиослэсь нимъёссэс сэрттыса-пертчыса, со таӵе йылпумъянэ вуиз Алексейёс пӧлын ӵемгес пумиськыло ваньзэ лыдъясь-чотась адямиос, Александръёс - шулдыръяськыны ярато, нош Пётръёс шыпыт но юн адямиос. Сергейёс сӥё-дано адямиослэн атайёссы луо: Пушкин, Грибоедов, Тургенев, Даргомыжский Сергеевичъёс вал. Берпуметӥеныз амалтэк соглаш кариськытэк уг луы, уго Совето Союзлэн кивалтӥсьёсыз пӧлысь кыкез - Хрущев но Горбачёв - Сергеевичъёс вал. Ку тӥ вордӥськиды? Толалтэ вордӥськемъёс быгатӥсесь, юн сямоесь луо. Соос малпаськись адямиос, но ваменэсэсь, асьсэды асьсэос яратӥсесь. Ужын асьсэды уг жаляло, ӟеч азинсконъёс басьто. Но улоназы витё пӧртэм шуг-секытъёс. Соослы семьяын улыны каньыл ӧвӧл, куддыръя чыры-пыры понна керето. Тулыс вордӥськемъёслэн тазалыксы ляб, асьсэды гинэ ярато, дӥсьтӥсьтэмесь, юрдӥсесь. Но визьмоесь. Дӥсьтӥсьтэм луэменызы азьветлӥсь уг луо. Ӵемысь соглаш карисько калык сьӧры мыныны. Шуг дышо воштӥськонъёслы. Тулыс нылпиос ваменэсэсь, чакласькисесь, асьсэ шоры синмаськыса учкыны ярато. Нылъёс шуген бызё. Соослы люкетэ чакласькемзы, воштӥськонъёслэсь кышкамзы. Гужем вордӥськемъёс копаськисесь ӧвӧл, карьера понна уг выро. Ужез яратэмзы юрттэ азинсконъёс басьтыны. Соос ваньзэ сюлэмзы пыртӥ потто. Лякыт сямзы вӧлме мурт нылпиос, пудо-животъёс вылэ, нош вожпотэмзы соку ик вунэ, йыркуръяськыса уг уло. Гужем вордӥськемъёс йӧнъяськисесь, азязы пуктэм ужпумзэс одно ик быдэстыны тыршо. Сӥзьыл вордӥськемъёс туж чакласькись, ӝикыт адямиос. Лэсьтэмзылэсь азьло нырысь кема малпасько. Соос туж тыршисесь. Сайкыт визьзы, огмылкыдо но капчи сямзы юрттэ юн семья кылдытыны. Сӥзьыл вордӥськемъёс шер дыръя керето семьяязы, ярато нылпиосыз но пудоосыз. Кызьы нимыз атайдылэн? Атай ним кылдэм образэ тупатъянъёс пыртэ. Сое быдэсак уг вошты: я небытгес каре, я - ӝотыресгес. Чакланъёс возьмато, Александрович атай ним нуллӥсьёс сямзы секыт, мылкыдзэс вормисьтэм адямиос, нырысь лэсьто, собере малпасько. Вань Игоревичъёс ваменэсэсь, чурытэсь. Николаевичъёс лякыт адямиос, но асьсэды лек возё. Соос юнэсь, туж кулэ учыръёсы нокинэ уг жаляло, верамзыя огзылы огзы пумит луэ. Соосын секыт огъя кыл шедьтыны. Сямзы секыт юэм дыръязы. Сыӵе адямиосыз кивалтон уже лэзёно ӧвӧл. Вуоно анай-атайёслы кӧня ке визь-кенешъёс Пиналды вордӥськонэн герӟаськем вань сюлмаськонъёсты быризы. Табере одӥг юан сюлэмшугъяськытэ: кыӵе ним сётоно пиналлы? Кызьы сое шонер быръёно, мае лыдэ басьтоно? 1. Умой вылэм, со нимаз но атай нимын ӵош но умой кылӥськиз ке. Вераны шугез котырысь адямиослы но, со нимез нуллӥсьлы но шуг-секытъёс кылдытэ, адями кепыр вае, нимзэ вольыт, чебер уг ке верало. 2. Ним шуг-секытъёс медаз кылдыты мусояса вераны (Санечка, Алинушка). Со адямилы мылкыдэз возьматыны луонлык сётэ. 3. Ним капчиен кылдытыны кулэ атай нимез. Сотэк со бадӟымесь курадӟонъёс кылдытоз тӥляд арлыдо луэм внуктылы. Кузпалъёськисьёслы кӧня ке дэмланъёс Быръем адямидылэсь нимзэ но вордскем дырзэ тодыса, тӥ асьтэлэсь ӵош улондылэсь кыӵе луонзэ тодыны быгатоды. Ортчытэм эскеронъёс возьмато, умой семья луэ одӥгез кузпал гужем вордӥськем ке. Но огез гинэ. Кыксы ик гужем ке, кусыпъёссы юнэсь уг луо. Сыӵе ик югдур, куке кузпалъёс сӥзьыл но тулыс яке толалтэ вордӥськемын. Малы бен озьы луэ? Тодады вае ай толалтэ вордскемъёслэсь аспӧртэмлыкъёссэс. Соос ваменэсэсь, чутрак карисесь. Кык сыӵе адямиос огазе кариськизы ке, ялан керетонъёс луозы. Б. Ю. Хигирлэн "Как назвать ребенка?" книгаысьтыз. Кыӵе улмопу мерттоно? Сӥзьыл вуэ ке, адямиос садъёсазы выль писпуос мертто, емыш сётӥсь писпуоссэс выльдо яке вошто. Нош кыӵе улмопуосты мерттоно? Соос пӧртэмесь. Огезлэн улмоосыз вазь кисьмало, мукетызлэн - гужем шорын, нош куинетӥосызлэн - бер сӥзьыл гинэ. Базарысь асьмеос ӵем пумитаськомы улмопуосын вузкарисьёсты. Машинаен лыктэмъёсты басяськисьёс ӝогак котырто. Калык яратыса басьтэ Воткинск ёросысь "Чайковский" огазеяськонлэсь (азьло совхоз вал) писпуоссэ. Воткинскъёс будэто вазь вуись "белый налив", "московская грушовка", "ижевское местное", "серебряное копытце" сортъёс. Гужем шорын кисьмало "уральское наливное", "экранное", "Марина", "подарок осени" яблокъёс, нош бер вуо "аврора", "анис полосатый", "исетское позднее" пумоосыз. Вакчияк татысь сад будэтӥсьёс сярысь. Садэн выро рос-прос 65 ар ӵоже ни. Со понна висъямын 85 гектар музъем. Будэто узы, сутэр (сьӧд, тӧдьы, горд), чия, облепиха, крыжовник (курень, вож), эмезь (горд, сьӧд), сьӧд палэзь, шу но мукетсэ. Тани туэ гужем бичамын но вузамын 35 тонна сьӧд сутэр, узы - 19 тонна, эмезь - 11 тонна, вишня - 6 тонна. Москвае туэ 22 тонна кынтэм емышъёсты басьтӥзы. Со 277 сюрс манетлы. Калыклы азьланяз но вузам понна, туэ тулыс выльёсыз улмопуос мерттэмын 2 гектар вылэ. П. Николаев. Тунсыко пумиськонъёс Льӧльпырась луовыл Киров областьысь Кильмезь ёросысь шор больницаын пумиським удмурт воргоронэн Михаил Кузьмич Лубягинэн. Со кема аръёс ӵоже шофёр луыса тыршемын, уно сюрс иськемъёсты ортчемын. Тани туэ, кускыз висемен, больницае лыктытэк амалыз луымтэ. Кыл бӧрсьы кыл, вераськон ӧрмы пуромиз. - Тон тодӥськод-а, ма шуэм луэ Байконур? - юаз Миша агай. Тодмо космодромлэсь нимзэ кылэме, со сярысь трос лыдӟеме вань ке но, (бигер кылэз тодэм вылысь, со казах кылэн огвыллемгес), валэктыны шугъяськи. Михаил Кузьмич валэктӥз: - Туэ Байконур космодромлы 45 ар тырме. Нош нимыз сярысь тросэз валэктыны шугъяськозы, дыр. Син азяд пукты ай Казахстан палась ӵошкыт степьёсты, отысь ӵыж-горд льӧльырась тюльпан сяськаосты. Кожалод, быдэс пыдул гомӟемын: луовыл льӧльыра, горд тусъем кариське. Нош казахъёс горд луоез "байко-нур" нимало. Табере та кылъёслэсь огазеяса гожтэм "Байконурез" быдэс дуннеын калык тодэ ни. Уг ваты, космодром сярысь лыдӟылэме вань. Та дыр ӵоже уго отысь кӧня корабльёс инсьӧре ыстэмын но пумитамын ни. Нош отын службазэ ортчытэм адямиез, уката ик удмурт воргоронэз, нырысетӥзэ пумитасько. Космодромез лэсьтыны кутскизы пельпумазы погонъёс вурӟем егит пиос. Лубягин мадемъя, кыӵе гинэ ужъёсты быдэсъяно ӧз луылы соослы. Асьсэос ик гудӟылӥзы тыл кадь сутӥсь луоё музъемез, пуктылӥзы электрокужым вуттӥсь юбоос, лэсьтӥзы-ӝутӥзы сюресъёс. Нош кӧня выль техника вуиз татчы со дыре. Ваньзэ вагонъёсысь бушатоно, интыяно, радъяно, лэсьтоно. Байконурез 1953-тӥ-1955-тӥ аръёсы чырмыт лэсьтӥзы. Та объект сярысь вераськон туж лушкем уж, государственной секрет вал. Нош таиз ини историысь чуръёс: "Байконур космодромез лэсьтонэн кивалтӥз ачиз Сергей Павлович Королев! Инсьӧры лобась машинаослэн киросатайзы, конструктор". Михаил Лубягин мыняса тодаз вае. - Солдатъёслы командиръёсмы огшоры валэктӥзы, - лэсьтӥськом стадион. Но... солдатъёс пӧлын но ӟеч ужа "чиган почта". Соос умой валазы: луовылын - пустыняын - стадион нокинлы кулэ ӧвӧл. 1957-тӥ арын сӥзьыл космодромысен нырысьсэ инсьӧре келямын вал баллистической ракета. Но, вить иськем инсьӧр сюресэз ортчыса, берен усиз-киргаз горд тюльпан луовыл музъем вылэ. Собере ик усиз кыкетӥез. Нош куинетӥез, 4-тӥ октябре ыстэмез, быдэс дуннеез зуркатӥз но паймытӥз: "Советской Союзын инсьӧры ыстэмын искусственной спутник!" Ӟеч вӧт кадь ик тодам на. Мыным соку куинь арес вал. Эшъёсы, дышетскись пиналъёс валэкто, инбамысь, пе, туннэ, адӟыны быгатом спутникез. О-о, кӧня сылӥмы ми урамын, уй инбаме учкыса. Синъёын ик эли-кеби кариськиз: кизилиос ворекъяло, кырмышъяло, усьыло... Тӥнь соку кин ке чирак кеськиз: "Спутник!" Оло зэм вал, оло ӧй - юа на куинь аресъем пияшлэсь. Оло, усись кизилиез адӟим? Кыӵе меда со Байконур? Лыдпусъёс басьтэмын туала печатьысь. Интыяськем музъемез 7360 иськем. Одӥг "Энергия" космической кораблен кивалтон понна гинэ лэсьтэмын-ӝутэмын вить этажъем юртъер ӝужда объект. Нош "Буран" понна висъямын вал 17 сюрс квадратной метр инты. Михаил Кузьмич Лубягин службае вуыку, ӵапак татын дасяське вал советско-американской программа. "Союз", "Апполон" корабльёс ӵошен ӝутскизы инсьӧры. Кильмезь ёросысь удмурт пи службазэ ортчытӥз машина руль сьӧрын, нуллӥз-ворттылытӥз частьысьтыз связья кивалтӥсез. Соин но солы шуд усьылӥз тодмо адямиосты пумитаны, соослэсь вераськемзэс кылзыны. Соос пӧлын ик вал космонавтъёс Герман Титов, Валерий Быковский, Владимир Шаталов. - Со аръёсы, - маде Михаил Кузьмич, - космодромын кузёяськиз лушкемлык, ас тодэмъёстэ шараяны ӧз лэзьылэ. Кунгож сьӧрысь "куноос" лыктыку, солдатъёсты ӵемысь пегӟытылӥзы мукет интыосы. Вошъяллязы войсковой частьёслэсь номеръёссэс. Кылсярысь, "штаб" гожтэм ик ӝог пӧрмылӥз "клублы", "медпунктлы". Ракетаез матысен адӟыны, киыным корт мугорзэ маялтыны ӧз кылды, - лулске Лубягин. - Вань солдатъёс укмыс сю метрлэсь матэ уг лэзисько вал. Матэктӥд ке - ыбозы. Азьвыл солдатлэн мадёсаз служба, уж, дисциплина кылъёс ӵемысь кылӥсько. Чидатэк юасько: - Михаил Кузьмич, службады мӧзмылэт ортчем кадь. Палэнын, нокинэ адӟытэк, шулдыръяськытэк. - О-о, - пальпотэ ни Лубягин. - Отчы вуылӥзы Советской Союзысь тросэз творческой ужасьёс, аристъёс. Куиньзэ гинэ пусъё, мыным шуд усиз Геннадий Хазановлэн, Валентина Толкуновалэн, Алла Пугачёвалэн концертъёсазы пукыны, билетъёслы дун тырытэк. Вунонтэм кылиз Байконуре писпуос мерттэммы но, - тодаз вае воргорон. - Сутӥсь-ӵушкась луое писпуос выжы лэзён понна кӧня-о ву киськано луиз меда? Отын зоръёс но уг луо. Котькуд писпу бордын - табличка-паспорт. Тодмоямын кинлэн мерттэмез но утялтэмез. Писпуэд ке куасьмиз - йырдэ утьы! Озьы, горд тюльпано луовылъёсын ӝутскизы, вожектӥзы писпуо интыос. Ньыльдон вить ар тырмиз ни Байконур космодромлы. Со пыраклы историе гожтӥськыса кылёз. Солэсь нимзэ историе кельтон вылысь ик тыршиз Кильмезь ёросысь удмурт пи но. Н. Турин. Правительствоысь иворъёс Чагыр эстӥськонэз кулэезъя висъяно Правительстволэн Тӧроез Н. Ганза но "Межрегионгаз" ООО-лэн валтӥсь директорез В. Никитин огкыл гожтӥзы чагыр эстӥськонэз потребительёслы кулэезъя но дыраз вуттон сярысь. Кылем арын республикае 2,8 миллиард кубометр чагыр эстӥськон вуттэмын вал, туэ 5 толэзь ӵоже - 1,4 миллиард кубометр. Сомында эстӥськон асьмелы тырмыт луэ. Туэ февраль толэзе Правительство озьы ик ужрадъёс чаклаз газлы дун тыронъёсъя. Озьы ке но, Удмуртилэн газлы пунэм тыронъёсыз 790 миллион манет тыр люкаськемын, нош бюджетысь газ тыронъёслы 131 сюрс манет гинэ висъяны учкемын. Сыӵе секыт югдурысь потон понна Правительство ӵектэ, вуоно арлы бюджетэз дасяку, газ, электрокужым, шуныт сётон понна коньдон тыронъёсын герӟаськем ыштонъёсты нимаз статья пыртыса чакланы. Удмурт Республикаысь Правительстволэн пресс-службаез. Масторава - зумыто му Финн-угор писательёслэн ВИ калык куспо ӧтчамзы Куинь "китъёс" но этнофутуризм Петер Домокош, Арво Валтон но Кари Салламаа - куинь "китъёс", мар вылын возиське финн-угор писательёслэн огазеяськонзы. Нырысь ик Домокош вырӟытӥз та ужез, со вал ассоциацилэн кивалтӥсез. Ньыль ар талэсь азьвыл Эстониын конгресс дыръя "биньгозызэ" Арво Валтонлы сётӥз. Будапешт университетысь финно-угроведениея профессор кыкетӥзэ Саранске вуэм ни. Эрзя но мокша кылъёсыз тодэменыз уг ушъяськы. Кӧня ке ӟуч кылын йӧндыре, та кылын ик со вераськиз. Мордва литератураез туж ӟеч тодэмзэ возьматӥз. Нош кулэ-а вераны, Петер Домокош мукет эшъёссэ но палэнэ уг кельты шуыса? Удмурт литературалэсь будон, ӝутскон сюрессэ пыр-поч эскерыса, коми, пор, мордва, чуваш литератураосын ӵошатыса, бадӟым монография гожтӥз но асьмелы кузьмаз. Со вал 1993-тӥ арын. Нош 1975-тӥ арын Венгриын "Гондыр кырӟан" бадӟым финн-угор антология поттӥзы. 800 бам пӧлысь 160-эз сӥземын удмурт кылбуретлы. Берыктӥсьёс пӧлын - ачиз Домокош, солэн кузпалыз Мария Матан, Каталин Надь. Иштван Белла, Каталин Надь - Венгриысь туж усто гожъяськисьёс. Таосыныз рос-прос тодматскыса ӧм вуэ, но син азе кылизы. Каталин Надь - ӝужыт, веськрес, сьӧд кысъем нылкышно, кылбурчи но тодосчи, филология наукаосъя кандидат, Будапешт университетын венгер кыллы дышетэ. Трос кылысь берыкъяз ни гожъямъёсыз. Но удмуртъёсын, поръёсын, эстонъёсын сокем матысь ӧвӧл на. Соин но, дыр, финн-угор кылбурчиослэсь калык куспо фестивальзэс адӟемез потэ. Эрзя кылэз Эстониысь сету, выру выжы калыкъёслэн кылзылы матын шуо (мокшае бигер шӧм пыӵамын). Оло, соин но Арво Валтон Мордовие ньылетӥзэ вуэм ни. Татын солэн уно эшъёсыз, Валентина Мишаниналэсь, Полина Алёшиналэсь, Анна Сульдиналэсь гожъямъёссэс эстон кылэ берыкъяз. Паймоно кадь: сыӵе бадӟым писатель прозаик малы ке нылкышно кылбурчиос борды кыстӥське: берыкъяз коми Галина Бутыревалэсь, пор Альбертина Ивановалэсь, та чуръёсыз гожтӥсьлэсь кылбуръёссэс но (верай ни вал: берыкъям гинэ ӧвӧл, нимаз книгаен поттыны сюлмаське). Та "китъёс" пӧлысь кыкезлы быдэн куатьтон ньыль арес ке, куинетӥезлэсь арессэ нокин уг тоды. Со Кари Салламаа, Финляндиысь Овлу университетысь профессор. Паймымон потӥз: котькуд адӟемлы быдэ со пиналгес луэ. Нош кыӵе йӧн возиське! Финн кылын вераськемзэ ӟуч кылын лыдӟыкузы, артист кадь сылӥз: тани, пе, адӟоды ай, маин "куртчоно" этнофутуризмез... Этнофутуризмлэн "атаез" сое уд шуы. Талэсь азьло вылэм ни кутскисьёс: Карл Синиярв, Юлле Каукси. Тодӥськом: этнофутуристъёслэн (егитъёслэн) нырысьсэ люкаськонзы вал 1993-тӥ арын Тартуын, собере 1998-тӥ арын Ижевскын, собере нош ик Тартуын. Нош Кари Салламаа куинетӥзэ ни таӵе конгрессъёсын та сярысь кылпум поттылэ. Али но этнофутуризмез котыр ласянь бергатӥз: кызьы кылдэмез, пуштросэз, кутӥськемез, эстетикаен герӟаськемез сярысь вераз. Вакчияк - таӵе кылъёсын: - Этнофутуризм аслыз сюрес усьтӥз куке выру но сету калыкъёс выль сямен учкизы асьсэлэн улон сямъёссы, выжыоссы, узырлыксы шоры. Озьы со вуиз Урал палась калыкъёс доры но. "Этно" - пичи калык, нош "футуризм" - со ӟуч футуризмен но, итальян модернизмен но огкадь маке ӧвӧл. Со возьматэ азьпала учкемез. Этнофутуризм адямилы ас кужымезлы оскон сётэ. Со кулэ городысь культураез азинтон понна. Нырысь ик - соослы, кин гуртын улӥз но табере, городэ лыктыса, ӟуч, швед, норвег яке финн (саамъёс) культуралэн зӥбетэз улэ сюриз. Этнофутуризмез азинтыку паськытало философия ласянь валанъёс. Урал калыкъёс туж дунъяло вал адямиослэсь ӵыжы-выжыя огазеяськемзэс. Со улон рад сӧриськиз, адямиосты герӟаны кутскиз уксё, алязы алкоголзим, наркомания, ас выжыдэ, асваландэ ыштонэ вуим... Национальность - идеология. Сое интеллигенция кылдытэ но калык вылэ выжтэ. Со понна ик этнофутуризм кулэ философиын но, литератураын но, творчествоын но. Озьы этнофутуризм политической кужымлы, наукаез, этносэз утён амаллы пӧрме. Этнофутуризм пыр урал калыкъёслэн литературазы быгатоз котькуд пала вамыштыны но ас пушказ сьӧлтаськем соцреализмлэсь мозмытскыны. Но озьы луоз, кылэз утьыса солэсь чылкытлыксэ возьыса гинэ... Мордва шаерамы - толъёс ӟучесь, Кырӟанъёсмы - ӟучесь, Гожтэтъёсмы но ӟуч кылын. Берпум сюрес вылэ Келян-бӧрдон гинэ - асьме кылын. Тазьы медаз луы, - Кари Салламаа веранзэ йылпумъяз Александр Араповлэн кылбуреныз. Вераны кулэ, азьлогес, Кари Салламаа но Кастрен обществоысь Еки Палтиа финн кылын вераськем бере, соосты эрзя кылэ берыктӥз Джак Рютер - американец, Финляндиын улэмын, 15 кылэз тодэ, али Мордва университетын финн но венгер кыллы дышетэ, кышноез эрзя. Валамон, тросэз ӧз валалэ вераськемзэс. Нош куке Салламаа мынэсьтым нимтулме поттылӥз но кыӵе ке кылбурме лыдӟиз, вӧзам пукись эрзя поэт берыктэмъя гинэ валай: со вера вылэм "Пыри автобусэ, сьӧд нюлэскы сямен"... кылбуре сярысь. Озьы мон но этнофутуристъёс пӧлы сюри, Виктор Шибанов тыршемен. Со финн кылбурчилы, тодосчилы дас кылбурме берыктыны сётэм вылэм. Кылъёссы матын бере, финнъёслы но эстонъёслы ог-огзэсты капчи валаны. Кари Салламаа вӧзысь адӟоно луылӥз Юлле Кауксиез, ӵемысь переводчица чотын, но берыктылӥз англи кылысь. Салламаалы тау карыса вазиськыкум но со юрттыны вуиз. Тодӥсько, Юлялэн Удмуртиын трос эшъёсыз: туэ гужем этнофутуристъёслэн "Мушо му" выставкаязы сое шӧдӥ. (Нош ачиз самой матысь эшен лыдъя Эстониын улӥсь но дышетскись Ирина Ореховаез.) Эшшо валай: Юлия Каукси - зэмос этнофутурист, суредась, кылбурчи но драматург. Таӵе эшъёс асьме доры нырысь ик ваизы выль тӧлэз, омырез. Зэм, дыр, вера Виктор Шибанов: - Татчыозь этнофутуристъёс Удмуртиын гинэ вал ай. Табере поръёс, эрзяос, мокшаос но тунсыкъяськыны кутскизы. Мукет дыръя со шуиз: - Жаль, троссэ этнофутуризм амалэн гожтэм произведениосыз школа программае пыртыны уг луы. - Малы меда? - Куд-огзэ - укыр дӥсьтӥсесь, хулиган шӧмо луэмысьтызы. Соин-а меда залын этнофутуризмлы пумит ӝутсконъёс вал. Но Арво Валтон, конгрессэз нуись, сыӵе пурӟем мылкыдэз серем улсын лапкатыны быгатэ. - Тросэз писательёс асьсэлэн творчествозы сярысь ӧжытгес тодо, кӧня "погмало" сооызс критикъёс но интерпретаторъёс. Мукет учыре ке но верамын вал, ӵапак татчы тупа. Мордва лулчеберет Мордовилэн шоркареныз тодматскыны кема ик ӧз кылды, мукетъёсыз сярысь бергес вуим но уго. Нуназеян вискын лук-лак нуизы С. Эрьзя нимо искусствоосъя музее. Мордовие тае адӟон понна гинэ ке но ветлӥд, чик уд жаля. Быдэс дунне данъяське эрзя скульпторлэн ужъёсыныз. Со сярысь трос кылэмын, лыдӟемын вал ке но ини, ас синмыныд адӟытэк, ас куэныд шӧдытэк уд вала, макем бадӟым кужымез таӵе ин югытэ кыстӥськись чеберлыклэн. Степан Эрьзя (1876-1959) бурлак выжыысь потыса, суредаськон удысын вылӥ тодон-валанъёс басьтыны быгатӥз. Революцилэсь азьло тямыс арзэ Италиын улӥз, модерн шӧм пыӵаз ужъёсаз. Трос калык куспо выставкаосы пыриськиз но быдэс дуннелы тодмо луиз. Татысен ик Нефедов фамилизэ вордэм калыкезлэн нимызъя тупатӥз. 1927-тӥ -1950-тӥ аръёсы Эрьзя улӥз Аргентинаын. Татын солы туж яраз кебрачо но альгарробо нимаськись писпуосын ужаны - соос туж юнэсь но пеймыт-чебер тусоесь. Россие берытскыса, сьӧраз ваиз 200 ужзэ. Тросэз али возисько Саранскысь та музейын. Шокатэк кадь учкиськод соосыз. Кӧня скульптураосыз адӟылӥм - таосыныз уд ӵошаты. Мраморлэсь но железобетонлэсь, чугунлэсь но гипслэсь, вылӥ верам писпуослэсь - адями киос йӧтскылыса, кисьтэм кадь вольытэсь, улэпесь шокало, кожалод. Адямилэсь лул пуштроссэ усьтэменызы но паймыто. Озьы ми йыбырттыса кадь сылӥм автопортретэз, анай-атайёслэн тусбуйёссы, "Эрзя нылкышно", "Дартлык" (гольык мугор), "1905-тӥ арын революциын быремъёс", "Испанка", "Аргентинка" но трос мукет ужъёсыз азьын. Татын ик - Ленинлэн, Сталинлэн тусбуйёссы, "Лев Толстой", "Сократ", Микеланджелолэн бадӟым портретэз (та ужзэ туж дунъя вылэм, люкиськемез ик потылымтэ). Кебрачоен яке мукетыныз ужакуз, Эрьзя инкуазен кылдытэмзэ туж чакласа вӧлэ вылэм, кулэ интызэ гинэ тупатъям - озьы солэн киыз уката но кужмо адӟиське, ачиз инмар йӧтскылэм кадь. Юнме шорысь-а тодмо актёр Михаил Козаков (тодады вае "Выстрел" фильмез) "Моисей" азьын быдэс час сылэм но, кӧня ке улыса, татчы юромо гастролен лыктэм на. Степан Эрьзя пичигес мугоро, но туж кужмо, удась-тыршись вылэм. Чагыр синъёсыныз бордаз кыскем. Мӧйымыса ини яратэм аслэсьтыз 24 ареслы пинал нылэз. Ноку кышнояськылымтэ. Тросгес тодэм потон мылкыдын пачылмыса потӥм музейысь. Василий Крылов эшмес, пор писательёслэсь тӧрозэс, Эрьзялэн памятникез азьын туспуктэм шуккыны курим но - нош азьлань вамыштӥм. Уката ик милемыз дыртытӥз Фома Кузьмич, солэн возьматэмез потӥз, макем татын сӥлы каро тодмо адямиоссэс, писательёссэс. Республикалэн юртэз азьысь площадетӥ васькыса (улӥяз - автомагистарль), син азямы усьтӥськизы радэн сылӥсь синпелетъёс-памятникъёс: З. Ф. Дорофеевлы, Л. И. Волковлы, С. Д. Эрьзялы, М. Е. Евсевьевлы, Л. П. Кирюковлы, П. С. Кирилловлы, И. М. Яушевлы, Ф. В. Сычковлы, М. И. Безбородовлы. Шумпотэм интые, сюлэммы ӝож луиз: ма, асьмеос Куӟебай Гердэз гинэ но ум быгатӥське на татчыозь тазьы йӧн-йӧн данъяны... - Ас культуразэс татын гажало. Та галерея сяна, куинь доска вылэ гожъямын луоз лулчеберетсы сярысь, - кытысь ке тодэм ни, милемлы но ивортыны дыртэ Ф. К. Ермаков. - Данъяно адямиоссы - Полежаев, Огарев, Сычков - ӟучъёс. Мукетъёсыз - мордваос. Кивалтӥсьёссы но татын ваньмыз сямен - мокшаос, эрзяос. Одӥг кыл таослы тупатоно вылэм: 80 процентэз кылъёссы ог-огзылы валамон ук. Озьы Фома Кузьмич Н. Ф. Мокшин профессорен но мукетъёсыныз огмылкыдзэ вераз. Нош мургес пыроно ке, эрзяос но мокшаос куспын лэчыт югдур. Но таиз ини мукет ужпум. Дыр луысал ке, Фома Кузьмичмы татысь Дышетӥсьёслэсь тодон-валанзэс будэтонъя институтэ но нуллысал, дыр. Ужезъя вуылэ бере тодэ: отын ик - эмъяськон, общежитие, артэ ик - спортзал, столовой, оранжерея. Синмаськем. Нош Н. П. Огарев нимо универстетсы (таиныз но аслазэн сямен данъяськыса вераз Фома Кузьмич) - Россиын МГУ бере самой бадӟымез. Татын дышетскисез 20 сюрслэсь уно. Ӝыт Национальной театре мыныкумы, со вадьсы вуюись ӝутскиз - пичияк зориз вал. Юнме шорысь ӧй ва кадь со. Та театрзы тужгес егитэз, дас арессэ алигес пусйиз ай. Самой пичиез но - асьме Удмурт театрмы сярсь куинь пол ӧжыт, дыр, интыез. Но со буш уг луы. тани али но калык зал тыр люкаськем. Писательёслы учкыны-кылзыны дэмлаллям туж тодмо ансамбльёссэс: "Торама" но "Келу". Вашкала крезьгуро инструментъёс шудэм улсын пӧртэм куараосын зыл-зыл ӧръяськись кырӟанъёсыз кылзэмъя, нош ик тодам ваи кылем арын августэ асьме доры фестивале ветлэм "Диголя" эрзя но "Мокшаночка" ансамбльёсыз, соосын Воткинске ветлэммес... Куд-огез та ӝытэ фойеын но эктӥзы на. Нош милемлы... шулдыръяськонэн йырин ӧй вал ни. Йырамы шуккем кадь вуиз Ижевскысь ивор: улонысь кошкем калык писательмы Петр Чернов. Тэльын писпу куаръёс шыпыртэм музэн ортчиз та ивор писательёс пӧлтӥ. Ми шоры мукет синмын, жаляса учкыны кутскизы: иське, таосын люкиськоно луомы. Ӵуказеяз ик - сюрес вылэ. Ижын пумиськытозь Удмурт делегация туннэ ик кошке ни шуыса тодэмзы бере, мылкыд карисезлы кыл сётӥзы на. Татын ӵапак интыяз луиз милемын ӵош сюрес вылэ потэм министрлэн Николай Мусалимовлэн вераськемез. (Огӵош вералом: со нырысьсэ, дыр, тазьы писательёсын ветлӥз, но пӧламы туж тупаз, сое кылбурчи кожасез но вал). Николай Николаевич нырысь ик бадӟым тау кариз та форумез дасясьёслы, ортчытӥсьёслы, уката ик мордва Писательёслэн огазеяськонзылэн тӧроезлэн воштӥсезлы Валентина Мишаниналы, уйзэ но изьытэк сюлмаськемез понна. Вылӥ кивалтэтлы - уксёен юрттэмез понна (190 сюрслэсь ятыр, шуо, та ужрадлы сётӥллям). Вуоноез пумиськон, кык ар ортчыса, Ижевскын луоз шуыса, тодо ни вал, но министрлэн вылӥ кивалтэтлэн нимыныз вераськемез уката но оскымон, сюлэме пыӵамон луиз. - Асьмеос таӵе улон дыръя дышемын ни нырмес ошыса, бӧрдыса но кураськыса улыны, - шуиз Николай Мусалимов. - Но улонлэн мукет палыз но вань: шумпотыны, пальпотыны быгатон, астэ палэнысен учкыса серекъян. Вуоно конгресслы дэмламын бере таӵе тема - юмор асьме улонамы - ми тӥледыз пумитаны дась. Сыӵе мылкыдзэс веразы Удмурт Республикаысь Кун Кенешлэн но, Правительстволэн но Тӧрооссы. Зэм, юмор огшоры маке ӧвӧл, со азьлань валтыны быгатӥсь бадӟым кужым. Но та ласянь асьмелы, вылӥ кивалтэт юрттэмъя, бадӟым уж лэсьтоно луоз ай. Нырысь ик, со дырлы поттоно финн-угор юморен антология, вань кунъёсысь писательёслэсь гожъямъёссэс, суредъёсыз люкаса. Кык ар куспын, оло, вырӟоз бигеръёслэн "Чаянзы" выллем удмурт журнал поттон ужпум но. Арво Валтон но Егор Загребин люкиськыса ваче кизэс кырмизы. Таослэн кылзы тупалоз, чылкак пӧртэмесь ке но юморъёссы: шӧдонтэм гинэ чепыльтэм бордысен серекъян-шузияськонозь. Нош асьмелэн вань мае возьматыны: "Шӧкычмы" но "САК-мы", Анатолий Ушаковмы но Валентина Серебренниковамы, Рашид Хайдаровмы но Анатолий Григорьевмы... Калыкмылэн ӟег нянь кадь сямыз но куноятыны быгатэмез. Удмурт мусур но пельнянь, перепеч... Муш бакчазэ возьматыны медэ Егор Егорович. Но соиз ай асьме дорын. Ӝыт вуэм бере, ӵуказе улысааз ӵукна ик кошконо луим ке но, ми шӧдыса-валаса вуттӥм та музъемлэсь зумытсэ, омырезлэсь шунытсэ, калыкезлэсь туж лякыт, юрттыны дась луэмзэ. Тодӥм, кин уг тоды на вал: "мастор" - со музем, дор, нош "ава, авай" - анай. Мордва музъем-анай милемыз ас нылпизэ кадь ӟыгыртыса пумитаз но, люкиськыны ӵыдытэк келяз но. Сюрес вылэ келяны эшъёсмы потӥзы: финнъёс, эстонъёс, поръёс, эрзяос. Туж жалязы, тӥ, пе, уд луэ туннэ Госсобранилэн кивалтӥсез Валерий Кечкин дорын котырес ӝӧк сьӧрын, ӵуказе уд адӟе Рузаевкаысь Финн-угор шудонъёсъя музеез, уд пылаське Пайгарма нылкышно монастырьысь вӧсям ошмес вуын. Трос музейёсмес, редакциосмес но адӟытэк кылиды. Мар карод на, озьы луиз бере. Юнме уг шуо: шумпотонэн артэ куректон ветлэ... Нош Пайгармаын мукет дыръя пыласьком ини. Таӵе туспуктэмъёс вуизы "Эрзянь правда" газетлэн фотокорреспондентэзлэсь Геннадий Романовлэсь. Мордва литературовед, филология наукаосъя доктор Александр Брыжинский, Петер Домокош но Каталин Надь. Кари Салламаа, Еки Палтиа но Джак Рютер. Степан Эрьзялы памятник. Политика Арня ӵоже - дуннеын, странаын, шаерын Кылем арняе кыдёкысь Австралиын Сидней городын кутскизы гужем Олимпийской шудонъёс. Спортсменъёс сяна, отчы люкаськизы тросэз тодмо политикъёс. Кылсярысь, аслаз землякъёсыз понна "висьыны" ӵуж континентэ лыктӥз США-лэн Президентэз Билл Клинтон но Челси нылыныз. Зэм, быдэс дуннее ӵошатсконъёс ваё шуд но шумпотон, адямилэн оскыны луонтэм кужмыныз но быгатонлыкъёсыныз данъяськон. Юнме шорысь шат вашкала грекъёс олимпийской шудонъёссы дыръя ожмаськемысь дугдылӥллям, вир кисьтон уг луы вылэм со вакытэ. Тодӥськоды, луоз, ӵапак Вашкала Грециын ӵошатсконъёслы кутскон сётэмын вал. Нош Олимп - уй пал Фессалиысь гурезь, сое туж дунъяло вылэм вашкала грекъёс. Лыдъяло вылэм угось, татын Зевс кивалтэм улсын инмаръёс уло шуыса. Бен, кемалась ортчем дауръёсы сямен туннэ но, Олимпийской шудонъёс мыныку, улонысьтымы секытэз, кырсез тӧлӟысалзы ке. Но озьы уг пӧрмы ай. Европаез кылем арняе "зуркатӥз" бензинэн герӟаськем ужпум. Югдур тужгес но лэчытомиз Великобританиын. Мугез но тани кыӵе: берло дас ар ӵоже нырысьсэ будӥз му вӧй понна дун - 1 баррель (158,76 литр) му вӧй сылэ 35 доллар. Озьы Великобританиын ялэмын вал бензинлы выль дунъёс. Шормуӵъёсысь калык понна та тӥробыкен шуккем кадь луиз. Нырысь ик водительёс но фермеръёс понна. Ӵапак соос ик пумитъяськон ужрадъёсы потӥзы, уно сюресъёсты пытсазы. Озьы АЗС-ёс бензинтэк кылизы. Экономистъёс лыдъяллям ни, нуналлы быдэ Британия 400 миллион доллар мында ыштон адӟе. Но тужгес но бадӟым ыштон адӟе премьер-министр Тони Блэр. Ужаса улӥсьёс пӧлысь 94 процентэз солы оскемысь дугдӥллям ни. Пусйыны кулэ, ОПЕК огазеяськонэ пырись кунъёс тросгес му вӧй кыскыны кутскизы, нош дунъёс ӧз усе. США но Западысь кунъёс тыршо огазеяськонэ пырись странаос вылэ зӥбыны, дунъёсты кулэстыны курыса. Саудовской Аравия талы дась, угось со Америкалэн эшез, собере му вӧй кыскон но арабъёс понна дуно ик уг усьы. Нош мукет кунъёс пыкисько. Кинъёс бен ОПЕК огазеяськонэ пыро? Вералом соосты: Венесуэла, Иран, Ирак, Кувейт, Саудовской Аравия, Алжир, Индонезия, Ливия, Нигерия, Катар но ОАЭ. Та странаос дунне вылын кыскем му вӧйлэсь 30 процентсэ потто, Россия - 8 процентсэ. Нош странаямы кыӵе югдур? Эстӥськонъя кампаниос кунгож сьӧры му вӧй тросгес келяны кутскизы. Озьы куд-ог улосъёсын шуг-секытъёс кылдӥзы ни. Экспертъёслэн чакламзыя, бензин дунъёс ар пумозь ӧжытсэ 10-15 процентлы ӝутскозы на. Нош 2001- тӥ арын мар луоз - тодмо ӧвӧл. Угось 1-тӥ январе улон пыӵалозы ГСМ-лы будэтэм акцизъёс. Кылем арняе Франциысь югдурез утисьёс бадӟым вормон басьтӥзы: кырмизы но пытсэт сьӧры келязы баск выжыысь террористъёслэсь азьветлӥсьёссэс. Баскъёс уно аръёс ӵоже кырсь амалъёсты кутыса нюръясько эрик басьтон понна. Испанилэн уй палаз но Францилэн лымшораз соос нимаз кун кылдытыны малпало. Соин сэрен уно калык быриз ини, тужгес ик - Испаниын. Та ужпум но матэ каре, оло, Москваез но Мадридэз. Россиын азыса улӥсь яра - Чечня. Таяз арня вискын отысь сюлмаськытӥсь иворъёс вуылӥзы. Чечня администрацилэн кивалтӥсез Ахмад Кадыров ожгарчиослэн паськыт зачисткаоссылы пумит луэмзэ вераз. Таӵе ужрадъёс дыръя, пе, адямилэн правоосыз лыдэ уг басьтӥсько. Соин ик чечен калык пумитъяськыны кутскиз ке, шуиз А. Кадыров, мон соин одӥг радын луо. Терроризмлы пумит ваче кариськыса нюръяськыны чаклано МВД и ФБР. США-ысь ФБР- лэн директорез Луис Фри куинетӥзэ Москвае лыктӥз ни. Америкаысь куно но Россиысь югдурез утёнъя министр Владимир Рушайло кенешизы огазеям ужась группа кылдытыны. Солэн нырысетӥ пумиськонэз октябре ортчоз ни. Ортчем арняе Россилэн Президентэз Владимир Путин Кун Думаысь фракциослэн но депутат группаослэн кивалтӥсьёсынызы пумиськылӥз. Отын вераськон мынӥз вуоно арлы бюджет сярысь. Валтӥсь документ пумысен ченгешонъёс нуналлы быдэ кужмояло. Кылсярысь, кемалась ик ӧвӧл куспазы кенешизы 18 губернаторъёс, улосъёслэн- доноръёслэн (соос пӧлын Москва, Татарстан, Самара, Нижний Новгород) кивалтӥсьёссы. Соос Кун Думалы вазиськизы, бюджетэз палэнтыны курыса. Интыосысь кузёослы уг кельшы, кызьы басьтӥськозы но кытчы мынозы вытъёс. Улосъёс люкаськись коньдонзылэсь ньыльмос люкетсэ ыштозы ук. Арня вискын Кун Дума эскериз "Курск" подлодкаен кылдэм югдурез. Кенешонэ ӧтемын вал Правительстволэн комиссиезлэн тӧроез, вице-премьер Илья Клебанов. Со ивортӥз морякъёслэсь мугоръёссэс ӝутон ужъёслы дасяськон сярысь. Соос кутскозы октябрь толэзьлэн кутсконаз. Отчы пыриськозы Россиысь но Норвегиысь водолазъёс. Кызьы быриз "Курск"? Тросэз специалистъёс малпало, со кыӵе ке мукет субмаринаен мырӟиськиз шуыса. Обороная министр Игорь Сергеев вазиськиз Пентагонлы, США-лэсь кык лодказэ эскерыны курыса. Американецъёс асьсэос ивортылӥзы ук, соослэн кык субмариназы "Курск" бырон вакытэ Баренцево зарезьын вал шуыса. США соглаш луоз шуыса оскон ӧй вал. Угось зарезьын могӟиськон учыръёс ортчылӥзы азьвыл но. Ноку но Америка лодкаоссэ ӧз возьматъя. Тазьы ик луиз али. Шаерамы быръён кампанилэн выль вакытэз кутскиз. Регистрациез ортчизы Павел Вершинин, Владимир Забильский, Андрей Солуянов, Николай Ганза, Александр Волков, Сергей Шуклин, Вячеслав Ануфриев, М. Кокорин. Кылем арня вискын кӧняез ке кандидатъёс калык азе вазиськонэн потылӥзы. Тани Николай Ганза ивортӥз, шаерамы ядерной кылем-мылемъёсты ваён сярысь документъёс улэ со ӧз гожтӥськылы шуыса. Андрей Солуяновлэн штабеныз кивалтыны мылкыд кариз "Куполлэн" кузёез Юрий Шестаков. Данакез понна та ивор шӧдтэк шорысь луиз. Арня пумын тодмо луиз, Быръёнъя комиссия А. Солуяновез президентэ кандидатъёслэн радысьтызы поттӥз шуыса. Ю. Александрова. Удмурт калык пӧлын вашкала дырысен озьы вал: адямиез гажазы но гажало ӟеч ужъёсыз, зарни киосыз но лякыт сямыз понна. Тани Уваысь Аркадий Егорович Морозов али пенсиын ни. Быдӟым Отечественной оже пыриськемын, пӧртэм интыосын ужамын: Пойвай лесопунктлэн леспромхозаз мастер, Уваысь 3 номеро ПМК-ысь парторганизацилэн секретарез вал. 7-тӥ сентябре со вуылӥз газетмылэсь собкорзэ П. В. Ивановез берпум сюресаз келяны, со сярысь туж жаляса но гажаса вераськиз. Малыез тодмо: Уваысь огкадесь гажано адямиос ог-огзэс валась устоесь эшъёс вылӥллям. П. Кузнецов. Туспуктэмез В. Беломорскихлэн. Пӧртэм кулэяськон "Можгинское" торфобрикетной предприятиын ужасьёслэн лыдзы берло арен ӝыны ӵоже 40 адямилы йылӥз. Сыӵе луонлык кылдӥз, металлообработкая ужъёсыз будэтэмен. Предприятие выльысь кусыпъёссэ тупатӥз Ижысь "Нефтемашен", солы кортлэсь езъёс вӧлэ. Валтӥсь ужезъя - гыбед поттонъя но переработать каронъя лыдпусъёсыз бадӟымесь ӧвӧл. Брикет поттон дугдытэмын, ёросысь хозяйствоосын торфокомпостлы кулэяськон усиз, но со понна адямиослы кельшиз "Здоровье" удалтӥсь сюен убо. Сое, Удмуртиын, Татарстанын, Башкортостанын сяна, Дальней Востокын но басьто. С. Петров. Сётэмын Суворов медаль Кемалась ик ӧвӧл Алнаш ёросысь военной комиссар Сергей Филаткин вуылӥз Писэй шор ёзо школае. Отчы со ӧтьылӥз Улын Сырьез гуртын улӥсез Н. В. Ивановез но солы Суворов медаль сётӥз. Ма понна? Николай Владимирович, Чечен Республикаын тероррлы пумит радъям ужрадэ пыриськыса, кышкасьтэм но зэмос батыр луэмзэ возьматэм. Наградаез сётонэ ветлӥзы ожгарчилэн атаез Владимир Иванович, анаез Мария Николаевна, гуртысь афган но чечен ожъёсы пыриськылэм ветеранъёс, Писэйгурт администрацилэн кивалтӥсьёсыз, геройлэн эшъёсыз, школаысь дышетӥсьёс но дышетскисьёс. П. Николаев. Ӝыныез егитъёс гуртъёсысь лыктӥзы Озьы шуэ Ижевск педагогической колледжысь профориентацияя методист Г. А. Лошкарева. Со гужембыт ужаз выль дышетскисьёсты кутонъя комиссиын. Колледжын дасяло начальной классъёсъя, иностранной кылъёсъя, физкультурая дышетӥсьёсты но дошкольной воспитаниея специалистъёсты. Туэ отын дышетскыны мылкыд кариллям: 9 класс бере - 256 мурт, экзаменъёс бере кутэмын - 112-ез. Шор ёзо школа бере - 107 мурт, пыртэмын 61-ез. - Азьло аръёсы дорамы егитъёс ньыльмос люкетэз сяна гуртъёсысь уг вуо вал, нош туэ - ӝыныез, - шумпотыса вера Галина Александровна. - Дышетскыны пыризы Селта, Сюмси, Пичи Пурга, Кизнер, Кияса, Шаркан, Якшур-Бодья, Завьялово, Камбарка но Сарапул ёросъёсысь нылъёс но пиос, данакез удмуртъёс. Мынам тау карон кылъёс вераме потэ "Удмурт дунне" газетлы. Пӧсьтолэзе печатлаз колледжамы дышетскыны ӧтён сярысь ялонмес. Мон сямен, со но туж юрттӥз кадь. Ми угось сюлмаськиськом, дышетэм студентъёсмы устоесь дышетӥсьёс мед луозы но кыдёкысь гуртъёсын но мед ужалозы шуыса. Берло дыре милям ужан условиосмы умоязы. Тани ноябре пусъёмы ни юбилеймес - колледжмы выль юртэ выжемез дырысен 20 ар тырше. П. Кузнецов. Пыӵалзэ воштоз... скалэн Алигес "Ижмаш" акционер огазеяськонлэн музеяз шумпотымон иворъёс вуизы. Апрельлэн пумаз предпрятие Сочиысь гожтэт басьтӥз. Отын улӥсь ивортэм, песятаезлэсь, пе, 29 сантиметръем пичи винтовкаез кылиз. Отысь пусэзъя со тодэм: та пыӵал 1897-тӥ арын поттэмын Ижысь заводын, номерез - 500000. Санкт- Петербургысь артиллерияя, инженерной но свзья музейын ужасьёс винтовка пумысен номыр выльзэ вераны быгатӥллямтэ но меӵак заводэ вазиськыны дэмлаллям. Архивъёс верало: Ижысь заводын ӝыны миллионэтӥзэ трёхлинейка поттэмен валче 1897-тӥ арын 11-тӥ июне заводъёслэн начальниксы генерал-майор Г. И. Сокерин императорлы Николай ИИ ыбылӥськись куинь пумо пичи винтовкаос кузьмам. Со пехоталы, драгунъёслы но казакъёслы чаклам пыӵал-тӥрлык. Соосты асьме дорын гинэ потто вылэм. Кызьы со выль кузё кие вуэм - тодмо ӧвӧл. Музейын ужасьёс ӝегатскытэк Сочие гожтэт ыстӥзы но винтовкаез басьтыны дась луэмзы сярысь ивортӥзы. "Ижмаш" со понна сётыны дась пӧйшуран карабинзэ. Кыкетӥеныз но иворен музейын ужасьёс тунсыкъяськыны кутскизы. Воложка гуртын улӥсь пенсионерлэн вань туж шер пумиськылӥсь пӧйшуран пыӵалэз, солэн кузьдалаез 94,5 сантиметр - чакламын нылкышноослы. Сое Ижысь тодмо фабрикант Иван Петров дасям, луоз, 1880-тӥ-1890-тӥ аръёсы. Ложаез кызьпулэсь, гумыез кисьтэмын Бельгиын, сое возьматэ нимысьтыз пусэз. Кузё пыӵалзэ скалэн воштыны соглаш. Завод солэсь куронзэ быдэстыны дась. Озьыен, городысь одӥгез устоез музей эшшо узырмоз выль арбериосын. В. Маратканов. Аръёс но адямиос Даурен ӵош вордскем кышномурт ГЛАЗОВ ёросысь Качкашур гурт администрацие пичигес гинэ Умск гурт пыре. Глазкарлэсь со сокем кыдёкын ӧвӧл. Куке но та гурт пыртӥ ортчись сюрес вылтӥ шаермылэн шоркараз ветлылӥзы. Нош али татысь урамъёсын чус. 17-тӥ августэ Умске огаз корка трос калык люкаськылӥз. Мугез но солы вал. Уго Васса Павловна Перевощиковалы 100 арес тырмиз. Быдэс даур! Та пумысен котькудӥз аслэсьтыз малпанзэ вераны быгатоз. Нош ми, газетын ужасьёс, Васса Павловна понна шумпотӥськом. Та кышномуртэз мӧйы но уд шуы. Сю арескын но умой адӟе, очки уг нуллы. Огзэ гинэ со жаля - лыдӟиськыны уг быгаты, солы сое ӧз дышетэ. Со понна кӧня кырӟанъёсты тодэ! Удмуртсэ но, ӟучсэ но. Юбилярмы вордскем Качкашур гуртын. 1922-тӥ арын Умск гуртэ бызиз. Семьяез бадӟым вал. Кузпалыныз 12 нылпи будэтӥзы. Самой бадӟымезлы Лёнялы - 76 арес, нош покчиезлы Колялы - 64. Тросэз пиналъёсыз районамы тодмо адямиос луо. Тани нылыз Валентина Васильевна Корепанова улэ Коӵыш гуртын. 25 ар гуртысь администрацилэн секретарез луыса ужаз. Нош солэн нылыз, Васса Петровналэн внучкаез Вера Евгеньевна, али Кочишевоысь культура юртлэн директорез луэ. В. П. Перевощикова сизьымдон ньыль аресъем нылыныз Нина Павловнаен улэ. Та кышномурт зэм но узыр. Туннэ нуналлы солэн 16 внукъёсыз, 29 правнукъёсыз, 3 праправнукъёсыз. Васса Павловналэн огез сярысь гинэ сюлэмыз висе: картэз вазь кулӥз. Соин ӵош нылпиоссы понна шумпотоно вылэм. Васса Павловна ортчем аръёс сярысь трос вераны быгатэ. 1918-тӥ арын гуртазы тӧдьыос вуизы. Егит нылашез бӧрсязы басьтӥзы. Пызен шыд пӧзьтылыны косылӥзы. Кызьы но озьы нылаш соослэсь пегӟыны быгатӥз. Троссэ кышномуртлэсь юам потэ на вылэм, но калык трос люкаськемын, ваньзы ик сое ӟечкыланы лыктэмын. Та нуналэ Качкашур гурт администрацилэн тӧроез Валентин Дементьевич Наговицын, ёросысь калыклы юрттэт сётонъя отделлэн кивалтӥсезлэн воштӥсез Нина Филипповна Князева юбилярлы трос шуныт кылъёс веразы но пичильтык синпель кузьым сётӥзы. - Ваньдылы туж бадӟым тау. Тупаса улэ,- вераз Васса Павловна. Мон ӧй чида но юбилярлэсь юано кариськи: - Васса Павловна, сю ар ӵоже одӥг пол но больницае ӧвӧл ветлылӥллямды. Оло, кыӵе ке аспӧртэмлыко сиён сииськоды? - Нырысь ик, ужатэк улымтэ, калыкен ноку но ӧй керетылы, парсь сӥль сиыны яратӥсько, куд-ог дыръя ӧжыт гинэ кабак вина но юисько, - мынектӥз со. Дунне вылын самой бадӟымез, самой дуноез эмъюм - шуныт, небыт, либыт кыл. Шуныт кыл - адямилы оскон. Озьыен, тӥледлы но, мусо нылкышно, котьку но шуныт кылын вазись мед луоз. Л. Лихачев. ("Иднакар" газетысь). Дас аръем сюрес Ӝӧк вылам - "Советской Удмуртия" газетлэн 1990-тӥ арын сентябре потэм номеръёсыныз бичет. Ӵужектыны кутскем бамъёс, туннэ нуналлы вуныны ӧдъясь ӧтёнъёс ("Вань странаосысь пролетарийёс, огазеяське!"), М. С. Горбачевлэн докладъёсыз... 22-тӥ сентябре КПСС-лэн Удмурт обкомезлэн, УАССР-ысь Верховной Советсылэн но Министръёслэн Советсылэн органзы печатла Удмурт Республикалэн государственной суверенитетэз сярысь декларациез. Со юнматэмын вал 20-тӥ сентябре. Ортчиз дас ар. Кыӵеесь бен луизы та толэзьёс но нуналъёс асьме яратоно шаермы понна? Огкылын сое нокызьы но уд вера. Вань ӟечез но, уродэз но. Шуг мертаны, кудӥз уногес. Республикамы быгатӥз утиськыны 1991-тӥ но 1993-тӥ аъёсы Россиын луэм шимес учыръёс дыръя бугыръяськонъёслэсь. Депутатъёсмы кутӥзы выль Конституция, юнматӥзы элькунмылэсь тодметъёссэ (макем соос чебересь!), утизы музъеммес вузан-басьтонлэсь. Кылмылы, документын гинэ ке но, кун статус сётэмын. Экономикамы но калленэн-калленэн пыд йылаз султыны дауртэ ни. Со дыре ик асьмеос трос ыштон но адӟим. Приватизациез Удмуртилэсь аспӧртэмлыкъёссэ чаклатэк ортчытэмен, уно ваньбур тус-тас луиз яке нимаз адямиос кие дунтэк выжиз. Огсыр улӥсь калык юн узыръёслы но воксё куанеръёслы люкиськиз. Республика ӧз быгаты декларациын пусъем правоосты, бускельёсыз сямен, падаё уже кутыны. Кема дыр но кужым быдтэмын политикаын нюръяськонлы. Кун Кенешлэн депутатъёсыз, экономикаез азинтыны умоесь луонлыкъёс кылдытон сярысь сюлмаськем интые, тросгес выризы интыысь аскивалтонъя ёзъёсын нюръяськонэн, вылӥ кузёослы тупасьтэм мылкыдо адямиосты зӥбыны выронэн. Бадӟымез янгыш со бордын, дыр: Удмуртилэн туала кивалтӥсьёсыз ӧз быгатэ Россиын мур пыӵам сямлэсь куштӥськыны, азьлоосыныз кутскем ужез азинтон борды рос-прос басьтӥськыны. Соос но пӧртэм амалъёсын ӧдъязы ортчемзэ урод карыны, муртъёсты курласа, асьсэдыз вылэгес ӝутыны. Озьы ӧз луы шат полномочиосты люконъя огкылэн? Вылӥ Кенешен дасям проект, пе, номырлы ярантэм. Ми выль сямен лэсьтом но мукет. Макем данъяськизы соос 1995-тӥ арын Москваын документ юнматэменызы. Малы ке туннэ сое тодазы уг ваё ни. Жаляса верано луэ: азьлозэ курлан сям политикъёсмы пӧлын та нуналъёсы уката яркыт адӟиське. Кызьы но уг выро али Удмуртиын Валентин Тубылов, Павел Вершинин кивалтон аръёсы лэсьтэм ужъёсты мыдланьтыса возьматыны? Историкъёс юнме уг шуо ук: котькуд учырез, котькуд вамышез учконо, со вакытысь югдурез котыр ласянь чакласа. Туннэ визьмын (Владимир Путинлэсь Россиын радэз тупатон ласянь ужъёссэ лыдэ басьтыса) котькин ик юаны быгатоз: кинлы кулэ вал со Декларациос, суверенитет шуонъёс? Бен, али озьы адске. Но со вал ук, вал. Историез мыдлань берыктыны ум быгатӥське. Озьыен, асьмелы тыршоно котькыӵе учырысь мазэ ке но ӟечсэ шедьтыны, куке но лэсьтэм янгышъёс вылын дышетскыны. Тани Декларациын нырысьсэ пусъемын вал удмурт кылмылэн интыез. Дас ар ӵоже со веранэз законэ пыртыны кужыммы ӧз тырмы. Ойдолэ ӵапак та сярысь ик малпаськом. Ма люкетӥз? Удмурт депутатъёслэн ичи но дӥсьтӥсьтэм луэмзы? Вылӥ кивалтӥсьёслэн ужпумез валамтэзы? Яке маке мукет? Кыл сярысь законэз юнматон но улонэ пыӵатон понна, оло, кыӵе ке выль сюрес утчано ни? Толэзь ортчыса, республикаямы власть воштӥськоз. Мон уг вераськы нимаз адямиос сярысь, пусйисько кивалтон удыслэн пуштросэз сярысь. Биньгозыез калык сётоз одӥг мурт кие. Кун Кенешлы кивалтонын инты ичигес кылёз. Кызьы ке но тыршоно вылэм та выльдӥськонэз Удмуртиын вань улӥсьёс понна пайдаен берыктыны. Со понна котькуд бырйисьлы бюллетеньзэ урнае лэземезлэсь азьло умой-умой малпаськыны. Янгышаны, эшшо дас арзэ шонаськыса улыны асьмелэн дырмы ӧвӧл ни. И. Лебедев. Солуяновез нюръяськонысь палэнтӥзы Табере тодмо луэ ни кадь, кӧня адями нюръяськоз Удмуртилы президент луон понна. Быръёнъя комиссия президентэ кандидатэ ӵектэмъёс пӧлысь 8 адямиез пусйиз ини. Соос пӧлын (гожтэмын пусйиськемзыя): 1. П. Вершинин - Кун Кенешлэн Тӧроезлэн воштӥсез; 2. В. Забильский - Россиысь Наукая академилэн Урал ёзысьтыз физикая но техникая институтысь тодосчи; 3. А. Солуянов - "Купол" ЭМЗ-лэн стратегияя программаосты дасянъя директорез; 4. Н. Ганза - Правительстволэн Тӧроез; 5. А. Волков - Кун Кенешлэн Тӧроез; 6. С. Щуклин - Россиысь коньдон ужпумъёсты сэрттон-пертчонъя но банкротствоя Федеральной службалэн Урал-Сибирь межрегиональной улосвыл ёзэзлэн агенствоезлэн кивалтӥсез; 7. В. Ануфриев - "Удмуртпродконтракт" кун управленилэн валтӥсь директорез, 8. М. Кокорин - Кун Кенешлэн депутатэз. Вань та адямиослэн Быръёнъя комиссие сётэм документъёссы пыр-поч эскеремын вал. Озьы ке но, комиссия выльысь нимысьтыз эскероно кариськиз на А. Солуяновлэсь документъёссэ, со кандидатэ пусъемын но ни ке вал. 15-тӥ сентябре Быръёнъя комиссия президентэ кандидатъёс пӧлысь А. Солуяновез палэнтӥз. Таӵе муген сэрен: бырйисьёслэн кинюртэмъёссы пӧлын 25 процент палаез шонертэмесь луо. Нош Законъя сыӵе янгышъёс 15 процентлэсь вылӥын луыны уг быгато. Со сяна, документъёсты эскерисьёс таӵе учыръёсты но шараяллям: кинюртэмзэс пуктэмъёс пӧлын улонысь кошкем сизьым адями но вылэм. Быръёнъя комиссилэн решениеныз А. Солуянов буйгатскыны уг малпа. Зэмзэ но, котькуд кандидатлэн сямен ик, солэн правоез вань судэ вазиськыны. Пыроз-а, уз-а А. Солуянов президентэ кандидатъёслэн радазы, ӝоген тодмо луоз. Но котьма ке но, президент луон понна нюръяськон мыноз куинь адямиос куспын. Республикамылэн азьветлӥсьёсыз А. Волков, Н. Ганза но П. Вершинин президентлэн постэз понна котькудзы ик нимазы нюръяськыны мылкыд каризы. Куиньзылэн ик калык пӧлын кужымзы вань. Соин ик озьы но луыны быгатоз: одӥг турен гинэ быръёнъёс уз ортче. Асьме законъя президентэз бырйыны одӥг турен гинэ учкемын. Зэмзэ но, одӥг гинэ кужмо но валтӥсь кандидат президентэ кариськыны малпасал ке, оло, со 25 процент куара бичаны быгатысал. Но туннэ нуналлы югдур сыӵе законэз кутӥсьёслы юри ӧчкарыса кадь али мынэ. Быръёнъёс матэктэмъя, куинь адями куспын нюръяськон уката но лекомоз, нош отӥосыз президентэ ӵектӥськись кандидатъёс та лидеръёслэсь куараоссэс гинэ кыскозы. Т. Миронова. Семья ке юн - улон но йӧн Удалтэм пушъет Та палась улосэз уд ӵошаты лымшор палъёсын. Кытчы гинэ уд учкиськы, котькытын выръёс-гурезьёс, муресь нюкъёс-гопъёс. Татысь уд адӟы паськыт но ӵошкыт вӧлскем бусыосты. Котырак эскериськод ке, тон азе йӧспӧртэм суред усьтӥське. Тӥни сыӵе интыын вордскизы но пенсие потытозязы ужазы Дэбес районысь Пичи Кизня гуртысь Пономарев кузпалъёс. Евгений Михайловичез но Капиталина Андреевнаез мон кемалась тодӥсько. Вань улон сюрессэс соос сӥзизы пудо вордон удыслы. Одӥгез кысконо скалъёсты возьмаз, мукетыз кунянъёсты сюдӥз. Алигес вуж тодмоосыным нош ик пумиськылӥ. Коркалэн кузёез бакчаысьтыз копам картофказэ утялтэ вал. Пересьмыны ӧвӧл сётскем ай, кык ведра картофкаен чупрес бызьылэ. Пичиысен ик техникаез яратӥз Пономарев. Вожъяськыса учкылӥз тракторен ужась воргоронъёс шоры. Малпа вал эшъёсыныз ӵош тарктористэ дышетскыны. Нош кыӵе ке но муген ӧз кылды. Бӧрысь кытчы бригадир ыстылӥз, отын ужаз. Котькуд удысэз сюлмысь быдэстыны тыршылӥз. Нош одӥг аре тулыс, пудоосты возь вылэ поттон азьын, гуртэ колхозысь зоотехник вуиз. Пастухъёс сярысь кенешиз бригадирен, фермалэн кивалтӥсеныз. Одӥгзэ дэмлало, мукетсэ, пудоосты возьмась шедьтыны уг быгато. Мугез но вал соку. Колхозэн кивалтӥсьёс пудо возьмасьёс сярысь чик ӧз сюлмаськылэ. Трос йӧл кыскем понна ватсаса уждун ӧз тырылэ. Соин но воргоронъёс пумитъяськылӥзы, дыр. Соку кин ке но ӵектӥз Пономаревез. Евгений Михайлович кӧняке чалмыт пукиз но вакчияк шуиз: - Оскиськоды ке, мон пумит ӧвӧл. Ачим но малпасько вал, нош куриськыны умой ӧз поты. Озьы кӧня ке аръёс ортчизы. Нош одӥг гужеме пастух пудо возьманысь секыт мылкыдын бертӥз. Оло йыркурен-а, оло ассэ жаляса-а кузпалызлы вазиськиз: - Капа, монэным ӵош ӧй мынысал-а пастухе? - Бен ӵошен возьмаськоды, лэся, - паймиз соиз юамезлы. - Эшелы ӧз кельшы, шӧдске, та уж. Ӵуказе, пе, уг мыны ни. - Озьы ке, мон пумит ӧвӧл. Нош кин нылпиосты эскероз, гуртамы ясли усьтымтэ? Оло, бадӟымъёсыз быгатозы ни? Озьы Пономарев кузпалъёс скалъёсты ӵошен возьманы кутскизы. Районысь пастухъёслэн ӵошатсконазы огпол гинэ вормисе ӧз потылэ. Соослэсь сюлмо тыршемзэс трос пол пусйылӥзы премиосын но грамотаосын. Соин но, вылды, гуртын вал пӧртэм вераськонъёс. Одӥгъёсыз кырыж синмын учкылӥзы премиос басьтэмзылы но ушъямзы понна, мукетъёсыз шумпотылӥзы ӟеч ужамзылы, трос йӧл поттыны сюлмаськемзылы. Толалтэ Евгений Михайлович фермаын ужаз. Ӵукна дояркаос вуытозь, пӧсь ву дасяса вуттылӥз, бер ӝытозь отысь ӧз кошкылы. - Тӥ дас нылпи будэтӥды. Кызьы вуылӥды пудо возьманы но, нылпиостэс но эскерыны? - юасько кузпалъёслэсь. - Петя но Ира бадӟымесь ни, соос ик эскеризы пичиоссэ. Собере артысь пересь нылкышно ӵем пыралляз, - ортчемзэ тодаз вае Капиталина Андреевна. - Шонергес верано ке, асьмеос но валаса ик ӧм вуттэ, кызьы соос огзы бӧрсьы огзы быдэ вуизы. Табере анай-атайзэс воштӥзы нылпиоссы. Ира но Маиса скалъёсты кыско но утялто вордскем гуртысьтызы фермаын. - Сузэрелэсь мон бере кылисько ай, - пальпотыса вера Маиса. - Скаллы быдэ нуналаз али со дас килограммлэсь ятыр кыске. - Эн куректы, азьлане, оло, монэ но азьпалтод, - буйгатэ покчи сузэрзэ Ира. Пономарев кузпалъёслэн нылпиоссы палэнэтӥ капчи уж утчаса ӧз ветлэ. Ваньзы сямен ик Калинин нимо колхозын ужало. "Милям шудбурмы - гурт улон", - огкылысь шуо соос. Тани Николай пизы гуртысь фермаен но кивалтэ, бригадирлэсь ужзэ но быдэсъя. Али солэн сюлмаськонъёсыз пумтэм: юосты утялтонэз йылпумъяно, вань куроез зуродъёсы тыроно, соин ӵош ик пудоосты но палэнэ кельтоно ӧвӧл. Пичи Кизняысь скал кыскисьёс азьло сямен ик данзэс уг ышто. Районын азьпал радын мыно. Ар кутскыса, котькуд скаллэсь 2800 килограммлэсь ятыр йӧл кыскизы ни. Пудоосты толйытон вакытэ ӵошатсконын вормисе потэмзы понна профсоюзъёслэн райкомысь президиумез татысь коллективлы 500 манет премия висъяз. Лыдпус бадӟым ке но ӧвӧл, шумпотон ни со! - Нылпиосмылэн сюлмо тыршемзы понна ми но шумпотӥськомы, - пальпотыса шуо Пономарев кузпалъёс. - Бускельёсмы, кивалтӥсьёс, соос сярысь ӟеч кыл верало ке, асьмеос но егитомиськомы кадь. Галя нылзы Зар.-Меалоын повар луыса ужа. Выль нунал ке вордӥське, Таня эшеныз механизаторъёслы борщ но гуляш дасялозы, мукет нуналаз котлет но курег пузэн шыд пӧзьтозы. Асьсэос ик бусые сиён но нулло. - Ми сярысь соос юн сюлмасько, котьку ческыт сюдыны тыршо, - огкылысь верало трактористъёс но комбайнеръёс. - Столовойын котьку чылкыт, сиськыны пырисьёсты капчи мылкыдын пумитало. ... Капиталина Андреевна но Евгений Михайлович одӥг гуртын вордскемын. Пичи дырысен ог-огзэс туж умой тодо. Ортчем сюрессы бускельёссылэсь номырин уг висъяськы. Война аръёсы соос но котьмае адӟизы, пичиысен шӧмъязы гурт ужез, ӧз тодылэ небыт вож турын вылтӥ гольык пыдын бызьылонэз. Школаын дышетскыкузы гужем етӥн ишкизы, кизем ю пӧлысь жаг турынэз утялтылӥзы, толлы пудоослы писпу куар дасяллязы, сӥзьыл картофка копазы. Палэнысен кузпалъёс шоры учкиськод ке, амалтэк малпаськод: вань улон сюрессы соослэн шудо вал, дыр. - Улонлы ум ӝожтӥськиське, - верало кузпалъёс. - Колхоз юрттэмен коркамес но выльдӥмы, Коля пимылы выльзэ пуктӥмы. Бордамы покчиез Алексей пимы улэ. Кемалась ик ӧвӧл, со но кузпалъяськиз ни. Мукетъёсызлэн асьсэлэн семьяоссы вань. - Нош кӧня ни нылпиостылэн нылпиоссы? - юасько соослэсь. - Капа, кӧня ни асьмелэн со ерпечкаосмы? - кузпалызлы вазиське Евгений Михайлович. Ваньзэсты нимын лыдъяса но озьы гинэ уд быдты ай. Кызё пала люкасько ни соос, - пальпотэ Капиталина Андреевна. - Нылъёсмы, эмеспиосмы но соослэн нылпиоссы огазе люкасько ке, коркан берытскон интыез но уг луы. Ваньзы ик милем соос муспотонэсь. Бадӟымез Петя пизы гинэ уз лу ни пӧлазы, тракторен ужакуз, шудтэм учыре шедьыса быриз. Кӧня синвузэс кисьтӥзы кузпалъёс, озьы ке но, куректонлы ӧз сётске, калык пӧлын ужаса юнматскылӥзы. Табере пизылэн нылыз но быземын ни, вань аслаз семьяез. Ира нылзы, педучилищеез быдтыса, школаын ужа ни вал. Кыдёкысь гуртын улыса мӧзмисько, пе, асьсэ палъёсы ик берытскиз. Ӵош дышетскем эшезлы бызиз. Улэмзылы но ужамзылы уг ӝожтӥсько. Ужакум гуртысь вань ужъёсты огнам нокызьы но быдэстыны ӧй вуылы, пиналъёс юрттылӥзы. Огзылэсь огзы адӟем карыса, лэся, одӥгез выж ӵужылӥз, мукетыз пу пыртылӥз, куинетӥез ву вайылӥз, пудоез утялтылӥз. Ваньмызлы уж тырмылӥз. Табере егитъёс кышкало ни трос нылпи вордыны но будэтыны, - шуэ Капиталина Андреевна. Пиналъёсты пичиысен ик ужлы дышетӥськод ке, быдэ вуыса соос ас интызэс шедьто, секытлэсь уг кышкало. Тани покчиез Алексей пизы анай-атаезлэсь мытэм сюрессэс азинтэ ни. Кыкетӥ арзэ кысконо скалъёсты возьма. Евгений Михайлович ачиз но пенсие потыса дораз пукыны, нуналъёссэ ужатэк ортчытыны уг чида. Куризы фермаысь пудоосты уин эскерыны, пумит ӧз луы. Пастухын ветлыкуз сямен ик али но скалъёс шоры нимынызы вазьылэ. Огзэ веша, мукетызлы кисыысьтыз пичигес нянь юдэссэ сётэ. Ӵукна дояркаос вуыса но дораз бертыны уг ӵыды. Тӥни сыӵеесь соос - Пономарёвъёс. М. МОСОВ. Витём вормонъёсын Австралиысь Сидней городын ЪЪВИИ Олимпиадалэн тылыз ӝуатскиз. Со шудонъёсын Россиысь спортсменъёс уно удысъёсъя нюръяськозы. Удмуртиысь спортэз яратӥсьёс сак эскерозы велосипедэн шоссе вылтӥ ворттылонэз, тирын ыбылӥськонэз, баскетболэн шудонэз. Россилэн командаяз пыртэмын Ижевскысь велосипедэн ворттылӥсьёс Светлана Бубненкова но Павел Тонков, ыбылӥськись Мария Феклистова но баскетболист Руслан Авлеев. Олимпиада кыстӥськоз кык арня ӵоже. Асьме спортсменъёслы сӥзиськом бадӟымесь азинсконъёс! Витём вормонъёсын. Б. Никитин. Вордскемзэс та нуналъёсы пусъё: Абрамов Михаил Иванович - "Удмурт дунне" газетлэн редакциысьтыз ветеран; Сидорова Ольга Николаевна - Шарканысь "Инвис" газетлэн редакторез. Пурысь эрказме Котькин тодэ, кион туж кескич но кышкыт пӧйшур шуыса. Берло дыре со чик кышкатэк вуылыны кутскиз Красногорск ёросын улӥсь адямиослэн юртъеръёссы доры. Кылем арын Селегын улӥсьёслэн пуныоссы жильыосынызы валче ышылӥзы. Мӧйы кионъёс пиоссэс быгатыса дышето кӧттырон утчаны. Пурысьёс туэ гужем уно пол вуылӥзы Курья черкогурт пала но. Августэ соос жильыосын ӵош нуизы кӧня ке пуныосты, Ботанихо гуртын кык йыр пудо вандэмын. Кионъёс табере уг кышкало ни нокыӵе куараослэсь но. Тани одӥгаз юртъер доры пурысь пӧйшур ӝытазе "куное" вуэм, кузё пудооссэс сюдыкуз. Курьяысь пенсионер Л. Борцов гурт пумын улэ уд шуы. Пудозэ возь вылэ улляны шуыса августлэн пумаз гидаз пырем но вандэм вить ыжзэ шедьтэм. Гуртъёсын улӥсьёсты тужгес но сюлэмшугъяськытэ та изьверьёслэн уйёсы эрказъяськемзы. Кион адямилы но кышкыт. Кылем арын Б. Чуваши - Селег сюрес вылысен та пӧйшур мӧйы адями вылэ но омырскылӥз. Соин ик пӧйшурасьёслы золгес басьтӥськоно сьӧсьёсын нюръяськыны. Со сярысь ивортӥз ёросысь "Победа" газет. Удмурт Республикалы президентэ кандидатэ М. К. Кокоринэз пусъён сярысь Удмурт Республикаысь Быръёнъя комиссилэн постановлениез Удмурт Республикалы президентэ кандидатэ М. К. Кокоринэз ӵектонъя радлыклэсь Удмурт Республикалэн "Удмурт Республикалы президент быръён сярысь" Законэзлэн куронъёсызлы тупамзэ эскерыса, кинюртэмъёсын кагазъёслэсь но мукет документъёслэсь шонер но зэм луэмзэс лыдэ басьтыса, вылӥ верам Законлэн 17-тӥ, 37-тӥ, 38-тӥ ёзэтъёсызъя Быръёнъя комиссия пуктэ: 1. Пусъёно Кокорин Михаил Константиновичез, Кун Кенешысь Законъёсты быдэсъямез чакланъя, калыкез кышкытлыклэсь утёнъя но гражданъёслэн правооссыя ялан ужась комиссилэсь тӧрозэ, вордскемын 1946-тӥ арын, улэ Ижын. Удмурт Республикалы президентэ кандидатэ ӵектэмын бырйисьёсын. Пусъён дыр - 2000-тӥ арын 15-тӥ сентябре 15 час 40 минутэ. 2. М. К. Кокоринлы сётоно пусъем сярысь удостоверение. 3. Та постановлениез печатлано республикаын потӥсь кун газетъёсын. Удмурт Республикаысь Быръёнъя комиссилэн тӧроез Д. Н. Талантов. Удмурт Республикаысь Быръёнъя комиссилэн секретарез Н. А. Глухова. Иж город, 2000-тӥ арын 15-тӥ сентябре. � 28.1. Бускельёсмы дорын Картофка бусые мерттэм коньдон Гуртоос картофка модоссэс турнаны вуттӥзы оло ӧз, гуртамы бадӟымесь машинаос вуылыны кутскизы ни. Котькытын огпуштросъем ялонъёс: "Люкаськом картошка. Дуныз..." Коньдонлы ёрмем калык, колхозын тыршисьёс, пенсионеръёс, клуб-библиотекаосын ужасьёс машинаос котыре кыстӥсько. Берло дыре гуртоос ӵемысь вераськон ӝутыло картофка мерттон удыссэс бадӟыматон, выль сортъёс шедьтон сярысь. Малы-о сокем вылӥе ӝутскиз кыкетӥ няньлэн асдуныз? Ватонэз ӧвӧл: али дыре гурт калык понна та бакча сиён пӧрмытскиз кӧттырлы (оло, нырысетӥ нянен нимано ни?) - пудоез но сюдыны луэ, коньдон но поттыны. Тае валаса, йырбкерзэс кормало колхоз тӧроос, агрономъёс. Нош кир-пазь тугамзэ, ыштэмзэ выльысь ӝогак гинэ люканы-лэсьтыны, азьвыл ӧраз пыртыны котьку но секыт йӧтэ. Ай дасо арлэсь азьло гинэ Киров областьысь Кильмезь ёросысь колхозъёс 2000 гектар музъем вылэ картофка мертто, будэто вал. Но туэ та культура улэ висъямын ваньзэ-ӧвӧлзэ 274 гектар музъем. Дас сизьым хозяйство пӧлысь сизьымез картофкаен воксё ӧз йыринты, малы-о, пе, милемлы мултэм сюлмаськонъёс? Вузаны шугъяськоно, дуныз ичи, нош сюлмаськонэз - йырвылтӥ. Одӥг колорад бӧчыосын гинэ нюръяськыны кӧня коньдон арам-сурам кароно луэ. Колхозъёс та культуралэсь палэнскизы, нош гурт калык кыдёке адӟись, улонэз валась луыса потӥз. Соос асьсэ бакчаосазы коньдон "будэтыны" ӧдъязы. Уго сӥзьыл-тулыс гуртэ лыктыса ик картофкаез окто-люкало, калыкез улэп уксёен шумпотто. Гурт калык кулонлы уг сётскы. Оскон тылсизы юнгес пиштыны, азьпала ӧтьыны ӧдъя кадь. Тросэз огкылысь шуо: картофка кулыны уз сёты. Тракторъёс басьтыны вутскем гурт ужасьёс эшшо но ужлы шаплы кариськизы. Табере тросэз гектаръёсын картофка будэто ни. Кылем аре одӥг гектарысь 300 центнер бакча емыш люкамын вал. Ичи лыдпус ӧвӧл кадь. Соин ик куд-огез выль машинаос басьтыны, юртъёс пуктыны кутскизы. - Асьме начар музъемъёсын будэтыны кулэ пайда сётӥсь культураосты, - ас мылкыдзэ шарая ёросысь гурт хозяйствоя управленилэн тӧроез Евгений Николаев. - Трослы выльдоно картофка будэтон технологиез, емышлэсь выжызэ но. Та ласянь милемлы юрттэ Удмурт Республикаысь Гурт хозяйствоя академиысь усточиосын, тодосчиосын эшлыко кусыпъёс воземмы но. Тани растениеводство кафедраын тырше асьме пал адями, Тархан гуртын вордскем но быдэ вуэм И. Ш. Фатихов. Солэн ӵектэмезъя будэтыса утчамын "петербургский", "елизавета", "акцент" сортъёс. Нош селекцияя но, эскерон ужъёсъя йылпумъянъёс лэсьтыны вазь на. Соосты тодыны луоз куинь ар ортчыса гинэ. Картофка будэтон борды саесъёссэс пужалляса басьтӥськоно, дыр, колхоз кивалтӥсьёслы, агрономъёслы но. Куке но сахар поттон, крахмально-паточный заводъёс пуктон сярысь мылкыд каронъёс майтал шукы выллем тӧлӟизы. Ӧвӧл коньдон. Басьтэм ужтӥрлыкъёс но зор улын сыныса кыллё. Нош картофкаез будэтыны, сое октыны но вузаны трос визь кулэ ӧвӧл. Сюлмо тыршыны гинэ кулэ. Н. Турин. Архивысь документъёсъя Удмуртия ЪЪ дауре 1942-тӥ ар Январьлэн нырысетӥ нуналаз ик УАССР-ысь Совнарком но ВКП(б)-лэн Обкомез Ижевск-Балезино чугун сюресэз лэсьтон сярысь постановление кутӥзы. Сюреслэн кузьдалаез 150 иськем. Со шонерак герӟаны кулэ уй пал Уралэз Поволжьеен но странамылэн лымшореныз. 18-тӥ январе СССР-ысь Вылӥ Кенешлэн Президимезлэн Указэныз Ижевскысь машина поттон завод Ленин орденэн пусъемын, пыӵал тӥрлык поттон удысын азинлыко тыршемез понна. 1942-тӥ арын тулыс Удмуртиысь ужаса улӥсьёс огдыре трос станокъёс сьӧрын ужанъя выль ӧтёнзэс вӧлмытыны басьтӥськизы но Вормонлы юрттонъя фонд люканы калыкез ӧтизы. Со понна егитъёс комсомольско-молодёжной бригадаос кылдытъязы, сменалы заданиоссэс мултэсэн быдэсъязы, ог-огзэс ӟечгес ужаны дышетылӥзы, асьсэды котьма ласянь адӟем карымон возизы. Нырысетӥзэ сыӵе бригадаез 1942-тӥ арын мартэ кылдытӥз Вилем Дубов. Нош ож бырон азьын 3095 бригада вал ни, отчы пыриськизы 20 сюрслэсь уно пиос но нылъёс. Гуртъёсысь егитъёс комсомольско-молодёжной тракторной но ремонтной бригадаос кылдытъязы, уно вал нылъёслэн бригадаоссы. 1942-тӥ арын, тулыс бусы ужъёс вакытэ социалистической ӵошатсконын вормисе потӥз Пычас МТС-ысь Лидия Кузнецовалэн бригадаез. Солы сётэмын вал ВЛКСМ-лэн Удмурт обкомезлэн Горд Знамяез. Августэ Воткаысь машина поттон заводысь егитъёс Удмуртиысь вань комсомолецъёслы вазиськизы, противотанковой артиллеристской подразделение кылдытонэ пыриськыны курыса. 23-тӥ сентябре Удмуртиысь комсомол нимо артдивизион фронтэ келямын. Декабре ожгарчиос Донэз выжизы но нырысьсэ ожмаськонэ пыриськизы. Война аръёсы республикаысь комсомолецъёс ньыль пол келяллязы артдивизионэ адямиосты, пыӵал тӥрлык но дӥськут. Удмурт комсомоллэсь знамязэ боецъёс данэн нуизы Сталинградысен Берлинозь. Батыр ожмаськемез понна, дивизион Горд Кизили орденэн пусъемын. Сентябре Ижевскысь машина поттон завод кутскиз, нош декабре тросэн поттыны ӧдъяз ни Нудельманлэсь-Сурановлэсь авиапушкаоссэ. Предприятиын туж люкыт луиз, соин кык толэзь ӵоже производство мукет интыын радъямын вал, со пӧрмиз 622 номеро союзной заводлы - табере механической завод. Нош соку уж радъяськиз Тулаысь сборщикъёслэн группазы бордысен. Ужаны туж секыт вал, эстӥськисьтэм, туж кезьытэсь баракъёсын октябрь толэзе ини бичазы Дегтяревлэсь 3000 противотанковой пыӵалъёссэ. Симоновлэсьсэ - 3700, "Наган" маркаен револьверъёсты - 4000, "ТТ" маркаензэ - 2000 но трос мукет пыӵал тӥрлык. Ар пумын выль военной техника лэсьтыны ваньбур бичан кутскиз. Иж ёросысь "Освобожденный труд" сельхозартельлэн членъёсыз республикаысьтымы вань колхозникъёслы вазиськизы, асьсэлэн люкам коньдонзы чотын "Колхозник Удмуртии" танково колонна лэсьтон вылысь. Вазиськонлы дурбасьтӥзы республикаысь вань ужаса улӥсьёс. Нырысьёсыз пӧлын вал Завьял ёросысь Азино МТС-ысь тракторист Павел Иванович Калабин. Со 155 сюрс манет уксёзэ сётӥз. Ар пумын 41 миллион манет люкамын вал. Та арын асьме земляклы Александр Николаевич Сабуровлы сётэмын "Советской Союзлэн Героез" дано ним. Солэн кивалтэм улсаз партизан отрядъёс тушмонэн нюръяськизы Брянск нюлэсъёсын, Полесьеын, Житомир котырын, чугун сюресъёсты пуштытъязы, тушмонлы выль юрттэт ворттыны люкетылӥзы. С. Некротюк, Удмурт Республикаысь Кун архивлэн иворъёсъя отделысьтыз валтӥсь специалист. "Удмуртиысь комсомол" нимо 174 номеро противотанковой артиллерийской дивизионлэн ож сюресэз. Интернет возьматоз Олимпиадаез синтэмъёслы но Франциын али 1,5 миллион пала синтэм адямиос уло, ваньзы сямен пичи дырысенызы инвалид кылемын. Соин отын гижысь-пиньысь тыршо соос понна Интернетын иворъёсъя нимысьтыз сайт кылдытон сярысь. Та уж борды басьтӥськиз 27 аресъем Жюльен Прюнэ. Сукыр луиз со сизьым арескын. Озьы ке но, ужа журналист луыса. Со ик кылдытӥз выль проект. Солэн малпамезъя, синтэмъёслы телевизор учконэз интернет пыр радъян - самой умой амал. Уже кутӥське Брайльлэн системаез (чиньыосын лыдӟон амал). Выль техника кылдытэмын ни. Али со туж дуно сылэ на, нош бӧрысьгес, ку сое тросэн поттозы, сыӵе техникаез синтэмъёслэн огазеяськонъёсазы, клубъёсазы, школаосазы басьтыны луонлык кылдоз. Басьтэмын Интернет пыр. Наталь Вазь пужмер Нылъёс азьын возьдаськоно кышномурт луон сярысь вераськыны. Соин ик егитъёс тросэз номыре валамтэенызы туж вазь "ӵуштасько". Дас куинь аресказ Алялэн мӧляосыз вӧсь луыны ӧдъязы, но со анаезлы но, эшъёсызлы но ӧз вера. Малпаз, пӧськы потэ. Сюрбубизъя кӧня ке ареслы бадӟымгес апаез сое исаны-чепылляны кутскиз. - Ой, пӧськыме! - кеськиз Аля. Валя серектӥз: - Шузи! Ноны потэ ук! Огпол нош Валялэн Витя братэз адскыны шуыса доразы пыриз. Сокугес гинэ армиысь бертэм муртэ дуно куноез кадь пумитазы. Арнялы улыны кылиз. Огнунал, анай-атайзы дорын ӧвӧл дыръя, Аля борды Витя пуксиз. - Шудон возьматом-а? -Возьматы, - шумпотӥз нылаш. Витя музъем люконэн шудыны дышетӥз. Кин вормиз, Аля уг тоды ни. Жадемзы бере, Витя нылашез кӧлыны чортӥз. - Мон нуназе уг кӧлӥськы, - паймыса шуиз Аля. - Ну соку кыллём гинэ, мон тыныд туж тунсыко учыр мадё. Кеносысь ӟус вылэ интыяськемзы бере, Витя нылашез кылиськыны косӥз, ӝокыт, пе. Аля пумитъяське, мон озьы уг кӧласькы, шуэ. Но Витя туж оскымон валэктӥз, вань культурной адямиос кылиськыса кӧлало, пе. Собере ачиз но гольык кариськиз. Нырысьсэ нагыляк пиосмурт мугорез адӟемысьтыз Аля шымырскиз, шобрет улэ ӝокатскиз. Но кужмо киос шедьтӥзы чиед ныл мугорез. Кесяськыны Витя ӧз лэзьы. Номыр ческытсэ-умойзэ ӧз шӧды нылаш, Витя туж кема со сярысь мадьыны выриз ке но. - Озьы-а пинал луэ? - кышкаса юаз Аля. - Табере мон бызи-а? Но Витя пумитаз шузи! гинэ шуиз. Ӵуказеяз со кошкиз. Аля валаз - сое пӧязы! Р. Шкляева. Игра ёрос. Наталь Улон бугор Кечато-вамато шуд Танялэн туннэ сюанэз. Кинлэн ке со улытозязлы вунонтэм но шудо нунал, нош солэн шудэз кечато-вамато, сюанэз но ортче кечато-вамато укноосын юртъер пушкын. Сюанчиос интые, карт луонэз вӧзын возьмаськисьёс. Эмеспи, куамын куинь аресъем Андрей, куинетӥзэ сюриз ни пытсэт сьӧры - ваньзэ дас куинь ар пукемын. Вылаз сьӧд костюм, гожтӥськыны шуыса, отрядысьтыз ик эшезлэсь пунэмаз. Озьы огдырлы ке но мозмытскиз пытсэт сьӧрын пуконо дӥськутэзлэсь. Колонилэн кивалтӥсез солэсь кизэ кутылӥз. Ӟечкылаз выль кенэз но. Таиз но куамынзэ ортчемын ни. Улэ гуртын, дышетэ пичи классъёсысь нылпиосты. Со "заочница", озьы нимало пытсэт сьӧрын пукисьёсын гожтэт пыр кусып возись нылкышноосты. Кӧня ке толэзь ортчыса, та кузпалъёслэн вордӥськоз нылпизы. Кызьы со будоз, кин луоз, соиз ини тросэз потоз анай-атаез бордысь. Гожтӥськон ортче зонаысь клубын. Загсын ужась дышем сямызъя вера трос пол ӟечкылам кылъёсты. Вераназ ӝутскем мылкыдыз ӧз шӧдӥськы ке но, егит кузпалъёслы шуныт кылъёс шедьтӥз ик. Собере егитъёс мынӥзы адӟиськон комнатае, татын соос нырысетӥ уйзэс уг ортчыто ни. Нош куинь нунал ортчыса, кузпалъёсты кема-кема дырлы люкозы - берлозэ лушкаськемез понна Андрейлы эшшо вить арзэ пуконо луоз на. Ватонэз ӧвӧл, яратон пытсэт сьӧрын гомӟе, гожтэтъёс пыр кусып тупатыса. Кыӵе гинэ кылъёс уг лобӟо эрике "гожъяськисьёслэн" перо улысьтызы. Ӧпкелён, куректон, мӧзмон, яратон - ваньмыз огазе биниськемын. Тодматом гожтэтъёсысь куд- ог чуръёсын. "Ӟечбур, Лена! Саламен тон доры Иван! Ватытэк ивортӥсько: пукисько пытсэт сьӧрын. Одӥг пол янгышай, тани табере ваньмызлэсь люкемын, ужлэсь сяна. Но мон лыдъясько, татын ортчытэм дыры юнме ӧз ортчы. Вань шуг-секытъёс, кудъёсыныз пумиськыны кылдӥз, азьвыл улонэ шоры мукет синмын учкыны юрттӥзы, азьланезлы оскон пыӵатӥзы... Макем мон мӧзмисько сюлэм шунытлэсь, адями кусыпъёслэсь, мылысь-кыдысь вераськонлэсь. Оскисько, тон валаны быгатод монэ но гожтэтэлы вазиськод". Куд-огез меӵак гожто: "Нокыӵе валамтэос медаз кылдэ. Куамын кык арескам дас ньыль арзэ пукисько ни пытсэт сьӧрын, ньыльзэ пукыны кылиз на. Мон куанер, нокинэ ӧвӧл. Я, мар, урод пал ӧвӧл кадь?" Та чуръёс шаерысьтымы одӥгысьтыз зонаысь. Нош таиз гожтэт Рязань палась колониын пукисьлэсь. "Гожтӥсько, нош ачим но уг валаськы малызэ. Монэ нокин уг возьма, ваньмыз тӧлъя-буръя тӧлӟиз. Уг ватӥськы - мон жади. Жади адямиослэн ӟичыяськемзылэсь, жади кечат-вамат укноослэсь, кудъёсыз уйвӧтъёсам но мынам син азям пуксё. Сюлэмы тымиськемын яратон мылкыдын. Сое кинэн ке люкыны кулэ, нош яратоно муртэ мынам ӧвӧл". Пытсэт сьӧрын пукисьёслэн та выллем гожтэтъёссы пумысен малпанъёс пӧртэмесь. Законэз тӥясьёс асьсэос но туж ик уг оско соослы. Мар малпаса бен зэк гожтоно кариське нылкышнолы, бумага вылэ яратон мылкыдзэ кисьтэ. Пытсэт сьӧрын улон капчи ӧвӧл, уката ик туала вакытэ. Пукисьлы сиён-юон но мукет салам кулэ, озьы ик пумиськонъёс мылкыдзэ лӧпкыто. Куд-огез меӵак шуо, нокыӵе яратон но уз вошты пытсэт сьӧрын пукисьлэсь мылкыдзэ, маин улэмзэ, шокамзэ. Соослэн гожтэтысьтызы одӥг кылзылы но оскыны уг яра. Бен, соиз но, таиз но вань. Озьы ик вань яратонлы, шудо улонлы оскон но, пытсэт сьӧрысь потыса, адямилы вань ке кин доры но кытчы мыныны. Нош возьмась ке ӧвӧл? Куд-огезлы ӵемысь берытсконо луэ тодмо сюрестӥ, кечат-вамат укноё дуннее. Пытсэт сьӧрын пукисьёслэн "заочницаос" сярысь асьсэлэн малпанзы кылдэмын. Кинъёс бен соос? Одӥгъёсыз лыдъяло, та нылкышноослэн эрикысь карт шедьтыны осконзы ӧвӧл. Соос пӧлы пыро: люкиськемъёс-нылпиен анайёс; пинал арлыдзы ортчемъёс; кыӵе ке но шекен нылъёс. Вань мукет но малпанъёс. Ваньмызлы ик нылкышноослы инкуазь ӧвӧл кузьмам аслэсьтыз чеберлыксэ. Соин пиосмуртъёс соослэн вӧзтӥзы ортчо, уг синйылто. Но та нылкышноос асьсэды мукет ласянь возьматыны быгато. Соос визьмоесь, ужасесь. Картлы бызьыса, соослэсь пӧрмо усто кышноос но анайёс. Тросэзлэн пиосмуртъёслэн таӵе нылкышноосты пумитамзы потэ. Котькыӵе шуг-секытъёс вылад мед зӥбиськозы, тон огнад уд луы. Оскымон кышно котьку валалоз но юрттоз. Яраты гинэ сое но нылпиостэ. Нош табере ойдолэ кыл сётом "заочницаослы". Таиз ньыльдон аресъем Вералэн гожтэтэз. "Тодматскон сэреге ялон сётӥ. Вазиськиз кӧня ке мурт. Пӧлазы вал Сергей. Солэн гожтэтаз сюлмысь потэм кылъёс гожтэмын. Жаль потӥз адями. Ньыльдон вить арескозь улыса, солэн ӧвӧл коркаез но, семьяез но, нылпиез но. Вань улонзэ ортчытэмын пытсэт сьӧрын костаськыса. Ыстӥ солы гожтэт. Ӝоген кузпалъяськыны малпам. Гожтӥськыны мынӥ зонае. Киям кутыны вормонтэм кык чемодан - сиён-юонэн но Сергейлы дӥськутэн. Пукси поездэ, отӥяз кӧнязэ ке сюресме ортчи пыдын но нялтас мынӥсь машинаосын. Уг тодӥськы ни, кызьы вуи зонае. Гожтӥським. Куинь нуналзэ ми ӵошен вал, собере бертӥ дорам. Огез бӧрсьы мукет куронъёс вуыны кутскизы: я посылка келяно, я коньдон. Али ке но секыт тодам вайыны, кызьы мон ветлӥ адӟиськыны вормонтэм чемоданъёсын но мешокъёсын. Но соку мон номыр сярысь но ӧй жаля: картэ ук, ай эшшо ке пытсэт сьӧрын. Кыӵе секыт солы отын йӧтэ - кезьыт азьын, вылаз ик, сютэм. Нош мон эрикын. Кызьы бен тау кариз вань со сюлмаськемъёсы понна? Пытсэт сьӧрысь потӥз, одӥг толэзьзэ ӵош улӥмы. Собере, мон гуртын ӧвӧлтэм дыръя, зундэсме, шубаме, коньдонме кайпалтӥз но ышиз-быриз". Россия Федерациысь Юстицияя министерствоысь Кыл кутытонъя валтӥсь управленилэн эскеронъёсызъя, зонаын кылдэм дас семья пӧлысь укмысэз воргоронлэн пытсэт сьӧрысь потон араз ик куашка. Озьы ке но, котькуд колониын арлы быдэ дасо сюан ортче. Шулдыръяськонъёстэк, ӵыжы-выжыостэк но эшъёстэк. Нош азяды юан кылдӥз ке, бызёно я ӧвӧл пытсэт сьӧрын пукись муртлы, валэктон сётом одӥг нылкышнолэн кылъёсыныз. Семья улонэз син усемлэсь сӧриськоз шуыса, аслэсьтыз нимзэ шараяны со ӧз дӥсьты. "Пытсэт сьӧрын пукисьёсты ваньзэсты курламе уг поты ке но, "заочницаослы" ӧй дэмласал сюанэн дыртыны. Кидэс но сюлэмдэс гожтэт пыр сётыны эн дыртэ, нырысь ик зол-зол малпаське. Эн вунэтэ: быръем мурттылэн лул-сюлэмыз сӧриськыны шедемын. Огназ улыса вунэтэмын, мар со адямиез яратон. Солы секыт бырйыны улонлэсь уродзэ но умойзэ. Бен, солы кулэ юрттыны, куд-ог дыръя тау карон кылъёссэ ӧд кылэ ке но. Вормоды-а тӥ ваньзэ сое? Оскиськоды ке асьтэлы, мынэ азьлань, но берло эн ӝожтӥське улонады кылдэм шуг-секытъёслы". А. Марчуков. Кулӥсез уногес Асьмеос ӟеч тодӥськом, берло аръёсы быдэс Россиын калыклэн лыдыз пумен кулэсме шуыса. Югдур пӧртэм ӧвӧл Удмурт улосын но. Солэсь уг висъяськы Алнаш ёрос но. Тани кылемаз толэзе районын 27 пинал вордскиз. Жаляса верано луэ, со пӧлысь кыкез шӧй вал. Нош улонысь кошкиз 34 мурт. Тямыс толэзь ӵоже 187 пинал пусъемын, кулэмын 213 адями. Выль семьяос но берло дыре ӧжытгес кылдо. Августэ 15 сюан шудэмын, одӥгез семья куашказ. Ар ӵоже 96 семья кылдӥз, 15-ез люкиськиз. О. Кожанова. *** Кулэ луоз: 3 килограмм кубиста, 2 килограмм помидор, 1 килограмм сугон, 1 килограмм ӵуж кушман (ӵыжатоно 200 грамм кӧс вӧй пӧлын), ӝыны стакан уксус, 1 стакан кӧс вӧй, 100 грамм сылал, сомында ик песок. Ваньзэ суралтоно. Банкаосы тырыса, пӧзись вуын пӧсятоно, собере пытсэтэн ворсано. *** Вож помидорез векчи юдоно 3 литръем посудае тэрымон. Кулэ луоз 10 ческыт пӧсьтурын, 1,5 килограмм сугон (ӵыжатоно 250 грамм кӧс вӧй пӧлын), 2 бадӟым ӵуж кушман (вуштоно), бадӟым пуньылэн ӝыныяз изэм сьӧд пӧсьтурын, 1 бадӟым пуньы сылал (йыровыл), 2 бадӟым пуньы песок, 200-250 грамм томат паста. Ваньзэ тае суралтыса, 30-40 минут ӵоже пӧзьтоно. Пӧсятэм банкаосы тырыса, пытсэтэн ворсано. *** Кулэ луоз 250 грамм ческыт пӧсьтурын, сомында ик ӵуж кушман но сугон, 750 грамм помидор, 30 грамм уксус, быдэн 75 грамм кӧс вӧй но песок, 1 бадӟым пуньы сылал. Юдыса ваньзэ суралтоно, пӧзьтоно 30 минут ӵоже. Банкаосы тырыса, суретэз ворсано корт пытсэтэн. *** 8 баклажанэз 4-5 люкетлы вандоно, векчи юдоно сомында ик ческыт пӧсьтурынэз, помидорез но сугонэз. Кулэ луоз 1 стакан кӧс вӧй, 1 стакан 6 процентъем уксус, 1 пичи пуньы песок, шӧмызъя сылал. Уксусэн суралтэм кӧс вӧез быректытоно, собере бӧрсьысь бӧрсе пононо дасям бакча сиёнэз. Пӧзьтоно кык час ӵоже, ялан суралляса. Дась суретэз банкоасы тыроно, ворсано корт пытсэтэн. Куазь Синоптикъёслэн ивортэмзыя, туннэ ӧжытак пильмаськылоз, зор-кот уз усьы, тӧл уй палась секундскын 3-5 метре пельтоз, -1+3 градус луоз. Ӵуказе ӧжытак пильмаськылоз, зор-кот уз усьы, - 2+2 градус луоз. Наталь Анай-атайёслы школа Изь, изь нуные... Тӥ нуны возьмаськоды. Синмаськыса учкылӥськоды, дыр, визьмо, чебер нылпиос шоры. Со туж умой. Кылылэмды вань ни, луоз, нунылы кӧтын дыръяз ик выжыкыл лыдӟоно, кырӟано шуыса но. Угось нуны нырысьгес кутске кылыны, собере ини адӟыны. Кӧтысь куинь толэзьем нуны вала ни крезьгур чузъяськемез, соин ик вордскемез бӧрсьы солы, эшъёсызлэсь сярысь, капчигес крезьгурез валаны, кырӟаны, инструментъёсын шудыны, аслыз крезьгур кылдытъяны. Со сяна, крезьгур юрттэ кылдэм нунылэсь шокан ёзъёссэ юнматыны, вирзэ золгес бызьылытыны, шутэтскыны. Туж умой луысал, анай ачиз ке веттан гуръёс кырӟасал. Анайлэн куараез туж чебер ке но ӧвӧл, кӧтысь нунылы со туж матын но дуно потэ. Веттан гур ӟеч кӧлон эмъюм луэ, буйгатэ. Тодосчиос туж ушъяло "крезьгуро шкатулкаез" - со туж эскериськыса-чакласа, ваньзэ - гурзэ, ӝоглыксэ, куаразэ - лыдэ басьтыса лэсьтэмын. Крезьгурез зол лэзьыны уг яра, со вераськем куараез медаз согы, уг яра магнитофонэз метрлэсь матэ пуктыны. Веттан гур кырӟалля но нылпилы куинь арес тырмытозь ке но. Москваысь Лазарев доктор крезьгурен эмъя асьсэды но секытэн нылкышноосты. Солэн программаез "Сонатал" нимаське. "Сонатал" юрттэ утиськыны, жадемлэсь мозмытскыны. Нылкышно секытэн ветлыкуз ӵемгес кылзыны кулэ яратоно гуръёссэ. Озьы со чальгес вунэтэ куректонъёссэ-сюлмаськонъёссэ, нош кӧтысьтыз нуны со вакытэ гань-гань будэ. Вордскемез бере чаклалэ ай тодмо кырӟанэз лэзьыса - нуныды соку ик тодмалоз сое, нош но нош кылзэмез потоз. Эн куректэ, тӥляд крезьгурлы нимысьтыз дышетскемды, куарады ке ӧвӧл - лэсьтэ ваньзэ сюлмысь. Сюлэмысь потэм гур юрттоз нуныдэс леклэсь утиськыны, дуннеез, чеберез адӟыны, аслыз паськыт, сайкыт инвисъёс усьтыны. И. Девятых, нылпи врач. Выль юртэ потӥзы Толэзь талэсь азьло Глазов нылпи юртысь нылъёс но пиос выль юртэ выжизы. Сое ӝутӥз Республикаысь лэсьтӥськонъя Чепца управлениысь коллектив. Таин валче Удмурт Правительство кузьмаз ньыль телевизор. Детдомлэн директорез Елена Евгеньевна Ушакова оскытӥз, нылпиос выль юртын уката умойгес дышетскозы шуыса. Табере пиналъёслэн вань ини туж шулдыресь улон комнатаоссы, вань мунчозы но бассейнзы. П. Николаев. Наталь Кызьы улӥськод, егит семья? Яна потон вае-а шумпотон Удмурт Республикаысь Егитъёсын ужанъя кун комитет вӧзын ужась "Егит семья" кун учреждение шаерысьтымы егитъёслэн улэм-вылэмзы пумысен ортчытӥз эскеронъёс. Азьланьтӥськом егит семьяослэн ужпумъёссылы сӥзем вераськонмес. Таиз люкетэз сӥземын арлыдоосын кусыпъёслы. Нылпиос анай-атайёслэсь котыр ласянь адӟем каро, уродэз но, умоез но соослэн сямзы пыӵа. Синйылтытэк уг кылё анай-атайёссылэн ог-огенызы кусыпъёссы но. Эскеронъёс ортчытыку, егит семьяослы юан сётэмын вал, кызьы соос дунъяло анай- атайёссылэсь улонзэс? 46,7 процентэз егитъёс данъяськемзэс веразы. Озьы ке но, улонзэс анай-атайёссы сямен тросэзлэн ортчытэмзы уг поты. 20,4 процентэз гинэ соослэсь адӟем карыны туртто, 63,6 процентэз меӵак пумит луэмзэс веразы. Егитъёслэн но арлыдоослэн кусыпъёссы пӧртэм сямен радъясько. Тросэз со потэ ныллэн но пилэн ӵош улыны дась луэмзы бордысь: ёрмо-а соос коньдонлы, нимазы улыны быгато-а? Берло дыре кузпалъяськисьёслэн арлыдзы пумен пиналме, тросэз семья кылдыто 18-24 арескын. Вазь кузпалъяськон уг юртты улон-вылон ужпумъёсты соку ик валаны. Юалляськемъёс пӧлысь 20 процентэз егит семьяос анай-атайёсынызы ӵош уло, 38,5 процентэзлы коньдонэн юртто. Егитъёс пусйизы анай-атайёссы ласянь мукет юрттэтэз но: нылпиоссэс утялто (25,8 процент); пайдаё дэмланъёс сёто (23,9 процент). 2,6 процентэз пусйизы, анай-атайёссы, пе, семья улонзэс тугало. Тросэз егитъёс пӧртэм ужпумъёссыя анай-атайёсынызы кенешо. 29,8 процентэз солы бадӟым саклык висъяло, 36,2 процентэз куд-ог дыръя кенешо. Мар сярысь та вера? Егитъёс гажало но дунъяло арлыдоосты, соослэсь адӟем карыны тыршо. Нош мукет ласянь учконо ке, егит семья нимаз улыны уг вормы. Анай-атайёссытэк улыны быгатозы-а шуыса юанлы 21,1 процентэз ум быгатэ шуизы, 30,6 процентэз юрттэт возьмало. Кызьы адӟиськом, асьсэ понна кӧняез ке гинэ егит семьяос улыны дась. Странаямы кылдэм туала югдур ачиз но егитъёсты юнгес герӟа анай-атайёсынызы. Палэнысь юрттэт луытэк, егит семья квартира ласянь но шугъяськоз, нылпиосты будэтоно, дышетоно, корка котыр басьтоно на. Пусйыны кулэ, юалляськемъёс пӧлысь 53,5 процентэз егит семьяос ӵошен уло ни куинь арлэсь ятыр. Мар тросгес герӟа арлыдоосты но егитъёсты? Уж шоры учкон, калыклэсь культуразэ, семья улонэз утён, нылпиосты будэтон. Споръяськонъёс ӵемысь кылдо ваньмон дырез ортчытонъя, ваньбур поттонъя. 66,2 процентэз юалляськемъёс шуизы: туала вакытэ егитъёс но арлыдоос пӧлын валамтэос кылдыло. Соос пӧлысь ӝыныезлэсь ӧжытгес егитъёс лыдъяло, валамтэос пото семья кусыпъёс пумысен. Сое валэктыны луоз, дыр, арлыдоослэн но егитъёслэн улон шоры пӧртэм сямен учкеменызы. Берыктытэк Ма туннэ гожъяло Лыдӟисьёсмы ваньмыз сямен ик ӟуч кылэз тодо бере, ми куддыръя печатласьком берыктымтэ материалъёсты. Мугез та бордын но: созэ яке тазэ гожтэмез мукет кылын вераку ыше яке кӧня ке воштӥське солэн пуштросэз. Озьыен, лыдӟе, ма гожъяло туннэ Удмуртиысь газетъёс. "Удмуртская правда", 13-тӥ сентябре (профессорлэн В. Туганаевлэн верамысьтыз): А частное проявление добра - к отдельному человеку, отдельной семье, отдельному коллективу - это как бы не совсем добро. Допустим, я помог какому-то абитуриенту - обеспечил его знаниями, помог поступить в вуз. Хорошо ли это? И где гарантия, что другой, не поступивший из-за меня, был бы плохим студентом? Или вот еще пример. Лев нападает на антилопу, и ее очень жалко. Если брать этот фрагмент из жизни антилопы и льва, то получается, что лев совершает недобрый поступок. Но если взять популяцию в целом - то лев, по сути, помогает существовать виду антилопы, уничтожая слабые особи. И с другой стороны, если антилопа убежит и оставит потомство льва без пищи, львята умрут с голоду - их ведь тоже жалко. "Известия Удмуртской Республики", 15-тӥ сентябрь (Быдӟым Вормонлы сӥзем матерал мотопробег сярысь гожтэмын): - Наши "Ижи" за границей еще не забыли? Юрий Мишкин: Нет. Но купить их сейчас, скажем на Украине, практически невозможно. Хотя в сельской местности они пользуются большим спросом. Большой интерес у молодежи вызвал наш мотоцикл "Юнкер". Легкий, маневренный, он явно пошел бы там в продаже нарасхват. Вообще хотел бы отметить: во время мотопробега наша техника показала себя только с лучшей стороны. По сравнению с теми же "Совами", участвовавшими в пробеге, наши "Ижи" были на порядок выше. "Совершенно конкретно", 15-тӥ сентябрь ("Чей прокурор?" нимо иворысь): Ходят упорные слухи, что прокурор республики Виктор Походин, недавно отметивший свой 65-летний юбилей, вскоре оставит службу. Недавно в Ижевск прибыл Владимир Зыкин - один из наиболее вероятных кандидатов на пост прокурора республики. Пока Владимир Кузьмич возглавляет Управление генеральной прокуратуры РФ в Приволжском округе. На одном из совещаний в Нижнем Новгороде Зыкин довольно крепко "приложил" Удмуртию. И вот теперь, если верить все усиливающимся слухам, он - почти стопроцентный президент. "Ижевск вечерний", 15-тӥ сентябрь (вуоно быръёнлы сӥзем материалысь): Ганза и Солуянов не дадут Волкову выиграть в городах Удмуртии, а Вершинин не даст это сделать на селе... Вот и все. Уже одного этого достаточно, чтобы начать переписывать закон о выборах президента УР. Кстати, председателя Центризбиркома России г-на Вешнякова очень удивило, почему это наши депутаты не предусмотрели второй тур голосования в президентских выборах. Это, мягко говоря, законодательное ноу-хау объясняли еще весной нам экономией средств (?!). Следуя этой логике, экономичней было бы вообще не проводить эти выборы, а дать возможность назначить нам главу республики Владимиру Путину. Что совершенно законно. Правда, через год. А куда спешить? "Саф Ислам", 15-тӥ сентябрь ( редакторлэн И. Хисамутдиновлэн вазиськонысьтыз): Как мало людей думает о предстоящей ответственности! Как мало людей духовно бодрствует! Ведь сами политики нам всегда твердят, что их работа - дело грязное. Выбирая, мы становимся соучастниками их грехов и преступлений. Пророк (да благославит его Аллах и приветствует) сказал: "С кем ваши сердца будут при жизни, с теми воскреснете в Судный День". Татары, чьи сердца еще не умерли, побойтесь Аллаха, побойтесь адского пламени! Земля - всего лишь испытательный полигон. Мы здесь должны бороться за истину, за божественный закон и крепко за него держаться. Мы не должны предаваться страхам и обманам. Мы не должны участвовать в выборах. Наталь Тӥледлы, пӧраськисьёс Толлы салатъёс Кулэ луоз: 3 килограмм горд помидор, 1 килограмм вож помидор, 10 ческыт пӧсьтурын, 1-2 курыт пӧсьтурын, 10 ӵуж кушман шоро-куспооссэ. Ваньзэ юдоно, йылтоно 1 стакан кӧс вӧй, 50 грамм уксус, 1 пуньы сылал, 1 стакан песок. Суралляса 1,5-2 час ӵоже пӧзьтоно пичи тыл вылын. Пӧсятэм банкаосы тырыса ворсано корт пытсэтэн. *** Кулэ луоз: 5 килограмм кубиста, 2,5 килограмм помидор, 1 килограмм сугон, 1 килограмм ӵуж кушман (поттоно зӧк вуштон пыр), 350 грамм песок, 4 бадӟым пуньы сылал, 2 стакан кӧс вӧй, 1 стакан уксус. Юдыса ваньзэ суралтоно бадӟым тазын, собере тыроно банкаосы. *** Кулэ луоз: 5 килограмм помидор, 2,5 килограмм ӵуж кушман, 700 грамм сугон. Ваньзэ поттоно сӥль лэзён пыр. Пӧзьтоно 2 час ӵоже, пӧлаз йылтоно 2 стакан кӧс вӧй, сылал шӧмызъя. *** 5 килограмм помидорез, 1 килограмм ӵуж кушманэз, 1 килограмм яблокез, 1 килограмм ческыт пӧсьтурынэз сӥль лэзён пыр поттыса, 2 час ӵоже пӧзьтоно пичи тыл вылын. Йылтоно 2 стакан пала кӧс вӧй, ӝыны стакан уксус, 1,5 стакан песок, 1 стакан сылал. Эшшо 30 минут ӵоже пӧзьтоно, собере йылтоно сӥль лэзён пыр поттэм чеснок (200 грамм) но 2 курыт пӧсьтурын. Нош ик пӧзьтоно 30 минут ӵоже. Пӧсятэм банкаосы тырыса, корт пытсэтэн ворсано. *** Вож яке ӵужмыт помидоръёсты 2-4 люкетлы вандоно. Векчи юдоно кидысъёслэсь сузям ческыт пӧсьтурынэз, ӵуж кушманэз. Ватсано петрушкалэсь но укроплэсь вож куарзэ. Пӧлаз ватсано на сылал но уксус. Ваньзэ суралтоно, банкаосы тырыса, пӧзись вуын пӧсятоно. Кулэ луоз: 200 грамм помидор, 100 грамм ческыт пӧсьтурын, быдэн 50 грамм ӵуж кушман, сугон, кӧс вӧй, 10 грамм сылал, 45 грамм уксус 6 процентъемзэ. Машинаез шукыен уд сюды Велосипедъёсын но валэн ветлӥсьёсты Ижевскысь урамъёстӥ уд синйылты. Ма, гуртъёсын но али мотоциклъёс, автомашинаос тросгес ворттыло. Но таосыз бензин "сиыны" ярато. Нош бензин дунъёслэн тэтчан сямзы вань. Машина возисьтэм адями но сое ас вылаз шӧдэ сиён-юон но мукет вузъёс дуноямъя. Югдур ӧжытак пуксьытскиз ни вал кадь, нош июль пумысен бензин дунъёс нош ик шукыяськыны ӧдъязы, арнялы быдэ сямен воштӥсько. Таяз учыре йыръёссы борды кутскизы Европаын улӥсьёс. Англиын тросэзлы велосипедъёс вылэ пуксьытэк ӧйлась, пе. Мар бен таяз учыре бугыртӥз быдэс дуннеез? Нефтьлы дунъёс Западын шуак выллань тэтчизы. Берло дас ар ӵоже сыӵеез ӧй вал на. Одӥг баррель нефть та нуналлы 36 доллар сылэ. "Удмуртнефтепродукт" акциосын огазеяськонлэн валтӥсь директорезлэн воштӥсез Андрей Шутов, бензин дунъёслэн будэмзы пумысен шуиз: - Ужпум ми бордысь уг поты ке но, берло арнязэ милемлы маза уг сёто, ваньзылэн тодэмзы потэ: кызьы но малы будӥзы бензинлы дунъёс. Ми мар каром, заводъёс дунъёссэс будэто бере? Быдэс дуннеын нефть дунояз, нош со шӧдӥськытэк ӧз кыльы кызьы ке странаямы, озьы ик шаерамы но. Али шуг вераны азьланяз бензин дунъёсъя кыӵе югдур луоз. Нош иворез вӧлмытӥсь ёзъёс верало ни, выль ар азьын бензин, пе, 10 манет котыр луоз. Буйгатӥз-а тӥледды таӵе валэктон. Малпасько - ӧз. Нош мар луоз азьланьын, соиз пумысен валэктон сётыны нокин ик али уз басьтӥськы. Быдэс дуннеез та ужпум туннэ сюлэмшугъяськытэ. Нош шаерамы кылдэм югдур шоры учконо ке, одӥгез буйгатэ: кӧня ке аръёс талэсь азьло сямен, машина возисьёс бензинлы шуыса черодын часъёсын уг сыло, трос литръем бекчеосы эстӥськон уг люкало. Сьӧд зарниен узыр музъем вылын улыса вылысь (быдэс дуннеез басьтоно ке, нефть кыскон 8 процентэз Россия вылэ усе), инмар мед утёз ни со дефицит шуонлэсь. Оло нош вӧсяськыны кулэ эстӥськон удысэн вырись валтӥсь компаниослэн кивалтӥсьёссылэн сайкыт визьзы понна. Запад палась лӧсъяськись уксё зынэз кылыса, сьӧд зарниез тросэн келяны медаз кутске вал кунгож сьӧры. Дунъёс куртчылӥсько ке но, АЗС-ёсын ужгур уг чалмылы. Нош дунъёс сярысь ке верано, арня талэсь азьло тужгес но трос кутӥськисез АИ- 92 бензин литрез сылэ вал: Новосибирскын - 8,10 манет, Саранскын - 7,70 манет, Ижевскын - 7,10 манетысен 7,30 манетозь. Машинадэс 1 литр со бензинэн ик "сектан" понна туннэ кисыысьтыды поттоно луоз ни 7,70 манет. Оло нош велосипед педальёсты бергатыса утчалоды? Л. Малых. Туспуктэмъёсыз А. Жуковлэн. Меми, эн кельты монэ! Басьты сьӧрад уж дуре. Тыныд сюлмысьтым юртто - Вань тари ӝукме сиё. *** Мынозы Финляндие Толон валлян Удмурт Кивалтэтлэн юртаз ортчиз "Удмурт кенеш" огазеяськонлэн Пичи кенешез. Со эскериз кӧня ке ужпумез. Пичи кенеше люкаськылэмъёс бырйизы Быдэс дуннеысь финн-угоръёслэн куинетӥ бадӟым ӧтчамазы ыстоно адямиосты (со ортчоз туэ толсуре Финляндиын). Делегатъёс - улосысьтымы синмаськымон адямиос. Кыдёкысь Суоми шаере мынозы "Удмурт кенеш" огазеяськонлэн тӧроез Валентин Тубылов, солэн воштӥсьёсыз Нина Малых, Валерий Митрофанов, история наукаосъя доктор Кузьма Куликов, тодосчи Роза Яшина, шаерысьтымы калык кусыпъёсъя министр Николай Мусалимов, Нылкышно кенешлэн удмурт ёзэзлэн тӧроез Галина Никитина, Можга городлэн тӧроезлэн воштӥсез Семен Павлов, "Удмурт кенеш" огазеяськонлэн пресс-службаеныз кивалтӥсь Вячеслав Михайлов, Башкириысь вань удмуртъёслэн огазеяськонзылэн тӧроез Ренат Галямшин, Татариысь Набережные Челны городысь удмуртъёслэн азьветлӥсьы Валентина Белых, Ижысь удмуртъёслэн огазеяськонзылэн тӧроез Илья Байметов, "Удмурт кенеш" огазеяськонлэн Балезино ёросысь ёзэзлэн тӧроез Лидия Иванова, Ижысь медакадемилэн ректорез Николай Стрелков, Вавож ёросысь Гурезь-Пудга школалэн директорез Анатолий Егоров, Дэри ёросысь "Путь Ильича" эштослэн тӧроез Удмурт Элькунысь Кун Кенешлэн депутатэз Валерьян Никитин, удмурт егитъёслэн "Шунды" огазеяськонзылэн тӧроез Татьяна Прокопьева, дипломат егит азьветлӥсь Юрий Перевозчиков, "Удмурт кенеш" огазеяськонлэн Вотка ёзысьтыз Тамара Бочкарёва но та чуръёсты гожтӥсь. Пичи кенеше люкаськылэмъёс озьы ик эскеризы Быдэс дуннеысь удмуртъёслэн тямысэтӥ ӧтчамзылы дасяськонэн герӟаськем ужпумъёсты. Со ортчоз туэ, толсуре, Ижын. Е. Виноградова. Удмурт Республикаысь Быръёнъя комиссилэн ивортонэз 2000-тӥ арын 19-тӥ сентябре 17 час 20 минутэ Удмурт Республикалы президентэ кандидатэ пусъемын Рудчук Сергей Васильевич, вордскемын 1963-тӥ арын, военной пенсионер, улэ Ижевск городын. 2000-тӥ арын 19-тӥ сентябре 17 час 25 минутэ Удмурт Республикалы президентэ кандидатэ пусъемын Головизнин Леонид Борисович, вордскемын 1955-тӥ арын, Ижевск городысь ТТУ-лэн КПП-ысьтыз валтӥс контролёр, улэ Ижевск городын. 2000-тӥ арын 19-тӥ сентябре 17 час 27 минутэ Удмурт Республикалы президентэ кандидатэ пусъемын Тимофеев Владимир Борисович, вордскемын 1939-тӥ арын, "Ижевский мотозавод" Аксион-Холдинг" ОАО-ысь инженер, улэ Ижевск городын. 2000-тӥ арын 19-тӥ сентябре 17 час 30 минутэ Удмурт Республикалы президентэ кандидатэ пусъемын Едигарев Андрей Борисович, вордскемын 1962-тӥ арын, Глазов городысь "Фронт" ООО-лэн радиоысьтыз валтӥсь редактор, улэ Глазов городын. Ура-а! Медаль Удмуртиын Котькудӥз али сак эскере Австралиысь Сидней городын ортчись ЪЪВИИ Олимпиадаез. Ваньмылэн нырысь ик кылэммы потэ Россиысь спортсменъёслэсь нимъёссэс. Но таяз учыре асьмелы малы ке уггес удалты ай. Туж кыдёкысь лымшор палась таиз ивор шумпоттоз, дыр, ваньзэ Удмуртиын улӥсьёсты. Пичи калибрен винтовкаысь 50 метрысен ыбылӥськыса, асьмелэн Мария Феклистовамы бронза медаль басьтӥз. Олимпиадалэсь медальзэ. Солэн 590 очкоез. Та лыдпус Россиын самой бадӟымез луэ. Ӟечкыласьком! Нош велосипедэн ворттылӥсьлэн землячкамылэн Светлана Бубенковалэн стартъёсыз азьпалан на. Оском, солы но медаль шедёз шуыса. Н. Лялин. Наталь Чидалоды-а веръятэк? (сюрес вылын зулён) Алнаше мыныкум, автобуслэсь бере кыльыса, нялтас машинае пуксёно кариськи. Шофёр тодмо воргорон тупаз. Кыл бӧрсьы кыл, вераноез но, верантэмез но кыре потэ. Шофёрлэн улон сюрес вылын бере, адямиосты но, интыосты но котькинлэсь умой тодэ. Нюлэс доры вуыкумы, Олёш серекъяса шорам учкиз: - Гали, ойдо нюлэскы эмезь бичаны пыралом. - Эмезь кисьмамын ӧвӧл ай, - вази пумитаз. - Соку малпаськы, нюлэс кузь на. -Ӵем-а тазьы шутэтскыны дугдылӥськод? - Ма егит дыръя малы дугдылонтэмез. Али бен кышно но тырме, вылаз ик, рейсэ потыкум но сьӧрам нылме лэзе. Соиз прокурор кадь котькуд вамышме чакласа улэ. - Кузпалэд нош вожась-а? - Вожамъяське но, уин вӧзысьтыз султыса кошкид ке но, уз шӧдылы, сокем зол кӧлэ. - Я вай коть пыддэ ке но маялляло, - нош аслэсьтыз ёртэ Олёш. - Только азьланяз сюрес вылэ вакчигес юбкаен пота, соку КамАЗ гинэ ӧвӧл, БМВ но дугдоз. Но со "юбкаосын" йырин олокытчы сюрыны но кема ӧвӧл. Кылем арын тулыс Алнашетӥ машинаен мынӥсько. Пумитам вакчи юбкаен егит ныл лыктэ. Ох, чебер. Ай соку куазь салкым, адямиос гольык пыд уг ветло. А татын!!! Со шоры учконъям, шорам ӧжыт гинэ "Лада" ӧз мырӟиськы. Тожо со ныл шоры учке вылэм. Куалектӥз бен. Мон со пыдъёс шоры кемагес учкысал ке, кыкнамы но пазьгиськиськом вал. - Мар-о табере, нылаш янгыш-а? - Инкуазь. Пиосмуртлэн мурт нылкышноос шоры учкылон сямыз вань ке, мар карод? - Астэ кияд возьыны тыршод. - Э-э, нуналлы быдэ сериалъёсын возьмато тӥни: мар уг туртто отын! Эсьма, аслад но утчамед потыны кутскоз. Нылкышноос но ведь ваньзы калгысалзы, картсылэн мыжыкезлэсь но супыльтонъёслэсь гинэ кышкало. - Нош ик ми - янгыш. Я коть вераськыса ик Алнаше вуим, споръяськонъямы кызьы ке нюлэсэз но нокыӵе кариськытэк ортчиз Олёш. Г. Савина. Алнаш ёрос. Шудтэм лыдпус - 13 Кышкыт ивор вуиз бускельёсмы дорысь. Кылем арня нуналэ Казань-Базарные Матаги маршрутъя мынӥсь автобус шуре усиз. 15 мурт пӧлысь улэп кылиз кыкез гинэ. Соос пӧлысь одӥгез, водитель, уно пол вуэ зымылӥз на, но поттыны нокинэ но ӧз быгаты ни. Автокатастрофа луиз Сорочьи Горы гурт дорын. Нырысетӥ эскеронъёсъя, "ПАЗ" автобуслэн тормозъёсыз ӧз кутэ, меӵ гурезьтӥ васькыса, со вуэ бекмыльскиз. Секыт учыр луэм интые вуизы спасательёс но водолазъёс, озьы ик Татарстанлэн премьер-министрез Рустам Минниханов. Басьтэмын Интернет пыр. Быдӟым Вормонлы - 55 ар Пересьмыны уг сётскы Асьмеос умой тодӥськом, адями ас улонзэ калыклы сётыны ке тырше, солэн пересьмемез уг поты шуыса. Мон кемалась юн кусып возисько кылем арын 75 арессэ пусъем воргоронэн Борис Александрович Олеровен. Быдӟым Отечественной война кутскыку, со Белоруссиысь Гродно городлэн пионерской лагеряз шутэтске вал. Эшъёсыныз ӵош футболэн шудӥз, шурын пыласькиз, ӝытазе тылскем дорын кырӟаз. Нош 22-тӥ июне арня ӵукна быриз пинал дырыз. Лагерьын улӥсьёсыз дырыз дыръя мукет интые воштыны ӧз быгатэ. Борис эшъёсыныз кӧня ке толэзь ӵоже, тушмонъёслэсь ватскыса Белоруссия пыр потоно луиз. Фронт пыртӥ ортчыса, Чкалов городэ ыстэм анай-атаез доры вуиз но татын заводэ ужаны пыриз. Но пияшлэн оже мынэмез потӥз. Ужзэ вис карытэк, со йылпумъяз радистэ- телеграфист дасянъя курсъёсты. Москваын радистъёсты дасян нимысьтыз школа усьтэм бере, военкомат пыр со отчы мынӥз. Татын со тодматскиз Алексей Волковен. 1943-тӥ арын феврале школаез быдтэмзы бере, старшой радист Олеров но радист Волков сюризы партилэн Брест обкомезлэн секретарезлэн Сергей Николаевич Сикорскийлэн группаяз. Тушмонлэн мышказ соосты ыстӥзы мартэ. Немецъёс соослэсь лобӟись самолётсэс ыбылӥзы ке но, Минскысь партизанъёс доры пиос вуизы. Белоруссиысь партизанъёслэн тушмонэн ожмаськемзы сярысь кӧня ке книгаосын гожъямын ни. Партизанъёслэн Брест областе выжемзы сярысь умой маде И. А. Артемьев Минскын 1978-тӥ арын поттэм "Позывные Москвы" книгаяз. Мискиньёслы нюлэскысь нюръёс пыр секытэсь котомкаосын кытӥяз кускозязы ву вамен потано ке но луиз, соос ваньзэ чидазы. Умой сюресъёсыз тушмонъёс сак эскерыса возизы угось. Партизанъёс уин гинэ азьлань вамышъязы, нош югыт луэм бере, кытын ке шыпыт интыын кӧлӥзы. Туж ватскыса ке но мынылӥзы, тушмонъёс соосыз шараяку, ожмаськоно луылӥзы. Шуг-секытъёс шоры учкытэк, комсомолецъёс-радистъёс вис карытэк Москваен кусып возизы. Инмын тушмонлэн самолётъёсыз бомбаос куяку но, соослы "бадӟым музъемен" вераськоно луылӥз. Кытӥяз кужмо пуштылэмен антеннаос но рациос мукет интые пезьдылӥзы. Радистъёс, соосыз ӝог тупатъяса, корреспондентъёсын вераськылӥзы. Советской Союзлэн Героезлэн полковниклэн С. И. Сикорскийлэн группаез тушмонъёслы пумит ожмаськиз Ковпаклэн но асьме землякмылэн Сабуровлэн люкам партизанъёсынызы ӵош. Горд Армия 1944-тӥ арын июль толэзе татчы вуытозь, Олеров но Волков, чаклам дыръёсы эфире потыса, Москвае ивортылӥзы тушмонлэн кужымез сярысь разведчикъёслэсь верамзэс, приказъёслэсь кызьы быдэсъяськемзэс, самолётъёслэн Москваысь кӧня сиён-юон, эмъюм но пӧртэм тӥрлыкъёс ваемзэс. Нош бертыкузы самолётъёс сьӧразы нуылӥзы сӧсырмемъёсты, военнойёслэсь семьяоссэс но партизанъёсын пленэ басьтэм немецъёсыз. Радистъёс шӧдылӥзы соосыз жалямзэс, утьыны тыршемзэс. Но егитъёс асьсэос куриськылӥзы секыт операциосы. Кытӥяз юатэк тушмонлы пумит маке со лэсьтыны ветлылӥзы. Но со понна кивалтӥсьсылэсь Сикорскийлэсь зол сюрылӥз; угось, бырыны шедьысалзы ке, интыязы радист шедьтыны шуг луысал. Нош рацитэк кызьы кусып возёд? Радистъёс Совинформбюролэсь ивортонъёссэ нуналлы быдэ партизанъёслэн типографиязы келяллязы. Печатлам листовкаосыз, артысь гуртъёсы сяна, Брестэ но ысъязы. Белоруссиез мозмытэм бере, Олеровлэн но Волковлэн ож сюрессы висъяськиз. Война бере Борис Александрович кӧня ке ужаз радист луыса Белоруссиысь компартилэн Центральной Комитетаз. 1956-тӥ арын транспортъя инженеръёсты дасян институтэз быдтэмез бере, Олеровез ыстӥзы Ижевскысь андан ӵыжатон заводэ. 1968-тӥ арысен сое трос пол бырйылӥзы заводысь парткомлы секретаре. Солэн сюлмаськемез юрттӥз предприятиын ожез но ужез данъян музей кылдытыны, Быдӟым Отечественной войнаын бырем металлургъёслы сӥзем памятник ӝутыны. Борис Александрович, энергоцехе кивалтыкуз, мылысь-кыдысь пыриськиз юонлы пумит нюръяськонэ но спортивной ӵошатсконъёсы. 44 аресказ солы спортъя мастер ним сётӥзы. Али со Удмуртиысь спортъя ветеранъёслэн газетъёс но радио пыр ӵемысь маде, макем юрттэ спорт тазалыкез юнматыны. Спортивной амалэн ветлонъя ӵошатсконэ пыриськыса, ветеранъёс пӧлын басьтылӥз "Россиын спортивной улон" журналлэсь приззэ. Солы сётӥзы ни спортивной ветлонъя дуннелэн чемпионэз но рекордсменэз нимъёс. Со сяна, Олеров куасэн нискыланъя нырысетӥ разряд басьтӥз. В. Чернов. 1. Борис Александровичлэсь ожын но ужын басьтэм орденъёсыныз но медальёсыныз. 2. 1943-тӥ арын Брест котырысь нюлэскын. 3. Паллян палаз сылэ ачиз кадь ик кышкасьтэм радист, партизан Владимир Кобозев. Праздник сӥзиськоз крезьгурлы Нырысетӥ октябре дуннеын пусъёзы крезьгурлы сӥзем нуналэз. Та ушъямон праздник арлы быдэ Удмуртиысь Операя но балетъя театрын но ортче. Но туэ, концерт интые, дасямын театрализованной возьматон. Со "Сӥзьыл рапсодия" шуыса нимаське но кельшыны кулэ вань кылзӥсьёслы-учкисьёслы. Ужрад кутскоз Герман Корепановлэн "Зарни сӥзьыл" тодмо кырӟанэныз. Та кырӟанлэн крезьгурез удмурт радио пыр чузъяське нуналлы быдэ. Артистъёс возьматозы но вералозы, кызьы юнмаз Удмурт Элькунамы Музыкальной театр, тодазы ваёзы нырысь спектакльёсты но артистъёсты. Куамынэтӥ аръёсы ик ни Ижын кылдытэмын вал крезьгуро комбинат. Отын ужазы ӟуч но удмурт драмая но операя труппаос. Театрын возьматэмын вал тужгес устоосыз операос: Даргомыжскийлэн "Русалкаез", Россинилэн "Севильский цирюльникез", Чайковскийлэн "Евгений Онегинэз", Гунолэн "Фаустэз" но мукетъёсыз. Тужгес но пусйымон таиз: Бородинлэн "Князь Игорь" операез "Половецкой стан" нимын пуктэмын вал удмурт кылын. Удмурт крезьгур кылдытонын туж емышо вал 1960-тӥ-1970-тӥ аръёс: Г. Корепанов кылдытӥз "Наталь" операзэ. Г. Корепанов-Камский - "Любушка" опереттазэ. Та крезьгуръёс удмурт калыклэн данъяськонэзлы пӧрмизы. Музыка сярысь валэктон вискын возьматэмын луозы спектакльёсысь сценкаос но киноархивысь кадръёс. Концертлэн пумазгес нырысьсэ жингыртозы Евгения Копысовалэн крезьгуръёсыз. Композитор дасям "Лебединый край" ("Юсь шаер") кантата. Та крезьгур туж ушъямон, лякыт но сюлэме пыӵась гожтэмын. Со маде асьме пичи вордскем музъеммы вылын вашкала дырысен туннэ нуналозь кызьы улэммы сярысь. "Сӥзьыл рапсодия" концерт программа возьматэмын луоз 29-тӥ сентябре, крезьгурлы сӥзем бадӟым праздник азьын. Нош сӥземын со Удмурт Ресупбликамылэн 80 ар тырмонэзлы. В. Лагунов. Дяди, сиеме потэ! - Пицца возьмалоз пие. Почтае ӝог мыноно Газетлы гожтӥськоно. Турын зуродъёс, куро люкъёс Соосты трос люказ туэ Балезино ёросысь "Звезда" эштосысь нимысьтыз кылдытэм бригада. Ӟеч тыршизы А. П. Веретенников, Э. В. Гуляев но В. В. Максимов но мукет эшъёссы. Бригадалы висъямын кык "Беларусь" трактор, огез - волокушаен, мукетыз - стогомётэн, нырысез турынэз кыскыса огазе ворттэ, мукетыз ӝутъяса огазе тыре, нош киын ужасьёс саникъёсын лач-лач тупатъяло. Эштосын туэ пудо сиён миымлэсь данаклы уно дасямын ни: 800 тонна турын, кӧня ке сюрс тонна силос, куро. Пудозы толэз майбыр потыны кулэ. Сюро таза пудозы 500 йыр, со пӧлын кысконо скалзы - 230 йыр, 45 парсьсы. Тырмыт сӥль-йӧл поттӥзы ке, город калыкез но сюдозы, асьсэос но тросгес уждун поттозы. П. Николаев. Ӧй вал, ӧвӧл, уз но луы Республикаын улӥсьёслы вазиськыны монэ ӝутӥзы куд-ог СМИ-осысь уже кутэм ядерной эстӥськонэз Удмуртие ваён сярысь гожтэмъёс. Ядерной эстӥськонэн герӟаськем ужпум туж лэчыт луэ быдэс дунне понна но, Россия понна но. Сое быдэстон борды мур-мур малпаськыса, ваньзэ лыдэ басьтыса кутсконо. Жаляса верано, данакез печатламъёс, радиолэн но телевиденилэн передачаоссы та куронлы уг тупало. Россия одӥгез кужмо атомной держава луэ. Техника дуннеысь ласянь азьмынӥсь кунъёс сямен ик, асьмеос но ядерной ож тӥрлык, сырьё поттӥськом, вань атом электростанциосмы но. Туннэ международной огкылъёсъя мукет интыосысь уже кутэм ядерной эстӥськонэз дорамы ваиськом. Ваньмыз со зэм, солэсь нокытчы уд пегӟы, соин ик кылдэм ужпумъёсты азьланьын одно ик быдэстоно луоз. Удмуртиын ядерной эстӥськонэн герӟаськем ужъёс уз нуиське. Угось сыӵе объектъёс вань, али но лэсьтӥсько Россиысь мукет улосъёсын, кылсярысь, Красноярск крайын, Челябинск, Томск улосъёсын. Али Россиысь наука конструкторъёс кылдытӥзы ни сыӵе технологиос, кудӥзъя ас ужзэ лэсьтэм ядерной эстӥськонэз выльысь кутыны луэ, эшшо но уногес электрокужым басьтыса, со дыре ик радиоактивной жуг-жагъёсты кӧня ке сю пол кулэстыса. Со сярысь Нью-Йоркысь саммитын ивортӥз Президентмы В. В. Путин. Та проектэз быдэстонэ коньдон висъяськиз ке, ядерной эстӥськонлэсь жуг-жагзэ быдтыны, ӝикыт возьыны, выль сямен уже кутыны луоз. Малы бен соку татын Удмуртия? Кин поттӥз сыӵе ӵашетонэз, калыклэсь йырвизьзэ сураса, кышкатыса? Яке со тодымтэ бордысь потэ, яке юромо, урод малпаса лэсьтэмын. Вунэтоно ӧвӧл кыл кутон сярысь. Удмуртиысь ядерной шайгуос сярысь "выжыкылъёс" Россилы, ядерной державалы, шӧдскымон изъян ваё. Нош та темаез вуоно быръёнъёс азьын ас палад уже кутон - таиз ини ярантэм. Соин ик иворъёсъя ёзъёслы но, республикамылы президентэ кандидатъёслы но вазиськисько, та ласянь чакласькыны ӧтьыса. Удмуртиысь калыкез йыромытоно-кышкатоно ӧвӧл. С. Чикуров, Россия Федерацилэн Президентэзлэн Приволжье Федеральной округысь Удмурт Республикая валтӥсь федеральной инспекторез. Останкиноын тылпу кылдытоз выль законъёс Москва городысь Дума но мукет кивалтон ёзъёс табере котыр ласянь чакласько но выль законъёс кутон сярысь малпасько, азьланяз кышкыт тылпуос медаз ни кылдылэ шуыса. Тани Воробьевой гурезьёсын сылӥсь МГУ-лэн бадӟымесь юртъёссэ уже кутонэз дугдытон сярысь но малпаськисьёс вань ини, отын тылпулы пумит нюръяськонэз кулэезъя ӧз ке, пе, радъялэ. Тылпулы пумит нюръяськисьтэм кивалтӥсьёсты штраф тырытон данаклы будэтыны чаклаське. Басьтэмын Интернет пыр. Быръён - 2000 Закон чурыт, но со закон Кызьы ивортылӥмы ни, Андрей Солуянов палэнтэмын Удмуртилы президент луыны турттӥсьёс пӧлысь. Мугез тодмо - правоосты утисьёс со понна гожтӥськемъёсты эскеризы но уно тырмымтэосты шараязы. Куд-огез понна мукет адями кизэ нюртэм, кин но со вазенгес ик улонысь но кошкыса вуттэм ни. Но Андрей Солуяновез гажасьёс Быръёнъя комиссиен соглаш ӧз луэ. Валлян соос люкаськизы Кун Кенешлэн юртэз азе но отын митинг ортчытӥзы. Калыкез укыр трос ӧй вал. Мынам чакламея, уногес вал митингез адӟыны лыктэмъёс, журналистъёс, милициын но со выллем музон ёзъёсын ужасьёс. Вераськисьёс быдтыса куштӥзы Удмуртилэсь туала кивалтӥсьёссэ. Соос тужгес но курлазы Александр Волковез, солэсь ужан амалъёссэ. Со дыре ик Дмитрий Талантов, Быръёнъя комиссилэн кивалтӥсез, дораз лыктэм журналистъёслы вераз кылдэм югдур пумысен малпанъёссэ. Ми вань кандидатъёслэсь документъёссэс пыр-поч эскериськом, янгышъёсты шараяськом, законлэн куронъёсызъя ужрадъёс кутӥськом, шуиз Талантов. Республикаямы политика омыр пумен ӟырда. Кин кызьы, вылды, мон уг быгатӥськы ни телевидениез учкыны. Котькуд канал ас палаз куасалтыны выре. Тани "Удмуртия" ГТРК пыкылэ Андрей Солуяновез, солэн юрттӥсьёсыз дурбасьтӥсьёс пӧлы кулэм муртъёсты пыртӥллям шуыса. Шонер куаретэ. Но тележурналистъёс, морален тупатэм вань куронъёсты тӥяса, асьсэос вамышто со мыдлань сюрестӥ, мыно со бырем адямиослэн доразы, кыско соосыз политика ужпумъёсы. Чебер шат? Сыӵе суредъёс пумтэм. Котьмалэсь уродэз со бордын: таӵе югдурез асьмеос толэзь пала чидано луом на. Ай трос шукы потоз на кыре телеэкран но газет бам пыр. Мискинь адямиос коть мед быгатысалзы асьсэдыз утьыны, политика ӵашкаысь йыромытэк потыны. И. Лебедев. Фотоез В. Беломорскихлэн. Автобусъёсты кулэстӥзы... Ортчем шутэтскон нуналъёсы Ижысь Южной автостанциысь Кеные ветлӥсь 117 номеро автобусъёслэн рейсъёссы туж трослы кулэстэмын вал, со пумысен мынӥсь-ветлӥсь калыклы рос-прос ивортытэк. Шутэтскон нуналъёсы рейсъёс, ужан нуналъёсы сярысь, данаклы тросгес луо вал ке, табере - ужан нуналъёсы сярысь ичигес. Рейсъёсты кулэстэм сярысь юанэлы автостанциысь диспетчер валэктӥз, коньдон ичи люкаське, пе. Но 12 час 10 минутэ мынӥсь рейсын мон азьын гинэ кондуктор быдэн кык манет басьтӥз Выль Чультеме мынӥсь кышномуртлэсь но Кены шай вылэ мынӥсь пиосмуртлэсь, огзылы но билет ӧз сёты, Тӥни озьы, кассае вуоно коньдон кылиз кондуктор кие. Ӵапак сыӵе ужасьёсын сэрен рейсъёс кулэсмо, мынӥсь-ветлӥсьёс дырзэс мултэм быдто. П. Скобелев. Киясаысь иворто Азьпалан - "Донлэн" кузёез Ортчем аръёсы сямен ик туэ но ваньмызлы адӟем карымон ужа "Киясовское" эштосысь Владимир Наумович Павлов. Со "Дон" комбайнэн котькуд ар 10-13 сюрс центнер ю тысь кутса. Али но Алнаш палась шайтангурт пи вань киясаосты азьпалтэ: кутсаз ини 9400 центнер ю-нянь. Но ортчем арлы йылпумъянъёс лэсьтыку, Владимир Павловез палэнэ кельтӥзы: тон, пе, огнад ёросын "Дон" комбайнэн ужаськод. Паймод но бырод. Котьма ке но, алнаш пи ӟеч ужа, пыдберзэ лёганы уг сёты. Юнме ӧз сётэ солы "За трудовую доблесть" медаль. Со дыре ик та хозяйствоысь куд-ог комбайнеръёс 2 сюрс центнер гинэ ю кутсазы ай. Ужзы эштосын данак на, оскиськом, В. Н. Павлов туэ 10 сюрс центнерлэсь ятыр ю тысь кутсалоз шуыса. Бызёно ке - Микталы гинэ 64 арлэсь кема ини ӵошен уло Киясаысь Мария Захаровна но Никита Ефимович Тугбаевъёс. Кемалась ини зарни но, бриллиант но сюанзэс ортчытӥзы, кылиз на рубин сюанзэс витьыны. Озьы ик 60 арлэсь кема тупаса, ог-огзэс валаса улӥзы Вуж Тӥгырменысь Никита Иосифович но Дарья Алексеевна Камашевъёс. Оже ветлэм мурт ар талэсь азьло улонысь кошкиз. Сомында ӵош улэм кузпалъёсты али та гуртысь уд шедьты. 60 ар пала ӵошен улӥзы Юрмалайысь (Ермолаевоысь) Никита Андреевич но Елизавета Васильевна Кибашевъёс. 80 аресъем пересьёс улонысь кошкизы огзы бӧрсьы огзы: арня пала гинэ виссы вал. Сыӵе ог-огзы борды бурмемын вылэм. Соин ик шуиськом егит нылъёслы: бызёно ке - Миктаослы гинэ. Жаль, Микит нимо пиос шер пумисько ни гуртъёсамы... Г. Парфенов. Удмурт автономилы - 80 Асьме калык туннэ но ӵуказе Кык толэзь но ӧз кыльы ни 4-тӥ ноябрёзь - Удмурт кун кылдэм дырысен 80 ар тырмытозь. Огласянь, со - праздник. Мукет ласянь - ортчемезлы йылпумъян лэсьтон нунал, азьланез сярысь малпаськон муг. Кузё луоз-а удмурт ас музъем вылаз? Мар лэсьтоно, сое улӟытон вылысь? Кыӵе сюрестӥ мыноно азьлане? Сыӵе юанъёслы валэктон утчаса, "Удмурт дуннелэн" редакциез ортчытӥз котырес ӝӧк сьӧрын пумиськон. Зэм, куд-ог мугъёсын йырин сое висъяно луиз кык люкетлы. Нырысь ас дораз ӧтиз огпӧртэм малпанэн улӥсьёсты, кыкетӥ нуналаз - мукет ӵектонъёслы дурбасьтӥсьёсты. Удмурт культура "Дэмен" огазеяськонлэн тӧроез Альберт Разин лыктӥз эшъёсыныз Лидия Ореховаен, Рево Разинэн, Клавдия Исуповаен ӵош. "Удмурт кенеш" огазеяськонлэн тӧроез Валентин Тубылов вуылӥз огназ. Вераськон лэчыт вал. Сое печатланы дасякумы кенешим тазьы: нимаз адямиос вылэ урдскылонъёсты газетэ ум сётэ. Калыкысь потӥзы но... отчы ӧз берытске ни Вераськонэз мытӥз Альберт Разин. Удмурт кун университетысь Адямиез эскеронъя институтлэн кивалтӥсез, философия нуакаосъя кандидат шуиз: - Асьмеды Запад юн зӥбе. Со шӧдӥське мультфильмъёсын но. но. Западысен дорамы вуэ жугиськон сям. Ӟуч выжыкылъёсысь - куинь батыръёс, Алёнушка, азьтэм Иван. Пичиысен озьы дышетэм нылпиосмылэн удмурт луэмзы уг поты ни. Уд паймы шат: Алнаш ёросысь Ӟатча школаын ӟуч сямен вераськыны кутскиллям. Пиналъёс семья пушкын ик ӟучомо. Тӥни та сярысь кема малпаськиськи мон. Наукаын уже ӟеч пӧрме бере, оло, чалякгес доктор луоно но буйгатсконо ни? Нош удмуртэз улӟытонъя пайдаё малпанъёсы улонэ пыӵатымтэ на бере, мылкыд кари "Дэменэн" кивалтыны. Ӵектонъёсы вань гуртэз выльдонъя, хозяйство нуонэз радъянъя. Асьме кунын асваньбур (собственность) кузёос уно - кун, коллектив, колхоз, община, нимаз мурт но мукет. Колхоз - кооператив ӧвӧл, малы ке шуоно, колхозник отын кузё ӧвӧл. Зэмос кооперативын со кузё луысал. Адямиез колхоз дышетӥз азьтэмъяськыны но юыны. Кулэм мурт доры но тордыны лыкто ни бере, мар веранэз на музон ужрадъёс сярысь? Кӧнязэ дэмланъёсме вылӥос уг учко! Яке мыдланьтыны шӧтало. Нош мынам соосты улонын эскереме потэ. Куд-огез оскыто: "Дэмен" но Разинъёс удмурт движениез люко-висъяло. Нош Разинъёс ноку но ӧз ужалэ на удмуртъёслы пумит. Мынам малпанэ валамон: удмурт нылпи медло удмурт. Нош солы люкетӥсьёс вань - мукетъёсыз. Соос уг лэзё гербере удмурт шӧм пыӵатыны но вӧсяськыны. Сыӵеос герберез пӧртэм калыкъёслэн праздниксылы пӧрмытон ньӧмын та ужрадэз ӟучомыто но суч-суч юонлы берыкто. Кемалась дасесь ни Алнаш ёросысь Кузебай школаез национальной школалы пӧрмытон концепция но проект. Дышетон мед мыноз удмурт сямен. Отын луозы йӧл завод, теплица, удмурт дӥськут вурон но музон мастерскойёс. Пиналъёс ӝыны нунал дышетскозы, ӝынызэ - ужалозы. Школаысь мед потозы сберкнижкаен но удмурт культураез азинтон мылкыдын. Нош али отын но уггес валало ни удмурт сямез, вӧсяськонэз, эктонэз. Кивалтӥсьёслы вазиським та пумысен бюджетэ нимаз чур кылдытон пумысен. Шуизы: Кузебайын медло огшоры школа. Балезино ёросысь Кестым школаын ваньмыз ик бигеръёс, ӟучъёс, удмуртъёс тодматско бигер кылэн. Нош малы Удмуртиын удмурт кылэз уг дышето? Кин янгыш со понна? Мукетыз Кузебай - Герд пумысен. Солэсь нимзэ таки ӧм сётэ Ижысь карлудлы (площадьлы) но, ульчалы но. Гердлы сӥзем лыдӟонъёсты ортчытоно вал удмурт сямен, ӟуче синхрон амалэн берыктыса. Ваньмыз музон ужрадъёс сямен ик таиз но радъяськиз ӟуч кылын. Удмурт тодосчиосмес (учёнойёсмес) ӟуч сямен вераськыны косӥзы. Ижлэн мэрезлы Анатолий Салтыковлы уноез удмуртъёс дурбасьтӥзы ке но, мар со лэсьтӥз? Казаньын, Чебоксарыын, Улан-Удэын - котькытын шӧдӥське выжы калыклэн шӧмыз. Ижын ӧвӧл. Удмуртъёсты куд-огез ӟуч газетъёс мыскылляло. Кин соослы пезьдэт сётыны кулэ? Юан нош ик юанэн кыле. Ми радъямы Удмурт драмтеатрлэн выль юртэзлы проектъёсъя ӵошатскон. Пыриськизы палэнысь адямиос но, шуом, Москваысь но Санкт-Петербургысь. Куать мурт пӧлын нырысетӥ интыез "сётытӥм" удмуртлы Касим Галихановлы. Нош юрт ӝутыны удмуртъёс ик ӧз люкетэ меда? Черкъёслы но Калашниковлэн музеезлы коньдон шедьтӥм, театрлы - ӧм. Лек ке но кылӥськоз, мон тазьы шуысал: партократъёс быдтӥзы коммунизм сярысь ӟеч малпанэз, попъёс - инмарлы осконэз, удмурт азьветлӥсьёс - удмуртэз азинтон сярысь малпанэз (идеяез). Татысь потэ мукет юан: удмурт маке лэсьтоз меда удмуртъёс понна? Со уг малпаськы калыкез сярысь. Ортчиз интеллигенцилы сӥзем конференция. Малпанэз ӟеч, пайдаез ноль. Малы? Интеллигенция вераське-вераське но уг ужа. Аслаз калыкез шоры вылтӥяськыса учке. Мон тазьы шуысал: интеллигенцимы калыкысь потӥз но... отчы ӧз берытскы ни. Бӧрдэм интые утчано аспӧртэм азинскон сюресъёс но "зӥбон кнопкаос". Сыӵе югдурлэн мугез валамон. Асьме интеллигенция тыро-быдо дышетскымтэ. Ӧжыт лыдӟисько ваньмыз, пӧлазы тӥ но, газетчиос. Соин ик Западлэсь гинэ адӟем карыны выриськом. Весь оскиськом юн кузёлы. Золэсь вал Иван Грозный, Петр И, Сталин. Нош соку калык шудо-а вал? Ӧй. Юан. Пумен кужмоя президент луон понна нюръяськон. Тӥ дурбасьтӥськоды ӟуч кандидатлы. Удмуртэз маин уг кельшы? Валэктон. Мон копак президентлэсь постсэ кылдытонлы пумит вал. Демократилы со уг тупа. Эксэй, генеральной секретарь, уллё кузё - ваньмыз огвыллемесь. Нош президент сярысь закон вань бере, кин ке понна ужано ни. Удмурт кандидатмы удмурт понна маке лэсьтоз шуыса оскон ӧвӧл. Кулэ вал мукет кандидатъёс, кылсярысь, Вячеслав Осипов, Иван Окулов, Виктор Туганаев, Владимир Савельев, Николай Стрелков. Соос пӧлысь кин ке нюръяськонэ пыриськысал ке, мон таизлы дурбасьтысал. Ӟуч кандидат котькуд ласянь адӟем карымон ӧвӧл. Но со - кужмо политик. Тӥни малы мылкыд кари ӟуч понна ужаны. Юан. Удмурт кандидатлы дурбасьтэмды уг поты ке, оло, чалмытак гинэ палэнын сылоно вал? Куд-огез шуэ: ӟуч кандидат, пе, "Дэменлы" коньдон сётӥз, Альберт Разинлы улон инты сӥзиз. Валэктон. Коньдон сярысь супыльтон зэм ӧвӧл. Улон инты пумысен мон тазьы шуысал. Одӥг комнатаен квартираям берытскыны интыез ӧвӧл ни. Ёрмон ултӥя адямиез. Ӟуч кандидат доры кабинетаз сюрысал ке, одно верасал тае. Огпол но та пумысен соин кенешонмы ӧй вал на. Нялтас верано ке, удмурт кивалтӥсьёслэсь кӧня адямиос юрттэт куризы! Ӧз басьтэ. Наукаосъя кандидатъёсмы общежитиосын курадӟо. Нылпиоссы но отын ик быдэ вуо. Юан. Озьыен, ӟуч кузё, удмуртэз сярысь, удмуртъёслы золгес юрттоз? Валэктон сётэ Лидия Орехова: - Мон ужбергатӥсь (предприниматель). Заводын но ужай. Номырлы уг ёрмиськы, ӟуч кандидатлэсь мыным номыр но кулэ ӧвӧл. Адӟисько: со мылысь-кыдысь ӝутэ заводъёсты, та уже кыске Кун Думаысь депутатмес Юрий Маслюковез. Ож тӥрлык лэсьтыны оско асьме предприятиослы. Заводъёс улӟо. Отын тыршисьёс уждун басьто, вузъёслы кулэяськыны ӧдъяло. Мон соослы вуттӥскьо сӥль-йӧл но музон сиён-юон. Озьыен, мыным но умой. Удмуртъёс пӧлын сыӵе ик сэзь кандидат луысал ке, мон таизлы дурбасьтысал. Тани Кезысь сырзаводлэсь кивалтӥсьсэ Анатолий Максимовез туннэ ик пуктыны луысал гурт удысъя но сиён-юонъя министре. Жаляса вераны кулэ: удмурт кивалтӥсьёсмы сыӵе адямиосты будэтыны ӧз сюлмаське. Командазы ӧвӧл, азьлань мыныны кужымзы уг окмы. Валэктон сётэ Клавдия Исупова: - Мыным но номыр кулэ ӧвӧл. Пиосы ужало, аслам пенсие потон дыры матэктэ. Малы-о ӟуч кандидатлы дурбасьтыны ӧдъяй? "Дэменэ" удмурт кивалтӥсьёсты ӧтим но, Валентин Тубылов сянаез ӧз лыктэ. Дырзы ӧвӧл удмуртъёсын пумиськыны. Вылаз ик, тодмо луиз на: удмурт кандидатлы дурваё бур кужымъёс - Союз правых сил шуон маке. Сыӵе движениен ӵош мон ноку но уг луы. Тодӥсько на: "Буммаш" заводмы тэк сылыку, ми ас дорысьтымы турын шыд вайылӥм. Табере югдур воштӥське. Мукет кандидатъёс - пенсионеръёс но ужтэк кылемъёс. Озьы мон ужаны мылкыд кари мыным тодмо мурт понна. Зэм, милемлы - Разинлы, Ореховалы, мыным - нокытын кыл уг сёто. Индустриальной ёросысь удмурт движенилэсь ужамзэ эскерыны люкасько но, монэ микрофон дорысь улляло. "Удмурт дуннее" ваем гожтэтме мыдланьтыса печатлаллям. Табере сое ӟуч газетэ нуоно луисько. Валэктон сётэ Рево Разин: - Асьмеос али малпаськиськом: кинэ быръёно - удмуртэз-а, ӟучез-а? Юанэз пуктоно мукет сямен. Мар луоз ӵуказе удмуртэн, туннэ тазэ бырйим ке? Удмурт кандидатлэн программаез ӧвӧл. Солы дурбасьтӥсь СПС асьме калыклэсь 300 миллиард долларзэ качаз но кунгож сьӧры выжтӥз. Удмуртлэн улон инъетэз - музъем. Сое вузан-басьтон сярысь вераськыку, адямиез но санэ басьтоно. Удмурт калыклэн али ляб вакытэз. Ӟуч кандидатэз асьме тушмонэн лыдъяса, солы пумит мынӥмы ке, собере со властез басьтӥз ке, мар каром асьмеос? Пумитъяськыны кужымед уг тырмы ке, утчано огъя кыл (компромисс). Та пумысен визьмо вераське тодмо тодосчи Карл Пономарев. Нош сое одӥгез газетмы вузаськись профессор шуиз. Политикае пыриськоно, удмуртлэн ӵуказе нуналэз сярысь малпаса. Азьвылъёсыз удмурт кузёосмы сое вунэтӥзы. Юрттэт интые, асьсэос ик удмуртъёсмы пумит урод уж нуизы. Биньгозыез выльысь кырме Альберт Разин: - Амалтэк тодэ ваёд азьвыл удмурт кивалтӥсьёсты. Соос доры куинь муртэ вуттылӥ капиталист карон вылысь. Чупырес удмурт кышномуртлы юрттон ласянь малпаськом ай шуизы но вунэтӥзы. Со куспын Виктор Хорошавцев таӵе амалэн ик бурдъяськиз но узыр ужбергатӥсь луиз. Ӵектӥ: "Удмурт кенеше" вице-президент кароно "Дэменлэсь" но Удмурт нылкышно кенешлэсь тӧрооссэс. Сое умоен ӧз лыдъялэ. Кылдӥз быръёнъя "Элькун" блок. Со, пе, ужалоз поръёсын но музон калыкъёсын ӵош. Нош Грахын "Удмурт кенеш" султӥз пор кандидатлы пумит, Киясаын, Вавожын, Шарканын - удмуртъёслы пумит. Кызьы сое валано? Удмурт движение "Дэмен" но Разин тул шукко шуон шонер ӧвӧл. Удмурт движение кемалась люкемын-висъямын ни. Удмурт калык но озьы ик пилемын. Ог-огмес сьӧдман нокинлы но кулэ ӧвӧл Вера Валентин Тубылов: - Асьме удмурт движениын югдур таӵе. Матысь дыре "Удмурт кенешлэн" районъёсысь ёъёсаз ортчытозы конференциос. Собере луоз "Удмурт кенешлэн" тямысэтӥ ӧтчамез (съездэз). Пӧртэм ужпумъёсты эскерыса, со быръёз финн-угор калыкъёслэн конгрессазы кызь делегат. Таиз ужрад Хельсинкие люкаськоз декабре. Делегатъёс Удмуртиысь гинэ уз мынэ. Башкириысь удмуртъёс асьсэ адямизэс отчы бырйизы ни. Ӧтчам ик йылпумъян лэсьтоз: пусъемез пӧлысь ма быдэстэмын, ма ӧвӧл. Удмурт движениез зэмен ик юдэсэн-юдэсэн пильыны выро. Нош "дэменъёслэсь" ымзэс уг ворсало. Берло пумиськонын но мон Альберт Разинлы кыл сётӥсько вал - ӧз лэзе люкаськемъёс. Соослэн куд-ог ӵектонъёссы улонэ зэмен ик уг пыӵало. Малы ке шуоно, туннэ быдэстымонэсь ӧвӧл на. Тани Удмурт центр кылдытыны 2 миллион 500 сюрс манет кулэ, пе. Кытысь сое шедьтод? Асьмеос музъем вылын улӥськом ук. "Дэмен" дурбасьтэ общиналы, ми - гурт кенешлы. Ужмы шуг мынэ. Кытын-отын пӧрме ке, бадӟым пайда вае. Нош мар со община? Тодмо ӧвӧл. Кызетӥ даурлэн кутсконаз со вал ке, улон сю арскын воштӥськиз ни ук. Озьы ик верасал гражданской общество сярысь дэмлан пумысен но. Мар со сыӵе? Кулэ ке, сое законэн юнматоно. Кун Кенешын али кӧня кужыммы? Со уз тырмы. Кылъёс сярысь законэн но кӧня выриськом ни. Проект али дась. "Кылъёс сярысь" уз нимаськы - нимаськоз "Кун кылъёс сярысь". Кылъёс сярысь закон республикаямы кулэ ӧвӧл. Со Россиын вань ни, мед гинэ ужалоз. Асьме дорын сыӵе закон огшоры ялонлы (декларацилы) пӧрмысал, нокинэ номыр лэсьтыны ӧй косысал. Берло дыре "Удмурт кенеш" сярысь ӵем верасько, малы ке шуоно, кужымзэ шӧдо. Кынартэм луысалмы ке, тэк бызгетэлэ ас поннады шуысалзы. Удмурт движение вань кожасько мон. Ми сярысь умойтэм кылъёс нырысь ик пото коньдон бордысь. "Удмурт кенешлы" азьвыл со кӧня ке висъяськылӥз Нациосын ужанъя комитет но министерство пыр. Табере "Удмурт кенешлэн" статусэз музон: со огазея вань удмуртъёсты. Солэн интыосын ёзъёсыз вань. Югдурез депутатъёслы валэктӥм но, соос соглаш кариськизы бюджетын милемлы нимаз чур кылдытыны. Музон организациос милям кадесь ӧвӧл. Кылсярысь, Удмуртиысь Бигер общественной центр (ТОЦ) пыре Дуннеысь бигеръёслэн конгрессазы, Удмурт культурая "Дэмен" огазеяськон - "Удмурт кенеше". Бюджетысь басьтэм коньдонэз кызьы кутэммес учко вытъёсъя (налогъёсъя) инспекциос но Коньдон ужпумъёсъя министерство. Весяк коньдонэн юрттӥсьёсмы ӧвӧл. Нош дырын-дырын сое кӧня ке сётъясьёс вань. Озьы машина басьтӥм. "Герд" газетмес печатланы но юртто. Одӥгез бадӟым сюлмаськонмы - удмурт кивалтӥсьёс дасян. Зэм, удмурт сяммы татын но кытӥяз туж люкетэ. Кемаласьгес ини Удмурт Республикаысь Правительствоен кивалтӥз удмурт воргорон Степан Ефремов. Компартилэн обкомаз огшоры секретарь (нырысетӥ ӧвӧл) вал Астраханьысь вуэм маке Валерий Марисов. Ефремовлы дэмлазы нырысетӥ секретарь кариськыны. Удмурт сямызъя пыкиськиз. Марисовез республикалы йыр каремзы бере, Ефремов шуиз ни: тодысал ке тазьы берытсконзэ, ачим соглаш луысал. Нош солы таӵе учыр ӧз тупа ни. Югдур отӥяз кызьы воштӥськиз? Мон республикаысь Вылӥ Советын ужаку, ужпум ӝутскиз Удмуртиысь химия ож тӥрлыкез быдтон сярысь. Та вакытэ ик Татариысь но Башкириысь Кун Кенешъёс куто закон: химияя ож тӥрлыкез милям республикаетӥмы нуллыны лэзёно ӧвӧл. Отысь кивалтӥсьёсын пумиськыкум юасько: милемлы сюресэз ворсады, нош ми химияя ож тӥрлык понна янгышесь шат? Мыным курыт юан сётӥзы: нош малы-о сыӵе ож тӥрлык тӥ доры вуэм - эн лэзелэ вал. Со Татарие дугдымтэ - Кизнере интыяськем, Башкирие сюрымтэ - Камбаркае лыктэм. Озьыен, Удмуртиысь кузё зэмос патриот вылымтэ, кыдёке азьпала учкымтэ, кышкыт мае ке ас дораз лэзем. Патриотизм кыл огшоры буш маке ӧвӧл. Вордскем музъем, анай-атай - ваньмыз соин герӟаськемын. Мон Вылӥ Советын дыръя ик быдэс ар утчамы калыкез дышетонъя министр. Кӧняез визьмо удмуртъёс пумит кариськизы отчы пуксьыны. Мукетыз умойтэмгес сяммы: лэсьтэммес но возьматыны ум пишмытӥське. Ум дӥсьтӥське меӵак вераны: мон малпай, мон пуктӥ. "Удмурт кенешлэн" азьвыл чакламтэ ӧтчамаз кутэмын решение: Кун Думаын огез депутат удмурт медло. Нош отчы дасямын ни вал ӟуч адями. Валэктон уж нуимы но, Светлана Смирноваез дэмланэн соглаш кариськизы. Таиз малпанмы озьы быдэсмиз. Удмурт Республика - удмуртъёслэн мылкыдзыя кылдытэм кун. Отын президент - огшоры кивалтӥсь ӧвӧл, со флаг но герб сямен ик республикаез тодметась кивалтӥсь. Малы ке-а татысь бигеръёс Удмуртилы президентэ кандидатэ одӥг адямизэс но ӧз дэмлалэ. Азьвыл чакламтэ ӧтчамын президентэ кандидатъёсы ӵектэмын вал кӧня ке удмуртъёс. "Удмурт кенеш" дугдӥз огез вылэ. "Дэмен" дэмла троссэгес поттыны. Котькудӥз 2 процент люказ ке, кыӵе-о пайдаез луоз? Мон уг малпаськы, быръён дыръя лыдпусъёсты алдаса возьматозы шуыса. Участокъёсын пукозы пӧртэм кандидатъёслэн адямиоссы. "Дэменъёс" монэ пыкыло: номыр ӧз лэсьты, пе, "Удмурт кенеш". Мон берло съездын гинэ татчы президентэ быръемын бере, кыл кутӥсько со бере ужамлы. Монэ ик янгыше уськыто дуннеысь организациосын кусып возьымтэе понна. Пичи калыкъёсты возьматонын но маке-маке лэсьтӥськом кадь. Мае ке адӟемед уг поты - сое уд адӟы. Куд-ог районъёсын "Удмурт кенеш" ужам, шуо, удмуртъёслы но поръёслы пумит - ӟучъёс понна. Татын ми решение кутӥм вал удмуртъёслы дурвайыны. Кытын но отын кулэен лыдъяллям, лэся, мукетъёсызлы юрттыны. Быръёнъёсын котькин мед вормоз, адямиос ужаны мед кылёзы азьвыл интыосазы ик. Ваче кусыпъёс котькыӵе медло - нош тыршоно калык понна. *** Тазьы мынӥз вераськонлэн огъя гожез. Газетэ ум печатлаське ог-огдэ лек пыкылонъёсты, сьӧраз ортчем шонаськонъёсты, нимаз кандидатъёсты ушъямъёсты но курламъёсты (тазэ закон уг лэзьы). Удмурт калыклэн улоназ зэмен ик лэчыт вакыт вуэмын. Улон-вылонмы урод шуыса ӝожтӥськонмы азьын асьмеос асьмелэсь ик юаны кулэ: нош кин асьмеды сыӵе югдуре вуттӥз? Кин коммунистъёсты кивалтонысь палэнтӥз? Митингъёсын черекъясьёс. Кин Борис Ельцинэз кык пол президентэ бырйиз? Асьмеос. Кин узыръёслы депутатъёслэсь мандатъёссэс сётъяз? Бырйисьёс. Демократиез котькызьы курла, но солэн ӟеч емышез вань. Котькудӥзлы со сётэ туж бадӟым кужым - бырйыны право. Россилэн Президентэз но, районысь Советлэн депутатэз но - ваньмыз асьмемын быръем муртъёс. Удмурт Республикалы 80 ар тырмонэз асьмеос пусйыны кулэ нырысетӥ президентэн. Эн янгышалэ! Асьмеды лыдъялозы 2002-тӥ арын Россиын улӥсьёсты лыдъян-чотанъя ужрад (перепись) ортчоз. Соин валче Правительство нимысьтыз комиссия кылдытӥз. Тӧрое юнматэмын коньдон ужпумъёсъя министр Алексей Кудрин. Со сярысь нимысьтыз постановление улэ гожтӥськиз Правительстволэн Тӧроез Михаил Касьянов. Комиссие пыризы Кун Думаысь адямиос, Россиысь Югдурез утёнъя, Экономикаез азинтонъя но вузкаронъя, Тазалыкез утёнъя министерствоосын но мукет кун ёзъёсын ужасьёс. Басьтэмын Интернет пыр. "Инкуазь. Адями. Эрик" "Удмурт кенеш" ассоциацилэн президентэз Валентин Тубылов журналистъёсын алигес пумиськыкуз химия ож тӥрлыкез быдтон пумысен таӵе малпанзэ вераз: "Паймоно кадь, малы та кышкыт ож тӥрлык Удмуртие гинэ шедем меда? Басьтом Кизнерез. Татария солы кыдёкын ик ӧвӧл, но бигеръёс доры ож тӥрлык вуымтэ. Табере Камбарка. Таизлы но Башкирия матын луэ. Отын но арсеналъёс ӧвӧл. Озьыен, бигеръёс но башкиръёс ас дыраз пумитъяськыны быгатӥллям. Нош Удмуртиысь кивалтӥсьёс сое асьме доры интыяны соглаш луиллям, вылды"... Химия ож тӥрлыкез быдтон пумысен кӧня кенешонъёс ортчизы ни. Тани алигес но асьме дорын радъямын вал "Химия ож тӥрлыкез быдтон - 2000. Экология но технология" конференция. Солэн ужаз пыриськизы Россиысь но мукет кунъёсысь специалистъёс. Нош августэ Кизнерын ортчиз отын возиськись арсеналэз быдтонъя объектлэсь инъетсэ эскерон кенеш. Отчы ветлӥзы Россия Федерациысь Обораная министерствоысь радиацияя, химияя но биологияя кышкытлыклэсь утиськонъя войскоослэн управлениысьтызы генерал-майор В. А. Ульянов, Россия Федерациысь Кун Думалэн депутатэз С. К. Смирнова, Кизнер но Камбарка ёрос администрациослэн кивалтӥсьёссы, "Гипросинтез" акционер огазеяськонын, Россиысь Калыкез дышетонъя министерстволэн "Медбиоэкстрен" управленияз, "Прикампромпроект" акционер огазеяськонын, Удмурт кун университетын ужасьёс, озьы ик вал пӧртэм организациосысь ыстэм муртъёс. Генерал-майор В. А. Ульянов ивортӥз туэ июль толэзе Россиысь Правительствоын ортчем пумиськон сярысь. Отын Россия Федерацилэн Президентэзлы химия ож тӥрлыкез быдтонъя программаез быдэсъян сярысь доклад дасямын. Та ужлы Правительство туэен ӵошатыса вуоно арын уногес коньдон висъян сярысь ужпум кутӥз. Кизнерын та ож тӥрлыкез быдтонъя объектлы проект дась ни. Со бордын тросгес ужазы "Прикампромпроект" АО (Ижевск), "Гипросинтез" ОАО (Волгоград), Удмурт кун университет, Ижевскысь медициная академия. Проектэз дасянын "Гипросинтез" валтӥсез организация луэ. Отын ужасьлэн В. Г. Блоклэн верамезъя, объектэз лэсьтонлы висъям коньдон пӧлысь 70 процентэз мыноз котырысь инкуазез но адямилэсь тазалыксэ утёнлы. Сое лэсьтыны 28 толэзь дыр сётӥське. Химия ож тӥрлыкез быдтыны кулэ 4 ар ӵоже. Отын ужалоз 1289 адями. Проект али кун экспертизаын. Документ сётэмын Удмурт Республикаысь Правительствое. Таин валче ватсалом на: туэ 20-тӥ-21-тӥ октябре Удмурт кун университетын ортчоз улосъёс куспын научно-практической конференция. Со "Химия ож тӥрлыкез быдтон: инкуазь, адями, эрик" шуыса нимаськоз. Н. Байтеряков. Удмурт Республикалы президентэ пусъем кандидатъёс (2000-тӥ арын 19-тӥ сентябрьлы) 1. Ануфриев Вячеслав Николаевич, вордскемын 1946-тӥ арын 1-тӥ январе, дышетскемез вылӥ, "Удмуртпродконтракт" кун управление (Ижевск город), генеральной директор, улэ Ижевск городын, КПРФ-лэн Удмурт Республикаысь комитетэзлэн бюроезлэн членэз. Ӵектэмын бырйисьёслэн кичӧлтӥсь группаенызы. 2. Вершинин Павел Николаевич, вордскемын 1949-тӥ арын 3-тӥ ноябре, дышетскемез вылӥ, Удмурт Республикаысь Кун Кенеш (Ижевск город), Тӧролэн Нырысетӥ воштӥсез, улэ Ижевск городын. Ӵектэмын бырйисьёслэн кичӧлтӥсь группаенызы. 3. Волков Александр Александрович, вордскемын 1951-тӥ арын 25-тӥ декабре, дышетскемез вылӥ, Удмурт Республикаысь Кун Кенеш (Ижевск город), Тӧро, улэ Ижевск городын. Ӵектэмын бырйисьёслэн кичӧлтӥсь группаенызы. 4. Ганза Николай Алексеевич, вордскемын 1946-тӥ арын 27-тӥ октябре, дышетскемез вылӥ, Удмурт Республикаысь Правительство, (Ижевск город), Тӧро, улэ Ижевск городын. Ӵектэмын бырйисьёслэн кичӧлтӥсь группаенызы. 5. Головизнин Леонид Борисович, вордскемын 1955-тӥ арын 11-тӥ мартэ, дышетскемез шор, Ижевск городысь Трамвайно-троллейбусной управление, КПП-ысь валтӥсь контролёр, улэ Ижевск городын. Ӵектӥз ассэ ачиз. 6. Едигарев Андрей Борисович, вордскемын 1962-тӥ арын 5-тӥ январе, дышетскемез йылпумъямтэ вылӥ, "Фронт" ООО (Глазов город), радиоысь валтӥсь редактор, улэ Глазов городын. Ӵектӥз ассэ ачиз. 7. Забильский Владимир Викторович, вордскемын 1948-тӥ арын 25-тӥ декабре, дышетскемез вылӥ, РАН-лэн Урал ёзысьтыз физико-технической институт (Ижевск город), наукая ужась, улэ Ижевск городын. Ӵектэмын бырйисьёслэн кичӧлтӥсь группаенызы. 8. Кокорин Михаил Константинович, вордскемын 1946-тӥ арын 21-тӥ ноябре, дышетскемез вылӥ, Удмурт Республикаысь Кун Кенеш (Ижевск город), депутат, Законъёсты быдэсъямез чакланъя, калыкез кышкытлыклэсь утёнъя но гражданъёслэн правооссыя ялан ужась комиссилэн тӧроез, улэ Ижевск городын. Ӵектэмын бырйисьёслэн кичӧлтӥсь группаенызы. 9. Рудчук Сергей Васильевич, вордскемын 1963-тӥ арын 26-тӥ ноябре, дышетскемез вылӥ, пенсионер (Ижевск город), улэ Ижевск городын. Ӵектӥз ассэ ачиз. 10. Тимофеев Владимир Борисович, вордскемын 1939-тӥ арын 16-тӥ июне, дышетскемез вылӥ, "Ижевский мотозавод" Аксион-Холдинг" ОАО (Ижевск город), инженер, улэ Ижевск городын. Ӵектӥз ассэ ачиз. 11. Щуклин Сергей Борисович, вордскемын 1956-тӥ арын 22-тӥ январе, дышетскемез вылӥ, Россиысь Коньдон ужпумъёсты сэрттон-пертчонъя но банкротствоя Федеральной службалэн Урал-Сибирь межрегиональной улосвыл ёзэзлэн агентствоез, агентстволэн кивалтӥсез, улэ Ижевск городын. Ӵектэмын бырйисьёслэн кичӧлтӥсь группаенызы. Ижевскысь цирклэн улонысьтыз Удмуртилэн шоркараз нырысетӥ цирк лэсьтэмын 1926-тӥ арын Сенной базар вӧзын. Чакламын 1500 учкисьлы. Ӝутэмын вал пулэсь, коръёслэсь но пулэн шуккыса, шуныт сётӥзы пуэн эстӥськись гуръёс. Электролампаос интые югдытӥзы керосин лампаос. Нырысетӥез представление ортчиз 1926-тӥ арын 21-тӥ сентябре. Собере, котькуд сӥзьылысен кутскыса, тулысозь, ог-огзэс вошъяса, Ижевске вуылӥзы нимаз гастролёръёс но бадӟымесь коллективъёс. Кызетӥ-куамынэтӥ аръёсы Ижевскын быгатэмзэс возьматъязы валэн етӥз ворттылӥсь Серж агай-вынъёс, иллюзионист Кио, нюръяськись Иван Поддубный, тэтчась клоун Виталий Лазаренко... Вань удмурт калыкез но ижъёсты тужгес но паймытӥз дрессировщик Анатолий Анатольевич Дуров (егитэз). Со цирке вуылӥз 1928-тӥ, 1933-тӥ, 1937-тӥ аръёсы. Дыр ортчиз - цирклэн пу юртэз сисьмиз. Со интые 1943-тӥ арын пуктӥзы кирпичлэсь выль юрт. Таиз сылӥз но ужаз ӝыны даурлэсь кема. Но аръёс юн кирпичез но куашкато вылэм. Берло аръёсы отчы пыраны ик кышкыт луиз - выж куашкано кадь вал ни. Таиз но юрт табере ӧвӧл ни, сое туэ куашкатӥзы. Солэн батыр кадь, котрес липето но ӝужытэсь колоннаосын выл-тусыз кылиз на асьмелэн визьмамы, фотоосын, газетъёсын но книгаосын гинэ. Али Ижын лэсьтӥське выль цирк. Вужъёсызлэн, кык циркъёслэн бервылазы ик. Таиз луоз бадӟымгес, юнгес но чебергес. Вуоз со, куинь ар ортчыса. Нош туэ гужем ик вуттэмын ни вал цирклэн манежез. Отын, гужем пӧсь нуналъёсы представлениос ортчизы ни. Дунтэк. Манежез эскерем мактал, цирк улонэз данъяса но дунъяса. В. Рогалев. Ку кузё луом? Анай-атае кулӥзы 1999-тӥ арын. Ми улыны выжим соослэн юртазы. Табере прописка кулэ. Но гурт администрациын шуизы, нырысь ик, пе, наследствоез басьтоно. Мон озьы ик кари. Но коньдон ӧвӧлэн, документъёсты басьтыны уг быгатӥськы. В. П. Улон интыдыя пусйыны пумит луыса, шонер лэсьто, угось тӥляд ӧвӧл наследстволы право сярысь свидетельстводы. Адями но закон Куректон пыд улысь потэ Зэмлыкез шедьтон понна ултӥям, обидем адямилэн одӥг сюресэз вань: судэ вазиськыны. Берло осконзэ со соин герӟа. Но таин гинэ мискиньлэн курадӟонъёсыз уг йылпумъясько. Угось ӵем дыръя судлэн решениосыз быдэсмытэк кылё. Малы? Та ужпумез умойгес возьматыны луоз куд-ог учыръёс вылын. Туэ гужем "Удмурт дунне" газетэ вазиськиз мар карыны ёрмем кышномурт. Удмурт нылкышно Анна Максимовна Еманова семьяеныз улэ вал ньыль комнатаё квартираысь кыказ комнатаын. Бускельёсызлэсь висъяськон но нимаз улон вылысь, кышномурт ас улоннизэ кык комнатаё квартиралы воштыны малпа. Та ужзэ капчигес но ӝоггес быдэстыны мед луоз шуыса, со вазиське В. М. Пушинлы, со вакытэ приватизацияя агентствоын ужасьлы. Воргорон кышномуртэ юн оскытэ, квратиразэ воштыны юрттоз шуыса. Но со понна одӥг курон пуктэ: карттылы, пе, улон интыысьтыды потоно луоз. Озьы ик каремын вал. Кык комнатаосын улӥсь семья огаз комнатае гинэ интыяське. Нош бушатэм 9 квадратной метр комнатаез В. Пушин гостиница выллем комнаталы воштэ но собере сое 23 сюрс манетэн вуза. Кескич воргорон коньдонэз но комнатаез вузан сярысь кагазэз но кышномурт кие уг сёты. Трос дыр ортчыса гинэ В. Пушин кышномуртлы расписка шуон сётэ. Отын со гожтэ, А. Емановалы 21 сюрс манет коньдон сётыны кулэ шуыса (кылемез коньдон, пе, квартира воштон ужъёслы кошкиз). Но та дырозь "юрттӥсезлэсь" коньдонзэ Анна Максимовна ӧз на басьты. Нош семьяез, кык комнатаё квартираын улон интые, озьы ик ёркыт комнатаын курадӟе. Тӥни озьы нылкышнолэн ӟеч малпанъёсыз семьяезлы пумит берытскизы. Кылем арын ноябре А. Еманова Ижысь Устинов ёрослэн судаз вазиське. Судлэн пуктэмезъя, В. Пушин А. Емановалы пунэм тыронзэ берыктыны кулэ. Со сяна, В. Пушин кышномуртлы 12 сюрслэсь ятыр коньдон тырыны кулэ на солэсь коньдонзэ кема дыр ӵоже бергатэмез понна. Судлэн решениосыз шонересь. Но алдам кышномуртлэсь улонзэ соос ӧз капчиятэ. Со озьы ик коньдонтэк но нимаз квартиратэк улэ. Нош коньдон нуналлы быдэ дунтэма. Мар басьтод на ай соин? Кескич воргорон ас тыронъёсызлэсь кемалась пегаса улэ ини. Анна Максимовналы кызьы но озьы юрттон вылысь, гожтэтэн вазиським Юстицияя министерствое. Та ужпумез отын пыр-поч эскериллям. Шараяськизы воргоронлэн мукет сьӧд ужъёсыз но. В. Пушин вылэ министерствое эшшо но ӝожтӥськонъёс вуылэмын ни вылэм. Озьыен, со одӥг муртэз гинэ пӧямтэ. Ваньзэ тае лыдэ басьтыса но обидем адямиослы коньдонэз берыктон вылысь, судебной пристав О. Семакина туэ май толэзе В. Пушинлэсь ваньбурзэ арест улэ басьтэ. Но Пушинлэн кузпалыз августэ Устинов ёрос судэ вазиське, ваньбурез арестлэсь мозмытыны курыса. Суд солэсь куронъёссэ лыдэ басьтэ. Нош Анна Максимовна ялан коньдонзэ возьма. Юстицияя министерствоын В. Пушинлэсь сьӧд ужъёссэ табере чакласа возё ке но, кышномурт ыштэм коньдонзэ но комнатазэ берыктыны быгатоз на шуыса оскон бадӟым ӧвӧл. Угось кескич адями туж умой тодэ, кызьы законэз палэнтӥ ортчыны луэ - соин ик со кескич, нош асьмеос, удмуртъёс, котькыӵе тодмотэм адямилы оскыны дасесь. Судлэн кутэм решениосыз куд-ог дыръя туж валантэмесь луо. Шугадӟонэ сюрем муртэз соос утьыны уг быгато? Кин-о со понна янгыш? Судья? Зэм, судьяос пӧлын но котькыӵеез вань, дыр. Нош мар кароз судья, со законэз чакласа гинэ ке ужаны кулэ. Иське, законъёсмы асьмелэн тупыттэмесь? Та шимес учыр озьы ик вал Ижын, егит кузпалъёслэн Анна но Андрей Варечкинъёслэн семьяязы. Со сярысь газетамы гожтӥз вал Анялэн Вавож ёросын улӥсь анаез ("Удмурт дуннее" печатламын 1999-тӥ арын 21-тӥ декабре). ... Вазь ӵукна Анялэн картэз кык аресъем пиеныз нянь дуре шуыса магазинэ потӥз. Сюресэз выжыкузы, кыксы ик иномарка шуон улэ сюризы. Воргорон пыраклы инвалид кылиз, нош пизэ катьяны ӧз ни луы. ВМВ автомобильлэн кузёез солэсь мугорзэ сюрес вылтӥ кема кыскыса нуэм на. Собере вал суд. Йыруж лэсьтэм водительлы Д. Ляшенколы, одӥг адямиез сӧсырмытэм но пиналэз вием понна, суд тупатӥз... 25 сюрс манет тырон. Тӥни собыдӟа коньдонэн гинэ дунъямын вал егит семьялэн курадӟонъёсыз. Но со коньдонэз но Ляшенко тупатэм дыр ӵоже ӧз тыры. Туж эрико улӥз, иномаркаеныз лошкинъяса. Газетмылэн Прокуратурае но Юстицияя министерствое вазиськемез бере, водителез кыл кутытон понна мар но со лэсьтэмын вал. Но "выль ӟуч" В. Ляшенко ӝогак гинэ "начар" муртлы пӧрмытскем. Ваньбурзэ, машиназэ но чаляк гинэ вузам. Ляшенко понна Варечкинъёслы коньдон тыризы солэн ӵыжы-выжыосыз, но 25 сюрс манет ӧз, 2 сюрс манет гинэ. Шӧдтэк шорысь "начармем" водитель, вань возьытсэ ыштыса, гань-гань эрикын улэ, нош шудтэм егит семьяын ноку уз чузъяське ни пинал куараос, сахарной диабетэн курадӟись Аняез пинал вайыны врачъёс уз ни лэзе. Вераны кулэ, та ужез сэрттыкумы, янгышъёсыз шараямын вал судебной приставлэн Т. Поленоклэн но. Ляшенко пумысен судлэсь кутэм решениоссэ урод быдэстэмез но йыруж лэсьтэм водителез утьыны турттэмез понна со кыл кутон улэ кыскемын. Тӥни озьы судъёс ортчем бере но луыло на трос интыостӥ бызьылонъёс но куректонъёс. Котькытын-а меда озьы яке Россиын гинэ-а? П С: Газетмылэсь куронъёссэ ӝегатскытэк быдэстэмзы понна тау кариськом Удмуртиысь Юстицияя министерствоын но Прокуратураын ужасьёслы. Т. Банникова. Машина лэсьтон удысын ужасьёс! Правительстволэн нимыныз сюлмысьтым ӟечкыласько тӥледыз праздникеныды - Машина лэсьтӥсьёслэн нуналэнызы. Удмуртилэн улоназ тӥляд удысты котьку валтӥсь инты басьтылӥз. Ортчись даурлэн берло дас аръёсыз яркыт возьматӥзы, тӥляд ужды промышленностья быдэс комплексын экономикаез огсыр возьыны юрттэ шуыса. Жаляса верано луэ, радъямтэ рынокен экспериментъёслы дась луымтэмы удысэз куашкатон калэ вуттӥз, сое дугдытыны луиз вить ар ортчыса гинэ. Но предприятиослэн кивалтӥсьёссы, ужась коллективъёс чигнанлы ӧз сётске, поизводствоез радъян понна выль амалъёс шедьтӥзы, азьмынӥсь технологиосты пыӵатӥзы, выль пумо вузъёс поттыны кутскизы. Тужгес но адӟем карымон вал ортчемез 1999-тӥ ар, соку югдур ӟеч-ӟеч тупатскиз. Чутрак кулэсмиз изъянэн ужась предприятиослэн лыдзы, производство пайда сётыны кутскиз, йылӥзы ужан интыос. Соиз но шумпотымон, коллективъёс гинэ утё на азьвыл аръёсысь ӟеч сямез - праздникез ужысь вормонъёсын пусъёнэз. Тани туэ но Ижевскысь машина лэсьтӥсьёс праздниксэс пумитало кузьымен - потӥз 25 сюрсэтӥез "Орбита" автомобиль. "Ижмаш" акционер огазеяськонэз огъя басьтоно ке, кылем арысь та вакытэн ӵошатыса, туэ 8 тоэзьскын производство будӥз 226 процентлы. Та ласянь азьпалан мыно "Ижнефтемаш" акционер огазеяськон, "ИЭМЗ "Купол" кун предприятие, отын вуз поттонзэс йылэтӥзы 523 но 437 процентлы. Со нош ик возьматэ, Удмуртиысь машина лэсьтӥсьёс шонер сюрес вылын шуыса. Удмурт Республикаысь Правительство оске: промышленностез азинтон экономикаез ӝутонын одӥгез шонер сюрес луэ, та удыслы кун бадӟым саклык висъя. Тӥледлы но семьяостылы сӥзисько юн тазалык, шудбур, экономикаын мед луозы умоесь воштӥськонъёс, ӟеч малпанъёсты уж вылын мед быдэсмозы. Удмурт Республикаысь Правительстволэн Тӧроез Н. А. Ганза. Утэм медаль яркыт чиля Кызьы ивортэмын вал, Удмуртиысь спортсменка Мария Феклистова Сиднейын ортчись Олимпиадаын ыбылӥськонъя ӵошатсконъёсын бронза медаль утӥз. Бадӟым вормонэныз ӟечкыласа, Удмурт Республикаысь Кун Кенешлэн Тӧроез Александр Волков солы телеграмма ыстӥз. Отын верамын: "Быдэс Удмуртия сак эскерыса улэ Сиднейын ортчись спортъя праздникез. Ми данъяськиськом, Тӥляд нимды олимпиада шудонъёсын ыбылӥськонын бронза медаль басьтэменыды табере историе кылёз шуыса. Вань сюлмысьтым ӟечкыласько Тӥледыз та вормонэныды. Удмуртия Тӥледлы со понна тау каре, Тӥ республикамылэсь спорт удысын данзэ юнматонын бадӟым уж лэсьтӥськоды. Оскиськом Тӥляд быгатонлыктылы но вормыны тыршемдылы. Олимпиадалэн зарниез понна нюръяськонын азинсконъёс Тӥледлы!" *** Удмурт Республикаысь Кун Кенешлэн Тӧроезлы Александр Волковлы телеграмма вуиз Россиысь Олимпиадая комитетлэн президентэзлэсь Виталий Смирновлэсь. Отын шуэмын: "Гажано Александр Александрович! Ӟечкыласько Тӥледыз землячкадылэн Мария Феклистовалэн Сиднейын ортчись ЪЪВИИ Олимпиада шудонъёсын бадӟым вормонэныз но бронза медаль басьтэменыз. Ми вылӥ дунъяськом Удмурт Республикаын физкультуралы но спортлы саклык висъямдэс. Тӥляд сюлмаськеменыды атлетъёс пыро страналэн огазеям командаосаз. Ми валаськом, татын Тӥляд но ужды шӧдӥське. Оскиськом, Мариялэн Олимпиадаын вормонэз республикаяды физкультураез но спортэз азинтонын уката бадӟым кужым сётоз шуыса. Сиднейысь ӟеч мылкыдъёсын". 01 ивортэ Уг жаля ваньбурез но, улонэз но Ортчиз ини 2000-тӥ арлэн тямыс толэзез. Капчиесь ӧй вал со толэзьёс. Уката но мур пытьы кельтӥз август - "Курск" атомоход, Останкино телебашня, пуштылонъёс, ыбылӥськонъёс... Нош тылпуос сярысь веранэз ик ӧвӧл, соос уг кулэсмо. Останкино телебашня сярысь котькин ӟеч тодэ ни. Нош асьме дорын вышкаос ласянь югдур кыӵе меда? Тылпуослэсь утиськонъя служба алигес Удмуртиысь башняосты эскериз. Со возьматӥз: югдур татын но пӧртэм вылымтэ. Москваын выллем тылпу потыны быгатоз котькудаз вышкаын. Малы? Тылпулэсь утиськон ужъёслы коньдон висъяське туж ӧжыт яке воксё но уг. Тылпулэсь утиськон автоматика уг ужа, куд- ог вышкаосын со чик но ӧвӧл. Улон интыосын туэ кышкытэсь тылпуос уно гинэ потылӥзы. Тани 2-тӥ сентябре 22 час 37 минутэ тылпу кутскиз Ижевскысь Богдан Хмельницкий ульчаысь одӥгаз юртын. Вакчи дыр куспын тыл эшшо куинь улон коркаосы вуиз. Быдэсак ӝуаса быриз, шуыны луоз, улыно-вылыно пу корка, юртъер котыръёс. Куштӥськем кортлы пӧрмизы "Волга" но ЛУАЗ автомобильёс, "Москвичлэн" кузовез, быриз уно ваньбур. Тылпулы кышкытлыкезъя 3-тӥ номер сётэмын вал. Сое кысыны вуизы 15 автоцистерна, рукавен 2 автомобиль, ӵынэз кыскись автомобиль но мукет нимысьтыз техника. Тылпуэз дыраз кортнаны луиз. Озьы ке но, изъян адӟемын 50 сюрс манетлы. Туэ 8 толэзь ӵоже 1578 пол тылпу потылӥз, изъянэз 10,5 миллион манетлы лыдъяське. Тылын быриз 90 адями (кылем арен та вакытэн ӵошатыса, 10-лы уногес), сӧсырмиз 114 мурт. Тылын быдтэмын 880 юрт (22,6 процентлы уногес), 413 тонна пудо сиён, 37 техника, 158 йыр пудо. Та лыдпус эшшо но бадӟымгес луысал, тылпулэсь утиськонъя службаын ужасьёс кышкыт учыре дыраз ке ӧй вуысалзы. Озьы ваньбур утемын 102 миллион манетлэсь унолы, улонэз утемын 82 адямилэн, тылысь поттэмын 97 пӧртэм техника, 1283 йыр пудо. Кызьы возьмато лыдпусъёс, ваньмыз вольыт уг ортчы, юосты октыку-калтыку. Туэ гинэ вал ини 22 тылпу, сутскиз 9 комбайн, ог 25 тонна пала ю тысь, 917 тонна пудо сиён, складъёс но куасьтӥськон агрегатъёс. Шудтэм учыръёс тросгес пото электропроезъёс бордысен. Кызетӥ августэ сыӵе учыр вал Кез ёросысь "Таненки" кооперативлэн складаз. Ӝуаса быриз склад, 8 тонна ю тысь, ДТ-75 трактор, 3 трактор двигатель, сварка лэсьтон 2 аппарат. Изъянэз вуиз 50 сюрс манетозь. Ю тысь бадӟым мускытэн вуэ бере, сое куасьтон комплекъёсты ужато вань кужыменызы. Агрегатъёс озьы мултэс ӟырдало. 29-тӥ августэ Шаркан районысь "Эрик" гурт кооперативын соин сэрен сутскиз липет, ачиз куасьтӥськон, 7 тонна тысь. Ваньбур 46 сюрс манетлы изъянэн берытскиз. Уно тылпуос пото пиналъёслэн тылын шудэменызы. 20-тӥ августэ гурт удысъя Удмурт кун институтлэн бусыяз куинь гектар вылын ӝуаз ӟеч выжы ӟег. Та бусы интыяськемын Ижевскысь автозавод дорысь улон коркаос вӧзын. Городысь укылтэмъёс соин гинэ уг буйгатско, соос арам бервылысь курое но тыл поно. Нош со тыл ӝуась бусыетӥ вуыны быгатоз артысь сикъёсы, автокооперативъёсы. Таиз учыр вал 5-тӥ августэ Вавож ёросысь Бадӟым Кион гуртысь фермаын. Отын, турын возён липетъёс сяна, 504 тонна пудо сиёнзы ӝуаз. Озьы быдэс арлы дасям турын пеньлы пӧрмиз. Изъянэз - ог 280 сюрс манетлы. Ма муген потӥз тылпу - возьматоз следствие. Азьпалан кезьыт нуналъёс, кутскиз дышетскон ар. Туэ школаосын вал ини 15 тылпу. Эскеронъёс возьматӥзы - татын янгыш луо куд-ог кивалтӥсьёс но. Унояз дышетскон интыосын тылпулы дась ӧвӧл: уг ужа сигнал сётонъя автоматика, борддоръёс лэсьтэмын ӝуась арбериослэсь, куд-ог интыосын ӧвӧл ӧсъёс гинэ но. Озьы вераны луысал Ижевскысь уноез школаос сярысь. Вераны кулэ котельнойёс пумысен но. Соосын сэрен уно шудтэм учыръёс луыло. Толлы ӟеч-ӟеч тупатъямтэ эстӥськон трос изъян вайыны быгатоз. Ортчем аръёсы сыӵе югдур вал ини Сарапулын, Камбаркаын, Шаркан но Каракулино ёросъёсын. Шуныттэк кыльылӥзы быдэс улон кварталъёс, школаос, нылпи садъёс, мукет юртъеръёс. Н. Ильин, Удмурт Республикаысь Югдурез утёнъя министерстволэн тылпулэсь утиськонъя управлениысьтыз валтӥсь специалист. Чуръёс, чуръёс Шокасал эрико омырен Калыкын сыӵе малпан вань: пытсэт сьӧрын пукылэм мурт адями уз луы ни. Мар чеберъяськонэз, ми пӧлын но котькыӵеез пумиськылэ, но ваньзэс одӥг мертэтэн мертаны уг луы. Пытсэт сьӧры шедемъёс тросэз шудтэм адямиос. Ас вакытаз ӧз луы валэктӥсь, кизэ сётӥсь. Мар веранэз, улон югдурмы ачиз но куд-ог дыре адямиез кыске кырыж сюрес вылэ. Кечат-вамат укноос шоры учкыса, макем потэ аслэсьтыд янгышъёстэ тупатэмед, ортчемзэ вунэтыса, выль сямен улэмед. Асме сяна, кинэ тышкаськом на ӟечез но уродэз пушкы йыромем понна. Нош улэм потэ, вань адямиос сямен ик. Эрико омырен шокасал. Трос миллионэз адямиос шуо, улонын валтӥсь интыын луыны кулэ яратон, зэмлык но чылкыт сюлэм. Шуыны шуо, нош малпало но лэсьто мукет сямен. Тросэз-а бен асьсэды шудоен лыдъяло, туннэ улыны тырмымон ваньбурзы шоры учкыса? Нош кин ке но пылаське со пӧлын. Сыӵе шуд борды кыстӥськон ик сӧре адямиез. Малпасько, мынам янгыше кинэ ке но кырыж сюрес вылэ султэмлэсь алоз. Мыным куамын ньыль арес, асме егитэн лыдъясько. Соин но вазиськеме потэ пинал калыклы. Быръе улонын шонер сюрес, асьтэлы тупамон ужан удыс. Кызьы, мар тонэныд луоз, кузпал бордысь но тросэз потэ. Но котькыӵе йыруж понна кыл кутоно аслыд. Тани ми пукиськом ни, егит дырмес пытсэт сьӧры ворсаса. Бен, азьланезлы, урок луоз, но укыр бадӟым дун тыроно ук со понна. Соин валче вераме потэ мукетсэ но. Эрикез таласа гинэ, адямиез уд тупаты, уд вошты. Юрттыны кулэ солы шонер сюрес вылэ султыны. Ӟеч лэсьтэмлэн емышез адӟиськытэк уз кыльы. А. Исламов. Шаерысьтымы тросэзлэн хозяйствоослэн но предприятиослэн "Удмуртэнерго" азьын данак пунэмъёссы люкаськемын. Гурт хозяйствоосысь кивалтӥсьёсын пумиськылыкуз, Правительстволэн Тӧроез пусйиз, пунэмъёсты тырымтэ понна республикамылы электроэнергия сётонэз 30 процентлы кулэстыны быгатозы. Жильыртӥсь ошмесъёсыд али но монэ буйгато Ф. Васильев. Арлыд вуэмъя но улонлэн секыт вакытъёсаз адямиез ялан кыске отчы, кытын со та югыт дуннее вордӥськиз. Котькӧня мед вошъяськоз улон-вылонэз, сюлмын исантэм кылёзы анай но вордскем инты сярысь сайкыт малпанъёс. Мон но куке-соку вордӥськи одӥг гуртын. Сое туж бадӟым но, укыр пичи но шуэме уг поты. Витьтон корка пала, дыр, вал. Али та аресыным, мон мӧйы ини, радэн- радэн син азям пуктӥсько, кин кытын улӥз. Верало ини гуртэлэсь нимзэ. Удмурт сямен - Бызара, ӟуч сямен Старый Кармыж шуо. Нош интыяськемын со шаермылэн лымшор палаз - Кизнер ёросын. Аслам гуртэлэсь чеберез номыр но ӧвӧл кадь потэ мыным али ке но. Милям гуртмы шып гинэ пуке, матаз вуытэк уд но адӟы, бадӟым сюреслы ӝыны иськемын сылэ ке но. Мон пичи дыръям та сюрес ӧй на вал, Бемыж палась Можгала мынон сюрес милям гуртмы пыр ортче вал. Бадӟым сюрес лэсьтэмзэс мон туж ӟеч тодӥсько. Тодам ваисько на мӧйыослэсь сюлмаськыса вераськемзэс. Землемеръёс бусыетӥ ветло, ӵогъёс пуктылыса кельто, сюреслэсь пасьталазэ мертало. Война кутскемлэсь азьло со вал. Та секыт уж лэсьтӥськиз, трудодень понна гинэ, одӥг копейка коньдонтэк. Кӧня дыр ӵоже лэсьтӥськиз вераны уг тодӥськы, но кылдӥз паськыт, ӵошкыт, сьӧд лента кадь, чильк-вальк кисьтаськись сюрес. Соку асфальт сярысь вераськон но ӧй на вал. Поляк гуртозь сюрес лэсьтэмын. Тазьы ик лэсьтӥськиз Кизнере мынон сюрес но. Гуртъёсын улӥсьёслы собере выль уж шедьтӥзы - из поттон. Давкино (Дауна) гурт но Арвазь (Возьпум) гуртъёс вискысь ӵошкыт бусыысь тӧдьы из шедьтӥллям. Милесьтым но гурт калыкмес палэнэ ӧз кельтэ. Вань кужмо, егит нылкышноосыз отчы келязы, со милям гуртмылы ог дасо иськем, дыр. Мон но апае сьӧры калъяськи. Кӧня ке нунал ужаса валай, мар со корт лопатаен, ломен музъемысь кокаса изэз поттон. Кырым пыдэсъёсы пульдылӥзы, лопаткаез кутэме но уг луы ни. Тае адӟыса апае ог ӵукна монэ Возьпумозь келяса лэзиз, ачиз берен из поттоназ кошкиз. Тӧдьы из сюрес лэсьтыны туж кулэ вылэм. Полякысен кутскыса Можга пала мынӥсь сюрес юг-юг тӧдьы изэн шобыртӥськиз. Та паськыт, бадӟым сюрес лэсьтэмын ке ӧй луысал, милям гуртмы тузон пӧлы ӵакмысал. Гуртмы туж писпуо. Вуылэ вал отчы льӧмпуос, шупуос сяськаяськон вакытэ! Воксё паймысалды. Уноез гуртъёс шур дурынгес пуксьылэмын. Мынам но Бызара гуртэ Эшек шур дурын пуке, ӟучъёс Ишек шуо сое. Шур сопалан, нош вӧл-вӧл паськыт возь сьӧрын - нюлэсо гурезь. Со нюлэслэн пумыз но ӧвӧл, дыр, кожасько вал пичи дыръям. Зэм но, пичиосыз мӧйыостэк нюлэскы ветлыны уг лэзё вал, йыромоды, пе. Та пичи гуртмес шорияк кыклы люке пичи гинэ шур, ним но солы Покшур сётӥллям, покчи шур. Солэн кузьдалаез но одӥг иськем сяна уз луы, дыр. Та пичи гинэ шур гуртмес со уллапаллы но выллапаллы люке но ачиз Эшек (Ӟуч сямен Ишек) шуре усе. Анаелэсь одӥг пол юамме тодэ ваисько на. Малы, пӧй, нокинлэн но бакчаяз тыпыез ӧвӧл. Солэн валэктэмез мыным туж паймоно потӥз. Тыпыез мерттыны уг дӥсьто, пе. Тыпылэн зӧкталаез мерттӥсь муртлэн чыртыез зӧкта луиз ке, со адями, пе, кулоз. Милям бакчаямы тыпыез мерттэм песятае, атаелэн атаез. Мон сое ӧй адӟы ни. Песятае тямыс ар армиын служить карем, Турциын ожмаськем. Война бырем бере доразы лэзиллям (со сяна, отын гуртысьтымы вить-куать воргоронъёс но вылӥллям). Анайлэн верамысьтыз гинэ тодӥсько. Турциысь бертыны соос сезьы кизён вакытэ потӥллям, доразы вуиллям сезьы аран вакытэ. Вань сюрессэс пыдын бертӥллям, куд- огез лябӟыса доразы но вуиллямтэ. Войнаысь бертэмез бере песятае кема ӧз улы ни. Мынам тодэмея, солэн мерттэм тыпыез весь ог зӧкта улӥз, ӧз но зӧкомы, ӧз но куасьмы. Бакчаысьтымы кызьпумылэсь тулыслы быдэ сурсвузэ юиськомы вал. Атае, инкуазез яратӥсь адями, ачиз гинэ тодэ вал кызьы ӵогыны кызьпулэсь мугорзэ. Ӵоге но отчы пичи гинэ корт дырды шукке, со дырдые етӥнлэсь яке пышлэсь черсэм шортэз юнматэ. Музъем вылэ сарва яке пичи ведра пуктэ. Сурсву кадь ческыт юонэз тодэммы ӧй вал бере, со ми понна туж бадӟым шумпотон вал ини. Бадярлэн сурсвуэз эшшо но, пе, ческытгес. Но милям бакчаямы бадярмы ӧй вал, солэсь вузэ юэме ӧвӧл, кызьы шуыны уг тодӥськы. Милям гуртмылэн самой шулдыр интыез тымет вал. Гурт калык сое вуко ты шуэ. Со угось вуко понна ик ӵыпемын но вал. Матысь гуртъёсысь, кытын вукозы ӧй вал, пызь изыны но кеньыр поттыны милям гуртамы ветлӥзы. Тылэн шораз ик шормуӵез вал. Та шормуӵын олокӧня пӧртэм писпуос будӥзы. Татчы, шормуӵе, яр дурысен уяса нокин но ӧз вуылы. Пыжен гинэ но самой дӥсьтӥсьёсыз, кышкасьтэмъёсыз, шаянъёсыз гинэ казакпиос вуылӥзы яратоно нылъёссылы кужымзэс возьматон понна. Та шормуӵ яратоно инты вал луд ӵӧжъёслы. Арлы быдэ тулыс, олокытысь вуыса, татчы каръяськылӥзы, пи поттылӥзы, сӥзьыл вуытозь жомбылляськизы. Татын соослы нокин люкетӥсь ӧвӧл, адямиос но, пуныос но уг вуо. Кыӵе усто инты: вуэз паськыт, чылкыт, чорыгез трос. Вудур шашы тымет дуртӥ метр ӝужда будэ. Талэсь ӟеч инты кытын вань на меда луд ӵӧжъёслы пи поттон понна. Луд ӟазегъёс ӧз вуылэ кадь ми пала, адӟемме уг тодӥськы. Сӥзьыл матэктэмъя, луд ӵӧжъёс шуныт пала лобӟыны дасяськон вакытэ, пӧйшураны яратӥсьёс одно ик ми пала вуылӥзы. Валлапал урамысь тымет палан интыяськемъёслэн бакчазы тымет вуэн гылъяське. Котькудӥзлэн бакча пумаз лабрес бадьпуос мерттэмын. Тулыс тудву кошкем бере, со интые вож-вож буртчин кадь турын будэ. Озьы котькудӥзлэн бакча бераз пичи гинэ возез вань. Тыметлэн мукет палаз, гурезь дорын вуко юрт но кебит пуктэмын. Малы ке милям гуртамы дурись но вукочи ӟучъёс вал, палэнысь лыктэмъёс. Соослы улон коркаос но та котыре пуктэмын. Одӥгез вырйылын сылӥсь корка асьме гуртысь ик ӟуч семьяысь яна потэм муртлэн Загуменнов Григорийлэн вал (гуртын сое Гринька шуылӥзы). Шур сопалан ик улӥзы дурись Епанешников Василий но мельник Сарсацкий Павел. Та ӟуч семьяослэн ваньзылэн ик нылпиоссы воксё удмуртомемын вал. Удмуртэн, ӟучен люкиськонъёс ноку но ӧй вал. Та куинь коркалы матын кык ошмес потэ вал. Валлапалан улӥсьёс сиён-юон пӧзьтыны та ошмесъёсысь гинэ ву нулло вал шур вуэз пудоослы но бакчае кисьтаны гинэ кутылӥзы. Уллапалан улӥсьёс эшшо одӥг бадӟым ошмес доры ветлылӥзы, сое Далля ошмес шуылӥзы. Татысь вузэ басьтӥд ке, дырды улаз одно ик мар ке кушты, а то висён кутоз. Вуэз туж кезьыт, гужем куазен но пинь уг чида. Та ошмес доры вӧсяськыны но ветло вылэм. Ваньмыз ошмесъёс гурезь улысь пото. Гурезьмылэн нимыз но гуртмылэн кадь ик - Бызара. Ортчем дауре улэм адямиос гурезьзэс туж утялтыса возиллям. Гурезьмы кык нюклы люкиськемын: одӥгез Гондыр нюк, мукетыз Така нюк. Малы тазьы нималлям, кин вералоз на. Оло куке но соку татчы гондыръёс но вуылӥллям. Поляк сьӧрын нюлэссы туж бадӟым, кытын меда солэн пумыз, кытын кутсконэз, мон ноку ӧй тодылы. Милям гурезьмы сокем ик ӝужыт ӧвӧл, но гурт понна солэн данэз но кулэлыкез туж бадӟым. Пӧртэм-пӧртэм писпуос будо, лысо писпуос тросгес. Така нюк палтӥ куаро писпуос будо, пашпу уно будэ. Ортчем дауре улэм адямиос гурезез но, нюлэсэз но, нюлэслэсь емышъёссэ но туж утялтыса возиллям. Гурезь бамалысь турын-куарзэ медаз лёгалэ, турын пӧлысь узы-борыез вуэмезлэсь азьло медаз бичалэ, пушмульыез но тысез вуытэк бичаны уг лэзё вал. Гужем шундыё шуныт нуналэ гузеьлэн самой ӝужыт интыяз тубыса, быдэс гуртмы кипыдэсын кадь адӟиське. Пинал дыръям гурезе тубыса кӧня пол мон гуртэ шоры учкылӥ! Кӧня соин данъяськылӥ! Али но син азям ялан гуртэлэн суредэз. Нош пель сьӧрам нюлэслэн куашетэмез но ошмесъёслэн шыпыртэмзы. Мон вордскыку но гуртам ошмесъёс жильыртӥзы. Азьланяз но озьы ик мед луоз вылэм. А. Иванова, ужысь ветеран. Ижевск город. Праздникен, машина лэсьтӥсьёс! Машина лэсьтӥсьёс - Удмуртилэн данъяськонэз но данэз. Республикамылэн экономикаяз та валтӥсь инты басьтӥсь удыслэн 36 предприятиосыз пӧлысь котькудӥзлэн аслаз узыр историез но ӟеч сямъёсыз, соос выжыысь выжые азинтӥсько но кужмояло. Ваньмыз со нырысь ик потэ улонэ ялан азьмынӥсьсэ пыӵатыны тыршем бордысь, огшоры гинэ но самой секыт изделиосты ӟечгес лэсьтыны сюлмаськем бордысь. Удмуртиысь машина лэсьтӥсьёсты юнме шорысь ужзэс тодӥсь кибашлыосын уг лыдъяло. Со вылӥ ним басьтэмын ӟеч тыршемен, азязы пуктэм котькыӵе ужез синмаськымон быдэсъямен. Соин ик Удмуртиысь машина лэсьтӥсьёслы кун оскиз обороналы продукция поттыны - пыӵал тӥрлыкысен кутскыса стратегилы чаклам ракетаос дорозь, оскымон ужамзы понна ик солы вылӥ дунъет сётӥзы быдэс дуннеын. Берло аръёссэ тӥляд удысады тыршисьёслы уно шуг-секытъёсты чиданы кылдӥз. Тау тӥледлы чидамды но юн сямъёсты понна, секыт минутъёсы но тӥ предприятиосады оскымон адямиос луиськоды, уд чигнаське. Кивалтӥсьёслэн тодон-валанзы, инженеръёслэн но конструкторъёслэн быгатонлыксы, рабочийёслэн зэмзэ но зарни киоссы туннэ машина лэсьтон удысэз нош ик республикамылэн экономикаяз валтӥсь интые пукто. Удмуртия данъяськыны быгатэ Ижевскысь радиозаводлэн коллективеныз, кудӥз Япониысь устоосыныз фирмаосын ӵош Россиысь банк ёзъёслы спутникъёс дасянъя конкурсын вормисьёс радэ потӥз. Асьмелэн обороная предприятиосмылэн коллективъёссы азинлыко поттыны кутскизы калыклы кулэ луись вузъёсты, соос пӧлын - нефть но газ поттон удыслы оборудование, солы ӟечлыкезъя дуннеын но вылӥ дунъет сётэмын. Шумпоттэ Ижевскысь автомобиль, мотоцикл лэсьтӥсьёслэн удыссэс выльысь улӟытыны тыршемзы, соос асьсэлэсь предприятиоссэс паськытатыны кыл сётӥзы, ужпум пуктӥзы "Иж" маркалэсь азьвыл данзэ выльысь ӝутыны. 1997-тӥ арысен кутскыса, Удмуртиысь машина лэсьтӥсьёс производствоез бадӟыматыны кутскизы. Тужгес но вылӥ азинсконъёс тӥ басьтӥды туэ, продукция поттон ог кык поллы будӥз. Удмурт Республикаысь Кун Кенешлэн нимыныз, гажано эшъёс, тӥледлы тау карисько республикамылэсь экономиказэ но улон-вылонзэ азинтонэ мылысь-кыдысь пыриськемды понна. Шудбур, ваньзэ умойзэ но ӟечсэ гинэ тӥледлы. Семьяосады тыр но тупаса улон. Праздникен! Удмурт Республикаысь Кун Кенешлэн Тӧроез А. А. Волков. Толлы дась Кезьытъёс вуэмен, кытӥяз гуртын улӥсьёслы вожъяськыны ик кутскиськод - кулэ дыръяз гурдэ эсты но нясь-нясь шунытын пук. Городын улӥсьёс уго ӟеч тодо на ай ортчемзэ арез. Соку унояз коркаосы шуныт октябрьлэн пумаз гинэ вуиз. Ижлэн мэрез Анатолий Салтыков таяз арня нуналэ городэ шуныт сётон югдурен тодматӥз. Пресс-конференциын со оскытӥз, арня ӵоже шуныт вань улон юртъёсы вуоз шуыса. Нылпи садъёсы со сётэмын ни вордӥськонэ ик, 34 больница пӧлысь 25-ез эстӥське. Собере шуныт вуоз школаосы, учреждениосы, улон юртъёсы. Туэ толлы дасяськон ужъёс, кылем арын сярысь, 4 поллы уногес быдэстэмын. Город толэз пумитаны дась. Б. Никитин. Удмурт Республикаысь Быръёнъя комиссилэн "Долг" газет сярысь постановлениез Удмурт Республикаысь печатья но иворъёсъя министрлэсь С. Ф. Васильевлэсь вазиськонзэ эскерыса но Удмурт Республикалэн "Удмурт Республикалэсь президентэ быръён сярысь" Законысьтыз 46-тӥ ёзэтээн 3-тӥ пунктэз вылэ пыкиськыса Удмурт Республикаысь Быръёнъя комиссия пуктэ. 1. Кун ёзъёс газетлэн учредительёсыз пӧлысь потэмен валче 2000-тӥ арын 28-тӥ июне Удмурт Республикаысь Быръёнъя комиссиен печатлам республикаын потӥсь кун газетъёслэн радысьтызы поттоно "Долг" газетэз. 2. Та постановлениез печатлано республикаын потӥсь кун газетъёсын. Удмурт Республикаысь Быръёнъя комиссилэн тӧроез Д. Н. Талантов. Удмурт Республикаысь Быръёнъя комиссилэн секретарез Н. А. Глухова. Ижевск город, 2000-тӥ арын 15-тӥ сентябре. � 28.16. Дауръёсысь дауръёслы книга Зэм ик, удмурт калыклэн, Удмурт Элькунлэн улон-вылон сюрессы вылын таӵеез книга ноку но ӧй вал на: нырысь ик, со туж зӧк - тямыс сю бамъем, секыт, бадӟым, киын ӝутыса вормонтэм кадь. Собере сокем узыр пуштросо - кияд кутӥд ке, куштэмед уз поты ни. Лыдӟисьмес уг ни гочаты, шонерак верало нимзэ: "Удмуртская Республика. Энциклопедия". Мон киын сигнальной шуиськись номерез. Быдэсак со калык кие вуыны кутскоз ини октябрь толэзе. Нош та бадӟымлэсь но бадӟым, кулэлэсь но кулэ ужез дасян бордын тыршиз "Удмуртия" книга поттонни, Удмурт Элькун Кивалтэтлэн бакель каремезъя но юрттэмезъя. Главной редакторез луэ В. В. Туганаев, солэн юрттӥсез - К. И. Куликов, валтӥсь редакторез - К. Н. Дзюина. Дасян-тупатъянъя кенеше пыртэмын вал элькунысьтымы тужгес тодмо, валтӥсь тодосчиос, тодонлыкен кивалтӥсь муртъёс. Дауръёсысь дауръёсы возиськись, пумтэм трос тодон-валан сётӥсь книгаез дасян бордын ужазы ньыль сюлэсь ятыр тодосчиос, кивалтӥсьёс, валэктон сётӥсьёс, суредасьёс, редакторъёс, шекъёссэ утчасьёс- тупатъясьёс но мукет ужась-тыршисьёс. Энциклопедия - грек кыл, вань тодонлыкъёслы дышетон шуэм луэ. Соин ик, дыр, котькуд тодосчилэн, тросэзлэн дышетӥсьёслэн, кивалтӥсьёслэн, улон-вылонэн тунсыкъяськись котькуд адямилэн гуртысьтыз шедьтоды энциклопедияя кудзэ ке но словарез. Соос трос пумо, пӧртэм удысъёсъя, ёросъёсъя, калыкъёсъя, элькунъёсъя поттылэмын ини. Сотэк одӥг калыклэсь но быдэс улон-вылонзэ, ортчем сюрессэ, азинсконзэ тодыны уд быгаты. Бадӟым лыдо калыкъёсъя таӵе ужъёс азьвылгес ик ини печатламын вал, али басьтӥсько шоро-куспо калыкъёслэсь улон-вылонзэс котыр ласянь возьматӥсь книгаос-энциклопедиос дасян борды. Туж шумпотымон; мукетъёсызлэсь туж ик бере кыльытэк, таӵе сӥё-дано книга Удмурт Элькунын но потӥз. Кык люкетлэсь инъямын со: нырысетӥяз возьматэмын шаермылэн вашкала дауръёсысен туннэ нуналозь азинскон сюресэз; вакчияк ке но тодматэмын экономикалэн, культуралэн, наукалэн, религилэн азинскон сюресэнызы; верамын шаермылэн кытчы интыяськемез, узырлыкъёсыз, аспӧртэмлыкъёсыз, инкуазез, киуж устолыкъёсыз, отын улӥсь калыкъёсыз, будосъёсыз, пӧйшуръёсыз сярысь. Озьы ик трос мукет тодонлыкъёс, ивортонъёс татысь шедьтыны луоз. Кыкетӥ люкетэз тужгес бадӟым но трос ивор сётӥсь. Отчы пыртэмын ньыль сюрс куать сю пичиесь но бадӟымесь кылужъёс. Татысь тодыны луоз эштосъёслэсь, заводъёслэсь, фабрикаослэсь, колхозъёслэсь, черкъёслэсь, наукая, культурая, спортъя огазеяськонъёслэсь, газет, журнал, книга поттонниослэсь, театръёслэсь но трос пӧртэм огазеяськонъёслэсь кылдон, азинскон сюресъёссэс; татчы ик пыртэмын элькунысьтымы городъёслэн, ёросъёслэн, бадӟымесь гуртъёслэн, шуръёслэн нимъёссы; макем узыр материал шедьтыны луоз историяя, этнографияя, археологияя, фольклоръя, осконъя (религияя), спортъя но улон-вылонмылэн мукет удысъёсызъя. Гажано лыдӟись эше! Та книгаез кияд кутыны кылдӥз ке, зэм ик верасько, киысьтыд куштэмед уз ни поты. Отын сомында-сомында суредъёс, картаос... Нош тужгес паймымонэз, шумпотымонэз, данлыкез, кулэлыкез - отын возьматэмын Адями... Калык... татын сюрс аръёс ӵоже улӥз ини, кылдытӥз шаермылэсь узырлыксэ, аспӧртэмлыко, асьмелы гинэ тупась тусбуйзэ. Малпасько, кияды кутӥды ке та книгаез, одно ик тодэмды, лыдӟемды потоз яратоно писательёсты, артистъёсты, тодосчиосты, кивалтӥсьёсты, спортэн эшъяськисьёсты, кышкасьтэм ожгарчиос, калыкмылэсь данлыксэ, азьпал улонзэ азинтонлы улонзэс сӥзем муртъёс сярысь. Тросэзлэн нимо-дано адямиослэн туспуктэмъёссы но сётэмын. Зэмос энциклопедия! Удмурт калыкез данъясь, дуннемы, асьме сярысь котькыӵе тодон сётӥсь книгамы ноку но ӧй вал на. Котькудзэ бадӟым ужез нырысьсэ лэсьтыку, ваньмыз чебер, гылыт, шектэм уг луы. Та ужын но, малпасько, сюрозы сыӵе интыос. Уката ик - котькудӥз тодосчи ас удысэзъя мур-мур утчаськыны кутскиз ке. Мон ачим кыл бордын ужась бере, кыл удыс сярысь лябгес гожтэмын кадь потӥз. 60-тӥ-70-тӥ аръёсы кадь. Тужгес но паймытэ инты нимъёслэсь кылдэмзэс (этимологизэс) сётон. Тросэз шонер ӧвӧл. Кин гожъям соосты? Алнаш, Вотка, Кама, Лекма но трос мукет инты нимъёслэн этимологизы мыдлань валэктэмын. Эшшо одӥг малпан: книгапоттонимылэн луонлыкъёсыз лябен, буёло суредъёс начар пӧрмемын. Вуюись кадь ворекъясь киужъёс, калык дӥськут, суредъёс бездытэсь адӟисько. Но ваньмыз та - чыры-пырыос гинэ. Тужгес дуноез но шумпоттӥсез - книга печатласькиз. Та бадӟым ужез лыдӟем бере, ас шаердэ, ас калыктэ гажан мылкыд пуроме. Паймоно: та дырозь тросэз улӥзы но ӧз тодэ, ӧз но малпалэ, кыдёкысь Урал но Волга вискын улӥсь таӵе зӥбыт-востэм, пӧсятозяз ужась, кепырась, ассэ возьматыны возьдаськись калыкмылэн узыр культураез туж вашкала аръёсы ик ини вал шуыса. Туннэ нуналысь но нимо-дано адямиосыз сярысь (ӵем дыръя оло нош нырысьсэ кылӥськомы) тодыса, сюлэм шумпотэ, калыкмы азинске, будэ, нюръяське, гожъяське, котыр ласянь ужа-тырше, мукет калыкъёсын оградын мыныны сюлмаське шуыса. Мон вератэк но тодмо: та книга ваньмызлы кулэ но со туж дуно - 400 манет. Сое басьтыны котькудӥзлэн моӵез уз тырмы. Соин ик туж-туж мылкыд карем потэ вал: та энциклопедия одно ик мед вуысал котькуд школае, библиотекае, калык люкаськылон интыосы. Михаил Атаманов, филология наукаосъя доктор. Очей Толилы - пӧсь салам! Одоть ке, Одоть Огназ улӥсь кышномуртлэн, сизьымдон тямыс аресъем Одоть кенаклэн, мунчоез куашкам. Вуж вылэм ини угось. Кулэм картэз ӵупыса кельтӥз вал ай. Куашкам ке куашкам, ма карод на табере. Нош арняяз одӥг пол мунчое пырем потэ. Соин ик Одоть кенак мур малпаськонэ усиз. Малпаськиз, малпаськиз но амал шедьтӥз ведь. Районысь администрацие ветлоно кариськиз. Кин тодэ, ӵош маин ке но юрттозы пересь нылкышнолы. Выль мунчолы нюлэс кулэ угось. Нюлэс висъязы ке, юрттӥсь шедёз. Тани пиезлэн пиез Геня туж кибашлы но сюлмо адями. Со син куспын выль мунчолы ӵупет лэсьтысал но, пуктысал но. Озьы ас понназ бӧтьыртон сяменыз ӧз но шӧдылы сюрес вылэ потэмзэ. Геня бензовозэн ужа бере, песяйзэ кабинае пуктӥз но районэ ширтӥз. Час куспын вуизы районэ. Геня базае кошкиз но песяез администрацие пыриз. Администрациын ужасьёс туж лякытэсь вылэм. Песяез пуктӥзы, соку ик лулысь- сюлмысь юалляськыны кутскизы. Ваньзы ик ӟуч сямен верасько вылэм. - Кто вы? Где живете? Одоть кенак ӟуч кылэз уг тоды бере, удмурт сямен тяп-тяп пумитазы шуэ: - Ма, что такое, мон Одоть кенак. Улӥсько Цыпьялан, картэ оже быремын. Улӥсько унучкаеным. Мунчо бы надо. Администрациын пукисьёс нош ик юало: - По какому вопросу пришли к нам? Одоть кенак валэктэ: - Мунчо бы надо, мунчо-то тучырак куашказ. - А кто построит вам мунчо? - Ма, што такое, унучкае, унучкае сделает. - Как зовут вунучку? - Ма, что такое? внучку Геня зовут. - А где работает внучка Геня? - Ма, што такое? Автобричкаен ужа. Гопёр со, гопёр! Эшшо мар ке но чыры-пыры юалляськемзы бере, пересь Одотез келязы. Буйгатӥзы, юрттом, пе. Кӧтыз каньылэн Одоть кенак столовой пала вамыштӥз. Геня отын возьмало шуиз вал уга. Бензовоз отын вылэм ини. Нош кабинаын тодмотэм адями пуке. Геня песяез доры потӥз но валэктӥз: - Песяй, тон монэ та интыын ик возьма. Мон та фельдшерез нырысь келяло. Ми ветлытозь, столовойын сиськы но мар. Мон али ик вуо. Геня машинаяз пуксиз но дуй не стой гурт палаз ширтӥз. Со дыртэ угось. Фельдшерез келяса, берлань песяез доры берытсконо на. Сюрес вольыт, чиль-дол асфальт кисьтаське. Эсьмаса, машинаез ог укмыстон километр пала часкын ширтэ. Гопо-выро интыостӥ гинэ цистерна йыг-дым вазьылэ. Пумитаз автоинспекторъёс но шедьылӥзы, малы ке ӧз дугдытъялэ. Куке весяк дугдытъяло, кагазъёссэ эскеро. Гуртэ вуыса, Геня кабинаысь потӥз, фельдшерлы но васькыны юрттӥз. Собере, пельпумаз чабкисез шӧдыса шуак берытскиз но песяйзэ адӟиз... Геня жӧломыса ланьырак музэ лэзькиз, йырсиосыз пештырскизы, ак но, бак но ваземез уг луы ни. Мырдэм ымзэ усьтыса юаз: - Песяй, кытысь тон потӥд? - Кытысь, кытысь, уд тодӥськы-а, мар-а, кытысь пото адямиос? Тӥни отысь, бензовоз йылысь! - Нош кызьы автоинспекторъёс ӧз адӟе? Кызьы тон отысь ӧд палды? Мар ишан та? - Эн кышка, унучкае, мон со баклэн ӵанэз борды тар-тар кырмиськыса пуки. Нош автоинспекторъёс медам адӟе шуыса, ӵан сьӧры ватскылӥ. Геня киыныз гинэ шонтӥз на. Собере инмарлы тау карыса, машина пала вамыштӥз. Л. Чупина. Яр район Кузьымгурт. Гажано эшъёс! Ӟечкыласьком тӥледыз Машина лэсьтон удысын ужасьёслэн нуналэнызы. Рынокен экономикае выжон капчиен ке но уг сётскы, тӥ ялан будэтӥськоды калыклы кулэ луись вузъёсты поттонэз, утьыны тыршиськоды "оборонаосын" ужась кибашлы адямиостэс. Ми, Кун Думалэн депутатъёсыз, вань кужыммес сётом тӥляд предприятиосты огсыр но азьланезлы осконэн мед ужалозы шуыса. Тӥледлы но семьяостылы тупаса но тыро улон, шудбур сӥзиськом. Гажаса Ю. Д. Маслюков, Н. И. Сапожников. Шӧкыч Тӧро луэме потэ вал Юмореска Э-э-э дауре, улон дауре ортче ини, нош кивалтӥсь таки ӧй луы. А кыӵе кивалтэме потэ вал... ӧз пӧрмы мынэсьтым нокин но: директор но, секретарь но, менеджер но, брокер но, сутенёр но, бригадир но. Мугез одӥг гинэ. Мынам сямы, кызьы али шуо, крутой, яке меӵ гурезь кадь. Мон мар ке борды кутскисько ке, ваньзэ йылаз-пумаз вуттоно кожасько. Соин ик ваньмыз мынэсьтым дэймо. Адямиос паймо уга, кызь одӥгетӥ даур вуиз ини, пе, нош одӥг кивалтӥсь та нуналозь нокыӵе кутскем кичӧлтэмзэ но, сётэм кылзэ но ӧз быдэсты на. А мон быдэсто шуисько. Соин ик кышкало, дэймо, курдало мынэсьтым. Я мукет адямиос кышкало, соиз валамон кадь, мурт - со мурт. Кытысь солэсь вань сямъёссэ, выросъёссэ тодод. Матысь адями но, картэ, кышка ява. Картэ шуэ, тон, кышно, кивалтӥсь луид ке, гуртэ уд шедьылы ни. Собере мурт воргоронъёсын калгыны кутскод. Нош мон татын тынэсьтыд трусикъёстэ миськыса улоно луо. Карт ке, карт шуом. Бускельёс но кышкало. Кызьы, пе, ми татын тонтэк уломы на. Мӧзмыт луоз азбаре ик потыны. Тынад куара-лангаед, пе, быдэс улосэз зуркатэ, шулдыртэ, выль кылъёсын узырмытэ. Нош азьтэм муртъёс воксё куанӥсько, ява. Тон, пе, кивалтӥсь луид ке, нуналлы быдэ уже потано луоз. Изёнэз но уд адӟылы ни. Нош ми дышемын ини нуназезэ изьыны, уйзэ - калтыртыны. Пересь адямиос но тыпак пумит луо мынам кивалтӥсь луэмелы. Кышкало уга, пенсиосмес ичиёмытод, пе. Сямыд тынад укыр крутой, пе. Туала кивалтӥсьёс, пе, коть пенсиосмес пичиен-пичиен будэтыны тыршо. Табере мыр-мыр паймиськиз ини. Кивалтӥсь луэм потэ, нош мынэсьтым ваньмыз кышкало. Ма кароно таӵе? Кызьы калыклэсь мылкыдзэ ас палам берыктоно? А мон сёровно малпам ужелэсь уг куштӥськы. Мар со калык шоры учкыса улод? Ярам асьме калык мынэсьтым кышка. Нош мукетъёсыз уг тодо ук. Соин ик кутско ай мукетыз бордысен. Али туж модно компьютер пыр интернет амалэн ужаны. Кытчы гинэ нырдэ уд чуртнаськы, котькытысь кылод "и" букваен кылъёсты. тани, кылсярысь, имидж, интернет, интерьер, интернат, инструмент, импотент, интим, институт но мукет. Адямиосты маин ке но бордад кысконо ук. Али мынам йырам туж мур но паськыт малпан чилектӥз. Ялон, ялон сётъяно, котькытчы, ялонъёс ошылоно! Пуштросэз таӵе луоз: "Интернетысь интересной инструментально-импотентной институтысь интимной имиджен интерьер сярысь лекция. Ӧтисько ваньмыз, кин мылкыд каре кивалтӥсь быръёнэ пыриськыны. Лыктэмъёслы сётъялозы быдэн ӟенелик аракы но вӧйын нянь. Кутсконэз 19 часэ ӝыт!" Адӟом ини улыса, мар луоз азьланяз! Калык оскоз-а, уз-а меда мыным. А ӵап! Дина Галина. Тулыс юг-юг, сӥзьыл - горд-горд Шупу асьме палъёын ас эрказ ке но будэ, сое, калык вашкала дырысен котьку ик юртъер котыраз мерттылӥз. Та писпу уго тулысысен бер сӥзьылозь - толалтэозь чебер сылэ. Шупу синмаськымон луэ тулыс юг-юг сяськыскыкуз, нош бер сӥзьыл егитъёсыз кыске льӧль-горд емышеныз. ратоно писпуэзлэсь нимзэ асьме шаерын улӥсьёс сётылӥзы гуртъёслы, шуръёслы, возьёслы, нюкъёслы, арамаослы. Тани 50-тӥ-60-тӥ аръёсы шупулэсь нимзэ нуллӥзы дас ньыль гуртъёс. Шупу яратэ сайкыт шундыё, мускыт интыосты. Сое трос адӟод Калмез, Вало Оӵ но отчы усись пичи шуръёс дурысь, ышыг интыосын писпу будэ ке но, со умой-умой уг емыша. Тужгес но бадӟым пайдаез емышъёсызлэн. Солэсь уно дасо сиён-юон дасяло. Кин уг тоды шунянез, шу кисалез. Усто пӧрме юон но. Зэм, шулэн емышъёсыз кузялгес, но со понна эмъянлыкез бадӟым. Отын С витаминэз, эмезен ӵошатыса, кык поллы тросгес. Лымшор шаеръёсын будӥсь лимонлэсь, мандаринлэсь, апельсинлэсь но витаминэз 1,5 поллы уногес, кортэз 5� 10 поллы, фосфорез 4-5 поллы. Нош та суредъёс угось юртто пӧртэм висёнъёслэсь эмъяськыны. Шонерзэ вераса кузял возиське куазь кынтылытозь гинэ. Бӧрысь сое пӧратэк но сиыны луэ. Шу дугдытэ вир виянэз, кызонэз, йыр висёнэз, кулэстэ давлениез, ӝутэ мылкыдэз, юнматэ вань мугорез. Озьы шупулэн сулэз юрттэ кӧт вияку, геморроен висьыку. Со понна сулзэ пукетоно тӧдьы винаын яке вуын, собере нуналлы быдэ куинь пол быдэн одӥг пуньыен юоно. Емышсэ чечыен пӧсятыса 6-8 час возёно но кӧт вияку чаен юоно. Шупуэз мертто тулыс но сӥзьыл. Со кык метр пала гинэ инты басьтэ, соин ик туж чебер адӟиське корка дорын. Ӝужыт ӧвӧл бере, корка пушказ но ышыг уг кары. Али солэн ӵапак мерттон дырыз. Али шупу вуэ ни городысь урамъёсы, скверъёсы но. Кылдытэмын пӧртэм буёло сяськаосын синмаськымон писпуос. Соос пӧлысь вераны луоз "бульдонеж" пумо шупуэз. Солэн сяськаосыз туж бадӟымесь, баблесэсь, ческыт зын лӧсъяло, мынэ букет дасяны но. Н. Возисов. Шӧкыч Туала анекдотъёс Кеч но ӧрӟи Луд кеч сикетӥ зар-зар бӧрдыса мынэ. Вылтырыз погмаськемын, гонэз - ӟуз-вир. Пумитаз ӧрӟи шеде но шулӟектыса юа: - Кеч уром, мар тонэн луиз? Кин тонэ сокем жугиз? Луд кеч шуэ: - Монэ нокин но ӧз жугы. Мумы гондыр монэ толэзьлы одӥг пол "Олвис" интые кутылэ. Жаляз Ӧрӟ кечез но азьлань лобӟиз. Ортче толэзь, кык, куинь... Луд кеч паймыса гуысьтыз потэ но ас понназ малпа... А-ха, уске, мумы гондыр кӧто луиз, дыр. Кӧня ке коть шутэтско ини. Шумпотэменыз куалак вушйылыкуз, вай вылысь ӟуч-вир луэм ӧрӟиез адӟиз. Соиз бурдъёссэ сузяса пуке. Луд кеч паймыса юа: - Ӧрӟ, мар тонэн луиз? Кин тонэ жугиз? Ӧрӟ йырыз курен вазе: - ТОн, скотина, малы мумы гондырлы верад бурдъёсын "Олвис" умойгес шуыса. Куинь кузя Одӥг пиосмурт эшезлы шуэ: - Йыры курен кытчы пырон инты ик уг шедьтӥськы ни! Ну кышно ке, кышно мынам! Куинь пиосмуртэн ярантэме потэ, пе. Ну бомба, а! Эшез буйгатыны выре: - Шедьтэм ук! Тон умой-умой малпаськы ай ачиз но. Оло со тыныд аслыд но тунсыко потоз. Куинь кузя огдыре, о-хо-хо, о-хо-хо!.. - О-хо-хо-хо, дыр, но соос монэ пӧлазы уг куто! Лякыттэм Банке лушкаськисьёс пыро но кесько: - Киостэс выллань! Ваньды выж вылэ выдэ! Эн выре! Банкын ужасьёс ваньзы выж вылэ выдо. Нош огез пиосмурт-кассир банклэн секретаришаезлы лушкем шыпыртэ: - Тон мар гаӵоло кыллиськод. Али боссэн юон дыр ӧвӧл ук. Банкез сузяло кадь. Л. Бурков. КЫЛБУРАЛО ДЭМЕНЪЁС Анай кыл Яратӥсько удмурт кылын Вераськыны котькытын: Эшъёсын, калык пӧлын, Школаын, институтын... - Удмурт вылэм выжымы, - Вералляз песятаймы. Соин ик, дыр, пиез солэн Яратэ анай кылэз. Покчиез но шумпоттэ - Вордскем кылзэ дышетэ. Шалтыр лыдӟе книгазэ, Вӧзаз пуктэм сузэрзэ. Тӥнь озьы ке луысал, Чебер кыл ӧй куасьмысал, Шаер юн жингыртысал, Удмурт вӧл-вӧл шокасал. Улонмылэн тодметэз Мыдлань кошке та улонмы, Ку вуоз солэн пумыз? Коньдон синэ, дунъёс будо, Мазэ малпа тӧро, кудо? Лушкась луиз миллионер, Кескичез - акционер. Узырзэ адӟод ни шер, Кылемез ваньмыз... куанер. Ф. Ускова. Играын улӥсь. Улонысь учыр Азьтэм копар Одӥг вадьсын йӧлпыд сиеме потыса улӥз. Сюкась но юисько, чырсатэм куарен пельнянь но сиисько - сёровно йӧлпыд кулэ. Коть выд но кул. Бускельёслэсь выль йӧлзэз басьтытэк ӧйлась. Аслам скалэ ӧвӧл бере, мар карод на. Пуктӥ чырсатыны. Нунал пуке, кык ортче, куинь... Йӧлы уг чырса но тӥни. Арня пала ортчыса гинэ быльыраны ӧдъяз кадь. Горшокме усьтӥ, бадӟым дурыен омыртӥ, тусьтые кисьтӥ но... ма та таӵе? Йӧлпыд не йӧлпыд, ву но ву. Соку гинэ йырам малпан шуккиз. Ма, мыным, ноголёк муртлы, обратэз вузаллям ук. Йыры курен бускельёс доры луть-лать вамышъясько. Тышкаськон кылъёс малпасько, асме ачим пыкылӥсько но йӧлпыд сиемме тодам ваисько. Азбаразы пыри гинэ но, син шорам йӧспӧртэм суред пуксиз. Вож гуждор вылын йӧлпыд вузась воргорон вез-вез кылле, нош солэсь ымнырзэ кунян ӵаж-ӵаж нюлэ. Пиосмуртэд кунянлэсь йырзэ палэнтыны турттыса шуэ: - Насьта, тырмоз, Насьта, эн чупаськы, сёровно кынары ӧвӧл ни, юнме сокем сач- сач чупаськиськод. Вай ай, кӧня ке изё, собере, оло, кать пыроз но: мар ке дауртом. Ой йыры кур луиз ук. Ка-а-ак бер палаз ӵыжи но шуисько: - Возьмато мон тыныд али Насьта, соку ик катьяськод. Малы мыным выль йӧл интые обраттэ вузад, тордос, а? Нош соиз мырдэм берпалаз пуксиз но шуэ: - А-а-а, тон-а со, азьтэм копар? Выль йӧл сиемед потэ ке, нырысь ик кунян ворды, скал будэты, а то ишь, тон, коммунистка, озьы гинэ, чик пычкиськытэк, йӧлпыд сиыны шӧтад. Долкаменым ымы куалак пась луиз, нош ачим лӧб-лӧб пукси. Эмилия Горемыкина. Шаркан село. Валэктэ юрист Сэрегез дася адвокат Лилия Шкляева Тел. 25-33-70 Кинлы кыле улон инты? Мон куинь нылпиен улӥсько Шарканын. Картэ кулӥз. Картэлэн мумиз улэ мукет пиеныз но солэн семьяеныз ӵош Татарстанын. Соослэн вань куинь комнатаен квартиразы. Картэлэн мумиз аслаз квартираысьтыз кошкыны медэ. Та улон интыын вань-а солэн но мынам пиосылэн пайёссы? Пыриськеммы луоз-а квартираез люконэ? А. Кильдибекова. Улон интыез кельтос (наследство) карыны луоз карттылэн мумиз кулэм бере гинэ. Солэн ог люкетэз тӥледлы мед кылёз шуыса, куинь учыр медло: 1. Квартира яке солэн люкетэз мед лыдъяськоз карттылэн мумизлэн асваньбурез (собственностез). 2. Карттылэн мумизлэн пропискаез (регистрациез) татын-а вал, мукет азьын-а - лыдэ уг басьтӥськы. 3. Внукъёс но правнукъёс законъя кельтос басьтӥсь лыдъясько соку, куке кельтос шараяськыку улэп ӧвӧл ни соослэн кельтос курыны быгатӥсь мумызы яке бубызы. Внукъёслы но правнукъёслы висъяське сомында ваньбур, кӧня басьтысал мумызы яке бубызы. Карттылэн мумиз нимысьтыз завещание ӧз гожты ке, тӥляд пиналъёстылы кылёз кулэм карттылэн люкетэз. Куинь комнатаен квартира приватизация пыр басьтэмын ӧвӧл но кунлэн яке муниципалитетлэн лыдъяське ке, солы пиналъёстылэн правозы ӧвӧл. Кун пошлина сярысь Судэ вазиськыны малпасько, ужатэк улэм дыр понна пособие мед тырозы шуыса. Собере, оло, судэз ик куро азьвыл ужам интыям берыктыны. Соку кун пошлина тыроно луо-а? Р. Кульков, Ижын улӥсь. Таӵе юанлы валэктон сёто Россия Федерациысь Уж сярысь законъёсын кодекслэн 212-тӥ ёзэтэз (статьяез), "Россия Федерациын калыкез ужатон сярысь" 1991-тӥ арын 19-тӥ апреле кутэм 1032-1 номеро Закон но "Кун пошлина сярысь" 1991-тӥ арын 9-тӥ декабре кутэм 2005-1 номеро Закон. Ужен герӟаськем ужпумъёсъя куронъёсын судэ вазиськем муртъёс кунлы тыронъёслэсь мозмытэмын. Зэм, ужатэк улыку тыриськись пособие ужен меӵак герӟаськемын ӧвӧл кадь. Но та дыр пыре огъя но вистэм ужам стаже. Озьы бере, пособие курон лыдъяське ужен герӟаськем ужпум. Удмурт Республикалы президентэ кандидатэ Ф. Г. Козьминэз пусйыны пумит луэм сярысь Удмурт Республикаысь Быръёнъя комиссилэн постановлениез Удмурт Республикалы президентэ кандидатэ Ф. Г. Козьминэз ӵектонъя радлыклэсь Удмрут Республикалэн "Удмурт Республикалы президент быръён сярысь" Законэзлэн куронъёсызлы тупамзэ эскерыса, кинюртэмъёсын кагазъёслэсь но мукет документъёслэсь шонер но зэм луэмзэс лыдэ басьтыса, Удмурт Республикаысь Быръёнъя комиссия шараяз, зэм луисьтэм кинюртэмъёслэн лыдзы уногес Удмурт Республикалэн "Удмурт Республикалы президент быръён сярысь" Законысьтыз 37-тӥ ёзэтлэн 14-тӥ, 15-тӥ пунктъёсыныз чаклам лыдпуслэсь. Вылӥ верам Законлэн 17-тӥ, 37-тӥ, 38-тӥ ёзэтъёсызъя Удмурт Республикаысь Быръёнъя комиссия пуктэ: 1. Пусъёно ӧвӧл Козьмин Фёдор Геннадьевичез, республикаысь ку но венерологической диспансерлэсь директорзэ, вордскемын 1958-тӥ арын, улэ Ижевск городын, Удмурт Республикалы президентэ кандидатэ ӵектэмын бырйисьёслэн кичӧлтӥсь группаенызы. 2. РФ-ысь Сбербанклэн Удмурт банкезлэн 8265 номеро Октябрь люкетсэ косоно кандидатлэн Ф. Г. Козьминлэн быръёнъя нимысьтыз счётэзъя коньдон операциосты дугдытыны. 3. Та постановлениез печатлано республикаын потӥсь кун газетъёсын. Удмурт Республикаысь Быръёнъя комиссилэн тӧроез Д. Н. Талантов. Удмурт Республикаысь Быръёнъя комиссилэн секретарез Н. А. Глухова. Ижевск город, 2000-тӥ арын 19-тӥ сентябре. � 30.5. Архивысь документъёсъя Удмуртия ЪЪ дауре 1943-тӥ ар 1943-тӥ арлэн кутсконаз ожлэн мышказ бадӟымесь воштӥськонъёс ортчизы. Промышленностьын ужасьёс тросэн поттыны кутскизы ни танкъёс, самолётъёс, ыбылӥськон пыӵал-тӥрлык. Азьланьтӥськиз пӧртэм винтовкаосты, самолётъёслы пулемётъёс но пушкаос поттон, со сяна, завод дасяз вал миномётъёслы 120 мм минаос. Ар ӵоже Ижысь ож тӥрлык поттӥсьёс ватсаса сётӥзы 8 стрелковой дивизилы, 80 авиационной полклы но 8 авиаэскадрильялы тырмымон пыӵал тӥрлык. 5-тӥ феврале "Удмурт правда" газет Верховной главнокомандующийлэсь И. В. Сталинлэсь Ижевскысь ужса улӥсьёслы тау каронзэ печатлаз. Танкъёсын колонна но самолётъёслэсь эскадрилья кылдытыны соос бичаллям 16 миллион манет уксё. Советской армилэн вормонъёсыныз данъяськыса, Можга ёросысь "Гигант" колхоз котькуд гектарысь сю пуд ю-нянь басьтон понна нюръяськыны кутскиз, ватсаса 15 сюрс пуд октон вылысь. Та кичӧлтонлы дурбасьтӥзы быдэс элькунысьтымы музъем ужасьёс. Со вакытэ пиосмурт кужым ожын вал, вань секыт уж усиз нылкышноос но быдэ вуымтэ нылпиос вылэ. МТС-ёсын 60 процентэз нылкышноос ужазы. Соин колхозъёслы, совхозъёслы но МТС-ёслы промышленной предприятиос бадӟым юрттэт сётылӥзы, тракторъёслы но гурт машинаослы воштос ёзъёс поттылӥзы. 4-тӥ июне Курск шаерамы улосысь нылпиос вуизы. Соосты интыязы Кияса, Тыловай, Дэбес, Вотка, Иж, Сюмси но Кизнер ёросъёсысь выль нылпи юртъёсы. Пӧсьтолэзе ВЛКСМ-лэн обкомез партизан отряд кылдытӥз. Отчы асьсэ мылкыд каремзыя пыриськиз 40 комсомолец, ожмаськизы соос Новгород но Ленинград котырын. Таяз арын фашистъёсын киултэм ӝыныез пала музъем мозмытэмын ни вал. Соин компартия но правительство тылӝу ортчем музъемъёс вылын хозяйствоез выльысь ӝутон сярысь постановление кутӥзы. Июне 60 рабочий куашкатэм Сталинградэз ӝутыны келямын вал. Сентябре школаосысь но училищеосысь 200 дышетскись ас мылкыд каремзыя келямын Макеев андан ӵыжатон заводэз но Зуев электростанциез ӝутыны. 28-тӥ ноябре Ижевскын усьтӥськиз цирклэн выль юртэз. Со республикаысьтымы улӥсьёслы бадӟым кузьым луиз - ож ӧз быры на ке но, улон азьланьске шуыса оскытӥсь, сютэм калыклэсь азьлань улыны мылкыдзэ ӝутӥсь луиз со. Таӵе цирк быдэс шаерамы нырысез юбоостэк куполэз возись цирк луиз. 50-тӥ аръёс пумозь Россия Федерациын тужгес умоез вал. Нош циркысь коллектив но артистъёс котькытын бадӟым шефской уж нуизы: выступлениосынызы вуылӥзы госпитальёсысь сӧсырмемъёс доры, пумиськылӥзы солдатъёсын. Циркын ортчылӥзы митингъёс, Ижевскысь ужаса улӥсьёслы орденъёс но медальёс сётъязы. С. Некротюк, Удмурт Республикаысь Кун архивысь валтӥсь специалист. Военной заводын ужало быдэ вуымтэос. Инмар анайлэн пытьыез Адями секыт но кайгу нуналъёсаз буйгатскон амал утча. Кин ке понна со - ӟенелик усьтон. Мукетэзлы - миндер пушкы пӧрдэмлэсь номыриз умоез ӧвӧл. Тросэзлы - черке мынон. Туэ пӧртэм сектаос кылдылэмын. куд-огез калыкез котыраз люкало, улон быронэн курдатыса. Котькуд выль адями понна мыжыкъёсын жугиськыны дсь. "Дело веры" секта котькуд оскисезлэсь толэзьлы быдэ барышысьтыз дас процентсэ бича. Куать сю манет пенсия басьтӥд ке, куатьтонзэ отчы нуоно. Ведра улмодэ, кызь манетэн вузад - кыксэ одно ик сётоно. Паймымон соиз: таӵе куронэз ваньзы сямен оскисьёс адаськытэк быдэсъяло. Люкаськонъёсазы экто, тэльмыро, курисько, чирдо, киоссэс инбам шоры урдыло. Пушкысьтыд вань люкаськем сьӧд кужымъёс, пе, потозы но, инмар пыроз. Соку адями ачз инмар луоз, шуо. Вань музон сектаос но. Паймоно кадь: Христослэн нимыз сьӧрын оломар но даурто. Ноз зэмос христианство сярыс верано ке, солы 2 сюрс ар тырме. Россиын сое пусъёнлэн шорсюлмыз луоз Нижний Новгород областьысь Дивеево черкогурт. Милям корреспондентмы Ольга Кожанова алигес отчы ветлӥз но адӟем-кылэмзэ "Удмурт дунее" гожтӥз. Дивеево музъем утиз Серафим Саровскийлэсь лыоссэ. Со герӟаьскемын Инмар анайлэн улон-вылонэныз но. Кутсконэз тазьы вал. Бай помещица Агафья Семеновна Мельгунова луыса 1758-тӥ ар котырын монашка Дивеевое вуиз но Александра анай луиз. Вань улонзэ сӥзиз инмар анайлы. Татын кылдӥз монастырь. Отысь адямиослэн дышетӥсьсы баӵко Пахомий вылэм. Кулон азяз Александра анай сое куриз монашкаоссэ чакланы. Ачиз лекос пересь ни малпаса, Пахомий юрттэт пумысен вазиськиз пинал иеродиаконлы Серафимлы. Ортчизы аръёс. Баӵко Серафим ассэ усто возьматӥз, пӧртэм шуг-секытъёсын пумиськылыса но. Огвакытэ монастырен кивалтӥз Ксения анай. Соос ваче луизы. Огласянь, Серафис быдэстыны кулэ Александра анайлэсь косэмзэ, мукет ласянь солы люкетэ Ксения анай. Соку, пе, инмар анай Серафимлы таӵе дэмлан сётэм: Ксенияез кельты, нош Агафиялэсь куронзэ быдэсты. Соку ик Серафимлы возьматэмын вал музъемез гудон инты. Озьы Серафим Ксения дорысь тямыс монашкаен ӵош кошке но выль община кылдытэ. Со вал 1825-тӥ арын 25-тӥ ноябре. Возьматэм интыын вуоно араз вуко пуктӥзы. Дивеево музъем вылын вордскиз нылкышноослэн Вуко община шуонзы. Солы музъем кузьмазы. Бусыез мертазы, кӧльыен пусъетъёс лэсьтӥзы. Табере монашкаос гудӥськыны кулэ. Нош соос секыт ужез быдэстыны ӧз дыртэ. Со борды ачиз Серафим басьтӥскьиз. Соку гинэ кышноос валазы янгышсэс - гудӥськыны ӧдъязы. Секыт ужзэс быдтӥзы Христослэн вордӥськем нуналэз азьын. Батюшка Серфим вералляз: - Ачиз инмысь эксэй кышно та гуэз кускерттонэныз мертаз. Кин со дортӥ куриськонэн ортчоз, но сю витьтон пол "Богородицаез" чирдоз, солы татын ваньмыз луоз - Афон но, Иерусалим но, Киев но! Баӵко Серафим 2-тӥ январе 1833-тӥ арын инмар доры кошкем бере, бадӟымесь воштӥськонъёс вал. 1917-тӥ арын бугырскем револбция - Дивеево монастырь пала но вуиз. Огдыре ужаз аспӧртэм артель мактал луыса. 1927-тӥ арын ворсаськз. Отчы каъяськизы сельхозартельлэн правлениез но школа. Тросэз юртъёс пӧрмылӥзы контораослы, мукетъёсыз сузмизы. Гу гинэ ас интыяз кылиз. Зэм, интыен, интыен сое согизы, гурезез ӵошкатӥзы, музъем улэ гумыос тыризы. Тазты 1988-тӥ арозь вал. Соку лэзизы инмар анайлэсь черксэ усьтыны. Оскисьёслы Троицкий соборез берыктӥзы. 1999-тӥ арын гужем дано Серафим Саровскийлэсь лыоссэ татчы ваизы. Бератаз ӧръяськизы гу бордын ужъёс. Сое шонер выльдон понна, археологъёслы но тыршоно луиз. Утчаськонъязы шедьтӥзы асэныз Серафимен лэсьтэм пусъетъёсты. Югыт гу нимало туннэ та интыез. Со пӧрмемын аспӧртэм сюреслы. Вӧзаз - дауръем писпуос но киросъёс, сяськаос. Вырйыл медаз куашка шуыса, пиосмуртъёс сое пулъёсын кутыто. Милемын артэ вамышъясь воргорон сослы юрттыны куриськиз. Вакчияк валэктӥзы: - Ӵуказе ӵукна тямыс часлы вуид ке, умой луоз. Гуэз дырын-дырын тупатъяло монашкаос. Соослэсь юалляськыса тодӥ тани мае: нырысь гудӥськиллям вань мылкыд карись сузэръёс, табере сыӵе уже лэзё пиосмуртэн кӧламтэоссэ гинэ. Трос вераськыны дырзы ӧвӧл - соин ик ужзэс ӝегатыса ӧй улы адямиос сьӧры вамыштӥ. Син шоры йӧтэ: вӧсяськисьёс гу вамен ваньзы сямен пото, пыдкутчанзэс кыльыса. Инмар анайлэн пытьыосыз борды соослэн пыдъёссы мед йӧтозы, пе. Баӵко Серафим вералоз вылэм: - Гу - инмар анайлэн пыд бервылъёсыз. Со инбамозь ӝутске. Антихрист лыктӥз ке, котькытӥ ортчоз, нош гу вамен тэтчемез уз луы. Ольга Кожанова. Дивеевоысь монастырь. Выжыосмы Кинъёс сооос, будинъёс? Бигер тодосчи М. З. Закаев "Татары. Проблемы истории и языка" (Казань, 1995) книгаяз тазьы гожтэ: "Ассириын но шунды ӝужан палась мукет интыосын вашкала гожъямъёсъя, ӵапак выль эралэсь ИИИ даур азьло удъёс (кутъёс) сярысь ивортонъёсты шедьтылыны луэ; соосты герӟаны луэ Каспий котырысь удъёсын, кудъёсыз берлогес пӧрмизы удинъёслы, бодинъёслы, будинъёслы (Ельницкий Л. А., 1977, 4). Милям малпаммыя, удъёс - узъёслы пӧрмем калыкъёс (тюркъёс), малы ке шуоно, тюрк кылъёслэн диалектъёсазы "д" куара ӵем дыръя "з" куараен воштӥське" (25-тӥ бам). Нош мынам малпамея, удъёс - удмуртъёс. Соос куке но, Кам но Ватка шуръёс дурысь кошкыса, уй пал Индиын арийёс пӧлын улӥзы. Отын но соос нимаськизы удъёс (со сярысь историкъёс тодо, со пумысен гожъяз тодмо удмурт этнограф Г. Верещагин но). Отысь бертыкузы, удъёс улӥзы Каспий дурын но. Со сяна, удмуртъёслэн трос гинэ Бӧдья, Бодья нимо гуртъёссы, вань Якшур-Бодья черкогуртсы, вал соослэн паськыт гинэ вӧлмем Бӧдья выжызы, родзы. Со сяна, удмуртъёслэн трос адямиоссы Будин фамилия нулло. М. Закаев номыр уг вера, вань-а тюркъёслэн Бодья выллем гуртъёссы, Будин фамилиоссы но мукет, нош мултэссэ вераны дӥсьтэ. Малыез валамон: асьме тодосчиосмы ымазы ву ӟузем кадь уло, удъёсты соос удмуртъёсын яке соослэн выжы-кумыенызы уг лыдъяло, шӧдске. Соин ик мукет калыкъёслэн тодосчиоссы сьӧраз ортчо, асьмелэсь азьло сюресмес вандыса кушто, вашкала выжыосмес ишкалтыса сэрпалто... Тани мар гожтэ ачиз Л. А. Ельницкий "Скифы евразийских степей: историко- археологический очерк" книгаяз(Новосибирск, 1977): "...Уйпал Иранысь, Каспий но Кавказ котырысь этнонимикаын (калык нимъёсын - Ф. П.), Ассириысь но шунды ӝужан палась мукет интыосын гожъямъёсъя шедьыло мукет племяослэн но нимъёссы. Озьы удъёслэн (кутъёслэн) нимзы туж вашкала дырысен античной вакытозь вуэ. Тырмыт луоз созэ гинэ но вераса: вашкала Эламысь эквидъёслэн одӥгез нимзы, кудӥз пусъемын асьме эра дырозь ИИИ дауре, ӵапак герӟаськемын Каспий дурысь удъёсын (берло пӧрмизы удинъёслы, бодинъёслы, будинъёслы), соос трос интыосын шӧдӥськымон кужымзэс возьматылӥзы". (4-тӥ бам). Кавказысь удинъёс сярысь мон гожтӥ вал ини, оскымон возьматӥ, соос удмуртъёслы матын вал шуыса. Гожтӥ, кызьы К. Герд паймыса вера Болгарие но Румыние пырись Добруджаз улосысь удмуртъёслы валамон кылын вераськись калык сярысь. Тани мар гожтэ азьланяз Л. А. Ельницкий: "Кӧчылыса улӥсь калыкъёс юрттылӥзы пӧртэм интыосын улӥсь калыкъёс, музъем ужасьёс пӧлы музон калыкъёслэсь культуразэс вуттыны. Паймыса ке но, оскытэк уг луы, Китайысь Хуанхэ шурлэн выллапалаз Каспий дурысь (Анау ёросысь) лента выллем пужыё керамика вуылӥз шуыса, со гинэ уг тырмы, гальштат культуралэн пужыосыз вуо Китаёзь но Индокитаёзь (Вьетнамозь)". (12-тӥ бам). Амалтэк юан кылдэ: кыӵе калык вал со, кудӥз Европаысь (Австриысь Гальштат карысь) керамикаез Китае но Вьетнаме вуттылӥз? Мон мукет кылъёсты удмурт кылэн ӵошатӥ. Даслэсь трос удмурт но огъя пермь кылъёсты шедьтӥ китай кылысь, дас вить удмурт но огъя пермь кальёсты - вьетнам кылысь. Ньыльдонлэсь трос огкадь кылъёсты шедьтӥ на удмурт но немец кылъёсысь. Кызьы соос отчы вуизы? Мон малпасько, удмуртъёслэн выжыоссы вуттӥзы соосты. Удъёс (удинъёс, юдинъёс, будинъёс) Каспий дурын но ке улӥзы, удъёс - со удмуртъёс ке, удмурт кылын луыны кулэ казах кылъёс, казах кылын - удмурт кылъёс. Асьмеос тани ёрмыкумы "амал ӧвӧл" шуиськом, казахъёс сыӵе дыръя "амал жок" шуо. Казах кылын - "десте", удмурт кылын - "дас", огъя пермь кылын но "дас". Казахъёслэн вань "еру" кылзы - "кин ке сьӧры мыныны". Удмуртъёслэн вылэм "эру карон" сэбедзы, обрядзы. Егитъёс мӧйыос сьӧры мед мынозы шуыса, праздник, сэбед ортчытӥське вылэм. Эшшо кӧня ке кылъёс. Казах "мыкыр" (лапег мурт), удмурт "мыкыртӥськыны"; казах ("ор" (канава), удмурт "ӧр"; казах "пай-пай" - паймемез возьматӥсь междометие), удмурт "паймыны"; казах "шал" (пересь), удмурт "шалмыны"; казах "кос", удмурт "куз"; огъя пермь "кӧз"; казах "косу", удмурт "косыны" но мукет. Та кылъёс башкир но бигер бускельёслэн ӧвӧл. Кызьы та казах кылъёс вуизы удмурт кылэ, нош удмурт но огъя пермь кылъёс казах кылэ? Озьыен, ӵошатоно ке, нош таӵе малпанэ вуоно: Каспий дурысь удъёс (удинъёс, бодинъёс, будинъёс) - со удмуртъёслэн выжыоссы. Собере соос берытскизы песятайёссылэн музъем вылазы. Та малпанэз оскымонгес карыны юрттэ таӵе эскеронэ: удмуртъёс казах музъем вылысь ваизы 200 нимез. Со пӧлысь одӥгез но ӧвӧл бигеръёслэн нимбугоразы-словарязы (Г. Ф. Саттаровлэн 1981-тӥ арын поттэмаз). Со 200 нимъёс пӧлысь 82-ез уй пал удмуртъёслэн вань, нош лымшор палъёслэн ӧвӧл. Кылсярысь, таӵеосыз Тебен, Тебеней (казах "тебын" - толалтэ пудо возьман инты), Тума (родственник), Буда (бинялтэт) но мукетъёсыз . Табере усьтомы Б. Н. Граковлэсь "Скифы" книгазэ (М., МГУ, 1971). "...будинъёс туж паськыт интыын улӥзы: Воронеж котырысь нюлэсо степьёсысен кутскыса, Полтава палась нюлэсо степьёс дорозь. Ведь одӥг соос сярысь гинэ историлэн атаез Геродот гожтэ: соос "бадӟым" но туж трос калык"... Ас эрказы улӥсь калык. Дарий вуылыку, соос эшъяськыса уло вал эксэй скифъёсын... Будинъёслэн, кӧчылыса улӥсьёслэн, шаеразы вань Гелон кар. Кыйёс зӥбемен, отчы вуо артэ улӥсь невръёс. Будинъёс - чагыр синмо но горд йырсиё калык". (131-132 б.) Мон малпасько, та будинъёс но асьме выжы ке вал, со удмуртъёслэн сямзылы тупа: мукет калыкъёсын эшъяськыса уло, шуге-леке вуэм муртъёсты асьсэ доры улыны лэзё. Со гинэ уг тырмы, соос грекъёслы но асьсэ музъем вылазы Гелон нимо город пуктыны лэзё. Таосын туж тупаса уло, соослэсь кылзэс тодо. Тӥни кытысь удмурт кылэ сомында грек кылъёс сюриллям! Соосты мон лыдъяй 50-лэсь трос... Отӥяз книгалэн авторез туж паймоно кадь ивор сётэ: будинъёс Грециысь вуэм дунне вузъёсты нуо Кам дурысь ананьинской культурае пырись калыклы. Со туж валамон кадь: отын уло будинъёслэн ӵыжы-выжыоссы ик, удмуртъёс. Ведь удмуртъёс но, будинъёс сямен ик, тросэз гордэсь. Яке соос сыӵе луизы, горд йырсиё будинъёс Кам дуре берытскем бере? Табере учкоме атласэ. Россилэн европа люкетаз таӵе шур нимъёс вань: Воронеж палан - Тихая Сосва, Киевлэсь кыдёкын ик ӧвӧл, Унава, Житомир палан - Гуйва, Ровно палан - Льва, Луцк дорын - Иква, Винница улосын - Лядова, Закарпатьеын - Тересва... Озьы тӥни вуэз "ва" шуись калыкъёс Европаын паськыт вӧлмемын вылэм. Табере учком Каспий палан улэм удъёслэн улэм бервылазы. Та палан вань таӵе гуртъёс: Кошкар, Челкар, Шалкар. Шалкарлэсь ог сю иськемын бызе Утва шур. Со вал, дыр, Удва - "Удъёслэн шурзы". Со палангес ик вань Булдырты но Калдыгайты шуръёс. Таос гужем пӧсен куасьмо но вакчияло, луоз. Соин "ты" луэм (Калдыгайты - "кылем ты"). Озьы тӥни, кылъёс, адями нимъёс сяна, географической нимъёс но верало: Каспий котырысь удъёс - со удмуртъёс, нокыӵе но тюркъёс вылӥллямтэ соос. Йылпумъяса тани мае верано на. Мон кемалась паймыса лыдӟисько удмурт пелляськонъёсты. Кӧняез соос кутско "зарезь" кылын: "... Сьӧд зарезьын вуош, сое поттыса, пыдпыдэсысьтыз дэризэ куке нюлыса быдтоз, соку мед сиёз, мед ведналоз..." Амалтэк юан кылдэ: уд выжыосмы пӧлысь нокин но, ноку но зарезь дурын ӧй ке улысал, кызьы соослэн пелляськоназы "зарезь" кыл пырысал? Чакламея, дуннеез котыръяны потэм адямиосмы трос зарезьёсты адӟизы: Сьӧд зарезез но, Средиземнойзэ но, Каспиез но, Аралэз но, Байкалэз но. Но ваньзэ сое утчаськонъёс пыр валэктоно на. Со туж бадӟым уж. Удмурт тодосчиослы асьме Кам но Ватка шуръёс вискы гинэ пытсаськыса улоно ӧвӧл ни - бадӟым дуннее, вашкала удмуртъёслэн котыръяськем дуннеязы но потоно. Федор Пукроков. Кӧня йӧл кыскемын 22-тӥ сентябрьлы районъёс скаллы быдэ кыскемын(кг) 2000 1999 Яр 6,7 7,8 Глаз 8,1 8,1 Юкаменск 6,3 7,1 Балезино 7,2 7,4 Красногорск 6,2 6,6 Кез 6,9 7,0 Дэбес 7,4 6,6 Игра 8,3 7,9 Як.-Бодья 7,2 7,9 Шаркан 7,0 7,4 Селта 6,2 5,8 Сюмси 5,9 5,6 Ува 7,8 7,7 Вавож 8,5 8,3 Кизнер 4,8 4,9 Можга 7,6 8,0 Грах 8,0 7,4 Алнаш 6,5 6,4 Пичи Пурга 7,5 7,3 Кияса 5,5 6,8 Каракулино 5,3 6,2 Завьялово 7,2 6,4 Воткинск 7,6 8,3 Сарапул 6,4 6,5 Камбарка 4,8 4,9 Республикая 7,0 7,3 Козьмин судэ уз мын Быръёнъя комиссия пумит луиз Федор Геннадьевич Козьминэз Удмурт Республикалы президентэ кандидатэ пусйыны. Мугез - со пала дурбасьтӥсьёслэн кинюртэмъёссы 27 процент палаез умойтэмен лыдъямын. Нош сётэмын вал ваньмыз 11 сюрс 500 кинюртэм. Тазалыкез утёнъя азьвыл министр, республикаысь ку но венерологической диспансерлэн директорез Федор Козьмин пятницае пумиськылӥз журналистъёсын, вераз Быръёнъя комиссилэн президентэ кандидатэ сое пусйыны пумит луэмез сярысь аслэсьтыз мылкыдъёссэ но малпанъёссэ. Шуиз, Андрей Солуянов сямен судэ уз вазиськы. Со понна люкам вань кинюртэмъёс, зэмос адямиосын пуктэмын ке но, туннэ нуналэ ужась закон пӧртэм шуг-секытъёс кылдытэ. Пӧяса лэсьтэм кинюртэмез секытгес шараяны, нош зэмос пуктэмезлы - оскыны. Федор Козьмин Быръёнъя комиссиез янгыш уг кары, со, пе, пыкъяськиз закон вылэ. Оскытыны ӧм быгатэ бере, асьмеос ик янгыш, шуиз со, юрттӥсьёсмы пӧлын ӟечгес валэктон уж нуоно вал, пе. Федор Козьмин журналистъёслы вераз ке но, келяны но быгатэм кулэ шуыса, ассэ со матэктӥсь быръёнъёслэсь уг палэнты. Нош кин пала дурбасьтоз со но солэн штабез, соиз сярысь тодмо луоз ни матысь нуналъёсы. Учком ни, пе, кыӵе ӵектонъёссы луозы президентэ кандидатъёслэн. Нош валтӥсь интые со пуктэ социальной удысэз, аслаз но ужез соин герӟаськемын бере. Кин, пе, басьтӥськоз калыклэсь улон-вылонзэ умоятыны, сое ик президентэ быръёно. Собере калык быръёнъёсы одно ик пыриськыны кулэ, со понна но ужано луоз. Нош вал-а Федор Козьминлэн президент луыны осконэз? - Мон тодӥсько вал, оскон туж ӧжыт, - шуиз со. - Но нюръяськытэк ноку уд буды. Ньыль ар, дас ар ортчыса ачид сярысь вераны мед быгатод. Азьветлӥсь луон понна, аслыд ачид сюрес лёгоно луэ. Л. Малых. Кӧс вӧен суро... героин ФСБ-лэн Удмурт Республикаысь управленияз ужасьёс шаерамы наркотик лушкемен вуттон сюресэз пытсазы. Нырысь-валысь соос шараязы, героинэз ваё Таджикистанысь Волгоград пыр автомобиль но чугун сюрес транспортэн, куръеръёс уже куто 10 литръем кык полэс пыдэсэн канистраосты. Соосты синпӧет чотын тырмыто вӧс вӧен. Таӵе вузъёсты таможня пыр поттыны капчи. ФСБ-ын ужасьёс одӥгзэ куръерез шараязы. Со контрабандистъёслэн кивалтӥсьсы Таджикистанысь 32 аресъем воргорон вылэм. Нимысьтыз дасям ужрад дыръя йыруж лэсьтӥсь ӝегатэмын. Кык канистраысь шедьтэмын 1,2 килограмм героин. Та вакытэ следствие мынэ. Наркотик вӧлмытӥсь пытсэт сьӧры 8-15 арлы пуксьыны быгатоз. ФСБ-лэн Удмурт Республикаысь управлениезлэн пресс-службаез. Калмез шыкыс Калмез выжы удмурт калыкын одӥгез вашкалаез но узырез. Жаляса верано луэ, пӧртэм мугъёсын берло дыре со сярысь ичигес кылӥськом. Отысь потэм кизилиос но синэз уг мальдыто. Малы меда? Неужто калмезъёс уно аръёс ӵоже люкам узырлыксэс ыштыны ӧдъязы мукет выжыос пӧлы сылмыны кутскизы? Та юанъёс кемалась висьыто ни визьмо, йӧно, дӥсьтӥсь удмурт кышномуртэз Евдокия Ильиныхез. Ачиз со Селта палъёсын вордскемын, берло дыре улэ Сюмси районын Тукан гуртын? Куать ар талэсь азьло Евдокия Михайловна луиз ёросысь удмуртъёслэн азьветлӥсьсы. Та вакыт ӵоже югдур воштӥськиз. Валамон ни, умой пала. Со ӟеч воштӥськонъёс алигес пусъемын вал "Ёрос кенешлэн" отчётлы но быръёнлы сӥзем конференцияз. 150-лэсь ятыр делегатъёс но ӧтемъёс эскеризы огазеяськонзылэсь куинь ар ӵоже кызьы ужамзэ. Ма бен пусйымонэз? Азьвыл татын мӧйыосынгес ужало вал. Соосын ик шулдыръяськонъёс но ортчытъязы. Но ярам коть, дыраз валазы: пиналъёсты, егитъёсты огъя ужрадъёсы кыскытэк, "Ёрос кенешлэн" ӵуказе нуналыз уз луы. Тани кӧня ке ар талэсь азьло шерез ужрад ортчылӥз Туканысь кенакъёслэн кырӟан-эктонъёссытэк. Котькытчы ик соос вутско вал. Табере? Табере нылкышноос пересьмизы, калыке потаны кынарзы котьку ик уг тырмы ни. Соос уг быгато, нош вӧзазы султыны нокинлы. Ас дыраз егитъёсты дышетыны ӧз вуэ. Умой соиз: бускель Вылынгуртын шедизы сыӵеос. Отысь нылкышноос кылдытӥзы "Купанча" ансамбль. Бордазы кыскизы пиналъёсты, мукет егитъёсты. Табере соос - ёросазы тодмо адямиос. Кырӟась кышномуртъёслэн туннэ ӧвӧл на тупамон дӥсьсы, но ансамбле ветлӥсьёс ӟечезлы осконзэс уг ышто. Сюмсиос мылысь-кыдысь басьтӥськизы вашкала йылолъёсты улӟытон борды. Соос калыклы возьматӥзы ни сюан ортчытон радэз. Ваньмызлы кельшиз кадь. Ижысь вуылэм эшъёс но туж ушъязы гуртоосты. "Ёрос кенеш" пыриськиз бӧляксылэсь Владимир Кашинлэсь суредъёсын адӟытонзэ радъянэ, мукет ужрадъёсы. Правленилэн сюлмаськеменыз районысь школаосын но нылпи садъёсын пумен ӵемгес чузъяськыны кутскиз удмурт кыл. Смотр но ортчытӥзы ни. Выль арез но сюмсиос асьсэ кылын вераськыса пумитазы. Кылем арын Гураын радъязы "Жингрес куараос" лагерь. Та ласянь туж юрттӥз республикаысьтымы Егитъёсын ужанъя кун комитет, солэн Сюмси ёросысь люкетэз, кудӥныз быгатыса кивалтэ правление быръем мурт Татьяна Мурашкина. Пиналъёс умой шутэтскизы, трос выльзэ тодӥзы, куспазы эшъяськизы. Жаль соиз: туэ сыӵе лагерь усьтыны коньдон ӧз шедьы. Нялтас пусйыны кулэ: коньдон сярысь вераськон конференциын ӵем потаз. "Ёрос кенешлэн" счётэз вань, нош отын копейка но ӧвӧл. Куать ар ӵоже "Удмурт кенеш" татчы сюрс манет сяна келяны ӧз быгатэ. Нимаз адямиос юрттӥзы ик, но со туж ичи. Уксё тырмымтэен, Евдокия Ильиныхлэн, солэн матысь юрттӥсьёсызлэн уно ӟеч малпанъёссы быдэсмытэк кылё. Тани юртты вал адямиослы удмурт газет-журналлы гожтӥськыны. Уго сотэк асьме кылэз, культураез вӧлмытыны шуг. Уг пӧрмы. Ярам ай, ёросын потӥсь "Знамяын" кутскизы удмурт кылын нимысьтыз бам поттыны. Нырысетӥ вамыш лэсьтэмын, шуыны луоз. Газетлэн редакторез Иван Рябов удмуртъёслэсь кулэяськонъёссэс умой вала. Ачиз но со трос лэсьтэ, сюмси палъёслэсь, калмез выжыослэсь историзэс эскерон вылысь. Огез книгаез потӥз ни, али дася эшшо кӧнязэ ке. Мынам малпамея та краеведлэсь ужан амалъёссэ умой-умой чакланы кулэ вылэм "Ёрос кенешлэн" правленияз быръем эшъёслы но. Оло, озьы луысал нылпиос пӧлын но та ужез радъяны, озьы соослы асьсэдыз, ас шаерзэс яратон мылкыд пыӵатыны. Сюлмаськонъёс трос. Но сюмсиослэн асваланзэс ӝутон ласянь рос-прос ужаны кутскемзы шумпоттэ. Ӵапак со ик оскон сётэ ӟеч воштӥськонъёслы. Калмез шыкысэз "Ёрос кенешлэн" азьветлӥсьёсыз усьтыны но быгатозы, сое асьсэ быгатонэнызы узырмытыны но тыршозы. Люкетӥсь гинэ медам луы. И. Лебедев. Сюмсиысь удмурт азьветлӥсьёс верасько ёросысь депутатъёслэн кенешсылэн тӧроеныз Людмила Пескишеваен. Конференция ортчытон нуналэ культурая юртын радъямын вал туэ будэтэм емышъёсын но сиён-юонэн адӟытон. Гуртоос отчы мылысь-кыдысь пыриськизы, урожайзэс чеберъяны тыршизы. В. Камашевлэн туспуктэмъёсыз. Гажано эшъёс! Удмурт Республикалы президентэ кандидатъёслы калыкез ӝуткась материалъёсты "Удмурт дунне" газетын дунтэк печатланы таӵе нуналъёс тупатэмын: 28-тӥ сентябрь, 5-тӥ октябрь, 12-тӥ октябрь. Дун тырыса, сыӵе материалъёсты печатланы луоз кандидатъёслэн куронъёссыя огшоры яке телепрограммаен номерын 28-тӥ сентябрьысен 13-тӥ октябрёзь. Юалляськыны луоз 444-344, 444-205 телефонъёсъя. "Удмурт дунне" газетлэн редакциез. Катанчи ӝоген усьтӥськоз Гужем куспын учкисьёс театрлэсь, яратоно артистъёссылэсь мӧзмыны вуизы. Соин ик чидатэк возьмало ни, ку соиз яке таиз театр усьтоз катанчизэ. 14-тӥ октябре республикаысьтымы Мунё театр туэ сезонэз усьтэ А. Чеховлэн "Каштанка" веросэзъя спектаклен. Алигес со Челябинск фестивале ветлӥз но выль кужымен, ӝутскем мылкыдын бертӥз. Азьпалан нылпиослы ужась театр малпа "Собачья радость", "Аленький цветочек", "Черная курица" но "Гулливер" спектакльёссэ пуктыны. Выль ужъёс борды кутскыны ӧтемын луозы палэнысь режиссёръёс. 18-тӥ октябре учкисьёссэ ӧте В. Г. Короленко нимо Ӟуч драматической театр. 65- тӥ сезонзэ со усьтэ А. Островскийлэн "Доходное место" драмаеныз. Сое пуктэ театрлэн выль валтӥсь режиссёрез Михаил Салес. Азьпалан театр классикалы бадӟым инты висъялоз. Владимир Сафонов пуктоз А. Островскийлэсь ик "Волки и овцы" пьесазэ. Мӧйыослэн нуналзылы дасяське А. Гаменлэн пьесаезъя "Ретро" спектакль (режиссёрез А. Вершинин). Со пуктэмын луоз Можгалан, Сарапулын, Уваын, Глазовын но. Сцена вылын 35 ар ужамезлы дасяське театрлэн дано артисткаез Анжелика Мази. 28-тӥ октябре луоз солэн бенефисэз. 70-тӥ, юбилейной сезонзэ усьтэ Удмурт кун национальной театр. 26-тӥ октябре луоз премьера - Гильермо Фигейредулэн "Ӟичы но виноград" ("Эзон") пьесаезъя спектакль. Удмурт кылэ берыктӥз шаерысьтымы дано артист Вячеслав Байков. 10-тӥ ноябре луоз солэн бенефисэз, та спектакльын актёр шудоз валтӥсь ролез. Героической трагедиез пуктон бордын ужало Кадим но Касим Галихановъёс (режиссёр но художник), Марина Ходырева (крезьгурзэ гожтӥсь). Удмурт театр трос выленыз шумпоттыны малпа. 30-тӥ ноябре луоз дано артисткалэн Галина Владыкиналэн юбилеезлы сӥзем ӝыт. Выль пьесаосыз учкись азе вуттон бордын ужазы драматургъёс Анатолий Григорьев но Вячеслав Ар-Серги. Т. Николаева. "Кенеш" - дуно эш Али мыным Москвае вуиз "Кенеш" журналлэн кырӟанъёсын номерез. Отчы, та номере, люкам вань материалъёс ӟеч-ӟеч быръемын-радъямын, чебер но узыр пуштросо. Соосын рос-прос тодматскеме бере, сюлэмам таӵе мылкыды кылдӥз: "Кенеш", туала удмурт писательёслы, чеберлыко литератураез яратӥсьёслы гинэ ӧвӧл, крезьгурчиослы, музыкантъёслы но туж дуно эш. Таӵе умой сямзэ "Кенеш" азьланьын но ӟеч утьыны мед тыршоз. И. Травина, РФ-ысь устолыкъёс удысын сӥё-дано ужась. Кыӵе ымнырын пырод хрестоматие Удмуртиысь Писательёслэн огазеяськонзылэн правлениез туннэ нуналлы туж кулэ луись ужпумез экериз: удмурт литературая учебникъёс но хрестоматиос дасян. Татчы ӧтемын вал, правленилэн членъёсыз сяна, Калыкез дышетонъя министерствоын, "Удмуртия" книгапоттонниын ужасьёс, асьсэос учебникъёсыз дасясьёс-составительёс но. Вераны кулэ, татын ӝутэм ужпум алигес Саранскын финн-угор писательёслэн ӧтчамазы вераськонэз азьланьтон выллем луэ. Соин ик правленилэн тӧроез Егор Загребин форумлэн ужамез сярысь вакчияк ивортӥз но пусйиз, дышетон книгаос бордын ужаку, ас калыкедлэсь шӧмзэ утьыны кулэ шуыса. "Удмуртия" издательстволэн валтӥсь редакторез Вениамин Ившин сюлэмшугзэ вераз, коньдон дыраз сётымтэенызы, туэ дышетскон ар кутскон азелы куд-ог пособиос потытэк кылизы шуыса. Соос пӧлын - "География Удмуртии", "Отчий край" шаертодонъя книга, "Букварь" (Бадӟым Уча школаысь дышетӥсьёслэн дасямзы), суредъёсын удмурт-ӟуч-англи словарь. Соин сэрен табере соослэн асдунзы вылынгес луиз, типография дунъёс январьысен 60 процентлы будӥзы. Туэлы дас дышетскон пособие чакламын ке вал, потӥз ай ньылез гинэ, кӧняез ке вуоно арлы кыле ни. Калыкез дышетонъя министрлэн воштӥсез Галина Васильева ивортӥз: али 12 предметъя учебникъёсын лыдэ басьтӥське регионально-национальной компонент, мукет сямен вераса, кутӥське интыысь материал, асьме улосвыллэн, калыклэн улонысьтызы пӧртэмлыкъёс. Республикаямы поттэм ваньмыз учебникъёс школаосы вуо дунтэк, асьме бюджет чотын. Тазьы шуыны уг луы Москва пыр вуисьёсыз сярысь. Соин ик нылпиосыз дышетон туала аре анай-атайёс понна туж дуно усе. Национальной образованиея научно-исследовательской институтлэн директорез Зоя Суворова вераз школаослы дышетскон книгаос бордын ужамзы сярысь. Котькудӥз автор, произведение но сое дышетон методика учебно-методической советын юнматӥське, шуиз со. Составитель, шуом, писатель ке, со вӧзын одно ик луэ дышетӥсь-методист, практик. Нош учебникъёсы, хрестоматиосы кыӵе материал пыртон ласянь ми оскиськом тӥледлыгес, писательёслы. Соин ик учебно-методической советлэн ужаз юнгес пыриськыны куриськом. - Ми тямыс ар ужамы удмурт литературая учебникъёсы текстъёс люкан бордын, - шуиз Удмурт кун университетысь дышетӥсь, доцент Любовь Федорова. - Литературалы дышетонлэсь котькуд ёззэ пыр-поч учким, вуж программалэсь быдэсак куштӥськытэк, ӟучез вылэ пыкъяськыса. Тыршиськом озьы: огез мукетыныз герӟаськыса мед кошкоз, созэ но тазэ олокӧня пол кутонэз медаз луы, удмурт но ӟуч литератураос куспазы ваче мед тупалозы. Темаосты чакласьком, но нырысь интые тае ум пуктӥське, али уногес саклык висъяськом жанръёс сярысь валанлы. Вераны кулэ, та вие ми нырысь интые поттӥм дышетскись нылпи сярысь сюлмаськонэз: кыӵе, мар пайда басьтоз со соизъя яке таизъя учебникъя дышетэмлэсь. Соин ик нылпилэсь малпаськон визылзэ муромытыны тыршиськом пӧртэм юалляськон, ваче кенешон, диалог пыр. Учебникъёсты-хрестоматиосты дасянэ пыриськись писательёс ласянь меӵкытэсьгес веранъёс вал. - Асьмеос нырысь ик учкыны кулэ, малы дышетыны но кызьы дышетыны, - пусйиз Алексей Ермолаев. - Зэм, классикатэк асьмеос пыр ум потэ, но, со сяна, вань ук вунэтэм писательёсмы но. Шуом, Иван Дядюковлэсь, Михаил Ильинлэсь, Михаил Шахмаевлэсь нимаз-нимаз кылбуръёссэс программае пыртыны луоно. Ватонэз ӧвӧл, поэзия, лирика асьмелэн кутсконысеныз ик кужмоез удыс луэ. Нош прозамы, жаляса верано, вульгарно-социалогической сюресэ кожылӥз. Соин ик татысь быръён- утчаськон ласянь уно шуг-секытъёс кылдо. Тани мон, кылсярысь, ас поннам валаны уг быгатӥськы, ма кароно Кедра Митрейлэн "Секыт зӥбет" романэныз. Кудласянь сое табере учконо? Черклы, православилы яке быдэс христианстволы пумит луись? Нош кызьы эскероно Генрих Перевощиковлэсь "Йыбыртты музъемлы" тетралогизэ?.. "Усьтыса" кельтэм юанлы ас сяменыз валэктӥз Фома Ермаков: - Озьы ке, ӵушоно луоз Пушкинлэсь но, мукетъёсызлэсь но трос произведениоссэс. Вунэтоно ӧвӧл: писательлэн дунне шоры учкемез ас вакытэзъя тупатӥське, пияла пыртӥ учкем кадь. Та учыре но озьы ик эскероно: христианство удмуртъёс понна кужмысь, бодыен жугыса пыӵатэм маке вал, соин валче трос синкыли кисьтонэз, курадӟонэз адӟиз калык. Финн-угор калыкъёс понна поп зэмзэ но луиз урод мае ке кизись-вӧлдӥсь. "Секыт зӥбетэз" гожтӥсьлэн кужымез со бордын: удмурт калыклэн вашкала дырысен возиськем улон радэз, солэн умой палъёсыз утиськыны кулэ, со сярысь вера- сюлмаське писатель. Нош со малпанэз нылпилэн йырвизьмаз вуттыны кулэ дышетӥсь. Национальной (удмурт, коми, мари но мукет) классъёслы ӟуч кылын сётӥськись литератураез басьтом. Отысь финн-угор писательёслэсь гожъямъёссэс чик уд шедьты. Кавказысь вань. Огъя вераса, асьме выжы калыкъёслэсь писательёссэс школа программае пыртон бордын ужано но ужано. Али номыр лэсьтымтэ ай, шуыны луэ. Та ласянь асьмеос али ке но адӟем карыны быгатӥськом Куӟебай Гердлэсь, солэсь "Шуныт зор" хрестоматизэ син азямы возьыса. Таӵе малпанзэ вераз Удмурт кун университетысь профессор Анна Зуева. Со ик шуиз: удмурт кылъя, литературая учебникъёсыз кие кутоно ке, паймоно гинэ: школьниклы малпанъёсыныз вылӥетӥ лобаны луонлык ӧвӧл, укыр гурт котыртӥ гинэ бергамын. Ӝӧк вылад телефон вань шуыса гинэ луэ-а азьлань мыныны, куке асьме улонмы кыдёке азьпала "тэтчиз" ни, шуом, компьютер, электроника кутӥськемен? Озьы ке озьы. Но... "город темаез" "Анай кылэ" яке мукетаз пыртыку, быдэсак сьӧлтаськоно луэ городын кутӥськись кылъёс (лексика) пушкы. "Вае милемлы чылкыт кылын гожъямъёстэс, соку сыӵе шугъяськонэ ум вуэ". Таиз ини нош ик учебникъёсыз дасясь методистъёслэн-тодосчиослэн куронзы. Доцентлэн Виктор Шибановлэн сюлмаськонэз: нырысь ик, тужгес устооссэ произведениосыз школа программае кутыны уг луы. (Тани басьтом Алла Кузнецовалэсь "Кобла мон..." кылбурзэ. Кызьы сое валалозы пиналъёс? Одно ик ас сяменыд, визьмо валэктон кулэ.) Кыкетӥез, "улэп писательёсын ужаны секыт". Солэн, котькуд музъемвыл адямилэн сямен ик, олокыӵе но йӧспӧртэм сямъёсыз, кожонъёсыз вань. Нош биографизэ вакчияк, бездыт сётоно луэ, писателез улэпен син азе пуктыны ум быгатӥське ни. Уката ик - гожтӥсезлэн кылыз чылкак кӧс ке... Зэм, писатель - улэп адями, улонын со таӵе, нош творчествоын мукет. Тае лыдэ басьтытэк уг луы. Ас малпанзэ вераз Никвлад Самсонов но. Правленилэн кенешоназ озьы ик пыриськизы Петр Поздеев, Анатолий Уваров, Анатолий Андреев, Вячеслав Ар-Серги но Зоя Богомолова. Йылпумъяса шуэмын вал: таӵе вераськон пайдаёгес луысал, солы нимысьтыз, эшшо но ӟеч дасяськысал ке. Т. Петрова. Писательёслэн тӧрозы Егор Загребин: капчи ӧвӧл удмурт литературая книгаос понна кыл кутыны. Тазьы ваче кенешыса вордско вордскем кылъя, литературая учебникъёс. Дышетӥсьёслэн шоразы - тодосчи, литературовед Фома Ермаков. "Удмуртия" издательстволэн берло аръёсы потэм куд-ог книгаосыз. 4000-лэсь ятыр Ува ёросысь "Заря" гурт кооперативын 15 сентябрьысен гужем лагерьёсысь фермаосы ваизы. - Туж вазь ӧвӧл-а? -юай мон эштосэн кивалтӥсьлэсь И. И. Тихомировалэсь. - Малы пусъем дырез витёд, зоръёс кутскизы но кезьыт луиз бере? - шуиз Иван Иваныч. - Пудоез тулыс лагерьёсы келяммы бере ик гидъёсты тупатъяны кутскимы. Со понна стройбригада кылдытэмын вал. Отын нуналлы быдэ ужазы 5-6 мурт. Милям вить интыын пусъёмы. Кыказ - скалъёс. Туэ рос-прос тупатъямы нырысетӥзэ скал фермамес. Вошъямы ваньзэ вжъёсты, умоятӥмы кыед утялтонэз, выльдӥмы липетъёсты но вӧлдэтъёсты, пушсэ тӧдьмамы но дезинфекция ортчытӥмы, мукет гидъёсы чыры-пыры тупатъянъёсты быдэстӥмы. Вань гидъёс толлы ӟеч дасямын. Хозяйство туэ тырмыт пудо сиёнъёс дасяз. Тырмыт дасямын куро, турын но силос. Дасямын жмых но нюлон сылал. Кык толэзьлы тырмымон куро но турын ворттэмын ни гидъёс доры. Гужем пудоез возьман туж ӟеч радъямын вал. 400 пала скалъёс но ветылъёс Помазкино но ӝужыт бусы гуртъёс вӧзысь лагерьёсын улӥзы. пастухъёс но скал кыскисьёс сокем ӟеч тыршизы - гужем вылтӥ котькуд скаллэсь шорлыдын 17 ктлограмм йӧл усиз. - Ужасьёсмы пӧлын ӵошатскон орчытъянэз ӧм на вунэтэ, вормисьёслы быдэс толэзьем уждун тырыны чакламы, соос пӧлы дояркаос гинэ уг, пастухъёс но пыро. Быгатыса кивалтэмлэн но котькуд пудо утисьлэн ӟеч тыршемез "Заряын" син азьын адӟиьке. Туэ тямыс толэзьскын котькуд скалзылэсь шорлыдын 3042 килограмм йӧл кыскизы ни. Со оскон кылдытэ, ар бырытозь та лыдпус 4000-лэсь ортчоз шуыса. Г. Земцова. Люкаськозы ужбергатӥсьёс Удмурт Республикаысь пичи ужбергатон удысын ужасьёс 28-тӥ сентябре люкаськозы кыкетӥ конференциязы, ортчоз со Удмуртиысь Профсоюзъёслэн федерацизылэн юртаз. Пичи ужбергатон удыслэсь туннэ нуналзэ но азинскон ужпумъёссэ эскерем сяна, люкаськемъёс бадӟым саклык висъялозы удысэз азинтонын общественной огазеяськонъёслэн но ужбергатӥсьёслэн кулэлыксылы. Со сяна, конференциын эскеремын луозы Удмурт Республикаын пичи ужбергатонэн вырисьёслэсь выт тыронзэс капчиятон сярысь законлэн инъетаз воштонъёс но ватсанъёс пыртон ужпумъёсъя. Конференцие пыриськоз 350 мурт. Ортчытэ ужрадэз Удмурт Республикаысь Ужбергатонъя кун комитет. Удмурт Республикаысь Правительстволэн пресс-службаез. Нянь удалтӥз, картофка "пӧяз" Республикаямы туэ котькинлэсь трос нянь люказ Алнаш ёрос. Со гектарысьтыз шорлыдын 20 центнер усиз. Алнашъёс дыраз тырмыт кидыс кисьтӥзы, ӟегзэс вакытаз кизизы. Кын улэ гыремын 67 процентэз муос, силос утялтэмын 85 процентэз. Котькытын сямен ик татын но али картофказэс копало. Зэм, ёросын "кыкетӥ нянь" будэтэ 7 эштос гинэ. Со гектарлы быдэ 63 центнер усе, утялтэмын ни картофка 84 процентэз. О. Кожанова. Ми - Россиын улӥсьёс Таӵе ӧтён улсын Удмуртиын ортчоз странаысьтымы егитъёслэн пумиськонзы. Форумез радъяло Россиысь калыкъёслэн ассамблеязы, Удмурт Элькунысь Кун Кенеш, Нациосын ужан политикая министерство, Егитъёсын ужанъя кун комитет, удмурт егитъёслэн "Шунды" огазеяськонзы но Удмурт кун университет. Кенешонэ лыктозы пӧртэм огазеяськонъёслэн егит азьветлӥсьёссы, государствомылэн ваньмысьтыз сямен улосъёсысь быръем но быдэсъясь ёзъёсын ужасьёс, тодосчиос, журналистъёс но мукет эшъёс. Турлы ужпумъёсты эскерон сяна, пумиськонэ вуэмъёсты вите шулдыръяськон программа. Озьы ик чакламын ортчытыны пӧртэм ӵошатсконъёс, викторинаос. Вормисьёслы сётозы кузьымъёс. Валамон ни, егитъёслэн ужрадзы юрттоз калыкъёс куспын эшъяськонэз юнматыны. Егитъёслэсь форумзэс умой радъян вылысь, Ижевске вуиз нимысьтыз делегация. Соин кивалтэ Россия Федерацилэн Кун Думаысьтыз Нациослэн ужъёссыя комитетлэн тӧроезлэн воштӥсез Светлана Смирнова. Дорамы озьы ик лыктӥз Россиысь калыкъёслэн ассамблеязылэн быдэсъясь комитетэзлэн тӧроез Чимир-Доржу Ондар. Толон ортчиз егитъёслэсь пумиськонзэс радъянъя комитетлэн нырысетӥ заседаниез. Соин кивалто Россиысь калыкъёслэн ассамблеязылэн советэзлэн тӧроез Рамазан Абдулатипов но асьме Кун Кенешлэн кивалтӥсез Александр Волков. Егитъёслэсь ужрадзэс Удмуртиын ортчытон - ми понна бадӟым дан, пусйиз республикамылэн кивалтӥсез, оргкомитетлэсь заседанизэ усьтыкуз. Пусйымон соиз: форумез радъян дыр тупа асьме элькунлы 80 ар тырмонэз пусъёнэн. Со возьматэ республикамылэсь калык кусыпъёсты азинтонэ рос-прос пыриськемзэ. С. Андреев. Улӥз калыкез понна Илья Михайлович Токмурзин вордӥськиз но будӥз Каракулино ёросысь Ныргында гуртын. Калыкез дышетон удысын куамын куать ар ӵоже тыршиз. Кема но ӟеч ужамез понна пусъемын Ленин орденэн но "Ужын азинлыкъёс понна" медален, "Калыкез дышетонысь азьветлӥсь" дано гадьпусэн но "Удмурт АССР-ысь школаысь дано ужась" сӥлы нимен. Илья Ломберский гожтӥз трос веросъёс, очеркъёс, кузьмадёсъёс, пьесаос, кылбуръёс но "Миллион ялон" роман-мемуар. 1924-тӥ арысен СССР-ысь Писательёслэн огазеяськоназы вал. Илья Михайлович ас калыкез пӧлын ӟеч дышетӥсь но гожъясь гинэ ӧй вал. Со туж уно тунсыко но кулэ ужъёслы кутскон сётылӥз, интыысь парторганизациен кивалтӥз, зэмос большевик-ленинец вал. Илья Михайловичлэн вакчи улонэз тунсыко, узыр но туж кулэлыко вал. Нош улонысь кошкиз со вордӥськем гуртаз 1956-тӥ арын. Бадӟымесь вормонъёссэ лыдэ басьтыса, шайгуэз вылэ пуктэмын буре вайытӥсь из, нимыз сётэмын Ныргындаысь одӥгезлы чебер но кузь ульчалы, та адямиез данъяса ик татысь шор ёзо школалэн юртэз но улэм но ужам коркаез борды юнматэмын буре ваён пулъёс. Вынлыко элькунъёсысь - Удмурт шаерысь но Марий Элысь - кивалтӥсьёс куинь ар пала кенешизы тодмо пор гожъясьлы, дышетӥсьлы сӥзем синпелет кылдытон сярысь. Зэм, та чебер малпан быдэсмиз туэ гинэ. Синпелетэз кылдытӥз Ижысь тодмо пор скульптор Борис Михайлович Козлов (со ик дасяз ни В. Г. Короленколы, Т. Н. Барамзиналы, И. А. Наговицынлы, Куӟебай Гердлы но удмурт шаерысь мукет тодмо адямиослы сӥзем синпелетъёс). И. М. Токмурзинлы-Ломберскийлы сӥзем синпелетэз усьтӥзы Ныргындаысь дано адямиос - ужысь ветеран Алексей Андриянович Кулмашев, трос нылпиё анай, "Ныргындыш сем" фольклор ансамбльысь мыло-кыдо кырӟась, синмаськымон пудо утись Галина Дмитриевна Култашева. Тодмо пор гуръёс чузъяськемъя, синпелет выжые выдӥзы уно улэп сяськаос. Р. Токмурзин. Чагыр экранысь адӟо асьсэдыз Можга городын улӥсьёс чагыр экранысь адӟыны быгато ни асьсэдыз. Бен, туэ 6-тӥ июньысен кутскыса. Нырысь-валысь эскерон понна гинэ ке потазы, али сентябрьысен Россилэн Удмурт Республикая Россвязьнадзорез лэзиз ини Можгалась муниципальной телевидениез умой-умой ужаны. "Можга" ТРК-лы кивалтӥсе юнматэмын Анатолий Алексеевич Красноперов. Солэн верамезъя, телекомпанизы али городын улӥсьёс поннагес ужа, гуртын та передачаосыз кутыны уг быгато на. Передачаос луо арняяз ньыль пол, ӝыны часъемесь одӥг метръем диапазонысь 8-тӥ каналын. Студилы оборудование, сю ваттъем передатчик басьтэмын городлэн, предприятиослэн кужыменызы. Телепередачаос луо ӟуч, удмурт но бигер кылын. Котькуд четверге, толэзьлы ньыль пол, учкисьёслы удмурт кылын вазиське Удмурт кун университетысь журналистикая факультетэз йылпумъям нылаш Лариса Постникова. Бигер передачаосты (толэзьлы кык пол) нуэ филфаклэн бигер кылъя ёзаз дышетскем Эльвира Насибуллина. Ма сярысь вера, мае возьматэ можгаослэн чагыр экранзы? Нырысь ик, валамон ини, маин пумитало соос Удмурт Республикамылэн кунлыкезлы 80 ар тырмонэз, 4-тӥ октябре пусъёзы Городлэсь нуналзэ, ӵем ивортыло ужысь но ожысь ветеранъёсын ужрадъёс, наркоманилы но мукет урод сямъёслы пумит нюръяськон сярысь, озьы ик тодмато культура удысысь пӧртэм иворъёсын. Т. Петрова. Шутэтском Ямболын Таяз толэзьлэн кутсконаз столицаысьтымы делегация вуылӥз Болгариысь Ямбол городэ. Ижевск но Ямбол вынъяськем каръёс луо уго. Экономика но культура удысын та городъёс куспын ма но со лэсьтӥське ни. Но асьмеды Болгария кыске Сьӧд зарезь дурысь курортъёсыныз. Уноез соос буш уло. Тани Ямбол городэ но туристъёс уг вуыло ни. Татысь курортэз Ижевск выльдыны чакла аслаз кужыменыз. Озьы, оло, вуоно арын асьмеос шутэтскыны быгатом ни шундыё Болгариын. Со сяна, вераськон мынэ отысь пӧртэм пумо консерваос, зэмос вина басьтон сярысь. Нош та нуналъёсы асьме доры лыктэмын Германиысь делегация. Немецъёсын вераськон мынэ отчы куштӥськем покрышкаосты келян сярысь. Озьы ик соос чаклало городысь ульчаосты уин югдытон сярысь. Но со ваньмыз азьланьын на. Н. Ефремов. Бусы ужъёс 22-тӥ сентябрьлы Районъёс Тысё юос утялтон Куро дасямын Кын улэ гыремын Ю-нянь вузамын гектар гектар гектар планъя быдэстэмын (процентэн) планъя процентэн тоннаен Яр 22705 86,9 9,7 8082 12460 20,6 2224 Глазов 23461 99,6 11,4 13385 19533 46,9 2118 Юкаменск 23370 97,3 11,2 15528 14040 46,3 923 Балезино 26722 99,6 11,3 20755 23536 40,1 960 Красногорск 13607 98,4 10,0 11614 8376 41,4 869 Кез 18179 100,0 10,8 11299 15215 64,5 487 Дэбес 16872 96,0 10,8 10622 12955 48,5 639 Игра 17503 94,0 11,5 6371 12041 58,2 185 Як.-Бодья 11707 94,5 12,8 4706 8500 35,1 408 Шаркан 21218 100,0 12,2 12432 19609 60,6 479 Селта 15516 94,0 9,5 10158 10280 34,2 572 Сюмси 4446 94,2 9,4 2480 2750 63,7 200 Ува 28982 95,3 12,5 18900 18185 46,6 690 Вавож 18599 95,8 17,0 11317 13217 51,8 623 Кизнер 15769 97,7 9,5 9986 9930 39,6 721 Можга 38109 99,6 13,9 30759 28970 53,9 839 Грах 14881 95,5 13,7 11753 11990 32,5 1214 Алнаш 25271 99,8 20,0 21661 22170 б9.3 1777 Пичи Пурга 22736 93,5 16,3 17200 28979 34,5 1573 Кияса 17320 91,7 12,3 12100 19100 17,6 1 329 Каракулино 25123 98,3 14,3 14266 21024 41,9 412 Завьял 26315 94,1 14,4 13882 27119 29,7 1635 Вотка 18372 108,6 12,3 9983 10340 39,9 16 Сарапул 37355 89,6 14,6 17288 33553 30,9 2990 Камбарка 3070 94,9 9,4 2254 3100 13,0 105 Республикая 507208 96,6 12,9 318781 406972 43,3 23988 1999 арын 564301 83,6 10,3 - 413564 165979 4,1 Адӟон Пичи Никита атайзэ быронлэсь утиз 14-тӥ сентябре газетамы печатламын вал "Инмар утиз, дыр" пичи гинэ ивортон. Отын вераськон мынӥз, "Курск" лодкаын Ува посёлокын вордскем Николай Кириллов но бырыны быгатысал шуыса. Ивортон печатласькем бере, лыдӟисьёс авторезлы трос юанъёс сётъязы. Соин со Увае командировкае потаз но подлодкаын ужам Николайлэн атаеныз Михаил Васильевич Кирилловен пумиськылӥз. Та шудтэм учырлэсь азьло Колялэн анай-атайёсыз уг тодо вылэм, кытын службазэ ортчытэ бадӟымез пизы. Бен, огзэ тодытэк ӧз улэ: ву вылын, со - электрик, Мурмансклы матын. Гожтэт гожъязы та областьысь Кольской ёросысь Видяево военной городоке. Сыӵе кусыпсы укмыс ар кыстӥськиз ни. Куддыр пизы 6-9 толэзь чик ӧз гожъялля. Куке тодмо луиз, "Курск" выиз шуыса, атай телеграмма ыстэ, пиезлэсь кытынзэ военной кивалтӥсьёслэсь тодыны турттыса. Юанлы валэктон вуиз: пизы "Курскын" службазэ ортчытэ. Кызьы уз шимы анай-атайёслэн сюлэмзы? Но со азьын гинэ Коля Увае телеграмма ыстылӥз вал, анай-атайёсызлэсь визьнод но юрттэт курыса. Кытын табере пизы? Коля кышнояськиз, нылпи возьмало вал. Мар луиз? Табере ини телефон пыр герӟаськизы. Колялы зарезе потоно, нош военной госпитальын ужась кышноез Галя дырызлэсь вазь нылпи вайыны кутскиз, йырсазьзэ ыштыса, реанимацие шедиз. Эмъясьёс, Галяез кулонлэсь утемзы бере, картэзлы шуизы: кузпалдэ но пидэ чик ӝегатскытэк но коньдондэ жалятэк, лымшор пала ну, сотэк тазалыксэс тупатыны шуг луоз. Ярам коть, вазь вордскем пиез, секталаезъя 2,5 килограмм гинэ ке но вал, чырткем вордскем. Егит атай пиезлы Никита ним сётӥз. Но со та югыт дуннее вордскыны ӧй ке дыртысал, атайзэ ноку но ӧй адӟысал. "Курсклэн" командованиез Кириллов электриксэс таяз учыре зарезе мынонлэсь мозмыто. Николайлэн варманаез лымшор палан, Евпаториын, улэ. Соин воргорон, кӧня ке нуналлы отпуск басьтыса, огшап гинэ катьяськем кышнозэ но пичи Никитазэ шундыё шаере келяса кельтэ. Табере солэн ӵош ужам эшъёсыз но ӧвӧл ни, ужан интыез но быриз. Но, чырты вань ке, сиес шедёз, шуо калыкын. Службаез кышкыт ке но, Коля уг малпа ву пуштӥ уянзэ куштыны. Вордскемын со 1973-тӥ арын 13-тӥ мартэ. 28-тӥ аресаз гинэ мынэ ай, но пенсиозь кылемын на 3,5 ар гинэ. Угось стажез 9 ар ни, нош ваньзэ люкано 12,5 ар. Подводникъёслэн одӥг арзы кыкен лыдъяське. Адямилэн улон сюресэз одно ик потэ кыӵе ке но малпаськонысь, ӵем дыръя со пичи дырысеныз синмаськыса учке кин ке но шоры. Кенешиськом Николайлэн атаеныз Михаил Васильевичен. Со Пенсиосъя фондлэн Ува ёросын валтӥсь уполномоченноез. - Мынам кык пие , - шуэ со. - Коля бадӟымез - со лякыт но кылзӥськись будӥз. Нырысь йылпумъяз Сарапулысь механической техникумез, электрик луиз. Но туж потэ вал моряк луэмез. Армиын зарезь вылын вал, бӧрысь отчы ик кылиз. Алигес гинэ тодӥ: нырысь со "Воронеж" подлодкаын уям, собере - "Курскын". Ог 6-9 толэзен гожтэт гожъямтэ дыръёсаз подлодкаен Балтикаысен Япония палозь Тихий океанэ вуылэм. Толалтэ, пе, куддыр лодказы лазеггес интыетӥ улласянь кӧтыныз музъем вылтӥ мынылӥз, нош выллласян йӧ борды йӧтскылӥз. Таӵе учыръёсы озьы ик шудтэм учыре шедьыны быгатысалзы, но капитанзылэн визьмо кивалтэмез улсын шуг-секытысь потылӥллям. - Нош ӵыжы-выжыосты пӧлын военнойёс вань-а? - юасько мон солэсь. - Вань, - валэктонзэ азьланьтэ атай. - Куинь кузя. Огез - агае Игорь. Али со пенсиын ни. Йылпумъяз Орджоникидзеысь военной артиллерияя училищеез. Ожмаськиз Афганистанын. Званиезъя майор. Кыкетӥез - агае Пётр. Йылпумъяз Хабаровскысь военной училищеез. Автомобилист, подполковник. Али контрактъя службазэ ортчытэ Кубаын. Москвае берытскоз октябре. Олокытын но вал ни со: Монголиын, Танзаниын, Прибалтикаын. - Нош подлодкаын нокинды ӧй вал-а Коля дырозь? - Вал. Коля нимо ик племяннике. 13 ар ӵоже подлодкаын уяз. Озьы туж вазь пенсие потӥз. Али атаеныз ӵош улэ Агрызын. Шонерзэ верано ке, таиз Коля моряк луыны уг малпа вал. Армиысь адӟиськыны бертакуз, со шузимымоназ синмаськиз одӥг нылашлы, сое юн яратӥз, малпаз кышнояськыны, нош выль кен луонмы сое ӧз возьма, мукетызлы бызиз. Коля дор палъёсаз берысткыны пумит луиз, озьы вань службазэ подлодкаын ортчытӥз. Кык Коляос ӵем ӧз пумиськылэ, соин вераны уг быгатӥськы, Коля пие Коля племянникелэсь адӟем кариз-а? Оло, озьы но со. - Михаил Васильевич, нош кыкетӥ пиды? - Дмитрийлы 25 арес. Таиз пичи дыръяз ик туж шӧртчи вал. Йылпумъяз Пермьысь военной авиационно-технической училищеез. Службазэ ортчытэ Камчаткаын. Кыксы ик бертыло, бадӟымез - миым, пичиез - туэ. Ог-огзэс куинь ар ӧз ни адӟе. Тани Коля вуоз, толэзь улыса. Ачиз но Михаил Васильевич етӥз на, солы 52 арес. Лапег мугоро, йыг-йыг, Колялэн но, подводник ке но, ӝуждалаез 161 сантиметр гинэ, шуэ атаез. Кузпалыз Капиталина Александровна ужа Госстрахын страховой агент луыса. Вӧзаз дыръя анай пиоссэ черке ӧз пырты. Армие кошкыкузы чукындыриз, инмар пиоссэ шудтэм учырлэсь мед утёз шуыса. Вылӥ верамъя тодӥськомы ни: инмар утиз Коляез. Кирилловъёслэн атайзы - азьло коммунист, атеист. Но солэн но кышкыт учыр бере сюлмыз небӟем ни. Николай Кирилловлы сӥзем корреспонденциме йылпумъяме потэ ӵошатонъёс вылын. Кӧня ке ар талэсь азьло Африкаысь одӥг кивалтӥсьлэн ТУ-154А самолётэз гурезьёсын пазьгиське. Отын улэп кыле одӥг ӟуч адями. Со, интытэк кыльыса, пуксем самолётлэн грузовой отсеказ небытэсь арбериос пӧлы. Советской аръёсы ай кемаласьгес ини Ленинградын одӥг кышномурт усе 23-тӥ этажысь сяська убо вылэ. Номыр но уг луы. Ижевскысь 5-тӥ этажысь пичи нылэз укноетӥ кушто, нош сое укно ултӥ ортчись милиционер киосыз вылэ кутыса уте. Зэм, адӟонлэсь уд ортчы. П. Скобелев. Николай Кириллов (паллянысез) нырысь-валысь службазэ ортчытӥз "Воронеж" лодкаын, отысь нырысетӥ командиреныз (капитанэныз), со та дыре ужаны выжтэмын Москвае. Николай Кириллов (бур паласез) службая эшъёсыныз. Атаез вераны ӧз тоды, кудаз подлодкаын лэсьтэмын туспуктэм. "Курск" лодка выемезлэсь азьло. Николай Кириллов (паллянысен кыкетӥез). Олимпиада даур ӵоже (1896-1996) Ваньмыз Зарни Азвесь Бронза 1. США 1974 815 623 536 2. Россия (СССР) 1193 467 382 344 3. Германия 1113 359 370 384 4. Великобритания 616 170 224 222 5. Франция 519 161 172 186 6. Италия 430 159 130 141 7. Венгрия 414 140 123 151 8. Швеция 450 134 149 167 9. Финляндия 289 98 79 112 10. Япония 280 93 89 98 11. Австралия 292 87 85 120 12. Румыния 239 63 77 99 13. Чехия (Чехословакия) 159 53 53 53 14. Китай 164 52 63 49 15. Польша 227 50 67 110 16. Голландия 183 49 56 78 17. Канада 210 48 77 85 18. Куба 116 46 36 34 19. Болгария 182 43 76 63 20. Норвегия 118 41 41 36 21. Швейцария 159 40 63 56 22. Корея 126 38 42 46 23. Дания 150 36 58 56 24. Бельгия 127 34 48 45 25. Турция 59 30 16 13 "Спорт-экспресс" Дуннеез усьто удмурт кылын Туннэ вить ар тырме Куӟёбай Герд нимо кун национальной гимназилы. Сю тямыстонлэсь ятыр пиналъёс пӧртэм удысъёсъя тодон-валан люкало, нош нырысетӥ интыын - удмурт кыл. Городын будӥсь нылпиос анай кылын чебер вераськыны но гожъяськыны дышетско . Шуг-секытъёс туж уно: гимназилэн та дырозь ӧвӧл на нимаз юртэз, уг тырмо дышетон арбериос, уката ик техническойёсыз. Озьы ке но, коллектив тырше но утчаське. Дышетӥсьёслы но, пианлъёслы но задор мылкыд кузьманы быгатэ гимназилэн директорез Ольга Константиновна Шилова. Гимназилэн азинскон сюресэзлы сӥзем ужрад ортчоз туннэ Удмурт драмтеатрлэн юртаз. Кутсконэз 17 часын. Ю. Михайлова. Петр Кубашев "Кайсы" повестьысь люкетъёс Гомась инвис Граждан ожлэн кыкетӥ тулкымез Кайсы черкогуртэ туж бадӟым тулкымен пальккиськиз тулыс, гырыны потон азьын. Сизьгурт бамалэтӥ Колчаклэсь уллане гылӟись сьӧд пилем мында солдатъёссэ адӟыса, Кайсыын сылӥсь горд солдатъёс кушетскизы: соос ӧз вите, шӧдске, тӧдьыослэсь таӵе шуккетсэс. Оген-кыкен, уллёен-уллёен, кир-пазь луыса, гуртысь кошкыны ӧдъязы Карйыл бусы пала. Гурт калык но шымырскиз, шыпак луиз, укнооссэ возъяз, капкаоссэ-ӧсъёссэ пунняз: горд солдатъёс уго туж уно кышкыт кылъёс мадизы тӧдьыослэн гурт калыкез сантэмамзы, пудо-животэз, ю-нянез таламзы, егит пиосыз кужмысь ас сьӧразы, ожмаськонэ, нуэмзы сярысь. Паймытӥз огез: сыӵе бадӟым кужым, ас азяз кыӵе ке люкетӥсь арбериез ньылӥсь, куажгатӥсь, сэрпаллясь кужым, гуртлэсь одӥг бусы капказэ но, кенерзэ но ӧз йӧтылы, ӧз тӥя. Гурезетӥ васькыкузы ик адӟиллям, шӧдске, гордъёслэсь олань талань бызьылэмзэс но Карйыл пала пегӟемзэс. Соин но, дыр, ыбылӥськонъёс но ӧй вал, коркась корка, юртысь юртэ пыраса, нянь колдыез, шуккем вӧез, шубаез яке ӟеч пыдкукез кужмысь талась но ӧй вал. Колчаклэн армиез Кайсы черкогуртэ вуиз Кам ласянь, Сарапул но Елабуга городъёсыз басьтэмез бере. Та гуртын ӝегатскыны дырыз ӧвӧлэн, шӧдске, Грах пыр сюбег дырдыетӥ выллем гылӟиз Казане нуись сюрес вылтӥ, Карйыл бусы пала, кытчы али гинэ чигназы гордъёс. Пумтэм-йылтэм солдатъёслэн вамышъямзы, валъёслэн соргетэмзы но гырдаллямзы, уно пӧртэм пыӵал тӥрлыкъёсын тырмытэм уробоослэн ӟукыртэмзы быдэс Кайсыез согиз. Карйыл бусые чигнам гордъёс но ӧз нырулэ. Котькуд солдат аслыз тупамон гу гудӥз но отчы каръяськиз, ваньмыз секыт пыӵал тӥрлыкъёс Кайсы палась лыктӥсь но Кайсыетӥ вамышъясь тӧдьы солдатъёс пала берыктэмын вал. Грахе нуись сюрес вылын Ӝоген пуштӥз нырысетӥез снаряд. Колчак солдатъёслэн йыг-йыг вамышъясь радзы соку ик кир-пазь луиз. Сюрес син куспын бушаз, отын но татын кылӥськиз пулемётъёслэн тачыртэмзы. Адӟиськизы костаськись ог дасо шӧйёс. Соосты солдатъёс-санитаръёс сюреслэн мыд-мыд палаз кысказы. Кыкетӥез снаряд пуштӥз Кайсы черкогуртлэн Бадӟым урамаз. Отын тужгес но уно вал на Грахе нуись сюрес вылэ кожыны вуымтэ тӧдьы солдатъёс. Жингыр-жангыр вазизы Кимокъёслэн, Пачейёслэн, Гирокъёслэн куажгатэм укно пиялаоссы, кылӥськизы сӧсырмем солдатъёслэн ӝуштэмзы но юрттэт курыса кесяськемзы. Ваньзэ тае Митрошинъёслэн корка сиг укноетӥзы учкыса улӥзы Максим, Марья, Санька, Самар Пилька но Иванька. Куиньметӥез снаряд Митрошинъёслэн корка вӧзазы ик пуштӥз. Быдэс юрт зуркак луиз, инбам сьӧдэктӥз, ӟукыртыса погразы кык бадӟым писпуос. Пиналъёс, туж юн кышкаса, корка сигысь усьтыр-табыр васькизы но адӟо: азбаре пыро ог вить кузя тӧдьы солдатъёс, туссы кушетскемын. - Кин татын кузё? - юаз огез. - Мон, - шуиз Иванька. - Милям офицермы сӧсырмиз. Тӥ доры интыяно луомы, дыр. Шуныт вуды вань-а? - Шедьтом, - шуиз Иванька. - Дася бен! Ми сое корка пыртомы, - кызьы дыртыса пыризы, озьы ик капка сьӧры дыртыса ышизы солдатъёс. - Хм!.. Вот таиз зол!.. - Иванька йырберзэ кормыштӥз но эшъёсыз шоры учкиз. Соосыз, ма карыны паймыса, долкам кадь сыло. - Ӧрӟиос, малпаськыны дырмы ӧвӧл, ваньды - мон сьӧры! Иванька бызьыса сямен корка пыриз, со сьӧры - эшъёсыз. - Кытӥ калтыртӥськод, Иванька! - кышнопалась бадӟым ӟус вылысь шонаськыса кадь султӥз Иванькалэн анаез, Лукер. - Мон ке татын... Осто!.. Номыр ӧд луэ-а?.. Ваньдылэн йырды быглес-а?.. Кышкаса пыдессинъёсы жильдӥськизы, кыре потэме но ӧйлась ни... - Анай, тӧдьыослэн офицерзы сӧсырмем, али сое татчы пыртозы... - Тӥни, пырто ни! - укное учкиз Мани. - Ой, копак виресь!.. Солдатъёс туж чакласькыса сӧсырмем офицерез корка пыртӥзы но ӧс палась бадӟым ӟус вылэ выдтӥзы. - Шуныт ву кулэ! - шуиз тӧдьы халатэнэз воргорон, Иванлэн анаез шоры учкыса. Собере солдатъёс пала берытскиз. - Вае, кительзэ кылёме... Лачмытгес, эн дыртэ, адӟиськоды ук: йырсазьзэ ыштэмын... Иванлэн анаез гуре пуктэм бадӟым горшокез поттӥз но отысь быректэм вуэз пу тусе кисьтӥз, сое кезьыт вуэн сураз, собере тусез солдатъёс доры ваиз. - Вот-вот, усто ву, - чиньызэ вуэ месылыса, Лукерез ушъяз тӧдьы халатэнэз першал. - Чылкыт ӵушконэд вань-а? - Ма... кызьы уз луы, вань... - Лукер ӝажые кыстӥськиз но юг-юг тӧдьы дэра ӵушкон сётӥз. - Осто!.. Туж юн сӧсырмем кадь ук?.. - офицерлэн кӧсэктэм ымнырыз шоры учкиз. - Егит нош ай кыӵе со!.. - Та-ак... М-да... - ас понназ лулӟылэ першал. - Кителезлэсь но дэремезлэсь паллян саесъёссэс вандылоно: уть, кыӵе луэмын пельпумыз... Вае качы! Сӧсырмем интызэ миськыкузы, офицер сазьтӥськиз. Секыт ӝуштыса, каллен гинэ юаз: - Быремъёс уно-а? - Господин офицер, кӧня ке дырлы тӥ ожмаськон сярысь вунэтоно луоды, - шуиз першал. - Сӧсырмем интыды улондылы кышкыт ӧвӧл ке но, бурмонды кема кыстӥськоз. Паллян пельпумды сузмытэмын. - Малпасько, пал суй уд кельтэ монэ? - Конечно, господин офицер! Тани, миськеме-утялтэме бере, полевой госпитальысь врачез ӧтё. Оскисько: со тӥледыз эшшо но буйгатоз. - Малы госпитале уд нуиськы? Татчы кельтыны малпаськод-а, мар-а монэ? - Конечно, господин офицер! Татын тӥледлы туж умой луоз. Учке ай: вӧл-вӧл чылкыт корка, уно егит эшъёс... - палэнынгес туж паймыса сылӥсь Иванька но солэн эшъёсыз шоры возьматӥз першал. - Тӥ удмуртъёс-а? - офицер пияшъёслы вазиськиз но ӧжытак пальпотӥз. Тае адӟыса, егитъёслэн ымнырысьтызы кышкам туссы соку ик тӧлӟиз. - Око-о, удмуртъёс ми, - вазиз Максим. - Ӟуч кылэз тодӥськоды-а? - Тодӥськом, господин офицер! - чёт-чёт вераз Иванька, эшъёссэ господин офицер шуэменыз паймытыса. Першал Лукер доры лыктӥз но лушкемак юаз: - Пумит уд луы-а сое ас дорад кельтыны? - Ма... пумит ӧвӧл, дыр, но... Улон-вылон туж шурдыт ук... Нуназе куазен инбамад я шунды ворекъя, я толэзь гожеръя... Юась-марась луиз ке, кытчы кариськом мон соин? - Нокин уз юалляськы. Нош марысь мар ке, со ачиз кыл кутыны быгатоз, тӥледыз умойтэм учыре уз вутты. - Ярам-а, мар-а иське... Кытчы бон выдтомы меда сое? Ӧс дорын умой уз луы, дыр: пырась-потась но вань, кезьыт омыр но пельтоз... Э-э... вай сое татчы интыяломы, - кышнопалась бадӟым ӟус доры вамыштӥз Лукер. - Тани татын солы шуныт но луоз, калык синлэсь ватыны бӧлетэз но вань, - борддорысь борддоре шедьытэм ез кузя мыдлань-азьлань кысказ сяськаё басмалэсь вурем паськыт возъетэз. - Туж умой, туж умой, - шуиз першал. - Али ик валиськом-а? Небыт тушакме пыртом-а? - О-о, таиз чылкак умой луысал... Тон огнад шат? Семьяед ӧвӧл шат? - кепырасагес юаз першал. - Иван пиеным ӵошен кылимы. Тӥни со, - ӧс палась гур урдсын эшъёсыныз ӵош сылӥсь Иванька шоры возьматӥз. - Картме но бадӟымзэ пиме гордъёс асьсэ сьӧры ожмаськыны нуизы. Соин курдасько уго... Улон-вылон нуналаз дас пол вошъяське бере... - Сьӧразы нуизы, шуиськоды-а? Кужмысь-а, мар-а? - Ма, кужмысьтэк-а!.. Картэлэн шокамез туж секыт, лулыз шуг, "мон тӥ сьӧры уйытӥськыны уг быгаты" шуиз ке но, доброволецъёс радэ гожтӥзы... Пие Чебер нюке пегӟисьёс пӧлы кошкиз вал но, чагиськись сюрыса, ваньзэс кутылӥзы. Дизертиръёс карыса, ӧжыт гинэ ӧз ыбылэ... Тӥлядъёс ӝык пӧртэмесь, дыр-а?! Кинлы ке оскон кылиз на шат?.. Курдасько мон сое татчы кельтыны, валаськод-а, курдасько!.. - ӝуштыса кыллись офицер шоры возьматӥз. - Тодӥськод-а, мар? - Лукерлы матэгес кариськиз першал. - Уд шӧдӥськы-а мултэс вераськемдэ? Таӵе огыр-бугыр дыръя кылдэ пинь сьӧрад куртчыны но умойгес вылэм... - Э-э.. ма... шуи ук, валесме вылӥ кеносамы поттӥ вал, мон сое али ик пырто но валисько... - Дыртоно луод!.. Першал офицер доры вамыштӥз. Соизлэн егит чебер ымнырыз эшшо но кӧдэктыны ӧдъяз, нырыз йылсогес луиз. Кымесаз вупульыос кылдӥзы. - О-о, господин офицер, тӥляд мугорды туж юн ӟырдамын, шӧдске... Сӧсырмем муртэ бинясь, шобыръясь адями солдатъёслы вазиськиз: - Кудды ке али ик лазаретэ ветлэ врачез ӧтьыны! Бадӟым ӝутэтэз сямен ӟыгыртыса, Лукер валессэ пыртӥз но кышнопалась бадӟым ӟус вылэ валиськиз. Офицерез туж чакласькыса со валес вылэ нуизы... *** Нош гордъёс но тӧдьыос куспын жугиськон пумен кужмояз. Карйыл бусые гудӥськем горд солдатъёс ӵемгес но кужмогес ыбылыны ӧдъязы, гурт кузяна пазьгиськем тӧдьыос туж дыртыса пушкаоссэс Карйыл пала берыкъяло, пулемётэн но винтовкаосын ыбылӥсь солдатъёс музъеме порисько. Егит эшъёс - Максим, Санька, Самар Пилька, Мани но Иванька - азбаре потӥзы. - Вот улон-вылон!.. - лулӟиз Иванька. - Тани табере тӧдьы офицеред но каръяськиз ни ми доры... Атаен агай бертӥзы ке, кыкмес ик улляса лэзёзы, тӧдьы офицерен герӟаськиллямды, шуозы... - Ма... тӥ янгыш шат? Тӥлесьтыд кин юаз? - Иванькаез буйгатыны выре Мани. - Сӧсырмем мурт - тӧдьы но, горд но ӧвӧл ни, со огшоры висись мурт! - туж малпаськись тусо кариськиз Самар Пилька но Максим шоры учкиз. Тодӥз, лэся, Пилькалэсь верамзэ серем карытэк уз кельты шуыса. Озьы ик вань: Максим та кылъёсыз возьмаса гинэ улэм, шӧдске: - Ой, ой, ой, утелэ монэ, пограсько ни!.. Кылӥды-а, Пилькаед книгае гожтоно кадь кылъёсын вераськись луэм!.. - Офицер интыын асьмеос но, сыӵе учыре ӝимимы ке, туж шулдыр потоз-а?! - Максимлы мытылыса кадь вазиз Пилька. - Астэ офицер интыын адӟиськод ни бере, мон али ик азяд йыбырттыны дась! - котькугес ик шып улӥсь Санькалэн но серемез потӥз. - Тӥледын кызьы вераськыны ик йӧныз ӧвӧл! - вожез потӥз Самар Пилькалэн. - Бертыса эскеро ай: ми доры но кыӵе ке тӧдьы офицер ӧз каръяськы меда?.. - Мын, мын, - туж дыртыса вазиз Максим. - Тон соин соку ик одӥг кыл шедьтод... Самар Пилька ураме потыса ӧз вуы - быдэс ёросэз зуркатыса, кытын ке, туж матын, нош ик пуштӥз снаряд, нош ик кылӥськизы кесяськем куараос. - Ойдолэ мон сьӧры! - вазиз Иванька но бакча ыбес пала бызиз. - Ойдолэ, шуисько! Вырйылысен учком ожлэсь мынэмзэ. Иван Митрошинъёслэн бакчазы бертӥ, мур нюкетӥ, пичигес гинэ нимтэм шур читыр- чутыръяське. Тӥни со шур дурысь вырйыл - та пиналъёслэн яратоно интызы: отысен котыр дунне син азе яплак кисьтӥське, ӵошкыт интыез но бадӟым гинэ - бызьылыса шудымон. Пиналъёс ог-огзэс ортчон вылысь дырто со вырйылэ. Самар Пилька но гуртаз ӧз берты, эшъёсыз сьӧры калъяськиз. Бакчаетӥ мыныны туж секыт на: пыд борды дэри наштаське. Вырйылэ вуизы но адӟо: татын кӧсамын ини, музъем вож-вож ожоен шобырскем. Нош улӥын, шур валлин, векчи кузилиос кадь, мыдлань-азьлань бызьыло тӧдьы солдатъёс, туж дыртыса музъеме гудӥсько. Витьымтэ шорысь пиналъёслэн мышказы валъёслэн соргетэмзы, поглянъёслэн ӟукыртэмзы кылӥськиз: Сапарай нюк палась, вырйыл кузянатӥ, Митрошинъёслэн бакча беразы кык валэн пушка кыскыто. Тальккес тулыс музъем секыт поглянъёс улын напыръяське, валъёслэн пыдъёссы гылӟо, пушкаез донгыны вырись солдатъёс керӟегъясько. Тэк сылӥсь пиналъёсты адӟыса, огез солдат кеськиз: - А ну, ми доры! Ӝоггес! Уд адӟиське-а милемлы юрттэт кулэ! Пал кыл но вератэк, пиналъёс солдатъёс доры бызьыса мынӥзы но дэрие месӥськем пушка борды кырмиськизы. - Тыныд нош татын мар кулэ?! - Мани шоры лек вазиз пушкаез донгись огез солдат. - Мын, гуртад бертыса, мунёеныд шуд! Мани ачиз но валаса ӧз вуы солдатлэсь гадяз мырӟемзэ. Озьы со ноку но ӧй лэсьтысал мукет дыръя, нош али, таӵе дыртон вакытэ, солы люкетӥсь мурт кадь потӥз, лэся, та солдат. Эшшо огпол мырӟиз, шуиз: - Эн люкеты! Мынам кужмы ӧвӧл кожаськод-а, мар-а?! Солдат вольтчыса пограз. Со куспын валъёс пушкаез зуркак кыскизы но, солдатлэн одӥгез пыдыз поглян улэ шедиз! "А-а-а!" - пелез кесьымон куара кылӥськиз. Пушкаез азьланегес вырӟытэмзы бере адӟо: солдатлэн пыдыз, ньӧр кадь куасалскыса, дэрие месӥськемын. Мани шулӟектӥз, ымнырыз тӧдьы дэра кадь кӧсэктӥз. Ас янгышсэ валаса, лэся, солдат доры мыкырскиз но аслыз гинэ кылымон "Осто быри, мар дауртӥ мон!.. Мар дауртӥ!" шуыса, солдатлэсь йырзэ маялляны ӧдъяз. Пушкаез кыскись солдатъёс но юрттӥськыны лыктэм пияшъёс соку ик солдат котыре люкаськизы. - Палэнске ай, - шуиз огез. - Умойтэм югдуре вуимы кадь асьмеос... Уть, пыдыз номырлы ярантэм луэмын... Кыкез солдатъёс сӧсырмем муртлэн пыдыз котырысь дэриез тазатыны кутскизы. Йырсазьзэ ыштэмзэ ожо вылэ мырдэм но кызьы кыскемзы бере, ваньзы валазы: сое али ик лазаретэ нуоно. - Кыдёкын, дыр, ук тӥляд лазаретты? - вазиз Иванька. - Ойдолэ ми доры пыртоме. Коркамы тани гинэ! - возьматӥз со юртсы шоры. - Тау, пияш! - шуиз мукетыз солдат но, шинельзэ кыльыса, музъем вылэ вализ. Сӧсырмем муртэ шинель вылэ выдтӥзы, собере туж чакласькыса ки йылазы ӝутӥзы но Иванька сьӧры вамыштӥзы. Мукет пияшъёсыз пушка доры кылись солдатъёслы юрттӥськыны косӥзы. Иванькалэн азьпалаз дэриетӥ волегаса, туж кушетскем тусын вамышъя Мани. Гур дорын сылӥсь Лукер корказы усьтыр-табыр пырисьёсты адӟиз но, ма шуыны паймыса, лэся, вӧсяськыны ӧдъяз. - Осто, осто... ма..., нош ик-а?.. - вазиз, кӧня ке улыса. - Ванька..., кыӵе улонэ вуттӥськод тон монэ, пие?.. Ма... Врач татын вылэм ини. Офицер дорысь сӧсырмем солдат доры лыктӥз. Умой-умой учкемез бере шуиз: - Таизлэн улон-вылонэз лябгес... Пыдзэ али ик вандоно луоз... Тае кылыса, Мани викышъяны ӧдъяз. Нош ик солдат доры мыкырскиз, нош ик йырзэ маялтӥз. Солдат каллен гинэ синзэ усьтӥз. - Кытын мон? - юаз. Собере Маниез тодмаз, лэся: кизэ кырмиз: - Малы бӧрдӥськод, нылы? - Мон янгыш... - синзэ ӵушылэ Мани. - Простить кар... - Ву... ву... Юэме потэ... - шыпыртэ солдат. Быдэс кобы юэмез бере, ымнырыз ӵыжыт луиз, каньылгес шоканы кутскиз. Туж ӝож сылӥсь Мани шоры учкыса улӥз огшап. Собере каллен гинэ шуиз: - Эн бӧрд, нылы. Тон нокуд ласянь но янгыш ӧвӧл. Мон ачим вольтчи ук... Мар карод: адӟонэ сыӵе, дыр... Инмар озьы гожтӥз, луоз: солэсь уд ортчы... Та кылъёс бере Мани эшшо но ӝожомиз, синвуэз шарак кисьтӥськиз. - Эн бӧрд, нылы, эн бӧрд... Ваньмыз умой луоз... Врачлэн косэмезъя, солдатъёс носилка лэсьтӥзы но, солдатлэсь сӧсырмем пыдзэ юн-юн керттыса, лазаретэ нуизы. Кытын ке, туж матын, "Ух!" вазиз ыбем куара. Носилкаез нуись солдатъёсты капка сьӧры келясь Иванька но Мани валазы: бакча берысь вырйылэ интыям пушка "улӟиз"! Бызьыса мынӥзы отчы. Адӟо: Карйыл бусы пала мертаськем кузь гумыё пушка котырын кузилиос кадь выро куинь солдатъёс но таослэн эшъёссы - Максим, Санька но Самар Пилька. Пияшъёс солдатъёслы снаряд сётъясьёс луиллям! Иванькалэн вожъяськон мылкыдыз бугырскиз, аслыз ачиз таӵе кулэ ужлэсь палэнтэм мурт кадь потӥз. Но кема малпаськыса сылыны ӧз кылды - урдсазы, ог дасо вамышын, снаряд пуштӥз. Пушкаез кыскись валъёс кышкатскыса кыткетысьтызы мозмытскизы но вырйылэтӥ соргетыса олань-талань ворттылыны ӧдъязы. Солдатъёс куспазы маке-со кесясько, пияшъёс, куаляк луыса, мар вазьыны тодытэк сыло. Самар Пилька гинэ пушка улэ йырзэ чуртнаны нодам. - Эй, Иванька, мар долкад?! - кеськиз Максим. - Давай, давай, милемлы снарядъёс кулэ! - солдатлы матэгес султӥз со. Ӝоген таиз но пушка, интыяз тэтчем кадь луыса, Карйыл бусы пала тылын но ӵынэн ӵош снаряд "сялӟиз". Кужмо куараез чидатэк, Мани пельёссэ ӵоксаз, ачиз но ӧз вала Самар Пилька доры кыӵе муген быземзэ. Пияшлэн саесаз кырмиськиз: - Палэнэ кариськы! Мын, мын, тӥни со куакъёс улэ ватӥськы! - Мар люкетӥськод татын! Уд адӟиськы-а, мар ужасько мон?! Тон кадь чебер мунёос али доразы пукыны кулэ!.. Кытысь ке ӧвӧл, висказы Максим кылдӥз. - Ыбылӥськемлэсь кышкаса, мар верамзэ уг вала ни со, - Пилька шоры серем тусын учкиз но Мани пала берытскиз. - Я, кыӵе-мар ини со сӧсырмем солдат? Иванькаос доры выдтӥды-а? - Ой, Максим, тодӥськод-а, сое лазаретазы нуизы. Офицер доры лыктэм тужгес бадӟым першалзы учкиз но пыдзэ вандоно луоз, шуиз... - Озьы-а, ма?.. - Око-о!.. - Палэнске!.. Эн люкетэ!.. - кеськиз снаряд ваись Самар Пилька Максимлы но Манилы, аслаз вӧзтӥзыгес туж каньылэн мынэмез луэ ке но вал. Максим Манилы мар ке вераны ӧдъяз вал. Киыныз шонтыса гинэ вуиз но, вӧзазы ик снаряд пуштӥз. Кужмо омыр тулкым кинэ кытчы сэрпалляз, бугыртэм музъемен согиз... Егитъёс пӧлысь нырысь ик сазьтӥськиз Мани. Адӟе: вӧзаз кыллись Максимлэн синмыз кынемын, ӝыныез йырыз сюен согиськемын, нош бур киыныз Маниез ӝиптэм. Ӝогак султыса, мугорзэс согем сюез курткыны малпаз вал, но малы ке ӝегаз: Максимлэн ӟыгыртыса возись киызлэсь люкиськемез ӧз поты, шӧдске. Ымнырыз шоры учкыса кылле. Али гинэ адӟиз со пичи дырысь эшезлэн бур син дурысьтыз кенэм быдӟа меньзэ. Татчыозь таӵе-таӵе пыр-поч ӧз учкылы вал уго. Серемез потӥз: сыӵе пичи мень малы ке туж мусо адӟиське! Витьымтэ шорысь нылашлэн вирсэръёсыз сылмем выллем луизы, быдэс мугорыз шуназ кадь. Со шӧдӥз Максимлэн мугорызлэсь шунытсэ. - Осто!.. Мар тон таӵе!.. Адӟизы ке, мар малпалозы!.. Максим, султы... - аслыз гинэ кылымон вазиз. Максимлэн ымнырысьтыз пазьгиськем сюй комокъёсыз палэнтӥз. - Султы, шуисько, Максим... Максим шуак вырӟиз но туп кадь тэтчыса султӥз. Мани доры мыкырскиз, кушетскыса юаз: - Тон улэп-а?!. Тон сӧсыртэмын-а?! - Ӧвӧл... Султэме уг луы малы ке... - Вай кидэ! - Ой!.. Мон согиськемын кадь ук... - Ӧжытак вань. Я, калленак султы но, мон тонэ куртко... - Ыбылӥсько на-а? - Ӧйтӧд... О-о!.. Уть ай, эшъёсмы ваньзы сюйын погыллясько! Эй, султэлэ!.. Эй!.. - кесяськыны ӧдъяз Максим но пушка котырын бергась солдатъёс доры вамыштӥз. - Мар луиз? Асьме шоры ыбизы-а, мар-а? - Ыбизы уго, пияш... Милемыз но кыдёке пезьгытӥз. Нош таиз эшты тани вӧсь луэм кадь... - пушка поглян борды мыкырскем Самар Пилькаез ӝутыны выро солдатъёс. Соос доры Мани но лыктӥз. - Ма, таидлэн ымнырыз мушник кадь луэмын ук! - паймиз со. Вераськисьёсты кылыса, лэся, музъем вылын погылляськись Иванька но Санька чорк-чорк султӥзы. Адӟо: Самар Пилькалэн кымесаз но йыраз мыжык быдӟаесь кык лёгъёс кылдӥллям. Огез солдат сое ки йылаз ӝутӥз но, гуждор вылэ выдтыны шуыса, палэнэгес нуэ. Пилькалэн киосыз кык йырси пунэтъёс кадь сэзъясько. Та суред Максимлы туж тумошо потӥз. Палэнэгес кариськиз но гор-гор серекъяса сылэ. Со доры Иванька лыктӥз: - Мар таӵе шулдыръяськон дуннее усид, Максим? - Пилькалэсь кык лёгъёссэ адӟид-а? - Сэре мар?.. - Огшоры гинэ... Йыраз тэрымтэ визьмыз со лёгъёстӥ кыре потэ ни кадь, шуисько... - Сётӥськод ке сётӥськод шол улонэз! Шуге-леке вуэм муртэ!.. Снаряд пуштэм дырысен ваньмыз та учыр туж вакчи дыр куспын ортчиз. Солдатъёс нош ик Карйыл бусы пала ыбизы. Куалектыса интыяз пуксиз Самар Пилька. Кымесаз кылдэм лёгез ымнырзэ кырыж карем, огзэ синзэ соге ини. - Сайкад-а, нуные?! - матаз мыкырскиз Максим. - Туннэ нуналысен тон Кайсы ёросысь калыкъёслэн самой дано адямизы! Малы лзьы шуиськод? - ӧз вала Пилька. - Гордъёслы пумит ыбылӥськонын астэ туж умоен возьматӥд но, вылаз ик, сӧсырмид на эшшо ке... Лазаретэ нуоно ӧвӧл-а данэ потэм солдатэз? Пилькалэн кырыж луэм ымнырыз амалтэк кисырскиз. Номыр но вераса ӧз вуы - Иванькаослэн юртсы палась куара кылӥськиз: - Дугдэ!!! Дугдэ ыбылэмысь!!! Учко: бакчаетӥ шонаськыса лыктэ Иванькаос дорын кыллись сӧсырмем офицер. Солэн ӝыны мугорыз тӧдьы бинетэн бинемын, тусыз туж висись, синъёсыз лекесь. Бӧрсяз мар ке лабыртыса вамышъя Лукер. Матазы вуэмъя, Лукерлэн кылъёсыз валамон луизы: - Господин офицер!.. Ваше благородие!.. Першалъёсты туж чурыт кыл веразы, тонэ утьыны косыса... Табере мон мар шуом соослы?! Осто быри!.. Кыӵе улонэ вуттӥды тӥ милемыз?!. Ойдо пыром, уть, куазь кыӵе кезьыт ай!.. Офицер солдатъёс доры лыктӥз: - Дугдэ! Эн ыбылэ!.. Вырйылэ султӥз но котыр дуннеез учкиз. - Озьы ик малпай!.. М-да!.. Ӧжытак малпаськыны гинэ но йырвизьды ӧвӧл шат тӥляд?!. Валъёстэс али ик пушка борды дэмӟытэ но тӥ-и-ни со нёжалэ васькелэ... Татын тӥ кикур вылын кадь адӟиськиськоды... Соин ик ыбыло тӥледыз!.. Ожо вылын пукись Самар Пилькаез синйылтӥз но лушкемгес юаз: - Таиз нош кыӵе образина татын? - Со милям тужгес кышкасьтэмез боецмы! - шуиз Максим. - Шӧдытэк кылемгес уго - пушкаен ӵош сэрпалтӥськем. - Та пиналъёслы мар ке луиз ке, нырысь ик тӥ кыл кутоды, - шуиз офицер солдатъёслы но Лукер пала берытскиз: - Нош али мон нош ик тынад пленной солдатэд луисько: котькуд верам кылыд - мыным приказ! - Ойдо корка пыром: татын кезьыт, - шуиз Лукер. Соос кошкем бере, солдатъёс, пиналъёслэн юрттэменызы валче, пушкаез ышыг интые кыскизы. Кайсы ёросын ожмаськон кужмояз но кужмояз. Коко Васьлей Левоньлэн бадӟым юртаз кохозлэн быдэс улэм-вылэмез тэриз: контора но отын ик, нылпи ясли но, скал, ыж, парсь возён гидъёс но. Лапас улаз - музъем ужан тӥрлык. Валъёсты тужгес бадӟым но эркын гидаз интыязы. Пересь Левонь вал сюдӥсьын ужаны мылкыд кариз. "Ватытэк верасько", - шуиз со председательлы Иван Митрошинлы, - кулак карыса, сомында тыршемме таламзы но пыд йылам кельтэмзы понна, сюлэмы ӝуа, со куректон кулытозямлы тырмоз. Озьы ке но, валасько: ачид тон озьы ӧй карысалыд монэ, выль закон озьы косэ, соин ик тыныд вожме уг поттӥськы. Выль властьлы но пумит уг луиськы: мон сое огнам вормо-а, мар-а? Пие туж жаль потэ: кытын меда коскало сое та дыре? Гожтэтэз но ӧвӧл... Луэ ке, Иванька, ас юртам ик ужаны лэзь вал тон монэ. Валъёсыз утьыны быгато на. - Туж умой, - шуиз председатель. - Егит нылкышноос но воргоронъёс мукет ужлы кулэ. Тон - самой киыз но пыдыз. Левоньлэн ыж гон тугон, ку посон, тысь вӧй поттон кеносъёсыз но ӧз пытсаське: ваньмаз ужез радъяны мылкыд кариз Левоньлэн Олексей пиез. Быдэс Кайсы черкогуртын та ужез со кадь тодӥсь-валасез ӧй вал уго. Огдышемъя туж уноысьтыз ёрос гуртъёсысь ыж гон тугыны яке тысь вӧй поттыны лыктыло. Соослэсь шӧдскымон табыш колхоз шыкысэ пырыны ӧдъяз. Колхоз ужлэсь радъяськемзэ уг адӟы Коко Васьлей гинэ. Выль улонлэсь туж уно пайда вите вылэм со: юртсэ воштыны но пумит ӧй луысал, колхоз амбарысь возэн- возэн ю тысь но ворттысал, нылпизэ но огъя кужымен дӥсясал-кутчасал... - Левоньлэн семьяез кӧй-вӧй пушкын кызьы пыласькыса улӥз, значить, али но озьы ик, - шуиз огпол Коко Васьлей кладовщиклы Самар Пилькалы. - Мар бен воштӥськиз? Кулак семьяед озьы ик ашкынэмын! Кытын Советъёслэн властьсы, юасько мон? А? - Хы, мар мыным кулэтэмзэ чирдӥськод! Вылад кинлэн шубаез? Левоньлэн ӧвӧл шат? Кӧтыд ӧз тыры-а, мар-а? Уже калык рад потаськод-а? Уд! Нош мон доры, колхоз амбаре, пыдыд туж шаплы вамыштэ: председатель созэ сётыны кагаз гожтӥз, тазэ сётыны кагаз гожтӥз... Беднякъёс радын уго тон, мискинь, кызьы жалятэк?! Тод но ул: юри тон понна колхоз собраниез люканы косо, ваньзэ верало, кызьы дасьсэ сиыны ымыд усьтӥськемын. Ньылон выжыям кугӟад ини кураськеменыд! Ужамед сярысь, кык пол уногес сиемын ук ини тон, тодэмед ке потэ! - Вераськонэд мукетгес шӧмо ӧз луы-а берло дыре, нуныкае? Азьвыл, значить, тынад Левонь кулак сярысь кырӟан гуред таӵе ӧй вал. - Али мынам ӵошатыны луонлыке вань: соос кызьы ужало но, тон кызьы ужаськод. Соос кураськисе кельтэмын ке но, конторае кагаз гожтыны курыса уг мыно, татчы складэ уг лыкто, валаськод-а тон сое? - Лушкем ватэгзы уно, значить. - Мын ай кошкы азьысьтым: йыры висе, куараед бадӟым... - Макмыр, значить. Бурмытоно. Векчи виямез мынам вань. Складад юомы-а, мон доры-а мыномы? Самар Пилька зӥрак берытскиз но контора пала вамыштӥз. *** Самар Пилькаен вераськемез бере, Коко Васьлейлэн мылкыдыз пилеш йыраз тылын гомась эгыр кисьтэм кадь луиз. Суралляськыса, ас понназ шара вераськыса ураметӥ мынэ. Али со кулакъёсыз но, колхозэз но, Совето властез но, гуртысьтызы коммунистъёсыз но огинэ сураса сӥсъя-поръя, ваньзэс одӥг тусьтыысь сиисьёс радэ пуктэ. "Левонь, значить, усто ужась, мон - дась сиись... Ярам!.. Самар Пилькалэсь та верамзэ таяз кырымам поном. Та ужпумез ик табере мукет ласянь учком: колхоз, значить, мон кадь беднякъёс понна кылдытэмын ӧвӧл, Левоньлы но солэн Олексеезлы бадӟым тусь дуре шунытак интыяськыны малпамын. Тазэ кыкетӥ кырымам поном. Табере, значить, та верамъёсыз ӵошатытэк луоно ӧвӧл. Ой, сыл ай, вунэтӥськем! Кинэ партие кутӥзы? Шакшылэсь но шакшы адямиосыз! Монэ, калык азьын сюлоен жугем муртэ, беднякез, палэнэ кельтӥзы! Таиз вераме кырымам уг ни тэры бере, кисыям поном. Табере, значить, вань верамъёсме ӵошатыса учконо ке, таӵе малпан кылдэ: колхозын лушкем ужасьёс вань! Али со выредительёс котькытын, пе, вань. Ми доры но соос каръяськемын, значить. Кивалтӥсьсы - кулак Левонь! Солэн бурд улаз шуныт инты шедьтӥллям председатель но, бригадир но, собере, значить, кладовщик Самар Пилька. Нош гожтэт тодӥсьтэм коммунистъёс, мар лэсьтыны косӥзы, сое лэсьтозы, тылэ-вуэ пырозы, значить, но лэсьтозы!" Урам тыр вераськыса мынӥсь Коко Васьлеен Отя пумиськиз. Мар вазьыны тодытэк, шораз паймыса учке: соизлэн ымнырыз вожомемын - киоссэ суралляса, чиньыоссэ куасалляса, я Левоньлэсь нимзэ вера, я колхоз председателез Иван Митрошинэз сизьдэ. Самар Пилька но палэнэ кылемын ӧвӧл, коммунистъёс но, быдэс Советской власть но. - Клубамы вераськыны дасяськиськод-а, мар-а, Васьлей агай? - серем пыр юаз Отя. - Мар, мар?! - куаляк луиз Коко Васьлей но Отя азе кынмем кадь султӥз. - Мар ке вераськи шат? - Мар ке гинэ луысал ке... Куараедлэсь укно пиялаос жингырто ук. - Воже потэ, Отя, воже потэ!.. - Кинлы? Марлы? - Колхоз ваньбурез тус-тас каро. Ачид но тани сыӵеос пӧлы пыриськод. - Осто, Васьлей агай!.. Туннэ вӧсяськытэк султӥд-а, мар-а тон? - Вӧсяськонэн эн пыкылы! Инмарлы оскыны косэмын ӧвӧл табере. Астэ тод: Инмарлы оскысалыд ке, значить, кысконо скалъёстэ, алама утеменыд, ӝуткано карысалыд-а? Вот уго! Нош Сталин эш адӟиз ке ӝуткано скалъёстэ?! - Со скал фермаямы пыралоз оло уз, нош тынэсьтыд урам тыр вераськыса ветлэмдэ одно ик кылоз. Кызьы тон туннэ сазь ай таӵе? Кышноедлэсь ватэгзэ ӧд шедьты-а, мар-а? - Асьмеос, значить, давай тазьы кенешом: Сталин эшлы мон уг вера вредительской ужед сярысь, но со понна тон мыным али кобыен нырйылдэ удод. Валамон-а верай? - Кытысь тодод тон милесьтым ужмес: фермаямы пырамед но ӧвӧл но?.. - Беднякъёс пӧлысь, значить, мон самой кужмоез активист, соин ик колхозын мар лэсьтӥське, ваньзэ дырыз дыръя тодыны кулэ. Ачиз Сталин эш сыӵе уж сётӥз мыным - валад-а, нушы йыр? Дышетскемед ӧвӧл уго тынад, значить, дышетскеме-ед... - Аслад нош? - Мон ликбезэ ветлӥсько, тодэмед ке потэ! Отын ик, значить, пыр-поч эскериськомы Сталин эшлэсь верам кылъёссэ. Со котькуд лэсьтэм ужмес, котькуд вамышмес адӟе. - Туж визьмо шуыса верало уго но, тон нош сое кытысь тодӥськод? Эшед-а, мар-а со тынад? - Эше ке ӧй луысал, кин монэ активистын возьысал, кин сельсоветэ депутатэ, значить, бырйысал? А?- Осто, Васьлей агай, ку эшъяськид сыӵе нимо-дано адямиен? - Ма, верай кадь ук ини кызьы тодматскеммес. Йырыд тырттэм горшок кадь ӧй луысал ке, ӧй вунэтысалыд. Эшшо верасько, кылзы: ми соин гражданскойын чебер нюкамы пумиськимы. Гордъёслэсь йыромыса кылем: шинелез кесяськемын, штани- дэремез сурыкмемын, пыдкукез нош чик ӧвӧл, гольык пыд, значить. Жаляй мон сое: пустол пенӝакме, выль катаосме но горд сатинет дэремме кузьмай. Адями тус пырем бере, сиеме потэ, шуэ. Мон, значить, котомкаысьтым картофкаме поттӥ но артысь шурын миськыса ваи. Тылскимы. Адӟысалыд ке, Отя, кыӵе ческыт потыса сииз со пыжем картофкаме! - Картофкаед но ведь ӵапак тупам, однако та Васьлей агаен! - Мон, значить, сьӧрам картофкатэк уг потаськы. Картофка - улон! - Сэре вылад ноку пырамтэ со пустол пенӝактэ но, горд сатинет дэремдэ но, ноку кутчамтэ выль катаостэ но вылысьтыд кыльыса кузьмад-а Сталин эшлы? - Конечно! Э-э... ма..., значить, тазьы вал со... - Тырмоз, Васьлей агай, - серектӥз Отя. - Тодӥсько ке но вал, Кайсы черкогуртамы Коко Васьлей кадь алдаськисез ӧвӧл шуыса, таӵезэ тынэсьтыд кылэме ӧй вал на. Бертыса нырйыл аракыме ачим ик пичи веръяло ай, алдаськисьёсын кусып воземе уг поты мынам. Ӟеч лу! *** Матэктэ Октябрь праздник. Кайсыос сое котьку шулдыр пумитало: клуб тыр калык люкаське, школаысь нылпиос концерт возьмато. Азьвыл та кылэз мӧйыос "синпӧртман" шуозы ке вал, табере соос но выль сямен вераны дышизы ни - "концерт" гинэ каро. - Значить, тазьы: туэ мон но кончертын шудо, - оло лӧпшаса, оло зэмзэ вераз контораын пукисьёслы огпол Коко Васьлей. Санька Копаров, кагазъёсын бугыръяськонъяз, Коколэсь верамзэ кылӥз но, сцена вылэ потэмзэ син азяз пуктыса, гор-гор серекъяны ӧдъяз. Дугдэмез уг ни луы. Сое адӟыса, мукетъёс но гудыртӥзы. - Мар серекъяськоды? - борддоръёс кузя лэсьтэм скамьяос вылын пукисьёслы киыныз шонаны ӧдъяз Коко Васьлей. - Уг пӧрмыты, малпады-а? Кырӟаме-вераме, эктэме уг луы, кожаськоды-а? - Синмез мальдытод, эн шузияськы! - серемзэ кутэмез луытэк, мырдэм вераз Санька. - Кытын эктыны дышид? Ноку но адӟемды ӧй вал ук татчыозь? - горо люкаськемъёс. - Ыж гидын, егит дыръям на ай, - калык серекъямъя, Коко Васьлейлэн мылкыдыз котьку сямен ик лопыръяськыны кутске. Сое кылзӥсь но серекъясь вань ке, кытын улэмзэ ик вунэтэ. - Огрейлы синмаськон арам вал со, эктыны быгатымтэ дыръям на ай. Учкисько, значить, но адӟисько: сылэ со огаз шудон пӧлын эшеныз, солэн пельпум вылаз зӥбиськыса но синъёссэ шорам уӵерак-уӵерак золтылыса. - Осто быри, синъёсыз солэн ошлэн кадесь вал-а, мар-а? - юась луиз. - В строю не разговаривать! Молчать! - кеськиз Коко Васьлей но соку ик валэктӥз: - Эксэй армиын командирлы, строй азьын вераськыкуз, таӵе шузи юан сёто ке вал, со "Молчать!" шуыса кеськылӥз. Ӝыт шудон пӧлы потон азям, значить, кутчасько долк-долк чилясь сурон сапегъёсме но нырысь ик ыж гидамы мынӥсько. Эктыку отын пыдъёсыз тыпыр-тыпыр карыны луэ, скал гидын кадь ӧвӧл. Вот, значить, огшап улыса, ачим шӧдыны кутски: эктэме пӧрме, дыр вуиз Огреелы возьматӥськыны. Шудон пӧлын арганчимылы синме кырмыштӥ но - эктыны потӥ. Эк, лопыръяське ук мугоры, эк, ӝутъясько ук пыдъёсы. Арган шудэ, ваньзы мыным чабо. Одӥг кылын, значить, калык мыным паймемын. Син пумыным Огрее шоры учки: ой, лулы-сюлмы! Соид, ява, чагаськем синъёсын шорам учке ини, улытозяз мон кадь эктӥсез адӟемез вылымтэ, шӧдске. - Кин со, Огрей, гуртамы сыӵе нимо адямиос ик ӧй вал кадь? - юась луиз. - Сьӧд Исьтапанъёслэн пукись нылзы вал со, Чумолёысь. Я, эн люкетэ ай: веранэлэн пумаз ӧй вуы на. Озьы, значить, чагаськем синъёссэ адӟеме бере, мылкыды кужмогес бугырскиз вал но, пыды кытчы ке ӵемтӥз. Вамыштэме ӧйлась ни: олань-талань сэзъялски но эктон интыям ик зоньтӥськи. Кутгозые сэрттӥськем ук, лешак! - Ма, сыл ай, тон долк-долк чилясь сурон сапеген вал кадь но? - юаз кин ке. - Молчать! В строю не разговаривать!.. Гурак серектэмлэсь, конторалэн укно пиялаосыз жингыртӥзы. - Огреед шорад ӧз учкылы ни-а со учыр бере? - Ӵукнаяз ик Чумолёяз лобатэм. Азьло-берло пумиськыны ӧз ни кылды. Озьы ке но, эктыны дышеме монэ чылкак мукет ласянь нимо-дано кариз, тодэмды ке потэ! - О-о-о! - паймем куараос кылӥськизы. - Давай, давай, кисьматы! - Герман ожын дыръям, значить, окопын тамак кыскыса пукиськом огпол. Ваньмылэн, солдатъёслэн, мылкыдмы секыт, гуртамы бертэммы потэ. Витьымтэ шорысь немец солдатъёс ми доры лэзиськизы. Абдрамы, кышкамы нырысь. Нош соос пальпото, ӟыгыръяло милемыз: "Асьмеос агай-вынъёс ук, малы виылӥськомы ог-огмес?" Ми доры таӵе кылъёсын коммунистъёслэн агитаторъёссы ӧй вуылысалзы ке, немец солдатъёслэсь лӧпшамзэс асьме сямен валасалмы, бер палазы ӵыжаса лэзьысалмы но - тӥни. - Сэре? - дыртытӥз кин ке. - Мар сэре?! Сэре винтовкаосмес штык палынызы музъеме бышкалтӥмы но эктыны- кырӟаны ӧдъямы. Соку тӥни возьматӥ ке возьматӥ мон удмурт эктонэз! Ой, оскоды оло уд - немецъёс монэ ки йылазы нуллыны кутскизы. Озьы, значить, ки йылазы нуыкузы, бур палась лӥял вылын сылӥсь воргоронэз синйылтӥ. Со но мон шоры паймыса сылэ вылэм. Синме чагасагес учки но - тодмай: Ленин! Вылтуссэ солэсь, значить, нокинэн уд сура: ӝужыт, юрт пуктыны мынӥсь пужым кадь веськыт, пальпотыкуз пиньёсыз чай юон тӧдьы ӵашкаос кадь чиляло. - Осто быри! Ӵашка кадесь пиньёсын адями уйвӧтад уз пуксьы-а? - Молчать! В строю не разговаривать!.. Котыраз сьӧд пилем мында калык люкаськиз. Кызьы адӟиз со монэ, ачим но паймисько. Азьчиньыеныз купыръя: лык ай, пе, дорам. Кышкаса мынӥ: Ленин ук! Нош со киме кутӥз но небытак пальпотыса шуэ: эктӥськод туж чебер, паймыса быри. Собере гудыръясь бадӟым куараеныз котыраз сылӥсьёслы немец но ӟуч кылъёсын вазиськиз: - Эшъёс! Огшоры солдатъёс! Тӥледлы, значить, али ик дугдытоно та ожмаськонэз! Ог-огдылы тушмонъёс ӧвӧл тӥ, туж кышкыт тушмонды, значить, асьтэлэн ик фабриканъёсты но заводчикъёсты, асьтэ гуртысьтыды сьӧсь кулакъёсты. Тӥни кинъёс тӥлесьтыд вирдэс юо. Тӥни кинъёслы пумит, значить, ожмаськоно. Та ожмаськонэз пӧрмытоно граждан ожлы. Бертэ гуртады но кутске крестьян ужды борды, нош граждан оже кулэ луиды ке, ми тӥледлы, значить, вазиськом. - Верам кылыз сярысь мар шуыны уг тодӥськы, но тусыз... ӧйтӧд... тусыз газетъёсын гожъямъёслы чик уг тупа, - вазиз огез воргорон. - Молчать! В стро... - Дугды ми шоры "Молчать!" шуыса кесяськемысь! Ми фронтын ӧвӧл, тон командирмы ӧвӧл. - Озьы, значить?.. Ярам... значить... Валай, зна...чить... Тазьы шулдыр серекъяса пукыкузы, конторае колхозлэн председателез Иван Митрошин пыриз. - Тӥ мар ӵукна ик таӵе шулдыр? - юаз со. - Кончерт! - шуиз корка шорын сылӥсь Коко Васьлей. - Мон серекъятӥсько. - Кыӵе концерт? - ӧз вала Иванька. - Синпӧртман, иське, - валэктӥз Коко Васьлей. Иван кутӥськыны ӧз быгаты - пырсйиз, собере контораын нош гудыртӥз... Кияса палан туннэ Дышетон удысын - ӝыны даур, Витьтон одӥг ар ӵоже одӥг школаын, Сабанчиноын, ужаз Клавдия Ивановна Субботина. Пенсие потыса но кема гинэ дышетӥз на та пичигес юртын. Нош ӟеч ужамез сярысь верало "Знак Почёта" орденэз но уно медальёсыз. Солэн дышетэм нылпиосыз - быдэс гурт. Али со нылыз доры, Сарапулэ, кошкиз. Нош сюлэмыз ӵем гинэ кыске та пичияк, вож топольёс но кызьпуос пӧлы ышем гуртэ. Дышетон удысын озьы ик ӝыны даур пала ужазы Роза Всеволодовна Белослудцева (Атабаевоысь), Маргарита Павловна Овчинникова (Ермолаевоысь), Клавдия Александровна Маргасова (Мушакысь). Р. В. Белослудцева сюлмо но мылысь-кыдысь ужамез понна сӥлы каремын Трудовой Горд Знамя орденэн. Витьтон арес тырмиз Августлэн одӥг чебер нуналаз витьтон арес тырмиз Вуж Салья школаысь Лидия Геннадьевна но Юрий Петрович Барановъёслы. Можга педучилище бере соос ужало та школаын. Педучилище бере ик Юрий Петрович армие ветлӥз на. Йылпумъяз Удмурт кун университетэз. Нош Вуж Салья школалы 100 ар тырмон нуналэ солы сётӥзы Удмурт шаерысь сӥё-дано дышетӥсь ним. Вералом на: солэн атаез, Пётр Иванович Баранов, вал РСФСР-ысь сӥё-дано дышетӥсь. Табере солэсь ужзэ азьланьтэ Юрий пиез. Премия басьтӥзы Таиз дышетскон ар ӟеч ивор ваиз Кияса шор ёзо школаысь Елена Николаевна Ураковалы но Людмила Николаевна Коробейниковалы: туэ соос басьтӥзы тодмо ужбергатӥсь Джордж Сорос нимо премиез. Огез дышетэ математика, мукетыз - химилы. Ёросамы та дырозь ӧй вал на таӵе дышетӥсьёс. Будэтом на: Л. Н. Коробейникова - шаерысьтымы сӥё-дано дышетӥсь. Шулдыртоз кедра нюлэс Вуоно даурлы сӥзьыса, Киясаысь нюлэс будэтӥсьёс огаз шулдыр, синмаськымон интые кедрапуос мерттӥзы. Соос будозы вуоно даурын. Кин тодэ, сю ар ортчыса, оло, ӵыжин но сётозы? Но отчыозь кема на ай. Туэ ик, Вормонлы 55 ар тырмонэз пусйыса, Сутягино гурт вӧзысь вашкала кедр аллеяез выльдӥзы. Вазенгес, эксэй кивалтыку, одӥгез узыр адями мерттэм вылэм гурт пуме. Та нюлэс - инкуазь синпелет. Вашкала кедрапуос озьы ик будо азьвыл Медвежье гурт вӧзын но. Тазэ но кунмы уте. Йӧл басьтон ӧз на дугды Туэ пудоез возьманы поттэм дырысен ик Мушак сельсоветэ пырись гуртъёсысь калыклэсь мултэс йӧлзэ басьтон радъямын. Та ужрад татын трос аръёс ӵоже ини мынэ. Туэ но тани май толэзьысен но али нуналозь мынэ йӧл басьтон. Та ужез радъяло йӧл бичасьёс. Дуно ик ӧвӧл ке но, гурт калык сётэ мултэс йӧлзэ: кӧня ке "улэп" уксё вуэ уго. "Мушаковское" сельхозпредприятие берло дыре век-век гинэ шока на. Г. Парфёнов. Фейерверк сямен Ӵапак ар тырмиз ни Россиысь калык творчествоя "Вормон салют" фестивальллэн мынэмезлы. Быдӟым Вормонлэн 55 ар тырмонэзлы сӥзьыса, со паськыт тулкымен ӧръяськиз асьме шаеретӥ но. Нылпи садъёс бордысен кутскыса, бадӟым дворецъёс дорозь шуккиськиз фестивальлэн шулдыр но пезьгыт куараез. Программаын вал пӧртэм ӝытъёс но концертъёс, творческой пумиськонъёс, смотръёс, конкурсъёс - калык устолыклэн вань удысъёсыз усьтӥськизы соку. Творчестволэсь пӧртэм жанръёссэ возьматонэ пыриськизы самодеятельностья уно коллективъёс, кружокъёс, клубъёс - котькыӵе профессиен адямиос. Огъя вераса, ёросъёсын но республикаын асьсэды возьматӥз 882 коллективе огазеяськем 12 сюрс адями. "Вормон салют" фестиваль усьтӥськиз вал кылем арын сентябре Глазкарын. Нош ворсаськоз со туэ 1-тӥ октябре Ижысь Операя но балетъя кун театрын лауреатъёслэн но дипломантъёслэн бадӟым гала-концертэнызы. Фейерверк сямен яркыт тылъёсын ӝуатскыса, сцена вылын ас быгатэмзэс усьтозы нылпиослэн "Зарни италмас" конкурсазы вормемъёс но городъёсысь, ёросъёсысь устоосыз чеберлыко коллективъёс, нимаз эктӥсьёс-кырӟасьёс. Ӝыт луоз на тужгес бадӟымез шулдыръяськон. А. Апаева. Эшъяськиз инсьӧрен Дуннеысь космонавтика бадӟым ыштон адӟиз. Кылем арня вискын кулӥз Герман Степанович Титов. Нош 10 нунал азьвыл гинэ 2 номеро космонавтэз 65 аресэныз ӟечкылазы вал. Эшъёсызлэн верамзыя, Титов дуннеын нырысетӥ космонавт луыны быгатысал. Но Королёв Гагаринэз бырйиз. Бен, Гагаринэз яратӥз калык, но Титовез дунъяз интеллигенция. Со дышетӥсьлэн семьяяз будӥз, яратыса лыдӟылӥз Лермонтовез, скрипкаен шудыны быгатэ вал. Улон сюресэз капчи ӧй вал. Инсьӧрысь васькемез бере ватытэк вераз, лобан вакытэ ӧскемез потӥз шуыса. Тае лыдэ басьтыса, кивалтӥсьёс Титовез космонавтъёслэн отрядысьтызы поттӥзы. Но со ӧз чигиськы, лётчик-испытатель луиз. Йылпумъяз Военно-воздушной академиез, бӧрысь Генштаблэсь академизэ, луиз генерал-полковник Военно-космической кужымъёслэн командующийзылэн нырысетӥ воштӥсез. Бен, Титов берлогес ини вераз, сое токма обидизы шуыса. Озьы ке но, быдэс улонзэ космонавтикалы сӥзиз. Басьтэмын Интернет пыр. Тӥ азьын - "Курск" подлодкалэн туспуктэмез. Ӵапак татын службазэ ортчытӥз Удмуртиын вордскем воргорон Николай Кириллов но. Солэн атаеныз Михаил Васильевич Кирилловен кенеше милям корреспондентэнымы. "Пичи Никти атайзэ быронлэсь утиз" материалэз лыдӟе 2-тӥ бамысь. Куазь Синоптикъёслэн ивортэмзыя туннэ пильмаськылоз, зороз. Тӧл лымшор но шунды пуксён вискысь секундскын 2-4 метре пельтоз, +6+10 градус шуныт луоз. Ӵуказе озьы ик пильмаськылоз, зороз. Тӧл уй палась секундскын 2-4 метре пельтоз, +3+7 градус шуныт луоз. Тол кузь - котьмае сиёз Озьы малпало Ува райпоысь заготконтораын ужасьёс. Малпанзэс малпанэн гинэ уг кельто, уж вылын быдэсъяло, толлы ватсаса пӧртэм сиён-юонъёс дасяло. Кризис аръёсы заготконтора ужъёссэ лябӟытӥз. Куд-огез ужасьёссы ужтэк кылизы но мукет интые кошкизы, нош бухгалтер Светлана Александровна нимысьтыз курсъёсы ветлӥз но заготовщикын ужаны мылкыд кариз. Та чырмыт кышномурт табере 11 ар ӵоже ни кивалтэ ёросысь ваньмыныз та ужен. Уваын но ёросын бичало калыклэсь ваньзэ, мар гинэ быгато. Тани туэ кунгож сьӧры 15 тонна губи келязы ни. Медаз уродмы шуыса, келяло кынтыса. Калыклэсь октӥзы лисичкаез килозэ 10 манетэн, тӧдьы губиосты - 12 манетэн. Туэ заготовительёс, миым сярысь, данаклы ӟечгес ужало. Уваын усьтэмын кыкетӥез заготпункт, стационаръёс ужало на Нылгаын, Удугучинын но Кыйлудын. Со сяна, кык машинаосын ветло быдэс ёросэтӥ. Соос вуыло 60 иськемысь Чеканэ но, Ува-Тукля, Сям-Можга но трос мукет гуртъёсы. Ӵошатон понна вералом кӧня ке лыдпусъёсты. Миым кунгож сьӧры келямын вал 3 тонна гинэ губи. Туэ улмо бичазы 1,3 тонна (1 тонналы уногес), 4,7 центнер чечы (3 центнерлы уногес); окто мукет арбериосты но, ӟустари люкамын ни 87,7 центнер (10 центнерлы тросгес), куштӥскьем сьӧд корт - 171,3 тонна (87 тонналы уногес), куштӥськем бумага - 415,5 центнер (207 центнерлы тросгес). Бичамын 571,9 килограмм эмъюм турынъёс, 1794 пудо-живот куос но мукетыз. Мар бен со мукетыз? Бакчаосын но нюлэскын будӥсь емышъёс (сутэр, эмезь, ягмульы-кудымульы, намер), сӥль (парсьлэсь, сюро таза пудолэсь, тулобурдолэсь), шунтэм скал вӧй, ыж гон, пӧйшур куос, картофка но мукет бакча сиёнъёс. - Ма юрттӥз туэ ӟечгес ужаны? - таӵе юанэн мон вазиськи райпоен кивалтӥсьлэн вузкаронъя юрттӥсезлы А. Г. Сырчиналы. - Кивалтӥсьмы бадӟым опыт люказ ни, - шуиз со. - Светлана Александровнамы туж чырмыт ужа, вуымтэ интыез ӧвӧл. Со юн кусып возе быдэс ёросысь калыкен. Ялонъёс печатлаз районысь газетын, пӧртэм интыосы ошылӥз информационной листокъёс (отын гожтэмын басьтон дунъёс но условиос, транспортлэсь ку лыктонзэ), вераськылӥз интыысь радио пыр, ачиз но ялан юрттӥсьёсыз пӧлын Уваысь заготовительёслэн ужамзы калыклы но туж умой. Адямиос быгато ватсаса уждун поттыны, палэнэ вузкарыны ветлыса, дырзэс уг быдто. Шумпотыса вераны кулэ: Ува ёросын азьланьтӥське, тол кузь - ваньзэ сиёз. П. Скобелев. Театр ӝуатэ сюсьтылъёс Выль, 43-тӥ, сезонзэ усьтэ Удмуртиысь Операя но балетъя кун театр. Кема возьмам "Пиковая дамаен" шумпоттоз со учкисьёссэ 21-тӥ октябре. Со сяна, ар пумозь та сцена вылысь адӟыны луоз на эшшо ньыль спектакль: И. Штрауслэн гурезъя "Летучая мышь" опереттаез, Ц, Пуни, Р. Глиэр, С. Васильевлэсь "Собор Парижской богоматери" балетсэ, И. Кальманлэсь "Марица" опереттазэ, В. Ильинлэсь, В. Лукашовлэсь "Дамских дел мастер" крезьгуро комедизэ но И. Морозовлэсь нылпиослы "Доктор Айболит" балетсэ. Туж усто кузьым дасяз туэ театр покчи учкисьёсызлы. Соос понна дасямын абонемент. Соя нылпиос выль арозь ньыль спектакль учкыны быгатозы, нош йылпумъяськемез бере соосын вераськозы кырӟась актёръёс, балетын эктӥсьёс, режиссёр. Нылпиослы валамон кылын валэктозы, мар со опера, оперетта, балет. Оло, тазьы асьмеос зэмзэ но Вылӥ Крезьгурез валаны, дунъяны дышом. Пусйыны кулэ, таиз сезон нырысетӥез луэ театрлэн выль кивалтӥсез Анетта Сидорова но валтӥсь режиссёр Александр Прасолов понна. Искусствоез гажасьёс понна, зэм, та нимъёс выль ӧвӧл кадь. Александр Юрьевичез Анетта Петровна Москваысь ӧтиз. Выль режиссёрлэн репертуарез узырмытон пумысен трос чебер малпанъёсыз ай. Артистъёс уг вунэто гуртъёсысь учкисьёсты но. Матысь дыре ик Сарапулысь, Воткинскысь, Глазовысь, Можгалась но куд-ог ёрос центръёсысь калык учкыны быгатоз "Страсти по златому петушку" спектаклез. Эшшо одӥг кузьым дасяз театр, Крезьгурлэн нуналызлы сӥзьыса. 29-тӥ сентябре ортчоз "Сӥзьыл гуръёс" гала-концерт. Театрысь тужгес устоосыз артистъёс Чайковскийлэсь, Кальманлэсь, Россинилэсь но мукет тодмо классикъёслэсь гурзэс быдэстозы. Чузъяськозы удмурт крезьгурчиослэн но гуръёссы. З. Вахрушева. Удмурт Республиаысь Правительство кайгыре Ижевск городысь 2 номеро больницалэн валтӥсь врачез Алабужев Валентин Васильевич улонысь кошкемен валче но ӵыжы-выжыосызлы но матысь адямиосызлы мур куректэмзэ вера. Политика Арня ӵоже дуннеын, странаын, шаерын Россилэн лымшор кунгожъёсыз дорын кӧшкемыт тулкымъёс пумен юнгес пальккаськыны кутско. Берло дыре Афганистанын югдур чутрак воштӥськиз. Ислам фундаментализмез вӧлмытӥсь талибанъёс уй пал кужымъёсты пазьгизы, СНГ-лэн кунгожъёсыз доры вуизы. Москва погранотрядысь пограничникъёс соосты бинокльтэк адӟыны быгато ни. Талибанъёс оскытӥзы, Шор Азиысь кунъёсы соос чуртнаськыны уг малпало шуыса. Но таӵе кылъёслы оскыны секыт. Пунэмзэ берыктыны тыршон вань ук ай. Афган ожлэн бервылъёсыз ӧз быре на. Туала вакытэ сое пӧртэм сямен дунъяло. Зэм но, йыре олокыӵе но малпанъёс лыкто. Оло, Совето Союзлэн кивалтӥсьёсыз шонер лэсьтӥзы вал, Афганистанэ ожгарчиосты пыртыса. Ислам фундаментализм варезь пиньёссэ со вакытэ возьматыны кутске ни вал. Валлян Югославиын проезидентэз, парламентэз но интыын кивалтон ёзъёсты бырйизы. Нырысетӥ лыдпусъёс возьмато: куаразэс 75 процентэз бырйисьёс сётӥллям. Нюръяськон мынэ туала кивалтӥсь коалиция но демократ кужымъёс куспын. Бюллетеньёс пичи люкетэз гинэ эскеремын ай. Соин ик та дыре вормисез вераны уг луы. Йылпумъянъёс дась луозы 28-тӥ сентябрьлы. Тросэз малпало ини, кыкетӥез тур луоз шуыса. Кылем арня вискын Кун Дума азьын кыл кутоно луизы премьер-министр Михаил Касьянов но солэн воштӥсез коньдон ужпумъёсъя министр Алексей Кудрин. Депутатъёслэн тодэмзы потӥз, кытчы мынэ бюджетлэн доход люкетысьтыз коньдон. Правительстволэн Тӧроез оскытӥз, данакез уксё мынэ, азьланяз но мыноз странамылэсь пунэмъёссэ тырыны, кылсярысь, обороная удыслы. Касьянов малпамъя, куинь ар ортчыса, Россиын шорлыдо уждун кризислэсь азьвыл вакытэ кадь луоз. Премьерлэн верам кылъёсыз борды итӥськыса, коньдон ужпумъёсъя министр лыдпусъёс сётӥз: туэ нырысетӥ палар понна планлэсь вылтӥ 158 миллиард манет люкамын. 119 миллиардэз кунлэн пӧртэм пунэм тыронъёсызлы кошкиз, угось МВФ выль кредит сётыны пумит луиз. Кылемез уксё висъямын вал обороная удыс чотын улӥсь городъёслы, Дагестанлы ож бере выльдӥськыны но шуге-леке шедем куд-ог улосъёслы. Кун Думае быръем муртъёслэн тодэмзы потӥз, малы 2001-тӥ арлы бюджетын доход люкетэз пичиятыса сётэмын, кылсярысь, 1 баррель му вӧй выль документын 21 доллар дунъямын, нош та вакытэ дунъёс 30 долларлэсь вылӥе ӝутскизы ни. Михаил Касьянов валэктӥз: дуннеысь экспертъёслэн чакламзыя, ӝоген рыноке уногес нефть вуыны кустскоз, озьыен, дуныз усёз, соин ик оскиськыса улыны уг яра. Ортчем арняе Удмурт Республикаысь Быръёнъя комиссия президентэ кандидатъёслэсь нимъёссэс ялӥз. Вылӥ должность понна 11 мурт нюръяське. Соос пӧлын ӧвӧл Андрей Солуянов. Ӟырдам югдурлэн тылсиосыз Москваозь вуизы ни. Отысь ивор вӧлмытӥсь ёзъёс но Удмуртиын улэм-вылэммес возьмато ни. Шумпотымонэз татын трос ик ӧвӧл. Бен, быгатӥськом ик, лэся, асьмеос жуг-жагмес кыре поттыны. Ю. Александрова. Архивысь документъёсъя Удмуртия ЪЪ дауре 1944-тӥ ар Каргам тушмонэз вормыны ӧй луысал, армия но фронтлэн мышказ кылемъёс огкужымен ӧй нюръяськысалзы ке. Фашизмез жугыны юрттӥз вань калык. 1944-тӥ арын республикаысьтымы черк но духовенство гинэ Обороная фондэ но Горд Армилэн семьяоссылы юрттыны 1107958 манет коньдон висъяз. Адямиос кунмес утёнэ асьсэ мылкыд каремъя берпум уксёзэс сётъязы, со сяна, заёмлы гожтӥськылӥзы на. Удмуртиысь ужаса улӥсьёс ож аръёсы 809 миллион манетлэсь унолы облигациос басьтӥзы; коньдонэн но арбериосын усьтӥськись лотереяез - 158 миллион манетлы. Озьы республикаысьтымы калык Обороная фондэ 1,5 миллиард манетлэсь тросгес коньдон но 12 килограмм 434 грамм зарни сётӥз. 1944-тӥ арын Удмурт шаермы бадӟым юрттэт сётӥз фашист ки улысь мозмем ёросъёслы. Шунды пуксён палась кунгож дорын кужмоесь ожмаськонъёс мыно на вал, нош Удмуртия мозмытэм Белоруссие келяз ни 130 вагон. Соос тырмытэмын вал промышленностьлы но гурт удыслы машинаосын но арбериосын, куштӥськем кортэн, лэсьтӥськон материалъёсын, эмъян тӥрлыкен, калыклы кулэ луись вузъёсын. Вынлыко юрттэт понна, Белорус ССР-ысь Калык Комиссаръёслэн Советсы, Вылӥ Советлэн Президиумез но партилэн Центральной комитетэз Удмурт АССР-ысь рабочийёслы, колхозникъёлы но служащийёслы бадӟым тау каремзэс веразы. Пӧсьтолэзьлэн пумаз республикаысьтымы егитъёслэн бригадаоссылэн бригадиръёссы нырысетӥ конференцие люкаськизы. Ужрадзэс егитъёс пумитазы ужан интыосазы басьтэм азинсконъёсын. Кылсярысь, Александра Исаевалэн бригадаез сменалы чаклам ужъёссэ 246 процентлы быдэстӥз. Тазьы ужаны цехаз нокин уг на быгаты вал. Леонид Тебеньков андан пӧзьтӥсьлэн бригадаез плавказэ ортчытӥз 1 час 5 минутлы вазьгес. Гребенкин электриклэн бригадаез нормазэ тырмытӥз 500 процентлы. Конференцие люкаськемъёс егитъёслы вазиськон кутӥзы, комсомолецъёслэсь бригадаоссылэсь лыдзэс будэтоно, изъянэн ужанлэсь палэнсконо, техника ласянь дышетонэз умоятоно шуыса. 17-тӥ августэ 184-тӥ стрелковой дивизиысь 297-тӥ полклэн ротаез Германиен кунгоже вуиз. Солэн командирез вал Удмуртиысь лейтенант Василий Петрович Зайцев. 1945-тӥ арын солы Советской Союзлэн Героез дано ним сётэмын. Октябре СССР-ысь Вылӥ Советлэн Президиумезлэн Указэзъя Ижевскысь андан ӵыжатӥсь завод, ыбылӥськон пыӵал тӥрлыклы но авиацилы выль маркаё но вылӥ ӟечлыкен андан поттэмез понна, Ленин орденэн пусъемын. Та арын ик машина поттӥсь заводлы туж ӟеч пыӵал тӥрлык поттэмез понна Горд Знамя орден сётэмын. С. Некротюк, Удмурт Республикаысь Кун архивысь валтӥсь специалист. Удмуртиысь эшелонъёс кошко Белоруссие. Дарт Воректӥсь кизилиос Юсь Пичи пияш шоканы дӥсьтытэк балет учке. Маиз тыныд юнгес кельше: крезьгурез-а, эктонъёс-а? - юа анаез. - Апайёс, - шуиз пияш. Амалтэк синмаськод таӵе юсьёслы. Сыӵе соос веськресэсь, капчиесь, мусоесь - пельтӥд ке, мамык сямен лобӟозы кадь. Пичи дыръяз котькуд нылаш вожъяське, дыр, балериналы: пыдчиньы йылаз султыса, синучкон азьын поръяны выре, анаез дорын ӧвӧл дыръя ватскыса укно возъетлэсь пуштырес юбка вуре... Но будыса тросэз лулӟо гинэ на. Тодысалзы ке соос, мар со астэ балетлы сӥзён. Зэм, Оля Серебренникова ноку но со сярысь ӧз малпаськылы. Вордскиз со Завьял ёросысь Якшур гуртысь туж но туж огшоры семьяын. Татын вордскылӥзы сӥё-дано художникъёс, журналистъёс, дышетӥсьёс, музъем ужасьёс... Балеринаос - ноку но. Ваньзэ лэсьтӥз Адӟон. Олялы 7 арес дыръя кулӥз анаез. Атаез сое но сузэр-вынзэ Глазовысь нылпи юртэ сётӥз, аслаз кужымезлы ӧз оскы, лэся. Но Оля атайзэ огпол но ӧз пыкылы, али но со понна тау шуэ. Нылпи юртын соосты туж шуныт пумитазы: дышетӥсьёс но, воспитательёс но ялан котыртӥзы бергазы. Отысь улонлы дышыса, Оля пумен улӟиз, эктыны-кырӟаны но кутскиз. Дышетӥсьёс синйылтӥзы, соку ик бальной эктонъя кружоке гожтӥзы. Тӥни со вал кутсконэз. Кӧня ке дыр ортчыса, кивалтӥсез нылашез дораз ӧтиз. - Оленька, асьмелы Перме мыноно. Хореографияя училищее. - Ми тонэ туж яратӥськом, но вала - тыныд дышетсконо. 11 аресъем нылаш пумитъяськыны ӧз но вала. Шуо бере, кулэ, дыр. Кыӵе ке апайёс азьын улдӥсь кожысь ветлыкуз но, паос возьматъякуз но ӧз кышка, кынмемысьтыз гинэ куалекъяз. Нырысьсэ кышказ классической эктонъя урокын. Лек тусо Нина Петровна соосты кылзӥськись луыны косӥз - туннэысен, пе, котькуд нунал часэн ӝыныен эктом. Бӧрдыны уг яра. Куалектэм пичи нылашъёс-пияшъёс валазы кадь кытчы сюремзэс, солань-талань учко, но... анай-атай вӧзын ӧвӧл ни. Озьы кутске татын быдэ вуон. Ӵукна укмысысен ӝыт укмыс часозь занятие, урок, занятие... Амалтэк тодэ лыктэ "Танцующие призраки" кинофильм. Соин ик Оляен вераськонмес со бордысен кутски. - Туж жаль, - веранзэ кутскиз егит балерина, - та фильм балеринаос сярысь урод малпан кылдытӥз шуыса. Ваньмыз соосты жаляны кутскизы: ах, куанеръёс, ах, визьтэмъёс... Отын туж трос пӧяськемын, нош чеберзэ, шумпотымонзэ ичи возьматэмын. - Но маиз ке но зэмез вань, дыр, ук? - Дышетскемзы зэмлыко возьматэмын. Жуммытозь эктытонъёс, лек дышетӥсьёс, пӧрмытымтэ дыръя сачкытъянъёс... - ?! - Сотэк Жизель ноку уд луы. Валаськоды-а, со тӥледлы паймымон потэ, нош ми ум куалектӥське: эктэмед ке потэ, чида. Балет - со самодеятельность ӧвӧл ни, со - вылӥ искусство, соин ик татын астэ жаляны - сьӧлык. - Но лумбыт дышетскыса шедьылӥз на-а шутэтскыны дыр? - Укмыс бере быдэс ӝыт но, уй но тынад. Куддыр эшъёсын ӵош городэтӥ поръяллям, куддыр комнатаямы огшоры визьтэмъяськылӥм. - Оля, вождэ эн вайы, нош синмаськыны лэзьылӥзы-а? (Малы ке юанэлы уг паймы). - Лэзьылӥзы, но чакласькыса, йырдэ ыштытэк. - Ческыт сиськыны? - Сиськемлэсь нокин но уг алы, сиськы, эн гинэ куайы. Балерина ачиз эсэпсэ валаны кулэ: туннэ пирожной сиид ке, ӵуказе тыршы ни салат вылынгес улыны. Дышетскыку со секытгес потэ. Нылъёс чидатэк ческыт сиё, кык нунал ортчыса нош дышетӥсь кускысьтызы мултэс миллиметръёссэ синйылтэ, куаретэ, соиз куалектэ, лумбыт сютэм ветлэ но занятиын йырсазьзэ ыштэ. Часэ шоры учкисько. Нуназеян вакыт. - Столовое ветлӥськод-а? - Уг, матын улӥсько, бертыса ӝук пӧзьто, чай юо. - Со гинэ-а? - Тырмоз. Мон сӥль уг сииськы, ческыт уг поты. - Ӝытазе 9 часозь репетициды кыстӥське. Со бере сиськиськод на-а? - Уг, 6 часын берпуметӥзэ. - Пыдъёстэс туж шуныт возиськоды кадь? - Кызьы сотэк? Соослы тужгес секытэз йӧтэ ук, - пыдъёссэ туж ненег маялля Оля. - Нош балетэн сяна, маин выриськод на? - Туж яратӥсько классикаез лыдӟыны, тунсыкъяськисько пӧртэм адямиослэн улонэнызы. Шутэтскон нуналъёсы яратоно песянае доры Якшуре бертылӥсько. Со мынам паймымон кышномурт: ноку но уг куареты. - Ноку но ӧд жалялля на-а та сюресэз быръемдэ? - Жалян сярысь вераськонэз ик ӧвӧл - мон туж шудо. Но туж но туж трос дышетсконо, мон ӧй но экты ук ай. - Малпасько, матысь дыре тонэ сцена вылысь адӟыны быгатом. - Аслам но потэ вылэм. - Кин тыныд тужгес но адӟем карымон потэ? - Галина Уланова. - Нош асьме театрысь? - Рос-прос ӧй вала на, но ваньмыз туж синмаськымонэсь кадь. Татын ваньмыз ог- огзылы пальпото, ужъёсынызы тунсыкъясько. Тау шуныт пумитамзылы. Ольга Серебренникова ӧз мальдытъя ай учкисьёсты, ӧз но ворекъя бадӟым сцена вылын. Солы али 19 гинэ ай, со али гинэ кутске улон сюрессэ. Но мон азьло ик оскисько: солэн кизилиез воректоз. Тӥ син азяды пуктыны быгатӥськоды-а удмурт примаез? Йыр ик берга, озьы-а? Нош мынам син азям пуксе. Мар со, кӧня ке ар? З. Рябинина. Конкурс Зарни ужась кужым Россия Федерацилэн Президентэзлэн Приволжье федеральной округысь Удмурт Республикая аппаратэз пыриськыны ӧте "Россилэн ЪЪИ даурысь зарни ужась кужымез" конкурсэ. Ортчоз со 7-тӥ-10-тӥ октябре Ижевск городын. Конкурсэ пыриськыны быгатозы вань мылкыд карисьёс, кинъёс асьсэлэн тодон-валанъёсынызы но быгатонлыкъёсынызы узырмытыны оско Россилэсь Зарни ужась кужымзэ. Конурсэ пыриськон понна гожтоно куриськон, со сяна, асьтэ сярысь таӵе валэктонъёс сётоно: 1. Быдэсак нимтулды. 2. Ку но кытын вордӥськемын. 3. Улон интыды но телефон номерды, (Емаил, пейджер). 4. Кыӵе ёросын улӥськоды. 5. Вералэ дышетскемды сярысь: кыӵе дышетскон заведениез йылпумъяды, кыӵе факультетэз но кыӵе специальностья. Ку дышетскыны пыриды но ку йылпумъяды. 6. Вань-а учёной степеньды, публикациосты, конференциосы пыриськемды но мукет. 7. Компьютерен ужаны быгатэмды. 8. Кунгож кылъёсты тодэмды. 9. Вералэ семьяды сярысь (кинъёс соос, ма каро). 10. Вералэ азьвыл ужам интыдэс. 11. Али кытын ужаськоды. 12. Пыриськиськоды-а кыӵе ке но огазеяськонлэн ужаз. 13. Маин тунсыкъяськиськоды. 14. Азьланяз кинэн асьтэды адӟиськоды. 15. Предприятилэсь, организацилэсь ужзэ умоятон понна, мар воштыны кулэ асьтэлэн ужан интыяды. 16. Кытысь тодӥды конкурс сярысь иворез. Дарт Чеберина Завьял ёросысь Шаберды гуртысь Оля Кирилловалэн йырсиез 75 сантиметр. Со туж данъяське соин. Зэмзэ но туж чебер, озьы-а? Я, кин эшшо милемыз гочатоз на? Ӟеч вал выжы уськыто Можга ёросын ӟеч выжы пудо вордонлы берло дыре бадӟым инты висъяське. Со пӧлысь одӥгез - вал вордон. Берло дыре удыс лябӟиз вал. Соин ик, солы сӥзьыса, нимысьтыз смотр-конкурс ялӥзы. Можга ёрослэн бускелез - Ува ёрос. Отысь эштосъёс, ог-огзы доры ветлыса, та удысын кызьы ужамзэс чаклало. Тани Можга ёросысь "Россия" но Ува ёросысь "Дружба" колхозъёс дунъет сётӥзы ог-огзылэн кызьы вал вордэмзылы. Умой чаклазы валъёсты кызьы сюдэмзэс, утялтэмзэс но эмъямзэс. Тодмо луиз, уваослэн азинсконъёссы вылӥынгес, гидъёссы чылкытэсь, выжыез умоятон ужез валаса нуэ зоотехник-селекционер. "Россиысь" пудо вордӥсьёс но утчасько. Соос басьтӥллям вятка выжыысь кык вал. Валъёсты быдтыны уг яра, шуо гуртоос, чыры-пыры нуон-ваён ужъёсы кыткыны, бакчаосты гырыны, дэри куазен кытчы ке ветлыны - соос гуртын номырин воштонтэм. П. Скобелев. Книгаоссэс ваё библиотекае Туэ выль дышетскон ар азьын Удмурт Элькунысь Калыкез дышетонъя министерство благотворительной ужрад ялӥз вал. "Школаысь библиотекае - котькуд семьяысь умой книга" нимаськиз со. Можга ёросын та ужлы 29-тӥ августэ кутскон сётӥз ёросысь Калыкез дышетонъя удысын ужасьёслэн профсоюззылэн ёросысь кенешезлэн кивалтӥсез Н. М. Пчеловодова. Надежда Михайловна Мельниково школалы сётӥз энциклопедилэсь куинь томъёссэ. Солэсь кичӧлтонзэ умоен лыдъяса, ёрос администрациысь егитъёсын ужанъя валтӥсь специалист Г. Н. Максимова трос книгаоссэ кузьмаз Вылын Юри школаысь библиотекалы. Берло дыре ужаса улӥсьёс школаосысь библиотекаосы уно книгаос вуттӥзы ни. Предприятиос но та ужлэн палэназ медаз кыле вал. Соос быгатысалзы шефской юрттэт чотын школа библиотекаослы коньдонэн но юрттыны. П. Скобелев. Дивеевоын пумиськонъёс Кирос но корос (Кутсконэз 118-тӥ номерын). Али, христианстволы 2 сюрс ар тырмон азьын, татчы уката трос адямиос вуыло. Лыкто лулзэс буйгатыны, висёнзэс йӧнатыны, Серафим Саровскийлэн лыосыз борды йӧтскылыны. Кылзо баӵкоен герӟаськем паймымон учыръёсты. Со улэп дыръя но, улонысь кошкемез бере но адямиосты бурмытъяз. Ошмес ву, шайгу вылысь сюй, ужам тӥрлык, вӧсяськон из бордысь изьыос - ваньмыз пыӵамын эмъясь кужымен. Та паймымон дуннеен артэ - туннэ нунал. Арзамас-2 станциын калык тачак. Ми, али вуэмъёс, бертон сярысь но малпаськом ни. Кассир черекъя: - Можгаозь билетъёс ӧвӧл, уз но луэ! - Умойгес учкелэ вал. - Учкелэ асьтэос: кӧня калык пуке, келяны ум быгатӥське! Куать часын вуиз Вознесенск пала мынӥсь автобус. Кык час куспын Дивеевое сюрим. Храм доры ваським. Сумкаосынымы ик вамыштӥм Серафимо-Дивеево монастырь пала. Кыӵе татын чебер! Кык бадӟым тӧдьы соборъёс инбамозь ик сузё кадь. Котыраз пӧртэм сяськаос мерттылэмын. Сьӧд дӥськутэн монашкаос храм дорысь пичи садын ужало. Пиосмурт ӵышке газонэз. Кузь тубатэтӥ ваським вӧсяськон корка пырон ӧс доры. - Нылаш, сыл ай, отчы штаниен пырыны уг яра. Монэ дугдытӥз сьӧд дӥськутэн но арлыдо кышномурт: - Мын висъет сьӧры, дӥся юбка. Ӵош лыктэм эшъёсы шыпыртӥзы: - Эн кылзы, татчы ӧс сьӧры гинэ пырыса воштӥськы. Ӧсэз усьтӥ гинэ но, кытысь ке нош ик со кышномурт потӥз: - Эн пыры отчы, со монахиняослы гинэ чаклам инты. Верай ук, кытчы воштӥськыны мыноно! Воже потӥз ке но, кылме кутӥ. Дӥсьме воштӥ. Потыкум монэ "миськизы" на, мон кадьёслы чакламтэ интыын киме миськеме понна. Котырысь чеберез уг ни адӟиськы. Пушкам тылпу гома: кинъёс соос, эксэйёс шат? Мукет дыре, музон интыын таӵе юмокъёсын пумиськыса серекъясал гинэ. Нош татын, сокем дано интыын... Эшъёсы возьмаса жадиллям ни. Пырим храме. Трос адямиос люкаськемын. Кирос каро, пыдесъясько, баӵко бӧрсьы чирдо. Лушкемак юаны вырисько: -Ку служба кутскиз? Причастие вал-а ни? Люкаськемъёс кылымтэ-адӟымтэ карисько. Чирдонлэсь быремзэ возьманы чидан ӧз тырмы, кошким. Ӵуказеяз, вазь султыса, монастыре кошким. Служба кутскемын вал ни. Адямиез нош ик трос. Сюлэм усьтонэ (исповеде) пыртась баӵкоос доры кык кузь черод кыстӥське. Бергес кутскиз причастие. Ортчемез бере сюсьтылъёс пуктылӥ, мудоръёсыз чупай. Серафим Саровскийлэн лыосыз кыллё ӵуж чилясь коросын. Вӧзаз дугдылӥсьтэм черод. Отчы султыса, паймымон арбери борды йӧтски. Учкисько: адямиос кироссэс кушто, корос дорын сылӥсь монашкалы югдытыны сёткало. Мон но кури. Киросме корос вадьсын кӧня ке возиз но берыктӥз. Табере мыным шуг-секытъёслэсь кышканэз ӧвӧл ни: монэ баӵко Серафим утёз. Таяз нуналэ сюлэм секыт ӧз луылы. Лулы мукетъёсын ӵош берганэ сюриз. Кырӟасьёс но вӧсяськонъёсыз сьӧры нёжъяны выри. Служба бырон азьын калык ичи кылиз. Монашкаос Серафимлэсь короссэ усьтӥзы, ужам тӥрлыкез борды йӧтскыны лэзизы. Лул пуш шумпотонэн тырмиз, лобаме ик потӥз. Адямиос сьӧры соборысь потӥм но, кыӵе ке черодэ шедим. Дунтэк, пе, ваньзэ сюдо. Ӧм оске ке но, пересьгес кышномурт бӧрсьы султӥм. Зэмзэ ик, кыӵе ке кышномуртъёс котькинлы сёто кык вандэт нянь, пуньы, тэркы, татчы шыд поно. Ӝӧкъёс дорын интыез ӧвӧл. Огез пиосмурт, кӧтсэ маялляса, ӟус вылысь султӥз. Солэн интыяз пукси. Помидорен, кешырен, картофкаен но тысь вӧйын шыдме быдтыса, тари ӝук но компот басьтӥ на. Артэ пукись шоро-куспо аресъем нылкышно пичи пизэ кесяськыса дыртытэ: -Я, чаляк сиськы ни! Кӧня тонэ возьмано на? Мукет палаз пукись кышномурт лякытак вазиз: - Тӥ ӝӧк сьӧрын ук. Нылпиен татын керетыны уг яра. Валай: соос артэ гуртысь ик, татчы котькуд нунал сиськыны ветло. Сиён сёткасьёсын кенешыны малпай. Ӝӧк утялтыны юрттӥськонъям тодӥ: соос но палэнысь лыктэмъёс, паломникъёс. Арнялы татчы кылемын. Квартираын уксё тырыса уло. Вазь ӵукна султыса вӧсяськыны но сиён дасяны вуо. - Арлы быдэ ветлӥськом Серафим Саровскийлэн музъем вылаз, - шуо. - Татысь кужым люкаса кошкиськом. Уксёен тырмымтэен яке мукет муген лыктэммы уг лу ке, сюлэммы интыяз уг кыльы. Монастырысь настоятельница Игумения Сергия аслаз юрттӥсьёсыз сярысь тазьы вера: - Ваньмыз тыршо ас мылкыдзыя. Уг вунэто преподобнойлэсь таӵе кылъёссэ: "Кин мон монна ужа но кыллён интыме уг вунэты, со понна мон но сюлмасько, таяз но вуонояз дауръёсы - сое но выжыоссэ уг кушты". Соос тодо, кыӵе кузьым басьтозы ужамзы понна. Син азям ӵемгес сюрылыны ӧдъязы юрттӥськисьёс. Огъёсыз куасьтэм нянез юдо. Шоремъёсты берлогес чугунын югдытозы но вӧсяськисьёслы сёткалозы. Мукетъёсыз шыдэ помидор вандыло. Кураськисьёс но ичи ӧвӧл. Одӥг вамыш но уд лэсьты, таӵе кылъёсыз кылытэк: - Юрттӥське вал, няньлы ке но. Одӥг кышномурт ӟустариен дӥсяськем ныллы чидатэк вазиз: - Мон туннэ сомында адямилы ӟеч лэсьтӥ ни, табере уг тодӥськы, кин мыным аслым юрттӥськоз. Юан кылдэ: кытысь татчы вуэ нянь, помидор но мукет сиён? Адямиос кузьмало? Яке ваньмыз уксёен октэмын? Ӧвӧл. Монашкаос асьсэос ужало. Со понна нимаз чаклам инты вань. Со кельше фермер хозяйстволы. Татын ю-нянь будэто но пудо вордо. Нюлэскы ветлыса, узы, эмезь, губи бичало. Тыршо сьӧд дӥсяськыса, йырзэс шобыртыса. Соослы но юрттӥськыны музон интыысь адямиос вуыло. Дарт Милям хитмы Кӧня, кӧня, кӧня чебер пиос Югытэ, синучконэ, Вера ай мыным зэмзэ: Кин-о меда чебергес, Тузӥгес, муспотонгес? Нош кыӵе муртэ чебер шуо, маръя дунъяло? Мугорзэс учко-а, ымнырзэс-а? Нош ымныр кудӥз чебер: мыным мыйыкоос кельшо, эшелы - мыйыктэмъёс. Туганэлы мон кадь лапег нылъёс ярало, ачим ӝужытъёсыз шоры учкыса лулӟылӥсько. Тӥни озьы ӝытбыт олокӧня тодмо адямиосты син азям бергатӥ. Нырысь ик чеберинъёсты утчай. Кутском мыйыкоос бордысен (сыӵе пиос асьсэды котьку чаклало, аспӧртэмлыко луо). Соку ик тодэ лыкто Михаил Ворончихин, Сергей Васильев, Петр Захаров, Валерий Тероков, Андрей Ураськин, Геннадий Бекманов, Валентин Белых... Мыйыктэмъёс но умой, дыр: соос котьку егит адӟисько. Таосыз пӧлын трос Анатолийёс: Ушаков, Митрофанов, Эркишев... Ӝужыт пиос удмуртъёс пӧлын трос ӧвӧл, но утчад ке, шедьтод: Алексей Шкляев, Владимир Возняков, Сергей Матвеев, Федор Миннигараев, Валерий Митрофанов, Алексей Ложкин... Только ӟызыесьгес. Со понна ичигес сисько, котькыӵе дӥсе тэро, ӝоггес бызьыло, дыр. Лапегъёссэ уг вера, соос пӧлын но синмаськымонъёсыз вань ке но. Бадӟым кӧтооссэ гожтом (йӧно-дано адӟисько): нош ик Анатолий Ушаковен Михаил Ворончихин, Андрей Анкудинов, Егор Загребин... Сьӧдкысъемесь: Михаил Ворончихин, Алексей Ложкин... Всё, тырмоз, бырйим! Озьыен, Егит Чеберин - Алексей Ложкин, солэсь Егитэзгес - Михаил Ворончихин! Кин соглаш ӧвӧл, пумитъяське. Табере быръем Чеберина. Вань ук чебер нылъёс, Кашина, Федорова, Дюпина сяна но. Маин пӧртэм Надежда Уткина? Мугорыз но ӝужыт, ымнырыз но вольыт. Бадӟым синмо, зӧк ымдуро, жингрес куараё. Татьяна Денисова но тузӥ, мугорыз шат лапеггес. Нош Валентинаос: Моисеева, Пудова, Бекманова? Эшшо олокин но йыре лыктэ. Копак сураськи - Чеберинаез, оло, ӵош быръём? Ыстэ асьтэлэсь малпанъёстэс редакцие. Кузьым - Чеберинаен интервью. Ольга Никитина, Удмурт университетын дышетскись. Михаил Кокорин: "Тодады ваелэ Суворовез" Удмурт Элькунлы Йыре дэмлам муртъёслэсь луонлыкъёссэс лыдэ басьтыса, кӧня ке адями ӵектэмъя, мон но пыриськоно кариськи быръёнъёсы. малы курадӟо туннэ удмуртъёс, ӟучъёс, бигеръёс? Музъеммы начар но куанер шат? Яке - куазьмы кезьыт? Ӧвӧл! Асьмеос курадӟиськом, законъёсмы ужамтэен, лушкаськисьёс йылэмен, лэсьтэм йыруж понна кыл кутыны курымтэен. Тодады ваелэ ӟуч генералиссимусэз Александр Суворовез. Со вормылӥз, кышкасьтэм, кӧттыро, дӥсям-кутчам солдатэз тыршемен. Законъёсты быдэсъян - тӥни мар ӧз тырмылы асьмелы та аръёс ӵоже. Сое ОМОН но СОБР выллем кужымъёс чакланы кулэ ӧвӧл, асьмеос, та кунын улӥсьёс. Уг оскиськы кесяськись адямиослы, оскисько калыклы. асьмеос данъяны кулэ аслаз выжыосыз, аспал эшъёсыз, вордӥськем шаерез понна нюръяськись муртэ. Котькудӥз быгатэ аслэсьтыз адямизэ бырйыны. Тӥ гажаськоды ке законъёсты, ӝикытлыкез, шаерысьтымы адямиослэсь эрикрадъёссэс утёнэз, тӥледлы дуно ке нылпиостылэн туннэ но ӵуказе нуналзы, мон луо Удмурт Элькунлэн Йырыз. Кошко "кизилиос" Странамы люкиськиз кык номеро космонавтэн Герман Титовен. Бен, улонлэн зэмлыкез сыӵе - та югыт дуннее асьмеос вуылӥськом огдырлы гинэ. Странаысьтымы космонавтъёс пӧлысь котькинлэсь азьло бырыны шедиз Владимир Комаров: со пазьгиськиз 1967-тӥ арын 24-тӥ апреле "Союз" корабльын, Музъем вылэ берытскыкуз. МиГ-15 УТИ самолётэн тренировкаос дыръя 1968-тӥ арын 27-тӥ мартэ быриз Юрий Гагарин. "Салют" станциын ужамзы бере, 1971-тӥ арын 30-тӥ июне, Музъем вылэ васькыкуз бырыны шедиз "Союз-11" корабльысь экипаж: Георгий Добровольский, Владислав Волков но Виктор Пацаев. Операция лэсьтэм бере кулӥзы Павел Беляев, Георгий Береговой но Юрий Малышев. Пыктос висёнэн курадӟыса, улонысь кошкизы Анатолий Левченко, Юрий Артюхин но Лев Демин. Сюлэмзы кутыса кулӥзы Борис Егоров, Георгий Шонин но Евгений Хрунов, отравленилэсь - Василий Лазарев. 1967-тӥ арын 27-тӥ январе, тренировкаос дыръя тылпу ӝутскыса, "Аполлон" корабльын ӝуазы астронавтъёс Вирджил Гриссом но Эдвард Уайт. 1982-тӥ арын 27-тӥ декабре пыктос висёнлэсь кулӥз Джон Свигерт - "Аполлон-13" корабльын Толэзь доры лобам астронавт. 1986-тӥ арын 28-тӥ январе инсьӧре ӝутскыкуз пуштӥз "Челленджер" корабль, быризы Рональд Макнэйр, Эллиссон Онизука, Джудит Резник, Фрэнсис Скоби. 1987-тӥ арын 2-тӥ декабре сюлэмыз кутыса кулӥз Дон Эйсил. 1989-тӥ арын 17-тӥ июне кыкетӥ мировой война вакытысь самолётын пазьгиськиз Дэвид Григгс. 1990-тӥ арын 6-тӥ апреле инфаркт луыса улонысь кошкиз Рональд Эванс. 1991-тӥ арын 5-тӥ апреле авиакатастрофаын пазьгиськиз Мэнли Картер. 1991-тӥ арын 8-тӥ августэ сюлэмыз висьыса кулӥз Джеймс Ирвин. 1993-тӥ арын 13-тӥ июне, йырвимаз пыктос кылдыса югыт дуннеен люкиськиз Дональд Слэйтон - "Союз-Аполлон" программае пыриськем астронавт. 1993-тӥ арын 5-тӥ октябре Эверест гурезе тубыкуз шоканы омыр тырмытэк быриз астронавт, тодосчи Карл Хениц. 1994-тӥ арын 12-тӥ декабре сэпез висьыса кулӥз Стюарт Руса. 1995-тӥ арын 3-тӥ октябре секыт висемез бере улонысь кошкиз Чарльз Вич. 1996-тӥ арын 22-тӥ мартэ капчи моторен лобась самолётэн пазьгиськиз Роберт Овермайер. 1998-тӥ арын 21-тӥ июле лейкемиен курадӟыса улонысь кошкиз Алан Шепард. 1999-тӥ арын 8-тӥ июле автокатастрофаын бырыны шедиз Чарльз Конрад, 1969-тӥ арын Толэзе вуылэм астронавт. Басьтэмын Интернет пыр. Россиысь Калыкез дышетонъя министерство юалляськон ортчытӥз: мар малпало пиналъёс школа сярысь? Соос пӧлысь 25 процентэз гинэ дышетӥсьёссэс гажамзы сярысь веразы. 40 процентэз пиналъёс кышкало школаын "йӧттэмзылэсь" 31 процентэз школаын шуккиськыло, 32-эз кышкало дӥськутсэс лушкамлэсь. Ӝыныезлы уг кельшы дышетскон тӥрлык - сюбег партаос сьӧрын 7-8 час пукыса, пиналъёс укыр жадё. Тросэз ӝожтӥсько расписание мултэс трос дышетон предметъёс пыртэмлы, школаосын начар сюдэмлы яке воксё сюдымтэлы. Шоркармылэн историысьтыз Тодэ вайытэ туспуктэм Кызетӥ даурез йылпумъясь арын асьмеос ваньмы историмылэсь туж бадӟымесь праздникъёссэ пусйиськом: тулыс пусйим Быдӟым Вормонлы 55 ар тырмон нуналэз, сӥзьыл - Удмуртимылэн республика яке кун луэмезлы 80 ар тырмон нуналэз. Пӧртэм аръёсы но вакытъёсы пӧртэм сямен ортчылӥзы та праздникъёс. Тани, шуом, фашизм Германиез пазьгыса, кинъёс пӧламы улэп кылизы но геройлыко вакытэз адӟисьёс луыса туала калыклы мадьыны-адӟытыны быгато на? Туж ӧжытэз. Совето Союзлэн Геройёсыз сярысь верано ке, соос чиньыен лыдъямон сяна ӧвӧл ни. Элькунмылэн шоркараз улэ егит дыръяз кужмо ожмаськем дано лётчица, трос аръёс ӵоже дышетӥсьын ужам мурт, гажано Нина Захаровна Ульяненко, Глазкарын - Артемий Демидович Торопов, таиз но герой-лётчик трос аръёссэ сӥзиз война бере но Родинамес утёнлы, собере егитъёсты визьноданлы. Нош вал аръёс, куке геройёсмес син азямы пуктыны, соосын пумиськылыны, дорамы ӧтьылыны, тодэ ваёнъёссэс кылзыны быгатӥськом на вал, данъяськылӥм соосын. Тани, кылсярысь, 1975-тӥ арын Совето Союзысь калыкъёс паськыт пусйизы Быдӟым Вормонлы 30 ар тырмон нуналэз. Со вакытлэсь одӥг учырзэ возьматэ тӥ азе поттэм снимок. Учыр таӵе вал. Ожысь ветеранъёсты пусъё юбилейлы сӥзем медальёсын. Тужгес гажано геройёсмес, землякъёсмес праздник азьын ӧтизы Иж горсоветлэн исполкомезлэн заседанияз, соослы медальёс сётӥз УАССР-ысь военком, полковник Юрий Александрович Савченко. Тӥни соку ик Ижевсклэн знамяосыз вӧзын городысь куд-ог кивалтӥсьёсын ӵош татын улӥсь геройёслэсь тусбуйзэс фотография вылэ пуктӥзы. Тани соослэн нимтулъёссы. Нырысетӥ радын паллян паласен: Валентин Сергеевич Логинов - КПСС-лэн горкомысьыз партия ужъёсты радъясь ёзэн кивалтӥсь (али но городын улэ); куиненыз ик Слава орденъёсын пусъем ветеран - герой Петр Ильич Бельский, Совето Союзлэн Героез азьло связист, собере заводысь рабочий Никифор Савельевич Павлов, куиньзэ ик Слава орденъёсты нуллӥсь, дано металлург Тарас Федорович Емельянов, Совето Союзлэн Героез, артиллерист Сергей Семенович Фионин. Кыкетӥ радын: нырысез - военком Ю. А. Савченко. Со бӧрсьын - Совето Союзлэн Героез Александр Андреевич Девятьяров, туж кема ДОСААФ-лэн Удмурт Республикаысь комитетэныз кивалтӥз. Куинетӥез - Иж горсоветлэн исполкомезлэн председателез Борис Владимирович Шишкин. Совето Союзлэн Героез полковник Георгий Сергеевич Томиловский война бере Удмуртиын улытозяз трос аръёс ӵоже зэмос патриотъёсты будэтӥз, пиналъёслэн но егитъёслэн "Зоринча" но "Ӧрӟипи" военно-спортивной шудонъёсынызы кивалтыса. Туспуктэм вылын берлосез горсоветлэн исполкомезлэн председатезлэн воштӥсез Маргарита Семеновна Торонцева. Татын возьматэм геройёсмы пӧлысь одӥгез но пӧламы ӧвӧл ни. Ар но ӧз ортчы на, улонысь кошкиз соку Удмуртиысь военной комиссариатэн кивалтӥсь Ю. А. Савченко. Снимокез Н. С. Павловлэн семьяезлэн архивысьтыз шедьтӥз Леонид Федоров. Куаразэ уг берыкто Чечен ож кутскем дырысен нырысьсэ Россилэн но Европаысь парламентлэн ассамблеяезлэн куссыпъёссы матэктыны ӧдъязы. Европаын, шӧдске, валаз ни, та война вакчи дыр куспын уз йылпумъяськы, нош ӟучъёс чигнаны уг малпало шуыса. Озьы ке но Россиысь делегацилы куаразэ берыктон ужпумез та дырозь нокин но ӧз ӝутъя на. Таӵе правозэ странамылэсь куштӥзы, Чечняын кылдэм югдурез лыдэ басьтыса. Басьтэмын Интернет пыр. Крезьгурлэн паймымон дуннеяз Тодмо удмурт крезьгурчилэн Николай Егорович Шкляевлэн нимыз меӵак герӟаськемын удмурт культураен. Солэсь "Тӧлӟыло улмопу сяськаос", "Уй тылъёс" но мукет кырӟанъёссэ тодӥсьтэмез ик ӧвӧл ни туннэ. Драмая удмурт кун театрын ӝыны даур ӵоже ужатозяз вуылӥз шаерысьтымы весь вань ёросъёсы. Тросэз тодылӥзы театр крезьгур кылдытӥсез, концертмейстерез но аккомпаниаторез. Николай Егорович Шкляевлэсь крезьгуръёссэ шаермылэн сьӧраз но тодо. Солэсь кырӟанъёссэ вӧлмытъяз "Италмас", чузъяськылӥзы соос Москва радио пыр, интыяськизы зарни шыкысэ. Адями тудж зол шӧдэ удмурт кырӟанлэсь, удмурт кыллэсь чеберлыксэс. Со ик юрттэ зэмос суредась луыны. Со вакытэ ик Николай Егорович трос выльзэ шедьтэ: нырысь ик со кылдытӥз вальс выллем кырӟан, тазэ матэктытӥз романслы. Вылезлэн вашкалаеныз герӟаськемез, узыр крезьгуръёс ик та адямиез чебер но вунэтонтэм каро. Н. Е. Шкляев вордӥськиз 1925-тӥ арын Дэбес ёросысь Ӟиллё гуртын. Анай-атайзэ вазь ыштӥз. Соин ик сое вордыны басьтӥз азьвыл Зура (туала Эгра) ёросысь Сюрсовайчик гуртысь воргорон Егор Андреевич Шкляев. Татын ик ортчиз солэн пичи дырыз. Ньыль аресысен пичи пи балалайкаен шудыны кутскиз. Покчи дыръяз дышетскиз Бадӟым Пурга школаын. Сое йылпумъяса, Иже лыктӥз но дышетскыны пыриз крезьгуръя школае. Дышетӥсь В. Е. Кудряшов виолончелист луыны лӧпкытъяз. Школаын усто дышетскиз. Ӵемысь пыриськылӥз концертъёсы, крезьгурлы сӥзем радиоверанъёсы, шудӥз дышетскисьёслэн оркестразы. Мон тодам ваисько соосты. Вуоно крезьгурчилэн шудэм куараез туж чылкыт вал. Котьмаиз йырсазе кыльылӥз. Соос пӧлын - Сен-Санслэн "Лебедь", П. И. Чайковскийлэн "Размышление" ужъёссы. Быдӟым тылож кутскыку дышетске вал куатетӥ классын. Школаысь мукет дышетскисьёсын ӵош пыриськылӥз госпитальёсын но воинской частьёсын ортчылӥсь концертъёсы. Собере берытскиз вордӥськем гуртаз. Война бере выльысь улӟытӥзы театръёсты, клубъёсты, усьтӥзы крезьгуръя училищеез. 1945-тӥ арын отчы пыре Н. Е. Шкляев но. Огвакытэ ик оркестрант но баянист-аккомпаниатор луыса тыршиз Драмая удмурт кун театрын. Татын ужан матэктытӥз Удмуртшаерысь интеллигенцилы, тодматӥз писательёсын, крезьгурчиосын, актёръёсын, юрттӥз сцена вылын пуктылыны ярано нырысетӥ ужъёссэ кылдытъяны. Театрын Н. Е. Шкляев ужаз витьтон ар - 1945-тӥ арысен 1962-тӥ арозь вал концертмейстер, баянист, виолончелист, 1962-тӥ арысен - драматической труппалэн крезьгуръя кивалтӥсез. Витьтон спектакльлы кырӟан гожтӥз, куинь сюзэ крезьгурен чебермаз. Тужгес яратоно спектакльёсыз - пиналъёслы выжыкылъёс. Пичиесь суредъёс, эктонъёс пыртылыса, крезьгурчи кылдытӥз яркыт тусбуйёс. Тужгес тодмоез, "Царевна-лягушка", сцена вылын дас вить ар ини улэ. Н. Е. Шкляев гожтӥз сю витьтонлэсь уно кырӟан. Соосты кылдытӥз, кылбурчиосын Николай Байтеряковен, Александр Вотяковен, Михаил Петровен, Михаил Покчи- Петровен, Степан Широбоковен но мукетъёсыныз валче ужаса. Гай Сабитовен пумиськемез юрттӥз кырӟанъёс вордыны. 1947-тӥ арын вал со. Николай Шкляев, виолончелен шудыны дышетскись, пичиесь пьесаос гожъяз. Гай Сабитовлы со пумысь вераз но, кылбурчи кырӟанъёсын эшъяськыны дэмлаз. Собере ик сётӥз кырӟанлы пӧрмоно кылбурзэ. Озьы вордӥськиз "Ӟеч лу", лагерь!" Таӵе ик тунсыко вал Михаил Покчи-Петровен пумиськон. 1956-тӥ арын, "Палдэм шелеп" спектаклез учкемыз бере, кылбурчи но крезьгурчи вальслэн инъетэз вылын кылдытӥзы туж яратымон "Ӟеч лу, институт!" кырӟан. Берло аръёсы Николай Егорович кияз тужгес ӵемысь кутылэ Александр Вотяковлэсь кылбуръёссэ. Соосъя гожтӥз "Востэм арганчи", "Мусо эше" но мукет кырӟанъёссэ. Нош тужгес ӟечъёсыз кылдытэмын Михаил Петровлэн кылъёсызъя. Тодмо крезьгурчи ужаз туж быгатыса кутэ кырӟанэз чеберъян амалъёсты. Н. Е. Шкляев - аспӧртэмлыко адями. Солэн кырӟанъёсынызы пумиськыку, асьмеос котьку шӧдӥськом крезьгур кыллэсь номырин дунъяны луонтэм кужымзэ. Соин валче кырӟанысь огшоры учыръёс но чебересьгес луо. Гужем со театрен ӵош кошкылӥз гастрольёсы. Сьӧраз басьтылӥз баянзэ. Спектакль дыръя артистъёслы шудылӥз. Собере шулдыртылӥз эктыкузы. Егитъёс яратылӥзы таӵе пумиськонъёсты. Тунсыкъяськылӥзы крезьгурлэн, кырӟанъёслэн, эктонъёслэн кылдон сюресэнызы. Трос вераськылӥзы спектакльёс, актёръёс сярысь. Николай Егоровичлэсь ӵемысь юаллязы: кырӟанъёстэс кинлэн кылъёсызъя гожъяськоды? Крезьгурчи вералляз кылбурчиос Герман Ходырев, Михаил Покчи-Петров, Михаил Петров, Николай Байтеряков сярысь. Театр со понна - быдэс улон. Ӵукна - репетиция, ӝыт - спектакль. Отын Николай Егорович - крезьгуръя кивалтӥсь но, сое чузъяськытӥсь но. Яке - аккомпаниатор. Бер жыт, ваньмыз кӧлыку, вуоно спектакль понна крезьгур кылдытэ. Театр эшъяськытӥз сое тодмо режиссёръёсын С. Гляттерен, С. Смирновен, Г. Веретенниковен, тодмо драматургъёсын И. Гавриловен, С. Широбоковен, Е. Загребинэн. Со сяна, Николай Егорович Шкляев туж яратэ чорыганы, тус пуктылыны. Та вакытэ ик кылдэ семьяез но. Кузпалыз - Ижысь тодмо эмъясь. Ньыльдон одӥг ар ӵоже ужаз городысь кыкетӥ поликлиникаын. Тазалыкез утёнысь азьветлӥсь. Тужгес ӟеч кылъёс вера Николай Егорович крезьгурчи Н. М. Греховодов сярысь. Таиз - Н. Е. Шкляевлэн зэмос дышетӥсез. А. Голубкова, музыковед. Крезьгурчи Николай Шкляев егит дыръяз. Правительствоын Кутэмын "2000-тӥ арын октябре-декабре гражданъёсты военной службае басьтонэз ортчытон сярысь" постановление. Туэ армие мынозы 1973-тӥ-1982-тӥ арын вордскемъёс. Таӵе егитъёс шаерамы 10 сюрслэсь уно, нош солдат дӥсез мерталозы 2600-эз. Удмурт Республикаысь Правительстволэн пресс-службаез. Выль школа усьтӥське Алнашын ӝоген ӝыт школа усьтӥськоз. Та нуналлы одӥг гинэ куриськон сётэмын ай. Но дышетскыны малпасьёслэн лыдзы будоз. Туэ гинэ укмысэтӥ классэз быдтэмъёс дас тямыс мурт дышетсконниоссы интыяськытэк кылемын. О. Кожанова. Юалэ - валэктом Кытчы каром пиме? "Уг валаськы ма карыны. Кык аресъем пиелы яслие путёвка курыны районысьтымы дошкольной отделэ вазиськи вал. Отын профкомлэн ходатайствоезтэк заявлениосты ум кутӥське шуизы, нош мон профсоюзын ӧвӧл. Ма каром, пие школае мынытозь-а пуком?" - юа Ижевскысь Октябрь ёросын улӥсь Вера Дмитриева. Юанлы валэктэ та ёросысь дошкольной отделлэн кивалтӥсез Алевтина Владимировна Ардашева. - Путёвка басьтон понна ми анай-атайёслэсь зэмзэ но ходатайство куриськом. Но со одно профкомлэсь луыны кулэ ӧвӧл, мед гожтоз сое ужантӥысьтыз кивалтӥсь. Со сяна кулэ аслаз анайлэн заявлениез, паспортэз но нылпилэн вордскемез сярысь свидетельство. Дасяз З. Вахрушева. Дарт Яратэ, уг яраты... "Яраты монэ гинэ!" гожтэт пумысен малпанъёс Лыдӟисьёсмы вунэтӥзы ни, дыр, та пумысен вераськонмес. Азьвыл номеръёсын вераськон мынӥз талам яратон сярысь. Вожзэ медаз вай Ольга, таиз гожтэтъёс берпуметӥосыз. Аслэсьтыз малпанзэ вера психолог Ирина Горбунова. - Зэмзэ но, яратӥсь адями номыре возьматэк яратэ. Яратон - со туж секыт уж, соин ик кулэ каре визьмо, кужмо луэмез, чидамез, оскыны, возьманы, шумпотыны быгатэмез. Бен, шумпотыны но. Яратӥсь адями шумпотыны кулэ яратоно муртэзлэн шудэз понна (со тӥледды уг яраты ке но). Жаль, сыӵеос уггес пумиськыло. Асьмеос дышемын кузё луыны: яке мыным, яке нокинлы но! Татысь ик потэ сьӧд вожан (тугандэ но, астэ но виё, быдто, веднало...), кышкатъян (асме быдто но, тон янгыш луод)... Психологъёслэн верамзыя, со туж кышкыт кусыпъёс. Адями йырсазьзэ ыштэ, номыр мукет сярысь малпаськыны уг быгаты ни. Кӧня ке дыр ӵоже сое утьыны выре эшез, туганэз, ассэ чиданы косыса, буйгатыны вырыса. Но вазь-а, бер-а, со кусыпъёс быро яке чидантэм луо, ог-огзэс ултӥяса, пыкылыса, вӧсь карыса уло. Мон уг оскиськы, Оля зэмзэ но шудо шуыса. Оло, со али ачиз но валаз ни. Со уг яраты Алёшаез. Алёша интыын луысал ке мукетыз пияш, Оля сое но кышкатъясал, малы ке шуоно, со туж но туж ассэ яратэ, калык азьын возьматэмез потэ: тани кызьы мон быгатӥсько, тани кыӵе монэ ярато! Малпаны ик кышкыт солэн азьпал улонэз, вуоно семьяез сярысь. Кин кинэ сялӟоз? Мон ӧвӧл психолог. Но аслам улонэ вылысь тодӥськод, макем секыт, куке тонэ кушто. Трослы каньылгес, куке тон сое куштӥськод. Уд быгатӥськы, яратӥськод... Быгатоды, ултӥяськемды ке ӧз поты! Сергей янгышсэ валаса шуэ: - Мон котьма лэсьтыны быгато, но нылашлы меӵак синмаз вераны... Эдик но пӧртэм ӧвӧл. Со кемалась уг яраты ни Машаез, но вераны дӥсьтытэк дырез кыске, куке дыръя, пӧртэм мугъёс утчаса, клубе уг поты, дораз уг мын, уг жингыръя... Нош тӥ асьтэос кемалась валатскиды ни. Котькуд ӝыт куалекъяса витиськоды. Ку со тӥ азьын йырзэ ошоз, яке керетон вылысь олокызьы но мыскылляны кутскоз, яке мукетыз вань шуоз. Нош тӥ ваньзэ тае чидалоды? Эн ик малпалэ. Пичи ке но данды вань ке, куштэ сое асьтэос! Озьы кыкнадылы капчигес луоз: тӥ асьтэды ултӥяськонлэсь утёды, со валэктыны вырыса уз курадӟы. Кызьы бен валано, яратэ на-а со тӥледыз? Лыдӟе. 1. Со тӥляд эшъёстылэсь, семьяостылэсь палэнскыны выре. Тодӥськоды на-а, кызьы ваньмыз умой вал, тӥ ӵош шулдыръяськылӥды, кызьы со нырысь укно улады гинэ шулалляз, собере коркады пыраны кутскиз, анай-атаеныды туж лачмыт ӟечъяськылӥз, Людмила Ивановна, Иван Петрович шуыса вазьылӥз... Но шуак пырамысь дугдӥз, эшъёстылэсь но висъяськыны кутскиз... 2. Солэн азьпал улоназ тӥ уд адскиське. Пиосмуртлэсь зэмос малпанъёссэ тодыны луэ, со аслаз азьпал улонэз сярысь вераськыкуз. Огпол ӝыт вераськыса пукыкумы Митя вераз сьӧрло дышетскыны мынонэз сярысь. Нырысь мон туж шумпотӥ - адями ас азяз бадӟым ужпумъёс пуктэ. Но... Вить ар Казаньын! Со монэ отчы пал кылын но уг ӧтьы, вылаз ик, Ижевскын одӥг ар дышетсконэ вань на. Собере, пе, оло, Москвае-а мыноно, шуыны кутскиз. А, коть Америкае мед мыноз, сялӟи. Кушто ай мон сое, кыӵе ке москвичкаен ӵошатыны кутскемезлэсь азьло. 3. Со яратымтэзэ выросъёсыз пыр возьматыны тырше. Пиосмуртъёс шараясько ужъёссы пыр. Пушкысьтыз кылзэ ке кыскемды уг луы, эскере, кызьы со ассэ возе. Тӥ маке ӝытбыт бӧтьыртӥськоды ни, нош со пал кыл но уг поттылы, йырзэ палэнтыса, маке мукетыз сярысь малпаськыса пуке. Тӥ чупаськыны кыстӥскькиськоды, со кучапиез сямен кымесады гинэ чупа яке маскаръяськыны кутске. Тӥ сое эктыны ӧтиськоды, со шуэ: туннэ мылы уг поты. 4. Кемалы ышылэ. Лыдъялэ ай, кӧня пол тӥ берло дыре пумиськылӥды? Шергес ук. Жингыртӥськоды ке, ачиз трубкаез уг куты, сузэрез шуэ: со дорын ӧвӧл. Нош тӥ тодӥськоды, со дораз шуыса. Азьвыл нуналлы быдэ ке пумиськылӥськоды вал, али ужез, жадемез вылэ чӧлске. 5. Адӟемысь дугдэ. Со уг синйылты ни тӥлесьтыд выль дэремдэс, чебер синъёстэс, пыдъёстэс, кустэс... Вожатон вылысь эшсэ ке эктыны ӧтиськоды, адӟымтэ улсы кариське (ас понназ шумпотэ - ф-фу, мозмытскиз!). Сялӟе тӥ но со вылэ! И. Гордая. Ижевск. Нянен гинэ уг улы адями Озьы лыдъяса, туэ Якшур-Бодья ёросысь организациос но предприятиос куспын конкурс ялэмын вал, кин чебересьгес сяськаос будэтоз. Сяськаосын вырыны яратӥсьёсты таӵе ялон бурдъяз. Тани лесхозысь Фаина Зорина, одӥг гужем гинэ будӥсь сяськаос кизем сяна, юн чебересь розаос но будэтэм. Райсельхозтехникаын котыр техника но бензинэн вӧй гинэ луыны быгатэ кадь, озьы но татын тыршисьёс убоос вылын сяськаос будэтӥллям. Ӟеч тыршиллям "Ижевскгаз" огазеяськонлэн участоказ ужасьёс. Школаос но нылпи садъёс сярысь верано ке, соос синмаськымон тыршиллям. Вормисе потӥзы райцентрысь шор ёзо школа, школа-интернат, гимназия. Синмаськымон сяська будэтӥллям на Варавай, Сюрсовай школа-садъёсын, Канифольной, Люк-Шудья нылпи садъёсын. Кузьымъёсын пусъемын на редакция, санэпидемстанция, коммунальной хозяйство, черк но куд-ог мукет организациос. П. Николаев. Нош война мынэ но мынэ Ижевскысь Ялан ӝуась тыл дорын каллен гинэ чузъяське крезьгур. Туннэ татын нош ик дано ужрад ортче: Чечняе ветлэмъёсты орденъёсын но медальёсын пусъён. Татчы лыктӥзы Россия Федерациысь Юстицияя министерстволэн Кыл кутытонъя управлениезлэн Удмурт Республикая ёзаз ужасьёс. Нимысьтыз отдел нимаське "Кречет" шуыса. Татысь пиос туэ куинь пол вуылӥзы ни Северо-Кавказ улосэ. Кышкасьтэм луэмзэс возьматэмзы понна 43 мурт пусъемын Россия кунлэн орденъёсыныз но медальёсыныз. Но со кышкыт интыысь ваньмызлы берытскыны ӧз кылды. Чечня Республикаысь Урус- Мартан ёросысь Комсомольское село понна ожъёсын быризы лейтенантъёс Ильфат Закиров но Валерий Бахарев. Дано ужрадэ пыриськизы Удмурт Республикаысь Кун Кенешлэн Тӧроез Александр Волков, Удмурт Республикая валтӥсь федеральной инспектор Сергей Чикуров, Россиысь Юстицияя министерстволэн кыл кутытонъя управлениезлэн начальникез внутренней службая генерал-лейтенат Владимир Ялунин, Удмуртиысь кыл кутытонъя управленилэн кивалтӥсез внутренней службая генерал-майор Григорий Желудов, Удмуртиысь юстицияя министр генерал-майор Вячеслав Осипов, мукет кивалтӥсьёс, куноос, "Кречет" нимысьтыз отделысь пиослэн ӵыжы-выжыоссы. Мемориал-памятник доры улэп сяськаос но гирлянда тырем бере, дано ужрад азьланьтӥськиз Кун Кенешлэн конференц-залаз. Отын Россия Федерациысь Президентлэн "Кречетысь" пиосты орденъёсын но медальёсын пусъён сярысь Указэз ялӥське. Родинамылэн вылӥ наградаосыз ог куамын муртлы сётэмын. Матысь нуналъёсы "Кречет" нош ик Чечняе кошкыны дасяське. Татысь пиос понна война ӧз на йылпумъяськы. Одӥгзэ гинэ соослы мылкыд карем потэ: улэпесь но тазаесь мед берытскозы со ож лудысь. Н. Лялин. Ижевскысь Ялан ӝуась тыл дорын сӥё-дано ужрад дыръя. В. Беломорскихлэн туспуктэмъёсыз. Дарт Чеберина Мынам куреньпыръем йырсие, туж потэ тӧдьы кареме. Трос пол утчай ни "Блондэксэн" буяса, горд луэ. Кыӵе ке амал вань-а тӧдьыгес карыны. Лиза. Як.-Бодья ёрос. Ум тодӥське, быгатом-а маин ке юрттыны Лизалы. Ӵектон сётэ парикмахер Августа Уткина: - "Блондекс" урод буёл ӧвӧл. Лизалы кулэ, дыр, бӧрсьысь бӧрсьы (арня вис карыса) кык-куинь пол буяны. Но со бере йырси уродмыны быгатоз, соин ик нимысьтыз шампунен миськылоно. Куд-огез юг-юг кариськон понна тӧдьы хнаен буясько. Таиз буёл туж урод, со йырсилы но, йыркулы но изъян гинэ вае. Ульчаос чылкытгес луозы Кизнер ёросысь но посёлокысь администрациос 15-тӥ сентябрьысен 15-тӥ октябрёзь посёлокысь но гуртъёсысь ульчаосты но юрт котыръёсты сузяны месячник ялӥзы. Соку, жуг-жагез октэм-калтэм, сузям, чылкытатэм сяна, выль писпуос мерттыны чакламын. Жаляса верано луэ, данакез адямиос техниказэс,лэсьтӥськыны ворттэм коръёссэс, дасям пузэс кырын возё. Ваньзэ соосты азбаръёсазы интыяны косэмын. Таӵе ужрадэн валче кулэяськисъёслы транспорт висъяське. Ужъёслэсь кызьы мынэмзэс чаклалоз нимысьтыз комиссия. Отчы вить мурт пыре: ёрос санэпиднадзорын ужась Н. Ф. Александрова, Кизнер посёлокысь администрацилэн кивалтӥсезлэн воштӥсез А. Н. Зуев, отысь ик специалист Л. Н. Головлев, участковой инспекторъёс Ю. М. Шитов но А. И. Лузянин. Ортчытэм ужрадъёс озьы ик юрттозы тылпу потонэз палэнтыны но паласькись висёнъёсты алыны. П. Николаев. "Гаудеамус" фестиваль 16-тӥ-20-тӥ октябре Ижевскын, Воткинскын, Сарапулын, Можгалан но Глазовын улӥсьёс асьсэ урамъёсысьтызы но бадӟым залъёсысь адӟыны но кылзыны быгатозы пӧртэм университетъёслэсь хоръёссэс. Бен, асьме дорын ортчытӥське университет хоръёслэн Нырысетӥез калык кумпо "Гаудеамус" фестивальзы. Отчы пыриськыны мылкыд каризы Россиысь но Гранадаысь (Испания) бадӟымесь коллективъёс - ваньмыз 500 адями. Фестивале лыктоз хоръёсын ужась тодмо менеджер, Юнескоысь Хоровой музыкая калык куспо федерацилэн генеральной секретарез Жан-Клод Вилькенс (Бельгия). Та фестивальлэн учредительёсыз луо Россия Федерациысь Дышетонъя министерство, Удмурт Республикаысь Кивалтэт, Ижысь администрация, Удмурт кун университет, республикаысьтымы композиторъёслэн огазеяськонзы но муниципальной камерной хор. Н. Васильева. Удмурт Республикаысь Культурая министерство но Писательёслэн огазеяськонзы ӝоже усьыса иворто писательлэн Владимир Яковлевич (Никвлад) Самсоновлэн Яша пиез улонысь кошкем пумысен но мур куректэмзэс верало солэн ӵыжы-выжыосызлы. Удмурт Республикалы президентэ кандидат Ганза Николай Алеексеевич Мон вордски 1946-тӥ арын 27-тӥ октябре Казах ССР-ысь Шемонаиха черкогуртын. Йылпумъяй Томскысь политехнической институтэз. Ужай Навои городысь, Кировоград улосысь предприятиосын. Но улон сюресэлэн тужгес валтӥсь люкетэныз лыдъясько Глазовысь Механикая чепецкой заводын ужамме. Заводэ лыктыкум, отысь югдур туж секыт вал. Но 5 ар куспын ужась коллективен ӵош ми сое тупатыны быгатӥм. Завод улӟиз, огсыр ужаны кутскиз. 1998-тӥ арын ЧМЗ басьтӥз Россиысь Правительстволэсь премизэ. 1999-тӥ арын 22-тӥ апреле Кун Кенеш монэ Удмуртиысь Правительстволы Тӧрое бырйиз. Мыным кылиз туж секыт "кузьым": республикалэн пунэм тыронэз арлы бюджет мында вал, уже кутӥськизы взаимозачётъёс: озьы бюджет коньдонлэн 20 процентэз нимаз адямиослэн кисыосазы кыльылӥз. Нырысь ик мон басьтӥськи бюджет коньдонэн кырсь ужъёсты палэнтон борды. Озьы премьер луыса ужан вакытам казнае 600 миллион манетлэсь ятыр коньдон берыктэмын вал. Со уксё мынӥз бюджет чотын ужась организациосын ужасьёслы уждун сётыны. Туннэ нуналлы таӵе пунэм тыронъёсмес ми быдтӥм. Черодын - нылпи пособиос но 2001-тӥ арын уждунэз 20 поцентлы будэтон. Азьланьын трос ужано луоз. Нырысь ик кивалтон ёзъёсысь югдурез тупатоно, "Ижмашын" машина поттонэз арозь 180 сюрсозь вуттоно, му вӧй кысконэз араз 4 миллион тоннаозь ӝутоно. Та но трос мукет ужпумъёсты мон быдэстыны тыршо, Удмуртилэн президентэз луыса. "Удмуртилы - огсыр улон но азинскон!" Александр Волков Удмурт Республикалы президентэ кандидатлэн Александр Александрович Волковлэн биографиез Александр Волковлы ньыльдон укмыс арес. Вордӥськиз со 1951-тӥ арын 25-тӥ декабре рабочийёслэн бадӟым семьяязы. 1970-тӥ арын йылпумъяз Брянскысь лэсьтӥськонъя техникумез, собере Пермьысь политехнической институтэз. Александр Александрович экономика наукаосъя кандидат. Профессиезъя лэсьтӥськись, мастерысен кутскыса будӥз лэсьтӥськон управленилэн кивалтӥсез дорозь. Аслэсьтыз улонзэ Александр Волков мур герӟаз Удмуртиен. Татын со улэ но ужа ини 30 ар. "Удмуртия" кыл Александр Александрович понна - азьлоез, алиез но азьлань улонэз. Татын вордӥськизы но уло солэн нылпиосыз. Александр Волков - кивалтонын бадӟым опытэн адями, со кужмо политик, тодэ кызьы но мар карыны. 1987-тӥ арын Александр Волков быръемын вал Глазов городысь Горсоветлэн исполкомезлы кивалтӥсе, нош кык ар ортчыса, со луиз республикаысьтымы Госпланлэн кивалтӥсезлэн нырысетӥ воштӥсез. 1990-тӥ арын Александр Волков луэ Удмуртиысь Министръёслэн Советсылэн Тӧроезлэн воштӥсез но Госстройлэн кивалтӥсез, нош 1993-тӥ арын - Удмурт Республикаысь Министръёслэн Советсылэн Тӧроез. Александр Волков ӧз кышка кыл кутонлэсь, Удмуртиен кивалтыны басьтӥськиз выльдӥськон но экономика куашкан вакытэ. 1995-тӥ арын со быръемын вал Удмурт Республикаысь Кун Кенешлы Тӧрое. Быдэстоно ужъёс трос вал - юнматоно кунлыкез, утёно Удиуртиын улӥсьёслэсь правооссэс но кулэяськонъёссэс, ӝутоно куашкам экономикаез. Александр Александровичлэн но соин ӵош ужасьёслэн тыршемзы дунъямын вал: 1999-тӥ арын сое нош ик быръё республикаысьтымы Кун Кенешлы Тӧрое. Александр Волков - Россиын гажано политик. Вить арзэ ини со Россиысь Федеральной Собранилэн Федерация Советэзлэн членэз луэ. Минтимер Шаймиевен, Аман Тулеевен, Константин Титовен, Муртаза Рахимовен но улосвылъёсысь мукет кужмо кивалтӥсьёсын ӵош юрттэ со Владимир Путинлы Россиез ӝутыны, кужмо но сяськаясь карыны. 1995-тӥ арын Александр Волков пусъемын вал Калыкъёслэн эшъяськонзы орденэн. Александр Волков кышнояськемын, семьяез тупаса но огкылысь улэ. Пиналъёсыз, пиез но нылыз, уло Удмуртиын. Александр Александрович яратэ крезьгурез, ачиз шудэ баянэн. Пичи ке но ваньмон дырыз луэ ке, сӥзе сое семьяезлы, яратоно книгаосызлы, спортлы но чорыганлы. Ӵошатско загсын ужасьёс Кузпалъёслэн семья улонэ сюрессы кутске загсысен. Нош кызьы соосты пумиталозы но келялозы татын ужасьёс, кыӵе мылкыд кельтоз гожтӥськон нунал егитъёслэн тодэ ваёнъёсазы, соиз ини гожтӥськонэз ортчытӥсьёслэн быгатонлыксы бордысь но потоз. Республикаысьтымы загс ужпумъёсъя комитетын ужасьёс тае ӟеч валало, соин ик ортчытъяло пӧртэм семинаръёс, пумиськонъёс. Одӥгез сыӵе семинар ортчиз сояз арня вискын. Ёросъёсысь загсын ужасьёс кык нунал куспын вуылӥзы Як.-Бодьяе, Играе но Глазове, тодматскизы татысь эшъёссылэн гожтӥськонэз радъян амалъёсынызы. Ар пумозь ваньмаз сямен ик ёрос загсъёсын ортчозы таӵе ужрадъёс. Загс ужпумъёсъя комитет ялӥз "Гожтӥськонэз ӟечгес радъясь" конкурс. Вормисьёсты возьмало дуно кузьымъёс. Быгатонлыкъёссэс нырысь ик возьматӥзы якшур-бодьяос, ортчытӥзы соос куинь пӧртэм гожтӥськон. Одӥгез егит семья мылкыд кариз Мендельсонлэн маршезъя гожтӥськыны, кыкетӥез - калык семьяосъя, фольклор крезьгурен но кырӟанъёсын, куинетӥез - нокыӵе шулдыръяськонъёстэк. Играослы юрттӥзы "Нефтяник" культура юртын ужасьёс. Нош глазовъёс палёмытӥзы выльдэм юртэнызы. Глазовын ик ортчиз семинар, люкаськемъёс эскеризы азязы кылдэм ужпумъёсты, тодматскизы город администрацилэн ужан амалъёсыныз, вуылӥзы "Семья" центре. Загс ужпумъёсъя комитетлэн кивалтӥсезлэн воштӥсез Николай Зорин лыдъя, таӵе ужрадъёслэн кулэлыксы туж шӧдскымон. Со ужасьёслэсь но быгатонлыкъёссэс будэтэ, собере ӟеч радъям гожтӥськон калыклы но шумпотон вае. Интыосы потаса конкурсэз радъян озьы ик юрттэ ёрос администрациосын огкыл шедьтыны, куд-ог кылдэм ужпумъёсты ӵошен быдэстыны. Л. Малых. Оло, луоз удмурт бензин 25-тӥ сентябре Удмурт Республикаысь Кун Кенешлэн Тӧроез Александр Волков Европаысь туж тодмо ЦОНАЛ АГ компаниысь ужбергатӥсьёсын пумиськылӥз. Та фирма республикаысьтымы му вӧй поттон удысэ инвестициос висъяны мылкыд кариз. Балезино районысь му вӧй поттон интыос но му вӧйлы переработка карон завод лэсьтонэ соос 5 ар ӵоже 300 миллион доллар висъяны дась. Со сяна, 2 миллион доллар выисъяны чакла на та ёросысь улон-вылонэз умоятон, больница но нылпи сад пуктон понна. Тунсыкъясько Карсовайысь азот интыен но. Фирмалэн туала амалъёсызъя селитра но азот ватсэтъёс (удобрениос) поттыны луонлыкъёсыз вань. Но со али малпанын гинэ ай. Александр Волков пумиськонын вераз Удмуртия му вӧйлы переработка карон заводын туж уг кулэяськы, малы ке шуоно бускель Башкортостанэ му вӧймес вузаса, республика ӟеч пайда басьтэ, соин ик завод пуктонэ асьме бюджетысь одӥг манет но висъямын уз луы. Нош ЦОНАЛ АГ Балезино му вӧй зэмзэ но тунсыкъяськытэ ке, соос конкурсэ пыриськыны кулэ, отын вормыса гинэ компания лицензия басьтыны быгатоз. Кивалтӥсьёс сюлмасько, му вӧй поттон республикамылы тросгес пайда мед ваёз, бюджетэз мед узырмытоз шуыса. Нош ЦОНАЛ АГ аслаз коньдонэныз завод ке пуктыны медэ, номыр уродэз ӧвӧл, отысь бюджетэ ватсаса коньдон вуоз. Александр Волков ужбергатӥсьёслы конкурсын вормыны мылкыд кариз. Удмурт Республикаысь Кун Кенешлэн пресс-службаез. Сюрессы вольыт луиз Сарапул ёросысь Лагуново гурт Ижевске нуись трактлы 8 иськемлы палэнын сылэ. Та дырозь сюреслэн куинь иськемез гинэ ӟеч вал. Алигес сюрес быдэсак асфальтэн шобыртэмын. Выль сюресэз усьтон праздниклы пӧрмиз. Гуртын улӥсьёс ужрадэ нянен-сылалэн ляктӥллям. Сюрес лэсьтон али дуно сылэ. Та ужлы кутэмын 18 миллион манет. Сокем дуно медаз усьы шуыса, сюрес лэсьтӥсьёс куспын конкурс ялэмын вал. Вормиз "Удмуртавтодорлэн" Сарапулысь управлениез. Соин кивалтэ Н. А. Меньшикова. Озьы ик гуртоос тау каро Кун Кенешлэн депутатъёсызлы В. И. Агашинлы но А. В. Шутовлы, сюрес лэсьтон сярысь трос сюлмаськемзы понна. Сюрес лэсьтонын синмаськымон ужазы бульдозеристъёс А. Треногин но А. Кузнецов, автогрейдерист А. Лихачев, мастеръёс А. Абашев но В. Меркульц, прораб А. Макшаков но мукетъёсыз. Сюрес лэсьтӥсьёс малпало Лагуново гуртысен Нечкино трактозь сюресэз выльдыны. Та вакытэ проектно-сметной документация дасяське. П. Кузнецов. Дарт Сётэ милемлы уж! Республикаямы ньыль ар ужа ни Егитъёслы уж сётонъя биржа. Маин со выре, кыӵе ужпумъёсты сэрттэ-пертче? Со сярысь вера биржалэн кивалтӥсезлэн воштӥсез Константин Владимирович Вечтомов. - Биржа кылдытэмын вал, туала улонлэсь куронъёссэ чакласа. Пиналъёс но егитъёс, асьсэды кытчы карыны валатэк, ульчаосын кыстасько, йыртэмало. Ваньмон дырзэс пайдаё ортчытон клубъёс дунын луизы, уж шедьтыны, пиналлы гинэ ӧвӧл, мӧйы муртлы но секыт. Нош юаса данак вазиськыло. Милям биржамы быгатэмезъя выре 14-18 аресъем пиналъёслы но егитъёслы тупамонгес уж шедьтыны, интыяськыны. - Кыӵегес уж ӵектӥськоды тӥ пиналъёслы? - Ми республикаен ужаськом бере, гуртысь пиналъёс пудо утялтонын, бакча сиён будэтонын тыршо. Городысь пиналъёс интыясько домоуправлениосы, тыршо городэз утялтонын. - Уд лыдъяське-а тӥ ваньзэ тае дунтэм ужан кужымен? - Нокызьы но уг. Нырысь ик, кужмысь нокин но ужаны уг косы - лыдэ басьтӥське пиналлэн но солэн анай-атаезлэн мылкыдзы. Кыкетӥез, ми предприятиен огкыл гожтӥськом, сак чакласьком солэсь быдэсъяськемзэ. Куинетӥез - пинал аслаз ужамез понна коньдон басьтэ. Одӥг пичи уждун, зэм, ичи. Но со сяна, милям луонлыкмы ӧвӧл. Удалтэгес заводъёсын, узыр предприятиосын тыршисьёсызлы - соос пичи уждун вӧзы ватсэт шедьто на. - Кызьы тӥ пиналъёслы ужан интыос утчаськоды? - Предприятиосын, организациосын огкыл кутӥськом. Но соос пиналъёсты уже кутэмзы понна нимысьтыз нокыӵе льготаос уг басьто, туж кутэмзы уг поты - кыл кутонэз но секыт, уждун но висъяно. - Уг кылдыло-а пиналъёслэсь правооссэс тӥян учыръёс? - Та дырозь ӝожтӥськонъёс ӧй вал на. - Нош марысь-мар ке, быгато-а пиналъёс юрттэт курыса тӥледлы вазиськыны? - Одно ик. Милям вань юристмы, со вань юанъёслы валэктоз. - Тросгес уж юасьёс гужем луо, дыр. Мынэ-а кыӵе ке уж ар ӵоже? - Ми ужаськом пӧртэм программаосъя. Одӥгъёсыз, зэмзэ но чаклало пиналъёслы огдырлы гинэ уж ӵектонэз, мукетъёсыз - ялан ужась пичи предприятиос кылдытонэз. Таизъя пиналъёс арбыт тыршо. Тани Глаз ёросысь Качкашур школаын ар но ӝыны ӵоже ужа ни тылобурдо вордон фермазы. Али соос пайда но басьто ни. Воткинскын ужа вуриськон цех, Ижевскын - кафе, Дэбесын - пинал газетчиослэн огазеяськонзы. Пиналъёс ужзэс быдэсъям сяна дышетско но, коньдон но басьто. Таӵе программаос туж пайдаё, но соосты уже пыӵатон понна трос коньдон кулэ. - Ваньмаз-а районъёсын ужаны мылкыд карись пиналъёс уж шедьтыны быгато? - Жаляса верано луисько, уг. Ижевскын сяна, биржаос ужало Глазовын, Можгалан, Сарапулын, Воткинскын, Игра, Сюмси, Дэбес но Балезино районъёсын гинэ. Мукетъёсаз но туж кулэ вылэм. Али пиналъёслы юрттыны тыршо районъёсысь уже интыянъя службаос. - Но малы тросэз пиналъёс ваньёсаз но уг вазисько, кырсь машинаос котыртӥ бергало, газет вузало? - Тросгес коньдон поттон понна. Газет вузасьёс шоры мон уг учкиськы. Та пиналъёсын ужало редакциос. Нош машина миськисьёс - со ӵемгес йыртэмасьёс. Собере та туж кышкыт, кыӵеез но машина кузё уг шедьы. Ярам, со ужамзы понна коньдон ке сётӥз. Но со коньдон но кулэезъя кутӥськысал ке... - Тӥляд пичи дырды шудо вакытэ укшаз. Озьы ке но, ужалляды-а, школаын дышетскыкуды? Кулэ-а туала пиналъёс асьсэ понна коньдон поттыны? - Мынам пинал дыры зэмзэ но шудо вал. Эшъёсын ӵош ӵемгес вырим тимур ужен. Но али ке но тодӥсько на нырысетӥ уждунме - гужем бакчаын будэтэм емышмес базарын сизьым манетэн вузай. Соку ик час басьтӥ. Малпасько, пиналлэн коньдон поттыны мылкыдыз вань ке, мед ужалоз. Медам гинэ со кырсь амалъёсын лэсьтӥськы. Западын али котькудӥз 14 аресъем пияш чыры-пыры ке но коньдон поттыны быгатэ ини, киное ветлыны, нылашсэ утялтыны анаезлэсь уг куры. Со сяна, пичиысен ужам мурт будыса рос-прос луэ, коньдонлэсь дунзэ вала. Со инмысь кеньыр возьмаса уз пукы ни, ачиз тыршоз. Туэ гужем гинэ 30 сюрс 944 пинал уже интыямын вал, со пӧлысь 3 сюрс 371-езлы уж ӵектӥз вылӥ верам биржа. Тужгес тыршись пиналъёс будо Можга районын. Отын гужем 1537 пинал ужаз, Дэбес районын - 1044, Яр районын - 710. 2000-тӥ арын биржаен нырысьсэ уж ӵектэмын вал студентъёслы. Соос тросгес шутэтскон лагерьёсын тыршизы. З. Рябинина. Туспуктэмез В. Беломорскихлэн. К. Вечтомов. Быръён - 2000 Солуяновез Вылӥ суд утиз Андрей Солуяновез президентэ кандидатысь куштон сярысь Быръёнъя комиссилэсь решенизэ Удмурт Республикалэн Вылӥ судэз умойтэмен лыдъяз. Со пумысен Андрей Владимирович 26-тӥ сентябре журналистъёсын пумиськон ортчытӥз. Вылӥ суд быръёнъёсъя законъёсты тӥямен лыдъяз: - А. Солуянов понна бичам кинюртэмъёсты МВД-ын ужасьёсын эскеронэз; - Быръёнъя комиссилэсь А. Солуяновлы сётэм алонъёссэ (дырызлэсь вазь, пе, со агитация нуыны кутскиз); - А. Солуяновез президентэ кандидатысь куштонэз. Озьыен, вылӥ судлэн пуктэмезъя, А. Солуянов нош ик президентэ огез кандидат луиз. - Туж умой, - шуиз кандидат, - возьытсэс ыштэм чиновникъёсты закон ас интыяз пуктыны быгатӥз. Но озьы ик пусйыны кулэ: Вылӥ судлэн сяна, со калыклэн но вормонэз. - Монэ олокызьы но сьӧдманы выризы, - шуиз Андрей Владимирович. - Но меӵак верасько: "Мон нокинэ ӧй косы кулэм муртъёслэсь кинюртэмъёссэс бичаны. Со бадӟым сьӧлык. Инмарлы оскисьёсты но мон ӧй мыскылля, черк котыре аслэсьтым листовкаосме ошылыса. Кинлэн ке йыраз сыӵе юрӟым малпан лыктыны кулэ ук!" Ас тушмонъёсылы (нимъёссэс тодӥсько ) мон куинь нунал сётӥсько ултӥям муртъёс азьын но мон азьын извиниться кариськыны. Нош янгышъёссэс ӧз ке валалэ, мон соосты законъёс улэ кыско. Солуяновлэн мылкыдыз тросэзлы журналистъёслы валамон. Ма, судъёстӥ бызьылон понна солы 10 нуналзэ ыштоно луиз ук. Нош президентэ кандидатъёслэн нуналзы гинэ ӧвӧл, котькуд чассы лыдъямын. Быръёнъя законын верамын котькуд кандидатлы огкадь луонлыкъёс кылдытон сярысь. Нош кызьы меда табере учконо Солуяновен кылдэм югдур шоры? Ачиз Быръёнъя комиссия кандидатъёслы огкадь тупатэм луонлыкъёсты юри тӥяны ке турттэ. Андрей Солуяновлэн быръёнъя штабеныз кивалтэ вал ЭМЗ-лэн валтӥсь директорез Юрий Шестаков. Та ужен вырон понна со юри отпуске лэземын вал. Но А. Солуяновез нюръяськонысь палэнтэмзы бере, директор ас ужаз берытскиз. Кин табере кивалтоз президентэ кандидатлэн штабеныз? Со адямилэсь нимзэ А. Солуянов ӧз вера. Кышкасько, пе, мон сэрен нош ик кинэ ке сьӧдманы кутскозы шуыса. Оло ас штабеным ачим ик кивалто. Президентэ кандидат уг оскы, сое нош ик президентлэн постэз понна нюръяськонысь уз поттэ шуыса. Т. Банникова. Сергей Шуклин: "Мон тодӥсько, кызьы..." - Сергей Борисович, ужан удыстыя тӥ экономист, кызьы дунъяськоды Удмуртиысь туала югдурез? - Бускель улосъёсын ӵошатоно ке, асьме республика улонлэн ӟечлыкезъя берпуметӥ интыосын сылэ. Улыны-вылыны ичи коньдон 1 сюрс манетлэсь трос ке, шорлыдо уждунмы 1300 манет гинэ люкаське. Озьы бере, куинь арлыдо адямиос, быгато одӥг нылпиез гинэ сюдыны-вордыны! - Секыт югдурысь потыны амалъёс вань-а? - Коньдон ужпумъёсты сэрттон-пертчонъя улосвыл агентствомы секыт кризисысь 40- лэсь ятыр предприятиосты поттӥз ни. Соос ар но ӝыны ӵоже 1,5 миллиард манет пала коньдон вуттӥзы ни бюджетэ но бюджет фондъёсы. Ӟеч пусйыны луэ "Удмуртнефть" огазеяськонэз, Ижевскысь подшипник поттӥсь но литейной заводъёсты, Глазовысь "Химмаш", "Порт Сарапул" предприятиосты но "Восточный" совхозэз. Татысь 20 сюрс ужасьлы уждунъя пунэм тыронъёс берыктэмын вал, табере соос коньдон дыраз басьто. - Кытысь пото таӵе азинсконъёс? - Россилэн экономикаысьтыз вань шуг-секытъёс герӟаськемын ӟеч квалификациен кивалтӥсьёс тырмымтэен, данакез угось уг валало, ма со сыӵе рынокен экономика. Нош ми кризис дыръя ужаны быгатӥсь кивалтӥсьёсты дасяськом, соос котькудӥзлы сямен ляб организацилы юрттыны быгато. Куддыръя, ваньбур поттон пайда мед ваёз шуыса, тырмыт луэ кивалтӥсез гинэ воштыны. - Нош со тырмыт ӧвӧл ке? - Ми дась ваньбурлэсь кузёзэ но воштыны, предприятие ас ужан удыссэ гинэ мед утёз, нош предприятиысь огшоры ужасьёс медаз шӧдэ урод пала воштӥськонъёсты. Тани Вотка ёросысь "мир" колхозлэн кузёез воштӥськиз, табере со ёросысь куинь кужмо гурт хозяйствоос пӧлы пыре. - Ваньмыз туж огшоры гинэ кадь? - Паймонэз чик ӧвӧл. Азьвыл таин нокин но ӧз вырылы. Нош мон умой тодӥсько, кызьы ӝутоно республикаысь промышленной предприятиосты, соосын ӵош экономикаез но. Улонзэ герӟаз гуртэн "Удмурт пушнина" огазеяськонлэн валтӥсь директорезлы Анатолий Липинлы - 60 арес. Анатолий Яковлевич шаерамы, тужгес но гурт удысын, тодмо адями. Со уго быдэс улонзэ гурт хозяйствоен герӟаз. 1940-тӥ арын 28-тӥ сентябре Кияса черкогуртын вордскыса ужаны кутскиз "Яжбахтинский" совхозын огшоры рабочий луыса. Собере йылпумъяз Ижысь гурт удысъя институтэз. Ужаны ыстӥзы Можга районысь "Можгинский" совхозэ, пуктӥзы отделенилы кивалтӥсе. Армие ветлэмез бере берытскиз вордскем палъёсаз. "Яжбахтинский" совхозын валтӥсь агроном луиз, бӧрысь та хозяйствоен ик кивалтӥз. Отысь Анатолий Яковлевичез ыстӥзы Игра районысь гурт удысъя управлениен кивалтыны. Вить ар ӵоже со возьматӥз усто специалист но кивалтӥсь луэмзэ. Колхозъёслы но совхозъёслы трос юрттӥз удалтэм ю-нянь будэтыны, трос но дунтэм сӥль-йӧл поттыны. Районын Анатолий Липин сярысь али но ӟечен верало. Анатолий Яковлевич "уг" шуонэз уг тоды. Азьвыл партия кытчы ыстэ вал, котькытын дырзэ жалятэк лулысь-сюлмысь тыршиз. Тани со куинь ар кивалтэ Якшур- Бодья райисполкомен, собере быръё Грахово райисполкомлы кивалтӥсе. Тодон- валанзэ будэтэ КПСС-лэн ЦК-езлэн общественной наукаосъя академияз. Тямыстонэтӥ аръёсы со кивалтэ нянь продуктъёсъя кун управлениен, партилэн обкомысьтыз гурт удысъя отделэн но Агрокомитетэн. Рынокен экономикае выжон кутскем бере, Анатолий Яковлевич трос кужымзэ, быгатонзэ но визьзэ сётэ шаерамы выль удыс кылдытонлы. Дас ар пала со кивалтэ ни "Удмуртпушнина" огазеяськонэн. Предпиятилэн пӧйшур вордон кык фермаез - Якшур- Бодья районысь Фрунзе но Балезино районысь "Труд Ленина" хозяйствоосын. Татын дышизы ни чайыос (норкаос), сьӧд ӟичыос, песецъёс но кыр чайыос (хорёкъёс) будэтыны, чебересь пӧйшур куос басьтыны. Табере таӵе продукцимы кошке ни бускель республикаосы, Свердловск, Омск улосъёсы. Анатолий Яковлевич трос лэсьтэ ӟеч пӧйшур выжы уськытон ласянь, сотэк, пе, чебер ку уд басьты. Соин ӵош ик кивалтӥсь сюлмаське куосты посонэз асьме дорын радъян сярысь. Та уж быдӟым пайда сётысал. - Асьме калыкез, тужгес но кышномуртъёсты, шуныт но чебер дӥсяно, - шуэ Анатолий Яковлевич. - Со понна ми ялан будэтӥськом пӧйшуръёслэсь лыдзэс. Али тани 6 сюрслэсь уно ни чайыосмы. Анатолий Яковлевичен капчи вераськыны. Чиль-чиль сьӧд йырсиез кӧня ке пужмераны кутскем но, шоро-куспо мугоро чебер воргоронлы туннэ 60 арес тырме. Но солы нокызьы сомында уд сёты. Бакчаяз ужаны яратӥсь адями арлыдэз шоры уг учкы. Мон, пе, котькуд тулыс быдэн сю модос помидор, кубиста мерттӥсько, со ваньмыз быдэс арлы тырме, шумпотыса ивортэ Анатолий Яковлевич. Егит дыръяз яратэ вал суреданы, тужгес но инкуазез. Табере малпаське фирменной магазинзэ инкуазь суредъёсын шулдыртыны. Адями, пе, магазинэ музее кадь мед пыроз, солэн мылкыдыз мед ӝутскоз. Анатолий Липинлэн ваньмыз умой пӧрмоз, кутскем ужзэ со котьку йылаз-пумаз вуттэ, ӝыныё уг дугды. Озьы ик радъяськоз пӧйшур куосты посон, чебер изьыос вурон но сое вузан. Солы юн оскисько. Солэн яратоно веранэз: "Музъем вылын шуд утчано ӧвӧл, сое лэсьтоно". Анатолий Яковлевич кузпалэныз кык нылпи будэтӥзы. Пиез адвокат луиз, нылыз - ужбергатӥсь. Анатолий Яковлевич, туннэ тӥледды сюлмысьтымы ӟечкыласьком вордӥськом нуналэныды, юбилееныды, сӥзиськом шудо улон но юн тазалык. Г. Романов. Анатолий Липин. Туспуктӥз В. Беломорских. Ануфриев Вячеслав Николаевич Удмуртилэн нырысетӥ президентэз - кандидат � 1 Быръёнъёсы пыриськисько рос-прос малпаськыса но ваньзэ лыдъяса-чотаса. Мон дась кыл кутыны шаермес шуг-секытысь поттон понна. Удмурт Республикалэн президентэз луыса азям пукто таӵе ужпум: законъя огсыр улонэз юнматоно, адямиослы ӵуказе нуналлы оскон мылкыдэз берыктоно. Соин ик мон пала дурбасьто КПРФ-лэн республикаысьтымы органзиациез но мукет патриот кужымъёс. Оскисько, асьмеос дэмен гинэ югдурез тупатыны быгатом. Асьмелэн бадӟым семьямылы - Удмуртилы - тупаса но тыро улон. Гажано ветеранъёс! Асьмелэн республикамы Россиен ӵош шӧмъяз реформаос ортчытон секыт вакытэз. Секыт ныпъет котькудӥзлэн улоназ шӧдӥськиз. Но тужгес со зӥбиз тӥледыз. Нырысь ик, коьдонлы ёрмон ласянь, уго кунмы уноезлэсь улон-вылонын юрттэт сётонъя программаосызлэсь куштӥськоно луиз, со ӧз быгаты тырмыт пенсиос тырыны. Вал на мукет шуккет, тӥ адӟиды быдӟым странамылэсь куашкамзэ, уноез лэсьтэмын но ӝутэмын вал тӥляд киосыныды. Но со вакыт ортчиз. Россилэн выль кивалтӥсьёсыз мылысь-кыдысь выльдо солэсь экономиказэ, юнмато солэсь кунлыксэ. Туж вакчи дыр куспын шӧдскымон азинсконъёс басьтэмын: ялан будэ пенсилэн быдӟалаез, ожысь но ужысь ветеранъёслы выльысь тупатӥсько улонэз капчиятонъя льготаос. Экономикаез ӝутыса, Россия но, республикамы но ялан уногес но уногес саклык висъяло тӥледлы, гажано ветеранъёс. Туннэ ми азьын - нылпиосты но соослэн пиналъёссы азьын - одӥг бадӟым ужпум сылэ: экономика ласянь Россия выльысь кужмо кун мед луоз, улон-вылонэз умоятонъя политиказэ уката юнгес мед быдэсъялоз. Оскисько, со пӧрмоз шуыса, оскисько, "Удмуртиез азинтон" программа быдэсмоз, озьы ик республикаысьтымы арлыдо адямиослы юрттэт сётонъя люкетэз но. Арлыдо адямиослэн нуналазы йыбырттӥсько тӥледлы ужъёсты, кышкасьтэм луэмды но чидамды понна, ваньмыз понна, ма тӥ лэсьтӥды странамылы, котькудмылы. Тазалык тӥледлы, тупаса улон, коркаосады шуныт мед луоз, ӵыжы-выжыостылэн улонзы шудо мед ӧръяськоз! УдмуртРеспубликаысь Кун Кенешлэн Тӧроез Александр Волков. Инвис паськыта Туннэ Глазовын данъяло Россиысь ляб адӟисьёслэн обществозылэн учебно- производственной предприятияз ужасьёсты. Ужрад сӥземын обществолэн 75 ар тырмонэзлы. 20-тӥ аръёслэн пумазы Удмуртилэн уй пал городаз кылдытӥзы синтэмъёслэсь нырысетӥ предприятизэс. Сыӵеез Ижын но ӧй вал на. Ляб адӟисьёс вакчи дыр куспын быгатӥзы ваньбур поттонэз радъяны, сыӵе ик висёнэн курадӟисьёслы ватсаса ужан инты усьтыны. Предприятие нимысьтыз удыс чотын аслыз бырйиз электропровод бичанэз. Пӧртэм пумо ёзъёсты соос керттӥзы тупатэм радъя. Сыӵе жгут кулэ вал странаямы соку гинэ ӝужась промышленностьлы. Берло дасо аръёсы глазовъёс ез керттӥзы мотоцикл но машина поттӥсьёслы. Ар ӵоже 42 сюрс километрозь люкаськылӥз со. Ваньмаз сямен асьме "Ижъёсын" электропровод кулэезъя радъяса керттэмын Глазовысь УПП-ын. Странаямы экономика шальтармен но автомашина поттон чутрак кулэсмемен, ужлы ёрмыны ӧдъязы ляб адӟисьёс. Татын ӝеганы ӧдъяз уждун тырон, ичигес луизы ужасьёс. Но коллектив весь улӥз ӟечезлы осконэн. - Куд-ог интыосын, кылсярысь, Екатеринбургын рыноке выжон вакытэ та выллем предприятиосты воксё быдтӥзы, - вера Россиысь ляб адӟисьёслэн обществозылэн Удмурт Республикая люкетэзлэн кивалтӥсез Анатолий Бабурченков. - Отын ужан тӥрлыксэс дунтэмен вузазы, юртъеръёссэс мукет кие выжтӥзы, ӧлексыосты, кызьы шуо, капка сьӧры поттӥзы. Глазовын сыӵе янгыш ӧз лэсьтэ. Чиданы быгатэменызы, куспазы тупаса улэменызы, татысь рабочийёс но специалистъёс производствозэс утизы. Туэ арлэн кутсконаз уждун тырон татын ньыль толэзьлы ӝега вал ке, табере югдур тупатскиз ни. Ваньбур поттон пумен йылэ. Ӝыны ар куспын ватсаса кутэмын 8 мурт. Та нуналъёсы глазовъёс юнматозы Ижысь автозаводлэн кивалтӥсьёсыныз огазе ужан план. Озьыен, машинаослы провод керттэт дасян татын уката паськыталоз. Предприятиын ужасьёс но капчиенгес шокчозы, дыр. Юбилеен тӥледыз, эшъёс! Ӟеч мылкыд ноку но медам кошкы шырыт сюлэмъёсысьтыды. И. Лебедев. Кинлы кузпалъяськон, кинлы люкиськон Удмурт Республикаысь Правительстволэн Загс ужпумъёсъя комитетэз 27-тӥ сентябре ортчытӥз "Меӵак телефон". Шаерамы улӥсьёс асьсэлэн юанъёсынызы телефон пыр меӵак вазиськыны быгатӥзы та комитетлэн кивалтӥсезлы Лариса Викторовна Лукинскаялы. Кык час куспын 38 юан сётэмын вал. Мар бен тужгес но сюлэм шугъяськытэ адямиосты? Ньыль мурт вазиськиз нылпилэсь атайзэ тодон пумысен, витез - юалляськизы нылпиез семьяязы будэтыны басьтонъя, куать юан вал кузпалъяськонэз гожтонъя, сизьымез - люкиськонъя. Адямиосты сюлэмшугъяськытэ нимзэс мукетызлы воштон, та юанэн сизьым мурт вазиськиз. Ньыль мурт юалляськиз кыкетӥзэ свидетельство басьтон пумысен. Кунгож сьӧры улыны потыку документъёс зэмесь мед луозы шуыса, нош ик вазиськоно луэ загсын ужасьёслы. Та ужпумъя кык мурт юан сётӥз. Пӧртэм юанъёсын эшшо куинь адями вазиськиз на. Загс ужпумъёсъя комитет кварталлы быдэ ортчытъя "Меӵак телефон" пыр вераськонъёс. Азьлоеныз ӵошатыса, маин бен пӧртэм вал таиз ужрад? Кызьы шуиз Лариса Лукинская, таяз учыре но ӝыныез вазиськисьёс вал Ижевсклэн палэнысьтыз. Комитетын ужасьёс азьланяз но телефон пыр юалляськон радъялозы. Оло, газет лыдӟисьёсмылэн но кыӵе ке сюлэмшугъяськытӥсь юанъёссы луозы загсын ужасьёслы. Озьы ке, "Меӵак телефон" тӥледлы но юрттыны быгатоз. Ку но кыӵе дыре со ортчоз, газет пыр ивортон сётом. Юанъёсын вазиськыны быгатоды редакцие но, Загс ужпумъёсъя комитетын ужасьёс тӥледлы кулэ валэктонъёс сётозы. Л. Малых. Возьдаськись юмореска Мон юн возьдаськись. Калык пӧлы но шедисько ке, шымырскыса гинэ улӥсько. Толон тани магазинын черодын сылӥськом вал но, азьпалан сылӥсь адямилэсь коньдон пуйызэ поттыны вуиськем. Кутскиз уг кесяськыны... Шуисько аслам, пӧй, кисыям пыри, кожай, мон возьдаськисько, эн кесяськы гульым тырад.. Ӝытазе клубын но тачак калык люкаське, нош мон отчы пырыны ик возьдаськисько. Огназ нылмурт потэ ке, айда сэрегын вераськом шуыса, китӥз тар-тар кутӥсько. Олома но вераськон шеде, ӵукна пал гинэ гуртаз келясько. Котькуд ӝыт озьы кинэн ке но вераськиськод, ма, вераськонэз ку-о быдтод, о-оветь? Возьдаськись мон, соин ваньмыз вормо. Туннэ ӵукна Бебей Рита но кутылӥз. Кӧт вылам, пе, кидэ понӟа ай, кинэз ке ӵыжаське ни. Мар таиз но визьтэммем-а, мар-а шуыса, шӧектыса пегӟи. Собере гуртамы Ӟамбай Зоя вуиз. Бӧрсям ветлэ весяк сылалтэм кияр куре. Ма, мынам ваньмызлы сылалтэм кияре тырмоз-а, мар-а? Мынам олома но сиеме потэ но... калык сьӧры уг бызьылӥськы. Азьло соосты мон ӧтьылӥ, табере соос монэ ӧтьыло. Кин сыӵе кат соослы поттэм? Собере куиньназэс кышно ваи ке, куинь пинал вордскоз уг. Уйзэ но уд кӧла соосын. Асьсэос изёзы, монэ пинал возьматозы. Вот сюриськиз, а! Монэ сяна соос мукет пиосты но-а, мар-а уг шедьто. Возьдаськись мон. Кышноос гинэ но монэ вормо. Табере ма карыны ёрми ини. Ай судэ сётонэн кышкато. Та нуналъёсы дыр-р-р куалекъяса улӥсько ини. Кин тодэ, зэмзэ но, ваньзы судэ сётӥзы ке, куинезлы ик алемент тыроно луоз ини ук. Эх-эх-эх, улон, шу. Оги Тёпанлэн городысь ваем кышноез, паймымон чебер апай, кӧня пол вералляз, кӧтыд сюмаз ке, дорам гинэ лык, мылкыддэ веськато. Бен картэз ӧвӧл дыръя пумиськылӥськом вал но, возьдаськись уга мон. Веня эше тодӥз ке, возьыт потоз. Нош нылкышноос уг но возьдасько-а, мар-а? Хоть бы хны соослы, лэся, а мон возьдаськись, возьдаськии-и-и-ись... Г. Баженова. Владимир Ехлаков: "Кыкетӥзэ ум куашкалэ ни" Глазовын но республикаямы Владимир Ехлаковез умой тодо. Со кивалтэ усьтэм амалэн ужась "Химмаш" огазеяськонэн. Куашкам предприятиез со пыд йылаз пуктэ но азьланезлы юн оскыса ужа. Владимир Анатольевичлы та нуналъёсы 50 арес тырмиз. - Владимир Анатольевич, зэм ик-а тӥ выльысь куашканы ӧдъяды? Малы сыӵе вераськонъёс мыно? - Кытысь мар потэ, кинлы сыӵе супыльтон кулэ - асьсэос тодо. Но туннэ номыре чик ватытэк ваньзэ шара верало. Ӝутскыны кутскеммес лыдпусъёсын возьмато. Тани туэ 8 толэзьскын 65 миллион манет тыр ваньбур поттӥм, кылем арын та дырен ӵошатыса, кык поллэсь трос (209 процент). Предприятиын та дыр ӵоже, миым сярысь, уждунмы 45 процентлы йылӥз но шорлыдын 1515 манет луиз. Уждунъя вань твронъёсмы быдтэмын, али толэзьлы быдэ кык пол уждун сётъяськом. Вылаз ик, ватсаны кулэ, огазеяськонэ выль ужасьёс лыкто. Кылсярысь, туэ 1-тӥ сентябрёзь 165 мурт уже кутӥм. Шат со урод. Банкротэ шедем предприятие озьы ужа шат? - Нош бюджетъёсы но фондъёсы вытъёс тырон сярысь мар ватсасалды? - Предприятие куашканы ӧдъяз 1992-тӥ арын но банкрот луиз. Тужгес но секыт вал 1995-тӥ-1997-тӥ аръёсы. Та дыр ӵоже вань бюджетъёсы 12 миллион манет тыронъёсмы люкаськизы. Туэ 8 толэзьскын ваньзэ пытсам-тырим. Озьы ик ваньмыз азьло люкаськем тыронъёсмы берыктэмын ужасьтэмъёсты возён но медицинской страхованиея фондъёсы. Кӧняез ке тыронъёсмы берлолы кельтэмын, но ку-кӧня тырон дырез юн чакласа возиськом. - Хозяйствоез куашкатыны капчи, нош ӝутскон секытэн сётске. Владимир Анатольевич, мар тӥледды тужгес сюлэмшугъяськытэ на? - Сюлэмез бышкисез, азьлане вамышъёсмес юнматыны люкетӥсез вань ай. Но ми шуг- секытъёслэсь ум кышкаське, ӵуказе нуналмы сайкыт. Быдэс коллективмы сыӵе мылкыдын тырше. Туннэ пайда ум басьтӥське на: 8 толэзьскын планын учкем мында - 1700 манет изъян адӟим. Но арлэн пумаз пайда поттом сомында, кӧня планын чакламын вал. Азинскон бен кожаз уг лыкты. Конструкторъёсмы утчасько, выль изделиос поттонэз радъяськом, техникамес выльдӥськом но продукция вузанэз умоятӥськом. Берло дыре поттэм изделимес басьтӥсьёслэн лыдзы будэ, рынок паськыта. Йыг-йыг ӝутскон сюрес вылэ потӥськом быдэс коллективлэн, инженеръёслэн, шор ёзо кивалтӥсьёслэн сюлмо тыршеменызы, утчаськыса ужаменызы, интыысь но республикаысь кивалтӥсь ёзъёслэн вис карытэк юрттэменызы. Али тани бизнес-планмы но инвестициосъя программамы сётэмын Промышленностья но Экономикая министерствоосы. Жаляса верано отысь нокыӵе ивор ӧм басьтэ на, чик но уг дырто. - Владимир Анатольевич, азьланезлы кыӵе малпанъёсты? - Бадӟымесь но умоесь. Сое кык лыдпусэн гинэ верасал. Али ми Глазовысь промышленной предприятиос пӧлын городысь бюджетэ 4,7 процент выт сётӥськом, нош 2001-тӥ арын со лыдпусэз 15 процентозь вуттыны чакласьком. Озьыен, кӧня пол ваньбур поттонмес йылэтом, асьтэос малпаське. Озьы тӥни, "Химмаш" улӥз, улэ но улоз. *** Вераськонме йылпумъяса, Владимир Анатольевич, сюлмысьтымы ӟечкыласьком 50 аресэныды, сӥзиськом ӟечсэ но умойзэ гинэ. Юанъёс сётъяз Г. Романов. Шӧкыч Очей Толилы - пӧсь салам Ветлӥськиз, шол, городэ (Пересь кышномуртлэн верамез) Городын - огыр-бугыр. Калык туж трос. Ма утчаса соос отчы-татчы ветло? Мылзы но потэ ук. Пыро, пото, донгасько, кесясько, серекъяло, бӧрдо, жугисько, чупасько, ӟыгыръясько... Мае но уд кылы, кыӵезэ но уд адӟы! Уката ик нылкышноос. Кыдзы бертэм-а, мар-а ини соослэн? Я дэрем сӧзулзэс музъем вылтӥ лёгаса ветло, я гольык макесэнызы ворекъяло. Пельёсазы, йырсиосазы олокыӵе но икыр-кукыр куасаллям кортъёс ошылэмын. Ымныръёссы нош!.. Кыӵе возьытэн калыке потод озьы? Лыз... вож.. ӵуж... горд... сьӧд буёлъёсын буямын. Оло буямын, оло жугемын - уд вала. Монэ коть, картэ жуге ке, кыре-буре ик уг потаськы ни. Коркам ворсаськисько но пукисько. Картэлэн ньылонзэ вормымэеныз мыным тыш сиыса улоно луэ. Юыса бертэ ке, соку ик ымнырме "суреда". Ай уг но пӧрмы солэн. Паллян синдурме ӵуж каре, бурзэ - вож, яке воксё одӥг палзэ гинэ "буя". Кытӥяз нош ангесам но кымесам пужы пуктылэ. Тӥни озьы. Собере... олокыӵеосыз но вань со кышноос. То йырзы курег пуз выллем, пилеш ӵышкемын, то йырсизы вукузёлэн кадь лэзьямын. Тӧло куазен со адями вӧзын сылыны ик уг луы: лусьтро йырсиез ыме-ныре пыре, бичатэ. Нош гижыоссы... кырныжлэн кузьдаесь, синъёстэ потталозы, ява. Номыр ке но уд вазьылӥськы, ыльын сиыны дасесь. Мар кари мон соосыз? Маи мынам соослы уг кельшы? Одӥг пол трамвае пукси но билет курисько. - Дай-ко мне билет, - шуисько матын сылӥсь пиёклы. - Нылы доры мынӥсько ай. - Иди да купи сама! - шуиз со пиёк. Ма карыны ӟудыса, азьлань вамыштӥ. Табере, малпасько, ас ёзо кышномуртлы билет курыса вазисько ай. Йырсиез но пурысьтамын кадь ини. Синмаз очки понэм, газет лыдӟе. Мон дораз мынӥ но газетсэ палэнтыса шуисько: - Дайте мне билет. Нылы доры мынӥсько. - Чты вы себе позволяете? - Билет мне надо! Билет! Нылы доры мынӥсько. - Какся наглость! У меня нет лишних билетов. Пошла вон отсюда! - Ярам, иське, пошла! Кинлэсь бен табере куром ини? Со куспын мон доры кыӵе ке пиосмурт лыктӥз. - Ваш билет, - шуэ. - Ӧвӧл билетэ. Нету. Сама ищу тани! - Идите за мной! - Кеськиз шорам. Марзэ-созэ валаса ӧй вутты, пиосмурт сильсьӧртӥм монэ ураме поттӥз. - Юрттэ! - черекъясько урам тыр. - Виё ини! Утыр ачим котомкаме юнгес бордам ӝиптӥсько. Отысь сӥльзэ шӧдӥзы, дыр. Али сӥль городын дуно, мынэсьтым, пересь муртлэсь, талалозы эшшо. Мынам шудам ӵапак милицаос отӥ ортчо вылэм. Лап-лап вамышъяса лыктӥзы, юазы- веразы. Одӥгез удмурт вылэм, со мыным ваньзэ тупен-тупен валэктӥз. Билет, пе, кондукторлэсь басьтоно вал. Табере мон трамвайын билеттэк уг ветлӥськы ни. Эшшо но "ӟечгес" адямиослэн ки улазы сюрод я мар? Майя Митрофанова, Алнаш село. Вуизы выль адямиос Операя но балетъя кун театрын туэ трос воштӥськонъёс ортчизы. Ужаны кутскизы театрлэн выль директорез А. П. Сидорова но валтӥсь режиссёрез А. Ю. Прасолов, ГИТИС-эз йылпумъям адями. Выль ужан вакыт усьтӥськон азьын выльдӥськем театрлэн пушкыз но: тупатъямын залэз, сценаез, артистъёслэн спектакльёслы дасяськон интыоссы. Валтӥсь режиссёр А. Ю. Прасолов алигес тодматӥз театрлэн репертуареныз. Ивортӥз: выль арозь дасямын луоз вить выль спектакль. Ньыльдон куинетӥ ужан вакыт усьтӥськоз 21-тӥ октябре. Та нуналэ пуктэмын луоз "Пиковая дама" опера. - Туж ӟеч спектакль та, - пусйиз А. Ю. Прасолов. - Сое дасянэ уно кужым понэмын. Александр Юрьевич озьы ик шуиз: "Театрлэсь репертуарзэ ялан выльдоно". Мӧйыос понна туэ возьматэмын луозы И. Дунаевскийлэн "Женихи" опереттаез но Дж. Россинилэн "Брачный вексель" крезьгуро фарсэз. Туэ театр бадӟымгес саклык висъялоз пиналъёслы. Соос понна дасямын В. Бельскийлэн "Страсти по золотому петушку" мадёсэзъя спектакль (крезьгурез Н. Римский-Корсаковлэн). А. С. Пушкинлэн туж тодмо выжыкылэзъя дасям спектакле туж быгатӥсь артистъёс пырисько. Со ас бордаз кыскоз пиналъёсты но, арлыдоосты но. Выль аре, шутэтскон нуналъёсазы, нылпиосты вите "Волшебная карта" спектакль. Татын чузъяськозы тодмо ӟуч крезьгурчилэн А. Гречаниновлэн гуръёсыз. Покчиос понна возьматэмын луозы "Тайна волшебного занавеса", "Загадки Терпсихоры" выжыкылъёс. Театре вуизы выль адямиос. Туэ татын ужаны кутскозы Пермьысь хореографияя училищеез йылпумъямъёс, озьы ик - егит кырӟасьёс Наталия Ермакова но Александр Артемьев. В. Лагунов. Дарт Крезьгур - секыт, мылкыд - капчи Можгаын витетӥзэ ини рок-фестиваль ортчиз. Отчы пыриськизы Можгаысь но Ижевскысь группаос. Вить час ӵоже чузъяськиз рок-крезьгур, нош "Модерн" радио егитъёс пӧлын шудонъёс, ӵошатсконъёс ортчытӥз. Ужрадэз ортчытӥз Можгаысь егитъёслэн огазеяськонзы. В. Кибардина. Выт но тыро, уждун но басьто Валлян, 27-тӥ сентябре, Правительстволэн Тӧроез Николай Ганза тодматскиз "Буммаш" акционер огазеяськонын ужез радъямен, пумиськылӥз отын тыршисьёсын. Удмуртиысь предприятиос пӧлысь али со одӥгез азьмынӥсез но огсыр ужасез. Предприятие дыраз тыре вытъёссэ, уждунэн ӝеганъёс уг луо. Завод уно коньдонзэ висъя производствоез азинтонлы, выль технологиосты пыӵатонлы. Министръёслэн кабинетсылэн туэ 8 толэзь ӵоже ужамезлы йылпумъянъёс лэсьтыса, Николай Ганза пусйиз: шӧдскымон азинсконъёс басьтӥсь промышленной предприятиослы юрттэт сётӥське нырысь ик. Та ласянь "Буммашлэн" ужан амалэз туж вылӥын. Коллектив рынокен экономикае капчиен выжиз, поттоно продукцизэ дыраз паськытатӥз, но тужгес но адӟем карымон луэ соиз - берло дас аръёсы предприятие экономикаын воштӥськонъёсты дыраз шӧдӥз. Вань предприятиос "Буммаш" кадь ужасалзы ке, Удмуртилэн промышленностез вуоно вить арскын 90-тӥ аръёслэн кутсконазы сямен ик луысал. Со кун инвестициосты, гурт удысэз азинтонэ юрттэт висъянэз кык поллы будэтыны луонлык сётысал, быдэстыны луысал улон-вылонысь мукет ужпумъёсты но. Коллективен пумиськон дыръя Николай Ганзалы умоесь дэмланъёс веразы производствоез кызьы ке та предприятиын, озьы ик быдэс удысын азинтон ласянь но. Удмурт Республикаысь Правительстволэн пресс-службаез. Лякытэн кутыны кулэ Толон валлян, 27-тӥ сентябре, Удмурт Республикаысь Кун Кенешлэн Тӧроез Александр Волков ужаз Федерацияя Кенешлэн заседанияз. Эскерем ужпумъёс пӧлын вал Федерацияя Кенешлэсь "2001-тӥ арлы федерацилэн бюджетэз сярысь" федеральной законлэн инъетэзъя ӵектонъёссэ сэрттон-пертчон, Россиысь агропромышленностья огазеяськонлэсь "Россиысь агропромышленностья комплексын секыт югдурысь потонъя ӝегатскытэк ужрадъёс кутон но странаын сиён-юон поттонэз умоян сярысь" ужпумез эскерон. Озьы ик учкемын Россия Федерациез 2010-тӥ арозь ӝоггес азинтонъя ужпум, озьы ик Федерацияя Кенешлэн Россия Федерацилэн Правительствоезлэн Тӧроезлы чагыр эстӥськонлы но электрокужымлы тарифъёслы дунъёс будэмен валче вазиськонэзлэн инъетэз. Россиысь РТР телерадиокомпанилэн вуоно арлы бюджетэз пумысен юанъёслы валэктыса, Александр Волков пусйиз солэсь аспӧртэмлыксэ: странамылэн коньдон ужпумъя валтӥсь документэз кутӥське выль куронъёсъя, Бюджетъя выль кодексэз лыдэ басьтыса. Зэм, бюджетысь куд-ог интыоссэ выльысь эскероно луоз на. Кылсярысь, федерацияя центр но улосъёс куспын бюджетъя кусыпъёсты, оборонно-промышленной комплексысь предприятиослы кун заказэз быдэстэмзы понна коньдон берыктонэз, химия ож тӥрлыкез быдтонъя программалы коньдон висъянэз Кун Кенешлэн Тӧроезлэн малпамезъя, со ужпумъёсты сэрттыны-пертчыны луоно ужан вискын, но котьма ке но, улосъёслэн кивалтӥсьёссы Правительстволэсь 2001-тӥ арлы бюджетэзлэсь ӵектэм инъетсэ лякытэн кутыны кулэ. Удмурт Республикаысь Кун Кенешлэн пресс-службаез. Шӧкыч - Мар со?.. - Рае мынон путёвка. Странаямы но, шаерамы но вылысьтыз вылаз быръёнъёс ортчо: я Россиысь Кун Думае депутат бырйиськом, я Удмурт Республикаысь Кун Кенеше. Алигес гинэ Россия Федерацилы президент бырйим, табере Удмуртилы президент кулэ. Сомында сӥзёнъёс, ӟеч улонлы оскытонъёс, странаямы кемалась райын выллем улон кылдытыны луысал ни. Ма, бен калык ачиз ик янгыш, вылды, кин понна куаразэ сётыны уг вала бере. Суредэз Вячеслав Шиловлэн. Дышетон удысысь Сюрес усьтӥське кибашлыослы Кема аръёс ӵоже дуннеысь кунъёс ӵошатскыса улӥзы, кин кӧня ож тӥрлык, чугун но андан поттоз. Табере югдур чутрак воштӥськиз. Вуоно даурын азьпала потозы сыӵе кунъёс, кудъёсыз тужгес но ӟеч дышетскон амалъёс кылдытыны быгатозы но обществолэсь визь-тодонзэ, дышетскемзэ вылӥе ӝутозы. Сое валаса, Россилэн Президентэз Владимир Путин али бадӟым уж нуэ дышетон удысын воштӥськонъёс ортчытон ласянь. Та ужпум сюлмаськытэ асьме республикаысь кивалтӥсьёсты но. Туннэ Россиын улӥсьёс пӧлысь 22 процентэзлэн шор ёзо профессиональной образованиез, вузысь котькудӥз витетӥез студент - техникумез быдэстэм мурт, нош Удмуртия шор ёзо профессиональной заведениосын дышетскись студентъёсъя Россиын 20-тӥ инты басьтэ. Вераны кулэ: берло вить аръёсы асьме республикаын шор ёзо пофессиональной заведениослэн лыдзы 30-ысен 32-озь йылӥз. Отын куатьтон пумо ужъёслы дышето. Техникумъёсын дышетскись студентъёс пӧлын 30 процентэз - гуртъёсысь лыктэм егитъёс. Республикаысьтымы куатез техникум колледжлы пӧрмытэмын. Отын ужало вылӥ квалификациен преподавательёс но мастеръёс. Ижысь монтажной техникум Интернетэн герӟаськемын, отын со ачиз сярысь бам но усьтыны быгатӥз. Удмуртиын та дышетон удыс, нокыӵе шуг-секытъёслы сётскытэк, азинскыны быгатӥз. Соин ик дышетонын чаклам воштӥськонъёс сое уг кышкато. Берло дас аръёсы Россиын но, Удмуртиын но бадӟым саклык висъяськылӥз вылӥ дышетскон удысэз азинтонлы, шор ёзо профессиональной образование саюулынгес улӥз. 1980-тӥ-1990-тӥ аръёсы вылӥ образованиен но шор ёзо образованиен специалистъёс огмында луизы. Соин ик ужан удысъёсын шор ёзо образованиен специалистъёс пумен кулэтэм луыны кутскизы. Но туннэ, куке экономика азинскыны ӧдъяз, "витьымтэ шорысь" таӵе квалификациен специалистъёслэн тырмымтэзы шӧдӥськиз, тужгес но уг тырмо мастеръёс, бригадиръёс, участокъёсын кивалтӥсьёс. Улон косэмъя, матысь аръёсы азьмынӥсь странаосын вань дышетскисьёсты одно ик кыӵе ке ужлы, профессилы дышетыны тыршозы. Сыӵе странаослэсь бере уз кыльы Россия но, озьыен,Удмуртиез но со ик возьма. Зэмзэ но, али тросэз валазы ни: нокыӵе ужлы дышетскытэк, ӟеч уж шедьтыны секыт. Эшшо одӥг ужпум сылэ на азьпалан - тодон-валан вис карытэк сётыны быгатӥсь сӧзнэт кылдытоно. Японилэсь экономикаын ӝутскемзэ та амалэз зол быгатыса пыӵатэмен валэктоно. Соин ик отын адями улытозяз олокӧня пол нокыӵе сюлмаськонъёстэк ужзэ воштыны быгатэ, ас луонлыкъёссэ но быгатонлыкъёссэ пӧртэм ужын эскере. Тодон-валан вис карытэк сётыны быгатӥсь сӧзнэт кылдытон бордын али ӟеч ужало ни Удмурт кун университетын но Ижысь техникая кун университетын. Профессиональной образование азьын сылӥсь ужпумъёс алигес эскеремын вал республикаын ортчем бадӟым кенешонын. Солэн ужаз пыриськизы училищеослэн но техникумъёслэн директоръёссы, вузъёслэн ректоръёссы, Калыкез дышетонъя министерствоысь специалистъёс. Ужрадэз усьтӥз Кун Кенешлэн Тӧроез А. Волков. Люкаськемъёсты со тодматӥз "Удмуртиез азинтонъя" программалэн дышетон удыслы сӥзем люкетэныз. С. Харитонов. Вордскем нуналзэс пусъё: Матушкин Михаил Иванович - Красногорск ёрос администрацилэн кивалтӥсез; Иванова Лидия Федоровна - "Удмурт кенешлэн" Балезиноысь ёзэзлэн кивалтӥсез; Хохряков Валерий Павлович - Удмурт Правительстволэн Аппаратаз ужась; Шкляев Алексей Петрович - "Удмурт дунне" газетлэн валтӥсь редакторез; Поздеев Виктор Петрович - тодмо шаерчи (краевед). Правительствоысь иворъёс Бускельёслэсь адӟем карыса Кылем понедельнике Правительстволэн Президиумезлэн кенешонэз ортчиз. Сое нуиз Правительстволэн тӧроезлэн нырысетӥ воштӥсез Юрий Питкевич. Кенешонын юртъёсты лэсьтыны но выльдыны технической условиос сётон радлык сярысь положение юнматэмын. Документ юрттоз Удмуртие уногес инвестициос кыскыны, угось соя лэсьтӥськон ужлы дасяськон дыр чутрак кулэсме. Положение дасямын, бускель улосъёслэсь ужамзэс лыдэ басьтыса. Предприятие быдтэмын Бюджет коньдонэз шыръян понна но инвестициос ӧвӧлэн "Дирекция строящегося консервного завода "Ижевский" кун учреждение быдтэмын. Сыӵе ужрадъёсты ортчытыны косэмын Лэсьтӥськонъя, архитектурая но улон-вылон политикая министерствоез. Собере объект сётэмын луоз Правительстволэн Капитальной лэсьтӥськонъя управлениезлы. Кышкыт висёнъёс уз вӧлме Юнматэмын 2000-тӥ-2004-тӥ аръёсы Удмурт Республикалэсь улосвылзэ тужгес кышкыт паласькись висёнъёсты пыртонлэсь но вӧлмытонлэсь утёнъя ужрадъёсын план. "ИжАвиа", Горький чугун сюреслэн Ижевск ёзэз, "Порт Сарапул" АО ужасьёссэс дышетыны кулэ сюрес вылын паласькись висёнъёсын курадӟисьёсты шараяны, эпидемилы пумит ужез радъяны, санитарилэн куронъёсызлы тупась транспорт дасяны. Постановленилэн инъетэныз тодматскыкуз, Удмурт Республикаысь санитарияя валтӥсь кун врач Николай Забродин пусйиз: азьвыл аръёсы таӵе ужрадъёс ортчытэмен, шаремы ӧз вуэ тужгес кышкыт паласькись висёнъёс, кылсярысь, чума, холера, жёлтая лихорадка, малярия но мукет. Азинскыны инъет Сюмси ёросысь "Нива" колхозлы висъямын 50 сюрс манет. Коньдон мыноз кунян вордон фермалы тӥрлык басьтыны. Выль станция Камбарка ёрос администрацилэн куремезъя, "Хлебная база � 55" кун предприятие интые "Машинно-технологическая станция "Ершовская" ГУП кылдытэмын. Со музъем ужасьёслы юрттоз гурт удысысь ужъёсты быдэсъяны. Музъем ужасьёслы юрттэт Кун ваньбуре эшшо 230 иськем гурт сюресъёс пыртэмын на, солэн огъя дуныз - 28,8 миллион манет. Нош ньыль ар ӵоже "Удмуртавтодорлэн" балансаз 955 иськем гурт сюресъёс пыртэмын. Соослэн одӥг зэмос кузёзы кылдӥз, со ик сюресъёсты чакласа возёз. Гуртысь ваньбур поттӥсьёс понна со шӧдскымон юрттэт луоз. Выльысь улӟо Балезино но Кизнер посёлокъёсын техникаез тупатъянъя предприятиослэсь валтӥсь ужан удыссэс улӟытон сярысь постановление кутэмын. Арлы быдэ соос гусеницаен 300 трактор тупатъялозы, солы чаклам коньдонлэн ӝыныез висъяськоз республикалэн бюджетысьтыз. Правительстволэн Тӧроезлэн воштӥсез Михаил Назаров верамъя, таӵе ужрадъёсты ёрос администрациослэн кивалтӥсьёссы умоен лыдъязы. Шаерамы гусеницаен 4 сюрс пала трактор лыдъяське. Техникаез тупатъянъя предприятиос кылдытон гурт удыслэн одӥгез валтӥсь ужпумез луэ. Удмурт Республикаысь Правительстволэн пресс-службаез. "Ода" кошкиз Пургае Та нуналъёсы "Ижмаш-Авто" акционер огазеяськонын шумпотымон ужрад ортчиз. Автозаводлэн конвейерыстыз васькиз 25 сюрсэтӥез "Иж-2126" автомобиль. Сое поттыны дасясько вал ини 70-тӥ аръёслэн пумазы ик, но бӧрысь аналтӥзы. Нош 1989- тӥ арын сое выльысь ик поттыны кутскизы. Кылем арысен солы "Ода" ним сётӥзы. Озьы ик та машиналэн инъетэз вылын пото "Иж-2717" фургон но "Иж-27171" пикап. Озьыен, заводмы пумен бурдъёссэ вӧлъя, кылдо выль ужан интыос, казнае вуэ ватсаса коньдон. Директоръёслэн кенешсы 25 сюрсэтӥ автомобилез сётыны кенешиз Пичи Пурга ёрос больницалэн нуны ваён юртаз. Б. Никитин. Шӧкыч Сябась! Лымы усемлэсь азьло шаермес котыртоно, кожай. Ма, собере, вез-вез кылльыса, бурдъёс но сыномыны кутскозы. Малпасько, ортчо ай город урамъёстӥ, гуртъёстӥ. Шудо адямиос шоры учкыса, эсьма толйыны но сокем мӧзмыт уз луы. Отчы, татчы лобисько, кунэрес ымныръёс шоры мырӟиськисько: нылпиос кампет курыса бӧрдо, арлыдоос дунтэмгес вуз утчаса город пумысь город пуме ворттыло, гуртын ужасьёс буш кисыосынызы шонало. Э-э, малпасько, уз пӧрмы лӧптыса толйыны. Тӥни соку синйылтӥ чарка бекыръясьёсты: шулдыр соослы, сюлмаськонъёссэс курыт вуэн гылато. Одӥг, кык, куинь... Ой, ой, лыдъяны луонтэм вылэм шулдыръяськыны яратӥсьёс. Городъёс гинэ ӧвӧл, гуртоос но быгато буйгатскыса улыны. Куд-огез арняосын уг сазьтӥсько. Зол ук! Нылкышноос но шӧдӥллям курыт вулэсь пайдазэ. Нош пиналъёс одӥг гучыклэсь гинэ но "лобась" луо. Кӧты лычсузьымон вожъяськи адямиослы. Майбыр улон возьма соосты азьланьын, курыт ву ошмес ву сямен пӧзе угось. Одӥг гучыксэ мон но ӟизтӥ ке, трослы уз куанерме, малпай ас поннам. Гуньдэм тракторез вӧзын мыняса кыллись воргорон доры лэзиськи, кыдёкысен нырам шуккиз угось аракы зын. Шудэ вылэм, ӟенелик пыдэскы кылем шапыкен кунояськи. Майбыр ке майбыр, кык бурд интые, дасэз кылдӥз кадь. Эк-эк-эк, нокин уг адӟы гадь тырам шуд пачыламез. Ым мъёсме эшшо пичыльтык коттӥ ке, уката шулдыр луоз, кожай. Озьы вылымтэ, мыжгаськеме, ӵыжаськеме потыны кутскиз. Соин ӧз тырмы, бусы шорын кыллись воргоронэз лексьыны йыринтӥ. Нокытӥыз ӧз вырӟы. Йыры курен эшшо ымме коттӥ. Э-э, кутски ук соку сэмберъяськыны, куарае бырытозь шиетыны: Юод, юод та винаез, Кызьы уд ю винаез. Эмезь кадь ик туж ческыт но, Сугон кадь ик туж курыт... Ньылонэ кӧсамысь эшшо пичильтык ӟузи. Отӥяз мар вал монэным, уг тодӥськы. Нош сайкай сать-сать дэриын, йырын жон вазе. Э-э, шиё пиёке, тырмоз тыныд ӟамыръяны, малпасько ас поннам. Тазьы йыружозь но кыдёкын ӧвӧл. Можга районысь Пычас посёлокысь воргорон но 4-тӥ сентябре мылкыдзэ гинэ шулдыртыны малпаз вал, дыр? Юлтошеныз керетон пурӟиз но, созэ пыӵалэн ыбыса вииз. Нош мар тырмымтэ Ижевскысь быдэ вуымтэ кык пиёкъёслы. Кудӟытӥсь юон ке шат йырзэс поромытӥз? Югыт куазен "Океан" магазин дорысен 50 аресъем воргоронлэсь кисызэ бушатыны малпазы. Пумитъяськемысьтыз одӥгез пияш сое пуртэн бышкалтыса вие. Таиз учыр вал августлэн пумаз. Нош кӧня тылпу пуроме юыса тамак ӵындытӥсьёсын йырин? Озьы 6-тӥ сентябре тылпу потӥз Сюмси районысь Гура селоын. Ваньбурез 5 сюрс манетлы нюлыштӥз, укылтэм. Со гинэ мар, корка кузё ачиз но ӵынын ӝоказ. Веранэз ӧвӧл ни юэм йырын машиналэн руль сьӧраз пуксисьёс сярысь. Уг, уг быгаты ни мон толэз капчи мылкыдын ортчытыны вань та кылэм-адӟемъёсы бере. Нош юонлы пум пононо. Всё, одӥг ымтыр но уг веръя ни. Тодам лыктӥз на египет калыклэн вашкала мадёсэз. Одӥг адями мерттӥз виноград пу, сюлмысь утялтӥз сое. Но пӧсь куазен котырак ваньмыз кӧсаз. Одӥг гинэ виноград пузэ утён понна адями павлинэз вие но вирзэ кисьтэ будосэз улэ. Со уг юртты, виёно луэ левез. Отӥяз дышетэм маймылзэ (обезъянзэ) но уг жаля, собере вандэ парсьсэ. Со дырысен адямиос асьсэды пӧртэм сямен возьыны кутскизы: пичильтык юыны шедьто ке, павлинлэн быжыз сямен чебертӥсько, ӧжытак йылто но - аслэсьтыз куаразэ поттэ изнэсо арыслан (лев). Эшшо одӥг чарка ӟумыртод - вашкала дауръёсысь маймыллы укшась выжыедлы матэктод. Нош эсэпсэ валатэк юид ке, парсен артэ выдыны луоз ни. Тӥни озьы, юлтошъёсы, сябась шуыкуды, оло, тӥ но тодады ваёды та веранэз. Шӧкыч уром. 1-тӥ октябре - Арлыдоослэн нуналзы Сӥзьыл но сяськая льӧмпу Туннэ ӵукнаысен пересь кенакъёс-агайёс вошкон дӥсьсэс поттӥзы ни, луоз - араз огпол ке но соосты ӝӧк сьӧрын пукыса сӥлы карозы уго. Пичильтык кузьым сётозы, пичильтык утялтозы. Ог-огенызы вераськыса, ӧжытак ке но сюлэмзы буйгалоз. Оло нош уз. Вераськон уго одно потоз пенсиос сярысь: со озьы-озьы ужаз но, сомында басьтэ, мон - тамында гинэ. Ми ваньзэ валаськом, но кызьы буйгатом тӥледыз? Оло нош капчигес учконо улон шоры? Дугдоно ни уен-нуналэн арлыдъем нылпиосты сярысь сюлмаськыны, тӥледлы соос будэтэмды понна но дас пол йыбырттыны кулэ. Улэ ӧжыт ке но асьтэос понна. Учке ай та кенакъёс шоры. Кин соосты пересь шуоз? Кин оскоз, 80 аресъем песянай туж шӧртчи ансамбльын эктэ-кырӟа, районысь конференциосы пыриське на шуыса. Нош Клавдия Николаевна Меньшикова (бурысез) зэмзэ но сыӵе. Тодматски мон соосын Сюмсиын. Татысь ёрос кенешлэн конференциез азьын коридорысь арлыдоосты адӟыса басьяськыны лыктӥзы, дыр, малпай. Кытын, пе. Таосыд вылдӥсьсэс куштӥзы но чиль-дол кисьтаськись дэремъёсынызы мальдытыса йӧн- йӧн залэ пыризы. Выль тодмоосы Туканысь вылэм. Кыкназы: Клавдия Николаевна но, Валентина Петровна но (таизлы 72 арес) мыло-кыдо пырисько ёросысь удмуртъёслэн ужрадъёсазы. Туж жаляло, Туканысь ансамбльзылэн кивалтӥсез Евдокия Ильиных Сюмсие улыны кошкиз шуыса (со ёросысь удмуртъёслэн кенешенызы кивалтэ). Табере уго соос асьсэ понна гинэ шулдыръясько на. Нош кык ар талэсь азьвыл гинэ ай концертъёсын сьӧрло но поталлязы. - Али но сюрес вылэ потысалыд на-а? - юасько Клавдия Николаевналэсь. - Потасал, ма мон пересь-а, мар-а, ми Иж сьӧры но вуылэмын ни. Тӥни озьы. Вань улонзэс секыт ужаса улэм, трос нылпи вордэм кышномуртъёс али но номырлы уг сётӥсько: пересьмонлы но (мылкыдзы котьку егит), ёрмонлы но (пенсизы ке уг тырмы, бакчазы, гидкуазьзы узыр). Вӧзаз тазалык гинэ мед луоз на. *** Тӥни озьы йылпумъяй ни вал. Но та уже газетэ потытозь, эшшо одӥг паймымон кышномуртэн тодматски. Любовь Апполосовна Караваева улэ Завьял ёросысь Изгуртын. Но пумиськимы ми соин Хохрякиысь профилакторийын. Сое татысь врачъёс "милям песянаймы" гинэ шуо. Любапай уго татчы витетӥзэ шутэтскыны-эмъяськыны лыктӥз ни. Нырысь колхоз дунтэм путёвка висъялляз. Берло кык ползэ аслаз коньдонэныз лыктэ. - Но вань пенсионеръёс куанер улэмзылы ӝожтӥсько, кытысь тӥ сыӵе луонлык шедьтӥськоды? - паймыса юасько Любапайлэсь. - Тазалыкед сярысь ке сюлмаськид, шедьтод. Кӧня ке толэзь ӵоже пенсиме шыръясько. Бадӟым бакча утисько, мултэс емышез, бакча сиёнэз вузасько. Зэм но, воштод шат тазалыкез ог-кык сюрсэн? Басьтод-а соин таза сюлэм? Нош со висе - пинал дыръя курадӟыса будэмлэсь но, секыт ужамлэсь но, шудтэм улонэзлэсь но. Коть татын толэзь ке но улэмез мед шулдыртоз Любапайлэсь улонзэ. З. Рябинина. Туспуктэмъёсыз В. Беломорскихлэн. Самой ӟеч пыӵал Ижевскын поттэм пыӵал тӥрлыклы быдэс дуннеын вылӥ дунъет сёто. Со уго дунтэм но, оскымон но, чида но кема аръёслы. Америкаысь специалистъёслэн дунъет сётэмзыя, Ижевскысь механикая заводлэн Иж-27 пыӵалэз туэ понна самой ӟеч пыӵалэн лыдъямын. В. Васильев. 4 мурт ӟыгыртоз Удмуртия дун вуо ошмесъёсыныз гинэ уг данъяськы. Шаерамы ӝыныезлэсь уно интыосты басьто нюлэсъёс. Асьме палан трос гинэ инкуазь памятникъёс но. Кизнер ёросын тани будэ вашкала тыпы. Солы дас одӥг даур ни. Со Удмуртиын самой мӧйыез писпу луэ. Тыпыез ӟыгыртыны быгатоз 4 адями гинэ. Та палангес будэ на эшшо кык пересь тыпы - таосызлэн арлыдзы 700 ар. Нош Грахово черкогуртлы кыдёкын ик ӧвӧл будо лыстэм пужымъёс (лиственница). Соос мерттэмын ни 1889-тӥ арын. В. Рогалев. 27-тӥ сентябре туристъёс асьсэлэсь нуналзэс пусйизы Султэ сюрес вылэ! 27-тӥ сентябрь - Туристъёслэн нуналзы. Кин со сыӵе турист? Удмурт кылын сое "сюресчи" шуим ке, ум янгышалэ, дыр. Сюречиосын кемалась ини герӟаськемын география. Кызьы-о сотэк? Тани басьтом Быдӟым географической усьтонъёс вакытэз 1492-тӥ арын Христофор Колумб Выль Дуннеез - Америкаез - усьтӥз. 1499-тӥ арын Васко да Гама, Африкаез котыртыса, Европаысь Индие вуиз. 3 ар ӵоже (1521-1524), парусной корабльёсын пӧртэм зарезьёстӥ уяса, Фернан Магелан Музъемез котыртӥз. Пӧртэм вакытысь сюресчиос, асьсэды но, дырзэс но жалятэк, вань улонзэс сӥзизы сюреслы, секытъёслэсь но ыштонъёслэсь кышкатэк, ялан азьлань мынӥзы. Кылэм- адӟемзэс гожтыса кельтӥзы. Сюресчиосын дауръёс ӵоже люкам тодон-валанъёс юрттӥзы кылдыны география наукалы. Али Музъем-дуннемы котьма ласянь но эскеремын ни кадь, нош сюресчиос арысь аре тросгес луо. Малы меда? Инкуазь кужым висёнъёслы пумитъяське, мылкыдэз умоятэ. Талы туж тупа туризм. Пыдын, куасэн, велосипедэн ветлыса, я пыжын шур кузя уяса адями шутэтске, выль кужым люка, мугорзэ ужатэ, инкуазен тодматске, тодмотэмзэ усьтэ. Тодосчиослэн лыдъямзыя, туристъёслэн лыдзы котькуд ар Россиын гинэ 160 миллионозь вуэ. Паймонэз ӧвӧл, угось сюрес вылэ (походэ) потыны быгатэ пересез но, пиналэз но, оген но, трос кузя но, тол но, гужем но. Котькуд походын - Алтай гурезьёсын-а, Уй пал Ураллэн ӝог бызись шуръёсаз-а, Сихотэ-Аминьлэн нюлэсъёсаз-а, Карелилэн тыосаз-а, Байкал дурын-а - турист шӧдэ ассэ мае ке выльзэ, нырысьсэ усьтӥсен. Ваньмыз та адямилэсь мылкыдзэ ӝутэ, сое шудо каре, мукет адямиослы ӟеч уж лэсьтыны ӧте, инкуазез яратытэ. Одӥг кылын вераса - сюрес вылын (походын) адями патриот луэ. Патриот луон понна улон интыезлэсь туж кыдёке но мыноно ӧвӧл. Куддыръя тырме, гурт сьӧрысь матысь нюлэскы но ветлыса. Отын чал-чал, зарни, ыргон куаръёс гинэ пыд улын ӵаштырто. Юзмыт омыр мугор пуштӥ поръя, йырез сайкытэ. Шунды тылсиос, писпуос пыр пиштыса, "татчы-татчы!" ӧтё. Паймонэз ик ӧвӧл кадь, нош мылкыд малы ке гадь пушкы уг тэры ни, кыре потыны турттэ. Ачид но валатэк кылиськод, кызьы тынад мылкыдыд ымтӥд кырӟан гурен потэ. Шедьтэм губидэ но, "вождэ эн вай" шуыса, туж жаляса выжытӥз вандӥськод. Нюлэслэн оломаизлы но паймиськод, чигем писпуэз жаляськод, ошмес синэз силёлэсь утялтӥськод. Озьы ӧвӧл шат? Нюлэскысь бертӥськод ӝутӥськем мылкыдын. Дышетскись пиналъёсын но походын тазьы ик луэ. Вылаз ик, сюрес вылын шуг- секытъёсты орчыса, ог-огзылы юрттыса, берло юдэс няньзэс но эшсылы сётыса вераны луонтэм шудо луо. Нош кыӵе шумпото соос тодмотэм интыын, тылскем дурын сиськыны, ог-огзэс куноятыны, оломар сярысь но вераськыны, кезьыт палаткаын ог-огзы борды юн ӝиптӥськыса изьыны. Кытын меда соос уйвӧтазы? Котыр чус-чус, палаткаысь гинэ огдыр кучапи выллем нискетэм кылӥське, я шур дурын луд ӵӧж куаразэ поттэ, я кысӥсь эгыр тачырак!" вазе. Макем паськыт дунне та кизилиё инбам улын! Пӧртэм буёлъёсын ворекъяса, соос маке но верало кадь. Тылскемысь кизер ӵын но вылӥе кыстӥське, пиналъёслэсь мылкыдзэс соослы ыстэ. Адями космосэн герӟаськемын, пе. Юнме верам ӧвӧл со. Яркыт кизилиос, пиштӥсь толэзь мылкыдэз капчиято, ӵуказелы осконэз юнмато, сюрес вылэ ӧтё. Изе, пиналъёс! Нош ӵуказе юн мылкыдын, выль кужымен - азьлань! В. Баймурзин, Пичи Пурга ёрос. Походын кӧс лым но ческыт! Тупаса улон но шудбур тӥледлы! Гажано ветеранъёс! Удмурт Республикаысь Правительстволэн нимыныз Арлыдо адямиослэн нуналэнызы валче вань тау карон кылъёсмес верасько. Соин но адӟем карымон со, праздниктэс пусйиськоды октябрьлэн нырысетӥ нуналаз, куке быдэс инкуазь зарниен шобырске. Улон сюрестылэн зарни сӥзьылэз будӥсь пиналъёсмылы гажан мылкыд пыӵатэ, соос тау каро улонады лэсьтэм ӟеч ужъёсты понна. Тӥ асьме историмылэн висъяны луонтэм люкетэз. Тӥ улӥды Атыкай музъеммы понна, нош со понна номыр пунэмзэ ӧд куре. Ми ваньмы йыбырттӥськом со понна, кинъёс вань улонзэс сётӥзы вордскем шаерзэс юнматон понна, кинъёс кылдытӥзы асьмелэсь узырлыкмес, кинъёс кышкыт аръёсы утизы Родинамес. Тӥ номырин мертаны луонтэмзэ лэсьтӥды, улонамы кылдытӥды чебер, чылкыт но узыр кужым, со азьланяз но будӥсьёслы адӟем карымон луоз. Ми со узырлыкез азьланяз но юн утьыса возьыны кулэ. Ми ваньзэ лэсьтӥськом, та секыт вакытэ шаермылэсь узырлыксэ утён понна. Со Удмуртиын вань гражданъёслы мед юрттоз ӟечгес улыны, азьланезлы оскыны. Озьы гинэ асьмеос быгатом тӥледыз куанер улонлэсь утьыны, нылпиостылы, соослэн пиналъёссылы ӟечезлы осконэн улыны. Тупаса улон но шудбур тӥледлы! Тӥлесьтыд улон-вылондэс котьку шунтыса мед улозы пиналъёсты но соослэн нылпиоссы. Ӟеч малпанъёсты но осконъёсты мед быдэсмозы. Удмурт Республикаысь Правительстволэн Тӧроез Н. А. Ганза. Валэктэ юрист Сэрегез дася адвокат Лилия Шкляева Анай-атайёс кельтӥзы юртъер Анай-атайёсы кулӥзы кылем арын. Ми выжим 1994-тӥ арын лэсьтэм юртазы. Табере прописка кулэ. Гурт администрациын валэктӥзы, со понна нырысь лэсьтоно кельтос (наследство) басьтэм сярысь бумагаос. Шонер-а куронзы? Документъёс лэсьтытӥ но, соосты нотариус киысь басьтоно дунэн. Коньдонмы ӧвӧл. Прописка кулэ уже пырыны но. Ма кароно? Оло, судэ вазиськоно? Н. Максимова. Дэбес район. Соку ик вералом: тӥледлы регистрация (тӥ гожтӥды - прописка) ортчытыны пумит луон - законэз тӥян ӧвӧл. Суд тӥледлы уз дурбасьты, малы ке шуоно, кельтослы (наследстволы) праводы сярысь свидетельстводы тӥляд ӧвӧл. Кельтос басьтэмын лыдъяське кык учыре: 1. Адями зэмен ик кузёяськыны кутскиз ке кылем ваньбурен. 2. Нотариатъя ёзэ со сётӥз ке кельтос басьтэмез сярысь курон. Та ужез лэсьтоно, кельтос сярысь тодмо луэм бере куать толэзьскын. Вунэтэмын! Каракулино ёросысь куинь бадӟым гуртын гинэ уло поръёс. Озьы ке но, та палан вордскизы но будӥзы туж тодмо гожъясьёс. Ми, поръёс, данъяськиськомы соосын. Пӧлысьтызы одӥгез - Ныргында гуртын вордӥськем но будэм мурт Илья Михайлович Токмурзин-Ломберский. Кыкетӥез тодмо гожъясь - Валентин Борисович Исенеков. Ас вакытаз туж данъяз быдэс Каракулино ёросэз но татысь Усть-Сакла гуртэз. Нош али со чылкак вунэтэмын, шуыны луоз, Марий Эл шаерысь пресса но телевидение Валентин Борисович сярысь дырын-дырын ивортыло ке но. Ӟеч нимзэ пыраклы тодэ кельтон сярысь нокин уг сюлмаськы, улонысь та адями алигес гинэ ай - 1988-тӥ арын 28-тӥ июне - кошкиз ке но. Со герӟаськемын, дыр, гожъясьлэн ӵыжы-выжыосыз, Усть- Саклаысь адямиос, "Марий ушем" огазеяськон та ужпум сярысь кивалтӥсьлы ивортымтэен. Ӟеч прозаиклэн тодмо нылпи гожъясьлэн, кылбуръёсын, веросъёсын, кузьмадёсъёсын, тодмо пор кырӟанъёсын книгаос кылдытӥсьлэн Валентин Борисович Исенековлэн нимыз вунэтэмын медаз луы шуыса, милемлы, Каракулино ёросын улӥсьёслы, сюлмаськоно, дыр, Усть-Саклаысь одӥгезлы ульчалы та адямилэсь нимзэ сётон, та учырлы сӥзьыса, буре ваён пул юнматон но сое сӥё-дано усьтон сярысь. Оло нош, тазьы кароно: писательлэн улэм коркаез борды юнматоно таӵе пул: та юртын улӥз тодмо пор гожъясь, пиналъёслэн матысь эшсы, пор нылпиос понна "Ямде лий" ("Дась лу!") газетын кема ужам адями, трос тодмо пор кырӟанъёс кылдытӥсь Валентин Исенеков. Нош вордӥськемез дырысен сизьымдон ар тырмонэн валче (та учыр луоз 2005-тӥ арын мартэ) малпаськоно, дыр, ини вордӥськем шаераз синпелет кылдытон сярысь но. Та уже мылысь-кыдысь мед пыриськысалзы "Марий ушем" огазеяськонлэн Ватка но Кам улосысь ёзэз, озьы ик - ёросысь азьветлӥсьёс. Р. Токмурзин. Архивысь документъёсъя Удмуртия ЪЪ дауре 1945-тӥ ар 1945-тӥ ар быдэс дунне вылын историе кылиз фашистской Германиез Вормон нуналэн. 9-тӥ мае вазь ӵукна ик Москваысь радиостанциос ивортӥзы, тушмон быдэсак пазьгемын шуыса. Нырысь ик ивортонэз кылыса, Удмуртиысь вань городъёсысь но гуртъёсысь площадьёсы но урамъёсы калык люкаськиз репродукторъёс котыре. Пачылмем шумпотон адямиосты огазеяз. Кӧня ке час куспын городъёс но гуртъёс чеберскизы горд флагъёсын, бадӟымесь панноосын, Сталинлэн, партилэн, правительстволэн кивалтӥсьёсызлэн но Советской Союзысь тодмо геройёсызлэн туспуктэмъёсынызы. Городъёсын митингъёс кутскон сярысь ивортылӥзы заводъёслэн гудокъёссы. Быдӟым Отечественной ож вань калыклы туж секыт йӧтӥз. Вормон нунал сярысь ивор вань сазь адямиосты кудӟытӥз кадь! Берло ини уно аръёс ортчыса гинэ тодмо луизы трос тырмымтэос, янгышъёс, ватыса лэсьтэм урод ужъёс. Вормонлы кужымзэс сётэм адямиос но йӧскадь ӧз улэ. Котьма ке но, Вормон вал - таиз вань калыклэн вераны луонтэм шумпотонэз. Немецко-фашистской гыжкалъёслы пумит сэзь но геройлыко нюръяськемзы понна, СССР-лэн орденъёсыныз но медальёсыныз пусъемын Удмуртиын вордскем 60 сюрслэсь уно воинъёс. Сю палаезлы сётэмын Советской Союзлэн Героез дано ним, Евгений Максимович Кунгурцевлы - кык пол. Промышленность, гурт но культура удысъёсысь кык сюрс азьмынӥсьёс озьы ик пусъемын орденъёсын но медальёсын, 377 сюрсэз - "Быдӟым Отечественной война аръёсы ӟеч ужамез понна" медален. Вормон азьын, Обороная кун комитетлэн косэмезъя, нимысьтыз радиоаппаратура поттэмез понна, Сарапулысь Орджоникидзе нимо радиозавод пусъемын Ужысь Горд Знамя орденэн. Воткинскысь машина поттӥсь заводлы сётэмын Ленин орден. Нош ноябре Удмуртия пусйиз автономия басьтэм дырысен 25 ар тырмонзэ. Улон азьпала вамыштӥз, вормонтэм шуг-секытъёсты вормыса... Калык туж трос быриз. Тужгес но - пиосмуртъёс... Но чидаз. Вотка карын Вормонлы сӥзем праздник 1945-тӥ арын 9-тӥ мае тазьы ортчиз. С. Некротюк, Удмурт Республикаысь Кун архивысь валтӥсь специалист. Вить, дас, сю ар ортчыса но... Вить ар... Та дыр куспын нылпилэн вамышъёсыз юнмало, со нырысь быгатонлыкъёссэ возьматыны вуэ. Нош нылпи сад яке школа сярысь вераськон мынэ ке, татын сомында ик шумпоттӥсь вамышъёс, кӧня отын нылпиос. Ӵапак вить ар талэсь азьвыл Удмурт Республикаысь Правительстволэн нимысьтыз постановлениезъя Ижын усьтӥськиз удмурт нылпиослы школа-сад. Нырысь-валысь солэн улонэз кутскиз 81 номеро нылпи садын, собере та вӧзы ватсаськиз на 28 номеро нылпи сад. Кивалтӥсе юнматӥзы Калыкез дышетонъя министерствоын ужасез Ольга Константиновна Шиловаез. Школа-садлэн нырысетӥ ужпумез - городысь удмуртъёслэсь нылпиоссэс асьме калыклэн ӟеч сямъёсыз вылын дышетон. Но та ужпумез быдэсъяны капчи ӧвӧл, пумтэм шуг-секытъёс кылдо, уката ик - удмурт анай-атайёс нылпиоссэс асьсэ кылын вераськыны дышетымтэен. Озьы ке но, вамыш бӧрсьы вамыш лэсьтэмын ини: та школаын удмурт лулчеберет пушйыны ӧдъяз. Сыӵе осконэз уката но бадӟыматэ кылем арын та школалы Куӟебай Гердлэсь нимзэ сётэмзы. Табере со нимаське Удмурт кун национальной гимназия. Куӟебай Герд нимо гимназия 26-тӥ сентябре вить ар тырмемзэ пусйиз. Удмурт кун национальной театр тырмемын вал жингрес нылпи куараосын. Котькудӥзлэн киосаз - сяськаос. Экран ӝуатскиз но - вить ар талэсь азьвыл школае нырысьсэ лыктэм нылпиослэн тусбуйёссы адскизы. Табере соослы быдэн дас кык арес ни. Тани асьсэос но пальпотыса пото сцена вылэ. Соосын ӵош - дышетӥсьсы Ольга Константиновна. Ваньмыз туннэ шумпотонэн пачылмемын. Удмурт гимназиын ужасьёсты но дышетскисьёсты ӟечкыланы лыктӥллям Кун Кенешысь комиссилэн кивалтӥсез А. Г. Красильников, Правительствоысь калыкез дышетон удысын лицензиосъя комитетлэн тӧроез А. В. Еременко, калыкез дышетонъя министр Л. Г. Захарова, нациосын ужанъя министрлэн воштӥсез Е. В. Петрова, Дышетӥсьёслэсь тодон-валанзэс будэтонъя институтлэн директорез Н. А. Шкляева но мукетъёсыз. Ваньмыз пусйизы, та национальной гимназия удмурт интеллигенциез будэтонын валтӥсь интыын луыны кулэ шуыса. Со понна арысь аре юнматоно солэсь материально-технической инъетсэ (вераськон мынэ нимысьтыз юрт пуктон сярысь), сэзьгес пыӵатоно выль дышетон технологиосыз, со дыре ик юнгес пыӵатоно татчы удмуртлыкез. Татын дышетскем нылпиос ӟеч тодонлыкен висъяськыса дышетскыны пырыны мед быгатозы Россиысь пӧртэм вузъёсы. Кун Кенеш гимназилы кузьмаз вить туала усто компьютеръёс, туж кулэ луись дуно книгаос. Бибилиотечка кузьмаз Нациосын ужанъя министерство но. 30 сюрс манет уксё сётӥз Калыкез дышетонъя министерство. Та министерстволэн данъян грамотаосыныз пусъемын национальной гимназиысь дышетӥсьёс Нина Владимировна Сунцова, Надежда Тихоновна Куртеева (директорлэн воштӥсьёсыз), Ирина Александровна Черепанова, Татьяна Михайловна Волкова, Надежда Петровна Жуйкова, Надежда Ивановна Демакова но Валентина Григорьевна Широбокова. Профессор Ф. К. Ермаков мылкыд кариз, Куӟебай Гердлэсь нимзэ нуллӥсь гимназиын дышетскисьёс та бадӟым адями кадь визьмо, йӧно луыны мед тыршозы шуыса, Кузьма Павловичлэсь калыкез югдытонын бадӟым уж лэсьтэмзэ пусйиз. Та мылкыд борды итӥськизы Вавож ёросысь калыкез дышетон ёзэн кивалтӥсь Л. В. Лукиных но Гурезь- Пудга школалэн директорез А. М. Егоров. Дас, кызь, сю ар ортчыса но та гимназиысь мед потозы туж адӟем карымон адямиос, шуиз Анатолий Максимович. Нош нылпиослэн фольклор коллективзы Ижысь эшъёссылы кырӟан-веранъёссэ кузьмаз на. Сцена вылын ас быгатэмзэс италмас усьтӥськем кадь возьматӥзы та гимназиын дышетскисьёс но. Хореографсы И. А. Черепанова кивалтэм улсын соос "Нуны веттан гур" но мукет композициос дасяллям. Усточи-мадись луыны быгатонлыксэ усьтӥз Ксюша Пельтемова. "Италмас" ансамбльысь калык эктонъя нылпи студия учкисьёслы кузьмаз ӟырдыт тыпыртонъёссэ. Нош ӝытэз ӝутскем мылкыдын нуизы Удмурт театрысь артистъёс Елена Сунцова но Игорь Моисеев. Т. Петрова. Рауф Каримовлы - 60 Куашкатыны ӧз сёты Элькунамы ньыль вынъёсты Каримовъёсты тодӥсьтэмез ӧвӧл, дыр, тужгес Рауфез, Равилез но Рафкатэз, нош Рашид военной вал. Рафкат али кивалтэ шаерысьтымы чебер киужъёсъя юртэн. Равиль - республикаысьтымы Национальной банкен, нош Рауф - Удмуртпотребсоюзлэн кенешезлэн тӧроез луэ. Со самой бадӟымез, Равиль пичиез. Кыкназы горд дипломен быдтӥзы Казаньысь финансово-экономической институтэз, Рафкат - Ижысь механической институтэз (али со кун технической университет). Ньыль вынъёс вордскемын но будэмын Можга районысь Люга посёлокын. Рауф Мухаметовичлэн тунсыко но аспӧртэмлыко улон сюресэз ортчиз. Ужаны кутскиз огшоры рабочий луыса Люга лесопунктын. Со Кизнер леспромхозэ пыре вал. Собере комсомоллэн путёвкаезъя кошкиз Караганда улосысь Тимирдаысь "казахстан магнитка" лэсьтыны. Татын быдтӥз технической училищеез но экскаваторщик луиз. Куинь ар ВВС-ын служить кариз. Куатьтонэтӥ аръёсы Алексей Косыгин экономической реформа ортчытон борды басьтӥськиз. Тӥни ӵапак со вакытэ, экономистъёс но финансистъёс трос кулэ луозы шуыса, Рауф Каримов 1966-тӥ арын институтэ пыриз. Конкурс пичи ӧй вал, одӥг интые 4 мурт нюръяськиз. Бырйиз коньдон но кредит люкетсэ. Егит экономистлы, горд дипломен быдтэмлы, право сётӥзы аспирантурае пырыны яке кытчы мылыд потэ отчы уже интыяськыны. Рауфлэн тодосчи луэмез ӧз поты, бертӥз вордскем палъёсаз. Нош практиказэ ортчиз вал шаерысьтымы Коньдон ужпумъёсъя министерствоын. Отчы ик ужаны но ӧтё вал, но куриськиз гуртэ. Ватонэз ӧвӧл, котькудӥзлэн городэ кылемез потэ вал. Егит специалистлы соку ик оскизы Можга райисполкомысь коньдон ужпумъёсъя отделэн кивалтыны. Со вал уго институтысь профкомлэн тӧроез, парткоме быръем адями. Общественной ужын со юн кыдаз, калыкен вераськыны, одӥг кыл шедьтыны дышетскиз. Оло сое, оло мукетсэ лыдэ басьтыса, Рауф Мухаметовичлы татын кема ужаны ӧз сётэ. Вить ар ортчыса, партилэн горкомаз ӧтизы но меӵак шуизы, ачид, пе, адӟиськод райпо син азьын лябӟе, куашка, пумтэм лушкаськонъёс, сиён-юонэз изъянтон учыръёс. Одӥг уй малпаськыны дыр сётӥзы ик, кузпалэныд, пе, кенеше. Со вал 1977-тӥ ар. Та луиз кооперацие лыктэмез. Рауф Мухаметович шуг-секытъёслэсь ӧз кышка, гуртын вузкаронэз умоятон, солэсь инъетсэ юнматон борды ӝабыр-ӝабыр басьтӥськиз. Вакчи дыр куспын 40 выль магазин, 3 вузкарон центр (Бадӟым Учаын, Нышаын но Пычасын) лэсьтӥзы. Можгалан пуктӥзы чебер универмаг, лэсьтӥськон материалъёс вузанъя магазин, колбаса поттон цех но мукетсэ. Оглом вераса, кооператоръёс огсыр но пайдаё ужаны ӧдъязы. Нош Рауф Мухаметович СССР дыръя кооператоръёслэн вань съездъёсазы ветлӥз, делегатэ бырйылӥзы. Можгаысь вузкарисьёс йыг-йыг пыд йылазы султӥзы, нош Рауф Каримовез, куинь ар ортчыса, Удмуртпотребсоюзлэн азьвыл тӧроез Константин Гуляев аслыз воштӥсе кураны ӧдъяз. Но Рауф соглаш ӧз луы. Эшшо вить ар ужаз на бӧлякъёсыз понна. 1985-тӥ арын УПС-э лыктоно луиз, экономика ужпумъёсъя предлэн воштӥсез луиз. Дыр ӝог ортче. Рауф Мухаметович вить арзэ ӧз но шӧдылы кадь, лобӟизы. Вуиз огыр-бугыр вакыт, рынокен экономикае выжон. Дунъёсты лэзизы, рынок, пе, сое ачиз радъялоз. Ӵапак та секыт дыре Рауф Мухаметовичез быръё Удмуртпотребсоюзлы кивалтӥсе. Соку ваньмыз кыляз кадь, огсыр ужан быриз. Калыклы туж кулэ удыс коньдонтэк но вузъёстэк кылиз. Кызьы потоно таӵе югдурысь, мар кароно? Табыдӟа песьтэрез ныпъяд бере, табере сое, секыт-а, ӧвӧл-а, одно нуоно. Кызьы шуо, таӵе дыре котьку валантэм решениос кутӥсько, тупасьтэм амалъёс пыӵатӥсько. Югдурез котькызьы солань-талань бергаты, гуртын вузкаронэз утёно вал. Кулэ вал райпоослы выль кивалтӥсьёс, таӵе условиосын пайдаё ужаны быгатӥсь адямиос. Мар бен, Рауф Каримовлы капчи ӧй ке но вал, выльдӥськон аръёсы ваньмызлэн сямен райпоослэн тӧрооссы воштэмын, вуж амалъёсын ужась кивалтӥсьёсын люкиськизы. Одӥг Кизнер райпоын гинэ кельтэмын. Предъёсы пуктылӥзы асьсэ ужасьёссэс ик, валтӥсь бухгалтеръёсты, экономистъёсты но музонзэ. Палэнысь одӥг муртэ но ӧз кутэ. Азьло кызьы лэсьто вал, колхоз кузё хозяйствозэ куашкатэ, сое та удысэ лэзё вал, райпое кивалтӥсе юнмато. Али сыӵе амалэн ужан быдтэмын. Рауф Каримов солы пум понӥз. Туннэ озьы ик пусйыны кулэ, магазин пичи-а, пайда сётэ-а, уг-а - одӥгзэ но ӧз пытсалэ, нош выльёссэ каллен усьтылӥзы. Азьло колхозъёс но совхозъёс магазин но мукетсэ пуктыны кӧня ке юрттылӥзы, табере гурт хозяйствоослэн сыӵе луонлыкъёссы быремын, шуыны луоз. Бен, Рауф Мухаметовичлэн сюлмаськеменыз, удыс утемын, инъетэз уката юнматэмын, гуртын вузкарон секытэн ке но мынэ, каллен-каллен умоя. Тани ар бырытозь, туэ УПС чакла 48 вузкарон инты усьтыны. Соос ужаны ӧдъялозы сыӵе гуртъёсын, кытын магазинзы ӧвӧл. Вузкарозы ас доразы нуналмысь кулэ луись вузъёсын. Озьы ик умоя калыкез сюдон. Берло дыре, Рауф Каримовлэн кичӧлтэмезъя, вузкарисьёс бытовикъёслэсь но ужзэс быдэсъяло, аптекаос усьто. - Ми одӥг магазинэз но ӧм ворсалэ, - шуэ Рауф Мухаметович.- Арысь аре тросгес вузкариськом, уногес сиён-юон поттӥськом, заготовкаосты будэтӥськом. Тӥни соин миым вань бюджетъёсы кооператоръёс 130 миллион манет выт тыризы. Берло дыре изъянтэк ужаськом, дыраз сётъяськом уждун, номыр понна, нокыӵе фондъёсы тыронъёсмы ӧвӧл. Гуртысь вузкарисьёслэн тыршемзы - быдэс Россиын тодмо. Удмуртпотребсоюз быдэс кылем ар но туэ ӝыны арскын ужамез понна нырысетӥ классной интые потӥз. Асьме сьӧры уисько на Псков но Новгород улосъёсысь кооператоръёс. Нош азинсконъёсын трос кужымез но визьмыз сётэмын Рауф Каримовлэн. Кызьы со ачиз шуэ, райполэн, пе, 90 процент ужез потэ кивалтӥсез бордысь. Солы пумит номыр уд вера. Кадръёс ваньзэ лэсьто. Озьыен, УПС-лэн ӟеч вамышъёсыз нырысь ик герӟаськемын солэн тӧроезлэн сюлмаськеменыз-тыршеменыз. Кӧня ке лыдпусъёс ватсало на. Дас ар талэсь азьло (1990 ар) Удмуртпотребсоюз пыжиськемъёс поттонъя Россиын 14-тӥ интыын вал, али 4-тӥын, юзмытӥсь юонъёсъя - 43 но 4, консерваосъя - 30 но 5, колбасая - 45 но 14, калыкез сюдонъя - 31 но 5, нош быдэсак вузкаронъя 37-тӥ интыысь 12-тӥе потэмын. Шаерысьтымы кооператоръёслэн кивалтӥсьсы Рауф Мухаметович адӟытэк кельтымтэ, тыршемез пусъемын Эшъяськон орденэн но солы сётэмын Россиысь вузкаронъя дано ужась ним. Нош данъян грамотаосыз сярысь веранэз ик ӧвӧл. Рауф Мухаметович туж лачмыт но востэм адями. Куаразэ ноку уз будэты, ачиз но ужасьёсыз азе юнэсь куронъёс пуктэ. Шоро-куспо мугоро воргоронлэн чиль сьӧд йырсияз пужмерез сое уката йӧно но чебер каре. Тӥни таӵе быгатӥсь но визьмо кивалтӥсьлы ӵуказе 60 арес тырме. Соин ик, Рауф Мухаметович, юн гажаса но тӥледын данъяськыса, сюлмысьтымы ӟечкыласьком вордӥськем нуналэныды но юбилееныды, мылкыд кариськом ваньзэ умойзэ, тужгес но шудо улон но юн тазалык. Геннадий Романов. Рауф Каримов. Туспуктӥз Владимир Беломорских. Я, вай, эше... Я, вай, эше, огпол юом на, Мон тон понна, тон мон понна... Дунне вылын медад ул юнме, Я, вай, эше, улон понна. Я, вай, эше, огпол юом на, Анай-атай вордэм понна... Уно кисьтэм синву понна, Я, вай, эше, керек эн кар. Я, вай, эше, огпол юом на, Яратонлы оскон понна... Медаз воштэ тонэ сӥлен, Я, вай, эше, керек эн кар. Я, вай, эше, огпол юом на, Пырем, кошкем эшъёс понна... Медаз вунэ соос ноку но, Я, вай, эше, буре вайса. Я, вай, эше, огпол юом на, Чал-чал гинэ асьме понна... Эн куректы тон мон понна, Я, вай, эше, керек эн кар. Я, вай, эше, огпол юом на, Я, вай, эше, пичи гинэ... Улон даур вакчи гинэ, Я, вай, эше, керек эн кар. Я, вай, эше, пичи юом на, Я, вай, я, вай, я, вай, я, вай... Медаз чиг пыд улад улвай, Я, вай, эше, вождэ эн вай. Ф. Суворов. Гурт улон "Улонлэн дэлетэз - тыр тысен веттаськись ю бусы" Завьялово рйонысь Якшур гуртэз шаерамы тодӥсьтэмез ӧвӧл, дыр. Нош данэ со потӥз муш кадь ужась калыкеныз, арысь аре басьтэм азинсконъёсыныз. Экономика ласянь ке верано, "Путь Ильича" колхоз пыд вылаз йӧн-йӧн султӥз Николай Петрович Тарасов кивалтон вакытэ, 60-тӥ-70-тӥ аръёсы. Та визьмо специалист, дышетскемезъя педагог, вань сюлэмзэ сётӥз, якшуръёсты ӟеч улонэ поттон понна. Туннэ "Путь Ильича" колхозэн-племзаводэн кивалтэ Валерьян Арсентьевич Никитин, Удмурт Республикаысь Кун Кенешлэн депутатэз. Вордскиз со Балезино районысь Пыбья гуртын. Армие ветлэмез бере дышетскиз Ижевскысь гурт удысъя институтын. Агрономлэсь дипломзэ басьтыса, куинь ар ужаз Вавож районысь "Путь к коммунизму" колхозын. 1986-тӥ арын семьяеныз ӵош улыны выже Завьялово районысь "Путь Ильича" колхозэ. Куинь арзэ ужа агроном луыса, нош 1989-тӥ арын колхозникъёс В. А. Никитинэз огкылысь пукто асьсэлы председателе. Егит специалист калыкез бордаз кыскиз вазиськыны, вераськыны быгатэменыз, либыт сямыныз, соин ӵош - чурыт куронъёс пуктэменыз. Котькыӵе ӟеч хозяйство мед луоз, но кивалтӥсез биньгозызэ ӧжытак музон пала кыскиз ке, дисциплина шальтралоз. Ваньзэ ведь быдтыны секыт ӧвӧл. Тӥни самой сыӵе вакытэ гуртэ вуиз егит визьмо агроном. Дас одӥг ар возе ни колхозэз. Ма шуод: якшуръёс ӧз янгышалэ, Никитинэз тӧрое пуктыса. Вормизы соос выльдӥськонлэсь зӥбетсэ но, шокчыны луонтэм пачкатӥсь кисъёссэ но. Якшуре трос гинэ куноос ветло. Сиыны-юыны шуыса уг, дышетско картофка будэтыны, сӥль-йӧл поттыны, чебер юртъер пуктыны. 1994-тӥ арын апрель толэзе татчы вуылӥз Россилэн нырысетӥ Президентэз Б. Н. Ельцин. "Путь Ильича" колхоз пуксемын Ижевскен артэ, бусыосыз йӧто ни город борды. Удмуртилэн шорсюлмыныз огласянь герӟа Воткинске нуись асфальт сюрес, мукет ласянь - чугун сюрес. Хозяйство 300 гектар вылын картофка будэтэ, сюро таза пудо вордэ. Кыскем йӧлзэ ачиз пакетъёсы тырыса, магазинъёсы келя, вӧй шукке, дасяське кефир но йӧлвыл поттыны. Кыкез но удыс пайдаен берытске. Сыӵе колхоз оскемын Валерьян Ареснтьевичлы. Со сяна, та чупрес, быгатонлыко воргорон мыло-кыдо пыриське республикамылэн общественно-политической улоназ. Кызьы пусйим ни, В. А. Никитин - Кун Кенешлэн кыкетӥ созывезлэн депутатэз. Быръемын "Удмурт кенешлэн" исполкомаз, юнматэмын Завьялово районысь Думалэн председателезлы воштӥсе, шаерысьтымы музъем ужасьёслэсь экономика ласянь куоэяськонъёссэ утёнъя алигес кылдытэм огазеяськонэн. Кызьы котькытчы вутске меда, шуоз, дыр, куд-огез. Валерьян Арсентьевичлэн валэктонэз одӥг: тонэ быръё бере, озьыен - оско. Кивалтӥсь понна солэсь вылӥ дунъет ӧвӧл ни. Туннэ асьмеос Валерьян Никитинлы ортчытом аспӧртэмлыко эскерон. Алфавитысь букваос юрттэмъя пыралом солэн пуш дуннеяз, усьтом ватыса возем малпанъёссэ - тодон-валанъёсын тырмытэм шыкыссэ. Анай. Та кыл мон понна котьмалэсь но дуно, анай - нырысь ик - улон сётӥсь. Со ке ӧй луысал, мон но югыт дунне вылэ ӧй вордскысал. Анае, Клавдия Сергеевна, али пенсие потэмын ни. Улэ Балезино районын. Вань даурзэ ужаз колхозын, бӧрысьгес - совхозын. Атаеным ӵош будэтӥзы куинь пиоссэс но нылзэс. Вынъёсы, атаймы сямен ик, шофёре дышетскизы. Мон но та ужысен кутски вал. Анаелы сӥземе потэ юн тазалык, кема мед улоз на. Курадӟыса ке но, со милемды вордӥз, шунтӥз, ваньместы калык радэ поттӥз. Ми ӵемгес дорад бертылыны тыршом. Аръёс ортчемъя, пумен юнгес валано вылэм анай-атай сюлэмез: кыӵе соос тонэ витё, макем мӧзмо нылпиоссылэн нылпиоссылэсь. Биньгозы. Та кыл соку ик тодэ уськытэ тӧро луэмдэ: кызьы биньгозыдэ возёд, озьы ик мынод, кудпала кыскод, сопала ик кожод. Аслыд ачид дунъет сётыны секыт, калык мед дунъялоз. Улон-вылонмы сярысь ке верано, со нюко-гопо, дырын-дырын туж бугырес. Огез нунал вӧй вылтӥ кадь ортче: уж пӧзе, ужамъя ужам потэ. Нош бӧрсяз ик вуэ секытэз, сьӧдэз нунал. Ма карод, инкуазен сётэм законэз уд вошты. Вакыт. Али тросэз ӝожтӥсько шуг-секытъёслы, асьсэлэсь лэсьтэм янгышъёссэс но погыльтыны выро туала вакыт вылэ. Нош мон адӟисько сое ортчем сюресмес чакламъя но, котькыӵе вапумлэн - аслаз секытэз. Учке ай, ку-о крестьян калык майбыр, ёрмытэк, курадӟытэк улӥз ни? Нош быдэс странамес ке басьтоно? Секыт шуыса огъя бӧрдӥд ке, озьы ик луоз. Куштӥськоно та малпанлэсь. Улон ведь котькудӥзлы одӥг пол сётӥське, соин ик ялан ӟечезлы осконо. Соку котыр дуннеед но чебергес, югытгес адӟиськоз. Мон сямен, ачид бордысь туж тросэз потэ: кыӵе улон сюрес ӵогод - сыӵе ик улод. Шуом, тыныд туннэ туж секыт, чида, эн чигиськы. Сюлмад ӟеч малпандэ ке возид, оскы, ӵуказе капчи луоз. Мон колхозникъёсылы ӵемысь шуисько: кызьы ужалом - озьы ик улом. Уродэз ведь улонысь ӝог тӧлӟе, малпанъёсы умоез гинэ кыле на. Газет. Зэмзэ ке верано, газеттэк мон одӥг нунал но улыны уг быгатӥськы. Со омыр кадь. Тодэм потэ, кин кызьы улэ, кин кызьы ужа, дунне вылын ма вылез. Сиськыны пуксьыкум но газет учкытэк уг чидаськы. Куд-огез верамъя, пиосмуртъёслэн, пе, со висёнзы. Озьы ик вань, дыр. Машинаен-а мынӥськод, пичияк шутэтскон вис-а шеде - ки улад газет медло. Информацитэк улыны секыт. Дан. Та кылэз мон герӟасал ужаз гажась калыкеным. Басьтом колхозмес ик. Арысь аре со азинске, шуг-секытъёсты ворме. Кивалтӥсь ноку но огназ табыдӟа хозяйствоез нуыны уз вормы. Нош коллективын, самой ӟечаз но, котькыӵе ужасез вань. Уродэз - ӧжытгес, умоез - тросгес. Сыӵеос вылын ик возиське колхоз, солэн данэз. Жаль, дырмы уг тырмы котькудӥзлы тау карон кылъёс вераны, доразы вутскыны. Уката но арлыдо пенсионеръёсмылы, кинлэн пельпумъёсыз вылын ӝутскиз но юнмаз туала хозяйстволэн инъетэз, экономикаез. Единоличник. Син азям соку ик пуксе хозрасчёт амалэн ужан. Коллективизация аръёсы ас визьмыныз улыны быгатӥсь крестьянэз кулак карылӥзы. Нош мон сыӵе адямиосты, туала улонысен учкыса, воксё музон сямен дунъясал - кузё шуысал. Гуртын улӥсь мурт али но котькудӥз ас понназ кузё, котькудӥз ас валамезъя нуэ хозяйствозэ, лыдъя пайда поттэмзэ. Пудо-а вордэ, картофка-а, бакча сиён-а будэтэ - одно ик мултэссэ вузалоз, кисыяз уксё пыртыны тыршоз. Нош уксёед ке вань - тон быгатӥсь, визьмо адями, ачид но, нылпиосыд но кураськыса уз ветлэ. Озьы ик колхозын но. Кузёез зол ке - калыксэ коньдонэн но, ю-нянен но возьыны сюлмаськоз. Рынок амаллэсь гурт удыс нокытчы но уз пегӟы. Жугиськон. Та верамез пӧртэм сямен валаны, луоз, дыр. Нош мон сое герӟасал политикаен, туала улон-вылонэнымы. 50-тӥ-60-тӥ аръёсы вордскемъёслы али шуг пыриськыны Россиен быръем капитализм пала нуись сюреслэн кожаз. Мон сое ас вылам шӧдӥсько. Поколенимы сыӵе: дышетским но будӥм комсомол, партия кивалтэм улсын, улон шоры учконмылэн мертэтэз но чылкак мукет вал. Отысь номыр уродзэ уг адӟиськы. Нюръяськон мынэ идея понна: кудӥз вормоз. Ӝажы. Соку ик син азе пуксё книгаосын тырмытэм ӝажыос. Азьвыл ведь тазьы шуо вал: кинлэн, пе, книгаез трос - со узыр. Духовной культура котьмалэсь но вылӥ дунъяськылӥз. Ӟеч литература понна черодъёсын сылылӥм, нош али котькыӵезэ басьты, коньдонэд ке вань, тырмыты книга ӝажыостэ. Со туж умой. Мон тросгес лыдӟисько аслам удысэя - музъем ужъя - литератураез. Куддыръя гуртэ туж жадьыса бертоно, номыр лэсьтэм, номыр борды кутскем уг поты. Та вакытэ йыре шуак кыӵе ке но юан лыктэ. Солы валэктон утчан вылысь бугыръяськисько книгаосы пӧлын. Жадем но быре, усем мылкыд но ӝутске. Ӝажы кыллэн мукет но валанэз вань. Ӟуч сямен вераса, сое "ниша" шуо. Таиз кыл уггес яра. Мон валамъя, со тросгес кельше люкон-басьтонлы. Шуом, вылӥын тынад ӟеч тодмоед, юрттӥсед ке вань - капчигес улод, нош ӧвӧл ке - ялан улӥе кылёд. Жаляса верано, политикаын та амал, тоно-моно карон, пумен ӵемгес кутӥське. Зона. Мон понна со - музъем, территория, мукетыз валанэ ӧвӧл. Кыӵе музъемез - сыӵе ик кузёез. Ӟег. Тодӥськоды-а, малы мон агрономе дышетскыны мынӥ? Ӵапак шепаськись ӟег бусылы синмаськыса. 10-тӥ классын дышетскыкум та профессиез бырйи. Улонлэн дэлетэз, данэз мон понна кутске ӟег бусы, ӟег нянь бордысен. Кӧняез тодмо художникъёсмы весяклы суред вылэ пуктӥзы тыр тысен веттаськись пумтэм-йылтэм ю-нянь бусыосты! Мыным туж яра бусы шорын огназ сылӥсь писпу. Агрономъёсты весь косо вал соосты быдтыны: юнме, пе, муосты басьто, гырыны-кизьыны люкето, нош кораны жаль. Котырскиськод бусыетӥ, вуиськод беризь доры, саюлаз пуксьыса ӧжытак шутэтскиськод. Вань жадем ортче. Нош ик азьлань мынӥськод. Тыр тысё шепен лэйкась ӟег бусы мон понна, аръёс ортчемъя но, улонлэн номырин ӵошатонтэм дунъетэз-символэз. Ӝӧк выламы туэ ӵемгес тӧдьы нянь ке но пуктӥськом, ӟегез - дэлетогес, мугорлы со кужым сётэ. Инмар. Вӧсяськыны, инмарлы оскыны милемыз ӧз ке но дышетэ, дунне вылын маке но вань. Удмуртъёс оскылӥзы инкуазь кужымъёслы, котькудӥзлэн ас инмарез вал. Черке ум ке но ветлӥське, шуге-леке шедьыса, соку ик инмарез тодэ ваиськом: медаз кушты, мед утёз шуыса. Но юрттэмез малы ке но уг адскы, ачид ке ӧд сюлмаськы - тон интые нокин уз лэсьты. Но, котьма ке но, дунне вылын осконтэк улыны уг яра. Кинлы ке но, малы ке но осконо. Азьло инмарез воштылӥз партия, али со но ӧвӧл ни. Йӧлвыл. Йӧллэн самой ческытэз, нӧкыез. Кин меда йӧлвыллэсь алӥськоз? Колхозамы ми созэ но, тазэ но поттӥськом, пакетъёсы тырыса келяськом Ижевскысь магазинъёсы. Тросэз председательёс милемлы вожъясько, капчи, узыр, улӥськоды шуыса. Но со понна трос гинэ пӧсям вудэ поттоно. Скалэз ведь кызьы сюдод - сомында ик йӧл кыскод. Колхозын одӥг нюжа турын но инмысь уг усьы, ваньзэ дасяно, шутэтсконэз валатэк, гужембыт ужано. Зэм, туала вакытэ йӧлвыл пӧлын пыласькисьёсыз но ӧжыт ӧвӧл. Мурт чотын узырмемъёс асьсэ нюлам вуэн ваньбур ӧз люкалэ, соос "пульдо" пӧям калык чотын. Нош колхоз нокинлэн но кисыяз уг пыры: кӧня ваньбур поттӥськом - сомында ик колхозникъёсмылы сётӥськом. Уждун дыраз тыриськом, пунэмаськыса ум улӥське. Со понна тау кароно вань калыкмылы. Калык. Нырысь ик мон понна со - якшур калык, колхозникъёс, кинэн нуналлы быдэ пумиськылӥськод, одӥг малпанэн, одӥг сюлмаськонэн улӥськод. Тон ке соосты валаськод, соос ке тонэ валало - озьыен, ваньмыз умой луоз. Балезино пала ке вуисько, отын асьсэ пиен лыдъяло - отын вордскемын, вавожъёсын ке пумиськисько - тодмало, ӟечбуръясько - отын ужан сюресме мытӥ, отысь аслым кузпал шедьтӥ, Завьялово район сярысь ке верано, татчы выжыосме лэзи ни. Кинэн ужаськод - со борды ик дышиськод, лэся. Якшуре лыктэммы бере, пиналъёсмы нырысь-валысь бӧрдо вал, кытчы милемды ваиды шуыса. Гурт бадӟым, калыкез трос. Нош али, дор паламы бертӥськом ке, ӝоггес Якшуре курисько ни. Ленин. Быгатэмея утеме потэ та нимез, шукыръяськон вакытэ но ӧм куштӥське "Путь Ильича" колхозлэсь. Туннэ но ужан кабинетам самой адскон интыын ик - В. И. Ленинлэн портретэз. Б. Н. Ельцин дорамы ветлыку но юан сётъязы вал хозяйстволэн нимызъя. Ас малпанмылэсь ми ӧм куштӥське, вылаз ик, со вакытъёсы колхоз правление азе Ленинлэсь бюстсэ пуктӥм на. Одӥгъёсыз памятниксэ, портретсэ но куштӥзы, ми, ӧчкарыса сямен, утялтӥм. Малпасько, уг яра огкутскемен улонысьтымы вань ӟечсэ кесяса-пожаса быдтыны, ми будэмын но дышетскемын Советской власть кивалтон аръёсы. Дун тырытэк, тодон-валан басьтӥм, сюлэммыя уж шедьтӥ. Мар отын уродэз? Октябрь революция весяклы историе пыремын, сое ӵушыса уд кушты, адями сюлэмъёсысь - уката но. Мон оскисько, вуозы на сыӵе дыръёс, куке история нош ик берытскоз Ленинлэн нимыз, солэн дышетэмъёсыз борды. Соку утчаломы на куштэм памятникмес но, дыртыса пазям книгаосмес но. Дунне вылэ одӥг пол вордске Ленин но, Наполеон но, Моцарт, Бетховен но. Со - история,. Мыйык. Таиз кыл туж тумошо потӥз (серекъя). Юри мыным туслатыса сётэмын, дыр. Малы мыйык нуллӥсько? Ачим но уг тодӥськы. Пинал дыръя туж эскерем потэ вал кызьы меда йӧногес адсконо: мыйыкен-а, мыйыктэк-а? Озьы но, тазьы но чакласькод. Мон дыши ни кадь мыйыкен ветлыны. Нош озьы ке учконо, со шудме но, данме уг будэты (серекъя). Ныпъет. Та кыл мыным туж кельше, солэн нясь-нясь удмурт шӧмыз. Песянаймы но ныпъет вурылӥз, вынмес, сузэрмес отын нуллӥськом вал. Али адӟиськод: кунгож сьӧрын но пиналъёссэс ныпъетэн нулло, асьмелэн егит семьяосмы отысь адӟем каро кадь. Нош та амал, мон малпамъя, потэмын ӵыжы-выжыосмы бордысь, финн-угор дуннеысь, кин тодэ, оло, ӵапак удмурт гуртысь. Отпуск. Жаляса верано, колхозлэн тӧроезлы умой-умой шутэтскон уг шедьылы. Котькытчы тон мын кылем гужем йырад - одӥг малпан, пушкад - одӥг сюлмаськон: колхоз. Уката но отпусктэ гуртын ке ортчытоно, нокытчы потатэк. Улытозямы нырысьсэ семьяеным ӵош одӥг арнялы вуылӥм Сочие, Сьӧд зарезь дуре. Та дырозь кышноелэн но, пиосылэн но зарезь вуэз шӧмъямзы ӧй вал. Туж яраз! Синмаським выжыкыл кадь городлы, отысь инкуазьлы. Кыӵе но будосъёс уг будо, кыӵе но сяськаос уг сяськаясько! Быдэс дуннеысь мерттэм тропической писпуос паймыто асьсэлэн чеберенызы. Дунне вылын зэмен но рай ке вань, со - Сочи. Ӧчес (ваменэс). Асме мон ваменэсъёс пӧлы пыртӥсько. Огласянь, сыӵе сям урод, дыр, но куддыръя ваменэс но луыны кулэ. Ваньмызлы сётскыса, ужед ноку но уз пӧрмы, тӧро кыл кутэ ваньмыз понна. Соин ик, калыкез кылзыса, аслад йырыныд улоно но ужано. Правленилэн кенешъёсаз, кылсярысь, милям туж ӵем вераськон пота вуж техникаез воштос ёзъёслы кесян-сэрттон сярысь. Озьы ик пумитъяськисьёс шедё колхозникъёслы ю тысен натуроплата тырон пумысен. Мон татын соосыныз но, таосыныз но соглаш ӧвӧл. Вуж техникаез быдтыса, маин выльзэ басьтом? Яке калыкез уждунтэк кельтом-а? Ю тысен но озьы ик: ма понна адями колхозын ужа, пудозэ сюдымон но юрттэт сётыны ӧм ке быгатэ? Пенсионеръёсты но палэнтоно ӧвӧл, соос вань улонзэс, вань тазалыксэс колхозэз ӝутонэ сётӥзы. Мон эшшо огпол пусйисько на: куддыръя ваменэс, ӟугырес но луыны кулэ. Пужым. Син азям нош ик пуксе Якшур гурт, луоё бусыосмы. Тулыс тӧл ке ӝутске, поръясь тузон интыысь интые лобе, быдэс гурт пурысь шобрет улэ ыше. Зэм, туннэ та адӟон палэнтӥгес кошке ни, азьвыл аръёсы сямен, луо возьёсты, бусыосты уг согы. Тау карыны кулэ Николай Петрович Тарасовлы - визьмо кивалтӥсьлы. Со кутскемъя, Якшур котыртӥ мерттэмын вал пужым нюлэс. Самой та яг сётэ тазалык но кужым, сюдэ губиен но. Пужым, мон малпамъя, со батыр, мотор писпу. Малы ке-а удмуртъёс вашкала дырысен асьсэлы жин-жин шуккиськись юртъер ӝутылӥзы. Радио. Котьма ке но, сюлэмлы "сиён" басьтон ласянь нырысь интые мон пуктысал газетэз, со бере - радиоез. Уг яратӥськы, корка пушкын чал-чал ке, одно ик лэзисько радиоез. Пумен сое кылзӥсько, пумен газет лыдӟисько Сэрег. Котькуд адямилэн луыны кулэ, дыр, аслаз улон сэрегез, собере - яратон сэрегез. Со тыныд котькыӵе вакытъёсы юрттэ, кужым сётэ. Табань. Удмурт калыклэн огез национальной сиёнэз. Кӧня гурт, кӧня район - сомында ик, дыр, пыжиськон амалэз. Ми палан табанез йӧлвылын яке щербетэн (коньыт вуэн) сиё. Вавожын но Завьяловоын - зыретэн. Зырет шуэмысь, ӵемысь гинэ тодам ваисько варманае доры нырысьсэ куное лыктэмме. Со милемыз зыретэн табанен утялтӥз. Ноку но шӧмъяме ӧй вал бере, малпай, йӧлвыл кадь ик, дыр, шуыса. Ымам понӥ но - мыным со ӧз яра. Берлань уд потты ук! Уката но - ӵыжак выль эмеспи ай. Озьы ик сии, ӝӧк сьӧрысь калыкен ӵош потӥ. Соку вань улытозямлы зыретэн кӧты тыриз кадь. Али но Завьялово районысь гуртъёсы куное мынӥськом ке, одно ик дэмлалозы: "Си, пие, си. Пӧраськеме уг яра шат?" Уг тодо ук, мыным со уг мыны шуыса (гиӵ-гиӵ серекъя). Анае бертэммылы быдэ губиен перепеч пӧраны тырше. Тодэ угось, милемлы губи йӧскадь уг шедьылы шуыса. Шаньги пыже. Пыжиськемъёсыз котьку но ческыт пӧрмо. Табань сярысь ке верано, огпол мон селтаослы пайми. Маин но соос уг пыжисько: чорыген, сӥлен, губиен! Ӝӧквылзы туж узыр адске, кинлы ма яра -сое ик си. Учыр. Улонам котькыӵе учыръёсын пумиськылыны кылдылӥз ни, но тужгес но вунонтэмез - Ельцинлэн гуртамы вуылэмез. Россилэн Президентэныз одӥг ӝӧк сьӧрын пуким, огшоры адямиен кадь, ӵош кунояським. Кытын но ку сыӵе учыр кемдоз на? Борис Николаевичен пуксьыса кенешеммы бере, сюлэме пӧртэм малпанъёс кылизы. Зэмзэ ке верано, солы мон сокем ик ӧй синмаськы, но ӟеч синмын шораз учки вал: улонэз вала, юрттыны но сюлмаське кадь. Нош али, "Царь Борис" киноез учкыса, оскыны секыт: кызьы ас парламенттэ ыбылод, кызьы калыкед шоры, ӵош ужам эшъёсыд шоры пушкаосты урдод?! Йыре уг тэры. Мон соку но, Якшуре вуылыкуз, малы ке но малпай вал, Ельцин мышкын кин ке сылӥсез, зол окружениез вань, дыр, шуыса. Одӥг адями уго нокызьы но собыдӟа удысэз уз вормы. Фамилия. Фамилия мон понна - вань ӵыжы-выжые. Песятае, солэн песятаез - ваньмыз крестьянъёс. Туж тодэме потэ вал фамилимылэсь кызьы кылдэмзэ, но валэктон ӧй шедьты. Быдӟым Отечественной война кутскыку, атаелы 16-17 арес вылэм ай. Нуо сое трудовой фронтэ, Пермьысь огаз военной заводэ. Отысен келяло Владивостоке, озьы ик - военной заводэ. Нош анаймы шеде Ижысь пыӵал тӥрлык поттонтӥе. Мугоры, пе, сокем пичи вал, пыд улаз ящик пуктыса, станок сьӧрын ужаз. Асьмеос али ӝожтӥськиськом, секыт улӥськом шуыса. Нош мӧйы поколение мае чидаз? Хозяйство. Нырысь ик - колхоз, кыкетӥ интыын - аслад юртъеред. Целина. Та кылэз мон герӟасько Л. И. Брежневлэн "Целина" книгаеныз. Сое институтысен пыр-поч дышетӥм, та книгая тодӥм, шуыны луоз, странамылэн историезлэсь бамзэ - выльвыл музъемъёсты ӝутонэз. Зэмен но, СССР со чотын нянь вылэ вуиз. Жаляса верано, та музъемъёс али нош ик аналмо. Мынам но ӵыжы-выжыосы отчы ужаны кошкемын вал, табере берен Удмуртие берто, улон интызэс, хозяйствозэс куштыса. Сыӵе калэ вуттӥз СССР-ез куашкатӥсь политика. Чагыр. Та буёл мыным туж кельше: чагыр инбам, чагыр ву. Мылкыды секыт дыръя яке уж ке уг пӧрмы, яратӥсько Кам дурын пукыны. Учкиськод зыл-зыл бызись шур шоры, вузэ маялляськод - вань уродзэ сьӧраз нуэ кадь, со интые мугоре выль кужым пыӵатэ, ужамъя ужам потыны кутске. Ӵог. Улонлэн ӵогез одӥг медло: шуккид ке - бӧрысь пороно медаз луы ни. Озьы ик решение кутонын но: кыл сётӥд - быдэсты. Школа. Ноку но уг вунэты нырысетӥ дышетӥсьме, Варвала Александровнаез, улонысь со кошкемын ке но ини. Мон сямен, вань ӟечез кутске школа парта сьӧрысен. Туж жаль, Россилэн туала кивалтӥсьёсыз дышетӥсез сокем улӥе пуктӥзы шуыса. Оскем потэ ӟеч воштӥськонъёслы. Ыштон. Та кыллэн пуштросэз секыт, но ма карод, сотэк улон ӧвӧл. Умойтэм решение кутӥд ке, ужад но, семья куспад но со одно ик ыштонэн берытскоз. Вылӥын ма гожтэмын, солэсь нокытчы уд пегӟы. Эзамен. Асьмеос нуналлы быдэ, уката ик тон кивалтӥсь ке, калык азьын экзамен сётӥськод. Мон понна, шонерзэ ке верано, тужгес но секытэз экзамен вал Россилэсь Президентсэ колхозамы пумитан. Нырысь-валысь ӧм но оске вал, Б. Н. Ельцин Якшуре лыктоз шуыса. Вуылӥзы "дышетӥсьёс" но: кызьы астэ возёно, ма сярысь верано. Кышканэ ӧй вал, озьы ке но, уйзэ ӧй кӧлы, сиён но кӧня ке нуналзэ ӧз мыны. Шӧдӥ туж бадӟым ответственность мон вылын шуыса. Ас поннад гинэ ведь кыл уд кутӥськы, вань удмурт калыкез, быдэс республикаез сомында вуэм куноос тон пыр, Якшур пыр адӟозы. Журналистъёс гинэ 130 странаысь лыктэмын вал! Дасям бумагазыя ӧй лыдӟы, ас малпанме, гуртын улӥсьлэсь шугъяськонъёссэ верай, Россилэн нырысетӥ Президентэныз пумиськон (котькыӵе со медло но) тодэ ваёнъёсы пыраклы кылёз. Юдэс. Син азе пуксе палдэм шелеп, юдэсэн-юдэсэн пазям музъем. Мынам малпанэ одӥг: кужым огазеяськем бордын. Одӥг адями но та улон-вылонын ассэ юдэсэн медаз лыдъя. Быгатэммыя гуртоосмылы пичи ке но, котьма ласянь юрттыны сюлмаськиськом. Тодмо ук, адями ёрмытэк ноку но уз вазиськы. Яратон. Со вылын возиське быдэс улон, семья кусып но уж. Калык ке тонэ гажа, яратэ - солэсь бадӟым дунъет вань на меда? Людмила Медведева. В. А. Никитин. Туспуктэмез Владимир Камашевлэн. Редакцилэсь: та нуналъёсы "Путь Ильича" колхоз пусйиз 70 ар тырмон юбилейзэ. Ми сюлмысьтымы ӟечкыласьком якшур калыкез та быдӟа праздникен но сӥзиськом ужаз эшшо выль вормонъёс, азинсконъёс басьтыны. Удмуртилы-80 Чагыр Дунай дурын Чагыр Дунай. Кӧня пол ини со вамен выжамын! Ӧз, милям солдатъёсмылы шур вылысь чебересь выжъёс вылтӥ мукет ярдуре потаны ӧз кылды. Мадьяръёслэн киосынызы, кужыменызы лэсьтэм выжъёс вез-вез вуын кыллизы. Кор сюрыосты, коръёсты Дунай гылъяз. Шур паськыт ке но, со вамен потоно. Тушмон пуке на куашкатэм юртъёслэн изъёссы сьӧрын. Дуринчи кар туж лек. Котьмар ке но, солы эрказъяськыны сётоно ӧвӧл ни - тузоно. Выжъёсты тӥяса, шур пыдэсы выйтыса, асьме солдатъёсты ӝегатыны малпаз тушмон. Янгышаз со. Ӝоген Дунай вамен потон выжъёс сазнамын вал. Тани машина вуэ чукинскоз кадь. Лэйка ке но выж, осконтэм ӧвӧл. Ми чагыр Дунайлэн мукет ярдураз лёгиським. Мышке кыле мадьяръёслэн шоркарзы - Будапешт. Вуэ выись муртлэн куро борды но кырмиськемез сямен, тушмон чигнакуз но ыбылӥське, котькуд писпу, корка сьӧрын возиськыны турттэ. Милемлы сутоно Кыкетӥ Украинской фронтлэсь штабзэ. Со азьпала кошкемын. Тани нош ик Дунай, Эстергом дортӥ но бызе со. Шур вамен потытэк сюрес ӧвӧл. Выльысь лэйкась выж вылэ пыроно. Солдатъёсын, техникаен тыро машинаос капчиесь ӧвӧл. Шур но чакласькыны, сак луыны косэ кадь. Азьпалан ай кык городъёс, озьы шуыны луэ ке. Бен, мукет сямен уд вера. Дунайлэн огпал ярдураз венгеръёслэн карзы - Комарам, мукет палаз - словакъёслэн - Комарно. Татын словакъёс вашкала дырысен уло ке но, пӧлазы шедё мадьяр гуртъёс но. Ми дугдӥм Мадьярскет-Бель черкогуртэ. Татысен кыдёкын ӧвӧл фронтлэн штабез но. Соин кусып возёно милемлы. Уйшор уй-а, нуназе шорын-а - отчы мыноно. Бадӟым гурт, трос ульчаосыз. Тушмон али гинэ татысь пегӟем. Солэн пытьыосыз шӧдӥсько на. Солдатъёсмы шоры кырыж учкисьёсыз но вань. Фашистъёс асьсэлэсь сямъёссэс пыӵатыса кельтӥллям, лэся. Война, солэсь умойзэ витёнэз ӧвӧл. Кӧня милемлы татын сылоно луоз? Одӥг-а, кык-а нунал, оло, быдэс арня, сое тодыны шуг. Мыным но ӧдӥг старшиналы (али но со син азям на, Мишенин Иван Дмитриевич) дэмлазы чебер, узыр корка интыяськыны. Малы ке со милемлы ӧз яра, пырим огшорыгес гинэ, аръёслы сётскыса вужмем юртэ. Милемлы удалтӥз. Кузё но кузпалыз туж умой пумитзаы. Пизы но нылзы номыр ӧз шуэ. Кӧлан интыен узыр ӧй вал уго та юрт. Бен, ӧм ёрме, ваньмылы койка но лапча шедиз. Люкытгес ке но вал - чидам. Ми татчы выжымес лэзён вылысь ӧм лыктэ ук. Оло, уйшоре ик ӝутсконо луоз. Трос пол озьы вал ини. Зэм, Мадьярскет-Бель гуртын милемлы ӝегано луиз. Война дугдон калэ вуэ ини. Асьме войскоос Берлинэз басьтон понна ожмасько. Мозмытэмын ни Дунай дурысь Братислава но Австрилэн шоркарез - Вена. Татын, Словакиысь мадьяръёслэн гуртазы, ми чылкак эшъяськыны вуим, шуыны луоз. Одӥг ӝыт, ужысь бертыса, коркалэн кузёез Янош комнатаямы пыриз. Шӧдӥське ини, солэн арлыдыз ӧжыт ӧвӧл шуыса. "Жадем вылэ, - шуиз со, - одӥг чарказэ зӥби, вождэс эн вае". Ӧръяськиз воргорон. Вань улэм-вылэмзэ маде, я пизэ жаля. Сое, пе, немецъёс кужмысь асьсэ армие басьтылӥзы. Ярам коть, пегӟыны быгатӥз. Табере со шоры олокыӵе но синъёсын учкисьёсыз вань. Нуллӥзы ини полицие но. Петэр, Яношлэн пиез (асьмелэн солэсь ёзъёссэ соку гинэ армие басьтӥзы, ожмаськон тылӝуэ ӧз лэзе ни) - востэм, пыӵалэз кияз возиз ке но, гуртэзлэсь кыдёкысь лудъёстӥ, гуртъёстӥ ветлыны ӧз вуы. Сое полициын лыдэ басьтӥзы, ӧз пуктэ. - Янош ялан юалляське. Кытысь вуэм адямиос солэн юртаз кунокуае пыризы? - Мон но, - шуэ, - Россие вуылӥ, чылкак тодмотэм шаер ӧвӧл. Сибирьын но, Уралын но ветлымтэ сюресъёсты лёгай. Кыӵе муген вуылэмез сярысь юай но, Янош вераны ӧз дырты, кӧня ке посӥськемез бере гинэ шуиз: - Чехословацкой корпусэн ӵош, кылэмды вань, дыр, дышетскымтэ мурт ӧвӧл кадь. Мон ӧй юалляськы ни, озьы но валай. Мади аслам Удмурт шаере, Кам но Вятка шуръёс сярысь. Соос куспын, шуисько, милям муъеммы. Нош шуръёс калыкмылы ужало. Янош номыре уг ваты, семьязэ сэрттэ-пертче. Пиез, нылыз, кузпалэз сярысь маде, тупаса, пе, улӥськом, ог-огмылы юрттыса. Мӧйы воргорон витьымтэ шорысь кышноезлы вазиз: - Бор ван? - Нинч, - кылӥськиз мукет комнатаысь куара. Янош пельдӥньзэ кӧня ке пол чабыштӥз но киоссэ шеръяз: "Нинч, нинч"... Мыным, удмурт шаерысь вуэм муртлы, та кылъёс валантэм вал. Янош сое шӧдӥз, жингыль-магыль ӟуч кылын валэктӥз. Винамы вань-а, шуи, пе. Ӧвӧл, шуэ кышное. - Ма, ӵок ӧвӧл ке, юыны татчы ӧм лыктэ, - верасько Яношлы. Кыл бӧрсьы кыл кошкиз - штабе но, подразделениосы но ӧтись ӧвӧл. Мон малпаськисько валамонгес кылӥськись кылъёс сярысь. Кызьы соос татчы вуизы? Тани мадьяръёс ван шуо, нош удмуртъёс - вань. Паймонэз вылымтэ солы, туж вашкала дауръёсы мадьяръёс асьме палан улӥзы ук. Оло, вераськон кылъёсмы чылкак ог-огзылы тупазы. Кыдёке кошкизы но, кылъёсмы но воштӥськизы. Мадисько со сярысь Яношлы но. Со чабкиське, пересьмытозь улӥд ке, пе, оломае но тодод. Мадьяр воргоронлэн Уралэ но Сибире вуылэмез сярысь юалляськемысьтым шонтӥз гинэ. Мон отчы, пе, аслам мылкыд каремея ӧй ветлы. Мон но юанэн ӧй мерскы ни. Нош радио выль но выль иворъёс сётэ: асьме войскоос Берлинын ни, секытэсь ожъёс пыр рейхстаг йылэ Вормон знамя ӝутэмын. Шумпотон, оло, солэн пумыз но ӧвӧл. Мадьяр семья но сое уг ваты. Вазь ӵукна Яношлэн кузпалэз, милям кӧлон комнатаямы пырыса, шобретмес кыска. Султэ, Вормон, пе. Кылӥське ульчаосын ыбылӥськем куара. Нарядын , постъёсын сылӥсь солдатъёс шумпотэмзэс ватыны ӧз быгатэ ни, вылды, лыз инме ыбылӥзы. Узыр ӧй вал Яношлэн семьяез. Коркаез но мукетъёсызлэн сярысь шуям губи кадьгес адӟиське. Нош Вормон нуналэз пусъён вылысь, со милесьтым юаз: - Ма пӧрано вылэм туннэ ӝытазелы? Мон но, Мишенин но таӵе юанлы дасесь ӧй вал. Старшина Украинаысь, мон Удмуртиысь, сиён-юонъёсмы но пӧртэмесь. Кема вераськем, ченгешем бере, дэмлам пельнянь пӧраны. Янош но, кузпалыз но, кызьы мытыны ик уг тодо сое. Но кузёлэн сиемез вылэм. Сибирьын, пе, одӥг семья куноятӥз. Мишенин юрттыны ӧз басьтӥськы. Украинаын, пе, пельнянен уг выро. Юрттон но дышетон мон вылэ усиз. Аслам но пӧраме ӧй вал, адӟылӥ гинэ. Озьы но тазьы пӧрамы. Ма ватонэз, удмурт нылкышнолэн кадь ӧз пӧрмы со. Бен, ческытэзъя мон вуылӥ кадь вордскем палъёсам, син азям пуктӥ Вавожысь столовойын эшъёс доры куное ветлыкум сиськемме. Сиён ческыт ке но, Вормон нуналэ кожаз лябгес мынэ. Мишенинлэн дасямез вылэм, пуктӥз ӝӧк вылэ. Комнатаын пумен шулдыргес луиз. Яношлэн кузпалэз мытӥз ини милемлы тодмо гурез: Из-за острова на стрежень, На простор речной волны... Ми ӟуч кылын кырӟаськом, со аслаз кылыныз, крезьгур нокытын уг могӟылы, одӥг ӧретӥ чузъяське. ... Кемалась вал ини со, 55 арлэсь уногес ортчиз. Венгрие но, Словакие но мон ӧй вуылы ни, Иван Дмитриевич Мишенинэн но люкиським. Со бертӥз аслаз Украинаяз, мон - Удмуртие. Ӵапак ноябрь толэзьлэн ньылетӥ нуналаз часьтысьтымы потӥ вал. Монэ тросэз офицеръёс но солдатъёс Удмурт Республикалэн кылдэмез дырысен 26 ар тырмемен ӟечкыласа келязы. Трос ву кошкиз ини со аръёс куспын Дунай шуретӥ но, Кам ӧретӥ но. Улонамы уноез воштӥськиз. СССР но ӧвӧл ни, Венгрия но НАТО-е пыриз. Кӧня ке ар талэсь азьло асьме шаере Венгрилэн президентэз ветлӥз. Удмурт калык сое туж шуныт пумитаз. Перепечез но, пельнянез но вал кадь. Собере тӥни... НАТО- ен одӥг кыл шедьтӥзы мадьяръёс. Ӧйтӧд, вань мадьяръёс вылэ уг чӧлскиськы. Соос пӧлын вань, дыр, мукет малпанъёсын улӥсьёсыз. Кам но Вятка куспын улӥсь удмуртъёс та нуналъёсы, республикалэн юбилеез азьын ӟырдыт салам ысто шуи ке, уг янгыша, дыр. Удмуртиысь трос солдатъёслы ожмаськоно луиз мадьяръёслэн музъем вылазы. Соос ӟеч тодо татысь калыкез. Сямъёс но, малпанъёс но пӧртэмесь луозы. Но ог-огдэ тэргатэк, тупаса улонмы мед азьланьскоз. Василий Смирнов, ожысь но ужысь ветеран. Октябрь: тодмо нимъёс но нуналъёс 1. Мӧйыослэн нуналзы; - Крезьгурлы сӥзем калык куспо нунал; - 30 ар талэсь азьвыл (1970) Глазовын усьтӥськиз покчиослы суреданъя школа. 2. Областьын архивъёсъя бюро усьтӥськиз (1923); - Улон интылы сӥзем калык куспо нунал. 4. Военно-Космической Кужымъёслэн нуналзы; - Вордскемез дырысен 70 ар тырме М. П. Покчи-Петровлы (1930-1959), удмурт кылбурчилы, Удмуртиысь искусство удысысь дано ужасьлы, Кун премилэн лауреатэзлы. Вордскиз Можга ёросысь Ныши-Какси гуртын; - 60 арес тырме Р. М. Каримовлы (1940), республикаысьтымы Басьяськисьёслэн огазеяськонзылэн союззылэн кенешсылэн, Россия Федерациысь вузкарон удысысь дано ужасьлы. 5. Дышетӥсьёслэн нуналзы; - 240 ар тырме (1760) Воткинск заводысь Святой Дмитрий Ростовский нимо черкез усьтэм но вӧсям дырысен. 8. Гурт но сиён-юон поттон удысын ужасьёслэн нуналзы. 9. Шукрес учыръёсты кулэстонъя калык куспо нунал. 11. вордскемез дырысен 85 ар тырме М. Г. Селезневлы (1915-1944), Совето Союзлэн Героезлы. Вордскиз Воткинск ёросысь Пичи Кивара гуртын. 14. Покров. 16. Сиён-юонъя калык куспо нунал. 17. Куанер улонлы пумитъяськонъя калык куспо нунал; - 5 ар талэсь азьло (1995) Россия Федерациысь но Удмурт Республикаысь кун властьлэн ёзъёсыз куспын полномочиосты люкан сярысь огкыл гожтэмын; - Вордскемез дырысен 155 ар тырме М. П. Сашинлэн (1845-1934). Солы, Ижевск заводлэн посёлоказ вордскем адямилы, шуд усиз Париж Коммунае пыриськыны. 18. Сиён-юон поттон промышленностьын ужасьёслэн нуналзы; - 85 арес тырме А. Д. Тороповлы (1915), Совето Союзлэн Героезлы. Вордскиз Балезино ёросысь Вуж Кен гуртын; - 65 ар талэсь азьвыл (1935) Н. Погодинлэн "Аристократы" пьесаеныз усьтӥськиз Ижевскысь В. Г. Короленко нимо драмая кун ӟуч театр. 18-19. Финно-угор калыкъёслэн нуналъёссы. 21. 35 ар талэсь азьвыл (1965) усьтӥськиз Ижевскысь автозавод. 22. 45 арес тырме О. Ю. Гуриналы (1945), медицина наукаосъя докторлы, Ижевскысь медициная кун академиысь профессорлы; - Вордскемез дырысен 85 ар тырме В. К. Марисовлэн (1915-1992), Ужысь Геройлы, КПСС-лэн Удмурт обкомезлэн азьвыл нырысетӥ секретарезлы (ужаз 1963-тӥ-1985-тӥ аръёсы). 24. ООН-лэн нуналэз. 25. Россия Федерациысь таможенниклэн нуналэз; - Вордскемез дырысен 95 ар тырме М. Н. Тимашевлы (1905-1938), писательлы, драматурглы, публицистлы. Гердлэн ужезъя репрессие шедиз но 1938-тӥ арын пытсэт сьӧрын кулӥз; - 40 ар талэсь азьло (1960) Москваысь Кремльын кырӟазы Пичи Пурга ёросысь "Юж- Пурга" колхозысь калык хор но Кизнер культура юртысь коллектив. 26. 40 ар талэсь азьло (1960) Ижевскысь машина лэсьтӥсьёслэн дворецысьтызы драмая Удмурт коллектив пӧрмытэмын калык театрлы. 27. 35 ар талэсь азьвыл (1965) Ижевскысь машинаос лэсьтон заводлэн конвейерысьтыз васькиз 2 миллионэтӥез мотоцикл. 29. Автомобиль транспортын но сюрес хозяйство удысын ужасьёслэн нуналзы; - 20 ар талэсь азьло (1980) усьтӥськиз изобразительной искусствоосъя республикаысьтымы музей; - Комсомоллэн нуналэз; - Вордскемез дыырсен 95 ар тырме А. И. Перевощиковлы (1905-1995). Со удмуртъёс пӧлын нырысетӥез медицина наукаосъя доктор луиз, вал Ижевскысь медициная институтысь профессор, Россиысь дано врач, Удмуртиысь наукая дано ужась. Вордскиз Глазов ёросысь Трубашур гуртын. 30. Политикая репрессиос улэ шедемъёсты буре ваён нунал. 31. "Гудыри" газетлэн нуналэз; - 30 ар талэсь азьвыл (1970) Ижевскысь автозаводлэн машинаосты бичанъя валтӥсь конвейерез ужаны кутскиз. Эн тӥялэ льӧмпу сяськаез! Та урамлэн шулдырез льӧмпу сяська вань ӵоже... Калык кырӟан. Ма гинэ уг буды асьмелэн, котькинлы синмаськымон музъеммы вылын?! Ваньмыз сямен будосъёс адямилы кыӵе ке пайда ваё. Соин ик инкуазез яратӥсь нокудзэ юнме уг быдты. Нош унозэ юри мерттэ корка дораз. "Удмурт дунне" газетлэн редакцияз но республикаысьтымы Госстрахлэн управленияз ужакум вуылӥ удмурт музъемлэн котькуд сэрегаз. Сюлэм вӧсь луылӥз, куштэм гуртэтӥ ортчыку. Адямилэсь азьвыл улэм интызэ тодманы луэ вал жильыртӥсь ошмесъя но пересьмем кызьпуосъя, льӧмпуосъя, шупудъёсъя, палэзьпуосъя. Уно писпуос пӧлысь льӧмпу - удмуртлэн тужгес яратоно писпуэз. Выль коркаез вӧзы со шупудэн но палэзьпуэн артэ одно ик льӧмпу но мерттылӥз. Та чебер писпулэсь нимзэ ӵемысь сёъялляз гуртэзлы. Сюмси, Дэбес но, Юкаменск ёросъёсын трос таӵе удмурт гуртъёс. Калыкмы льӧмпу сярысь уно кырӟан кылдытӥз. Чебер сяськаё писпулы синмаськымтэ адямиез шедьтыны туж шуг. Гужемлэн пумаз льӧмпу шумпоттэ ческыт мульыеныз. Кам, Ватка, Калмез, Чупчи, Оӵ, Вало но уно пичи шуръёс дурын будӥсь льӧмпу куартолэзе (мае) вань шаермес югыт каре, нош пӧсьтолэзе но гудырикошконтолэзе дораз кыске удалтэм векчи, сьӧд емышеныз. Льӧмез яратыса сиё уно тылобурдоос но пӧйшуръёс. Со зол юрттэ пӧртэм висёнъёслэсь утялскыны. Сулзэ но мульызэ тӧдьы винаен огазеям сурет юрттэ кӧт виянэз но радикулитэз эмъяны, нош куарез ӝушез (желудокез) юнматэ. Льӧмпулэсь сяськазэ, мульызэ вуын пӧзьтэм суретэн эмъяло кызонэз, пыэдэз, туберкулёзэз. Одӥг сюмык вуэ пононо дас вить грамм куасьтэм мульы. Сӥямез бере нуналлы быдэ юоно куинь пол-ньыль пол. Гуртын улӥсьёс льӧмез толлы дасяло. Толбыт пыжо куасьтэм льӧмен ческыт кутэмнянь, дасяло ческыт но курыт юонъёс. Али городын улӥсьёс но льӧмпуэз сад-бакчаосазы яратыса будэто чебер сяськаез но ческыт мульыез понна. Город вӧзысь бакчаосын ӵемгес пумиськылэ Виргин выжыысь льӧмпу. Солэн мульыез бадӟымгес но гордгес. Отын сизьым процент сакырез. Дубилез, миндаль вӧез но уно минерал суретэз вань. Сиё сое ыльын но, куасьтыса но. Виргин льӧмпулэн емышез котькуд аре удалтэ. Артэ мерттэм писпуослэн мульыоссы уногес луо. Сузен-сузен бичало соосты гудырикошконтолэзьлэн пумаз. Льӧмпуос ӟечгес будо, сӥзьыл мерттыса. Али мон, городын ке но улӥсько, вашкала калыкмы сямен, выль бакчаям ортчем аре, сӥзьыл, мукетъёсыныз ӵош мерттӥ шупуд, палэзьпу, льӧмпу. Ваньзы улӟизы. Озьы бере, тӥ но будэтэлэ. Оскисько: уд жалялэ. Нош тулыс эн тӥялэ тӧдьы сяськазэ. Со ческыт льӧм луоз. Н. Возисов. Экономика но политика "Сьӧд" зарни зарниен ӵоша Европаез та нуналъёсы пумен юнгес шымыртэ техникалы эстӥськонлэн дуноямез. Машина возисьёс я отын, я татын пумитъяськон ужрадъёс ортчыто, мынон-ветлон сюресъёсты пытсало. Малы му вӧйлэн дуныз дуннеысь рынокын нош ик вылӥе ӝутскиз но та ласянь выль рекорд пуктӥз? Экономикая но политикая удыслы ма со сётоз? Зэмен но, "корт валэз" возён сентябрьлэн берло арняосаз мултэс дуно луиз, водительёс сюлэмзы шымыраса кожо автозаправкаосы. Тужгес но со шӧдӥське Европаын, татын уго дышемын ни "сьӧд зарнилэн" дунтэмен но котьку дыраз вуэмезлы. Саудовской Аравия, эстӥськон кризислэсь вуэмзэ шӧдыса ялӥз, му вӧйзэ мултэсэн вузаны дась шуыса. Та ивор бере нефтьлэн дуныз ӧжытаклы усиз, но кемалы ик ӧз. "Кизер зарни" шуак дунояз но одӥг баррелез (со ог 135 килограмм луэ) вуиз 37 долларозь. Берло 10 ар ӵоже таӵе югдур нырысьсэ кылдӥз. Мугез ма бордысен кутскиз? Политикъёс чакламъя, му вӧй вузасьёс доры туж ӝог вуиз США-лэн эстӥськонлы запасъёсыз кулэсмем сярысь ивор. Тӥни малы соос огкылысь музъем узырлыклэсь дунзэ ӝегатскытэк ӝутӥзы. Дуннеысь валютной фондын (МВФ-ын) ужась экспертъёс верамъя, эстӥськон ласянь шуге-леке вуон шӧдскымон люкетоз дуннеысь экономикаез азинтонлы. Туэ со 4,7 процент луиз ке, вуоно арын усёз 4,2 процентозь. Экономикалэн уллане васькемез тужгес но адскоз валтӥсь индустриальной государствоос вылын - самой соос тужгес но тросэн "кизер зарни" басьто. Ма луоз Россиен? Экономистъёс лыдъямъя-чотамъя, странамы понна кылдэм югдур пайдаен берытскыны кулэ. Му вӧйлэн дуноямез чотын федеральной бюджет "пасьёссэ" ӵоктаны кутскиз ни. Тае асьмеос шӧдӥськом уждун но пенсиос дыраз басьтыны кутскеммыя. Тӥни малы али, кык ар вис карем бере, Россилэн правительствоез выьысь басьтӥськиз му вӧй поттонъя бадӟым предприятиосты приватизация улэ кыскон борды. Уж интыысьтыз ӝог вырӟиз. Кылсярысь, Оренбург областьысь ОНАКО компанилэн 85 процентэз акциосыз вузамын 1,08 миллиард долларлы. Экспертъёс чакламъя, рынок понна со туж бадӟым дун. Озьыен, басьтӥсез - Тюменьысь му вӧй кысконъя компания, куанеръёс пӧлысь ӧвӧл. Эстӥськонлы туала дунъёсъя учконо ке, та коньдонзы ӝог берытскоз. Кема-а возиськозы вылӥ дунъёс? Политикъёс но экономистъёс чакламъя, октябрьлэн пумаз соос нош ик ас интыязы пуксьыны кулэ. Но та вакытэ, му вӧй сьӧры уиськыса, сиён-юон но мукетыз медаз дуноя вылэм, сооссэ улӥе васькытыны уз луы ни. Асьмеос сыӵе адӟон пыр одӥг пол гинэ ӧм ортче уга. Л. Медведева. Удмурт Республикаысь Правительство мур ӝоже усемзэ вера Удмурт Республикаысь коньдон ужпумъёсъя министрлы Бельтюков Владимир Васильевичлы - солэн анаез Бельтюкова Екатерина Алексеевна кулэм пумысен. Тазалык Сю грамм... емыш - йырыд уз вись Ӵапак али кисьма сьӧд палэзь (арония). Со туж узыр С но В12 витаминъёсын, картинэн, никотин но фолисовой кислотаосын. Та емыш 1 грамм гинэ сиыса нуналлы тырмымон Р витамин йӧд басьтоды. Со сяна, отын вань на молибден, марганец, ыргон, магний, железо. Сьӧд палэзен эмъясько атеросклерозэн, бадӟым визӥбетэн (давлениен) курадӟисьёс. Врачъёс тужгес но ӵекто на та емышез сиыны капилляротокситозэн, аллергилэсь васкулитэн, пужыен, карсэн, скарлатинаен висисьёслы. Эмъяськон выльысь нуналаз куинь пол сиськон азьын 100 грамм емышсэ сиёно яке 50 миллилитр вузэ юоно. Эмъяськоно 2-3 арня, собере 2-3 толэзь вис кароно. Талэсь кемагес эмъяськыса тазалыктылы изъян вайыны быгатоды. Туж ческыт луэ сьӧд палэзьлэсь варення-компот но. Та емышысь витаминъёс пӧзьтыса но уг быро. Но палэнтэ сьӧд палэзьдэс пичи давлениен но 12-перстной сюлынызы курадӟись эшъёстылэсь. Т. Григорьевых, врач. Владимир Путин дурбасьтӥз Александр Волковлы Кылем пятницае, 29-тӥ сентябре, Россилэн Президентэз Владимир Владимирович Путин Кремльын пумиськылӥз Удмурт Республикаысь Кун Кенешлэн Тӧроеныз Александр Александрович Волковен. Пумиськон дыръя кӧня ке ужпумъёс эскеремын. Удмурт Республикаысь Кун Кенешлэн Тӧроез Россия Федерацилэн Президентэзлы ӵектӥз Удмуртилэн 2001-тӥ-2004-тӥ аръёсы социально-экономической азинсконъя Программаезлы федеральной статус сётыны но Федерацилэн "2001-тӥ арлы федеральной бюджет сярысь" Законлы инъетэ та программаез быдэстонлы 200 миллион манет коньдон висъяны. Россилэн Президентэз Александр Волковлэсь ӵектонзэ умоен лыдъяз но Россилэн Правительствоезлэсь Тӧрозэ Михаил Касьяновез та ужпумез сэрттыны-пертчыны куриз. Правительстволэн Тӧроезлэн воштӥсез Илья Клебанов матысь дыре Удмуртие вуыны кулэ, Россилэн Правительствоеныз та пумысен нимысьтыз ужпумъёс кутон вылысь. Россилэн Президентэныз кенешон дыръя вераськон мынӥз республикаямы автомашинаосты поттонэз азинтон сярысь но. Ижевскысь автозавод котьку но бадӟым инты басьтылӥз Удмуртилэсь бюджетсэ узырмытонын но улосын улон-вылонэз огсыр возёнын. Александр Волков Владимир Путинлы ивортӥз Ижевск автозаводлэн конвейерысьтыз 25 сюрсэтӥез "Ода" авомобиль поттэм сярысь, со вераз, туэ республика 30 сюрс автомобиль поттоз но, та лыдпус 2001-тӥ арын 60 сюрс пала вуоз шуыса. Но Ижевскысь автозаводлэсь машинаосты буянъя туала линия пуктон вылысь Япониысь кредитъёсты басьтон понна кулэ вылэм документъёсты дасянэз ӝогомытыны. Со линия луонлык сётысал уката но устоесь машинаос поттыны, озьы бере, автомобильёслы кулэяськонъёс но будысалзы. Россилэн Президентэз та ужпумъя Правительстволэн Тӧроезлэсь воштӥсьсэ, коньдон ужпумъёсъя министрез Алексей Кудринэз нимысьтыз ӵектонъёс дасяны косӥз. Россилэн Президентэз озьы ик умоен лыдъяз Кун Кенешлэн Тӧроезлэсь "Ижмаш" акционер огазеяськонлэн инъетэз вылын Ижевскын автомобильёсты поттонъя огъя технологической комплекс кылдытон сярысь ӵектонзэ но. Со пӧртэм интыосын ёзъёс но агрегатъёс поттонэз огазеяны юрттысл, озьы "Одалэн" дуныз шӧдскымон кулэсмысал но со зэмзэ ик "калык" автомобиль луысал. Владимир Путин Россиысь экономикаез азинтонъя но вузкаронъя министрез Герман Грефез косӥз та ужпумен нимысьтыз вырыны. Со сяна, пумиськон дыръя эскеремын промышленностьлэн туэ 8 толэзь ӵоже ужамезлы йылпумъянъёс, ож тӥрлык поттӥсь предприятиослэсь пунэмзэс берыктонъя график, "Тополь М" стратегической ракетаосты лэсьтонлы кун ласянь коньдон висъян, республикаямы бусы ужъёслэн мынэмзы, гуртлы техника висъян ласянь ужпумъёс. Пумиськон но солы йылпумъянъёс возьматӥзы, Удмурт Республикаын югдурез Владимир Путин ялан син азяз возе шуыса. Александр Волковлэсь ӵектонъёссэ умоен лыдъяса, Владимир Владимирович Путин эшшо одӥг пол возьматӥз, со бадӟым саклык висъя асьме экономикаез азинтонлы но дурбасьтэ сыӵе улосъёслы, кытын азинсконъёссы уж вылын шӧдӥсько. Удмурт Республика но отчы пыре, уго Удмурт Республикаын промышленностьлэн быдӟалаез туэ 130 процентлы будӥз. Пумиськонэз йылпумъяса, Владимир Путин Александр Волковлы тау кариз Удмурт Республикалэн кунлык басьтэмез дырысен. 80 ар тырмонэз пусъёнэ ӧтемез понна. Удмурт Республикаысь Кун Кенешлэн пресс-службаез. Удмурт автономилы - 80 ар Тазьы кыдаз удмуртлык И Удмурт автономиез кылдытон, Всероссийской Центральной Исполнительной Комитетлэн но РСФСР-ысь Калык Комиссаръёслэн Советсылэн Вотской (Удмурт) автономной область кылдытон сярысь 1920-тӥ арын 4-тӥ ноябре кутэм постановленизы Удмуртилэн историяз ЪЪ дауре бадӟым инты басьтӥз. Озьы уно дауръёс ӵоже удмурт калыклы нырысьсэ кунлык сётэмын вал. Автономия ялон азьын трос ужано луиз удмурт интеллигенцилы, советской но партийной органъёслы. Удмуртъёсты огазеянын, соослы шонер сюрес быръёнын, национально-государственной но культура удысын тодон-валанъёссэс ӝутонын бадӟым инты басьтӥзы удмуртъёслэн нырысетӥосыз Всероссийской съездъёссы. 1918-тӥ арын июне Елабугаын ортчиз нырысетӥез национальной съезд. Отчы Вятка, Казань, Уфа, Пермь губерниосысь 78 делегат ветлӥз. Делегатъёс съездын огкылысь тӧрое бырйизы Максим Прокопьевич Прокопьевез, крестьянъёслэн, рабочийёслэн но солдат депутатаъёслэн Оса уезд исполкомезлэн Советэзлэсь члензэ, удмурт кылбурчиез, Казаньысь дышетӥсьёсты дасян семинариын дышетскем муртэ, фронтовикез. Съездын бадӟым саклык висъяськиз удмурт калыкез дышетонлы, солэсь улон-вылонзэ умоятонлы, сётэм правозэ пайдаё но шонер кутонлы. Лэчыт вераськон ӝутскиз удмуртъёслэсь национально-территориальной административной ёзъёссэс кылдытон пумысен. Яке кылдытоно Урало-Волжской штатъёс яке Татаро-Башкирской Республика, оло, умой луысал, Вятка, Казань, Пермь но Уфа губерниосын тросэн улӥсь удмуртъёс Прикамской губерние пырысалзы ке. Съезд огкылысь луиз берлоеныз ӵектонэн, но бӧрысь со палэнтэмын вал. Удмуртъёслэн И Всероссийской съездзылэн резолюцияз гожтэмын: "Асьмеос ӟуч гражданъёслэсь огазеяськыса улонзэс чакланы но соосын огъя кун кылдытыны кулэ. Вань калыкъёс, бадӟымъёсыз но, пичиосыз но, уно лыдъемъёсыз но, ичи лыдъемъёсыз но, огъя союз кылдытозы, соку асьмелэн музъеммы (Россия) вань калыкъёслэн музъемзы луоз... Соку гинэ, куке котькуд калыклы сётӥськоз эрик, кӧлӥсь калыкъёс сайкалозы но кузь вамышъёсын азьлане мынозы"... Съезд Максим Прокопьевез бырйиз РСФСР-ысь Нациосын ужанъя калык комиссариатэ. 1918-тӥ арын 31-тӥ июле РСФСР-ысь Наркомнацлэн постановлениезъя кылдытэмын солэн Вотка ёзэз, кивалтӥсез М. П. Прокопьев луиз. Со дасяз вуоно Удмурт автономной трудовой коммуналэсь (областьлэсь) инъетсэ. Советъёслэн уездъёсысь но губерниосысь исполкомъёсазы кылдылӥзы удмурт национальной секциос но отделъёс, губерниосын но уездъёсын люкаськылӥзы ичи калыкъёслэн съездъёссы. Но со вакытэ Удмурт шаерын пуроме ни вал граждан ож. Наркомнацлэн удмурт ёзэзлэн нырысетӥ кивалтӥсез Максим Прокопьев ас мылкыд каремезъя фронтэ кошке но 1919-тӥ арын гужем быре. Е. Ушакова, Удмурт Республикалэн туала историезлы сӥзем центрысь ёзлэн кивалтӥсез. Гуртъёслы выль юртъё Та секыт вакытэ но гуртъёсын ӝутскыло выль юртъёс, школаос, больницаос, нылпи но культура юртъёс, пичи предприятиос. Нош соосты пуктэмлэсь азьло юртъёс вордӥсько инженеръёслэн, архитекторъёслэн йыръёсазы. Тросэз сыӵе проектъёс кылдо Удмурт Республикаысь "Удмуртагропромпроект" институтлэн кабинетъёсаз. - Али татын одӥг миллион манет тыр быдэстоно проектъёс люкаськемын, - шуэ институтлэн дриекторез Борис Николаевич Евдокимов. 60-тӥ аръёсы, куке бадӟым саклык висъяськылӥз гуртъёсын лэсьтӥськонэз нуонлы, Ижын усьтӥськиз поектъёс бордын ужась пичи гинэ контора. - Нырысь отын 7 мурт гинэ ужа вал, - шуэ Борис Николаевич. - Но лэсьтӥськонлы туж трос заказъёс вуылэмен, институт усьтон сярысь ужпум кылдӥз. 1990 арын отын 600 проектировщикъёс ужа ни вал. Жаляса верано, выльдӥськон аръёсы институт туж трос визьмо ужасьёссэ ыштӥз. Али татын 120 адями гинэ ужа. Туж жаль. Но югдур пумен умой пала воштӥськыны кутске ни кадь. Соин ик берло дыре луонлыкъёс усьтӥськизы институтэ егитъёсты кыскыны. Шуг-секытъёс шоры учкытэк, институт утьыны быгатӥз аслэсьтыз ваньбурзэ но справочно-информационной фондзэ. Институтлэн коллективез вань мылкыдзэ сётыса тырше гуртъёсын чебересь юртъёс ӝутон понна. Кылсярысь, Як.-Бодьяысь культурая юртлэн, Зураысь школалэн, Балезиноысь центральной больницалэн, Юкаменскысь стадионлэн авторзы луэ Роза Дмитриевна Гордеева. Институтын 30 ар пала ужатозяз, со сюлэсь уно проектъёс дасяз ини. Шуныт кылъёс гинэ верам потэ Анатолий Павлович Городничевлы, Виктор Федорович Смадычлы, Анатолий Васильевич Юшковлы, Юрий Николаевич Поповлы, Алла Ильинична Битеровалы. Берло дыре уно заказъёс вуо гуртъёсы газ пыртон ласянь. Та ужен вырон понна, табере нимысьтыз отдел кылдытэмын ини, соиныз кивалтэ Удмурт Республикаысь сӥё- дано лэсьтӥськись Валентина Ивановна Кустова. Газ пыртонъя тужгес но паськыт ужъёс мыно Пичи Пурга, Завьял но Кизнер ёросъёсын. Уждун тыронэн ӝеганъёс али институтын ӧвӧл. Со понна бадӟым тау шуоно Наталья Федоровна Калининалы. Лэсьтэм проектъёс понна гурт хозяйствоослэсь улэп коньдонзэс басьтыны секыт ке но, Наталья Федоровна заказъёсты тырон понна ялан мукет амалъёс но утча. Шумпотоно: лэсьтӥськон гуртъёсын улӟе. Ӝоген тани Алнаш ёросысь Кузёбай гуртын шор ёзо школа ужаны кутскоз. Гурт калыклы туэ капчи ӧвӧл. басьтом тани сюресъёсты ик. Кӧня гуртъёс курадӟо ӟеч сюресъёс ӧвӧлэн. Азьло аръёсы сюресъёслы проектъёс лэсьтонэн институтын быдэс отдел тыршиз. Собере, заказъёс ӧвӧлэн, отделэз быдтӥзы. Но улон огинтыяз уг сылы - али гурт хозяйствоослэн кивалтӥсьёссы ялан вазиськыло сояз, я таяз гуртэ сюресъёс лэсьтон пумысен. Та ужпумез асьме правительствомылы юнгес син азяз возёно, дыр. Нош митэк гуртъёсын выль юртъёс уз кылдэ. Азьло аръёсы милям тыршеменымы удмурт гуртъёсын сомында 25 сериен ӟеч коркаос пуктылэмын вал. Кылсярысь, Каракулино ёросысь Ленин нимо колхозын. Туэ институтмылы 40 арес тырме. Ми азьланяз но дась луиськом асьме сюдӥсьёсмылы - гуртоослы усто проектъёс дасяны но тодӥсь-валась специалистъёсты будэтыны. Т. Кузьмина. Б. Н. Евдокимов - институтлэн директорез. Зураысь спецшколалэн юртэз. Зарни Италмас Кылъёсыз но крезьгурез В. Карповлэн Берыктӥз Ан. Перевозчиков. 1. Зарни-зарни шыркун гырлы, Италмас, италмас. Тон кырӟаськод жингыр-жингыр, Бурдъяса милемыз. Припев: Ми тэле лыктӥм туннэ - Паймымон нюлэс дунне! Шунды учке ми шоры, Анай кадь пальпотыса. Жингыра возьвыл шыркун, Ӵуж йырыныз шонаса. Тылобурдоос чирдо, Зарни-азвесь гур кисьто. 2. Зарни-зарни шыркун жондэ, Италмас, италмас. Уть, сяськамы, ас чебердэ, Шулдырты дор музъеммес! Припев. Золотистый италмас Музыка и слова В. Карпова. 1. Колокольчик, золотистый, Италмас, италмас. Ты поёшь так звонко, чисто - Радуй нас, радуй нас. Припев: Мы пришли сегодня в лес - Здесь кругом миллион чудес: Колокольчики звенят, Солнце смотрит на ребят. Мы пришли сегодня в лес - Здесь кругом миллион чудес: Птицы весело поют, И цветы нас радуют! 2. Колокольчик золотистый, Италмас, италмас. Береги своё монисто - Радуй землю, радуй нас. Припев. Юалэ - валэктом Адӟо на-а урамез? Мон 1-тӥ группаен инвалид. Пери шуккыса вить ар курадӟисько. Азьвыл кышное утялтэ вал, но со туэ кулӥз, табере кызьы улыны ик уг валаськы ни. Кулэ вылэм коляска, сотэк мынам ураме но потаме уг луы. Гожъяй тазалыкез утёнъя министрлы, но со нокыӵе валэктон ӧз сёты. А. Комиссаров. Ува ёрос. Ӵапак таӵегес юанлы валэктон газетмы пыр алигес гинэ сётъям вал. Отын Калыкез улон-вылонын утёнъя министерствоысь валтӥсь специалист Татьяна Кудрина валэктэ: коляска басьтон понна министерствое черодэ султоно. Со понна кулэ тазалыкты сярысь справка (МСЭК-ысь заключение) но заявление. Асьтэос лыктыны уд быгатӥське бере, куре тодмоостэс, ӵыжы-выжыостэс. З. Вахрушева. Таӵеез - одӥг гинэ! "Ӟеч кивалтос та удмурт кыл" Куӟебай Герд - Кин тӥ: удмурт, ӟуч, бигер? - Удмурт. - Кыӵе кылын вераськиськоды? - Ӟуч. - Малы бен удмурт кылын уд вераськиськелэ? - Уг тодӥськы. Малы кулэ со мыным - ваньмыз ӟуч кылын верасько ук? Бен, ӵемысь кылод таӵе валэктонъёсты. Удмурт шаерын улыса, удмуртъёс ас кылзэс уг тодо, ӟуч кариськыны выро. Озьы ке но, одӥг дышетӥсе вераз вал: котькызьы ӟуч кариськыны выре - удмурт ик кылёды. Тӥляд пельысьтыды сюсьты но, пе, удмурт. Ӟучъёслэн кадь ӧвӧл. Мае возьмалод удмурт кыллэсь, Тӧромы гинэ но "Ӟечбуресь!", "Ӟеч луэ!" кылъёсты сяна уг тоды бере? Озьы ке но, удмурт кыл сярысь рос-просгес вераськем потэ вылэм. Малы? Малы ке шуоно, со - асьмелэн вордӥськем кылмы: ненег, анай кадь шуныт но мусо. Ӵапак та кыл мынэсьтым синъёсме усьтӥз, улонэ вамыштытӥз. Кыӵе кылын нырысетӥзэ кырӟаз, выжыкылъёс мадиз мыным анае? Удмурт кылын. Нырысетӥ классын кыӵе кылын вал нырысетӥ урок? Удмурт. Бен, кытчы гинэ эн учкы - котькытын удмурт кыл кадь. Со вакытэ ик, кытчы гинэ уд мынӥськы, уд вамыштӥськы - уг кылӥськы та кыл. Нош анай кылзэс туж яратӥзы вал Куӟебай Герд, Ашальчи Оки. Туэ удмурт кыл нюк пыдсы сэрпалтэмын. Йырзэ нюштыр-нюштыр гинэ мычылэ. Озьы ӧвӧл шуоды-а? Ӵапак озьы. Тани басьтом удмурт газетъёсты но журналъёсты. Кӧня соос шаерамы? Ӧжыт, туж ӧжыт. Нош тросаз школаосын удмурт кыл, урок интые, факультатив гинэ луэ. Мед луысал тазьы: лавкае пыриськод но вузчиен удмурт кылын вераськиськод - тонэ валало. Мынӥськод кыӵе ке министерствое кыӵе ке ужпумъя - тонэн удмурт сямен верасько. Ульчаын чузъясько шулдыр удмурт крезьгуръёс, вераськемъёс - кыӵе умой!.. Синъёстэ усьтӥськод но - выльысь - туала улон... Мар, мар кароно, удмурт кыл мед пушъёз, вань удмуртъёс удмурт сямен мед вераськозы шуыса? Татын малпаськонэз ик ӧвӧл: дышетоно элькунмылэсь кылзэ. Нош со понна усьтылоно удмурт школаос, печатлано выль книгаос, газетъёс, журналъёс... Та уж быдэстонтэм ӧвӧл: мылыд гинэ мед потоз. Но тросэз туала вакытэ герӟаськемын вылӥын пукись адямиосын, Тӧроенымы. Нош соос - ӟучъёс. Удмурт кыл вылэ сялӟизы таосыд. Кин, кин сюлмаськоз удмурт кыл сярысь? Асьмеос, удмуртъёс. Бен, быдэс дунне вылын одӥг гинэ таӵе кыл. Сое дуно зарниез сямен утёно, кӧкыын веттаса возёно. Медаз сэрпалтэ удмурт кылмес кытчы ке, нюк пыдсы! Удмурт шаерын мед ужалоз удмурт кыл! Светлана Иванова, Удмурт кун университетын дышетскись. Николай Ганзалэн вакытэз 15-тӥ октябре асьмеос быръёмы Президент. Кызьы валано - кин со? Калыкын верало, адямиез тодон понна, пе, соин ӵош разведкае ветлоно. Кинэн бен "разведкае велӥз" президентэ кандидат Николай Ганза? Солэн матысь эшъёсыз - гажано но тодмо адямиос. Узбекистанлэн Президентэз Каримов но Украиналэн Президентэз Кучма. Россия Федерациысь министръёс но вылӥ кивалтӥсьёс: атомщик Адамов, ужъя министр Починок, Пенсиоъся фондлэн председателез Зурабов. Соосын ӵош промышленностез ӝутӥз, зарни поттӥз, лушкаськонлы пумит нюръяськиз, уждунэз но пенсиосты будэтон понна сюлмаськиз. Соосын ӵош со улӥз но ужаз. Соос - странаен кивалтыны быгатӥсь адямиос, соос тодо, кызьы властез кутоно, калыклэсь улон-вылонзэ умоятон понна. Премьер луыса Ганза али ик кусыпъёссэ Удмуртилы пайдаен уже кутэ ни. Солэн Минатомен кусыпъёсызлы луыса, республикамы, бускельёсынымы ӵошатыса, электрокужым дунтэменгес басьтэ. Ӵапак Ганзалэн тыршеменыз Чепецкой завод одӥгез ӟеч ужасез луэ, татын но солы юрттӥзы Обороная министерствоысь валтӥсь ужасьёс. Россиысь военнойёслэн но промышленникъёслэн юрттэменызы, бюджетэ вуиз пенсиос но пособиос тырыны коньдон. Та ваньмыз ӧвӧл на, ма лэсьтыны быгатэ Ганза. Президент луыса, солэн луонлыкъёсыз паськыталозы, Россиын власть Ганзалэн огъёзъёсыз кие выжиз угось, соослэн мылкыдъёссы но огвыллемесь, соос - военнойёс, силовикъёс, хозяйственникъёс. Ганза - соос пӧлысь одӥгез, со капчиен шедьтоз соосын одӥг кыл. Ганза сюлмаське, Удмуртия бускельёсызлэсь узыргес мед луоз шуыса. Ваньмыз со улонын быдэсмымон. Татын солы юрттозы оскымон эшъёсыз но ӵош ужасьёсыз. Солы юрттомы асьмеос но - Удмуртиын улӥсьёс. Нош Ганза вань чакламзэ быдэстоз. Сыӵе адями со. Амурысен Вислаозь Ӧжытэз тодэ, дыр: 1943-тӥ арын 17-тӥ январе Александр Кроник генераллэн 357 номеро стрелковой дивизиез мозмытӥз тодмо полководецлэсь Константин Рокоссовскийлэсь вордскем Великие Луки городзэ. Отчы шедем воинъёслэн эшелоназы вал Шаркан ёросысь Сосновкаысь куинь эшъёс но: Николай Вахрушев, Геннадий Прозоров но Давид Невяжский. Ӝыны толэзь ортчыса, Удмуртиысь пиос Благовещенскын вал ни, Дальний Востокысь музъем вылын. Капчи ӧй вал егит солдатъёслэн службазы. Соос уно иськеме марш-бросокъёсы поталлязы но Амур шур дурын укреплениос лэсьтылӥзы. - Милемды куддыръя уй куспын кык пол но тревогая ӝутылӥзы. Бызьылоно луылӥз пелляськыку но, чидантэм кезьытэн но. Сиёнмы нуналысь нуналэ чорыг гинэ вал, 600 грамм нянь сётылӥзы на. Ваньмыз ӧз чидалэ. Еврей пимы Давид кулӥз (со Сосновкае эвакуацие вуиз вал Каунасысь), - тодаз вае Россиысь калыкез дышетон удысысь отличник Николай Иванович Вахрушев. (И степенё Отечественной война орденлэн кавалерез доры мон вуылӥ туэ 17-тӥ сентябре.) Боецъёс командованилы рапорт гожъязы, ож бусые, фронтэ келяны курыса, но соослы шуылӥзы: - Татын но фонт - Дальневосточной. Котькуд нуналэ кутскыны быгатоз Япониен ож, - возьматылӥзы сопкаос шоры, кытчы интыяськемын вал "ӵуж ымныро" бускельёссы. Одӥг пол сапёръёслэн ротаысьтызы красноармеец Николай Вахрушев пумитаз эшсэ, связистэз Геннадий Прозоровез. Тодӥз, сое Шунды пуксён пала келяло. Николай, - полклэн командирез доры мыныса, туж куриз, сое но отчы мед келялозы шуыса. Офицер пумит ӧз луы. Николай Вахрушев выль дӥськут басьтӥз но 1943-тӥ арын гужемлэн пумаз вуиз покчи командиръёслэн школаязы, со вал Пенза улосысь Инза станция дорын. Котьмае тодыны тыршемез, сэзь, чырмыт луэмез Николай Вахрушевлы юрттӥзы военной наукаез валаны. Нош ар ортчыса, Сосновкаысь егит командир вуиз ни К. К. Рокоссовский маршаллэн кивалтоно И Белорусской фронтаз. Та фронтлэн войскоосыз форсировать каризы Западной Двинаез но азвесь вуо Бугез, нош 28-тӥ июле мозмытӥзы вашкала Брестэз но легендае пырем Брест крепостез. Собере ожъёс кутскизы Польша музъем вылын. 1944-тӥ арын 16-тӥ сентябре ӵукна бус-кот дыръя Вахрушев сержантлэн отделениысьтыз куать боецъёс дугдылытэк мерскись гитлеровецъёслы пумит ыбылыса возиськизы одӥгаз вырйылын. Отын вал ни быремъёс но, сӧсырмемъёс но. Ӵапак соку ик Вахрушевлэсь но мугорзэ ӵушказы кадь. Командир йырсазьзэ ыштӥз... Синъёссэ усьтӥз... пленысен. "Тӥляд макесты сӧсыртэмын кесясь (разрывной) пуляен", - вирен пыласькись командирлы шуиз мадьяр санитар. Со дырысен вал чидантэм висьыса пырпотэм уйёс, ас улонэд, вордскем палъёсыд, быдэс странаед сярысь пумтэм малпаськонъёс. Соку Николайлы 20 арес но ӧй вал на. Оскиз аслаз бурмонэзлы, оскиз, ӝоген Польшаез мозмытозы, трос калыкъёс эрико луозы шуыса. Кема возьмам Вормон нуналэз со пумитаз Висла дурын госпитальын. Ож сюресъёс кыдёке нуизы Идӟи (Вотка) шур дурысь пияшез. Вордскем шаераз со бертӥз куар усён толэзьлэн кутсконаз. Бертӥз но - соку ик школа парта сьӧры пуксиз, дасэтӥ классэ. Удмурт кун пединститутын дышетскиз. Сосновка шор ёзо школаын трос дасо ар ужаз. Татын со эшъяськиз Социалистической Ужысь Героен Иван Константинович Зеленинэн. Та аръёссы сярысь тазьы тодаз вае дышетӥсь Павел Михайлович Широбоков: - Николай Иванович Вахрушевез но солэсь кузпалзэ Валентина Гурьяновнаез мон тодӥсько Сосновка школаын 60-тӥ-70-тӥ аръёсы ӵош ужаммыя. Иван Константинович кошкем бере, школаысь опытной участокен кивалтӥз Николай Иванович. Бадӟым эшезлэсь басьтэм вормонъёссэ ӧз уськыты, школалэсь но данзэ вылын возиз. Мон соку школалэн директорез вал, Николай Ивановичез дунъяй, али дунъясько, пиналъёслы но, мӧйыослы но адӟем карымон, туж тыршись но ас ужзэ мултэс ушъяськытэк, шыпак лэсьтӥсь адямиез сямен. Куке школаысь ветеранъёслэн кенешсылы кивалтӥсь быръёно луиз, ваньмыз огкылысь шуизы: та ужез осконо Николай Ивановичлы. Котьку но соин артэ вал эшез, юрттӥсез, кузпалыз Валентина Гурьяновна. Соослэн дышетэмъёссы пӧлын табере трос дано, гажано адямиос, кылсярысь, инженер-конструктор Владимир Шамаев, военой инженер Михаил Поткин, Шаркан школа-интернатлэн директорез Генрих Петухов, Сосновка школаысьтымы дышетӥсь Тамара Васильевна Харитонова но мукетъёсыз. Дышетӥсьёс-кузпалъёс - Валентина Гурьяновна но Николай Иванович Вахрушевъёс куинь пиналзэс быдэ вуттӥзы: нылъёссы Пермьын медициная вылӥ образование басьтӥзы, пизы "Ижевскнефь" огазеяськонын шофёр луыса ужа. Фронтовик-педагог али но калык пӧлын. Туэ, Быдӟым Вормонлы 55 ар тырмон аре, шаерамы улӥсьёс сое кык пол адӟизы ни телевизор экранысь. Нош 14-тӥ сентябре солэн тӧлпериё ортчем сюресэзлы сӥземын вал Удмурт радиолэн "Аргурезь" передачаез. Таӵе бадӟым, гурезез берыктыны быгатӥсь адямиосты вунэтоно ӧвӧл. Учыр тупамъя, мон Николай Ивановичез но, мукетъёссэ но ӟечкыласько Дышетӥсьёслэн нуналэнызы. Сӥзисько юн тазалыко, чырткем луыны. Малпасько, мон вӧзы эшъёсы но итӥськозы шуыса. Виктор Поздеев, Россиысь калыкез дышетон удысысь отличник. Кин кин понна? Экспертъёсъя национальной институт 1-тӥ�2-тӥ октябре Удмуртиысь 1467 адями пӧлын вуоно быръёнъёсъя юалляськонъёс ортчытӥз. со понна нимысьтыз адямиос дасямын ӧй вал. Кинэ тӥ адӟиськоды вуоно президентэн юанлы, мылкыдзэс тазьы веразы: Александр Волков � 46,5 % Павел Вершинин � 19,2 % Андрей Солуянов � 10,7 % Николай Ганза � 10,1 % Ваньзылы пумит � 10,7 % Вуоно президентлы кандидатлэсь мазэс тужгес но вылӥе пуктӥськоды? Кандидатлэсь программазэ � 49,2 % Гажано адямиослэсь мылкыдзэс � 25,8 % Быгатонлыксэс � 21,3 % Рекламазэс � 3,7 % Кызьы тӥ учкиськоды адямиез ултӥясь ӝуткан-лӧпкытъян листовкаос шоры? Умойтэм � 58,1 % Со зэм ке, умой � 18 % Нокызьы но уг � 23,9 % Лыдпусъёс возьмато: кандидатъёс куспын нюръяськон огсыр мынэ. Павел Вершинин пумен куараоссэ ыштыны ӧдъяз. Городъёсын но куд-ог бадӟым гуртъёсын. Со герӟаськемын, дыр, бырйисьёсызлы уж вылын быдэстыны луоно кужмо программа ӵектыны быгатымтэеныз. Нош Александр Волков кӧня ке толэзь ӵоже ини ужа "Удмуртиез азинтон" программаез бордын, туннэ нуналлы со одӥгез оскымон программа. Волковлэн данэз ӝутскиз на Россилэн Президентэныз пумиськылэмез бере но, уго соку Удмуртия понна туж пайдаё документъёс гожтэмын. Экспертъёс лыдъяло: Волковлэн но Путинлэн пумиськонзы возьматэ Кремльлэсь республикамылы президентэ одӥгезлы кандидатлы дурбасьтэмзэ. Бырйисьёс умойтэм учко ултӥясь листовкаос шоры (58,1%), соин ик соос кандидатъёслы нюръяськыны уз люкетэ. Бадӟым инты басьтоз гажано адямиослэн кандидат сярысь мылкыдзы (25,8%). Тужгес но со шӧдӥське ёросъёсын, отын бырйисьёс уго кандидатлы дунъет сёто ужась коллективъёсынызы, ӵош кенешыса. Бырйисьёс уно саклык висъяло ёросазы гажано адямиослэн но предприятиослэн кивалтӥсьёссылэн радио пыр вераськонъёссылы. Социологъёс пусъё: удмурт ёросъёсын ӵемгес вераны кутскизы таӵе малпанъёссэс: "Волковез Президентэ быръёно, нош Вершинин Кун Кенешлэн Тӧроез луоз". Со возьматэ, Вершинин политикгес луэ шуыса, со ужаны кулэ законъёсты дасян бордын. Удмуртиысь уноез бырйисьёс (79 %) лыдъяло, президент Александр Волков луоз, озьы ик уноез (68,5 %) мылкыдзэ верало, кампания огсыр но пайдаё мед ортчоз шуыса. Гажано дышетӥсьёс! Витетӥ октябрь вазен ини пӧрмиз вань калыклэн праздникезлы. Со нуналэ асьмеос пусйиськом яратоно дышетӥсьёсмылэсь нуналзэс. Туэ сое пумитаськом Удмуртилэн кунлык басьтэмез дырысен 80 ар тырмонэз азьын. Республикаямы калыкез дышетон удыс пайдаё ужа, дышетӥсьёс ялан будэто тодон- валанзэс, быгатыса куто выль амалъёсты, паськытато дышетон программаоссэс. Удмуртиысь педагогъёс азинто мукет кунъёсысь эшъёсынызы кусыпъёссэс. Тазэ праздникез дышетӥсьёс пумитало уждунъя пунэмъёстэк, республикалэн правительствоез берло аръёсы та ужпумез быдэсак йылаз-пумаз вуттӥз. Школа азьло ик вал кунмылы вуоно кивоштӥсьёсты дасянлэн инъетэз. Асьмеос али но ӟечен тодамы вайылӥськом нырысетӥ визьнод сётӥсьёсмес, соос пиналъёссылы жалятэк сёто сюлэм шунытъёссэс, ненег кылъёсын будэто соосты, пыӵато азьланезлы оскон мылкыд. Дышетӥсь котьку но задор мылкыдо, со сямзэ сётэ пиналъёсызлы но. Удмурт Республикаысь Правительстволэн нимыныз, гажано дышетӥсьёс, сюлмысьтым тау карисько ӟеч ужъёсты понна, асьтэлы но семьяостылы сӥзисько тазалык, дышетоно пиналъёсты тӥледыз котьку мед яратозы но гажалозы, ошмесо шаермес уката но узыргес карон сярысь малпанъёсты уж вылын мед быдэсмозы. Удмурт Республикаысь Правительстволэн Тӧроез Н. А. Ганза. Республикаысь власть воштӥськыны кулэ Туннэ асьме пӧлысь котькудмылэн луонлыкмы вань улонмес умой пала воштыны. Нош со понна вань одӥг сюрес - властез воштон. Мон - странамылэн Конституциысьтыз 7- тӥ статьяез, кыл вылын ӧвӧл, уж вылын быдэсъян понна. Отын гожтэмын: "Россия Федерация - социальной государство, солэн политикаез нуиське, адямилы умой улыны но эркын азинскыны луонлыкъёс кылдытон вылысь". Удмурт Республикалэн президентэз луыса, мон быдто куанер улонэз, радъяло ваньбур поттонэз, уз луэ ужтэк кылемъёс, уждунъя пунэмъёс, вакчи дыр куспын будэто адямиослэсь барышсэс. Республикаысьтымы котькуд улӥсь умой пала воштӥськонъёсты ас вылаз шӧдоз. Асьмелэн вань луонлыкъёсмы Татарстанын, Башкортостанын но Москваын кадь ик улыны. Кылем арын декабре Кун Думае быръёнъёс дыръя мыным оскизы но бырйисьёс пӧлысь 15 процентэз (55000-лэсь трос мурт) мон понна куаразэс сётӥзы. Соос мыным дурбасьтӥзы, малы ке шуоно, мон вералляй но верасько, республикаямы властез но политикаез воштон сярысь котькыӵе удысын но кивалтыны кулэ закон. Соин ик монэн соглаш луисьёслы вазиськисько Удмурт Республикалы президент быръён нуналэ куаразэс мон понна сётыны куронэн. Мыным дурбасьтэмзы сярысь ивортӥзы ини: - Россиысь "Духовное наследие" общественно-политической движение; - Россиысь интеллигенцилэн конгрессэз; - Россиысь "За справедливость и закон" общественно-политической движение Телевидение пыр ("Удмуртия" ГТРК, 2-тӥ канал) мон верасько 10-тӥ октября 18 час 30 минутэ. Ижевскысь общественной приёмноелэн телефонэз: 30-68-99. Удмурт Республикалы президентэ кандидат Забильский В. В. Вуоноез лауреат - дышетӥсь Ашальчи Оки но Удмурт нылкышно кенеш. Мар соосты герӟа? 1994-тӥ арын Нина Малых кивалтэм улсын кылдытэмын вал Ашальчи Оки нимо премия. Солэн нырысетӥ лауреатэз луиз кылбурчи Людмила Кутянова. Бӧрысь аръёсы та премиез сётылӥзы Алла Кузнецовалы, Галина Романовалы, Людмила Христолюбовалы, Лидия Нянькиналы. Кылем арын медицина удысын ужась нылкышно быръемын вал. Лауреат луиз удмуртъёсты вырӟытонэ вань кужымзэ сётӥсь, Воткаысь эмчи Альбина Вахрушева. Туэ та премия усиз культура удысысь тодмо ужасьлы, Национальной библиотекаысь библиотекарьлы Надежда Бочкарёвалы. Ашальчи Оки премилэсь 2000-тӥ арлы лауреатэс ӟечкыланы алигес пичи ӧтчаме люкаськылӥзы Удмурт нылкышно кенешлэн исполкомаз пырись нылкышноос, соос пӧлын ик - ёросъёсысь, гуртъёсысь ӧтемъёсыз но. Та ӧтчамез люказ Удмурт нылкышно кенешлэн кивалтӥсез Галина Никитина, нош нуиз Милитина Гаврилова. Галина Аркадьевна шумпотэмзэ вераз, быдэс дуннеын, озьы ик Удмуртиын нылкышнолэн обществоын будэ-паськыта шуыса. Удмурт нылкышноослэн но данзы- йӧнлыксы вылэгес ӝутӥське. Сре возьмато Ашальчи Оки нимо премиен пусъем нылкышноос но. Та люкаськонын ик вераськон потӥз Удмуртилы Президент быръёнлы, Удмурт кунэн 80 ар тырмонэзлы, Финляндиын ортчоно финн-угор конгресслы, вань удмуртъёслэн выль ӧтчамзылы дасяськон пумысен. Г. А. Никитина люкаськемъёслэн тодазы уськытӥз, удмурт нылкышноослэн нырысетӥ ӧтчамзы 80 ар талэсь азьвыл, 1920-тӥ арын декабре ортчиз ва шуыса. Тае озьы ик пусйытэк кельтыны уг луы. Тужгес мыло-кыдо удмурт нылкышноослы калыкез ӝутонэ-огазеяськонэ пыриськемзы понна тау карыса вераськиз "Удмурт кенеш" огазеяськонлэн кивалтӥсез Валентин Тубылов. Кыл сётэмын вал Ашальчи Оки нимо премилэн азьвыл но туэ лауреатъёсызлы но. Нылкышно воштоз улонэз. Узыргес, чебергес, сяськаёгес кароз. Таӵе малпанлы оскиськод, кивалтон ужысь тросгес нылкышноосыз адӟыса. Тани Шаркан ёросысь куд- ог куашканы кутскем хозяйствоос борды ӝабыр-ӝабыр басьтӥськизы нылкышноос, эштосъёсын кивалтӥсьёслэн лыдзы дас котыре вуэ ни. Соос пӧлын директорез Зоя Александрова. ненег пельпумлы секыт ке но, таос чидало. - Гырон-кизён, турнан-аран, октон-утялтон сяна, вылэм ай мукет улон но, - та ӧтчаме шедьыса, паймемзэ вераз З. А. Петрова. Нылкышно лауреатъёсын но мукет выль эшъёсыныз ӵош со но кылзӥз-учкиз Надежда Уткиналэсь, Ирина Габитовалэсь но Иван Григорьевыхлэсь кырӟамзэс. Нош вуоноез лауреат луыны кулэ дышетон удысысь. Азьпаллы таӵе малпанэн люкиськизы нылкышноос. Озьы ке, озьы ик мед луоз. Ашальчи Оки нимо премия ас кузёзэ мед шедьтоз котькыӵе удысын. Т. Петрова. Кулэ удмурт егитъёслы газет! Нуналъёс гылӟо, аръёс ортчо, мон но будӥсько. Нош шаерысьтымы удмурт газетъёс но журналъёс огинтыязы бергало. Зэм, будо, но туж каллен. Ӵапак таӵе ужпумез чакласа, мон ачим кадь егитъёслэсь юалляськоно кариськи. Ма вераны быгатысалзы соос туала удмурт журналъёс но газетъёс сярысь? Кыӵе дэмланъёс сётысалзы? Алёна, дас тямыс аресъем нылмурт: - Вераме потэ: газетъёс пӧлын ӧвӧл егитъёслы кадез. - Нош "Ӟечбур!"? - "Ӟечбур!" - школаын дышетскись пиналъёслы. Нош егитъёслы, вузъёсын дышетскисьёслы газет ӧвӧл. Кылсярысь, поттыны умой луысал сыӵе газет - отын номыре ватытэк вераськон мед мынысал яратон, ныллэн но пилэн кусыпъёссы сярысь. Малы ке шуоно, гуртысь егитъёс возьдаськогес та ужпумъёсъя вераськыны. Та газетын ик мед луысалзы астэ чебер возьыны быгатон, дӥсяськон сярысь гожъямъёс. Андрей, дас тямыс аресъем пимурт: - Удмурт газетъёсты но журналъёсты уг тодӥськы, нимъёссэс сяна. Кие кутэм ик уг поты соосты. Елена, дас укмыс аресъем нылмурт: - Мон тужгес но яратыса лыдӟисько "Инвожо" журналэз. Ярало отысь пӧраськыны, вуриськыны дышетӥсь сэрегъёс. Пӧртэм кырӟанъёс печатлало. Буёло луысал ке, тунсыкогес, кие кутымон луысал. "Удмурт дунне" сярысь ке верано, со - мӧйыослыгес. Татын трос печатлало политикалы, гурт улонлы сӥзем гожъямъёсты. Соос тунсыкоесь ӧвӧл. "Ӟечбур!" - пичиослы газет. Нош егитъёслэн асьсэлэн газетсы ӧвӧл. Со кулэ вылэм. Аркадий, дас сизьым аресъем пимурт: - Мед луысалзы тросгес удмурт газетъёс но журналъёс. Тани басьтом нылпиослы "Ӟечбур!" газетэз.Мед луысалзы отын чылкытэсьгес туспуктэмъёс. Ӧжыт туала нуналлы сӥзем гожъямъёс. Удмурт газетъёс но журналъёс пӧлын ӧвӧл егитъёслы нимысьтыз газет. "Инвожо" журналын ичи ёзъёсыдлэн гожъямъёссы, юнмам, кыдам писательёслэн ужъёссы. Тросгес мед печатласалзы егитъёслэсь верамъёссэс. Татьяна, дас сизьым аресъем нылмурт: - Удмурт шаерамы мед кузёяськысалзы удмурт газетъёс но журналъёс. Соос мед луысалзы чебер буёлоесь. Кылсярысь, "Маруся", "Лиза" выллем. Тани басьтом бускельмес - Татариез. Отын туж вылӥын культуразы. Бигер кылын журналъёссы но, газетъёссы но трос. - Нош кызьы малпаськод: малы Татариын озьы, нош Удмуртиын - мукет сямен? - Малы ке шуоно, али тросэз вылӥ кивалтӥсьёсын герӟаськемын. Нош соос пӧлысь туж уноез - ӟучъёс. Мукет выжыос удмурт кыл шоры киынызы шонто гинэ. Зэм вера Татьяна. Туала улонын тросэз герӟаськемын вылӥ кивалтӥсьёсын. Соин но, дыр, сыӵе ӧжыт удмурт газетъёс но журналъёс. Озьы ке но, егитъёслы удмурт газет поттыны кулэ вылэм. Соослэсь сюлэмшугъяськонъёссэс шараяно, егитъёслэн улонысьтызы иворъёсын тодматоно. Ку малпаськыны кутскозы удмурт егитъёс сярысь?! Светлана Иванова, Удмурт кун университетын дышетскись. Кузесь но вакчиесь сюресъёс Улонысь дырызлэсь вазь кошкем кылбурчилы михаил покчи-петровлы 70 арес тырмысал Сыӵе ини музъем вылэ улыны вордскем адямилэн адӟонэз: солы усем, оло нош, сётэм сюресэз ортчыса, пыраклы кошке мукетаз дуннее. Таӵе кылъёсын кутскисько удмурт кылбурчи Михаил Покчи-Петров сярысь куд-ог тодэ ваёнъёсме. 4-тӥ октябре солэн вордскемез дырысен 70 ар тырмиз. Нош сыӵе сэзь, чырткем, тузӥ воргорон 29 аресозяз но ӧз улы � 1959-тӥ арын 26-тӥ июне сюлэмыз ужамысь дугдӥз. Мон понна Михаил Покчи-Петров вал туж матысь адями но дуно эш. Ми, пӧртэм ёросъёсын вордскемъёс, пӧртэм институтъёсын дышетскемъёс, ог-огмес умой валамы но юн гажамы. Одӥг арзэ Миша дышетскиз Ижын � Удмурт пединститутын. Мукетъёсыз студентъёс-кылбурчиос кыкетӥ но куинетӥ курсъёсын вал ини. Эшъяськон ваньмес ик огазеялляз. Институтын дышетскем сяна, Покчи-Петров ужаз на радиоын: отын со диктор вал. Шутэтскон нуналъёсы но вазь ӵукна ик дыртылӥз студие. Таиз интыяськемын вал Ижевсклэн шораз ик � связья 57 номеро отделенилэн юртаз. Одӥг пол, каникул нуналъёсы, егит диктор кемагес изьыны шедьтэм. Шуак-дуак вуиз дорамы � Шумайлов ульчаысь (соку Верхний переулок) общежитимылэн нырысетӥ этажысьтыз кыкетӥяз. Ми но, Гера Архипов, Фома Овчинников, Миша Гаврилов но мон, каникулъёс дыръя ужаллямы "Советской Удмуртия" газетын (али со � "Удмурт дунне"). � Вить минут улыса, мыным студиез усьтоно, � лулзэ кутыны выре Покчи-Петровмы. Ваньмы чус луимы. Пукиськом. Вот ведь: Удмурт радио ӟуч кылын вераськыны кутскиз. Йырзэ ошиз кемагес изьыны шедьтэм пияш. Кӧня ке дыр ортчыса, Гай Сабитовлэсь куаразэ кылӥз но ӧжытак буйгаз кадь. Дикторын кема ужам Сабитов соку улэ вал автовокзал вадьсысь одӥгаз кык этажо пу коркан. Тужгес матын улӥсь ужасьсэс кин ке пыр ӧтьыны вуиллям. Маскара уд шуы таӵе учырез, но сыӵе югдуръёс одӥг-одӥг кылдылӥзы. Соин ик дисциплина шуонэз юн эскероно, быдэсъяно вал. Михаил Покчи-Петров тросэз удмурт писательёс сямен ик дышетскиз Можга педучилищеын. Ма бен, вордскем дорез та ёросысь ик Ныши-Какси (Бадӟым Сибы) гурт луэ. Ас палъёссэ кылбурчи котьку но гажаз, данъяськылӥз. "Дор" кылбурез, оло, вань гожъямъёсыз пӧлысь одӥгез кужмоез но чеберез луэ. Буйгатскыса, шыпытэн гинэ ӧз ортчылэ поэтлэн нуналъёсыз. со улыны но дыртӥз, шӧдыны-валаны но ӝог выриз. Котьку но азьпал радъёсын вамышъяз но ужаз. Пединститутын дышетсконме йылпумъяса, татысь ик педагогикая кафедраын кык ар ужай. Со дыре ик вал "Удмуртиысь комсомолец" газетлэн редакцияз литературая визь-кенеш сётӥсь. Москваысь А.В.Луначарский нимо театральной институтысь студент Михаил Петров выль кылбуръёссэ мыным ыстылэ вал. Жаль: гожтэтъёссэ киям ӧй кельтылы. Соос кыллё вал гожтэтъёсъя отделын. М.Покчи-Петровлэн трос кылбуръёсыз егитъёслэн газетазы потылӥзы. Аслам Москвае ыстэм гожтэтъёсы пӧлысь кыкез тани ӝӧкам кыллё али но. Машинкаен печатлам кыкетӥ экземпляръёс. Нырысетӥез кошке вал авторлы, киын гожтэмзэ сётӥсько вал архиве. "Удмуртиысь комсомолец" газетын ужай С.Г.Машков, Л.П.Емельянов, В.П.Ложкин редакторхъёс дыръя. Отделэн кивалтӥз Л.Н.Данилов. Мон � литконсультант. Тодматэме потэ Михаил Покчи-Петровлы ыстэм кык гожтэтэным. нырысетӥез. Ӟечбур, Миша! Нырысь ик таӵе вступление луоз (со одно кулэ). Кыӵе мынэ ини дышетсконэд? Мар вылез улонад? Серекъяны но кутскод � алиезлэсь но бадӟым вылез уз луы ук. Будэ, иське? Я, мед будоз. Миша! Майской кылбурдэ Герман ыстӥз, лэся. Кыксэ нош ик сётыны малпаськом: ӝоген, оло, инты сюроз (мон верасько "Очи арганчи" но "Уйвӧт" кылбуръёсыд сярысь). Трос гожъямедлы шумпотоно � гожъятэк улэмед уг луы, шӧдске. Умой со. Нош куд-ог дыръя йыркуръяськоно. Тани "Дворник" веросэд � лябыт ведь. Верос но, фельетон но шуыны уг луы сое. Таиз мынам малпанэ. леонид Никандрович но соглаш луиз. та темая веросъёс туж кулэ, нош кызьы ке мукет сямен возьматоно вал. Дворникез но умой-умой уд возьматӥськы, со нылмурт нергеослэсь но жоб пуштроссэс пумозяз уд вуттӥськы. Верос гожтыны кутскид бере, сое огшоры статьяез сямен гожтоно ӧвӧл. Одӥг урод сямыд вань: гожтӥськод но � мар гожтэмдэ учкыны уд яратӥськы ни. Кызьы нош сотэк? Я, вождэ эн вай. Эшъёсызлы таӵе урод гожтэтъёс ысъя шуод. Мар каром на, уг лу бере мукет сямен лэсьтэме? Валад-а? Я, ӟеч лу! Эш мылкыдэн С.Перевощиков. Та гожтэт Москвае келямын 1955-тӥ арын 17-тӥ мае. Пумаз пуктӥськем Мишалэн кылбурысьтыз-кырӟанысьтыз кылъёссэ: "Мар каром на?.." Кыкетӥез гожтэт со аре ик 3-тӥ ноябре келямын. Таӵе таиз. Ижевскысь салам! Оломар луиз ини монэн � вань эшъёсты тазьы вунэтыны шедьтод. Куинь-ньыль гожтэтъёсыд ӝӧкам кыллё. Кыдёкысез бордысен кутсконо кариськи. Пичи Миша! 9-тӥ декабре "Советской Удмуртиын" Петька-почтальон сярысь кылбуред потӥз. Со газетэз ыстӥсько, яралоз-а уз-а кылбуред? Тупатъясьсэ тышкаськемед потӥз ке, та гожтэтлэн авторез шоры черекъя. Поэмаед "Молотлэн" декабрь номераз потоз. Мукетэз газетэ но дасямын вал, табере озьы ик кылёз, дыр. Кылбуръёсыд ышонлэсь эн кышка. Соос яке потозы, яке ответ басьтод. "Комсомолеце" ыстэмез ляб. Малпаськонэн йырдэ ӧвӧл ӝегатэмед, соин ик али но "зӥр бергаса усё куаръёс", яке "чалмыт сыло гольык бусы вылъёсы". Умойтэм интыос тросгес гинэ: "пуктӥськемен зӥбем ӝӧк котыре", умой уг кылӥськы "японской но германской ожъёсын" шуыса кутскись строфа. Туж умой основной мыслез. Шонерзэ вераса, Миша, тае поттыны луоз � тупатъям гинэ кулэ. Праздник азе дасяны дыры ӧвӧл ни. собере ачиз автор умойгес тупатыны быгатысал. Егитъёслэсь конференцизэс январе ортчытыны малпало. Малызэ уг тодӥськы. Кыӵе улэ ӝыныед но будӥсь поколениед? Мар бордын али ужаськод? Ӟеч лу! Саламен С.Перевощиков. Эшлыко кусыпъёсмы Михаил Покчи-Петров Ижевске берытскем бере нош ик матынгес луылӥзы. со � театрын режиссёр, мон � газетын ужась. Кылбуръёсын кык книга поттыны вуиз Михаил Покчи-Петров � "Тодматскон" (1956) но "Малпаськон" (1959). Нырысетӥ сборникезлы рецензия гожтӥ. Со потӥз "Советской Удмуртия" газетын. Тодӥсько на авторлы трос ӟеч кылъёс верамме. Кызьы уд шумпоты эшедлэн нимаз книгаез потэмлы? Созэ но, тазэ но мыным ачиз кузьмаз вал. "Малпаськонлэн" титульной бамаз автор гожтэ: Семонэ � мынам эше, Вай вамышъялом ӵошен. Мон понна та дуно чуръёс улэ кизэ нюртэм но кузьмам нуналзэ пусъем: 3/ВИ-59. Улонысь кошконэз азьын, шуыны луоз. Улон тубатэтӥ Михаил Покчи-Петров дан утчаса ӧз вамышъя. Ачиз калык солэсь чылкыт сюлэмо, сэзь мылкыдо луэмзэ адӟиз но санэ поттӥз, вылэ ӝутӥз. Солы сётэмын вал Удмурт шаерысь искусствоосъя дано ужась ним. Егит адями понна со � бадӟым дан. Ныши-Какси (Бадӟым Сибы) гуртын вордскем пияшлэн бадӟым эшез вал татарстанысь Выль Канисар гуртын улон сюрес вылэ потэм адями Гай Сабитов. Одӥгез � театральной, мукетыз � литературной институтъёсын Москваын огдыре дышетскыкузы, кык кылбурчиос ӵем пумиськылӥзы, ог-огзылы выль чуръёссэс лыдӟылӥзы. Михаил Покчи-Петровез асьмелы ӟеч валаны но тодамы возьыны юрттэ Гай Сабитовлэн сонетъёсын "Шунды но ӝужа но" тугокоез. Отын кылбурчи кылбурчиез, мур гажаса, буре вае. Вот, малпасько, Мишалы но сизьымдон арес тырмысал ини. Адями азьын усьтӥсько кузесь но вакчиесь улон сюресъёс. Кӧня ортчемез шонер лыдъяны но дунъяны юртто шаеред, калыкед понна лэсьтэм ужъёс. Покчи-Петров али но пӧламы кадь, тодамы улэ. соин артэ улэмъёс но ужамъёс кылбурчилэсь, режиссёрлэсь нимзэ уг вунэто. Югыт дунне вылэ берлогес аръёсы вуэмъёслы, егитъёслы, Михаил Петрович Покчи-Петровен матэгес кариськыны юрттоз "Удмуртия" издательствоын" та нуналъёсы потэм книга. Бадӟым сюлэмыз вал Мишалэн. Кӧня вал солэн матысь эшъёсыз! Берпум сюресаз туж уно калык люкаськылӥз. Адямиос сое гажазы. Ачиз но со юн яратӥз! Семён ПЕРЕВОЩИКОВ. Николай Никифоров Кысэм кизилилэн югытэз Верос Алама уж понна анай-атаед азьын гинэ ӧвӧл, дят мурт азьын но кепырано (анаелэн верасмысьтыз). Калмез нюлэсъёс пӧйшуръёсын но емышъёсын узыр. Озьы ке но, инсьӧр кузёмы сое котькуд шораз пӧртэмгес интыям. Тани милям Бураши ёросамы нюрмульы чик уг буды шуымон. Вань ке но, кыдёке мыныса, нюлэс пӧлы интыяськем сыръясь интыосысь утчано луод. Нош Калмез шурлэн бур пал ярдураз улӥсьёслы майбыр - емышъёс удалтон аръёсы нюрмульыез пу лопатаен октыны быгатод, дыр. Сокем трос - быдэс пыдул лызпыръем емышъёсын веттаське, лэйка. Огнуналэ мон но лӧпшай: "Ветло ай со палъёсы. Толалтэлы ӧжытак варенья пӧзьтымон ке но октыны йӧндыро". Та ёросэ мон куинь ар талэсь азьло вуылӥ ни вал. Соку ик ӟеч-ӟеч тодматскыны, эшъяськыны вуимы Гозек гуртысь арлыдо кышномуртэн - Микта Паняен. Таяз ветлыкум но, тодмое доры дугдылыны малпаса (мотоциклэз кытчы ке но кельтоно ук), сьӧрам саламъёс басьтӥ. Куазь чебер улэ на. Дырын-дырын гинэ губиё зоръёс шыпыртыса ортчыло. Крезьгурась бурдоос пиоссэс бурдъяса ни выльысь нёжъяло шумпотон гуръёссэс. Ӵошкыт сюрес вылтӥ ӝог ширтӥсько. Лобань шур вамен выжез ортчем бере, кыдёке мыноно ӧвӧл ни - сокугес ик синйылтӥськод писпуос сьӧры ватскем Гозек гуртэз. Чус ульчаын бичаськыса ветлӥсь курегъёсты кышкатыса ортчисько но урам пумысь вужгес, сэрегъёсыз ӧжытак кырыжаны кутскем корка вӧзы дугдӥсько. Соку ик чырткемъяськисько: мотоцикл куараез кылыса уг-а учкылы Паня кенак? Ӧвӧл, кылымтэ, лэся. Синмам малы ке шарак йӧтэ укноысьтыз юг-тӧдьы чильтэръёслэн ышемзы. Капка азяз гуждор но ӧжыт лёгаськемын кадь. "Оло, Андрей пиез доры-а улыны кошкиз?" - нырысь малпан вордске йырвизьмам. Азьвыл ветлыкум, ӵапак со сярысь поттылӥз вал уго Микта Паня. Малпанъёсме но паймонме кир-пазь таркаса, ӟукырак! вазиз капкалэн ӟирыез. Тодмотэм воргоронлэсь шорам пыр-поч учкемзэ адӟыса, азьпала вамыштӥ. - Ӟечбуресь! Паня кенак дораз-а? - Ӟеч, - шорам сӥсъяса музэн учке воргорон. - Анаеным тодмоесь вал шат? Егит воргоронлэсь ортчем дырын юан сётэмзэ кылыса, мугор ик юзыр-кезьыр кариськиз. - Бен, тодмоесь. Нош анаед кытын? - ас малпанэлы оскеме уг поты на. - Анаелы - каюк, мил человек. Толалтэ кулэм. - Инмаре! Улымон на вал уго. Нош ачид куд пиез-о луиськод? Петыр? Андрей? - Ох-хо, ваньзэ ватытэк мадем, лэся, анай. Ойдо тодматском, - горд гоно суйзэ азьпала мычиз со. - Петунез мон солэн, кыкетӥез. - Костя, - вакчияк вази ачим. - Бурашиысь. Та ёросэ нюрмульы бичаны ветлыкум тодматскыны тупаз анаеныд. Мотоциклме тӥ доры кельтылӥ вал. - Озьы, иське. Ойдо корка пыром. "Иж-Планетаме" азбаре пыртыса интыяй но, сумкаен саламъёсме басьтыса воргорон сьӧры вамыштӥ. Петырлы ог ньыльдон-ньыльдон вить ёрос арес луоз. Вакчияк лэзем горд тушез но пуштырес мыйыкъёсыз-бакенбардъёсыз сое арлыдогем возьмато. Йырсиез вакчияк ӵышкемын, курень синъёсыз мӧзмытэсь, кыӵе ке ӧпкелён, ӝожан буёлъёс кугӟаллям кадь отчы. Ӝужыт но восьтэт мугорыныз ӵошатыса, киосыз кузесь адско. Аслэсьтыз ӝуждалазэ кулэстон вылысь, оло, ӧжытак губырскыса вамышъя. Петырлэн вылаз шунды сиос улын бездыны вуэм шакмато дэрем, джинс брюки, пыдъёсаз, пӧсь куазез чаклатэк, сурон сапегъёс. Азьло пыракум кадь уг лэйкало ни корказьысь выж пулъёс. Соку ик валатскиськод: выльёсыныз вошъямын, йӧн-йӧн тупатъямын-выльдэмын шальтыраны кутскем ӧс но. Корка пыремен валче, ныре шуккиське курыт тамак зын. Укно возъетъёс, борддоре ошылэм пужъятскемъёс ӵужектыны вутскиллям ни. Выж кемалась миськымтэ ке но, чылк-чылк ӵужемын, ӝӧквыл чылкытак утялтэмын. - Инты шедьтыса пуксьы, Константин. Кырсь улэм-вылэмелы но эн паймытскы. Корка пуш кышномурт киосты вите, соосты ӟечгесвала, лэся. Тыршисько ке но, соос музэн утялтыны, корка пушкам пальышась шунды сиосты кузёяськытыны уг йӧндыриськы на. - Шонер вераськод, Петыр. Пӧртэм ужпӧръёс пӧртэм киосты кулэ каро, - ӟус вылэ интыяськонъям вази мон. - Нош аслад кузэд кытын? Аресэд но вань ни кадь. - Пытсэтын сюан шудыны уг лэзё уго. Уката ик - нокинэ яратыны, - гольтырес пальпотӥз воргорон. - Обидемын мон инмарен, Константин. Ас гумырам сюан шудыны, эмеспи кариськыны ӧз кылды. -Да-а... Вождэ эн вай. Ӧй тоды, сыӵе интыосын улӥд шуыса. - Дас кык ар. От звонка, до звонка. - Нош Парасковья Андреевна со сярысь номыр ӧз поттылы вал. Уд вуылӥське шуыса гинэ ӝожтӥськылӥз. Уката ик тонэ жаляса лулӟылӥз. Егит дыръяд, пе, ӝоже уськытыны шедьтӥ. - Э-э, берло ке но, валатскем, иське? - паймытскиз ик воргорон. - Нош мон со учыр сярысь вунэтыны тыршисько. Сюлэмы гинэ пумитъяське, вунэтыны уг лэзьы. Кӧтӝоже тӧлӟымтэысь ик ӧй поттылы анаелы пытсэт сьӧры шедемме. Ӧй гожъя мон солы, Андрейлы но. Петыр нянь шормаз, ӝӧк вылэ сылалтэм губи интыяз. Ӟус улысьтыз поттӥз на мытэм полуштопен аракызэ. - Оломаръёс эн утча. Мон ачим но, анаедлы шуыса, сьӧрам саламъёс вуттӥ вал. Кузёлэсь адӟем карыса, мон но, сумкаысьтым саламъёсме, ог ӟенелик водкаме поттыса, ӝӧк вылэ интыяй. - Да-а, Парасковья Андреевнаеныд ваче вераськыса уд пукы ни таяз учыре, Константин. Жаль. Солы кисьтон выллем луоз-а, мар-а? Матэгес интыяськы. Мон олокӧня пол косэмзэ-куремзэ возьмаса ӧй пукы ни. Лыктыса ӝӧк вӧзысь пукон вылэ пукси. Стаканъёсмес шуккытэк гинэ кымалтэммы бере, сылалтэм губи доры сузьтӥськи. Ческыт шӧмоесь, быгатыса сылалтэмын коньыгубиос. Пиньёс улын куажыр-куажыр куаразэс сёто. Петунь (озьы мусояса нималляз пизэ Паня кенак ас тодэ ваёнъёсаз) ӝӧк дорысь ӧжытак палэнскиз но сигарет кенжытӥз. Кӧлон койкаез вӧзысь анаезлэн туспуктэмез шоры учкиз но секытак лулскиз. - Курадӟыса, ас вордэм нылпиосызлэсь шуныт кылъёссэс кылытэк, кенъёсын улытэк, внукъёссэ мусоятэк улыны кылдӥз анаелы. Чик шумпотон адӟытэк кошкиз кадь югыт дунне вылысь, мискинь. Шудонын шедьтэм "емышъёс" вал ми Андреен. Пересьмон даурзэ ас нылпиосыз вӧзын ортчытыны малпаса вордӥз вал, дыр. Нош улон сильтӧлъёс ваньзэ суразы-тарказы. - малы-о огды но анайды вӧзын, ас вордскем гуртады улоно ӧд кариське? - шӧдытэк ик кыли секыт юанэлэсь бурдъяськыса кошкемзэ. - Э-э, Константин, - киыныз шонтӥз Петыр. - Кинлэн-о вань шудоесь малпанъёсыз быдэсмо меда та сьӧлыко музъемын? А-а? Мынам но эшъёсы кадь ик, гуртам семья кылдытыса, ас нылпиосме мусояса, анаен огазьын улэме потэ вал. Нош югыт дунне вылэ вордӥськыкум, кузё кымесам воксё мукетсэ гожтэм-пусъем, вылды. Ӧз, малпамея ӧз лу. Ӧз кылды мыным шумпотон нимаськись шурлэн чылкыт ӧраз пыласькыны. Азьпалан но шуд бурдоме кутыны уг пӧрмыты кожасько. Егитысен ик кошкыны тупаз мыным гуртысь. Ачид верад уго, анае ассэ мон азьын сьӧлыкоен лыдъялляз шуыса. Вот, со витьымтэ-возьмамтэ сьӧлык ик улляз монэ гуртысьтым, пыраклы люкиз егит дыр эшъёсылэсь, яратонэлэсь... Секыт но туж кышкыт адӟон та адями сюлэмлы. Мон ас юанъёсыным ӧй люкеты. Шыпытак султыса, учог азе интыяськи но сигарет аратӥ. Ас поннам шӧдӥ-валай: люкетыны уг яра! Сюлэмаз кӧтӝожъёссэ возись адями сабыр, дыртытэк гинэ мед кылалоз-буралоз. - Шуг вераны: яратӥ-а, синмаськи гинэ-а мон гуртысьтымы Исьтапан Валялы? Мон сое али но пырак вераны уг быгатӥськы. Нош ужпум со бордын ӧвӧл, Константин. Укыр мыдланес кутскиз милям эшъяськонмы. Кык лэсянтэмъёс, тямысэтӥ классын дышетскыкумы ик анай-атай кариськыны турттӥськомы вал. Зэмзэ вераны кулэ: Валюша ас секытэз сярысь нокинлы ӧз поттылы. Кыкнамы гинэ тодыса улӥмы нырысь- валысь. Бератаз мон ас анаелы шараяны малпай. Кузпалъяськон, сюан сярысь кылпум ӝутыны дӥсьтонлык шедьтӥ. - Нош Парасковья Андреевна? Пумит кариськиз, оло? - Коса на камень, - киыныз шонтыса, ӟуч сямен вакчияк гинэ ивортӥз со. Маке малпаськемез бере будэтӥз на: - Валюшаелэсь нимзэ кылыса, воксё перияськиз кадь анае. Коть, пе, мунчокузёлэсь нылзэ кенлы вай, нош Исьтапан Валялэн тусыз но, буйыз но медаз лу. Воргорон кысэм сигаретсэ учог азе сэрпалтӥз но стаканъёсы аракы лэзьяз. Мон юыны пумит луэм бере, аслэсьтыззэ ӝогак кымалтӥз но, ымдуръёссэ кимышкыныз ӵушалтыса, мадёнзэ азинтӥз. - Анаелэсь малы сыӵе лекос пумитъяськемзэ ӧй вала: мугзэ ӧй тоды соку. Ас поннам гинэ малпай: "Секытлы чидамтэеныз, ас чыртыяз выль сӥес бырттэмез уг поты, луоз". Алигес тани анайме ватэмзы бере ни гуртысь огез мӧйы кышномурт шараяз, вань ортчемез шоры выль синмын учкыны юрттӥз. Утёд ке, анайме егит дыръяз, возь турнаку, Валялэн атаез, Исьтапан, кужмысь эриктэмам вылэм. Вот, пас-ку-да-а! - кузь нёжтӥз со. - Нош ми, пичиос, со сярысь кытысь тодомы? Тямыс классэз кызьы но озьы пырпотӥ...и городэ шонтӥ. Анаелы йыркуре йырйылтӥм шукыяськыса ортче ни вал. Жалялоз, ас янгышсэ валалоз но берытскыны косыса сюлвороз кожай. Ас понназ лушкемен куректылӥз, синвуаськылӥз, дыр, мискинь кышномурт. Нош монэ ӧз утча. Озьы улон сюресмы вайяськыса кошкиз. А город, тодӥськод, Константин, кыӵе маке со: ас кырсь киосыныз ӝабыртэ гуртысь лыктэм муртэ, шоканэз пытсаськымон кекатэ, бератаз - ньылэ... Шеди мон лушкаськисьёс пӧлы. Дальше - больше. Сюрес пумысь шедьтосэ тодмо ни: тюрьма! - Оло, сьӧрад Валядэ басьтоно вылэм, Петыр? Ӵошен семья кылдытысалды: городын но уло угось гуртысь кошкемъёс. Ваньзы кырыж сюрес вылэ уг кожо. - Нырысь малпанэ мынам но сыӵе ик вал, Константин. Валя огназэ куштыса кельтӥ кожам, лэся. Соин ик бероми... - огдырлы ӵоксузиз мадисе. - Кызьы беромид? Кытчы? - Лобань шурмылэн бугрес ӧрезлы лулзэ, мугорзэ но вордскымтэ нылпимес "кузьмам". - От, мискинь лулъёс! - Мон ӟеч валасько Валентинаез. Секыт вал, дыр, оген. Секыт но возьыт. Уката ик нокинлэсь юрттэт, шуныт кыл витьыны. Шудонын шедьтэм "ваньбурез" понна, оло, анай-атаез ӟеч кыл веразы кожаськод? Эн ик возьма! Ар ортчыса бертӥ вал гуртэ. Соин кенешыны, сьӧрам нуыны шуыса. Нош со йырпоромымон иворез кылыса, ӝытаз ик берен кошки. Ӧй быгаты ни мон анаелэн, гуртоосылэн синъёсазы пырак учкыны. Ма, быдэс гурт калык азьын та трагедия понна мон уго ягыш вал. Нош ас лул-сюлэмы валамъя - анае. Петыр мадёнзэ йылпумъямен лыдъяз, лэся. Интыысьтыз султӥз но шорам учкыса ӵектӥз: - Ойдо, нюлэскытӥ котыръяськыса бертомы ай. Ачим но емышъёслы, губиослы ветлыны малпасько вал. Оло, мылкыды но капчиялоз. Нюлэс ас чеберлыкеныз но узырлыкеныз мылкыдмес бурдъяз кадь. Ма, Петыр но губиосын, емышъёсын узыр, аслыз гинэ тодмо интыостӥ нуллӥз. Соин ик, лэся, кудыосмес ӝог тырмытӥм. Гурт пала вамышъякум ни сюлэмме бичатӥсь юанме бурдъятэк ӧй чида. - Петыр, тыныд, шуом, Инмар ас гуртысьтыд палэнэ кошкыны гожтэм. Нош агаедлы, Андрейлы, малы-о кошконо вал на? - Видишь ли: анаелэн сямыз ярамтэ. Воргоронъёсты, пе, яратылӥз. Соин ик, матысь адямизэ "вузаса", мукет районэ пегӟем, Иуда. - О-о, укыр "данъяськод" агайдэ. - Кыӵе агай со мыным? Матысь муртсэ вузась Иуда ик вань. Артэ районын улыса вылысь, анаймес берпуметӥ сюресаз келяны но бертымтэ. Зэм, азьло аръёсы бертылыса, пудо сиён, пу дасяллям ик. Со понна, анайлэсь вордэм пудооссэ вандыса, сӥльзэ вузаса, кисыоссэ коньдонэн тырмытылыса кошкылэм. Берло аръёсы анае, гурт кеч сяна, мукет пудо возьымтэ ни. Андрей но вуылэмысь дугдэм. Соиз паймымон, Костя, - куаразэ ик бадӟым карыса лэзиз Петыр, - Андрей воксё сьӧд ӝушо адями вылэм. Алигес сельсовет председательмы ивортӥз. Берлояз вуылыкуз, Ондӥ куриськон гожтыса кельтэм. Шараялом-а пуштроссэ? - Бен, вера. "Анайме, Никитина Парасковья Андреевнаез, утьыны пумит луэмме верасько. Интыялэ пересьёслэн юртазы. Яке мед утёз гумыраз тыршем колхозэз". Вот тыныд ас гадьыныд сюдыса вордэм нылпи! Ас пиед шуыны ымыд усьтӥськоз шат? Иуда ик вань со. - Осконтэм кадь: ас анаез ук. - Кин оскоз та шакшы ужлы, кин? Мон но, гожтэм куриськонзэ ке ӧй возьматысалзы, ас синъёсыным ке ӧй адӟысал, ӧй лыдӟысал ке, оскысал шат? Воргорон анаезлэн туспуктэмез шоры учкиз но, выльысь сигарет аратыса, ӝожанзэ азинтӥз: - Малпалоз ай со анаймес, кулон азяз но тэльмыроз. Кысэм кизилилэн югытэз музъем вылэ кема дыр ортчыса вуэ, шуо. Улоназ басьтэм сьӧлыкъёссэ анае азьын куке но, мон азьын но, гуртоос азьын но тӧдьманы уз быгаты ни. Алама уж понна но ымныр пилиськымон гордэктыны тупа. Ватонэз ӧвӧл: ачим но янгыш, сьӧлыко. Нош милям анаен ог-огмы азьын сьӧлыкъёсмы огкадесь. Вес табаос вылэ поныса мертад ке, воксё уз шудэ. Озьы ке но, мон - солэн пиез, со азьын сьӧлыке но, иське, секытгес луыны кулэ. Тае валаса ик ас гуртам улыны малпасько. Медаз таркаськы Микта Панялэн юртъерез, жуг-жаг медаз шобырты шайвылзэ. Мынам кас сюлэмам но вутскиз ни кысэм кизилилэн югытэз. Экономика Нюлэс куашетэ Та нуналъёсы шаерысьтымы нюлэс ужасьёс сӥё-дано пусйизы асьсэлэсь профессиональной праздниксэс. Удысын усто тырше Ижысь опытной нюлэс хозяйство. Со сярысь алигес газетмы гожъяз. Юнме шорысь ӧз, татын вань ужъёс - выль нюлэс мерттон, тэлез утён-чаклан - кулэезъя радъямын. Солэсь данзэ ӝуто, ужъёсты оскымон быдэсъяло нюлэсчиос. Тямыс лесничествоос пӧлысь котьку висъяське Рашид Садретдиновлэн Майской лесничествоез. Со 15 ар кивалтэ ни та коллективен, нош та удысын 32 ар ужа ни. Лесничество пичи ӧвӧл, 21 мурт тырше. Соос арлы быдэ шорлыдын 15-20 гектар вылэ кыз но пужым мертто, 200 гектар вылын пинал нюлэсэз шеромыто. Рашид Кашапович 1965-тӥ арын быдтӥз Лубянысь (Татарстан) нюлэс техникумез. Собере куинь ар армиын служить кариз. Ужаны кутскиз Лубянысь ик опытной лесхозын техник-лесовод луыса. Усто лесничий быръемын Завьял районысь думае. Депутат ужа музъем, инкуазь узырлыкъёсъя но гурт хозяйствоя комиссиын. Лесхозын таӵе ужасьёс ичи ӧвӧл. Тани лыдъян-чотан ужез быгатыса нуэ экономист Наталья Надирашвили. Со директорлэн Владимир Соловьевлэн оскымон юрттӥсез но ӵуказе нуналэз чаклась луэ. Озьы ик шуныт кылъёс верало Завьялово лесничествоысь водитель чиган Василий Галанов сярысь. Со татын 5 ар ужа, улэ Казмаска гуртын. Василий Александрович "уг" шуонэз уг тоды, машинаез сюрес вылэ потыны котьку дась. Чебер шудэ гитараен, аккордеонэн но кырӟаны яратэ. Г. Романов. Лесничий Рашид Садретдинов. Экономист Наталья Надирашвили. Шофёр Василий Галанов. Туспуктэмъёсыз В. Беломорскихлэн. Михаил Кокорин за духовную чистоту Мы продолжаем знакомить читателей с выдержками из книги М. К. Кокорина "Эгоизм закона - эгоизм власти", которая сейчас готовится к выпуску. "... Каждый вечер, включая телевизор, вы и особенно ваши дети становитесь объектом серьезной информационной и духовной обработки. Общество проходит постоянный инструктаж, как надо убивать со смаком, насиловать, грабить, хамить. за всем этим не наш с вами мир. И это называют свободой слова. Поганого, неродного, сволочного слова, но свободой, декларируемой законом. За таким законом, позволяющим не свободу, а разгул слова, эгоизм власти по отношению к духовно-нравственным ценностям российских граждан. Традиции и обычаи, неписанные правила поведения складывались веками, очищались ото всего вредного. Они заложены в генах, поколениях народа. Их отсутствие не только тормозит соблюдение принятых законов, но и позволяет принимать законы, которые для государства и народа несут вред, приходить к власти разного рода проходимцам, которые в порядке "благодарности" развалили страну, заполнили наш духовный мир опасными игрушками и ловушками. Возрождение традиций, следование им- благо, спасение и очищение для нас. Это и есть настоящая законность в условиях "беспредельного" нормотворчества". Архивысь документъёсъя Удмуртия ЪЪ дауре 1946-тӥ ар Быдӟым тылож бере нырысетӥ ар... СССР-ысь Вылӥ Кенешлэн Президиумезлэн Указэныз 20-тӥ мартэ ялэмын быдӟым тылож пыр потэмъёсты доразы лэзён сярысь. Соослэн ӵыжы-выжыосынызы пумиськылонъёссы радъямын вал Удмурт шаерысь весь вань чугун сюрес станциосын. Татын ужазы агитпунктъёс, калыкез сюдӥсь-вордӥсь юртъёс, эмъясьёс вӧзысьтызы ӧз кошкылэ. Бадӟым саклык висъяськылӥз быдӟым тылож пыр потэмъёсты уже интыянлы. Фронтысь берытскылэмъёслы сётылӥзы азьвыл удысъёссэс, дышетылӥзы выль ужъёслы, эскерылӥзы улон-вылонзэс, юрттылӥзы дӥсен-кутэн, пуэн, лэсьтӥськон материалъёсын. 1946-тӥ арын Удмуртиын вал быдӟым тыложысь сӧсырмыса бертэм 15769 адями. Соосты эмъян понна, шаерамы ужаз куать госпиталь: ньылез Ижын, кыкез - Сарапулын но Варзи-Ятчи курортын. Сӧсыръёсты йӧнатыку кутӥськылӥзы выль амалъёс. 29-тӥ июле Парижын усьтӥськиз тупаса улонлы сӥзем кенеш. Со эскерыны кулэ вал гитлер Германилэсь Италиен, Румыниен, Болгариен, Венгриен но Финляндиен огкыл гожтонъя ӵектосэс. 1-тӥ октябре 15 час 40 минутэ Военной трибунал Нюрнберг городын ивортӥз йыруж лэсьтӥсьёслы пум ваён сярысь. Дас одӥг адями виыны чакламын. 1946-тӥ ар - ньылетӥ пятилеткалэн нырысетӥ арез. Быдӟым тыложез азинлыко йылпумъяса, кунмы басьтӥськиз куашкатэмзэ ӝутон борды. Ижысь заводъёсын нуналмысь кулэ луись вуз поттон 1946-тӥ арын йылӥз 19,8 процентлы (1944-тӥ арен ӵошатыса), Сарапулысь Г. К. Орджоникидзе нимо завод поттыны ӧдъяз "Урал" приёмникъёс, Камбаркаысь машина лэсьтӥсь завод - чугун сюрес платформаос, Воткалась машина лэсьтӥсь завод чорыг вордон удыс понна поттыны кутскиз локомобильёс но транспортёръёс, Сарапулын но Можгалан выльысь улӟытэмын корка пушкын кулэ луись тӥрлык поттон. Предприятиосын басьтӥськизы кортӵог, бирды но юрт котырын кулэ луись мукет арбериос дасян борды. 15-тӥ мартэ СССР-ысь наркоматъёс пӧрмизы министерствоослы. Наркомъёс луизы министръёс. УАССР-ысь Вылӥ Кенешлэн Президиуменыз 28-тӥ мартэ кутэм Указъя шаерысьтымы Калык Комиссиаръёслэн Кенешсы пӧрмиз УАССР-ысь Министръёслэн Кенешсылы (кивалтӥсез луиз А. В. Тронин). Та аре ик дас вить ар тырмиз Удмурт пединститутлы. Данакез дышетӥсьёс данъямын вал "Калыкез дышетонысь азьветлӥсь" гадьпусэн. Глазовысь дышетӥсьёсты дасян институтлы сётэмын В. Г. Короленколэн нимыз. Кылъя, литературая но историяя Удмурт институт печатланы дасяз удмурт калыклэн ортчем сюресэзъя документъёсын "Вотка музъем вылысь удмуртъёс ЪВ-ЪВИИ дауръёсы" нимо бичет. 9-тӥ августэ ВКП(б)-лэн ЦК-ез-лэн оргбюроез культуралы сӥзем кенеш ортчытӥз. Отын вераськиз И. В. Сталин. Адямиослэн тодазы кылизы таӵе кылъёсыз: "... Малы мон уггес яратӥськы Михаил Зощенко выллем адямиосты? Малы ке шуоно, соос гожъяло ӧскемез поттӥсь суретлы кельшись макеос... Эйзенштейнлэн "Иван Грозный" ужезлэн кыкетӥ люкетэз воксё валантэм..." Валамон ни: И. В. Сталинлэн кылъёсыз кыӵе ке йылпумъянъёс лэсьтӥзы. 14-тӥ августэ потӥз ВКП(б)-лэн ЦК-езлэн "Звезда" но "Ленинград" журналъёс пумысь постановлениез. Печатланы лэземын ӧвӧл ни Михаил Зощенколэсь но Анна Ахматовалэсь ужъёссэс, "Ленинград" журналэз. 26-тӥ августэ потӥз партилэн ЦК- езлэн "Драматической театръёслэн репертуарзы но сое умоятонъя ужрадъёс сярысь" постановлениез. Культура султӥз нюръяськон сюрес вылэ. Н. Пушкарёва, Удмурт Республикаысь Кун архивлэн директорезлэн воштӥсез. Глазовысь кыкетӥ нылкышно школаын ожмаськон ужлы дышетонъя урокын. 1946-тӥ ар. Ӵошатскозы... пересьёс Калыкез улон-вылонын утёнъя министерство арлыдоос понна 5-тӥ октябре 11 часысен шулдыр ӵошатскон ортчытэ. Отчы пыриськозы Ижевскысь, Воткинскысь, Глазовысь, Сарапулысь, Можгалась социальной юрттэт сётонъя центръёсын шутэтскисьёс. 11-тӥ октябре арлыдоос пумиськыны быгатозы тунсыко адямиосын. Ужрадъёс ортчозы Ижевскысь "Металлург" культура дворецын. И. Кириллова. Гажано дышетӥсьёс! Шуныт мылкыдын, сюлмысь ӟечкыласьком тӥледыз Дышетӥсьлэн калык куспо нуналэныз. Асьмелэн сюлэмъёсамы Дышетӥсь котьку но тужгес матын луись адямиосын артэ луоз. Туннэ нуналлы вуоно кивоштӥсьёсмылы тодон-валанъёс сётон тужгес бадӟымез но кун политикаын нырысь быдэстоноез ужпум луэ. Тӥледлы оскемын туж бадӟым удыс - угось, кызьы дышетомы асьмеос пиналъёсмес, со бордысь ик потоз азьланяз улон- вылонмы. Шумпотымон соиз: тӥляд, гажано дышетӥсьёс, жадёнэз валатэк тыршеменыды, Россиын калыкез дышетон удыс, азьвыл сямен ик, быдэс дуннеын адӟем карымонэз луэ. Сюлмысь сӥзиськом Тӥледлы ужады азинсконъёс, юн тазалык, тупаса но огкылысь улон. С. В. Кириенко, Россия Федерацилэн Президентэзлэн Приволжье округъя оскем муртэз. С. В. Чикуров, Россия Федерацилэн Приволжье округысьтыз Удмурт Республикая валтӥсь федеральной инспектор. Гажано дышетӥсьёс! Шумпотыса ӟечкыласько тӥледыз праздникеныды! Элькунмылэсь визь узырлыксэ йылэтонэ пыриськемдэс вылӥ дунъяса, тау кареме потэ нылпиосты будэтон сярысь уен-нуналэн сюлмаськемды понна. Кужымдэс жалятэк тӥ ужаськоды, азьланьын улонмы мед умоялоз шуыса. Асьмеос ваньмы тыршиськом пиналъёсмес шудогес карыны, соосты шуг-секытъёслэсь утьыны. Огъя кариським ке, озьы ик луоз шуыса оскисько. Мед тырмоз юн мылкыдды но кужымды ӟеч ужъёс лэсьтонын, мед удалтоз тӥледлы улонын! Тазалык но вань умойзэ гинэ сӥзисько тӥледлы! Светлана Смирнова, Россия Федерациысь Кун Думалэн депутатэз. Пайдаёгес кутоно Удмурт Республикаысь Правительстволэн 2-тӥ октябре ортчем кенешаз эскеремын "электрокужымез но шунытэз шыръян, солэсь пайда сётонзэ будэтон сярысь" Законлэн инъетэз. Со дкументэн тодматыса, эстӥськонъя, энергетикая но связья министр Виктор Савельев пусйиз, Удмурт Республика та удысын ужзэ нуоз электрокужымез но шуныт сётонэз пайдаёгес кутон вылысь. Сое кун эскерыса возёз, рынокын дунъёслэсь вошъяськемзэс лыдэ басьтыса, энергетикаез азинтонлы быгатэмезъя юрттэт сётыны тыршоз. Законлы инъетын озьы ик вань энергетикаез поттӥсьёслы но сое басьтӥсьёслы налогъёс тыронъя льготаос сярысь ёзэз но. Законлы инъет Удмурт Республикаысь Кун Кенешлэн сессияз эскерыны сётэмын. Удмурт Республикаысь Правительстволэн пресс-службаез. Пумиськем потэ... Ортче даур. Кызетӥез. Ми таяз вордскимы, будӥмы, юнмамы, кыдамы, ужамы, улонэз азьланьтӥмы! Даурамы пытьы кельтӥмы. даурмы ми понна лек, чурыт, гудыриё, дыгыриё вал. Озьы ке но, ӝожтӥськонэ ӧвӧл. Ужаса вормонъёс басьтылӥмы, со ик шумпотонъёс вайылӥз. Кыӵе ужез бугыртӥмы, погыльтыса нуимы. Али кужым кулэсмемъя паймисько: ма, кызьы меда вуылӥмы? Ӧм но жаде-а, мар-а? Ӵош ужано эшъёсы но огвыллемесь � задор мылкыдын ужасесь вал. Соос � Валентина Ивановна лебедева, Анна Егоровна Загребина, Александра Ивановна Вахрушева, Римма Ивановна Данилова, Алевтина Николаевна Журавлёва. Авторъёслэсь ужъёссэс эскерись дышетӥсьёс но ортчыт удалтылэмын вал: сакесь, лэчыт визьемесь, ньӧмыз понна гинэ ӧз ветлылэ уже. Авторъёслэн мумызы вал Валентина тимофеевна Кузнецова. Кӧня чидаз синтэм кӧчышпиос кадь адямиосты! Ми ведь, дышетон ужын кыдамын ке но вал ини, таӵе ужын нодтэмесь вал. Кутскыса-кутскыса малпасько но та мӧйы йырыным али но паймисько. Вордскыкуз ик сое инмар "редактор луод" шуиз, дыр. Со бордын ужаны но, ужез мытыны но, азьланьтыны но, сое йылпумъяны но каньыл вал. Кыӵе чурытэсь куронъёс пуктыны быгатылӥз ми азе! Солэсь куронъёссэс быдэстытэк, йӧныз ӧй вал. Ас азяз но сыӵе ик куронъёс пуктылӥз. Нокыӵе мертэт ӧвӧл солэн йырыныз но киосыныз сэзъям-веттам ужъёсты мертаны! Ми со вӧзын йыг-йыг, оскыса ужамы. Валамон: оскылӥмы визьмо редактормылы. П.М.Яшин издательстволэн директорез вал. Со трос вераськыны ӧз яратылы, нош авторъёс азе куронъёс пуктылыны ӧз вунэтъя. Букварь кылдытон азьын кенешысен огпол чот-чот вераз: "Школае нырысьсэ лыктэм пиналлэн букварез жингыртӥсь мед луоз". Сыӵе курон бере тяп-ляп ужаны дӥсьтоз на шат автор? Син азе али но яркыт суредъёс кадь пуксё авторъёсын, тодосчиосын, рецензентъёсын ӵош ортчытылэм кенешъёс. Со ужрадъёсты туж быгатыса нуылӥз министерствоысь национальной ужъёсты валтӥсь А.С.Березина. Та кышномуртлэн быгатонлыкезлы соку но синмаськылӥ, али но паймисько на. Оскем ужез котьку йыг-йыг нуэ. Ми, авторъёс, ог-огмылы синмаськылӥмы но: быгатыса урок нуэммылы, тунсыко луэммылы, чылкыт, чебер вераськеммылы. Ма ватонэз? Валаса дӥсяськеммылы, дышетӥсьлэн выросъёсызлы но. Сыӵе лушкем синмаськонъёс котькудмес узырмытъязы, вылӥе ӝутскыны бурдъяллязы, сюрес возьматъязы. Ма, нокызьы но-а меда пумиськыны уз кылды? Милемлы гольтыръяськон кулэ ӧвӧл, юон, сиськон понна ум люкаське. Син адӟыку, пель кылыку, пыдъёс нуллыку пумиськем потэ на вал. Отӥяз бер луоз ведь... Туж ӟеч малпанъёсын но тӥляд визьдылы, быгатондылы оскыса � Вера Ивановна Колесникова. Праздник шулдыр ортчиз "Метталург" культура Двореце нырысетӥ октябре уно ветеранъёс люкаськизы. Концерт кутскемлэсь азьло соосын врачъёс вераськизы, юанъёслы валэктонъёс сётӥзы. Кулэяськисьёсыз татын ик эмъюм но басьтыны быгатӥзы. Буфетын дунтэк пыжиськемен чай юизы. Собере арлыдоосты шулдыр концертэн шупоттӥзы нылпиос. Концерт бере но ветеранъёс доразы ӧз дыртэ. Эктӥзы, кырӟазы, ортчемзэ тодазы вайизы, туннэ улон-вылонзы сярысь веразы-мадизы. В. Чернов. Пусъемзэ быдэстом! "Удмуртилэн 2005-тӥ арозь азинсконэз" программа улосвыламы быдэсъя Россилэн Президентэныз В. В. Путинэн, Россия Федерацилэн Правительствоеныз кутэм "Россия Федерацилэн азинсконэзъя стратегиез". Берло дас аръёс куспын нырысьсэ Удмуртиын, быдэс Россиын сямен ик, экономика ӝутскыны ӧдъяз, улӟо промышленной предприятиос, узырме бюджет. Туннэ нунал сярысь гинэ ӧвӧл, матысь ньыль аръёсы азинсконъя программа сярысь но малпаськыны луонлыкъёс кылдо ини. Талэсь азьвыл экономикая лыдпусъёс сярысь тросгес вераськонъёс мынылӥзы ке, "Удмуртилэн азинсконэз" программалэн шорсюлмыз нырысьсэ луиз адями сярысь сюлмаськон. "Удмуртилэн азинсконэз" программаын пусъем валтӥсез ужпум - социальной удысэз азинтонлы инъет дасян. Сое лыдэ басьтыса ик азьланяз пусйиськозы экономикаын азьлане вамышъёс но. Та программаез дасянэ пырисько учёнойёс, устоосыз специалистъёс, депутатъёс, культура удысын ужасьёс, быдэс Удмуртиысь гажано адямиос. Тани ик пырозы городъёсын но ёросъёсын улӥсьёслэн курон-ӵектонъёссы. Мон оскисько, "Удмуртилэн азинсконэз" программа республикаысьтымы вань улӥсьёслэсь улон-вылонзэс шӧдскымон умоятыны юрттоз шуыса. Быдэстонтэмзэ уг ӵектӥськы. Нош мар ӟечсэ кутски вал Кун Кенешлэн Тӧроез луыса, азинто Президент луыса но. 15-тӥ октябре ортчоно быръёнъёс мон понна - туж бадӟым но юн малпаськытӥсь вамыш. Та нуналысен ик республикамылэн улоназ выль вакыт кутскоз. Монэн артэ огкылысь ужало тодӥсь-валась но оскымон адямиос. Оскисько тӥледлы но, мыным дурбасьтоды шуыса. Асьмеос ваньмы ӵошен трос лэсьтыны быгатом. Гажаса Александр ВОЛКОВ. Ой, палэзьпу, палэзьпу вазен удмуртъёс выль юртэнызы артэ палэзьпу мертто вылэм. Сыӵе сям возьматэ калыкмылэсь та писпуез яратэмзэ, гажамзэ. Зэм но, палэзьпу котьма ласянь синмаськымон. Тани шуом, куаро вайёсыз ик, беризь но кызьпу вайёсын ӵош, веник карыса пинал пудоез сюдыны мынэ. Сыӵе веникез сиыса ыжпиос, кечпиос умой будо, уг висё. Отын уно трос пайдаё витаминъёсыз. Уката но уно соос палэзьлэн сяськаосаз но емышъ1саз. Палэзьлэн кынтылэм бере кузял шӧмыз быре. Яое яратыса сие адями но, тылобурдо но, пӧйшур но. Шаерамы вить гуртъёс нулло та чебер писпулэсь нимзэ. Берло аръёсы палэзьпуэз мертто ни сюрес дуръёсы, городысь урамъёсы, эмъяськон, шутэтскон но мукет интыосы. Со ас понназ тросэн будэ лысо но куаро писпуос пӧлын. Пушъе со пеймыт тэльын но только со отын ӵемысь уг емыша. Завьял ёросысь Ягул гуртысь корка дорам тэльын палэзьпуос лыдъянтэм трос, нош емышез уг луы. Нош гуртын будӥсь писпуослэн вайёссы мульыосын някырскемын. Палэзьпулы синмаськиллям асьме пала лыктэм ӟучъёс но. Соос удмуртъёс сямен ик улон инты котыразы та писпуэз мерттыны кутскиллям. Соин но, дыр, мукет азьын улӥсьёс соосты "рябинникъёс" шуыса нималлям. Юнме ӧвӧл, дыр, палэзь ӟуски вань Ижлэн герб вылаз но. Палэзьлэн мульыяз уно С. Р, В2, К, Е, витаминъёсыз, каротинэз, кортэз, ыргонэз, марганецез, вань флавоноидъёсыз, дубилкъёсыз, органика кислотаосыз, нош С витаминэз лимонынлэсь но уно. Палэзь адямиез йӧнатэ гипертонилэсь, атеросклерозлэсь, подагралэсь, ревматизмлэсь, ты висёнъёслэсь, нош куасьтэм палэзь дизентерилэсь но цингалэсь эмъяскьыны юрттэ. Палэзь толалтэлы дасяло куасьтыса яке кынтыса. Уноез солэсь лэсьто ческыт варення, кӧс вина. Али палэзь вуэмын ни, интыен-интыен со туж удалтэмын. иське дасялэ яке мерттэ. Палэзьпу пӧртэм пумо луэ. Вань сьӧд емышоез, сое арония шуыса нимало на. Нош ческыт мульыё Невежинской палэзьпуэз садъёсы мертто. Отын уно сахарез. Н. Возисов. Огез мерттэ, мукетыз кора Шаерысьтымы нюлэс ужасьёс алигес гинэ пусйизы асьсэлэсь профессиональной праздниксэс. Сое бадӟымесь азинсконъёсын пумитазы Играысь нюлэсчиос но. Татысь лесхозын вань улытозязы тыршо ни нюлэсъя мастер Юрий Андреевич Палкин, лесник Юрий Анатольевич Устинов но лесничийлэн юрттӥсез Александр Николаевич Антипов. Ваньзы соос туж гажало асьсэлэсь быръем ужзэс. Соослэн ымныръёссы шундыен пыжемын но тӧламын, ужан дӥсьсы - фуфайка, пыдкутчанзы - сапег, нуналлы быдэ пыдын ортчо дасо иськемъёсты, нош мукет уж соослы кулэ ӧвӧл. Малы ке шуоно, нюлэс - соослы сюдӥсь но, эмъясь но, буйгатӥсь но. Лесничесвтоязы 19 сюрс гектар нюлэссы. Ужало но 19 кузя. Нюлэссэс чаклан сямен, гужем соос бичало губи, пӧртэм емышъёс, эмъяськон турынъёс но заготконторае вузало. Со сяна, турын турнало, пудо сиён дасяло, нош пӧйшуран азьын пӧйшуръёслэсь билетъёссэс эскеро. Но самой кулэ ужзы - нюлэс мерттон. А. А. Палкинлэн Россиысь нюлэс хозяйствоя федеральной службалэн "Нюлэс хозяйствоын 20 ар" знакеныз пусъемын. Нюлэсэз огез мерттэ, мукетыз кора. Умой ужа нюлэс дасян бордын "Лоза" акционерной общество. Огеныз бригадаен 15 ар ни кивалтэ Александр Иванович Ворончихин. Солэн бригадаез ужан нормаоссэс 140 процентозь тырмытъя. Ӟеч тыршо улвай корасьёс А. П. Калинин но П. С. Копысов, соин ӝеганъёс уг луо. П. Николаев. Дышетӥсьлэн нуналэныз! Калыкез дышетонын гажано ужасьёс, педагогика удысысь ветеранъёс но егит педагогъёс! Удмурт Республикаысь Кун Кенешлэн но аслам нимыным сюлмысьтым ӟечкыласько тӥледыз та сайкыт праздникен - Дышетӥсьлэн нуналэныз! Та нуналэ котькудӥз тау карыса тодаз вае визьнод сётӥсь адямиоссэ, дуно школазэ, дышетскем аръёссэ. Школаен люкиськем бере котькӧня ар мед ортчоз, котькудмы асьмеос ужъёсмес но ортчем сюресмес мертаськом дышетӥсьёсмылэн сётэм визь кенешенызы. Дышетӥсь котькуд вакытэ обществолэн но кунлэн осконэз кыле. Со киын страналэн азьланьын улонэз, со киын быдэс вуоно поколение. Кызьы со будоз, кыӵе общество кылдытоз, кыӵе ӟеч сямъёс пыӵатоз, кыӵе кусыпъёс тупатоз мӧйыосын, уноез со потоз дышетӥсьлэн быгатонлыкез но визьмыз бордысь. Удмуртиысь калыкез дышетон удыслэн данэз ӝутскиз республикаысьтымы городъёсысь но гуртъёсысь школаосын ужась дышетӥсьёслэн сюлмысьтызы тыршеменызы, профессизэс юн гажаменызы. Удмурт Республикаысь Кун Кенеш, кивалтӥсьёс тужгес но бадӟым тау каремзэс верало соослы, кинъёс школаын тыршо туннэ, кинъёс вуоно Россия понна зэмос кивоштӥсьёсты дасяло. Лыдъямон нуналъёс кылизы ни выль ЪЪИ даур вуытозь, соку кунмылэн улонэз потоз калыкез дышетон удысын басьтэм азинсконъёс бордысь. Соин ик али кун азьын бадӟым ужпум сылэ - матысь аръёсы дышетӥсьлэн ужезлы кулэезъя вылӥ дунъет сётоно, котькудӥз школа улонамы бадӟым инты мед басьтоз. Компьютеръёсъя технологиос пыӵан дауре дыр вуиз ни сайкытэсь школаосын дышетскыны, отын дышетӥсь сётыны мед быгатоз вань тодон-валанъёссэ но быгатонлыксэ. Соин ик, "Удмуртиез азинтон" программае матысь ньыль ар ӵоже чакламын 60 выль туала школаос пуктыны но калыкез дышетон удысэз азьланяз уката азинтыны. Гажано дышетӥсьёс! Та праздник нуналэ мон тӥледлы сӥзисько ӟеч мылкыд! Дышетскисьёстылэн вань ӟеч кылъёссы, ӟеч мылкыд сизёнъёссы мед шунтозы тӥлесьтыд сюлэмъёстэс! Юн тазалык, шудбур но дано ужады выль азинсконъёс но шумпотон тӥледлы. Праздникен! Удмурт Респуликаысь Кун Кенешлэн Тӧроез А. А. Волков. Гажано бырйисьёс! Быръёнъёсы мон пыриськоно кариськи, асме егитъёс пӧлысь адямиен лыдъяса. Элькунамы котькыӵе но интыын улыса, пӧртэм азьын ужаса но дышетскыса, егитъёсмы тӧрлыклэсь сюлмаськемзэ нокытын ик огкадь уг адӟо. Ас эрикрадзы сярысь шара веран понна, мон вань егитъёслы, Удмурт Элькунысь азьмынӥсь кужымъёслы огазеяськыны ӵектӥсько. Асьмелэн эрикрадмы вань тырмыт уждунэн умой ужлы но, дунтэк дышетсконлы но, уже пырыны огкадь луонлыкъёслы но, егит семьяосты мерлыко утён оскытонлы но. Одӥг гинэ нылпи будэтон но егит семьялы вормыны луонтэм коньдон зӥбет кылдытэ. Нылпи ваён кулэсме, элькунысьтымы экономика тупатскытэк, югдур уз воштӥськы. Пенсия басьтӥсьёслэн но коньдэт чотын улӥсьёслэн табышсы тыршись калыклэн уждунысьтыз кельтэм вытэн герӟаськемын. Тросгес егитъёс тырмыт уждун басьтыса ужазы ке, пересьёс, дышетӥсьёс но эмъясьёс умойгес улыны кутскозы. 15-тӥ коньывуонэ быръёнъёсын тӥледды мыным юрттыны ӧтисько, малы ке шуоно, мынам программаям Удмурт Эькунын выльдӥськон ужпум борды кичӧлтӥсь егитъёсын огкылысь басьтӥськыны чакламын. Тодады возе, 15-тӥ коньывуонэ котькуд куаралэн кужымез бадӟым шуыса! Соин ик, кандидатъёс пӧлысь кинлы гинэ уд дурбасьтӥське ке но, быръёнъёсы одно ик пыриськыны курисько. Соку гинэ быръёнъёс, вань калык пыриськыса но зэмлыко ортчозы Удмурт шаерез вордскем интыеныз лыдъясь котькуд адямилэсь, йӧскалыклэсь но вань калыклэсь малпанзэ возьматозы. Гажаса Удмурт Элькунлэн азьмуртэзлы ӵектэм мурт Андрей Едигарев. (Редакцилэсь. Материал басьтэмын факс пыр. Печатламын тупатъятэк). Тау карыса ӧй вуы Котькудӥз адями ӟеч кылъёсын тодаз вае нырысетӥ дышетӥсьсэ. Со ук тонэ дышетӥз нырысетӥ букваен, нырысетӥ лыдпусэн, нырысетӥ книгаен. Алнаш ёросысь Ляли гуртысь покчи классъёсын уно аръёс дышетӥз Иван Федорович Данилов. Можга педучилище бере вуиз со вордскем гуртаз. Собере пенсие потытозяз ужез яратоно школаяз. Гуртысь котькуд семьяын вань, солэн дышетэм нылпиез. Эшшо одӥг гинэ ӧвӧл, дыр, ай. Тани Иван Федорович дорын дышетски ачим но, выны но, сузэре но. Дышетӥсьлэн ужез капчи ӧвӧл. Уката ик покчи классъёсын жуасьёслы. Ведь пинал школае мыныкуз воксё еж на. Солы вӧзаз анай куэ. Сое дышетӥсь воштэ. Али ке но паймисько, кызьы воргорон ужа меда пичиосын? Но милям дышетӥсьмы котьку ляыт сямо вал. Зэмзэ но, со ик улонэ сюрес но усьтӥз. гуртэ бертылыку Иван Федорович котьку тунсыкъяськоз вал улон-вылонэн ужъёсын. Но малы ке тау шуыны дӥсьтонэ ӧз тырмылы кадь. Тани кылем арын Ляли| школа пусйиз 100 ар тырмонзэ. Соку уно шуныт кылъёс верамын вал отын ужам дышетӥсьёслы. Мон но дӥсяськи вал, ӧй дӥсьты. Нырысетӥ дышетӥсеным туэ берпуметӥзэ пумиськыны кылдӥз туэ март толэзе Алнаш селоын. Сипельлы шуыса туспуктэм лэсьтӥм. Фотоез аслыз кузьмаса ӧй вуы ни, кема висемез бере, гужем со улонысь кшкиз. Ми, солэн дышетэм нылпиосыз, тау кареммес вераськом Иван Федоровичлэн семьяезлы. Малпасько, газетысь туспуктэмез уноез синпельлы кельтозы шуыса. Н. Байтеряков. И. Ф. Данилов (паллянысез). В. Беломорскихлэн туспуктэмез. Сергей Шуклин - пумиськонъёс пайдаен берытско Огдышемъя тросэз малпало, быръёнъёс азьын кандидатъёс миллион манетъёсын, мантэн гинэ ӧвӧл, долларъёсын коньдон быдто шуыса. Зэмзэ но, туннэ республикамылэн нырысетӥ президентэз луон понна нюръяськись куд-ог кандидатъёслэн нимысьтыз пусйымтэ фондъёсазы ӝыны миллионысен куать но ӝыны миллион долларозь коньдон лыдъяське. Нош та инсьӧр лыдпусъёс чик но уг сёто на вормонлы оскон. Аналитикъёс юнме шорысь уг кышкало, Удмурт Республикалы президентэ кандидат, коньдон ужпумъёсты радъянъя федеральной службалэн Удмурт Республикая улосвыл агентствоезлэн кивалтӥсез Сергей Шуклин, быръён нунал матэктэмъя, президентэ мукет кандидатъёсты шӧдскымон азьпалтоз шуыса. Вылаз ик, кисыяз мултэс миллионъёсыз ӧвӧл ке но, калыкен меӵак пумиськонъёс ортчытъям чотын со туннэ нуналлы та аспӧртэм ӵошатсконын азьмынӥсьёсты сутылӥз ни. Ёрос школаысь дышетӥсьёсын пумиськонысь - сергей Борисович, туннэ тросэз власть понна нюръясько коньдоно луон вылысь, нош малы тӥ малпады президент луон понна нюръяськыны? - Туннэ мон коньдон ужпумъёсты радъянъя федеральной службалэн Удмурт Республикая улосвыл агентствоезлэн кивалтӥсез луыса ужасько бере, вераны быгатӥсько, республикамылэн экономикаез куашкамын шуыса. Соин огдыре милям службамы пыдес йылысьтызы ӝутӥз ньыльдонлэсь ятыр предприятиосты. Соос пӧлын - "Удмуртнефть" Ижысь подшипникъёс поттон но корт кисьтон заводъёс, Глазовысь "Химмаш" ("Инвис"), "Сарапул корт" но трос мукетъёсыз. Табере 20 сюрс ужасьёс дыраз уждун басьто, нош предприятиос асьсэлэн удысъёсазы азьветлӥсьёс луо. Милям штатамы дас одӥг мурт гинэ лыдъяське. Нош син азяды пуктэ ай, мар лэсьтыны быгатысал быдэс кун аппарат, сое радызъя ужатысал ке! Ёросысь тупатъян-лэсьтӥськон предприятиысь ужасьёсын пумиськонысь. - Туннэ верало, Россиын ваньбур поттон ӝутске шуыса. Озьы ке, малы на асьмелы коньдон ужпумъёсты кызьы ке выль сямен радъян-чакланэз? - Экономикалэн ӝутскемез сярысь вераськонъёс - со буш супыльтонъёс. Учке ай асьтэос, 1990-тӥ арын республикаямы азьвыл союзъя шорлыдын лыдпуслэсь 8,5 процентлы тросгес ваньбур поттэмын вал ке, туннэ Россияя асьмеос 20 процентлы бере кылиськом! Вылаз ик, бускель улосвылъёсын ӵошатыса, асьмелэн улон-вылонмы ваньмызлэсь "дуно" усе, нош шоро-куспо уждунмы ваньмызлэсь пичи. Республикамы "данъяськыны" быгатэ котькинлэсь но трос висён но асьсэды асьсэос быдтон уыръёсын. Умой пала воштӥськонъёс, республикамылэн кивалтӥсьёсыз азьысь бумагаос вылын гинэ ӧвӧл, улонын но луысалзы ке, сое асьмеос шӧдысалмы ни. Нош югдурез воштыны луоно. Милям службамы сярысь верано ке, со сое нуналлы быдэ, часлы быдэ возьматэ. Тужгес но кулэез - уж борды басьтӥськыны кулэ сое ӟеч тодӥсьёс, республикамес пашмем югдурысь поттыны сюресэз тодӥсьёс. Владимир Гобулев. СВЕДЕНИЯ о поступлении и расходовании средств избирательных фондов зарегистрированных кандидатов на должность Президента Удмуртской Республики (на основании данных сторых финансовых отчетов зарегистрированных кандидатов) 1 2 3 4 5 6 7 1. Ануфриев аслаз коньдонэз 5000 Вячеслав нимаз адямиослэн коньдонзы 8000 13000 4000 9000 Николаевич Юридик огазеяськонъёслэн коньдонзы - 2. Вершинин аслаз коньдонэз 8000 Павел нимаз адямиослэн коньдонзы - 23000 6759,10 16240,90 Николаевич Юридик огазеяськонъёслэн коньдонзы 15000 3. Волков аслаз коньдонэз 7000 Александр нимаз адямиослэн коньдонзы - 177000 9563,97 167436,03 Александрович Юридик огазеяськонъёслэн коньдонзы 170000 4. Ганза аслаз коньдонэз 10010 Николай нимаз адямиослэн коньдонзы - 10010 5854,60 4155,4 Алексеевич Юридик огазеяськонъёслэн коньдонзы - 5. Головизнин аслаз коньдонэз 10 Леонид нимаз адямиослэн коньдонзы 2800 2810 2800 10 Борисович Юридик огазеяськонъёслэн коньдонзы - 6. Едигарев аслаз коньдонэз 8000 Андрей нимаз адямиослэн коньдонзы 16050 24050 24050 - Борисович Юридик огазеяськонъёслэн коньдонзы - 7. Забильский аслаз коньдонэз 22700 Владимир нимаз адямиослэн коньдонзы - 2700 22655 45 Викторович Юридик огазеяськонъёслэн коньдонзы - 8. Кокорин аслаз коньдонэз 9100 Михаил нимаз адямиослэн коньдонзы 430 9530 3276,45 6253,55 Константинович Юридик огазеяськонъёслэн коньдонзы - 9. Рудчук аслаз коньдонэз 10 Сергей нимаз адямиослэн коньдонзы 500 2510 2500 10 Васильевич Юридик огазеяськонъёслэн коньдонзы - 10. Солуянов аслаз коньдонэз 8000 Андрей нимаз адямиослэн коньдонзы 99600 107600 67000 40600 Владимирович Юридик огазеяськонъёслэн коньдонзы - 11. Тимофеев аслаз коньдонэз 10 Владимир нимаз адямиослэн коньдонзы 3000 3010 3000 10 Борисович Юридик огазеяськонъёслэн коньдонзы - 12. Шукшин аслаз коньдонэз 10710 Сергей нимаз адямиослэн коньдонзы 3000 14710 7200 7510 Борисович Юридик огазеяськонъёслэн коньдонзы 1000 Суредъёсыз ворекъяло Озьы шуысал мон, Удмурт Республикаысь Изобразительной искусствоя музейлэн филиалэз, Уваысь выставочной залэ пыраса но отысь интыысь ас понназ ужась художниклэсь А. Ф. Журавлевлэн суредъёсыныз тодматскеме бере. Та возьматон ужалоз 6-тӥ сентябрьысен 6-тӥ октябрёзь, мукет сямен вераса, ӵап одӥг толэзь. Учкисьёслы возьматыны ошылэмын 80 суредъёс, быдӟалаезъя пичиесь но бадӟымесь, вань 1-2 квадрат метръемъёсыз но. Художниклэн ваньмыз сямен ужъёсыз сӥземын инкуазез возьматонлы. Учкисьёслы со шуэ кадь: "Гажалэ, вань сюлмыныды яратэ инкуазез, со тӥледлы котьку ӟечсэ гинэ кузьмалоз". Шунды ӝутске-а, пуксе-а быдӟым мастерлэн ужъёсаз, но синъёсты палёмытэ кожалод, со улэп шунды, улэп шунды сиос". Тӥни сыӵе мылкыд кылдэ, возьматонэ пыраса. Бен, вань на художниклэн портретъёсыз но. Аслаз но, Инмар суредъёсъя но, дояркалэн но. Берлоез ужез бадӟымгес полотно вылын. Скал кыскись нылаш - пырак улэп кадь, яке егит кышномурт-а со, но вань ныл шунытлыкез - ымныраз но, синъёсаз но, мугораз но. Одӥг гинэ юанэ кылдӥз: ас понназ ужась ке но. Малы уг луы Александр Федоровичез Удмуртиысь художникъёслэн Союзазы кутыны? Кӧня ке кыл автор сярысь. Вордскемын но будэмын Удмуртиын, Ува ёросын, йылпумъямын Кыйлуд шор ёзо школаез, армие ветлэмын. Собере Журавлев ужам Москваысь Лихачев нимо автозаводын, быдтэм военной училищеез, но ялан ветлылэм суредасьёслэн студиязы. Нош 19 ар талэсь азьло берытскем вордскем палъёсаз. Вордскемын Александр Федорович 1938-тӥ арын, пенсие потон арлыдыз ортчемын ке но ни, ужа Кыйлуд шор ёзо школаын дышетӥсь луыса. Вань солэн возьматоназ автопортретэз но. Соя учконо ке - йыг-йыг воргорон, ӟег нянь кадь. Тау, шуо солы учкисьёс, нимысьтыз книгае маке мында шунытэсь кылъёс гожтэмын. Автор возьматонысь ужъёссэ вуза, куинь пейзажъёссэ басьтӥллям ни. Та возьматонэ пыриськем на Радик Абдулханович Якупов но, райвоенкоматын ужась. Со ваем возьматыны пулэсь чеберъям арбериоссэ. Мылкыд карем потэ, таӵе калык азе ӵемгес мед поттылозы вылэм шуыса, нош художник Журавлев ке ужъёссэ Иж карозь мед вуттоз вылэм. П. Кузнецов. Егитъёслэн журналзылы - 10 ар - Туэ егитъёслэн "Инвожо" журналзылы дас ар тырме. Та дыр ӵоже кыӵе воштӥськонъёс луизы татын? - Нырысь ик, журналлэн вылтусыз воштӥськиз. Со чебергес луиз: Москваын потӥсь куд-ог ӟуч журналъёслэсь но йӧногес адӟиське ни. Азьвыл типографилэн луонлыкъёсыз ӧй вал, пӧртэм буёлъёсын шудыса, чебер журнал поттыны. Соин ик ӟеч туспуктэмъёс но, суредъёс но пожгес, бездытгес луылӥзы. Ма, бумагалэн ӟечлыкез но начаргес вал. Журналлэн пуштросэз сярысь верано ке... - Дугды ай, дугды, тӥ ведь, гырымтэ му вылэ, кизьыны потыса, чылкак выль кидыс уськытыны турттӥды. - Бен, чылкак выль журнал кылдытӥм. Ужасьёсмы но егитэсь, гурезез берыктыны дасесь вал: Владимир Котков, Ульфат Бадретдинов, Пётр Захаров, Юрий Лобанов, Любовь Тихонова... Кивалтӥсьмы - Нивклад Самсонов. Ма веранэз, вылез борды кутскыны котьку секыт, трос кужымез кулэ каре. Ваньзэ вормим. Журналмылэн аслаз ымнырыз кылдӥз. Нырысь номеръёсаз куддыръя милям куронъёсмылы тупасьтэмгес материалъёс но потылыны сюрылӥзы ке, азьланяз ми чаклам планъя ужаны кутским, котырамы авторъёсмы но пумен йылӥзы. - Журнал егитъёслы чакламын бере, гожъясьёсты но егитъёс, дыр? - Бен, котырамы егитъёсты бинялтыны тыршиськом, соослэсь гожъямъёссэс тросгес поттылӥськом. Палэнэ ум кельтӥське мӧйыосты но. Нош публицистика сэрегамы улонэз мургес тодӥсь-валасьёс тросгес гожъяло. - Берло вакытэ публицистика сэрегысьтыды ӵемгес адӟыны луэ Любовь Тихоновалэсь, Виктор Занчаровлэсь, Римма Лаптевалэсь, Пётр Захаровлэсь нимъёссэс. - Бен, соос синйылто, возьматыны быгато асьме улонлэсь пӧртэм лэчыт сэрегъёссэ. Соин ик лыдӟисьёсмылы соослэн гожъямъёссы тунсыко пото. Выль редактормы Пётр Захаров публицистика сэреглы тужгес бадӟым саклык висъя. Малы ке шуоно, тросэз егитъёс та палдурес улонамы йыромыны шедё. Кызьы юрттоно соослы? Мар кароно, кытчы вазиськоно егитъёслы, асьсэ кужымзылы, быгатонлыксылы осконзэс медаз ыштэ шуыса? - Журналдылэн 7-тӥ-8-тӥ номеръёсыз удмурто-ӟучо потэмын. Азьланяз но-а кык кылын поттыны чакласькоды? - Таиз номермы кык юбилейлы сӥземын: тямыстон ар тырме Удмурт Элькунмылы, дас ар - "Инвожо" журналмылы. Соин ик эскерон вылысь поттоно кариським кык кылын. Кызьы пумиталоз сое калык, ма шуоз? 5-тӥ-6-тӥ номеръёсын юанъёсын анкета но печатламы вал. Собере, журналмес таӵе чебер поттон понна, трос коньдон кулэ, асьме Правительство сое быдэсак сётыны уг быгаты. Озьы коньдонэн ялонъёс, материалъёс утчаса, асьмелы бызьылоно луэ. Соосты ӟуч кылын поттоно луэ - асьсэос куро. - Нош авторъёслэн гожъямъёссы кызьыгес потозы? - Мон журналмес ӟучо-удмурто карыны пумит. Коми-пермякъёслэн вал нылпиослы "Силькан" нимо чебер журналзы. Со кык кылын потӥз. Басьтӥсь луымтэен ворсаськиз. Асьмелы будэтыны кулэ чебер удмурт кылын гожъясьёсты. - Журналдылэсь юбилейзэ кытын пусйиськоды? - Бадӟым ӝыт ортчоз Драмая удмурт кун театрын. Кутскоз ӝытазе 18 часын. Отын ик мыноз журналмылы 2001-тӥ арлы гожтӥськон. Солэн быдэс арлы дуныз таӵе: редакциысь ке басьтоно - 45 манет, почта пыр ке - 65 манет 40 коньы. Та ӝытэ пырыны луоз, дун тырытэк. Ӧтиськом вань мылкыд карисьёсты. - Ӟечкыласьком юбилееныды. Азьланяз журналды бордаз уката тросгес лыдӟисьёссэ мед кыскоз. - Тау. "Инвожо" журналлэн валтӥсь редакторезлэн воштӥсеныз Галина Романоваен вераськиз Николай Байтеряков. 15-тӥ октябре быръёмы Удмуртилы сюрес (А. Солуяновлэн вазиськонэз) Валлян, 3-тӥ октябре, Удмурт Республикалы президентэ кандидат А. Солуянов журналистъёсын пумиськыны кулэ вал. Но со интые пресс-конференция ортчытӥз солэн пресс-секретарез А. Васильев. Со лыдӟиз А. Солуяновлэсь калыклы дасям нимысьтыз вазиськонзэ. Мар сярысь верамын отын? Туж ӧжыт дыр кылиз ни 15-тӥ октябрёзь, куке котькуд адями куаразэ сётыса бырйыны кулэ сюрес, кудытӥз со вамыштоз ЪЪИ дауре. 15-тӥ октябре асьмеос адямиез гинэ ум быръе, кудӥзлы оскомы властез. Ивановез, Петровез, Сидоровез яке кинэ ке мукетсэ ум быръе. Хозяйственникез но ум быръе. Меӵак вераса, республикамылы президент но ум быръе. Асьмеос быръёмы Удмуртилы сюрес. Тӥни со луэ милям прлограммамылэн валтӥсь инъетэз, верамын Солуяновлэн вазиськоназ. Собере президентэ кандидат политикъёсты ӧте "сьӧд" технологиослэсь куштӥськыны. Власть понна нюръяськон, ог-огдэ сьӧдман - сое адӟиськомы туннэ. Зэмос политикаен сое нокызьы но уд лыдъя. Озьы республикаез уд улӟыты. Сыӵе нюръяськон сэрен адямиос республикаын югдурез валамысь дугдӥзы ни. Соос вылэ нуналлы быдэ тоннаосын политикалэн сьӧд вуэз кисьтӥське, кудӥз президентэз быръёнэн но, азьлань мынон сюресэн но нокызьы герӟаськемын ӧвӧл, шуэмын вазиськонын. Республикамылэн вылӥ кивалтӥсьёсыз но таӵе югдурлы дунъет сётыны уг ни быгато, шӧдске. Кризисысь потон сюресъёс ӵектон интые, власть понна нюръяськон мынэ. Солы пум пононо ни. Вань калыклэн нимыныз, кин малпаське Удмуртиез улӟытон сярысь, ми президентэ кандидатъёсты ӧтиськом ог-огзы вылэ пож ву киськамысь дугдыны но валтӥсь уж борды басьтӥськыны: республикалы кризисысь потон сюрес шедьтыны. Озьы ик ми ӧтиськом Удмуртиысь иворъёсты вӧлмытӥсь ёзъёсты, югдурез мыдланьтыса возьматӥсь публикациослэсь куштӥськыны, котькӧня дун соос понна ӵектӥзы ке но. Оскелэ, нокыӵе дунын басьтыны уг луы шаерамы тупаса улонэз. Озьыен, мон, Солуянов Андрей Владимирович, шуэмын вазиськонын, ялӥсько мораторий вань кырсь иворъёслы, кудъёсыз нуналлы быдэ кисьтӥсько адямиос вылэ телевизор но газетъёс пыр. Сюрес усьтӥське ӟеч ӵектонъёслы но пограммаослы гинэ. Калыклы ми ӵектӥськом, верамын возиськонын, "Удмуртиез улӟытон" программа. Ӵапак со программаен пыриськоз нюръяськонэ президентэ кандидат Солуянов Андрей Владимирович но сое улонэ пыӵатыны тыршоз быръёнъёс бере. Журналистъёсты таӵе пресс-конференция паймытӥз. Малы пумиськонэ ӧз лыкты ачиз Солуянов? Журналистъёслэн юанъёссылэсь шат кышказ? Нош юанъёс вал. Озьы ке но, солэн юрттӥсез А. Васильев одӥг юанлы но валэктонъёс ӧз сёты. Т. Банникова. Сиён-юон поттон промышленностьын ужасьёс! Сюлмысьтым ӟечкыласько тӥледыз Гурт удысын но сиён-юон поттонъя промышленностьын ужасьёслэн нуналэнызы. Республикамы понна тӥляд ужды озьы ик кулэ но дано, кызьы ке нянь будэтӥсьёслэн но пудо утисьёслэн, етӥн но бакча сиён будэтон бордын тыршисьёслэн. Сиён-юон поттонъя промышленностьлэн предприятиосыз берло аръёсы трос шуг- секытъёсыз адӟоно луизы. Трос кужым но коньдон кулэ луиз удыслы выль техника басьтон ласянь. Мукет кунъёсысь сиён-юон поттӥсьёсын рынок амалэн ужан вакытэ нюръяськыны луоз поттоно вузлэсь ӟечлыксэ умоятыса гинэ. Соин но Удмуртиысь сиён-юон поттӥсьёслэн подукцизылы республикаямы улӥсьёс ялан вылӥ дунъет сёто ни. Гуртын тыршисьёс но сиён-юон поттон промышленностьын ужасьёс азьын быдэстоно ужпумъёс трос на. Республикамылэн калык хозяйствояз тӥлесьтыд удыстэс тужгес кулэен лыдъяськом. Ӵапак солы нимысьтыз инты висъямын "Удмуртиез азинтон" программаын. Асьме азьын огъя одӥг ужпум сылэ - умойгес кароно калыклэсь улон-вылонзэ. Оскисько, гурт удысын но сиён-юон поттонъя промышленностьын ужасьёс ошмесо шаермес узыргес но чебергес каронын вань кужымзэс сётозы шуыса. Сӥзисько тӥледлы тазалык, шудбур, вань ӟеч малпанъёсты мед быдэсмозы. Праздникен! Удмурт Республикаысь Кун Кенешлэн Тӧроез А. А. Волков. Октябрь толэзе тужгес сӥлы карон нуналъёс 4 октябре Кузё-Инмарлэсь Улэп улон Сётӥсь Кироссэ Ӝутон праздникез сётон (Отдание праздника Животворящего Креста Господня) 6 октябре Покров праздниклы сӥзьыса, Кулэмъёсты буре ваён нунал 8 октябре Родонежысь игуменлэсь, Сергий преподобнойлэсь кулэм нуналзэ буре ваён 9 октябре Святой апостоллэсь, Евангелия гожтӥсь Иоанн Богословлэсь кулэм нуналзэ буре ваён 14 октябре Покров (удмртъёс сое Пукрол шуо) праздник 22 октябре Дуне вылысь Православно черкен кивалтӥсьёслэсь В даурын огазе люкаськемзэс сӥлы карон 26 октябре Инмар Анайлэсь Иверской (Грузинской) шуыса нимаськись оброссэ (иконзэ) сӥлы карон 28 октябре Святой Дмитрииез сӥлы карыса кулэмъёсты буре ваён (ӟуч сямен: Дмитриевская рдительская суббота) 31 октябре Евангелия гожтӥсь Лука апостолэз сӥлы карон Таяз толэзе Инмысь дурбасьтӥсь кылчинзылэсь (ангелзылэсь) нуналзэ пусъё таӵе нимо адямиос: София, Ирина, Ариадна, Ираида, Фекла, Евфросиния, Мария, Иустиния, Анна, Вероника, Пелагея, Трофим, Савватий, Федор, Константин, Михаил, Игнатий, Андрей, Дмитрий, Даниил, Иосиф, Фока, Иона, Петр, Косма (Кузьма), Макарий, Иоанн, Анатоний, Иннокентий, Стефан, Давид, Никандр, Владислав, Сергий, Герман, Тихон, Ефрем, марк, Кирилл, Александр, Григорий, Амвросий, Рустик, Дионисий, Гурий, Алексий, павел, Владимир, Филипп, Матфей, Фома, Анатолий, Симион, Вениамин, Никита, Назарий, Лонгин, Лазарь, Лука, Артемий но куд-ог мукет вашкала нимо муртъёс. Гажано агай-вынъёс, сузэръёс, анай кылынымы потӥсь "Удмурт дунне" газетэз лыдӟисьёс! Та нуналысен кутскыса, толэзьлы быдэ одӥг пол "Удмурт дунне" вӧсяськисьёслы, улонысь интызэс утчась адямиослы, куректон-кайгуос пӧлы сюремъёслы, шонерлыкез-зэмлыкез утчасьёслы, Инмар пала мыныны тыршисьёслы, одӥг бамзэ сётэ. Калыкен одӥг-ог пумиськылыку но - пересьёс-а соос, яке егитъёс, огшоры ужась яке интеллигенция-а со - трос-трос юанъёс кыдо оскон пумысен, черке велон но вӧсяськыны дышетскон пумысен. Али дыре ӧжыт кылемын ини Инмарлы чылкак пумитъяськисьёс, тросгес оскемзы потӥсьёс, но ӵем дыръя соос шуо, ум, пе, валаське мар бордысен кутскыны. Таӵе муртъёслы шуэм потэ: нырысь ик кутске сюлэмдэс чылкытатон бордысен. Со понна йыркурен, вожпотонэн улондэс кысэ, кутске пичи ке но ӟеч уж лэсьтон борды. Но ялан сюлмады Инмарез возе. Со асьмелэн Судьямы, Со тодэ асьмелэсь вань ӟечсэ но, уродзэ но ужъёсмес, Солэсь номыр но валтӥськыны уг быгаты. Одно ик кияды кутэ Библиез, уката ик солэсь Ӟеч Ивор (Евангелия) люкетсэ, апостолъёслэсь ыстэм гожтэтъёссэс, Псалтирез. Библия - со одӥг адямилэн, писательлэн гожтэм книгаез ӧвӧл. Со - Святой Дух пыр дэлет (благодать) басьтыса гожтэм книга. Соин ик Со, нырысь кутскемен, ваньмызлы капчиен уг сётскы. Трос юанъёс кылдо. Соин ик, гажано эшъёс, таӵе ӟеч вакытэ, куке оскон понна адямиосты пытсэтэ уг пукто, унь-мань, серем уг ни каро, лыдӟе Священной Гожтэмез, мар ке валантэмез, сюриз ке, юалэ, валэктомы. Со понна ик "Удмурт дунне" ӟеч мылкыдзэ возьматыса, асьмелы, Инмарлы оскисьёслы, толэзьлы быдэ одӥг бамзэ сётэ. Котьку но таӵе ӟеч вакытъёс уз луэ, дыртэ оскондэс юнматыны, сюлэмдэс буйгатыны, чылкытатыны. Юалэ - валэктомы, - быгатэммыя, Инмарлэн юрттэмезъя. Эшшо таӵе куронмы вань, та бамын печатласькозы Священной Гожтэмысь чуръёс, соин ик та газетэз кырсь макеосын эн сапталэ, пыд улады эн лёгалэ, биняськон, ӵушылӥськон макелы эн пӧрмытэ чылкыт азьын возе; асьтэос лыдӟиды ке, мукетъёсызлы но сётэ. Кесяськиз-сурыкмиз ке, гурады сутэ. Нырысь бамзэ кутскиськомы оскон, оскиськон, яратон сярысь Библиын гожтэм чуръёс бордысен. Уго Христос Инмарлы оскисьёс понна та смой дуно кылъёс: Иисус Христослэн дышетонэзлэн шорсюлмыз, соос бордын возиське. Баммылы но "Оскон", оскиськон, Яратон" ним сётӥмы. Та толэзе ортче Сӥзьыл кисьтон - кулэм анай-атайёсмес, ӵыжы-выжыосмес, Эшъёсмес, Тодмоосмес буре ваён. Пукрол (Покров) праздниклэн азьвыл субботаяз черкын кулэмъёсты буре ваён ортче. Таяз номерын ми малпамы вакчияк ке но кулэм муртэ буре ваён сярысь вераськыны, куд-ог кырӟанъёсты сётыны. "Удмурт дунне" газетын оскисьёсын вераськон, валэктон уж нуыны бакель (благословить) каре Ижевск-Удмурт Епархилэн, элькунысьтымы вань православно черкъёсын кивалтӥсь архиереймы Николай Архиепископ. Улыны, ужаны кужым сӥзьыса, ваньдэс туж-туж яратыса, ивордэс возьмаса протодиакон Михаил Атаманов. Святой Павел апостоллэн Коринф карын улӥсьёслы ыстэм Нырысетӥ гожтэтысьтыз 13-тӥ люкет "Шуом, мон адями кылъёсын, кылчин кылъёсын, пе, быгатӥсько вераськыны, нош яратонэ ӧвӧл ке, соку мон шальтыртӥсь пу гырлы, дыбыртӥсь коскам крезь луисько. Инмарлэсь кылзэ ивортыны быгатонлыке, пе, вань, вань ватӥськыса улӥсь зэмлыкъёсты тодӥсько, котьмае но тодонэ, мур осконэ вань, гурезьёсты но интыысьтызы воштыны, пе, быгатӥсько, нош яратонэ ӧвӧл ке, - соку мон ваньлэсь ӧвӧлтэм маке гинэ луисько. Аслэсьтым вань байлыкме-узырлыкме, пе, люкылӥ, оскон понна аслэсьтым мугорме но сутыны сётӥ, нош яратонэ ӧвӧл ке татысь мон нокыӵе но пайда уг басьты. Яратон кема чида, гажа-жаля; яратон уг вожъяськы; яратон ассэ вылӥе уг пукты, уг вылтӥяськы, яратон уг кереты, уг даллашы; аслыз пайда уг утча; уг керӟегъяськы, уродэз-лекез сюлмаз уг возьы. Со эрекчаськонлы шум уг поты, нош зэмлыклы шумнотэ; яратон ваньмызлы дурбасьтэ, юн оске, чылкыт сюлмын оскиське, ваньзэ чида. Инмарлэсь кылзэ ивортонъёс ке но быризы, кылъёс ке но дугдӥзы, тодон-валан но ышысал ке, яратон ноку но уз быры. Уго милям тодонъёсмы тырмыт ӧвӧл, Инмарлэсь кылзэ ивортыны быгатонлыкмы но пичи гинэ. Нош куке дун-шектэм улон вуиз ке, соку вань шеко, тырттэм луисез ышоз-быроз. Куке мон пичи вал, пичи мурт кадь вераськисько вал, пичи мурт кадь малпаськисько вал, пичи мурт кадь верасько- малпасько вал; нош куке воргорон луи, соку мар вал пичи муртлэн кадез, солэсь куштӥськы. Та дуннеын ваньзэ пеймыт пияла пыртӥ, уй вӧтын кадь адӟиськомы, нош вуоно улонын ваче ымныр адӟиськомы. Али мынам тодон-валанэ пичи гинэ, нош вуонояз улонын со паӵыл луоз, озьы, кызьы мон сярысь Кузё-Инмар тодэ. Нош али уло та куиньёс: оскон, оскиськон, яратон; нояратон соос пӧлысь ваньмызлэсь вылӥынгесэз". КУЛЭМ МУРТЭ БУРЕ ВАЁН СЯРЫСЬ "Адямилэн улоно нуналъёсыз турын-куар кадь, бусыын будӥсь сяська кадь, озьы со сяськая. Со вылтӥ тӧл пельтэ. Но - со ӧвӧл ни, солэн улон интыез уз тодма ни сое" (102-тӥ псаломысь чуръёс) Сюлмез бугыртӥсь, малпаськытӥсь та куинь сюрс талэсь азьвыл гожтӥз визьмолэсь но визьмо, Израиль бунысь йӧно, ас вордэм калыкез понна ужась- тыршись, Инмарез данъяса улӥсь, Давид Эксэй. Дунне вылэ вордске адями: ужа, тырше, нылпи будэтэ, марке но понна сюлмаське, шумпотэ, кырӟа, вера, кытӥяз керетэ, керӟегъяське но, ялан тырше маке но люканы, маке но лэсьтыны, нош ӵуказеяз со выдэ но, уг ни султы - кулон умме усе. "Улон вань но, кулон вань" - шуо удмуртъёс, эшшо ватсало на: "Вордӥськем кулытэк уг кыльы". Зэм, куло пересьёс но, пичиос но; узыръёс но, начаръёс но; Эксэйёс но, кураськисьёс но... Одӥг мурт но, - туж-туж узырез но, туж-туж визьмоез но, туж-туж куанерез, курадӟисез но - нокин но кулытэк уг кыльы. Та ышоно-быроно дуннеын улыны асьмелы вакчи гинэ дыр сётэмын, кызьы сое уломы: ӟеч ужъёс лэсьтыса, вӧсяськыса, Инмарез но Солэсь кылдытэм лулъёссэ, котыр дуннеез яратыса, Инмарлы тау карыса, Солы тэрытскыса, Солэсь курон-косонъёссэ быдэсъяса, яке Инмарез тодытэк, Солы тэрытскытэк, ас тодэмъямы, асьмелы гинэ умой каронъёс утчаса; ческыт сиыса-юыса, узырлык люкаса, лушкаськыса, пӧяськыса, керетыса, одӥг пол но кирос карытэк, черке ветлытэк, сьӧлыкъёслэсь ӧпкельыса куштӥськытэк... Мар кизид, сое ик аралод. Кулон дырыд одно ик вуоз, соку лулыдлы улэп Инмар азьын одно ик ответ сётоно луоз: сизьым аресысен берпумзэ шокчытозяд кыӵе сьӧлыкъёс лэсьтӥд уженыд, кылыныд, мылкыдыныд, малпанэныд - ваньмыз тодмо Инмар дорын; шайтан, солэн ляльчиосыз - периос но тодо вань урод, сьӧлыко ужъёсмес. Адямилэн лулыз потэм бере, Инмарлэн асьмелэсь лулмес утьыны сётэм кылчинъёсыз (ангелъёс) но шайтанлэн ужасьёсыз - периос куспын кутске кужмо нюръяськон. Инмарлы ярамон улӥмы ке, ӟеч ужъёсмы вань ке, Инмар дорысь потэм тӧдьы кылчинъёс адями лулэз вылӥе, Инмар пала ӝуто. Ярантэм, урод ужъёсмы вань ке, шимес лек периос мискинь адями лулэз бордаз куто но улӥе, шайтан доры, ад пала кыско, кытын ноку но кысылытэк тыл ӝуа, кытын дугдытэк курадӟо сьӧлыко лулъёс, Инмарлы пумитъяськыса, мыдланьяськыса улэмъёс, язычникъёс. Дунне вылын одӥг адями но сьӧлыкатэк улыны уг быгаты, но со понна адямиез гажась-жалясь Инмармы черк кылдытӥз, кытын вӧсяськыса, исповедь пыр, причащение басьтыса, сьӧлыкъёслэсь мозмытскыны, дун-чылкытаны луэ. Ӧпкельыса сьӧлыкъёслэсь куштӥськиськод но Инмар азьын азьланяз дун-чылкыт улыны кыл сётӥськод ке, Инмар сьӧлыкъёсмес ӵуше. Причащение басьтыку луламы-мугорамы Инмар пыре. Солэн быдӟым дэлетэз шумпотон, каньыллык вае, Асэныз Инмарен огазея, уго причастие "кусып кылдытон, огазеяськон" шуэм луэ. Инмарлы оскиськы таяз дуннеын майбыр, куаныса-шумпотыса, шулдыръяськыса, кырӟаса-эктыса улыны уг кылды: со ялан сюлмаськыны кулэ лулзэ дун-чылкыт, сьӧлыкатэк возьыны. Нош тушмон-шайтан, солэн лыдъянтэм периосыз - сьӧд кужымъёс, уг кӧло, тыршо Инмарлы оскись муртэ погыртыны, осконтэк кельтыны, Инмарлэсь палэнтыны но паськыт, эзылыса, майбыр улон сюрес вылэ султытыны, кудӥз нуэ быронэ - адэ, шайтанлэн ки улаз. Адямиез адӟон карись шайтанлэн ки улаз мыно черке пырымтэос - язычникъёс, асьсэды быдтӥсьёс, адями виылӥсьёс (татчы ик пыро аборт лэсьтӥсьёс), Инмарлы но Солэн черкезлы пумитъяськыса улӥсьёс, ведӥнъёс, туно-пеллёос (экстрасенсъёс); юыса, жугиськыса, калгыса- юмшаса, узырлык люкаса улӥсьёс, кинъёс Инмар законэз, Солэсь курон-косонъёссэ санэ ӧз понэ, одӥг пол но черке мыныса сьӧлыкъёссылэсь ӧз куштӥське. Нош адямиез яратӥсь, гажась-жалясь Инмар вань адямиосты дораз ӧте, возьма соослэсь сьӧлыко ужъёслэсь, куштӥськемзэс но утиськон сюрес вылэ султэмзэс. Дунне вылын ӧвӧл сьӧлык, кудзэ Инмар простить медаз кары. Но асьмеос, сьӧлыкъёсмес ӵушон понна, ӧпкельыса-тэльмырыса сьӧлыко, урод ужъёслэсь куштӥськыны кулэ, черке мыныса исповедь пыр, причащение басьтыса, дун-чылкыт луыны. Гажано агай-вынъёс, сузэръёс! Сюлмысьтыды вӧсяськыса тырше черке ветлымтэ, оскытэк улӥсь нылдэс, пидэс, кузпалдэс, ӵыжы-выжыостэс Инмарез данъяса, осконэн улон пала берыктыны. Адями одӥг пол но исповеде ӧз ке пыры, причащение ӧз ке басьты, Инмарлы тау карыса ӧз ке улы, Инмарлэсь курон- косонъёссэ санэ ӧз ке поны, яке кыӵе ке сектаосы ветлӥз, языческой сямъёсты быдэсъяз, юиз погратозяз, кулытозяз, яке керетӥз, жугиськиз, одӥг пол но черке ӧз ветлы ке - кызьы тӥ куроды Со мурт понна черкын вӧсяськыны? Инмарлы оскытэк кулэм мурт понна, ассэ быдтӥсь понна черк уг вӧсяськы. Сыӵе муртъёсты вань ке, вӧсяське дорады, нуналлы быдэ вӧсяськыса, Инмарлэсь куриды ке, со муртлэн нимыз понна Инмар азьын ӟеч ужъёс лэсьтӥды ке, кылсярысь, сютэмъёсты, кураськисьёсты сюдӥды-вордӥды ке, висьыса, курадӟыса улӥсьёслы, кынартэм пересьёслы, ӧлексыослы, пытсэтын пукисьёслы Христос Инмарлэн Нимыныз юрттӥськиды ке, адямиез яратӥсь Инмар бам вылысьтыды синвудэс, ӟеч лэсьтэм уждэс адӟоз но, ӧпкельытэк кулэм выжы-кумыдылэсь сояз дуннеын улонзэ капчиятоз. "Курелэ, тӥледлы сётэмын луоз - шуэ Инмар. - Утчалэ - шедьтоды; йыгаське - тӥледлы усьтозы. Уго котькудӥз курись мурт басьтэ, утчась мурт шедьтэ, йыгаськисьлы - усьтозы" (Мф. 7:7-8). Кулоно кадь висись мурт доры, со пылатэмын (черке) пыртэмын ке, священникез ӧтёно. Пылатымтэ ке пылатоно солэн соглаш луэмезъя. Висись мурт вань сьӧлыкъёссэ вераз ке, соослэсь куштӥськиз ке, священник сое причастить кароз. Соборовать кароз - соку вунэтэм сьӧлыкъёсыз но ӵушиськозы, куштӥськозы. Кулэм муртэ мисько, гылто но чылкыт дӥськут дӥсяса, шайгуэ поно. Инмарлы оскисьёс, мар кулэ, азьвыл ик черкысь басьтыса дасяло, ӵыжы-выжыослы сюлмаськоно, бызьылоно медаз луы шуыса. Шайпулэз корка шоры пукто, черкын кадь ик, ымнырыныз обросъёс (иконъёс) шоры берыкто. Сюсьтыл ӝуато. Гадь вылаз оброс (икон) пукто, кияз кирос поно. Висьыса кылльыкуз но, лулыз потэм бере но ялан вӧсяськыны кулэ. Кулыны дасяськись мурт но, солэн котыраз учырамъёс но ог-огзылэсь прощение (сьӧлыкъёссэс куштыны) куро. Кулэм мурт дорын уй но нунал чирдо Псалтирь. Акафист чирдо, духовной кырӟанъёс кырӟало. Нокызьы но уг яра винаен сектаськыны, куяськыны, виро сётыны. Та языческой сямъёс, Инмарлы ярантэм ужъёс. Черкын вӧсям бере, ваньмыз чупаса люкисько. Ымнырзэ тӧдьы бӧзэн (басмаен) шобырто, шобретсэ кортӵогало но ватыны нуо. Духовной кырӟанъёсын шайгуэ лэзё. Согем беразы шайгу вылаз сюсьтыл ӝуатыса вӧсясько, буре ваё. Ужасьёсты капчи сиёнэн - пыжиськемъёсын, визь дыр (кӧс утён) ӧвӧл ке, курег пузэн но яра сюдыны; чай, компот, сок сектаны луэ. Винаен буре вайыны, куяськыны уг яра. Кулэм бераз ик черке вазиськоно, панихида служить карыны заказ лэсьтоно; заказной Черкын вӧсям бере, 40 нуналлы (сорокуст), арлы вӧсяськыны курыны луэ. Кураськисьёслы, ӟудыса-ёрмыса улӥсьёслы сиёнэн, дӥськутэн юрттӥськиды ке, кулэм мурт понна Инмар азьын ӟеч уж лэсьтоды. Ӵукна но, ӝыт но вӧсяськыкуды буре вае таисьтыз дуннеысь кошкем ӵыжы- выжыостэс, тодмоостэс. Черклэн дышетонэзъя, кулэм муртлэн лулыз кык нунал ӵоже эркын улэ: музъем вылтӥ, шайпул котыртӥз поръя, ветлэ, но асьмеос сое ум адӟиське. Куинетӥ нуналаз лул ӝутӥське Инме, Инмарлы йыбырттыны. Йыбырттэм бераз, кылчинъёс луллы шулдыр, майбыр улон дуннеез-раез (узьмакез) возьматыса нулло. Та дуннеын дун-чылкыт улэмъёслэсь (святойёслэсь) сояз дуннеын шумпотыса, майбыр улэмзэс адӟыса, сьӧлыко лул туж куректыны-кайгырыны кутске: малы мон но соос кадь ӧй улы?! Укмысэтӥ нунал азьын кулэм муртлэсь лулзэ кылчинъёс нош ик Инмар доры йыбырттыны ваё. Табере луллы курадӟон интыез - адэз возьмато. Туж секыт та интыез адӟыны, уката но секыт курадӟон интыысь тодмоостэ пумитаны. Ньыльдон уез вуыку, кылчинъёс лулэз нош ик Инмар доры йыбырттыны ваё. Та дыр куспын котькудӥзлэн адямилэн вань сьӧлыкъёсыз но, вань ӟеч ужъёсыз но шарае пото. Инмар азьын ӟеч ужъёсыз тросгес ке, со лул Инмарлэн бур палаз - каньыллыке (рае) мынэ, сьӧлыкъёсыз вормыса, улэ кыско ке, курадӟон интые - адэ усе. Кулэм мурт понна котьку но вӧсяськыны кулэ, но тужгес юн вӧсяськоно ньыльдон нуналэз вуытозь. Чылкыт улыса, ӟырдыт вӧсяськонъёсты Инмар адӟе, кабыл басьтэ. Ньыльдон нуналэз вуытозь, нуналлы быдэ Псалтирь чирдоно. Ньыльдон нуналэз ортчем бере но ялан вӧсяськоно. Святой атайёслэн дышетэмзыя, шайвылэ ветлыны кулэ. Уго котькудмылэн асьмелэн кулэм анай, атаймы, ӵыжы-выжыосмы, тодмоосмы, ӵош ужам, ӵош вӧсяськем эшъёсмы ватэмын. Соослэсь шайгузэс утялтоно но сюсьтыл ӝуатыса вӧсяськоно. Уг яра шайвылын вина юыны, керетыны, сиён-юон киськаны. Кулэм муртлы сиён-юон кулэ ӧвӧл, солы Инмар азьын буре вайыса вӧсяськеммы гинэ кулэ. Шай вылэ ветлон тодэ вайытэ: вордӥськем адями кулытэк уг кыльы. Макем вакчи улон дырмы! Соин ик рае сюрон понна, асьмеос Инмарлы тэрытскыса, оскыса, вӧсяськыса, ӟеч ужъёс лэсьтыса улыны кулэ. Мае кизимы, сое ик араломы. Аминь. Тропарь, 5-тӥ глас* Припев: Данлыко Тон, Инмаре, шонере потыны монэ дышеты. Вань святойёс улон ӧрез, рае пырон ӧсэз шедьтӥзы, Сьӧлыкъёслэсь куштӥськыса мон отчы сюрес мед шедьтом вал. Мон - йыромем-ышем ыж ук, Утисе, куарадэ сёт но уть монэ! Данлыко Тон, Инмаре, шонере потыны монэ дышеты. Инмар Ыжпиез тодытэм понна курадӟытыса виемъёс, Тӥ асьтэоос но ыжпи кадь ик вандэмын вал. Бырисьтэм, вужмисьтэм улонэ выжыса, Кытын пересьмон, бырон ӧвӧл, Сьӧлыкъёсмес мед куштоз шуыса Инмар азьын ми понна вӧсяське. Данлыко Тон, Инмаре, шонере потыны монэ дышеты. Ӟоскыт, секыт сюрестӥ ветлӥсьёс, Секыт ныпъетэз кадь киросэз нуллӥсьёс, Мур осконэн Мон сьӧры мынӥсьёс, Тӥ понна Мынэсьтым инмын дасям, Кузьымъёсме, венец изьыосме басьтыны, Шумпотыса, каньылэн улыны табере лыктэлэ. Данлыко Тон, Инмаре, шонере потыны монэ дышеты. Сьӧлыкъёслэн яраоссы мон пушкы муре пыремын, Но мон - Тынад кылдытэм тусбуед луисько. Жаля монэ, Аслэсьтыд сётэм лулдэ, Дун-чылкыт кар монэ, Инмаре, Улэм потон Атай юртам пырты но, Нош ик райын улӥсь кар монэ. Данлыко Тон, Инмаре, шонере потыны монэ дышеты. Дунне кылдыку ӧвӧлтэмысь монэ Кылдытӥсь, Инмар тусбуйдэ сётыса сӥлы-дано Карись! Курон-косонъёсыдлэсь куштӥськем поннам, Нош ик сюй пушкысь потэм интыям монэ Берыктӥсь, Аслыд укшась карыны ӝуты монэ, Нырысь сётэм чеберлыкеныд дӥся монэ. Данлыко Тон, Инмаре, шонере потыны монэ дышеты. Кулэм ляльчиедлэсь лулзэ, Инмаре, каньыллыкад пырты, Раяд улыны солы инты сёты, Кытын Тынад лыдъянтэм трос святойёсыд, Шунды кадь пиштыса уло. Кулэм ляльчиедлэсь лулзэ, Сьӧлыкъёссэ ӵушыса отчы интыя. Данлыко Тон, Инмаре, шонере потыны монэ дышеты. Дан Атайлы, Пилы, Святой Духлы: Сӥё-дано карыса, кышканэн кырӟаса данъяломы, Куинь полэс пиштыса улӥсь одӥг гинэ Инмармес; Дун-Сьӧлыктэм пумтэм вапумъёсы улӥсь Атаймы, Пумтэм вапумъёсы улӥсь Инмар Пи но Инмар Дух! Оскыса Тон дорын ужась-тыршисьёсты югдыты, Кысылӥсьтэм тылын курадӟонлэсь но мозмыты Али но, котьку но, пумтэм вапуме. Аминь. Мугорыныд Инмарез вордскытӥсь, шумпоты, Тон пыр адями выжыос утиськон басьто. Тон пыр ми но рае пырон мед басьтомы, Ваньмызлэсь Дун-Чылкыт, Данлыко Инмар Анаймы. *Али поттыны дасяське вӧсяськонъёсын, канонъёсын книга, отчы пыртэмын тросэз кырӟанъёс. Книгаосты черкъёсые вузалозы. Очей Толилы - пӧсь салам Эх, Микол, Микол... Миколлэн йырыз черке ошем гырлы кадь жонла. Малы озьы, воргорон ачиз но пайме. Кема но ӧз юы на кадь, вить нунал гинэ луиз ай. Йырыз нош толэзь ӵоже бекыръям кадь висе. Талы паймеменыз, йырыз уката юнгес висьыны ӧдъяз. Та ӟырдам пуртызэ кызьы ке веськатоно ик вал. Кытысь эмъюм шедьтоно меда? Сотэк но висись йырзэ тӥя Микол. Шораз учкид ке, жалезлы уд чида, амалтэк азяз "тӧдьы апаез" пуктод. Таӵе дыръя озьы ик лэсьтылэ вал ук Палашез. Ма, быдэс ӟенелик ик ӧз пуктылы но, кык сю грамма сётылӥз ик. Чоньдыны медаз шӧта шуыса, вылды. Солы но бакель луылӥз Микол. Палашезлэсь сётэм аракызэ ури-бери гульымаз лэзьылӥз но, огшап валес вылын вез-вез кылльыса катьяськылӥз. Нош Палашез огдырлы коркась потыны тупалляз ке, Миколлэн мылкыд лӧптылӥз. Угось, кышноезлэсь ватоссэ со синйылтыса возиз. Соиз потэм бере ик, ватосэз поттыса гульымаз кисьтылӥз. Собере ини уж дураз "дыртылӥз". Отчы сое адскисьтэм бурдъёс синтэм-пельтэм нуылӥзы кадь. Пилорамаын ужа со. Ужзэ сокем ик уг яраты. Ма, кызьы, пе, яратод коръёсты ӝутканы, кысканы, нуллыны? Оло кинлы ке яра ик та уж, нош Миколлы уг. Солы мукетыз кельше. Солы луыса ик уж дураз но амалтэк возьке. Пеймытын пиштӥсь яркыт тыл музэн шунтэ со Миколлэсь сюлэмзэ. Сое малпакуз, ужез но акылес уг потылы ни. Тани толон но лымшор бере, быдэс черык вуттӥзы вал. Макарлы выж пулъёс пилизы... Дораз Микол яратоно кырӟанзэ нёжъяса бертӥз. Котыр вӧлме солэн кырӟамез: "Моя милка, пилорама, Когда поит, когда нет!.." Колхоз уг тыры бере, гуртооссы озьы пилорамаын ужасьёслы уждун тыро. Ма собере, гуртын улӥсь калык кемалась дышемын ини коньдонтэк улыны. Сотэк улыны луоно вылэм, аракытэк тани педло но потыны луоно ӧвӧл. Котьма шу но, курытэз коньдонлэсь дуногес потэ Миколлы но. Ма, калык пӧлын но коньдон сярысь вераськисез уд кылы, уката ик воргоронъёс кулэ шуыса картошсэс но вузало. Собере воргоронъёс малы ке сакыр сиыса-а, мар-а солань-талань шонаськыса ветлыны ӧдъяло. Сакырез мултэс сиыны шедьтыса, "давлениен" курадӟо, шӧдске. Гурт калыклэн коньдонэз ӧвӧл ке, со понна котьку вакчи виятэмез вань. Соин котьмае но шедьтыны луоно. Тани ачиз ик Микол кӧня адямиез сюлмаськонъёслэсь мозмытӥз ини. Тани огназ улӥсь Одотьлэн лампочкаосыз быриллям, коньдонэз нош ӧвӧл. Ма кытысь ужась адямилэн коньдонэз луоз? Со базарын вуз уг кары. Нуналмысь ужа гинэ. Туала ужась адямилы сӥ-дан ӧвӧл, вузкарисьёслы гинэ. Уката ик музъем ужасьлэн данэз куашкамын. Эк-ке-ке, кызьы тае валэктод вылӥын пукисьёслы? Куспазы но кыӵе тузон потто? Тьфу! Радлык шат со? Озьыен, Микол Одотез жаляз - солы лампочкаос вуттӥз. Ох-хо-хой! Дунзэ но уно ӧз куры, ог литр сяна ӧз басьты. Лампочкаоссэ шуген шедьтӥз уга: огзэ ферма гидысь бералтӥз, мукетсэ - клуб корказьысь. Ма, ӵок ини, шуиз Микол, литрен но окмоз. Ӵуказеяз ӝытпал ужысь бертыкуз нош ик Одоть доры кожылӥз на. Кызьы сотэк, оло, лампочкаосыз чик уг ӝуало? Ӝуало вылэм. Пырем муртлы кышномурт эшшо кык сю грамм удӥз на. Кызьы нош сотэк? Миськоно ук лампочкаосты, ӝуало бере. Одӥг пол чут Матронлы Микол мажессэ вузаны йӧндыриз. Палашез сое базарысь басьтэм вылэм. Акыльтӥз солы ныд понынын курыса. Соин ик Микол мажеслэсь мозмытскыны малпаз. Сое чут Матрон доры нуиз. Со понна уно ӧз куры, одӥг "шатыртон" гинэ басьтӥз. Ма со "шатыртон" шуиськоды-а? Ма, со литр но ӝыныем пластиик бутылка. Со сярысь но кырӟан пӧрмытӥз ини Микол. "Трос пол вералляд мыным тон, Кыӵе со луэ "шатыртон". Ортчемзэ тодаз вайыса, Миколлэн йырыз эшшо но юнгес висьыны ӧдъяз. Пушказ тыл гома кадь. Со тылэз ог кобы сурен гинэ кыс вылэм но... Эсьма, кытысь та вие сур шедьтод. Миколлэн син азяз Палашаезлэн тусбуез пуксиз. Пальпотэ со, Миколлэн тазьы курадӟемезлы шумпотэм мактал. - Эх, Палаш, Палаш, - кузпалэзлэн пальпотэмезлы вожез потытэк, мур лулӟиз Микол, - тон вӧзам луысал ке, таӵе курадӟонэз ӧй тодысал. Жалясал монэ, пуктысал азям векчи виятэмдэ! - Аслаз жалезлы чдатэк-а, Палашсэ тодаз ваемысьтыз-а, синвуосыз потӥзы воргоронлэн. Кышноез Микол дорысь кылем сӥзьыл кошкиз. Ӵапак ар луоз ини. Миколлэн юыса улэмезлы чиданэз чигиз, котырзэ люказ но чиптэм-чаптэм ышиз-быриз. Уг тоды Микол кышноезлэсь кытын улэмзэ. Кайгуэзлы чидатэк, влыды, уката "нюромыса" ветлыны ӧдъяз, уез-нуналэз валамысь дугдӥз Микол. Кышноез кошкон азяз вераз: - Тонэ утьытозь, парсь вордо, сӥль коть луоз. Миколлэн тодаз лыктӥз Палашезлэн тазьы верамез но син азяз парсьёсты пуктӥз. Тани Палашез потэ но соос азе тусе быдэс ведра сур кисьтэ. Парсьёс сурез гуч- гуч юо но гань-гань дэрие выдыса шутэтско. Таӵе суредэз син азяз умойгес пуктыны вырыса, Микол синъёссэ ик кыньыса малпаське. Тани дэриын кыллись парсьёс суч-суч син азяз пуксё ини. Осто, мар ишан та? Одӥгез самой дэриесь но шуш парсь копак Миколлэн укша. - Ма-мо-о-он, лэся, ук со-о! - шара моганы ӧдъяз Микол. Собере шарак синъёссэ усьтӥз. - Озьы-а брат, нёжтӥз воргорон, - юан ӟече уз вутты! Туннэ йырме веськато но, усьсэ ымам но уг понылы ни. Оло, собере Палаше бертоз. Палашез сярысь малпанэз мугорзэ ик шунтыса лэзиз кадь. Татьяна Харисова. Татышлы район, Кызылъяр гурт. ЙЫБЫРТТӤСЬКОМ ТӤЛЕДЛЫ МУЗЪЕМОЗЬ! Гурт удысын тыршисьёс! Сюлмысьтым ӟечкыласько тӥледыз матэктӥсь праздникеныды � Гурт удысын но сиён-юон поттонын ужасьёслэн нуналэнызы. Гурт удыс котьку вал но луоз Удмуртиысь экономикамылэн валтӥсь ёзэз. Тӥляд, музъем вылын тыршисьёслэн но сиён-юон поттӥсьёслэн ужамды бордысь потэ калыкмылэн ӟеч улонэз, тазалыкез но мылкыдэз. Гуртын воштӥськонэз ортчытон � со кун политикалэн огез валтӥсь ужез луыны кулэ. Тӥледлы но тӥляд ӵыжы-выжыостылы сӥзисько юн тазалык, шуд, азинсконъёс, вань кутскем ужъёсты асьме республикамы понна ӟечен мед мынозы. С.ЧИКУРОВ, Удмурт Республикая валтӥсь федеральной инспектор. Гурт удысын тыршись эшъёс! Та вакытэ странаямы гурт удыс секыт югдуре шедемын. Дунъёслэн тупамтэзы, гуртъёсын ужаны туала техникалы кулэяськон но мукет быдэстымтэ ужпумъёс гурт удысмес азинтыны люкето, озьы кулэезъя ум быгатӥське кутыны инкуазь узырлыкмес но калыкмылэсь кужымзэ. Но тужгес секыт вакытъёс ортчизы. Странамылэн выль кивалтӥсьёсыз Россилэн Президентэз Владимир Путин кивалтэм улсын кунлыкмес юнматон, асьмелэсь промышленностьмес но гурт удысмес азинтон борды кужмо басьтӥськизы но вакчи дыр куспын азинсконъёс шӧдскизы. Удмуртиын ми ваньзэ лэсьтӥськом тӥляд удыстылы уногес коньдон висъян ласянь, сюлмаськиськом техника но эстӥськон сётыны, гуртъёсы газ но умоесь сюресъёс кыскыны, туала школаос но больницаос ӝутыны. Нырысь ик ми гуртъёсын социальной удысэз азинтӥськом, ӟеч ужаны луонлыкъёс кылдытӥськом. Туннэ шумпотыса пусйыны быгатӥськом: Удмуртиысь сиён-юонъя промышленностьлэн вузъёсыз мукет кунъёсын поттэмез сярысь номырин уг висъяьско, сое яратыса басьто республикаямы но, солэн палэназ но. Но ваньзэ ужпумъёсты малпамъя гинэ ӝог быдэстыны уг луы. Соосты азинлыко быдэстон понна республикаямы кутэмын "Удмуртиез азинтон" программа. Отын гуртын тыршисьёслэсь улон-вылонзэс но ужан условиоссэс умоятон ласянь туж бадӟым саклык висъяське. Та программа уж вылын мед быдэсмоз шуыса кулэ тӥляд юрттэмды. Оскисько, асьмеос ваньмы ӵош Удмуртилэсь гурт удыссэ шӧдскымон вылӥе ӝутом шуыса. Вань сюлмысьтым ӟечкыласько Гурт удысын но сиён-юон поттон промышленностьын ужасьёслэн нуналэнызы! Тӥледлы но ӵыжы-выжыостылы тазалык но ваньзэ умойэ гинэ сӥзисько! Гажаса, Удмурт Республикаысь Кун Кенешлэн Тӧроез А. А. Волков. Адӟем карымон "Чингыли" Сюмси ёросысь Гура черкогуртысь "Чингыли" удмурт нылпи сад анай кылэз нылпиосын дышетон ласянь адӟем карымонэз луэ. 198-тӥ арын со пыриськиз вал Россиысь нылпи учреждениослэн конкурсазы но вормисе потӥз. Ёросысь удмурт кылэз гажасьёс та вормонэз бадӟым данэн лыдъяло но данъясько. Анай кылзэс азинтон бордын ӟеч тыршо нылпи садысь воспитательёс. Та ласянь трос кужымзэ сётэ "Чингылилэн" кивалтӥсез Любовь Викторович Осипова. Ёросэ азьло аръёсы но удмурт газетъёс трос уг лыкто вал. Кылсярысь, "Удмурт дунне" � ог 100 ёрос. Оло, азьланяз та ужпум умоялоз. Солы оскон луоз соку, куке ваньмыз "Чингыли" кадь тыршоз. П.НИКОЛАЕВ. Сюрестэк нокытчы уд мыны Соин Сюмси ёросын сюлмасько сюресъёссэс тупатъяны. Алигес Казань�Малмыж� Екатеринбург сюресысь Юбери гуртэ кожон асфальтэн шобыртэмын. Солэн кузьдалаез 2,6 километр. Комиссилэн председателез выль сюресэз шумпотыса кутӥз. Со, угось. вазен чакламъя быдэстэмын: ву кошкыны улаз куинь трубаос понэын, сюрес знакъёс гинэ 30 пуктэмын, мынӥсь-ветлӥсьёслы зор-котлэсь ватскон инты ӝутэмын, пыдын лыктӥсьёслы тыремын сюбег асфальт сюрес, нош вӧзаз кызъёс мерттэмын. Та туж кулэ ужъёсты быдэстӥзы Уваысь сюрес лэсьтӥсьёс но лэсьтӥськисьёс. Ёросэтӥ ортчись вуж трактэз тупатон йылпумъяськоз октябрь толэзе ик. П.НИКОЛАЕВ. ГУРТЫСЬ УЖАСЬЁСЛЭН НУНАЛЗЫ АЗЬЫН Николай ВЕРЕТЕННИКОВ: "Вамыш бӧрсьы вамыш" Усьтэм амалэн ужась "Реммаш" акционер огазеяськон � со гурт техникаез тупатъянъя но выль машинаос поттонъя ремонтно-механической завод луэ. Соин ик предприятие арлы быдэ гуртын ужасьёсын ӵош праздникез пусе. Кызьы бен огазеяськон туннэ шока, кыӵе вормонъёсын та нуналэз пумита? Та но куд-ог мукет юанъёсын алигес заводэ вуылӥм но солэн валтӥсь директореныз Николай Веретенниковен пумиськылӥм но кӧня ке юанъёс сётӥм. � Николай Данилович, ку предприятиды вордскиз? � Ӝоген милемлы 70 ар тырмоз ни. Завод ужаны кутскиз 1932-тӥ арын. Со дыр ӵоже, кызьы шуо, трос ву бызиз, бадӟымесь воштӥськонъёс вал. Но валтӥсь ужез озьы ик кылиз � республикаысьтымы но Россиысь музон улосъёсысь гурт техникаез тупатъян но выльзэ поттон. Предприятилэн 12 сюрс квадратной метр ужан интыез. Вань ӵыжатон (литейной), механо-сборочной но тупатъян произвордствоез. Гуръёсмы устоесь, станокъёс ЧПУ-ен, сыло полуавтоматъёс, корт вандон, ӵыжатон, автомобильёсты но электродвигательёсты тупатъяны ӟеч оборудование пуктылэмын. � Нош берло дыре ужъёсты кызьы мыно? � Урод ӧй шуысал. Ортчем арез азинлыко йылпумъям. 1998-тӥ арен ӵошатыса, 2,5 пол тросгес продукция вузам, нош уждунмы кык поллы йылӥз. Со сяна, ватсаса 36 выль ужан интыос усьтӥм. Туэ но вамышъёсмы кузёмо. Тямыс толэзьскын, миым та дыре сярысь, витьтон процентлы уногес ваньбур поттӥм, уждун но кык поллы будӥз. � Николай Данилович, кыӵе тӥляд валтӥсь продукциды? Мар тросгес лэсьтӥськоды? � Ми котьку поттӥськом кыед поттон траспортёръёс. Али соос милям куинь пумоесь: КСН-Ф-100, ТСН-3, Об но ТСН-160 М. Матысь дыре лэсьтыны ӧдъям тылобурдо кыед поттон транспортёр. Сое быдэстӥм "Пятигорсксельмаш" ОАО-лэн куремезъя. Со луэ ТСП 7һ8. Предприятие транспортёръёслы воштос ёзъёс но лэсьтэ. Азьло транспортёръёсты тупатъян ёзъёс палэнысь басьтӥськом ке вал, 1995-тӥ арысен асьмеос таӵе производство усьтӥм, поттыны ӧдъям редукторъёс но музон ёзъёс. Кылем арын вань транспортёръёсмы кун эскеронэз умой ортчизы. Констуркторъёсмы озьы ик малпазы но лэсьтӥзы АКР-1 ю тысь пыргытон агрегат. Со одӥг часкын 5 тонна пызь ищзэ. Таиз но машинамы эскеронэз умой потӥз но али Россиысь 10 улосъёсы кошке ни. Валтӥсь специалистъёсмы ялан ветло пӧртэм адӟытонъёсы (выставкаосы), продукцимес возьмато но мукетъёсызлэсь дышетско. Ведь вылез инмысь уг усьы. Соин ӵош ик пусъеме потэ тани мае. Шаерысьтымы Гурт хозяйствоя удысъя но сиён- юонъя министерстволэн куремезъя, ми лэсьтӥм туж усто агрегат. Огдыре со муэз небӟытэ, кидысэз, минерал сылалэз соге, усыя но музъемез пачкатэ. Со эскеремын ни Воткинск районысь "Июльское" учхозын но "Мир" гурт хозяйствоын. ПАйдаез шӧдскымон, урожай 20 процентлы йылэ. Вераны кулэ, ӵыжатон производствомы пӧртэм детальёс тырмыт сётэ. Редукторъёслы мугор но асьмеос дасяськом. Озьы ик тупатъяськом ЗИЛ автомобильёсты но солэсь агрегатъёссэ, выльдӥськом электродвигательёсты, насосъёсты но ӵыжатон трансформаторъёсты. Оглом, тупатъян ужъёсмы кӧня ке синӥзы, нош выль продукция уногес поттӥськом. Коллектив азьын бадӟым ужпум сылэ � рынокен экономикае выжемен, эстӥськонлы, электрокужымлы дунъёс будэмен валче, бадӟым инты висъяськом ӟеч продукция поттонлы. Сое Россиын гинэ ӧвӧл, быдэс дуннеын но мед басьтозы. Со сярысь ноку ум вунэтӥське. Ужасьёсмы тодон-валанзэс будэто вылӥ дышетскон заведениосын. � Акциосты нош кинлы сётэмын? � Ми усьтэм амалэн ужась ак2ционер огазеяськон луиськом. 72 процентэз акциос коллективлэн кияз, 12,3 процентэз ваньбуръя кун комитетлы (государстволы) сётэмын, кылемзэ нимаз адямиос возё. Туэ арозь вань пайда басьтэммес производствоез азинтонэ висъяллям. Таиз ар понна дивидендъёс сётъялом. Директоръёслэн кенешазы сизьым мурт быръемын. Вань адями Гурт хозяйствоя но сиён- юонъя министерствоысь но Глазовысь администрациысь. Соос пӧртэм ужпумъёсты эскерыку лыдэ басьто предприятилэсь, городлэсь но республикалэсь интересъёссэ. � Николай Данилович, кызьы быдэсъяськоды ужасьёсты сярысь сюлмаськонэн герӟаськем ужпумъёсты? � Кызьы бен сотэк ужалод. Адямиослы ӟеч лэсьтытэк, соос азинлыко уз тырше. Ужасьёсмы столовойын сисько, нуналлы быдэ 24 манетлы талон сётӥськом. Кин сомындалы уг сиськы, гуртаз сиён-юон басьтэ. Нош олалтэ губи будэтӥськом, кыӵе ческыт пыжиськемъёсмы пӧрмо � быдэс город тодэ. Столовойын кибашлыос тыршо. Тани Татьяна Лихачёва 18 ар ужа ни, со пӧлысь 5 арзэ пӧрась луэ. ПРораны дышетскиз Алма-Атаысь кулинарной школаын. Ужасьёсмылы котьмаин юрттӥськом, тазалыксэс юнматыны путёвкаос сётъяськом. Профком ваньзэ син азяз возе. � Нош сюлэмшугъяськытӥсь ужпумъёсты вань-а? � Ма кызьы уз луэ? Котькуд коллективын сямен ик соос милям но вань. Со нырысь ик герӟаськемын интыысь бюджетлэн предприятилы городысь соцкультбыт юртъёсы но улон коркаосы шуныт но пӧсь ву сётэмез понна дыраз дун тырымтэеныз. Озьы милемлы интыысь бюджет котьку сямен 2-3 милион манет тыр тыронэз луэ. Нош милям продукция поттонмес будэтэмен валче оборотной ваньбурмы уг тырмы. � Николай Данилович, праздникты азьын мар верасалды? � Нырысь ик, быдэс коллективме ӟечкыласько гуртын ужасьёслэн нуналэнызы, ваньмызлы сӥзисько шудбур но тазалык. Кыкетӥез, гуртлы уката ӟечгес продукция поттом но та удысэн кусыпъёсмы уката мед юнмалозы. Вераськиз Геннадий РОМАНОВ. Николай Веретенников. Тани таӵе со музъемез небӟытӥсь, кизись но усыясь агрегат. АКР-1 ю тысь пыргытон агрегат. Пӧрась Татьяна Лихачёва. Туспуктӥз Владимир Беломорских. ПРЕЗИДЕНТЭ КАНДИДАТ Павел ВЕРШИНИН: "Ноку уг пӧя, калыклы юртто" Пумиськон Мынэ юосты октон. Потӥм лымшор палась арасьёсты возьматыны. Котькытын нянь понна нюръяськон кужмоя, комбайнеръёс пеймытозь но лысву усьытозь бусыысь уг кошкыло. Бер ӝытазе, редакцие бертон азямы, арлыдо эшъёсы шуо, ойдо, пе, "Ленинский путь" колхозэ кожалом. Соин кивалтэ угось егит, задор мылкыдо, капчи сямо бӧлякмы Павел Вершинин. Ижысь гурт хозяйствоя институтэз йылпумъямез бере вордскем "Россия" колхозаз ужаны кутскиз. Нырысь механике пуктӥзы, собере мастерскоез оскизы но валтӥсь инженер луиз. Шаерамы самой бадӟым хозяйствоен соку кивалтӥз юн тодмо адями Аркадий Горынцев. Егит Павел Вершинин солэсь ужаны дышетскиз. Кызь ар талэсь азьло бускельёссы, пичи сюгаос усто инженерез Павел Николаевичез доразы ӧтизы, председателе бырйизы. Вершининлы соку 30 арес гинэ вал. ...Вуим Пичи Сюгае. Но одӥгез эшмы вазиз, ма, пе, таӵе бер ӝытэ кивалтӥсь контораын пукоз на ай. Лыктӥм бере, кызьы бен пыратэк кошкод. Контораын зэмзэ но чал-чал. Пумитамы ӝужыт, йӧно но веськрес мугоро воргорон потӥз. Йырсиез чиль-чиль сьӧд, ымныраз жадем тусыз адӟиське, пльпотыса киосмес кутылӥз но шорамы вазиз: � Ма, журналистъёс но таӵе кема ужало шат? Вуиды бере, кабинетам тубалом ни. � Нош асьтэос малы сыӵе ӝегатскиды, � куарето эшъёсы. Павел Николаевич ӧжыт мыняк потыса но шумпотыса валэктэ, ӵуказе, пе, Москвае кошкисько, бадӟым кенешын вераськыны дасяськи. � Нош гурт ужъёсты кызьы мыно? � Толон районын котькинлэсь азьло аранмес быдтӥм, ю-няньмы чакламлэсь данаклы трос люкаськиз. Пудо утисьёсмы но синмаськымон тыршо. Тӥни озьы нырысьсэ адӟи Павел Вершининэз, соин пумиськи. Хозяйстволэсь азинскемзэ но та удысысь куд-ог лэчыт ужпумъёсты со синучконын кадь возьматӥз. Вань лыдпусъёс йыраз, нокыӵе бумагаосты ӧз учкылы. Егит кивалтӥсь магинтэн кадь бордаз кыске, мадемзэ чик дугдылытэк кылзысал. Сыӵе ӟеч мылкыд кельтӥз гурт кузё. Со дырысен Павел Николаевичез ноку ӧй вунэтылы, будэмез, лулысь-сюлмысь тыршемез - пырак син азям. Павел Вершинин колхозэн дас ар кивалтӥз нош. "Ленинский путь" районын но шаерамы одӥгез усто, огсыр ужась азьмынӥсь хозяйство луиз. Кытчы гинэ сое ӧз кураллялэ: я районэ ӧтё, я Дэбесэ, партилэн райкомезлы нырысетӥ секретаре ӵекто. Павел Николаевич кема "ӵыжаськиз" но чиданэз быриз, лэся. 1990-тӥ арын Министръёслэн Кенешсылэн Тӧроезлы воштӥсе юнмато но огдыре Гурт хозяйствоя но сиён-юонъя министерствоен кивалтыны оско. Со ӝог возьматӥз гурт удысэз ӟеч тодэмзэ но кивалтыны быгатэмзэ. Со доры лыктэ крестьян калык, ваньмызлы юрттэ. Бӧлякъёссэ но уг вунэты. Ньыль ар ортчыса, Павел Николаевич луэ шаерысьтымы Министръёслэн Кенешсылэн тӧроезлэн нырысетӥ воштӥсезлэсь ужзэ быдэсъясь. Со нуэ промышленностез, лэсьтӥськонэз но коньдон ужпумъёсты. Таиз ныпъетэз уката секытомиз. Озьы ке но, Вершинин солэсь уг кышка, вань ужъёсты быгатыса бергатэ, пумен данэз но ӝутске. Правительствоын Павел Николаевичлэн улоназ бадӟым ӵогиськон луиз вить ар талэсь азьло. 1995-тӥ арын сое быръё Удмурт Правительстволы Тӧрое. Со киын быдэсъяно ёз, нош вакыт быдэс Россиын кадь ик шаерамы но туж секыт вал. Бадӟымесь промышленной предприятиос мырдэм возисько, гурт удыслы но капчи ӧвӧл, дунъёс будо но будо, нош тыронъёс миллиардъёсын люкасько. Музъем ужась уг быгаты ни техника, минерал сылалъёс но мукетсэ басьтыны. Мар кароно? Кызьы югдурез тупатоно? Ведь Павел Вершинин ас вылаз басьтӥз куашкан калэ вуэм хозяйствоез. Республикаез со вие вуттӥзы умойтэм нуиськись выльдӥськон, реформаос. Правительство кылын верантэм бадӟым кужым понтӥз экономикаез но промышленностез куашканлэсь утён вылысь. Тӥни озьы 1999-тӥ арын азинскыны умоесь условиос кылдытэмын вал. Павел Николаевич меӵак ивортӥз, Правительстволэсь ужамзэ, тыршемзэ, калык, пе, мед адӟоз, ваньзэ шара, номыре ватытэк лэсьтоно. Со понна ик Тӧро Правительствоын нырысьсэ кылдытэ пресс-служба, арнялы быдэ вторнике журналистъёсын пумиськонъёсты радъя. Кутскон сётэ ачиз, ваньзэ шара маде. Тани алигес, пе, Россиысь коньдон ужпумъёсъя министрлэн нырысетӥ воштӥсеныз Алексей Кудринэн пумиськылӥ (али со министр ни � Г.Р.). Республикалы нош ик ватсаса уксё висъямын. Со дыре ик Павел Николаевич Москваын рос-прос эскере пенсиос но пособиос тыронэз умоятон ужпумъёсты. Павел Вершинин уг кышка урамысь пумитъяськисьёс доры потыны, соосын вераськыны. Кылдэм югдурез, уждун тыронэз умоятонъя чаклам ужрадъёс сярысь тупен-тупен валэктэ дышетӥсьёслы, врачъёслы но бюджет удысын тыршисьёслы. Кивалтэтлэсь Тӧрозэ валало, со, пе, калыкез уз кушты, уз пӧя. Павел Николаевич сяме пыӵатэ тужгес секыт шокась интыосы потанзэ. Сарапулын югдур уродме ке, со отчы вуэ ни. Мукетъёссэ но уг вунэты, быдэс командаен министръёсын ӵош ветлэ Каркулино, Сарапул, Селта, Шаркан, Грахово, Кизнер но музон районъёсы. Интыосын ортчытъя Правительстволэн Президиумезлэсь кенешъёссэ но кулэ ужрадъёс кутэ. Пайдаез соку ик шӧдӥське, юрттэт ӝегатскытэк вуэ. Тани Каракулиноын Павел Николаевич ужпум ӝутэ котькуд районын мшинно-технологической станциос (МТС-ъёс) клыдытъян сярысь. Люкаськемъёс ӵектонэз умоен лыдъяло. Табере соос трос гинэ ни, кысык бусы ужъёс но шӧдскымон ӝогомыса мыно. Кичӧлтонэз выжыяськиз. Правительстволэн Тӧроез озьы ик бадӟым инты висъя промышленной предприятиосты улӟытонлы-ӝутонлы. Павел Вершинин рос-прос тодматске кызьы Ижысь электромеханической завод пыд йылаз султэ, кыӵе солы юрттэт кулэ. Котькуд цехын сое ужасьёс котырто, уно юанъёс сётъяло. Али, пе, мылкыдмы умой, уждун дыраз басьтӥськом ни. Таӵе ик пайдаё пумиськонъёс ортчо "Буммаш" огазеяськонын, автомашина поттӥсьёс дорын, нош гуртысь механизаторъёсын � меӵак бусыын. Со уго ачиз кӧня пол трактор, комбайн улын кыллиз. Соин ик музъем ужасьёсты уката ӟеч вала, нянь сукырилэсь дунзэ умой тодэ. Правительствоын ӵем верасько, кызьы гуртлы юрттоно, сое пайдаёгес кароно. Павел Николаевич нош ик калыке потэ, кенеше, кызьы юрттэт сётонэз умоятоно. Интыосын Тӧролэн малпанъёсыз кельшо. Озьы кин тросгес сӥль-йӧл поттэ, соослы ик уногес коньдон вуэ. Палэнэ уг кылё лябгес хозяйствоос но. Павел Николаевичез тужгес зол сюлэмшугъяськытэ гурт техникалэн вужмемез. Сое выльдыны нош ик сюрес шедьтэ. Лизинг амалэн "Клаас" но "Доминанта" усто немец комбайнъёс дорамы вуо. Тырмыт ӧвӧл ке но, бусыосамы ужало ни. Куд-огезлэн Павел Вершининэз токма шорысь куртчылэмез потэ, со, пе, кутскем ужзэ йылаз-пумаз уг вутты, ӝыныё дугдэ. Меӵак пусйыса, со юнме шорысь супыльтон, данзэ быдтыны турттон. Кытысь со потэ, тросэзлы тодмо, нош озьы вераськисьёслэсь юаськод ке, я бен возьматэ одӥг коть пример, соку ик ымзы пытсаське. Парламентын Кызьы тодмо, миым Кун Кенеше быръёнъёс вал. Павел Николаевич ас округаз котькинлэсь трос, 93 процент пала куара басьтӥз. Бырйисьёсыз солы юн оско. Кун Кенешлэн кыкетӥ созывезлэн нырысетӥ сессияз Павел Николаевичез Парламентлы Тӧрое ӵекто. Но со, жаляса верано луэ, ӧжыт гинэ ичи куара люказ. Соку со вылӥ трибунаысен шуиз: "Келяны но дышетсконо". Ӵуказеяз Кун Кенеш азе кӧня калык потӥз, ваньмылэн син азямы. Куронзы одӥг вал � Павел Николаевичез вӧсь карыны ум сётэ. "Удмурт кенеш" но ас кылзэ юн вераз. Собре Павел Николаевичез быръё Кун Кенешлэн тӧроезлы нырысетӥ воштӥсе. Павел Вершинин ӧз чигиськы, уката юнмаз. Котькуд сессиын, ялан ужась комиссиын мылкыдзэ шара вера но лэчыт ужпумъёсты ӝутэ. Со чутрак пумит вал республикалы президент быръён сярысь законлы, тужгес но 25,1 процентэн азьмурт луонлы но одӥг пол быръён ортчытонлы. Нош Правительстволэн Тӧроез дыръя депутатъёс кыӵе гинэ куронъёсын ӧз потылэ. Павел Николаевич но солэн воштӥсьёсыз котьку рос-прос валэктылӥзы, югдурез тупатыны ужрадъёс кутылӥзы. Нош кыӵе ӟырдыт вераськонъёс мыно, арлы быдэ кун бюджет кутыку. Кивалтэтлэн Тӧроез котьку ассэ юн возиз, депутатъёслэсь ӵектонъёссэс лыдэ басьтылӥз. Павел Николаевич Вершинин али республикамылы президентэ кандидат. Со асьмелэн бӧлякмы. Солы шаермылэн но татысь вань калыкъёслэн интересъёссы котьмалэсь вылӥын. Павел Вершинин � со визьмо, бадӟым опытэн будэм кивалтӥсь, азьветлӥсь но лидер. Павел Вершинин � со гажано адями, данэз бадӟым шаерамы но Россиысь кивалтон ёзъёсын. Павел Вершинин � со кыдёке азьпала учкись политик, республикалэсь луонлыкъёсэ ӟеч тодӥсь-валась адями. Малпанъёсыз, программаез калыклы кельше. Гажано бырйисьёс! Таӵе кисьмам кивалтӥсьмы понна ке куарамес ӧм сётэ, соку асьмелы кыӵе бен азьмурт кулэ на? Укыр ум тэргаське-а меда? Сыӵе сяммы ӟече уз утты. Ваньдэсты ӧтисько Павел Николаевич понна куарадэс сётыны. Со ужалоз республикаысьтымы вань калык понна, шаермес котькытын умоен возьматоз. Сыӵе со туннэ асьмелэн будэм адямимы, бӧлякмы но оскымон юрттӥсьмы. Со нокинэ уз пӧя. Сыӵе ӟеч сям солы пыӵатӥз удмурт музъем. Сыӵе малпанэ вуи, Павел Вершининэн районъёсы, городъёсы, предприятиосы ӵош ветлыса, Правительстволэн кенешъёсаз но мукет ужрадъёсаз пукыса. Солы туж зол оскисько, уката бадӟым ныпъетэз вормоз, дырзэ но кужымзэ жалятэк ужалоз шуыса. Асьмелы кулэ зэмзэ но таӵе азьмурт � Президент. Геннадий РОМАНОВ. Дун тырыса печатламын. Павел Вершинин Мытэм ужъёсты мед быдэсмозы! Удмурт Республикаысь Праивтельстволэн нимыныз сюлмысьтым ӟечкыласько праздникеныды - Гурт удысын но сиён-юон промышленностьын ужасьёслэн нуналэнызы. Гурт экономикаямы котьку вал но луоз одӥгез валтӥсез удыс. Музъем бордын ужасьёсты калык вашкала дырысен гажалляз. Ӟеч пыӵатэм сямъёс но калыклэн культураез, солэн лулчеберез, ужез яратэмез но вашкалазэ гажамез гуртъёсамы весяклы кылёзы. Нянез тӥ котьку будэтӥськоды чылкыт малпанъёсын, берло дас аръёссэ экономикалэн куашкамез тӥляд удыстылы юн шуккет сётӥз ке но, тӥ ӧд куасалске. Но ортчись даурлэн берпуметӥ араз Удмуртилэсь азьвыл данзэ ӝутыны вань луонлыкъёс кылдытэмын, озьы ик гуртъёсын но. Правительство агропромышленной комплексэз азинтонлы бадӟым саклык висъя, вузъёс но сиён-юонъёс поттӥсьёс куспын валче ужаны эрик сётэмын, крестьянъёслы кун ласянь юрттыны оскымон амал тупатэмын. Бусыосын но фермаосын, сиён-юон поттон промышленностьын, гурт удыслы юрттэт сётон ёзын ужасьёсты гажаса, Удмурт Республикаысь Правительство оске, асьмелэн ошмесо шаермы азьланяз уката узырмоз но азнискоз тӥляд жадёнэз валатэк ужаменыды. Сӥзиськом тӥледлы юн тазалык но шудбур, улонады азинсконъёс, мытэм ужъёсты мед быдэсмозы. Удмурт Республикаысь Правительстволэн Тӧроез Н. А. Ганза. "Ческыт!" Глазовысь пищекомбинат рынокын умой возиське Гурт удысын но сиён-юон поттонын ужасьёслэн нуналзы азьын нош ик вуылыны кылдӥз Глазовысь пищекомбинатэ. "Кызьы меда уло ни татын пряникъёсмы, печеньяосмы?" - тазьы малпаса пырано кариським. Собере коллективлэсь мылкыдзэ но тодэммы потӥз, угось берлозэ татчы вуылэммы бере ар пала ортчиз ини. Азьло сямен ик куинь цехын дугдылытэк ужало ческыт сиён поттӥсь линиос. Тани огез конвейер кузя льӧльмыт пряникъёс мыно. Вераськиськом удмурт нылкышноен Галина Николаевна Токсанбаеваен. - Таизлэн пряниклэн нимыз "Клюква". Туж ческыт. Вань удмурт калык сое мед шӧмъялоз вылэм. Тыршиськом пряникъёсмес ческыт, чебер карыны. Собере сюлмаськиськом, басьтӥсез но мед луоз шуыса. Ужмы лекос секыт ӧвӧл. Туж шумпотӥсько, ӟеч предприятие ужаны сюремелы. - Та пряникъёслэсь ӧд-а на акыльтэ? - Ма, кинлы акыльтоз сыӵе ческыт сиён! Асьме ужасьёс понна соосын буфетын вузкаро. Кӧня мылыд потэ, сомында ик басьты. Глазовысь пищекомбинатын ческыт сиёнэз поттон 1987-тӥ арысен радъямын. Тросэз татын со дырысен ужало. Али татын 300 пала адями тырше. Тӧдьы халатэн ужасьёс пӧлын тросгес син шоры йӧто нылкышноос. Нырысетӥ номеро цехысь технолог Любовь Федоровна Педос татын комбинат усьтэм дырысен ужа. Та цехын сакыр печення поттон радъямын. - Печенняосмылэсь вылтуссэс ялан выльдыны, чеберманы турттӥськом, - шуэ со. - Кемалась ӧвӧл выль ротор (форма) басьтӥм. Табере соин "Чаровница" печення поттӥськом. Мыным солэн абрикос выллем шӧмыз кельше. - Вань ужъёсты киын лэсьтоно - шуэ технолог, - но адямиосмы туж лякытэсь, ужасесь. Ӝожтӥськыны но нокин вылэ. Ӟеч мылкыдмы потэ дыраз уждун басьтэммы бордысь но. 14 ар ӵоже татын ужатозям тодам уг вайиськы, уждун тыронэн секыт югдур мед кылдоз шуыса, калык сярысь кивалтӥсьёсмы юн сюлмасько. Глазовысь печенняос, пряникъёс, мармеладъёс ческыт шӧмынызы гинэ бордазы уг кыско. Соослэн пушказы витаминъёслэсь ватсэтъёс вань. Таӵе амалэн пӧраськыны комбинатын кылем арысен гинэ кутскизы. Озьы Глазовысь кондитеръёс витамино ческыт сиёнъёс поттон ласянь Удмуртиын нырысьёсыз луизы. Тросэз басьяськисьёс тодо ини, глазовъёслэн печенняоссы но пряникъёссы тазалыклы но пайда ваё шуыса. Сиёнъёс пӧлы понэм витаминъёс но бетакаротин юртто сиёнэз ӝоггес сылмытыны, сиськон мылкыдэз ӝутыны. Умой соиз но: витамино сиёнъёсын нокыӵе хими суретъёсыз ӧвӧл. Кылсярысь, мармеладэз пӧзьтыку, пӧлаз понӥське вубуртчинын (водоросльын) гинэ возиськись агароид. Сыӵе ватсэтъёсын пӧрам сиёнъёс адямилэсь тазалыксэ кырсь омырлэсь но утё. Туннэ татысь сиён кошке Тюменьысь, Пермьысь, Кировысь, Башкириысь, Татарстанысь но мукет улосъёсысь басяськисьёслы. Басяськисьёс вань. - Сиёнъёслэн дунзы уг кышкаты кадь, озьы ке но, басьяськисьёс туэ сиёнлэн ческытэз, пайдаез шоры уггес учко, - шуэ производстволэн кивалтӥсез В. В. Князев. - Адямиос дунъёс шоры учко. Жаляса верано, калыклэн начармемез сиёнъёсты вузанын туж зол шӧдӥське. Но милям гинэ со курадӟонмы ӧвӧл. Тросэз предприятиос ас продукцизэс вузаны ёрмо. Басьяськисьёсты бордазы кыскон понна рынокын котьку но зол нюръяськон мынэ. Озьы вал, озьы луоз - сотэк рынок но ӧвӧл. "Глазовский пищекомбинат" Усьтэм амалэн акциосын огазеяськон рынокын интызэ шедьтӥз, отын возиське ай. Али татын 30 нимлэсь но трос ческыт сиён потто. Витамино сиёнъёс сяна, кыӵеез но ӧвӧл! Пушмульыен, шоколадэн, макен. Выль печенняос поттон сярысь коллективлэн пӧртэм малпанъёсыз вань. Но син медаз усьы шуыса вераны ум дыртэ ай. Со сярысь гожтыны дыр луоз на. Гурт удысын но сиён-юон потонын ужасьёслэн нуналэнызы валче Глазовысь пищекомбинатлэсь усто ужась коллективзэ ӟечкыласьком та шулдыр сӥзьыл праздникен. Сӥзиськом азьланяз но вормонъёс басьтыса гинэ тыршыны. Улонды ческыт мед луоз. Т. Банникова. Предприятилэн адресэз: Глазов город, Драгунов нимо урам, 41. Телфонъёсыз: 3-76-22, 3-75-65. "Глазовский пищекомбинат" ОАО-лэн валтӥсь дриекторез Виктор Яковлевич Журавлёв. Галина Николаевна Токсанбаева ческыт пряникъёссэ оскалтыны вань калыкез ӧте. Мармелад но пастила поттон цехын туж кельше ужаны Сергей Сабрековлы. 11 классэз йылпумъямез бере татын ужаны мылкыд кариз тодмоосызлэн ӵектэмзыя. Уг жаля. 2 номеро цехысь удмурт нылкышноос Ольга Ивановна Сидорова но Алевтина Арсентьевна Зюзикова. Лумбыт пыд йылын, киосын ужано ке но, мылкыдзы лякыт. Цехын ваньзы эшъяськыса ужало. Кема аръёс ӵоже ӵош ужаса, ог-огзылы сокем дышизы ни: шутэтскон нуналъёс вуо ке - мӧзмо. Туспуктэмъёсыз В. Беломорскихлэн. Пыбьяын уйёс югытэсь Балезино ёросысь Пыбья черкогурт огез бадӟымез, шулдырез. Вӧл-вӧл урамъёс асфальтэн шобыртэмын. Нош тём-тём пеймыт уйёсы гуртэз электротылсиос югдыто. Та хозяйствоын али куинь электрик ужа. Пумиським огеныз - Василий Геннадьевич Золотарёвен. Глазовысь техникумез йылпумъямез бере со татын 12 ар пала ини электрик луыса ужа. Ужез, уждунэз вылэ воргорон уг ӝожтӥськы. Электроезъёс, лампочкаос, мукет кулэ арбериос басьтыны коньдон шеде. Но одӥгез урод: лушкаськисьёс ёрмыто Татчы ӵем гинэ Балезиноысь шырмачъёс вуыло. Гурт уго станцилы матын интыяськемын. Соин ик гуртын радъямын возьмаськон. Электриклэн ужезтэк гуртын нокызьы уг луы. Али соос гидъёсты, котельнойёсты толлы дасяло. Нош гужем электрикъёслы трос ужано вал сильтӧллэсь бервылъёссэ тупатъян бордын. Василий Геннадьевичлэн эшшо одӥг яратоно ужез вань на: со холодильникъёсты тупатъясь. Юрттэт курыса, кибашлы воргоронлы гуртоос ӵем гинэ вазиськыло. Т. Миронова. Туспуктэмез В. Беломорскихлэн. Удмурт Республикаысь тазалыкез утёнъя министерство, Ижевскысь медициная колледж Быдӟым Отечественной ожысь ветеранлэн, УАССР-ысь дано врачлэн, СССР-ысь тазалыкез утёнъя отличниклэн, Ижевскысь медициная колледжысь азьвыл дышетӥсьлэн ПАПУЛОВА Мария Сергеевналэн кулэменыз валче мур ӝоже усемзэс верало солэн ӵыжы-выжыосызлы но матысь адямиосызлы. *** Удмурт Республикаысь Правительстволэн аппаратэз УАССР-ысь Министръёслэн Советысьтызы быдэ вуымтэосын ужанъя комиссилэн азьвыл кыл кутӥсь секретарезлэн МОРЕВА Мария Васильевналэн кулэменыз валче мур ӝоже усемзэ вера солэн ӵыжы-выжыезлы но матысь адямиосызлы. ИВОРЪЁС Кин со крашин? Кылем арняе Граховоын ортчиз элькунысьтымы крашинъёслэн (кряшенъёслэн) шулдыръяськонзы. Пӧртэм интыосын улӥсьёс огазе люкаськыса кенешизы калыксылэсь данзэ улӟытыны, мукет выжыосын оградэ султыны. Бен кинъёс соос, крашинъёс? Малпанъёс пӧртэмесь. Куд-огез лыдъя, соос христианствое выжем бигеръёс шуыса � укыр уго вераськемзы огкадь, нимзы но, пе, "крященые" кылысь потэмын. Мукетъёсыз кемалась ӵекто ни соосыз нимаз калык чотын азинтыны. 30-тӥ аръёсы озьы ик вал. Берло дыре сыӵе мылкыдъёс юнмазы. Москваысь этнологъёс но соглаш кариськизы, крашинъёс нимаз калык луо шуыса. Соос 2002-тӥ арын перепись ортчытон вакытэ крашинъёсты мукетъёсызлэсь висъяса лыдъяны ӵектонэн потӥзы. Удмуртиын крашинъёс огазьын уло Алнаш, Грахово, Кизнер ёросъёсын. Историяя, кылъя но литературая асьме институтысь тодосчиос алигес котыр ласянь эскеризы та калыклэсь улэм-вылэмзэ. Эскеризы, трос выльзэ шараязы. 70 процентэз крашинъёс семьяен уло, асьсэлы кузпал выжыысьтызы ик шедьтыны тыршо, соин ик семьяоссы юнэсь, люкиськон учыръёс шер пумиськыло. Пусйымон соиз: крашинъёслэн асваланзы туж вылӥын. 70 процентэз лыдъяло, соослэн кылзы аспӧртэмлыко луэ шуыса. Ваньмыз сямен крашинъёс перепись дыръя нацизэс шара вераны малпало. Крашинъёслэн огазеяськон мылкыдзы шумпоттэ. Со возьматэ, асьме элькунын Национальной политикая концепция улонэ пыӵа ни шуыса. Мултэс ӵашетытэк, огсыр ужаса, вамыш бӧрсьы вамыш лэсьтыса луоз, вылды, шаерамы калык кусыпъёсты юнматыны, улонмес узыргес карыны. И.КРИЧЕВ. Политика Волгаез Рейнэн герӟалод меда? Сентябрьлэн пумаз дорамы ужазы Германиысь политикъёс. Конрад Аденауэрлэсь нимзэ нуллӥсь фонд юрттэмен ортчиз "Демократия но общество" темая семинар. Солэн ужаз пыриськизы Кун Кенешысь депутатъёс, политической но общественной партиосын ужасьёс, журналистъёс. Вакчияк вылӥ верам фонд сярысь. Туннэ нуналлы со кусып тупатӥз но представительствооссэ усьтӥз дуннеысь ог 60 странаосын. Фондлэн правлениез интыяськемын Санкт-Августин городын, ужасез - 500 мурт. Азяз пуктэм ужпумъёсты быдэстон вылысь кылдытэмын трос пумо институтъёс: политической тодон-валанъёс сётонъя, быгатонлыко егитъёслы юрттонъя, исследованиос нуонъя. Ужа политической академия, муниципальной наукаосъя, калык куспо институт, христианско- демократической политикая архив. 1990-тӥ арлэн пумаз Фонд аслэсьтыз представительствозэ усьтэ Москваын, соку ик МВД-ын аккредитация басьтэ. Общественно-политической улонэ пыриськыса, Аденауэрлэн фондэз быгатэмезъя выре Россиын ортчись политической но экономической воштӥськонъёсын ас интызэ шедьтыны. Валтӥсь интые со пуктэ демократилэсь куронъёссэ улонэ пыӵатонэз, рынокен экономикае выжонэз, правовой государство понна нюръяськонэз, децентрализмез но федерализмез юнматонэз, калык кусыпъёсты радъянэз. Тӥни малы Германиысь политикъёс вуылӥзы Удмуртие, кенешонъёс, семинаръёс ортчытъяло Россилэн пӧртэм интыосаз, СНГ-е пырись странаосын, доразы дышетскыны ӧтчало пӧртэм адямиосты. Огкылын вераса, немецъёс туж бадӟым уж лэсьто Россиез Европаысь цивилизацие пыртон понна. Фондэн кусып тупатӥзы ни Россиысь министерствоос, парламентъёс но комитетъёс, интыосысь администрациос, наука удысын ужасьёс, вылӥ дышетскон заведениос, политической партиос, профсоюзъёс, ужбергатӥсьёс. Удмурт Республикаын гинэ Аденауэр нимо фонд ньыль семинар ортчытӥз: "СМИ но политика", "Правовой государство", "Интыын ас коже кивалтон", "Интыын экономикалы юрттон", "Гурт хозяйство но кооперативъёс", "Демократия но общество" темаосъя. Конрад Аденауэр нимо фондлэн Москваысь ёзэныз кивалтэ Герд Дитер Боссен. Ижевскын ортчем кенешонэз но господин Боссен ачиз нуиз. Иворъёсты вӧлмытон но властез киултон Кин киын туннэ печать, радио но телевидение, со ик кивалтэ дуннеен. Ӟуч сямен вераса, "кто владеет информацией, тот правит миром". Тӥни малы ялымтэ ожмаськон мынэ Россилэн валтӥсь телевизионной каналъёсыз понна. Семинарын та югдурез пыр- поч валэктыны выриз Россия Федерациысь Кун Думалэн депутатэз Владимир Лысенко. Россилэн парламентаз Москваын улӥсьёс сое ньылетӥзэ бырйизы ни. Озьыен, калыкен ужаны быгатэ. В. Н. Лысенко верамъя, ОРТ но НТВ вань луонозэ лэсьто, страналэсь туала президентсэ В. В. Путинэз но солэсь нуоно политиказэ урод ласянь возьматон понна. Тӥни малы кыксэ но та телевизионой каналъёсты государство ас кияз басьтыны выре. Нош али соослэн кузёоссы - Березовский но Гусинский "Березовский ОРТ-тэк кужымтэк кылёз, со луоз огшоры Борис Абрамыч", - пусйиз Москваысь политик. Гусинский, "Медиа-Мост" ЗАО но сыӵе ик инты басьто, президентлы пумит сыло. Но НТВ-ын ужась журналистъёсты Владимир Лысенко умоен пусйиз: 10 ар ӵоже отчы люкаськиз кужмо коллектив, мукет студиосын ӵошатыса. Соослэсь кузёзэс гинэ воштоно. Кун Думалэн депутатэз нимысьтыз саклык висъяз интыосын ортчись быръёнъёслы. Россилэн 89 улосвылъёсыз пӧлысь куиньмос люкетаз туэ асьсэлы кивалтӥсь быръёзы. Аспӧртэмлыко югдур кылдэ Татарстанын. Минтимир Шаймиевлэн мылкыдыз вань президентэ куинетӥ дырлы кыльыны, нош федеральной законъя со уг лэзиськы. Али ваньмыз учко Путин шоры: ма шуоз президент? Татарстанлы нялтас мыноз-а яке законлэсь куронъёссэ быдэсъялоз-а? - Нырысетӥ амал Владимир Путинэз берен вуттоз Ельцинлэн сюресаз, калык азьын данзэ уськытоз, - шуиз Владимир Лысенко. - Политикъёс туж сак чаклало солэсь котькуд вамышсэ, учко, ма лэсьтыны быгатоз президент ар ӵоже. Умой пала улон ӧз ке воштӥськы, оскон быроз. Законъёсты тӥяз ке, Россия нош ик ельцинизме вуоз. Кун Думалэн депутатэз "котырес ӝӧк" сьӧрын вераськон дыръя пӧртэм юанъёслы валэктонъёс сётӥз. Кылсярысь, ку кутӥськоз политической партиос ласянь закон? - Паймымон, но 10 ар ӵоже сое юнматон бордын парламент йӧскадь ӧз ужа, партиослы асьсэлы но сыӵе закон кулэ ӧй вал кадь. Мугез тодмо: государство ласянь коньдон юрттэт уз вуы, налогъёс чотын улыны калык уз сёты. Но матысь дыре "Единство" но куд-ог мукет партиос куремъя, закон одно ик, шуген ке но, кутӥськоз. Ляб партиос бырозы. - Ма вераны луоз КПРФ сярысь? - Кун Думалэн таяз ӧтчамаз компартия куаразэ шӧдскымон ыштӥз, оппозициын со ӧвӧл ни, шуыны луоз. Мон сямен, туала депутатъёслы-коммунистъёслы асьсэлэн быръем позицизы кельше. Воштӥськонъёс луыны быгатозы, дыр, кивалтӥсьсы мукет луиз ке. - "Единство" валтӥсь партилэсь интызэ басьтыны быгатоз-а? - КПСС выллем, со вань ужаса улӥсьёслэн партизы уз луы. "Единство" - чиновникъёслэн, кивалтӥсьёслэн, президентлэн партиез. Со нюръяське демократия амалэн Россиын выль порядок кылдытон понна. Огшоры калык талы пумит, нош демократ кыл пӧрмиз тышкаськонлы. Сютэм муртлы уж, нянь кулэ. - Озьыен, Россиез азьланяз нош ик витё "демократической централизм", улӥысен вылӥозь кылзӥськон? - Мон озьы уг малпаськы, малы ке шуоно, интыосын радъямын ни ас коже кивалтон ёзъёс, чылкак мукет сямен ужаны кутскизы печать, радио но телевидение. Но авторитарной нимаськись кивалтон амал вань. Со юн пыӵамын Калмыкиын, Башкортостанын, куд-ог мукет регионъёсын, отын властез быдэсак киултӥз одӥг адями - президент. Удмуртия та ласянь эркын на, властьлэн зӥбемез тӥ дорын уг шӧдӥськы. - Россиын улӥсь калык ачиз вите кужмо президентэз, малы ке-а мӧйы поколение ӵем гинэ тодаз вайылэ Сталин кивалтон аръёсты... - Соиз шонер. Асьмеос выжыысь выжые дышемын одӥг кузёлы йыбыртъяны, инмарлы сямен, кивалтӥсьлы оскыны. Али но валанлыкмы ӧз воштӥськы, озьы ик витиськом кужмо властьлэсь вуэмзэ. Партия берытсконлы оскон быремын, али огез но соос: коммунистъёслэн но, музонэз но � странаен кивалтыны дась ӧвӧл. - Россия Западлы кыӵеенгес кельше? - Солы умойгес небыт кивалтон режим, коммунистъёс но военнойёс кулэ ӧвӧл. Кулэ ӧвӧл Ельцинлэн берло аръёссэ ужамез выллем амал но. Запад гажа Конституцияя улӥсь но ужась государствоез, солы матын парламент республика но. Мар дэмлало Россилы немецъёс? Россиез социализм сюрес вылысь капитализме нуисяз поттыны вырисьёс трос гинэ. Со бордын ужало нимыстыз кылдытэм академиос но институтъёс, миллионъёсын, миллиардъёсын кисьтӥське коньдон. Малпан кылдэ, Запад асьме сярысь туж юн сюлмаське шуыса. Оло, зэмен но озьы? Россилэн пумтэм курадӟемез цивилизованной дуннелы, оло, акыляк потӥз ни? Соин асьмелы вылысьтыз вылаз гуманитарной юрттэт ысто, асьсэлы кулэтэм сиён-юонзэс, кылем-мылем дӥсьёссэс, аръёсын кыллем ю тысьсэс келяло. Дырын-дырын кредитъёссэ висъя Дуннеысь валютая фонд, но со понна тэльмырыны быгатоно но фондлэьс фондлэсь куронъёссэ быдэсъяно... Ма дэмлало Россилы немецъёс? Соос дышето асьмеды Германия кадь улыны но ужаны, кивалтон ужез демократия амалэн радъяны. Кык нунал ӵоже семинаре лыктэмъёс азьын вераськизы Герд Дитер Боссен, Хайнрих Хоффшульте - Европаысь общинаослэн но регионъёслэн Советсылэн нырысетӥ вице-президентэз, Вальтер Байор, Бундестаглэн ХДС/ХСС фракцилэн спикерез. Кунгож сьӧрысь вуэм куноос таӵегес кенешон Ижевскын нуизы вал ини кык ар талэсь азьло. Али соос нош ик тодматӥзы Германилэн демократия амалэн азинскеменыз, Ваймарской республикаысен кутскыса, туннэ нуналозь ортчем сюресэныз. - Германия (ФРГ) возиське кужмо городъёс но муниципальной кивалтон чотын, юн выжыяськемын федерализм, - шуиз Х. Хоффшульте. - Выль Конституцияды тӥляд но со пусъемын. Демократилэн шӧмыз ФРГ-ын котькуд 5 ар ортчыса канцлерез воштонын гинэ уг шӧдӥськы, вань кивалтон удыс соин пыӵамын. Нацистъёслэсь партизэс быдтэм бере, кыкетӥ мировой войналэсь бервылъёссэ утялтыны но выль государство кылдытыны кылдӥз Конрад Аденауэрлы. Канцлере бырйытозь, со городлэн мэрез вал. Аденауэр кивалтон аръёсы демократия ас ӧрзэ умой-умой шедьтӥз но ӝог азинскиз. Тӥни малы милям фондмы солэсь нимзэ нуллэ. Россия сярысь ке верано, зэмос демократилэн инъетэз татын ӧвӧл на. Туала югдурдэс ӵошатыны луоз Ваймарской республикаен. Немецъёслы туж кельше Интернетэз уже кутон, со пыр ужаны луэ быдэс дуннеен, тужгес но - егит поколениен. Та обществоын кыӵе инты басьтэ нимаз адями, эрико государстволэн гражданинэз? - Кызетӥ дауре выжыса, Германия улыны кутскиз чылкак выль малпанэн, нырысетӥ интые султӥз адями понна сюлмаськон. Тӥни малы закон юн уте солэсь правооссэ но эриксэ, тӥни малы ваньмыз лэсьтӥське калыкмес утён вылысь. Зэмос демократия кутске "демос" (народ) кыл бордысь, озьыен, ас пуштросэзлы тупаны кулэ. Германиысь политикъёс умоен лыдъяло Европаысь странаослэсь огъя союзэ пыриськемзэс, али соос 15-ёзь вуизы ни. Но та огазеяськон федеративной государство ӧвӧл на, пусйиз господин Боссен. - Россиен ӵошатыса, Германиын туж зол пуктэмын иворъёсты вӧлмытон ёзъёс, районъёсысь газетъёсты, радиоез вераса но. Соосты зӥбон, политика шоры учконъя люкон-басьтон ӧвӧл. Государстволэн улоназ озьы ик валтӥсь инты басьтэ суд. Котькудзэ умойтэм кутэм решениез со одно ик тупатоз, одӥг вазиськонэз но учкытэк уз кельты, котькыӵе адямилэсь со мед луоз. Кун суд сяна, вань на независимоез но федеральноез. Германиысь куноос мыло-кыдо ужазы юанъёслы валэктонъёс сётон бордын. - Столицаез Боннысь Берлинэ выжтон Германилы ма сётоз? - Столицалэн данэз будоз. Но озьы ке но, кыӵе луэ Париж Франция понна, Берлин отчыозь уз ӝутскы ни. 40 ар ӵоже городэз люкыса возён ас ужзэ лэсьтӥз. Кык Германиез огазеян но кыл вылын гинэ капчиен сётске, ГДР-ын улэм муртлэн валанлыкез пӧртэмгес ни. - Европалэн Союзаз кыӵе инты басьтоз нациосын ужан? - Милям валаммыя отын одӥг нация луоз - европеец, ЪЪИ даурын калыкъёсты выжыосъя люкон Европалэн политикаяз уз луы. Нош Европейской Союзэ вуоно арын пыроз ни 27 государство. - Россиын 80 процентэз регионъёс уло кун чотын, мукет сямен вераса, дотационной луо. Центр ке куштӥз, соос асьсэды возьыны уз ворме. - Германиын котькуд регионлы бюджетъя тырмыт коньдон висъяське. Политика та удысэ уг пыриськы. - Ма вералоды Россиысь СМИ сярысь? - Милям валанмы таӵе: печать, радио но телевидение ужаны кулэ лыдӟись понна, политической кужымъёслэн "законъёссылэсь" палэнскыса. Германиын журналистлэсь правооссэ но данзэ уте закон, газетъёсын бадӟым инты басьто интыосын нуиськись политикалы сӥзем материалъёс. Тӥляд районлы быдэ потэ ке 1-2 газет, ми дорын - дасолэсь ятыр. Соос мыло-кыдо ужало лыдӟисьёсын, соослэн гожтэтъёсынызы. Журналистъёс кышкатэк возьмато кивалтӥсьёслэсь тырмымтэоссэс, критика лек но чурыт пуктэмын. Кенешонэ люкаськемъёс, асьмелэнъёсыз но, кунгож сьӧрысь лыктэмъёсыз но, кык нунал куспын сэрттӥзы-пертчизы трос ужпумъёсты. Странаосмы пӧртэм сюрес кузя мынӥзы но мыно ке но, ог-огедлэсь дышетскон, умойзэ басьтон ноку уз люкеты. Германия пыре ке вылӥ цивилизациен государствоос пӧлы, Россилэн но данъяськымон интыосыз ӧжыт ӧвӧл. Кураськисьёс радын ведь со азьвыл ноку но ӧз ветлы. Людмила Медведева. Корка пушез шулдыртэ "Оскон" Асьме республикалэсь ӝыны люкетсэ нюлэс басьтэ. Вашкала аръёсысен шаермы та дуно узырлыкеныз тодмо. Пётр И эксэй дыръя татысь лыстэм пужымез нуллӥзы ӟуч флот кылдытон понна. Нош Удмуртиысь заводъёсмы дауръёсын эгыр вылын ужазы. Калыкмы понна нюлэсъёсмы али но бадӟым инты басьто. Тросаз ёросъёсын ужало леспромхозъёс. Огез сыӵе хозяйство вань Балезиноын но. Туннэ татын 1200 пала адями ужа. Малпаны ик шуг, мар луысал соосын та хозяйство пыд йылаз возиськыны ке ӧй быгатысал. Туннэ Балезиноысь леспромхоз акциосын огазеяськем предприятие луэ. Валтӥсь инженерлэн Владимир Ильич Борисовлэн верамезъя, азьло аръёсы леспромхоз ужа вал палэнысь ваем нюлэсэн, асьсэлэн сырьёзы 40 процентэз гинэ уже кошкылӥз. Табере югдур мукетгес луиз. Нюлэс дунояз. Соин ик одӥг шелеп но азбар шорын уг костаськы. Пу быдэсак уже кутӥське. Татын вератэк уг луы леспромхозлэн ортчем сюресэз сярысь. Балезиноысь леспромхоз ужаны кутскиз 1931-тӥ арын. Нырысь со выриз пу дасянэн. Бадӟымесь коръёс Чупчи шур но собере чугун сюрес кузя кошкылӥзы страналэн пӧртэм сэрегъёсаз. Секыт война аръёсы но собере татысь нюлэс кошкылӥз куашкатэм калык хозяйствоез ӝутонэ. Война вакытэ обороная предприятиосты дугдытэк ужатон понна суткалы быдэ 10 сюрс кубометр пу кулэ вал. 50-тӥ аръёсы татын радъямын вал пулэсь ящикъёсты поттон, паськытгес ӧръяськиз пу пилён. Со аръёсы ик пуэз куасьтон гур но пуктэмын вал. Хозяйстволэн тужгес но бадӟымесь азинсконъёсыз луизы 60-тӥ аръёсы, куке татын усьтӥскьиз паркет поттон цех, лэсьтыны кутскизы мебель но коркаос. Ӟеч ужамез понна коллектив пусъемын вал ВДНХ-лэн нырысетӥ степенё дипломеныз но вить медальёсыныз. Бӧрысь Балезиноысь леспромхоз валче ужаны кутскиз Чепцаысь мебель поттон фабрикаен. Ӵош ужан кусыпъёссы али но возисько. Табере соос ӵош потто вить пумо пуконъёс, нылпиослы мебель, ӟирыё креслоос но улыны кулэ мукет арбериос. Туннэ мебель поттон цех огез бадӟымез производство лыдъяське. Балезиноысь мебель поттӥсьёс огвакыт матысь кусыпъёс возизы Глазовысь мебель поттӥсьёсын. Но табере ньылетӥ арзэ ини балезиноос ас кожазы ужало. - Ужмы пӧрме, - шуэ валтӥсь технолог Маргарита Аркадьевна Русских. - Мебельмес умой басьто, сад-бакча но дача возисьёслы туж кельшо пу коркаослы. "Надежда" нимо стенкаосмы но умой кошко. Технологлэн верамезъя, балезиноослэсь мебельзэс умой басьто Сибирьын, Оренбургын, Татарстанын, Башкортостанын. куд-огез нимаз заказъёс но сётэ. Сыӵе заказъёс пӧлысь адӟим чебермаса лэсьтэм бадӟым сундукез. Леспромхозлэн продукциез пӧлысь берло дыре шугадӟонэ сюриз паркет. Куке-соку предприятие соин данъяськылӥз. Нош табере, мода сьӧры уиськыса, дыр, адямиос кулэгес каро линолеумез. Солэсь тазалыклы уродзэ уг валало, лэся. Акциосын усьтыса ужась "Балезинский леспромхоз" мукет фабрикаослэсь нимаз кариськыса ужаны кутскемез бере, аслэсьтыз пайдазэ золгес шӧдӥз. Тазьы ужаны умойгес, - шуэ сбытъя отделэн кивалтӥсез Наиля Равильевна Касимова. - Котькуд пулэз, шелепез уже кутӥськом. Мебель лэсьтонэ пу уг ке яра, ӝажыос, ящикъёс лэсьтӥськом. Пул пызь гинэ но мултэс уг луы. Сое али ку посон фабрикае келяськом. Ӧсъёсты, укноосты нырысь Играысь басьтӥськомы вал, табере ас дорамы лэсьтыны кутскимы. Котьма ке но, милемыз бордазы кыскизы "Надежда" нимын стенкаос. Соос пӧртэм пумоесь ке но, ваньмыз чакламын, асьме квартираослэсь быдӟалазэс лыдэ басьтыса. Дунзы но уг кышкаты, 7 сюрс манетэн басьтыны луэ. Соосты кылдытон бордын мыло- кыдо ужало конструкторъёс. Вань татын дизайнерзы но. Вераны кулэ, леспромхозын ужасьёс пӧлын туннэ 38-лэн вылӥ образованиез, нош 140-эз - ас ужзыя специалистъёс луо. Дизайнер Ольга Александровна Лекомцева Ленинградысь лесотехнической академиез йылпумъямын, нош валтӥсь технолог Маргарита Аркадьевна Русских - Москваысь лесотехнической институтэз. Кыксы ик пӧртэм аръёсы дышетскемын Кожилоысь шор ёзо школаын. Предприятилэн кивалтӥсьёсыз (директорез Геннадий Иванович Костин) ужасьёссы сярысь сюлмаськса, секыт ныпьетлэсь, соцкультбыт шуонлэсь, ӧз куштӥське. Предприятие уте-возе 40 сюрс квадрат метр пала улонниосты, мунчоез, дӥсь миськон интыез (прачечноез), санаторий-профилакториез. Ас ужасьёсызлы дунтэм дунын пу висъя. Нюлэс удысын ужасьёслэн нуналэнызы валче кылем арын но, туэ но куамынлэсь ятыр адямиос сӥё-дано нимъёсын пусъемын вал. Ужасьёслэсь мылкыдзэс ӝутон ӟечен берытске, соослы гинэ уг, вань семьяослы, кытчы вуэ татысь мебель поттӥсьёслэн вузъёссы. Т. Банникова. Туспуктэмъёсыз В. Беломорскихлэн. 1. Пуэз куасьтон цехын ужасьёс Н. Князева, Б. Тютина, Н. Корепанова, В. Яковлева. 2. Мебель лэсьтон цехын ужасьёс. Нырысетӥ радын: З. Касимова, В. Аверин, Т. Пряженникова, А. Касимова. Кыкетӥ радын: Е. Касаткина, Г. Касимова, Н. Вахрушева. 3. О. Лекомцева - дизайнер. 4. Сбытъя отделлэн кивалтӥсез Н. Касимова. 5. Столяр В. Ажихмин. 6. Куинь комнатаен пу коркалэн вылтусыз. Уважаемые господа! Вы имеете уникальную возможность приобрести экологически чистый жилой дом или дом для дачного участка и все необходимое для его отделки из древесины: паркет щитовой, столярные изделия, строганный погонаж. Укомплектовать его современной корпусной мебелью и красивыми долговечными стульями. Кроме этого, можем предложить комплект деревянной тары, щепу технологическую и балансы для производства целлюлозы. Более половины квартиры, построенных за последние 35 лет в г. Ижевске, оборудованы нашим паркетом. Высокий уровень качества паркета - это красота и комфорт в Вашем доме. Построено два уникальных города для военнослужащих под Курском и Ростовом турецкими и болгарскими строителями с использованием нашего паркета. Мы сами занимаемся заготовками древесины, поэтому имеем дешевое сырье, что позволяет удерживать цены на продукцию значительно ниже рыночных. Имеем опыт поставки продукции на экспорт. Обращайтесь к нам и вы убедитесь , что не ошиблись! Наш адрес: 4275-20, п. Балезино, ул. Школьная, 1. Вордоз на-а Кейлуд академикез? Сюмси ёросэ вуылыкум ӧй чида, Кейлудэ вуылытэк. Ачим но уго кейлуд ныл, но артысь Селта ёросысь. Кемалась тодэм-ӵошатэм потэ ни вал � кудӥз тузӥгес? Райцентрысь вить иськемын гинэ сылэ та вуж гурт. Визьмоесь вылӥллям сое кылдытӥсьёс � сюрес дуре интыяськиллям. Лента кадь вольыт асфальт вылтӥ машинаен вить минут ӵоже вуоно. Но гуртэ пырыса мылкыд куашка: ульчалэн кыкнапалаз � куашкам, ёмырам коркаос. Куд-огезлэн укноосысьтыз чилько возъетэзъя гинэ буйгам: татын улӥсез вань ик. Зэм, трос ӧвӧл, сое калыклэсь юаськытэк но лыдъяны шуг ӧвӧл: одӥг, кык, куинь, ньыль, вить. Гуртсылэн кылдэмез сярысь нокин но рос-прос уг тоды ни: сылэ но сылэ. Будӥсез кошке, пересез кыле. Магазин-медпункт-школа � вить иськемын � райцентрын. Ужан инты � ас юртъер котырад. Куке но, конечно, Кейлуд синмаськымон вылэм. Татын дас ар талэсь азьло гинэ ай ужаз нылпиослы шутэтскон лагерь. Со нуллӥз гуртозылэсь � академиклэсь Василий Паринлэсь нимзэ. Та фамилия лыдӟисьёсмылы тодмо, дыр. Паринлэн пиосыз но медицинаын валтӥсь удысчиос, профессоръёс луизы. Уд но малпа, таӵе гинэ гуртысь сыӵе бадӟым адями потоз шуыса. Но вань кейлудъёслэн туала геройзы но. Со � Кун Кенешлэн депутатэз Виталий Возисов. Виталий Михайлович � "Межрегионгазлэн" Ижысь филиалэзлэн директорез. Депутатэ бырйизы аспалъёсыз. Татын со кемалась уг улы, уг ужа ке но, вордскем палъёссэ уг вунэты. Кейлудын солэн атай юртэз. Ми вуылыку атаез Михаил Савельевич доразы ӧй вал, больницае укшаз. Нош анаез Любовь Ивановна милемын мылысь-кыдысь кенешиз. Кызьы сокем визьмо пи будэтӥды шуыса юамелы со огшоры вераз: ачиз будӥз. Возисовъёслэн куинь пиоссы. Школаын дышетскыкузы но, будыса но, огпол но ӧз возьдаськытылэ анай-атайзэс. Ма, уд но дӥсьты: атайзы � ожысь ветеран, коммунист, партшколаез йылпумъямын, районын тодмо-дано адями; анайзы � дышетӥсь. Таин ваньмыз верамын. Михаил Савельевич но Любовь Ивановна шумпотылӥзы пиоссылэн котькуд вормонзылы: школаын "вить-а" басьто, киязы тӥр-а возьыны дышо. Берло дышизы но кадь, ӧз паймылэ ни. Тани Виталий кӧня ужан интызэ воштӥз: инженер, кивалтӥсь, эшшо бадӟымгес кивалтӥсь... Быгатӥсь муртлэн сюресэз озьы ик азинскыны кулэ кадь, но куке со депутатэ мыныны малпаз, Любовь Ивановна куалектӥз. "Пук вал интыяд, ужа гань- гань, со быдӟа йырвисён вылад басьтӥськод", � алыны выриз со. Но пиез таяз учыре ӧз кылзӥськы, кужыме но визьмы вань дыръя ужало, шуиз. Анай али но уг буйга ай: азьвыл коть доре кемалыгес бертылэ вал, али депутат ужезъя Сюмсие вуылыкуз гинэ эскерон сямен таман пыра, сиськыны но уг ваньмылы, пыд йылаз маке-со курче но кошке. � Оло, вылтӥяськисьгес луиз? � Ӧ-ӧз, сыӵе ик. Зарни сюанамы тани телевизор кузьмаз, но учкеммы уг луы � кыӵе ке мукет антенна, пе, кулэ. ...Зарни сӥзьыл. Шыпыт. Гурт сьӧрысь пионерлагерь бервылын лошъясько дранчаос, ӟечыранъёс... Мынам Кейлудэ кадь ик шулдыр Кейлуд. Но мӧзмытгес. Мынам гуртам ӧз вордскылэ на тодосчиос, бадӟым кивалтӥсьёс, пуксемын но со сюресъёслэн урдсазыгес, но со � улэп. Таяз уг чузъясько нылпи куараос. З.РЯБИНИНА. Кейлуд урам. Л.Возисова. Туспуктэмъёсыз В.Камашевлэн. Кун Кенешын пумиськон Завьялово черкогуртын 26-тӥ августэ ёрос но гурт администрациослэн кивалтӥсьёссы кенешизы вал интыосысь аскивалтонлэн но кун властьлэн ёзъёссы куспын ужанэз умоятон сярысь. Кун Кенешлэн Президиумаз 7-тӥ октябре кенешонын вераськон уж вылэ выжтэмын вал. "Удмуртилэн азинсконэз" программая матысь 4 ар куспын республикаын 600 иськем чурыт сюресъёс лэсьтоно, 60 школа пуктоно, 300 иськем газ гумыос кысконо. Озьы ик эскеремын вал гуртэ ужасьёсты юнматон но соослы юрттон вылысь ужпумъёс. Кун Кенешлэн Тӧроез Александр Волков пумиськон дыръя рос-прос мадиз Россилэн Президентэныз Владимир Путинэн пумиськемез сярысь. Кылсярысь, со вераз, Россилэн Президентэз политика удысын куд-ог ужрадъёс кутыны - му вӧез, газэз но электроэнергиез кун сьӧры вузанэз кулэстыны - кулэ но странаез азинтон вылысь асьмелы келяны кулэ шуыса. Угось электрокужымлы но мукетызлы дун будонъёс одно ик вуттозы экономикаез лябомытонэ. Клебанов лыктэ Удмуртие Россия Федерацилэн Президентэзлэн Владимир Путинлэн куремезъя, 10-тӥ октябре Удмуртие вуоз Россиысь Правительстволэн Тӧроезлэн воштӥсез Илья Клебанов. Кызьы тодмо, Владимир Путин умоен лыдъяз республикаысьтымы Кун Кенешлэн Тӧроезлэсь Александр Волковлэсь 2001-тӥ-2004-тӥ аръёсы Удмуртилэн социально- экономической азинсконэзъя программаезлы Россия Федерацилэн бюджетысьтыз коньдонэн юрттонъя ӵектонзэ. Программаез улонэ пыӵатон понна, Илья Клебанов эскероз нырысетӥ быдэстоно ужъёсты. Малпанъёс вань, Илья Клебанов Ижевске лыктэ республикаысьтымы пыӵал тӥрлык предприятиослы пунэм тыронъёсты берыктон ужпумъёсты радъян пумысен. Александр Волковлэн ӵектэмезъя дасям Удмуртилэн социально-экономической азинсконэзъя программа тупа Россиысь Правительстволэн но Президентлэн экономикая программазылы. Сое возьматэ Илья Клебановлэн Удмуртие лыктэмез но. Вордскем нуналлы кузьым Кылем арняе Можгалы тырмиз 74 ар. Та нуналэ отын улӥсьёс басьтӥзы дуно кузьым - ёрос больницаын хирургияя выль корпус усьтӥськиз. Отын огдыре 100-лэсь ятыр мурт йӧнатскыны быгатэ, эмъян тӥрлык выль, тырмыт. Сӥё-дано ужрадэ пыриськиз Кун Кенешлэн Тӧроез Александр Волков. Можгалы гинэ ӧвӧл, быдэс Удмуртилы та дуно кузьым, шуиз со. Республикамы быгатэ бере школаос, больницаос лэсьтыны, озьы бере, азинскыны инъет вань. Удмуртиысь АПК-ын чидантэм секыт югдур кылдэмен валче, Удмурт Республикаысь Кун Кенеше но Правительствое ВАЗИСЬКОН Туэ юосты утялтонын ыштонъёс адӟемен валче, Удмуртия одӥг миллион центнерлэсь уно ю тысь басьтытэк кылиз. Озьы луиз, комбайнъёс юн вужмемен, АПК-лы кун ласянь техника, воштос ёзъёс, эстӥськон но вӧй басьтыны тырмыт саклык висъямтэен. Эстӥськонлы, электрокужымлы тарифъёс пумтэм будэмен (9 толэзьскын 100 процентлы) но туэ май толэзьысен йӧл басьтонлы дунъёсты кулэстэмен сэрен, гуртысь ваньбур поттӥсьёс толлы дасяськон вакытэ коньдонтэк кылёно луо. Удмуртилэн экономикаяз кылдэм югдурен сэрен сизьыметӥ арзэ ни гурт удысэз азинтыны уг луы, ӵуказе немаин луоз гырыны, кизьыны, будэмзэ утялтыны. Пумен куштӥськоно луиськом музъем ужын наукалэсь куронъёссэ быдэсъянлоэсь, удысын азьмынӥсь амалъёсты кутонлэсь, выль выжы пудо уськытонлэсь. "Удмуртилэсь экономиказэ утён понна" Удмурт огазеяськонлэн исполкомез, Удмуртиысь колхозъёслэн огазеяськонзылэн президиумез (СХПК) Удмурт Республикаысь Кун Кенеш но Правительство азе таӵе куронъёс пукто: 1. Удмуртилэсь агропромышленной комплекссэ быронлэсь утён но солэсь экономиказэ, материально-технической инъетсэ азьланяз но куашканысь поттон понна ӝегатскытэк Удмурт Республикаысь Кун Кенешлэсь сессизэ люкано. 2. Ӝегатскытэк ужрадъёс кутоно гуртысь ваньбур поттӥсьёслы йӧл вузамзы понна дотациосты будэтон ласянь, со мед тупалоз эстӥськонлы но вӧйёслы дунъёслы: � 1 кило сӥль понна со 40 манетлэсь ичи медаз луы; � 1 кило ю тысь понна со 4 манетлэсь ичи медаз луы; 3. Техника но ӟеч выжы пудо басьтыны лизинген юрттэт сётыны ӵектоно, ваньбур поттӥсь предприятиослэсь луонлыкъёссэс лыдэ басьтыса. 4. Республикаысьтымы дышетскон заведениосын азьланьтоно гурт удыслы кадръёсты дасянэз. В.А.НИКИТИН, Удмуртиысь колхозъёслэн огазеяськонзылэн тӧроез, Удмурт Республикаысь Кун Кенешлэн депутатэз. Ивортон Россия Федерациысь юстицияя министрлэн Ю.Чайкалэн туэ 28-тӥ сентябре кутэм 1636 номеро приказэзъя Россия Федерациысь Конституцилэн 78-тӥ ёзэтэзлэн 1-тӥ люкетэзъя но Россия Федерациысь Юстицияя министерство сярысь положениея, Удмурт Республикаысь Юстицияя министерство пӧрмытэмын Россия Федерациысь Юстицияя министерстволэн Удмурт Республикая Управлениезлы. Россия Федерациысь Юстицияя министерстволэн Удмурт Республикая Управлениезлы кивалтӥсе юнматэмын Осипов Вячеслав Сергеевич. А.ЧЕРНОВ, Россия Федерациысь Юстицияя министерстволэн Удмурт Республикая Управлениезлэн кивалтӥсезлэн воштӥсез. Кызь студент бадӟым стипендия басьтоз Владимир Потанинлэн фондэз одӥг сюрс визьмо студентъёслы нимысьтыз стипендия ӵектэ. Потанинлэн программаез чакламын Россиысь 50 вузлы. Соос пӧлы пыртэмын Удмурт кун университет но. Туэ ӵошатсконэ пыриськизы ни тямыс вузысь студентъёс: Санкт-Петербургысь, Петрозаводскысь, Архангельскысь, Мурманскысь но Быдӟым Новгородысь. Ӝоген устоосыз студентъёс быръемын луозы Приволжск федеральной округын. Потанинлэн фондысьтыз стипендиез басьтон понна ӵошатсконэ пыриськыны быгато "витьлы" гинэ дышетскись студентъёс � берло кык сессиос понна соослэн зачёт книжкаосазы "витьёс" луыны кулэ. Ӵошатсконын вормисьёслы одӥг ар ӵоже толэзьлы быдэ 1200 манет стипендия тыриськоз. 10-тӥ, 11-тӥ, 12-тӥ октябре УдГУ-ын ортчоз 20 стипендиантъёсты быръён. Т.МИРОНОВА. Мӧйыос вӧзын егитъёс Каракулино ёросысь администрация, бусы ужъёсын данэ потэмъёслы сӥзьыса, флаг ӝутыны кыл сётӥз вал. Сыӵе дан басьтӥз КПСС-лэн ЪЪИИ партсъездэз нимо колхоз. Та эштос ёросын аранзэ нырысетӥез йылпумъяз. Отын куинь звеноос, 20 комбайнеръёс, ӵошатскыса, ю-няньзэс октӥзы-калтӥзы. Котькудӥз сярысь ӟеч кыл гинэ вераны луоно, умой ужазы егитъёс но. Куинетӥез звено котькуд гектарысь 25,6 центнер ю тысь кутсаз. Мӧйыос шумпото, кивоштӥсьёссы умой тыршо шуыса. Тани Фанис Гайфуллин ньылетӥ арзэ ни араз. Вазен со комбайнерлэн юрттӥсез вал. Туэ ачиз штурвал сьӧры пуксиз но "Ниваеныз" 5447 центнер ю тысь кутсаз. Таӵе кивоштӥсьёс вань бере, эштос уз куанермы. П. Николаев. Лыдпусъёсын котыртэмын Лыдпусъёсын олокызьы но "шудэ" Виктор Петрович Поздеев, турист но шаерчи, ог ньыльдон ар школаын ужам дышетӥсь, ожысь ветеранъёс сярысь книгаослэн авторзы, газетчи. Кин ке дасэн-дасэн, нош та адями дас одӥген лыдъя аръёссэ. Тани учке ай. 1956-22 аресъем студент нырысьсэ путешествие потӥз "Генерал Крисанов" теплоходэн, соку ик вуылӥз дано сталинград музъем вылэ. 1967-33 аресъем историк поттӥз "Они защищали Брестскую крепость" нырысетӥ книгазэ, соку ик вераськиз Брестысь телевидение пыр. 1978-44 аресъем дышетӥсьлы сётӥзы запасысь капитан звание. 1989-55 аресъем запасысь офицер вуылӥз Россиысь Военной историяя институтэ. 2000-66 аресъем "котырес" лыдпусо адями пумиськылӥз "По местам боевой славы" вуоно книгаезлэн геройёсыныз - Пугачевоын, Кечолын, Красногорскын, Дизьминоын. Та аресыз тупаз Быдӟым Вормонлы 55 ар тырмонэн. Вераськиз Удмурт радиоын меӵак эфирын. Сыӵе со Виктор Петрович, быдэск лыдпусъёсын котыртэм адями. Т. Петрова. Удмурт автономилы 80 ар Тазьы кыдаз удмуртлык ИИ 1919-тӥ арын сентябре удмуртъёслэн ИИИ Всероссийской съездзы РСФСР-лэн Наркомнацысьтыз Вотской (Удмурт) отделэзлэсь нимзэ Вотский Комиссариатэн воштон сярысь ужпум кутӥз, интыяськиз со Сарапулэ. Комиссариатлэн коллегиезлы тӧрое бырйизы Трофим Кузьмич Борисовез. Трофим Борисовлэн аслаз верамезъя, со "крестьянъёс пӧлысь интеллигент", врач, тодосчи-филолог, этнограф, публицист, вордӥськемын али Алнаш ёросысь Кезекгуртын. Империалистической но граждан ожъёсысь 1918-тӥ арын бертэмез бере, Борисов луэ Елабуга уездысь исполкомлэн, революционной комитетлэн кивалтӥсьсы, кылдытэ но луэ большевикъёслэн удмурт кылын потӥсь "Гудыри" газетсылэн нырысетӥ редакторез. 1919-тӥ арын сӥзьыл со Москваын РСФСР-ысь Наркомнацын тодматэ удмуртъёслэн ИИИ съездэныз кутэм ужпумъёсын. Соку Трофим Борисов тодматске Иосиф Алексеевич Наговицынэн, со вакытэ советской но партийной ужъя центральной школалэн музъем ужъя, сиён-юонъя но кооперативъёсъя секцилэн секретарез но кивалтӥсез. Иосиф Наговицын удмурт, вордскиз али Глазов ёросысь Омутница гуртын, революционер, 1905-тӥ арысен РСДРП-ын. Уралын - Екатеринбургын но Уфалей- Кыштымын ӟырдыт революционной уж нуэмез понна сое кырмо но Енисей губерние келяло. Отысь со пегӟе, выльысь куто. 1913-тӥ арын кошке кунгож сьӧры. Эммиграциысь берытске 1918-тӥ арын. Трофим Борисов Наговицынэз Вотской Комиссариатэ ужаны ӧте. Та ӵектон Наговицынлы кельшиз, со уго кемаласен ини вордскем палъёсаз бертыны малпа. Озьы со Вотской Комиссариатэн кивалтыны кутскиз, нош Трофим Борисов солэн воштӥсез луиз. Секытэн кутскиз Комиссариатлэн ужез: куанер но сютэм улон, калыкез ултӥян, висёнъёс, граждан ож. Удмуртъёс пӧлын культураез вӧлмытон, гожтэтлы дышетон но валэктон уж нуон кутскиз Сарапулысь партийной школа усьтон бордысен. Комиссариатлэн РКП(б)-лэн вотской секциосызлы, ячейкаосызлы но волостьёсысь исполкомъёслы 1920-тӥ арын 10- тӥ январе вазиськоназ верамын: "Эшъёс! Вотякъёс пӧлын ужасьвань организациосын но учреждениосын уно тырмымтэос шараясько, отын туж ӧжыт яке воксё ӧвӧл бадӟым опытэн ужась адямиос. Та ужез интыысьтыз вырӟытыны кулэ, нош адямиос ӧвӧл. Соин ик Вотской Комиссариат аслаз нырысетӥ быдэстоно ужпуменыз лыдъя: вакчи дыр куспын удмурт крестьянъёс но рабочийёс пӧлысь кадръёсты дасяно". Сарапулысь партийной школа ужаны кутскиз 1920-тӥ арын феврале. Ар пумын сое йылпумъяз 218 адями, со пӧлысь 91-ез - удмурт. Вотской Комиссариатын ужасьёс (соос пӧлын вал тодмо удмурт кылбурчи но тодосчи Кузьма Павлович Чайников (Куӟебай Герд), 1920-тӥ арын кивалтӥз издательской ёзэн) радъяллязы митингъёс но кенешъёс, волостьёсы ысъяллязы агитаторъёссэс, Калыкез дышетӥзы гожъяськыны-лыдӟиськыны, усьтылӥзы лыдӟон коркаос, библиотекаос, театръя но гурт удысъя секциос, самодеятельностья кружокъёс, поттылӥзы книгаос, палакатъёс, удмурт кылын листовкаос. Комиссариатлэн издательской ёзаз усьтэмын вал литературая кружок. Ужаз театр. Со ик радъялляз удмуртъёслэсь конференциоссэс но съездъёссэс. Е. Ушакова, Удмурт Республикалэн туала историезлы сӥзем центрысь ёзлэн кивалтӥсез. Кусыпъёс юнмало Таяз арняе Ижевскын ужалозы Германиысь Люнебург университетысь студентъёс но преподавательёс. Соос тодмасткозы Удмурт кун университетэн, озьы ик вуылозы городысь куд-ог фирмаосы, учреждениосы но предприятиосы. Кык университетъёслэн эшъяськонзы кык ар пала кыстӥське ни. Студентъёс но доцентъёс ог-огзы доры дышетскыны вуыло но лекциос лыдӟо. Люнебургысь преподавательёс озьы ик наукаен герӟаськем кусыпъёс тупатыны малпало Западной Европаысь но Урал улосысь - Ижевскысь, Пермьысь но Тюменьысь - куд-ог универстетъёсын. Немецъёслэн делегацизы Удмуртиын ужалоз 19-тӥ октябрёзь. Т. Миронова. МАТЭ ВУЭ ТОЛ "Чагыр эстӥськон" дыраз вутто Городын та организациез тодӥсьтэмез ӧвӧл, дыр. Усьтэм амалэн ужась "Глазовгаз" акционер огазеяськон уй палась 5 ёрослы "чагыр эстӥськон" сётэ. Котькудаз усьтэмын аслаз участокъёсыз. Табере уго асьсэ коркаосын улӥсьёс но юртсэс газэн шунто. Огазеяськонын тужгес гажано но дано адями � Римма Емельянова. Со уго ОАО кылдэм дырысен, 1967-тӥ арысен, татын ужа ни. Интызэ но уг вошъя, 33 ар кладовщик луэ ни. Римма Тихоновна татчы выжы лэзиз, шуыны луоз, вуоно арын солы 55 арес тырмоз. Тыршемез-сюлмаськемез адӟиськытэк уг кыльы. Солы сётэмын республикаысьтымы услугаос сётон удысысь дано ужась ним. Юнме шорысь ӧвӧл. Оскем ужзэ лулысь-сюлмысь быдэсъя. Тани ми ветлон нуналэ но со ёросэ газ келя вал. Мылкыдыз капчи, инмар мугор но, тазалык но сётэм. � Кузпалэным (АТП-ысь азьвыл водителен, али пенсиын ни � Г.Р.), кык пи будэтӥм. Бадӟымез бордамы улэ, � шуэ усто кладовщица. � Та "чагыр эстӥськондэс" нош кытчы келяськоды? � юасько Римма Тихоновналэсь. � Яре. � Котькуд баллонэз лыдъяськоды-а? � Кызьы, пе, сотэк. Тамында тыршыса, Римма Тихоновна кладовщиклэсь ужзэ вить чиньызэ кадь тодэ. Азьло угось со вузкарись вал. 1964-тӥ арын йылпумъяз Ижысь вузкаронъя училищеез. Собере куинь ар магазинын ужаз. Нош татын шудзэ шедьтӥз, быдэс улонзэ газ сётонэн герӟаз но "Глазовгаз" огазеяськонын ужамме уг жаляськы, пе. Куинь комнатаен квартира сётӥзы. Огазеяськонын таӵе чырмыт ужасьёс ичи ӧвӧл. Тани кызьы уд вера нырысетӥ классэн водитель Николай Владыкин сярысь. Кемалась уг ке но ужа, 4-тӥ арзэ коллективын соин данъясько. КамАЗ автомашинаез котьку сюрес вылын. Пачкатэм газ вае Чайковский городысь, собере нуллэ Глазов, Юкаменск, Яр, Красногорск, Кез но Балезино ёросъёсы. Нош газ сётонэз быгатыса радъя Ирина Адаева. Чырткем сямо кышномурт 15-тӥ арзэ кивалтэ ни газ сётонъя службаен. Глазовысь пединститутэз быдтэмез бере (физматэз) егит математик одӥг арзэ школаын ужаз. Собере татчы мастере кутӥзы. Куинь арскын ассэ ӟеч возьматӥз но 1985-тӥ арын та службаез оскизы. Ирина Игоревналэн ужез тырме. Со вань газ басьтӥсьёсын кусып возе, соослы дыраз эстӥськон келя, лыдъя-чота но дун тыронэз радъя. Ӝожтӥськисьёс ӧвӧл. Кезьыт тол матэктэмен валче, Ирина Адаевалэн ужез уката ватсаське. Вить ёросэ дыраз газ вуттоно, сотэк адямиос коркаосазы кынмыны шедёзы. Бен сыӵе учыръёс уг луыло. Ирина Игоревна ваньзэ дыраз лэсьтэ. Соинтэк-а туэ сое пусйизы Удмурт Правительстволэн Данъян грамотаеныз. Тӥни таӵе но мукетъёсыз ужасьёс "Глазовгаз" огазеяськонлэсь данзэ ӝуто но, газ басьтӥсьёс соослы юн оско. Г.РОМАНОВ. Кладовщица Римма Емельянова. Водитель Николай Владыкин. Газ сётон службалэн кивалтӥсез Ирина Адаева. Туспуктэмъёсыз В.Беломорскихлэн. Вордскемзэс та нуналъёсы пусйизы, пусъё, пусъёзы: Борзенков Александр Семенович - Удмурт Элькунысь Прокурорлэн нырысетӥ воштӥсез; Лопатин Александр Константинович - Удмурт Элькунысь Кун Кенешлэн депутатэз; Поздеев Андрей Викентьевич - Удмурт Элькунысь Кивалтэтлэн Аппаратаз ужась. Шведъёс тунсыкъясько Удмуртиен Удмуртие вуылӥзы ож тӥрлык поттонъя но конверсия ортчытонъя валтӥсь специалистъёс. Ужрад ортчытэмын Россиысь инженеръёслэн академизылэн но Швециысь инженеръёслэн королевской академизылэн тупатэм огкылзыя. Швециысь делегация пӧлын вал: делегацилэн кивалтӥсез, Инженеръёслэн королевской академизылэн но Королевской военно-научной академизылэн экс-президентэз Карл-Улоф Терирюд, Швециысь обороная министерстволэн НИИ-ысьтыз обороная анализъёс лэсьтонъя департаментлэн кивалтӥсез, генерал-лейтенант Пер-Курт Грин, делегацилэн секретарез Инженеръёслэн королевской академизылэн учёной секретарез Бенгт Меллерюд, Инженеръёслэн королевской академизылэн экс-президентэз Ханс Форсберг. Россие вуэм делегациез келяса ветлӥзы Швецилэн Россия Федерациысь посольствоысьтыз вузкаронъя представителез инновационно-инжиниринговой центрезлэн исполнительной директорез Андрей Чинарев, Россиысь инженеръёслэн академизылэн Ижевскысь представителез, РИА-лэн Удмурт ёзэзлэн кивалтӥсез но Инженерной академилэн Удмурт Республикая президентэз, РИА-лэн но МИА-лэн академиксы, техника наукаосъя доктор Валерий Никулин. Куноос пумиськылӥзы специалистъёсын, тодосчиосын, предприятиослэн кивалтӥсьёсынызы, Удмурт Республикалэн Правительствояз ужасьёсын, вуылӥзы академиосы, университетъёсы, Удмурт Республикаысь Мукет кунъёсын кусыпъёс возёнъя министерствое. Пумиськонъёс дыръя кенешемын обороная предприятиосын конверсия ортчытон, химия ож тӥрлыкез быдтон, вылӥ технологиосъя но специалистъёсты дасянъя ӵош ужан сярысь. Н.СЕРГЕЕВ. Шуге-леке вуэмъёслы юрттэт Россиысь Пенсиосъя фондлы 22-тӥ декабре тырмоз 10 ар. Соин валче Пенсиосъя фондлэн Удмурт ёзэз ортчытэ Арлыдоослы сӥзем толэзь. Республикаысьтымы Калыкез улон-вылонын утёнъя министерстволы Арлыдоослэсь нуналзэс пусйыны висъямын 150 сюрс манет. Ижевскысь, мукет городъёсысь но ёросъёсысь пенсионеръёслы Короленко нимо ӟуч драмтеатрысь артистъёс октябре дунтэк возьматозы "Ретро" спектакль. Со понна театрлы висъямын 100 сюрс манет. Ижевскысь 3 номеро медсанчастьын таяз арын май толэзе усьтэмын Геронтология центр, солэсь ужзэ радъян понна озьы ик сётэмын 571,3 сюрс манет. 250 сюрс манет висъямын республикаысьтымы Сӧсыръёслэн огазеяськонзылы, Сӧсыръёслэсь нуналзэс ортчытон понна. Сӧсыръёсты но ужысь ветеранъёсты эмъяны Калыкез улон-вылонын утёнъя министерстволы келямын 500 сюрс манет. Республикаысьтымы ветеранъёслэн огазеяськонзылэн ужаз мылысь-кыдысь пыриськисьёслы, 572 муртлы, дунтэк гожтэмын "Достоинство" газет. Вань та ужрадъёслы коньдон шедьтэмын Пенсиосъя фондэ выт тыронэн ӝегасьёслэсь пенсиос но штрафъёс басьтэм чотын. Таяз арын 29-тӥ январе Россия Федерацилэн Президентэз указ поттӥз интернат- юртъёсын но стационар учреждениосын улӥсьёслэсь улон-вылонзэс умоятон пумысен. Удмурт Республикаысь Пенсиосъя фонд но Калыкез улон-вылонын утёнъя министерство бадӟым уж лэсьтӥзы та указэз улонэ пыӵатонъя. Россия Федерациысь Пенсиосъя фонд но Удмурт Республикаысь Правительство 29-тӥ мае валче ужанъя огкыл гожтӥзы. Удмуртиын 13 интернат-юртъёс. Президентлэн указэзъя соослы нимысьтыз юрттэт сётӥське. Россиысь Пенсиосъя фондлы вань та ужрадъёслы висъямын ке 3 миллиард манетлы лимит, 45 миллионэз сётэмын Удмурт Республикалы. Калыкез улон-вылонын утёнъя министерство котькуд интернат-юртлэсь кулэяськонъёссэ лыдъяз-чаклаз: кӧня сиён-юон, мебель, транспорт кулэ, кытын тупатъян-выльдон ужъёс ортчытоно, шунытлы, тыллы но газлы пунэм тыронъёсты берыктоно. Соя ик интернат-юртъёс кулэ юрттэт басьтозы Пенсиосъя фонд азьын пунэме кылем предприятиослэсь. Кин лэсьтӥськон материал висъялоз, кин сиён-юон, кин мукет кыӵе ке вуз. Тазьы радъям уж пӧртэм ласянь пайдаё: интернат-юртъёс но пыд йылазы ӝутско, пунэме кылем предприятиослэн но Пенсиосъя фондэ тыронъёссы быро. Огдыре ик республикамылэн экономикаезлы азинскыны луонлыкъёс усьтӥсько, интернат-юртъёс кулэ вузлы шаерысьтымы предприятиосы вазисько угось. Россиысь Пенсиосъя фонд но Удмурт Республикаысь Правительство огкыл гожтэм бере июне-июле лыдъян-чотан ужъёс ортчытэмын вал ке, августэ интернатъёсы юрттэт вуыны кутскиз ни. 1-тӥ октябрьлы республикаысьтымы Пенсиосъя фонд та ужрадъёслы висъяз 17 миллион манетлэсь ятыр коньдон. Сентегысь психоневрологической интернатлы сётэмын УАЗ-3962 автомобиль, Нагорнойысь интернатлы "Инструментальный завод" ОАО-лэсь басьтэмын ГАЗ-2705 автомобиль. "Удмуртрыба" ОАО интернатъёсы 183 сюрс манет тыр сиён-юон висъялоз. Шуге-леке сюремъёсты сюдыны озьы ик юрттозы "Аксион-Холдинг" ОАО, "Увадрев" ОАО, "Ювента" ОАО, "ФОРМЗ" завод, Завьялово ёросысь "Правда" но Холмогоров нимо, Глазов ёросысь "Луч" но "Колос", Сюмси ёросысь - "Нива", "Лактан" но "Лялино" колхозъёс. Глазовысь интернат-юртъёсты выльдон-тупатонын юртто Глазов ёросысь УУССПАО но "Чепца" ОАО, мукет интернатъёслы - Як.-Бодья ёросысь "Строитель", "Завьялово ёросысь МПМК, Ижевскысь механической заводысь 22-тӥ цех но республикаысьтымы мукет предприятиос. Диван-кресло котыръёс, дӥськут но пыдкутчан интернатъёслы висъяло Ижевскысь "Художественной вузъёсъя фабрика", Сарапулысь "САРКОО", Ижевскысь радиозавод, Глазовысь УЗСМ. Пенсиосъя фонд азьын трос пунэм тыронъёсыз "Ижнефтемашлэн". 28-тӥ сентябрьлы интернатъёслы завод висъяз 3,2 миллион манет тыр вузъёс. Ӝеганъёс яке кыӵе ке валамтэос уг кылдо. Пенсиосъя фонд коньдонэз келя интернатъёсы, интернатъёс - юрттӥсь предприятиослэн счётъёсазы. Таосыз ини пунэмъёссэс тыро Пенсиосъя фондэ. Президентлэсь указзэ быдэстыны чакламын 2000-тӥ арын 31-тӥ декабрёзь. Республикаысьтымы Пенсиосъя фонд но Калыкез улон-вылонын утёнъя министерство азязы пуктэм ужпумъёсты вазьгес быдэстыны тыршо, малы ке шуоно, со луонлык кылдытоз шаерысьтымы интернат-юртъёслы Россиысь Пенсиосъя фондысь эшшо коньдон курыны. Россия Федерациысь Пенсиосъя фондлэн Удмурт ёзэзлэн пресс-службаез. Быгатэмзэс оскымон возьматӥзы Ижевскысь "Ижсталь" йӧ дворецын 20-тӥ сентябре усьтӥськиз бадӟым адӟытон. Сое радъяз Ижевскысь экспоцентр. Выль техникаез поттон умоямъя, али ортчисез выставка уката узыргес, шуизы отчы люкаськемъёс. Адӟытонэ вазен ик чаклам вузъёссэс ваиллям Белоруссиысь, Пермьысь, Москваысь куноос но. Татысь ик шедьтыны луэ быгатонлыксыя валэктэмъёссэс. Нош малы сӥземын выставка, тодыны луэ вал ни дворец бордысь бадӟым рекламаез адӟыса ик: Экспоком, компьютеръёс, связья средствоос, оргтехника, полиграфия, реклама. Куамынлэсь уно ужась коллективъёслы, фирмаослы, выль огазеяськонъёслы - котькудӥзлы лыктэм группалы нимаз инты висъямын вал дворецлэн котыр кыстӥськись фойеаз. Мар гинэ адӟыны уг луы отысь, маин гинэ уг паймыто выль вуз поттӥсьёс... Туж азьпала кошкемын ни связья техника. Телефонъёс вань дорын возёноосыз но сьӧре нуллоноосыз, дунтэмъёсыз но дуноосыз, кинлэсь ке маке верамзэ ачид ӧвӧл дыръя гожтыса кельтӥсьёсыз, пичиесь но сьӧре нуллоно радиостанциос, автоответчикъёс. Фирмаос дэмлало азьлолэсь но визьмоесь компьютеръёсты, ксероксъёсты, соослы юрттӥсь арбериосты. Со гинэ-а? Вузасько кивалтӥсьёслы, бухгалтеръёслы, вузкарисьёслы туала дэмланъёсын, валэктонъёсын программаос. Адӟытон возьматэ печатлан уж туж вылӥе ӝутске шуыса. Кагаз пӧртэм буёло, вольыт, чебер адӟиське. Со пӧрме, выль техникаез, выль амалъёсыз уже кутэмен. Ужан амалъёссэс возьматыны реклама сётӥсьёсты доразы ӧтё Ижысь авторадио, ӟуч радио, телепрограмма поттӥсь , уж дэмлась но мукет газетъёс. Печатья но иворъёсъя министерстволэн С. Ф. Васильевлэн верамезъя, республикаямы али 61 типография ни. Зэм, офсет амалэн ӟеч печатласез - одӥг гинэ. Озьыен, та удысын выль техникаез но выль амалъёсты уже кутонын асьмелы ужано но ужано на. Зэм, возьматонын пӧртэм вузъёс вань. Тани москвичъёс номырин усьтыны луонтэм тунгонъёс ваиллям, мукетъёсыз - корка котырын кутӥськись тӥрлык. Адӟытон вера кадь: улон ӝог азьланьске, асьмеос но азьмынӥсь странаослэсь бере ум кыле. Нош кулэ ке со вузъёс, соосты дэмласьёсын огкыл шедьтэ но басьтон сярысь кенеше. П. Скобелев. Уно вузъёс пӧлысь кӧняез ке. Пиосмуртъёслэсь зол ыбылӥське Сиднейын олимпиада дыръя Удмурт шаерын улӥсьёс шумпотыса пумитазы Ижевскыст Маша Феклистовалэсь бронза медаль басьтэмзэ. Со малокалиберной виновкаен ыбылӥськыса куинетӥ интые потӥз. Континентысь берытскемез бере Иж карысь администрацилэн юртаз ортчиз пресс- конференция. Отын ачиз Маша Феклистова но солэн тренерез Владимир Лукин журналистъёслэн пӧртэм юанъёссылы валэктонъёс сётӥзы. Лыдӟисьёслэн юанзы кылдоз, кӧня тыро олимпиадаын медаль басьтэм спортсменъёслы? Зарни медаль понна - 50 сюрс доллар, азвесез понна - 20, бронза понна - 10 сюрс доллар. Озьыен, Маша басьтӥз 10 сюрс доллар. Нош со сяна 2-тӥ октябре столицалэн мэрез Анатолий Салтыков Машалы кык комнатаен квартира сётӥз. Кызьы ӵошатскиз Маша Феклистова? Инмар но юрттӥз, дыр. Мумиз, нылызлы мед удалтоз шуыса, черке ветлэм но сьӧраз конвертэн гожтэт ыстэм, нош со гожтэтэз, пе, ӵошатсконъёс азьын гинэ усьтоно вал. Маша озьы ик лэсьтэм. Нош мар люкетӥз спортсменъёслы мурт шаерын? Куазьлы но, воштӥськем дырлы но вакчи дыр куспын дышыны кулэ вал. Соин, лэся, нырысь тренировкаоссы секытэн ортчизы. Финалын ыбылӥськыны 2 час 15 минут сётӥське. Сылыса, пыдесъяськыса но выдыса, котькудаз 20 пол ыбылоно. Собере очкоосты огазе ватсало. Ӵошатсконъёсын нырысетӥ интые потӥз Польшаысь спортсменка (Атлантаын со олимпийской чемпионка вал ини), кыкетӥ интые - Россиысь ик Татьяна Голдыбина. Та вакытэ Машалы шутэтскыны чик маза ӧвӧл, я пресс-конференция, я журналистъёс жингырто но соин пумиськыны туртто, нош ортчем покчи арняе Москвае кошкиз. Россилэн президентэз, Индиысь берытскемез бере, олимпиадаысь спортсменъёсын пумиськылӥз. Собере азьланьтӥсь тренировкаос. 14-тӥ�19-тӥ ноябре Мюнхенын ортчоз дунне вылысь ыбылӥськонъя кубок понна ӵошатсконъёссылэн финалзы. Феклистовалы отчы мыныны ӟечгес дасяськоно, нош шаерысьтымы кошкыны солы кулэ ни 30-тӥ октябре. Машалэн тренерез мон вераськи Владимир Валерьянович, тупен-тупен мадиз прессаын печатламтэез, верамтэез сярысь но, ачиз сярысь но. Котькуд адямилэн йыг-йыг быдэ вуонэз но вормонъёсыз пото солэн анай-атайёсызлэн но дышетӥсезлэн кыӵе луэмзы бордысь. Мариялэн анай-атайёсыз. Кыксы ик герӟаськемын азьло ДОСААФ-ен. Анаез Юлия Леонидовна самолётысь парашютэн 3 сюрс пол тэтчамын, со - та удысъяъя инструктор вал. Атаез Александр Михайлович - тылпулэсь утиськон удысысь парашютист. Али пенсиын ни, но ужа на. Машалы 24 арес, быземын, нылпиосыз ӧвӧл на, уло анай-атайёсыныз ӵош. Ӵап дыраз луз Барышников ураме 2 комнатаен квартира сётэмзы. Дышетӥсез-теренерез Владимир Валерьянович Лукин вордскемын но будэмын Кизнер ёросысь Вичур гуртын, йылпумъямын Кизнер шор ёзо школаез, собере - Глаз карысь гурт удысъя техникумез, 7 ар ӵоже армиын службазэ ортчытэ, ялан ыбылӥськонъя спортэн тунсыкъяське, вормисе потылэ, спортъя мастер, уно пол пыриськылэ Россиысь ӵошатсконъёс но вормисьёс радэ потылэ. Со - ӟуч пиосмурт, но умой тодэ удмурт кылэз. Кузпалэныз ӵош будэтэ куинь нылпи. Покчиосыз, 19 аресъем нылыз но 14 аресъем пиез, бырйиллям ни атайзылэсь сюрессэс, атайзы доры тире ветло но ыбылӥськыны дышетско. П. Скобелев. Маша Феклистова (бур паласез) но солэн тренерез В.В.Лукин Туспуктэмез А.Жуковлэн. Пумиськизы Вормон парадэ ветлэмъёс Ожысь но ужысь ветеранъёслэн Ижевскысь клубзы филармонилэн бадӟым залаз пумиськон ортчытӥз туэ 9-тӥ мае Вормон парадэ ветлэмъёсын. Соос вить кузя вал, отчы куинез лыктӥзы. Нырысь ик шаерамы али ортчись ужъёс сярысь веразы но люкаськемъёсыз мӧйыослэн нуналэнызы ӟечкылазы Удмурт Республикаысь Правительстволэн Тӧроез Н.А.Ганза но Октябрь ёрос администрацилэн кивалтӥсез С.В.Протазанов. Собере кыл сётӥзы Вормон парадэ куинь пол ветлэм муртлы старшой сержантлы В.Ф.Мерзляковлы. Владимир Фролович мадиз десантникъёсын ӵош тушмонъёслы пумит Карелиез мозмытон понна ожмаськемез сярысь. Самолётысь со парашютэн 58 пол тэтчаз. 1945-тӥ арын, война бырытозь одӥг толэзь кылем бере, сое штабе ӧтизы но парадлы дасяськыны косӥзы. Воинъёсты Сокольники паркысь палатаосы интыязы. Нырысетӥ мае зориз ке но, парадэз ортчытӥзы, нош демонстрация ӧй вал. Собере Мерзляковлэн ротаысьтыз 14 мурт пӧлысь комиссия куиньзэ кельтӥз 24-тӥ июне ортчоно Вормон парадэ мыныны. Нош 1995-тӥ арын 9-тӥ мае Вормонлы 50 ар тырмонлы сӥзем парадэ Владимир Фролович асьме республикаысь огназ ветлӥз. Старшой сержант Мират Газимутдинович Ишматов 14 аресысен 180 номеро заводын курьер луыса ужаз. Солы но шуд усиз туэ вормон парадэ ветлыны. Ожысь инвалид малпа 80 арес тырмонзэ парашютэн тэтчыса пумитаны. Удмуртиысь делегацилэн кивалтӥсез запасысь полковник Виктор Игнатьевич Ярков мадиз Вормон парадэ ветлэмзы сярысь. Москвае вуэм беразы соосыз автобусэн Обороная министерстволэн шутэтскон юртаз нуизы. Со столицалы 30 иськеме интыяськемын. Комнатаын кык мурт улӥз. Сюдӥзы куинь пол. Ӵукнаосы строен ветлыны дышетӥзы, нуназе бере Кремльлэн съездъёс ортчытъян дворецаз концерт учкыны нуллӥзы. Операя но балетъя театрын пумиськылӥзы егитъёсын. Отын вераськиз тодмо лётчик герой Алексей Маресьев. Ваньмызлы ик парадэ ветлэмъёслы сётӥзы медаль но Советской Союзлэн ньыль пол Героезлы Г.К.Жуковлы сӥзем альбом. Куинь кило кыскись книгаез 1995-тӥ арын Москваысь "Истоки" издательство поттэм. Сое печатланы юрттӥллям маршаллэн ӵыжы-выжыосыз, тодмоосыз но полководецъёс. Тросэз туспуктэмъёс но гожъямъёс вылесь. Альбом Быдӟым Отечественной войнаысь солдатъёслы сӥземын. Вакчияк тодматэм потэ солэн пуштросэныз. Георгий вордскиз гуртысь сапег лэсьтӥсьлэн семьяяз 1896-тӥ арын. Граждан ож дыръя со полкен кивалтӥз. Нош Быдӟым Отечественной война бере НКВД солэн архивысьтыз трос материалъёссэ киултӥз. Лаврентий Берия пытсэтын пукись офицеръёслэсь тыршиз Жуковез ултӥясь учыръёсты шедьтыны. Сталин маршаллэн бадӟым данэзлы вожъяськеменыз сое ыстӥз военной округъёсын кивалтыны. Георгий Константинович Уралысь военной округен кивалтон вакытэ мон нимаз ротаысь эшъёсыным Свердловске (али Екатеринбург) интыяськем штабез возьмай. Ӵукнаосы Жуков уже лыктыкуз со честь сётылӥз. Со та округен кивалтыку ик Берия Абакумовен ӵош Сталинлы чагиськиллям, маршал, пе, тюрьмаысь офицеръёсын ӵош Сталинэз сэрпалтыны малпа. Иосиф Виссарионович таӵе зулисьёслы пумит соку ик меӵак верам: � Жуковез арестовать карыны уг сёты. Мон со вераськонъёслы уг оскиськы. Ньыль ар ӵоже ож мыныку мон сое аслэсьтым но умойгес тодӥ. Вождьмы кулэм бере, 1953-тӥ арын Жуковез Москвае ӧтё но обороная министрлы воштӥсе пукто. Дыр трос ик ӧз ортчы, маршал армиен ӵош быгатӥз Бериез ужысьтыз куштыны но сое быдтыны. Собере Георгий Константинович обороная министр луэ, сое КПСС-лэн Центральной Комитетаз быръё. Маршал Хрущёвлы юрттӥз Молотовен, Маленковен но Кагановичен нюръяськыны. Но 1957-тӥ арын Никита Сергеевичез Югославие ветлыкуз ужысьтыз кушто. Собере Жуковез ужысьтыз улляло но военной ужъёсъя нокыӵе кенешонъёсы уг ӧтчало. Таӵе ултӥямлы чидатэк, Жуков КПСС-лэн Генеральной секретарезлы Брежневлы гожтэт ыстӥз, но солэсь нокыӵе ивор ӧз вуы. Парадэ ветлэмъёс та пумиськонын котьмае тодазы ваизы � ӟечсэ но, пыкылӥзы уродзэ но. Нош самой бадӟымез мылкыд каронзы � дунне вылын мынӥсь войнаосты дугдытон. Тужгес но Чечняын. Медаз быре ни пиосмы нокинлы кулэтэм ожъёсын. Быдӟым Вормонлы сӥзем юбилей табере ортчоз 2005-тӥ арын. Куатьтон ар тырмоз Германиез пазьгем дырысен. Соку но асьмелэн землякъёсмылы шуд мед усьысал вылэм Вормон парадэ ветлыны. В.ЧЕРНОВ. Вормон парадэ ветлэмъёс. В.Беломорскихлэн туспуктэмез. Юридическая консультация Предоставление сожительнице краткосрочного и длительного свидания с осужденным Вопрос: Предоставляется ли право на долгосрочное и краткосрочное свидания с заключенным, находящимся в колонии общего режима, сожительнице? Какие справки при этом нужно предоставить, кем они должны быть выданы? Кузнецова Е., г. Воткинск. Ответ: В соответствии со ст.89 Уголовно-исполнительного кодекса РФ осужденным к лишению свободы предоставляются краткосрочные свидания продолжительностью четыре часа и длительные свидания продолжительностью трое суток на территории исправительного учреждения. Краткосрочные свидания предоставляются родственникам или иным лицам в присутствии представителя администрации. Длительные свидания предоставляются с правом совместного проживания с супругом, родственниками, детьми, усыновителями, усыновленными, родными братьями и сестрами, дедушками, бабушками, внуками, и в исключительных случаях с разрешения начальника исправительного учреждения с иными лицами. Таким образом, по закону сожительница относится к категории "иных лиц", и разрешение на свидания ей дает начальник учреждения. Это является его правом, а не обязанностью... Какие при этом необходимо предоставить справки, также определяет начальник учреждения. Пыриськизы глазовъёс но Ижысь декоративно-прикладной искусствоя национальной центрын возьматон усьтӥскьиз ни ортчем толэзьлэн шораз. Со быдэсак сӥземын Глазовысь но ёросысь усто кибашлыослы. Отчы пыриськизы пӧртэм арлыдо адямиос. Адӟыны луоз Н. Гусейновалэсь но Е. Данчуклэсь пӧртэм киужъёссэс. Трубашурысь дышетскисьёс келяллям бадьпу ньӧръёслэсь лэсьтэм арбериоссэс. Писпу выжыослэсь пунэмъёссэ нуэм Пӧжы гуртысь дышетӥсь Л. Лукина. Мар сярысь вера та возьматон? Йырыд ужа но киосыд мыно ке, коть аслыд, коть вузаны котьма лэсьтыны луоно, мылыд гинэ мед потоз. Чеберлык сое вазен ик адӟыны быгатӥд ке, асьме вӧзын ик вылэм. Тӥни озьы: глазовъёс но пыриськизы асьсэлэсь быгатонлыксэс возьматонэ. П. Николаев. Журналистъёсын пумиськонъёс Сергей Шадрин: "Эмъяськон кӧня ке умоя" Берло дыре дышетӥсьёс, врачъёс чалмизы кадь. Куронъёссэс вераны ураме уг потало ни. Со бен туж умой. Югдурез тупатон вылысь, Правительство трос ужрадъёс кутӥз. Соин ик тазалыкез утён удыс огсыр ужаны кутскиз. Та но куд-ог музон ужпумъёс сярысь журналистъёслэн пумиськоназы рос-прос мадиз тазалыкез утёнъя министр Сергей Шадрин. - Туала вакытэз валля арын август бере дырен уд ӵошаты ни. Миым удыслы тросгес уксё висъямын вал, нош туэ, кылем арен ӵошатыса, 37,8 процентлы уногес. Туэ апрельысен тазалыкез утисьёслэн уждунзы 20 процентлы йылэтэмын. Оглом вераса, тазалыкез утён удыслы кун но инттысь бюджетъёсысь 17 процентэз уксё висъямын, нош азьло со лыдпус 13-14 процент гинэ луэ вал. Туж умой луысал бен 20 процентсэ висъясалзы ке. Сыӵе куронзы ЮНЭСКО-лэн но дуннеысь музон огазеяськонъёслэн. Озьы ик тросгес коньдон вуэ медицинской страхованиея фондэ. Со мынэ эмъюмъёс басьтыны, висисьёсты эмъяны но адямиосты поликлиникаосын учкыны-чакланы. Больницаосын койкаосмы тырмыт. Берло дыре паськыта нуназе эмъяськон. Калыклы таӵе амал кельше. Вуоно арлы бюджет сярысь верано ке, со туэ сярысь 30 поцентлы будоз. Коньдон висъяськоз эмъяськон оборудование басьтыны, вуж больницаосты ӟеч тупатъяны но музонэзлы. Арлы быдэ ӝутско выль больницаос. Туэ Балезиноын вуттэмын эмъяськон юрт, Ижын - пыктос висёнъёсты эмъянъя диспансер, кардиологической центр, 3 номеро медико-санитарной частьлэн больницаез (отын арлыдо адямиосты но эмъялозы), Пичи Пургаысь нылпи ваён юрт, Можгаын ЦРБ-лэн хирургической но травматологической центрез. Та удысъя уно нимаз программаос кутэмын. Кызьы бен соос быдэсъясько? Урод шуыны уг луы. "Ты висён" программая 7 рентген аппарат басьтэмын. Тая асьмеос, Москва но Санкт-Петербург бере, куинетӥ интые потӥм. Озьы ик коньдон висъяське лемтэй куртчем (энцефалит), шыр (керӟегъяськон), сахарной диабет но СПИД висёнъёсын нюръяськыны. Берлоез юн ӝог аля. Азьло 13 гинэ висись вал ке, туэ 9 толэзьскын 229 мурт СПИД-эн курадӟе. Со пӧлысь 2-ез кулӥз, 3-ез ассэ ачиз быдтӥз. Тужгес но секыт югдур Балезино, Яр районъёсын но Глазов городын. 80 процентаз учыръёсы та висён аля бышкиськыса наркотикъёс басьтӥсьёс пӧлын. - Нош грипп туэ вӧлмоз-а? - Кытысь со вуоз, Западысь-а, Азиноысь-а, секыт вераны. Но ми солы дасяськиськом, вакцинаос вань. Эмъяськон кӧня ке умоя ке но, та удысын но тырмымтэос трос ай. Али республикаямы 1 адямилы быдэ эмъяськыны 850 манет (1999 ар) коньдон кутӥське но Уралын витетӥ инты басьтӥськом. Г. Романов. "Грач" ыбе лач! Армиын но милициын ог ньыльдон ар ӵоже уже кутӥзы Макаровлэсь пистолетсэ. Ас вакытаз со туж кулэ но оскымон вал. Лэсьтӥзы Ижевскысь механикая заводын. Бӧрысь армия конструкторъёс азе бадӟымесь куронъёс пуктӥз: кулэ кужмогес патронэн, бадӟымгес магазинэн пистолет. Мугез валамон: со вакытэ уго адямилэсь мугорзэ бронежилетъёс утьыны кутскизы. Вылаз ик, дуннеысь уноез адямиос 9 миллиметръем "Парабеллум" пистолетъёс вылэ выжыны кутскизы. Солэн магазиназ 15 яке солэсь но трос патрон тэре. Нош 8 зарадэн 8 миллиметр патронэн Макаров вужмиз, шуыны луоз. Собере та пистолетлэн ыбон кужымез но улӥын вал. Соин ик армилы 9 миллиметр патронэн выль пистолет дасянъя "Грач" шифр улсын конкурс ялэмын вал. Нырысетӥез курон пуктэмын сыӵе - со мед пасятоз броняез. Ижевскысь механикая заводын та уж оскемын вал валтӥсь инженерлэн Владимир Ярыгинлэн группаезлы. Ачиз конструктор тодмо луэ спортъя пистолетъёсыныз. Со трос лэсьтӥз Иж-35 но Иж-35 М пичи калибрен пистолетъёс бордын ужаменыз. Та пистолетэн Советской Союзысь но Россиысь спортсменъёс уно вормонъёс басьтӥзы дуннелэн, Европалэн чемпионатъёсаз, Олимпиада шудонъёсын. 1997-тӥ арын Ярыгинлы "Россия Федерациысь дано конструктор" ним сётэмын. Конкурсэ озьы ик пыриськиз Москва улосысь Климовск городысь машина лэсьтонъя научно-исследовательской институт но. Пистолеъёсты эскеризы Россиысь Обороная министерстволэн полигоназ. Куронъёс пуктэмын вал туж юнэсь. Ижевскысь конструкторъёс отын вормисе потӥзы. Выль пистолетысь ыбылӥськизы ФСБ-лэн подразделениысьтыз боецъёс но. Ыбылӥськисьёс пӧлысь 65 процентэз "вить" но "ньыль" дунъет басьтӥзы. Выль пистолет, "Макаров" сярысь, 30 миллиметрлы кузьгес, магазиназ 18 патронэз, секталаез но 260 граммлы уногес. Но вераны кулэ созэ но: та классъем пистолетъёслэн секталазы кунгож сьӧрын бадӟымгес. Шуом, США-лэн котькинлы тодмо "Беретта-92" пистолетэз, асьмелэн сярысь 1,2 поллы секытгес кыске. Пистолетмес сэрттон-пертчон понна нокыӵе инструмент но кулэ уг луы. Озьы Ярыгин та пистолетэныз артэ султӥз мукет тодмо конструкторъёсын - М. Т. Калашниковен, Е. Ф. Драгуновен но Т. Н. Никоновен артэ. Озьы пыӵал тӥрлык кылдытонын Владимир Александрович Ярыгин нош ик Россилэсь данзэ вылӥе ӝутӥз. Н. Лялин. Гуртысь пиналъёслы но - лицей Туала вакытэ столицаосын гинэ ӧвӧл, пичи городъёсын но вань ини гимназиос но лицейёс, отын муресь но паськытэсь тодон-валанъёс сёто. Валамон, отын дышетскем нылпиослэн вузъёсы пырыны луонлыкъёссы, гуртысь эшъёссылэн сярысь, шӧдскымон тросгес. Нош гуртысь пинал, туж визьнодо луыса но, институтэ пырыны уг быгаты. Солэн школаын басьтэм тодон-валанъёсыз городысь ёзъёсыныз ӵошатскыны луонлык уг сёто угось. Республикаысьтымы дышетон удысэн кивалтӥсьёсты таӵе югдур кемалась сюлэмшугъяськытэ ини вал. Соин ик соос кулэен лыдъязы гуртысь пиналъёс понна лицей яке гимназия выллем нимысьтыз школа-интернат усьтыны. Удмурт Правительство но умоен лыдъяз дышетӥсьёслэсь кичӧлтонзэс. Сое улонэ пыӵатон понна, туж ӟеч луонлык но учыраз. Завьялово районысь Италмас посёлокын 1992-тӥ арысен ик ини школазылы выль юрт лэсьтыны туртто вал. "Восточный" совхозын (ӵапак со ас чотаз луиз лэсьтӥськон ныпъетэз) коньдон югдур шугомемен, юртэз йылаз-пумаз вуттон ӟудӥз. Со понна выль школа-интернатэз интыян понна та юрт витьымтэ кузьым кадь луиз. Юрт нимысьтыз проектъя лэсьтэмын. Чакламын со 850 дышетскисьлы. Но быдӟалаез самой синмаськымонэз ӧвӧл ай. Татын котькуд классын луоз дышетӥсьлэн кабинетэз. Луоз нимысьтыз кык компьютерной класс. Конференц-залэ огдыре 420 адями тэроз. Спортзал но зэмос спортъя дворец быдӟа. Та юртын ик чакламын мастерскойёс. Нош тужгес но паймымонэз - обсерватория. Кыӵе город школа аслаз обсерваториеныз ушъяськыны быгатоз? Со сяна, татын тол садъёс возьыны интыос учкемын. Пӧръятэк вераса, та школа вуоно вакытлэн куронъёсызлы тупа ини, шуыны луоз. Вылаз ик, лыдэ басьтыны кулэ солэсь городлы матын луэмзэ но. Огъя вераса, ачиз инмар косэ татчы школа-интернатэз интыяны. Ку нош татын дышетскыны, гуртысь вуоно ломоносовъёсты но пушкинъёсты будэтыны кутскозы? Матысь дыре ик, шонергес вераса, Выль ар бере. Удмурт Эльунлэн Кивалтэтэз школа-интернатэз усьтон сярысь нимысьтыз постановление кутӥз вал туэ июле. Сое быдэстон понна трос ик кужым кулэ уз луы ни. Лэсьтӥськисьёс ужъёссэс йылаз-пумаз вуттыны чаклало ноябре. Дышетскон оборудование но мебель пумен басьяло ини. Калыкез дышетонъя министерствоысь специалистъёс, верамзыя, йылпумъяло ини дышетон программаосты дасянзэс. Кыӵе луоз выль школа-интернат? Кинъёс отын дышетскозы? - Со луоз куинь ёзэн - тямысэтӥысен дас одӥгетӥ классозь. Котькуд ёзын - кык класс, быдэн 25 адями. Озьыен, вань дышетскисьёслэн огъя лыдзы - 150 адями. 9-тӥ классын пиналъёс дышетскозы огшоры школаын кадь огъя программаосъя. Зэм, дышетозы соосты мургес, пыр-почгес, кужмоятэм куронъёсъя. Дасэтӥ классъёсын нимаз предметъёслы, гуманитарной яке естественной удысъёсъя. Нош берпуметӥ классын тодматозы ини вуоно профессизылэн инъетъёсыныз. Берло дышетскон аре пиналъёсын ужалозы ини вузъёсысь дышетӥсьёс но. Улозы дышетскисьёс Италмасысь интернатын. Солы юрт вань. Сое возьыны коньдон но висъямын ини. Школа-интернатэ кутозы быдэс республикаысь гуртъёсысь тямыс классэз йылпумъям пиналъёсты, нырысь ик, удмурт кылэз тодӥсьёсты. Татын дышетскыны мылкыд карисьёс конкурс пыр потоно луозы. Приёмной комиссия эскероз соослэсь тодон-валанъёссэс. Со сяна, школа-интернатэ пырисьёс вайыны кулэ мумы-бубыоссылэсь заявлениоссэс но тазалыксы сярысь справка. Оглом вераса, республикаысьтымы Правительство но Калыкез дышетонъя министерство туж ӟеч, пайдаё уж лэсьто, выль школа-интернат усьтыса. Пашмыны Пашмыны кулэ ӧвӧл удмурт гуртъёсын будӥсь пиналъёслэн инмарен сётэм визьлыксы но быгатонлыксы. Г. Дмитриев. Алон Россия Федерациысь Печатья, телерадиовещаниея но коммуникация ужпумъёсъя министерство эскериз И.Хисамутдиновлэсь "Саф Ислам" газетын 2000-тӥ арын 23-тӥ июне (� 13 (38)) печатлам "За мечту в тюрьму не садят" статьяезлэсь пуштроссэ. Калыкъёслэсь кусыпъёссэс ултӥяса но сое уродэн возьматыса, Россиын Конституциез тӥяса но солэсь радлыксэ кужымен воштон сярысь материалэз печатласа, редакция иворъёсты эркын вӧлмытонъя куронъёсты лыдэ уг басьты, со тӥяз Россия Федерацилэн "Иворъёсты тросэн вӧлмытонъя ёзъёс сярысь" Законэзлэсь 4-тӥ ёзэтэзлэсь куронъёссэ. Соин валче Россиысь МПТР аслэсьтыз полномочиоссэ кутыса но РФ-ысь "Иворъёсты вӧлмытӥсь ёзъёс сярысь" Законлэсь 16-тӥ ёзэтэныз валче "Саф Ислам" газетлэсь редакцизэ алэ. В.А.СПРОЖЕНКО, министрлэн воштӥсез. Дарт Воректӥсь кизилиос Арганчи, гурдэ тон шуд ай... Бобья-Учалась "Арганчи" ансамблез шаерамы тодӥсьтэмез ӧвӧл ни. Нош оскоды-а меда мыным, тани та нылаш но ансамбльысь арганчи шуи ке. 7-тӥ классын дышетскись Таня Трофимова шоры учкыса, мон но нырысь абдраса быри: кызьы-озьы нылаш бадӟым апайёсын ӵошатскыны быгатэ? Концертъёс дыръя со одӥг но уг мога - сыӵе ик шаплы арганзэ кыска, кырӟа. Пӧлысьтызы пичи чиед мугорыныз гинэ висъяське. Гуртад, районад ке со концерт, ярам ай, но нылаш ялан сюрес вылын. Кытчы "арганчиос", отчы ик со но. Эсьма, Москваын но кырӟаз ни! Мон Таняен тодматски, Башкирие ветлыкумы. Автобусын кузь сюресэз мыныса, со воксё жуммиз: тӧдь-тӧдь кӧдэктӥз, йырыз бергаса олокӧня пол автобусэз дугдытъяно луиз. Но выльысь сюрес вылэ потод на-а шуыса юамелы, "о-о" шуиз. Тӥни сыӵе со юн сямо. Концертъёсын ветлэмез уг люкеты дышетскыны но, Таня "4"-лы но "5"-лы гинэ дышетске, школаысь вань ужрадъёсы мыло-кыдо пыриське. Сотэк ӧй но лэзьысалзы, дыр, дышетӥсьёсыз кӧня ке нуналэн школазэ келляны. Таняез ансамбле ӧтиз Екатерина Леонидовна Антонова. Школаын крезьгуръя урокын синйылтӥз нылашлэсь мылкыдзэ, быгатонлыксэ. Со туж сюлмаське уго кивоштӥсьёс сярысь. Танялэн анай-атаез но кырӟаны-эктыны устоесь, кызьы шуо, выжыезъя емышез. Нош инкуазен сётэм быгатонлык но мылкыд вордо тани таӵе антоноваосты. З. Рябинина. Туспуктэмез В. Камашевлэн. Азьпалан Александровоысь спортсменъёс Кез ёросысь школаосын дышетскись пиналъёс асьсэлэсь спортлы сӥзем сезонзэс туэ усьтӥзы 15-тӥ сентябре. Соку ортчиз сӥзьыл кросс, ӵошатсконэ пыриськиз 14 школа. Арессэс лыдэ басьтыса, ӵошатсконъёс радъямын вал ньыль группаосъя. Куазь удалтӥз, бызьылонъёс праздниклы пӧрмизы. Трос вал вормисьёс Александрово шор ёзо школаысь, соос пӧлын, кылсярысь, таӵе дышетскисьёс: Лариса Белослудцева но Ксения Ворончихина, Юра Волосков но Игорь Ворончихин, Алёна Степанова но Люба Максимова, Витя Ворончихин но Яна Белослудцева, Наташа Дерендяева но мукетъёсыз. Праздник котьку ӝог ортче. Ӵошатсконъёс вискын спортсменъёслы ялан тыршоно асьсэд дасяны, со понна нуналмысь тренировкаосы ветлыса Со сярысь ӟеч тодэ Александрово школаысь туэ гинэ ужаны кутскем тренер но дышетӥсь С. В. Чечегов. Со вакчи дыр куспын пиналъёслэсь мылкыдзэс ӝутыны быгатӥз спортэз юн гажаны, нош али соосты дася вуоно ӵошатсконъёслы. П.Николаев. Кин кӧня кутсаз? Элькунамы бусы ужъёс йылпумъясько ни. Нош кин кызьы тыршиз Красногорск ёросысь ЪЪИ партсъезд нимо эштосын йылпумъянъёс лэсьтӥзы. Нырысетӥ интые потӥз комбайнер Юра Тугбаев, со 1834 центнер ю тысь кутсам. Солэсь ӧжытлы гинэ бере кылем Виктор Бармин. Куинетӥ интыез басьтэм Алексей Плетенев. Со кутсам 1328 центнер. П. Николаев. Кинэ быръёно президентэ? Сыӵе кандидат 12 кандидат пӧлын ӧвӧл! Озьы шуиз журналистъёслы Удмуртиысь Экологической союзлэн кивалтӥсез А. Б. Торгушин, соин ик, пе, ми та быръёнъёсы ум пыриськиське. Асьсэлэсь таӵе мылкыдзэс ЭКоСоюзлэн адямиосыз тазьы валэктӥзы: туннэ, зэмзэ ик, пе, кышкытлык вань радиоактивной бервылъёсты Россие но Удмуртие вайыны. Торгушинлэн верамезъя, Россия Федерацилэн инкуазез утён сярысь законаз туэ ватсан пыртыны кулэ вал татчы ядерной бервылъёсты пыртыны лэзён сярысь. Та ужпумез эскеризы Удмуртиысь Кун Кенеш, отысь правоосъя управление но Правительство. Республикалэн вылӥ кивалтӥсьёсыз но тросэз депутатъёс ватсанэз умоен лыдъязы. Тӥни соин калыклы вазиськоназ Экологической союз ивортэ президент быръёнъёсы пыриськымтэез но ӵектэм кандидатъёслы оскымтэез сярысь. Озьы ке но, калыкез со ӧте 12 кандидат пӧлысь Удмуртилы президентэ выль адямиез, ассэ номырин сьӧдмамтэ муртэз бырйыны. Т. Миронова. Ар но ӵош ӧз улэ Сюмси ёросын люкиськись семьяослэн лыдзы, кузпалъяськисьёслэн сярысь, ичигес. Люкиськисьёс пӧлысь уноез егит кузпалъёс арзэ но ӵош улыны чидаллямтэ. Ёросын кулӥсьёс но туэ, вордӥськись нылпиос сярысь, уногес. Туэ тямыс толэзь ӵоже кулӥз ни 189 мурт, нош вордскиз 147 пинал. Соос пӧлысь пиос тросге - 80. Кыӵе ним сёто туала арын анай-атайёс асьсэлэн нылпиоссылы Сюмси ёросын? Нылъёслы: Дарья, Евгения, Анастасия, Полина, Александра. Шергес: Милана, Владислава, Аделина. Пиослы берыктӥсько вашкала нимъёс: Тимофей, Федор, Никита, тросэзлы сётӥзы Евгений, Дмитрий, Роман но Станислав нимъёсты. Вань вордӥськемъёс пӧлысь ӝыныез егит семьяосын нырысетӥез нылпи, озьыен - возьмам нылпи. Кыкез нуныос семьяязы сизьыметӥ нылпи луизы. П. Николаев. Кин луоно? Грах ёросысь ужтэмъёс туэ 320-лэсь уноез гинэ уж курыса вазиськизы. Нош уже интыямын 700-лэсь ятырез. Озьы ортчем толэзе 129 мурт гинэ ужтэк кылемен лыдъяське на вал, соос пӧлысь данакез нылкышноос - 78 мурт. Пособие басьтыны правозы вань 89 процентэзлэн гинэ ужатэк улӥсьёслэн. Кыӵе ужасьёслы кулэясько ёросын? Котьку кулэ пудо утисьёс, лэсьтӥськисьёс (устоесь плотникъёс - тужгес ик), трактористъёс, шофёръёс - тужгес тросэн кулэ пиосмуртъёс. Котькытын сямен, ёросын но арлы быдэ сюосын нылпиос дышетсконзэс йылпумъяло. Кин луоно соослы? Кыӵе удысын ужась кулэ - сыӵе специальностез ик басьтоно. Озьыен, луоно пудо утись, лэсьтӥськись, нянь будэтӥсь но нуись-ваись. П. Николаев. Удмурт Республикаысь Быръёнъя комиссилэн республикаын улӥсьёслы вазиськонэз Гажано бырйисьёс! Вуонояз арня нуналэ ортчозы Удмурт Республикалы нырысетӥ президент быръёнъёс. Тӥляд эркын быръемды ик возьматоз, кин республикамылы йыр луоз но матысь ньыль аре соин кивалтоз. Тӥ улӥськоды но улоды асьтэ музъем вылын. Быръён нуналэ кыӵе вамыш лэсьтэмды понна асьтэос ик кыл кутоды. Политикая технологъёс, "быръёнъёсъя шоу" ортчытъяны яратӥсьёс но Москваысь журналистъёс быръёнъёс бере нунал ортчыса ик, республикамы сярысь вунэтозы. Толэзь ортчыса, озьы ик вунозы кандидатъёс пумысен калыкез паймытӥсь курлан-веранъёс. Нош туннэ, кызьы малпало газетъёсы кырсь материал дасясьёс, зэмзэ но быгатозы бырйисьёслэсь мылкыдзэс воштыны. Ӵапак соин ик Удмурт Республикаысь быръёнъя комиссия кулэен лыдъя Москваын потӥсь газетъёсын но телеканалъёсын потэм кӧня ке ивортонъёс пумысен мылкыдзэ вераны. Россия Федерациысь быръёнъёсъя центральной комиссия трос пол эскерылӥз ни Удмурт Республикаысь быръёнъёсъя комиссилэсь решениоссэ, одӥгаз учыре но соос воштэмын ӧй вал. Удмуртиысь быръёнъёсъя комиссилэн ужысьтыз шекъёс пумысен вераськонъёс - со алдаськон гинэ. Озьы ик паймыто Москваысь иворъёсты тросэз вӧлмытонъя ёзъёслэн газетъёсты киоскъёсысь талан пумысен ивортонъёссы но. Оскытыса вераськом, таӵе учыр пумысен Удмурт Республикаысь быръёнъёсъя комиссие одӥг ӝожтӥськон но ӧз вуы. Адямиослэсь та пумысен вазиськонъёс ӧй вал правоез утёнъя ёзъёсы но. Быръёнъёсты уретыны мылкыд карисьёс гинэ верасько Удмурт Республикаысь быръёнъёсъя комиссиез законэз тӥяса кылдытэм сярысь но. Москваысь иворъёсты тросэн вӧлмытонъя ёзъёслы трос пол ивортылэмын ни, Удмурт Республикаысь быръёнъёсъя комиссилы Председатель быръён сярысь ужпум судын эскеремын шуыса. Удмурт Республикаысь Вылӥ Судлэн граждан ужъёсъя Судъян коллегилэн туэ 9-тӥ сентябре кутэм решенияз пусъемын, быръёнъёсъя комиссия но солы председатель быръён законлэн куронъёсызъя ортчытэмын шуыса. Жаляса верано луэ, куд-ог журналистъёс со сярысь одно ик "вунэтыны" тыршо. Пусйыны кулэ тани мае. Удмурт Республикалы президентэ кандидатъёсты курласа гожтэм материалъёс газетъёсын но телеканалъёсын пото ӵапак быръёнъёс азьын. Соосты дасясьёс оскытско, кандидатъёсты "сьӧдмаса" поттэм материалъёс пумысен валэктонъёсты со газетъёсын ик печатланы но телеканалъёсын ивортыны дыр уз кыльы ни шуыса. Нош сыӵе материал дасясьёс умой тодо, сыӵе выросъёсынызы быръёнъёсъя катрадлыкез тӥяло шуыса. Асьме республикаын улӥсьёс котьку но висъяськылӥзы йыгмыт, керӟегъяськисьтэм луэменызы. Оскиськом, тӥ та кылдэм югдуре уд йыроме но куарадэс асьтэлэн мылкыддыя сётоды шуыса. Гажаса Удмурт Республикаысь Быръёнъя комиссия. Комсомол ужа Кылем субботае Удмуртиысь комсомолецъёслэн ортчиз ортчётно-выборной конференцизы. Солэн ужаз пыриськизы КПРФ-лэн Удмурт рескомезлэн нырысетӥ секретарез Россиысь Кун Думалэн депутатэз Н. И. Сапожников, КПРФ-лэн Удмурт рескомезлэн секретарез Кун Кенешлэн депутатэз А. Г. Красильников, КПРФ-лэн Удмурт рескомезлэн секретарез Кун Кенешлэн депутатэз В. П. Бодров, Офицеръёслэн союззылэн кивалтӥсез Кун Кенешлэн депутатэз В. В. Ходырев. Ортчем ар понна республикаысьтымы комсомолецъёслэн ужамзылы йылпумъянъёс лэсьтӥз Удмуртиысь комсомольской организацилэн секретарез Юрий Мишкин, контрольной комиссилэн нимыныз вераськиз Владимир Мошкин. Конференцие лыктэм делегатъёс эскеризы Удмуртилы нырысетӥ президент быръёнъя ужпумез но. Соос мылкыд каризы В. Н. Ануфриев пала дурбасьтыны. Кутэмын вазиськон. Отын комсомолецъёс куро шаерамы улӥсь ёзъёссэс быръён нуналэ, 15-тӥ октябре, куаразэс сётыны Вячеслав Ануфриев понна. Ю. Алексеев. Кутчалозы сурон сапег Ортчем арня куспын Алнаш ёрос военкоматэ вуылӥзы 166 пияш. Ӧтчамъёс пӧлысь 30-эз лыктыны ӧз быгатэ дышетсконэнызы валче. Тазалыксэс пыр-поч эскерон вылысь, 21-зэ Ижевске лэземын. Туннэ нуналлы армие мыныны дась 32 егит пи. Сурон сапег кутчаны быгатозы на эшшо 18-эз, но таосызлэн тазалыксы ӧжытак лябгес. Армие келянъёс ноябрьлэн кыкетӥ люкетаз кутскозы. О.КОЖАНОВА. Курченколэн арез ялэмын 1970-тӥ ар, 15-тӥ октябрь. Ӵапак 30 ар талэсь азьвыл Совето Союзмес но быдэс дуннеез паймытӥз сюлэмшугъяськытӥсь ивор. АН-24 самолётЛЭСЬ экипажзэ йырвандӥсьёслэсь утьыкуз бырыны шеде бортпроводница Надежда Курченко. Самолёт Батуми-Сухуми рейс лэсьтэ вал. Егит нылашез виисьёс, атаез но пиез Бразинкасъёс, кылизы США-е. Надеждалэн анаез, Генриетта Ивановна, мукет ӵыжы-выжыосыз, ӵош ужась эшъёсыз гыжкалъёсты пытсэт сьӧры келяны курыса олокытчы но вазиськылӥзы, пайдаез ӧз луы. Та чуръёсты гожтӥсь но США- лэн Президентэзлы Билл Клинтонлы 1993-тӥ но 1997-тӥ аръёсы шара гожтэтэн вазиськылӥз. Нокыӵе ивор ӧз вуы. Надежда Курченко вордскемын Глазов ёросысь Понино черкогуртын. Со пыраклы 19 аресъем кылиз. Нош туэ солы тырмысал ини 50 арес. "Шунды" калык куспо ассоциация 2000-тӥ арез ялӥз Надежда Курченколэн ареныз. В.РОГАЛЁВ, шаерчи. Паймод, ява Кыйёс - ишанлы? Туэ гужем Кияса палась Подгорное посёлокын улӥсьёс нерад луизы... кыйёсын. Соос я кинлэсь ке кечсэ куртчо, я кинэ ке кияр убо вӧзын кышкато. Огез песяй тани гуртаз пырем но шуэ: "Эй, тӥ, мунчо эстӥсьёс, кудды отчы едэс уськытӥды?" Городысь вуэм нылъёсыз-пиосыз мунчое пыро но адӟо: сьӧд йыро кый гур вӧзын шунтӥське... Талэсь мугзэ валэктыны ӧз быгатэ на. Нош кин но со шуиз: ишанлы та. 10-тӥ августэ уин посёлокын огдыре кӧня ке муртлэн турынэз, пуэз, пудоез ӝуаз. Озьы дас семья мур куректон адӟиз. Кин сутӥз, сое ӧз на шедьтэ, но таиз ини мукет учыр. Алигес посёлокын укмыс муртлэн скалэз трос аръем турын вылын тордӥз. Нош ик кӧня кайгу! Татын трос гинэ ужтэк кылемъёс: угось шаерысьтымы огез бадӟым парсь вордон комплекс трослы кулэстӥз пудо уллёзэ. Соин ик адямиос ужтэк кылизы... Паймод, ява. Кытӥяз оскыны но кутскод пересьёслэн верамзылы: ишан, пе, пыд улысь потэ. Куд-огез мӧйыос шуо: сьӧлыкмы трос, соин ик, дыр - таӵе адӟонъёс. Инмарез но вунэтыны, пе, кутским. Соиз но вань. Сое малпаса ик, дыр, Кияса селоын но туэ черк лэсьтон борды кутскыны малпало. Соин ик газет пыр но вазиськизы, коньдонэн юрттэт курыса. Геннадий Парфёнов, Кияса ёрос газетын ужась. Кылиз на куать пумиськон Урал улосын футболэн шудонын кужмоосыныз лыдъясько Ижевскысь но Пермьысь командаос � "Газовик" но "Амкар". Ӵапак соос ик шудӥзы берлояз пумиськонын. Шоркарысьтымы команда бускельёсмес вормиз 2:1 лыдын. Али "Газовиклэн" 54 очкоез, мынэ 5-тӥ интыын. Вуоноез пумиськон ортчоз 13-тӥ октябре, Томскысь "Томь" командаен. Со али 44 очкоен 11-тӥ интыын. Чемпионат йылпумъяськытозь кылиз на куать пумиськон. Н.СЕРГЕЕВ. Калык творчество Кызьпу туй но шока, куро но кырӟа Игра ёросысь усточиос куинетӥзэ ни асьсэлэсь киужъёссэс возьмато республикаысьтымы Кибашлыослэн юртазы. 2-тӥ октябре татын усьтӥськиз соослэн выставказы (со луоз 26-тӥ октябрёзь). Сое адӟытонэз усьтонэ лыктӥзы чеберлыкез дунъясь кенеше (художественно-экспертной советэ) пырись адямиос но играослэн матысь эшъёссы. Советэн кивалтӥсь, профессор Владимир Владыкин шуиз: - Та коркан нош ик шумпотон. Пурысь буёлъёсын тырмем улонамы со туж кулэ. Пӧртэм-пӧртэм киужъёс пӧлысь мон висъясал кызьпу туйлэсь лэсьтэмъёссэ. Со кырӟась пужыос, шуысал. Кызьпу туйлы гимн. Татын туж умой адӟиське, кыӵе синпӧртман кужым ватӥськемын огшоры гинэ маке пушкын. Профессор Кузьма Куликов пулэсь вӧлэм арбериослы паймемзэ вераз. Котькытын, кунгож сьӧрын но, пусйиз со, асьме мастеръёс доры уногес калык люкаське, тросэз басьтыны мылкыд каро Николай Тарасовлэсь но Геннадий Сидоровлэсь чеберлыко киужъёссэс. Та ласянь бере уг кылё, шуыны луэ, Игра ёросысь усточиос но. Сое возьматӥз туэ гужем Венгриын финн-угор фестивале пыриськемзы. История наукаосъя доктор Галина Никитина аспал адямиосыныз данъяськыса шуиз: Игра музъем - со му вӧен яке етӥнэн узыр музъем гинэ ӧвӧл, отысь адямиослэн киоссы зарни. Галина Аркадьевна тужгес синмаськем Светлана Цыкуновалэн буртчин басма вылэ суредамезлы. Зэм но, Игра ёросын берло вить аръёсы чебрлыко киужъёс бордын ужанъя паськыт шоналскизы ни, куд-ог ёросъёслы адӟем карымон, вожъяськымон. Шаерысьтымы но, палэнысь но лыдъяса, 72 культурая ёз вазиськиз ни татчы ас куронъёсыныз. Райцентрысь кибашлыослэн юртазы дышетскыны ветлэ гуртъёсысь 150 дышетскись. Со сяна, котькудаз сямен гуртын, культура юртын вань кибашлыослэн кружокъёссы, мастерскойёссы. Районысь культурая ёз кулэ луись тӥрлыкъёс басьтон понна коньдонзэ уг жаля, ваньмыз со пумен берыктӥське. Та сярысь ивортӥз ёросысь культурая отделлэн кивалтӥсез Анатолий Чирков. Ёросысь кибашлыосын ужанэз, соослэсь ужзэс радъянэз-адӟытонэз умой пуктыны быгатӥз Александр Кардапольцев. Вить арлэсь кема ни со кивалтэ кибашлыослэн юртэнызы, та дыр куспын олокыӵе но выставкаосы пыриськылӥзы, кунгож сьӧры но вуылӥзы. Туэ феврале быдэс шаерысьтымы кибашлыос люкаськылӥзы таос доры, семинаръёсын тодон-валанзэс будэтӥзы. Александр Васильевич али, Ижын адӟытонзы усьтӥськыку, котькудӥз мастер-усточи сярысь туж гажаса, нимысьтыз вераз (тросэз соос асьсэос но татын вал). Наталья Злобина горд сюен ужа, пӧртэм сюй мунёос пӧрмытъя. Огез ужез - "Кырӟаса черсӥсь ныл". Со вӧзын ик - ас даурзэ малпаса черсӥсь мӧйы кышномурт. Таиз ини - Константин Усковлэн пулэсь вӧлэм, лул шокчем ужез. "Вот таиз губи сылалтыны ярасал", - пыремъёс синмаськыса учко Сепысь Александр Корепановлэн дузъёсыз, вышкыосыз шоры, соос писпу гыркез вуштыса- волятыса лэсьтэмын. Маиз но ӧвӧл татын! Макраме - Татьяна Трефиловалэн. Гобеленъёс - Вера Леконцевалэн. Бадьпу ньӧрлэсь корзинаос - Ольга Агафоновалэн, Нина Широбоковалэн, пуэз вандылэм-чильпамъёс - Александр Алексеевлэн... Нош тани - кызьпу туйлэн шокамез, Светлана Русскихлэн киужъёсыз. Кызьпу туй но куро - кырӟась макеос - Фаина Усковалэн ки улаз. Сумкаос, шляпаос, конфет- печення тыронъёс, вазаос - соос зэмзэ но кырӟало, кылдытӥсьсы сярысь ӟеч кыл вераса. Фаина Алексеевна котькуд чыры-пырыез интыяз кутыны, синэз шулдыртыны быгатэ. Солы дышетэ пиналъёсты но, 4 номеро школаын нимысьтыз, ас кылдытэм методикаезъя ужа. Кызьпу ас мугораз быдэс дуннеез биня кадь. Туй борды пуксё суредъёс- тулкымъяськон, куашкам юрт бервылъёс, шур ярдуръёс. Художник сое синйылтэ, асэстэ. Соин ик выставкаысь адӟиськом Галина Северьяновалэсь аспӧртэм учкемзэ. Зэм, со асьмеды но дышетэ дунне шоры синпӧртмась синмын учкыны. Галина Юрьевна "Нефтяник" культура юртын куроен ужанъя, аппликациос лэсьтонъя кружок нуэ. Соин артэ тырше Ольга Денисова но, таиз коклюшкаен чильпаськеменыз абдратэ. Та адӟытонэ ваемын 71 ӝӧккышет, 19 ӵушкон, 14 шобрет. Учкисьлэн синмыз ик палёмоз. Нош тросэз устоесь киужъёссы, асьсэос верамъя, татчы ӧз вуэ, жаль ке но, куддыр вузатэк уг луы. Чеберлыко салонлэн кивалтӥсез Надежда Агафонова шуэ: - Кылем арын, киужъёсмес вузаса, 18 сюрс манет поттӥм. Вузам арберилэн дунысьтыз дас процентэз лэсьтӥсезлы мынэ. Тужгес умой милям вузасько кызьпу туйлэсь, пулэсь, бадьпу ньӧрлэсь арбериос: лянэсъёс, дузъёс, корзинаос. Пумен паськытаса, жингыраса кошке играослэн ужзы. Токарьлэсь ужзэ быдэсъя, пулэсь заготовкаос лэсьтэ Владимир Рябов. Татын пайда поттыны быгато ни, муш вордыса, чечы вузаса но. Чечыен пичи бекчеос пӧртэм пала "питырало", куноосыз тросгес кыско. Кибашлыослэн ёрос центразы вань ини асьсэлэн научной ужасьсы но, Светлана Корепанова. Пӧртэм ужан амалъёсыз кутыса эскеро татын. Та ёросын гинэ вань, дыр, клуб-мастерской: со ик кырӟась-верасьёслэн, со ик - кибашлыослэн люкаськылон интызы. Таӵе клуб-мастерской - Чемошур гуртын. Соин кивалтэ Елена Лекомцева, татын со мастер-методист но, художник-оформитель но ачиз ик. Етӥнлэсь, куролэсь мунёос лэсьтэ, та ужлы пиналъёсыз дышетэ. Мӧйыос клубе керттӥськыны, пужыятскыны, чильпаськыны ветло, кызьпу туен ужасьёс но вань. Озьы кырӟан но киуж ваче ки кутӥськемын. Уд ке оскиське, пыралэ Кибашлыослэн юртазы - асьтэос адӟоды. Т. Петрова. Министрлы Сергей Васильевлы дурбасьтон Удмуртилы президент быръён азьын пӧртэм адямизэ калыклы пӧртэм вазиськонъёсын потыло. Валлян, 10-тӥ октябре, одӥг сыӵе вазиськонэз Удмурт Республикаысь калык огазеяськонъёслэн нимынызы журналистъёслы шараяз "Союзная общественная палата" огазеяськонлэн кивалтӥсез А. С. Кудрин. Удмуртиысь общественной палата Сергей Флорович Васильевлы дурбасьтэмзэ вера, шуиз со, сое печатья но иворъёсъя министрысь палэнтэмзы пумысен. Министрез ас ужысьтыз палэнтон возьматэ Удмуртилы президент быръёнэн валче политикаын югдурлэсь лэчытомемзэ. Кудринлэн верамезъя, общественной палата нокыӵе эскерон ӧз ортчыты, министрез ужысь куштон сярысь нокыӵе приказъёсын ӧз тодматскы. Таӵе вазиськонэн потыса, общественной палата аслэсьтыз мылкыдзэ гинэ вера законъёсты тӥямлы пумит. Юрист А. С. Кудрин озьы ик пусйиз, ачиз С. Ф. Васильев таӵе вазиськон сярысь номыр уг тоды шуыса. Солэн куремезъя, пе, ми калыклы ум вазиськиське, вазиськиськом асьмелэн кичӧлтэммыя Удмуртиысь общественной палаталэсь президент быръёнэн валче умойтэм кылдэм югдурлы мылкыдзэ возьматон понна. Т. Миронова. Гажано бырйисьёс! 15-тӥ октябре Удмурт Республика нырысьсэ аслыз Президент быръёз. Музъем ужасьёслы, сиён-юон поттӥсьёслы, гурт удыслы юрттон вылысь огазеяно вань кивалтон ёзъёсты, вань улосъёслэсь кивалтӥсьёссэс но Кун Думаысь депутатъёсты. Александр Александрович Волков уж вылын возьматӥз агропромышленной комплексэз азинтон но юнматон понна сюлмаськемзэ. Та быръёнъёсын солы осконзэс вераса, бырйисьёс уз янгышалэ: бадӟым опытэн кун кивалтӥсь вань луонозэ лэсьтоз шаерын улӥсь калык понна, сиён-юон поттӥсез утён вылысь. В. Плотников, Кун Думаысь Гурт удысъя комитетлэн кивалтӥсез, гурт удыс наукаосъя кандидат, РСФСР-ысь сӥё-дано агроном. Удмурт кунлы - 80 Нимзэ ӧз ышты Туэ сю ар тырмиз Фаддей Петрович Макаровлэн вордӥськемез дырысен. Та адями - нырысетӥ удмурт тодосчиос-историкъёс пӧлысь одӥгез. 1930-тӥ аръёслэн шоразы кивалтӥз УдНИИ-ен. Фаддей Петровичлэн нимыз дуно соин но: та адями яркыт тусбуйзэ кельтӥз удмурт калыклэн культураяз но наукаяз. Зэм, солэн тодон- валанэз, визьмыз но быгатонлыкез та улонын асьсэлэсь интызэс ӧз шедьтэ: улон- вылонзэ быдэсак сьӧдмаз шимес 1937-тӥ ар. Удмурт Элькунлэн туннэ нуналэзлы сӥзем юртын утисько Ф. П. Макаровлэн ужкагазъёсыз (улон-вылон сюресэз сярысь асверанэз, паспортэз, удостоверениез, кузпалызлэн но пиезлэн гожтэтъёссы). Соос выльысь улӟытыны юртто тодмо тодосчи сярысь яркыт веранъёсты. Фаддей Петрович Макаров вордӥськиз 1900-тӥ арын 5-тӥ (мукет лыдпусъёсъя - 12- тӥ) июле Алнаш ёросысь Тутайгуртын шоро-куспо улӥсь удмуртлэн семьяяз. 1918-тӥ- 1921-тӥ аръёсы дышетскиз Алабгоын (Елабугаын) - дышетӥсьёсты дасян семинарилэн удмурт люкетаз. Отын тодматскиз Трофим Борисовен. 1919-тӥ арын пыриз комсомолэ, бырйылӥзы Алабгоысь укоме, комсомоллэн обкомезлэн Вотка люкетаз инструктор вал, мылысь-кыдысь пыриськылӥз Можга уездысь комсомол огазеяськонлэн ужаз. Вал Горд Армиын, басмачъёсын нюръяськиз Ӵукпал Бухараын. Собере дышетскиз Москваын - Шунды ӝужан палан ужаса улӥсьёслэн И. В. Сталин нимо Коммунистической университетазы. 1925-тӥ арын партие пыриз. 1927-тӥ арын йылпумъяз университетлэсь лекторъёсты дасян ёззэ. Валэктон уж нуон вылысь келязы сое Иже. Озьы ке но, та адями ялан сюлмаськиз тодон-валан люкан сярысь. Удмурт шаерын кык ар ужамез бере, Фаддей Петрович нош ик вуиз Москвае - дышетскыны пыриз Научно-исследовательской институтлэн историяя люкетысьтыз аспирантурае. 1931-тӥ арын Макаров аспирант сярысь гожъязы: "Ф. П. Макаров тодматскиз Удмурт шаерлэн ортчем сюресэныз. Берлогес эскериз "Октябрь но Удмурт шаерын граждан ож" ужпумез. Куинь ар ӵоже туж ӟеч дышетскиз. Ф. П. Макаров дэмламын вал дышетон уже - 1932-тӥ арын Шунды ӝужан палан ужаса улӥсьёслэн Коммунистической университетазы ӝыны ар ӵоже тодматылӥз парторганизациослэн ортчем сюресэнызы. Вал доцент. Макаров сярысь отӥяз гожто: "Дышетскиз ӟеч, лулысь-сюлмысь пыриськиз кафедралэн ужаз..." Собере Фаддей Макаров наука удысын тыршиз вордӥськем Удмурт шаераз: 1932-тӥ- 1939-тӥ аръёсы - вал Ижысь коммунистической университетлэн (берлогес - Гурт улонъя вылӥ удмурт школалэн) дышетон ужъя проректорез, 1975-тӥ-1977-тӥ аръёсы УдНИИ-лэн директорез. Со вакытэ радъяз валче кылдытэм бичетъёс поттонэз. Соос ивортылӥзы удмуртъёслэн но оглом Ватка улослэн сюлмаськонъёссы сярысь. Фаддей Петрович Макаров тужгес лулысь-сюлмысь тыршиз "Октябрь революция но Удмурт шаерын граждан ож" ужпум бордын (та удысэн со аспирантураын дышетскыкуз ик ини вырыны кутскиз). 1932-тӥ арын печатлам ужзэ туж вылӥ дунъязы. Ижын ужакуз, яратоно удысэз борды мылысь-кыдысь басьтӥськиз: печатланы вуиз даслэсь трос ужзэ. Соос пӧлын - "Удмурт шаерысь пӧртэм выжыослэн куспазы нюръяськемзы" - 5-тӥ-7-тӥ классъёсын дышетскись пиналъёс понна книга (1933-тӥ ар), "В. М. Азинлэн улэм-вылэмез сярысь" (1935-тӥ ар), "Удмурт шаерын граждан ож сярысь" (1936-тӥ ар), "Ижын Октябрь нуналъёс" но мукетъёсыз. Наукаын Ф. П. Макаров яркыт тусбуйзэ кельтӥз. Со кутскон сётӥз историографилы. Нырысьсэ уже кутӥз архивысь ужкагазъёсты. 1937-тӥ арысь январь толэзь Фаддей Петрович Макаровлы секыт адӟон ваиз - со янгыш каремын но партиысь поттэмын вал. 1937-тӥ арын сентябрь толэзе Фаддей Петровичез янгыше уськыто "Даниловлэн эшъёсызлэн" ужазы пыриськемезъя но РСФСР-ысь Уголовной Кодекслэн туж тодмо 58-тӥ статьяезъя. Янгыш луэм адямиос - Ижысь планово-экономической техникумлэн директорез Д. М. Данилов, партилэн обкомезлэн азьвыл кыкетӥ секретарез С. К. Ельцов, Вузкаронъя наркоматысь инспектор А. Я. Вьюгов сярысь ивортӥзы: та адямиос 1927-тӥ арын ик ини Москваын - Шунды ӝужан палан ужаса улӥсьёслэн Коммунистической университетазы дышетскыкузы ик кылдытӥллям асьсэлэсь "огазеяськонзэс". "Даниловлэн эшъёсыз" асьсэ азе пуктӥллям, пе, таӵе ужпум: киултоно шаерысьтымы весь вань кивалтон удысъёсты, троцкистъёслэсь-националистъёслэсь малпанъёссэс валэктон вылысь - трос ивор вӧлмытӥсь ёзъёсты, крестьян калыкез ӝутоно Кенешо кунлы пумит. Юри малпаса но пӧяса верамъёс туннэ, валамон ни, нокинэ уг сюлэмшугъяськыто. Та чуръёсты кылдытӥсьлэн син шораз тужгес йӧтӥз тодосчилэн архивын утиськись берпуметӥ ужкагазэд - пиезлэн пытсэтын улӥсь атаезлы 1937-тӥ арын 24-тӥ феврале ыстэм гожтэтэз. Покчи эке тӧдьы кагаз вылэ мылысь-кыдысь гожъям: "Атай, мон адӟи тонэ уйвӧтам. Малпай вал: уин доре бертӥд. Кыӵе яратӥськомы ми тонэ! Аля сузэре "витьлы" гинэ дышетске. Атай, Боря букварьзэ быдэсак лыдӟиз ни. Атай, вай милемлы пӧртэм буёло карандашъёс... Гожья милемлы..." Ф. П. Макаровез вить ар ӵоже лагерьёсын возьыны дэмлазы. Келязы Колымае. Бен, улэп кыльыны ӧз кылды: лек адӟонэз вите вылэм ГУЛАГ Архипелагын. Фаддей Петрович Макаров улонысь кошкиз 1944-тӥ арын. Янгыштэмен лыдъязы ай 1956-тӥ арын гинэ. Нош 1930-тӥ аръёслэн пумазы сое калыклэсь мукет тушмонъёссэ сямен ик вунэтӥзы... Е. Ушакова. Удмурт Элькунлэн туннэ нуналэзлы сӥзем юртысь иворъёсъя но ужкагазъёсъя ёзэн кивалтӥсь. "Милям но выжыосмы татын" Удмурт Республикаысь Национальной библиотекаын еврей книгалы сӥзем фестиваль усьтӥськиз. "Черта оседлости: до и после. Жизнь и судьба евреев в России" нимаське со. Адӟытонэз радъязы "Открытое общество" институт, Россиысь кунсьӧр литературая М.И.Рудомино нимо кун библиотека, Удмурт Республикаысь еврей культурая центр но Национальной библиотека. Та ужрадэ озьы ик пырисько Нидерландыысь Мукет кунъёсын ужанъя министерство но черк ужъёсты выльдонъя Европалэн комитетэз. Выставка возьматэ еврей калыклэсь Россиын улыны кутскемзэ (ХВИИИ даур) но туннэ нуналзэ. Эксэй Россия та калыкез ултӥяса возиз. Революция гинэ сюрес усьтӥз визьмоосызлы адямиослы тодон-валан басьтыны, вылӥ интыосын асьсэды возьматыны. Репрессиос но еврейёсты палэнэ ӧз кельтэ. Соку адямилэн кыӵе выжыысь потэмез шоры ӧз учке уго. Бырыны шедизы, кылсярысь, таӵе тодмо адямиос � Якир, Тухачевский... Бӧрысь еврейёслы "выль родина" ялӥзы. Кылдӥз автономной область, шоркарез луиз Биробиджан (1928). Солэн культураезлэн азинскемез сярысь возьматэ выставкаысь одӥгез сэрег. Бадӟым куректон ваиз странамылы кыкетӥез Отечественной война. Со юн шӧдӥськиз еврейёслэн улоназы но. Соку тросгес улэп кыльыны быгатӥзы фронтэ кошкемъёсгес. Адӟытонысь мукетыз инты сӥземын со кышкыт аръёслы. Ньыльдонэтӥ аръёслэн пумазы Совето Союз антисемитизмъя политика нуыны кутске. Со аръёслы но выставкаын бадӟым инты висъямын. Нимаське со "Россиысь кошкиськом" шуыса. Огкылын вераса, выставкаысь трос тунсыкозэ адӟыны луоз. Со ужалоз 14-тӥ октябрёзь. Н.ЛЯЛИН. Национальной библиотекалэн директорез Н.М.Собина; Люкаськемъёсты ӟечкыла культурая министрлэн воштӥсез С.М.Мутерко. В.Беломорскихлэн туспуктэмъёсыз. Гажано эшъёс! Мыным тросэн вазисько Удмуртиысь предприятиослэн коллективъёссы, общественной огазеяськонъёс, нимаз адямиос, тодэмзы потэ, кин пала дурбасьто 15-тӥ октябре, Удмуртилы президент быръён нуналэ. Президентэ валтӥсь кандидатъёсты мон умой тодӥсько, тодматски соослэн программаосынызы но. Соин ик вераме луэ: Удмурт Республика понна тужгес но тупась кандидатура - Кун Кенешлэн Тӧроез Александр Александрович Волков. Курисько ваньдэсты 15-тӥ октябре лыктыны быръёнъя участокъёсы но А. А. Волков понна куарадэс сётыны. Ю. Маслюков, Кун Думаысь Промышленностья, лэсьтӥськонъя, наукаен герӟаськем технологиосъя комитетлэн кивалтӥсез, Кун Думалэн быръёнъя 28-тӥ Ижевск избирательной округъя депутатэз. Шаермес валтоз Автозавод � Удмуртия � Россилысь одӥгез кужмо улосвыл, � шуиз Автозаводлэн пресс- конференц залаз вераськонзэ кутскыса Россилэн нырысетӥ вице-премьерез Илья Клебанов. � Соин ик мон татчы котьку ӝутскем мылкыдын но сюлмысь юрттон вылысь вуылӥсько. Нимысьтыз вераськон потӥз Автозаводлэн матысь аръёсы азинскон сюресъёсыз, азьпала планъёсыз сярысь. Автозавод кӧня ке аръёс талэсь азьло государстволы самой трос выт тырись вал. Али выльысь улӟе ини. Матысь дыре ӝотырак ужаны но арскын куатьтон сюрслэсь ятыр автомашина поттыны кулэ. Нош отӥяз сю кызь сюрсозь вуттыны луонлыкъёс кылдытоно. Огъя чаклам планъя кык ар куспын Ижысь Автозавод Россиын одӥгез валтӥсь предприятиез луоз. � Куд-огез малпало, дыр, мон Удмуртие ӵем вуылӥсько бере, нимысьтыз юрттэт сётӥсько шуыса, � пусйиз оратор. � Со чик но озьы ӧвӧл. Мон нимаз адямиосын яке кивалтӥсьёсын уг ужаськы. Мон ужасько Россилэн но солэн регионъёсызлэн огъя юнматэм планъёссыя но пусъем сюресъёссыя. Нырысетӥ премьер озьы ик пусйиз но вылӥ дунъяз республикаысьтымы кивалтӥсьёслэсь ӟеч ужамзэс ужазинлыклэсь будэмзэ но калыклэсь яке улон-вылонзэ умоятон сярысь сюлмаськемзэс. Россилэн Президентэзлэн В.Путинлэн Индие ветлэмез пумысен со шуиз: дыраз кутэмын вуоно аръёсы Россилэн но Индилэн кусыпъёссылы тупась документъёс. Удмуртилэн кык азинскон программаез пумысен Илья Клебанов вице-премьер шонерак вераз: солы валамон луэ "Удмуртилэн азинсконэз" программа. Нош "Вордӥськон" программа бордысь революцилэн шӧмыз кылӥське кадь. Удмурт республика, мукет регионъёсын ӵошатыса, данаклы огсыргес азинске, шуиз вераськонзэ йылпумъяса нырысетӥ вице-премьер. Соин ик Россиысь Правительство кужымзэ но коньдонзэ но уз жаля регионэз азинтон понна. Л.БУРКОВ. Удмурт Республикаын улӥсьёслы вазиськон 15-тӥ октябре Удмурт Республикаын нырысьсэ ортчозы президентэз быръёнъёс. Россилэн Конституциеныз асьмелы право сётэмын сыӵе адямиез бырйыны, кудӥз быгатоз Конституциен сётэм правоосмес утьыны, республикамылэсь экономиказэ юнматон понна луонлыкъёс кылдытыны, социальной политикаез, законъёсты чакласа шонер нуыны. Кызьы пусъемын быръёнъёсъя катрадлыкын, валэктон-ӝуткан уж нуыкузы, кандидатъёс тодматыны быгато асьсэлэн программаосынызы, кудъёсыз президент луыса ужан радзылы инъет луозы. Нош берло нуналъёсы куд-огез кандидатъёс Москваын потӥсь газетъёс но телеканалъёс пыр, кун властьлэн ёзэсъёсызлэн документъёссы но материалъёссы вылэ чӧлскытэк, осконтэм иворъёс вӧлмытыны кутскизы. Озьы соос асьсэлы пумит луись кандидатъёслэсь вылӥе ӝутскыны тыршо. Быръёнъёс ортчем бере ми пыр-поч эскером-чаклалом, кызьы кылдэмын со материалъёс но кыӵе коньдон чотын печатласько-ивортӥсько, нош янгыш муртъёсты кыл кутытом. Газетъёсын печатлам сыӵе материалъёс но телевизор пыр передачаос Удмурт Республикамылэн экономикаезлы изъян ваё но палэнысь коньдон вуонэз радъяны люкето. Ӧтисько тӥледыз быръёнъёсы пыриськыны но куарадэс пыр-поч малпаськыса сётыны, кызьы туэ тулыс куарадэс сётӥды вал Президентмы Владимир Владимирович Путин понна. Республикаямы улӥсьёс понна ӟеч гинэ луоз, Удмуртилэн вуоно президентэз Россилэн президентэныз огкылысь ужаз, вылӥысен улӥозь огъя власть понна луиз но огъя социально-экономической политикаез быдэсъяны луонлык кылдытӥз ке. Россилэн Президентэзлэн Владимир Владимирович Путинлэн Федерацилэн Ӧтчамезлы ар понна ыстэм Вазиськоназ пусъем ужпумъёслы тупамон луэ Александр Александрович Волковлэн гинэ программаез. Федерациысь властьлэн республикаысьтымы ёзэсъёсыз асьсэ ласянь ваньзэ лэсьтозы, Удмуртилы нырысетӥ президент быръёнъёс вань катрадлыкъёсты чакласа, шекъёстэк но керӟегъяськонъёстэк мед ортчозы шуыса. С. В. Чикуров, Приволжье округысь Удмурт Республикая валтӥсь федеральной инспектор. Усто егитъёс быръемын Приволжск федеральной округен кивалтӥсьлэн С.Кириенколэн ӵектэмезъя, Россиын радъямын "Золотой адровый резерв России ХХ века" ӵошатскон. Вань улосъёс со борды рос-прос басьтӥськизы. Кылем арын февральысен кутскыса, визьмо егитъёсты шараян быдэс Россиын радъямын. Туэ 7-10 октябре сыӵе ӵошатскон ортчиз Ижевскын но. Отчы пыриськон сярысь мылкыдзэс веразы 740 егитъёс. Но компьютеръёс бырйизы 130-зэ. Соос пӧлын куинь нунал ӵоже мынӥз ӵошатскон. Кыкетӥ туре потэм егитъёслы дасяно вал Удмуртиез азинтонъя программа, нош берлояз ӵошатскон нуналэ соослы возьматоно вал, кызьы со программаез соос улонэ пыӵатозы. Вормисе потӥз 28 егит. арлыдзыя верано ке, 21-35 аресозь. Пусйымон соиз но: вормисьёс пӧлы тросгес егит пиос сюризы. Ваньмыз вормисьёс куинь номенациосъя быръемын вал: устоез кивалтӥсь, устоез бизнесмен, устоез студент- аспирант. Ӵошатсконэ пыриськемъёслы сётэмын дипломъёс но синпель кузьымъёс. Нош куинезлы ӵектэмын Удмурт Республикаысь валтӥсь федеральной инспектор дорын ужаны. Т.МИРОНОВА. Уг ке вунэто, мӧйыос шумпото Ортчемаз арня ӝыт, 8-тӥ октябре, "Вараксино" тылобурдо вордон фабрикалэн клубаз тыраз калык люкаськылӥз. Отын калыклы дунтэк концерт возьматэмын вал. Люкаськемъёс азьын шулдыр кырӟазы но чырмыт эктӥз кырӟанъя но эктонъя "Айкай" ансамбль. Та шулдыръяськон сӥземын вал гурт хозяйствоын ужасьёслэн но дышетӥсьёслэн профессиональной праздникъёссылы. Соин нырысь ик ужась но ужам калыксэс сюлмаысьтызы ӟечкылазы интыысь кивалтӥсьёс. Ӟечкылам гинэ ӧвӧл, праздникен валче тылобурдо вордон фабрикалэн директорез В.Н.Зенин али ужасьёсызлы быдэн 250 манет, нош пенсионеръёслы быдэн 50 манет коньдон висъям. � Директормы Владимир Николаевич милемыз, мӧйыосты, ноку уг вунэты, тани монэ со киосме кутылыса ик ӟечкылаз, � вера пенсионеръёс пӧлысь одӥгез З.Д.Ардашева. � Туж бадӟым тау солы. Мон нырысь фабрикаын ужасьёслы сиён пӧрай, собере фабрикаын курег пуз келян кассетаосты дасян бордын ужай, картэ но фабрикаын ик ужаса пенсие потӥз вал. Али Толя пие ужа, солэн куинь нылпиосыз, выль ӝутэм коркась квартира вите. Умой ужасьёсты милям гажало но данъяло. П.СКОБЕЛЕВ. ЖУРНАЛИСТЪЁСЫН ПУМИСЬКОНЪЁС Шаермы узыр пӧйшуръёсын Кылем вторнике журналистъёсын пумиськиз республикаысьтымы Пӧйшур хозяйствоя ёзлэн кивалтӥсез Василий БУЛАТОВ. Та удыслэн ужамез сярысь вераса, со рос-прос валэктӥз люкаськемъёслэн трос юанъёссылы. Зэмзэ но, асьме шаермы ошмесъёсын, нюлэсъёсын гинэ ӧвӧл, уно пӧйшуръёсын но кыр тылобурдоосын узыр. Соослы улыны, телеӟыны но будыны инкуазь ваньзэ сётэм. Вылаз ик, пӧйшур хозяйствоос соосты утьыны но будэтыны юртто. Тани кыр парсьёслы толалтэ сиён сётъяло, подкормка лэсьто. Асьмелэн соос 1000-1200 йыр лыдъясько, арлы быдэ 300-350 тонна ю тысь макня но тӧлбер кошке. Шаерамы озьы ик ваемын но уло вучайы (бобр), сурок но сибирь косуля. Берлоез дорамы выльысь выжыяське ни, угось азьвыл косуляос дорамы улӥллям. Но соосты кӧня ке быдто балянъёс (рысь) но кионъёс. Миым 7-зэ сиизы, туэ � 9-сэ, 3-зэ браконьеръёс быдтӥзы. Соин ӵош ик косуляос дорамы лыкто ни бускель Башкортостанысь но Татарстанысь. Пӧйшуръёслэн самой кышкыт тушмонзы луэ кион. Сое арлы быдэ шорлыдын сю пала куто, нош миым 118-эз ыбемын. Нош арлэн пумаз котьку огмында ёрос, 50-60 кион кыле. Тодосчиослэн лыдъямзыя, 100 пыд гижыё пӧйшурлы одӥг кион кулэ. Со лябъёссэ, висисьёссэ быдтэ, соин ик кионэз санитар шуо. Пӧйшур озьы ик дорамы каръяське Киров но музон улосъёсысь. Шаермы узыр лосьёсын (койыкъёсын). Берло куинь ар ӵоже соос шорлыдын 8300-92000 вазисько. Миым 570 койыкез кутыны лицензия сётэмын вал, туэ � 470. Со сяна, арлы быдэ 200-эз быро пӧртэм мугъёсын (браконьеръёс ыбыло, машина улэ сюро, кионъёс быдто). � Жаляса верано луэ, � шуэ Василий Прокопьевич. � Республикаямы уг буды кечъёслэн лыдзы. Валантэм со, йылыны котькыӵе условиос вань кадь, но 1800-2000 сяна ӧвӧл. Сомындазэ ик арлы быдэ пӧйшурасьёс кутыло. Малы ке шуоно, кечъёс араз куинь пол пи вайыны кулэ. Шаерамы уй пал районъёсын, Як.-Бодьяысен кутскыса, 600-800 гондыр улэ. Кылем арын 68-эз кутэмын, туэ � 48-эз. Соосты кутылыны ярато кунгож сьӧрысь пӧйшурасьёс. Но республикаямы соос уг лыкто, условиос кылдытымтэ, нош Киров улос та ласянь асьмеды данаклы азьпалтӥз ни. Селта районысь Копки питомникын гинэ пӧйшурасьёслы улыны умойгес корка пуктэмын. Отын западно-сибирской пуныосты будэто. Матысь дыре арлы быдэ 300-400 чайыез (норкаез) кутылӥськом. Но пӧйшур куослы дунъёс кулэсмемен, та уж лябӟе. Сёръёс (куница) сярысь верано ке, шаерамы соослэн лыдзы 1500-1600. Сомындазэ ик араз кутыло. Шаерамы трос уло кыр тылобурдоос. Дукъяосмы 12200 йыр, туръёс 30000. Огмында возисько сялаосмы но мукетъёсыз. Гужем дорамы пи поттыны лыкто луд ӵӧжъёс но ӟазегъёс. Республикаямы 20-25 сюрс пӧйшурасьмы. Но со пӧлысь ӝыныез гинэ пӧйшурало. Нош пӧйшуръёсты уте-чакла 100 егерь. Озьы ке но, соосты быдтӥсьёс шедё. Миым сюлэсь уно койыкъёсты быдтон учыръёс шараямын, ӝыныез (48-эз) браконьеръёс кырмемын. Соос бадӟым штраф тыро но судын кыл куто. Туэ сыӵе учыръёс кык поллы ӧжыт ай, но ар ӧз йылпумъяськы на. Котьмар шу но, ошмесо шермы пӧйшуръёсын но тылобурдоосын узыр. Али 178 косуля улэ на. Соосты адӟыны луэ Якшур-Бодья, Селта но Игра палъёсысь. Г.РОМАНОВ. Шуныт луоз! Вавож черкогуртысь коммунальщикъёс озьы шуо вань ужасьёслы но улӥсьёслы. Нош шуныт мед луоз шуыса, котельное тырмыт эстӥськон вайыса дасяно. Тол кыӵе луоз, тодмо ӧвӧл ке но, ӧжытсэ 500-600 тонна музъем эгыр кулэ. Нош ваемын кык толлы тырмымон. Кызьы ужалоз ачиз котельной. Оскымон ужаны кулэ. Кун комиссия, толлы дасяськемзэс эскерыкуз, сое тужгес умоеныз лыдъяз. Нош гумыос уродэсьгес ни. Но та шек асьсэос шуныт басьтӥсьёс бордысь но потэ. Соос шуныт басьтэмзы понна, ас дыраз коньдон тырыны уг дырто; таӵе организациосты но нимаз адямиосты алытэк уг луы. П. Николаев. Бырем гуртлы памятник Кин тодэ, Удмурт шаерысьтымы кӧня гуртъёс пашмизы меда, одӥгъёссэ быдтыса, хозяйствоослэсь центральной усадьбаоссэс бадӟыматон политика нуон вакытэ? Пичи гуртъёсысь кошкисьёс данакез пыраклы люкиськизы вордскем палъёсынызы но палэнэ кошкизы. Но адямилэн уг луы вунэтэмез ас вордскем интызэ, пичи дыръяз гольык пыд бызьылэм вож гуждоро ульчаоссэ. музъем вылаз куке но сылӥз Каравай гурт, адямиос ужазы "Чепецкий" совхозын. Но гурт быриз. Нош туэ гужем отын вордскем но будэм адямиос огинэ люкасьылӥллям но бырем гурт бервылазы памятник пуктӥллям, чылкак кулэм муртлэн шайгу вылаз выллем. Мар шуод на, вылӥ кивалтӥсьёслэн тыро-пыдо малпаськытэк ужаменызы йырин ӵемысь адямиослэн улон радзы но сураське. П. Скобелев. Архивысь документъёсъя Удмуртия ЪЪ дауре 1947-тӥ ар Та аре туж трос вал юбилейёс: куамын ар тырмиз Октябрь революцилы, кызь вить ар - СССР-лы. Котькытын кутскиз пятилеткалэсь ужпумъёссэ ньыль ар куспын быдэстонъя ӵошатскон. Удмурт шаерын азьпалан мынӥзы Ижысь предприятиос, Камбаркаысь машина лэсьтӥсь но Сарапулысь кулэсь пӧртэм арбериос поттонъя заводъёс. Куарусён толэзе (сентябре) тямыс сю ар тырмиз Москвалы. Удмурт шаерысь пӧртэм предприятиосын но огазеяськонъёсын ужасьёсты тодматӥзы Москвалэн но татысь Кремльлэн ортчем сюресэнызы. Та ужын бадӟым инты басьтӥз Политикаысь но наукаысь тодон-валанъёсты вӧлмытонъя удмурт ёз (нош кылдӥз со 1947-тӥ арын). Шаерысьтымы библиотека но радъяз Москва сярысь литературая адӟытон. Шутэтскыкузы Ижысь школаосын дышетскись пиналъёс пумиськылӥзы Москва вӧзын ортчем ожъёсы 1941-тӥ арын пыриськемъёсын. Москваысь кивалтӥсьёс ӧтемъя, шоркарамы юбилейлы сӥзем нуналъёсы вуылӥз РСФСР-ысь дано врач Ф. Ф. Сысоев. Кызь ар тырмонзэ пусйиз Осоавиахим. Быдӟым тылож азьын отын ньыльдон сюрс адями вал. Война аръёсы ожлы дасяськиз тямыстон сюрс мурт. Ижысь аэроклуб дасяз уно пилотъёсты, авиамеханикъёсты, техникъёсты, парашютистъёсты. Ож бере выльысь улӟизы авиа- но автомотоспорт, ыбылӥськон, спорт уж. Кызь вить ар тырмиз Можга педучилищелы. Тамында дыр ӵоже татын дышетскиз сюрс сю куатьтон укмыс адями. Татын будӥзы, тодон-валан люказы Советской Союзлэн Героез Григорий Евдокимов, писательёс Филипп Кедров но Игнатий Гаврилов. Та аре ик трослы йылӥз шаерысьтымы вузъёсын дышетскыны мылкыд карисьёслэн лыдзы. Тужгес трос вал Удмурт кун пединститутысь литературая но историяя факультетъёсын дышетскыны малпась адямиос. Ижысь мединститутэ сю интые сётэмын вал кык сю куатьтон тямыс куриськон. Удмурт шаерысь сяна, Киров, Пенза, Саратов улосъёсысь адямиос но дышетскыны мылкыд карылӥзы. 1947-тӥ арын выльысь усьтӥськизы фабрикаосын но заводъёсын ужаны дышетӥсь школаос, Эгралан (Игралан) - чугун сюрес вылын ужасьёсты дасянъя но Ижын - анайтэм-атайтэм нылпиос понна но чеберлыкъя школаос. СССР-ысь Вылӥ Кенешлэн Президиуменыз 26-тӥ мае кутэм Указъя воштэмын адямиез виыны чаклан. Со интые дэмламын кызь вить арлы лагерьёсы келялляны. Быдӟым тылож возьматӥз калыкмылэсь огазеяськыны быгатэмзэ, ас шаерзэ яратэмзэ. Шуэмын вал: тупаса улон вакытэ адямиез виыны чаклан кулэ ӧвӧл ни. Соин валче ик, таӵе малпан вылэ вуыса, Вылӥ Кенешлэн Президиумез лыдэ басьтӥз со вакытэ быдэс дунне вылын кылдэм югдурез, профсоюзъёслэсь но калык куспо огазеяськонъёслэсь мылкыд каронъёссэс. Арлэн пумаз СССР куштӥськиз война вакытэ кылдэм карточкаослэсь. Кутскиз уксёез кыкетӥзэ воштон. Со быдтыны кулэ вал вузкаронын-басьяськонын кутӥськись мултэс коньдонэз (таиз кылдӥз, армиез возьыса, ож удысэз азинтыса). Уксёез воштон тазьы радъяськиз: выль одӥг манет тупа вал вуж дас манетлы. Огвакытэ ик улӥязы няньлы, кеньырлы дунъёс, кӧнялы ке йылӥзы дӥськутлы, пӧртэм тӥрлыклы дунъёс. Валамон ни: уксёез воштыку, кӧня ке адями ыштонъёс адӟиз. Н. Пушкарёва, Удмурт Республикаысь Кун архивлэн директорезлэн воштӥсез. Ижысь Культбаза ёросын улон коркаос пуктон. 1947-тӥ ар. Гуртысь егитъёс "Пенсионеръёсты ки йылын нуллоно" Фермае нуись сюрес кузя Марина бызьыса сямен васькиз. Ӵук омыр нылашез ӝогак сазьтӥськытӥз ке но, ассэ ачиз со тышкаськиз: "Иземе кылисько вылэм ук - сизьыме мынэ ни". Кунян сюдӥсьёслэн бригадирзылы кызь куинь арес гинэ ай, шуныт валес вылын самой назьылляськон вакытэз. Мар карод, сыӵе уж бырйиз бере, вить часэ султытэк уг луы. Вож кунянъёс пичи нуныос кадь ик. Ужаны кутскем бераз сюлмаськыса Мариналэн уйёссэ но изьытэк потамез вань. Нош макем секыт туала вакытэ гурт удысын ужаны. Ужам ужед шумпотон уг вайы, зӥбе коньдонлы ёрмон. Кызьы сыӵе дыре адямиосты ужаны косод? Пинал муртлы туж секыт арлыдоосын косъяськыны, котькудӥныз кыл шедьтыны быгатоно. Та улонэнымы чигиськем адямиос куд-ог дыръя пумитаз вӧсь кыл но вераны шедьто, но со дыре ик анайзы чотын асьсэос ик лӥятыны, буйгатыны вутско. Улонэз адӟем нылкышноос пинал эшсэс улыны но дышето. Палэнысь вуэм муртлы гуртлы но, адямиослы но дышыны кулэ на угось. Кыкетӥ арзэ гинэ ужа ай Марина Гожнялась кунян вордон гидын. Асановоысь совхоз-техникумез йылпумъямез бере ужаны кутскиз вал Итэшысь парсь вордон гидын ветеринар луыса. Соку ик тодматскиз вуоно картэныз, бензовозэн ужась пияшен. Бызиз. Егитъёслэн будэ ни кык аресъем нылзы. Ужысь эшъёсыз куд-ог дыръя жаляса шуо, кыкетӥ нылпи вай но, та секыт ужлэсь ӧжыт ке но шутэтскод. Но Марина уг дырты шуг- секытъёслэсь пегӟыны. Али гинэ ужлы дышыны ӧдъяй, тодон-валанъёсме но будэтыны кулэ ай, пе. Мукетыз но вань. Нылпи вордон-будэтон туала вакытэ капчиен уг сётскы. Мар чотын бен возисько гуртысь тросэз егит семьяос? - Юрттэ аслам мамае. Витяелэн мамаез пенсия басьтэ, песянаймы вань на. Кык пенсионерен улӥськом, огнамы ми ӧй быгатысалмы шуг-секытъёсты вормыны. Туала вакытэ пенсионеръёсты ки йылын нуллыны кулэ, соос вӧзад луизы ке , уд кулы. Ма, аслым пыдкутчан 200 манетэн басьтӥсько, ныллы но сомында ик кулэ. Школа бере Марина аслэсьтыз улонзэ мукет сямен адӟе вал. Дас классэз йылпумъямез бере экзаменъёс сётӥз Ижевскысь Вузкаронъя училищее, бухгалтер луэмез потэ вал. 28-тӥ августэ тодӥз, со кутэмын шуыса. Нош ӵош дышетскем эшез пырыны быгатымтэ. Огназ кылемез ӧз поты, эшез сьӧры кошке Асановоысь совхоз- техникуме, зоотехнической ёзаз. Татчы сое куто экзаменъёстэк. Туннэ визьмыныз Марина сыӵе вамыш ӧй лэсьтысал. -Соку куректыны но ӧй вала. Нош макем синмаськи вал училищелэн общежитиезлы, компьютеръёслы. Мамае туж косэ на вал дышетсконме Гурт хозяйствоя академиын азинтыны. Табере дышетскон сюрес пытсаськемын. Егитъёслы верам потэ, пинал дыръя мед дышетскозы. Семья ке кылдэ, пуксёно. Улон котькыӵе шуг-секытъёсты вормыны дышетэ. Вӧзад валась адямиос мед луозы на. Марина Черновалы эшъёсын удалтӥз. Пудо вордон удысын кема ужам нылкышноос Нина Крылова но Зинаида Михайлова бригадазы сярысь туж ӟеч вазисько, одӥг семья кадь, пе, улӥськом. Пинал бригадирзы сярысь но шуныт кылъёс гинэ веразы. Нош Мариналэн кырӟаны уг йӧндыриськы шуыса ваземез пумит капчияк серектӥзы, сектаса адӟом али, пе. Керттӥськем, пужыятскем гинэ ӧвӧл, усто кырӟась но луод. Л. Малых. Доразы лыктозы егитъёс Ноябрь шоры Ижын ортчоз Россиысь егитъёслэн форумзы. Сое ортчыто странаысьтымы калыкъёслэн ассамблеязы, асьме Кун Кенеш, Удмурт кун университет но мукетъёсыз. Дорамы ӧтемын вань улосъёсысь егитъёслэн азьветлӥсьёссы. Ужрадэз дасян вылысь кылдытэмын нимысьтыз комитет. Солэн одӥгез кивалтӥсез Рамазан Абдулатипов алигес вуылӥз Удмуртие. Кун Думаысь Нациосын ужанъя комитетлэн тӧроезлэн воштӥсеныз Светлана Смирноваен ӵош соос пумиськизы форумез ортчытӥсьёсын, ветлӥзы университетысь дышетӥсьёс но студентъёс доры, озьы ик пумиськизы сельхозакадемиын дышетскисьёсын. Со сяна, Москваысь куноос кенешизы асьме национально-культурной огазеяськонъёслэн кивалтӥсьёсынызы. Ф.ПЕТРОВ Куноосын пумиськонъёс дыръя. Ошмесъёсты утялтозы Курег вордӥсьёслэн Вараксино посёлоксы берло дыре чебер городлы пӧрме ни, квартираосазы кезьыт но пӧсь ву сётӥське. Ӝоген тросэз семьяос бадӟым выль юртэ улыны пырозы, унозэ квартираоссэс тылобурдо вордон фабрикаын ужасьёслы, азьло сямен ик, дунтэк сётозы. Но данакез чай пӧзьтыны, кияр сылалтыны ву нулло Истомино но Малиново гуртъёс вӧзын жильыртыса бызись ошмесъёсысь. Уноез татчы ветло миськем дӥсьсэс гылъяны но. Соин интыысь администрацилэн кивалтӥсез А.Ю.Чесноков, птицефабрикалэн директорез В.Н.Зенин но Завьял ёросысь инкуазез утёнъя комитетлэн председателез Ю.Е.Смелов кенешизы та кык ошмесъёсты сузян но соослэсь котырзэс чылкытатон сярысь. Эскизъёссы дась ни. Ӝоген уж борды басьтӥськозы. Соку ошмесо шаерысьтымы кыкез ошмесъёс уката шулдыргес жильыртозы. П.НИКОЛАЕВ. Етӥн � уй пал буртчин Юкаменск ёросысь администрацилэн кивалтӥсез В.Невоструев алигес Дэбесэ вуылӥз. Отын ортчиз уй пал ёросъёслэн кивалтӥсьёсынызы кенешон. Кылсярысь, вераськон мынӥз етӥнэз Голландиын сямен будэтон но утялтон сярысь. Кенешемын, кыдёкысь шаере асьме дорысь специалистъёсты выль амалъёслы дышетскыны ысъяно шуыса. Ёросын етӥн будэтон шоры валаса учко � та культураез умой будэтыса, ӟеч пайда поттыны луоно. Соин одӥгез эштос быдэсак выжоз голландецъёс сямен етӥн будэтонэ, со понна кулэ техника висъяны чаклаське. П.Николаев Огез сяна, Чечняе ӧз кыльы Каракулино ёросысь Владимир Седов, армиын службазэ ортчытон дырыз бырыса, контракт гожтэ но Чечняе ожмаськыны кыле. Райвоенкоматлэн военной комиссарезлэн воштӥсезлэн Э. А. Прозоровлэн верамезъя, ёросысь мукет егит пиос ожмаськыны мылкыд ӧз каре, нош огъя верано ке, туэ берло куать толэзьем контракт гожтыса Чечняе мыныны мылкыд карисьёслэн лыдзы 1,5 пол йылӥз. Ма кыске пиосмуртъёсты оже? Нырысь ик ӟеч уж шедьымтэен но умой улымон уждун поттыны луымтэен. Отын ожмаськемъёслы, угось, одӥг нунал понна 800 манет тыро. Контракт гожтэмъёс пӧлысь 60 процентэз та уксё понна ожмасько, 10 процентэз - армиын службаез яратӥсьёс, 5 процентэз гинэ патриотъёс. П. Николаев. Устоез лыдӟись Вамыштомы артэ Фома Кузьмич Ермаковлэсь сӥё-дано нимъёссэ вераса-вераса жадёд, дыр. Со - Россиысь Писательёслэн союззылэн членэз, Удмурт Республикаысь Культура удысысь дано ужась, Удмурт Республикалэн дано деятелез, профессор, Венгер филологияя калык куспо огазеяськонлэн но, М. Кастрен финн огазеяськонлэн членэз, Калык куспо финн-угор фондлэн но, Удмурт Республикаысь кун премилэн лауреатэз, вань удмуртъёс пӧлысь Куӟебай Гердлэн премиеныз пусъем нырысетӥ мурт. Вань та нимъёс борды йылтэм потэ на: Фома Кузьмич "Советской Удмуртия"-"Удмурт дунне" газетлэн тужгес но устоез лыдӟисез. Куатьтон арлэсь ятыр соин артэ вамышъя ни удмурт газет. Лыдӟись сяна, со газетлэн матысь авторез но луэ. Куатьтон ар ӵоже Фома Кузьмич газетэ гожтӥз ни 145 статья. - Лыдӟиськыны мон дыши вить арескысен, - шуэ Ф. К. Ермаков. - Ӟуч классикъёслэн ӟуч кылын гожъямъёсынызы "Родная природа" книга туж синмаськытӥз яркыт буёло суредъёсыныз. Будэмъям удмурт газет борды кыстӥськи. "Советской Удмуртия"-"Удмурт дунне" мынам котьку но гажано газетэ луоз. Азьло аръёсы туж кельшо вал писательёслэн статьяоссы. Котьку но синмаськыса лыдӟылӥ Михаил Петровлэсь, Василий Широбоковлэсь, Геннадий Красильниковлэсь, Семен Самсоновлэсь тунсыко материалъёссэс. Мар мынам тужгес но пусъеме потэ удмурт газетысь? Редакциын ужасьёс утьыны туртто котькуд авторлэсь стильзэ, ас малпаськонзэ, мылкыдзэ, нош ӟуч газетъёс сое уг чаклало. Озьы ик газет кельтэ уй пал но лымшор удмуртъёслэсь вераськонзэс, нош со узырмытэ литература кылэз. Кельшо туала журналистъёслэн лэчыт кылын гожъяськемъёссы. Трогес печатланы кулэ "Кильмезь шур кузя" выллем материалъёсты. Соос туж малпаськытӥсесь, трос тодон сёто, озьы ик тодмато калыклэн маин улэменыз, малпанъёсыныз, узырлыкеныз. Газет бамъёсысь уката но тросгес адӟем потэ вылэм палэнын улӥсь удмуртъёслэн улэм-вылэзы сярысь. Кыӵе синмаськымон адямиос уло отын. Утьыса, гажаса возё удмуртлыкез, удмурт кульутраез. Шаерамы улӥсь удмуртъёс понна тросэз со адӟем карымон. Ӧвӧл вунэтоно венгер, финн вынлыко калыкъёсмы сярысь но. Газетын ужасьёслы сюлмаськоно удмурт кыллэн чылкытлыкез сярысь но. Али со туж узырмиз. Азьло кызьы луэ вал. Ӟуч кыл борды кылпум ватсаськом но удмурт сямен гожъяськиськом ни шуиськом. Шудыны уг яра международной терминъёсын. Соосты берыктон сураськон-пожаськонэ вуттэ. Татарстанысь Степанов эш газетады туж шонер гожтӥз вал, удмуртлы шуыса эн дышетэ, пе, милемды бигер кыллы, ми сое сотэк но тодӥськом. Фома Кузьмич Ермаков улытозяз кытчы гинэ ӧвӧл вуылэмын, кыӵе гинэ тунсыко адямиосын ӧз пумиськылы. Оскиськом, "Удмурт дунне" газетэн кусыпъёссэ со уз ышты. Лэчыт перо улысьтыз лыдӟисьёс доры трос гожъямъёсыз вуозы. Л. Малых. Гошалэн вылэм правоез Удмуртиысь быдэс дуннеын тодмо Иван Кудрявцев улэп дыръяз вань калыкез паймытъяз визьмо гондыреныз. Гондырпиеныз со вуылӥз Воткинск шоссеысь Печатья юртэ но, журналистъёсын пумиськылӥз. Нош тросэз уг тодо, дыр, быдэс дуннеын одӥг гинэ таӵе документ сярысь. Тодматӥсько соин: Водительлэн удостоверениез. Фамилиез - Гоша, Кивалтӥсез - РСФСР-ысь дано артист но Удмурт АССР-ысь калык артист Иван Кудрявцев. Сериез - Иж, номерез 000001. Сётэмын - УАССР-ысь МВД-лэн ГАИ-еныз. Сётэмын - пыраклы. ётэмын - 1975-тӥ арын 19-тӥ сентябре. Водитель сярысь вакчияк валэктон: 1. Таӵе водитель дунне вылын одӥг гинэ. 2. Сямызъя умой, но ваньмыныз эшъяськыны уг яраты. 3.Госавтоинспекторъёсты гажа. 4. Яратэ ӝог ворттылыны. 5. Ижевскысь транспортной дружиналэн членэз. Нимысьтыз тодметэз: удостоверенизэ эскеремез уг яраты, сыӵе дыръя гондыр сямен бурсыны быгатоз". Зэм, Гоша быгатэ вылэм, мотоциклэн но машинаен ворттылыны сяна, баказ бензин лэзьяны, машиназэ миськыны, поглянъёссэ вошъяны. Гоша сярысь асьме дорын но кунгож сьӧрын уно кинофильмъёс пуктэмын. В. Рогалев. ПРАВИТЕЛЬСТВОЫСЬ ИВОРЪЁС Стипендиос басьтозы Удмурт Республикаысь Правительстволэн Президиумезлэсь ортчем заседанизэ нуиз Правительстволэн тӧроезлэн нырысетӥ воштӥсез Юрий Питкевич. Отын Кун Кенешлэсь но Правительстволэсь кун учреждениосын 2000-тӥ-2001-тӥ аръёсы дышетскись аспирантъёслы но студентъёслы стипендиоссэс тупатон сярысь постановление кутэмын. Дас вить кандидат азьвыл ик эскеремын ни вал дышетскон завдениосын. Нош тодмо удмурт тодосчи Куӟебай Герд нимо премия тупатэмын туэ гинэ. Сое сётыны республикаысьтымы вить вуз быдэн одӥг муртэ ӵектӥзы. Соослэн нимтулъёсынызы Правительствоысь Президиумын ужасьёс соглаш луизы. Улон интыос йылозы Нимаз адямиослы улон юртъёс лэсьтыны республикамылэн бюджетысьтыз коньдон висъян сярысь положение ватсан пыртэмын. Табере ссуда басьтыны быгатозы радиациен герӟаськем шудтэм учыръёслэсь бервылзэ быдтонэ пыриськемъёс но тужгес шукрес учыръёсы ветлэм ветеранъёс, ожъёсы пыриськем ветеранъёс, Чечня Республикаын террорлы пумит ужрадэ ветлэмъёс, озьы ик соосын ӵош улӥсьёс но огазьын хозяйствозэс нуисьёслэн семьяоссы. Нюлэс ужъёсты эскериз Куд-ог документъёс эскеремын нюлэс ужпумъёсъя. Городъёслэн но ёросъёслэн администрациоссылы 2001-тӥ арлы нюлэс фондэз висъянъя радлык тупатэмын. Со луоз 570 сюрс кубометр. Со сяна, лесхозъёслы аукционъёсын вузаны 737 сюрс кубометр нюлэс сётӥськоз. Юнматэмын Селта но Дэбес лесхозъёсын нюлэсэз вузанъя конкурс ортчытон сярысь ужпум. Аренда сётӥськоз 5 арлы, 19,5 сюрс гектар вылын 490 сюрс кубометр нюлэс дасяны чаклаське. Араз 25 сюрс кубометрлэсь уно нюлэсэз кораны лэземын ӧвӧл. Дэбесысь улон интыосты возёнъя предприятилы 3,7 сюрс гектар вылын нюлэс 5 арлы сётӥське. Араз 3 сюрс кубометрлэсь уно нюлэсэз кораны лэземын ӧвӧл. Удмурт Республикаысь Правительстволэн пресс-службаез. Удмурт Республикаысь Быръёнъя комиссилэн Удмурт Республикалы президентэ кандидатлэн Ануфриев Вячеслав Николаевичлэн ивортонэз сярысь ПОСТАНОВЛЕНИЕЗ Удмурт Республикалы президентэ кандидатлэсь В.Н.Ануфриевлэсь аслэсьтыз кандидатуразэ палэнтон сярысь ивортонзэ эскерыса но Удмурт Республикалэсь "Удмурт Республикалы президент быръён сярысь" Законлэсь 17-тӥ, 41-тӥ, 42-тӥ, 55-тӥ но 51-тӥ ёзэтъёссэ лыдэ басьтыса, Удмурт Республикаысь Быръёнъя комиссия пуктэ: 1. Ануфриев Вячеслав Николаевичлэсь Удмурт Республикалы президентэ кандидатэ пусйиськемзэ (регистрацизэ) дугдытоно (Удмурт Республикаысь Быръёнъя комиссилэн постановлениез кутэмын 2000-тӥ арын 12-тӥ сентябре, � 27.2). 2. Улосвылъёсысь но интыосысь быръёнъя комиссиослы Удмурт Республикалы прзидент быръён дыръя куара сётонъя бюллетеньёсысь В.Н.Ануфриев сярысь ивортонъёсты ӵушылоно. 3. Улосвылъёсысь но интыосысь быръёнъя комиссиослы дугдытэмен лыдъяно быръёнъя комиссиослэсь В.Н.Ануфриевен юнматэм кенеш сётыны быгатӥсь правоен членъёссэс сярысь решенилэсь кужымзэ. 4. В.Н.Ануфриевен юнматэм наблюдательёслэсь, оскем муртъёслэсь но В.Н.Ануфриевез президентэ кандидатэ ӵектэм кичӧлтӥсь группалэсь полномочиоссэс дугдытэмен лыдъяно. 5. Удмурт Республикаысь Быръёнъя комиссилэсь 2000-тӥ арын 15-тӥ сентябре, � 28.5 но 2000-тӥ арын 19-тӥ сентябре, � 30.17 кутэм "Удмурт Республикалы президентэ кандидатлэсь В.Н.Ануфриевлэсь оскем муртъёссэ пусъён сярысь" постновленизэ кужымзэ ыштэмен лыдъяно. 6. В.Н.Ануфриевлэн оскем муртъёсызлы Удмурт Республикаысь Быръёнъя комиссиен сётэм удостоверениоссэс кужымзэс ыштэмен лыдъяно. 7. Россия Федерациысь Сберегательной банклэн Удмурт банкезлэн 8265 номеро Октябрь ёззэ косоно пусъем кандидатлэн В.Н.Ануфриевлэн быръён счётэзъя коньдон операциосты дугдытыны. 8. Та постановлениез печатлано республикаын потӥсь кун газетъёсын. Удмурт Республикаысь Быръёнъя комиссилэн тӧроез Д.Н.Талантов. Удмурт Республикаысь Быръёнъя комиссилэн секретарез Н.А.Глухова. Ижевск город, 2000-тӥ арын 11-тӥ октябре. � 42.1. Удмурт Республикалы президентэ кандидатлэн В. Н. Ануфриевлэн ивортонэз Туэ 15-тӥ октябре ортчозы Удмурт Республикалы президент быръёнъёс. Отчы пыриськыны мон мылкыд кари, югдурез ӟеч валаса, Удмуртиысь коммунистъёслэн но патриотъёслэн дурбасьтэмзылы оскыса. Быръёнъёсын данак пумиськылонъёс дыръя мон ӟеч валай, Удмуртилэсь "реформаос" ортчытон вакытэ куашкатэм калык хозяйствозэ выльысь ӝутонъя программамес калык умоен лыдъя шуыса. Адямиослы тужгес но тунсыко пото промышленностез но гурт хозяйствоез ӝутонъя, дунтэк дышетскыны но дунтэк медицинской юрттэт басьтыны правоосты берыктонъя но егитъёслы юрттонъя ӵектонъёсмы. Быръёнъёсъя кампанимес ми нуим, законъёсты тӥятэк. Мукет кандидатъёс вылэ пож ву ӧм киськалэ, пӧламы ӧм кутэ палэнысь политехнологъёсты, кузёосыз понна бырйисьёслэсь йырвизьзэс суран-пожан профессилы пӧрмоз ни. Быръёнъёсъя комиссия ласянь милемды одӥг пыкылон учыр но ӧй вал. Озьы ке но, берло арняосы быръёнъёсы мукет кандидатъёсын огкадь луонлыкъёсын пыриськыны быгато но быръёнъёс зэмос демократия амалэн ортчозы шуыса осконэ быриз. Быръёнъёсъя кампания кыӵе ке но шоулы пӧрмиз. Интыысь но Москваысь иворъёсты тросэн вӧлмытонъя ёзъёсын зэмос ож пуромиз. Кандидатъёс пумысен олокыӵе но супыльтонъёс пото. Чиновникъёс, асьсэ удысъёсазы ужам интые, ӝуткан- валэктон уже выизы. Быръёнъёсъя кампанилы укыр трос коньдон куштӥське. Со вакытэ ик властьёс уг быгато нылпи пособиосты тырыны, нош сюрсъёсын семьяос кураськон калэ вуэмын. Таӵе югдуре быръёнъёсы пыриськыны мон уг быгатӥськы, уг но пыриськы. Соин ик, монэн огкадь мылкыдо эшъёсыным кенешыса, кандидатураме куштыны малпай. Сюлмысьтым ик тау карисько ваньмызлы, кин мыным юрттӥз: кичӧлтӥсь группаын но быръёнъёсъя штабъёсын ужаз, мыным дурбасьтӥсьёслэсь кинюртэмъёссэс люказ, бырйисьёсын пумиськонъёсме радъяз но адямиосты мон понна куаразэс сётыны ӝутказ. Мон котьку но шӧдылӥ тӥлесьтыд дурбасьтэмдэс, мыным оскемдэс, со ик мыным та палдурес нюръяськонын кужым сётылӥз. Оскисько, мынам та вамыше Удмуртиын улӥсьёс понна азьланяз улон-вылонмы сярысь малпаськыны муг луоз но, быръён нуналэ соос асьсэлэсь мылкыдзэс шонер возьматозы шуыса. 09.10.2000 ар. Ӟоскытгес йӧтэ ни Куамынэтӥ арзэ ини Алнашын ужа искусствоосъя школа. Пиналъёс татын нырысьсэ тодматско фортэпианоен, баянэн, аккордеонэн, балалайкаен, домраен, крезен, дышетско суредаськыны. Миым татын хореографилы дышетыны кутскизы, нош туэ усьтэмын на духовой отделение. Таяз дышетскон аре ӧсъёссэс усьтӥзы подготовительной классъёс. Татын вить аресъем пиналъёс музыкаез кылзӥсько но ритмикая валан басьто. Нош куать-сизьым аресъемъёсыз музыкалы дышетско ни. � Ми ум турттӥське профессиональной музыкантъёсты будэтыны. Озьы ке но, дышетскисьёсмылэн конкурсъёсын вормонъёссылы туж шумпотӥськом, � шуэ искусствоосъя школалэн кивалтӥсез Анатолий Федорович Захаров. � Миым Быдӟым Вормонлы 55 ар тырмонлы сӥзем "Зарни италмас" фестивальын дипломантъёс луизы милям баянэн, балалайкаен шудӥсьёсмы но фольклорной ансамбльёсмы. Солистъёс-вокалистъёс пӧлын лауреат ним басьтӥз Саша Решетников. Чайковскийлэн вордскемез дырысен сю куатьтон ар тырмонлы сӥзем конкурсын дипломант луиз пианистмы Полина Измейстева. Алнашысь искусствоосъя школае озьы ик ветло райцентрлы матысь Казаково, Вуж шудья, Байтеряково, варзи-Ятчи гуртъёсысь пиналъёс но. Туэ та школаын ваньмыз кык сю куамын нылпи дышетске. Соослэн лыдзы тросгес луыны быгатысал, но дышетскон классъёс тырмымтэен, ваньзэ мылкыд карисьёсты кутыны луонлыксы ӧвӧл на. Дышетсконни интыяськемын азьвыл райкомлэн юртаз, татын ик алнаш шор ёзо школалэн начальной классъёсыз дышетско. Анатолий Фёдоровичлэн верамезъя, дышетӥсьёслэн вань осконзы: райцентрын дас одӥг ар ӵоже лэсьтӥськись юртлы. Сое искусствоосъя школалы шуыса лэсьтыны кутскемын вал, нош туннэ нуналлы Алнашын клуб но ӧвӧл. Мар луоз татын азьланяз, тодмо луоз лэсьтӥськон ужъёс йылпумъяськем бере гинэ. Пичи музыкантъёс, кырӟасьёс но суредасьёс та дыре липет улэ пырем корка шоры урамысен гинэ учкыло. Нош искусствоосъя школа дышетскисьёсызлэсь лыдзэс йылтыны матысь дыре уз быгаты. О.КОЖАНОВА. Александр Волков Россилэн Президентэзлэн Владимир Путинлэн оскымон юрттӥсез луэ. Соослэн уртче, огкылысь тыршеменызы радъямын луоз кужмо кун власть, тупатэмын луоз политикаын, экономикаын но социальной удысын югдур. Александр Волков гинэ быгатэ Удмуртия понна Москваысь юрттэт курыны-басьтыны. Е. Строев, Г. Селезнев, С. Кириенко, М. Шаймиев, М. Рахимов, А. Тулеев,Ю. Маслюков но трос мукет тодмо адямиос республикамылэсь кивалтӥсьсэ гажало но солы дурбасьто. Одӥгезлэн гинэ кандидатлэн, Александр Волковлэн, пыр-поч дасям но уж вылын быдэстымон "Удмуртилэн азинсконэз" программаез. Отын нырысь интые пуктэмын адями сярысь сюлмаськон, промышленностьысь но гуртысь предприятиосты огсыр ужатон, городъёсты но ёросъёсты азинтон. Александр Волков, мастерысен кутскыса, бадӟым опытэн кивалтӥсёзь но политикозь сюресэз ортчиз. Со - тодӥсь-валась экономист: Со кадь нокин уг тоды республикаысьтымы калык хозяйство азьын сылӥсь ужпумъёсты но соосты быдэсъян сюресъёсты. Александр Волков котьку но ужын. Солы пумит луисьёс но пусъё, солэсь вылӥ азинлыко ужаны но кутскем удыссэ пумозяз вуттыны быгатэмзэ. Республикамылэн кивалтӥсез огшоры адямиослы юрттэ; гуртын улӥсьёс азьын сылӥсь ужпумъёсты сэрттэ-пертче; заводъёслы выль заказъёс басьтыны юрттэ; солэн кивалтэмез улсын азинске автомобиль поттон, лэсьтӥсько сюресъёс, школаос но больницаос. Со меӵак ачиз чакласа возе "Анайлык но покчилык", "Улон инты" программаослэсь быдэсъяськемзэс. Александр Волковлэн кылъёсыз уж вылын быдэсъясько. Солы оско но дурбасьто республикаысьтымы сюрсъёсын адямиос. Ӵапак Александр Волковлы оскыны быгатӥськом Удмуртилэн нырысетӥ президентэз луыны. Ӟечкылан! 14-тӥ октябре Л. М. Никитиналы тырме 50 арес. Трос аръёс ӵоже, вань сюлэмзэ сётыса, со ужаз Пичи Пурга ёросысь Вуж Монья нылпи садын кивалтӥсь луыса. Ми, ӵош ужась эшъёсыз, ӟечкыласьком сое та юбилееныз. Юн тазалык, шудбур но байлык сӥзиськом. Кыдыра, кыдыра сӥзьыл зор. Нош вуэ ни, вуэ ни Пукро. Та бадӟым нуналэ, пе, туннэ Вордӥськем кивалтӥсь туж усто. Бызьылӥсь, сюлмаськись, утчаськись, Маин ке но ялан шумпоттӥсь. Куддыръя куаретӥсь, индылӥсь, Бен, сыӵе уго со кивалтӥсь. Тон уд кортна солэсь мылкыдзэ, Тудву кадь со вӧлскоз котыре. Тон уд ӵыпы бызись сюрессэ, Со шедьтоз аслэсьтыз мур ӧрзэ. Ӟеч кылъёс вералом ми солы, Тазалык сӥзёмы кемалы. Мед луоз ваньбуро но шудо, Котьку тыр но ӟырдыт сюлэмо. КПРФ-лэн ЦК-езлэн кивалтӥсезлэн Г. А. Зюгановлэн Удмурт Республикаысь бырйисьёслы Вазиськонэз Гажано эшъёс! Удмуртиысь бырйисьёс! Милям партимы но народно-патриотической огазеяськон туж бадӟым саклык висъя быръёнъёслы. Ми озьы лыдъяськом, котькытын ик кивалтонэ мед лыктозы сыӵе адямиос, кин ужез ӟеч тодэ, кин аслэсьтыз калыксэ гажа, кин гажа ортчемзэ, кин вала, туала югдурысь потыны луоз калыкъёслэсь эшъяськонзэс юнматыса, ӟеч но сюлмысь тыршыса гинэ. Партийной организациосын, милемлы дурбасьтӥсьёсын кенешыса, ми туж эскерим кылдэм югдурез но милесьтым кандидатмес Ануфриев Вячеслав Николаевичез ӵектӥм быръёнъёслэсь куштӥськыны. Со визьмо, быгатӥсь, котьмае тодӥсь, оскымон адями, со быгатысал уно кивалтон интыосын ужаны. Ваньмы ӵош кенешыса та быръён азьын ми дурбасьтоно кариським Волков Александр Александровичлы. Со тӥ дорын кемалась ужа ни. Со тодмо адями. Со огшоры лэсьтӥськись бордысен бадӟым кивалтӥсёзь будӥз. Ми сое адӟылӥм татысь Думаысь, Федерацияя Кенешысь, адӟиськом быръёнын вормисе потыны солэн луонлыкъёсыз бадӟымесьгес. Малпасько со шонер, соин ик партимылэн но уно патриотической кужымъёслэн нимынызы куриськом тӥледыз Волковлы дурбасьтыны. Малпаськом, та быръёнъёс республикалы гинэ ӧвӧл, огъя быдэс странамылы азьланезлы сюрес усьтозы. Странамы сюрес вожын сылэ. Ельцинлэн 10 ар ӵоже ортчытэм реформаосыз быдэсак вуттӥзы куашкан калэ, асьмеос пыдйылчиос радэ кылим. Соос гинэ но, кинъёс мукетъёсыз чотын туж узырмизы, валало ни, азьланяз таӵе улон странамес быдэсак куашкатыны быгатоз шуыса. Соин ик мед луоз оскон, огсыр улон. Тӥляд республикаяды куд-ог вормонъёс басьтэмын ни, соос герӟаськемын Волковлэн нимыныз. Мон оскисько, быръёнын тӥ солы дурбасьтоды шуыса. Соин ми озьы ик вераським, со милесьтым куронъёсмес но ӵектонъёсмес лыдэ басьтоз шуыса. Ми курим уногес саклык висъяны нылпиослы но арлыдоослы, зэмос ужбергатӥсьёслы юрттыны, ваньзэ лэсьтыны школаослэсь, ВУЗ-ёслэсь ужзэс умоятон вылысь. Котькудӥз предприятие мед шӧдоз зэмос юрттэтэз. Нош ми асьме ласянь кыл сётӥськом: Думаысь бадӟымез фракцимы но гурт удысъя группа бадӟымгес юрттэт сётыны тыршом тӥледлы но ож тӥрлык поттӥсь комплекслэн предприятиосызлы, соосын Удмуртия котьку данъяськылӥз, соос ӟечесь арбериос лэсьто, кудъёсыз оскымон утё странамес. Мон эшшо тау карисько милемын огкылысь ужамды понна. Ваньзэ ӟечсэ, азинсконъёс сӥзисько тӥледлы. Ӟечкыласьком! Як.-Бодья ёросысь Мукши гуртын ӟеч кышномурт улэ. Со - Галина Дмитриевна Широбокова, школаысь дышетӥсь. Пӧртэм интыосын ужаны кылдӥз та адямилы, но сюлэмыз биниськиз нылпиос котыре. Пиналъёс сое ярато, гуртоос гажало. Галина Дмитриевна али юбилейзэ пусйыны дасяське. Милям сое ӟечкыламмы потэ вордскем нуналэныз. Шуд, тазалык но вань умойзэ гинэ тыныд, дуно эшмы! Ноку но эн сётскы урод мылкыдлы, ноку но медаз ышы ымнырысьтыд пальпотон! Яратыса но гажаса - матысь эшъёсыд. Удмуртъёс сярысь Удмурт Элькунысь Национальной библиотекаын матысь дыре ортчоз Р.Д.Голдиналэн "Удмурт калыклэн вашкала но шор дауръёсысь ортчем сюресэз" книгаеныз тодматскон. Р.Д.Голдина � шаерысьтымы тодмо тдосчи-археолог, история наукаосъя доктор, профессор, Удмурт кун университетысь Урал улосысь калыкъёслэн историзыя но культуразыя институтлэн директорез, вашкала калыклэн археологиезъя кафедраен кивалтӥсь, Археологияя но этнографияя диссертациосъя кенешлэн тӧроез, Ижысь мэрилэн тодмо нылкышноослы-тодосчиослы премиезлэн лауреатэз. Удмурт шаерын та адями нырысь ик кылдытӥз зэмос археологъёслэсь школазэс, Уралын � Кам но Ватка улосвылысь археологияя одӥгзэ бадӟым экспедициез. Р.Д.Голдиналэн книгаез йылпумъянъёс лэсьтэ Кам котырысь вашкала калыклэсь улэм- вылэмзэ эскеронын куамын ар ӵоже ужамезлы. Археологиысь, лингвистикаысь, антропологиысь, этнографиысь но мукет удысъёсысь иворъёсъя та ужаз нырысьсэ верамын удмурт калыклэн вашкала но шор дауръёсысь ортчем сюресэз сярысь. Бадӟым саклык висъямын удмурт калыклэн мукет калыкъёсын кусыпъёсызлы. Та ужрадын вераськозы Удмурт Элькунысь Кун Кенешлэн Тӧроез А.А.Волков, Удмурт Элькунысь Кун Кенешысь Наукая, калыкез дышетонъя, культурая но егитъёсын ужанъя ёзлэн тӧроез А.Г.Красильников, Удмурт Элькунысь Кивалттэтлэн Тӧроезлэн воштӥсез физика-математика наукаосъя доктор-профессор. В.Е.Шудегов Удмурт Элькунлэн Кивалтэтысьтыз, Наукая шоро-куспо тодон-валанъя комитетлэн тӧроез химия наукаосъя доктор профессор С.Н.Решетников, Удмурт кун университетлэн ректорез физика- математика наукаосъя доктор профессор В.А.Журавлев, Удмурт кун университетысь этиологияя но релиологияя кафедраен кивалтӥсь история наукаосъя доктор профессор В.Е.владыкин, Ижысь но Удмурт епархиысь диакон кылтодон наукаосъя доктор Профессор М.Г.Атманов, Удмурт Кун университетысь Урал улосысь калыкъёслэн историзыя но культуразыя институтлэн директорез история наукаосъя доктор профессор Р.Д.Голдина. М.НЕМЦОВА. ШӦКЫЧ Бадӟым тау ӟазегъёслы! Пелейӧтон Курег � со тылобурдо ӧвӧл, шуо. Юнме шорысь-а, кыӵе ке но муген-а озьы верало, туэ шонерак валэктон сётыны нокин но уз быгаты ни, дыр. Кытысь тодод на угось со сярысь, кӧняетӥ дауре кинлэн кыл йылысьтыз сыӵе мудрон кылтэчет ньӧл сямен мозмиз но бурдо луиз. Марысь мар ке, оло со йыркурен но верамын ӧй вал. Оло со асьмелэн кион кадь сютэм улэм ӵыжы-выжымы курегез кутыны быгатӥз но ортчыт лӧптэменыз озьы улосвыл тыр кеськиз. Кин тодэ на. Тылобурдоос сярысь мукет но лэчыт веранъёс трос гинэ кагаз вылэ гожтэмын. Соосын сэрен ачим но юмоке сюрылӥ ини. Одӥг пол мон укноетӥ та-а-аӵ! гинэ музэ уси. Кер-кор шокаса, мырдэм но кызьы пукси гинэ но, дортӥм кошкись воргорон гор-гор серекъяса шуэ, тон мар-о лобӟыны озьы турттӥськод-а, мар-а вал, пе. Ка-а-кой лобӟыны, шуисько, кин ке пожа-а-ар! шуыса кеськиз но ӧсэтӥ потонэн йырин ӧй вал ни, пӧй. Воргорон соку ик сэзь кариськиз но таиз мукет ужпум, пе. Ӟазегъёс сярысь шуо: соос Римез утиллям. Мед шуозы. Ӟазегъёс Римез утиллям ке, нош малы куд-ог гуртъёсын улӥсьёс, адямиос, корка котыръёссэс, гидъёссэс, мунчооссэс возьманы уг быгато. Ӟазегъёссы ӧвӧл-а, мар-а? Соку коть атас мед вордозы вал. Атас но чоръяны кутске ке, адямиос шӧдо ук. Соку ик уйшор вуэм ни, ньыль час ӵукна луэм ни, вушйылыса шуо. Атас чоръян пумысен вераськон мугез трос ай. Уката ик "горд атас" пумысен. Та ужпум угось асьмеды воксё кышкыт югдуре вуттӥз ини. Абдралод, ява. Асьме Правительствоын но тылпулэсь утиськон сярысь нимысьтыз кенешон пуромиз. Кызьы уд абдра ӟазегъёслы. Мыжык быдӟа гинэ йыръёсынызы, кырым мында гинэ визьёсынызы соос быдэс Римез сайкато но возьмало. Нош асьмеос, адямиос шуисько, тыква быдӟа йыръёсынымы, кобы мында визьёсынымы асьмеды асьмеос, асьмелэсь лыдъянтэм-мертантэм дуно ваньбурмес утьыны ум быгатӥське. Паймод но бырод. Республикаямы тямыс толэзь ӵоже 1578 пол тылпу потаз. Тдӥськоды-а, кӧня сюрс манетлы изъян усиз? Дас миллион манетлэсь ятыр. Дас миллион! Ай, соин тырмысал вылэм, но кӧня адями бырыны шедиз! Укмыстон адями быриз, сю дас ньыль мурт сӧсырмыны сюриз. Татын гамылак адямиез гинэ янгыше уськытыны уг луы. Эшшо одӥг мугез вань на ай... Юон! Ӟистон! Тордон! Ньылонэз курыт вуэн гылъясьёсын сэрен тылпу гомӟон учыръёс, миым сярысь, кызь ньыль процентлы йылӥзы. Соин ик нимысьтыз бадӟым саклык висъяны косэмын вал гуртын улӥсьёслы, фермеръёслы но шунтон агрегатъёсты ужатӥсьёслы. Ӵем дыръя угось отысь адямиос юэмен сэрен, "горд атас" эрказъяськыны кутске. Берло вакытэ таӵе учыръёслэн лыдзы уката ик будӥз Глазов, Завьялово, Кез, Красногорск, Сюмси, Як-Бодья ёросъёсын. Тылпулэсь утиськонэз ӟеч-ӟеч радъяськод ке, тылпуос но шер луыло. Балезино, Грахово, Кизнер но Шаркан районъёсын берло аръёсы "горд атаслы" маза уг сёто. Курегъёс но ӟазегъёс сярысь кылпум поттылыны оло кулэез ик ӧй вал, но ваньмыз угось огез бордысь мукетыз потэ. Юнме уг шуо, дыр, ӟазегъёс Римез утизы. Улонын уга озьы ик луэ. Чаклась вань ке, укшась но вань. Нош "горд атас" нюлыштэм бере котькӧня кормаськы на. Л.БУРКОВ. 15-ТӤ КОНЬЫВУОН: КУАРАОСМЕС СЁТОМ ПАВЕЛ ВЕРШИНИН ПОННА ВАЗИСЬКОН Шудмы � ас киямы Гажано эшъёс! 15-тӥ октябре быръёмы Удмурт Республикамылы йыр (президент). Ӵапак та нуналэн герӟаськомы калыкмылэсь вуонозэ, югыт нуналъёссэ, мукет калыкъёсын артэ сяськаяськонзэ, йырмес ӝутон вакытъёсмес. Асьмелэсь правоосмес Конституциен юнматон, сӥ-данмес будэтон понна, улонзэс ӧз жалялэ Куӟебай Герд, Трофим Борисов, Иосиф Наговицын но мукет азьветлӥсьёсмы. Соос зол нюръяськизы эрикмы понна, туннэ сое медам ыштэ но вунэтэ. Дунне вылын котькуд калык ас музъем вылаз ачиз кузё луыны тырше. Нош ми, удмуртъёс, маин пӧртэмесь? Малпаськы, удмурт калыке, кинлы куарадэ сётод. Кин тыныд дуно: анай музъеммес яратӥсь, сое узырмытыны, чебер карыны турттӥсь яке солэсь узырлыксэ пазясь, калыкмес ултӥясь мурт-а? Удмурт калыклэн уксёеныз кузьмаськонъёс, созэ яке тазэ лэсьтом шуыса оскытонъёс, огнуналлы пӧяськонъёс тӥлесьтыд йырдэс медам поромытэ. Ойдолэ, президентэ быръёме сыӵе адямиез, кудӥз вордскемын но будэмын удмурт музъем вылын, ӟеч тодэ шаермес но калыклэсь сюлэмшугъяськонъёссэ. Сыӵе адямимы Павел Николаевич Вершинин, удмуртъёслэн дано пизы. Солэн кужмыз вань асьмелэсь улонмес рос-прос радъяны, калык кусыпъёсты уката юнматыны. Эшъёс! "Удмурт кенешлэн" но аслам нимыным ӧтисько тӥледыз 15-тӥ октябре быръёнэ одно ик пыриськыны но куарадэс Павел Николаевич Вершинин понна сётыны. Валентин ТУБЫЛОВ, "Удмурт кенеш" огазеяськонлэн тӧроез. Визьмо политик но усто кивалтӥсь Павел Вершининэз кемалась тодӥсько. Со � дано адями, бадӟым опытэн кивалтӥсь но визьмо политик. Асьме понна таӵе огыр-бугыр но секыт вакытэ эшшо огпол малпаське но куараостэс сётэ бӧлякмы-землякмы Павел Вершинин понна. Гажано дышетӥсьёс, университетэз быдтэмъёс, кинэн ужай, кинэ дышетӥ но вань удмурт калыклы вазиськисько: вань бырйисьёслы вералэ Павел Николаевич сярысь зэмзэ, кыӵе со оскымон, зӥбыт но лачмыт адями. Азьло но берло нуналъёсы мар со сярысь уродзэ, умойтэмзэ веразы � эн оске. Солэсь куд-огез юн кышказ. Оске асьме калыклы. Мон туж зол оскисько, кин удмурт музъем вылын вордскиз, будӥз но юнмаз, со ноку уз вузаськы, асьмелы котьку юрттӥз но юрттоз. Тӥни соин ик Павел Николаевич Вершинин понна куараостэс сётӥды ке, уд янгышалэ. Солы юн оскисько. Роза ЯШИНА, УдГУ-ысь доцент, Удмуртиысь наука удысысь дано ужась. Оскымон президент луоз Гажано бырйисьёс, землякъёсы! Мон, писатель Павел Куляшов, тӥледлы вазиськисько но курисько куараостэс Павел Вершинин понна сётыны. Соин тӥ уд янгышалэ. Мынам солы юн осконэ. Ведь котькуд кунын, котькуд республикаын азьветлӥсь но азьмурт луэ асьсэлэн адямизы. Со ваньмызлы валамон кадь. Кунлэн йырыз кыл кутэ калыкезлэн улэм-вылэмез, азинскемез, культураез понна. Туж тумошо луысал Япониен коми кивалтысал ке, нош Америкаен � ӟуч. Конечно, со юн серемес. Соин ик отысь калык озьы уз лэсьты, палэнысь лыктэм муртэ президентэ уз бырйы. Павел Вершнин � со зэмос лидер, азьветлӥсь, шаермылы оскымон азьмурт-йыр луоз. Павел Вершинин � визьмо но востэм адями, инкуазь узырлыкъёсмес но ваньбурмес тус- тас карыны уз сёты, калык сярысь сюлмаськоз, солэсь улонзэ умоятон вылысь ваньзэ лэсьтоз. Тӥни соин ик куараме сёто Павел Николаевич Вершинин понна. Павел КУЛЯШОВ, писатель. Гажано удмурт нылкышноос! Асьмеос бадӟым кужым. Улон нылкышно бордысен кутске. Ойдолэ, вань мылкыдмес, сазь йырвизьмес, ӵуказе нунал сярысь малпаськеммес возьматомы республикамылы нырысетӥ президент быръёнын. Асьмелы одно ик удмурт президент кулэ. Оскымон, дано адямимы со интые вань. Со � Павел Николаевич Вершинин. Со ас шаерамы вордӥськемын, политика но экономика удысын бадӟым опытэн, кивалтон ужез тодӥсь, гурт улонэз но ужез гажась, валась, калык пӧлын дано адями. Сое удмурт луэмез понна гинэ ум ӵектӥське. Со котыр ласянь тупамон азьветлӥсь. Юнме ӧвӧл ук: ӟучъёс пӧлын но, мукет выжыысь калык пӧлын но со понна дурбасьтӥсьёс трос. Со Россия Федерациын ужаны быгатымон будэм кивалтӥсь, Правительстволэн Тӧроез дыръя Москваын пайдаё ужаз. Президент луыны мылкыд карисьёс ичи ӧвӧл. Кудъёсыз соос пӧлысь кӧлыкуз но ассэ президентэн адӟе ини, нокыӵе кырсь амалъёслэсь уг куштӥськы, пӧяськонлэсь уг возьдаськы, ваньзэ огинэ погмаса калыкез алданы тырше, тужгес но гуртын улӥсьёсты. Мон оскисько: тӥ ваньды ик Павел Вершинин понна куарадэс сётоды, эшъёстэс, бускельёстэс но сьӧрады нуоды. Бадӟым ужлэсь, политикалэсь палэнскыса, собере ӝожтӥськонэ усём: нош ик удмуртъёс ӧз ворме, нош ик соосты палэнтӥзы шуыса. Озьы медам луы шуыса, ваньмылы быръёнэ пыриськоно. Тодады вае: котькуд удмуртлэн куараез дуно луоз 15-тӥ октябре. Галина НИКИТИНА, история наукаосъя доктор, Удмурт нылкышно кенешлэн кивалтӥсез. Юрттоз, гуртэз улӟытоз � Павел Николаевич ӟеч тодэ гурт хозяйствоез: колхозлэн председателез, гурт хозяйствоя министр, Правительстволэн Тӧроез вал. Асьмелэсь сюлэмшугяськонъёсмес гуртын будэм адями гинэ валаны быгатоз. Бырон калэ вуэм гурт хозяйствоез со ӝутоз � солы оскисько аслым кадь ик. Куке Павел Николаевич Правительствоен кивалтӥз, республикамы лизинг амалэн "Доминатор" комбайнъёсты басьтӥз. Ваньмыз адӟе, кыӵе пайдаё ужало соос асьме бусыосын. Али нош ик лизинг амалэз уже куто. Вераме потэ: Ганзалэн Правительствоез ужа Вершинин дыръя дасям программаосъя. Гажано бырйисьёс! Республикамес, гуртэз утён вылысь, куарадэс сётыны курисько Павел Николаевич Вершинин понна. Николай ЧУВАШОВ, "Металлург" совхозлэн директорез, Кун Кенешлэн депутатэз. Шӧкыч Улонысь учыр Пумиськиллям кык врачъёс-психиатръёс но гор-гор серекъяса, кылзэс шеро. Огез юа: - Я мар вылез ини улон-вылонад? Соиз шуэ: - Алигес мон доры одӥг чебер нылкышно пыриз но ассэ мон ужпи шуэ. Ӵыжаське. - Дэймид-а? А маин-о сое эмъяськод? - О-ко-о, пе? Эмъяса улод ай! Мон сое соку ик кытки но табере вылаз ворттылӥсько. Л. Бурков. Обращение фракции промышленников Государственного Совета Удмуртской Республики Фракция промышленников Госсовета Удмуртской Республики была образована для усиления позиций промышленности Удмуртии и решения первоочередных вопросов, стоящих перед этой важной отраслью народного хозяйства. В первую очередь, это дальнейшее увеличение промышленного роста, выпуск нашими предприятиями конкурентоспособной на внутреннем и мировом рынке продукции, решения проблемы задолженности федерального центра перед предприятиями оборонного комплекса, развитие наукоемких и высокотехнологичных производств, создание рабочих мест для жителей Удмуртии. Сейчас, после обнародования концепции программы "Развитие Удмуртии", мы можем сказать, что все те основные цели и задачи, которые ставила перед собой наша фракция, фактически в полном объеме отражены в концепции этой комплексной программы. Очень важно, что в перспективной программе развития нашей республики, которая рассчитана на ближайшие четыре года, одно из первых мест занимают вопросы развития промышленности. Мы также хотим отметить важность того факта, что концепция программы "Развитие Удмуртии" уже была представлена Президенту России Владимиру Владимировичу Путину и получила его одобрение. Ведь для дальнейшего развития промышленности Удмуртии первоочередное значение имеют как поддержка федерального центра, так и усиление горизонтальных связей республики с другими регионами России. Мы целиком и полностью поддерживаем те принципы развития промышленности республики, которые заложены в программе "Развитие Удмуртии". Со своей стороны мы будем всячески способствовать их воплощению в жизнь и готовы предложить свою помощь и поддержку в реализации программы усиления промышленности Удмуртской Республики. Мы также официально заявляем, что мы поддерживаем главу республики, Председателя Государственного Совета Удмуртии Александра Александровича Волкова в качестве кандидата на должность Президента Удмуртской Республики и призываем вас, наши избиратели, поддержать наш выбор! Члены фракции промышленников Государственного Совета Удмуртской Республики: Депутатская фракция "Промышленники и предприниматели" Биганишвилли Гиви Несторович, ОАО "Ижмаш", исполнительный директор - первый зам. ген. дир.; Богомольный Евгений Исаакович, ОАО "Удмуртнефть", генеральный директор; Боровик Юрий Иванович, ОАО "Удмуртэнерго", генеральный директор; Возисов Виталий Михайлович, ООО "Удмуртрегионгаз" зам. ген. дир. по оперативной работе; Галеев Азат Таисович ОАО "Гамбринус", генеральный директор; Галимуллин Валентин Хакимзянович, дир. Глазовских эл. сетей ОАО "Удмуртэнерго"; Горбунов Виктор Дмитриевич, ЗАО "Сарапульская кондитерская ф-ка" директор; Дудин Сергей Геннадьевич, ОАО "Ижевский хлебозавод � 5", зам. директора; Дворцова Жанна Витальевна, Госсовет УР, председатель пост. комиссии по государственному строительству, национальной политике и м/с; Касимов Карим Фаттахутдинович з-д "Металлист" директор; Кацемон Владимир Иванович, ОАО "Уральская нефть", Генеральный директор; Кокорин Михаил Константинович, Госсовет УР, председатель пост, комиссии по законности, общественной безопасности, правам граждан; Кушко Виктор Михайлович, Госсовет УР, председатель пост, комиссии по промышленности, развитию инфраструктуры, формирования товаров и услуг; Лошкарев Григорий Андреевич, ДОАО "Ижмашавто", зам. нач. отдела охраны труда и техники безопасности; Любимов Виктор Николаевич, ЗАО "Научно производственное объединение "Время", генеральный директор; Малюк Михаил Семенович, ЗАО "Сарапульский комбинат хлебопродуктов" директор; Молчанов Сергей Михайлович, ОАО "Редуктор", ген. директор; Мохначев Владимир Александрович, ОАО "Свет", ген. директор; Осколков Андрей Эдуардович, ОАО "Удмуртнефтепродукт" Генеральный директор; Перешеин Владимир Юрьевич, глава адм. г. Глазов; Подсевалов Владимир Анатольевич, ОАО "Удмуртнефть", зам. ген. др. по мат. тех. обеспеч. и соц. вопросам. Нач. упр. пр. техн. обслуж. и комплектации оборудования; Прасолов Алексей Михайлович, Росспецстрой УПР. Стр. � 18, начальник; Семенов Игорь Николаевич, Местное самоуправление г. Можги, глава; Сорокин Николай Борисович, ЛВЗ "Глазовский", директор; Суркин Валерий Сергеевич, ОАО "Продторг", вице-президент; Тарасенко Виктор Дмитриевич, Госсовет УР, зам. председ. ком. по регламенту и орг. работы; Фролов Леонид Кириллович, Госсовет УР, председ. пост. ком. по АПК земельным отношениям природопользованию и охране окр. среды; Широбокова Софья Эльфатовна, Госсовет УР, председатель пост. комиссии по бюджету, налогам и финансам; Шутов Андрей Васильевич, Первый зам. ген. дир. - исполнительный директор ОАО "Удмуртнефтепродукт"; Повышев Николай Михайлович, гл. врач И республиканской больницы; Федорова Фания Марваретдиновна, Госсовет УР, председатель пост. комиссии по соц. политике. Сергей Кириенко: "Оскисько, быръён ортчоз" Нырысь ик, быръёнъёс сярысь. Соос ортчо бере, соиз ини умой. Учыр тупаз бере, мон Волковез гажасько шуыны быгатӥсько. Быръён ортчытэк но кыльыны быгатысал. Тӥ дорын быръён кемалась ӧз ортчы, со (Волков) республикаен эшшо куинь ар кивалтыны быгатысал на, быръёнъёсын герӟаськем секыт ныпъетэз но вылаз басьтоно ӧй луысал. Озьы ке но, республикаын быръён ортче, республика законъёссэ воштӥз. Озьыен, республика та ласянь мукет улосъёслэсь уг висъяськы ни. Россиын парламент амалэн кивалтон тӥ дорын сяна кылемын ӧй вал ни, куке вылӥ органэн кивалтӥз Кун Кенеш. Табере кивалтоз президент, со инты понна ортче шара быръён. Со умой ини. Республикалэн азьланез сярысь федеральной власть синмын учкыса верано ке, вуоноез мед потоз шара ужан бордысь, республика Россия Федерацилэн люкетэз луэ уго. Мукетыз луыны но кулэ ӧвӧл. Кызьы ке быръён законодательствоын, озьы ик экономикалэн вань удысъёсаз но республика быдэсак кутӥз вань луонлыкъёссэ, со луэ Россилэн висъяны луонтэм люкетэз: мед луозы одӥг законъёс, мед луоз огъя улос. Сое ӟеч валало котькудӥз предприятие, республикаысь котькудӥз ужбергатӥсь. Со аслэсьтыз вуззэ, продукцизэ эркын вайыны мед быгатоз республикае, сое эркын вузаны мед быгатоз Россия Федерацилэн котькыӵе сэрегаз (малы ке шуоно, Удмуртиысь уноезлэсь предприятиослэсь вузъёссэс туж вылӥ дунъяло), со татын туж бадӟым инты басьтэ. Удмуртия табере пыре Приволжской федеральной округе. Та пумысен уно юанъёс кылдылӥзы: малы Удмуртия улос Уралысь Приволжьее выжиз? Мынам малпамея, со странамес уката но огазеяны тыршемез возьматэ. Со Удмуртиез Ураллэсь люкыса но Приволжье борды огазеян уг луы, со огъя странаез, солэсь огъя экономиказэ огазеян луэ. Собере котькудӥз адями валаны кулэ, со нырысь ик Россилэн гражданинэз луэ шуыса, собере гинэ со луэ Удмуртилэн улӥсез, Нижний Новгород улослэн, Татарстанлэн, Башкортостанлэн яке Пермь улослэн улӥсез. Озьыен, законъёс ваньмызлы одӥг, сое котькытын огкадь утёзы, дыраз пенсиос тырозы, медициная юрттэт сётозы. Улэ-а со, шуом, Москваын яке Удмуртиын, Киров улосын яке Чувашиын. Отын номыр пӧртэмез луыны кулэ ӧвӧл. Та ласянь Удмуртилэн осконэз бадӟым. Приволжской округысь 15 улосъёс пӧлын республика шоро-куспо интыын мынэ. Со умой. Ма огазея округмес? Россиысь автомашинаосты поттон предприятиос пӧлысь 85 процентэз асьмелэн улосвыламы интыяськемын. Со ВАЗ, ГАЗ но КамАЗ, озьы ик "Ижмаш" но, кытын автомобильёсты поттон выльысь ӝутске. Басьтом му вӧй поттонэз но нефтехимиез. Та удысъя округмы 40 процентсэ басьтэ. Нефть кыскон ласянь но Удмуртилэн кужымез бадӟым - али 7,7 миллион тонна му вӧй кыскиськоды. Нош карта шоры учконо ке, Удмуртилэсь эшшо одӥг узырлыксэ пусйыны кулэ. Республика пыр уно сюресъёс ортчо. Озьыен, уно грузъёс вайыны луоз Азилэн лымшор но шунды ӝужан пал интыосысьтыз, Китайысь. Огъя вераса, Удмурт Республика азьлане йыг-йыг вамышъя. Ортчозы быръёнъёс. Удмуртиен, оло, выль адямиос но кивалтыны кутскозы. Озьы ке но, республика мытэм сюрес вылысьтыз мукет пала медаз кожы, люкам кужымзэ кир-пазь медаз пазя. Визыллы пумит мыноз Туннэ асьмеос котькудмы, кинлы Удмуртилэн улон-вылонэз сярысь сюлмаськон матын но дуно луэ, сылӥськомы быръён азьын, мар луоз ӵуказе? Нырысь ик асьмеос асьмелэсь юаны кулэ, мар луоз азьланез? Нырысь ик асьмеос асьмелэсь юаны кулэ, мар мон витисько ӵуказе нуналлэсь, кинлэн кияз луоз власть? Кыӵе луыны кулэ республикамылэн Президентэз? Берло ум жалялэ-а быръеммы пумысен? Мон туннэ быръён лэсьтӥ ини. Со - Александр Александрович Волков. малы со? Солэн туж бадӟым ужан опытэз - мастерсысен кутскыса, Тӧроен дугдыса. Волков - тыршись солы матын луо ужась адямилэн куронъёсыз. Лэсьтӥськонын ужамез сое кыдатӥз, юн сямо кариз, пуктэм ужпумез быдэстыны дышетӥз. Александр Волков понна ӧвӧл пытсам сюресъёс, тодмотэм югдуръёс но ужпумъёс. Солэн ӟеч ужан амалэз луэ ужпумъёслэсь пуштроссэс котькуд ласянь адӟон но соосты быдэстон вылысь вакчи но ӝог амалъёс сюресъёс, луонлыкъёс утчан. Асьме республика соку гинэ сяськаялоз, куке солэн промышленностез выльысь улӟоз но вылӥ инты басьтоз. Волков аслаз уженыз вылӥ кивалтон удысын ӟеч возьматӥз, та ужпумъёсты быдэстонэз со нырысь интые пуктэ шуыса. Одӥг кивалтӥсь но уз быгаты соин ӵошатскыны республикаын но мукет удысъёсын кылдэм югдуръёсты сэрттон-пертчонэз быдэстонын быгатонлыкезъя. Республикаысь бадӟым предприятиослэн туннэ ужаны кутскемзы - со Александр Александровичлэн сюлмаськемез. Волков - юн сямо адями, визыллы пумит мыныны кышкасьтэм мурт. Со быгатэ котьмае чиданы но вормыны. Дыр умой возьматӥз, солэн ужан амалъёсыз шонересь - вылласянь кужмо властьтэк - со куашкан. Со ассэ жалятэк ужась, котькинэн пайдаё кусыпъёс тупатыны дась мурт. Со - республикамылэн, калыклэн ӟеч улонэз, азинскон понна. Волков - калык куспо улонэз гажась, Удмутилэн патриотэз. Сыӵе сямзэ со ватыса уг возьы. Со сярысь уг верало шат Удмуртиын вань калыкъёслэсь культуразэс азитон сярысь сюлмаськемез. Востэм сямыз но ӝикыт луэмез, ушъяськонэз адӟонтэм каронэз - ваньмызлы тодмо. Чупырес, куронъёсты быдэсъямез, кутскем ужез йылаз-пумаз вуттон сямыз солэн тодмо. Нош кӧня быдэстымтэ ужпумъёс на! Кӧня аръёс ужано на! Асьмеос солы юрттыны куэ! Ижевскысь гажано улӥсьёс республикаысь калыкъёс, ваньдэс ӧтисько 15 октябре быръёнэ пыриськыны но Александр Александрович Волков понна оскемдэс вераны. Мон оскисько - со аслаз тыршеменыз оскеммес уж вылын быдэстоз! Ш. Утешев, Ижысь Думалэн депутатэз, "Ижевск" чугун сюреслэн кивалтӥсез. СВЕДЕНИЯ о поступлении и расходовании средств избирательных фондов зарегистрированных кандидатов на должность Президент Удмуртской Республики (на основании данных вторых финансовых отчетов зарегистрированных кандидатов) � п/п Фамилия, Имая, Отчество зарегистрированного кандидата Поступило средств (в руб) Израсходовано, всего (в руб.) Остаток (в руб.) основные источники поступления сумма всего 1 2 3 4 5 6 7 1. Ануфриев Вячеслав средства Избиркома УР - Николаевич собственные средства 5000 39950 36888 1112 средства граждан 34950 средства юридических лиц - 2. Вершинин Павел средства Избиркома УР 2000 Николаевич собственные средства 83000 средства граждан 179300 784800 634472,12 327,88 средства юридических лиц 520500 3. Волков Александр средства Избиркома УР 2000 Александрович собственные средства 7000 средства граждан - 773980 265680,94 452299,06 средства юридических лиц 764980 4. Ганза Николай средства Избиркома УР - Алексеевич собственные средства 78070 средства граждан 104700 375770 225482,09 287,91 средства юридических лиц 193000 5. Головизнин Леонид средства Избиркома УР - Борисович собственные средства 10 средства граждан 2800 2810 2800 10 средства юридических лиц - 6. Едигарев Андрей средства Избиркома УР 2000 Борисович собственные средства 8000 средства граждан 46300 56300 52146,42 4153,58 средства юридических лиц - 7. Забильский средства Избиркома УР 2000 Владимир собственные средства 71750 Викторович средства граждан - 73750 73434,50 315,50 средства юридических лиц - 8. Кокорин Михаил средства Избиркома УР 2000 Константинович собственные средства 9100 средства граждан 15430 226530 209262,45 17267,55 средства юридических лиц 200000 9. Рудчук Сергей средства Избиркома УР - Васильевич собственные средства 10 средства граждан 2500 2510 2500 10 средства юридических лиц - 10. Солуянов Андрей средства Избиркома УР 2000 Владимирович собственные средства 8000 средства граждан 160000 642000 563760,78 78239,22 11. Тимофеев Владимир средства Избиркома УР - Борисович собственные средства 10 средства граждан 3000 3010 3000 10 средства юридических лиц - 12. Шуклин Сергей средства Избиркома УР 2000 Борисович собственные средства 10710 средства граждан 3000 146710 70710,84 75999,66 средства юридических лиц 131000 ШӦКЫЧ Тэтчатӥз Кышноез руль сьӧрын автомашинаез валтэ. Картэз ӝутскем мылкыдын кузпалэзлы шуэ: � Мусое, оло асьмелы автомашина интые ужпи басьтоно, а? Туж умой ворттӥськод? Соиз ортчыт лӧптыса, пумитаз вазе: � Кин тодэ на! Нылкышноос но адямиос ук, котьма карыны быгато. Кылльыны но ворттылыны но. Нош тон малы нимысьтыз ужпи басьтоно шуиськод? Картэз йырзэ кормаса вазе: � Ма, тынад автомашинаед но ужпи кадь тэтчаса мынэ но соин! Кышноез чик паймытэк шуэ: � О-о-а! Егитъёс люкаськозы Иже 15-тӥ-18-тӥ шуркынмонэ Ижын нырысьсэ ортчоз Россиысь егитъёслэн ӧтчамзы. Соин валче сое радъясь адямиос таяз арняе люкаськылӥзы Удмурт Элькунысь Кун Кенешлэн юртаз. Татчы вуылӥзы Россия Федерациысь Кун Думалэн депутатэз Светлана Смирнова но Россиысь Калыкъёслэн ассамблеязылэн тӧроез Рамазан Абдулатипов. Пумиськонын ивортэмын вал, та ӧтчамлы дасяськонлэн кызьы мынэмез сярысь. Удмурт егитъёслэн "Шунды" дэменлыксылэн тӧроез Татьяна Прокопьева верамъя, иворъёс вуо Россилэн пӧртэм улосвылъёсысьтыз. Ужрадлэн кулэлыкез бадӟым: адямиосты малпаськыто егитъёслэн сюлэмшугъёссы. Малы ке шуоно, элькунмылэн но быдэс Россилэн азьпал улонзы егитъёс бордын. Ӧтчамез дасянъя ужъёс огсыр мыно. "Та ужрадэ мылысь-кыдысь пыриськоз милям "Шунды" дэменлыкмы но", - ивортӥз Татьяна Прокопьева. Галина Савина. Кинлэн вань азинскон программаез? Мынам валамея, котькудӥз кивалтӥсь сюлмаськыны кулэ экономикамес но культурамес азинтыны. Бырйисьёс мед тодозы кытысь коньдон поттыны быгатоз, кылсярысь, президент, мар умойзэ лэсьтоз асьме калыклы. Жаляса верано луэ: чик но озьы уг ужало вылэм Н. А. Ганзалэн юрттӥсьёсыз. Азинсконъя программа сярысь кылпум ик уг потто соос. Кӧня кужымзы тырме сомында пож ву кисьтаса ветло А. А. Волков вылэ. Малы кулэ вал, тодыса но тодытэк, валаса но валатэк, калык пӧлын урод кыл вӧлдыны? Тани Алнаш ёросысен Н. А. Ганзалэн дурбасьтӥсез Л. А. Тимошкин Ляли клубе пырем но люкаськем калыклы чик но кӧбератэк верам: Волков, пе, 23 миллиард манет тыр ю тысез предпринимательёслы люкылэм но, та ваньбур понна коньдон вуымтэ ни. Озьы, пе, йыртэмасьёслы люкылэ асьме ваньбурмес. Гажано Леонид Андриянович! Сокем бадӟым янгыше уськытэмдылэсь азьло турттэ вал тодыны, кин выриз та ю тысез люкылон ужпумен но кудмында вылӥллям ыштонъёс. Мынӥсько Алнаш урамтӥ но, одӥг воргорон мыным вазиське: - Тани тон дурбасьтӥськод А. А. Волковлы. Нош со алнаш музъемез спиртзаводтэк кельтӥз, татчы чаклам заводэз Балезиное пуктӥз. Озьы, пе, шуиз Ганзалэн дурбасьтӥсез. Тазэ но валэктытэк уз луы. Удмурт шаерамы пуктыны чакламын вал кык спиртзавод. Балезиное чакламзэ оскизы А. А. Волковлы, нош Алнаш ёросысьсэ - мукетызлы. Александр Александрович гижысь-пиньысь басьтӥськиз уж борды. Завод туннэ ужа. Кыӵе коньдон чотын пӧрмиз со? Госсоветлэн тӧроез быгатӥз Глазысь ликёр но водка поттон заводэз вытлэсь мозмытыны. Со чотын ик лэсьтэмын спирт поттон завод. Жаляса верано луэ: Алнаш ёросын озьы ӧз пӧрмы. Асьмелы тау карыны кулэ, дыр, А. А. Волковлы ӟеч уж лэсьтэмез понна, нош асьмеос сое пож вуэн пазяськом. Балезиноысь завод пайда вае ни. Кудӟытӥсь юонъёс чотын бюджетмылэсь 20 процентсэ тырмытӥськом, со сяна, уно валюта поттӥськомы на, водкамес кунгож сьӧры келяса. Туж ик потэ ке адямиез пож вуэн пылатэмды, Ганзалэн гажано юрттӥсьёсыз, тыршелэ вал тодыны солэсь зэмос сьӧлыксэ. Утчанын арлыдоосын пумиськимы. Отын Н. А. Ганзалэн мукетыз дурбасьтӥсез, И. Н. Иванов, ӧз чида, пож вуэн пазяськытэк. Таиз быдэс веранзэ газет лыдӟонлы пӧрмытӥз. Гожъямын, кызьы министерствоосысь чиновникъёс коммерцие пыриськиллям. - Озьы бере, - шуэ И. Н. Иванов, - та ужасьёс йыртэмась ёзъёсын герӟаськемын. Та ужпумъя но А. А. Волковез янгыше уськытыны выриз. Кызьы бен ӧд валалэ ни тӥ, гажано Илья Николаевич, министерстоосысь чиновникъёс быдэсъясь властьын ужало шуыса. Н. А. Ганзалэсь азьвыл соосын кивалтӥз П. Н. Вершинин. Нош А. А. Волков кивалтэ закон кылдытъясь властен. Озьыен, таяз учыре оратормы шӧдытэк кылиз П. Н. Вершинин вылэ пож ву пазьгемзэ. Ярам ини, асьсэос тодозы кинлэсь янгышсэ кин вылэ погылляны. Мынам валамея, урод кыл вӧлдыса ветлон - юнме дыр быдтон, ӟеч адямиослэсь мылкыдзэс сӧрон. Сыӵе дыръя лымшор палась калыкъёс шуо: пуны утэ, караван мынэ. Зэм но А. А. Волков уно кужымзэ понӥз ни заводъёсмес азьлань вырӟытон понна. Емышъёссэ туннэ адӟиськомы. "Ижмашез" ке басьтоно, 215 процентлы умойгес ужа со, кылем арын сярысь. Солэсь но золгес азинскемын "Редуктор" ОАО - 473 процентлы, уката умойгес "Ижнефтемаш" ОАО - 551 процентлы. Тазьы чаклад ке, котькуд завод умой пала воштӥськемзэ возьматыны быгатэ. Уже выль технологиос пыӵаны кутскизы. Куашкам производствоез ӝутон понна трос ужано луиз А. А. Волковлы. Асьме республикаын ужез бергатыны шуг, угось заводъёсмылэн 80 процентэз поттэм ваньбурзы ож тӥрлык дуронэн герӟаськемын. Озьыен, Москваын пукись чиновникъёслэн кабинетъёстӥзы уно ветлоно луэ. Сотэк-а Александр Александрович вить ар куспын гинэ 200 пол вуылоно луиз Россилэн шоркараз, 40 пол - Перме, Екатеринбурге, Курганэ, Кирове, Уфае, Казане но мукет каръёсы, угось горизонтъя герӟетъёсыз но сазнано. Мынам малпамея та кусыпъёс уката юнмалозы, малы ке шуоно, Москваысь чиновникъёс туж уно лыдъем корпорация выллем луизы ни. Соослы пумит юн сылыны ӧд ке быгаты, вань байлыктэ капыртозы. Сотэк-а нефтьлэсь коньдонтэк но кельтыны туртто вал асьмемыз? А. А. Волков чурыт кариськемен гинэ туннэ нефтьлэсь коньдон асьме кие вуэ но бюджетмылэсь 40 процентсэ тырмытэ. Н. А. Ганза но умой кивалтӥсь, дыр. Нош мыным ӧз кельшы А. А. Волковлэсь лэсьтэм ужзэ ас вылаз гожтыны турттэмез. Огшоры адямилы но валамон: одӥг ар куспын быдэс республикалэсь хозяйствозэ ӝутыны нокызьы но уг луы. Вить ар но ӧжыт ай сыӵе ужлы. Заводъёслэн директоръёссы тодо, кин юрттӥз соослы ужзэс вырӟытын, соин ик дурбасьто А. А. Волковлы. Валтӥсь производственникъёсын огкыл шедьтыса, республикалэсь куронъёссэ утьыны быгатэ зэмос азьветлӥсь гинэ. Та быръёнъёсын мынам аслам кулэяськонэ вань. Удмурт культуралэн, удмурт калыклэн ӵуказе нуналэз. Быгатозы-а, уз-а асьме егитъёс йылолъёсмес утьыса будыны, яке будозы-а отчы-татчы кир-пазь луыса, палдэм шелеп кадь? Нош Ганзалэн дурбасьтӥсез Л. А. Тимошкин чылкак мукет сямен малпаське вылэм. Пумиськонъёсын тышкаське А. А. Волковез, асьме "Шундылы" бюджетысь коньдон висъямез понна. Кулэ меда пыкылыны Александр Александровичез, удмурт калыклэн ӵуказе нуналэз понна сюлмаське шуыса? Кыӵе но сьӧлыкъёс лякылыны уг выро Н. А. Ганзалэн юрттӥсьёсыз А. А. Волков борды. Асьме Кун Кенешлэн законъёсыз Россилэн законъёсызлэсь пӧртэмгес, пе, луо. Соосыз, пе, федеральной законъёс кадесь ик кароно. Нош та ӵектэмъя лэсьтӥд ке, Россимы федеративной республика уз лу ни ук. Со луоз унитарной общество. Али тани Россилэн ӧвӧл на егитъёслы ужан ласянь законэз. Табере асьмелы возьмаса пуконо-а, ку сое кутозы? А. А. Волков возьмаса ӧз улы. Удмурт Республикалэн вань сыӵе законэз. Со пыр асьмелы ӟеч лэсьтыны тырше. Татын бигеръёслэсь но башкиръёслэсь адӟем каре, асьме суверенитет понна нюръяське. Асьме республикаын одӥгез тужгес но бадӟым осконмы - автозавод. Соин ик А. А. Волков отчы уно кужымзэ понӥз ни. Татын ужез радъян пумысен олокыӵе но амалъёс эскериз. Куашкам ужез ӝутонлэсь йылзэ-пумзэ шедьтыны капчи ӧвӧл. Одӥг гинэ сюресэ ӧз дэмӟиськы. Кылсярысь, чакламын вал Кореялэн заводъёсыныз но герӟаськыны, западысь фирмаосын но кушласькыны. Туннэ дунтэмгес усе "Орбитамес" умоятыны, асьме сюресъёслы но туала куронъёслы тупась юнэсь "Одаос" поттыны. "Нива" выллемъёссэ но лэсьтыны луоно. Азьланяз кунгож сьӧрысь фирмаосын герӟаськыны но сюрес пытсамын ӧвӧл. Ужмы шаплыгес мынысал, Москваысь чиновникъёслэн ӝӧказы ӧй ӝегасалзы ке документъёс. Озьы ке но, таяз арын ик 30 сюрс машина конвейерысь васькоз ни. Нош 2001-тӥ арын та лыдпус кык пол будоз, 2002-тӥ арын 120 сюрслэсь ортчоз. Соку мулак коньдон вуоз бюджетамы. Бюджетмы бусьтыр ке луиз, Удмурт Республикаямы гурт калык но капчигес шокчоз. Угось А. А. Волковлэн кивалтэмез улсын кылдытэм программаын чакламын сӥль, йӧл, вӧй поттӥсьёслы, нянь будэтӥсьёслы юрттыны. Котькудаз азинскем кунын озьы лэсьтӥське. Быдэс Россиысь огшоры калык чотын байкем олигархъёс но соос кие сюрем радио, телевидение, газетъёс гинэ шуо: "Рынокен экономикаын гурт калык но вузкарем чотын гинэ мед улоз". Нош солы дотация сётоно! Малы ке шуоно, ю тысь но, сӥль но, йӧл но - ваньмыз со сырьё. Солэсь дасям сӥён-юонлы дунъёс огсыр мед возиськозы шуыса, гурт калыклы бюджетысь коньдон висъяно. Тае умой вала А. А. Волков. Соин ик "Азинскон" программаяз чакла дотациос. Бусыын но пудо вордон фермаосын ужасьёс чылкак ёрмемын техника ласянь. Тани Дэбес ёросын син шоры йӧтӥз кын улэ гырытэк кельтэм бусы. Техника тырмымтэен валче таӵе мӧзмылэс суред кылдэ уно интыосын. Пудо вордӥсьёслэн ужзы но туж секыт луэмын, машинаос куашкамен йырин. Техникаез выльдонлы программаын бадӟым саклык висъямын. Со сяна, 600 иськем сюресъёс лэсьтон, 960 иськем газ гумыос кыскон гурт калыклэсь улонзэ капчиятоз. Телефонъёслэн лыдзы йылоз. Гурт калыклэсь байлыксэ йылтон понна етӥнэз куинь поллы уногес будэтыны чакламын. Та культуралэсь пӧртэм продукция поттон радъямын луоз. Гурт калыкез туннэ зол шымырто электрокужымен кузёяськисьёс. Монополистъёс медаз эрказме шуыса, кунмы гуртын улӥсьёслы сое дунтэмгес сётоз. Мынам аслам сюлэмы шуг, Москваысь олигархъёс музъеменымы вузкарыны кутскозы шуыса. Быдэс Россиысь качам коньдонэн сое басьтӥзы ке, кин луомы асьмеос ас дорамы? Соиз тодмо ни. Бур кужымъёс но куд-ог мукет партиос кемалась туртто ни музъем рынок шуонэз радъяны. Соослэн валамзыя, муэн вузкарытэк, зэмос рыноке ум потэ. Озьы малпаськид ке, рынок уката но "зэмосгес" луоз, инкуазен но адямиен вузаськыса. Кытчы вуттоз сыӵе "рынок"? Музъемен мед кузёяськоз гурт калык. Сое утьыны кулэ кун. Таӵе осконъёс чакламын "Азинскон" программаын. Тазалыкмес утён понна пуктэмын луоз сизьым больница, куинь поликлиника, кык нылпи санаторий. Асьме калыклэн ӵуказе нуналэз - нылпиосмы бордын. Кин луозы соос, кыӵе сюлмаськонэн улозы, кыӵе культураез асьсэлы пыӵатозы, быгатозы-а вылӥ образование басьтыны? Та юанъёс пумысен "Азинскон" программаын ӝот-ӝот ужрадъёс чакламын. Бадӟым саклык висъямын школалы. 14 сюрс дышетскисьёс 60 выль школа юртъёсы пырозы. Котькудаз луоз компьютер класс. Уноез быгатоз герӟаськыны Интернетэн. Озьы быгатозы дистанционное образование шуонэ пыриськыны. Со асьмелы туж кулэ. Кемалась тодмо ни: гуртын будэм нылпиослэн тодон-валанзы лябгес, городын дышетскем нылпиослэн сярысь. Соин ик университетъёслэн дано факультетъёсазы пырыны шуг йӧтэ. Дистанционной образование юрттоз ӟечесь тодон-валанъёс басьтыны. Нылпиосмес университетъёсы но академиосы дасяны луоз. Программалэн котькуд палыз туж ӟеч малпамын. Соин, дыр, Удмурт кун университетлэн ректорез профессор В. А. Журавлев но сое умоен лыдъя. Программа мыным кельше аслаз зэмлыкеныз. Котькуд лыдпус котыр ласянь бергатэмын но луонлыкъёсмес чакласа пыртэмын. 29-тӥ сентябре А. А. Волков пумиськылӥз В. В. Путинэн. Россилэн Президентэз умоен лыдъяз Удмурт Республикамылэсь азинскон программазэ. Соин ик, дыр, А. А. Волковез оскытыса, сое быдэсъянэ коньдон висъяны кылзэ сётӥз. Угось отысь ужрадъёс огшорыесь ӧвӧл, соос - ӵуказе нуналэз азинтон прграмма. Сое пыр-поч лыдъяса-чотаса лэсьтӥзы экономистъёс, учёнойёс. Удмурт калыклэн, быдэс Удмурт шаерлэн ӵуказе нуналэз сярысь сюлмаськыса дасям ужез сьӧдманы кулэ ӧвӧл. Вань мылэз-кыдэз сётыса, чаклам ужрадъёс борды ӝот-ӝот басьтӥськыса, улонмес бусьтыр, шудо, тазалыко, азинлыко карон бордын тыршоно. Соку удмурт калыклэн но луоз азинскон сюресэз. Котькинлэн аслаз вордӥськем гуртэз, калыкез, школаез мусо но дуно потэ. Кылдэм югдурез валэктыны шуыса, туж потэ вал пыраме Варзи-Ятчи школаям. Отын люкаськемын вал арлыдо кышномуртъёс но воргоронъёс. Соос улонлэсь вань секытсэ ас вылазы басьтэмын. Йӧноесь, чылкыт сюлэмоесь. Данмес но, культурамес но утизы соос. Туж гажасько мон арлыдо удмуртъёсыз. Жаляса верано луэ: Варзи-Ятчи администрацилэн тӧроез Лидия Алексеевна Романова мыным но сӧсыръёслэн огазеяськонзылэн тӧроезлы Л. Е. Васильевлы люкаськемъёс доры пырыны ӧз лэзьы. Марлэсь кышказ меда гажано Лидия Алексеевна? Ми вуыкумы, отын вал ни мукет кандидатъёслэн дурбасьтӥсьёссы. Оло, соослэн ваньзэ ӧвӧл, ӧвӧлзэ вань карыса пож вуэн пазяськемзы шараяськоз шуыса кышказы? Быръёнъёс азьын таӵе амалэн ужан пож технология нимаське. Туннэ отчы мылысь-кыдысь пырисько Москваысь радио, телевидение но куд-огез газетъёс. Малы меда? Валатскыны чик но шуг ӧвӧл. Отысь данакез акциос Борис Березовский киын. Анатолий Чубайсэн ӵош пыро "Союз правых сил" шуон партие. Соослы чик но кулэ ӧвӧл зэмос патриот. Лулчебердэ утись удмурт калыке! Быдэ вуэм егитъёс, кышномуртъёс, воргоронъёс, асьтэос чаклалэ. Рево Разин, Удмурт кун университетысь социолог. Колхозлэн тӧроез � профессор Россиысь естествознаниея академилэн президиумез тодосчи-профессор ним сётӥз Завьял ёросысь "Путь Ильича колхоз-племзаводлэн тӧроезлы Валерьян Никитинлы. Сыӵе вылӥ нимез Валерьян Арсентьевичлы сётӥзы Нижний Новгородысь гурт удысъя академиен но Санкт-Петербургысь научно-агрофизической институтэн юнэсь кусыпъёс воземез, музъем ужын лазерез но магнитэн модулез азинлыко кутэмез, озьы ик наукалы сӥзем ужъёсыз но экономика удысын басьтэм азинсконъёсыз понна. Тодосчи-тӧро тужгес но данэ потӥз толйись ӟегез будэтонын выль амалэз кутэменыз. Кылсярысь, солэн хозяйствояз ӟегез тулыс кизё, йыдыен яке сезьыен ӵош. Нош арало сое вуоно гужемаз гинэ. Озьы ватсаса уг кутӥськы ни удобрение но, шыръяське эстӥськон но, ӟеглэн удалтонлыкез но 2-3 поллы вылӥынгес. Оло мукетъёсызлы но адӟем кароно со амалэз? Н.ИВАНОВ. Кулэ-а асьмелы Ганза? Табере тодмо ини, республикамылы Президент луон понна нюръяськон ортчоз ньыль адями куспын. Одӥгез соос пӧлысь - Правительстволэн Тӧроез Николай Ганза. Быръёнъёс сярысь ялэм бере ик политологъёс но журналистъёс Николай Алексеевичлэсь кивалтон удысын мур тодон-валанъёссэ но быгатонлыксэ вылӥ дунъямен ӵош пусйылӥзы мукетсэ но: сое калык ӧжыт тодэ, соин ик солы секыт луоз вормон понна тырмыт куараос люканы. Соиз зэм: мукетъёсыныз ӵошатыса, Н. Ганза, туж ӵем ӧз поталля телевизор экранъёсы но газет бамъёсы. Нош быръёнъёс азьын государстволэн ваньмыз ивор вӧлмытӥсь ёзъёсыз Николай Алексеевичез нуналысь нуналэ выль кенэз сямен эскерыны ӧдъязы. Курлазы шуид ке, небыт верамын луоз. Сое дэриен сураны, пож вуэн пылатъяны тыршизы. Солэн тусыз вылын одӥг чылкыт интыез но ӧз кыльы ни кадь. Нош зэмзэ ке верано, кин со сыӵе - Ганза, кыӵе солэн зэмос тусбуез? Вордскиз со Казахстанын. Ужаз атомной промышленность удысын, пӧртэм ёзъёсын кивалтӥсь луыса. 1999-тӥ арозь вал Глазовысь Чепецкой механической заводлэн генеральной директорез. Я, тазэ коть калык тодэ, дыр. Нош мар лэсьтӥз ини Ганза Удмуртия понна? Кыӵе инъет со аслыз кылдытӥз президент луон понна? Мар лэсьтэмын? Н. Ганза асьме республикае вуэмез бере ик зол кивалтӥсь луэмзэ возьматӥз. Со Глазове вуыку, Чепецкой механической завод дугдон калэ вуэмын вал. Предприятилэн туж бадӟым пунэмен тыриськонэз люкаськемын, ужасьёс уждун уг басьяло, заказъёс ӧвӧл, азьланяз но номыр ӟечез уг адскы. Выль кивалтӥсьлы вакчи дыр куспын удалтӥз югдурез тупатыны. Зэм, со понна чуыртэсь ужрадъёс кутоно луиз. Тросэз ужасьёс дунтэк шутэтскыны келямын вал, кӧняезлы ке азьтэм мылкыдтэм яке пӧрмостэм кивалтӥсьёслы но специалистъёслы мукет ужан инты утчаны ӵектӥзы. Вакчияк вераса, выль директор заводын юн порядок тупатӥз. Соин ӵош ик выль командазэ заказъёсын пыр-почгес ужаны косӥз. Ужпум сыӵе пуктӥз - поттоно сыӵе гинэ продукция, кудзэ басьтӥсь луоз, быдэсъяно сыӵе гинэ заказъёсты, кудъёсыз понна коньдон тыро. Озьы завод берыктӥз ыштэм данзэ но кужымзэ. Али со пыре Россиысь тужгес но пайдаё ужась предприятиос пӧлы. Нош уждунъёс татын 5 сюрс манетоз но вуо. 1999-тӥ арын тулыс Н. Ганзаез юнмато Правительстволы тӧрое. Завод сямен ик, республикалэн но экономикаез шуге-леке вуэмын вал. Вытъёс уг тырисько, предприятиос тыро-пыдо уг ужало, уждун ӧвӧл, бюджетын тачак пасьёс. Тужгес но секыт югдур вал социальной удысын. Но выль премьер ӧз сёты аслыз юскиськыны, гижысь-пиньысь басьтӥськиз выль удыссэ радъян борды. � Нырысь ик, чутрак кулэстӥз вытъёсты взаимозачёт амалэн тыронэз. Та амал угось кырсь сямо кивалтӥсьёслы но ужбергатӥсьёслы пумтэм луонлыкъёс сётэ вал поттэм пайдазэс выт тыронлэсь ватыны, ужатэк коньдон капыртыны. Та амалэн сэрен бюджетэ 25 процентэз вытъёс уг вуо вал. Вытъёс сярысь веранэз азьланьтыса пусйыны кулэ мукетсэ но. Трос гинэ предприятиос Удмуртиын пайда поттыса пусъемын (регистрировать) каремын вал палэнын, отын ик выт но тыризы. Соин сэрен республика арлы быдэ 1-1,2 миллиард манет ыштон адӟе вал. Озьы асьмеос сизьым ар куспын быдэс арлы бюджетмес ыштӥм. Ганзалэн тыршеменыз та "пась" ӵоксамын вал. Выт тыронэз радъян соку ик шӧдӥськиз шаермылэн улоназ. Кылем тулыс быдтэмын вал бюджетниикъёслы уждун тыронэз ӝегатон. Тырыны кутскизы социальной пособиосты но компенсациосты. Нимаз удысъёсты ке верано, республика выльысь шӧдыны ӧдъяз му вӧй поттонлыклэсь пайдазэ. Озьы ик улӟиз автозавод но. Ваньмыз та вылӥ верам Н. Ганзалэн тужгес но пусйымон ужъёсыз гинэ. Нош нуналысь нуналэ лэсьтэмез, нырысь учкыса, чыры-пырыез кадь, но кудӥзтэк уг быгаты возиськыны экономика, - пумтэм. Котькудӥз кужымез, дырез, юн мылкыдэз кулэ каре. Азьланезлы пусъетъёс Республикаын югдур тупатскыны ӧдъяз ке но, со кутсконэз гинэ ай, самой нырысетӥ вамышъёс. Азьланьын уж пумтэм, быдэстоно ужпумъёс - вераны луонтэм бадӟымесь. Нырысь ик, ӝутоно промышленностез. Но продукция поттоно сыӵезэ гинэ, кудӥз кулэ басьяськисьлы. Кызьы малпа Н. Ганза, коньдонэз сояз яке таяз удысэ ӧръямлэсь азьло рос-прос, котыр ласянь эскероно рынокез, кулэ луоз-а отын поттэм продукция. Та дырозь угось туж трос калык коньдон быдтэмын ини нокинлы кулэ луисьтэм, нокинлы пайда ваисьтэм проектъёслы. Вылаз ик, данакез соос йылаз-пумаз вуттымтэ, чик малпаськытэк дауртэмлы, тяпайтэмлы синпель кельтэмын. Кылсярысь, кӧня миллионъёс куштэмын кирпич но черепица поттон заводъёсты лэсьтонэ! Яке басьтом "Шкода", "Рено", "Форд" но "Фиат" фирмаосын ӵош автомашинаос лэсьтонэн герӟаськем проектъёсты. Коньдон дурыныз кисьтэмын, нош пайдаез - ноль. Калыкез туж но туж керӟегъяськытэ выль "капиталистъёслэн" лыдзылэн будэмез. Ярам, соос асьсэ кужымзы но коньдонзы чотын ваньбур поттысалзы ке. Но олигарх шуонъёс узырлык калык ваньбур чотын люкало ук. Н. Ганзалэн верамезъя, сыӵе луонлык кылдэ акционированиез ярантэм амалэн ортчытонэн сэрен. Та дырозь кызьы со лэсьтӥське вал? 49 процентэз акциос кылё государство кие, 51 процентэз, контрольной пакет, сётӥське предприятилы, коллективлы. Кивалтӥсь предприятиез куашкан калэ вуттэ, ужасьёсызлы уждун уг тыры (амалъёс со понна тачак). Собере палэнысь адямиос пыр ялэ акциос басьтыны мылкыд каремзэ. Ужасьёс, коньдонлы ёрмыса, акциоссэс вузало. Валамон, самой дунтэм дунын, вылаз ик соослы нокыӵе дивидендъёс уг тырисько бере. Озьы кивалтӥсь кие 51 процентэз акциос вуо но со предприятилэн огназ кузёез луэ. Мар лэсьтэмез потэ, сое ик лэсьтэ. Н. Ганза таӵе югдурез быдтыны огшоры гинэ амал ӵектэ: акционирование дыръя 49 процентсэ акциосты кельтоно предприятилы, нош 51 процентсэ, яке контрольной пакетэз, сётоно государстволы. Соку нокыӵе олигарх но предприятиез киултыны уг быгаты. Табере му вӧй сярысь. асьме республика кема аръёс ӵоже бюджетсэ "сьӧд зарни" чотын тырмытъяз. Берло аръёсы инкуазь ваньбурез поттон тачак янгышъёс но йыртэман учыръёс вал. Му вӧй поттон араз 7 миллион тоннаос усиз. Туж тросэз месторождениос аналтэмын. соосты улӟытыса, Н. Ганза малпа му вӧй поттонэж,5 мллион тонналы коть йылэтыны. Кыӵе пайда со сётоз - валэктыны кулэез ӧвӧл. Котькытын сямен ик, гуртын но тачак лэчыт ужпумъёс люкаськемын. Николай Алексеевич соосты туннэ-ӵуказе ик сэрттыны-пертчыны уг лӧпты. Солэн лыдъямезъя, югдурез тупатон понна уно мллионъёсын коньдон но трос гинэ дыр, 4-5 ар пала, кулэ луоз. Тужгес но сюбег инты - техникалы ёрмон. Машинаос но тракторъёс сокем вужмемын, соосты тупатъяны йӧныз ик ӧвӧл ни. Выльзэ басьтыны возёслэн коньдонзы ӧвӧл. Соин ик йылэтоно но кудмоятоно машинно-технологической станциосты. Соослы пыд йылазы султыны капчигес мед луоз шуыса, паськытгес уже кутоно лизинг амалэз. Музъем ужасьёс ӵемысь ӝожтӥсько техникалы, электрокужымлы, эстӥськонлы но удобрениослы вормонтэс дунъёс вылэ. Мар карод дунъёсты кулэстыны туала вакытэ кужмысь косыны нокинэ но уг луы ни. Амал одӥг гинэ - будэтоно продукцилэсь асдунзэ кулэстоно.Гуртын котькытынлэсь но юнгес сюлэмшугъяськыто социальной ужпумъёс. Н. Ганза сое ӟеч тодэ но югдурез тупатыны чакла. Тани асьме шаертӥмы куинь магистральной газпроводъёс ортчо. Озьыен, котькуд гуртэ газ пыртон - со быдэстоно ужпум. Гуртын улӥсьёс умой валало, макем капчиятоз соослэсь улонзэс "чагыр эстӥськон". Жаляса верано луэ, гуртысь кивалтӥсьёс пӧлын но куд-огез адӟем карыны тыршо городысь выль "кузёослэсь". Мукет сямен вераса, калык чотын бусьтыр улыны туртто. Колхозникъёс толэзен-толэзен уждун уг адӟо, нош "йырзы" шыкыс вылем юръер пуктэ, арлы быдэ машина выльдэ, курортын шутэтске. Кыл кутытыны сое уг луы, меӵак уг лушкаськы угось, пӧртэм кескичамалъёсты уже кутэ. Мар ӵектэ Н. Ганза? Со малпамъя, хозяйство умой ужа ке, кивалтсь зэмос кузё ке, солы государство ватсаса коньдон мед тыроз. Озьы ик егитспециалистъёслы улон инты но лэсьтыны мед юрттоз. Соку соос уз тырше ни ужзэс вунэтыса асьсэлэсь улонзэс умоятыны. Котькыӵе удысэз басьты но со котькудӥз адями понна азинскыны куэ. Азинскон ачиз азинскон понна гинэ медам луы, со нуналысь нуналэ пайда мед ваёз. Озьы лыдъя Николай ганза. Сыӵе ужпум со пуктэ ас азяз но, соин артэ ужасьёс азе но. Юан кылдэ: нош малы та дырозь Н. Ганза ӧз быдэсты вань ӟеч амлпанъёссэ, мар солы люкетӥз но люкетэ? Валэктонэз огшоры гинэ. Со угось республикаын кузё ӧвӧл. Со - Кун Кенешен медъям вылӥ чиновник. Мар косэ Госсовет - сое ик быдэсъя. Нош Президент луиз ке, быдэстоз-а меда ваньзэ, мае сӥзе? Ас кылызлы кузё луоз-а? (Кылемез вуоно номерын) Кыӵе адями со, Николай Ганза? Ваньмыз, кин кӧня ке коть тодэ Николай Алексеевичез, огкылысь пусъё: Ганза вераз ке, одно ик лэсьтоз, уг ке оскы, сётэм кылзэ быдэстоз шуыса, кыл но уз сёты. Куд-огез пыкыло сое: ужан амалъёсыз, калыкен ассэ воземез мултэс чурытэсь, пе. Нош туала дыре мукет сямен луэ шат? Асьмеос ик ӝожтӥськиськом ук, нокытын но порядок ӧвӧл ни, ваньмыз асьсэлы гинэ капыртыны но ужатэк ваньбур поттыны яке меӵак лушкаськыны туртто шуыса. Небыт амалъёсын но сямъёсын кивалтыны та вакытэ уд быгаты. Веранэз ӧвӧл, туж умой вылэм, чеберъяськыса, ӧвӧлтэмзэ вань карыса, быдэстонтэмзэ сӥзьыса, аслыд дан люканы. Яке выль школаез, больницаез, сюресэз усьтонын лемлет лентаез качыен вандыны, ачид со объектэз лэсьтон понна чиньыдэ но ӧд ке но вырӟыты. Николай Ганза мукетъёсыз сямен арнялы быдэ уг чеберъяськы телевизор экранын, уг ушъяськы лэсьтымтэ ужъёсыныз. Со кыштыр гинэ, данъяськытэк нуналысь нуналэ ужа. Нош солэсь пайда поттэмзэ куд-огез вань калык азьын ас вылазы каро. Автозавод улӟытэмын Николай Алексеевичлэн сюлмаськеменыз. А. Волков шуэ: милемлы, пе, удалтӥз... Ганза радъя выт тыронэз. Волков ивортэ: ми, пе, быгатӥм.. Дышетӥсьёс но медикъёс дыраз уждун басьтыны кутско Правительстволэн тыршеменыз. Волков данъяське: ми, пе, юрттӥмы... Паймоно кадь, кин ке ужа, нош кин ке данзэ киултэ. Зэмзэ вераса, А. Волковлэн кивалтэмысьтыз одӥгез гинэ тодэ лыктэ. Кызьы со дугдылытэк Москвае лобаз коньдон тэльмырыны, я вылӥ кивалтӥсьёсын эшъяськемзэ возьматыны. Нош кӧня изъян ваиз со асьмелы пӧртэм кичӧлтонъёсыныз лэсьтӥськонын (кирпич поттон завод), му вӧй поттонын ("Сиданка" но "Сэмсон" компаниосын герӟаськем проектъёс), сиён-юон поттонын (Сиён-юонъя удмурт корпорация пыр), автомашинаос поттонын ("Форд", "Хюндай", "Шкода"), соиз сярысь тодаз уг вайылы. Кытӥяз малпан лыктэ: А. Волков чик уг малпаськы, кыӵе пайда вае со республикамылы аслаз кивалтэменыз. Со понна кивалтон гинэ мед луоз, власть власть понна. Таиз ини висёнлы укша. Власть понна жугиськонын Александр Александрович нокыӵе амалъёслэсь но уг юрды. Солэн оскымон телерадиоканалъёсыз но газетъёсыз кызьы гинэ уг сьӧдмало мукет кандидатъёсты. Соос пӧлын - Ганзаез но... Янгыш-а Ганза? "Удмуртия" ГТРК, "Удмуртская правда", "Известия УР", "АиФ Удмуртии" но куд-ог мукет газетъёс Николай Ганзаез янгыш каризы: со, пе, Удмуртие кунгож сьӧрысь ядерной отходъёсты вайыны турттэ. Жаляса верано луэ, куд-огез лыдӟисьёс оскизы та пӧяськонлы. Ма, зэмзэ тодыны но соослы нокытысь угось, малы ке шуоно, ваньмыз ивор вӧлмытӥсь государственной ёзъёс ужазы но ужало Ганзалы пумит. Кыӵе нош зэмос югдур? Николай Алексеевич ноку но ӧз туртты ядерной отходъёсты асьме доры вайыны. Соосын татын номыр карыны уг луы. Чепецкой механической заводын отходъёсты мукет арберилы пӧрмытыны чаклам технологиос ӧвӧл, уз но луэ. Соос вань Челябинскын но Сибирьын гинэ. "Известия Удмуртской Республики" газет аслэсьтыз пӧяськонзэ зэмлы туслан карон вылысь чӧлске кӧня ке депутатъёслэн (соос пӧлын Н. Ганза но) ядерной отходъёсты Россие ваён пумысен Кун Думае сётэм кичӧлтонзы вылэ. Но та документын пал кыл но ӧвӧл поттылэмын ук Удмуртия сярысь. Н. Ганзаез озьы ик янгыш каро Б. Березовскиен эшъяськемез понна. Ку, кытын соос эшъяськизы, ӵош ужазы яке сиизы-юизы, таиз сярысь но номыр уг верало. Озьыен, юнме супыльтон гинэ со ваньмыз. Н. Ганзаез пыкыло ини, нылыз Америкаын дышетске шуыса. Но Николай Алексеевич сое отчы республика чотын ӧз келя. Нылыз ачиз, аслаз визьмыныз но быгатэменыз конкурсын вормыса, США-е дышетскыны мынӥз. Озьы ик Н. Ганзаез янгыш каро, солы центральной газетъёс дурбасьто шуыса. Нош кин солэсь данзэ утёз на, асьме газетъёс одӥг адями вылэ гинэ ужало бере? Туннэ шуг вераны, вормоз-а, уз-а Николай Ганза быръёнъёсын. Туж бадӟым кужым угось кутэмын солы пумит нюръяськонын - телевидение, газетъёс, коньдон, интыосысь кивалтӥсь ёзъёс но... кырсь амалъёс. Николай Алексеевичлэн осконэз - зэмзэ тодӥсь дунъясь адямиос но аслаз юн мылкыдыз. Туж жаль луоз, со ӧз ке луы президент. Азьвылэз ик кужымъёс вормизы ке, нокыӵе выльдӥськон асьме доры уз вуы, озьы ик уломы данзэ ыштэм уллёын кадь. Нош Ганза кадь сайкыт визьмо, юн мылкыдо но чылкыт сямо кивалтӥсьёс шаерысьтымы кошконо луозы. Кулэ-а со асьмелы? Г. Тихонов. Вордскемзэс та нуналъёсы пусъё: Красильников Алексей Геннадьевич - Кун Кенешысь комиссиен кивалтӥсь; Еременко Алла Васильевна - Правительствоысь комиссиен кивалтӥсь; Кузелин Леонид Герасимович - Ижысь СПИД-эн нюръяськонъя центрысь эмъясь, "Удмурт дуннелэн" авторез; Бурчин Валерий Дмитриевич - "Удмурттелеком" акциосын огазеяськонлэн валтӥсь директорезлэн воштӥсез; Тихонов Валерий Иванович - Пичи Пурга районысь Аксакшур гурт администрацилэн йырыз. АРХИВЫСЬ ДОКУМЕНТЪЁСЪЯ УДМУРТИЯ ХХ ДАУРЕ 1948-тӥ ар Февраль толэзе усьтӥськиз Россия Федерациысь калыкъёслэн нырысетӥ тол спартакиадазы. Тужгес зол нюръяськемзы бере, куАС сюрес вылын Удмурт шаерысь спортсменъёс кыкетӥ интые потӥзы. Соосты азьпалтӥзы Москва улосысь эшъёссы гинэ. Нош Ленинградын гимнастикая ӵошатсконъёсын Удмуртиысь пинал гимнастъёс басьтӥзы куинетӥ инты. Та толэзе ик Москвае люкаськылӥзы быдэс Россиысь кырӟасьёс-верасьёс. Та ужрадэ пыриськизы Пичи Пурга ёросысь "Юж-Пурга" колхозысь адямиос но. Ӟеч дунъет басьтыса, удмуртъёс устолыксэс возьматӥзы на ужрадэз йылпумъясь концертын. Таиз ортчиз 25-тӥ феврале Бадӟым театрын. "Сталин сярысь кырӟанэз" хор быдэстӥз удмурт кылын. Нылпи юртъёслы сӥзем ужрадэ ветлӥз Каракулиноысь С.Я.Певзнерлэн кивалтоно коллективез. Дышетон но валэктон ужез радъянын каракулиноос басьтӥзы нырысетӥ инты. РСФСР-ысь Калыкез дышетонъя министерство Каракулиноысь нылпи юртлы Данъян грамота сётӥз, нош кӧня ке визьнодасьёслы � коньдон премиос. "Артеке" 1948-тӥ арын вуылӥз Ижысь дас куинь дышетскись. Ижын Октябрь революцилэсь нимзэ нуллӥсь клублэн интыяз лэсьтӥськыны кутскиз культура дворец. Ӟеч азинскиз шаерысьтымы промышленность. Ижысь андан ӵыжатӥсь завод поттыны кутскиз векчи лента (азьвыл сое кунгож сьӧрысь ваё вал). Ижысь машина лэсьтӥсь заводлэн мотоциклъёс поттон люкетаз вуттэмын мотоциклъёслэсь куд-ог ёзъёссэс лакен буянъя юрт. 1948-тӥ арын Ижысь мотозаводын нырысьсэ поттэмын туж тодмо АК-47 автоматъёс. Собере та ужез оскизы машина лэсьтӥсь заводлы. Воткалась машина лэсьтӥсь заводын дасямын интыысь интые выжылӥсь электростанцилэн вылтусыз. Сарапулысь Ф.Э.Дзержинский нимо заводын пуктэмын кислород станция. Заводэз мозмытӥз со кислородэз мукет улосъёсысь ваёнлэсь. Газетъёс пачылмизы кӧня ке арлы чаклам ужъёсты дырызлэсь вазь быдэстэм сярысь иворъёсын. Со сяна, 10-тӥ феврале печатласькиз ВКП(б)-лэн ЦК-езлэн Вано Мураделилэн "Великая дружба" операез пумысен постановлениез. Отын крезьгурчиослэн С.Прокофьевлэн, Д.Шостаковичлэн, А.Хачатурянлэн ужъёссы калыклы ярамтэен ылдъямын. Выль амалъёсын ужась крезьгурчиосты газетъёс тэрганы ӧдъязы. Колхоз тӧроослэн школаязы ветлӥсьёс, кылсярысь, "Удмуртская правда" газетэ гожъязы: "...Дмитрий Шостакович, Сергей Прокофьев выллем крезьгурчиослэсь ужъёссэс кылзыса чабкиськиськод: ма та таӵе?! Амалтэк малпаськыны ӧдъяськод: крезьгурчиосмы чылкак вунэтӥзы ни шат ӟуч классикаез? Ми, музъем ужасьёс, кемалась витиськомы ни крезьгурчиосмылэсь колхоз ужысь азьмынӥсьёс сярысь ӟеч операзэс..." Секыт кылъёс кылоно луиз удмурт крезьгурчилы Н.Греховодовлы но. Солэн "Надгошур" но "Камит Усманов" спектакльёслы крезьгуръёсыз валантэм шуэмын вал. "Правдаез" лыдӟисьёс газетэз 29-тӥ июне усьтӥзы но чылкак чабкиськизы: толон гинэ ай Югославилэсь кивалтӥсьсэ маршалэз Иосиф Броз Титоез шуылӥзы ужась калыклэн эшез но солэн шудэз понна нюръяськись, нош туннэяз печатласькиз Европаысь тямыс коммунистической партиослэн иворъёсъя бюрозылэн Югославиысь Коммунистической партиын югдур сярысь резолюциез. Иворъёсъя бюролэн кыкетӥ резолюцияз меӵак шуэмын вал: "Югославиысь компартиын � адямиез виисьёс но шпионъёс". Та учыр ик луонлык сётӥз Югославиен кусыпъёсты уродмытонлы. Зэм, ваньмыз ик урод ӧй вал. 1948-тӥ арын 20-тӥ июне Ижын выльысь усьтӥськиз культурая но шутэтсконъя С.М.Киров нимо парк. Солы инъет кылдытэмын вал ай 30-тӥ аръёсы. Зэм, быдӟым тылож дыръя юртъерлэн ог люкетэз чылкак ярантэм луиз, нош писпуосты коразы. Ижысь дас вить сюрслэсь трос адями пыриськиз паркез тупатъянэ-выльдонэ. Андан кисьтӥсь завод дасяз ӟечыранъёс, тупатӥз ву кисьтӥсь гумыос, мотозавод выльдӥз Вож театрез, механикая завод � нылпиослы чаклам шудон интыез, машина лэсьтӥсь завод � парке пырон капкаосты, кенерез но эктон интыез. Бер ӝытозь чузъяськизы духовой оркестрлэн крезьгуръёсыз. Парк выльысь луиз Ижын улӥсьёслэн яратоно шутэтскон интызы. Н.ПУШКАРЁВА, Удмурт Республикаысь Кун архивлэн директорезлэн воштӥсез. Кырӟа-вера Пичи Пурга ёросысь "Юж-Пурга" колхозысь ансамбль 1948-тӥ ар. Кышкыт югдурысь репортаж Кӧлано на-а сад-бакчаын? Таӵе юанзы кылдӥз "Теплоэнергетик" массивысь уноезлэн сад-бакча возисьёслэн. Со Ижысь 2 номеро ТЭЦ-лэн, отын ужасьёс ик луо сад-бакчаослэн но пуктэм коркаослэн кузёоссы. Ортчем кӧс нуналэ, ӝыт палгес аслаз алигес басьтэм ГАЗель машнаеныз сад-бакчае Паша огназ вуиз, арня нуналэ мунчозэ эстыса, бускельёссэ ӧтьыны малпа вал. Ӝытме шуыса, со ӝоггес басьтӥськиз бакчазэ гудыны. Пеймыт луытозь, пӧсяса ик ужаз. Пашалэн вань семьяез, будэ нылыз. Со пор пиосмурт. Ас кылзэ тодэ. Ужаны яратэ, маиз ке вань, котьку шори люкыны дась, кирпичсэ яке шиферзэ пунэмен сётэ. Соин но сад-бакча возись бускельёсыз сое гажало. Нош таяз уе тани мар вал. Ымныръёсазы маскаосын ньыль кузя йыртэмасьёс корка вадьсаз урамын сылӥсь машинаезлэсь ньыль часын уин укнозэ пилё, ӧссэ усьто, капотсэ ӝуто, аккумуляторзэ лушкало, кык азь поглянъёссэ пасяса кельто. Шырмачъёс таин уг буйгастко. Кыкез урам пал укноетӥ корка пырыны туртто, кыкез корказь ӧсэтӥ. Ӧсэз усьтыны быгатытэк, укно рамаез тӥяло но корказе пыро. Кӧлӥсь Паша сайка, со дыре огез шырмач укноетӥ йырзэ чуртна ни. Паша ӧсэтӥ кыре потэ, ӧс дорысь огез бандит солэн йыраз ожон выллем арбериен шукке. Одӥгнад ньыль муртэ уд вормы. Паша мырдэм нюлэскы пегӟе, огез йырвандӥсь сьӧраз уиське, но куакъёс пӧлысь сое уг шедьты. Куазь али мускыт но салкым улэ ни. Озьы Паша куинь час ӵоже нюлэскын ватскыса улоно луэ. Собере мынэ сторожъёс доры. Но отын телефонзы уг ужа, милициез ӧтьыны луонлык ӧвӧл. Сизьым час бере тодмо луэ: Пашалэсь радиомагнитолазэ лушкаллям. Кык ласянь ик укноос пильылэмын. Ӧс бордын но, выж вылын но, корказьын но - вир. Кин тазьы дауртӥз? Котырысь адямиос паймемын, уж дугдэмын, вань вераськон - йыруж сярысь. Шеде фельдшер, Пашалы юрттэт сётэ, сое бускелез машинаеныз городэ нуэ, отын йыркузэ вуро. Вань калык куре милициез ӧтьыны. Пашалэн эшъёсыз, тае тодыса, ӝогак гинэ юрттыны вутско, машиназэ тупатъяло, аккумулятор вутто. Нош аслазэз таки уг шедьы. Пересь кышноос вӧсясько. Инмар коть бандитъёсты кутыны мед юрттоз вал шуыса. Иське, кызьы ветлод на сад-бакчае? Уез кӧлыны кышкыт, лушкаськем гинэ ӧвӧл, виыса кельтозы. Инмар кылэм, лэся, вӧсяськисьёсты, бандитъёс машинаенызы бекмыльскиллям. Кельтӥллям соос машина вӧзазы лушкам магнитолазэс но, Пашалэсь куртказэ но. Соку гинэ тодмо луиз, куртка но лушкаллям вылэм шуыса. Нош сюрес вылысь патрульной службалэн ивортэмезъя, бекмыльскем машина ышемен уг лыдъяськы, солэсь кузёзэ соку ик тодӥзы. Следствилы кыле на шырмачъёсты кутыны но пуктыны. Кырсь ымныръёссы вылэ маскаос тыриллям ке но, чиньы пужыоссэс но пыдкутчан пытьыоссэс соос тросэтӥ кельтӥллям. Нош суд ини дунъет сётоз, кызьы кыл кутытоно та шимес учырез радъясьёслы. Тае тодыса, ӝыт пал "Теплоэнергетикысь" сад-бакча возисьёс ӧжыт буйгатскизы. Азьланяз, пе, уйлы сьӧрамы пыӵалъёсмес басьтомы, мукетъёсыз кӧня ке кузя кӧланы чаклало. Нош Пашалы, валамон, мунчояз париськыны ӧз кылды. Пӧсь вал солы сюлмаськон но куректон ласянь гинэ. Котьма ке но, органъёсын ужасьёслы юнгес басьтӥськоно калыклы дурбасьтон ласянь. П. Скобелев. БЫРЪЁНЪЁС БЕРЕ Куаразэс чурытасьёс йыло Республикамылы президент нырысьсэ бырйиськомы бере, малпан вал, калык мыло-кыдогес кариськоз но быръёнъёсы тросгес адями пыриськоз шуыса. Собере кандидатъёс куспын нюръяськон но туж огыр-бугыр мынӥз, куд-огез, бырйисьёсты асьсэ пала берыктон понна, уже кырсь амалъёсты но кутыны ӧз возьдаське. Оло, соин ик уноез бырйисьёс кин ке понна куаразэс сётыны ӧз ик малпалэ. Асьме калык укыр бугыръяськонэз уг яраты угось. Ижевскысь "Буммаш" микрорайонын быръёнъёсъя ньыляз участокъёс артэ ик интыяськемын: 33 номеро Лермонтовской, 34 номеро Удмуртской, 35 номеро Интернациональной - 52 номеро школаын, 36 номеро Лесной - 2 номеро ТЭЦ-лэн общежитияз. Котькуд быръёнъёс дыръя ик вуылыны кылдылэ та участокъёсы, ачим но куараме сётылӥсько соос пӧлысь одӥгаз участокын. Комиссиослэн кивалтӥсьёссы татын берло кӧня ке аръёс ӵоже уг вошъяськыло ни. Соин ик куд-ог ӵошатонъёс но лэсьтыны луоно. - Азьвыл быръёнъёсын ӵошатоно ке, номыр ик аспӧртэмез ӧвӧл, - шуэ 36 номеро участокысь комиссилэн председателез Т.В.Задорина. - Ваньмыз огсыр мынэ, бырйисьёс но чакласьёс ласянь ӝожтӥськонъёс ӧвӧл. Нош лыдпусъёсты учконо ке, 18 часлы 43 процентэз бырйисьёсмы куаразэс сётӥзы. Азьвыл быръёнъёсы сярысь ог кызь процентлы ӧжыт со. Мукетъёсаз но участокъёсын югдур та выллем ик. Быръёнъёс йылпумъяськытозь, час но ӝыны кылиз на, нош куаразэс сётыны мылкыд карисьёс одӥг-ог гинэ вуо. Та дырлы ньыляз ик участокъёсын 40-44 процентэз бырйисьёс куаразэс сётӥзы. Мартэ ортчем быръёнъёсы сярысь ог 18-20 процентлы ӧжыт со. Дырызлэсь вазь куаразэс сётэмъёс но трос ӧвӧл, быдэн 6-8 мурт. - Кызьы тӥ валэктысалды адямиослэсь быръёнъёсы мылкыдтэкгес пыриськемзэс? - юасько 33 номеро Лермонтовской участокысь комиссилэн председателезлэсь А.Ф.Каревлэсь. - Кин азьвыл ветлӥз, со ик туннэ но лыктэ бырйыны. Мыло-кыдоесьгес пенсионеръёс но шор арлыдъемъёс. Туж ӧжыт лыкто егитъёс, - вера Александр Фёдорович. - Нош кызьы валэктод? Кандидатъёс трос луо берло дыре. Соослэн штабъёссы ужало, кызьы шуод, одӥг пала берыктӥськыса, бырйисьёсты асьсэ пала берыктыны малпанэн. Нош калык пӧлын рос- прос ужась али ӧвӧл, ӝуткась-косӥсь ӧвӧл бере, адямиос бырйыны правозэс кулэен но уг лыдъяло ни, шӧдске. - Александр Фёдорович, берло дыре трос вераськонъёс ветло, комиссиослэн ужазы алдаськонъёс луыло шуыса... - Кыӵе ке одӥг учыръя гинэ ваньзэ мертаны уг яра. Милям ваньмыз чылкыт. Собере - ваньмыз син азьын. Котькуд кандидатлэн чакласьёсыз вань, соос ваньзэ адӟо, номыре ум ватӥське. Собере комиссимылэн 15 членъёсыз пӧлысь 6-ез общественной движениослэсь но партиослэсь быръемын. Соос но ваньзэ туж сак чаклало. Ваньмыз потоз бырйисьёс, соослэн мылкыдзы бордысь. Мар бен, вылӥ верам участокъёсын быръёнъёс ортчизы. Нош йыре таӵе малпан кыле: асьмеос ке ӧм, кин кылзэ вералоз асьме понна? Бырйыны правомес но ум кутӥське бере, ялан ӝожтӥськыса улом ни-а, мар-а "вань калыкен" быръемъёс вылэ. Н.КОРЯКИН. Йырдэс ӝутэлэ, удмуртъёс! 10-тӥ коньывуонэ (октябре) "Аксион" культура дворецын удмурт эстрадаысь кизилиослэн концертсы ортчиз. Ӝытэз усьтӥз модая театр, бӧрсязы шулдыр кырӟаса потӥзы "Зарни шеп" ансамбльысь кырӟасьёс. Аслэсьтыз кырӟанъёссэ кузьмаз крезьгурчи эстрадая "Шулдыр ӝыт" ансамбльын кырӟась Наталья Матвеева. - Ой, нылдыр, нылдыр, Тон - ческыт уйвӧт, Ку ортчид, кошкид - Мон сое ӧй шӧд? Нылдырзэс тодазы тазьы ваизы Ольга Зорина но Алефтина Корепанова. - Нош али татчы потоз Драмая удмурт кун театрысь туж тодмо артистка, но нокинлы тодмотэм кырӟась, - ӝытэз нуись Сергей Сава сцена вылэ тазьы ӧтиз Валентина Бекмановаез. - Ой, кыӵе яратӥсько мон тӥледыз, - учкисьёс азе потӥз Любовь Быкова. Тук-тук-тук! шуккиське ук, Ныл сюлэм жугиське ук, Тук-тук-тук! йыгаське со - Тон доры куриське. Жугиськизы ик, дыр, пиослэн сюлэмъёссы, Любаен ӵош залын эктыкузы. Нош Игорь Перевозчиков но Владимир Мальцев кырӟаку, нылъёслэн киоссы чабыса пульдылӥзы. Озьы ик - Алексей Ложкин сцена вылэ потыку но, отысь кошкыку но. Вис ялэм бере, "Инвожо" калык ансамбль тэк пукыны ӧз чида - люкаськем калыкез эктытӥз. Сергей Савалы пӧсяно ик луиз, залысь вуэм гожтэтъёсты лыдӟыса. Учкисьёс ог- огзэс ӟечкыланы дыртӥзы. Татын тужгес висъяськизы пургаос. Учкисьёслэсь мылкыдзэс ӝутӥзы на Галина Платонова, Геннадий Ганьков, Валерьян Исламгареев. Нош Геннадий Бекманов, кык кырӟанзэ кузьмаса, арганзэ кутытэк ӧз чида. Соку ини "кисьтӥськизы" туж тодмо такмакъёсыз. Ми сьӧрын ӟучъёс пуко вал. Огез кышномурт шуэ: "Мар кырӟамзэс уг валаськы, но мылкыд ӝутӥське, кылзэмъя кылзэм потэ". Туннэ мон гинэ ӧй кырӟа на шуыса, микрофонзэ кутӥз Сергей Сава. Гажанэзлэсь нимзэ тодаз вайыны тыршыса, нылъёсты бырйиз гинэ - Параска-а, Маланья-а, оло, воксё Попадья-а, пе, вал. - Йырдэс ӝутэлэ, удмуртъёс, - таӵе кырӟанэн вань аристъёс йылпумъязы та ӝытэз. Галина Савина. БЫРЪЁНЪЁС БЕРЕ Нюръяськон быриз, азьпалан огсыр улон Быръёнъёс азьын шаерамы югдур пӧзись пуртылы укша вал. Президентэ кандидатъёс пала дурбасьтӥсьёс куспазы зэмос ожын кадь жугиськизы шуид ке, со бадӟыматыса верам уз луы. Толон улон азьвыл ӧраз пыриз, шуыны луоз. Кызьы табере тодмо ини, Удмуртилэн нырысетӥ президентэз луиз Александр Волков. Валамон, мукет кандидатъёс пала дурбасьтӥсьёсты таӵе югдур уг шумпотты. Куд-огез (оскем потэ, тросэз) куашкам осконэнызы мултэс кайгырытэк люкиськозы. Нош мукетъёсыз кема ӵашетозы на, дыр, Волковлэсь командазэ кескич но кырсь нюръяськон амалъёсыз понна янгыше уськытыны турттозы. Но зэмзэ ик-а меда Волков ярантэм амалъёсын вормиз? Таизлы шуг оскыны. Ярам, со мукет кандидатъёсты 2-3, мед луоз 5 процентлы ортчысал ке, соку быръёнъёсъя комиссиослэсь сьӧлыкъёссэс утчаны луоно вылэм. Нош татын вормисьлэн "песьтэрез", сьӧраз сылӥсь кандидатлэн сярысь, ог 15 процентлы (нырысетӥ йылпумъянъёсъя) секытгес. Кыӵе ке пӧяськон сярысь таӵе дыръя вераськыны уд дӥсьты, дыр. Озьыен, калык ачиз бырйиз Александр Волковез. Туж-а урод со? Котьма мед шуозы солэн тушмонъёсыз но, нюръяськонлэн тазьы быремез республика понна самой кышкытэз ӧвӧл, дыр. Нырысь ик, калык тодэ ини Волковез кивалтон ужын, дышемын ини солы, тодэ, мар солэсь витьыны луоз. Озьыен, матысь ньыль ар ӵоже асьмеды уз шугъяськытэ чутрак кожылонъёс, витьымтэ но малпамтэ выльдӥськонъёс но воштӥськонъёс. Вылаз ик, берло дыре республикаямы улон ӧраз пыриз кадь ини. Али та сюресэз огсыр азьланьтоно гинэ, нырысь ик ӝутоно но юнматоно экономикаез. Со дыре ик ӧвӧл вунэтоно А.Волковлэсь быръёнъёс азьын сётэм кылъёссэ но, шонергес вераса, солы тодаз вайытоно ваньзэ, мае со сӥзиз вал кандидат дыръяз. Келям кандидатъёс сярысь но чутрак, огвыллем уродзэ гинэ вераны уг луы. Тырмыт куара ӧз ке но люка кандидат, сое пӧрмостэм кивалтӥсен но ярантэм адямиен лыдъяны уг луы, дыр. Нокин но уг мыны ук президентэ, аслаз калыкезлы изъян ваён вылысь. Соин ӵош ик кыӵе воштӥськонъёс вайысалзы соос асьмелэн улонамы? Одно ик-а пайдаёзэ гинэ меда? Сое рос-прос валэктыны уз быгатэ, дыр, асьсэос но кандидатъёс. Ярам, соос синмаськымон программаоссэс быдэсъяны тыршозы. Но республикаен кивалтонэ выль адями вуыса, нокызьы но уз луы кивалтэтын но ужан амалъёсын воштӥськонъёстэк но. Кин тодэ, кӧняез министръёс, директоръёс, редакторъёс но мукет кивалтӥсьёс "лобысалзы"? Кӧня коллективъёс шуге-леке вуысалзы? Одӥгез гинэ умой тодмо: Президентэ мукет адями луысал ке, республикаын нырысетӥ паларзэ-арзэ огсыр улон но ужан интыя, лэчыт югдур, огыр-бугыр вырон пӧрмысал. Кинлы со кулэ? Нош али асьмелы ваньмылы, сэзъяськон мылкыдъёсмес мышкамы кельтыса, быръёнъёсын сэрен уретэм ужъёсмес кыштыр гинэ азинтоно. Ӝоже кылемъёслы нимаз ӝожзэс пачкатоно. Тон астэ политикен лыдъяськод ке, аслад будонэд сярысь гинэ эн сюлмаскы, вань калыклэсь кулэяськонъёссэ лыдэ басьты. Нош пунэмзэ берыктон сярысь малпаськыны кулэез ик ӧвӧл. Республикамы пумтэм, ноку быронтэм быръёнъёсын улыны кулэ шат? Ӟучъёслэн со пумысен визьмо веранзы вань: жугиськон бере мыжыкъёсын уг шонало. Ватсалом, быръёнъёс бере но. Д.ИСАЕВ. Кивалтӥсен кенешон Юрий Шестаков "Мажес вылэ эн лёгиськы" Шаерамы таӵе тодмо, визьмо но кышкасьтэм кивалтӥсьёсмы трос ӧвӧл. Соос пӧлысь одӥгез - Юрий Шестаков, "ИЭМЗ "Купол" огазеяськонлэн валтӥсь директорез. Бадӟым промышленной но ож тӥрлык поттӥсь предприятиен ньыль ар кивалтэ ни. Со дыр куспын куашкан калэ вуэм заводэз пыд вылаз пуктӥз, син азьын улӟытӥз, шуыны луоз. Юрий Шестков - егит кивалтӥсь. Институтэз быдтэмез бере кужым люказ, ӟеч опыт басьтӥз Ижысь кык заводын. Отын егит инженер химик-технолог усто производственник луиз но калыкен ужаны дышетскиз. Алигес Юрий Шестаковен пумиськылӥз милям корреспондентмы. - Юрий Владимирович, вераськонмес туж огшоры мытом. Вералэ кытын вордскиды- дышетскиды но кызьы Удмуртие вуиды? - Вордски 1958-тӥ арын 7-тӥ октябре Тула улосысь Куликово поле черкогуртын. 1981-тӥ арын йылпумъяй Москваысь Д. Менделеев нимо химико-технологической институтлэсь Новомосковской ёззэ (филиалзэ), инженер, химик-технолог луи. Удмуртие азьло лыктӥз кышное, татын уго ужа вал сузэре. Ужан сюресэ кутскиз Ижысь механикая заводын. Монэ пуктӥзы технологе, собере валтӥсь мастер, цехлэн кивалтӥсезлэн воштӥсез луи. Берло быдэс цехез оскизы. Татын сизьым ар ужай. 1988-тӥ арын ӧтизы "Нефтемаш" заводэ, валтӥсь технологе юнматӥзы. Собере вал предприятиысь валтӥсь инженерлэн воштӥсез, валтӥсь инженер но валтӥсь директорлэн инвестициосъя но заводэз азинтонъя воштӥсез. Нош 1996-тӥ арын май толэзе юнматӥзы "Ижевский электромеханической завод" кун предприятилы директоре, собере со "ИЭМЗ "Купол" луиз. - Таиз тӥляд куинетӥез предприятиды. Тӥ лыктӥды пилиськем тусь дуре кадь, завод куашкан калэ вуэмын вал. Кызьы быгатӥды сое улӟытыны? - Одӥг кылын уд валэкты. Но тодмо вал тани мар: ож тӥрлык поттӥсь предприятиын котьку зол коллектив тырше. Озьы ке но, юн жаляса верано луэ, соку завод ваньзэ-ӧвӧлзэ 62 миллион манет тыр продукция поттӥз (со дыре коньдонэн), нош тыронъёсыз люкаськемын вал 450 миллион манет. Адямиос 8-9 толэзь ӵоже йӧскадь уждун ӧз басьтылэ. Куд-огезлы со оло валантэм потоз. Мугез одӥг - гуньдӥз ож тӥрлык поттон, кабзэ быризы солы куронъёс. Калык ужтэк кылиз, заводысь тросэз кошкизы. Мон татчы лыктыкум, 6,2 сюрс ужасьёс вал. Нош али - 13,5 сюрс. Мар бордысен бен кутским? Нырысь ик предприятиен, ужасьёсын рос-прос тодматски. Туала ӟеч станокъёс но музон оборудование гуньдэмын, сыло. Мар кароно? Толэзьлы быдэ кенешъёс ортчытъям. Валтӥсь ужпум вал одӥг - шедьтоно коньдон. Кытысь? Палэнысь юрттэт ас кожаз уг лыкты. Вань кивалтӥсьёсын, специалистъёсын таӵе малпанэ вуим - утчано заказъёс, ваньбур поттонэз вырӟытоно. Ож тӥрлык кунлы кулэ ӧвӧл бере, калыклы вузъёс поттонэз радъям. Сое арысь аре паськытатӥм но каллен шоканы ӧдъям. Оглом вераса, калыклы кулэ вузъёс поттонэз шӧдскымон будэтӥм, ож тӥрлыклэсь данаклы уно лэсьтыны кутским. Со вал улӟонмылэн одӥгез люкетэз. Таин ӵош ик ӧм вунэтылэ, ялан утчам ож тӥрлыкмес кунгож сьӧры вузан амалъёс. Озьы 1996-тӥ арлэн пумаз вордскиз нырысетӥез экспортъя контракт (огкыл). 1997-тӥ арын вань тыронъёсмес быдтӥм но 1998-тӥ арез тыронъёстэк мытӥм. Со ваньмызлы бадӟым шумпотон ваиз. Собере гожтӥм кыкетӥзэ но куинетӥзэ огкыл "ОСА", "ТОР" но музон со выллем ож тӥрлыкмес вузаны ӧдъям Китае но мукет кунъёсы. Но татын тани мае пусъеме потэ. Котькыӵе ож тӥрлык вузанъя контракт гожтон секытэн сётске: трос дыр, кужым но визь кулэ. Вань таӵе ӵошатон: котькудӥз директор ужатозяз одӥг коть огкыл кутэ ке, со туж бадӟым вормонэн лыдъяське ни. - Зэмзэ но, Юрий Владимирович, вамышъёсты адӟем карымон. Алигес тӥ "Рестер" завод но со выллем музон производство усьтӥды. Со сярысь мар верасалды? - Туэ май толэзе шаерамы пусйымон ужрад ортчиз. Милям вордскиз выль заводмы. Удмуртиын гинэ ӧвӧл, быдэс Россиын со нырысетӥез таӵе предприятие луэ. Поттэ усто эмъюм - инфузионной растворъёс. Заводмес пуктӥм вакчи дыр куспын, 1 ар но 2 толэзьскын "Метеор" заводлэн инъетэз вылын. Али со вӧзы мукетсэ, "Климатехник" завод ӝутӥськом. Куд-огез юа, малы, пе, заводлы "Рестер" ним сётӥм. Озьы со нимамын поттоно продукциезъя. Латынь кылысь берыктыса, туж чылкыт эмъюмъёс шуэм луэ. Нырысетӥосыз растворъёс Удмуртие гинэ кошкизы. Со ваньмызлы кулэяськисьёслы тырмиз, нош июне лицензия басьтӥм но эмъюмез палэнэ вузаськом. Завод, кык сменаен ужаса, арлы быдэ 5 миллион эмъюм пакетъёс (0,5 литрен) поттоз. Республикамылы (адямилы быдэ 2 пакет лыдъяса) 3,2 миллион пакет кулэ луоз. Кылемзэ завод мукет азе вузалоз. Нош куронъёс будӥзы ке, "Рестер" араз 7,5 миллион пакет лэсьтыны быгатоз. Сыӵе луонлыкмы вань. Озьы завод арлы быдэ 200-250 миллион манет тыр продукция поттоз но 3-4 ар ӵоже быдтэм коньдонзэ берыктоз. Таӵе производствоез радъяны юрттӥзы Москваысь "Машино-экспорт" огазеяськон но Швециысь "Луки" одӥгез кужмо фирма. Эмъюм поттӥське ӵыжак выль амалэн но мынэ адямилы трос вирзэ ыштыку но вирез уродмыку. Ми та уж борды юнме шорысь ӧм басьтӥське. Нырысь ик чаклам азьланьзэ, ӵуказе нуналэз. Ведь калыклы эмъюмъёс поттонэз ож тӥрлыкен уд ӵошаты. Гужем ик сюлэмез эмъяны кардиомониторъёсмес ужатыса эскерим. Таиз но аппарат дуннеысь куронъёслы тупа. - Али нош "Климатехник" завод пуктӥськоды. Ку сое вуттоды? - Малпаськом, арлэн пумаз 31-тӥ декабре ужаны кутскоз. Калыклы, предприятиослы, организациослы но учреждениослы туж кулэ луись изделиос поттоз. Магазин ӝажыосы вузъёсмы вуизы ке, басяськись ачиз дунъет сётоз. Продукцимес ватыса ум возе, со мед гинэ яралоз, улонмес умоятыны мед юрттоз. Ведь одӥг ож тӥрлыкен гинэ уксё поттыны умой ӧвӧл. - Кызьы ужасьёсты сярысь сюлмаськиськоды, социальной удысты азинске-а? - Миым гинэ улон коркаосмес городлы сётӥм. Кылемзэ ваньзэ завод возе. Ужало нылпиослы шутэтскон лагерьёс, тазалыкез утёнъя, спортъя учреждениос но мукетыз. Гужем одӥг сюрслэсь ятыр нылпиосмы город сьӧрысь лагерьёсын тазалыксэс юнматӥзы. Асьмелэназ сяна, 50-100 путёвка мукет лагерьёсы но сётъям. Ужасьёсмы эмъясько-шутэтско "Металлург", "Ува", "Варзи-Ятчи" санаторийёсын, "Сосновый" профилакторийын но музоназ. Соосын арлы быдэ тупанкыл гожтӥськом. Али спортъя комплексмес выльдӥськом, Киров нимо паркын нимысьтыз аттракцион- шудон усьтӥм. - Вань таӵе вераськон. Котькуд кивалтӥсь, пе, котыраз оскымон адямиоссэ люка, кызьы шуо, команда кылдытэ. Та пумысен мар верасалды? - Мон командаен ужаны быгатӥсько. Со чеберъяськон ӧвӧл. Воштӥсьёсызлы но мукетъёсызлы артэ ужасьёслы, кивалтӥсьёслы но специалистъёслы оскыны кулэ но соос азе валамон куронъёс пуктоно. Котькудӥз малпаськыса мед тыршоз, ведь адями вал ӧвӧл, сое сюлоен улляса уд ужаты, кыдёке уд вуы. Та ласянь мукет но визьмо веран вань, мажес вылэ эн лёгиськы, кымесад шуккоз. Та сярысь озьы ик вунэтыны уг яра кулэ решениос кутыку, аслад янгышъёсыд вылын дышетскыны но ӟеч ӧвӧл. - Юрий Владимирович, Кун Кенешын тӥ "Промышленникъёс но ужбергатӥсьёс" бадӟым фракциен кивалтӥськоды. Огдыре таӵе предприятиен кивалтон но Кун Кенешын ужан секыт ӧвӧл-а? - Меӵак вераса, капчи уд шуы. Но тыбырад песьтэр ошид бере, секытсэ но вормыны быгатоно. Ачим тани ноку ӧй малпалля, таӵе бадӟым фракциез оскозы шуыса. Татчы пыро Правительстволэн Тӧроез Николай Ганза, "Удмуртнефть", "Буммаш" огазеяськонъёслэн валтӥсь директоръёссы Евгений Богомольный, Валентин Жебровский, 17 номеро лэсьтӥськон управленилэн кивалтӥсез Алексей Прасолов, Кун Кенешлэн комиссиосызлэн тӧрооссы Виктор Кушко, Софья Широбокова но музон кивалтӥсьёс. Фракция 30 пала депутатъёсты огазея но парламентын валтӥсь инты басьтэ, тужгес но юн лэчыт ужпумъёсты эскерыку но кутыку. Мукет сямен вераса, кызьы милям фракциысь депутатъёс шуозы, озьы ик ужпум ортче-юнматӥське. Нош со понна фракциын ужано, шонер решение кутоно. Озьы дыр но, визь но кулэ. - Нош кин тӥляд матысь юрттӥсьёсты? - 1989-тӥ арысен "Нефтемаш" заводын ӵош ужам Андрей Солуяновен. Али солы дорамы юн кулэ удыс - ож тӥрлык поттонэз но бадӟым ужпумъёсты азинтыны оскемын. Кун Думаын депутат дыръяз предприятилы но мыным трос юрттӥз. Таӵе ик оскымон юрттӥсьёсы пӧлы пыртысал вань воштӥсьёсме, выль заводъёсын, производствоосын, цехъёсын кивалтӥсьёсты, инженеръёсты, конструкторъёсты, мастеръёсты но мукетъёссэ. *** Та нуналъёсы Ю. В. Шестаковлы 42 арес тырмиз. Юрий Владимирович, вордӥськем нуналэныды ӟечкыласа, мылкыд кариськом коллективдылы 2000-тӥ арез азинлыко йылпумъяны, нош тӥледлы сӥзиськом улонады тросгес шундыё нуналъёс, шудбур но тазалык, котьку луэ задор мылкыдо но малпанъёстэс улонэ пыӵатэ. Вераськиз Геннадий Романов. Юрий Шестаков. Музъем ужась палэнэ медаз кыльы Россилэн 89 улосвылъёсыз пӧлысь та дырозь Удмуртия но Дагестан гинэ президент бырйытэк кылемын на вал. 15-тӥ октябре асьмелэн республикамы бырйиз ни нырысетӥ президентсэ. Кызьы калык пыриськиз та бадӟым ужрадэ? Республикаысь избирком ивортэмъя, быръён нуналэ ик 22 часэ тодмо луиз: Удмуртиын быръёнъёс ортчемен лыдъясько. Озьыен, калык мыло-кыдо пыриськиз аслыз нырысетӥ президент быръёнэ. Быръёнъя комиссие вуэм лыдпусъёсъя тужгес но мыло-кыдо куаразэс сётӥзы Грахово, Можга, Юкаменск но куд-ог мукет районъёсын, ӧжытгес - Камбарка, Игра, Воткинск палъёсын. Кинлы меда тросгес оско удмурт шаерамы улӥсьёс? Кинэ адӟемзы потэ президентлэн интыяз? Со понна вуыломе Завьялово районысь Якшур гуртэ, "Путь Ильича" колхозэ. Кызьы гожъямы ни, та хозяйство республикаямы огез кужмоез но азьмынӥсез луэ, та нуналъёсы гинэ пусйиз 70 ар тырмон юбилейзэ. Колхозникъёслэн мылкыдзы ӝутскемын азьланяз но тазьы ик, огкылысь ужаны, тросгес сӥль но йӧл поттыны, ю-нянь, картофка будэтыны. Сыӵе малпанэн ик вамыштӥзы 15-тӥ октябре Удмуртилы президент быръёнэ. Быръёнъя участоклы но инты туж валаса быръемын: ужез данъян залын. Борддоре юнматэм стендъёсысь туала бырйисьёс шоры учко соослэн песятайёссылэн, песянайёссылэн тусбуйёссы. Соос пӧлысь данакез улонысь кошкемын ни, озьы ке но, улэп кылемъёсызлэн сюлэмъёсазы пыраклы кылемын асьсэлэн ӟеч ужъёсынызы. Туннэ но пиналъёссылэн пиналъёссылэсь юало кадь: кинэ быръёды, кинлы оскоды азьпал улон-вылондэс? Калыклэн мылкыдыз пӧртэм. Со озьы ик луыны но кулэ, дыр. Одӥг каб улэ котькуд адямиез уд кыскы ук. Якшуръёс пӧлысь котькинлэсь вазь быръёнъя участоке лыктӥз та гуртысь ик азьвыл дышетӥсь Мария Павловна Стеценко. Быдэс улонзэ со сӥзиз егит кивоштӥсьёсты будэтонлы, нуиз историяя урокъёсты. Котьку оскиз ӟечезлы гинэ, туннэ но таӵе малпанэн ик бюллетеньзэ урнае лэзиз. Арлыдо бырйисьлы быръёнъя комиссия синпель кузьым сётӥз. Кузьымен пумитазы 18 аресъем егитъёсты но. Якшурын соос 15 мурт. Огез жаль: президент быръёнэ ваньмыз ӧз пыриськы. Нош кинлы, соослы сяна, верано вал ас мылкыдзэс? Егитъёслы ук улоно но ужано, пинал будэтоно вуоно даурын. Нош мӧйы поколенилэн вакыт шоры аслаз учконэз, аслаз мертэтэз. Соос пӧлысь данакез куаразэс сётӥзы Павел Николаевич Вершинин понна. Мария Фёдоровна Бабкина, вань улонзэ колхоз ужлы, пудо вордонлы сётэм арлыдо кышномурт шуиз: "Куараме сётэме потэ Вершинин понна. Ми кадь ик, со гуртысь потэмын, малы ке но оскисько, гурт улонэз таиз кандидат ваньмызлэсь умойгес тодэ шуыса. Милям сямой бадӟым сюлмаськонмы музъем понна. Сое вузаны медаз сётэ вал". Таӵегес шугъяськонзэс веразы мукетъёсыз но гуртоос. Зэмен но, берло аръёссэ гурт удыслэн лябӟемез гуртоослэн сюлэмазы зол гинэ йӧтэ. Тӥни малы соослэн президент интыын адӟемзы потэ гуртын будэм но ужам муртэ. Озьы вань бырйисьёс пӧлысь 538-эз, яке 80 процентэз куаразэ сётӥз П.Н.Вершинин понна. Александр Александрович Волковлы дурбасьтӥз 54 мурт. Соос пӧлысь данакез оско, Александр Александрович, промышленностез ӝутэмен валче, музъем ужасез но палэнэ уз кельты шуыса. Нош егитъёслэн мылкыдзы берытскемын А.В.Солуянов пала. Солы куаразэ сётӥз 42 бырйись. Кылемез кандидатъёс Якшур избирательной участокын куара ӧжыт люказы: Н.А.Ганза - 15, М.К.Кокорин - 2, быдэн одӥг - В.В.Забильский но С.Б.Шуклин. Оглом кыӵе мылкыд кельтӥзы 15-тӥ октябре ортчем быръёнъёс? Умой, дыр. Туннэ тодмо ни, Удмурт Республика аслыз президент бырйиз огкутскемен. Калык оскемзэ вераз Александр Александрович Волковлы, Кун Кенешлэн Тӧроезлы. Озьыен, адӟе солэсь ужаны быгатэмзэ, республикамы понна сюлмаськемзэ. Эшшо ватсалом на: президент котыраз мед огазеялоз вылэм вань калыкез, быдэс обществоез. Быръёнъёс дорозь бугырскем кырсь-кур толло нуналэ мед кылёз. Нош октябрьлэн 15-тӥ числоез табере пыраклы шедёз шаермылэн историяз - та нуналэ асьмеос бырйим Удмурт Республикалы Президент. Люлмида МЕДВЕДЕВА. УДМУРТ КУНЛЫКЛЫ � 80 Мылкыд вӧзы � оскон Кенешо кунамы улыкумы, дас кык пол бырйылӥмы СССР-ысь Вылӥ Кенешлэсь депутатъёссэ. Нырысетӥзэ � 1937-тӥ арын, берпуметӥзэ � 1989-тӥ арын. Та дыр ӵоже Удмурт Республикаысь кызь тямыс удмурт нылкышно бырйылэмын. Соос пӧлысь куинез � быдэн кык пол. Со депутатъёс пӧлын ньыль врач, куинь дышетӥсь, куинь агроном, быдэн одӥг � заводысь токарь но юрт лэсьтон удысысь штукатур, отӥыз � колхоз бусыосын но фермаосын ужасьёс вал. Ваньзы соос � ужын данэ потэм адямиос. Шуг-секытъёсты пичиысен адӟыса будылэмын, вазь ужаны дышемын. Дано луыса но капчи улонэз ӧз адӟылэ: ялан уж но уж � колхоз лудын, фермаын, школаын, больницаын, дорын... Али соос пӧлысь ӝыны мындаез улонысь кошкемын ни, нимъёссы но вуно кадь ини. Соин ик татын ваньмызлэсь нимъёссэс ке но тодэ уськытэм потэ. 1937-тӥ арын депутатъёс луизы Можга ёросысь Бадӟым Сибы гуртысь дас укмыс аресъем етӥн будэтӥсь Елена Васильевна Васильева (вордӥськемын 1918-тӥ арын, улэп на-а, улонысь кошкемын-а ни � уг тодӥськы, сое тодӥсьёс гожтысалзы ке, шумпотысал). Яр ёросысь сельсоветлэн кызь куинь аресъем тӧроез Анна Максимовна Аввакумова (Ившина) (1914-?) но Дэбес ёросын фермаын ужась куамын куинь аресъем Евдокия Фёдоровна Будина (1904-?), удмурт нылкышноос пӧлын Ленин орденэн пусъем нырысетӥез мурт. Со вал пудо утён удысысь стахановецъёслэн Москваын 1937-тӥ арын ортчем кенешазы. Елена Васильева етӥн шукконын 1935-тӥ арын быдэс СССР-ын тодмо луиз. Солы соку Трудовое Красное Знамя орден сётэмын. 1946-тӥ арын депутатэ быръемын вал Дэбес ёросын вордӥськем но Вавож ёросын ужас дышетӥсь Серафима Григорьевна Бушмакина (1903-1953). 1944-тӥ арын солы Удмуртиысь дано дышетӥсь ним сётэмын. Война бырон аре гадяз Ленин орден бырттӥзы. Шаркан ёросын вордскем нылмурт � Вотка заводысь токарь-стахановка Екатерина Евсеевна Вахрушева (1919-?). Война аръёсы нормаоссэ ялан мултэсэн (150-200 %) быдэсъяз. 1945-тӥ арын медаль басьтӥз. Алнаш ёросын фермаын ужась (война вакытэ ньыль фермаен кивалтэм) Мария Прохоровна Чувашова (1917-?) но Яр ёросысь колхоз бригадир Валентина Петровна Ярославцева (1918-1997). Валентина Петровна Ленин орденэн пусъемын. 1950-тӥ ар. Алнаш ёросысь кызь куать аресъем дышетӥсь Раиса Николаевна Байкова (1924) но Яр ёросысь фермаын ужась Мария Ивановна Корепанова (1905-?) Мария Ивановналэн война аръёсы ужамез медален пусъемын, берлогес � "Знак Почёта" орденэн. 1954-тӥ ар. Кез ёросын вордскем но Ува ёросын ужам агроном Галина Кирилловна Леонтьева (1929). Выльысь быръемын Мария Ивановна Корепанова но. 1958-тӥ арын ньылез удмурт нылкышноос быдӟым кунмылэн Вылӥ Кенешезлэн депутатъёсыз луизы. Соос � Кез ёросысь агроном Агния Фёдоровна Иванова (1918-?), Всесоюзной сельхозвыставкалэн Пичи зарни медаленыз пусъем мурт; мединститутысь нылпи висёнъёсъя кафедраен кивалтӥсь, профессор Александра Ивановна Перевощикова (1905-1995): Александра Ивановна нылпиосты утён но врачъёсты дасян удысын ужаменыз туж тодмо луэмын, солы куинь орден но Россиысь дано врач, Удмуртиысь наукаын дано ужась нимъёс сётылэмын. Соосын ӵош депутатъёс луизы Кизнер ёросысь парсь сюдӥсь Ксения Павловна Рябчикова (1919-1979), война аръёсы ужамез понна медален пусъем мурт но Можга ёросын скал кысконын вормонъёсыныз соку тодмо луэм Зинаида Дмитриевна Тубылова (1927). 1962-тӥ арын кык удмурт нылкышноос депутатэ бырйылэмын. Соос � Вавож ёросысь парсь сюдӥсь Екатерина Семёновна Калашникова (1930) но Игра ёросысь ыж сюдӥсь Антонида Артемьевна Корепанова (1923). Порвайын улӥсез олокӧня пол ысъяллязы Москвае Всесоюзной выставкае � солэн ужез ВДНХ-лэн Пичи зарни медаленыз но пусъемын. 1966-тӥ арын но кык удмурт нылкышноос депутатъёс луизы: Завьял ёросын вордскем но Кез ёросын ужам врач Антонина Матвеевна Главатских (1926-1984) но Завьял ёросысь ик скал кыскись Елизавета Григорьевна Дородова (1927), "Знак Почёта" орденэн но медальёсын данъям адями. 1970-тӥ ар. Вавож ёросын вордскем но Кизнер ёрос больницаын коммунистической ужысь азьветлӥсь ним басьтэм врач Раиса Никоноровна Коробейникова (1932) но Ува ёросысь скал кыскись Елена Григорьевна Чернова (14.09.32). Елена Григорьевна 1971-тӥ но 1986-тӥ аръёсы "Трудовое Красное Знамя" но Ленин орденъёсын данъямын. 1974-тӥ ар. Киров улосысь Уни ёросын вордӥськем но Алнашын ужам врач Антонина Николаевна Ямщикова (1936) но выльысь � Елена Григорьевна Чернова. 1979-тӥ ар. Алнаш ёросын вордскем но будэм ныл � Можгалась вуриськись Татьяна Петровна Карпова (1948-1989). Куинь Слава орденэн но кун премиосын пусйылэмын. Туж тодмо вал со аръёсы Иже Вавож ёросысь лыктэм штукатур Нина Никоноровна Митрофанова но (1941). Со кык пол, бере кылись бригадаосы мыныса, соосты азьмынӥсе поттылӥз, со понна кык орденэн пусъемын. Балезино ёросысь Глаз ёросэ бызем нылкышно, азьмынӥсь скал кыскись, "Трудовое Красное Знамя" орденэн пусъем мурт Фаина Иосифовна Наговицына (1948) но Кияса ёросысь азьмынӥсь скал кыскись, "Социалистической ӵошатсконын вормись" гадьпусэн но "Знак Почёта" орденэн куинь ар ӵоже данъяллям мурт Мария Кузьмовна Тукаева (1939). 1984-тӥ ар. Пичи Пурга ёросын вордӥськем но Завьял ёросын бакча сиён будэтӥсь Нина Ивановна Итешина (1955). Выльысь � Нина Никоноровна Митрофанова но Шаркан ёросын вордскем но будэм ныл � Ижысь дышетӥсь Надежда Витальевна Юдина (1957). 1989-тӥ ар. Алнаш ёросысь Завьял ёросэ бызем нылкышно, бакча сиён будэтӥсь Надежда Никифоровна Байрамова (1952-1999). Пусйыны кулэ: Байрамова вормиз выль сямен нырысетӥзэ ортчытӥськись быръёнъёсын � соку одӥг депутат инты понна трос мурт нюръяськиз. Кызь тямыс мурт пӧлысь кыкез � З.Д.Тубылова но Т.П.Карпова � бырйылэмын Вылӥ Кенешлэн вылӥ палатаяз. Мукетъёсыз � пӧртэм калыкъёслэн палатаязы. 1993-тӥ но 1995-тӥ аръёсы ортчем быръёнъёсы удмурт нылкышноос депутат луон понна нюръяськонэ ӧз ик пыриськылэ. 1999-тӥ арын, секыт нюръяськонын вормыса, вылӥ верам адямиослэн радазы пыриз визьмо удмурт нылкышно Светлана Константиновна Смирнова. Со Россилэн Кун Думаезлэн нациосын ужанъя комиссиезлэн тӧроезлы воштӥсе быръемын. Удмуртилэн Кун Кенешаз но али чылкак одӥг гинэ удмурт кышномурт быръемын. Татын верам котькуд нылкышно сярысь нимысьтыз гожтыны кулэ шуыса малпасько. Удмурт нылкышноос сярысь али дасяно книгаям ваньзэс пыртэме потэ � соос уго, асьсэды сяна, уженызы данъязы гуртсэс, колхоззэс, Удмурт Республикаез но удмурт калыкез. Возьматӥзы удмуртлэсь пӧртэм удысъёсын азинлыко ужаны быгатэмзэ. Йылпумъяса вераме потэ: егит нылъёслэн но нылкышноослэн мылкыдзы мед ӝутӥськысал азьланяз но быръёнъёсы пыриськыны но, вормыны но. Валамон: солы кӧня ке ар ӵоже туж зол дасяськыны, юн мылкыд кулэ. Мылкыд сяна, аслыд ачид оскон но. Улон возьматэ: зол мылкыдо адямиос асьме пӧлын ӧжыт ӧвӧл. Людмила ХРИСТОЛЮБОВА, история наукаосъя кандидат. БЫРЪЁНЪЁС Уваос - Вершинин понна Быдэс Удмуртиын сямен ик Ува районын ужаса улӥсьёс но президентэз быръёнэ мыло- кыдо пыриськизы. Павел Николаевич Вершинин понна ваньмыз сямен куараоссэс сётӥллям Нылга палъёс. Озьы асьмелэн бӧлякмы ог 600 куаралы уногес басьтэм но ёросын нырысетӥ интые потэм, кыкетӥ интые - А.А.Волков, нош куинетӥе - А.Солуянов. П.СКОБЕЛЕВ. Уфаын пумиськон 2000-тӥ арын 14-тӥ октябре Уфаын пумиськылӥзы Удмурт Республикаысь Кун Кенешлэн Тӧроез Александр Волков но Башкортостан Республикалэн Президентэз Муртаза Рахимов. Пумиськон дыръя ужпум ӝутэмын вал 1996-тӥ арын 16-тӥ декабре Удмуртия но Башкирия куспын гожтэм тупанкыллэн кызьы быдэсъяськемез сярысь. Тупанкылын вераськон мынэ му вӧй поттон удысын валче ужан но акциосын "Ижмаш" огазеяськон но Уфаысь мотор лэсьтон завод куспын ӵош ужась производство кылдытон сярысь. Пумиськон дыръя огкылэ вуэмын "Белкамнефтез" Удмуртилэн улосвылаз пусйыны (зарегистрировать), нош валче ужась производство юрттоз Уфаысь мотор поттон заводэз азинтыны. "Белкамнефтез" Удмуртилэн улосвылаз кельтон юрттоз республикалэн бюджетаз вуись вытъёслэсь лыдзэс трослы йылэтыны. Выль кылдытэм производство висъялоз республикаямы потӥсь "Одалы" моторъёс но юрттоз машина лэсьтон удысэз огсыр ужатыны. Уфаын ортчем ужрадэ озьы ик пыриськизы Удмурт Республикаысь Правительстволэн Тӧроезлэн нырысетӥ воштӥсез Юрий Питкевич, Правительстволэн Тӧроезлэн воштӥсез Николай Хохлов, эстӥськонъя но энергетикая министр Виктор Савельев, акциосын "Ижмаш" огазеяськонлэн директорез Владимир Гродецкий, акциосын "Белкамнефть" огазеяськонлэн директорез Виктор Хорошавцев но акциосын "АСПЭК" огазеяськонлэн директорез Валерий Бузилов. Башкортостан ласянь вераськонэ пыриськизы республикаысь премьер-министр Рафаэль Байдавлетов, премьер-министрлэн нырысетӥ воштӥсьёсыз Николай Сигаков, Мидхат Шакиров, Рафиль Гарифуллин но мукетъёсыз. Удмурт Республикаысь Кун Кенешлэн пресс-службаез. Чырмыт басьтӥськиз Озьы шуо Сюмси ёросысь "Каксинский" гурт кооперативын ужасьёс, асьсэлэн выль кичӧлтӥсьсы Вадим Геннадьевич Русанов сярысь. Солэсь азьло хозяйство куашкан калэ вуэмын вал, нош табере дыраз уждун тыриське, банклы пунэмзэс берыктӥзы.с, табере 100 гектар узьымзы чебер вожектэмын ни. Техниказэс тупатыны В. Г. Русанов пунэмаса 250 сюрс манет куриз вал, та дырлы берыктӥз ни. Малы ке шуоно, калык оскиз солы, уж борды рос-прос басьтӥськиз. Турын трос дасязы, вузаны но кылёз. Силос но уно тыризы, гидъёссэс но толлы тупатъязы. Фураж ласянь гинэ ӧжыт ёрмогес. Хозяйствоын пумен умоя йӧл кысконзы. Али нуналскын котькуд скалзылэсь шорлыдын 6,8 килограмм гинэ йӧл кыско ай, но осконзы вань, йӧлзы йылоз шуыса. Кивалтӥсь ужась калыкен огъя кыл шедьтӥз. Нокыӵе ужлэсь уг палэнско Николай Нелюбин, Николай Пенягин но Наиль Закиров. Турын турнанын ӵукна ньыль часысен ужазы С. Опушнев, Н. Коркин но Н. Нелюбин. Турын дасянэ озьы ик пыриськизы вань пенсионеръёс, дышетскись пиналъёс но городысь гужемлы дачаосазы улыны лыктэмъёс. Тазьы ужамлэн пайдаез шӧдскымон. Октябре кутскозы ни тырытэк кылем уждунзэс берыктыны. Кооператив аслыз спонсор но шедьтӥз. Со - "Золото-Платина-Банк". Утчась шедьтэ, шуо. Со зэм ик озьы. П. Николаев. Удмурт Республикалы президент быръёнъя но интыысь аскивалтон ёзъёсы депутатъёсты ватсаса быръёнъёслы нырысетӥ йылпумъянъёс сярысь ИВОРТОН 2000-тӥ арын 15-тӥ октябре ортчизы Удмурт Республикалы президент быръён но интыысь аскивалтон ёзъёсы депутатъёсты ватсаса быръёнъёс. Удмурт Республикаысь Быръёнъя комиссия ивортэ нырысетӥ йылпумъянъёсты. *** Бырйисьёслэн списоказы пыртэмын вал 1201657 мурт, Удмурт Республикалы президент быръёнэ соос пӧлысь пыриськиз 50,3 процентэз. Пусъем кандидатъёс понна сётэм куараослэн лыдзы: Вершинин Павел Николаевич - 144459 (куара сётонэ пыриськемъёслэн 23,9 процентсы); Волков Александр Александрович - 228441 (37,8 процент); Ганза Николай Алексеевич - 74134 (12,3 процент); Забильский Владимир Викторович - 4664 (0,8 процент); Кокорин Михаил Константинович - 3492 (0,6 процент); Солуянов Андрей Владимирович - 73347 (12,2 процент); Тимофеев Владимир Борисович - 1013 (0,2 прцоент); Шуклин Сергей Борисович - 4287 (0,7 процент); Вань кандидатъёслы пумит сётэм куараослэн лыдзы - 57.228 (9,5 процент). Умойтэмен лыдъямын 12587 бюллетень (2,0 процент). Быръёнъёсы пыриськемъёс пӧлысь котькинлэсь трос куара люказ Волков Александр Александрович, вордскемын 1951-тӥ арын, Удмурт Республикаысь Кун Кенешлэн Тӧроез, улэ Ижын. *** Улосвылъёсысь быръёнъя комиссиослэн ивортэмзыя, интыысь аскивалтон ёзъёсы депутатъёсты ватсаса быръёнъёс вань округъёсын ортчемен лыдъямын. Удмурт Республикаысь Быръёнъя комиссия. Шуныт сётон Ижевскын 9 октябрьлы шуныт сётэмын ваньмаз ик 38 больницаосы, 100 пӧлысь 98 школаосы, 199 пӧлысь 191 нылпи садлы, инты фондысь 1708 пӧлысь 1696 но предприятиослэн фондысьтызы 679 пӧлысь 667 улон коркаын. Оглом вераса, быдэс Иже шуныт сётэмын ни, шуыны луоз. Шуныт сётон системаез эскерись-чакласьёс ваньзэ ик тупатъяса возьыны, пуктэм куронъёсъя ужатыны тыршо. Озьы ке но, гумыосты вуэн тырмытыку, я отын, я татын пасям интыос шараясько. Сыӵе гумыосты одно ик вошъяно луэ. Соин ик куд-ог улон коркаосы та дырозь шуныт уг вуы на. Кылсярысь, В. Сивков ульчаысь 21 номеро шуныт сётон пункт 1982-тӥ арын лэсьтэмын ни. Татысь шуныт вуэ 12 улон коркаосы. Туэ майысен татын мынӥзы выльдон ужъёс. Шуныт сётон пунктэ пуктэмын туала эскерон-мертан оборудование, со ик юрттоз предприятилэсь кужымзэ будэтыны но коньдонэз шыръяны. 20-тӥ сентябре улон коркаосы шуныт сётэмын ни, нош 11-тӥ октябре пӧсь ву но вуоз ни. Гумыос пасямен но котельной ужамтэен, шуныт сётымтэ на 8-аз нылпи садэ, 2-аз школае, инты фондысь 12 коркае. Шуныт ӧвӧлысь трос ӝожтӥськонъёс вуо ведомствоослэн подряд амалэн ужась организациосынызы эскероно-чаклано коркаосын улӥсьёслэсь. Кылсярысь, "Ижмаш-ЖКУ � 13" акционер огазеяськонлэн улон коркаосаз шуныт сётыны кутскемын вал 26-тӥ сентябре гинэ яке, тямыс нуналлы беромыса. Та огазеяськонлэн ик 11 коркаез шуныт сётон системаен герӟамтэ на. Шуныт сётымтэ куатяз нылпи садэ но "Июльская" котельноен шунтӥськись 3 улон коркае. Шуныт сётонъя югдур ушъямон ӧвӧл "Ижмаш" АО-лэн 313 номеро ЖКУ-эзлэн юртъёсаз но. Тырмымтэос пумиськыло ке но, та удысын адӟем карымонэз но вань. Кылсярысь, Устинов ёросысь микрорайонысь 46 коркае 22 сентябре ик шуныт сётэмын ни вал. Татысь 26 номеро ЖРП-ын (директорез С. Е. Суркин) ужасьёс ваньзэ дыраз но ӟеч дасяны быгатӥзы. Городын шуныт сётон пумысен ватсаса ивор басьтыны луоз, 072 телефон номеръя жингыртыса. "ГЖУ - Ижевскысь ЖКХ-лэн валтӥсь компаниез" интыысь учреждение. Пичи шумпотон но бадӟым куректон Быръёнъёс нуналэ шуд усиз эскерись луыса ужаны. Озьы "Удмурт кенешлэн" Устинов ёросысь ёзэзлэн оскемезъя, 15-тӥ октябре мон огдырлы президентэ кандидатлэн Павел Вершининлэн эскерисез луи. Ужаны куриськи 22 номеро участоке (интыяськемын Ижысь Т.Барамзина нимо урамын, 16 номеро школаын), отчы котькуд быръёнъёс дыръя куараме сётыны ветлӥсько. Ас поннам тазьы малпай: та микрорайонын 20 арлэсь кема улӥсько ини, калыкез но умой тодӥсько, монэ но тодмало. Монэным ӵош ужазы валтӥсь кандидатъёслэн эскерисьёссы но. 22 номеро участоклэн кивалтӥсез Юрий Валентинович Кузнецов быръёнъя комиссилэн адямиосызлы но кандидатъёслэн эскерисьёссылы ог-огдэ валаса но валче ужаны ӟеч луонлыкъёс кылдытыны быгатӥз. Сыӵе ӟеч мылкыд бордысь но потӥз, дыр, татын ортчем быръёнъёслэн йылпумъянъёссы. Устинов ёросын тросгес ужась калык улэ. Уноез тыршо пластмасс поттон заводын, автозаводын. Та предприятиосты лэсьтонэ ас вакытаз гуртъёсысь уно удмуртъёс пыриськизы, собере татчы ик улыны выжыяськизы. Озьыен, президент понна куаразэс сётыку, татын улӥсьёс нырысь ик ужась калыклэсь мылкыдзэ веразы. Нунал ӵоже участокын законэз тӥян учыръёс ӧй вал. Бюллетеньёсты пыр-поч эскерем бере, син азе таӵе суред пуксиз. Павел Вершинин 321 куара люказ, Николай Ганза - 320, Андрей Солуянов - 257, Александр Волков - 241. Кылемъёсызлэн кандидатъёслэн куараоссы туж ӧжыт люкаськизы. Пусйытэк кельтыны уг луы таӵе учырез: вань депутатъёслы пумит луэмзэ та участокын вераз 202 адями. Со сяна, ярантэмен лыдъямын вал 25 бюллетень. Соин ик малпан кылдэ, калык пӧлын валэктон уж тырмыт нуэмын ӧй вал, дыр, шуыса. Паймытэ адямиослэн бюллетене пус пуктыны быгатымтэзы но. Туж кема кенешим одӥг бюллетень пумысен. Мар кароно? Одӥг ласянь бырйись шонер пус пуктэм, куаразэ Вершинин понна сётэм. Но со дыре ик кандидатлэн нимтулыз вадьсы таӵе кылъёс гожтэм: "Эн вуза бускельёстэ, эн вуза шаермылэсь узырлыкъёссэ, эн лэзьы татчы ядерной бервылъёсты пыртыны". Комиссилэн членъёсыз нырысь та бюллетенез ярантэмъёс пӧлы пыртӥзы. Но куштэм бюллетеньёсты выльысь эскеремзы бере но эскерисьёслэсь мылкыдзэс лыдэ басьтыса, та бюллетень умойёсыз пӧлы пыртэмын вал. Тӥни озьы П.Вершинин одӥг куаралы азьпалтыны быгатӥз Н.Ганзаез. Ӵем дыръя бырйисьёс бюллетеньёсы кыӵе ке но куронъёссэс, лек кылъёссэс гожъяло. Таяз учыре сыӵе "гожтэтъёс" кык сяна ӧй вал. Одӥгез сярысь верай ни. Мукетыз бырйись тазьы гожтэм: "Аслым сяна нокинлы уг оскиськы. Мон трос нылпиё анай, мыным 45 арес. Ёрмыса улэммы понна, нылпиосы монэ уз курлалэ, дыр". Жаляса верано, та кышномуртлэн бюллетенез ярантэмъёс пӧлы сюриз, угось пӧсекъясь мылкыдыныз сэрен, лэся, со "ваньмызлы пумит" вадьсы пус пуктыны вунэтэм. 15-тӥ октябре бер ӝыт ини тодмо луиз президентэ кандидатлэн А.Волковлэн огъя республикая вормисе потэмез сярысь. Озьы, вылды, со луыны кулэ вал. Но мон шумпотӥсько, куд-ог участокъёсын городысь удмуртъёс, заводъёсын ужасьёс азьпала осконзэс асьме землякенымы герӟазы шуыса. Со понна ик тросгес куаразэс сётӥзы 21 номеро участокысь бырйисьёс но, озьы ик та микрорайонын улӥсьёс. Кыӵе умой луыса, удмурт кандидатлэн сыӵе пичи вормонъёсыз бадӟым вормонэн быдэсмысалзы ке. Но озьы ӧз луы. Малы? Солэсь мугъёссэ табере кема, дыр, сэрттыса уломы. Т.БАННИКОВА. шаермылэн ортчем сюресысьтыз одӥгез кужмоез вал 1808-тӥ арын Ижысь металлургъёс кутскизы артиллерилы но пыӵал тӥрлык поттӥсь заводъёслы андан ӵыжатыны. 1830-тӥ арын 165 сюрс пуд андан поттэмын вал. Завод кужым люкамен ӵош ик, ӟеч андан пӧзьтон понна, технологиез выльдӥзы. 1858-тӥ арын татын ужаз ини дас кык кӧрык. Юбоос лэсьтыны мынӥсь андан поттон удысын ужамез сярысь "Горный журналэ" кылуж гожтӥз валтӥсь мастер Ф. Бердников. Нимысьтыз маркаё андан утчаку, бадӟым юрттэт сётӥз Златоустысь тодмо ӟуч металлург Павел Матвеевич Обухов. Со вордскиз сю тямыстон ар талэсь азьло - 1820-тӥ арын 11-тӥ ноябре - Вотка заводын ужасьёслэн семьяязы. Солэн песятаез усто рабочий вал. Мастерозь будэм. Атайзэ Матвей Фёдоровичез, кибашлы механикез, Златоустын ужакуз, цехын сяна, быдэс заводын тодылӥзы. Пӧртэм юанъёсын со доры егит специалистъёсын ӵош гӧртыны кутскем йырсиё адямиос но ветлылӥзы. Атайзэ ӝоген келязы азвесь поттӥсь заводэ. Соку ӵапак та предприятие вуиз Петербургысь генерал Е. П. Ковалевский. Со тодматскиз трос тодӥсь-валась Матвей Обуховлэн выль ужъёсыныз. Матвей Фёдорович ачиз понна гинэ ӧз шумпоты. Генерал солэн пиезлы, Павлушлы, институтэ пырыны сюрес усьтӥз. Обухов отын умой дышетскиз. Техникаез яратэменыз, мылысь-кыдысь тодматскиз металлургиен, механикаен но химиен. Ужен пыр-поч тунсыкъяськиз пӧртэм заводъёсын но фабрикаосын. Институтэз йылпумъямез бере, Павел Матвеевичез ыстӥзы кунгож сьӧры. Германиын но Бельгиын со эскериз андан но ыргон поттон удысэз. 1854-тӥ арын, атаез кулэм бере, Павел Матвеевичез пуктӥзы Златоустысь пыӵал поттон фабрикалы кивалтӥсе. Со азинтӥз Уралын вордскем сӥё-дано кибашлылэсь, кӧня ке ар Вотка заводын улӥсь П. П. Аносовлэсь кутскем ужзэ. Устоесь литейщикъёс Павел Матвеевичлы юрттӥзы выль технологияя андан ӵыжатыны. Обухов вить пӧртэм маркаё андан пӧзьтон амал шедьтэм бере, пыӵал-тӥрлык поттыны Англиысь но Германиысь Крупплэсь дуно анданзэ Россие вайылэмысь дугдӥзы. Ижысь заводын пӧзьтэм анданлэсь лэсьтэм пыӵал гумыосты куасалляса эскеризы но нокыӵе шексэ ӧз шедьтэ. Али ке но соосты "Ижмаш" огазеяськонын возё. 1860-тӥ арын Обуховлэн кивалтэмез улсын Златоустысь заводын ньыль корт пушка бичазы. 26-тӥ ноябре та пушкаосты Петербурге ваизы. Татын соосты ыбылыса рос- прос эскеризы. Пушкаос пӧлысь одӥгзэ уй столицаысь артиллерияя музейын али ке но возё. Сюлмысь тыршемез понна, П. М. Обуховез Златоустысь завод кивалтӥсе пуктӥз. Бырйизы артиллерияя комитетлы член-корреспондентэ. 1862-тӥ арын быдэс дуннелэн Лондонын ортчем адӟытоназ Обуховлэн пушкаезлы медаль сётӥзы. Соку эксэй правительство малпаз пушка поттон заводъёс лэсьтыны. Одӥгзэ - Петербургын. Мукетсэ - Пермьын. Павел Матвеевичез столицае ӧтизы. Со умоен лыдъяз Россиысь андан пӧзьтон заводъёс пӧлысь одӥгзэ валтӥсь интыын возёнэз. Озьы Иж заводын ӵыжатэм анданлэсь лэсьтэм броневой плитаосыз Вотка заводын пумозяз тупатъязы. Со сяна, Ижын трос корт поттэмен ӵош ялан сюлмаськылӥзы солэсь ӟечлыксэ умоятон сярысь. Татын, Павел Матвеевичлэн ӵектэмезъя, юбоос лэсьтыны тупась андан пӧзьтыны ӧдъязы. Быдӟым тылож дыръя ӵыжатэм ваньмыз сямен андан пыӵал тӥрлык поттыны мынӥз. Али Ижысь металлургъёс, Россиысь предприятиос продукция поттонзэс кӧнялы ке кулэстэмен валче, унозэ пӧзьтэм ӟеч анданзэс кунгож сьӧры келяло. П. М. Обуховлэн улон сюресэз оло нош туж ик пӧртэм ӧвӧл, дыр. Нош шонерзэ вераса, со кадь адямиос вань быгатонлыксэс но кужымзэс сётӥзы яратоно Россимес кужмогес каронлы. Соин ик сыӵе сӥё-дано адямиосыз асьмелы вунэтыны кулэ ӧвӧл. 1869-тӥ арыҥ-тӥ январе Павел Матвеевич Обухов секыт висемез бере кулӥз. Ватӥзы сое Петербургысь Александро-Невской лаврае. Владимир Чернов. Бырйизы устооссэ Удмуртъёслэн тямысэтӥ ӧтчамзылы дасяськыса, "Удмурт кенеш" огазеяськонлэн Ижысь но сьӧрлось ёзъёсыз ортчытъяло асьсэлэсь ужрадъёссэс. Драмая удмурт кун театре алигес люкаськылӥзы Ижысь Устинов ёросысь удмуртъёс. Ӧтчам кутскем бере ик "Удмурт кенеш" огазеяськонлэн та улосвылысь ёзэзлэн тӧроез Евгений Егоров ивортӥз ортчем дыр ӵоже быдэстэм ужъёс сярысь. Отӥяз вераськиз кӧня ке адями. Шаерысьтымы тодмо журналист Леонид Федоров, Ижысь дышетӥсь Валентина Шмыкова, тодосчи Людмила Христолюбова театре люкаськем калыкен сюлэмшугъяськыса кенешизы шаерамы та вакытэ кылдэм югдур пумысь. Та ӝытэ ик быръемын "Удмурт кенеш" огазеяськонлэн Ижысь Устинов ёросысь ёзэзлы выль кивалтэт, удмуртъёслэн тямысэтӥ ӧтчамазы адямиос. Ӝытлэн пумаз калыкез шумпоттӥзы Драмая удмурт кун театрысь артистъёс: вань люкаськемъёс понна возьматӥзы шаерысьтымы тодмо драматурглэн Анатолий Григорьевлэн "Парсьпи но эмеспи" пьесаезъя спектакль. Удмуртъёслэн тямысэтӥ ӧтчамзылы дасяськыса, таӵе ик кенешъёс ортчыло Ижысь мукет ёросъёсын но сьӧрлон. Е. Ромашова. Гурт улон Людмила Никитина: "Толэз ӟеч толъем" Людмила Сергеевна Никитина "Балезинский" гурт кооперативен нырысетӥ арзэ ке но кивалтэ, вань ужъёсты быгатыса радъя. Татын нош кема аръёс ӵоже валтӥсь специалист луыса ужаз. Хозяйствоез уго пичи ӧвӧл. 2300 гектар вылысь котькудысьтыз 15 центнер пала ю тысь кутсазы. Комбайнеръёс пӧлысь тужгес но азьпала потӥз, "Енисей" комбайнэн 620 тонна ю-нянь кутсаз Вениамин Иванов. Кыкетӥ интые кылиз, 430 тонна лэсьтӥз Владимир Ложкин. Кыӵе юос бен хозяйство будэтэ? Ӟегзы 600 гектар пала вал, валэс юоссы - 1700 гектар. Со пӧлын тросгес - йыды, чабей но сезьы. Ю тысь ворттонын вормисе потӥз Василий Никитин. Со КамАЗ-эн 1370 тонна лэсьтӥз, нош Сергей Корепанов ЗИЛ-эн - 1000 тонна. КЗС-ын синмаськымон тыршиз Юрий Корепанов но Александр Максимов. Нимысьтыз пусъем потэ Евгений Семеновез. Со кибашлы адями: шофёр но, комбайнер но, тракторист но. Кидыс дасянын усто ужаз КЗС-ысь оператор Валерий Корепанов. Зэм, ваньмызлэсь нимъёссэс вераса но уд быдты. Пыбьяос ог-огзылэсь адӟем карыса, вожмаськыса ужало. Тани сотэк-а бен планлэсь кык пол уно (2760 тонна) турын дасязы, силос - 4400, сенаж - 2600 но куро - 1500 тонна. Оглом лыдъяса, пудо йырлы быдэ 27 центнер кормовой единица сиён усе. Али скаллы быдэ 9 килограмм ёрос йӧл кыско. - Толэз умой потом, - шумпотэ Людмила Сергеевна. - Соин ӵош ик малпаськом пудо йырмес будэтыны, ӟеч ветылъёс басьтыны. Луонлыкъёсмы вань. Людмила Никитиналэн нырысетӥ матысь юрттӥсез луэ хозяйствоысь валтӥсь бухгалтер Валентина Ивановна Савина. Со татын 30 ар ужа ни, эштосын лыдъян-чотан ужез туж валаса нуэ. Солы ӟеч юрттэ воштӥсез Галина Васильевна Федорова. Мар бен, азинсконъёс кожазы уг лыкто. Соос басьтэмын вань гурт калыклэн, специалистъёслэн, бригадиръёслэн, агрономъёслэн, комбайнеръёслэн, механизаторъёслэн лулысь-сюлмысь тыршеменызы, музъем ужанэз умоятэменызы. Тӥни соин ик сюлмысьтымы, ӟырдыт мылкыдын ӟечкыласьком алигес ортчем Гуртын ужасьёслэн нуналэнызы, ваньзылы сӥзиськом умойзэ но ӟечсэ гинэ. Г. Романов. Валтӥсь бухгалтер Валентина Савина но воштӥсез Галина Федорова. Туспуктӥз В. Беломорских. Дивеевоын пумиськонъёс Апайёсы дорын Дивеевоын дас ар ӵоже ини Кузьма кырсие но Даша ӵужапае улэ. Семьязэс соос кылдытӥзы Алнашын, нылпиоссы но татын ик будӥзы. Лидалы, Трофимлы, Наташалы, Риммалы, Тонялы, Колялы, Толялы - кузпалъёс ваньзылы Инмарлы оскон пыӵатӥзы. Нош Римма но Тоня нылъёссы монашкаос луизы. Анай-Атаез Нижний Новгородэ кошкемзы бере, вань нылпиоссы сьӧразы ширтӥзы. Ӵужмуртъёсы отын басьтӥзы вужгес корка, сое выльдӥзы, муш вордыны ӧдъязы. Алнашысь кык комнатаен квартиразэс вузаса, Наташа киросапае но картэз Володя, сыӵе ик вуж корка басьтон вылысь, ӵыжы-выжыоссылэсь пунэмаськоно луизы. Со коньдонэн та дыре ми дорын кык-куинь умой корка басьтыны луоно. Улон интыосты татын долларъёсын дунъяло, уго Святой музъем вылэ выжыяськыны малпасьёс туж трос. Кузпалъёс татчы лыктэмзы пумысен уг ӧпкельыло. Сьӧразы ваем куинь зырымесь нылпиоссы будӥзы ни. Лена туэ гужем вуриськисьлы дышетскиз, Костя школаез йылпумъяз, нош Надик, пичиез, берпуметӥ арзэ дышетске. Лыктэм эшъёсыным ӵош киросапайёс доры вуим. Корка дораз, машинаез котырын, Володя агай берга. Нырысь милемыз ӧз тодма, кӧня ке учкемез бере паймиз: - Кызьы тӥ татчы вуиды, гажаноосы? Пырелэ, пырелэ. Нылпиоссы, мамаенызы ӵошен чебурек но повидлоен пирог пыжизы. Ӟыгыръяськеммы но чупаськеммы бере тодмо луиз: кенъёссы ог вить иськемлы Серафим Саровскийлэн источниказ вузкарыны дышетско. - Наташа апай, отын но вузкаро ни шат? - Ваньмызлы улыны уксё кулэ ук. Нош источник дурын, котьку паломникъёс трос, соослэн сиськемзы потэ. - Трос-а вузаськиськоды? - Улыны тырме. Ӧм ке пыжиськысалмы, кимес мычыса ветлысалмы ни, дыр. Вераськон куспамы Володя агай пыриське: - Тӥляд батюшка Серафимлэн источниказ ветлэмды потэ, дыр, ук? Пайми: - Тӥ удмурт кылэз ӧд на вунэтэ шат? - Наташаен кыкнамы бӧтьыртӥськом, нылпиослэн дышетэмзы уг пот. Сьӧразы биниськыса Серафимлэн дано источникез доры вамыштӥськом. Ошмес Удалтӥз тӥледлы, калыкез туннэ ӧжыт, шуо кузёоосмы. Нош отын сыло вал куать "Икарус" автобусъёс но ог кызё пала машинаос. Ошмес доры Сатие шур вамен лэсьтэм выжетӥ потоно. Та выж дорын вузчиос пуко. Пыжиськемъёс, чай, кофе, источникысь бичаса чеберъям вӧсям изъёс, мудоръёс вузало. Татчы но рынок вуэм. Наташа апай узчиосын артэ интыяськиз. Нош ми пыласькыны кошким. Ошмесысь потӥсь вуэз котыртыса, отын пичи ты лэсьтэмын. Пуллэсь корам часовня, со вӧзын Серафим Саровскийлэн мудорез пуктэмын. Палэнынгес, вуэ ик пыласькон корка пуктэмын, со борддорен люкемын. Татчы кузь черод кыстӥське. Пуконъёс вылын ведраосын та источникысь ик югыт ву сылэ. Сое кобыен банкаосы тырыса, паломникъёс сьӧразы нуо. Ты выжъёсын котыртэмын, соос дорысь вуэ пагӟаос васько. Татын но пыласько. Пиосъёс плавкиен, нылкышноос улдэремен вуэ зумыло. Татын вуэз туж кезьыт. Источникъёсысь потэм ву шунаса уг вуы. Пичи нылпиос но татын трос. Мумы-бубыоссы соосты йырынызы кезьыт вуэ месыло. Учкыса сюлэм ик вӧсь луэ кадь. Кыӵе бадӟым оскон луыны кулэ, пичи нуныдэ йӧ вуэ зумытъяса. Пичильтыкъёс бӧрдо, черекъяло, кудӥз синъёссэ ворсаса викышъя гинэ. Артэ ик, гурезь йылын, дӥсь воштон юрт сылэ, отын черод. Тани лызо-ӵужо купальникен кышномурт пагӟаетӥ васькиз, йырсизэ гинэ коттӥз. Йырыныз валче омырскыны чиданэз тырмымтэ: - А-а-а! - кеськыса тубиз. Мынам но черодэ вуиз. Каллен гинэ васькисько. Возьмаськисьёс дышето: - Чалякгес пыр, эн малпаськы, кужымед уз тырмы. Пыри. Пыдъёсы ты пыдсын ни. Лаптӥськыса пукси. - Ой-ёй-ёй, кезьыт, - пуля сямен потӥ. Кӧня ке минут ортчыса, мугор шуназ, пушкы выль омырен шоканы кутскиз кадь. Володя агай валэктӥз: - Пушкысь сьӧд кужымъёс озьы пото. Умойгес луысал, куинь пол зумылысалыд ке, йырез но одно ик быдэсак вуэн окоттылоно. Татын пыласькем бере адямиос чылкак воштӥськыса кошко. Куд-огез араз куинь-ньыль пол вуыло. Тазалыксэс юнмато. Татын пыласькемзы бере, висёнзы ортче, шуо. Туэ гужем гинэ Удмуртиысь вить бадӟым автобусэз адӟи. Син азям одӥг семья сюриз. Ваньзы - атайзы, анайзы, нылзы, песятайзы, - пыласькемын, йырсиоссы котэсь. Песянаенызы верасько: - Малы ӧд зумылы? Сыӵе умой! - Тӥ оскиськоды, соин кельшиз. Нош мон мукет сямен дышетэмын. Вань ортчем улонэ вылтӥм потыса, инмар доры уг ни мыны. Адӟиське, татын котькыӵе калык вань: узырез но уродгес улӥсез но. Уг лу вераны, кышномуртъёс-а, пиосмуртъёс-а яке пиналъёс-а, мӧйыос-а тросгес. Тани вылӥ верам песянай инмар доры уг мыны шуэ, нош ачиз малы ке татчы лыктэм ук. Ваньмызлы оскон кулэ. Азьло коммунистъёслы оским, табере инмарлы. Ты дурысь часовенкае штаниен но пырыны лэзё, кышет гинэ керттоно. Сьӧрад ӧвӧл ке, пырон азьын ошылэмын, басьты, берло интыяз кельтод. Пырон азьын монашка мудоръёс, сюсьтыл вуза. Пушказ куинь адями сяна уз тэры. Пырыны уг лу, сыӵе пичи, но туж чеберъяса лэсьтэмын. Мудоръёс палэзьпулэсь керттэтэн чеберъямын, выж вылын сяськаос пуктылэмын. Сюсьтыл пуктон инты буш ӧвӧл. Ми вуыку, киросапай кылем пыжиськемъёссэ артэ вузчилы дунтэмгес сётыса кельтӥз. Машинае пуксьыса кошкыны турттӥськом вал ни, адӟим дас тямысэтӥ регионысь номерен "жигулиез". Одно ик вераськоно. Шаер палэнын дыръя ваньмыз Удмуртиысь вуэмъёс ӵыжы-выжы кадь пото. Таосыз Ижевскын уло вылэм, вить кузя, сьӧразы вож нунызы. Серафим Саровскийлэн музъемаз нылмес чукынэммы потӥз, шуо. Ӝыт вераськонъямы тодмо луиз, киросапайёс но Удмуртие бертыны малпало. Володя агайлэн Можга ёросын анаез-атаез улэ, соослы картошка октыны юрттӥськоно, пе. Машинаен бертом, шуо, нылпиосыз сьӧрамы ум басьтэ. Озьыен, милемлы но инты сюроз. Вокзалъёстӥ донгаськоно уз луы. - Тӥледлы инмар юрттэ, таӵе секыт вакытэ лыктыны быгатӥллямды, бертон сюрес но усьтӥськиз, - вераз Наташа апай, мынэсьтым малпамме шараяз кадь. Дивеево черкогурт котырын вить святой источник жильыртэ: Казанской инмар анайлэн - вужез но вылез, Иверской инмар анайлэн, преподобной Серафимлэн Сатис гурт палан но Изыгановка гурт дурысь Серафим Саровскийлэн ик ошмесэз - таиз тужгес тодмо. Интыяськемын со Сатис шур, Цыгановка гурт но Хитрый хутор котырын. Шонергес вераса, со дивеевской ӧвӧл, саровской. Малы ке шуоно, батюшка Серафимлэн подвигъёсыныз югдытэм нюлэскын жильыртэ. Но, Саров пытсаськем бере, городлэн югытэз Дивеевое выжемын, соин ик та ошмес но дивеевской лыдъяське. Пересьёслэн верамзыя, вордӥськемын со алигес гинэ: Саровской пустынь бышкись езэн котыртэмын. Пырыны но потыны отысь уг луы. Караульноесь Сатис шур дурын возьмаськыкузы тӧдьы дӥсен, кияз бодыен пукись пересез адӟиллям. Юаллям: "Пересь атай, мар тон татын кариськод?" Нош со номыр вазьытэк султэм, бодыеныз музъеме куинь пол шуккыса кошкем. Татын куинь интыысь ву бызьыны кутскем. Караульнойёслэн кивалтӥсьсы, та адӟонлы паймыса, котыртэмез палэнтэм. Бӧрысьгес но возьмаськисьёс татын тӧдьы дӥсен пересез адӟылӥллям. Источник сярысь калык тодӥз. Адямиос пыласькыны, югыт ву юыны татчы ветлыны кутскизы. Пытсам зоналэн кивалтӥсьёсыз таин сюлмаськыны кутскизы. Соин 1980-тӥ арын ошмесэз ӵошкатыны косэмын вал. Источникез ачиз преподобный Серафим утиз. Бульдозеристлы со шуэм: "Тон ведь сое уд согы". Озьы ик луиз. Трактор сӧриськем, тупатыны ӧз быгатэ. Со дырысен приказэз быдэстонтэм вылысь распоряжение потӥз. Дивеевской монастырь усьтӥськем бере, ошмесэз солы сётӥзы. Котыръёссэ бетонэн кисьтӥзы. Дивеево-Троицкой соборысь кирос ваизы. 1994-тӥ арын шурез палэнтӥзы, ты лэсьтӥзы. Пуллэсь часовня пуктӥзы. Сое преподобной Серафимлэн черкен шулдыръяськонэзлы, 1-тӥ августэ 1994-тӥ арын Святейший Патриарх Алексей ИИ югдытӥз. Ӟеч ул, Дивеево Вить часын ӵукна султыса, ваньмы вӧлдэт улын сылӥсь мудор азьын вӧсяським. Табере сюрес вылэ но потыны луэ. Машинае тыриськыса вырӟим. Дивеевоын калык сайкамын ни. Кин кытчы дыртэ. Монастырь вӧзтӥ кошкыкумы мур лулӟи, пушкы мӧзмонэн тыриз. Соку ик асме буйгатӥ: вуоно аре одно ик выльысь татчы лыкто. О. Кожанова. "Алнаш" файл яке Кытысь потэ мылкыд? Компьютерам бугыръяськыкум, вунэм "Алнаш" файлэз синйылтӥ. Йылпумъям маке кыӵе ке муген вунэм но - тӥни. Оло, аслым гинэ шуыса гожтӥ вал-а? Ма, усьтӥ бере, принтере ик лэзё ни. Тани со. "Кытысь потэ мылкыд?" нимамын вылэм. Школаямы но литературно-творческой кружок вань бере, мон шумпотӥ, Алнашысь таӵе огазеяськон эшъёссэ Ижысь Национальной библиотекае люкам сярысь тодыса. Монэ но телефон пыр шедьтӥзы - ӧтизы. Таизлы но туж шумпотӥ. Шумпотӥ-то шумпотӥ ай, но... мынонэлэн азьпал нуналаз шӧдӥсько: чер кутэ кадь. Грипп шуонзы ветлэ уга. Та рад зол куасалтоз, дыр. Шӧдӥське ни со: ӟигар но быриз, йыр но... эгесэн пачкатэ ккдь. Э-э, мар веранэз, асьтэос тодӥськоды - шулдырез ичи. Озьы ке но, сюрес вылэ потӥ. Бӧлякъёсын пумиськон - котьку праздник. Тодмоосме, Алнаш школаын дышетскемме но "Алнаш колхозник" газетлэн редакцияз нырысь сюрес лёгемме йырам бергатӥсько. 1974-тӥ арын вал кадь со. Соку мон нырысьсэ тодматски усто журналистэн, кылбурчиен но писателен (Писательёслэн союзазы кутэмын ӧй вал ке но, мон сое котьку озьы шуо) Семён Тарасович Шихаревен. Со ик нырысь кылбур сузьетме но "Молот" журналэ келяз вал. "Шудо сюрес тыныд, Володя!" - Семён Тарасовичлэн таӵе кылъёсыныз печатлазы сузьетме. Шуг-секытъёсын пумиськисько ке, та кылъёсты али но тодам ваисько: оско вал бере, тыршоно. Зол дасяськиллям библиотекаын ужасьёс. Алнашысь литературно-творческой кружоклэн уженыз, солэн емышъёсыныз тодматэ выставка. Нош кыӵе но туспуктэмъёс шедьтӥллямтэ! Отӥ но татӥ тодмоос адскыло ни: Пётр Чернов, Пётр Кубашев, Иосиф Иванов, Иосиф Бобров, Александр Лаптев, Юрий Лобанов, Пётр Сергеев, Анатолий Комаров, Елена Виноградова... Сюлэмын шуныт луэ. Ай мон алнашъёсты гинэ пусйи, кинэ тодам ваи. Нош мукетъёсыз писательёс, журналистъёс но огшоры адямиос кӧня вал на!.. Ваньзы та лыктэм адямиос маинызы ке но герӟаськемын алнаш музъемен, алнаш литератураен (ачим но шӧдытэк, "алнаш литератураен" шуи: та пумысь вераськон соку отын потылӥз). Но ӵок, мон ай воксё мукетыз сярысь вераны турттӥсько. Мон али аслэсьтым мылкыдме эскерисько. Нош вераськон сярысь газетъёсы гожъялозы ай: редакциосын ужасьёс трос вал. Кытысь ке ӧвӧл Илья Пельтемов гитара но шедьтӥз: кырӟа, пе, люкаськемъёс азьын - куарадэ кылэммы кемалась ни. Кырӟасько но ас поннам малпасько: "Висись мурт тазьы выроз-а? Ачим шӧдӥсько: куарае но юн, йыр но интыяз. Мар таӵе? Нош кытын грипп шуон? Номыриз но ӧз кыльы ни. Нош мон ведь нокыӵе эмъюм ӧй юы, мукетсэ но... Озьыен, мукет кыӵе ке бадӟым кужым вань на. Со кужым - эшъёс, тодмо адямиос. Эшшо ик - Национальной библиотекаын ужасьёслэн шуныт, задор мылкыдъёссы. Кыӵе ӟеч адӟиське соослэн удмурт культура сярысь сюлмаськемзы, сое ӝутон понна, маин ке но юрттыны тыршемзы! Мон ваньмыз сярысь татын нимысьтыз вераны быгатысал. Но, малпасько, тӥледлы, гажано эшъёс-юлтошъёс, ваньдылы асьтэлы ветлыны-тодматскыны кулэ та вераны луонтэм дуно адямиосын. Нош мон выльысь мылкыды доры берытско. Кыӵе висён сярысь татын вераськыны луоз на, куке Алнашысь уӵыос кырӟанзэс мытӥзы ини, куке Владимир Соловьёв но Пётр Кубашев калыкез горыто ини? Тӥни кытын эмъюмед! Висьыса кошкыса таза бертэмысьтым, кузпалы шорам кырыжак учкиз, но номыр ӧз куареты. Кыӵе ке медиум яке эмъяськон котырын вырись ӧвӧл мон - огшоры кылбурчи ик луыса, бӧрысьгес ини, выльысь висьыны усеме бере гожтэм чуръёсме ӵектӥсько. Ӵемгес мед луылозы таӵе пумиськылонъёс! *** Таосыз-а? Уз, матысь уз луэ, Сюлэмам уз пырелэ ноку. Тӥ монэ Актэмырам ик нуэ, Мон вылэ мӧзмон ёмралляку. Таосыз-а? Таосыз - уй пал ни. Кезьытгес ини татын омыр. Кемалась дорам мон вуысал ни, Бурдъёсме выретыса лопыр. Таосыз-а? Озь гинэ уг лэзё. Шунытме вампир сямен сюпсё. Мон нош - лымшор пи - Кышкай кинлэсь-о? Сюпсе, юэ, но лулме уг сёт! Таосыз-а? Уз, матысь уз луэ, Сюлэмам уз пырелэ ноку. Тӥ монэ Вордскем гуртам ик нуэ, Мон вылэ мӧзмон ёмралляку. Мӧзмонэз но уй палэз мон висёнэн ӵошатӥ. Мукетсэ эн малпалэ. Нош постскриптум карыса пусъё: туж умой: Национальной библиотекаез синйылтӥзы но отысь ужасьёссэ Кун премиен дунъязы. Владимир Котков. Ӟечкыласьком! Та нуналъёсы 50 арессэ пусйиз Пичи Пурга ёросысь Улын Юриысь Людмила Ильинична Федорова. 32 ар дышетэ ни со школаын. Пионервожатойысен кутскыса директорозь вуиз. Усто дышетӥсь, усто кузпал но анай котьку вала адямилэсь сюлмаськонзэ, юрттыны, небыт кылын буйгатыны тырше. Тазалык, ӟеч мылкыд, кужым но оскон сӥзё эшъёсыд. ПОЛИТИКА Арня ӵоже дуннеын, странаын, шаерын Быдэс дунне сюлмаськыса чакла Ближней Востокын кылдэм югдурез. Арня куспын со наналысь нуналэ ӟырдаз. Еврейёс но палестинецъёс вожмаськыса кадь ог-огзылэсь вӧсяськон интыоссэс куашкатъязы, машинаоссэс сутылӥзы, адямиосЭС быдтылӥзы. Озьы сю пала мурт бырыны шедиз. Кылсярысь, палестинецъёс виизы Израиль армилэсь кык ожгарчиоссэ. Одӥгез солдат Россиысь эмигрант вылэм. Солэн кузпалызлэн ӝоген нуныез вордскыны кулэ. Кык вылӥ кивалтӥсьёс - Израильлэн премьер-министрез Эхуд Барак но Палестина автономилэн азьветлӥсез Ясир Арафат - арня ӵоже ог-огзы вылэ пож ву гинэ кисьтазы, одӥг кыл шедьтыны мылкыдзы ик ӧй вал, кожалод. Югдурез ӧз вошты Россиысь кунсьӧр ужъёсъя министрлэн Игорь Ивановлэн Ближней Востоке ветлэмез но. Пумитъяськон тулкымъёс шуккиськизы дуннелэн пӧртэм сэрегъёсаз. Ислам фундаменталистъёс кышкытэсь терактъёс ортчытӥзы США-лэн Персидской заливын службазэ нуись авианосецез, Великобританилэн Йеменысь посольствоез пумит. Пӧртэм кунъёслэн шоркаръёсазы еврейёслэн но палестинецъёслэн демонстрациоссы ортчизы. Ближней Востокысь пумитъяськон туж ӝог шӧдӥськиз экономикаын но. 37 долларозь будӥз 1 баррель му вӧйлэн дуныз, дунтэмазы данакезлэн корпорациослэн акциоссы. Бадӟымесь ыштонъёслэсь утиськыны тыршыса, адямиос тросэн зарни басьтыны ӧдъязы. Толон Египетын саммет ортчиз. Солэн ужаз пыриськизы США-лэн Президентэз Билл Клинтон, Египетлэн Президентэз Хосни Мубарак, ООН-лэн Генеральной секретарез Кофи Аннан, Израильлэн премьер-министрез Эхуд Барак но Палестина автономилэн кивалтӥсез Ясир Арафат. Кылем арняе люкаськылӥзы Европаысь 12 кужмо кунъёслэн кивалтӥсьёссы. Со пумиськонэ ӧтемын вал Югославия кемалась ик ӧвӧл быръем президентэз Воислав Коштуница. Тросэз ӧз оске вал, со отчы мыноз шуыса. Но Коштуница лыктӥз. Ма, пумитъяськыны мугез но ӧй вал. Югославилы йӧнатскыны кулэ кема дыр ӵоже "ужам" санкциослэсь. Запад кӧняезлэсь ке куштӥськиз ни. Со сяна, Коштуницаез оскытӥз, ӝоген странаезлы коньдонэн но юрттоз шуыса. Декабре Югославиын выльысь быръёнъёс ортчозы. Воштэмын луоз Сербиысь парламент. Демократъёс оско: социалистъёс отысь данаксэ пуконъёссэс ыштозы. Ӵапак парламентсэ ортчем шутэтскон нуналэ бырйиз Белоруссия. Солэн Президентэз Александр Лукашенко оске, оппозиция келялоз шуыса. Быръёнъя участокын куаразэ сётэмез бере со мылкыдзэ вераз вуоно арын президент быръёнъёс сярысь. Александр Лукашенко отчы одно ик пыриськыны чакла но вормонэзлы оске. Кылем арняе Россилэн Президентэз Владимир Путин нош ик кунгож сьӧрын ужаз. Витетӥ октябре со Казахстанлэн шоркараз Астанае вуиз. Нырысь ик пумиськылӥз но кенешиз Казахстанлэн президентэныз Нурсултан Назарбаевен. Кутэмын кӧня ке документъёс, кылсярысь, ӝоген Казахстанын ужаны кутскоз МГУ-лэн ёзэз, Уральск городын усьтэмын луоз Россилэн консульствоез, нош Астраханьын - Казахстанлэн консульствоез. Астанаын мукетыз но пусйымон ужард ортчиз - люкаськылӥз таможенной огазеяськон (Россия, Белоруссия, Казахстан, Киргизия, Таджикистан). Кенешонъёс бере огазеяськон интые пӧрмытэмын Евразиысь экономикая сообщество (ЕЭС). Кызьы верало экспертъёс, табере Россилэн кужмыз одно ик будыны кулэ. Угось ЕЭС-ын куараос люкемын луозы, соизлэсь яке таизлэсь кунлэсь экономикаын узырлыкъёссэ лыдэ басьтыса. Озьыен, Россилэн квотаез 40 куара луоз, Белоруссилэн но Казахстанлэн - 20, Киргизилэн но Таджикистанлэн - 10 куара. Ортчем арняе республикаямы президент быръёнлэн берпуметӥ люкетэз вал. Вылӥ должностез басьтыны мылкыд карисьёс пӧлысь ньылез нюръяськонысь потӥзы. Арня нуналэ ортчем быръёнъёс возьматӥзы: шаерысьтымы ужаса улӥсьёс оско Александр Волковлы. Бен, быръён кампания йылпумъяськиз. Но азьланьын политикъёсмы малпаськыны кулэ, дыр, президент быръён сярысь законэз выльдон сярысь. Угось асьмелэн законамы президент быръён одӥг турен ортчытыны чакламын. Ярам, таяз учыре ваньмыз умой ортчиз. Нош азьланьын?.. Ю.АЛЕКСАНДРОВА. Аръёс но ортчо... Воксё али гинэ дышетскыны пыримы вал кадь Удмурт кун университетлэн кылтодонъя факультетаз. Пӧртэм ёросъёсысь, пӧртэм ужан интыосысь вал ми. Кин ке серекъяса шуиз вал: "заушникъёс"... Ӝог гинэ ортчиз куать ар. Туэ тани дас ар тырмиз ни диплом басьтэммы дырысен. Вераськимы вал, туэ одно пумиськомы шуыса. Но пӧртэм мугъёсъя ӧз кылды. Оло, ас вакытаз ӟеч кылъёсмес вераны вунэтӥмы яратоно но дуно дышетӥсьёсмылы? Бен, котькыӵеез вал та дышетскон аръёсы. Но ми котьку но ӟеч малпаса гинэ тодамы ваиськомы И. В. Таракановез, Д. А. Яшинэз, А. А. Алашееваез, В. А. Штабскаяез, С. В. Соколовез, А. Ф. Шутовез, Е. А. Подшиваловаез, Н. А. Ремизоваез... Трос гинэ соос, йырзы кур медаз лу, кинэ ӧй вера: угось дышетскон вакытамы трос гинэ усто дышетӥсьёсмы вал. Соос пӧлы ик пыртысал И. П. Тукаевез, С. Л. Копотевез. Мон оскисько: ӵош но огвакытэ дышетскем эшъёсы азьло кадь ик - нырысь радын, сюлмоесь, визьмоесь, мур тодон-валан сёто ас нылпиоссылы. Уноез ужало школаосын. Соос - Юськиысь Пётр Давыдов, Брангуртысь Владимир Байсаров, Бӧдья-Пуроысь Галина Елышева но Елена Кузнецова, Люкшудьяысь Анна Скорнякова, Пичи Пургалась Зоя Вахрушева, Шарканысь Нина Ильина но Лидия Иванова, Кузёбайысь Николай Пислегин, Дэбесысь Валерий Нуриахметов, Уё-Докъялась Галина Баязитова, Алнашысь Татьяна Пчеловодова но трос мукетъёсыз. Дышетӥсьлэн нуналэныз ваньдэс ӟечкыласько, ужады котьку выль вормон но азинскон, ӟеч тазалык но шудбур сӥзисько! Ортчо аръёс. Табере та университетын дышетске ни аслам пие. Нош дыртӥсько кыкетӥ этажысь 204-тӥ аудиторие, тубатэтӥ тубыкум, сюлэм нош ик интыысьтыз потоз кадь, ас эшъёсме адӟон, яратоно дышетӥсьёсмес пумитан сярысь малпакум. Бен, соос ужало азьло кадь ик. Но дунне питран берга - выль дышетскисьёс, дышетӥсьёс син азе сюро, дырто, вӧзтӥ ӝог гинэ ортчо... Г. Парфёнов, Кияса ёрос газетын ужась. Кин узыргес? Мон трос газетъёсты но журналъёсты лыдӟисько но пӧртэм иворъёсын тунсыкъяськисько. "Самой, самой..." пӧртэмгес луись, мукет адямиосты маин ке ортчыны быгатӥсьёс сярысь гожъямын Гиннесслэн рекордъёс сярысь книгаяз. Отчы 2000-тӥ ар понна но туж паймымон лыдпусъёс пыртэмын. Та книга 100 миллион пала печатламын ни. "Форбс" журнал гожъямъя, дунне вылысь самой узыр адями - со "Майкросафт Карпорейшин" директоръёслэн советсылэн кивалтӥсез. Солэн ваньбурез 90 миллиаард долларозь люкаськем ни, но али коньдонэз 63 миллиард доллар, пе. Та журналлэн гожъяммезъя, Россиын самой узыр муртэн лыдъяське "Онексимбанклэн" президентэз Владимир Потанин. Со нефтен но кортэн вузкарыса, банклэн но телекоммуникациослэн ужамзы пыриськыса, 1,6 миллиард доллар люкам ни. Гиннесслэн рекордъёсъя книгаяз Удмуртиысь 1990-тӥ но 1998-тӥ аръёсы шедьылэмын Иван Вениаминович Шутов - Ижевскысь кужмо адями, спортсмен, ужбергатӥсь "Вордскемын со Селта ёросысь Узи гуртын. В. Рогалев. Юбилеез - президентэн Республикамы дасяське автономия басьтэмез дырысен 80 ар тырмон юиблейзэ пумитаны. Та уж быръёнъёслы сӥзем кампания дыръя но азинскиз. Кылем вторнике эшшо огпол люкаськылӥз на оргкомитет. Солэсь кенешонзэ нуиз Кун Кенешлэн Тӧроез А.А.Волков. Юбилейлы сӥзем ужрадэз ортчытонъя вераськиз А.М.Фоминов. Удмурт Республикалэн автономиезлы сӥзем праздник Ижевскын ортчоз 3-тӥ ноябре. Ӟеч сямъя та нуналэ сӥё- дано пусъёзы шаерысьтымы азьмынӥсь ужасьёсты. Соос люкаськозы 8 час 30 минутлы. Нош 11 часын Операя но балетъя театрын ортчоз Кун Кенешлэн сессиез, отын ялэмын луоз Удмурт Республикалэн нырысетӥ президентэзлэн ужаны кутскемез сярысь. Собере праздник азинскоз Йӧ дворецын. Озьыен, Удмуртия дано юбилейзэ пумиталоз выль сямен - президентэн. Кошкись даур понна - аспӧртэмлыко вамыш. Та нуналэ шаерамы вуозы трос вылӥ куноос. Л.МЕДВЕДЕВА. Витьтон арессэс пусъё Ижын ортчыло калыклэн шутэтсконэзлы сӥзем ужрадъёс. Матысь дыре Егитъёслэн юртазы луоз Удмурт Элькунысь дано артистлэсь Виктор Сергиенколэсь витьтон арессэ данъясь ӝыт. Солы юрттоз "Арсенал бэнд" концерт оркестр. Шаерысьтымы крезьгуръя училищеын ортчоз Тамара Ювенальевна Корепановаез данъясь ӝыт. Ужрад сӥземын луоз та адямилэн дышетон удысын куамын ар ужамезлы но витьтон арес тырмонэзлы. Азьвылгес С.М.Киров нимо паркын вал Пукролян сӥзем шулдыръяськон. Татын возьматӥськиз вашкала сюан дӥсь. А.АПАЕВА. Вожъяськон медаз сюпсьы школаез Алигес вуылӥ Алнаш ёросысь Асан гуртысь пичигес школае. Татын дышетске сю кызь кык нылпи. Туэ дасэтӥ классэ мынӥсьёс ӧвӧл, дас одӥгетӥяз сизьым адями люкаськиз. Начальной классъёсы ньыльдон ньыльзэ бичаллям. 1966-тӥ арысен ужа школаын покчиосты дышетӥсь Дмитриева Анисия Васильевна. Аслаз солэн куинь нылпиез - кык пи, одӥг ныл. Ваньмыз гуртоос сямен, соослэн семьязы но пудо вордэ, бакча возе. Туэ со дышетэ нырысетӥ классэ люкаськем дас куать пиналэз. Азьвыл дышетскисьёсызлэн нылпиоссы но пӧлазы вань. Анисия Васильевна, аръёс ӵоже воштӥсько-а пиналъёс? - Улон бызе, со сьӧры пичиос но дырто, шаплыесь луэмын. Али дышетскисьёсын огкыл шедьтыны шуггес. Нылпиос пӧртэмесь вуыло, кудӥз лыдӟиське ни, нош кудӥз букваосыз но уг на тодма. Дышетскон арлэн нырысетӥ толэзез гинэ ортчиз, нош ньылез нылпиос нырысетӥ класслэсь минут куспын лыдӟон нормазэ быдэстӥзы ни. - Дышетэм нылпиосты будыса тӥледыз тодмало на-а? - Вылӥ классъёсын дышетскисьёс вуыло, ӵошен кенешиськом, малпаськиськом. Школаез быдтэмъёс пӧлын дорам умой-умой ветлӥсьёсыз ӧвӧл ни. - Ваньмыз-а нылпиосты удмурт кылэз дышето? - Нырысетӥ арзэ ваньмыз. Берло ӟучъёсыз мозмытско. Мылкыд карисьёсыз пуко. Берпуметӥ выпускын одӥгез ӟуч нылы удмурт кылын мукетъёсызлэсь шонергес гожъяське вал. - Анисия Васильевна, тӥ малпамъя кулэ-а нимысьтыз школаын ветлон дӥськут (форма)? - Кулэ. Ваньмызлэн мумы-бубыослэн пичильтыкъёссэс чебер дӥсяны луонлыксы ӧвӧл. Нош нылпиослэн вожъяськон сямзы вань. Куд-огез тани школае уксёен ветло, мукетъёсыз но доразы коньдон курылыны кускизы. Алигес анай-атайёсын бичаським, таӵе югдур кылдонтэм вылысь кенешим. - Асьтэ нылпиостэс дышетӥды-а? - Одӥгзэ. - Каньылгес-а, шуггес-а ас пиналэн ужан? - Асладэзлы вожпотон золгес усе. Уж дурысь бертыса, ваньзэ дорысь лэсьтыны турттӥськод, утыр ӝыт вуэ. Вуоно нуналлы план гожъяно, тетрадь эскероно. Аслад, нылпиедлы дыр уг кыльы. Пиосыз дорысь ужъёссэс лэсьтыны косӥсько ик вал, нош нылы ваньзэ ачиз гожъялляз. - Кельше-а тӥледлы дышетӥсьлэн ужез? - Дышемын ни. Мукет интыын аслам тэркыям кадь уг йӧтӥськы. Нылпи садэн кӧня ке кивалтӥ. Ӧз кельшы, школае берытски. - Ортчем аръёс шоры палэнысен учкыса, улонэ пӧрмиз шуэмды луоз-а? - Уг быгатӥськы. Туэ туж трос алдаськонъёс. Умой улон понна куд-ог дыръя пӧяськыны быгатэм кулэ. Нош мон ачим но уг алдаськиськы, нылпиосме но ӧй дышеты. - Анисия Васильевна, кызьы тӥ учкиськоды Чечняын ожмаськонъёс шоры? - Малы кулэ со нылпиез быдтон? Кӧня синву кисьто пиослэн ӵыжы-выжыоссы. Гуртамы алигес отысь пияш берытскиз, уйёсы умой-умой иземез уг луы на. Сурон сапеген ветлыкуз, анайёсыз кӧня сюлмаськизы! Табере но шораз учкыса бӧрдо. - Дышетӥсьёслы вӧсь, луоз, пиналъёслэн шугъяськонъёссы шоры учкыны? - Озьы. Милям дышетэм нылпиосмы ук со. Ваньмыз аслам пичиосы кадь пото. Дышетскисьёсылы верасько: мон тӥледыз тышкаськисько но, вешасько но аслам нылпиосме сямен. Юисьёс шоры учкыса, сюлэм бӧрдэ. Пиналысен ик урамтӥ кудӟыса калго. Кинъёс соос луозы? Доразы ик мыныса тышкаськисько: юон сяна, мукет уж уд шедьтӥське шат? - Ма кароно, нылпиос "вож кый" борды медаз дыше шуыса? - Ваньмызлы ӵошен тыршоно. Вылӥын пукисьёс но огшоры адямиос огъя уж борды дэмен басьтӥьскизы ке, соку гинэ вормом. - Бигеръёс асьсэзыз ярато. Ас кылынызы мылкыд карысагес верасько, магазинъёс вылазы кык кылын ялонъёс ошыло. Асьмелы со кулэ-а? - Кулэ. Удмуртиын улӥськом бере, удмуртъёсыз гажаны кулэ. Гуртын, городын сямен, кылъя шугъяськонъёс уг шӧдӥсько. Ӟучъёс но асьме кылын ӟабыльто. - Тӥ понна мар со шумпотон? - Туж тыршисько: дышетскисьёсы верам кылме пелязы мед понозы, умой-умой мед валалозы. Даурлэсь висёнъёссэ бордазы медаз кыске. Мон понна нылпиосыз дышетон - шумпотон. Пиналъёс шоры учкыса, ачим егитомисько кадь йӧтэ. - Тӥледын вераськон азьын мукет дышетӥсьёсын пумиськылӥ. Ваньзы шуо: педагогез гуртын уг гажало. Анисия Васильевна, озьы-а со? - Шонер. Дышетӥсь гуртын нырысетӥез адями вал. Туэ калыклэсь копак музон малпанъёссэ нылпиос пыр но шӧдӥськод. Трос уксё басьтӥськоды, бусы ужъёсын уд выриське, шуо. Вожъясько. Пӧламы аламаез дышетӥсьёс но вань, дыр. Озьы котькыӵе ужын луэ. Котькуд адямилэн умой но урод сямъёсыз вань. Одӥг адями вылтӥ ваньмыз сярысь вераны уг яра. *** Вераськеммы бере Анисия Васильевна мынэ классысь нылпиосыз доры. Урокъёс быремын ке но, пиналъёс гуртазы уг дырто. Соослэн кыкетӥ анайзы вань - учкоз, утялтоз но улон-вылонэн тодматоз. Татын, нылпиос пушкын, Анисия Васильевналэн улонэз. О. Кожанова. Редакциын пумиськонъёс Армимес сюдэммы уг поты ке, сюдомы муртлэсьсэ Редакциын пумиськонъёсы шаерысьтымы пӧртэм тодмо адямиос, кивалтӥсьёс, политикъёс, тодосчиос вуыло. Таиз куномы кыдёкысь Украинаын улэ, но сюлэмыз солэн вордӥськем палъёсаз. Удмурт генерал-лейтенант Пётр Иванович Гусев ачиз сярысь мадёнзэ тазьы кутскиз. - Вордӥськи мон Селта районысь Улын Уметьгуртын. Улонысьтым ньыльдон арзэ герӟай армиен, рядовойысен кутскыса, генерал-лейтенантозь будӥ. Ортчи командирлэсь вань должностьёссэ: кивалтӥ взводэн, дивизен, корпусэн, 13-тӥ но 20-тӥ армиосын, вал Прикарпатьеысь военной округлэн штабезлэн кивалтӥсез. Отысен ик шеди Африкае, Анголаын валтӥсь военной советник вал. Солдатлэсь шинельзэ дӥсяй Сталин кивалтон вакытэ, Хрущев дыръя офицер луи, генерал луыса служить кари ни, Горбачев кивалтыку, вылдӥськон вакытэ. Та дыр куспын куашказ, быриз Совето Союз, чалепъёс гинэ кылизы на быдӟым державалэсь. Озьы мон сюри кунгож сьӧры, улӥсько Украинаысь Львов городын. Но вордӥськем гуртэлэсь мӧзмон, мон пушкын улэ, со котьку но адӟиськыны ӧте дораз. Аслэсьтыд улондэ службалы сӥзён капчи ӧвӧл, но со туж кулэ уж. Мӧзмонэз чидано луылӥз. Берлозэ дорам вуылӥ дас ар талэсь азьло. 90-тӥ аре пенсие потӥ, ӝыны ар ортчыса, сизьымдон аресме тырмыто ни. Арлыд будэмъя, лэся, гуртэлэсь мӧзмон сюлэмме золгес бугыръяны ӧдъяз. Львовын мон общественной ужен вырисько, егитъёслы патриотизм мылкыд пыӵатонэн. Пумиськылӥськом Украинаысь солдатъёсын, офицеръёсын, ветлӥсько генералъёслэн клубазы. Службаез нуон вакытэ пӧртэм пумиськонъёс вал, уката ик шумпотӥськод ас шаерысьтыд адямиосын пумиськонлы. Улытозямлы сыӵе вунонтэм пумиськон вал Африкаын дыръям Удмуртиысь тодмо суредасен Петр Васильевич Ёлкинэн. Посол жингыртэ мынам резиденциям но юа, пумиськемед потэ-а, пе, аспал адямиеныд? пумита, келяло. Тодматским, ӟыгыртӥським, чупаським. Мерседесэ пуксьыса, мынам улонтӥям мынӥмы. Туж тунсыко вал сое кылзыны, мыным аслым удмурт сямен секыт потӥз ни вераськыны. Чай юон сяменымы портретэ но дась вал. Мон соку граждан дӥськутэн ветлӥ, уг яра вал астэ шараяны. Уката ик со странаосын, кудъёсызлы юрттӥз Совето Союз, кудъёсыз султӥзы социализм сюрес вылэ. Асьмеос ведь вал пӧртэм странаосын. Африкаын гинэ дурбасьтӥмы Анголалы, Эфиопилы, Мозамбиклы, Танзанилы но мукет государствоослы. Пётр Васильевичен со пумиськонмы дырысен ортчиз ни дас одӥг ар. Удмуртие вуыса, выльысь пумиськи мон соин. Туж синмаськымон суредась, трос ужа удмурт калыкез данъян бордын. Мон ачим ӧй буды удмурт сямъёс, йылолъёс вылын. Анаймы дышетскымтэ вал, сизьым нылпиоссэ пичиысен дышетӥз ужез гажаны, лушкаськытэк, пӧяськытэк улыны. Палэнын улӥсько ке но, мон тодӥсько, адӟисько удмурт калыклэсь висёнзэ, бырон калэ мынонзэ. Астэ ачид утён понна юн кариськыны, нюръяськыны кулэ. Куд-ог дыръя малпасько, Удмуртие берытскыса, калыке понна мон троссэ лэсьтыны быгатысал на. Но арлыд ассэ тодаз вайытэ ни. Кӧня ке арлы бероми шуысал, но янгышъёстэ кулонын уг луы. Эшъёсылэсь кылзӥськи, семьялэсь но мылкыдзэ чаклатэк уг луы. Кузпалыным Галина Васильевнаен ми кык ныл будэтӥм. Соослэн асьсэлэн нылъёссы будо ини. - Пётр Иванович, кызьы огшоры солдат генерал-лейтенантозь вуэ? - Котькуд адями пиналысен малпаське ини кин луон сярысь. Мон туж синмаськылӥ военнойёслы, мудор интыын адӟылӥ соосты. Кин ке армиысь бертэ ке вал, быдэс гуртэн люкаськылӥзы. Али ке но син азям на бускель пилэн Шиляевлэн армиысь бертэмез. Сое дорамы но куное ӧтчазы. Синъёсме вошъятэк учки со шоры. Огшоры солдат, нош кыӵе шулдыр, капчи мылкыдо. Малпай, одно ик солдат луо. Спортэн вырыны кутски, трос бызьылӥ. Эшъёы пӧлын мон азьветлӥсь вал: я мурт бакчае пыроно, я нылашез пунэттӥз кысконо, я атакае мыноно - сьӧрам кыстӥскьылӥзы. Куасэн бызьылыса ӵошатскиськом вал, кин кинэ ортчоз. Озьы шеди районын куасэн бызьылонъя ӵошатсконъёсы. Мынам пыдам ас лэсьтэм куасъёс, бускельмы Хитрин лэсьтӥз. Киям нинпу бодыос, вылам ас куэм дӥськут, пыдкутчанэ - гын сапегъёс. Ӵошатсконъёсы соку пыриськиз Селта школаысь дышетӥсьлэн пиез Шаклеин, соку со дышетске ни вал физкультурая факультетлэн нырысетӥ курсаз. Ваньмыз со котырын бергало. Кызьы, пе, уд. Со спорт костюмен, басьтэм куасъёсын, бамбук бодыосын. Соин артэ ик Селта школаысь чемпион, 10-тӥ классын дышетскись Беляев. Кутскизы ӵошатсконъёс. Нырысь ик мынэ Шаклеин, со бӧрсьы - Беляев но мон. Ортчоно 10 иськеме. Пиослэн куасэн бызьылон амалзы но куронъёсъя тупатэмын. Мон кельтӥсько Беляевез, собере Шаклеинэз, вуисько нырысетӥ. Ваньмыз паймемын: кин та таӵе? Сыӵе мастеръёсты гуртысь пияш кельтӥз! Соку ик ӧз оске, оло, пе, мукет сюрестӥ бызиз. Эскеризы. Ваньмыз умой. Озьы мон луи районлэн чемпионэз. Пыртӥзы республикалэн сборной командаяз. Отын куинетӥ инты басьтӥ. Собере пыриськи Россилэн первенствоез понна гуртысь егитъёс пӧлын Пермьын ортчем ӵошатсконъёсы. Озьы спорт монэ гурт улонлэсь вылэ ӝутӥз. Тодматски город улонэн, культураен. Дышетсконме азьланьтэме потэ на вал, анае шуиз, кыӵе школа, пе, луоз на, ӝоген армие мынод ни. 1946-тӥ-1947-тӥ аръёс туж секытэсь вал, сиён ӧвӧл, кызьы ке но улоно. Мынӥ военкоматэ, армие куриськисько. Ма, тыныд 17 арес но ӧвӧл ай, пе. Кык арзэ йылтэ шуисько, шедьтэ кыӵе ке но училище. Со вакытэ монэным лыдъясько ни вал. Шедьтӥзы училище, военком оскытӥз, экзаменъёсы, пе, тонэ ӧтёзы. Возьмаса аръёс но ортчизы, вуиз армие мынон дыры. 1951-тӥ арын март толэзе рядовой солдат луи. Асме котыр ласянь ӟеч возьматэме понна, ар ортчыса, гуртэ лэзьязы. Отличник шуыса, младшой сержант луытэк, сержант звание сётӥзы, собере ефрейтор луи. Кык ар служба бере армиен люкиськеме ӧз поты ни. Куинь арзэ дышетски Тюменьысь училищеын, отчы куто вал сизьым классэз йылпумъямъёсты но. Озьы малпанэлэн ог люкетэз быдэсмиз, луи офицер. Кыӵе ке ужпум азяд пуктӥськод ке, вань шуг-секытъёсты вормыны луэ вылэм. Туннэ нуналмес но азьвыл аръёсты ӵошатоно ке, улыны луоно. Тросэз ужлы ёрмиськом шуо. Ма, ку меда гуртын улӥсьёс ужтэк пукизы? Музъемды вань, киосты вань - ужалэ. Визьмоосыз та вакытэ гуртын но ёрмыса уг уло. Но странамылэсь улонзэ огъя учконо ке, азинсконъёс адӟисько ни. Асме мон куинь-ньыль пол иностранец шуыны быгатӥсько. Дас одӥг ар улӥ Германиын, куинь но ӝыны ар - Анголаын, вал Венгриын, Польшаын, Казахстанын. Куинь арзэ улӥ Москваын, дышетски генеральной штаблэн Фрунзе нимо академияз - кулэ вал басьтыны вылӥ военной образование, сотэк генерал уд луы. Нош мон ас азям ужпум пуктӥ: малпанме быдэсто, удмуртъёс пӧлын но мед луозы генералъёс. Йылпумъяй сое вылӥ азинсконъёсын. Оскизы дивизиен кивалтыны - 13 сюрс адямиен, собере корпусэн - таяз 20 сюрс пала адями, армиын 40 сюрс мурт ни, отӥяз луи округысь штаблэн кивалтӥсез - отчы пыриз Украинаысь дас область, ыстӥзы кунгож сьӧры - кыл кутӥськод ни быдэс государство понна. - Кызьы учкиськоды Кавказын но Шор Азиын кылдэм югдур шоры? - Югдур отын туж секыт, та улосъёс пала кизэ мыче Запад. Нюръяськон нырысь ик мынэ сьӧд зарни понна. Ас кылзэ тужгес но вераны турттэ США, со самой ожмаськись страна. Совето Союзлэн куашкамез Америкалы ӟечен гинэ берытскиз. Шеварднадзе Кавказэ ӧте Америкаысь советникез, Назарбаев - Казахстанэ, туркменъёс но ас доразы ӧтё США-ысь юрттӥсьёсты. Американецъёслы со ик кулэ вал, асьсэлэсь политиказэс та странаосы пыӵатон понна. Соин ик нюръяськон та улосъёсын азьланьтӥськоз на. Мукетыз но вань. Историез ӟеч тодӥськоды ке, вань ожмаськонъёс кутскылӥзы осконъёслэн пӧртэмлыксы бордысен. Вашкала дырысен куспазы ӧз тэрылэ католикъёс но православнойёс, соосыз но, таосыз но христианъёс ке но. Исламлэн аслаз куронъёсыз. Малы ожмаськон кутскиз Чечняын? Вакхабитъёслэн ваньзэ ас сяменызы каремзы потӥз, но соос огназы ӧй вал, шедизы кунгож сьӧрысь юрттӥсьёс. Чечен калыкез озьы гинэ уд буйгаты, вашкала дырысен соослэн сямзы тодмо. Тодӥськоды на, дыр, Пушкинлэн, Лермонтовлэн гожъямъёсысьтызы, чеченъёс эксэй дыръя но нюръяськонлэсь ӧз куштӥське. Али но капчиен уз йылпумъяськы пумитъяськон. Быро пинал пиос, усе армилэн данэз. Нош макем секыт та вакытэ анайёслы. Но солэсь нокытчы уд кошкы. Тани Украиналэн Запад люкетэз Быдӟым Отечественной война дыръя соку ик Гитлер пала кариськиз. Ожмаськон бырем бере но вить ар ӵоже пумитъяськизы, бандеровецъёс нюлэсъёсын ватскыса улӥзы. Кызь вить ар ӵоже ог-огенызы ожмасько ни Анголаысь калыкъёс. Одӥгъёсызлы Совето Союз дурбасьтӥз, мукетъёсызлы - США, ЮАР. Озьы пуромиз граждан ож. Югославиын но сыӵе ик югдур вал. Америкалэн быдэс дуннеен кузёяськемез потэ, со туж зол возиське пыд йылаз. Кык толэзь талэсь азьло американецъёсын пумиськыны кылдӥз, кемалась адӟиськем потэ ни вал соосын. Германиын служить карыкум, ай мон соку старший лейтенант вал, танкъёсмылэн гумыоссы ог-огмы пумит учкизы - НАТО-лэн ӝыны миллионъем армиез но Варшавской огкылэ пырись странаослэн ӝыны миллионъем армизы, 10 сюрслэсь ятыр танкен. Ми соку Берлинысь борддорез ӝутӥмы. Одӥг пол но ӧм ыбе, соос но чалмытак палэнскизы. Шӧдо вал Совето Союзлэсь кужымзэ. Бен вал, дыр, пӧртэм янгышъёсмы, но странамы соку зол возиськиз. Ми, дас генералъёс, пумиським американецъёсын Украиналэн шунды пуксён люкетаз "Щит мира-2000" учениос дыръя. Куамын сизьым страна пыриськиз та ужрадэ. Америкаысь одӥгез генерал соку шуиз, 1991-тӥ арозь, пе, дивизиосмы ваче пумит сылӥзы, тушмонъёс вал, нош табере ӵош пукиськом. Американецъёс туж капчи мылкыдоесь, весяк пальышало, серекъяло, но со дыре ик югдурез ас палазы куасалтыны туртто. Соос уг вунэто американец луэмзэс. - Пётр Иванович, кӧня кылъёсты тодӥськоды? - Селтаысь шор ёзо школаын дышетӥ француз, немец, англи кылэз. Котькуд ар дышетӥсьёсмы вошъяськылӥзы. Тодӥсько удмурт, ӟуч, украин, испан кылъёсты. Жаль, кунгож кылъёсты дышетон школаын ляб пуктэмын вал. Малпасько, калыкъёсты герӟась немец, англи ӟуч кылъёсты тодыны кулэ. - Мар малпаськоды "Курск" атомной подлодка пумысен? - Малпасько, "Курск" пуштӥз ачиз, торпедаосты эскерон дыръя. Но палэнтыны уг луы, дыр, Россиысь Правительстволэсь мукет веранъёссэ но: зарезь пыдсысь кыӵе ке пуштытӥсь арбериен мырӟиськиз яке мукет подлодкаен. Озьы-а, тазьы-а, но "Курск" пумысен сыӵе огыр-бугыр вераськонъёс ӝутыны кулэ ӧй вал. Военной секретъёс котьку но вал, азьланяз но соос луозы. Оло, адямиос дасо аръёсын мар ке но вылез бордын ужазы, табере ваньзэ шараяны кулэ шат? Нош американецъёс олокызьы но тодыны турттозы сое, озьы гинэ уз буйгалэ. Азьло аръёсы но ӧжыт-а адями быриз пӧртэм испытаниос дыръя, но калыке со ӧз вӧлмылы. Зарезь пыдсы 118 муртлэн выемез туж бадӟым кайгу. Но асьмелэн нуналлы быдэ сямен сюрсъёсын адямиос быро. Нош Чечня кӧня егит пиосмылэсь улонзэс басьтӥз ни. Соос маин урод? - Улондылы кышкытлык кылдылӥз-а армиын дыръяды? - Африкаын дыръям вертолётмы шоры ыбылӥзы, усиськом ни вал. Соку трос пол сыӵе учыръёсын пумиськылыны кыдылӥз. Пленэ шедемъёс одӥг пол шуизы, ми, пе, адӟимы тӥлесьтыд лобамдэс, витьтон метр кеме гинэ ӝутскылӥды, но шорады ӧм ыбылэ, тодӥськом, пе, вал тӥ советской шуыса. Кылдылӥз музъемлэсь вить сюрс метрлэсь вылэтӥ но лобыны - "Земля-воздух" ракетаос со кеме ӧз сузьылэ. Витьтон метр улэтӥ лобакумы но соослы секыт вал шорамы ыбылыны, люкетылӥзы джунглиос. Мар веранэз, военнойёс Африкаын асьсэды геройлыко возизы, улӥзы землянкаосын. Мадё, ӵукна потӥськом, пе, кунгожез чакланы, нош отын слонлэн лыосыз костасько. Уин левъёс шораз урдӥськиллям. - Кызьы учкиськоды Россилэн НАТО-е пыронэз шоры? - Россия НАТО-е уз пыры, но кусыпъёс соин возёз, аслэсьтыз секретъёссэ шараятэк. Ӟеч куспыъёс возёнлэн мукет палыз но вань - тушмонъяськись странаос шуак уз омырске асьме вылэ. Косовоын луэм учыр но возьматӥз, Россиысь солдатъёс быгато асьсэды возьматыны. Десантникъёсмылэн уй ӵоже ортчем сюрессы американецъёсты но паймытӥз, соослэн кужыменызы лыдъяськытэк ӧйлась ни. Совето Союзлэн куашкамез зол шуккиз странамес, но али Россия ӝутскыны кутске ни. Америка но сое адӟытэк уг улы. Асьмелы али азьлане мынон сюрес шедьтоно. Но сыӵе вамышез мон ӧй шӧды на. - Петр Иванович, мар малпаськоды тросэзлэн егитъёслэн армие мынынын пумит луэмзы сярысь? - Гуртысь пияш армие ветлытэк кыле ке вал, сое серем карылӥзы. Нылъёслэн но шораз учкемзы ӧз потылы. Нош али югдур воштӥськиз. Со туж умойтэм. Егитъёслы пыӵатыны кулэ патриотизм мылкыд. Та ласянь тырмыт уг ужало ветеранъёслэн огазеяськонъёссы. Армилэсь данзэ зол куашкатӥз "дедовщина" шуон но. Но со армилэн янгышез ӧвӧл, отчы вуттӥз обществомылэн куашканэз, лябез. Али армие куто ни пытсэт сьӧрын пукылэмъёсты но, нош соос сьӧразы ваё асьсэлэсь законъёссэс. Пионер лагеръёсын гинэ но бадӟымъёс пичиоссэ ултӥяло, собере вуэ армие мынон дыр: урод сямъёс сьӧразы ик мыно. Мар ватонэз, ӟеч сямъёсты пыӵатон уж лябӟиз армиын но. Военной училищеосы али кин шедем мынэ, азьло сямен котыр ласянь уг чаклало офицер луыны турттӥсьёсты. Но берло дыре югдур татын но умояныгес кутскиз, адямиос валало ни армилэсь кулэлыксэ. Армитэк государство но уз луы угось. Наполеон шуиз вал. "Асьмелэсь армимес сюдэммы уг ке поты, сюдоно луом муртлэсьсэ". Тае вунэтыны уг яра. - Мукет улон сюресэз ортчысалды ке, кин луысалды? - Выльысь улоно луысал ке, мон быръем сюрестӥм ик ортчысал. Со сярысь мон тодэ ваёнъёсме но гожтӥ, книгаен поттыны турттӥсько. Но кулэ коньдонэн юрттӥсьёс. Вазиськи ни Удмуртиысь пӧртэм общественной огазеяськонъёслы, политической партиосы, банкъёсы. Ӧйтӧд, луозы-а юрттыны мылкыд карисьёс. Но та книга юрттысал вал егитъёслы патриотизм мылкыд пыӵатыны, историмес тодыны. Дасяз Л. Малых. Выль спектакль луоз Шаерысьтымы Операя но балетъя кун театрын 21-тӥ октябре возьматӥськоз П.И.Чайковскийлэн "Пиковая дама" операез. Пуктоз сое Санкт-Петербургысь режиссёр Алексей Степанюк. Театр выль ужзэ дасяз кык ар ӵоже. Пусйымон соиз: та спектакль сцена вылэ потэ быдӟым аспал эшмылы П.И.Чайковскийлы вордӥськемез дырысен 160 ар тырмыку. Ноябре - выль премьера: "Зарни атас сярысь выжыкылэз" пуктӥз шаерысьтымы Операя но балетъя кун театрысь выль валтӥсь режиссёр Александр Прасолов. Шугадӟонъёсты палэнто Туннэ та юртын ужа Россиысь калык коркаослэн огазеяськонзы. Адямиослы юрттэ со пӧртэм шугадӟонъёссэс палэнтыны. Куинь толэзь ӵоже татчы вазиськылӥз кык сюрслэсь трос мурт. Куронъёс котькыӵеесь вал: одӥгъёсыз косо уже интыяны, мукетъёсыз тышкасько улон-вылон юртъёсты чакласьёсты... Та вакытэ татчы кельтыны луоз Удмурт Элькунлэн нырысетӥ Йырызлы куронъёстэ но. Вазиськыны луоз 11 часысен 18 часозь. Удалтоз устоосызлы Операя но балетъя кун театр утча выль усточиосты. 24-тӥ но 25-тӥ октябре куспазы ӵошатскозы Ижысь пинал артистъёс но музыкантъёс. Устоосыз пӧлысь устоосыз кутэмын луозы театрлэн хораз, балетаз, оркестраз но драмая люкетаз. Кужымзэс эскерыны мылкыд карисьёс но вылӥ тодон-валанэн адямиос тросгес ивор тодыны быгатозы 75-42-71 номеро телефон пыр. Е.БЕЛОВА. 1� � Б а=Р/яя 2 А! 8 Ё9Р Р Мотоцикл возисьёсты вите выль магазин Россилэн сюресъёстӥз ширтӥсь мотоциклъёс пӧлысь 90 процентэз "Иж" маркаен лэсьтэмын. мотоцикл поттон удыслы - 70 ар ини. Со дыр ӵоже 11 миллион "Ижъёс" поттэмын - али но солы кулэяськон бырымтэ на. Но шонерзэ верано ке, мотоцикл возисьёс ӵем гинэ ӝожтӥськылӥзы воштос ёзъёслэн тырмымтэзы вылэ. Азьло аръёсы зэмзэ но воштос ёзъёсын вузкарись нокыӵе магазинъёс ӧй вал. Соин ик пӧртэм цилиндръёсты, шатунъёсты но мукет воштос ёзъёсты спекулянт шуонъёслэсь гинэ шедьтоно вал. Сыӵе киосысь басьтэм воштос ёзъёс кемалы ӧз чидаллялэ, угось ӵемысь соос лэсьтэмын "кибашлы" адямиослэн валамзыя гинэ, вылӥ куронъёсты чаклатэк. "Ижмаш-Мото" предприятие, та югдурез тупатон вылысь, пӧртэм амалъёс утчаны выриз. Предприятиын кивалтӥсьёс воштӥськемен, мотоциклъёслэн ӟечлыксы сярысь сюлмаськон выль сямен радъяськиз. Нырысь ик, пум понэмын вал заводысь лушкаськисьёслы. Собере мотоциклъёсты утьыны выризы алдаса лэсьтэм детальёслэсь (подделкалэсь). Заводын лэсьтэм детальёс вылэ фирмалэсь пуссэ пуктыны кутскизы. Нош туэ арлэн пумаз "Ижмаш-Мото" предприятилэн воштос ёзъёсыз нимысьтыз пакетэ тырыса поттэмын луозы. Соин ик кельшисьтэм деталез мотоцикллэн кузёез берлань воштыны но быгатоз. Таӵе ужрадъёс МВД-ын но выт бичанъя инспекциын ужасьёслы но юрттозы, угось соос сертификаттэк детальёс лэсьтӥсьёсты чакласа возьыны кулэ. Вераны кулэ, алдаса лэсьтэм детальёс понна уголовной уж усьтыны чакламын. Нош ватскыса ужась предприятиез РФ-лэн Уголовной кодексысьтыз 46 но 180 статьяосыз улэ кыскыны луэ. Но соин гинэ алдаса лэсьтэм детальёсын вузкаронэз уд дугдыты. Адямиослы паськытгес луонлыкъёс усьтоно мотозапчастьёсты фирменной магазинъёсысь басьтыны. Та нуналъёсы "Ижмаш-Мото" аслэсьтыз выль магазинзэ усьтыны дасяське. Соку мотоцикл возисьёс отысь котькуд кулэ деталез басьтыны быгатозы, солэн ӟечлыкез сярысь сюлмаськытэк. � � ъ Б у � � q д q Б q В яя - �ь<ьг - ИА�.яя Ҥ6 ы Е ?Р Р И( Б Ц яяяя Тимес Неw Роман Цыр ХелветицаУЦД КУСЫПЪЁС Норьяысь - Ньюарке Кыллэн кужмыз бадӟым. Юнме шорысь шуиллямтэ, дыр, вашкала ӟучъёс, кыл, пе, Киевозь вуттоз. Нош Пичи Пурга ёросысь Норья школаысь дышетӥсьлы Галина Александровна Кротовалы кыл тодэмез юрттӥз пырак Америкае вуылыны. Егит нылкышно кӧня ке пол пыриськылӥз Россиысь англи кылэз дышетӥсьёслэн конкурсазы. Сое радъяло США-лэн странаысьтымы посольствоез, Калыкез дышетонъя министерство но "Учительская газета". Ньылетӥяз гинэ Галина Александровналы удалтӥз. Нырысь-валысь республикаысьтымы дышетӥсьёс пӧлын вормисе потӥз. Собере кыкетӥ турын ваньзэс азьпалтӥз. Со ортчиз Нижний Новгородын. Бӧрысьгес ини синмысь синме кенешонлэн (собеседованилэн) йылпумъянъёсызъя Г.А.Кротова вормисен лыдъямын вал. Али, трос дыр ортчыса но ни, нылкышнолэн мылкыдыз буйгамтэ на, кожалод, вормемезлы со та вакытэ но уг оскы кадь. - Конкурсэ 1200 пала мурт пыриськиз. Куамынэзлы гинэ шуд усиз Америкае стажировкае мыныны, - маде Галина Александровна. - Кык толэзь ӵоже отын узыр тодон-валан люкам. Россиысь дышетӥсьёс США-е июнь толэзьлэн шораз кошкизы. Арня ӵоже улӥзы Вашингтонын, тодматскизы Америкалэн шоркареныз. Собере мынӥзы Далавар штатлэн университетаз. Со интыяськемын Ньюарк городын. Сизьым арня ӵоже англи кылэз дышетонэн выризы, нылпиосын ужан методикая тодон-валан люказы. Пумаз ортчиз конференция. Отчы СНГ-е пырись мукет кунъёсысь, кылсярысь, Узбекистанысь, Украинаысь, Кыргызстанысь - делегациос но лыктӥзы, озьы ик тодон- валанэнызы шумпоттӥзы Америкаысь англи кыллы дышетӥсьёс - асьсэ куназы ортчем конкурсын вормисе потэмъёс. - Конференция дыръя туж уно материал люкам, - тодаз вае Г.А.Кротова. - Творческой мастерскойёсын ог-огмылы адӟем карымонзэ, азьланьын уже кутымонозэ мадьылӥм. Малпасько, азьланьын ваньзэ сое ужам пыӵатыны быгато. "Америкаын ма тужгес но вунонтэм кылиз?" - юанэлы Галина Александровна валэктӥз: - Тужгес но кельшиз Далавар университетын дышетскеммы. Преподавательёсмы ваньмыз сямен азьвыл школаын ужамын, данакез али но, университетын сяна, отын тыршо. Пиналэн ужан аспӧртэмлыкъёсты ӟеч валано. Соин ик соослэн визь-нод сётэмзы нокызьы но пайдатэк уз ортчы. Туж яразы США-лэн Конституциезъя, историезъя занятиосмы. Тани историлы дышетӥсьмы одӥгзэ пумиськонзэ кырын-бурын ортчытӥз. Со милемды Геттисберг улосэ вуттӥз. Ӵапак татын дас укмысэтӥ дауре граждан ож дыръя уй пал но лымшор кужымъёслэн бадӟым ожмаськонзы ортчем. Преподавательмы юрттыны ӧтем азьвыл дышетскисьёссэ, туала студентъёсты но соослэсь анай-атайёссэс. Соос аспӧртэм спектакльын кадь яркыт син азе пуктӥзы даур талэсь азьло ортчем учыръёсты. Бен, шумпотон шумпотонэн, но дораз берытскемез бере Г.А.Кротовалэн сюлмаськонъёсыз ватсаськиллям. - Ми Америкае ветлӥм бере, табере отысь дышетӥсьёс Россие лыкто, - сюлмаськон мылкыдзэ уг ваты Галина Александровна. - Укмыстон укмыс процентлы оскиськом вал, дорамы нокинэ но уз ыстэ шуыса. Ма со Норья, Москваен яке Владивостокен ӵошатыса?! Заявка ньӧмыз понна сётӥм ик. Кемалась ик ӧвӧл тодӥм - дорамы лыктэ Юта штатысь дышетӥсь. Ӧйтӧд, кызьы сое пумиталом, вылӥ кивалтӥсьёсмы ӧз юрттэ ке. Милям диафильм возьматыны гинэ но техникамы ӧвӧл. Бен, гурт школаосмы зэмзэ но,| туж куанересь. Галина Александровна Кротова кадь дышетӥсьёс гинэ юртто солы азинскыны но кужмояны. Тани конкурсын вормемез понна нылкышнолы компьютер техника кузьмазы. Ваньзэ сое дышетӥсь школаезлы сётӥз. Инъяны- пуктыны юрттӥз Москваын улӥсь братэз. Табере ӵошатскы на Норья школаен, пырак Интернетэн кусып возе ни ук со. Галина Александровнаен кенешыса синмаським солэн ӟырдыт утчаськон мылкыдызлы, буйгатскытэк улон сямызлы. Тӥляд но, гажано эшъёс, Америкае вуылэмды потэ, дыр. Дырдэс токма эн быдтэ, дышетэ англи кылэз. Ю.АЛЕКСАНДРОВА. УДМУРТ КУНЛЫ � 80 АР Удмуртъёс но ӝутӥзы заводъёсты Граждан ож йылпумъяськем бере ик котькытын кутскизы куашкатэм калык хозяйствоез ӝутон, фабрикаосты но заводъёсты выльдон ужъёс. Но азьлане шӧдскымон вамыш лэсьтон понна со тырмыт ӧй вал. Бере кылёнысь чутрак потон понна кулэ луиз кужмо секыт промышленность, радъяно вал огъя калык хозяйствоез, пыд вылаз ӝутоно гурт удысэз. Озьы ик палэнскыны тыршоно капиталистъёслэн юрттэтсылэсь. Удмуртиын индустриализация кутскиз 1920-тӥ аръёслэн пумазы. Та ласянь валтӥсь инты басьтӥз "Ижстальзаводын" корт ӵыжатон. 1929-тӥ арын ини йылпумъяськиз выль мартенэз лэсьтон, поттэмын нырысетӥосыз "Беккер" фрезер но "Левс" токарь станокъёс. Нош 1928-тӥ арын кутскемын "Иж" пусэн мотоциклъёсты бичаны. Бӧрысь соос данзы быдэс СССР-ын тодмо луизы. Со аре ик кутскизы Ижевскысь пӧйшуран пыӵалъёс поттонъя фабрикаез выльдыны. Асьмелэсь пыӵалъёсмес быдэс дунне вылын басьяны ӧдъязы. Та аръёсы кутскемын пул пилён завод но пуллэсь арбериос поттон комбинат пуктыны. Играын ӝутэмын уксуслэсь порошок но метиллэсь спирт поттонъя завод, Яганысь заводын поттӥзы канифоль но скипидар. Озьы ке но, уно удысъёсъя Удмуртия мукет улосъёслэсь трослы бере кылемын вал. Соку индустриализациез ӝогомытон вылысь уно ужрадъёс кутоно луиз. Кылсярысь, сизьым толэзьскын гинэ 1932-тӥ арын пуктэмын Ижевскысь ТЭЦ. Со кужмо электростация городамы али ке но ужа. Станкостроез пӧрмытӥзы станокъёс лэсьтонъя заводлы. Отын со вакытлы тупась "Удмурт" нимо кортэз вӧлӥсь усто станокъёс поттыны кутскизы. Куамынэтӥ аръёсы ӵыжатӥзы ни чугун. Можгаын вуттэмын бадьпу суллэсь дубиль экстракт поттонъя "Удмурт" завод (бӧрысь "Дубитель" луиз). Со дырысен дубительёсты асьме странае мукет кунъёсысь ӧз басьтылэ ни. Можга посёлок городлы пӧрмиз. Та вакытэ ик лэсьтӥзы пул пилён но кирпич шуккон заводъёсты, азинскиз гыбед но нюлэс промышленность. Индустриализация азинскиз кыкетӥ пятилеткае но. 1933-тӥ арын ужаны кутскиз газогенераторной станция, "Ижстальзводын" вуттэмын кузнечной цех, отын поттӥзы молотъёс. Шоркарамы со вакытэ ужаны ӧдъязы электроен ужась гур, корт нуйтон цех. Но ижъёс тужгес но данъяськизы блюмингенызы, со вал СССР-ын витетӥез. Выль заводъёсты ӝутон но вужъёссэ выльдон ужъёс мынӥзы шаерысьтымы ваньмаз городъёсын. Азинскизы пияла но сиён-юон, дӥськут, пыдкутчан но мукет вузъёсты поттон удысъёс. 1939-тӥ арын "Ижстальзавод" кык нимаз предприятиослы люкиськиз - андан ӵыжатон но машина лэсьтон заводъёслы. Нош кинъёс бен ужазы заводъёсын, кин соосты ӝутӥз но кыӵе коньдонэн? Асьмелы тодмо, революция дырозь тросгес лыктэмъёс ужазы шуыса. Табере кадръёсын ужан политика воштӥськиз, ужпум пуктэмын вал, заводъёсы тросгес татын улӥсьёсты кыскон сярысь. 1925-тӥ арын Ижысь заводъёсын 237 удмурт ужаз, 1926-тӥ арын - 308, 1927-тӥ арын - 640, 1928-тӥ арын - 796 но 1929-тӥ арын - 852 мурт. Удмуртъёслэн лыдзы будӥз ке но, огъя ужасьёс пӧлын соос ваньзэ 3,4 процент гинэ вал. Соин ик ВКП(б)-лэн ЦК-ез "Ижстальзаводэз" удмуртъёслэсь лыдзэс 1932-тӥ арлэн пумозяз 25 процентозь вуттыны косӥз. 1929-тӥ арын 11-тӥ декабре ВКП(б)-лэн обкомезлэн бюрояз удмуртъёсты- батракъёсты но куанеръёсты заводэ кыскон пумысен 5 арлы план кутэмын. Та дырысен югдур умой пала воштӥськыны ӧдъяз. Кылсярысь "Ижстальзаводын" 1930-тӥ арын удмуртъёс вал ини 6,4 процент, 1931-тӥ арын - 10,2, 1932-тӥ арын - 10,3, 1935-тӥ арын - 12,7, 1936-тӥ арын - 13,4 но 1938-тӥ арын - 14,5 процент. Та лыдпус талэсь вылӥе ӧз ӝутскы ни. Озьы удмуртъёсты заводъёсы 25 процентозь вуттон сярысь план ӧз быдэсмы. Но куд-ог заводъёсын удмуртъёслэн-рабочийёслэн лыдзы солэсь но ичигес вал. Кылсярысь, Можгаысь пияла поттон "Свет" заводын 1930-тӥ арын 433 ужасьёс пӧлысь удмуртъёс вал 21 мурт гинэ, нош "Дубительын" 83 рабочий пӧлын удмурт чылкак одӥг лыдъяськиз. Юан кылдэ, малы бен партилэн та ужпумъя куронъёсыз ӧз быдэсъяське? Мугъёсыз уно, нырысь ик кадръёслэн вошъяськемзы. Кылсярысь, 1928-тӥ арын Ижевскысь заводъёсы 661 удмурт кутэмын ке вал, уже кылиз 151 адями гинэ. 1931-тӥ арын 1-тӥ январьысен 1-тӥ декабрёзь кутэмын вал 5137 удмурт, нош ужысь кошкиз 2051 мурт. Малы бен удмуртъёс заводъёсы уг кылё? Татын мугъёсыз уно. Нырысь ик, соос быдэсъязы тужгес секыт ужез. Уноезлэн дышетскемзы ӧй вал, тодон-валанзэс будэтон сярысь но ӧз сюлмаськылэ. Тани, шуом, Ижысь заводъёсын 1930-тӥ аре 1287 удмурт ужаз. Со пӧлысь 336 муртлэн вал 1-тӥ разрядэз, 2-тӥ разрядъя ужаз 562-ез, 3-тӥ разрядъя - 221-ез, 4-тӥ разрядъёс - 108-эз, 5-тӥя - 41-ез, 6-тӥ - 16-ез, 7-тӥ - 2-ез но 8-тӥ разрядъя - 0 адями. Дышетскемзы йӧназ ӧй вал бере, уждунзы но соослэн улӥын вал. Собере цехъёсын но отделъёсын урод сям пыӵаз: ужасьёсты ӵемысь одӥгысьтыз мукет уже выжтылӥзы. Трос шугъяськонъёс кылдылӥзы улон-вылон ласянь но. Ижевскысь 6724-ез рабочийёс но служащийёс улӥзы асьсэ коркаосын, 4 сюрсэз возизы скал но вал. Выль кутэм адямиос улӥзы заводлэн юртъёсаз но баракъёсаз. Удмуртъёс уноез улон ласянь ултӥямын вал. Соослэн коркаоссы сылӥзы Соцгородын, Карлуд площадьын, Красной площадьын, городлэн шораз, Зарекаын. Завод 198 улон юрт возиз, удмуртъёс улӥзы 50 квартираын гинэ. Тани Карлуд площадьын заводлэн 270 квартираяз улӥз 2670 мурт, нош удмуртъёс 50 гинэ, яке 1,8 процент. Уноез удмуртъёс улӥзы нимаз квартираосын, толэзяз 10 манет тырыса. Баракъёсын ӧз тырмылы пу но ву, ӧй вал радио. Рабочийёс 5- 10 нуналъёсын басьтыны ӧз быгатылэ сиён-юонлы карточкаоссэс, аванссэс. Няньлы черодъёсын сюлэсь но уно адями сылылӥз. Удмуртъёс заводъёсысь кошкылӥзы на администрацилэн но куд-ог ӟуч рабочийёслэн ултӥяменызы но, соку юн шӧдӥське на вал шовинизм шуон. Одӥг кылын вераса, удмуртъёсты заводысь улляны мугъёс котьку шедьылӥзы. Со вакытэ бадӟым заводъёсысь таӵе ӧтёнэз адӟыны луэ вал: "Заводъёс - ӟучъёслы, гуртъёс - удмуртъёслы". Вал на мукетыз ӧтён но: "Удмуртъёс кут кутаса улӥзы, азьланяз но озьы ик мед улозы, нош городэ медаз мерске". Заводлэн коркаосаз но баракъёсаз огазьын улӥзы удмуртъёс но, ӟучъёс но. Соос куспын ӵемысь гинэ керетонъёс но потылӥзы. Кытӥяз удмуртъёс шоры коӵышъёсты сэрпаллязы но шуылӥзы: "Тани тыныд шыр, си!" Вал таӵе учыр. Со сярысь тани ма вералляз Дэбес ёросысь "Пламя" сельхозкоммунаысь бригадир Ложкин: "Ижысь заводъёсын ужакум, ноку но фамилиме, нимме кылэме ӧй вал. Рабочийёс монэ "вотяк - пурысь шыр" шуылӥзы. Ужан инструменттэк кельтылӥзы, кытӥяз нуналъёсын нянез ӧй адӟылы. Ӝожтӥськонэн вазиськылӥ цехысь комитетэ, областьысь прокуратурае. Нокин ӧз юртты. Ултӥянлы чидатэк быдэс бригадаен заводысь кошким. Совето власть но шовинизмез выжыеныз ишкалтыны ӧз быгаты". Нош табере кинлэн коньдонэныз, ма чотын ортчытӥськиз индустриализация? Валамон, со ортчиз "административно-командной системалэн", казармае выжтэм социализмлэн куронъёсызъя. Сое улонэ пыӵатӥз "вань калыкъёслэн вождьзы" но "марксизм-ленинизмъя быдӟым теоретик" И.В.Сталин. Коньдон утчан понна кутӥськизы котькыӵе амалъёс. Нюръяськон мынӥз ваньбурез шыръян ласянь, чурытэсь ужрадъёс кутӥськизы нокыӵе мугъёстэк уже потамтэосын. Паськыт вӧлмизы социалистической ӵошатскон, стахановской движение, чакламлэсь уно ужан, "штурмовщина", "индустриализацияя нуналъёс", "ударниклэн нуналъёсыз" но мукет. Государство адямиез пичи винтиклы пӧрмытӥз. Солэсь кулэяськонъёссэ лыдэ ӧз басьтылэ, со вал ужась кужым, ляльчи. Сое кужмысь но дунтэк ужатӥзы, ултӥязы. Вань ужамды, пе, лыдэ басьтӥськоз коммунизме вуэмды бере. Зэмзэ но, калыклэн улонэз каторгаынлэсь пӧртэм ӧй вал. Ваньзэ сое социализм шуылӥм. Стахановлэн движениез дыръя но адями азе чурытэсь куронъёс пуктылӥзы. Карточкаен сётъязы пыдкутчан но дӥськут, сахар но керосин, йӧл, сылал, тамак. Уноез улӥзы баракъёсын но землянкаосын. Но социалистической индустриализациез улонэ пыӵатонын валтӥсь инты басьтӥз гурт. Колхозъёс но совхозъёс кылдэм бере, гуртэз зэмзэ но "сюпсьыны" кутскизы, шуыны луоз. Ваньбурен но, ужась кужымен но кузёяськыны ӧдъяз город. Партилэн Удмурт обкомезлэн решениезъя Ижевскысь лэсьтӥськонъёсы келямын вал 12 сюрс гуртоос. Котькуд ёрослы сётылӥзы нимысьтыз задание. Революция бере но крестьянъёс озьы ик дунтэк яке туж ичи уждунэн ужазы. Казармаен социализм номыр ӟечсэ ӧз сёты. Соос озьы ик толъёсы заводъёслы нюлэс дасязы. Басьтом 1931-тӥ арез. Соку нюлэс поттонын ужаз 7747 мурт, валъёсын тыршиз 2799 адями. Соос пӧлын уноез удмуртъёс вал. Но котьма ке но, 1930-тӥ аръёслэн пумазы яке Быдӟым Отечественной ож кутскон азьын странамылэн политикаяз омыр шунытгес луиз. Индустриализацилэн, коллективизацилэн но культурая революцилэн пуртыяз кыдазы ӟучъёс, удмуртъёс, бигеръёс, поръёс но мукет калыкъёс. Национализм ласянь куд-ог умойтэм учыръёс вал ке но, кылдӥз выль валатон - советской калык. Ог-огеныд тупаса но эшъяськыса улон. Со ик юрттӥз 1941-тӥ�1945-тӥ аръёсы фашизмез вормыны. Леонид ВАРГИН, история наукаосъя кандидат. Галина РОМАНОВА БАТЫР Сценка Шудӥсь муртъёс: Нуись. Анай. Атай. Пичи ныл. Нуись. Улон - эгес. Берга но берга, азьлань питыра. Асьмеос нош кытчы медам мынӥськомы - азьлань-а, берлань-а? Кемалась-кемалась аръёсы сьӧд тэль шоры пуксем пичигес коркан вал одӥгез таӵе учыр. Вашкала пичи корка. Анай черсэ. Вӧзаз пичи ныл шудэ, юалляське. Пичи ныл. Анай, вера мыным выжыкыл. Анай. Мар сярысь-о кылзэмед потэ, нылы? Пичи ныл. Батыръёс сярысь. Анай. Кылзы соку. Улэм-вылэм Ӝикъя батыр. Тыпы кадь юн мугоро, паськыт пельпумо, ӧрӟи кадь сэзь, кышкасьтэм вылэм со... Пичи ныл. Мынам атае кадь, ого? Анай. Бен, бен, нылы, атаед кадь. Кылзы. Со Ӝикъя батыр улэм асьмелэн кадь ик сьӧд тэль шоры пуксем гуртын. Атаед сямен ик пӧйшурам, чорыгам. Мукет воргоронъёс одӥг- кык пӧйшурен, ӝыны мушко чорыген, куддыръя нош воксё буш бертыло вылэм, нош Ӝикъя батыр пельпум вылаз куиньзэ-ньыльзэ ваёз вылэм. Чорыг но быдэс гуртлы тырмымон кутылэм. Озьы гурт калык каньыл улэм. Ӝикъя батырез данъяса, кырӟан-веранъёс кылдытъям... Кӧттыро муртлэн нош малпаськыны дырыз трос луэ... Пичи ныл. Анай, сием потэ. Анай. Кӧня ке чида, нылы - тани атаед вуоз, чорыг ваёз. Пичи ныл. Эшшо мар ваёз на? Анай. Пеллян гумы ваёз. Ческыт чорыг сиём но пеллян гумыен шудом. Кылзы, кылзы... Кызьы дугдӥ вал али, нылы? Пичи ныл. Со гуртын улӥсьёс весь ческыт гинэ сиыса улӥллям. Анай. Бен, бен... Ческыт сиись муртлы эн вожъяськы, нылы, солэн малпанэз паллянэ нуэ... Тӥни соку гуртысьтызы куд-ог воргоронъёс малпаськыны кутскиллям: малы али Ӝикъя батырлы гинэ сыӵе сӥ-дан усе? Соос нош маин пӧртэмесь? Озьы одӥг уин кӧня ке воргоронъёс Ӝикъя батырзэс, изись адямиез, кутӥллям но вииллям... Пичи ныл (бӧрдыса). Атай малы уг вуы-ы-ы?!. Беглойёс кутӥзы, ды-ыр... Виизы-ы... Сием потэ-э-э... Анай. Эн бӧрды, нылы, атаймы асьмелэн Ӝикъя батырлэсь но кужмо, сое нокин уз вормы. Тани адӟод али - быдэс мушко чорыген вуоз... Кылзы, собере тани мар луиз. Одӥг пол Ӝикъя батырлэн гуртысьтыз калык вылэ трос-трос беГлойёс омырскиллям. Воргоронъёслэн соосын нюръяськыны кужымзы тырмымтэ. Быдэс гуртэз со беглойёс быдтӥллям, пурысьтам пересез гинэ улэп кельтӥллям. Соиз, пе, шуэм: "Зӧк ӝушлы, лул кеч луллы ӟеч лэсьтытозь, музъем мед пилиськоз..." Атайзы пыре. Пичи ныл (бызьыса дораз мынэ, ӟыгырске). Атай, атай!.. Атай (нылзэ кияз ӝутэ). О-о-о, мон ветлытозь, нылы мабыдӟа будэм! Ме, тани тыныд мунё вӧлӥ. (Пулэсь киын вӧлэм мунё сётэ.) Пичи ныл. Нош мушкояд мар вань? Чорыг-а? Атай. Чорыг но, эшшо маке но... Пичи ныл (мунёеныз шумпотыса тэтча). Атай бертӥз, атай бертӥз! Асьмелы сиён ваиз! Эшшо ваиз... эшшо ваиз... пеллян гумы. Атай. Тодӥд. Пеллян гумы но ваи. (Мушкоысьтыз поттыса сётэ.) Анай. Верай ведь, нылы, асьмелэн атаймы Ӝикъя батырлэсь но батыр. Тыл кысэ. Нуись. Улон - эгес. Берга но берга, азьлань питыра. Таиз учыр вал асьме вакытэ, одӥг пичигес гуртын. Корка пуш. Сэрегын вуж телевизор сылэ. Ӝӧк вылын нянь сукыри, пӧзьтэм картофка. Анай керттӥське, вӧзаз пичи ныл шудэ. Пичи ныл. Анай, вера мыным выжыкыл. Анай. Мар сярысь-о кылзэмед потэ, нылы? Пичи ныл. Батыръёс сярысь. Анай. Кылзы соку. Вашкала-вашкала аръёсы улэм-вылэм Ӝикъя батыр. тыпы кадь юн мугоро, паськыт пельпумо, ӧрӟи кадь сэзь, кышкасьтэм вылэм со. Быдэс гуртсэ тушмонъёслэсь утьыса улэм. Пӧйшураны, чорыганы но кибашлы вылэм, гуртсэ сютэм улонлэсь ӵемысь утьылэм. Пичи ныл. Асьмелэн атаймы сямен-а пӧйшурам? Анай. Мар тон, нылы. Али пӧйшураса кӧтэз уг тыро ни. Пичи ныл. Малы-о соку атайлэсь юаськод: "Кытын нош пӧйшурад?! Кытысь гинэ шедьтӥськод тон со шакшы пож вуэз?!" Анай. Пӧйшуран - со, нылы, чылкак мукет маке. Вашкала-вашкала вакытэ, али сямен, нянь уг будэто на вал. Котырак - пеймыт нюлэс, паськыт, мур визыласа бызись шуръёс. Нюлэскы мыно но луд кечез, гондырез, кыӵе ке тылобурдоез ыбо, сое гуртазы ваё, пӧзьто, сиё. Нош шур дурын чорыгало. Пичи ныл. Асьмелэн атаймы сямен-а чорыгало? Анай. Мар тон, нылы? Ку-о адӟид ини атаймылэсь чорыген вуэмзэ?! Пичи ныл. Соку малы-о атайлы шуиськод: "Ой, инмаре, калтаке, нош чорыгам ук та?!" Собере штанзэ кылӥськод. Анай. Ӧвӧл, ӧвӧл, нылы. Чорыган - со чылкак мукет маке. Кызьы валэктод али тыныд? Вань сыӵе пӧйшур - со шурын улэ. Сое визнанэн яке калтонэн куто но гуртэ ваё. Чорыг лым пӧзьто. Пичи ныл. Ческыт-а со? Малы-о нош али шурамы ӧвӧл со чорыгзы? Анай. Быдтӥзы, нылы. Пуштытъязы, пож, зын ву лэзьязы... Я, Ӝикъя батыр сярысь выжыкыл верасько вал ук. Кылзы. Кызьы дугдӥ вал ай? Пичи ныл. Чорыгам но пӧйшурам со батыр, ческыт сиён нуллэм... Анай, сием потэ. Анай. Тӥни нянь шор но си, картошка но вань. Кулэ ке, шыд пӧсято. Пичи ныл. Нянь но нянь, картошка но картошка, шыд но шыд (бӧрдэ.) Кампет сием потэ-э... Преник сием потэ-э... Анай. Я, нылы, тани бадӟым будод. Трос коньдон поттод. Котьма, котьма сиёд. Пичи ныл. Бадӟым будэм потэ-э-э... Анай. Будод, нылы, будод... Нош али Ӝикъя батыр сярысь выжыкыл кылзы. Одӥг пол гуртазы тушмонъёс вуиллям. Калыкез коркасьтызы поттӥллям, быдтыны дасяськиллям. Соку Ӝикъя батыр ӧрӟи синъёсыныз чилектэм, паськыт пельпумъёсыныз сэзъялскем но кутскем ук тушмонъёсын нюръяськыны! Ваньзэс кир-пазь пазям. Со дырысен гуртазы тушмонъёс вуылӥллямтэ ни, кыдёкетӥ котырскыса ортчыло вылэм. Пичи ныл. Анай, нош кинъёс-о со тушмонъёс? Анай. Тушмонъёс, нылы, со урод адямиос. Тон соослы тӧдьы шуиськод, нош соос тыныд сьӧд шуо. Ваньзэ ас сяменызы гинэ адӟо-мертало, ваньзэ асьсэлы каремзы потэ. Пичи ныл. Телевизорысь дядяйёс сямен-а? Анай. Ӧвӧл, нылы, соос асьмелы тушмонъёс уг луо. Пичи ныл. Тушмонъёс луо, тушмонъёс луо! Атай шуиз: соослэн ваньзэ асьсэлы каремзы потэ. Анай. Ваньзэ асьсэлы каремзы потэ ке но, тушмонъёс уг луо. Пичи ныл. Нош малы, Ӝикъя батыр сямен, соосын атаймы уг нюръяськы? Анай. Ӝикъя батыр кадьёс, нылы, вашкала дыръя улӥллям. Пичи ныл. Собере кытчы пыриллям? Кулӥллям-а? Атай пыре. Кудӟемын. Шӧл-пал сылэ. Анай. Тани одӥгез батыр вуэ ини, нылы. Азьвыл батыръёс семьязэс сюдӥллям, утиллям, табере - вина юонын батыръёс. Атай. Батыр мон, нылы, батыр. (Гадяз мыжга, саесъёссэ пужалляса, мыжыкъёссэ сэзъя.) Чаль али дорам, нылы. Одӥг ки вылам оп! шуытозь ӝуто. Пичи ныл (кышкаса анаез сьӧры ватӥське). Батыр ӧвӧл тон, атай! Тушмон тон! Атай. Кин, кин - тушмон?! Анаед озьы дышетӥз-а? (Мыжыкъёссэ сэзъяса, доразы вамыштэ.) Катанчи. Ӝуась корка но пыроз Алнашысь крестьян семьяын 1908-тӥ арын вордскиз нылаш, Рая Машкова. Пичи дыръяз со чупрес, ас малпанзэ быдэстыны тыршись вал. Школаын дышетскыкуз ик Раисалэн улонэз милицилэн уженыз герӟамез потӥз. Дас вить аресысен со отын секретарь луыса ужаны ӧдъяз. Ӝоген милиционерлэсь формазэ но дӥсяз. Со сярысь гожъяз вал отставкаысь майор но шаерчи В. Ф. Татаринов. Виктор Федорович "Такие будни" книгаяз кӧня ке чуръёссэ сӥзиз Р. М. Машковалэн улон но ужан сюресэзлы. Милициын ужаны кутскемез бере кема ик дыр ӧз ортчы, Раиса Михайловна Можга районысь милицилэн отделысьтыз уголовной розыске куриськиз. Ныллэсь юн сямзэ тодэменызы сое выль уже выжтӥзы. Но та вакытэ предприятиос тыро-пыдо ӧз ужалэ. Гуртъёсын тырмыт ю-нянь но бакча сиён ӧз басьтэ. Война бере тросэз рабочийёс но крестьянъёс доразы бертӥзы. Котькытын хозяйство куашкамын. Уж уг шедьы. Соку куд-огез йыружъёс лэсьтон сюрес вылэ султӥзы. Милицилы секыт йтылӥз. Соку Можгаын бадӟымесь йыружъёс лэсьтӥзы кык бандаос. Гозыез котькӧня бинь, пумыз вуэ, шуо. Озьы ик луиз кунлэсь но калыклэсь ваньбурзэ капыръясь "Барон" бандаен но. Р. М. Машкова одӥг милиционерен ӵош ассэ баронэз кутыны быгатӥзы. Кӧня ке час ортчыса, "Баронлэн" кивалтӥсез Раиса Михайловна азьын сылэ вал ини. Машковалэн юанъёсызлы со нырысь номыр ӧз вера. Собере векчи мугоро ныл шоры синултӥз учкыса шуиз: - Тон, нылаш, татын пукытозь, уть вал анаедлэсь нылпиоссэ. Тыныд та уж уг тупа. Мон эшъёсы сярысь тӥледлы одӥг кыл но уг вера. Раиса Михайловна лушкаськись шоры учкыса валаз: солэн но котькинлэн сямен ик эркын улэмез потэ. Нош марлы йыруж лэсьтэмезлэсь азьло со сярысь ӧз малпа, малы гылыт сюрес вылэ кожиз? "Барон" кадь адямиос асьмелы туж люкето, улонмес саптало. Кызьы бен жалялод сыӵе адямиосты? Кытӥяз соосты мултэс жаляменымы йыружъёсты быдтыны ум быгатӥське. Аслэсьтыз та выллем малпанъёссэ Раиса Михайловна меӵак вераз со азьын сылӥсьлы. "Барон" валаз кадь аслэсьтыз янгыш лэсьтэмзэ, мадиз лушкам тӥрлыкъёсты кытчы ватэмзы, аслаз эшъёсыз сярысь. Та дырысен Машкова юнгес пыриськиз йыруж лэсьтӥсьёслы пумит нюръяськонэ. Со мургес тодматскыны ӧдъяз милицилэн уженыз, педагогикая книгаосын. Ведь йырвандӥсен вераськон понна аслыд но соослэсь улонзэс, сямъёссэс валаны кулэ. Куамынэтӥ аръёсы Удмурт областьысь БХСС-лэн отделэныз кивалтыны оскемзы бере, Р. М. Машкова аслаз котькуд ужасезлэн сюлэмазы пырыны усьтон шедьтыны тыршиз. Быдӟым Отечественной война аръёсы йыруж лэсьтӥсьёслы пумит нюръяськонэ ӟырдыт пыриськемез понна, Раиса Михайловналы "За отвагу" медаль сётӥзы. Собере солэн гадяз бырттӥзы Ленин но Ужысь Горд Знамя орденъёс. Пенсие потыкуз, Машкова милициысь майор вал ини. Удмуртиысь милицилэсь ужзэ возьматонъя музеез кылдытӥсь В. Ф. Татаринов мыным мадиз, кызьы СССР-ысь югдурез утёнъя министр Н А. Щелоков 1972-тӥ арын 21-тӥ июне, асьме доры вуылыкуз, музейлэн нырысетӥ экспонатъёсыныз тодматскем. Нырысетӥ стендысь быгылес бамо кышномурт милиционерлэсь тусбуйзэ адӟыса, министр Виктор Татариновлэсь юам: - Кин та кышномурт? - Удмурт областьысь БХСС-лэн отделэзлэн нырысетӥ кивалтӥсьез. - Нош со татын-а? - юам на министр. - Кытӥ ке татӥ ветлэ, - буйгатэм Виктор Федорович. Министр Н. А. Щелоков куриз Р. М. Машковаез президиумын вӧзаз пуктыны. Та вераськонэз кылӥз нимысьтыз отделлэн кивалтӥсез полковник И. К. Капленко. Со В. Ф. Татариновез алӥз: Машкова пересь ини, уг яра сое президиуме пуктыны. Соку Виктор Федорович юн вераз: "Мон уг быгатӥськы армиысь генераллэсь куронзэ быдэстытэк кельтыны". Собере Машковаез шедьтӥзы но министрен артэ пуксьыны косӥзы. Соку министр Раиса Михайловналэсь юалляськиз милициын ужамез сярысь, солы киын нуллон час кузьмаз. Пенсие потэмез бере Р. М. Машкова улӥз Ижевскысь Советской ульчаын. Ӵем дыръя со ветлӥз музее, Можгаысь музейлэн ужамез сярысь стендэз выльдонъя умоесь визь- кенешъёс сётӥз. Сизьымдон ареслэсь кема улэмез бере со кулӥз. Р. М. Машковалэсь егит дыръяз пуктэм тусбуйзэ али ке но МВД-лэн музейысьтыз адӟыны луэ. Та музеез кылдытӥсь В. Ф. Татаринов аслаз архивысьтыз милициысь майорлэсь Раиса Михайловналэсь тусбуйзэ газетэ сётӥз. Зэм вераз быдӟым ӟуч поэт Николай Некрасов асьмелэн нылкышноосмы сярысь. Кулэ ке луиз соос ворттӥсь валэз но дугдытозы, ӝуась коркае но пырозы. В. Чернов. Удмурт Республикаысь Быръёнъя комиссилэн постановлениез Удмурт Республикалы президент быръёнлы йылпумъянъёс сярысь Удмурт Республикаысь Быръёнъя комиссилэсь Удмурт Республикалы президент быръёнлы йылпумъянъёс сярысь 2000-тӥ арын 18-тӥ октябре протоколзэ лыдэ басьтыса: бырйисьёслэн списоказы пыртэмын 1202589 мурт; быръёнъёсы пыриськиз 604021 мурт, яке 50,2 процент; куара сётонэ пыриськиз 603652 бырйись; Удмурт Республикалы президентэ пусъем кандидат Волков Александр Александрович 228441 куара люказ, со луэ 37,8 процент яке куара сётонэ пыриськемъёслэн 25-лэсь ятыр процентсы. Тае лыдэ басьтыса но Удмурт Республикалэн "Удмурт Республикалы президент быръён сярысь" Законлэн 17-тӥ, 68-тӥ но 70-тӥ ёзэтъёссы вылэ чӧлскыса, Удмурт Республикаысь Быръёнъя комиссия пуктэ: 1. Удмурт Республикалы президент быръёнэз ортчемен лыдъяно. 2. Волков Александр Александровичез Удмурт Республикалы президентэ быръемен лыдъяно. 3. Та постановлениез, озьы ик Удмурт Республикалы президентэ пусъем кандидатъёсын люкам куараос сярысь но вань кандидатъёслы пумит куараослэн лыдзы пумысен йылпумъянъёсты печатлано республикаын потӥсь кун газетъёсын но ыстоно ивор вӧлмытӥсь мукет ёзъёсы. Удмурт Республикаысь Быръёнъя комиссилэн тӧроез Д. Н. Талантов. Удмурт Республикаысь Быръёнъя комиссилэн секретарез Н. А. Глухова. Удмурт Республикалы президентэ пусъем кандидатъёсын люкам куараос Республикаысь Быръёнъя комиссия Удмурт Республикалэн "Удмурт Республикалы президент быръён сярысь" Законэзлэсь 70-тӥ ёзэтысьтыз 3-тӥ люкетсэ лыдэ басьтыса печатла Удмурт Республикалы президентэ пусъем кандидатъёсын люкам куараосты: Вершинин Павел Николаевич - 144459 (куара сётонэ пыриськемъёслэн 23,9 процентсы); Волков Александр Александрович - 228441 (37,8 процент); Ганза Николай Алексеевич - 74134 (12,3 процент); Забильский Владимир Викторович - 4664 (08, процент); Кокорин Михаил Константинович - 3403 (0,6 процент); Солуянов Андрей Владимирович - 73436 (12,2 процент); Тимофеев Владимир Борисович - 1013 (0,2 процент); Шуклин Сергей Борисович - 4287 (0,7 поцент); Вань кандидатъёслы пумит сётэм куараослэн лыдзы - 57228 (9,5 процент). Умойтэмен лыдъямын 12587 бюллетень (2,0 процент). Удмурт Республикаысь Быръёнъя комиссия. Пусйизы юбилейзэс Вить ар талэсь азьло Балезиноын ӧсъёссэ усьтӥз 48 номеро профтехучилище, гурт удыслы специалистъёсты дасян вылысь. Дыр вуиз нырысь йылпумъянъёс лэсьтыны. Училищелэн директорез Николай Вячеславович Бабинцев шумпотэ, коллектив ас азяз пуктэм ужпумъёсты ӟеч быдэсъя шуыса. Кылсярысь, выпускниксы Алексей Шмелев 2000- тӥ ар понна ёросысь егитъёс пӧлын усто ужась механизаторен лыдъямын. Вить ар ӵоже училище 200 специалист дасяз ни. Со оскон кылдытэ, Балезино но со котырысь ёросъёсын механизаторъёслы уз ёрме шуыса, озьыен:, ю-нянь будэтонэ егит ужымъёс тырмыт пыриськозы. П. Николаев. Пыӵатэм возьдаськон Марлы ми, удмуртъёс, возьдаськисесь? Ыммы но мырдэм усьтӥське, малпанмес но вераны курдаськом. Басьтӥм егитъёсты. Школаез ӟеч йылпумъяса, гуртысь пинал университет пала учке. Кытчы со мыноз кожаськоды? Тросэз сямен ик быръёз Удмурт кун университетысь удмурт филологияя факультетэз яке гурт хозяйствоя академиез. Ачиз кадь ик ёрмись нылпиос пӧлы шедёз. Вераськон уг мыны книга лыдӟон но лекциос гожъян сярысь. Шуг йӧтэ мукетыз ласянь. Дӥсян умой-умой уг шедьы, уксё уг тырмы, кӧт уг тыры. Университетысь одӥгез преподаватель шуиз: - Ӟучъёсты дышетыны мыло-кыдо, лекциосын соос пулъёс сямен уг пуко, одӥгезъя мукетыз юанъёс сёто. Шаплыесь, визьмоесь. Нош удмуртъёс йырзэс ӝутканы дӥсьтытэк тетрадязы гожъяло. Шуо, удмуртъёсты, пе, зӥбо. Озьы ик луоз возьдаськисьёсын. Егитъёсты янгыше уськытыны уг яра, дыр, та пумысен. Тросэз удмуртъёс уло гуртын. Нош отын мар вань тунсыкоез, одӥг-ог усьяськись клуб сяна. Соин но калык юон вылэ сётскемын, бере уг кылё егитъёс но. Мар карод на гуртын? Уж бере шулдыръяськем потэ, ӟенелик усьтӥськод ке, устогес луэ. Ӟучъёс тросэз уло городъёсын но черко гуртъёсын. Татын но калык юэ. Но сюлмоосызлы вань кытчы мыныны ваньмон дыръязы. Пӧртэм кружокъёс, театръёс. Пиналъёс пичи дырысен культураен тодматскыны быгато. Школаосын выль программая ужало, компьютеръёс вань. Нош гуртын ужась дышетӥсь оло урокез сярысь малпалоз, оло урокез сярысь малпалоз, оло пудозэ утялтоз, бакчаяз бергалоз, семьязэ сюдон сярысь малпалоз. Ма, кызьы шаплыгес но визьмогес уз будэ ӟуч нылпиос. Ӧвӧл янгышесь удмурт пиналъёс. Соослэн возьдаськонзы пушказы пыӵатэмын ни. Кӧня чидаз удмурт калык. Кӧня чидано луоз на. О.КОЖАНОВА. Ольга Николаевна Ускова - Игра ёросысь "Родина" колхозысь устоез скал кыскись. Сизьым ар талэсь азьло Украинаысь татчы бертыса со кӧбератэк кутскиз та секыт уж борды. Нырысетӥ арзэ ветылъёсты сётӥзы, но кайтаяз ик Ольга соослэсь пуж-пуж йӧлзэс кыскиз ни. Жаль, шуэ со, скалъёсты ялан вошъяно луэ: я лейкоз кутэ, я эшшо маке. Но Пежвай ферма колхозын но, районын но тужгес "чылкытэз" лыдъяське. Йӧл но шӧдскымон тросгес кыско - йырлы быдэ 10 килограмм пала усе. Луысал, дыр, тросгес но - ваньмыз ас ужзэс сюлмысь быдэсъясалзы ке, шуэ нылкышно. Гужем пудоез туж бер возь вылэ потто. Гурт удысын мукет ужасьёсты сямен ик сюлмаськыто на сое йӧл дунъёс. Сое басьтӥсьёс йӧлэз туж дуноятыса вузало. Но пичи уждун шоры учкытэк но, та нылкышно яратэ ас ужзэ, таманлы палэнэ кошкылыкуз сюлмаське, кызьы ни меда отын? Тыршемзэ кивалтӥсьёс адӟытэк уг кылё - арлы быдэ пусъё грамотаосын, кузьымъёсын. Туспуктэмез В. Беломорскихлэн. Удмурт Республикаысь Правительство ялэ, Селта но Дэбес лесхозъёсын лэсьтӥськон нюлэс но пу дасян вылысь, нюлэс фондысь участокъёсты арендае сётонъя конкурс Конкурс ортчытӥськоз 2000-тӥ арын 16-тӥ ноябре. Нюлэс дасяны 5 арлы арендае сётӥськоз нюлэс фондысь куинь участок. Участокъёслэн номеръёссы Лесхоз Участоклэн быдӟалаез (га) Араз кораны чакламын (сюрс кб.м) Аренда понна нырысь тыроно дуныз (сюрс манетэн) Азьло тырон (сюрс манетэн) ваньмыз со пӧлын лысоез 1. Селта 4106 5,6 2,7 155,8 31,2 2. Селта 8238 11,2 5,4 310,1 62,0 3. Дэбес 7185 8,6 4,9 331,4 66,3 Конкурсэ пыриськыны быгато нимаз адямиос но юридической лицоос, кин Россия Федерацилэн нюлэс сярысь законодательствоя нюлэс ужен вырыны быгатэ. Нюлэс фондысь участокъёсты арендае басьтон понна конкурсэ пыриськыны мылкыд карисьёс куриськон сётыны кулэ Удмурт Республикаысь Нюлэсъёсъя управление таӵе адресъя: Ижевск, К.Маркс ульча, 431 а. Куриськон вӧзын луыны кулэ конкурслы дасям документъёс понна коньдон (толэзяз куинь пичи уждун мында) тырем сярысь банкысь документ. Конкурслы дасям документъёс сётӥсько со понна коньдон тырем бере. Аренда понна дунлэсь 20 процентсэ тыроно конкурс ортчытон нуналлэсь 10 нуналлы азьло. Та тырон пыре аренда понна дунэ. Кин конкурсэз ӧз ортчы, азьвыл тырем коньдонзы берыктӥськоз. Коньдон тыроно: Селта лесхозысь 1-тӥ но 2-тӥ участокъёсъя - ИНН 1819001312, р/с 40503810200002000011 в РКЦ с.Селты БИК 049454000, Дэбес лесхозысь 3-тӥ участокъя - ИНН 1807000120, р/с 40503810500002000007 в РКЦ с.Дебесы БИК 049416000. Конкурсэ пыриськыны мылкыд карисьёслэн ӵектон-дэмланъёссы кутӥсько нюлэс конкурс сярысь ивортонэз газетъёсын печатлам дырысен 30 нунал ӵоже. Юанъёсын вазиськыны луоз таӵе номеро телефонъёсъя: 222-379; (251) 21-243; (259) 21-667. АРХИВЫСЬ ДОКУМЕНТЪЁСЪЯ Удмуртия ХХ дауре 1949-тӥ ар 1949-тӥ арын СССР-ысь Министръёслэн Кенешсы "Ижын улон-вылонэз радъян сярысь" нимысьтыз постановление кутӥз. Кивалтӥсьёс кӧня ке миллион манет висъязы Ижын улон юртъёс пуктонлы, культураез ӝутонлы, автотранспортэз азинтонлы. Та аре Киров ульчаетӥ Ленин нимо завод дорозь лэсьтэмын трамвай сюрес, Кузон вокзалын - сюресчиослы выж. Городэ вуизы калыкез нуись-ваись выль дас автобусъёс но такси машинаос, асфальтэн шобыртэмын куамын куинь сюрс квадрат метр сюрес. Шаерысьтымы машина лэсьтӥсь но корт дурись предприятиосын кутскиз кортэз ӝог амалъёсын вандылонэз пыӵатонъя ӵошатскон. Кичӧлтон сётӥз Воткалась машина лэсьтӥсь заводысь токарь Роман Денисов (1949-тӥ арын со луиз Сталин премилэн лауреатэз). Нырысетӥ степеньем Сталин премия озьы ик сётэмын "валтӥсь сержантлы Михаил Тимофеевич Калашниковлы, выль пыӵал тӥрлык кылдытэмез понна". Ижысь машина лэсьтӥсь заводысь мотоцикл поттӥсь Алексей Котомчанин кичӧлтэмъя, ужын вис каронъёсты кулэстонъя ӵошатскон мылысь-кыдысь пумитамын шаерысьтымы уно предприятиосын. Кылсярысь, андан ӵыжатӥсь Ильн, та ӵошатсконэ пыриськыса, 1949-тӥ арын 16-тӥ мартэ андан кисьтӥз 5 час но 5 минут куспын, 9 час но 30 минут интые. Чакламлэсь вылтӥ сётэмын 28 тонна андан. Удмурт кун пединститутын усьтӥськиз мугорез кыдатонъя но спортъя факультет. Нырысетӥ курсэ физкультуралы дышетӥсь но тренер луыны мылкыд карись витьтон адями кутэмын. 29-тӥ августэ Советской Союзын Семипалатинсклы сизьымдон иськемын нырысьсэ эскеремын атом пыӵал тӥрлык. Вань шерсым, вань визь сётэмын атом бомба лэсьтонлы. Сое кылдытӥсьёс пӧлысь одӥгез, Игорь Курчатов, шуылӥз: "Асьмелэн лэсьтэм ужмы нокытын ноку медаз кутӥськы". Курчатов сяна, атом бомбаез кылдытонэ пыриськизы Харитонов, Сахаров выллем тодмо тодосчиос. РСФСР-ысь Министръёслэн Кенешсы 1949-тӥ арын учкиз-чаклаз Удмурт шаерын утьыны чаклам памятникъёсты. Соос пӧлын - "Колосс" кинотеатрлэн юртэз (азьвыл Александро- Невский собор), Вавож ёросысь Бадӟым Водӟимонья, Каракулино ёросысь Колюшево гуртъёсысь черкъёс. Ваньмыз - архитектурая вить памятник (пуктэмын ХИХ даурлэн нырысетӥ ӝыныяз). Удмурт шаерын ужаз Ленинградысь этнографияя кун музейлэн экспедициез. Татын ужасьёс вуылӥзы Дэри но Пичи Пурга ёросъёсын улӥсь удмуртъёс доры: тус пуктылӥзы, кырӟанъёсын тодматскылӥзы, музей куремъя дасямын вал азьвыл но туала удмурт гуртъёслэн вылтусъёссы. Шаерысьтымы школаосысь тямыс сю тямыстон вить дышетскись 1949-тӥ арын пусъемын СССР-лэн орденъёсыныз но медальёсыныз. Ленин орден басьтӥз сю тямыс дышетӥсь, Трудовой Горд Знамя орден - тямыстон кык дышетӥсь, "Знак Почёта" орден - сю куатьтон одӥг дышетӥсь. Вить сюлэсь трос дышетӥсь пусъемын "За трудовую доблесть" но "Трудовое отличие" медальёсын. Выль ар азьын, 29-тӥ декабре, Воткалан выльысь усьтӥськиз П.И.Чаковскийлэн музей- юртэз. Н.ПУШКАРЁВА, Удмурт Республикаысь Кун архивлэн директорезлэн воштӥсез. Сталин премилэн лауреатэз токарь Роман Денисов стахановецъёслы визь-кенеш сётэ Воткалась техникая юртын. 1949-тӥ ар. АДЯМИОС НО АРЪЁС Тушмонэз пезьгытъяз... езэн Очерк Шаянэсь ке шаянэсь ни та егитъёс. Юртлэн уллапалаз уло-выло немец ки улэ шедемлэсь курдаса пегӟемъёс. Дасэтӥ уйвӧт адӟо ни, вылды. Выллапалаз, библиотека шуонын, егитъёс лякыттэмъясько. Кызьы бен уд йӧнтэмъяськы? Секыт ум соосты но зӥбе. Нош парторг приказ сётыса сямен шуиз: ӵукнаозь вань ӧтёнъёс гожтэмын медло. Вераны гинэ капчи. Букваос шоры учкыса, синъёс асьсэос кынисько. Вормон понн... - Нылъёс, изиськоды ук! Ойдолэ тэтчалом! Егитъёс кечтакаос музэн бызьыло библиотекаын. Улӥын улӥсьёс туӵкоен йыгам бере гинэ буйгатско но выльысь суредало букваоссэс. Ӵуказеяз ӵукна анай Фенязэ жаля: - Вань улондэ-а куанер колхозын быдтод? Мын дышетскыны. Озьы Феня Воробьева вуиз Ижысь фармацевтъёсты дасян школае. Городъёслэсь адӟем карыса, дышетскон висказ гитараен трень-брень карыны выриз. Нылъёс доры ветлыны шӧтазы Азин районлэн военкоматысьтыз таза сӥлё-виро офицеръёс. Ӧз, кырӟан кылзыны яке эктыны ӧз. Соослэн черсазы бергаз музон шорт. Бумага юдэсъёс вандыло, огаз-кыказ маке кыл гожто, сое ватыса, бумагаез бинялто но нылъёс азе поно: - Котькудды басьтэлэ быдэн одӥгзэ. - Ма со? - Пус чӧлтӥськом: куддэс фронтэ келяно. Оже кошкемзы нылъёслэн уг поты: - Нош пыкиським ке? - Тӥлесьтыд нокин уз юа. Бумагаосты амалтэк кутоно луэ. Феня ас синъёсызлы ӧз оскы: солы - фронтэ? (Берло, куатьтон ар ӵоже улытозяз, со ноку но ӧз лыдӟылы тылӝуэ пус чӧлтыса ысъямзы сярысь гожъямъёсты). Мискиньёсты люказы военкоматэ. Офицеръёс лекъясько: - Ожмаськемды уг поты, мать вылэ мать? Кин-о шуиз, тӥледды кужмысь ыстӥськом? Тӥ мынӥськоды ас мылкыддыя. Кылӥськоды-а: доб-ро-воль-но! Гожтэлэ курон: мынӥськом асьме мылкыдмыя. Станциын ог-огенызы тодматскизы. Феня вӧзын - куинь нылмурт: Катюша но кык Александраос (сурантэм вылысь огзэ Сашик, огзэ Саня шуылӥзы.) Саня быземын но секытэн вылэм. Пус чӧлтон амал сое но жалямтэ. Тэльмыремзэ санэ басьтӥллямтэ. Берлогес гинэ дораз лэзизы ни. Нылъёсты ож тылӝуэ ӧз келялэ. Свердловск доры вуттӥзы но телеграфистэ дышетӥзы. Возизы нюлэскын. Куинь иськемысь торф вайтытъязы гур эстыны. Векчи шинель но ботинка уг утё ӟырт кезьытлэсь. Дӧдьые нылъёс асьсэос кыткисько но секыт сьӧд сюез гыж кыско. (Пиналъёс Фенялэсь куке-соку юалозы: троссэ-а немецъёсты вииды? Ма вералод сыӵе юанлы? Зэмос улэп немецъёсты Феня адӟылӥз кык пол). Шутэтскон нуналэ егит солдатъёсты ваизы Свердловскысь Операя но балетъя театре. Буфетлэн огпалаз люкенак пуко таза мугоро воргоронъёс. Дӥськутсы чылк-чылк утюгамын. Сапегъёссы чиль-дол ворекъяло. Кыӵе ке кырӟанэз нёжъяло. Валаны луэ одӥг кылзэс гинэ - коммунистен шуэмзэс. Кинъёс соос? Пленэ сюрем офицеръёс, пе. Ижысен Феня адӟылӥз ни пленнойёсты. Соос кельшо вал кулэмысь улӟемъёслы. Озьыен, плен но огкадь ӧвӧл. Кинлы - пась ботинка но вузӥсь тӧл шорын цемент суран, кинлы - чилясь хром сапег но жингрес крезьгур улсын балет учкон. Со вал нылмуртлэн немецъёсын берло пумиськемез. Дӥськутэн йырин ик нылъёс юмоке усизы. Москва дорысен соослы сётӥзы туж кузесь гын сапегъёс но радазтэм бадӟым шинельёс. - Тани тӥледлы бызён фата, - маскаръяськиз кин ке. Сьӧрад весь нуллоно на винтовкадэ но противогаздэ. Нуллоно гинэ ӧвӧл - тодоно. (Туннэ но коть уйшор уин Феклинья вералоз: винтовкаын - куинь люкет: магазин, гумы, е-штык...). Шуныт кариськем бере, нылъёслы "кузьмазы" китай ботинка - туж лэсянтэм маке. Кескичъяськыса соос пыдкутчан пыдулъёссэс кормазы, кесязы, вандылӥзы. Командиръёс абдрало: - Мар луиз пыдкукеныды? Нарядэ но ӧд ветлэ кадь. - Ярантэм лябесь та ката шуонъёс, - лулскыло нылъёс. Соосты строе султытӥзы но кытчы ке нуизы. Строй кузя лушкемак вӧлмиз ӟеч ивор: выль ботинкаос мертаны мынӥськом. Лӧптэм нылъёс пыдъёссэс парадын сямен выллань урдылыса вамышъяло. Вормон нунал вуиз ни кадь. Нылкышно взвод дугдӥз мастерской азе. Нылъёсты, дуроно валъёсты музэн, висъет сьӧры оген-оген пырто но ботинка пыдулзэс шуккылыса юнмато. Тӥни тыныд парад! Зэмос шумпотон но вал - сиён пӧранэ нарядэ сюрон. Отысь бадӟым ӵанъёсын возё сылалтэм кубиста, горд кушман, ӵуж кушман, турнепс. Тальккес нянь вылын восьмем нылъёс ури-бери сисько но... висьыны усё. Феня кескичгес вал. Таба пасьта ымныро повар-солдат доры кык котёлокен вуэ: - Эше связья машинаын дежурной, лыктэмез уг луы, монэ сиён вайыны косӥз. Шыдзэс ури-бери ньыло но, эшез кык котёлокен дыртэ таба ымныр доры: - Эше дежурной, солы но сиён нуоно. Кыкетӥ шыдзэс ӟузьыло ни дыртытэк, пелляса, шӧмзэ шӧдыны вырыса. Украин выжыысь кышномурт-сержант Похитон дассэ усто телеграфистъёсты бордаз бырйиз. Валэктӥз: - Тӥ уд тодске кинэн кусып воземдэс. Оло Сталинэн герӟаськиськоды, оло кинэн ке мукетыныз. Ятвылтыны но эн выре. Вань иворъёс ыстӥсько шифрен. Уждэс котьку быдэсъялэ ӝикыт. Асьмелэнъёс вуизы Балтика дуре. Вормон но матэктэ ни кадь. Куд-огез тодазы ваизы нылмурт луэмзэс. Огез сьӧд синмо эшсы йырсизэ бабыльтӥз но гижызэ буяз. Мунё кадь чебер адске. Ваньмыз синмасько. Арлыдо сержант Похитон гинэ быльк! учке: - Али ик парикмахерез ӧтё, тонэ вальк-вальк гольык ӵышкыны косо. Мыно, лейтенантлы верало. Вуиз офицер. Бабля йыр, ӧз уг куалекты со азьын но: - Мон мында ожмаськы ай, лейтенант, собере монэным кивалтод. Бабля ӟеч тодэ аслсэьтыз дунзэ. Вормон понна со чидаз кезьытсэ но, секытсэ но. Юнме шат врачъёс лулӟылӥзы: - Та нылъёс огзы но нуны уз вае ни. Озьы ке но, нылокъёслы яратон маза уг сёты. Федосья Воробьёва тодматскиз техник- лейтенантэн. Визьмо маке, Ленинградысь связья техникум бере фронтэ вуэм. Шутэтскон дыръя егитъёс клубе ветлӥзы, эктӥзы, кырӟазы. Одӥг уе инмез гожмазы пӧртэм буёло ракетаос. Вормон! Тужгес арлыдо связистъёсты оген-оген доразы лэзьязы. Нош малы сыӵе списокын Воробьёва ӧвӧл? Огнуналэ быдэс полкез поездэ пуктӥзы.. Техник-лейтенант но татын ик. Мар вите соосты? Состав дыртӥз шунды ӝужанэ. Казань. Можга. Агрыз. Поезд уг дугды. Сарапул. Янаул. Свердловск. Сибирь. Озьы асьмелэнъёс сюризы Китае, Харбин городэ. Сюрес урдсын кыллё вием японецъёс. Лек ожъёс сярысь номыр ӧз ивортылэ, нош татын шӧйёсты но утялтыны вуиллямтэ на. Выльысь пуромиз огпӧртэм уж. Ки пыртӥд уно иворъёс кошко - тон огезлэсь но пуштроссэ уд тодӥськы. Шутэтскон дыръя нылъёс городэ курисько. Матын нокыӵе тушмон ӧвӧл ке но, соосты огназэс уг лэзё. Сьӧразы ветло утисьёс-воргоронъёс. Базарын амалтэк абдралод. Китайёс ымнырзы тыр пальпото, гурезь ӝужда тырем курег пузъёссэс ӵекто: - Гав-гав! Чушка! Пакупай! Ураметӥ вамышъясь ӟучъёс ваньзы сямен кунэресэсь. Берлогес тодмо луиз ни: Харбинын уно вылэм ӟучъёс - тӧдьы эмигрантъёс. Соос кырыж учко СССР-ысь вуэмъёс шоры. Куддыръя тушмонъяськыло. Тӥни кинъёслэсь утьылӥзы нылъёсмес. Огпол связистъёсты мукет интые нуизы. Тӧл ӧвӧл ке но, сюрес урдсын будӥсь ыжйыр (сьӧд йыр) ас кожаз выре кадь. Солдатъёс машинаысь тэтчизы. Куак пӧлысь кырмизы паськыт пельпумо воргоронэз. Со вылэм камикадзе шуон - бырытозяз ожмаськыны дасяськем маке. Япон семьяын сыӵе сям вань: берпуметӥ вордскем пи одно ожмаськыны кулэ вормытозяз яке бырытозяз. Озьы удмурт ныл нош адӟиз улэп тушмонэз. *** Вормон аре, декабре, сержант Феклинья Воробьёва бертӥз вордскем Норья черкогуртаз. Огназ ӧз - сьӧраз калъяськиз техник но. Кык арня тэльмырыса улӥз бызьыны. Сомында пӧсьсэ-кезьытсэ адӟем нылмурт весь анай-атаезлэсь кылзӥськоно кожаз. Нош таосыз нылзэс ӟучлы сётыны пумит луизы. Озьы ик Ленинград пала огназ ширтӥз ни офицер. Берлогес гожтэтъёсыз но ӧз вуылэ ни. Та толэзьёсы Норьяла практикае лыктӥз Ижысь сельхозтехникумын дышетскись пияш Николай Марданов. Штанез - клёш, быдэс урамысь тузонэз ӵужыса вамышъя. Клёшез понна шоголь уд шуы - зэмен ик зарезьысь бертэмын. Сизьым ар ожмаськем уй палан, корабльысь артиллериын пичигес командир мактал вылэм. Йӧ гурезьёс вискын улон майбыр ӧвӧл йӧтэм. Огпӧртэм чорыг шоры учкем уг поты. Амало зарезьчиос тюленез куто - сиемзы уг луы. Мусэз гинэ пыжыны яра. Таза адямиос амалтэк вожъяськылӥзы сӧсырмемъёслы: таосыз коть кырын уг кынмо ни. Нош Николайлы "ӧз удалты" - ӧлексы ӧз кыльы. Горд Кизили орденэн но медальёсын вуиз Норьяла. Сельхозтехникум бере йылпумъяз колхоз председательёслэсь школазэс но Пермьысь сельхозинститутлэсь курсъёссэ. Фенечка Воробьёва луиз Феклинья Марданова. Улыны выжизы вал картэзлэн гуртаз, Алнаш районысь Асанэ. Но ӵыжы-выжыоссы отӥгес каремен берытскизы Норьяла. Николаез партия кивалтыны косӥз бере кылись Кулай фермаен, бригадаен но Норья сельсоветэн. Уг шуонэз ӧз тодылы. Аръёс ортчыса, кынмем бервылъёс пумен золгес шӧдӥськизы. Висёнлэсь нимзэ врачъёс тупыттэм кема утчазы. Бератаз пумен юнгес мычиськиз лек кыл - туберкулёз. Солэсь ӧз уте партия но, инмар но. Копак уродмем воргоронлы эмъясьёс дэмлазы весяклы Крыме мыныны. Коньдонлэсь улон дуногес шуыса, Мардановъёс кылзӥськизы. Пудозэс но юртъерзэс вузаса выжизы отчы. Нырысь гинэ йӧнгес вал. Толэд асьме сӥзьыл кадь кот. Сизьым ар улыса бертӥзы татчы. Али Феклинья Васильевна улэ анаезлэн корказ. Норьялан квартиразы вал ке но, выльысь кариськиз татчы. Вордскем юртаз, яратонзэ пумитам урамаз. Ачиз верамъя, нылпиосыныз ӵош дас ар ӝутэ ни выль юртъерзэ. Отчы но куке-соку пыроз ай, вылды. Туннэ Мардановаез котырто пичи но бадӟым шумпотонъёс, куректонъёс, тодэ ваёнъёс. Огез пиез университетсэ куштӥз. Мукетыз Казаньысь авиаинститут бере ужтэк кылиз. Трос аръёс ӵоже колхозысь столовоен кивалтыса, песянай Феклинья яратэ пиналъёсызлэсь нылпиоссэ паймытыны адӟылымтэ сиёнэн. Огпол картэз радио пыр кылэм улмоен, пызен, сакырен пыжиськем сярысь. Кышнозэ ёртӥз: пӧра но пӧра пичиослы. покчиос ӝӧк сьӧры каръяськизы но, песянаен песятай соослэн ымазы учко ни: кылзэс уз ньылэ меда таӵе аспӧртэм маин ке ӵош? Пиналъёс ӟабыльто: - Тон но-а, бабуш, шарлотка дасяны пишмытӥськод? Милемлы мама тае весь лэсьтэ. Песянай ньыль ар улэ ни картэзтэк. Пӧран мылкыдыз копак усемын. Гурзэ но эстытэк кельтылэ. Нош ужтэк уг пукы. Сюлэмзэ буйгатэ бакчаез. Картэз агроном вал бере, эмъяськыны ветлыкуз, оломае но шедьтылӥз. Норьялась соослэн бакчаязы нырысь ик выжыяськизы виктория, тёрн, виноград, слива, олокӧня пӧртэм георгинъёс. Феклинья Васильевна тодаз вае ожмаськем эшъёссэ но. Ветеранъёслэсь пумиськылэмъёссэс радио пыр кылылыса, ачиз но малпалляз эшъёссэ утчаны. Пенсие потыса гинэ дыр сюриз. Кӧтшурысь Катя Шикаловаез шедьтӥз Огырчиысь (Агрызысь) шедьтӥз шуод-а бен? Кылӥз на кулэм эшез сярысь верамзэс гинэ. Карамбайысь Света Ефимова но олокытын. Мардановаез одӥг-ог ӧтьыло калык пӧлы. Кылыз шаплы ке но, ожмаськемез сярысь мар вераны ёрме. Тушмонэз езэн пезьгытъяз шуоз ке шат? Со нуиз ожысь тужгес дано адямилэсь - содатлэсь ныпъетсэ. Нуиз чидаса но оскымон. *** Ортчо аръёс. Дасо-кызё ар талэсь азьвыл, ветеранъёсты ушъяса, ми, газетчиос, лӧпшаськом вал: соос асьмелы ваизы шудо улон. Туннэ амалтэк юаськод: нош асьсэлы соос ваизы-а шудо улон? Ӧз кадь. Кун (государство) ожмаськемъёсты вунэтӥз. вормон нуналъёсы ке шат, вить арлы огпол, тодаз вайылэ. Малы асьмеос сыӵе сюлэмтэмесь? Мугез тодмо: кун уг дунъя адямиез, адями уг дунъя кунэз. Алексей ШКЛЯЕВ. Пичи Пурга ёрос. Феклинья Воробьёва 1940-тӥ арын. Феклинья но Николай Мардановъёс. Гуртъёс быро - гуртъёс йыло Сизьымдонэтӥ аръёсы ёросын быризы трос гинэ гуртъёс. Кин ке городэ кошкиз, кин ке нош - бадӟымесь посёлокъёсы. Огвакытэ уго пичи гуртъёслэн азьпал улонзылы ӧз оскылэ... Дас ар тырмиз, городэ кошкем но отысь берытскем Вострецов агай-вынъёс вордскем Михайловск гуртсэс выльдэм бере. Татчы табере асфальт вуиз, жин-жин кирпич коркаос ӝутскизы. Нош алигес Пушин Мыс гуртэз "улӟытон" борды басьтӥськиз городысь вуэм куинь семья: Лагуновъёс татын 1992-тӥ арысен уло ини. Буш интыын кутскизы соос выль улон кылдытыны: сад будэто, азьланяз малпало чорыг но муш вордыны. Кин тодэ, оло, шаермылэн сӥё-дано нуналозяз Кияса ёросын одӥг гуртлы тросгес луоз? 1949-тӥ арын Пушин Мысын улӥз кызь ньыль семья, нош куатьтонэтӥ аръёсы татысь кошкизы берпум улӥсьёсыз. Ньыльдон ар ортчыса, татын, Аксак но Кечол гуртъёс вискын, нюлэс кушын, нош ик тӥр куара кылӥське, атас но чоръя, пуны утэ, нош гужем пиналъёслэн куаразы нюлэс куш тыр чузъяське. Кин тодэ, азьланяз, оло, куинь гинэ ӧвӧл, уногес семья улоз та Пушин Мыс нимо гуртын. Г. Парфёнов. Кияса ёрос. Егитъёслы кузьым Шаерамы Пичи Пурга ёросысь Баграш-Биграез тодымтэез-кылымтэез ӧвӧл, дыр. Эсьма, кунгож сьӧрысь куноосты но капчияк отчы нуо: вань маизлы синмаськыны: улыны но быгато, удмурт луэменызы но данъясько. Коть котькуд корка пырты, огысьтыз но потыны уд ӵыды. Вот огазе люкаськылон интыен Бигралан шуггес: ӟеч школа дырыз дыръя татчы ӧз пуктэ (туннэ но вуж пу коркан дышетско), клубзы сисьмыны-куашканы кутскиз. Татысь егит калык ӟечгес культурая юрт сярысь малпаськыны ик ӧз дӥсьтылы: кин туала арын отчы сомында коньдонзэ кисьтоз, али тросгес магазинъёс усьтыло ук. Но шедиз сыӵе адями. "1-тӥ Май" колхозлэн председателез Александр Ерохин шуиз: егитъёс - асьмелэн, клуб - асьмелэн, лэсьтоно! Вить толэзь ӵоже лэсьтӥськисьёс лумбытэн ужало клубез тупатъян-выльдон бордын. Кивалтӥсьсы Пётр Баталов оскытэ, биграос ноябрь праздникез шуныт-шулдыр клубын пусйыны быгатозы ни шуыса. Кылемын на буяськон, утялскон ужъёс гинэ. - Клубдылэсь усьтӥськемзэ возьмаса, нуналлы быдэ ужъёслэсь азинскемзэс эскерыны ветлӥськоды, луоз? - юасько культура юртлэн кивалтӥсезлэсь Елена Сагитовалэсь. - Усьтӥськемзэ чидатэк витиськом. Но эскерыса ветлонэз ӧвӧл, отын туж оскымон адямиос ужало. Лэсьтӥськисьёс зэмзэ но синмаськымонэсь. Калыклэн верамезъя, соос, пе, ваньзэ асьсэлы кадь гижысь-пиньысь лэсьто. Пётр Иванович Баталов улытозяз трос лэсьтӥськиз ни: кык корка аслыз пуктӥз, одӥг - нылызлы, дасяське пиезлы инъяны. Соин ик быгатонлыкез пумысен сюлмаськонъёс ӧвӧл. Сьӧраз кыстӥсько эшъёсыз но: Пётр Плотников, Александр но Михаил Чекмарёвъёс, Исаев но Тимофеев Павелъёс. Вань пӧлазы нылкышноос но: Светлана Лукина но Екатерина Куклина. Та бригада ик толалтэ нюлэс дася, пул пиле. "Асьме материалтэк ваньмыз та туж дуно усьысал, - шуэ колхозлэн председателез. Али 300 сюрсэн окмытӥм. - Юрттӥз-а маке ласянь район? - Ӧз, но ми ум бӧрдӥське. Аслад лэсьтэм ужед дуногес. - Школады шоры учкыны жаль... - Моӵе тырмысал ке, вераськытэк басьтӥськысал. Но, жаляса верано луэ, школа пуктыны миллионъёс кулэ. Озьы ке но, таизлы но туж шумпотоно ни. Нош школа Биграла кулэ ик вылэм. Вань оскон - президент вылэ. Оскытъяз ук та толэзьёсы. З.РЯБИНИНА. Александр Волковлы ӟечкыланъёс Удмурт Республикалы Президент быръёнын вормеменыз валче, Александр Волковлы уно ӟечкыланъёс вуизы. Шуныт кылъёс гожтӥллям Россия Федерацилэн Президентэз, Правительстволэн Тӧроез, Россия Федерациысь улосвылъёслэн кивалтӥсьёссы, республикаысьтымы городъёслэн но ёросъёслэн тӧрооссы, ужась коллективъёс, нимаз адямиос. Владимир Путин Александр Волковлы ыстэм телеграммаяз гожтэ: "Ӟечкыласько тӥледыз Удмуртиын нырысетӥ президент луэменыды. Шаерады улӥсьёс умоен лыдъяло Тӥлесьтыд улон-вылон но экономика удысъёсты азитонын Тӥлесьтыд ӟеч тыршемдэс. Пусйыны кулэ: Удмуртиын быръёнъёс туж ӟеч радъямын вал, мукет улосвылъёслы адӟем карымон. Оскисько ог-огмес валаса, пайдаё ужанлы. Со ӟеч емышъёс ваёз Удмуртилы но быдэс Россилы. Гажано Александр Александрович! Сӥзисько Тӥледлы юн тазалык, ужады бадӟым азинсконъёс но ваньзэ умойзэ гинэ". Александр Волковлы ӟечкыланъёс озьы ик ыстӥллям Россия Федерациысь Правительстволэн Тӧроез М. Касьянов, Россия Федерациысь Федеральной Собранилэн Кун Думаезлэн кивалтӥсез Г. Селезнев, Россия Федерациысь Федеральной Собранилэн Федерацияя Советэзлэн кивалтӥсез Е. Строев. Удмурт Республикаысь Кун Кенешлэн пресс-службаез. Ӟуч кыл чылкытгес медло Ма ватонэз, ӟуч кылэ берло дыре олокыӵе но шуш, кулэтэм кылъёсты пырыло. Соин но, дыр, туэ 18-тӥ феврале Россия Федерацилэн Правительствояз кылдытэмын ӟуч кыллэсь чеберлыксэ утёнъя нимысьтыз кенеш. Со улэ гожтӥськиз В. В. Путин. Та пумысен Ижын конференция ортчытэмын, сое радъян бордын ужазы ИУУ, "Истоки" общественной организация но Дышетӥсьёслэн юртсы. Люкаськемъёс азьын, кылсярысь, вераськизы Удмрутиысь тодмо учёнойёс З. А. Богомолова но А. А. Александров. Таӵе Кенеш Удмурт Правительствоын но медло вылэм. В. Рогалев. Журналистъёсын пумиськонъёс Виктор Викулов: "Трос вузаськом, ичи басьтӥськом" Ортчем вторнике Правительствоын журналистъёсын пумиськиз Удмуртиысь кунсьӧр кусыпъёсъя министр Виктор Викулов. Кунгож сьӧрысь кунъёсын вузкарон туэ 2 поллы (220 процентлы) йылӥз. Мар бен асьмеос палэнэ келяськом? Нырысь ик, му вӧй. Со 37 процент басьтэ, ож тӥрлык (ТОР-ёс но музонэз) 54 процент луэ. Шӧдскымон инты басьтэ сьӧд но буёло корт вузан (5,3 процент). Ичи вузаськом нефтехимической продукция, нюлэс но солэсь арбериос. Соин ӵош кунгож сьӧрысь басьтӥськом 50,8 процент нефтехимической продукция, 37 процент машинаос но оборудование, 6 процент корт но 3,1 процент сиён-юон. Огъя вераса, импорт кулэсме, нош оборудованимы 70-80 процентэз вужмемын ни. Туэ 12 предприятие 2 миллион доллар юрттэт (инвестициос) басьтӥзы, со туж ичи. Озьы ик ляб вузкариськом СНГ-е пырись кунъёсын. Тани Узбекистан асьмемын кусып тупатыны, вузкарыны дась, но со улэп коньдон уг сёты, ӵектэ хлопок гинэ. Нош Беларусь Республикаен тупанкыл гожтэмын ке но, куспамы вузкарон ляб азинске. Озьы ик шуыны луоз Москваын вузкарон сярысь. Бен, та удысын нокыӵе ужрадъёс уг кутӥсько, шуыны уг луы. Юнматӥське нормативно-правовой инъет. Удмурт Республикаысь Правительство, та ужез умоятон вылысь, 4 постановление но 13 распоряжение кутӥз ни. Туэ нош ик ортчытэмын "Устоез экспортер" конкурс. Миым наградаос басьтӥзы "ИЭМЗ "Купол" кун предприятие, "Удмуртнефть", "ГМЗ", "Харви-Яр" но "Нюлэс" огазеяськонъёс. Республикалэн делегациосыз вуылӥзы трос кунъёсы - США-е, Нидерландые, Германие, Англие, Канадае, Францие, Казахстанэ, Венгрие. Удмурт Республика возьматэмын "Россия но Китай" ИВ российско-китайской форумын. Паськытало бускель улосъёсын кусыпъёс. Огкылъёс гожтэмын Татарстанэн, Марий Эл Республикаен, Ингушетиен, Курган, Киров улосъёсын . Г. Романов. "Тополь" но поттом, му вӧй но кыском Таяз арня вискын Воткинске люкаськылӥзы Россиысь военно-промышленной но тепло- энергетической комплексъёсысь предприятиослэн кивалтӥсьёссы. Таӵе огазеям бадӟым кенешон ортчиз ни куинетӥзэ, нош нырысетӥез озьы ик люкаськылӥз Воткинскын 1998-тӥ арын. Совещаниез дасясьёс пӧлын: Россия Федерациысь Кун Думалэн Промышленностья, лэсьтӥськонъя но наукаен герӟаськем технологияя комитет, Удмурт Республикалэн Правительствоез, "Воткинский завод" ГПО, Россиысь Минэнерго, Минатом, нефтегазовой оборудование поттонъя Союз но мукетъёсыз. Кенешонэз усьтӥз Удмурт Республикалэн Президентэз А.А.Волков. Вераськонэз нуиз Кун Думалэн депутатэз Ю.Д.Малюков. Люкаськемъёс азьын ӝутэмын вал одӥг бадӟым ужпум: военно-промышленной комплексэз азинтэмен ӵош бадӟым саклык висъяно му вӧй но газ кыскон оборудование поттонлы, мед со тупалоз дуннеын пуктэм огъя куронъёслы. Конверсия улсын та удыс пыӵаз ни данаказ предприятиосы, соос радын "Воткинский завод" ГПО но. Тӥни малы быдэс странаысь оборонщикъёс люкаськылӥзы асьме доры. Совещаниын ӝутэм ужпумъя вераськон сярысь лыдӟыны луоз газетмылэн вуоно номерысьтыз. Л.МЕДВЕДЕВА. Чуръёс, чуръёс... "Выль пенсионеръёс" Пенсиосты будэтон, куанер пересьёсыз куанер кельтӥз, узыръёссэ уката узырмытӥз. "Выль ӟучъёс" вӧзы табере "выль пенсионеръёс" ватсаськизы. Демократ шуонъёс милемыз нош пӧязы. Пенсизэс йылэтӥзы соос кузёяськон вакыт потэмъёсызлы гинэ. Нош ми маин янгыш? Война вакыт сютэм, уен-нуналэн дунтэк секыт ужаммы понна-а? Ми трос уксё интыостӥ ужаса ӧм ветлэ, чугун сюрес лэсьтонлэсь но ӧм кышкалэ, нылпиосмес но утялтыны ӧм ваньмылэ, табере тани... Кызьы ӝож уз луы, война вакыт ужамдэ 500 манетэн дунъяло ке? Отын ик "выль пенсионер" 950 манет басьтэ. Ма понна? Т. Петрова. Алнаш ёрос, Мукшур гурт. Усьтӥськиз выль общественной приёмной Валлян журналистъёс понна пресс-конференция ортчытӥз Удмурт Республикая валтӥсь федеральной инспектор Сергей Витальевич Чикуров. Пумиськонлэн мугез таӵе вал. Ижысь Карл Маркс урамысь одӥгаз юртын усьтӥське федеральной инспекторлэн общественной приёмноез. С. В. Чикуров люкаськемъёсты тодматӥз выль ёзын ужасьёсын, вераз, соос нуналлы быдэ, шутэтскон нуналъёсы но ужалозы, лыктэм адямиослэсь куронъёссэс-веранъёссэс лыдэ басьтозы, нош, толэзьлы огпол Сергей Витальевич ачиз но калыкен пумиськылоз. Общественной приёмное вазиськыны луоз политика, кивалтон ёзъёслэн кызьы ужамзы, законъёсты кызьы быдэсъямзы пумысен. Приёмнойёс усьтӥськозы на Глазов, Можга, Воткинск но Сарапул городъёсын. Кинлэн татчы лыктэмез уг луы, вазиськыны быгатоз телефон пыр. Бӧрысьгес со сярысь газетъёс, радио но телевидение пыр ватсаса ивортэмын луоз. Калыкен таӵе амалэн кусып возён чакламын соин: мар лэсьтыны косэ Россия Федерацилэн Президентэз В. В. Путин, ваньмыз со дыраз но ӟеч мед быдэсмоз. *** Та нуналъёсы Сергей Витальевич Чикуров 35 арес тырмонзэ пусъе. Солы сӥзиськом бадӟым шуд но юн тазалык. Оскиськом азьланьын но со быгатыса тыршоз республикамес азинтон удысын. П. Скобелев. Шорлыдо уждун юнматэмын Россиысь Правительство куинетӥ квартал понна шорлыдо уждунэз тупатӥз. Солэн быдӟалаез - 1383 манет. Та пумысен нимысьтыз распоряжение гожтӥз премьер-министр Михаил Касьянов. Шорлыдо уждун лыдъямын-чотамын, ортчем куинь толэзез чакласа. Солэн быдӟалаез июле 1413 манет вылэм, августэ - 1411, сентябре - 1325 манет. 1383 манет лыдэ басьтэмын луоз ноябрь толэзьысен, кун пенсиосты юнматон понна. Басьтэмын Интернет пыр. Чечы вӧзы - шырыт сюлэм Маин узыр асьме шаермы? Шырыт адямиосын, шуозы Вавож ёросысь Зетловай гуртын улӥсьёс но одно ик мушкасьсэс Юрий Васильевич Барановез тодазы ваёзы. "Курск" подлодка Баренцево зарезе выем бере, асьме Удмуртиысь но шырыт адямиос возиськизы секыт кайгуэ шедем муртъёслы. Юрий Васильевич быремъёслэн семьяоссылы юрттыны шуыса, вить фляга чечы келяно кариськиз. Кин бен со Ю. В. Баранов? Куамын ар ӵоже улэмын Ижын но ужамын "Ижмаш" заводын, мастер но старшой мастер луыса. Солэн "пӧсь" стажез 10 ар бере, пенсие вазьгес потӥз но гуртэ улыны лыктӥз. Ай, вордскем гуртаз но ӧз, эшъёсыныз ӵош пӧйшураны ветлыкуз, Вавож инкуазь кельшем солы. Озьы со муш умортооссэ 120-ёзь вуттӥз, со сяна, бакча но пудо возе. Ижлэсь кыдёкын луэмез сое чик уг кышкаты. Тӥни сыӵе паймымонэсь но адӟем карымонэсь адямиосын дуно но узыр асьмелэн Удмуртимы. П. Николаев. Пенсиос нош ик будо 1-тӥ ноябрьысен пенсиос йылозы 10 процентлы. Берло дас кык толэзь ӵоже пенсиос бӧрсьысь бӧрсьы йылэмын (2000-тӥ арын февраль но март толэзе), Удмуртиын улӥсьёслы одӥг толэзьлы тырмымон пенсилэн быдӟалаез кык поллы йылӥз. Шуом, кылем арын октябре кулэ ке вал 168 миллион манет, таяз арын ноябре 330 миллион манет тыр луоз ни. Россиысь Пенсиосъя фондлэн удмурт ёзаз выт тыронъёс ялан будо. Тросэзлэн пунэм кылемъёссы вань на, со чотын но Пенсиосъя фондэ коньдон вуэ. Пунэме кылем предприятиослы но организациослы эшшо тодазы вайытэм потэ: туэ арлы выт тыронэн ӝеганъёссы ӧз луэ ке, азьвыл пунэм тыронъёссэс висатыса берыктон пумысен огкыл гожтыны луоз Пенсиосъя фондэн. Соку пени но басьтӥськемысь дугдоз, счётазы вуэм коньдон но пунэм тыронзылы уз кошкы. Огкыл гожтыны луоз 12 толэзёзь. Нош кин пунэм тыронъёссэ берыктоз 2000-тӥ арысь 31-тӥ декабрёзь, пенилэн быдӟалаез 75 процентлы кулэсмоз. 1-тӥ июльлы Удмуртиысь предприятиос Пенсиосъя фондэ тырыны кулэ 1593567000 (1 миллиард вить сю укмыстон куинь миллион вить сю куатьтон сизьым сюрс) манет. Россия Федерациысь Пенсиосъя фондлэн удмурт ёзэз. Пусъемын устоосыз Можга педколледжысь ньылез дышетӥсьёс удыссылэн нуналыз азьын вылӥ наградаосын пусъемын. Быдэс улонзэс сётӥзы соос дышетон ужлы. Лев Афанасьевич Смирнов кутскон сётӥз педучлищеын краеведениез дышетонлы. Ачиз ик программа дасяз. Бӧрысь сое юнматӥз Удмурт Республикаысь Калыкез дышетонъя министерство. Лев Аркадьевич дас арлэсь кема ни завуч луэ, вуоно дышетӥсьёсты дасянэн быгатыса кивалтэ. Солы сётэмын "Удмурт Республикаысь калыкез дышетон удысысь дано ужась" ним Л. А. Смирнов будӥз Алнаш ёросысь Кузьымгуртын. Атаез колхозлэн председателез, колхозысь ревизионной комиссилэн кивалтӥсез вал. Пичи Лева атаез вӧзын будӥз, кивалтыны но адямиослы ӟеч сямъёс пыӵатыны дышыса. Нош мумиз, лякыт востэм кышномурт, куинь нылпиоссэ ачиз кадь ик сямо будэтӥз. РФ-ысь шор профессиослы дышетон удысысь дано ужась" нимен пусъемын директорлэн воспитательной ужъя воштӥсез Н. Е. Лушникова но изобразительной искусствоя дышетӥсь В. П. Кошкин, Удмурт Республикаысь Правительстволэн Почёт грамотаеныз - дышетӥсь Ф. В. Четвертных. Та дышетӥсьёс ноку но, дыр, ӧз малпаське дан сярысь. Ужазы но ужазы, мушъёс сямен. Дан вуиз соослы, вуоно дышетӥсьёсты дышетон удысазы кема но ӟеч тыршемзы понна. Можга педколледж (азьло училище) кемалась данэ потэмын ни аслаз ӟеч дышетӥсьёсыныз, ӟеч ужъёсыныз. Та наградаос - быдэс коллективлэн данэз. П. Скобелев. Фермеръёслэн киросатайзы Россиысь уно сюрс фермеръёс та уже кыстӥськемзы понна туннэ тау шуыны кулэ Иван Степанович Силаевлы - Россия Федерациысь Правительстволэн нырысетӥ премьерезлы. Иван Степанович странаын кемалась тодмо вал ини промышленностьлэн огез валтӥсь кивалтӥсез шуыса. Собере солы оскизы кивалтыны Россилэн быдэс калык хозяйствоеныз. Соин ик солы юн сюлмаськоно вал гурт удыс сярысь но. 1990-тӥ арын декабре Иван Силаевен кивалтоно Правительство Россиын нырысьсэ закон кутӥз крестьян фермер хозяйствоос кылдытон сярысь. Законэз уже пыӵатон понна одӥг миллиард манет коньдон но висъямын вал. Коньдонэн юрттытэк, та уж борды нокин басьтӥськыны ӧй дӥсьтысал, дыр. Угось со вакытэ "Беларусь" трактор 5 сюрс манет сылэ вал, "Нива" комбайн - 10-12 сюрс, "Жигули" - 7-9 сюрс манет. Россиысь фермеръёслэн лыдзы туж ӝог йылыны кутскиз. Кыкетӥ но куинетӥ ӧтчамзы вискын одӥг ар гинэ ортчиз, нош макем будӥз соослэн лыдзы - 4 сюрсысен 60 сюрсозь. Туннэ Россиын 260 сюрс фермер хозяйство лыдъяське ни, Удмуртиын соос 3,5 сюрс пала. Жаляса верано, берло дыре фермеръёслэн лыдзы кулэсмыны кутскиз, угось кун юрттэт басьтытэк, та ужен вырыны туж секыт луиз. Озьы ке но, та секыт вакытэ но куд-ог хозяйствоос пыд йылазы возиськыны быгатӥзы. Соос пӧлы пыртыны луэ Удмуртиысь фермер хозяйствоосты но. Туннэ республикаысь фермеръёс 63 сюрс гектар муосты возё, 7 сюрс таза сюро пудо утялто, соос пӧлын 4 сюрс пала скал но 4,5 сюрс пала парсь. Арлы быдэ усто азинсконъёс басьто фермеръёс Собин Николай Иванович (Шаркан), Шадрин Александр Павлович (Сарапул), Матвеев Виктор Александрович (Завьял), Данилов Сергей Николаевич (Юкаменск). Али малпаны ик шуг, мар луысал Россиысь гурт удысэн фермер хозяйствоосты кылдытыны кычӧлтон ке ӧй сётысал Правительстволэн азьвыл премьерез Иван Силаев. 21-тӥ октябре И.С.Силаевлы тырме 70 арес. Али со кивалтэ Дуннеысь машина поттӥсьёслэн огазеяьконэн но Латинской Америкаысь странаослы экономикая юрттэт сётонъя национальной комитетэн. Озьы ик мыло-кыдо пыриське фермеръёслэн арлы быдэ ортчылӥсь ӧтчамъёссылэн ужазы. Асьсэ киросатайзылы фермеръёс сӥзё тазалык но ваньбуро улон. Ю.БАСКОВ. Шӧкыч Николай Никифоров Туно Серемес верос Сьӧд адӟон, пе, адямиез ныртӥз кыска. Кин тодэ на. Капчиен коньдон дурыны быгатӥсьёс шоры быдэс гумырам вожъяськыса учкылӥсько. Ферма котырын, колхоз мастерской вӧзын лошъяськись буш бутылкаосты люкаса, магазинэ вуттӥ но вузкарись меӵак вераз: "Коньдонэн ум тыриське, вузэн берыктӥськом". Дуныз ӵапак шудон картаослы окмиз. Дорам бертыса малпаськеме бере, туно кариськыны малпай. Мон но инмарлэн нылпиез ук, понедельнике вордскем адями ӧвӧл. Ярам ай, ог аре "Удмурт дунне" печатлаз вал, кыӵе картаос мае возьмтао, ма сӥзе - ваньмыз пусъемын. Ӵукна уж дуре вуыса, ӵош ужась эшъёсылы шуисько: - Толон анаелы, кузпалэлы тунай вал. Ваньмыз зэмаз. - Остэ-э, - чабкиське Миток Галя. - Оло, зэмзэ пӧрмытӥськод, Микол? Туна ай мыным но. Буш уг кары, зэм ке, курытэныз кунояло. Тодӥсько вал, кышномурт Мирон кузпалэзлэсь выльысь доразы берытскемзэ вите. Соин ик та "крезьгуръя" нёжъяно кариськи. - Ох-хо, Галина, - ӝӧк вылэ картаос куянъям пальпотӥсько ачим. - Укыр ӟеч мадё тыныд картаос. Шумпотон, яратон, шудо пумиськон сӥзё. Одно ик Миронэд дорад берытскоз. Таӵе кылъёсты кылыса, Миток Галя интыысьтыз турак тэтчиз но чыртыям ошиськыса, ӟыгыръя, чупа гинэ. Кыкетӥзэ тунано кариськи Катыр Зоялы. Укыр мӧзмыт пуке. Пиезлэн гожтэтэз, пе, вуэм. Оже келяны дасяло шуыса гожтэм. - Микол, тунамед понна тырыны коньдонэ ӧвӧл, - пумитъяськыны выре на кышномурт. - Ог пачка "Прима" сигарет ке сётӥд - тырмоз, - киыным шонтӥ. Зоя апайлы усиз шумпотон, пӧртэм шаеръёстӥ ветлон, ӟеч пала воштӥськонъёс... Арня ортчыса, быдэс гуртын мон сярысь гинэ вераськылӥзы ни. Гамби Микол, пе, чиганъёслэсь но усто туна. Дун но трос уг басьты. Таӵе дан юнме шорысь ӧз лыкты уго. Нырысь ик, Миток Галялэн кузпалэз берытскиз. Мон но ӧтем куно вал. Кыкетӥез - Катар Зоя апайлэсь Санька пизэ "Дыр" программаын возьматӥзы, Санька кизэ сэзъяса ик анаезлы, гуртоосызлы салам вераз. Ӝытаз ик Зоя апай дас пачка фильтрен сигаретъёс вуттӥз, юонэн но кунояз. Тунолэн но верамъёсыз инкуазьын сямен вошъяськыны кулэ. Одӥг ӟечсэ гинэ сӥзьыса, быгатонлыктэ уд ӝуты. Пикуль Марфалы казна машинаын ворттылод ке шуи, сюлэмыз ляб вылэм, шӧдске. Ӝог юрттэт сётӥсь машинаен больницае келяллям. Опочей Сандырлы "сьӧд зарни" сярысь гинэ поттылӥ, кудӟеменыз лымые погыраса, чӧльызэ кынтэм. Тордос ик вань. О-о, мынам данэ ӝутскиз но ӝутскиз. Ӝыны ар куспын господин Гамбиев луи. Эсьмаса, ёросысь калык сяна, Агрыз но Иж палъёсысь вуылыны кутскизы. Ферма ужме палэнтыса, кемалась дорам гинэ пукисько ни. Тунаськон вылысь юри Франциысь тузӥесь картаос ваизы. Шумпотыса, мыняса гинэ ул вылэм - таяз арняе ваньмыз йырчукин берытскыны ӧдъяз. Нырысь ик Агрызысь одӥг "криминальной авторитет" вуылӥз. Верамед, кырныж музэн корккетэмед, пе, зэмаз, кыл кутоно луод. Толон Ижысь "Вольво" машинаеныз ужбергатӥсь вуылӥз, али сямен вераса - выль ӟуч. Ужаз азинлыкъёс, кунгож сьӧрысь фирмаосын ӟеч кусып тупатонъёс сӥзи вал. Нош коммерсантэ "ӝуам" - эрекчаллям кунгож сьӧръёс. Ачиз дорам ветлытӥз, ява. Уез уйбыт уг изиськы ни. Коньдон жильдонэн йырин ӧвӧл. Ма малы-о туно кариськи меда? Шӧкыч Суредась пальпотэ 1. - Пужей сӥльын сюдӥ но кымесад сюръёс потӥллям ук. Ха-ха-ха! Шузие мынам! 2. - Петя, ваён нуналэ вуэ ини. Дасяськы. Ныл вордскиз ке, ним Инаугурация поном, ява! 3. - Телефон, ой телефон, вера ик вал мыным тон, кытын мынам кышное... а, кулэез вал! 4. - Кытчы меда со монэ ыстэ? Тӥни сюдӥськод-вордӥськод та пиосты, нош тау карем вадес?.. Суредъёсыз В. Шиловлэн. Гурт удыс Гурезь-Пудгаысь кузё Лапеггес, тып-тып мугоро, паськыт пельпумо, котьку дыртӥсь сямо бӧляке Иван Перевощиков быдэс улонзэ гурт удысэн герӟаз. Районын гинэ ӧвӧл, шаерамы но со тодмо адями. Вавож ёросысь "Луч" гурт хозяйствоен 23 ар кивалтэ ни. Нош солэсь азьло дас ар ӵоже татын ик ужаз валтӥсь инженер луыса. Игра районысь Вылӥ Нязь гуртын вордӥськем егит специалистэз, Ижысь гурт удысъя институтэз йылпумъямез бере, 1967-тӥ арын ужаны ысто та районэ. Кельшизы солы Вало палъёс, ӵошкытэсь лудъёс-бусыос, возьёс, лысо-кызо нюлэсъёс-тэльёс. Гурезь-пудгаос будӥзы-ӝутскизы Иван Павловичлэн син азяз. Мар умоез-ӟечез, адӟем карымонэз лэсьтэмын, отын колхоз тӧролэн сюлмаськемез вань. Берло дыре гуртэз зӥбо-пачкато ке но, "Луч" огсыр ужа, лэсьтӥське, шуг-секытъёслы уг сётскы, кураськыса уг ветлы, музъем ужасьёс асьсэос вань луонлыкъёссэс уже куто. Иван Павловичлэн ужъёсты арысь аре ӟеч радъяса, быгатыса бергатэмез улсын гурезь-пудгаос котьку азинлыко тыршо. Зэмзэ но, гурт кивалтӥсь бордысь туж тросэз потэ. Кызьы со калыксэ ӝутоз музъем ужанэз но пудо вордонэз умоятонэ, озьы ик пайда но лыктоз. Нош гурт хозяйство липет улын ӧвӧл, фермаоссэ гинэ шат вератэк. Но таиз но удыс люконтэм герӟаськемын инкуазен. Сое туж ӟеч вала Иван Павлович. - Ваньмыз понна куазез курланы уг яра, - маде Иван Павлович. - Татын 33 арлэсь кема ужатозям, котькыӵе аръёс вал ни. Таиз но гужем нянь будэтӥсьлы удалтӥз шуыны уг луы. Озьы ке но, кин музъемен арысь аре рос-прос ужа, агротехникалэсь куронъёссэ дыраз но ӟеч быдэсъя, со ноку няньтэк, бакча сиёнъёстэк но мукет емышъёстэк уг кыльы. Тани 1997-тӥ арын котькуд гектарысь шорлыдын 27 центнерлэсь уно ю тысь кутсам, нош музон араз но туэ 18 центнер пала люкаськиз. Республикая со лыдпус урод ӧвӧл. Соин ик йырмес ум ошиське. Гурезь-Пудга кузёез валаны луэ. Музъемъёссы начар, луовыл ке но, хозяйство районын ялан куинетӥ-ньылетӥ инты басьтэ. "Лучез" котьку сямен азьпал "Удмуртия", Мичурин нимо но "Колос" колхозъёс. Берлоеныз хозяйствоен интыоссэс вошъяло ик. Азинсконъёс ас кожазы уг лыкто. Соос басьтэмын гурт калыклэн, специалистъёслэн, шор ёзо кивалтӥсьёслэн лулысь-сюлмысь тыршеменызы. Юнме шорысь гурезь-пудга калыкез муш кадь тыршись-сюлмаськись уг шуо ук. Нош ачиз азьветлӥсьсы муш вордыны но дыр шедьтэ, хозяйствозэ но валаса нуэ. Иван Перевощиковез кызё ар пала тодӥсько ни. Таӵе адямиосты кӧльы кадь юн шуэм потэ. Соин ми колхозаз но ӵем пумиськылӥськом, редакцие но пыраны дыр шедьтэ. Газетмылэн юбилеез, 80 ар тырмон азьын "котырес ӝӧк" сьӧрамы со лыктӥз шаерысьтымы музон кивалтӥсьёсын ӵош, визьмо политик, усто тӧро луэмзэ, кыдёке азьпала адӟемзэ возьматӥз. Гурезь-Пудга тӧролэн сюлэмыз висе гурт удыслэн куашканы ӧдъямез, мырдэм возиськемез, музъемен урод ужаммы но мукетыз понна. Сайкыт малпанъёссэ со кышкатэк шарая. Нош таӵе гурт кивалтӥсьёс элькунамы чиньыен лыдъямон кылемын. Та дыр ӵоже Иван Павлович трос ӟечсэ, верамонзэ лэсьтӥз. Но мае нимысьтыз, тужгес пусйысалды шуыса юанэлы, шумпотыса вераны ӧдъяз: гурт калыклы но, пе, аслым но туж яра Гурезь-Пудгае но музон гуртъёсы асфальт сюрес кыскеммы. Со бен капчиен ӧз сётӥськы. Куке Нылгаысь Вавоже сюрес ӝутыны кутскизы, ӵапак соку, кызьы шуо, кытӥ кӧяса, кытӥ вӧяса, лэсьтӥськисьёсты гуртамы берыктыны быгатӥм. Соос сюресэз ӝутыны куризы вал, но кыкетӥ улыг-нюр интыостӥ кыз выжыосты порылыны ӧм быгатэ. Сюрес лэсьтӥсьёсты пӧям кадь луиз, но берло асьсэос ик ваньзэ со ужъёсты йылаз-пумаз вуттӥзы. Туннэ озьы ик данъяськыса верам потэ, шуэ И. П. Перевощиков, секыт улон-вылон вакытэ но гурт калык лэсьтӥське, арлы быдэ уно семьяос выль коркаосы пыро. Адямиос улыны-ужаны малпало, ӵуказеез сярысь сюлмасько. Хозяйство лэсьтӥськисьёслы котьмаин юрттэ: транспорт но, пиломатериал но сётэ. Сотэк кызьы бен: огнад ведь венез но уд ӝуты, нош дэмен, огъя кужымен гурезез но берыктод. Иван Павлович бадӟым инты висъя выль, усто сортъёс уськытонлы, ӟеч выжы пудо вордонлы, фермаосты выльдонлы но хозяйствоын кивалтон амалъёсты умоятонлы. Солэн ваньмыз пӧрме, кутскем ужзэ ӝыныё уг кельты. Эшшо одӥг юан сётытэк ӧй чида: - Кызьы тодмо, Иван Павлович, Совето власть дыръя тӥ быръемын вал колхозъёслэн союзной кенешазы (советазы). Мар верасалды со сярысь? Кӧня ке малпаськемез бере, бӧляке мадьыны ӧдъяз: - Умоен гинэ тодам ваисько. Монэ отчы бырйизы колхозникъёслэн куинетӥ ӧтчамазы (съездазы) 1982-тӥ арын, нош 1985-тӥ арын СССР-ысь аграрийёслэн И съездазы вераськыны шуд усиз. Быдэс страна азьын кык ужпумез ӝутӥ - гуртэ газ кысконэз но музъем ужасьёслы 3 фазаен электрокужым сётонэз. Кыкез но ӵектонэ умоен лыдъямын вал. Озьы ке но, али гинэ гуртамы "чагыр эстӥськон" кыскиськом. Ӟеч уж Россиын кематэк уг быдэсмы. Али со оло тумошо кадь потэ, но югдур зэмзэ но сыӵе вал. Гурт кивалтӥсез али уката ик юн сюлэмшугъяськытэ техникалэн вужмемез, сое выльдыны быгатымтэмы. Инженер та ужпумез уката ӟеч вала. Ведь музъемез трактортэк уд гыры, юосты комбайнтэк уд окты. Иван Павлович, тӥ туж шулдыр, зарни сӥзьылэ вордӥськиллямды. Туннэ, 20-тӥ октябре тӥледлы 60 арес тырме. Газетмылэсь эшсэ, юрттӥсьсэ, Иван Павлович, быдэс редакцилэн нимыныз сюлмысьтымы ӟечкыласьком юбилееныды, сӥзиськом капчи мылкыд, хозяйстволы бадӟымесь вормонъёс, нош асьтэлы шудбур но юн тазалык. Геннадий Романов. Редакциын пумиськон дыръя(1998-тӥ ар) куспазы кенешо Иван Павлович (шорысез) районысьтызы "Колос" колхозлэн тӧроеныз Владимир Красильниковен но бускель Ува ёросысь "Дружба" гурт хозяйстволэн кивалтӥсеныз Василий Гореевен. Туспуктӥз Владимир Камашев. Чуръёс, чуръёс... Кин понна пи вордӥськом? Кызьы-мар кариськыны ик уг валаськы ни, олокызьы улоно. Мон ИИ группаен инвалид, 520 манет пенсия басьтӥсько, картэ возьмаськисьын ужам каре, уждунэз кӧттырыны но уг тырмы. Вазиськылӥз вал уж юаса "Красная звезда" фабрикае, но мӧйы карыса кутӥллямтэ. Озьы тӥни, пинал дыръяд ужа-ужа, пересьмид ке, кулондэ возьмаса пук. Кытысь газ, тыл понна уксё тырод, ялан йыр висе. Эшшо юртъер, музъем понна выт куро на. Эмъюмлы номыр уг кыльы ни, нош дунтэк аптекаосын али инвалидъёслы но малы ке уг сёто. Картэ уж юаса фабрикае вазиськылӥз вал, но мӧйы карыса кутӥллямтэ. Пимы бордамы луысал ке, маин ке, оло, юрттыны быгатысал. Али со армиын. Азьло аръёсы армиын служить карисьёслэн анай-атайёссы выт уг тыро шуо вал, али ке нокызьы уг юртто ни. Малы соку милесьтым пиосмес басьто? Кин ке со кык ар ӵоже дышетске, коньдон люка, милям ке - тэк быре. А. Павлова. Можга город. Редакцилэсь: Оло, Арлыдоослэн нуналзы азьын ке но Можгаысь администрация но военкомат луонлык шедьтозы пересь муртъёслы юрттыны? Анна Анисимовналэн адресэз редакциын. Шӧкыч Кин бон тон? Контролёр! Телевизор пыр мон туж яратӥсько "Пӧйшуръёс пӧлын" нимо суредъёсты, возьматонъёсты учкыны. Шонерак вераса, берло вакытэ мон соослы наӵ-наӵ вожъяськыны ӧдъяй. Кыӵе умой соослэн улэм-вылэм! Кызьы гинэ уг сюлмасько соос ог-огзы сярысь! Нуч-нуч кытчы ке интыяськыса, яке вай вылэ тач-тач ӝабырскыса, ог-огзылэсь гонъёссэс сузялозы, тэйёссэс бичалозы, нюлӥськозы. Нош адямиос малы озьы уг быгато? А? Визьзы уг тырмы-а, мар-а? Яке туала вакытэ асьмеос пӧйшуръёс кадь луимы ини? Тани кылем пятницае таӵе суредэз адӟи. Буммашысен трамвайысь потӥсько. Ӵап контролёръёс вуизы. Нош покчи дышетскись нылпиослэн билетъёссы ӧвӧл вылэм. Школае дыртон сямен доразы вунэтӥллям. Нылпиос гинэ ӧвӧл, мӧйыос но котьмазэс вунэтыло ук. Малы мон та учыр сярысь рос-прос верасько? Тани малы. Кутскизы ук контролёръёсыд шонаськыны, кесяськыны... Палэнысен учкыса, кинъёс ке дунтэк колбаса понна озьы даллашо шуыса малпалод. Нош суред воксё мукет вылэм. Контролёръёс озьы дунтэк ворттылӥсьёсты кир-пазь пазяны кутскиллям. Номыр но уд шуы, культуразы соослэн туж "вылӥын"! Покчи нылпиосты трамвайысь ка-а-ак туздыризы ук, эсьмаса, мылкыдзы ик лыч сузьыса кошкиз, лэся. Гор-гор серекъяло. Нош мискинь нылкышноосты сильсьӧртӥзы гинэ кутыса возё, билетъёссэс сумкаосысьтызы поттытозязы. Пегӟемзылэсь кышкало, шӧдске. Соин гинэ уг тырмы ай. Проездной билет вӧзы, пенсионной документ понна паспорт возьматыны куро на. Сьӧрпалаз ортчиллям ини, шӧдске, та контролёръёсыд. Яке улон-а сыӵе каре адямиосты? Ог-огмылы пичи но оскон ӧвӧл ини, лэся. Трос юанъёс та пумысен кылдо, нош валэктонъёс сётӥсь ӧвӧл. Уз но луы, дыр. Табере угось котькудӥз огазеяськон ас понназ гинэ сюлмаське на. Кызьы шуо, ужпум со бордын ӧвӧл, кин кызьы ужа, пайда гинэ мед потоз. Нош пайда поттон понна амалъёс, кызьы шуо, кырсез но, чылкытэз но окме. Кин кудзэ быръе угось. Тӥни сыӵе пичи гинэ суредэн сэрен, олома быдӟа вераськон ӝутӥське. Сялӟы вал со контролёръёс вылэ, мар мынам отын уже шуыса, кошкы вал палэнтӥ, нош сюлэм уг чида, лулсэръёс ик висьыны кутско. Йылпумъяса эшшо одӥгзэ пусъем потэ на. Котькуд адямилэсь сюлэмзэ кырныж сямен власть сярысь малпаськон портэ, лэся. Контролёръёслэн но озьы ик, вылды. Улытозяд одӥг пол ке но кузёяськем потэ. Мар веранэз на быръён кампаниос ортчем дыръя уно пож ву жомбыльтэм сярысь. Эх шу, улон шу! Л. Бурков. СПОРТЫСЬ УСТООСЫЗ Кионэз пыдъёсыз сюдо Туэ кадь лек вордскем нуналыз ӧй на вал Герман Скурыгинлэн. Быдэс нуналзэ пуэктыса пукиз со телевизор азьын: 15-тӥ сентябре Сиднейын усьтӥськиз Олимпиада. Тӥни отын луыны кулэ вал со али, отын паймытыны кулэ вал быдэс дуннеез, но... Августэ Герман Подмосковьеын Олимпиадалы дасяськиз, ваньмыз асэрказ мынэ вал, но толэзь но ӝыны кыльытозь солы шуизы: уд мыны. Пӧсь гужем шорын лек йӧзорлэсь но вӧсь шуккизы германэз, со вие ассэ ик шӧдэмысь дугдӥз кадь. Кызьы озьы? Кызьы сое - дуннеысь чемпионзэ палэнтыса келяло мукетсэ, лябзэ (азьпала потыса вералом - Николай Матюхин Олимпиадаын призёре но ӧз поты). Кызьы кивалтӥсьёс сокем ӝог малпанзэс воштыны быгато - кылем арын дуннелэн чемпионэз луэмез бере солы Олимпиадае вож сюрес сӥзизы вал ук... Но мар луиз - луиз. Москваын пукисьёс - инмаръёс. Соосты валаны шуг ке но, чидано. Но кызьы чидалод аспалъёсыдлэсь ултӥямзэс? Спортсменлы та адӟонэз вормыны юрттэм интые, шаерысьтымы огез дано телеканал допингэн герӟаса пӧрмостэм материал сётэ. Ярам, секыт спортын кыдам удмурт воргорон уг юскиськы. Туннэ со, ваньзэ вунэтыны тыршыса, нош тренировкае потэ. азьпалан - выль чемпионатъёс, оло, нош, Греция но. Ньыль арлы азьлапал тунаны кышкыт, арлыд но йылэ, кин тодэ... Тани 1992-тӥ арын Барселонаын 42 аресъем испанец вормиз вал ук. Соин ик - вамышъяно. Вамышъяны кутскемзэ Гера ачиз но, апайёсыз но уг тодо ни. Семьяязы со дас кыкетӥ вордӥськиз. соин ик трос чаклам-нуныям ӧз йӧтылы. Атаез кулыку, кык арес кылиз, анаез ялан уж пӧлы выемын вал: гуртысь пӧрзэ лэсьтэ но бызьыса - фермае. Озьы отысь татчы бызьылыса ик нуналыз бырылӥз. Песянайзы бен лек вал, трос вераськыса ӧз улы, еэн дышетъяз. Со ваньмымтэ дыръя покчиоссэ учкылӥзы бадӟымъёсыз. Ох и бӧрдылӥз бадӟымез апайзы Лида, анайзы роддомысь арлы быдэ нуныен бертылыкуз: нош гужембыт шудэм уз йӧт ни. Вань оскон со вылэ вал. Уката ик вӧжогес братсылэн пичизэгес "кӧлтэмез" бере. Ялан бӧрдэмысьтыз мар карыны паймыса, со нунылэн ымаз кизэ донгем. Соиз, пе, изе-изе. Мумызы дораз мынэм но... кулэмын. Ӝокам. Соин ик пичи гералы но Лида туж йыркуръяськиз. со понна али туж тупаса уло, Лида анай интые кылиз. Германлэсь Дуннелэн чемпионэз луэмзэ анайзы ӧжыт гинэ адӟыса ӧз вутты. Но вормонзэ Герман котьку сӥзе солы. Али кадь ик шуэ, тодӥсько, кызьы 6-тӥ классын дышетскыкум туж кышкаса куас кури. Анай номыр куаретытэк басьтӥз. Ох, шумпотыса ширтӥ школае лымы вылтӥ! Вутноысен Гопгуртозь тӧллэсь азьлогес вуиз кадь. Со дырысен Гера чидатэк возьмалляз физкультурая урокъёсты. Эшшо ик! Со уго котькинлэсь азьло финише вуылӥз. Бӧрысьгес Селтала но ӵошатсконъёсы нуллыны кутскизы. Пияш малпаз рос-прос спортэн эшъяськыны. Мар кароно ай, малпалляз со: гуртын йӧскадь луонлыкъёс ӧвӧл, городэ кошконо! 8 класс бере Ижысь 22-тӥ училищее пырыны малпаз. Отын, пе, пӧртэм клубъёсы, секциосы ветло. Школаысь документъёссэ мырдэм сётӥзы (азьвыл пиналъёсты али сямен школаысь уг улляло вал, вылаз ик, Гера ӟеч дышетскиз, ӵошатсконъёсын школалэсь данзэ утьылӥз). Станокъёсты тупатъясь со, конечно, ӧз луы. Ма, ӧз но малпалля, городэ со, зэмзэ ке, спортэн вырон понна вуиз ук. Озьы ик луиз. Соин ик училищезэ йылпумъямез бере но заводэ ӧз дырты. Армие ветлыса, Удмурт университетысь спортфаке пыриз. Малпанэз быдэсмиз кадь - табере со ялан спортэн эшъяськоз. Но солы быдэс улонзэ сӥзёз шуыса ӧз тоды ай. Юрттӥз... кылзӥськись сямыз. Тулыс спартакиадаын спорт амалэн ортчыны курсысьтызы мылкыд карисьёс ӧз шеде. Куратор Гералы вазиськиз. Ойдо, пе, кыӵе ортчид, яралоз, ӧвӧлтэмлэсь одӥг балл ке но азьпал луоз. Но Гера сыӵе ортчиз! Ӵошатскон бере дораз кожиз тренер Леонид Вахрушев. - Туннэ ик ужаны кутским ке, ар ортчыса спортъя мастер луод! - оскытӥз со. - Нош кызьы куасъёс, биатлон? - Уг тодӥськы, но тон та амалэн вырыны кулэ. Шуак мукет тренер доры выжыны капчи ӧй вал. Герман трос малпаськиз, куасэн бызьылонъя тренереныз кенешиз но выжиз ик. Озьы со ӝог ветлӥсь кариськиз, нош ар но ньыль толэзь ортчыса, зэмзэ но спортъя мастер луиз. Эшшо одӥг ар ортчыса - калык куспо классэн мастер. Собере - вылысьтыз вылаз ӵошатсконъёс но вормонъёс. герман Скурыгин - Россилэн куинь полэс чемпионэз, утылӥз СССР-лэсь но дуннелэсь Кубоксэ, вормылӥз Франциын, Бельгиын, Швейцариын ортчылэм калык куспо ӵошатсконъёсын, спорт амалэн 35 иськеме ветлонын дуннелэн рекордсменэз, 1999-тӥ арын Испаниын капчи атлетикая чемпионатын зарни медаль басьтӥз! Учкиськод тазьы телевизор пыр ӝог ветлӥсьёслэн вамышъямзы шоры но... керӟегъяськиськод гинэ - не чеберез, не маиз. Мыно-мыно-мыно: иськем, дас, кызь, витьтон. Ф-фу! Бызь вал но тӥни. Но ӝог ветлонын со бордын ик ужпум - пыдъёсыд амалтэк бызьыны ке ӧдъязы, ӟеч лу, медаль. Ӧжыт-а спортсменъёсты ӵошатсконъёс дыръя дистанциысь палэнто. Германлы нош ик юрттэ, вылды, удмурт сямыз: со - юн, чидась, мылкыдлы сётскисьтэм, ас азяз пуктэм ужпумзэ одно быдэстыны тыршись. Сотэк кызьы чидасалыз со Испаниысь Севильяын 50 градус пӧсьын 50 иськемез 3 час 45 минут ӵоже ортчыны. Вылаз ик отчы со пыэдэн вуиз. Врач нафтизин гинэ но ӧз сёты - допинг шуозы, пе. Зэмзэ ке, мар со пыэд, чигем пыдын ӵошатыса? Бен, луылэ уго сыӵеез но. 1998-тӥ арын Россилэн чемпионатаз Герман маке умойтэмзэ шӧдӥз ик, но сюрес вылэ потӥз. Ортчиз умой но финише вуыса одӥг вамыш но лэсьтэмез ӧз лу ни. Тренерез сое стадионысь тыбыр вылаз нуиз. Соин ик - туннэ чидано. Шунды гинэ медаз шуккы. Сюрес вылын юэм ву нюласа соку ик потэ, векчи кыдырась душ - кыкетӥ гинэ, со но кызь метр мынытозяд гинэ юзматэ. "Чида, яке туннэ, яке ноку но!" - косэ со ассэ. Ачиз пумен табло шоры учкылэ - ку ни "тушмонъёсыз" сутыны кутскозы? Бӧрсяз уго кылем Олимпиадалэн чемпионэз - Ивано Брунетти мынэ. Я, берпуметӥ иськем. Тазэ ини оп! шуытозь ортчоно кадь. Но со тужгес секытэз луиз: ву нокытын ӧвӧл ни, шунды нош уката зол пыже. Шуккиз ке, йырсазьдэ ыштод - чида, чида, чида. Быземлэсь но возиськыны уката секыт - зэмзэ но, зарни метръёс. Ярам, буйгатэ табло. Тани со стадионэ пыре - всё. Вомон! Ӵаш каремлэсь пельёсыз ӵоктасько, йыр берга. Собере - журналистъёс, камераос... Пьедесталэ тубытозь вормонэзлы оскыны но, буйгатскыны но, капчияк шокчыны но дыр ӧвӧл. Россилэн гимнэз шудэм улсын гинэ со ассэ зэмос героен шӧдӥз. Кӧня ке минут ӵоже йыраз бергатӥз улон сюрессэ. Ох и кема мынӥ мон тон дорозь, - чупа со медальзэ. - Кӧня сюрс иськем ортчи меда? Кӧня шаеръёсты котыртӥ? *** Кузпалзэ Лена учкиз телевизор пыр. Ӧйтӧд, маизлы соку золгес шумпотӥз: вормонэзлы- а, ӝоггес бертонэзлы-а. Дораз уго Гера араз кӧня ке толэзь сяна уг улы. Ай медален вуэмез бере но кӧня "кысказы" на: я Москвае, я Сыктывкаре (отын солэн контрактэз), я асьме Правительствое, я вордскем палъёсаз - Селтала ӧтё. "Ӟечкыламзы, данъямзы, конечно, дуно, - шуэ Герман. - Тани бадӟымгес квартира но висъязы, выль машина но кузьмазы - ӝожтӥськыны номырлы". Мукетъёсызлы, оло, ваньмыз та ӧжыт потысал, но Герман сыӵе ӧвӧл. Аслыз дун пуктыса, со ноку уг ветлы. Малы астэ американецъёсын ӵошатонэз, шуэ со. Кӧня сёто, тырмоз: сиськытэк ум улӥське. Сиёнын но бен со копаськись ӧвӧл, тужгес яратэ "гурт" сиёнэз: пыжискем, сылалтэм губи... Нош ёрмид ке, уксё поттон амал шедёз. Казиное ветлӥсьёс шоры ваньмыз умой уг учко ке но, отын номыр уродэз ӧвӧл, дыр. Азарто адямиос котьку тунсыкогес. Вылаз ик, утыны но луэ. Тани алигес солы куинь сюрс усиз. Кышноез соку ик аслыз пальто басьтӥз. *** Герман шоры учкыса, ноку но уд малпа, со - батыр шуыса: лапеггес, чиед мугоро, зӥбыт, трос вераськисьтэм. Кызьы со арня ӵоже 300 иськем пыдын ортчытыны быгатэ? Кионэз пыдъёсыз сюдо, шуэ со ачиз. Паймоно кадь. Зэм шуо - "удмуртлэн кужымез - пушказ". Зинаида Рябинина. Туспуктэмез В. Беломорскихлэн. "Кенешен" кусыпъёсты уката юнмалозы "Кенеш" журналлэсь котькуд выль номерзэ чидатэк возьмало кызьы ке шаерамы, озьы ик солэн палэназ улӥсь удмурт семьяос. Лыдӟисьёсмылэсь таӵе мылкыдъёссэс лыдэ басьтыса тыршиськом, толэзьлы быдэ вордсконо "пиналмы" югыт дуннее дыраз мед вамыштоз, пӧртэм улосвылъёсысь ӵыжы-выжыосмы доры трос выльзэ, паймымонзэ мед вуттоз шуыса. Татарстанын-а, Башкортостан-а, Киров, пермь, Свердловск улосъёсын-а, Москваын-а, Томскын-а улэ со семья - одӥгзэ но палэнэ кельтыны ум быгатӥське. Со понна одно ик пыриськом Россиысь вань газетъёсты но журналъёсты огазеясь бадӟым каталоге. "Россиысь пресса" нимо вож выло каталоглэн нырысетӥ томез пӧртэм улосвылъёсысь, шаеръёсысь удмурт семьяослы вуоно арлы гожтӥськонын туж юрттоз. Солэсь 170-тӥ бамзэ усьтӥськоды но "Кенеш" журнал сярысь гожтэмез шедьтӥськоды. Почта пыр быдэс арлы гожтӥськон дун 65 манет но 40 коньы (Удмуртиын улӥсьёс понна). Изданиосты лыдӟисьёс доры нуон-ваён дунъёс улосвылъёсын огкадь ӧвӧл бере, та лыдпус пӧртэм луыны быгатэ. Со тӥледыз медаз паймыты. "Кенеш" озьы ик пыриз на шаерысьтымы связья федеральной почта управленилэн асьме дорын потӥсь газетъёсын но журналъёсын тодматӥсь каталогаз. Гожтӥськонъя индексъёсмы таӵеесь: 73251 - ӝыны арлы; 73977 - быдэс арлы. Кызьы тодӥськоды, берло аръёсы ваньмыз сямен изданиос гожтӥськонэз ас доразы (редакциосын) но радъяло: озьы угось дунтэм усе. Шаерысьтымы уноез ёросъёс солы дышизы ни. Асьсэос ик гожтӥськыны мылкыд карисьёслэсь коньдон бичало, сое дорамы ваё но выль номермес толэзьлы быдэ редакциысь басьяло. Та амалэн гожтӥськисьёслэн лыдзы арысь аре йылэ. Редакциын гожтӥськонлэн дуныз - 45 манет. Нош табере вылез сярысь. Печать юртлэн Ижлэн кыӵе сэрегаз интыяськемез пумысен уноез лыдӟисьёсмы татчыозь ӧз ик малпаськылэ, луоз. Та юан юнме шорысь медаз но сюлмаськыты. Журнал гинэ дыраз мед вуоз. Но вань на сыӵеосыз, кинъёс милесьтым ужан интымес туннэ ик шоркаре выжтыны дасесь. Маин валче шуиськоды-а? Тани одӥг учыр вылын югдур валамон луоз. "Кенеш" журналэз мукет интыосын сямен ик Завьял ёросысь Пироггуртын улӥсьёс но яратыса лыдӟо. Асьсэлэсь уждунзэс, пенсизэс кӧня ке шыръян вылысь, уноез солы редакция пыр гожъяськыны кутскизы. Нош нуллонзэ оскизы гуртысьтызы нылпи садын ужась егит но чырткем воспитательзылы Ольга Вороновалы. Ӵапак солы тӥни толэзяз огпол Ижлэн одӥг пумысьтыз мукетаз ворттылыны кылдэ. Ольга Максимовналы но, Ижын улӥсь мукет семьяослы но трос дыр быдтыса ветлоно медаз луы шуыса, вуоно аре "Информпечатен" огкылысь ужан сярысь вераським. Нырысь ик, гажано лыдӟисьёсмы, тӥ сярысь малпаськыса, тӥледлы капчи карыны турттыса. Табере Ижын улӥсь котькуд удмурт семья юртэзлы матэ интыяськем киоскын "Кенеш" журналлы гожтӥськыны но отысь ик котькуд толэзе солэсь выль номерзэ басьяны быгатоз. Со понна 58 манет тыроно луоз. Нош кин, шуом, "Кенеш" журналэз татчыозь кияз но ӧз кутылы, нош табере тодматскемез потӥз - тӥледлы, кутскон понна, ӝыны арлы гожтӥськыны ӵектысалмы. Ӝоген "Кенеш" журналлэн туж аспӧртэмлыко кузьымез лыдӟисьёс кие вуоз. Талэсь азьвылъёсаз удмурт калыкмылэсь тужгес но яратоно кырӟанъёссэ огазеяллямы ке, выляз поттыны малпаськомы вашкала дыръя кылдэм сямъёсмес, йылолъёсмес, нергеосмес. Со номерез узырмытон бордын шаерысьтымы валтӥсь тодосчиос мылысь- кыдысь ужало ни. Гажано эшъёс! Тодэлэ: "Кенеш" тӥледын улонысь пӧртэм ужпумъёсъя кенешыса ужалоз, котькуд учыре мылкыддэс, ӵектонъёстэс лыдэ басьтоз. Гожтӥськонлэн тужгес но кысык дырыз али - бере эн кыле. Пётр Сергеев, "Кенеш" журналлэн валтӥсь редакторезлэн воштӥсез. Шӧкыч Редакцие вуиз гожтэт Пиньтэм гожтэт "Гажано редакция! Чиданэ быремен тӥледлы гожтоно кариськи. Милям али выль председательмы Николай Васильевич Волков. Огласянь, туж уж борды ӝабырске, соин синмаськисько, но контораын пукисьёсты уг куареты, йыртэмамзэс уг но адӟы кадь. Тани бухгалтериын ужасьлэн Ильиналэн братэз Данилов уин комбайнзэ тыро бункерен бусые кельтэм. Данилов кык кырсиосыныз (огез инженер) уин сое лушканы вераськем. Но чабеен бертыкузы, соосыз ГИБДД-ос кутӥллям. Возьыт! Азьвыл сыӵе ужъёс понна пытсэт сьӧры келяло вал, али ке кылымтэ-адӟымтэ улсы карисько. Мар меда малпа та пумысен Волков? Фамилиме уг гожтӥськы, тодӥзы ке, медъяса виёзы". Таӵе чагиськон вуиз редакцие Пичи Пурга ёросысь Улын Юриысь. Гожтэт нимтэм бере, луэ вал сое эскерытэк. Но тылтэк ӵын уг луы, шуэм сямен, Пурга ёросэ вуылыкумы, нялтас Юрие но пыраны малпамы. Жаль, колхозлэсь председательзэ Н. Волковез интыысьтыз ӧм шедьтэ, со райцентре кошкемын вылэм. Соин ик гожтэтэз возьматъям валтӥсь бухгалтерлы Александр Дмитриевлы но участковой инспекторлы Иван Васильевлы. - Сыӵе супыльтонъёс отысь-татысь ялан потало, но таиз учыр мыным тодмо ӧвӧл, - шуиз Александра Парамоновна. - Аслам ужасьёсы сярысь номыр уродзэ вераме уг поты. Сыӵе учыр вылэм ик ке, тодысал, дыр, председатель яке милиция. - Милиция зэмзэ но тодысал, - оскытӥз участковой инспектор, малы ке шуоно, чагиськись мурт гожтэ, лушкаськисьёсты ГИБДД-ос кутӥллям шуыса. Кутысалзы ке, со учыр ӵуказеяз ӵукна ик сводкае шедьысал (малпаськытэк гожтэтсэ пӧрам чагиськись - авт.) Собере мыным но сыӵе ивор нокин ӧз вуттылы, соин ик супыльтонъёслы оскыны уг яра. Зэм но, ваньмыз радзэ шедьтӥз кадь: гожтэт пӧрам куке но "контораын обидем" мурт. Асьмелэсь лыдӟисьёсмес ми туж гажаськом, но чик мылкыдмы ӧвӧл супыльтонъёсты эскерыны, соин ик маке тӥледыз зэмзэ но сюлэмшугъяськытэ ке, маде со сярысь алдаськытэк, нимдэс ватытэк. З. Вахрушева. Архивысь документъёсъя Удмуртия ЪЪ дауре 1950-тӥ ар Вуиз 1950-тӥ ар. 2-тӥ январе РСФСР-ысь Вылӥ Кенешлэн Президиумезлэн Указэзъя Глазов луиз шаерысьтымы город. Та аре татысь педучилищеын усьтӥськиз нылпи юртъёслы дышетӥсьёсты-визьнодасьёсты дасясь ёз, ужамысь дугдӥз тамак поттӥсь фабрика, выльысь улӟиз ликёр но водка поттӥсь завод. Шаермы ӟеч мылкыдын пусйиз П. И. Чайковскийлэн вордӥськемез дырысен 110 ар тырмонэз. Солы ӟеч дасяськиллям Ижысь крезьгуръя училищеын дышетскисьёс, Удмурт кун филармониысь артистъёс. Иже но крезьгурчилэн вордӥськем интыяз, Воткала, вуылӥзы Бадӟым театрысь кырӟасьёс Леокадия Масленникова но Эмиль Гилельс. 1950-тӥ арын 15-тӥ июне, "ож мытон вылысь", Уйпал Корея пыриз Лымшор Кореяе. 1950-тӥ-1953-тӥ аръёсы Кореяын быриз татысь - 9 миллион, Китайысь - 1 миллион адями, Америкаысь - 54 сюрс солдат, нош асьмелэнъёслэн лыдзы татчыозь тодмо ӧвӧл. Тодӥськом созэ гинэ: Кореяын ожмаськем 22 лётчикмылы сётэмын Советской Союзлэн Героез дано ним. Быремъёс ватэмын Китайын - Далянысь ӟуч шайын. Ижын усьтӥськиз лётчиклы шаерамы вордӥськем адямилы Советской Союзлэн Героезлы Е. М. Кунгурцевлы сӥзем бюст. Со кисьтэмын Ленинградысь одӥгаз заводын. Пуктэмын 2-тӥ сентябре И. Д. Пастухов нимо карлудын - Ижысь машина лэсьтӥсьёслэн, культура дворецсылы вачепумит (сое ӝутон йылпумъямын ни вал). 6- тӥ ноябре двореце пыризы нырысетӥ адямиос. Со сяна, та арын ик Ижын усьтӥськизы шаерысьтымы Дышетӥсьёслэн юртсы но городысь пионеръёслэн клубзы. Дышетӥсьёслэн юртсы луиз калыкез югдытӥсь. Кызь ар тырмиз Сарапулысь кооперативной техникумлы. Ортчем дыр ӵоже со дасяз 1137 бухгалтеръёсты но товароведъёсты. 1950-тӥ арын куамын ар тырмиз Удмурт кунлы. та бадӟым ужрадэ вуылӥзы бускель шаеръёсысь но - Татариысь, Башкириысь, Чувашиысь, Молотов (туала пермь) улосысь - эшъёсмы. Ижын радъямын вал юбилейлы сӥзем кинофестиваль. Калыклы возьматӥзы "Ленин в Октябре", "Ленин в 1918 году" но мукет фильмъёсты. Удмурт кунлы куамын ар тырмонлы сӥзьыса ик Ленинград киностудия пуктӥз "Советская Удмуртия" чибориё фильм. Со дасямын Сталин премилэн лауреатэзлэн "Сказание о земле Сибирской" киносуредэз кылдытӥсьлэн Н. В. Рожковлэн сценариезъя. Киноез пуктон ужъёс мынӥзы Ижын, Сарапулын. Кык нунал ӵоже сое учкиз Удмурт шаерысь дас сюрс адями. Ноябрь толэзе УАССР-ысь Вылӥ Кенешлэн юртаз но Гужем садын усьтӥськиз шаерысьтымы калык хозяйстволэн но культуралэн азинскемзы сярысь верась юбилей адӟытон. Ваньмыз тунсыкъяськизы мотоцикл поттон удысэн. Адӟытонын возьматӥськиз шаерамы гинэ ӧвӧл, быдэс Советской Союзын тодмо луэм "Иж�1" маркаё машина. "Иж-350" мотоцикл кылдытэмзы понна, Ижысь мотоцикл лэсьтӥсьёс 1950-тӥ арын басьтӥзы Чехословакиысь иворъёсъя министрлэсь хрусталь кубоксэ. Мадьяр спортсменъёс, "Иж-350" мотоциклъёсын Чехословакиын ортчись ӵошатсконъёсы пыриськыса, вылӥ вормонъёс басьтӥзы. Тазьы йылпумъяськиз 1950-тӥ ар - ЪЪ даурлэн нырысетӥ ӝыныез. Со уно воштӥськонъёс ваиз. Н. Пушкарёва, Удмурт Республикаысь Кун архивлэн директорезлэн воштӥсез. Ижысь машина лэсьтӥсь заводысь хор но струнной оркестр пыриськизы шаерысьтымы кырӟась-верасьёслэн ужрадазы,.1950-тӥ ар. Аренда автомобиля Вопрос: Я заключил договор аренды автомобиля. Могу ли я использовать указанный автомобиль не только для личных целей, но и для извлечения прибыли (перевозить за плату пассажиров)? Если собственник автомобиля узнает, что я занимаюсь извозом на его автомобиле, сможет ли он на этом основании расторгнуть наш договор либо потребовать увеличения арендной платы и установления последней в виде процента от полученной мной прибыли от эксплуатации автомобиля ? Макаренко А.Н., г. Ижевск. Ответ: В соответствии с п. 2 ст. 647 ГК РФ арендатор транспортного средства вправе без согласия арендодателя от своего имени заключать с третьими лицами договоры перевозки и иные договоры. При этом арендатор должен соблюдать одно условие: эти действия в отношении арендованного транспортного средства не должны противоречить целям его использования, указанным в договоре аренды, а если такие цели не установлены, назначению транспортного средства. Поэтому, если в вашем договоре аренды автомобиля нет условий, запрещающих перевозить за плату пассажиров, и если это не противоречит назначению этого транспортного средства, вы можете заниматься извозом на автомобиле собственника, с которым заключили договор аренды. Однако, если вы собираетесь заниматься извозом систематически, то вам придется зарегистрироваться в качестве индивидуального предпринимателя со всеми вытекающими отсюда последствиями. Арендодатель вправе требовать досрочного расторжения договора через суд и возмещения убытков, если арендатор пользуется имуществом не в соответствии с условиями договора аренды или назначением имущества (п. 3 ст.615 ГК РФ, ст. 619 ГК РФ). Следовательно, если в вашем договоре аренды не было запрещения использования автомобиля для извоза и если такая деятельность по перевозке пассажиров не противоречит назначению этого транспортного средства, собственник не сможет расторгнуть договор на этом основании. Порядок, условия и сроки внесения арендной платы определяются договором аренды. Поэтому, если в вашем договоре арендная плата установлена, изменяться она может только по соглашению обеих сторон в сроки, предусмотренные договором, но не чаще одного раза в год. Иное может быть предусмотрено договором (п.3 ст.614 ГК РФ). Стороны могут предусматривать в договоре аренды различные формы арендной платы и их сочетания (в том числе и в виде процента от полученной прибыли от эксплуатации транспортного средства). г. Ижевск, ул. Пушкинская, 268, тел.: 48-55-25, 43-01-36. АНО "Центр правовой защиты". Кин кӧня инвестиция басьтэ? Быдэс дуннелэн экономикаез возиське инвестициос чотын. Та кыл Россия понна выль на, соин но, вылды, туж каллен пыӵаны выре. Запад но уг дырты огыр-бугыр вырись страналы коньдонзэ сётыны: кин тодэ, кудпала мынозы ӟучъёс ӵуказе бере. ООН-лэн Комиссиез алигес дасяз но печате поттӥз вузкарон но экономикае понэм дуннеысь инвестициос сярысь документъёсты. Соосъя адске: ар ӵоже 800 миллиард доллар инвестициос улсын уже кутэмын, нош 2000-тӥ арын та лыдпус ортчыны кулэ триллионэз. Инвестициосты котькинлэсь трос "ужатэ" США. 1999-тӥ арын кунгож сьӧрысь соос 276 миллиард долларез ас вылазы "кыткизы". Нош кыӵе адске Россия? Странамы басьтыны быгатӥз 2,8 миллиард доллар. Ӵошатон понна учкоме Польшаез. Бускельмы кыскиз 7,5 миллиард доллар, яке куинь поллы ятыргес. Аслэсьтыз капиталзэ мукет странаосы интыянын валтӥсь инты басьтэ Великобритания. Кылем арын англичанъёс 1999 миллиард инвестициос сётӥзы. Эшшо одӥг лыдпус: та вакытэ Россиын ужа 7793 иностранной фирма. Л. Дмитриева. КИБАШЛЫОС Коркалэн чеберез - кузёлэн йырвисёнэз Выжыкылын кадь корка пуктӥд ке но, улонэд отын выжыкылын кадь уз луы. Владимир Герасимович Андреев сое ас вылаз шӧдӥз ни. Кибашлы воргоронлы корка пуктыны музъем висъязы Ижевскысь Ленин районэ. Вить ар куспын буш интые пуксиз син палёмымон юрт. Вылтусыныз, пуш чебереныз гинэ со уг паймыты. 250 квадратъем юрт куинь поллы шунытгес пуллэсь но кирпичлэсь пуктэмезлэсь. Кыӵе сыӵе пӧртмочи кужымез вань бен солэн? - Одӥг но ӝыны сантиметр пасьталаем бетон борддоръёс вискы тулъямын пила пызь, пасьталаез куамын сантиметр, - валэктэ Владимир Герасимович. - Ваньзэ тае ӝутыны кулэ луиз кумын машина пила пызь, соку со 30 копейка сылэ вал. Корка пуктыны дунтэм усиз мукет ласянь но. Городысь куяськон интые мын но, мар ке кулэ, ваньзэ шедьтод - пӧртэм пумо езъёс, куштӥськем корт, ыргон, бронза... Дунтэм, шуныт но йыг-йыг сылӥсь таӵе корка пуктыны Владимир Герасимовичез нокин ӧз дышеты. Инкуазен сётэм быгатонлык вӧзы ватсаськиз на улон но ужан сяменыз люкаськем тодонлык. Кин гинэ ӧй вал со улытозяз: художник, маляр, скульптор, модельщик, лепщик, фотограф. Одӥгезлы но та ужъёслы со нокытын ӧз дышетскы, ваньзэ-ӧвӧлзэ вить классэз йылпумъяз. "Витьёс" басьяз суреданъя, арифметикая но ассэ умен воземез понна гинэ. Быгатонлыкез нырысетӥ емыш ваиз витетӥ классын дышетскыкуз. Войнаын бырем агайзэ суредамез понна, дышетӥсез солы парсь кӧй сётӥз. атаез соку пизэ ушъяз, та, пе, тынад нырысетӥ уждунэд. Нош суреданы пияш туж яратэ вал. Дышетӥсьёс но, писательёс но карандаш улаз сюрылӥзы. Усто пӧрмылӥз, эшъёсыз соку ик тодмаллязы кинэ суредамзэ. Арлыдо дыръяз мылысь-кыдысь басьтӥськиз скульптураос лэсьтон борды. Ужъёссэ пӧртэм выставкаосын но возьматъязы. Нош кӧня уждунзэ сииз та яратонэз, кӧня уйёссэ изьытэк потоно луиз. Владимир Герасимовичлэн быгатӥсь киосыз улын "улӟылӥзы" Советской Союзлэн Геройёсыз, художникъёс. Кышноез куд-ог дыръя пыкылоз но вал, нош ик, пе, мунёосыныд шудӥськод ни. В.Г.Андреев вордӥськиз Башкортостанысь Челноковка гуртын, куамын арзэ ужаз Куйбышев областьысь Чапаевск городын. Ужан интызэ одӥг пол гинэ воштоно ӧз луы. Художниклэсь ужзэ ӧз дунъяллялэ угось кулэезъя. Одӥгаз заводын грузчиклы гинэ но солэсь тросгес уждун сётӥзы. Но кибашлы но котьмалы усто луэмзэ котькытын ик синйылтылӥзы. Со огназ воштыны быгатӥз пӧртэм ужасьёсты. Нош Ижевске Владимир Герасимович вуиз 1989-тӥ арын, нылпиосыз пала улыны кариськиз. Юрттэ будэтыны висись пиезлэсь кык пичи нылпиоссэ. Ачиз ик сюлмаськиз соослы музъем инты шедьтон но корка пуктон ласянь. Бакчазэс гырыны-копаны культиватор выллем машина лэсьтӥз. Моторез ужа электричестволэсь, 10 сотых музъемез небӟытон 10 манет тыр усиз. Кибашлы воргоронлэн ужъёсыз юрт котырзэ гинэ уг шулдырто. Кык-куинь ар талэсь азьло секытгес луиз улыны, одӥгаз организацие вазиськиз уже куриськыса, уд, пе, жалялэ, ваньзэ лэсьтыны быгато, мар косӥды. Оскытэкгес ик юазы, выж вылэ пуктон бадӟым вазаос лэсьтӥськоды-а, пе. Суредаса ик возьматӥз, собере кыксэ лэсьтӥз бетонлэсь но мрамор пырыослэсь. Кельшизы ужъёсыз, соку ик дас вить ваза лэсьтыны куризы. Кык ар ортчыса, эшшо дас тямыссэ лэсьтытӥзы на. Владимир Герасимовичлэсь аспӧртэм вазаоссэ синйылтытэк ӧз кельтэ, дыр, "Металлург" санаторийын шутэтскисьёс но. Соос шулдырто эмъян корпусэз. Кибашлы муртлэсь быгатонлыкъёссэ дунъяло ке, мылкыд но бугыртӥське выльзэ, чеберзэ кылдытыны. Но ӵем дыръя мылкыдэз куашкато вожъяськись синъёс. Владимир Герасимовичлы туж ӝож потэ сое ӧвӧлтэм быгатонлыкъёсын пыкылэмзы. Уг оско коркаезлэн шунытэзлы, ӧжытгес коньдон тырон понна оломар но амалъяськиськод, шуо. Нырысь коркаязы шуныт лыктэ вал ву гумыос кузя артысь садикысь. Ваньзэ лыдъяз-чотаз счётчик. Ӧжыт, пе, возьматэ, озьы луыны кулэ ӧвӧл. Коньдон тырыны куризы, коркалэсь быдӟалазэ лыдэ басьтыса. Ӧз чида ултӥямез воргорон, корказэ чагыр эстӥськонэн шунтыны кутскиз. Таяз учыре но счётчик "янгыш" луиз, нош ик коркалэн быдӟалаез шугъяськытэ шуныт сётӥсьёсты, табыдӟа корка понна туж ӧжыт дун тыриськоды, пе. Владимир Герасимович паймемын ни мар карыны. Кышноезлэн но куд-ог дыръя куаретэмез потэ, пуктӥськд, пе, олокыӵе йӧспӧртэм корка йыр висёнлы. Зэмзэ но, паймоно куд-ог адямиослэн ваньзэ коньдон пыр мертамзылы. Владимир Герасимович кышноеныз ёмырам корка азьысьтызы пилиськем тусь вӧзын пукысалзы ке, соку ваньмыз капчигес шокчысалзы, вылды. Л.МАЛЫХ. Мынам доре - Удмуртия Кивоштӥсьёсмы будо. Соос киын шаермылэн вуоно нуналэз но азинсконэз. Туспуктэмъёсыз Владимир Беломорскихлэн. Россиысь дано артистэз Николай Широкихез тодӥсьтэмез ӧвӧл, дыр. Со туж тодмо баянчи. Николай Александрович кема аръёс ӵоже ужаз кырӟанъя но эктонъя "Италмас" ансамбльын, фольклоръя "Айкай" театрын. Али со тырше Удмуртиысь калык артисткалэн Валентина Пудовалэн группаяз. Туннэ Николай Широких пусъе зарни юбилейзэ. Соин валче Удмурт флармонилэн юртаз сӥё-дано ужрад но бадӟым концерт орчтоз. "Удмурт дунне" газетлэн редакцияз ужасьёс сюлмысьтызы ӟечкылало Николай Александровичез 50 арес тырмонэныз. Солы сӥзё ужаз азинсконъёс, шудбур но тазалык! Николай Широких. В. Беломорскихлэн туспуктэмез. Гажано эшъёс! Вань сюлмысьтым тау карисько тӥледлы Удмурт Республикалы президент быръёнэ пыриськемды понна! Уката ик мур гажамме верасько мон понна куаразэс сётэм бырйисьёслы. Асьме калык котькинлы адӟем карымон луэ ужез яратэменыз, вань секыт ужпумъёсты быдэстыны дась луэменыз. Сое ӟеч возьмато шаермылэн экономикаяз но улон-вылонын умой пала воштӥськонъёс. Оскисько, президентэз быръён юрттоз ӟеч кутсконъёсты эшшо но пайдаё азинтыны, кун властез юнматыны, луонлык кылдытоз калык хозяйствоез огсыр радъяны. Сӥзисько тӥледлы шудбур но юн тазалык, котькуд семьяын тупаса но ог-огдэ валаса улон, ужады бадӟымесь азинсконъёс. Удмурт Республикаысь Кун Кенешлэн Тӧроезлэн нырысетӥ воштӥсез П. Н. Вершинин. ПОЛИТИКА НО ЭКОНОМИКА Ракетаос вордско музъем вылын Азькыл интые Воткинск городлэн данэз дуннее вӧлмиз заводэныз. Татысь мастеровойёс 1858-тӥ арын Петропавловской крепостьлы шпиль лэсьтӥзы. Туннэ со уй пал столицамылэн, Санкт- Петербурглэн, асӧртэмлыко символэз луэ. Пужыятыса пӧръям выжъёссы пуктэмын Амур, Висла, Зея, Кама, Москва шуръёс вылын. Нош кӧня зарни но азвесь медальёсын пусъемын завод 1851-тӥ, 1862-тӥ, 1867-тӥ, 1882-тӥ, 1893-тӥ аръёсы ортчем выставкаосын! Россия гинэ ӧз, Америка, Великобритания но Франция Воткинскысь мастеровойёсты дуннеысь тужгес но устоосыныз лыдъялляз. Туала завод поттэ туала дырлы кулэ луись продукция - ракетаос но му вӧй кысконъя оборудование. "Тополь-М" - дуннеысь огез кужмоез военной техника. Му вӧй поттӥсьёс но вылӥ дунъяло воткаослэсь ужзэс. Татчы заказ сёто Россиысь тодмо компаниос: "Удмуртнефть", "Татнефть", "Лукойл", "Юкос", "Сибнефть", "Роснефть" но мукетъёсыз. Оборудованизы кошке кунгож сьӧры но. Россилэн палэназ Воткинскез герӟало ВПК-лэн азинсконэныз. Со озьы ик вань. 40 ар пала завод ужа ракета поттон бордын. Берло аръёсы "Воткинский завод" ГПО данэ луиз ракетаослы "Тополь-М" комплексъёс лэсьтэменыз. Военной специалистъёс верамъя, солэсь золэз дуннеын ӧвӧл на. Техникалэн ужамез эскеремын вал сентябрь пумын "Плесецк" космодромын. Испытаниос умой ортчизы. Со понна заводлэн коллективезлы тау карон кылъёс вераз Россиысь Ракетной войскоослэн главнокомандующийзы, армилэн генералэз В.Н.Яковлев. Тямыс ар талэсь азьло предприятие выжтэмын вал коммерция амалэн ужанэ. Со понна чакламын вужмыны кутскем СС-25 ("Тополь") ракетаосты выльдыны. Ар ортчыса, "Свободный" космодромын ортче нырысетӥзэ коммерческой кораблез эскерон ("Старт"). Нош 1997-тӥ арын 4-тӥ мартэ "Старт" юрттэмен, орбитае потэ "Зея" российской космической спутник. Собере "Старт" выже иностранной государствоослэсь космической аппаратъёссэс лэзёнэ. Озьы 1997-тӥ арын ик 24-тӥ декабре орбитае потэ американской спутник. Ноябрьлэн пумаз лобоз Израильлэн спутникез. Нош декабре космодроме вуоз вылез "Старт". Таиз инсьӧры поттоз шведъёслэсь спутниксэс. "Му вӧй кыскон - со сыӵе ик космос" СССР куашкам бере, Россилы собыдӟа военно-промышленной комплексэз возён туж секытэн сётске. Малыез тодмо: экономикалэн инъетэз котырак лябӟемын. Но сое ӝутыны амалъёс вань. Нырысетӥез но валтӥсез - топливно-энергетической комплексэз (ТЭК-ез) выльдон. Тӥни ма бордысен кутске экономикамылэн стратегиез. Та ужпум странамы азе тужгес но лэчыт султӥз, дуннеын му вӧйлы дунъёс чутрак ӝутскемен валче. Инкуазен сётэм узырлыксэ тросэнгес рыноке поттыса, таӵе луонлык шедьыку, Россия омыръя но омыръя вылэм нефтедолларъёсты, ум быгатӥське - техникамы вужмемын. Вань оскон ВПК вылэ. Тӥни малы кылем арня вискын Воткинске люкаськылӥзы странаысьтымы ВПК-ысь но ТЭК-ысь предприятиослэн кивалтӥсьёсссы. Куинь ар куспын та куинетӥез бадӟым кенешон. Вераськонэз нуиз Кун Думаысь депутат, Промышленностья, лэсьтӥськонъя но наукаен герӟаськем технологиосъя комиссилэн кивалтӥсез Ю.Д.Маслюков. Со ик кыл кутэ нефть но газ оборудованиез выльдонъя удыс понна. Статистика: Россиысь топливно-энергетической комплекс куашкан калэ вуэмын. Экономикалэн огъя инъетэз шорлыдын вераса вужмемын ке 43,5 процентлы, му вӧй кысконын - 55, сое переработать каронын - 78, газ поттонын - 40, сое переработать каронын - 80, эгыр поттонын - 60, электрокужым удысын - 55 процентлы. ТЭК-е пырись предприятиослэн валтӥсь фондъёссы пӧсьтэмын 22-38 процентлы, экономика удысын оглом - 12,5 процентлы. РФ-ысь ТЭК туннэ возиське таӵе предприятиос вылын: Оборонной луисьёсыз - "Воткинский завод" ГПО, "Мотовилихинские заводы" ОАО, "Зеленодольский завод" ГУП, "Уралвагонзавод" ГПО, "Воронежский механический завод" ФГУП, "Баррикады" ФГУП, "Станкомаш" ОАО, "Электрохимприбор" ФГУП, "Корвет" АК... Гражданской тӥрлык поттӥсьёсыз -"Алнас" ОАО, "Первомайскхиммаш" ОАО, "Ижнефтемаш" ОАО, "ВЗБТ" ОАО, "Уралбурмаш" ОАО, "Сибнефтемаш" ОАО... Металлургической - "Северский трубный завод" ОАО, "Ижсталь" ОАО, "Челябинский трубопрокатный завод" ОАО, "Волжский трубный завод" ОАО, "Альметьевский трубный завод" ОАО... Валтӥсь инты басьто "УралАЗ" но "КамАЗ". Та заводъёсын поттэм автомобиль шассиос вылэ интыясько му вӧй кысконын ужась кужмо агрегатъёс. ТЭК-лы туала оборудование дасянэ кыскемын Россиысь ваньмыз сямен научно- исследовательской но проектно-конструкторской организациос. "Музъем узырлыкез, нефтез но газэз уже кутон, со чотын страналэсь экономиказэ юнматон - со сыӵе ик космос", - пусйиз Юрий Дмитриевич. Тӥни малы ВПК вылэ усе таиз но стратегической ужпум. Му вӧй поттӥсьёс, кылсярысь, 95 процентсэ кулэ луись оборудованизэс лэсьтыны быгато обороная предприятиосын. Озьы ке но, чаклам ужъёс туж каллен радъясько. ВПК ог 30 процентсэ гинэ вылӥ технологиен туж кулэ луись техникаез дася. Тӥни малы му вӧй кыскон тӥрлыкез али но басьтоно луэ кунгож сьӧрысь, асьмелэсь предприятиосмес палэнтыса. - Кемалась дыр вуэмын Россилэн заводъёсаз дуннеысь куронъёслы тупась оборудование поттыны но соин вузкарыны, - вазиськиз кенешонэ люкаськемъёслы Ю.Д.Маслюков. - Соослэсь адӟем кароно, со дыре ик чаклано: малы асьмеос бере кылиськом, кытысь, ма бордысь пото янгышъёсмы но ыштонъёсмы? Экономикамы та вакытэ тупа йӧ шоры тэтчась чорыглы: выре, выре, нош шуг-секытысь потыны кужымез ӧвӧл. 2001-тӥ арлы кутӥськись бюджетлэсь но возьманы номыр, туалаезлэсь со пӧртэм ӧвӧл. Вань оскон "ВПК-ТЭК" проектлы. Та кык бадӟым удысъёсты валчеяса гинэ экономикаез азинтыны но котыр ласянь юнматыны луоз. Е.П.Велихов, Россиысь Наукаосъя академилэн вице-президентэз, "Росшельф" ЗАО-ысь директоръёслэн советсылэн председателез меӵак шуиз: - Сьӧрлось государствоос Россиез ӝутыны ноку но уз юрттэ. Учке Норвегиез. Туннэ со пыре тужгес но узыр странаос радэ, узырмиз ас кужыменыз ужаны быгатэменыз, Северной зарезьысь му вӧй кыскеменыз. Асьмеос татын но лябӟемын, "Курск" подводной лодкалэн быремез тае быдэс дунне азьын возьматӥз. Арктикаын, Северной мореын, Северной ледовитой океанын, озьы ик Сахалин шельфын ужан понна поттоно зӧк йӧосты пильылыны вормись судноос, ву улын эскерон-чаклан нуись техника, йӧ пӧлтӥ трубопроводъёсты герӟась оборудование. Академик дэмла, ракетно-космической промышленность юрттэмъя 5-10 пол кужмоятыны ву улын кутӥськись аппаратъёслэсь энергизэс, луонлыкъёс кылдо чылкак выль техника но поттыны. Самой отчы кутӥськысал ракета двигательёслэн ужатэм эстӥськонзы. Экономикаын кылдэм туала югдур пумысен мур шугъяськонзэ вераз Россилэн Франциын азьвыл аръёсы ужам посолэз Я.П.Рябов: - Дуннеын валтӥсь интыын луон понна, асьмелы ваньмыз сётэмын: музъем узырлык, коньдон, вылӥ быгатонлыко адямиос. Но ваньмыз со кошке кунгож сьӧры: миллиардъёсын уксё, му вӧй, газ... Нош сиён-юон пӧлысь 65 процентсэ ваиськом отысь, Россиысь гурт удысэз, промышленностез ӝокатыса, пыд йылазы поттыны вырыса. Маин мерталод учёнойёслэсь, визьмо специалистъёсмылэсь кунгож сьӧры кошкемзэс? Новосибирскысь Наукая академия гинэ кӧня интылы бушаз ни, Москваез но мукет бадӟым центръёсты вератэк. Мар дауртӥськом инкуазен? Ма кыле му вӧй скважинаос ужам бере Тюменьын но музон интыосын? 1997-тӥ арын ваньмызлы тодмо луиз выльдӥськонлэн кудпала нуон сюресэз. Экономика ласянь ыштонъёсты лыдъяно ке, Советской Союз Быдӟым Отечественной война аръёсы но сокем юн ӧз куашка. СССР секыт ожмаськон бере но индустрия ласянь валтӥсь государствоос радын вал. 1950-тӥ арын со быдэсак радъяз немецъёсын куашкатэм производствоез, нош 60-тӥ аръёслэн кутсконазы СССР быдэс дуннелы возьматӥз космос ласянь супердержава луэмзэ. Тужгес но кужмоез флот, авиация, атомной энергетика - ваньмыз со асьмелэн вал. Ельцинэн ортчытэм реформаосын Россия "ваське" космосысь, ыштэ флотсэ, армизэ. Технология ласянь учкыса шеде азьвыл колониальной луись лябыт странаос радэ. Туж трос ыштонъёс адӟо предприятиосмы, рынокысь соосты кужмысь палэнто но ужтэк, коньдонтэк кельто. Выись муртэ нокин но уз утьы. Тӥни малы Россия Федерацилы вань луонозэ лэсьтоно, экономикамес, лябӟытэм предприятиосмес вакчи дыр куспын ӝутон понна. Со понна Кун Думаын кылдытэмын нимысьтыз Координационной Совет. Кулэ на-а Россилы Сибирь? Таӵе юанэн люкаськемъёс азе потӥз И.И.Простяков, РФ-ысь Президентлэн Сибирь федеральной округъя оскем муртэзлэн нырысетӥ воштӥсез. Сибирь - Россилэн инкуазь узырлыкен тырмытэм шыкысэз. Нош кытчы ваньмыз кошке?! Малы уг кыльы татын улӥсь калыклы, син азьын куашкась предприятиосы, заводъёсы? Урал дорозь Европае ӧс усьтэмын ке, Россилэн Азия люкетэз выльдӥськонэн валче ортчытэм реформаосын сэрен Западэн но, Востокен но кусыпъёссэ ыштӥз. Та югдурысь потон понна, Иркутскын ортчытэмын Байкал котырысь улосъёслэн кивалтӥсьёсынызы кенешон. - Ми ум валаське Россилэсь политиказэ. "Азиатско-тихоокеанской экономической союз" (АТЭС) туннэ огазея 21 странаез, США-ез, Япониез, Китаез, Южной Кореяез вераса. Дуннеын поттэм ваньбурлэсь 60 процентсэ соос потто. Берло кӧня ке аръёссэ гинэ шӧдскымон юн азинскиз Индия. Математика наукаын Россия котьку но валтӥсь государствоос пӧлын мынӥз, соин ик программаос кылдытонъя рынокын асьмеос азьпалан луыны кулэ вал, нош туннэ усим нулёзь. Со дыре ик Индия ар ӵоже та удысын 5,6 миллиард доллар поттэ, кужмо кунъёсты берлане кельтыса. Ма вераны луоз Сибирь, Дальний Восток сярысь? Отысь кивалтӥсьёслы туннэ капчигес Москвае люкаськыны но огъя ужпумъёсмы сярысь кенешыны. Москвае самолётъёс лобало на, нош ми дорын транспорт куашкатэмын. Умоен пусъёно Россилэсь АТЭС-э пыремзэ. Но со тырмыт ӧвӧл. Шунды ӝужан палась бускельёсмы асьмеды лёгаса кельтӥзы ни, тӥни малы Сибирез ужатыны кулэ. Нефть, газ, оглом быдэс энергетической комплекс берытскиз ке Восток пала, югдур син азьын воштӥськоз. Малы Китай 1 миллиард 300 миллионъем калыкеныз 20 арлэсь ятыр дугдылытэк уаинске, Россиез пумен кыдёке но кыдёке кельтэ? Валэктонэз одӥг: быгатэ вузарыны но промышленностьсэ ужатыны. Россия аслыз музон сюрес, музон эшъёс бырйиз. Тӥни кытын куашканмылэн мугез. Байкал котырысь улосвылъёс ӝуто туж кулэ ужпумъёсты. Соосты матысь дыре улонэ ӧд ке пыӵаты, Россия, зэмен но, Сибирез ыштоз. Сибирез, Дальний Востокез гинэ уз, вань на Урал, Поволжье... Тӥни малы та вакытэ тужгес но лэчыт султэ ВПК-ез но ТЭК-ез одӥг кужыме огазеян но одӥг ӧре выжтон. Сотэк узыр Россия ВМФ азьын ялан пыдесъяськыса сылоз, ялан тэльмыроз, миллиардъёссэ пунэмен курыса. Нош "сьӧд зарнимы" но "чагыр эстӥськонмы" сюдоз-вордоз мурт кузёоосты, соослы лыдъянтэм барыш вайыса. *** Воткинскын ортчем кенешонлэн пайдаез шӧдӥськыны кулэ ни матысь толэзьёсы. Ю.Д.Маслюков верамъя, Кун Думаын кылдытэмын луоз нимысьтыз комитет, со эскерыса возёз ТЭК-лэсь азинскемзэд возьыны мукет амал ӧвӧл. Людмила Медведева. Ивор понна - 50 сюрс манет 19-тӥ октябре Якшур-Бодья ёросысь прокуратураын ортчиз кенеш. Сое нуиз республикаысь югдурез утёнъя министр В. Ф. Щербаков. Кенеш сӥземын вал туэ август толэзе тазалыкез юнматонъя "Березовая роща" нылпи лагерьысь. Наташа Зорина ышем пумысен ӝутэм уголовной ужлэсь кызьы мынэмзэ эскеронлы. Ужрадэ озьы ик пыриськизы ёросысь прокурор Ф. М. Веретенникова, республикаысь прокуратураын но Югдурез утёнъя министерстволэн пӧртэм ёзъёсаз ужасьёс. Кызьы пусйиз министр, та учыр паськыт вӧлмиз но калыкез бугыртӥз. Пичи нылэз утчан ужез эскерыса возёнэз ас вылаз басьтӥз Удмурт Республикаысь Кун Кенешлэн Тӧроез А. А. Волков. Люкаськемъёслэсь малпанъёссэс, ӵектонъёссэс лыдэ басьтыса, Наташа Зоринаез утчанъя огъя план дасямын. Тужгес но бадӟым саклык висъяны чакламын нылашен герӟаськем котькуд пичи гинэ учырез но лыдэ басьтонлы. Лагерь котырын трос нунал ӵоже утчаськон нокыӵе пайда ӧз вайы бере, малпан кылдэ: та учыр герӟаськемын кузь сюрес вылэ ветлӥсь водительёсын-дальнобойщикъёсын. Югдурез утёнъя ёзъёс лагерьын луэм учыръя кыӵе ке ивор тодӥсьёсты вазиськыны куро милицилэн матысь ёзъёсаз. Нимтулды шараямын уз луы, нош иворды дунъямын луоз 50 сюрс манетлы. Удмурт Республикаысь МВД-лэн пресс-службаез. Лэчыт ужпум Кыӵе буёл уг тырмы туала властьлы Россие но Удмуртие ядерной кылем-мылемъёсты пыртыны лэзён сярысь ужпум одӥгез лэчытэз луиз Удмурт Республикалы президент быръён вакытэ. Та ужпумлэсь пуштроссэ пыр-поч сэрттыны-пертчыны курим Удмуртиысь Экологической союзлэсь кивалтӥсьсэ Александр Борисович Торгушинэз. Асьме инкуазьмес кырсёмытонлэсь быгатэмзыя туннэ утьыны выро "вожъёс" ("зелёные"). Соослэн радазы султӥзы ни егитъёс, арлыдоос, студентъёс, учёнойёс, экологъёс. "Вожъёслэн" огазеяськонъёссы ужало ни Россилэн пӧртэм улосъёсаз. Удмуртиын соос огазеяськемын экологической союзэ (ЭКоСоюз). Нош дуннеын инкуазез утён сярысь туж зол сюлмаське "Гринпис". Отчы пыро дуннеысь тодмо политикъёс, артистъёс, писательёс. США-лэн парламентысьтыз одӥг сенатор но уз дӥсьты инкуазьлы пумит чаклам закон ӵектыны. Европаысь странаосын но котькуд пӧйшурез, коӵышез, пуныез быдтонлэсь утьыны выро. Соин ик кунгож сьӧрын пӧйшур куослэсь вурем дӥськутъёс пумен модаысь потӥзы ни. Нош мар кароно сутэм ядерной эстӥськонлэн бервылъёсыныз? Учёнойёс со пумысен ялан кенешо на. Нош дыр мынэ. Куд-огез ӵектэ соосты музъеме ватыны. Но кин, кыӵе кун со ужез ас вылаз басьтоз? Тросэз кунъёс пумит луизы ни. Африкаысь пичи кунъёс но, кылсярысь, Намибия, радиацилэсь кышкытлыксэ валаса, ядерной бервылъёсты ас музъем вылазы пыртыны ӧз лэзе. - Сыӵе зол пумитъяськыны быгатон понна Россиын но власть "вож" буёло луыны кулэ, - шуэ Удмуртиысь ЭКоСоюзлэн кивалтӥсез Александр Борисович Торгушин. Нош, кызьы со буёл шоры учко меда асьме кивалтӥсьёс но депутатъёс? Со понна тодэ ваёно луоз Кун Думаысь депутатъёслэсь ужамзэс. Нырысь чакламъя, таяз Кун Думаын Экологияя комитет кылдытыны воксё но учкемын ӧй вал, угось азьвылаз Думаын но со комитетэ 8 депутат сяна пырыны мылкыд ӧз кары (кыӵе ке комитет кылдытон понна ӧжытсэ 12 депутат кулэ). Озьы ке но, соку пичи комитетэз ужаны лэзизы. Отчы тӧрое быръемын вал "Яблоко" фракциысь депутат Тамара Злотникова. Солэн тыршеменыз но юн нюръяськеменыз со вакытэ Дума ӧз лэзьы инкуазез утён сярысь законэ нимысьтыз ёзэт (статья) кутыны радиоактивной бервылъёсты странаямы пыртыны лэзён сярысь. Экологияя комитет озьы ик пумит луиз нимысьтыз закон кутыны Россиын ядерной эстӥськонэз уже кутон но сое возён сярысь. Та законэз кутыны ӵектэ вал Минатом. Россилы, пе, со бадӟым барыш ваёз (кунгож сьӧрысь АЭС-ёс ядерной кылем-мылемъёсты Россие ваёзы, нош асьмеос сое переработать каромы). Та законэз кутонлы пумит соку Думаын озьы ик зол нюръяськиз депутат Сергей Шамшурин. Закон ӧз ортчы. Туэ Думалэн выль ӧтчамаз (созываз) азьвылэз депутат Т. Злотникова ӧз сюры. Экологияя комитетлэн кулэлыкез сярысь выль быръем депутатъёс вунэтӥзы кадь. Озьы ке но, кӧня ке депутатъёслэн-экологъёслэн куремзыя, комитет кылдытэмын ик вал. Но туж паймымон луиз: экологияя комитетлы кивалтӥсе табере юнматэмын "Единство" фракциысь депутат Владимир Грачёв, кин тужгес но зол выриз вал Минатомлэсь кичӧлтонъёссэ законэ пыӵатыны. Быгатоз на-а табере Экологияя комитет ас кужымзэ возьматыны, радиоактивной бервылъёсты асьме странае пыртыны лэзён сярысь ужпумез депутатъёс выльысь эскерыны кутскизы ке? Оскон ӧжыт. Туэ Федерацияя Кенеш Россилэн куд-ог улосъёсаз эскерыны келяз РФ-лэн инкуазез утён сярысь законаз пыртыны чаклам ватсанэз, кудӥз герӟаськемын радиоактивной бервылъёсты странае вайыны лэзёнэн. Республикамылэн вылӥ кивалтӥсьёсыз но тросэз депутатъёс со ватсанэз умоен лыдъязы. Озьыен, соос соглаш луизы мукет странаослэсь ядерной кылем-мылемъёссэ Россие пыртыны. Кун Думаысь депутатъёс та ужпумез выльысь эскерыны малпало, вуоно арлы бюджетэз юнматэм бере. Нош со дырозь улосъёслэн кивалтӥсьёссы ядерной бервылъёс пумысен ас мылкыдзэс вераны кулэ на. Малпаськыны дыр вань на ай. Оло, асьме Кун Кенешлэн Президиумез но азьвыл кутэм решениезлэсь куштӥськыны быгатоз на? Уката ик табере, куке Удмуртиын президент быръемын. Куд-ог улосъёслэн та ужпумъя мылкыдзы тодмо ини. Кылсярысь, радиоактивной бервылъёсты Россие пыртыны чутрак пумит луэмзэс веразы ни Нижний Новгородысь Законодательной собранилэн адямиосыз, Мурманскысь Думалэн депутатъёсыз, Татарстанысь, Башкортостанысь кивалтӥсьёс. Удмуртиысь Экологической союзлэн кивалтӥсез А. Торгушин верамъя, инкуазьлы но адямиослы кышкытлык кылдытыку, одно ик экологической экспертиза ортчытоно. Солэн огез куронэз луэ кивалтӥсьёслэсь гинэ ӧвӧл калыклэсь но мылкыдзэ тодон. Со понна калыкын юалляськон ортчытоно. Лэзёно-а, ӧвӧл-а Россие ядерной бервылъёсты пыртыны? Таӵе юанэн, та ужпум кылдэм бере ик, Россиысь экологъёс адямиос пӧлы юалляськыны потӥзы. Юалляськонэз ортчытоно туэ 25-тӥ октябрёзь. Но малы ке та уж туж шыпыт мынэ. Яке асьмеос, Удмуртиын улӥсьёс гинэ-а, президент быръён ужрадэ выйыса, со сярысь номыр тодытэк кылимы? Кызьы валэктӥз та юанлы А. Торгушин, зэмзэ ик, юалляськон каллен мынэ. Кун Думаысь туала депутатъёслэн-экологъёслэн но озьы ик "вожъёслэн" кужымзы туж ляб на, нош Удмуртиысь Кун Кенешын сыӵе депутатъёс воксё но ӧвӧл. Соин ик ядерной бервылъёсты Россие пыртыны пумит луисьёслэсь кинюртэмъёссэс бичан йӧскадь радъямын ӧвӧл. Туннэ нуналлы Россиын одӥг миллионлэсь ятыр пала гинэ кинюртэмъёс бичамын, Удмуртиын - 22 сюрс пала. Нош законэ пыртыны чаклам ватсан медаз ортчы шуыса, 2 миллион пала кинюртэмъёс бичано. Соку гинэ экологической экспертиза но ортчымтэен лыдъяськоз. Психологъёслэн чакламзыя, буёлъёс адямилэн мылкыдаз, пе, туж бадӟым инты басьто, кылсярысь, мае ке вормемед потэ ке, котырты ас улондэ горд буёлэн, нош астэ катьямед, буйгатэмед, гань-гань ужатэмед потэ ке, бырйы вож буёлэз. Оло, асьме кивалтӥсьёслы, депутатъёслы но пумтэм нюръяськонъёсысь потыса, вож буёлэз быръёно ни. Соку гинэ, дыр, "вожъёслэн" куронъёссы но валамонэсь луозы. Т. Банникова. Нылпи садъёс пытсасько Алнаш ёросын та вакытэ ужа куамын нылпи сад. Отын шутэтско 1147 покчиос. Нош Вуж Шудья но Казак гуртъёсын нылпи юртъёс пытсамын, отчы ӧжыт покчиос ветлэмен. Ёросысь нылпи садъёсын огъя 159 мурт ужа. Ваньзы сямен соос дышетскемын, нош куд- огез тодон-валанзэ али йылэтэ вылӥ дышетскон заведениосын. О.КОЖАНОВА. "Горд атас" медаз кузёяськы шуыса Сарапул ёрос администрациен кивалтӥсь А. А. Антропов алигес нимысьтыз постановление улэ гожтӥськиз. Отын тупен-тупен верамын, мар лэсьтыны кулэ, сӥзьыл но толалтэ улон но ужан интыосын тыл медаз поты но соин валче ыштонъёс но адями бырон учыръёс медаз луэ шуыса. Та документын косэмын, интыысь администрациос калык пӧлын валэктон уж мед нуозы но тылпу кысон арбериосты котькытын дасянэз мед чаклалозы шуыса. Та вакытэ ёрос ас мылкыд карыса ужась (добровольный) дружинаосты тырмытъяло, эстӥськон гуръёсты тупатъяло, электрикъёс езъёс кузя ортчо но тӥяськем интыосты ёзнало, связистъёс телефонъёсты тупатъяло. П. Николаев. УДМУРТ КУНЛЫ - 80 АР Улон - со нюръяськон Таӵе верам кылъёсты мон трос пол кылӥ визьмо адямиослэсь. Мур малпаськиськод ке, асьмелэн вань улонмы зэмзэ но нюръяськон пыр ортче. Со сярысь Удмуртилэн историяз но гожтэмын. Кызьы тодмо, Глазовысь большевикъёс 1917-тӥ аре март толэзе огазеяськизы. Соин кивалтӥз И.В.Попов. Нош Ижевскысь большевикъёс, эсеръёсын но меньшевикъёсын кужмо нюръяськыса, 1917-тӥ арын май толэзе огазеяськыны быгатӥзы. 26-тӥ июне нырысетӥзэ ӵош кенешонзэс ортчытэмзы бере, Иж карысь большевикъёс парторганизацизылы кивалтӥсе бырйизы И.Д.Пастуховез. Парторганизация ог сюрс эшъёссэ чехъёслы пумит ожмаськыны ыстӥз, но соос пӧлысь тросэз Казань дорын тӧдьыосын ваче пумиськыкузы бырыны шедизы. Соку заводэ кӧня ке гинэ коммунист кылиз. Сое шӧдыса, эсеръёс, меньшевикъёс, "Фронтовикъёслэн союззы" тӧдьы гвардиысь офицеръёслэн кивалтэмзы улсын 7-тӥ августэ бугыръяськон ӝутӥзы, кӧнязэ ке большевикъёсты но соослэсь юрттӥсьёссэс быдтӥзы. Иван Пастухов пегӟыны быгатӥз, дораз ӝытазе пыраса, дӥсьсэ воштӥз но лодкаен Воложкае вуиз. Кӧня ке нунал нюлэскытӥ губи но пӧртэм емышъёс сиыса ветлӥз. Тӧдьыос сое котькытысь утчазы, кутыны юрттӥсьлы дас сюрс манет коньдон висъян сярысь ивортӥзы. Кужымез бырем бере, Иван Дмитриевич одӥг чорыгасез мукет ярдуре нуыны куриз. Та чорыгась тодмаз большевикъёслэсь кивалтӥсьсэс, со сярысь соку ик тӧдьыослы вераз. Иван Дмитриевичез нюлэскысь дас одӥгетӥ километрысь шедьтӥзы но пеймыт камерае пуктӥзы. Отын сое ватэм коньдонэз сярысь юаса жугизы, нянь но ву сётытэк, сылалтэм чорыген гинэ сюдӥзы. Нокыӵе ултӥянлы ӧз сётскы юн большевик, номыр тодыны ӧз быгатэ солэсь. Огаз уе, ымзэ юрӟым ӟустариен ӵоктазы но бадӟым мешоке понӥзы. Карлутка дорысь шайвылэ вайыса, дась гуэ улэпкын куштӥзы но сюен согизы. Быдӟым Отечественной война бере Ижевскысь 4 номеро ремесленной училищее дышетскыны пыри. Та шайвыллы артэ общежитиын улыкум, мон адӟи сое ватэм интыез. Отӥ ортчыкум, котьку ик малпалляй, кӧня сюрс адямиос асьсэлэсь улонзэс сётӥзы шудо улонмы понна. Трос аръёс ортчыса, та шайвыл интые "Зенит" стадион лэсьтӥзы. И.Д.Пастуховлэсь шӧйзэ выльысь ватӥзы азьвыл Михайловской черк доры интыяськем Горд площаде, революциын быремъёслэн шаязы. Пастуховлэн памятникез али сылэ Коммунаров урамын, радиолэн юртэз вӧзын выллапалан. Удмуртиын выль школаос усьтӥськыку, асьме дорын улӥз Иван Дмитриевичлэн сузэрез Анастасия Пастухова (Сергеева). 1916-тӥ арын Ижевскысь нылкышноослэсь гимназизэс быдтэмез бере ужаз Якшур-Бодья волостьысь Патраки гуртын дышетӥсьын. 1917-тӥ арысен со мылысь-кыдысь пыриськиз Маркслэсь дышетэмзэ калыклы валэктыны. Нош 1918-тӥ арын, мятеж ортчыку, атаеныз но кык агайёсыныз ӵош Анастасия Дмитриевнаез пытсэт сьӧры келязы. Удмуртиез колчаклэсь мозмытэмзы бере, А.Д.Сергеева кивалтӥз калыкез дышетон удысэн. 1922-тӥ арын сое келязы Москваысь академие. Студентъёс азьын татын лекциос лыдӟизы А.В.Луначарский, Н.К.Крупская но мукет тодмо адямиос. Анастасия Дмитриевна Надежда Крупскаяен азьвылгес пумиськиз Россия губерниысь калыкез дышетон удысысь кивалтӥсьёслэн нырысетӥ съездазы. Соку А.Д.Сергеева Вотской автономной областьысь делегат вал. Академия бере Анастасия Дмитриевна татысь партийной кабинетэн кивалтӥз. Кӧня ке арзэ ужаз Москваысь шор ёзо школалэн директорез луыса, кивалтӥз та городысь ик калыкез дышетон удысысь отделэн. Озьы ик вал Москваысь Дышетӥсьёслэсь тодонлыксэс будэтонъя институтлэн директорез. Быдӟым Отечественной война дыръя Сергеева вал СССР-ысь МВД-лэн шуг сямо нылпиосын нюръяськонъя отделэзлэн кивалтӥсезлэн юрттӥсез. Ож бере кивалтӥз "Семья и школа" журналэзлэн отделэныз. Ижевскысь "Удмуртия" издательство пӧртэм аръёсы поттӥз "Семья рабочего", "Товарищи"", "Дети войны" книгаоссэ. Отын со возьматӥз агаезлэн Иван Дмитриевичлэн но аслаз улэм-вылэмзы сярысь тодэ ваёнъёссэ. Удмурт автономилы 80 ар тырмон азьын одно ик данъяны кулэ таӵе зол адямиосты. Соос вань кужымзэс но улонзэс жалятэк тыршизы асьме шаермы понна. В.ЧЕРНОВ. Бадӟым учыр Кылем толалтэ ай шаерысьтымы Операя но балетъя кун театр басьтӥськиз П.И.Чайковскийлэсь "Пиковая дама" операзэ дасян борды. Туэ 21-тӥ но 22-тӥ октябре со возьматэмын луоз. Ар но ӝыны ӵоже лэсьтэмын туж бадӟым уж. Екатерина ИИ эксэйлэсь кузёяськон вакытсэ возьматон понна гинэ вуремын куинь сю дӥсь. Суредась Владислав Анисенков туж сюлмаськем спектакльлы сизьым ӟеч суред кылдытон сярысь. Соосын ӵош адямиос вуыло Петербург садэ, Тол двореце, казармае, шудон корка. Сергей Разенков дирижёр кивалтэм улсын хорысь кырӟасьёс, оркестр али ужало крезьгурез чузъяськытон бордын. Таяз арняе Санкт-Петербургысь вуоз режиссёр Алексей Степанюк. Азьвылгес Иже кык пол вуылӥз. Спектакльын шудэ быдэс театрысь быдэс труппа. Валтӥсь интыосын - артистъёс Татьяна Силаева, Александр Каманицын, Любовь Куликова, Ювеналий Осипов, Александра Шулятьева, Валерий Дёмин. "Пиковая дама" операез пуктон шаерамы бадӟым учыр луоз. В.ЛАГУНОВ. Бадӟымлэсь но бадӟым кузьым Та бадӟым кузьымез "Удмурт Республикалэсь энциклопедизэ", шаерамы кема гинэ витизы. Пӧртэм мугъёсын сэрен сое поттон ӝегаз. Республикамылэн кунлык басьтэмез дырысен 80 ар тырмон азьын энциклопедия типографиысь потӥз. Трос тодмо адямиос ужазы со бордын - тодосчиос, писательёс, журналистъёс. Соосын кивалтӥзы профессор Виктор Туганаев но "Удмуртия" издательствоысь редактор Клавдия Дзюина. Алигес Калык куспо Восточно-Европейской университетын энциклопедиен тодматскон ужрад ортчиз. Отчы трос тодмо адямиос ветлӥзы. Соос энциклопедилы вылӥ дунъет сётӥзы. Та узыр книга магазинъёсын вузаське ни. Дуныз 400 манет. Н.ЛЯЛИН. "Удмурт Республикалэсь энциклопедизэ" возьматон ужрад дыръя. В.Беломорскихлэн туспуктэмъёсыз. Шулдыртэ "Меркурий" Грах ёросын, гужем ужъёс йылпумъяськем бере, ужзэ выльдӥз егитъёслэн "Меркурий" огазеяськонзы. Озьы ик азьланьтӥське керттӥськонъя, кырӟанъя но эктонъя кружокъёсы гожтӥськон, угось ужзы бырем бере егитъёс нуналлы быдэ, тужгес но шутэтскон нуналъёсы, тросэн культура учреждениосы люкаськыло ни. Тани "Меркурий" ӟеч дасяз но ортчытӥз ни "Поле чудес" выллем шулдыръяськонъёс Зареченск но Новогорск гурт культура юртъёсын. Таӵе шулдыр ӝытъёс ортчытэмын луозы мукет гуртъёсын но. Калыклы соос туж кельшиллям. П. Николаев. Быдӟым Вормонэз дуризы Та тушо пересь сярысь вералляло радио пыр, гожъялляло газетъёсын. Жадёнэз тодӥсьтэм адямилы туэ, 9-тӥ октябре, тямыстон тямыс арес тырмиз. Артемий Петров солдатлэсь шинельзэ дӥсяз 1935-тӥ арын сӥзьыл. Нош ар ортчыса, кыдёкысь Монголие вуиз. Армия сое кыдатӥз. "Батыр", "Ленин" - тазьы вазиськылӥзы татын улӥсьёс Горд Армиысь солдатъёс сярысь. Пичи Пурга ёросысь Орлой гуртысь пулемётчик Артемий Тимофеевич Петров японецъёсын ӧз ожмаськы. Тушмонэз жугиз Воронеж фронтын - 1942-тӥ арын Гитлерлэн гыжкалъёсыныз нюръяськиз. Бухенвальдлэсь шимес нуналъёссэ чидам адями Артемий Тимофеевич Петров вордӥськем палъёсаз сӧсырмыса бертӥз. Кӧня ке ар ӵоже колхозын пудо возьмаз, муш утиз. Быдӟым тыложе пыриськем мурт котьку шуэ: "Улонын мед луоз яратон. Яратоно уждэ, вордӥськем палъёстэ, вӧзысьтыд эшъёстэ, пӧйшуръёсыз, тылобурдоосыз, оглом - быдэс инкуазез. Осконо инмарлы. Лэсьтоно ӟеч ужъёс". Та паймымон воргорон дунне вылын тамында улытозяз пуктэм ньыль корка. Будэтэм куать синмаськымон нылпи. Артемий Тимофеевич Петров аслаз эшъёсыз Павел Коробов, Иван Очеев, Николай Антипин, Николай Иванов, Леонид Баграшов, Василий Гызин сямен ик дуриз Быдӟым Вормонэз. В. Поздеев, шаерчи. Ӧз кышкатске Та юлтошъёсты табере быдэс шаермы тодэ ини. Куинь эшъёс Артем Ворончихин, Сергей Новиков но Рустам Гафуров Ижысь 37-тӥ школаын дышетско. Зэмос геройёс шуыны луоз соосты. Ог шутэтскон нуналэ Ижысь Ленин ёросын улӥсь нокытын ужасьтэм воргорон усыкмем йырыныз улон юртъерзэ кенжытӥз. Ӵап со вакытэ коркан вал 4 аресъем но 5 толэзьем нылпиос. Урамын шудӥсь эшъёс ӵынэз ӝог синйылтӥзы. Кема малпаськытэк, соку ик ки улазы ма шедем соин тылпуэз кысыны кутскизы. Со сяна, пичи нылпиосты но ӵынэн тырмем коркась поттыса, быронлэсь утизы. Тылпу кысӥсьёс вуытозь, ас кужыменызы тылпуэз вормизы. Та кышкыт учыре пиос ӧз куалектэ: ваньзэ кызьы кулэ, озьы лэсьтӥзы. Кышкасьтэм луэмзы но ӝог юрттэт сётэмзы понна элькунысьтымы МВД- лэн тылпулэсь утиськонъя кун управлениезлэн кивалтӥсез М. Г. Камалетдинов быдэс школа азьын пиослы суйпосын нуллон часъёс кузьмаз. Мышказы "За отвагу на пожаре" гожтэмын. А. Сергеев. Фотоез В. Беломорскихлэн. Политика Арня ӵоже дуннеын, странаын, шаерын Дунне оскон мылкыдын чакласа улӥз Египетысь Шарм-эль-Шейх городын ортчись пумиськонэз. Израиль но Палестина куспын пумитъяськонэз зӥбломытон борды басьтӥськиз ук США-лэн Президентэз Билл Клинтон. Со трос кужымзэ сётӥз Ясер Арафатэз но Эхуд Баракез одӥг кылэ вуттон понна. Ӧз пӧрмы. Кык кивалтӥсьёс огзы шоры огзы ӧз ик учкылэ. Египетысь кошкизы... тупатэк. Нош со дыре ваче пумит сылон пӧрмиз лек ожмаськонлы. Кык арня ӵоже 120-лэсь ятыр адями быриз ни. ООН-лэн Генеральной Ассамблеяез секыт югдур понна янгыше уськытӥз Израилез. Араб кунъёслэн Каире люкаськем кивалтӥсьёссы но огкылысь веразы еврейёслы пумит луэмзы сярысь. Куд-ог кунъёс Израильлы пумит чурыт ужрадъёс куто ни. Тани Тунис соин дипломатической кусыпъёссэ дугдытӥз, мукет арабъёс но бӧляксылэсь адӟем карозы шуыса оскон вань. Каирын пумиськон дыръя тужгес но чурыт вераськиз Багдадлэн ыстэм муртэз. Вунэтоно ӧвӧл, дыр: Ираклэн тужгес лек тушмонэз - США, нош США - Израильлэн "бадӟым агаез". Ближний Востокын югдурез тупатонлэн палэназ кылиз Россия. Солэсь мылкыдзэ юась-верась ӧвӧл. Нош ас вакытаз Совето Союз туж зол дурбасьтылӥз Палестиналы. Ачиз Ясер Арафат Москваысь ӧз ик кошкылы кадь. Владимир путин кылем арняе шутэтскиз Сочиын. та нуналъёсы со кӧня ке пумиськонъёс ортчытӥз. Украиналэн Президентэныз Леонид Кучмаен кенешиз чагыр эстӥськонэн герӟаськем ужпумъя. Берло дыре Россия Украинаез пыкылӥз, солэн улосвылаз газэз лушкан учыръёс луыло шуыса. Ужпумлэсь быдӟалазэ валаны секыт ӧвӧл, со борды президентъёс басьтӥськизы ни бере. Белоруссилэн Президентэныз Александр Лукашенкоен ӵош Владимир Путин эскериз выль Союз кылдытон ужлэсь азинскемзэ. Бӧрысь Александр Лукашенко ӝутскем мылкыдзэ ӧз ваты. Владимир Путинлы оскыны луэ, шуиз со, озьы бере, Белоруссилэсь но Россилэсь Союззэс кылдытон кыл вылын гинэ ӧвӧл, уж вылын но быдэсмоз. Кун Дума азинтӥз вуоно арлы бюджетысь инъетсэ эскерон ужзэ. Тодады вайытом, нырысетӥзэ лыдӟыса потэмзы бере депутатъёс бюджет сярысь пӧртэм малпанъёссэс веразы. Куара сётон но секытэн мынӥз. Правительство данаксэ ӵектонъёсты лыдэ басьтэм, кылсярысь, ватсаса коньдон висъям оборона, калыкез улон-вылонын утён удысъёслы. Сое депутатъёс лыдэ басьтӥзы. Кыкетӥзэ куара сётон капчиен ортчиз. Та пумысен вице-премьер, коньдон ужпумъёсъя министр Алексей Кудрин шуиз, Россиын нырысьсэ, пе, бюджет цивилизационной амалэн кутӥське. "Курск" подлодкаысь бырем морякъёсты ӝутон ужъёс ортчем арня ӝог мынӥзы. Россиысь но Норвегиысь подводникъёс вакчи дыр куспын субмариналэсь бордзэ пасяны быгатӥзы. Лодкалэн тямысэтӥ отсекез вуэн быдэсак тырмытэмын. Со радиациен но, вӧй-эстӥськон суретъёсын но кырсёмытэмын ӧвӧл. Азьпалан тужгес секытэз уж: подводникъёс огзэ бӧрсьы мукетсэ отсекъёсты чакланы-эскерыны кулэ. Куазез эскерисьёс кышкато, Антарктикае тол вуэ ни шуыса, таӵе вакытэ зарезь вылын сильтӧл кузёяське. Нош Норвегиысь "Регалия" судно пайдаё ужан понна тулкымъёс 3 метрлэсь ӝужыт луыны кулэ ӧвӧл. Кылем арня вискын "Комсомольская правда" газет печатлаз "Курсклэн" капитанэзлэн Геннадий Лячинлэн кузпалызлэсь Ирина Лячиналэсь шара гожтэтсэ. Морякъёслэн семьяоссылы юрттон вылысь кыдытэм комиссиысь потэмез сярысь ивортӥз нылкышно, со янгыше уськытӥз Мурманск улос администрациез люкаськем коньдонэз тус-тас каремез понна. Выем субмарина нуллӥз Курск городлэсь нимзэ. Кылем арня нуналэ Курск улосын губернатор бырйизы. Нош со азьын сӥзьыл куазен ӵашъем выллем луиз улосысь судлэн решениез: быръёнэ пыриськонлэсь со мозмытӥз туала губернаторез Александр Руцкоез. Нош асьмелэн шаермы кылем арняе капчи шокчиз - президент быръемын, вылӥ должностез басьтӥз Александр Волков. Правительстволэн Тӧроез Николай Ганза отставкае кошкиз. Кыӵе луоз солэн азьпалан ужан сюресэз? Ачиз шара вералляз вал ини, сое Минатоме ӧтё шуыса. Озьы ик луоз но, дыр, Ганза Москвае кошкоз. Республикамы дасяське 80 арзэ пусйыны. Праздник бадӟым луоз. Тани Ижын Йӧ дворецын гинэ асьсэлэсь быгатонлыкъёссэс 1,5 сюрслэсь ятыр усточиос, пе, возьматозы. Ма, мугез но бадӟым ук: юбилей вӧзы ватсаськиз на эшшо одӥгез пусйымон ужрад - выль президентэз вылӥ должносте юнматон, инаугурация, ӟуч сямен вераса. Ю. Александрова. 24-тӥ октябрь - ООН-лэн нуналэз ООН: лябӟем политика биньгозы яке кышкыт кивалтос? Музъем вылысь тужгес бадӟым огазеяськон (Огазеям Нациослэн Организацизы) сярысь пӧртэм вераськонъёс ветло. Куд-огез политикъёс юан пукто: кулэ на-а ООН туала дуннемылы, кыӵе ужпумъёсты со быдэсъяны быгатэ на? Угось берло дыре югдур чылкак воштӥськиз, социализм куашкамен, кык кужмо кунъёслэн пумитъяськонзы йылпумъяськиз. Тазьы малпаськисьёсын споръяськисьёс но вань. Аслэсьтыз кужымзэ шӧдыса, мултэс шаянъяське, пе, США, одӥгаз яке мукетаз сэреге нырзэ чуртна. Собере Музъем вылын мукет ужпумъёс но ӝутско, кылсярысь, арысь аре паськыт но паськыт вӧлме ислам фундаментализм. Солэн азьветлӥсез саудовской миллиардер Усам бен Ладен быдэс дуннеез киултон сярысь малпаське. Ма, малпанъёссэ улонэ пыӵатэ. Кыдёке ветлонэз ӧвӧл, тани Чечняын ик кӧня вир кисьтӥськиз ни. Кызьы шуиз Россилэн Президентэз Владимир Путин, Японие берлозэ ветлыкуз, дэмен, кужымзэ огазеяса гинэ дунне кортнаны быгатоз кӧшкемыт эзелез. Озьы бере, ООН-эз быдтыны вазь на. Нош кызьы кылдӥз та огазеяськон? 1939-тӥ-1945-тӥ аръёсы быдӟым война вӧлмиз Европае, Азие, Африкалэн уй палаз. Германиысь фашизм уно странаосты капчиен пачкатыны быгатӥз. Угось кунъёсаз тушмонлы пумит ӵош нюръяськон сярысь ӧз малпаськылэ. 1941-тӥ арын Гитлер ожалскиз Россия вылэ. Со дырысен ини кыкетӥ фронт усьтон, фашизмез дэмен лябӟытон сярысь кылпум потылыны кутскиз. Нош дуннеын одӥг кужмо огазеяськон кылдытыны решение кутэмын вал Москваын ортчем конференциын 1943-тӥ арын октябрь толэзе. Соку куспазы кенешизы Россиысь, США- ысь, Великобританиысь кунсьӧр ужъёсъя министръёс. Кышкытлыклэсь ӵош утиськон сярысь декларация улэ, соос сяна, гожтӥськиз на Китайлэн представителез. Та документын пусъемын вал: выль огазеяськон тупаса улонэз утён понна кылдытӥське, солэн ужаз пыриськыны быгатоз котькудӥз мылкыд карись страна, бадӟымез но пичиез но. Огазеяськон кылдытон сярысь ужпум бӧрысьгес ӝутэмын вал та арын ик Тегеранын. Отын пумиськизы куинь союзной державаослэн кивалтӥсьёссы, Россилэн - Иосиф Сталин, США-лэн - Франклин Рузвельт, Великобританилэн -Уинстон Черчилль. Тегеран конференция бере ини мытэмын вал выль организацилэсь уставзэ кылдытонъя уж. Уставлэсь валтӥсь тодметъёссэ рос-прос эскеризы та куинь кунъёсысь делегациос 1944-тӥ арын сӥзьыл нимысьтыз конференциын. Со ортчиз США-ын Думбартон-Окс городын. Ужрадлэн кыкетӥ люкетаз пыриськиз Китайысь делегация но. Ӵапак та конференция кылдытыны ӵектӥз Огазеям Нациослэсь Организацизэс но чаклаз солэсь ёзъёссэ. Валтӥсь ёзэз - Генеральной Ассамблея. Со огазея ООН-э пырем вань кунъёслэсь ыстэм муртъёссэс, одӥг кун - одӥг куара. Генеральной Ассамблея дуннеын кылдэм ужпумъёс сярысь кенеше, огазеяськонэ выль странаосты кутэ, коньдон ужпумъёсты эскере. Дуннеын тупаса улон понна кыл кутэ Кышкытлыклэсь утиськонъя кенеш (Совет Безопасности). Отчы пыре 15 мурт. Витез (Китай, СССР, Великобритания, США но Франция) ялан ужало, мукетъёссэ кык арлы быръе Генеральной Ассамблея. ООН-лэн вань аслаз Калык куспо судэз. Отын ужа 15 судья. Соосты быръё Генеральной Ассамблея но Кышкытлыклэсь утиськонъя кенеш. Огазеяськонлэн пӧртэм ёзъёсыныз кутэм программаосты но ужпумъёсты улонэ пыӵатон бордын ужа Секретариат. Соин кивалтэ Генеральной секретарь, кудзэ Кышкытлыклэсь утиськонъя кенешлэн ӵектэмезъя юнматэ Генеральной ассамблея. Нырысетӥез Генеральной секретарь Трюгве Ли (Норвегия) ужаз 1953-тӥ арозь. Сое воштӥз Даг Хаммаршельд (Швеция), 1961-тӥ арын со Африкаын самолётэн пазьгиськиз. Бирмаысь (туала вакытэ Мьянма) У Тан ООН-эн кивалтӥз 1971-тӥ арозь. 1972-тӥ арын вылӥ постэ быръемын вал Курт Вальдхайм (Австрия), нош 1982-тӥ арын - Перес де Куэльяр (Перу). Туала вакытэ Генеральной секретарьлэн пукон вылаз пуке Кофи Аннан (Египет). Дуннеысь кунъёслэсь огазеяськонзэс кылдытонъя берпуметӥез ужрад ортчиз 1945-тӥ арын 25-тӥ апреле - 26-тӥ июне Сан-Францискоын. Отчы люкаськиз 50 кунысь 282 делегат но 1,5 сюрслэсь уно экспертъёс, советникъёс но мукет специалистъёс. Конференцилэн пумаз ООН-лэн Уставез кутэмын вал. Со улонэ пыӵаны кутскиз 1945-тӥ арын 24-тӥ октябре, та вакытлы ратификацияя грамотаоссэс вуттӥзы Великобритания, Китай, Совето Союз, США, Франция, озьы ик Гитлерлы пумит коалицие пыриськем данак кунъёс. Ӵапак со дырысен 24-тӥ октябрь ООН-лэн нуналэныз лыдъяськыны кутскиз. Дасяз Ю. Александрова. Гажано Александр Александрович! Сюлмысьтым ӟечкыласько Тӥледыз быръёнъёсын вормеменыды но Удмурт Республикалы Президент луэменыды. Бырйисьёс вылӥ дунъяллям Тӥлесьтыд юн сямо луэмдэс, ужын быгатонлыкъёстэс, калыкез огазеяны быгатэмдэс. Оскисько: Тӥ азьланяз но бадӟым инты висъялоды асьме республикаос куспын валче ужанэз юнматонлы. Сӥзисько Тӥледлы, гажано Александр Александрович, выль удыс борды кышкатэк басьтӥськыса, пайдалыко ужаны. Юн тазалык, шудбур но ваньзэ умойзэ гинэ. Гажаса Александр Лукашенко, Беларусь Республикалэн Президентэз. Юалэ - валэктом Гажано редакция! Газетты пыр юрттэт курыса вазиськисько таӵе ужпумен: туэ апрельэн пумаз колхоз бухгалтерия 1997-тӥ ар понна нылпи пособие сётъяз. Мынам куинь нылпиосы списокын ӧй вал. Документъёсме ыштӥллям, косӥзы выльысь справкаос люканы. Собере шуизы, коньдонэд вуоз банке июне яке июле. Но коньдон ялан ӧз на ву. Кытысь утчано? Райсобесын но колхоз бухгалтериын но вераськемзы но уг поты. Г. Лекомцева-Гуляева, Балезино ёрос. - Галина Ювшальевналэн ужпуменыз ми вазиськылӥм Калыкез улон-вылонын утёнъя министерствое но, Балезиноысь пособиос сётъянъя ёзэ но. Министерствоын ужасьёс коньдон ӝгеатэмзэс ас вылазы басьтӥзы. Янгышен соос Гуляевалы сётӥськись коньдонэз Яре ыстӥллям. Но гожтэтэн вазиськеме бере ик соос кыл сётӥзы ваньзэ йылаз-пумаз вуттыны. Оскиськом, туннэ нуналлы со нылпиосыз понна сётӥськись коньдонэз басьтӥз ни шуыса. З. Вахрушева. Сиён-юон но улон-вылон Асьме республикаысь дано (мон шуысал: быдӟым) дышетӥсь Вера Ивановна Колесникова сярысь "Удмурт дунне" гожъяз валля арын сӥзьыл. Очерк нимаськиз "Вешась". Солэн данак кылъёсыз соку газетэ ӧз сюре. Шуом, пӧран сярысь, шонер пересьмон сярысь (вань сыӵе но ужпум), кема улон но астэ быдтон сярысь Тӥни малы кулэ луиз Вера Колесникова сярысь аспӧртэм малпантэк уг кыльы, дыр. Ассэ философ ӧвӧл шуэ ке эшшо огпол мадьыны. Дунне вылысь одӥг ужпумъя но Вера Ивановна но, котькыӵе удыслэсь кыӵе ке пуштроссэ шедьтэ. Солэсь ӧй юа на сопал дунне но Марсын улӥсь микроб сярысь, атом бомба но бигер сюан сярысь, ӧри (комиссия) кыл но музон макеос сярысь. Нош мон соосын тунсыкъяськысал ке, Колесникова одно шараясал аслыз гинэ тупась малпанзэ. Берло пумиськонамы оломалы тодэме потӥз вашкала но туала сиёнъёс сярысь. Татын но солэн быдэсак аспӧртэм философиез вань вылэм. Пӧран удыс люконтэм герӟаськемын малпаськонэн, ужанэн, куноятонэн, бускелен кусып возёнэн, улонэн. Ма, кылзэлэ ай асьтэос. Чыры-пыры помидорез но Вера Ивановна герӟа улон питранэн - философиен. Помидор Одӥг аре помидоре туж удалтӥз. Нылпиосылы келяны окмиз, сылалтыны акыльтӥз. Куазь кезьытскиз ке, со кынмоз но ярантэм луоз. Помидорме векчи юдылӥ, но кеньыр кадёзь ӧй вутты, пичиоссэ шори вандылӥ. Озьы,"тяпайтытозям" сакыр сиропе быректӥз. Ваньзэ сураса кисьтӥ вина пӧзьтон пуртые (олокытчы луизы сыӵе ӟеч макеос). Кило - помидор, кило - сакыр. Пиналъёсы чечылэсь ымемын, нош тазэ, шыдэз сямен, тусьтые поно но сиё. Сакырен умойтэм югдур дыръя куштӥськылӥ та амаллэсь. Сӥзьыл, помидор тачак дыръя, кыл сётӥсько: вуоно тулыс неномыр сяин но уг мертты ни сое. Тол ӵоже выльысь буйгасько но тулыс пал лачак помидор выжыятӥсько. Удалтэ но, кыӵе ке амал утчано луэ. Помидорез сакырен пӧзьтон пумысен нокытысь лыдӟеме ӧвӧл. Адӟеме вань: егитъёс оломае но сакырен сиё. Мон но соослэсь адӟем кари. Жаляса верано луэ: огзэ сиёнэз копак вунэтӥськом, музонзэ шер но шер пӧраськом. Тодэмзэ но дыртӥд-вуттӥд инъяськом. Сяртчы Басьтом сяртчынянез ик. Тросэз-а меда тодо на, сое чипы сӥлен дасяно шуыса? Солэн лымаз рис пӧзьто, отчы поно векчи юдэм сяртчы яке каляга но сӥль. Чаклано: ӝук нап медаз лу. Тае куарняне чепыльтэм но пыжем бере, сяртчынянь дась ӧвӧл на. Чурыт ук. Сое одно ӝокатоно кӧс вӧен. Пыжиськемез интыяно мур тусьтые, шобыртоно кӧс вӧен пыӵатэм нимысьтыз ӵушконэн. Ӟеч кышноос юри сыӵе ӵушкон возё. Тодо: каляга, рис, чипы сӥль но лым куспазы туж тупало. Ӟеч пишме ке, кышнозэ воргорон пельпумаз веша. Дуно ӧвӧл кадь сыӵе лӥятон, нош нылкышнолы туж кулэ маке. Собере тодыны тыршо, пиналлы яра-а, уг-а пыжиськем. Али та сям но ыше ни. Нош вазен воргорон но кышномурт нылпизылы мар кулэзэ вераны быгатъязы. Нокыӵе институттэк. Табере семья куашка. Алигес кылӥ: Норьяла, пе, газ пыртӥзы ке, ӝыныез кышноос картъёссэс улляны дасесь. Малы ке шуоно, воргорон кулэ на пу дасяны гинэ. Сяртчыез лымшорынгес мертто, калягаез - уй палан. Тазэ ми дорын уггес выжыято ни. Мон ачим кидыс уськытӥ. Мыло-кыдо сямо тодмоос куро кидыс, мылкыдтэмъёсыз - одӥг-кык каляга. Уг валало: сомындӥклэсь гинэ уд пӧзьты паронка, уд пыжы печень. Нош таоссэ сиыкуд чакласькы: кылдэ ньылыны эн шедьты. Вераны кулэ на: калягаен йӧло шыдэ тупа котькыӵе кеньыр - йыды но, сезьы но, чабей но. Лым кольыр-кольыр медаз луы шуыса, вазен кеньырез трос ик ӧз тырылэ - шыдэз нурмыт карон понна гинэ. Сюмась нылпиослы индылӥзы: - Сие-сие, отын кеньырез вань ни. Кеньырез вань бере, сие-сие няньтэк, отын нянез но вань ни. Малы асьмеос сӥль вылэ сокем усемын? Ӝӧк вылад шашлыкед ӧвӧл ке, сиёнэд но ӧвӧл шуись шеде. Холодильникын колбаса быриз ке, кышномурт шиме: лек кайгу вуиз. Ай огшоры пӧзьтэм сӥлез но сиён чот уг каро. Огез пичи тэшкылике куное лыктыса абдраз: - Песянай, котлетэд но ӧвӧл шат? Нош кытын гуляшед? Меми, песянай асьмеды яратэмысь дугдӥз. Аслам нылпиосылы шуисько: - Пиналъёстэс песянай доры ваемдылэсь азьло визьнодалэ: соосты со яратэмысь ӧз дугды, гыдыкъёсызлы дася тазалыкез утись сиён-юон. Малы-о укыр курадӟиськом пӧртэм гижлоосын? Лекос трос белок ньылӥськом. Нош сиёнэз весь вошъяны кулэ. Сюкась Лыдӟом-а тӥледлы сюкась сярысь ода? Со малы-о вазен ӧз бырылы? Воргорон шуылоз вал: сюкась юи но - кӧты тыриз. Солэсь мар но дасяны уг луы? Сюкасе понылӥзы вуштэм сяртчы но кӧня ке гинэ сылал. Тазэ шыдэ мында уно пазьгыса, туссэ но быдтод, шӧмзэ но суралод. Кӧс вӧй кисьтылӥзы туж шыръяса, вылаз кӧня ке кизили гинэ мед уялоз-пиштоз. Вуштэм горд кушманэз малы-о, сюкасен сураса, сульыр сиылӥзы? Дышетскемзы ӧвӧл, клетчатка шуонэз ӧз кылылэ, нош мугорзы куре кӧтпушез сузяны. Сыӵе сиён (юон-а шуод) вань кырсез ас котыраз бинялтыса поттэ. Сюкасен сиёнэз кызьы-о кышноос туж ушъяллязы? Самой вылӥ дунъет таӵе вал: - Сюкасед тупыттэм удалтэм, ичимень, пичияк гуӵӵадэ уд сёты-а? Сюкась тупа губиен но. Сылалтэм губиез азьвыл, сиыса быдтылӥзы выль арозь. Отӥяз изъянмыны но шедёз. Нош куасьтэмзэ арбыт куто. Корало, пӧсь вуын небӟыто, сурало сюкасен но сугонэн. Бускель кышно веръя но чабкиське. - Ма, али но вань на шат куасьтэм губиед? Кыӵе бадӟым дан со кышномуртлы воргорон азьын! Сюкасе озьы ик тырыны луэ кубиста, пӧзьтэм мус, туем картошка. Нянь Вашкала дыръя трос юытэк но куно карон туж сӥё-дано вал. Сьӧрло ныпъеттэк ӧз ветлэ. Отчы одно интыяло салам, ӵемгес - нянь туриж. Ӵужнэнэ мыным индылоз вал: - Дӥе (дыдые), нылпи доры буш киын уг мыно. Ныпъетэ маке шедем уг поно. Сюрес вылын вамышъякуд, сиемед котькӧня мед потоз, турижзэ уд куры - уз сёты. Куноын та нянез интыяло мудор улысь ӝӧк вылэ, вӧсяло но соку гинэ нылпиослы люкыло. Кизён бере шуо: - Выль нянь но тазьы ик мед удалтоз. Аран бере сӥзё: - Инмарлэсь сётэм няньзэ огсямен сиыны мед кылдоз. Туннэ няньлы ёрмись ӧвӧл. Соин ик мон нылпиосылы келясько мукет салам - пызь, кеньыр, лапша - олокӧня пӧртэмзэ, килоен-кыкен. Колдыез сиид но быдтӥд, таоссэ далай тодазы возёзы. Кема возьмам кунолы мон пыжисько кекер. Ӝытазе ик дасяно йыды кеньырлэсь яке чабей кеньырлэсь йӧлын ӝук. Нап кароно - пуньы мед сылоз. Уй куспын со пачке. Тодкоды-а сыӵе кылэз? Уд? Чурыт луэ. Ӝукез ӵукна небӟытоно кӧня ке ыль курег пузэн. Ӧжыт гинэ пононо сылал но сакыр песок. Пыжон азьын табаез ӟырдатоно. отчы понэм одӥг пуньы ӝук пыш-ш! мед вазёз. Узырмон но ёрмон Улонмес али куӵо-коӵо шуиськом. Вашкала дырысен озьы. Вал ук тыршись узыръёс но азьтэм куанеръёс. Огезлэн йырыз весь висе: кыед поттоно, кидыс но му дасяно. Вераллязы: улыны малпась муртлэн кизёнэз киземын медло, кызьпу гуры сэраса усьытозь. Собере турнано, арано, кутсаськоно. Музъем бадӟым, пудо лачак, ужась киос уг окмо. Амалтэк медо утчано луэ. Кытысь? Азьтэмлэн кырӟанэз музон. Коркаез мунчо быдӟа - кема ик утялтоно ӧвӧл. Ӧвӧл бакчаез но, гидэз но, пудоез но. Нылпиез тачак. Солэн веранэз одӥг - ай: музъем кот ай, куазь кезьыт ай, лэсьтыны вуо ай. Зэм, сыӵе кузё но сютэм уз кулы. Кӧттыр шедьтоз ужаса ик, но - муртлы ужаса. Кудӥз-огез лушкаськыны шӧта. Мурт бакчаысь сугон капыртӥз - пушнерен ньӧралозы. Дуногес ваньбур кайпалтӥд - ӵыжалозы-мыжгалозы. Милям гуртамы лушкаськисез кырмизы но мешоке туйназы: - Сиемед потэ ке, ужа ми вылэ ик, сюдом. Нош муртлэсь котырзэ эн иса. Мискинь черекъя: - Таре уг лушкаськы ни! - Азьло но кыл сётъяд. Мешокез гурезь уллань питыртӥзы. Адями керпотыса гуртысь ик кошкиз. Судэз-прокурорез гуртын ӧз тодылэ. Палэнэ чагиськисез синазькыль карылӥзы. Туэ мар луэ? Пиёкед парсьлы сиён поныны ӧз дышы на - шашлык пыжыны пишмытэ ни. Семьяын со огназ бере, йӧлвыл пушкын кадь будэмын. Шуг-секытэз уг тоды. Куректонзэс но сюлмаськонзэс мумиз-бубиз уг шараяло, нуныклы ымаз ческыт сиён гинэ туйыны выро. Вылаз ик, азьвыл юн оскылӥзы государстволы. Со дышетоз но эмъялоз, сётоз уж, уждун, улон инты. Мумы-бубыез люкылӥзы пиналлэсь. Мӧйыос мед гинэ тыршозы. Нылпи улэ яслиын, садикын, школаын, лумбыт ужась группаын. Осконтэм ӧвӧл-а со: дышетскон ар быре но, данаксэ пиналъёсты куинь смена ӵоже возьылӥзы лагерьын. Гужемзэ, пе, ныпъет музэн медаз ошиське мӧйыослэн сильсьӧразы. Кызё арес дыръяз адями потэ котыр дуннее. Тодмоосыз воштӥсько. Нош юн пыкетэз ӧвӧл. Солы ваньмыз кӧшкемыт потэ. Пӧламы мур выжыяське информатика шуон. Радио, телевизор, компьютер - ваньмыз адямиез поромыто. Ас улонзэ сэрттыны-пертчыны пияшлэн яке нылашлэн визьмыз уг окмы ни. Куд-огезлэн йыраз каръяське ассэ быдтон сярысь малпан. Мон философ ӧвӧл, нялтас вераса, телевизор но уг возиськы, нош улонэз озьы валасько. Вазен мар вал? Кин ке ошиське ке, быдэс улосын верало ни кык-куинь ар ӵоже - мукетыз шимес учыр луытозь. Пинал мурт тае кылытэк уг кыль. Солы со - визьнод, мур малпаськытӥсь наука. Аслам нылпиосы трос бере, соос но мынам чисто сортировать каремын. Вань сюлмаськисьёсыз, шоро-куспоосыз, азьтэмъяськисьёсызгес. Картэным ми ог-огмылэн тыршись сяммылы синмаським. Огпол но озьы ӧй вал: пиналмес огез пыкылэ, мукетыз лӥятэ. Пазяськем малпанъёс Газетчиос монэным бӧтьырто-бӧтьырто но берло асьсэос кышкало: гожтыны быгатэ меда? Малы ке шуоно, мон мадисько улонлэн пӧртэм палъёсыз сярысь. Соосты одӥг гердэ биньыны секыт, вылды. Жадьытӥ-а? Йырдэс шутэтон понна верало на кӧня ке пазяськем дэмланъёсме. Висьытэк улэмед потэ ке, кубиста си. Сылалтэм кубиста ву макмырлы гинэ пайда уг сёты. Тазазэ эшшо тазатэ, малы ке шуоно, лыоссэ юнматэ. Ӵужкушман уте синъёсты. Уката ик юрттэ телевизорез яратӥсьёслы. Мылкыдэз юнматыны, сиён-юон сяна, зол юртто мукет макеос но. Ӵукна зарядка лэсьтыны моӵед уг сузьы ке, ымнырдэ гылты ӵаж-ӵаж кезьыт вуэн. Али мон малпаськисько книга гожтыны. Ним но шедьтӥ ни: "Кызьы шонер пересьмоно". Но курдасько. Кинлы ке яралоз-а? Кызьы печатлано? Кытын вӧлмытоно? Оглом вераса, егит муртлы но, мӧйыезлы но валаса сиськыны кулэ. Со но юрттоз шонер пересьмыны. Алексей Шкляев. Пичи Пурга ёросысь Курчум посёлок. Кияса палась иворъёс Тари ӝук сиёмы-а? Кемалась-кемалась асьме гурт калык уно гинэ тари кизе вылэм. Но берло дыре соин вырисьёсты пумитаны уг луы ни вал. Нош Кияса ёросысь "Рассвет" колхозын та культураез кыкетӥ арзэ ни будэто. Вӧзазы улӥсь бигеръёс гектарысьтыз 30-35 центнер кутсало, соин ик та хозяйствоысь но агрономъёс тари кизён борды кутскизы. Туэ соос 200 гектарлэсь уно тари будэтӥзы, котькуд гектарысьтыз быдэн 16 центнер кеньыр кутсазы. Озьыен, та дуно маке быдэс ёрослы тырмоз. Эн сётӥськы, Николай! "Киясовское" эштосысь Игрово фермаез Бесогонов кузпалъёстэк син азе ик пуктыны шуг. Гурт пичи, нош ужзы - фермаын гинэ. Татын куамын арлэсь кема ини скал кыско сузэр-апайёс Лилия Бесогонова но Липиада Емшанова. Мукет фермаосысь шер пумиталод скал кыскись агайёсты, нош татысь Николай Бесогонов дас ар пала ини та удысын. Огшоры дояр ӧвӧл - быдэс эштосъя - нырысетӥ радын. Ӵем гинэ Лилия кузпалзэ но вормылэ. Али Бесогоновъёс котькуд скалзылэсь быдэн 10 килограмм йӧл кыско. Та фермаын ик тыршо соослэн пиоссы, озьы ик - Л. Емшановалэн нылыз. Кинлэн ужан интыез шулдыргес? Берло дыре вунӥз вал ини, райцентрысь организациос но предприятиос ку тупатъязы, выльдӥзы ужан интыоссэс. Коньдон ласянь шуг ке но, ортчем арын но туэ трос гинэ тупатъян ужъёс мынӥзы. Миым тани копак выльдӥзы Киясаысь лесничестволэсь юртсэ, туэ та ужез быдэстӥзы ветстанциын ужасьёс. Гужем ӵоже озьы ик выльдӥзы, чебермазы юртъёссэс почтаын, газетлэн редакцияз, милициын ужасьёс, кидыс дасян станциын, райбольницалэн калыкез эмъян юртаз, художниклэн-баталистлэн П. А. Кривоноговлэн музеяз, аптекаын но мукет юртъёсын тыршисьёс. Али выльдӥськон ужъёс мыно казначействолэн юртаз, роноын, ёрос администрациын. Утчаськод, сюлмаськиськод ке, луэ вылэм та вакытэ но маке но лэсьтыны. Сорослэн юрттэмезъя Ёрос библиотека кыкетӥзэ ини басьтӥз тодмо ужбергатӥсьлэн Джордж Сорослэн фондысьтыз книгаос. Туэ тулыс но тани библиотекаын ужасьёслы кыӵе шумпотон вал выль книгаос басьтон нуналэ!.. Зарни, азвесь, малахит книгаос-выжыкылъёс, искусствоя, Россия Федерацилэн законъёсын кодексъёсыныз куинь том но мукет изданиос. Та книгаос дуно сыло, соин ик лыдӟисьёс понна кӧня ке дун тупатэмын. Сорослэн юрттэтэзлы тужгес но шумпотӥзы калыкез дышетон, эмъян удысын ужасьёс. Семьяын - кык бригадир но ньыль председатель Ильдибаево черкогуртысь Микешкинъёслэн семьяязы - кык бригадир, кык кивалтӥсь. Кузёез, Александр Григорьевич, кивалтэ селоысь бригадаен, кузпалыз Любовь Александровна - Мало-Киясово бригадаен. Азьвылгес со вузкарон удысын ужаз вал, али - кивалтонын. Оскоды-а, уд-а, нош ӵемгес умойгес ужа кышномуртлэн кивалтоно коллективез. Татын Суворов колхозъя нырысь ик йылпумъязы аран удыссэс, нош ильдибайёс устогес нуо кын улэ гыронзэс. Вералом на одӥг семья сярысь. Война вакытэ Кумырса гуртын председатель луыса ужаз Алексей Ижболдин, нош со оже кошкем бере, председатель луыса ужазы солэн кык пиез но нылыз. Соос пӧлысь тужгес но кема но азинлыко тыршиз та удысын Г. А. Ижболдин, Киясаысь "Дружба" колхозлэн тӧроез (али - "Киясовское" эштос). Ожмаськонысь вуэм мурт пусъемын вал на уно орденэн но медален. Али со асьме пӧлын ӧвӧл ини ке но, гурт калык ялан тодаз вае на Григорий Алексеевич кивалтон вакытэз. Вож толэзен юрт Бигер Тавзямалысь адямиос асьсэ кужымен кутскизы мечеть лэсьтон борды. Бугро но ӵупизы, нюлэс но шедьтӥзы, басьтӥзы ини кортӵог но куж, сыномисьтэм корт. Соиз гинэ жаль: кирпичлы коньдонзы ӧзгес тырмы. Туэ, Сабантуй дыръя, 7 сюрс манетлэсь уно коньдон люказы: кин ке сётӥз 2 сюрс, кин ке - 10 манет. Котькудӥз - быгатэмезъя. Табере тавзямал бигеръёс оско: вуоно Сабантуй дыръя уногес коньдон люкано: угось мечеть лэсьтон ӝегалоз. Соиз но вань - кин но со вуоно мечетьлэсь я пулзэ, я корзэ курытэз понна вузаны вуиллям ини. ... Витьтонэтӥ аръёсы татын вылэм ини вож толэзен юртсы-мечетьсы. Али отчы пырыны кышкыт: угось аръёс ӵоже со куашканы, сисьмыны кутскиз. Ёросын кык бигер гурт. Огаз луоз ас вӧсяськон юртсы. Нош Данилово ӟуч гуртын вань вашкала черксы. Отын но выльдон ужъёс мынӥзы. Озьы ке но, сюлмаськонзы трос ай. Геннадий Парфёнов, Кияса ёрос газетын ужась. Туймазы городысь адӟытонын Туймазы город - Башкортостан Республикалэн одӥгез ёрос центрез - маиныз ке но туж кельше асьмелэн Глазов городмылы. Бадӟым ик ӧвӧл, чылкыт, шыпыт. Та город тужгес но тодмо луэ акциосын "Туймазинский завод автобетоновозов" огазеяськонэн. Солэсь продукцизэ, Россиын сяна, тросэн басьто Восточной Европаын, Азиын но Ближний Востокын. Заводын озьы ик потто вылӥ ӟечлыкен культиваторъёс, ю тысь но пудо сиён октон машинаос. Ӵапак та техникаен адӟытон усьтэмын вал Туймазы городлэн шор площадяз. Куноос синмаськыса учкизы Башкортостанын но Татарстанын лэсьтэм вертолётъёс но дельтапланъёс шоры. Но та республикаосын но ваньмыз огсыр гинэ ӧвӧл. Котькытын сямен ик шугъясько воштос ёзъёслы, куашкан калэ вуэмын гурт техникаез возён паркъёссы. Соин ик тыршо ас кужыменызы секыт югдурысь потыны, асьсэлэсь производствозэс юнматыны, пӧртэм амалъёсын кыскыны басяськисьёсты. Та республикаосын лэсьтэм гурт техникалы луыса ик, Башкортостан туэ 1 миллион 100 сюрс тонна ю тысь люказ. Вылӥ урожай басьтыны озьы ик юрттэ му вӧй поттӥсь промышленность. Удмуртия адӟытонэ нуллӥз Ижысь механикая заводын поттэм арбериослы упаковкаос лэсьтӥсь оборудованиез но Глазовысь заводъёслэсь продукцизэс. Соослы вылӥ дунъет сётэмын. Пусйымон соиз но, таӵе продукция нокытын уг лэсьто на. Туймазы городын радъям адӟытонэз усьтӥз Башкортостанлэн Президентэз Муртаза Рахимов. Ӧтем куноос пӧлын вал Россиысь Правительстволэн Тӧроезлэн воштӥсез, гурт удысъя но сиён-юонъя министр Алексей Гордеев, Татарстанлэн Президентэз Минтимер Шаймиев, Удмуртиысь Кун Кенешлэн Тӧроез Александр Волков. Адӟытон туж умой возьматӥз: улосвылъёс ас кужыменызы быгато асьсэлы но быдэс страналы вылӥ ӟечлыкен гурт техника поттыны. Кулэлыкез ӧвӧл сое кунгож сьӧрысь уно сюрс долларъёсын басьяны. Удмурт Республикаысь Кун Кенешлэн пресс-службаез. Сьӧрлось вузъёсы но сюрес усьтэмын Ижысь Калык куспо восточно-европейской университет матысь кусыпъёс возе дуннеысь тросэныз тодмо вузъёсын. Уго кунгож сьӧрысь предприятиосын валче ужан кулэ каре вылӥ тодон-валанъёсын специалистъёсты. Асьмелэн егитъёсмы тужгес но бадӟым мылкыдын дышетско Америкаысь университетъёсын. Отын басьтэм тодон-валанъёссы юртто бизнес удысын устоесь азинсконъёс басьтыны. Нош Чехословакиысь одӥгаз тужгес но тодмо университетын луэ чик дун тырытэк дышетскыны. Пырыку экзаменъёсты гинэ ӟеч сётоно. Дышетскон вакытэ студентъёс армие мынонлэсь но мозмытско. Е.НИКОЛАЕВА. Зарни медален пусъемын Ижевскысь механикая заводлэн генеральной директорезлы Василий Чугуевскийлы "Австралиана Дискавери Маркет" калык куспо ассоциациысь ӟеч ивор вуиз. Экспертъёслэн ортчытэм эскеронъёссы бере, завод пусъемын "2000-тӥ арын устоез предприятие" пусэн но пыртэмын та ассоциацилэн радъёсаз. Быгатыса кивалтэмез понна Василий Сергеевичлы сётэмын зарни медаль но "Бизнес- лидер 2000" диплом. Н.ЛЯЛИН. Ужын вылӥ вормонъёссы понна Удмурт Республикаысь Правительстволэсь премиоссэ сётон сярысь Удмурт Республикаысь Правительстволэн постановлениез Правительствоысь Премиосъя кенешлэсь ужын вылӥ азинсконъёс басьтэмъёслы премиос сётон пумысен дэмланзэ лыдэ басьтыса, Удмурт Республикаысь Правительство пуктэ: 1. Ужын вылӥ вормонъёссы понна Удмурт Республикаысь Правительстволэсь премиоссэ сётоно: Удмурт Республикалэн географиезъя учебно-методической комплексысь авторъёслэн коллективзылы (Н. Т. Козлова, И. И. Рысин, В. М. Успенская, М. Ф. Кузнецов, Э. М. Русских, А. Г. Илларионов, А. К. Осипов, М. М. Кибардин); Удмурт Республикаысь Культурая министерстволэн симфонической оркестрезлэн коллективезлы, калык пӧлы культураез паськыт вӧлмытэмзы но берло аръёсы кылдытэм концерт программаоссы понна; акциосын "Завод бытовой техники" огазеяськонысь коллективлы (З. К. Газизулин, В. А. Шустов, Л. Я. Айзенберг, А. Л. Проводников, И. В. Горелкин, В. П. Филонов, В. А. Пилин, В. Г. Сосунов, А. В. Лубков, Л. М. Власова, Е. А. Лазарева), странаын потӥсь вань пумо машинаослы фара ёзъёс тросэн лэсьтонэз радъямзы понна. акциосын "Свет" огазеяськонысь коллективлы, вылӥ азинлыкен ужамзы понна. 2. Коньдон ужпумъёсъя министерство республикалэн бюджетысьтыз премиослы висъяны кулэ 26720 манет но дипломъёс басьтыны - 800 манет коньдон. Удмурт Республикаысь Правительстволэн тӧроезлэн нырысетӥ воштӥсез Ю. С. Питкевич. Ижевск город, 2000-тӥ арын 20-тӥ октябре � 1006. Гажано Удмурт Республикаын улӥсьёс! Вазиськисько тӥледлы Удмурт Республикалы президент быръён дыръя мыным дурбасьтэмды но монэ Удмуртиын вылӥ кун постэ быръемен валче ӟечкыланъёсты но ӟечсэ сӥзёнъёсты понна сюлмысь тау карон кылъёсын. 80 ар тырмонзэ пусйыса, асьмелэн республикамы вамыштэ аслэсьтыз кунлыксэ азинтон выль вакытаз. Удмуртилы нырысетӥ президент быръёнэ пыриськемъёс пӧлысь тросэзлэсь бырйисьёслэсь мыным дурбасьтэмзэс лыдъясько, соос промышленностьын но гурт хозяйствоын ваньбур поттонэз ӝутон, тазалыкез утён, калыкез дышетон, культура но калыкез улон-вылонын утён удысъёсысь ужпумъёсты быдэсъян ласянь берло аръёсы нуиськись политикаен соглаш луо шуыса. Туж шумпотӥсько, тросэзлэн бырйисьёслэн "Удмуртилэн азинсконэз" программаез дасянэ мылысь-кыдысь пыриськемзылы. Та программаын пусъем валтӥсез ужпум шаерысьтымы вань улӥсьёслэсь кужымзэс но быгатонлыксэс республикамылэсь но котькуд адямилэсь улон-вылонзэс умоятон понна чырмыт уже огазеян. Удмуртиысь трос национальностьем калыклэн мур визьмыз яркыт адӟиське тупаса улонэз утьыны, керӟегъяськонъёстэк, огсыр, ог-огеныд тупаса улыны но ужын ӟеч сямъёсты ялан йылэтыны тыршемез бордысь. Ӵапак со ик Россия Федерациысь калыкъёслэн вынлыко семъяязы кун улосвыл луись Удмурт Республикалэсь данзэ уката ӝутыны оскымон инъет луэ. Нырысетӥ Президентлы оскем ужлэсь быдӟалазэ валаса, вань бырйисьёсты, Удмуртиысь вань улӥсьёсты оскытӥсько, вань кужымме, тодон-валанъёсме но опытме мыным оскемдэс улонэ пыӵатонэ куто шуыса. Вылӥ кун постын ваньзэ лэсьтыны тыршо Удмуртимылэсь улон-вылонзэ умоятон но шулдыртон понна. Тазалык, ваньзэ ӟечсэ но шудбур тӥледлы! Гажаса Александр Волков. Футбол Келяз Нырысетӥ дивизионын шудӥсь "Газовик" берло пумиськонъёсаз "висисьёссэ" паймытэ... мылкыдтэк шудэменыз. Огласянь соиз валамон но кадь - вылӥегес ӝутскыны луонлыкъёссэ ыштӥз, сокем улӥе но уз палды ни. Командаен кивалтӥсьёс вуоно ар сярысь сюлмасько ни, соин ик ӟырдыт нюръяськонъёсын ежалэс пиосты но эскеро. Берло кык пумиськонын "Газовик" ас дораз 1 очко гинэ басьтӥз. Томскысь футболистъёслы асьме пиос 1:2 лыдын келязы, нош Москваысь "Торпедо-Зил" командаен шудон нокин вормытэк, 1:1 лыдын, йылпумъяськиз. Сочиысь но мӧзмыт ивор вуиз. "Газовик" татысь "Жемчужиналы" 2:3 лыдын келяз. Туннэ асьме команда нюръяськоз Нальчикысь "Спартакен". М. Кузьмин. Удмурт Республикалэсь 2000-тӥ ар понна Кун премиоссэ сётон сярысь Удмурт Республикаысь Кун Кенешлэн Тӧроезлэн ПОСТАНОВЛЕНИЕЗ Наука но техника удысъя 2000-тӥ арлы Кун премиез сётоно акциосын "Проектный институт "Удмуртгражданпроект" огазеяськонысь коллективлы, Камбарка городэз выльдонъя проект бордын тыршемзы понна. Отчы пыро: 1. Шахов Иван Владимирович - акциосын "Проектный институт "Удмуртгражданпроект" огазеяськонлэн директорез. 2. Лопаткин Игорь Георгиевич - акциосын "Проектный институт "Удмуртгражданпроект" огазеяськонысь валтӥсь инженер. 3. Першаков Владимир Сергеевич - акциосын "Проектный институт "Удмуртгражданпроект" огазеяськонысь проектъя валтӥсь архитектор. 4. Зарипов Шамиль Закирович - акциосын "Проектный институт "Удмуртгражданпроект" огазеяськонысь валтӥсь архитектор. 5. Ильминских Николай Геннадьевич - профессор, биология наукаосъя доктор, экологияя вылӥ колледжлэн директорез, Удмурт кун университетысь экологияя кафедраен кивалтӥсь. 6. Романов Александр Алексеевич - Камбарка ёрос администрацилэн тӧроез, Удмурт Республикаысь дано лэсьтӥськись. 7. Казанцева Ирина Алексеевна - акциосын "Проектный институт "Удмуртгражданпроект" огазеяськонысь инженер. 8. Ходырева Ирина Петровна - акциосын "Проектный институт "Удмуртгражданпроект" огазеяськонысь валтӥсь архитектор. 9. Шарикова Светлана Сергеевна - акциосын "Проектный институт "Удмуртгражданпроект" огазеяськонысь инженер-дендролог. 10. Герасимова Галина Владимировна - акциосын "Проектный институт "Удмуртгражданпроект" огазеяськонысь инженер-программист. Литература но искусство удысъя 2000-тӥ арлы Кун премиез сётоно "Эш-Тэрек", "Кикы нош силе но силе..." пьесаос кылдытэмез понна Загребин Егор Егоровичлы - драматурглы, Удмурт Республикаысь Писательёслэн огазеяськонзылэн тӧроезлы, Россия Федерациысь Писательёслэн огазеяськоназы быръем муртлы. Удмурт Республикаысь Кун Кенешлэн Тӧроез А.А.Волков. Ижевск город, 2000-тӥ арын 24-тӥ октябре. � 598-ИИ Дарт Кузьма аслыд улон! Котькуд адямилэн улонэз, вазь-а, бер-а, кулонэн йылпумъяське. Жаль, куд-огез сое ачиз матэктытэ. Сыӵеос пӧлы пыртысал мон наркоманъёсты. Берло аръёссэ наркомания улонмылы бадӟым кышкытлык кылдытэ. Али шаерамы ВИЧ-инфекциез нуллӥсьёс но СПИД-эн висисьёс 250-лэсь ятыр ке, соос пӧлысь 91-ез - наркоманъёс. Ваньзы ик 30 аресозь егитъёс. Наркомания паськыт вӧлме студентъёс, дышетскисьёс пӧлын. Соин ик паймисез ӧвӧл ни туалетъёсын костаськись буш шприцъёслы. Статистика ивортэмъя, берло 10 ар ӵоже наркотикъёсын йырин улонысь кошкемъёслэн лыдзы 12 поллы йылӥз, соос пӧлын нылпиос быризы 42 поллы тросгес. Ватонэз ӧвӧл, али наркоманъёс вань ни гуртъёсын но. Усыкмытӥсь суретъёсты вузасьёс асьсэлы барыш поттон понна нокинэ уг жаляло. Пичи бинетэн ӵош соос кулон вузало. Тӥни ку егит муртлы юн сямо луоно, пыкет сётыны быгатоно. О. Никитина, Удмурт университетын дышетскись. ДАРТ ЧЕБЕРИНА Йырсиосме лӧсъяло, ваньдэс-ваньдэс гочато. Зэмзэ но гочалод, озьы-а? Таӵе чебер йырсиез Пичи Пурга ёросысь Ильинск черкогуртысь Людмила Николаевалэн. - Конкурс ялэмды бере ик анаймы туспуктэмме лэзьыны косӥз вал. Малы ке но ӧй ысты. Мурт адямиос но лӧпкытъям бере лэзёно кариськи. Йырсиелэсь кузьдалазэ ноку мертаме ӧвӧл, но сьӧлтаны быгато, - гожтэм Людмила. Дарт Комсомоллы-82 Луозы на-а зэмос комсомолецъёс? Алигес телевидение пыр возьматӥзы, кызьы Москваысь выль комсомолецъёс асьсэлэн съездазы люкасько. Чильк-вальк "Мерседесъёсын" но "Вольвоосын" уй пеймытэз сылмытыса вуо соос люкаськон интыязы. Дикторлэн верамезъя, соос, пе, асьсэос но рос-прос уг тодо на ма сярысь вераськозы. Тодмо огез гинэ - кызьы вузкаронысь тросгес барыш поттоно. Та выль комсомолецъёс, пе, мӧляязы Ленинлэн тусбуеныз сыӵе ик горд значок нулло. Уксёез пумтэм яратӥсь ужбергатӥсьёс асьсэдыс комсомолецъёс шуыса зэмос комсомолэз серем уг каро-а? Бодьялась одӥгез тодмое, телевизорысь вылӥ верам учырез-а, мар-а тодаз вайыса монэ "куртчынылы" шӧтаз: - Тон школаын но, армиын но, районын ялан егитъёсты дышетӥд, комсомолын ужад, нош малы-о со тонэ ӧз узырмыты? Монэ огазеяськонысьтыды куштытӥд ке, ӵок: ачим янгыш. Но мынам машинае но выль, мотоциклэ но вань. Нош тынад? Учкы ай, выль комсомолецъёс кыӵеесь - машинаоссы синэз мальдыто. Мынам солы кӧты туж ӝож луиз. Малы, дыр ортчыса, асьмеос ӟечсэ дунъяны ум валаське ни? Ӧжыт-а ӟеч уж лэсьтӥз комсомол? 70-тӥ аръёсы районысьтымы егитъёслэсь гинэ ӟеч ужъёссэс вераса уд быдты. Тани "Выль улон" колхозысь скал кыскись комсомолка Раиса Завалина вазиськиз, араз скаллэсь быдэн кык сюрс килограмм йӧл кыскыны ӧтьыса. Соку та лыдпус бадӟым лыдъяськылӥз. Завалина сётэм кылзэ быдэстӥз, ӵошатсконэ пыриськизы районысь вань фермаос. Нош комсомолкаос Надя Злобина но Зоя Широбокова котькуд мумы парсьлэсь 12-15 парсьпи басьтыны, пудо сярысь ӟечгес сюлмаськыны ӧтизы. Таиз но вазиськон быдэс районэ вӧлмиз - со аре ик парсь вордон фермаос синмаськымон азинсконъёс басьтӥзы. Малы бен мон та сярысь али верасько? Туала пиналъёс чик уг тодо ни историез, анай-атайёссылэсь улэм сюрессэз. Но мон оскисько, комсомол выльысь улӟоз шуыса. Одӥг-ог газетъёсысь но лыдӟылыны луэ ни ӟырдыт егитъёслэн огазеяськонъёссы сярысь. Мед кыскысалзы соос сьӧразы мукетъёссэ но, мед дышетысалзы умой ужъёслы гинэ. Соку, оло, ӧжытгес луысалзы йыртэманъёс, юон, наркомания. Мон паймисько на тани малы: куд-ог гуртъёсын, пе, клубъёс эстӥськытэк сыло, вӧлдэтъёссы вияло. Но кин отчы пу вайыны кулэ, сьӧрлось дядяй-а, мар-а? Асьсэлы егитъёслы клуб ке кулэ, уг быгато-а соос, ӵош кариськыса, липет тупатъяны, кӧня ке пу дасяны. Быгато, мылзы уг поты, коньдон возьмало. Ми егит дыръя номыр ӧм возьмаллялэ, дунтэк субботникъёсы потамы. Эшшо одӥг учырез вератэк кельтэме уг луы. Куать ар ортчиз ни Бодьялась тымет кыриськем бере. Нокин но сое тымон борды уг басьтӥськы: коньдон, пе, ӧвӧл. Паймод! 1956-тӥ арын райцентрысь но котыр гуртъёсысь кык сю комсомолецъёс ас кужыменызы ӵыпет юнматӥзы: ведраосын, носилкаосын из кӧльы, горд сюй нуллӥзы. Быгатӥзы ук! Нош али пруд бервылын пипу нюлэс будыны ӧдъя ни. Бакаос кваккетыса пуко. Е. Николаев. Селычка гурт, Якшур-Бодья ёрос. ДАРТ Лулӟылон (яке малы Лена Тюбина Алексей Ложкин вылэ толязяз 500 манет быдтэ) Черк книгаос аслыд кумир возьыны уг лэзё ке но, улонын сотэк уг луы. Азьвыл йыбыртъязы Ленинлы, Чапаевлы, Гагаринлы. Зэм, али малы ке но геройёслы уг йыбыртто ни, азьпал радэ потӥзы киноысь актёръёс, кырӟасьёс. Егитъёс визьзэс ыштытозь синмасько соослы: лулӟыло, йыбыртъяло, бӧрдо. Туспуктэмъёссэс, кассетаоссэс люкало, тусбуенызы дӥськут басьто. Бӧрысьгес ог-огзы шоры учкыса валало: ми трос. Ма кароно? Огазеяськоно - фанклуб кылдытоно. Та сям асьме удмурт масскультурае но вуиз. Али тужгес трос лулӟылӥсьёсыз Алексей Ложкинлэн. Эсьмаса, удмурт эстрадае потэмез бере ар но ӧз ортчы, йыбыртъясьёсыз фанклуб кылдытӥзы ни. Кичӧлтӥсез - егит нылаш Лена Тюбина. Солэсь ик мон юалляськи та огазеяськон сярысь. - Малы кулэ фанклуб, кызьы со кылдӥз? - Малы кулэ? Ӧйтӧд. Ӵошен капчигес ук. Мон радио пыр ялон сётӥ, фанклуб кылдытӥсько шуыса. Вазиськисьёс луизы. Озьы огазеяським. 15 кузя люкаським. Табере ӵош Ложкин понна "висиськом", солэсь творчествозэ данъяськом. - Пиосты но вань шуыса кылылӥ. - Вал но кошкизы. Ӧз кельшы-а, мар-а. - Фанаткаостылэн арлыдзы? - 18 арес но ӧвӧл ай. - Городысь-а? - Огез гинэ. Мукетъёсыз пӧртэм гуртъёсысь, али Ижын дышетско. - Мар бен кариськоды клубады? - Пукиськом, лулӟылӥськом (серекъя). Нырысь Алёша сярысь книга поттыны малпаськом вал. Но кужыммы тырмиз альбом лэсьтыны гинэ. Али малпаськом тусбуеныз футболкаос вуртытыны. - Тон сое яратӥськод, дыр? - Конечно. - Кемалась-а? - Нырысьсэ адӟеме дырысен. Школаын дышетскыкум ай Селта ёросэ Удмурт театр "Эмеспиос" спектаклен ветлӥз. Син шорам соку ик йӧтӥз Ложкин. - Маиныз бен сокем кельшиз? - Чебереныз. - Быгатысал ке, йырзэ берыктысал-а? - Со сярысь ӧй малпаськылы. - Эн алдаськы. - Ну вал, дыр, лулӟылон-бӧрдон вакытъёсы, но али улон шоры сазь учкисько - сузёнтэмзэ уд сузьы. Ачим но, малпанъёсы но быдэ вуо. Соин ик али творчествоезлы йыбыртъясько. - Кырӟамез-а, спектакльёсын шудэмез-а кельшегес? - Сюлэмъягес театрын ужамез. - Тон солэн котькуд спектакляз ветлӥськод, дыр. - Одно ик. Театрысь вахтёръёс монэ тодмало ни, лыктэмелы быдэ пышкыло: нош-а, пе, Ложкинэдлы сяська ваиськод. - Котьку сяськаен ветлӥськод-а? - О-о. - Иське, зэм, тон толэзяз Ложкин вылэ 500 манет быдтӥськод шуыса? - Хм, кин тыныд озьы вераз? Зэмзэ ке, луэ но, дыр. - Секыт ӧвӧл-а палдурес яратыны? - Секыт, вань малпанъёс уго Соин герӟаськемын: ку Сое адӟод, ку кылод? Фанатизм - со висён. Мон "висисько" Ложкинэн, но асме шудтэмен уг лыдъяськы. П.С. Алексей Ложкин но "Венец" группа ноябрьлэн пумаз творчествозылы сӥзем ӝыт ортчытыны чаклало. Леналэн фанклубысьтыз нылъёс татчы Ложкинлэн тусбуеныз дӥсьёсын лыктыны малпало. А.Клементьев. Мынозы Йошкар-Олае Пичи Пурга ёросысь Брангуртын улӥсьёс кылем пятницае ӵош пусйизы Удмурт кунлы 80 ар тырмонэз но Гуртын тыршисьёслэсь нуналзэс. Культура юртазы лачак калык люкаськылӥз, ӝытсэс дун басьтыса ке но ортчытӥзы. Ватсаса трос пуконъёс пыртытэк ӧйлась. Нырысь ик данъязы бусыосын но фермаосын тыршисьёсты - азьмынӥсьёсты. Соослы грамотаос, сюлмысь ӟечкыланъёс сётӥзы. Дано праздникъёсын гуртооссэ ӟечкылаз кивалтӥсьсы-тӧрозы А. Н. Титов. Собере возьматэмын вал жин-жин концерт. Тямыстон ёрос артистъёс ас быгатэмзэс возьматӥзы отын. Соос пӧлын вал нылпи садэ ветлӥсь тэшкылиос но, школаын дышетскисьёс но, шоро-куспо арлыдоос но, мӧйыослэн "Даур" ансамблязы кырӟасьёс но. Туж шулдыр шудо, кылсярысь, Н. Зарбатовлэн крезьчиосызлэн ансамблязы ветлӥсьёс. Учкисьёслы яразы "Возьвыл сяськаос", удмурт но Латыш Америкаысь калыкъёслэн эктонъёссы, серемес, ӵушкась "Куно" сценка. Умой татын вокально-инструментальной ансамбльзы. Зэм, та ӝытэ тросгес ӟырдыт кылбуръёс но мултэс ӧй луысалзы, вылды. Нимаз- нимаз кырӟасьёслэн но куараоссы берло дыре шӧдскымон юнмаллям-воляллям. Культура юртлэн кивалтӥсез О. Туктарева та нуналъёслы артистъёсты умой дасяны быгатэм. Солэсь сюлмаськемзэ кызьы ке но пусъёзы ай, вылды. Нош тужгес шумпотоно тани малы: Брангурт школаын дышетскисьёс 4-тӥ ноябре мынозы Йошкар-Олае, финн-угор калыкъёслэн фестивалязы. Отын соос возьматозы асьсэлэсь бадӟым ужзэс. Нылпиос дасяллям Флор Васильевлэн кылбуръёсызъя ӝыт. Нимаське со "Улон биньгозы". Мар шуод, Брангурт калык ас улонэзлэсь биньгозызэ кияз юн возе ужын но, шутэтсконын-шулдыръяськонын но! К. Ломагин. ДАРТ Утча-а дан Катков? Тани со - Александр Катков - "Вылӥ электрокужым" группаысь солист. Удмурт эстрадае пыриз кык ар талэсь азьвыл. Интервью сётыны Саша мырдэм дыр шедьтӥз. Сыӵе со "крутой" - ӵукна Культурая училищеын дышетске, ӝыт "Ошмес" кафеын куронъёсъя кырӟан быдэсъя. Асьмеос сое тодӥськом, "Вылӥ электрокужым" группаын кырӟамезъя. Но ваньмыз радызъя. - Эстрадае сюресэд? - Кырӟасько пичи дырысеным. Семьяенымы пӧртэм концертъёсы пыриськылӥм. Крезьгуро школае ветлӥ, но ӧй йылпумъя. Одӥг концертын кырӟаме бере "Зеркало" студиысь продюссер Александр Козырев дорам лыктӥз но дораз ужаны ӧтиз. Мон соку ик соглаш луи. - Группалэн нимыз пумысен вера вал. - Шаерамы эстрада ансамбльёс пӧлын выль шӧмоез, туала улонэн герӟаськемез ӧй вал на. Нош ми - егитэсь, кужмоесь. Озьы тӥни "Вылӥ электрокужым" ним потӥз. - Люба Быкова концертъёсын "220 вольт" группа шуыны шедьтылэ. - 220 ӧжыт, 1000 вольт. - Вань-а кумиред? - Мынам аслам тусы-буйы. Асме ачим лэсьтӥсько. - Кин кырӟанъёсыдлы кылбур гожъя? - Азьло потэм кырӟанъёсылэсь кылъёссэ Алексей Ельцов гожтӥз вал. Берло арзэ Фёдор Суворовен кусып тупатӥм. Али выль кылбурзэ сётӥз, но ачим ӧй на адӟы. Солэн кылбуръёсыз туала поп-крезьгур вылэ умой выдо. - "Вылӥ напряжение" плагиат ӧвӧл-а? - Вань кырӟанъёсмылы аранжировка лэсьтэ Сан Саныч Козырев. - Кӧня тынад кырӟанэд ни? - Али - тямыс. Ваньмыз сямен шудо но шудтэм яратон сярысь. - Катковлэн кырӟанъёсыз - со улонэзлэн синучконэз? - Вань маиз ке но. Тужгес ик нырысетӥез кырӟанэ. Лыдӟиськод тани кылбурез, тодад ваиськод улонысьтыд тупась учырез. Со кылбур тыныд матын луэ. Со пыр ик ӧръяськод ини аслэсьтыд но мылкыддэ. - Кырӟамтэ кырӟанэд? - Азьпалан ай. - Вераськиськод-а удмурт сямен? - Пичи дырысеным мон сое кылӥсько, валасько, но вераськыны уг быгатӥськы. Каллен дышетӥсько, но секытэн сётӥське. - Удмурт кырӟанъёс пумысен матысь эшъёсыдлэн мылкыдзы? - Эшъёсы умой пумитазы. Мон понна шумпото но возьмало ӟучъёссэ но кырӟамме. - Вань-а ни Катковлэн удмурт эстрадаын интыез? - Будэто на. - Яратон сярысь малпанъёсыд. - Зэмос яратон нырысь адӟыку ик кенже. Мукетыз яратон дунне вылын ӧвӧл ни. - Кызьы учкиськод узырлык шоры? - Узырлык - со лулчеберлык, яратон, крезьгур, адямилык. Нош коньдон - со лыктэ но, кошке но. - Александр Катков - дан утчась-а? - Адямиослэсь висъяськеме уг поты, но пӧлазы пурысь шыр сямен ышеме но уг поты. Улон - со усто маке. Котькуд минуттэ дунъяно, уже кутоно. - Трос-а фанатъёсыд? - Сцена вылэ шер потасько. Люба Быковаен одӥг студиын ужаськом бере, солэн берло концертъёсаз пыриськылӥ, "Мылысь-кыдысь" передачалэн ӝытъёсаз но "Егит тулкым" шоу-ӝытын кырӟалляй. - Оскиськод-а гороскопъёслы? - Оскисько но, уг но. Вордскем пусэя мон - Эгызоос. - Азьланезлы малпанъёсыд? - Группамес будэтыны малпаськом. Костюмъёс бордын нимысьтыз ужано вылэм. Коньдон луысал ке, клип дасясал. Репертуарам ӧвӧл на "медляке", со сярысь малпаськоно. - Куке адӟыны луоз ик-а Катковлэсь альбомзэ? - Чидан - зарни. Выль арлы поттыны тыршом. - Лулӟылӥсьёсыдлы кӧня ке кыл. - Мусо нылашъёс, мон ваньдэсты яратӥсько, но гожтэт ысъяны дыр уг тырмы. Ветлэ концертъёсам, мон мылкыддэс ӝутыны тыршо. А.КЛЕМЕНТЬЕВ. Дарт Ушъя астэ англи кылын Удмурт университетлэн нырысетӥ общежитияз мукет кунъёсысь но студентъёс уло. Ачим та дырозь тодматскыны ӧй дӥсьтылы, но учыр тупаз ик. Вӧзамы улӥсь Володя Гоголевлэсь нянь пунэманы потӥ. Со дорын ӵапак кык индусъёс пуко вылэм. Валамон, удмурт кылэз соос уг валало, ӟученыз мырдэм кык-куинь кылэз герӟало. - Кызьы бен тон соосын вераськиськод? - юасько Вовалэсь. - Англи кылын, - нокыӵе кариськытэк вераз со пумитам. - Мда, полиглот тон милям, иське. - Мон бен англи кылэз ӟеч уг тодӥськы, но чыры-пыры йӧндырисько - озьы мыгыль- могыль иностранецъёсын вераськемъяськи ик. Табере рос-прос дышетыны кутскытэк уз луы. Оло, кунгож сьӧры бызьыны шуд усёз. С. Калугина, Удмурт университетын дышетскись. Ю-нянен тырмизы кеносъёс... Быдэс бусы чалмытскемын - Ужез быриз. Зарни ю тысьёсын со Кеносъёсы пыриз. Ф. Васильев. Арлэн кысык вакытэз ортчиз. Музъем ужась понна но вуизы гань-гань шутэтскон нуналъёс. Бушам бусыосын артэ туннэ вож-вож пильыса узьым - вуоно няньлэн инъетэз, пумен паськыта кын улэ быг-быг гырем му. Таӵе суред сюлэме йӧтэ, крестьян калыклы музъемозь ик йыбырттэм потэ. Нош усьтэ ай кенос ӧсъёсты, гадь тыр шокче выль юэн напчем омырез, учке жильк-жильк тысен тырмытэм сюсекъёсты. Со-а шуд, шумпотон ӧвӧл тулысысен сӥзьылозь, вазь ӵукнаысен бер ӝытозь тыршемед понна? Котьма шоры учкытэк, вань на ай асьмелэн данъяськымон хозяйствоосмы, ушъяськымон председательёсмы, агрономъёсмы, механизаторъёсмы, ужаны быгатӥсь калыкмы. Соос сюлмаськемен будэтэмын ю тысь, шаермес сюдыны тырмыт кисьтэмын ӟег, сьӧдчабей, йыды но кӧжы. Пусйыны кулэ Яр, Алнаш, Балезино, Можга, Сарапул, Ува районъёсты. Нянь вузанъя сётэм кылзэс соос дыраз быдэстӥзы. Ю-нянез утялтон ноку но капчиен уг сётскы, уката ик берло аръёссэ. Солэн мугез - вужмем, кема ужаса куажгам техника. Малы ке-а ог миллион центнер ю тысьмы бусыосы кисьтӥськыса кылиз, кыедлы пӧрмиз. Нош кызьы та югдурысь пото, государствоен сётэм заданиез быдэсто республикаысь хлебоприёмной предприятиос? Оскыса-а ваё татчы будэтэм урожайзэс колхозъёс но эштосъёс? Та юан ик вуттӥз милемды Уваысь ю тысь басьтонъя предприятие. Соин кивалтэ Надежда Федоровна Лущикова. - Ми ужаськом Ува, Вавож, Селта, Сюмси районъёсын. Туэ арлы 4 сюрс 800 тонна ю-нянь дасяно, ваньмыз сямен со ӟег. Нырысь-валысь ваисез ӧжытгес вал, малы шуоно, кӧс куазед, чебер нуналъёсты котькудӥз хозяйство ас понназ кутыны тыршиз. Техниказы ӧжыт бере, бусыысь вань кутсамзэ лапас улъёсы интыяны сюлмаськизы, дорамы одӥг-кык рейс гинэ келяло вал. Нош зор-кот куазен, комбайнъёс сылыку, куасьтэм ӟегзэс тросэнгес вуттылӥзы. Кун заданиез быдэстӥм, шуыны луоз, куд-ог хозяйствоос али но ваё на ке но. Одӥгзэ но машинаез берлань ум берыктӥське, буш интымы лачак. Азьвыл аръёсы уго ю тысь трос поллы ятыргес возиськом вал. Тулыс кизён но сӥзьыл бусы ужъёс туэ каньылэнгес радъяськизы техникалы эстӥськон ласянь. Правительстволэн решениеныз "Удмуртпродконтракт" пыр хозяйствоослы висъямын вал 58 миллион манет. Таӵе юрттэтэз гуртоос кемалась ӧз адӟылэ ни. Озьы ке но, ӝеганъёс ӧжыт ӧй вал: вужмем техника кема ик ужаны уг чида, я отын, я татын чиге. Зоръёс люкетӥзы на. Соин сэрен дыраз утялтыны вуымтэ ӟег му вылаз кисьтӥськиз, уданы кутскемзэ но комбайнъёс кутсаны выризы на. Сыӵе тысьлэн ӟечлыкез трослы ышиз. Та пумысен Ф. М. Фархутдинов, республикаысьтымы ю- нянез эскеронъя валтӥсь специалист, шугъяськонзэ уг ваты: - Мынам ӵошатэме потэ бускель Татарстанэн. Кылем арын гектарысьтыз соос 15-17 центнер ӟег кутсазы, туэ - быдэн 40! Ӟечлыкезъя ке учконо, тысьсы шальтыр- шальтыр, бушъёсыз, висисьёсыз туж ӧжыт. Республикамыя та ласянь соослы матынгес Пичи Пурга, Алнаш, Завьялово районъёс. Нош Ува но со котырысь ёросъёсын югдур начар: тыро-пыдо кисьманы ӟеглэн кужымез ӧз тырмы. Тӥни малы данакез тысьсы кутэмын фуражлы шуыса, нош коньдон висъямын пыжиськонэ мынӥсь юлы. Малы озьы луиз? Валэктонэз огшоры: музъемлы но дыраз сиён-юон кулэ. Татарстанын туэ куинь поллы ятыргес минерал сылал сётӥзы - сомында ик урожай басьтӥзы. Удмуртия та ласянь шӧдскымон кыле. Соин ик бусыосмы но арысь аре куанермо. Хозяйствоослэн ужамзылы берпуметӥ дунъет сётэ лаборатория. Котькуд машинаез татын сак эскеро. Азьвыл аръёсын ӵошатыса, кыӵе-о пӧртэмлыкез? - Нырысь ик, трослы кулэсмиз дорамы вуись техникалэн лыдыз, - шуэ Н. В. Обухова, лабораторилэн кивалтӥсез. - Азьло уйшорозь уж тырме вал, берло аръёссэ одӥг сменае выжим. Туэ самой троссэ нунал ӵоже 15-20 рейс люкаськылӥз. Со но умой ини. Кылем арын воксё сюрс тонна сяна ю-няньмы ӧз люкаськы вал. Хозяйствоос пӧлысь чылкыт, кӧс тысь вуттӥзы Ленин нимо, "Дружба", "Нива", "Искра", "Сям-Можга" колхозъёс. Кылемезлэн нюргес, жуг-жаго вал. Озьы ке но, одӥг машинаез но берлань ӧм келялэ, малы ке шуоно, ю куасьтон но шертон агрегатъёссы тросэзлэн хозяйствоослэн тыро-пыдо уг ужало ни. Та ужез хлебоприёмной предприятие ас вылаз басьтоно луэ. "Заряысь", "Ур-Сюмсиысь" но куд-ог мукет интыосысь ӵапак сыӵе тысь вуиз. Пыкмыны сётонтэм вылысь, юэз соку ик куасьтон гуре келяло. Татын интыез тырмыт. Кеносъёсын но чылк-чылк ӵужем сюсекъёс выль ю-нянез витё. Ӟеч аръёсы уваос нуналаз ог 1000 тоннаозь тысь кисьто вал, 120-150 машина черодзэ витиз... Али но сыӵе мылкыдзы ӧз кысы на, уж гинэ мед луоз. *** Ӵапак та нуналэ Уваысь хлебоприёмной предприятие люкаськылӥзы Вавож, Селта, Сюмси районъёсысь валтӥсь агрономъёс но председательёс. Вераськиськом Вавожысь гурт удысъя управлениысь валтӥсь агрономен В. И. Березинэн. Та ужын со кыкетӥ арзэ гинэ ай, отчыозь "Луч" колхозын агроном вал. - Кылем арен ӵошатыса, ю-нянь туэ шӧдскымон удалтэмын вал. Хозяйствоосмы пӧлысь нырысьёсыз радын аран-кутсан ужъёссэс йылпумъязы Мичурин нимо, "Колос" , "Горд Октябрь" колхозъёс. Техникаен сэрен берегес кылизы "Волипельга", "Искра", "Рассвет", "Нива". Но соослы быгатэмзыя юрттыны сюлмаськизы вазь быдтэмъёсыз. Секыт йӧтӥз узьым кизён. Таиз удыс ми дорын арлы быдэ малы ке ӝегаса мынэ, переходящий фонд тырмыт дасяны ум вуиське. Тани туэ но 25-тӥ августозь ӝынызэ сяна ӟегмес кизьыса ӧм вуэ. Нош солэсь берло тысез муэ согемлэн пайдаез ичи, эстӥськон гинэ юнме быре. Урожайзы вылӥын ке но, валтӥсь агрономлэн мылкыдыз интыяз ӧвӧл. Сое туж шугъяськытэ жуг-жаглэн алямез. - Гербицид басьтыны коньдон уг тырмы. Туэ малы бусыос сокем юн пашмизы? Июле куасьтӥз, нош зоръёс кутскемен, жаг турын вань культураосты зӥбиз. Июне солы пумит нюръяськоно вал. Соку государстволы эшшо ӟечгес ю тысь келясалмы. Вавож район чаклам заданизэ быдэстӥз. Шаермылэн "сукырияз" 800 тонналэсь ятыр юоссэ келяз. Нош кыӵе мылкыдзы Селта палан? Та юанэн вазиськисько "Копки" эштослэн кивалтӥсезлы Н. Б. Чирковлы. Та хозяйствоын Николай Борисович ужа ни кызь кык ар, татын ик вордскиз, улон сюрессэ мытӥз. - Договоръя ми 300 тонна ю тысь вузаны чакламы. Тупатэм дуныз кельше, птицефабрикаос но фирмаос трослы дунтэменгес басьто. Хозяйствомы сярысь ке верано, гыроно-кизёно муос пӧлысь 87 процентэз - луовыл. Пӧртэм аръёсы отысь быдэн 6-12 центнерозь ю тысь люкаське. Туэ ӟегмы ӧзгес удалты, гектарысьтыз 6,2 центнер сяна ӧз лыкты, но со понна умойгес будӥзы валэс юос. Соос чотын ик шуг- секытысь потыны малпаськом. Татын но сюлэм висёнзы одӥг: нюръяськоно бусыослэсь ӟечлыксэс ӝутон понна. Кулэ коньдон. Нош кытысь сомында шедьтод? Ярам, "Удмуртпродконтракт" туэ пичиен-пичиен юрттӥз, эстӥськон ласянь коть сокем ӧз курадӟе. Нош ма луоз вуоно арын? Республикамылэн бюджетаз тырмыт-а висъяськоз коньдон, кун кеносъёсы чакламъя ю тысь кисьтон понна? Та юан музъем ужасез туннэ ик шугъяськытэ ни. *** Шугъяськытэ хлебоприёмной предприятилэсь кивалтӥсьсэ но. Ярам, туэ ужзы тырмыт. Со понна тау карон кылъёс вераны кулэ ю-нянь будэтӥсьёслы. Нош коллективзэ шуг-секытъёслэсь утён вылысь, Надежда Федоровна олокыӵе но амалъёс утча: асьсэ понна шуыса усьтӥзы пичияк нянь пыжон. Продукцизы Уваын ӝог кошке. Вань вуриськон цехсы но, ужан дӥсь 120 муртъем коллективзылы асьсэос вуро. Дунтэмгес усе, нош ик коньдон шыръяське. Столовойзы понна будэто парсь сӥль, гужемлы быдэ дасяло пӧртэм пумо емыш мертто кубиста, картофка, бичало губи. Кызьы-о, кытчы-ы татысь калык кошкоз? Подсобной хозяйствоез возён предприяилы сокем бадӟым пайда уг ке но вайы, ужасьёссы понна шӧдскымон луэ: столовойын ческыт но дунтэм сюдо. Мултэсэз продукцизы вузаны но шеде. Нош валтӥсь сюлмаськонзы, валамон ини, - ю тысь дасян-басьтон. Со понна предприятие кылдытэмын но. Макем ӝог тырмозы кеносъёс, оскем бусьтыр луозы асьмелэн ӝӧк вылъёсмы. Людмила Медведева. Ю куасьтон. Ю-нянь вуэ. Кенешо гурт удысысь специалистъёс. Шорысез - "Удмуртпродконтракт" управленилэн кивалтӥсез В. Н. Ануфриев. Лаборант Людмила Мельникова вуэм ю тысез эскере. Ф. Фартдинов эшшо огпол чакла на ю-няньлэсь ӟечлыксэ. Вавож районысь валтӥсь агроном В. И. Березин. Таӵе ческыт пыжисько предприятилэн пекарняяз, кивалтӥсез Людмила Геннадьевна Николаева. Н. Б. Чирков, "Копки" эштослэн кивалтӥсез. Туспуктэмъёсыз Владимир Беломорскихлэн. Банкрот луон котьку уг вайы бырон Совето власть аръёсы банкротство кылэз асьмеос герӟаськомы вал "сисьмись капитализмен" гинэ. Нош табере со Россиын но выжыяськиз ини. Мар со банкрот луон? Кин уг тоды туала экономикалэсь пуштроссэ но аспӧртэмлыксэ, одно ик шуоз: банкрот луон - со пыд йылэ потон. Нырысь-валысь учкыса, озьы ик вань со. Пунэмзэ тырыны быгатӥсьтэм предприятиосты банкротэн яло но, соослэсь ваньбурзэс вузаса, конодонзэс кредиторъёслы берыкто. Банкрот луэм предприятие быре яке кузёзэ воштэ. Но туала вакытэ банкрот луон одно ик пыд йылэ потон ӧвӧл. Ӵем дыръя со шуге-леке вуэм предприятилы выльысь улӟыны берпуметӥ луонлык луэ. Озьы лыдъя Россиысь коньдон ужпумъёсты сэрттон-пертчонъя но банкротствоя службалэн Удмурт Элькунъя агентствоезлэн кивалтӥсез Сергей ШУКЛИН. - Сергей Борисович, тросэз адямиос малпало, предприятиез банкрот карон - со одно ик сое быдтон шуыса. Нош тӥляд верамдыя, со озьы ӧвӧл кадь. - Бен, котьку ик озьы уг луы. Нырысь ик, мар со банкротство? Тросэз малпало: арбитраж предприятиез банкротэн ялэ но сое быдтэ, вань кылем ваньбурзэ вузаны косыса. Но озьы шуак-дуак нокин но, ноку но уг лэсьты. Та пумысен тыриськыны быгатонтэм (банкротство) сярысь закон вань. Солэн косэмез улсын ужаськом ми но, арбитражной суд но. Нырысь ик арбитраж нимысьтыз ыстэм адямиез пыр пыр-поч эскере начармем предприятиын кылдэм югдурез. (Та ужрад внешней наблюдение шуиське). Куинь толэзь куспын со тодыны кулэ предприятиын коньдонлэсь бергамзэ, солэсь пунэмен тыриськонъёссэ но, начармемезлэсь мугъёссэ но чакла, вань-а ӝутскыны луонлыкъёс. - Куспетӥ каро, Сергей Борисович: нош кызьы тодмо луэ предприятилэн начармемез сярысь? со сяна, валантэмгес тӥляд агентстводылэн интыез. - Куашкась предприятие выт уг тыры, ужасьёсызлы уждун уг сётъя, солэн люкасько пунэмен тыриськонъёсыз, шуом электрокужым, эстӥськон, пӧртэм материалъёс понна но внебюджетной тыронъёсыз. Кинлы пунэме кылемын предприятие, соос ик иворто со сярысь арбитраже яке милям агентствоямы. Озьы ик лэсьто интыосысь ёзъёс но. Нош ми судын ужасьёсын ӵош сэрттӥськом-пертчиськом предприятиосын кылдэм югдурез. - Ярам, сэрттӥды-пертчиды, азьланяз мар? - Арбитражной суд, предприятилэсь луонлыкъёссэ лыдэ басьтыса, палэнысь кивалтон (внешней управление) яке конкурсной производство сярысь решение кутэ. Палэнысь кивалтон дыръя предприятиен кивалтэ судэн юнматэм внешней управляющей. Та вакытэ предприятилэсь вытъёсъя но внебюджетной тыриськонъёсъя пунэмен кылемзэ огдырлы "вунэто". Кредиторъёс но басьтоно коньдонзэс витьыны соглаш луо. Та амал ар ӵоже кутӥське но предприятиез утьыны луонлык сётэ. Малпамъя уг ке пӧрмы, предприятиез быдэсак яке люкетэн-люкетэн вузало. Но таӵе "адӟон" кутсконаз ик нокыӵе палэнысь кивалтонтэк луыны быгатэ. Шуом, предприятие чылкак куашкамын ини, ужатэк сылэ, кивалтӥсьслы котькыӵе кредитъёс сётъя но, сиыса-юыса гинэ быдтозы, нош югдурез уз тупатэ. Сыӵе дыръя одӥг гинэ амал кыле - предприятиез быдтон, вузан. Озьы кун но (предприятие солэн ке), ужась коллектив но ыштонъёслэсь утиське. - Кун - валамон. Нош адямиос ужтэк кылё ук. - Малы соос одно ик ужтэк кылё, кин шуиз озьы? Эн малпалэ, предприятиез котькуд мылкыд карисез басьтыны быгатоз шуыса, шуом, кыӵе ке спекулянт, дуногес дунын вузан вылысь. Закон выль кузё азе чурыт курон пуктэ: предприятиез кӧня ке ар ӵоже ужатоно азьвыл удысэзъя но азьвыл мында ик ужан интыос возёно. Выль кузёослэн предприятиез улӟытонъя оскымон бизнес-планзы но луыны кулэ. - Вераны луоз-а кыӵе ке предприятиез, кудӥз банкротство бере улӟыны быгатӥз? - Пожалуйста! Тани Якшур-Бодьяысь леспромхозэз басьтом. Со быдэс ар ӧз ужа, пунэмен тыриськонъёс уно люказ, уждун ӧз тыры. Судлэн пуктэмезъя, предприятие вузамын вал. Выль кузёез "Фармаимпекс" огазеяськон луиз. Али леспромхоз огсыр ужа, татын 170 адями тырше, уждун но дыраз басьто. Выльысь улӟиз, выль кузё шедьтыса, Вотка районысь азьвыл "Мир" колхоз. - Нош тросэзлы-а юрттӥз палэнысь кивалтон? - Таосыз но ӧжыт ӧвӧл. Одно ик пусйыны кулэ Сарапулысь портэз, ку посон комбинатэз но "СарКОО" огазеяськонэз, Ижевскысь подшипникъёс поттонъя литейной заводъёсты, "Редуктор" огазеяськонэз, Глазовысь "Химммаш" но Воткаысь кирпич поттонъя заводъёсты. соин ик уг яра одно ик кышкытэн лыдъяны предприятиын банкротствоя ужрадъёсты кутонэз. - Озьы ке но, предприятиез банкротство кылэн герӟало ке, отын ужасьёс сюлэмшугъяськыны кутско. - Мугез валамон. Огшоры адями угось уг тоды, мар со сыӵе. шуом, внешней наблюдение, управление яке конкурсной производство. Вылаз ик, солэсь йырзэ берыктыны туртто пӧрмостэм кивалтӥсьёс. Предприятие угось банкрот луэ ке, нырысь ик кивалтӥсез мозмыто. Мукет уже интыяськыны солы туж секыт, вуж "данэз" люкетэ. Соин ик со вань кужмысьтыз, котькыӵе амалъёсын пумитъяське банкротстволы пумит. - Куддыръя кылоно луэ, созэ яке тазэ предприятиез, со ӟеч ужа ке но, юри банкротозь вутто, сое киултон понна яке вожмаськисез (конкурентэз) быдтон понна. Мар вералоды со пумысен? - Мынам но кылэме вань, нош аслым сыӵе учырен пумиськыны ӧз кылдылы. Одӥгзэ гинэ вераны быгатӥсько: предприятиез юри банкрот карыны туж секыт, быдэстонтэм ужпум, шуыны луоз. Умой-а, урод-а, но та ласянь законъёс ужало ай, соосты уже кутӥсь ёзъёс но вань, нырысь ик югдурез утисьёс. Предприятиез банкротэ вуттыны быгатэ одӥг кужым гинэ - пӧрмостэм, урод ужась кивалтӥсь. - Сергей Борисович, кӧня предприятиос потӥзы ини тӥляд агентстводы пыртӥ но кӧняез, кинъёс потозы матысь дыре? - Агентствомы 1994-тӥ арысен ужа ке, ми "эмъямы" 280-лэсь трос предприятиосты, колхозъёсты но совхозъёсты, соос пӧлысь 40 палазэ утимы, банкротэ вуттытэк. Берло ар но ӝыны куспын гинэ ми бюджетэ вуттӥмы 1,5 миллиард манет тырымтэ вытъёсты, 20 сюрс пала адями ӝегатэм уждунзэ басьтӥз. Соин ик учке асьтэос: банкротствоя агентство кышкытлык-а вае, юрттэт-а сётэ. Нош вуоно "клиентъёсмы" сярысь номыр вераны уг быгатӥськы, закон уг лэзьы. Со дыре ик 40 процентэз предприятиос пайда вайытэк ужало. Г.ТИХОНОВ. УДМУРТ КУНЛЫ - 80 АР Шаермылэн быдэс улонэз адӟиське "Удмурт Республика" энциклопедиысь "Удмурт Республика" экнциклопедия поттонэз удмурт шаермылэн улонысьтыз нимысьтыз тужгес пусйымон вакытэн ӵошатыны луоз. Энциклопедилы таӵе дунъет сётыса, чик но ум янгышалэ, со возьматэ угось республикамылэсь культура, наука но техника удысъёсын азинсконъёссэ, кужымзэ но луонлыкъёссэ. Пусйымон соиз но: та энциклопедия удмурт шаермылэн автономия басьтэмез дырысен 80 ар тырмон азьын потӥз, элькунамы улӥсьёс понна ӟеч кузьым луиз. Та дырозь дасямын но печатласа поттэмын ни Удмуртилэн калык хозяйствоезлы, историезлы но культураезлы сӥзем трос гинэ монографиос, сборникъёс, статьяос. Но огшоры лыдӟисьлы соосты шедьтыны ик шуг, угось книгаос, журналъёс но газетъёс пӧртэм библиотекаосын но архивъёсын утисько. Нош энциклопедия республикмылэсь ортчемзэ но, туннэ нуналзэ но огазеяса возьматэ, отын вань удысъёс пыртэмын. Янгышатэк вераны луоз, та энциклопедия Удмуртилэсь экономиказэ но культуразэ азинтонын бадӟым юрттэт луоз шуыса. Энциклопедие пыртэм данак очеркъёс но статьяос пӧлын нимысьтыз пусйымонэз луэ историлы сӥзем сузьетэз. Ужпум тани ма бордын. Али туж кулэ угось Удмуртилэн историезъя огъясь уж. Со герӟаськемын 1991-тӥ ар бере азьвыл Совето Союзлэн быдэс улосвылаз воштӥськонъёсын. Авторъёс но редакторъёс Удмуртилэсь вашкала дырысен туннэ нуналозь азинскон сюрессэ, историысь пӧртэм учыръёсты, удмурт шаермылэсь быдэс Россилэн азинсконаз интызэ вакчияк но шонер возьматыны быгатӥллям. Удмуртилэн историезъя тыро-пыдо дышетскон книгаос но пособиос ӧвӧл на бере, та энциклопедия дышетон удысын валтӥсез книга луоз - начальной классъёсысен вылӥ школаозь ик. Озьы ик нимысьтыз пусйымонэсь республикамес азинтон удысын тыршем адямиос сярысь статьяос. Сомында адямиослэсь нимтулъёссэс пыртыса, энциклопедиез кылдытӥсьёс, азьвыл умойтэм "адями государство понна" шуыса малпанлэсь куштӥськыса, историлэн азинскемез шоры выль сямен учкон пала йыгмыт вамыш лэсьтӥзы - "государство адями понна". Энциклопедиын нырысьсэ шара верамын военно-промышленной комплекс сярысь. Ӵапак со ик Удмуртилэн экономикаезлэн инъетэз вал угось. Соин валче ик энциклопедие пыризы ВПК-ез кылдытӥсьёслэн но сое азинтӥсьёслэн - азьвыл "ватыса возем" инженерно- технической ужасьёслэн но рабочийёслэн биографиоссы. Энциклопедия Удмуртиын улӥсьёс понна гинэ дуно ӧвӧл. Со бадӟым юрттэт луоз Россиысь вань калыкъёслэсь кусыпъёссэс юнматонын. "Удмурт Республика" энциклопедиез дасясьёслэн трос аръёс ӵоже творческой ужзы, та изданилэн полиграфияя ӟечлыкез кунмы ласянь туж вылӥ дунъямын луыны кулэ. А.А.ТРОНИН, история наукаосъя доктор, Удмурт кун университетысь профессор. Удмурт Республикалэн Данъян пулаз пыртон сярысь Удмурт Республикаысь Кун Кенешлэн Президиумезлэн но Правительстволэн постановленизы 2000-тӥ арын ужын бадӟымесь азинсконъёс басьтэмзы но Удмурт Республикалы 80 ар тырмонлы сӥзьыса, Удмурт Республикаысь Кун Кенешлэн Президиумез но Правительство пукто: 1. Удмурт Республикалэн данъян пулаз пыртоно: "Ижевский механический завод" ГУП-ысь коллективез (валтӥсь директорез - Чугуевский Василий Сергеевич); Воткинск городысь "Юбилейный" культура дворецысь коллективез (директорез - Окладовиков Владимир Евгеньевич); Игра ёрос больницаысь коллективез (валтӥсь врач - Шаповалов Алексей Федорович); Дэбес ёросысь Калинин нимо колхозысь Мало-Кизнино фермаысь коллективез (заведующей - Пономарев Николай Евгеньевич); Кизнер ёрос администрацилэн культура отделэзлэн ветеранъёслэн калык хорзылэн коллективез (хормейстер - Андреев Михаил Иванович); Завьялово ёросысь "Тепличный комбинат "Завьяловский" ОАО-ысь коллективез (директорез - Полтанов Анатолий Иванович); "Удмуртнефть" ОАО-ысь коллективез (валтӥсь директорез - Богомольный Евгений Исаакович); "Чепецкий механический завод" ОАО-ысь коллективез (валтӥсь директорез - Рожденственский Владимир Владимирович); Россиысь синтэмъёслэн огазеяськонзылэн "Сарапульское учебно-производственное предприятие "Радиотехника" ООО-ысьтыз коллективез (валтӥсь директорез - Абросимов Геннадий Егорович); Почта кусыпъёсъя Сарапул ёрос узелысь коллективез (кивалтӥсез - Евстифеев Геннадий Евгеньевич); Ижевск городысь 83 номеро шор ёзо школаысь коллективез (директорез - Печищева Эльвира Васильевна); Кун унитарной предприятилэн 802 номеро монтажно-строительной управлениысьтыз коллективез - (управленилэн кивалтӥсез - Маркелов Александр Владимирович); "Сарапульский радиозавод - холдинг" (валтӥсь директорез - Полусмак Александр Михайлович); Абашев Рашид Наильевичез - "Можгинское деревообрабатывающее предприятие "Красная звезда" ОАО-лэсь валтӥсь директорзэ; Анисимов Виктор Антоновичез - Киясово ёросысь "Киясовское" гурт удысъя эштосысь трактористэз; Анкудинова Вера Андреевнаез - Грах ёросысь Вылӥ Эгра фельдшерско-акушерской пунктлэсь кивалтӥсьсэ; Болтачева Надежда Ивановнаез - Балезино ёросысь "Путь к коммунизму" колхозысь дояркаез. Бутолин Петр Васильевичез - Кез ёросысь Пушкин нимо гурт уыдсъя эштослэсь тӧрозэ; Валиахметов Игорь Наримановичез - "Ижевский радиозавод" ОАО-лэсь валтӥсь директорзэ; Вахрушева Апполинария Георгиевнаез - Якшур-Бодья ёросысь ляб визё нылпиосты утялтонъя Канифольный юрт-интернатысь воспитателез; Вепрев Михаил Владимировичез - Глазов ёросысь Глазов кун лесхозлэсь директорзэ; Герасимова Раиса Павлиновнаез - Пичи Пурга ёросысь Гожня шор ёзо школалэсь директорзэ; Даутов Тахир Михайловичез - "Ижнефтемаш" ОАО-лэсь валтӥсь директорзэ; Евгеньев Геннадий Васильевичез - Юкаменск ёрос больницаысь паласькись висёнъёсъя ёзлэсь кивалтӥсьсэ; Евсеев Сергей Федоровичез - республикаысь нылпи клинической больницаысь реанимацияя но интенсивной терапияя ёзлэсь кивалтӥсьсэ; Ельцова Эльвира Васильевнаез - Глазов ёросысь Кожиль гурт администрацилэсь кивалтӥсьсэ; Жириль Федор Викторовичез - "Удмуртавтодор" ГУП-лэн Можгаысь выж лэсьтонъя кун предприятилезлэсь кивалтӥсьсэ; Журавлев Виталий Анатольевичез - Удмурт кун университетлэсь ректорзэ; Ившин Анатолий Васильевичез - Кез ёросысь "Иван" ООО-лэсь директорзэ; Касимов Карим Фаттахуддиновичез - "Глазовский завод "Металлист" ОАО-лэсь валтӥсь директорзэ; Корепанова Елена Александровнаез - Красногорск ёрос больницаысь нуны ваёнъя отделенилэсь кивалтӥсьсэ; Красильников Владимир Анатольевичез - гурт удысъя "Колос" кооперативлэсь тӧрозэ; Кузнецов Виталий Васильевичез - Ижевскысь 16 номеро жилищно-ремонтной предприятиысь газоэлектросварщикез; Кузнецов Владимир Ивановичез - Сарапул городысь "Сарапульский водоканал" предприятилэсь директорзэ; Лапина Валентина Игнатьевнаез - Воткинск райпоысь Светлое хлебопекарнялэсь кивалтӥсьсэ; Леконцев Михаил Тимофеевичез - Пичи Пурга ёросысь му вӧй кысконъя "Малая Пурга" станцилэсь кивалтӥсьсэ; Липанов Алексей Матвеевичез - Россиысь наукаосъя академилэн Урал люкетысьтыз прикладной механикая институтлэсь директорзэ, Россиысь наукаосъя академилэсь академиксэ; Личидова Наталья Дмитриевнаез - Сарапул городысь "Столовая � 5" ООО-лэсь директорзэ; Лузянина Алевтина Терентьевнаез - Селта ёросысь ужаса улӥсьёслы улон-вылонын юрттонъя центрлэсь директорзэ; Любимова Надежда Аркадьевнаез - Россия Федерациысь нимысьтыз лэсьтӥськонъя Федеральной службалэн 8 номеро улосвылъя 808 номеро управлениысьтыз маляръёслэсь бригадирзэс; Мартьянов Алексей Борисовичез - "Прикампромпроект" ОАО-ысь архитектурая но лэсьтӥськонъя 6 номеро отделысь валтӥсь специалистэз; Марченко Анатолийц Владимировичез - "Удмуртторф" ГУП-лэсь валтӥсь директорзэ; Моисеев Валерий Васильевичез - "Ижсталь" ОАО-лэсь валтӥсь директорзэ; Невоструев Владимир Петровичез - Юкаменск ёрос администрацилэсь кивалтӥсьсэ; Орехова Татьяна Аркадьевнаез - Ижевск городысь "Альтаир" ОАО-ысь операторез; Пашкова Надежда Ивановна - Глазовысь нылпи культура юртлэсь директорзэ; Перевозчиков Александр Федоровичез - Удмурт Республикаысь Мунё кун театрысь актёрез; Перевощикова Валентина Петровнаез - Ижевск городысь покчиослэн творчествозыя дворецысь химилы дышетӥсез; Пермяков Геннадий Валентиновичез - Алнаш ёросысь Алнаш шор ёзо школа- колледжлэсь директорез; Плетнева Вера Серафимовнаез - Яр ёросысь Зюино шор ёзо школаысь директорез; Людмила Галина Дмитриевнаез - Сюмси РУПС-лэсь связья Кильмезь ёзысьтыз почтальонэз; Сальников Олег Александровичез - Россия Федерацилэн Правительствоысьтыз лэсьтӥськонъя Федеральной службаезлэн 6 номеро улосвылъя "Строительное управление � 603" кун унитарной предприятиезлэсь кивалтӥсьсэ; Силаева Татьяна Ивановнаез - Удмурт республикаысь Операя но балетъя кун театрысь артистка-вокалисткаез; Ситдиков Гарипзан Шарифзяновичез - Сарапулысь автотранспортъя огазеяськонлэн Камбаркаысь предприятиысьтыз водительзэ; Соловьев Владимир Григорьевичез - Ижевск городысь "Торговый Дом "АСПЭК" огазеяськонлэн "Супермаркет" магазинэзлэсь директорзэ; Суходоев Александр Васильевичез - Удмурт Республикаысь МВД-лэн Можга городысь тылпулэсь утиськонъя 7 номеро отрядэныз кивалтӥсез, югдурез утёнъя службаысь подполковникез; Сырых Алексей Федоровичез - Ува ёросысь гурт удысъя "Колхоз имени Ленина" эштослэсь тӧрозэ; Третьяков Сергей Александровичез - Каракулино ёросысь КПСС-лэн ЪЪИИ съездэз нимо колхозлэсь тӧрозэ; Ушакова Валентина Павловнаез - Глазов городысь "Удмуртская птицефабрика" ОАО- лэсь валтӥсь директорзэ; Феклистова Мария Александровнаез - Удмурт Республикаысь Физкультурая но спортъя кун комитетлэн дышетон центрысьтыз спортсмен-инструкторез; Чуверов Сергей Леонидовичез - Сарапул городысь милицилэсь ужзэ радъянъя ёзлэсь кивалтӥсьсэ, милициысь майорез; Шаркин Владимир Николаевичез - Шаркан ёросысь "Шаркан трикотаж" ЗАО-лэсь валтӥсь директорзэ; Якимович Святослав Анатольевичез - Удмурт Республикаысь МВД-лэн экономика удысысь йыружъёсын нюръяськонъя ёзэзлэсь кивалтӥсьсэ; 2. Удмурт Республикаысь Правительстволэн Аппаратэз Данъян пул вылэ пыртэмъёслы висъяны кулэ дас пичи уждун мында коньдон. Удмурт Республикаысь Кун Кенешлэн Тӧроез А. А. Волков Удмурт Республикаысь Правительстволэн Тӧоезлэн нырысетӥ воштӥсез Ю. С. Питкевич. Ижевск город, 2000-тӥ арын 24-тӥ октябре. � 173/1026. ИВОРЪЁС Депутатлы тау каро Россиысь Кун Думалэн депутатъёсыз азьланьто вуоно арлы бюджетэз дасян бордын ужанзэс. Тодӥсь муртъёслэн чакламзыя, туэ та уж умойгес радъямын. Депутатъёс законлы ӵектосэз кык пол лыдӟыса юнматӥзы ни. Нырысетӥ декабре чакламын сое куинетӥзэ эскерыны. Бюджетэз дасянэ мыло-кыдо пыриське асьмелэн депутатмы Светлана Смирнова. Со Удмуртиысь огназ быръемын вал бюджет кусыпъёсъя куинь палъем комиссие. Алигес Светлана Константиновналы вуиз Россия Федерациысь Правительстволэн Тӧроезлэн воштӥсезлэсь Алексей Кудринлэсь гожтэт. Вице-премьер Правительстволэн нимыныз тау каре асьме депутатлы бюджетлэн проектэз бордын сюлмысь ужамез пумысен. Уноез депутатъёс ӟеч валало Россилэн Президентэзлэсь экономикаез азинтонъя но кун кивалтонэз юнматонъя малпанъёссэ, та ласянь солы котыр ласянь юрттыны тыршо, пусъемын гожтэтын. Оскисько, вера А.Кудрин, валче ужан мылкыдмы азьланьын но уз быры шуыса. И.КРИЧЕВ. Архивысь документъёсъя Удмуртия ЪЪ даур 1951-тӥ ар 1951-тӥ арлэн нырысетӥ толэзьёсаз республикаямы ортчизы РСФСР-ысь но Удмурт АССР-ысь Вылӥ Кенеше быръёнъёслы дасяськонъёс. И. В. Сталин улэп дыръя соос берлоосыз вал. Быръён нунал 18-тӥ феврале тупатэмын вал. Отчы вань бырйисьёс пӧлысь 99,7 процентэз пыриськизы. 21-тӥ феврале "Удмурт правда" газетысь адямиос лыдӟизы таӵе йыръянъёсты: "Калык огкылысь бырйиз", "Быдӟым Сталин - асьмелэн депутатмы", "Сталин асьмемыз коммунизме валтэ". 1-тӥ мартэ СССР-ысь Министръёслэн Кенешсы но ВКП(б)-лэн ЦК-ез сиён-юонлэсь но промышленной вузъёслэсь дунъёссэс кулэстон сярысь постановление поттӥзы. Сылаллы, тылпоттонлы, мебельлы но бензинлы дунъёс - 20 процентлы, няньлы, кеньырлы, макаронлы, сӥльлы но вӧйлы дунъёс 15 процентлы кулэстэмын вал. Та арлы Удмуртиысь промышленной предприятиосын паськыт вӧлмизы кортэз ӝоггес вӧлон амалъёс. Та ласянь кутскон сётӥзы Сарапулысь Ф. Э. Дзержинский нимо заводысь егит рабочийёс-стахановецъёс. Соос ужан нунал куспын 30-40 норма быдэстыны ӧтизы Удмуртиысь вань промышленной предприятиосысь ужасьёсты. Куартолэзе уже потасьтэмъёсты суд улэ кыскемысь. Табере таӵеослэсь кылзэс юаллязы административной амалъя. Гурт удысын колхозъёсты огазеян но бадӟыматон борды басьтӥськизы. Гужем толэзьёсы Ижевск вӧзысь 8 иськемын тямыс бадӟыматэм колхоз басьтӥськиз 240 киловаттъем ГЭС лэсьтон борды. Партилы но, бадӟым вождьлы чебересь рапортъёс кылдылӥзы ке но, гурт калыклэн улонэз туж секыт вал на. Партилэн гурт калык шоры учкон политикаез мултэс чурыт вал, колхозник аслаз ужамез понна кӧттыр нянь гинэ но ӧз басья. Июне Удмуртиысь куд-ог колхозъёслэн кивалтӥсьёссы, кылсярысь, Яр ёросысь Мичурин нимо колхозлэн кивалтӥсьёсыз, юн алэмын вал, калыкез ляб ужато но мултэс трос уждун тыро шуыса. Гужем Удмурт кун театре вуизы Ленинградысь Островский нимо театральной институтысь нырысетӥ удмурт студиез йылпумъям артистъёс. Августэ-сентябре Удмурт шаерысь музей Кез, Кулига, Карсовай но Балезино ёросъёсы этнографияя но археологияя экспедициез радъяз. Та экспедиция возьматӥз, Камалэн вылӥысьтыз но Чепца котырысь Ъ-ЪИВ дауръёсысь памятникъёс туала коми- пермякъёслэн но удмуртъёслэн вылэм шуыса. Сентябре "Удмурт правда" ивортӥз, советской калыклэн кызьы улэмез котькуд адямилы кемагес улыны юрттэ шуыса. УАССР-ын 90-100 аресъем адямиос соку 200-лэсь уно вылӥллям. Соос уло вылэм Бемыж, Завьял, Сарапул, Селта, Вуж Зятцы, Сюмси, Якшур-Бодья ёросъёсын. Шонер-а меда, соку калык ӟеч улӥз шуыса? Таиз ласянь бадӟым юан кылдэ. Но гурт калыклэсь ужзэ капчиятон вылысь, 1951-тӥ арын выль техника вуыны кутскиз, со пӧлын - ДТ-54 гусеничной тракторъёс но ю тысь октон комбайнъёс. Е. Вяткина, Удмурт Республикаысь Выль Кун архивысь валтӥсь специалист. Вавож ёросысь Водзимонье МТС колхозъёсы комбайнъёс келя. "Тор" сачкытэ зол Россиысь ож тӥрлык поттӥсьёс ялан выль но выль вормонъёс басьто калык куспо выставкаосын. Сое возьматӥз туэ октябрьлэн кутсконаз Грециын ортчем "Дефендори- 2000" ЪИ калык куспо адӟытон но. Отын нош ик данэ потӥз Ижевскысь "Купол" электромеханикая заводлэн "Тор-М1" зенитно-ракетной комплексэз. Адӟытонэ пыриськизы дуннеысь 40-лэсь уно кунъёс. Озьы ке но, Россиысь "Антей" концерн (отчы пыре "Купол" но) "вузъёссэ" ӟечен возьматӥз. Кылем арын гинэ Греция Россилэсь 21 "Тор-М1" комплексъёссэ басьтон сярысь кенешон гожтӥз. Со понна 521 милион доллар тыриз. Туэ гужем но эшшо 10 комплекс басьтон сярысь огкыл гожтэмын. Предприятие соосты лэсьтыны кутскиз ни. Выставкаын "Тормылэсь" луонлыкъёссэ возьматэм бере ик Афинае эшшо 19 зенитно- ракетной комплекс вузан сярысь кенешемын. Греция гинэ Ижевскысь "Торёс" понна 1,2 миллиард доллар висъяны быгатоз. Н.ЛЯЛИН. Удмуртия - доре мынам Сыӵе ини асьме шаер: Котькуд гуртын ошмес синъёс уно. Сыӵе ини удмурт калык Со ужаны но кырӟаны шаплы. Туспуктэмъёсыз Владимир Беломорскихлэн. ДАРТ Азьлоез пыр - азьлань Тамаша ке тамаша та: бигер пи еврей нылэз удмурт сямъёсъя кышно вае. Сыӵезэ кылэмды вань-а? Эн пайме, та нуналлы со шудон гинэ. Нош азьланяз, оло, зэмзэ но сюанын ог-огзэс вошъяса чузъяськозы пор но немец крезьгур, удмуртэз но евреез, бигерез но эшшо кыӵеез ке. Шаерысьтымы удмурт, пор, бигер, немец, еврей, егитъёслэн огазеяськонъёссы, республикаысьтымы Кун Кенешлэн но Егитъёсын ужанъя кун комитетлэн юрттэмзыя, гужем радъязы "Эшъяськон" лагерь. Егит азьветлӥсьёс сизьым нунал ӵоже тодматскизы ог- огзылэн сямъёсынызы но йылолъёсынызы, культураенызы (отын ик йӧспӧртэм сюан ортчиз). Егитъёслэн та лагерьын эшъяськонзы огдырлы пумиськонэн гинэ ӧз йылпумъяськы. Огазеям малпанъёс выль огазеяськонозь вуттӥзы. Удмурт егитъёслэн "Шунды", бигеръёслэн "Иман", поръёслэн "Ужара", Ижевск городысь немец егитъёслэн "Югенд хайм" огазеяськонъёссы, еврей егитъёслэн клубзы "Ӵошен" ассоциация кылдытӥзы. Ассоциацие пыриськемъёс алигес нимысьтыз пресс- конференция но ортчытӥзы огазеяськемзы сярысь ваньмызлы кылымон вераны. Шаерамы гинэ ӧвӧл, Россиын но та выллем ассооциация ӧй вал на. Таӵе эшъяськонлы вожъяськыса, республикаямы улӥсь мукет выжы калыкъёс но асьсэлэсь огазеяськонъёссэс кылдытыны ӝуатскиллям ни. Кызьы ивортӥзы ассоциацие пыриськемъёс, соос дась асьсэлэн радъёсазы вань мылкыд карисьёсты кутыны. Сентябрь пумын Егитъёсын ужанъя кун комитет ортчытӥз гужем шутэтсконлы сӥзем конференция. Отын ӟечен пусъемын вал "Дружба" лагерьлэн ужамез но. Вуоно гужем со нош ик ӧсъёссэ усьтоз эшлыко огазеяськонъёслы. "Ӵошен" ассоциация али ик сюлмаське ини лагерьлэсь ужзэ ӟечгес радъян сярысь: азьветлӥсьёс понна ортчытоно семинар, кутсконо ни вожатойёсты дасяны. Но вань мукет но сюлмаськонъёс. Ассоциацие пыриськемъёс гужемозь мӧзмыса улыны уг малпало, чакламын трос пӧртэм пумиськонъёс, шутэтскон ӝытъёс. Республикамылэн нуналаз егит азьветлӥсьёс поталозы Глазове но Воткинске. Интернетэз но асьсэлэн эшъяськон ужазы паськыт кутыны чаклало, дасязы нимысьтыз программа. Нош кызьы выль арез но мукет праздникъёсты ӵошен пумитатэк. Егитъёс малпало асьсэ калык сямъёсъя туала модалы тупась дӥськутъёсын но паймытыны. Азьлоез пыр - азьлань, сыӵе куронъёс пуктэ ас азяз "Ӵошен" ассоциация. Шаерысьтымы егитъёс мед тодозы Удмуртиын улӥсь вань калыкъёслэсь сямъёссэс но культуразэс, со юрттоз огъя культурамес но узырмытыны. Ассоциация ас азяз пуктэ егитъёслы юрттэт сётон ужпумез но. Солэн радъёсаз пырыны быгатозы дас ньыль аресысен куамын аресозь пиос но нылъёс. Дасямын нимысьтыз закон, со улонэ пыӵаз ке, ассоциацие пыремъёс ӧжытгес выт тырозы поттэм барышысьтызы. Соин валче егитъёслэн луонлыксы кылдоз тросгес вуз басьтыны. Уже кутӥськозыдисконтной карточкаос. Но кызьы учкозы та законодательство шоры Кун Кенешысь депутатъёс, егитъёслэн кутсконзылы ӝуатозы-а соос вож тыл. Нош суро семъя кылдытон сярысь ке верано, "Ӵошен" ассоциациын сыӵе егит кузпалъёс вань ни. Ассоциацилэн координаторез, "Ужара" огазеяськонлэн кивалтӥсез Владимир Кузнецов "Шунды" нылэз Ирина Дедюхинаез синйылтӥз. Л.МАЛЫХ. Кино но икебана Та нуналъёсы Ижевскын кутске Япониын пуктэм кинофильмъёсты возьматонъя фестиваль. Со радъямын Японилэн Россиысь посльствоезлэн кичӧлтэмезъя, кутскон сётӥз отысь советник Идэ господин. Туэ гужем со "Дзержинец" лагере вуылӥз. Удмуртиен эшъяськонзэ азьланьтыны малпаз. Фестивальын возьматӥськозы ньыль художественной фильмъёс но одӥг мультфильм. Тани со фильмъёс: "Угорь" (1997-тӥ арын Канны фестивальын басьтӥз гран-при), "Школа-ИИ, "Сонатина" но "Семья Кимура". Мультфильм нимаське "Экспресс "Галактика-999". Фильмъёс возьматӥськозы дунтэк. Идэ господинэн ӵош лыктоз икебана лэсьтонъя специалист. Икебана со сяськаослэсь аспӧртэмлыко букетъёс дасян амал. Б.НИКИТИН. Дарт Визьмо емыш Зал но фойе тыр вӧлске апельсин зын. Выль ар вуиз, кожаськоды-а? Ӧз, Ижысь гуманитарной лицейлэн дасэтӥез вордскем нуналыз. Апельсин, пе, визез, усто быгатонлыкъёсты возьматӥсь пус. Нош лицейын дышетско ӵапак таӵе пиналъёс. Шоразы учкыса вожъяськод: соос, ӟеч дышетскем сяна, пӧртэм кунсьӧр кылъёсын верасько, эскерон уж нуо, кунгож сьӧры потало. Нош Марина Панчукова понна дуно потэ на лицеистъёслэн эшъяськыса улэмзы. "Ми ваньмы ог-огмес тодӥськом, котькыӵе курсысь, ёзысь мед луом, - шуэ со. - Дышетскымтэ дыръя туж но туж тунсыко ужрадъёс ортчытъяськом, ансамбльын кырӟаськом-эктӥськом. Нош Санкт-Петербурге, Болдиное, Киеве, Финляндие, Англие, Америкае вуылэмъёсты кызьы вераны ик уд тоды - со кыӵе ке выжыкыл кадь". Кызьы бен ваньмыз кутскиз? 1987-тӥ арын малпамын вал школаез лицей карыны. Ӵапак кайта араз Асанын ортче Россиысь авторской школаослэн нырысетӥ фестивальзы. Со бӧрсьы татысь дышетскисьёс ӝуалскизы выль амалъёсын ужаны. Нырысь малпазы коммунар идеяос вылэ пыкъяськыны. Но кӧня ке ар ортчыса, соосты палэнто. 1994-тӥ арын Сорослэн фондысьтыз лицейлы коньдон висъязы. Ортчытӥзы экспертно-аналитической семинар. Лицейлэн ужез умой дунъямын вал. Али дышетӥсьёс тыршо уката ӟечгес. Соос будэто выль даурлэн куронъёсызлы тупась визьмо егит муртэ. Лицейлэн нырысетӥ выпускникъёсыз али асьсэос усто специалистъёс луизы ни. Ваньмыз соос дано дышетскон заведениосын вылӥ тодон-валан басьтӥзы. Но бадӟымъяськонэз уг тодо - шумпотыса пырало яратоно лицеязы, юрттэт ӵекто, визь- кенеш юало. Вордскем нуналэныды, лицеистъёс! О. Никитина, Удмурт университетын дышетскись. Возьмасько Кылбурез И. Пельтемовлэн Крезьгурез Ю. Кузьминалэн Шур сьӧрын нылъёс, пиос шудо, Мон гинэ огнам весь пукисько. Пукисько мон мӧзмыса, Тон сярысь малпаськыса, Малы тон шуид: лыкто? Мыняса кизилиос пишто, Весь монэ, лэся, серекъяло. Мӧзмисько ке но огнам, Тон гинэ весь син азям, Малы шуид: яратӥсько? Кӧлыны толэзь ваське ини, Уй но ӵукналы сётскоз ини. Бен кызьы меда озьы Вераллям кылъёсыдлы Чик ачид уд оскиськы? Шур сьӧрысь нылъёс, пиос кошко, Та дырозь огнам весь пукисько. Шедьтоно кытысь тонэ? Мон сярысь, яратонэ, Я малы-о вунэтӥд? Удмурт кунлы - 80 Анай кыл - мусо кыл Анай кыллы дышетӥсьёс арлы быдэ асьсэлэн бадӟым кенешазы люкаськыло. Таиз ужрад республикамылэн юбилеез азьын ортчиз. Соин ик отын таӵе валтӥсь ужпум сэрттэмын-пертчемын вал: мар лэсьтэмын ни 80 ар ӵоже национальной школаез азинтонъя. Кенешон куинь нунал ӵоже кыстӥськиз. 500 пала делегатъёс пӧлын вал Татарстанысь, Башкортостанысь, Чувашиысь, Марий Элысь, Москваысь но Санкт- Петербургысь куноос. Удмуртиын туннэ 70 пала пӧртэм калыкъёс уло. Озьы соос люкемын кылзыя, угось котькуд нацилэн валтӥсь тодметэз кыл луэ. Вордскем кыл ке утемын, нация но утемын. Кылтэм калык - бырем калык. Та верамъёслэсь пуштроссэс асьмеос берло аръёсы гинэ кадь мургес валаны кутскимы. Но та ужпумез 20-тӥ даурлэн кутсконаз ик юн валазы визьмо удмуртъёс-просветительёс. Анай кылэз, культураез азинтонлы вань улонзэс сётӥзы удмурт калыклэн дано пиосыз И. Михеев, К. Андреев, К. Герд, Т. Борисов. Шимес аръёс, "калык тушмонъёсын" нюръяськон аръёс но мукет пӧртэм ожмаськонъёс чидантэм шуккизы пичи калыкъёсты. Пумен быдтэмын вал удмурт кылын поттэм учебникъёс. 1968-тӥ арын берлозэ печатламын вал удмурт кылын дасям математикая учебник. Национальной школалэн гопо-выро ортчем сюресэз сярысь люкаськемъёслы тодэ вайылтӥз. Г. Васильева - Удмурт Республикаысь калыкез дышетонъя министрлэн воштӥсез. 90-тӥ аръёсы анай кыл школаосамы выль кужымен пыӵаны кутскиз. Та ужез нылпи садъёсын но школаосын нуон понна нимысьтыз национальной тодон-валанъёс сётон концепция кутэмын вал. Но кӧня ке дыр ортчыса, солэн куронъёсыз ӝог азинскись улонлэсь бере кыльыны кутскизы. Анай кылын ужась классъёс, школаос усьтыны мылкыд каризы, удмуртъёс сяна, бигеръёс, поръёс, чувашъёс, немецъёс. Соин ик нылпиосты дышетон шоры мургес учконо луиз. Ярам, табере асьме республикаын калыкез дышетонъя выль концепция кыдытэмын ни - отын национальной компонент шуонлы табере бадӟымгес саклык висъямын. Дышетон удысын азьланезлы чаклам ужпумъёс пӧлы табере пыртэмын этнокультуралы, вордскем кыллы сӥзем люкетъёс. Азьвыл со учкемын ӧй вал. Ярам, туэ Россиысь дышетӥсьёслэн Москваын ортчем ӧтчамазы национальной ужпумъёс сярысь вераськон туж лэчыт ӝутэмын вал. Г. Васильевалэн верамезъя, туэ Калыкез дышетонъя министерство, Правительствоен но Кун Кенешен огкылэ вуыса, программа дасяз гурт школаослы компьютеръёсын юрттон ласянь. Та ужлы коньдон висъяськоз республикалэн бюджетысьтыз. Котьма ке но, национальной школаос выль учебникъёс, пособиос, компьютеръёс ласянь мукет школаослэсь туж бере кылё. Соос возисько чырмыт дышетӥсьёслэн мылкыдзы вылынгес. Национальной школаез азинтыны кужыммы тырмоз-а, ӟеч сюресъёс шедьтомы-а? Рынокен экономика кулэ кароз-а сыӵе школаысь потэм дышетскисьёсты? Национальной школалэн ужез калык фольклорен гинэ уз-а быдэсмы? Та ужпумъёс сярысь люкаськемъёсты юн малпаськыны ӧтиз Кун Кенешысь Наукая, дышетонъя, культурая но егитъёсын ужан политикая ялан ужась комиссилэн тӧроез А. Красильников. Анай кыллы дышетонын умоез шӧдӥське ни. Но ушъяськыны вазь на. Тырмымтэос трос гинэ. Уката ик уй пал ёросъёсын. - Удмурт учебникъёс ласянь туж секыт, - шуэ Балезино ёросысь Эркешово шор ёзо школаысь дышетӥсь Т. Чиркова. - 7-тӥ-9-тӥ классъёслы синтаксисмы ӧвӧл. Диктантъёс но вуж текстъёсъя гожъяно луиськом. Выль учебникъёс, пособиос ми доры туж шуген вуо. Ярам, туннэ тани тодӥм, кыӵе учебникъёс потэмын ни, кудъёсыз дасясько гинэ ай. Табере курыны коть быгатом ини. Кыкетӥ арзэ кивалтӥсько ёросысь удмурт дышетӥсьёслэн ёзэнызы. Секыт йӧтэ. Ярам, туж юрттэ роноен кивалтӥсьмы Анатолий Панфилович Шарипов. Со удмурт кыл понна юн сюлмаськись адями. Посёлокын но табере удмурт кылэз дышето. Но солы интеллигентъёслэн семьяоссы пумитъяськогес. Туннэ та ужрадын вожъяськыса учкисько ӟуч дышетӥсьёслы поттэм книгаос шоры. Языковедъёслы кыӵе гинэ книгаос ӧвӧл! Удмурт дышетӥсьёслы - ӧжытгес. Но коньдонэ ке тырмыт луысал, вань со удмурт книгаосты дышетӥсьёслы басьтысал. Писательёс сярысь видеофильмъёс, пе, дасямын. Кыӵе со усто вылэм, но соосты учкыны, пиналъёслы возьматыны луонлыкъёсмы ӧвӧл. Компьютеръёсмы, ксероксмылы гинэ но школаын ӧвӧл. Егит дышетӥсь Иванова Валентина Михайловна Балезино посёлокын ӟучомем нылпиосты анай кылзылы куинетӥ арзэ дышетэ ини. Со удмурт кылъя урокъёсты нылпи садъёсын нуэ. Сыӵе группаос Балезиноысь, сизьымаз ик нылпи садъёсын усьтэмын ини. Та ужез кык кузя гинэ нуиськом ай. Но тани мар монэ туж паймытэ: малы ке бигер нылпиос, удмуртъёс сярысь урокъёсам мылкыдогес ветло. Удмурт Правительстволэн пуктэмезъя, Ижысь национальной нылпи сад-школа К. Герд нимо национальной гимназилы пӧрмытэмын вал. Татын ваньмыз умой кадь. Книгаослы, пособиослы, компьютеръёслы сокем уг ёрмо. Коллективын быгатӥсь визьмо дышетӥсьёс ужало. Нылпиослы удмуртлык пыӵатонын соос ӵошатскыса сямен Вавож ёросысь Гурезь-Пудга школаысь дышетӥсьёсын ужало. Но гимназиысь дышетӥсьёсты но юн сюлмаськытэ одӥг ужпум: анай-атайёслэн удмуртлыкез ӝутонлы оскытэкгес учкемзы. Солэсь кулэлыксэ соос уг на кадь валало. Зэмзэ но али озьыгес луэ: школаез быдтэм бере, удмурт кыл кулэтэм луэ. Шуд усе соослы гинэ, кин дышетсконзэ удмурт факультетъёсын азьланьтэ. Но вань удмурт нылпиослэн дышетӥсь яке воспитатель гинэ луэмзы уг поты ук. Асьме Конституциын ӟуч но удмурт кылъёс оградэ пуктэмын - соос кыксы ик кун кылъёс луо. Но удмурт кыллэн кулэлыкез (социальной статусэз) улӥын возиське на. Со сярысь ас малпанъёссэ вераз нациосын ужан политикая министр Н. Мусалимов. Калык пӧлын ортчытэм эскерон-юалляськон таӵе лыдпусъёсты шараяз: удмурт семьяосын 40 процентэз гинэ нылпиоссэс удмурт кылын вераськыны дышето, 45 процентэз адямиос удмурт луэмзы сэрен ултӥямез шӧдо. Удмурт школаосты усьтыны коньдон сюроз, но кызьы воштоно удмурт адямилэсь психологизэ? Кылъёс сярысь закон но кутэмын луиз ке, юрттоз меда со удмуртъёслы? Министрлэн верамезъя, сыӵе законлэн инъетэз трос пол эскерем бере дасямын ни. Оло, туэ ик со юнматэмын луоз. Удмуртъёслэн лулпушсы (психологизы) чылкак мукетгес луэ удмурт ёросъёсын. Со ласянь адӟем карымон, кылсярысь, пичи Пурга ёос, Башкортостанысь Янаул, Татышлы, Калтасы, Бурай ёросъёс но мукет. Пичи Пурга ёросын удмуртъёс калыкъёс сярысь 80 процент лыдъясько. Соин ик быдэс ёрос удмуртлыкез ӝутонын ог мылкыдэ пыриськыса ужа. Со сярысь ужрадэ люкаськемъёслы мадиз администрацилэн тӧроезлэн воштӥсез В. Панфилова. Национальной компонентэз уже кутон татын шудон сямен кадь капчиен ӧръяське. Пичи Пурга ёрослэсь зэмос национальной школа кылдытон ӧпытсэ Россиысь Калыкез дышетонъя министерство но вылӥ дунъяз. Кыкетӥ арзэ ини ёросысь школаос пырисько Россиысь школаослэн ӵошатсконъёсазы. Пусйымон соиз но: 80 процентэз дышетӥсьёс - ас палъёсазы вордӥськемын. Национальной школаослэн азинскемзы (ёросын соос 16) меӵак соин но, дыр, герӟаськемын. Ёросын туэ 20-ез дышетскисьёс школазэс зарни медальёсын йылпумъязы - ваньзы ик вузъёсы пыризы. Таяз дышетскон арын ортчем экзаменъёслы дунъет сётоно ке, данакез национальной школаос нылпиосты кык кылын (удмурт но ӟуч) ӟеч вераськыны но гожъяськыны дышетон понна тырмыт уг ужало на. Кык нылъёс гинэ (Алнаш но Кияса ёросъёсысь) Удмурт кун университетэ пырон понна сочинениоссэс удмурт кылын гожтыны дӥсьтӥзы. Та лыдпус вань дышетӥсьёсты малпаськытыны кулэ. Малы дышетскисьёс уг дӥсьто мылкыдзэс но малпанъёссэс анай кылынызы вераны? Оло, удмурт кылъя урокъёсты зэмос узыресь, яркытэсь нуыны ум на турттӥське? Дышетӥсьёслэн ужрадазы трос пол умоен пусъемын вал удмурт тодосчиослэн нимъёссы: М. Гришкиналэн, Т. Владыкиналэн, В. Владыкинлэн, М. Ивановалэн, Г. Никитиналэн, Л. Христолюбовалэн. Соослэн ужъёссы вылэ пыкъяськыса, асьме дышетӥсьёс нылпиослы вуттыны туртто калыкмылэсь историзэ, культуразэ, сямъёссэ. Озьы ик трос тау кылъёс верамын вал "Анай кыл" пособилы (авторъёсыз В. Журавлева но Ю. Байсарова). Одӥгез жаль: малы меда та книгаос вань удмурт школаосы уг вуо? Т. Банникова. Химилы дышетӥсь - спортъя мастер Алигес Ижевскысь Киров нимо паркын бызьылонъя республиканской ӵошатсконъёс ортчизы. Отчы пыриськизы калыкез дышетон но наука удысын ужасьёс. Красногорск ёросысь 11 мурт та ӵошатсконъёсы пыриськиз. Ваньзы ик соос кроссын шаплы бызьылӥзы, нош нырысетӥ интыез басьтӥз Красногорск гимназиысь химилы дышетӥсь, спортъя мастер Ирина Геннадьевна Волкова. П. Николаев. Уй пал кизили Мед луозы ӟечкыланъёс, Люкаськоме ӵош, огинэ. Бен, арлыдмы ӧвӧл ай трос, Дас аресмы гинэ тырме. Газет понна ӧжыт, но со шудо, Капчи ӧй вал ке но ортчем сюресъёсмы. Но ми оскиськомы: эшшо будом. Соин ик ваньдэс ӧтиськом та ӝытамы. Таӵе кылъёсын ас эшъёссэс доразы ӧтё Глазкарын потӥсь "Иднакар" газетын ужасьёс. Зэм, та газет дас ар талэсь азьвыл уй пал кизили кадь ӝужаз Глаз, Яр, Юкаменск, Балезино, Красногорье но мукет ёросъёсысь удмуртъёс понна. Соин кивалтыны басьтӥськиз удмуртлык понна ӟырдыт нюръяськись адями Надежда Константиновна Золотарева. Кӧня ке мурт бордысен кутскыса, коллективын адями 16- озь вуиз ни. Со сяна, газет поттыны мылысь-кыдысь юрттэ 19 внештатной автор. Огъя тыршемен, "Иднакарлэн" тиражез 3000 котыре вуиз. Вуоно арлы Глазкарысь но ёросысь лыдӟисьёс гинэ 1000 экземпляр гожтӥськизы ни. Озьыен, газет зэмзэ но будоз, пушъёз, паськыталоз. Аслэсьтыз покчи эшсэ "Удмурт дунне" ӟечкыла дас аръем юбилееныз. Уй пал калыкмес югдытонын тыршемез куинь, сизьым, дас полэс ӟечен мед берытскоз. Утиське, "луд кечъёс!" Ижевскысь калыкез нуон-ваён транспортын дунтэк ветлэмзы понна туэ сюлэсь уно уголовной уж ӝутэмын ни. Городысь электрокужымен ужась транспортысь эскеронъя службалэн чакламезъя, та лыдпус, кылем арын сярысь, данаклы уногес. Соин ик табере билет эскерисьёсын рейдъёсы потало ни, экономикаын йыружъёсын нюръяськонъя ёзын ужасьёс но. Тужгес но ӵем пумиськыло "пенсионеръёслэн" пӧяськыса лэсьтэм удостоверениоссы, студентъёслэн билетъёссы, мукет документъёс. Алдаськыса дасям проездной билетъёс шер пумиськыло. Н. Ефремов. Сюрес вакчиялоз Ижевскын ӝоген усьтӥськоз троллейбуслэн выль маршрутэз. Со Молодёжной ульчаез герӟалоз керамикалэсь блокъёс поттон заводэн. Маршрут усьтӥськоз, Клубной ульча палась сюресэз выльдыса вуттэм бере. Ужъёс йылпумъяськыны кулэ тол вуытозь. Выль маршрутлэн номерез тодмо ӧвӧл на. Одӥгез гинэ тодмо ни: со ортчоз 10-тӥ маршрутъя ик, но сюрес кӧнялы ке вакчиялоз. Н. Сергеев. Кужмогес ужалоз Россиысь Госсовет 14-тӥ ноябре эскерыны чакла "Уралысь малолитражка" программалэсь пуштроссэ. Кызьы ивортӥз "Ижмаш" акционер огазеяськонысь пресс- служба, со планлы федеральной кужым сётыны чаклаське. Озьы предприятие Россилэн мукет улосъёсысьтыз проставщикъёсын паськытгес ужалоз, луонлык кылдоз уногес автомобиль поттыны. Б. Никитин. 29-тӥ октябре - автотранспортлэн нуналэз Ӵошкыт сюрес, каньыл мылкыд тыныд, водитель! Туала адямилэн улон-вылонэз люкыны луонтэм герӟаськемын мынон-ветлон транспортэн. Нош огдырлы гинэ син азяды пуктэ ай таӵе суредэз: поездъёс дугдӥзы, автобусъёс рейсэ ӧз потэ, троллейбус-трамвайлы электрокужым пытсамын. Шимес нунал! Уйвӧтамы но сое адӟыны медаз кылды. Ойдолэ оскоме ӟечезлы, уката но али, автотранспортын ужасьёслэн нуналзы азьын. Ӵукналы быдэ тодмо сюресъёссы кузя мед ширтозы автобусъёс, дыраз мед вуттозы пассажиръёсты, мед кузьмалозы асьмелы умой мылкыд. Туннэ вераськиськом "Удмуртавторанс" территориальной производственной объединенилэн валтӥсь директореныз С. В. Минеевен. Томатон вылысь: вордскемын 1957-тӥ арын 27-тӥ ноябре Дагестан АССР-ысь Кизляр городын. 1980-тӥ арын йылпумъяз Челябинскысь политехнической институтэз. Егит специалистэз ужаны ысто Удмуртие, Воткинск городэ. Вакчи дыр куспын старший мастерысен будэ автотранспортъя предприятилэн кивалтӥсез дорозь. 1987-тӥ арын Минеевез выжто Ижевске, юнмато "Удмуртавтотранс" объединенилэн кивалтӥсезлы воштӥсе. 1990-тӥ арын - валтӥсь инженер, 1997-тӥ арысен туннэ нуналозь - валтӥсь директор. Пусъемын "Почётный автотранспортник" пусэн, сётэмын "Удмурт Республикаысь но Россиысь транспорт удысын сӥё-дано ужась" ним. - Сергей Васильевич, тӥляд праздникты ортче республикамылэн бадӟым юбилеез азьын. Шӧдӥське-а солэн вуэмез коллективды вылын? - Котькудӥз праздник автотранспорт вылын юн шӧдӥське, ӵапак та нуналъёсы трослы йылэ мынӥсь-ветлӥсьёслэн лыдзы: огез дораз бертэ, мукетыз куное мынэ. Водительлэн ужез - пассажирез дыраз вуттон. Шуг-секытъёсын берло дыре ӵемгес ке но пумиськылоно луэ, шумпотыса пусйисько: ми утьыны быгатӥм вань маршрутъёсты, одӥг гуртэз но, одӥг районной центрез но автобустэк ӧм кельтэ. Нош автобус республикамы понна огез валтӥсь транспорт луэ. Чугун сюресъёс, шур кузя мынон- ветлон, жаляса верано, асьме дорын туж ичи инты басьто. - Ватонэз ӧвӧл, берло аръёссэ пассажиръёслэн лыдзы трослы кулэсмиз. Таин сэрен "Удмуртавтотранс" ыштонъёс уг адӟы-а? - Югдур быдэс странаын огкадь, асьме дорын гинэ ӧвӧл. Удмуртиын тыршиськом на билет дунъёсты улӥынгес возьыны. Мукет интыосын городын мынон-ветлон 2 манет 50 копейка но солэсь ятыр сылэ ни. Юрттэ Правительство, Кун Кенеш. Таяз арлы бюджетэн чакламъя огъя кулэяськонъёсмылэсь 82 процентсэ ас вылазы басьтӥзы. Нош кылемзэ потто автопредприятиос, груз ворттон чотын. Таиз уж объединение понна но оглом пайдаен берытске. Озьы ке но, солэн бадӟым люкетэз кошке эстӥськонлы, воштос ёзъёслы. Кин-о малпаз, бензин нош ик сокем дуноялоз шуыса? - Котьма ке но, Ижевскысь ульчаосы туэ гужем вуизы ӵыж выль автобусъёс... - Туэ ар ӵоже басьтыны быгатӥм 63 единица техника, со пӧлысь 23-ез - автобус. Солы коньдон люказы автотранспортъя предприятиос. Туж секытэн ке но, шыръяны быгатӥзы. Объединениея оглом ке верано, та вакытэ калыкез нуонын-вайонын ужа 980 автобус, берло 6 ар куспын автопаркмы кулэсмиз 200-лы. Тужгес но ӟеч дыръёсы "Удмуртавтотранс" возиз 1300-1400 автобус. Али, сомында техника басьтон понна, кулэ 700 миллион манет. Кин сомында коньдон сётоз? Соин ик Кун Кенеше вазиським, вуоно арлы 140 миллион ке но висъяны курыса. Оскиськом, депутатъёс шуг-секытъёсмес валалозы шуыса. - Сергей Васильевич, праздник нуналады но водительёс вазь ӵукна ик сюрес вылэ потозы, гуртазы вуозы бер ӝыт гинэ. Ма соослы сӥзьысалды? - Ӵошкыт сюресъёс, каньыл мылкыд, юн тазалык. Котькудӥзлы мед кылдоз вылэм выль автобусэн, ӟеч техникаен ужаны. Соку ӧжытгес луозы шуг-секытъёс но пурысь нуналъёс. Вераськиз Л. Медведева. С. В. Минеев. Туспуктэмез В. Камашевлэн. Вордскемзэс та нуналъёсы пусъё но пусъёзы Чулков Виктор Иванович - Кун Кенешысь пресс-службаен кивалтӥсь; Васяев Александр Иванович - Удмурт Республикаысь кинофондлэн валтӥсь директорез; Салтыков Анатолий Иванович - Иж городлэн мэрез. Серемес верос Доллар Дарья Ой, та Лёгор, Лёгор, веник куар кадь бордэ лякиське. Мытэм кырӟанзэ ӧд ке азьланьты, уй но нунал ӟуроз: - Дарья, а Дарьюш, городэ пота вал. Доллар бадӟым коньдон шуо, быдэс дуннелы эксэй. Пенсимес вошты вал со вож бумагаослы. Дуннеысь самой йӧно коньдонэз адӟытэк, пу шыкысэ выдэм уг пот вал. Пота, пота... Бускель Онись дорын кожа, лэся, город. Пыдъёсы куашкан калэ вуэм кенер кадесь. Дас метр вамышъяно ке, ӝыны нуналлы диван вылэ урдоно луэ. Лёгорлы пумит кӧня ке ӵыжаськи ик: - Ма, со 500 манетэныд астэ миллионер-а мар-а кожаськод? Со вож бумагаослы куашкам лавкаысьтымы спичка-а, мар-а басьялод? Доллар эксэй ке, асьме магазинэ вамыш но лэсьтыны кепыралоз со. Но маза ӧз сёт ни. Уз но сёт. Сямыз укыр ваменэс. Парсьпимес, ошпимес, кык ыжъёсмес вандӥз но вань поттэм коньдонэн городэ ыстӥз. Гур вылын пуке но ассэ депутат малпа, лэся. Пумит луыны выри ик на: - Лёгор, мынам со доллар шуонзэс адӟылэме ик ӧвӧл. Кытын сётъяло но уг тодӥськы. Город ке кузь? Уйзэ вокзалын-а, мар-а кӧлом? Нош сузязы ке? Солы мар. Гур вылысен указ вылэ указ сётъя. Нош быдэсъясько соосты мон: ужась адями. - Дарьюш, нёжто вож коньдонэз уд тодма? Укно вылад будӥсь садэд кадь вож со. Нош вылтусызъя?.. Тямысэз тодӥськод-а? Кык сушкаез артэ кар но тямыс луоз. Нош сушкаослэсь огезлэсь огпалзэ, мукетызлэсь мукет палзэ быдэн ӝыны си но, ӝыныё тямыс луоз. Тӥни со ик доллар. Сӥль ошылон курикмы но быдэс со кадь. Вылаз кык ньӧр понӥд на ке, кисьтэм-басьтэм доллар. Мынод, кытчы-о пырод. Пельёсаз шуба вурылэмын, котькӧня пумитъяськы. Ай, вылаз ик, со доллар шуонзы 25 поллы, пе, дуногес. Кин-о ятыр коньдонлы пумит? Лёгорелэн верамезлы пумитъяськисько ке но, кылзӥськытэк уг луы. Со вылӥынгес пуке, кеньырез но пӧсь азьын золгес пӧзе. Нырысь ик кускерттон вури. отчы вань коньдонме тыри. Губияны ветлон рюкзакме кутӥ на. Зор-котлэсь но ӟеч маке, лушкаськисьёслэн но син улазы уз йӧты. Лёгоре шуиз на: - Дарьюш, городын самой чебер магазинэ пыр. Эн кепыра. Керпотондэ гур азь палад кельты. Озьы ик кари. Туж ӟеч магазинэ пыри. Выжзы чиля, борддоръёсын синучконъёс. Бигер колошиме ӧс доры кыли, бодыме ӧс сьӧры ватӥ - со ведь мынам машина сё таки. Кышъям носкиосме кисыосам ваткай. Чутышак отделэ вамыштӥ но кык сушка басьтӥ. Продавец быльк! шорам учкиз но ымзэ усьтыны ӧз дӥсьты. Возьдаськиз, лэся. Нош мынам пигонэ но ӧз вырӟы. Пукисько, сушка сиисько. Одӥгез йӧно мадам дорам лыктӥз но горд кушманэн зырам ымдуръёсыныз юа: - Песяй, мар-о пукиськод? - Доллар лэсьтӥсько. Маке юаны шуыса ымзэ усьтэм вал но, гуньдӥз. Я, умой, мыным трос адӟись кулэ ӧвӧл. Эшшо кусме чигтыса кельтозы. Сием сушкаме артэ кари но тёпак касса вылысь ӝыныё тямыс кадь луиз. Кык чиньыме артэ кари на, кисьтэм-басьтэм доллар. Продавец доры конгыльтӥ: - Дыдӥе, хелло! - Ӟечбур, песяй. - Рубльёсме зелёненькими воштоно вал. Юрдӥсь мурт сямен ымнырзэ кисыртӥз но нёжъяса юа: - Дас манеттэс-а, мар-а? Йыры курен шер-тур йырсие но выллань ӝутӥськиз. Йыромем тури. Возьмато али мон тыныд дас манет. Гольык киноосын сямен кылиськыны кутски. Огзэ кофтаме кыли, кыкетӥзэ, куинетӥзэ... Ныллэн син табаосыз кымесаз вуизы, ӵужонъёсыныз хлоп- хлоп! каре. Ай та ма гинэ, возьмато мон тыныд дас манет но, еротика но. Гудыри медаз шуккы вал тонэ, гыдыке. Парсьме, порозпиме, кык ыжъёсме, кык пенсиме - куамын штука 100 манетъёсме - узыръёс сямен шлач! азяз куштӥ. Дыдӥе шумприч гинэ коньдонме лыдъяны кутскиз. То-то, шуисько. Сылӥсько: кӧня меда вож бумагаоссэ сётоз? Лёгор 25 поллы тросгес луоз шуиз ке, рюкзак тыр, дыр. А ӧз ке тэры? Я, огзэ юбкаме кылё, огпалзэ керттыло но пуйы луоз. Губиямысь но озьы ӵем бертылӥсько. Рюкзаклэсь ымзэ усьтӥ но касса борды кари. - Пожалуйста, песяй. Учкисько но, со така кымес,.. монэ пӧяны ӧдъям... Рюкзак тыр интые, дасо пала гинэ бумага сётэ... Кукъёсы шальтразы, пӧсектӥ. Таба вылэ пуктӥзы, кожалод. Я, сутскыны ӧй вуы, вылтӥм жальыр ву вияны ӧдъяз. Олокытысь пиньгес куарае потӥз на, кутски ук магазин тыр кесяськыны: - Лёгор, тарказы, тарказы!.. Со дырысен город шуоназы уг ни ветлӥськы. Грамотаед ке ӧвӧл, сыӵе визьмо ужъёсын вырод-а? Доллареп валан понна институтъёсты быдтоно, дыр... Со дырысен монэ Доллар Даръя гинэ шуо на. Тӥни озьы, городэ аслым кушем ним утчаны ветлӥськиз. Эмма Загребина. Шӧкыч Одӥг номеро палатаын Ӧс усьтӥськиз но, Иван Кокорин аслаз синъёсызлы ӧз оскы. Со азьын гондыр кадь таза мугоро воргорон, Иванлэн кемалась тодмо эшез Емельян Атасов. - Кемалась-а татын? - Кокоринлэн нырысь юанэз вал со. - Кызьы шуод тыныд, витетӥ нуналзэ ини койка пружинаос урдлыосме лыдъяло. - Я, выжыкыл вераса ум улэ, пуксём но сумка пушме эскером. Кемалась аръёсы сямен ик ваньзэ шори люком. Ма но вайымтэ Иван, шат курег йӧлэз ӧвӧл. Тумбочка вылэ поттӥз пыжем курег, ӵынатэм колбаса, кутэм нянь... - Эк, - шуиз Иван Кокорин, - ӧжытак чыртыез бичатысьсэ кулэ на вал. Ӧй дӥсьты вайыны. Тӧдьы халатэн ветлӥсьёс шӧдӥзы ке, дунне берытскоз. Но тон эн куректы, Емеля, та "пытсэтысь" потӥм ке, кылемзэ но, вуонозэ но ӵошкатом. Тылын но, вуэн но люкыны луонтэм кык эшъёс ну сиськизы бен. Кухняысь сётэмзэ ӧз но зынъялэ. Ӝытазе соос коридорысь телевизор дорын артэ пукизы. Шара вераськемысьтызы висисьёс трос пол алӥзы ини. Оло уг кыло, оло ӧчкаро таосыд. Соин уг тырмы ай, телевизорез позыръяло - одӥг канал но уг яра, ма, пе, со ыбылӥськисьёсты, гольык беръёсты учкод. Чиданзы бырыса, висисьёс палатаосазы кошко, кык эшъёсты лек кылъёын шобыръяса. Кокорин но, Атасов но уг кыло кадь сое. Пинал медсестра кык пол но, куинь пол но алӥз ини телевизор азьын пукисьёсты, шутэтскыны выдэм висисьёс йыркуръясько ини, пе. Эшъёслы мар ке шат. Бератаз Атасов вушйылыны кутскиз,но эшезлэсь зулемзэ кылзэ ик. Сестралэн чиданэз быриз, лэся, телевизорез кысӥз: - Иземды уг поты ке, коть уйбыт пуке. Кокорин но Атасов кема супыльтӥзы на. Ма гинэ тодазы вайытэк кылиз меда? Егит дырзэс но, мӧйымыны кутскем аръёссэс но ёзэн-ёзэн сэрттӥзы-пертчизы. Уйшор бере ини палатаязы гонӟыртӥзы. Кокрин соку ик соргетыны ӧдъяз, оло, быдэсэз одӥг номеро палата зурка. Атасов нырысь чидатскиз. Зэм, йыркурзэ вормытэк, одӥг урдэсысьтыз мукетаз берыкъяське. Ма, мукетъёсыз но висисьёс кытын кыллемзэс эскеризы, лэся, койкаоссы кежыр-куажыр каро. Бератаз ӧз вормы ини ассэ Атасов. - Кокорин! - аслаз куараезлэсь ачиз ик кышкаса кеськиз со. Палатаын чал-чал, нокин уг вазьы. - Кокорин! - уйшор ортчиз ини, эн чоръя, - выльысь куара сётӥз Атасов. - Мар-о зулиськод, кӧлыны уд сётӥськы, - изем куараен лек вазиз Кокорин. - Пилемтэм шорысь гудыръяськод, шуисько, астэ ӧжыт ке но шӧдыны кулэ. Кокорин койка вылаз ӝотрак пуксиз, ымаз тэронтэм лек кылъёс вераз но, берен выдӥз. Одӥг-кык минут ортчиз-а, ӧз-а со нош ик соргетэ ини вал. Атасов ӧз чида Кокоринлэсь нырзэ чепыльтӥз. - Тон озьы-а, ма? Эшшо ке эш шуиськод астэ, - кылӥськиз Кокоринлэн умйылтӥз шиетэмез. Эшезлэн куаретэмез пумитэ Кокорин ӵукна сьӧд но, тӧдьы но ӧз вазьы. - Оло, пыӵ куртчиз тонэ? - юаз Атасов, но Кокорин ымаз ву ӟузем кадь улӥз. Со куспын Атасов свитерзэ дӥсяны малпаз но, молниез мар ке луэм. - Тон таӵеослэсь кылзэс тодӥськод кадь, оло, юрттод? - куриз Атасов. - Мон "гудыръяны" гинэ мастер - палэнтӥз Кокорин эшезлэсь мычем кизэ. Со дырысен эшъёс ӧз вераське ни. Больницаысь потыкуз, Кокорин Атасовлы кизэ но ӧз сёты. В. Смирнов. Лидия ЧЕРНОВА Дугдэ! Тырмоз... Дугдэ! Тырмоз калыкез пӧяны. Кӧс кылъёсын кӧяны-вӧяны. Ваньмыз луиз ни та ӧскымон. Ма сётӥды калыклы окмымон? Дугдэ! Тырмоз гочатыны калыкмес! Реклама сюдоз-а сютэм нылпимес? Малпаське ай сазь-сазь йырын, Мар йырйиськиськоды Кун Думаын? Оло, интыды-а луиз ни ӟоскыт, Яке уждунды потэ-а ӧжыт? Малпаське, сюлмаське калык но сярысь. Собере ог-огдэс пуре бӧрысь. Флаг ӝутэмын нянь будэтӥсь понна Каракулино ёросын туэ нянь будэтӥсьёс ӵошатскыса, ог-огзэс ортчыны турттыса ужазы. Комбайнеръёс пӧлын самой кужмоез луиз Павел Васильевич Самарин - одӥгез устоез нянь будэтӥсь. Со кутсаз "Нива" комбайнэн 7799 центнер ю тысь. Ёрос администрацилэн юртэз дорын али но горд флаг тӧла, со сӥземын ЪЪИИ партсъезд нимо колхозысь нянь будэтӥсьёслы, нырысь ик - П. В. Самаринлы. П. Николаев. Шӧкыч Электроэнергиез кысо! Гуртоос ыж трос вордо, тырозы. Шонер вераськод. Депутатъёслэсь пенсизэс будэтоно! Бен, бен, юэмед потӥз ке, сюрс долларен гинэ пыр уд поты. Сюрес ӧте выль инвисъёс доры Удмурт Республикаысь кырӟанъя но эктонъя "Италмас" ансамбль, улонысьтымы нокыӵе шуг-секытъёс шоры учкытэк, ужа но ужа. Нуналлы быдэ ортчыло репетициос, дасясько выль номеръёс. Зэм, концертъёсын коллектив али ӧжытгес пота. Мугез вератэк но валамон, дыр. Но коллективлэн кивалтӥсез Россиысь но Удмуртиысь калык артист Анатолий Мамонтов азьланезлы осконэн улэ. Югдур пумен умой пала воштӥське, ваньбур поттон ӝутске. Озьыен, калыклэн коньдонэз но луоз. Но искусствотэк адями куасьмоз, быроз. Со одно ик концертъёсы, спектакльёсы кыстӥськоз. "Италмас" калыкез пумитаны котьку дась. Туэ, 4-тӥ ноябре, Удмуртия кунлык басьтэмез дырысен 80 ар тырмонзэ пусъёз. Та дано нуналлы коллектив бадӟым концерт дасяз. со ортчоз 29-тӥ октябре "Металлург" культура дворецын. Кыӵе сюлмаськонъёсын улэ туннэ "Италмас"? Газетмылэн авторез Галина Романова кенеше ансамбльлэн кивалтӥсеныз Анатолий МАМОНТОВЕН. *** - Коллективады одӥг семьяын кадь уло-ужало пӧртэм арлыдъем кырӟась-эктӥсьёс. Тупамтэос уг луыло-а? - Котьмаиз луэ. Мынам ведь артистъёсы ог тямыстон пала. Котькудӥзлэн улонэз аслаз. Кудӥзлэн со тупамын, кудӥзлэн туж секыт... Ми дорын ужало зэмос профессионал луон понна. Соос весь дышетско: сцена вылын но, репетициосын но. Дорамы, шуыны луоз, куинь поколение ужа: мӧйыос, шоро-куспо арлыдоос но егитьёс. Соос ог-огзылэсь адӟем каро. Семьяын сямен ик, зэмос коллективын озьы ик луыны кулэ. Песятай-песянаез но, анай-атаез но, нылпиосыз но ӵош мед улозы. Куддыръя тупамтэос кылдыло ке но, ӵош радъяны тыршиськом. - Котьма ке но, бадӟым талантлы эрик но паськытгес кулэ. Мынам чакламея, калыклэн тужгес но тросгес адӟемез потэ Евгения Медведевалэсь, Людмила Ахтариевалэсь кырӟамъёссэс. Нош соос сцена вылэ потоно луо кык-куинь гинэ кырзанъёсын. Кызьы тӥ малпаськоды, быгатысалзы-а соос Валентина Пудова сямен огназы ужаны? - Быгатысалзы, дыр. Но соос мукет луысалзы ни. Ансамбльлэн программаез - со ведь конвейер кадь. Татын эктӥсьёсты но, хорез но, солистьёсты но поттоно. Соин одӥг муртэ гинэ тросгес поттаськод ке, конвейер (программа) дугдэ. Залын учкисьёс позыръяськыны кутско. Ансамбль возиське костюм, ритм, движение бордын. Часысь шестерняос сямен, ваньмыз ӵош, ог-огзылы юрттыса мед ужалозы. - Тӥ кузпалэныды, Леонора Викторовнаен, вань улондэс культура удысын ужаськоды ини, калыклы трос шумпотон кузьмады. Нош асьтэлы со мар сётӥз? - Мон дас куинь аресысен культура удысын ужаны кутски, ансамбльын тани - ньыльдон ар. Леоноралэн но озьы ик. Со, Москваысь хореографияя училищеез быдтыса, куамын сизьым ар сцена вылын эктӥз. Со сяна, эктонъёсты дасяз-пуктылӥз, вылӥ профессионал- балетмейстер но вал. Али но та удысын ик ужа. Кытчы ке мыныкумы, Леонораез юало. Малы, пе, со сьӧрады ӧвӧл. Милям, пе, со кумирмы вал, солэсь эктыны дышетским. Нош мар сётӥз мыным культура удысын ужаме? Ансамбльмы али зол, пыд йылаз йыг-йыг сылэ. Котькуд тренерлы, аслаз дышетэм спортсменэз вормонъёс басьтэ ке, солы со шумпотон сётэ. Мынам но озьы ик. Вань кужымме, быгатэмме мон аслам нылпиелы, "Италмаслы", сётӥ. Табере со быдэ вуиз, возьдаськытэк калыке потыны быгатэ. Со-а шумпотон ӧвӧл?! - Кивалтӥсьёс культура шоры азьвыл но чиньы пыртӥзыгес учкылӥзы, табере нош со сирота выллем куштэмын. Ма, культура гинэ шат, дышетон, эмъян удыс но аналтэмын. Кызьы тӥ малпаськоды, малы со озьы луэмын? - Мыным али жаль пото врачъёс, дышетӥсьёс. Больницае мынӥськод ке, сюлэмез пуртэн вандо кадь. Собере дышетӥсьёсты учкиськод но, нош сюлэм бугырске: дӥсьсы огшоры, ма, вамыштэмзы ик мукетгес - востэмгес луэмын. Нош вӧзысьтызы тросэз дышетскисьёссы кулэсь курткаосын, дуно шубаосын, чайы изьыосын йӧн-йӧн ветло. Культура сярысь ке верано, мон ноку ик капчи ӧй улы. Асьмелэн городмы, республикамы военной, оборонной промышленностез азинтӥсь. Соин но, дыр, культура шоры чиньы пыртӥзыгес учкылӥзы. - Мон сямен, али но со озьыгес кошке. Кун Думаын пуко заводъёслэн, бадӟым фирмаослэн директоръёссы, му вӧй удысысь кивалтӥсьёс. Соос культуралэсь туж кыдёкын. - Соос пӧлын но вань валасьёсыз. Уродзэ вераме уг поты. Ӝожтӥськыны кутскид ке, пумаз-йылаз уд вуы, зулись луод, ужед но уз азинскы. Соин ик мон ваньзэ ас вылам басьтӥсько, тросгес ужаны тыршисько. - Тӥ ведь татын огшоры кивалтӥсь гинэ ӧвӧл: музыкант но, режиссёр но. Мынам йырам уг тэры, кызьы сомында ужез бергатыны, сюлмаськонэз чиданы быгатӥськоды? Ведь тӥляд пельпум вылады - куатьтон куинь арес ни. Нош ымнырды сыӵе ик задор, синъёсты чиляло, мугордэс капчи возиськоды. Шорады учкыса, улэм потыны кутске. Собере ачид шоры палэнысен учкыны кутскиськод: улонад тросэз нуналъёс юнме зульыса, ӝожъяськыса уг ортчо-а? Нокинэ янгыш карытэк, тӥ сямен ужано но ужано, дыр. Нош вакыт, история ачиз интыяз пуктоз, кин янгышаз, кин тросгес ӟечсэ лэсьтӥз... Табере мынам тодэм потэ вылэм туала удмурт эстрада сярысь малпандэс. - Татын нырысь ик тросгес мед ужалозы вылэм талантъёс, профессионалъёс. Нош туала удмурт эстрадаысь кырӟанъёс туж ӵемысь мукет калыкъёслэсь асэстэм кадь кылӥсько. Малы со озьы луэ? Эстрадаын ужасьёс дышетскемын ӧвӧл. Ведь зэмос музыкальной литератураен ӟеч-ӟеч тодматскыны луэ вылӥ дышетсконниын гинэ, консерваториын, шуом. Соин ик асьмелэн эстрадаысь артистъёсмы тросэз йыромо. - Одӥг тодосчи шуиз, калыкен, пе, кивалтыны кулэ философ. Со, пе, дунне шоры котыр ласянь эскериськыса-чакласькыса учкыны быгатэ, кизили дуннелэсь катъёссэ (законъёссэ) шӧдэ-вала, адямиез но инкуазез люконтэм гердэ герӟа но йылпумъянъёс лэсьтыны быгатэ. Асьмелэн адӟонъёсмы, курадӟонъёсмы, пе, пото кивалтӥсьёслэн ас пыд азьзэс, ас кисызэс гинэ адӟеменызы. - Таиз туж зол верамын, зэмзэ но философ синмын учкыса. Но мон огшоры гинэ тазьы валэкто: балетмейстер, шуом, выль эктон пуктэ но солэн со ужез пӧрмымтэ, нокинлы но со уг яра. Ваньмыз керӟегъяськыны кутско: ачиз но балетмейстер, артистъёс но, учкисьёс но, администрация но. Артистъёс асьсэды янгыш карыны кутско - ӧм, пе, быгатэ эктыны, учкисьёс - ӧм валалэ шуыса, администрация - ужаны ӟеч луонлык ӧм кылдытэ, шуо. Но ведь вань янгыш кивалтӥсь-пуктӥсь балетмейстер бордысь потэ, со ужзэ йылаз-пумаз вуттымтэ. Политикаын но сыӵе ик. Нырысь ик, кивалтӥсез калык медаз адӟы-шӧды. Со калыкез мед гинэ вӧялоз, мылкыдзэ ӝутоз, нош ужаны, кызьы-мар карыны калык ачиз тодоз-валалоз. Тани мынам но ужам: аристъёсы ваньмыз быгатӥсесь, соослы ӟеч кыл, капчияк верам, пичияк индылон гинэ кулэ, кылемзэ ваньзэ асьсэос лэсьто. политикаын-а, культураын-а - пӧртэмез ӧвӧл. - Али асьмелэн котькыӵе удысэз басьты - отын одно нырысь интые политика потэ. Огшоры выж миськисьысен министрозь политикаен тунсыкъясько. А.М. Со туж урод. Милям оркестрысь музыкантъёс тазьы шуо: дирижёр, пе, сыӵеез умой, кудӥз шудыны уг люкеты. Оркестрын шудон ӝоглыкъёс сюрс пумо, соос пӧлысь одӥгзэ гинэ, туж кулэзэ, шонерзэ шедьтыны кулэ. Дирижёр сое шедьтэ ке, со ини зэмос быгатӥсь мастер. политикаын но югдур сыӵе ик. Валтӥсь политик вань калыклэсь кыӵе "ӝоглыкен" улэмзэ валаны-шӧдыны кулэ, но соослы со "шудыны" медаз люкеты. - Асьтэлэн политикае пыриськемды уг поты-а? Раймонд Паулс но, Иосиф Кобзон но отын ужало ук? - Уг, уг поты. Пинал дыръям мон дас вить ар ӵоже асьме дорын депутатын ужай. Но мон туала политикъёслы культура удысысь индылӥсь, юрттӥсь луыны быгатысал. Малы ке шуоно, культура удысысь законъёсты тодытэк-валатэк, соос туж трос янгышъёс лэсьто. Ми кадьёслэсь кылэм-адӟем уг каро, уг юало-верало. Котькудӥз ассэ гинэ визьмоен лыдъя, нош калык курадӟе. - Нош мар шуысалды нылкышно политик сярысь? - Соосты нимысьтыз висъяме уг поты. Тани мыным туж яра Валентина Матвиенко, Мадлен Олбрайт. Нош Алла Памфилова уггес тупа кадь потэ. Политиклы чурытгес луыны кулэ. - Лыдӟисьёсмылэн тодэмзы потоз кузпалды сярысь но. - Леонора Викторовнаез ваньмыз тодо. Соин ми куатьтон куинетӥ арысен ӵош улӥськом ни. Пумиським музыкальной татрын, "Наталь" операез пуктыкумы. Со отын Москваысь хореографияя училище бере балетын ужа ни вал. Мон Леоноралы бадӟым тау карисько "Италмасын" ужамез понна. Со ведь туж трос эктӥсьёсты будэтӥз. солэн дышетэмъёсыз пӧртэм премиослэн лауреатъёссы луизы. Кылсярысь, Любовь Кунакова, надежда Рогозина - международной конкурсъёслэн лауреатъёссы. Ма, милям ансамбльысь вань эктӥсьёс - солэн будэтэмез. - Вань улондэс сюрес вылын ортчытӥськоды ни. Ӧз на-а акыльты? Яке со, вуюись выллем, весь дораз ӧте, выль инвисъёс доры чортэ? - Вуюись выллем - дораз ӧте. Ньыльдон ар ужасько ини "Италмасын". Со пӧлысь кызь арез сюрес вылын ортчиз, шуыны луоз. Тани али шергес потаськом ни но, шӧдӥсько, артистъёсы но сюреслэсь мӧзмо. - Сюрес вылэ потыны али бензин ласянь но, транспорт ласянь но секытгес луиз, дыр? - Секыт ке но, амал шедьтӥськом, потаны тыршиськом. тани алигес одӥг аре Башкириысь удмуртъёс доры куинь пол ветлӥм. Соос туж ярато милемды, коньдон но шедьто. - Азьланяз кунгож сьӧры кытчы мыныны малпаськоды? - Нокытчы но ум. Францие ӧтё, но ужпум коньдон борды пыкиське, асьме Правительствомы коньдон висъялоз шуыса оскон ӧжыт. Бюджетын угось пыртэмын артистъёсмылы уждун гинэ сётыны, отӥзэ аслыд бызьылоно луэ. Костюмъёс вужмо, музыкальной инструментъёс сӧрисько, пыдэ пононъёс пасясько, кесясько, куашкало. Соосты возьыны коньдон асьмелы утчано луэ. - Тӥледыз, Анатолий Васильевич, умой тодо ук, спонсоръёс, узыр адямиос юрттыны пумит уг луо, дыр? - Ӧвӧл, удмуртъёслэн соос уз но луэ, дыр. Пичиен-пичиен, кызьы но озьы кӧня ке шедьтӥськом ик но, "вуж дэремез кышъяны" гинэ со тырме. - Тау, Анатолий Васильевич. Ӟечезлы осконмы медаз быры. - Озьы мед луоз. В.Беломорскихлэн туспуктэмъёсыз. Нырысетӥ президентлы ӟечкыланъёс Удмурт Республикаысь Кун Кенешлэн Тӧроезлы А.А.волковлы та нуналъёсы уно ӟечкыланъёс вуо. Сое республикамылы президентэ быръемен валче, адямиос мур оскемзэс верало шаерамы экономика но улон-вылон удысъёсын ӟеч воштӥськонъёслы. Александр волковез президентэ быръемен ӟечкылазы: Россия Федерацилэн президентэз В.Путин, Правительстволэн Тӧроез М.Касьянов, солэн воштӥсез В.Матвиенко, Федерацияя Советлэн кивалтӥсез Е.Строев, Россия Федерациысь Кун думалэн кивалтӥсез Г.Селезнев, Россиысь Лыдъян палаталэн кивалтӥсез С.Степашин. Федерациысь министерствоослэн но ведомствоослэн кивалтӥсьёссы: Кунсьӧр кусыпъёсъя министр И.Иванов, югдурез утёнъя министр В.Рушайло, ужъя министр А.Починок, культурая министр М.Швыдкой, вытъя полицилэн федеральной службаезлэн директорез В.Салтаганов, Пенсиосъя фондлэн правлениеныз кивалтӥсь М.Зурабов, Россиысь ож тӥрлыкъя агентстволэн директорез З.Пак, АРКО-лэн валтӥсь директорез А.Турбанов но мукетъёсыз. Мукет кунъёсысь вуэм ӟечкаланъёс Беларусь Республикалэн Президентэз А.Лукашенко, Венгрия Республикалэн Россиысь посолэз Эрнё Кешкень, Чехия республикалэн Россиысь советникез Франтишек Масопуст. Удмуртилэн нырысетӥезлы президентэзлы озьы ик ӟечкыланъёс ыстӥллям Кун думалэн депутатъёсыз: промышленностья, лэсьтӥськонъя но наука удысысь технологиосъя комитетлэн кивалтӥсез Ю.Маслюков, экономика ужпумъёсъя но ужбергатонъя комитетлэн кивалтӥсез С.Глазьев, "Регионы России" депутат группалэн кивалтӥсез О.Морозов, "Единство" фракцилэн кивалтӥсезлэн воштӥсез Ф.Клинцевич, Россиысь Аграрной партилэн кивалтӥсез М.Лапшин, депутатъёс А.Билалов, А.Коржаков, Р.Еаклиев, А.- В.Ниязов, В.Коптев-Дворников но мукетъёс. Федерациысь улосъёслэн кивалтӥсьёссы: Москвалэн мэрез Ю.Лужков, татарстан Республикалэн Президентэз М.Шаймиев, Татарстан Республикаысь Кун Кенешлэн Тӧроез Ф.Мухаметшин, башкортостан Республикалэн Президентэз М.Рахимов, башкортостан республикалэн премьер-министрез Р.Байдавлетов, Чуваш Республикалэн Президентэз Н.Фёдоров, Калмыкия Республикалэн президентэз К.Илюмжинов, Мордовия Республикалэн Тӧроез Н.Меркушкин, Мордовия Республикалэн Кун Собраниезлэн Тӧроез В.Кечкин, Мордовиысь Правительстволэн Тӧроез В.Волков, Кабардино-Балкария Республикалэн Президентэз В.Коков, Дагестан Республикаысь Кун Кенешлэн Тӧроез М.Магомедов, Кемерово областьлэн губернаторез А.Тулеев, Свердловск областьлэн губернаторез Э.Россель, Самара областьлэн губернаторез Г.Игумнов, Томск областьлэн губернаторез В.Кресс, Саратов областьлэн губернаторез Д.Аяцков, Москва областьлэн губернаторез Б.Громов, Ленинград областьлэн губернаторез В.Сердюков, Тюмень областьлэн губернаторез Л.Рокецкий, Курган областьлэн губернаторез О.Богомолов, Киров областьлэн губернаторез В.Сергеенков, Челябинск областьлэн губернаторез П.Сумин, Оренбург областьысь администрацилэн Тӧроез А.Чернышев, Коми Республикаысь Кун Кенешлэн Тӧроез В.Торлопов но мукетъёс. Бадӟым предприятиослэн, инвестициосъя но банкъёсъя структураослэн кивалтӥсьёссы: "Газпром" ОАО-лэн правлениезлэн кивалтӥсез Р.Вяхирев, "ЕЭС России" РАО-лэн правлениезлэн кивалтӥсез А.Чубайс, "Межрегионгаз" ООО-лэн валтӥсь директорез В.Никишин, Россбербанк правленилэн кивалтӥсез А.Казьмин, "Группа "Альянс" ОАО-лэн Президентэз М.Бажаев, "ОНЭКСИМ-Банклэн" президентэз М.прохоров, "Лукойл" НК-лэн президентэз В.Алекперов, "Сиданко" НК-лэн президентэз Р.Шеппард, "Центральная топливная компания" ОАО-лэн правлениезлэн кивалтӥсез Ю.Шафраник, "Московская нефтяная компания" ОАО-лэн президентэз Ш.Чигиринский, "Автоваз" АО-лэн директорезлэсь ужзэ быдэсъясь Н.Ляченков, Набережные Челны городысь "Завод микролитражных автомобилей" ОАО-лэн валтӥсь директорез В.Каюмов, "Уфимское моторостроительное производственное объединение" ОАО-лэн валтӥсь директорез но мукетъёс. Республикаысь кивалтон ёзъёсысь: Удмурт республикаысь Правительстволэн Тӧроез Н.Ганза, Кун Кенешлэн депутатъёсыз, Удмуртиысь Правительстволэн членъёсыз, Ижевск, Воткинск но Глазов городъёслэн мэръёссы А.Салтыков, В.Фридрих но В.Перешеин, Можга администрацилэн тӧроез И.Семенов, городъёсысь но ёросъёсысь калыкен быръем ёзъёслэн кивалтӥсьёссы, администрациослэн тӧрооссы, военной комиссаръёс, воинской частьёслэн командиръёссы. Гурт удысын но промышленной предприятиосын ужась коллективъёслэн нимынызы республикалэсь Тӧрозэ ӟечкылазы: "Ижмаш" ОАО-лэн валтӥсь директорез В.Гродецкий, "Ижевский оружейный завод" ДОАО-лэн управляющиез Г.Шумков, ЧМЗ-лэн валтӥсь директорез В.Рождественский, "Воткинский завод" ГПО-лэн валтӥсь директорез В.Толмачев, "Удмуртнефть" ОАО-лэн валтӥсь директорез Е.Богомольный, "Ижсталь" ОАО-лэн валтӥсь директорез В.Моисеев, "Ижевский мотозавод "Аксион-холдинг" ОАО-лэн валтӥсь директорез Г.Кудрявцев, "Сарапульский электрогенераторный завод" АО-лэн валтӥсь директорез Е.Сторонкин, "Элеконд" ОАО-лэн валтӥсь директорез А.Наумов, "Свет" АО-лэн валтӥсь директорез В.мохначев, "Сарапульский машзавод" ОАО-лэн валтӥсь директорез Н.Макаров, "Ижевский литейный завод" ОАО-лэн валтӥсь директорез В.Овечкин, "Химмаш" ОАО-лэн валтӥсь директорез В.Ехлаков, "Чепецкое управление строительства" АО-лэн валтӥсь директорез А.Орлов, "Удмуртнефтестрой" ЗАО-лэн валтӥсь директорез И.Чо, "АССО-стройлэн" валтӥсь директорез Р.Хабибуллин, "Увадрев" ОАО-лэн валтӥсь директорез В.Перепелкин, "Сарапульский комбинат хлебопродуктов ОАО-лэн валтӥсь директорез М.Малюк, "Ижмолоко" ЗАО-лэн валтӥсь директорез Г.Красноперов, "Глазовмолоко" ПК-лэн директорез Э.Волков, "Глазовский" ЛВЗ-лэн директорез Н.Сорокин, "Восточный" совхозлэн директорез В.Гусев, "Агрызмолоко" ОАО-лэн валтӥсь директорез Г.Насифулин. Ивор вӧлмытӥсь ёзъёсын ужасьёс: Россиын потӥсь "деловые люди" журналлэн шеф- редакторез О.Медведев, "Федеральной газетлэн" редакторез З.Боноева, "Военный парад" журналлэн редакторез О.Куст, "Время МН" газетлэн редакторезлэн воштӥсез К.Катанян, "Партнер-Регион" журналлэн редакторез В.Ильин, "Удмуртия" издательстволэн директорезлэсь ужзэ быдэсъясь В.Ившин, Киясово ёросысь "Знамя труда" газетлэн редакторез Н.Красноперова но мукет; дышетон, тазалыкез утён но культура удысысь коллективъёс: Россиысь Наукаосъя академилэн Урал люкетысьтыз наукая ёзлэн кивалтӥсез, академик А.Липанов, ИжГТУ-лэн ректоратэз, Глазов пединститутысь, Уралысь инженеръёсты дасясь калык куспо университетысь, Кун службая Урал академиысь, Калык куспо восточно-европейской университетысь коллективъёс, шор профессиослы дышетон заведениосысь но Сарапул колледж-совхозысь директоръёслэн Советсы, Шаркан ёросысь Ляльшур шор ёзо школаысь, Ижысь 21 номеро школаысь, Глазовысь 7 номеро школаысь, Кез посёлокысь "Теремок" нылпи садысь, "Танок" но "Песняры" ансамбльёсысь коллективъёс. Общественной но вӧсьлык огазеяськонъёслэн, профсоюз организациослэн, партиослэн кивалтӥсьёссы: Иж-Удмурт епархиен кивалтӥсь владыко Николай, можгаысь настоятель игумен Вениамин, муфтий г.Мухамедшин, Россиысь Нылкышно огазеяськонлэн кивалтӥсез А.Федулова, Нылпи фондлэн кивалтӥсез А.Лиханов, республикаысь Сӧсыръёслэн огазеяськонзылэн кивалтӥсез В.Сковородников, Пенсионеръёслэн огазеяськонзылэн кивалтӥсез М.Котов, Удмурт культурая "Дэмен" огазеяськонлэн тӧроез А.Разин, Глазовысь азербайджанъёслэн "Одлар Юрду" огазеяськонзы, Москваысь "Удмурт землячество" огазеяськонлэн президентэз С.Маев но мукетъёс. Александр волковез ӟечкылазы Своетской Союзлэн Героез, генерал-полковник Н.Антошкин, Советской Союзлэн Героез, лётчик-космонавт, полковник А.Волков, дано военной лётчик, полковник Б.Мосейчук. Удмурт Республикаысь Кун Кенешлэн пресс-службаез. Куиньмо пиос Красногорск ёросысь мӧйыос но уг тодо ни, куиньмо нылпи вордӥсьёсты. Но тани сыӵе ивор кылӥськиз Дебы гуртысь. Татьяна но Дмитрий Васильевъёс, егит кузпалъёс, нырысетӥ нылпизэс витё вылэм. Нош вордскиллям... куинь пиос. Зэм, анаез эскерон дыръя Ижевскысь акушер-гинеколог М. Е. Кривоногова вазен ик шӧдӥз, анай одӥг гинэ пинал уз вайы шуыса, соин нылашез Удмуртилэн столицаысьтыз 7 номеро роддоме интыяз. Анаез но нылпиосты эмъясьёс эскерыса возё. П. Николаев. Выль книга вордӥськиз Кылем арняе шаерысьтымы Национальной библиотекаын тодмо тодосчилэн Римма Дмитриевна Голдиналэн книгаеныз тодматскон ортчиз. "Удмурт калыклэн вашкала но шор дауръёсы улэмез-вылэмез" нимо со. Гожтэмын ӟуч кылын. Татын нырысьсэ, дыр, котыр ласянь чакламын-эскеремын Кам но Ватка шуръёс вискысь удмуртъёслэн вашкала улонзы. Али удмуртъёс 750 сюрс кузя. Археологияя эскеронъёс возьмато выжыосмылэсь азьвыл кытын но кызьы улэмзэс. Римма Дмитриевна Голдиналы та нунал кык полэс шумпотон ваиз: нырысь ик - аслаз вордӥськем нуналыз тупаз, кыкетӥез - книгаез калыкын тодмо луиз. Р.Д.Голдина - история наукаосъя доктор, профессор, Удмурт кун университетысь археологияя кафедралэн кивалтӥсез, Урал котырын улӥсь калыкъёслэн историзыя но культуразыя институтлэн директорез. Со сяна, пӧртэм монографиослэн авторзы. Тросэзлы тодмо, дыр, "Силуэты растаявших веков" книгаез. Пумиськонэз нуиз Удмурт кун университетысь историяя факультетлэн деканэз Михаил Юрьевич Малышев. Со шуиз: - Римма Дмитриевналэн дышетэм нылъёсыз но пиосыз элькунмылэн пӧртэм сэрегъёсаз тыршо. Ми туж бадӟым тау кариськом солы, табыдӟа ужез ӝутэмез но вормемез понна! Владимир Емельянович Владыкин аслэсьтыз малпанзэ тазьы вераз: - Туннэ выль книга вордӥськиз. Шумпотоно: ӟуч выжыысь адямиос юртто мукет калыкъёслы (удмуртъёслы - тодӥськом П.Н.Лупповез, В.Г.Короленкоез, З.А.Богомоловаез). Соос пӧлы пыртӥськом Р.Д.Голдинаез но. - Котькыӵе адямиосыз ог-огенызы герӟа история. Р.Д.Голдиналэсь ужъёссэ чакласа, таӵе малпан кылдэ: со удмуртъёсты ӟеч тодэ но вала, - шуиз биология наукаосъя доктор профессор Виктор Васильевич Туганаев. Трос гинэ тодмо адямиос ветлӥзы та ӝытэ Римма Дмитриевна Голдинаез ӟечкыланы. Соос - Н.П.Смирнова, А.А.Разин, В.А.Журавлёв, С.М.Решетников... Удмурт кун университетысь кылтодонъя факультетлэн деканэз П.И.воронцов римма Дмитриевнаез ӟечкыласа кузьмаз удмуртъёслэсь вашкала синпельзэс - пулэсь лэсьтэм кырӟась тылобурдоез. Вератэк кельтэме уг поты Зоя Алексеевна Богомоловалэсь кылъёссэ: - Та книга туж дуно, - шуиз со. - Со кулэ кариз, дыр, гожтӥсь адямилэсь историез но философиез пыр-поч тодэмзэ. Римма Дмитриевна, та уждылэсь кулэлыксэ но дуно луэмзэ лыдэ басьтыса, мон кузьмасько тӥледлы мыным дуно луись Флор Васильевлэсь книгазэ. Зэм но, Р.Д.Голдиналэн "Удмурт калыклэн вашкала но шор дауръёсы улэмез- вылэмез" книгаез туж дуно. Ньыль сю витьтон бамын ваньмыз пыр-поч эскеремын, валэктэмын. Со мыным аспӧртэмлыко энциклопедия выллем потӥз. Та книга трос выльзэ сётоз студентъёслы, юрттоз дышетӥсьёслы, туж пайдаё луоз удмуртъёслэн ортчем сюресэнызы но культураенызы тунсыкъяськисьёслы. Г.САВИНА. Нюлэстэм Алнаш ёросын Алнаш ёросын нюлэс ичи. Соин ик татын сое дунъяло. Алнаш лесничество алигес гинэ йылпумъяз 40 гектар вылэ писпу мерттонзэ. Куинь аресъем кызъёс тросэн мерттэмын Асан совхоз-техникум, Варзино-Алексеево но Кизекгурт котырын. Та ужлэсь палэнэ ӧз кыле нылпиос но. Тужгес но ӟеч тыршизы Асан но Улын Котныр гуртъёсысь дышетскисьёс (школаоссылэн директоръёссы В. К.Павлов но Ю.С.Алексеев). Аръёс ортчозы, вож лысо нюлэс будоз, уно калыклы шумпотон ваёз. П. Николаев. Валэктэ юрист Сэрегез дася адвокат Лилия Шкляева Телефон 25-33-70 Липет но сад Улӥсько аслам коркам. Милям ульчаямы азьвыл эркын вал, табере отчы выль юртъёс ӝутскизы. Коркае азьын кылдӥз сад. Липетме выльдыны медӥсько вал. Бускеле ӧз лэзьы: садме, пе, лёгалод. Мар кароно? Яков Зыкин, Ува районысь Нылгаын улӥсь. Ваньбур понна кыл кутэ солэн кузёез. Таиз ик сое пусъе (регистрация лэсьтэ), уте, со понна выт (налог) тыре. Гожтэтъя валаны уг луы, кызьы кылдӥз корка азьын сад. Солы музъем кесэг умойтэм висъямын вал шуыса лыдъяськоды ке, тӥ вазиськыны кулэ районысь администрацилэн музъемен вырись ёзаз. Отын выльысь пусъёзы кык юртъеръёс вискысь гожез. Россия Федерацилэн Граждан кодексысьтыз 304-тӥ ёзэт (статья) валэктэ: ваньбур кузё быгатэ тӥям правооссэ шонертыны, соос ваньбурез таланэн герӟаськемын ӧвӧл ке но. Музъем кесэглэн гожъёсыз шонер пусъемын ке но, тӥледлы правоостэс быдэсъяны (липеттэс тупатыны) кин ке люкетэ ке, тӥ юрттэт курыны быгатӥськоды судысь. Но тӥ асьтэ правоостэс быдэсъян сямен тӥяны кулэ ӧвӧл музон кузёлэсь правоосэ. Нылпи утён дыр Мынам таӵе юанэ кылдӥз. Мон нылпиме огнам вордӥсько. Солы сизьым толэзь. Колхозын бухгалтермы шуиз: - Вордӥськемез бере куинь толэзь ортчыса тыром "по уходу за ребенком" нимаськись коньдон. Кык толэзь улыса бухгалтермы вераз: - Тыныд умойтэм юрттӥськеммы. Нылпизэ огназ вордӥсь кышномуртлы ватсаса пособие уг сётӥськы. Шонер-а лэсьто, нылпиез утялтэм понна коньдон тырытэк? Озьы ик уг тыро компенсация но 69 манет. Екатерина Хохрякова, Дэбес районысь Лесагуртын улӥсь. *** Кышномуртлы секытэн луэмез но нуны ваемез понна пособие тыремын ке, пиналызлы одӥг но ӝыны арес тырмытозь пособие сётӥське нуны ваемез бере отпускез бырем бӧрсьы гинэ. Отпускын дыръя пособие тыро нуны ваён азьын 70 нунал понна но ваем бере 70 нунал понна, шуген ваем бере - 86 нунал понна, кык яке тросгес пинал ваем бере - 110 нунал понна. Сыӵе юрттэт сётӥське шоро-куспо уждун (пайда) мында соцстрахен герӟаськем кышноослы. Нылпилы одӥг но ӝыны арес тырмытозь пособие тыриське нуны ваем бере отпуск бырем бӧрсьы - нуныез утялтонъя отпуск нуналысен солы одӥг но ӝыны арес луытозь. Пиналлы 16 арес тырмытозь пособие сётӥське пичи уждунлэн 70 процентэз мында, анай-атайёслэн улон интыысьтызы, калыкез шугадӟонъёслэсь утён ёзын. Огназы нылпи будэтӥсь анайёслы со ватсаське 100 процентлы. Екатерина Хохряковалы ужан интыяз пособие умойтэм тырыны уг быгато, малы ке шуоно, отын пособие сётыны правозы чик ӧвӧл. *** Кенэ нуны ваиз туэ январьлэн пумаз. Со нокытын уг ужа бере, огпол сётӥськись пособие басьтӥз картэзлэн утем интыысьтыз. Документъёс люка толэзьлы быдэ пособилы но декретын дыръя отпуск дунлы. Кӧня, кытын но кызьы солы юрттэт сётозы? Г. Васильева. Куд-ог юанъёслы валэктон печатламын ни вылӥын. Нылпиен адямиослы кун пособие тырон сярысь закон кутэмын 1995-тӥ арын 19-тӥ мае, воштонъёс пыртэмын 2000-тӥ арын 10-тӥ июле. Соослэн правозы вань: нунылы 1,5 арес тырмытозь сое утем понна отпуск дыръя толэзьлы быдэ пособие басьтыны, пиналлы 16 арес тырмытозь солы толэзьлы быдэ пособие басьтыны. Нырысетӥезлэн быдӟалаез - кык пичи уждун. Со тыриське мемилэн ужан яке дышетскон интыяз. Кыкетӥезлэн - пичи уждунлэн 70 процентэз. Сётӥське калыкез шугадӟонъёслэсь утён (социальной защитая) ёзын. Со понна кулэ ужан интыысь но вытъя инспекциысь пайда (доход) басьтэм сярысь справкаос. Та ужез лэсьтоно нуны вордскем бере куать толэзьскын. Нылпи утьыны отпуск вакытэ толэзьлы быдэ пособие сётӥське сыӵе анайёслы, кинъёс уг басьто ужтэк кылемзы понна пособие. Ужтэк кылем понна пособие тыриське, анай лыдэ басьтэмын ке улон интыысьтыз уж сётон ёзын. Со уг ужа но нокытчы отчы ӧз вазиськы ке, пособие уг тупатӥськы но уг сётӥськы. *** Нылпи ваи 1997-тӥ арын 21-тӥ июне. Пособилы курон соку ик ӧй гожты, малы ке шуоно, верась ӧй вал, ачим ӧй тодылы. Ар ортчыса гинэ вазиськи но, бухгалтермы шуиз: юрттэт сётӥськоз 1998-тӥ арысен гинэ. Пособиос "кынтэмын" вал, али гинэ тырыны кутскизы. Табере пособие вуыны кулэ на 1998-тӥ ар понна январьысен июнь толэзёзь (1998- тӥ ар понна июньысен декабрь толэзёзь басьтӥ ни Дэбес райсобесысь). Тазэ нокытысь но уг сёто. Ужасько Иж городысь 3-тӥ больницаын 1990-тӥ арысен. Нылпи вордэм берам пуки пиналын гуртын (пропискае али но отын). Ужан интыысь бухгалтер шуиз: пособие сётозы райсобесысь (пропиская). Нош Дэбесын верало: июль толэзьысен гинэ книжка усьтэмын, азьвылзэ куре ужан иинтыысьтыды. Кытысь басьтыны быгатӥсько пособиез январь толэзьысен июнёзь? Светлана Агеева. Жаляса верано луэ: гожтэтын шонерак верамын ӧвӧл шугадӟонъёслэсь утён ёзэ курон сётэм нунал. Сое отчы вайыны кулэ нуны вордскем бере куать толэзьскын. Тӥ бергес вазиськемды бере, пособие пыриськоз курон гожтытозь ортчем куать толэзь понна гинэ. Толэзьлы быдэ пособие курыса мыноно мемилэн улон интыысьтыз шугадӟонъёслэсь утён ёзэ. Нош ик "тол" Дышем сяммыя дыр вуиз нош ик тол дыре выжыны. Озьыен, 28-тӥ октябре 3 часын уин час стрелкаосмес одӥг часлы берлань выжтоно луоз. Удмурт Республикаысь Кун Кенеш но Правительство мур куректэмзэс верало "Удмуртская правда" газетлэн редакторезлы Николай Иванович Нестеренколы анаез Нестеренко Лидия Владимировна улонысь кошкемен валче. Удмурт Республикаысь Кун Кенешлэн президиумезлэн Удмурт Республикаысь Кун Кенешлэсь дас кыкетӥ (азьвыл чакламтэ) сессизэ люкан сярысь ПОСТАНОВЛЕНИЕЗ Удмурт Республикаысь Кун Кенешлэн президиумез пуктэ: Удмурт Республикаысь Кун Кенешлэсь дас кыкетӥ (азьвыл чакламтэ) сессизэ люкано Иж городын 2000-тӥ арын 3-тӥ ноябре но кенешез ортчытоно 11 часын Операя но балетъя кун театрын. Удмурт Республикаысь Кун Кенешлэн Тӧроез А.А.Волков. Ижевск город, 2000-тӥ арын 24-тӥ октябре. � 169-ИИ. Удмурт Республикаысь Кун Кенешлэн Президиумезлэн Удмурт Республикаысь Кун Кенешлэн дас кыкетӥ (азьвыл чакламтэ) сессияз эскерыны чаклам ужпумъёс сярысь ПОСТАНОВЛЕНИЕЗ Удмурт Республикаысь Кун Кенешлэн президиумез пуктэ: Удмурт Республикаысь Кун Кенешлы дэмлано дас кыкетӥ (азьвыл чакламтэ) сессиезлэн ужрадаз пыртыны таӵе ужпумез: А.А.Волковлэн Удмурт Республикалэн Президентэзлэсь ужзэ быдэсъяны кутскемез сярысь. Удмурт республикаысь Кун Кенешлэн Тӧроез А.А.Волков. Ижевск город, 2000-тӥ арын 24-тӥ октябре. � 170-ИИ. Вордскемзэс Та нуналъёсы пусйизы но пусъё: Ившин Вениамин Никонорович - "Удмуртия" издательстволэн валтӥсь редакторез, "Удмурт дунне" газетлэн редакторезлэн азьвыл воштӥсез; Фролов Леонид Кирллович - Кун Кенешысь ялан ужась комиссилэн тӧроез; Наговицын Василий Иванович - Гурт удысъя но сиён-юонъя министрлэн воштӥсез. Наталь Котькуд улэм арзы - зарни Шаркан ёросысь Гондырвай гуртысь Прохоровъёслэн семьязы туэ кыкетӥзэ - зарни сюанзэс пусйизы ни: кылем арын - улэм аръёссыя, туэ - документъёссыя. Азьвыл уго штамп понна ӧз бӧрдылэ. Соин ик гожтӥськизы пизы вордӥськем бере гинэ. Аркадий армиысь бертыку дораз телеграмма ыстӥз. Ӵыжы-выжыосыз, тодмоосыз, эшъёсыз люкаськиллям, огзэ гинэ нылашез ӧз тодма солдат. Тӥни со ик тунсыко потӥз. Ар ортчыса нош Анна но Аркадий кузпалъяськизы, эшшо ар ортчыса Всеволод пизы вордӥськиз, собере - Юра, Саша, Надя. Будыса Всеволод военной юрист луиз, Юра ужа заводын, Надя - школаын дышетэ, нош Александрез тодо, дыр, тросэз - со Шаркан ёрос администрацилэн тӧроез. Анай-атаенызы али огез но уг уло, но юрттыны ӵем вуыло: пу но дасяло, турнало но, картош но копало. Аркадий Ивановичлэн но Анна Егоровналэн правнучказы но вань ни, нош соос ялан егит дыръязы кадь: ог-огзылы гажаса вазё, тупаса уло, шуныт пальпото. - Кызьы озьы тӥ витьтон ар ӵоже тупаса улӥськоды, али куд-огез вить ар улэменызы но ушъяськыны уг быгато ук? - юасько кузпалъёслэсь. - Семья куспын оломар но луэ, но чидано. Туала егитъёслэн чиданзы уг тырмы, шуг-секытэн пумисько ке, нюръяськыны уг ик курадӟо, ваньмыз соослы инмысь мед усёз. Со сяна, ог-огедлы оскон мед луоз. Милемлы туж тросэз вожъяськылӥзы, мар но ӧз вераськылэ, но ми пелямы ӧм понэ, даллашыса ӧм ветлэ. Н. Князева, Удмурт университетын дышетскись. Райпоысь устоосыз Играос данъясько асьсэлэн лулысь-сюлмысь тыршись кооператоръёсынызы. Вузкарисьёс пӧлысь нимысьтыз пусъем потэ Чутырьысь 44 номеро магазинлэсь кивалтӥсьсэ Галина Геннадьевна Бушмакинаез. Солэн ваньмыз интыяз, котыр чылк- чылк утялтэмын, магазинысь мултэссэ, кулэтэмзэ номыр уд адӟы. Эшъёсыз солэсь ӟеч ужаны дышетско, чырткем кышномурт ужаз но, дораз но адӟем карымон. Райпоын, веранэз ӧвӧл, ӟеч ужасьёссы трос. Тани Ирина Шкляева татын 18 ар тырше ни. Котькытчы ысты, со оскем ужзэ мылысь-кыдысь быдэсъя. Али райполэн юртысьтыз магазинын вузкаре, кивалтӥсьёс но дораз нуналлы быдэ сямен пырало. Нош му вӧй поттӥсьёслэн микрорайоназы шуныт кылъёс верало ... номеро магазинлэн кивалтӥсез Римма Хаертдинова сярысь. Солэн ужан интыяз котьку ӝикыт, басьяськисьёс магазинэ капчи мылкыдын пыро. Соосты угось отын шумпотыса пумитало. Нош 10 номеро магазинын синмаськымон ужа Ираида Корепанова. Райполэн аптекаяз но калык ӵем пыра. Соосты шуныт пумита провизор Лариса Масленникова. Татын со апрельысен гинэ ужа, выль аптека аслыз но, адямиослы но кельше. Кин бен магазинъёсы нянь, сиён-юон но мукет вузъёс вуттэ? Валамон, шофёръёс. Тани кызьы бен уд ушъя "Сиён-юон" ("Продукты") автомашиналэсь водительзэ Геннадий Меркушевез. Со татын 17-тӥ арзэ ужа ни. Али Зура палась 17 магазинъёсы вузъёс нуллэ. Котьку дыраз вуттэ, номыре тус-тас уг кары, ваньзэ ӝикытак лэсьтэ. Райпоын озьы ик гажано адями луэ "Нянь" ("Хлеб") автомашиналэн водителез Михаил Векшин. Татын со 22 ар ужа ни. Магазинъёсы дыраз нянь, сушкиос, булкаос вуттэ. Фотокормы но сое сушки керттэтэн туспуктэм. Туж тунсыко адӟиське. Адями ас ужзэ яратэ, машиназэ дыраз чакла-уте, техуход лэсьтэ. Туннэ озьы ик вератэк кельтыны уг луы Светлана Долгалюк сярысь. Играын вордӥськем кышномурт быдэс улонзэ кооперациен герӟаз, 1973-тӥ арысен татын ужа. Сарапулысь кооперативной техникумез йылпумъямез бере, 20 аресъем нылэз товароведэ юнматӥзы. Собере тодон-валанзэ будэтӥз Москваысь кооперативной институтын, огдыре ужаса дышетскиз, 1980-тӥ арын сое быдтӥз. Егит специалист ас ужезлы ӝог дышиз, тыршемзэ адӟытэк ӧз кельтэ. 1996-тӥ арын райполэн кивалтӥсезлэн вузкаронъя воштӥсез луиз, нош кык ар ортчыса, быдэс правлениез оскизы. Светлана Ефимовна быръем ужзэ ӟеч тодэ. Вераськон куспамы ас малпанъёссэ пыртэ: вот, пе, ведь 12 магазин ялан изъянэн ужа, номыр уд кары, соосты ум ворсалэ. Пытсад ке, калык уз вала. Соин ӵош ик играос пумен паськытато гуртъёсы потаса вузкаронэз. Куд-ог дуно вузъёсты кредитэн вузало, 3 но 6 толэзь ортчыса дунзэ тыро. Нош секыт вузъёсты (холодильник, мисьтаськон машина, мебель, газ- плита, лэсьтӥськон материал) меӵак гуртазы, улон интыязы ваё. Калык солы кыӵе шумпотэ но котьку тау каре, вузкарисьёслы шуныт кылъёс вера. Г. Романов. Шара вераськон Яратон, юон но кыскон Оля, Люба но Света - куинь эшъёс. Олялы - дас укмыс арес, Любалы - дас тямыс, нош Светалы - дас сизьым. Оляен Люба дышетско вуриськисе, нош Света университетэ пырыны дасяське. Ваньзы ик соос уло городын, но гужемъёсы гуртысь ӵыжы-выжыоссы дорын шутэтскыны ярато. Дышетскем сяна, нылъёслэн мылкыдъёссы яратон сярысь малпанъёсын но тымиськемын. Лушкем малпанъёссэс ваньзэ ӧз шараялэ ке но, враськонмы тазьыгес пӧрмиз. - Мар со яратон? Люба: - Выжыкыл, загс но коляска (серекъя). Оля: - Ӧй малпаськылы. Яратӥ ке, соку тодо, вылды, вераны. - Нош анайёсыныды вераськиськоды-а яратон сярысь? Кызьы утиськоно нылпи шедемлэсь, висёнъёслэсь? Света: - Эшъёс пӧлын вераськиськом, нош анаен та сярысь ӧм кенешылэ. Утиськон амалъёс сярысь биология урокын но вераськылӥм. Люба: - Троссэ тодӥськом книгаосъя, журналъёсысь. Нош кыӵе ке шуг-секытэ кылдэ ке, нырысь ик мынӥсько эше доры. Анае котьку дыръя уз вала монэ. Оля: - Нош ми анаен оломар сярысь но вераськиськом. Со мыным ачиз ик куке шуиз, нылпи шедемлэсь утиськон маос ке кулэ луизы ке, вазиськы, пе. Люба: - Ваньмызлэн ик анайёссы озьы шара мед вераськозы вылэм, соку нылъёс ураме ӧй кыстӥськысалзы. Ог-огзэс валамтэен, эшъёсы пӧлысь тросэз анай-атайёсынызы керето, дорысьтызы кошко. - Анай-атайёс котьку ик шонересь ӧвӧл, дыр, но соос тӥ сярысь сюлмасько ук. Оля: - Нылпиоссэс соос валаны кулэ. Мынам но анае куд-ог дыръя монэ уг вала. Споръяськонозь но вуиськом, куатаськылэме но вань, но коркась кошкон мылкыды ӧз ӝутскылы. Озьы ик тупаськом. Люба: - Нош милям керетонъёс ӵемысь кылдыло пиос пумысен. Кин ке аслыз кельше тодмоосы пӧлысь, соин ветлыны косэ. Та нуналъёсы гуртысь пегӟон калэ вуи ни вал, ярам, Олялэн анаез индылӥз, изьыны дорам ик бертӥ. Света: - Анаелэсь верамъёссэ кылзӥсько но, милям тупамтэос уг кылдо. Со мыным шуиз: пиосын тодматскыкуд, аслад йырыд бордад медло. Оля: - Мыным анае весь шуэ, дышетскы, пе, мынам янгышъёсы вылын. Но мон малы ке пелям уг понӥськы верамъёссэ, ас пыртӥм ӧз ке поты, уг оскы индылэмъёсызлы. - Пиос гинэ ӧвӧл, али тросэз нылъёс но тамак кыско, вина юо. - Тӥляд та ласянь кызьы? Оля: - Ми куиньнамы ик ум но кыскиське, ум но юиське. - Ноку но оскалтылэмды ӧвӧл-а? Люба: - Пивоез но шампанскоез оскалтылэммы вань. Нош ӵош дышетскись нылъёсмылы куд- огезлы водка гинэ кулэ. Оля: - Вить арескын бускель квартираысь нылашен ымамы тамак тырылӥм - солэн анаез кыске. Ӧз кельшы, ӵынэн воньдӥсько ни вал. Али ымам но понэме уг поты. Люба, Света: - Оскалтэммы ик ӧвӧл тамакез. - Пиосын матысь кусыпъёс уд возиське, вина уд юиське, тамак уд кыскиське. Оло, тӥ улонлэсь бере кылемын? Пиос шорады озьы уг учко-а? Люба: - Пиос сыӵеоссэ ик гажало. Оля: - Тодо ке, молодец шуо, озьы ик, пе, луыны кулэ. Люба: - Малы ке но пиослэн кыскисьтэмзэ но юисьтэмзэ кышно ваемзы потэ ук. Эшъёсмы но милесьтым вожъясько, нош асьсэлэн кысконлэсь нокызьы люкиськемзы уг луы ни. Света: - Милям классысьтымы куд-огез нылъёс тымясэтӥ классысен кыскыны кутскизы. - Нош маин валэктыны луоз нылъёслэсь кыскыны, юыны, юмшаны кутскемзэс? Кин янгыш - анай-атайёс, урам, эшъёссы? Света: - Тросэз потэ кинэн эшъяськем бордысь. Оля: - Мынам эше кыске вал, нош мон тамак кыскыны ӧй кутскы ук. Эшме но ӧжыт гинэ тамаклэсь ӧй люкы, мукет классэ выжтӥзы но, со кыскись нылъёс пала кариськиз. котькудӥзлэн аслаз йырыз луыны кулэ. Люба: - Малы аслэсьтыд тазалыксэ кысконэн быдтыны? Оля: - Тросэз потэ анай-атайёс бордысь но. Ӵош дышетскись эшъёсмылэн ӝожтӥськылэмзы вань, дорын керетон потэ ке, валамзы ке уг поты, юри ӧчкарыны кутскиськом, пе. Сыӵе дыръя юон но мултэс уг луы ни. - Кыӵе пиос тӥледлы кельшо? Оля: - Быж сямен бордэ медаз лякиське. Люба: - Мӧзмыт медаз луы соосын, котьмар сярысь вераськыны мед быгатозы. Кызьы луэ ӵемысь: одӥг пол пумиськиськод но, ӵуказеяз номыр сярысь вераськыны луэ. Аслыд шулдыртоно луэ пияшез. Оля: - Ярало кужмо но таза пиос, кулэ дыръяз утьыны мед быгатозы, ми сьӧры медаз ватске. Уг кельшо анай юбка борды возиськись пиос. Люба: - Уг кельшо юисьёсыз. Света: - Капчи, шулдыр мылкыдоосыз кельшо. Мед эшъяськозы спортэн. - Бызьыны уд малпаське на-а? Света: - Вазь ай. Дышетскыны кулэ. Оля: - Бызёно кадьзэ ӧй пумита на. Но пиосын тодматскеме бере таӵе малпанэ вуи: ваньзы соос одӥг кадесь, туннэ одӥгезлы яратэмзэс-синмаськемзэс верало, ӵуказе - мукетызлы. Яратыса бызён ваёз меда шумпотон? Малпасько, оло, лыдъяса-чотаса умойгес луоз бызьыны - улон интылы, коньдонлы медаз ёрмы. Семьязэ утьыны, сюдыны быгатӥсь адями вӧзын яратон но ӝужалоз. Люба: - Кинлы меда сюлэмме сётоно? Тодмоосы мынам туж трос, - дас тямыс аресысен кызь витёзь кудзэ бырйыны ик уг тодӥськы. Одӥгез жингыртэ, мукетыз... Соиз но, таиз но жаль. Пӧяськоно луэ. Умойгес луоз, дыр, одӥг гинэ яратон возьыса, нош со понна ӧжытгес тодматсконо пиосын. Пиналэсь ай, малпанъёсты трос пол воштӥськозы на, нылъёсын люкиськыкум малпай ас поннам. Нош куинь эшъёс, шулдыр серекъяса но асьсэ понна бӧтьыртыса, Ижевсклэн урамъёсаз дыртӥзы. Л. Малых. Гурт улон Мертчан бусы паськыта Октябрьлэн пумаз шаерамы кык нунал ӵоже ужаз туж кулэ но аспӧртэмлыко кенеш- семинар. Со сӥземын вал етӥн будэтонэз но сое уже кутонэз умоятонлы Ужрад ортчиз Игра районысь "Рассвет" гурт кооперативын (СПК-ын) но Зураысь етӥн шуккон заводын. Та кенешонэз радъязы республикаысьтымы Гурт удысъя но сиён-юонъя министерсво но Гурт удысъя Удмурт кун научно-иследовательской институт. Семинаре озьы ик ветлӥзы музон улосъёсысь тодосчиос но специалистъёс. Ужрадэз усьтӥз Гурт удысъя кун научно-исследователькой институтлэн директорез, экономика наукая кандидат Василий Жуйков. Со вакчияк возьматӥз шаерамы уй пал буртчинэз будэтонъя югдурез. Малы бен семинар Играын ортчиз? Нырысь ик, ёрос арысь аре паськытатэ етӥн лудъёссэ. Кыкетӥез, Зураысь етӥн шуккон завод одӥгез устоез луэ. Со юн кусыпъёс тупатӥз гурт хозяйствоосын. Тани "Рассвет" СПК-лэн районын котькинлэсь трос, 160 гектар мертчан бусыез. Та дуно культураез будэтон амалъёссы сярысь люкаськемъёслы мадиз кооперативлэн тӧроез Иван Чирков. Хозяйство ялан выльдэ етӥн кизён-утялтон техниказэ. Нош республикаямы етӥн будэтонлэн азинскемез сярысь вераськиз гурт удысъя министрлэн воштӥсез Василий Наговицын. Кыкетӥ нуналаз люкаськемъёс рос-прос тодматскизы Зура етӥн заводлэн ужаменыз. Соослы кельшиз предприятилэн азинскон сюрес вылэ потэмез, етӥн шукконзэ умоятэмез но выль техникаез. Семинарын со сярысь вераськиз заводлэн директорез Анатолий Максимов. Нош республикаысьтымы етӥн заводъёслэн рынокен экономикае выжон вакытэ возиськыны быгатэмзы но пыд йылазы сылэмзы сярысь мадиз "Удмуртлён" огазеяськонлэн кивалтӥсез Владимир Подзырей. Семинарын озьы ик ужпум ӝутэмын вал таза етӥн кидыс уськытон сярысь. Та ужпумъя асьсэлэсь малпанъёссэс веразы бускель Киров улосысь Фалены, озьы ик Можга но Балезино льносемстанциослэн кивалтӥсьёссы но специалистъёс. Г. Романов. НАТАЛЬ Анай-атайёслы школа Нылпи будэтэмды понна - "вить"? Котькуд анай-атай яратэ ас нылпизэ, сое зэмос адями карыны турттэ, но, жаляса верано луэ, капчиен со уг сётскы. Кӧня тӥляд пиналды - одӥг, кык, куинь? Кинъёс соос - шумпотон ваисьёс-а яке сюлмаськон люкасьёс-а? "Ой, нылпиос, нылпиос!" - лулӟыло анайёс. Тунсыко, нош мар меда верало асьсэ понна пиос но нылъёс анай-атайзы сярысь? Шуом, тӥледлы 35 арес, пидылы - 15. Адскиськоды егит но веськрес, ӵемысь сузэрен- вынъёс кожало. Тӥледлы со кельше. Нош малы меда, мугорды музэн, лулпушты но сыӵе ик пинал ӧвӧл? Кыӵе адскисьтэм борддор пуктэмын пиды но тӥ вискын? Бен, кызь ар гинэ ортчиз ай, тӥледлы соку вал дас вить. Ваньзэ вунэтӥды? Кытчы ке ыштӥды дневниктэс, кудаз тӥ асьтэлы кыл сётӥды: "Мон ноку но уг вунэты аслэсьтым дас вить аресме". Соку тӥ юн куректылӥды, анай-атайды уг валало шуыса. Уд тодӥське ни? Ӧжыт гинэ? Туж жаль. Мар соку вераськонэз на дас, куать, куинь аресъёс сярысь? Тӥ понна соос сизьым полэс тунгонъёс сьӧрын ни. Ульча. Егит анайёс ӟус вылын лабырто. Куддыръя, вераськонзэс дугдытыса, соос пиналъёссы шоры кеськыло: "Уг яра! Кош отысь! Кинлы мон верай!" Со куспын соослэн ымнырзы вожпотонэн шобыртӥське. Оскыны но шуг, луоын шудӥсь пиналъёс яратоно нылпиоссы шуыса. Кудзылэн ке пичизы дэрие усе но анай пери музэн лобӟыса вуэ ни дораз. Кесяське, нуналлы быдэ комбинезондэ миськыса акыляк потӥ ни, пе. Ньылон пыдсысьтыз ик куаразэ поттыса вера, тон мынам пие (нылы) ӧвӧл, кыӵе ке пӧрмостэм, нокинлэн но талэсь урод пиналэз ӧвӧл ни, дыр, пе. Куд-огез нош "виыса куштон люкет" но шуозы. Шуш кылъёссы вӧзы чабкызэс ватсало на. Пиналзы, вӧсь луэмлы чида, уг бӧрды, со кышка верам кылъёслэсь. Кыӵе ӵем анай-атайёс ог-огзылы ӝожтӥсько: укыр секыт та нылпиосты вордыны. Нош малпаськиды-а тӥ огпол ке но: соослы тӥледын капчи-а? Тодэмды ке потэ, эшшо но секытгес. Нош вожпотэмзэс, керӟег мылкыдзэс возьматыны уг быгато - кылзӥськыны кулэ. Дышетсконо вылэм нылпиосмылэн чиданы быгатэмзылы но вань вунэтыны тыршемзылы. Утчалэ одӥг нунал (коть кӧня ке час, троссэ тӥ чиданы но уд быгатэ) нылпидылэсь рользэ шудыны. Тани со бертэ школаысь. Маке но мылкыдыз урод кадь потэ тӥледлы. Ма бен лыктӥз ни йырады? Яке "кык" басьтӥз, яке ассэ умойтэм возиз, мукетыз номыр тодады ӧз лыкты ни. Нош со понна, оло, быдэс дунне куашкамын - сое эшез вузаз. Яке шӧдтэк шорысь адӟиз, кызьы яратоно дышетӥсез урокъёсаз кыл вылын гинэ дышетэ зэмос улонлы. Оло, нылаш, кудӥзлы гинэ быгатэ вал сюлэм шыкыссэ усьтыны, берытскиз дорысьтыз. Тӥледлы сое тодыны сётэмын ӧвӧл. Куспады ог-огдэс валанды ке но шӧдӥське - лулпуш дуннелэн вань сыӵе сэрегез, кудаз со тӥледыз утчаськыны уг лэзьы. Отын солэн ватосэз интыямын. Эн йӧтылэ вал коть со борды эн тэбине юанъёсыныды! Нош тырмиз ке толыкты буйгатыны, сюлэм шунытэныды сётыны, дыртэлэ, эн ӝегатӥське. Но ӧвӧл, тӥ коркаез ик зуркатӥськоды: "Вай дневниктэ!" телефон доры кыстӥськиськоды, дышетӥсезлы жингыртон вылысь. Понэ трубкадэс. Асьмеос вераським - тӥ шудӥськоды пиналдылэсь рользэ. Пуктэ асьтэды со интые. тӥледлы урод ке, кӧтӝождэс кинлы ке вераськоды ук. Нош тӥляд нылпиды али одӥгназ. Школа сярысь татын веранэз ӧвӧл. Пиналды та дыре, Шекспирлэн Гамлетэз музэн, малпаське улон но кулон пумысен. Берат воксё дунне вылысь кошконэз шонерен лыдъя ни. Нош тӥ со вакытэ акыляк туйылӥськоды ӟечгес дышетскон, азьтэмъяськонэз палэнтон сярысь. Солэм сыӵе сюлмаськонъёсыз мед луозы вал. Эшшо ке со, висись яразэ возьматонтэм вылысь, серекъяса гинэ вераськыны тырше, пӧзьтэм сиёндэс но ушъяны уг вунэты, кулэтэм юанъёслы но валэктон сётъя на. Тӥ со быгатӥськоды ваньзэ лэсьтыны но, лэсьтытэк но. Нош со пусъем гожъёслэсь ортчиз ке - керетон ӝутскоз. Ма бен, пиналдылэсь рользэ шудыны кельше-а? Кыӵе тӥляд мылкыдды? Ой, та "переходной возраст" шуонзы! Кӧня куректон вае анай-атайлы! Нош тодазы возьысалзы ке бадӟымъёс, кыӵе секыт та дыре пиналъёслы! Но тӥледлы нокыӵе но ӧвӧл, мар лэсьтӥське пиеныды, тунсыкъяськытэ солэн пож вераськемез, кылзӥськымтэез гинэ. Малы озьы луиз, али тӥ сое котькуд ласянь бергатыны быгатӥды. Ну, кыӵеен шӧдӥськоды асьтэдыз пидылэн интыяз? "Со милемыз нокин чотэ уг пукты..." Кыӵе ӵемысь кылоно та веранэз анай- атайёслэсь. Сыӵе дыре жаляськом анайёсты, пиналъёс нош ик янгыш. нош нылпиослэн кыӵе потэ анаен-атаенызы данъяськемзы! Соин ик, луоз, серемес но осконтэм мадёсъёс вордскыло атайёссы сярысь, кудъёсыз кыдёкысь зарезьёсын уяло. Анайёссы но паймымон чебересь, лякытэсь. Ог-огзы азьын магнитофонъёсын, великъёсын уг ушъясько - анай- атаенызы. Нош гуртазы со мадиськисьёсты вите ултӥян, чабкылон. Зэм, будэтӥсьёслэн но данъяськонзы - нылпиос. Соку малы меда ог-огды пумитэ вамыштонтэмез? Малы пиналлы ялан "уг яра" шуонэз? Сётэ нылпидылы эрик! Уг яра - дэрие, уг яра - бер ни, уг яра - изьытэк, уг яра - чупаськыны. Тросгес жильы дурылэ ай но, асьтэды ик со юнгес шуккоз. Малы кужмысь косӥськоды дӥсяны та пальтоез, куке солэн потэ курткаен мынэмез? Кезьыт? Но ведь со ӝоггес выре, шудэ, бызьылэ, соин ик кынмонлэсь уг кышка. Уг быгаты со та адӟемпотостэм пальтоеныз (тӥ понна со туж чебер но шуныт) яратоно нылыз азе возьматскыны. Капчигес кулыны, нош школае озьы уз мыны со. Дугдэ! Малы кутскиды тӥ та ченгешонэз? Тазалыкез сярысь-а сюлмаськиськоды? Таӵе споръяськон номыр но ӟечсэ уз лэсьты нылпидылы. Тросаз семьяосын кусыпсы сӧриське школаен сэрен. Вералэ, малы нылпидэс янгыше уськытыса, дышетӥсьлы дурбасьтӥськоды? Нош кин сое утёз? Пиналэныды кусыпты школаен сэрен тэшканы кутске шуыса шӧдӥды ке, вунэтыны тырше дышетсконэз сярысь. Тӥ бен туж ӟеч тодӥськоды ук, пидэс нокинэн но ӧй воштысалды - чылкыт сюлэмо, лякыт сямо, дышетскыны гинэ тани лябытгес. Одӥг-кык арнялы вунэтэ дневникез сярысь. котькыӵе секыт мед луоз сюлмады, тырше валаны лулпуш дуннезэ. Отметкаос шат нырысетӥ интыын? Чаклаське ай ӟечгес, оло нош школаын со кинлэсь ке кышка, возьдаське. Валэктыны тырше, тӥ сое яратӥськоды сыӵеен, кыӵе вань, нош математикаен "кыкъёсыз" яке "витьёсыз" татын нокыӵе инты уг басьто. Юрттэ солы шуг-секытъёсты вормыны. Малы пиналъёстэс "пӧраськоды" асьтэ мертэтъёсъя? Соос мукетэсь ук. Оло нош трослы умоесьгес но. Сётэ ук бен эрик, эн ере бордазы кулэтэм юанъёсын, валэктонъёсын, эн вие пушказы будӥсь асваланзэс. Тросаз семьяосын нылпизэс эркияло, "соос понна гинэ уло". Быгатонтэмзэ но лэсьтыны дасесь. Пиналлы капчигес луысал, дыр, тӥ ӧжыт ке но асьтэ улонэныды улысалды ке. Уг яра нылпи пушкы быдэсак сылмыны. Анай-атайёслэн педагогикая валанъёссы ӵемысь лябесь. Соос асьсэлы капчи сюрес утчало. Татысь ик вордско янгышъёс но. Пиналэз будэтонын кулэ луись литература туж ӧжыт, нош кыӵе бадӟым инты басьтэ нылпилэсь психиказэ тодон, эскерон. Шуом, малы со шӧдтэк шорысь куинь аресказ вань куронъёслы "уг" шуэ. Сиён уг кельшы, ульчае потыны пумитъяське, шудонъёссэ пазя, нош ик штанияз "лэземын". Ваньзэ мыддорин лэсьтэ, уродъяське. Малы? Малы ке шуоно, куинь арескын, психологъёслэн гожъямзыя, пиналлэн нырысетӥ переходной шуон дырыз вуэ. Кызьы астэ возёно? Утчалэ тазьы: "Туннэ асьмеос кыре ум потэ, дыр?" "Сиськыны тон, конечно, уд пуксьы?" Оло, соку, пиналды тӥляд куронъёсыныды соглаш кариськоз. Нош тодӥськоды-а тӥ, нылпиос нырысьсэ вить арескын синмасько шуыса? Бен, тӥ троссэ уд тодӥське... Оскем потэ, семьяды юн шуыса. Нош люкиськемын ке? Тӥ быгатӥськоды кузпалды сярысь номыр но тодытэк, сое адӟытэк улыны. Вераськон нош пналдылэн таез сярысь. Кӧня пол тӥ картты шоры кесяськиды: "Тон пидэ ноку но уд адӟы ни!" Визьмо нылкышно уз быгаты ассэ гинэ тодыны, пунэмзэ берыктон мылкыдын улыны. Озьы ке нош, мон кыл уг шедьтӥськы тӥ сярысь мар вераны но. Нырысь малпаське нылпидылэн улонэз сярысь, собере ини - асьтэлэн. Эн басьтэлэ солэсь атайзэ - праводы ӧвл. Визьмогес, шуныт сюлэмогес кариське. Сыӵе сям туж кельше ымнырдылы. Атай пинал понна озьы ик самой яратоноез, мусоез. Со одӥг гинэ, тӥ но одӥг. Пиды будӥз ке, кинэн со вераськоз, малпанъёссэ усьтоз, кенеш куроз, шуом, яратонэныз валчеяськон пумысь ик. Пияш анаеныз та сярысь ноку но уз кенешы, та юанъёслы валэктон сётоз атаез гинэ. ...Туннэ шуак кылӥды пидылэсь эшезлы верамзэ: - Анае мынам тодӥськод-а кыӵе? Со ваньзэ вала! Ма бен, соку мон вань сюлмысьтым ӟечкыласько тӥледды. Озьыен, семьяяды ваньмыз адӟем карымон. Тӥ басьтӥды тужгес но вылӥ отметка. Света НИКИТИНА, Удмурт кун университетын дышетскись. Чакламын дышетскисьёслы Удмурт Элькунысь национальной библиотекаын усьтӥське "Книга но тодон-валан" нимо выставка. Отын возьматӥськозы пӧртэм издательствоослэн ужъёссы. Адямиос тодматскыны быгатозы пӧртэм удысъёсъя - экономикая, политикая, кунъя но правоя, социологияя, психологияя, историяя, философияя - визь сётӥсь выль документъёсын. Выставкаын возьматӥськись ужъёс ваемын Москваысь. Чакламын пӧртэм училищеосын, вузъёсын дышетскисьёслы но дышетӥсьёслы, пӧртэм удысъёсын ужасьёслы. М.НЕМЦОВА. Кун университетысь удмурт кылъя но литературая факультетэз йылпумъямез бере, Л.Г.Булдакова вордӥськем палъёсаз берытскиз. Али сизьыметӥ арзэ ужа ни Юкаменскысь шор ёзо школаын, пиналъёслы ас кылзэс яратон но гажан мылкыд пыӵатон сярысь сюлмаське. Дышетэм пиналъёсыз арысь аре удмурт кылъя ёросын но республикаын ортчись олимпиадаосы пырисько. Бен, нырысетӥ интыозь кыдёкынгес ик ай, но Лариса Георгиевналэн мылкыдыз уг юскиськы. Со оске, тыршемез одно ик ӟеч емышъёс сётоз шуыса. Юкаменскын тросэз пиналъёс ӟучомемын, анай-атайёс пӧлын но пиналзэс удмурт кыллы дышетыны пумит луисьёсыз вань, соин покчи классъёсын уж секытэнгес мынэ. Но дыр ортчыса, нылпиос урокъёсы туж мыло-кыдо ветлыны кутско. Пӧлысьтызы куд-огез, Лариса Георгиевназылэсь адӟем карыса, али дышетсконзэс университетысь удмурт филологияя факультетын азинто, вордскем кылмес ӝутонэ кужымзэс поно. И.ЛУКИНА. Наталь Кызьы улӥськод, егит семья? Дышетскод - капчи улод Удмурт Республикаысь Егитъёсын ужанъя кун комитет вӧзын ужась "Егит семья" кун учрежденилэн шаерамы улӥсь егитъёслэн улэм-вылэмзыя эскеронъёссы Гуртын улӥсь но Ижевскын улӥсь егит семьяос пӧлын ортчытэм эскеронъёс возьмато: тросэз егитъёс одӥг нылпи вордо, но мылкыдзы вань кыксэ будэтыны. Городэн ӵошатоно ке, гуртоос кык нылпи тросгес вордо - юаляськемъёс пӧлысь 22,8 процентэз, кык но солэсь трос нылпи будэтӥсьёсыз 2,2 процент. Нош городын кык нылпи будэтӥсьёсыз 5,2 процент, куинь но солэсь трос - 0,5 процентэз. Нош коньдон ласянь учконо ке, гуртоослэн табыш поттонзы трослы пичигес. Уноез егитъёс кыкетӥ нылпи вордыны пумит луо, улон югдурзы шоры учкыса. Семьялэн быдӟалаез шоры пиосмуртъёс но кышномуртъёс пӧртэм сямен учко вылэм. Юалляськемъёс пӧлысь одӥг но ӝыныезлэсь ятырез пиосмуртъёс трос нылпи вордон понна кылзэс верало. Нылкышноослэн та ласянь мылкыдзы сӥялэсгес: нылпиосты будэтон ӵемысь соос вылэгес усе угось. Нылпи вордыны мылкыд вань, но луонлык ӧвӧл - тӥни сыӵе югдур кылдэмын та вакытэ странаямы. Юалляськемъёс тросэз веразы: тужгес но сюлэмшугъяськытэ коньдонлы но улон интылы ёрмон. Нош кыӵе куронъёсты егитъёс валтӥсь интые пукто нылпизэс будэтонын? Пусйымон соиз, анай-атайёс бадӟым саклык висъяло нылпилэн азьланьын шуг-секытъёстэк улонэзлы. Со понна валтӥсь интые пукто ӟеч дышетон сётонэз, нылпи ас понназ улыны мед дышетскоз, ужаны мед быгатоз. Троссэ анай-атайёсты сюлмаськытэ нылпизэс дӥсян-кутчан, сюдон ужпум. Мар сярысь со вера? Егит семьяос секыт югдуре вуэмын, туннэ нуналэн гинэ уло. Нылпи вордӥське ке, семья азе ужпум пуксе - сётоно-а пиналэз ясли садэ. Юалляськемъёс пӧлысь тросэз лыдъяло (31,7 процентэз): нылпилы умойгес луоз нимаз адямиен усьтэм садикын. Та амал республикаямы вӧлмемын ӧвӧл ке но, егитъёс со сярысь кылэмын иворез вӧлмытон удысъёс пыр. 31,1 процентэз егит семьяос нылпизэс кун учреждениосы ик сётысалзы. Нош школае мынэмлэсь азьло пиналзэс гуртын возьысалзы 27,4 процентэз. Вераны кулэ, юалляськемъёс пӧлысь ваньмыз сямен ик нылкышноос ужало, уждун потто, нылпиоссы ваньзылэн сямен интыямын. 4,3 процентэз гинэ кулэясько садиклы. Дышетонын мае нырысетӥ интые пукто анай-атайёс? 20,4 процентэз пиналзэс дышетысалзы компьютерен ужаны. 19,1 процентэз лыдъяло: азьланяз нылпизылы одно ик кулэ луоз кунгож кылъёсты тодэмез. 18 процентэз вылӥе пукто крезьгурлы дышетонэз, 15,2 процентэз - спортэз; 9,2 процентэз - художественной образованиез; 8,4 процентэз - ужбергатонлы дышетонэз. Ӝыныезлэсь ятырез анай-атайёс нылпизылы ас мылкыдызъя уж шедьтыны сӥзё. 22,1 процентэз нылпизэс дышетысалзы туала куронъёслы тупась ужъёслы. 16,8 процентэзлэн нылпизэс адӟемзы потэ бадӟым коньдоно ужын. Нылпиоссылы коньдон поттыны юрттысалзы ӝыныезлэсь тросэз анай-атайёс, 5,4 процентэз гинэ алысалзы. Егит кузпалъёсты туннэ туж сюлэмшугъяськытэ семьялэн секыт югдуре вуэмез. 66,5 процентэз юалляськемъёс шуизы: ӝутыны кулэ семьялэсь данзэ. Та уж борды золгес мед басьтӥськозы вылӥ кивалтӥсь ёзъёс. ОСКОН Дышетскозы но, эмъяськозы но Ижевскысь "Ижнефтемаш" санаторий-профилакторийын бӧрсьысь куинетӥ арзэ ини ужало но пумен эмъясько-шутэтско республикаысьтымы инвалидъёслэн огазеяськонысьтызы ёрос ёзъёслэн кивалтӥсьёссы, бухгалтеръёс, Инвалидъёслэн огазеяськонзы соос понна радъяз 24-тӥ октябрьысен дышетскон семинар. Татчы люкаськемъёс кык арня ӵоже тодматскозы ог-огзылэн ужъёсынызы, дышетскозы ужбергатон удысэз радъяны, документъёсын ужаны, ужазы ӵемысь кылдылӥсь мукет юанъёсты сэрттозы-пертчозы. Таӵе семинаръёслэн пайдазы шӧдскымон. Тазалыксэс юнматэм сяна, огазеяськонэ пыремъёс азинсконъёссэс уж вылын но возьмато. Кызьы шуиз республикаысьтымы инвалидъёслэн огазеяськонзылэн кивалтӥсез Владимир Сковородников, ёрос ёзъёслэн кивалтӥсьёссы ас котыразы пумен тросгес шуге-леке сюрем адямиосты кыско, дӥсьтысагес басьтӥсько ни коньдон поттон ужъёсты радъянэ, кусыпъёссэс юнмато ёрос администрациосын. Кудаз ёросын огазеяськон пыд йылаз йыг-йыг сылэ ни, нош кудъёсыз соос сьӧры кыстӥськыны туртто. Вань ньӧмыз понна гинэ ужасьёс но. Кылем аре дышетсконэ ветлэмзы но пайда сётымтэ, лэся, куд-ог ёрос ёзъёслэн кивалтӥсьёссылы. Ляб ужало Юкаменскысь, Селтаысь но Пичи Пургаысь огазеяськонъёс, нош шуге-леке сюремъёс татын ӧжыт ӧвӧл. Шуныт кыл, огазьын пукон, коньдонэн пичильтык юрттон гинэ но адямилэсь мылкыдзэ бурдъя. Та ласянь учконо ке, республикаысьтымы инвалидъёслэн огазеяськонзылэн ужъёсыз урод уг мыно. Котькуд ар ортче кырӟаны-вераны быгатӥсьёслэн, кибашлыослэн фестивальзы, нылпиос но палэнэ уг кылё. Туэ 16-тӥ августэ нырысьсэ ортчиз юрттэт сётонъя марафон. Люкаськем коньдонэн малпало вал нимысьтыз фонд кылдытыны. Малпанзы ӧзгес пӧрмы - вазиськисьёс ӧжыт луэмен, юрттэт сётӥзы 7,5 сюрс манет тыр. Озьы ке но, газетъёс но телевидение пыр республикаямы улӥсьёс тодӥзы инвалидъёслэсь шугъяськонъёссэс. Азинсконъёс вань спорт ӵошатсконъёсын. Тужгес но шугъяськисьёсызлы коньдонэн юрттыны луонлык вань, та аре гинэ 141 сюрс манет тыр юрттэт сётэмын. Палэнысь юрттэт курытэк радъямын та семинар-шутэтскон но. Таяз аре гинэ огазеяськонлэн 1 миллионлэсь ятыр коньдонэз люкаськиз, отчы ик пыре ужбергатон удыс пыр коньдон поттон но бюджет пыр вуэмез. Луонлык кылдӥз транспорт но оргтехника басьтыны, усточиослэсь фестивальзэс радъяны, ёрос ёзъёслы азинскыны юрттэт сётыны. Семинаре люкаськемъёслэн нырысетӥ ужан нуналзы кутскиз пленумысен. Отын ик сэрттэмын-пертчемын вал огазеяськон азьын кылдэм пӧртэм ужпумъёс. Нош тужгес но шугъяськытӥсез юан - Россия Федерациысь инвалидъёсты улон-вылонын утён сярысь законлэн быдэсъяськемез. Сое кутэм дырысен вить ар луиз ни. Вань-а кыӵе ке но азинсконъёс? Пленумлэн ужаз пыриськизы республикаысьтымы Кун Кенешысь, Правительствоысь, Калыкез улон-вылонын утёнъя министерствоысь, протезно-ортопедической предприятиысь, Ижевск город администрациысь валтӥсь специалистъёс. Шаерысьтымы инвалидъёслэсь улон- вылонзэс умоятон ужпумъёсъя соос валэктонъёс сётӥзы. Закон тырмыт уг быдэсъяськы, но номыр уг лэсьтӥськы шуыны уг луы. Транспортын ветлон, коммунальной юрттэт сётон, телефон дун тырон ужпумъёсъя юанъёс уг ке кылдо ни, секыт югдур дунтэк эмъюм висъянэн, уг тырмо эмъяськон путёвкаос, будо квартиралы черодъёс, вить ар ӵоже таяз арын нырысьсэ транспорт сётэмын ожысь инвалидъёслы - мукетъёсыз сярысь та вакытэ вераськон ик ӧвӧл. Юанъёс но быдэстоно ужпумъёс трос. Оскон вань, "Удмуртилэн азинсконэз" программа улонэ пыӵаз ке, трос сюрс шуге-леке сюрем адямиос капчигес шокчозы. Калыклэсь улон-вылонзэ умоятон ужпумъёслы, соос пӧлын инвалидъёслэсь но, отын бадӟым саклык висъямын угось. Л.МАЛЫХ. АРХИВЫСЬ ДОКУМЕНТЪЁСЪЯ Удмуртия ХХ дауре 1952-тӥ ар Удмуртилэн экономикаяз азьпал радэ пуктэмын вал секыт промышленность, со пыр - военной кужымез юнматон. Озьы паськытаз станокъёсты уже кутон. Соин ӵош азинскиз мотоциклъёсты но радиолаосты поттон. Нош улон интыос лэсьтон, калыклэсь тазалыксэ эмъян но нылпиосты дышетон туж ляб радъяськизы. Таӵе вакытэ бадӟым инты басьтӥз ВКП(б)-лэн ЦК-езлэн 2-тӥ январе кутэм партилэн Удмурт обкомезлэн промышленностез но гурт хозяйствоез азинтонын ляб ужамез сярысь постановлениез. Отын верамын вал, парторганизациос социалистической ӵошатсконэз ляб радъяло, ӟечлык понна тырмыт уг нюръясько, заводъёсын ыштонъёс бадӟымесь, ӝикыт ужан радъямтэ, электрокужым пайдаё уг кутӥськы. Соин валче туж трос ыштонъёс луо шуыса. Постановление потэм бере, республикаямы паськыт радъяськизы пӧртэм ӵошатсконъёс, ӝикыт ужан понна нюръяськон. Озьы Ижысь андан ӵыжатӥсьёслэн 60 бригадазы ар ӵоже 1152 тонна корт шыръяз. Ӟеч ужаны уг луы вал, егитъёсты дышетытэк. соин радъямын вал техникаен умойгес ужанъя курсъёс но азьмынӥсь амалъёсты валэктонъя школаос. котькуд рабочийлы ватсаса специальность сётъязы на. Быдэс шаерын туж бадӟымесь лэсьтӥськонъёс кутскизы. Со чакламын вал Сталинэн но сӥземын коммунизм лэсьтонлы. Отчы пыризы гидроэлектростанциосты ӝутон, Волгаын, Донын но Днепрын каналъёс кырон. Пӧсьтолэзе ужаны кутскиз В.И.Ленин нимо Волга-Дон канал. Та каналэз но Каховка гидроузелэз лэсьтонын Удмуртиысь сюосын пиос но нылъёс ужазы. Асьме дорысь отчы келяллязы писпу, прокат станокъёс, редукторъёс, перфораторъёс, музъем портонъёс, эмъюмъёс но мукетсэ. Секыт промышленностез ӝутэмен валче лябӟиз капчи промышленность, мукет сямен вераса, калыклы кулэ луись вузъёсты поттон. Удмуртиысь 41 предприятие пӧлысь 28-эз планъёссэ ӧз быдэсъя, поттэм вуззылэн асдуныз туж вылӥын вал. Кылсярысь, Тыловайын поттэм пукон, 38 манет интые, 116 манет сылэ вал. Юрттэт лябен, гурт удыс 1913-тӥ арынлэсь но улӥе васькиз. 1952-тӥ арын республикаысьтымы уноез колхозъёс туж ӧжыт будэтӥзы ю тысь, картофка, бакча сиёнъёс но пудо сиён, нянь вузан планзэс ӧз быдэстэ, тырмыт кидыс кисьтыны ӧз быгатэ, колхозникъёслы ужамзы понна котькуд трудоденьлы туж ичи ю-нянь сётӥзы, гурт калык сютэм улӥз, ас киыныз нянь будэтыса вылысь. Колхозник азе правительствоен пуктэм чурытэсь куронъёс номыр ӟечсэ ӧз сётэ. Колхозъёсты огазеязы, бадӟыматъязы, Удмуртиын, 3451 колхоз интые, 959 гинэ кылиз, бырись гуртъёсысь пиосмурттэк кылем семьяос юртъёссэс выжтыны дась ӧй вал, уж но уждун ласянь уката шуг луиз. Республикаысь городъёсын улӥсьёслы тырмыт бакча сиёнъёс но картофка шедьымтэен, УАССР-ысь Министръёслэн Кенешсы мартэ городъёс вӧзысь ёросъёсын бакча сиёнъёс но картофка будэтон но йӧл хозяйствоосты азинтон сярысь постановление кутӥз. Озьы ке но, колхозник, рабочий яке служащий сярысь, 4 поллы ичи уждун басьтэ вал. Соин ӵош ик колхозъёсты кужмысь косылӥзы кунлы ю тысь вузанъя планзэс быдэстыны, итымъёсысь но кеносъёсысь ваньзэ сямен ю тысьсэс ӵужыса поттатӥзы. Колхохзникъёслы асьсэ киын будэтэм пудо-животсы понна но туж бадӟымесь тыронъёс пуктӥзы. КПСС-лэн ЪИХ съездэз ортчиз октябре. 1951-тӥ-55-тӥ аръёслы директиваос кутэмын вал 1952-тӥ арлэн пумаз гинэ. Таиз но съезд саклык висъяз секыт индустриез элктрофикациез но гурт удысэз азинтонлы. таяз аре Удмуртиын усьтӥськизы Ижевскысь механической но Глазовысь дышетӥсьёсты дасянъя институтъёс. Ижевскын пуктэмын вал 8 магазин, 2 сиськонни, Сарапулын кык столовой но быдэн магазин Воткинскын, Глазовын но Можгалан, нош вузкаронын трос вузъёс уг тырмо вал на. Куанер улэменызы, калыклэн тазалыкез ляб вал. 30 сюрс адями трахомаен курадӟиз, со пӧлысь 7615-ез - дышетскись нылпиос. соин Ижевскын ортчытэмын вал Гельмгельц нимо научно-исследовательской институтлэн сессиез. воткинсклы культурно-бытовой лэсьтӥськон понна, трос коньдон сётэмын. Ленин нимо клубын усьтӥськиз суредасьёслэн адӟытонзы, городын ветлыны кутскиз автобус, ужаса улӥсьёслы сад-бакча возьыны быдэн 6 сотка музъем висъямын вал. Ужаны кутскиз "Ижевск-1" чугун сюрес вокзал. Вис каремез бере выльысь потыны кутскиз комсомолецъёслэн "Егит большевик" газетсы. УАССР-ысь Вылӥ Кенешлэн президиумез УССР-ысь калык художник дано ним сётон сярысь Указ кутӥз. Ижевскын пионеръёслы но дышетскисьёслы нылпи экскурсионно-туристической станция усьтэмын. Писатель Александр Эрик янгыше уськытэмын вал. Е.ВЯТКИНА. Удмурт Республикаысь ЦДНИ-ысь валтӥсь специалист. Зураысь колхозъёслэн огъя кужыменызы пуктэм ГЭС. Чугун сюрес вылын ужась азьмынӥсь комсомолецъёс: машинист А.Федорычев, солэн юрттӥсез П.Соколов но кочегар П.Желтышев. Сюрес лёгисьёс уз вунэ! Тямыстон кык ар талэсь азьло, 1918-тӥ арын 31-тӥ октябре, вордӥськиз "Гудыри" газет. Солэсь азьло, 1918-тӥ арын 24-тӥ январе, кылдӥз "Виль синь" газет. "Гудыри" газетлэн нырысетӥ предакторез вал Алнаш ёросысь Кизекгуртын вордӥськем пи Трофим Борисов. Редакцилы ужасьёс утчаса, Трофим Кузьмич вуылӥз Алнаш волосте, Можгала, Иже но Вятские Поляны городэ. Алабгое (Елабугае) ӝоген лыктӥзы Михаил Шахмаев, Артемий Кириллов, Пётр Буранов, Николай Зайцев, Николай Буранов. Михаил Шахмаев луиз редакцилэн кыл кутӥсь секретарез, Артемий Кириллов - лыдъясь-чотась (счетовод), Пётр Буранов - газетэз бичась (наборщик), нош Николай Зайцевез но Николай бурановез дышетӥсьёсты дасясь семинарие дышетскыны ыстӥзы. Газет кылдэм бере ик солэн уаз лулысь-сюлмысь пыриськизы Куӟебай Герд, Иван Векшин, Яков Ильин, никифор Корнилов, мукетъёс. Редакциын ужасьёс тырмымтэен, Т.К.Борисов но М.Н.шахмаев тодмооссылы гожтэтъёс ысъязы. "Гудырие" Алнаш волостьысь ик вуизы Анисим туганаев, Роман Кубашев, нош Грах волостьысь - Егор Овчинников, Константин николаев, Семён Биккузин но Даниил Майоров. соос пӧлысь куд-огез ужаны кутскизы комиссариатын, куд-огез - типографиын но редакциын. Даниил Майоров нырысь ик газетэз бичась (наборщик) вал, собере редакциын ужаны кутскиз. Колчаклэн армиез вуэмен сэрен, редакция кошконо луиз Вятские Поляны городэ, отысь - Шихран станцие. Тӧдьыосты уллям бере, Алабгое ик берытскиз. Нош 1919-тӥ арлэн пумаз, Удмурт комиссариат Сарапулэ выжемен валче, "Гудыри" но отчы кошкиз. 1920-тӥ арын январь толэзьысен Ижевскын потыны кутскиз. Граждан ож аръёсы газет, интызэ вошъямен, 1918-тӥ арын потӥз тямыс пол, 1919-тӥ арын - куамын сизьым пол, 1920-тӥ арын - витьтон сизьым пол гинэ. 1920-тӥ-1925-тӥ аръёсы "гудыриын" гожтэтъёс печатласькылӥзы таӵе ӧтёнъёс улсын: "Кунгож сьӧрын", "Ож заводын", "Сютэмъёслы юрттон", "Музъем ужан", "Муш вордон", "Гожтэтъёс", "Гожтэт песьтэр", "Пӧртэм иворъёс". "гудыри" котыре люкаськизы но отын кужымзэс эскеризы уноез удмурт гожъясьёс. Асьсэлэсь сюрессэс мытӥзы Даниил Майоров, Иван Дядюков, Дмитрий Корепанов (Кедра Митрей), Григорий Медведев но мукетъёсыз. Кузь но секыт сюресэз ортчиз "гудыри" - удмурт журналистикалы инъет кылдытӥсь газет. 1930-тӥ арысен со нимаськиз "Удмурт коммуна", 1943-тӥ арысен - "Советской Удмуртия", 1992-тӥ арысен луиз "Удмурт дунне". Пӧртэм аръёсы газетъёсын кивалтӥзы пӧртэм редакторъёс. Эшъёссэс азьлань валтӥзы Константин Яковлев, Трофим Борисов, Петр Баграшов, Дмитрий Корепанов (Кедра Митрей), Степан бурбуров, Иван Калинин, Макар волков, Пётр Кильдибеков, поликарп русских, Василий тронин, Иона Кутявин, Василий Максимов, Трофим Иванов, Николай Хохряков, андрей Бутолин, Пётр Яшин, Алексей Стрижов, Василий Михайлов, Анатолий Комаров. 1994-тӥ арын "Удмурт дунне" газетлэн редакторез луиз Алексей Шкляев. Туннэ сое лыдӟе дас куинь сюрслэсь ятыр адями. Та нуналъёсы, ӝытъёсы... Та нуналъёсы республикаысьтымы Культурая министерство трос ужрадъёссэ сӥзе Удмурт кунмылэн 80 ар тырмонэзлы. 31-тӥ октябре К. Герд нимо Национальной музейын усьтӥське "Шаермылэн ортчем сюресэз - со калыкмылэн но сюресэз" выставка. 1-тӥ ноябре Синтэмъёслэн огазеяськонзылэн библиотекаяз - Удмурт шаермылы сӥзем литературной ӝыт. 2-тӥ ноябре Пичи Пурга ёрос библиотекаын элькун конкурслы йылпумъянъёс лэсьтэмын луозы: кудӥз библиотека ӟечгес вӧлмытӥз шаермылы сӥзем литератураез. 31-тӥ октябрьысен 2-тӥ ноябрёзь - Игра ёросын литературалы но искусстволы сӥзем нуналъёс. Программаын - Удмурт Республикалэн кунлыкезлы 80 ар тырмонэн герӟаськем ужрадъёс: конференция, концертъёс, конкурсъёс, выставкаос, тодмо писательёсын, артистъёсын, тодосчиосын пумиськонъёс, творческой ӝытъёс. Та ужрадъёсы пырисько Удмурт Республикаысь Кун Кенешлэн депутатъёсыз С. Э. Широбокова но Е. И. Богомольный. А. Апаева. Играысь кооператоръёс дорын Тамара Чиркова: "Котькуд гуртэ вуиськом" Выльдӥськон, рынокен экономикае выжон кутскем бере, тросэз удысъёс (калыклы бытовой юрттэт сётон, кун вузкарон) куашказы но шӧдскымон лябӟизы. Озьы шуыны уг луы шаерысьтымы Удмуртпотребсоюз сярысь. Гуртысь вузкарисьёс ас интызэс ӧз ыштэ, шуг-секытысь потыны амалъёс шедьтӥзы. Тӥни соин ик Удмуртиысь кооператоръёс Россиын котьку азьпал радын ветло. Нош республикаямы ялан вормисьёс пӧлын луо Играысь вузкарисьёс. Алигес ми вуылӥм татысь кооператоръёс доры. Райполэн кивалтӥсезлэн воштӥсеныз Тамара Чирковаен выль магазинъёсты учким, отысь ужасьёсын вераським. Адямиос капчи мылкыдын вузкаро. Нош ачиз Тамара Аркадьевна татын 30 арлэсь кема тырше ни. Йылпумъяз со Сарапулысь кооперативной техникумез. Собере огдыре ужаса тодон- валанзэ будэтӥз Москваысь кооперативно институтлэн Чебоксарыысь ёзаз. Вал экономист, юрист, базалэн директорез, профкомлэн кивалтӥсез, нош 1993-тӥ арысен райполэн кивалтӥсезлэн кадръёсъя воштӥсез луэ. Али но профсоюзной комитетлэсь ужзэ радъя. Туннэ Тамара Чирковаен вераськонмы. - Тамара Аркадьевна, тӥ райпоын самой кема ужасьёс пӧлы пыриськоды. Мар верасалды туннэ ужъёсты но берло воштӥськонъёсты сярысь? - Райполэн ужаз бадӟым инты басьто вузкарон, калыкез сюдон, адямиослэсь мултэс сиён-юонзэс, бакча сиёнъёссэс, картофказэс басьтон но бытовой юрттэт сётон. Берло дыре аптекаос но усьтӥськом, эмъюмъёс вузаськом ни. Но вань та удысъёсмы пӧлысь нырысетӥ инты басьтэ вузкарон. Ми котькуд гуртэ вуиськом, одӥгзэ но ум вунэтӥське. Али милям 62 магазинмы, калыкез сюдонъя 11 предприятимы но 500 пала ужасьёсмы. Соос 43 специальностья тыршо. Вузкарисьёсмы, пӧрасьёсмы, товароведъёсмы, экономистъёсмы, бухгалтеръёсмы сяна, вань час, холодильник эмъясьёсмы, водительёсмы, трактористъёсмы, фотографъёсмы но музон ужасьёсмы. Ми вузкариськом, калыклы бытъя юрттэт сётӥськом интыысь 14 администрациосын но 2 посёлокъёсын. Матысь дыре гурт калыклэн куанермемез, ичи уждун басьтэмез ужамы юн шӧдӥське. Райполэн ноку уг тырмо оборотной средствоосыз. Со люкетэ вузкаронэз умоятыны но ужан культураез ӝутыны. Озьы ке но, кооператоръёс уг чигнало. Кыдёке учкытэк, тани басьтом кылем арез. Миым огъя розничной товарооборотмы 75 миллион манет ёрос луиз, яке, валля арен ӵошатыса (со дыре дунъёсын), 109 процент басьтэ. Со пӧлысь вузкарон 69 миллион манет люкаськиз, но калыкез сюдон - 5,7 миллион. Таиз ужмы 21 процентлы будӥз. Калыкез сюдӥсьёс асьсэос 6,5 миллион манет тыр сиён-юон поттӥзы, яке 1998-тӥ арын сярысь 30 процентлы ятыр. Вузкарон тазьы люкиське: сиён-юонъёс вузамын 56 миллион манетлы, нош сиён-юон луисьтэм вузъёс - 12,9 мллионлы. Нырысез розничной оборотын 81 процент басьтэ, нош кыкетӥез - 19 процент. Ар ӵоже 34 пумо вузъёс тросгес вузамын, кылсярысь, сельд чорыг 2,2 поллы, маргарин, сӥль консерваос - 1,5-1,6, тамак - 1,7 поллы. Со дыре ик кулэсмиз пудо вӧй, сыр, чай, сахар, пызь, чорыг консерваос вузан. Берло вить ар ӵоже ялан йылэ лэсьтӥськон материалъёс вузан. Адямиос озьы ик трос басьто мисьтаськон машинаос, холодильникъёс но электропылесосъёс. Ӧжыт вузамын часъёс, телевизоръёс, утюгъёс но музонэз. Быдэс районъя потребкооперацилэн розничной товарооборотэз пумен будэ но али 2,6 процент луэ, нош Удмуртсоюзъя - 9,4 процент. Валля арын вузъёсмы 31 нуналскын вузасько ке вал, миым со лыдпус 24 нунал луиз. Ми азьын одӥг бадӟым ужпум сылэ - гуртын вузкаронэз умоятон но отын улӥсьёслэсь кулэяськонъёссэс тырмыт быдэсъян. Нош со трос шуг-секытъёсын герӟаськемын. район бадӟым, гуртъёс ог-огзылэсь кыдёке интыяськемын. Вузъёсты нуон-ваён понна уно коньдон быре. нош калык трос басьяськыны уг быгаты, уждунзы туж пичи. Соин ик гуртысь магазинъёс пайдаё ужаны уг быгато. Тани райцентрысь 17 магазинъёс ӝынызэ розничной товарооборотэз лэсьто ке, нош гуртысь 45 магазинъёс сомында гинэ вузкаро. Кылсярысь, му вӧй поттӥсьёслэн микрорайоназы ужась одӥг магазин гуртысь 3 магазин мында лэсьтэ. - Нош кыдёкысь но пичи гуртъёсы, кытын магазинды ӧвӧл, кызьы вуиськоды? Выльёссэ ӝутӥськоды-а? - Верай ни вал, одӥг гуртэз но ум вунэтӥське. Кыӵе гуртын магазинмы ӧвӧл, отын потаса вузкариськом. та ласянь районысь администрация но райпо куспын тупанкыл гожтэмын. Али зэмзэ но дасо пала гуртъёсын (Пежвай, Узырмон, Арлеть, Муча но мукет) магазинъёсмы ӧвӧл. Татчы нуналмысь кулэ луись вузъёс (сылал, спичка, кӧс вӧй, кеньыр, тамак, майтал) сяна, улӥсьёслэн куремзыя, дуно вузъёс (мебель, сложной бытовой техника, лэсьтӥськон материалъёс) вуттӥськом. Калык юрттэммылы шумпотэ. Гуртын магазин - со басьяськон инты гинэ ӧвӧл. Адямиос отын пумисько, куспазы кенешо, выль иворъёсты тодо, малпанъёссэс но куронъёссэс верало. Ваньмыз со умой. Но берло дыре санэпидемстанция но мукет со выллем ёзъёс кооператоръёс азе юнме шорысь чурытэсь куронъёс пукто, могӟетъёс лэсьто, нош гуртысь магазинъёсын ужан условиоссэс лыдэ уг басьто, юри вунэто кадь. Вераськон мынэ санитарилэсь куронъёссэ быдэсъян сярысь. Ведь данак гуртъёсын нуналмысь кулэ луись вузъёсын вузкаронъя гинэ магазинъёс усьтэмын, соос юн пичиесь. Озьы ке но, отын азьло котьку луэ вал кынтэм чорыг, пудо но кӧс вӧй, майтал но музонэз. Нош берло дыре сыӵе вузъёсты вузаны уг лэзё ни. Шонер-а со? Ӧвӧл, дыр. Таӵе секыт улон вакытамы но лэсьтӥськиськом на. Миым 1-тӥ декабре Лоза посёлокын выль магазин усьтӥм. Отын куинь вузкарисез. но самой умоез - калык кыӵе шумпотӥз! Игра посёлокысь Западной микрорайоныны но выль магазинлы ужан инты басьтӥм. Калыклы озьы ик юн кельшиз усто аптекамы. Ужаны кутскиз асьмелэн мебельной цехмы. Со магазинъёслы вузкарон оборудование, ӝажыос но мукетсэ лэсьтэ. Нош та нуналъёсы П. Пурга черкогуртын Удмурт Республикалы 80 ар тырмонэз азьын усьтом выль магазин. - Тамара Аркадьевна, вузкарон бере, кыкетӥез бадӟым удысты тӥляд - калыкез сюдон. Таиз сярысь мар верасалды? - Урод уд шуы, татын но азинсконъёсмы вань, вамышъёсмы юнмало. Сое лыдпусъёс но яркыт возьмато. Тани миым калыкез сюдон но асьме кужымен сиён-юон поттон (пыжиськемъёсты но пыртыса) 8 миллион манет тыр люкаськиз, яке, валля арен ӵошатыса, 128 процент луиз. Пусъеме потэ: выль столовойёс трос лэсьтыны ум быгатӥське, но берло дыре соос шӧдскымон чеберско. Озьы шуыны луоз Чутырь черкогуртысь закусочной сярысь. Отын чылкыт, ческыт пӧрасько, уката ик пельняньзы. Мынӥсь-ветлӥсьёс но татчы шумпотыса, капчи мылкыдын пыро. Но котькытын таӵе условиос кыдытымтэ на. - Заготовкаосты кызьы мыно? - Кылем арын 7-тӥ январе Россиысь Правительство калыклы сиён-юон сётонын потребкооперацилэсь интызэ ӝутон сярысь нимысьтыз постановление кутӥз. Райпо соя ужа. Озьы ортчем арын 2,2 миллион манетлы заготовкаос лэсьтэмын, 1998-тӥ арын сярысь 35 процентлы уногес. Оглом вераса, 15 пумо сиён-юонъёс но сырьё басьтӥськом. Калыклэсь кутэмын 32,5 тонна сӥль, картофка - 283, сьӧд корт - 765 тонна, скал ку - 1360, ыж но кунян ку - 983, куштӥськем бумага - 266 центнер. Бичаны кутским эмъюм турынъёс. Со 2 тонна люкамын. Огдыре та ужлэсь куштӥським ни вал, но со туж кулэ маке. Быдэс Удмуртпотребсоюзын Игра райпо огъя заготовкаосъя бадӟым инты уг басьты. Но берло кык ар ӵоже та уж данаклы йылӥз, нош сьӧд корт бичан Удмуртпотребсоюзъя 42 процент басьтэ. Со туж умой. Малы бен калыклэсь мултэс сиён-юонзэ, бакча сиёнъёссэ но емышъёссэ бичан ляб мынэ? Мугез одӥг - та ужез кулэезъя радъяны но нуыны кредит уг сётӥськы, мукет сямен вераса, коньдон уг тырмы. Соин ик заготовкаос каллен азинско. - Тамара Аркадьевна, калыклы бытовой юрттэт сётон удыс куашкамен, тӥ кыӵе услугаосын выриськоды? Райпо пайда басьтэ-а? - Миым 609 сюрс манетлы услугаос сётӥм ке, туэ 9 толэзьскын со лыдпусэз ортчытӥм ни. Ми калыклы таӵе юрттэт сётӥськом: радъямын пыдкутчан, час, сложной бытовой техникаез тупатъян, туспуктон (фото лэсьтон), йыр ӵышкон но музон. Туэ кутским эмъюмъёс вузаны, одӥг аптека усьтӥм ни. Азьланьын та ужез уката паськытатом. Ыштонъёс трос ке но адӟиськом, кылем арез пайдаен йылпумъям, изъян ӧм адӟе. Потребкооперацилэн азинскон фондэз будэ. Асьмелэн оборотной средствоосмы 380 сюрс манетлы будӥзы но 1260 сюрс манет луизы. Но солэн люкетэз вузъёсын 8,2 процентлы кулэсмизы (1998-тӥ арын 24,8 процент ке вал, миым 16,6 процент кылиз). Тӥни соин сэрен уно кредит басьтоно луэ. Одӥг ар ӵоже процент чотын гинэ Сбербанклы 480 сюрс манет коньдон тырим. Бен, райпо огинтыяз уг сылы, инъетсэ юнматэ. Миым 8 автомашина но трактор басьтӥм, Чутырьысь столовоез выльдӥм, Зура черкогуртысь котельноймес кизер эстӥськонэ выжтӥм но мукет. Оглом 1 миллион 407 сюрс манет тыр коньдон (капвложениос) кутэмын. Вузъёслэн дунзы 19 поцентлы будэтэмын, яке 7 процентлы кулэстэмын. Сотэк калык вузъёсмес чик ӧй басьтысал, дыр. Ведь али нимаз вузкарисьёс туж трос. Нош республикаямы милям гинэ переработка радъямтэ, райполэн ӧвӧл йӧл но колбаса цехъёсыз. - Пайщикъёсын кызьы ужаськоды? - Кооперация ассэ туж умой возьматэ секыт вакытэ, война аръёсы но калык шуге- леке шедьыку. Милям райполы 96 ар ни. Со сыӵе кема возиське пайщикъёсыз чотын. Али тани 10 сюрслэсь трос пайщикъёсмы. Соослэн паевой фондзы 300 сюрс манет ёрос. Пайщикъёслы нимаз магазинъёс но отделъёс пыр дунтэмгес вузъёс сётӥсько. Миым тани соослы 7 миллион манет тыр вузамын. Али котькыӵе вузъёс тырмыт. Соин ик ваньмызлэн пайщик луэмез уг поты. Вылаз ик, гуртысь уноез магазинъёс пайда уг сёто, изъян гинэ ваё. Озьы ке но, ми одӥгзэ но ум пытсаське. калык но пайщикъёс со понна тау каро. Азьланьын пайщикъёсын ужез но умоятоно, соосты вунэтыны уг яра, ӵемгес пумиськылоно но ужзэс адӟоно-возьматоно. Кытын вузкариськёс пайщикъёсын умой ужало, отын ужъёссы но ӟеч мыно. Кылсярысь та ласянь адӟем карымон тырше Факел посёлокысь вузкарись Раиля Плетенева. Со басьтӥз Удмуртиысь услугаос сётон удысысь дано ужась ним. Озьы ик данакез пусъемын Кун Кенешлэн, Правительстволэн но Удмуртпотребсоюзлэн данъян грамотаосынызы. Кӧняез ке ужасьёсмы огдыре ужало но дышетско, тодон-валанъёссэс будэто институтъёсын но техникумъёсын. Нош вань водительёсмы автослесарь спциальность басьтӥзы ни. Оглом пусйыса, районлэсь экономиказэ юнматонын кооператоръёсмы шӧдскымон инты басьто. Тани миым интыысь бюджетэ выт чотын 6,4 мллион манет тыр коньдон пыртӥм, яке вань вузкарись организациос пӧлысь 60 процентлэсь уно, нош райпо огъя розничной товарооборотын, верай ни, 26 процент гинэ басьтэ. Тӥни озьы райпо вузкарем но услугаос сётэмен ӵош районлэсь бюджетсэ но узырмытэ. - Тамара Аркадьевна, 2000-тӥ арез кызьы йылпумъялоды? Азьланезлы кыӵе малпанъёсты? - Ар бен ӧз быры на. Урод быдтом шуыны ым уг пыры. Кылем арын сярысь лыдпусъёсмы умоесгес луозы. Малы ке шуоно, 9 толэзь ӵоже азинлыко ужам, ваньмыз сямен планъёсмы мултэсэн быдэстэмын. Лыдпусэн вераса, розничной товарооборотмы 6,4 миллион манет пала луиз. Озьы ик урод уг мыно калыкез сюдон, сиён-юон поттон, пыжиськон, заготовкаос, услугаос сётон но вуриськон. Азьланезлы но малпанъёсмы сайкыэсь. Юнматоно инъетэз, выльдоно магазинъёсты, ӝутоно ужан культураез, уката ик вузкаронъя. Но самой бадӟымез ужпум - калыклэсь кулэяськонъёссэ ӟечгес но тырмытгес быдэсъян. Со понна ваньзэ лэсьтом, ужасьёсты дышетом но музон ужрадъёс кутом. Нош дэмен, огъя кужымен гурезез но берыктод, шуэ калык. Туннэ эшшо нимысьтыз пусъеме потэ на, ваньмыз та азинсконъёс, матысь дыре мар ӟечез, адӟем карымонэз лэсьтэмын, со райполэн тӧроезлэн Анатолий АндреевичВасильевлэн берло ньыль ар ӵоже вань ужъёсты быгатыса радъяменыз, вузкаронэз умоятон сярысь вис карытэк сюлмаськеменыз но быдэс коллективлэн огкылысь, тупаса ужаменыз. Студент но, офицер но Дуннеысь ваньмызлэн туала армиослэн дасьлыксы возиське на усто дасям резерв чотын но. Со понна висъяське нимысьтыз коньдон, дасяло службалы ярась сӥлё-виро но ӟеч сямо егит адямиосты. Россия Федерацилэн Правительствоез вылӥ дышетскон заведениосысь военной кафедраосын запасысь офицеръёсты дасян сярысь постановление кутӥз. Коня ке ар талэсь азьло кун вылӥ дышетскон заведениосын усьтэмын вал военной кафедраос. Со понна бюджетысь коньдон висъяськиз, студентъёсын ужазы офицеръёс. Но дыр ортчемъя, куд-ог вузъёслэн кивалтӥсьёссы кафедраоссы сярысь "вунэтӥзы". Уксё но палэнэ кошкыны кутскиз. Соин ик куд-ог дышетскон заведениосы нимысьтыз комиссиос потазы. Уно интыосын военной кафедраос быдтэмын вал. Странаямы кылизы на кыксюлэсь уно сыӵе вузъёс кытын дасялозы вуоно офицеръёсты. Дышетскон чакламын кык сю часлы, студентьёс ветлозы лагерьёсы но войскоосы. Студентъёс военной ужлы дышетскозы асьсэлэн мылкыд каремзыя гинэ. Нош бӧрысь запасысь офицеръёсты кык арлы басьтыны бытатозы армие но. . Асьме дорын офицеръёсты дасялозы Ижевскысь техникая Кун университет, медициная но гурт удысъя кун академиос. Н. Лялин. Политика Арня ӵоже дуннеын, странаын, шаерын США-лэн Президентэз Билл Клинтон келяз - ӧз быгаты со Ближний Востокысь югдурез тупатыны. Израиль армия но Палестина калык куспын ожмаськонъёс эшшо лекгес гомӟизы. Бырем муртъёслэн лыдзы нуналлы быдэ будэ. Кӧшкемыт пумитъяськон уг жаля нокинэ но. Улонысь кошко араб пиналъёс-камикадзеос, мугорзэс пуштӥсь арбериосын бинялтыса ожалско соос еврей ожгарчиос вылэ. Таӵе ыштонъёсты адӟыса, йыркурзылэсь сазьяськыны кулэ ни вань кадь кык кунъёслэн кивалтӥсьёссы. Нош озьы уг пӧрмы ай. Кылем арняе Палестинаез мозмытонъя огазеяськонлэн (ООП-лэн) кивалтӥсьёсыз вуылӥзы Москвае, кенешизы Россиысь кунсьӧр ужъёсъя министрен Игорь Ивановен. И. Иванов оскытӥз, Ближний Востокысь югдурез тупатон понна Россия вань кужымзэ сётоз шуыса. Нош Америка, аслэсьтыз янгышамзэ няськатон понна кадь, дуннелэн мукет сэрегез шоры берытскиз - США-лэн кун секретарез Мадлен Олбрайт вуылӥз Уйпал Кореяе. Соин кенешиз страналэн кивалтӥсез Ким Чен Ир. США дасяське президент бырйыны. Куара сётон ортчоз 7-тӥ ноябре. Кужымзэ мертало республиканец Джордж Буш (азьвыл Президентлэн Джордж Бушлэн пиез) но демократ Альберт Гор. Мар шуод, та кампанилэн тулкымъёсыз асьме политикъёсты но шукко. Тани Джордж Буш янгыше уськытӥз Виктор Черномырдинэз, Россилэн азьвыл премьер-министрез Валютая фондлэсь висъям коньдонзэ капыръяз шуыса. Кун Думалэн депутатэз таӵе мыскыллянэз ӧз чида, Россиысь Прокуратурае вазиськиз, Джордж Бушез кыл кутон улэ кыскыны курыса. Валлян Россилэн Президентэз Владимир Путин кошкиз Францие. Отын со француз кивалтӥсьёсын кенешонъёс ортчытоз, озьы ик пыриськоз ЕЭС-лэн саммитаз. Нош арня вискын странамылэн кивалтӥсез пумиськылӥз Югославилэн выль Президентэныз Воислав Коштуницаен. Кык Президентъёс огкылысь луизы кык славян странаослэсь кусыпъёссэс юнматон ласянь. Россия Югославилы юрттэ ни куд-ог объектъёсты выльысь ӝутыны. Матысь дыре чагыр эстӥськон келяны кутскоз. Югославилы берло аръёсы жуммытэм экономикаезлы энергетика удыссэ ӝутоно. Ӵапак энергокужымъёс сярысь вераськон нуиз Турциын дыръяз Россилэн премьер- министрез Михаил Касьянов но. Пусйыны кулэ, Турция - мусульман кун ке но экономиказэ азинтонын дуннеысь азьмынӥсь кунъёслэсь адӟем каре. Солэн кивалтӥсьёсыз но Россиысь куно кенешизы Сьӧд зарезь ултӥ чагыр эстӥськонэн гумыос лэзён сярысь. Паймытӥз нош ик Кун Дума. ЛДПР-лэн кивалтӥсез Владимир Жириновский ӵектэмъя, со эскериз трос кышноен улыны лэзён сярысь законлэсь инъетсэ. Валтӥсь либерал- демократ нокыӵе кариськытэк валэктыны тыршиз, озьы, пе, странаысьтымы демографияя югдурез тупатыны луоз. Нылпи понна кыл кутонэз со нылкышноос вылэ куштыны ӵектэ, соин ик, пе, кышномуртъёсты 42 аресозь кунгож сьӧры потаны лэзёно ӧвӧл. Вераны кулэ, ас вакытаз Ингушетилэн Президентэз Руслан Аушев но та выллем указ кутылӥз ни, но бӧрысь сое ачиз ик палэнтӥз. Угось указ Россилэсь законодательствозэ тӥя вал. Ма, трос кышноен улон азьмынӥсь кунъёсын ӧвӧл. Сирия выллем кӧня ке странаосын гинэ юнматэмын со. Озьы ке но, 21 депутат Жириновскийлэн ӵектонэзлы дурбасьтӥз ик. Тодэм потэ вылэм соослэсь нимтулъёссэс. Баренцево зарезьын "Регалия" платформаын ужась водолазъёс средае ньыль подводникъёслэсь мугоръёссэс ӝутӥзы. Одӥгезлэн капитан-лейтенантлэн Колесниковлэн кисыысьтыз гожтэт шедьтэмын. Отын ивортэмын, лодкаын югдур уродмемен 6-тӥ-8-тӥ отсекъёсысь адямиос, ваньмыз 23 мурт, 9-тӥ отсеке люкаськизы шуыса. Та кылъёс чутрак пумит луо кун комиссилэн ивортонэзлы. Солэн кивалтӥсез Илья Клебанов кык толэзь талэсь азьло вераз вал, лодкаысь экипаж нырысетӥ минутъёсы ик быриз шуыса, нош акустикъёс кылӥзы, пе, атомоходлэн механизмъёсызлэсь куараоссэс. Капитан-лейтенантлэн гожтэмез козьматэ: экипажлэн ог люкетэз кӧня ке дыр ӵоже улэп на вал, лодкаысь кылэм куараос, зэмзэ но, юрттэт курыса "СОС" шуккылэмъёс вал, нош соос 14-тӥ августозь кылӥськизы ук. Озьы бере, со секыт нуналъёсы ваньмыз-а лэсьтэмын вал подводникъёсты мозмытон понна? Удмуртия дасяське кунлык басьтэмез дырысен 80 ар тырмонэз сӥё-дано пусйыны. Кун премирлэн лауреатъёсызлэн, Данъян пулэ интыям коллективъёслэн но нимаз адямиослэн нимтулъёссы тодмоесь ни. Кинлы шумпотон, кинлы... куректон. Москваысь вылӥ кивалтӥсьёс ужысьтыз мозмытӥзы "Ижевский электромеханический завод "Купол" кун предприятилэсь валтӥсь директорзэ Юрий Шестаковез. Валэктӥсьёс вань, озьы, пе, заводлэсь заказъёссэ мукетъёсызлы сётыны малпало шуыса. Юанъёс кылдо: нош кин воштоз Шестаковез? Ӟеч ужась, пыд йылаз йыг-йыг сылӥсь предприятие выльысь уз куашка-а? Ю. Александрова. Федор СУВОРОВ Гырлы Толэсь шорын сыръя уй дарали, Кытын ке но бӧрдэ нош шурали... Малы таӵе сюлэм висе, малы, Оло, мынам со йыромем лулы?.. Уй чалмытэз куддыр куалектытса, Кытын ке но кин ке жуге гырлы... Мӧзмыт гурез ыше веттаськыса, Оло, мынам со йыромем лулы?.. Кайгырыса шудтэм вордскемезлы, Кытын ке но кин ке ӝожмыт бӧрдэ... Малы пинал дырез тодэ со вайытэ, Оло, мынам со йыромем лулы? Арамаез турлы шулдыртыса, Кытын ке но гурзэ кисьтэ уӵы... Куректонзэ лэзе веськатыса, Оло, мынам со йыромем лулы?.. Ӟардон палан выльысь нош гудыръя, Кыӵе кайгу ваёз меда кинлы?.. Оло, со ишанэ шат ворекъя, Оло, мынам со йыромем лулы?.. Инкуазь сюлэмшугъяськытэ Быдэс дуннеысь калык али нырысетӥ ужпумен лыдъя котырысь инкуазез утёнэз. Уго трос гинэ люкаськемын ни ядерной ож тӥрлык, солэн кылем-мылемъёсыз, трос гинэ химия ож тӥрлык. Кытчы сое ваньзэ кароно, кызьы сое быдтоно? Со бордын трос аръёс ӵоже йырзэс тӥяло ини уно адямиос. Та ужпумез эскерыны дасяське Россиысь Кун дума но. Экологияя калык куспо "Гринпис" огазеяськонлэн Россиысь ёзэз али инкуазез утён пумысен юалляськон ортчытэ. Сыӵе ужрад ортчиз Удмуртиын но. Люкамын 25 сюрс 600 кинюртэм. Со али эскерыны сётэмын республикаысьтымы быръёнъя комиссие. Референдум ортчытон понна быдэс Россия 2 миллион 500 сюрс кинюртэм люканы кулэ. Собере сое эскероз Россиысь Конституцияя суд. Бӧрысь ини Россия Федерацилэн Президентэз со документъя Указ кутыны кулэ. юалляськонэз ортчытыны чакламын вуоно арлэн кыкетӥ палараз. Б.НИКИТИН. Шаермылэн кунлыкезлы - 80 ар 1920-тӥ арын 4-тӥ ноябрь удмурт калыклэн историяз вунонтэм кылиз. 80 ар талэсь азьло кутэмын вал Вотской автономной область кылдытон сярысь Декрет. Та дыр ӵоже Удмуртия ортчиз кузь, дано сюресэз. Шӧдскымон вормонъёс басьтэмын промышленностез, гурт удысэз, наукаез, калыкез дышетон но тазалыкез утён удысъёсын. Асьмеос утьыны быгатӥм вашкала калыкмылэсь кылзэ, сямъёссэ, узыр йылолъёссэ. Шаерамы одӥг семья кадь уло но ужало пӧртэм нациен калыкъёс. Соин ик куспамы тупаса улонэз но ог-огдэ валанэз возьматонын республикамы котькинлы адӟем карымон луэ, со - мукет улосъёс пӧлын тужгес но огсыр азинскисез. Удмуртия обороная предприятиосаз ас кужыменыз выльдӥськонэз ортчытыса, азьмынӥсь амалъёсты пыӵатыса быгатӥз промышленностьын ваньбур поттонэз трослы йылэтыны, шоро-куспо уждунэз будэтыны, калыклэсь улон-вылонзэ умоятыны. Удмуртиысь предприятиосын поттэм унозэ вузъёсты но сиён-юонэз шумпотыса басьто республикамылэн палэназ но. 80 арессэ пусъён азьын Удмуртия эшшо одӥг бадӟым, туж кулэ вамыш лэсьтӥз. Шаерамы ортчем референдумын калык мылкыдзэ вераз республикалы президент быръён пумысен. Озьы туэ 15-тӥ октябре быръемын Удмурт Республикалэн нырысетӥ президентэз. Шаермылэн историяз со пыроз чылкак выль вакыт луыса. Выль кивалтон амалъёс юрттозы улон-вылон но экономика удысъёсмес огсыр азинтыны, Россиысь мукет улосъёсын кусыпъёсмес эшшо но юнматыны. Гажано эшъёс! Сюлмысьтым ӟечкыласько тӥледыз республикамылы 80 ар тырмонэн. Сӥзисько юн тазалык, шудбур но тупаса улон. Удмурт Республикаысь Кун Кенешлэн Тӧроез Удмурт Республикалы президентэ быръем мурт А. А. Волков. Мадьяръёс парсь вордыны дышето "Восточный" совхоз - Удмуртиын гинэ ӧвӧл, быдэс Россиын тужгес бадӟымез парсь вордӥсь хозяйство. Озьыен, татын котькытынлэсь но ӟеч тодо яке тодыны кулэ та удысэз. Но визьмо адями вань улытозяз дышетске. Тани совхозысь специалистъёс но дышетскыны, адӟем карыны кутскизы Венгриысь эшъёссылэсь. Кӧня ке толэзь талэсь азьло совхозысь кивалтӥсьёс Москваын ортчись одӥгаз выставкаын тодматскизы Венгриысь парсь вордонъя "Хунгапин" фирмалэн адӟытонэныз. Туж тунсыко потӥзы соослы мадьяръёслэн парсь вордонын басьтэм азинсконъёссы но ужан амалъёссы. Трос гинэ адӟем карымонзэ но синйылтӥзы. Соин ик доразы бертыса кенешизы но огкылэ Вуизы: кунгож сьӧрысь опытэм рос-просгес тодматсконо но луонозэ доразы пыӵатоно. Озьы кӧняез ке валтӥсь специлаистъёс Венгрие ветлӥзы. Валтӥсь технологлэн Августа Сапожниковалэн верамезъя, соос доразы бертытозязы адӟемзылы паймемысь ӧз дугдылэ. Нырысь ик, мадьяръёслэн парсьёссы туж ӝог будо. Соос 180 нунал куспын 120 килограмм сектала люкало. Асьме парсьёсты со понна 240 нунал вордоно. Мадьяръёс парсьлэсь секталазэ (привессэ) 1 килограммлы будэтон понна быдто 3,7 килограмм комбикорм, асьмелэн - 4,8. Нялтас вераса, Венгриын комбикормзы шӧдскымон "зумытГес". Солэн 90 процентэз парсьлэн мугораз кыле, сое куайытэ, асьмелэн 38 процентэз гинэ, кылемез кыедэ кошке. Селекционной уж яке ужан культура но условиос сярысь веранэз ик ӧвӧл: Европа - со Европа ик вань ни. Огъя вераса, кунгож сьӧры ветлэмъёс туж синмаськизы адӟемзылы но мае ке-мае ке доразы одно ик пыӵатоно кариськизы. Ӵош ужась эшъёссылы но сыӵе мылкыд пыӵатыны быгатӥзы. Озьы совхозын решение кутэмын вал "Хунгарипик" фирмаен кема дырлы кусыпъёс тупатыны но возьыны. Алигес Венгриысь специалистъёс вуылӥзы "Восточный" совхозэ. Бьёш кальман но Шлезак Дырдь эскеризы, мар лэсьтыны кулэ совхозын, пудо вордонлэсь пайдазэ будэтон вылысь, но мае пыӵатыны луоно асьсэлэн люкам опытысьтызы Удмуртиысь эшъёссы дорын. Нялтас вераса, соос вылӥ дунъет сётӥзы совхозын селекционной ужлы. Со дыре ик ӧз синмаське асьме пудо сиёнлы, гидъёслы но оборудованилы. Кылсярысь, куноос чылкак паймизы, макем трос вуэз юнме быдто совхозын кыедэз гылтон понна. Пумиськон ог-огеныд тодматскон понна гинэ ӧз ортчы. Кенешемын вал, уртче ужан куинь удысын радъямын луоз шуыса. Нырысь ик, совхозэ Венгриысь басьялозы пичи парсьпиослы сиён - нимысьтыз комбикорм. Кыкетӥ удыс - парсьёслэсь выжызэс тазатон, выльдон. Со понна кунгож сьӧрысь ваемын луозы "хунгари-39" выжыысь айы парсьёс. Куинетӥез - оборудованиез воштон. Ку быдэсъяськыны кутскозы та малпанъёс? Совхозысь кивалтӥсьёслэн верамзыя, Венгриысь комбикорм ворттыны кутскозы соку ик, ку рос-прос тодматскозы сьӧрлось государствоосын вузкарон порядокен. Озьы ик айы парсьёс пумысен но. Нош оборудованиез воштон кутскоз берлогес, совхозын коньдон югдур умоямгес бере. Г.ТИХОНОВ. НИМЗЫ - ДАНЪЯН ПУЛ ВЫЛЫН Мон тонэ тодмасько, маска. Кемалась дырысен синмаськыса учкисько Удмурт Республикаысь Мунё кун театрысь актёрлэн Александр Фёдорович Перевозчиковлэн шудэмез шоры. Удмурт Республикаысь калык артист, Россия Федерациысь дано артист, Удмурт Республикаысь Кун премиослэн лауреатсы 2000-тӥ арын ужын бадӟымесь азинсконъёсыз понна пыртэмын Удмурт Республикалэн Данъян пул вылаз. Татын со луоз нокыӵе маскатэк. Александр Фёдоровичез сцена вылысен гинэ адӟылыны кылдӥз. Нош кыӵе со улонын? Котьку но кыӵе ке роль шудэмзэ, маска дӥсямзэ адӟыны дышемын бере, вераськонмес но та дышем ӧръя азьланьтэм потӥз. Пумиськеммы бере вазиськи: - Маска, мон тонэ тодмасько, нош кин луэмдэ уг тодӥськы. Ойдо тодматском. Но таяз учыре шудоно луоз Александр Фёдорович Перевозчиковлэсь рользэ. Озьыен, усьтӥськом катанчиез. Пинал - Пинал дыры сярысь серемес но мадьыны луоз, сюлэмез вӧсь карыса но. вордӥськи мон 1951-тӥ арын. Война бӧрсьы аръёс туж секытэсь вал. Анай монэ кубистаысь шедьтӥз, шуыны луоз. Оже кошкем картэз 1941-тӥ арын чиптэм-чаптэм ышиз. Дас ар возьмаз солэсь берытскемзэ, собере монэ вордоно кариськиз. Та дуннее вордӥськеме понна анаелы туж тау карисько. Асме улонын мон шедьтӥ, ваньмызлы озьы уз кылды сюлэмызъя уж бырйыны. Пинал дыр асьме дорысь пыраклы кошке, но кылё тодэ ваёнъёс. Улӥмы ми туж куанер, но уг пот солы ӝожтӥськем. Малпасько, гуртын вордӥськем пиналъёслы трослы удалтэ, городын будӥсьёсызлы сярысь. Улӥськод инкуазен артэ, вӧзад пудо-живот. Нылы шоры учкисько но, жаль потэ со мыным - куд-ог дыръя кытчы кариськыны пайме. Кызьы озьы? Милям, пиналъёслэн, номырлы дырмы уг тырмы вал. Липет вылтӥ бызьылоно, салазкиен нискылано, нюлэскытӥ калгоно, тылскем дорын пуконо... Одӥг пол мон ӧжыт гинэ ӝыны гуртэз ӧй суты. Алладинлэн выллем лампа шедьтӥ. Эскерем потӥз сое ӝуатыса. Шедьтӥ спичка. Анай лапасмес сэрттӥз вал, пулы шуыса. Бервылаз трос жуг-жагез кылиз. Тӥни отын ик ӝуатоно кожай лампаез, нош со шӧдтэк шорысь музэ усиз. Жуг-жагез гомак тыл басьтӥз. Гужем вал со учыр, куазь пӧсь, тӧло. Кышканнам мынӥсько ульча кузя бӧрдыса. Полисадниказ бугыръяськись кышномурт адӟиз монэ но юа, мар, пе, луиз. Коркамы ӝуа, шуисько. Таид тӧдьыӟектӥз, кышканназ бызьыса кошкиз тылпуэз кысыны. Ярам, дыраз вуиз, номыр сутскыса ӧз вуы. Мукет дыръя бусыысь зуродэз сутӥм эшъёсыным, партизанэн шудӥськом вал. Куазь зоро. Кысыны но турттӥм, тылыз уг адӟиськы ни вал. Пеньӟектэм. Ӵуказеяз ваньмес школаысь бордгазетын ӵушказы. Шаян вал, мӧзмыса улыны дыр ӧз шедьылы. Тодэмды потэ кызьы дышетски? Нырысетӥ классын кык ар пуки. Эше уг дышетскы, мынам но шудэм потэ. Гуртын монэ эскерись ӧй вал. Соин но, дыр, туж урод дышетски. Тулыс классэнымы походэ мынӥм. Дышетӥсе ваньзэс ушъя, тон, пе, умой дышетскид, тон эшшо но умойгес. Мон сярысь гинэ номыр уг вера. Чидатэк гожеръясько ни котыртӥз. А тонэ, Перевозчиков, мон кыкетӥ арлы кельтӥ, шуэ. Ой, макем ӝож вал мыным соку. Со вӧсь луонэ ик малпаськонэ уськытӥз - визьмаськи. Умой дышетскеме понна, одӥг аре Кунгурысь пещераосы но ветлӥ. Нош октябрёноке кыкетӥ классысен гинэ кутӥзы. Гуртэ макем шумпотыса соку бертӥ, анаелы ушъяськыны турттыса, гадьме возьматӥсько. Со туж огшоры гинэ шуиз, эн, пе, озьы турскы вал, пие. Мар пумысен озьы вераз, уг валаськы, но со кылъёсыз пыраклы сюлмам кылизы. Вань пиналъёс сямен мон вал пионер но, комсомолец но - урод луэме ӧз поты, калык марда улӥ. Школаын дышетскем аръёс малы ке но вунонтэмгес кылё. 1960-тӥ аръёсы улон капчигес луиз, калык но лякытэнгес шокчиз. Гуртоос пӧртэм КВН-ёс, концертъёс возьматъязы, спектакльёс пуктылӥзы. Глазовысь пединститутэз йылпумъяса, школаямы вуиз егит дышетӥсь Юрий Егорович Шкляев. Со дышетӥз милемды крезьгурлы, суреданы, географиен. Спектакльёс пуктылӥмы. Мынам 3-тӥ-4-тӥ классысен ик артист луэме потэ ни вал, со мылкыды уката но юнмаз. Пурысь улонлэсь пегӟыса, югыт азе кыстӥськем потӥз - кызьы бубылиос тыл шоры лобо. Артистлэн улонэз туж чеберен адӟиськиз. Собере, пичи адямиос бадӟымгес луыны туртто - Наполеонлэн но, Ленинлэн но ӝуждалазы, кызьы шуо, "метр с кепкой" вал. Возьматэм потэ, тон пичи адями ӧвӧл - быгатӥськод. Но мунё театр сярысь ноку ӧй малпалля. Вордӥськи мон Дэбес ёросысь Четкер гуртын, тямысэтӥ классэз мынӥ Играла, агаелэсь пичи пиналъёсэ возьманы кулэ вал. Соку тӥни нырысьсэ адӟи мунё театрлэсь спектакльзэ. Йырам малпан ик ӧй вал, отчы сюро шуыса. Тямыс класс бере быдэс арзэ ужай гуртысьтымы клубын директор луыса. Самодеятельносте пыриськемме синйылтыса, лэся, сыӵе ужез оскизы пинал муртлы. Собере Дэбес ёросысь культура отдел пыр монэ ыстӥзы культпросветучилищеысь орестровой отделение. Кык арнязэ дышетскыса, "Удмуртская правда" газетысь адӟи ялон, Мунё театре, пе, кулэ артист. Конкурс пыр ортчи, кутӥзы театре. Культпросветучилищеысь кошкыкум, кӧня тэльмыризы, сцена, пе, тынэсьтыд нокытчы уз пегӟы. Бӧрдыса, бӧрдыса кошки: мон артист ни, малы дышетскод на. Артист Мунё театр мон понна инмарен сӥземын, лэся. Мон асме шедьтӥ - та мынам удысэ, мынам уже. Но оскалтэм потэ ваньзэ, мар герӟаськемын искусствоен: драмаез, эстрадаез, киноын но шудысал. Операын но кырӟам потылӥз, балетын но эктыны мылкыд вал. Культпросветучилищее дышетскыны пырыса, "Машиностроитель" дворецысь вань кружокъёсы гожтӥськи: балетэ, хоре, калык театре, суреданэ. Арня но ветлыса ӧй вутты, театре кутӥзы. Нош отысь потыны дыр ӧй вал ни, ужаны кулэ угось. Азьло туж ӵем потано вал гастрольёсы. Одӥг ар ужаса, монэ театрысь кошкытыны туртто вал. Удмурт мар ке ӟуч сямен уродгес мадиськи, луоз. Худсоветэ ӧтизы но шуо, ми, пе, тонэныд, люкиськыны малпаськом ни вал, но берлояз спектакльын парсьпиез туж умой шудӥд. Макем шумпотӥ мон соку - артист луи шуыса данъязы ук. Мукетыз туж бадӟым шумпотонэ вал 1969-тӥ арын, комсомоллэсь Данъян грамота сётӥзы. Театрын ужаме понна со вал нырысетӥез сыӵе бадӟым дунъет. Театрын ужакум ик армие ветлӥ, заочно дышетски культпросветучилищеысь режиссёръёсты дасясь отделениын, вис карылыса, дас ар пала кыстӥськиз таиз дышетсконэ. Свердловскысь театральной училищеын удмурт студиез йылпумъяй на. Пиос ӧвӧл. Мылкыд карисьёс вал но, одӥгзэ армие басьтӥзы, мукетыз шуиз, артист луэме уг поты, тракторист, пе, луо. Монэ куризы, дышетскыны пыри кыкетӥ курсэ. Озьы 1981-тӥ арын театрамы кылдӥз удмурт труппа. Жаляса верано, удмурт спектакльёсты ми али ум шудӥське. Режиссёр луыса, сизьым спектакль пуктӥ ик. Но сюлэмыя мыным артистлэн ужез ик кельше. Татчы, Мунё театре, ми ваньмы шузиос люкаськемын. Сыӵе уждунэн нокин но уг ул ни, визьмоосыз бизнесэ кошкемын. Эшъёсы шоры учкисько но... оло ми инмарлэн быръемъёсыз, оло инмарлэн куштэм пиналъёсыз. Ваньмызлы шуд уг усьы ук Москваысь артистъёс кадь данэ потыны, озьы ке но, театрысь нокин уг кошкы. Одӥгез трамвай водителе кошкылӥз вал, мукетыз - заводэ. Берен лыктӥзы. Кин театрын куинь арзэ ужа, со люкиськыны уг быгаты ни та удыслэсь. Мунё театрын мон куамын куинетӥ арзэ ужасько ни. Пиналъёслы шудон понна, аслад мылкыдыд пинал луыны кулэ. Нылпиосты ведь уд пӧя, сюлмыныд соосты шӧдыны кулэ. Туж куддыръя уг поты тэтчам-эктэм, нош сцена вылэ потӥськод но, воштӥськиськод. Рольёс сярысь ке верано, соос ваньмыз умоесь. Но нырысетӥез, умой но ӧй шуды, дыр, тужгес но вунонтэм кылиз. Со вал "Розовый фламинго" спектакльысь белогвардеец. Мыным сюлэмъям отрицательной рольёс. Отын тросгес шудыны, шаянъяськыны луэ. Нош шузияськыны мон яратӥсько. Яратӥсько, куке монэ серекъяло. Улонын мон туж возьдаськись, тодмотэм адямиос пӧлын бакомисько. Куд-ог дыръя аслым но умой ӧвӧл, ас дуннеям выйыса пукисько. Нош сцена вылын возьдаськонэ ыше-быре, аслым ачим абдрасько. Роль умой, учкисьёс шорад учко, тон соослы кельшиськод - ачим ик ӧвӧл кадь со. Малы мон яратӥсько мунёосты? Соос сьӧры ватскыны луэ. Учкиськод, кин кытын пуке, мар каре. Озьы залэн капчигес кусып шедьтыны. Мунё театрын сяна, "Чагыр, чагыр дыдыке" радиопередачаын вить но, куать но роль шудӥсько, Кузьгубей но луисько. Кельше телевидениысь Питранлэн образэз, со мынам сямылы тупа, сыӵе ик визьтэмъяськись. Пыриськисько Анатолий Ушаковлэн серекъянлы сӥзем ӝытъёсаз. Малпай, мынам улонэ мунёосын герӟаськемын бере, малы соосты уже кутонтэм? Озьы кылдӥз песянай. Берло дыре пӧртэм маскаосы кылдӥзы: песянай, песятай, грузин, алкоголик, ачиз Ушаков. Матысь дыре соосты сцена вылын улӟытыны малпасько. Аслэсьтым быгатэмме эскери Ар.-Сергилэн "Ёк-макарёк" моноспектакляз. Вить пол шудӥ ни, дыр. Аслым но кельше спектакль, гожтэмез но яраз. Но уггес мыны со. Кулэ продюсер, кудӥз вузаны быгатысал спектаклез. Адямиослы но со кельшоз, дыр, но учкисез люканы секыт. Удмуртъёс уггес ярато спектакльёсты учкыны, кылызлэсь ик кышкало, лэся. Кырӟасьёсты, эктӥсьёсты кулэгес каро. Кузпал Ми, артистъёс, туж уродэсь кузпалъёс, дыр. Со сярысь мед вералоз ни кышное Ирина Николаевна. Ми соин кыкнамы но Мунё театрын ужаськом, кузпалы кивалтэ постановка люкетэн. Театрез со мынэсьтым но золгес яратэ, дыр. Тодматским но ми театрын ик. Кык арзэ солэн кабинетаз возьмаськись сямен пуки, собере кузпалъяським. Дас куать арзэ ӵош улӥськом ни. Ог-огмес туж валаськом, эшшо трос аръёс озьы улыны мед кылдоз (пуэ йыга). Кин семьяямы кузё? Кузпалы шуэ, тон, пе, кивалтӥсь. Нош мон малпасько, солэн ик кивалтыны пӧрме. Туж быгатыса мон вылэ погыльтӥз сиён пӧранэз. Шӧдӥз, дыр, пӧраськыны быгатонлыкме. Шыд но пӧзьтӥсько, пыжиськисько но. Нимысьтыз кыӵе ке но яратоно сиёнэ ӧвӧл. Кызьы шуо удмуртъёс, пӧрам сиён ваньмыз ческыт. Нылы яратэ пельнянь но мильым пӧрамме. Со милям куинь арескозь гуртын пукиз. Садике нырысетӥ нуналаз мынӥз но, нуназелы манной ӝук сёто. Пумитъяське, пе, мон тае уг сиы, вае мыным пельнянь яке мильым, кудзэ мынам атае дася. Нош кыӵе ке йӧспӧртэм сиён пӧрано ке, мыным книга юрттэ. Одӥг дыре йыринтӥ квартирамес чебертыны - кухнязэ но прихожейзэ. Нылмылы школае ветлыны матэгес мед луоз шуыса, квартирамес воштӥм. Ремонт лэсьтоно вал. Тӥни соку, лопатка ныдъёсты ӝыныё карыса, борддоръёсты но вӧлдэтэз соин шобыртӥ. Корен лэсьтэм кадь луиз. Волятыса олифаен зырай. Ӝыны арлэсь ятыр лэсьтыны выри. Кин ке адӟе ке, туж пайме, шутэтскиськод, пе, татын. Ӧйтӧд, мон сямен номыр сыӵе-таӵеез ӧвӧл кадь. Квартирамес чебертыны мылкыд вал, нош уксё ӧвӧл. Тӥни озьы оломар но малпано луиз. Туалетэ, ванное плиткаос гинэ но тодмоос пыр басьтӥськиз. Али пыриськод магазинъёсы но, син палёме. Соку ке таӵе материал луысал, вӧзаз уксё медло вал на. Атай Кузпалъяськимы ми бер, кыкнамылы но куамын куинь арес вал ни. Ар ортчыса вордӥськиз нылмы, Анечка. Визьман-дышетонэн выре анаез, нырысетӥ классысен соос ӵош дышетско. Мон уг мерскиськы пӧлазы. Куронэ сыӵе гинэ: учкы мон шоры, дышетскы - лэсьты мон кадь, лэсьты мынэсьтым умойгес. Вӧсь кареме, чабкылэме ӧвӧл, огмес огмы ми туж яратӥськом. Анямы милям театрын будэмын, но али солэн переходной шуон дырыз, дас куатяз мынэ. Театр шоры кырыжгес учке, мар, пе, со тӥляд Мунё театрды. Абдрасько, куинетӥ классозь вань пиналъёс кыстӥсько театрамы, уг ярато сое укмысэтӥ классозь, собере нош ик яратон кутске. Нылмы вылысь но ми сое шӧдӥськом. Пичи дыръяз дорын но весь мунёосын шудӥськом вал. Али со дышетске Ижевскысь 44 номеро гуманитарной лицейын. Кытчы сюлэмыз кыстӥськоз, ӧйтӧд, мылкыдыз али шалтай-балтай: писатель но, журналист но, кинорежиссёр но, артист но луысал. Творческой уж борды ик кыстӥське, но ӵемысь дорысьтымы вераськонъёсты кылэ: "нош ик уждун ӧз сётэ" но мукет со выллем. Соин ик малпаське но, дыр, азьланез сярысь. Кун мурт Мар веранэз странаямы, шаерамы кылдэм югдур пумысен, куке сюлэм висе Мунё театр сярысь. Ужпумъёс милям туж трос. Уксё трос луысал ке, мон та театрез яке пуштытысал, куашкатысал, собере выльысь пуктысал, яке зол-зол басьтӥськысал выльдон-тупатъян ужъёс борды. Шуо ук, театр кутске ошетысен. Театре пырыса ик пиналъёс мед шӧдозы искусстволэсь шокамзэ. Мар веранэз кызь ар талэсь азьло пуктэм юрт сярысь, со уг тупа ни туала куронъёслы. Театре нуись сюресъёс но мед чеберскозы вал. Чылкытатэмын- сузямын ӧвӧл, лампаос уг югдыто. Выль ар праздникъёс дыръя берлоез спектакльмы ньыль часын ӝыт быре. Урамын пеймыт ни, сюбег лымы сюрес кузя кымесэз но коканы кема ӧвӧл. Ваньмыз со потэ кузё бордысь, нош мукет сямен вераса - кузё ӧвӧлысь. Мынам ветлэме вань Венгрие но Финляндие. Кунгожез потыса уд вуиськы на, син шоры йӧто Венгрилэн мажесэн ортчем кадь чылкыт утялтэм бусыосыз. Нош Украиналэн бусыосаз отын но татын кырыжам трактор я комбайн сылэ. Венгер кылысь берыктӥсь тае туж огшоры валэктӥз - татын кузёез вань. Но таӵе улонмы шоры учкытэк, сюлэмъёсысьтымы медаз кысы чеберлыклэн, искусстволэн мальдэмез. Л.МАЛЫХ. Тугоко Луо пӧрмоз-а зарнилы? Кызьы тодмо, вуоно толэьзлэн шораз Ижын ортчоз Россиысь егитъёслэн бадӟым пумиськонзы. Сое ортчытӥсьёс пӧлын - странаысьтымы Калыкъёслэн ассамблеязы, асьме Кун Кенеш, "Шунды" огазеяськон но мукетъёсыз. Ужрадэз дасян вылысь, Удмуртие вуылӥзы Калыкъёслэн ассамблеязылэн кенешезлэн Тӧроез Рамазан Абдулатипов но Россия Федерацилэн Кун Думаысьтыз Нациослэн ужъёссыя комитетлэн кивалтӥсезлэн воштӥсез Светлана Смирнова. Соос пумиськизы элькунысьтымы калык огазеяськонъёслэн ыстэм муртъёсынызы. Пумиськонэз радъяз нациосын ужан политикая министр Николай Мусалимов. Ми дэмласьком тодмасткыны кенешон дыръя куд-ог верамъёсын. Рамазан Абдулатипов: - Калык кусыпъёсты эскеронэн кемалась вырисько ни. Эшъёсын ӵош ми кичӧлтӥсьёс пӧлын вал Москваын выжы калыкъёслы сӥзем конференция ортчытонлы. Отчы 45 кунысь ыстэмъёс пыриськизы. Мар но со лэсьтӥське ни. Тани Ямало-Ненецкой но Ханты- Мансийской округъёсын кутэмын выжы луись общинаос сярысь законъёс, тупатэмын отысь калыкъёслы кивалтонъя быръем ёзъёсын инты сётон рад. Мон малпасько, асьмелы кызьы ке вырӟытоно Кун Думалэсь депутатъёссэ, умой-умой вераськоно отысь асьме удысъя депутат огазеяськонэ пырем эшъёсын, палаталэн кивалтӥсьёсыныз. Светлана Смирнова: - Кун Думае пӧртэм мылкыдо адямиос быръемын. Но соос пӧлын ичи ӧвӧл калык кусыпъёсты радъяны, умоятыны тыршись муртъёс. Ужпумез кызьы ке но чакласа возён вылысь, ми кенешим нимысьтыз группае огазеяськыны. Солы "Калыкъёслэн эшъяськонзы - Россилэн быдэслыкез" ним сётӥм. Группае пыризы ваньмысьтыз сямен фракциосысь депутатъёс. Мыным эшъёс кивалтӥсь луыны дэмлазы. Огазеяськонмылэн нырысетӥ кенешоназ ик вераським валтӥсь ӵектонъёсмес радъяны но Россилэн президентэзлы келяны. Туж оскиськом вал, дэмланъёсмы Владимир Путинлэн Федерацилэн Ӧтчамезлы вазиськоназ (посланияз) пырозы шуыса. Жаляса верано луиськом, со йӧно документэ калык кусыпъёсты утён сярысь кылъёс ӧз шеде. Озьы ик ӧй вал пусъемын Россилэн трос калыко луэмез сярысь веран. Со учыр возьматэ: вылӥ кивалтон ёзъёсын асьме ужпумъёсты валан уг тырмы на. Озьы ке но, кутскем ужмес ми аналтыны ум малпаське. Со понна пӧртэм амалъёсты кутом. Тани ӵош кариськыса золомытом Калыкъёслэн ассамблеязылэсь кужымзэ. Бордамы егитъёсты кыскыны тыршом. Юнме шат егитъёслэсь форумзэс но люкано кариським? Со ужрадлэн пайдаез одно ик луоз. Кунмуртъёслэн правооссы сярысь партиез ӝоггес кутон ласянь. Мукет государствоос борды та ужпумъя итӥським ке, юнгес быгатом ичи лыдъем калыкъёслэсь кылзэс азинтон борды басьтӥськыны. Алигес учки куд-ог лыдпусъёсты. Удмуртъёс Волга котырысь калыкъёс пӧлын висъясько, кылзэс тодымтэенызы но тодыны тыршымтэенызы. Куд-огез шуэ ке но, отын, пе, номыр умойтэмез ӧвӧл, нациос ог-огенызы сурасько, ӟучомо, огъя культурае кыстӥсько. Мынам малпамея, таӵе сюрес асьмелы уг тупа. Нялтас тани мае пусйысал: опыт возьматэ, тужгес но лек националистъёс пото ас выжыоссэс, ас кылзэс тодӥсьтэмъёс пӧлысь. Сыӵеос кылзэс валамтэзы понна но янгыш уськытыны выро мукет калыкъёсты. Кылэз вӧлмытоно одно ик. Куддыр со понна трос коньдон но кулэ ӧвӧл ук. Тани толон лобиськом Иже самолётэн. Светлана Константиновналэсь юасько: уг луы шат салонын иворъёсты кык яке куинь кылын вераны? Самолёт кытысь ке ӧвӧл, со Удмуртиысь компанилэн ваньбурез. Дышеты вылэм ужасьёсты, егит нылъёсты, кӧня ке коть удмурт кыл вераны, соослы шуг ӧвӧл ук. Нош лобисьёслы - шумпотон но ас шаерыныд данъяськон. Нациос куспын ужпумъёс, нырысь ик, ог-огдэ гажанэн герӟаськемын. Бен, со гинэ тырмыт ӧвӧл. Коньдон но кулэ. Но таиз сюлмаськон быдэстонтэм шат? Валаса, уртче ужаськод ке, пӧрме ук. Тани тӥляд депутатъёсты юнматӥзы Национальной политикая концепциез. Табере котыр ласянь тыршоно сое улонэ пыӵатыны. Адямиосын пумиськонъёс дыръя мыным ӵем сётъяло таӵе юан: маин пӧртэм луэ "национальной" валатон "националистической" кыллэсь? Мон тазьы валэктӥсько. Соослэн кусыпсы луэ отын, кытын ас калыкеныд данъяськон, ас выжыостэ гажан- яратон выже мукет нациосты аслэсьтыд уродгес каронэ, соосты ултӥянэ. Виктор Ярошенко, Удмуртиысь казакъёслэн кивалтӥсьсы: - Берло дыре кылыны луэ, Россиын калыкъёслэн правооссыя уполномоченнойлэсь должностьсэ кылдытыны туртто шуыса. Кулэ меда со? Тани Думаын но нимысьтыз комитет ужа ук... Светлана Смирнова: - Бен, сыӵе мылкыдъёс вань. Та дырлы кык сюрес эскеремын. Нырысетӥезъя пусъемын со уполномоченноез Кун Думалэн депутатъёсыз пӧлысь бырйыны но бӧрысь сое Федерацияя Кенешын юнматыны. Мукетъёсыз дэмлало сыӵе уже адямиез Россиысь общественной огазеяськонъёслэн ӵектэмзыя парламентын бырйыны. Но соку та должностез кун реестре пыртыны, мукет куронъёсты быдэстыны кулэ луоз. Таиз сюрес шуггес. Мон малпасько, депутатъёс пӧлысь ик шедьтозы шуыса. Нош сыӵе муртлэн кулэлыкез сярысь верано ке, оскисько, со странамылы мултэс уз луы. Уполномоченнойлэн ужез юрттоз пӧртэм выжыосысь калыкъёслэсь правооссэс утьыны, дуннеын тупатэм нормаосты асьме дорын тӥян учыръёсты алыны но кулэстыны. Нош Думаысь комитетлэн сыӵе ужоскетъёсыз ӧвӧл. Милям ужмы - закон дасян. Рамазан Абдулатипов: - Уполномоченной юнматытозь трос дыр ортчоз на. Оске мыным. Асьме депутатъёслы калыкъёслэн правооссы сярысь туж кема но зол валэктоно луоз. Пӧлысьтызы данакез та ужпумлэсь туж кыдёкын уго. Озьы ке но, со ужез аналтыны уг яра. Обществоын калык кусыпъёс шоры учконэз умой пала кызьы ке но воштоно ук. Пусъёно созэ но. Куддыр кылыны луэ: Россиын трос коньдон быдто калыкъёсты, соослэсь культуразэс азинтонъя программаос дасянлы. Озьы ӧвӧл со. Ваньмыз ӵошатыса адӟиське. Тани пенсиосъя реформаосты ортчытонэ кӧня ке пол ини быдэн 25 сюрс доллар пала коньдон висъязы. Кытын пайдаез, мар воштӥськиз? Со уксё пенсиос тырыны ӧз мыны ук, быриз реформаез дасянэ. Отысь коть вить процентсэ сётысалзы ке асьме программаосты быдэсъянэ, шуом ичи лыдъем калыкъёслэн кылынызы книга поттонэ, югдур воштӥськысал ни. Малы мон верасько книга сярысь. Издательствоос туннэ ёрмемын ужбергатонэн, уксё жильдон сярысь малпанэн.Нош пичи тиражен асьме кылын книга поттон соослы нокыӵе но пайда уг вайы, солэсь но ортчыт изъянэн берытске. Ма кароно? Та удысын юн сямзэ но кужымзэ возьматыны кулэ государство. Уго котькуд адямилэн тыр улонэз сярысь сюлмаськон - солэн нырысетӥ ужез. Меӵак верасько: асьме странаын та ужпумез валан туж уг тырмы на. Министр луыса ужакум но, бӧрысь но весь пыкылӥсько, министерство ньӧмыз понна гинэ кылдытэмын шуыса. Нимыз вань, нош кужымез ӧвӧл, солы уг сёто югдурез тупатыны луымон зэмос амалъёс, уг висъяло тырмыт коньдон. Министерствоез, мискинь адямиез музэн, отчы- татчы донгало, я кулэсто, я мукет бурд улэ выжто, но вылӥ кивалтӥсьёс пӧлысь нокин но уг сюлмаськы сое национальной политикаез быдэстонъя юн ёзлы пӧрмытон сярысь. Юрий Семенов, Россиысь калыкъёслэн ассамблеязылэн Удмуртиысь ёзэзлэн кивалтӥсез: - Мынам малпамея, тырмымтэос пото нимаз адямилэсь правооссэ укыр вылэ ӝутыны турттон бордысь. Со дыре ик коллективлэсь, огазеяськонлэсь, калыклэсь правооссэс зӥбыны выро. Рамазан Абдулатипов: - Мон соглаш тӥледын. Озьы ужаммы умойтэме вуттэ. Обществоын кусыпъёс тэшкало. Та ласянь ваньмылы зол ужано на. Куддыр кылӥськод нокытын но кивалтон ёзъёс кылдытыку уг чаклало адямилэсь кыӵе выжыысь потэмзэ. Мыдлань веран. Бен, вылӥ уже кандидатлэн национальностез со ужлы тупатэм куронъёс пӧлын нырысетӥез луыны кулэ ӧвӧл. Но сое воксё лыдэ басьтытэк кельтыны нокызьы но уг яра. Калыклэсь мылкыдзэ одно ик чаклано. Котькыӵе ужын эсэпсэ валаны тыршоно. Киын шонаса гинэ улӥд ке, кыдёке уд вуы. Тани чаклалэ ай, малы туннэ, шуом, курадӟо Латвиын улӥсь ӟучъёс? Уг тодо латыш кылэз. Уг тодо, малы ке шуоно, соос будӥзы сыӵе условиосын, куке котькудӥзлы пыӵатыны выризы, мукет калыкъёслэсь кылзэс тодытэк но улыны луэ шуыса. Озьы ук? Кин люкетэ бускелезлэсь ма верамзэ валаны, солэсь кылзэ дышетыны? Мон тани куке но дышетӥ ог 150 кылъёсты. Трос ӧвӧл со, но арабъёс доры вуыса быгатӥсько соос сямен ӟечъяськыны, ма но со юаны, мылкыдме возьматыны. Урод шат? Алигес Москваын ортчытӥзы выль книгаосты адӟытон. Отын трос учебникъёс вал. Историяя ог 25-сэ басьтӥ, юри тодматски. Копак пайми. Выль омырен дас вить ар шокаськом ни, нош асьме историез шонер возьматыны ялан оло кышкаськом на, оло ум быгатӥське. Ӟуч калыклэсь гинэ но историзэ кулэезъя ӧм кылдытэ на. Со книгаосын югдур я мыдланьтыса, я вылтӥз гинэ возьматэмын. Сыӵе-сыӵе арын, пе, ӟучъёс Казаньысь Кремлез киултӥзы, бигеръёсты тышказы. Нош малы уг гожто, Казанез басьтонэ ӟуч эксэй ласянь пыриськемъёс пӧлын ӝыныез бигеръёс вал шуыса? Та тодмет историысь учырлы асьме дунъетэз уг вошты шат? Огъя вераса, пӧлысьтымы котькудӥзлы, мукетъёсызлы но, асьме нылпиослы но уж тырмоз на. Ойдолэ созэ гинэ ум вунэтэ: адямиос ог-огенызы тупаса уло ке, огшоры луо но дуно зарнилы пӧрме, нош соос керето ке, зарни но луоен ӵоша. Е. Николаева. Россиысь егитъёслэсь форумзэс дасясьёс - министр Николай Мусалимов, тодосчи Пётр Воронцов, Кун Кенешын ужась Людмила Порцева, радъясь комитетлэн кивалтӥсез Рамазан Абдулатипов, Кун Думалэн депутатэз Светлана Смирнова но "Шунды" огазеяськонлэн одӥгез валтӥсез Юрий Перевощиков. И. Лебедевлэн туспуктэмез. "Мынам Удмуртие" Таӵе нимын викторина та нуналъёсы ортче дышетскисьёс но студентъёс понна Интернет пыр (хттп:/арсиома. уни. удм. ру). Со мыноз 3-тӥ ноябрёзь, нош йылпумъянъёс лэсьтэмын луозы туэ 8-тӥ-9-тӥ ноябре. Ужрадэз радъяло Удмурт Республикаысь Калыкез дышетонъя министерство но Удмурт кун университет. Викторина сӥземын кунмылэн 80 ар тырмонэзлы. Ӵошатсконлэн юанъёсызлы шонер валэктонъёс сётэмъёсты дуно кузьымъёс возьмало. Т. Миронова. "Удмурт Республикалэн дано гражданинэз" дано ним сётон сярысь Удмурт Республикаысь Кун Кенешлэн Тӧроезлэн постановлениез Удмурт Республикаысь Кун Кенешлэн 1995-тӥ арын 26-тӥ октябре 111-И номеро постановлениеныз юнматэм "Удмурт Республикалэн дано гражданинэз" ним сётон сярысь положениез лыдэ басьтыса, "Удмурт Республикалэн дано гражданинэз" дано ним сётоно: Зыков Михаил Ефимовичлы - Ожысь но ужысь ветеранъёслэн республикаысь кенешсылэн тӧроезлы; Семенов Иосиф Ефимовичлы - "Прогресс" колхозысь лэсьтӥськисьлы, Алнаш ёрос; Торопов Артемий Демидовичлы - Советской Союзлэн Героезлы; Удмурт Республикаысь Кун Кенешлэн Тӧроез А. А. Волков. Ижевск город. 2000-тӥ арын 24-тӥ октябре. � 602-ИИ. Улонмы мед умоясал Республикаысьтымы Национальной библиотекалэн шаермес тодонъя люкетаз усьтэмын Удмуртилэн юбилеезлы сӥзем выставка. Отысь туспуктэмъёс, книгаос но пӧртэм документъёс возьмато удмурт калыклэсь ӟуч адямиосын ӵош огъя кун кылдытэмзэ. Трофим Борисов сярысь яркыт книга гожтӥз Семён Шихарев. Трофим Кузьмичлэн ӵыжы-выжыосыз мыным мадизы, кызьы сюлмысь тыршиз Семён тарасович, вуоно ужзэ лыдӟымон карон понна. Та выставкаысь ик тӥ адӟоды Никифор Павловлэсь облисполкомлэн нырысетӥ председателез Иосиф Алексеевич наговицын сярысь книгазэ. 1921-тӥ арын 16-тӥ июне Удмурт автономной областьысь советъёслэн нырысетӥ съездзы ортчиз. Сое усьтыса, Иосиф Алексеевич вераз: "Удмурт автономной областьлэн нырысетӥ съездэз удмурт калыклэн улоназ бадӟым учыр луэ. Татысен асьмеос лэсьтыны кутскиськом но лэсьтом быдэс калыклэсь выль улонзэ. Кенешо кун асьмелы сюресъёс усьтӥз". Пусъем потэ: берло аръёсы асьме тодосчиос пӧртэм адямиос но ужпумъёс сярысь книгаос гожтӥзы. Библиотекаысь ужасьёс чылкыт ӝажыосы тыриллям М.В.Гришкиналэсь "Удмурты: этюды из истории ИЪ-ЪИЪ в.в.", К.И.Куликовлэсь "Дело Софин" но 1993-тӥ арын потэм "Национально-государственное строительство восточно-финских народов в 1917-1937 г.г." книгаоссэс. Асьмеос тодӥськом: Удмуртилэн шоркарезлы, Ижевсклы, туэ тырмиз 240 ар, нош та городын ик пыӵал поттон заводэз кылдытӥсьлэн Андрей Дерябинлэн вордскемез дырысен 230 ар тырмоз ӝоген. Соин валче "Удмуртия" издательство туэ поттӥз тодосчилэсь Е.Ф.Шумиловлэсь выль книгазэ. Отын со пыр-поч маде гурезь ужъя инженерлэн Андрей Фёдорович Дерябинлэн будэмез но завод ӝутэмез сярысь. Паймытэ таӵе учыр: 1867-тӥ арысен 1925-тӥ арозь Ижевскез черкогуртэн лыдъяллям. Быдэс Россиысь удмуртъёслэн нырысетӥ кенешсы ортчиз Елабугаын 1918-тӥ арын инвожо толэзьлэн (июньлэн) 26-тӥ-28-тӥ нуналъёсаз. Отчы лыктэм 78 адями бадӟым саклык висъям удмурт калыклы кунлык сётонлы. Ар ортчыса, оштолэзе (мартэ) Сарапулын кыкетӥ съездэз люканы ӧз быгатэ, татын граждан ож пуромемен. Делегатъёсыз люказы Казань губернилэн Мамадыш уездысьтыз Нырья гуртаз. 1919-тӥ арын ик куарусён толэзе (сентябре) Сарапулын ортчиз быдэс Россиысь удмуртъёслэн куинетӥ съездзы. 1934-тӥ арын 28-тӥ толсулре (декабре) область пӧрмытэмын вал республикалы. Соку лэсьтӥзы выль заводъёс, электростанциос, ӝутскизы гурт удыс, культура. Но ӝожомыса верано луэ: ваньмыз капчи ӧй вал. Пӧртэм удысъёсысь трос тырмымтэос сярысь мадизы 1991-тӥ арын шуркынмон толэзьлэн (ноябрьлэн) пумаз ортчем кенешын. Тужгес но шуге- леке вуизы гуртын улӥсьёс, туж бадӟым колхозъёс но совхозъёс кылдэмен. Али асьмеос ас выламы шӧдӥськом выльдӥськонлэсь вань улонмес сурамзэ-пожамзэ. Асьмеос ӟечезлы окскыны дышемын ини. Кин тодэ, оло нош, республикамылы президент быръем бере, улонмес умоятыны быгатом. Бускель республикаосын улонзы таӵе ужрад бере ӧз уродмы ук. Таӵе ӟеч малпанъёсы кылдӥзы, выставкаен тодматскеме бере. В.ВОЛОДИН. Удмуртия ассэ возьматоз на Алигес дорамы вуылӥз РФ-ысь Кун Думалэн депутатэз Юрий Дмитриевич Маслюков. Со нуиз Воткинскын ортчем ВПК-ТЭК темая кенешонэз. Газетмылэн корреспондентэз Юрий Дмитриевичлы вазиськиз кӧня ке юанъёсын. - Дорамы тӥ вуиды ӵапак быръёнъёс бере. Кыӵе мылкыдын лыктӥды? - Ӟеч, ужан мылкыдын. Ӟечкыламы нырысетӥ Президенттэс. Сӥзим солы вольыт сюрес, Удмурт Республикалэн историяз азинскон но вормон. - Воткинск тӥ понна - тодмо город. Таяз учыре маин герӟаськемын вашкала заводэн, солэн кивалтӥсьёсыныз пумиськон? - Удмуртилэсь, Россилэсь экономиказэ оглом ӝутонэн. Милям комитетмы азяз ужпум пуктӥз му вӧй, газ кыскон комплексэз чутрак выльдон сярысь. Сотэк федеральной бюджетысь доход ваись инъетсэ нокызьы но уд юнматы, ялан пась кылёз. Кун Думаын та пумысен ортчизы нимысьтыз парламентской кылзонъёс, огъя кенешонэ люкаськылӥзы Россиысь металлургической но му вӧй, газ поттонъя комплексъёсысь кивалтӥсьёс. Али вань кужыммес сётоно ТЭК-ез юнматонэ. Озьы гинэ Россиез ӝутыны быгатом. Со понна асьме предприятиослы нимысьтыз нормативной актъёс пыр ӟеч ужаны луонлык кылдытоно. Та государственной ужпумез пумаз-йылаз вуттыны кулэ Правительство но Кун Дума. Чаклано но кылдытоно сыӵе инъет, кудӥз пыр му вӧй кысконэ мынӥсь оборудованиез лэсьтон мед пӧрмоз пайда ваись производстволы. Со понна коньдон шедьтыны луоз кредитъёс но инвестициос чотын, кунгож сьӧрысьёссэ но лыдэ басьтыса. Лизинглэсь но палэнскыны уг яра. - Юрий Дмитриевич, ВПК-ТЭК ласянь та куинетӥез бадӟым кенешон. Соослэн пайдазы шӧдӥське-а? - Одно ик. арлы быдэ тазьы пумиськылон экономикалэн кыкезлы но валтӥсь удысъёсызлы луонлык сётэ рынокын котькудӥзлы ас интызэ шедьтыны, Правительство но Кун Дума азе лэчытэсь ужпумъёс пуктыны но пумаз-йылаз вуттыны. Мон кивалтӥсько Промышленностья, лэсьтӥськонъя но наукаен герӟаськем технологиосъя комитетэн. Комитетмы пыр бадӟым инты висъяськом Россиын лэсьтэм оборудованиез дуннеысь рыноке поттонлы. Огъя кылэ вуэмын Иранэн. Озьы ик ужалом Индиен, Сириен, Иракен но кусып возём СНГ-ысь мукет кунъёсын. Туннэ бадӟым саклык висъяське информациен ужанлы. со ласянь пусъеме потэ "Воткинский завод" обороная кун предприятиез но му вӧй, газ кысконъя оборудование поттонъя огазеяськонэз. Воткинскысь специалистъёсын дасямын туж ӟеч, ялан выльдӥськись "МашИнформТЭК" иворъёсъя система. Со пыр вакчи дыр куспын тодыны луоз ваньзэ, ма кулэ ТЭК удысын ужасьлы. - Вераськонэ пыриськемъёс пӧлысь тросэз пусйизы центрлэсь ляб кивалтэмзэ, ӟечен тодазы ваизы Госпланэз... - Ваньмыз шонер. Огъя системалэн куашкамез зол шуккет луиз научно-технической стратегия понна но, уката ик туннэ ӝутэм ужпумъя. Данакез стандартъёсмы но технической луонлыкъёсмы вужмемын. Татын "юрттӥз" США-ысь АПИ нефтяной институтэз но. Россия быдэсак выжиз иностранной стандартъёсы, копак "вунэтӥз", лэся, Сибирь но Заполярье Техаслэсь но Саудовской Аравилэсь пӧртэмгес шуыса. Тӥни малы куд-ог нефтегазовой компаниос, предприятиос нимазы люкиськизы, асьсэ понна оборудование поттон борды басьтӥськизы. Огъя приозводствоын ваньмыз со ыштонъёсын берытскиз. Сыӵе амалэн ноку но йӧскадь, дуннеысь куронъёслы тупась техника уд потты. Ужано одӥг технической политикая, озьы гинэ рыноке шедём. Та ужпумъёс, висьытӥсь интыос пыр-поч эскеремын воткинске люкаськемъёс пӧлын. Оскон кылдэ: шуг-секытъёсты Россия ас кужыменыз вормыны быгатоз. Удмурт Республика но ассэ возьматоз на, туннэ кадь начар ялан уз улы. Л.МЕДВЕДЕВА. НИМЗЫ ДАНЪЯН ПУЛ ВЫЛЫН Помидор кисьма толалтэ но 2000-тӥ арын ужын бадӟымесь азинсконъёс басьтэмзы понна но Удмурт Республикалы 80 ар тырмонлы сӥзьыса, Удмурт Республикаысь Кун Кенешлэн Президиумез но Правительство Завьялово ёросысь "Тепличный комбинат "Завьяловский" ОАО-ысь коллективез Удмурт Республикалэн Данъян пулаз пыртӥз. Милям корреспондентмы алигес вуылӥз бакча сиён будэтӥсьёс доры, пумиськылӥз комбинатлэн директореныз А.И.ПОЛТАНОВЕН но предприятиысь ужасьёсын. Коллективен тодматскон Ужез яратӥсь адями мултэс вераськись уг луы, шуо. Комбинатлэн директорез Анатолий Иванович Полтанов коллективез данэ потэм понна шумпотэ ке но, ушъяськон кылъёссэ солэсь уд кылы, ӵуказе нунал сярысь сюлмаськонэн улэ. - Коньдонэн секыт ке но, выльдон-тупатъян ужлэсь ум куштӥськиське, бакча сиёнъёсты будэтонэ выль амалъёсты кутэммес тодытэк-адӟытэк ӧз кыле кадь, - шуэ со. - Миым 2560 тонна бакча сиён будэтӥмы но 30 миллион манетл люкамы вал ке, туэ - 3000 тонна пала будэтӥмы но 40 миллион манетлы ужамы. Ижысь Воткинск пала машинаен потыку, паллян палась пияла липетъёс кыдёкысен адӟисько. Самой та комбинатлэн соос. Комбинат - со пияла липет улэ пыртэм 13 гектар музъем. Комбинат - со шуныт но ву сётӥсь 980 иськем гумыос, комбинат - со 90 теплица, котькудӥзлы кулэ 120 квартираем коркалы мында шуныт, комбинат кутэ 2 номеро ТЭЦ-лэсь 10 процент кужымзэ. Предприятие туэ вузаз 1 сюрс 500 тонна кияр, сюрс тонналэсь уно помидор, 42 тонна ческыт пӧсьтурын, 8 тонна баклажан, 70 тонна вож сугон, со сяна, салат, укроп, сельдерей. Бакча сиён Удмуртилэн вань сэрегъёсаз кошке. Куиньмоссэ коллектив ас кужыменыз вуза. Миым декабре коллектив пусйиз комбинатлэсь 25 аръем юбилейзэ. Табере со акциосын огазеяськон луиз. 390 ужасьёс - предприятизылы асьсэос кузёос. Данакез трос аръёс ужало ини. Ачиз Полтанов - 20 ар ӵоже, кивалтэ 3 ар, ужамын прораб но валтӥсь инженер луыса. Шуныт но электрокужым туж дуно сылэ. Соин ик соосты ӝикытгес кутыны тыршо. Миым январе шуныт но тыл понна 3 миллионлэсь уногес тыроно луизы. Табере чакласькытэк нокин но уг ужа. Толэзьем шоро-куспо уждунзы 2000 манет ӧвӧлгес, но ваньмыз потэ асьсэлэн ӟечгес но ӝикытгес ужамзы бордысь. Кӧня ке минут куспын Анатолий Иванович вераз на, миым нырысьсэ пайдаё ужамзы, выль сямен помидор мерттыны кутскемзы но азьланяз консервной цех усьтыны малпамзы сярысь. Нош собере дэмлаз теплицаостӥ ортчыны но ужасьёсынызы пумиськыны. Бен, дунтэм уг усьы пияла улын толалтэ кияр но помидор будэтон, но уксёен кӧтэз уд тыры ук. Историысь чуръёс Сизьымдонэтӥ аръёсы Ижевскын калык ӝог йылӥз. Нош ватсаса бакча сиён будэтӥсь ӧй вал. Удмуртиысь Правительство решение кутэ тепличной комбинат пуктон сярысь. Инты быръемын вал Завьялово ёрослэн музъемез вылэ Ижевсклы матын. Дасязы проект. Коньдон утчазы партилэн Завьялово райкомезлэн нырысетӥ секретарез М.И.Лизунов но райисполкомлэн председателез А.П.Сычёв. Колхозъёс комбинатлы пунэмен 136 сюрс манет сётӥзы. Со коньдонэз комбинат процентэн (160 сюрс манет) берыктӥз ӧжыт бергес. Генподрядчик луиз 18 номеро лэсьтӥськон трест, ужъёс кыстӥськизы 4 ар ӵоже. Со сяна эшшо одӥг блок лэсьтэмын вал на. Тазэ шобыртӥзы полиэтилен плёнкаен гинэ. Со чакламын вал, ӝоггес коньдон поттыны кутскон вылысь. Ужзы пӧрмиз. Вуоно араз ик кылдӥсь комбинат аслаз кияреныз вузкариз ини. Будэтӥзы сое куро но пулпызь вылын. Совето аръёсы комбинат куинь пол Горд Знамя басьялляз. Тани кинъёс вал нырысь ужасьёс пӧлын: директор Е.И.Булатов, учёной-агроном П.И.Борисова, валтӥсь бухгалтер Ю.С.Волков, секретарь-машинистка но кадръёсъя отделэн кивалтӥсь Ирина Останина но лэсьтӥськисьёслэн группазы. Пумен ужасьёслэн лыдзы йылӥз. Теплицаосын ву кисьтанэн кивалтӥз учёной-агроном А.Р.Давкова, собере блокъёсын кивалтыны ӧдъязы Р.В.Огородникова но И.Р.Сельницина. Ву киська... компьютер Сю пол кылытозь, огпол ас синмыныд адӟод. Директорлэн ужбергатонъя воштӥсез И.И.Сельницина азьло парторганизацилэн секретарез. Калыкез ӟеч тодэ. - 290 удмуртъёсмы, газеттэс тросэз уг басьто, нош удмурт газетын ужасез шумпотыса пумиталозы, - шуиз со. Кыкетӥ блокын сыӵе пумиськон вакчияк но шулдыр ортчиз. Мон газетъёсме люкылӥ, чырмыт кышномуртъёс утыр пӧртэм юанъёс сётъяллязы, утыр ужзы сярысь ӟабыльтыны кутскизы, ужазы выль кутӥськись амалъёслы соос шумпото. Тани помидорез азьло мертто вылэм торф убоосы. Табере - кыктэтӥ пасям торфен полиэтилен мешокъёсы. Котькуд помидор уд выжые векчи резина гумыостӥ нимаз капельница бышкалтӥське. Отчы удоберниен ву сётӥське, нимысьтыз командая, соин кивалтэ компьютер. Нуналскын котькуд помидор выжые сётӥське удобрениен узырмытэм шуныталэс 2-3 литр ву. Та голландской технологиез уже кутыса, туэ одӥг гектарысь 700 тонна помидор басьтэмын, азьло аръёсы та лыдпус ноку но 600-лэсь ӧз на ортчылы. Табере 1 квадрат метрысь басьтыны быгато ни 25 килограммозь помидор, азьло 18-20 гинэ басьяллязы. Торфен ужанэз но капчиязгес: мешокен ваид, мешокен поттӥд. Кисьтанэз но каньыл луиз, мултэс мускыт уг кылды. Кыкетӥ блокын та выль амалзэс уже пыӵатэмзы сярысь тупен-тупен мадиз но возьматъяз управляющий но учёной-агроном Тамара Ивановна Носова. Тани кутске ни ноябрь толэзь, нош ужасьёс мешокъёсы бичало гордэктыны кутскись помидоръёсты. Арнялы быдэ куинь пол 5-7 тоннаен вузкаронэ помидор келяло на. Тани та ог 2 метр ӝужда помидоръёссы мерттэмын ар талэсь азьло, помидор сётыны кутскиллям соос миым мартэ, со дырысен ялан "ужало", вожесь на, сётэм емышсы выль даурлы - 2000-тӥ Выль арлы но ӝӧк вылэ пуктыны возиськоз на. будосъёс будэмысь дугдо, "кӧлыны" выдо нунал самой вакчи луон вакытэ, декабрь пумлы, нош тепличникъёс пӧяло соосты, нунал кузь на шуыса, вазенлэсь но ӟеч югдытӥсь выль лампочкаосын. Тӥни ма чотын соос али но вож будо но горд помидор кузьмало. - 15 метр кузьда помидор удъёсмы но вал туэ, - валэктӥз 3-тӥ блокысь управляющий- агроном Михаил Андреевич порымов. - Огшорыосызлэн помидор гердзы 6-7 кельтӥське ке, таосызлэн - 15-ёзь, нош бичаны вылэ тубано медаз луы шуыса, кырыж карыса, сопала но, та пала но будэтӥськом. Таиз - огез пусйымон выль сортмы. Но мерттӥськом ми гибридъёсты, юри теплицалы дасям сортъёсты. - Нош кӧня дырлы тырмоз 1 мешок торф 2 помидорлы? - юасько мон Радий Костинлэсь, лабораториен кивалтӥсьлэсь. - Эскером но тодом, - шуэ со. - Огшоры бусы музъемын гумусэз луэ 1-3 процент. Ӝог быриз ке, ӝоггес воштом. Вошъяно на, висёнъёс медаз кылдэ шуыса, музъем чырс медаз луы шуыса. Егит учёной-агроном татын кыкетӥ арзэ гинэ ужа ай. Со йылпумъям Москваысь гурт удысъя Тимирязев академиез. Ас быгатонэзлы оске, Ӟуч Вожойын ке но улэ, уг шугъяськы, мылкыдыз умой. - Тани таоссэ мешокъёсты поттамы ни, - теплицаысь вистӥ кошкыкумы ни валэктэ со. - Тазэ торфез укнодур сад мерттыны вузалом. Зэм, котькытын мур тодэм-валам кулэ: нянь но луэ пӧртэм: выль, вуж, ӟег, чабей, ыль... Озьы корт но: андан, чугун, алюминь, чурыт, векчи, зӧк... Ӵап озьы музъем но: удалтытӥсь, кыедо, куанер, чырс... Берлоез сярысь комбинатысь учёной-агрономъёслы верало Радий Костин, нош агроном - овощеводъёсызлы. Озьы огъя кужымен гинэ арскын 13 гектар вылысь соос быгатозы басьтыны 3000 тонна кияр, помидор но мукетсэ... Адями - бадӟым кужым Учыръёс. Котькытын уно соос. Но ойдолэ эскероме та коллективысь кӧнязэ ке. Вить ар талэсь азьло октябре кезьытъёс луизы. Соку огзэ теплицаез кынтӥзы. Нош отын лачак вал на вож но горд кисьмась помидоръёс. Шуныт сётӥсь оператор, уй куазез чакласа, теплицае гумыосты шуныт сётыны кулэ вал, нош со дораз бертэм. Комбинат бадӟым изъян адӟиз, нош суп-сап ужасез соку ик ужысьтыз уллязы, комбинат бадӟым изъян адӟиз. Но таӵе ужасьёс комбинатын шер пумиськыло, коллектив уг вошъяськы. Тани Надежда Георгиевна Мерзлякова ужа ни овощевод луыса комбинат кылдэм дырысен, праздникъёс дыръя сое пусйытэк уг кельто, туэ со ческыт пӧсьтурын будэтӥз, урожаез, эшъёсызлэн сярысь, вылӥгес вал. Зоя Филипповна Елизаровалэсь нимтулзэ али Завьялово ёросысь Данъян пул вылэ интыялозы. Со 3-тӥ блокысь огез азьмынӥсь овощевод. 25 ар ӵоже теплицаосы шуныт, электротыл сётон бордын, теплицаосты выльдон- тупатъян, будэтэм бакча сиёнъёс вузаны келян бордын тырше бригадир В.П.Гурьев. Сотэк кызьы? Вылӥ верам кадь кынмон учыр медаз ни луы. Вазен ни, ку бакча емыш будэтонын учёной-агрономъёс ӧй вал, огполаз ядэз уже тросгес кутӥллям но, уноез будосъёс быриллям. Но татын коть быдэс теплица ӧз быры. Озьы ке но, дышетон ортчытытэк ӧйлась. Помидор бичан висказ пӧртэм учыръёс сярысь мадиз Фаина Ивановна Петрова: - Таӵе учыр сярысь мадё. Егит на вал мон соку, Колзина Нинаен ӵош ужамы. Агрономъёс дорамы лыктэмын вал бусы ужысь, ю кизёнысь, соин соос но ваньзэ рос-прос уг тодо вал. Милемды косӥзы кияр убоосмес чылкыт возьыны. Ми уж бере кыльыса ужамы на, кияр куар выжые потӥсь вайёсты ваньзэ ишкимы но убоосмес учкымон чебер сузямы. Нош данакез ужасьёсмы азьтэмъяськизы. Но соослэн урожайзы ӟечгес вал, милям - уродгес. Улӥ вайёс ватсаса кияр сёто вылэм. Со вакыт дорамы ужаны вуиз "Правда" совхозын теплицаын ужам агроном Александра Андреевна Курятникова. Со валэктэм бере умой валамы ни. Ӵем дыръя дышетсконо луылӥз янгышъёс вылын. Но дышимы. Азьло одӥг квадрат метр музъеммы 16 килограмм помидор сётэ ке вал, туэ 22-23 килограмм люкаське. Ф.И.Петровалэн туспуктэмез али чеберъя Завьял ёросысь Данъян пулэз. Со татын ужаса, семьяезлы Хохрякиын квартира басьтӥз, ужзэ уг кушты, уждунэз ичигес дыръя но. "Куректыкум яке кузпалэным керетыкум но помидоръёсыным яке кияръёсыным вераськыса сюлэмме буйгатӥсько, - шуэ со, - Будосъёс улэпесь ук. Эркияса вераськемез валало кадь потэ мыным". Юнме ӝоггес келямтэ монэ директор ужась коллективез пӧлы. Солы ватыны немае, нош возьматыны вань мар. Асьсэ ужзэс ӟеч тодӥсь-валась адямиосын узыр комбинат, соин бакча емышъёсын узыр ачиз комбинат но. П.СКОБЕЛЕВ. Комбинатлэн директорез А.И.Полтанов. Бакча сиён будэтӥсь Ф.И.Петрова. Кенешо лабораторилэн хзаведующиез Р.В.Костин но тупатъян ужъёсты быдэсъянъя бригадир В.П.гурьев. Туспуктэмъёсзы В.Беломорскихлэн. Дан тӥледлы, кышномуртъёс! Дыр ортчемъя, улон-вылонысьтымы троссэ вунэтӥськом. Куке но туж данъяськыса вераллямы война вакытэ ужам нылкышно трактористъёслэсь нимъёссэс. Нош али пумен шергес тодамы вайылӥськомы ни соос сярысь. Ог 60 ар талэсь азьло колхоз лудъёсын ужам нылкышно трактористъёссылы аспӧртэм кузьым дасяны малпазы Играысь ёрос историко-краеведческой музейын ужасьёс К. С. Грахова но М. Т. Шуб. Та чупрес кышномуртъёслэн кичӧлтэмзыя радъямын вал нылкышно трактористъёсты данъян ӝыт. Валамон ни, уж капчиен ӧз сётскы. Архив документъёсты гинэ ӧвӧл, адямиосты но шедьтыны шуг ни угось. Уноез ветеранъёс улонысь но кошкемын ни. Пырыен-пырыен люкамын вал азьвыл трактористкаос сярысь материал. Озьы пумиськон радъяськиз. Клавдия Сергеевна Грахова люкаськемъёс азьын зэмос научной доклад лэсьтӥз, шуыны луоз. Солэсь пуштроссэ асьсэлэн синкыли пыр тодэ ваёнъёсынызы узырмытӥзы люкаськем кышномуртъёс - азьвыл трактористъёс. Соос вылэ усиз угось секыт гурт уж, соос воштӥзы фонтэ кошкем картъёссэс но атайёссэс. Трос шуныт кылъёс верамын вал ужысь зэмос геройёс М. Ф. Тронина, А. И. Белых, Е. Н. Витвинова сярысь. Бригадаосын ужам сяна, соос мылысь-кыдысь пыриськылӥзы общественной уже. Та кышномуртъёс улонысь кошкизы ни, но, ёросын соосты ӟеч тодо на. Нош нылкышно трактористъёслэн нырысетӥез бригадазы кылдытэмын вылэм Пежвайын. Люкаськемъёс пӧлысь нокин но ӝыны даур талэс азьло ӧз малпа вал, дыр, соослэн ужзы вунэтэмын луоз, соослы пенсия но туж ӧжыт тырозы шуыса. Соку соос ӧз бырйиське, секыт югдуре Родиналы юрттоно, Вормонэз дуроно вал. Вормонтэмзэ но вормизы соос. Ӟечкыланъёсты, шуныт кылъёсты кылзыса, арлыдо кышномуртъёс ӧжыт ке но каньылскизы, луоз. Выльысь тодэ ваемзы но данъямзы понна тау карон мылкыдзэс усьтӥзы. О. Марков. Софья Широбокова, Кун Кенешлэн депутатэз. "Данъяськисько аслам шаереным" Кошкись даурын Удмуртия берпуметӥзэ пусъе вордскем нуналзэ - 80 ар тырмонзэ. Ортчем сюресаз котькыӵе вакытъёсыз вал, озьы ке но, утьыны быгатӥз аслэсьтыз калыксэ, солэсь кылзэ, культуразэ, пӧртэм нациосын тупаса улон мылкыдзэ. Дорамы дышетскыны шуыса лыкто пӧртэм интыосысь ыстэм муртъёс, кусып возиськом трос кунъёсын. Ваньмыз со шӧдӥське республикамылэн экономикаяз но политикаяз. Пусъеме потэ гурт удысэз. Со лябӟиз ке но, калыкмес сюдымон поттэ йӧл но сӥль, будэтэ картофка, бакча сиён, ю-нянь. Куд-ог улосъёсын ӵошатыса, удмурт музъеммылэн кузёез оскымон сылэ пыд вылаз. Дыраз юрттэт сётыны мед быгатысалмы на. Промышленностез азинтонын но Удмуртия мукетъёсызлэсь бере уг кыльы, куд-ог удысъя кельтэ но. Уж ласянь мон вуылӥсько мукет регионъёсы, кунъёсы. Котькытын асьмелэсь республикамес умой ласянь гинэ тодо. Кызьы уд данъяськы сыӵе дунъетэн. Ваньмыз ма лэсьтэмын но лэсьтӥське - калыкмылэн ужез, быгатонлыкез. Тӥни ма бордын шаермылэн узырлыкез. Ватонэз ӧвӧл, ЪЪ даурын гинэ ичи лыдъем нациос пӧлысь тросэз ышизы-быризы. Та ласянь удмуртъёс йыг-йыг возисько, озьы медло азьланяз но. Удмуртилэн автономия басьтэмез оглом шӧдӥськиз татын улӥсь вань калык вылын. Асьмелэн луонлыкмы вань дышетскыны, кельшись уж бырйыны, кивалтон удысэ мыло- кыдо пыриськыны. Ачим сярысь ке верано, мон вордски ӟуч-бигер семьяын, бызи удмурт пилы. Куиньзэ но кылэз умой тодӥсько. Озьыен, куинь полэс узырлыке. Йылпумъяй гуртысь школаез, собере - гурт удысъя институтэз. Дас ар ужай совхозын, экономистын. Отын ик калык оскиз депутат луыны: нырысь районын, собере - Удмурт Республикалэн Кун Кенешаз. Вить ар кивалтӥсько ни татысь ялан ужась комиссиен. Собыдӟа дан ноку но ас кожаз уг лыкты, уд басьты сое уксёен но, вылӥ кивалтӥсьёсын тодматскыса но. Ваньмыз потэ ужам бордысь. Гуртысь потэм специалистлы, нылкышнолы табыдӟа удысэз нуон капчиен ӧз сётскы. Но улон ачиз ваньмызлы дышетэ, мылкыдыд, быгатонлыкед гинэ медло. Арлыдыя мон кунлыкмылэсь кык поллы егитгес, озьы ке но, ортчем сюресме ӵошатӥсько вань калыкелэн сюресэныз. Мӧйы поколение трос лэсьтӥз туннэ нуналмы понна. Табере ми бордысь потоз республикамылэн азьпал улон-вылонэз. Егитъёслы мон сӥзьысал огзэ: ӟеч дышетскыны но ӟеч ужаны. Со вылын возиське обществолэн инъетэз. Сое мон адӟи, США-е, Франция, Бельгие, Россилэн пӧртэм областьёсаз но республикаосаз вуылыса. Асьмелэн Удмурт шаермы номырин но урод ӧвӧл, нош сямъёсмес, чылкытлыкмес, семья кусыпъёсты утёнъя, оло, вылӥынгес но. Республикамылэн кивалтӥсьёсыз но, мон сямен, котькудӥз ас удыссэ валаса нуэ. Сыӵе ик дунъет сётысал парламентлэн ужезлы. Та бадӟым но дано нуналмес пусйыса, вань калыкмылы сӥзем потэ тупаса, ог-огдэ валаса улон. Ӵош ужаса, валче вамышъяса гинэ асьмеос азинском но Удмурт музъеммес данъяны, шулдыртыны быгатом. Тодмо нимъём но нуналъёс Ноябрь 1. 40 ар талэсь азьло (1960) Ижевскын усьтӥськиз ужась егитъёслы чаклам крезьгуръя ӝыт дышетскон школа. 2. 30 ар талэсь азьло (1970) Удмурт Республика пусъемын Октябрь Революция орденэн. 4. 80 ар талэсь азьло (1920) кылдытэмын Вотка (Удмурт) автономной область; - 7 ар талэсь азьло (1993) кутэмын Удмурт Республикалэн куншетэз но гимнэз; - 80 ар талэсь азьло (1920) Сарапулын усьтӥськиз совхоз-техникум; - 30 ар талэсь азьло (1970) Удмурт телевидение кык канал пыр ужаны кутскиз. 5. 70 ар талэсь азьло (1930) Ижевскын кутскемын станокъёс поттыны. 6. 50 ар талэсь азьло (1950) Ижевскын усьтӥськиз Машина лэсьтӥсьёслэн культурая дворецсы; - 45 ар талэсь азьло (1955) Ижевскын "Дружба" кинотеатр усьтӥськиз. 7. 65 ар талэсь азьло (1935) Ижевскын ветлыны кутскиз нырысетӥ трамвай. - 50 арес тырме Николай Алексеевич Забродинлы (1950) медицина наукаосъя кандидатлы, Удмуртиысь тазалыкез утён удысын сӥё-дано ужасьлы, Россиысь дано эмъясьлы. 9. Ӟечлыкъя калык куспо нунал. 10. Милицилэн нуналыз; - Дуннеысь егитъёслэн нуналзы. 11. Вордскемез дырысен 180 ар тырме Павел Матвеевич Обуховлы (1820-1869). Со кутскон сётӥз Россиын андан пушкаосты дасянлы. Вордскемын Воткинск городын. 12. 55 арес тырме Владимир Васильевич Парамоновлы (1945), Удмуртиысь ӟуч кылбурчилы. 13. Ляб адӟисьёслэн калык куспо нуналзы; - 50 арес тырме Юрий Валерианович Семёновлы (1950), философия наукаосъя кандидатлы. Вордскемын Ижевскын. 14. Диабетэн нюръяськонлы сӥзем нунал. 15. 70 ар талэсь азьло (1930) Дэбесын усьтӥськиз дышетӥсьёсты дасянъя училище. 16. Зарезь пехоталы сӥзем нунал; - Тамак кысконэн нюръяськонъя нунал; - 75 арес тырме Герман Владимирович Коротковлы (1925), Совето Союзлэн Героезлы. Вордскемын Сарапулын. 17. Студентъёслэн калык куспо нуналзы. 17-20. 65 ар талэсь азьло (1935) Удмуртиысь егит нылкышноослэн съездзы ортчиз. 19. Ракетной войскоослэн но артиллерилэн нуналзы; - 100 ар талэсь азьло (1900) Ижысь пыӵал поттон заводын театр усьтӥськиз. 1900-тӥ- 1915-тӥ аръёс ӵоже возьматэм 120 спектаклез учкиз 70 сюрс адями. 20. 80 ар талэсь азьло (1920) усьтӥськиз шаермес тодонъя музей. Али со Национальной музейлы пӧрмытэмын; - вордскемез дырысен 90 ар тырме Александр Матвеевич Лушниковлы (1910-1989), Совето Союзлэн Героезлы. Вордскемын Завьял ёросысь Сепыч гуртын. Вылӥ нимен Лушников пусъемын война аръёсы кышкасьтэм луэмез понна; - 55 арес тырме Маргарита Григорьевна Ивановалы (1945), история наукаосъя докторлы, археологлы, Удмуртиысь наука удысын дано ужасьлы. Вордскемын Можга ёросысь Кватчи гуртын. М.Иванова 70-лэсь ятыр уж гожтӥз. Солэн сюлмаськемезлы луыса ик вашкала удмуртъёслэсь Иднакар улон интызэс музейлы пӧрмытыны малпамын. 21. Ог-огдэ ӟечкыланъя калык куспо нунал; - Россиысь вытъёсъя службалэн кылдэм нуналэз. 24. 55 ар талэсь азьло (1945) Завьялово черкогуртын усьтӥськиз фермаосын кивалтӥсьёсты, ветсанитаръёсты, мушкасьёсты, счетоводъёсты дасянъя школа. 25. Вордскемез дырысен 95 ар тырме Михаил Петрович Петровлы (1905-1955), тодмо удмурт писательлы, кылбурчилы но драматурглы. Удмуртиысь Писательёслэсь огазеяськонзэс кылдытӥсьёс пӧлысь одӥгезлы. Петров "Вуж Мултан" романлэн, "Италмас", "Кырӟан улоз" поэмослэн, "Ӟардон азьын" повесьтлэн но трос мукет гожтэмъёслэн авторзы луэ. 26. Анайлэн нуналэз (ноябрь толэзьлэн берпуметӥ арня нуналэз). 29. 80 ар талэсь азьло (1920) Ижевскын усьтӥськиз 1 номеро ремесленной училище. Али со Автомобильно-технической лицейлы пӧрмытэмын; - 60 арес тырме Алла Алексеевна Кузнецовалы (1940), удмурт кылбурчилы. Вордскемын завьялово ёросысь Чимошур гуртын; - 30 ар талэсь азьло (1970) Сарапулысь Г.К.Орджоникидзе нимо радио поттон заводын дасямын 200-этӥез "Орлёнок" приёмник. Е.УШАКОВА, Удмурт Республикалэн туала историезлы сӥзем центрысь ёзлэн кивалтӥсез. 1-тӥ ноябрьлы Дауръёс вискын: нунал бӧрсьы нунал Ноябрь 95 ар талэсь азьвыл (1905-тӥ) 3-тӥ ноябре потӥз крестьянъёслы эрик сётон дунэз кулэстонъя вылӥ манифест. 10-тӥ ноябре кылдӥз октябристъёслэн партизы. Ноябре: Петербургысь марксистъёс огазеяськизы но "Рабочий классэз мозмытон понна нюръяськон союз" кылдытӥзы. Соин кивалтӥз Владимир Ленин. Сьӧд зарезьысь корабльёсын но Севастопольысь гарнизонын бугыръяськонъёс пуромизы. 21-тӥ ноябре кылдӥз Москваысь Совет. Россия но Англия гожтӥзы Россия но Афганистан вискытӥ кунгож тупатон сярысь огкыл (договор). Со ортчиз Памир гурезетӥ но Пяндж шур кузя. 80 ар талэсь азьвыл (1920-тӥ) 7-тӥ ноябре Горд Армия басьтӥз Перекопез. Тӧдьыос Крымысь кошкизы но, отын Совето власть юнматскиз. 75 ар талэсь азьвыл (1925-тӥ) Ноябре "куинь эшъёс" И. В. Сталин, Л. Б. Каменев но Г. Е. Зиновьев люкиськизы. И. В. Сталин Н. И. Бухаринэн но мукет "буръёсын" ӵош урдскиз Л. Б. Каменев но Г. Е. Зиновьев вылэ. Тыосыз И. В. Сталинлы пумит кылдытӥзы "выль оппозиция". 70 ар талэсь азьвыл (1930-тӥ) 25-тӥ ноябре кутскиз "Промпартия" шуонлэсь ужъёссэ судын эскерон. Сое янгыше уськытӥзы СССР вылэ мукет кунъёслэсь омырсконзэс дасямез понна, промышленностьын но транспортын сьӧсь ужъёс лэсьтылэмез понна. 60 ар талэсь азьвыл (1940-тӥ) 12-тӥ-13-тӥ ноябре В. М. Молотов но И. Риббентрон Берлинын кенешизы мукет кунъёсты люкылон но СССР-ез Германиен, Италиен но Япониен одӥг пакт борды огазеян сярысь. Вераськонъёс пайда ӧз сётэ. 55 ар талэсь азьвыл (1945-тӥ) 20-тӥ ноябре Нюрнбергын усьтӥськиз Германиысь кузёосты судъян уж. 45 ар талэсь азьвыл (1955-тӥ) 30-тӥ ноябре Антарктидае кошкиз СССР-ысь нырысетӥ экспедиция. 10 ар талэсь азьвыл (1990-тӥ) 9-тӥ ноябре гожтэмын ФРГ-ен бускель кусыпъёс возён но ӵош ужан сярысь огкыл. Сарапул ронолы - 70 Кылем толэзе Сарапул ёросысь калыкез дышетон удысын ужасьёс кык праздниксэс пусйизы: Дышетӥсьлэсь нуналзэ но ёросазы калыкез дышетонъя отдел кылдытэм дырысен 70 ар тырмонэз. Сарапулысь роно кылдытэмын вал 1930-тӥ арын октябре. 1935-тӥ арозь со ужаз Урал областьысь калыкез дышетонъя отделлэн ёзэз луыса, собере пыриз Киров областьысь отделэ, 1938-тӥ арын гинэ со выжтэмын вал УАССР-ысь калыкез дышетонъя комиссариатэ. Данакез школаос интыяськемын вал нимаз юртъёсы. Котькудӥзлэн ик вал гырон-кизён музъемез, асьсэос ю-нянь, бакча сиён будэтӥзы. Дышетскисьёсты дунтэк пӧсь сиёнэн сюдылӥзы. Дыр ортчыса, ёросысь школаослэн инъетсы юнмаз, азинскизы пиналъёсты дышетон амалъёс. Али ёросын 12 шор ёзо, 5 укмыс классъем, 6 начальной школа но 6 школа- сад ужало. Вань ватсаса тодон-валан сётон учреждениос. Огъя образование басьтэм сяна, ёросысь гурт пиналъёс тодон-валанъёс басьто экологияя, эстетикая, краеведениея но валеологияя, пырисько техникая но чеберлыко творчествоя кружокъёслэн но спортъя секциослэн ужазы. Дышетӥсьёслэн ужазы пыӵало выль но выль амалъёс, уноез соос асьсэлэн кылдытэм программаоссыя дышето. Тыршемзылэн пайдаез адӟиськытэк уг кыльы. Сарапул ёросысь куатез школаос но нылпи садъёс Россиын ортчытъяськись "Ар понна дышетон учреждение" конкурслэн лауреатъёсыз луо. Ёросысь дышетскисьёс вормисе потыло республикаямы но регионын ортчылӥсь олимпиадаосын но конкурсъёсын, научно- исследовательской конференциосын школаез йылпумъямъёс пӧлысь уноез вылӥ дышетсконниосы пыро. Юбилейзылы сӥзем пумиськонэ люкаськылӥзы ёросысь ваньмысьтыз ик школаосысь дышетӥсьёс, педагогика ужысь ветеранъёс. Устоосызлы дышетӥсьёслы сётэмын дано нимъёс но данъян грамотаос, дуно кузьымъёс. Ёрослэн администрациез ронолы видеокамера кузьмаз. Н. Корякин. Трос чиньыос пӧлысь огез Сьӧд нюлэс пушкын вашкала дырысен улӥзы удмуртъёс. Ошмес дурын лянэсэн сылӥсь воргорон доры огпол дугдӥз суд йырсиё пиосмурт. Тусызъя адске: асьме выжыысь ӧвӧл ке но, лек малпанэн лыктымтэ. Удмурт солы вуэн лянэссэ мычиз: - Ю, друг. Озьы, пе, Вало шур дурын кылдӥз Юдрук гурт. Удмурт адями бускельзэ ноку но мурт ӧз карылы. Сое возьматэ асьме кунлэн вашкала но туала дырыз. 1780-тӥ арын Россиын кылдӥз Ватка наместничество. 1796-тӥ арын со пӧрмиз Ватка губернилы (ваньмыз соос 100 котыр вал), котькудаз - 300-400 сюрс адями. Губерния люкиське уездлы (удмурт сямен - утемлы. Таяз -10-30 сюрс мурт улэ. Уно удмуртъёс вал Россиысь 812 уездъёс пӧлысь ньыляз: Глаз, Сарапул, Малмыж но Алабго (Елабуга) уездъёсын, лыдъяськылӥзы кунлэн крестьянъёсыз. 1861-тӥ арын, крепостной право шуонэз быдтыку, уездъёсын кылдытӥзы волостьёс. 1920-тӥ арын 4-тӥ ноябре, Удмурт автономной область кылдыку, татын 71 волость вал. Улӥз ог 700 сюрс мурт: 59 процентэз - удмуртъёс, 38 процентэз - ӟучъёс, кылемез - музон выжыос. Удмурт калыклэн куназ кивалтон туж аспӧртэм вал. Шоркар (столица) луиз Глазов. Ваньмыныз кузёяськиз революцияя нокинэн бырйымтэ комитет (ревком). Солэсь пуктэмъёссэ (решениоссэ) улонэ пыӵатылӥз Глаз уездлэн исполкомез. 1921-тӥ арын июне Удмурт областьлэн шоркарез луиз Иж. Та арын ик июле люкаськиз кунысь Советъёслэн нырысетӥ ӧтчамзы (съездзы). Областьысь исполкомлы Тӧрое быръемын Иосиф Наговицын. Арлэн пумаз Удмуртия люкемын вить уездлы. Котькудӥзлэн шорсюлмыз пӧрмиз городлы. Глазов уездэ пыриз 19 волость, Иже но Можгала - 14, Дэбесэ - 12, Селтала - 11. Таосыз юдӥськизы на 1067 сельсоветлы (берлогес - 416 сельсоветлы). 1923-тӥ арын кутскиз уездъёсты но волостьёсты бадӟыматон. 1924-тӥ арын СССР-ысь ВЦИК-лэн Президиумез юнматӥз Удмуртиын та ужез нуон сярысь решенизэ. Капчи вылымтэ со. Кивалтӥсь ёзъёсты кулэстон но дунтэматон сярысь бадӟым вераськон пуромиз пӧртэм кенешъёсын но газетъёсын. Кылиз 3 уезд (5 интые), 34 волость (70 интые), 208 сельсовет (416 интые). Зэм, берлогес сельсоветъёслэн лыдзы вуиз 349-озь. Селта но Дэбес уездъёс быризы, Селта но Дэбес городъёс пӧрмизы черкогуртъёслы (селоослы). Сыӵе "шудонъёс" асьме шаерын гинэ ӧй вал. Быдэс Союз эскериз кивалтонэз озьы яке тазьы радъяны. 1929-тӥ арын Чуваш, Мари но Удмурт областьёс шедизы Нижний Новгород крае. Уездъёсмы пӧрмизы 21 ёрослы. Пусйыны кулэ: ӟучъёс но соку вераллязы но гожъяллязы ёрос. 1934-тӥ арын 28-тӥ декабре Удмурт область луиз Удмурт республика. 1936-тӥ арын со пыриз Киров крае. 1937-тӥ арын гинэ асьме шаере пыриз Вотка, Сарапул, Кияса но Каракулино районъёс, кылдӥз Игра район. 1939-тӥ арын Удмуртие сюриз Кизнер район. 1990-тӥ арын Удмурт Республика ялӥз аслэсьтыз суверенитетсэ. Али татын 6 город (Вотка, Глаз, Иж, Камбарка, Можга, Сарапул), 25 район, Ижын 5 район, 12 поссовет но 268 сельсовет. Валамон ини, трос шуг-секытъёс вал та сюрес вылын - политикаын но, экономикаын но, ваче кусыпъёсын но. Кин ке лыдъя, Удмуртиын ӟучъёсты зӥбо шуыса. Кин ке малпа, удмурт адями аслаз куназ зэмос кузё ӧвӧл шуыса. Нош оглом удмурт калык Россиын пӧртэм выжыос пӧлын сокем ляб ӧвӧл. Куд-огез асьсэлэсь кунзэс таки кылдытыны ӧз быгатэ на. Нош Удмуртия - Россиысь трос чиньыос пӧлысь одӥгез. Можга районысь Юдрук гуртлэн нимыз аслэсьтыз пуштроссэ уг ышты туннэ но. Ар бӧрсьы ар... Шаермы туннэ чебер дӥсяськемын: вордскем нуналзэ сӥё-дано пумита. 80 аръем сюресэз ортчыны капчи ӧвӧл, но со - история, асьмелэн будэм но азинскем вамышъёсмы. Ойдолэ ӧжытаклы берытскыломе со вакытъёсы. 1917-тӥ ар, июнь. Глазовын кылдэ удмуртъёслэн культурая но дышетсконъя огазеяськонзы. Соин кивалтэ священник Василий Крылов. Азязы ужпум пукто национальной школаосты, библиотекаосты, Глазовын музей усьтыны, удмурт кылын газет поттыны. Со понна огазеяськонэ пырись дышетскисьёс, черкын ужасьёс потало гуртъёсы, валэкто странаын кылдэм политической югдурез, удмуртъёсты мыло-кыдо дышетскон борды кутскыны косо. Нимысьтыз вераськонъёс нуизы кумышка пӧзьтонлы пумит, туберкулёз но трахома висёнъёсын нюръяськизы. Та огазеяськонлэн кичӧлтэмезъя, 1917-тӥ-1918-тӥ аръёсы Глазов уездысь удмуртъёс куинь пол ортчыто асьсэлэсь кенешсэс. Отын кылпум поттэмын вал удмурт нацилэн азьпал сюресэз сярысь. 1918-тӥ ар, июнь. Елабугаын ортче Россиын улӥсь удмуртъёслэн И съездзы. Укмыс уездысь вуиз 78 делегат. Съездлы председателе быръё Максим Прокопьевез. Бадӟым люкаськемын ӝутэмын одӥг ужпум: Прикамье губерния кылдытон, шорсюлмыз - Сарапул но отчы вань удмуртъёсты огазеян. Вераськон мынӥз нимысьтыз национальной административно-территориальной единица кылдытон сярысь. Мукет но дэмлан сётэмын вал - удмуртъёсты пыртоно Татаро-Башкирской республикае. Данакез делегатъёс солы пумит луизы. Прикамской губерния кылдытонъя малпамзы ӧз быдэсмы. 1918-тӥ арын Москваын Нациосын ужанъя Наркоматын кылдэ Вотской отдел, со ик ас вылаз басьтэ удмуртъёслы огазеяськыны юрттонъя ужпумез. Та арын ик 31-тӥ октябре Елабугаын потэ большевикъёслэн нырысетӥ удмурт газетсы - "Гудыри". Солэн редакторез - Трофим Борисов, Елабугаысь ревкомлэн председателез. Дышетскемезъя врач, ожмаськиз чехъёсын, Колчаклы пумит. Ӟырдыт оске выль улонлы. 1919-тӥ ар, сентябрь. Сарапулын ортче удмуртъёслэн ИИ Всероссийской съездзы. Кылдытэмын удмурт калыкен ужанъя Центральной комиссариат. Солы кивалтӥсе быръемын Трофим Борисов, бӧрысьгес - Иосиф Наговицын. 1920-тӥ ар, 4-тӥ ноябрь. ВЦИК юнматэ СНК-лэсь удмурт автономной область кылдытон сярысь постановленизэ. Вераны кулэ, та решениез кутон капчиен ӧз сётскы. Ваньмыз воксё мукет сямен луыны быгатысал, Иосиф Наговицын но Трофим Борисов сомында кужымзэс, быгатонлыксэс ӧй ке сётысалзы. Нош вакытэз бугырес вал: Советской властьлэн ёзъёсыз но Удмурт комиссариат куспын валантэмъёс кылдӥзы. Нырысетӥосыз кивалтон удысэз быдэсак асьсэлы карыны выризы, удмуртъёслы дышетон но валэктон ужез гинэ оскыса. Партилэн Сарапулысь укомез Москвае телеграмма но ыстэ, удмуртъёслы автономия сётыны кулэ ӧвӧл шуыса. Соос, пе, котырак пазьгиськемын но национальной ужпумъёсын вырыны нокинлы, удмуртъёс пӧлысь кивалтӥсе пуктымонэз адями ӧвӧл. Центрлы сыӵе решение кутыны люкетӥз Удмурт комиссариат. Но ваньмыз малпамъя ӧз пӧрмы: Сарапул, Воткинск, Камбарка 1920-тӥ арын Вотской автономной областе ӧз пыре. 1921-тӥ ар, 5-тӥ январь. Та нуналэ ВЦИК-лэн декретэныз пусъемын выль кылдэм областьлэн кунгожъёсыз. Автономие соку пыртэмын вал Глазов ездысь 27 волость, Сарапулысь - 18, Елабугаысь - 14 но Малмыжысь 12 волость. Огъя улӥсез - 700 сюрс мурт, ӝыныезлэсь ятырез - удмуртъёс. Со дыре ик областьлэн палэназ 100 сюрслэсь ятыр огинын улӥсь удмуртъёс кылизы. Автономия шӧдскымон ыштон адӟиз экономика ласянь но. Кама но Вятка шуръёс асьмелы ӧз шеде. Кильмезь вӧзысь ӟеч нюлэсъёс кылизы Вятской губерние. Сарапул, Воткинск городъёс, Камбарка, Каракулино, Киясово районъёс пыризы Пермь губерние. Озьы ВЦИК- лэн решениеныз экономика ласянь тупатэм кусыпъёс таркаськизы. Автономилэн шорсюлмыз луиз Глазов. 1921-тӥ арын 9-тӥ феврале татын кылдэ Вотской областной ревком. Солэн кивалтӥсез Иосиф Наговицын дасяське калык хозяйствоын но культура удысын бадӟым воштӥськонъёс ортчытыны. Кӧня ке дыр ортчыса валало: Глазов город столицалы малпаськытэк юнматэмын, сюресъёс ӧвӧл. Ижевскысь Глазове ветлоно луылӥз Москва яке Свердловск пыр. Эшшо одӥг лэчыт ужпум султӥз выль область азе - кадръёсты дасян. Соос туж ӧжыт. Таин валче но столицаез выжтоно луо Ижевске, промышленной центре. Озьы 1921-тӥ арын 2-тӥ июне ВДО-лэн столицаез луэ Ижевск. 1921-тӥ арын 20-тӥ июле, ӝыны ар ужамез бере, ревком аслэсьтыз полномочиоссэ сётэ облисполкомлы. Отчы быръемын вал 25 мурт, соос пӧлысь куинез гинэ удмуртъёс - И.Наговицын, Т.Борисов, П.Стрелков. *** Озьы ужаны кутскиз нырысетӥез Удмурт правительство. Секыт вакытэ тупаз солэн пыд вылаз султонэз. Нырысетӥ мировой война, граждан ож. Куашкатэм гуртъёс но городъёс. Кизён бусыос 1922-тӥ арын кык поллы кулэсмо. 1921-тӥ арын юос выжыенызы ик куасьмизы-быризы. Вылаз ик, ӝуаны кутскизы тэльёс но гуртъёс. Глазов уездын 300 гурт пеньлы пӧрме. Со борды вуо на сибирской язва но холера висёнъёс. 1921-тӥ арын тулыс 80 процентэз калык сютэм кылиз. Кин быгатӥз - кошкиз мукет улосвылъёсы, кин ӧз - кӧтсэ трыны выриз ӝуйыен, вож потэн, куроен, писпу сулэн но пушнерен. 1921-тӥ арын 11-тӥ августэ кылдытӥське сютэмъёслы юрттонъя областной комиссия. Областез юнмато Ярославской губерния борды. Но кусып юнматыны ӧз кылды - сютэм Удмуртия ляб промышленностеныз Ярославльлы кулэ луись вуз сётыны ӧз быгаты. 1922-тӥ арын тужгес но юн сиён-юонлы ёрмизы Можга но Ижевск котырын улӥсьёс. Май толэзе гинэ Можга уездын 482 мурт кулэ. Самой та секыт вакытэ Америкаысь юрттэт вуэ. Сое дася но ыстэ Герберт Гувер, США- лэн вуоно президентэз. 1922-тӥ арын 26-тӥ мае кылдытэмын вал Вятской областной русско-американской комитет. Зарезь сьӧрысь вуэм паёке пыриз какао, сахар, йӧл, кӧй- вӧй, бобы, кукуруза кеньыр. Столовойёс пыр нуналлы быдэ соин сюдӥзы тужгес но ёрмисьёсты. Августэ югдур тупатскиз. Выль вуэм ю-нянь калыкез быронлэсь утиз. Соин ӵош тупатскыны ӧдъяз экономика. 1925-тӥ ар, март. Иосиф Наговицын гожтэт пыр вазиське ВЦИК-лэн председателезлы М.И.Калининлы, СССР-лэн правительствоезлэн председателезлы А.И.Рыковлы Вотской автономной областьлэсь границаоссэ паськытатон ласянь. Та вазиськонлы валэктон ӧз вуы. 1929-тӥ ар. ВЦИК-лэн постановлениезъя РСФСР-ын ортчо административно- территориальной воштӥськонъёс. Удмуртиын, 3 уезд интые, кылдэ 21 район. Таӵе воштӥськонъёс страналэн кивалтӥсьёсызлы кулэ вал центральной районъёс чотын бере кылись улосъёсты ӝутон понна. Удмуртилы та вакытэ туж кулэ вал азинтыны секыт промышленностез но скал вордонэз, йӧл-вӧй поттонэз. Кадръёсты будэтон. 30-тӥ аръёслэн кутсконазы Удмуртиын усьтӥсько научно- исследовательской, педагогической но медицинской институтъёс. 1934-тӥ ар. Горьковской край люкиське Горьковской но Кировской крайёслы, Удмуртия кыле Киров борды. 1934-тӥ ар, 28-тӥ декабрь. ВЦИК-лэн Президиумезлэн постановлениеныз Удмурт автономной область пӧрмытэмын Удмурт Автономной Советской Социалистической Республикалы. 1936-тӥ ар, декабрь. СССР-ын кутэмын выль Конституция. УАССР луэ РСФСР-лэн люкетэз, крайёслы люкон быдтэмын. 1937-тӥ ар, 14-тӥ март. Юнматэмын УАССР Конституциез. Солы сӥзьыса, Ижевсклэн ульчаосаз ортчиз бадӟым митинг. Отчы люкаськылӥз ог 40 сюрс мурт. Таӵе ик ужрадъёс ортчизы республикалэн вань городъёсаз но районъёсаз. УАССР-е пыризы Воткинск, Сарапул, Каракулино но Киясово районъёс. Азьмынӥсьлы - дано ним Трос аръёс ӵоже ини Мостовое черкогуртысь скал кыскись Любовь Григорьевна Пономарёва Сарапул ёросын азьмынӥсьёс радын ветлэ. Куамын вить ар пала ини тырше со фермаын. Миым Любовь Григорьевналэн нимыз пыртэмын вал республикамылэн Данъян пулэз вылэ. Нош туэ со вылэ кизили зор жилдӥськиз, шуыны луоз. Ужын азинсконъёсыз понна гурт администрация солы чибориё телевизор кузьмаз. Нош алигес Л. Г. Пономарёвалы сётэмын "Удмурт Республикаысь гурт хозяйствоысь дано" ужась ним. Н. Никонов. Выльысь пумиськытозь, Гёнц уром... 1993-тӥ арын инвожолэн берпуметӥ нуналъёсаз асьме шаере вуылӥз Венгрия Республикалэн Президентэз Арпад Гёнц. Со вакытэ Удмуртиысь Вылӥ Кенешлэн Президиумезлэн Тӧроез В. К. Тубылов мадьяр куноосты Пичи Пурга ёросысь Баграш- Бигра гуртэ нуиз. Венгриысь Президентэз пумитаны вань гурт калык потӥз. Но тужгес но та учыр вунонтэм кылиз дышетӥсьёслы-кузпалъёслы Нина Андрияновна но Анатолий Яковлевич Матвеевъёслы но пенсионеръёслы Ольга Владимировна но Семен Анисимович Орловъёслы. Угось Арпад Гёнц соослэн коркаосазы пыраз, та семьяослэн улэм- вылэменызы тодматскиз. Венгриысь лыктэм куноосты Матвеевъёс ческыт пӧрам сиёнэн куноязы. Уз вунэты та нуналэз механизатор Михаил Захарович Орлов но. Солы, усто ужасьлы, оскизы Президентэз нянь сукыриен, вӧйын, сылалэн пумитаны. Нош ачиз А. Гёнц таӵе шуныт пумиськонлы паймыса шуиз: "Мон уг тодӥськы, мар гожтозы та пумиськон сярысь журналистъёс, но одӥгзэ умой тодисько, мар татысь нуисько мон сюлэмам". Туэ 3-тӥ августэ Арпад Гёнц странаен кивалтонысь кошкиз. Президентэ со нырысьсэ быръемын вал 1990-тӥ арын, та интые ик со кылиз кыкетӥзэ но - 1995-тӥ арын. Озьыен, 3-тӥ августэ дыр вуиз солы интызэ кельтыны. Уго Венгрилэн Конституциезъя, Президентэ одӥг мурт ик кык поллэсь ятыр быръемын луыны уг быгаты. Мадьяр калык пӧлын ортчытэмын юалляськонъя, А. Гёнц Венгрилэн историяз тужгес но даноез, визьмоез но гажамонэз политик вал. Республикаен дас ар ӵоже кивалтытозяз со ассэ номыр ласянь но ӧз сьӧдма. Озьыен, выльысь пумиськытозь, гажано уроммы. Нош Венгриын шуысалзы: выльысь пумиськытозь, Гёнц урам. Соослэн верамзыя со господин шуэм луэ. Нош удмурт кылын уром шуо матысь эшез, бускелез. Зэмзэ но, Венгрилэн Президентэз республикамы понна дуно эш луэ. Т. Банникова. Туспуктэмез А. Кузнецовлэн. НИМЗЫ - ДАНЪЯН ПУЛ ВЫЛЫН Кырӟа, Татьяна! Ас ужазы бадӟымесь азинлыкъёс басьтэмзы понна но Удмурт кунмылы тямыстон ар тырмемен валче, уно ӟеч адямиослэн тусбуйёссы шумпотыса интыяськизы туэ Удмурт шаермылэн Данъян пулаз. Соос пӧлын ик - Операя но балетъя кун театрын кырӟась Татьяна Ивановна Силаева. Башкортостанысь Белорецк городын вордӥськиз но будӥз востэм нылаш. Пичи дыръяз ик аслыз ачиз кыл сётӥз: будӥ ке, эмъясь луо. Валентина Ивановна но Иван Иванович, нылоклэн мумиз-бубиз, нуныкайзылэсь таӵе чебер малпанзэ тодыса шумпотӥзы гинэ. Школаын дышетсконзэ йылпумъяса, нылмурт вамыштӥз андан ӵыжатӥсь комбинатэ. Мукет эшъёсыныз ӵош ракетаос понна дасяны кутскиз адями йырси зӧкта гинэ векчи ез. Ваньмыкуз хорын кырӟалляз. Танялэсь чебер но кужмо куаразэ огпол синйылтӥз хорен кивалтӥсь. Нылмуртлы вань сюлмысьтыз дэмлаз: - Чик малпаськытэк йыгаськы Магнитогорскысь крезьгуръя училищее. Таӵе адями даурзэ татын "сисьтыны" кулэ шат? Визьмасезлэсь-нодъясезлэсь кылзӥськиз нылок. Иське, табере нокыӵе эмъясь уз луы со. Ӟеч лу, тӧдьы халат! Ӟечбур, кырӟанэн пачылмем дунне! Крезьгуръя училищее куриськыкуз, сюрес вылаз нокыӵе могӟетъёс ӧз кылдылэ. Татын дышетскеменыз ӵош Таня огдыре ик кырӟаз Магнитогорск кун хор капеллаын. Кӧня ке гинэ ар туж ӝог ортчиз. Зэм, туж ӟеч кырӟась луэмед потэ ке, татын гинэ люкам тодон-валанэныд буйгатсконо ӧвӧл, дыр. Нош бадӟым сцена сярысь дӥсьтыса малпаськиськод ке, сюрес одӥг - консерваторие. Москваын Татьяна Силаеваез дышетӥз тодмо ӟуч кырӟасьлэн Сергей Яковлевич Лемешевлэн кузпалыз Вера Николаевна Кудрявцева-Лемешева. Нош ик ортчиз вить ар. Дышетсконзэс йылпумъямъёсты, кин ке куремъя-косэмъя, нокытчы ӧз ысъялэ азьвыл. Кырӟасьёс но дирижёръёс, режиссёръёс ог-огзэс асьсэос шедьтылӥзы. Чебер но кужмо сопраноез Свердловскысен огпол кылӥз Удмурт шаерысь Крезьгуръя театрысь (соку та юрт озьы нимаськиз) валтӥсь дирижёр Леонтий Вольф. Татьяналы меӵ- меӵ шуиз: - Тынад интыед - ми дорын. Ӧз пыкиськы егит мурт. Леонтий Яковлевич ӧтемъя вуиз Иже. Со дырысен ортчиз ни дас куинь ар. Пӧртэмесь вал соос, ог-огзылы пичи но кельшисьтэм вакытъёс. Котькыӵеесь вал соос, тыныд оскем операосысь но опереттаосысь адямиос: Татьяна, Сильва, Тоска. Нош сцена вылэ потон азяд йырад возёно одӥг гинэ малпанэз: театре лыктэм учкись понна куарадэ но, кужымдэ но жаляно ӧвӧл. Нош со, кылзӥсь, дунъя-а тонэ? Чик ушъяськытэк верам потэ: Операя но балетъя театре адями туннэ лыктэ, тужгес яратоно кырӟасьсэ адӟон но кылон понна. Ма, собере нинэн-бунэн керттылэмын ӧвӧл ай со. Яратоно кырӟасезлы лулысь-сюлмысь кузьмалоз турлы буёлъёсын ворекъясь тузӥ сяськаос. Театрын дас куинь ар ӵоже ужатозяз, Татьяна Ивановна Силаева кӧня ке пол вуылӥз кунмы сьӧры но: Россиысь телевиденилэн но радиолэн оркестренызы ӵош вал Америкаын, Германиын. Зэм, котькыӵе мед луоз со, кунсьӧр, асьме кырӟасез асьме учкись но кылзӥсь гинэ туж вылӥ дунъяны быгатоз. Татьяна Ивановна Силаеваен артэ мылысь-кыдысь тыршо туннэ эшъёсыз но. Тамара Камашева, Александр Каманицын, Александра Шулятьева, Дмитрий Шиврин - театрлэн данъяськонэз но чеберлыкез. Кырӟан Со понна - быдэс улон. Нош театр - кыкетӥ Дор. Зэм, Ижысь уноез улӥсьёс та юртэ одӥг пол но ӧз на пыралэ. Мед тодысалзы соос: шаермылэн шоркараз вань Операя но балетъя кун театр, отын кырӟало но экто дунне вылысь тужгес устоосыз адямиос. Удмурт шаермылэн Данъян пулаз интыяны малпамзы сярысь ивор Татьяна Ивановна Силаева понна шӧдтэк шорысь луиз. Зэм, сюлэмаз каръяськиз туж бадӟым шумпотон. Иське, юнме ӧз бырйы со Кырӟасьлэсь сюрессэ. Кырӟа, Татьяна! Е.РОМАШОВА. Удмурт Элькунысь дано кырӟась Татьяна Силаева. Тусбуйзэ пуктӥз Владимир Беломорских. УДМУРТ КУНЛЫ - 80 АР Кырӟанэз-веранэз ке ӧй луысал... Аръёс ортчо. Пичи Пурга хормылы но тани куатьтон вить ар тырмиз ини. Секыт вакытэ кӧттырымон сиськытэк будэм егитъёсты Кузьма агай (Маштаков) котыраз люканы быгатӥз. Хоре ветлэм котькуд адямилы музъемозь йыбырттыса тау кареме потэ. Тау карисько улэпъёсызлы но, улонысь кошкемъёсызлы но. Туала калыклы, будӥсь нылпиослы ӟеч мылкыд, ӟеч сюрес сӥземзы понна тау карисько Сметанина сузэр-апайёслы - Лиса но Анна апайёслы. Анастасия Боталова но - Пичи Пурга хорез кылдытӥсьёс пӧлысь одӥгез. Кузьма агайлэн бур киыз вылэм со. Солэн Миша пиез но татын кырӟаз. Али хоре ветлэ Таня нунокез (внучкаез). Кырӟаны-вераны сюрес усьтӥсьёс пӧлысь улэп на мынам киросапае - Клавдия Мохова гинэ. Солэн Лена нылыз, Надя нунокез но сыӵе ик устоесь. Калык азе нырысьсэ потон понна, Лиса Сметанина, консерва банкаос бичаса, уй ӵоже, киосыз пульдылытозь вандылыса, кык чыртывесь вурем. Нош Анна апайлэсь сюрессэ али азьланьтэ матысь ӵыжы-выжыез - Оля Кузьмина. Ёрос культура юртын хореограф луэ со. Кузьма агайлэсь кырӟан-веран тылгизьызэ ожысь бертыса пуромытӥзы Миша но Коля пиосыз. Михаил Кузьмичлэсь мылкыдзэ маин меда ӵошатысалыд? Уй-нунал ӵоже жильыртӥсь но бугыр пӧзись ошмес синэн ке шат? Солэн сыӵе мылкыдызлы луыса, бордаз муш мумы котыре сямен бинялскылӥзы егитъёс. Оло, соос ваньзы юри быръемын вал? Сцена вылын сюсьтыл кадь адӟиськылӥзы: мыскалэн мертамон вал соослэн чеберлыксы. Веськрес кызьпуос, тӧдьы юсьёс, вумульыос кадь потылӥзы. Таӵе мусоесь вал Клавдия Чернова, Елизавета Ожмегова, Елизавета Борисова, Александра Викулова, Анастасия Быкова, Анисья Соловьёва, сузэр-апайёс Дедюхинаос - Анастасия но Ольга. Шоразы учкыса, вӧй кадь шунаськод вал. Али но буртчин возь кадь луиськод, вераськем куаразэс кылыса. Аръёс но чеберзэс ӧз гужатэ. Оло, Оӵдормы соослы, турлы сяськаё возез турнакузы, быронтэм, бездонтэм чеберзэ кузьмам? Воргоронъёсты но вератэк кельтэме уг поты. Пинал дыръязы соос но туж чебересь, етӥзэсь, сьӧд тӧри ужпиос кадесь вал, дыр. Кыӵе устоесь вал Некрас Семон, Быки Семон, Бот Пипка (Миша), Какся Пислэг, Кукыль Миша (Александров). Быки Семонмы арганэн шудылӥз. Уката ик тау кареме потэ Кузьма агайлы, солэн Миша пиезлы. Вань калык солэн шаплыезлы, чеберезлы паймылӥз. Сцена вылэ потэ ке, гадьзэ йӧно урдыса но пыдчиньы йылаз сылыса кырӟа вал. Но туж ӝожомыса верам потэ: Михаил Кузьмичлэсь ужзэ азьланьтӥсь ӧз кыльы. Кузьма агайлэн Параски нылызлэн Коля пиез (Николай Тубылов) кызь ар ӵоже ини "зарни шеп" фольклор ансамбльлэн шорсюлэмыз луэ, шуысал мон. Ачиз чылкыт, куараез чебер. Концерт дыръя арганэныз шудыны кутске ке, мӧйы муртъёслэн но пинал даурзы тодазы лыктэ, пыдчиньыоссы вырыны кутско. Михаил Кузьмичлэн ӵыжы-выжыез, Иванай Толя (Анатолий Фёдоров) но, "Зарни шепысь" Коляен вожмаськыса шудылӥз. Камис выжыос сярысь но вератэк кельтэме уг поты. Камис Насьталэсь мытэм сюрессэ азьланьтӥз Миша выныз. Коля пиез но трос аръёс ӵоже хорын кырӟаз. Али "Зарни шеп" ансамбле ветлэ. Колялы инмар чебер куара но, веськрес мугор но сётэм. Пичи Пургаламы кырӟаны-вераны яратэменыз туж висъяське вылэм Алексей Воронцов. Кировысен вормемез понна скрипка кузьмаллям. Солэн Нина нылыз туннэ но кырӟа на ветеранъёслэн хоразы. Олёшлэн Сандӥ нимо нунокез туж шаплы вал кырӟаны но, эктыны но. Туж ӝож: вазь кошкиз улонысь. Алексей Воронцовлэн мукет ӵыжы-выжыез, Валентина Борисова, али "Зарни шепын" вань мылкыдзэ сётыса кырӟа, эктэ. Олёшлэн Иван выныз но калык хорез кылдытӥсьёс пӧлысь одӥгез луэ. Мандолинаен шудӥз, кырӟаз, эктӥз. Учкыны дӥсьтонтэм ӝужыт, таза, чебер, йӧно воргорон вал. Солэн Тамара нылыз но хорын кырӟаз. Табере Тамаралэн Игорь пиез семьяеныз ӵош ветлэ "Зарни шеп" ансамбле. Дукъялэн сиёнэз лыс, шуо, нош удмурт калыкелэн - кырӟан-веран. Куректыкуз но, бӧрдыкуз но кырӟа. Шумпотэмзэ но кырӟаса-вераса возьматэ. Нош эктыны кутске ке, вань шаерез сайкатэ, турлы-турлы калыклэн сюлэмаз пыре. Кырӟанэз-веранэз ке ӧй луысал, кызьы меда улысал удмурт калыке?.. Т.МОХОВА. Пичи Пурга хор. "Гожтонэ азьпалан ай" Удмурт Республикамылэн 2000-тӥ ар понна Кун премиеныз пусъемъёс пӧлын - драматург Егор Егорович Загребин но. Тазьы вылӥ дунъямын солэн "Эш-Тэрек", "Кикы нош силе но силе..." пьесаоосыз. Тодмо драматургенымы туннэ кенеше Федор Никитин. - Егор Егорович, нырысь ик ӟечкыласьком Удмурт Республикамылэн Кун премиеныз пусъемен. - Тау. - Кыӵе мылкыдын пумитады тӥ таӵе иворез? - Таӵе иворез котькуд адями шумпотыса пумита, дыр. Бергес ке но, малпасько, котьмалэн аслаз дырыз вуэ шуыса. Ужась адямилэн кыӵе ке но емышез потыны кулэ. Писпу но мерттэ ке, вите солэсь ческыт емыш сётэмзэ. Нош со писпу ялан буш, кидыстэм луэ ке, ӟечез ӧвӧл. Адямилэн ӟеч, умой-умой тыршемез сяськаяськон дыръяз-а, бергес-а, но одно ик солы кужым сётэ на. Куд-огез малпало, аслэсьтым но юало, туж бадӟым коньдонэн пусйизы шуыса. Со озьы ӧвӧл. Мон шуисько, со - сӥ-дан карон. Кун премия - со адямилэсь ужзэ данъян. - Туннэ ӵапак дырыз, шуысал мон, ортчемез пала берыктӥськыны. Тани емыш бичан вакытты вуиз, нош кыӵе вал нырысь мерттэм удды? - Вакчиесь веросъёс гожъяны кутски сизьыметӥ классысен. Нош нырысетӥ пьесаме гожтэме дырысен туэ 40 ар тырме. Со вал, Ленинградысь театральной институтын дышетскыкум. Ӵапак соку мылкыды бугырскиз ӵош дышетскись удмурт нылъёсын но пиосын ӵош аслам гожтэм пьесаея спекталь пуктыны. Озьы 1960-тӥ арын институтмылэн дышетскон залаз пуктэмын вал "Тулыс зор" пьесаея спектакль. Сое пумозяз ик вуттыны ӧмгес вуэ. Татчы, Иже вуыса, "Тулыс зор" спектакль пуктэмын вал ни, выль сяменгес учкыса. Отчы пыриськизы ни удмурт театрысь валтӥсь артистъёс но. Та нырысетӥ пьесаям ик мон возьматыны тырши, мар со сыӵе ог-огдэ вузан, ӟуч сямен вераса - предательство. Малы ке шуоно, соку, 50-тӥ аръёсы, куке ыркыт тӧл пельтыны ӧдъяз, 58-тӥ арын, куке адямилы ӧжыт ке но эрик сётыны кутскизы, калыкын меӵакгес вераськыны кутскизы ни. Ведь кыӵе репрессиос вал асьмелэн! Тани милесьтым одӥг тодмомес но кулэмын-быремын кожаллямы ни. Дас кык ар ортчыса гинэ со ми доры вуиз. Быдэс гурт калык паймемын вал та учырлы. Пьесаям мон сое Илья Богатырев кари. Нош со мукет адями вал, ӵыжы-выжые, нимзэ но уг вера. Пьесалэсь сюжетсэ лэчытатон понна, сое разведкаен герӟай. Мон соин разведкае мынысал яке ӧй мынысал шуэмъя. Кык эшъёс мыно разведкае. Нош тушмон котыртэме сюрыса, одӥгез кышка, эшсэ огназэ кельтэ. Мар сярысь вераны турттӥсько? Тани берлоосаз "Эш-Тэрек", "Кикы нош силе но силе..." пьесаосам но мыд-мыд ласянь учкыны тыршисько адями кусыпъёс шоры. Кытысь потэ адямилэн сыӵе вузаськон сямыз? Малы со сыӵе, малы асьмеос таӵеесь. Малы ум быгатӥське туннэ нуналэ но валтӥсь адямимес поттыны? Тани быръёнъёс ортчизы. Со но возьматӥз: туж пӧртэм сямен учкиськом валтӥсь шоры, туж пӧртэм сямен ужа асьмелэн визьмы но сюлэммы. Малы асьмеос одӥг киысь чиньыос кадь кырмиськыса ваче ужаны ум быгатӥське? Та сярысь туж кемалась вераськон мынэ ни, гожъямын но трос. Басьтом классикмылэсь Кедра Митрейлэсь "Эштэрексэ" ик, ӟуч литератураез. Кыӵе сюлэмшугъяськыса гожъямын адямиос куспын тэргаськон пумысь. Шуом, вал удельной князьёс. Куспазы макем жугиськыса улӥзы. Ачиз Святополк, валтӥсь луон понна, вынъёссэ Борисэз но Глебез вие. Тани лыдӟиськом "Повести временных лет", "Слово о полку Игореве" мукет произведениосты. Кыӵе бадӟым патриотизм мылкыдын гожтэмын: ойдолэ огазе кариськом, мед кужмо луомы, медам келялэ асьмеос. Кыӵе зол кышномурт образ пуксе син азе - Ярославна. Кызьы со оскыса вите картсэ. Со пыр лыдӟисьлы но бадӟым оскон пыӵа кадь. - Кызьы тӥ верады, драматургия удысын сюрестэс мытӥды 40 ар талэсь азьло. Нош кун премия басьтоды "Нош кикы силе но силе", "Эштэрек" пьесаосты понна. Асьтэос малпаськоды-а, та тӥляд ваньмызлэсь ӟечъёсыз но бадӟымъёсыз ужъёсты шуыса? - Умой юан. Кызьы ай шуод... Нырысь пиналзэ вордэ ке, адями шумпотэ. Мынам нырысь "нуные" вал "тулыс зор", отӥяз кыдӥзы мукетъёсыз. Тани "Асьмелэн со одӥг" - асьме дунне, музъеммы, яратон сярысь, кызьы асьмеды быдто, пичи гуртъёсты таркало. Та сярысь трос гожъяз Валентин Распутин. Мон но ас сяменым, удмурт пыр возьматытэк ӧй чида. Яке шуом, нылкышноез яратон сярысь. Верай ни Ярославна сярысь. Мон ас сяменым адӟисько сое. Серемес комедиосам но нылкышноез данъяны тырши. Тани Насьток - удмурт нылкышно, ужась, котьмае чидась, ас сяменыз вала чеберлыкез, пиосмурт но со шоры ас сяменыз учке. Вань пьесаосам, нош соос дас сизьым, кутсконысен пумозяз горд гожен возьматыны тырши адями кусыпъёсты: малы асьмеос таӵеесь, малы ог-огмес ум валаське? Таӵе мылкыд ик пыӵамын "Эштэрек", "Кикы силе но силе" пьесаосам. Малы асьмелэсь валтӥсьмес Эштэрекез соин ӵош нюръяськись эшъёсыз ӧз валалэ? Тӥни озьы ик Иднаез, вал асьмелэн сыӵе батырмы, Ожмегез но туж троссэ эшъёссы валатэк быдтылӥзы. Озьы ик Гердэн но. Кин сое вузаз? Матысь адямиосыз. Ӵош ужась но Москваын ӵош дышетскем эшъёсыз. Малы сыӵе висёнмы вань асьмелэн? Кытысь потэ со? Кышкасьтэм! Кыӵе зол адями вал Герд! Пӧртэм удысъёсъя эшъёсызлэсь дас йырлы вылынгес. Кыӵе визьмоесь солэн ӝуась мылкыдын гожтэм чуръёсыз. Удмуртлэн гинэ висёнэз ӧвӧл со, вань ӟучлэн но, мукетызлэн но. Тани басьтом Пушкинэз ик "Моцарт и Салвери". Мон алгебра пыр учки дуннеез, шуэ Салвери, кин кол кык - ньыль. Нош Моцарт ваньзэ, пе, тӥя-тарка. Уг вала угось. Кызьы, пе, озьы, ульчае кожыса, калык азьын скрипкаен шудэ, нош отын ик пуксе но сюлэмез позыртӥсь крезьгур гожтэ. Нош со, Салвери, Моцартлэсь дас пол визьмо, быдэс дуннеысь музыкаез алгебра пыр дышетэм мурт, озьы уг быгаты. Солэн валамезъя озьы луыны кулэ ӧвӧл. Тӥни озьы Моцартэз ядэн удэ. Та темаез ик котыр ласянь усьтыны турттӥ "Кикы силе но силе" пьесаям. Калыклын туж умой верамын адӟон сряысь, ӟуч сямен - рок. Вадьсамы бадӟым лэчыт пурт музэн ошиськыса улэ со. Нош золэсь-а, лябесь-а та берлоосыз пьесаосы вераны уг басьтӥськиськы. Учкись дунъялоз. Котькуд гожъяськись мурт сямен ик шуысал: главной книгае ӧз кылды на, гожтоноез - азьпалан. Ваньзэ лэсьтӥ ни шуыны уг быгатӥськы. Таӵе мылкыдтэк улыса, ӝӧк сьӧры уд пуксьы. Нош Шекспир но Островский сямен уг быгаты. Соосты нокин ӧз ортчы на, уз но ортчы. Сыӵе адямиос сюрс арлы одӥг пол вордско. - Егор Егорович, мылкыдды ик бугырскыса верады ог-огдэ вузан, адӟон пумысен. Ваньмыз со лек вожъяськон бордысь уг поты-а асьмелэн? - Ваньмыз со лек вожъяськон, ог-огдэ адӟонтэм карон, ултӥян, кышкан бордысь потэ, одӥг бинетысь сэрттӥськыса кошке. Собере аскалыкмы пичиен. Трос мугъёсыз, ваньзэ вераса но уд быдты. - Уг янгыша, дыр, тӥ дӥсьтӥсь адями шуи ке. Кивалтӥсь азьын-а, огшоры адямиос пӧлын-а шара вераськоды малпанъёстэс. - Куддыръя кескичъяськытэк но уг луы. Котькуд учыре меӵак вераса, шелепен ӵош ачид но вуя гылӟыны быгатод. Куддыръя, уг ни ке чидаськы, тонэ отчыозь вутто ке, меӵкытӥсько. Собере сюлмын гинэ улыны уг луы, сюлэм борды визь кулэ на. Меӵкытъян, киыныд гинэ шонаськон - со бадӟым визьлэсь ӧвӧл. Аслэсьтыд шонерлыктэ возьматон, малпамдэ пумозяз вуттон понна тыршыны, ужаны кулэ. - Егор Егорович тӥ луиськоды шаерысьтымы писательёслэн огазеяськонзылэн тӧроез, озьы ик финн-угор калыкъёслэн литературая ассоциацизылэн вице- президентэз. Сюлмаськонъёсты но йылӥзы. Кызьы адӟиськоды литературамылэсь азинскон сюрессэ? - Асьмеос асьме сярысь гинэ ум сюлмаськиське. Котьку но, Куӟебай Герд дырысен, учкиськом асьме выжыысь валтӥсь калыкъёсмы шоры, кудъёсыз асьсэлэсь сюрессэс вольыт юн лёгизы но шонер мынынын быгато ни улон кузя, визьын но, ужен но, улон- вылонын асьмеды азьпалто. Соос пӧлы пыртысал финн, венгер, эстон калыкъёсты. Соин ик, малпасько, соослэн литературазы но умойгес азьланьске. Но ӧй шуысал, удмуртъёс лябгес шуыса. Тани алигес Саранске ветлӥм, писательёслэн конгрессазы. Отын но учкиськод, кин кызьы ужа. Асьме калык кырӟась бере, мон нимысьтыз пусйысал удмурт поэзиез. Михаил Ильин но Куӟебай Герд бордысен кутскыса, Михаил Петров, Флор Васильев, Николай Байтеряков но трос мукетъёсыз нокинлэсь но номырин лябесь ӧвӧл, куд-ог дыръя, оло, золэсьгес но. Кытысь со потэ? Асьмелэн туж мур философской кырӟанъёсмы. Соосты пичиысен ик сюлэмамы, вирамы пыӵатыса будӥськом. Соин ик, вылды, поэзия удысын сыӵе чебересь нимъёс кылдо. Тани кызьы уд вера улонысь алигес кошкем Михаил Федотовез. Солэн творчествоез эскеремын- чакламын но ӧвӧл ай. Мур пуштросъем берло кылбуръёссэ, оло, Есенин сямен ик виреныз гожтӥз со. Туала егитъёс но золэсь. Верасал Риф Моникузинэз, Сергей Матеевез, Владимир Романовез азинтӥсьёс шуысал мон соосты. Туж паймыто нылкышноос. Мукет республикаосын та ласянь асьмелэн кадез ӧвӧл. Ваньзэ вераса но уг улы, пусъё тани ньыльзэ гинэ: Алла Кузнецова, Галина Романова, Людмила Кутянова, Татьяна Чернова. Соослэн быгатонлыксы туж вылӥын. Таосызлэсь бере кыльытэк сюрес лёге ни Любовь Тихонова. Журналистика ӧз "сиы" ке, со ассэ зол возьматоз ай. Тихонова, кылбуръёсызлэн калыклы кельшемзыя, Ашальчи Окилы тупа, шуысал. Озьы ик кылбуран удысын йыгмыт вамышъёс лэсьто ни Лидия Нянькина, Елена Виноградова но мукетъёсыз. - Нош драматургия ласянь кинэ пусйысалды? - Драматургия - со секыт маке. Кырӟаны пуксем сямен гинэ уг луы та удысын. Тодыны кулэ сценалэсь аспӧртэм законъёссэ. Драматургие ӟеч-ӟеч пыриз ни Анатолий Григорьев, ӧрзэ шедьтӥз со. Озьы ик ассэ эскере Вячеслав Сергеев. Но ваньмыз огкадь уг пӧрмы на. Со поэзиын но, прозаын но быгатэ, берыктыны но тырше. Но озьы уг луы дуннеын. Нырысь огзэ атасэз быжтӥз кутоно, солыгес сётскыны кулэ. Озьы ик та удысэ кыстӥське Петр Захаров. Оскем потэ, литератураямы азьланяз выль но выль пушъетъёс ӝужалозы шуыса. - Егор Егорович, кылпум поттылӥм Тӥляд дӥсьтонды сярысь. Нош малэсь та дуннеын кышкаськоды? - Асьмеос трос гинэ вераським ог-огдэ вузан, вожъяськон сярысь. Со бордысь ик потэ кышканэ но. Мон ачим пӧйшурась. Нош одӥг гондырлэсь но, чипейлэсь но, балянлэсь но уг кышкаськы, кышкасько адямилэсь, кык пыдо пӧйшурлэсь, уката ик туала вакытэ. Нош аслад визьмыдъя, сюлэмыдъя кӧбераськод аслад возьытлыкедлэсь, ӟуч сямен вераса, совестедлэсь. - Егор Егорович бадӟым тау верам-мадемды понна. Ӟечкыласьком на Кун премия басьтэменыды. Юн тазалык но вань азинсконъёс тӥледлы. - Тау. Верам кылъёсты инмарлэн пеляз мед кылӥськозы. Озьы мед луысал. Ноябрь толэзьысь сӥё-дано нуналъёс 4, суббота: Инмар Анайлэсь "Казанской" шуыса нимаськись оброссэ (иконазэ) сӥлы карон. Та праздник сӥземын Москваез, Россиез 1612-тӥ арын полякъёслэн урдсконзылэсь утёнлы. Та оброс азьын вӧсяськыса, Инмар Анайлэн юрттэменыз, Москва тушмонлэсь утемын вал. 6, понедельник: Инмар Анайлэсь "Вань куректӥсь-кайгырисьёслэн шумпотонзы (Всех скорбящих Радость)" оброссэ сӥлы карон. 10, пятница: Почаевоысь преподобной Иов игуменэз (1651-тӥ ар) сӥлы карон. 14, вторник: узырлыкез кулэ карисьтэм, паймымон ужъёс лэсьтӥсь Асиысь Космаен (асьме сямен вераса - Кузьма) Дамианэз но соослэсь анайзэс преподобной Феодотиез сӥлы карон. 19, арня нунал: Казаньысь архиепископез, герман югдытӥсез (святителез) сӥлы карон. Та святойлэн тыршеменыз трос бигеръёс, удмуртъёс, поръёс, чувашъёс пылатэмын, черке пыртэмын вал. 21, вторник: Михаил Архистратигез но Инмысь мугортэм кужымъёсты - кылчинъёсты сӥлы карон нунал. Инмысь Инмарлэн престол дораз улӥсь архангелъёсты - Гавриилэз, Рафаилэз, Уриилэз, Селафиилэз, Иегудилэз, Варахиилэз, Иеремиилэз сӥлы карон; соос Михаил Архистратиген ӵош дунне вылэз сьӧд кужымъёслэсь возьмало. Вань пылатэмъёслэн (чукынэмъёслэн) инмарлэн асьмелэсь лулмес утьыны сётэм кылчинэз (ангелэз) вань. Соин ик инмарлы оскисьёс, черке пыртэмъёс та нуналэ черке мыныса, одно ик тыршо исповеде пырыны но причастие басьтыны. 26, арня нунал: Константинопольысь архиепископез, Иоанн Златоуст югдытӥсез (святителез) сӥлы карон. Христиан калык пӧлын Иоанн Златоустэз тодӥсьтэмез ӧвӧл. Туж трос книгаос гожтӥз; кыллы усто луэм понназ сое "зарни ым" (златоуст) шуизы. Солэн гожтэм, кылдытэм литургиезъя православной черкъёсын служба мынэ. Православной осконэз чылкытэн возён понна трос курадӟонъёс чидано луиз. Кышкасьтэм патриарх, визьмо дышетӥсь вал со. 27, понедельник: Филипп апостолэз сӥлы карон. 28, вторник: Иисус Христослэн вордсконэзлы (Рождестволы) сӥзем визьлэн (кӧс утёнлэн) кутсконэз. Таяз визе средае но пятницае сяна, чорыг сиыны яра. Берпум арняе, 7-тӥ январёзь, чорыг сиыны уг ни яра. Сиёнэн сяна, чылкытэн возёно лулэз, мугорез. 29, среда: Евангелие гожтӥсез, Матфей апостолэз сӥлы карон. Таяз толэзе Инмысь дурбасьтӥсьсылэсь нуналзэ сӥлы каро таӵе нимо адямиос: Иоанн, Димитрий, Артемий, Герасим, Иларион, Дионистий, Антоний, Константин, Иаков, Игнатий, Елисей, Афанасий, Феофил, Нестор, Стефан, Арсений, Терентий, Максим, Спридон, Никодим, Косма, Дамиан, Георгий, Симеон, Микандр, Галактион, Павел, Герман, Лонгин, Никон, Фёдор, Валерий, Евгений, Феодот, Лазарь, Зосима, Михаил, Гавриил, Григорий, Гурий, Матфей, Рафаил, Александр, Родион, Виктор, Викентий, Филипп, Анна, Елисавета, Гликерия, Феодотия, Тавифа, Анастасия, Мария, Елена, Иулиания, Александра, Клавдия, Матрона, Ефросиния, Феодора, Манефа. Куректон-кайгу лыктыку, чидасесь луэ Атайлэн, Пилэн, Святой Духлэн нимыз понна! Гажано агай-вынъёс, сузэръёс! Котькудӥзлэн адямилэн кадь ик, быдэс калыклэн но улон-вылоназ луо шумпотон дыръёсыз но, туж секытэсь куректон-кайгуо нуналъёсыз но. Кытӥяз омыр ик уг тырмы ни кадь шокчыны, шундылэн югытэз но уг ни пишты кадь, солэн шунытэз кезьыт кадь потэ. Мылкыд туж секыт луэ, но урод мылкыдлы сётӥськыны уг яра - со сьӧлык. Святой атайёс таяз дуннеын улыкузы шумпотыса, шулдыръяськыса улонэз ӧз адӟе, соос ялан куректон- кайгу, шугадӟонъёс пӧлын улӥзы, но Инмарез данъямысь ӧз дугдэлэ. Соос тодо вал уго: асьмеос дуннеез вормыны ӧм лыктэ, ваньзэ чиданы но котьма понна Инмарлы тау карыны лыктӥм. Таизэ дуннеез ярато узыръёс, шонертэм улонэз яратӥсьёс - кивалтӥсь-а со, огшоры адями-а со - Инмар законэз тодӥсьтэмъёс. Таӵе адямиослэн туж потэ быдэс дуннеез киултэмзы но вань адямиосты, калыкъёсты асьсэлы ляльчи, лакей каремзы. Соослэн та улонын самой бадӟым сюлмаськонзы, тыршонзы - котькыӵе но амалэн байлыкез, властез ас киулазы басьтон. Шудтэм адямиос! Та дуннеын сыӵе вакчи улон дырмы, лулмы потӥз ке, мае сьӧрамы басьтыны быгатомы - узырлыкмес-а, киултэм властьмес-а? Ваньмыз понна инмар азьын кыл кутоно луоз ук! Гольык лыктӥм, гольыкен ик кошкомы но. Гажано агай-вынъёс, сузэръёс! Чидан но яратон артэ луыны кулэ. Библиын тазьы шуэмын: "Яратонды чылкыт сюлмысьтыды потэмын мед луоз. Урод ужез адӟонтэм каре, ӟечез борды лякиське. Агай-вынъёс кадь, гажаса ог-огеныды улэ. Мукетъёссэ асьтэ сярысь умоесьгес шуыса лыдъялэ. Тыршыса, дугдылытэк, духеныды ӝуатскыса, Кузё-Инмарлы ужалэ. Оскиськонды ваньлы шумпотэ. Куректон-кайгу лыктыку, чидасесь луэ. Дугдылытэк вӧсяськыса улэ. Вӧсяськисьёс шуге-леке сюрыку, соослы юрттӥське. Пыдйылчиосты гуртады вайыса сюдэ-вордэ. Тӥледыз уллясьёсты-ултӥясьёсты бакель каре; эн юриське, эн каргаське, бакель (благословить) каре. Шумпотӥсьёсын ӵош шумпотэ, бӧрдӥсьёсын ӵош бӧрдэ. Куспады огкылысь тупаса улэ. Асьтэдыз вылӥе эн пуктэ, востэмъёслэсь- зӥбытъёслэсь адӟем карыса улэ. Асьтэдыз асьтэос визьмоесь-йӧноесь шуыса эн лыдъялэ. Нокинлы но уродлы пумит уродэн пунэмзэ эн берыктэ. Вань адямиослы ӟеч лэсьтон сярысь сюлмаське. Быгатэмдыя, вань адямиосын тупаса улэ. Гажаноосы, тӥледлы урод лэсьтӥсьёслы пунэмзэ эн берыктэ, инмарлэн вожпотонэзлы инты кельтэ. Гожтэмын уго: "Мон - пунэм берыктӥсь, Мон пунэмзэ берыкто", - шуэ Кузё-Инмар. Тӥ лэсьтэ тазьы: "тушмонэд сютэм ке, сюд сое; сюэз куасьме ке, секта сое. Тазьы лэсьтыса, солэн йыр вылаз кисьтыны ӝуась эгыръёс люкалод". Уродлыклы вормыны эн сётӥськы, уродлыкез ӟечлыкен вормы". (Павел апостоллэн Римын улӥсьёслы ыстэм гожтэтэз; 12-тӥ люкет, 9-21 стихъёс). Гажано агай-вынъёс, сузэръёс! Куректон-кайгуос лыктыку, асьмелэн дурбасьтӥсьмы, сюлэм буйгатӥсьмы вань - Инмар Анай! Солэсь Пизэ, Инмармес, Иисус Христосэз Иуда куамын манетэн вузаса, кортӵогаса курадӟытэмзы бере Инмар Анай Мария кӧня куректӥз! Но кайгулы, чигиськыны ӧз сётӥськы, ялан Инмарез данъяса, вӧсяськыса улӥз. Сыӵе секыт куректон пыр потоно луиз бере, Инмар Анаймы, Дун-Чылкыт Мария куректӥсь- кайгырись сюлэмез адӟе-тодэ, соин ик асьмеос секыт учыре сюрыку, ӝож нуналъёс вуыку, ваелэ Инмар Анайлы вазиськыса вӧсяськоме, кӧтӝожмес Солы вераломы но. Со асьмеды кынартэмъёсты, буйгатоз, пеймыт азьысь югытэ поттоз, улыны кужым сётоз. Ваньмызлэсь Дун-Чылкыт Инмар Анаймы Мария, инмарлэн Инмысь престол азяз удмурт калык понна вӧсяськы: Инмар милемлы чидан мед сётысал; сьӧлыкъёс пӧлы ми медам быре вал, ӟеч ужъёс лэсьтыса улыны мед быгатысалмы, нош лулмы потэм бере, Инмарлэн Инмысь Эксэйлыказ пырыны ярамонэсь мед луысалмы. Аминь. Гажано агай-вынъёс, сузэръёс! Православной калык туж сӥлы каре Инмар Анаез, асьмелэсь Дурбасьтӥсьмес, бам вылысьтымы синвуосмес ӵушылӥсез. Сое данъяса туж трос кырӟанъёс кылдытэмын ини. Соос пӧлысь одӥгез тужгес но яратоноез луэ "Царице моя преблагая". Тае удмурт кылэ берыктӥмы но радио пыр но ӵем гинэ кырӟаськомы. Куд- огезлэн кылъёсыз ӧвӧл киязы, соин али та кырӟанэз кык кылын сётӥськомы. Черке ветлӥсьёс, уката ик черкын кырӟась-чирдӥсьёс, славян кылынзэ тодо, табере удмурт кылын но Инмар Анаез данъяны дышетске: Ваньмызлэсь но ӟеч Эксэё Анае Царице моя преблагая, Оскиськонэ мынам Инмар Анае, Надеждо моя Богородице, Огназы кылемъёслэн утиськон интызы, Приятелице Сирых Пыдйылчиослэн палазы пырисьсы, И странных предстательнице, Куректӥсь-кайгырисьёслэн шумпотон сётӥсьсы, Скорбящих радосте, Ӝоже усемъёслэн дурбасьтӥсьсы! Обидимых покровительнице! Учкы мынам ӟудыса улонэ шоры, Зриши мою беду, Учкы мынам куректон-кайгуэ шоры, Зриши мою скорьб, Кужымез быремлы кадь Тон мыным юрттӥськы, Помози ми яко немощну, Пыдйылчи муртэз кадь Тон монэ утялты. Окорми мя яко странна. Кӧтӝожме мынэсьтым тодӥськод, Обиду мою веси, Ӟеч мылкыдыд медло сое буйгатыны: Разреши ту, яко волищи: Тон сяна, ӧвӧл уго мукет юрттӥсе, Яко не имам иныя помощи разве Тебе Ӧвӧл мынам мукет палам пырисе, Ни иныя предстательницы, Сюлэмме буйгатӥсе но мукетыз ӧвӧл, Ни благия утешительницы, Одӥг Тон сяна, Инмар Анае, Токмо Тебе, о Богомати, Дурбасьтыса, жаляса уть монэ Яко сохраниши мя и покрыеши, Пумтэм вапумъёс ӵоже. Аминь. Во веки веков. Аминь. Выль книга Кыӵе умой валаса, аслад вордскем анай кылыныд инмарез данъяны, Солы тау карыса вӧсяськыны! Котькуд кылыз сюлме пыре, нош мур-мур малпаськиськод ке, котькуд кылзэ валаны тыршиськод ке, синвуос ик пото. Синвулэсь кышканы кулэ ӧвӧл, синвуэн воштӥськем сьӧлыкъёсмы но гылтӥсько; вӧсяськыку потэм синву - со инмарлэн дэлетэз. Соин ик, дыр, удмурт вӧсяськисьёс туж шумпотыса лыдӟо Вӧсяськон (Молитвослов) книгаез. Кин та дырозь черке ӧз на ветлы, исповеде ӧз на пыра, Инмар законъёсъя улонзэ ӧз на тупаты, соослы кӧня ке верам потэ, мар со Вӧсяськон (ӟуч сямен вераса Молитвослов) книга. Нырысь ик, кин Инмарлы оске, вуоно улонын Инмарлэн Эксэйлыказ пырон сярысь малпаськыса улэ, сыӵе мурт, со православной ке, одно ик ӵукна но, ӝыт но Черкен тупатэм вӧсяськонъёсты (молитваосты) чирдэ-лыдӟе. Со "правило" шуыса нимаське. Ӵукназэ но, ӝытсэ но правилоез ог ӝыны час куспын лыдӟыса быдэстыны луэ. Нош трос-трос улэпъёс но, кулэм ӵыжы-выжыосмес но бере вайыса вӧсяськиськомы ке, солэсь но тросгес дыр кулэ луэ. Эшшо Ӟеч Иворысь (Евангелиысь) одно ик одӥгзэ ке но люкетсэ лыдӟыны кулэ. Псалтирез но вунэтоно ӧвӧл. Вӧсяськытэк, кӧс утёнтэк (визятэк) утиськон ӧвӧл уго. Соин ик вӧсяськись, Инмарлы оскись муртлэн эркын дырыз ӧвӧл: ужзэ но быдэстоно, Инмарен но кусыпез ыштоно ӧвӧл. Удмурт кылын Вӧсяськон книга нырысьсэ калык доры вуиз 1994-тӥ арын, потӥз со туж бадӟым - 10000 тиражен. Но калык сое син куспын октыса быдтӥз. 1995-тӥ арын пичигес тиражен кык пол кутскыса потӥз - калык ялан куриз, октӥз на. Коньдон сюре ке, бадӟым тиражен но поттыны луэ. 1998-тӥ арын 1000 тиражен потӥз. Книгаосмес асдунызлэсь но дунтэмгес карыса вузаны тыршиськомы. Азьпалан но выль книгаос поттон понна, соосты уксёен вузатэк амалмы ӧвӧл. Библиез но солэсь люкетъёссэ поттыны Финляндиысь ӵыжы- выжыосмы коньдон сёто, нош православной вӧсяськон книгаосты поттыны коньдон утчатэк уг луы. Инмарлы тау, Инмар уг кушты, котькыӵе но ӟеч амалъёс пыр Со книгаос асьмелы кузьма. Инмарлы оскись туала узыръёслы но вазиськытэк уг луы. Юртто. Инмарлы тау. Таяз толэзе потоз "Вӧсяськонъёс. Канонъёс. Кырӟанъёс" нимын книга. Ӵукна, ӝыт, нуназе вӧсяськонъёс сяна, татчы пыртэмын исповеде пырон но причастие басьтон понна лыдӟоно канонъёс. Оскомы, ӝоген толэзь куспын канонъёс калык кие вуозы шуыса. Тросэтӥ удмурт вӧсяськисьёс кемалась куро вал ини кулэм мурт дорын, кисьтон (поминка) ортчытыку вӧсяськонъёсты берыктыны. Та книгае пыртэм куроно вӧсяськонъёсты но, куд-ог кырӟанъёс но. Кинлы та книгаос кулэ, вазиське приходысьтыды священниклы, нош со Епархиысь протодиакон Михаиллы вазиськоз. Ижын улӥсьёс епархие лыктыса но басьтыны быгатозы та книгаез. Нырысь вамыш - медам кыле янгыш Удмурт Республикалэн президентэзлэсь ужзэ быдэсъяны кутскон азьын Александр Волков пумиськылӥз журналистъёсын. - Та дырысен республикаямы властьлэн кужымез будоз, - пусйиз со. - Быдэсъясь властьлэн кивалтӥсез луыса, мон ваньзэ лэсьто Кун Кенеш но Правительство одӥг кылысь мед ужалозы. Удмуртия кужмо луыны кулэ. Ог-огеныд йырйиськонэз дугдытоно. Соин ик мон та интые дэмласько выль адямиез. Со Игорь Николаевич Семёнов, Можга городысь администрацилэн кивалтӥсез. Мынам озьы ик ки улам луоз Кун Кенеш пыр ортчись законъёсты эскерон. Тужгес бадӟым саклык висъяськоз экономикаез азинтонъя программалы, бюджет сярысь законлы. Син азям возё валтӥсь удысъёсты, мар вылын лэсьтӥське бюджет: му вӧй поттонэз, автомобильёс лэсьтонэз. Мон ик чакласа возё цирк лэсьтонэз, улон интыосъя, анаез но нылпиез утёнъя программаослэсь быдэсъяськемзэс. Бырйисьёсын пумиськылыкум, Удмуртиез азинтонъя уно дэмланъёс сётэмын вал. Ваньмыз со компьютере пыртэмын. Умойёсыз куронъёс, ӵектонъёс одно ик лыдэ басьтӥськозы, республикамес азинтон программае воштонъёс пыртыку. Азьпалан но уртче ужаны малпасько пӧртэм общественно-политической организациосын. Берло дыре кужымез лябомиз ке но, бадӟым осконэ "Удмуртия" огазеяськонлы. Александр Волков оскытӥз на, удмурт кылэз дышетоз шуыса. Сотэк ог-огмес валаны шуггес луоз. 14-тӥ-15-тӥ ноябре тодмо луозы ни Кун Кенешлэн но Правительстволэн кивалтӥсьёссылэн нимъёссы. Отӥяз, кык арня куспын, мукет ёзъёс но радъяськозы. Аппаратын бадӟымесь воштӥськонъёс уз луэ, шуиз Александр Александрович. Президентлэн луоз нимаз секретариатэз гинэ, аппаратэз паськытатыны кулэез ӧвӧл. Вуоно президент малпа на нимаз резиденцилы юрт сярысь. Пумитало, пе, дӥськутъя. Келяло... Таиз сярысь вазь ай вераськыны. Янгыше медам кыле. Т.ПЕТРОВА. Басьтӥзы Россилэсь наградаоссэ Бадӟым юбилеймы азьын Россия Федерацилэн Президентэз В. В. Путин вылӥ наградаосын пусъён сярысь поттӥз нимысьтыз Указ. Отчы пыртэмын шаерысьтымы 21 мурт. Таяз учыре кинлы сыӵе дан усиз? Атомной энергетикаез азинтонын кема аръёс ӵоже ужамез понна Почёт орден сётэмын "Чепецкий механический завод" АО-ысь лабораторилэн кивалтӥсезлы Николай Васильевич Кузьменколы. Та заводысь ик куинез устоосыз пӧлысь устоосыз - цехлэн начальникез Александр Михайлович Никитин, старший электрик Вячеслав Николаевич Суднищиков, фрезеровщик Сергей Алексеевич Широков - пусъемын "За заслуги перед Отечеством" орденлэн ИИ степенё медаленыз. Россия Федерацилэн дано конструкторез луиз Сарапулысь радиозаводлэн валтӥсь конструкторез Валерий Максимович Лихарев. Эшъяськон орденэн пусъемын "Металлургической технологияя научно-исследовательской институт" АО-ысь отделэн кивалтӥсез Николай Алексеевич Сидоров. Награда басьтэмъёс пӧлын одӥг гинэ кышномурт - Валентина Федоровна Калягина, Сарапул радиозаводысь штамповщица. Шумпотоно солэн ӟеч ужамезлы, чупрес киосызлы. Азьланяз но ас удыссэ тазьы ик быгатыса мед нуоз. "За спасение погибавших" медаль мӧля вылаз бырттэмын Сергей Владимирович Корепановлы. Та егит воргорон ужа "Чепца" станциын, вагонъёсты эскере-чакла. Соин ӵош быронлэсь уте адямиосты но. Тӥни малы нимыз пыртэмын республикаысьтымы улӥсьёс пӧлысь тужгес но сӥё-даноосыз радэ. Шумпотӥськом но ӟечкыласьком вылӥ награда басьтэменызы художникез Валерий Борисович Кононовез, Ижевскысь П. И. Чайковский нимо муниципальной камерной хорлэсь кивалтӥсьсэ Владимир Николаевич Михайловез но мукетъёссэ. Наградаосты сётъяз Удмурт Республикаысь Кун Кенешлэн Тӧроез А. А. Волков. Правительстволэн нимыныз ӟечкылаз Ю. С. Питкевич. Л. Медведева. Туспуктэмез В. Беломорскихлэн. В. Ф. Калягина. Валэктэ юрист Нылпиосме будэтӥ огнам Огнам ньыль нылпи будэтӥ. Покчиезлы куинь толэзь дыръя картэ висьыса кулӥз. Кыкетӥзэ бызи дас куинь ар ортчыса гинэ. Быгатӥсько-а мон нылпиосме огнам будэтэме понна 50 арескын пенсие потыны? А. Перевозчикова. - Жаляса верано луиськом, РФ-лэн Законысьтыз "Государственной пенсиос сярысь" статья сыӵе луонлык уг чакла. 50 арескын пенсие потыны быгато вить яке солэсь трос нылпи ваем но соосты тямыс аресозь ке но будэтэм, яке ӧлексы нылпиослэн анайёссы, огъя ужам стажзы 15 ар люкаське ке. Ужаме кылиз дунъятэк 1960-тӥ-1965-тӥ аръёсы мон ужай МСО-ын (али ПМК нимаське). 1963-тӥ арын Шаркан ёросэз Воткинске пыртӥзы, нош 1965-тӥын выльысь люкизы. Тӥни со вакытэ ужам стаже трудовой книжкаям кылемын, нош уждунме тодыны уг быгатӥськы (уждун лыдъям книгазы ышемын). Сое одӥгысьтыз но архивысь уг шедьто. Райсобесын со вакытэ ужамме зэматыны ветлӥзы азьвыл ӵош ужам эшъёсы, но отын уждунэлэн быдӟалаез сярысь справка куро. Иванова. Шаркан ёрос. - Райсобесын ужасьёс тӥлесьтыд справка шонер куро, малы ке шуоно, кыӵе ке вакытысь уждунлэн быдӟалаез сярысь адӟисьёслэн верамзы законын чакламын ӧвӧл. Адӟисьёс зэматыны быгато ужан аръёсты гинэ, соин ик та учыре номыре воштыны уг луы. Коркась улляло ке... 1992-тӥ арын бызи, 1995-тӥ арын аймуртылэн музъемез вылын корка пуктыны кутским (али со быдэстымтэ ай). Кылем арын картэ ассэ быдтӥз, ми нылыным солэн анай-атаезлэн коркаяз ик улыны кылим (пропискамы вань). Но юртъер аймурты вылын лыдъяське. Туэ гужем Дагестанысь семьяеныз ӵош бертэ картэлэн сузэрез. Табере со атай юртлэсь пайзэ куре. Куспазы вераськиллям, али улоно коркамес но, пуктӥськисьсэ но вузаса, КамАЗ басьтыны. Милемлы нош тулыс, пе, корка утчалом. Туж ӝож, со отчы одӥг копейказэ но ӧз поны, нош милесьтым ужам ужмес вузаны дасяське. Выльзэ коркаез пуктыны юрттӥзы вал мынам анай-атае но. Мар кароно? Г. Трапезникова. Кез. Нырысь ик, пропискады ке вань, нокин но тӥледды али улон коркасьтыды улляны уз быгаты. Сое тӥлесьтыд мылкыддэс юатэк вузаны но, отын улондылы люкетыны но нокин уг быгаты - тӥляд праводы вань со коркан кулытозяды улыны. Нош юртъерез ас вылады карыны тӥ али уд бугатэ ни, малы ке шуоно, корка пуктыны инты висъям аймуртты, солы юрттӥськем лыдэ уг басьтӥськы. Юртэз огъя ваньбур карон понна кулэ вал азьвыл ик огкыл гожтыны. Дыртэлэ ярмаркае! Удмурт кунлыклы 80 ар тырмонлы сӥзьыса, 4-тӥ ноябре Ижысь Шор площадьын луоз вузкарон ярмарка. Сое радъяло Вузкаронъя но калыклы юрттэт сётонъя министерство, Гурт удысъя но сиён-юонъя министерство, Удмуртпотребсоюз. Гуртоос, сиён- юонэнызы сяна, шумпоттозы эктыны, кырӟаны-вераны яратӥсь коллективъёсынызы. Удмурт Республикаысь Правительстволэн пресс-службаез. Гажано удмурт калык! Тямыстон ар талэсь азьло дунне вылын нырысьсэ кылдӥз удмурт калыклэн кунэз. Дано пиосмылэн Трофим Борисовлэн, Иосиф Наговицынлэн, Куӟебай Гердлэн, Максим Прокопьевлэн но мукетъёсызлэн сюлмаськеменызы, Кам но Ватка шуръёс вискын вордскиз элькунмы. 1920-тӥ арысен удмуртъёс но мукет калыкъёсын ӵош оградэ султыны быгатӥзы. Озьы ке но, удмурт калыклэн сюрес вылаз трос гинэ шуг-секытъёс пумиськылӥзы. Ужез гажась, зӥбыт, тэргаськисьтэм, эрико улонэз яратӥсь сямъёсыз юрттӥзы солы туала историын зэмос интызэ шедьтыны. 90-тӥ аръёслэн кутсконазы Удмурт Элькунмы трослы юнманы быгатӥз калыкмылэсь кунлыксэ: выльдэмын Удмурт Конституция, кутэмын данъяськымон куншет (флаг), кунгур (гимн), кунпус (герб). Асьме элькунмес, солэсь дано пиоссэ, нылъёссэ ӟеч тодо Россиын но, кунгож сьӧрын но. Таӵе узыр калык, ӧжыт лыдъем ке но, котькинлы возьматэ ЪЪИ дауре со йыгмыт вамышъёсын выже. Туннэ но удмурт калык азьын лэчыт ужпумъёс сыло. Ӟеч валамы ни: Удмурт Элькунамы улӥсь мукет калыкъёсын ӵош кариськыса гинэ асьмеос шаермес кужмогес, чебергес но синмаськымонгес карыны быгатомы. Гажано удмурт калык! Кунмы кылдэм дырысен 80 ар тырмемен валче, котькуддылы сӥзиськом шуд но тазалык, котькуд семьяе ӵемгес мед пыралозы серекъян но шумпотон. Шуг-секытъёслы эн сётӥське, эн чигиське, соос тӥледыз палэнэтӥ мед ортчозы. Данъяське, тӥ дунне вылысь удмурт калыклэн элькуназ улӥськоды шуыса. Ӟечкыласьком! Вань удмуртъёслэн "Удмурт кенеш" огазеяськонзы. Гажано эшъёс! Сюлмысьтым ӟечкыласько тӥледыз Удмуртилэн кунлыкезлы 80 ар тырмонэн. Туннэ асьмеос адӟиськом кунлыкмес юнматонын бадӟым азинсконъёсты. Со ӟеч шӧдӥське экономикаын но, калыклэн нуналмысь улон-вылоназ но. Кун властьлэн ёзъёсаз котькуд ужась кыл кутэ Россиын вань улӥсьёс понна. Федерациысь, улосъёсысь но интыосысь узырлыкъёсты огазеяса быгатом вордскем шаермес эшшо но узыргес, шулдыргес карыны. Сӥзисько тӥледлы юн тазалык, шудбур но ог-огдэ валаса улон. С.В.Чикуров, Россия Федерацилэн Президентэзлэн Приволжск округын Удмурт Республикая валтӥсь федеральной инспекторез. УДМУРТ КУНЛЫ - 80 АР Быдэс даур ӵоже сюлэм бӧрдонъёс Ортчем сюресмес эскерись тодосчи Н.П.Павлов выль книга поттӥз. Ӟуч сямен со тазьы нимаське: "Самоопределение, автономия: идеи, реалии". Со возьматэ удмуртъёслэн национальной движенизылэсь кутсконзэ. Российской империын 1897-тӥ арын лэсьтэм переписья асьме шаерын 10 сюрс мурт пӧлын дышетскемын вылэм 76 ӟуч но одӥг гинэ удмурт. Озьы эксэй Россиын ӟуч луисьтэм калыкъёс зол ултӥямын вал. Удмуртъёсты зӥбет улысь мозмытон вылысь нюръяськись лушкем кружок нырысьсэ кылдэмын вылэм 1901-тӥ арын Пермь губерниысь Сосновка уездысь Бадӟым Гондыр удмурт гуртын. Отчы пыриллям егитэсь, етӥзэсь удмурт дышетӥсьёс И.И.Шкляев, И.В.Яковлев, Ф.И.Волков но С.Калимуллин. Соос нюръясько вылэм удмуртъёслэн данлыксы, инородецъёсты асьсэлэн вордскем кылынызы дышетон понна. Соку ик ини удмурт дышетӥсьёс пӧлын ветло вылэм Удмурт яке Прикамской губерния кылдытон сярысь малпанъёс. Национальной ужпумъёсъя кенешонъёс паськыт вӧлмиллям Февраль революция бере. Поволжьеысь пичи калыкъёслэн обществозы кылдэм. Отын вылэм удмурт ёзэз но, соин кивалтэм удмурт дышетӥсь И.В.Васильев. 1917-тӥ арын 15-тӥ-22-тӥ мае общество ортчытэ Поволжьеысь калыкъёслэсь И съездзэс. Со уже пыриськизы бигер, башкир, чуваш, мордва, мари но умдурт калыкъёслэн ыстэмъёссы. Удмурт делегациын вал И.С.Михеев, И.В.Яковлев, Т.К.Борисов, В.Д.Крылов, М.П.Прокопьев, К.С.Яковлев, В.И.Широбоков, И.Я.Поздеев, В.Фокин, В.Михайлов, Глазов но Елабуга уездъёсысь крестьянъёс. Н.П.Павлов съездлэн но удмурт секцилэн ужамзы сярысь пыр-поч маде. "Со вал Поволжьеын национальной движениез огазеян вылысь кужымъёсты нырысьсэ эскерон". Собере книгаын вераськон мынэ Глазкарысь культурая югдытӥсь обществолэн ужамез сярысь. Сое кылдытӥллям уездысь удмурт интеллигентъёс 1917-тӥ арын инвожо толэзе. Отчы пыриллям устоосыз, визьмоосыз дышетскем муртъёс. Огазеяськон ас азяз ужпум пуктэм школаын дышетонэз вордскем кылын радъян. Поволжьеысь калыкъёсын огазе ужан но Совето властьлы дурбасьтон но юрттон сярысь. Озьы ке но, вылӥ властьёс обществолэсь ужамзэ туж пӧртэм валало вылэм. ӟуч луисьтэм калыкъёс Россилэсь люкиськыны туртто шуыса янгыше уськыто вылэм. Выль книгаын пыр-поч вераськон мынэ удмурт кылын нырысьсэ потыны кутскем газетъёс но журналъёс, удмурт печатьлэн кылдэмез сярысь. Асьмеос, лыдӟисьёс, кемалась тодӥськом но данъяськиськом, туала "Удмурт дунне" газетлы "Гудыри" кутскон сётӥз шуыса. Туэ 31-тӥ октябре пусйиськом ини газетлэсь 82 арессэ. Нош тодмо вылӥллям мукет изданиос но, историе пытьы кельтӥзы "Войнаысь ивор", "Удморт", "Виль синь" газетъёс но. Озьы ик потылӥзы "Удмурт калыклы кулэ кенешъёс" но "Муш" журналъёс. Таосыз сярысь туж ӧжыт тодылӥмы яке чик ӧм тодылэ. Октябрь революцилэсь куд-ог вормонъёссэ туннэ асьмеос, оло, пыраклы ыштӥмы. Куд- огез соосты юри вунэтыны турттэ. "Удмуртия за 40 лет Советской власти" книгаын нырысетӥ удмурт газетъёсты но журналъёсты юн курласа гожъямын. 1918-тӥ арын нянь понна нюръяськон вакытэ соос, пе, гуртысь кулакъёслы юрттылӥзы. Советской властьлы пумит нюръяськонэн кивалтӥзы эсеръёс но буржуазной националистъёс. Тужгес но ултӥяса гожъязы "Выль синь" удмурт газет сярысь, удмурт калыкез, пе, со ӧтьылӥз Советской властьлы пумит нюръяськыны, куанеръёс но кулакъёс куспын тупаса улыны, Советской правительстволэн ужрадъёсызлы пумит луыны. Озьы-а бен вылэм со? Н.П.Павлов книгаяз "Удморт" но "Виль синь" газетъёслэсь пуштроссэс возьматэ. "Удморт" газетлэн нырысетӥ номерез (со потӥз 1917-тӥ арын 15- тӥ гудырикошконэ) редакция вазиське удмурт интеллигенцилы, ӧте кужымзэс удмурт калыкез ӝутонлы сётыны. Статьяын верамын, удмуртъёс пӧлын дышетскем муртъёс ӟучомыны кутско шуыса. Собере та номерын ик печатламын вань удмуртъёслы вазиськон, Поволжьеысь калыкъёслэн И съездзылэсь решениоссэ чакласа. "Удморт" газет пролетар газет луыны уг быгаты вал, малы ке шуоно, удмурт калыклэн пролетариатэз ӧй вал на, шуыны луоз. Газетын печатласькизы вань сословиос. Кылсярысь, священникъёс но. "Удморт" газет ялан гожъяз калыкез дышетон сярысь. Со пусйылӥз: удмуртъёсты ӟуч кылын гинэ дышетылӥзы, соин ик тросэз нылпиос школазэс куштылӥзы. Соин ик удмуртъёс пӧлын дышетскемъёс туж ӧжыт. Нылпиосты асьсэ кылын визьноданы дышетӥсьёс уг тырмо. Со вакытэ ини анай кылын дышетон сярысь трос вераськон мынӥз. Кудӥз юало вал: удмурт кылын дышетон ӟуч кылэз ляб тодонэ уз вутты- а? Валэктылӥзы, солэсь кышканы кулэ ӧвӧл шуыса. Ӟуч кылын гинэ дышетскем нылпиос удмуртъёс пӧлысь палэнскизы. Ӟучъёс пӧлы но ӧз пыре. Удмурт кылын дышетон радъямын луиз ке, ӟуч кылэз но дышетыны сокем шуг уз луы, каньылля дышетозы. Анай кылыныз дышетскись школаез уз кушты: ("Удморт", 1918-тӥ ар, 3-тӥ февраль). "Виль синь" газет потэ вал Елабугаын 1918-тӥ арысен январь толэзьысен, лымшор палась удмуртъёслэн национальной движенизылэн шоркараз. Сое поттӥз уездысь земство, редакторез К.С.Яковлев дышетӥсь вал, соку ужаз на уездысь калык хозяйствоя комиссариатын. Сыӵе адями тушмон луоз шат? Вералом Г.П.Прокопьевлэн, удмурт нылпиосты 26 ар дышетэм муртлэн, газетэ поттэм "Удмуртъёслы гожтэт" статьяез сярысь. Со тазьы гожтэ: "Азьло удмуртъёсты ултӥяло вал ӟучъёс но, бигеръёс но. Нош калык ӧз сётскы, ӧз куасалскы. Туртто вал удмуртъёсты ӟучлы яке бигерлы пӧрмытыны, удмурт нимез выжыеныз порыны. Тонэ инмар утиз, сылӥськод тыпы кадь юн. Дорад эрик вуиз. Пеймыт, жоб нуналъёс ортчизы. Вадьсад яркыт шунды ӝужаз". Вазиськонлэн авторез ӧте удмуртъёсты газет, книга лыдӟыны, школаын сюлмо дышетскыны, мӧйыосты гажаны. Со дырысен тямыстонлэсь трос ар ортчиз, нош сыӵе малпанъёс ӧз вужме. Туала обществоын но вань на сыӵеос, удмурт интеллигенциез националистъёс шуыса пыкылӥсьёс. Соос удмуртъёслэсь ӟучомемзэс возьмало, вылды. Нырысетӥ удмурт газетъёс удмуртъёсты огазеяськыны ӧтьылӥзы, национальной кулэяськонъёсты утён вылысь, удмуртъёслэн нырысетӥ югдытӥсьёссы, соос пӧлын И.В.Яковлев, К.С.Яковлев, Т.К.Борисов, К.П.Чайников но трос мукетъёсыз, валамон ини, националистъёс луо шуыса, янгыш ӧй вал. Калыклэн тушмонъёсыз луо шуыса но юнме янгыше уськытӥзы. Табере тодӥськом, вань ужрадъёс соку ӧръяськизы удмурт калыклэн самоопределениез, кунлыкез понна нюръяськон сюрес вылтӥ. Н.П.Павлов книгаяз со сярысь, Удмурт Республикалэн кылдэмез сярысь, оскымон но валамон кылын гожъя. Со туж умой. Но, мон сямен, азьло, политикаысь, дышетон но культура удысысь удмурт азьветлӥсьёс сярысь асьмеос туж ӧжыт тодылӥм, "Советской Удмуртия" - "Удмурт дунне" газет соос сярысь гожъялляз ке но, тужгес но юбилейёс азьын. Со тодон-валанъёс туала егитъёс доры туж ляб вуо. Трос-а бен удмуртъёслэн национальной асваланзы понна нюръяськонзэс возьматӥсь книгаосмы? Малпасько, вань соос, но ӧжыт на. Юан кылдэ: туала гурт калык трос-а меда лыдӟе Ф.К.Ермаковлэсь, Н.С.Кузнецовлэсь, А.Н.Уваровлэсь, К.И.Куликовлэсь но мукет тодосчиослэсь но писательёслэсь книгаоссэс? Собере Н.П.Павлов историклэн "Самоопределение, автономия: идеи, реалии" книгаез но Удмурт Кунлэн юбилеез азьын пичи тиражен потӥз - одӥг сюрс гинэ. Шедьтозы-а сое краеведениея дышетӥсьёс, мукет шаерчиос? Зэм, Н.П.Павловлэн вань на та радысь мукет книгаосыз но: "Удмуртская республика - детище Октября" книгаез, 1980-тӥ арын потэмын, "Трофим Борисовез" - 1994-тӥ арын. Калыкмылэн визьмо нылпиосызлэн вордэм бадӟымесь но чебересь малпанъёссы туннэ но тросэз пумозяз быдэстэмын ӧвӧл на, соосты азинтон сюрес вылын ӧжыт ӧвӧл могӟетъёс, шуг-секытъёс но. Та пумысен удмуртъёслэн трос на юанъёссы, веранъёссы. Леонид ФЁДОРОВ, УР-ысь дано журналист. Туннэ, 3-тӥ ноябре... Удмурт Республика пусъе автономия басьтэмез дырысен 80 ар тырмон юбилейзэ, та нуналысен выже Президент кивалтэм улсын улонэ но ужанэ. Кыӵе ужрадъёс чакламын туннэлы? 8 час 30 минутэ Кун Кенешлэн юртаз пусъёзы шаермылэсь дано адямиоссэ. 11 часын Операя но балетъя театрын усьтӥськоз Кун Кенешлэн сессиез. Татын юнматэмын луоз Удмурт Республикалэн нырысетӥ Президентэзлэн ужаны кутсконэз. Люкаськемъёс азьын А. А. Волков клятва сётоз. 14 час 30 минутэ Йӧ дворецын кутскоз бадӟым концерт. Со йылпумъяськоз 17 часын. 18 часысен Ижевсклэн шор площадяз кутскозы шулдыртӥсь ужрадъёс. 20 часын город вадьсын ӝуатскозы фейерверк тылъёс. Ӵуказе, 4-тӥ ноябре, Удмурт Республикалэн нуналэзлы сӥзем ӝытъёс ортчозы ваньмаз городъёсын но районъёсын. Тупаса но огкылысь улон праздникен! Шаерысьтымы улӥсьёсты Россилэн кун праздникеныз - Тупаса но огкылысь улон нуналэн - ӟечкыла Кун Кенешлэн Тӧроез, Удмурт Республикалы президентэ быръем мурт Александр Волков. Со шуэ: "Мӧйыослэн тодэ ваёнъёсазы 7-тӥ ноябрь кылиз, странаын быдӟым воштӥськонъёслэн но кужмо кун кылдытонлэн вакытсы луыса. Октябрьлэн вормонъёсыз басьтэмын калыкмылэн ассэ жалятэк тыршеменыз. Со вакытэз пӧртэм сямен дунъяны луэ, но со пачыламын азьланезлы осконэн, быдӟым кунысь пӧртэм калыкъёслэн тупаса, ог-огзэс валаса улон мылкыдын. Удмурт Республикалэн президентэз луыса мон тыршо политикая вань партиосты но пӧртэм кужымъёсты огазеяны, шаермес азинтон но калыклэсь улон-вылонзэ умоятон понна. Та нуналэ тӥледлы сӥзисько шуд, тупаса улон, ужады азинсконъёс". Корка пыронэн, покчиос! Удмурт Республикамылэн юбилеез азьын Кизнер ёросысь Короленко черкогуртын улӥсьёслы лэсьтӥськисьёс шумпотон кузьмазы. Татын йылаз-пумаз вуттэмын но комиссиен кутэмын нылпи садлы выль юрт. Егит анай-атайёслы зэмзэ но ӟеч кузьым луиз со. Берло аръёссэ ёросын лэсьтӥськон тыро-пыдо ӧз ик мыны, шуыны луоз. Ретранслятор но нылпи сад сяна, номыр ик вылез ӧз ӝутскы. Короленкоысь нылпи садэз "Мултан ужлы" 100 ар тырмонэз пусъёнлы ик пуктыны чакламын вал ни. Нош коньдон тырмымтэен, озьы ик берлолы кылиз. 1995-тӥ арын лэсьтӥськон кутскиз ик, ёрос бюджет чотын. Но со али но ӧй йылпумъяськысал на, дыр, со борды кык ар талэсь азьло Удмурт Республикаысь Правительстволэн лэсьтӥськонъя управлениез ӧй басьтӥськысал ке. Выль нылпи сад бадӟым ик ӧвӧл, 25 интылы чакламын. Нош сое уже сётон - гуртоос но, лэсьтӥськисьёс понна но - бадӟым шумпотон. О. Марков. Шӧкыч Лия Малых Кузё Мӧйыослы выжыкыл Курег азбарын огыр-бугыр. Тютюпи мамыксэ али гинэ воштэмез но, бурдъяськемез но, пересез но кут-кутак гоно дӥськутсэ кукчо ныр йылыныз сынам, маяллям каре. Со гинэ мар. Кудӥз-огез музын кыллись из борды пыдчиньы гижызэс сузяло. Мукетъёсыз, гадьзэс урдыны турттыса, солдатъёс сямен солань-талань лёгасько. Нош куинетӥосыз ымазы ву ӟузиллям но, гульымзэс гылатэмъясько, коткетэммы, пе, вольыт но чебер мед чузъяськоз. Пересь курегъёслэн гинэ но синъёссы чиляк-чиляк ӝуалтӥськизы, секыт берпалъёссы выллань сётӥськизы, ява, нош мар веранэз юмалъёсыз но юнмамъёсыз сярысь. Атас Атасович, коткасьёсызлэсь такем-такем дарманьтэмзэс адӟыса, кылтэм-ымтэм луиз кадь. Быжыз лэзиськиз, бурдъёсыз луть-луть ошиськизы пила кадь ӟускиез кисмыльскиз. Нуназезэ сиськыны ӧтьыса, Атасовичлэн кынарыз ӧз тырмы ни кенерысь ӝужыт майыг вылэ лопырскыны но кӧня ке иськеме чузъяськись куараеныз кырӟан гурзэ золтыны. Ма, бен азбар шорысен дармантӥз ик вал чоръялтыны. - Ку-ка... - озьы гинэ шуыса вуттӥз, шӧдтэк шорысь мышласянь кин ке но шачак донгыны шедьтӥз. Мискинь, усьтэм ымыныз ӧжыт гинэ тысен тыр тусе ӧз мертчиськы. Нокин жалясь но, адӟись но ӧз луы. Озьы ик ке ваньмыз котыраз кӧй-вӧй бергазы: - Ӟускидэ маялтом-а? Оло, быждэ сыналтоно? Атас Атасович, зумыто, нумырез оскалтэмед уг поты-а? - Тьфу, макня йыръёс ик вань та курегъёс! Атасович ӵемонэз лыч сузьымон сялскиз но лапас улэ гызмыльтӥз. Нош со куспын, йӧн-йӧн вамышъёсын лёгаськыса, азбаре пыриз выль кузё. Бабыля ӟускиё быг-быг макесо, гадьыз мычиськемын, быжыз тур-тур пуштырскемын, гонэз- турез нош ӵужалэс-тӧдьы. Азбар шуак гужетэмысь дугдӥз, вань бурдоослэн йыръёссы пырон ӧс пала берытскизы. Ох-ко-ко-ко-ко! - азбарчиос пӧлысь кудӥз ке но мылкыдзэ пушказ возьыны ӧз вормы. - Хеллоу, май френд! - бур пал бурдзэ выллань урдыса ӟечъяськиз зарезь сьӧрысь вуэм йӧно-башо кузё. - Осто, покач, мар ке ӧз ораськы-а со? - вӧзаз сылӥсь быжтэм эшсэ мырӟытыса, лушкемак сипыртӥз сонгро курег. - Мар ке вераз кадь но, ӧй вала, - вазиз соиз пумитаз. Тае кылыса сямен, сьӧрлось вуэм атас азбарчиослы валамон кылэ выжиз: - Пардон, вождэс эн вае, мусокаосы. Шуак йырысьтым потӥз, кытчы вуэме. Ойдолэ тодматском: мон Питер Петкович, тӥляд выль кузёды но яратоно муртты. Шораз синзэс вошъятэк учкись чипы-курегъёслэн шоканзы усьтӥськиз кадь. Бурдъёсынызы чабо, ура! кесясько. Тае адӟыса, Питэр Петковичлэн чыртыез эшшо но кузь-кузь золтӥськиз. Азбарчиос пӧлы вамыштыса, я йырзэс маялтэ, я берпалазы чабем каре, пиналъёссэгес тып-тып веша. Курегъёс копак кисмылязы, кузёзылэн ымаз гинэ учко на. Ог-огзы азьын ушъясько, бордазы йӧтылэмысьтыз шумпотэменызы кот-кот серекъяло. Но бурдоослэн тазьы лӧпшамзы кема ӧз кыстӥськы. Зарезь сьӧрысь кузё котыраз люказ мынчыръяськись но чибори курегъёсты, кыланы-вераны но кырӟаны-эктыны яратӥсьёссэ. Пиналъёссэ аналтӥз, воля лэзиз. Кӧттыро улэмды потэ ке, дышетске, пе, пичи дырысен кӧттыр шедьтыны. Нош мӧйыосыз шоры ӧз но учкылы, даурзы ортчемъёс гинэ шуылӥз, Нимысьтыз радлык тупатӥз сиськонъя. Нырысь ик ачиз кӧт- тырымоназ сие-юэ, собере лулгажанъёссэ тусь котыре люка. Кылем-мылемзэ сиё ини пиналъёсыз но мӧйыосыз коткасьёс. Питер Петкович ачиз дырез ивортыса яке сиськыны ӧтьыса, гульымзэ чоръянэн ӧз кеся, куараез пуксемлэсь кышказ, лэся. Атас Атасовичез дораз ӧтиз но шуиз: - Сиемед потэ ке, котькуд нунал майыг вылэ лопыръяськы - час интыын луод. Кытчы пырод, аслад азбарад мурт луид ке, кӧтыд понна ляльчие но потод. - Ярам, - шуиз Атас Атасович, йырзэ ошыса, мукет номыр куаретыны ӧз дӥсьты ни. Одӥг курег но дур ӧз басьты солы, азьло улонзэс ӵемысь тодазы вайылӥзы ке но. Кышказы Питэр Петковичлэн син азьысьтыз усемлэсь. Со понна заборчиос пӧлын сямлы пӧрмиз ог-огдэ кокчалтон, вожъяськон, урттылӥськон. Бурдоос йӧназ пузамысь ик дугдӥзы, ма веранэз ини чипы поттон сярысь. Сонгро курег быжтэм эшезлы одӥг пол вазиськиз: - Ма, азьланяз но тазьы луиз ке, азбармы чипы-курегтэм кылёз. - Эн но вера. Пи потты вылэм та виысь, но шоре учкись ӧвӧл. Озьы ик курег дауре ортчоз ни, кудыын пукытэк. Ма, собере, ӟеч сиён шедьтытэк, таза чипы вордод шат? Та вераськонэз Чечег курег кылӥз но, ӝогак гинэ вуттӥз Питэр Петковичлэн пеляз. Малпаськонэ усиз кузё. Ма, кызьы уд куректы, возьыт ук. Кызьы учкозы табере со шоры мукет азбаръёсын улӥсьёс. Лулгажанъёссэ котыраз люказ но котькудзылы куды возьматӥз. Таосыз пумитъясько. Ми, пе, пиналэсь ай, шулдыръяськон дырмы ӧз ортчы на. Соку Питэр Петкович ӧтиз кылемъёссэ курегъёсты но, луткам лулъёссы шоры учкыса, куды шоры возьматыны ик ӧз дӥсьты ни. Со вие азбар вадьсын поръясь душес адӟиськиз. Чыры-пыры пиналъёс кин кытчы ватӥськизы, нош одӥгезлэн ӟигарыз ӧз тырмы ни пегӟыны, азбар шорын гуньдэм кадь сылэ. Питэр Петкович тае адӟымтэ улэ кариськиз, душесэн йырин ӧвӧл ай, пе, та вие. Ӧйтӧд, мар луысал, вылды, сьӧдун чипыен, Атас Атасович душес шоры ӧй омырскысал ке. Шумпотэменызы курегъёс ну ӟыгыръяло, ну чупало ук лул утисез, Питэр Петкович тодазы ик ӧвӧл ни кадь. Атас Атасович пушказ тымиськем кӧтӝожзэ, вожпотонзэ ӧз вормы ни, кунгож сьӧрысь вуэм петак вылэ вань кужмыныз омырскиз. Азбар вадьсын гонтур гинэ пурӟе на. Кин кинэ вормоз? Ӧз чида Питэр Петкович, мултэс сиськемысьтыз, лэся, шокась луиз. Берзэ-азьзэ учкытэк, азбарысь ну лобатӥз, ну лобатӥз. Атас Атасович майыг вылэ лопырскиз но жингыр-жингыр чоръялтӥз: - Ку-ка-ре-ку! Кунгож сьӧрад ик ойдо кузёяськы. Серем пыр Кутэ монэ партие Выль кылдэм партилэн штабаз КПСС-лэн членэз лыктэ но юа: - Луоз-а тӥляд партияды выжеме? - Луоз, шуо солы, но потоно КПСС-ысь, курлано сое котыр ласянь. - Ярам, - соглаш луиз таид. - Со сяна, вераськыны кулэ митингын, Ленинэз террористэн ялоно. - Мон пумит ӧвӧл. - Берпуметӥез, одно ик куштӥськоно вань наградаослэсь, званиослэсь, степеньёслэсь, привилегиослэсь, кудъёссэ басьтӥды сояз партиын. - Возьыттэмъёс! - кеськиз КПСС-лэн членэз. - Эн ожалтӥське святоез вылэ. Ӵош, пе, кӧлӥм Министр доры кышномурт лыктэ но квартира куре: - Мон тӥледын ӵош кӧлӥ, министр эш. - Ку, кытын? - Одӥгаз конференциын, куинетӥ рядын. Архивысь документъёсъя Удмуртия ЪЪ дауре 1953-тӥ ар 1953-тӥ арын 5-тӥ мартэ кулӥз И. В. Сталин. Быдэс странаямы соку ик бадӟымесь воштӥськонъёс кутскизы. Улон-вылонэз выльдон борды басьтӥськиз Н. С. Хрущев. Со, кивалтонэз ас кияз басьтонэн валче, Сталинлэсь трос шекъёссэ шараяз, солэсь дышетэмъёссэ умойтэмен лыдъяз. 28-тӥ мартэ пытсэт сьӧры 5 арозь пуктэмъёслы амнистия ялӥз, вань висисьёсты но мӧйыосты мозмытӥз. Адямиосты репрессиос улэ кыскемысь дугдӥзы, нош азьлооссэ юнме ягыше уськытэм адямиосты шонере поттылӥзы. Зӥбем но шып улӥсь коммунистъёс но, партие пырымтэос но асьсэлэсь мылкыддэс вераны дӥсьтӥзы ни. Но арлэн кыкетӥ кварталаз странаын туж уно йыружъёс лэсьтэмын вал, угось амнистиен валче Л. П. Берия мозмытэм тупатсконтэм йырвандӥсьёсты но. Пытсэтысь мозмытэмъёс пӧлысь 1,5 сюрсэз уже интыяськиллямтэ. Гужем Берия ачиз кырмемын вал. Кивалтон ласянь ялэмын дэмен ужан сярысь. Та ласянь Удмуртиын но кенешъёс ортчылӥзы. Калык отын вожпотэмзэ вераз Бериялы но солэн гыж-калъёсызлы. Гурт удыс туж лябӟиз. 1952-тӥ арын нянь но ӧз удалты. Соин апрель толэзе ик ини СССР-ысь Министръёслэн Кенешсы Удмуртиысь колхозъёслы кӧня ке сюрс тонна ӟег висъяз. Гурт калыклы ож аръёс бере туж секыт вал. Ӝыныезлэсь тросэзлэн колхозникъёслэн скалзы ӧй вал. Кызьы улыны ёрмыса, адямиос колхозъёсысь пегӟыны тыршылӥзы. Озьы гуртын ужазинлык туж улӥе усиз. Сентябре КПСС-лэн ЦК-ез пленум ортчытӥз. Отын эскеремын вал гурт удыслы юрттон ужпум. Нырысь ик, вузам гурт продукциослы дунъёс будӥзы. Кохозникъёслы азьло араз огпол гинэ уждун тыро вал ке, табере аванс сётъяны ӧдъязы. Гуртэз азинтыны государство чотын коньдон висъяллязы ни. Нош колхозникъёслэсь кун азьын тыронзэс куштӥзы. Городъёсысь 2000 специалистъёстэз ыстӥзы колхозъёслы председателе. Комсомолецъёс но егитъёс мынӥзы ужаны МТС-ёсы но пудо вордон фермаосы, ӵемысь нимысьтыз бригадаос кылдытъяса. Озьы таяз арын калыклэн улонэз кӧнялы ке капчияз. Тани Завьял ёросысь "Красный труд" колхозын 70 семьялэн скалэз ӧй вал, 37-ез басьтӥзы. Озьы республикаын 1-тӥ октябрьлы 18 сюрс скал уськытэмын ни вал, ыж 2 поллы тросгес, парсь - 8 поллы. Улон чидамон луэмъя, кошкемъёс гуртъёсы берлань берытскизы. Городын улӥсьёслэн нырысьсэ кӧттыр картофка басьтэмзы луиз ни. Колхозникъёслэн коньдонзы йылӥз 15,5 миллион манетлы. Трудоденьлы быдэ нянь сётон шорлыдын ӝыны килолы йылӥз но 1370 граммозь вуиз. Нош городын улӥсьёс со уксёзылы ик кык поллы уногес нянь, сакыр, сӥль, скал вӧй, картофка но емышъёс басьтыны быгато ни вал, 1950-тӥ арен ӵошатоно ке. Сберкассае коньдон тырисьёслэн лыдзы вуиз 28882-озь, отчы 43 миллион манет коньдон понэмын вал. Но туж секыт вал на калыклы нуналмысь куэ луись вузъёс ласянь. Ӧз тырмылы дӥськут но пыдкутчан. Школаос куинь сменаен ужаллязы, соин вань нылпиосты одно 7 классозь дышетон шуген сётӥськиз. Ӧз тырмылы улон инты, городысь адямиос 80 процентэз улӥзы куамынэтӥ аръёсы пуктэм, куашкан калэ вуэм пу баракъёсын. Тужгес но секыт вал ож тӥрлык поттон удысын ужасьёслэн семьяоссылы. 1-тӥ октябре лыдэ басьтэмын вань пудо. Ижевскын но Сарапулын быдтэмын нылпи колониос. Глазовын усьтэмын лэсьтӥськон материалъёс поттон завод, ветлыны кутскизы автобусъёс, усьтӥськизы "Родина" кинотеатр но Пионеръёслэн юртсы, дасяны ӧдъязы шутэтскон паркез. Ижевскын кутскизы юзматӥсь минерал ву кыскыны, 25 сюрс учкисьлы "Зенит" стадион ӝутыны учкемын. Гужем кырӟанлы сӥзем праздникъёс ортчытэмын Ижевскын, Алнаш но Пычас ёросъёсын. Спортъя мастер В. Осинцев, куас вылын бызьылыса, СССР-лэн чемпионэз луиз, Антонина Зорина, коньки вылын бызьылыса СССР-ын нырысетӥ интыез басьтӥз, нош Ижевскысь мотогонщикъёс мотокроссъя вормисе потӥзы. Улон каллен ас ӧраз пырыны ӧдъяз. Е. Вяткина, Удмурт Республикаысь Кун архивысь валтӥсь специалист. ЛЫДӞЕЛЭ НО СЁТЭЛЭ ЭШТЫЛЫ, БУСКЕЛЬДЫЛЫ, ТОДМОДЫЛЫ УДМУРТЪЁС, САЗЬТӤСЬКЕ! Музын кыллись коньдонэз ӝутыны дэмлазы ке, мыкырскыны эн дыртэлэ Велосипед - 10 манетэн Ог ньыльдон ар талэсь азьвыл монэ ыстӥзы районэ, математикая олимпиадае. Шӧдтэк кыльыса кин ке интые, вылды. Али но йырам кылемын отын сётэм ужзы. Меӵак верало - каргам ужзы. Одӥг городын малпаллям аспӧртэм шудон. 100 манетэн велосипед басьтӥськод но, тыныд дунтэк сёто 9 талон. Котькудзэ 10 манетэн вузаны кулэ тодмоосыдлы. Озьыен, ас кисыяд 90 манет понӥськод но, велосипедэд тыныд усе 10 манет тыр гинэ. Талонэн музон адями магазинысь 100 манетэн велосипед басьтэ но, солы вӧзаз озьы ик 9 талон сёто. Таиз соосты нош ик 10 манетэн вузаны кулэ. Выльёсыз талон кузёоос магазинысь нуо одӥг велосипед но 9 талон. Котькуд талонэз мукет муртлы вузаны кулэ, пе, 1 час. Кӧня дыр ӵоже городысь 100 сюрс мурт талоно луоз? Кӧня талон но кӧня велосипед кулэ таӵе шудон ортчытыны? Йырберме кема кормай та чуръёс вадьсын. Собере, нокыӵе лыдпусэн шудытэк, йырам мар лыктӥз, сое ик гожтӥ: талонъёсты быдэс городлы вӧлмытыны кулэ 1 ар, вузаны кулэ 100 сюрс талон но 100 сюрс велосипед. Туала визьмын ятвылтӥсько, малы таӵе "ӟеч" валэктонъёсы понна мыным зарни медаль ӧз сётэ. Вылаз ик, берлогес кылӥськиз таӵе ивор: милемлы, покчиослы, олимпиадаын янгышаса дэмлаллям бадӟым классъёслы чаклам йыртӥян. Ми, арифметикая но геометрияя прогрессия шуонъёсты кылымтэос, сьӧлыктэк но сьӧлыко кылиськеммы. Туннэ но мон уг вера та йыртӥянлы валэктонэз. Оло, лыдӟисьёс пӧлысь кин ке сое шедьтоз. Нош тодӥсьёс оскытэмъя, 100 сюрс муртэ талоно карон понна кулэ кӧня ке час гинэ. Зэм, дунтэм велосипед басьтыны тросэз ик уз быгатэ. Малы ке шуоно, берлогес "талонам" адямиос сое вузаны нокинлы уз пӧрмытэ - ваньмызлэн сыӵе бумагазы вань ни. Коммунизм дыръя таӵе йыртӥянъёсын вырыса, капитализме выжон вакытэ куд-огез чаляк узырмиз, мукетъёсыз уно коньдонзэс ыштӥзы. Ваучеръёсмы кошкизы пӧртэм коньдон пирамидаосы, МММ, "Хопёр-инвест", "Пик-инвест", "Гермес" огазеяськонъёсы. Бен, коньдонмес ыштӥськом, суд пыр номыр ум утӥське. Тылыосмес сузяськом но... выльысь утчаськом чаляк узырмон амал. Туннэ - куанер, усьсэ - миллионер! Ортчем гужем вылтӥ одӥг тодмо журналистэн оломар луиз. Азьвыл весь малпаськылӥз композиция, фокус, сюжет, кыл тӥрлык сярысь. Вераськоназ шуак пыризы выль валанъёс: квартира, зарни, барыш, пайда, доллар. Тыбырыз пумен шонерске, синъёсыз чилекъяло, галстукез чибориё буёлэн ворекъя. Кышноос шыпырто: - Ма, таид егит туган шедьтӥз ке шат? - Нылъёс шоры сокем ӧз жальмалля ук. - Пиослы оскон ӧвӧл. Соос котькыӵе арлыдазы кырыж сюресэ кожыны дасесь. Воштӥськонлэн мугез музон вылэм. Огаз министерствое пыри но, отын коньдонэн вырисьёс, валтӥсь бухгалтер но экономист, пальпото: - Журналистты нерад кариз ни. Кыӵе ке МОО шуонэ ӧте. Кӧня ке сюрс манет тыроды но, отӥяз бадӟым процентъёс гинэ басьялоды, пе. - Пыриды-а сыӵе организацие? - юасько. - Дунтэк сыр асьмеды возьма капканын гинэ. Берлогес шараяськиз: сыӵе сырез но яратӥсьёс ӧжыт вылӥллямтэ. Данак тодмоосы - газетчиос, артистъёс, книга поттӥсьёс, телепередача дасясьёс - вожмаськыса пӧлазы ӧтьыны шӧтазы. Телефон пыр огаз бер ӝытэ таӵе кенешон пӧрмиз. - Матысь нуналъёсы ми огазе люкаськиськом. Тӥледлы билет кельтоно-а? - дэмла тодмо чебер кышномурт. - Дунтэк-а? - Сю витьтон манетэн гинэ. Отчы мыноды но, тӥледлы ваньзэ валэктозы. - Кӧня бен барыш жильдысал мон отын? - Коммерциысь ватосэз ми телефон пыр ум шараяське. Билет кулэ-а? - Кӧня ке малпасько на. Мон тяпайтытозь, нылы но эмеспие кутӥллям но мынӥллям сыӵе ужрадэ. Юнме жаляськем 150 манетме. Ваньзэ ас синмыным адӟысал. Отчы ачим ӧй ветлы бере, чӧлсконо луисько "АиФ в Ижевске" газетлэн корреспондентэз Андрей Тронин, нылы но эмеспие вылэ. Ӟеч дӥсяськем но тодмотэм адямиос ог-огзылэсь кӧня ке керпотыса сыло. Кема уг возьдасько. Куноос доры лыкто чебер дыдыос но экеос, чорто залэ. Татын ини кыӵе ке кыллы быремъёс азьпалась улон-вылонэз суредало вуюись буёлъёсын. Туннэ тон куанер - ӵуказе - миллионер! Вылаз ик, тонэ утялто на коньякен. 150 манет понна сое лекос трос уг сёто ке но, тон астэ уката шудогес кожаськод. Стоп! Тани кытын ке татын тон астэ ачид ыштӥськод. Копак жӧломиськод. Кудӥз шуэ: залын огкылысь кенешон озьы усыкмытэ. Мукетыз сьӧлыка коньяк вылэ. Куинетӥез - вӧзад сылӥсь но котькуд юанэдлы валэкъясь чебер нылок вылэ. Огкылын вераса, улон сыӵе чебер адске: вань шуд - тыныд, вань кайгу - муртлы. Татын кутске тужгес тунсыкоез. Адямилы тырыны дэмлало 15 сюрс 200 (дас вить сюрс кык сю!) манет. Куд-ог ӝытъёсы та лыдпус вуэ 26 сюрсозь. Сьӧрад коньдонэд ӧвӧл? Пунэма! Ӝытазе-а! Мар курдад? Али ик машина шедьтом! Коть уйбыт ворттыл! Али ик ширтӥськом! Тодмоосыд дӥне! Мынэсьтым жӧломем нылме, педагог но психолог лыдъяськись мае ке, эмеспие сазёмытэм. 300 манетсэс ыштӥллям ке но, чаляк шупчиллям татысь. Мукетъёсыз сюриллям сыӵе вотэсэ. Учкиськод ке, узырмон мылкыдын черламъёслэн синъёсазы ӵуказеяз-усьсэяз но шайтан каръяськем ни кадь. Оло, мыным гинэ-а озьы потэ? Ужзы но кулэ ӧвӧл ни. Семьяен-семьяен гыро "зарни бусызэс". Адямиез усыкмыто куинь амалэн. Нырысетӥез: сыӵе МОО шуонэ ӧтё тодмоссэс гинэ. Тӥни малы Ижысь удмурт интеллигенция отчы пумен мур вые. Кыкетӥез: кӧня барыш жильдонэз шара уг верало. Тодмотэм маке ас бордаз юнгес кыске. Куинетӥез: Александр Волков вылэ чӧлско. "Удмурт дуннеысь" азьвыл ужасьмы меӵак озьы ик шуиз: - Тон милемды пыкылӥськод бере, Волковлы но уд оскиськы ни шат? Оло, тон солы пумит мынӥськод? Тодэ меда республикалэн президентэз, солэн нимыз вылын озьы шудо шуыса? Котькин вылэ чӧлскы, но пирамидаос пӧртэмесь луо. Египетысь изъёслэсь ӝутэм маке 5 сюрс ар сылэ ни. Коньдон пирамида ӵемысь ар улытэк куашка. Малы? Хеопслэсь пирамидазэ ӝутӥзы 40 ар ӵоже. 1-2 метр зӧкта изъёсты вӧлдыны кутскизы 120һ20 метръем инъет вылэ. Пумен сюбегатыса, 150 метрозь вуттӥзы но йылсазы. Коньдон пирамида вордске чылкак музон сямен. Нырысь ик кылдэ йылыз - кыӵе ке Яков Игерман. Вӧзаз, улӥегес, султо Осиновский но Солянский. Соослэн пельпумъёссы вылын Игерман вылэгес ӝутске. Таоссэ улласянь пыко выль лыктэмъёс - Иванов, Петров, Сидоров, Козлова. Соос улэ гинэ кепырско Тронин, Корепанов, Широбоков, Шкляев но уно сюрс мукетъёсыз. Отӥяз мар луэ? Огнуналэ ваньмыз куашка. Игерман тӧлӟе Америкае, Осиновский но Солянский - Израиле. Ивановлэн, Петровлэн но Сидоровлэн пытьыоссы ышо Москвае. Козловаез кырмо но пукто. Конфискацие (таланэ) сюро посӥськем ныркышетэз но пасяськем коньдон пуйыез гинэ. Широбоковъёс но Шкляевъёс кылё пилиськем тусь вӧзы. Малы мон лыдӟисьёсты сокем курдатӥсько? Оло, монэ "зарнияло" вылӥ верам пирамидаослэн вожвылъяськисьёссы (конкурентъёссы)? Уг, нокинлэсь но куронзэ (заказзэ) уг быдэсъяськы. Монэ куалекъятэ музон муг. Лекос трос удмурт тодмоосы юмоке усьыло уга. Нош мукетъёсызлы со но визьнод уг луы. КИНЛЫ КОНЬДОН ГУРЕЗЬ? Лэчытэсь мадёнъёс дасян вылысь, Шӧкычлы куддыръя уно иськемъёс лобано луэ. Туннэ эскере Кизнерын улӥсьлэсь ӝожтӥськонзэ, ӵуказе мыноно луэ Яре. Нош куддыръя вероссэ дася, "Удмурт дунеысь" потатэк. Татын ужасьёслы почта вуттэ уга олокыӵе гинэ иворъёс. Соосты учкы, ог-огенызы герӟа но - мадён дась. Дорамы пыриз редакциямы азьвыл ужам мурт. Пенсиез азьло минстрлэн мында ӧвӧл бере, коньдонзэ шыръясагес улэ. Нялтас кыӵе ке амал утча уксё пуйызэ кӧнялы ке но зӧкомытыны. Кин утча, со шедьтэ, шуо. Редакциысь пенсионерлы вуиз чебер конвертэн гожтэт. Сое ыстэм Москваысь "Ридерз дайджест" нимо издательство - акциосын огазеяськон. Шонергес вераса - отысь лотерея ортчытонъя комиссия. Ужасьмылы ивортэ: тӥ пыртэмын лотереяен шудӥсьёс пӧлы. Нырысетӥ кузьым - 1 миллион манет. Куинь быръён пыр потӥды ке, тӥляд осконды кылдоз сыӵе бадӟым утон басьтыны. Гожтэт улэ гожтӥськем кыӵе ке Е. Смирнова. Пенсионермы дышем сямызъя визь-кенеш куре редакцилэсь. Куспамы таӵе вераськон пӧрмиз. Азьвыл корреспондент. Мар-о кароно та гожтэтэн? Али корреспондент. Кесяса кушты. Азьвылэз. Ма, Москва али мынэсьтым номыр уг у куры ук. Гожтэт гинэ отчы ыстоно, пе. Алиез. Маркалы но конвертлы коньдонэд жаль ӧвӧл ке, келя гожтэт. Азьвылэз. Кин тодэ, оло утон кемдоз. Алиез. Москваос коньдонзэс кытчы поныны уг тодо ни. Йырзы висе: кыӵе, пе, улэ ни меда Ижысь огез мискинь пенсионер? Коньдонлы уг ёрмы-а? Азьвылэз. Бен-бен, конверт вылэ мынэсьтым нимме-тулме печатласа гожтӥллям. Алиез. Москвае ар куспын кык-куинь пол ветлӥсько. Данак редакциосы вуылӥсько. Нош "Ридерз дайджест" издательство сярысь кылылэме но ӧвӧл. Азьвылэз. Котьма ке но, шудо учырлы кыӵе ке осконэ вань. Алиез. Гожтэт ыстӥсь организацилэн нимыз ик возьматэ: со малпамын, кунгож сьӧръёслы пышкылыса. Отын, капиталлэн дуннеяз, адямиез олокызьы но алданы выро. Азьвылэз? Кызьы? Германиысь андан ӵыжатон заводын ужась Дитер Ципрат пыриськиз огаз шудонэ: утӥз 466 сюрс 153 марка (конверт вылэ лякон марка ӧвӧл - коньдон). 400 сюрссэ кельтӥз выль корка басьтыны. Кылемзэ, ог 66 сюрссэ, быдтӥз шудо учырез миськыны. Куинь нунал кыстӥськиз шулдыр юондыр. Ньылетӥ нуналаз Ципрат басьтӥз гожтэт. Шудонэз радъясь фирма туж жаляса ивортэ: солы бадӟым утон усем... компьютер янгышамен сэрен. Дитерлы 153 марка гинэ вуыны кулэ вал. Корка басьтыны кельтэм коньдонзэ со берыктӥз фирмае. Нош юондыр ортчытыны быдтэмзэ... Котьма ке но пенсионерез осконтэм издательствоен герӟаськыны алэммы иназ ӧз мыны. Москваысь гожтэтсэс пияз туж чакласа ватӥз но отчы ивор келяло, шуиз. Сыӵе учыръёсы шедьыса ӵуштаськем муртъёс сярысь вераммес пеляз ӧз поны. Жаль. Нош ми мадьыны медӥськом вал... Одӥгез ужасьмы курортын шутэтскыкуз лыдӟем "Дочки-матери" газетэз. Син азяз йӧтэм книга вузась фирмалэн адресэз. Вузъёссы нош кыӵеесь: "Что сексолог делает в постели", "Травник для мужчин", "Лекарства без врача" но мукет. Пӧлазы кызьы ке сюрем крем. Нимыз: "Депил плюс". Малы меда "Дебил плюс" ӧвӧл? Котькудӥз 199 манетэн. Коньдон келямез бере дыдымес книгаен шумпоттӥллямтэ - "Сони" фотоаппаратэн гочатӥллям. Собере вуэм таӵе ивор: 1999-тӥ арын 1-тӥ октябре 13 час 45 минутэ шудон ортчытонъя комитет решение кутӥз ӵапак тӥледлы, одӥгезлы усто басьяськисьлы, туж аспӧртэм кузьым сётыны. Кузьым зэмен ик осконтэм - "Сони" аппаратура. Вӧзаз - зарнивуам бумага. Вылаз пусъемын: зарни шобретэз ӵушылэ но тододы, кӧня муртлы кузьым вуэ. Ужасьмы, огназ улӥсь дыды, озьы ик лэсьтӥз. Буёл улысь потӥзы зарни кылъёс: ньыль муртлы. Озьыен, шудо мурт утӥз буёло телевизор (72 сантиметр), стереорадио, колонкаос (акустической система) но видеомагнитофон. Сыӵе чебер бумага улэ киоссэс нюртӥллям Москваысь "Покупки на дом" акциосын огазеяськонлэн валтӥсь директорез Ксавье Брандизи, солэн воштӥсез Николай Какаулин но шудон ортчытонъя кыл кутӥсь Наталья Прусаченкова. Зэм, огазеяськонлэн адресэз сётэмын ӧвӧл - гожтэмын почта ящиклэн номерез гинэ (ож тӥрлык поттӥсь заводлэн сямен). Сыӵе бадӟым утонэз басьтон понна лэсьтоно пичи уж - огаз банке келяно на 467 манет. Тазэ но ужасьмес кема сюлворим: эн ысты коньдондэ. Алэммес пеляз ӧй понысал, но та вакытэ уждун тырон ӝегаз. Соин гинэ, вылды, дыдымы "мултэс" коньдонэзлэсь ӧз мозмытскы. Вылаз ик, солы лыдӟыны сётӥм кунгож сьӧрысь иворез. Франциын вань Бордо город. Отын уло вынъёс-математикъёс - Роже но Реймонд Пуатьеос. Соос кема малпаськизы рулетка сярысь - котырес дырды кузя бызьылӥсь шарикен шудон сярысь. Шедьтӥзы келянлэсь утись амал. Мынӥзы Средиземной зарезь дурысь Монако кунэ, дугдӥзы дано Монте-Карло городэ. Нырысь нуналэ вынъёс утӥзы 167 сюрс франк, ӵуказеяз - 548 сюрс, усьсэаз - 2 миллион 800 сюрс. Соос вылэ синзэс уськытӥз отысь мафия. Казиноысь дӥсяськон сэрегын вынъёслэсь утэм коньдонэн сумказэс шырмачъёс лушкемак воштӥзы. Со интые кельтӥзы суредам франкъёсын сыӵе ик сумка. Ульчаысен Пуатьеосты дугдытӥзы полицейскойёс. Вынъёсты янгыше уськытӥзы суредам коньдон вӧлмытэмзы понна. Табере математикъёс малпасько кыл кутонлэсь мозмон сярысь. Таӵе учыръёс сярысь рос-прос ӧй мадьысалмы, соос одӥг-ог гинэ луысалзы ке. Почта ивортэ: миллион яке "Сони" утыны вырисьёс гуртъёсын но уно ни. Шаркан ёросысь огез семья миым октябре 600 манет келям Москвае. Книга но, телевизор но ӧз вуэ. Кин но со дэмлалоз: милицие вазиськы но кырмы йыртэмасьёсты. Вераны гинэ капчи. Удмурт милицаос шуозы: коньдондэс Москвае лэзиды - Москва ик мед утчалоз. Нош отчы мыныны уно сю манет кулэ - ачид уд вырӟы. Москва уг оскы синвулы. Тае лыдӟемды вань ни? Ӧд янгышалэ. Сыӵе мадёнме мон "Удмурт дуннее" печатлай туэ 4-тӥ феврале. Печатлай но киосме посыса витьыны ӧдъяй: ку мыным тау каронъёс вуозы? Гожтэтэн, телефон пыр, меӵак вераса. Одӥг-а, кык-а мурт, ӵыжы-выжые, ӟеч кыл вераз ик. Тросгес кылӥ лекъяськемъёсты: - 200 манет ыстӥ но дуно кузьымзэс витисько вал. Умме усьыкум но, кӧлэмысь сайкакум но сюлэмме шунтылӥз одӥг малпан: ку вуоз Египетэ путёвка, видеомагнитофон, иномарка машина? Нош тон монэ копак ӟечезлы осконтэк кельтӥд! Озьы луэ ни: пилемо куазь понна барометр янгыш. Усыкмем йырез сазёмытӥсько, выжыкыл дуннеысь поромем муртэ музъем вылэ васькытӥсько но, мон ик сьӧлыко. Малы? Шонер гожтӥз дано кылбурчи: "Меня обманывать не трудно, Я сам обманываться рад". Астэ быдӟым муртъёсын артэ пуктыны ӟеч ӧвӧл ке но, выжыкылысь ик шедьтӥ валэктон. Максим Горькийлэн Данко батырез, сике йыромем муртъёслы сюрес возьматон понна, ас гадьзэ кесиз но ӝуась сюлэмзэ кыре поттӥз. Адямиос нюлэскысь кошкизы но ма каризы? Пограм Данколэсь тэлясь сюлэмзэ лёгаса кельтӥзы. Губырскем муртлэн сильсьӧраз пуксьыны лякыт Туннэ но, поромем юлтошъёсме визьманы вырыкум, куд-огез абдра: - Малы тон йыг-йыг фирмамес кыӵе ке алдаськись пирамидаен ӵошатӥськод? Договор вань, печать вань, подписьёс вань. Кин кинэ алдалоз? Вожъясько милемлы, соин ик эсэпсы пӧсьтэ. Табере тӥледлы кӧня ке юан сёто. Зэм, мон уг быгаты коньдон люкасьёсты меӵак йыртэмась шуыны. Документъёссы вань уга. Нош Сергей Мавроди МММ шуонэныз бумагаостэк ужаз шат? Усто бусы гектарысьтыз 200 центнер картофка сётэ. Кызьы отысь 1000 центнер люкалод? Адямиосын кемалась ужась банкъёс ар куспын 10-40 процент барыш сӥзё. Али кылдэм организация кызьы 100-200 процентлы узырмытоз? Пияла синтэк но адӟиське ук: одӥг мурт сьӧраз кык-куиньзэ валтыны кулэ ке, выль адямиос ӝоген сюремысь дугдозы. Соку ик коньдон ошмес куасьмоз. МОО шуонъёсы нырысь пыремъёс, оло, кыӵе ке коньдон жильдозы ик. Тӥни соос ик та чуръёсме вожомыса пумиталозы. Нош мукетъёсыныз мар луоз? Соос та вотэсысь кошкыны уз дӥсьтэ - оло, зэмен ик зарни вуоз малпалозы. Музон юан: малы таӵе огазеяськонъёс лушкемгес бергало, газетъёсы но телевидение ялонъёс уг сётыло? "Хопёр-инвестъёс" куашкам бере, адямиос огъя ӧтёнъёслы уг оско ни угось. Быръемын музон амал: тодмоос пыр ужан. Пирамидаысб адямиос пӧлын алигес лушкемак вӧлмиз таӵе ивор: отчы гужем пырем кышномуртлы зӧкос конверт сётӥллям - ӝыны квартиралы окмоз, пе. Коммунизмысен кылӥсько: кинлы ке конвертэн коньдон кузьман - котьку котькытын кырсь киын капыръян (кӧня к-ос!). Мукет сямен вераса, лушкемен барыш люкылон одно герӟаськемын йыртэманэн. Выль ивор: Глазовысь одӥг кышномурт (нимтулзэ тодӥсько) 15 сюрс манетсэ нуэм одӥг фирмае (нимзэ тодӥсько). Оскытӥллям: 10 муртэ сьӧрад вай но басьты 96 сюрс манет. Мискинед уг быгаты 10 адямиез но палёмытыны, 15 сюрс манетсэ но берлань басьтыны. Асьме дорын визьмо ужбергатӥсьёс (предпринимательёс) уно. Соослэн сямзы аспӧртэм: коньдон вылэ коньдон уськытоно. Малы бен уг тунсыкъясько таӵе зарни зарезь сӥзись ошмесъёсын? Малы сыӵе паськытэсь коньдон шуръёс нокытчы дэмӟылытэк бызё куанергес удмуртъёс дӥнёзь? Котьмалы оскеменымы йырин ӧвӧл меда? Табере усьто гожъямелэсь тужгес бадӟым мугзэ. Монэ курдатэ удмурт интеллигенцилэн ӵуказе нуналэз. Мавродиос но игерманъёс пегӟозы кунгож сьӧры. Ышем коньдонмы понна судэ сётыны нокинэ луоз. Кисыямы пырыса, коньдонмес ӧз кайпалтэ - асьме киын сётӥм. Печатьёслы но договоръёслы оскыса. Асьмеос амалтэк урдском тронинъёс но корепановъёс вылэ: тон монэ кыскид та шакшы уже! Интеллигенция лыдъяськисьёсмы сотэк но уг тупало вал, куспазы эшшо шуккиськом на бадӟым тул. Асьмелэн дышетскем адямиосмы одӥгтэм сямен будэмын гуртын. Вазь-а, бер-а, та чер отӥяз вуоз вордскем палъёсазы. Сотэк но кекатэм гуртоосмес эшшо золгес серметаны ум юрттэ меда? Оскон одӥг: гуртысь котькуд вамышсэ чаклась мурт лякытэн уз сюры вотэсэ. Вылаз ик, солэн мултэс манетэз ӧвӧл. Гуртмес ӵуказе вите уката бадӟымгес кышкытлык - музъемез вузан. Сое муртъёслы сётыны закон уг лэзьы шуиськомы ке но, учкелэ ай городлы 20-30-40 иськемысь гуртъёсты. Отын но татын музъем кесэг возё ни "выль ӟучъёс". Пӧлазы "выль удмуртъёс" туж ичи. Городъёсысь заводъёс, магазинъёс, ресторанъёс, мастерскойёс приватизация дыръя нимаз кузё кие выжыку, удмуртъёс сокем трос ӧз кайгыре. Малы ке шуоно, соос отын кивалтӥсьёс ӧй вал - быдэсъязы тужгес секыт но дантэм ужъёсты гинэ. Нош музъемез ыштон луоз калыкмылэн тужгес лек адӟонэз. Вашкала удмуртъёс сямен, асьмеос мур нюлэскы пегӟыны ум быгатэ - сикын но кузё вань. Ватытэк верано ке, асьмеды музъем ласянь кемаласьгес шымырто ни. Учке ай: дано Кам дурын, вашкала удмурт музъем вылын, одӥг удмурт гурт но ӧвӧл. Чистоназэ выжы-кумъёсмес отысь вазенгес улляллям. Бабим ке, отӥяз ыштыны быгатом музон муосмес но. Ӟенелик понна вузалом убомес, бакчамес, музъем паймес. Удмуртъёс, эн усыкме! Удмуртъёс, сазьтӥське! Музын кыллись коньдонэз ӝутыны дэмлазы ке, мыкырскыны эн дыртэлэ! Губырскем муртлэн сильсӧраз пуксьыны лякыт. Мынам та алонэ (каркатьтонэд шуиз одӥг кылтэчы) ӧз зэма ке, ар ортчыса ик мон дась таӵе документ дасяны: "Пирамида" огазеяськонлэн кузёезлы Сфинкс Хеопсович Игерманлы Курон Тӥ вылэ юнме кыл вӧлдэмме валаса, туж курисько монэ пуктыны "Пирамидае" пырисьёслэн черодзылэн быжаз коть. Алексей Шкляев. Нырысетӥез Удмурт Республикамылэн улоназ луиз бадӟым учыр. Удмурт кунлыклы 80 ар тырмон азьын, 3-тӥ ноябре, Операя но балетъя кун театрын ортчиз республикамылэсь нырысетӥ президентсэ та сан улэ пыртон - инаугурация. Залэ люкаськизы шаерысьтымы сӥё-дано адямиос, ёросъёслэн, предприятиослэн, огазеяськонъёслэн кивалтӥсьёссы. Лыктэм куноос пӧлын вал Татарстанысь, Башкортостанысь, Мордовиысь но мукет улосъёсысь кивалтӥсьёс. Быръёнъёс дыръя тросгес куараос люкам муртлы Александр Волковлы Удмурт Республикалэн Президентэзлэсь удостоверенизэ сётӥз Удмурт избиркомлэн кивалтӥсез Дмитрий Талантов. Александр Волков, сюлэм вылаз кизэ поныса, Удмурт Республикалэн Президентэзлэсь присягазэ лыдӟиз ӟуч но удмурт кылын. Со кыл сётӥз аслаз ужъёсыныз республикамылэсь данзэ вылын возьыны, кунлыкмес уката но юнматыны. Та оскем выль ужын шуд-дэлет сӥзьыса, нырысетӥ президентэз вӧсяз Иж- Удмурт епархилэн кивалтӥсез еписком Николай. Собере Александр Александровичез ӟечкылазы эшъёсыз но лыктэм куноос. Нуназе бере Ижысь Йӧ дворецын ортчиз бадӟым шулдыръяськон. Ӝыт со азьланьскиз Шор площадьын, йылпумъяськиз фейерверкен. Соку выль президент нырысьсэ потӥз калык азе. Ӵуказеяз, Республикамылэн нуналаз, Ялан ӝуась тыл доры трос улэп сяськаос понэмын вал. Тыл доры нырысь ик вамыштӥзы Александр Волков, Владимир Агашин но Юрий Питкевич. СЮМСИ Уж дурын пӧсялод, калыкын данъяськод Ушъямез кышномуртъёс гинэ уг ярато, шӧдске. Ӟеч кыл котькинлы но дуно, нош со ужам уждэ дунъяса ке верамын - кык полэс. Гурт удысын ужасьёслэн нуналзы азьын колхозысь энергетиклы Иван Степанович Ходыревлы "Удмурт Республикаысь гурт удысысь сӥё-дано ужась" ним сётӥзы, нош бригадирез Михаил Вениаминович Аитовез республикаысьтымы Кун Кенешлэн Данъян грамотаеныз пусйизы. Сыӵе дунъет ваньмыз уг басьто. Ма бен, ужало но дунъямон. Михаил Вениаминович дас сизьым ар бригадирын тырше ни. Кӧня ке ар талэсь азьло колхозын ньыль бригада вал ай, али соосты огазеязы, соин ик нуналаз олокӧня гуртэз котыртытэк ӧвӧл. Ай котькудӥныз кыл шедьтоно. - Ф-фу, пуны уж, ноку но куштӥськемды ӧз потылы-а? - юасько Михаил Вениаминовичлэсь. - Оломар эн юаське, со бригадир луыса вордӥськемын! - азьпалтэ колхозлэн тӧроез. Озьы ик вера со мукет специалистъёсыз сярысь но. (Иське, соос зэмзэ но ваньмыз ас интыязы воштонтэм адямиос!) Тани энергетик Иван Ходырев сярысь но ӟеч кыл гинэ кылод. Со ужзэ ӟеч радъяны быгатэ - хозяйство туннэ нуналозь тылтэк но ӧз пукы на, тьфу-тьфу! шудтэм учыръёс но ӧз луылэ на. ВОРМОНЛЫ - 55 АР Утчаськись Ӝӧк вылам кылле А.П.Кузнецовлэн "Это было, было, было..." книгаез. Солэн нырысетӥ бамаз ик автор лыз чернилаен гожтэм: "Гожъялэ пӧяськытэк, зэмзэ гинэ, уката но война сярысь. Война - со йырсазьзэс ыштэмъёслэн сьӧд ужзы. Со нокинлы кулэ ӧвӧл: ӟучъёслы но, немецъёслы но, чеченъёслы, удмуртъёслы но". Но Алексей Петрович Кузнецовен вераськонме та кылъёсызлы синмаськемелы луыса гинэ ӧй мыты. Пурысьтаны кемалась вуэм ветеранлэн книга гожтымон ужъёсыз люкаськемын редакциямы. соин ик дорамы со ӵем дыръя вуылэ. Ӵапак соку ик синйылтӥ азьвыл ожгарчилэсь зӥбыт, лачмыт, кутскем ужзэ йылаз-пумаз вуттыны тыршись луэмзэ. Малпай, та сямъёсыз ик, луоз, юртто та адямилы со быдӟа уж нуыны. Алексей Кузнецов война аръёсы 313-тӥ дивизиен ӵош Карелиысен Берлиноз ортчиз. Со вакытысь эшъёссэ-ожгарчиосты утчан-шедьтон ужлы ик табере ветеран сӥзе улонзэ. - Алексей Петрович, Ижевскын кылдэм 313-тӥ стрелковой дивизиысь ожгарчиослэн война бере улонэнызы тунсыкъяськыны кутскемды дырысен 35 ар ортчиз. Та дыр ӵоже тӥ трос лэсьтӥды. Нош ма бордысен мытӥды утчаськон сюрестэс? - 1965-тӥ арын октябрь толэзе Ижевске люкаськылӥзы та дивизиысь ветеранъёс. Быдэс Совето союзысь соку 17 сюрс ожгарчи пӧлысь татчы 109-эз гинэ лыктӥз. Кылемъёсыз тазалыксы лябен яке сюрес вылэ коньдон шедьтымтэен ӧз вуэ. Куд-огез ӧтемъёсты ӧз басьтэ, луоз, нош тросэз улэпесь но ӧвӧл ни. Соку ик мынам мылкыды бугырскиз "ышем" эшъёсмес шедьтыны. Утчаськом ужме трослы капчиятӥз В.И.Крапивинлэн "313-я Петрозаводская" книгаез. Отчы пыртэм фамилиосъя ысъяй гожтэтъёс, куд-ог азьвыл ожгарчиосын кусыпъёс тупатӥ. Но книгаын вань гинэ мыдлань гожтэм фамилля-нимъёс но. Сыӵе янгышлы луыса ик, 25 ар ӵоже утчано луи 1070 номеро полклэсь командирзэ Гнединэз. Книгаын со "Г.П.Гнедин" шуыса гожтэмын, нош зэмос нимтулыз Владимир Иванович Гнедин вылэм. Та адямиез мыным одно шедьтоно вал. Угось солы луыса гинэ мон но эшшо ньыль эшъёсы Шуя шур дурын улэп кылим. Милемыз татысь выжез чакласа возьыны косӥзы. Со вакытэ пуромем тушмон аслэсьтыз лэсьтӥз, полкмы трос ыштонъёс адӟиз. Нош ми эшъёсмылэсь палдыса кылим, сиыны нянь сукыритэк. Гнедин подполковник валаз милемыз, юрттӥз: выжез пуштытыны но кельтыны косӥз. Жаляса верано, владимир Иванович ож бусыысь ӧз берытскы - семьяез чиптэм-чаптэм ышемез сярысь кагаз басьтӥз. Бӧрысь тодӥ: со понна, пе, Гнединлэн кышноез но 6 пиналъёсыз коркасьтызы поттыса лэземын вал. - 313-тӥ дивизиысь куинез ожгарчиос Александр Матросовлэсь подвигзэ лэсьтӥзы. Соос пӧлын луиз Куйбышевысь Иван Клюев но. Но солэн нимыз война бере тодмо ӧй вал. Ог 30 ар ортчыса, сое шедьтӥды тӥ, Алексей Петрович. - Клюевез утчанме но В.И.Крапивинлэн книгаез бордысен кутски. Отын сётэм адресъя ысъялляй гожтэтъёс - нокин ӧз вазиськы. Малпай, солэн анай-атаез улэпесь на ке но, ог 100 аресъемесь луозы шуыса. Соин ик одӥгаз гожтэтам со гуртысь почтальонлэсь юрттэт курыса вазиськи: марысь мар ке, ассэ гожтыны кури. Арня улыса, осконэ быдэсме. Тодӥсько: А.П.Клюев интые, со Иван Васильевич вылэм, анаезлы - 90 арес. Толэзь, арлы беромысал ке, оло, весяклы беромысал. Озьы шедьтӥ иван Клюевлэсь туспуктэмъёссэ, ожысь гожтэтъёссэ. Тодматски Куйбышевысь журналистэн, кудӥз ожгарчилэсь ож сюресъёссэ эскерыны басьтӥськем. - Дивизиысь Гнедин, Клюев но данак мукет ӵош ожмаськем эшъёсты сярысь тодэ ваёнъёстэс пыртӥды "Это было, было, было..." книгаяды. Трос ужъёсты люкаськемын кун архивын, вань соос шаермес тодонъя музейын. - Кун архивын 100 килограммлэсь ятыр кагаз-гожтэтъёсы люкаськемын. Отчы ик сётӥ туспуктэмъёсын "Навечно в памяти" одӥгзэ альбомме. Таӵе книга-фотоальбом мон куинь пумо дасяй вал. Кыкетӥзэ кузьмай Ижысь 37 номеро школаысь музейлы, куинетӥзэ возисько ас дорам. "Это было, было, было..." книгае сярысь верано ке, со 1994-тӥ арын 1 сюрс 200 экземплярен потӥз. Но со пӧлысь огез но вузамын ӧвӧл. Кузьмаса ик быдтӥсько ни: "Удмуртия" издательствоысь ужасьёслы, кун архиве, шаерысьтымы музейёслы. 500 экземплярзэ военкомат пыр кузьмай Чечняе кошкись пиослы, ыштонъёстэк берытскыны курыса. Туэ Вормон нуналэ МВД-ын ужасьёс сое ас ветеранъёссылы кузьманы мылкыд каризы. - Азьланьын кыӵе малпанъёсты? - Эшшо одӥг книга поттон сярысь сюлмаськисько. Со мынам быдэсак гожтыса дасямын, нимыз "Три жизни" луыны кулэ. - Кызьы валасько, отын кыӵе ке куинь улон сярысь верамын. - Куинь улон: война азьвыл, 1941-тӥ-1945-тӥ аръёс но война бере. Шонерзэ, отын ньыль улон луыны кулэ вал, дыр. Ньылетӥез - революцилэсь азьло, уго со вакытэз но мон адӟи на. Но тыро-пыдо, валаса ортчытӥ ни нэп, военной коммунизм, индустриализация шуонъёсты. Вордӥськи Можга ёросысь Чумойтло гуртын. Семьямы милям ёрмыса ӧз улы. Кык вал, кык скал, парсь, чипы-курег вордӥм. Атаймы пызь изон лапас пуктӥз. Но ваньмыз со асьмеды кыӵесэ кыскон понна гинэ вылэм. Атаймес "враг народа" каризы. Ярано, эксэйлы оскемез но солы дурбасьтэмез понна "Солдат кирос" пусэз вазенгес ик ыштэмын вал... Анае дышетскымтэ, анай-атайтэк будэмын. соин ик трос курадӟоно луиз, быдэс улон "академиез" вылаз шӧдӥз. - Нош война бере улонэз кыӵеен адӟиськоды? - Ушъяськымон ум улӥське. Но пичияк курадӟытэк, тямыстонэтӥ аръёсы малпам выльдӥськонэз ӧй вормысалмы. Собере, выльдӥськон сярысь решение кутӥз партия. Малы со понна туала кивалтӥсьёсты, президентэз янгыше уськытӥськом? - Алексей Петрович, тодӥсько, вазенгес ик тӥ трос сюлмаськиды ни Киров паркысь стела борды 313-тӥ дивизилэсь нимзэ гожтон пумысен. Та нуналозь отын номыр лэсьтымтэ кадь? - Ӧвӧл, отын "1941-тӥ-1945-тӥ" аръёс гинэ гожтэмын. Но кинлы со сӥземын шуыса, туала егитъёс уг тодо. Соос уг тодо: ӵапак татысен кузь ож сюрес вылэ вырӟиз Удмуртиын кылдытэм 313-тӥ дивизия. Малпасько, Горд Знамя кык орденэн, Суворовлэн но Кутузовлэн орденъёсыныз пусъем дивизиез стела вылэ пусйыса, ӟеч луысал. Верам ни, татысь куинез ожгарчиос Матросовлэсь подвигзэ лэсьтӥзы. Тросэз орденъёсын, медальёсын пусъемын. Туала ветеранъёс пӧлын "городлэн дано улӥсез" ним нуллӥсьёс но вань. Нош кӧняез пыраклы ож бусые кылиз. Та дивизиен ӵош Удмуртиысь кошкем 4 сюрс ожгарчи пӧлысь 1943 арын 1-тӥ январьлы улэп кылемын вал 252-ез гинэ. Нош азьпалан витизы на трос гинэ лек ожъёс. Кивалтӥсьёс шуо, война аръёсы, пе, ваньзы курадӟизы, мон озьы ӧй верасал... Но туннэ сое бугыръяны кулэ ӧвӧл ни. - Алексей Петрович, озьыен, стела вылэ 313-тӥ дивизилэсь нимзэ пусъён но выль дасям книгадэс поттон - туннэ нуналлы тужгес бадӟымесь сюлмаськонъёсты луэ. Малпасько, соос быдэстыны луонтэмесь ӧвӧл. Валаны гинэ кулэ соослэсь дунзэс, гажаны гинэ кулэ шаермылэсь историзэ. Оском: валалом. Оском: гажалом. Э.КУМАЧЕВА. Туспуктэм вылын: А.П.Кузнецов но 313-тӥ дивизиысь роталэн командирез Н.С.Поздеев война бере ог кызё ар ортчыса пумисько. Одӥгез лек ожмаськон дыръя Никита Семёнович секыт сӧсырмиз, ож бусыысь сое поттэ Алексей Петрович. Вордскем нуналзэ туннэ пусъе Белов Иван Иванович - Правительствоысь пресс-службалэн кивалтӥсез. Россия Федерацилэн кун наградаосыныз пусъён сярысь Россия Федерацилэн Президентэзлэн указэз Атом энергетикаез азинтонын кема аръёс ӵоже пайдаё тыршемзы понна пусъёно: Почёт орденэн Кузьменко Николай Васильевичез - акциосын "Чепецкий механический завод" огазеяськонысь лабораторилэсь кивалтӥсьсэ; "За заслуги перед Отечеством" орденлэн ИИ степенё медаленыз Никитин Александр Михайловичез - акциосын "Чепецкий механический завод" огазеяськонысь цехлэсь кивалтӥсьсэ; Суднищиков Вячеслав Николаевичез - акциосын "Чепецкий механический завод" огазеяськонысь электрикез; Широков Сергей Алексеевичез - акциосын "Чепецкий механический завод" огазеяськонысь фрезеровщикез; радиоэлектронной аппаратура поттонын бадӟымесь азинсконъёссы понна но "Акционерное общество "Сарапульский радиозавод - Холдинг" предприятилы сю ар тырмонэн валче пусъёно: Эшъяськон орденэн Полусмак Александр Михайловичез - валтӥсь директорез; "Россия Федерациысь дано конструктор" сӥлы каро ним сётоно: Лихарев Валерий Максимовичлы - секторен кивалтӥсьлы, валтӥсь конструкторлы; "Россия Федерациысь дано машиностроитель" Калягина Валентина Федоровналы - штамповщицалы; Кобяков Анатолий Александровичлы - слесарь-инструментальщиклы; нимысьтыз техника дасян, сое эскерон но тросэн поттонын бадӟым азинсконъёссы но уно аръёс ӵоже сюлмысь тыршемзы понна пусъёно: Эшъяськон орденэн Сидоров Николай Алексеевиез - акциосын "Научно-исследовательский институт металлургической технологии" огазеяськонысь отделэн кивалтӥсез; "За заслуги перед отечеством" орденлэн ИИ степенй медаленыз Афанасьев Андрей Васильевичез - акциосын "Научно-исследовательский институт металлургической технологии" огазеяськонысь дурисез; Войцеховский Владимир Андреевичез - акциосын "Научно-исследовательский институт металлургической технологии" огазеяськонысь консультантэз; калыкъёс куспын эшъяськонэз но валче ужанэз юнматонын, удысын кема аръёс ӵоже пайдаё тыршемзы понна "Россия Федерациысь дано артист" сӥлы карон ним сётоно: Михайлов Владимир Николаевичлы - Ижысь П. И. Чайковский нимо камерной хорлэн кивалтӥсезлы; "Россия Федерациысь дано художник" сӥлы карон ним сётоно: Кононов Валерий Борисовичлы - художниклы; гурт удысын бадӟым азинсконъёс басьтэмез но трос аръёс ӵоже пайдаё тыршемез понна "Россия Федерациысь дано ветеринарной врач" сӥлы карон ним сётоно: Горячев Борис Ивановичлы - тылобурдо вордонъя "Увинский" совхозысь ветеринарияя валтӥсь врачлы; тазалыкез утён удысын бадӟым азинсконъёсыз но трос аръёс ӵоже пайдаё тыршемез понна "Россия Федерациысь дано врач" сӥлы карон ним сётоно: Напольских Владимир Михайловичлы - Ижысь медициная кун академиысь кафедраен кивалтӥсьлы. Россия Федерацилэн Президентэз В. Путин. Дано премия Сӥё-дано инженерез, калыкез югдытӥсез, Ижысь пыӵал тӥрлык поттон заводэз кылдытӥсез Андрей Федорович Дерябинэз данъяса но буре вайыса, "Ижмаш" ОАО-лэн валтӥсь директорез но татысь профсоюзной комитет кылдытӥзы Дерябин нимо арлы быдэ сётъяськись тямыс премия. Со пӧлысь витез сётӥськоз акциосын огазеяськонын ужасьёслы ужез радъянын но ваньбур поттонын азинсконъёссы понна. Нош куинез чакламын пыӵал поттон удысъя школаын дышетскисьёслы но дышетӥсьёслы, дышетсконын, наука но техника удысын азинсконъёссы понна. Н. Корякин. Дырызлэсь вазь быдэстӥзы Удмуртилэн кунлыкезлы 80 ар тырмон азьын акциосын "Ижевский литейный завод" огазеяськон республикаысь вылӥ кивалтӥсьёслы шумпотыса ивортэ 2000-тӥ арлы планзэ дырызлэсь вазь, 1-тӥ ноябре, быдэстэмез сярысь. Вуз поттонлэн быдӟалаез йылӥз 221,4 процентлы, нош продукциез вузанлэн быдӟалаез - 240,1 процентлы. Озьыен, ватсаса 17710,0 сюрс манетлы табыш басьтэмын. Предприятиын ужасьёс ар йылпумъяськытозь планлэсь вылтӥ поттыны чаклало на 20000,0 сюрс манетлы вузъёс, со луонлык кылдытоз ватсаса эшшо 4000,0 сюрс манет коньдон басьтыны. Коллективлэн басьтэм азинсконъёсыз республикамылэсь экономиказэ юнматонын эшшо одӥг вамыш луозы. Е.ПЕТРОВА. Фермае - вожмаськыса Колхозын куинь пудо вордон ферма: Пичи но Бадӟым Ингалан но Чажиын. Гидъёсазы вуылыса паймим ужасьёссылы: ваньмыз сямен егитъёс. Тунсыко, азьвыл косыса но скал кыскыны мынӥсез ӧй вал, али, пе, вожмасько. Зэм, али киын скал уг ке но кыско ни, ужзэс капчи уд шуы. Котькуд скал кыскисьлы 25 йыр пудо оскемын. Одӥгаз гидын гинэ нылкышноос быдэн 50-зэ утялто. Отын, пе, ужзы кӧнялы ке капчигес - кыскем йӧлзы гумыос кузя кошке. Кылемъёсыз сое ведраосын нуллоно луо. Но зоотехниклэн Валентина Никифоровалэн оскытэмезъя, ведраен нуллэмлэн ӟечез но вань: котькуд скал кыскись кӧня йӧл поттэмзэ ачиз чотаны быгатэ. Пудозэс нылкышноос сюдо асьсэос. Вож кунянъёсты толэзьем луытозязы утялто. Соос анайёссы вӧзын ӝоггес катьясько. Тани со нуныос, кӧтсы тыр, шӧдске. Пӧлысьтызы соку ик син шорам йӧтӥз горданез, кӧт ултӥз гинэ тӧдьы пештрокез адӟиське. - Скалъёсты сьӧдэн тӧдьыесь кадь, таиз кунянды асьтэлэн ик-а? - паймыса юасько зоотехниклэсь. - Бен, пудомес ми быдэсак выльдӥм - сьӧдэн тӧдьы куӵо выжы йӧлогес. Скалъёсмес тросгес искусственной амалэн бызьылытӥськом но вань ошъёсмы но, соин ик одӥг-ог таӵе горданьёсмы луыло на. Валентина Никифорова, колхозын валтӥсь зоотехник луэм сяна, кык арзэ ни Бадӟым Инга камплексын осеменатор луыса ужа. Солэн тыршемез - син азьын. Кунянъёс таза вордӥсько. Ӝоген шумпоттозы ветылъёс, тол вылын тямыстонэз кунянаны кулэ, озьыен, колхозын пудо йыр но уз кулэсмы. Жаляса верано, скалъёсты быдто мастит, эндометрит висёнъёс. Но секыт аръёсы но "Ниваын" кыскон скалъёслэсь лыдзэс ӧз кулэстэ. Ай арлы быдэ кӧнялы ке но будэтыны тыршо. Валентина Васильевна таӵе лыдпусъёсты возьматэ: 1997-тӥ ар - 1075 йыр, 1998-тӥ - 1080, 1999-тӥ - 1143, 2000-тӥ ар - 1150 йыр. Бен, йӧл кысконзы, кылем арын ӵошатыса, кӧнялы ке кулэсмиз. Йырлы быдэ 2058 килограмм кыско, но скал кыскисьёслэн "тупатскыны" мылкыдзы шӧдӥське. Уго колхоз барышлэн бадӟым люкетэз йӧл вузамзы бордысь потэ. Та нуналъёсы котькинлэсь трос йӧл кыске Елена Вострикова. Одӥг скалэзлэсь со 2490 килограмм йӧл люка, Лия Смирнова но Ирина Виноградова - быдэн 2280 но 2225 килограмм. - Пусъеме потэ кунян сюдӥсьёсмес но, тужгес но кык Семенихинаосмес. Лидия но солэн кенэз Наташа ӵошен ужало куать толэзьем кунянъёсты будэтон бордын. Ужзы синмаськымон пӧрме - кунянъёссы нуналаз 400-450 граммозь куаё. Ужзэс ӟеч тодо, ушъяськыны уг ярато (таиз зэм, туссэс мырдэм пуктӥм - укыр возьдасько). Ӟеч мылкыд кельтӥз Валентина Васильевна. Шӧдӥське, ассэ но сое гажало ужась эшъёсыз. Нош вань ке коллективын ог-огдэ валан, уж но азинске. Бадӟым Инга фермаысь скал кыскисьёс К.Антонова, Т.Кайсина, А.Паушева, Л.Салатьянкина но колхозысь зоотехник В.Никифорова (паллянысен кыкетӥез). Сюмси тапалан сайкытгес лыз инбам Сюмси ёрос ноку но азьпал радын ӧз ветлы на. Вань сводкаосъя - берпуметӥ чуръёсын. Солы вань пӧртэм мугъёс: му пушкын ӧвӧл нефть, му вылын - мултэс трос луо. Соин ик калык нунал пӧрат улэ: улонысьтызы мазэ ке воштон мылкыдзы укыр уг шӧдӥськы. Но калык пӧлын калык вань шуэм сямен, сюмсиос пӧлын сюмси тапалъёс вань. Меӵакгес ке - ингаос, дмитрошуръёс, чажиос, гуртлудчикъёс. Ваньмыз та гуртъёс пыро "Нива" колхозэ. Хозяйство егит ай, шуыны луоз, "Правдаен" люкиськемзы бере 10 ар гинэ тырмиз. Но та вакыт ӵоже районын азьмынӥсе потӥз. Солэсь татын дышетско, адӟем каро, вожъясько, со уго уте на осконэн районэз: луэ ужаны! Колхозлэн вань аслаз муш бакчаез, вукоез, нянь пыжонниез, но валтӥсь удыссы - пудо вордон, йӧл но сӥль поттон. Колхозын тырше 165 мурт, ньылез соос пӧлысь - "Удмурт Республикаысь гурт удысысь сӥё-дано ужась" ним нулло. Тямыс ар ӵоже кивалтэ ни хозяйствоен Валерий Николаевич Никифоров. *** Пичи Генчала вуыку, часэ шоры учкисько - дасысь алигес гинэ потэмын ай. О, чаль вуим, малпасько ас поннам. Конторае пырыса гинэ валасько, гуртын тыршисьёс понна дас час - со туж бер ни. Председательлэн ӧсэз ворсамын. Кин ке но вераз, со, пе, нюлэскы кошкиз, но туннэ ӵап кык часын правление люкаське. Кык час вить минут. Контора азьын воргоронъёс тамак кыско. Туссыя валасько - специалистъёс. Иське, правление кутскымтэ на. Но бӧрсямы ик пыро но, колхозлэн председателез Валерий Николаевич Никифоров пичи кенешсэ кутске. Шонергес ке, специалистъёсызлы кыл сётэ. Так, давай, Галина Анатольевна, кыӵе отын югдур, вазиське пудо эмъясьлы. Собере - зоотехниклы. Таиз ваньзэ лач, радызъя маде: сомында турын кулэ, тамында дасямын, ӧм ке пазяське, тырмоз. Трос учыръёсъя председателез индылэ но, алэ но кадь (ну нокызьы но уд малпа, соос кузпалъёс шуыса). Бӧрсьысь бӧрсе верасько техникая инженер, энергетик. Кыӵе ке чыры-пыры понна но "барабанэ жуго". Огласянь со туж умой - татын котькуд учырез соку ик эскеро, валче сэрттыны-пертчыны тыршо. Соинтэк-а та колхоз районысь троссэ паймытъя аслаз лыдпусъёсыныз. Кылзӥськод экономистсэс но тунаны кутскиськод: бен та Сюмси ёрос ик- а? Кызьы-озьы районъя 7 центнер ю тысь басьто, татын - 16 центнер пала басьто?! Оло, музъемзы-а сьӧд сюёгес, кыӵе ке кыл-а тодо? - Ужмес тодӥськом, - пумитам пальпото соос. - Зэмзэ ке, тросэз потэ специалистъёс бордысь, - азьланьтэ вераськонмес "Нива" колхозлэн кивалтӥсез Валерий Никифоров. - Соос милям уг вошъясько, котькудӥз аслэсьтыз ужзэ ӟеч тодэ. Огез ке азьтэмскиз, мукетыз вылын шӧдӥськоз. Гурт уж - со хор выллем: пудо уд ворды сиёнтэк, сиён уд дася техникатэк. Таизэ нош берло аръёсы нокин но гаражад дасяк пуктыса уз кельты, кулэ ке, утча, бызьылы, коньдонэд ке вань - басьты. "Ниваос" та ласянь вожъяськымон уло. Берло аръёсы гинэ ньыль комбайн, ньыль колёсаё трактор, куинь гусеницаен трактор, прицепъёс, турын калтон техника, "ГАЗ-53", "Москвич", "Волга" машинаос, автобус басьтыны быгатӥзы. Но председательлэн малпамезъя, та трос ӧвӧл. Луысал, шуэ со, уката ӟечгес улыны, вылӥын пукисьёс гурт калыкез валасалзы ке. Уг юртто ке - уг, но коть медаз люкетэ вал ужаны. Сотэк кызьы валалод закупочной дун пуктылэмъёсты? Солярка кык поллы йӧллэсь дуно. Ноку но таӵеез ӧй вал на - аръем барышысь 32 процентэз ГСМ-лы гинэ кошкиз! Ӵошатон понна: уждунлы - 18 процентэз. Лыдъяно ке, зэмзэ но ӧжыт: сюлмысь ужам понна толэзяз - шорлыдын 650 манет. Озьы но гуртын ужасьёс йырзэс уг ошо. Колхозын ӧвӧл ужтэк пукисьёс. Соос тодо, хозяйство соосты уз кушты, тракторен- машинаен но юрттоз, пилорамаын пул но дунтэменгес пильыны лэзёз, ю тысь но сётоз. Юг-юг чабей пызь базарын кӧняен? Куинь сюлэсь но трос, татын со - мешокез 192 манетэн. Асьсэ вукоязы изо. Но ваньмыз та, кызьы шуо, привилегиос, сюлмысь тыршисьёсызлы гинэ. Азьтэмъяськыса одӥг нунал ке но уже ке ӧд пота, гырпумдэ куртчылы. Котькӧня йыбыртъя на председательлы, со аслаз кыл вылаз юн сылоз. - Укыр лек ӧвӧл-а тӥ? - юасько мон Валерий Николаевичлэсь. - Ӧйтӧд, созэ мукетъёслэсь юалэ. Мукетъёс нош (колхозникъёс) та сямез уродэн уг лыдъяло вылэм. Экономист Антонида Березина но кивалтӥсьсылэсь юн сямзэ умоен лыдъя. Дисциплина ке ӧз луы, нокыӵе уж уз азинскы, шуэ со. - Ай уката "чурытгес" кариськытэк ӧвӧл, - итӥське Валерий Николаевич, - тани туннэ тэле ветлӥ - дасям пу ышем. Кытчы пыриз - нокин но уг тоды. Озьы ваньбурез суп-сап кариськом, тӧлъя-буръя лэзиськом. Тэль вылэ вуим бере, юатэк ӧй чида: - Тӥ тэль пушкын улӥськоды, нош урамъёсты малы ке выль коркаосын уг шумпотто. - Жаляса верано луисько, таиз ласянь ушъяськыны ум быгатӥське. Лэсьтӥськисезлы, конечно, юрттыны тыршиськом материалэн но, пилорамаен но, транспортэн но, но сыӵеос ӧжыт. Колхоз араз одӥг корка ке но пуктэ, оло ке солы оскисько-а, шай-а? - Татысь калык маин ке но аспӧртэмгес кадь. Секыт ӧй вал-а тӥледлы, лыктэм адямилы, кивалтыны кутскыны? - Калык котькытын аспӧртэм. Быгатоно соин огъя кыл шедьтыны, кужымзэс кулэ ӧре ӧръяны. Мон шуи: асьмеос умойгес улыны кулэ! Малпасько, тямыс ар ӵоже кыӵе ке но емышъёс адӟисько ни, но таин дугдыны ум малпаське: йылтоно пудо йырез, паськытатоно, узырмытоно музъемъёсты, барыш поттоно мукет удысъёсысь. Мон татчы лыктон азям кема малпаськи (азьвыл Вячеслав Николаевич кивалтӥз Завьял ёросысь Бабиноысь пудо комплексэн - З.Р.), малы кулэ кадь бере кылись районэ мыныны? Дорам куинь пол "кураны" ветлэмзы бере, соглаш кариськи. Малпасько юнме сыӵе вамыш ӧй лэсьты, уг жаляськы. Али куддыр мыным татын уж но уг тырмы ни кадь... - Оло ке кошкыны малпалськиськоды? - Уг, вань ӟечгес малпанъёс, но соиз сярысь али уг вера. Но оскытӥсько: пӧрмиз ке, улонмы трослы умоялоз. Мар бен, мед пӧрмоз малпамдыя. П.С. Машинаысен удмурт кылэз йӧскадь валасьтэм водительмы юа: - Кылзы ай, малы тон ульчаын калыкен ӟуч сямен вераськид? - Соос удмурт сямен уг валало, - мылкыдтэк вази мон пумитаз. - Кызьы уг валало: контораын председательзы специалистъёсын удмурт сямен вераськиз ук! - Зэм! Агрономзы но кыӵе чылкыт вераськиз! - чилектӥз йырам. Зэм шуо, ваньмыз кивалтӥсь бордысь потэ: коть со уж мед луоз, коть сям-йылол. А-ысен Я-озь Удмурт кунлыклы 80 ар тырмонэз пусъён тупаз республикаямы быръем президентлэн ужзэ быдэсъяны кутсконэныз. Таин валче 3-тӥ ноябре Ижевскысь Йӧ дворецын бадӟым шулдыръяськон ортчиз. Быдэс шаерысьтымы дано адямиос, ужысь геройёс лыктэмын вал татчы. А-ысен Я-озь, Алнаш ёросысен кутскыса, Яр ёросозь бӧрсьысь бӧрсе колоннаосын потылӥзы соос Йӧ дворецлэн бадӟым бусыяз. Таӵе дыръя амалтэк тодэ лыктэ кылбурчилэн верамез: "Удмурт Республика - дано геройёс, Удмурт Республика - шулдыр кырӟанъёс...". Зэмзэ но, ужын басьтэм дан тугокоен кадь котыртэмын вал чебересь крезьгуръёсын. Нош ик (кӧняетӥзэ ни!) чузъяське тодмо кырӟан: "Хватает Волге широты и сини, но с Камою она еще млей..." Та кылъёслэсь зэм луэмзэс возьматыса кадь, Россия Федерацилэн Президентэзлэн Приволжск округъя оскем муртэз Сергей Кириенко двореце люкаськем калык азьын шуиз: -Бен, Удмуртия Росситэк Удмуртия ӧвӧл. Но Россия но Удмуртитэк Россия ӧвӧл. Кема аръёс ӵоже, Удмуртия бадӟым инты басьтӥз обороная промышленностез азинтонын. Татын, ог-огенызы тэрыса, ваче ки ветло тупаса улон но пыӵал тӥрлык дурон. Оскисько: президент кивалтэм улсын улыса но ужаса, Удмурт Республика басьтэм вормонъёссэ уз ышты, обороная комплекслэн шоркарез луыса кылёз но уката сяськаялоз. Александр Волковез президент луэменыз ӟечкылазы Мордовия Республикалэн кивалтӥсез Николай Меркушкин но Венгрилэн Россиысь посолэз Эрнё Кешкень. Соос оскемзэс веразы, финн-угор республикаос куспын кылдэм герӟетъёс азьланяз но юнмалозы шуыса. Солы юрттозы вашкала дырысен возиськись кусыпъёсмы но туала аръёсы тупатэм огкылъёс. Удмурт Республикалэн дано гражданинэз Михаил Зыков шуиз: - Республикамылы 80 арес гинэ ай. Мон солэсь вить ареслы бадӟымгес. Соин ик ветеранъёслэн нимынызы нырысетӥ президентмылы оскемме верасько. Трос аръёс ортчыса но, егит пушъетъёс со сярысь ӟечен гинэ мед вералозы. Таӵезэ Йӧ дворец кемалась ӧз адӟылы ни вал, дыр. Шонергес вераса, Йӧ двореце быдэс шаерысьтымы такем уно киизилиос, сяськаос-а шуод, ноку таӵе-таӵе пазьгиськемын ӧй вал на. Профессиональнойзэ но, самодеятельнойзэ но вераса, 150- лэсь уно коллектив пыриськиз концерт программае. Ваньзы огазе потыкузы, зэмзэ но, кӧжылы усьыны нокытчы. Нош со шулдыр мылкыдэз кылдытон понна куд-огезлы вить нуналзэ Иже репетицие ветлытэк ӧйлась. Зэмзэ, шуод ини, искусство чидамез кулэ каре. Я, зэмос аритистъёс солы дышемын. Удмурт театрысьёсыз уката но. Соостэк кызьы ай... Туала пушъетъёс шорын, музъемлэн сӥез усьтӥськыса кадь ӝужазы вашкала удмуртъёс ("Эш-Тэрек" трагедиысь суред). Трос чидам пельпумзэс сэзъялтыса вордӥзы зэмос чеберлыкез. Крезьгурчи Ася Корепанова, эктонъя но кырӟанъя "Танок" ансамбль, ГТРК-лэн "Удмуртия" капеллаез, "Шудыр ӝыт" ансамбль, Чайковский нимо муниципальной хор, фольклор кырӟанъя "Айкай" театр, Операя но балетъя театрлэн тӧдьы юсьёсыз, калык артистка Валентина Пудова, дано "Италмас" ансамбльмы. Зэм, талэсь но яркыт тылсияськись тугоко малпаны ик уд быгаты. Нош со пӧлын ворекъяло на шаерамы улӥсь калыкъёслэн аспиштэтъёссы: со бигер, бесермян, чуваш, кряшен, немец, еврей, белорус, корей но мукет калыкъёслэн кырӟан-эктонъёссы. Нош тужгес трос, валамон ни, удмуртэз но ӟучез. Нош котьма ке но... Котьма ке но... ӟучез вормыны кутске. Татын но со шӧдӥськиз. Удмурт кылбуръёслы но инты ӧз шедьы. "Живи, процветай, наш любимый родниковый край" выллем кылъёс согизы программаез. Туж умой ке но ас малпам крезьгурез, В. Пудова "Русь святая ты моя" шуыса кырӟано луиз. Нош пумаз вань лопырскем калык йыбырскиз: "Я желаю счастья вам...." Тросэз сое Президентлы йыбырскон шуыса валазы. А-ысен Я-озь... А...(?) Б... Борисов, Барышинков. В... Вершинин, Волков... Алфавитъя улонэз уд тупаты вылэм. Быръе калык. Куддыръя - ачиз но валатэк. Но - сябась каромы. Улонмы питранзэ вырӟытӥз выль дауре. Нырысетӥ президент понна! Мед со шонер нуоз питранзэ. Т. Петрова. Кин вормоз? Ижевсклэн администрациез городысьтымы милициысь учатокъя устоез инспектор нимез басьтон понна конкурс ялӥз. Со радъямын инспекторъёслэсь ужзэс умойгес азинтон вылысь. Отчы лыдэ басьтӥськозы соослэн югдурез утёнэ ӟечгес пыриськемзы, калыкен ужаны быгатонлыксы. Конкурс ортчоз кык вакытэн. Нырысетӥ вакытсэ городысь ёросъёслэн администрациоссы ортчытозы туэ 1-тӥ декабрёзь, кыкетӥ вакытэзлы городлэн администрациез йылпумъян лэсьтоз 31-тӥ декабрёзь. Со понна кылдытэмын нимысьтыз комиссия. С.ПЕТРОВ. Умоен пусъемын Москваысь выставкаос возьматон центрын ортчиз агропромышленностья адӟытон. Отысь бронза медален но куинетӥ степенё дипломен берытскиз парсь вордонъя Удмуртиысь одӥгез комплекс - "Восточный" совхоз. Со отын возьматӥз 30-лэсь уно сиёнъёссэ - колбаса, пастрома, балык, рулет... Хозяйство лауреат луиз "Ужын умоесь азинсконъёсыз понна" номинацияя. Н.ВАСИЛЬЕВ. Валче ужан вае шумпотон Удмурт Республикалэн юбилееныз валче Правительстволэн премиеныз пусъемын Удмуртилэн географиезъя учебно-методической комплексэз дасям авторъёслэн коллективзы. Со бордын ужазы пӧртэм вузъёсысь преподавательёс но тодосчиос - огъя тямыс адями. - Географияя учебниклы мон дасяй республикамылэн экономикаеныз, сьӧрлось кусыпъёсыныз но азьпала азинсконъёсыныз герӟаськем люкетъёсты, - шуэ экономика но география наукаосъя доктор А.К.Осипов. - Валче ужаны туж умой вылэм. Нош Удмурт кун университетысь преподаватель, доцент Н.Т.Козлова коллективлэн ужамез сярысь тазьы валэктӥз: - Тау Правительствомылы 12 ар ӵоже ужаммес адӟемзы понна. Та коллективен ик ми куке но поттӥмы вал Удмуртилэн географиезъя 8-тӥ-9-тӥ классын дышетскисьёслы нырысетӥзэ учебник. Таиз луоз ини кыкетӥез издание. Учебник выльдэмын туала куронъёсъя. Юрттоно кариським географиен дышетӥсьёслы но. Табере учебник вӧзы дасямын на программа, атлас, пособие. Со сяна, дышетскисьёслы тыршимы дасяны географияя нимысьтыз тетрадь но. Та уже пыр-поч кыстӥськиз Дышетӥсьёслэсь тодон-валанзэс будэтонъя институт но. - Мон туж шумпотӥсько, сыӵе дуно премиен милям институтлэсь коллективзэ но пусйизы шуыса. Мынам гинэ со вормонэ ӧвӧл, - вераз географияя кафедралэн кивалтӥсез В.М.Успенская. Выль учебниклы но пособиослы умой дунъет сётӥзы ни дышетӥсьёс. Соосты эскерон мынэ ни Ижысь 16, 40, 41, 49 номеро школаосын. Нош 80 номеро школаысь дышетӥсьлэн Э.М.Русскихлэн тросэз дэмланъёсыз меӵак Удмуртилэн географияз пыртэмын. Т.БАННИКОВА. Правительстволэн премиеныз пусъемын Удмуртилэн географиезъя учебно-методической комплексэз дасям авторъёс. Соос пӧлын Н.Козлова, А.Осипов, Э.Русских, В.Успенская. В.Беломорскихлэн туспуктэмез. Котьма сярысь МТС-лы вож сюрес Туэ гужем пумын Кияса палъёсын но МТС кылдӥз. Вазенгес, ож вакытэ, ёросын куинь машинно-технологической станция вылэм. Али нош выльысь азьвыл вапум пала берытскыны кутским; угось эштосъёслы туж шуг выль техника басьтыны: одӥг трактор, одӥг комбайн понна ӝыны уллё пудодэ сӥльлы келяно луэ. Киясаысь МТС-э силос октыны чаклам выль комбайн вуиз. Со ужаз "Рассвет" колхозын но "Киясовское" эштосын. Тэльёс кузя, шуръёс кузя Ёросысьтымы "Мушаковское" хозяйствоын ӝоген, оло, воксё дугдозы ю тысь будэтэмысь. Эн паймелэ: гурт вӧзысь бусыосын - луо гинэ. Зоро куазен но ю тысь тыро-пыдо уг буды. Соин ик татын лудъёссэс бадӟыматыны малпазы - Кырыкмас но Оӵ шур кузя азьвыл гуртъёслэсь бусыоссэс утялтыны туртто. Гуртъёс кемалась быризы, нош бусыоссэс жаг турын, векчи нюлэс басьтэ. Кылем арын таӵе лудэ толйись ӟег кизизы - удалтӥз. Туэ трослы будэтӥзы ӟег кизёнзэс. Нош луоё бусые оло нюлэс мерттоно, оло трос аръем турын кизёно? Пайдаез тросгес луысал, дыр. Кинлы - серем, кинлы - ӧвӧл Алигес Сарапулысь ю тысь изон комбинатлэсь пызьзэ басьтӥм. Синмаськымон. Зэм, мукетыз мылкыдме ик куашкатӥз: мешок борды скал син быдӟаесь букваосын гожтэмын: "Удмуртская республика". Татысь пызь быдэс Урал улосвылэ кошке - яра, иське. Нош кин меда сыӵе визьмо гожъяськыны быгатэ? Озьыен, Сарапулын Фонвизинлэн Митрофанушкаез улэ? Казаньын нош майтал борды но ас кылынызы - бигер сямен - гожто. Нош асьмеос ӟуч сямен но шонер гожъяськыны ум ни йӧндыриське кадь... Апайёс вортто мотоциклэн Куазь пеймыт, юзмыт шуыса уг уло Игрово гуртысь куд-ог апайёс. Тани алигес соос нош ик сюрес вылэ потӥзы. Но малы ке но милицаысь агайёс соосты дугдытоно кариськизы: угось уйшор бере ини вал. Оло нош чеберайёслы кыӵе ке юрттэт кулэ луиз? Ӧз. Эскерон дыръя мотоцикл коляскаысь ю тысен мешокъёс шараяськизы. Эх-ма, мур лулӟизы чебер апайёс... Вашкала сямъя Кияса ёросысь ӟуч культурая общество алигес ортчытӥз вашкала ӟуч сюан. Нош солэсь азьвыл "котырес ӝӧк" сьӧрын вал вашкала сямъёсты выльдон, соосты нош ик улонэ пыӵатон сярысь вераськон. Та сюан вунонтэм кылёз егитъёс - Евгения Марьина но Андрей Бреган понна. Та йылолэз улӟытонын трос лэсьтӥз А. И. Коробейникова, ёросысь ӟуч культурая ёзлэн кивалтӥсез. Та нуналэ ик азвесь сюанзэс пусйизы Первомайскоеын улӥсь Суханов кузпалъёс. Наплыкез будэ Пудоез гидэ пыртэм бере, трослы будӥз йӧллэн наплыкез: ортчем арын сярысь, скалъёслы тросгес сюре фураж, уногес дасямын мукет сиён но. тани сентябрь толэзе "Колос" эштосын кыскем йӧллэн наплыкез вал 4,09 процент, "Ленинец" колхозлэн скал вордон фермаосаз но йӧллэн наплыкез будӥз. Али ёрос нош ик бере кыле - ӧжыт кыскиськом. Укмыс толэзь куспын 85 процент йӧл нырысетӥ сортэн кошкиз. Со дыре ик Ленин нимо совхозлэн вань кыскем йӧлэз нырысетӥ сортъем луэ. 8-тӥ октябрьысен йӧллэн дуныз будӥз 200 манетлы (тоннаез). Оло, со юрттоз пудо утён удысэз азинтыны?.. Тӧролэсь - кузьым Шаермылы йыр быръён понна нюръяськон мыныку, Удмурт Элькунысь Кун Кенешлэн Тӧроез А. А. Волков Кияса школалы сӥзиз вал компьютер. Верам кылзэ Александр Александрович быдэстӥз: 11-тӥ октябре татчы вуиз 5 компьютер. Тӥни озьы... Ӟучез но, удмуртэз но шуэм сямен куаразэс сётӥзы выль кузьым понна. Кун Кенешлэн Тӧроез ик оскытӥз: 2003-тӥ арысен татын выль школа лэсьтӥськыны кутскоз. Вылӥ ӟечлыко кидыс Котькуд ар "Киясовское" эштос кизьыны дася чылкыт, сузям кидыс. Соин ик котькуд ар юзы но удалтэ. Туэ но татын ёросъя нырысь интые потӥзы. Кидыс кисьтон планзэс мултэсэн быдэстӥзы. Ваньмыз кизьыны дась вылӥ ӟечлыко. Нош быдэс ёросъя 16-тӥ октябрьлы 61 процент гинэ кидыс кизьыны дась ай. Со дыре ик "Яжбахтинское" эштосын сое ӧз на дасялэ, техниказы сылэ, эстӥськон ӧвӧлысь. Сое басьтыны коньдонзы ӧвӧл. Тӥледлы 16 арес Туэ ёрос газет егитъёслы но бадӟым классъёсын дышетскисьёслы толэзьлы быдэ дася "До 16 и старше" газет-приложение. Бичало сое компьютерен: озьы газет кие кутымон луэ. Озьы ик ас вакытазы пото удмурт "Италмас", бигер "Чулпан", пор "Семык", армян "Наринэ" но мукет газет бамъёс. Соин ик, дыр, ёрос газетлы гожтӥськон котькуд аре нырысетӥ интыын. Геннадий Парфенов, Кияса ёрос газетын ужась. Мар выльзэ сётоз Президент? Быръёнъёс кемаласьгес ортчизы ке но ини, куд-огез ялан уг тодо на, малы кулэ луиз элькунамы президент, кыӵе воштӥськонъёс со вуттоз асьмелэн улонамы. Таӵе юанэн ми вазиським Жанна Дворцовалы, Кун Кенешлэн Кунэз радъянъя, калык куспын политикая но интыысь аскивалтонъя ялан ужась комисиезлэн тӧроезлы. - Президентлэн кулэез сярысь трос верамын но гожъямын ини, соин ик та пумысен мар ке но выльзэ йылэтыны шуггес. Озьы ке но, мон тыршо тӥляд юандылы рос-прос валэктон сётыны. Кызьы асьмеос тодӥськом, Россия Федерациын но, солэн ваньмаз республикаосаз но, Дагестанэз но Удмуртиез (берло дырозь) вератэк, вань президентъёс. Президенттэм республика огъя ӧрысь потэ, кивалтонын сураськон-пожаськон кылдытэ. Власть государствоын улӥысен вылӥозь котькытын огвыллем луыны кулэ. Президентлэн постэз ваньмаз республикаосын возьматӥз ини пайдаё луэмзэ. Тани Татарстан но Башкортостан кужмо президент властьсы луыса гинэ быгатӥзы федеральной центр азьын асьсэлэсь кулэяськонъёссэс утьыны. Асьмеос сыӵе луонлыкъёсты дыраз уже ӧм кутэ. Президент асьмелы тани малы тужгес но кулэ. Республикаямы 80 процентэз предприятиос военно-промышленной удысэ пыро, соосын федеральной центр кузёяське. Озьыен, та предприятиослэсь но республикалэсь кусыпъёссэс радъяно. Огъя ужпумъёсты ялан сэрттоно-пертчоно луэ Москваен ӵош. Кужмо президент кадь тырмыт кин утьыны быгатоз республикалэсь кулэяськонъёссэ? Россия Федерациын котькуд республика ас понназ кун луэ бере, со быгатэ мукет государствоосын ачиз меӵак кусыпъёс тупатыны. Валамон, та удысын но президентлэн луонлыкъёсыз, кужымез котькинлэсь но бадӟымгес но кулэгес. - Жанна Витальевна, но, президент сяна, ӧжыт шат кивалтӥсьёс котькуд удысын? Соос уг-а тырмо? - Кивалтӥсьёслэн лыдзы бордын ужпум ӧвӧл. Вылӥ удысын, вылӥ ёзэтын луыны кулэ вылӥ кивалтӥсь. Котькуд эскероно ужпумлэсь яке тупатэм огкыллэсь кужымзэ, "секталазэ" бадӟымгес каре вылӥ кивалтӥсь, асьме учырын - президент. Чаклалэ ай асьтэос. Шуом, мукет государствоен яке Федерациен тупанкыл гожтоз министр яке президент. Кудӥзлэн документлэн кужымез бадӟымгес луоз, кудӥз тырмытгес быдэсъяськоз, малпасько, валамон шуыса. Лыдэ басьтыны кулэ законъёс бордын ужанэз но. Жаляса верано луэ: соос я уг тырмо, я ӝыныё-урдсо яке воксё суро-пожо луо. Ванез но уг быдэсъяськы, таиз ини лек йыр висёнлы пӧрмиз. Законъёс ас кожазы уг ужало, соосты быдэсъянэз радъяны но эскерыны кулэ. Та ужпумез котькинлэсь но ӟеч но йылозяз-пумозяз быдэсъяны кулэ президент. - Власть куинь люкетлы люкиське - закон кылдытъясь, быдэсъясь но судебнойёзъёс. Нош президентлы кыӵе инты висъямын? - Президент кивалтэ быдэсъясь удысэн. Соин ӵош ик со ки улаз возе властьлэсь мукет удысъёссэ. Ватонэз ӧвӧл, властьлэн пӧртэм люкетъёсыз куддыръя одӥг ӧретӥ уг мыно, огъя кыл шедьтыны уг быгато. Соин ик президент соослэсь ужзэс куспазы герӟа, одӥг ӧре ӧръя. Мар лэсьтӥське республикаын - ваньмыз понна кыл кутэ со. Президент - со элькунлэн вылӥ данэз но, вылӥ кужымез но, вылӥ утисез, кыл кутӥсез но. Г.ТИХОНОВ. СЮМСИ Лудъёслэн кузёзы - агроном Спиридон Вениаминович Аитов 18 ар ӵоже нуналлы быдэ сямен котыръя бусыосты. Сарапулысь совхоз-техникумез йылпумъяса, со эшез сьӧры нырысь Кез пала кошкиз вал, но сюлэмыз кыскиз вордскем палъёсаз. Табере тани солэн ки улаз кык сюрс гектар музъем. Кулэ на вылэм эшшо коть кык сю гектар, шуэ валтӥсь агроном, йылтоно клеверез но, ю бусыосты но. Пар улэ кельтон лудъёс тани чик ӧвӧл, музъем уг шутэтскы. - Озьы ке но, районысьтыды мукет колхозъёсын ӵошатыса, урод урожай уд басьтӥське. - Ужам вылысь урод медаз лу ни. Ми ведь котькыӵе амалъёсты эскериськом, утчаськиськом. Туж пайдаё, мон сямен, музъемез берыктытэк гырон (безотвальная обработка). Тазьы учкыса со чебер уг адӟиськы, бусыез юнме гожмам кадь гинэ, но со понна уг быры тужгес ӟечез музъем сӥ - гумус (со сю арскын одӥг сантиметр зӧкта гинэ люкаське). Та амалмес учкыны мукет районъёсысь но ветло. Музъемъёсмы луо бере, ӧжыт ке но умоятон вылысь, рапс, трос аръем турын кизиськом, интыосты вошъяськом). Озьы ик туж пайдаё потэ мыным ю бусыосты химиен урон. Тани урем интыосысь 22,5 центнер басьтӥм, урымтэысьтыз - 9 центнер. Со сяна, кидыс но чылкыт, таза луэ. Жаль, луонлыкъёсмы ӧвӧл ваньзэ бусыосмес урыны, соин валче трос ыштӥськом. - Тӥ асьтэос ик ӟеч кидыс но уськытӥськоды-а? - Туэ малпаммылэсь трос кидыс дасям. КЗС-ёсты выльдыны быгатысалмы ке, жуг-жагтэк, чылкытгес кидыс дасяны луысал. - Кыӵе сортъёсты кизиськоды? - Мыным туж кельше московской-3 йыды. Сое ялан куро мукет интыосысь но. Кидысэз таза, умой будэ чырс музъемъёс вылын но. Фалёнской-4 умой, куроез вакчи, кезьытъёслэсь уг кышка. - Картофкады малы ке туж ӧжыт - кызь гектар вылын сяна уд будэтӥське. - Картофка - со сыӵе маке: туэ вань, кайта - ӧвӧл, соин ик солы туж "ум йыбыртъяське". Музъем ке воля луысал, оло, тросгес но мерттысалмы, но али ваньысьтыз тросгес пайда поттыны тыршоно, ю бусыосты "ужатоно". Ай тани тулыслы удобрениос, гербицидъёс утчано. Вот зол - лымы ӧз на усьы, нош агроном тулысэз малпа ни. Ма, рос-прос ужась мурт озьы ик ужаны кулэ, дыр. Музейын - дауръем сюрес Сарапулысь радиозавод (али "СРЗ-Холдинг" ОАО) странаямы радиоаппаратура поттон удысын вашкалаез луэ. Туэ солы 100 ар тырмиз ни. Дауръем юбилейзылы сӥзьыса, татын малпамын вал завод музей усьтыны. Отын тупен-тупен тодматскыны луэ предприятилэн ортчем сюресэзлэн вань вакытъёсыныз, татын поттэм трос пӧртэм арбериосын. Музейлэн экспонатъёсыз пӧлысь синйылтӥськод нырысетӥ поттэм "Кама" радиолаез но, армилы, МВД-лы но мукет сыӵе ёзъёслы чаклам туала аппаратъёсты но. Учкисьёсты тужгес но тунсыкъяськыто калыклы вузъёс. Кылсярысь, автомагнитолаос но пӧртэм пумо приёмникъёс. 1992-тӥ арын заводын приватизация ортчиз. Нош 1998-тӥ арын отын ужъёс выль сямен радъяськизы. Валтӥсез предприятие вӧзы кылдытэмын на укмыс пичиосыз. Н. Никонов. Удмурт Республикаысь Кун Кенешлэн 2000-тӥ арын 4-тӥ ноябрез шутэтскон нуналэн ялон сярысь постановлениез Удмуртилэн кунлыкезлы 80 ар тырмонэн валче, солэсь обществолэн улоназ но политикаын бадӟым интызэ, удмурт калыклэсь дауръёсын юнмам сямъёссэ лыдэ басьтыса, Удмурт Республикаысь Кун Кенеш пуктэ: 1. 2000-тӥ арын 4-тӥ ноябрез - Удмуртилэн кунлыкезлы 80 ар тырмон нуналэз - шутэтскон нуналэн ялоно. 2. Та постановлениез ивор вӧлмытӥсь ёзъёсын печатлано. Удмурт Республикаысь Кун Кенешлэн Тӧроез А. А. Волков. Ижевск город, 2000-тӥ арын 3-тӥ ноябре. � 211-ИИ. Выль удыс Трос пӧртэм машинаос поттэм сяна, "Буммашлэн" 21 номеро цехаз басьтӥськизы выль удыс борды, татын кутскизы кужмоесь лебёдкаос лэсьтыны. Таӵе арбериослы кулэяськисьёс али трос гинэ. Соос пӧлын - "Оренбургнефь", "Пермьтехносервис", "Технохимприбор" (Москва), "Красный пролетарий" (Стерлитамак), "Судостроительный завод" АО (Тюмень) но мукет предприятиос. Та удыс борды цехын туэ апреле кутскизы ни. Нырысетӥ вить лебёдкаоссэс июне сётозы, али куамынэз дась ни. Машина лэсьтӥсьёс азе ужпум пуктэмын туэ арлэн пумозяз толэзьлы быдэ 25-30 лебёдка дасяны. Уксёлы берыктыса, 5-6 миллион манет тыр луэ со. Вуоно арын татын пӧртэм пумо 200 пала лебёдкаос поттыны чаклало. Тросэз соос кутӥськозы уй палась улосвылъёсын. Соин ик цехын ужасьёс азе юнэсь куронъёс пуксё: машинаоссы оскымонэсь мед луозы. Н. Корякин. Репортаж Люкамын дуннелэн чеберез Ижевскысь сяська будэтонъя предприятие алигес пусйиз кылдэмез дырысен 25 ар тырмонзэ. Таин валче со вань узырлыксэ бадӟым адӟытонын (выставкаын) возьматӥз. Быгатысалмы ке ваньмы та синпӧртмась чеберлыкез адӟыны, оскисько, улонмы трослы чылкытгес, шундыёгес луысал. Лушкемен жильырась ошмесэз котыртӥллям сыӵе ик ненег лилиос. Со вӧзысь клумбаосты согиллям хризантемаос, розаос, лыдъяны луонтэм пӧртэм пумо турын-куаръёс. Кин пумитъяськоз меда лыз-вож-горд ковёр пӧлы йыромем ӟуг вылын ялкарыны. Нош кызьы огшоры но паймымон шулдыртыны луэ вылэм сад-бакчамес, корка пушмес! Арлэн котькыӵе вакытэзлэн аслаз вылтусыз. Но та выставкаез адӟемед бере, ӵошатыны быгатод на шат сӥзьылдэ мӧзмонэн, лулӟылонэн. Татын люкаськемын кожалод быдэс дуннеысь вань чеберез, паймымонэз. Огдыре ик вуиськод кадь луо борды ӝабырскем кактусъёс пӧлы но, ӟуч толъёсысь кызъёс котыре но. Тросэз будосъёс вуиллям татчы Голландиысь. Кызьы вера предприятиысь валтӥсь специалист Людмила Куравлева, со понна, пе, бадӟым тау кароно туала кивалтӥсьсылы Марат Аухатдеевлы. Ог куинь ар талэсь азьло со вуиз предприятие. Со дырысен ик шаерамы "вуизы" кунсьӧр будосъёс но. Голландиысь сяна, Франциысь, Германиысь ваемъёссэ но табере адӟод татысь. Предприятие ассэ ачиз возьыны-вордыны быгатэмезъя, Россияя нырысетӥ интые потӥз. Сяська, турын-куар сяна, вузан вылысь татын будэто пӧртэм пумо писпуослы, сяськаослы, бакча сиёнъёслы кидыс. Ижевск но гужемзэ "вожектэ" татысь ужасьёслы луыса ик. Озьы 25 ар ӵоже предприятие шӧдскымон сяськаяз, пурӟиз. Э. Кумачёва. Туспуктэмъёсыз В. Беломорскихлэн. Нимъёссы - "Буре ваён книгаын" Туннэ - Россиысь милицилэн нуналэз. Соин валче котькытын ортчозы сӥё-дано ужрадъёс. Нош толон республикаысьтымы Югдурез утёнъя министерстволэн данъян но буре ваён залаз люкаськылӥзы ужзэс быдэсъян дыръя бырем милиционеръёслэн матысь адямиоссы, ӵыжы-выжыоссы. Мемориалэ туннэ нуналлы пыртэмын 33 мурт. Нырысетӥезлэн нимтулыз Александр Семенович Бабушкин. Быремын 1918-тӥ арын. Куинез пиос - Владимир Востриков, Владимир Собин но Константин Токарев туэ быризы чечня музъем вылын. Чечня пумысен ке верано, та нуналъёсы отын службазэ нуэ 200 мурт. Соосты воштыны эшъёссы кошкозы 12-тӥ ноябре. Со сяна, МВД-лэн войсковой частьысьтыз асьмелэн 500 пиосмы отын службазэс нуо. Быремъёслэн ӵыжы-выжыосынызы пумиськонэз усьтӥз Удмуртиысь югдурез утёнъя министр, милициысь генерал-лейтенант Владимир Щербаков. Со ивортэ "Буре ваён книга" поттэм сярысь. Отчы пыртэмын вань со 33 милиционеръёс, верамын соослэн улон сюрессы сярысь, сётэмын туспуктэмъёссы. Табере та книга пыраклы кылёз мемориалъя залэ. Собере коллегиос ортчытъян залын министр В. Ф. Щербаков тодматӥз кивалтоно удысэзлэн ужаменыз. Берло толэзьёсы быдэс Россиысь МВД-лэн ужез секыт но кышкыт вал. Со герӟаськемын вал терроризмлы пумит нюръяськонэн, зэмзэ но, тырмыт коньдон висъяськымтэен, югдур котькытын ик секыт. Тани патрульно-постовой службаын кулэезлэсь 40 процентэз гинэ адямиос ужало. Министерстволэн транспортлы эстӥськон понна пунэмез 3 миллион манет люкаськиз ни. Щербаков азьланезлы оскон мылкыдзэ уг ышты. Со понна ужаны гинэ кулэ. Но милицилэн ӟеч ужамез шӧдӥськытэк уг кыльы. Уно йыружъёсъя лыдпус шӧдскымон кулэсмиз. Тросгес шараямын йыружъёс но, ӟечгес мыно следствилэн ужъёсыз. Сюлэмшугъяськыто сюресъёс вылын шудтэм учыръёс, туэ быриз 210 адями. Котькудӥз витетӥез учыр лэсьтэмын юэм йырын. Уг кулэсмы тылпуослэн лыдзы. Туэ отын быриз ни 120 мурт. Та лыдпус кылем арын сярысь уногес. Министерство но кун кивалтӥсьёс сюлмаськемен, та нуналъёсы милициын ужасьёслы алигес лэсьтыса вуттэмын 199 квартираен юрт. Али мынэ ордеръёсты дасян. В. Ф. Щербаков оскытӥз, улон интыос лэсьтон азьланяз но мыноз шуыса. Собере ачиз МВД но выль интые выжыны дасяське. Лэсьтӥсько но тупатъясько ёрос отделъёслэн юртъёссы. Вань люкаськемъёслы министр сётӥз "Буре ваён книгаысь" листъёссэ. Валлян МВД- лэн юртаз усьтӥськиз вӧсяськон сэрег. Отын толон ӝуатскизы сюсьтылъёс. Собере бадӟым вӧсяськон ортчиз Александр Невский соборын. Нош туннэ "Металлург" культура дворецын 17 часэ кутске праздниклы сӥзем сӥё- дано ужрад. Собере концерт сётоз "Россия" кун ансамбль. Ми но редакцилэн нимыныз ваньзэ милициын ужасьёсты, ӟечкыласьком праздникеныды. Шуд но тазалык тӥледлы! Н. Байтеряков. Милицилэн нуналэныз! Удмурт Республикаысь Югдурез утёнъя ёзъёсын ужасьёс но ветеранъёс! Сюлмысьтым ӟечкыласько тӥледыз праздникеныды - Милицилэн нуналэныз! Та нунал асьме странаын тужгес но данъяськымонэз луэ, малы ке шуоно, та праздник - адямилэсь правооссэ но улонзэ, кунлэсь кулэяськонъёссэ утисьёслэн, милициын али ужасьёслэн но ветеранъёслэн, оскымон адямиослэн праздниксы. Республикаысьтымы Югдурез утёнъя министерстволэн историез узыр геройлыко ужъёсын. Милициын ужасьёс кышкатэк, асьсэлэсь улонзэс жалятэк нюръясько йыртэмасьёсын. Юн сямо луэмзэс соос возьматӥзы ни шаермылэн палэназ но пӧсь интыосын. Милицилэн нуналыз, Вормон нунал кадь ик - синвуо. Туннэ асьмеос йырмес мыкыртӥськом Закон но зэмлык понна нюръяськонын улонзэс сётэмъёслы. Милициын ужасьёс секыт ужез быдэсъяло, соос котьку дась азязы пуктэм ужпумез быдэстыны. Ми данъяськиськом соослэн Атай музъеммес, шаермес яратэменызы. Вань сюлмысьтым ӟечкыласа сӥзисько тӥледлы тазалык, шаерысьтымы но Россиысь порядокез но законэз утёнын бадӟым азинсконъёс но ваньзэ умойзэ гинэ. Удмурт Республикалэн Президентэз А. А. Волков. Вордскем нуналзэс туннэ пусъё: Лебедев Владимир Степанович - Удмурт Республикаысь Правительстволэн Москваысь представительствояз ужась; Красильников Владимир Анатольевич - Вавож районысь "Колос" колхозлэн председателез; Князев Александр Иванович - "Удмурт дунне" газетлэн Воткаысь азьвыл собкорез. Медаль вуиз Можгала Егитъёс пӧлын ӝӧк выл теннисъя Всероссийской ӵошатсконъёс алигес ортчизы Пермь городын. Отчы 200 пала спортсменъёс пыриськизы. Удмуртиысь ветлӥзы можгаос - соосты нуллӥз ДЮСШ-ысь старшой тренер Р. М. Марданов. Шоро группае пырисьёс пӧлын бронза медаль басьтӥз Оля Устинова, покчи группаын - Лиза Кускова. Лиза Кусковалы 10 арес гинэ ай, со странаысьтымы ачиз кадь спортсменъёс пӧлын 20 кужмоосыз пӧлы пыртэмын но азьланяз Россилэн сборной командаяз вуоно ӵошатсконъёслы дасяськоз. П. Николаев. ВАЛЭКТЭ ЮРИСТ Сэрегез дася адвокат Лилия ШКЛЯЕВА Телефон 25-33-70 Утялтӥм пересь муртэ Дас ньыль ар талэсь азьло ми лыктӥм Черемушки посёлоке, утялтӥм огназ улӥсь кышномуртэз-пенсионеркаез. Сое пери шуккиз. Йырсазьыз вань дыръя ми юам: завещаниед кин вылын? Тӥ вылын, пе. Гожтэмын вал картэ вылын. Но кузёе (кузпалы) кулӥз пересьлэсь азьло. Утялтоно адями вераськыны валаку, сельсоветын ужасьёсты ӧтим. Огез шуиз: мынам уже ӧвӧл со. Мукетыз кык нунал ортчем бере куинетӥяз лыктӥз ик. Пересьлэн кылыз быриз номыр вераны ӧз быгаты ни. Кулӥз 76 аресаз. Солэн корказ али улэ нылы картэныз ӵош, прописказы ми дорын. Нуны возьмало. Уксё уж дуразы уг сёткало. Быгатоз-а сельсовет соосты отысь улляса поттыны? Ми ӧтем бере, отысь соку ик лыктысалзы ке, завещаниез луысал мон вылэ яке нылъёсы вылэ гожтыны. Книжкаысь коньдон табере государстволы кылёз-а? Кулэм муртлэн нылпиез ӧй вал. Сое ватыны ми уно пунэмаським. О.КУЗНЕЦОВА. Можга район. Валэктон шедьтон вылысь учком Россия Федерацилэн Граждан кодексысьтыз 552-тӥ ёзэтэз (статьяез). Кельтос (наследство) кунлы (государстволы) кыле таӵе учыръёсы: со завещаниея кунлы кельтыны чакламын; ваньбур кузёлэн наследникъёсыз ӧвӧл законъя но, заведещаниея но; вань наследникъёсты ваньбур кузё сыӵе правотэк кельтӥз; огез но наследник мылкыд ӧз кары ваньбурез басьтыны. Гожтэтъя тодмо: кулэм кышномуртлэн ӧвӧл выль завещаниез, законъя нырысетӥ черодысь наследникъёсыз (нылпиосыз, кузпалыз, анай-атаез). Соку та уже пыриськыны кулэ кыкетӥ черодысь наследникъёс - вын-агайёсыз, сузэр-апайёсыз, песятай-песянайёсыз. Соос ӧвӧл ке, ваньбур выже кунлы. Тӥ яке нылды улӥз ке пересь кышномуртэн ӵош, нуиз ке огъя хозяйство, ас коньдонзэ кутӥз ке ваньбурен кузёяськонэ, ужпумез эскерыны луэ суд пыр. Со ик чаклалоз ни, кинлы кылёз юртъер. Картэным люкиським но... Сюанлэсь азьло соин вуоно картэным ӵош басьтӥм вал машина. Собере люкиським. Луоз на-а мынам куреме ас пайме (уксёме) со ваньбурысь? Кызьы сое басьтоно? Лидия ОВЧИННИКОВА. Кияса районысь Вуж Салья гурт. Гожтэтысь валаны уг луы: кин пыриськиз машиналы коньдон люканэ но кин вылэ пусъемын автомобиль. Россия Федерацилэн Семья сярысь кодексысьтыз 34-тӥ ёзэт пусъе: ӵош улыку басьтэм ваньбур огъя лыдъяське. 36-тӥ ёзэт вера: кузпалъяськытозь люкам ваньбур но ӵош улыку огезлы кузьмам ваньбур лыдъяське огезлэн гинэ. Машина басьтэмын ке бракез пусйытозь, нош соин кузёяськон право сётэмын ке кузпалдылы гинэ, судын тӥледлы секыт йӧтоз сое огъя ваньбурен лыдъяны. Муминым 35 ар улӥм Ми муминым ӵош 35 ар ӵоже огазьын улӥм Ижысь кык комнатаен квартираын. Кык сузэръёсы кемалась ас семьяосынызы нимазы кариськемын. Соослэн но нылпиоссылэн асьсэлэн квартираоссы. Муми, пенсие потыса, висись луиз. Мон ноку но ӧй кышнояськылы. Мемиме ачим утялтӥ: сиён пӧзьтӥ, дӥсьсэ миськылӥ. Нош сузэръёсы аръёсын ӧз ветлылэ сое эскерыны. 1995-тӥ арын одӥгез сузэре мемиме курем ас дораз прописать карыны одӥгзэ пизэ. Нош пи одӥг нунал но татын ӧз улы. Мемие ик прописка понна дун тырылӥз. Берло дыре та пиез дорысьтыз выписать карыны малпа вал ини, но шӧдтэк шорысь улонысь кошкиз. Табере сузэре мыным шуэ: - Таиз комната луоз мынам пиелы! Мумыме ватэм бере ик солэсь комнатазэ ӵогаса кельтӥз. Нош мон малпасько ни вал кышнояськыса та квартираын улыны. Мынам тодэме потэ: луэ-а племянникелэн басьтэмез со комнатаез, аслаз квартираез бадӟым ке? Луоз-а мынам сое выписать кареме дорысьтым? В.КУДРЯШОВ. Гожтэтады тӥ ӧд ивортэ квартирадылэсь кузёзэ. Нош соин герӟаськемын выпиская пӧртэм учыръёс. Шуом, кык комнатаен квартирады приватизация пыр асьтэлы куддылы ке басьтэмын ӧй вал. РСФСР-лэн Улон инты сярысь кодексысьтыз 54-тӥ ёзэт чакла: улон инты возись(наниматель) быгатэ ас дораз пыртыны кузпалзэ, нылпиоссэ, мумы-бубызэ, мукет ӵыжы-выжызэ, ужаны быгатӥсьтэм но сюдоно-вордоно муртъёсты, семьяысьтыз ваньмыз быдэ вуэмъёс со понна гожтыса соглаш луизы ке. Озьы улыны пыртэмъёс мукетъёсыз сямен ик право басьто улон интыез уже кутыны, та пумысен мукет тупанкыл (соглашение) лэсьтэмын ӧй вал ке. Озьыен, улон интылы право басьтон понна племянникты та квартираын улыны кулэ вал. Нош со татын пусъемын вал но ӧз улы ке, квартира понна дун ӧз тыры но котырзэ татын ӧз возьы ке, тӥляд судэ вазиськемды луэ, сое улон интылы правотэк кельтон сярысь курыса. Регистрациысь куштыны племянниктэс озьы ик луоз суд пыр гинэ. Мукет улон инты воземез сое уг кельты квартирадылэн ог люкетэзлы правотэк. Квартирады приватизация пыр асьтэлы басьтэмын вал ке, ӵыжы-выжыдэс кошкытыны быгатӥськоды асьтэос но. ТОДМАТСКЕ УМОЙ АДЯМИЕН Ӵошатысал гурезен Алигес, шаерамы нырысетӥ Азьмурт быръён нуналэ, 49 номеро шор ёзо школаысен пумиським милициысь подполковникен Тофик Керимовен. Тодмо эше, газетчи, ӵошен вераськеммес адӟыса вазиз: "Тон, Кирилл Егорович, Тофик Гахверди-оглыез одно ик ӟечкыла выль книгаеныз!" - Маин? Книгады потӥз-а? - паймыса юасько. - О-о. Пичи гинэ... - Нош кылбуръёстэс пыртӥды-а? - Ӧй, - ӵыжектӥз офицер. - Куке но мукетаз книгаям, оло, пырто ай. Таиз - ужан амалъёсы сярысь. Милицилы гинэ сӥземын... Ӵуказеяз ик ужан интыяз пыри. Мырдэм портӥ одӥгзэ книгазэ. Сюлмысьтым ӟечкылай Анатолий Фёдоровичез, асьме пӧлын азербайджан эшмес озьы гинэ шуо угось, "выль пыжем колдыеныз". Азинсконъёс сӥзи. Бадӟым гурезь выжыысь пызьырась ошмес вуэз сямен юи вань чуръёссэ. Ӟеч тодӥсько уго Тофик Гахварди-оглыез. Дружинникъёсын кивалтыкум но, азьлогес но, али, пенсие потэме бере но, ялан син азям. Ужан интыез милям улон интыямы. Нуналаз одӥг пол гинэ уг ортчылы укно ултӥм. Туж ӵем ӟечъяськиськом, выль иворъёсты ог-огмылы мадиськом. Быдэс шаермылы тодмо ини Анатолий Фёдорович. подполковникозь будэмын. Кин тодэ, оло, пельпумъёсаз эшшо быдэн одӥг кизили вурӟозы на. 1989-тӥ арын Тофик Керимовлы сётӥзы "СССР-ысь дано участковой" ним, нош дас ар ортчыса, гадяз бырттӥзы "За заслуги перед Отечеством" орденлэсь медальзэ. Аслаз книгаяз Анатолий Фёдорович пыр-поч маде, кызьы будэмез, милицие сюремез сярысь, асьме шаермес, татысь калыкез яратыны вуэмез сярысь. Туж огшоры гинэ нимам книгазэ - "Четверть века - на одном участке". Но уно бамъёсыз чебер, вольыт кылын гожтэмын, отын лачак зарни пырыосыз, вунонтэм суредъёсыз. Туала бугырес улонамы олокыӵе но секыт висёнъёс алязы: лушкаськон, жугиськон, ог- огдэ вийылон, сантэман, рэкет (ужась муртлэн чырты сьӧраз улыны тыршон, дасьсэ кыскан), куртчанги, наркотикъёсын шузимон, СПИД... Ваньзэ вераса но уд быдты. Озьы бере гыжкалъёсын нюръяськонэз чутрак кужмоятоно. Со понна пумен уно егитъёсыз милицие ысто. Соосты нош одно ик дышетыны кулэ. Училищеосын, институтъёсын гинэ ӧвӧл - мӧйыослэн визьмынызы. Ӟечгес тодматоно соослэн амалъёсынызы. Кивоштӥсьёс мед адӟем карозы та удысын будэм но кыдам адямиослэсь. Оскисько: Тофик Керимовлэн книгаез соослы зэмос визьмась, дышетӥсь луоз. Автор туж шонер лэсьтэ, пӧртэм гыжкалъёсын нюръяськонэ уногес калыкез кыскемез сярысь. Трос интыосын югдурез дэмен утёнъя сэрегъёс быдтэмын яке куашкан калэ вуэмын ини. Милям микрорайонамы со умой ужа. Эрказмемъёслы маза уг сёты. татын но юн шӧдӥське Керимов эшлэн сюлмаськемез. Калык сое гажа. анатолий Фёдорович угось котькудӥныз адямиен - законъёсты чакласьёсыныз но, эрказмем-асгынмемъёсыныз но - огъя кыл шедьтэ. Укыр урдскылӥсьёсызлы кулэ дыръя пезьдэт но сётыны быгатэ. Мар шуод, та ласянь шудоесь милям микрорайонамы улӥсьёс. Соос тодо: кулэ дыръяз Керимов котьку юрттоз, дыраз вуоз. Тофик Гахверди-оглы вордскемын гурезё интыын, Азербайджанысь Джалалабад ёросысь Базайрон гуртын. Асьме шаерамы кыдёкысь вуэм воргорон арысь аре бадӟымесь вормонъёс басьтэ, данэз вылэ но вылэ ӝутӥське. Соин ик сое улыгогес шаерысьтымы кыӵе ке ӝужыт курезен ӵошатэм потэ. Тани мае но одно ик вераны кулэ, дыр: тросэз асьме дорын палэнысь вуэмъёс, ӝыны даур но пӧламы улыса, удмурт кылэз уг тодо. Таиз - паймоно адями: солы ӵемысь вазиськиськод ӟуч кылын, со нош валэктэ удмурт сямен. Асьме калыкез пумтэм гажа. Книгаез выль авторлэн пӧрмем, шуыны луоз. Ас эшъёсызлы Тофик Гахверди-оглы Керимов милицилэн праздникез азьын дуно кузьым дасям. Одӥг-кык гинэ ӵектонъёсы вань. Туж усто луысал, та книгае автор аслэсьтыз егит дыръяз гожтэм кылбуръёссэ но пыртысал ке. Зэмос поэзиез яратӥсь мурт сюрес урдсы кожем адямиез но жалялоз, вӧсь уз кары. Аслаз сюлмыз небытэн ик, оло, со эрказмем муртъёсты но каньылэнгес буйгатыны- зӥбломытыны быгатэ, тужгес ик урод семьяосын юн даллашон ке ӝутске. Соин но, дыр, мыжыксэс дась возисьёс со шоры кусолы пумит из мактал уг урдско, быжзэс каньылля- каньылля шымырто. Мед, одно ик егит дырысьтыз куд-ог кылбуръёссэ мед пыртоз вал книгаяз. Тодэмея, огез таӵегесэз но гожтэмын вал: пияш вожъяське ӝужыт гурезьёслы-батыръёслы, улонлы вазиське, со, пӧй, мед юрттоз вал син шурдоно кадь азе тубыны. Нош зэмзэ ке верано, Керимов эш аслаз удысаз самой ӝужыт тубатэ, йылосэ, тубиз ини. Данэз кыдёкысен адске, быдэс шаерамы но Россиын вӧлмемын. Кӧня-кӧня газетъёс, журналъёс солы сӥзьылӥзы ни асьсэлэсь бамъёссэс! Бадӟымъёсыз но, пичиесьгесъёсыз но. "Комсомольская правда", кылсярысь, "Анатолий Холмс, или шерлок Керимов" шуыса данъя сое, куд-огез чырмыт Анискинэн но ӵошато. Ваньзы туж шонер гожто. Мултэс ӧй луысал, вылды, со дунъетъёсты но книгаяз пыртыны. Огкылын, Азербайджанысь удмуртомем, вань сюлмыныз асьмеды гажась эшмылы уката бадӟымесь азинсконъёс басьтыны мылкыд карем потэ. Весяк милициын уз ужа, арлыдыз биниськемъя тодэ ваёнъёс гожъянын но, творчество удысын но аслэсьтыз кужымзэ мед эскероз вылэм. Кирилл ЛОМАГИН, писатель. Шӧкыч Очей Толилы - пӧсь салам Чеберае мынам Егит мурт нылашез нырысь ик маизъя меда синйылтэ? Шонер, вылтусызъя. Мон но озьы ик. Аслым инмар мугор сётымтэ, вераны ик возьыт: со витьтон вить сантиметр гинэ, ява. Соин, лэся, котьку но ӝужыт нылъёслы синмаськылӥ. Нош соос... Эх, мар веранэз ни. Кӧня серекъямзэс, бышкись кылъёссэс, исаськемзэс мон чидано луи. Озьы ке но, коть вандыса кушты, кельшо бере, кельшо мыным ӝужытъёс. Нош нылъёс сое уг валало, лэся, ялан палэнско дорысьтым. Эшъёсылэн кемалась туганъёссы вань ни, нош мон весь огнам но огнам. Ярам ай, солдатэ мынон дыр вуиз. Татын ни мыным удалтӥз ке удалтӥз. Мукетъёсыз сямен дэриез пыдъёсыным нэлькыса ӧй улы, зарезьёстӥ уяй, кок луцса служить кари. Кык ар ӵоже нуйтӥськи, табере сю куатьтон луи ява. Гуртэ бертон дыр но вуиз. Анае монэ адӟыса, воксё чабкиськиз. - Э, быри, Петыр, тон-а, та? Ма, воксё батыр кадь луэмед ук! Ма, тодмо ни, анай ӧвӧлтэмзэ но вань кароз. Озьы ке но, мон малпаськонэ уси: оло, зэмзэ но, ӝужытгес луиськем? Озьы бере, нылъёс но шорам учкозы. Ма, собере кин чидалоз, таӵе чебер чильк-вальк кисьтаськись погонъёсы шоры учкыса? Мон огшоры ожгарчи ӧвӧл ук, мон - моряк. Штание но мынам клёш, йырам - бескозырка. Тазьы малпаса, ӝытазе эшъёсын клубе потӥ. Ма, ачим кадь лапег нылъёс милям гуртамы трос гинэ, уноез кырмышъязы шорам. Но ма карод? Сюлэм ӝужытсэ куре. Озьы ӝыны ар пала ортчиз. Но инмаре сюлэм висёнме шӧдэм. Сӥзьыл ми доры пинал фельдшер вуиз. Соку ик кылӥськиз ни гурт кузя: - Шача кузьда нылаш вуэм, ява. Полинаез, фельдшермылэн нимыз озьы вылэм, адӟи но воксё бакоми. Сыӵе мусо потӥз со мыным. Мугорын, зэмзэ но, ӝужыт ке ӝужыт. Гуртамы Митрей агай гинэ со ӝуждагес луоз, дыр. Мон каллен Полинаез чакласько ни, пумен воргоронъёслы ушъяськисько: - Чебер, веськрес нылаш о-о-ведь? Мон сое одно ик кышно басьто. - Ну куасалтӥд ке, куасалтӥд. Кызьы сыӵе кузьгубеен улод. Кӧня ке гинэ кык метрозь уг вуы. Тыныд, Петыр, сое чупан понна сьӧрад пукон нуллоно луоз, - серектӥз Олёш. Воргоронъёслэсь серекъямзэс мон пелям ик ӧй поны. Аслэсьтым малпанме быдэстон сярысь гинэ сюлмаськи. Кема гинэ улӥ вазьылыны дӥсьтытэк. Нош одӥг пол клубын шулдыръяськон дыръя сэзёми но Полинаез эктыны ӧти. Паймод, ява, нылаше воксё ӧз пумитъяськы. Небытак мыняса вальсэз поръяны потӥз. Бергаськом, нош со ялан лапеггес кариськыны выре. Мон ӧй чида ни вазьытэк: - Полина, кыӵе тон чебер, ӝужыт, веськрес нылаш. Кӧня нылъёс синву кисьто тон кадь луон понна. Манекенщица но тӥни. Хоть туннэ ик мукет кунъёстӥ чебердэ возьматыса ветлы. - Нош мон возьдаськеменым ялан лапеггес кариськыны турттӥсько, губырес карнан кадь луи ни. - Бен уго. Тон астэ ӝужыт шуыса тэргаськод, нош мон асме шуисько лапег. Озьы ке но, сюлэмъёсмы одӥг кадь зол йыггето: быгатӥськом яратыны но, ужаны но, шулдыръяськыны но, куректыны но. Та вераськон бере ик мынам улонэ воштӥськиз. Ӝыны ар улыса Полинаен ми кузпалъяським. Тани дас ар улӥськом ини. Кык нылъёсмы будо. Эшъёсы телевизор пыр манекенщицаосты, чеберинаосты учко, нош мынам чеберае вӧзам. Мусое мынам, коӵышпие мынам шуисько ке, Полинае воксё пичи нылаш кадь луэ. Нош со Петыре, мусо батыре шуэ ке, соку ик одӥг йырлы будӥсько, ява. Е. Богданова. Шӧкыч Пеляд пон! Базар бӧрӟытоз зар-зар Дунтэм вуз утчаса но коньдонзэс шыръяны турттыса, басьяськисьёслэн пыд- ныръёссы ӵемгес базар пала учко. Мар бен, умойтэмез отын номыр ӧвӧл, но ӵем дыръя адямиос асьсэды асьсэос пӧяло. Вузчиос азе пуктэм куронъёсты тодытэк куд- огез зар-зар бӧрдон калэ вуо, базарысь дуно дӥськутъёс, пудкутчанъёс, мукет арбериос басьтыса. Озьы ӧвӧл шуоды-а? Туж умой, сыӵе ишан палэнтӥды ортчиз ке. Нош Олён песянай табере базар дортӥ палэнскыса ортче. - Пенси будэтэмзылы шумпотыса, аслым шуныт кофта басьтоно кариськи, - маде сизьымдон вить арессэ ортчем песянай. - Базаре кожи но, синъёс ик палёмо. Вузчиос котырам тэбинизы, мар, пе, кулэ, песянай. Озьы но озьы, валэктӥсько. Макня йыр, кык кофта басьтыса кошки ведь базарысь. Дунтэмесь, пе, уд жаля, озьы шуыса ик келяз монэ шӧртчи нылкышно. Э-э шумпотыса бертӥсько ни, нылылы, пӧй, ушъясько: куинь сю манетлы кык кофта басьтӥ, улон даурам тырмоз ни. Нош нылы куаретэ: ма, пересь даурад пинал ныл кариськыны турттӥськод-а, кытчы дӥсялод, пе, со кильтро дӥськутъёсты. Ӵуказеяз выльысь базаре мынӥм нылыным, вузъёсме одӥг ӟечезлы воштыны шуыса. Сьӧськиз ведь вузчие, мон, пе, тонэ ӧй ик адӟылы. Ма, неужто синъёсы алдасько? Ярам, нылы мыным мукет шуныт кофта кузьмаз, нош аслэсьтым басьтэмъёсме школаын дышетскись нылыз но малы ке ӧз яраты. Ярам, таиз песянай ни, шӧртчи вузчиослы кема ик ӧвӧл алданы со кадьёсты. Но егитъёс озьы ик бӧрдон калэ вуо ук. Тодӥсько одӥг сыӵе нылокез. Кроссовки шуон пыдкутчан басьтӥз но, соиз одӥг нуналлы но ӧз тырмы. Пыдчиньы ныръёсыз, промокашка выллем мае ке пасяса, ураме куриськыны кутскиллям. Пӧрмостэм пыдкутчанзэ нылок вузчилы берыктыны малпаз. Кытын, пе, соиз кык киосыныз ик пыкъяське: эн басьты вал, мон тонэ кужмысь ӧй кары. Жаль, басьяськисьёслэсь правооссэс утись ёзъёс но та учыре нылоклы уз юрттэ, кияз чекез ӧвӧл угось. Соин ик, базарысь дуно дӥськут басьтыны малпады ке, эн вунэтэ вузчилэсь бумага-чек курыны. Котькуд вузчилэн со луыны кулэ. Но кыӵе визьмо мурт аслэсьтыз барышсэ бумага сьӧры келялоз? Л. Малых. ТОДМАТСКОН СЭРЕГ "Салон для двоих" - озьы нимаське Ижевскысь тодматскон служба, кивалтэ соин Алевтина Иосифовна Агалакова. Салон ужа огназы улӥсьёсын, кинлэн кылдытэмез потэ таза семья. Лулсэр висёнъёсын курадӟисьёс, кышнояськем-быземъёс, пытсэт сьӧрын пукисьёс медаз вазиське. Улӥын верам кыӵе ке абонентэн тодматскемды потэ ке, гожтэ солы гожтэт, келялэ салонлэн кивалтӥсезлы (абонентъёслэсь адресъёссэс нокинлы уг келяло). Гожтэт пыр кусып возён понна ыстоно луоз 10 манет яке 5 конверт. Вазиськоно таӵе адресъя: 426060, Ижевск город, а/я 3307. Гажано лыдӟисьёс, тодады вайытӥськом: та салонысь абонентъёслы сӥзем гожтэтъёстэс "Удмурт дунне" газетэ эн келялэ. Аб.4255. Игра ёросын улӥсь нылмурт, 26/158, ужа служащий луыса, огъя кыл шедьтыны быгатӥсь, вераськись сямо. Шедьтэмез потэ улонысь эшсэ. Аб.4256. Вотка ёросын улӥсь ӟуч нылмурт. 25/170. Тодматскысал 30 аресозь пиосмуртэн. Аб.4258. Пичи Пурга ёросын улӥсь пиосмурт, 37/166, люкиськемын, вань аслаз хозяйствоез, выль юртэз. Семья кылдытон вылысь тодматскысал урод сямъёстэм, вазиськись 39 аресозь нылкышноен, нылпиосты но гурт улонэз мед яратоз. Аб.4259. Кизнер посёлокын улӥсь пиосмурт, 59/160, удмурт, сьӧд йырсиё, номырлы уг ёрмы, нылпиосыз нимаз уло, кышноез кулэмын, вань ӟеч хозяйствоез, пудо-животэз. Тодматскысал огнын улӥсь ас ёзо лякыт сямо нылкышноен. Аб.4260. Ижевскын улӥсь удмурт нылкышно, 39/160, дышетскемез средне-специальной, гуманитарной, нылызлы 7 арес, улон интыез вань. Семья кылдытон вылысь тодматскысал пыд йылаз йыг-йыг сылӥсь, лякыт сямо, ужез яратӥсь 37-42 аресъем пиосмуртэн. Аб.4261. Пичи Пурга ёросын улӥсь удмурт пиосмурт, 62/165, тазалыкез юн, кышноез кулэмын. Хозяйствоез ӟеч, котыраз чебер инкуазь, но огнын улыны мӧзмыт. Тодматскысал огшоры удмурт нылкышноен, улыны мыноно дораз. Аб.4262. Завьялово ёросысь удмурт нылкышно, 31/160, картэз кулэмын, пиезлы 9 арес, улон интылы но коньдонлы уг ёрмы. Лякыт сямо, азьлань улонлы оскись, ужась, яратэ кырӟаны, но коркан пиосмурттэк кырӟан гур уг кисьтӥськы. Аб.4263. Вотка ёросысь удмурт пиосмурт, 60/160, улон интылы но коньдонлы уг ёрмы, вань бакчаез. Яратэ ужаны, урод сямъёсыз ӧвӧл. Тодматскысал огшоры сямо, синмаськымон, лапеггес мугоро 49-55 аресъем нылкышноен. Президент тодмо ӧвӧл на Демократической партилэн Флоридаын улӥсь дурбасьтӥсьёсыз судэ вазиськизы, быръёнъёсты выльысь ортчытыны курыса. Кызьы ивортэ Би-Би-Си, Флоридаын быръёнъёч бюллетень аспӧртэм дасямын вылэм. Соин ик данакез бырйисьёс янгышаллям. Тани Палм-Бич городын азьпала потэм нюръяськонлэн аутсайдерез Пэт Бьюкенен. Солэн нимыз Альберт Горлэн нимыныз артэ вылэм. "Озьы бере, Бьюкенен солэсь ик куараоссэ капыртӥз". Пусйыны кулэ, республиканец Буш вормиз 29 штатын, люказ выборщикъёслэсь 246 куаразэс, демократ Гор азьпала потӥз 20 штатын, басьтӥз выборщикъёслэсь 260 куаразэс. Нош президент луон понна 538 куара пӧлысь 270-зэ люкано. Флоридаын бырйисьёслэсь куараоссэс выльысь лыдъяло, угось кандидатъёс татын одӥг мындагес куара люказы. Йылпумъянъёс туннэ тодмо луыны кулэ. Озьы ик эскерон уж 9 нунал ӵоже кыстӥськыны быгатоз на - ӵапак сомында дыр кулэ почта пыр сётэм куараосты лыдъян понна. Басьтэмын Интернет пыр. Данъяськисько Удмуртиен Мон пӧртэм газетъёсты но журналъёсты лыдӟисько но шумпотӥсько, куке шедьтӥсько Удмуртимы яке Ижевскмы сярысь иворъёсты. Тани Москваысь "Эксперт" журнал гожтэм Россиыс 200-эзлэн самой бадӟымесь предприятиослэн ваньбур поттэмзы сярысь. Му вӧй но солэсь кизер эстӥськон поттӥсь предприятиос пӧлы пыртэмын "Удмуртнефть" огазеяськон но. Отын со тямысэтӥ интыез басьтэм. Предприятилэсь продукцизэ уже кутӥсьёс пӧлын верамын "Купол" ИЭМЗ, "Ижмаш" но "Ижсталь" заводъёс. Калык куспо "Австралиана Дискавери Маркет" ассоциациысь экспертъёслэн дунъет сётэмзыя, Ижевскысь механической завод данъямын "2000-тӥ арлэн предприятиез" нимо призэн, солэн директорезлы В. С. Чугуевскийлы сётэмын зарни медаль но диплом. Нош Аргентинаын али ортче "Армас - 2000" адӟытон. Отчы пыӵалъёссэ но карабинъёссэс келяллям ижъёс но тулаос. Та пӧйшуран тӥрлыкъёсын тужгес но тунсыкъясько, пе, Латинской Америкаын улӥсьёс. Озьыен, Удмуртиез тодо дуннелэн пӧртэм сэрегъёсаз. В. Рогалев. Сьӧд тушо маскарчи Та артистэз элькунамы тодӥсьтэмез ик ӧвӧл, дыр. Лапеггес гинэ мугоро, сьӧд тушо, чупрес выросо, визьмо синмо воргоронэз адӟо ке, адямиос соку ик, вашкала тодмозэс пумитам выллем, пальпотыны кутско. Ма, мугез но вань уго: Драмая удмурт кун театрлэн сцена вылаз кызь сизьым ар ӵоже ужатозяз, шаерамы ӧвӧл ни, дыр, огпол ке но вуылымтэ гуртэз, ӧвӧл, дыр, радио пыр ке но куаразэ кылылымтэ мурт. Нош сцена вылын шудэм рольёсыз сярысь ке верано, соос туж но туж трос. Уноез - комедиосысь геройёс. Соин ик, лэся, адямиослэн В. Байков пумысен асьсэлэн малпанзы кылдэмын: со - маскарчи. Соин ик, дыр, артист сцена вылэ серемес луисьтэм рольёсын потыку но сое пальпотыса пумитало ни. Тани коньывуонтолэзьлэн (октябрьлэн) пумаз Драмая удмурт кун театр, 70-тӥ сезонзэ усьтыса, нырысьсэ возьматӥз Бразилиысь драматурглэсь Гильерми Фигейредулэсь "Эзоп" ("Ӟичы но виноград") геройлыко комедизэ. Та пьесаез сцена вылэ вуттон понна, трос кужымзэ сётоно луиз В. Байковлы но. Ог дасо арлэсь кема нуллӥз со сюлмаз та пьесаын валтӥсь геройлэсь Эзоплэсь рользэ шудон сярысь лушкем малпанъёссэ, уно пол кенешылӥз театрысь кивалтӥсьёсын, режиссёръёсын, артистъёсын... Но нокин но пьесаез пуктон борды ӧз басьтӥськы. Соку Вячеслав Петрович кутӥз но ачиз басьтӥськиз пьесаез удмурт кылэ берыктон борды. Кылем сезонлэн пумаз пьеса пыртэмын вал театрлэн ужан тепертуараз, нош туэ сое адӟизы ни учкисьёс. Маин бен бордазы кыско вашкала Грециын улэм адямиослэн малпаськонъёссы? Соос, вылаз ик, возьматэмын туала Бразилиысь драматурглэн визьмалпанъёсыз пыр. Пьесаез сцена вылын пуктӥсь режиссёр Кадим Галиханов но, отын шудӥсь артистъёс но, вить сю ар талэсь азьвыл ортчем учыръёсын тодматыса, туала улонмы сярысь верало. Автор уго аслаз пьесаяз ӝутэ котькыӵе вакытэ лэчыт луись ужпумъёсты. Соос - секыт зӥбет улын курадӟон, коньдонэз но ваньбурез адямиослэн улонзылэсь вылӥе пуктон, яратонэз но Инмарез палэнтон. Вашкала Грециысь ассэ философ шуись Ксанф (артист Кадим Галиханов) кыдёкысь шаеръёсысь басьтыса вае уаръёсты (рабъёсты) - эфиопез но Эзопез. Со егит кышноезлы Клеялы (артистка Светлана Ложкина) аспӧртэмлыко кузьым луэ. Кылтэм- ымтэм эфиоп кылзӥськисьтэм уаръёсты жугыны гинэ быгатэ, нош Эзоп висъяське аслаз туж визьмо луэменыз. Со уго вань учыръёс пумысен басняос вераны быгатэ, пӧртэм шуг-секытъёсысь но капчиен потон амалъёс шедьтэ. Тани Ксанф юэм йырыныз Агностос ожгарчи (артист Сергей Салтыков) азьын ушъяськиз: мон ченгешыса быдэс зарезез но юыны быгато. Ӧй ке юы, мон тыныд быдэс юртъерме кузьмало. Дыр вуиз, нош зарезь юэмын ӧвӧл. Соку тӥни кузёезлы юрттэ Эзоп. Тон, пе, нырысь зарезе усись вань шуръёсты ӵыпыны кос, собере, пе, мон юо отысь вузэ. Нош кин ӵыпоз сомында шуръёсты? Таӵе визьмо валэктэмез понна, Ксанф Эзоплы эрик кузьмало шуиз вал. Кытын, пе, со?! Эзоп быгатэ ик аслыз эрик басьтыны, но сое мукет карын куто но, лушкаськись шуыса, выльысь вутто азьвыл кузёез доры. Табере сое яке меӵ гурезь йылысь зарезе куштозы, яке со нош ик Ксанфлы уар луыны кулэ. Эзоп нокызьы но мылкыд уг кары ни выльысь зӥбет улэ сюрыны, со быръе быронэз. Ляльчи луонлы пумитъяськон, зӥбетлэсь мозмытскон ужпум быдэс спектакль пыр поттэмын. Спектакльлэсь пуштроссэ мургес усьтыны юртто Марина Ходыревалэн крезьгуръёсыз, нош Касим Галихановлэн декорациосыз асьмеды, зэмзэ но, Вашкала Грецие вутто кадь. Спектакльын огшоры уар, Эзоп, аслаз малпанъёсыныз, улонэз валаменыз философлэсь но вылӥынгес луэ. Со бордын пьесалэн комеди пуштросэз но. Та философи валатонъёс матын луо аслыз но Вячеслав Байковлы - со туж яратэ лыдӟиськыны, пӧртэм вакытъёсы улэм философъёслэсь ужъёссэс сӥсъяны-поръяны. Лыдӟиськыны яратэмез сярысь вераноке, со пичи дыръяз ик сыӵе вал. Сыӵе сям пыӵатӥз солы анаез, вань улонзэ дышетӥсь луыса ужам мурт Раиса Николаевна. Славалэн песятайёсыз но уго алнаш палъёсын туж тодмо адямиос - дышетӥсьын ужам муртъёс вылӥллям. Озьыен, со куинетӥ выжыысь интеллигент ни. Шор Утчан школаын тямыс классэз йылпумъямез бере, Слава лыктӥз Алнаш шор ёзо школае. Сое йылпумъяса дышетскыны пыриз вал Ижысь культурая училищелэн режиссёръёсты дасян люкетаз. Ар гинэ дышетскиз - конкурсэз ортчыса вуиз Москваысь Б. В. Щукин нимо Вылӥ театр училищелэн удмурт студияз. Татын ини, улонлэн зэмос ӧраз сюрыса, мылысь-кыдысь дышетскыны кутскиз сюлэмызлы ярась ужлы. Удмурт шаерысь мукет кызь нылъёсын но пиосын ӵош вить ар ӵоже Москваысь огаз тужгес но тодмояз вузын дышетскон туж тунсыко но пайдаё вал. Со вакытэ та училищеын дышетӥзы туж тодмо режиссёръёс но артистъёс. Училищелэн ректорез вал СССР-ысь калык артист Б. Е. Захава, соин ӵош егитъёслы вань быгатэмзэс но тодон-валанзэс сётыса ужазы Евгений Вахтанговлэн меӵак дышетэм адямиосыз - В. К. Львова, Ц. Л. Мансурова, И. М. Толчанов. Соосын артэ ужазы ас удысысьтызы егитгес усточиос. Тани Славалы шуд усиз СССР-ысь калык артистэн профессорен И. М. Толчановен "Фома Гордеев" дипломной спектакльзэс дасян бордын ужаны, отын со шудӥз Яков Маякинлэсь рользэ (ас вакытаз солэн дышетӥсез та ролез туж быгатыса шудӥз вал Евгений Вахтангов нимо театрлэн сцена вылаз). Россия Федерациысь калык артист профессор В. Г. Кольцов Вячеслав Байковен но Галина Владыкинаен ӵош экзаменлы шуыса пуктӥз Ж.-Б. Мольерлэн "Лекарь поневоле" комедиысьтыз одӥг люкетсэ. Бӧрысь ни, театрын ужаны кутскемзы бере, та спектакль удмурт кылын "Эриктэм эмъясь" нимын Удмурт театрлэн сцена вылаз потӥз. Сганарелез отын туж тунсыко но аспӧртэмлыко шудӥз В. Байков. Ар бӧрсьы ар, сезон бӧрсьы сезон... Рольёс, спектакльёс, репетициос, гастрольёс, учкисьёсын пумиськылонъёс... Тани театрын но элькунысьтымы калык артист Вячеслав Петрович Байков 27-тӥ сезонзэ шудэ, улэм аръёс но пельпум сьӧрын витьтон луизы ини. Быдэ вуэмын ни кыкез ик нылъёсыз. Лена, Удмурт кун университетысь историяя факультетэз йылпумъямез бере, татын ик тодмо тодосчимы В. Е. Владыкин дорын аспирантураын дышетске, нош Дина нылыз туж усто суреда. Университетэз йылпумъяса, со, суредась луиз ке но, та вакытэ ужа Удмурт радиоын. Ассэ эскере журналистика удысын: егитъёслы программаос дася. Вячеслав Петровичлэн куд-ог рольёсыз пыраклы сюлэмаз пыӵаса кылизы, куд-огез, оло нош, вуно но... Нош та актёрлэсь нимзэ вераськом ке, син азе соку ик пуксё Капыръянов ("Атас Гири"), Алангасар ("Сюан"), Пугачёв ("Гаян"), Пери ("Эш-Тэрек"), мукет рольёс, озьы ик - нылпиослы выжыкылъёсысь пӧртэм пумо пӧйшуръёс, губиос, пӧртмаськись пересьёс... Артист ноку но буйгатскыны кулэ ӧвӧл лэсьтэменыз, со котьку но выль ужъёс сярысь малпаськыса улыны кулэ. Тэк кыллись из ултӥ ву уг бызьы, шуо калыкын. Нош Вячеслав Байков кадь чупрес адями сярысь тэк улӥсь ноку но уд шуы. Сое тӥ нош ик огпол адӟыны но валаны быгатоды 10-тӥ шуркынмонэ (ноябре) ӝыт, элькунысьтымы калык артистэн Драмая удмурт кун театрысен пумиськыса. Леонид Гусев, Удмурт радиоысь режиссёр. Театре пырон азьын. Спектакльысь суредъёс: Клея - артистка Светлана Ложкина. Эзоп - Удмурт Элькунысь калык артист Вячеслав Байков. Ксанф - артист Кадим Галиханов. Агностос - артист Сергей Салтыков. Мели - Удмурт Элькунысь калык артистка Августа Лазарева. Владимир Беломорскихлэн туспуктэмъёсыз. Етӥн будэтон паськыта Юкаменск ёросысь "Ежевское" эштосын туэ 90 гектар вылэ етӥн кизизы вал. Уй пал буртчинэз хозяйствоысь ужасьёс август толэзе ик утялтӥзы. Льнозаводэ вуэм етӥнзы вылӥ дунъямын. Нырысь ваемазы ик хозяйстволы 143 сюрс манет коньдон тыремын. Табере, Узбекистан пӧламы ӧвӧл ни бере, Россиын улӥсьёслы шуггес луысал басма куыны. Та шуг-секытысь потыны юрттозы "Ежовское" эштосын сямен етӥн будэтыны басьтӥськем гурт калык. Выль удыс пайдаё луыны чаклаське. П.НИКОЛАЕВ Таӵе памятник медаз луы вылэм Кемалась ӧвӧл, Балезиноын ортчиз выль памятникез усьторнлы сӥзем ужрад. Со пуктэмын Афганистанын но Чечняын быремхёслы сӥзьыса. Балезиное, вордскем музъем вылазы ожъёсысь ӧз берыстке угось С.С.Хлобыстов, Л.В.Шиляев, К.Д.Князев, А.А.Кулаков. Та мӧзмыт но бадӟым куректонэн герӟаськем ужрадэ ветлӥзы ёросысь кивалтӥсьёс, Афганистанын но Чечняын ожмаськемъёс, быремъёслэн анай-атайёссы, агай-вынъёссы но мукет ӵыжы-выжыоссы. П.КУЗНЕЦОВ. Завьяловоын выль музей кылдэ Завьялово администрация краеведениея музей усьтон сярысь решение кутӥз. Со понна нимысьтыз инты висъямын. Али мыно лэсьтӥськон но тупатъян ужъёс. Музеез усьтыны чакламын 4-тӥ ноябре, Удмуртилэн вордскем дырысеныз 80 ар тырмон нуналэ. Ёросысь кивалтӥсьёс калыклы вазиськизы, пӧртэм экспонатъёс курыса. Со пӧлын луыны быгатозы вашкала дӥськут но корка котырысь арбериос, усточиослэн быгатыса лэсьтэм киулъёссы, инкуазез утьыны чаклам арбериос, данэ потэм адямиослэн документъёссы но мукетыз. П.СКОБЕЛЕВ. Клуб "улӟиз" Пичи Пурга ёросысь Кулаево гуртысь клуб ворсаськыса улӥз вал, калыклы огинэ люкаськон инты ӧз шедьылы. Но ар талэсь азьло клубез тупатъязы но усьтӥзы, шедиз соин кивалтӥсь адями но - Евгений поликарпов. Кузё шедиз бере, табере клуб котырын но чылкыт луиз, пушкыз но чебермиз, со понна пушсэ но вылзэ буязы, та ужъёсты быдэстыны буёлэн юрттӥз "Норья" гурт кооператив. Клубын егитъёслы ортчытъясько дискотекаос, нош алигес отын ортчиз самодеятельной удмурт композиторен Пантелей Николаевич Кузнецовен но Уваысь нылкышно ансамблен пумиськон. Соосты куное ӧтем "Норьялэн" кивалтӥсез С.И.Соколов. Кырӟанъёс кылзэмзы сяна, Кулай калык трос юанъёс сётъяз Пантелей Николевичлы кырӟанъёс кылдытъямез сярысь. Пумиськон ортчиз туж шулдыр но пайдаё. П.НИКОЛАЕВ. "Айна" Югытэныз, шунытэныз, чебереныз та спектакль али но сюлэмам. Ӝыны ар ортчиз ке но ини. Сыӵе отын ваньмыз тупа: пуштросэзъя кабыз. Пумыз сюлэмез чигиськытэ ке но, ӝутскем мылкыд кемалы возе бурдъяса. Учконо ке, огшоры гинэ кадь мадёс: узыр но куанер луон ваче пумит шуккисько яратӥсь адямиослэн сюрес вылазы. Нош ворме татын, валамон ини, яратон. Нош кыӵе пуктэмын та спектакль! Декорациос олокыӵе йӧспӧртэмъямын ӧвӧл, но туж тупало со вашкала вакытлы. Синэз шумпотто яркытэсь дӥсьёс но: соос удмурт калык вылысь басьтэмын, таӵе чеберлыкез утеменызы данъяськыто. Спектакль быдэсак крезьгур пӧлы выемын, кырӟанъёс юртто действилэсь пуштроссэ уката муромытыны. Тани, шуом, Артан эшъёсыныз пото ке, кионъёс вузыны кутско, кинэ ке кесяны медо кадь. Айна ке адӟиське, солэн мылкыдызъя кырӟало уӵыос но, шур но жильыртэ. Нош пиос жугиськыны ӧдъяло ке, оло, шокамысь ик дугдӥськод, шымыраськод - таиз но эктонлы матын, крезьгурен юнматэмын. Огъя вераса, актёръёс та спектакльын уг шудо - соос уло, шумпото, курадӟо но нюръясько. Со Валентина но Игорь Моисеевъёс, Алексей Ложкин, Елена Сунцова, Наталья Тур-Ветрова, Валерий Мадзеков, Валентина Загуляева, Раиса Нефедова, Леонид Романов но мукетъёсыз. Спектакль бордын зол тыршиллям режиссёр (со ик пьесалэн огез авторез) Василий Ушаков, кылбурчи Татьяна Чернова, крезьгурчи Николай Шабалин, суредась Владислав Анисенков, хореограф Ксения Русских но мукетъёсыз. А. Бердникова. Редакцилэсь. Та спектаклез учкыны мылкыд карисьёслы ивортӥськом: "Айна" крезьгуро лирико-романтической драма Удмурт театрлэн сцена вылаз возьматэмын луоз вторнике, 14-тӥ ноябре. Гуртын улӥсьёс азьпал дырлы куронзэс вераны быгатозы, театре вазиськыса. Ӟеч нимыз уз вуны Алнашъёс туж ӟеч пусйизы аспал эшсылэсь, улонысь дырызлэсь вазь кошкем кылбурчилэсь Герман Алексеевич Ходыревлэсь вордӥськем нуналзэ (туэ 23-тӥ октябре Герман Алексеевичлы тырмысал ини куатьтон тямыс арес). Таин валче ёрос кивалтэтлэн юртаз туж шуныт мылкыдын тырмем пумиськон ортчиз. Таяз учыре но ужрадэз усьтӥз Алнаш ёросысь депутатъёслэн кенешсылэн тӧроез Нина Андреевна Образцова. Герман Алексеевич Ходырев сярысь ӟеч тодэ ваёнъёссэс веразы тросэз алнашъёс. Котькудӥзлэн сюлэмаз кылизы Ашальчи Окилэн Алнашысь музееныз кивалтӥсьлэн Удмурт Элькунысь культура удысысь дано ужасьлэн Людмила Ивановна Посадовалэн, ёросысь Писэйгурт шор ёзо школаысь дышетӥсьёслэн Ольга Михайловна Бусыгиналэн, Екатерина Павловна Машковалэн, Тыло школаысь дышетӥсьлэн кылбурчилэн ӵыжы-выжыезлэн Елена Герасимовна Смирновалэн верам кылъёссы. Писэйгурт шор ёзо школаын дышетскись туж мусо пиос, Саша Евсеев но Костя Исаков, мылысь-кыдысь лыдӟизы поэтлэсь кылбуръёссэ. Удмурт Элькунысь Писательёслэн огазеяськонзылэн тӧроез драматург Егор Егорович Загребин, огазеяськонлэн тӧроезлэн воштӥсез драматург но прозаик Владимир Яковлевич Самсонов, покчиослы "Кизили" журналлэн валтӥсь редакторез прозаик Ульфат ШаХэутдинович Бадретдинов но ас веранъёссэс герӟазы матысь эшсы, дышетӥсьсы но усто кылбурчи сярысь тодэ ваёнъёсын. Сюлэмез вырӟытӥзы шаерысьтымы тодмо нылпи кылбурчилэн "Алнаш колхозник" газетлэн редакторезлэн Иосиф зОтович Ивановлэн кылъёсыз. - Зэмос гожъяськисьёс ноку но трос уг луо, - шуиз со. - Огпол Герман Алексеевич мыным шуиз: "Нылпи кылбуретын тон табере мон интые генерал кылиськод..." Нырысь ик ӧй, берло гинэ валай та кылъёслэсь пуштроссэс. Кылбурчилэн шайгуэз вылэ но трос калык люкаськылӥз. Барельеф вылын (сое кылдытэм шаерысьтымы тодмо скульптор Удмурт Элькунысь искусство удысысь дано ужась Анатолий Егорович Аникин) - тыпак ачиз Герман Алексеевич Ходырев. Тусбуйзэ синйылтыса, адямиос шуизы: "Та вакытэ таӵе ик луысал ини яратоно кылбурчимы..." Нош усьтэм книга вылэ гожтэмын Герман Алексеевич Ходыревлэн кылбурысьтыз таӵе чуръёс: "Мон - удмурт пи, мон - тапалась..." Шайвылын Герман Алексеевич Ходырев сярысь тодэ ваёнъёссэс веразы кылбурчилэн сузэрез Роза Алексеевна Григорьева, кузпалыз Ирина Михайловна Ходырева, Удмурт Элькунысь нациосын ужан политикая министрлэн воштӥсез Елизавета Владимировна Петрова, мукет адямиос. Та нуналэ пумиськонэ люкаськылэмъёс чик ӧз вунэтылэ одӥг малпанэз: кылбурчилэсь куд-ог книгаоссэ нокытысь пумитаны уг луы ни - соосты выльысь поттоно вылэм. Та куронэз лыдэ басьтыса, Удмурт Кивалтэтысь Секретариатлэн Тӧроезлэн воштӥсез Юрий Алексеевич Попов шуиз: кылбурчилэсь книгаоссэ выльысь поттон сярысь курондэс одно ик иворто вылӥ кивалтӥсьёсмылы. Уно ӝож кырӟанъёс чузъяськизы та нуналэ. Ваньмыз соос кылдытэмын Герман Алексеевич Ходыревлэн кылъёсызъя. Уд ик шӧды - ӝоген кылбурчилэн вордӥськемез дырысен сизьымдон ар тырмоз. Со сярысь али ик малпаськоно ни. Е.РОМАШОВА. Республиканская комиссия объявляет конкурс по привлечению автотранспорта юридических и физических лиц к маршрутным перевозкам пассажиров в междугородном сообщении Начало проведения конкурса по истечение месяца с момента публикации в печати. Дополнительную информацию об условиях конкурса можно получить по адресу: 426057, г. Ижевск, ул. Красная, 144. Телефоны: 78-25-26; 78-07-02. Условия проведения конкурса по привлечению автотранспорта юридических и физических лиц к маршрутным перевозкам пассажиров в междугородном сообщении 1. Конкурс проводится в целях повышения культуры и качества обслуживания пассажиров, более полного удовлетворения потребностей населения республики в пассажирских перевозках. 2. Конкурс проводится ежегодно. 3. К участию в конкурсе допускаются владельцы автотранспорта, оформившие в установленном порядке: - заявку на участие в конкурсе с указанием характеристики транспортных средств; - сертификат соответствия на услуги по перевозке пассажиров автомобильным транспортом в междугородном сообщении; - заключение Удмуртского отделения Российской транспортной инспекции о выполнении конкурсантом лицензионных условий в предыдущем году и готовности к выполнению данных перевозок; - заключение Управления Государственной инспекции безопасности дорожного движения Министерства внутренних дел Удмуртской Республики о наличии дорожно- транспортных происшествий и других нарушений Правил дорожного движения. 4. Заявка на участие в конкурсе представляется в конкурсную комиссию не позднее десяти дней до его проведения. 5. Решение комиссии об участии заявителя в конкурсе принимается большинством голосов. 6. Конкурс оценивается по балльной системе в соответствии с постановлением Правительства Удмуртской Республики "Об утверждении Временного положения по привлечению в Удмуртской Республике автотранспорта юридических лиц и физических лиц к маршрутным перевозкам пассажиров в городском, пригородном и междугородном сообщении" от 18 августа 1997 года � 774. 7. Победителями конкурса признаются владельцы автотранспорта, набравшие большинство баллов. 8. При равенстве баллов у нескольких конкурсантов победителями конкурса признаются владельцы автотранспорта, обеспечившие перевозку пассажиров с наилучшими условиями проезда, высоким уровнем культуры обслуживания, сервиса и устойчивой работы. 9. По результатам конкурса победитель заключает договор с Удмуртским производственным объединением автовокзалов и пассажирских автостанций на выполнение транспортной работы, соблюдение расписания движения на маршруте, кассового обслуживания пассажиров, контроля и диспетчерского сопровождения автобусов на линии, при этом отправление и прибытие автобусов должно осуществляться с существующих автовокзалов и пассажирских автостанций. Адӟытон Кудзэ меда быръёно, кинлэн меда ческытгес? Ой кӧня пыжиськемъёс, кудӥз меда ческытгес? Таӵе аспӧртэмлыко смотр-конкурс нырысьсэ ортчиз "Удмуртконтракт" управление пырись хлебоприемной предприятиос пӧлын. Ю-тысь дася сяна, берло аръёссэ соос мыло-кыдо басьтӥськизы сиён-юон поттон борды. Сюкась лэсьто, нянь пыжо, пӧрасько, етӥн вӧй, кӧс вӧй потто, кеньыр изо, муш вордо, бакча сиён, емыш будэто. Сомында удысъёсты нуоно луизы, рынокен экономикае ужаны потыса. Кинлэн кызьы пӧрме адске арлы йылпумянъёсъя. Нош соос уродэсь ӧвӧл. Тае возьматӥз 1-тӥ ноябре ортчытэм адӟытон но. Ужрадэз усьтӥз "Удмуртконтракт" управленилэн валтӥсь директорез Вячеслав Николаевич Ануфриев. Со сюлмысьтыз ӟечкылаз вуись праздникен, республикамылэн кунлыкезлы 8- ар тырмон нуналэн, сӥзиз котькуд предприяилы азьланяз но ӟеч мылкыдын ужаны, шаермылы тырмыт ю-нянь люканы, басьяськисьёсты ческыт сиён- юонъёсын паймытыны. Нош смотр-конкурсэ ваем продукцизы, зэмен но, туж узыр. Басьтом Кезысь элеваторез, кивалтӥсез Валерий Аркадьевич Семенов. тужгес но секыт аръёсы татын нырысьсэ пттыны кутскизы шаерамы вуныны кутскем вашкала сиёнэз - ӵужъемез. Табере соослэсь адӟем каризы мукетъёсыз но. Кезъёс туж быгатыса пӧрало пельнянь, перепеч, булкаос, нянь сярысь вератэк ни. Ӝӧк вылзы туж бусьтыр. Нош Глазовысь хлебопредприятие, кивалтӥсез Инна Александровна Зеленинова, адӟытонэ вуэмъёсты воксё паймытӥз пужыятыса-пужыятыса дасям пӧраськемъёсыныз. Атасэз но, юсьёсты но, возь вылысь сяськаосты но пуктыны быгатллям татысь пыжиськисьёс булкаоссы вылэ. - Быдэс уйзэ туннэ ужам, быгатонлыкмес возьматон понна - шумпотымон мылкыдзэ уг ваты пекарнялэн кивалтӥсез Александра Сажина. - Коллективмы 8 кузя, котькудӥз сюлэм шунытсэ сётӥз та дасяськонлы. Адӟытонэ лыктэмъёслы кельшизы Воткинскысь но пыжиськисьёслэн ӝӧк вылзы, нош тужгес но - картофкаен сӥлен суро куарнянь пиры (бигер сиён). Пекарнялэн кивалтӥсез Флорида Масалимовна Сулейманова мыло-кыдо сётӥз солэсь рецептсэ. Пуштрослы картофкаез сӥлен но сугонэн ӵош корано. Ыльняньзэ пельняньлы сямен дасяно, пызез курег пузэн, йӧлэн, йӧлвылэн, шунтэм маргаринэн суралтоно )ву уг кутӥськы). Шӧмызъя сылал ватсано. Сарапулъёс шумпоттӥзы пӧртэм пумо кеньыръёсын. Оглом вераса, котькудӥз предприятие котыр ласянь возьматӥз ужаны быгатэмзэ. Котькинлэсь трос йӧл люказы Глазовысь пыжиськисьёс. Кыкетӥ н куинетӥ интыосты басьтӥзы уваос но кезъёс. Нимысьтыз пусъемын Ижевскысь кыкетӥ хлебоприёмной предприятие. Вылӥ быгатонлыксэс озьы ик возьматӥзы каракулиноос, кизнеръёс, воткаос. Адӟытон пӧрмиз. Азьланяз таӵе ужрадъёс ортчылозы арлы быдэ. Сыӵе малпанэ вуизы ваньмыз смотр-конкурсэ пыриськемъёс. Л. Медведева. Туспуктэмъёсыз В. Беломорскихлэн. Николай Никифоров Шӧкыч Улонысь учыр Кыкетӥ улонзэ улэ Пыкъяськон бодызэ юн кырмыса, урам кузя вамышъя Седой Лёнька. Ӟус вылын пукисьёсын ӟечбуръяськиз но азьлань конгыльтӥз. Воргоронлэн мышкыз ышыса ни огез кышномурт лулске: - Уть ай, операция бере Лёнькалэн тазалыкез кыӵе какшаз (лябӟиз). Кема улоз на меда? - Чаль гинэ уз кулы ай. Мон сое ватэме дырысен, ог кызё арзэ улэ-вылэ ни Лёнька, - эшъёссэ паймытыса серектӥз Римма кенак. - Кызьы ватыса? Ку? - паймытскизы артэ пукисьёс. - Нокинлы уг поттылы шуисько вал, сюлэмы уг чида ни, - мадёссэ мытӥз Римма кенак. - Со аре маке черлай мон. Фермаын кынмыны шедьтӥ, лэся. Кыллисько валес вылын, ӵапак пошта нуллӥсь Верка газетъёс пыртӥз. Кӧня ке кылъёсын вошъяськеммы бере, потон сяменыз почтальон ивортӥз на: - Кылӥд-а, Римма, Леонид Ильич, пе, кулэм? Жаль. Ӟеч адями вал. - Кин, кин шуиськод? - йырме ик миндэр вылысь ӝутӥ. Нош Верка оло юанме ӧз кылы, оло сокем дыртӥз - ӧсэз ӝогак педпаласен ворсаз. Мур малпаськыса кыллисько: "Кудӥз-о гуртомы ас лулзэ инмар кие сётӥз меда? Леонид Ильич шуиз кадь Верка". Вань арлыдоосты, висён черен курадӟись гуртоосмес йырвизь пыртӥм пужныса поттӥ. Валатски: гуртамы Леонид Ильич одӥг гинэ - Седой Лёнька. Алигес операция лэсьтӥллям, висьыса улэмезлы ӝожтӥськиз вал Ульяна кузпалэз но. Лёнькаез жаляса кема куректӥ. Уг ваты: егит дыръям монэ ӝыт шудонысен кык-куинь пол келямез но вань. Вот йырвисён шедиз: ку-о кулӥз меда? Веркалэсь уго юаса ӧй вутты. Берпум сюресаз келятэк медам кыльы шуыса, валес вылысьтым султӥ но, сумкае мар но со сиён, ӧжытак аракы поныса, гуртоеным люкиськыны дыртӥ. Коркаязы ӟечбуръяськыса пыремен валче, синъёсы кымысам кӧчизы: Седой Лёнька но, Ульяна но ӝӧк сьӧразы ӵошен нуназеяса пуко. Эрекчатэк амалы ӧз луы ни. Висемелы чӧлскыса, пыштурынзэс кури. Кошкыны вырӟеме бере ни Веркалэсь кылъёссэ шараясько: - Леонид Ильич кулэм шуо кадь. Пошта нуллӥсь Веркалэсь кылӥ. - Да-а, жаль, адаше (паньтэме) кулэм. Кема аръёс ӵоже асьме кунэн кивалтӥз Брежнев. Жаль, - лулскиз Седой Лёнька. Россиысь егитъёс люкасько Иже 15-тӥ-18-тӥ ноябре Ижын ортчоз Россиысь егитъёслэн бадӟым пумиськонзы - форумзы. Таӵе ужрад нырысетӥзэ ортче. Пусйымон соиз, егитъёс люкасько асьме шаере. Со юнме шорысь ӧвӧл. Мукет улосъёсын ӵошатыса, элькунамы трос аръёс ӵоже азинлыко ужало ни поръёслэн, бигеръёслэн, еврейёслэн, немецъёслэн но мукет выжыысь егитъёслэн огазеяськонъёссы. Тани та нуналъёсы дас ар тырмонзэ пусъёз удмурт егитъёслэн "Шунды" дэменлыксы. Сое сӥлы каронлы ик сӥземын луоз ужрадлэн нырысетӥ нуналэз. Уго "шундыослэн" вань мар сярысь вераны куноослы, соослэн узыр ини песьтэрзы. Трос тунсыкозэ, адӟем карымонзэ сьӧразы ваёзы куноос но. Форумлэн ужаз пыриськыны мылкыд каризы витьтон пала улосъёсысь егитъёслэн огазеяськонъёссы. Пумиськонэ озьы ик лыктозы Кун Думаысь депутатъёс, Россиысь калыкъёслэн ассамблеяязы ужасьёс но мукет вылӥ кивалтӥсьёс. Е. Николаева. Асьсэ шӧмо Корей выжыысь адямиос асьме шаерамы ӧжыт ӧвӧл. Соос кылдытӥзы ни асьсэлэсь культурая огазеяськонзэс. Кивалтӥсьсы луиз Юрий Николаевич Ногай. Та огазеяськонэ али 50 мурт пыре. Ваньмон дыръязы люкаськыло Ижысь "Железнодорожник" культура юртэ. Ас кылынызы кырӟало, экто, ӝытъёс ортчытъяло, пӧртэм огазеяськонъёсысь эшъёссэс ас доразы куное ӧтьыло. Алигес Йӧ дворецын бадӟым шулдыръяськон дыръя, корейёс но огъя программае пыриськизы, эктонъёссэс возьматӥзы. Со сяна, асьсэ пӧрамъёссэс оскалтыны ваиллям: кубистаен, ӵуж кушманэн, кӧжыен но губиен салатъёссэс. Тужгес но усто вылэм кубистаенэз: со курыт ке но, ческыт. Т. Николаева. Экономика Висёнэз но ало, эмъяло но Кызьы ивортэмын ни вал, республикамылэн нуналэз азьын дас куинь ужась коллектив пыртэмын Удмурт Республикалэн Данъян пулаз. Соос пӧлын "Ижеысь механический завод" кун предприятие но. Та заводлэсь продукцизэ странаямы гинэ ӧвӧл, дуннеын но тодо. Татын поттэм данак арбериос возьматъяськизы ни пӧртэм адӟытонъёсын. Озьы луиз ни, асьмелэн ваньмыз сямен ик валтӥсь предприятиосмы конверсиен валче выль арбериос поттонэн герӟаськоно луизы. Механикая завод но ог дас ар талэсь азьло калыкез эмъянэн кусып радъяз, аслаз валтӥсь удысэзъя солэсь кыдёкын ке но. Кутскизы микроэлектроникая арбериос дасяны. Оскемын та удыс 139 номеро отделлы. Али тросэзлы тодмоесь ни татын поттэм кардиостимуляторъёс. Нош кык ар талэсь азьло уж вылын быдэсъяськыны кутскиз медициналы чаклам пичиесь выль арбериос дасянъя малпанзы. Кызьы возьматэ улон, медициналы пӧртэм техника дасян предприятиослы пайдаен берытске, адями тазалыкез сярысь котьку но сюлмаське угось. Тӥни озьы пӧртэм висёнъёсты алыны но эмъяны чаклам аппаратъёс поттон заводын пумен паськыта. Выльёсыз сыӵе арбериос пӧлысь - "биофон" нимаськись куинь пӧртэм аппаратъёс. Кылсярысь, странаысьтымы валтӥсь урологъёс вылӥ дунъязы уже паськыт кутыны дэмлазы "Уро-биофон" аппаратэз. Со ӟеч юрттэ шуг эмъяны луоно уреаплазмоз висёнлэсь мозмытскыны. Та аппарат тросэн поттыны кутскемын ни. Бадӟымгес аппарат эмъяськон учреждениослы чакламын, со дуногес но сылэ. Соин ик отделысь микроэлектроникъёс басьтӥськизы эшшо одӥг эмъяськон арбери - "Уро- бифон" нимо ик брелок - дасян борды. Со дунтэмгес сылоз, тросгес адямиос уже кутыны быгатозы. Та брелок нимаз адямиослы но семьяослы чакламын угось. Пӧртэм клиникаосын но институтъёсын али эскерисько ни кык выль аппаратъёс - "Фтизио-биофон" но "ОРВИ-биофон". Нырысетӥез чакламын, туберкулёзэз, шокан ёз висёнъёсты алыны но эмъяны, нош кыкетӥез - кынмам, шокан ёз но ньылон висёнъёсты. Та выль аппаратъёсты поттыны чакламын ог-кык ар ортчыса. "Биофонъёсты" уж вылын эскерон-чаклан возьматэ, сиосты пӧртэм висёнъёсты алонын паськытгес кутыны пайдаёгес шуыса. Озьы беретаӵе аппаратъёслы ӵапак инты луозы санаторийёс, профилакторийёс, курортъёс. Тӥни соингес но "биофонъёсты" кылдытӥсьёс алигес ветлӥзы тазалыкез юнматонъя но курортологияя международной форуме. Радъяз сое Россиысь та удысъя научной центр. 139 номеро отделлэн кивалтӥсез Петр Николаевич Жарков люкаськемъёслы мадиз медицинаен герӟаськем выль ужъёссы сярысь. Мар бен, вань вылез уже паськытгес мед кутӥськысал. Озьы висён учыръёсты алыны, тросгес адямиосты эмъяны луысал, нош заводлы со барышен берытскысал. Н. Корякин. Корка вӧзад киоскед - басьтод отысь "Кенешез" Ижын улӥсь лыдӟисьмылэн (нимтулзэ малы ке ивортымтэ) тодэмез потэм: малы "Кенешлы", мукет газетъёслы но журналъёслы сямен, Ижысь киоскъёс пыр гожтӥськыны уг луы? Милям малпаммыя, со гожтэтысь юанэн огмылкыдо кариськемзэс верасьёс трос шедьысалзы на. Куд-ог ёросъёсын улӥсь но толэзьлы быдэ дорамы журнал басьяны ветлӥсьёс та верам борды нырысь ик итӥськысалзы, дыр. Кулэяськон вань бере, сое кызьы ке быдэстоно. Озьыен, мар ӟечсэ вераны быгатысалмы ми лыдӟисьёсмылы та ӵектонэн валче? Зэмзэ но, "Кенеш" журналэз киоскъёс пыр басьясь татчыозь ӧй вал. Табере тани "Информпечатен" валче ужан сярысь огкыл гожтэмын. Газетъёслы но журналъёслы гожтӥськон йылпумъяськытозь (одӥг толэзь кылиз на), котькудӥз, ас мылкыд каремезъя, улон интыезлы матысь киоске вазиськыны быгатэ. Таӵе амалэн быдэс арлы гожтӥськон дунлэн быдӟалаез 58 манет. Азьвыл аръёсысь ужан амалъёсмылэсь но куштӥськыны ум малпаське. Редакциысь басьян вылысь гожтӥськонлэн дуныз - 45 манет. Данакез адямиос "Кенешез" почта пыр басьтыны дышемын. 65 манет но 40 коньы тыриды ке, удмурт кылын потӥсь журнал вуоно арын почта ящикъёсады толэзьлы быдэ вуылоз. "Кенеш" журналлы гожтӥськон азьланьтӥське на. Туж оскеммы потэ: вуоно арын 75 ар тырмонзэ пусйыны дасяськись удмурт изданиез трос выль лыдӟисьёс быръёзы. "Кенеш" журналлэн редакцияз ужасьёс. Ваньмыз - кипыдэс вылын Удмурт кунмылы тямыстон ар тырмемен валче, Удмурт Элькунысь Куӟебай Герд нимо шаеръюртын усьтӥськиз но ужа тунсыко адӟытон. Со калыкез мылысь-кыдысь тодматэ шаермылэн ортчем сюресэныз. Адӟиськымон интыын - кунмес кылдытӥсьёс. Трофим Борисов, Куӟебай Герд, Иосиф Наговицын меӵ-меӵ учко котькудӥзлэн синъёсаз. Соосын артэ ик - удмуртъёсты югдытӥсь, быдӟым тодосчи Григорий Верещагин. Озёлонгес, мукет укноос палан - шаерысьтымы тодмо тодосчиос, крезьгурчиос, улосвылмылэсь кунгурзэ но кунпуссэ кылдытӥсьёс. Татын ик - Удмурт Элькунысь туж тодмо кырӟасьёс-верасьёс. Туж тунсыко вашкала удмурт гуӵинлы, Иднакарлы, сӥзем сэрег. Татын ик - удмуртъёслэн вашкала пусъёссы. Адӟытонын ик вань алигес ортчем быръёнъёслы сӥзем веран. Вуылэ Удмурт Элькунысь Куӟебай Герд нимо шаеръюртэ - тодматскелэ Удмурт кунмылэн ортчем сюресэныз. Е. Ромашова. Вамыштоно ке - мед кылёз пытьы! Куатьтон вить арес тырмиз удмурт калыклэн тужгес визьмо но зӥбыт пиезлы - вань удмуртъёслэн "Удмурт кенеш" огазеяськонзылэн тӧроезлы Валентин Кузьмич Тубыловлы. Шуркынмонтолэзьлэн одӥгаз чебер но сайкыт нуналаз вордӥськыса, та адями йыг- йыг вамышъёсын мытӥз улон но ужан сюрессэ. Чик уг кышкаты сое нокыӵе сильтӧл, чик курдыт ӧвӧл солы нокыӵе шуг ӧр. Пичиысен ик шӧдӥз Валентин Кузьмич: тонэ вордэм но будэтэм удмурт калыкед понна ужано вань сюлмысь, ненег лулдэ, лэчыт визьдэ, таза кужымдэ сётыса. Чебер мылкыдын мытэм сюресэз кузя дӥсьтыса но оскыса вамышъя Валентин Кузьмич Тубылов - вань удмуртъёслэн яратоно, гажано но йӧно азьветлӥсьсы. Улонысьтымы дырызлэсь вазь кошкем тодмо кылбурчимы Даниил Александрович Яшин ӵапак та адямилы сӥзьыса кылдытэм кадь визьмо но лэчыт чуръёссэ: Тӧлъя ветлон ӧвӧл секыт ужпум - Зарезь тулкым ачиз нуэ сьӧраз. Гурезь уллань кулэ ӧвӧл кужым, Тыр уробо уллань ваське огназ. Нош мар ӟечсэ сётоз тӧлъя ветлон, Кинлы кулэ лэсьтымтэлэсь лэсьтэм? Уз ушъялэ, озьы улӥд ке тон, Ӧз курлалэ ке но урод кылэн. Калык пӧлын эн вераськы токма, Кутскид ке уж борды - быдэстоно, Мылысь-кыдысь тыршымтэед понна Медаз лу вал тыныд ӵыжектоно. Кылбур гожтӥд ке - мед пыроз сюлме, Юртэ кирпич понӥд ке - даурлы. Эше, сыӵе ужъёсыныд гинэ Выльзэ, ӟечсэ сётод калыкедлы. Вай, утчатэк шыпыт интыосты, Ыркыт тӧллы пумит мыном шара. Вамыштоно ке - мед кылёз пытьы, Вазиськоно ке - мед кылёз куара. Гажано Валентин Кузьмич! Вань сюлмысьтымы ӟечкыласькомы Тӥледыз улон вакытысьтыды тужгес йӧно но дано лыдпусэн! Ужано ке - весь вань сюлмысь! Нюръяськоно ке - берпум кужымозь! Тӥледлы шудбур, тазалык, яратон но кузь даур сӥзьыса - тӥледыз весь вань сюлмысьтыз яратӥсь но гажась удмурт калык! Куинь кизилиос Таиз туспуктонмы лэсьтэмын алигес гинэ - Удмурт кунмылы 80 ар тырмонэз пусъён нуналэ. Та куинь воргоронъёслэн-батыръёслэн нимъёссы котькинлы ӟеч тодмо. Михаил Тимофеевич Калашников пыӵал-тӥрлыкъёсъя конструктор, Социалистической Ужысь кык пол Герой, техника наукаосъя доктор, генерал-лейтенант. Олег Алексеевич Поскребышев Удмуртиысь калык кылбурчи, Удмуртиысь Комсомоллэн премиезлэн лауреатэз, Удмуртиысь кун премилэн лауреатэз, культура удысын но калыкез дышетонын дано ужась. Геннадий Михайлович Корепанов-Камский крезьгурчи, педагог, Удмуртиысь культура удысын дано ужась, УАССР-лэн калык артистэз, Россиысь искусство удысын сӥё-дано ужась. Куиньназы та эшъёс пусъемын уно медальёсын но орденъёсын. Таин валче тани ма сярысь но вераны кулэ. Та нуналъёсы М. Т. Калашников вордскем нуналзэ пусйиз. Собере эшшо одӥг шумпотымон ивор вуиз. "Россиысь национальной Олимп" общественной организация Михаил Тимофеевич Калашниковлы сётӥз "Адями-Легенда" ним но "Зарни Пегас" кузьым. Ӟечкыласьком! Соин валче сӥё-дано ужрад ортчоз туэ 16-тӥ ноябре Москваын. Н. Байтеряков. М. Т. Калашников, О. А. Поскребышев, Г. М. Корепанов-Камский. В. Беломорскихлэн туспуктэмез. Вуоно арлы дэмласал Ог-огдэ валан мед луоз ялан Гажано лыдӟисьёсмы, туннэ ми усьтӥськом выль сэрегмес. Йылпумъяське ЪЪ дауре, толэзь но ӝыны ортыса, асьмеос выжом редакциысь корреспондентъёс, кыӵе ужъёсты быдэстыны малпало выль арын - ӵапак та сярысь ми мадьыны малпаськом выль сэрегамы. Нош кин ку верасько радэз огшоры амалэн тупатӥм - алфавитъя. Выль арын лыдӟисьёсмылы бадӟым кузьым лэсьтыны чакласьком. Луонлык кыдӥз газетмес январьысен арняяз ньыль пол поттыны. Со чотын пятница номерес бадӟыматыны малпаськом. Али сое тямыс бамен поттӥськом ке, выль арысен дасялом дас куаь бамен номер. Кызьы сое узыргес кароно? Со милям, редакциын ужасьёслэн, сюлмаськонмы. Соин ӵош вазиськиськом тӥледлы но, гажано лыдӟисьёсмы, куронэн: верадэ вал, кыӵе ужпумъёс адямиос сярысь тӥляд лыдӟемды потэ газет бамысь. Выль арын азинтыны малпаськом "Арня ӵоже", нимын гожъянъёсмес. Берло аръёсы Москваысь "официальной" шуиськись материалъёс газетэ уг вуо ни, озьы странаысьтымы но дуннеын югдур палэнэгес кыле. Соин выль арын но арнялы быдэ вакчияк мадьылом музъем вылын луэм учыръёс сярысь. Со сяна лыдӟисьёсмес тодматыны тыршом дуннеысь но асьме странаысь политика удысын ужась кужымъёсын, огазеяськонъёсын, нимаз адямиосын. Озьы ик азьланьын чакласьком ӵемгес сётъялляны "Тазалык" рубрика улын материалъёс. Та ласянь юрттыны быгатоды тӥ но, гажано лыдӟисьёс. Вералэ вал, ма сярысь тодэмды потэ, озьы сётъялэ юанъёстэс. Асьмеос куспамы пайдаё кенешыса мед улом но ужалом. Ог-огдэ валан мед луоз ялан. Юлия Александрова, кыл кутӥсь секретарь. Кутсконэз тазьы вал Октябрь революцилэсь азьло удмуртъёслэн профессиональной искусствозы ӧй вал. Озьы ке но, вашкала дырысен ик калык аслэсьтыз искусство удысын луонлыкъёссэ но быгатонлыкъёссэ устной творчествоын � выжыкылъёсын, легендаосын, крезьгуръёсын � возьматылӥз. Паськыт вӧлмемын вал пӧртэм маскаръяськон-шулдыръяськон сямъёс. Сыӵе сямъёсысь син азе пуксьылӥзы театрлы матын луись суредъёс. Тужгес но тодмоез � пӧртмаськон. Куд-ог интыосын со али ке но улэ на. Пӧртмаськисьёс, дӥсьсэс воштылыса, суаськыса но мыйык-туш лякылыса яке, кыӵе ке пӧйшур, тылобурдо сямъёсты возьматыны тыршыса, эктон-кырӟанэн, кылан-буранэн коркась корка потаса ветлылӥзы. Кылан-бураназы соос серем карылӥзы адямиослэсь урод сямъёссэс, данъязы ӟечъёссэ. Калыклэн та маскарьяськонъёсысьтыз ик адӟыны быгатӥськом ни профессиональной театральной искусстволэсь вордӥськон инъетъёссэ. Октябрь революция странаысьтымы вань калыкъёслы культура но искусство удысъёсты эрико азинтыны луонлык сётӥз. Озьы пумен пушъет сётыны кутско удмурт калык искусстволэн пӧртэм удысъёсыз. Тужгес но адӟем карымонэсь вал театральной искусстволэн инъетьёсыз. Та удысын кичӧлтӥсьёс луылӥзы дышетӥсьёс, культпросветучреждениосын ужасьёс. Калык пӧлы культураез вӧлмытонлы бадӟым саклык висъялляз удмурт партийной организация но. Драматической коллективъёс кылдытонэ пыриськылӥзы тодмо удмурт революционеръёс. Удмурт совнаркомлэн нырысетӥ председателез Иосиф Алексеевич Наговицын, писательёс Даниил Афиногенович Майоров, Куӟебай Герд но мукетъёсыз. Асьсэос ик соос пичиесь пьесаос но гожьяллязы. Удмурт калыклэн историяз удмурт кылын спектакль нырысьсэ пуктэмын вал 1918-тӥ арын 2-тӥ гудырикошконэ Глазов уездысь Ягошур гуртын. Л. Н. Толстойлэсь "От нее все качества" комедизэ удмурт кылэ берыктӥз но сцена вылын возьматӥз А. Н. Урасинова. Та пьесаез ик кыкетӥзэ удмурт кылэ берыктӥз К. П. Чайников (Герд). 1919-тӥ арын со пьеса "Ваньмыз со бордысь потэ" нимын Елабугаын нимысьтыз книгаен потӥз. Озьы со Удмуртиысь вань районъёсы но городъёсы шедиз. Учкисьёс удмурт кылын спектакльёсты ӟеч мылкыдын пумиталлязы но вылӥ дунъет сётъяллязы. Сыӵе спектакльёсы, удмуртьёс сяна, ӟучъёс но, бигеръёс но ветлылӥзы. Революция бере нырысь аръёсы Удмуртиын трос гинэ драматической кружокъёс кылдылӥзы. Зэм, куд-огез соос пӧлысь, интызы, тодӥсь-валась кивалтӥсьёссы ӧвӧлэн, кема ӧз ужаллялэ. Та вакытэ ик кылдыло ини стационарной драматической коллективъёс. 1919-тӥ арын Глазовын "Шурали" труппа кылдэ, Ципьяын - "Шунды". 1920-тӥ арын Сарапулын "Гудыри" газетлэн редакцияз ужасьёс дышетӥсьёсты дасян курсъёсын но партийной школаын дышетскисьёсын валче театральной труппа кылдыто. Та арын ик Ижевскын коммунистьёслэн клубзы усьтӥське. Татын но самодеятельной театральной труппа ужаны ӧдъя. Соин профессиональной режиссёр А. Ф. Фёдоров кивалтэ. 1923-тӥ арын Ижевскын удмуртъёслэн Центральной клубзы ужаны кутске. Татысь театральной труппаен кивалтыны басьтӥське нырысетӥосыз пӧлысь одӥгез удмурт артист, национальной театральной искусствоез азинтонлы вань сюлэм ӟырдытсэ сётыса ужась А. В. Сугатов. Куанер удмурт семьяын будэм мурт школаын дышетскон аръёсаз ик искусствоен тунсыкьяське. Режиссёр луэм сяна, со ачиз но усто шудылӥз пӧртэм рольёсты. Сямызъя туж лякыт, гажамон вал. Соин ик татчы трос егитъёс ветлӥзы. Та драматической коллектив бератаз профессиональной театрлэн инъетэз луиз. Сценической искусствое нырысь вамыш лэсьтӥсьёс пӧлын вал К. А. Ложкин, В. Г. Волков, Г. А. Ардашев, Г. П. Овечкин, Я. Н. Перевощиков, К. К. Фанталова но мукетъёсыз. Озьы 1920-тӥ аръёсы Удмуртиын паськыт вӧлме самодеятельной драматической искусство. Ӵем дыръя коллективъёслэн репертуаръёсазы асьсэ вакытлы тупась пьесаос-агиткаос луылӥзы. Спектакльёс революционной малпанъёсты вӧлмытыны юрттылӥзы, большевикъёслэн кивалтэтсы понна дурбасьтылӥзы, контрреволюционеръёслы, буржуазилы, националистъёслы пумит луон мылкыдъёссэс возьматылӥзы, соин ик ӵемысь быдэс залэн "Интернационалэз" кырӟаса йылпумьяськылӥзы. Сыӵеесь вал со вакытэ гожъям пъесаос. Соослэн пуштроссы пырак улонысь басьтылэмын вал. Озьы ке но, драматургия улонлэсь куроньёссэ пумозяз оз быдэсъя. Куд-огез бадӟымесь кружокъёс асьсэлэн репертуаразы ӟуч но кунгож сьӧрысь драматургъёслэсь пьесаоссэс пыртылӥзы. Нош соосъя дасям спектакльёс умой-умой ӧз пӧрмылэ, малы ке шуоно, актёръёс но, пуктӥсь режиссёръёс но тодонзыя но бытатонзыя сыӵе бадӟым ужлы дасесь ӧй вал на. Соин ик ӝегатскытэк басьтӥськоно вал национальной кадръёсты дасян борды. 1928-тӥ арын партилэн Удмурт обкомез Москваысь Центральной театральной техникуме дышетскыны лэзе Ижевскысь педтехникумлэн куинетӥ курсаз дышетскись Кузьма Ложкинэз. 1929- тӥ арын толшоре Удмурт клубын кык аръем театральной курс усьтӥське. Татын актёрской мастерстволы, эктыны, пианиноен но калык инструментъёсын шудыны дышето, театрлэн историеныз, удмурт но ӟуч литератураен тодмато. Та курсъёсты быдтэмъёс пӧлысь куинь муртэ � А. И. Саратовез, Е. К. Малыхез но А. В. Волковаез � Москваысь театральной техникуме ысто. Игнатий Гавриловез, курсъёсын дышетскемез бере, Центральной клубысь драмкружокен кивалтыны пукто. 1930-тӥ аръёслэн кутсконазы странаямы куашкатэм калык хозяйствоез выльдон ужъёс йылсаськыны ӧдьязы. Таӵе югдуре огья культураез, нимысьтыз ик театральной искусствоез но азинтыны луонлыкъёс усьтӥськизы. 1930-тӥ арын 7-тӥ коньывуонэ РСФСР-лэн СНК-ез "Театральной ужез умоятон сярысь" постановление кутэ. Та постановлениын верамын вал национальной театръёслэсь лыдзэс йылэтон но соосты юнматон сярысь но. Озьы Удмуртиын профессиональной театр усьтыны шонерак луонлык кылдӥз. 1930-тӥ арын оштолэзе Ижевскысь егит рабочийёслэн нуналмысъ ужась театральной труппазы - ТРАМ (Театр рабочей молодежи) � усьтӥськиз. Вакчи дыр куспын со организационной но художественно-воспитательной ужъёсты быдэстӥз, уно спектаклъёс но концертьёс куктӥз. Соосты дасо сюрсъёсын учкисьёс адӟизы. Та аре ик сӥзьыл партилэн областной комитетэз национальной театр кылдытон сярысь ужпум ӝутэ. Центральной клубысь драматической кружоке егитъёсты куто на. Ваньмызлы соослы уждун тырыны кутско. Я, труппа кылдытэмын. Нош репертуар? Кутскыны ик кельшымон пьеса ӧз сюры. Соку уж борды сэрытак кутске И. Г. Гаврилов. Кылдытэ "Вало ӧр куашетэ" нимо удмурт пьеса. Отын возьматэмын удмурт гургьёсын колхозъёс кылдытон. Пьес, со вакытэ гуртысь югдурез шонер ке но возьматӥз, геройёслэсь мылкыдзэс пыр-поч ӧз усьты. Мугез вал, дыр, авторзэ дыртытыса ужатэм бордын но. Котьмар ке но, пьесаез пуктоно кариськизы. Со понна Москваысь ГИТИС-ысь ӧтемын вал ньылетӥ курсын дышетскись К. А. Ложкин. Егит режиссёр вуоно спектакльзэ эктонъёсын-кырӟанъёсын шулдыртыны сюлмаськиз, крезьгуръёс пыртылӥз. Сотэк, пе, учкисьлы мӧзмыт луоз. Спектакльлы крезьгуръёс бырйыны Г. В. Тельновлы ӵектӥзы. Со Центральной клубысь струнной оркестрен кивалтэ вал. Нош спектакльлы декорациос но костюмъёс дасяны басьтӥськиз суредась Авдеев. Кыкназы ик лулысь-сюлмысь тыршизы. Артистъёслы � толло крестьян нылпиослы � матын но валамон вал пьесалэн пуштросэз. Профессиональной быгатонлыкъёссы тырмыт ӧй вал ке но, соос вань кужымзэс но сюлэм ӟырдытсэс сётылӥзы. Спектаклез дасян бордын ужан йылпумьяськиз, солэн нырысь учкисьёсыз но вал ини. Премьера бере, пуктӥсьёслэсь но артистъёслэсь ужзэс дуньяса, вераськисьёс "спектакль республикамылэн культурной улоназ бадӟым инты басьтоз" шуизы. "Арысь аре азинске культурамы. Туннэ мынам ваньмызлы кылӥськымон вазиськеме потэ,� шуиз, премьераез эскеронын вераськыкуз, удмурт писатель Кедра Митрей,� вордӥськиз асьмелэн театрмы, эшъёс! Та спектакль возьматэ: макем уно асьме калык пӧлын талантливой адямиос! Шудо сюрес тӥледлы, егит артистъёс! Азьланяз но жадёнэз валатэк ужалэ, нош ми тӥледлы юрттом!.." Облисполкомлэн президиумезлэн 1931-тӥ арын 23-тӥ толшоре кутэм постановлениезъя профессиональной Удмурт театр усьтӥськиз 1931-тӥ арын 7-тӥ тулыспалэ "Вало ӧр куашетэ" спектакльлэн премьераеныз. Выль театр премьераез берегес ик Нижний Новгородэ мынэ. Татын Советъёслэн Кыкетӥ краевой съездзылэн делегатъёсызлы со "Вало ӧр куашетэ" спектакльзэ возьматэ. Съездлэн делегатъёсыз спектаклез туж шуныт пумитазы. Спектакль йыллумъяськем бере, митинг ортчиз. "Эшъёс! � шуиз одӥгез вераськись,� дауръёсын эксэй правительстволэсь зӥбетсэ чидаса улэм удмурт калык туннэ бадӟым уж лэсьтэ: удмуртъёслэн асьсэ театрзы сяськаяське. Со туж ӟеч!" Та нунал вунонтэм кылиз, артистъёсты выль вормонъёсы бурдьяз. Тулысаз труппа Глазов но Яр районъёсы нырысетӥ гастрольёсы потэ. Репертуараз солэн, "Вало ӧр куашетэ" сяна, концертной программа но М. П. Петровлэн "Батрак" пьесаезъя спектакль вал ини. Гастрольёс усто ортчизы. 91 спектакль но 85 концерт возьматэмын вал. Котькуд выступление бере колхозникъёсын собраниос, митингъёс ортчылӥзы, докладьёс лыдӟемын вал, тулыс кизён вакытлы ударной бригадаос кылдылӥзы. Та гастрольёсын коллектив ужаны быгатэмзэ но калыклы кулэ луэмзэ возьматӥз. Б. Саушкин. Кузьым чотын - янтарь Уно аръёс ӵоже ини Янтарной комнатаез утчан ужъёс мыно. Кемалась ик ӧвӧл выль адӟись кылдӥз. Германиысь 79 аресъем воргорон, азьвыл лётчик журналистъёслы ивортӥз: 1945-тӥ арын январ толэзе янтарен ящикъёсты со Восточной Пруссиысь Германие поттыны кулэ вал. Но лобыны ӧз быгаты, самолётэзлы эстӥськон ӧз шедьты. Нош ӵуказеяз - 1945-тӥ арын 20-тӥ январе - городэ Советской Армия пыриз. Азьвыл лётчик малпамъя, Янтарной комнаталэсь узырлыкъёссэ трофей чотын куспазы люкизы ӟуч офицеръёс. Басьтэмын Интернет пыр. Игорь Семенов: Ужлэсь шӧмзэ пичиысен тодӥсько... "Берло дыре трос верасько Можгаысь Семенов депутат сярысь. Сое, пе, Кун Кенешлы кивалтӥсе бырйыны чаклало. Та адями сярысь тросгес тодэм потэ вал..." (Ижысь лыдӟисьмылэн А. Берестовлэн куронысьтыз.) Зэм, Игорь Николаевич Семеновлэн нимыз-тулыз али уноезлэн кыл йылаз. Мугез тодмо. Удмуртилэн Президентэз телевидение пыр но, мукет интыосын но поттылӥз ни, сое аслаз азьло ужан интыяз адӟемез потэ шуыса. Кинэ быръёзы депутатъёс Кун Кенешлы кивалтӥсе - соослэн ужзы. Нош ми кӧня ке мадём та адями сярысь. Игорь Семенов вордскемын Алнаш ёросын 1951-тӥ арын 20-тӥ декабре. Будэмын бадӟым удмурт семьяын. Кызьы шуэ ачиз, ужлэсь шӧмзэ пичиысен, пе, тодӥсько. Аслаз но семьяез пичи ӧвӧл. Куать нылпиосыз. Вань ни пиналъёсызлэн нылпиоссы но. 1998-тӥ арын Семенов луиз Можга городысь интыысь аскивалтонлэн йырыз (главаез). Со дырозь 16 ар ӵоже ужаз коммунальной хозяйствоын. Озьыен, город ужпумъёсты туж ӟеч тодэ. Куинь пол сое бырйылӥзы интыысь кенешлы депутатэ. Игорь Семенов быгатӥз городысь предприятиослэн кивалтӥсьёсынызы, общественной огазеяськонъёсын, огкыл шедьтыны, ваньзэ соосты Можгаез азинтонэ-ӝутонэ кыскыны. Городын юнматэмын куинь арлы программа. Со келямын вал Сорослэн фондэзлэн нимысьтыз ӵошатсконаз. Можгаослэн проектсы умоен лыдъямын. Со возьматэ татысь специалистъёслэсь азьлане учкыны быгатэмзэс. Быдэс странаямы тодмо луэ Можгаысь "Свет" пияла поттон завод. Та предприятие алигес пусъемын Удмуртиысь правительстволэн премиеныз. Сыӵе азинсконын вань городлэн кивалтӥсезлэн тыршемез но. Нош мар малпа депутат Президентлэн ӵектонэз пумысен? Александр Волковен кылмы тупа, шуэ Игорь Николаевич, ми соин огъёзъёс, кусыпмы вить нунал гинэ. Республикалэн кивалтӥсезлэсь дунъямзэ шонер валасько. Депутатъёс оскизы ке, ӵош ужаны быгатом, оскыса вера Семенов. Е. Пермяков. АРХИВЫСЬ ДОКУМЕНТЪЁСЪЯ Удмуртия ХХ дауре 1954-тӥ ар Та аре тужгес но паськытазы лэсьтӥськон ужъёс. Можгалан ӝутэмын вал етӥн завод, Глазовын - лэсьтӥськон материалъёс поттон завод. Сарапулысь комбинатын 4,5 поллы йылӥз выльвылэ келяно коркаосты лэсьтон, чакламлэсь вылтӥ келямын вал тямыс квартираен 39 корка. Машина поттонын, капчи но сиён-юон промышленностьын уже кутӥськыны кутскизы поточной линиос. Механизация умояз интыысь промышленностьын но кооперациын. Можгалась дубильной экстрактъёс поттон заводын механизациез умоятэм чотын ужазинлык 1,5 поллы йылӥз, озьы чакламлэсь вылтӥ 2 миллион манет пайда поттэмын вал. Данаклы йылӥз рационализаторъёслэн но изобретательёслэн лыдзы, соос сётӥзы 25 сюрслэсь уно дэмланъёс. 1954-тӥ арын данакез рабочийёс но предприятиосысь быдэс коллективъёс вить аръем планъёссэс дырызлэсь вазь быдэстӥзы. Кылсярысь, Ленин нимо заводысь 235 рабочийёс асьсэлэсь вить арлы заданиоссэс быдэс арлы вазь тырмытӥзы. Кун шӧдскымон юрттэт сётыны ӧдъяз гурт удыслы. МТС лэсьтонэ гинэ 29 миллион манет коньдон кутэмын вал. Со чотын умояз хозяйствоослы юрттэт сётон. Бусыосы поттэмын вал ни 7,5 сюрслэсь уно тракторъёс, ю тысь утялтӥсь 3 сюрслэсь уно комбайнъёс но трос мукет техника. Колхозъёсын но совхозъёсын, тросгес пайда басьтон вылысь, нимысьтыз ужрадъёс ортчытыны чакламын вал. 1954-тӥ арын 5 сюрс гектар вылэ нырысьсэ кизьыса эскеремын кукуруза. Кутскемын ӟечесь пудо гидъёс пуктыны, силос гуос лэсьтыны. Данаклы трос вордыны кутскемын скал но парсь. Колхозъёслы но совхозъёслы юрттэт сётонзэс умоятӥзы республикаысьтымы промышленной предприятиос. Соос инженеръёссэс но рабочийёссэс ыстылӥзы гурт техникаез тупатъяны, пӧртэм машинаоссэс висъяллязы. Ӝыны арскын гинэ Ижысь шефъёс гурт фермаосын 8 иськем ву сётӥсь гумыос кыскизы, 6 колхозэ электротыл пыртӥзы, пудо сиён дасян 60 инты лэсьтӥзы. Ужын кыдазы гурт кивалтӥсьёс, соос пӧлын - колхозъёслэн тӧрооссы: Балезино ёросысь В.С.Касимов но С.Ф.Фофанов, Алнаш ёросысь П.М.Мыльников, Камбарка ёросысь К.В.Антропов, Воткинск ёросысь А.Г.Кашин, А.П.Сентяков но мукетъёсыз. Соос пыриськылӥзы гурт удыслэн Москваын ортчылӥсь кенешъёсаз. Наукаын басьтэм вормонъёсты но азьмынӥсь опытэз быдэс республикаямы ӝоггес но паськытгес вӧлмытон вылысь, 1954- тӥ арын кылдытэмын вал гурт удысъя выставка. Сыӵе адӟытонъёс радъямын вал пӧртэм ёросъёсын но. Нош гурт удысъя Всесоюзной адӟытонлэн "Урал" павильоназ 1954-тӥ арын Удмуртиысь 300 азьмынӥсьёслэн басьтэм азинсконъёссы возьматэмын вал. Соос пӧлысь 65-сэ зарни но азвесь медальёсын пусйизы. Вотка ёросысь "Выль улон" но Кизнер ёросысь Ленин нимо колхозъёслы нырысетӥ степенё диплом сётӥзы. Гуртын улӥсьёсты пайдаёгес ужаны дышетоно вал. Соин колхозникъёсты дышетылӥзы агрономъёслэн но зоотехникъёслэн курсъёсазы. 1954-тӥ арын мартэ Удмуртиысь 350 комсомолецъёсты сӥё-дано келязы выльвылэ. Отчы огдырлы ветлыса, ю-нянь октыны юрттылӥзы уно студентъёс, городъёсысь егитъёс но МТС- ысь механизаторъёс. Шаермы выжыны кутскиз нылпиосты 10 ар ӵоже дышетонэ, соин тросэн усьтӥськылӥзы шор ёзо школаос. 1952-тӥ-1953-тӥ дышетскон арын Удмуртиын 75 гинэ сыӵе школа вал, отын 195,3 сюрс пинал дышетскиз, 1953-тӥ-1954-тӥ дышетскон арын соос пӧлысь 5,5 сюрссэ интернатъёсын возьыны кутскизы. Ужаз ни 1334 технической кружок, отчы ветлыны кутскизы 32 сюрс нылпи. Глазовын усьтӥськиз Пионеръёслэн юртсы но "Родина" кинотеатр, выльысь усьтӥськиз 48 библиотека, котькытын ужазы художественной самодеятельностья коллективъёс. 1954-тӥ арын Ижевскын усьтӥськиз Гурт удысъя институт, выльысь потыны кутскиз "Молот" журнал, республикаын поттэмын вал 115380 экземпляр газет но журнал, Удмурт научно-исследовательской институт но Республикаысьтымы краеведениея музей профессорлэн В.Ф.Генинглэн кивалтэмез улсын ортчытӥзы археологияя экспедиция, Вотка городын усьтэмын нылпи парк. Огазеямын пичиесь сельсоветъёс, соослэн лыдзы, 473 интые, 307 гинэ кельтэмын. Калыклэн огъя улонэз секыт вал на, но ӟечезлы оскон пичияк шӧдӥськыны кутскиз ни. А.КАСАТКИНА, Удмурт Республикаысь Кун архивысь валтӥсь специалист. А.П.Сентяков - Вотка ёросысь "Выль улон" колхозлэн председателез, 1954-тӥ арын 11-тӥ-16-тӥ феврале со пыриськиз гурт удысысь азьмынӥсьёслэн Москваын ортчем кенешазы. Милемлы кулэ ужась Редакциысьтымы пичи автобусэн ужан вылысь кулэ чырмыт сямо, машинаез ӟеч тодӥсь-валась воргорон. Умой луоз, со асьме кылэз тодэ ке. Уждунэз - шоро-куспо. Витиськом жингыртэмдэс. Мон тодам ваисько Удмурт радиолэн вордскем нуналэз матэ вуэмъя, йыре пӧртэм малпанъёс лыкто. Ез пыр куараез нырысьсэ кылӥм 50-тӥ аръёсы. Ми, пичиос, уриськиськом вал гуртлы матысь бусыын. Гурт палась шуныт тӧл пельтэмъя, пель сьӧрамы кылӥськиз туж шулдыр кырӟан гур. Нырысь-валысь мазэ-созэ валаны ӧм быгатэ, соин оградэ ваньмы султыса кылзӥмы крезьгурлэсь кудпалась лыктэмзэ. Со бере вераськись сьӧд воронкаос котькуд корка пыризы. Эсьма, шулдыр гурез кылыса, корт гур вӧзын кыллись кечпиос, ыжпиос гинэ но выж вылысь ӟус вылэ, ӟус вылысен ӝӧк вылэ тэтчаны кутскылӥзы. Кунянлэн гинэ улэмез секытгес вал, со угось ӟус кук борды керттылэмын. Пластинкаосты бергато вал нуналлы быдэ. Отысь ик мон дыши нырысетӥ ӟуч кырӟанэз, нимаське вал "Вчистом поле под ракетой" шуыса. Огвакытэ арнялы быдэ "Запомните песню" радиоверанэз кылзылӥм. Отысь выль кырӟанъёсты дышетылӥ. Удмурт дикторъёст, чылкыт куараосынызы быгатылӥзы калык сюлэмъёсты бугыртыны. Одӥг пол Ижевске ветлыкум, машина дорамы воргорон лыктӥз, юаз, уд нуэ-а, пе, монэ Киров урамозь? Пие магазинэ пыратозь, ми соин вераськон мытӥм. Отысен тодӥ, со Борис Саушкин вылэм шуыса. Вераськонмы вакчи ке но вал, со пумиськон, мон понна вунонтэм кылиз. Вераськем куараезлы синмаськыса, сое адӟон мылкыды, аръёсын сюлэмам ветлӥз. Ми, война нылпиос, Удмурт радиоен ӵош будӥмы, кыдамы, отысь ик визь-кенеш, секытъёсты вормыны кужым басьтӥмы. Со вакытысь дикторъёс табере шутэтскыны кошкизы ни, но соослэн шунытсы сюлэмамы пыӵаз. Мусо кышноос Полина Ухова, Милитина Гаврилова пыраклы кылизы сюлэмамы. Мӧйы писпуос шеректо ке, вӧзаз одно ик вож пушъетъёс будо. Сыӵе пушъетъёсын туж узыр туннэ Удмурт радио но. Отчы лыкто егит, задор мылкыдо, котьма борды гижысь-пиньысь басьтӥськись, чылкыт но чебер куараё ужасьёс. 23 ар талэсь азьло Удмурт радиоысь ужасьёсын туж шуныт пумиськон ортчиз вал Пичи Пургалась лыдӟон коркан. Калык пӧлын со али но вунэмын ӧвӧл на. Сыӵе пумиськонъёсын, калык пӧлы, арлы быдэ мед поталозы вылэм, Удмурт радиоысь, телевидениысь, "Удмурт дунне" газетысь ужасьёс. Калыкен пумиськыса, вераськыса но синмысь синме гинэ учкыса, трос ужпумъёсты умойгес сэрттыны-пертчыны луэ ук. Васса Васильева. Удмурт кунлы - 80 Театр улонлэн сюлмаськонэз Вуоно арын Удмурт театрлы тырме 70 ар. Со дас арлы гинэ элькунмылэсь покчигес луэ. Театр асьмелэн историмы, ортчем улон сюресмы. Та нуналъёсы "Удмуртия" издательствоын вордскиз выль книга - "Удмурт театр. Ортчем вамышъёс". Сое гожтӥз радио но театр удысын кема аръёс ӵоже тыршем мурт. Удмурт Республикаысь искусство удысын дано ужась Борис Саушкин. Борис Ефремович аслаз книгаяз яркыт возьматэ Драмая удмурт кун театрлэсь куатьтон ар ӵоже (1931-1991) ортчем сюрессэ. Отын радызъя суредамын театрлэн репертуарез, пуктэм пьесаослэн пуштроссы, артистъёслэн но режиссёръёслэн ужан амалъёссы. Книгаын трос гинэ тунсыко туспуктэмъёсыз. Театрез яратӥсьёслы со усто кузьым луоз, со аспӧртэмлыко энциклопедия. Зэм, книгалэн авторез театрлэсь берло дас аръёс ӵоже ужамзэ сэрттыны-пертчыны ӧз тыршы. Борис Саушкин гожтӥз со сярысь, мае со ачиз ӟеч тодэ. Быгатыса кутэмын архивысь документъёс. Нош театрлэн туннэ но ӵуказе улонэз сярысь вералозы, дыр, мукетъёсыз. Театр - со пырак дырлы кылдэм маке, малы ке шуоно, солэн нуналмысь сюлмаськонъёсыз - улонлэн сюлмаськонъёсыз. Н. Байтеряков. Улэм потэ! Кык ар тырмоз ини Илья Петрович Мартюшевен пумиськылэммы дырысен. Алигес нош ӝож ивор кылӥськиз: кема висемез бере, Илья Петрович улонысь кошкем. Но мынам со сярысь одно ик вераме потэ: угось сомында секытэз адӟыса, та адями туж гажаз улонэз. Нош улон сое выйытӥз, зӥбиз, ӝутскыны ӧз сёты. Озьы ке но, со мон понна Илья Муромец батыр кадь вал. Зэм, шораз учкыса, батыр уд шуы: огшоры, шоро-куспо мугоро, чиед, чылкыт. Чик ӧй шӧдылы, воксё уг адӟы шуыса. Ӧвӧл одӥг пыдыз. Мукетыз нош - сӧсыр. Ӧз, тӧллы но, толлы но ӧз сётскылы, ӧз чигиськылы И.П.Мартюшев. ...Вордскиз но будӥз со Кияса ёросысь Юрмалай (Ермолаево) черкогуртын. Етӥз комбайнёр вал! Дас тямыс аресэз тырмиз но, оже ӧтён вуиз. Днепр шур вамен потыкузы, туж зол сӧсырмиз. Кема кыллиз йырсазьтэк. Толэзь пала. Кытын мон? Нош кытын пыды? Солэсь но секытэз вылэм азьланяз - Илья Петрович сукыр кылем: угось немец снаряд туж матын пуштэм. Ӧвӧл, ваньзэ чидало. Нош кинлы кулэ сукыр мурт? Куать операция пыр ортчиз. Зэм, со но ӧз юртты ини. Кема гинэ йӧнатӥськиз Одессаысь син эмъян клиникаын. Вал сыӵе мылкыдыз но: укноысь усьыса, улонэн люкиськоно. Кема сылӥз огпол усьтэм укно дурын. Зэм, палатаын кыллись эшъёсыз зӥбломытӥзы: тон егит ай, дышод улонлы. Ойдо, ӵошен дышетском. Войналэсь азьвыл Илья Сарапулысь огаз техникумын дышетскиз. Но, ожен сэрен, куспетӥ луиз дышетсконэз. Дышиз синтэмъёслы дасям книгая лыдӟиськыны. Букваос интые - точкаос, точкаос... Ох, шуг вылэм. Но собере книга бӧрсьы книга лыдӟыны кутскиз. Улоно, дышетсконо! Татын ик, Одессаын, баянэн шудыны дышиз: маке но кароно вал ук кызь одӥг аресъем егит пилы. Дораз, Юрмалай черкогуртаз, баянэн но кунул бодыосын вуиз. Ураме потаны кема ӧз дӥсьты: жалялозы шуыса малпаз, лэся. Котьма ке но, чидалоз-а егит пияш дораз пукыны? Уноез эшъёсыз лек тылӝуын быризы, нош со - улэп. Сӧсыр ке но, улэп! Анна сузэрез ик лӧпкытӥз: ойдо но ойдо ураме потом, баянэн шудом, кырӟалом, серектом. Кӧня улыны кулэ куректыса?! Нырысь-валысь Илья баянэн шудылӥз корка вӧзаз гинэ: отчы трос егитъёс люкаськыло вал. Илья шудэ баянэн, егитъёс экто. Пыдыз кӧня ке бурмем бере, сузэрез сое каллен гинэ клубе нуллыны кутскиз. Агайзэ китӥз кутэ, нош эшъёсыз баянзэ нуо. Пишмиз ведь: концерт бӧрсьы концерт. Юрмалайысь ӟуч хор сцена вылын уно пол шумпоттылӥз гуртооссэ. Хор вормон сярысь кырӟа-вера, шудо улонмес данъя, соосын ӵош кырӟа синтэм баянист но... Дышетскыны пыроно! Таӵе малпан Ильяез бурдъяз кадь. Но кин юрттоз? Со вакытлы солэн кузпалыз вал ини. Пиосыз будӥзы. Ижын пичигес патерзы вал. Нош пенсиез улыны но уг тырмы. Ижысь дышетӥсьёсты дасян институтлэн историяя но филологияя люкетаз документъёссэ бичаз. Нош дышетскыны нокин уг куты: пӧртэм мугъёс шедьто, экзамен сётыны лэзёнтэм понна. Москвае но вазиськылӥз, юрттыны курыса. Быгатӥз ведь. Вань экзаменъёссэ "витьлы" гинэ сётӥз. Озьы куинь ар ӵоже будэтэм стипендия басьтыса дышетскиз. Гужемъёсы но тол шутэтскон нуналъёсы юрттылӥзы пиосыз, агайёсызлэн нылпиоссы. Кин ке книга шара лыдӟе, кин ке мае ке магнит лента вылэ гожтэ вал. Озьы И.П.Мартюшев пединститутэз усто йылпумъяз. Кема гинэ историлы дышетӥз ӝыт ужась школаын. Берлогес синтэмъёслэн библиотекаысьтызы фонотекаен кивалтӥз. Со вакытлы синтэмъёслы нимысьтыз книгаос туж ӧжыт вал. Уката ик - удмурт кылын. Илья Петрович ялан тодаз вайылӥз, кызьы Удмурт радиоысь дикторъёс Пимен Касаткин но Милитина Гаврилова лыдӟылӥзы асьме кылын гожтэмъёсты, кызьы соосты магнит лента вылэ гожъяллязы но гуртъёсы келяллязы. Пенсие потон вакытэз вуиз ке но, Илья Петрович кема гинэ тыршиз на ас ужаз. Уже ветлонэз кыдёкын ӧй вал, ӵемысь выжы-кумыез ик келялляз уж дораз. ...Нош адӟон сьӧраз ветлэ вылэм, лэся. Вазь кулӥз нырысетӥ кузпалыз - Катюша. Кыӵе ярато вал ог-огзэс! Бӧрысь нош кузпалъяськиз - Любовь Семёновнаен куамын ар ӵоже ӵош улӥзы. Азьвылгес тракторен ужамын со. Городэ вуыса но аслыз ярамон уж шедьтӥз. Нош улон нош но нош выль кайгу вае: табере солэн кузпалыз гангренаен висьыны кутске. Укмыс пол пыдъёссэ вандылӥзы. Озьы ке но, Любаез "Запороженценызы" сад-бакчаязы нуэ-вае вал. Картэз пал пыд, но - синтэм. Кышноез синмо, но - пыдтэм. Ма понна меда инмар таӵе адӟон ваиз та кузпалъёслы? Висён нош ик вормиз Любаез... Пиосызлэн семьязы асьсэлэн. Кинлы кулэ сукыр мурт? Тодматӥзы асьсэ гуртысь ик пал кышномуртэн. Картэз вазь кулэм, нылпиосыз ӧвӧл. Озьы Фаина Алексеевна Новокрещёнова сое ас патераз ваиз, со понна ик сузэръёсыз соин кык ар ӧз вераськылэ. Берло тупазы ик, валазы, улон ортче, ог-огзылы юрттыны кулэ шуыса. Илья Петрович улонлэсь бере ӧз кыльы: кӧня газет, журнал басьтэ вал! Телевизорез, радиоез кылзылӥз, вань иворъёсты тодылӥз. Сизьымдон аресэз тырмем бере, кылбуръёс гожъяны кутскиз. Соос пӧлысь уноез Кияса ёрос газетын но потӥзы. Вал школаын ужам аръёсыз, тылӝу пыр потэмез, котькыӵе кайгуосыз сярысь кылбуръёсыз. Уноез выль нуналлы осконэн пыӵамын. Доразы, Иже, огпол вуылыкум кури Илья Петровичез ас кылбуръёссэ лыдӟыны, баянэн шудыны. Диванэз вылэ пуксыьса, "Белым снегом... Ночь метельная ту стёжку замела" кырӟанэз мытӥз. Шораз пуксьыса, синъёсы нюромизы: угось Илья Петрович войналэсь азьвыл Салья школаямы дядяеным ӵош дышетскем вылэм. Кыӵе шумпотӥз ас шаерысьтыз ваем иворлы! Киясаын улӥсь агаезлэн нылызлэсь но, солэн кузпалызлэсь но салам верай. ...Соку, квартираысьтызы ӧсэ жингыртэме бере, ӧй но оскы вал, монэ доразы лэзёзы шуыса: угось ог-огмес адӟеммы ноку но ӧвӧл. "Пароль" ик юрттӥз кадь: мон, шуисько, Сальялась луисько, тӥ доры куное лыктӥ. Нош ӧссэс ӧй усьтысалзы ке? Соку, оло, ёросысьтымы газет лыдӟисьёс ноку ӧй тодысалзы таӵе дано, улонэз гажась асвыл адямимы сярысь. Нош табере вал шуыса гожтом ини: угось ӧвӧл ини Илья Муромецмы асьме пӧлын. Со ноку но ӧз адӟылы пиосызлэсь, соослэн нылпиоссылэсь муспотон ымныр тусъёссэс. Тодылӥз одӥгзэ гинэ: кужмо муртлэн нылпиосыз но кужмо, юн выжыё луо. Геннадий ПАРФЁНОВ, Кияса ёрос газетын ужась. Ужезъя данэз Ӟеч сямъя таяз но вордскем нуналаз республикамы сӥё-дано пусйиз ужын данэ потэм нылъёссэ но пиоссэ, азьмынӥсь коллективъёсты. Соослэсь нимъёссэс но тусбуйёссэс быдэс ар ӵоже адӟыны быгатом Ижевсклэн шор площадяз юнматэм Удмурт Республикалэн Данъян пул вылысьтыз. Пӧлазы ӧжыт ӧвӧл гуртоос но. Басьтом Дэбес ёросысь Калинин нимо колхозысь Николай Евгеньевич Пономаревез. Та егит, чупрес воргорон кивалтэ Пичи Кизьна фермаысь коллективен. Данэ потӥзы трос йӧл кыскыны быгатэменызы: гужем нуналъёсы скаллы быдэ 16-18 килограммозь люкаськылӥз. Тол вылтӥ ӧжытак синэ. - Мынам туж бадӟым тау шуэме потэ дояркаосмылы. Соос милям 4 гинэ: Маиса Евгеньевна Ловкина, Ираида Евгеньевна Жуйкова, Алевтина Вениаминовна Константинова но Фаина Васильевна Иванова. Таиз алигес гинэ выль группа кутӥз. Ӟеч ужазы пудо возьмасьёсмы Алексей Евгеньевич Пономарев но Петр Николаевич Васильев. Нуналлы быдэ ӵукна сизьым часысен сизьым час ӝытозь скалъёсты возь вылын сюдӥзы. Тыршемзы - син азьын. Пусъём на: та пичи гинэ фермалэн, вордоно сюро таза пудозы ог 60 йыр, сюлмаськемзы тодмо луиз быдэс шаермылы. Пичи Кизьна гурт ачиз нимызлы кельше - улӥсез-вылӥсез 26-28 хозяйство. Тросэз - арлыдоос. - Егитъёслэн город пала мылкыдзы кыстӥське, озьы ке но, юртъер но пуктӥськом, нылпи но будэтӥськом, - шуэ Николай Евгеньевич. Ачиз со 10 классэз йылпумъяз, армие ветлӥз. Семья кылдытӥз. Тани ньылетӥ арзэ фермаен кивалтэ. Ужез пӧрме. Азьланяз но, Николай, ваньмыз умой мед луоз! Л. Медведева. Туспуктэмез В. Беломорскихлэн. Эшсэс буре вайыса Берло дыре Ува ёросын ӟеч азинскыны ӧдъяз спортлэн вунэтэм удысэз - шашкиен шудон. Али татын спортъя мастере 3 кандидатсы, 15 муртлы сётэмын нырысетӥ разряд. Пӧлазы вань егитъёс но, шутэтскыны потэмъёс но. Арлы быдэ дасо ӵошатскон ортче. Алигес татын Парамон Ивановез буре ваёнлы сӥзем турнир ортчиз. Парамон Васильевич уно аръёс ӵоже журналист луыса ужаз "Удмурт дунне" но Уваысь ёрос газетъёсын. Нош ваньмон дырзэ сӥзе вал шашкиен шудонлы. Со огшоры шудонэз мукет радэ пуктӥз. Тодматылӥз солэн теориеныз, лыдӟе вал нимысьтыз литература. Озьы Иванов котыраз люказ зэмос спортсменъёсты. Солэн кичӧлтэмезъя ик ёросын шашкия федерация кылдытэмын, кивалтэ соин Николай Ходырев. Нош буре ваён турнирын вормисе потӥз Уваысь улон интыосты возёнъя управлениысь команда. Нимаз спортсменъёс пӧлын азьпала потӥз Леонид Красильников. Шашкиен шудонлы республикаысь ёросъёсын саклык ичи висъяське. Соин ик спортсменъёс ог-огенызы уг пумиськыло. Та удыс пыртэмын ӧвӧл спартакиадае. Кызьы пусъё Уваысь шашкиен шудӥсьёс, умой луысал, сое гурт шудонъёслэн программаязы но пыртыса. Отын нокыӵе шугъяськонъёс но ӧй луысалзы. Ульчае ӝӧкъёс пукты но - шуд. Оло, республикаысьтымы спортъя но физкультурая комитет со куронэз лыдэ басьтозы? Н. Лялин. Тугоко Эшъяськонлэн кужымез бадӟым Кылем арня вискын Нациосын ужан политикая министерствоын ортчиз "котырес ӝӧк" сьӧрын пумиськон. Вераськон мынӥз шаерамы потӥсь газетъёслэн калык кусыпъёсты радъянын, тупаса, ог-огдэ валаса улонэз юнматонын кыӵе инты басьтэмзы сярысь. Пумиськонэ ветлӥзы прокуратураын, Печатья но иворъёсъя министерствоын, газетъёсын ужасьёс но мукет эшъёс. Ивор вӧлмытӥсь ёзъёс котькуд адямилэн улоназ бадӟым инты басьто. Нош быгато-а соос шаерамы улӥсь пӧртэм выжыысь калыкъёслэсь кулэяськонъёссэс тырмыт но кулэезъя быдэсъяны? Юрттэ-а газет калыклы вылӥ кивалтон ёзъёсын кусыпъёс тупатыны, кыло-а соос ог-огзэс? Мар лэсьтоно, газетын ӝутэм лэчыт ужпумъёс вылӥ кивалтӥсьёс дорозь мед вуозы шуыса, уката ик материал ӟуч кылын гожтымтэ ке? Таӵе но мукет ужпумъёсты сэрттыны-пертчыны ӵектӥз нациосын ужан политикая министрлэн нырысетӥ воштӥсез Наталья Смирнова, кенешез усьтыса. "Котырес ӝӧк" сьрын вераськонэз мытӥз "Герд" газетлэн редакторез Александр Вахрушев: - 1917-тӥ арын ай В. И. Ленин кивалтон вакытэ потыны кутскиз "Жизнь национальностей" газет. Ӵапак со ас бамъёсаз сэрттэ-пертче вал странаын улӥсь вань калыкъёслэсь кулэяськонъёссэс, паськыт вӧлмытъяз соослэсь малпанъёссэс. Туннэ сыӵе газет ӧвӧл. Табере ивор вӧлмытӥсь ёзъёс утьыны быгато на ас улосысьтызы гинэ калыкъёслэсь кулэяськонъёссэс. Нош мар печатлаське газетын, ваньмыз потэ вылӥ кивалтӥсьёс бордысь. Соос кыдёкын нациос куспын ужпумъёслэсь, кылэмзы-валамзы но уз поты шаерамы кылдэм югдурез. Тани берло быръёнъёс но яркыт возьматӥзы вылӥ кивалтӥсьёслэсь выжы калыкен герӟаськем ужпумъёс шоры чиньы пыр учкемзэс. Тросэз газетъёс, соос пӧлын удмурт кылын потӥсьёсыз но, вылӥын пукисьёслэсь куронъёссэс быдэсъязы. Нош куд-огез юри тыршизы калык кусыпъёсты ӟырдатыны, ог-огдэ синазькыль каронэз пуромытыны, удмуртъёсты ултӥяны, соослэн азинскон, будон сюрессы ӧвӧл шуыса. Ваньмылы асьмелы малпаськоно огъя газет кылдытон сярысь. Со огазеясал ивор вӧлмытӥсь ёзъёсты но юрттысал шаерамы улӥсь пӧртэм нациен калыкъёслэсь кулэяськонъёссэс сэрттон-пертчонэ вылӥ кивалтӥсьёсты кыскыны. - Та вераськонэз ик азланьтыса, мон пусйысал, власть ӵемысь ачиз палэнске ог- огедлы пайдаё луись вераськонлэсь, кужмысь пыкиське матэ кариськыны тыршонлэсь, - шуиз "Удмурт дунне" газетлэн редакторезлэн воштӥсез Иван Лебедев. - Калыкъёс куспын тупамтэос, ченгешонъёс, ог-огдэ ултӥян учыръёс юнгес шӧдӥсько быръёнъёс дыръя. Озьы ик вал таяз учыре но. Нош вылӥ кивалтӥсьёс югдурез валаса, законэз чакласа, демократилэн куронъёсызъя ужасалзы ке, ивор вӧлмытӥсь ёзъёсын ӧй потысалзы ог-огдэ сьӧдмась материалъёс, ӧй луысалзы нокыӵе вераськонъёс соиз яке таиз газет вылэ зӥбон, кужмысь карон, коньдон понна вузаськон учыръёс сярысь. Асьмелы кулэ ке президент, уг луы шат сое бырйыны калыкез бугыръятэк, пӧртэм огазеяськонъёсын, ог-огеныд кусыпъёсты тӥятэк? Газетъёс талэсь вылӥын луыны кулэ. Калык понна гожъясь мурт котьку тодаз мед возёз аслаз данэз, чылкытлыкез сярысь. - Вискады ик пырыса юаме потэ, - шуиз Удмурт кун университетысь огъя историяя кафедралэн кивалтӥсез Татьяна Ефремова, - иворъёс вӧлмытӥсь ёзъёсты ньылетӥ властен лыдъяло. Мар шуысалды та пумысен? - Жаляса верано луэ, гожтэм кыллэн кужымез туннэ, азьло вакытэн ӵошатыса, трослы лябӟиз. Кун властез радъянын, политика удысын солэн интыез шӧдсконтэм. Журналист вылӥ кивалтон ёзъёсын кусып возись гинэ луэ на. - Озьы ке но, адямиос оско газетъёслы, радиолы, телевиденилы, - азинтэ Татьяна Николаевна. - Калык пӧлын ортчытэм эскеронъёс возьмато: котькуд адями нуналаз шорлыдын куинь-ньыль час виъя телевиденилы, со сяна лыдӟе на газетъёс. 70 процентэз, со пӧлысь 30 процентэз мӧйыос, сётӥсько гожтэм-верам кыллы оскытонлы (внушенилы). Соин ик котькуд кылэз пыр-поч эскерыса, малпаса гожтоно. Монэ юн сюлэмшугъяськытэ туала гожъясьёслэн ужзэс суп-сап, урод быдэсъямзы, югдурез, верам кылэз мыдланьтыса ивортэмзы. Журналистика берло дыре туж пиналмиз. Отчы вуизы пичи опытэн, та ужлы чик дышетскымтэ, чылкак мукет удысъёсысь адямиос. Ивор вӧлмытӥсь ёзъёс шедизы нимаз адямиос кие. Соос ас тодэмзыя ужало. Асьмеос ыштӥм 1990-тӥ аръёсы кылдытэм зарни фондмес, куке гожъяськон удысын тыршизы зэмос журналистъёс. Таин валче мон ӵектӥсько гожъясьёсты дасянъя, дышетонъя, соослэсь тодон- валанзэс но быгатонлыксэс будэтонъя центр кылдытыны. та уже мед пыриськозы Печатья но иворъёсъя министерство, Калыкез дышетонъя министерство, тодмо журналистъёс, тодосчиос. Ӟеч тодон-валанъёсын, юн мылкыдо журналистъёстэк та удыс пумен уката куашкалоз, кужымзэ воксё ыштоз. - Туж кулэ ужпумъёсты эскериськом асьмеос туннэ, - вераськонэ пыриське бигер кылын потӥсь "Янарыш" газетлэн редакторезлэн воштӥсез Закуан Нурутдинов. - Милесьтым газетмес Удмуртиын сяна, солэн палэназ улӥсьёс но лыдӟо. Газет пыр ми пыӵатыны тыршиськом ас калыктэ, кылдэ, культурадэ, йылолъёстэ гажан но утён мылкыд. Со дыре ик бадӟым саклык висъяськом мукет калыкъёсын кусыпъёс тупатонлы, эшъяськыса улонлы. Калыкедлэсь сяна дышетсконо гажаны мукетъёслэсь но улон дуннезэс. Со понна одно ик тодоно соослэсь но историзэс, сямъёссэс. Та ласянь ми нырысь вамышъёс лэсьтӥм ини. "Удмурт дунне" газетын поттӥм бигеръёслэн улэм-вылэмзылы сӥзем быдэс бам, нош милям газетамы куное вуылӥз "Удмурт дунне". Таӵе амалэн ужан кельшиз милемлы но, лыдӟисьёслы но. Та кутсконэз одно ик азинтом, мукет газетъёсы но сое вӧлмытом. Нош верано ке газетлэн вылӥ кивалтон ёзъёсын кусыпъёсыз сярысь, та ласянь ми ушъяськыны быгатӥськом. Газетамы кварталлы быдэ вераське Татарстанлэн Президентэз Минтимер Шаймиев. Со пыр-поч валэктонъёс сётэ калыклэн юанъёсызлы, ивортэ сюлэмшугъяськытӥсь ужпумъёсъя кутэм ужрадъёс сярысь. Туж умой луысал, Удмуртилэн Президентэз но, газетъёсын матысь кусыпъёс тупатыса, улон-вылон но экономика удысъёсын кылдэм югдурен ӵемгес тодматысал ке. Котькуд калыклэн правоез вань вордскем кылын газет поттыны. Юртэ-а Печатья но иворъёсъя министерство газет поттыны мылкыд карисьёслы? Кызьы эскерыса возе сослэсь ужзэс? Таӵе юанъёслы валэктон сётӥз печатья но иворъёсъя министрлэн вошттӥсез Назира Касимова: - "Ивор вӧлмытӥсь ёзъёс сярысь" Законын верамын, вань газетъёс, журналъёс эрикоесь шуыса. Со - демократилэн вормонэз. Туннэ нуналлы асьме дорын печатласько кык сюлэсь ятыр изданиос. Та лыдпус ик вера, дыр, со сярысь: министерство ӟечкыла гинэ газет поттыны мылкыд карисьёсты, котьку дась соослы юртттыны. Но ваньзэ, мар сярысь гожъяло газетъёс но журналъёс, ми эскерыса ум вуиське. Мон сямен, солэн кулэлыкез но ӧвӧл. Западысь специалистъёс асьме улосмес номырин ӵошатонтэм, туж паймымон (ӟуч сямен вераса, "феномен") шуо. Уго шаерамы дауръёс ӵоже тупаса, ог-огзэс валаса, вожвылъяськытэк уло 70 пала пӧртэм калыкъёс. Веранэз ӧвӧл, югдурез утёнын бадӟым интызы ивор вӧлмытӥсь ёзъёслэн но. Соос бордысь ик потоз азьланьын но огсыр улонмы. Демократия луонлык сётэ котькудӥзлы ас малпанзэ, мылкыдзэ шара вераны. Но со эрикез эсэпсэ валаса кутоно. Янгышаса верам одӥг кыл гинэ но быгатоз калык кусыпъёсты зуркатыны, весяклы куашкатыны. - Но куд-ог дыръя гожъясь ачиз но сое валаса уг вуы, - вераськонэ итӥське республикаысь Прокурорлэн юрттӥсез Любовь Амбарцумян. - Ужамы ми ӵем пумиськылӥськом сыӵе учыръёсын. Тани берло быръёнъёс азьын гинэ керӟегъяськон потӥз "Герд" газетын печатлам одӥг материал пумысен. Отын вераськон мынӥз удмуртъёсты шаерамы улӥсь мукет калыкъёслэсь вылӥе пуктон сярысь. Ми пумиськылӥм статья понна кыл кутӥсьёсын. Соослэн верамзыя, нокин но ӧз малпа ог-огзэ ултӥян, мыскыллян, уката ик - калык кусыпъёсты таркан сярысь. Кин татын янгыш? Таӵе учыръёсы туж шуг кинэ ке янгыше уськытыны, кинэ ке шонере поттыны. Та учыръя но адӟиське: элькунамы вань калык кусыпъёсын герӟаськем ужпумъёс. Сотэк уз но луы, малы ке шуоно, дорамы пӧртэ выжыосысь калыкъё уло. Но со ужпумъёс шоры синмез кынёно ӧвӧл. Соослэсь кепыраны уг яра. Республикаямы Юстицияя министерствоен пусъем ог кызь пала калык огазеяськонъёс лыдъясько. Ваньзы соос тыршо калык кусыпъёсын герӟаськем ужпумъёсты сэрттон-пертчон бордын. Та огазеяськонъёслэсь ужзэс радъяны, шонер сюрестӥ ӧръяны кулэ Нациосын ужан политикая министерство. Нош солэн нырысь юрттӥсьёсыз мед луозы ивор вӧлмытӥсь ёзъёс. Таин валче мон дэмласько кылдытыны нимысьтыз Кенеш (мон сое шуысал консультативной). Отын журналистъёс быгатысалзы ог-огзылэсь малпанъёссэс шараяны, ӵош утчасалзы кивалтон ёзъёсын кусып тупатон амалъёс, кенешысалзы калыкъёс куспын эшъяськыса улонэз газет бамъёсын паськытгес, мургес возьматон сярысь. Зэм но, вераськон пайдаё ортчиз. Азьланяз таӵе пумиськонъёс одно ик луозы на. Эшъяськыса улонэз утён - бадӟым ужпум. Эшъяськонлэн нош кужымез бадӟым. Е. Николаева. Удмурт Республикаысь Кун Кенеш мур куректэмзэ вера Кун Кенешлэн депутатэзлы, акциосын "Гамбринус" огазеяськонлэн директорезлы Галеев Азат Таисовичлы нылыз Екатерина шудтэм учыре сюрыса, улонысь дырызлэсь вазь кошкемен валче. Удмурт Республикаысь Кун Кенеш но Правительство мур куректэмзэ вера Россия Федерациысь Юстицияя министерстволэн Удмурт Республикая управлениезлэн кивалтӥсезлэн воштӥсезлы - Удмурт Республикаысь судъя валтӥсь приставлы Семенов Валерий Викторовичлы кышноез Семенова Нина Васильевна шудтэм учыре шедьыса, улонысь кошкемен валче. ГОЖТӤСЬКОН-2001 Газетмес лыдӟись гондырлэсь но уг кышка Чиньыен лыдъямон лыдӟисьёсмы Сюмси палан. Ӟучгес карисько: удмурт кылэз, пе, школаын ӧм дышетэ. Ӧйтӧд, мар пӧртэмез букваосын? Но асьсэлэсь кылзэс, калыксэс гажась муртъёс татын но вылэм ай. Толэзь талэсь азьло редакцие Пичи Ингалась гожтэт вуиз. Лыдӟисьмы Фёдор Сергеевич Раевских ыстэм, удмурт кылын ма но со гожтэм. Чуръёсыз газетэ ӧз потэ ай, но алигес, Сюмси палъёсы вуылыкумы, ми Фёдор Сергеевич доры кожам. Тунсыко адями вылэм со. Огшоры учыръёсты но серекъяса-серекъяса маде. "Шӧкычен" номермес но, пе, чидатэк витисько. Гондыръёсын пумиськылэмъёссэ мадьыкуз уд но оскиськы кадь. Но кузпалыз - Олимпиада Дмитриевна - зэм вал, шуэ. Кытысь гондыръёс- а? Сюмси тэльёсын соос лачак. Нош Фёдор Сергеевич улытозяз колхоз пасекаын мушкасьын ужамын. Нюлэс буба ӵем бекыръяз умортоосты. Но маскаръяськыны яратӥсь эшмы соослэсь уг кышка, пенсие потыса, воксё палазы кариськиз: гужемлы муш умортооссэ лудэ нуэ, отын ик палаткаын ачиз но улэ. Сӥзьыл пал трос чечыен бертэ. Малпаськом, Фёдор Сергеевич аслэсьтыз мушкан "ватосъёссэ" лыдӟись эшъёсмылы но усьтоз, газетмы пыр мушен вырисьёслы ӵектонъёс-индылонъёс сётъялоз. Чечыен чай юон сямен почтальон ӵап "Удмурт дуннелэсь" выль номерзэ пыртӥз. Фёдор Сергеевич матысь эшеныз сямен ӟечъяськиз газетэн: о-о, вуид-а? Умой, умой. - Кызьы озьы тӥ мукетъёсыныз ӧд сураське, ӟучъяськисьёс пӧлын улыса удмурт газетэз ӧд вунэтэ? - юасько гажано лыдӟисьмылэсь. - Мон удмурт ук, - вакчияк шуиз со. З.Рябинина. Туспуктэмез В.Беломорскихлэн. Ваче кенешон Юрий Семенов: "Тонэ ке валало - со бадӟым шуд" Та адямиен пӧртэм ужпумъёсъя вераськыны луэ. Угось мар борды гинэ со уг басьтӥськы, ваньзэ пыр-поч быдэстыны тырше. Кытысь сомында кужым шедьтэ? Оло, Скорпион кизили улын вордӥськемез юрттэ? 13-тӥ ноябре Юрий Валерьянович Семеновлы ӝыны даур тырме. Та вакытэ со философия наукаосъя кандидат луэ, кивалтэ Россиысь калыкъёслэн ассамблеязылэн Удмуртиысь ёзэныз. Со сяна, коммунист Семенов бадӟым уж нуэ республикаысь коммунистъёс пӧлын, угось со КПРФ-лэн республикаысь огазеяськонэзлэн секретарез луэ. Юрий Валерьянович озьы ик депутат луыса туж мыло-кыдо ужаз Кун Кенешлэн азьвыл ӧтчамаз. Юрий Семеновез юбилееныз ӟечкыласа, солэн куд-ог ужъёсыз сярысь вераськоно кариським. - Юрий Валерьянович, кылем арын гужем ортчиз Россиысь калыкъёслэн ассамблеязылэн 2-тӥ ӧтчамез. Солэн ёзэз табере кылдытэмын Удмуртиын но. Кыӵе ужъёсын со вырыны кулэ? - Калыкъёсэсь кусыпъёссэс юнматон но соослэсь эшъяськонзэс вылӥегес ӝутон понна кулэ луиз огазеяськыны. Озьы кылдӥз Россиын улӥсь калыкъёслэн ассамблеязы. Одӥг калыклэсь гинэ куронъёссэ вылӥ кивалтӥсьёс ӵем дыръя адӟымтэ улэ каро. Нош огазеяськыса трос ужпумъёсты ӝоггес быдэстыны луэ. Мыным туж кельше Р. Абдулатиповлэн (туннэ со кивалтэ ассамблеяен), национальной ужпумъёс шоры учкемез. Но жаляса верано, берло дыре ортчем бадӟым ужрадъёс - Кун Думае быръёнъёс, Россилы но Удмуртилы президент быръёнъёс - ассамблеялэсь быдэстоно ужъёссэ берлолыгес кадь кельтӥзы. Озьы ке но, 15-тӥ ноябре Удмуртиын ортчоз ассамблеялэн кивалтэмез улсын Россиысь егитъёслэн форумзы. Та ужрадэ пыриськон сярысь мылкыдзэс веразы ни 50 пала улосысь егитъёс. Удмуртилы президент быръем бере, малпасько, национально-культурной огазеяськонъёслэсь ужамзэс кужмоятоно. - Удмуртилы президент быръён азьын коммунист В. Ануфриев нюръяськонысь потэмез сярысь ивортӥз. Нош коммунистъёслэн азьветлӥсьёссы Г. Зюганов но Н. Сапожников бырйисьёсты меӵак ӧтизы мукет кандидатлы дурбасьтыны. Сыӵе "шудонъёс" тросэзлы коммунистъёслы, тужгес но гуртъёсын улӥсьёсызлы, валантэмесь луизы. Кызьы дунъяськоды тӥ со югдурез? - Меӵак верано ке, КПРФ-лэн Удмуртиысь ёзэз Ануфриевлэн вормонэзлы сокем зол ӧз оскы, угось вань кандидатъёслы нюръяськон кутскон азьын ик туж пӧртэмесь луонлыкъёс кылдытэмын вал. Кандидатмы понна паськыт агитация нуыны, нимаз газет поттыны гинэ но коньдон ӧм шедьтэ. Но ми Ануфриевез "шедьтӥм", солэсь кандидатуразэ бырйисьёслы ӵектӥм, собере каньылля со понна ужаны кутским. Кандидатмылэн нюръяськонысь потэмез ми понна но туж витьымтэ шорысь луиз. Ӧм малпалэ, со сярысь ужпумез сокем вылӥын но эскерозы шуыса. Ма бен, В. Ануфриевез но табере валаны быгатоно, дыр. Асьсэос коммунистъёс но валче ужаны ӧз быгатэ ук, люкиськизы, пӧртэм кандидатъёс понна ужазы. - Туала вакытэ, оло, сомында партиос кулэ но ӧвӧл ни? Мар толыкез пайдатэм нюръяськонъёслэсь? Коньдоно партиослы (властьлэн партиосызлы) гинэ, лэся, сюрес усьтӥське ини... - Мон озьы уг лыдъяськы. Партиос кылдо, улон куремъя, угось котькудзы соос кыӵе ке калыкъёслэсь, улӥсьёслэсь кулэяськонъёссэс утё, мылкыдзэс возьмато. Начар но узыр партиос сярысь ке верано, соос дуннеын котьку но вал. Партиез возьыны-кылдытыны гинэ коньдонмы тырме, но туж секыт йӧтэ мултэс коньдон шедьтыны паськыт быръён кампаниез нуон понна. Озьы луиз коммунистъёсын но. Вылаз ик, Россиын но Удмуртиын берло ортчем быръёнъёс партилэсь казназэ туж зол бушатӥзы. - Таиз быръёнъёс бере Удмуртиысь коммунистъёслэн кужымзы уз-а лябӟы? - Уз. Мон туж шумпотӥсько, берло аръёсы коммунистъёслэн радъёсазы егитъёс но кыстӥсько ни шуыса. Та уж тужгес но ӟеч мынэ Ижысь Первомай ёросын. Улӟыны кутскиз комсомол. Вуоно арын 80 ар тырме Удмуртиын партийной организация но комсомол кылдытэм дырысен. Шуг-секытъёс вань - кызьы-о соостэк. Кылсярысь, ум быгатӥське на лэсьтэм ужъёсмы сярысь калыклы ивортыны. Парторганизацилэн секретарез луыса радио но телевизор пыр вераськыны яке воксё уг лэзё, яке сокем ӧжыт дыр висъяло - ачид аналскиськод. Соин ик малпамы асьмелэсь газетмес поттыны. Редактор но шедьтӥмы ни. Ӝоген газетмылы гожтӥськон яломы. Редколлегие монэ но пыртӥзы. - Кызьы мыно ужъёсты доктор диссертацидэс дасян бордын? - Ужме азьланьтон вылысь, туэ бугыръяськи Санкт-Петербугысь архивын. Малпамтэ шорысь шедьтӥ "Мултан ужъя" бумагаосты. Соосты быремын шуыса лыдъяло ни вал. Макем бадӟым шумпотон! Бурдъяськем мылкыдын выльысь басьтӥськи ас уже борды. Но шонерзэ верано ке, вань ужъёсы, политикаен-а со, партийной ужен-а герӟаськемын, ваньзы юртто кадь темаелы материал люканы. Мон эскерисько кунлэсь но черклэсь, черклэсь но калыклэсь, язычестволэсь но православилэсь кусыпъёссэс. - Юанъёсын, куронъёсын тӥ доры адямиос ӵем-а вазиськыло? Тросэз тӥледыз тодо на депутат ужъя? - Шонергес, дыр, тазьы вераны луысал: кин меда уг вазиськы? Тодмало урамын, транспортын. Куд-огез баӵко доры сямен, пыдло ватэм малпанъёссэ усьтэ. Тыныд оске, иське. Палэнтӥд ке одӥгзэ, мукетсэ, тыныд вазиськись луоз на шат. Мон пӧртэм религиосын вырисько бере, инмарлы оскисьёс но вазиськыло, тужгес но семья кусыпъёсазы валамтэос кылдыку. Мынам малпамея, улонын тужгес но бадӟым инты басьтэ ог-огдэ валан. Тонэ ке валало, тон ке мукет адямиез валаськод - со бадӟым шуд ини. - Али пӧртэм пумо черкъёс, храмъёс усьтӥськыло. Сыӵе югдур мар сярысь вера? Оло, вань православнойёс, осконзэс воштыса, мукет черкъёсы ветлыны кутскозы? Тани Ижын протестантъёслэн туж бадӟым черксы ӝутске ни. - Зэм, вань черкъёс, конфесиос адямиосты ас палазы кыскыны туртто. Соин ик чик но шонер ӧвӧл, куке шуыны туртто: али, пе, идеологиын нокыӵе нюръяськон уг ни мыны. Эшшо кыӵе мынэ! Мынам эскеремея, Удмуртиын православной черк туж зол герӟаськемын кунэн. Сыӵе герӟет зэмос оскисьёсты кышкатэ но. Соин ик куд-огез шонско государствоен герӟаськымтэ черкъёс пала. Нош ик тодэ лыкто президент быръёнъёс. Православной черклэн епископез калыкез меӵак ӧтиз куараосты А. Волков понна сётыны. Черкез, малпасько, сыӵе вамышъёс уг чебермало. Протестантъёс сярысь ке верано, соос юн чаклало "свобода совести" шуонэз. Адямилы ас осконзыя улыны эрик сёто. Со дыре ик соос берло дыре зол басьтӥськизы юисьёсты, наркоманъёсты эмъян борды! - Юрий Валерьянович, кызьы тӥ философ синмын дунъяськоды экономикаез азинтонъя министрлэсь Г. Грефлэсь программазэ? Верало, Россиысь Правительство али быдэсак соя ужа ни шуыса. Но республикамылэн экономикая министрез та ужпумъя валэктонъёс малы ке сётыны уг дырты. - Мынам тодэмея, Грефлэн программаез али эскерыны сётэмын академикъёслы. Шара эскеремын луоз-а, уз-а, али вераны шуг. Но озьы, кызьы со али дасямын, уже кутыны уг яра. Меӵак верано ке, Грефлэн программаез укша Гайдарлэн программаезлы. Сое улонэ пыӵатыса, ӝутскись экономикамылы верантэм шуккет лэсьтэмын луоз, социальной удысын али чаклам программаослы соку быдэсак пум понэмын луоз. Мынам учкемея, Грефлэн программаез дасямын МВФ-лэн но Западлэн куронъёссыя. - Тӥ преподаватель луыса ужаськоды Ижысь Гурт удысъя академиын. Озьыен, музъем ужпумъёслы но тӥ матын луиськоды. Кызьы учкиськоды музъем реформа ортчытон шоры? Кун Дума музъем вузанэз умоен кадь лыдъя ни. - Музъемез вузаны лэземын луиз ке, калык уката но начармоз. Угось выль кузёос басьтозы ӟеч музъемъёсты. Озьы ке луиз, музъеммы сюроз пӧртэм выжыысь потэм кузёослы, удмуртъёс музъемтэк кылёзы. Ма, удмуртъёс пӧлын узыр ужбергатӥсьёс, фермеръёс но ӧжыт на ук. Музъем кодексэз эскерон Думаын мынэ на. Тазьы малпасько: отын ужась депутатъёсмы С. Смирнова, Н. Сапожников но Ю. Маслюков азе та ужпумъя золгес куронъёс пуктоно. Собере соослэсь но кылзэс юаны ӧвӧл вунэтоно, дыр. - Тау вераськемды понна. "Удмурт дунне" газетын ужасьёс ӟечкылало тӥледыз юбилееныды. Сӥзиськом тазалык, ужады уно вормонъёс. Татьяна Банникова. Сессия люкаськоз Толон люкаськылӥз Кун Кенешлэн президиумез. Отын вераськизы Кун Кенешлэсь дас куинетӥ (азьвыл чакламтэ) сессизэ 28-тӥ ноябре люкан сярысь. Сессиын эскерыны чакламын уно ужпумъёс: Кун Кенешлэн Тӧроезлэн А. А. Волковлэн но Глазовысь быръёнъя 54 номеро округъя депутатлэн ужзэс дырызлэсь вазь быдэсъямысь дугдэмзы сярысь, Кун Кенешлы но Правительстволы Тӧро быръён пумысен, "Удмурт Республикаысь Правительстволэн ёзъёсыз сярысь" Законлэсь инъетсэ юнматон, коньдон ужпумъёсъя министрлэн кандидатураез пумысен вераськон. Президиумын чакламын Кун Кенешлэсь дас ньылетӥ сессизэ 19-тӥ декабре люканы. Отын эскеремын луоз 2001-тӥ арлы бюджетлэн инъетэз, "Удмуртиез азинтон" программа но республикалэн правоя норма луись актъёсаз воштонъёс-выльдонъёс пыртон сярысь ужпум. Удмурт Элькунысь Кун Кенешлэн пресс-службаез. Та нуналъёсы, ӝытъёсы... 15-тӥ ноябре - Москваысь П. И. Чайковский нимо концерт ортчытъян залын - кырӟанъя но эктонъя "Италмас" кун академической ансамбльлэн концертэз. Со сӥземын удмрут кунлыклэн 80 ар тырмонэзлы. 17-тӥ ноябре - республикаысьтымы Крезьгуръя училищеын Удмурт Республикаысь искусство удысысь дано деятельлэн крезьгурчилэн Юрий Болденковлэн вордскемез дырысен 55 арес тырмонлы сӥзем концерт. 18-тӥ ноябре - "Металлург" культура дворецын калык кырӟанъя, крезьгуръя но эктонъя "Танок" кун ансамбльлэн концертэз (16 часысен). Сӥземын та коллективлэн дас ар но кунлыкмылэн 80 ар тырмонзылы. 17-тӥ ноябре Сюмсиын, нош 19-тӥ ноябре Вавожын - театр амалъёсын пуктэм концерт программаослэн нырысетӥ люкетъёссы. Со нимаське "Ортчись даурлэн берпум жингыртӥсь сиосыз". Та конкурс сӥземын ЪЪИ дауре выжонлы. Нырысетӥ люкетэз луоз районъёсын но городъёсын. Кыкетӥез - зонаосын концертъёс. куинетӥез - йылпумъясь программаос, отчы пыриськозы шаерысьтымы устоосыз кырӟась-верасьёс, коллективъёс. Та концертъёс луозы 2001-тӥ арын январе, отысь адӟыны луоз, чеберлык удысысь кыӵе жанръёс тужгес но азинскозы та ортчись дауре. А. Апаева, республикаысьтымы Культурая министерствоын ужась. Табере уин но югыт Завьялово черкогуртын уин пеймыт шуыса, адямиос кемалась сюлмаськемзэс верало ни вал. Но тани туэ ёросысь жилищно-коммунальной хозяйствоын ужасьёс нырысь кутскемазы 80 юбое электролампочкаос юнматӥзы ни. Но со тырмыт ӧвӧл на, соин электрикъёс вутскозы на Механизаторъёслэн но Октябрьской ульчаосы. Кивалтӥсьсылэн В. А. Шишовлэн верамезъя, туэ лампочкаос басьтыны 10 сюрс манет уксё висъямын. Озьыен, Завьяловоын табере бер ӝыт но, уин но югыт луоз. П. Николаев. Политика Арня ӵоже дуннеын, странаын, шаерын Кык сю арлэсь ятыр демократия амалэн улӥсь странаын но президент быръёнъёс капчиен уг ортчо вылэм. Ӝоген арня тырмоз ни США-ысь калык аслыз вылӥ кивалтӥсь быръем дырысен. Нош президентлэн нимыз али но тодмо ӧвӧл на. Тодады вайытом, Америкаын улӥсьёс куаразэс уг сёто президентэ кандидат понна, соос быръё выборщикъёслэсь коллегизэс. Отчы пырем муртъёслэн лыдзы тупа Конгресслэн улӥ палатаяз быръем депутатъёслэн лыдзылы. Озьыен, котькуд штатлэн выборщикъёсыз сомында ик, кудмында конгрессменъёсыз. Президентэ кандидат люканы кулэ 270 куара. Альберт Гор но, Джордж Буш но сомында ӧз тырмытэ. Флорида штатын кандидатъёс огмындагес куара люказы. Сыӵе дыръя лыдъян-чотанэз выльысь радъяло. Таӵе амал но вормисез ӧз шарая. Табере лыдъяно на палэнын сётэм куараосты. США-лэсь президентсэ быръёнэз чакланы ветлӥз Россиысь Быръёнъя комиссилэн тӧроез Александр Вешняков. Адӟем карымонэз трос, шуиз со, но Россиын но ӟечез вань, шуом, асьмеос котькудмы шонерак бырйиськом президентэз. Таӵе амаллы дурбасьто ини данакез американецъёс, выборщикъёслэсь коллегизэс быдтыны косо соос. Флорида штатысь городъёсын демонстрациос но митингъёс ортчо, быръёнъёсты выльысь ортчытыны курыса. Ортчем арня вискын шутэтскон нуналъёс тупазы. Пусйим Тупаса но огкылысь улон праздникез. Озьы ке но, политика удысын шутэтскон уг луылы, шӧдске. Кемалась ик ӧвӧл Кышкытлыклэсь утиськонъя кенеш люкаськылӥз. Отын вераськон мынӥз армия сярысь. Ужпум пуктэмын сое ӝыны миллионлы кулэстон сярысь. Нош коньдон висъянэз азьвыл мында ик кельтыны чакламын. Президентлэн та пумысен документъёсыз матысь дыре потыны кулэ. Россиысь политика удысысь элитаос котьку но вожмаськылӥзы ож тӥрлыкен вузкаронэз капыртон понна. Озьы странамы уно коньдонзэ ыштылӥз. Владимир Путин таӵе югдурлы пум пуктыны малпаз, шӧдске. Со отставкае келяз куспазы нюръяськись кык кун предприятиослэсь кивалтӥсьёссэс: "Росвооруженилэсь" директорзэ Алексей Огарёвез но "Промэкспорт" предприятилэсь директорзэ Сергей Чемезовез. Пусйыны кулэ, асьсэос предприятиос но быдтэмын. Соос интые кылдытэмын "Рособоронэкспорт" выль компания. Солы кивалтӥсе юнматэмын "Промэкспортлэн" генеральной директорезлэн воштӥсез Андрей Бельянинов. Оскон вань, ачиз Президент басьтӥськиз ни бере ож тӥрлыкен вузкарон борды, озьыен, отын югдур тупатскоз. Странамы тросгес пайда басьтыны кутскоз. Но кунсьӧръёс Россилы осконзэс уз ыштэ меда, укыр ӵем ук вошъяськыло ож тӥрлыкен вузкарись предприятиосмылэн кивалтӥсьёссы. Вторнике (7-тӥ ноябре) йылпумъяськизы "Курск" атомоходысь бырем подводникъёсты ӝутон ужрадъёс. Шедьтэмын 12 мурт. Ваньзы сос сӥё-дано ватэмын странамылэн пӧртэм сэрэгъёсаз. Малы быриз "Курск"? Та юанлы валэктон али но сётэмын ӧвӧл. ВМФ-лэн командованиез но главком адмирал Куроедов оско: лодка борды мырӟиськиз кыӵе ке мукет подлодка. Нош Западын уг но вато: морякъёслэсь учениоссэс Баренцево зарезьын чакласа улӥзы США-лэн кык подлодкаосыз - "Толедо" но Мемфис", Великобританилэн - "Сплэндид" атомоходэз. Правительстволэн комиссиезлэн кивалтӥсез Илья Клебанов военный морякъёсын соглаш ӧвӧл. Ваньмыз шараяськоз вуоно арын, шуиз со, "Курскез" ӝутэм бере. Та ужез Россия огназ быдэстыны уз быгаты. Соин ик дасяське калык куспо проект. Ма, кылемаз ужрадэ но пыриськиз Норвегиысь "Регалия" судно. Со пыре "Халлибертон" фирмае. Уд но оске, но туэ август толэзёзь та фирмаен кивалтӥз ЦРУ-лэн азьвыл кивалтӥсез Ричард Чейни. Шаермылэн улонэз н ужамез понна табере кыл кутэ Президент Александр Волков. Ӝоген люкаськыны кулэ Кун Кенешлэн азьвыл чакламтэ дас куинетӥ сессиез. Депутатъёс быръёзы асьсэлы тӧро. Кинэ меда? Шаерысьтымы ивор вӧлмытӥсь ёзъёс ӵемгес верало кык нимъёсты - Павел Вершинин но Игорь Семенов. Ю. Александрова. АРХИВЫСЬ ДОКУМЕНТЪЁСЪЯ Удмуртия ХХ дауре 1955-тӥ ар Таиз ар историе кылиз кукуруза сярысь мултэс вераськонъёс ӝутэмен. Январе ортчиз КПСС-лэн ЦК-езлэн пленумез. Отын нимысьтыз саклык висъямын вал пудо вордон удыслы. Сое азинтон вылысь пленум ӵектӥз котькуд хозяйствоын кукуруза кизьыны. Удмуртиысь бусыосын но пленумысен ушъям культуралы бадӟым инты висъязы. Зэм, со понна кулэстоно луиз йыдылы но сезьылы висъям муосты. Азьвыл чаклам 5-6 ар интые, шаерысьтымы крестьянъёс ю-нянь люканэз но йӧл-сӥль поттонэз 2-3 арскын ик йылэтыны басьтӥськизы. Та вакытэ гуртын улӥсьёслы пичияк луонлык сётӥзы кузё мылкыдын ужаны. Соин ик музъемез но соос уже кутыны пайдаёгес сюлмасько ни. Пусъем ужпумъёс уг быдэсмо. Куазь ваньзэ ас сяменыз радъяз. Кизем кукуруза пӧлысь 60 процентэз бырыны шеде, кылемез но туж начар будэ. Та аръёсы котькудӥзлэн син азяз - выльвыл музъемъёс. Удмуртиысь 4500 егит пиос но нылъёс ас мылкыд каремзыя кыдёкысь шаеръёсы ю-нянь октыны-калтыны мыно. 96 адями правительстволэн вылӥ наградаосыныз пусъемын, 700 мурт комсомоллэн кузьымъёсыныз. 13-тӥ ноябре Иж вӧзысь Пазял гурт дорын усьтӥське шаерысь музъем ужасьёслэсь но пудо утисьёслэсь азинсконъёссэс возьматӥсь выставка. 1955-тӥ ар - пятилеткаез йылпумъясь ар. 5 арлы пусъем задание быдэстэмын вал дырызлэсь вазь. Удмуртиысь промышленной предприятиос, 1950-тӥ арен ӵошатыса, 93 процентлы уногес продукция поттӥзы. Шорлыдын ваньбур поттон арлы быдэ 14,2 процентлы йылэ, нош ужазинлык - 9 процентлы. Улон ӟеч пала воштӥське ке но, городысь калык сиён-юонлы ёрме, шаерамы поттэм сӥль-йӧл уго уноез палэнэ кошке. 1955-тӥ арын Удмуртия 53,7 сюрс тонна йӧл люказ ке, 20 сюрс тонназэ мукет интыосы келяз. Озьы городын улӥсь адямилы быдэ араз 47 килограмм йӧл люкаськиз. Быдэс странаен ӵошатоно ке, со кык пол ӧжыт. Октябре йылпумъяз ужзэ тушмон радэ поттэм адямиослы ӟеч нимзэс берыктон но пытсэт улысь мозмытон вылысь радъям комиссия. Учкемын 500 адямия 445 уж. Сӥзьыл шаерамы улосьёсты дышетыны кутско атом бомбалэсь утиськон амалъёслы. Ижысь Пушкинской ульчаын ӝутско уно квартираен чебересь выль юртъёс (архитекторез В.С.Масевич). 600 адямилы чаклам "Дружба" кинотеатр но нырысетӥ учкисьёсызлы ӧсъёссэ усьтӥз. Удмуртиысь вань предприятиосын но учреждениосын Дуннеысь Тупаса улонлэн кенешезлэн атом войналы пумит вазиськонэз улсын кинюртэмъёсты люканъя акция ортчиз. 1-тӥ июнь нырысьсэ ялэмын нылпиосты утёнъя нуналэн. Заводъёслы кадръёс дасянъя дышетсконниосы егитъёсты кыскон амалъёс воштӥсько. Азьвыл кужмысь косо ке вал, табере ас мылкыд каремзыя. Школаосын бадӟымгес саклык висъяны кутско химия, физика предметъёслы. СССР-ысь художникъёслэн огазеяськоназы пырись суреадасьёслы нимысьтыз мастерскойёс висъяло. Сарапулысь пищекомбинатын усьтӥськиз кондитерской цех. Араз со 900 тонна кампет- печення пыже-пӧзьтэ. Удмуртилэн шоркараз Ижевскын та вакытэ 300 сюрс адями улэ. Е.ВЯТКИНА, Удмурт Республикаысь Туала историяя центрысь валтӥсь специалист. ГУРТ УЛОН Валерий БЛАГОДАТСКИХ: "Кӧня меда чидалоз на?" Таӵе юан юнме шорысь пуктымтэ. Туннэ котькудӥзлэн, тужгес но гуртын улӥсьлэн, сюлмыз висе та удыслэн чидамезлы, трос шуг-секцытсэ вормыны быгатэмезлы. Мугез тодмо. Выльдӥськон, рынокен экономикае выжон вакытэ гурт удыс кун ласянь кабзэ аналтэмын. Вань азинскем кунъёсын гуртлы котьку бадӟым юрттэт сётӥське. Россиын но Удмуртиын гинэ со палдурес лэсьтӥське, музъем ужасьёслы но пудо утисьёслы туж ичи коньдон вуэ. Со но куд-ог мукет лэчыт ужпумъёс сярысь алигес журналистъёслы мадиз "Удмуртагропромсервис" огазеяськонлэн тӧроез Валерий БЛАГОДАТСКИХ. Со озьы ик кивалтэ Россиысь аграрной партилэн Удмурт Республикаысь ёзэныз. Зэмзэ но, гуртлэн чидамезлы туэ, кылем арен ӵошатыса, тросгес ю-нянь люкамезлы сокем паймыны кулэез ӧвӧл. Татын бадӟым инты басьтэ куазь. Миым со крестьян калыклы ӧз юртты, нош туэ ӟечен берытскиз, зоръёс дыраз усизы. Но урожаез октон-аран секытэн сётскиз, музъем ужасьёс трос ыштонъёс адӟизы, одӥг ньыльмосэз ю тысь му вылэ жильдӥськиз. Озьы ке но, данакез хозяйствоос котькуд гектарысь шорлыдын 20-30 центнер ю-нянь басьтӥзы. Но жаляса верано луэ, сыӵе эштосъёсмы, кооперативъёсмы но крестьян хозяйствоосмы трос ӧвӧл. Ушъяськыны номырин. Югдур люконтэм герӟаськемын кунлэн гурт шоры учкеменыз, та удысъя кыӵе политика нуэменыз. Берло дас ар ӵоже гурт хозяйство ялан берлань гылӟе, син азьын лябӟе. Кылемын на кӧня ке гинэ шормуӵъёс - усто хозяйствоос. Соос но, валамон, сокем кема уз возиське ни. Хозяйствоослэн лябоме, вужме техниказы, пудо гидъёссы, складъёссы, КЗС-ъёссы но мукетыз. Озьы со луэ гурт удыслы арысь аре ичи юрттэмен. Элькунысьтымы Кун Кенешын но Правительствоын со сярысь трос чебересь вераськонъёс гинэ мыно, нош министерстволэн гурт хозяйствоослэсь ужзэс радъянын, экономиказэс юнматонын интыез чик уг шӧдӥськы. Кизён, турнан, аран дыр вуэ ке, музъем ужась уг быгаты эстӥськон, воштос ёзъёс басьтыны. Таӵе югдуре одӥг нуналскын, одӥг арскын гинэ ӧм вуэ. Сое умой возьмато лыдпусъёс. Тани гурт удыслэн продукциезлэн дуныз, 1990-тӥ арен ӵошатыса, 2300 поллы йылэмын, нош промышленной продукцилэн - 11000 поллы, яке 5 поллы трос. Дас ар талэсь азьло республика 1100 сюрс тонна ю тысь кутса ке вал, миым 478 сюрс тонна басьтэмын. Сыӵе ик югдур пудо вордонын. Йӧл-сӥль поттон кык поллы кулэсмемын. Шаерамы 100 сюрс гектар гыроно-кизёно муос аналтэмын. Со кык шоро-куспо районлэн бусыосыз мында. Нош азьланьын мар луоз? Угось арлы быдэ шорлыдын 10 сюрс гектар лудъёсмы сюбегало, номыр уг сёто, ышо-быро. Берло аръёсы лизинг амалэн (федеральной но кун бюджетысь коньдонэн) республикаямы 640 пумо техника но машинаос басьтэмын. Туэ кунлэн юрттэменыз 62 пумо техника вуттэмын, яке 44,6 миллион манет тыр. Со пӧлысь 68-эз висъямын машинно-технической станциослы. Хозяйствоос асьсэ кужымен но пунэмаса ваньзэ-ӧвӧлзэ 9 миллион манетлы гинэ техниказэс выльдӥзы. Со туж ичи. "Агропромсервис" озьы ик сюлмаське техникаез ӟеч ужатон, утён, тупатъян но воштос ёзъёс шедьтон сярысь. Оглом вераса, Удмуртиысь гурт хозяйствоос туэ 60 миллион манетлы выль техника, оборудование но воштос ёзъёс басьтӥзы. Нош шаерысьтымы машинно-тракторной паркез будэтыны-выльдыны ичизэ 400-500 миллион манет коньдон кулэ. 2001-тӥ арлы кун бюджетын гурт удыслы 13 процент гинэ уксё висъяны учкемын. Со быдэсак куашканлэсь пичильтык пыкет луоз. Гурт удысэз ӝутон вылысь, зэмос кун юрттэт кулэ. Инвестициос сяна, дунъёсъя политикаез умоятоно: кызьы ке гурт хозяйствоослы техникая, озьы ик эстӥськонъя, электрокужымъя но мукетызъя. Сотэк гурт кема уз чида ни. Берло дыре гуртэ выль техника кабзэ уг вуы, шуыны луоз. Кылсярысь, 1990-тӥ арен ӵошатыса, 12 пол ичи тракторъёс басьтэмын, ю тысь октон комбайнъёс - 25, нош пудо сиён дасянъя комбайнъёс - 20 пол. Дас ар ӵоже техникамы одӥг куиньмослы кулэсмемын, яке 30-50 процент уг тырмы, нош 70 процентэз вужмемын ни. Фермаосын но механизация сюбега бере, тросэз ужъёс киын быдэсъясько. Гуртын огъя механизация уродмемен валче, арлы быдэ 30 процентсэ урожаез му вылаз кельтӥськом, со пӧлысь 140 сюрс тонналэсь уно ю тысез. Реформа аръёсы гурт туж трос ыштӥз ни, уката ик материальной инъетсэ, производственной фондъёссэ. Азьланьын югдур ӧз ке тупатскы, электрокужымлы, ГСМ-лы дунъёс будӥзы на, 90-95 процентэз хозяйствоос изъян гинэ адӟозы, куашкан калэ вуозы. Рынокен экономикае выжон вакытэ крестьянин утисьтэк- вордӥсьтэк кылиз. Тани кун страхование быдтэмын, нош вылез кылдымтэ. Правительство тылпу кысӥсьёс кадь ужа: отын ӝуа, мукетаз сильтӧл шукке, куинетӥяз куашка. Малпан вал, вуоно арын гурт удыслы уногес уксё висъялозы шуыса. Но озьы ӧз луы. Россилэн 2001-тӥ арлы бюджетэзлэн инъетаз гуртлы 20,8 миллиард манет гинэ коньдон висъяське, яке вань расходъёс пӧлысь 1,5 процентэз (1991-тӥ арын со 19 процент вал). Нош азинскем странаосын та удыслы 70 процент юрттэт вуэ. Нырысетӥ лыдӟыку, Кун Думаын таӵе бюджет понна куаразэ сётӥз Светлана Смирнова гинэ (асьме депутатъёс пӧлысь). Кун Дума, страналэсь кулэяськонъёссэ умойгес быдэсъян вылысь, сиён-юон басьтонэз радъян сярысь закон кутӥз. Но со уг быдэсъяськы. "Удмуртиез азинтон" программаын гурт удыслы, сиён-юон басьтонлы шӧдскымон инты висъямын. Но кызьы со улонэ пыӵалоз? Азьло хозяйствоослы кредит сётонъя умоесь амалъёс вал. Али со быдтэмын. Трос вераськонъёс мыно Сельхозбанк кылдытон сярысь, но ужпум интыысьтыз уг вырӟы. Крестьян калык таӵе югдурен уг буйгатско. Москваын алигес, 2-тӥ ноябре, пумитъяськон ужрад ортчиз. Отчы асьме республикаысь но адямиос ветлӥзы. Ведь АПК-я политика лэсьтӥське улосъёсын. Гуртлы огшоры гинэ юрттэт кулэ ӧвӧл. Умой-умой радъяно лизинг амалэн техника, пудо но мукетсэ басьтонэз. Кыкетӥез, выльысь улӟытоно техникаез выльдонэз, ремонтно-технической предприятиослэсь ужзэс. Куинетӥез, дасяно выль техникаен ужаны адямиос. Дыр вуэмын ни Удмуртиысь предприятиосын гуртлы техника, оборудование но воштос ёзъёс поттонэз радъяны. Со юрттысал экономикаез юнматыны но усьтӥськысалзы ватсаса выль ужан интыос. "Удмуртагропромсервис" огазеяськон лизинг амалэн техника басьтэменыз ӵош машинаосты утёнъя, выльдонъя центръёс возе. Оскон вань "Удмуртиез азинтон" программалы. Сое улонэ пыӵатыса, дэмен но огъя кужымен гинэ та удысэз шуг-секытысь поттом но калыклы тырмыт сиён-юон дасяны быгатом. Геннадий РОМАНОВ. Вылӥ дунъет Россия Федерациысь Правительстволэн пуктэмезъя, вань медико-профилактической ёзъёс вить арлы одӥг пол эмъяськон уж нуэмзэс эскерон ортчо. Собере гинэ соослы лицензия сётӥське. Тани Ижевскысь "Металлург" санаторий-профилакторийлэн но сётэм лицензиезлэн дырыз йылпумъяськиз. Алигес татын калыклэсь тазалыксэ утёнъя минитерствоысь экспертъёс ужазы. Соос санаторийлэсь ужзэ пыр-поч эскеризы но самой вылӥ - нырысетӥ категория сётӥзы. Ӟечен пусъемын татысь уноез эмъясьёс но мукет ужасьёс. Соос пӧлын физиотерапияя ёзысь врач Е. П. Ямшанова, медсестра В. Н. Лобанова, эмъянъя отделенилэн кивалтӥсез Л. А. Дозорова но валтӥсь медсестра Н. И. Панина, пинь эмъясь врач Н. А. Телицина, физкультурая кабинетысь инструктор Т. М. Овчинникова, сиськоннилэн кивалтӥсез Е. В. Копысова. Н. Ефремов. Выль сезон. Укмыстонэтӥез! Кайта Сарапулысь драмая театр 90 арессэ пусъёз ини. Солэн кызетӥ даурлэн кутсконаз кылдэмез вашкала городлэн улоназ нимысьтыз пусйымон учыр вал. Та дыр куспын трос гинэ артистъёс но учкисьёс воштӥськизы ни, нош калык театре озьы ик шуныт мылкыдын лыктэ. Кылем толэзьлэн пумаз Сарапулысь драмтеатр выль сезонзэ усьтӥз, таиз лыдызъя укмыстонэтӥез ини. Учкисьёс тодматскизы Москваысь драматурглэн Эдуард Володарскийлэн "На окраине" пьесаезъя спектаклен. Тодмо автор ӵапак Сарапулысь театрлы оскиз пьесазэ нырысьсэ сцена вылын возьматыны. Спектаклез пуктӥз Москваысь ик режиссёр Вадим Кондратьев. Спектакльын рольёсты шудо театрысь устоосыз актёръёс Е. Потапов, Г. Есырова, И. Афанасьев, В. Мельник, З. Ланина. Театрысь коллектив азьланяз но кусып радъяны малпа Москваысь но Санкт- Петербургысь мукет драматургъёсын но режиссёръёсын. Н. Никонов. Люкаськылӥзы азьвыл морякъёс Ижевскысь "Октябрь" кинотеаре люкаськылӥзы азьвыл морякъёс. Татчы лыктэмъёс пӧлысь уноезлэн йырсиоссы пурысьтамын. Соос Быдӟым Отечественной война дыръя улонэн но кулонэн артэ зарезьёстӥ подлодкаосын но корабльёсын уязы. Секыт ожез ортчемъёс пумиськон дыръя Вормонлы 55 ар тырмонлы сӥзем медальёсын пусъемын. Азьвыл морякъёс куректо "Курск" подлодка быремен валче. Кӧшкемыт луэм учыр эшшо одӥг пол возьматӥз асьме армилэсь куашкамзэ. Зэмен но, пе, асьме армимес сюдэммы уг ке поты, сюдоно луом муртлэсьсэ. В. Володин. Мушкасьёслы дэмланъёс Мушъёс уг ярато керетэмез Берло аръёсы шаерамы мушкан уж борды трос гинэ егитъёс кутско. Шумпотымон со. Иське, вашкала дырысь удмуртъёслэн кибашлы но инкуазен кусып герӟась ужзы уз сины. Мынам, мӧйы мушкасьлэн, кутскись мушкасьёслы кӧня ке дэмланъёсы вань. Шуом, тулыс кузьылиос пыро муш умортоосы. Ма кароно? Сукно юдэсэз чиньы пасьта но вись кузьда вандыса, отработка вӧе месылоно. Сое уморто пушкысь огаз сэреге дэра улэ пононо. Кузьылиос кошкозы. Уморто ӵогъёсты солидолэн но зыраны луоз. Соиз но, таиз но ки улады ӧвӧл ке, сэреглы быдэ чеснок пилетъёс тырелэ. Кузьылиос палэнскозы. Мушъёс но керӟегъяськемысь дугдозы. Ортчыт лекесь уз луэ ни. Майсыос мушъёслы лап-лап ужаны маза уг сёто. Кызьы палэнтоно таоссэ? Майсыос пасека котырегес кар лэсьто. Гырлыоссэс пичигес дыръязы огпол, кык пол тӥяло. Соку соос кыдёке каръяськозы. Чечыез кыскем бере, августэ, зынэз шӧдыса, мушкан корка котыртӥ лушкаськись мушъёс лобало? Ма кароно? Полынен кышкатоно. Уго та будос вылэ муш ноку уг пуксьылы. Зыныз лек. Полынь зын озьы ик чечы зынэз согоз. Мушъёс уз ериське ни. Муш уморто котыртӥ пирсало ке, озьы ик бертӥз но урдэстӥз полынь бышкало. Лушкаськисьёсты тазьы капчиен кышкатоды, нош ядъёсын вырыны уг яра. Сьӧлык. Шыр пыремлэсь уморто улэ кыз лыс тыре. Бышкемлы чидатэк, соос пегӟозы. Кейёс но мушкасьлы трос изъян ваё. Юрттоз кӧлтурын, серыпу куар. Тужгес кужмо - герань. Веникен-веникен керттылыса ошылэ мушкан коркады. Сыӵе зын азе пырозы на шат кейёс? Кызьы отын пи поттод? Нафталин, антимоль но вань. Дырыз дыръя тыроно, ӵемгес вошъяно. Зыныз тӧла ке, кейёс уг кепырало ни. Туэ сӥзьыл туж аспӧртэмлыко. Кема кыстӥсько ни шуныт нуналъёс. Мушъёссэс гулбече пыртӥсьёслы тани мае тодоно. Картофка туэ сисьме. Толалтэ но сисьмоз. Иське, зын потыса улоз. Мушъёслы со урод. Соин ик муш умортолэн урдсаз, буш интые, кыз, ньылпу яке пужым вай пононо, умортоысь омырез со чылкытатоз но, тазатоз но. Мушкан - секыт уж. Со кулэ каре трос тодэмез, чакласькемез, котькуд мушкан ужез ас дыраз но одно ик лэсьтэмез. Вуо ай, ӵуказе, яке мыдъят лэсьто шуыса гань-гань улон мушканын азинлык уз вай. Пасекае капчи мылкыдын, ӟеч малпанъёсын гинэ пыроно. Валамон ни, чылкыт киосын но дӥсен. Киосты мятаен яке мелиссаен зырано. Семьяяды даллашон, тэргаськон луиз ке, мушъёс уз улэ: иськавын-бӧлякен но, ужысь эшъёсын но ӟеч кусып возьыны быгатоно. Мушкан ужъёсты мылысь-кыдысь быдэсъяно, тюпыр-тяпыр выремез мушъёс уг ярато. Тани мае вераны кулэ на: пасекаын чылкыт, ӝикыт мед луоз, садо, сяськаё. Мушкан коркаез, озьы ик тӥрлыкез но чылк-чылк возёно. Кырсь, утялтымтэ, сузямтэ инты геопатогенной зона кылдытоз. Отын мушкасьлы но, мушлы но урод луоз. Я, мушкан ужды мед удалтоз. В. Колесникова. Пичи Пурга ёрос, Курчум посёлок. Хоккей Россиысь хоккеен шудонъя командаослэн чемпионатсы азьланьтӥське. Таяз сезонэ асьмелэн "Ижстальын" бӧрсьысь бӧрсе витетӥзэ вормон басьтӥз ни. 13-тӥ но-14-тӥ ноябре Ижевске куное вуылӥз Кемеровоысь "Энергия" команда. Нырысетӥ нуналаз "Ижсталь 5:1 лыдын ке вормиз, кыкетӥяз 1:3 лыдын келяз. Табере 17-тӥ но 18-тӥ ноябре "Ижсталь" аслаз йӧ вылаз пумиталоз Новосибирскысь "Сибкрез". Б. Никитин. Экономика Усьтӥськиз выль цех Удмурт Республикамылы 80 ар тырмон азьын Ижысь подшипник поттӥсьёс дорын зэмос праздник вал. Аспӧртэмлыко ужрад ортчиз - усьтӥськиз выль цех. Таӵеез заводын кемалась ӧй ни вал. Со вӧл-вӧл, нуназе шорын кадь югыт, кунгож сьӧрысь ваем станокъёс но оборудование син шоры йӧто, чибориё буямын, соос зыл-зыл гурето, пеле чик уг шуккиськы. Вӧй пушкын подшипникъёс бергало-воляло, чильк- вальк кисьтӥськисесь луо. Таӵе производствоын, пе, кышкытэз луэ омырын вӧй пырыос (пар) вӧлмон, соя ик ужасьёслы льготаос учкемын: йӧл, вазьгес пенсие потон, тросгес шутэтскон нуналъёс сётон но музон. Бен, котькыӵе ужлэн аслаз пӧртэмлыкез но шуг-секытэз. Огазеяськонысь куинь цех пӧлысь таиз самой устоез, чылкытэз но туала куронъёслы тупасез луиз. Нош кин бен оскоз: куать-сизьым ар талэсь азьло та юрт аналтэмын, кулэтэм оборудованиен-кортэн тырмытэмын, выж вылаз кызь сантиметрлэсь зӧк кырсез люкаськемын вал. Тӥни таӵе вераськон потӥз, цехез усьтыку. Нош та ужрадэ предприятиысь оло вань ужасьёс лыктӥзы. Пырыкузы ик егит кышномуртъёс шумпотыса но данъяськыса ог- огзылы вазё: - Ма, кыӵе югыт, та куштэм цех тодмантэм, бадӟым кадь луэм, паймод ява. Татын ужамед поттэк ужалод... ... Станокъёс огдырлы чалмизы. Микрофон азе потэ ӝужыт мугоро, шоро-куспо арлыдо воргорон, огазеяськонлэн валтӥсь директорез Александр Черных. Со вакчи дыр куспын куашкан калэ вуэм, банкротэ поттэм предприятиез пыд вылаз пуктӥз. Валля арын завод толэзяз 500-600 сюрс подшипник лэсьтэ ке вал, али - 3 пол трос. Огазеяськон Россиысь конкурсын вормисе потӥз, лауреат луиз но диплом басьтӥз. - Туэ но ужъёсмы огсыр мыно, - шуэ Александр Геннадьевич. - Али толэзьлы быдэ шорлыдын 1800 сюрс подшипник поттӥськом. Ужасьёсмы шорлыдын 2200 манет уждун басьто. Таиз 22 номеро цехмы самой устоез, татчы выль оборудование пуктэмын. Умоязы ужан условиос. Республикалэн кунлыкезлы 80 ар тырмон вакытэ та зэмос кузьым луиз. Выль цехез усьтонэ лыктэмъёсты шуныт ӟечкылаз Удмурт Правительстволэн Тӧроезлэн воштӥсез Николай Хохлов. Со шуиз: - Туэ 10 толэзь ӵоже тӥ данаклы будэтӥды ваньбур поттондэс. Нош туала вакытэ выль цех усьтон - со шумпотымон, нуналлы, толэзьлы быдэ таӵеез уг луылы. Удмуртилэн юбилеезлы но заводлэн 44 ар тырмонэзлы тӥ ӟеч кузьым лэсьтӥды. Со луонлык сётоз вамышъёстэс уката кузёмытыны. Кыл сётӥське заводлэн азьвыл директорезлы (кема аръёс ӵоже со кивалтӥз "ИПЗ"- ен - Г. Р.) Алексей Иванович Комлевлы. Ӧжыт чиедгес, ӝужыт, веськрес мугоро воргоронэз татчы люкаськемъёс пӧлысь тросэз тодо, кизэс чабо. Со уго 70-тӥ аръёсы заводэз азьмынӥсьёс радэ поттӥз, предприятие вуизы город знамяос но мукет наградаос. Со, пе, вал заводлэн нырысетӥ вордӥськонэз, али - кыкетӥез. Со вакытэ, пе, заводэтӥ резина сапеген гинэ ветлыны луэ вал, тодаз ваиз Алексей Комлев. - Таиз администрация, Александр Черныхлэн кивалтэмез улсын, производствоез азинтон, ужан условиосты умоятон сярысь трос сюлмаське, - шуэ Алексей Иванович. - Со адӟиське тани та цехъя ик. ИПЗ берло дыре зэмзэ но умоесь кусыпъёс тупатӥз Россиын автомобиль поттӥсь заводъёсын. Соин ӵош ик данак продукциез кошке кунгож сьӧры. Азьло 50-60 процентсэ басьто вал, матысь дыре югдур воштӥське, машинаос поттон улӟемен, подшипникъёс асьмелы кулэ луизы. Нош выль цех туж дыраз усьтэмын. Г. Романов. Таӵе станокъёс ужало выль цехын. Подшипникъёс. Туспуктэмъёсыз А. Жуковлэн. Вуоно арлы дэмласал Ӵошен гинэ Выльдӥськон шуон вакытлэн пилемъёсыз быдэс странамес шундылэсь ватӥзы вал кадь. Пумен экономика куашканы кутскиз, промышленность ужамысь дугдӥз, гурт удыс пыдес вылаз кылиз. Ваньмыз со журналистъёслэн уж вылазы но шӧдӥськиз. Ужын вормон басьтӥсьёс быризы, бусыос гырытэк-кизьытэк кылизы. Ӟечез сярысь гожтыны омыр луиз. Нош уродэз сярысь гожтыны ки уг ӝутскы ни. Критика сярысь веранэз ик ӧй вал. Ваньмызлы валамон вал ини, кытысен кутскиз со куашкан сюрес. Со дырысен ик уноез редакциос лыдӟисьёсын кусыпсэс ыштӥзы, шуыны луоз. Газет бамъёсысь огшоры ужась адями огдырлы бус пӧлы ышиз кадь. Соиз шумпотымон ини, берло аръёссэ каллен гинэ ке но, пыд йыламы ӝутскиськом, лэся, ни. Озьы азьлань мынэм интые, ыштэм аръёсмес "уёно" луиськом. Предприятиосын ужъёс пумен умояло бере, луозы азьмынӥсьёс но, луозы вормонъёс но. Адями одно ик газет бамъёсы вуоз. Улон-вылон но, югдур но секытгес гуртъёсын. Азинскон ваись шуныт омыр та пала ӝогак гинэ уз вуы, дыр, ай. Уноез техника номырлы ярантэм кылемын. Ӧйтӧд, кызьы меда ужало на соин механизаторъёс. Нош выль тракторъёс, гырон-кизён но мукет машинаос басьтон сярысь веранэз ик ӧвӧл. Кун юрттытэк музъем ужысь ӝутскыны уз быгаты ни. Собере кӧня сюрс гектар музъемъёс аналтэмын-куштэмын та дыре. Фермеръёслы висъям уно бусыосын но жуг-жаг будэ. Ӵапак та ужпумъёсты сэрттон- пертчон бордын газетын бадӟым вераськон ӝутыны малпаськом. Ведь шаерамы вань азьмынӥсь эштосъёс но, трос гинэ фермер хозяйствоос но. Таӵе кенешонъёсы кыском вылӥ кивалтӥсьёсты но. Вазен газет бамъёсын вал "Инкуазь - асьмелэн узылыкмы" рубрика. Отын тросгес вераськон мынӥз инкуазьмылэн чеберлыкез, узырлыкез сярысь. Соку котырысь инкуазез утёнлы саклык ӧжытгес висъяськиз, луоз. Улонамы пыремын ӧй вал на "экология" кыл но. Асьмеос ӧм тодылэ Камбаркаын но Кизнерын возиськись химия ож тӥрлык сярысь, ӧм малпаськылэ Воткинскысь чурыт эстӥськонэн ужась ракетаослэсь двигательёссэс быдтон пумысен. Малпасько, та ужпумъёсты сэрттон-пертчонэ кыскыны быгатом огшоры калыкез но, тодосчиосты но. Зэмзэ но, жаляса верано луэ, куд-ог ӟеч рубрикаос газетысь ышизы. Но соосты берыктыны луоно, дыр. Малпанэ вань армилы сӥзем сэрег выльысь усьтыны. Отын военной журналистъёс вераны кулэ армиын туала югдур сярысь. Соос мадёзы асьме палась ӟеч служить карись солдатъёс но офицеръёс сярысь. Журналистъёсын герӟаськыны республикаысьтымы военной комиссариат юрттоз шуыса оскисько. Бен, газетлэсь пуштроссэ узырмытон ласянь малпанъёс уно гинэ кадь. Но соосты лыдӟисьёстэк уж вылын быдэстыны шуг луоз. Соин ик, редакция тӥлесьтыд ӵектонъёстэс-дэмланъёстэс вите. Ӵошен гинэ сое узырмытыны луоз. Николай Байтеряков, иворъёсъя отделысь корреспондент. Черк эмъяськыны юрттэ Алигес Ижын паймымон ужрад ортчиз: "Ижмаш" ОАО-лэн нырысетӥ номеро медсанчастяз Удмуртиын нырысьсэ усьтӥськиз православной христианъёслэн черксы. Та ужлы вань кужымзэ сётӥз больницалэн валтӥсь врачез Виталий Анатольевич Есипов, россия Федерациысь дано врач. Куинь ар талэсь азьло Санкт-Петербурге вуылыкуз, огаз больницаысь со вӧсяськон сэрегез адӟем. Тӥни со дырысен солэн йыраз но малпан кылдэм больница пушкын ик вӧсяськон сэрег усьтыны. Та пумысен со вераськиз ӵош ужась эшъёсыныз. Малпан кельшиз. Собере ини герӟаськизы Удмуртиысь епархиен. Владыко Николай черклы быръем интыез учкиз-эскериз но бакель кариз. Лэсьтӥськон ужъёс радъяськем бере но Со татчы вить пол вуылӥз. Ачиз ик Москвае курон лэзиз татчы мудоръёс ваён сярысь. Табере соос черклэсь борддоръёссэ чебермало ни. Туэ гужем больницаысь черк ужаны кутскиз. Но сое сӥлы карон ужрад 14-тӥ ноябре ортчиз. Татчы вуылӥзы Кун Кенешысь, Правительствоысь, Устинов ёрос администрациысь ӧтем куноос но "Ижмаш" ОАО-лэн валтӥсь директорез В. Гродецкий. Дуно кузьымъёс пӧлын тужгес но висъяськизы обросъёс. Черк ужаны кутскем бере ик инмарлы оскисьёс татчы куд-ог дуно кузьымъёссэс ваиллям вылэм ини. Тани син шоры йӧтэ святой Пантелеймонлэсь тусбуйзэ пужыятыса лэсьтэм оброс - сое кузьмам та больницаын ужась медсестра. Нош огез врач кузьмам 1645-тӥ арын поттэм библиез. "Адямилэсь мугорзэ гинэ ӧвӧл, лулпушсэ но эмъяно" - шуэ Виталий Анатольевич. - Инмарлы оскись адямиез эмъяны но капчигес". Со озьы, вылды. Больницаын эмъяськисьёс табере кыӵе ке операциос лэсьтон азьын но, собере но татчы лыкто. Оброс азе пуктэм сюсьтылзы дорын кема сыло, буйгатско. Нош Виктор баӵкоез ялан висисьёс пӧлысь адӟоно луэ - соосты со лякыт кылыныз буйгатэ, улыны,оскон пыӵатэ. Вераны кулэ: больницаысь черкын радъямын пӧртэм службаосты ортчытон. Татын табере черке но пырто, венчать но каро, кулэм муртэз берпум сюресаз но келяло. Черк лэсьтэмын инмарлы оскисьёслэн ӟеч мылкыдын юрттэмзыя. Вуылэм татчы Америкаысь одӥг миллионер но, одӥг сюрс доллар кузьмаса кельтэм. Т. Банникова. Ческыт пӧрало, ческыт сюдо Глазовын кемалась дырысен, Совето власть дыръя ик, калыкез ческыт сюдо вал. Шаерысьтымы вань пӧрасьёс татчы дышетскыны ветлӥзы. Али но соос данакез данзэс ӧз ыштэ на. Тани одӥгез сыӵе столовой луэ усьтэм амалэн ужась "Реммаш" акционер огазеяськонлэн (ОАО-лэн) сиськонниез. Гуртлы машина лэсьтӥсьёс но техникаез тупатъясьёс столовоязы шумпотыса лыкто но ческыт сисько. Огазеяськон нуналлы быдэ 24 манетлы талон сётэ. Кин сомындалы уг сиськы, гуртаз сиён-юон, пыжиськемъёс басьтэ. Нош толалтэ татын губи будэто, кыӵе ческыт кутэм няньёссы пӧрмо - быдэс город тодэ. Столовойын уго вань ужъёсты валаса но быгатыса радъя кивалтӥсьлэн воштӥсез Нина Пьянкова. Со татын 10 ар ужа ни. Нырысь пӧрась вал, табере ваньзэ ачиз бергатэ. Нош тодон-валан басьтӥз Ижысь вузкаронъя техникумын (ачиз нош вордӥськемын бускель Киров улосын). 1988-тӥ арын сое йылпумъяса, Глазове ужаны ыстӥзы. Кык ар "Химмаш" огазеяськонын вал. Отын, пе, столовойзы бадӟым вал. Тазэ но бен сокем пичи уд шуы, 22 мурт ужасьёсмы, - маде Нина Владимировна. - Милям асьмелэн кондитерской цехмы вань. Отын чебересь но ческытэсь тортъёс, пирожнойёс, печеньяос но пряникъёс пӧраськом. Кондитермы Мария Третьякова, усто специалст, кибашлы адями. Ужасьёс вордскем нуналзылы, праздникъёсы но юбилейёсазы нимаз торт пыжыны куро, азьло ик верало. - Нош пӧрасьёсты кӧня? - юатэк ӧй чида. - Вить. Ваньзы 3 но 4 разрядэн ужало. Котькудӥз оскем ужзэ мылысь-кыдысь быдэсъя. Тани соос - Татьяна Лихачева, Надежда Косенко, Агафья Трепет, Ирина Куртеева но Людмила Бернякова. Нина Владимировна дыраз сётъя вузъёс, нуналлы быдэ чакла сиёнъёслэсь но пыжиськемъёслэсь ӟечлыксэс, ассортиментсэс но вузкарон правилоосты быдэсъямез. Одӥг арбери но, пе, басьяськись кие беромыса медаз вуы. Та ласянь озьы ик юнэсь куронъёс пуктэ ОАО-лэн валтӥсь директорезлэн вузкаронъя воштӥсез Елена Георгиевна Марина. Г. Романов. Нина Пьянкова. Туспуктӥз В. Беломорских. Тӧдьы халатэн Остап Бендер Д. А. Несмелов ужа вал Республикаысь наркологической диспансерлэн экспертизаос ортчытонъя кабинетаз психиатр-нарколог луыса. Кызьы косэмын инструкциын, со экспертиза дыръя шараяны кулэ вал эскероно адямиослэсь кудӟемзэс яке наркотикъёсын сэрен уйжомемзэс. Солэн берпум кылыз бордысь потэ вал, луэ-а, уг-а адямиез винаен яке наркотикъёсын кудӟемез понна административной яке дисциплинарной кыл кутон улэ кыскыны. Д. Несмелов толэзь но ужаса ӧз вуы ай выль интыяз, нош пайда потыны луонлыкъёссэ туж ӝог шӧдӥз. Нырысетӥ "коньдон ошмес" луиз кыӵе ке С. Старков, водитель. Сое экспертизае вуттӥллям ГИБДД-ын ужасьёс, юэмзэ шӧдыса. Несмелов ачиз ӵектэ Старковлы кудӟемзэ ватыны. Со понна куре 600 манет. Но соиз 300 манет гинэ сётыны быгатэ но врач таин но соглаш луэ. Нош протоколэ гожтэ: "Юэмын но кудӟемез ӧвӧл". Озьы Старков руль сьӧрын кудӟыса ворттылэмез понна штраф но уг тыры, правозэ но уг келя. Озьы ик кыл кутонлэсь гылӟыны быгатэ З. Соловьева но. Тазэ но водителез экспертизае вутто ГИБДД-ын ужасьёс. Анализ возьматэ, солэн вираз 2,82 промилле мында этиловый спирт вань шуыса, озьыен, вдитель туж кудӟемын. Соку З. Соловьева вазиське Несмеловлы выль документ гожтыны. Соиз соглаш луэ но со понна куре штрафлэн ӝыныез мында коньдон. З. Соловьева наркологлы сётэ 500 манет, нош таиз вужзэ протоколэз кеся но выляз гожтэ, эскерем вирын 0,82 промилле спиртэз вань шуыса. Нарколог туж яратэ вылэм, шӧдске, коньдонэз. Тани В. Буркинлы со "ӟеч" уж воксё 40 манет понна гинэ лэсьтэм. Н. Долгановалы юрттэм 50 манет понна. Со понна кыӵе П. Прокашевез 50 манет понна утемез ӧвӧл потэм, курем 100 манет. Одӥгезлэсь водительлэсь басьтэм чектэм "Шарп" видеоплейерзэ. Мукетызлэсь кык машина питранъёс. Куинетӥезлэсь - 450 манет. Та ӟеч ужъёс бергатэмын вал тямыс толэзь куспын гинэ. Ваньмаз протоколъёсын нарколог гожъяз: "Юэмез вань, кудӟемез ӧвӧл шараямын". Озьы тӧдьы халатэн но кырсь киосын адями, законэз утьыны юрттэм интые, сое тӥянэз ватылӥз. Валамон, суд кулэезъя дунъяз туала Остап Бендерлэсь йыртэмамзэ. Г. Дмитриев. Спорт Шахмат Удмурт кунлы 80 ар тырмонлы сӥзьыса, "Ижпланета" клубын ортчизы шахматэн ӝог шудонъя ӵошатсконъёс. Отчы пыриськизы, республикаысьтымы сяна, бускель кунъёсысь но кужмоосыз спортсменъёс. Ваньмыз 56 мурт люкаськиз. Нырысетӥ но кыкетӥ интыосты куспазы люкизы Ижевскысь Владимир Федосеев но Нижний Новгородысь Дмитрий Заполоцкий (11 пӧлысь быдэн 9 очко люказы). Кыксы но соос спортысь мастеръёс луо. Таослэсь быдэн одӥг очколы гинэ кылизы мастере кандидат Сергей Лыков но спортъя мастер Александр Филиппенко. Вить кужмоосыз пӧлы озьы ик шедиз 30 номеро школаысь спортсмен Дмитрий Кочуров (7,5 очко люказ). Ижевскысь шахматистъёслэсь трослы ӧз бероме Глазовысьёсыз. Кыкез соос пӧлысь - Чепецкой механической заводысь инженер Александр Хмелевских но педагогикая институысь студент Константин Вихарев быдэн 7 очко люказы. Пусъем потэ нылъёсты но. Таос пӧлын тужгес висъяськизы Ижысь радиозаводысь инженер Тамара Евстратова но УдГУ-ысь студентка Светлана Дерябина (быдэн 50 очко люказы). И. Вельтмандер. Шунды мумы "Шунды" ӝужаз! Ӵуказе шаерамы ужаны кутске Россиысь егитъёслэн форумзы. Нош туннэ "Металлург" культура двореце асьсэлэсь вордскем нуналзэс пусйыны люкаськозы "шундыос". Ӟечкыласько, эше! Туннэ асьмелэн дэменлыкмылы - 10 ар. Общественной огазеяськон понна со бадӟым арлыд. Уката ик со егитъёслэн шуыса чаклано ке. Туала егитъёсты уго тросэзлэн пыкылэмзы потэ улон шоры капчи учкемысьтызы... Озьы пыкылэмзы уз луы "шундыосты". Та дыр ӵоже дэменлык ассэ шараям, котыраз етӥз но тунсыко удмурт егитъёсты огазеям сяна, соослы котыр ласянь азинскыны, шаерысьтымы но солэн палэнысьтыз егитъёсын кусыпъёс тупатыны юрттэ, республикаямы кутӥськись программаос дасянэ, политикая но экономикая выльдӥськонъёс ортчытонэ пыриське. Та дыр ӵоже дэменлык юнмаз, будӥз лыдыз. Тылсиосыз пиштыны ӧдъязы пыдлось пичи гуртъёсын но, сайкатӥзы улонлы тунсыксэс ыштэм, йыртэман коже сюрем егитъёсты. ЪЪИ дауре выжыса но, асьмеос ӧм быгатэ на удмурт луэмысьтымы воздаськонмылэсь быдэсак мозмытскыны, ум тодӥське ӵыжы-выжымес, кин луэммес, ултӥяськом асьмеды мукет бадӟым калыкъёс азьын. Соин ик али "Шунды" тросгес ужа пиналъёсын - асьмелы пичиысен данъяськон, астэ гажан мылкыд пыӵатоно, улон ӧре сэзь вамышъясь удмурт егитъёсты будэтоно. Астэ бадӟым музъемлэн ог люкетэныз шӧдыны юртто МАФУН-лэн программаосыз. Мукет финн-угор шаеръёсы вуылыса, асьмеос тодӥськом ӵыжы-выжыосмес, эшъёсмес. Соос паймо асьмелэн визьмо, ужась но ӟеч сямо луэммылы. Соку сюлэме удмурт луэменыд данъяськон каръяське, со выль пайдаё ужъёсы ӝутскыны юрттэ. "Шунды" мыло-кыдо пыриське финн-угор калыкъёслэн ассоциацизылэн ужаз, котькуд егит муртлы асваланзэ будэтыны, улоназ инты шедьтыны юрттэ. Куд-огезлэн пыкылэмез потэ, шундыос мукет калыкъёсын кусып возьыса удмуртлыксэс ышто шуыса. Но астэ гинэ тодыса, мукет калыкъёслы вождэ поттыса улон ноку но ӟече ӧз на вутты. Бен, "Шунды" нырысь ик ачиз кизэ мычиз шаерамы улӥсь пор, бигер, немец, еврей но мукет выжыосысь егитъёслы. Пӧртэм калыкъёсысь егитъёс одӥг сюлмаськонъёсын уло ук - нош огазе кариськыса, секыт ужпумъёсты вормыны капчигес. Аръёс ортчыса, кин тодэ, кыӵе инты басьтоз котькудӥз туннэ "Шунды" дэменлыке пырись. Тужгес но шаплыосыз татчы кыстӥсько бере, оскон кылдэ, азьланяз соос азьветлӥсьёс, кивалтӥсьёс, удмурт калыклэсь данзэ возьматӥсьёс луозы шуыса. Дас ар ӵоже вошъяськылӥзы "Шундылэн" азьветлӥсьёсыз. Вошъясько егитъёс: кин ке вуэ, кин ке кошке. Со озьы ик луыны кулэ - "шундыос" уг тыршо кыӵе ке идеология вылэ пыкъяськыса ужаны. Соос возьмато егит муртлы выльвылъёсты но инвисъёсты. Нош вамыштэ ни со ачиз. Кин ке сэзьгес, кин ке дӥсьтытэкгес. Но туннэ данъяськыса вераны быгатӥськом созэ: та вакыт ӵоже "Шундыен" эшъяськем егитъёс улонын интызэс шедьтэм, калыклы адӟем карымон, визьмо но тодмо удмуртъёс луизы. Со-а ӧвӧл "Шундылы" дунъет? *** Россиысь егитъёслэн мукет огазеяськонъёссы пӧлысь "Шунды" тужгес но арлыдоез луэ. Огазеяськонэ куинь но ӝыны сюрс мурт пыре. "Шундылэн" ёзъёсыз ужало шаерысьтымы ваньмаз сямен ёросъёсын но бускель республикаосысь удмурт гуртъёсын, кусып возё Эстониысь, Финляндиысь ӵыжы- выжыосынымы. "Шунды" пыриське МАФУН-лэн но Россиысь калыкъёслэн ассамблеязылэн ужъёсазы. Надежда Уткиналэн "Шундыкар" программаез "ЮНЕСКОЕН" ялэм "Дуннеысь культура" проектъя устоеныз лыдъямын. Со сяна, ужало на "Вож тулкым", "Лулчеберт" программаос. Дас ар ӵоже "Шундыен" кивалтӥзы Татьяна Корнилова, Геннадий Бекманов, Валерий Сидоров, Светлана Смирнова, Надежда Уткина, Юрий Перевозчиков, Татьяна Мазитова. Туннэ азьветлӥсьсы - Татьяна Прокопьева. З. Рябинина. Сямъёс, сямъёс Буям ымдурлы кельше-а сигарет? Воргоронъёс ымазы сигаретэн вордскысалзы ке но, нокин ӧй паймысал, дыр. Нош пурккетӥсь кышномуртэз адӟыку, мылкыд уродме. Нылмуртэз ӵемысь ачиз сигарет уг кыскы бордаз. Солэн ассэ йӧногес возьматэмез потэ, кильтыръяськыны быгатэмзэ возьматыны турттэ. Нош собере кысконлэсь куштӥськыны шуг луэ. Жаляло-а меда нылкышноос кыскыны кутскемзы сярысь яке соослы кельше ӵындыны? Вазиськи куд-ог кышномуртъёслы. Лена, 27 арес: - Нырысьсэ кыски тямыс ар талэсь азьло. Соку мон университетын дышетски, общежитиын улӥ. Татын ик нырысьсэ курыт юонъёсты утчай. Городэ кошкыса, аслым ачим кузё луи, ваньзэ эскереме потӥз, анаен-атай уг чаклало ни ук. Вожъяськи студенткаослэсь, соос сигарет кыско, вина юо, чильтыр-вальтыр дӥсяськемын, буяськемын. Кӧня ке дыр ортчыса, ачим сыӵе ик луи. Табере кысконтэк улыны уг быгатӥськы, но тыршисько чидатскыны. Таня, 20 арес: - Нырысьсэ сигарет утчай, школаын дышетскыкум, кӧс нуналъёсы дискотекае потаськомы вал. Эшъёсын сёросэ люкаськыса ӵындылӥм. Табере шуг-секытъёсын пумиськыкум но азьвыл тодмоосын пумиськыкум гинэ кыскисько. Галя, 30 арес: - Ачим но ӧй вала, кызьы тамакен эшъяськи. Медучилищеез быдтэме бере ик, уж шедьтытэк, вузчи кариськи. Толалтэ вить-куать час урамын вузаськыса пыдъёс но киос йӧ луо, выремысь ик дугдо. Вузчиос пӧртэм амалэн шунтӥсько: кин ӟенелик басьтэ, кин пӧсь чаен термос сьӧраз нуллэ, нош мон кыскисько. Укыр кезьыт дыръя нунал куспын пачка сигарет быре. Табере биниськи, гужем но толалтэ но, кыскисько. Сигарет борды кыскиськеме гинэ ӧвӧл, рынокын ортчытэм дыры но жаль потэ. Вань тазалыке татчы кельтэмын. Пӧсь дыръя но, кезьыт дыръя но эмъяськонниысь потоно ӧвӧл. Лариса, 22 арес: - Мыным кыскись нылмуртъёс уг кельшо. Чебер ӧвӧл. Эшъёсы пӧлын но ӵындӥсьёс вань. Монэ но дышетыны выризы огпол. Кӧш йӧтӥз, собере ымам ӧй тырылы ни. Вераськем нылмуртъёс пӧлын ӧвӧл одӥгез но тамакаськымтэез. Зэмзэ но, та улонын ваньзэ тодэм, эскерем потэ, вылды. Кылсярысь, тросэз одӥг пол ке но парашютэн тэтчысалзы, но со понна городэ мыноно, кӧня ке дышетсконо, уксё тыроно. Огкылын вераса - тыршоно. Нош тамакез котыр вузало. Манет но тямыстон коньы "Прималы", вить-куать манет "Балканская звезда" но "Родопи" сигаретъёслы тырме. Уз шедьтэ шат пиналъёс та уксёез? Вылаз ик, бадӟымъёс шоры учкыса, нылпиос малпало, сигарет - со аспӧртэмлыко будон амал, астэ бадӟымъёс пӧлы пыртыны луоз ни. Нылъёсты возе ик кыскись кышномуртъёс шоры калыклэн кырыж учкемез. Но тамаканы кутскемлэсь азьло малпаськыны кулэ ик вылэм солэн изъянэз сярысь. Статистика вера: кыскись кышномуртъёс 10 поллы ӵемгес стенокардия висёнэн курадӟо, 15 поллы уногес соосты кутэ инфаркт, туберкулёз но мукет ты висёнъёс ӵындӥсь адямиослэн 25 поллы уногес пумиськыло. Мар пыре сигаретлэн ӵыназ? Химикъёс шедьтӥзы тазалыклы изъян ваись куинь сю пала маосты ке. Соос пӧлын никотин - тужгес золэз яд. Пичи дозаосын никотин йыр визьлэсь ужзэ золомытэ, нош трос кыскыку - зӥбе но восьмытэ. Сигаретлэн ӵыназ вань на усыкмытӥсь газ, кема дыр ӵоже ты пушкы сюрыса, адямилы кислород уг тырмы ни. Ваньмыз та сяна, мугоре тамак тэкит пыре, отысь шедьтэмын пыктос висёнъёслы сюрес усьтӥсь, кышкыт суретъёс. Тамакен эшъяськон кышномуртлэн ымныр вылысьтыз но адӟиське. Вир тырмымтэен, ку пересьме, куасьме. Вазьгес кылдо кисыриос, пырдо пиньёс. Калык дышемын улыны туннэ нуналэн, нош сигарет пытьыос асьсэды дыр ортчыса шӧдыто. Висьыны кутскыку малпаськом ни: "Эх, луысалыз ке улонэз видио кассетаез сямен берлань бергатыны!" Тужгес секыт йӧтэ кыскись кышномуртлэн нылпиезлы. Солэн тазалыкез ляб луоз яке ӧлексы вордӥськоз. Нылъёслы, нылкышноослы малпаськыны кулэ: нацилэн кужмо но таза луэмез трослы соос бордын возиське. О. Кожанова. Ох, со Картошка! США-лэн шоркараз Вашингтонын ужа картошкалы сӥзем музей. Сое усьтонлы инъет сётӥзы Хьюз кузпалъёс. Татысь эксионъёс пӧлысь тужгес вашкалаез луэ Перуысь ваем бакча будос. Измыны вуэм картошка ог ньыль сюрс ар талэсь азьло мерттэмын вылэм. Музейысь озьы ик адӟыны луэ дуннеын кыӵе сортъем картошкаос вылэм но вань шуыса. Нош тодмо Голивуд кизилилэсь Мерлин Монролэсь туспуктэмзэ та музейысь адӟыса, нырысь памод но, вылды. Солэн картошка возён мешоклэсь вурем дӥсьсэ синйылтыса гинэ талэсь мугзэ валалод. Музейын люкамын картошкалы сӥзем уно пӧртэм книгаос, кырӟанъёсын кассетаос. Хьюз кузпалъёс, та будослы сӥзьыса, журнал но потто. В. Рогалев. Электрокужым - со кышкыт маке Ваньмыз тодо, электрокужым вераны луонтэм пайда вае шуыса. Со гинэ ӧвӧл, электрокужымтэк туала адями улыны ик уз быгаты. Со дыре ик электричество - кышкыт арбери, изъян но вайыны, ӧлексы но карыны, эсьмаса, кулонозь но вуттыны быгатэ. Кызьы ин сое уже кутод. Тани Пичи Пургаысь Л. Гардасов, кылсярысь, электрокужымен сэрен пытсэт сьӧры ӧжыт гинэ ӧз шедьы. Ужаз туэ дырозь "Удмуртэнергонадзор" управленилэн Пичи Пурга районъя кун инспекторез луыса. Солы оскемын вал районысь предприятиосын электрокужымез но электроустановкаосты уже кутонэз эскерон, та удысын шудтэм учыръёслэсь утиськонэз чаклан. Властез пичи ӧвӧл, али котькуд азбарын электричество уже кутӥське бере. Энегонадзорен тупатэм куронъёсты санэ ӧд ке басьты, инспектор лыктоз но езъёстэ шач! вандыса кельтоз. Яке выль юртад тыл кыскыны ик уз лэзьы, тупатэм куронъёсты ӧд ке быдэсты. Пичи Пургалан Гардасовен огдыре ик улӥз (ма, али но улэ-вылэ, дыр, шуыса оскем потэ) Даниловъёслэн семьязы. Кузё кышно возе нимаз предприятие (ЧП), вузкаре. Кылем ар пумын со Пичи Пургаын аракыен вузкарон выль магазин усьтыны малпаз. Но туала вакытэ ларёк усьтон понна гинэ олокӧня-мар инстанциосты ортчоно, дасоосын бумагаос дасяно но пумтэм чиновникъёслы йыбырттоно, соглаш луэмзэс тэльмырыса. Лыдъянтэм дыр но андан выллем тазалык, чидан кулэ та ужпумез быдэстон понна. Котькудӥзлы воргоронлы но со секыт, мар веранэз на ляб нылкышно сярысь. Соин ик вузкарись кузё кышнолы юрттыны басьтӥськиз оскымон кузпалыз. Шедьтӥзы ук ог-огзэс бӧлякъёс - П. Данилов но Л. Гардасов! П. Данилов лыктӥз инспектор доры, со кышноезлы аракыен вузкарыны но магазиназ электричество пыртыны мед лэзёз шуыса. (Татын веран ӧрмылэсь ӧжытак палэнсконо луом. Пичи Пургаысь властьёс ужбергатӥсьёсты аракыен вузкарыны энергонадзор соглаш луыса гинэ малы ке но лэзё. Кытысь меда таӵезэ кылод - адӟод на? Оло, Пургалан аракылэн градусъёсыз сяна напряжениез но вань?) Шӧртчи инспектор дораз зарнивуам чорыг вуиз, лэся, кожам. Со соглаш луиз аракыен вузкарыны лицензия басьтон понна бумагае но гожтӥськыны, магазинэ электротыл но пыртыны лэзьыны. Вылаз ик, чик ӝегатскытэк. Но дун пуктӥз - 2500 манет. Зэм, кун инспектор ас ужзэ быдэсъямез понна уждун басьтэ, вазиськем адямиос но организациос нокыӵе дун но тырыны ӧвӧл кулэ. Но с законъя но кема. Нош законтэк но чаляк ке, дун тырыса, шонергес вераса, инспекторлэн кисыяз барыш поныса. Даниловлы верам дун мултэс бадӟым потӥз, кыӵе вузчи угось воксё тэргаськытэк кылёз. Тупазы 2000 манет вылэ. Кӧня ке нунал ортчыса. Данилов вуттӥз Гардасовлы кузьымезлэсь нырысетӥ люкетсэ - 1000 манет. Со нуналэ ик инспектор пӧраз бумага, кудаз верамын вал Даниловалы аракыен вузкарыны пумит ӧвӧл шуыса. Но сюрс манетэз Гардасовлы кемалы тырмымтэ. Ӝоген со, йӧл сётӥсь скалэзлэсь" 100 манет куриз. Соиз сётӥз, кытчы пыроз. Кӧня ке гинэ нунал ортчыса, эшшо 50 манет. Со сяна, Данилов кӧня ке пол вуттылӥз "эшезлы" кабинетаз водка. Номыр уд кары, выль магазинэ электричество пыртэмын ӧвӧл на угось. Но ӝоген Гардасов юлтошсэ шумпоттӥз. Со магазинысь электроустановкаез уже кутыны лэзьыса бумагаос сётӥз. Но со понна куриз вераськем коньдонысь кылемзэ 850 манетсэ. Нош Даниловлы, шӧдске, пумен жальгес потыны кутскем уксёез. Зэм но, кызьы озьы луоз: инспектор уждун вӧзаз, мултэссэ номыр но лэсьтытэк, ватсаса барыш поттэ? Чагиськем Данилов кытчы кулэ. Озьы берлозэ кузьымез сётон-басьтон ортчиз следовательёслэн эскеремзы улсын. Л. С. Гардасовлэсь кузьым яратэмзэ (взяткаос октэмзэ) суд дунъяз кык ар ӵоже пытсэт сьӧрын пуконэн, зэм, условно. Азьвыл шуныт интыяз ужан сярысь вераськонэз ик ӧвӧл ни. Г. Дмитриев. Автотранспорт Валерий Прохоров: "Секыт ке но - выльдӥськом" Рынокен экономикае выжон но выльдӥськон кутскем бере, Играысь сюрес лэсьтӥсьёслэн частьсы кабзэ куашказ, шуыны луоз. Со вал 1992-тӥ ар. Нош командирзы, полковник Валерий Прохоров, кадровой офицер, военной дӥсьсэ кышкатэк куштӥз. Малпаськоды, кытчы солы уж дэмлазы? Таӵегес ик интые, мырдэм шокась автотранспортной предприятиез оскизы. Нырысь ик со юнматӥз кылям дисциплинаез. Собере басьтӥськиз материальной инъетсэ, машинаосты выльдон но ужан условиосты умоятон борды. Со сярысь газетмы кӧня ке ар талэсь азьло рос-прос гожъяз ни вал. Нош октябрьлэн пумаз, автотранспортникъёслэн праздниксы азьын, нош ик вуылӥм Играысь АТП-е но пумиським солэн директореныз Валерий Прохоровен. Соин туннэ кенешонмы. - Валерий Александрович, азьвыл мар ӟечсэ лэсьтӥды - ваньмыз син азьын. Сое ум бугыръялэ ни. Миым кызьы ужады но туэ мар пусйымонзэ лэсьтӥды ни? - Вань верамонэз. Мукет АТП-осын ӵошатыса, секы ке но, ми техникамес кӧня ке выльдыны быгатӥськом на. Со шумпотымон. Тани кылем арын 2 ПАЗ-3205 автобус басьтӥм. Юрттӥзы районысь му вӧй поттӥсьёс. Соос дорын уго грузовой автомашинаосмы ужазы. Озьы ик кык автобус басьтӥз Глазовысь автопредприятие. Музон АТП-ослэн улонзы шуггес. Туэ но одӥг ПАЗ (240 сюрс манетэн) шедьтӥм ни. Со сяна, интыысь бюджет чотын 2 ЛиАЗ басьтӥм на. Пенсионеръёсты ӝоген дунтэк нуллыны кутском. Озьы ке но, техникамы син азьын вужме. Кылсярысь, ПАЗ-ъёс 1993-тӥ арын басьтэмъёсыз ветло на, нош ЛиАЗ-ёс но ЛАЗ-ёс - 1990-тӥ арысен. Ум вунэтӥське грузовой транспортэз но. Тани КамАЗ-ёслы 5 выль двигатель басьтӥм на. - Кытын бен соослы уж шедьтӥськоды на? - Ваньмыз сямен сюрес лэсьтонын ужало, дорожникъёслы юрттӥськом. Соос Пермь- Казань сюрес вуттыны дырто. Ми сюй, кӧльы но музонзэ ворттӥськомы Сектыр гуртысен Выль Зятцы черкогуртозь сюрес кысконын. Отын уж тырмыт. "Удмуртавтодорен" кусыпъёсмы умоесь. - Нош калыкез кызьы нуллӥськоды? Ӝожтӥськонъёс вуо-а? - Бадӟымесь ӧвӧл, чыры-пырыос, валантэм учыръёс луыло. Сое ум вунэтӥське, котькуд учырез пыр-поч учкиськом но ужрадъёс кутӥськом. Но оглом вераса, автобусъёсмес выльдӥськом бере, калыкез нуллон но умоя. Али милям 48 автобусмы но 90 водительмы. Милям 28 маршрут усьтэмын. Со пӧлысь 8-эз район понна кылдытэмын. Ӝыныез автобусъёсмы кондукторъёсын ужало, 27 кузя соос. Вераны кулэ, кондукторъёсын пайдаёгес ужаны ӧдъям. Но мукет городъёсы ветлэммы понна юрттэт (дотация) уг сётӥськы. Со вань районэтӥ но посёлокетӥ нуллӥсь автобуъёслы гинэ. - Валерий Александрович, нош тыронъёсты вань-а, коллективды будэ-а? - Ушъяськемлы медаз пӧрмы, син медаз усьы вал, али нокыӵе тыронъёсмы ӧвӧл, вань бюджетъёсы, фондъёсы дыраз уксё висъяськом, ужасьёсмы но озьы ик уждун басьто. Кызьы бен сотэк техникаез ӟеч ужатод. Адямиослы коньдон дыраз ӧд ке сёты, соос азинлыко уз тырше. Коллективмес пичи-а, бадӟым-а шуод, но али 240 пала ужасьёсмы. Кылем арен ӵошатыса, 20 муртлы тросгес ни. Азьланьын но выль ужан интыос усьтӥськозы. Сое улон куре. - Тӥ ведь Игра райсоветлэн депутатэз луиськоды. Со уг люкеты-а валтӥсь ужъёстэс быдэсъяны? - Зэм, директор ваньмыз понна кыл кутэ, сюлмаськонъёсыз пумтэм трос. Но депутат луон пӧртэм ужпумъёсты ӟечгес быдэсъяны юрттэ. Ведь соку дырен уд лыдъяськиськы ни. Ачим мандатъя комиссиын ужасько, одӥг кенешсэ но уг кельтылӥськы. Со юрттэ бырйисьёсылэсь куронъёссэс умойгес быдэсъяны. - Валерий Александрович, лэсьтэменыз буйгатскытэк азьланьын но ужъёсты умой мед мынозы, предприятиды уката мед юнмалоз-кужмоялоз. Соку районысь бюджетэ но уногес уксё пыртоды но экономикадэс юнматоды. Сыӵе милям мылкыд каронмы. - Тау. Ӵуказеезлы осконмы вань, 2000-тӥ арез умой йылпумъяса, выль даурез усто мытом. Вераськиз Геннадий Романов. Быдӟым Вормонлы -55 ар Тылӝу кыдатӥз Алнаш ёросысь Юмьяшур гуртын уло Марфа Николаевна но Василий Трофимович Глезденёвъёс. Вить нылпи вордӥзы соос. Бадӟымъёсыз - Аркадий пизы но Елена нылзы - уло Москваын. Соос доры арлы быдэ, толалтэ, Марфа Николаевна но Василий Трофимович куное ветло. Буш киын уг мыно - нуо сӥль, вӧй но мукет сиён-юон. Москваысь нылпиоссы доразы бертало кык арлы огпол. Мукет нылзы, Мария, улэ Можгалан. Покчи пизы, Леонид, гуртын улэ - Варзи-Ятчи школаын ужа. Кыкетӥ пизы, Валерий, Львовысь военно-политической академиысь журналистикая факультетэз йылпумъяз. Военной корреспондент луыса ужаз. Майор вал. Туркестан военной округын тыршыкуз, эшъёсыныз ӵош вертолётэн ӵем гинэ пота вылэм афган оже. Огпол соосты ыбыса уськытӥллям. 1984-тӥ арын 10-тӥ октябре быдэс экипаж быре. Валерий Васильевичез вато Ташкент городлэн шаяз. Пизэс ватыны ветлӥзы анаез но атаез, соослэн ӵыжы-выжыоссы. Валерий Глезденёвез тодэ быдэс Удмурт шаер. Тужгес ик - афган оже ветлэмъёс. Та адями сярысь бадӟым книга дасямын, кырӟан кылдытэмын. Анай-атаез арлы быдэ, март толэзе, ветло афган оже пыриськемъёслэн эшъёссэс буре ваён ужрадазы. Валерий Васильевичлэн кышноез но пиез кылизы. Али соос уло Ташкентын ик. Ачиз но Василий Трофимович быдӟым тыложын вал. Армие басьтӥзы сое 1939-тӥ арын август толэзе. Отын вал 1946-тӥ арысь октябрь толэзёзь. Ваньзэ сизьым ар. Нырысь аръёсаз вуылӥз Кыдёкысь Ӵук пала. Службазэ ӟеч нуэмез понна луэ ефрейтор, покчи сержант, сержант. Арлы быдэ вал котькыӵе удысын азьмынӥсь. Дивизилэн командирез огпол киын нуллон час но кузьмаз. 1943-тӥ арын октябрь толэзе келязы Хабаровске. Офицере дышетон вылысь. Ӵапак ар ортчыса луиз покчи лейтенант. 1944-тӥ арын октябрь толэзьлэн пумаз ыстӥзы Александр Невский ордено батальонлэн 271-тӥ бригадаяз. Кивалтыны оско сапёръёслэн ротаенызы: отын вал дас тямыс солдат но форд-амфибия нимо куинь машина. Таосыз чакламын вал солдатъёсты шур вамен выжтылыны. 1944-тӥ арын ноябрь толэзе, Кёнигсберг паласен тушмонлы шуккет сётыку, одӥг немец снайпер вииз СССР-лэсь маршалзэ Иван Черняховскиез. Туж сӥё-дано ватӥзы сое Вильнюс шае. Куинетӥ Прибалтийской фронтэн отӥяз кивалтыны кутскиз армиысь генерал Иван Баграмян. Кӧня ке дыр ортчыса, Василий Глезденёвлы оско пуштытъясь взводэз. Кёнигсбергез мозмытэмзы бере, вань ульчаос тырмемын вал пӧртэм машинаосын, пыӵал тӥрлыкен. Пырон инты ик ӧй вал ни. Асьме солдатъёс минаосты октӥзы, ульчаосты чылкытатӥзы. Нош ӝоген ас киязы басьтӥзы Балтийской зарезьысь военно-морской базаез. Тушмонлы пезьдэт сётыны быгатэмез понна, Василий Трофимович пусъемын медален. Со сяна, солы сюлмысь тау кариз фронтэн кивалтӥсь. Трос пол сӧсырмылӥз солдат. Озьы ке но, ӵем дыръя шӧдтэк шорысь улэп кыльылӥз. Ож йылпумъяськем бере, Германиын вал. Гуртаз берытскиз 1946-тӥ арын октябрь толэзе. 1947-тӥ арын февраль толэзе бырйизы "Изошур" колхозлы тӧрое. 1950-тӥ арын "Изошур" но "Красное знамя" колхозъёсты огазеязы. Собере Василий Трофимович кивалтӥз ю-нянь будэтӥсь, лэсьтӥськись бригадаосын. Огвакытэ ик вал парторганизацилэн секретарез. Отӥяз дас ар ӵоже чакласа улӥз калык ваньбурез тус-тас карисьёсты. Кӧня ке данъян грамотаосыз вань. Шутэтскыны потон азяз тылпулэсь утиськонъя удысэз валтӥз. Котькуд удысын ӟеч ужамез понна, Василий Трофимович Глезденёвлы сётэмын дано колхозник ним. Солэн кузпалыз, Марфа Николаевна, ож аръёсы но собере толалтэосы ужалляз нюлэс дасянын, "Ижевск-Балезино" чугун сюресэз лэсьтонын. Гужемъёсы бусыын тыршиз. Ож дыръя бригадир но вал. Али но кузпалъёс тэк уг пуко. Василий Трофимовичлы тямыстон одӥг арес ни. Озьы ке но, пудо вордэ на. Ачиз ик сюдэ, люкта сое. Гужем бакчаяз тырше. Марфа Николаевна муш уте: чечыез котьку удалтэ. Юмьяшур гуртмы пичи ик ӧвӧл: ваньмыз - тямыстон куать юртъер. Быдӟым тыложе ветлэмъёс пӧлысь луло на В. Т. Глезденёв, М. Тупиков но Г. В. Софронов. Асьсэлы но, нылпиоссылы но, соослэн пиналъёссылы но ӟеч мылкыд но юн тазалык сӥзисько. А. Поляков, Ижын улӥсь, ужысь ветеран. Василий Трофимович Глезденёв. Гуртын борддоръёс но эмъяло Майбыр уло брангуртъёс: клубзы, школазы, магазинзы сяна, соослэн асьсэлэн участковой больницазы но вань. Висиь муртлы бен вожъяськонэз ӧвӧл, но улэп маке висьытэк уг улы. Нош мар со висись кускын сьӧрлотӥ кыстаськон, асьтэос тодӥськоды. Тӥни соин майбыр шуисько - уродэ шедид ке, кулыны уз сётэ, больница ныр улын. Татчы ик эмъяськыны ветло котыр гуртъёсын. - Аксакшурын, Байситовоын, Сундуковоын, Кечолын, Пуро-Можгалан, Чутожмонын - улӥсьёс. Тросгес вазисько арлыдоос. Но егитъёс но бере уг кылё. Гуртын али ваньмыз сямен курадӟо уго "модной" висёнэн - остеохондрозэн. Секыт уж но мултэс кӧё-вӧё сиськон мугор вылын шӧдӥськытэк уг кылё. Уката ик сӥзьыл ужъёсты быдэстэм бере чурен лыктозы ни, - шуэ валтӥсь врач Валерий Широбоков. - Гужем асьсэдыз жалятэк сузмыто. Быгатэммыя юрттыны тыршиськом, но адями уг вала, нырысь ик со ассэ ачиз утьыны кулэ шуыса. Малпало, а-а, кык-куинь арня койкаын кыллё но ортчоз. - Койкаосты бен тырмо-а? - Черодтэк уг луы. Вылаз ик, дассэ али дунын шутэтскыны мылкыд карись пересьёслы висъямын. - Но дунын палэнын шутэтскыны умойгес, дыр... - Ӧйтӧд, асьсэлэсь юалэ, - шуиз врач. Пересьёс мон сямен уг малпасько вылэм. Доредлы матын ик, пе, умой, сюлэм коть интыяз. Ма, собере одӥг пенсилы кытын шутэтскод ай? Нош татын сюдо но, кӧлто но, эмъяло но. Вылаз ик, эмъясь- утялтӥсьёссы удмурт кылын вазё, котьмардэ соослы вера: коть висёндэ, коть сюлэм бӧрдондэ, - ваньзэ валалозы. Тазьы ик малпало стационарысь висисьёс но. - Райцентре-а, городэ-а эмъяськыны уд куриськиське-а, отысь больницаос аппаратураосын но узыресь, палатаоссы но шулдыресь ук? - юасько соослэсь но. - Хей! - киыныз пумитам шонтэ Кечолысь кенак. - Мон котькытын кылли ни, татын кадь умой нокытын уг поты. Со ужрадъёс, чильк-вальк палатаос уг бурмыто уго, врачлэн ик валась небыт киыз бурмытэ. Нош со чиньы йылыныз гинэ учкиз, дораз пукытозяд шорад огпол но ӧз вазьылэ ке... Милям Михайловичмы сыӵе ӧвӧл. Валерий Михайлович сярысь озьы верало. Со татын кемалась уг ужа ай. Институт бере Селта ёросын но, Балезиноын но ужаз, нош кӧня ке ар талэсь азьло татчы лыктӥз но инъяськиз. Виясь вӧлдэтъёс, пурысьтам борддоръёс ӧз кышкалэ. Нырысь ординаторскойысь кушетка вылын ик кӧлаз. Бӧрысьгес квартира сётӥзы, кузпалъяськиз. Аслэсьтыз медсестразэ ик кышно ваиз. Кылем арын ӵошен сандык кадь чебер корка ӝутӥзы. Табере кытчы ке кошкон сярысь уг но малпаськы ни, соин ик ужаз но дораз кадь мынэ. Ма, коллективзы но туж мыло-кыдо. Трос кузя ӧвӧл, тупаса уло. Валзылы турын но уртче турнало. Кыӵе вал, шуиськоды-а? Туж ӟеч, гордалэс. Сотэк гуртысь больница мар карыны ик абдрасал - сиён-юон но ваёно, сьӧр гуртэ висись доры но потано, шутэтскись пересьёсты но мунчое нуллоно. Таӵе транспорт туж сюлэмзыя апайёслы - пыдын кӧня курадӟысалзы ай палатаосазы вуытозь, париськем вылэ кынмаса вуттысалзы. Нош татын жиррак ваё, чаен сектало. Сюдо но ушъямон, асьсэлэн заказзыя: котлет-а, сылалтэм чорыг-а сиемед потэ - пожалуйста. - Нош кызьы чидады чидантэм вакытъёсты? - юасько Валерий Михайловичлэсь. (Со шорам учке, номыр уг вера). - Уждунтэк пукемысьтызы медикъёс ужзэс уретъязы, сютэм улон ялылӥзы... - Ми сыӵе вогесь ӧвӧл. Вакыт вошъяськемъя улӥд ке, уждэ вунэтод. Милям ужмы - висись муртэ бурмытон, нош керӟегъёяськыса, астэ жаляса сое эмъяны уд быгаты. Тук-тук! - врач доры куриськыса йыгасько висисьёс. З. Рябинина. Ужпум Америка оскытӥз Вераськон мынэ Воткинск вӧзы выль завод пуктон сярысь, отын быдтозы чурыт эстӥськонэн ужась ракетаослэсь двигательёссэс. Ужпум тани ма бордын: лэсьтӥськоз-а та объект, уз-а? Та юан шугъяськытэ шаерысьтымы вань калыкез, Воткинск сярысь поттылонэз ӧвӧл ни. Зэмзэ но маин йылпумъяськоз ӝутэм вераськон? США-е Воткинскысь кык пумо делегация ветлӥз ни. Нырысез отысь вуиз завод пуктонлы пумитъяськон мылкыдын (ӵапак со тупаз Кун Думае быръёнъёслы дасяськон вакытэн), нош кыкетӥез делегация Вашингтонысь бертӥз оскон мылкыдын: двигательёсты гурын сутон адямилэн улонэзлы кышкытлык, пе, уз кылдыты. США-лэн Колумбия округаз быдэс арня ӵоже, 22-тӥ-29- тӥ октябре, кенешизы "кезьыт войналэсь" бервылъёссэ быдтон пумысен. Воткинск районысь отчы ветлӥзы А. А. Орлов - районысь администрацилэн кивалтӥсезлэн воштӥсез, А. И. Поздеев - Первомай посёлокысь администрацилэн кивалтӥсез, П. А. Пермяков - физикая но ужъя Кам посёлокысь дышетӥсь, Н. Р. Широбокова - Кивары гуртысь врач, З. М. Бирина - Гавриловка гуртысь землеустроитель, А. Б. Соснов - "Вега" газетлэн редакторез. Делегацие озьы ик пыртэмын вал Н. А. Кирьянов - медицина наукаосъя доктор, профессор, Ижевскысь медициная академиысь проректор, Москваысь но Саратовысь экспертъёс, "Вож кирос" огазеяськонысь специалистъёс. Пумиськонэз радъяз США-ысь "Локхид Мартин" корпорация, ӵапак со басьтӥське двигательёсты быдтон борды. Малы одно ик сутыны кулэ? Чурыт эстӥськонэз двигатель пушкысь поттыны уг луы - пуштоз. Кизер эстӥськонэн ужасезлэсь мозмытскыны каньыл: химической заводын сое переработкае басьто. Воткинскын поттэм ракетаослэсь двигательёссэс быдтонъя ужпум 1992-тӥ арысен кутскыса эскериське ни. Коньдон тырмымтэен, али но йылаз-пумаз вуттымтэ. Специалистъёс верамъя, тужгес но дунтэмез амал - Тихой океанлэн нимысьтыз быръем районаз выжтон. Та амалэн ик СССР ужаз. Нош кин оскытоз, ужаны чаклам дырыз (гарантиез) бырем ракета пусъем интые усёз шуыса? Тӥни малы одно ик пуктоно завод, со интыяськыны кулэ ракета поттонэн артэ. Вужмем ракетаосты (боевой люкетэзлэсь висъяса) берен ваёзы ас заводаз, отысь двигательзэ поттон но быдтон понна. Матысь дыре чакламъя сутоно 916 двигателез яке 17500 тонна чурыт эстӥськонэз. Удмуртилэн палэназ, быдтыны шуыса, туннэ нуналлы 48 двигатель келямын ни. Соосты суто кырын. Кызьы радъяськоз та уж нимысьтыз завод пуктэм бере? Чакламъя арнялы быдэ сутэмын луоз 6 двигатель яке 150 тонна эстӥськон. Со ӝуаса быроз 6-10 минутскын. Одӥгез но эксперт, учёной уг оскыты, та объект адямилэн тазалыкезлы, улонэзлы кышкытлык уз вайы шуыса. Верало огзэ гинэ: завод ужамен омыр кырсёмиз ке, двигательёсты сутон пытсамын луоз. Чакламын куд-ог мукет учыръёс но. "Локхид Мартин" корпорация асьмелы дэмлам технологизэ эскериз ни Чайна-Лейкын пуктэм (США) опытно-промышленной установкаын. 58 двигатель сутыса, омыр, инкуазь ӧз кырсёме. Тӥни малы американецъёс оскыто, Воткинскен артэ пуктоно заводлэсь ӟечез амал ӧвӧл ни шуыса. 21-тӥ даурын Россилэн висёнэз но шугъяськонэз ӵапак потоз вужмем ракетаосты быдтон бордысен, Удмуртия, Воткинск нырысь ик адӟоно луоз та адӟонэз. США-е ветлэм делегация бертӥз шуиськом азьланезлы оскон мылкыдын. Со пумысен журналистъёс азьын вераз котькудӥз делегацие пыртэм мурт. Тани ма шуиз "Вега" газетлэн редакторез А. А. Соснов. - Американецъёс асьмелы вань сюлмысьтызы юрттыны тыршо. "Локхид Мартин" корпорациын ужасьёсын пумиськылэм бере, мынам кышканэ быриз. Зэмен но пытсам камераын сутэм двигатель, кырын сутонэн ӵошатыса, инкуазез утёз, озьыен, адямиез но. Воткинск ке нырысетӥез амал борды ӧз кутскы, кыкетӥ амалэн ужалозы бускельёсмы - Пермь область; отысь сурымез асьме вылэ ик усёз. США-ын двигательёсты сутон кемалась мынэ ни, двигательёсты быдто военно-морской базаен артэ. З. Н. Бирина верамъя, завод котырысь музъем тросгес кулэ кароз изваска сётэмез. Зол-а ӵашетоз выль усьтоно удыс? Ӵашетоз 6-10 минут ӵоже, двигатель сутскыса бырытозь. Тӥни сыӵегес суред пукто асьмелы США-е ветлэм муртъёс. Экспертъёсын- учёнойёсын таяз учыре журналистъёс ӧз пумиськылэ. Но Воткинск котырын улӥсьёс пӧлын валэктон уж мынэ. Кылдытэмын нимысьтыз комитет. Поттэмын литература. Огъя вераса, выль заводэз пуктонлы дасяськон мынэ. Коньдон солы висъя США, но берло дыре мукет но вераськонъёс кылӥсько ни: Воткинск кема пумитъяськиз ке, "Локхид Мартин" корпорация юрттэт сётонлэсь куштӥськоз, малы ке шуоно, дасям проектэз куинь пол дунояз ни. Соку вань секытэз усёз Россилэн бюджетэз вылэ. Л. Медведева. Удмурт Республикаысь Правительстволэн Сюресъёс вылын шудтэм учыръёсты алонъя комиссиез мур куректэмзэ вера Югдурез утёнъя министерствоысь Сюресъёс вылын шудтэм учыръёсты алонъя кун инспекцилэн кивалтӥсезлэн воштӥсезлы Афанасъев Валентин Петровичлы атаез кулэмен валче. Асладэз аслыд пайдаё Дас ар. Трос-а, ӧжыт-а со? Адями арлыд сярысь верано ке, дас аресъем мурт - со нылпи ай. Дас аресъем учреждениез но пересь уд шуы. Нош Сарапулысь коммерческой банкез республикаямы мӧйыез, шуыны луоз, кылдэмез дырысен нырысетӥ дас арзэ гинэ пусйиз ке но. Ӵапак со мытӥз угось асьме шаерамы выль банкъёслэсь вакытсэс. Куд-огез та дыр куспын куашканы но вуттӥз ни, нош Сарапулысез али ке но городын огназ ас кожаз ужась банк луэ. Шоркаренымы бен уд ӵошаты, нош Глазов но Воткинск сярысь верано ке, татын асьсэлэн банксы ӧвӧл на. Городлы аслаз банкез трос гинэ пайда вае. Кыӵе ке банклэн филиалэныз уд ӵошаты сое. Сарапулысь коммерческой банк выт Москвае, Ижевске яке мукет интые уг тыры, Сарапуллэн бюджетаз тыре. Тросэн выт тырись дас предприятиос но учреждениос пӧлы пыре со. Туэ укмыс толэзь куспын со Сарапуллэсь бюджетсэ 2 миллион 300 сюрс манетлы узырмытӥз. Н. Никонов. КИЯСАЫСЬ - КОТЬМА СЯРЫСЬ Пичильтык гинэ школа Тазэ дышетскон арез Кияса ёросысь Нӧднюк починкаын улӥсьёс пичильтык гинэ школаязы кутскизы. Солэсь азьвыл пичиос бускель гуртэ ветлӥзы. Нош табере школа - ас гуртазы. Трос ик ӧвӧл дышетскисез, но азьланяз соос луозы: угось пичи дыдыос но экеос будо но будо... Лэсьтӥськон ужъёс быризы ке, та юртын луозы пичигес сиськон инты но спортзал. Огаз висъетэ интыяськиз калыкез эмъясь. Гуртоос понна со бадӟым шумпотон ини. Гуртазы вань дышетӥсьёс. Озьыен, будӥсь кивоштӥсьёс син азьын луозы. Дышетон удысэз али радъяло Мария Николаевна Камашева но Любовь Васильевна Михалина. БАМ вамен выж Эн пайме: ми палан уз лу Байкало-Амур чугун сюрес. "Рассвет" колхозысь калык тазьы шуэ Юрмалайысь (Ермолаевоысь) бадӟым тыметсы сярысь: сое лэсьтыны кутскизы уго БАМ-ез инъян вакытэ. Али татын бадӟым ужрад мынэ: Юрмалае мынон сюрес вылын, БАМ шуонын, выж лэсьто. Сое быдэстон бордын тыршо Можгалась выж лэсьтонъя мастеръёс. Выж вуиз ке, отӥяз уж борды кутскозы сюрес лэсьтӥсьёс но. Соку ик герӟаськоз Юрмалай-Кияса сюрес. Малы ворсаське нылпи сад? Районын одӥгез шулдыр нылпи сад вал Чувашайка гуртын. Татчы, кызьпуос пӧлы, инкуазь ачиз косэм кадь нылпиослы юрт пуктыны. Школа выль амалъя инъямын. Но... али татын мӧзмыт, чус: нокинлы луиз татчы ветлыны. Гурт пичия но пичия, егитъёс ӧжыт. Кӧня ке ар ӵоже нылпи юрт буш сылӥз. Кин но со изъянтыны но вуиз... Табере Суворов колхозлэн правлениез тае кариз улон юрт. Лэсьтӥськон уж быриз ке, татын ньыль семья улоз. Нош кызьы меда эстозы - вӧлдэтъёс укыр ӝужытэсь ук? Котьма ке но, таӵе чебер юрт жаль. Отчы профилакторий яке гужемлы нылпиослы лагерь усьтон сярысь вераськон но вал. Огез но малпан ӧз быдэсмы... Озьы ик бушаз "Сельхозтехникалэн" Киясаысь нылпи садэз но: покчиосты огазеязы "Чингыли" нылпи садэ ветлӥсь эшъёсынызы. Нош та юртэз табере эмъян удысын ужасьёслы сётыны малпало, со куспын тус-тас ӧз ке каре. Туэ бушам нылпи садэз озьы ик улон интылы пӧрмытӥзы азьвыл Яжбахтино черкогуртын но. Табере коть кылемзэ ворсаны медам сётэ вал. Ӵоганы кема ӧвӧл... Парсь интые, скал-а вордомы? Куке но соку Ленин нимо совхозлэн парсь вордон комплексаз огвакытэ 24 сюрс йыр пудо вордӥзы. Кыӵеесь вал со аръёс! Та вакытэ татын будэто ог вить сюрс парсь - соосты но куддыр маин сюдыны паймо. Оло, буш корпусын, парсь интые, скал вордоно? Гужемзэ возьмалозы, соослы комбикорм но ӧжытгес кулэ луоз. Таӵе малпанэн уло совхоз кивалтӥсьёс. Нырысь-валысь малпало трос йӧл сётӥсь уллё уськытыны, нош отӥяз - улыса адӟозы ини. Мар но уд малпа, улон питран кадь берга бере? 1942-тӥ арысен Шофёре ож вакытэ дышетскиз Киясаын улӥсь Иван Васильевич Шамшурин. Армиын но руль сьӧрын вал. Со дырысен - весь одӥг ужын. Тямыстон куинь аресаз мынэ шуимы ке, нокин но уз оскы. Кузпалыз, Александра Яковлевна (ӵош уло ни ӝыны даурлэсь кема), куд-ог дыръя туздыре ик картсэ, тон, пе, ӝоген гидкуазетӥ но машинаен ветлод ини. Ма, огшоры гинэ со озьы ӟургетэ: ачиз, Иже мынон вань ке, одно ик Ваня, ойдо ветлом шуыса лӥятэ. Ужысь но ожысь ветеран пересьмонлы уг сётскы. Тамак кыскемез ик ӧвӧл. Нош курытсэ юондырын пичияк гинэ веръялоз. Нокинэн ур-яр каремез ӧвӧл, ваньмыныз тупаса улэ, соин ик чырмыт возиське, сомында арес ноку но уд сёт Иван Васильевичлы. Ӧм лыдъялэ, кӧня сюрс иськем ортчиз меда со витьтон тямыс ар ӵоже? Уно гинэ, дыр. Из, из, вукое Котьмалы шаплы азьвыл Эльдыбай (Ильдибаево) черкогуртысь Сергей Сутягин. Со ик сварщик, со ик - усто шофёр. Туэ тани итыме 1755 тонна ю тысь вуттӥз но Кияса ёросъя нырысетӥ интые потӥз. Кӧня ке ар талэсь азьло соослэн семьязылы ёросысь устоез егит семья дано ним сётӥзы вал: угось ваньмыз - мудрон. Туж туслы юртэз. Гур азь паласьтыз тӥрлыкез но ас киыныз быдэстэмын. Ачиз ик пичияк вуко лэсьтӥз, усто киос пӧрмытӥзы пушнер, куар коран но. Соиз понна Нина кузпалыз тужгес шумпотэ: кӧнялы меда капчияз кышномурт уж?! Быдэс семьяен - руль сьӧрын Первомайский посёлокын улӥсь Владимир Наумович Глухов армиын но шофёр вылэм, собере но уно аръёс ӵоже "Яжбахтинский" совхозын водитель луыса ужаз. Атайзылэсь бере ӧз кыле пиосыз но - куатьназылэн ик вань трактор, машина нуллон правооссы. Эсьма, кык эмеспиез но руль сьӧрын. Таӵе семья вань Уддяди гуртын но. Атайзы, Андрей Алексеевич Андриянов, шофёре ож вакытэ дышетскем Кыдёкысь Ӵук палан. Правозэ басьтӥз 1945-тӥ арын, Уй пал Кореяын службазэ нуыкуз. Атайзылэсь быръем сюрессэ азинто куинь пиосыз но эмеспиез. Геннадий ПАРФЁНОВ. Кияса. Юрттэ, ӝуаськом! Туэ тол вуыны уг дырты, лэся. Но куазь пумен кезьытгес но кезьытгес луыны ӧдъя. Озьыен, тылпуэн нюръяськисьёслэн нош ик "пӧсь" вакытсы вуэ. Калык улон интыоссэ олокыӵе амалъёсын но шунтыны тырше. Нош векчи проводъёс бадӟым электрокужым басьтӥсь приборъёслы уг чидало - тэлеӟо. Трос тылпуос пото асьсэ киын лэсьтэм электрогуръёслэсь. Кытӥяз соосты вунэтыса но кельтыло. Туэ ноябрь толэзе гинэ Устинов ёросысь тылпу кысонъя 4-тӥ частьысь "горд атасэн" нюръяськисьёс сизьым пол потазы ни сыӵе учыръёсы. Ярам, тылпу сярысь дыраз ивор сётэмен, соос дыраз кысэмын вал. Соин валче нош ик калыклы вазиськем потэ. Чаклаське, электроприборъёстэс вунэтыса эн кельтэ, суп-сап лэсьтэм гуръёстэс сэрпалтэ. А.ЛУГОСКОВ, Ижевскысь Устинов ёросысь тылпулэсь утиськонъя 4-тӥ частьысьтыз инспектор. Ижевск - Буэнос-Айрес Кемалась ик ӧвӧл Аргентиналэн шоркараз буэнос-Айресын "Армас-2000" калык куспо ярмарка ортчиз. Россиысь отчы кык предприятиос гинэ вуылӥзы - Тулаысь пыӵал-тӥрлык поттон завод но Ижевскысь механикая завод. Асьмелэн предприятимы со выставкае кыкетӥзэ пыриське ни. "Байкал" вузкарон юрт возьматӥз 46 пумо пыӵалзэ. Котьку но асьме стенд дорын уно калык бергалляз. Ярмарка бырытозь, вань ваем пыӵалъёссы вузаса быдтэмын вал. Кызьы вера заводлэн генеральной директорез В.С.Чугуевский, Латинской Америкаын пыӵал-тӥрлык поттон удысын асьме сьӧры уиське Бразилия. Соослэн вуззы дунтэмгес, но ӟечлыксы иЖъёслэн сярысь трослы улӥынгес. Та страна сьӧры мынэ Китай. Асьме пыӵал тӥрлыкен тужгес тунсыкъяськизы Чилиысь, Парагвайысь но Уругвайысь нимысьтыз фирмаос. Спортъя, пӧйшуранъя, пневмотикая но нимысьтыз пыӵал тӥрлык поттонъя Ижевскысь механикая завод быдэс дуннеын одӥгез бадӟымез луэ. Кылем арын со кунгож сьӧрын вуззэ 14 миллион долларлы вузаз, со пӧлысь 500 сюрс долларез -Лымшор Америкаын. Предприятие кусып возе дуннеысь 65 кунъёсын. Н.ЛЯЛИН. Удмурт Республикаысь Кун Кенешлэн Президиумезлэн Удмурт Республикаысь Кун Кенешлэсь дас ньылетӥ сессизэ люкан сярысь постановлениез Удмурт Республикаысь Кун Кенешлэсь дас ньылетӥ сессизэ люкано 2000-тӥ арын 19- тӥ декабре, 10.00 часын Ижевск городын. Удмурт Республикаысь Кун Кенешлэн Тӧроезлэн нырысетӥ воштӥсез В. И. Агашин. Ижевск город, 2000-тӥ арын 13-тӥ ноябре. � 176-ИИ. *** Сессиын эскерыны чакламын: республикалэсь улон-вылон но экономикалэсь удысъёссэ 2001-тӥ арын азинтонъя программалэсь инъетсэ; республикалэсь 2001-тӥ арлы бюджетэзлэсь инъетсэ но мукет ужпумъёс. Удмурт Республикаысь Кун Кенешлэн Президиумезлэн Удмурт Республикаысь Кун Кенешлэсь дас куинетӥ (азьвыл чакламтэ) сессизэ люкан сярысь постановлениез Удмурт Республикаысь Кун Кенешлэсь дас куинетӥ (азьвыл чакламтэ) сессизэ люкано 2000-тӥ арын 28-тӥ ноябре, 10.00 часын Ижевск городын. Удмурт Республикаысь Кун Кенешлэн Тӧроезлэн нырысетӥ воштӥсез В. И. Агашин. Ижевск город, 2000-тӥ арын 13-тӥ ноябре � 174-ИИ. *** Сессиын эскерыны чакламын таӵе ужпумъёс: Удмурт Республикаысь Кун Кенешлэн Глазов городысь быръёнъя 54 номеро Левобережной округъя депутатэзлэн но Удмурт Республикаысь Кун Кенешлэн Тӧроезлэн А. А. Волковлэн ужзэс дырызлэсь вазь быдэсъямысь дугдэмзы сярысь; Удмурт Республикаысь Кун Кенешлэн дас куинетӥ (азьвыл чакламтэ) сессиезлэн ужан радэз сярысь; Удмурт Республикаысь Кун Кенешлы Тӧро быръён сярысь; Удмурт Республикаысь Правительстволэн Тӧроезлэн кандидатураез сярысь; Удмурт Республикалэн "Удмурт Республикалэн Конституциезлэн нырысетӥ но кыкетӥ ёзэтъёсазы воштонъёс пыртон сярысь" Законэзлэн инъетэз сярысь; Удмурт Республикалэн "Удмурт Республикалэн Конституцияз воштонъёс пыртон сярысь" Законэзлэн инъетэз сярысь; Удмурт Республикалэн "Удмурт Республикаысь Правительстволэн ёзъёсыз сярысь" Законэзлэн проектэз сярысь; Удмурт Республикаысь Правительстволэн Тӧроезлэн воштӥсьёсызлэн но коньдон ужпумъёсъя министрлэн кандидатураоссы сярысь. ИЖЫСЬ МЭРИЫН Кулэ, пе, референдум Матэктӥсь арня вискын ортчоз Ижевск городысь Думалэн азьвыл ялымтэ сессиез. Со герӟаськемын куд-ог депутатъёслэн городлэн уставаз воштонъёс пыртон сярысь куронъёсынызы. Соос ӵекто, город думалы тӧро быръёно, пе, озьы мэрлэсь быдэсъя но удысъёссэс кулэстоно. Со сяна, депутатъёс пӧлысь ог люкетсэ кивалтэт ёзъёсы кысконо, ялан ужан инты тупатыса, шуо соос. Валамон, городлэн мэрезлы А.И.Салтыковлы та выллем бугыръяськонъёс уг кельшо. Нош алигес ортчытэм пресс-конференциез дыръя шӧдӥськиз: Анатолий Ивановичлэн мылкыдыз сокем куашкамын ӧвӧл. Берло 8 ар ӵоже городэн кивалтон ёзъёслэн ужамзы вылэ нокыӵе ӝожтӥськонъёс ӧй вал, шуэ со. Мэрилэсь котькуд вамышсэ, прокуратура сяна, мукет эскерон ёзъёс но чакласа возё. Уставе воштонъёс пыртон мылкыдын уло депутатъёс ужбергатӥсьёс. Соослы, автозаправкаос пуктон вылысь, городлэн музъемез кулэ луиз, ас кисыосазы барыш поттон понна кузёяськемзы потӥз базаръёсын, азьланьтэ веранзэ А.Салтыков. Пумиськон дыръя ик Ижевсклэн мэрез та ужпумъя референдум ортчытон мылкыдзэ вераз. Калык, пе, мед быръёз, кулэ-а властез мэр но город Думалэн тӧроез куспын люкыны. Табере город Думалэсь депутатъёссэ кивалтон ёзъёсы пыраклы кыскон сярысь. Туала юнматэм законъя но, соос пӧлысь 25 процентэз таӵе вамыш лэсьтыны быгато. Но шедёз меда тамында мылкыд карись дышем интыоссэ "вунэтыны", оскытэ мэр. Мар луоз - возьматоз сессия. Ватсаса пусъём на: законлы выль проектэн потэ депутатъёс пӧлысь куиньмос люкетэз. Э.КУМАЧЁВА. Мед чузъяськоз крезьгур! Россиысь дано артист Геннадий Кузнецов - шаерысьтымы одӥгез тодмо кырӟась. Удмурт радио пыр ӵемысь чузъяське солэн чебер но небыт куараез. Геннадий Васильевич тужгес мыло-кыдо кырӟанъёс кылдытъя Куӟебай Гердлэн, Михаил Федотовлэн, Геннадий Камашевлэн кылбуръёссыя. Толсур толэзьлэн сизьыметӥ нуналаз (7-тӥ декабре) "Аксион" культура дворецын ортчоз Геннадий Кузнецовез данъясь ӝыт. Со сӥземын луоз кырӟасьлы ньыльдон вить арес но кырӟаны кутскемез дырысен кызь вить ар тырмонлы. Двореце лыктэм калыкез шулдыртозы фольклор кырӟанъя "Айкай" театр, эктонъя "Венец" ансамбль, Удмурт Элькунысь калык артистка Валентина Пудова но ачиз кырӟась Геннадий Кузнецов. Мед чузъяськоз та нуналэ тужгес жингрес, тужгес удалтэм крезьгур! Ӝыт кутскоз 18 часын. Кырӟа Геннадий Кузнецов. Искусство удысысь Кырӟа-вера "Танок" Со вал ӵапак дас ар талэсь азьло. Мӧзмыт сӥзьыл нуналэ республикаысьтымы культурая училищелэн концерт возьматон залаз жингрес праздник вуиз кадь. Отын дышетскись дас кык нылъёс но соослэн ньыль дышетӥсьёссы туж аспӧртэмлыко концерт возьматӥзы. Ужрадэ ветлэмъёс солы туж бадӟым дунъет сётӥзы. Со вал "Танок" ансамбльлэн кутсконэз, солэн нырысетӥ вамышез. Табере коллектив кун (государственной) ансамбль луиз ини. Кылдэм бераз ик"Танок" аслаз концертъёсыныз вуылӥз шаермылэн пӧртэм сэрегъёсаз. Нош вуоно араз ини Удмурт шаерысь кырӟаны-вераны быгатӥсьёсты сюрес вуттӥз океан сьӧры - Америкае. Концерт возьматӥзы США-ысь Колорадо но Вайолинг штатъёсын. 1991-тӥ арын Вайолинг штат пусйиз 100 ар тырмонзэ. Отчы Россиысь но куноос ӧтемын вал. Культурая но спортъя ассоциацилэн комиссиез уно городъёсысь художественной самодеятельностья коллективъёсты учкиз. Нош Америкае мыныны шуд усиз "Таноклы" гинэ. Странаысьтымы телерадиокомпания 1994-тӥ арын "Россилэн куараосыз" конкурс ортчытӥз. Сю егит коллективъёс нюръяськизы отын. Удмуртиысь артистъёс отысь бертӥзы куинетӥ премиен но лауреат нимын. "Танокез" ӧтчазы Москва кылдэм дырысен 850 ар тырмемен валче сӥё-дано ужрадэ. Собере вал Владимир, Муром, Череповец, Вологда, Челябинск, Италия, Германия, Венгрия... "Танок"- туж аспӧртэмлыко ансамбль. Отын али 24 эктӥсь но кырӟась. Аристъёсты дасяло асьсэос ик. Нош репертуарзы кыӵе узыр! Программаязы пыртэмын удмурт, ӟуч, бигер, пор но мукет выжы калыкъёслэн кырӟанъёссы но эктонъёссы. Нимысьтыз вераны кулэ ансамбльлэн чеберлыкъя кивалтӥсез Федор Иванов сярысь. Федор Ивановичлы сётэмын "Россия Федерациысь культура удысын дано ужась" вылӥ ним. Быгатӥсь но кибашлы уно егитъёслы бадӟым сцена вылэ сюрес сётӥз ини. Та ансамбльысь ньылез артистъёс та вакытэ дышетско Москваысь Гнесинъёс нимо академиын. Соос пӧлын Ф. И. Ивановлэн нылыз Наташа но. Нош покчиез нылыз, Марина, Москваысь ик одӥгзэ академиез йылпумъяса, ӝоген модельёсъя конструктор луоз. Федор Ивановичлэн кузпалыз, Валентина Николаевна, ансамбльлэн директорез. Ансамбльлы трос кужымзэс сёто балетмейстер Марина Уткина, хормейстер Евгений Степанов, балалайкаен шудӥсь Иван Вахрушев, арганчи Алексей Белослудцев, баянэн шудӥсь Ринат Миникаев, эктӥсьёс-эгызоос Александр но Сергей Бурковъёс. Та вӧзы мукетъёсызлэсь но нимтулъёссэс ватсаны луысал. Та нуналъёсы тани "Таноклы" 10 ар тырмиз. Ансамбльлэн бадӟым концертэз ортчоз 18-тӥ ноябре Ижевскысь "Металлург" культура дворецын. В. Чернов. Редакцие вуиз гожтэт Нимтэм вазиськон Газет лыдӟисьёс редакцие пӧртэм юанъёсын вазисько. Тросэзлэн валамтэоссы кылдо пенсия басьтон пумысен. Лыдӟисьёслэн юанъёссылы валэктон курыса, ми вазиськиськом Калыкез улон-вылонын утёнъя министерствоысь специалистъёслы. Пенсия сярысь закон пумысен валэктон сётыны юась-верасьлэн нимыз но кытын улэм- вылэмез одно ик кулэ ӧвӧл ке, нимаз адямиослэсь ужзэс эскерыку, специалистъёслы ӝутоно луэ вань документъёсты, ёросъёсы вазиськыса. Татын ини юанъёс кылдо. Алигес редакцие вазиськиз Балезино ёросысь Семенова эш. Туэ гужем солэн картэз шуккиськыны шедьтэм. МСЭК (ВТЭК) пыр ортчыса, пиосмуртлы группа уг сёто. Нош солэн паллян киыныз ужамез уг луы. Югдурез эскерыны курыса, вазиським министерствое, но милемды отысь номыртэк келязы. Ужпумез эскерон понна тодыны кулэ, пе, пиосмуртлэсь нимтулзэ, кытын улэмзэ, сотэк кытысь утчалод Медико- санитарной экспертной комиссия (МСЭК) пыр ортчем бумагаоссэ. Ма бен, утчаса шедьтод ик, но кӧня мултэс дыр быдтыны кулэ со понна. Ӧжыт-а, вылды, Балезино ёросын Семеновъёс. Алнашысь Данилова эшлэн озьы ик тодэмез потэ ӵужапаезлэн пенсиез пумысен. Песянайлы 80 арес ни, 1-тӥ группаен инвалид, но пенсия ӧжыт басьтэ. Шонер-а солы пенсия сёто? Та юанлы валэктон сётон понна эскерыны кулэ песянайлэсь пенсиосъя ужзэ. Таизлэн но нимыз-тулыз гожтымтэ. Алнаш ёросысь ик Дернова эшлэн тодэмез потэ анаезлы пенсия тыремзы пумысен (нимыз нош ик верамтэ). Анаезлы 90 арес ни, пенсия 528 манет гинэ басьтэ. Райсобесын валэктӥллям, стажез, пе, уг тырмы. Арлыдоослэсь таӵе ӝожтӥськонъёс редакцие трос вуо. Вань улонзэс секыт колхоз ужын ортчытэм муртъёс обидеме кылемын угось. Уждун ӧжыт басьтэменызы пенсизы но ӧжыт люкаське. Нош куд-огезлэн, пинал дырысен ужаса но, стажез уг тырмы - ужамзы сярысь кулэ документъёс ышемын яке кылемын ӧвӧл. Архив юрттыны уг быгаты ке, сыӵе дыръя вазиськоно адӟисьёслы. Соослэсь верамзэс лыдэ басьтыса, ужам аръёсты будэтыны луоз. Жаляса верано, пенсия сярысь Россиын кутэм законъёс туала куронъёслы уг тупало. Шуом, кин быдэс даурзэ секыт ужаса ортчытӥз, нош пенсия ваньмыныз одӥг выллем басьтэ. Законэз выльдон берло дыре сярысь трос гинэ верасько, мар но со лэсьтӥське но ини. Нош туннэ нуналлэн аслаз законъёсыз, райсобесын ужасьёс со куронъёс вылэ ик пыкъясько. Пенсия ужпумъёсъя кыӵе ке юанъёсты кылдӥзы ке, валэктонъёс нырысь ик утчалэ асьтэ райсобесысь, пенсиосъя вань ужъёс отчы люкаськемын угось. Калыкез улон-вылонын утёнъя министерствое яке редакцие вазиськиды ке, валэктон утчано луоз райсобесын ужасьёс пыр ик. Нош татын тӥледлы кулэ валэктон ӧз сётэ ке яке юрттыны ӧз быгатэ, вазиське редакцие яке меӵак министерствое. Кинлэн ке, оло, юаськон-вераськон понна райцентре потыны луонлыкез ӧвӧл, - таяз учыре но гожтэт келяны луоз "Удмурт дунне" газетэ. Но эн вунэтэ пусйыны ним-тулдэс, кытын улэмдэс. Вераськон мынэ ке мукет адями сярысь - гожтэ солэсь нимзэ но кытын улэмзэ. Соку шугъяськонъёс уз кылдэ, юанъёслы валэктон сётыку. Л. Малых. ШӦКЫЧ Луд кечъёс Улонысь учыр Пичи дыръям монэным тумошо учыр вал. Одӥг гурезь баме узы-борыяны мынӥ. Эляй бам шуо вал сое. Эшъёсыным ялан отчы ветлылӥмы, интыос тодмо, кыдёкын ке но уг кышкаськы. Нош туннэ огнам гинэ мынӥ. Со бамалын трос сусыпуос будо. Ветлӥсько сусыпуос пӧлтӥ боры бичаса. Борыос пӧлы пум быдӟаесь, ӵыж-горд пишто. Гурезь улысь ческыт лудын скал уллё шутэтске. Пастухъёс возьмало соосты. Соин ик мон уг кӧшкемаськы. Малпамтэ шорысь одӥг сусыпу улысь кыӵе ке пурысь быльк синмо бӧмез адӟи. Шорам учке, уг но вырӟылы. Мон туж кышкай, со кион, дыр, шуыса. Луд кеч ке, пӧй, луысал кемалась пегӟысал ини. Сэрыт гинэ со дорысь палэнски но кесяськисько. Пастухъёс доры э-э-эх! лобатӥ ук. Гурезь уллань бызьыны капчи, эсьмаса пыдъёсы ик музъем вылэ уг йӧтыло. Шокпотыса соослы верасько: � Отын кион кылле, монэ куртче вал ини, ӝог мынэ отчы! Кутэ! Пастухъёс шуо: � Возьматы ачид, кытын со? Пересь пастух Данёк мон сьӧры гурезе тубиз. Мон возьматӥ кытынзэ. Со отчы мынӥз но, "кионме" пельёстӥз кутыса, лус-лас гинэ гурезь уллань васькиз. Мон со сьӧры бызисько, борыянме но вунэтӥ. Пастухъёс монэ гор серекъяло. � Эх, тон, луд кеч! Кык кечъёс огзылэсь огзы кышкаллям. Кеч вылэм сӧсыр, соин ик пегӟыны быгатымтэ. Ишан Мукет дыръя кӧшкемыт адӟонэн пумиськиз кузпалы. Пичи дыръяз сое, пучу арня нуналэ, ыстӥллям сусыпу вай дуре. Ведӥнъёс, пе, медам пырыны быгатэ ӧсъёстӥ, укноостӥ. Соос, пе, олокин но кариськыны быгато: коӵыш но, шыр но, комак но. Озьы эшъёсыныз мынӥллям шур сьӧры сусыпу вай тӥяны. Ӝыт пал берто ини соос доразы. Мунчоос пала вуиллям но, отысь гоно адями адскем. Гоно киыныз, пе, шона, дораз ӧте. Пиос пегӟыны медо вылэм но уг быгато ни. Пыдъёссы музъем борды бурмиллям кадь, вырӟемзы уг лу. Озьы кӧня ке сылыса, эшъёсыз пегӟыны быгатӥллям ик, нош сое уг лэзьы, пе. Бӧрдыны кутскем. Собере, кӧня ке минут сылыса, сое но лэзиз, пе. Кышкаменыз пегӟемез но уг лу ни. Кызьы но озьы тубем но дядяезлы верам. Соиз шуэм, бускеле Назар кышкатӥз, дыр. Со сыӵе маскарчи. Ай мон сое тӥрен кышкато, пе. Тӥр кутыса васькем нюк уллань. Мунчо пушкын но мунчо дорын но, нокин но ӧвӧл. Со учыр бере мунчоосты кыдёкетӥ ортчылӥз. Ялан кӧшкемаса ветлӥз. Со адӟемез токма ӧз лу: кӧня ке ортчыса, пересь дядяез кулӥз. Та учыръёс зэм вал. А.ШКЛЯЕВА, Игра ёросысь Порвай гурт. тазалык Утиськись муртэ инмар уте Дуннеын арлы быдэ пыктослэсь 6 миллион адями кулэ. Соос пӧлысь 200 сюрсэз - нылпиос. Пӧртэм инфекциосын нюръяськонъязы, врачъёс вунэтылӥзы нылпиез раклы эскерыны. Нош берло аръёсы пыктосэн курадӟись нылпиослэн лыдзы чутрак йылӥз. Тросэз пыктосэн вордӥсько ни. Соин ик та вормонтэм черен нюръяськоно, нуны кылдытозь. Али тодӥсьтэмез ӧвӧл ни, кыӵе кышкытлык кылдыто секытэн ветлыку химия, радиация, юон, кыскон но мукет урод сямъёс. Озьы ке но, нылкышно яке ужысь уллямзылэсь кышкаса, яке тросгес коньдон поттыны тыршыса секыт, тазалыкезлы кышкыт луись ужез быдэсъя. Секытэн нылкышнолы тужгес но чакласьконо кыкетӥ арняяз но кыкетӥ толэзяз - та вакытэ нуны вылын шӧдӥсько вань "сьӧлыкъёс". Со - анайлэн паласькись висёнъёсын курадӟемез но чакласькытэк эмъюм юэмез, сиськемез но, шуг ветлэмез но, юэмез-кыскемез но. Со сяна, кышкытлык вань, бер пинал вайыса. Палаське пыктосэн висён выжыысь выжые но, уката ик ретинобластомаен курадӟисьёслэн но. Таза нылпи вордэмды потэ ке, малпаське со сярысь азьло ик. Нуны сюремдылэсь азьло эскериське генетикъёс дорын, куштӥське урод сямъёстылэсь, уте нылпидэс паласькись висёнъёслэсь, шуккетъёслэсь. Эн пыкиське УЗИ-ен эскериськонлэсь, со дырыз дыръя шарая урод будӥсь нуныез. В. Кишкан, республикаысьтымы валтӥсь нылпи онколог. Шӧкыч Басьто бере, вузаськом. Озьыен. лушкаськиськом... Базаре ветлӥсьёс одно ик синйылтыло, дыр, олокыӵе но корт арбериосын вузкарисьёсты. Котькуд рынокын сямен ик, соослэн асьсэлэн сэрегзы вань. Маиз но ӧвӧл отын: сыномем ӟирыен кутскыса, алмазэн шобыртэм шериськон арбериозь. Люкен- люкен кыллё эголъёс, портонъёс, корт вандон-вӧлон арбериос... Дунъёссы но магазинын сярысь данаклы пичигес. Ма бен ваньмыз ӵыжак вылесь ӧвӧл, но пӧлазы трос гинэ чик ужамтэосыз но. Нош кытысь вуо таӵе арбериос базаре? Вузкарисьёс асьсэос уг лэсьто ук соосты, магазинысь но басьтэмын ӧвӧл, дыр. Валатскыны луэ ик бен. Таӵе арбериосын завод цехъёсын но мастерскойёсын ужало ук... Тросэз ӧз вунэтэ на, луоз, предприятиосын реформа шуонлэсь кутскон вакытсэ. Кӧня ваньбур таркаськиз! Соку ик базаръёс но узырмыны ӧдъязы олокыӵе но ужан тӥрлыкен. Мар вал, соиз ортчиз ни. Нош юанмылы валэктон али но сюре на. Ассэ ачиз гажась котькуд предприятиын ужало югдурез утён-чакланъя службаос. Соос но дырын-дырын ужамзылы йылпумъянъёс лэсьтыло. Тани, кылсярысь, акциосын "Ижсталь" огазеяськонын туэ гинэ 429 лушкаськон учыръёсты алыны но 2072544 манет тыр ваньбурзэс утьыны быгатӥллям. Завод чотын байкыны малпась 194 мурт ӝегатэмын. 115 лушкаськон учыръёсъя материалъёс милицие сётэмын. Кылсярысь, одӥг шулдыр нуналэ лушкаськемзы понна ӝегатэмын вал кык эшъёс П. но Д. Таосыд 38793 манет но 60 копейка тыр 720 корт вӧлон резец поттыны малпало вылэм. Нуналлэн шулдырез бусъяськиз соос понна: уголовной уж ӝутӥзы. Трос гинэ сюро чыры-пыры лушкаськисьёс. Сыӵеос я премиостэк кельтэмын, я ужысьтызы мозмытэмын. Мукетаз нуналэ одӥгысьтыз цехысь бригадирлэн В. Коноваловлэн косэмезъя, вдитель Д. Рыбкин ЗиЛ130 машинаеныз 6 тонналэсь ятыр вуж быстрорезъёсты поттэм. Дуныз ӧжыт ӧвӧл - 73965 манет. Берлогес сое шедьтӥллям "Ижмаш" ОАО-лэн одӥгысьтыз отделысьтыз. Татын куштӥськем кортлы ёрмиллям, шӧдске. Куштӥськем корт пумысен. Трос гинэ вераськонъёс мынӥзы тӧдьы но ӵуж-горд металл люкасьёс но вузасьёс сярысь. Чилясез пумен быре ни, лэся. Табере отын но татын усьтӥсько куштӥськем корт кутон интыос. Озьыен, ӟуч сямен вераса "цветмет" эстафетазэ сётэ "черметлы". Вузасез но вуза, басьтӥсез но басьтэ. Ярам куштӥськем корт ке луысал. Лошъяськисез ӧвӧл бере, мукетсэ синйылто. Тани одӥг уе Якшур-Бодьяысь урамъёсысь водопровод колодчаос вылысь вить чугун шобретъёс "тӧлӟиллям". Куиньзэ шедьтӥллям ик ... куштӥськем корт люкан интыысь. ЖКХ-ын ужасьёслэн верамзыя, 50 килограммъем таӵе чугун шобрет, пе, соослы 530 манет тыр усе, нош "куштӥськем" чотын сое 25 манетэн гинэ басьто. Вераськонъёс ветло, "куштӥськем" корт вузасьёс, пе, сюресъёс дурысь пусъёсын юбоос шоры но уӵертыло ни шуыса. Паймод, ява! "Цветмет" - "чермет" эстафета пумысен ке, нырысь электроезъёсты качазы, табере кечат-вамат корт юбоосты но кесяны уз кутске-а? Н. Корякин. Шундылэн шунытэз ваньмызлы мед тырмоз Россиысь егитъёслэн "Ми - Россиын улӥсьёс" форумазы лыктэмъёс удмурт егитъёслэн "Шунды" дэменлыксылэсь шунытсэ, ӟеч малпанъёссэс дор палъёсазы но нуозы. Озьыен, "Шундылэн" югытэз финн-угор дуннеез гинэ уз мальдыты ни, солэн тылсиосыз быдэс странаямы пазьгиськозы. "Металлург" культура дворецын 15-тӥ ноябре пуксён интыез ик ӧй вал. Россиысь егитъёслэн форумзылэн нырысетӥ нуналэз кутскиз "шундыосын" тодматсконэн, соосты 10 ар тырмеменыз ӟечкыланэн. Ӝыт зэмос праздниклы пӧрмиз. Шуныт кылъёс, ӟечкыланъёс, кузьымъёс. Отын ик мылкыдэз бугыртӥсь, серемез поттӥсь концерт номеръёс... "Шундыосты" ӟечкыласа но быгатэмзэс дунъяса, та ӝытэ ӟырдыт чабизы Россиысь витьтон пала улосъёсысь лыктэм куноос, шаерысьтымы вань ёросъёсысь но городъёсысь лыктэмъёс, министерствоослэн но ведомствоослэн кивалтӥсьёссы. Ӝытэ озьы ик лыктэмын вал Россиысь Калыкъёслэн ассамблеязылэн Советэзлэн тӧроез Рамазан Абдулатипов, Россия Федерациысь Кун Думалэн депутатэз Светлана Смирнова но мукет куноос. "Шундыосын" тодматскон йылпумъяськиз ог-огеныд тодматскон но эшъясько ӝытэн. 16-тӥ ноябре Россиысь егитъёслэн форумзы ужзэ азьланьтӥз. Л. Малых. Шӧкыч Мар но уг луы Юымтэ ке но - парсь Юэменыз пыд вылаз возиськымтэ адямиез кылало, нош ик парсь кадь тордэм ни, пе. Та верамез асьсэос парсьёс кылысалзы ке, туж мур ӝоже усьысалзы, дыр: ма, кызьы озьы, парсь даурмы кыстӥськытозь сазьтӥськонтӥе ӧм вуылэ на, нош милемды тордосъёсын ӵошато. Шуг оскыны, та вераськонэз куке-соку пичи парсьпи кылӥз шуыса, но пинал визьмыныз сазьтӥськон коркае сюрес лёгиз ик со. Кӧня ке ар талэсь азьло вал со. Катя апаен Толя агай, вузаны шуыса, гуртысь куать парсьпи ваизы. Мешоке тырыса, интыязы мотоцикллэн коляскаяз. Толя агай городысь базаре кошкиз, нош Катя апай кылиз дорысь ужъёссэ быдэсъяны. Нуназе котыр нылкышно картсэ чакланы ветлӥз. Ньыльзэ парьспиез басьтӥллям ни, кылиллям тужгес чырткемъёсыз но жиетыны яратӥсьёсыз. - Чакласькы, уть, - алӥз Катя апай Толя агаез, - ӧд вуза мар ке, бертыкуд мешоктэ керттылы, пегӟыны шедьтозы та шаянъёс. Кӧня ке сылэмез бере, воргорон эшшо одӥгзэ парсьпиез вузаз, собере дораз бертыны дасяськиз. Куатетӥзэ жиетӥсез мешоке тырыса мар ӧз йыринты, коляскае пыдлогес донгиз но дораз ширтӥз. Гуртаз вуиз но - парсьпиез коляскаын ӧвӧл. Ӝыт пал кузпалъёс доры куноос вуизы. Ваньзы жалязы пегӟем парсьпилэсь кузёоссэ. Ӵошен одӥг малпанэ вуизы: газетэ ялон сётоно. Ортчизы нуналъёс. Ышем парсьпизы сярысь кузпалъёс вунэтыны кутскизы ни вал. Нош одӥг ӝыт корка вадьсазы машина дугдӥз. Милиционеръёс Толя потыны косо. Катя апай копак кушетскиз: мар сыӵезэ лэсьтӥз меда картэз? Вить но, дас но минут ортчиз ни, Толяез уг пыры. Но тани машина кошкиз. - Марлы соос ветлӥзы? Мар ке умойтэм ужад-а? - картэз пумитэ соку ик ожалскиз нылкышно. - Мон номыр ӧй даурты, нош парсьпимы тани сазьтӥськон корка котыртӥ зынъяськыса ветлэ вылэм, - серектӥз пумитаз Толя агай. - Тани та пиос ик шедьтӥллям сое турын пӧлысь. Нырысь сазьтӥськон коркан возиллям, собере одӥгез аслаз гидаз нуэм. Газетысь ялонэз адӟыса ини дорамы кожиллям. Ӵуказеяз Толя агаен Катя апай йыромем нурскетӥсьсэс доразы ваизы. В. Кибардина. Быръёно устооссэ Матэктэ удмуртъёслэн тямысэтӥ ӧтчамзы. Данаказ ёросъёсын ортчизы ни делегатъёсты быръёнъя кенешъёс. Куд-огаз ӧй вал на. Тямысэтӥ ӧтчаме асьсэлэсь адямиоссэс дэмлалозы на Грах, Красногорск, Кияса, Дэбес, Дэри ёросъёс. Удмуртлык мед луоз котькуд адямилэн сюлмаськонэз. Е. Ромашова. Серемес чуръёс Депутат - ӝӧк сьӧрын Сессиысь бертэм картэзлы кышноез ӝӧк вылэ сиён пуктылэ. - Борщ сиёд-а? Номыр вазьытэк воргорон кизэ ӝутэ. - Пыжем сӥль пуктом-а? Картэз нош ик кизэ ӝутэ. - Нош стакан водка? Кылӥсько залын кичабонъёс. Куанеръёс - Вань-а Россиын куанеръёс? - Вань. Кинлэн номыриз аслаз ӧвӧл. Квартираез - государстволэн, дачаез - государстволэн, машинаез - государстволэн. Праздник, пе, вал Пыдкутчан фабриклэн директорез ужасьлэсь юа? - Малы толон уже ӧд пота? - Праздник вал; - Кыӵе праздник. - Чугун сюре вылын ужасьёслэн нуналзы. - Нош тон кызьы соос пӧлы пыриськод? - Мынам фамилие Шлагбаум. Эшшо одӥг ним Толон Москваын ортчиз пыӵал тӥрлыкъёсъя конструкторлы, Социалистической Ужысь кык пол Геройлы, техника наукаосъя докторлы, генерал-лейтенантлы Михаил Тимофеевич Калашниковлы сӥзем бадӟым ужрад. Быдэс дуннелы тодмо адямилы "Россиысь национальной Олимп" общественной организация сётӥз "Адями-Легенда" дано ним но "Зарни Пегас" кузьым. Со сяна, Михаил Тимофеевичлэн эшшо одӥг нимыз ватсаськиз на. Калык куспо штаб сое пусйиз "ХХ даурысь инженер" нимен. Б.НИКИТИН. Удмуртъёслэн ӧтчамзы азьын Сюлэмыз ваньмызлы усьтэмын Куартолэзез егитъёс но, пересьёс но пачылмем мылкыдъёсын пумитало. Та вакытэ уго инкуазьын ваньмыз улӟе, дуннемы соку гинэ вордскем адямилы кельше. 1970-тӥ арын таӵе шулдыр нуналъёсы азьмынӥсь но кужмо СССР-лэн шоркараз, Москвае, комсомоллэн дас ньылетӥ ӧтчамаз, быдэс кунысьтымы делегатъёс вуизы. Соос пӧлын вал удмурт улосамы вордскем пияш Анатолий Комаров но. Ӧтчаме ыстӥзы сое Забайкальской военной округысь егит ожгарчиос. Столицамылэн тужгес дано но бадӟым юртаз, Съездъёсъя Кремль Дворецын, - пукиз удмурт пияш но. Ӧтчамлэн одӥгаз нуналаз кибашлы егит ожгарчиосыз ӧтьылӥзы. Обороная министерствое. Отын соослы сухопутной войскоослэн кивалтӥсьсы суйпосын нуллон часъёс кузьмаз. Нош собере егитъёсыз ӧтчаз Советской Союзлэн кык пол Героез, СССР-ысь обороная министр, Советской Союзлэн Маршалэз А. А. Гречко. Удмурт пияш понна со туж вылӥ дан вал. Со шудо нуналъёссэ Анатолий Комаров ноку уз вунэты. Кӧня выль адямиосын тодматскиз удмурт пи столицаямы улон вакытаз. Уноеныз али но эшъяське. Нош сыӵе бадӟым ужрадэ чебер синъёсыд но супыльтыны быгатэмед понна гинэ нокин уз ысты. Ӟеч сямъёсыд, ужез яратэмед гинэ дандэ вылӥе ӝуто. Толя пичи дыръяз ик шӧмъяз улонмылэсь кузялзэ но, ческытсэ но. Вордскиз 1949- тӥ арын Можга ёросысь Пазял гуртын. Кӧшкемыт ож аръёслэн яраоссы быдэсак бурмемын ӧй вал на. Калыкмылэн улон-вылонэз секыт вал на. Нылпиослы но бусьтыр сиён-юон, дӥсь, пыдкутчан ӧз шедьылы со аръёсы. Нош крестьян ужлы соос пичиысен дышылӥзы. Со аръёсы будэм пиос но нылъёс азьланяз визьмоесь, ужез яратӥсь адямиослы пӧрмизы. Туж шерез гинэ, палдэм шелеп сямен, улонмылэн ӧрысьтыз палэнэ кожиз. Нош сыӵеос, туала вакытэн ӵошатыса, чиньыен лыдъямон гинэ вал. Пазял школаын дышетсконын но, пионер огазеяськонлэн ужаз пыриськонын но Толя берлоосыз пӧлын ноку но ӧй вал. Чырткем но ваньзэ тодыны тыршись пияш котькытчы вуыны тыршылӥз. Дышетӥсьёсызлэсь гуртэ сётэм ужзэс мур малпаськыса, дыртытэк быдэсъяз. Собере ини библиотекаысь ваем книгаос борды басьтӥськылӥз. Туж яратылӥз удмурт писательёслэсь гожъямъёссэс. Ма, ӟуч кылын гожъямъёссэ но палэнэ ӧз кельтылы. Бен пияш тетрадь, книга сьӧрын гинэ ӧз пукылы, урамын, тэльын, шур дурын эшъёсыныз ӵош шудылӥз но. ... Пазял школаез йылпумъяса, Толя пыриз Можга педучилищее. Удмурт литератураез яратэменыз, чик ӝегатскытэк мылкыд кариз педучилищеысь литературая огазеяськонлэн ужаз пыриськыны. Соин кивалтэ вал соку берло ини тодмо луэм удмурт писатель Григорий Данилов. Огазеяськонлэн ужаз со аръёсы мылысь-кыдысь пыриськылӥзы Николай но Владимир Самсоновъёс, Николай Кузнецов но уно мукетъёсыз. Али соос пӧлысь куд-огез туж тодмо писательёс луизы ини. Толя Комаров аслэсьтыз кужымзэ эскерылӥз но куд-ог гожъямъёссэ печатлалляз Можгалан потӥсь "Ленинъя" газетын. Райгазетлэн со вакытэ редакторез Тихон Андреевич Марков егит пилэсь мылкыдзэ азьланяз но гожъяськыны ӝутъяз. Пазял школаын пионер уже мылысь-кыдысь пыриськон сямыз Толяез юнгес кыскиз ини табере комсомол уже. Та удысын но вань сюлэмзэ сётыса тыршиз. Анатолий Анатольевичлэн таӵе ӟеч сямыз быдэс улонэзлы кылиз. Педучилищеез йылпумъямез бере, егит дышетӥсез вордскем палаз, Пазял школае, ужаны ыстӥзы. Выль ужаз но со нылпиослы вань сюлэмзэ, вань люкам тодон-валанзэ сётыса тыршиз. Удмурт кыллы но литературалы дышетэмен ӵош, дышетӥсьёс тырмымтэен-а, мар-а, Комаровлы нылпиослы математикая, суреданъя но крезьгуръя тодон-валан сётоно луиз. Пазял гурт со аръёсы вал Можга ёросысь но быдэс Удмуртиысьтымы тужгес бадӟым "Россия" колхозын. Отысь комсомол огазеяськонлэн ужаз пыриськылӥзы дышетӥсьёс но. Комсомол комитетлэн кивалтӥсез (огвакытэ отын секретарь луыса ужаз "Россия" колхозлэн туала тӧроез Аркадий Николаевич Вершинин) синйылтӥз Пазял школаысь дышетӥсез Анатолий Анатольевич Комаровез. Мон малпамъя, солэсь чырмыт луэмзэ шӧдытэк ӧз кыльы, дыр, та колхозэн дасо аръёс кивалтэм, элькунысьтымы тодмо адями Аркадий Петрович Горынцев но. Комаровез бырйизы комсомоллэн комитетаз. Та ужын но со ассэ умой ласянь гинэ возьматӥз. Быгатӥз уго егитъёсты котыраз огазеяны, соосты ӟеч ужъёсы кыскыны. Нош школаын ужзэ котьку нырысетӥ интые пуктылӥз. Анатолий Анатольевич ӵем малпаськылӥз, кызьы дышетоно нылпиосты удмурт кылэз но литератураез яратыны. Сотэк угось удмуртлык пашмоз. Пазялын ужакуз ик кутскиз удмурт кылэз но литератураез дышетонэз умойгес радъян борды. Вуж Юбералан, нош бӧрысь та школаез Александрово школаен огазеямзы бере, Анатолий Анатольевич йӧн-йӧн басьтӥськиз удмурт кылэз но литератураез дышетонъя кенеш борды. Солэн ӵектэмезъя, программаосы куд-ог воштонъёс но пыртэмын. Соинтэк-а Комаровез дэмлазы ёросысь удмурт кыллы но литературалы дышетӥсьёслэн огазеяськонэнызы кивалтонэ? А. А. Комаров кема ужаз Можга карын но ёросын вордскем, сӥё-дано Можга педучилищеын (али - педколледж - Л. Е.) дышетскем писательёслэсь гожтэмъёссэс но улэм-вылэм сюрессэс эскерон бордын. "Можга писательёс" книга гожтэмын. Сое печатлан понна, али трос коньдон кулэ. Нош дышетӥсьёслэн уждунзы туж пичи: улыны-вылыны но уз тырмы, аслад бакчаед, пудо-животэд ӧз луы ке. Оло, Калыкез дышетонъя, Нациослэн ужпумъёссыя министерствоос юрттозы та кулэ книгаез печатланы? Комаров ачиз но, коньдон возьмаса, тэк уг пукы. Уно пол вераськылӥз ни ужбергатӥсьёсын. Утчась адями шедьтэ, шуо. Шедёзы, дыр, али но шӧртчи муртъёс: "Можга писательёс" книга удмурт кылэз но литератураез дышетӥсьёс но лыдӟисьёс кие вуоз. Тыршись адями интызэ воштэ ке но, сое ӝоген выль улосын но синйылто. Озьы ик луиз Комаровен но, Александрово школае выжемез бере. "Тракторысь" коммунистъёс адӟизы та адямилэсь партийной организацилэн ужаз мыло-кыдо пыриськемзэ, соин ик, дыр, соос вазиськизы партилэн Можга райкомаз но куризы Комаровез асьсэлы секретаре ӵектыны. Та удысын но Анатолий Анатольевич вань сюлэмзэ, кужымзэ сётыса тыршиз. Ар ортчыса, "Тракторысь" парторгез кенешыны ӧтиз райкомлэн соку нырысетӥ секретарез Г. Г. Оревков. Кема вераськемзы бере шуиз: - Малпаськом тӥледыз вуоно конференциын райкомлы секретаре бырйыны... - Мон туж яратӥсько дышетӥсьлэсь ужзэ. Солы сётӥ ини дасо аръёсме. Малы меда мӧйымон азям кулэ на, яратоно ужме куштыса, быдэсак бадӟым уже выжыны? Мон быгатэмея дышетӥсьын ужакум но калык понна тыршисько. Тӥ монэ шонер валалэ, Геннадий Григорьевич. Но серем эн каре. Удмурт кылэз но литератураез дышетонэз умойгес радъян вылысь, та ужез выльдон ласянь малпанъёсы куд-ог вань, - пумитъяськиз воргорон. - Туж умой ук со, Анатолий Анатольевич. Ужалэ ас удысады ик. Мылкыд карисько: малпанъёсты мед быдэсмозы, - шуиз райкомлэн секретарез. Но, дыр ортчемъя, Комаровлы мукет йырвисён шедиз. Александровоын но улӥсьёс, бускельёссылэсь адӟем карыса, гуртсылы староста бырйыны малпазы. Гуртоослэн огъя люкаськемазы нырысь ик Комаровлэсь нимзэ веразы. - Туж бадӟым тау, иськавынъёс, оскемды понна, - шуиз со люкаськемъёслы. - Мон ноку но огъя ужлэсь уг палэнскиськы. Но асьтэос умойгес малпаське ай. Мон - Пазялын вордскем но будэм адями. Тӥляд гуртоосты пӧлын но ӧжыт ӧвӧл улонэз валась, визьмо воргоронъёсты. Ма, сыӵеесь ик нылкышноосты но. Малпаське ӟечгес: кинэ умойгес луоз старостае бырйыны? - Мукет мурт кулэ ӧвӧл милемлы! - ӵаш потто люкаськемъёс. Тужгес но - нылкышноос. - Вае тазьы малпаськом, гажано иськавынъёс: старостае ас гуртодэс ик быръём. Нош монэ солы воштӥсе ӵектондылы пумит уг луы... *** ... Улонысь алигес кошкем тодмо удмурт писательмы Пётр Константинович Чернов "Герд" газетэн кивалтыны кутскемез бере ик огпол монэн кема вераськиз. - Тӥ, Леонид Петрович, уно аръёс ӵоже ини ужаськоды элькунысьтымы ожысь но ужысь ветеранъёслэн огазеяськоназы но соослэн "Долг" газетсылэн редакцияз, - шуиз со. - Лыдӟылӥ тӥлесьтыд ветеран уже мылысь-кыдысь пыриськись адямиос сярысь очеркъёстэс но статьяостэс. "Удмурт кенешамы" ӧжыт ӧвӧл ук сюлмо тыршись эшъёсмы. Нош соос сярысь удмурт калыкмы туж ӧжыт тодэ. Уд басьтӥське-а соос сярысь "Гердамы" гожъяны? - Малпаськыны кулэ, Пётр Константинович. - Мар кема малпаськонэз? Кутскелэ но гожтэлэ али аспал адямиды Анатолий Анатольевич Комаров сярысь. Со "Удмурт кенешамы" одӥгез чырмытэз. - Со сярысь гожтон сярысь кемалась малпасько вал ини, но ведь ваньмаз вуттӥськыны дыр но, кужым но уггес тырмы ни. Кыл сётӥсько, Пётр Констанинович: курондэс быдэсто. Али туж жаляса верано луисько: "Гердлэн" редакторезлы сётэм кылме улэп дыръяз быдэстыны ӧй вуы... ... "Удмурт кенеш" огазеяськонлэн Можгалась но та ёросысь ёзъёсыз ужаны кутскизы 1991-тӥ арын. Вуоно арын, гужем, соослы дас ар тырмоз ини. Вылӥын мон пусйи ини: кыӵе гинэ уже уг быръё Комаровез, ньӧмыз понна гинэ уг басьтӥськы. Нош удмуртлыкмес утён, удмурт калыкмылэсь данзэ эшшо но вылэ ӝутон, солэсь эрикрадъёссэ улонэ пыӵатон понна нюръяськон - Комаровлэн, кызьы шуо калыкын, сюлмаз но, вираз но пыӵамын. Солы оскем туж дано ужез быдэсъян вылысь, Анатолий Анатольевич уй но, нунал но ужаны дась. Леонид Емельянов. Анатолий Анатольевич Комаров, "Удмурт кенеш" огазеяськонлэн Можга ёросысь ёзэзлэн тӧроез. Удмурт Элькунысь Национальной театрын 20-тӥ ноябре 18 часэ Тон лобӟы, мынам кырӟанэ Галина Романова кылбурчилэн юбилей ӝытэз. пыриськозы артистъёс: Евгения но Алевтина Медведеваос, Геннадий Бекманов, Надежда Уткина, Валентина Серебренникова, Ольга Зорина, Алефтина Корепанова, Ада Диева, Уваысь "Купанча" ансамбль (кивалтӥсез Пантелей Кузнецов), Булайысь "Инвожо" ансамбль (кивалтӥсез Вячеслав Кириллов), удмрут театрысь артистъёс. Тодматскон сэрег Аб. 404. Удмурт нылкышно, 38 арес, люкиськемын, будо 16 но 17 аресъем пиосы. Улӥсько Ижевскын, 3 комнатаен квартираын, ужасько вузкарисьын. Сямыя шулдыр адями, яратӥсько кырӟаны, эктыны , концертъёсы, театре ветлыны. Тодматскысал умой сямо ас ёзо пиосмуртэн. Аб. 405. 40 аресъем удмурт нылкышно семья кылдытон вылысь тодматскысал городын улӥсь, улон интылы ёрмисьтэм, мултэс юисьтэм, ужез гажась пиосмуртэн. Ачим сярысь: картэным люкиськемын, кык бадӟым пиосы вань. Яратӥсько пӧраськыны, мукет нылкышно ужъёсты быдэсъяны. Аб7 406. Нефтекамск городын улӥсь удмурт нылмурт, 33/164, Овен, бызьылымтэ, вылӥ образованиен, ужасько дышетон удысын. Яратӥсько гурт котырын ужаны, бакча ужен вырыны. Тодматскысал, визьмо, дышетскем, лякыт сямо, юисьтэм, гурт ужез валась удмурт пиосмуртэн. Улон интыме воштыны соглаш. Аб. 407. Тодматскысал 25-30 аресъем учкымон, сьӧд яке тӧдьы йырсиё нылмуртэн. Пумит ӧвӧл одӥг ныл пиналэзлы. Ачим сярысь: учкымон, веськрес мугоро 30/172/65 гороскопъя Козерог. Улӥсько анаеным ӵош. Яратӥсько ужаны, чорыганы, спортэн вырыны. Винаен, тамакен уг эшъяськиськы. Лыктоно мон доры. Возьмасько фотоен гожтэт. Аб. 408. Удмурт пиосмурт, 36 арес, лякыт сямо, уг юиськы, тамак уг кыскиськы. семья кылдытон вылысь тодматскысал лякыт сямо, огшоры нылкышноен, улыны лыктоно дорам (ялонэз потаз ни - Аб. 287). Редакцилэсь: Лыдӟисьёсмылэсь ялонъёссэс тодматскон сэреге сётӥськомы, дун басьтытэк. Нимзэс, кытысь луэмзэс газет пыр ум шараяське, ваньмызлэн адресъёссы редакциын. Ялон сётӥсен тодматскыны мылкыд карисьёслы ивортӥськом: адресъёсты ми нокинлы ум келяське. Абонентлэсь номерзэ пусйыса, редакцие гожтэт ыстэ. Нош кинлы ке сӥзем гожтэттэс маркаен чылкыт конвертэ понэ - ыстомы кулэ адресъя. Шӧкыч Суредась пальпотэ � 1 Паллянзэ... Бурзэ... Паллянзэ... Бурзэ... � 2 Кин ке кылтӥды кыскиз шат? Сомында ӟечсэ сӥзь ай ужасьёсыдлы!!! � 3 Нуназелы асьмелэн луз курег, сылалтэм кияр но 300 грамм виски. Суредъёсыз Игорь Кийколэн. Дышетскон Визьнодзэс будэтӥзы Та туспуктэмъёс кытын ке лымшор палан лэсьтэмын шуыса малпады ке, янгышалоды. Со Ижевскысь "Строитель" санаторий-профилакторий ас кунооссэ пальма, фикус, аспарагус выллем будосъёсын садаз ӧте, саунаен бассейназ пыласькытэ, пӧртэм процедураосын эмъяськытэ, ческыт сюдэ-утялтэ. Нош та адямиос ог дас нуналзэ гинэ татын вал ке но, со кемалы кылёз сюлэмазы. Татын уго соос ог-огенызы эшъяськизы, шутэтскизы, нош со сяна, ужазы, дышетскизы. Соос ёросъёсысь гуртъёсысь, посёлокъёсысь администрациослэн тӧрооссы. Соос понна, тодон-валанзэс будэтон вылысь, курсъёсты радъяз Кун но муниципальной службая Удмурт институт. Нимысьтыз программая ужазы, котькуд нуналзы пайдаё вал. Социально-психологической юрттэт сётонъя центрысь специалистъёс валэктӥзы, кызьы, кыӵегес вамышъёс лэсьтоно кивалтӥсьлы, адямилэсь сюлэмзэ вӧсь карытэк ужан понна. Тренинг но ортчытэмын вал. Вылӥ верам институтысь факультетлэн кивалтӥсез Людмила Филипповна Быстрых мадиз ужын этикет, вераськон культура сярысь. Курсэ лыктэмъёс тодматскизы муниципальной службалэн правоя инъетэныз, законъёсыныз, выт тырон ласянь воштӥськонъёсын (ӝоген выль закон - "Налогъёсъя кодекс" - кутэмын луоз). Юристъёс но экономистъёс умой тодон-валанъёс сётӥзы музъем ужез нуонъя, музъемез люкылонъя, вузанъя. Кыӵе выль куронъёс, калык куспо стандартъёс вань делопроизводствоын - тазэ но тодӥзы гурт кивалтӥсьёс. Кызьы выль сямен радъяно кивалтонэз, уже кутоно маркетингез, менеджментэз - та ласянь но валанзы муромиз. Татын ик, дышетскон сяменызы, гурт тӧроос уж вылын, ог-огенызы кенешыса-кивалтыса эскеризы люкам тодонъёссэс. Потазы соос Завьял ёросэ но - социально-культурной комплексэн тодматскыны. Зэм, татын социальной удыс но культура ваче юн герӟаськемын. Синмаськымон луэ "Радуга" но "Викинг" нылпи огазеяськонъёслэн ужамзы. Завьялысь шор ёзо школа, искусствоосъя школа, нылпи спортивной школа, внешкольной ужъя центр - ваньзы соос одӥг кыткетын ужало, пиналъёслы чебер сюлэмо, таза будыны юртто. Мар лыдӟиське бумага вылысь, уж вылын быдэстыны луоноез шӧдӥськод ке, туж умой. Нош чылкак теория пӧлы выйыса "уян" визез-нодлыкез будэтыны сокем ик уг юртты. Занятиоссы пумысен тазьы малпа Балезино посёлокысь администрацилэн тӧроез Георгий Александрович Пашкин. Солы тужгес но кельшем Удмурт кун университетысь профессорлэн, экономика наукаосъя докторлэн Владимир Иванович Некрасовлэн кивалтон ёзъёслэсь ужзэс умоятон ласянь дэмланъёсыз. Игра ёросысь Сепож администрацилэн кивалтӥсез Владимир Николаевич Коровкин шуэ, азьло, пе, уг валаськы вал, маин пӧртэмесь луо бизнес, коммерция, предпринимательство шуонъёс. Пыр-поч валэктэмзы бере, соосты уд ни сураськы. Та группаысь 20 адями пӧлысь котькудӥз аслыз маке но выльзэ усьтӥз, кивалтон биньгозызэ золомытыса бертӥз, луоз, дораз. Удмурт Республикаысь Правительстволэн Аппаратэзлэн кадръёсын ужанъя кун службая но интыысь аскивалтон ёзъёсын кусып возёнъя управлениысьтыз валтӥсь специалист Сергей Львович Железняков вера: - Асьме республикаын гурт админисрациослэн тӧрооссы 321 лыдъясько. Госстандартъя чакламын: муниципальной служащийёс одно ик тодон-валанзэс будэтыны кулэ. Соин ик кык ар куспын ми малпаськом курсъёсы люкалляны сыӵеоссэ, кин та вакытэ нокытын уг дышетскы. Туэ таӵе группаос вить луозы. Тӥ али куинетӥеныз тодматскиды. Т. Петрова. Лымшор палась писпуос улын - гуртъёсысь кивалтӥсьёс: Ф. М. Гаязова - Сарапул ёросысь Уральский посёлокысь, Е. М. Хмелявская - Кез ёросысь Тортым гуртысь, И. А. Кропотин - Игра ёросысь Лоза гуртысь, В. Н. Луппова - Кез ёросысь Полом черкогуртысь, В. Н. Девятова - Сарапул ёросысь Девятово гуртысь. Тӧроос В. Н. Коровкин но Г. А. Пашкин. Туспуктэмъёсыз В. Беломорскихлэн. Валэктэ юрист Сэрег нуэ адвокат Лилия Шкляева тел. 25-33-70 Висемез уг чаклало Туэ октябрь толэзе мон арлыдыя пенсие потӥ. Та дырозь вить арзэ висеменым группаын улӥ. Мыным шуизы, та аръёс, пе, стаже уг пыро. Озьы-а со? Эшшо одӥг юанэ. Колхозын огвакыт лэсьтӥськисьёслэн бригадаязы ужай - нимаз адямиослы (частникъёслы) корка пуктылӥм. Уждун кузёез киысьтыз сётъяз, нокыӵе бумагаосы со ӧз пыры, соин ик пенсия тырисьёс сое лыдэ уг басьто. Луэ на-а али маке карыны? А. Иванов. - "РФ-ысь кун пенсиос сярысь" Законысь 92-тӥ ёзэтья огъя ужан стаже зэмзэ но ужам вакыт сяна пыре: а) уж дурын яке ужен йырин сӧсырмыса И яке ИИ группаын улэм яке ужаку ик огдыре ужаны быгатытэк улэм вакыт; б) И группаен инвалидэз, инвалид нылпиез яке утялтонэз кулэ карись пересь муртэ (больницаысь йылпумъянъя) утялтэм вакыт; в) ужасьтэм анайлэн нуныез вордскытозь 70 нунал но со бере куинь аресозяз утялтэм вакытэз (огломез укмыс арлэсь трос медаз луы); г) советской учреждениосысь но калык куспо огазеяськонъёсысь ужасьёслэн кузпалъёссылэн кунгож сьӧрын улэм вакытсы (огломез дас арлэсь трос медаз луы); д) уголовной ужез выльысь эскерем бере пытсэт сьӧрын ватсаса пукем вакыт; ж) ужтэк пукем дыръя пособиос басьтон, общественной ужын дунэн ужам но уже интыянъя службаослэн ӵектэмзыя мукет улосэ выжон но уже интыяськон вакыт. Тӥляд, Александр Васильевич, инвалидностьты ужен герӟаськымтэ бере, со вакытты стаже уг пыры. Номыр буйгатымонзэ вераны ум быгатӥське кыкетӥ юандыя но. Лэсьтӥськисьын ужам вакытты стаже уз пыры, малы ке шуоно, кузёен кусыпъёс (подряд сярысь) огкыл тӥ, мон валамъя, гожтӥллямтэ. Сыӵе бумагады луысал ке, кузёды Пенсиосъя фондэ взносъёс тырысал но, пенсия лыдъякузы, сое чакласалзы. Сюдӥсь кулыса но сюдэ Мынам пенсие 700 манет 10 копейка. Гужем пенсиосты будэтыкузы мынэсьтым ӧз йылтэ, тӥ ужан вакытэ колхозын, пе, уждун пичи вал. Туж ӝож, 40 ар ужам понна озьы тау каро тӥни. Картэ ИИ группаысь инвалид вал. Солэн кулэменыз валче уз луы-а будэтыны пенсиме? Ю. Миронова. Ижевск. - Кык пенсия басьтыны луонлыксы вань: а) войнаын сӧсырмемъёслы, огъя висёнъя яке шуккиськыса инвалид луэмын ке (но йыртэмакузы сӧсырмемъёслэн сыӵе правозы ыше); б) Финляндиен, Япониен войнаосы но Быдӟым оже пыриськемъёслэн пал кылем кышнооссылы, соос выльысь бызьымтэ ке. Соослы тыриське арлыдзыя но сюдӥсьсэс ыштэм понна пенсия; в) армиын служить карыкузы быремъёслэн но служба дыръя сӧсырмеменызы валче (йыртэмакузы ке ӧвӧл сӧсырмемын) увольнение бере кулэм военнослужащийёслэн анай- атаёссы. Таяз учыре ватсаса пенсия басьто анай но, атай но. Тӥляд праводы вань кыӵе ке одӥг пенсия басьтыны: яке ализэ (арлыддыя), яке сюдӥсьтылэн (карттылэн) кулэменыз валче. Кыӵе ке пӧртэмлыкез луоз-а пенсидылэн быдӟалаез, юалэ райсобесысь. "Ручка кутылон киосы Автомат кутыса жадёзы... (Удмурт калык кырӟанысь.) Кошко пос армие... Тани нош ик вуиз сӥзьыл. Соин валче мытэмын егитъёсты армие келян ужрадъёс. Военкоматъёс ӟырдало призывникъёсты сюрес вылэ дасянлэсь - сюлмаськонъёс тырмыт. Югдурен ӟечгес тодматскон вылысь, Сюмси пала вуылыкумы, кожим татысь военкоматэ. Пумитаз милемыз прапорщик М. В. Бушмакин. Михаил Васильевич ик кылкутэ вылэм армие келян ужрадъёслэн радъяськем понна. - Михаил Васильевич, тӥ малпамъя, кызьыгес ортчоз призывной кампания ёросады? - Чакламъя, Сюмси ёросысь 35 мурт армие кошкыны кулэ. Тулысэн ӵошатыса, та лыдпус кӧнялы ке ӧжытгес. Но быгатом-а та мында но пиосты люканы - шуг вераны. Угось туала призывникъёслэн тазалыксы шӧдскымон лябӟемын. Егитъёс ӵемысь курадӟо пуш висёнъёслэсь, плоскостопие шуонлэсь. Данакез пиос чиед мугороесь, секталазы пуктэм куронъёслы уг тупа. Та мугъёсъя ик соосты армие мынонлэсь мозмытоно луэ. - Но ляб тазалыкен пиос вазенгес ик шараясько, вылды. Угось армие келян азьын эмъясьёс пыр соос одӥг пол гинэ уг ортчо ук. - Маиз паймытэ, вань азьвыл медосмортъёсты соос "яраноен-годенэн" ортчо. Но военкоматэ ӧтён кагаз вуэм бере ини, анай-атайёс выльысь шуэрско, пизылэн ӵем висьылэмезлы ӝожтӥськыны кутско. Озьы армие келян интые, призывникъёсты Ижевске стационаръёсы интыяно луиськом. Валамон, ас ёзъёсынызы ӵош служить карыны соос уг вуо ни. Нош куд-огзэ зэмен ик армие мынонлэсь воксё но мозмытоно луэ. - Берло дыре сюлмаськытэ егитъёслэн наркотикъёс борды кыстӥськемзы. Та ласянь кыӵегес югдур Сюмси ёросъя? - Таизлы коть шумпотоно. Наркотикъёсын кушласькемзы понна, пиосмы армие мынонлэсь палэнтон учыръёс ӧй вал на. - Михаил Васильевич, нош дышетскемзыя, тодон-валанзыя кыӵегес пиос кошко армие? - Сюмсиын вань училище. Тросэз егитъёсмы отын дышетско. Туэ тулыс армие кошкем 44 мурт пӧлысь 18-эз отын водительлы право басьтэмъёс вал. Со сяна училищеын дасяло трактористъёсты, фермеръёсты. Сюмси егитъёс пӧлын ӧжыт ӧвӧл вылӥ образование басьтыны мылкыд карисьёс. Туэ тани 32 мурт пӧртэм вузъёсы дышетскыны пыриз. Зэм, призывникъёс пӧлы шедё шор ёзо школаез йылпумъямтэос но: дышетскемзы 8-9 класс сяна ӧвӧл. - Азьвыл школьной программае НВП-я (начальной военной подготовкая) урокъёс пыртэмын вал. Табере сое ОБЖ (основы безопасности жизни) шуонэн воштӥзы. Маин ке висъясько-а ог-огзылэсь та урокъёс? Шӧдӥське-а соослэн пайдазы пиосты армие дасянын. - Соку ик верало, НВП урокъёслэн пайдазы ӟечгес шӧдӥське вал. Отын пиос но нылъёс нимаз группаослы люкиськыса дышетскизы. Трос саклык висъяськиз пиослэсь ёзвиоссэс, кужымзэс кыдатонлы, умой-умой дышетӥзы радэн ветлыны. Бен, урокъёсын но строен ветлонлы пичи дыр висъяське ик, но туж ӧжыт. Школаосын материально- технической базаос лябӟемын. Гужемзэ бадӟым классъёсын дышетскись пиосты нимысьтыз лагере келялляськом. Таиз оборонно-спортивный оздоровительный лагерь шуыса нимаське. Ортчем гужем таӵе лагерь Дмитрошурысь школаын радъямын вал. Но вань-а таослэн но пайдазы - осконтэм. Эшшо та вылэ вуисько: дышетскисьёслы огшоры грамнатаосты гинэ но возьматыны ум быгатӥське - ӧвӧл соос. - Иське, пиосмы армие кошко, автомат шуонэз адӟылытэк но? - Бен, тазьы верам ке, трослы ик ум янгышалэ. Куд-ог школаосын кылемын ик пневматической винтовкаос. Но ньыль-вить час ӵоже гинэ дышод шат шонер ыбылӥськыны? Нош пневматической винтовка зэмос автоматъёслэсь трослы капчигес луэ ай. Вераськом армимес юнматон сярысь. Нош та ужез кутсконо, дыр, выжыысеныз - школаос - бордысен. Э. Кумачева. Юалэ - валэктӥськом Таӵеез законын ӧвӧл Мынам туж бадӟым мылкыды армиын служить карыны. Но монэ агай-вынъёсы уг лэзё. Вань, шуо, сыӵе закон, кудӥзъя, семьяысь куинез агай-вынъёс служить каремын ни ке, мукетыз анай-атайлэн лэземезъя гинэ, пе, службае мыныны быгатоз. Валэктэ вал, вань-а сыӵе закон? В. Бубякин. Кияса ёросысь Карамас-Пельга гурт. В. Бубякинлэн гожтэтэныз тодматӥм но валэктон сётыны курим Удмурт Республикаысь военкомлэсь призывъя ужпумъёсты быдэсъясь воштӥсьсэ А. М. Боговаровез. Тани кыӵе валэктон сётӥз со: - Военной службая законъя армие басьтӥсько тазалыксыя служить карыны ярамонэсь 18-ысен 27 аресозь пиос. Службае басьтонлэсь мозмытӥсько: судлэн решениезъя эриклэсь люкемъёс яке сыӵеосыз, кудъёсызлэн суд улэ шедьылэмзы бере пусъем дыр ортчымтэ на; али служить карисьёс яке армиын службазэс ортчемъёс; мукет кунъёсын службазэс ортчемъёс, кудъёсыз Россилэсь гражданствозэ басьтӥзы но, документъёсазы служить каремзы сярысь пусъемын ке; службае мыныны арлыдзы вуэмъёслэн наукаосъя кандидат но доктор учёной степеньзы вань ке; армие мыныны арлыдыз вуэм муртлэн атаез, анаез, агай-выныз яке анай-сузэрез военной службазэс ортчкузы бырыны шедемын ке; кызьы ивортӥз А. М. Боговаров, военной службая законын армие мынонлэсь мозмытон ласянь мукет учыръёс чакламын ӧвӧл. СУЛЕРАДАСЬЁСЛЭН ОГАЗЕЯСЬКОНАЗЫ Куатьтон аръем сюрес Ижевскысь Пушкинской урамысь выставкаос ортчытъян залэ пырем бере син шоры йӧтэ выль экспозиция. Таиз сӥземын Удмуртиысь Художникъёслэн огазеяськонзылы 60 ар тырмемлы. Зэмзэ но, Николай Косолапов бордысен кутскыса, чылкак егит суредасьёс дорозь пӧртэм жанръем чеберлыко искусство возьматӥське татын. Ваньмыз со огдыре ик усьтэ кадь шаермылэсь 80 ар куспын ортчем сюрессэ но. Петр Ёлкин пастелен суредам куинь дано адямиослэсь портретъёссэс: М.Петров писательлэсь, М.Иванова тодосчилэсь но Л.Лещинский профессорлэсь. Куиньназы ик соос туэ юбиляръёс луо. Маргарита Владимировна - удмурт дэремен, визьмо но шуныт учке шорамы. Нош Михаил Петровичез суредасьлэн адӟылэмез ӧй вал ке но, со туж оскымон пӧрмем. Соин но дуно: писательлэн татчыозь буёло портретэз ӧй вал на. Живопись амалэн лэсьтэм портретъёс озьы ик улэпен пукто адямиез син азе. Борис Постниковлэн "В.Е.Почерняев - Халхин-Гол дорын ожмаськем адями", Евгений Скобелевлэн "Крезьгурчи Ю.Толкач", Валерий Кононовлэн "Спортъя мастер - С.Чирцев", Алексей Холмогоровлэн "Медсестра Александра Александрова нылыныз", Генрих Верещагинлэн "С.Наговицын - воин-афганец", Ильяс Нурмухаметовлэн "Г.Красильников" ужъёссы котькудӥз туж усто быдэстэмын, суред вылысь адямиос бордазы кыско. Валамон ини, пейзаж но нимысьтыз инты басьтэ. Вӧлмыт Выль Мултан котыръёсыз возьматэ А.Русскихлэн суредэз. Инкуазьлэсь пӧртэм вакытъёссэ усьто авторъёслэн ужъёссы. Тросэз сӥзьыллэсь зарни буёлъёссэ ярато. Б.Постниковлэн выль лымы вылысь палэзез пинь улэ куртчыны куриське кадь. И.Бехтеревлэн суредэз шоры учкыса, сурсву виятӥсь пияшъёс доры вуиськод. Сюжето картинаос сокем трос ӧвӧл, но отысь адӟиське художникъёслэн тыршемзы, трос кужым понэмзы, котькуд адями тусбуез сюлмысь суредамзы. Сыӵеесь луо П.Семеновлэн "Колхоз праздник", Д.Горбуновлэн "Пӧсь вакыт", С.Виноградовлэн "Мотопроизводствоын госприёмка" но мукет ужъёс. Валентин Белыхлэн суредысьтыз асьме шоры эшшо огпол учко кадь вашкала-вашкала даурысь удмуртъёс. Выль утчаськонъёсынызы паймыто авангард амалэн ужась художникъёс: Сергей Орлов, Вячеслав Михайлов, Ольга Чунаева, Анвар Сафиуллин но мукетъёсыз. Огъя вераса, живопись, графика, линогравюра, скульптура - суредан искусстволэн вань пӧртэмлыкез усьтӥське та выставкаын. Отысен ас малпанъёссэ вераны курыса вазиськи Удмуртиысь Художникъёслэн огазеяськонзылэн кивалтӥсезлы П.В.ЁЛКИНЛЫ. - Пётр Васильевич, кыӵе малпанэн быръемын вал таяз адӟытонэ ужъёс? - Выставкаос ортчытъян залмы пичи, но ми тыршим, котькудӥз суредась татчы одӥг ке но уженыз мед шедёз шуыса. Адӟиськоды, улонысь кошкем художникъёслэн но произведениоссы татын вань: Евгений Русановлэн, Иосиф Шанлэн, Рем Тагировлэн, Игорь Бехтеревлэн, Леонид Прозоровлэн... - Вераськемзыя, Суредасьёсмылэн огазеяськонзылы кылем арын ик 60 ар тырмиз... - Зэм, пӧртэм вераськонъёс вал. Кудӥз шуэ: 1939-тӥ арын кылдӥз, кудӥз - 1940-тӥ арын. Архивъёсысь документъёсыз ӝутӥм, умой-умой тодӥм но республикаысьтымы Юстицияя министерство пыр юнматӥм: огазеяськонмы кылдӥз 1940-тӥ арын. Нырысетӥез кивалтӥсез вал Михаил Балагушин. Собере - Андрей Сенилов, Дмитрий Ходырев, Алексей Холмогоров, Пётр Семёнов, Анатолий Аникин, Анатолий Русских, Валерий Кононов, Валентин Белых но мон. - Тӥ тужгес но кема, 1992-тӥ арысен кивалтӥськоды ни та огазеяськонэн. Уно ужъёсты калыклы тодмо луизы. Берлоосыз пӧлысь кудӥз тросгес дырдэс басьтӥз, кудӥныз данъяськыны быгатӥськоды? - Со кемалась тодмоелы, эшелы сӥзем суред - "Россиысь Конституционной судлэн судьяезлэн Николай Васильевич Витруклэн портретэз. Та адями Москваын ке но улэ, трос лэсьтэ, Удмуртиысь художникъёслы юрттон вылысь. Алигес таӵе малпанзэ вераз: асьме суредасьёс пӧлын ортчытоно конкурс, Сергей Есенинлы, Куӟебай Гердлы, Ашальчи Окилы сӥзьыса. Нырысетӥ инты понна ас фондысьтыз вить сюрс манет дэмла. - Москваын Художникъёслэн шор юртазы ӝоген усьтӥськоз Христианстволэн 2000 ар тырмонэзлы сӥзем выставка. Удмуртиысь кыӵе суредасьёс отчы пырисько? - Ваньмыз 15 автор: А.Русских. Ф.Матанцев, А.Кривошеин, В.Лузин, В.Кашин, В.Тенсин, Р.Нурмухаметов, О.Чунаева, В.Морозов, Б.Постников, А.Рычков, Г.Верещагин, Ю.Осипов, В.Костылев, П.Ёлкин. Ужъёс пӧртэм амалэн лэсьтэмын: живопись, графика, скульптура, гобелен, озьы ик ювелирной но декоративно-прикладной искусство. - Республикамылэн нуналэз азьын Художникъёслэн огазеяськонзы выль дано нимъёсын узырмиз... - Зэм, кык суредасьёсмы - Виктор Овчинников но Александр Кокорин Удмурт Республикаысь искусство удысысь дано деятель луизы. Валерий Кононовлы сётэмын Россиысь дано художник ним. Али огазеяськонамы 93 суредась. Малпасько, азьпалан дано нимез нуллӥсьёсмы эшшо йылозы на. - Ойдолэ таоссэ тодэ ваём на: тӥледлы но Анатолий Русскихлы, Пётр Семёновлы Россиысь дано художник ним азьвылгес сётэмын ни вал. - Таос ик, Валерий Кононов сянаез, луо Удмуртиысь калык суредасьёс. Таӵе ик нимын данъямын Семён Виноградов но Алексей Холмогоров. Берлоез луэ на Россиысь калык художник. Россиысь искусствоосъя дано деятель ним сётэмын Георгий Векшинлы. Удмуртиысь искусство удысын дано ужасьёсмы но ӧжыт ӧвӧл. Со сяна но мукетъёсызлы, шуом, Евгений Скобелевлы дыр вуэмын таӵе нимез басьтыны. - Тау, Пётр Васильевич, мадемдылы. Асьтэлы но, огазеяськондылы но бадӟымесь азинсконъёс сӥзиськом. Т.ПЕТРОВА. Туэ Россия Федерациысь дано суредась луиз Валерий КОНОНОВ (шорысез). А.Холмогоровлэн "Быдӟым ожысь ветеранъёс" суредэз. "Курелэ но - сётозы, йыгаське - но усьтозы" Скал кысконэз умоятон вылысь фермалы кивалтӥсь юнматэмын шуыса. Кивалтӥсьсы Николай Евгеньевич, одно мар ке сётонзэс тодысал ке, пыдын бызьыса мынысал, дыр, центральной усадьбаязы Зар-Медла гуртэ. Бен, номыр уг сёто, колхозлэн квалтӥсьёссы номырин уг юртто уд шуы, кивалтсьёслэн мукет фермаос сярысь но сюлмаськонъёссы тырмыт. Туэ чебер гид лэсьтӥзы Бадӟым Кизьна гуртын. Табере эштосэн кивалтӥсьёс таӵе йылпумъян лэсьто: Пичи Кизняын выллем пичи коллективъёсын пудо утисьёс тупаса, ог-огзылы юрттыса ужало, кин ке вылэ уг чӧлско, шуг-секытысь огъя кужыменызы но быгатэменызы потыны тыршо. Озьыен, азьланяз пудо вордон ужез пичи коллективъёсын радъяно. Тани та нуналъёсы одно ик кулэ вылэм скалъёс улэ пул пызь тырыны. Нош кытысь сое ваёд? Колхозазы али пилорамазы уг ужа, мукет интыосын со тырмыт ӧвӧл, матысь нокытысь вайыны, колхозлэн кивалтӥсьёсыз юрттыны ӧз вутске, Пономарёвлэн аслаз кужмыз ӧз тырмы. Бен, таӵе сюлмо дояркаослы одно ик дыраз юрттэт сётоно. Пу пызь ӧвӧлысь, одӥгаз группаын скалъёс курмиллям. Таяз угось выжъёссэс ӝутыса вуттӥллямтэ, соин но кот. - Пулъёс сётысалзы ке, асьме кужымен лэсьтысалмы, ужез сокем трос ӧвӧл ни, - шуэ Николай Евгеньевич. - Милям ужасьёсмы азьтэмесь ӧвӧл. Тани гужем ӵукна сизьымысен ӝыт сизьым часозь пудоосты валаса возьмазы Алексей Евгеньевич Пономарев но Петр Николаевич Васильев. Огез али скотникын тырше, мукетыз - сторож. Пиосмуртъёсмы пудо сиён пыртыло, скал кыскон вакытлы тусьёсы тыро Михаил Геннадьевич Ложкин, Алексей Евгеньевич Пономарев но мукетъёсыз. Пичи Кизняын ужез гажась адямиос уло шуыса, ваньмызлы валамон. Зар-Медлаын ас дыраз ужаз но колхозэн кивалтӥз Удмуртиысь одӥгез кужмо кивалтӥсь - К. А. Гуляев. 1965-тӥ арын огазеям ёросъёсты выльысь люкылыны кутскемзы бере, сое ысто Киясае, партилэн райкоменыз кивалтыны, нош собере - Удмуртпотребсоюзэн кивалтыны. Мар юрттэ адямилы кивалтон ужез умой быдэсъяны? Дышетскемез но, дыр. Вордскемез но, дыр, сыӵе. Фермалэн заведующиез тунсыкъяське, кызьы ужало быдэс колхозысьтызы скал кыскисьёс. Со тодэ но шумпотэ: нырысь интыын соос, кыкетӥ интыын - Зар-Медла ферма, куинетӥ интыын - Уйвай-Медла, ньылетӥ интыын - Бадӟым Кизня ферма, берпуметӥ интыын - Удмурт Лем. Зэм, таосызлэн но скал кыскисьёслэн лыдпусъёссы, огъя ёрос лыдпусъёсын ке ӵошатоно, данаклы умойгес. Тани Бадӟым Кизня фермаысь доярка Нина Геннадьевна Васильевна дас толэзьскын 4195 килограмм йӧл кыскем ни. Ма кароно Пономаревъёслы, солэн но дояркаосыз сомында ик мед кыскозы шуыса? Егит кивалтӥсь малпаськытэк уг улы, озьыен, азьланяз дояркаосызлы тросгес юрттыны тыршоз. Угось коллективез сое возьытэ уз уськыты. Калинин нимо колхозын али ӧвӧл одӥг но сыӵе доярка, кудӥз быдэс ар ӵоже котькуд скалэзлэсь кыскоз 3000 килограммозь ичи йӧл, Миым эштосъя 4000 килограммлэсь уно кыскисьёс куинь гинэ вал ке, туэ сизьым луыны кулэ, Пичи Кизняысь ньыль дояркаослэн ичизэ быдэн 4300 килограмм усьыны кулэ. Фермалэн кивалтӥсез эштосысьтызы вань шумпотымонэныз тунсыкъяське. Тани Бадӟым Кизьнаысь комбайнер Марат Вениаминович Иванов туэ 5600 центнер ю тысь кутсаз. Озьыен, пудо сюдыны но пызь тырмыт шедёз. Зэм, таиз - артэ ужась. Яке, шуом, "Лесагурт" эштосысь Лесагурт фермаын ошпиосты куайытӥсь Петр Геннадьевич Тронинлэн котькуд сюдоно ошпиез толэзьскын 1,2 килограммлы будӥз. Кивалтӥсьлы тунсыко та лыдпус. Яке Удмурт Лемын вордӥськем кунянзэс, нунал ортчыса, нимаз группае сёто. Бӧрысь со кунянлэн анаезлэсь ӵӧжизэ, медаз сураськы шуыса, доярка ачиз нуллэ. Нош кызьы шонер? Удлемъёс сямен-а? "Мир" колхозын сямен, нунал ортчыса, кезьыт азьын возьыны кутскыса-а? (Таосызлэн зэм но кунянъёссы уг быро). Яке соос, Пияи Кизнаос, сямен кӧс но шуныт пичи гидын нимаз возьыса-а? Озьы но кунянъёссы бырылон учыръёс вал ук. Адямиос вашкала дырысен пудо вордо ни, табере котькуд эштосын вань зоотехникъёс, нош юанъёс маке мында на туннэ но. Яке али 80-85 процентэз йӧлзы нырысетӥ сортэн кошке. Кулэ вал ваньзэ озьы келяны,нош фермае ву гинэ но тырмыт уг бызьы, гумыостӥ со лыктэ я пӧсь, я кезьыт. Валамон, Николай Евгеньевич вань малпанъёсыз но юанъёсыз сярысь дояркаосызлы но мукет пудо утисьёсызлы вератэк уг луы. Огшоры ужась калык туала арын политикае но пыриськоно луэ. - Малы, - шуо дояркаос, - умой ужаммы вылысь пичи уждун басьтӥськом? Со кризис аръёсы, - малпанзэс юнматыса верало соос, - Гусинский но Березовский кадьёс миллионъёсын лушкаса калыкез куанермытӥзы но, ми кадь ужаса улӥсьёс табере курадӟыса уло. Но ужасьёсыз сярысь Пономарев ачиз уг вунэты, я концертэ нуэ, я артистъёсты ӧтьытэ. Госсоветысь Депутатсылэн А. М. Фокинлэн огшоры открыткаез ке но вуэ, со шумпоттэ ужасьёссэ. Ведь котькыӵе ужын адями - со самой главноез. "Кизьна" но "кизь на" кылъёс - герӟаськемын-а соос? Гуртсылэн историзы сярысь мон юай люкиськыкум. Скал кыскисьёс тазьы валэктӥзы: "Вашкалаосмы лыктӥллям Дэбесысь, отын музъемзы тырмымтэен. Вашкалаосмы ужасесь вылӥллям, татын музъем соку оскымон вылэм на. Соин ог-огзэс куриллям: "Кизь на, кизь на..." Валамон, адямиослэн кидыссы но гырыны-кизьыны кужымзы вань бере, буш кыллись музъемез шоры соос долкаса учкыса уз улэ. Гыриллям-кизиллям, нылпи вордӥллям, вӧл-вӧлэсь юртъеръёс пуктӥллям. (Коркаоссы но соослэн данакез ульча пала ньыль-вить укноосын, али ӝуто улыно-вылыно коркаос, улӥыз - кирпичлэсь, вылӥыз - коръёслэсь.) Соос сямен, вылды, ми но урод ужаны дышымтэ...". Бен, ужез яратон но адямилэн вираз пыӵамын луэ. Мон кылбурчи ӧвӧл ке но, та чебер сюлэмо адямиосын пумиськылэме бере, йырам асьсэос пыризы таӵе чуръёс, кудъёсыныз мон йылпумъясько Данъян пул вылэ шедем скал кыскисьёс сярысь мадёнме: Пичи Кизьна, Эшшо тон кизь на Ӟег, чабей но мукетсэ. Пичи Кизьна, Эшшо тон "кизь" на Вань адӟем карымонзэ. П. Скобелев. Туспуктэмъёсыз С. Катаевлэн. Главной зоотехник С. А. Косарев. А. В. Константинова, Н. Е. Пономарев, М. Е. Ловкина (сыло) но И. Е. Жуйкова. М. Г. Ложкин силос пыртэ. Силос поттонын. Доярка М. Е. Ловкина скалъёссэ кыскыны дась. Кызьпу туй но улӟе Одӥг нуналэ урамысен тодмоеным пумиськи. Вераськыкумы дортӥмы ӝог вамышъяса ортче вал сьӧд кысъем егит воргорон. Соку эше дорысьтым кӧнялы ке палэнскиз но та адямилы вазиськиз: - Коля, шыкыс лэсьтэмед шуо: луоз-а учкыны? - Пыра, пыра, ӧс ваньмызлы усьтэмын, - шуиз со. - Тодматскод мукет арбериосын но. Вераськонмес нош ик азинтӥськомы. Люкиськыкумы юатэк ӧй чида ни та егит воргорон сярысь. - Уд тодӥське-а сое? - куаразэ ик мукет карыса юаз эше. - Чебер киужъёсъя центрын ужа со. Усточи: киосыз ма гинэ уг пӧрмыто! Одно ик тодматскы соин. Ваньзэ ас синмыныд адӟод. ... Сизьым ар талэсь азьло чебер киужъёсъя мастерсткой усьтон пумысен вераськон потӥз. Со понна висъязы связья азьло районной узеллэсь вуж юртсэ. Маке пӧрмытыны быгатӥсь адямиос но шедизы. Котькуд удысъя нимысьтыз сэрегъёс висъязы. Борддоръёсаз шпалер лякизы - юртлэн пушкыз чылкак воштӥськиз. Нырысь пыжем табань но комоко луэ, шуо. Озьы вал татын но. Пужыятӥськон, пул вылэ пӧртэм суредъёс лэсьтон, кызьпу туез улӟытон понна ӧз тырмылы кулэ материал. Ар-кык ортчыса, ваньмыз ас интыяз пуксиз. Табере татысь мастеръёс быдэстэм ужъёссэс пӧртэм выставкаосын возьматъяло ни. - Нимысьтыз пусъем потэ Николай Рафаилович Перевозчиковез, - шумпотыса вера центрлэн кивалтӥсез Михаил Петрович Николаев. - Огшоры кызьпу туез но улӟытыны быгатэ. Екатеринбургын ортчем адӟытонын солэн ужъёсыз вылӥ ӟечлыкен пусъемын. Нош республикаысьтымы выставкаын вормисе потӥз. Тӥни солэн ужан интыез. Пыралэ, вераськелэ, ужъёссэ учкелэ. Николай Рафаилович котькуд адямиез шуныт пумита, вераськыны дыры ӧвӧл, уз шуы. Ӝӧкез вылысь вань ужан тӥрлыкез но ас интыяз. - Кызьы тӥ татчы ужаны вуиды?- юасько Перевозчиковлэсь. - Дышетски педучилищеын, художественно-графической отделениын, - пуртсэ лэчыт шерон куспаз вера Николай. - Милемлы соку вылӥ тодон-валан сётӥз зарни киё дышетӥсьмы Владимир Яковлевич Корепанов. Мыным малы ке но яраз солэн кызьпу туйлэсь лянэсэз. Бӧрысь ачим но со борды басьтӥськи. Нырысь лянэсме анаелы возьматӥ, быгатэмелы со шумпотӥз. Аръёс ортчыса, киы но воляз, йыре пӧртэм малпанъёс но лыкто. Кык ар талэсь азьло Николай туйлэсь самовар лэсьтыны кутскиз. Нырысь сое кияз котыр бергатӥз, мертаз, бумага вылэ суред пуктӥз. Бӧрысь самовар вылэ лякылӥз. Кӧня ке дыр ортчыса, кызьпу туй борды басьтӥськиз. - Кӧня выриды со котырын? - юасько Николайлэсь. - Ӧй но лыдъя: кык-куинь толэзь ортчиз, дыр. - Пӧсь ву возьыса но эскериды-а? - Нуналлэсь ятыр возимы - одӥг шапыкез но ӧз вия. Али со Москвае вузаны келямын. Бордаз ик чайникез но, сакыр песок возёнэз но, пичи пуньыез но. Ваньмыз - кызьпу туйлэсь. - Нош ужед уг акыльты-а? - Уж ассэ ачиз дышетэ. Одӥгзэ быдэстӥськод ке, мукетыз борды басьтӥськем потэ. Чебер, учкымон арбери пӧрмытӥськод ке, мылкыд капчи луэ, - пальпотыса вера Перевозчиков. - Николай Рафаиловичен вераськыкумы, комнатае пыриз егит нылаш - Ольга Салтыкова. Тодмотэм адямиез адӟыса, огинтыяз кӧня ке сылӥз но дӥсьтытэк вазиськиз: - Шыкыслэсь пытсэтсэ тупатыны уг быгатӥськы: оло, учкод, Коля? Мастер егит ныллэсь быдэстэм ужзэ кияз котыр ласянь бергатӥз но, шекез соку ик син шораз йӧтӥз. Кияз лэчыт пурт кутыса, шыкыслэсь огпал сэрегзэ волятӥз. - Тани тамак возьыны портсигар лэсьтӥ, - возьматэ Николай Рафаилович. - Учкелэ: яра-а тӥлед? - Нош туй вылэ огпалаз - Дэбес, мукет палаз - Байгурезь кылъёс кызьы гожтӥды? - Огшоры чурыт пул пуме лэчыт но йылсо пуртэн букваос вӧлӥськом, соосты волятӥськом но туй вылэ секыт арбериен зӥбиськом. Озьы тӥни кыл пӧрме, гожтэмез номырин уз ӵушиськы. - Кыӵе ке арбери лэсьтыны кутскемлэсь азьло, пыр-поч малпаськыса, материал дасяно, - веранзэ азинтэ Перевозчиков. - Кызьпу туй но огкадь ӧвӧл: одӥгез - чурыт, мукетыз - небыт. Соин ик нюлэскы но гужем асьмеос ветлӥськом. Николай Рафаилович быгатэмзэ ватыса уг возьы. Мылкыд карисьёслы котькуд ласянь юрттыны дась. Кык-куинь ар куспын кызьпу туен ужаны усто дышизы ни Валентина Калашникова, Вера Тронина, Ольга Салтыкова но мукетъёсыз. Татчы ӵем вуыло педучилищеын дышетскисьёс но. Оло, куд-огез соос пӧлысь кивоштӥсьёс но луозы? М. Мосов. ВАКЧИ ВЕРОСЪЁС Яратон дунне Мынам тодэме потӥз люкиськонлэсь шӧмзэ. Кылэме потӥз, кызьы пумтэм бӧрдоз телефонэ. Адӟеме потӥз дуно бамысьтыд куректонлэсь гожзэ. Луэме потӥз вылтӥяськись нылаш. Туж зол потӥз чигтэме ӟырдыт яратонэлы оскондэ. Мыным вал тунсыко. Но шудоннам валаса ӧй вутты: асме ачим коросай шузи мылкыдыным. Яратон уг чида вылэм серекъямез но ултӥямез. Солэн дуннеяз ӧвӧл янгышасез но, судьяез но, йыр ӵогисез но. Ӧвӧл чурыт куронъёс но. Яратон - кузьмам хрусталь ваза выллем: одӥг пол пилиськыса лякемед бере но уз пишты ни азьло чебереныз. Кулэтэм луэ... О город Олокӧня улӥсько ини О нимо городын. Дыр мертасе но уг вераськы ни монэн: жадем. Мар бер, мед шутэтскоз. О городын ӧвӧл дыртон, возьман, огыр-бугыр улон. Татын ваньмыз чал-чал, гань-гань. Ӧвӧл, мӧзмыт но, вӧсь но, кезьыт но ӧвӧл. Огшоры пумтэм оген улон. ...Вылӥ бускельёслэн мусо ӵашетэменызы синъёс ураме мертчисько. Озьыен, выль югыт нунал. Пыдъёс уг ни ке нуо шузи йырме - ӝыт кузёяське О городын. ...Бӧрдӥсь инбам. Котмем сюрес. Керпотонэз валасьтэм тӧл маялля писпуослэсь гольык мугорзэс. Но ӝоген чилясь шапыкен кынмозы соослэн синкылиоссы, вуноз возьдаськыса шымырскемзы. Тӧдьы мамык шунтоз, изьтоз. Собере кин ке понна - сайкан, шумпотон яке выль яратон. Шур палась ир-люр шуккиськись жингрес пинал куараос. ...Сьӧд-вож-тӧдьы-ӵуж - пумтэм-йылтэм вошъяськись буёлъёс. Пумтэм-йылтэм оген улон. Тол мылкыд Комнатаын чалмыт, ӝомо-югдо. Ӝӧк вылын - шампанской, кык бокал, йӧ. Ӝуатэм сюсьтыллэсь борддорын лэйкало соослэн вужеръёссы. Вань та суред усьтэ мынэсьтым мылкыдме: мон мӧзми Тынэсьтыд. "Лыкто буйгатыны" шуид Тон. Но Тынэсьтыд ӝоггес укноям шыпытак, мыным гинэ кылымон, йыггетӥз беромем лымы. Чебер, ворекъясь мамык. Со дыре ик возьмамтэ но шумпоттытӥсьтэм. Чик жалятэк кынтӥз со сюлэмме, осконтэмлэн векчи бышкись йӧэныз шобыртӥз мугорме. Сюсьтыл гинэ ӧз кысы, борддорын озьы ик уязы сьӧд виштыос - мынам кынмем мугоры возьмаз Тонэ. Возьмаз - Тон вуид. Ӧсэз усьтӥд - котьку сямен капчи, задор мылкыдо. Ӧс кусыпез вамыштӥд гинэ но, укно сьӧрам лек кузёяськыны кутскиз кезьыт толлэн мылкыдыз. Мон кышкай оскыны мӧзмемелы, кышкай оскыны серекъясь шудэлы... Соин Тон монэ адӟытэк ворсад улон ӧсме. Монэ кылытэк ортчид вӧзтӥм. А.МИТРОФАНОВА. МИХАИЛ ПЕТРОВЛЭН ВОРДСКЕМЕЗ ДЫРЫСЕН - 95 АР "Улон шур" Литературовед Зоя Богомолова Михаил Петровез одӥг пол гинэ - 1954-тӥ арын СССР-ысь писательёслэн ӧтчамазы адӟылӥз. Но солэн улэп тусбуйыз пыраклы вунонтэм кылиз. Тодматскиз писательлэн быдэс творчествоеныз. 60-тӥ-70-тӥ аръёсы улӥз М.Петров сярысь книга люканы малпанэн, пумен-пумен пӧртэм тодэ ваёнъёсыз люказ. Малпанэзлы быдэсмыны туэ гинэ, М. Петровлэн вордскемез дырысен 95 ар тырмон аре, кылдэм вылэм. З. А. Богомолова, рукописьсэ сётӥз "Удмуртия" издательствое, ӝоген книгаез потыны кулэ. Со нимаськоз "Река судьбы". Та книгаезлэн пуштросэз сярысь Зоя Алексеевна тазьы вера: - Та книга луоз туж бадӟым, ог 800 бам. Быдэсак син азе пуксёз удмурт литературалэн классикезлэн улэмез но творчествоез. Книгаез кылдытонэ пыриськизы сю пала авторъёс. Вераны кулэ, Ф. К. Ермаковлэн 1995-тӥ арын поттэм "Воспоминания о Михаил Петрове" книгаез сярысь та мукет: чылкак выль материал люкамын. "Река судьбы" книга куинь люкетлэсь. Нырысяз - писатель сярысь тодэ ваёнъёс. Солэн "бурд улысьтыз потэм тылобурдоос" Н. Байтеряков, Г.Красильников, А. Белоногов, С. Перевощиков, К. Ломагин, Г. Ходырев но Г.Корепанов-Камский верало дышетӥсьсы сярысь. П. Поздеев но Е. Самсонов, М. Покчи-Петров, В. Ванюшев, А. Гребенкин, В.Глушков но мукетъёсыз сӥзё солы кылбуръёс. Книгалэн кыкетӥ люкетаз - Михаил Петровлэн ӟуч кылэ берыктэм прозаез но поэзиез: "Вуж Мултан" романэз, повестьёсыз, веросъёсыз, кылбуръёсыз. Рукописе бордын ужакум, мыным туж юрттӥз М. Петровлэн нылыз Ольга Михайловна Белоус. Со асьсэ семья архивысьтызы туспуктэмъёссэс сётӥз, ачиз ик книгалы компьютерен набор лэсьтӥз. В. Семакин кылбурчилэн кузпалыз Агния Петровна Михаил Петровичлэсь куать гожтэтсэ сётӥз. Соос 1953-тӥ-1955-тӥ аръёсы гожтэмын. 50-тӥ аръёсы Москваын дышетскисьёслэн Г. Красильниковлэн, М. Покчи-Петровлэн, В. Михайловлэн, В. Семакинлэн но Г. Корепанов-Камскийлэн кинюртэменызы открытка, отысь шуныт кылъёс верало, макем ас атайзэс кадь гажало вылэм Михаил Петровичез та адямиос. Удмурт писательлэсь творчествозэ 1955-тӥ арын ик Украинаын но тодо вылэм ни шуыса тодӥськом Юрий Назаренколэн ӟечкыланысьтыз. Михаил Петровлэн ӟуч литератураен макем юн тунсыкъяськемез адӟиське лекциосын тетрадьёсысьтыз. Таосты но сётӥз нылыз. Книгалэн куинетӥ люкетаз син шоры йӧтэ Петровъёслэн дорысьтызы библиотекаысь книгаосын список. Соя но адӟиське писательлэн мур но паськыт дуннеез: В. Шекспирлэн вить изданиез, Т. Шевченколэн ньыль книгаез. Та люкетын ик сётэмын Михаил Петровлэн удмурт литература сярысь статьяосыз, кытын со нодъя И. Дядюковез, Т. Шмаковез, И. Зоринэз, П. Блиновез но мукетъёссэ. Михаил Петрович кафедра сьӧрын сылэ но ваньместы дышетэ кадь. Михаил Петровлэн Россиысь литератураын интыез уката но золгес шӧдӥське ни. Кунгож сьӧрын но соин тунсыкъясько. "Вуж Мултан" романэныз со усьтӥз удмуртъёслэн улонысьтызы тужгес кайгуо вакытэз, отысь потыны сюресэз но югдытӥз кадь. Удмуртиын нырысьсэ кылдытӥз Владимир Короленколэсь чеберлыко образзэ. Та ӟуч писатель луиз асьмелэн национальной героймы. "Италмас" ке шуиськом, соку ик син азе пуксе таӵе нимо поэмаез кылдытӥсь М. Петров. Та сяськаез со удмурт калыклэн символэзлы пӧрмытӥз. Нош со сяна, М. Петров гожтӥз "Италмас" опералы либретто (сое Г. Корепанов быдэстыса ӧз вуы), таӵе ик темалы пьеса, крезьгуро драма. Соос татчыозь печатламын ӧй вал на. Озьы ик нырысьсэ лыдӟисьлэн син азяз усьтӥськозы книгае пырем куд-ог туспуктэмъёс, архивъёсысь документъёс. Нош книгалэн вылаз - М.Петровлэн 30-тӥ аръёсы пуксем фотоез: визьмо но лэчыт синъёсын со учкоз азьпал даурысь лыдӟисьёс шоры но. Вылбамез берыктыса адӟыны луоз писательлэсь буёло портретсэ, сое лэсьтӥз П.Ёлкин. Быдӟым ож пыр потыкуз, Михаил Петрович Петров 16 шур вамен выжоно луэм. Адӟиз, вылды, ӝуась шурез но, выись эшъёсыз понна сюлэмыз кужекъяз. Сыӵе ик бугырес вал солэн улон сюресэз, улон шурез. Та сярысь З.А.Богомолова умой вера, книгаезлэн кутсконаз, эссеын. Нош быдэсак верано ке, со нош ик дунъяны луонтэм бадӟым уж лэсьтӥз асьме удмурт литература, асьме калык понна. Т.ПЕТРОВА. Редакцилэсь. "Река судьбы" книга, коньдон ласянь ӝеганъёс луэмен, М.Петровлэн юбилеезлы ӧз поты. Оскиськом, со лыдӟисьёс кие вуоз писательлэн сӥё-дано ӝытэзлы. Сое ортчытыны кенешемын 18-тӥ декабре. Удыссы паськыта "Можгасыр" акциосын огазеяськонлэсь поттэм вузъёссэ шӧмъямтэос вань меда? Уго сутка ӵоже татын ог сю тонна йӧллэсь пӧртэм пумо сиён потто. Берло дыре тужгес но дунъяське соослэн "Голландский" луись сырзы. 1999-тӥ арын со Россиысь устоосыз вузъёс пӧлы пыртэмын. Но "Можгасыр" таин гинэ буйгатскыны уг малпа. Туэ со "Костромской" но "Российский" луись сыръёс поттыны кутскиз, паськытатӥз та сиёнэз ӵыжатон амалэн дасянзэ. Вузъёслэн ӟечлыксы сярысь вера заводлэн "Сыры-2000" Российской конкурсын азвесь но бронза медальёс басьтэмез. Н.ЛИПИНА. Вениамин ИВШИН Михаил Петровлэсь "Урымтэ чабей" статьязэ лыдӟыса Мон выльысь лыдӟисько Михаил Петровез. Вандэмо гуртысь пи ма сярысь ай вера? Син азям со ветта урымтэ чабеез - Йӧнызэ, порнизэ со зӥръя луд дураз. Ишкалтэ но лёга кулэтэм лулъёсыз, Йӧнызъя югдытэ зарни си будосэз. Пуж пыртӥ кадь шертэ книгаысь тысьёсыз, Кыл жаглэсь мозмытэ казакпи крезьгурез. Валэктэ но алэ Блиновез - юлтошсэ, Солэсь выль романзэ мӧля тыр шокчытэ. Сюлэмам ӟардымон тылсия дунъетсэ: Чабеез ӟег уг шу - Зарниен Ӵошатэ. Е.САМСОНОВ М.П.Петровлы Его стихов пленительная сладость Пройдет веков завистливую даль... ("Жуковскому" А.С.Пушкин) Туй гумылэн ӧтись гурез сямен, Кылбуредлэн ӟырдыт кылыз пыраз оже. Кылбуръёсыд - кырӟан, ӵукна со кырӟанэн Тыршись калык шулдыр мынэ уже. Тынад кылбуредлэн жингрес чуръёсыныз Егит ныллы пи вералоз яратэмзэ... Калык тонэ аслаз кырӟасеныз Нималлялоз но вералоз шуныт кылзэ! Шаердэ тодэм мултэс уз лу Кык ар ӵоже кыстӥськиз Национальной кун библиотекалэн шаермес тодонлы сӥзем конкурсэз. Удмурт кунлы 80 ар тырмон азьын солы йылпумъянъёс лэсьтэмын. Вормисьёс пӧлы шедиз Пичи Пурга ёросысь Вуж Монья гуртысь библиотека. Татысь лыдӟиськисьёсты ӟечкылан вылысь, доразы трос гинэ куноос вуылӥзы. Шаерысьтымы сяна, Татарстанысь, Пермь, Киров улосвылъёсысь библиотекарьёс тодматскыны мылкыд каризы гуртысь лыдӟиськон коркалэн ужаменыз. Удмурт литературалэн чеберлыкез сярысь куноос азьын вераськизы Удмурт кун университетысь учёнойёс, Национальной кун библиотекаысь ужасьёс. Н.ЛИПИНА. НИМЗЫ - ДАНЪЯН ПУЛ ВЫЛЫН Пичи Кизьналы - бадӟым дан 2000-тӥ арын ужын бадӟымесь азинсконъёс басьтэмез но Удмурт Республикалы 80 ар тырмонлы сӥзьыса, Удмурт Республикаысь Кун Кенешлэн Президиумез но Правительство Удмурт Республикалэн Данъян пулаз пыртӥзы Дэбес ёросысь Калинин нимо колхозысь Пичи Кизьна фермаысь коллективез (кивалтӥсез - Пономарёв Николай Евгеньевич). Хозяйствоязы вить гуртъёс, ваньмаз скал фермаос вань, огазеяськемын соос куинь бригадаосы. Николай Евгеньевич, фермаен кивалтэм сяна, бригадир но луэ на. Гуртазы 30 семья улэ, данакез - мӧйыос. Егитъёссы тросэз город пала кыстӥсько. Ачиз Николай Евгеньевич, шор ёзо школаез йылпумъяса, армие ветлӥз, семья кылдытӥз но вордскем гуртаз ужаны кутскиз, ньылетӥ арзэ ни Пичи Кизьна фермаен кивалтэ. Гидзы вуж ке но ни, Удмурт кунамы ваньмызлэсь устогес ужаны пӧрмыто. Дояркаоссы ньыль кузя гинэ: Маиса Евгеньевна Ловкина, Ираида Евгеньевна Жуйкова, Алевтина Вениаминовна Константинова но Фаина Васильевна Иванова. Куамын но куинь пол машина нуоз йӧл Пичи Кизьна фермаысь одӥгез скал кыскись ар ӵоже та мында йӧл кыске. Нош машиналэн цистернаяз тэре 3 тонна. Озьыен, одӥг доярка ар ӵоже кыске сю тонна пала йӧл. Пудо котырын мукет бызьылонъёссэ лыдэ басьтытэк, ма мында секытэз ӝутъяны но нуллыны кулэ ненег кышномурт? Дораз бертыса но ужез трос на: юртъер котыр, пудо, бакча, нылпиосыз но картэз. Данъян пулэ пыртэм 13 коллективъёс пӧлысь одӥгез - со Пичи Кизьна фермаысь скал кыскисьёс. Ми, Дэбесысь гурт удысъя управленилэн кивалтӥсезлэн юрттӥсеныз Анатолий Вячеславович Серебренниковен, фермае потэммылэсь азьло, ӝытаз солэн ужан кабинетаз пукиськом, лыдпусъёсты ӵошатӥськом. Бен, лыдпусъёслэсь нокытчы уд пегӟы. Ичи ке йӧл кыскемын, кинлы гинэ со тырмоз? Ӟечлыкез ке урод, дасялод-а солэсь сиён-юон? Нош Дэбес ёрос йӧлзэ ворттэ Кезысь сыр поттон заводэ. Нырысетӥ сортэн келя ке, котькуд килограммезлы али 3 манет 50 копейка тыро. Анатолий Вячеславович журналъёсыз пӧлын кема уг бугыръяськы, данаксэ лыдпусъёсты йыраз возе, шонертон вылысь гинэ учкылэ. - Тани ӵошатом берло куинь аръёсы кызьы ужамзэс, - шуэ со, Пичи Кизьнаысь скал кыскисьёслэсь арысь аре умойгес ужамзэс пусйыса, - 1997-тӥ арын котькуд скаллы быдэ шорлыдын ёрос кыскиз 2483 килограмм гинэ, Калинин нимо эштос - 3277, Пичи Кизьна - 3282, 1998-тӥ арын ёросын но, Калинин нимо эштосын но 200 килограммлэсь ятырлы кыскизы. Пичи Кизьнаын - ог 300-лэсь ятыр, миым та ферма - 3766 килограмм, ёросын сярысь со 1141 килограммлы ятыр, эштосазы сярысь, 283 килограммлы тросгес. Туэ 10 толэзьскын азьмынӥсьёсмы котькуд скалзылэсь быдэн 3842 килограмм кыскизы ни. Гужем нуналъёсы йӧлзы скаллы быдэ 16-18 килограммозь люкаськылӥз. Бен, пуж-пуж йӧл кыскон меӵак герӟаськемын дояркалэн кызьы ужаменыз. Но шуныт гидэз кышномурт ачиз уз пукты, пудо сиён дасяса уз вутты, вань на ӟеч выжы уськытон, пудоез эмъян, гидъёсты сузян но мукет ужпумъёс. Серебренников упарвлениын кема ужамын, валтӥсь зоотехник луыса. Соин ик ӟеч тодэ ёросысь пудо вордонлэн кызьы азинскемез сярысь. Со мылысь-кыдысь мадиз хозяйствоосазы ӟеч выжы пудо уськытон сряысь: - Голштинизация нимаське со, куке кык ӟеч выжы пудоез герӟаськод. Соку лыдэ басьтоно луэ скаллэсь тросгес но напгес йӧл сётонзэ, мугорзэ, сиськемзэ. Милям осеменаторъёсмы ӟеч ужаны дышизы ни - пудо вордонын со бадӟым инты басьтэ. Скаллэн йӧлыз кыл вылаз, шуо калыкын. Пичи Кизьнаысь пудо утисьёс тае ӟеч тодо. Соослэн курозы тырмыт, силоссы но турынзы чакламлэсь уно дасямын, кушманзы гинэ ичигес. Совето аръёсы ӵошатскон акыльтӥз вал, лэся, уноезлы, со ньӧмыз поннагес радъяське вал. Нош али тани "Мир" колхоз уиське Калинин нимо эштос сьӧры. Пичи Кизьнаын кылдытэмын выль сямен уждун тырон амал, соя уждун будыны кулэ тросгес, йӧл кыскемъя. Кенешиськом колхозысь валтӥсь зоотехникен Сергей Александрович Косаревен, туж тунсыко адямиен. Со яратэ валъёсты, Иж ипподромын ӵошатсконъёсы пыриськылэ, ужан кабинетаз но валлэсь суредзэ возе. - Гидъёсмы вужесь ни, туэ выльдӥмы Бадӟым Кизьнаысьсэ, - шуэ со, - лэсьтӥськыны секыт, коньдон тырмымтэен, соин Пичи Кизьнаын но ужан условиоссы ушъямонэсь ӧвӧл. Нош коллектив сярысь ке верано, умой ласянь гинэ пусъеме потэ. Огъя кылъёс вылымтэ эштосысь валтӥсь специалистлэн верамез - дояркаосын пумиськыса, котькудӥзлы синмаськоно ужын чебер луэмзылы. Уг лу ужаны, ужез тодытэк, уг лу ужаны, ужез гажатэк Уг луы огшоры гинэ ужаны, котькыӵе ужез ӟеч тодыны кулэ. Быдӟым ӟуч баснописец Крылов но пусйылӥз: урод, куке сапег кышъясь сиён пӧра, нош пӧрась сапег кышъя. Ужзэ вошъясьлэн ноку уг лу данэз но, уксёез но. Соин рос-просэсь адямиос пӧлысь уд пумита сыӵеоссэ. Йыг-йыгесь, ӟеч ужась адямиос вылын гинэ возисько кызьы ке нимаз семьялэн улон-вылонэз, озьы ик быдэс шаерлэн кужымез. Табере кыл сётӥськом Пичи Кизьнаысь дояркаослы. Ираида Евгеньевна Жуйкова: - Нокытчы кошкылытэк, та фермаын гинэ дас ньылетӥ арзэ скал кыскисько. Та гуртын ик вордскемын, татын ик будэмын. Нылпиосмы куинь кузя. Кык нылъёсы быземын артысь Бадӟым Кизьна гуртэ, соос но дояркаос, но али нылпиоссэс утё. Картэ ужа парсьёсты вордон удысын. Куинетӥез нылпимы - пи, укмысэтӥ классын дышетске, ас улонзэ гуртэн ик герӟаны малпа. Ма шуод, пудо вордон удыс капчи ик ӧвӧл, ужан сямен котькыӵе дыръёс луылӥзы ни. Нырысь ужан аръёсам киын кыскылӥмы, табере аппаратъёсмы вань. Зэм, адямиос малпало, дыр, тани йӧл кыскон аппаратъёс ваизы но, дояркаослы майбыр луиз шуыса. Скалъёсмы нырысь-валысь со аппаратъёслэсь кышкало вал, трос нуналъёс кулэ луизы дышетыны. Скал - со нылпи выллем, туж яратэ лӥятэмез, кузяз ветлэмез. Берло аръёсы куд-ог скалъёсмы лейкозэн висьыны ӧдъязы. Огезлэсь скалэлэсь 4000 килолэсь уно йӧл кыскисько вал. Сӥльлы келяно луиз. Синкылиосын бӧрдӥ. Шуисько ук, соос милемлы нылпиосмы выллем. Киямы басьтӥськомы ветылэн. Котькудӥзлы ним сётӥськом, котькудӥз аслэсьтыз нимзэ тодэ, коть уллёысь вазь, кылоз но шорад учкоз, ӧтид ке - лыктоз но. Тани нырысетӥ кунянзэ гинэ ваиз ай Виктория нимо скалэ. Али со 23 литр йӧл сётэ. Алевтина Вениаминовна Константинова: - Мон но 14 ар ӵоже ни скал кыскисько. Мынам но нырысетӥ кунян ваем Картина нимо скалэ пуж-пуж йӧл сётэ - нуналаз али но 22 литр кыскисько. Зэм, ужан сямен пӧртэм янгышъёс вылын дышетсконо луиз. Тани клевер вылын сюдыса, скалъёс данаклы тросгес йӧл вайылӥзы. Нош огпол кӧня ке скалъёсмы тордыса кулӥзы, уг яра вылэм зорем бере клевер вылын сюдыны. Эшелэн группаяз куинез тордӥзы. Сьӧд бадӟым скалэз 700 килограмм кыске вал, нош шоро-куспо скал - ог 500 сяна уг кыскы. Та скал туж сиськись скалэн лыдъяськиз, соин но, дыр, гужем нуналаз 31 литр йӧл сётылӥз. Дояркалы таӵе скалзэ ыштон - синкыли гинэ ӧвӧл, ӟеч эшсэ ыштон выллем. Я лыдъялэ бен, али ёросамы вань сыӵе фермаос, кудъёсаз туж ичи йӧл кыско, огаз нуналаз котькуд скалзылэсь 1,7 килограмм, мукетаз - 2,6 килограмм. Озьыен, таӵе одӥг скал интые даслэсь уно скал вордыны кулэ. Маиса Евгеньевна Ловкина: - Мон куинь ар талэсь азьло гинэ та фермае скал кыскыны вуи. Азьло ужай Ува районын, бакча сиён будэтӥ, кунянъёсты утялтылӥ вал бызем гуртам, но улыны семьяеным ик берытским мынам вордскем гуртам. Мыным сётӥзы бадӟым группа, но пудоосы ваньзы ветылъёс гинэ вал ай. Учкисько: ӵош ужась эшъёсы трос йӧл кыско, мынам соослэсь бере кылеме ӧз поты. Пумен куд-ог ветылъёсме басьтӥзы, кельтӥзы 24-зэ. Озьы мон кутски анаелэн ужам амалэныз ужаны - ветылъёсылэсь кунян ваемзылэсь азьло ик вераоссэс небӟытъяны, кунян ваён азязы ни - кыскыны, пичиен йӧл поттыны кутски, зоотехникен чик кенешытэк. Скалъёсы нырысь кунянъёссэс вордӥзы но, соку ик, ӵӧжизы бере, тросэз йӧл сётыны кутскизы. Тодӥсько мон скал кыскон ужез соин но: анае ялан дояркаын ужаз, сьӧраз ветлӥсько вал, юрттӥськыны но кызьы ужамзэ учкыны. Картэ но, Андрй Сергеевич, та фермаын ик ужа, милемлы юрттӥське. Куинь пиосмы будо, бадӟымез, Женя, тракторист, пе, луо. - Нош серекъяны ӧд дышетэ на-а скалъёстэс? - юаз кин ке. Дояркаос гурак серектӥзы. Та нуналэ соослэн мылкыдзы умой вал: вань кужымзэс сётыса ужамзэс Удмурт Элькунысь вылӥ кивалтӥсьёс адӟытэк кельтӥллямтэ. Бен, ӝожтӥсько адямиос, уждунзы ичи шуыса, гужем толэзьёсы но, ку пуж-пуж йӧл кыскизы, котькуд скалзылэсь нуналаз шорлыдын 16- 18 килограмм, озьы но толэзьем уждунзы 700-800 манетлэсь ӧз ортчылы. Вуоно арлы дэмласал Жаль: ваньмызлы юрттыны уг луы Мыным, политика отделын ужась корреспондентлы, пӧртэм ужрадъёсы пыриськылоно луэ. Ас синмыныд адӟиськод котькуд политикез, депутатэз, министрез. Материал гожтон ласянь, оло, со капчигес но. Ма, республикамылэн бадӟым политикаен "шудонэз" татын, шоркарын, лэсьтӥське ук. Ачид пушласянь адӟиськод, кызьы ужало парламент, правительство, кызьы кутӥсько законъёс, постановлениос. Ваньзэ сое лыдӟисьёс доры вуттыны тыршиськод. Азьланяз но та ужпумъёсты возьматэмлэсь уг куштӥськы, вылды. Туэ басьтӥськи вал "министрен кенешон" рубрика борды. Лыдӟисьёсты тодматӥ ни вал калыкез дышетонъя, юстицияя, гурт удысъя но сиён-юон поттонъя министръёсын. Удмуртилы президент быръемен валче, воштӥськонъёс луозы, дыр, Кун Кенешын но, Правительствоын но. Оло, куд-ог министръёс но воштӥськозы. Огъя вераса, вылӥ кивалтон ёзъёслэсь ужамзэс возьматон понна пумтэм темаос вань. Но монэ сюлмаськытэ мукетыз ужпум: кызьы соиз яке таиз закон, постановление огшоры адямилэн улонэныз герӟаськемын. Малы соос ӵем дыръя адямилэсь улонзэ уг капчиято? Со сярысь верало редакцие вуэм гожтэтъёс но. Котькуд сыӵе гожтэтэз пыр-поч эскерисько, юалляськисько - тӥни сыӵе учыръёсы, оло, золгес валаськод куд-ог кивалтӥсьёсын, министръёсын, юристъёсын тодмо луэмдэ но умойгес дунъяськод корреспондентлэсь ужзэ. Шумпотӥськод, лыдӟись юрттэмед понна тау каре ке. Но жаляса верано, ваньмызлы юрттыны уг луы. Нимаз папкае поныса кыллё куд-ог адямиослэн гожтэтъёссы, кудъёсызлы юрттыны ӧй быгаты на. Меӵак верано ке, мынам быгатымтэеным гинэ со герӟаськемын ӧвӧл. Тани юрттэт курыса вазиськиз вал Сюмси районысь Верх-Юс гуртысь А. Т. Шумилова. 1996-тӥ арозь со улэм Казахстанын, ужам воинской частьлэн госпиталяз. Но частез ворсамзы бере, со кадь арлыдо пенсионеръёс нокинлы кулэтэм луиллям. Ижысь миграцияя служба пыр Анна Трофимовналы "вынужденной переселенец" шуон статус сёто ик. Но нокыӵе льготаос, квартира но субсидия солы татын уг ӵекто. Тӥ инвалид но, герой но ӧвӧл, шуо. Озьы 66 аресказ кышномурт пилиськем тусь азе кыле. Нош Казахстанын солэн кык комнатаен квартираез но, улон котырез но, яратоно ужез но вал (наградаосыз но трос гинэ). Миграцияя службаын кышномуртлэн гожтэтэзлы тазьы шуизы: огдырлы улонниез ке, пе, вань, солы но мед шумпотоз ни. Уже интыяны быгатӥськом, нош улонни висъяны, коньдонэн юрттыны луонлыкмы ӧвӧл. Ёрос администрация, пе, со сярысь мед сюлмаськоз. Зэмзэ но, чутрак вошъяськись улон сьӧры уиськыны шуг, куд-ог законъёс бере кыльыса вордӥсько. Тани, шуом, вань ёросъёсын али ужасалзы ке миграцияя службалэн ёзъёсыз, оло, СНГ-лэн мукет кунъёсысьтыз кошконо луэм адямиослы но юрттыны капчигес, ӝоггес луысал. Семьяя службаос но тросаз ёросъёсын ӧвӧл ни. Соин ик таӵе югдуре сюрем адямиос пумысен куд-ог кивалтӥсьёсын но вераськыны туж шуг. Куд-ог мукет учыръёсты но вераме потэ. Соос ӵем дыръя герӟаськемын луо кыӵе ке сьӧд ужез сэрттонэн-пертчонэн. Кылсярысь, Алнаш ёросысь воргорон ӝожтӥське участковой милиционер вылэ: со сӧсырмытозь адямиез жугем. Адӟисьёс но вылӥллям. Солэн азьло но сыӵе учыръёсыз вылӥллям ни. Газетэ гожтӥсь юа: вань-а, пе, милиционерлэн правоез мыжыкъёсыныз улыны дышетыны? Мар бен татын газетэ вазиськонэз. Озьы но валамон кадь: адямиез жугыны нокинлэн но правоез ӧвӧл, уката ик милиционерлэн. Нош жугем муртлэн правоез вань судэ вазиськыны. Кык адӟись но вылэм бере, суд ултӥям муртэз утёз. Грах ёросысь воргорон озьы ик ӧте корреспондентэз следствие нуыны. Кӧня ке ар талэсь азьло ас кочегаркаяз усыкмыса кулэм солэн выныз. Воргорон ас интызэ уг шедьты, йыраз ялан берга малпан: ас адӟонэныз-а меда со улонысь кошкиз, оло, юри кин ке усыкмытӥз. Ёросысь прокурор та учырысь нокыӵе йыружез уг адӟы. Нош лыдӟись солы уг оскы. Мар бен шуод та гожтэтъя? Шонерзэ верано ке, журналист быгатэ следствие шуонлэсь но мынэмзэ чакланы, судлэсь решенизэ эскерыны. Но гожтэтын номыр верамын ӧвӧл воргоронлэн кулэмезъя уголовной уж ӝутэм сярысь. Озьыен, кыӵе "ужез" эскерыны кулэ корреспондент? Та учыръя гуртын ветлӥсь супыльтонъёсты-вераськонъёсты шат? Но со туж дантэм уж. Газетэ гожтӥсьлы тазьы гинэ верасал: тӥледлы дырыз дыръя ёрос судэ вазиськоно вал. Нош али мар на? Сюрес вылэ ӧтись гожтэтъёслэсь газетамы ужась корреспондентъёс ноку уг палэнско. Огез жаль, ваньмызлы юрттыны уг луы. Куд-ог дыръя со понна асьсэос лыдӟисьёс но янгышесь луо, укыр бер редакцие вазисько. Татьяна Банникова, политикая отделысь корреспондент. Юрттэт - зэмос ёрмисьёслы гинэ Тани куинетӥ арзэ ини Россиын улӥсьёс улон инты но коммунальной юрттэт понна дунъёслэсь ӝынызэ асьсэ кисыысьтызы тыро. Соин ӵош ик ӧжыт коньдон басьтӥсьёслы кун та ласянь юрттэт (компенсациос) сётэ. Кызьы но кинлы со сётӥське? Та пумысен милям корреспондентмы кенеше Ижевскысь администрацилэн улон инты понна дун тырисьёслы юрттонъя центрезлэн кивалтӥсеныз Римма ПЕРЕВОЗЧИКОВАЕН. - Римма Вячеславовна, туж-а трос адямиослы кун юрттоно луэ улон инты понна дун тырыны? - Ӧжыт уд шуы. Но берло дыре соослэн лыдзы кулэсме. Тани туэ укмыс толэзь ӵоже юрттӥмы 10207 семьялы, нош миым та дыр ӵоже ик - 12950 семьялы. Угось городысь предприятиосын уждун тырыны ӧдъязы. Со сяна, ужан интыос но йылӥзы. Соин ик ми доры вазиськем ужтэк кылемъёслэн лыдзы 2,5 поллы кулэсмиз. Огъя лыдпусъёсты верано ке, туэ вань семьяос пӧлысь 5,4 процентэз милесьтым юрттэт басьто. Туэ укмыс толэзь куспын 12970,9 сюрс манет тыр субсидиос висъямын. Толэзяз котькуд семья (валамон, вазиськемъёсыз пӧлысь) 157,86 манет басьтӥз. Со семьяослэн толэзяз доходзы, шорлыдын вераса, 1373 манет вал. Нош миым та лыдпус 903 манетозь сяна ӧз вуы. - Ёрмисьёс тӥляд центрады коньдон басьто-а? - Уг, соос уксёез воксё уг адӟыло. Квартира дунзэс тупатэм быдӟалалы ӧжытгес тыро. - Улон инты понна дун тырыны юрттэт басьтон вылысь одно ик тӥляд центрады вазиськоно-а? - Одно ик. Вазиськыны малпам муртлы дасяно таӵе документъёс: - семьялэн быдӟалаез сярысь справка; - быдэ вуэмъёслэсь паспортъёссэс; - улон инты но коммунальной юрттэт понна берло толэзе дун тырем сярысь квитанциос; - электрокужым понна дун тыронъя расчётной книжка; - берло куинь толэзь ӵоже басьтэм уждун (премиосты, ватсаса ужам понна, отпуск но висьыса кыллем понна коньдонэз нимаз вераса) но пиналъёслы пособиос сярысь справка (мед луоз предприятилэн печатез, кивалтӥсьлэн но валтӥсь бухгалтерлэн гожтӥськемъёссы); - пенсионеръёслы но ужтэк кылемъёслы - ужам сярысь книжкаоссэс но куд-ог мукетъёссэ. - Мултэс трос ӧвӧл-а кадь? Бюрократизмлы кельше ук? - Милям малпаммы, дан поттэммы ӧвӧл со. Озьы косэмын Ижевсклэн мэрезлэн постановленияз. - Озьы ке но, туж-а кулэ ваньмыз со документъёс? - Кулэ ик, дыр, удысмы коньдонэн герӟаськемын бере. Вылаз ик, бюджет чотын узырмыны турттӥсьёс ӵем гинэ пумиськыло. Тани туэ ми доры юрттэтлы вазиськиз вал 13452 семья. Со пӧлысь 1251-езлы компенсация тыронлэсь возиськимы. 575-езлы - доходзы тырмыт шуыса, кылемезлы - мукет мугъёсын. Куд-огез милемды пӧяны тыршо, доходъёссэс вато яке кулэсто, "кескич" документъёс пӧрало. Сыӵеосты нимысьтыз пыр-поч эскероно луиськом. Туэ милям специалистъёсмы 479 семья эскеризы. Тодмо луиз: соос пӧлысь 16-ез ватсаса пайда потто, 68-ез доходъёссэс ватӥллям. Валамон, соос компесациос ӧз басьтэ ни. Озьы ми бюджетлы шыръямы 142,2 сюрс манет коньдон. Уждунзэс ватыса, тужгес но сьӧлыкало пӧртэм ООО-осын, АО-осын но ЧП-осын ужасьёс. Кудӥз лыктэ ми доры юрттэт курыса, уждунэ, пе, 200 манет гинэ. Нош ачиз чилясь журналысь модель выллем дӥсяськемын, квартираяз мынӥськод но, со кунсьӧр техникаен но мебелен тырмытэмын. Кызьы меда сыӵеослэн возьытсы тырме компесация курыны? Вб .хннцмрйв п'вйц `хвбцм`цспкс гинэ. - Римма Вячеславовна, тӥляд центрды городлэн бюджетэз чотын ужа. Озьыен, малпан кылдэ, компенсациос басьто муниципальной коркаосын улӥсьёс гинэ? - Ваньмыз басьтыны кулэ: муниципальной но, государственной но, ведомственной но, эсьмаса, приватизировать карем квартираосын но улӥсьёс, соослэн доходъёссы законэн чакламлэсь ӧжыт ке. Со гинэ ӧвӧл, общежитиын улӥсьёслэн но сыӵе правозы вань. Вераны кулэ: компенсациос тыре улон интылэн кузёез. Шуом, корка заводлэн балансаз ке, завод ик юрттэт но сётыны кулэ. Озьы ик мукетъёсыз но. Г.ТИХОНОВ. Павел Вершинин: "Калыклэн оскемез кужым сётэ" Удмуртилы Президент быръемын. Бадӟым куашетонъёстэк асьмеос парламент республикаысь президент амалэн кивалтонэ выжимы. Мултэс вераськыны кулэез ӧвӧл ни, дыр, табере кандидатъёслэн нюръяськон луонлыкъёссы сярысь. Соос, валамон, пӧртэмесь вал. Угось котькуд кандидат сьӧрын сылӥзы соослэсь но бадӟым адямиос, партиос, коньдон. Со сяна, соос сьӧрын вал на калык, бырйисьёс. Ӟырдыт нюръяськонын кыкетӥ интые потӥз Павел Николаевич Вершинин. Азьпалан Кун Кенешлы Тӧро быръён. Мар малпаське депутатъёслэн сессизы азьын Павел Николаевич? - Быръёнъёсы мон югдурез валаса мынӥ. Та ужрадэ удмуртъёсты валаса пыриськи. Кызьы тодӥськоды, удмуртъёслэн ӧтчамазы решение кутэмын вал, президент быръёнъёсы удмурт калыклэн но адямиез мед пыриськоз шуыса. Кин со луоз Вершинин-а, мукетыз-а соку тодмо ӧй на вал. "Удмурт кенеш" ӵектӥз Вершининэз. Сое, пе, калыкын тросгес тодо. - Кыӵе мылкыд кельтӥз тӥлед калык пӧлын ужан? Адямиосын вераськыса шӧдӥськоды- а вал асьтэлэсь вормондэс? - Быръёнъё азьын толэзьлэсь вазьгес ик мон тодӥсько ни вал, кин понна дурбасьтоз Москва. Мон со ӧй вал. Но мынам кандидатураелы пумит центр ӧз нюръяськы. Тазьы малпаса, вылды: кин тодэ, мар луыны быгатоз трос калыкъем республикаын. Соку, быръёнъёс азьын, мон уката но зол валай калык понна ужамме. Бадӟым решение кутон азьын калыклэсь гинэ, дыр, кужымзэ басьтӥськод. Соин но, вылды, котькыӵе секыт, шуом война аръёсы, калыкен ӵош вераськыса гинэ шонер амалъёс кутыны луэ. Бырон сярысь но (нюръяськонын котьма но луыны быгатэ) уд малпаськиськы. Тӥни сыӵе вал мынам мылкыды. Туж зол шӧдӥ адямиослэсь мон понна дурбасьтэмзэс. Кызьы мыным соос юрттӥзы! Вань районъёсысь сомында ӟеч адямиосты вераны быгатӥсько. Тау ӟучъёслы но, мукетъёсыз но, кудъёсыз мон понна дырзэс жалятэк ужаны дась луизы. Тау предприятиослэн директоръёссылы - тросэныз кылдӥз пумиськыны-вераськыны. Та нюръяськонэ соос но монэ балгословить каризы, шуизы Удмуртиын улӥськомы бере удмурт кандидат одно ик луыны кулэ. Озьыен, соос мыным тушмон ӧз луэ, асьсэос мукет кандидат понна ке но ужазы. Но солы паймыны кулэез ик ӧвӧл. - Озьыен, быръёнысь быръёнэ калыклэн асваланэз будэ? -Бен, озьы. Но быръёнъёс сое но возьматӥзы: кинъёс азьвыл ялан вераськылӥзы асваланэз ӝутон сярысь, соос асьсэдыз воксё мыдлань возизы. Соос шуыны выризы: та вакытэ, пе, удмуртъёслэн нокыӵе визьмо, быгатӥсь адямизы ӧвӧл, соин ик ойдолэ, пе, мукет кандидат понна ужаломы. Мон ӧй вормы. Но та учыр шоры философлэн синмыныз учкисько, зол уг куректӥськы. Монэ жаляно ӧвӧл. - 28-тӥ ноябре Кун Кенешлэн сессиез усьтӥськоз. Отын депутатъёс Тӧро бырйыны кулэ. Быръёнъёс дыръя тӥ ӧжыт куара ӧд бичалэ. Тӧро бырйыку, депутатъёс лыдэ басьтозы-а меда со учырез яке ваньмыз радъяськоз кинлэн ке дасям сценариезъя? - Куд-огез али тазьы лыдъя. Президент быръем бере, пе, Кун Кенешлэн ужез лябӟоз. Мон сыӵе вераськонъёсын соглаш ӧвӧл, малы ке шуоно, власть соку гинэ кужмо луоз, куке солэн вань ёзъёсыз золэсь луозы. Президент-а со, Кун Кенеш-а, Правительство-а яке суд ёзъёс-а. Кун Кенеш али туж чакласа ужаны кулэ законъёс дасян-кутон бордын, медаз соос Россилэн законъёсызлы пумит мынэ. Со ласянь парламент визьмо луэмзэ возьматыны ӧз ке быгаты, Россилэн Президентэз сое лэзьыны но быгатэ ук. Мон сямен, ог-огдэ валан, керетытэк улон парламентлэн ужамез бордысь но потэ. Соин ик Кун Кенешлы Тӧро бырйыку но керентонъёслэсь палэнскыны быгатоно. Республикаын тупаса улон мед луоз шуыса, умой, дыр, луысал быръёнъёслэсь йылпумъянъёссэс но лыдэ басьтыны. Мынэсьтым ке кандидатураме Тӧролы ӵектӥзы, мон малпасько, но та дырлы ас поннам нокыӵе решение ӧй на куты. - Но депутатъёслэн малпанъёссы тӥлед тодмо ни, вылды? - Тросэзлэсь мылкыдъёссэс тодӥсько. Но, жаляса верано, куд-огез малпаське озьы, нош лэсьтэ мукет сямен. Кыӵе вамыш лэсьтозы шонаськись депутатъёс голосовать карон дыръя кабинае пырыса, али вераны шуг. Журналистъёс Тӧро быръёнэз олокызьы но суреданы выро ни, но мон эшшо но верасько на: депутатъёслэсь мылкыдъёссэ быдэсак валай ке, соку гинэ соглаш луо кандидатураме ӵектыны. Тросэз адямиос, бырйисьёс, со сярысь куро монэ. Но Тӧроез быръёзы сю депутатъёс гинэ ук. Нош соос ваньзы ик бырйисьёслэс куронзэс лыдэ уз басьтэ, Тӧроез быръёзы ас мылкыдзыя яке кинлэн ке косэмезъя. Соин ик та ужрадэ мон югдурез валаса пырисько. - Шараяськиз ни, Кун Кенешлэн Тӧроезлы Можга ёрос администрацилэсь кивалтӥсьсэ Игорь Семеновез но ӵектозы шуыса. Та ужпум сярысь землякеныды вераськылӥды-а ни? - Игорь Николаевичен со сярысь вераськыны уг малпаськы. Югдурез азьпалтэме уг поты но, малпасько, Семенов сяна но ӵектэмъёс луозы на. - Депутатъёс сессиын быръёзы Кун Кенешлэсь Тӧрозэ нош солы воштӥсьёс быръемын луозы-а? - Сыӵе ужпум уз сылы. - Озьыен возьмаломы ни парламентлэсь ужамзэ. Тау валэктонъёс сётэмдылы. Т. Банникова. Данэз ӟечлык бордын Странаысьтымы 47 улосвылъёсысь предприятиосын поттэм 800-лэсь уно вузъёс возьматэмын вал арлы быдэ ик ортчылӥсь "Россиысь устоосыз 100 вузъёс" адӟытонын. Удмурт шаерысьтымы отчы нуэм вузъёсмы тужгес но умоен пусъемын вал. Нош возьматӥськизы отын республикаысьтымы дас предприятиосын поттэм 11 пӧртэм вузъёс. Валтӥсь предприятиосмы азьвыл аръёсы пыӵыл тӥрлыкенызы но сое поттонын кутӥськись продукциенызы данэ потылӥзы ке, табере калыклы вузъёсынызы паймыто ни. Таяз адӟытонын вормисьёс радэ потӥзы ЧМЗ-лэн цирконийлэсь лэсьтэм тусьты-пуньыез, Сарапулысь радиозаводлэн "Урал" автомагнитолаез, Ижевскысь пыӵал поттӥсьёслэн "Тигр-9" карабинзы, "Аксион-Холдинг" мотозаводын поттэм прицел. Озьы ик вылӥ дунъямын вал "Аксион-Холдинглэн" медтехника поттон заводаз дасям дефибриллятор, "Ижнефтемашлэн" му вӧй кыскон насосъёсыз. Таосын артэ ик вормисьёс радын - Иджевскын поттэм подшипник но "Металлист" заводын лэсьтэм огшоры акар. Удмурт шаермы диплом басьтӥз ческыт сиёнэз понна но. Комиссия нимысьтыз пусйиз Сарапулысь кондитерской фабрикалэсь "Очарование" нимаськись конфетсэ но Удмурт хладокомбинатлэсь мороженойзэ. Табере удмурт шаермы Калашниковлэн автоматэныз гинэ ӧвӧл, огшоры акареныз но данъяськыны быгатоз ни. Озьыен, котькыӵе вуз медло, солэн данэз ӟечлык бордын. Н.НИКОНОВ. Политика Арня ӵоже дуннеын, странаын, шаерын Дас куинь нунал талэсь азьло Америкаысь калык выль президент понна куаразэ сётӥз. Нош солэн нимыз та дырозь тодмо ӧвӧл на. Тодады вайытом: демократъёслэн куремзыя, Флорида штатын выльысь мынӥз бюллетеньёсты лыдъян-чотан. Президентэ кандидат Альберт Гор оскиз, тазьы Джордж Бушез сутылыны быгатоз шуыса. Со 300 куаралы гинэ бере кыле ук. Но Флоридалэн кун секретарез Кэтрин Харрис бӧрысьгес ивортӥз, бюллетеньёсты киын выльысь чотан лыдэ уз басьтӥськы шуыса. Пятницалы тодмо луыны кулэ вал ини кунгож сьӧрын куара сётэмъёслэн лыдзы. Соос пӧлын данак военнослужащийёс но соослэн семьяоссы. Та адямиос дышем сямъя куаразэс тросгес сёто кандидат-республиканец понна. Ку США-лэн президентэзлэн нимыз тодмо луоз ни? Таӵе юанэн пумитазы Билл Клинтонэз Брунейын. Та страналэн столицаяз, Бандар-Сери-Бегаван городын ортчиз экономика удысын валче ужанъя Азиатско-Тихоокеанской огазеяськонлэн саммитэз. Бруней - туж аспӧртэмлыко кун. Интыяськемын Калимантан шормуӵлэн уй палаз, матысь бускелез - Малайзия. Солэн султанэз - дуннеысь котькинлэсь узыр адями. Промышленностез азинске му вӧй но чагыр эстӥськон кыскон вылын. Брунейлэн узырлыкез пачыл кисьтӥське, кожалод. Тани султанлэн дворецаз ӝӧкъёс, пуконъёс, ӧс кутонъёс гинэ но зарнилэсь лэсьтэмын. Брунее Россилэн Президентэз Владимир Путин но ветлӥз. Солэн ивортэмезъя, Россия понна туж ӟырдыт ужпумъёс быдэстэмын та нуналъёсы. Кылсярысь, юнматэмын дыр, ку Россия Дуннеысь вузкаронъя органзиацие пырыны быгатоз. Россиысь делегацилэн малпамезъя, вань кенешонъёс йылпумъяськозы 2001-тӥ арын декабре. АТЭС-э пырем кунъёс мылкыдзэс усьтӥзы Дальний Востоке но Сибире инвестициоссэс ыстон ласянь. Нош Россия экономика кусыпъёссэ паськытатоз Перуын, Чилиын, Сингапурын, Иранын. Отын выльысь ужаны кутскозы пӧртэм вузъёс нуон-ваёнъя, чорыганъя компаниос. Пусйыны луэ соизэ но, Владимир Путин быгатӥз Азиатско-Тихоокеанской улосысь странаос азьын Россилэсь данзэ ӝутыны. Со сярысь вера, дыр, тани таӵе тодмет но: АТЭС-лэн секретариатэз чаклаз 2002-тӥ арын Владивостокын инвестициосъя бадӟым форум ортчытыны. Россия сярысь верано ке, арня понна "дано" адямиен лыдъяны луоз Борис Березовскиез. Кемалась ик ӧвӧл со Кун Думалэн депутатэзлэн мандатэныз л.киськиз, властьлы оппозицие султӥз. Табере со ассэ политэмигрант шуэ. Таяз арня вискын сое Генпрокуратурае ӧтизы вал "Аэрофлотлэн" ужез пумысен. Но Борис Абрамович кулэ дыръя прокуратурае ӧз вуы, та вакытэ Нью-Йоркын улэ, Россие берытскыны уг малпа. Ивор вӧлмытӥсь ёзъёсы гожтэт ыстэм, со печатламын вал "Коммерсантын". Борис Абрамович шуэ: "Аэрофлотлэсь" ужзэ ӝутӥз, пе, Примаков, табере сое азинтэ Путин. Со озьы ик вераз, та компаниен, пе, ӵош ужало Швейцариысь куд-ог компаниос, соос ик коньдонэн юрттӥзы "Единство" блоклы но Владимир Путинлы быръёнъя кампаниос дыръя. Березовскийлэсь таӵе кылъёссэ "дунъяз" Центризбирком но. Александр Вешняков верамъя, Борис Абрамович кулэ документъёс вуттӥз ке, пе, ЦИК одно ик соосты эскероз но законэз тӥям муртъёсты кыл кутон улэ кыскоз. Куд- ог аналитикъёслэн чакламзыя, Березовский нокыӵе кагазъёс уз вутты. Ас ужзэ лэсьтӥз ни ук - возьматӥз, со кытын ке но вань на шуыса, озьы аслэсьтыз данзэ но будэтӥз. Кылем арня вискын югдур ӟырдаз Ижевск Думаын. Отысь кӧня ке депутатъёс ӵектонэн потӥзы мэрлэсь быдэсъяно удысъёссэ сюбегатон сярысь. Ижевскын, странаысьтымы кӧня ке бадӟым городъёсын сямен, властьмылэн кык ёзъёсыз - закон кылдытъясь но быдэсъясь - ог-огзылэсь тыро-пыдо люкемын ӧвӧл, кыксы ик кырмемын мэрлэн кияз. Туннэ Дума люкаське, со Уставе воштонъёс пыртон сярысь ужпумез эскере. Депутатъёслэн-ужбергатӥсьёслэн ӵектонзылы чутрак пумит луэ мэр Анатолий Салтыков. Городын кивалтон радлык пумысен ужаса улӥсьёслэн одӥг но ӝожтӥськонзы ӧй вал на, шуэ со, соин ик умойгес луысал, пе, вуоно быръёнъёс дыръя калыклэсь юалляськон ортчытыны, кыӵеен со адӟе городэн кивалтонэз. Нош мэрез асьмеос выльысь быръём 2002-тӥ арын апрель толэзе. Ю. Александрова. Эрик котьмалэсь дуно Драмая удмурт кун театр Бразилиысь драматурглэн Гильерми Фигейредулэн "Эзоп" ("Ӟичы но виноград") пьесаезъя возьматыкуз, учкисьёслы маде дуно эриклэн бездонтэм дунъетэз но со понна юн мылкыдын нюръяськонлэн кулэлыкез сярысь. Сыӵе кадь спектакльлэн огъя мылкыдыз но огъя индылонэз. Макем визьмо но юн мылкыдо кадь уар кузё - Ксанф философ (артист Кадим Галиханов): солэсь кылзӥсько базаре потэмъёс но, матысь адямиосыз но. Соос - уар ныл (Удмурт Элькунысь калык артистка Августа Лазарева), ожгарчиослэн капитанзы Агностос (артист Сергей Салтыков), косонэз соку ик быдэстыны дась Эфиоп (артист Михаил Васильев). Озьы ке но, трослы визьмо уарлэн Эзоплэн (Удмурт Элькунысь калык артист Вячеслав Байков) верамъёсыз азьын со бездэ, туж ляб адӟиське. Философ азьвыл но вуоно ужпумъёслы шонер дунъет сётыны быгатэ. Нош туж кулэ вамышъёс лэсьтон азяз сыӵе кужмо Ксанф но Эзопен кенеше. Эзоп уго базарысь калыклэсь мылкыдзэ ас сяменыз вераны быгатэ. Со юн герӟаськемын эрик сярысь малпанэн но со понна юн сылыны быгатонэн. Эрик. Инбамысь со огшоры гинэ уг васькы вылэм. Сое шӧдоно артистъёслэн быгатыса шудэмысьтызы но спектакльлэсь пуштроссэ учкисьёс доры валаса вуттэмысьтызы. Озьы ик шуэ пьеса. Ксанф - инмаръёс радын. Солэн эрик сётыны кужымез но, моӵез но вань ке но, соосты уг сёты. Туж тросэз, малпаме озьы уг поты ке но, эрико улонэз адӟо кадь кинлы ке йыбыртъян бордысь. Котькызьы медло но, со бусэн шобыртэм эрик. Интыяз-интыяз озьы но кулэ, дыр, нош быдэс эрикез дорад вайыны со уз юртты. Йыбыртъян гинэ но ини - уар сям: озьы малпасько мон. Сыӵе эрик - кужмо но кескич Ксанфлэн пыд улаз выжлёгет кариськыса выдон. Тодмо ӧвӧл, мар малпалоз философ вуоно минутэ: Оло воштоз со выжлёгетэз, оло куштоз сое, оло пыдӵушет карыса возёз. Котьку ик. Ксанф - со понна ик Ксанф. кужмо мурт. Вылаз ик, мукет ужен выроз, но выжлёгетэз трос уаръёслэн кузёзы. Соослэсь улонзэс аслаз мылкыдызъя радъя ке но, сётэм кылызлы кузё кариськыны уз быгаты (кызьы шуо, шунды но ваньмызлы одӥг кадь уг пишты. Но уд возьматы ук аслад уаръёсыдлы кас, кезьыт, сюлэмтэм философ луэмдэ. Соин ик кескичъяськоно... Та ласянь Кадим Галиханов быгатэ героезлэсь сыӵе мылкыдзэ учкисьёслы возьматыны. Сыӵе визьмо но кескич философлэн кивалтэмез улсын улон - пумтэм-йылтэм зӥбет улын курадӟон. Кылтэм-ымтэм Агностос но (артист Сергей Салтыков), трос вераськыны яратӥсьтэм эфиоп но (артист Михаил Васильев) - эрико улон сярысь Эзоп (Удмурт Элькунысь калык артист Вячеслав Байков) сямен ик меӵак малпаськисьёс. Эрик сярысь малпаськись муртлы эрик вае базаре лыктэм вань калык. Тӥни малы кышка Ксанф площадьысь адямиослэн со сярысь урод вераськемъёссылэсь. Мынам малпамея, спектакльын базарлэн но отысь калыклэн эрико куараоссы сцена вылын шудӥсьёслэн тусбуйёсынызы артэ уг пуксё. Валамон: режиссёрлэн Кадим Галихановлэн чакламезъя, сцена - инмаръёслэн улон-вылон интызы, нош калык улӥын, кыдёкын. Соин ик, вылды, куараоссы но сокем юн кылӥськыны кулэ ӧвӧл. Со шонер, дыр: татын режиссёрлэн малпанэзлы пумит уд мыны. Нош мон, кылсярысь, та интыоссэ ӧжытак гинэ юнматысал. Эзоплэн но, базарысь калыклэн но эрик сярысь малпанъёссы огазе кисьтӥськысалзы ке, та малпан уката но кужмогес чузъяськысал сцена вылысен. Огъя учконо ке, режиссёр но, артистъёс но пьесалэсь мылкыдзэ учкисьёс доры вуттыны быгатӥллям. Соин ик адямиос кыӵе ке малпанъёстэк уз бертэ доразы. Драмая удмурт кун театр аслаз репертуараз котьку сямен пыртылэ пӧртэм авторъёслэсь ужъёссэс. Ӟуч кылын гожъясьёслэсь но. Котьку сямен ик артистъёс соослэсь пуштроссэс умой усьтыны быгато. Та радаз но актёръёс ӟеч сямзылэсь куштӥськиллямтэ. Соин ик вераны кулэ: спектакль пӧрмем. Вераны кулэ крезьгурез сярысь но. Грек гур туж умой огазея малпанъёсты но мылкыдъёсты. Та ласянь туж мыло-кыдо ужам крезьгурчи Марина Ходырева. Виктор Ивашкин, Удмурт радиоысь журналист. Спектакльысь одӥгез суред. Шудо Удмурт Элькунысь калык артистка Августа Лазарева но артист Кадим Галиханов. Владимир Беломорскихлэн туспуктэмез. Архивысь документъёсъя Удмуртия ЪЪ дауре 1956-тӥ ар Феврале ортчиз партилэн ЪЪ съездэз. Со эскериз но юнматӥз 1956-тӥ-1960-тӥ аръёслы азинскон план. Отын чакламын секыт промышленностез азинтыса, калык хозяйствоез ӝутыны но адямиослэсь улон-вылонзэс умоятыны. Съездлэсь решениоссэ быдэсъянэн валче рационализаторъёслы но изобретательёслы паськыт сюрес усьтӥскьиз. Егитъёс пӧлын азьмынӥсь амалъёсты вӧлмытыны юрттӥз ВЛКСМ-лэн обкомез, ӵемгес ортчылӥзы кун совещаниос но слётъёс. Озьы бадӟым инты басьтыны кутскиз котькуд ужасьлэн аслаз нимысьтыз планэз. Таӵе кутскон сётӥз Вотка машзаводысь токарь В. Д. Ежов. Со витетӥ пятилеткае тямыс арлы чаклам нормаез быдэстӥз, нош 1956-тӥ ар понна - кык аръем нормаез, Партилэн обкомезлэн бюроез, таӵе кутсконэз умоен лыдъяса, парторганизациосты косӥз Ежовлэсь ужан амалъёссэ паськыт вӧлмытыны. 1956-тӥ арын 6,6 миллиард манетлы огъя ваньбур поттэмын вал. 1913-тӥ арен ӵошатыса, со 200 поллы уногес луэ. 9-тӥ мартэ партилэн Удмурт обкомез Н. С. Хрущевлэн "Одӥг адямиез мултэс ӝутон но солэн бервылъёсыз" докладэныз вань коммунистъёсты, комсомолецъёсты но партие пырымтэ рабочийёсыз, служащийёсыз но колхозникъёсыз тодматон сярысь постановление кутэ. Парторганизациосын ортчытэмын вал 1055 кенеш. Тросэз ужаса улӥсьёс куризы Сталинэз кулэмез бере судын эскерыны, туспуктэмъёссэ, ӧтёнъёссэ, Сталинлэн нимыныз книгаосты быдтыны. Ижысь Пастухов площадьысь, "Колос" кинотеатр вӧзысь, генералиссимуслэн бетонлэсь вить метр ӝужда памятникез басьтэмын вал. Нош ноябре, Венгриын ортчем бугыръяськонъёс бере, трос интыосын митингъёс ортчылӥзы но калык чурыт кылзэ вераз Венгриысь рабочийёслэн но крестьянъёслэн правительствозылы пумит луэмъёслы. Отын бырыны шедиз Удмуртиысь 9 военнослужащий, соослэн семьяоссылы юрттэт сётэмын улон инты басьтон, дышетскыны пырон но мукет куронъёссы ласянь. Сарапулысь электрогенераторъёс поттон завод бичаз нырысетӥ электрокаръёссэ - соосын лякыт вал вузъёсты матэ нуыны-вайыны. Вотка машзаводын кукуруз октӥсь комбайнъёслы ёзъёс поттыны кутскизы. Мае ужаны ӧдъяз Ижысь "Строммашина" завод (али со "Нефтемаш" нимаське). Октябре кутскемын "Ижтяжбуммаш" заводэз пуктон. Быдтэмын Бемыш, Бадӟым Уча, Пычас, Тыловай, Зура, Кулига, Понино но пудем ёросъёс, соос чотын бадӟыматэмын артысь ёросъёс. Комсомол путёвкая Казахстан выльвылъёсы Удмуртиысь кошкиз 1540 мурт. Соос юрттэмен, Акмелинск областьысь Вишневск но Евильск ёросъёсын 120 сюрс гектар вылысь юосты дырызлэсь вазь утялтӥзы но государстволы ог 10 миллион пуд ю тысь келязы. Ӟеч ужамзы пусъемын ВЛКСМ-лэн ЦК-езлэн Почёт грамотаосыныз но значокъёсыныз. Выльвыл музъемъёс чотын государство басьтӥз, ортчем арен ӵошатыса, миллиардлэсь унолы пуд нянь, йӧл - 4 миллион пудлы уногес. Секыт югдур кылдӥз Удмуртиын пудо сиён ласянь. Куазь кӧс улэмен, юос ӧз ӝутске, куро ичи люкаськиз, пудоез сюдыны куро липетъёсты кесяно луылӥз. Гурт хозяйствоез наукалы матэ карон вылысь, Удмуртиын кылдытэмын опытной станция. Отын тросэн мерттыны кутскизы картофка. Со тырмиз пудоез но сюдыны. Няньтэм арын висён ӝог аляз. Нылпиосты сюдонэз умоятон вылысь, шунды ӝужан палась ваемын вал сюрс тонна пала улмо, апельсинъёс но мандаринъёс. 1956-тӥ арын котькуд гектар колхоз музъем 141 манет пайда сётӥз, нош колхозникъёслы трудоденьлы быдэ 90 копейкаен гинэ тыризы. Кутэмын кун пенсиос сярысь выль закон. Гурт налог кулэстэмын вал 2,5 поллы. Гуртъёсысь магазинъёсы вуыны кутскизы басмаос, вуриськон машинаос, радиоприёмникъёс, часъёс, велосипедъёс. Улонэ мургес но мургес пыӵаны кутскиз элктрокужым. Но туж шуг на улон инты ласянь. Ижевскын, Воткинскын но Сарапулын воксё улон интытэм дас сюрс пала адямиос "липет" куро. Соин ик СССР-ысь Министръёслэн Кенешсы улон интыос лэсьтон сярысь нимысьтыз постановление кутӥз. Ижевскын пуктэмын телецентр. Со бордын ужазы Ижевск но Вотка машзаводъёс, Сарапулысь радиозавод, Челябинскысь ваизы 120 метръем вышка. Ноябре Ижевскысь телестудия ужаны кутскиз - нырысьсэ ӝуатскизы чагыр экранъёс. Ӝоген Ижевскын ужаны кутскиз Свердловскысь киностудилэн ялан ужась корреспондентской пунктэз. 1-тӥ сентябре Дэбесын усьтӥськиз нырысетӥез школа-интернат, кытын улӥзы но дышетскизы куанер семьяосысь нылпиос. Ижевскын усьтӥськиз пыӵал поттӥсьёсты дасясь школа, Глазовын - Пионеръёслэн юртсы но вуриськон комбинат, кутскемын колхоз рынок ӝутыны. Трос ужрадъёс ортчытъяськылӥзы ни спорт, культура но исскуство удысын. Декабре аслаз Гоша гондыреныз циркын манеже потаны кутскиз Иван Кудрявцев. Огъя улон секыт вал на, но калык сютэм ӧз ни улы. Е. Вяткина, Удмурт Республикаысь Кун архивысь главной специалист. Глазовын 7-тӥ ноябре демонстрация дыръя. Казахстанысь выльвыль музъем вылын. Сюрес вакчиялоз Ижевскысь ульчаостӥ автобусъёс уно ке но ветло, соослэн лыдзы уг тырмы. Тужгес но трос калык люкаське, ӵукна уже мыныку но ӝытазе уж бере. Соин ик куд-ог маршрутъёсъя выльдӥськонъёс луизы. Кылсярысь, 24-тӥ атвтобусъёс 13-тӥ ноябрьысен даслы йылӥзы. Азьло соос ветлыкузы 6 минут вис каро ке вал, табере 4 гинэ. Нош 20-тӥ ноябрьысен усьтӥськиз вылез 13-тӥ маршрут. Со центрысен Труда ульчаозь ветлоз (Александр Невский собор-Советской ульча-Удмуртской ульча- Октябрьлы 10 ар нимо ульча-Ворошилов ульча-4-тӥ микрорайон-Труд ульча). 13-тӥ автобус ветлоз ужан нуналъёсы гинэ - ӵукна 6 час 30 минутысен 10 час 30 минутозь но 14 час 30 минутысен 18 час 30 минутозь. Н. Сергеев. Герд но Петров сярысь Гердэн артэ Петров удмурт литератураын туж вылӥын сылэ, трос национальносьем советской литератураын со бадӟым художник луэ. Герд - ас кожаз пӧрмем маке (самородок), котыр ласянь быгатӥсь, "котьмар ужлы кибашлы", каньылэн гинэ кадь трос ужез быдэсъясь; Петров нош - пыр-поч ужаса выльзэ кылдытӥсь, ас тодонъёсыныз курадӟон пыр потӥсь, со ӧжытгес лэсьтэ, но ассэ жалятэк ӵушкаменыз, тыршеменыз вамыш бӧрсьы вамыш азьлань мынэ, солы вылӥе тубыны юрттэ нуналмысь тыршемез, ужамез. Петер ДОМОКОШ. Зарни ваёбыжъёс Сыктывкарын ортчиз балетлы сӥзем "Зарни ваёбыжъёс" нимо Куинетӥ калык куспо фестиваль. Солэн ужаз пыриськизы Россиысь финн-угор кунъёс но улосвылъёс. Фестиваль усьтӥськон нуналэ Операя но балетъя кун театрын гала-концерт вал. Асьсэлэсь устолыксэс возьматӥзы Санкт-Петербургысь, Москваысь, Мордва, Удмурт, Эстон кунъёсысь театръёс. Фестивальлы вылӥ дунъет сётӥз Коми Элькунлэн тӧроезлэн воштӥсез Алексей Конюхов. "Комиинформ" агентство ивортэмъя. Кионъёс Селта ёрос нюлэсъёсын шобырскемын, соос пӧртэм пӧйшуръёсын узыр. Ужаса улӥсьёс туж ӵем адӟыло кионэз. Тани Аманы гуртысь пенсионерка Раиса Скворцова Ижысь сузэръёсызлы гожтэ: "Света нылы бертылыны ик кышка ни - нуназе шорын ик гурт котыртӥмы кионъёс ветло. Ог нунал мон пудо возьмасько вал. Бускельмылэсь, Аркашлэсь, мӧйы ыжзэ син азям ик кион кесяны кутскиз. Мон ӧй кышка, кион доры кесяськыса мынӥ но ыжез мозмытӥ. Скалъёс но бурсыса сьӧсез кышкатыны выризы. Со кышказ но гурт пала пегӟыны ӧдъяз. Кион бӧрсьы - скалъёс, скалъёс бӧрсьы - мукет пудо, пудо бӧрсьы - мон. Но сьӧсь ӧз буйгатскы, берытскиз но мукет ыжлэн чыртыяз куртчиськиз. Мон нош ик кутски бадӟым куараен кесяськыны. Со вакыт гурт калык потӥз но, кионэз дэмен уллямы. Кионъёс - сьӧсь пӧйшуръёс, хозяйствоослы но, нимаз адямиослы но бадӟым изъян ваё. Соин вазиськем потэ пӧйшурасьёслы: юрттэлэ Аманы гуртысь, озьы ик Селта ёросысь мукет гуртъёсын улӥсьёслы, быдтэлэ нюлэсъёсысь сьӧсь пӧйшуръёсты. П. Скобелев. Валтозы чупрес адямиос Асьсэлэн кенешазы люкаськылӥзы Ижысь удмуртъёс. "Удмурт кенеш" огазеяськонлы Ижысь ёзэзлэн тӧроез Илья Байметов люкаськемъёслы ивортӥз куинь ар ӵоже быдэстэм ужъёс сярысь, уӵыртӥз данак тырмымтэосты но шекъёсты. Собере вераськизы ӧтчаме лыктэмъёс. Николай Симонов, Геннадий Ермаков, Людмила Христолюбова, Алевтина Поткина, Алефтина Корепанова, Галина Шушакова, Виктор Егоров, Евгений Егоров, Леонид Загребин Ижысь удмуртъёслэсь ужзэс умоятонъя дэмланъёссэс веразы. Сюлэмез тужгес вырӟытӥзы тодосчилэн Людмила Христолюбовалэн кылъёсыз. Удмуртъёслэн тямысэтӥ ӧтчамзы азьын солы вуылыны кылдӥз Набережные Челны городысь эшъёсмы доры. Татын печатласькись одӥг газетлэн корреспондентэз Людмила Степановналэсь туж паймыса но дӥсьтытэкгес юам: "Шонер-а таӵе ивор: Удмурт шаерлэн Тӧроез удмурт ӧвӧл? Сыӵеез улонын луылэ шат?!." Та ӝытэ ик "Удмурт кенеш" огазеяськонлэн, Ижысь ёзэзлы выль кивалтэт быръемын. Азьвыл сямен ик сое азьлань валтозы, чупрес, шӧртчи, нодлыко, визьмо адямиос. Азьло аръёсы сямен ик ёзэн кивалтоз "Вордскем кыл" журналлэн валтӥсь редакторез Илья Байметов. Та нуналэ ик удмурт калыклэн ӵуказе нуналыз сярысь сюлмаськись муртъёс дуно кузьымъёсын пусъемын. Алигиес ортчем быръёнъёслы йылпумъянъёс лэсьтыса но азьланяз ӟечгес ужан пумысь визь-кенешъёс сётыса вераськизы "Удмурт кенеш" огазеяськонлэн тӧроез Валентин Тубылов. Е. Кузнецова. Тямыстон ар тырме Удмурт Элькунысь Куӟебай Герд нимо шаеръюртлы (Национальной музейлы) тямыстон ар тырмемен валче, Ижын ортчо финн-угор калыкъёслэн чебер киужъёссылы сӥзем фестиваль но "Этнографияя музей ЪЪИ дауре выжон азьын" нимо конференция. Туннэ ӧтчамлэн нырысетӥ ужан нуналэз вал. Конференцие лыктэмъёсты ӟечкыласа вераськиз Удмурт Элькунысь культурая министр Николай Бесогонов. туала музей, калыкъёс но политика, удмурт туала удысысь ужпумъёсъя кенешизы Удмурт Элькунысь культурая министрлэн воштӥсез Аверьян Христофоров, Куӟебай Герд нимо шаеръюртлэн директорез Раиса Мартынова, история наукаосъя докторъёс Кузьма Куликов, Владимир Владыкин, мукет адямиос. Нуназе бере ужазы секциос. Соосын кивалтӥзы историяя науакаосъя доктор Владимир Владыкин, биологияя наукаосъя доктор Николай Ильинских, история наукаосъя кандидат Николай Родионов, кылтодон наукаосъя докторъёс Татьяна Владыкина, Василий Ванюшев. Удмурт арня нуналэ, 24-тӥ ноябре, ортчоз Удмурт Элькунысь Куӟебай Герд нимо шаеръюртлы тямыстон ар тырмонлы сӥзем сӥё-дано кенеш. Вань ужрадъёс луозы Удмурт Элькунысь Куӟебай Герд нимо шаеръюртын, Удмурт кун филармониын, писательлэн Геннадий Красильниковлэн музей-квартираяз. Та ӧтчаме лыктэмын сьӧрлось куноос но. Венгриысь Будапешт городысь этнографияя музейын ужась Агнеш Керенси, Будапештын университетысь профессор Ласло Виктор, Эстониысь тодмо тодосчи история наукаосъя доктор Алексей Петерсон тунсыко веранъёссэс ваиллям. Кӧснуналэ, 25-тӥ ноябре, соос вуылозы Кияса ёросысь Карамас-Пельга гуртэ. Покчи арня нуналэ, 23-тӥ ноябре, Операя но балетъя кун театрын ортчоз чебер киужъёс кылдытъясь усточисолэн фестивальзы. Отчы пыриськозы Ижын, Дэри но Пичи Пурга ёросъёсын улӥсьёс. Е. Михайлова. КАЛЫКЛЫ - ЧЕСКЫТ СИЁН Данэз вӧлмиз Автралиозь Выльдӥськон но рынокен экономикае выжон кутскем бее, котькытын сямен ик, асьме шаерамы но трос усьтӥськизы колбаса лэсьтон цехъёс. Вылаз ик,мукет интыосысь но кунгож сьӧрысь чебер бинялтэм пӧртэмсаос но музон сиён-юон вуыны ӧдъязы. Басьяськисез соос бордазы кыскизы, нош шӧмзыя тросэзлы ӧз кельше. Тӥни соин ик Ижысь но республикаысьтымы самой бадӟымез мясокомбинат куашкан калэ вуиз, банкрот луиз. Но бӧрысь но кунын бадӟымесь воштӥськонъёс луизы, 1998-тӥ арын 17-тӥ августэ доллар зол будӥз. Переработчикъёслы со юрттӥз, поттэм сиён-юонзы магазинъёсы вуиз. Ижысь мясокомбинат но каллен-каллен пыд йылаз султӥз, шуг-секытысь потӥз. Табере со луиз усьтэм амалэн ужась "Ижевский мясокомбинат" акционер оагзеяськон ("ИМКО"). Воштӥськизы кивалтӥсьёс. Кылем пятницае, 17-тӥ ноябре, журналистъёсын пумиськизы солэн выль валтӥсь директорез Леонид БРИЛЛИАНТОВ но воштӥсез Сергей МАКСИМОВ. Люкаськемъёслы соос мадизы туннэ ужъёссы сярысь. Нош пресс-конференцилэн мугез вал сертификат басьтон. Предприятилэсь продукцизэ сыӵе вылӥ дунъяз "Австралиана Дисковери Маркет" калык куспо огазеяськон (ассоциация). "ИМКО-лы" сётэмын "2000- тӥ арлэн предприятиез" ("Предприятие года - 2000") приз. Кызьы бен туннэ комбинат ужа? Урод шуыны уг луы. Толэзьлы быдэ 2000 тонна колбаса поттэ но вуза. Продукцизэ 400-лэсь трос предприятиос, организациос но магазинъёс басьто. Али 69 пумо колбаса лэсьтэ. Сиён-юонэз кошке ни бускель Татарстан, Башкортостан, Киров, Пермь, Тюмень улосъёсы, озьы ик Францие, Испание, Австралие но музон кунъёсы. "ИМКО" колбаса поттэ клиентъёслэн куремзыя гинэ. Одӥг куиньмос палаез (30 процентэз) со элькунлэн палэназ кошке. Нош сӥль басьтэ "Восточный" совхозлэсь, матысь ёросъёслэсь но нимаз адямиослэсь. Огазеяськонлэсь колбасазэ адямиос умой басьто, ӟечлыкез вылӥын, мукет интыосын лэсьтэменыз уд ӵошаты. Татын озьы ик бадӟым инты висъяло оборудованиез, технологиез выльдонлы. - Комбинатэз быдэсак выльдыны милем ичизэ 1,5-2 миллион доллар коньдон кулэ луоз, - шуэ Леонид Семенович. - Соин ик али утчаськом юрттӥсьёс (инвесторъёс). Угось мясокомбинат пуктэмын кемалась, оборудованиез вужмиз ни. Шуг-секыт трос ке но, "ИМКО-лэн" данэз ӝутске, кужымез будэ. Туэ тани ватсаса 30 муртэ уже кутӥзы ни. Али татын 300 пала ужасьёссы, 1,5 сюрс манет шоро-куспо уждун басьто. Пыриське пӧртэм адӟытонъёсы (выставкаосы) но ярмаркаосы. Тани Удмуртилэн кунлыкезлы 80 ар тырмонлы сӥзем адӟытонын "ИМКО-лы" И степенё диплом сётӥзы. Г.РОМАНОВ. Архивысь документъёсъя Удмуртия ЪЪ дауре 1957-тӥ ар Тулыс поттэмын СССР-ысь калык хозяйствоез ӝутонъя берпуметӥез кун заём. Вуж заёмъёсъя калыклы коньдон берыктон ӝегатэмын 20-25 арлы. Удмуртиысь ужаса улӥсьёс пӧлын партилэн но правительстволэн таӵе решенизылы дурбасьтӥсьёс шедизы, нош куд-огез мылкыд кариз заёмъёссэ кун фондэ сётыны. Вузкарон дунъёс, 1947-тӥ арын сярысь, кулэстэмын вал 2,4 поллы. КПСС-лэн ЦК-езлэн нырысетӥ секретарез Н. С. Хрущев калык азе таӵе ужпум ӝутӥз - котькуд адямилы сӥль, йӧл но вӧй поттон ласянь США-ез сутоно но кельтоно. Удмуртиысь ужаса улӥсьёс асьсэлэн огъя кенешъёсазы эскерылӥзы партилэн пленумезлэсь Маленковлэн-Каганович-Молотовлэн партилы пумит группазэс пазьгем сярысь июне кутэм решенизэ но сӥль но йӧл-вӧй поттонэз ӝогомытон сярысь декабре кутэм решениоссэ. Вераськон ӝутскылӥз отын амнистия но реабилитация улэ шедемъёсты шонер сюрес вылэ султытон сярысь но. Соку печатласькизы СССР-ысь Вылӥ Кенешлэн пӧртэм указъёсыз, кылсярысь, йыртэмасьёсты кыл кутытон, улон интыослы дано адямиослэсь нимзэс сётон сярысь. Со вакытэ 54 колхозъёслы но 15 урамъёслы улэп адямиослэн нимъёссы сётэмын вал, 28 колхозъёслы - Маленковлэн, Кагановичлэн но Молотовлэн, 1-тӥ ноябрёзь вань со нимъёс воштэмын вал. Та аре колхозъёсты совхозъёсы выжтылӥзы. Удмуртиын 5 совхозъёсы пыртӥзы 34 пичиесь колхозъёсты. Нош Казахстан азьланьтӥз выльвыл музъемъёсыз гыронзэ. Удмуртиысь отчы ю-нянь октыны ветлӥзы 3 сюрс егитъёс. Партилэн февраль толэзе ортчем пленумаз промышленностен кивалтонэз воштӥз, министерствоос интые, совнархозъёс кылдытыса. Кылдытэмын вал совнархоз Удмуртиын но, отчы пыриз 117 валтӥсь предприятие, соос потто вал 80 процентлэсь ятырзэ продукциез. Удмурт совнархоз пыре вал Урал совнархозэ. Со чаклаз специализациез но кооперациез умоятыны. Удмуртия быдэсъяз обороная удысысь нимысьтыз машинаос но приборъёс, меӵак металлургиын туж вылӥ ӟечлыко андан поттон заказъёсты. 1957-тӥ арын ужаз 1320 предприятие. Отын тыршизы 200 сюрс пала рабочийёс но служащийёс. Андан ӵыжатонъя заводмы СССР-ысь 700 заводъёсы келялляз андан, прокат, штамповка но кисьтэм арбериос. Ленин нимо завод 405 редукторъёсты но 3-5 тоннаез ӝутӥсь винто домкратъёсты поттӥз. Сарапулысь Дзержинской нимо завод музъем портон но мур насосъёс лэсьтылӥзы. Камбаркаын поттылӥзы сюбег чугун сюреслы мотовозъёс но пассажиръёслы вагонъёс, соосты уже кутылӥзы нюлэс дасясьёс. Удмурт кунысь 2 радиозаводъёс арскын 300 сюрс радиолаос но радиоприёмникъёс лэсьтӥзы. Ижмаш заводын кутскизы выль станокъёс Иж-56 но Иж- 49 мотоциклъёсты коляскаен поттыны, Воткинскысь машзаводын выль фреза станокъёс, Ленин нимо заводын - капчи редукторъёс. Июне "Ижмаш" аслэсьтыз 150 арессэ пусйиз, соку ик кутскиз космослы кык тубатъем ракетаос лэсьтыны. Заводлы сётэмын Ужъя Горд Знамя орден. Подшипникъёс поттыны ӧдъяз Ижевскысь подшипник завод. Л. М. Васев возьматӥз аслэсьтыз корт вылэ туж чебер но аспӧртэмлыко суредъёс пуктыны быгатэмзэ. Ижевскын усьтӥськизы Ленин нимо кун библиотека но Чайковский нимо пианино поттон фабрика. Телестудия 0,8 час передачаос возьматъяз ни. УАССР-ысь Министръёслэн кенешазы кылдытэмын радиотелекомитет. Кенеш озьы ик постановление кутӥз историен герӟаськем но вынлыко шайгуос вылысь памятникъёсты утялтон но сӥё-дано возён сярысь. Сарапул театрысь режиссёр но артист аслаз гожтэм пьесаезъя "Мултан уж" спектакль пуктӥз, озьы быдӟым ӟуч писатель В. Г. Короленколэн образэз нырысьсэ сцена вылын возьматэмын. Ортчизы дышетӥсьёслэн нырысетӥ кун съездзы, егитъёслэн, пионеръёслэн но школьникъёслэн нырысетӥ кун фестивальзы. Кырӟанъя но эктонъя удмурт ансамбль театръёслэн но музыкая коллективъёслэн Союзысь конкурсазы лауреат луиз. Удмуртиын ужазы ни 900 клубъёс, 674 библиотекаос, 390 киноустановкаос, 3 драмтеатр, мунё театр, кырӟанъя но эктонъя ансамбль, госфилармония. Ёросъёсысь клубъёсын ужазы 2000-лэсь ятыр художественной самодеятельностья кружокъёс, отчы пыриськизы 26 сюрс пала адямиос, соос возьматӥзы уно сюрс концертъёс но 750 спектакль. Ӟуч но удмурт артистъёсмы потазы мукет городъёсы но. Быдӟым Октябрьлы 40 ар тырмонэз котькытын паськыт пумитазы, вань калык демонстрацие потаз. Удмурт издательство печатлаз 138 пумо 932 сюрс книгаос но брошюраос. ДОССАФ-лэн Ижевск аэроклубысьтыз лётчикъёс Казаньысь зоная ӵошатсконъёсын нырысетӥ интые потӥзы. Союзъя мотоциклэн ипподромын ӵошатсконъёсын Леонид Шадрин СССР-лэн чемпионэз луиз. 1957-тӥ арын калык котьма ласянь ӧжыт эркынгес шокчиз ни. Е. Вяткина, Удмурт Республикаысь кун архивысь главной специалист. Егитъёсты выльвылъёсы келяло. Митинг ортче машиностроительёслэн Культура дворецсы дорын. Егитъёслэн фестивальзы - парад ортче Ижевскын. ДАРТ Ми - Россиын улӥсьёс Россилэн 65 улосысьтыз егитъёс люкаськылӥзы Удмуртие кылем арняе асьсэлэн форумазы. "Егитъёс - калыкъёс куспын эшъяськон понна" - сыӵе ӧтён улсын ужазы соос та нуналъёсы. Берло дыре угось ӵап та муген калыкъёслэн кусыпъёссылы саклык висъямтэен валамтэос, ог-огед вылэ урдылӥськонъёс ӝутскыло. Соин ик егитъёс пӧлын валэктон уж нуоно, аслыд но мукет калыкъёслы гажан мылкыд пыӵатыса, ваньмызлы ӵош огазеяськыса, Россимылэн данэз понна нюръяськоно. Берло 10-15 ар ӵоже егитъёс понна - та нырысетӥез табыдӟа ужрад. Азьветлӥсь егитъёс сяна, форумлэн ужаз пыриськизы Россия Федерациысь но Удмурт Республикаысь кивалтон ёзъёсысь дано адямиос. Республикаысьтымы Президентлэн нимыныз люкаськемъёсты ӟечкылаз Кивалтэтлэн Тӧроезлэсь ужзэ быдэсъясь Юрий Питкевич, пайдаё ужан мылкыд сӥзизы асьме улосъя Валтӥсь федеральной инспектор Сергей Чикуров, Кун Кенешлэн тӧроезлэн воштӥсез Владимир Агашин. Форумын валтӥсь адямиос луизы Россиысь калыкъёслэн ассмблеязылэн кивалтӥсез Рамазан Абдулатипов но Кун Думаысь депутат Светлана Смирнова. Солы паймонэз ӧвӧл. Ӵап та гажано адямиослэн кичӧлтэмзыя люкаськиз та форум. Туэ гужем ассамблеялэн кыкетӥ съездэз ортчиз. Отчы пыриськиз Россилэн вань 89 улосысьтыз 800 делегат. Съездын малпан кылдӥз егитъёслэсь но ассамблеязэс кылдытыны. Угось ХХИ дауре выжыку, егитъёс ӟеч валало, Атай музъеммес утён но улӟытон соос вылэ усе шуыса. Егит мурт азинтоз туала наукаез но экономикаез, турлы калык культураез, зурмытоз адямилэсь пуш дуннезэ, сюлмаськоз Россилэн ӟеч, данъяськымон улонэз понна. Вай, эше, бур кидэ! Россиын кык сю пала калыкъёс уло. Жаляса верано луэ, туннэ соос ваньзы асьсэды огкадь умой уг шӧдо. Куд-огзэ воксё но уг тодо, куд-огзэ укыр ӟеч "тодо". Сюрсъёсын калык быре калыкъёс куспын мынӥсь войнаосын. Кызьы кароно озьы - калыкъёс нюръяськон интые, мед эшъяськозы шуыса? "Нациез государствоозь ӝутоно, но со дыре ик ӧвӧл вунэтоно, тон Россиын улӥсь шуыса, - лыдъя Рамазан Абдулатипов. - Котькуд калык - со аслаз законъёсызъя улӥсь гражданской общество, малы кулэ сое тарканы? Луонлык сётоно котькудӥзлы аслэсьтыз культуразэ но историзэ азинтыны". Удмуртиын уло сизьымдон пала калыкъёс. Котькудӥзлэн аслаз кӧтӝожез вань, дыр, но инмарлы тау, лек керетонъёс та дырозь ӧз поталэ на. Ужало кызь пала национально- культурной огазеяськонъёс. Вить огазеяськон кылдытӥзы асьсэос егитъёс. Соос пӧлысь тужгес тодмоез - удмурт егитъёслэн "Шунды" огазеяськонзы. Табере со тодмо быдэс Россиын. Соин но форумез ортчытон интыен Удмуртия быръемын вал. Нырысетӥ нуналаз ик син шоры йӧтӥз суро-пожо делегация: пӧлазы вань кадь украинецез но, осетинэз но, ассириецез но... Озьы ик вылэм. Москваысь калык куспо ассоциация сьӧраз ваем пӧртэм калыкъёсысь егитъёсты. Кивалтӥсьсылэн Иван Владимирович Автандилянлэн верамезъя, али ассоциацие 25 пала калыкъёс пыро. Пӧлазы алигес вуизы кык удмурт студентъёс но. Кулэ-а Москваын таӵе огазеяськон, дор палысьтызы кошкыса пичи калыкъёсысь егитъёс асьсэды урод уг шӧдо кадь? - юасько Иван Владимировичлэсь. - Ӵапак соин ик кулэ. Бадӟым городэ вуыса, соос мукетъёсыныз суралско, асьсэлэсь шӧмзэс ышто. Нош милям огазеяськонамы соос асьсэ калыкенызы тодматэм сяна мукетъёсыныз эшъясько. - Дорады кыстӥсько, шӧдске, кунгож сьӧрысь но егитъёс? - Бен, милям ӧсъёсмы усьтэмын ваньмызлы. Трос Шунды ӝужан пал странаосысь Москвае дышетскыны лыктэм егитъёс. Ми шумпотӥськом, соос асьсэ доры Россиысь трос ӟечсэ нуыны быгатозы. - Нылъёсмес уд шуиське, дыр, ук? - (Гор-гор серекъя). Кин тодэ. - Собере соос отын бӧрдыса пуко... - Вот милемын эшъяськисьёсын озьы уз луы. Нылъёслэн-пиослэн луонлыксы вань котькуд калыклэн сямъёсыныз-йылолъёсыныз тодматскыны. Бен, со понна гинэ но огазеяськон - со умой ни. Нош Нарюян-Марысь ненец нылаш Валентина Тарасова малы ке ялан мылкыдтэм ветлӥз. Тодматскыса Валя мугзэ но вераз. Паймеменым, дыр, таӵе жӧлмай. Та быдӟа форуме вуоно дышетӥсь нырысьсэ вуэм. - Мон мукет калыкъёс шоры учкисько но, вожъяськыса синвуосы пото. Тӥляд, удмуртъёслэн сыӵе зол культурады, сомында огазеяськонъёсты, азьветлӥсь муртъёсты. Милям ноку но таӵе "Шундымы" уз луы, дыр. - Малы асьтэды озьы дунъяськоды? - Ненецъёс вань улытозязы дышемын тайгаын улыны, пужей вордыны, соос ноку но ӧз дӥсьтылэ асьсэ сярысь шара враны, калыке потыны. Али, конечно, ӝыныез дышетскылэмын ини, вань вылӥ образованиен адямиос, куддыр быгатӥськом ни огазе люкаськылыны, азинскон сярысь вераськыны. - Маке басьтӥд-а тон ас поннад та форумысь? - Туж трос. Нырысь ик, кыӵе ке оскон, дӥсьтон кылдӥз. Бертыса мон та форум, ассамблея, удмуртъёс сярысь мадё, оло, огазеяськонмес кужмоято сюлмаськытӥсь ужпумъёсты дӥсьтысагес сэрттыны-пертчыны выром. - Маин паймытӥз на тӥледыз удмурт шаер? - Туж чебер, небыт куазез. Милям отын али 30 градус кезьыт. Адямиосты но сыӵе. Но потэ вылэм ӟечгес Ижевскен тодматскем, такеме лыктыса, рос-прос адӟытэк кошконо луиськом. Фестиваль, фестиваль... Ворекъя тылъёсын театр, ворекъя фестиваль. Турлы калык дӥсьёсын егит муртъёс огезлэсь усто мукетыз кисьто сцена вылысен мылкыдзэс, шонергес ке, асьсэлэн калыксылэсь мылкыдзэ. Одӥг кырӟанын яке эктонын солэн ортчем сюресэз - вашкала йылолъёсыз но, туала сямъёсыз но. Азербайджан нылаш Таира Киримова вань сюлмысьтыз кырӟа яратон сярысь. Тани со дась кадь пиосмуртлы йыбыртъяса улыны, но куинетӥ чураз ик сэзъялске, бурдъёссэ вӧлъя, сутӥськыса эрик доры кыстӥське. Кырӟанэз воштэ шаман эктон. Асьме доры кыдёкысь чузъясько тайгаысь куараос, ырак пельтэ юзмыт уй пал тӧл, синэз мальдытэ уй ворекъян. Туж тунсыко. Кыдёкысь эшез - ненец ӵыжы-выжыосмылэн улоназы соку гинэ выйиськод но, шуак каро башкир пиос. "Анд" эстрадной ансамбль Башкириын тужгес тодмоез. Кыӵе но гурез уг шудо соос: ӟучсэ но, башкирзэ но, кунгож сьӧрысьсэ но, ой, тӥ чебер нылъёсты" но. Я, кытын удмуртъёс? Тани - зыл-зыл уяса пото "анданъёс". Кызьпуосын эктон туж вольыт чебер, но кулэ на вылэм задорзэгес, ну коть тапыртон-а, мар-а. Ӧз, удмуртъёс ӧз ни потэ, бӧрсьысь бӧрсе чузъясько бигер кырӟанъёс. О, сцена вылэ потэ осетин! Гадьзэ урдэ но... зал гудыртэ. Чырмыт кавказ гуръя Рустам эктэ лезгинкаез. Нокинлэн лэземез уг поты, но сое муспотон узбек нылаш воштэ, киоссэ пельпум вадьсаз нялмытак позыръяны кутске но аслаз шаераз вуттэ. Огкылын, синмаськод. Огаз пумиськонын Рамазан Абдулатипов вераз, мон, пе, пинал дыръям лезгинка сяна кыӵе ке эктонъёс вань шуыса ӧй ик тодылы. Нош соос тани - мар пӧртэм. Кӧня калык - сомында культура. Котькудӥз ас сямыныз чебер но паймымон. Одӥг ӝыт ӵоже, зэм, ваньзэ тодыса уд вутты, но одӥг ӝыт тырме ни аслэсьтыд культурадэ тодыса мукетъёсыныз тунсыкъяськыны кутскыны, соослы гажан мылкыдын пыӵаны. Визьлы брейн-ринге ветло Ну таӵеез Ижевскын ноку ӧй вал на! Ачиз Андрей Козлов асьме дорын зэмос телешудон ортчытӥз. Зэм. шудӥсьёс пӧлы шедьыны мон ӧй но вӧталля (берпум минутозь ринг луоз ик шуыса ӧй но оскылы), но Ижевскысь команда понна соосын артэ "висеменым" но туж данъяськисько. Та тӥледлы "Поле чудес" ӧвӧл - дас минутэн букваосты тодэ вайыны дыр ӧвӧл, секунд-кык ӵоже валэктон сётоно. Юанъёс нош, асьстэос валаськоды кыӵеесь. Но Ижевскысь кык университетъёсысь (УдГУ но ИжГТУ) визьлюкъёс кӧберамзэс чик но ӧз возьматэ, эсьма, нырысетӥ секундаз ик ӝӧк вылысь лампаос огдыре ӝуатскылӥзы. Тӥ тодӥськоды-а, кызьы мукет сямен нимаське грек кенӟали? УдГУ-ысь историкъёс нырысетӥ секундаз ик кнопкаез зӥбизы. Крокодил! - валэктонэзлэн шонерезлы оскыса вераз Сергей Пресняков. "Висисьёс" чабыны кутско. Ӧвӧл! - шуак каре Козлов - ГТУ - 15 секунд. Техникъёс шуо "динозавр" но эшшо одӥг очко уто. Кивалтон вакытаз Юлий Цезарь вералляз: "Адӟонтэм ке каризы, ӵок, мед гинэ..." Йылпумъялэ солэсь верамзэ! Время! - нош ик кеське Козлов. Историкъёслэн тылзы нырысьгес ӝуатске, таяз соос шонер валэктон сёто. Тӥляд тодэмды потэ-а, мар шуылэм Цезарь? Мед, пе, кышкалозы. Но туж но туж капчи юанъёслы: кылсярысь, кызьы шуо асьме дорын скандиданвъёслэсь "шунды коӵышпиоссэс" яке кыӵе зӧк выло, нимысьтыз шрифтэн, 250 грамм секталаем книга асьмелы пичи дырысен тодмо? Кема споръяськиз Козловен УдГУ-лэн командаысьтыз егит атай Иван Лазаричев. Кызьы нимаське тямыс питранэн ветлӥсь, одӥг адямиез гинэ нуыны быгатӥсь транспорт юанлы со чик малпаськытэк "ходунки" шуиз (аслам нылпие, пе, али соин ветлыны дышетске), но шудонэз нуись очко сётӥз технической университетысь аспиранткалэн Наталья Курколэн валэктонэзлы. Со шуиз: роликен конькиос. Та нылаш сярысь нимысьтыз вератэк ӧвӧл. Кык бой ӵоже ӵапак со тросгес очко ваиз командаезлы. Озьы ИжГТУ УдГУ-эз капчиен вормыса нюръяськыны кутскиз Москваысь командаен. Юанъёс шуггес луизы, жадем "висисьёс" выльысь улӟизы: Москва! Ижевск! Москва! Ижевск! - борддоръёс зуркамон кесясько соос. Наталья Курко уг сётскы, шонер валэктон сётыса, командазэ азьпала поттэ. Но вылез юан чузъяськем бере, москваос ижъёсты азьпалто. Нюръяськон ӟырда. "Мае тодаз вайытылӥз Гейнелы сюан марш? Время!" - нош кузёяське Козлов. Эх, жаль, та юанлы одӥгез но команда шонер валэктон ӧз сёты. Ну кин малпасал сюан гурез война маршен ӵошатыны? Чёрт со Гейнеен, но табере кык очко шудӥське. "4-тӥ июле 1886-тӥ арын Нью-Йорке француженка вуиз, нош со арын ик 28-тӥ октябре со калыкен тодматскиз. Кызьы солэн нимыз?" Конечно, асьме визьлюкъёс тодо вал, со Статуя Свободы шуыса, шуак тодазы гинэ ӧз лыкты, но ӵап со москваосты азьпала поттӥз. Жаль, но ижъёс всё равно устоесьгес вал. *** Наука но калыкез дышетон; культура егитъёс эксремизмлы пумит; трос калыкъем кунын тупаса улон, Россиын кун но военной служба; калыкъёслэсь кусыпъёссэс тупатонын сямъёслэн интызы но право, иворъёсты вӧлмытон ёзъёслэн интызы, Россиысь калыкъёс куспын туризм; егитъёслэн огазеяськонъёссылэн "РФ_ысь кун национальной политикая концепциез" быдэсъянэ пыриськемзы - сыӵе сюлмаськытӥсь юанъёсъя семинаръёс ортчизы форум дыръя. Солэн йылпумъянъёсызъя азинскон программаослы проектъёс ӵектэмын. Форуме пыриськем егитъёс странамылэн кивалтэтэзлы но Президентлы Владимир Путинлы егитъёслэн сюлмаськонъёссылы бадӟымгес саклык висъяны курыса вазиськизы. Туала егитъёсты Атай музъемдэ гажан, эшлыко мылкыдын будэтоно, - шуо соос. Ваче ки кутскыса гинэ асьмеос Россимес сяськаясь шаерлы пӧрмытом. Музейёслэн ужзылы сӥзьыса Ижевскын усьтӥськиз финно-угор выжы калыкъёслэн декоративно-прикладной искусствоя "Родники-2000" фестивальзы. Соин ӵош ик музейёслэн ужазы этнографиез кутон амалъёслы сӥзем научно-практической конференция но радъямын. Со ужрадъёс ортчытӥсько Удмутиысь Куӟебай Герд нимо национальной музейлы 80 ар тырмонэн валче. Вераськон мынэ элькунысьтымы но солэн палэназ музейёсты азинтон пумысен. Ивортонъёс лэсьто тодосчиос но музейёсын ужасьёс. Ужрадэ пырисько Эстониысь (Тарту) но Венгриысь тодосчиос. Кунгож сьӧрысь куноос вуылыны чаклало Киясово ёросысь Уддяди гуртэ. Фестиваль но конференция йылпумъяськоз 24-тӥ ноябре. Б. Никитин. "Шаркан ӝытэ" кызьы уд лык Тодэмды потэ-а, кызьы улэ туннэ нуналэ Шаркан музъем, кинэн но маин данъяське? Кырӟаны-вераны, эктыны быгатӥсь усточиос но отын вань гинэ. Ӧд адӟылэ на? Жаль. Нош модматскемды ке потэ - ӵапак дырыз. 24-тӥ декабре 16 часын шарканъёс нош ик пумиськозы Ижевскын улӥсь аспалъёсынызы, эшъёсынызы. Ӝыт ортчоз Удмурт драмтеатрын. Радъямын луоз шаркан усточиослэн киужъёсынызы адӟытон, куиськон фабрикалэн дӥськутъёсыныз вузкарон. Ваньмыз со тӥ понна, эшъёс. Озьыен, капчи мылкыддэс кутыса вамыштэ "Шаркан ӝытэ" Берга тыр воз вылын Сюмси ёросысь Дмитрошур школалэсь директорзэ Аркадий Васильевич Селезневез ветыл-скалъёс вӧзын туспуктыны турттӥськом вал. Малпанмы ӧзгес быдэсмы: пудооссы, пе, возьвылэ келямын. Шедьтӥм тани таӵе пештрок курег апаез - пӧрмиз кадь. - Асьмеды кызьы ке, маин ке сюдоно ук, - вера Аркадий Васильевич. - Со понна столовоямы ог люкетсэ ке но ас курег пузмылэсь, йӧлмылэсь пӧраськом. Сӥльмы но асьмелэн ик - парсь куайытӥськом на. Нош кин-о утялтэ пудодэс? - Пиналъёсмы. Усто, быгатыса радъям ужзэ А. В. Селезнев. Школалы пичильтык барыш ваем сяна, пиналъёс татын ик дышетско гурт котырысь ужъёсты бергатыны. Сяська-будосъёс будэтон, пудо-живот утялтон, фермер - оглом таӵе сюресэз ортчо нылпиос. Та удысъёсъя нимысьтыз урокъёс но радъямын, эсьмаса, чылкак математика яке химия сямен ик. Ай кык ар талэсь азьло Аркадий Васильевич эшшо одӥг ӟеч малпанэ вуэм: Ижевскысь гурт академиен ӵош ужаны. Табере татысь бадӟым классъёсын куд-ог дышетскисьёс дырын-дырын та вузэ потало: отын студент луыны дасясько. - Аркадий Васильевич, нош асьтэос дышетскемдыя физкультура урокъёсъя дышетӥсь луиськоды, дыр? - О-о! - паймытскиз кадь директор. - Тустыя адӟиське, выросъёстыя. Зэмен но, сюлэм кыскемезъя, Аркадий Васильевич спорт удысысь луэ. Ярысь педучилищеез йылпумъяса, дышетсконзэ со Чайковскийысь институтын азьланьтӥз на. Но берло аръёссэ школаын физрук луонлэсь палэнтӥськиз, табере ОБЖ урокъёсты нуэ. ОБЖя программалы сокем уг синмаськиськы, шуэ со. Умой, пе, луысал, нылъёсты но пиосты нимаз группаосын дышетыса. Собере программая вань сыӵе интыос, кудъёсаз нылъёслэн но пиослэн матысь кусыпъёссы сярысь вераськыны кулэ. А. В. Селезнев школаын директор луыса 7 арзэ тыше ни. Ужзэ капчи уд шуы - сюлмаськонъёсыз быдэс воз мында. Но малпанъёсыз пӧрмо, быдэсмо кадь - со тырше. Соинтэк-а школаын пумиськеммылэн ӵуказеяз Аркадий Васильевичен выльысь вожвыл луим - табере Сюмси районын. Ужъёсы вань, пе. Э. Кумачева, Туспуктэмез В. Беломорскихлэн. Пичи ке но - шумпотон Шаерысьтымы инвалидъёслэн пӧртэм огазеяськонъёсынызы ӵош, Инвалидъёслэсь калык куспо нуналзэс пусйыны дасяське Калыкез улон-вылонын утёнъя министерство но. Шуге-леке сюремъёслы озьы ик юрттӥськыны мылкыд каро мукет министерствоос но ведомствоос. Таиз ар удмурт шаер понна аспӧртэмлыко: республика пусйиз 80 ар тырмонзэ, бырйимы нырысетӥ президент. Шаерысьтымы шуге-леке сюремъёслы но бадӟымгес саклык висъяны чакламын. 30-тӥ ноябре 10 часын ӵукна "Металлург" культура дворецын ортчоз сӥё-дано ужрад. Отчы люкаськозы вань ёросъёсысь но городъёсысь инвалидъёс. Соослы татчы лыктыны юрттозы ёрос администрациос но инвалидъёслэн огазеяськонъёссы. Люкаськемъёсты шулдыртозы кырӟась-верасьёс усточиос, инвалидъёс асьсэос но быгатэмзэс возьматозы. 3-тӥ декабрьлы сӥзьыса, шаерамы ортчозы мукет но ужрадъёс. Юрттэт сётон но пенсия тырон ужпумъёсъя радъямын луозы телефон пыр юан-веранъёс, калыкез улон- вылонын утён удысын ужась специалистъёсын пумиськонъёс, огазьын пуконъёс но чай юон ужрадъёс. Л. Кимова. Юалэ - валэктом Пенсие дасяськисько Мон пие армиын быремен валче 595 манет пенсия басьтӥсько. Гужем пенсие ӧз йылы. Шонер-а мыным тыро пенсия? 2001-тӥ арын мыным 60 арес тырмоз - арлыдыя пенсие потон вакытэ вуоз. Кыӵе документъёс дасяно со понна? И. Крючков. Можга ёрос. - "РФ-ысь кун пенсиос сярысь" Законысь 50-тӥ статьяя армиын служить карыкузы бырем муртъёслэн анай-атайёссы пенсия басьтыны быгато: кышномуртъёс - 50 аресысен, пиосмуртъёс - 55 аресысен. Солэн быдӟалаез луэ: 1-тӥ майысен - 480 манет, 33 копейка, туэ 1-тӥ ноябрьысен - 528 манет 36 копейка. Со вӧзы ватсаське на 115 манет компенсация. Али сыӵе пенсилэн быдӟалаез (компенсациен ӵош) 643 манет 36 копейка луыны кулэ. Озьыен, пизэ ыштэмез понна Крючков Иван Ивановичлы пенсия шонер лыдъямын (55 арескысен). 60 арессэ тырмытэмез бере солы сётӥськоз на кыкетӥез пенсия - арлыдыз вуыса. Со понна Крючковлы районысьтызы калыкез утёнъя отделэ трудовой книжкаеныз но берло кык ар яке огъя ужам вакытысьтыз вить ар ӵоже басьям уждунэз сярысь справкаен вазиськоно. Уждунме уг ышты-а? Огвакытэ мон кык ужын ужай, лыдэ басьтозы-а кыкетӥ уждунме, пенсия лыдъякузы? В. Михайлова. Сюмси ёрос. - Пенсия лыдъяку лыдэ басьтӥськоз ваньмыз уждун, отысь Пенсиосъя фондэ страховой взносъёс тырылэмын ке. Валэктонъёсты дасяз С. Адаева - республикаысьтымы Калыкез улон-вылонын утёнъя министерствоысь отделэн кивалтӥсь. Пыралэ "Легендае"! Кез посёлок сьӧрысь лыктэмъёсты паймытъямысь уг дугдылы: я кибашлыосыныз, я котькыӵе сиён-юон поттэменыз, я ветлыны луонтэм сюресъёсыныз. Рос-прос асфальт уго таки ӧз шобырты уйпал райцентрез. Нош та вакытэ Кез маин паймытэ шуоды? Улӥ дунъёсын. Ижевскен ӵошатыса, сиён-юон татын шӧдскымон дунтэмгес, малы ке шуоно, данаксэ асьсэ дорын потто. Переработка умой пуктэмын. Трос магазинъёс но. Басьтӥсез бордаз кыскон понна, соос ог-огенызы ӵошатскыса дунъёссэс кулэсто. Калыклы со ик кулэ. Котькуд предприятилэн - аслаз фирменной магазинэз. Нош "Кезский элеватор" предприятие августлэн пумаз посёлок шорын ик усьтӥз "Легенда" кафе. Райцентр понна со бадӟым кузьым. Адямиос татын семьяен-семьяен шутэтско. Вордскем нуналзэс, сюанзэс, пумиськемзэс одӥг ӝӧк сьӧры пуксьыса пусъё. Кафелэсь юртсэ ӝутон - элеваторлэн директорезлэн Валерий Аркадьевич Семёновлэн сюлмаськонэз но кемалась вордскем малпанэз. Табере со быдэсмиз: йӧно, чебер пӧрмиз. Пушкыз но туж быгатыса лэсьтэмын. Каллен гинэ шудӥсь музыка улсын егитъёс пуко, кенешо. Ӵукнаысен ӝытозь кафеын калык уг бырылы. Сюдо но ческыт, дунтэм. Одӥг пол татчы пырем мурт мукет дыръя но кыстӥськоз, уката но кезьыт, тол ӝытъёсы. Соку, оло, пукон инты но шедьтыны шуггес луоз. Али но нуназе шорын буш ӝӧкез уд адӟы: кезъёс но, куноос но "Легендаез" ӝог синйылто. Тӥ но, Кез пала вуылыны учыр кемдӥз ке, палэнэтӥ эн кошке: одно ик пельнянен но пӧсь чаен утялске. Л. Медведева. Туспуктэмъёсыз В. Беломорскихлэн. "Легенда" кафе - элеваторлэн данъяськонэз. Ческыт сиське! Валентина Елиссева - кафелэн кивалтӥсез. Ож тӥрлык интыяз ик кылиз Россиысь Вож Кирос, Швейцариысь Вож Кирос но Глобал Грин (США) алигес химия ож тӥрлыкез быдтонъя но сое возёнъя форум ортчытӥзы. Москвае люкаськылӥзы уно кунъёсысь пӧртэм ведомствоосын но организациосын ужась адямиос. Россия Федерациысь Кун Дума химия ож тӥрлыкез быдтонъя нимысьтыз программа кутӥз вал. Но солы коньдон но, саклык тырмыт уг висъяськы. Озьы Курган улосысь Шучье городын 400 тонна химия ож тӥрлыкез быдтыны луонлык ӧз шедьы. Сое умойтэмен лыдъяло мукет странаос но. Нош США та ужлы коньдон висъяны пумит луэмзэ но вераз. Вуоно арлы Россия та ужпумез быдэстон вылысь, бюджетысь куать поллы уногес коньдон висъяны чакла. Со программаез быдэстыны луонлык кылдытэ кадь. Но мукет кунъёс ласянь юрттэт сётытэк Россия сое огназ уз вормы. Вераськонэ пыриськизы Россия Федерациысь боприпасъёсъя агенстволэн валтӥс директорез З. П. Пак, федеральной программалэн директорез В. П. Капашин, США-лэн Россия Федерациысь посолэз Джемс Коллинз, Франциысь, Италиысь посольствоосын ужасьёс, химия ож тӥрлыкез возись улосъёсысь губернаторъёслэн воштӥсьёссы. Озьы ик лэчыт вераськон ӝутскиз та ож тӥрлыкез быдтыку кышкытлыкез палэнтон, экологиез утён пумысен. Та уже кыскыны чакламын огшоры калыкез, интыосысь ёрос администрациосын, Вож Кирослэн ёзъёсаз ужасьёсты. Та форуме Удмуртиысь бадӟым делегация пыриськиз. Нош толон Удмурт Республикаысь мукет кунъёсын кусып возёнъя министерствоын пресс-конференция ортчиз. Отчы пыриськизы Россиысь Вож Кирослэн Удмурт улосъя ёзэзлэн директорез А. В. Арефьев, техника наукаосъя доктор, ИжГТУ-ысь профессор В. А. Алексеев, Камбарка ёрос администрацилэн кивалтӥсез А. А. Романов, Удмурт Республикаысь Правительстволэн химия ож тӥрлык ужпумъя комитетысьтыз В. П. Малышев, Кизнер ёрос администрацилэн кивалтӥсез В. Г. Ушаков. Н. Лялин. Дарт *** Одӥг пияшлы будыса но йырси потымтэ. Пилешсэ ватыса со ялан изьыен ветлэм, кышнояськемез беер валесын но изьызэ куштымтэ. Кышноез юа, пе: - Малы тон изьыдэ уд куштӥськы? - Шып ул, нылкышно! Милям калык сяммы сыӵе, - лек верам воргорон. (Куд-огез калык сямъёсын вато асьсэлэсь "пилешсэс"). *** Кызь-куамын ар талэсь азьло гинэ Россиын 27 пӧртэм калык (нация) лыдъяськылӥз. Демократия вуэмен воштӥськонъёс ортчем бере со лыдпус 176-ёзь вуиз. Россиысь калыкъёслэн ассамблеязылэн чакламзыя, ӝоген ортчоно перепис бере 200-лэсь трос калык шараяськоз. *** Ижевскысь одӥгез газет гожтэм, мар понна, пе, 500 сюрс манет быдтонэз вал? Тӥни кытысь пото валамтэос, - шуиз Рамазан Гаджимуралович. - Али огазеяськон понна 500 сюрсмес жаляськом, нош собере дас миллион долларъёсын кусыпмес тупатонлы быдтӥськом. З. Рябинина. Городлэн улонысьтыз Кузё одӥг ик кылиз ай Ижевскын улӥсьёс, тужгес но кин политикаен тунсыкъяське, чидатэк витизы 21-тӥ ноябрез. Та нуналэ угось городысь Дума кивалтонэ бадӟымесь воштонъёс пыртыны кулэ вал. Та дырозь Ижевсклэн кузёез одӥг вал, шуыны луоз, - Анатолий Салтыков, со ик мэр но, со ик Думалэн тӧроез но. Кӧняез ке депутатъёс лыдъязы, Анатолий Иванович огназ кык пукон вылын пуке но мултэс бадӟым власть кияз возе шуыса. Соин ик соос дэмлало Думалы нимаз тӧро бырйыны. Со сяна, Думалэн, пе, аслаз ялан ужась аппаратэз луыны кулэ. Валамон, таӵе кичӧлтон быдэсмиз ке, городэн кивалтонын но солэн вань улоназ туж бадӟымесь воштӥськонъёс вуозы. Соин ик шуак-дуак югдурез воштыны уг луы. Со сяна, ваньмыз законъя мед луоз шуыса, воштонъёс но ватсанъёс пыртоно. Соосты дасян вылысь, Думаын 1999-тӥ арын гужем (тӥни куддырысен кутскиз властез воштон понна нюръяськон) кылдытэмын вал депутатъёслэн нимысьтыз группазы. Декабрьлы соос ужпумзэс быдэстӥзы. Но выль ар азьын, кызьы тодӥськомы, Б. Ельцин отставкае кошкиз. Собере Удмуртилы президентлэсь постсэ кылдытон кутскиз. Городлэсь Уставзэ воштонэн йырин ӧз луы ни. Но депутатъёс ӧвӧл вунэтӥллям кичӧлтонзэс. Со йылаз-пумаз вуттыны кенешемын вал 29-тӥ, азьвыл чакламтэ, сессиын, 21-тӥ ноябре. Огдырлы кылдытэм ужась группалэн нимыныз вераськиз депутат Олег Красноперов. Кема гинэ вераськиз Олег Геннадьевич. Со рос-прос валэктӥз, мар со сыӵе интыысь кивалтэт (самоуправление), кыӵе солэн кужымез, правоосыз но быдэсъяно ужпумъёсыз. Ӧз азьтэмскы, самоуправление пумысен ваньзэ законъёсты, Россиын но, Удмуртиын но потэмъёссэ, тупен-тупен вераз. Депутатъёс соосты сотэк но тодо вылэм, шӧдске, эшсэс ӧз кылзэ, куспазы лабыртыса пукизы. О. Красноперов Уставе воштонъёс пыртонлэсь кулэзэ тазьы валэктӥз. Нырысь ик, Думалэн, пе, кужымез бадӟымгес луыны кулэ. Со мед быгатоз администрациез ки улаз возьыны но ужамзэ ялан эскерыны. Аслаз ужаз Дума нокинъя но медам кариськы, калыклэсь куронъёссэ гинэ мед быдэсъялоз. Дума кивалтыны кулэ городлэн ваньмыныз ваньбуреныз: пӧртэм фондъёсын, вуэн, музъемен. Со ик радъя муниципальной предприятиос кылдытонэз, соослэн прродукцизылы дунъёсты тупатэ, чакла. Депутатъёс администрациен кивалто, солэсь ёзъёссэ (структуразэ) тупато, со азе ужпумъёс пукто. Мэр арлы быдэ Думалы отчёт лэсьтэ. Валамон, Думалы аслыз нимаз аппарат кулэ. Со кылдытэ Думалы ужаны организационной, информационной но юридической луонлыкъёс. Солэн гаражез но, делопроизводствоез гинэ но аслаз луыны кулэ. Быдэсъясь ёзъёслэсь ужамзэс эскерыса возёз Эскерон палата. Соин кивалтоз Думалэн тӧроезлэн воштӥсез, мэрлэсь нимаз. Тӥни сыӵе ӵектонъёссэ вераз В. Хорошавцевлэн кивалтоно группаезлэн нимыныз О. Красноперов. Туж ке но оскымон со вераськиз, синмаськымон малпанъёс но пайда ваёно ужпумъёс вылэ чӧлскиз ке но, эриктэк малпан кылдӥз: та группае пырем депутатъёс малпало, администрацилэсь но мэрлэсь кужымзэс кулэстыса, асьсэлы бадӟымгес власть басьтыны. Таӵе малпанэз юнматӥз мукетызлэн депутатлэн, Марина Нохриналэн, верамез. Со шуиз: али, пе, Думалэн но администрацилэн огкадь кужымзы, соос ог-огзэсты уг зӥбо. Нош О. Красноперовлэн ӵектэм проектэз со огсыр югдурез сӧроз. Соин ик, быръем но быдэсъясь органъёсты одно ик висъяно, люконо ке, мед луоз нимаз Дума но, администрация но, кыкезлэн ик нимаз тӧроссы. Думалы оскыны кулэ огъя кивалтонэз, администрацилы нуналысь нуналэ быдэсъяно ужъёсты. Со сяна, кулэ на мэр но. Кин со, мар со луоз - валантэмгес. Оло, президент выллем шат? Вылаз ик, М. Нохриналэн верамезъя, со, пе, администрацилэсь тӧрозэ но юнматоз. Депутатъёс но, одӥгтэмак визьмо адямиос ке но, ваньзы ик валаллямтэ, шӧдске. Василий Шаталов юаз В. Хорошавцевлэсь: кин бен кужмогес, пе, луоз - мэр-а, Дума- а. Соиз меӵак валэктонлэсь погыльскиз: кинэ ке, пе, кужмогес карыны ум турттӥське, котькудӥз аслэсьтыз ужзэ лэсьтоз. Озьы кык пумо ӵектонъёс лэсьтэмын вал Думалэн кенешаз. Одӥгез - Виктор Хорошавцевлэн группаеныз, мукетыз сьӧрын шӧдӥськизы администрацилы дурбасьтӥсьёс. Кенешын тани-тани ваче пумит лэчыт нюръяськон пуромыны кулэ вал кадь ини. А. Салтыков вис карон ялӥз. Вис карон бере кыл куриз В. Хорошавцев. Со шуиз: куд-ог ӵектонъёс, пе, ыльысгес на, нош М. Нохриналэн кичӧлтонэз витьымтэ шорысь луиз, но со пумысен малпаськыны дыр кулэ. Соин ик ӵектӥз югдурез мукетъят эскерыны но соку решение кутыны. Депутатъёс син азьын улӟизы: матэктӥсь сильтӧл угось ӧз вуы. Вань ӵектонъёсты выльысь эскерон вылысь азьвыл группае эшшо сизьым депутатъёсты пыртӥзы на. Табере отын 19 адями, нош Думаын ваньмыз - ӧвӧлэз 30 депутат. Группалэн ужамез сессилэн ялымтэ кенешез кадь луоз-а, мар-а ини? Ужпумез эскерыны выль дыр ӧз тупатэ. Сессия йылпумъяськиз. Г. Тихонов. Сюлмысь потэм кылъёс Туэ тулыс май нуналъёсы асьме калык пусйиз Быдӟым Вормонлы 55 ар тырмемез. Та юбилей ар огшоры ӧй вал: бырйимы кунмылы Президент, кивалтон уже лыктӥз выль Праивтельство. Россия Федерациысь Кун Дума но Правительство, улон-вылонмес умоятон вылысь, кӧня ке законъёс кутӥзы. Таин ӵош ик кунмес но Россиысь калыкез шудтэм учыръёс шуге-леке вутто. Соос пӧлын - Чечняын ожмаськон, кунмылэн шунды ӝужан палаз ву тудӟон, Кавказысь гурезьёсын ӧръяськем вулэн гуртъёслы, адямиослы курадӟон ваемез, пӧртэм пуштылонъёс, ву ултӥ уясь "Курск" пыжлэн выемез но трос мукетъёсыз. Ожысь но ужысь ветеранъёс йыркуръясько кивалтӥсьёсты но огшоры адямиосты медъяса быдтонлы, наркотикъёсын вузкаронлы. Таӵе тырмымтэосты тодэм вылысь, кунамы быръёнъёс дугдылытэк ортчо. Саесъёсты пужалтыса ужам интые, депутатъёс но Федерацияя кенешысь адямиос дугдылытэк супыльто властьлэн тырмымтэосыз пумысь. Нош законъёсты тӥясь кивалтӥсьёс калык азьын кыл кутытэк кылё. Выль Президент, властез юнматон вылысь, кӧня ке вамышъёс лэсьтӥз. Зэм, солы пумит луись кужымъёс йырзэс ӝутӥзы. Бен, соиз валамон: пож вуысь чорыгез кутыны капчигес. Асьме шаерысь ветеранъёс сюлэмшугъяськыса пумитало та выллем учыръёсты. Соос тэк уг уло быгатэмзыя но асьсэлэн кужымзылы оскиськыса юртто улон-вылонмес умоятыны. Конференцие лыктэм делегатъёс но докладчик пусйиз: берло толэзьёсы республикаямы экономикаез ӝутыны кӧня ке вамышъёс лэсьтэмын. Со сярысь верало таӵе лыдпусъёс но: промышленной продукция поттон (вузъёс но калыклы юрттэт сётон), кылем арысь таӵе дырен ӵошатыса, 30,3 процентлы йылӥз. Улон юртъёс туэ куамын процентлы уногес ӝутэмын, пе. Нош ог дасо ар талэсь азьло кӧня калык выль корка пырон лэсьтылӥз, со пусъемын ӧй вал. Нош лыктэмъёс витизы. Вань делегатъёс пенсионеръёс вал. Соослэн тодэмзы потӥз пенсиос сярысь но. Инвожо толэзе, пусйиз, шоро-куспо пенсилэн быдӟалаез 694,6 манет вал. Тырмыт-а со? Сиён-юонлы, туж кулэ вузъёслы, улон интылы дун ялан будэ ук. Тырмыт уг быдэсъяськы ветеранъёс сярысь закон. Озьы ке но, арлыдоослэн огазеяськонъёссы городъёсын но гуртъёсын бадӟым уж нуо. Зэм, мӧйыослэсь арзэс но нуналзэс ортчытонэ куд-огез мылысь-кыдысь ӧз пыриське. Соинтэк-а ветеранъёслы эм юрттэт сётонысь, вузкаронысь тырмымтэос вылэ ӝожтӥськонъёс уг кулэсмо? Ветеранъёслэн кенешъёссы бадӟым уж нуизы Вормон нуналлы дасяськон но сое ортчытон вакытэ. Мӧйыос пумиськылӥзы дышетскись пиналъёсын. Вотка но Завьял ёросъёсысь пиналъёс ожын но ужын сӧсырмемъёслы юрт котырзэс чылкытатыны юрттӥзы. Секытэсь ожъёс пыр ортчем адямиос сярысь уг вунэто Игра, Каракулино, Сарапул, Якшур-Бодья ёросъёсын. Татысь ожгарчиос сярысь книгаос но поттэмын. Ветеранъёслэн кенешсы тау каре "Ижтяжбуммаш" но ИЭМЗ заводъёслэн кивалтӥсьёссылы, "Ветераны Удмуртии" книгаез поттыны юрттэмзы понна. Юбилей тросэзлы вунонтэм кылиз. Мӧйыос сярысь сюлмаськон ньӧмыз понна гинэ ӧй вал уго. Со сярысь уг вера шат пумиськонъёслы, кузьымъёслы, сиён-юонлы федеральной бюджетысь 18,27 миллион манет, 1055 путёвкалы 6,48 миллион манет коньдон висъян? Со гинэ ӧвӧл ай, городъёсысь но ёросъёсысь кенешъёслэн ивортэмзыя, куинь ар куспын 29 миллион манет коньдон кутэмын, ожын сӧсырмем куатьтон сизьым муртлы автомашинаос сётэмын. Таин ӵош ик вераны кулэ: куд-ог кенешъёс мӧйыосын дырын-дырын гинэ сюлмысь ужало. Соинтэк-а ветеранъёс ӝожтӥсько? "Праздникъёс, 9-тӥ май азьын гинэ тодэ ваёно ӧвӧл милемыз, сюлмаськон мед луоз быдэс ар ӵоже", - таӵе кылъёсты кылыны луэ унояз районъёсын. Шаерысьтымы ветеранъёслэн кенешсы ас ужезъя трос огазеяськонъёсын но ужъюртъёсын, шонерзэ верано ке, ваньмыныз герӟаськемын шуыны луэ. Угось котькуд коллективысь пенсие потэм адямиос вань. Туннэ ке ӧвӧл, ӵуказе луозы. Улон но аръёс огинтыязы уг сыло. Соин ик пичиез но, бадӟымез но кивалтӥсь, ас удысэз сярысь сюлмаськеменыз ӵош мӧйыосты вунэтыны кулэ ӧвӧл. Ас дыраз соос кыӵе ке заводлэн, колхозлэн, совхозлэн улоназы но ужазы мылысь-кыдысь пыриськизы ук. Трос ужпумъёс ӝутэмын вал республикаысьтымы ветеранъёслэн огазеяськонзылэн йылпумъянъёслы но быръёнъёслы сӥзем конференцияз. Ӧтчамын вераськись М. Е. Зыков Кенешлэн ужысьтыз умойзэ но, уродзэ но пусйиз ке но, ваньзэ вераны ӧз шедьты. Соос сярысь делегатъёс ивортӥзы. Ижысь ветеранъёслэн кенешсылэн тӧроез Б. Г. Аминов ӝутэ санаториосы путёвкаос висъян сярысь ужпумез. Городын арлыдоос трос гинэ. Путёвка курисьёс но данак. Городлы соос ӧжыт уг сётӥсько. Но ваньмыз кие уг вуо. "Малы? - юа Аминов. - Малы ке шуоно, соос пӧртэм пичи но кузёос бадӟым кие шедё, нош ветеранъёсты лыдэ уг басьто". Мӧйыосын ужась огазеяськонъёс вылэ ӝожтӥськонъёс вань ке но, тау карон кылъёс ӧжыт ӧвӧл. Тани Камбарка гроодысь ветеранъёслэн советсы куамын вить пенсионерлэсь квартариазэ тупатыны юрттӥз. Татын мӧйыос, огназы кылем пиосмуртъёс но нылкышноос сярысь сюлмасько районысь кивалтӥсьёс но. "Таин ӵош ик, - шуэ О. М. Сидорова, - палэнэ кылё ужысь ветеранъёс, соин ик ож пыр ортчемъёслыгес юрттыны тыршиськом". Ветеранъёслэн огазеяськемъёссы, уката ик ужъюртъёсысь узыресь ӧвӧл. Палэнысь юрттэт сётытэк, соос номыр лэсьтыны уг быгато. Та ласянь Воткинскын первичной организациос умоесь кусыпъёс тупатӥзы заводъёсын но мукет предприятиосын. Озьы мӧйыослы ӟечгес юрттэт сётыны луэ. Со сярысь ужпумез сэрттыса-пертчыса вераськиз В. П. Погадаев. Ожысь но ужысь ветеранъёслэсь огазеяськемъёссэс нимаз басьтыса верано ке, тужгес бадӟымез - "Ижмашысь". Татын ожысь ветеранъёс вить сю дас ньыль мурт. Нош война вакытэ ужам егитъёс, али пенсионеръёс, сюрсъёсын. Соослэн ужазмы но улэм-вылэмзы сярысь маде В. Г. Гунина: - Милям заводамы война вакытэ трос егит пиос но нылъёс ужазы. Соос бичазы фронтлы кулэ луись пыӵал тӥрлык. Ӵем дыръя, уез-нуналэз чаклатэк. Уноез пусъемын орденъёсын но медальёсын. Вань "Анай-героиня" нимен данъямъёсыз но. Али соос пенсие потэмын ни. Витё мӧйыос асьсэ сярысь сюлмаськемез. Зэм, сыӵе сюлмаськон ӧвӧл эмъюм вузась юртъёсын. Туж трос кулэ эмъюмъёсты пенсионеръёс басьтыны уг быгато. Гунина но мукет делегатъёс кадь ӝожтӥськыса сямен вераськиз тазалыкез утёнъя министрлэн воштӥсез В. С. Яковлев. Кылзӥсьёсты со туж ик буйгатыны ӧз быгаты, пӧртэм постановлениос вылэ чӧлскиз. Нош соин валче нокинлы капчи ӧз луы. Республикаысьтымы ветеранъёслэн кенешсылэн конференцияз озьы ик вераськизы Удмурт Кивалтэтлэн тӧроезлэн воштӥсез В. Е. Шудегов, калыклы социальной юрттэт сётонъя министр С. И. Андреева но мукетъёс. Пенсинеръёслэсь, ожысь но ужысь ветеранъёслэсь улон-вылонзэс умоятыны чакламын. Та конференциын ик ветеранъёслэн кенешсылы тӧрое быръемын М. Е. Зыков. Озьы ик чакламын Россиысь ветеранъёслэн кенешсылы ӧтчамаз делегатъёс. Со ортчоз Москваын 14-тӥ декабре. В. Смирнов. Москваысь кенешын Толон Бадӟым Кремлевской дворецлэн Александровской залаз ортчиз Россия Федерациысь Кун Кенешлэн заседаниез. Солэн ужаз пыриськиз республикамылэн Президентэз Александр Александрович Волков но. Кенешын эскеремын кунлэн 2010-тӥ арозь азинсконэзъя ужпумъёс. Удмурт Республикаысь Кун Кенешлэн пресс-службаез. Слово директору училища В.Н.Самойлову Мы не пашем, не строим, но готовим тех, которые учат и пахарей и строителей. Есть в Удмуртии село с оригинальным названием Дебесы. И не так уж оно неизвестно, если на вопрос "Откуда родом?", вы скажете: "Из села Дебесы, что на старом сибирском тракте", можно ожидать, что в ответ собеседник закивает головой: "Как же, знаю", даже если он никогда здесь не бывал. В 80-х-90-х годах ХВИИИ века окончательно сложились две ветки сибирского тракта: на севере - Петербуржско-Вологодская, на юге - Московско-Казанская. С небольшбми изменениями они сохранились и до наших дней, только теперь рядом со старой дорогой лежит лента асфальта. Обе ветки соединялись в Дебесах и далее в Сибирь вела лишь одна дорога. В разное время по этому тракту в Сибирь проследовали А. Н. Радищев, декабристы, А. И. Герцен, Н. Г. Чернышевский, бывал здесь Салтыков-Щедрин, шли в Сибирь партии простых уголовников, крепостных крестьян, чем-то не угодивших своим хозяевам. Звон кандалов не стихал на государевой дороге. Время шло, менялись правители, менялась и жизнь в старинном селе. В 1930 году партией и Советским правительством было принято решение о переходе ко всеобщему начальному образованию. Для этого потребовалась громадная армия учителей. В июле 1930 года по решению Удмуртского областного отдела народного образования Дебесская районная школа 2-ой ступени была реорганизована в массовую 7-летнюю для крестьянской молодёжи, а на базе восьми классов 2-ой ступени и ее педагогических кадров открыт Дебесский педагогический техникум. Большая ответственность возлагалась на первого директора Гавриила Федотовича Федотова по подбору кадров и созданию материальной базы училища. Федотов был автором Удмуртского Букваря "Грамота школаослы" и методических пособий к нему. Его ученики говорили о нем: "...личность выразительная, оптимистическая, это был человек, отец, учитель и друг..." 30-е годы - это годы сплошной коллективизации и ликвидации безграмотности. Учащиеся педтехникума были основной опрой учителей и партийной организации по решению многих проблем того времени. Они индивидуально занимались с безгармотными, работали с детьми по вовлечению их в пионеры, выступали с концертами, проводили факельные шествия. Всё это отвлекало молодёжь и детей от церкви, пробуждало интерес к новому (очевидно теперь, что лишь в последнем была ошибка). Вместе с тем существовали определенные проблемы с кадрами, мешало и отсутствие жилья. В 1932 году прибывают первые преподаватели с высшим образованием - выпускники Вятского педагогического института. В тяжелые военные годы возглавляла училище Варвара Мароновна Иванова. Ушла на фронт часть преподавателей и учащихся старших курсов, а оставшиеся совмещали учебу с работой: убирали урожай, заготовляли топливо, изготовляли теплые вещи для фронта. 20 апреля 1943 года была получена правительственная телеграмма: "Прошу передать учащимся и сотрудникам Дебесского педагогического училища, собравшим 7075 рублей на строительство танков, мой братский привет и благодарность Красной Армии. И.Сталин". В ответ на эту телеграмму учащиеся и преподаватели еще собрали 31500 рублей в фонд Красной Армии и 2 марта 1944 года получили вторую правительственную телеграмму. В конце 1941 года в Дебесы прибыли эвакуированные из Литвы дети и учителя. Здесь они на все военные годы нашли надёжную пристань. Дружба, рожденная в эти трудные годы, длилась несколько послевоенных десятилетий. В селе Дебесы до сих пор есть улица Литовская, а в Вильнюсе - улица Дебесская. Наступил 1945 год... Завершилась война. Велика была радость встреч и горечь утрат. Но жизнь продолжалась. После окончания войны наши выпускиники несколько лет распределялись по всему Союзу - это Бурятия, Тува, Узбекистан, Красноярский край, Сталинградская, Калининградская, Ульяновская области, освобожденные западные области страны. В августе 1956 года училище было расформировано. На его базе была открыта первая в УАССР средняя школа-интернат. В этот период были построены столовая, водонапорная башня, спортзал, учебная мастерская, склады, баня и четвертый корпус общежития. Училище было открыто вновь в 1963 году. А в 1967 году появилось здесь художественно-графическое отделение, у истоков которого стояли Я.И.Иванов, Е.Б.Суворова, В.П.Скородумов, В.Я.Корепанов. На сегодня художественно-графическое отделение училища закончило около 900 человек, а на школьном отделении подготовлено около 5-тӥ тысяч специалистов. Некоторые выпускники училища, накопив богатый педагогический опыт, проявив себя умелыми организаторами, сегодня работают директорами школ: Владимир Поздеев - Дебесская средняя школа, Римма Поздеева - Сюрногуртская средняя школа, Александр Холмогоров - Сарапульская школа � 12, Нина Гаврилова - Ижевская школа � 10, Людмила Петрова - Шарканский район, Виталий Белослудцев - Завьяловский район, Нина Сафронова - М.Пургинский район, Геннадий Лопатин - Игринский район, Владимир Савин - Балезинский район и т.д. Из среды наших выпускников вышли ученые, преподаватели высшей школы: Роза Ивановна Яшина - ветеран труда, заслуженный деятель науки, доцент кафедры удмуртского языка и литературы УдГУ; Алевтина Анатольевна Алашеева - доцент кафедры удмуртского языка и литературы УдГУ; Надежда Ивановна Ураськина, Елена Александровна Главатских - кафедра Удмуртского языка и литературы УдГУ. Преподаватели художественно- храфического факультета УдГУ: Василий Петрович Степанов, Светлана Сазонова, Галина Владимировна Коновалова. Достойно представляют республику в области культуры выпускники разных лет: артисты театра - Леонид Баженов, Анатолий Байтеряков; члены Союза художников - Александр Абрамов, Алексей Плотников; артисты ансамбля "Айкай" - Петр Данилов; диктор удмуртского радио, ветеран труда - Милитина Гаврилова; редактор газеты - "Удмурт дунне" Алексей Шкляев; фотокорреспондент этой же газеты - Владимир Беломорских. В разное время успешно работали и работают руководители в различных хозяйствах, обществах, объединениях: Анатолий Александрович Максимов - председатель Дебесского райсовета; Владимир Белослудцев - управляющий в центре занятости п.Кез; Виталий Калинин - председатель колхоза в Балезинском районе; Михаил Петрович Николаев - директор центра "Народное творчество" с.Дебесы и т.д. Учлище заслуженно гордится своими выпускниками, среди которых: народный поэт Удмуртии - Степан Павлович Широбоков, народный учитель России - Александр Иванович Горбушин (г.Глазов техучилище � 24), заслуженный учитель школ Удмуртской Республики - Алевтина Васильевна Чунарева (Шарканская средняя школа), заслуженный учитель школ Удмуртской Республики - Алевтина Антольевна Бушмакина (Дебесская средняя школа), заслуженный учитель Удмуртской Республики - Любовь Анатольевна Вечкалова (средняя школа). Сегодня училище занимается в новом корпусе, имеет 2 общежития на 300 мест, автогараж, столовую на 100 посадочных мест, столярную мастерскую, спортивный зал, спортивную площадку, лыжную базу, тир, библиотеку. Много сил для создания материально-технической базы в разное время приложили директора училища: Василий Петрович Пономарев, Дмитрий Федорович Шкляев, Валентин Георгиевич Бабайлов, Борис Павлович Кустов, Андрей Никитич Аверкиев, Николай Федорович Рыков, Виталий Викторович Чирков. Времена меняются, изменения претерпевает не только материальная база. Сейчас в училище три специальности: 1. Учитель начальных классов с дополнительными специализациями: валеология; музыкальное воспитание детей младшего школьного возраста; организация внеклассной работы во внеурочное время; коррекционная работа в начальных классах. 2. Коррекционная педагогика в начальном образовании без дополнительной специализации (первый набор в данном учебном году). 3. Изобразительное искусство и черчение с дополнительной специализацией народные промыслы. В училище работают 44 преподавателя, все с высшим образованием. Среди них двое носят звание - "Заслуженный учитель Удмуртской Республики"; 15 - "Отличник народного просвещения РСФСР"; многие награждены различными грамотами и дипломами. 38 % преподавателей имеют высшую категорию. В училище работают бывшие его выпускники, закончившие вузы и имеющие опыт работы в школе и органах народного образования: директор Валерий Николаевич Смойлов; заведующая педагогической практикой, отличник народного образования РСФСР - Ольга Павловна Иванова; заведующая методкабинетом, заслуженный учитель школ Удмуртской Республики Елена Александровна Кузовкова. заведующая ХГО - Василий Вениаминович Ившин; преподаватели: Зинаида Васильевна Стрелкова - отличник народного образования, кавалер Ордена трудовой славы ИИИ степени; Чирков Виталий Викторович - отличник народного образования; преподаватели И категории - Елена Николаевна Белослудцева, Валентина Петровна Ложкина, Татьяна Геннадьевна Перевозчикова, Владимир Иванович Эсенкулов; преподаватель высшей категории - Сергей Александрович Богатырев. Большая часть преподавателей начальной школы, где наши студенты проходят педагогическую практику, тоже выпускники училища - это Людмила Семеновна Рыкова, Татьяна Германовна Коробова, Елена Павловна Чиркова, Людмила Семеновна Протопопова, Наталья Викторовна Ускова, Любовь Вениаминовна Редозубова, Елена Петровна Первушина и другие. Они служат достойным примером для будущих учителей. Показателен тот факт, что в училище проходят обучение целые педагогические династии. Сейчас у нас учатся дети и даже внуки наших выпускников. А братьев и сестер, обучавшихся в училище, мы насчитали более сотни. Много добрых традиций сложилось в училище. Одна из них - ежегодные встречи выпускников в мартовские школьные каникулы. Преподаватели училища следят за дальнейшей жизнью и работой своих воспитанников, держат связь с отделами кадров роно, участвуют в работе учительских конференций. Также поддерживается связь через межрайонные консультации для учителей ИЗО, музыки, начальных классов, которые проводятся в училище. К числу традиций училища относится и вечер посвящения первокурсников в студенты, который проводится в День учителя. Традиционными стали студенческие конкурсы: "профессиональное мастерство", "вожатское мастерство", "конкурс знатоков методики математики", спортивная олимпиада, весенний туристический слет, первоапрельский капустник ХГО, конкурс на лучшего чтеца. Два года, как возобновил работу русский драматический кружок под руководством преподавателя Г.Горошниковой. Преподаватели и студенты ХГО регулярно участвуют в выставках живописных и декоративно-прикладных работ и лучших композиций, организуют передвижные выставки для поездок по школам и районам. Стала традиционной открытая защита курсовых работ на ХГО. Студенты ХГО курсовой работой оформили кабинет ИЗО в Дебесской средней школе. На школьном отделении организована показательная защита для студентов 3 курсов. Работы преподавателей и студентов ХГО стабильно отмечаются Дипломами И, ИИ степени на зональных и российских выставках, это в 1994 и 1997 годах в Москве выставка "Искусство и образование", в Красноуфимске в 1994 году, в Златоусте - в 1995 году, в г.Катайск - в 1997 году, в г.Стерлитамак - в 1998 году. Более 20 лет назад наши учащиеся под руководством бывшего завуча Серафимы Никитичны Загребиной, заслуженного учителя школ УАССР, создали группу следопытов и положили начало музея истории училища, который существует и пополняется. Около 20 лет исполняется и музею изобразительного искусства, основателем которого был бывший преподаватель училища Михаил Михайлович Зидияров, член Союза художников России. Последние 10 лет музеем занимается преподаватель живописи и рисунка Алевтина Кузьмовна Ившина, благодаря которой здесь постоянно организуются тематические экспозиции. 10-летие отмечает в училище музей народнго поэта Удмуртии Степана Павловича Широбокова, основателем котрого была бывший преподаватель удмуртского языка и литературы Мария Павловна Байметова. Дебесское педагогическое училище имеет грамотный коллектив, богатую историю, хорошие традиции, тысячи выпускников, работающих по всей стране. И в новых условиях коллектив готов продолжать работать по воспитанию и образованию молодого поколения ХХИ века. 2000-2001 учебный год кажется начался недавно, но на носу уже Новый год и начало нового века, еще пол учебного года - и он закончится, а затем нам, преподавателям Дебесского педучилища, принимать свежее пополнение. На будущий год набор в 1 группу планируется в количестве 125 человек. Желающих будет гораздо больше, однако поступят 125 человек те, кто покажет хорошие знания и склонности к педагогической работе. Педколлектив, безусловно, заинтересован в приеме умных и творческих абитуриентов. Ибо его гордость - это люди, чей труд поставлен на служение всему обществу Удмуртии. Дарт Вить чиньы умой, нош дасэз - умойгес Илья Дьяконов, Кез ёросысь гурт хозяйствоя "Мир" эштослэн кивалтӥсез. - Югдур странаямы туж секыт. Чечняын гинэ ожъёс уг мыно. Кызьы шуиз Рамазан Абдулатипов, ялымтэ война мынэ быдэс Россиын: пуштыло юртъёс, пазьгисько самолётъёс. Та югдурысь кызьы ке но потыны кулэ. Россиысь но бускель кунъёсысь егитъёсты огазеян понна, таӵе форум ортчытыса, туж ӟеч уж лэсьтэмын. Малпасько, шонер лэсьтӥмы Россия Федерациысь Кун Думае Светлана Смирноваез бырйыса. Солэн юрттэменыз ик таӵе бадӟым ужрад Ижевскын ортчиз. Кыӵе мылкыд кельтӥз форум? Туннэ нуналозь мон кырыж учкылӥ мукет калыкъёс шоры, уката ик Кавказын улӥсьёс пала. Форум бере малпанэ трослы берыктӥськиз. Кызьы адями юрттӥсьёстэк ӝутыны корказэ уз быгаты, озьы ик странамы но уз сяськая калыкъёслэн эшъяськонзытэк. Вить чиньы умой, нош дасэз - умойгес. Россия кужмо луоз ваньмы ӵош огазеяськыса гинэ. Нош та форум сю пала нациосысь егитъёсты огазе люказ. Визьмоесь, ӟырдыт мылкыдоесь. Возьдаськытэк, данъяськыса возьмато асьсэ калыксылэсь культуразэ, дӥськутъёссы вылысь гинэ но со адӟиське. Кез ёросысь ми вить кузя лыктӥмы та форуме. Туж шумпотӥсько татчы шедемелы. Асьме сэрегамы ми но егитъёсты огазеяны турттӥськом, ог-огмес гажаса, тупаса мед уломы. Туж секыт туннэ егитъёслы пыд йылазы султыны, уката ик удмуртъёслы. Асьме музъем выламы кузё луыны ум быгатӥське: мар ке секыт уж вань - со асьме вылын. Ум быгатӥське ӝутскыны. Малпасько, та форум удмуртъёслы азьлане вамыш лэсьтыны юрттоз. Татчы лыктэмъёс ас кужымзэс шӧдыны-валаны быгатӥзы. Гуртъёсамы бертыса, эшъёсмылы вералом ни вань адӟем-кылэммес. Ёросысьтымы Егитъёсын ужанъя отдел конференция ортчытыны дасяське, отын луоз, мар сярысь вераськыны. Верам потэ созэ но. Рамазан Абдулатипов но, мукет лыктэм куноос но удмурт егитъёс, "Шунды" дэменлык сярысь туж гажаса верало. Паймизы, вожъяськизы удмурт егитъёслэн ужзылы. Нокинэн уг керето, уг вожвылъясько, сьӧразы мукет выжы егитъёсты но кыско. ЖУРНАЛИСТЪЁСЫН ПУМИСЬКОНЪЁС Виктор САВЕЛЬЕВ: "Кезьыт толлы ваньмыз сямен дась" Правительствоын журналистъёслэн пумиськоназы озьы шуиз шаерысьтымы эстӥськонъя, энергетикая но связья министр Виктор САВЕЛЬЕВ. Со люкаськемъёслэн трос юанъёссылы умоесь валэктонъёс сётӥз. - Республикамы толлы 95-97 процентлы дась, - пресс-конференциез кутскиз Виктор Алексеевич. Выльдэмын 5 сюрс метр шуныт сётӥсь гумыос, 1200 иськем электроезъёс, ужало 1 но 2 номеро газ сётӥсь станциос (ГРС-ёс) но вуттэмын куинетӥез. табере Ленин ёросын чагыр эстӥськонлы уз ёрме. Элькунмылы толэз поттыны ичизэ 110 сюрс тонна музъем эгыр кулэ. Али 103 сюрс тоннаез дорамы вуттэмын ни. Газ но тырмыт висъялозы. Асьмелы со 3.6 миллиард кубометр кулэ, нош кутӥськом 2,9-3. Сомында ик сётозы 1 но 2 номеро Сарапулысь ТЭЦ- ёслэн эстӥськонзы окмымон дасямын. Югдур ӧжыт уродгес азьланезлы эстӥськон возёнэн. Кылсярысь, 125 сюрс тонна интые, 80 сюрс тонна гинэ мазут кылемын. Туэ РАО ЭС-лэн кивалтӥсез электрокужым басьтӥсьёс азе чурыт курон пуктӥз, ваньзэ тыронъёсты, пе, улэп коньдонэн гинэ сётъяно. Асьмелэн туннэ тыронъёс урод уг мыно. Но бадӟымесь тыронъёс люкаськемын, котьку сямен ик, "Ижмаш" огазеяськонлэн, 100 миллион пала, Горький чугун сюреслэн Иж ёзэзлэн, Сарапул городлэн но мукетъёсызлэн. Огъя вераса, "Удмуртэнерголы" предприятиос но организациос 570 миллион манет уксё сётыны кулэ. Соин сэрен та удыс уг азинскы, огинтыяз сылэ, электроподстанциос, котёлъёс но музонэз вужмо, соосты матысь дыре выльдоно луоз. Пумиськонын Виктор Алексеевич ивортӥз, туэ, пе, азьло аръёсы сярысь тол 4,4 градуслы кезьытгес луоз. Со шаерамы шӧдӥське ни. Дорамы тол ӧз вуы на, нош педлон порпи куараос кылӥсько ни. Министр озьы ик пусйиз, милям удысмы - эстӥськон, энергетика но связь кун бюджетэ ӝынызэ коньдон пыртэ. Асьмеос 1700 миллион киловатт час электрокужым поттӥськом. Вуоно арын чаклаське му вӧй кысконэз будэтыны но сое 7 миллион 720 сюрс тоннаозь вуттыны. 2001 арлы кун бюджетэ газ но шуныт сётонъя тыронъёсты интыаны нимаз гурен гожтыны учкемын. Туж умой со. Озьы ик ватсаса уксё шедьтоно луоз электрокужым висъянъя выль валтӥсь схема лэсьтон но электрокужымез шыръянъя программаез быдэстон понна. Нырысезлы 2 миллион манет кулэ, кыкетӥезлы - 1,8 миллион. Умоен пусйыны кулэ тани мае. Интыысьтыз вырӟе ни шаерамы нефтеперегонной завод пуктон. Вуттэмын ни документация, коньдон сйтэ Израильысь инвестор, ӧжытаз 110 миллион манет. Али асьмелы ялан пыдзэ пуктэ "Лукойл" огазеяськон. Со котьку сямен тужгес шӧдӥське кизён-аран вакытэ. Виктор Алксеевич озьы ик шумпотыса ивортӥз, туэ, пе, удысмы эшшо ватсаса 1 миллиард манет уксё пыртоз на кун но интыысь бюджетъёсы. Нош выль арын чаклаське 5 процентлы электрокужым поттонэз йылэтыны. Алигес элькунамы тодмо луиз, шарае потӥзы кузётэм электро сетьёс. Соя уж мынэ ни. Соин ӵош ик учкемын газотурбинаен электростанциос лэсьтон. Со 20 процентлы дунтэмгес электрокужым сётоз. Оглом вераса, Приморьеын кадь асьмелэн элетрокужым сётонэн шуг-секытъёс уз луэ. Со понна дыраз улэп уксё гинэ тыроно. Г.РОМАНОВ. Вуоно арлы бюджет Правительстволэн берло кенешаз нош ик вераськон мынӥз республикалэсь улон- вылон но экономика удысъёссэ азинтон программа пумысен но 2001-тӥ арлы бюджет сярысь. Бюджетлэн инъетэз пумысен вакчияк ивортӥз коньдон ужпумъёсъя министр Владимир Бельтюков. Со пусйиз, бюджетлэн барыш ваись люкетэз вуоно арын будэтэмын луоз 300 миллион манетлы. Со коньдонлэн ог люкетэз мыноз бюджет чотын улӥсь учреждениослы, уго отын ужасьёслэсь уждунзэс выль арысен йылэтыны чакламын. Со понна кулэ луоз 25,5 миллион манет коньдон. Нош бюджетлэсь расход люкетсэ йылтоно луоз "Ветеранъёс сярысь" Законэз быдэстон понна, пиналъёслэсь толалтэ но гужем шутэтсконзэс, нылпи садъёсын сюдонэз радъянлы, жилищно-коммунальной юрттэт сётонлы но мукет удысъёслы. Толлы дась "Удмуртавтодор" кун предприятие толэз ӟеч дасяськыса пумита. Предприятилэн кивалтӥсезлэн Александр Соловьёвлэн верамезъя, сюресъёсты умой возьыны тырмыт дасямын луо но сылал, солы кулэлык 80 процентлы быдэстэмын, нош лымы сузян техника - 75 процентлы. Нош предприятилы кыӵе ке юанъёсты кылдӥзы ке, вазиське таӵе телефонъя: 23-13-06. Грипплы пумит Тазалыкез утёнъя министерствоысь Аптекаосъя управленилы висъямын 1 миллион манет коньдон. Со кутӥськоз калыклэсь тазалыксэ утёнлы тужгес но кулэ луись но грипплэсь эмъюмъёс басьтыны. "Нылпиос-сӧсыръёс" "Нылпиос-сӧсыръёс" нимын выль программа дасяны ӵектэмын Калыкез улон-вылонын утёнъя министерстволы. Удмуртиын ог сизьым сюрс пала сӧсыр нылпиос лыдъясько. Соослэн шоро-куспо пенсизы - 505 манет. Ужпумез быдэстон понна, матысь кык аръёсы кулэ луоз 27,7 миллион манет коньдон. Нош вуоно арлы бюджетлэн инъетаз та удыслы 747 сюрс манет гинэ висъяны чакламын . Удмурт Республикаысь Правительстволэн пресс-службаез. Дарт Яратэ, уг яраты?.. Яратыку тусэз уг учко? Кыӵе нылаш уз синмаськы ӟырдыт джигитлы? Тӥни со кыӵе - ӝужыт, веськрес, пельпумъёссэ урдыса ветлэ, мыйык пумзэ кутылэ. Нош кавказ эктонэз эктыны кутскиз ке, амалтэк йыбырттод. Ижевскын ортчем форумын но огезлэсь гинэ ныллэсь йырзэ ӧз берыктэ, дыр, та "пӧсь" пиос, озьы-а? - юасько дагестан джигитлэсь Равиль Абдулаевлэсь. Со пумитам мынь потэ. - Мон виноват ӧвӧл, асьсэос лыкто.. - Ойдо та сярысь рос-прос вераськом, ӵектӥськом мон солы. - Тӥляд вашкала калык сямдыя, мизылы кышно анай-атай утча. Али со сям возиське-а? - Бен. Но мон отысь номыр уродзэ уг адӟиськы. Анай-атай нылпизылы шуд сӥзьыса озьы лэсьто. Али бен эриктэм уг каро - пиосмуртлэн быръем нылмуртэз соослы кельше ке, бакель сёто. - Нош со быръем нылмурт мукет калыкысь ке? - Чутрак уг каро. Но со нылмуртлы аслыз туж секыт йӧтоз - шуак мукет дуннее, мукет сямъёсын-йылолъёсын улӥсь калыке ву ай. Вылаз ик, милям арлыдо адямилэн верамез - закон, тӥляд кенъёсты сямен (вождэс эн вае), керетыса улӥсьёсты уз чидалэ. - Нош бадӟым калымед ке ӧз луы, кышнояськытэк улод-а? - Ассэ гажась пиосмуртлэн калымез одно луоз. - Кытӥ-отӥ депутатъёс пӧлын но трос кышноен улыны лэзён сярысь вераськыло... - Быгатӥсез али но улэ. Мар отын тунанэз - толыкед ке вань, возь, но соослэн ваньзылэн огкадь кӧтсы но, мылкыдзы но тыр мед луоз. - Малы тӥляд нылкышноосты али но ляльчи интыын уло? - Ой, мар тӥ, Аллахлэсь кышкалэ, кыӵе ляльчиос? Соос - нылкышноос. Нылпи утись-вордӥсьёс, солэсь бадӟым шуд но дан ӧвӧл шуо кадь ук. - Озьы ке но... Тани сьӧрады но нылъёсты ӧвӧл. Соин сыӵе малпан кылдэ, кавказ нылъёс дуннеысь улонэн асьсэос уг ик тунсыкъясько, воргоронъёссылы оскисько шуыса. - Воргоронъёслы оскон - со урод-а? Тӥляд тани, зэмзэ но, троссэ нылкышноос вылазы басьто, но соку мар каро воргоронъёс? - Равиль вождэ эн вайы, но Кавказ кема аръёс ӵоже "пӧсь интыен" кыле. Кызьы малпаськод, мар кароно югдурез умоятон понна? - Тодӥськоды-а, мар мон шуо. Кавказ - со аслаз законъёсызъя улӥсь, ассэ гажась общество. Солэсь данзэ ноку но уд тала. Кавказын улӥсь котькуд мурт кужымлы кужымен, гажамлы гажамен вазиське. Соин ик нюръяськон интые эшъяськоно. Ог-огмес валаны тыршымтэмы сыӵе адӟонъёсы вуттэ. З. Рябинина 1-тӥ ноябрьысен пенсиосты будэтэм сярысь Туэ 1-тӥ ноябрьысен 10 процентлы будӥз пенсия. Соин валче арлыдо адямиослэн нош юанъёссы кылдыло: асьмелэн лыдъяммыя сомында потэ, собесъёслэн - тамында. Вань ужпум со бордын: пенсионер дас процент йылтонъя басьтоно коньдонэз борды, но законъя йылэ ачиз пенсия гинэ. Компенсацилэн быдӟалаез уг воштӥськы. Кылсярысь, Петров В. Н. ноябрёзь 650 манет басьяз: 535 манет - пенсия, 115 манет - компенсация. Али солэн пенсиезлэн быдӟалаез 588 манет 50 копейка луоз, вӧзаз ватсаса 115 манет компенсация. "Выль" законъя 1-тӥ ноябрьысен пенсия тазьы лыдъяськоз: ИКПһ383 (туэ ИИИ кварталэ шаеръя шоро-куспо уждун). Сюлмаськонэз ӧвӧл, тӥ кудӥныз ке законэн йырин ӧжытгес пенсия басьтоды шуыса - районъёсысьтыды калыкез улон-вылонын утёнъя ёзъёсысь специалистъёс котькуд пенсионеръёслы кык законъя пенсия лыдъяса утчало: кудӥзъя тросгес потэ, соизъя ик тыро. Со понна тӥледлы нокытчы ветлонэз но, гожъянэз но ӧвӧл. Арлыдъя тужгес пичиез пенсия (кулэ мында стаж вань ке) 1-тӥ ноябрьысен 176 манет 12 копейка луиз. Валэктон дасямын УР-ысь Калыкез улон-вылонын утёнъя министерствоын ужасьёсын. Галина Романова МОН - АРТИСТ Серемес верос Аслэсьтым талантме мон нырысьсэ усьтӥ, возь вылысен турын мажсакум. Тэшкыли быдӟа гинэ вал ай соку, мажсаськон интыысь муӵъёс нош - кускозям. Кузь ныдо мажесэн читыр-чутыр ветлӥсько, усисько, пӧсь шунды шоры учкылӥсько - ку со йыр вадьсысьтым питырскоз ини. Лузьёс но комаръёс шоканэз пытсало - улэпкын сиыны дась. Ужаны амал ӧвӧл ни - синкылиосы тани-тани потозы но, бадӟым куараен вузыны кутско. Эшъёсы шоры учкылӥсько. Соос мынэсьтым ӝужытэсь - муӵъёс вискытӥ капчияк вамышъяса ужало. Ӧй чида - мажсам турын пӧлам кыштырак выдӥ, ӵоктаськи но - умме усиськем. Синме усьтӥсько - ымныр вадьсам эшъёсы паймыса сыло: Витялы, пе, мар ке но луэм, лэся - ымнырыз дарали кадь ӵыжектэмын, сэзъяса но уг сайка. Тужгес но зол котыртӥм Берга Толя эше. Ми соин соку ӵапак керетӥм вал: шурысь чукырна кутылыкумы, мынэсьтым синйылтэмме кырмиз но аслыз кариз. Мон сое бамаз мыжги, со - нырам. Чукырнаос сямен шурын асьмеос жомбыль вырим, сумедын погылляським, дэриен колӟояськыса, гуртэ вуим. Толя монэ соку вормиз - быдэс йырлы ӝужыт вал угось. - Искусственной дыхание лэсьтоно, - шуэ Толя али. - Синзэ усьтӥз кадь ини, - кин ке вераз. Нош мон синме усьяй но выльысь кыни. Толя пельзэ гадь бордам поныса кылзэ: шока ини, пе. - Шунды шуккиз, луоз, сое, - тодӥсьяське Толя. - Саюлэ нуоно. Мон мӧйыослы ивортыны ветло. Ӵап соку ныр вылам чибинь куртчиськиз. Номыртэм зол лыдэ. Синме усьтытэк, ымыным пельтӥсько - уг кошкы. Киын чабкы вал - эшъёсы адӟозы. Чидай ведь - чибинь вирыным пульдӥз но ачиз лобӟиз. Гуртэ нуытозязы, киме-пыдме но ӧй выретъя, синме но ӧй усья. Першалъёс шуизы: гуртын, пе, мед пукоз, шунды шорын трос медаз ветлы. Нош мон - мемей-дядяй уже кошко гинэ - шуре чукырнаяны бызисько. Толя эшетэк шулдырез ӧй вал ке но, со понна вань чукырнаос мынам луизы. Талантэлы луыса, школаез горд дипломен йылпумъяй. Тодӥсько вал угось: доска доры потӥд ке, ымыд медаз пытсаськылы: вера, вера, вера... Мар супыльтэмдэ уд валаськы ке но - чалмыт эн ул. Трос верамед пӧлысь дышетӥсь одно аслыз кулэзэ шедьтоз, ӟеч отметка пуктоз. Быдэ вуэм берам шӧдӥ: инкуазен сётэм бадӟым куараме люкаськемъёсын кутыны луоз. Калык угось бадӟым куаралэсь кылзӥське, зӥбломе, востэмме. Огаз кенешын вераськисько, кыкетӥяз, куинетӥяз. Ньылетӥяз кузёмы ӵектӥз: Виктор Ивановичез сельсовет тӧрое, пе, быръёно - калыкен одӥг кыл шедьтыны быгатэ. Кин-о бадӟым куаралы пумит султоз - ваньзы кузёен соглаш кариськизы. Сельсоветын ужаны кутскем берам, Толя эше жаль потыны кутскиз - табере угось со мынэсьтым быдэс йырлы лапег кылемын. Огаз кенешын, фермалы кивалтӥсь бырйыку, эшме ӵектӥ. Калык ӵаш поттэ, солэн, пе, кисыез пыдэстэм, тордэм комак, ваньзэ караз пыртыны дась. Калыклэн куспаз ӧй пыры, мед ойдо вань жобзэс кисьтыса буйгатскозы. Со куспын сцена сьӧры мынӥ, азьвыл ик дасям сьӧд костюмме, юг тӧдьы дэремме, ныркышет пасьта ӵыж горд галстукме дӥсяй, чиль сьӧд йырсиме вӧен зыраса вальк-вальк сынай но, йырме вылэ ӝутыса, калык азе потӥ. Монэ адӟыса, со кылзэ ньылӥз, лэся. Нош мон бадӟым куараеным гудыртӥ: - Эшъёсы, кидэс ӝутэ али, кин тӥ пӧлысь коньдонэз, нянез, сӥль-вӧез уг яраты? Чал -чал пуко, синзэс питыртыса, шорам учко. - Вот ведь кызьы луыса кошке, эшъёс: муртлэн венез но кор зӧкта потэ, курегез но ӟазеглы пӧрме, нянез но табань кадь адӟиське. Ку асьмеос ог-огмес гажаны, валаны кутском ини. Ойдолэ вожъяськонмес, йыркурмес выжыеныз пором. Ӟеч адямиез фермаен кивалтыны пуктом. Собере созэ но валалэ: кин дораз ваньбур люканы быгатэ, ужаз но озьы ик муш кадь сюлмаськись луоз. Ог минут мында вис лэсьтӥ. Ачим пумен сцена вылтӥ чильк-вальк кисьтаськись ботинкаеным, чебер дӥсеным йӧн-йӧн ветлӥсько. Калык шорам озьы ик синзэ кыньыръятэк учке. Бадӟым куараме небытгес карыса юасько: - Табере, эшъёс, кидэс ӝутэ, кин Анатолий Николаевичез фермаен кивалтӥсе пуктон понна? Синпӧртмаме иназ мынӥз - киос выллань ӝутскизы. Ӝыны ар но ӧз ортчы, Толя эше вылэ кенеш калык нош омырскиз: фермаысь, пе, я парсьпиос, я кунянъёс ышыло. Адӟисьёс но сюризы: городысь выль ӟучъёслэн, машинаоссы, пе, корка дорысьтыз уг бырыло. - Куштоно! Воштоно! - кесясько. Толяе луд кеч сямен шымырскиз, тани-тани пуконъёс улэ пыроз. Шӧдӥсько, татын бадӟым куараен синзэс уд пӧртма. Мон Толя доры мынӥ, коӵышпиез сямен ӝутӥ но калык шоры, пуктӥ. Собере залэ йӧн-йӧн вазиськи: - Адямиез пыд улэ лёганы капчи. Мон малпасько, сое тани тазьы, вашкалаос сямен дышетоно, - киме вылэ ӝутӥ но Толялэн ныраз вань кужмысьтым мыжги. Калык шуэрскиз, Толя доры бызиз. Кин кышетэныз нырзэ ӵушылэ, кин ке йодэн вата вуттэ. Эшме жаляло, монэ тышкасько. Ӵуказеяз Толя эше тордэм нырзэ кутылыса мыным шуэ: - Ну и артист тон, Витюш. Тау. - Мыным тау эн кары - калыклы. Солэн сюлмыз сыӵе жалясь, вир кисьтӥськемез адӟыны уг чида. Ӝытазе одӥг ӝӧк сьӧрын пукыкумы, эшме дышетӥсько: - Калыклэсь синзэ уд возъя, пельзэ уд ӵокта. Визьмын ужано. - Мынам угось тынад кадь талантэ ӧвӧл, - ӝожтӥське Толя. - Йырыд мар понна пельпумад пуке, киыд-пыдыд но интыяз. Кышноед но, нылпиосыд но - ваньмыз вань. Мон нош тани валесэз весь огнам мертасько. - Ма, тон шулты гинэ - любоез сьӧрад бызёз. - Мыным любоез кулэ ӧвӧл. - Кинлы сыӵе синдэ уськытӥд? - Олёнлы. - Ну сётӥськод тон, Витюш. Чеберен чебер, визьмын визьмо, но венё ӵушъял ук со. - Соин ик мынам сюлмам мертчиз. Котыраз уг лэзьы - артист, пе, тон. - Ма, артист ӧвӧл шат? - Олёнлы кулэ ӧвӧл. Толик, ойдо роленымы воштӥськом. Табере тон мыным юртты. Кенешим-вераським но Олён доры медпунктэ вамыштӥм. Толя монэ кунултӥм кутӥз, ачим кӧт бордам киосме понӥ но, шуш кесяськыса, медпунктэ пыриськом. - Ой, ой, кӧты! Лулме кыске ни, улэпкын сыске! Ой, ой! - лулӟылыса кесяськисько. - Олён, ой, Олён! Юртты, маке но кар! - Толя сюлворе. Олён шудӥськом шуыса, нырысь шорам но уг учкы вал. Мыным синкылиме поттоно луиз - бам кузям ӵужыр гинэ ва ське. Олёнэ монэ кушетка вылэ выдтӥз, кӧтме кутылэ, синме-кылме учке. Мар шуыны уг тоды. - Ой, кӧты! Вай ук кыӵе ке эмъюмдэ-а, уколдэ-а! - курисько. - Олён, адями кулоз, янгышсэ вылад куштозы, - Толя будэтэ. Олён кык укол пуктэм бере гинэ кесяськемысь дугдӥ. Кушетка вылысь ӧй султы, Толялы синмыным кырмыштӥ: кошкы ини, пӧй. Толя кошкем бере умме усемъяськи. Олёнлэсь солань-талань шугъяськыса ветлэмзэ лушкемен учкылӥско. Жаль потыны кутскиз. Мак сяська кадь чебер, визьмо нылашез кулымоназ кышкатӥм угось. - Олён, - шуисько каллен, небыт куараен. - Ортчиз кадь кӧты. Мар-о меда вал со? - Ачим но уг валаськы - аппендицитлы уг кельшы. Анализ сётоно луод. Эскерыны сое ёросэ келялом. Озьы мон толэзь пала Олён доры ветлӥ. Эмъясьлы, пе, кема висьыса улӥсь мурт матынгес луыны кутске. Венё ӵушъялэз мон пумен пуштырес коӵышлы берыктыны быгатӥ. Отӥяз, валамон ини, выжыкылын сямен, ӵош одӥг коркан шудо-буро улыны кутским. Шуисько ук: мон - артист, нош улон - со театр но, кино но. Мертчан луоз Кезысь етӥн сэстон завод кылем арын кема гинэ ужатэк сылӥз - ӧй вал куро. Туэ югдур умойгес, ваем етӥнлэсь 310 тонна мертчан сэстыны луоз. Озьы завод дас толэзь ӵоже кык сменаен ужаны быгатоз. Предприятие етӥн будэтӥсьёслы кык миллион 282 сюрс манет коньдон тырыны кулэ. Со пӧлысь кӧня ке люкетэз берыктэмын ни. Б. Никитин. Лечат результативно, поэтому много клиентов В 1990 году в Центр планирования семьи и реабилитации (ЦПСиР) с бесплодием обратилось 5200 человек. Из них с первичным бесплодием - 42%. Для сравнения: в 1995 году обращалось 1,5 тысяч человек. В прошлом году после обследования и лечения беременность наступила у 60% (у 3120 женщин). В 30% обращений беременность состоялась после проведения искусственной инсеминации спермой мужа или донора. Вот несколько примеров. Семья прожила 18 лет, не имея детей, жила в одном из райцентров Удмуртии. Очень желая иметь детей, и муж, и жена долгое время лечились в райбольнице. Когда они обратились в данный Центр планирования семьи и реабилитации, их обследовали и лечили в течение года. Затем наступила беременность. Женщина находилась под наблюдением и во время беременности. Она благополучно родила мальчика, которому сейчас уже три года. Семья очень благодарна врачам центра. Кстати, проблемы со здоровьем в данном случае были и у мужа, и у жены, поэтому лечились оба. На прием обратилась женщина в возрасте 38 лет с первичным бесплодием 14 лет. При обследовании супружеской пары выявлена инфекция - уреаплазмоз и сниженная проходимость труб у женщины. В ЦПСиР проведен десятидневный курс лечения инфекции и восстановлена проходимость труб. Долгожданная беременность наступила через 2 месяца. Другая женщина обратилась на прием в возрасте 41 год с вторичным бесплодием в течение 17 лет, с нарушением менструальной функции. В ЦПСиР была обследована и проведена коррекция менструальной функции, восстановлена проходимость труб, беременность наступила через 3 месяца после лечения. В ЦПСиР много лечится иностранных студентов, также приезжают из близлежащих регионов - из Кировской и Пермской областей, из Татарстана; из-за рубежа - из Кении, Германии, Израиля, Франции и других мест. П.СКОБЕЛЕВ. Фото В.Беломорских. Нуналлы быдэ сяська пӧлын Сяськаез кин меда уг яраты? Дунне вылысь сыӵе адямиез уд пумита, дыр. Мон котьку синмаськыса но вожъяськыса учкисько оранжереяын, теплицаын ужасьёс шоры, уката ик тол вакытэ, ӟырт кезьыт нуналъёсы. Ульчаын вистэм-вожтэм пелляське, нош отын - гужем. Кыӵе но сяськаос ӧвӧл! Ӵапак соослэн чеберзылы ӵыдытэк, агрономе дышетскиз, луоз, Таисися Ивановна Деветьярова. Вордскиз но будӥз со Пичи Пурга районысь Горд Шунды гуртын. Пичи дырысеныз тодмо музъем ужен. Гавриловъёслэн семьяязы со котькудӥзлы анай йӧлын пыӵамын, дыр, - ас сюдӥсь-вордӥсьсэ гажан, утялтон. Таисия Ивановна 20 арлэсь ятыр Ижевскысь оранжереяын сяськаос, корка пушкын будӥсь садъёс будэтэ. Кӧня шумпотон ваиз, кузьмаз ни меда ас яратоно уженыз? Чупрес сямо нылкышно олокытчы но вутске, выл но выль выжы будосъёс утча. Пумен ялан дышетске, сяська будэтон уго трос тодон-валанэз кулэ каре. Сое адӟод-валалод синмез палёмытӥсь букетэз адӟыса. Нош кин малпасал, корка пушкамы лавр, лимон, кофе, мандарин, гранат будэтыны луэ шуыса? Луэ вылэм. Таиз ини агрономлэн ужез, сюлмысь тыршемез. Л. Медведева. Т. И. Деветьярова, Ижевскысь "Декоративно-цветочные культуры" унитарной муниципальной предприятиысь агроном. Шӧкыч Шуасьёс (Улонысь учыр) Асьме доры арлы быдэ олокӧня пол вуылэ вормонтэм кышкыт висён - грипп. Маин но кызьы солэсь эмъяськыны мынам Мила апае табере ӟеч тодэ ини. Одӥг пол со нош ик гриппен черлаз но тодаз ваиз укно улаз октытэк кылем шуэз. Та учыр толалтэ вал. Мила апай внучказэ шуныт дӥсяз но салазки кутыса шуаны потӥз. Лымы нош кускын ӵош. Палисадник доры вуыса, со нырысь внучказэ шупу доры пыртыны малпаз. Ӟыгыртӥз но кенер сьӧры лэзиз. Нош соиз, соиз! Чыртыозяз лымые выиз. Пичи Ани кышкаменыз бӧрдыны ӧдъяз. Песяез шоры лымы пӧлын чир-р-р кесяське: - Ба-а-ба, кызьы мон татысь потом на? Ӝокасько ини! Мила апай но шулӟектӥз. Усьтыр-табыр Ани доры палисадник вамен тэтчиз. Нылзэ лымыысь мырдэм поттӥз но берлань ураме сэрпалтӥз. Табере аслаз потэмез уг луы ни. Кускозяз лымые таиз. Ма карыны ёрмыса, кызьы но озьы кенер вамен пал пыдзэ выжтыны быгатӥз. Нош мукетыз штани кукез штакетнике пыриз. Коть караул кесяськы. Кема озьы сылысал на, дыр, пал пыдыз салазки вылын, нош мукетыз - кенер йылын. Ярам штани кукез кеськиз. Табере внучказэ кияз кутӥз но выльысь палисаднике пыризы. Ачиз шуэз ӟускиосын вандылэ, нош внучкаез качыен ӟускиосты юдылэ. Озьы ужан шорысь пичи Ани зар-зар бӧрдыны кутскиз. Мила апай берытскиз но йырсазьзэ ик ыштӥське вал. Пичи Ани кылзэ кык качы борды лякем. Ымысьтыз вир вия. Шу бичанэн йырин ӧй вал ини. Кенер сьӧрысь бызьыса корка пыризы. Анилэсь кылзэ шуныт вуэн качы бордысь мозмытӥзы. Нош пичи Ани кылыз мӧзмем бере, вань кӧт ӝожъёссэ песятаезлы кисьтӥз. Кыӵе но учыръёс уг луо асьмелэн улонамы. Т. Юферева. КЕЗЫСЬ ПИЩЕКОМБИНАТЛЫ - 60 Ӵош вордӥськизы, ӵош вамышъяло Кезысь пищекомбинатлэсь сиён-юонзэ республикаямы тодӥсьтэмез ӧвӧл, дыр: пиналэз но, арлыдоез но. Шаерамы со одӥгез огсыр но усто ужась предприятие. Районын сырзавод бере (му вӧй поттӥсьёсты вератэк) интыысь бюджетэ выт тыронъя кыкетӥ инты басьтэ. Нош выльдӥськон но рынокен экономикае выжон вакытэ мырдэм шоказ. 1994-тӥ арын луиз усьтэм амалэн ужась "Кезский пищекомбинат" акционер огазеяськон (ОАО). Туннэ мадём предприятилэн кылдэмез но азинскемез сярысь. Туэ солы 60 ар тырмиз. Тупаны но кулэ, огазеяськонэн ӵош ик вордӥськем солэн али валтӥсь директорез Евгений Михайлович АРДАШЕВ. Солэн валаса ужъёсты бергатэменыз пищекомбинат пыд вылаз йыг-йыг султӥз, ческыт но ӟеч сиён-юон поттэ. Продукцизэ басьтӥсьёс вань, кӧняез ке бускель Пермь улосэ но кошке. Предприятилэн ортчем сюресэз туж тунсыко. Тани уд но малпа, 1940-тӥ арын пу юртэ усьтэм райпищекомбинат туала усто огазеяськонлы сюрес лёгись вал шуыса. Соку со выриз нюлэс емыш пӧзьтонэн, губи, кубиста но мукет бакча сиёнъёс сылалтонэн. УАССР-ысь Сиён-юон промышленностья наркоматлэн косэмезъя, 1940-тӥ арын 28-тӥ мае нырысетӥ директоре юнматэмын Андрей Алексеевич Ложкин. Соку татын 7 мурт ужаз. Та арын ик шаерысьтымы 11 городъёсын но районъёсын сиён-юон поттонъя предприятиос кылдытэмын вал. Наркомпищепром Кезын комбинат пуктыны 6 сюрс манет уксё висъяз. Солы косэмын вал колбаса но поттыны. Но войналэн тулкымъёсыз татын но зол шӧдӥськизы. Со дыре ик Пужмезь, Кузьма но Полом гуртъёсын усьто заготпунктъёс, витаминэн узыр кыз лыс ву дасяны но майтал пӧзьтыны кутско. Та вакытэ уго берлоез арбери юн кулэ вал, тужгес но калыклы. Нош комбинатын одӥг ужасьлы 8 час ӵоже 12,5 килограмм пряник пыжыны норма тупатӥзы. Предприятилэн вал аслаз пызь изонъя 3 вукоез. Вератэк кельтэм уг поты одӥг тунсыко учырез. 1945-тӥ арын 1-тӥ мае предприятие люка военнослужащийёслэсь 22 нылпиоссэс но соосты куноятэ шыдэн, сӥлен, котькудӥзлы сётэ одӥг курег пуз, 50 грамм печення но 200 грамм нянь. Соку нылпиос понна со самой бадӟым шумпотон но праздник вал. Комбинат ялан юнмаз но паськытаз. 1945-тӥ арын вуттӥзы крахмал но патока поттон заводзэс. Со арын предприятие поттӥз 4 тонна пряник но печення, колбаса - 1,1, сылалтэм кубиста - 1,5, огреч - 0,5, сылалтэм но куасьтэм губи - 0,1, повидло - 0,4, кисель - 0,3, куасьтэм емышъёс - 6,7, кофе - 6 тонна, сюкась - 400 литр, но трос музонзэ. Озьы ик будэто вал ю-нянь, етӥн, бакча сиён, картофка, вордӥзы скал, вал, ыж, ӟазег, ӵӧж, курег но музонзэ. Ваньзэ та ужъёсты быдэсъяз 42 мурт. Туннэ поттоно вузъёсын нокызьы уд ӵошаты. Та аръёсы ик пищекомбинат азьмынӥсьёс радэ потэ. Коллективез пусъё ВКП(б)-лэн обкомезлэн но Удмурт АССР-ысь Министръёслэн Кенешсылэн киысь кие вошъяськись Горд Знамяенызы. 1960-тӥ арын октябре директоре пукто Борис Иванович Артемьевез. Со предприятиен 24 ар кивалтӥз. Та дыр ӵоже комбинат выльдӥське, секыт ужъёс капчиязы, кирпич юртъёс ӝутӥзы. Узырмизы выль оборудованиен - пряник лэсьтыны но юзмытӥсь юонъёс лэзьяны машина басьтӥзы. 1968-тӥ арын райпищекомбинатэз крахмал но патока поттӥсь завод каризы, нош 14 ар ортчыса, выльысь пищекомбинат луиз. 1984-тӥ-1989-тӥ аръёсы предприятилэн директорез вал Владимир Евгеньевич Кондратьев. Пищекомбинат вамышъёссэ уката кузёмытэ. Газэн ву лэзьяны линия пукто. Со одӥг часкын 1,5 сюрс бутылка тырмытэ. Азбаразы ик музъем пушкысь ӟеч ву кыскыны скважина порто. Пукто 30 тоннаем автовесъёс но азбарзэс асфальтэн шобыртыны кутско. 1989-тӥ арын пищекомбинатлэн коллективез директоре быръе Евгений Михайлович Ардашевез, Кезысь тодмо кивалтӥсез. Сое татын гажало шуг-секытъёсты вормыны быгатэмез понна. Азьло со котькытын ассэ умоен гинэ возьматылӥз. Калыкен ужаны дышетӥз школаын, комсомольской но партийной ужын, кивалтӥз "Сельхозэнерго" предприятиен, тыршиз районысь гурт удысъя управлениын но мукет интыосын. Котькуд удысын трос кужымзэ, визьзэ но дырзэ сётылӥз. Нош пищекомбинатэ лыктэмез бере предприятилэн выль вакытэз кутскиз: лябӟон дырыз но вал, но ӝутскемез, юнмамез син азьын. Азьло ваньзэ вылӥысен косылӥзы, план сётъязы но музон. Нош 90-тӥ аръёсы предприятиос ас эрказы лэземын вал. Кутскиз рынокен экономикае потон. Ваньзэ аслыд шедьтоно вал. Но бадӟым опытэн кивалтӥсьлэн Евгений Михайловичлэн суй-пыдыз ӧз юскиськы, ялан сюлмаськиз предприятизэ юнматон, азьланезлы ӟеч инъет лэсьтон сярысь. 1990-тӥ арын вутто трансформаторной подстанцизэс, нош ньыль ар ортчыса - котельнойзэс. Сое газэн эсто. 1992-тӥ арын пукто чебер администратино- бытовой юрт, выльдо производственной корпусъёссэс. Со юрттэ выль пумо сиён-юон поттыны, кылсярысь, мармелад, лукум, конфетъёс, драже, сахарной печення но выль пряникъёс. Предприятие огдыре ужасьёслы улон инты но лэсьтӥз. - 1992-тӥ арозь предприятие сахар, пызь но мукет сырьё фондъёсъя басьтылӥз, - маде Евгений Михайлович. - Продукцимы но озьы ик нарядъя кошкылӥз. Соку кулэ ӧй вал снабжениея но сбытъя ёзъёс. Нош та дырысен планъя ужась экономика куашкатэмын вал. Быризы поставщикъёс но, басьяськисьёс но. Секыт луиз сахар шедьтыны. Комбинат пытсаськон калэ вуиз, тужгес но ичи сиён-юон поттӥм 1993-тӥ�1994-тӥ аръёсы. Шуг-секытысь потыны амалъёс шедьтоно вал. Директор уй-нуанал малпаськылӥз, адямиосын кенешылӥз. Кин утча, со шедьтэ. Районысь кивалтӥсьёсын вераськыса, одӥг кылэ вуизы, пищекомбинат огазеяськиз Ижысь минерально-фруктовой заводэн, солэн ёзэз луиз. Дыр возьматӥз: шуг-секытысь потыны шонер сюрес быръемын. Ижысь завод юрттӥз комбинатэз выльдыны. Азьвыл ӵужъем изон цехазы инъязы, юзмытӥсь юонъёс но вина лэзьян линиос, басьтэмын драже но лукум лэсьтонъя выль оборудование. Тӥни озьы 1995-тӥ арысен комбинат выльысь улӟыны, тросгес сиён-юон поттыны но ватсаса ужасьёс кутыны ӧдъяз. Али но, предприятие пумен кужмоя. 1997-тӥ арын пуктӥзы пластик бутылкаосы интыысь минерал но газэн ву лэзёнъя линия. Басьтӥзы кондитерской сиён-юон пыжон, ыльнянь суран куинь машина но музон оборудование. Озьы ик паськытатӥзы кондитер цехсэс. Пищекомбинат тужгес но ӟеч ужаз 1998-тӥ арын. Соку 1847 тонна кондитерской изделиос поттӥзы, сиён-юон концентратъёс - 127, крахмал - 152 тонна, минерал ву - 455 сюрс ӝыны литр но мукет. Ужасьёссы 200-лэсь уно луизы. Нимысьтыз ватсаны кулэ, предприятиез улӟытыны но азинтыны тужгес трос кужымзэ, дырзэ но визьзэ сётӥз али директор Евгений Михайлович Ардашев. Пищекомбинатэн ӵош вордӥськем кивалтӥсь ӵош вамышъя коллективен. Шумпотоно предприятилэн азинскемезлы. Татын дыраз уждун сётъяло, вань бюджетъёсы но фондъёсы ӝегатскытэк выт тыро. Басьяськисьёсты предприятие трос пол паймытъялоз на выль сиён-юонэн. Нош туннэ сюлмысьтымы ӟечкыласьком пищекомбинатлы но солэн валтӥсь директорезлы Евгений Михайлович Ардашевлы 60 ар тырмемен. Мылкыд кариськом уката бадӟымесь азинсконъёс басьтыны но вамышъёстэс кузёмытыны, сӥзиськом ваньдылы юн тазалык но шудо-буро улон. Геннадий РОМАНОВ. Владимир Беломорских (фото) Евгений Ардашев. Пищекомбинатлэн таӵе чебер "Аромат" кафеез. Конфет лэсьтӥсьёс. Производстволэн кивалтӥсез Анна Ивановна Чмеленко. Помидор но, губи но Удмурт шаере мукет улосъёсысь куд-ог лыктэмъёс серем карыса музъеммес шуо: "Страна вечнозеленых помидоров". Та будос ӟучъёс но удмуртъёс доры огдыре вуэмын. Огдыре ик со кисьма кызьы ке Москва но Тверь палан, озьы ик асьме палан но. Соин ик озьы веран шонер уг луы. Помидор кисьма теплицаын но, убоын но. Но али мынам верам потэ шаермылэн синмаськымон инкуазез сярысь. Тэле ветлыны яратӥсько бере, солэсь "сямзэ" умой тодӥсько кадь. Куддыръя солы паймисько но. Тани али но Ягул черкогуртысь тэле пырасько. Отын уно тунсыкоез вань. Тани 6-тӥ ноябре отысь пырак быдэс куды сьӧд нингуби, чургуби (рядовка) но лӥялгуби (опёнка) бичай. Та нуналэ куазь туж кезьыт ӧй вал на, пужмер но ӧз усьы, нош ӵуказеяз кынтӥз ини. Озьы ке но, арня ортчыса, нош ик тэле пырай. Ӧй пӧяськы, сомында ик кынмем губи бичай, я коть лымы усьыса ӧз вуы на вал. Али лымы усиз ини, но кин тодэ, со, оло, шуналоз на ай. Пыралэ тэле, шуд усиз ке, тӥ но губи шедьтоды. Кынмылэм губилэн шӧмыз уг быры. Ческыт мед кошкоз. Н.ВОЗИСОВ. Закон пуж кадь, капчиен пыр потом. Депутатъёс нунал лумбытэн законъёс малпаса пуко. Но тросэз соос йылаз пумаз вуттымтэ, "кышъямез" кулэ каро. Бӧрдо пенсионеръёс, бӧрдо анайёс, бӧрдэ огшоры калык. Законасьёс гинэ малы ке но мыньпото. Суредез И.Азимовлэн. КУНООС Пӧсь парен! Толэзь талэсь азьло школаямы ивор вӧлмиз - дорамы Америкаысь куно лыктэ! Юта штатысь дышетӥсь Зен Бенингеш, конкурсын вормыса, Россие путёвка утэм. Таӵеез Норьялан, конечно, ӧй вал на. Но шумпотонэн ӵош трос сюлмаськон но сюриз: школаез утялтоно, куноез пумитано, утялтоно, интыяно... Дышетӥсьёсмы тыршизы ни бен. Бӧрысьгес ми соин матысьгес тодматским, эшъяським. Со огшоры школаын искусствоя урокъёсты нуэ, яратэ сюрреализм амалэн суредаськыны. Россие мынонэз сярысь тодыса, туж шумпотэм, корка шортӥ, пе, тэтчаса ветлӥ. - Кыӵе бен мылкыд кельтӥз Норьямы? - юалляськиськом ми солэсь. - Пайми капчи мылкыдо калыктылы, шуныт пумитамдылы. Малпасько вал, автоматъёсын охранникъёс пумиталозы шуыса. Ноку уг вунэты мунчое пыремме - лулы потӥське вал, чир кесяськи. - Нош огъя Россия паймытӥз-а маин ке? - Ваньмыныз. Кельше аспӧртэм улэмды, фотое пуктылӥсько пудо-животэз но, вуж коркаосты но. - Кыӵе праздникез тужгес ярато Америкаын? - Рождествоез. Соку ваньмыз ог-огзэс ӟечкылало, кузьмасько. Мынам кузпалы керамик, со юри вань ӵыжы-выжыосмылы горд сюйлэсь горшокъёс лэсьтэ, собере ми соосты Рождество уе тодмоосмылэн ӧс азязы тыриськомы но ӧсазы йыгаськыса пегӟиськом. - Вань-а тӥляд нылпиосты? - 11 кузя. - ?! - Куинез асьмелэн, мукетъёсыз приютысь басьтэмын. Улонын озьы луэ: ачид кайгуэз адӟытэк, муртлэсьсэ уд валаськы. 15 аресъем пимылы шудтэм учыр шедиз - ангес пыртӥз пуля потӥз, ымнырыз ярантэм луиз. Туж трос курадӟим, пластической операция лэсьтӥм, витьтон вить миллион долларлэсь трос коньдон быдтӥм. Со учыр бере мон улон шоры чылкак мукет синмын учкыны кутски, адямиез жалясьгес, валасьгес луи кадь. Зен милемлы но сыӵе потӥз. Кыӵе со визьмо, чебер, небыт сюлэмо. Солэн семьяез, пе, узыр ӧвӧл, но коньдон люкаса, куке но семьяеным ӵош Норьяла лыкто на, шуиз. Школамылы со телевизор но видеомагнитофон кузьмаз. Тау тыныд Зен, ӟеч ужед ӟечен мед берытскоз. Таня Бектышева. Норья школа, Пичи Пурга ёрос. ГОЖТӤСЬКОН-2001 Вуоно дауре вамыштомы артэ Гажано эшъёс, 2001-тӥ арлэн нырысетӥ нуналъёсысеныз ик газетмес басьтэмды потэ ке, кема тунаса эн улэ - гожтӥськон кыстӥськоз 20-тӥ декабрёзь. Тау карем потэ, вуоно дауре но "Удмурт дуннеен" ӵош вамыштыны мылкыд карисьёсты. Кин гожтӥськиз ни, нош кин та нуналъёсы почтае вамыштоз. 20-тӥ ноябрьлы газетмылы гожтӥськон тазьы радъяськиз: Ёросъёс 20-тӥ ноябрь 2000-тӥ ар 1-тӥ январь 2000-тӥ ар Алнаш 1324 1780 Балезино 298 617 Вавож 249 367 Вотка 26 81 Глазов 109 160 Грах 70 222 Дэбес 204 462 Завьялово 393 736 Игра 475 767 Игра 475 139 Ижевск 83 6 Камбарка 2 2 Каракулино - - Кез 169 338 Кизнер 152 314 Кияса 250 397 Красногорск 20 21 Пичи Пурга 980 1580 Можга 640 1228 Сарапул 18 30 Селта 138 232 Сюмси 18 34 Ува 227 361 Шаркан 945 1600 Юкаменск 42 61 Як.-Бодья 122 236 Яр 71 82 Ваньмыз 7020 12089 Газет одӥг - дунъёс пӧртэмесь Кызьы ивортылӥм ни, Ижевскын улӥсьёс "Удмурт дунне" газетлы улон юртсылы матэ интыяськем "Информпечатьлэн" киоскъёсыз пыр. газетэз киоскысь арняез куинь пол басьтон трослы дунтэмгес усе. 64 манет тырыса, "Удмурт дуннеез" лыдӟоды быдэс ар ӵоже,толэзьлы одӥг пол вуоз ӟуч кылын потӥсь "Твой дом и сад" приложение, нош телепрограммаен потӥсь пятница номер 16 страницаен луоз. Гожтӥськыны быгатоды пятницае потӥсь номерлы гинэ но, гожтӥськон дуныз - 40 манет. Газетлы редакцие яке Удмурт драмтеатрлэн юртаз ветлыны мылкыд карисьёс понна гожтӥськон эшшо но дунтэмгес - быдэс арлы тыроно 50 манет. Луэ гожтӥськыны пятница номерлы гинэ но - дуныз 30 манет. Пичи Пургаын, шарканын, Воткаын улӥсьёс "Удмурт дунне" газетэз ёрос газетэнызы ӵош басьтыны быгатозы, огазеям гожтӥськон трослы дунтэм луоз. таиз гожтӥськон радъямын ёрос газетъёсысь редакциос пыр. Гуртын улӥсьёс, студентъёс, пенсионеръёс понна гожтӥськон дунъёс озьы ик пичиятэмын. Кызьы адӟиськоды, ваньмыз тӥ понна лэсьтӥське, гажанао лыдӟисьёс. Ар пумозь дыр вань ай, газетлы гожтӥськыны луонлыкъёс но шедёзы. Тамак кыскисез нуналаз одӥг-кык сигаретлы ӧжытгес ӵындоз, ческыт но кӧй-вӧй сиыны яратӥсез кускерттонзэ пичильтык золтоз, чильпырасез кырмышъяз ке - палэнтӥ ортчод. Нош "Удмурт дунне" газетлы гожтӥськид ке, кин тодэ, оло, тужгес шудоез лыдӟисьёс пӧлы сюрод. Ошпилы - базаре яке почтае? "Удмурт дунее" газетлэн аслаз гидазбарез ӧвӧл, озьы ке но, лыдӟисьёсты таяз аре но дуно кузьымтэк кельтэмез уг поты. Шаркан музъем вылэ "йыромыса" кылем ошпи одно ик шедьтоз аслэсьтыз кузёзэ, нош газет - шудо лыдӟисьсэ. Дышем сямъя, таяз аре но ортчытом лотереяен шудон. Отчы пыриськозы ваньмыз, кин гожтӥськыса вуттоз 20-тӥ декабрёзь. луозы мукет но кузьымъёс. Устоосызлы - кузьым Почтаын ужасьёс милям матысь эшъёсмы-юрттӥсьёсмы. Гожтӥськонлы йылпумъянъёс лэсьтыку, соос пӧлысь но устоссэ пусйытэк ум кельтэ. таиз конкурсмы сярысь нимысьтыз гожтом на, ивортон ыстом Почта кусыпъёсъя управленилэн ёзъёсыз пыр. Л.МАЛЫХ. Сюмси ёросын кенеш Кун Кенешысь бюджетъя, вытъя но коньдон ужпумъёсъя ялан ужась комиссия бадӟым инты висъя ёросъёсын матысь кусыпъёс возёнлы. Тани алигес но Сюмси черкогуртын ортчиз бадӟым кенеш. Со сӥземын вал вуоно арлы бюджетэз эскеронлы. Семинарлэн ужаз пыриськизы республикаысь кивалтон ёзъёсын ужасьёс, Селта, Сюмси, Вавож но Ува ёросъёсысь депутат комиссиослэн кивалтӥсьёссы, коньдон ужпумъёсъя кыл кутӥсьёс. Люкаськемъёсты огъя югдурен тодматӥзы Кун Кенешысь бюджетъя, вытъя но коньдон ужпумъёсъя комиссилэн кивалтӥсез Софья Широбокова но Эскерон комитетысь отделлэн кивалтӥсез Любовь Мартынова. Улон-вылон но экономика удысъёсын берло дас ар ӵоже кылдэм югдур пумысен ивортыса, Софья Широбокова пусйиз республикалэн бюджетаз выт чотын вуись коньдонлэсь трослы йылэмзэ. Со герӟаськемын экономикалэн огсыр азинскеменыз: промышленностьын дас толэзь ӵоже огъя ваньбур поттон 118 процентлы будӥз, йылӥзы обороная заказъёс но му вӧйлы дунъёс. Республикалэн бюджетэзлэн доход люкетэз 30 процентлы быдэстэмын пайда басьтэмлы выт чотын, 25 процентэз - йылтэм дунъёс чотын, 11 процентэз - подоходной выт чотын, 10 процентэз - музъем узырлыкъёслы выт чотын, 1 процентэз - музъемлы выт чотын. Вуоно арысен пайда басьтэмлы вытлэн вить процентэз кылёз интыосысь бюджетэ. Котькуд ёрослэн сюлмаськонэз - дотация чотын улонысь потон. Республика та ужпумез куинь ар куспын быдэстыны чакла. Сюмси ёросын кылдэм югдур сярысь ивортӥз администрацилэн тӧроез Валерий Расамахин. Берло вить ар ӵоже татын быгатӥзы сӥльлэсь сиён поттон удысэз кулэезъя радъяны. Кылсярысь, одӥг цех смена ӵоже ог 2500 килограмм колбаса дасяны вуэ. Уно барыш потэ йӧллэсь дасям сиён-юон вузамысь но. Ёросэ сяна, солэн бадӟым люкетэз кошке Ижын улӥсьёслы но. Уго отын усьтэмын ёрослэн нимысьтыз вузаськон юртэз. Валерий Расамахинлэн бадӟым осконэз - торфен узыр интыос. Соос татын кызьлэсь ятыр лыдъясько. Нош та узыр музъемлэсь дасяны луоно пӧртэм удобрениос. Со ик ёрослэн бюджетаз ватсаса коньдон пыртоз. Семинаре люкаськемъёс таӵе кенешъёсты туж умоен лыдъяло. Соин ик соос азьланяз но ортчылозы. Удмурт Республикаысь Кун Кенешлэн пресс-службаез. Солы тужгес но дуно удмурт крезьгур Та нуналэ Удмурт кун филармонилэн концерт возьматъян залаз пукон интыос ик ӧй вал. Озьы учкисьёс лыктӥзы Россиысь дано артистлэсь, баянистлэсь Николай Широкихлэсь 50 арес тырмонзэ пусйыны. Тани сцена вылэ потэ ачиз юбиляр но. Баянзэ кыскиз но, зыл-зыл чузъяське тодмо крезьгур - сюан гур. Сое лыктэмъёс кужмо кичабонъёсын пумитало. Та тодмо гурез котькин ӟеч тодэ. Чузъяськиз со "Тӥляд куремдыя" радиопередачаын. Та калык гурез тупатъяз но чеберъяз Николай Широких. Куке но быдӟым ӟуч композитор М.И.Глинка шуиз вал: "Крезьгурез кылдытэ калык, нош композиторъёс сое чебергес гинэ каро". Композиторъёс калык гурез чебергес каремзы бере, со чылкак выль сямен, волятэм марӟан кадь пиштыны кутске. Нош кӧня сыӵе марӟан пырыос потӥзы Николай Александровичлэн киосыз пыр. Вордскиз со 1950-тӥ арын 11-тӥ октябре Святогорск ёросысь (али Красногорск) чебер нимо Заутинский орёл гуртын. Ӟуч пияшлэн анай-атаез Екатерина но Александр Широкихъёс ӧз но малпалэ, дыр, соку пизы быдэс республикалы тодмо баянист но крезьгурчи луоз шуыса. Ӟуч пилэн быгатонлыкез удмурт искусствоез быдэс дуннее вӧлмытыны юрттӥз. Широкихъёслэн семьяязы крезьгурчиоссы ӧй вал на. Зэм, атаез быгатыса кырӟалляз ӟуч калык кырӟанъёсты. Глазове улыны выжемзы бере, Коля кык нылашъёслэсь аккордеонэн шудэмзэс кылӥз. Пияшлы со вунонтэм кылиз. Малпаз, соос баянэн шудо шуыса. Гуртаз бертыса анай-атайзэ сюлмысьтыз сюлвориз крезьгуръя школаын баянэн шудыны дышетскон сярысь. Удалтӥз Николайлы! Экзамензэ лякытэн сётыса, со крезьгуръя школаысь преподаватель Удмуртиысь дано дышетӥсь Николай Фёдорович Сухов доры шеде. Дышетскон тунсыко ке но, секыт вал. Одӥг пол Николай Фёдорович Коляез котькуд ноталэсь хроматикая гаммаоссэ дасяны косӥз. Пияшлы со быдэстонтэм потӥз. Собере школае но ветлэмысь дугдӥз. Гуртаз школае мынӥсько шуылӥз, но отын пионеръёслэн собраниязы вал шуыса эрекчалляз. Но ӝоген ваньмыз шарае потӥз. Анаез умой-умой визь "тыремез" бере, Коля школазэ ӧз келля ни. Ӝоген Глазове вуиз Н.Ф.Сухов дорын дышетскем муртэз Михаил Ескин, али Кранодарысь искусствоосъя институтысь профессор. Ескинлэсь шудэмзэ кылзыса, Широких одӥг малпанэ вуиз: "Мыным но со кадь шудыны дышетсконо". Н.Ф.Сухов котькуд пиналлы мылкыд сётылӥз дышетсконзэ крезьгуръя училищеын азьланьтыны. Соин ик дышетскон программазэ узыр но секыт карылӥз. Баянчи котькуд учыре шудыны мед быгатоз пӧртэм крезьгуръёсты. Быгатонлыксэс волятон понна ыстылӥз пионеръёслэн лагерязы. Озьы 12 аресъем Коля но лагере вуэ. Отын школаын дышетэм гуръёсты сяна, шудыны быгатэ вал Совето Союзлэсь гимнзэ но Александра Пахмутовалэсь "Гайдар шагает впереди" кырӟан гурзэ гинэ. Нош лагерьын шудоно луиз ӵукна мугорез кыдатон ужрадын, пыриськылӥз концерт дасянэ. Соку амалтэк уно кырӟан но эктон гуръёсты бичалод. Широкихлэн ужез пӧрмиз, вылды. Сое кыкетӥ сменае кельто на. Соку ик пияш нырысетӥ уждунзэ - 56 манет 50 коньы - басьтэ. 1966-тӥ арын Николай Широких дышетскыны пыре Ижевскысь крезьгуръя училищее но шеде Удмуртиысь дано дышетӥсьлэн Иван Маркович Агафоновлэн классаз. Дышетскеменыз ӵош со ужа электромеханикая заводысь хорын, "Октябрь" культура дворецысь эктонъя "Юность" коллективын. Со дыре кутске кырӟан но эктон гуръёс гожъяны. Широкихез ӧтё драмая Удмурт кун театрлэн спектакльёсызлы крезьгуръёс гожъяны. Туннэ нуналлы крезьгурчиен Николай Шкляевен ӵош Николай Александрович куамынлэсь уно спектакльёслы гуръёс гожтӥз. 1975-тӥ арысен Широкихлэн выль вакытэз кутске. Солы кивалтыны оско кырӟанъя но эктонъя "Италмас" ансамбльлэн оркестреныз. Отын дас вить ар ӵоже ужатозяз трослы волятӥз аслэсьтыз крезьгуръя быгатонлыксэ. Тодмо крезьгурчиен, удмурт фольклорез ӟеч тодӥсен, ансамбльлэн кивалтӥсеныз А.В.Мамонтовен ӵош ужан трос ӟечсэ сётӥз Широкихлы. Тодмо коллективен Удмуртиетӥ, Совето Союзэтӥ, мукет кунъёстӥ гастрольёс уката паськытатӥзы Николайлэсь быгатонлыксэ. Со оркестрлы ялан выль но выль гуръёс дасялляз. Кылзӥсьёс но, музыкантъёс- профессионалъёс но Широкихлэсь ужъёссэ туж вылӥ дунъяллязы. Уноез крезьгуръёс гожтэмын Удмуртиысь дано артист, Москваысь радиоын но телевидениын. 1976-тӥ арын Н.А.Широких луэ Удмуртиысь, нош 1986-тӥ арысен - Россиысь дано артист. Крезьгурчи ӵемысь пумиськылэ мукет музыкантъёсын, крезьгурез ӟеч тодӥсь-валась адямиосын. Удмуртиысь ёросъёстӥ ветлыкуз, Николай Широких одно ик шедьтэ калык кырӟанъёсты ӟеч тодӥсь адямиосыз. Соос крезьгуръёсты книгаосъя уг дышето, соос асьсэос кырӟанэн ӵош вордско. Соинтэк-а удмуртъёсты дунне вылысь самой кырӟась калыкен ӵошато. Николай Александрович но ялан со калыклэсь ик дышетске. Куд-огез копозиторъёс калык гуръёсты сокем асэсто но чеберъяло, кытӥяз калык гурлэн бервылыз но уг кыльы ни. Нош Широких та ласянь туж юн чакла калык гурез. Вылаз ик, солэн крезьгурез уката жингыртыны кутске, уката узырме. 1990-тӥ-1996-тӥ аръёсы Николай Широких, фольклор кырӟанъя "Айкай" театрын. Таиз но туж аспӧртэмлыко коллектив. Нош ик выль кырӟанъёс, выль эктонъёс, выль пумиськонъёс. Нош 1995-тӥ арын Николай Александрович лыктэ Удмурт кун филармоние но ужаны кутске Удмурт Республикаысь калык артисткалэн Валентина Пудовалэн гурппаяз. Талэсь азьвыл Пудова но Широких 1982-тӥ-1985-тӥ аръёсы ӵош ужазы ни вал "Италмас" ансамбльын. Но соку нокин ӧз тодылы, та егит, чебер нылмурт удмурт калыклэн данъяськонэз луоз шуыса. Кызьы шуо, Валентиналы инмар ваньзэ сётэм. Соос Николай Широкихен кӧня устоесь программаос дасязы ни со дыр ӵоже, кӧня выль кырӟанъёс вордскизы. Юбилейлы сӥзем ӝытаз Николай Александрович шуиз: "Мон туж шудо, таӵе быгатӥсь кырӟасен артэ ужаны кылдӥз шуыса". Валентина Тихоновна пусйиз: "Мыным уноез вожъясько таӵе усто музыкантэн ужамелы". Н.А.Широкихез та ӝытэ уно адямиос, трос коллективъёс ӟечкылазы. Валентина Пудовалэн группаяз вань эктӥсьёс но. Соос тыл кадь возьматӥзы "Казак эктонэз". Солэсь гурзэ выльдыса гожтӥз Николай Широких. Россиын ортчытэм конкурсын солы усто аранжировкаез понна сётэмын И степенё диплом. Бен, Николай Александровичлэн дипломъёсыз ӧжыт ӧвӧл. Но со понна тужгес но дуно луэ учкись, солэн кичабонъёсыз, солэн гажамез. Солы уката но дуно удмурт крезьгур. Евгения КОПЫСОВА, Удмурт Республикаысь искусство удысын дано ужась. В.Беломорскихлэн туспуктэмез. Тодматскон сэрег "Салон для двоих" - озьы нимаське Ижевскысь тодматскон служба, кивалтэ соин Алевтина Иосифовна Агалакова. Салон ужа огназы улӥсьёсын, кинлэн кылдытэмез потэ таза семья. Лулсэр висёнъёсын курадӟисьёс, кышнояськем-быземъёс, пытсэт сьӧрын пукисьёс медаз вазиське. Улӥын верам кыӵе ке абонентэн тодматскемды потэ ке, гожтэ солы гожтэт, келялэ салонлэн кивалтӥсезлы, 2 чылкыт конверт ыстэ на, сотэк тӥледлы вазиськись уз луы. Асьтэлэсь ке ялондэс та служба пыр газетъёсы печатламды потэ, тыроно 50 манет (ыстоно коньдон тырем чекез но 2 конверт салонлэн кивалтӥсезлы). Вазиськоно таӵе адресъя: 426060, Ижевск город, а/я 3307, Алевтина Иосифовна Агалаковалы. Гажано лыдӟисьёс, тодады вайытӥськом: та салонысь абонентъёслы сӥзем гожтэтъёстэс "Удмурт дунне" газетэ эн келялэ. Аб. 4266. Гуртын улӥсь удмурт пиосмурт, 36/170, кышнояськылымтэ, яратыны быгатӥсь но яратонэз возьмась, лякыт сямо, ИИ группаен инвалид - огъя висёнэн. Тодматскысал Можга яке Грах ёросын улӥсь 38 аресозь лякыт сямо нылкышноен (пумит ӧвӧл нылпиезлы). Аб. 4267. Игра посёлокын улӥсь нылкышно, 27/166, гороскопъя Телец, нылылы 2 арес. Оскиськом пумитаны лякыт сямо, сюлмо, ӟеч мылкыдо пиосмуртэз. Со ми сярысь сюлмаськоз, нош ми со сярысь. Аб. 4270. Ижевскын улӥсь удмурт нылкышно, 53/170, синмаськымон вылтусо, дышетскемез средне-технической, вань сад-бакчаез, пиез нимаз улэ, нокин кутӥсь- возисез ӧвӧл. Тодматскысал ас понназ улӥсь 50-60 аресъем пиосмуртэн, урод сямъёсыз медаз луэ. Аб. 4271. Гуртын улӥсь ӟуч пиосмурт, учкымон тусбуё, дышетскемын, ужа нефтяникын, урод сямъёсыз ӧвӧл, йыгмыт, дораз пукыса шутэтсконэз уг яраты. Тодматскысал городын яке райцентрын улӥсь лякыт сямо, визьмо, синмаськымон тусбуё 25-35 аресъем нылкышноен, пумит ӧвӧл нылпиезлы. Аб. 4275. Ижевскын улӥсь удмурт пиосмурт, 38/175, кышноез кулэмын, сямызъя огшоры, кутӥсь-возисез ӧвӧл, ужа, улон интыез вань. Тодматскысал огшоры, лякыт сямо, нылпиосты яратӥсь 40 аресозь удмурт нылкышноен, пумит ӧвӧл нылызлы. Аб. 4278. Завьялово ёросын улӥсь удмурт нылкышно, 40/150, люкиськемын, капчи мылкыдо, ужась, вазиськись, адямиез валась, будо нылпиосыз. Тодматскысал сюлмо но огшоры пиосмуртэн, 45 аресозь. Умой луысал, со гуртын улӥсь ке. ШӦКЫЧ Серем пыр *** Егит кышномурт вузкарисьлы вазиське: - Ӧвӧл-а тӥляд ӧжытак сутскыны шедьтэм тортты? Картэ мед малпалоз, ачим пыжи шуыса. *** Соку гинэ бызем нылмурт анаезлэсь юа: - Нуназе дасям сиёнэд атайлы уг ке кельшы, мар тон кариськод соин? - Ӝытлы кельтӥсько. *** - Мон кылӥ, картэд юонлэсь но, кысконлэсь но куштӥськем шуыса. Макем бадӟым кужым кулэ ук солы! - Бен угось, кужыме мынам вань. *** Верасько кык эшъёс: - Картэд ӝытъёсы ӵемысь-а дорысьтыды кошкылэ? - Туж ӵем. Мискиньлэн огназ пукемез уг поты угось. Тылпу кысӥсьёслы юрттэт Удмурт Республикаысь МВД-лэн тылпуэн нюръяськонъя службаяз техника ласянь кылдэм югдур сярысь пӧртэм интыосын трос гинэ вераськонъёс мынӥзы ни. Нош та дырозь тыро-пыдо юрттэт озьы ик ӧз шӧдӥськылы. Данакез машинаоссы мултэс "пересесь" ни, уг тырмо ву сётон гумыос, секыт югдур пожарнойёслы боевой дӥськутэн но шокан аппаратъёсын. Службалэн кивалтӥсез Михаил Камалетдинов трос аръёс ӵоже ини вылӥ кивалтӥсьёсмылы вазиськылӥз ӝужыт коркаосын тылпу потон кышкытлык пумысен. Нош 10 этажъем но солэсь ӝужыт коркаос Ижевскын тырмыт гинэ ни. Таӵе юртъёсын тылпу потон учыръёсы пожарнойёслы туж секыт йӧтэ. Тылпу кысон адямиосты утён нимысьтыз техниказы ӧвӧл угось. Пожарнойёслэн куриськонзы куке-соку кивалтӥсьёслэн пелязы кылӥськоз. Кылем арняе республикаысьтымы коньдон ужпумъёсъя министр Владимир Бельтюков тылпуэн нюръяськонъя службалы коньдон висъян пумысен Правительствое ӵектонэн потӥз. Правительстволэн Тӧроезлэн нырысетӥ воштӥсез Юрий Питкевич 15-тӥ ноябре гожтӥськиз тылпуэн нюръяськонъя службалы 6 миллион 650 сюрс манет коньдон висъян сярысь постановление вылэ. Та коньдонэн пожарнойёс табере басьтозы 50 метръем автопагӟа но автоцистерна. Таӵе юрттэт понна республикаысьтымы пожарнойёс сюлмысь тау каремзэс верало. Н. Корякин. Анайлэн нуналыз Россиысь тодмо нуналъёс пӧлысь тужгес пусйымонэз луэ Анайлэн нуналыз. Та нуналэ асьмеос йыбырттыны кулэ дунне вылысь тужгес но сайкыт но дуно адямимылы - Анайлы. Кӧлатэк потон уйёс, нырысетӥ вамышъёс, шудо пичи дыр, быдэ вуон - кӧня визь, кужым, чидан но сюлэм шуныт кулэ асьмеды утялтон понна. Анай асьмелы улон сётэ, оскон пыӵатэ, секыт дыръя лӥятэ, буйгатэ. Анайзэ ыштӥсь ыштэ Утисьсэ. Улонысьтымы вань ӟеч ужъёсмес но вормонъёсмес асьмеос сӥзиськом Солы. Котькуд ар асьмелэн анайёсмылы ӟеч иворъёс гинэ мед ваёз. Республикаысьтымы вань нылкышноослы мон шуд, тазалык, егитлык но шуныт мылкыд сӥзисько. Йыбырттӥсько тӥледлы, анайёс! Удмурт Республикаысь Президент А.А.ВОЛКОВ. Кӧжыпог сиём Сарапулысь кеньыр изон заводын кӧжы поттыны кутскизы. Таӵе завод республикаямы кык гинэ, одӥгез интыяськемын Ижевскын. Кам дурысь кибашлыос заводзэс асьсэос лэсьтӥзы но выльдӥзы. Али отчы 60 тонна кӧжызэ вуттӥз ни "Нечкинский" эштос. Матысь дыре та ческыт сиёнэз мукет хозяйствоос но ваёзы. Сарапулысь заводэн кусыпъёс тупатыны чаклало Башкортостанысь но Татарстанысь эштосъёс, мукет улосъёсысь фермеръёс. Озьыен, ӝоген асьмеос но кӧт тырымонамы кӧжыпог сиём ни. Н. Ефремов. Архивысь докуменъёсъя Удмуртия ЪЪ дауре 1958-тӥ ар Шаерысьтымы ужаса улӥсьёс пусйизы Удмуртилэн Россия борды огазеяськемезлы 400 ар тырмонэз. Сое ӟеч пумитан вылысь, уноез кун предприятиос пыриськизы социалистической ӵошатсконэ. УАССР-ысь Вылӥ Кенеш, КПСС-лэн Удмурт обкомез но УАССР-ысь Министръёслэн Кенешсы со пумысен сӥё-дано кенеш но митингъёс ортчытӥзы. Кунмылэн знамяез вылэ соку нырысьсэ бырттэмын вал Ленин орден. Сое сётӥз СССР-ысь Вылӥ Кенешлэн Президиумез, хозяйствоез но культураез ӝутонэ удмурт калыклэн мур пыриськемез понна. Соку СССР-лэсь орденъёс но медальёс басьтӥз на промышленностьысь, гурт, наука но культура удысысь 1576 ужась, 203- езлы сётэмын вал УАССР-ысь дано нимъёс. Нош блюминглэн операторезлы С. А. Гондыревлы, андан пӧзьтӥсьлы Л. И. Телегинлы, слесарьёслы В. И. Муравьевлы но В. П. Пупышевлы, конструкторлы М. Т. Калашниковлы - Социалистической Ужысь Герой ним. Юбилеен валче ӝутыны кутскемын вал ӟуч но удмурт калыкъёслэн эшъяськыса улэмзылы монумент но паськыт экранэн кинотеатр, Свердловскысь киностудия кык люкетэн "Советская Удмуртия" кинофильм кылдытӥз. Удмурт литератураез но искусствоез уката азинтон но отчы творческой ужасьёсты паськытгес кыскон вылысь, та удысэ пыриськемъёслы 1959-тӥ арысен арлы быдэ 15, 10 но 7 сюрс манетъем премиос тырон сярысь решение кутэмын вал, сое тырыны чакламын вал 4-тӥ ноябре - Удмурт автономиез кылдытон нуналэ. Июне Ижевскысь Советской урамын усьтӥськиз В. И. Ленинлы памятник. Солэн скульпторез - СССР-ысь кун премилэн лауреатэз П. П. Яцыко, архитекторез А. Н. Кулага. Ижысь механической заводысь коллектив кылдытӥз "Иж-58" пӧйшуран пыӵал, со нуллэмын Брюссельысь возьматонэ. Ижысь машзавод поттӥз 85 пумо арбери, Ленин нимо завод - странаысьтымы 40 процентсэ редукторъёсты но ваньзэ домкратъёсты. Тросэн поттыны кутскемын пӧйшуран пыӵалъёс, сюбег чугун сюреслы тепловозъёс, мотовозъёс но платформаос, перфараторийёс, мур насосъёс, нефть поттӥсьёслы портонъёс, радиолаос, радиоприёмникъёс, пианиноос. Шаерамы ужало ни вал 6 лесозавод, корка лэсьтӥсь 4 завод, шпал лэсьтӥсь 17 завод но мебель поттӥсь 14 фабрика. Рос-прос ужаны ӧдъязы подшипник поттӥсь завод но радиозавод. Нырысез радиоприёмник нимаськиз "Волна" шуыса, потыны кутскиз со 1958-тӥ арлэн шораз. Коммунистической ужысь бригада нимез нырысь ик басьтӥз "Ижмашысь" Г. А. Хорошенинлэн бригадаез. Егитъёсты ужлы дышетон амалзы умоен лыдъямын Асанысь зоотехникъёсты дышетонъя техникумын. Ижевскын ортчиз изобретательёслэн но рационализаторъёслэн нырысетӥ конференцизы. МТС-ёс пӧрмытэмын РТС-ёслы, ог люкетэз техника кельтэмын, уноез колхозъёслы вузамын. Колхозъёс асьсэлы басьтӥзы 4113 трактор, 2465 комбайн но мукет техника, ваньзэ 129 миллион манетлы. Тросгес кутӥськыны кутскиз электрокужым, данаклы йылӥз пудолэн лыдыз. Озьы пумен кылдылӥзы колхозъёс-миллионеръёс. Тани Пичи Пурга ёросысь "Молния" колхоз 3,6 миллион манет пайда басьтӥз но колхозникъёсызлы котькуд трудоденьлы 4 манет 29 копейкаен уждун тыриз. Таӵе пайда поттэмын, етӥн будэтыса. Озьы ке но, гурт калыклэн улонэз сокем ӟеч ӧй вал на. Тросэн пудо вордыны ӧз лэзьылэ, кужмысь кукуруза кизьыны косылӥзы, музъемез мултэс мур гырытъязы но кыедо вылзэ пыдло согылӥзы. Соин сэрен данакез гурт калык городэ кошкиз. Казахстанысь "Сочинский" совхозын Сарапулысь гурт удысъя техникумын дышетскисьёс гужем каникулъёссы ӵоже 9 корка ӝутӥзы но со ульчаез Сарапульской шуыса нимазы. Выльвылъёсын ужасьёсмылы 1958-тӥ ар понна Казахстанысь комсомоллэн киысь кие вошъяськись Горд Знамяез сётэмын. Партия басьтӥськиз юисьёсын нюръяськон борды, соин калыклы гожтэтэн вазиськиз. Озьы милицилы сётэмын 7064 аракы пӧзьтон аппарат, 39 адями партиысь куштэмын, 218 адями кыл кутытэмын на. Пенсионеръёсты общественной уже кыскон вылысь, соослэсь кенешъёссэс кылдытъяны кутскизы. Ижевскын усьтӥськиз "Детский мир" магазин. Нылпиосты одно ик ваньзэс 8 класс дышетон кутскемын. Толшоре эскерон ортчытэмын но чик дышетскымтэ 4965 адями шараямын, ичи дышетскемез 7927, соослэн арлыдзы 40 ареслэсь ортчемын ӧй вал. Ар бырытозь, гожтэт тодӥсьтэмъёс ваньмыз лыдӟиськыны, лыдъяськыны дышетэмын вал. УАССР-ысь Министръёслэн кенешсы юнматӥз удмурт орфографилэсь выль правилооссэ. 1958-тӥ арысен П. И. Чайковскийлэн вордскем интыяз, Воткинск городын, крезьгуръя фестивальёс ортчылыны кутскизы, пумен со сямлы пӧрмиз, Удмуртиын но будӥзы композиторъёс: Г. А. Корепанов, Н. М. Греховодов, Г. М. Корепанов- Камский. Соос кылдытӥзы нырысетӥзэ удмурт опера, оперетта но балет. Удмурт драмтеатрысь валтӥсь художниклы Г. Е. Векшинлы, В. Г. Короленко нимо ӟуч драмтеатрысь валтӥсь художниклы А. Ф. Фокинлы сётэмын РСФСР-ысь искусствоя дано ужась ним. РСФСР-ысь куать автономной республикаос - Удмурт, Мари, Чуваш, Бигер, Мордва но Башкир АССР-ёс - "Волга но Урал куспын" ӵош радиоверанъёс ортчытъяны кутскизы. Соку Удмуртиын ужал ни вал 133 сюрс репродуктор но 53 сюрс радиоприёмник. Удмурт писатель Трофим Архипов печатлаз "Лудӟи шур дурын" романзэ. Та аре вордскизы удмурт кылбурчиос Владимир Котков но Михаил Федотов. Ижевскысь "Спартак" кинотеатрын учкыны луэ ни вал паськыт экранэн кинофильм. "Металлург" санаторий кутӥз нырысьёссэ шутэтскисьёсты-эмъяськисьёсты. Глазовын усьтӥськиз "Прогресс" спортклублэн дворецез. 23-тӥ мартэ 20 час 23 минутэ Ижевскын улӥсьёс ас синмынызы учкыны быгатӥзы лыз инметӥ лобись Музъемлэсь кыкетӥ искусственной спутниксэ. 1958-тӥ арын вордскиз 41487 пинал, кулӥз 11235 адями. Озьы одӥг арскын калыкмылэн лыдыз будӥз 30252 муртлы. Та лыдпус вера улон-вылонмылэн кӧня ке умоямез сярысь. Е. Вяткина, Удмурт Республикаысь ЦДНИ-ысь валтӥсь специалист. Воткинскын ортче П. И. Чайковскийлы сӥзем фестиваль. Ижевскын В. И. Ленинлы сӥзем памятник усьтӥськиз 1958-тӥ арын 21-тӥ июне. Ӧрзы паськыта Толон национальной библиотекаын "Роль библиотек в правовом просвещениии населения. Проблемы и перспективы правовой информатизации в Удмуртии" научно- практической конференция ортчиз. Ужрадэ пыриськизы республикаысьтымы данакез вылӥ кивалтэт ёзъёс. Шаерысьтымы куд-ог библиотекаос правоен герӟаськем иворъёсты калык пӧлы вӧлмытон борды вазенгес басьтӥськизы ни. Табере, пе, та уж борды кылемъёссэ но бибиотекаосты кысконо. Кызьы сое ӟечгес лэсьтоно, кыӵе амалъёсын? Та ужпумъёс сэрттэмын-пертчемын конференция дыръя. Н.ЛИПИНА. "Корка, кудаз ми улӥськом" Алигес москваын ортчиз нылпиослэн инкуазьлы сӥзем ужъёсынызы кинофестиваль. "Кино. Образование. Творчество" шуыса нимаськиз со. Фестивале ваньмыз 44 фильм кутэмын ке вал, 10-эз соос пӧлысь финалэ потӥз, 4-ез пусъемын данъян дипломъёсын. дипломен пусъем ужъёс пӧлы ик шедиз Удмуртиысь ваем фильм но. Ижысь 42-тӥ школаысь дышетскисьёслэн но дышетӥсьёслэн "Дом, в котором мы живем" ужзы синмаськымон пӧрмем. Та школаез йылпумъям Дарья Шилова (корреспондент), 11-тӥ классын дышетскись Михаил Коньков (оператор), географиен но биологиен дышетӥсьёс Т. М. Уварова но Н. В. Кудрявцева (постановщикъёс) ИУУ-ысь ужась С. И. Шумихина (монтаж) - ваньзы синпель кузьымъёсын пусъемын. Э.ВАСИЛЬЕВА. Кӧня кузя асьмеос? 2002-тӥ арын ортчоз Россиын улӥсь калыклэсь лыдзэ чотан ужрад. Солы дасяськыны али ик кутсконо, шуэмын Ижысь администрациын та ужпумъёсъя люкаськылэм комиссия дырхя. Азьвыл ик эскероно городысь адресъёсын хозяйствоез, ӟеч-ӟеч чаклано "нокинэ вунэтытэк" пусйылон ужрадэз, дасяно юалляськисьёсты. Берлоез таӵе ужрад ортчытэмын вал 11 ар талэсь азьло, 1989-тӥ арын. Соку Ижевскын 635 сюрс улӥсь лыдъяськиз. Э.ВАСИЛЬЕВА. Фёдор Пукроков Одӥг выжыысь ӧвӧл меда? Йыркобыез эскерисьёс (краниологъёс), археологъёс, антропологъёс, берло дыре таӵе малпанэ вуизы: урал выжы (татчы пыро удмуртъёс но) дунне вылэ куке но туж паськыт вӧлмемын вылэм. Солэсь пытьыоссэ шедьтӥзы ини Португалиысь но, Уй пал Германиысь но, Прибалтикаысь но, Крымысь но Мынам малпамея, Крым кыл удмурт кырым кыллэсь пӧрмемын: малы ке шуоно, та шормуӵ кельше усьтэм кырымлы. Нош отӥяз, юкагиръёсты учконо ке, соос вӧлмемын вылэм Колымаозь, Аляска пыр - Америкаозь. Нош урал выжыысь кинъёс меда Германие вуылэмын? Нырысь ик мон эскероно кариськи удмуртъёсты. Басьтӥ "Большой немецко-русский словарь" книгаез (поттэмын О. И. Мосальскаялэн кивалтэмез улсын Москваын 1980-тӥ арын). Усьтӥ но немец кылъёсты удмурт кылъёсын ӵошатыны кутски. Вань удмуртъёс немец кылын лыдӟиськыны уг быгато бере, мон соослэсь кылъёссэс удмурт букваосын гожтӥсько. Тани соос, ог-огзылы тупась кылъёс: Аарн - удмурт сямен - аран. Асьме тодосчиос шуо: аран кылмы бигеръёслэн урак (сюрло) кылысьтызы потэмын. Кӧчылыса ветлӥсь калык ю-нянь кизьылэ вал, но огинтыын кемалась улӥсь удмуртэз ю кизьыны но араны калгись калык дышетӥз-а, мар-а? Шонергес уз луы меда, урак кыл аран (аарн) кылысь потэмын шуим ке? Анай. Асьме тодосчиос таиз но кылмы бигеръёслэсь басьтэмын, шуо. Со но шонер ӧвӧл: тюркъёс удмуртъёслэсь кылзэс басьтӥллям (ведь тюркъёс дунне вылэ потӥзы куатетӥ дауре гинэ, нош урал выжы олокӧня аръёс ӵоже улэ ини). Алнаш палъёс анае шуэмзэс анэ шуо... Бӧк (призрак, привидение) - удмурт сямен - боко (Кавказысь удинъёслэн кылазы боко - котэм нянь). Мон син азям пуктӥ, малы удинъёслэн боко кылзы сьӧд кужымлы пӧрмиз. Тани нылпи огназ кельтэмын корка. Со туж сак кылзӥське: кытӥ ке ведон (ведӥн) уг пыры-а? Гур сьӧрын шуак кин ке но вуӵ-ваӵ! каре. Пияш кышкаса шобрет улэ пыре но, бадӟымъёс ужысь бертытозь, йырзэ но уг поттылы ни. Дорысьёсыз вуо но юало: "Марлэсь сокем кышкад? Тон сяна, дорын нокин ӧвӧл ук". Со шуэ: гур сьӧрын кин ке вуӵ-ваӵ каре. Мыныса учко но - отын котэм нянь чырса. Вакчияк вераса, боко чик но сьӧд кужым вылымтэ. Со вылэм нылпилэн аслаз малпам кышканэз, ас малпанэныз, ас кышкаменыз кылдытэм "шайтанэз"... Бӧльк (громкая отрыжка) - удмурт сямен - бульк (ӧскемлэн ньылонэтӥ потэм куараез). Дари (сорго обыкновенное) - удмурт сямен - тари. Даур (продолжительность, длительнось) - удмурт сямен - даур. Асьме тодосчиос таиз кылмы тюркъёслэсь басьтэмын кожало. Даус (чёрт, дьявол, молодец, удалец) - Башкириысь Татышлы ёросысь удмуртъёс дяус шуо укыр ортчыт, етӥз муртэ но дьяволэз. Тазэ но, пе, асьмеос бигеръёслэсь басьтӥськеммы. Немецъёс но соослэсь ик басьтӥллям шат? Динг, тинг (народное собрание у древних германцев) - татышлыослэн гуртъёссы кӧня ке динъёслы люкиськыло. Кенеше соос люкаськыло вал шор динэ. Ми палан джиннэз но ӟин, дин шуо. Мон паймисько вал, малы дин доры кенеше люкаськоно. Динг кыллэн берло куараез усем но, та кылъёс сураськиллям: ӟин доры уг люкаськыло вылэм удмуртъёс, динге, динэ кенеше лыкто вылэм. Дункель (темнота, мрак) - татышлыос туж пеймытэз дынк пеймыт шуо. Дурстен (испытывать ӝажду) - удмурт сямен дурыстэм. Дурыстэм юэм потэ, дурыстэм сием потэ, дурыстэм бертэм потэ... Густо (вкус) - удмурт сямен - гусъяськыны (озьы верасько пичи пургаос, сиёнэз пичильтык веръямзы бере). Йан (Йахн) - ряд, полоса. Удмурт сямен - ана. Гыроно бусызэс кана шуо грузинъёс, аныз шуо туркменъёс, ана шуо чувашъёс но. Минка - Мюнхен карлэн вакчиятэм нимыз. Башкириысь Татышлы ёросысь Улысь Балтач гуртын улэм Минка нимо купец. Дано удмурт суредасьлэн Менсадик Гариповлэн (Менсадык шонер ӧвӧл) песятаез вылэм со. Минкалэн кышноез вылэм мынам ӵужапае. Соин ик ми Менсадикен ог-огмес ӵужодӥг шуиськом вал. Нимъёс сярысь вераськон потӥз бере, созэ но иворто на. Швейцариын ӝужыт гурезё интызы нимаське Адула. Мынам Адолло нимо ӵужмуртэ вал. Французъёс Германиез Альмань шуо. Удмуртиын вань (Якшур-Бодья ёросын) Альмань гурт. Иж дортӥ бызе Игерман шур. Удмуртъёс пӧлын пумиськыло Герман нимо адямиос. Новгород палан улӥсь немецъёс кылдытӥллям вылэм "Ганзейский орден". Германиын али вань футболэн шудонъя "Ганза" командазы. Инбур кылын (легендаын) вераське: удмуртъёслэн нэбегзы (книгазы) вылэм. Нош кыӵе вал со - тодӥсь ӧвӧл ни. Мынам сюлэмы шӧдэмъя, со Авеста вал. Астрологъёслэн верамзыя, арийёслэн мукылчинзы Заратустра (татысь потэмын удмуртъёслэн Зара, Зарай нимъёссы) вордӥськемын Каракулино палан, Кам дурын (укнозы та шур пала учке вылэм). Ӵапак со, Заратустра, гожтэм дунне вылысь нырысетӥзэ инбуро нэбегез - Авестаез (Авестаын одӥгезлэн покчи Инмарлэн нимыз Менюк, удмуртъёслэн Менок но Менёк нимъёссы вань. Одӥгезлэн дэймонлэн (демонлэн) нимыз Аз. Татысь потэмын азыны, азгынмыны, аздырыны но таос выллем мукет кылъёс. Нош асьме тодосчиосмы та кылъёсмы бигеръёслэсь басьтэмын кожало (йырин- чукин берыктыса сётэм малпан со). Арийёс вӧсясьсэс заотар (гимн кырӟась) шуо вал, Кукмор палась удмуртъёс сямлыко (обрядовой) кырӟанъёссэс зоутъёс шуо. Арийёс эфирез, дуннелэн лулыз шуэмез, Акаша шуо вал, Кукмор но Балтач палась удмуртъёс Будӟынналзэс Акашка шуо. Соослэн таӵе зоутсы но вань: "Арысь но лыктэм тюрагаед Бусы шоръёсын кырӟалоз, Арысь но васькем Акашкаед Тубат но дорын гурлалоз..." Зэм, али соос тубат кылзэс бигер сямен верало ини - баскич шуо... Нош арийёсын удмуртъёс куке но туж матысь кусыпъёс возьылӥллям. Со вакытысь Йырйыл (Полярной) кизилилэн нимыз Тубан вылэм - удмуртъёс но арийёс отчы тубало вылэм. Ми палан таӵе кырӟан вань: "Сэри валме кыткыса, Мэрӟен каре тубысал, Мэрӟен каре вуыса, туганъёсме адӟысал..." Сэри вал - удмуртъёслы Сэрван инмарлэн кузьмам валэз. Грекъёслэн Пегас валзы выллем со (Пегас - пегась: со вал бурдо бере, думетын улыны уг яраты вал, пега вал...). Сэрван - дырлэн инмарез. Удмурт кылын дырез сэр шуо вылэм: сэрыт, сэры (дыры) ӧвӧл. Дунне улосъёстӥ сэр (дыр) бызе, вирсэръёстӥ - вир. Нош скандинав фольклорын ван - нянез удалтытӥсь инмар. Удмуртъёс юнме шуо шат: "Кинлэн нянез трос, со ванен улэ?" Азьло со ванэн вал, дыр. Китай кылын ван - эксэй. Шунды пуксён палан господин шуэмзэс сэр, сир шуо: озьы соос Сэрван кылэз вакчиятӥллям. Сэр (дыр) кылысь ик потэмын сэраны кыл но: дыр ведь магнит лента выллем биниське но, сэрттӥське но... Нош Веда кылысь потэмын ведон (тодӥсь) кыл. Берло со кыллэн пуштросэз воштӥськиз: ведон луиз ведӥн (колдун). Арийёслэн видья (тодон) кылысьтызы потэмын виӟъя (визья) улон, виӟ (визь) кылъёсмы. Ӟучъёслэн видеть кылзы. Германиын вань таӵе шуръёс: Мур (яке Мура), Мург (Рейнэ усе), Мурр (тазьы ик син азе пуксе, кызьы удмурт та шуре тэтче но, вуысь потэмез бере, кезьыт вулэсь дырекъяса шуэ: "Мурр..." Зарг (гроб) - удмурт сямен заргыны. Тазьы шуо татышлыос туж зол бӧрдэмзэс. Со вылэм шайкорос (гроб) вадьсын бӧрдэмзэс возьматӥсь кыл. Вань на соослэн зарыгыны кылзы (юн куректэмзэс вераса бӧрдыны). Зер (Зехр) (очень, весьма, крайне) - Башкириысь Татышлы ёросысь удмутъёс туж шуэмзэс ӵем дыръя зээр но шуо. Нош тодосчиос шуо: асьмелэн та кылмы бигеръёслэсь басьтэмын. Нош немецъёс кинъёслэсь басьтӥллям? Тир (бог войны, сын Одина) - удмурт сямен тӥр (вашкала ожтӥрлык). Вашкала дыръя удмуртъёсыз нимало вал уд, удин, будин; од, один, бодин. Удин - инмысь васькем уд; один - инмысь васькем од. Мон Варзи-Ятчиысен кылӥ таӵе кырӟанэз: Ми таримес кизимы, кизимы, Один садын кизимы, кизимы... Тодосчиос малпало: та кырӟанэз удмуртъёс ӟучъёслэсь басьтӥллям. Но соос тазьы кырӟало: Мы просо сеяли-сеяли, Ой-дид-ладо сеяли, сеяли... Нош Европаысь калыкъёс Один инмарлы вӧсяськыку, ӟучъёс ӧй вал на, славянъёс гинэ вал... Ог-огзылы ваче тупась ньыльдон вить кыл шедьтӥ немец кылысь. Финн кылысь - ньыльдонзэ гинэ. Историкъёслэн валэктыны быгатымтэ одӥг учырзы вань: Швейцариысь гальштат пужыен керамика олокызьы Китае но Вьетнаме вуэм. Нокин но уг тоды, кин соосты сокеме вуттэм. Мон малпасько: вашкала удмуртъёс. Малы ке шуоно, китай кылысь тямыстонэз кыл тупа удмурт кылысь тамында ик кыллы. Со пӧлысь дас витез огъя пермь кылъёс. Вьетнам кылысь но трос кылъёс тупало удмурт кылъёсын. Соос пӧлысь дасэз - огъя пермь кылъёс. Табере вае валэктон сётыны турттоме таӵе юанлы: кытысь потӥз германъёслэн (немецъёслэн, алльманьёслэн) дойч нимзы? Мынам малпамея, удмурт кылысь. Германиын улэм удъёс (одъёс) немецъёс сярысь шуизы, луоз: ӟеч калык. Немецъёслэн ӟ куаразы ӧвӧл, соос та кылэз дӧйч шуыса кылӥзы. Кин ке мукет сямен малпа ке, мынэсьтым оскымонгес валэктыны быгатӥз ке, мон соин огкылысь луо. Тэк улыны уг быгаты Кияса ёросысь трактористлэн Виктор Антонович Анисимовлэн нимыз республикамылэн Данъян пулаз пыртэмын. Ужась, востэм, лякыт сямо - сыӵеен сое тодо гуртоосыз. Воргоронлэн шутэтскыны дырыз вуэмын ни. Но тэк пукыны сюлмыз уг чида. Туэ но тани "Киясовское" эштослэсь бусыоссэ ДТ-75 трактореныз тулыс но, сӥзьыл но гырыса-кизьыса улӥз. Собере силос дасянэ выжиз. Сокем сӥё-дано каремзылы Виктор Антонович шумпотэ. Но со дыре ик ӝож мылкыдзэ но ватэмез уг луы: егитъёслэн гуртэ кылемзы уг поты, хозяйство син азьын куашка. Ма, государстволэн юрттэмезтэк быгатод шат техника но басьтыны. Ярам, туэ удалтӥз тросгес ю-нянь утялтыны, хозяйство гектарысьтыз 16 центнер пала басьтӥз. Инкуазь ӧз люкеты. Виктор Антонович пырак ужаса улэмын. Солэн усто тыршемез азьвыл аръёсы но пусъемын ни вал "За трудовую доблесть" медален но "Знак почёта" орденэн. Азьпалаз но сӥзиськом тӥлед, Виктор Антонович, сыӵе ик чырткем луыны. Т. Банникова. Туспуктэмез В. Беломорскихлэн. Школаысен - вузэ Ижысь механикая кун университетын кӧня ке арзэ ини быгатыса радъямын школа- училище-техникум-институт амалъя дышетон. Школаез йылпумъямъёслы луонлык сётӥське дугдылытэк дышетсконзэс азинтыны училищеын-техникумын, нош собере институтын. Та ужпумлы сӥзем конференция ортчоз вуоно арняе 30-тӥ ноябре ИжГТУ-лэн нырысетӥ корпусаз. Ужрадэз радъяло Россия Федерацилэн но Удмурт Республикалэн Калыкез дышетонъя министерствооссы, Правительствоысь Наукая, вылӥ но шор профессилы дышетонъя комитет но Ижысь Механикая кун университет. Люкаськемъёс азьын вераськозы профессоръёс И.В.Абрамов, С.М.Решетников но Москваысь тодосчиос. Куд-ог ужпумъёс эскеремын луозы "котырес ӝӧк" сьӧрын вераськыса но. А.МИХАЙЛОВА. Азьлапал, выль дауръёслы Шаертодонъя музей - шоркармылэн огез данъяськонэз. Арсеналэ выжемез но отын тупатъян ужъёс ортчем бере, со юг тӧдьы борддоръёсыныз котыр ласянь усьтӥськиз. Шор площадьысен-а кожод, Ялан ӝуась тыл дорысен-а пырод, одно ик выль адӟытон усьтӥськоз син азяд. Татын уго арлы быдэ 20 пала, выставка луылэ, экспозициос ялан выльдӥсько. Нош быдэс фондын 170 сюрслэсь уно котыр (единица) лыдъяське. 1994-тӥ арысен музей Национальной статус басьтӥз. Нош кемалась ик ӧвӧл солы сётӥзы Куӟебай Гердлэсь нимзэ. Кызьы тодӥськом, Удмуртиын музей кылдытон уж 1918-тӥ арын ик кутскиз. Краеведческой музейлэн нырысетӥ директорез вал Михаил Ильин.Со бӧрсьы та уж борды ӝабыр-ӝабыр басьтӥськиз Куӟебай Герд. Шаертодонъя музеймылэн 80 ар тырмемезлы сӥзьыса, республикаысьтымы Культурая министерство но Национальной музей 21-тӥ-24-тӥ ноябре ортчытӥзы научно- практической конференция но финн-угор калыкъёслэн чеберлыко киужъёсынызы фестиваль. Та бадӟым ужрадъёс калыклэсь зэмос культуразэ, лулчеберетсэ адӟытонлы пӧрмизы. Асьме доры та нуналъёсы вуылӥзы бускель элькунъёсысь но кунгож сӧрысь куноос. Научно-практической конференцилэн темаез вал "Куинь сюрсэтӥ вапуме (тысячелетие) выжыку, калык сямъёсты, йылолъёсты утёнын музейлэн интыез". Мукет сямен вераса, этнография но музей ужез нуон, кызьы соос герӟасько. Туалаез уг луы, ортчемзэ тодэ вайытэк. К. Герд нимо Национальной музейлэн директорез Р. Ф. Мартынова пыр-поч мадиз, кыӵе сюресэз ортчиз та ужъюрт (учреждение) 80 ар куспын. Шонерзэ ке верано, музейлы пӧртэм-пӧртэм юртъёсы интыяськоно луылӥз. Нырысь ик со усьтӥськиз национализировать карем кирха (черк) юртын, Красной но К. Маркс ульчаослэн сэрегазы. 30-тӥ аръёсы калык пӧлы экспедициосын потаса, музейлэн узырлыкез трослы йылӥз. Сое Михайловской соборе выжтӥзы. Но та чебер черкез куашкатэмен валче, музей нош ик питранъёс вылэ потӥз. Сарапулысь музеен валчеямзы бере, уноез экспонатъёс ыштэмын вал, солы "юрттӥз" ож тылӝулэн пуромемез но. - Музейлэн ужез туннэ калыкысь люкам арбериосты утён гинэ ӧвӧл - пусйиз Раиса Федоровна. - Вань удысъёсъя ми нуиськом бадӟым научно-исследовательской уж. Россиысь музейёсын выставкаосынызы вошъяськиськом. Кунгож сьӧрысь эшъёсынымы юнэсь кусыпъёсмы. Но туала улон кулэ каре ини выль сямен ужамез. Кылдытоно электронной программаос. Кунгожсьӧр кусыпъёсмы арысь аре юнмало шуыса шӧдыны луиз Венгриысь куноосмылэн вераськемысьтызы но. Ласло Викар, Будапешт университетысь профессор, ассэ туж шудоен лыдъя. Дас ар малпай, пе, таӵе пумиськон сярысь, 1958-тӥ арысен кутскыса, Габор Берецкиен ӵош соос Кам но Волга котырысь калыкъёслэсь уно кырӟанъёссэс люказы. 1989-тӥ арын Венгриысь Наукаосъя академия удмурт кырӟанъёс сярысь бадӟым книга поттӥз. Отчы люкамын Татарстанысь но Башкортостанысь удмуртъёслэн кырӟанъёссы, иворчиослэн туспуктэмъёссы (куд-огез та кырӟанъёс али филармония залэ люкаськемъёслы кылзытэмын вал). Тазьы учконо ке, музейчиослэн ужазы - вашкала арбериосты бичан гинэ ӧвӧл. Со арбериос сярысь, калыклэн улон-вылон йылолъёсыз, сямъёсыз, кырӟанъёсыз сярысь иворъёс люкано. Та пумысен ас малпанъёссэ усьтӥз Будапештысь Этнографияя музейысь валтӥсь научной ужась Агнеш Кережи. Кылем даурлэн пумаз Бернат Мункачи этнографияя материал бордын ӧз ке но ужа, солэн фольклор бичетэз, кыллюкамез (словарез) юрттӥзы вашкала удмуртъёс сярысь тодонлыкез муромытыны. Дасо ар талэсь азьвыл Венгриысь Этнографияя музей асьме шаертодонъя музеен огкыл кутӥзы. 77 удмурт арбери вуттэмын вал татчы, тодосчи Серафима Лебедева тыршемен. Ма уг тырмы венргеръёслэн музеязы, со ваньзэ эскериз но котькуд выль вуттэм арберилы дунъет-ивор сётӥз. Серафима Христофоровналы бадӟым тау карон кылъёссэ вераз Тартуысь Этнографияя музейлэн директорез Алексей Петерсон но. 1971-тӥ арысен ваче ки кутскыса ужаськом ни, шуиз со. Удмурт экспонатъёстэк музеймы зэмос ӧй адскысал кадь. Удмуртия усьтэм республика луэм бере, ог-огеныд кусып возьыны луонлыкъёс трослы паськытазы. Табере мадьяръёс но, финнъёс но, мукетъёсыз но, вашкала музъем вылысь выжыоссэс умойгес тодон вылысь асьме доры кыстӥсько, татысь трос эшъёс шедьто. Тани та лыктэмазы но Агнеш Кережи эшъёсыныз ӵош вуылӥзы Кияса ёросысь Уддяди гуртэ. Татысь тодмо куиськисез Зоя Алексеевна Мазитоваез 80 аресъем юбилееныз ӟечкылазы. Асьсэлы удмурт пужыосысь, лякыт калык сямысь выль кужым, выль мылкыд басьтӥзы. Конференцилэн ужез секциосъя но радъямын вал: Этнографической, естественно- научной, историяя но музей ужез нуонъя, литературая секциосын кивалтӥзы наука удысысь дано адямиос В. Е. Владыкин, Н. Г. Ильинских, Н. А. Родионов, Т. Г. Владыкина но В. М. Ванюшев. Конференцилэн берло нуналаз ӟечкыланъёс вал Удмурт Республикалэн Кун Кенешысьтыз Правительствоысь, Иж администрацилэн мэриысьтыз лыктэм эшъёс трос шуныт кылъёссэс веразы музей ужез азинтонын кема аръёс тыршем адямиослы. Республикаысьтымы культура удысын дано ужась ним сётэмын М. Б. Рупасовалы но В. Б. Симячкинлы. Кун Кенешлэсь данъян грамотазэ басьтӥзы Н. А. Бузмакова, С. Н. Евсеев но Г. П. Блинова, Правительстволэсь - Н. Ю. Попова но Л. Б. Туркевич. Тросэз эшъёс данъямын Культурая министерстволэн но. грамотаосыныз. Таӵе адямиос азьланьто историмес. Соос сярысь ик малпаса шуыны луэ: писпулэн выжыосыз ке муресь, со ачиз но ӝужыт, вылӥе инбаме кыстӥське. Озьыен, музей ужез азьланьтӥсьёс кыдёке азьпала учкыны быгато, сэзь синъёсын выль дауре выжо. Т. Петрова. Удмурт Республикаысь Кун Кенеш, Правительство кайгыро Удмурт Республикаысь гурт удысъя но сиён-юонъя министрлэн азьвыл нырысетӥ воштӥсез, "Удмуртагропромхимия" огазеяськонлэн кивалтӥсез ШУКЛИН Александр Игнатьевич улонысь кошкемен валче но мур куректэмзэс верало ӵыжы-выжыосызлы но матысь адямиосызлы. Люкиськон луоз 28-тӥ ноябре таӵе адресъя: Иж город, Холмогоров урам, 27 номеро юрт, 145-тӥ квартира. Удмурт Республикаысь Кун Кенеш, Правительство кайгыро Удмурт Республикаысь гурт удысъя но сиён-юонъя мнистрлэн азьвыл воштӥсез МАЛЬЧИКОВ Евгений Иванович улонысь кошкемен валче но мур куректэмзэ вера ӵыжы-выжыосызлы но матысь адямиосызлы. Люкиськон луоз 28-тӥ ноябре таӵе адресъя: Иж город, Пушкин урам, 286 номеро юрт, 116-тӥ квартира. Почта кусыпъёсъя службалэн Удмуртиысь управлениез шаерамы потӥсь газет- журналъёслэн редакциосынызы ӵош ортчытъя лыдӟисьёсын пӧртэм пумиськонъёс. Алигес сыӵе ужрад ортчиз Сарапулын. "Комсомольская правда" газетлэн республикаямы печатласькись приложенияз ужасьёс лыдӟисьёссы пӧлын лотерея радъязы. Шудоосызлы шедизы дуно кузьымъёс. Та выллем пумиськонъёс но шудытонъёс ортчытъяны кутске "Удмурт дунне" но. УФПС-ысь гожтӥськонъя отделлэн кивалтӥсез Татьяна Горячих (бурысез) ялэ шудо муртлэсь нимзэ. Гожтӥськон-2001 Палэнскыны капчи, эшъяськыны секытгес "Удмурт дунне" газет "АиФ в Удмртии" газетэн ӵош пятница нуналэ Якшур-Бодья ёросысь гожтӥськисьёс пӧлын ортчытӥз лотереяен шудон. Ужрадэ пыриськизы республикаысьтымы Почта кусыпъёсъя управлениын, ёрос почта ёзын ужасьёс, лыдӟисьёс. 20-тӥ ноябрьлы "Удмурт дунне" газетлы Як.-Бодья ёросын 122 мурт гожтӥськемын, нош 2000-тӥ арын 1-тӥ январьлы газетмес басьтӥз 236 мурт. Якшур-Бодьяос понна туж ӧжыт со, удмуртъёс татын ӧжыт уг уло угось. Ёрос почта ёзысь газет- журналъёслы гожтӥськонэз радъясь Нина Дмитриевна Ушакова та удысын кема аръёс ӵоже ужа ини. - 1983-тӥ арын "Советской Удмуртия" газетэз 615 мурт басьтэ вал, - шуэ со. - Нош вань изданиослы гожтӥськон 24 сюрсозь вуылӥз. Одӥг семья ик вить-куать пумо газет-журнал басьтэ вал. "Советской Удмуртия"-"Удмурт дунне" газетэз ёросамы улӥсьёс туж яратыса басьтылӥзы. Но троссэ лыдӟисьёсмес ыштӥм, газетъёсты огазе интыям ящикъёсы тырылыса. Пичигес гуртъёсысь почтальонъёсты кулэсъязы. Газет лыдӟись доры нуналаз ик ӧз вуылы ни. Тӥни озьы адямиосты лыдӟиськонлэсь палэнтӥмы, дышетӥмы соосты газет-журналъёстэк улыны, нош выльысь эшъяськыны секытгес йӧтэ ни. Почтаын ужасьёсын соглаш кариськытэк уг луы. Вань на мукет но мугъёс, адямиосты зӥбе коньдонлы ёрмон. Но озьы ке шуоно, Якшур-Бодья ёрос республикаямы куанеръёсыз пӧлы уг пыры. Озьыен, луонлыкъёс вань газет-журналъёсын эшъяськыны. Кин тодэ, оло, та ёросысь но лыдӟисьёс шудоосыз пӧлы шедёзы, арлы йылпумъянъёс лэсьтыку. Нош таяз лотереяен шудонын удалтӥз Коӵыш гуртысь Елена Геннадьевна Пантелеевалы. "Удмурт дунне" газет сярысь солы котьку тодэ вайытоз будильниклэн жингыртэмез. Газетмес та нуналлы ёросын тужгес но трос вӧлмытӥз Кыква гуртысь почтальон Светлана Владимировна Пантелеева. Ӟеч ужамез понна редакция солы кузьмаз борддоре ошон дуно час. Гожтӥськон азьланьтӥське на, ойдолэ бен ог-огенымы эшъяськыса улом. Л. Малых. Вань удмуртъёслэн ӧтчамзы азьын Пельпумез шонертыны дыр вуэмын Алигес Дэбесын ортчиз "Удмурт кенеш" ассоциацилэн та ёросысь ёзэзлэн конференциез. Отчы велӥзы огазеяськонлэн вице-президентэз В. Я. Митрофанов но мукет кивалтӥсьёс. Ёрос кенешлэн берло дыре ужамез сярысь отчёт лэсьтӥз праленилэн председателез Эвелина Будина. Конференция умой ортчиз, 83 мурт пӧлысь котькудӥз ньылетӥез вераськыны быгатӥз, соин ик ужпумъёсты котыр ласянь эскерыны луиз. Люкаськемъёс бырйизы Вань удмуртъёслэн вуоно ӧтчамазы сизьым делегат. Тани соос - Э. А. Будина, В. М. Нуриахметов, В. А. Каракулов, Б. В. Урасинов, С. К. Смирнова, И. Н. Кропотин но Г. Л. Перевозчикова. Правленилы кивалтӥсе выльысь быръемын Эвелина Будина. Со азьло ужаз ёрос газетын, табере Дэбесысь музеен кивалтэ. Умой соиз: ёросын уно адямиос удмуртлык понна асьсэлэсь ваньмон дырзэс жалятэк ужало. Дышетскем адямиос ас удмурт калыкезлэн улонэз сярысь сюлмасько. Со озьы ик луыны но кулэ кадь, интеллигенция ке ӧз, кин-о огшоры калыклэсь синъёссэ усьтоз? Котькуд ужась адями улонэз мургес мед валалоз, кулэтэменыз медаз герӟаськы, ваньмон дырзэ пайдаё мед ортчтыоз, адӟем карымон нылпи мед будэтоз но котьку ас ужаз ӟеч мед тыршоз. Грамотаосын пусйыкузы, Эвелина Будина ӧтиз Зар.-Медла гуртын улӥсез Нина Васильевна Тутаеваез. Со ӟуч кышномурт, вордскемын но будэмын Вологда областьын, егит дыръяз тодматскем отын службазэ ортчытӥсь удмурт пияшен, бызем но дорамы вуэм. Нина Васильевналы кельшем удмурт калык, солэн культураез но кылыз, со ӝог дышетэм мурт кылэз, табере сцена вылысен но кырӟа ни удмурт кырӟанъёсты. Со гинэ-а? Та ӟуч кышномурт мур пыриське удмуртлыкез вылэгес ӝутонэ, "Удмурт кенешлэн" Зар.-Медлаысь ёзэзлэн членэз луэ. Созэ но вератэк кельтыны уг луы: кытын гажало ас выжыоссэс, отысь калык гуртысь уг кошкы, нылпиоссылы выль юрт пукто, ужасьёслы но уг ёрмо. Миым, ар талэсь азьло, Будина ужан план кылдытӥз, котыраз юрттыны дась луись адямиосты люказ. Калыклэсь мылкыдзэ ӝутон вылысь, со герӟаськиз Дэбесысь "Ӟардон" ансамблен. Та ансамбльлэн сюлмыз но визьмыз - покчи классъёсын дышетӥсь Эльза Семеновна Россова но Галина Азарьевна Образцова. Соос ӵош ветлӥзы Вуж Кыч гуртэ, соку нырысьсэ усьтӥзы отын "Удмурт кенешлэсь" ёззэ. Пумиськонэз дасяны умой юрттӥз библиотекарь Антонида Алексеевна Хохрякова. "Ӟардон" пыриськиз Г. М. Корепанов-Камскийлэсь юбилей ӝытсэ ортчытонэ но потаз ёросысь мукет гуртъёсы, озьы ик вуылӥз Иже, марий-Эл республикае, Челябинск областе. Пусйымон ортчиз Гыркеснюк гуртлэн праздникез, соку ик та гурт сярысь гожтэм книгаен тодматон радъязы. Удмурт движение пырисьёслэн юрттэменызы ортчытэмын Ягвай гуртлэн праздникез. Та уже тужгес но пырисько, шуом, удмурт кылъя дышетӥсьёс, мукет дышетӥсьёс но библиотекарьёс, гурт администрациосын ужасьёс. Но мукет удысъёсын тыршисьёс пӧлын но юрттӥсьёсьёс ичи ӧвӧл. Сыӵеос пӧлын - газ участокын ужась Татьяна Геннадьевна Сундукова, коммунальной хозяйствоын ужась Ирина Всеволодовна Зюзикова но трос мукетъёсыз. Яке басьтом "Байгурезь" ӟуч ансамбльзэс. Со удмурт кырӟанъёсын быдэс блок кылдытэм ни, нош кырӟало туж шулдыр, удмурт артистъёс музэн - калыклы туж кельше. "Удмурт кенеш" юрттӥз "Чеберина-2000" конкурсэз ортчытыны. Дэбес гурт администрацилэн тӧроезлэн Вениамин Дмитриевич Серебренниковлэн дэмламезъя радъямын вал яратонлы сӥзем шудон, туж усто ортчиз со. Ӝытэз дасяз библиотекарь Екатерина Павловна Леконцева. Котькыӵе ужрадэз ортчытыны кулэ коньдон. Та ласянь юрттэ Ижысь "Байгурезь" землячество. Соин кивалтэ Иван Николаевич Кропотин. Г. М. Корепанов-Камскийлэсь юбилейзэ пусъёнэ-а, Уйвай-Медлаын Алексей Ложкинэн пумиськонэ-а, мукет ужрад дыръя-а - со котьку быгатэмезъя коньдонэн но аслаз капчи мылкыдыныз пыриське ужрадъёсы. Май толэзе удмурт интеллигенциен пумиськон ортчытӥзы М. Г. Гаврилова-Решитько но Р. И. Яшина. Егитъёсын умой ужало "Шунды" огазеяськонлэн Дэбесысь "Тылси" ёзэз, отысь Татьяна Николаевна Осотова но Ирина Федоровна Тимирзянова, берлоез педучилищеын удмурт кыллы но литературалы дышетэ. Э. А. Будина ас докладаз пусйытэк ӧз кельты сюлэмвисёнъёссэ но. Кылсярысь, со пусйиз: - Ветлӥм "Шундылэн" дас ар тырмоназ, юбилее мынэмъёс пӧлысь ӝыныез мынӥзы удмурт кылэз тодӥсьтэмъёс. Нош кин та ласянь ужаз - соосты малы ке ӧтиллямтэ... Куд-ог гуртъёсын ӧм быгатэ на ёзъёсмес кылдытыны. Тырмыт ӧм ужалэ удмурт кадръёсты дасянь ласянь. Калыкен лябгес ужа Дэбесысь клуб. Ӧм на пӧрмытэ "Удмурт кенешмылэсь" Данъян книгазэ усьтыны. Но соиз умой: ёрос тӧромы Б. В. Урасинов куронъёсмылэсь уг палэнскы, ачиз но ужрадъёсамы пыриськылэ. Со оскон кылдытэ, азьланяз уката тросгес ужрадъёс ортчытъяны быгатомы шуыса. Коньдон ласянь капчи ӧвӧл ке но, пичиен-пичиен юртӥсьёс шедё, тау соослы. Правленилэн миым ужамез умоен лыдъямын. Со сярысь пусйизы прениосын туж уно вераськисьёс. Зэм, соос куд-ог тырмымтэосты но шараязы, уно дэмланъёссэс веразы. Кыч гуртысь библиотекарь А. А. Хохрякова дэмлаз библиотекаязы колхоз музей кылдытыны, нылпи врач Г. Л. Перевозчикова ӵектӥз пиналъёсты Ижысь удмурт театре но творческой пумиськонъёсы ӵемгес нуллыны, Сюрногурт школалэн директорез Р. Н. Поздеева сюлмаськемзэ вераз школаосты национальной программае выжтон пумысен. Дышетӥсь Е. А. Бушмакина мадиз, кызьы ёросын драматург Е. Е. Загребин кутскем нылпиосын театральной кружок нуыны, писатель Никвлад Самсонов - литературно- творческойзэ. Кыӵе мылкыд кылдӥз, конференцие ветлыса? "Удмрут кенеш" ассоциацилэн ёзэз удмуртлыкез ӝутон ласянь бадӟым уж нуэ. Ёрос кенеш пыд йылаз йыг-йыг сылэ ни. Дыр вуэмын табере пельпумез умой-умой шонертыны. Уго лэсьтоно ужъёс туж трос на. Мынам малпамея, ӟечгес сюлмаськоно калыкмы сярысь тодон-валанъёсты, иворъёсты вӧлмытон сярысь. Татын тырмыт уг басьто удмурт газетъёсты но журналъёсты. Тани туэ отчы лыктэ 462 экземпляр "Удмурт дунне" газет. Вуоно арлы гожтӥськемъёс ог 200 гинэ ай. Мукет изданиос ласянь но югдур урод. Гожтӥськон йылпумъяськытозь дыр вань на. Оском, дэбесъёс бере уз кыле шуыса. П. Скобелев. Туспуктэмъёсыз С. Катаевлэн. Кенеше зал тыр калык люкаськылӥз. Правленилэн кивалтӥсез Э. М. Будина грамота сётэ ӟуч кышномуртлы Н. В. Тутаевалы. Президиум ужа, кенешез нуэ В. И. Агеева. И. Ф. Тимирзянова. Тӥтэк уг вордӥськы газет Дунне ӟеч адямиостэк ӧвӧл, шуо. Соос сярысь яркыТ но тунсыко веран - мынам нырысетӥ сюлмаськонэ. Кияса ёросысь Уддяди (Карамас-Пельга) гуртын улэ-вылэ туж чебер но йӧно адями - Ӝакы апай. Ольга Николаевна Соловьёва. Ас вакытаз пӧртэм шуг-секытъёсын пумиськыса, та кышномурт мемитэк кылем нылпиос доры мынӥз но соослы туж ӟеч анай луиз. Пыд йылазы султэм пиналъёсыз али но сюлмысьтызы тау каро мусо но яратоно нэнэзылы. Бератаз мукетъёсызлы но лулысь-сюлмысь юрттӥз на Ольга Николаевна Соловьева. Мон ачим но туж синмаськисько та адямилы. Кызьы меда уд мадьы Ӝакы апай сярысь газет бамын?! Таӵе йӧно малпанме кемалась ини возисько сюлэмам. Озьы бере, сое уж вылын быдэстоно. Кемалась синмаськисько Вавож ёросысь Гурезь-Пудга школалэн директорезлы, Удмурт шаерысь дано дышетӥсьлы Анатолий Максимович Егоровлы. Анатолий Максимович, котькыӵе шугадӟонъёсты чидаса, выльысь улӟытӥз чылкак бырыны шӧтам Эмезьгуртэз (сое ас вакытаз кылдытэм быдӟым удмурт Куӟебай Герд). Саесъёссэ пужалтыса басьтӥськиз но инъяз Кузьма Павлович Чайниковлы (Куӟебай Гердлы) сӥзем синпель юрт. Али со ужа. Уно калыкез тодматӥз ини та быдӟым адямилэн улэм- вылэменыз. Анатолий Максимович Егоров сярысь веранэ но одно ик мед вуысал газет баме. Удмурт радио пыр алигес кылӥ Алнаш ёросысь Ӧркагуртысь туж паймымон пудо возьмась Сергей Евдокимович Леонтьев сярысь. Бен, таӵе адямиос пумысь гожъямъёс газет бамын туж шер адӟиськыло. Нош соос туж кулэ но секыт ужъёсты быдэсъяло ук! Макем чидасесь соос, вал сюдӥсьёс, пӧйшурасьёс, нюлэсчиос, чорыгасьёс, пудо эмъясьёс, мушкасьёс... Та паймымон эшъёсы сярысь мадёнъёсы - азьпалан. Азьланяз одно ик кылдозы, дыр, шаерысьтымы тодмо гожъясьёс сярысь веранъёсы. Соослэн улон-вылонзы туж гожмо но йӧспӧртэм ук. Котькудӥз сярысь нуналэн- нуналэн мадьыны луоз. Данъяськисько вань удмуртъёслэн "Удмурт кенеш" огазеяськонзылэн тӧроеныз Валентин Кузьмич Тубыловен. Кыӵе зӥб-зӥб но ӝикыт воргорон! Таӵе адямиосмы вӧзамы луизы ке, асьмеос , удмуртъёс ноку но ум быре. Валентин Кузьмич Тубыловлы сӥзьысал одӥгзэ веросме. Газет бамын озьы ик ялан луозы культура удысысь пӧртэм ужпумъёслы сӥзем гожъямъёс, соос пӧлын ик - устолык удысысь тужгес даноосызлы сӥзем ивортонъёс. Мынам нырысетӥ юрттӥсьёсы - редакцие ас гожтэтъёсынызы дыртӥсь лыдӟисьёс. Соостэк уг вордӥськы одӥг газет но. Бур киы - Киров улосысь Калмез ёросысь Бураши гуртын улӥсь Николай Никифоров. Таӵе секыт вакытэ но Николай Михайлович кытысь меда шедьтэ такем чебересь веросъёс, кузьмадёсъёс кылдытъян кужым?! Тани али но ӝӧк вылам асьсэлэсь черодзэс витё солэн данак печатламтэ ужъёсыз. Матысь дыре газет баме соосты одно ик вуттыны тыршом: лыдӟисьлы но угось туж ярало Николай Михайловичлэн гожъямъёсыз. Мынам матысь эшъёсы - шаерысьтымы пӧртэм удысъёсын ужасьёс. Туннэ туж бадӟым тау карисько тодмо тодосчиосмылы, гожъясьёсмылы, суредасьёсмылы, кырӟась- верасьёсмылы, озьы ик - нуналмысь огшоры ужез быдэсъясьёслы. Котьку луэлэ таӵе ик, гажано эшъёсы-юлтошъёсы! Эн гинэ вунэтэлэ редакцие нуись сюресэз! Вань сюлэмшугъёстэ вунэтыса, гожъя но гожъя вылэм. Зэм, выль даур сьӧры ворттӥсь вал кадь уиськись вакытмы котькудӥз азе пуктэ туннэ данак мукет куронъёс. Озьы ке но, мон котьку тонэн, гажано лыдӟись эше! Тон сярысь нуналмысь малпаськон, тыныд ӟеч кыл веран, тынад сюлэмад шуныт но югыт пыртон - мынам нырысетӥ сюлмаськонэ. Елена Виноградова. Диплом - дышетонтэк Вылӥ дышетскон заведениослэн дипломъёсынызы вузкарон сярысь туэ ваньмыз тодо ини, дыр. Вузын одӥг нунал но дышетскытэк, луэ котькыӵе специальностья диплом басьтыны. Кызьы интыяськод уже сыӵе документэн - мукетыз ини ужпум. Но, кызьы шуо сыӵе дыръя, нырысетӥ интыын диплом, нош тодон-валан кызьы ке но люкаськоз ини ужамъя. Ӵапак озьы малпаллям, шӧдске, Ижевскысь гурт хозяйствоя академиысь студентъёс. Ӧз, соос вузэ пыратэк дипломъёс ӧз басьтэ. Но зэмос сямен ӧз но дышетске. Шуом, одӥг предметъя ке но. Соя экзаменъёсты соос дышетскытэк сётъязы. Ужаз академиын старшой преподаватель луыса Анатолий Павлович Бабкин. Нуиз со экономикая факультетын анализ хозяйствоенной деятельности предприятия шуыса нимаськись предметэз. Экономистэ дышетскем адямиос ӟеч тодо, макем огшоры ӧвӧл та наука шуыса. Валамон ини, экзаменэз но секыт гинэ. Курсовой уж сярысь веранэз ик ӧвӧл: сое дасян понна кыӵе ке гурт возёслэсь ужамзэ пыр-поч эскероно, олокӧня-мар таблицаос но диаграммаос лэсьтоно. Нош экзамен понна ӟеч дунъет басьтод шуыса, оскон ӧвӧл, вылаз ик, дышетӥсед А. Бабкин сямен бадӟымесь куронъёс пуктэ ке. Огъя вераса, вуоно экономистъёслы уд вожъяськы. Но студентъёс котьку котькытыны шуг югдурысь потыны быгатылӥзы. Тани таяз учыре но соос чурыт преподавателен огъя кыл шедьтӥзы. Ку но кызьы кутскиз дышетскыны азьтэмъяськись студентъёслэн но коньдон поттыны быгатӥсь преподавательлэн эшъяськонзы, пыр-поч тодмо ӧвӧл. Следствие шараямъя, 1996-тӥ арысен. Уголовной ужын нырысетӥез учыр пусъемын ноябрь толэзе. Ӵапак соку студентка-заочница Н. Шмыкова сётэм А. Бабкинлы 50 сюрс манет (валамон, соку ветлӥсь уксёен). Со понна соиз пуктэм Шмыковалэн зачётной книжкаяз кык "ньыльёс" - курсовой уж понна но экзамен понна. Со толэзе ик коньдонзэс отметкаосын вошто О. Юрина но Е. Молчанова, декабре - И. Дегтярева. Вуонояз аре эшшо но тросгес студентъёс тодон-валанзэс коньдон тырыса йылэто. Тулыс сессия дыръя 5 егитъёс дышетӥсьсылы быдэн 20 сюрс манет сёто, ноябре 9 адями 1 миллион 600 сюрс манет люка. Декабре 21 студентъёс зачёт пуктэм понназ Бабкинлы сёто быдэн 20-25 сюрс манет. Ӝыны ар ортчыса, ваньмыз та эшъёс коньдон кусыпъёссэс юнмато. Со сяна, 1998-тӥ арлэн кутсконаз, Анатолий Павлович 38 (!) адямилы юрттэ. Ужбергатон азинскемъя, преподаватель-экономист дунъёссэ но радъяны тырше. Азьвыл солы вазиськемъёс быгатэмзыя, кин 20 сюрс, кин 40-50 сюрс тыро ке вал, табере дунъёс ваньмыз понна одӥг кадесь тупатэмын: "витьлы" - 120 манет, "ньыльлы" - 90 манет. Коньдонэз отметкалы воштонын номыр кескичез, йӧспӧртэмез ӧй вал. Студент огназ ке, коньдонзэ преподавательлы сётэ но соиз зачётной книжкае но ведомосте отметка (сётэм дунызъя) пуктэ. Курсовой ужъёсын йӧнгес. Анатолий Павлович азьвыл дышетскемъёслэсь вуж ужъёссэс али студентъёслы сётъяз. Соос, вылӥ бамаз асьсэлэсь ним-тулзэс гожъяса, ужъёсты берен кафедрае сётъязы. Озьы визьмо студентъёс мурт ужъёс чотын отметкаос басьязы. Коньдонэн отметкаосты вузан-басьян кык ар ӵоже кыстӥськиз. 1998-тӥ арын 25-тӥ ноябрез А. Бабкин вань улытозяз тодаз возёз, дыр. Со нуналэ Анатолий Павлович "ӝуаз"... 16 часэ Анатолий Павлович экзаменъёс но курсовой ужъёс понна отметкаос "вузаз" Л. Бусаревалы, Л. Ларионовалы, О. Ибрагимовалы но С. Колесовалы. 17 часэ со доры со кабинетэ ик 250 манет вайыса лыктӥз А. Потемкин. Эх, тодысал ке Анатолий Павлович, та пияшлы со коньдонэз, номеръёссэ гожъяса, милициын сётӥзы но кисыяз диктофон донгизы шуыса!.. Ӧз но малпалля угось. Соин ик, кызьы вераськемын вал, уксёзэ басьтӥз но экзамен понна но курсовой уж понна отметкаос пуктӥз. Нош собере сое оперативникъёс кырмизы, шедьтӥзы пусъем коньдонзэ. Коньдон сярысь вераськемез но диктофонын гожтэмын, уд танӥськы. Студент Потемкин "коньдон-отметка" кусып тупатъялляз вал ини Бабкинэн. Но таяз учыре коньдонэз-а жаль потӥз яке дышетӥсьсэ-а адӟемпотостэм карыны кутскиз но Бабкинэн пумиськемезлэсь азьвыл милицие мынӥз. Оперативникъёс, кызьы тодӥськом ини, рос-прос дасязы сое пумиськонлы. Толэзь талэсь азьло А. Бабкинлэн судэз вал. Элькунысь Вылӥ суд солы 5 ар условно сётӥз, туж ляб тазалыксэ но азьвыл суд улэ шедьылымтэзэ лыдэ басьтыса. Со сяна, кы ар ӵоже солы ӧвӧл лэземын дышетон ужын ужаны. Кин солы коньдон сётъяз, соос пӧлысь одӥгез но кыл кутон улэ ӧвӧл кыскемын. Соос свидетельёс луыса судэз ортчизы. Следствилэн чакламезъя, сю пала адями. Таин валче, туж тунсыко луысал, дыр, кузьмаськисьёслэн ужъёссы пумысен малпаськыны. Следствие но, суд но соосты янгышен ӧз лыдъя. Соос, пе, ас мылкыд каремзыя кузьмаськемзы сярысь мадизы, следствилы юрттӥзы. Веранэз ӧвӧл, законлэн куронъёсызъя шонер со. Но меӵак учкыса, кин меда ачиз мылкыд кариз следствилы юрттыны? Ваньзэсты, Потемкинэз вератэк, следовательёслы утчано (быдэс республикаысь), допросэ ӧтчано но юалляськоно луиз ук. Но ярам, следсвилэн но судлэн ужамзылы дунъет сётыны ум турттэ, сыӵе ужпум газетлы уггес тупа. Вылаз ик, кузьмаськисьёслэсь но одно ик "вирзэс кисьтыны" ум ӧтиське. Тужгес но тунсыко потэ мукетыз: кыӵе меда дунъет сёто асьсэлэн ужъёссылы асьсэос кузьмаськисьёс? Табере соос ваньзы йылпумъязы ини дышетсконзэс, дипломъёс басьтӥзы. Специалистъёс луизы, кудъёсыз кивалтӥсьёс но. Ужало пӧртэм интыосын, вань налоговой инспекциын но полициын но, мукет элькун учреждениосын но тыршисьёсыз. Куд-огез табере ачиз нюръяське тырмымтэосын, йыртэманэн но законэз но порядокез тӥянэн. Нош тодазы уг лыкты меда, кыӵе амалъёсын соос ортчизы та бадӟым уже вуттэм сюрессэс? А. Бабкинэз шонере поттыны нокызьы но уг луы, веранэз ӧвӧл. Но со дыре ик юнме шорысь уг шуо ук: ӵектонэз, пе, кулэяськон поттэ. Асьме югдурын дышетскыны азьтэмскись студентъёс отметкаослы кулэясько вал. Соослы ӵектӥзы сыӵе отметкаос. Бабкин ке ӧй, мукетыз луысал. Ма, кин тодэм, оло, мукет факультетъёсын но вузъёсын сыӵеос туннэ но вань. Ӵапак уголовной ужен тодматскон нуналэ, мон автобусысен эриктэм кылӥ егитъёслэсь куспазы вераськемзэс. Нылаш пияшлы маде дышетскемез сярысь, коньдон, пе, кулэ луоз зачёт азьын, преподавательлы 100 манет сётыны. Пияшез тунсыкъяське, кӧня, пе, сётоно экзаменын отметка понна. Нылаш верамъя, солэн эшез "кыксэ" "ньыльлы" тупатон понна 700 манет сётэм. Сыӵе дунъёс Ижевскысь технической университетын (Бабкин шӧдскымон востэмгес адӟиське). Малпасько, студентъёс пӧлысь лыдӟисьёсмы но соослэн анай-атайёссы одӥг гинэ таӵе выллем учыр уз вералэ, дыр. Ма, табере нокин но уг паймы ни кадь, вузъёсын но техникумъёсын экзаменъёс вузкаронлы пӧрмизы шуыса. Улонамы кортнэттэм рынок вуэм бере, ваньмыз вузлы пӧрмиз, котькытын коньдон кузёяське. Кин сое уг вала, пӧрмостэм кадь адӟиське. Дышетӥсьёслы, оло, уката но секытгес йӧтэ. Куке но гажано, вылӥ дунъям специалистъёс калык радъя сиыны-юыны но дӥсяськыны уг быгато. Тани со Бабкинлэсь ик мон уждунлы ведомостьсэ учки. 1998-тӥ арын одӥг толэзе но 600 манетлэсь бадӟымез лыдпус ӧвӧл. Кызьы улод, маин вордод семьядэ? Нош со дыре тынад ик студентъёсыд выжыкылысь сяськаос выллем дӥсяськыса ветло, нуназеян дыръя сур юо, лекциос вискын вӧзад импортной тамак кыско. Та материалэз дасякум, А. Бабкинлэн следователез Д. Матушкин (али со Ижевск городлэн прокурорезлэн воштӥсез) куриз: газет пыр пыкылыоно, пе, вал селхозакадемилэсь кивалтӥсьёссэ, кузьым октӥсьёслы пумит кулэ ужрадъёс кутымтэзы понна. Соиз озьы, кулэ, дыр. Но дышетонэн кивалтӥсьёс азе мукет курон но пуктыны кулэ. Нырысь ик, мед соос юнгес сюлмаськозы дышетӥсьёссы сярысь. Тодӥсько, одно ик чӧлскозы быдэс государствоын югдур вылэ, солэн дышетон удыслы тырмыт саклык висъямтэезлы. Но малы ке но нокыӵе югдур но уг люкеты ректоръёсоы номырлы ёрмытэк улыны. Кызьы ке мукет удысъёсын вылӥ кивалтӥсьёслэн но огшоры ужасьёслэн уждунъёссы ӵошатонтэм луизы, озьы ик дышетсконын но. Котьма вераны луоз А. Бабкинлэн преступлениез пумысен. Шуом, дышетӥсьлэсь данзэ коньдонэн воштыны уг луы яке мукетъёсыз чидало, уг йыртэмало но трос мукетсэ. Но мон сямен, янгыш татын кызьы ке огъя югдур но, озьы ик кузьмаськисьёс но. Йылпумъяса нялтас верам потэ соос пӧлысь одӥгез сярысь. Одӥгысьтыз групаысь студентъёслэсь коньдонзэс Бабкинлы сётон вылысь бичам Я. Дилянов. Люкам 4000 манет, нош Бабкинлы сётэм 700 манет. Таиз верамын мед луоз кузьмаськисьёслэн туссы пумысен. Г. Тихонов. Сергей Трухин уртче ужаны ӧте Ижевскысь улон интыосты возёнъя управленилэн (ГЖУ) кивалтӥсез Сергей Трухин алигес ортчытэм пресс-конференцияз журналистъёслы ӵектӥз огазьын ужаны. Рос-прос валэктӥз, малы кулэ луиз. Жилищно-коммунальной хозяйствоын воксё ёрмиллям ини улон интыосын ваньбурез тус-тас каронэн. Улон юртъёсысь, нырысь ик подъездъёсысь, лушкало ваньзэ, мае гинэ луэ: лампочкаосты, проводъёсты, счётчикъёсты, укноосысь пиялаосты, лифтъёсысь качало, эсьмаса, ӧсъёсты но нуо. Интыяз выльзэ пукто но соиз но туж ӝог ыше. Но лушкаськемен гинэ ӧвӧл ай. Егит укылтэмъёс, киоссы лыдыса, изъянто подъездъёсысь но азабръёсысь ваньбурез. Нокыӵе коньдон но, кужым но уз тырмы пумтэм, вылысьтыз вылаз ваньзэ ышемзэ но изъянтэмзэ ялан вошъяны но тупатъяны. Нош улӥсьёс ӝожтӥсько: ми, пе, улон инты понна коньдон дыраз но тырмыт тыриськом, нош подъездъёсын кезьыт, пеймыт, кырсь, лифтъёс уг ужало, азбаръёсын жуг-жаг. Ӝожтӥськемзы валамон кадь. Но мукет ласянь учконо ке, асьсэос улӥсьёс бордысь но потэ ук улон интыосын югдур. Малы соос чылкак уг чаклало улон интыосазы югдурез, малы уг нюръясько порядок понна? Кызьы соослы пыӵатоно коркаослы но азбаръёслы кузё луон мылкыд? Жилищно-коммунальной удысын ужасьёс огназы, ас кожазы гинэ уг быгато улон интыосты кулэезъя возьыны. Ачиз калык та уже ӧз ке пыриськы, удыс озьы ик пыдэстэм бекче кылёз. Соиз зэм, адямиос, улон инты понна дун тыро, ваньмыз ик дыраз уг ке но. Но со коньдон уг тырмы. Дунъёсты уд будэты, асьсэос улӥсьёс солы пумит луозы. Озьыен, ваньбурез шыръяно, солы кузё котькудӥзлы кариськоно. Ӝожтӥськиськом, коркаосын кезьыт шуыса. Нош асьмеос укно висъёсты ум ӵоктаське, подъездъёсын ӧсъёсты мышкамы ум пытсалляське, лампочкаос уен-нуналэн ӝуало. Ву сярысь веранэз ик ӧвӧл. Со понна дун адямилы быдэ 300 литрлы чакламын, асьмеос быдэн 1000 литр быдтӥськом. Нош "Водоканал" нормаосты уг учкы ведь: кӧня ву быдтӥд, сомында ик тыр. Тыре жилищно- коммунальной хозяйство. Нош со ачиз коньдон уг потты, калыклэсь люка. Озьыен, мар понна гинэ эн тыры, ваньмыз со улӥсьёслэн кисыысьтызы потэ. Кызьы сое адямиослэн визьмазы вуттоно? Кызьы соослы кузё мылкыд пыӵатоно? Тани мар бордын уртче малпаськыны, ужаны ӧтиз журналистъёсты Сергей Трухин, ГЖУ- лэн кивалтӥсез. Ватонэз ӧвӧл, улон интыосты возён журналистъёслэн ужазы нырысетӥ ужпумъёссы пӧлы уг пыры. Гожъяны, вераськыны со сярысь туж ик шулдыр ӧвӧл, мӧзмытгес тема, шуод-а, мар-а. Озьы ке но, солэсь палэнскыны но уг яра. Журналистъёс но угось ваньмыз кадь улон инты возисьёс. Г.ТИХОНОВ. Тупанкыл гожтӥзы Удмурт Республикаысь Прокуратура но Эскерон кун комитет куспын валче ужан сярысь Тупанкыл гожтэмын. Отын валтӥсь инты басьто Россилэн но Удмуртилэн Конституциосынызы тупатэм правоосты тӥян учыръёсты дыраз палэнтон, обществолэсь но кунлэсь кулэяськонъёссэс утён, республикалэсь бюджетсэ быдэстон удысын чаклам куронъёсты эскерыса возён. Прокуратура но Эскерон комитет соглаш луизы правоосты тӥян учыръёс сярысь ог- огзылы дыраз, ватытэк ивортылыны, ӵош ортчытъяны эскерон ужрадъёс, огъя кенешъёс. Тупанкыл гожтӥзы республикаысь Прокурорлэсь ужзэ быдэсъясь Александр Борзенков но Эскерон кун комитетлэн тӧроез Александр Кузнецов. Кун Кенешлэн Тӧроезлэн нырысетӥ воштӥсез Владимир Агашин пусйиз та Тупанкыллэсь туннэ нуналлы туж кулэ луэмзэ. Со юрттоз Эскерон кун комитетлэсь но Прокуратуралэсь законэз тӥян учыръёсты палэнтонъя но шаерамы улӥсьёслэсь конституциен тупатэм правооссэс утёнъя ужзэс кулэезъя радъяны но быдэсъяны. Удмурт Республикаысь Кун Кенешлэн пресс-службаез. Туж бадӟым тау! Юбилей ӝытам пыриськемзы но юрттэмзы понна, туж бадӟым тау карисько шаерысьтымы Печатья но иворъёсъя, Калыкез дышетонъя министерствоослы, Уваысь "Купанча" ансамбльлы, солэн кивалтӥсезлы крезьгурчилы Пантелей Кузнецовлы, Уваысь сюрес лэсьтон предприятилэн кивалтӥсезлы Аркадий Позыревлы, та ёросысь "Дружба" колхозлэн кивалтӥсезлы, Булайысь "Купанча" ансамбльлы, Булай школаысь дышетӥсьёслы, Булай починка калыкелы, ӵыжы-выжыосылы, эшъёсылы. Озьы ик бадӟым тау карисько ӝытам кырӟась-верась, шудӥсь артистъёслы. Ваньдылы ик инмар азинлык, шудбур, тазалык мед сётоз. Галина Романова. Гурт улон Ӟеч выжытэк йӧл трос уд кыскы Селта ёросысь Винишур-Бия посёлокын вордӥськем Татьяна Скрябинаез, Ижысь гурт удысъя институтэз йылпумъямез бере, ужаны ыстӥзы Игра районысь "Чутырский" совхозэ. Со вал кызь ар талэсь азьло. Егит специалист буш интые ӧз лыкты, хозяйствоын ӟеч выжы пудо уськытон борды басьтӥськизы ни вал. Но уг тырмы вал та ужез зол-зол бергатӥсь-радъясь. татьяна Сергеевнаез зоотехнике-селекционере юнматӥзы. Тӥни ӵапак со луиз совхозын ӟеч выжы пудо кылдытонлэн кутсконэз. Холмогор выжы скалъёссэс голжтинофриз ошъёсын бызьылытыны ӧдъязы. кыкез ик та скал выжы трос йӧл сётэ. Озьы выль выжы пудо кылдӥз. Нош Татьяна Сергеевна мултэс востэм сямзэ возьматыса кадь, шуэ: - Мон лыктэмлэсь азьло но татын племенной уж нуо, бонитировка (пудоез арлы быдэ котыр ласянь пыр-поч эскерон - Г. Р.) лэсьто ни вал. Кутскемзэ азинтӥ гинэ. Нырысь кыкез ферма племенной луиз, собере - ньылез, нош 1997-тӥ арын быдэс хозяйствоез племенной репродуктор каризы, лицензия сётӥзы. Табере со районысь но республикаысьтымы музон гурт кооперативъёслы, эштосъёслы но фермеръёслы ӟеч выжы скал вуза ни. Бен, азинсконъёс кожаз уг лыкто. Вить ар талэсь азьло гуртысь специалистъёслы, уката ик Татьяна Сергеевналы, бадӟым сюлэмшугъясьокн усиз, скалъёссы лейкозэн курадӟыны ӧдъязы. Соин нюръяськон но пудоез тазамытон понна кӧня кужымзэс сётӥзы, Киров улосысь умоесь ветыъёс басьтӥзы, асьсэлэсь таза ветылъёссэс вордыны кельтӥзы. Озьы со арын ик быдэс гидэз одӥг уллёен тырмытӥзы. Зоотехникъёслэн, ветврачъёслэн но пудо утисьёслэн тыршемзы-сюлмаськемзы табере син азьын. "Чутырский" гурт кооператив али районын ваньмызлэсь уно йӧл кыске, Удмуртиын но азьмынӥсьёс пӧлын ветлэ ни. Кылсярысь, хозяйствое ми вуылон дыре, августэ, Чемошур фермаын скаллы быдэ нуналаз 17 килограммлэсь трос йӧл люкало вал. Нош миым соос котькуд скаллэсь 5030 килограмм басьтӥзы но вань эшъёссэс азьпалтӥзы. Азьвелӥсьёс сьӧры уйисько Чутырьысь но Удмурт Лозаысь дояркаос. таосыз но 4 сюрс килограммлэсь уно кыско. Ӧжыт гинэ бер кыле Вылӥ Нязь ферма. - Чемошур фермаез кебасьтоно, - маде зоотехник. - татын тыршо ужез яратӥсь адямиос. Отделенилэн кивалтӥсез Вячеслав Сергеевич Кодевников но туж сюлмасько. Пудо сиёнлы ноку уг ёрмо. Со бордысь ик тросэз потэ. Ведь юнме шорысь уг шуо, скаллэн йӧлыз кыл вылаз. Но котьмалэсь вылӥе пуктысал дояркаослэсь куспазы вожмаськыса, огкылысь но тупаса ужамзэс. Соос ваньзэ мылысь-кыдысь лэсьто, толалтэ зоотехниклэсь куронъёссэ дышетӥськом, конкурсъёс ортчытъяськом но музон. Ӟеч выжы пудо уськытонын озьы ик трос кужымез но визьмыз понэмын хозяйствоысь валтӥс зоотехниклэн Николай Германович Малыхлэн. Кызьы бен палэнэ кельтод пудо першалэз (ветеринарез) Татьяна Лукъяновна Леконцеваез. Сетпиын вордӥскьем но будэм ныл ужаны лыктӥз татчы. Совхоз квартира сётӥз, табере асьсэос гид, мунчо пукто. Хозяйство лэсьтӥськисьёслы котьмаин юрттэ: сётэ транспорт, шифер, нюлэс но музонзэ. Нимысьтыз пусъеме потэ кооператив лэсь директорзэ Валерий Митрофановез. Со пудо вордонэз азинтонлы шӧдскымон саклык висъя, специалистъёсызлы трос юрттэ, соосты вала но куронъёссэс улонэ пыӵатэ. Хозяйстволэн тӧроез уго тыршис адями, ваньмыз понна сюлмыз висе, трос аръёс ӵоже совхозлэн кивалтыса, бадӟым опыт люказ ни. Мар бен ватонэз, сюлмо ужась кышномуртъёс киын кылдо трос йӧл сётӥсь скалъёс - рекордисткаос. Чемошур фермаын самой трос соос. Нош гуртысь, татысь кышномуртъёслэн, ваньмызлэсь трос уждун ке но басьто, сюлэмшугъяськонъёссы ичи ӧвӧл. Озьы ик Валентина Семеновналэн но. Но ваньзэ газетэ гожтод шат? Чидало угось удмурт нылкышноос, город калыкез йӧлын-вӧйын сюдӥсьёс. Озьы ке но, одӥгез но улэм-вылэмезлы ноку уг ӝожтӥскьы. Котькудӥз огвыллем малпаське но шуэ, Россиын но, дорамы но вир кисьтон гинэ, пе, медаз луы вал, пиосмы армиысь улэпесь но тазаесь мед бертысалзы. Геннадий Романов. Доярка Валентина Лекомцева. Ветврач Татьяна Леконцева. Туспуктэмъёсыз Владимир Беломорскихлэн. АЗЬМЫНӤСЬЁС ДОРЫН Ӟег ке вань, няньтэк ум кыле Оскымон, умой сямо адямиез удмуртъёс ӟег нянь кадь шуо. Со - туж вылӥ дунъет, дыр, няньлэсь дуно дуннеын уго номыр ӧвӧл. Сыӵе малпанэз Инна Александровна Зеленниковалэн, Глазовысь ю тысь кутонъя предприятилэн кивалтӥсезлэн. Вордскиз но будӥз со Воронеж областьысь Алёшки гуртысь крестьян семьяын, нош вань улонзэ, аръёсын люкам тодон-валанзэ сӥзиз Удмурт шаерлы, калыкмес нянен сюдонлы. Шутэтскыны арлыдыз вуыса но сюлмаськонэз ӧз воштӥськы: кун кеносэ тырмыт ю люкано, выль урожаёзь мукет улосъёстӥ тэльмырыса ветлоно медаз луы. Жаля-а Инна Александровна мурт интыосы шедемез сярысь? - Уг, уг жаляськы. Шумпотӥсько таӵе ӟеч, каньыл, ужась сямо калык пӧлы сюремелы. Удмуртия мон понна кемалась кыкетӥ родинаелы пӧрмиз ни. Мон сюлмыным бурми Глазов борды, аслам ужасьёсы, кивоштӥсьёсы борды. Соиз зэм. Коллективез понна со директор но, анай но, эш но. Котькудӥзлы шуныт кыл шедьтӥз, кулэ дыръяз чурыт курон пуктоз. Озьытэк уг луы. 1061-тӥ арысен, Москваысь сиён-юон промышленностья институтэз йылпумъямез дырысен, И.А.Зеленникова татын, кивалтӥсьын - 1984-тӥ арысен. "Воргорон ке луысал, Александровнамы кемалась генералозь вуысал ни" - серекъяло ӵош ужась эшъёсыз. Луысал но, сямыз сыӵе: ялан азьлань дыртэ, вань ужез быдэстыны тыршыса, уез-нуналэз, шутэтсконэз адӟылытэк, валаллятэк. Сюлмыд мед кырӟалоз Воронеж калык вордскыкуз ик, пе, кырӟа. Удмуртъёс сярысь но озьы ик шуыны луоз, дыр. Инна Александровналэн куараез жин-жин. Сыӵе ик сюлэмыз но: вань малпанзэ шара вералоз, номыре но пыдло ватыса уз возьы. Оло, самой соин ик адямиос котыраз бинисько? - Мынам самой бадӟымез сюлмаськонэ - котькудзэ 150 семьяез ӟеч улон интые выжтоно вал, - тужгес но висись яразэ кыре-буре поттэ директор. - Ӝыныезлэсь ятырез ужасьёсмы - пиосмуртъёс, ми ке ӧм, кин соослы юрттоз? Тросэз ӟеч квартираосы потӥзы ни, но черодын сылӥсьёсыз тырмыт на. Предприятие 10 ар ӵоже асьсэлы шуыса улон юрт ӝутыны выриз. Странаын, республикаын оглом югдур воштӥськемен, та уж каллен мынэ. Озьы ке но, коркатуй каронъёс берло арын гинэ вылысьтыз вылаз ортчизы. Даур пумын, оло, эшшо кинлы ке удалтоз на ӵыжак выль улон инты басьтыны. Соку директор но капчияк шокчоз. Зеленниковалэн хозяйствоез бадӟым: 11 гектар вылын элеватор, кеньыр изон, ю тысь кеносъёс, пекарня пуксемын. Огез но тэк уг сылы: уен-нуналэн берга. Валтӥсь интыын татын - тырмыт госрезерв кисьтон но утён, быдэс арлы тырмымон ю- нянь дасян. Туэ та уж умой мынӥз. Нырысь ик, тулысысен кутскыса, котькудӥз эштос, колхоз гырыны-кизьыны тырмыт басьтӥз эстӥськон. Сое висъяз "Удмуртпродконтракт". Кыкетӥез - кылем арен ӵошатыса, тросгес кутсамын ю тысь. Тужгес но та палан удалтӥз ӟег. Шаермы понна со - оскон но кӧттыро улон-вылон. - 1999-тӥ арез секытэн ортчытӥм, ваньзэ-ӧвӧлзэ 1 сюрс тонна сяна люканы ӧм быгатэ вал, 800-900 тонназэ палэнысь басьтоно луиз. Туэ планмес быдэстӥм. Тау со понна ю- нянь будэтӥсьёслы, гуртоослы. Жургето машинаос, гуж! поттэ элеватор. Куасьтэм юлэн гочатӥсь зыныз кыдёке вӧлске. Татын ужась муртлы со нокыӵе ик уг, дыр, йӧты ни: 40 ар ӵоже котьмалы дышоно. Но озьы вылымтэ. Инна Александровна Зеленникова али но шумпотонэн пачылась мылкыдзэ уг ваты: нянь - со нянь. Тӥни малы ӵукналы быдэ кыстӥське татчы сюлэм. Уж ке пӧрме, кырӟам потэ. Нош кырӟаны нылкышноос ярато: коть удмуртсэ, коть ӟучсэ, коть бигерзэ - мылкыд гинэ медло. Уй пал ёросъёс понна Глазовысь хлебоприёмной предприятие оскымон сюдӥсь-вордӥсь луэ шуим ке, ум янгышалэ. Ӟеч урожай дыръя солэн кеносъёсаз 16-25 сюрс тонна тысь люкаське. Пайдаен ужан понна 20 сюрслэсь ичи медаз луы. Нош тодэ ваёно ке тужгес но умой вакытъёсты, 40 сюрсэз но ортчемзы вань. Ӟег ке луиз, предприятие ужтэк уз кыльы. Музон культураослы осконзы ӧвӧлгес. Нош районъёс пӧлысь тысь басьтӥсьёс туэ пусъё Ярез, Глазовез, Балезиноез, Красногорскез. Отысь чылкыт, жильк-жильк куасьтэм ю вуттӥзы. Юкаменск та ласянь мукетгес дунъет басьтӥз, продукцизы жагесь вал. Нош оглом ӟег нянь сукыримы та палан но ческыт пӧрмыны кулэ. Лабораториен нуэм эскерон- чакланъёс со сярысь верало. Одӥг семья кадь Нянь бордын лек, кас сямо адямиос уг, дыр, ужало. Солэн шунытэз, шундылэн сямен, ваньмызлы тырме. Сыӵе малпанэ вуиськод, хлебоприёмной предприятие вуылыса, отысь калыкен пумиськылыса. Тросэз гуртысь вуэмын, малпанъёсынызы али ке но отын уло на. Кинэн гинэ ӧй вераськы, котькудӥз ӟеч кылъёс вераны тыршиз ӵош ужась эшъёсыз, кивалтӥсьёссы сярысь. Л. А. Ардашевалы оскемын элеватор. Кысык вакытэ со кӧланы гинэ дораз бертылэ, котькуд машинаез ачиз пумитаны дася, ю тысь гинэ мед вуоз. - Нырысетӥез рейс туэ вуиз 31-тӥ июле, "Заречный" эштос ӟегзэ ваиз. Соосты сӥё- дано нянен-сылалэн пумитам, - шуэ Людмила Анатольевна. - Ми понна со зэмос праздник: кин выль няньлы шум уз поты! Шаерысьтымы 5 район дорамы тысьсэ вуттэ. Ӝеган учыръёс ӧй вал. Со понна тау карон кылъёс вераны кулэ Капитолина Аркадьевна Корепановалы, Елена Валентиновна Наймушиналы но мукет эшъёсмылы. Ужан нунал татын берозь кыстӥське - берпуметӥ машинаез бушатытозь. Тани Анатолий Викторович Сунцов, Яр районысь "Дзюинский" эштосысь шофёрзы ӝыт пал гинэ вуиз. Мылкыдыз умой. - Аран-кутсан ужъёсмы туэ радызъя мынӥзы, урожаез но шумпоттӥз. Татчыозь 80 иськем, озьы ке но, нунал ӵоже 2-3 рейс, куд-ог дыръя солэсь но ятыр лэсьтӥськом вал. Сюрес чебер, асфальт. Эстӥськон ласянь ӝеганъёс ӧй вал, огез гинэ урод - машинаосмы вужесь. Комбайнъёс но сыӵеесь ик. Сизьым пӧлысь одӥгзэ воштос ёзлы сэрттоно луиз. Али шуг вераны, кызьы, маин аралом-ворттом ар-кык ортчыса. Тӥни малы механизаторъёслэн сюлэмзы пӧзе. Вераськыны дыр ӧвӧл. Анатолий Викторович машиназэ бушатӥз но гурт палаз дыртӥз: югытэн вуоно, сюрес матын ӧвӧл. Со дыре элеваторлэн кузёез тодматэ мукет ужасьёсыныз. - Люция Кузьмовна Чупина татчы лыктӥз 35 ар талэсь азьло. Вань удысъёсты ортчиз, котькудаз пукты - ужез пӧрмоз. Кызьы ӟеч кыл уд вера Василий Петрович Никитин, Павел Семенович Макаров, Минсара Исмагиловна Абашева но мукетъёсыз сярысь. Коллективысьтызы ӝыныез пала арлыдо ужасьёс быдэс улонзэс сӥзизы егитысен быръем ужзылы. Семьяен-семьяен татчы лыктӥзы, али нылпиоссы интыязы кылё ни. Озьыен, лёгем сюрессы шонер вал. - Мон ӝоген пенсие пото ни, 34 ар ӵоже та коллетивын ужай, - шуэ М.И.Абашева. - Семьяе кадь дуно потэ, олокызьы люкиськом. Синвуосыз шапырак питырско нылкышнолэн бам вылтӥз. Со ӟечен тодаз вае азьвыл директорзэс Михаил Иванович Фетисовез, туж гажаса вера туалаез сярысь. Капитолина Аркадьевна Корепанова вордскемын Балезино районысь Волково гуртын. Татчы школа бере вуиз. Сётӥзы общежитие. Али гинэ кадь ваньмыз вал - тани пенсие потонэз но вуиз. Куать кузя пинал будэтӥзы. Пиез элеваторын ужа. Синъёсыз нюромыса ик со шумпотэ туала урожайлы: толбытлы ужмы тырмоз! Гуртын пукыны секыт. Таӵегес ик улон сюресэз Глазов ёросысь Люм гуртысь Елена Валентиновна Наймушиналэн. 18 арескын со вуиз та коллективе, сокем юн бурмиз эшъёсыз, ужез борды, отпуске потыса но, пе, туж юн мӧзмисько. - Огмес огмы валаса, тупаса ужаськом. Шумпотонмы но, куректонмы но ӵош. Елена Валентиновналэн та верам кылъёсыз пыдлось сюлмысьтыз потэмын. Умой ук, адями уж дураз бурдъяськем мылкыдын вамыштэ ке. Озьыен, татын тонэ дунъяло. Ӵок, котькудӥзлы медаль но, орден но уг ке но сёто, адямилы небыт кыл но туж дуно. Зеленниковалэн кивалтоно коллективез со вылын ик возиське. Нунал вордске сюлмаськонэн Кивалтӥсьлэн уин но йырыз ужен тырмемын. Инна Александровна вань луонозэ лэсьтӥз- бергатӥз, предприятизэ бырон калэ вуонлэсь утён понна. Партия кивалтон вакытэ соос ю тысь гинэ басьтӥзы, мукет удысэн вырыны малпаназы ик ӧй вал. Выльдӥськон шуон хлебопредприятиез но зуркатӥз: улод ке ул, бырод ке - быр. Тӥни малы усьтоно луизы нянь пыжон, кеньыр изон цех, магазин, вордо парсь но муш, мертто бакча сиён. Озьы утизы ужтэк кылёно адямиоссэс, дунтэматӥзы ӝӧк вылзэс. Мултэс поттэм продукцизы "улэп" коньдон вайыны кутскиз. Та амал ик юрттӥз пыд йылазы потонлэсь но шуге-леке вуонлэсь. Кин тодэ, кӧня уйёссэ соку кӧлатэк потаз, вылды, директор, кӧня сюресъёсты лёгаз, кӧня кабинетъёс пыр ортчиз, выль удысъёсты кылдытон понна. Туннэ капчиенгес шокчизы ни. Ужзы пӧрме, поттэм продукцизы мынэ. Глазовын яратыса басьто соослэсь няньзэс но пыжиськемъёссэс. Шырыт кузё чигем веньлы но инты шедьтоз шуэмъя, хлебопредприятиын котьмае туж ӝикыт, пайдаё кутыны тыршо. Озьы ке но, вань улонзэ ю- нянь бордын ужам муртлэн сюлэмыз бӧрдэ крестьян калыкез сантэм каремзылы. - Котькудӥз азьмынӥсь страна гурт удыслы нимысьтыз саклык висъя но кулэезъя коньдонэн юрттэ. Кытын-о меда, асьме доырын сяна, аран-кутсан вакытэ техникаез эстӥськонтэк кельто?! - пӧсекъямзэ уг ваты И.А.Зеленникова. - Куазь котькыӵе луэ, арен-арен со уг тупа, таизлы асьмеос дышемын. Нош кызьы дышод юри малпаса люкетэмлы? Малы му вӧйлэн дуныз ю-няньлэсь дуно? Малы со уксё гурт удысэ уг вуы? Арлыдо кивалтӥсь юанъёсызлы валэктон уг шедьты. Нош солы ужано ук ю ваисьёсын, коньдон тыроно продукцизы понна. Нош няньмы асьмелэн, ватонэз ӧвӧл, бускель республикаослэсь дуногес, удалтонлыкез начаргес. Тӥни кытчы пыкиське гуртлэн экономикаез но политикаез. Ярам, коньдонэн но со чотын висъям эстӥськонэн туэ дыраз юрттӥз Правительство, со "Удмуртпродконтракт" пыр вуиз хозяйствоосы аванс чотын. Ар бырытозь пунэмен басьтэмез будэтэм продукциен берлань берыктоно. Ваньмызлэн кужымез тырмоз меда? Ӧз ке, солэн пумыз шуккоз хлебоприемной предприятиосты но. Тӥни ма шугъяськытэ кивалтӥсьёсты, Инна Александровнаез но. Сямызъя та адями - улонэз яратӥсь, ӟечезлы оскись. Сыӵе мылкыдыз медаз кысы азьланяз но. Нош вордскись нунал мед тырмоз сайкыт, чебер малпанъёсын гинэ. Сыӵе оскон сёто ӵог-ӵог узьымен шобырскем бусыос. Ӟег туэ тырмыт люкаськиз, вуоно арын эшшо но умойгес мед удалтысал. Соку элеваторъёсмы дугдылытэк, уен-нуналэн жургетозы, пызь изозы. Асьме музъем вылын будэтэм няньлэн - аслаз шӧмыз, мукетыныз сое уд вошты. Людмила МЕДВЕДЕВА. Туспуктэмез Владимир Беломорскихлэн. Удмурт Республикалэн автономиезлы 80 ар тырмон азьын ортчем смортр-конкурсын Глазовысь хлебоприёмной предприятие И инты басьтӥз. Сӥлы карыса, куноосты нянен- сылалэн пумита предприятилэн кивалтӥсез И.А.Зеленникова. Егит пыжиськись Ольга Семакина. "Удмуртпродконтракт" управленилэн валтӥсь директорез В.Н.Ануфриев (снимок вылын шорысез) котькуд коллективез ужезъя дунъя. Туннэ вылӥ дунъет басьтӥзы глазовъёс. ПОЛИТИКА Арня ӵоже дуннеын, странаын, шаерын Толэзь йылпумъяське ни, нош Америка али но выль президентэзлэсь нимзэ уг тоды на. Ортчем арня вискын Флоридаын бюллетеньёсты киын лыдъян азинтӥськиз. Азьвылгес штатлэн кун секретарез Кэтрин Харрис вераз вал, бюллетеньёсты выльысь эскерыса поттэм лыдпусъёс лыдэ уз басьтӥське шуыса. Но кӧня ке нунал талэсь азьло чурыт кылзэ вераз татысь ик Вылӥ Суд: киын лыдъян-чотанъёс лыдэ басьтэмын луозы. Таӵе югдурлы шумпотӥзы демократъёс. Малыез но вал. Кандидатсы Альберт Гор нуналлы быдэ Джордж Буш доры матэктиз. Арня нуналэ кусыпсы 500 куара пала вал. Со сярысь ивортӥз штатлэн кун секретарез но, со Джордж Бушез Флоридаын вормисен ялӥз. Но вожвылъяськон таин уз йылпумъяськы. Демократъёслэн кандидатсы Альберт Гор малпа юрттэт курыса странаысь Вылӥ Судэ вазиськыны. Кышкыт иворъёс вуо Ближний Востокысь. Арабъёслэн но еврейёслэн пумитъяськонзы уз кысы. Пайдазы ӧжыт пӧртэм пумиськонъёслэн но. Тани таяз арня вискын Москваын Владимир Путин кенешиз Палестиналэн кивалтӥсеныз Ясир Арафатэн. Со вакытэ ик телефон пыр вераськиз Израильлэн премьер-министреныз Эхуд Баракен. Тросэз оскизы вал, жугиськон кысоз шуыса. Но озьы ӧз луы. Быремъёслэн лыдзы 200-лэсь уно луиз ни. Куд- ог аналитикъёс верамъя, зэмос кышкытлык, пе, вань ини, паськыт война кутскоз шуыса. Кремль дворецлэн Александровской залаз нырысьсэ ортчиз Кун Кенешлэн заседаниез. Та дырозь солэн президиумез гинэ люкаськылӥз. Тодады вайытом: та вакытэ президиумын ужало Ю.Лужков (Москва), В.Яковлев (Санкт-Петербург), В.Ишаев (Хабаровск улос), М.Шаймиев (Татарстан), Л.Рокецкий (Тюмень улос), В.Кресс (Томск улос) но М.Магомедов (Дагестан). Заседаниез нуиз Владимир Путин. Президент ивортӥз, кыӵе ужпум пуктӥське Кун Кенеш азе. Со кема дырлы чаклам уж, странамылэн азьланезлы стратегиез бордын вырыны кулэ, шуиз Владимир Владимирович. Мар шуод, тазьы луысал ке, пайдаез уж вылын шӧдӥськысал. Угось та дырозь странамылы азинскон сюрес бырйылӥз кӧня ке гинэ мурт, дэмен ужан ӧз шӧдӥськылы. Соин но, дыр, янгышъёс но пумтэм вал. Кылем арня вискын ик люкаськылӥз Федерацияя Кенеш. Пусйымон соиз: заседание лыктэмъёс пӧлысь куинез мурт та ёзэ выль сямен быръемын ни, соосты Москвае асьсэ улосъёссы келязы. Сенсация выллем луизы Россия Федерацилэн Президентэзлэн Южной округын оскем муртэзлэн Виктор Казанцевлэн кылъёсыз. Со ивортӥз, кенешонъёс, пе, мыно чечен боевикъёслэн командиръёсынызы вир кисьтонэз дугдытон пумысен. В.Казанцев поттылӥз Руслан Гилаевлэсь нимтулзэ. Пусйыны кулэ, Р.Гилаевлэн отрядэз вожомыса сямен ожмаськиз кивалтӥсезлэн вордскем интыяз Комсомольское черкогуртын. Ачиз полевой командир пумит луэ, пе, вакхабизмлы. Туннэ усьтӥське Кун Кенешлэн сессиез. Отын эскериськись ужпумъёс пӧлысь одӥгез бадӟымез - Кун Кенешлы Тӧро быръён. Кин пала дурбасьтозы депутатъёс, тодмо ӧвӧл, нош та вылӥ постэз басьтыны мылкыд карисьёслэн нимтулъёссы кемаласьгес тодмоесь ни - Павел Вершинин но Игорь Семёнов. Мылкыд карем потэ, вормем муртъёс медаз вунэтэ вал - туж кулэ шаермылы тупаса, ог-огдэ валаса ужан, нош керетыса улон, ялан тушмон утчан ӟеч емыш ноку но ӧз сётъялэ на. Ю.АЛЕКСАНДРОВА. Митрофан МОСОВ Атай, юнматскы! Верос Куректон малпамтэ шорысь лыктэ. Тодылӥз-а "Югдон" колхозысь шофёр Пимен Васильевич Плетенёв, таӵе адӟонэ вуоз шуыса? Тулыс, льӧмпу сяськаян вакытэ, кузпалызлэн синмыз пыраклы кыниськиз. Котькытын шулдыр: вожекто писпуос, тылобурдоос но, вордскем палъёсазы вуэмзылы шумпотыса, пӧртэм гурен чирдо. Нош механизаторлэн корказ - бадӟым куректон: Пимен Плетенёв дас вить аресъем Нонна нылыныз ваче кылиз. Бен, Пименлэн кузпалыз, Василиса, висемез пумысен ӝожтӥськылӥз ни. Озьы но ялан оскиз тупатсконэзлы. тулыс но сӥзьыл кезьыт дыръя фермаын, резина сапеген ужакуз, юн кынмыны шедиз. Тӥни соин валче но скал кыскисьлы валес вылэ выдоно луиз. Пӧртэм турын-куарен эмъяськиз ке но, пайдаез ӧй вал. Секытсэ шӧдыса, кузпалыз Василисаез уйшор котырын больницае нуиз. Отын но йӧнатыны ӧз быгатэ ни. Дорысь вань секытэз Нонналэн пельпумъёсыз вылэ усиз. Огдыре ик тямысэтӥ классын дышетсконзэ но йылпумъяно. Нош со ӧз ӝожтӥськы, ас вылаз вань секытэз вормыны басьтӥськиз. Али ке но уг оскы анаезлэн ӧвӧлэзлы. Соин но, вылды, пудоез доры потэ ке, ялан корказь пала учкылэ. "Тани нэнэез коркась потоз но Нонналы ӝыт кыскем йӧлэз кувшинэн юыны сётоз", - малпа ас понназ. ...Пимен Васильевич кузпалзэ ватэм бере арня ортчиз-а, ӧз-а - Василисалэн Камчаткаын улӥсь апаез, Ираида Дмитриевна, бертӥз. Сюрес кузь бере, дыраз ӧз вуы со. Ӝытазе, Плетенёв ужысь бертыса, ваньзы шайвылэ ветлыны вераськизы. Ираида Дмитриевна кема пукиз отын, синвузэ кисьтыса. - Ой, Василиса, малы астэ кутыны ӧд быгаты, малы черлы сётскид, кинлы кельтӥд мусо нылдэ?.. - куараен бӧрдыны ӧдъяз апаез. - Кыӵе дано адями вал тон! Ӟеч ужамед кык орденэн пусъемын ук. - Я, тырмоз, Дмитриевна: синвудэ кисьтыса, адямиез уд ӝуты ни, - буйгатэ сое Пимен Васильевич. - Тани пеймыт но луэ ни, ӝоген пудоез возь вылысь ваёзы. Пазяськыны медаз шеде вал. Нонналэн сюлэмыз буйгаз ни вал кадь. Пудоез котырын бергакуз, ваньзэ вунэтылӥз. Нош апаез вуыса, ваньмыз выльысь бугырскиз. Шайвылысь бертыса, Пимен Васильевич нылыныз ӵошен пудооссэс утялтӥзы, кияр вылэ ву киськазы. Со куспын Ираида Дмитриевна сиён но дасяны вуэм ни. Ӝӧк сьӧры пуксьыса вазиськиз: - Я, табере вералэ ни: кызьы улыны малпаськоды? Василисаез ватӥды. Тон, Пимен Васильевич, кузпалтэк кылид, нош тон, Нонна, - анайтэк. Плетенёв кык киосыныз йырзэ кутыса пуке. Ираида Дмитриевналэн юанэзлы валэктытэк, интыысьтыз султӥз. Нонна, ымдурзэ куртчыса, анаезлэн борддоре ошем тусбуез шоры учкыса пуке. - Малы огды но уд вазьылӥське? Валасько: валэктон сётыны таӵе дыръя капчи ӧвӧл. Соку ачим тӥлед визь-кенеш сёто. Ньыльдон уй ортчытонэ пыриськыны уг быгаты: мугез тодмо. Собере... Собере, Пимен Васильевич, мылкыдыд аслад. Кулэ ке, кузпалъяськы. Яке одӥг арзэ чида. Кыкез пӧлысь бырйы одӥгзэ. - Ираида Дмитриевна, - пыдлось лулскыса, Плетенёв маке вераны турттэ вал - нылыз шоры учкиз но дугдӥз. Ираида Дмитриевна сое ӧз кылзы, ялан кузёяськемез потӥз, веранзэ нош ик азьланьтӥз: - Тодӥсько: кышнояськод. Малы астэ пӧянэз? Мон солы пумит ӧвӧл, но учкы, Пимен, басьтӥд ке, визьзэ учкыса басьты. Сямыз Василисалэн кадь мед луоз. Ноннаез аслэсьтыз нылзэ кадь мед утёз. Кузпалъяськид ке, нылдэ вӧсь карыны эн шедьты, солы али ӝыны верам кыл но туж секыт. Шедьты ярамонзэ. Котькуд кышномуртлэн чыртыяз эн ошиськы. Тодӥсько: сямыд туж небыт. Озьы ке но, пиосмурт кадь луоно. Василиса кулӥз шуыса, со сьӧры кошкыны уг луы. Мыным капчи шат: аслам сузэре ук? Я, вождэ эн потты: пересьлэн дышетэмез - шундылэн тылсиез. - Малы сокем - йыры вань ук? - куаразэ поттӥз вал Пимен. - Йыры, йыры... Чильымлэн но йырыз вань, но отысь малы ке но зын потэ. Тыныд, Нонна, дас вить арес тырмиз ни, быдэ вуиськод, визьдэ эн ышты. Туала егитъёслы оскон ичи. Уд но вала нальыке кызьы шедемдэ ик. Соослы пӧсь но, кезьыт но огкадь. Вань верамме пеляды понэ. Ираида Дмитриевна кема ӧз улы. Нош ӝыт вуыса огазе люкасько ке, ялан аслэсьтыз гозызэ пуныны кутске. Пименэз но, Ноннаез но одӥг кылыныз дышетӥсько каре. Ваньмыз со атаен ныллы акыльтӥз ни. Ӵуказе кошкон сярысь кылпум поттэмез бере, каньылак шокчизы. Пимен Васильевич ачиз келяз станцие, юрттӥз вагонэ пуксьыны но. ...Василисаез ватэмзы бере, магазинысь вузкарись Клавдия Петровна чылкак воштӥськиз. Плетенёвъёс шоры мукет синмын учкыны ӧдъяз. Нонна магазинэ маке басьтыны пыре ке, соин туж небыт вераське, солэсь олома сярысь но юалляське. Пименлэсь Клава ог дас ареслы пичи. Ачиз таза, учкымон. Егит пиос котыраз гожеръязы ке но, бызьыны мылкыд ӧз кары. Малы - табере нокин валэктыны уг быгаты. Бен, али но солы семья кылдытыны бер ӧвӧл на, вань кураны ветлӥсьёс но. Нош Клавалэн йыраз весь Плетенёв гинэ берга. Пимен Васильевич, шофёрын ужа бере, кытчы гинэ ветлоно уг луы. Азьло ӵем гинэ республикалэн палэназ но потаз. Нош кузпалзэ ватэмез бере, кыдёке уг ысъяло ни. Клавдия Петровна "визнанзэ мургес лэзёно" кариськиз, соин ик базаысь вуз вайыны Плетенёвез куриз. Нылкышно кыллы кисыяз уг пыры: кабинаын артэ мыныкузы, ымыз уг ик пытсаськылы. - Василич, валасько: секыт тыныд али. Шӧдӥсько: ӧжыт восьмемед но, - кӧня ке мынэмзы бере кутскиз Клавдия Петровна. - Весь тазьы огнад уд улы ук, кузпал шедьтоно ни, кузпал. - Мон огнам ӧвӧл ук, нылы вань, вань куректонмес соин шори люкиськом, - пумитаз вазиз Пимен Васильевич. - Ныл со ныл: туннэ татын - ӵуказе лобӟоз. Нонна чебер, ачид кадь таза будэ, син медаз усьы. Уд но шӧды - бызёз. - Дыр вуиз ке, оло, аслыз ярамонзэ, верамед сямен, шедьтоз но, - ватсаз Пимен. Ог дасо иськем ортчыса, шофёр машиназэ дугдытӥз но кыре потӥз. Моторез огсыр ке но ужа, юри эскероно кариськиз. Интыяз пукыны ӧз чида Клавдия но. Пименэз ӟыгыртыса, нырысь бамзэ чупаз, собере, йырзэ ас палаз берыктыса, ымдураз вутскиз. Плетенёв вӧесь кизэ ӟустариен ӵушылӥз но нылкышноез ӝик-ӝик ӟыгыртӥз. - Нош малы-о ачид огнад улӥськод: гуртын пиос ӧжыт шат? - юаз Пимен Васильевич. - Оло, нокинэ гажасьтэм нылкышно тон? - Со сярысь вераны капчи, нош сюлэм ваньзэс палэнтэ ке, - мур лулскыса шуиз Клавдия Петровна. - Вот тон кадесь луысалзы ке, соку... - Мон ведь пересь ни. Али мусояськиськод, бӧрысь куректоно уз луы меда? - машинае пуксьыкуз юаз Плетенёв. - Василич, эн палэнты монэ бордысьтыд: яратӥсько ук тонэ. Инмар косӥз, дыр, асьмемыз ӵош луыны, - вазиз Клавдия. - Тынэсьтыд одӥг ке но пи вордоно вал. Тон кдь ик чебер, паськыт пельпумо но таза луысал со. Машиназэ интыысьтыз вырӟытыса, Пимен Васильевич пумитаз вакчияк шуиз: - Кузпалъяськон - бусы вамен выжон гинэ ӧвӧл ук. Собере мар шуоз нылы но?.. Вераськонъязы сюресэз ӝог ортчизы. Со нунал бере Клавдия, Пименэн пумиськон понна, пӧртэм муг шедьтылӥз. Ачиз но чылкак воштӥськиз, басьяськисьёсын но капчи мылкыдын вераськыны кутскиз. Нош дораз ӧтьыны уг дӥсьты: анаезлэсь кепыра. Плетенёв доры пырыны Нонналэсь возьдаське. Пичи ӧвӧл ни со, ваньзэ вала. Гуртын ӟечез но, уродэз но пельысь пеле ӝог вӧлме. Пимен Васильевич но Клавдия Петровна сярысь но пӧртэм вераськонъёс кылдӥзы. Нонна вазь ӵукнаысен бер ӝытозь пуксьылонэз уг адӟылы. Скалзэс кыске, пудооссэ бусые келя, чипы-курегъёссэ сюдэ, атаезлы сиён пӧра. Калыкен ӵош бусые но дыртэ. Клавдия сярысь со но тодӥз ни. Нош атаезлы поттылыны уг дӥсьты. Малпа: дырыз вуиз ке, ачиз ик вералоз. Огпол Пимен Васильевич кема гинэ ӝегатскиз. Уйшор берозь Клавдияен магазинын пукизы. Вузкарисьлэн ваньмыз ик ки улаз: яратонэзлы курысэ но ӧз жаля. Дораз пыремез бере, нылыз кӧлэ ни вал. Лумбыт ужаса жадем. Нонналэсь йырсизэ маялтэ, шобретсэ тупатэ. Сӥям шыдзэ ӟузьылӥз но кӧлыны выдӥз. Юн куректэ Плетенёв. Оло, соин но, вылды, дырын-дырын курытэз борды но басьтӥськылэ. Василисалэн тусбуйыз син азьысьтыз нокызьы уг кошкы. Жаляса учке нылыз шоры но: капчи ӧвӧл ук солы. Соин ик огпол, ӝыт сиськыса пукыкузы, нылызлэн синмаз учкыса шуиз: - Жадиськод тон, Нонна, туж секыт тыныд. - Номыре ӧвӧл, атай, пумен дышисько ни, лэся. Собере Оля эше но юрттыны вутскылэ. - Аслым но капчи ӧвӧл. Гуртэ бертыса пырыкум, анаедлэсь пальпотыса ваземзэ витисько. Тон ке ӧй луысал... - Атай, юнматскы: асьмелы гинэ адӟоно ӧвӧл ук таӵе секыт кайгуэз, - синвуаськыса Нонна корказе потӥз. Нуналъёс огез бӧрсьы мукетыз шӧдылытэк ортчо. Тани вуиз выль дышетскон ар. Нонналы эшшо но секытгес луиз. Школаысь бертыса, гуртысь вань ужъёсты быдэстыны сюлмаське. Нош ас понназ дырын-дырын малпаське атаезлэн азьпал улонэз сярысь. Нылзэ жаляса, Пимен Васильевич арня нуналэ верано кариськиз кемалась малпанзэ. - Трос уйёсты пыр-поч кӧлытэк, уно йырвизьме сурай ни, нылы. Оло, син адӟымтэ, пель кылымтэ интые-а кошконо асьмелы? Кыӵе ке городын яке посёлокын уж шедьтоно?.. - Атай, тон мар супыльтӥськод? Оло, йырыд сураськиз ни? - пумитаз дырекъяса вазиз нылыз. - Толон гинэ шуид ук: анаедлэн тусбуез син азям. Табере кошкомы, огназэ кельтомы-а? Гурт калыклэсь но возьыт луоз ук. Корка пушкын огдырлы чалмыт луиз. Ӝӧк вылысь будильниклэн тикккетэмез гинэ кылӥське. Нонна ӧз чида ни, вазиз: - Тыныд кузпалъяськоно ни, атай. Озьы умойгес луоз. - Вераны гинэ капчи, нылы. Нош ярамонэз, тыныд кельшымонэз шедёз-а? - секыт лускыса юаз Пимен Васильевич. - Гуртамы но, палэнын но вань карттэм нылкышноос. Зэм, одӥгез курытсэ веръяны яратэ, мукетызлэн юбка бордаз кутскыса ветлӥсез вань. - Атай, писпу тӧлтэк уг выры, шуо. Весь возьмай Клавдия Петровнаен кусыпты сярысь верамдэ: калык юнме уг супыльты, дыр. Яра ке тыныд - кузпалъяськы. Мон пумит ӧвӧл, - дӥсьтытэк кыл поттӥз Нонна. - Собере, оло, дышетскыны палэнэ но кошконо луоз? Огнад уд улы ук. Пимен Васильевич нылыз пумитэ номыр ӧз вазьылы. Куртказэ дӥсяса, коркась потӥз но забор вӧзысь скамья вылэ пуксиз. Котьку сямен, со татын секыт мылкыдзэ буйгатэ. Нонналэн верам кылыз сюлэмзэ эшшо но юн бугыртӥз. "Улонме Клавдияен герӟай ке, уг янгыша меда? Адямилэсь сямзэ вакчи дыр куспын уд вала. Али чеберъяськоз, нош отӥяз астэ коркась но улляса лэзёз: ичи-а кылӥськыло сыӵе учыръёс?" - малпа Пимен Васильевич. ...Выль ар бере огарня улыса, Клавдия Петровна Плетенёвъёс доры улыны лыктӥз. Бадӟым коркан ваньмыз воштӥськиз: пилемо куазен но шунды пиштыны кутскиз кадь. Ноннаен ӵош котькуд сэрегез асьсэлы ярамон каризы. Нылкышноос шоры учкыса, капчияк лулскиз Пимен но. Кун Кенешлэн сессияз "13" число шудо медло!" Ватонэз ӧвӧл: та нуналэз Удмурт Республикаын улӥсьёс кема витизы. Асьмеды ваньместы шугъяськытӥз одӥг юан - кин кивалтоз Кун Кенешен, Правительствоен? Берлоез ласянь сокем трос йыртӥянъёс ӧз кадь кылдэ. Отставкае потэм Н. А. Ганзаез соку ик воштӥз Ю. С. Питкевич, премьерлэн "бур киыз". Парламанет ласянь ке верано, данакез бырйисьёс оскизы, соин П. Н. Вершинин кивалтоз, дыр, шуыса. Угось 15-тӥ октябрёзь олокыӵе но сӥзёнъёс, дэмланъёс вал. Депутатъёс пӧлын но "тулкымъёс" шуккиськизы: огъёсыз соку ик дурбасьтӥзы Можгаысь И. Н. Семеновлы, мукетъёсыз - П. Н. Вершининлы... Возьмазы музон но учырез - кык удмуртъёс-Можга пиос куспазы ваче кымес шуккиськизы ке, вискытӥзы уз ортчы-а куинетӥез? Тӥни сыӵе кык-куинь полэс "икс" но "игрек" пусъёсын ужпумез сэрттоно- пертчоно луиз Кун Кенешлэн азьвыл чакламтэ 13-тӥ сессиез. Куд-огез та лыдпусэз уг яраты, зэмен но "чертова дюжина" ваньмызлы шуд уг вайы. Мукет паласен ке учконо, Удмуртилы президент быръеммы дырысен 28-тӥ ноябре ортчоно сессия луиз нырысетӥез. Озьыен, кызьы сое мытом, озьы ик радъяськоз выль кивалтӥсьёсмылэн ужан сюрессы. Парламентлэн гужем каникулъёсыз вить толэзьлэсь ятыр кыстӥськизы. Но депутатъёслы гань-гань шутэтскыны маза ӧй вал: комиссиос ас удыссэс вис карытэк нуизы. Ваньмызлы пӧсь йӧтӥз. Со понна нырысетӥ люкаськемен ик пумаз-йылаз вуттэмын дасолэсь ятыр ужпумъёс. Валтӥсез соос пӧлысь, валамон ини, Кун Кенешлы но Правительстволы тӧроосты быръён. Сессиез нуиз В. И. Агашин, Кун Кенешлэн тороезлэн нырысетӥ воштӥсез. Президент А. А. Волков пукиз ни ас ужан интыяз, президиумен артэ интыям нимаз ӝӧк сьӧрын. Та нуналысен со депутат ӧвӧл ни. Президентэ быръемен валче, полномочиоссэ дырызлэсь вазь сётоно луиз. Озьыен, Удмурт парламентэ кылиз 99 депутат. Кун Кенешлы кивалтӥсе ӵектэмын 2 мурт: Павел Вершинин, Кун Кенешлэн тӧроезлэн воштӥсез но Игорь Семенов, Можга городлэн мэрез. Быръён ортче лушкем амалэн. Депутатъёс кие сётэмын 96 бюллетень, сомында парламентарийёс вуэмын сессие. Лыдъян комиссилы председателе юнматэмын А. В. Соловьев, секретаре - В. М. Возисов. Урнаосты усьтэм бере тодмо луиз: 56 куара люкаса вормиз Игорь Николаевич Семенов. Павел Николаевич Вершинин пала дурбасьтӥз 27 депутат. 13 бюллетень ярантэмен лыдъямын. Тӥни озьы, одӥг пол кутскемен, парламент аслыз кивалтӥсь бырйиз. Игорь Николаевич Семенов вордскемын 20-тӥ декабре 1951-тӥ арын, дышетскемезъя - инженер-механик. Сётэмын "Россия Федерациысь жилищно-коммунальной удысысь сӥё- дано ужась" ним. Бырйисьёсын ӵош сюлмысьтымы ӟечкыласьком сое выль уже выжеменыз но оскиськом: можга музъем вылын кыдам кыкез но удмурт кивалтӥсьёсмы ог-огзэс валаса, ог-огзылы юрттыса, йыг-йыг ужалозы республикамы, калыкмы понна. Правительстволэн Тӧроез - Юрий Степанович Питкевич. Со вормиз, 80 куара люкаса. Та интые мукетыз кандидатура ӵектэмын ӧй вал. Юрий Степановичез дэмласа но дурбасьтыса вераськизы депутатъёс, пӧртэм фракциослэн представительёссы А. М. Прасолов, Д. Е. Белоголовкин, Е. Г. Одиянков, В. Н. Ануфриев но мукетъёсыз. Соос пусйизы Питкевичлэсь ужаны быгатэмзэ, адямиосын огъя кыл шедьтэмзэ, котьмае пумаз-йылаз вуттэмзэ. Удмурт Правительствоын ужа ни ог 10 ар. Озьыен, депутатъёс республикамылы оскымон кивалтӥсьёс бырйизы, шуыны луоз. Президентмы вань, юрттӥсьёсыз - вань калыклы тодмо, гажамно адямиос. Кылиз на юнматыны Правительстволэн Тӧроезлы воштӥсьёсты но министръёсты. Пусъём на тани мае: кивалтон удысэз быдэсак ас киязы басьтӥзы 1951-тӥ арын вордскемъёс-огъёзъёс. Вуоно арын декабрьлэн 20-тӥ но 25-тӥ нуналаз 50 арес тырмонзэс пусъёзы И. Н. Семенов но А. А. Волков. Ю. С. Питкевичлэн зарни юбилеез вуоз вазьгес, майлэн кутсконаз. "Пятидесятникъёслы" сӥзём юн тазалык но тупаса улон мылкыд. 13-тӥ сессия соос понна но, шаермы понна но шудо лыдпусэн мед берытскоз. Сессилэн кенешаз эскероно, сэрттоно-пертчоно ужпумъёс трос гинэ. Парламентлэн ужамез сярысь ивортом на газетмылэн вуоно номераз. Л. Медведева. Лыдпусъёс но политика Россия: даурлэн кутсконаз но пумаз Толэзьлэсь ятыр гинэ асьмеды висъя на вуись ЪЪИ даурлэсь. Туала поколенилы шуд усиз, огзэ даурез келяса, мукетаз выжыны, социализмын но капитализмын улыны, ӵошатонъёс, йылпумъянъёс лэсьтыны. Со понна, Россиысь Госкомстатлэн лыдпусъёсыз вылэ пыкиськыса, ойдолэ вуыломе ЪЪ даурлэн кутсконаз. Адямилэсь улон-вылонзэ учконо ке, 13 процентэз гинэ 50 арессэ ортчылӥз. Грамотаез тодӥз 30 процентэз, нош вылӥ дышетскон заведениын дышетскиз сомында студент, кӧня соос вал быдэс Москваын СССР вакытэ. Дунтэк эмъям но дышетон пыӵаз. Советской властен ӵош, соин ӵош ик кошкиз, шуыны луоз. Странамы понна таиз вамыш туж бадӟым вормон вал, Запад туннэ ке но отчыозь ӝутскыны ӧз быгаты. Эшшо одӥг ӵошатон: Россиын улӥсь нылкышноос но воргоронъёс огкадь право басьтэмзы бере 40 ар ортчыса гинэ Америкаысь негръёслы тӧдьы куо адямиосын огкадь право сётэмын. Таӵе учыръёсты асьме пӧлысь тросэз уг но тоды. Эксэй кивалтон вакытэ Россия котькинлэсь трос ю-нянь будэтылӥз: быдэс дуннелэсь ньыльмос люкетсэ! 83 процентэз крестьянъёс 1861-тӥ арозь музъем борды думемын вал, крепостной калык чотын империя ю тысен вузкариз, трос кунъёсты сюдӥз-вордӥз. Даурлэн кутсконаз ваньбур поттонъя асьмеос сылӥм 4-тӥ-5-тӥ интыын, СССР кӧня ке арлы потаз 1-тӥ-2-тӥ интыыосы. Адямилы быдэ поттэм сиён-юонъя но промышленной вузъёсъя эксэй дыръя но, партия кивалтон вакытэ но Россия ноку но азьмынӥсь странаосын артэ ӧз сылы. Октябрь революцилэсь азьло но нырысетӥ мировой война кутскемлэсь азьвылгес котыр ласянь тужгес но ӟечен лыдъяське 1913-тӥ ар. Соку экономикалэн ваньмаз удысъёсаз шӧдмскымон азнсконъёс басьтэмын вал. Тӥни малы статистика пыкиське но ӵошатон понна сётэ та арез. 1913-тӥ ар 1998-тӥ ар Россиын улӥсез (млн. адями) 89,9 146,3 Чугун кисьтэмын (млн. т) 1,3 34,7 Поттэмын эгыр (млн. т) 6 231,9 му вӧй (млн. т) 1,3 303,3 Электрокужым (млрд. кВт-ч) 1,3 82,7 басма (млн. кв. м) 2741 1383 кор (млн. куб. м) 24 78,2 сахар (тыс. т) 245 4812 сӥль (млн. т) 2,4 1,3 йӧл (млн. т) 19,3 13,1 курег пуз (млрд. шт) 7,1 21,1 ю тысь (млн. т) 82 41,9 Вузамын кунгож сьӧры (экспорт) (процентэн) ю тысь 41,7 - му вӧй, газ - 39,7 нӧкы вӧй, курег пуз 9,2 - корт, дуно изъёс - 31,7 ыжгон, мертчан 7,8 - машинаос, оборудование - 9,8 пызь, отруби 3,4 - хим. продукция, каучук - 8,3 кор - 5,4 мукетыз 35,5 5,1 Одӥг мурт араз сииз (шорлыдын) сӥль(кг) 92 58 йӧл (кг) 55 245 курег пуз (шт) 78 198 Дасяз Л. Дмитриева. Ӵуказе - СПИД-эн нюръяськон нунал Кулон ветлэ вень йылын Музъем вылэ вӧлмыны кутскемез дырысен кызь ар ӵоже ини иммунодефицитлэн вирусэз 50 миллионлэсь ятыр муртлы паласькиз ни, ВИЧ-инфекция улонысь нуиз 16 миллионлэсь трос адямиосты. Та лыдпусъёс ялан воштӥсько. Угось вирус нуналлы быдэ кырмиське 16 сюрс выль адями борды. Та вакытэ ас мылкыд каремзыя уно сюрс адямиос асьсэ мугорзы вылын выль вакцинаосты эскеро. Соос ньыльдонлэсь ятыр. Но одӥгез но пайдаё луэмзэ ӧз возьматы СПИД-эн нюръяськонъя дас куинетӥ конгрессын (со ортчиз Лымшор Африкаын) ивортэмын вал: матысь сизьым ар ӵоже таӵе вакцина уз луы на. Англиысь тодосчиос шуо, кышкыт висёнэз кортнаны, эмъюм кылдытыны быгатом, пе, вить ар куспын, но со мында, дыр кулэ луоз на вакцинаез тросэн поттонэз радъян понна. Озьы тӥни, кӧшкемыт эзелез кырмыны адями ӧз быгаты на, бырон вайыса вамышъя со Музъем вылтӥ. Ачиз адями но юрттэ, кожалод, солы. Тани Россиын ВИЧ-инфекцилэн эпидемиез вамышъя наркоманилэн лёгем пытьыосыз кузя. Висён тужгес но зол вӧлмыны кутскиз 1996-тӥ арысен. Туннэ нуналлы Россия Федерациын ВИЧ-инфекциез нуллӥсь 68 сюрс мурт пусъемын, пӧлысьтызы 418-эз СПИД-эн висё ни. Вирусэз нуллӥсь анайёслэсь 411 пинал вордскиз. Данакез соос мумы-бубытэк будо, угось анайёссы наркотикъёсын эшъясько, "зарни комокъёссы" соослы кулэ ӧвӧл. Туэ СПИД-эн нюръяськонъя нунал ортче таӵе ӧтён улсын: "СПИД - тросэз герӟаськемын воргоронэн". ООН-лэн йылпумъянъёсызъя, иммунодефицитлэн вирусэз пиосмуртъёслы ӵемгес, пе, палаське. Малы меда? Соос асьсэлэн тазалыксы сярысь ӧжыт сюлмасько. Соин ӵош золгес кыстӥсько кыскон, юон, наркотикъёсын вырон борды. Мукетсэ но пусйытэк кельтыны уг луы. Воргоронъёс данакез чакласькытэк тупато матысь кусыпъёс. Нош дуннеысь статистикая, ВИЧ-инфекция 70 процентаз учыръёсы палаське воргоронэн но нылкышнолэн матысь кусыпъёссы дыръя. Шаермы сярысь верано ке, югдур мукетгес. ВИЧ-инфекцилы вӧлмыны "юрттэ" наркомания. Туннэ нуналлы пусъемын 266 висись адями. Тямысэз соос пӧлысь кулӥз ни, ньылез - СПИД-лэсь. 245 муртлы (92,1 процентэз) вирус паласькем наркотикен ӵош. Инфекциез нуллӥсьёс шараямын 8 ёросын но 4 городын. Соос пӧлын 209 воргорон но 57 нылкышно. Арлыдзыя верано ке, 15-24 аресъемъёс - 184 мурт, 25 аресъемъёс но солэсь бадӟымъёсызгес - 82 мурт. Инфекциез нуллӥсьёс пӧлын - 198 ужтэк кылемъёс, 35 рабочий, 9 служащий, школаосын но ПТУ-осын 21 дышетскись, 3 студент. Тужгес секыт югдур кылдэмын Глазовын, Ижевскын, Сарапулын, Балезино но Яр ёросъёсын. Нырысь ик наркотикъёслэн паськыт вӧлмеменызы сэрен, кылсярысь, героин (79 процентаз учыръёсы), "первитин" психостимулятор но эфедрон (21 процентаз учыръёсы). Тани Глазовын тросэн вузаське кизертэм героин. Отысь наркокуръеръёс сое вутто Балезино но Яр ёросъёсы. Шаермылэн мукет интыосаз вузаське порошокен героин. Пусйыны кулэ, егитъёс уг тодо, кыӵе бадӟым кышкытлык ваё соослы наркотикъёс. Иммунодефицитлэн вирсуэз палаське ук шприц, вень пыр. ВИЧ-инфекциез нуллӥсь муртъёслэн лыдзы йылэмен, калык пӧлын профилактикая ужез паськытатоно луиз. Озьы миым центрамы нимысьтыз бригада кылдытӥмы. Отысь врачъёс интыосы потало, ВИЧ-инфекциез алонлы сӥзем ужрадъёс радъяло, со вакытэ ик ужаса улӥсьёслэсь тазалыксэс эскеро. Пусйыны кулэ, ваньмыз та уж мынэ котькуд адямилэн ас мылкыд каремезъя гинэ, законъя сое нокин но кужмысь карыса эскерыны уг быгаты. Туэ таӵе ужрадъёс ортчытӥмы Ижевск, Глазов, Воткинск, Сарапул городъёсын, Балезино, Дэбес, Игра но Яр ёросъёсын. Ваньзэ 2 сюрслэсь ятыр мурт эскеремын. Шараямын ВИЧ-инфекциен 47 мурт, С гепатитэн - 187, В гепатитэн - 29, сифилисэн - 48 адями. Валамон, ми, тазалыкез утисьёс, огнамы гинэ ум быгатэ та кышкыт эзелез кортнаны. Ужзэс ӟечгес радъяны кулэ Правительствоын, городъёслэн но ёросъёслэн администрациосазы нимысьтыз кылдытэм комиссиос, тужгес ик егитъёс пӧлын валэктон уж нуонъя, наркотикъёс вӧлмытонэн нюръяськонъя, но ВИЧ-инфекциез алонъя. Правоез утись ёзъёслы юнгес ужано наркодиллеръёсты но наркокуръеръёсты шараян ласянь. Сакгес кариськоно эмъян учреждениосын ужасьёслы, инфекция медаз паласькы донор вир пыр но пӧртэм эмъян манипуляциос дыръя. Котькуд адями мед тодоз, кызьы со ассэ СПИД-лэсь утьыны быгатоз. Республикаысьтымы Кун Кенеш 2000-тӥ-2003-тӥ аръёсы ВИЧ-инфекциен нюръяськонъя нимысьтыз программа кутӥз. Сое улонэ пыӵатон борды басьтӥсько дэмен министерствоослы, ведомствоос но службаослы, врачъёслы, психологъёслы, социологъёслы, юристъёслы, наркологъёслы. Та выллем программаос одно ик кутыны кулэ котькуд городын но ёросын, нош солы коньдонэз чаклано бюджетын. Л. Кузелин, республикаысь СПИД-эн нюръяськонъя центрысь эпидеологияя отделенилэн кивалтӥсез. Медло вамышмы йыгмыт Кызьы быдэс улон-вылонмес, озьы ик газет бамъёсмес но шулдырто-узырмыто чебер но визьмо, кибашлыесь но чупресэсь адямиос. Нош удмурт шаермы дун ошмесъёсыныз сямен ик туж узыр сыӵе адямиосыныз, соосты синйылтыны гинэ кулэ. Нош та ласянь мон кӧбератэк шуысал, бадӟым но туж аспӧртэм удыс оскемын милемлы - фотоаппартэн ужасьёслы. Котькуд туспуктэм - со шаермылэн, калыкмылэн улон-вылоназ, историяз кельтэм пытьы. Мон туж шумпотӥсько, "Удмурт дунне" газетлэн редакцияз ужаны кылдӥз шуыса. Тазьы кылдӥз бере, ӵош ужась эшъёсылэн оскемзылы вуись выль дауре выль ужъёсыным вазиськыны мылкыд бадӟым. Ватонэз ӧвӧл, берло дыре газет бамъёсын кулэсмизы фотоочеркъёс. Та удысэз ик мон азьланяз ас поннам валтӥсь карысал. Ачим куке но суредасьлы дышетски бере, объектив пыр но суредасьлэн синмыныз учкыны тыршисько. Осконэ вань, газет бамъёсмес чеберлыко туспуктэмъёсын, репортажъёсын узырмытыны быгато шуыса. Палэнэ уз кыле кибашлыосмылэн, усточиосмылэн синмес шумпоттӥсь, мылкыдэз бурдъясь ужъёссы. Нош нырысь интыын котьку но луоз тыршись адями. Мылкыд карон - со ӝыныез гинэ уж ай. Соин ик туннэ мон вазиськысал газет лыдӟисьёсмылы но. Тӥляд юрттэмды, дэмлан-ӵектонъёсты понна тау карыса, куронме но верасал: ялан витиськом вӧзысьтыды ӟеч адямиос сярысь иворъёстэс, озьы ик улон- вылонмес кырыжатӥсь учыръёс сярысьёссэ но. Улон ӧрмес уртче кужымен, огъя мылкыдын ужаса гинэ дун-чылкыт возьыны но шулдыртыны быгатом. Котькуд ӟеч иворды историямы чебер пытьы кельтыны юрттоз. Нош пытьы чебер но ӝикыт пуксе, йыгмыт но оскыса вамышъяку. Владимир БЕЛОМОРСКИХ, туспуктӥсь. Лыктозы устоосыз Удмуртъёслэн тямысэтӥ ӧтчамзы ортчоз туэ, 6-тӥ толсуре (декабре). Та бадӟым ужрадлы дасяськыса, ваньмаз сямен ёросъёсын ортчизы ни покчи ӧтчамъёс. Иже келян вылысь быръемын тужгес устоосыз удмуртъёс. Вуоно пумиськонын эскеремын луоз "Удмурт кенеш" огазеяськонлы тӧро быръён ужпум но. Адямиослэн дэмламзыя, огазеяськонэн мед кивалтоз солэн туала азьветлӥсез ик - Валентин Тубылов. Тямысэтӥ ӧтчам ортчоз Операя но балетъя кун театрын. Е.РОМАШОВА. Тямысэтӥез вал Сыктывкар кун университетлэн коми но финн-угор кылтодонъя кафедраяз ортчиз "Пермь кылъёсысь вераськетъёс но соослэн ортчем сюрессы, мукет кылъёсын ӵошатыса" нимо тямысэтӥ калык куспо ӧтчам. Вынлыко музъем вылэ люкаськылӥзы Коми но Удмурт Элькунъёсысь, Коми-Пермяк улосвылысь, Москваысь, Санкт-Петербургысь, озьы ик - Финляндиысь, Венгриысь, Эстониысь но США-ысь тямыстон ёрос тодосчиос. Сыктывкар кун университетысь коми но финн-угор кылтодонъя кафедраысь доцент Валентина Лудыкова ивортэмъя, финн-угор кыл семьяысь пермь ёзэ пыро коми, коми- пермяк но удмурт кылъёс. Ӧтчаме ветлэмъёс кенешизы пермь кылъёс, отысь вераськетъёс но соослэн мукет кылъёсын кусыпъёссы сярысь.Таӵе ӧтчамъёс кык арлы огпол луо. 1986- тӥ арысен кутскыса, соос вал ини Удмурт но Сыктывкар кун университетъёсын, Россиысь Наукаосъя Академилэн Урал ёзэзлэн Коми наукая центраз. Ужрадэз ортчытыны юрттӥз Коми Элькунысь Нациослэн ужъёссыя министерство. "Комиинформ" агентство ивортэмъя. Укмыстон вить арес тырмысал... Удмурт кун университетын ортчиз быдӟым удмурт гожъясьлэн Михаил Петрович Петровлэн вордскемез дырысен 95 ар тырмонлы сӥзем кенеш. Сое дасянэ но радъянэ пыриськизы Удмурт кун университетысь удмурт кылтодонъя факультет, ӟуч кылтодонъя кафедра, Удмурт Элькунысь Кун Кенешысь Наукая, калыкез дышетонъя, культурая но егитъёсын ужанъя комиссия, Удмурт Элькунысь Нациосын ужан политикая министерство, Удмурт Элькунысь Писательёслэн огазеяськонзы. Михаил Петрович Петров сярысь трос тунсыкозэ ивортӥзы гожъясьлэн покчи нылыз Ольга Михайловна Белоус, Каролина нылызлэн пиез Валерий Александрович Никулин, тодосчиос Анна Сергеевна Зуева-Измайлова, Иван Васильевич Тараканов, Виктор Леонидович Шибанов, Риф Шакрисламович Насибуллин, Александр Григорьевич Шкляев, Светлана Тимофеевна Арекеева, профессор Фома Кузьмич Ермаков, кылбурчи Пётр Кириллович Поздеев, прозаик, драматург, Удмурт шаерысь Писательёслэн огазеяськонзылэн тӧроезлэн воштӥсез Владимир Яковлевич Самсонов. Писательлэн тусбуез бордын ужамез сярысь мадиз Удмурт Элькунысь но Россия Федерациысь калык суредась Пётр Васильевич Ёлкин. Михаил Петрович Петровен пумиськылэмъёссы сярысь ивортӥзы Удмурт Элькунысь культура удысысь дано ужасьёс Эльза Алексеевна Борисова, Анна Яковлевна Евсеева. Мыло-кыдо веранъёссэс дасяллям озьы ик Удмурт кун университетысь валтӥсь дышетӥсь Тамара Григорьевна Пантелеева, Удмурт кун университетысь аспирантка Роза Владимировна Кириллова, Удмурт Элькунысь искусство удысысь дано ужась Валентина Оскаровна Гаргитг, Удмурт Элькунысь культура удысысь дано ужась Надежда Николаевна Бочкарёва, Удмурт Элькунысь Крезьгурчиослэн огазеяськонзылэн тӧроез Александр Германович Корепанов. Михаил Петрович Петров сярысь туж ӟеч вераськиз та кенешез дасян но радъян сярысь трос сюлмаськем адями критик но литературовед Зоя Алексеевна Богомолова. Котькудӥзлэн сюлэмаз кылизы, дыр, таӵе кылъёсыз: - Михаил Петрович, чекист вал бере, Куӟебай Гердлы огпол вазиськем: "Кузьма Павлович, тонэ пуктозы: ӝоггес кошкы вал кытчы ке". Кузьма Павлович, нокыӵе кайгу сярысь малпаськытэк, сюлэмзэ вӧлак усьтыса шуэм: "Мон - кылбурчи, чеберлык сярысь ялан малпаськись адями, ӵуж гадё уӵыпиез кин пытсаны дӥсьтоз кыӵе ке корт кенер сьӧры?!." Ӝожомыса верано луэ: Кузьма Павловичез (Куӟебай Гердэз) ӵуказеяз ик пытсаллям. Михаил Петрович Петровлы сӥзем кенешез дасясьёслы тау карыса вераськизы удмурт кылтодонъя факультетлэн деканэз Пётр Иванович Воронцов, Удмурт кун университетлэн ректорез Виталий Анатольевич Журавлёв. Л.КУЗНЕЦОВА. Лыктэлэ! Толон юбилейзэ пусйиз шаерысьтымы тодмо кылбурчи Алла Алексеевна Кузнецова. Алла Алексеевна - гожъяськись нылкышноос пӧлысь тужгес кужмоез. Ортчем дыр ӵоже кылдытӥз ини кӧня ке кылбур книга. Юбилеезлы сӥзьыса но ӝоген вылез печатласькоз. 13-тӥ толсуре (декабре) Удмурт кун филармониын ортчоз кылбурчилэн Алла Алексеевна Кузнецовалэн юбилеезлы сӥзем ӝыт. Кутскоз 18 часын. Лыктэлэ та юртэ, удмурт кылбуретэз, удмурт кылэз, удмурт кырӟанэз яратӥсьёс! Л. МАКСИМОВА. Нылпиос сисько дунтэк Пичи Пурга ёрос бюджетысь дышетскись нылпиослы компенсация чотын 160 сюрс манет коньдон висъямын. Озьы ёросысь школаослэн кивалтӥсьёссылэн дышетскисьёссэс дунтэк сюдыны луонлыксы кылдӥз. Чакламъя, та коньдон толэзьлы тырмоз. Котькуд пиналлы 54 манет усёз. Азьло анай-атайёс кисыысьтызы 40 манет сёто ке вал, табере нылпиоссы 15 манетлы тросгес но ческытгес сисько. Таӵе иворлы котькудӥз шумпотӥз. Коньдон висъяны луонлык кылдэмын выт бичан чотын. РОНО-ен кивалтӥсьлэсь ужзэ быдэсъясь Екатерина Анатольевна Зубинова верамъя, оскон, пе, вань, нылпиосты азьланяз но дунтэк сюдыны быгатом шуыса. Н. Шутова. УДМУРТЪЁСЛЭН ТЯМЫСЭТӤ ӦТЧАМЗЫ АЗЬЫН Бурдэз лэзьыны уг яра Шаерысьтымы вань ёросъёсын ортчизы ни удмуртъёслэн тямысэтӥ ӧтчамзылы сӥзем ужрадъёс. Асьсэлэн кенешазы люкаськылӥзы Завьялово (Дэри) ёросысь удмуртъёс но. Покчи ӧтчамез усьтӥз ёросын удмуртлыкез утись-возись, ас калыкез но кылыз сярысь вань лулзэ, вань визьзэ сётыса сюлмаськись удмурт адями Мария Дмитриевна Ишматова. Вераськонэз мытӥз "Удмурт кенеш" огазеяськонлэн Дэри ёросысь ёзэзлэн тӧроез Иван Петрович Осинцев. Иван Петрович ивортэмысь тодмо луиз: "Удмурт кенеш" огазеяськонлэн та улосвылысь люкетэз ӟеч ужа. Зэм, куддыръя пумиськыло сюлмо адямиослы люкетӥсьёс. Сыӵеос ичигес мед луысалзы. "Удмурт кенеш" огазеяськонлэн Дэри ёзэзлэн азьвыл тӧроез Валерьян Арсентьевич Никитин, Удмурт лулчеберлыкъя дэменлыклэн та улосвлысь "Чагыр дыдык" люкетэзлэн тӧроезлэн воштӥсез, черкогуртысь одӥг номеро нылпи садысь визьнодась Людмила Андреевна Тепина ивортэмысь но тодмо луиз туж трос ӟечез. Удмурт калыклэн "пӧськыосыз" сярысь вераськон утыр ӟырдаз но ӟырдаз. Интыязы ялан пукыны чидатэк вераськыны кыл куриз Изгурт школалэн директорезлэн пиналъёсты дышетон но визьнодан ужезъя юрттӥсез, ёрос Думалэн депутатэз Галина Витальевна Мамонтова: - Туннэ асьмелы тросгес сюлмаськоно егитъёсмы сярысь. Туж ӝожомыса верано луэ: туала удмурт пиналъёс анай кылзэс малы ке мылкыдтэк дышето. Изгуртысьтымы нылпиос но школае ӟучомыса вуо. Та ужпумез син азяз ялан возьыны кулэ, дыр, удмурт егитъёслэн "Шунды" дэменлыксы. Зэм, со усто нылпиосты арлы быдэ "Шундыкар" лагере люка но таӵе бадӟым огазеяськонлы егитъёсты анай кылзэс яратыны дышетонэн но выроно, дыр. Азин нимо колхозысь профкомлэн тӧроез Надежда Дмитриевна Бутолина сюлэмыз туж вӧсь луыса шуиз: - Удмурт Элькунмылэн Тӧроез удмурт ӧз луы бере, туж бӧрдӥ. Быръёнъёс дыръя зэмлык пала чик кӧбератэк дурбасьтэм адямиосты табере котькызьы сантэманы выро. Тани ёрос кивалтэтысь гурт улон-вылонъя управленилэн тӧроезлэсь воштӥсьсэ Иван Петрович Осинцевез ужысьтыз палэнтыны малпало ни кадь. Асьмеос солы юрттыны кулэ. Сцена вылэ ӝутскиз удмурт сямен дӥсяськем туж чебер но йӧно нылкышно Тамара Геннадьевна Габитова. Кияса ёросысь Уддяди (Карамас-Пельга) гуртын вордӥськем но будэм ныл эмъясь луыса тырше. Нош ваньмыкуз лулысь-сюлмысь пыриське удмуртлыкмес утён уже. Веранэз но быдэсак герӟаськемын вал та удысэн. - Быръёнъёс дыръя Удмурт Элькунлы Тӧрое чаклам адямилэн Павел Николаевич Вершининлэн оскем адямиез вал мон, - шуиз Тамара Геннадьевна. - Тодӥсько вал: кужыммы ичи. Озьы ке но, бурдъёсмес ӧм лэзьялэ. Номыр шоры учкытэк, весь нюръяським. Мынам ӵужатае но, Алексей Гаврилович Мазитов, быдэс улонзэ нюръяськиз удмурт калыклэн шудо нуналъёсыз понна. Ойдолэ асьмеос но, туала удмуртъёс, саесъёсмес пужалтыса ужаломе! Ас выжыосыз сярысь уен-нуналэн сюлмаськыны дась Ижын улӥсь Семён Петрович Иванов. Таяз учыре но вераськытэк чидалод шат? Аслэсьтыз малпанъёссэ Семён Петрович мытӥз пиналъёс пумысь ӧпкелёнэн: - Туэ Дэри ёросын вордӥськемын вить сю гинэ нылпи, - ивортӥз со. - Со туж ӧжыт. Асьмелы адӟем кароно сьӧрлось эшъёсмылэсь. Германиын, кылсярысь, нылпи ваёно нылкышнолы эмъясьлы нырысьсэ вазиськыкуз сёто вить сюрс марка. Нылпи ваён юртысь кияз вож нуныен потэ - нош ик вить сюрс марка. Та коньдонэн быдэс автомашина басьтыны луоно. Тырмоз ини ялан, гадьынымы жильтыртыса, кырӟаса-вераса гинэ улыны. Асьмелы вузкарыны дышетсконо. Малы та удысын котьку сямен кузёясько ӟучъёс, бигеръёс, лымшор палась лыктэмъёс?! Тӥледлы Ижын усьтоно асьтэлэсь вузкарон юрттэс. Черкогуртады но сыӵе интыды мед луысал. Удмурт калыкмылы дурбасьтытэк чидалозы шат арлыдоос? Черкогуртын улӥсь Фаина Афанасьевна Широбокова туж кайгырыса тодаз ваиз ортчемзэ: - Кызь тямыс ар ужай вузкаронын. Нош шутэтскыны кошкон азям мукет удысэ выжоно луиз: кивалтӥсьмылы ӧз яра удмурт кылын вераськись адями. Дэри ёросын данак ӟучомем удмуртъёс. Соос пумысь кайгыре Ягул гуртын улӥсь Валентина Кузьминична Максимова: - Дорамы трос удмуртъёс уло. Нош анай кылынызы вераськемзы воксё уг поты. Таӵе кенешъёсы ветлыса, сюлэм туж пачылме. Но малы меда бертыса бурдъёс выльысь лэзисько?!. Удмуртлыкмес утён пумысь малпанъёсын тырмемын вал Пероггуртысь кырӟасьлэн Евгения Григорьевна Моховалэн, Дэри школа-колледжысь удмурт кыллы но литературалы дышетӥсьлэн Ангелина Алексеевна Байсаровалэн, татын дышетскись Милана Габитовалэн, "Италмас" школалэн директорезлэн Василий Петрович Ложкинлэн, милициын ужасьлэн Любовь Четкарёвалэн, мукет адямиослэн веранъёссы. Ӧтчамын ӟырдыт вераськиз "Удмурт кенеш" огазеяськонлэн тӧроез Валентин Кузьмич Тубылов но. Со вераськонзэ мытӥз алигес ортчем быръёнъёс бордысен. - Туж кырсь амалъёс кутыса мынӥз таиз нюръяськон, - шуиз Валентин Кузьмич. - Умой адӟимы куд-ог удмуртъёсмылэсь вылласянь гинэ чебер луэмзэс. Нош асьсэос соос чылкак мукетыз сярысь малпасько вылэм. Быръёнлы йылпумъян одно ик лэсьтоно. Янгышъёсты лыдэ басьтоно, азьланьын соос медам луэ ни. Туннэ татын ӧвӧл гурт кенешъёслэн тӧрооссы. Малы меда? Соос ӵапак калыкен ужаны кулэ ук! Куд-огез малы ке ялан утчаны выро "Удмурт кенеш" огазеяськонлэсь шекъёссэ. Нош со нокыӵе урод ужъёсын ӧз выры, уз но выры! *** Покчи ӧтчамын выль адямиос дэмламын "Удмурт кенеш" огазеяськонлэн Дэри ёросысь ёзэзлэн кивалтэтаз (вераны кулэ: соос азьвылъёсыз ик), тужгес шаплыосыз, визьмоосыз, нодлыкоосыз быръемын тямысэтӥ удмуртъёслэн ӧтчамазы (ортчоз туэ, 6-тӥ толсуре (декабре)), чакламын Пичи кенеше адямиос но. Татын ик ивортэмын вал таӵе малпан: вань удмуртъёслэн "Удмурт кенеш" огазеяськонэнызы азьланяз но мед кивалтоз солэн туала азьветлӥсез - Валентин Кузьмич Тубылов. Та нуналэ ик данъямын удмуртлыкез утён удысысь тужгес сюлмоосыз. Соос - "Путь Ильича" племзаводлэн тӧроез Валерьян Арсентьевич Никитин, ёрос кивалтэтысь гурт улон-вылонъя ёзлэн тӧроезлэн воштӥсез Иван Петрович Осинцев, Дэри школа-колледжысь удмурт кыллы но литературалы дышетӥсь Ангелина Алексеевна Байсарова, ёрос эмъюртысь фельдшер Тамара Геннадьевна Габитова, черкогуртысь тазалыкез кыдатонъя школалэн тӧроезлэн юрттӥсез Николай Алексеевич Перемечев, "Труженик" эштослэн тӧроез Николай Степанович Соловьёв, Ожмос гурт кенешлэн тӧроез Виктор Николаевич Акилов, Азин нимо колхозысь профкомлэн тӧроез Надежда Дмитриевна Бутолина, мукет адямиос. *** Дэри ёросын удмуртъёс ичи ӧвӧл. Озьы ке но, туж ӧжытэз пыриське на удмуртлыкмес возёнэ. Кулэ ни ук сэзъялтӥськыны, эшъёс. Тырмоз ини весь шымыртӥськыса, йырмес ошыса улыны! Елена ВИНОГРАДОВА. Тэк пуконэз тодӥсьтэм Мария Дмитриевна Ишматова котьку калык пӧлын. Таяз учыре со агаезлэн писательлэн Геннадий Дмитриевич Красильниковлэн Ижын улэм юртаз кенеше "Айкай" театрысь кырӟасен Валентина Серебренниковаен. НИМЫЗ - ДАНЪЯН ПУЛ ВЫЛЫН Узырмонлэн шӧмыз кузьыт 80-тӥ аръёслэн пумазы кӧня адями меда нимаз кузё луон сярысь малпаськылӥз? Ӵапак соку уго луонлык сётэмын вал аслыд кельшись удыс усьтыны, вуз поттыны, узырмыны. Озьы кылдӥзы пичигес гинэ фирмаос, магазинъёс, нянь пыжонтӥос, кафеос... Россилэн экономикаез азинтонъя программаяз пичи ужбергатон нимысьтыз инты басьтӥз. Со пыр чакламын вал производствоез "огинтыын сылонысь" вырӟытыны но тросэн сиён-юон, дӥськут но мукетсэ поттыны. "Кооперация сярысь" законэз кутэм дырысен ортчиз 12 ар. Озьы ке но, пичи ужбергатон ассэ малы ке но тыро-пыдо ӧз пукты. Нош реформаосты ортчытонын странамы зэмен но кыдёке кошкиз ни: ужаськом долларен, кылдытэмын транснациональной корпорациос, отын но татын чильк-вальк тылъёсын кисьтасько узыр магазинъёс. Соос ялан йыло. Озьыен, выль улонлэн выжыосыз дасям му вылын ӝог пушйизы. Нош удмурт ужбергатӥсьёс кыӵе адско та тулкым вылын? Соос пӧлысь огеныз, Кез посёлокын улӥсь А.В.Ившинэн пумиськылӥз газетлэн корреспондентэз Людмила МЕДВЕДЕВА. Кезысь "Иван" ООО-лэн кивалтӥсезлэн Анатолий Васильевич Ившинлэн нимыз пыртэмын Удмурт Республикалэн Данъян пул вылаз: пичи ужбергатонэн вырисьёс пӧлысь солы нырысетӥезлы сыӵе дан усиз ай, млы ке-а ачиз но паймиз. Собере буйгаз: озьыен, эшшо но умойгес тыршоно, луэмезъя тросгес юрттоно, курисезлы кидэ мычоно. Анатолий но ас дыраз пыд йылаз потон калэ вуылӥз. Тау эшъёсызлы: пельпумзэс дыраз пуктӥзы, канжаськыны ӧз сётэ. Егит ке но, Ившинлэн утчаськон-бызьылон сюресэз кузь. Ачиз сяна, кин со сярысь ӟечгес вералоз? Кутсконэз. Одӥг нуналэ мон, районысь связья ёзэн кивалтӥсь, ужтэк кыли. Со вал 1996-тӥ арын. Ӵош служить карем эшъёсы, та иворез кылыса, быгатэмзыя кин коньдонэн, кин кызьы юрттӥзы. Озьы кылдӥз "Иван" огазеяськон (быдэсак вераса, Ившин Анатолий). Усьтӥм кӧня ке вузкарон интыос, бӧрысьгес - нянь пыжонтӥ. Мини-пекарня басьтӥм Дэбесысь "Ветеран" огазеяськон пыр. Кык арзэ туж умой ужам, басьтӥсьлы ӧм ёрме. Собере пытсано луиз. Утчам фотосалон кылдытыса. Кредит курыны юри Москвае ветлӥ. Номыр ӧз пӧрмы. Уксё мукет интыысь шедиз. Фотосалонмы умой ужаз, дунъёсмы, Ижевскен ӵошатыса, улӥын вал. Но пайдаез но сомында ик люкаськылӥз. Ӵапак та вакытэ "Ижладабанк" одӥг фермерлэсь хозяйствозэ пунэмаськемъёссэ берыктымтэез понна вузан сярысь ялон сётӥз. Солэсь корказэ дунъяса, отчы магазин усьтӥм, бордаз сюро таза пудо басьтӥм на. Таиз но ужмы нырысь-валысь пӧрмиз: сӥлез интыяны ӧм курадӟе. Парсь но вордыса утчам. Пудоен вырон мыным тужгес но кельшиз, малы ке шуоно, ужам ужед калыклы яра ке, астэ чылкак мукет адямиен адӟиськод. Озьыен, юнме уд бергаськы, уен- нуналэн йырдэ уд висьытӥськы. Жаляса верано, таизэ но удысэз ӝыныё-урдсо дугдытоно луим. Валэктонэз огшоры. Пудо куайытон понна, ӟеч сиён кулэ. Сое кизёно, будэтоно, утялтоно, музъем куроно, техника басьтоно. Ваньмызлы коньдон кулэ. Нош кин сомында сётоз? Улон возьматоз ай: оло, выльысь пудо вордон борды берытском ай. Али выриськом вузкаронэн гинэ, магазинъёсмы райцентрын но, гуртын но ужало. Малпаськом на столовой усьтыны, матысь предприятиосысь рабочиёсты сюдыны. Инты тупаса быръемын кадь, ветлӥсез луоз. Тӥни сыӵе матысь дыре быдэстоно ужпуммы, азьланьзэ улон возьматоз. Дышетскон. Адями улытозяз дышетске, озьы но тодон-валанэз уг тырмы. Мон вордски Юкаменск районысь Починки гуртын. 5 арес дыръям семьямы Вавоже улыны выже, отчы ужаны ысто атайме, Казаньын юристэ дышетскемез бере. Мон Вавож школаез йылпумъяй. Кӧня асме тодӥсько, октябрёнокысен кутскыса, ялан азьветлӥсьёс радын вал, кивалтӥ школаысь комсомольской организациен. Ижевскысь механической институтын дышетскыкум - профсоюзный бюроен. Диплом басьтыса ужаны мынӥ Кезэ, татчы ик кыли. Служить кари Дальний Востокын. Отын ик мылкыды кенжиз вал чекист луыны, туж потэ вал люкам тодон- валанъёсме сӥзьыны адямиосты, странамес утёнлы. Вань эскеронъёсты ортчыса, тани-тани ӧтьыны кулэ вал - малы ке но ӧз пӧрмы. Со вал 1991-тӥ�1992-тӥ аръёсы. Али но жалясько, малпанэ ӧз быдэсмы шуыса. Дышетскыны пыри Казаньысь финансовой институтлэн заочной люкетаз, йылпумъяй ни, шуыны луоз. Кылиз на дипломной ужме гинэ пумозяз вуттыны. Малы кулэ луиз кыкетӥ вылӥ образование? Рыноке выжыса, сотэк азьлань уд мыны: лыдъян-чотан сылэ нырысетӥ интыын. Кузпалы но быдтӥз та институтэз, дипломен специалистэз ыстӥзы Кезэ. Татын ик пумиським, семья кылдытӥм. Ӵош ужаськом, одӥг удысэз нуиськом. Ог-огмылэсь дышетскиськом, ог-огмылы юрттӥськом. Нош шуг-секытъёс тырмыт. Валтӥсез соос пӧлысь - рынокын ас интыдэ юнматон. Кезын туж бадӟым конкуренция. Интыысь предприятиослэн но районлэн сяна, вузкарон интыоссы лачак лымшор палась лыктэм муртъёслэн. Ми дорын соос малы ке но туж трос, нюръяськон мынэ басьяськисьлэн котькуд манетэз понна. Тӥни малы Кезын сиён-юон дунтэмгес. Рыноклэн "тулкымаз" возиськон понна мед луоз оскымон ужасьёсыд. Коллективамы 40 мурт, урод ӧвӧл: котькудӥз интыез понна возиське. Мынам, шонерзэ вераса, одӥг адямиез но улляме уг поты, ачим сыӵе адӟон пыр потӥ. Сокем ӧй ке но куректы, но сюлмам маиз ке но кылиз. Улонын сыӵе урок но кулэ, вылды. Тыл пыр но потыны кылдӥз. Магазинмес быдэсак сутӥзы, 3 вузкарись, кладовщик но товаровед ужтэк кылизы. Быгатэмея соосты буйгатӥ, нош толэзь ортчыса, выль юртэ выжим. Асьме кужымен пуктӥм, ачим борддорзэ но тырыны юрттӥ. Студент дыръя дышем уж ӵапак иназ луиз. Огдышемен улон коркамес но быдэсак ӝутӥ, атае раствор нуллӥз. Дышетскем ноку но мултэс уз луы. Мӧзмон. Ӟучъёс сое ностальгия шуо. Кин кинлэсь, кин марлэсь мӧзме, дыр, нош мон та сямме шӧдӥ, 12 нуналлы кунгож сьӧры потаса. Институын дышетскыкум ай вуылыны кылдӥз Индие, Шри-Ланкие, Араб Эмиратъёсы. Отысь бертӥ чылкак мукет адямиен. Зэм, отын пӧртэмгес уло, оло, трослы ӟечгес, узыргес. Но асьме странамылэсь котькыӵе начар, аспӧртэмлыко медло - солэсь умоез ӧвӧл. Асьме бордысь потэ ук: кызьы ужалом - озьы ик улом. Рыноклэсь экономиказэ валан вылысь пыри Казаньысь финансовой институтэ. Отын монэ зэмос рыноклы дышетӥзы, соин ӵош - социализмлэсь ӟеч интыоссэ дунъяны но гажаны. Асьмеос ваньзэ кораса, лёгаса кельтӥськом. Азьвыл улонысьтымы вань умойзэ мон туала обществое выжтысал, нырысь ик, чылкыт сямъёслы дышетонэз, нравственностез. Политика. Та удысэн юн герӟаськемын школаысен ик. Али - уката но. Умоен лыдъясько Удмуртилы президент быръёнэз, республикамес со ӟеч пала воштоз. Асьмеды асьмеос ӵемысь ӵошатыны выриськом бускель Татарстанэн, вожъяськыса учкиськом соослэн радъяськем улонзы шоры. Мон сямен, котькудӥз регион - аспӧртэмлыко, аслыз гинэ тупась ӧръя улэ но азинске, кинлэн кызьы пӧрме. Удмуртия но юн кивалтӥсен бере уз кыльы. Быръем президентмылы мон оскисько. Александр Волковлэн ужан опытэз бадӟым, Кун Кенешез но, Правительствоез но огазеяны быгатоз. Огъя командаен, тупаса гинэ калыкмес умой улонэ вуттыны луоно. Сямыя мон - ӟечезлы оскись. Яратӥсько районме, республикаме, странаме. Родинаез уг быръё. Татын вордскид бере, татын ик мед яралод. Мурт музъем вылын, мурт калык пӧлын ноку но шудо уд луы. Армия. Службаез ортчыны кулэ котькудӥз воргорон. Мынам куинь пиосы будо, ваньзы дышетско 2-тӥ классын. Бадӟымез арлыдыз тырмыса мынӥз, пичиосыз-кыктоос - 5 арескын. Сётӥм соосты, юри эскерон вылысь, ронолэн кивалтӥсеныз кенешыса. Чупрес дышетско, вынзылэсь ук кылё, кытӥ-отӥ азьпалто но. Ыстысал-а соосты службае? Солдатэ - ӧй, военной училищее ке, пожалуйста. Мон сямен, Россилы одно ик кулэ профессиональной армия, федеральной бюджетысь висъяно коньдон сомында, кӧня кулэ туала армиез возьыны но оборонкаез юнматыны. Начармем, жуммем часте пиналъёсме келяме уг поты. Нош пиослэн офицер луон мылкыдзы уг кысы. Учке ай, ма быдӟа конкурс суворовской училищеосы! Дыр но коньдон ваньзэ интыяз пуктозы. Курон-вазиськон. Мон - пичи ужбергатонысь огез. Кыӵе куронэн потысал Правительство азе? Мед ужасал та удыслы юрттонъя фонд, туннэ солэн ванез уг шӧдӥськы. 1998-тӥ арын ужбергатонлы сӥзем конкурсын мон лауреат луи, шеди устоосыз пӧлы. Вормисе потэмъёсты Ижевске люказы, ӟечкылазы, синпельлы "Пей и процветай!" гожтэм кылъёсын кружка кузьмазы. Дэмлазы та выллем шулдыръяськон ас коллективам ортчытыны, веразы кӧня коньдон отчы кошкоз. Верам лыдпуссылы быдэс Кезэз утялтыны луоз! Со ӝытсы мыным ӧз кельшы. Гольтыръяськем интые кредит ке сётысалзы. Со коньдонлы паськытатысал производствоез, адямиослы ужан инты луысал. Тани туннэ мыным туж кулэ ГАЗ "бычок" машина, груз нуыны-вайыны. Гожтэтэ келямын Экономикая министерствое. Отын монэ валазы но юрттӥзы ке, туж шумпото, ӧз ке - соку вань вераськемъёссы, сӥзёнъёссы - юнме чеберъяськон. Али мынам ас поттэм уксёе выль машиналы уз тырмы, басьтӥм ке - ужасьёсы коньдонтэк пукозы. Луысал, дыр, мукет сямен но лэсьтыны: кулэ адямиосты кӧяны-вӧяны, но озьы выреме уг поты. Пичи ужбергатӥсьёс республикаын сокем трос ӧвӧл, коньдон но ми куриськом, берыктон вылысь. *** Табере кӧня ке лыдпус. Пичи ужбергатон. Кытын со тросгес интыяськемын (процентэн вераса): 42,7 - вузкаронын но калыкез сюдонын 16,4 - лэсьтӥськонын 15,7 - промышленностьын 5,5 - наукаын 2,1 - транспортын 1,7 - оборудованиез оптовой амалэн вузанын 1,3 - гурт удысын 1,3 - коньдон ужпумъёсъя но страхованиея удысын 1,3 - тазалыкез утёнын 1,2 - бытовой юрттэт сётонын 0,7 - информационно-вычислительной юрттэт сётонын 0,6 - связьын но ЖКХ-ын 0,5 - улон интыосты вузанын 6,4 - музон интыосын Западысь экономикаын пичи ужбергатон басьтэ ӝыны люкетсэ, Россиын - 8 процентсэ. Экспертъёс верамъя, со ичи вал, ваньмыз чакламъя мынэ. Кунгож сьӧрын уго 50 процентозь вуизы ни трос дауръёс ӵоже ужаса, асьмеос - 10 ар куспын. Озьыен, ваньмыз азьпалан на. Коньдон ке луиз, вуз поттон но мукетыз ӝог азинскоз. А.В.Ившин. "Иван" ООО-лэн огез магазинэз. Выль юртъёсты пуктонын, чеберъянын ужало кибашлы воргоронъёс Иван Ардашев но Николай Иванов. Туспуктэмъёсыз Владимир Беломорскихлэн. Ӵошен гинэ Туннэ Пермьын йылпумъяськиз Приволжск регионэ пырись улосвылъёслэн огъя ярмарказы. "Пермь-2000" шуыса нимаськиз со. Ужрад сӥземын вал улон-вылон но культура удысысь выль ужъёсты возьматонлы. Соосты улонэ пайдаё пыӵатон понна, регионысь вань улосвылъёс огкылысь луыса ужаны кулэ. Вылӥ кивалтэт ёзъёс сяна, огинэ кариськыны кулэ калык огазеяськонъёс, ӟеч мылкыдын юрттон фондъёс, ивор вӧлмытӥсь ёзъёс но мукетъёсыз. Э. ВАСИЛЬЕВА. Газетлэн куноез Мае адӟытод, чагыр экранэ? "Советской Удмуртия"-"Удмурт дунне" газетэз кема аръёс ӵоже лыдӟись эшъёсмы тодазы ваё на, дыр, Владимир Алашеевлэсь нимзэ. Трос аръёс ӵоже со ужаз газетлэн редакцияз, гожъяз гурт улон-вылон сярысь. Кӧня пумиськонъёс, газетэ потэм корреспонденциос, статьяос, интервьюос. Туннэ солэн нимыз нош ик газет бамын. Но таяз учыре Владимир Евсеевич, "Удмуртия" кун телерадиокомпанилэн телевидениея директорез, "Удмурт дунне" газетлэн куноез. Владимир Евсеевич, журналистикае вуон сюресты кузь-а, вакчи-а вал? - Мынам атае газетъёсы гожъялля вал. Солэсь ик адӟем кари, лэся. Нырысетӥ гожтэме потӥз "Алнаш колхозник" газетын кӧня ке чурен гинэ. Мон соку дыштскисько вал куинетӥ классын. Мылкыды ӝутскиз, пичиен-пичиен гожъяны кутски эшъёсы сярысь, школаын ортчем ужрадъёсты. Умойгес гожъяськыны кутски ни сизьыметӥ-тямысэтӥ классъёсысен. Тямысэтӥ классын дышетскыкум ик "Комсомолец Удмуртии" газетын потэ вал "Дась лу!" бам, дасяз сое Григорий Симаков. Нош редакторез - Флор Васильев. Газетлэсь ньыльдон вить ар тырмон юбилейзэ пусйыны монэ но ӧтизы. Алнаше сяна, нокытчы но потаме ӧй вал. Атае шуиз, мын ветлы, адӟы мар со город, армие мынэмелэсь азьло мон но, пе, Ижевске вуылӥ. Автобусъёс соку уг ветло вал. Поездэн ӧй мыны, "Ан-2" самолётэн Ижевскозь лоби. Редакцие вуэм бере нырысь ик тодматски Владимир Романовен, Григорий Симаковен. Соос ик келязы монэ Центральной гостиницае, "Волгаен". Кӧлӥ огнам. Уин султыса учкисько укноетӥ. Котырак тылъёс ӝуало. Мыным со туж паймымон вал. Газетлэсь юбилейзэ пусйизы ӵуказеяз, Пастухов урамын ик вал журналистъёслэн клубзы. Мыным соку кузьмазы будильник. Али со уг ветлы ни, но синпельлы шуыса возисько. Дас класс бере малпасько вал Удмурт пединститутэ пырыны. Военкоматэ ӧтьыса, повестка вуиз. Озьы экзаменъёсы ӝегай, одӥг нуналэ кыксэ сётоно луиз. Одӥгаз экзаменын "куинь" басьтӥ. Солы луыса пырыны ӧй быгаты. Соку конкурс туж бадӟым вал, нош дышетскыны кызь вить муртэ гинэ кутылӥзы. Бертыса толалтэзэ "Алнаш колхозник" газетын ужай, тулыс армие басьтӥзы. Кык ар служить кари Чебарькульын. Учёбкаын дыръям киям фотоаппарат кутӥ. Ужъёсме ыстӥ дивизилэн газетаз. Ӧтизы редакцие. Озьы ар но ӝыны мон ужай со газетын фотокорреспондент но корреспондент луыса. Арми бере дышетскыны пыри Удмурт университетэ. Соку ини тодматски тросэныз журналистъёсын, писательёсын. Нош Герман Ходыревен мон тодмо вал ни витетӥ- куатетӥ классын дышетскыкум ик, "Алнаш колхознике" гожъякум. Со атаеным ӵош дышетскемын, матысь эшъёс вал. Гожтэтъёс пыр дышетылӥз монэ гожъяськыны, али ке но мон соосты возисько. Герман Алексеевичен ӵош ик соку "Алнаш колхозникын" ужазы Петр Николаевич Кубашев, Николай Васильевич Васильев. Со кужмо писательёслэсь-журналистъёслэсь адӟем кариськиз-а, мар-а, соос сьӧры кыстӥськем потӥз. Университетын дышетскыкум нырысетӥ курс бере ик гужемзэ практика ортчи "Советской Удмуртия" газетын, иворъёсъя отделын. Кивалтӥз соин Василий Иванович Иванов. Отын ик ужаз соку тодмо кырӟасьмылэн Надежда Уткиналэн анаез Мария Михайловна. Озьы котькуд гужемзэ дышетскыкум тырши газетын ужаны. Со ик луиз улон сюресэ вамыштэме. Университет бере ужаны кутски "Советской Удмуртия газетын. Али ке но со мыным аслам доре кадь потэ. Али со "Удмурт дунне", нош мон понна со дуно "Советской Удмуртия" нимын. Огшоры корреспондентысен кутскыса, отделлэн кивалтӥсез луи. Табере дасэтӥ арзэ ужасько ини телевидениын. - Выль удыс, дышымтэ уж. Мар бордысен кутскиды? - Телевидениын но кутсконо луиз огшоры корреспондентысен. Гера Грязевен ӵошен нырысьгес кылдытӥм вал "Улон-вылон" передача. Адямиос сое яратыса учкизы, трос гожтэтъёс вуо вал, жингыртылӥзы но. Вить аръёс ӵоже ужаса, республикаысьтымы вань районъёсты котыртӥм. Одӥг гуртэ ик кык пол, куинь пол потано луылӥз. Трос калыкен тодматски, милемыз но тодмало ни вал. Но улон азьлань мынэ. Весь одӥг передачаос уз луэ, мукетъёсыз но вордӥськыны кулэ. Мыным кивалтыны оскизы информация отделэн. - Нош та дыре тӥледлы оскизы бадӟым удысэн кивалтыны - телевиденилэн туннэ нуналэз - кыӵе со? - Туннэ "Удмуртия" кун телерадиокомпаниен кивалтэ Александр Александрович Ушаков. Вылез валтӥсь директор вуыса, милям трос воштӥськонъёс ортчизы. Тулысысен 10-тӥ каналысь телепередачаос ӵукна но ужаны кутскизы - 6 час 30 минутысен 8 часозь. Нырысь ик удмурт кылын вераськиськом. Туж быгатыса, яратыса, асьме калыкез сайкатэ Светлана Кибардина, дыры-дырын Федор Миннигараев ӵукнаосы пота. Кыкетӥез воштӥськон - июль толэзьысен ми кылдытӥмы иворъёсъя блок. Азьло "Шаер" но "Песочная, 13" гинэ мынэ ке вал, али быдэс час ӵоже вис карытэк учкыны луоз удмурт телевиденилэсь передачаоссэ. 19 час 20 минутысен кутске "Шаер", собере - "Опасная зона". Понедельнике, средае но пятницае мынэ "Основной вопрос", вторнике, четверге - "Государственная казна". Иворъёсын блок йылпумъяське "Песочная, 13" передачаен, кӧня ке дыр кыле на спорт иворъёслы. Малы кулэ вал таӵе блок кылдытыны? Адямиос мед тодозы шаерамы ортчись ужрадъёсты, воштӥськонъёсты ог пуксемен. Куное но ӧтчаськом дорамы. Республикаысьтымы кивалтӥсьёс сяна, палэнысь лыктэмъёс но телепередачаосы пырисько. Адямиос со нуналэ ик мед тодозы малы но кыӵе ужпумъёсын соослэсь шаерамы вуэмзэс. Тани Сергей Кириенко ми дорын кык пол вал ни. Вераны кулэ созэ но. Таяз аре ми быгатӥмы ньыль цифровой видеокамера басьтыны. Телевиденилэн луонлыкез туж паськыт. Нырысь кутскимы супер ВХС форматэн ужаны, собере выжимы СП "Бетакам" системае, нош табере тани цифровой камераосын ужаськом ни. Кемалась ӧвӧл ай, СП "Бетакамен" ужало вал кунгож сьӧрысь вань телекомпаниос, Россиысь но ваньмыз сямен телекомпаниос берло дыре выжизы со вылэ. Но капиталистъёс азьлань мыно, соос табере ужало цифровой камераосын. Солэн луонлыкъёсыз но ӟечлыкез экран вылын эшшо но устогес. Милям но калыклэсь бере кылем уг поты, экран вылысь суред учкисьёс понна эшшо но чебергес мед луоз. Со выль камераосын съёмкаос али нуналлы быдэ мыно. Нош выль арысен иворъёсъя вань передачаос ужаны кулэ ни цифровой камераосын. - Кызьы кылдо но возисько телепередачаос? Тани берло кык-куинь аръёс ӵоже котькуд тулыс ми ортчытӥськом аттестация. Нимысьтыз комиссия кылдытыса, котькуд передачалы дунъет сётӥськом. Со дунъетъя ик передачаез лэсьтӥсьёс быдэс ар ӵоже ужало. Али дырыз сыӵе, котькудӥз передача дас-дас вить ар ӵоже улыны уз быгаты. Кудӥз, оло, ӝыны ар гинэ возиськоз, собере солэн кулэлыкез быре. Вань кема возиськись передачаос но. Матысь дыре ми пусъёмы бигер кылын потӥсь "Хэерле кич!" передачалы дас ар тырмонэз. Малпаськом, со азланяз но улоз, пуштроссэ ӧжытак выльдыса, чебертыса. Мукетъёсызлы но адӟем карымон мед луоз, бигер кылэз валасьтэмъёссэ но бордаз кыскыны мед быгатоз. Аттестация бере передачаосты ми соку ик ум быдтӥське. Экран вылын со кӧня ке дыр ӵоже возиське на, соин ӵош ик уж мынэ выль проект кылдытон бордын. Комиссия нош ик сое эскере, дунъет сётэ, собере ини со учкись доры вуэ. Телевизор учкисьёс синйылтӥзы, дыр, таяз аре кылдӥз "Серекъялод но бӧрдод" выль удмурт передача. Малпасько, та передача улӟиз, учкисьёссэ но шедьтоз. Удмурт калык яратэ серекъяны, яратэ маскарчиосты. Мынэ со 10-тӥ но 34-тӥ каналъёсын. Али толэзяз кык передача лэсьтӥськом, пӧрмиз ке, оло, арнялы быдэ но учкись доры вуоз ай. - Телевизор учкисьёслэсь дунъет сётэмзэс лыдэ басьтӥськоды-а передачаос дасяку, ужасьёслэсь тыршемзэс дунъяку? - Одно ик. Араз ньыль пол ортчытӥськом рейтинг, учкисьёс пӧлын юан-веран. Огкыл лэсьтэмын "Митраен", мукет но амалъёсты уже кутӥськом. Но рейтинг ӵемысь ортче городын, соин ик юаськонэ тросгес ӟуч учкисьёс шедё. Азьланяз чакласьком сыӵе эскерон удмурт районъёсын но ортчытыны. Соя тодомы ни, кыӵе передачаосты тросгес учке удмурт калык. - Удмурт учкисьёс понна тырмыт-а туннэ мынӥсь телепередачаос? - Меӵак вераса, тырмыт ӧвӧл. Телевизор учкисьёслы ӟеч тодмо ни "Питран", "Марӟан", "Тулкым", "Мылысь-кыдысь", "Эзь", "Вамыш" передачаос. Кызьы верай ни, кылдӥз "Серекъялод но бӧрдод" выль передача. Выль арлы выль проект бордын ужа Светлана Кибардина. "Мылысь-кыдысез" дасясьёс но учкисьёсты вуоно арын мукет уженызы паймытыны туртто. Учкисьёс ӵем дыръя вазисько, малы, пе, удмурт спектакльёсты 10-тӥ каналын уд возьматъяське. Секыт луиз дыр ласянь. Нош 34-тӥ каналын кык ар ӵоже шутэтскон нуналъёсы возьматъямы удмурт спектакльёсты. Но та каналэз али учкыны быгато Ижевскын но со котырын улӥсьёс гинэ. Азьланяз передатчикъёс пуктыны чакламын Балезиное, Играе, Кизнере, 34-тӥ канал быдэс республика понна мед ужалоз. Но вуоно арын та ужпумез быдэстыны ум быгатэ на, малпасько. Передатчикъёс туж дуноесь, коньдон уг тырмы. - Владимир Евсеевич, ваньмыз сямен удмурт телепередачаос кырӟан-веран пыргес ортчо. Кыӵе ке выль малпанъёс вань-а мур пуштросъем передачаос лэсьтонъя? - "Вамыш" передачаын Георгий Грязев возьматыны тырше гурт улонысь лэчыт ужпумъёсты. Зэм, уг тырмо, политикаен, экономикаен герӟаськем адӟытонъёс.Осконмы вань, 34-тӥ канал быдэс республикалы ужаны кутскиз ке, дыр тырмыт луоз, удмурт передачаос но тросгес луысалзы. Тани алигес гинэ ивор вуиз бускель Башкортостанысь. Отын но кыдытэмын асьсэлэн нимаз каналзы. Соослэн Президентсы М. Рахимов со каналэз асьсэ шаерысьтызы котькуд сэрегын учкыны мед быгатозы шуыса, 280 миллион манет коньдон висъям. Оло. асьме куд-ог ёросъёс но азьланяз соослэн передачаоссэс учкыны быгатозы. - Озьыен, выль ужасьёс но кулэ луозы? - Телевидение сюрес нокинлы пытсамын ӧвӧл, но ужаны кутӥськом вылӥ образование басьтэмъёсты. Мылкыд карисьёс нырысь ужало внештатной корреспондентъёс луыса. Ортчо соос иворъёсъя передачаос пыр, асьсэды возьмато ке, кутӥськом ни штатэ. Тани "Шаер" передачаын кык ар ӵоже внештатной корреспондент луыса ужаз Майя Бывальцева, та нуналъёсы сое уже кутӥмы. Удмуртъёс милям ӧвӧл, шуыны луоз, технической ужасьёс пӧлын. - Телевидеиын ужасьёс асьсэлэсь тодон-валанъёссэс азьланьтыны но быгато. - Бен. Милям вань "Школа телевизионного мастерства". Таяз арын отын чакламын монтажёръёсты дышетыны. Тросэз ужасьёсмы тодон-валанзэс будэто Москваысь институтын. Вань ужзэс вис карытэк, кык ар ӵоже дышетскисьёсыз, кудӥз кык-куинь арняем, толэзьем курсъёсты быдтэ. Дышетскыны быгато операторъёс, режиссёръёс, журналистъёс - вань мылкыд карисьёс. Мукет амалъёсты но уже кутӥськом. Тани Татьяна Денисова но Федор Миннигараев ноябрь толэзе арня ӵоже вал Финляндиын. Кылем арын Россиысь финн-угор телекомпаниос Кастрен фонд ӧтемъя пыриськимы Финляндиын радъям фестивале. Отын журналистлэн Валерий Сидоровлэн "Эзь" передачаез вань финн-угор дунне телекомпаниос пӧлын нырысетӥ интые потӥз. Та фестивальын соку ваньмыз мылкыд каризы кунгож сьӧры ивор дасясьёсты ыстыны, озьы та эшъёсмы "Юле" телекомпаниын тодон-валанъёссэс будэтӥзы. - Финн-угор республикаосын ӵошатыса, Удмурт телевиденилэн азинсконэз кыӵегес адӟиське? - Кылем гужем вуылӥ Сыктывкарысь "Коми гор" телерадиокомпание. Азьло ми азьпалан вамышъяськом ке вал, берло дыре соос милемды азьпалтӥзы. Выль кивалтӥсьсы огъя кыл шедьтыны быгатӥз Коми Республикаысь вылӥ кивалтӥсьёсын. Соос бадӟым коньдон сётӥзы телевиденилы СП "Бетакам" системаен камераос гинэ ог дас куать басьтӥзы. Ми соку кык-куинь сыӵе камераен ужамы. Соос озьы ик трос монтажнойёс лэсьтыны быгатӥзы. Та ласянь милям югдур секыт. Ужаськом вить монтажнойын, нош передачаос котькуд нунал лэсьтоно. Озьы передача дасясьёслы дыр трос сётыны ум быгатӥське. Но матысь дыре куатетӥез монтажной усьтӥськоз. Вуоно арын , бадӟым павильонэн аппаратмес выльдыны мед быгатысалмы. Нош телепередачаослэсь пуштроссэс учконо ке, троссэ возьмато фестивальёс. Мукет телекомпаниосын ӵошатыса, ми тросгес пыриськиськом пӧртэм конкурсъёсы. Ужаны быгатэммес возьмато воромонъёсмы. Лев Вахитовлэн передачаосыз котьку сямен нырысетӥ инты яке диплом басьто. Али со дася "Наедине с природой" передачаос. Гужем ӵоже кытчы гинэ ӧз вуылы, быдэс толлы ужез вань. Одӥгез гинэ уг тырмы - монтаж лэсьтон дыр. Али гинэ Ханты-Мансийск городысь бертӥз режиссёрмы Лев Вахитов. "Золотой бубен" возьматон-фестивальын "Странник" телефильмезлы самой вылӥ дунъет сётӥзы. Татын ик кыкетӥ степенё дипломен пусъемын "Питран" передачамы. - Кивалтӥсьын ужаса, асьтэос уд мӧзмиське-а журналистлэн ужезлэсь? - Туж лэсьтэм потэ передачаос, но дыр ӧвӧл. Котькуд минут нуналлы быдэ гожъямын. Мӧзмон медаз луы шуыса, дырын-дырын монтаж лэсьтонын пукисько, ачим но сюжетъёс гожъясько. Но трос кужым но дыр быре огъя ужъёслы. Коллектив милям телевидениын бадӟым, кык сю адями пала. Огъя уж мед пӧрмоз шуыса, зол дисциплина кулэ. Ужано луэ котькызьы, кинэ ушъяськод, нош кинэ тышкаськиськод но. Ужасьёс понна тӥ кышкыт кивалтӥсь ӧвӧл-а? - Ӧвӧл кадь потӥсько. Л. Малых. АРХИВЫСЬ ДОКУМЕНТЪЁСЪЯ Удмуртия ХХ дауре 1959-тӥ ар Толшоре ортчиз быдэс Союзын улӥсьёсты лыдъян но гожъян. Удмуртия автономной республикаос пӧлын Башкирия но Татария бере куинетӥ интые потӥз. 1929-тӥ арысен 1959-тӥ арозь Удмуртиысь городъёсын улӥсьёслэн лыдзы 4 поллы будӥз но 599,4 сюрсозь вуиз, вань калыклэн 56 процентэз. Со пӧлысь 74,2 процентэз - ӟучъёс, 14,8 процентэз - удмуртъёс, 8,1 процентэз - бигеръёс, 1,9 процентэз - украинецъёс. Пиосмуртъёс - 43,3 процентэз, кышномуртъёс - 56,7 процентэз. Вань улӥсьёс пӧлысь сизьым классэз йылпумъямтэ яке начальной классэз гинэ йылпумъям адямиос соку вылэм 44,4 процентэз. Толшоре ик ортчиз ХХВ Удмурт областной партконференция. Отын 1959-тӥ�1965-тӥ аръёслы калык хозяйствоез ӝутонъя сизьым аръем план юнматэмын вал. Соя чакласькиз ваньбур поттонэз кык поллы будэтыны, нош сиён-юон поттон ласянь США-ез сутыны, нош куд-ог ласянь кельтыны но. Нырысетӥ июльлы 82 МТС быдтэмын. Соос интые кылдӥз 35 РТС. Данаксэ техникаез, озьы ик 40 МТС-лэсь мастерскойёссэ но оборудованизэ колхозъёс басьтӥзы. Соин ӵош 1-тӥ августлы 694 пичиесь колхозъёс огазеяськизы 421 бадӟыматэм колхозъёсы. Колхозъёс выжыны кутскизы коньдонэн уждун тыронэ. Дыр ортчемъя гинэ правительство валаз: кутэм законъёс котькытын пайда ӧз вае. Кылсярысь, Ижевскын но город котырын пудо вордыны лэземын ӧй вал, нош тырмыт сӥль- йӧл ӧз на вузаськы. Пичи гуртъёсты быдтон но нимаз хозяйствоосын пудолэсь йырзэ кулэстон номыр ӟечсэ ӧз вайы, тросэз гурт калык воксё гуртысь пегӟиз. Озьы Ижевск гуртъёсы келяно луиз вылӥ образованиен 378 гурт специалистъёсты. Нош асьмелэн тысьмы уг тырмы вал Ижевскысь мелькомбинатэ ӟеч пызь изыны. Чабей тысь вайылӥзы Сибирьысь, Казахстанысь но Ураллэн лымшор палысьтыз. Воткинскын пусйизы машзаводзылы 200 ар тырмемез. Ижевскысь андан ӵыжатон заводын нырысьсэ андан пӧзьтӥзы. Ужаны ӧдъязы вылӥ вольтэн таӵе электролиниос: Закаменск ТЭЦ (Пермь улос)-Воткинск ГЭС-Ижевскысь 1 номеро ТЭЦ. Ижевскысь но Воткинскысь электростанциос огъя Урал энергосистемаен герӟаськизы. Озьы кылдӥз огъя "Удмуртэнерго" система. Кутскемын "Буммаш" заводэз лэсьтон. "Ижстрой" трестысь лэсьтӥськисьёслэн коллективзы басьтӥськиз бадӟымесь панельёслэсь коркаос ӝутон борды. "Коммунистической ужысь бригада" ним понна нюръяськисьёслэн городын ортчиз нырысетӥ слётсы. Октябре тупаса улон фондэ глазовъёс 91659 манет, сарапулъёс 76121 манет, ижъёс 187572 манет, нош быдэс Удмуртиысь улӥсьёс 397705 манет уксё бичаса сётӥзы. Со сяна инмарлы оскисьёслэн Удмурт епархизы - 40 сюрс манет. 1953-тӥ арен ӵошатоно ке, Удмуртиысь рабочийёслэн но служащийёслэн доходзы ӝутскиз 45 процентлы, колхозникъёслэн - 64 процентлы. Нош Удмуртиысь ужаса улӥсьёс, 1940-тӥ арен ӵошатыса, 8,9 поллы уногес уксёзэс сберкнижкае тыризы. Удмуртиын вал ни 12836 телевизор, со пӧлысь гуртын - 179. Асьсэлэсь нырысетӥ конференциоссэс ортчытӥзы Удмуртиысь спортъя обществоос, Журналистъёслэн огазеяськонзы но машина поттӥсьёслэн научно-технической обществооссы, слётсэс - гурт удысысь егит азьмынӥсьёс. Глазовысь пединститутын усьтӥськиз начальной классъёслы дышетӥсьёсты дасянъя факультет, Удмурт кун пединститутын - художественно-графической факультет, суреданъя нырысетӥ дышетӥсьёссы отын вал А. П. Холмогоров но Г. И. Якушев. Ижевскын усьтӥськиз чеберлыко вузъёсъя фабрика. Октябре Удмурт драмтеатрын возьматэмын Г. М. Корепанов-Камскийлэн "Любушка" опереттаез. Со вал нырысез удмурт оперетта. Культуралэн ӝутскемез возьматэ огъя улон-вылонлэсь умояны кутскемзэ. Е.ВЯТКИНА, Удмурт Республикаысь ЦДНИ-ысь валтӥсь специалист. Ижысь машзавдлэн винтовка бичан конвейерез. Ижысь механической заводысь формовочной участоказ. Школаысен - институтозь Берло дыре бадӟым инты висъяське пиналъёсты пӧртэм профессиослы дышетонлы, та удысэз паськытатонлы. Таин валче вылӥ дышетон заведениосын усьтӥсько нимысьтыз среднетехнической факультетъёс, ужало пӧртэм колледжъёс, лицейёс. Вис карытэк тодон-валанъёс басьтон (школа-училище-техникум-институт) ужпумъёслы сӥземын вал Ижысь техникая кун университетын ортчем научно- методической конференция. Солэн ужаз пыриськизы мукет улосъёсысь но шор профессиослы дышетонъя училищеослэн, лицейёслэн, колледжъёслэн но школаослэн кивалтӥсьёссы. Конференцилэсь ужзэ радъязы Россия Федерациысь Калыкез дышетонъя министерство, республикаысьтымы Калыкез дышетонъя министерство, Ижысь техникая кун университет, Наукая, вылӥ но шор профессиослы дышетонъя комитет. Кенешын ӝутэм ужпумъёсъя вераськизы ИжГТУ-лэн ректорез, профессор И. В. Абрамов, Россия Федерациысь Калыкез дышетонъя министерствоысь управленилэн кивалтӥсез, экономика наукаосъя кандидат П. Ф. Анисимов, педагогика наукаосъя кандидат, профессор, Л. Г. Семушина но мукет эшъёс. Шор профессиослы дышетон удысын кылдэм ужпумъёс сярысь вераськон мынӥз нимаз секциосын но "котырес ӝӧк" сьӧрын. Люкаськемъёс трос ӵектонъёс, дэмланъёс сётӥзы. Азьланьын соос одно ик лыдэ басьтэмын луозы, пиналъёсты дышетон удысын пайдаен берытскозы. Е. Иванова. Шумпоттэ "Италмас" Туж яратӥсько "Италмас" ансамбльысь артистъёслэн концертъёсазы ветлыны. Асьсэлэн чебер костюмъёсынызы, шулдыр кырӟаменызы но капчи эктэменызы соос учкисьёслэсь мылкыдзэс инме тубымон ӝуто. Нош татысь нылпи студие ветлӥсьёс, сцена вылын эктыкузы, возь вылысь турлы сяськаослы укшало. Берлозэ "Италмасъёсты" учкыны кылдӥз Ижевскысь "Металлург" культура дворецын Удмурт кунлы 80 ар тырмонлы сӥзем концертсы дыръя. Таяз учыре но учкисьёс трос номеръёсты киоссы пӧсямон чабыса келязы. Соослы тужгес но кельшиз кык сузэръёслэн Евгения но Алевтина Медведеваослэн, Иван Русскихлэн но мукет артистъёслэн кырӟамзы. Концерт йылпумъяськем бере витезлы устоосызлы Удмурт Республикалэн артистэз дано ним сётӥзы. Нош Удмурт Республикалэн дано артистэз В. И. Веалуйкин 38 ар ӵоже "Италмасын" кырӟамез бере туннэ берпум концертсэ возьматӥз. Владимир Ивановичлэн пичи дырыз Украинаысь песятаез дорын ортчиз. Черновицаысь крезьгуръя училищеез быдтэмез бере со кырӟаз гуцулъёслэн ансамблязы. 1962-тӥ арын, та ансамбльлэсь концертсэ учкыкуз, А. В. Мамонтовлы кельшиз Валуйкинлэн кырӟамез но сое "Италмасэ" басьтӥз. Со дырысен Владимир Валуйкин вань лулчеберзэ сӥзиз удмуртъёслы. В. Чернов. Питкевич Юрий Степанович Вордскиз 1951-тӥ арын 2-тӥ мае, белорус. Дышетскемез вылӥ. Йылпумъяз Пермьысь политехнической институтэз - инженер-строитель. Удмурт Республикаысь дано строитель. 1971-тӥ-1978-тӥ аръёс - цехлэн мастерез, Чепца механической заводысь цехлэн участокеныз кивалтӥсь, УАССР, Глазов город. 1978-тӥ-1979-тӥ аръёс - Чепца механической заводысь Лэсьтӥськон управленилэн СУ-2 участокеныз кивалтӥсь, Глазов город. 1979-тӥ-1987-тӥ аръёс - лэсьтӥськонъя Чепца управленилэн 3 номеро лэсьтӥськон управлениеныз кивалтӥсь, Глазов город. 1987-тӥ-1988-тӥ аръёс - лэсьтӥськонъя Чепца управлениысь парторганизацилэн парткомезлэн секретарез, Глазов город. 1988-тӥ-1989-тӥ аръёс - "Чепецкий механический завод" ПО-лэн парторганизациезлэн секретарез, Глазов город. 1989-тӥ-1993-тӥ аръёс - Удмурт Республикаысь калык депутатъёслэн Глазов городысь кенешсылэн комитетэныз кивалтӥсь. 1993-тӥ-1995-тӥ аръёс - Удмурт Республикаысь Министръёслэн Кенешсылэн Тӧроезлэн воштӥсез. 1995-тӥ арысен - Удмурт Республикаысь Правительстволэн Тӧроезлэн нырысетӥ воштӥсез, Иж город. Бырйылэмын Удмурт Республикаысь Кун Кенешлэн нырысетӥ но кыкетӥ ӧтчамъёссылы депутатэ. Гондырез кутӥзы Дэбес ёросысь пӧйшурасьёс пӧлын ялэмын вал ӵошатскон. Отын верамзыя но гондырлы лицензия басьтӥзы туэ ёросысь РОВД-ын ужасьёс. Со лицензиен 24-тӥ августэ 200 килограммъем гондырез погыртӥзы Александр Целоусов, Павел Владыкин, Сергей Перевозчиков но Игорь Сундуков. - Бадӟымезгес гондыр 300 килограммозь но кыске, - шуэ Игорь Сундуков. - Малпаськом на эшшо одӥг ке но лицензия басьтыны но гондырез кутон понна нюлэскы потаны. Мар бен, тӥледлы мед удалтоз, Дэбесысь пӧйшурасьёс! Кышкасьтэм егит воргоронъёс гондырез но, кионэз но кутыны пӧрмытозы. Туспуктэмез газетэ вуттӥз П.Скобелев. Кылбурет удысысь Сюр но сюр кабандэ, Ар-Серги! Вячеслав Ар-Сергилэн кылбуръёсын "Таяз ярдурын..." книгаез мон доры бер вуиз. 1997-тӥ арын поттэм мае ке алигес гинэ шедьтӥ. Шонерзэ вераса, авторез ачиз кузьмаз. Но, малпасько, зэмос поэзия сярысь вераськыны ноку но бер ӧвӧл. Нош вераськон муг усиз тани маин валче: книгаез лыдӟеме бере, ас поннам "Усто!" пусйыса, мон сое ӝажые понӥ ни вал. Арня но ӧз ортчы - мылкыды выльысь со борды берытскиз, синъёсы нош ик ӝажыысь уродос вылбамен книгаез шедьтӥзы. Чебер книга поттон понна, али чебер коньдон кулэ. Нош таиз отысь-татысь утчаськыса поттэмын, шӧдске. Ӵок , али экономикаез но политикаез поэзиен ум суралэ, озьы карыны турттӥсьёс вань ке но (малы, пе, со кулэ, пайда ке уг вайы...) Поэзия - инӟы шапык. Сюлэм пушкы лысвуэн усе но вирсэръёсы пыӵа. Яке - кызьы шуиз Ар-Серги, ... Нош мынам пичи Шурелы Пичильтык гинэ ошмес Дун вузэ сётэ - Тырме. Зэм, дунне вылын котькуд адямилэн шумпотонэз аслаз. Сое Вячеслав Ар-Серги туж тунсыко пусъем "Шумпотонъёс" диптихаз. Таӵе эпиграфез но юнме шорысь ӧвӧл: Мон котьку но шудо, Эшъёслэн синъёссы Шудбурен ке шудо... Валады: Владимир Романовлэн кылъёсыз. Гажано кылбурчимы тазьы гожтӥз ке но, улонэзлэн берло аръёсаз со ӵем но ӵем поттылэ вал, туж кулэ луись ог-огедлы шумпотон сям адямиос пӧлын ыше шуыса. Ар-Серги аслаз диптихаз со малпанзэ ик азьланьтэ но таӵе йылпумъян лэсьтэ: ... Муртлэн куректонэз Туж тросэзлэн син азязы Сьӧд гижылэсь но пичигес... Нырысетӥ кылбурын лирической герой ваньзэ ик кунэрес луэм эшъёссэ шумпоттыны быгатэ тани кызьы: Огезлы шуи - толон, пӧй, Вытрезвителе шеди. Адӟи - лулӟем улсаз со Пальпотӥз. Мукетызлы шуи - ыштӥ, пӧй, Ваньзэ уждунме. Адӟи - лулӟем улсаз со Пальпотӥз. Куинетӥезлы нош шуи - - Улэм уг пот Сумбрес та вакытэ, Дасяй ини кыӵес... Валамон: таиз но шумпотэ. Кыкетӥяз кылбурын ваньмыз йырин-чукин берыктэмын. Татын лирической геройлэн эшезлэн мылкыдыз нырысь-валысь инмын. Шумпотэ со понна пумиськем эшез. Нялтас аслэсьтыз но шумпотэмзэ вера: выль книгае, пӧй, тани- тани потэ ини. Син азе макем пуксьымон образэн йылпумъямын! Эшлэн соку ик Пальпотон кысӥз, Ӵемтылыса олокытчы Кошкиз. Учке ай авторлэсь стильзэ: эшлэн - эшелэн интые, пальпотон - пальпотонэз интые. Тазьы вераса, гожтӥсь лыдӟисьлэсь юа кадь: зэм ик-а эш вал пумиськем адямиез? Нош кылбур, быдэс диптих - удмуртлэн тужгес бурмыны валасьтэм через сярысь. Вожъяськон со. Ох, мынам но нырдӥням вуиз ни! Куддыръя ачим но черлаллясько. Палась маке... Но со вакытэ ик валасько: урод сямъёс пӧлысь та самой самоез. Одӥг гинэ кылбур ӧй гожты ни ачим но солы пумит: оло, эмъюм луоз кожаса? Огез таӵе: Бен уго... Ожмаськон но интые Эшъяськон ке луысал, Вожъяськон но интые Данъяськон ке луысал, Омыръяса ӧд быдтысал Шудбурдэ, Пашмон интые, Ӝужан луысал, Удмуртэ. Та темаез ик Вячеслав Ар-Серги азьланьтэ мукет кылбураз: Тон шумпотсал мынам усемелы - Созэ мон тодӥсько... Эктысал тон мынам висемелы - Созэ мон тодӥсько. Юондыр ортчытод тон, пӧрмиз ке лулы Пыкмем но ӵакмем ошмеслы - Созэ но тодытэк уг улӥськы, ява... Собере чигиськыса кадь юа: "Марлы озьы? Марлы? Я вазь ук, юлтоше". Шуг валэктыны та юанлы. Кылбурчиез сюлэмшугъяськытэ на мукетыз но юан: "Кин мон? Кинъёс ми, удмуртъёс?" - Нош мон кыӵе тусо меда? - Юай мон эшелэсь. - Тусыд тынад, дуно эше, Тусыд гинэ ӧвӧл, сямыд но - Из вакытысь инме Лопырскыны вырись. Сумбрес тусъем, Бушгес йыро та даурлэсь. Беромемын... - Я, кин? Я, кин? - Вот ведь ёртӥз ини! Шуи ук - Птеродактиль. Вячеслав Ар-Сергилэсь кылбуръёссэ малпаськытэк лыдӟыны уг луы. Солэн котькуд чурез шӧдтэк шорысь луэ. Соин ик книгаез выльысь но выльысь кутэм потэ: тазэ ӧйгес вала вал, оло, али валало? Та кылбуръёс - визьмо лыдӟисьлы. Нош нырысь лыдӟемады ик ӧдгес ке валалэ, мон сямен ик выльысь берытске соос борды, палэнэ эн понэ. Тӥ шӧдоды, одно ик шӧдоды пичи Казмас гуртлэсь шокамзэ, эшшо но пичигес Шлано шурлэсь мусо кырӟамзэ. Озьы ик пумиськылоды дуннеысь быдӟым адямиосын, культураосын. Зэм, книгаын шӧдӥське авторлэн уно тодон-валанэз. Соин ик капчи мылкыдын йылпумъям потэ вал. Тани "Таяз ярдурын" книгаез лыдӟеме бере кылдэм пародия нергее. Мон татын книгае пыртэм нимъёсты гинэ радысь пыртылӥ. Возьматон понна: ма сярысь вераське кылбур сборникын? Птеродактиль? Митхун, Харон, Франсис Гойя. Ностальгия, Ноктюрн, Куинджи, Пикассо, Стендаль. Монматр бездэм дӥсен. Неандер. Низами Гянджеви, Ли Бо. Либо Микеланджело, Даная, Давид, Либо Назарет, Голгофа. Антика? Тодад вай ай, Либо Йошкар-Ола, Сомбатхей, Либо Шкетан но Чавайн. Либо Геракл Авгей гидын, Либо Пелей Ахиллэз келя. Йошкар-Ола-а-а! Ну, ёк-кы-лы-мы-ны-ы!.. Нош Пенелопа но Одиссей Гордий гердэн герӟамын! Сукыр Гомер но уз пертчы. Моцарт, Сальери, Эстер... (Кылемез талмудэ ӧз тэр) Интеллект, Эрудит! Кыӵе стиль!!! Нош тон шуиськод - Птеродактиль... Кытысь ке кылӥ вал, Вячеслав Ар-Серги кылбуръёсын зӧк книга дася шуыса. Потэмез сярысь кылӥ ке, оскытӥсько: "ӵемтылыса олокытчы уг кошкы". Шумпото шуэме та. Мон сюрисько аслэсьтым кабанме, Сюлмо ворттӥсько со доры турынме. Сюр но сюр кабандэ, Ар-Серги! Владимир Котков, писатель. Сцена вылын - ӟечъёсыз Шаерамы йылпумъяськиз калык инструментъёсын шудӥсьёслэн "Зарни крезь" нимо фестивальзы. Концертъёс ортчылӥзы Удмурт кун филармониын, Егитъёслэн юртазы. Фестиваль дыръя асьсэлэсь устолыксэс возьматылӥзы Калык куспо конкурслэн лауреатэз Татьяна Кунгурова (домбра), Калык куспо конкурслэн дипломантэз, Удмурт Элькунысь искусствоосъя дано ужась Виктор Новиков (баян), Россиысь дано артист Шаунат Амиров (балалайка), Калык куспо но Россиысь конкуретъёслэн лауреатъёссы Людмила Кондратьева, Ольга Войстер (балалайка), Инесса гареева (домбра), Россиысь дано артист Раджан Шайхутдинов. Со сяна, концертъёсы пыриськиз калык инструментъёсъя "Зарни крезь" камерной оркестр (солэн чеберлыкъя кивалтӥсез но дирижёрез - Калык куспо конкурслэн лауреатэз Сергей Кунгуров). А. АПАЕВА. Ижын но сьӧрлон Та нуналъёсы Ижын но сьӧрлон уло пӧртэм ужрадъёс ортчо. 1-тӥ�2-тӥ толсуре (декабре) Сьӧлта (Селта) но Балезино ёросъёсын луозы театр амалэн дасям "Ортчись даурлэн берпуметӥ шочемъёсыз" нимо концертъёс. Удмурт Элькунысь Национальной библиотекаын вал право удысысь ужпумъёслы сӥзем кенеш. Отчы пыриськизы шаерысьтымы валтӥсь библиотекаослэн директоръёссы, мукет ужъюртъёсысь адямиос. Кенешез радъяз Удмурт Кивалтэтысь иворъёсъя но перӟетъя федеральной агентство но. Глазкарын ортчиз татысь шаеръюртлы тямыстон ар тырмонлы сӥзем сӥё-дано ӝыт. Сое шулдыртӥзы Б. Моркус кивалтэм улсын кырӟась муниципальной камерной хор, шаеръюртлэн шыкысъёсысьтыз дӥсез возьматон, А. Б. Чеховлэн "Чайка" пьесаезъя спектакльысь суред, Борис Рейдэман кылбурчиен пумиськон. А. АПАЕВА. Чуръёс, чуръёс... Та кӧня ке аресме... Дунне вылэ мон 1926-тӥ арын потӥськем. Сизьым классэз быдтӥ но, война кутскиз. Кинлы со кулэ вал? Милемлы-а - егитъёслы-пиналъёслы? Война шудо улонмес копак уретӥз. Мыным соку 15 арес вал. Турттӥсько вал дышетӥсь луыны, удмурт литератураен вырыны. Нош ужано луиз механизаторын. Ми, егит нылъёс, 6-7 ар ӵоже курадӟим. Ӧм адӟе шудонэз-серектонэз, кӧт тырымон сиёнэз, чебер дӥсяськонэз, ӧм тодылэ кытысь ке коньдон басьтонэз. Али учкиськом ортчем сюресмес, пинал дырмес - ваньмыз со ышем-бырем ни. Ми ӧм малпалэ, лэся, пересьмом шуыса, ӧм шӧдылэ жадеммес но, висеммес но. Кытчы ке мыныны пумит кариськид ке, "время военной" шуозы вал. Тюрьмаен кышкатъязы. Кытчы гинэ егитъёсты ӧз пазялэ: МТС-э, ФЗО-е, чугун сюрес ӝутонэ, нюлэс дасянэ, аэродром лэсьтонэ... Уй кӧлонэз но соку тыро-пыдо ӧм адӟылэ. Всё турттӥм фронт понна. Нош али ми кылим самой ичи пенсиен - 505 манет гинэ тыро. Макем потэ вал пересьмыса коть умой-умой сиськыны, кыӵе ке коть дӥськут басьтыны. Маин? Коньдонмы кошке эмъюмлы. Суймы-пыдмы воксё лябӟемын. Тужгес но шугъяськытэ соиз. Туала пенсионеръёс тросгес коньдон басьто но ми кадьёсты серекъяло. Кызьы ке коть, кин ке коть мед валасал милесьтым мылкыдмес. Эк-ке-ке, берыкты вал со пинал дырез. Х. ЕЛЬЦОВА но ӵош улӥсь эшъёсы. Игра ёрос. Семенов Игорь Николаевич Удмурт Республикаысь Кун Кенешлэн кыкетӥ ӧтчамезлэн Можга городысь быръёнъя 57 номеро Короленковской округъя депутатэз. Вордскиз 1951-тӥ арын 20-тӥ декабре. Дышетскемез вылӥ. Йылпумъяз Ижысь гурт удысъя институтэз - инженер-механик. Россия Федерациысь жилищно-коммунальной удысысь дано ужась. 1973-тӥ ар - связья монтажник - "Восток-промсвязьмонтаж" трестлэн управленияз линейщик, Пермь город. 1973-тӥ ар - 5 номеро СПТУ-ысь производстволы дышетонъя мастер, Можга город. 1973-тӥ-1974-тӥ аръёс - Советской Армиын службазэ нуиз. 1974-тӥ-1978-тӥ аръёс - школа-интернатын дышетӥсь, Можга город. 1978-тӥ-1979-тӥ аръёс - 5 номеро СПТУ-ын дышетӥсь. 1979-тӥ-1982-тӥ аръёс - консерва поттон заводын инженер. 1982-тӥ-1987-тӥ аръёс - водопроводно-канализационной хозяйствоя управлениын инженер, Можга город. 1987-тӥ-1998-тӥ аръёс - жилищно-коммунальной хозяйствоя предприятилэн директорез. 1998-тӥ арысен - Можга городысь администрацилэн тӧроез. Бырйылэмын Удмурт Республикаысь Кун Кенешлэн нырысетӥ ӧтчамезлы депутатэ. Туннэ - бенефис Таиз ар юбилейёсын узыр. Уно гинэ дано адямиосмы - кылбурчиос, писательёс, артистъёс пусйизы ни, пусъёзы на 50 арес тырмонзэс. Тани туннэ но драмая Удмурт кун театрын шаерысьтымы калык артисткалэн Галина Владыкиналэн бенефисэз ортчоз. Галина Михайловна йылпумъяз Москваысь Б.В.Щукин нимо Вылӥ театр училищелэсь удмурт студизэ. Со вал 1973-тӥ арын. Со дырысен шудэмын ни уно гинэ тунсыко рольёс. Нош туннэ Галина Владыкина шудэ болгар драматурглэн "Бабий бунт" пьесаезъя комедияз. Пьесаез удмурт кылын пуктыны дасяз Вячеслав Ар-Серги. Спектакль нимаське "Сельсовет Маня" шуыса. Валтӥсь ролез - Маняез - шудэ Г. М. Владыкина. Спектакль мыноз на ӵуказе но. Н.ЛЯЛИН. Галина Владыкина. Ӟеч кӧл, Дышетӥсь... Асьме пӧлысь пыраклы кошкиз Дышетӥсь. Бадӟым Дышетӥсь. Владимир Лазаревич ИВАНОВ вань улонзэ сётӥз пиналъёслы, ньыльдон ар пала ужаз Ува ёросысь Поршур школаын. Алнаш ёросын вордскем бигер пияш синмаськиз удмурт ныллы, дышиз асьме кыллы. Со сюлмысьтыз яратӥз калыкез, музъемез, инкуазез. Биология урокъёсты нылпиос чидатэк витьылӥзы. Иванов дышетӥз соосты улонэз валаны, чеберлыкез дунъяны. Владимир Лазаревич эшъёсыныз ӵош уно выль сорт георгин кылдытӥз, мукет сяськаосты но будосъёсты вӧлмытӥз. Ми ноку ум вунэтэ та адямиез. Солэн ӟеч ужъёсыз ваньмызлэн тодазы кылёзы. Дышетэм пиналъёсыз. Ӟеч ужад ке шутэтскы Газетмылы гожтӥськисьёс чидатэк возьмало ни, дыр, Выль арез. "Удмурт дуннеысь" Тол Бабай тужгес шудоезлы дася уго бадӟым кузьым - оштрак. Куспамы вераськыса, малпам на солэсь эшшо одӥг кузьым курыны. Кызьы уд пусйы юрттӥсьёсмес-почтальонъёсты. Ӵапак соос уго тӥ доры дыраз вуттыны тыршо газетмес. Соос тӥ доры вуттозы кайта шудоослэн нимынызы номермес но. Озьыен, "Удмурт дунне" газетэз куамынлэсь трос вӧлмытэм почтальонъёс пӧлын шудытэмын луоз "Завьяловской" санаторий-профилакторие путёвка. Секыт гужем но сӥзьыл ужъёс бере ӵапак дырыз кӧня ке шутэтскыны, тазалыкез тупатыны. 30 экземпляр трос ӧвӧл кадь, озьы-а? Лымшор районъёс сюлэсь ятырен но гожтӥскьыто. Но милям палэнэ кельтэммы ӧз поты ӟучомем районъёсты но. Соин ик газтмес ӧжытгес басьтӥсь гуртъёсысь почтальонъёслэн но луонлыксы вань лотереяе пыриськыны. Со сяна, тужгес устоосыз газет вӧлмытӥсьёс пусъемын луозы на мукет кузьымъёсын - гурт котырын туж кулэ луись чебер арбериосын. Оло, тӥ луды тужгес шудоез? Утчалэ. Удмурт книгаез лыдӟись яратэ Пичи Пурга ёросысь Улын Юри библиотекаын Г. Г. Ермакова дас ар пала ужа ни. Со дыр куспын лыдӟисьёсызлэсь сямъёссэс но кулэяськонъёссэс умой валаз. - Удмурт книга уг тырмы, - шуэ Галина Григорьевна, - гуртоосмы ялан куро писательёсмылэсь гожъямъёссэс, уката ик выльёссэ. Но соос дорамы туж ичи вуо, 1-2 экземпляр гинэ. Я коть, удмурт газетъёсты но журналъёсты басьтӥськом. Та секыт вакытэ газетлы-журналлы гожтӥськыны куд-огез уг ни быгато бере, дорамы лыдӟиськыны лыкто. Библиотекарьлэн верамезъя, трос лыдӟисько мӧйыос но покчиос. Нош шор арлыдоос книга борды уггес кыстӥсько. Малы меда? - Ужзы трос, дыр, - пальпотӥз библиотекарь, - мӧйымыса ке, оло, лыдӟиськонэз валаны кутскозы. Ю.МИХАЙЛОВА. Библиотекарь Г. Г. Ермакова. Туспуктэмез В.Беломорскихлэн. ШӦКЫЧ "Хеллоу, Серапион, яке выль титул" (телефон пыр) - Хеллоу! Хеллоу! Хеллоу! Дӥньтэм-Вамъя! Дӥньтэм-Вамъя! Дӥньтэм-Вамъя-а та? Ӧвӧл? А мар-о? Куддыр-Кӧтъя та! Валад-а? Мар-мар? Пиньтэм Дарья пельтэмъёслы куддыръя сакар сётъя, шуисько! Трос-а кулэ? Мыным Пиньтэм Дарья шуод ай, тьфу! Мыным Дӥньтэм- Вамъя кулэ. Трубкаез пон интыяз! Вот с-с-сукум, а! Ну и связь тӥляд брезгливо ужа, а! - Хеллоу! Хеллоу! Дӥньтэм-Вамъя! Дӥньтэм-Вамъя! А-а-а Дӥньтэм Вамъя-а та? Фу, кӧты ик кольырак кариз! Серапион, тон-а та? Тон! Мон та, Галактион! Тодмад-а? Тонэ кызьы уд тодма, шуиськод? Озьы, озьы! Хеллоу, Серапион, Хеллоу! Мар-мар? Номырзэ ӧд вала шуиськод? Привет, шуисько, привет! Западын озьы адямиос ог-огзэс ӟечкылало! Мар-мар? Кыӵе закодын? Западын, шуисько, Западын! А-а-а! Валад-а? То-то! Ну, в натуре, а! Блин! - Хеллоу, Серапион! Гуртын кыӵе улэм-вылэм? Улӥськоды каллен! Умой, умой! Мар-мар? Кытысен? Кибъяласен-а жингыртӥсько? Кебитысен шу на вал! Египетын мон али! Мар-мар? Египет возьмасько-а? Уг, уг! Мон али, брат, шутэтскисько татын! Тазалыкме кыдатӥсько, куме ӵыжатӥсько, ветылъёсты уйылӥсько. Мар-мар? Ветылъёсты сяна Египетын уйылыны но нокинэ-а, мар-а? Тьфу! Покач! Тоже мыным, жокей! - Хеллоу, Серапион! Кыл вискы эн чуртнаськы! Кыӵе жокей, кыӵе ветылъёс? Ну, в натуре, блин, номыре уд валаськы! Дамаосты мон озьы ветылъёс шуисько. Валад-а? А-а- а! То-то! Со Дӥньтэм-Вамъя палан улыса, нокинэ уйылытэк ик чоньдод ини! Серапион, мар вылез тӥляд? Мар-мар? Вуж сямен ик, шуиськод? Ужез бергатыны кулэ, брат, бергатыны! Музъем но берга ук. Мар, мар? Герылэсь вылэ уд тэтчы? Кыӵе геры? А-а-а! Гогы! Гогылэсь вылэ уд тэтчы, шуиськод. А-а-а! Туж интересно! Ну, в натуре, интересно, блин! - Хеллоу! Хеллоу! Хеллоу! Серапион, кытчы ышид? Ну и связь тӥляд хреново ужа, а! А кин тонэ тэтчаны косэ? Ачиз мед тэтчалоз! Шедьтӥллям шузи муртэ! Бизнесэн вырыны кулэ, брат, бизнесэн! Мар-мар? Сынамын? Мар сынамын? Изнэс! Да причём тут изнэс? Бизнес шуисько мон, бизнес! Коммерция! Валад-а? Тьфу! Мар-мар? Мон-а жулик? Господи помилуй, Серапион! Мон, пе, жулик! Ха-ха-ха! - Хеллоу! Хеллоу! Серапион, кытчы нош ик ышид? Ну и связь, а! Блин, Серапион, ну тон монэ паймытӥд, с-с-сукум, а! Ну тон, в натуре, шузи-а, мар-а? Господи помилуй, кыӵе мон жулик! Мар мон Мудайс-а, мар-а? Мынам нокинлэсь но одӥг доллар но кайпалтэме ӧвӧл! Мар-мар! Египетэ пегӟыны кытысь сомында коньдон шедьтӥ? Ну, таиз, брат ты мой, мукет ужпум. Кызьы шуо ужез бергатӥсьёс - коммерческой тайна! Не телефонной базар! Валад-а? - Хеллоу! Серапион! Мар-мар? Кышкай? Кинлэсь мон кышкалом? Я, вера! А-а-а! То-то! Улласянь монэ кин уте? Миквор! Нош вылласянь кин? Прокурор! Мар-мар? Кылбурен вераськисько? Кӧйы голяса улӥсько? Эх, Серапион, Серапион!.. Ну, в натуре, дунне вылын адями одӥг пол улэ ук! Соин ик о-о-озьы улыны кулэ, калыклэсь берло возьы-ы-т медаз луы! Мар-мар? Питул! Мон-а титул? Выль питул даже! Ну, ну! А-а-а! Ха-ха-ха! Выль питул, пе! Шедьтӥськод ук вераны но! Блин! - Хеллоу! Серапион! Кызьы гинэ тон монэ уд шуиськы! Аслэсьтыд но улэм-выэмдэ вера вал? Мар-мар? Нылпиос сютэм, кышно калге!.. Ма, со калгись кышнодэ виемед уг луы-а, мар-а? Мар-мар? Пуктозы! Кытчы пуктозы? А-а-а! Уз!!! Тон в состоянии аффекта вииськем, шу! Наотрез сеськы! Яке юэм дыръям макесме ымныр вылаз поныны шедьтӥськем, шу! Условно сётозы! Мар-мар? Кин мон? Циник! А-а-а! Ха-ха-ха! Циник, пе! Ну, в натуре, а! Блин! - Хеллоу! Хеллоу! Хеллоу! Серапион, кытчы нош ик ышид? Ну и связь брезгливо ужа, а! Мар-мар? Трубка киысьтыд усиз? Олома но супыльтӥсько? Серапион, мон ваньзэ тыныд сюлмысьтым верасько. Кыллы-бурлы туэ эрик сётэмын. И шонер верасько! Озьы ведь, а? То-то! Серапион, кышно - со кортӵог ӧвӧл. Вот огшоры кортӵог лушкад ке, могут пуктыны. Вить арлы! Нош латуннойзэ патялтыны шедьтӥд ке, пожизненно но могут сётыны! Так что чакласькы! Ну, в натуре, а! Чакласькы! Блин! - Хеллоу! Хеллоу! Серапион, тон вань верамме пеляд тыр! Мон юнме уг супыльтӥськы! Мар-мар? Ачид валаськод? То-то! Туэ пичиен капыръяны ни в коем случае уг яра! Бадӟымен, тросэн, лучше машинаен лушкаськыны кулэ. Но ту-у-уж лушем! Мар-мар? А-а-а! Шӧдӥськод, дыр, лушкем но лушкаськон кылъёслэсь ш-ш-ш! каремзэс? То-то! Соос одӥг шобыретэн шобырскемын. Озьы ведь? Мар-мар? Кин мон? Тодосчи! А-а-а! Ха-ха-ха! Тодосчи, пе. Блин! Озьы, о-о, югдытӥсь! Ну, в натуре, а! Серем ик потэ! - Хеллоу! Серапион! Мар-мар? Мон-а кыӵе улӥсько? Тон лучше кытын улӥськод, шу! Тани туэ Египетысь нокызьы уг ӵыдӥськы! Собере кышноосы но уг ӵыдо! Мар-мар? Кӧня кышное? Та вие куинь сяна ӧвӧл. Ог вадьсын сизьым вал. Тон но куинь ке но кышно возь. Мар-мар? Огезлы но моӵед уг тырмы? Тырмоз, тырмоз! Соос тонэ вӧлозы, сузялозы, сюдозы, утялтозы, маллялозы. Ужпи кадь луод! Берганы кулэ, брат, берганы! Мар-мар? Монэ воксё эрказмемын шуиськод? А-а-а! Ха-ха-ха! Озьы но, дыр. Эрказмемын, пе! Ну, в натуре, а! - Хеллоу! Серапион! Улэме-вылэме сярысь вераса, йылаз-пумаз ӧй вутты. Выль ар бере кышноосы Куала-Лумпурае чорто. Отчы шонто, дыр. Отысен но жингырто! Одӥг интыын акыльтэ, брат! Собере кышноосы алигес выль ивор кылӥллям: Брунейын эшшо но умойгес, пе. Ӝыны арзэ отын ӵуштасько, дыр. Отысен но жингырто! Антарктидаын но кык-куинь нунал улэм потэ вал. Кышноосылэн улыштан нуллэмзы уг поты. Шуныт, пе, нюлано. Окыт, зын потэ. Мар-мар? Айы коӵыш мон? А-а-а! Ха-ха-ха! Писэй, иське, шуиськод! Ну, ну, писэй, пе! Блин! - Хеллоу! Хеллоу! Хеллоу! Серапион, кытчы нош ик ышид? Мар-мар? Трубка киысьтыд усиз! дак юн возь! Яке чыртыяд дум! Тазалыкед кыӵе-о, шуисько? Мар-мар? Виськод? Рак-а, мар-а! Хеллоу! Хеллоу! Серапион, кытчы нош ик ышид? Ну, связь, блин! Мар-мар? Трубка киысьтыд усе? Юн возь, шуисько ук! Кытӥыд висе? Рак ӧвӧл, дыр, ук? Хеллоу! Кытчы нош ик ышид? Мар-мар? Трубка усе?.. Кык киыныд возь, кунян! Мар-мар? Йырыд пороме? Ну, в натуре, а! - Хеллоу! Хеллоу! Серапион! Мар-мар? Изверг? Мон-а? Изверг! Ха-ха-ха! Ну, ну! Кызьы гинэ тон монэ уд шуиськы! То жулик, то питул, то изверг, то циник... Нош мыным хоть бы хны! Трубка киысьтым уг усь! Мар-мар? нерваосыд лябесь ини? Паймисько мон тыныд, Серапион. Жаль но потӥськод. Нерваосыд, зэмзэ но зырет кадь супырӟемын, лэся. Йӧнатскыны кулэ, брат, йӧнатскыны. Ну, в натуре, блин, кызьы озьы улыны можно, а?! - Хеллоу! Серапион, сад-бакчадэ возиськод на-а? Мар-мар? Нергеез понна гинэ? Уксё ӧвӧл?! А малы уксё кулэ? Мар-мар? Корка пуктоно вал? А кӧня тыныд кулэ? Ог витьтон сюрс манетэн тырмысал, дыр? А мар со манет? Мон озьы уг валаськы. Блин! Умой вера, адями сямен! Тыныд баксы кулэ-а, мар-а? Мар-мар? Уд валаськы, мар со баксы? Соку, соку... килограммен яке мешокен вера. Кӧня мешок доллар кулэ луоз? - Хеллоу! Серапион, кытчы нош ик ышид? Мар-мар? Трубка киысьтыд усе? Ачид выж вылэ пограмед? Мырдэм султӥд? Мар-мар? Корвалол юод? Ю, ю, давай. А то монэным сэрен пыдъёсме шеръяй шуод. Хеллоу! Серапион, катьяськид-а? Умой, умой! Нерваосыд тынад, зэмзэ но, зыретлэсь но кизер, лэся. Мар-мар? Зыретлэсь кизер мар луэ на? Корвалол интые, пурген юыса эскеры ай, соку тодод! Мар-мар? Монэ-а садист шуиськод? А-а-а! Ха-ха-ха! Садист, пе. Йӧнатскыны кулэ, Серапион, йӧнатскыны! Ну, в натуре, а! Блин! - Хеллоу! Серапион, кӧттэ сокем шуг эн кар. Корка пуктыны мон тыныд юртто. Али вераськон дырмы быре ини. Монэ срочно Лос-Анджелесэ самолёт вите. Мар-мар? Уг пӧяськы-а? Уг, уг! Господи, помилуй! Пырак отысен мон тыныд одӥг торба мешок баксы телеграфен келяло. Только юыса эн быдты! Хеллоу! Серапион! Кытчы нош ик ышид? Вот зараза, нош ик пограз-а, мар-а? баксы сярысь воксё кылэмез но уг луы. Сач! погра, куанер, блин! - Хеллоу! Серапион! Мар-мар? Мырдэм пукси шуиськод? Бадӟым тау кариськод? Мар-мар? Ну, в натуре, блин, одӥг торба мешок доллар понна собыдӟа тау карыса улод ай. Огшоры со. Мар-мар? Мон-а? Выль питул! А-а-а! Ха-ха-ха! Выль питул, пе! О, Господи, помилуй, шедьтэм ук мар сярысь сюлмаськон! Ну, в натуре, а! Блин! Выль питул, пе! - Хеллоу! Я, ӟеч лу, Серапион! Мар-мар? Номырзэ уг валаськы! Мар пуны сямен ыргетӥськод? Мар-мар? Телефон трубкаез ымад куртчид? Юн возь, опеть уськытод! Вот с- с-с-сукум, а! Нодлыко ик тон, блин! Ну, в натуре, а! - О кей, Серапион! Мар-мар? А-а-а! Ха-ха-ха! Выль питул, шуиськод? Шедьтӥськод вераны но. Ха-ха-ха! Я, мон лобӟи Лос-Анджелесэ! Отысен нош ик жингырто. Нош ик лабыртом, блин! Али дыр ӧвӧл ни. Мон "Боинг" самолётын пукисько ини. О кей, о кей, Серапион! Дӥньтэм-Вамъяослы хеллоу! Привет! Сэнк ю вери матч! Озьы, о-о! Галактионэн уртче вал Фёдор СУВОРОВ. Удмурт Республикаысь Правительстволы Тӧрое кандидатлэн Ю. С. Питкевичлэн Удмурт Республикаысь Кун Кенешлэн дас куинетӥ (азьвыл чакламтэ) сессияз верамез Удмурт Республикалэн гажано Президентэз! Удмурт Республикаысь Кун Кенешлэн гажано Тӧроез! Гажано депутатъёс, Правительстволэн членъёсыз, ӧтем эшъёс! Туннэ ужаны кутскиз Удмурт Республикаысь Кун Кенешлэн дас куинетӥ (азьвыл чакламтэ) сессиез. Удмурт Республикалы Президент быръем дырысен со луэ Кун Кенешлэн нырысетӥ сессиез. Удмурт Республикалэн Конституциезлэсь 100-тӥ ёзэтсэ лыдэ басьтыса, Правительстволэн валтӥсь ужпумез луэ улон-вылон но экономика удысъёсты котыр ласянь, огсыр азинтон. Со понна Кун Кенешлэн депутатъёсыз, Правительстволэн членъёсыз но тодосчиос республикалэн Президентэз А. А. Волков кивалтэм улсын дасязы но кутӥзы "Удмуртилэн 2001-тӥ-2004-тӥ аръёсы азинсконэзъя" нимысьтыз программа. Со печатламын но вӧлмытэмын. Калык сое умоен лыдъяз. Мон но та программаез дасянэ пыриськи, отын пусъем валтӥсь ужпумъёсты туж кулэен лыдъясько. Выль Правительство та документэз йылаз-пумаз вуттоз но эскерыны сётоз Президентлы, сое Кун Кенешын юнматон вылысь. Вераме потэ республикаын улон-вылон но экономика удысъёсты азинтон ужпумъёсъя аслэсьтым малпанъёсме. Нырысетӥ валтӥсь ужпум - экономикаез но социальной удысэз котыр ласянь азинтыса, котькуд семъялэсь, нимаз адямилэсь кулэяськонъёссэ лыдэ басьтыса, калыклы ӟеч улыны-вылыны луонлыкъёс кылдытон. Нош со понна калыклэсь огъя доходзэ йылэтоно, уждунэз, пенсиосты но пособиосты будэтыса, соосты дыраз но ӝеганъёстэк тыроно. Котькудӥз нимаз адями мед шӧдоз кун ласянь сюлмаськонэз. Бадӟым саклык висъяно социальной удыслы. Быдэсак выль сямен радъяно калыкез дышетонын, тазалыкез утёнын, культура но спорт удысъёсын тыршисьёслы уждун висъянэз. Шаермылэн азинсконэз - егитъёс киын, кыӵе кивоштӥсьёс будэтом, сыӵе ик луоз азьпал улонмы. Соин ик егитъёс сярысь кун ласянь сюлмаськон пичиысен ик мед шӧдӥськоз ини, соослы юрттоно улонын шонер сюрес бырйыны, пыд йылазы йыг-йыг султыны. Егит семьяос сярысь сюлмаськон, экономикаен, кун ужъёсын, бадӟым производствоен, гурт удысэн кивалтыны быгатӥсь ужасьёсты дасян котьку син азьын луозы. Доходъёсты будэтон сярысь ялан сюлмаськемен ӵош вунэтоно ӧвӧл коньдонэз валаса но пайдаё кутон пумысен. Мукет сямен вераса, со коньдонэз ик эсэпсэ чакласа уже кутон бадӟым барышен берытске. Россия Федерациысь Правительствоен бюджет кусыпъёсты радъянын но тырмымтэос вань. Тросэз ӝегатскытэк быдэстоно ужпумъёс, кудъёсыз кулэ каро ватсаса коньдон висъянэз, усё улосвылъёслэн пельпумъёссы вылэ. Таӵе югдурез тупатон вылысь паськытатоно выт тыронэз эскерон ужез но выль амалъёс утчано ватсаса барыш поттыны. Югдурез тупатыны юрттоз республика но интыысь бюджетъёс куспын доходъя но расходъя полномочиосты, удысъёсты люкылон. Чылкак выльдоно бюджетэз люкылон радлыкез но. Али озьы луыса кошке: одӥг ужез ик быдэсъясьёс коньдон басьто пӧртэм бюджетъёсысь. Кужмо экономикатэк уз умоя калыклэн улон-вылонэз. Промышленность удысын ӟеч пала воштӥськонъёсты Правительство адӟе производствоен кивалтон радлыкез юнматонын, мукет кунъёсын, улосъёсын уртче ужанъя кусыпъёс тупатонын, поттэм ваньбурез вузаны луонлыкъёс кылдытонын. Ваньмыз со юрттоз рынокын вылӥ дунъяськись продукция поттонэз радъяны, калыкез уже интыяны, бюджетэ выт чотын тросгес коньдон пыртыны. Кун куронъёсты быдэсъясьёс трос, али рынокын кужмо нюръяськон мынэ. Отын инты шедьтон понна, вылӥ ӟечлыкен вузъёс поттоно. Экономикаез огсыр азинтон вылысь, промышленностьын огъя ваньбур поттонэз арлы быдэ 10-15 процентлы йылэтоно. Валамон, со герӟаськемын Россилэн экономикаяз огъя кылдэм югдурен. Республикалэсь бюджетсэ кылдытонын валтӥсь инты басьтэ му вӧй кыскон удыс. Со туэ дас толэзь куспын бюджетэ 2328,7 миллион манет коньдон пыртӥз, ваньмыз пӧлысь 44 процентэз. Эшшо но трос му вӧй кыскон понна ужатыны кутсконо му вӧен узыр мукет интыосты, уже пыӵатоно выль технологиосты, пайдазэс будэтоно му узырлыкъёсты утчан ужъёслэсь. Пусъеме потэ, Ижысь автозавод луонлыкъёс кылдытыны быгатоз республикамес дотация чотын улӥсьёс пӧлысь поттыны. Дас толэзьлы йылпумъянъёс возьматӥзы: автозаводэз выль кужымен ужатонъя проектэз туннэ ик улонэ пыӵатыны луоно. Автомобиль лэсьтонэз азинтон Правительстволы озьы ик юрттоз мукет ужпумъёсты но сэрттыны-пертчыны, кылсярысь, калыкез уже интыяны, бюджетэз узырмытыны. Нимысьтыз саклык висъяно гурт удыслы. Бадӟым уж ортчытоно материально- технической базаез юнматонъя, муослэсь удалтонлыксэс умоятонъя, кадръёс дасянъя, нимысьтыз кутэм программаосты улонэ пыӵатонъя. Палэнэ уз кыле гуртын поттэм вузъёслы, сиён-юонлы дунъёсты кун ласянь радъян, сюресъёс лэсьтон, улон юртъёсы чагыр эстӥськон вуттон, школаос, больницаос, культура юртъёс пуктон. Ӟеч ӧре пыртоно лэсьтӥськон удысэз. Берло аръёсы татын югдур уродмиз. Шӧдскымон кулэсмиз инвестициослэн быдӟалазы, йыло лэсьтӥськисьёслы уждунъя пунэм тыронъёс. Соин валче ӝегатскытэк выльдоно ужан амалъёсты, удысэ азьмынӥсь технологиосты пыӵатыса, выль материалъёсты но конструкциосты кутыса. Озьы кулэсмысал лэсьтӥськонлэн дуныз, тросгес адямиос быгатысалзы улон инты басьтыны. Капчиятоно проектлы документъёс дасянэз, лэсьтӥськыны музъем висъянэз. Соос туж ӝегато чаклам ужъёсты огсыр быдэсъяны. 2001-тӥ арын чакламын 350 сюрс квадрат метр улон юртъёс пуктыны. Со понна нимысьтыз ужрадъёс кутэмын луозы ас кужыменызы корка ӝутыны мылкыд карисьёслы кредит висъянэз капчиятон но кун ласянь юрттэт сётонэз кулэезъя радъян вылысь. Экономикаез ӝутыны юрттозы тросгес инвестициосты уже кыскон, пичи ужбергатонэз паськыт вӧлмытон, асваньбурен валаса кивалтон, музъем кусыпъёсты радъян, телекоммуникация но транспорт удысъёсты азинтон. Правительстволы ӟеч вамышъёс лэсьтоно администрациосын кусыпъёсты матэгес но оскымонгес карон ласянь. Котькудӥз ас сюлмаськонъёсыныз, ӵектонъёсыныз вазиськыны мед быгатоз кивалтон ёзъёсы. Ачиз улон зол тыршемез кулэ каре обществоез но нимаз адямиез кышкытлыклэсь утёнын, калыклэсь конституциен тупатэм кулэяськонъёссэ быдэсъянын, йыружъёсын нюръяськонын. Тужгес но бадӟым кышкытлык кылдыто шаерамы наркотикъёслэн вӧлмемзы, радъям йыружъёслэн йылэмзы, кузьмаськон, быдэ вуымтэос пӧлын йыртэман учыръёслэн будэмзы. Таӵе югдурез тупатыны луоз, правоосты утись вань ёзъёслэсь, кун властьлэсь но интыысь аскивалтонъя ёзъёслэсь кужымэс огазеяса гинэ. Удмурт Республикалэн гажано Президентэз! Удмурт Республикаысь Правительстволы Тӧрое мынэсьтым кандидатураме ӵектэмдэс дунъясько мынам быгатонлыкъёсылы оскемен. Сюлмысь тау карисько тӥледлы. Удмурт Республикаысь Кун Кенешлэн гажано депутатъёсыз! Эшлыко мылкыдын юрттэмдылы оскисько но лыдъясько: республикаямы политика, калык кусыпъёс, улон-вылон но экономика удысъёсын вань луонлыкъёс кылдытэмын калыкмылэсь улонзэ ӟечгес карон понна. Та ужез ас ӧраз пыртыса азинтыны гин кулэ. Тау кылзэмды понна! Дэбесысь декоративно-прикладной искусствоя центрын тунсыко адӟытон ужа. Отысь адӟыны луэ трос пӧртэм киужъёсты, кылсярысь, Н.Р.Перевозчиковлэсь кызьпу туйлэсь лэсьтэм самоварзэ, чайниксэ, кружкаоссэ но мукетсэ - ваньзэ соосты уже кутыны луэ. Николай Рафаилович та ужъёссэ быдэсъя, вань сюлэм шунытсэ сётыса. П.Скобелев. Туспуктэмъёсыз С.Катаевлэн. Киосыз пуэз но кырӟато Тазьы шуыны луоз Дэбесысь декоративно-прикладной искусствоя центрысь П. В. Ложкин суредась сярысь. Аслыз кельшись пулэз бырйыса, со кылдытъя туж чебересь суредъёс. Аспӧртэмлыко ужъёсыз, Дэбес черкогуртын улӥсьёслы сяна, юн кельшиллям Москваын улӥсьёслы но. Отчы возьматыны нуэмъёссэ соку ик басьтӥллям. П.В. Ложкин йылпумъяз Дэбесысь ик педучилищеысь художественно-графической отделениез но вань улонзэ чеберлыкез данъянлы сӥзиз. Зэм верало калыкын: зарни киос ужтэк уг пуко, писпуэз но кырӟатыны быгато. Туспуктэмез С.Катаевлэн. Африкан агаез тодӥсьтэмез ӧвӧл Дэбесын таӵе учыр сярысь веразы: пиосмуртъёс тамак кыскыны кутскиллям но Африкан Поздеев вӧзысьтызы соку ик кошкем, нош табере соин артэ тамак арато ке, асьсэос, пе, тамак кыскисьёс со дорысь палэнско ни. Угось 70 аресъем ужысь ветеран чик уг гажа тамак кыскисьёсты но, аракы юисьёсты но. Зэм, егит дыръяз со вина но юэм, тамак но кыскем. Но урод сямъёсызлэсь куштӥськыны кужым шедьтэм. Табере котькуд нунал, вазь ӵукна ик султыса, туж капчи дӥсяськыса бызьылыны пота. Мӧйы спортсмен ёросын ортчись вань ӵошатсконъёсы пыриське, ӵемысь вормисьёс радын луэ. фТӥни соин Африкан агаез Дэбес котырын тодӥсьтэмез ӧвӧл. Туспуктэмез С.Катаевлэн. Кизилилэсь адӟем карисько Пеймыт. Гуртын чал-чал. Инмын гинэ шудыса сямен ворекъяло яркыт кизилиос. Соосты ик пиос "кузьмало" яратоно нылзылы. Но кизилиос туж вылӥын. Ойдолэ васьком музъем вылэ. Татын озьы ик трос яркыт кизилиос ворекъяло. Ас тылсиосынызы соос куд-ог дыръя синмез ик мальдыто, сюлэме шуныт пырто. Одӥгез сыӵе кизили - егит кылбурчи но журналист Эрик Батуев. Бен, бен, ӵапак со, Чечняе ож мыныку гинэ тямыс пол вуылэм адями. Поттӥз ни кылбуръёсыныз куинь книгазэ. Кызь ньыль аресказ пыриз Россиысь Писательёслэн огазеяськоназы. Ӟеч вераське немец кылын. Кемалась ик ӧвӧл Англие вуылӥз. Москваын ке но улэ, ужа, уг вунэты дор палъёссэ, вордӥськем удмурт шаерзэ, няп-няп удмурт кылзэ. Маиныз бен Эрик мынэсьтым сюлэмме бугыртӥз? Кылбуръёсыныз! Синмаськисько соослэн аспӧртэмлыко луэмзылы. Кылбуръёссэ лыдӟыса шӧдӥськод: автор меӵак уг вера малпанъёссэ, лыдӟисьсэ кыӵе ке тодметъёс пыр малпаськыны косэ. Эрик Батуев гожъя этнофутуризм амалэн: выльзэ вераны тырше вашкалаез пыр. Соин но, дыр, кылбуръёсыз тросэзлы валантэм. Сыӵе амалэн ик мынам но кылбуръёсы пӧрмо. Нош Эриклэн чуръёсысьтыз басьтӥсько гожъяськон кужым. Нош ма со, эрик? Бен, ӟуч кылэ берыктыса - свобода. Валера но ассэ Эрик шуэм. Малы меда? Созэ ачиз автор гинэ тодэ, дыр. Нош мон малпамъя, Валера аслаз кылбуръёсаз ватытэк шараяны тырше та улонмес яратэмзэ. Соин но, дыр, аслыз Эрик кушем ним басьтӥз. Бен, Эрик мон понна - пыдэстэм шыкыс. Сӥзем потэ солы выль азинсконъёс но бадӟым гожъяськон кужым. Тазьы малпаськыса пуконъям адӟисько: ульчаын сактэ ни, адямиослэн, пудо- животъёслэн куараоссы кылӥсько. Нош инмысь кизилиос пӧлысь одӥгез тужгес но яркыт пиштэ на. Югыт куазьлэсь кышкатэк, ачиз доры тубыны косэ кадь... Светлана Иванова, Удмурт кун университетын дышетскись. Валерий Фридрихлы - 60 Ваньмыз понна сюлмыз висе Шаерамы, тужгес но Воткинск городын, тодмо адямилы Валерий Фридрихлы туннэ тырме куатьтон арес. Солэн ортчем сюресэз аспӧртэмлыко, тунсыко но адӟем карымон. 1959-тӥ арын йылпумъяз Сызраньысь му вӧй поттонъя техникумез. Собере куинь ар вал Советской Армиын. Ужан сюрессэ мытӥз 1963-тӥ арын Самара (азьвыл Куйбышев) улосысь Сызрань городысь мебель поттон огазеяськонын электрослесарь луыса. Вакчи дыр куспын егит специалист луэ валтӥсь инженер-энергетик. Нош со ачиз ялан шӧдылӥз, тодон-валанэз уг тырмы шуыса. Озьы дышетскыны пыре Лениградысь электротехнической институтэ. 1970-тӥ арын сое ужаны ысто Воткинскысь машзаводэ. Валерий Леонидовичез пукто инженер-конструкторе. Ужез герӟаськемын страналы туж кулэ ож тӥрлык - ракета - поттонэн. Усто специалист оскымон но ӟеч техника лэсьтон понна кужымзэ но, дырзэ но, визьзэ но уг жаля. Заводын сое ӝог адӟо. Нырысь ик старшой инженер- конструктор вал, кивалтӥз конструкторъёслэн группаенызы. Собере луэ валтӥсь инженер-конструктор. Та вакытэ страналы туж кулэ вал таӵе ож тӥрлык. Дуннеын угось "кезьыт война" мынӥз, США маин гинэ асьмеды ӧз кышкатъя. Валерий Леонидович предприятиын 24 ар ужаз. 1994-тӥ арын, юн секыт дыре, выльдӥськонлэн но рынокен экономикае выжонлэн самой пӧсь вакытазы, сое Воткинсклы мэре быръё. Бадӟым опытэн производственник быдэсак выль ужаз вые. Со уго тодэ городлэсь лэчыт ужпумъёссэ. Городлэн кузёез лулысь-сюлмысь басьтӥскьиз куашкан калэ вуэм предприятиосты улӟытон, вань удысъёслэсь ужзэс умоятон борды. Мэрлэн сюлмаськемез юнме уг луы. Воткинскын вордӥсько устоесь кичӧлтонъёс, выльдӥсько рынокъёс, ӝутско чебересь магазинъёс, асфальтэн шобырско сюресъёс. Город тодмантэм воштӥське, чеберске. Валерий Леонидович сяме пыӵатӥз арнялы быдэ калыкен пумиськонъёссэ. Мэр адямиосын кенеше улон-вылонзэс умоятон сярысь. Солэн ваньмыз понна сюлмыз висе. Нош сётэм кылзэ быдэстытэк ноку уз кельты, йылаз-пумаз вуттоз. Соин сое воткинск калык гажа. Ведь Валерий Леонидовичез юнме шорысь куинетӥзэ уг быръё ни республикаысьтымы вылӥ законодательной ёзэ - Вылӥ Советэ но кыкетӥзэ - Кун Кенеше. Татын но со мылысь-кыдысь ужа, депутатъёс кун бюджетэз яке музон законопроектэз учко, Валерий Фридрих котьку малпанзэ вера, мылкыдзэ возьматэ. Нош куд-огез, оло, зэмзэ но В. Фридрихез валантэм адямиен лыдъя, городлэн мэрез, пе, одӥг комнатаен квартираын улэ, машинаез ӧвӧл, ужысьтыз ӝытазе 9-10 часын кошке, нош вазь ӵукна кабинетаз тыл ӝуа ни. Берло дыре шаерысьтымы Кун Кенешын но, Праивтельствоын но ӵем гинэ кылыны луэ Воткинсклэн умоесь ужан амалъёсыз сярысь, Фридрихлэсь адӟем карыны куро. Туж умой со. Тӥни таӵе мэрез но сюлмаськись депутатэз Валерий Леонидович Фридрихез туннэ сюлмысьтымы ӟечкыласьком вордӥськем нуналэныз но юбилееныз, сӥзиськом азьланьын уката чырткем луыны, мылкыд кариськом шудбур но, тазалык но, калыклы тросгес ӟеч ужъёс лэсьтыны. Геннадий Романов. 3-ТӤ ДЕКАБРЕ - ДУННЕЫСЬ ИНВАЛИДЪЁСЛЭН НУНАЛЗЫ Липет ке вань, коркан гань-гань Инвалидъёсты сӥлы карон но саклык висъян нунал респубЛИкаямы нырысьсэ сокем паськыт радъямын. Толон "Металлург" культура двореце люкаськылӥзы шаермылэн пӧртэм сэрегъёсысьтыз шуге-леке вуэмъёс. Шуг-секытъёслы сётскытэк, соос улоныН асьэды кызьы ке но возьматыны туртто, тросэз пырисько инвалидъёслэн пӧртэм огазеяськонъёсазы. Нош нырысетӥ юрттӥсьлы соослэн - Калыкез улон-вылонын утёнъя министерство. Россия Федерациын "Инвалидъёсты улон-вылонын утён сярысь" Закон кутэм бере, республикаямы кыӵе ке но воштӥськонъёс луизы-а? Та сярысь вераськиськом Калыкез улон-вылонын утёнъя министрлэн воштӥсеныз Сергей СУВОРОВЕН. - Инвалидъёсын герӟаськем ужпумъёсты сизьымдон аръёс ӵоже пыдло палэнтыса воземен, ужпумъёс сокем трос люкаськизы, огкутскемен гинэ соосты уд быдэсты ни. Выльдӥськон вакыт странаямы 1985-тӥ аръёсы кутскиз ни, нош инвалидъёс сярысь закон 1995-тӥ арын гинэ потӥз ай. Но вань законъёс сямен ик, со тросгес сӥзёнъёслы кельше. Закон вань, нош кызьы сое улонэ пыӵатоно, кин чОтын, кыӵе амалъёсын? Бен, отын ваньмыз гожтэмын, кин коньдон висъяны кулэ соиз яке таиз статьяя - Россия Федерация, Россия Федерациысь субъектъёс яке интыосысь аскивалтон ёзъёс. Но коньдон та ужрадъёслы висъямтэ. Югдур ӧз ке воштӥськы, законын кутэм ужпумъёс азьланяз но уз быдэсъяське, нош кудъёсыз дасо аръёс ортчыса но интыысьтызы уз вырӟе. Но номыр ум лэсьтӥське шуыны уг луы. Быдэс Россия понна вераны уг быгатӥськы, но законын пуктэм куд-ог ужпумъёс асьме республикаын урод уг быдэсъясько. Кылсярысь, йылпумъяське ни ВТЭК интые МСЭ-я (медико-социальной экспертизая) бюро кылдытон уж. Азьло кызьы вал? Ужаны быгатонлыксэ учкыса, адямилы группа сёто но, таин сюлмаськон йылпумъяське. Нош али группае потэм муртлы выльысь лыктытозязлы сёто шуг-секытъёсты палэнтыны юрттонъя нимысьтыз программа - тазалыкез юнматонъя, ужанъя яке дышетсконъя ӵектонъёс, улон- вылонын юрттэтлы кулэяськонъёсыз. Огъя юрттэт сётонъя (реабилитацияя) та программаез дасяло врачъёс-реабилитологъёс. Та ӵектонъёсын-дэмланъёсын адями мынэ ни аслаз ёросаз. Но татын нош ик кылдо шуг-секытъёс. Городын улӥсь инвалидъёслы пӧртэм юрттэт басьтыны капчигес, уже интыяськонэз но, эмъяськонэз но вераса. Нош гурт ёросъёсын юрттэт сётонъя та программаез улонэ пыӵатыны туж секыт. Калыкез улон-вылонын утёнъя ёрос ёзъёсын ӧвӧл та ужпумъёсын вырись специалистъёс гинэ но. - Нош сыӵе ужпум ёрос администрациос азе пуктӥське-а? - Ёрос ёзъёсы инвалидъёсын ужась специалистъёсты кутон ласянь дасямын нимысьтыз документъёс. Уждун соос басьтыны кулэ интыысь бюджет чотын. Но ёросъёсын но городъёсын туннэ кылдэм югдур шоры учконо ке, сыӵе луонлыкъёс шедьтыны та вакытэ секыт. Нырысетӥ интыын али сылэ пенсиосты но пособиосты тырон уж. - Сергей Васильевич, мар вылез кылдӥз на МСЭ бюролэн ужаз? - Инвалидъёсты улон-вылонын утён сярысь законъя, Россиысь вань субъектъёсын пытсэт сьӧрын пукисьёс ортчыны быгато МСЭ пыр, соослы озьы ик сётӥськыны кулэ пенсия. Законлэн та куронэз шаерамы быдэсъяське ни. 1-тӥ декабрьысен МСЭ ас вылаз басьтоз дас тямыс аресозь нылпиосты эскеронэз но, нош азьло та уж оскемын вал тазалыкез утён ёзъёслы. Республикаысьтымы нылпи больнгицаын усьтӥськоз МСЭ-лэн педиатрияя бюроез. Отын ужалозы нылпи врачъёс- экспертъёс. Нылпиосты озьы ик эскерозы нимаз висёнъёсъя ужась бюроосын но Глазов, Можга, Сарапул котырысь ёрос бюроосын. - Кемалась вераськон мынэ ни инвалидъёслы огъя юрттэт сётонъя (реабилитациЯЯ) центръёс кылдытон сярысь. Мар лэсьтӥське шаерамы таиз ужпумъЯ? - Инвалидъёслы огъя юрттэт сётон - законысь эшшо одӥгез бадӟым ёзэт. Нош сыӵе центръёс кылдытон вань кивалтӥсь ёзъёслэн огъя сюлмаськонзы луыны кулэ. Инвалидъёслы огъя юрттэт сётон удысэз кылдытыны кулэ ваньмаз ёросъёсын но городъёсын. Туннэ со вань, но котькудӥз нимаз ужа. Со юрттэтэз кулэ вылэм одӥг липет улэ инъяны. Вераськон мынэ инвалидъёслэсь тазалыксэс юнматон, дышетонэз но уже интыянэз радъян, улон-вылонын юрттэт сётон сярысь. Бен, эмъяськыны луэ больницаын, санаторийын, курортын, шаерамы вань протезно-ортопедической предприятие. Ужлы дышетэ Сарапулысь колледж. Уже интыяськонъя ёзъёс юртто уж шедьтыны. Синтэмъёслэн но кылӥсьтэмъёслэн огазеяськонъёссы пыр тросэз ас удысазы тыршо. Вань нимаз адямиосын кылдытэм "Ирисс" выллем огазеяськонъёс. Улон-вылонын юрттэт сётон милям министерствомы пыр лэсьтӥське. Инвалидъёслэн ужпумъёсынызы вырись кун службалэн кылдонэз азьпалан на. Нош огъя юрттэт сётонъя нырысетӥез центр ӝоген ӧсъёссэ усьтоз. Кылдытэмын со синтэмъёслэн огазеяськонзылэн "Спутник" предприятиез вӧзын. Та ужез быдэстонын бадӟым юрттэт сётӥз Удмурт Республикаысь калыкез уже интыянъя кун службалэн департаментэз. Та центрын огдыре шутэтскыны, тазалыксэ юнматыны, кыӵе ке ужлы дышетскыны огдыре виТьтон мурт быгатоз. - Улон коркаос, администрацилэн юртъёсыз, культура учреждениос, вузкаронтӥос, урамъёс ветлыны быгатӥсьтэмъёслы пырон-потантэм лэсьтэмын. Мар вераны быгатысалды таиз ужпум пумысен? - Инвалидъёс сярысь закон потэм бере, лэсьтӥськисьёс азе нимысьтыз куронъёс пуктэмын. Со пумысен вань Россия Федерацилэн Президентэзлэн указэз, Россиысь но Удмурт Республикаысь Правительствоослэн постановлениоссы. Выль законлэн куронъёсызъя, ветлыны шугъяськисьёслэсь кулэяськонъёссэс чаклатэк пуктӥськыны уг яра. Но та курон уг быдэсъяськы. Лэсьтӥськонъя но архитектурая министерствое вазиськеммы бере, та ужпумъёслы саклык висъязы ик, министерствоенымы кенешытэк, лэсьтӥськон ужъёс уз кутске. Но та уж туж секытэн Мынэ. ДасЬ проектъёсты выльысь эскерыны туж трос коньдон кулэ луоз. Нош вуж юртъёсты но зданиосты кызьы тупатод туала куронъёсъя? Алигес мон Москваын вал, вУылӥ Третьяковской галереяе но. Коляскаен ветлӥсь инвалидъёс понна ваньмыз чакламын, соос нокин юрттытэк галереяетӥ конгыръяськыны быгато. Калык пыран-потан юртъёсын инвалидъёс понна нимаз сёросъёс лэсьтэмын. Светофоръёс, стоянкаос но соос понна ужало, урамъёстӥ но капчиен выжод. Асьмелы Москваозь кыдёкын ай. Но министерствомылэсь юртсэ инвалидъёслы пырон-потымон карон борды басьтӥським, мукетъёсыз но милесьтым мед адӟем карозы. Юртамы лифтэз ӧвӧл бере, вылӥ этажъёсы тубантэм понна, нырысетӥ этажын усьтӥськиз общественной приёмной. Кыӵе ке куронэн яке юанэн вазиськемъёс доры министерствоысь специалистъёс азьсэос пото. - Республикаысьтымы инвалидъёслэн огазеяськонъёссы ужпум ӝуто Удмурт Республикаын инвалидъёс сярысь закон кутон пумысен. - Бен, та ужпум одӥг пол гинэ ӧз эскериськы ни. Кун Кенешысь улон-вылон политикая ялан ужась комиссиын но паськыт вераськон мынӥз. Закон кутыны луоз, но вань-а солэн кулэлыкез? Гожтыны котьмар луоз. Но калыклы номыр сётыны ӧм быгатэ ке, со пӧяськонлы пӧрмоз. Россия Федерациен кутэм закон ужа Удмурт Республика понна но, сое быдэстыны кужыммы мед тырмоз вал. Туж кулэ ужпумъёсты быдэстыны луоз Удмурт Правительстволэн постановлениеныз но Калыкез улон-вылонын утёнъя министрлэн приказэныз. - Кылпум ӧм поттылэ на улон-вылонын юрттэт сярысь. - Тазэ но ужпумез огкутскемен гинэ уд быдэсты. Но мар но со таиз ласянь но лэсьтӥське. Дунтэк мынон-ветлон, телефон понна, улон инты понна ӧжытгес дун тырон - таиз вань. Шуггес югдур эмъюмъёс ласянь. Но пӧртэм та льготаос сярысь верано ке, мон тазьы малпасько: государство адямилэн кулэяськонъёсызлы тырмымон пенсия сётысал ке, льготаослэн кулэлыксы ӧй луысал ни. Л.МАЛЫХ. 6-ТӤ ДЕКАБРЕ - УДМУРТЪЁСЛЭН ТЯМЫСЭТӤ СЪЕЗДЗЫ Малы кулэ "Удмурт кенеш"? Нырысь учкыса, паймымон но кулэтэм юан кадь. Ярам, со ог дас ар коть талэсь азьло чузъяськысал ке. Нош али, огазеяськон кылдэм дырысен сомында ар ортчыса, кинлы валантэм на, малы со кулэ. Сыӵе ик дунъет мынам нырысетӥ юанэлы сётӥз Валентин Кузьмич ТУБЫЛОВ но, огазеяськонлэн президентэз. Озьы ке но, та юанлы валэктон дырын- дырын кулэ ик, вылды. Малы ке шуоно, пыдлон, кыдёкысь (ма, тросаз матысьъёсаз но) гуртъёсын улӥсьёс, огшоры ужасьёс тыро-пыдо уг тодо на, мар со сыӵе "Удмурт кенеш", мар бордын ужа, кыӵе ужпумъёсты быдэсъя. Кыл сётомы аслыз Валентин Кузьмичлы. - Ижевскын улӥсь удмуртъёс нырысь ик кылдытӥзы вал удмурт культурая общество. Но улон со азе трослы бадӟымесьгес но паськытэсьгес куронъёс пуктӥз. Общество азе потӥзы экономикаен но политикаен герӟаськем ужпумъёс. Калыклэн но мылкыдыз со аръёсы бугырскиз. Ӟоскыт луиз культурая обществолэн котыртэтэз. Соин ик кылдытэмын вал вань удмуртъёслэн "Удмурт кенеш" шуыса нимам огазеяськонзы. Кыӵе ужпумъёсты ми быдэсъяськомы? Тужгес но бадӟым саклык висъяськомы удмуртлыкез утёнлы но юнматонлы: мар со удмуртлык, валэктонэз ӧвӧл, дыр. - Ӧйтӧд, ваньмыз ик тодо-а меда... - Удмуртлык, мон шуысал, со, нырысь ик, анай кыл. Собере вашкалаысен ӝутскись сямъёс, йылолъёс, улон шоры учкон, аслыд но ог-огедлы дунъет сётон. Медам ышты асьме калык ас туссэ, та улонын ас интызэ - тӥни сыӵе бадӟым ужпум пуктӥськомы азямы. Жаляса верано луэ, экономика удысын луонлыкъёсмы ӧжытгес. Но со милям тырмымтэмы ӧвӧл, шонергес луоз, вань туала улонлэн шуид ке. Озьы ке но, ми куд-ог осконъёсмес герӟаськомы егит движениенымы. "В защиту экономических интересов Удмуртии" шуыса нимаське со. Нимызъя ик валаны луэ, мар бордын со ужа. Берло аръёсы бадӟым саклык висъяськомы удмурт национальной кадръёсты будэтонлы. Ӵошатэ ай таӵе лыдпусъёсты. Элькунамы улӥсь ӟучъёс пӧлысь 5,5 процентэз вылӥ дышетскемен, бигеръёс пӧлын - 9 процентэз, нош удмуртъёслэн - 3,5 процент гинэ. Секыт асьме егитъёслы угось вузъёсы пырыны. Тужгес но юридической но экономической факультетъёсы. Ми огъя кыл шедьтыны быгатӥмы Удмурт университетысь кивалтӥсьёсын егитъёсты заочной амалэн дышетон сярысь. Кызьы тодмо, али дун тырыса дышетскыны луэ. Ректорат соглаш луиз студентъёсмес ӝыны дунэн дышетыны. Кандидатъёслы куронмы одӥг гинэ - мед тодозы соос удмурт кылэз. Юрист яке экономист луизы ке, мед быгатозы удмурт калык понна ужаны. Али, милям юрттэммыя, УдГУ-ын 500 пала адями дышетске. Ми озьы ик пыриськиськомы Удмуртилэн палэназ вузъёсы абитуриентъёсты быръёнэ. Асьме егитъёсмы но мед быгатозы Москваын, Санкт-Петербургын но мукет бадӟым городъёсын дышетскыны, йӧн-йӧн специальность басьтыны но собере шаермес юнматыны но узырмытыны. Уг ваты, дышетон удысын милям одӥгез бадӟымез ужпуммы - удмурт кивалтӥсьёсты будэтон. - Нош али кивалтӥсь ёзъёсы удмуртъёсты кыскон пумысен кыӵе ке уж нуиськоды-а? Кыӵе луонлыкъёсыз огазеяськонлэн та ласянь? - Луонлыкъёсмы, зэмзэ вераса, туж ик бадӟымесь ӧвӧл: ми угось общественной огазеяськон, государственной ӧвӧл. Соин ик быгатӥськомы курыны, валэктыны, лыдэ басьтыны. Тани милям дэмламмыя Правительствое пыртэмын вал Назаров но Шудегов, Тӧролэн воштӥсьёсыз. Та ласянь ужаськомы депутатъёсын. Кун Кенешын гинэ ум, районъёсын но. Удмуртъёсын удмуртъёс ик мед кивалтозы вылэм яке асьме кылэз тодӥсьёс коть. - Районъёс сярысь кылпум поттӥды бере, ачиз куриське таӵе юан: кыӵе луонлыкъёсыз огазеяськонлэн ёросъёсын? - Луонлыкъёс вань. Мукет ужпум - кызьы соосты уже кутӥськомы. Меӵак верало, лябгес ай. Котькуд районын вань милям ёзмы, соиз умой ини. Но соос мед луозы гуртъёсын но, гурт кенешъёс. Таиз одӥг-ог сяна ӧвӧл ай. Со сяна, ӧвӧл ай матысь, юнэсь кусыпъёсмы гурт калыкен. Гуртын улӥсьёс кытӥяз умой-умой уг но тодо огазеяськонмы сярысь. Та ласянь паськытгес уже кутоно вылэм газетъёсты, радиоез но телевидениез. Соослэн милемлы юрттыны мылкыдзы туж ик уг шӧдӥськы ай. "Удмурт дуннелы" но сыӵе ик пыкылон вераны кулэ. Ярам коть, берло дыре асьме газетмес, "Гердэз", поттыны кутским. Но со матысь ик уг вуы котькуд гуртэ. Районъёсын но гуртъёсын уг тырмо ас калыксэс яратӥсь, анай кылзэс гажась, ӟырдыт но етӥз мылкыдо адямиос. Ваньмылы уг тырмы на политикаын ужан опыт, пумен люкаське но ке. Пӧламы луыло на ог-огдэ валантэм яке солань-талань вырон учыръёс. - "Дэмен" общество сярысь вераны турттӥськоды кадь? - Бен, со сярысь но. Малпасько, матэктӥсь съездын шонер дунъет сётэмын луоз "Дэменлэн" кивалтӥсезлэн ачизъяськемезлы. - Съезд сярысь юанэн ик йылпумъялом ини вераськонмес. Маин сое пумитаськоды, кызьы ужады съездысен съездозь, соиз сярысь рос-прос вералоды, луоз, докладады. Нош тӥ асьтэос мае витиськоды со бадӟым ӧтчамлэсь? - Ӧтчам зэмзэ но бадӟым луыны ӧдъя: 400 адями люкаськоз отчы. Котьку сямен ик лыктозы шаермылэн палэнысьтыз но удмуртъёс. Мае мон витисько? Кыӵе ке зурканъёс, революционной воштӥськонъёс уз луэ шуыса малпасько. Тырмоз ини, огсыр ужаны кулэ, солань-талань сэрпалъяськонэн вырыны дыр ӧвӧл. Котьку сямен ик таяз но съездын быръемын луоз пичи кенеш но президент. Валамон, пусъём но эскером азьланезлы ужан планъёс. Г. ТИХОНОВ. Малы сюлэмшугъяське калык? Атайлэн, Пилэн, Святой Духлэн нимыз понна! Гажано агай-вынъёс, сузэръёс! Али дыре, малпасько, ваньдылэн кылэмды вань ини ИНН - куинь букваё тодмотэм, выль кыл сярысь. Ӟуч сямен вераса, со букваослэн пуштроссы тазьы лыдӟиське: идентификационный налоговый номер. Та номер асьме элькунын улӥсь вань ужась калыклы сётэмын ни. Солэсь кулэлыксэ валэкто выт (налог) бичанэз шонер нуонэн. Тросэз, уката ик туала узыръёс, яке узырмыны мылкыд карисьёс, асьсэлэсь доходзэс вато яке пичиято. Соин сэрен кун (государство) трос ыштонъёс адӟе, трос коньдон, узырлык ыше-быре, кунлы но, калыклы но пайда уг вайы. Та номерез компьютере пырто но, со номеръя котькудзэ йыруж лэсьтӥсь адямиез шедьтыны но солэсь ватэм байлыксэ таланы луэ. Таиз умой кадь, ӧрекчаськыса узырмыны нокин но кулэ ӧвӧл. Но татын кылдо юанъёс но: кин лыдӟиз Библиез, со тодэ: берпум аръёс вуон азьын, дуннеын антихрист кивалтыку, котькуд адямилы номер сётэмын луоз - кымесаз яке бур ки вылаз пус пуктэмын луоз. Тани та сярысь кызьы верамын Библиялэн самой пумысьтыз Иоанн Богослов апостоллы Усьтӥськон (Апокалипсис) книгаын: "!Со (антихрист) ваньмызлы лэсьтоз тае: покчиослы но, бадӟымъёсызлы но, узыръёсызлы но, кураськисьёслы но, эркын улӥсьёслы но, ляльчиослы но бур ки вылазы яке кымысазы пус пукэмын луоз. Соку нокин басьяськыны но, вузаны но уз ни быгаты, - соос сяна, кинъёслэн та пуссы, яке пӧйшурлэн нимыз, яке солэн нимызлэн лыдпусэз пуктэмын луоз. Татын визьлык кулэ. Кинлэн визьмыз вань, со пӧйшурлэсь лыдпуссэ мед лыдъялоз, уго та адями лыдпус. Солэн лыдпусэз куать сю куатьтон куать". (Усьт. 13:16-18). Та пумысен мар вераны луоз? Нырысь ик, туала ИНН-ын "666" лыдпусэз ӧвӧл, со кимыш вылэ но, кымысэ но уг пуктӥськы. Мукет ласянь, кызьы дышето святой атайёс, берпум аръёсы адямиос туж лекомозы, адямиос куспысь яратон быроз, Инмарез данъямысь, вӧсяськемысь дугдозы; Инмарлы интые, шайтанлы йыбыртъяны кутскозы. Соос асьсэос, куриськон гожтыса, шайтанлэсь пуссэ-номерзэ басьтозы, нош кин та пусэз ӧз басьты, - Инмарлы оскись муртъёсты, ӝикатыса возьыны кутскозы, сиён-юон басьтыны но сыӵе муртъёс уз ни быгатэ. Жаляса верано луэ, бадӟымесь городъёсын туала пинал калык пӧлын али ик вань ини 666 номерез сӥлы карисьёс, соос шайтанлы йыбыртъян сямъёс ортчытъяло, адямиосты курбон сёто, киросэз синазькыль каро, иконъёсты-обросъёсты сӧрыло, черк вылэ урдскыло. Вӧсяськись калык пайме но, куалектэ но, таӵе ужъёсты адӟыса. Таӵе кылдэм ужъюгдурез валэктыны быгатымтэенызы сэрен, тросэз вазисько гожтэтъёсын Священной Синодэ яке аслыз Патриархлы. Мукет ласянь, черк пушкын кылдо бугыръяськонъёс но: тросэтӥ вӧлмо киын гожъям гожтэтъёс, соосты, пе, я Афонысь, я Почаевоысь, я Сергиев-Посадысь, я Оптина Пустыньысь монахъёс гожтӥллям но ИНН- эз басьтыны, пе, соос нокызьы но уг лэзё. Куд-ог священникъёс ИНН басьтэм муртъёсты причастие басьтыны уг лэзё. Калык паймемын. Соин ик та югдур эскеремын Священной Синодлэн кенешаз. Патриархлэн нимыныз Епархиосы келям гожтэтын шуэмын: огшоры пусъёслэсь, лыдпусъёслэсь кышканы кулэ ӧвӧл. Адями Христос Инмарлы осконэн улэ ке, солэн бордаз Инмарлэн дэлетэз вань ке, сьӧлыкъёсыз понна ӧбкельыса причастие басьтыса, чылкытатӥськыса улэ ке, тушмонлэн номыр каремез уг луы, огшоры лыдпус но сыӵе муртлы изъян вайыны уг быгаты. Инмарез яратонэд, сюлмысьтыд ноку но медаз гинэ сӥя. Быдӟым Святой Пётр апостол тазьы гожтэ: "Ӟеч лэсьтыны тыршисьёс ке тӥ луиды, кин тӥледлы уродзэ лэсьтоз? Шонерлык понна курадӟоно луиды ке но, тӥ шудоесь. Соослэн кышкатонзылэсь эн курдалэ, кер но эн потэ. Асьтэлэн сюлмады Инмарез, Кузё-Инмарез сӥё-дано возе. Оскиськонды пумысен котькудӥзлы кылдэс юасьлы востэмен, гажась мылкыдын ответ сётыны котьку но дась луэ". (Пётр апостоллэн 1-тӥ ыстэм гожтэтэз, 3 люкет, 13-15 кыбуръёс). Трос гожъёс пӧлысь самой дурысъёсыз но шорысез гожъёс кузесьгес мукетъёсызлэсь. Соос ик, пе, 6...6...6 лыдпусэз возьмато. Та шайтанлэн лыдпусэз. Малы сое вуз вылэ пуктыны кулэ? Малы 555 яке 777 уг пукто, пукто шайтанлэсьсэ 666 номерез. Туж трос гожтэт вуэ Патриархие. Соин ик Священной Синодлэн нимыныз Алексий Патриархмы та лыдпусэз воштыны курыса Россилэн президентэзлы В. В. Путинлы вазиськиз. Мукет ласянь, нокинэ но кужмысь номер басьтыны косоно ӧвӧл, ваньмыз мед лэсьтоз озьы, кызьы косэ солэн осконэз, мылкыд каронэз. Эрикез тӥяса, адямилы курадӟон, куректон-кайгу вайыны туала законъёс уг косо. Кӧня улэ ни христиан дунне, сомында ик оскись калык ялан тодаз возиз куке но адямиослы пӧйшурлэсь-шайтанлэсь лыдпуссэ сётозы шуыса. Со дыр матэктӥз. Черкъёсын, вӧсяськись калык пӧлын огыр-бугыр луыны кутскиз, ӝожтӥськонъёс, викышъянъёс, лулӟылӥськонъёс кылӥськыны кутскизы. Таин сэрен Ижкарамы ортчем одӥг ужъюгдур сярысь вератэк уг луы. Таяз толэзе, 10-тӥ ноябре ог сю пала вӧсяськисьёс Правительстволэн юртэз азе пикетэ, демонстрацие птазы ИНН сётъянэз дугдытыны курыса. Та ужрадэн кивалтӥзы кык монахъёс но Дебессын улӥсь кышномурт, пӧлазы вал на кык священникъёс. Маиз татын паймытэ? Нырысь ик, черкын одӥг уж но черкен кивалтӥсь, мукет сямен вераса, архиерей бакель карытэк, солэн благословнеиезтэк номыр но уг лэсьтӥськы. Нош та адямиос архиерейлы чик но ӧз вазиське, черкысь черке ветлыса, телефонъёс пыр жингыръяса, гожтэтъёс гожъяса калыкез булгандыризы, ӝутӥзы Правительстволэн юртэз доры пикетэ потыны. Архиереез, черкен кивалтӥсез, санэ понытэк улон, Инмарлы ярантэм уж, сьӧлыко уж луэ. Демонстрациосы, пикетъёсы революция поттӥсьёс ветло вал, нош Инмарлы оскисьёс - вӧсясько. Калыклэн улон-вылоназ секыт учыръёс кылдо, шугадӟонъёс вуо ке, святой атайёс, Инмарлы зэмос оскисьёс туж мур вӧсяськыны кутско: вань калык визяны (кӧс утьыны) кутске; 40 нунал визяса, вӧсяськыса улэмез Инмар адӟе, калыклы буйгатскон вае. Инмар шуэ: "курелэ, сётэмын луоз", уг шуы ук Со "пикетэ потэ, вормон басьтоды". "Сак улэ, - шуиз Кузё-Инмармы - уд тодӥське уго, ку бертоз коркалэн кузёез - ӝыт-а яке уйшор уе-а, атасъёс чоръяны кутскыку-а яке ӵукна-а; шӧдытэк шорысь бертыса, изён дыръяды со тӥледыз медаз пумита. Нош мае верасько тӥледлы, верасько ваньмызлы: сак улэлэ" (Марклэсь Ӟеч Ивор 13:37-37). Аминь. Малы ыбылӥсько Иерусалимын? Паймымон ужъёс али ортчо дунне вылысь одӥгаз самой вашкала, сӥё-дано городын - Иерусалимын. Со луэ туала дырысь тужгес кужмо осконъёслэн - иудаизмлэн, христианстволэн, исламлэн - шоркарзы. Иерусалимлэн нимыз "тупаса улонлэн карез" шуыса берыктӥське ("Салим" люкетэз удмурт кылысь "салам" кылэн одӥг выжыысь потэмын, асьме доры со бигеръёс пыр араб кылысь вуэмын). Кин телевизор учке, радио кылзэ, газет лыдӟе, тодэ луоз: али дыре, та виын Иерусалим котырын бугыръяськон мынэ, еврейёс но арабъёс ваче вуыло, ыбылӥськем, пуштылэм куара но кылӥське. Шонерзэ ке верано, пӧртэм сямен, пӧртэм осконэн ке но уло, еврейёс но арабъёс одӥг Авраам атай бордысь потэм матысь ӵыжы-выжы калыкъёс луо, но пырак дауръёс ӵоже куспазы тупатэк уло (анайзы пӧртэмесь: еврейёслэн выжызы потэ сӥё-дано Сара кышномурт бордысь, нош арабъёслэн анайзы Египетысь потэм Агарь нимо ляльчи кышномурт вал, со юмшаса шедьтӥз Измаил пизэ; мусульманъёсты азьвыл "агарянъёс", "измаильтянъёс" шуо вал). Мусульман дунне бугыръяське. Ираклэн кузёйырыз Садам Хуссейн дась 5 миллион солдатъёссэ Иерусалиме келяны но еврейёсты улляны. Мар понна та жугиськон, бугыръяськон? Библиез тодӥсьёс, оскисьёс понна та валантэм ужъюгдур ӧвӧл, соос паймо огезлы - сокем ӝог но матэ вуэ кышкыт судлэн дырыз. Кык сюрс ар тырме ини Инмар Пилэн Иисус Христослэн дунне вылэ лыктэмез, курадӟыса кирос вылын кулэмез, кулэмысь улӟыса султэмез но Инме ӝутскемез. Ваньмыз ортчиз Иерусалимын - дунне вылысь одӥгаз вашкала, нимо-дано городын. Дунне вылэ Ӟеч Ивор (Евангелие) вераны лыктэм Инмар Пиез Иерусалим кабыл ӧз басьты, кулэ ӧз кары. Со понна, солэн шугадӟонъёсыз сярысь Кузё-Инмармы Иисус Христос тазьы шуиз: "Иерусалим, Иерусалим, Пророкъёсты сӧсыръясь, тон доры ыстэмъёсты изъёсын жугылӥсь! Кызьы тылобурдо аслэсьтыз пиоссэ бурд улаз люка, кӧня пол Мон тынэсьтыд нылпиостэ люканы турттӥсько вал, нош тӥ кулэ ӧд каре! Тани тӥляд коркады тӥледлы тырттэм кельтӥське. Тӥледлы верасько: "Кузё-Инмарлэн нимыз понна Лыктӥсь дано! шуытозяды, тӥ монэ уд ни адӟе". (Лукалэсь Ӟеч Ивор, 13-тӥ люкет, 34-35; Матфейлэсь Ӟеч Ивор, 23-тӥ люкет, 37-39). Инмар Пилэн Иисус Христослэн верам кылъёсыз ӝоген быдэсмизы: Рим кунлэн Тит эксэез дыръя, 70-тӥ арын, Иерусалимез быдэсак куашкатӥзы. Ӝоген еврейёс восстание ӝутӥзы но вормыны ӧз быгатэ. Миллион пала еврейёс быдтэмын вал, одӥгтэм, ваньзэсты уллязы, нош городэз, куашкатэм храм бервылэз герыен гыризы: бервылыз но, пе, медаз ни кыльы. Та дырысен еврей калык быдэс дунне вылэ пазьгиськиз, сӥтэм-сантэм калыклы пӧрмиз. Нош Иерусалим бервылэ интыяськизы римлянъёс, соос бере грекъёс, персъёс, египтянъёс, Европаысь вуэм христианъёс, турокъёс, англичанъёс.. Ӧй вал ни солэн йӧназ кузёез. Но тодэ: еврейёс Инмарлэн быръем калыкез. Трос сюрс аръёс талэсь азьвыл ик пророкъёс веразы та ортчем ужъюгдуръёсты. Веразы дунне бырон азьын Инмар аслэсьтыз калыксэ нош ик вордскем музъемаз берыктоз шуыса. Асьмеос адӟиськомы, кызьы война бере кылдӥз кужмо Израиль кун. Инмарлэн ӟечлыкеныз Иерусалиме кык пол вуылыны кылдӥз, мон ас синмыным адӟи, кызьы арабъёс, турокъёс кивалтон аръёсы вашкала Израиль музъем луоё, изо кырлы пӧрмытэм маке али дыре пӧрмемын ини чебер садо, паськыт, вольыт сюресо, азинскем кунлы. Соку ик адӟи арабъёслэсь но еврейёслэсь ваче гадь вуылэмзэс но. Мар бордысь потэ та ваче вуылонъёс? Одӥгез, тужгес но бадӟым мугез герӟаськемын таин: Соломонлэсь храмзэ, кызьы верамы ни, Рим кунлэн ожгарчиосыз куашкатӥзы, но сюй пушкы солэн инъетэз, сюй улысь висъетъёсыз кылизы. 637 арын Иерусалимез мусульманъёс киултэм бере, Соломон храмлэн вылӥяз мечеть пуктӥзы. Одӥгез нимаське аль-Акса, мукетыз Омарлэн мечетез шуыса. Еврейёс тыршо со мечетез сэрттыны но Соломонлэсь храмзэ, вуж инъет вылаз ик ӝутыны. Нош мусульманъёс понна аль-Акса мечеть, Мекка, Медина бере, куинетӥез святынязы луэ. Соин ик соос котькызьы но, кӧня быгато, пумитъясько еврейёслэн малпанзылы. Святой атайёс вань та ужъюгдуръёс сярысь азьвыл ик тодытыса веразы: мечетез басьтозы, храмез ӝутозы но отчы... антихрист пуксёз. Еврейёс чидатэк сю, сюрс аръёс возьмало ни Мессиялэсь (кызьы соос шуо, Машиахлэсь) лыктэмзэ. Иисус Христос - зэмос Мессия (мессия - вӧйын зырӟыса эксэе пуктэм - Помазанник - шуэм луэ) лыктӥз Израиле, но та кунысь узыръёс, священникъёс, тросэз огшоры калык но сое кулэ ӧз каре, малы ке шуоно, Со куанеръёсты висисьёсты, ӟудыса-ёрмыса улӥсьёсты котыраз люказ но Вылысь Инмар дорысь ваем Ӟеч Иворез тодытӥз, нош узыръёслы кулэ вал сыӵе Эксэй-мессия-машиах, кудӥз быдэс дуннеез мед киултысал но еврей калыкез ваньмызлэсь вылӥе мед пуктысал, мукет калыкъёсты соослы ляльчи, медо (гой) мед карысал. Асьтэос тодӥськоды: али дуннеен коньдон кивалтэ, нош дунне вылысь тросэз коньдон-ваньбур еврей банкиръёс киулын ини. Ваньмыз вань ини: ваньбур но, еврей кун но кылдэмын ини, нош машиахсы ялан уг возьматскы. Кыкетӥ ползэ Израиле вуылыкум, мыным пыраны кылдӥз Соломон храмез ӝутонъя институтэ (сыӵе институт но вань). отысь трос тунсыкозэ тодыны быгатӥ. Храмез ӝутыны ваньмыз дась ини: изъёс но, храмлэсь вылзэ, пушсэ чербеманы тоннаосын зарни, азвесь тӥрлыкъёс дасямын, священникъёслэн дӥськутсы но курбон сётыны горд скалъёс но - ваньмыз дась ини. Но ялан машиах уг на вуы. Но со лыктоз, одно ик лыктоз. Адӟиськоды ук али макем дунне выл сьӧлыкъёс пӧлы вые, кылылымтэ, адӟылымтэ, оскыны луонтэм сьӧлыко ужъёс лэсьтӥсько. Самой сыӵе куашкан вакытэ ик дунне вылэ еврейёслэн возьмано муртсы лыктоз, но со антихрист луоз. Со кескич амалэн, котьмар тодӥсь, валась эксэй кариськыса кивалтыны кутскоз. Но зэмос оскисьёсты - христиан калыкез туж ӝикатоз. Со дыръя уксё быроз, со интые адямиослэн кымесазы яке бур ки вылазы компьютерен 666 номер пуктозы. Со номеръя гинэ басьяськыны-октӥськыны луоз на. Кин ӧз басьты шайтанлэсь та номерзэ, туж курадӟытыса виылозы. Та номерез басьтӥсьёс быдэсак шайтан ки улэ сюрозы но кышкыт суд нуналэ пырак дауръёс ӵожелы антихристэн валче тыл пушкы куштэмын луозы. Тӥни малэсь кышка христиан калык. Тӥни малы кылдо бугыръяськонъёс, викышъянъёс, лулӟиськонъёс - Инмарлы зэмос оскисьёс кулэтэм каро ИНН-эз, отын али 666 лыдпусэз ӧвӧл ке но, антихрист но ӧз на вуы. Но мынэ антихристэз пумитаны туж кужмо дасяськон. Дуннеен лушкем кивалтӥсьёс асьсэ радэ пырто трос дышетскем муртъёсты, кивалтӥсьёсты, кинъёслэн сюлмазы Инмарез яратон, Инмарлэсь кышканзы ӧвӧл. Дуннеен кивалтыны кутскиз ини "выль даур" - "новая эра" - "нью-эйдж" шуон система. Соослы кулэ ӧвӧл Христос Инмарлы оскисьёс, опкчи калыкъёсты, соослэсь кылзэс, культуразэс утён но соослэн планазы пыртэмын ӧвӧл. Ваньмыз мед луоз одӥг кадь: кыл но, культура но: оскон но, мед луоз одӥг кун но быдэс дуннеен-кунэн одӥг кивалтӥсь. Та понна дунне вылын мынэ кужмо нюръяськон, дасяськон. Сак луэ! Вакчи визьем, укылтэмъёс кадь вае ум улэ. Осконмес юнматоме, кылмес, культурамес но быдтыны ум сётэ. Инмаре, эн кушты милемыз, улыны, ужаны кужым сёт, утиськон сюрес вылэ султыты. Аминь. *** Декабрь толэзе сӥё-дано нуналъёс Быдэс толэзь ӵоже, 7-тӥ январёзь - визьдыр (кӧс утён) 4, понедельник: Дун-Чылкыт Нылмуртэз, Инмар Анаез храме пыртон. Арысь 12 быдӟым праздникъёс пӧлысь одӥгез. Вань черкъёсын мынэ служба. 17, понедельник: курадӟытыса вием Варвараез но Иулианияез буре ваён, сӥлы карон нунал. 19, вторник: Ликияысь Миры городысь святителез, Николай чудотворецез сӥлы карон нунал. 30, суббота: Даниил пророкез но куинь егит пиосты Ананияез, Азариез, Мисаилэз сӥлы карон нунал. Язычникъёслэн сульдэръёссылы йыбырттымтэзы понна соосты Вавилонын ӝуась гуре куштӥзы, но тыл соос борды ӧз йӧты. Инмысь дурбасьтӥсьсылэсь нуналзэ таӵе муртъёс сӥлы каро: Роман, Платон, Иларион, Адриан, Григорий, Анатолий, Иосиф, Иоанн, Александр, Михаил, Максим, Петр, Иаков, Стефан, Василий, Андрей, Савва, Николай, Даниил, Арсений, Севастьян, Симион, Флор, Екатерина, Варвара, Иулиания, Августа, Анастасия, Анна, Зоя, Марина. Очей Толилы - пӧсь салам! Маскарчи ке ӧй луысал, Адмирал со луысал. Адмирал ке ӧй луысал, Кардинал со луысал. Кардинал ке ӧй луысал, Ушаковик луысал. КУН КЕНЕШЛЭН СЕССИЯЗ Улон воштӥське, законъёс выльдӥсько Таяз арня вискын кык нунал ӵоже ужаз Кун Кенешлэн азьвыл чакламтэ дас куинетӥ сессиез. Отын эскерон вылысь пусъемын вал 15 ужпум, нош депутатъёс дэмламъя, соос 34-ёзь вуизы. Валтӥсез, кызьы гожъям ини, луиз Кун Кенешлы но Правительстволы кивалтӥсьёсты быръён. Сессилэсь ужзэ нуиз ни выль Тӧромы - Игорь Николаевич Семёнов. Депутатъёс сое ӟеч мылкыдын пумитазы, данакез тодо Игорь Николаевичлэсь хозяйственник но политик луэмзэ, ужамын нылпиосты дышетон удысын но. Кыӵе ужпумъёс учкемын сессилэн кыкетӥ нуналаз? Сое усьтӥз, шуыны луоз, Ижевскысь депутат Михаил Ильич Кучерявенко. Люкаськемъёс азьын шара лыдӟиз Первомай районысь дышетӥсьёслэсь вазиськонзэс. Соосты шугъяськытэ школаын кылдэм югдур: пичи уждунэн валче, тросэз дышетӥсьёс кошкизы но кошко ни мукет удысъёсы. Урокъёсты нуыны нокинлы. Кин дышетоз пиналъёсты азьланяз? Кун Кенеше вазиськыса, дышетӥсьёс оско, закон кылдытӥсьёс югдурез валалозы но сое радъян амалъёс шедьтозы шуыса. Отӥяз парламент лумбыт выриз азьвыл кутэм законъёсты выльдон-тупатъян бордын, мукет сямен вераса, соосты умой-умой кутскыса сузяз-вуштӥз, ревизия ортчытӥз. Малы со кулэ вал? Федеральной законъёсын ӵош вамышъян вылысь. Асьме дорын кутэмъёсыз куд- огез республикамы понна туж умоесь кадь, но пумит луо российскоезлы. Ӵапак та муген кужымзэ ыштэмен лыдъямын кылем арын октябре кутэм сьӧд но буёло куштӥськем кортэз бичанэз радъянъя Кун Кенешлэн кутэм постановлениез. Озьы ик трос воштонъёс пыртэмын налог тыронэз, ужбергатонэз, дунъёсты радъянэн герӟаськем законъёсты. Куд-огез бордын депутатъёс ужалозы на матысь нуналъёсы. Пусъемлэсь далайгес эскеризы депутатлэн статусэныз герӟаськем ужпумез. Вераськон мынэ Удмурт Республикалэн Законаз 6-тӥ, 30-тӥ, 32-тӥ, 49-тӥ но 50-тӥ статьяосаз воштонъёс пыртон сярысь. Соослэн пуштроссы федеральной законэн пуктэм куронъёслы уг тупало. Та ласянь ас мылкыдзэс веразы депутатъёс В. А. Соловьёв, М. К. Кокорин, Е. Г. Одиянков но мукетъёсыз. Закон депутатэз мед утёз, депутат но Законэз медаз ортчы - сыӵе решение кутэмын ӵош кенешыса. Неприкосновенность шуон нимаз адями вылэ гинэ медаз шуды, бырйисьёс понна мед ужалоз. Депутат Соловьёв ӟырдыт вераськиз сиён-юонлы дугдылытэк будӥсь дунъёс пумысен. Ӵошатон понна, со чӧлскиз матысь республикаос вылэ: малы отын ваньмыз дунтэм - нянь, йӧл, сӥль но мукетыз? Малы асьмеос та ласянь калыкез утьыны ум быгатӥське? Виталий Александрович ӵектӥз матысь дыре рабочей комиссия кылдытыны. Мед со эскероз-чаклалоз шаерысьтымы югдурез, тодматскоз палэнысь дунъёсын. Али ик тодмо, пусйиз Соловьев, Удмуртия соос пӧлын сокем чебер уз адӟиськы. Кык пол но кутскыса дпутатъёс кенешизы сюрес понна дун тырон сярысь законлэсь инъетсэ. Ас дэмланъёссэс веразы депутатъёс Бычков, Батанов, Лошкарёв, Кушко, Роговец. Ваньмыз соос санэ басьтэмын. 13-тӥ сессия ужзэ азинтоз на 19-тӥ декабре. Отын учкыны кылемын куинь ужпум: Удмурт Республикаысь Правительстволэн Тӧроезлы воштӥсьёсты но коньдон ужпумъёсъя министрез дэмлан; президент быръемен валче, Кун Кенешлэн но Правительстволэн структураосазы воштонъёс пыртон. Пумаз-йылаз вуттэмын луозы куд-ог мукет ужпумъёс но. 19-тӥ декабре ик нуназе котырын ужзэ мытоз Кун Кенешлэн дас ньылетӥ сессиез. АРХИВЫСЬ ДОКУМЕНТЪЁСЪЯ Удмуртия ХХ дауре 1960-тӥ ар Партсобраниосын та вакытэ эскериськиз КПСС-лэн ЦК-езлэн гожтэтэз. Отын вераськон мынӥз США-ысь империалистъёслэн асьме шаерлы пумит нуиськись тушмон мылкыдо политиказэс шараян но солы пумит султыны коммунистъёсты, комсомолецъёсты но вань ужаса улӥсьёсты ӧтён ласянь. Н. С. Хрущев США-лэсь вылласянь гинэ тупаса улон понна нюръяськемзэ но пушласянь туж йӧнтэм луэмзэ, Париже ветлыкуз, мур шараяз. Гожтэтын озьы ик шараямын вал пӧртэм сектантъёслэн совето калыклэн улонэзлы изъян ваемзы. 1960-тӥ арын паськыт пусъемын Удмуртилы 40 ар но Ижысь андан ӵыжатон заводлы 200 ар тырмон. Та вакытэ Удмурт АССР-ысь энергетика, странаын сярысь, кык поллы бере кыле вал. Со ик юн люкетӥз промышленностез, гурт хозяйствоез, азинтыны. Соин Удмурт совнаркоз но УАССР-ысь Министръёслэн Кенешсы республикае электрокужым сётон ласянь нимысьтыз схема дасязы. Соя электрокужым лыктыны кулэ вал Урал энергосистемаысь (Воткинск ГЭС- ысь). Шедьтэмын Сарапул но Грах ёросъёсын му вӧен узыр интыос. КПСС-лэн ЦК-езлэн косэмезъя, пӧртэм кивалтон удысъёсы кыскыны ӵектэмын нылкышноосты. 1960-тӥ арын калык хозяйстволэн пӧртэм удысъёсаз тыршо вал ини 54 проект нылкышноос, колхозъёсын - 64 процентэз. Кивалтон удысын ӝыныез пала нылкышноос вал ини. Интыысь советъёсы депутатэ быръемын 4300 нылкышно, СССР-ысь, РСФСР-ысь но Удмурт АССР-ысь Вылӥ Кенешъёсы - 66 нылкышно, КПСС-лэн членъёсыз вал ни 10 сюрс 500 нылкышно. Удмуртиысь уноез предпрятиос но колхозъёс мукет странаосын эшъяськыны кутскизы. Кылсярысь, Сарапулысь радиозавод - Китайысь радиозаводэн, завьялово ёросысь "Родина" колхозысь, Воткинск ёросысь "Новая жизнь" колхозысь, Дэбес ёросысь Ленин нимо колхозысь но Камбарка ёросысь "Путь Ильича" колхозысь колхозникъёс ваче гожтэт гожъяны кутскизы Кореяысь гурт хозяйствоя кооперативъёсын. Удмурт радио пыр нуналлы быдэ чузъяськылӥзы "Социализм лэсьтӥсь вынлыко шаеръёсын" радиоверанъёс. Толсуре Ижевскын вуттэмын нырысетӥез бадӟым панельёслэсь пуктэм корка. Со луиз выль сямен но ӝог лэсьтӥськонлэн кутсконэз. Сыӵе квартираосты бӧрысь "хрущёвка" шуыса нимазы. Та амал шаерамы улон интылы шугъяськонэз данаклы капчиятӥз. Удмурт правительство решение кутӥз 1960-тӥ�1961-тӥ аръёсы 4840 интыен пионерлагерьёс лэсьтыны. Удмурт АССР-ысь Калык писатель но Калык поэт дано нимъёс юнматэмын. Удмуртилы 40 ар тырмонэн валче, сыӵе дано нимъёс басьтӥзы удмурт писательёс Т. А. Архипов но М. А. Лямин. Удмурт АССР Москваын ортчытӥз удмурт литературалы но искусстволы сӥзем декада. Оштолэзе Москваын ортчиз "Советской Россия" возьматон, отчы аслэсьтыз "Егит удмурт анай" ужзэ нуиз шаерысьтымы суредась А. П. Холмогоров. Инвожо толэзе РСФСР-ысь Художникъёслэн огазеяськонзы Удмуртиысь ёззэ кылдытӥз. Гудырикошкон толэзе Ижевскысь художественной вузъёс поттонъя фабрикалэн удмурт пужыосын куэм ковёрзылы Москваысь возьматонын нырысетӥ степенё диплом сётэмын. Композиторлэн Г. А. Корепановлэн пуктэмын нырысетӥез удмурт "Наталь" операез. Нош устоосыз художественной самодеятельностья коллективъёс Москваысь ВДНХ-ын концертъёссэс возьматӥзы. Е. ВЯТКИНА. Удмурт Республикаысь ЦДНИ-ысь валтӥсь специалист. Ижевскын ӝутско выль юртъёс. Пумиськон Аракум чумолё сьӧрын но эктӥсько вал Анайлэн нуналызлы сӥзем шулдыр ӝыт алигес ортчиз Завьялово ёросысь Юськи черкогуртын. Сое радъянэ мылысь-кыдысь пыриськизы шор ёзо школаысь дышетӥсьёс но дышетскисьёс, соослы озьы ик юрттӥзы клубын ужасьёс. Нылкышно вылын возиське улонмы. Сыӵе мылкыдын пыӵамын вал ужрад. Пиналъёс куное ӧтиллям гуртысьтызы тужгес данооссэ кышномуртъёсты. Тани одӥгез соос пӧлысь 87 аресъем Варвала Евдокимовна Байсарова тубе сцена вылэ. Мар шуод, улон сюресэзлэн ныпъетэз капчи ӧй вал, дыр, но песянай шумприч адӟиське, кылыз но лэчыт, выросъёсыз но шаплы, эсьма, егитъёслы вожъяськымон эктыны но быгатэ ай, пумен вераны но вуэ: - Пинал дыръям аракум чумолё сьӧрын но эктӥсько вал. Ӵапак таӵе мылкыдыз юрттэ, луоз, песянайлы улонлэн кузь сюресэз кузя вамышъяны, шудлы шумпотыны, куректонэз вормыны. Ужрадэ ӧтем мукетыз куно - Лидия Николаевна Балашова. Будэтӥз дас нылпи со: укмыс ныл но одӥг пи. Табере пиналъёсызлэсь пиналъёссэ, зарни комокъёссэ, мусоя ни со. Талэсь бадӟымгес шуд вань на меда кышномурт понна дунне вылын. Зэмос шуд ук со - будэтэм нылпиосыдлэн ӟеч ужъёссылы шумпотон. Нылкышноослы коньысир буёло шуныт кышетъёс кузьмаса, Юськи школалэн директорез Лидия Алексеевна Орехова шуиз: - Таӵе синмаськымон адямиосын узыр Юськи гуртмы. Соослы юн тазалык но бадӟым шуд сӥзем потэ. Ӝытэ люкаськем калыклы шулдыресь кырӟан-эктонъёс дасяллям пиналъёс. Пусйыны кулэ, Юськи школа но клуб ӵош, ог-огзылы юрттыса ужало. Клублэн кивалтӥсез Э. В. Михеева шуэ: - Кружокъёсамы данак пиналъёс пырисько. Арлыдоослэн ужпумъёссы трос, лэся. Куд-огез кӧня ке ветлэ ик но дугдэ. Кышномуртъёслэн юртъер котыразы ужзы данак, дыр, ма, куд-огезлэн картъёссы но вожало. Та ӝытэ юськиос доры куное ветлӥзы землякъёссы тодосчи Л. С. Христолюбова, журналист Ю. М. Александрова, озьы ик кылбурчи Галина Романова. М. Караваева. "Аслэсьтыд калыктэ гажатэк, мукетъёссэ уд дышы валаны," Озьы лыдъя Россия Федерацилэн Кун Думаысьтыз "Калыкъёслэн эшъяськон - Россилэн огъя луонэз" депутат группалэн квалтӥсез: Нациослэн ужъёссыя комитетлэн тӧроезлэн воштӥсез Светлана Смирнова. Светлана Константиновна, кыӵе ужпум пуктӥды тӥ ас азяды, Кун Думаын выль группа кылдытыкуды? - Нырысь ик пусйыны кулэ, депутатъёслэн та огазеяськонзы кылдытэмын Нациослэн ужъёссыя но Россиысь калыкъёслэн ассамблеязылэн кичӧлтэмзыя. Ассамблеялэн ӧтёнэз ик пӧрмиз группамылэн нимызлы. Валтӥсез ужпум герӟаськемын Кун Думаысь депутатъёслэсь асьме государствоын калык кусыпъёсты умоятонъя мылкыдъёссэс огазеянэн но асьме кунлыкез юнматонэн. Пусйыны кулэ: группаямы пыризы сизьым фракциысь но депутат огазеяськонысь эшъёс. Ӧвӧл ЛДПР но "Яблоко" гинэ. Со сяна, кенешон куара сётыса, бордамы басьтӥм ассамблеялэсь кивалтӥсьсэ Рамазан Абдулатиповез, со депутат уг луы ке но. Нырысетӥ огъя вамышъёсынымы лыдъяськом Россилэн Президентэзлэн Владимир Путинлы вазиськонмес. Солэсь ваньзэ сямен кичӧлтонъёссэ умоен лыдъяса, ми курим син азьын возьыны странаямы улӥсь калыкъёслэн кусыпъёсынызы герӟаськем ужпумъёсты. Уго сотэк мукет но малпанъёс уз быдэсме. Ми оскеммес верам, калыкъёслэсь улонзэс радъян властьлэн одӥгез бадӟымез сюлмаськонэз луоз шуыса. - Озьыен, "Калыкъёслэн эшъяськонзы - Россилэн огкылысь луонэз" группа юрттоз Комитеттылы законъёс бордын ужаны? - Бен, озьы. Ваньмыз ӵектосъёс нырысь учкемын луозы группаын. Соку котькудӥз эшмы, аслаз фракцияз берытскыса, умойгес быгатоз валэктыны вуоно законлэсь кулэлыксэ. Но группамы мукет ужъёсын но выроз ук. Кылсярысь, ми малпаськомы, Россиысь Кун национальной политикая концепциез быдэсъяса, данак ужрадъёс ортчытыны, калыкъёс куспын валамтэос кылдэмен валче ӟырдам интыосын югдурез тупатонэ пыриськыны, улосъёсысь кивалтонлэн вань ёзъёсысьтыз депутатъёслы быръем удысмыя юрттыны. Мон ачим но Удмурт Республикаысь властьлэн пӧртэм органъёсаз ужакум, туж шдӥсько вал Центрен кусыпъёслэсь лябзэс. Соин ик малпасько, та ласянь югдурез воштыны кулэ шуыса. Со понна радъяно конференциос, "котырес ӝӧкъёс" но мукет ужрадъёс. Умой луоз, соосты интыосы потыса ортчытылӥзы ке. - Центр но улосъёс. Та ужпум котьку ик лэчыт вал. Тани Президентмы Федеральной округъёс кылдытыны малпаз, Федерацияя кенешез выльдыны кутскиз. Луоз-а тодыны группадылэсь но тӥлесьтыд асьтэлэсь та пумысен мылкыддэс? - Позицимес ми вазиськонамы возьматӥм. Мон асме котьку ик "государственник" шуыса лыдъялляй. Соин ик Владимир Путинлэн кивалтонэз юнматонъя ӵектонъёслы дурбасьтӥсько. Но та ласянь ужез йылаз-пумаз вуттон понна, трос лэсьтоно на. Кылсярысь, кылдытоно Конституцияя комиссия. Со вань ужпумъёсты котыр ласянь эскерыны быгатысал. - Куд-ог улосъёслэн кивалтӥсьёссы ӝожтӥсьско, Центрез юнматон субъектъёслэсь правооссэс сюбегатон чотын мынэ шуыса. Та ласянь тужгес но вӧсь луыса верасько национальной республикаослэн валтӥсьёссы. Зэм ик, уз-а пӧрмы Россия нациослэсь пӧртэмлыксэс лыдэ басьтӥсьтэм государстволы? - Мон озьы меӵак ӧй шуысал? Уго республикаослэсь шугъяськонъёссэс ачимъя но тодӥсько? Владимир Путинэн ӵектэм законопроектъёсты эскерыку ӧй шӧды элькунысьтымы кивалтӥсьёслэсь зӥбемзэс? Ваче пумит сылон нокинлы но кулэ ӧвӧл. Асьмелы ӵош вамышъяно, пӧлысьтымы тросэз, мон верасько депутатъёс сярысь, Президент быръён вакытэ Путин палан вал. Малы табере ми солы пумит кариськыны кулэ. Басьтом тани интыосысь законъёсты ик. Берло дырозь данакез соос уг тупало вал Россилэн катрадлыкезлы, Конституциезлы. Ма, ог-огенызы но умой-умой ӧз герӟаськылэ. Та удысын рад тупатыны одно ик кулэ? - Удмурт Республика азьло пыре вал Урал огазяеяськонэ. Табере сое Приволжск округе выжтӥзы. - Республикамес Поволжье округе пыртон мон понна но кӧня ке валантэм вал. Но выльысь воштон сярысь вераськонэз ӧй кылылы. Мон сямен, котькуд учырысь ӟечсэ шедьтыны тыршоно. Волга котырысь округ данак республикаосты огазеяз. Озьыен, татын луонлык вань национальной политикаез нуыны. Тани Сергей Кириенколы воштӥсе юнматэмын Кун Думаысь Нациослэн ужъёссыя комитетлэн азьло кивалтӥсез Владимир Зорин. Юнме шорысь озьы ӧз лэсьтэ ук. Калык кусыпъёсты радъянын солэн опытэз бадӟым. Приволжск округе, уно республикаос сяна, пыро на, шуом, Оренбург но Саратов областьёс. Отын но трос пӧртэм калыкъёс уло. Пусйыны кулэ: кыказ но та улосын уно ӟеч вамышъёс лэсьтэмын. Саратов областьлэн губернаторез Дмитрий Аяцков калык кусыпъёсты юнматонэн ачиз выре, соин ик тупамтэос но уг кылдыло. Ватсаса верало на. Удмуртиын но национальной политикаез нуонъя ичи лэсьтэмын ӧвӧл. Ми доры концепциез дасян мынӥз быдэс страналы сыӵе документэз йыла-пумаз вуттонэн огдыре. Республикамы аспӧртэмлыко луэ, сое уд ӵошаты, кылсярысь, бускель Татарстанэн, Башкортостанэн яке Якутиен. Таоссэ элькунъёсты куддыр куарето Федерациын тупатэм огъя возетъёсты (принципъёсты) тӥямзы-чакламтэзы, кивалтон ёзъёсысь ӟучъёсты палэнтыны тыршемзы понна. Милям сыӵеез ноку ӧй вал. Солэн но ортчыт: властьын удмуртъёслэн лыдзы кулэсме. Мон уг шуиськы: кивалтӥсе адямиез солэн национальностез шоры учкыса гинэ пуктоно. Котькӧня бигеръёсты яке, удмуртъёсты бырйы, соос ужпумез уг валало ке, ужлы пайдаез уз луы. - Удмуртилы нырысетӥ президент быръёнын вормиз ӟуч - Александр Волков. Озьыен, кивалтӥсьлэн кыӵе выжыысь потэмез номыр вылын уг шӧдӥськы? Национальностез чакланы кулэ. Калыклэн кызьы улэмез потэ со бордысь но, кӧня солэн адямиосыз пырисько кивалтон удысэ. Юнме шат КПСС сак быдэсъяз таӵе куронэз: Обкомлэн нырысетӥ секретарез ӟуч ке, кыкетӥез удмурт мед луоз но озьы азьлань. Асьмеос пӧртэм выжыысь потэмъёсты власте быръёнъя амал шедьтыны тупатыны кулэ. Мукет странаосын люкам опытэз но со понна тупатоно. Но мон лыдъясько, нокызьы уг яра быръён вакытэ яке мукет дыре национальной ужпумъёсты шудонлы пӧрмытыны. Со туж кышкыт маке. Озьы ик туж чакласьконо ӵошатонъёсын. Та ласянь сьӧлыкало ивор вӧлмытӥсь ёзъёс. Уг яра, шуом, ӵошатыны Россиез Америкаен. Бигеръёс, поръёс, чувашъёс но мукетъёсыз кытысь ке палэнысь ӧз вуэ. Соос кылдэмын татын, соин ик Россилэн Федерацилы кун кылдытӥсь калыкъёсыз луо, озьы ик уг яра юан пуктыны, кудӥз калык ӟечгес луэ. Национальной политикаын лыд но котьку ик валтӥсь луыны кулэ ӧвӧл. - Удмуртиын трос ӟучъёс уло. Соин валче уз сылмы-а удмурт нация? - Сыӵе кышкытлыкез адӟытэк кельтыны уг яра. Юнме шорысь шат кылдӥзы калык движениос? Соос герӟаськемын выжыосты утьыны тыршонэн. Россилэн кулэяськонъёсыз сярысь малпаськыса маке со лэсьтыкумы, асьмеос вунэтыны кулэ ӧвӧл странаямы улӥсь калыкъёслэн интересъёссы сярысь. Странамылэн трос нациё луэмез - солэн узылыкез, бадӟым кужымез. Куддыр кылыны луэ, национальной ужпумъёс бырозы, пе, Россиын губерниос кылдытыса. Мынам малпамея, сыӵе амал шонер ӧвӧл. Шуом, республикаосты быдтом, но калыкъёс, соослэн сюлмаськонъёссы уз быре ук. Соин ик утчано мукет сюрес. - Депутат луэмдылэсь азьло тӥ пыриськылӥды-а кыӵе ке калык движенилэн ужаз? - Бен. Мон вал Дуннеысь финн-угор егитъёслэн ассоциацизылэн (МАФУН) кивалтӥсез, "Шунды" огазеяськонлэн тӧроез. Али быръемын финн-угор калыкъёслэн консультативной советазы, луисько "Удмурт кенешлэн" Пичи кенешаз быръем мурт. - Тӥ йылпумъямын гурт хозяйствоя институтэз. Но пинал дыръяды быръем улон сюрестэс воштоно луиды? - Мон будӥ гуртын, огшоры крестьян семьяын. Соин ик гурт улонлэсь кыӵезэ ас вылам пичиысен шӧдӥ. Семьяямы воргорон ӧй вал, куинь кышномурт гинэ - песянае, анае но солэн апаез. Озьы но вить арескын лыдӟиськыны-гожъяськыны дыши. Скал кыскыны, пудо возьманы но кылдылӥз. Бӧрысь одӥг "ньыльтэк" йылпумъяй школаез. Институтэз но - озьы ик. Наукаосъя кандидат луи. Академиез отличиен быдтӥ. Соин ик, малпасько, адями гуртын будэмын но сельхозинститутэз йыдлпумъямын ке, сое маке ласянь умойтэмен лыдъяны мугез ӧвӧл кадь. Та улонын быгатыны кулэ ма но со ас киосыныз но лэсьтыны. Гурт хозяйствоез тодэме мыным юрттэ депутат ужын но. Уго данакез бырйисьёсы гуртын уло. Думаысь агропромышленной группаен но кусыпъёсы умоесь. Мон тау карисько институтысь дышетӥсьёсылы. Соос монэ дышетӥзы музъемез, улонэз яратыны. Луысал ке со вакытэз берыктыны, мон ортчем сюрестӥм ик вамыштысал. -Ма сӥземды потэ "Лига наций" газетэз лыдӟисьёслы? - Аслэьстыд калыктэ гажаны дышетсконо, соку гинэ быгатод мукет выжыысь потэмъёсты валаны. Ог-огдэ чиданы ӧвӧл, та кыл мыным уг кельшы, ог-огдэ яратыны быгатоно. Со понна калыкъёслэсь культуразэс, сямъёссэс тодоно. Котьма ке но, асьмелы ваньмылы уртче улоно ук. Озьы кылдэмын ни. Кенешиз Игорь Дмитриев. (Интервью печатлманы Москваын потӥсь "Лига наций" газетын туэ 10-тӥ ноябре. Сётӥськом кӧня ке вакчиятыса). Кӧня сылэ "эшъёсыд" понна юон? Ӵошатэ ай таӵе лыдпусъёсты. Ижысь техникумъёсын дышетскись егитъёс пӧлысь 15 процентэз ас вылазы эскеризы ни наркотикъёсты, 92 процентэз тодо вина юонлэсь но тамак кысконлэсь шӧмзэс. Пусйыны кулэ, егитъёс пӧлысь тросэз верало, асьсэды тазьы воземзылэн мугъёсыз "номыр ужамлэсь", "эшъёслэсь висъяськонтэм вылысь" луо шуыса. Та егитъёс пӧлысь ик 50 процентэзлэн матысь кусыпъёссы вылэм ни, 48 процентэз гинэ оскыто одӥг адямиен улэмзы сярысь но 50 процентэз паласькись висёнъёслэсь нокызьы уг утисько. Со понна асьсэлэн ӟеч тазалыксылы оско егитъёс пӧлысь 8 процентэз гинэ. Таӵе лыдпусъёс алигес сётӥзы Ижысь медициная колледжын ужасьёс, егитъёс пӧлын юалляськонъёс ортчытэмзы бере. Юалляськонлы пыр-поч йылпумъянъёс лэсьтэмын Ижысь Октябрь ёросысь "Семья" центрен, СПИД-эн нюръяськонъя центрен но МВД-ен радъям "Актуальные проблемы: наркомания и СПИД. Пропаганда здорового образа жизни" конференция дыръя. Ужрадэ данак егитъёс но кыскемын вал. Э. ВАСИЛЬЕВА. В. Сунцов, Удмурт Элькунысь сӥё-дано тренер: - Тодӥськоды-а Тӥ Вань удмуртъёслэн ортчоно ӧтчамзы сярысь? - Тодӥсько. Но туж жаль, тросэз тодытэк кылё. Общественной уже пыриськисьтэм муртъёс дорозь сыӵе ивор уг вуы. Туж умой, асьмелэн "Удмурт кенешмы" вань шуыса. Но со огазеясал ке вань удмуртъёсты... Тани милемлы, спортсменъёслы, туж ӝож - малы ми пӧлысь одӥг делегат но ӧвӧл быръемын? Нош спортын сомында дано удмуртъёс! Малы ӧтчам сярысь уг тодо Герман Скурыгин, Анатолий Корепанов? Пыриське меда "Кенешлэн" ужаз Галина Кулакова? Огазеяськон бадӟымгес саклык висъя культуралы. Но спорт - со сыӵе ик культура, спортысь адямиос данъяло Удмуртиез быдэс Дунне тыр! Гур шукке... нылпи вешась Куинь-ньыль аресъем покчиос шып пыро вашкала удмурт корка. Кыӵе ке пичи, пеймыт, бездыт ӧвӧл таиз. Куэм чибориё ковёръёс синэз кыско, Рома тӥни маялля ни, мынам песянаелэн но, пе, таӵе вань. Нош Вика пыдчиньыяськыса кыстӥське зыбкаысь мунё нуны доры, пумен Галина Аркадьевна шоры учкылэ: лэйкатыны яра-а, пе. Соиз йырыныз мыкыртэ но веттан гур кырӟаны кутске. Собере пиналъёс гур азе карисько. Соку ик синйылто табаысь пыжиськемъёсты. Таиз - перепеч, таиз сяртчынянь. Эх, жаль, соос сиыны ярантэмесь. Самовар но тӥни ӝӧк вылын мӧзме. - Ярам, пиналъёс, куке но асьмеос татын праздник ортчытом ай, нош али олле азбаре, - ӧте сьӧраз дышетӥсьсы. Кыӵе азбаре ӧте та дэрем полэс пиналъёсты? Паймыса мынӥ мон сьӧразы. Но азбарзы (гидкуазьзы) кыдёкын вылымтэ. Висъет сьӧрын гинэ. Мон нырысьсэ таӵезэ адӟемысьтым, мар вазьыны ик пайми. Нош пиналъёс тӥни пыдес вылазы кариськыса кин ке колодчаысь ву ӝутэ, кин ке курегъёсты сиськыны ӧтьыса чип-чип! каре, кин ке тусе кунянлы юон кисьтэ - одӥгзы но тэк уг сыло. Кыӵе тунсыко соослы татын, нош асьмеос пиналъёсмес кыӵе ке китай шудонъёсын буйгатыны выриськом. Но азбарын кема сылыны дыр ӧвӧл, нылпиосты дышетскон висъетын кемалась возьма ни Машизы. Маши - со удмурт кылын вераськись мунё. "Ӟечбур, Кирилл! Ӟечбур Виталик! - ваньмыныз нимзыя ӟечъяське со. Пиналъёс но бере уг кылё, огымысь Машиен ӟечъясько: - Ӟечбур! Собере Маша аслаз выль дэременыз, айшетэныз ушъяське. Озьы шудон сямен ӟуч яке ӟучомем пиналъёс удмурт кылын вераськыны дышетско. Малы со соослы кулэ? Юалэ ай асьсэлэсь. Ньыль аресъем покчиос тани шуо: - Малы ке шуоно, асьмелэн странамы Удмуртия нимаське. Соос понна Удмуртия али зэмзэ но бадӟым страна. Зэм, соос отысь Ижевскез но песянайзылэсь гуртсэ сяна, мукет номыре но уг тодо ай. Но покчиослэн тодон-валанзы нуналмысь будоз асьсэлэсь Удмуртия страназэс гажанэн ӵош. Соос уго али ик быгато ни мултэс ӟучъяськись анай-атайёссэс "дышетыны". Тани одӥгез атай чутрак пумит вал пизэ садикын удмурт кыллы дышетэмлы. Дышетӥсь но, нылпи садэн кивалтӥсь но, валамон, кужмысь ӧз каре, пияшез занятиосы ӧз басьялэ. Кӧня ке дыр ортчыса атай ачиз куриз, дышетэмез, пе, потэ, бӧрдэ. - Таӵе учыръёс кутскыкумы вал, - вера Ижевскысь 112 номеро нылпи садлэн кивалтӥсез КапитолинаПавловна Цыбина. - Визьмо муртлы валэктонэз ӧвӧл, дыр, трос тодэм нянь уг куры шуыса. Пиналъёслэн огъя тодон-валанзы (кругозорзы) паськыта, йырвизьзы лэчытоме - капчиенгес тодазы поно мукет материалэз но... Тазьы ик верало мукет удмурт нылпи садъёсын ужасьёс но, кылэз эскерись тодосчиос- лингвистъёс но. Кылсярысь, кемалась ӧвӧл 275-тӥ садын логопед шуг вераськись пиналъёсты нимаз группае люканы малпаз. Тӥ уд оске, но та садысь со кӧня ке пиналэз сяна ӧз шедьты. Логопед паймиз нылпиослэн чылкыт вераськемзылы. Кызьы-озьы, пе. Кивалтӥсьсы Ольга Александровна Пантелеева солы туж огшоры валэктӥз: - Ми удмурт кылэз дышетӥськом. Угось учёнойёслэн эскеремъёссыя, шуг удмурт фонетика (аффрикатаос) зэмзэ но туж юрттэ вераськон аппаратэз волятыны. Озьы пинал капчиен дыше мукет кылъёслы но. Соинтэк-а та кык верам нылпи садъёсын покчиос англи кылын но шалтыр потто, школае мыныса, мукетъёслэсь ӟечгес дышетско. Нялтас вераса, арлы быдэ кӧняез ке пиналъёс одно ик удмурт классъёсы гожтӥсько. 112 номеро садысь нылпиос быръё Куӟебай Герд нимо гимназиез, 275 номеро садысь - 31-тӥ школаез. Соос пӧлын, конечно, тросгес выжызыя удмурт пиналъёс, но вань чылк-чылк ӟучъёс но. Луозы-а та покчиос куке но йӧно удмуртъёс, уз вунэтэ-а, нылпи садысь потыса, удмурт кылзэс? Соиз ини асьмеос, анай-атайёс, бордысь потоз. Нош али воспитательёс но дышетӥсьёс вормонтэмзэ лэсьто: из борддоръёсты куашкато, мумыкор тыро, гур шукко... Номырзэ ӧд валалэ, озьы-а? Яке мон ӵошатон амалъёс утчасько кожады. Чик но уг. 112-тӥ садын ужасьёс зэмзэ но гужембыт та ужен выризы - озьы соос удмурт музей лэсьтӥзы. Тупамон инты ӧй вал бере, малпазы кык-куинь пичи комнатаез "кесяны". Одӥгезлэсь борддорзэ куашкатыса, ведраосын, носилкаосын арня поттылыны выризы изэз-сюез. Комната шедиз, табере музей кароно. Кызьы, мар бордысен кутсконо? Ох, тӥязы ке тӥязы ни йырзэс кивалтӥсь но, дышетӥсь но, воспитательёс но. Дизайнер кулэ вылэм, но коньдон ӧвӧл. Кескич амал шедьтыса, быгатӥзы ик солэсь ӟеч малпанзэ поттыны. Кутскизы гур пуктыны. Асьсэос кирпич вылэ кирпич кӧня ке тыризы но могазы - кызьы гур азьзэ лэсьтыны уг тодо ни. Юрттӥз Галина Аркадьевналэн кузпалыз. Собере кутскизы музейзэс чеберъяны: кин шыкыс ваиз, кин зыбка, кин куэм ковёр... Котырзы бадӟым музейлы мында люкаськиз. Ваньзэ сое туж валаса радъязы татчы. Уд оске, но талэсь чеберзэгес музеез мон нокытысь но ӧй адӟылы на. Ӵошатскыны быгатоз республикаысьтымы шаертодонъя валтӥсь музей гинэ. Кылъёсме зэматон понна верало: туэ нылпи садъёс пӧлын музей комнатаослы ялэм конкурсын 112 номеро сад нырысетӥ инты басьтӥз. 15 сюрс манетэн дунъяз соосты город. Кыкетӥ инты сётӥзы 275-тӥ садлы. Таяз но туж тыршиллям: нылпиос ымзэс усьтыса учко вашкала арбериосты. Сюлэм шумпотэ, таӵе воспитательёс вань на шуыса. Нылпиез ӝукен сюдыса, соос уг буйгатско, вань тодэм-валамзэс, быгатэмзэс сётыса Дунне пинал будэтыны тыршо. З.РЯБИНИНА. Туспуктэмъёсыз М.Менладшинлэн. Политика Арня ӵоже дуннеын, странаын, шаерын Вуоно арын 20-тӥ январе США-лэн выль президентэзлэн инаугурациез ортчыны кулэ. Ӵапак соку ик та странаысь кивалтӥсь ёзъёс быдэсак воштӥськозы. Быръёнъёс умой ортчысалзы ке, та вакытэ туала президент куд-ог быдэсъян удысъёссэ выль кивалтӥсьлы сётысал ни. Но со тодмо ӧвӧл на. Таӵе валантэм югдурысь потон понна, Тӧдьы юрт ужрадъёс чаклаз: Бушез пумен-пумен кун ужъёсын тодмато ни. Альберт Гор тае кулэен уг лыдъя, со туала вице-президент бере, ваньзэ рос-прос тодэ-вала. Пусйыны кулэ, президент быръёнъёсъя ужпумез ни США-лэн Вылӥ Судэз. Отчы вазиськизы кыкезлэн ик кандидатъёслэн адвокатъёссы. Республиканецъёс оско, соослэн азьветлӥсьсы вормиз шуыса. Ачиз Джордж Буш но талы оске. Со но вице- президентэ кандидат Дик Чейни Техас штатын выль администрация кылдытон бордын ужало ни. Уг сётскы Альберт Гор но. Кемалась ик ӧвӧл со дораз ӧтчаз коньдон ужпумъёсъя министрез Соммерсэз но выль администрациын нош ик та удысэз ик сӥзиз. Данакезлы американецъёслы таӵе югдур акыльтӥз ни. Юалляськонъёс возьмато: США- ын улӥсьёс 67 процентэз возьмаса жадизы ни, ку югдур валамон луоз, нош 60 процентэз лыдъяло, Альберт Гор быръёнъёсын келяз шуыса. Кылем арня вискын Минске люкаськылӥзы СНГ-е пырись кунъёслэн кивалтӥсьёссы. Ӵапак татын кык президентъёс Владимир Путин но Александр Лукашенко нош ик кенешизы Россилэсь но Белоруссилэсь Союззэс кылдытон сярысь. Борис Ельцин кивалтон вакытэ та уж паськыт мынэ ке вал, Владимир Путин дыръя могӟетъёс кылдӥзы. Зэмзэ но кык бускель кунъёс туж пӧртэмесь, нырысь ик экономика ласянь. Россиын рынок юнма но азинске, нош Белоруссиын ваньзэ радъя но эскере кун. Соин ик куд-ог аналитикъёслэн малпамзыя, странаосмылы огазеяськыны капчи уз луы, со понна уно аръёс кулэ луозы на. Минскын кутэм документъёс сярысь верано ке, пусйыны луоз терроризмлы пумит центр кылдытон сярысь тупанкылэз. Солэн кулэлыкез туж бадӟым. Тае котькин вала. Нош шуг-секытъёс кылдоз ик, кылсярысь, Россия но Грузия куспын. 5-тӥ декабрьысен кык кунъёс куспын юнматэмын визаосъя режим. Россия пыкылэ, Грузиын ватскыса уло но кужым люкало чечен боевикъёс шуыса. Бускель кунлэн кивалтӥсьёсыз, югдурез тупатон вылысь, нокыӵе ужрадъёс уг куто. Средае Кун Дума эскериз Россилэн экс-президентэзлы Б. Н. Ельцинлы гарантиос сётон сярысь законопроектэз. Нырысетӥ лыдӟем бере, кӧня ке воштонъёсын закон кутэмын. Мар шуод, президент понна ӧжыт уг лэсьтӥськы: солы сётӥськоз госохрана, госстраховка, эмъяськон, президентлэн уждунэзлэн 75 процентэз мында пенсия, дача, юрттӥсьёслэн аппаратсы но мукет. Азьвыл президентлы но солэн семьяезлы арлы быдэ висъяськоз 45 миллион манет (1,6 миллион доллар). Ӵошатон понна, США та понна кык пол ӧжыт коньдон - араз 700 сюрс доллар - быдтэ. Ортччем арня вискын Кун Кенешлэн дас куинетӥ азьвыл чакламтэ сессиез ортчиз. Отын республикамылы кык вылӥ кивалтӥсь юнматэмын. Кун Кенешлы Тӧрое быръемын Можга городлэн мэрез Игорь Семенов. Правительстволы Тӧрое юнматэмын Юрий Питкевич. Депутатъёс озьы ик трос ужазы республикамылэсь законодательствозэ федерацилэн законъёсызъя тупатон бордын. Мар шуод, Владимир Путинлэн кивалтонэз улсын вылӥозь радъян мылкыдыз улонэ пыӵа ни. Та ласянь шӧдӥське федеральной инспекторлэн Сергей Чикуровлэн но ужез. Иське, федеральной округъёс ньӧмыз понна гинэ кылдытэмын ӧвӧл. Таяз арня вискын Ижевскын ортче вань удмуртъёслэн тямысэтӥ ӧтчамзы. Отчы 400- лэсь уно делегатъёс люкаськозы. Ужрадлэн одӥгез валтӥсь ужпумез - "Удмурт кенеш" огазеяськонлы тӧро быръён. КУЛЬТУРАЯ УЧИЛИЩЕЛЫ - 55 АР Ярато альма-матерзэс Школаын, клубын, библиотекаын ужасьёс гурт улонэз югдытӥсьёс луо. Соин ик ю-нянь будэтӥсьёс, пудо вордӥсьёс соос шоры гажаса учко. Шаерамы дышетӥсьёсты Быдӟым Октябрь революция бере ик дасяны кутскизы ке, культура удысын ужасьёсты - быдӟым тылож бере гинэ. 1945-тӥ арын Ижын усьтэмын вал библиотекаын ужасьёсты дасясь техникум. Бӧрысь отын дышетыны кутскизы клубын пӧртэм ужасьёсты. Али со нимаське шаерысьтымы культурая училище. Туэ татын ужа кык ёз: библиотекаын но культура удысын ужасьёсты дасянъя. Туэ училищеын ужасьёс, сое йылпумъямъёс но отын али дышетскисьёс пусйизы та дышетскон юртлы витьтон вить ар тырмонэз. Та дыр куспын татын умоесь тодон-валанъёс басьтӥзы но шаермылэн, озьы ик солэн палэназ тыршо уно усточиос. Дышетскыкузы ик егитъёс концертъёс возьматъяло гуртын но, городын но. Татын угось ужало "Зангари" (кивалтӥсез Борис Сухенький), "Инвугур" (кивалтӥсез Надежда Полякова), "Зарни крезь" (кивалтӥсез Анатолий Иванов) ансамбльёс. Татчы дышетскыны тросгес басьто гуртын будэм егитъёсты. Соин ик, дышетсконзэс йылпумъяса, уноез берто гуртазы. Озьы ке но, городэ кылисьёсыз но вань. Соос асьсэды синмаськымон возьмато удмуртъёслэн данъяськоно "Италмас", "Шулдыр ӝыт" ансамбльёсазы, фольклор кырӟанъя "Айкай" театрын. Кин уг тоды Владимир Лебедевез, Людмила Ахтариеваез, сузэръёсты Евгения но Алевтина Медведеваосты, Анна Плотниковаез, Геннадий Ганьковез, Александра Шулятьеваез, Геннадий Кузнецовез?.. Училищеын дышетскисьёс, гуртазы бертыса, асьсэос но кылдытъяло синмаськымон коллективъёс. Соосты тодо ини кунмылэн пӧртэм сэрегъёсаз. Мынам "Инвожо" но "Ожо-вожо" ансамбльёсам но соос асьсэды чебер возьматъязы. Нош сӥзьыл но толалтэ, 1991-тӥ�1992-тӥ аръёсы, огъяулонъюртазы нимысьтыз коллектив но люкалляй. быръёнъёс азьын Ува, Селта районъёсын кырӟамы-эктӥмы но. Сизьым нылъёс-пиос сюлмысь, капчи мылкыдын люкаськылӥзы. Зэм но улонэз туж зол яратӥсьёс, чеберез валась усточиос, калыкез гажасьёс ужало, дышетско культурая училищеын. Алигес ортчем юбилейлы сӥзем ӝытэ калык фойе тыр, зал тыр люкаськылӥз. Озьыен, ярато соос альма-матерзэс. Пумиськонъёссы уно пол луозы на ай. Училищелэн директорез Валентина Михайловна Дерюшева вераськем бере, вал бадӟым шулдыр концерт. Со бере но калык кема шулдыръяськиз на. Н.ВОЗИСОВ. Ныпъетмес ӝутомы-а? Ӧтчам азьын милям корреспондентъёсмы кӧня ке муртлы вазиськизы таӵе юанъёсын: тодӥськоды-а тӥ Вань удмуртъёслэн ортчоно ӧтчамзы сярысь, мар верасалды туала удмурт огазеяськон сярысь? Лариса, заводын ужась: - Ӧй ик кылылы на нокыӵе кенеш сярысь. Нокытын уш шӧдӥськы удмурт кунмылэн тодметэз. Ижын ӧвӧл анай кылынымы гожъямъёс, ульчаосысен но туж шер кылод удмурт сямен вераськемез. Нош бигеръёс тӥни кыӵе сэзесь! Котькытын - бигер кылын гожъямъёс, бигер сямен вераськисьёс. Алевтина, дышетскись: Мон но ӧй кылылы на нокыӵе ӧтчам сярысь. Капчи ӧвӧл туала вакытмы. Удмуртъёс пумен ӟучомо. Мон но тани анай кылме уг тодӥськы ини. Малы? Анае-атае ӧз дышетэ. Пичи дыръямы монэн но апаеным ӟуч кылын вераськизы. Эшъёсылэн но семьяязы югдур таӵе ик вал. Ижын удмуртлык чик уг шӧдӥськы: кытын удмурт кылын гожъямъёс?!. Тӥни сыӵе малпанъёс. Озьыен, буйгатскыны чик уг яра! Азьпалан - ӝутыны вормонтэм ныпъет! УДМУРТЪЁСЛЭН ӦТЧАМЗЫ АЗЬЫН Кузёоос-а асьмеос? Ас музъеммы вылын асьмеос кин луиськом? Кузёос-а яке огдырлы улӥсьёс-а? Сыӵе малпанэ вуоно, кык берло быръёнъёсты учкыса. Соос туж зол возьматӥзы удмурт адямилэсь интызэ, сое кивалтон удысъёсысь пылэнтыны выронэз. Асьтэос учке, асьме выжыысь кӧня-о потэмъёс шедемын республикалэн парламентаз, прокуратурае, судъёсы, районъёслэн но городъёслэн администрациосазы. Туннэ янгыше уськытыны нокинэ кадь: кинэ бырйим, соин озьы ик улӥськом. Пӧлысьтымы ӝыныез куаразэ но сётыны уг ветлы ни. Табере бӧрдӥськом, ӝожтӥськыса, тэльмырыса пукиськом. Кемыз, озьы ик кулэ, шуо сыӵе дыръя. Мон чакламъя, "удмуртский народ" шуон пӧрмиз ни "население Удмуртии" валанлы. Зэмен но, асьмеос трос ӧвӧл бере, асьме кужымен ум быгатӥське бадӟым ужпумъёсты быдэсъяны. Малы арысь аре начармиськом? Инмарен сётэм ваньбурмес, кылтэм-ымтэм пудолэсь музэн, ныр улысьтымы кыскаса нуо. Асьмеос ваньзэ чидаськом: ултӥянэз но, коньдонтэк воземез но. Ялан витиськом, лэся, зарни пыры пазьгемзэс, нянь юдэс куштэмзэс. Туж жаль, даурлэн пумаз но асьмеос, удмуртъёс, ӧм сазьтӥське, бускель калык сямен, одӥг кужыме ӧм биниське. Тазьы улыса, данмес гинэ ум, пыд улысьтымы музъеммес но келялом. Выль кузёос пичиен-пичиен дорамы каръясько ни. Д. ИЛЬИНЫХ, отставкаысь майор. ДЫШЕТОН УДЫСЫСЬ УДМУРТ ГИМНАЗИЯ ИНВИСЪЁССЭ УСЬТЭ Сӥзьыл каникулъёслэн берпуметӥ нуналаз вуылыны кылдӥз Ижысь К.Герд нимо гимназие. Тодэме потӥз соэн азинсконъёсыз сярысь. Берло дыре та удмурт школа сярысь уно гинэ шуныт кылъёс кылоно ни. Нош мынам син шорам ялан султылэ таӵе суред: вуоно школалэн- нылпи садлэн азбараз мӧзмыт тусын сыло кӧня ке удмурт нылпиос, соослэн анайёссы но дышетӥсьёс. Выль дышетскон ар кутскытозь кӧня ке нунал гинэ кылемын на, нош удмурт школа пушкын кыштыр гинэ тупатъян ужъёс мыно на. "Ма, неужто татын кыӵе ке школа луоз?" - таӵе осконтэм малпанэн кадь сылӥзы соку усьтымтэ школалэн азбараз люкаськемъёс. Со вал 1995-тӥ арын. Табере та школа сярысь данъяськыса шуо: "Шиловалэн школаез". Кылем арын удмурт школалы национальной гимназия статус сётӥзы. Школалэн ужамез но со азьын сылӥсь ужпумъёс сярысь кема гинэ вераським татысь дышетӥсьёсын но солэн директореныз Ольга Константиновна ШИЛОВАЕН. - Ольга Константиновна, тӥляд коллективды аспӧртэмлыко гимназиын ужа. Кыӵе куронъёс тӥ пуктӥськоды удмурт нылпиосын ужась дышетӥсьёс азе? Нылпиосты будэтонын кыӵе дунъетъёсты валтӥсь интые пуктӥськоды? - Туала вакытэ адямилэн пуш тӥрлыкез сокем ик узыр ӧвӧл кадь потэ мыным. Нош адямилэн культураез чебергес, мургес, паськытгес ке, со улонэз но котьку умойгес адӟе. Уг тыршы утчаны адямилэсь канжаськемзэ, тырше солы юрттыны, кизэ сётыны. Сыӵе ик куронъёс пуктӥсько ужасьёсы азе но. Соин ик ӧтисько соосты пиналъёслэсь янгышъёссэс ӧжытгес адӟыны. Медаз соос нылпиос шоры кесяське, обиде, ултӥялэ. Угось вӧсь карыса будэтэм нылпи бӧрысь пунэмзэ берыктэ. Соин ик одӥг дышетӥсь но ас авторитетэныз пиналэз зӥбыса уг возьы. - Школаосын йылпумъяськиз нырысетӥ четверть. "Неуд" отметка кинлы ке пуктӥды-а? - Со ласянь мон туж "урод" адями. Сыӵе отметка сярысь вунэтыны курисько, "неуд" пуктыны уг лэзиськы. Котькыӵе адями янгыш лэсьтыны быгатэ. Мынам атае тазьы шуылӥз: "Ньыль пыдын ветлӥсь вал но канжаськылэ, нош адями кык пыдын гинэ ветлэ". Юрттоно солы канжаськемысь потыны. шунытэсь кылъёс шедьтоно, ултӥяны уг яра. - Нылпиослэсь быгатонлыкъёссэс усьтыны, ӟеч сямъёс пыӵатыны гимназиын ортчылӥсь ужрадъёс но, дыр, юртто? - Со бордын быдэс коллективмы выре. Татын ужаса, нылпиосмылэсь будэмзэс куд-ог дыръя, оло, ум но шӧдӥське. Но палэнысен со умойгес, лэся, адӟиське. Адямиос пиналъёсмы шоры паймыса учко. Тани алигес Якшур-Бодьяе вуылӥм, отын гимназилы 10 ар тырмонэз пусйизы. Ми но соосты ӟечкыланы ветлӥм. Макем паймытӥз соку удмурт кылын чебер вераськись Элямы! Та школамес усьтэммы бере, нылпиосмес 7-тӥ классозь вуттӥмы ини. Ваньзэсты куинь кылэз, удмуртэз, ӟучез, англи кылэз тодыны дышетӥськом. Нош 7-тӥ классмы кыкетӥ арзэ ини финн кылэз дышетэ. Ми доры вуылӥз англиысь Манчестер университетысь профессор Д. Робертс - со но пиналъёсмылы туж вожъяськыса кошкиз. Кытысь, пе, тӥ сыӵе чебересь пиналъёс шедьтӥды. Юри-а, пе, татчы сыӵеосты люкады. 6-тӥ�7-тӥ классъёсын дышетскись нылпиосмы соин англи кылын вераськыны йӧндыризы. - Асьмеос ӵем ӝожтӥськиськом, удмурт кивалтӥсьёс уг тырмо шуыса. Нош адями кивалтӥсь луыса уг вордӥськы. Сое пичиысен дасяно. Татын, удмурт гимназиын, со понна, оло, паськытгес луонлыкъёс вань? Шуом, гимназиын ик пиналъёслэсь кыӵе ке ас коже кивалтон ёзъёссэ кивалтыны? - Зэмзэ но, та ужпум сярысь ялан малпаськиськом. Чакласьком Выль ар бере пиналъёсмы пӧлын таӵе шудон ортчытыны: кинэ ке одӥг нуналлы директоре пуктыны, кинэ ке - математикая яке удмурт кылъя дышетӥсе. Удмурт нылпиез дӥсьтонлы дышетоно - сое туж умой валаськом. Пиналъёсмы пичиесь дыръя вань ужъёсты дышетӥсьёс но воспитательёс радъяллязы. Нош табере нылпиосмы бадӟымесьгес луизы, улон шоры сазь учкыны тыршо. Гимназия пушкын луыны кулэ пиналъёслэн кыӵе ке но организацизы. Солы ним утчаськом ай. Гимназилы Куӟебай Гердлэсь нимзэ сётӥзы ни бере, вань ужъёсмес солэн нимыныз ик герӟано вал. Туэ гужем тани Гердлэн вордскем палъёсаз экспедицие потамы. - Ольга Константиновна, удмурт классъёс, школаос усьтон шоры куд-ог анай-тайёс али но осконтэмгес учко. Удмурт кыллэсь кулэлыксэ уг кадь валало. Нош тӥ адӟиськоды-а нылпиостылэсь азьпал сюрессэс? - Гимназиын али 182 нылпи дышетске. Соослы мон аслэсьтым йырме но, сюлэмме но кузьманы уг быгатӥськы, но одӥгзэ вераны быгатӥсько: соослэсь азьпал сюрессэс адӟисько. Адӟисько пӧртэм институтъёсы пыремзэс. Азьланяз кусыпъёс возем потэ Удмурт кун университетэн, Ижысь механикая кун университетэн, Ижысь медициная кун академиен. Нылпиосмы мед дышетскысалзы Россиысь мукет вузъёсын но. Бадӟым вузъёсысь адӟисько ни кадь Н. Ушаковаез, М. Сувороваез, Р. Байбековаез, А. Широбоковез, М. Жуйковаез, Л. Игошинаез, А. Филимоноваез, Э. Перчиковаез но мукетъёссэ. Гимназимылэсь тодон-валан сётон пуштроссэ, оло, паськытгес кароно. Али со удмурт кылъя но чеберлыкез валанъя (эстэтикая) гинэ шуыса лыдъяське. Но шӧдӥськом ини, пиналъёсмылэн пӧртэм наукаосын но мургес тодматскемзы потэ шуыса. Соин ик гимназие ужаны кыскеммы потэ математикаен, биологиен но мукет предметъёсын усто дышетӥсьёсты. Алигес ми доры ужаны лыктӥз математикаен дышетӥсь Валентина Зотовна. Туж яратэ аслэсьтыз предметсэ, вань дышетскисьёсты математикъёсын кадь адӟе ни. Котькуд дышетӥсь озьы ке тыршысал, соку вань предметъёс пиналъёслы лякытэсь, чебересь потысалзы. Али дышетонэ зол пыӵало компьютеръёс. Но жаляса верано, школаямы со одӥг гинэ. Анай-атайёс сярысь ке верано, соос пӧртэмесь. Куд-огез, дасьсэ гинэ возьмаса улэ, (потребительской шуон мылкыдынгес улэ). Соос ик удмуртлыклэсь кулэлыксэ но уггес адӟо, вылды. Нош ӟечезлы оскисьёсыз дышетӥсьёсын ӵош сюлмасько школамылэн данэз понна, быгатэмзыя ӟеч мылкыдынызы но, коньдонэн но юртто. Татын пусйысал ужбергатӥсез Николай Лазаревич Соловьёвез. - Тӥлед, гимназилэн директорезлы, выль ныпъетэз вормон понна, трос гинэ бызьылоно, мар ке но куроно, вылды, луэ. Та гимназилэн улэмез-ужамез понна кинлы тӥ туннэ тау шуысалды? - Нырысь ик тау карысал калыкез дышетонъя азьвыл министрлы Алла Васильевна Ерёменколы - та школалы сюрес со усьтӥз. Министерство али но куронъёсмылэсь уг палэнскы. Вылез министр Любовь Григорьевна Захарова сётэм кылъёссэ быдэсъя. Коллектив азьын вераз, гимназимылы выль юрт шедьтыны юрттоз шуыса, солы юн оскиськом. Гимназимы интыяськемын нылпи садлэн юртаз, табере отын милем туж ёркыт ини. Нимысьтыз шунытэсь кылъёс вераме потэ министрлэн нырысетӥ воштӥсезлы Галина Николаевна Васильевалы. Арысь аре умояло кусыпъёсмы Дышетӥсьёслэсь тодон-валанзэс будэтонъя институтэн. Ваньзы соос мыным ужаны мылкыд сёто. Та уже мон ачим лыктӥ. Ижын удмурт школа усьтон сярысь мынам вал малпанэ. Басьтӥськи бере, ужано ини. Нош небыт пукон мыным кулэ ӧвӧл. - Тӥ шудо адями - адӟиськоды азьпала мынон сюрестэс, туннэ нуналэн гинэ уд улӥське. Но тодэм потэ на вал: кыӵеен тӥ адӟиськоды школадэс вуоно даурын? - Мед луоз со одӥг бадӟым юртын. Школа пушкын мед луысал бассейнэз, саунаез. Пиналъёс урокъёс бере жадемзэс буйгатыны мед быгатысалзы садын, мед кылысалзы тылобурдоослэсь кырӟамзэс, ошмесъёслэсь жильыртэмзэс. Эшшо малпаськисько на школа вӧзы интернат усьтон сярысь. Татын дышетскыны мылкыд каро гуртын улӥсь нылпиос но. Сыӵеосты кутыны ум быгатӥське. Тани огез нылпимы Завьялово школае выжиз, семьязы отчы улыны кариськиз, нош пиналлэн татын ик дышетскемез потэ, со нош ик берлань куриськылӥз. Мар карод сыӵе учыръёсы, интернат ӧвӧл ке. *** Кема кыстӥськиз на вераськонмы. Директорлэн пичи гинэ кабинетаз ас мылкыд каремзыя люкаськизы дышетӥсьёс. Сайкыт тусъёссыя но ӝуась синъёссыя валай: ӝожтӥськыны ӧз пыре - шуныт кылъёс вераны. Кылсярысь, дышетӥсьёслэн Валентина Григорьевна Широбоковалэн но Ирина Александровна Черепановалэн сомында веранзы люкаськемын Вавож ёросысь Гурезь-Пудга гуртэ гужем экспедицие потамзы сярысь. Макем матын но валамон луиз 17 нылпи понна Куӟебай Гердлэн улон сюресэз - кӧня адямиосын вераськемын- пумиськемын одӥг арня ӵоже. Со сярысь табере верало нылпиослэн гожъямъёссы но. Нош кин бурдъяз соосты та уже? Директорзы - Ольга Константиновна. Коллективлэн ужаз луыло ке бӧрдон-куректон мылкыдъёс, уг ке пӧрмо кыӵе ке ужрадъёс, урокъёс яке семьяын кыӵе ке валамтэос кылдо - вань юанъёсын нырысь ик Ольга Константиновна доры лыкто. Директор доры сямен уг - эш но анай доры сямен. Нош ачиз директор ужасьёсыз сярысь тазьы шуиз: - Мон соослы анай сямен йыбырттӥсько. Ас пиналъёссэс но соос ӟечезлы оскыса дышетыны татчы сётӥзы. Шуныт кылъёсты дыраз верано. Ас поннам малпай: котькуд кивалтӥсь быгатысал ке озьы ужасьёссэ дунъяны, макем ӟечгес тыршысал адями. Выль уж ноку капчиен уг сётскы, удмурт гимназилэн но шуг-секытъёсыз тырмо гинэ. Но кыӵе шудоесь татын нылпиос! Угось котькудӥз татын аслэсьтыз яратоно дышетӥсьсэ пумитаз. Татьяна БАННИКОВА. Мыным туж кельшиз арлыдо адямиосын вераськыны. Соос Гурезь-Пудгаын кемалась уло ни. Зэм, К. Гердэз адӟылэмзы ӧвӧл. Но соос тодо на пересьёслэсь со сярысь мадемъёссэс. Н. Сафарова, 6-тӥ классын дышетскись. Ми, гимназиын дышетскисьёс, К. Гердлэн гуртэныз тодаматским. Татын улӥсьёс милемлы туж кельшизы. Соин ик одӥг ӝытэ соосты пумиськонэ ӧтимы, концерт возьматӥмы. Татысь школалэн директорез Анатолий Максимович К. Герд сярысь милемлы тупен-тупен мадиз, нош колхозлэн председателез чечы кузьмаз. Концертэ мукетъёсыз лыктэмъёс но сьӧразы пӧртэм сиёнъёс ваиллям. Пумиськонмы туж удалтӥз. К.Ермаков, 6-тӥ классын дышетскись. 2001-тӥ арлы гожтӥськон Дуноез кузьым - лыдӟисьлэсь Ӟечбуресь, "Удмурт дунне" газетэз лыдӟись гажано эшъёсмы! Улонэ кемалась пыӵам ӟеч сяммылэсь куштӥськеммы ӧз поты: Выль ар азьын "Кенеш" журнал тӥ доры куное йыгаськыны мылкыд кариз на. Сюлэмъёсмы дорады туж курисько ке но, котькудӥныды пумиськыса вераськыны луонлык нокызьы ум шедьтэ. Нош газетлэн бурдъёсыз вылын ми огнуналэ дас куинь сюрслэсь трос удмурт семьяе вуылыны быгатом. Мар сярысь вераськеммы потэ? Валамон ни: улэм-вылэммы, ужъёсмы, шумпотонъёсмы, малпанъёсмы пумысь. Одӥгмылэн но улонмы шуг-секытъёстэк ӧвӧл ке но, туннэ соослэсь палэнэтӥ ортчыны тыршом. Выль кужым сётэ, бурдъя лыдӟисьёсмылэсь мылкыд каронъёссэс лыдэ басьтыса быдэстэм уж. Со - "Кенеш" журналлы 2000-тӥ ар понна гожтӥськемъёслы дасям нимысьтыз номер. "Жингырты, даур кырӟан!" нимамы ми сое. Кызетӥ даурысь кык сю пала туж тодмо, калыкмылэн яратоно кырӟанъёсыз пыризы отчы. Сузьетэз узырмыто нотаос но даслэсь уно кырӟасьёсмылэн туспуктэмъёссы. Одӥг кылын вераса, журналмылэн та номерез кие кутымон, мукетъёс азьын возьматымон пӧрмиз. Лыдӟисьёсмы кие со инвожо толэзе вуиз ини. Кырӟанъёсын та сузьетмы сярысь юалляськыса, кызьы ке шаерамы, озьы ик солэн палэназ улӥсь удмуртъёс ялан вазиськыло на: кин ке - аслыз басьтон вылысь, мукетыз - матысь адямиезлы кузьман понна. Таин ӵош вераны кулэ, дыр, мар вите "Кенеш" журналлы 2001-тӥ ар понна гожтӥськемъёсты. Трос пӧртэм малпанъёс верамын вал, соос пӧлысь одӥгзэ бырйимы. Вылаз ик, кудаз ке пумиськонын лыдӟисьёсмы ӵапак со мылкыдзэс вераллязы но вал ини. Озьыен, вуоно арын ми поттыны малпаськомы калыкмылэн сямъёсыныз, нергеосыныз, йылолъёсыныз нимысьтыз номер. "Кенешлы" гожтӥськемъёс кие со вуоз огшоры номер интые. Журналлэсь котькуд номерзэ нимаз книгаен ӵошатыны луоно. Но книга шуэмысь, сое озьы гинэ уд басьты ай - дуныз "куртчылӥське". Со понна "Кенеш" котькуд семьялы гожтӥськыны луымон. Выль романъёс, повестьёс, веросъёс нырысь ик ми дорын печатласько. Ортчем дас одӥг толэзь ӵоже потэмъёсыз сярысь ум вералэ ни. Вуоно арын печатланы дасямъёсыз пӧлысь кӧняеныз ке тодматыны луоно. "Кайсы" нимо выль романэныз шумпоттӥз Петр Кубашев. Нырысетӥ люкетэз потоз толшор толэзе. Киров шаерын улӥсь удмурт гожъясьмылэн Николай Никифоровлэн нимыз ваньмызлы сямен умой тодмо ни. Солэн повестьёсыз, веросъёсыз, пьесаосыз пӧртэм газетъёсамы, журналъёсамы потыло. "Кенешез" лыдӟисьёслы нош ик выль повесть гожтэм. "Ой, тӧл тӧла..." нимам сое авторез. Николай Никифоровен ӵошатоно ке, Ливий Ураковлэн нимыз "Кенеш" журналэз лыдӟисьёс понна туж тодмо шуыны уг луы. Быдӟым Отечественной ожысь сӧсыр луыса бертэмын. Ортчем сюресэз трос орденъёсын но медальёсын пусъемын. Глазов пединститутын кема ужамын. Ливий Петровичлэн "Котьма ке но..." повестез озьы ик вуоно арын поттыны дасямын. Журналын пьесаос ӧжыт потэм пумысь ӝожтӥськисьёс луо. Та ласянь 2001-тӥ ар бездыт уз адӟиськы. Лыдӟисьёсмы тодматскыны быгатозы Анатолий Григорьевлэн, Никвлад Самсоновлэн выль ужъёсынызы. Римма Игнатьева, Виталий Агбаев, Валерий Батуев, Павел Семёнов, Галина Романова но мукетъёс веросъёссэс ӵектӥзы. Кылбур чуръёстэк, кырӟанъёстэк "Кенеш" аслэсьтыз "ымнырзэ" ыштоз. Жингыртӥсь кылбуръёс но соосъя кылдытэм выль кырӟанъёс журналмылэсь пуштроссэ узырмытыны гинэ юртто. Литератураез возьматонлы, сое лыдӟись доры вуттонлы сӥзем "Кенеш" журнал, валамон ни, туала улонысь бадӟымесь ужпумъёслэсь, шуг-секытъёслэсь палэнскыны нокызьы но уг быгаты. Туж ӝужыт но шоро-куспо креслоосын пукись кивалтӥсьёслэсь мылкыдъёссэс, малпанъёссэс лыдӟисьмы доры вуттыны тыршом но "Югдуръёс но ужпумъёс", "Ваче син" сэрегъёсамы потӥсь материалъёс пыр. Вуоно арысен номерлы быдэ сямен печатласькылозы тазалыкез утёнлы, семья кусыпъёсты возьматонлы сӥзем кылужъёс. Вунэтэмын уз луэ улонмылэн "шунды пырыосыз" - покчиос. Юри соос понна усьтэм "Нылпи дунне" сэрегмес озьы ик азьланьтом: пиналъёс понна серемес веросъёс, улонысь учыръёс сярысь гожъямъёс, дэмланъёс но мукет тунсыко ужъёс номерысь номере потылозы. Удмурт лыдӟисьёс понна бадӟым уж лэсьтӥз кылбурчи, филология наукаосъя доктор Василий Ванюшев. Михаил Худяковлэсь удмуртъёс сярысь ӟуч кылын гожтэм эпоссэ берыктыса, солы "Дорвыжы" ним сётӥз. "Та гожтос, тӥ кие вуытозь, туж кузь сюресэз ортчоно луиз. Нырысь ик, сое кылдытӥз ачиз улон. Собере ини, ортчемез но туннэез сярысь котыр-котыр малпаськыса, удмурт калык радъяны, кырӟаны-вераны кутскиз улон-вылон, ас выжыез но югыт дунне сярысь пӧртэм-пӧртэм мадёсъёс", - тӥни озьы гожтэ Василий Михайлович та ужезлэн азькылаз. Вуоно аре, тулыспал толэзе, "Кенеш", 75 ар тырмонэныз валче, аслэсьтыз лыдӟисьёссэ дораз куное люкалоз. Матэктӥсь юбилеенымы валче, милемлы котькудмылы номырин воштонтэм бадӟым кузьым лэсьтысалды, журналлы гожтӥськыса. Почта пыр басьтыны мылкыд карисьёслы солэн быдэс арлы дуныз 65 манет но 40 коньы тыр усёз. Редакциын гожтӥськисьёслы 45 манет тыроно. Ижын улӥсьёс вуоно арысен быгато улон интызылы матысь киоск пыр басъяны. Сыӵе амалэн гожтӥськонлэн быдӟалаез 58 манет. Азьвыл журналмес ноку но басьямды ӧй вал ке, тодматскон вылысь быгатӥськоды ӝыны арлы яке куинь толэзьлы гожтӥськыны. Оскытыса вераны дӥсьтӥськом: "Кенеш" журналэн тӥляд семьядылы мӧзмыт уз пот. Пётр Сергеев, журналлэн валтӥсь редакторезлэн воштӥсез. Мылкыдмы медам сӥя Ӵуказе усьтӥське удмуртъёслэн бадӟым ӧтчамзы. Таиз тямысэтӥез ни. Ваньмызлы сюрес мытӥз 1989-тӥ арын 9-тӥ толсуре (декабре) ортчем ӟырдыт кенеш. Ижысь машина лэсьтӥсьёслэн культура дворецазы соку люкаськылӥзы шаерысьтымы но сьӧрлось удмуртъёс. Кыӵе вожпотыса мадизы соос удмурт калыклэн чиданы луонтэм сюлэмшугъёсыз сярысь! Асьсэлэн кӧтӝожъёссы сярысь веразы тодмо тодосчиос, гожъясьёс, суредасьёс, кырӟась-верасьёс, мукет удысъёсын тыршисьёс. Соку ик тодам кылиз шаерысьтымы тодмо драматурглэн Егор Егорович Загребинлэн тазьы верамез: "Асьмеос, удмуртъёс, йӧн-йӧн вераськыны но али гинэ дышиськомы ай..." Туж ӝож: аслым ӧз кылды та ӟырдыт кенеше вуылыны. Пелляськись куазь шоры укноетӥ учкыса, сюлэмы гадьысьтым потыны турттэ вал. Шокатэк музэн кылзӥ удмурт калыкмы, анай кылмы сярысь тулкымъяськыса вераськисьёсты... 1991-тӥ ар 22-тӥ�23-тӥ шуркынмон (ноябрь). Ижын ортче быдэс дуннеысь удмуртъёслэн нырысетӥ бадӟым ӧтчамзы. Сюлэм нош ик гадьысь потыны турттэ: кӧня выль эшъёс ! Кӧня выль тодмоос! Вуылӥзы Россимылэн шоркарысьтыз, Москваысь, удмуртъёс! Вуылӥзы Тюменьысь, Томскысь, Омскысь ӵыжы-выжыосмы! Кӧня тунсыко пумиськонъёс!.. Нырысетӥ бадӟым ӧтчаме люкаськемъёслы нырысьсэ адӟыны но кылзыны кылдӥз удмурт кылын вераськись финн нылмуртэ - Марья Картаноез. Кыдёкысь Суоми музъем вылысь вуэм куно тросэзлэсь сюлэмзэ бугыртӥз. Ӧтчаме люкаськемъёс пушсы тырыса синвуаськизы... Андан ӵыжатӥсьёслэн культура дворецазы калык та нуналэ кӧтыз тырымон шулдыръяськиз. Пель сьӧрын али но кылӥське на кадь сюлэмез позыръясь арган гур... Та ӧтчамын ик кылдӥз "Удмурт кенеш". Быдэстоно ужъёссэ пусйыса, солы ӝабыр-ӝабыр басьтӥськыны кулэ вал кадь биньгозы борды. Нош тэльбуго малы ке сырк возиськиз... Отӥяз вал пӧртэм вакытъёс. "Удмурт кенеш" огазеяськонлэн кивалтӥсьёсыз но вошъяськизы. Огдыре чылкак ляб вал ини пыдул. Соку уж борды ӝабрес басьтӥськиз шаерысьтымы тодмо тодосчи, удмуртлыкмы сярысь вань сюлэмзэ, вань лулзэ сётыса сюлмаськись адями Роза Ивановна Яшина. "Удмурт кенеш" пыд йылаз йыг-йыг султӥз, солэн тӧроез Валентин Кузьмич Тубылов луэм бере. Удмуртъёс соку ик шӧдӥзы: огазеяськонлэн кужымез юнмаз, куараез пыдлось гуртъёсын но кылӥськыны кутскиз. Солэн ӟеч бервылыз - берло дыре гинэ кылдэм гурт кенешъёс. "Удмурт кенеш" котыре вуиз данак егит кужым. Алигес кылдытӥз со "Эрик" огазеяськонзэ. Кивалтэ соин шӧртчи удмурт пияш Алексей Андриянов. Нош берлоосызбадӟым ӧтчамъёс нырысетӥез кадь ӧвӧл ни. Оло трос пол люкаськылэмен, оло мукет муген сӥялскиз кадь мылкыд. Удмуртлыкез утён сярысь азьвыл сюлмаськем адямиос но малы ке чутрак воштӥськизы. Бен, туж улӥын на калыкмылэн асваланэз. Сое ӧз возьматэ шат туэ коньывуонтолэзе (октябре) ортчем быръёнъёс?! Удмуртъёс, сайкалэ! Тырмоз кӧлыны! Елена ВИНОГРАДОВА, вань ӧтчамъёсы ветлэм мурт. Ойдолэ шедьтом огкыл Вуоноез понна Удмуртъёслэн ӧтчамзы азьын "Удмурт кенеш" огазеяськонлэн тӧроез Кун Кенешлэн депутатэз Валентин Тубылов мылкыдъёссэ шараяз нимысьтыз люкам пресс- конференциын. Ёросъёсын ортчем ужрадъёсын быръемын 400-лэсь уно делегатъёс. Пӧлазы шедемын кызьы ке туж дано адямиос, озьы ик - тодмотэм егит муртъёс. - Ӧтчамлэн котьмалэсь бадӟым ужпумез - валтӥсь ужъёсъя огкылэ вуон, - пусйиз президент. Зэм но, та юан али данаксэ удмуртъёсты шугъяськытэ. Уго берло дыре удмурт огазеяськонъёс куспын, нимаз лидеръёс пӧлын валамтэос трос луизы. Уноез соос герӟаськемын элькунмылы президент быръёнэн. Одӥгъёсыз уен- нуналэн ужазы удмурт выжыысь кандидат понна, мукетъёсыз синмаськизы кыкетӥезлы. Озьы-а, тазьы-а - туннэ нуналлы республикалэн вылӥ кивалтӥсьёсыз быръемын-юнматэмын. Соин ик табере, огазе кариськыса, ӵош ужаны дыр вуэмын. Бен, азьлоез вылын дышетскыны кулэ. Йырмес уно пол йыгам мажес вылэ выльысь султонтэм вылысь. Но али, мон сямен, уно ужпумъёс пӧлысь нырысетӥ интые поттыны кулэ азьпалан улонэнымы меӵак герӟаськемзэ. Ма кароно, удмурт калыклэн ЪЪИ даурын адӟонэз шудо мед луоз шуыса? Та юанлы кыӵе ке коть син азе пуктымон валэктон шедьтӥм ке, съезд юнме ӧз ортчы шуыны быгатом. Ӟеч мылкыд но огкыл тӥледлы, гажано эшъёс-делегатъёс! Иван Лебедев. Эшъяськыса улод - кужмо луод Кызьы ивортылӥм ини, вуоно арын милям газетмы трослы "зӧкомоз". Соин ик нырысь сюлмаськонмы - солэсь пуштроссэ узыргес, мургес, шулдыргес карыны тыршон. Газетлэн котькуд бамез лыдӟисьлэн син азяз мед йӧтоз, бордаз мед кыскоз. Ӵапак та бордын ик али ми йырмес "тӥяськом". Оло котькуд бамез кыӵе ке нимысьтыз ужпумлы сӥзёно, оло нош пӧртэм удысъёсъя люкылоно. Оло, тӥляд, гажано лыдӟисьёсмы, визь-кенешты юрттоз газетмес эшшо ӟечгес радъяны. Юнме уг шуо ук, одӥг йыр умой, нош кыкез - эшшо умойгес. Выль арозь дыр вань на. Ойдолэ, ӵош малпаськом! Мукет муген но тӥледлы вазиськеммы потэ. Секретариатлэн шумпотонэз - материалъёсын тырмем зӧк папкаос. Нош али соос, милям, укыр векчиесь. Гожъялэ вал милемлы вӧзады улӥсь, ӵош ужась эшъёсты сярысь. Эн кепыралэ газет пыр вераны асьтэлэн улэм-вылэмды, сюлмаськонъёсты. шумпотонъёсты, кӧтӝожъёсты сярысь но. Ми чидатэк витём гожтэтъёстэс. Азьло вакытэ ми доры трос иворъёс вуо вал телетайп пыр. Политика, экономика удысъёсысь сяна, соос мадьылӥзы улон-вылонын пумиськылӥсь олокыӵе но тунсыко учыръёсты. Та быдӟа музъем вылын мар гинэ уг луы ук. Газетын соос азьло "Дунне вылын", "Котьма сярысь" рубрикаос улын пото вал. Нош али милям вань эшшо но бадӟымесь луонлыкъёсмы лыдӟисьёсмес дунне вылысь иворъёсын тодматыны. Компьютеръёсын ужаськом бере, Интернет пыр ми быгатӥськом дуннелэн котькуд сэрегаз "вуылыны". Та луонлыкмес уже кутыса, газет баме одно ик вуттылом паймымон учыръёсын сузьетъёсмес. Вуоно арын но "Тугоко" рубрика улын потозы калык кусыпъёслы сӥзем ужъёсмы. Шаерамы сизьымдон пала пӧртэм калыкъёс уло бере, вань мар сярысь мадьыны. Котькудӥзлэн аслаз сямъёсыз, йылолъёсыз. Дауръёсын соос валче тупаса, ог-огзылы юрттыса уло. Нош кӧня шудо семьяос кылдӥзы ини пӧртэм выжыысь потэмъёс куспын! Кызьы соос сярысь уд гожты? Республикаямы кылдытэмын но пайдаё ужало пӧртэм нациен калыкъёслэн кызь куинь огазеяськонзы. Вордскем музъемзылэсь, выжы калыксылэсь палэнын улыса но соос утьыны тыршо ас кылзэс, культуразэс. Валамон, ваньмыз вӧй вылтӥ кадь уг мыны, кылдыло пӧртэм шуг-секытъёс, сюлмаськонъёс. Соосты но газет пыр сэрттыны-пертчыны тыршом. Эшъяськон мед луоз котьку, солэн кужымез - бадӟым. Елизавета Камашева, кыл кутӥсь секретарьлэн юрттӥсез. Тодмо нимъёс но нуналъёс: Декабрь 1. СПИД-эн нюръяськон нунал. 3. 75 арес тырме Николай Егорович Шкляевлы (1925), удмурт крезьгурчилы, УАССР-ысь исскуство удысысь дано ужасьлы, Удмуртиысь комсомоллэн премиезлэн лауреатэзлы. Вордскемын Дэбес ёросысь Ӟиллё гуртын; - инвалидъёслэн калык куспо нуналзы; - вордскемез дырысен 105 ар тырме Фома Филиппович Сысоевлы (1895-1974). Со вал медицина наукаосъя кандидат, офтальмолог, медицина удысысь нырысетӥ удмурт профессор, РСФСР-ысь дано эмъясь, УАССР-ысь наука удысын дано ужась. Республикаямы тужгес тодмо луиз 1930-тӥ�1940-тӥ аръёсы, трахома висёнэн нюръяськеменыз. 4. 60 арес тырме Людмила Борисовна Шмыгиналы (1940), педагогика наукаосъя кандидатлы, Глазовысь пединститутысь доцентлы, СССР-ысь калыкез дышетон удысысь отличниклы. Вордскемын Глазов ёросысь Качкашур гуртын. 5. Экономикаез но улон-вылонэз азинтон сярысь ас мылкыд каремзыя сюлмаськисьёслэн калык куспо нуналзы. 7. 6 ар талэсь азьло (1994) кутэмын Удмурт Республикалэн Конституциез. 9. Вордскемез дырысен 110 ар тырме Константин Сергеевич Яковлевлы (1890-1937), удмурт гожъясь драматурглы. Вордскемын Алнаш ёросысь Намер гуртын. 1933-тӥ арын "Гердлэн ужезъя" репрессия улэ кыскемын. 10. Адямилэсь правооссэ утён нунал. 12. Россия Федерацилэн Конституциезлэн нуналэз. 13. 25 ар талэсь азьло (1975) Ижевскын Андан ӵыжатӥсьёслэн культура дворецсы усьтӥськиз. 14. 75 арес тырме Лев Александрович Лещинскийлы (1925), медицина наукаосъя докторлы, Удмуртиысь но Россиысь наука удысын дано ужасьлы, Россиысь дано эмъясьлы, Удмуртиысь Кун премилэн лауреатэзлы, Ижевск городлэн дано улӥсезлы. 17. Ракетной войскоослэн нуналзы; - энергетиклэн нуналэз (декабрьлэн куинетӥ арня нуналэз). 20. Россия Федерациысь кышкытлыклэсь утиськонъя ёзъёсын ужасьлэн нуналэз. 24. 75 ар талэсь азьло (1925) Ижевскын пуктэмын излэсь нырысетӥез школалы юрт (архитекторез Г. Ф. Сенатов); - вордскемез дырысен 75 ар тырме Виктор Петрович Лаптевлы (1925-1974), Совето Союзлэн Героезлы. 25. 60 арес тырме Леонора Викторовна Мамонтовалы (1940), "Италмас" ансамбльысь артисткалы, Россиысь но Удмуртиысь дано артисткалы. 26-29. 80 ар талэсь азьло (1920) Сарапулын ортчиз удмурт нылкышноослэн И Всероссийской конференцизы. Ужрадэ пыриськиз Елабуга, Сарапул, Малмыж, Глазов, Бирск уездъёсысь 93 делегат. 27. Спасательлэннуналэз. 28. Вордскемез дырысен 105 ар тырме Василий Ильич Лыткинлы (1895-1981), филология наукаосъя доктор, профессорлы, Россиысь культура но наука удысысь дано ужасьлы, финноугроведлы. 29. Вордскемез дырысен 50 ар тырме Надежда Владимировна Курченколы (1950-1970). Пинал дыръёсыз солэн ортчизы Глазов ёросысь Понино черкогуртын. Бортпроводница Курченко 1970-тӥ арын 15-тӥ октябре бырыны шедиз. Кулэмез бере Надежда пусъемын Горд Знамя орденэн, ВЛКСМ-лэн данъян пусэныз. 31. 220 ар тырме Вятской губерния кылдытэм дырысен (1780); - вордскемез дырысен 85 ар тырме Пётр Иванович Сюткинлы (1915-1954), Совето Союзлэн Героезлы. - 30 ар талэсь азьло Ижысь машина лэсьтон но андан ӵыжатон заводъёс Октябрь Революция орденэн пусъемын. декабрь - Вордскемез дырысен 230 ар тырме Андрей Фёдорович Дерябинлы (1770-1820). Со кутскон сётӥз Ижысь пыӵал поттон заводлы; - 225 ар талэсь азьло (1775) В.Г.Пуцек-Григорович удмурт грамматикалы сӥзем нырысетӥ уж гожтӥз. Е. УШАКОВА, Удмурт Республикалэн туала историезлы сӥзем центрысь ёзлэн кивалтӥсез. Тодматскизы Дауръёслэн висказы Удмуртилы кунлык сётон дырысен тырмиз тямыстон ар. Бадӟым юбилеез республикаысьтымы ваньмыз ёросъёс. Валамон ини, тужгес вунонтэм ужрадъёс ортчизы шаермылэн шоркараз - Операя но балетъя театрын, Йӧ дворецын. Шулдыръяськонэ пыриськизы вань ёросъёсысь но пӧртэм культура огазеяськонъёсысь усточиос-артистъёс. Удмуртъёслэн сяна, чузъяськизы ӟучъёслэн, бигеръёслэн, поръёслэн, чувашъёслэн, еврейёслэн, немецъёслэн, азербайджанъёслэн крезьгуръёссы. Пичи Пурга ёросын тужгес усто самодеятельной артистъёс уло Бобья-Уча гуртын. Татысь арганчиос-кырӟасьёс шулдыр кырӟан гуръёсын паймытӥзы ни Россиысь но кунгож сьӧрысь уно адямиосты. Дас ар талэсь азьло Ижевскысь Чугун сюрес вылын ужасьёслэн культура юртазы кылдытэмын вал арганчиослэн ансамбльзы. Та дыр ӵоже соос вуылӥзы ни шаерысьтымы унояз ёросъёсы, Москвае, Нижний Новгородэ, Кирове но мукет интыосы. Та коллективе ветло удмуртъёс, бигеръёс, ӟучъёс но мукет калыкъёс. Йӧ дворецын бобья-учаос но чугун сюрес вылын ужасьёс калыкез удмурт но бигер гуръёсын пумитазы. Отысен ик тодматскизы, ӵош туспуктэм лэсьтӥзы. Н. ВОЗИСОВ. Тугоко Кин тон сыӵе, бесерман? Асьме шаерын улӥсь калыкъёс пӧлын тужгес но мур, паськыт эскеремез кулэ каро бесерманъёс. Соослэн кыӵе выжыысь потэмзы, удмуртъёс куспын пӧртэмлыкъёссы пумысен тодосчиос даурлэсь кема ченгешо ини. Та аспӧртэм калыклэн выжыосыныз тунсыкъяськыса, дорам ӵем вуыло кунгож сьӧрысь куноос но. Бесерманъёслэн шорсюлэмзы - Юкаменск ёросысь Шамардан гурт. Татын улӥсьёс пӧлысь 95 процентэз бесерманъёс луо. Алигес та гурт пусйиз 385 ар тырмонзэ. Соин валче Юкаменск селоын ортчиз научно-практической конференция. Солэн ужаз пыриськизы Глазов, Балезино, Красногорск ёросъёсысь но Ижевскысь ӧтем куноос, кивалтӥсьёс, тодосчиос. Ужрадэз усьтыса вераськиз но пайдаё ужаны мылкыд кариз республикаысьтымы нациосын ужан политикая министр Николай Мусалимов. Со куспын куноосты ас пӧраськемъёсынызы: перепечен, кенэмен куарнянен, калягалэсь паронкаен утялтӥзы бесерман дӥсен пӧрмытскем апайёс. Бесерман калыклэсь историзэ, будон но азинскон сюрессэ эскерон бордын ужамзы сярысь пыр-поч мадиз Россиысь Наукаосъя академилэн Урал люкетысьтыз историяя, кылъя но литературая Удмурт институтэзлэн кивалтӥсез Кузьма Иванович Куликов. - Та аспӧртэмлыко, паймымон калыкез эскерон - институтлэн одӥгез валтӥсь ужпумез, - шуиз со. - Ми трос аръёс ӵоже тодыны тыршиськом ини та выжылэсь кытысь потэмзэ. - 1926-тӥ арозь бересерманъёс нимаз калыкен лыдъяськизы. Соослэн огъя лыдзы дас сюрс пала вал. Тросэз соос улӥзы удмурт гуртъёсын, кӧняез ке гинэ - Вятской губерниысь Слободской но Омутнинской уездъёсын. Нош 1926-тӥ ар бере ортчем переписьёс дыръя бесерманъёс пыртэмын вал удмуртъёс пӧлы, асьсэлэсь правоя статуссэс пыраклы ыштыса. 1995-тӥ арын историяя, кылъя но литературая Удмурт институт эскеронъёс ортчытӥз. Соя шаерамы уло куинь сюрслэсь ятыр бесерманъёс. Пӧртэм вакытэ пӧртэм малпанъёссэс вераллязы учёнойёс та калыклэн кыӵе выжыысь потэмез пумысен но. Одӥгъёсыз сое герӟаллязы тюрк выжыен, мукетъёсыз - удмуртъёсын. Но бесерманъёс мукет калыкъёсын сураськыны ӧз дыртэ. Юн возизы сямъёссэс, утизы лул узырлыксэс. 1990-тӥ арын кылдӥз бесерман калык огазеяськон. Со ик басьтӥськиз бесерманъёслэсь нимаз нацизэс кылдытонъя бадӟым уж борды. Озьы 1992-тӥ арын республикаысьтымы Вылӥ Советлэн Президиумез но Министръёслэн Кенешсы юнматӥзы "Бесерман калыклэсь исторической нимзэ берыктонъя" постановление. Бесерман культураез азинтонлы бадӟым саклык висъяны кутскизы кун но интыысь ас кивалтон ёзъёс. Усьтэмын ини музейёс, ужало фольклор коллективъёс, пото нимаз книгаос. Кылдытэмын бесерманъёслэн национально-культурной автономизы. Сое законъя пусйыны гинэ кулэ на. Институт азьланяз но уз палэнскы та ужлэсь, бесерманъёслэн зэмос историзы одно ик гожтэмын луоз. Шамардан - вашкалаосмылэн шорсюлэмзы Нош кытысь меда потэмын та кыл? Мае со возьматэ? Трос аръёс ӵоже та юанъёслы валэктон утча ини бесерман калык огазеяськонлэн тӧроез Валериан Фёдорович Сабреков. Нырысьсэ Шамардан кыл поттылэмын П.Н.Лупповлэн "Удмурты ХВ-ХВИИ вв" книгаяз. Волга кузя но трос пумиськыло Шамардан нимын гуртъёс. Тани бускель Татариын ик вань Шемардан станция. Михаил Юхмалэн "Вашкала чувашъёс" книгаяз но пумиськыло солы тупасьёсыз. Хазар каганатлэн шорсюлмыз вылэм Самандар. Хазаръёс но бесерманъёс одӥг выжыысь потэм калыкъёс. Самандар интыяськемын вылэм Терек шурлэн ярдураз, Гудермеслы но Хасавюртлы матэ. Та городъёс али пыро Чечен Республикалэн улосаз. Араб писатель Аль-Истархи гожтэ: Самандар бадӟым город вал, отын улӥзы туж лачмыт, лякыт сямо адямиос. Улӥзы узыр, трос коньдонэн. ЪИИИ дауре та город вылэ урдскизы арабъёс, со быдэсак сутэмын вал. Отын улӥсьёс пегӟизы. Волга кузя вылӥе тубӥзы но огазеяськизы Хазар каганатлэн уй пал калыкеныз - болгаро-чувашъёсын. Озьыен, шамардан гуртлэн нимыз - бесерман калыклэн историез. Сое азинтоно, эскероно, йылаз-пумаз вуттоно. Библиотека - историмес утись Калыклэн историез улэп, вань ке со калык сярысь верась одӥг ке но документ. Тазьы кутскиз веранзэ республикаысь Национальной библиотекаысь краевед но финн-угор литературая ёзэн кивалтӥсь Надежда Петровна Лимонова. Отчы пыро газетъёс, книгаос, журналъёс, рукописьёс, кино- но фотодокументъёс но мукет. Ваньмыз соос люкамын но утисько библиотекаосын. Берло дыре, калыклэн ас выжызэ шӧдонэз (самосознаниез) будэмен, республикаямы кылдӥзы пӧртэм калык огазеяськонъёс, нош библиотекаосын - соизлэсь яке таизлэсь калыклэсь культуразэ вӧлмытонъя центръёс. Соин ик йылӥз литературалы кулэяськон но. Жаляса верано луэ, бесерманъёс сярысь книгаос Национальной библиотекаын чиньыен лыдӟымон гинэ. Малы ке шуоно, берло аръёсы дасям сборникъёс ми дорозь уг вуо, соос туж пичи тиражен пото. Уно статьяос печатласько газетъёсын. Кылсярысь, уй пал ёрос газетъёсы ӵем гожъя бесерман калык огазеяськонлэн тӧроез В.Ф.Сабреков. Но соос уг вуо мукет ёросъёсы. Библиотекаос, коньдон ӧвӧлэн, уг быгато шаерамы потӥсь вань газет-журналъёслы гожтӥськыны. Нош ивор ми доры ӧз вуы бере, озьыен, со весяклы ышиз, быриз. Соин ик Юкаменскысь шор ёрос библиотекалы мон дэмласал бесерманъёслы сӥзем литератураез но статьяосты люкан борды басьтӥськыны. Нош соосты поттӥсь но печатлась организациосты курысал одӥг ке но экземплярзэ Национальной библиотекае вуттыны. Озьы гинэ быгатом огъя фондмес узырмытыны, котькуд калыклэсь историзэ весяк дауръёслы кельтыны. Дӥсь вера арлыд сярысь Конференцие люкаськемъёсты чылкак паймытӥз Юкаменск ёросысь Пышкет черкогуртысь музейлэн кивалтӥсез Тамара Федотовна Невоструева. Со сьӧраз ваем бесерман дӥсен пӧрмытскем ог дасо пиналъёсты. Кӧня ке дырлы вашкала дауръёсы вуыса, син азяды пуктэ: со - одӥг бадӟым бесерман семья. Котькудӥзлэн дӥсез ачиз вера солэн арлыдыз, семьяын кин луэмез но кыӵе инты басьтэмез сярысь. Тужгес но бадӟым данэз вал зӧк (бадӟым) кенлэн. Вань дуно чеберъяськон арбериос со киын улӥзы. Со котькинлэсь узыр дӥсен пӧрмытскемын, айшетэз ворекъя зарни но азвесь пырыосын, пужыятэмын горд буёло сӥньысэн. Зӧк кен ик кивалтӥз гурт котырысь вань ужъёсын. Нош егит кен - ичимень - ветлэ ымнырзэ ватӥсь сюлыкен. Нырысетӥ пиналыз вордскытозь нуллэ сое. Бызем кышномуртлы одно ик дӥсяло зыбын. Соя ик валаны луэ нылмуртэз, эшшо солэн паллян суяз понэмын поскес, суйы весь. Покчи ныллэн кусказ еэз ӧвӧл на, йыраз - такъя, со ӵуж буёлъёстэк. Озьыен, со пичи на, улон-вылонэз уггес вала на. Тӥни озьы, дӥсьлэн пичи гинэ тодметэзъя оглом дунъяны луэ адямиез. Школаосын бесерман культураез дышетон пумысен ивортӥз Глазов городысь 15 номеро школаысь историлы дышетӥсь Наталья Николаевна Комарова. Мур пуштросъем, узыр материал люкаллям Глазов пединститутын дышетскисьёс Александр Сунцов но Фёдор Киселёв. Соос мадизы бесерман купец Сабреков но бесерманъёслэн улон юртъёссы сярысь. Собере конференция ужзэ азьланьтӥз калык искусствоя музейлэн юртаз. "Семьялэн музеез" Зэм но, юнме шорысь тазьы уг нимало вылэм та музеез. Сое кылдытӥз но укмыс ар соин кивалтӥз Борис Михайлович Пряженников. Нош али солэн кузёез - Борис Михайловичлэн нылыз Галина Борисовна Саламатова. Со йылпумъяз Ленинградысь искусствоосъя академилэсь музейёсын ужанъя ёззэ. Кузпалыз но Людмила Алексеевна татын ик экскурсовод луыса ужа. Музейын куать зал усьтэмын. Огаз возьматэмын удмуртъёслэн, ӟучъёслэн, бесерманъёслэн, бигеръёслэн дӥсьёссы, юрт котырын ужан арбериоссы, куэм чалмаос, ӵушконъёс, ӝӧккышетъёс. Мукетыз сӥземын ужын но ожын данэ потэмъёслы, ёросысь хозяйствоослэн но предприятилэн азинсконъёссылы, Ижевск-Балезино чугун сюресэз лэсьтӥсьёслы. Тужгес но тунсыкоез - няньлы сӥзем сэрег. Татчы, музейын ужасьёслэн верамзыя, шумпотыса ветло покчиос но, дышетскисьёс но, асьсэлэсь праздникъёссэс ортчытъяло гурт удысын тыршисьёс но. Пичиос татын "Колобок" выжыкылъя сценка но возьматъяло. Уго ваньмыз син азьын, киосын но кутылыны луэ. Тани бусы, ю кизён но сое аран арбериос, киын ю тысь изон вуко, нянь котон шумес, татын ик сылэ гур. Отын пыжиз нянь-колобок. Табере нылпиос тодо, макем секыт но дано ужез нянь будэтӥсьлэн, няньтэк улон но ӧвӧл шуыса. - Ӵапак соос сярысь, музъем бордын, гуртын тыршись огшоры адямиос сярысь мед тодозы нылпиосмы, - шуэ Борис Михайлович. - Соос ӟеч тодо Гитлерез, Сталинэз, Гагаринэз, Менделеевез, нош вӧзазы улӥсь данэ потэм нянь будэтӥсь, пудо утись сярысь тодазы но уг ваё. Мынэсьтым пырак юасез но вань: "Кинлы кулэ со музейёс?" Кӧтӝожме мур ватыса, сыӵеослы шуисько: "Со кулэ ваньмылы! Сотэк ӧвӧл историмы, сотэк ум луэ асьмеос!" Вордскем нуналад гуртад люкад Трос калыкез люказ Шамардан аслаз вордӥськон нуналаз. Лыктэм куноосты но гуртоосты ӟечкылаз Юкаменск ёрос администрацилэн тӧроез Владимир Невоструев. Со вакчияк тодматӥз гурт улон-вылонэнызы, ӟеч ужасьёслы Данъян грамотаос сётӥз. Шуныт кылъёс веразы, ӟеч мылкыд но ужын азинсконъёс сӥзизы, бесерман калыклэсь культуразэ азинтыны куризы Правительстволэн Тӧроезлэн воштӥсез Виктор Шудегов, нациосын ужан политикая министр Николай Мусалимов, культурая министрлэн воштӥсез Аверьян Христофоров но мукет эшъёс. Шулдыр концерт дасяллям ёросысь удмурт, ӟуч, бигер культурая огазеяськонъёс, уно фольклор коллективъёс. Учкисьёс тужгес но юн кизэс чабизы Шамарданысь "Лампачей" фольклор коллективлы. Солэн данэз паськыт вӧлмемын, быгатэмзэс возьматӥзы ини Венгриын, Финляндиын, асьме кунысь унояз городъёсын. Куноос синмаськизы гуртысь музейлы. Та нуналъёсы гинэ со школаысь выжиз нимаз юртэ. Отчы люкамын бесерман калыклэсь улэм-вылэмзэ возьматӥсь арбериос, дӥськут. Ваньмыз со люкамын библиотекарьлэн Г.П.Сабрековалэн но дышетӥсьлэн Г.Б.Абашевалэн сюлмаськеменызы. - Ачим удмурт ке но, бесерманъёс пӧлын улыса дыши ини соослэн сямъёссылы, кылы но соос сямен кошке ини, - шуэ Галина Борисовна. - Бесерманъёс сямзыя шаплыесьгес, дӥсьтӥсесьгес, нош ми лякытэсьгес. Оло, со ик юрттэ ог-огмес ӟечгес валаны, куспамы тупаса, ченгешытэк улыны. Шулдыръяськонэ лыктэм пичи Олилэсь юасько, тон ӟуч-а, удмурт-а, бигер-а шуыса. Нош со пумитам ӝот-ӝот вазе: "Мон - бесермянка!". Озьыен, бесерман калыклэн азьланезлы осконэз вань, сое азинтозы егитъёс. *** Ужрад пайдаё но ӟеч ортчиз. Азьланьын но республикаысьтымы Нациосын ужан политикая министерство таӵе ужрадъёслэсь медаз куштӥськы, мукет ёросъёсын но соос мед ортчылозы. Е. КАМАШЕВА. "Алнашысь шуныт тӧл" Озьы нимаськоз учкисьёслэн куремзыя концерт. Сӥземын со вуись Выль арлы. Отын кырӟалоз Удмурт Республикаысь сӥё-дано артист Геннадий Ганьков. Концертэ пыриськозы "Шулдыр ӝыт" ансамбль, маскарчи Анатолий Григорьев но мукетъёсыз. Концерт ортчоз 26-тӥ декабре 18 часысен Удмурт кун филармониын. Блиц-опрос А. Александров, врач: - Ӧтчам луоз шуыса тодӥсько, но мар сярысь отын вераськозы - уг. Кылӥ ик, кивалтӥсь быръёзы шуыса. Мынам малпамея, удмуртъёслэн огазеяськонзы культураен гинэ выре. Нош удмуртъёслэн мукет но ужпумъёссы трос ук, тани малы удмуртъёс пӧлын йырзэс быдтӥсьёс трос яке кызьы кивалтон ёзъёсы егитъёсты кысконо. "Удмурт кенешен" кивалтӥсьёс пӧлысь но мыло-кыдо егитъёсты адӟем потэ ни. Собере малы-о асьмеос ялан тушмон утчаськом, шуом, ӟучъёс пӧлысь ик. Соосын артэ улӥськом-ужаськом бере, огкылысь улыны тыршоно. Н. Быков, художник-дизайнер: - Вань удмуртъёслэн ӧтчамзы люкаське шуыса ӧй кылылы. Дыр уг тырмы радио- телевизор кылзыны, нош мукетыз нокин верась ӧй вал. "Удмурт кенешлэн" ужамез сярысь берло дыре трос кылэме ӧвӧл, соин ик мар шуыны уг тодӥськы - уродэн но, умоен но вераны уг быгатӥськы. Но малпамея, номыр вылез удмурт движениын ӧз кылды, кивалтӥсьёс но ваньмыз соос ик кылемын угось. Законъёс тупатэмын Кызьы тодмо, Россиын федеральной округъёс кылдытъямен валче республикамы шедиз Приволжск округе. Табере асьме дорын но луиз солэн синмыз-пельыз - валтӥсь федеральной инспектор Сергей Чикуров - но вордскиз солэн ёзэз. Аппаратэз пумен паськыта но кужмоя. Ижын ужа ни калыкез кутон инты (общественной приёмной). Вакчи дыр куспун отчы 200 адями ветлӥз ни. Калык пӧртэм ужпумъёсын но сюлэмшугъяськонъёсын лыктэ. Соос нырысь ик вазисько улон интыоссэс умоятонэн но пенсиос тыронэн герӟаськем ужпумъёсъя. Та но куд-ог мукет лэчыт ужпумъёс сярысь журналистъёслы мадиз Сергей Витальевич Чикуров. Со ивортӥз, Удмуртия мырдэм-мырдэм дыр шедьтӥз федеральной законъёслы тупасьтэм катъёсты тупатыны. Та ужлы нимысьтыз бадӟым инты висъяз Кун Кенешлэн азьвыл пусйымтэ дас куинетӥ сессиез. Депутатъёс дырзэс жалятэк ужазы. Тӥни соин ик Сергей Кириенко Сергей Витальевичез ӟечкылаз удмурт законъёсты выльдыны быгатэменыз. Округын, пе, асьмелэн кадь югдур кылемын на Самара но Пенза улосъёсын. Сергей Чикуров кыл сётӥз вал толэзьлы быдэ одӥг пол журналистъёсын пумиськылыны. Со озьы ик лэсьтэ, пресс-службазэ но юнматӥз ни. - Но законъёсты тупатон йылпумъямтэ на, - ватсаз Сергей Витальевич. - Али нырысетӥ люкетэз гинэ быдэстэмын. Кылемын на кӧня ке нормативной актъёс но постановлениос, озьы ик интыысь ас коже кивалтонъя ёзъёслэн уставъёссы (Ижевск) но музон. Соос бордын выль арын дыртытэк огсыр ужалом ни. Пусйыны кулэ тани мае но. Кун Кенешлэн депутатъёсыз нырысь-валысь та уж шоры оскытэкгес учко вал, но берло та ужпумлэсь кулэлыксэ тросэз валаз. Сергей Чикуров таяз толэзе кутске, республикаысьтым городъёсы потаса, кенешъёс ортчытъяны. Отчы озьы ик ветлозы матысь районъёслэн кивалтӥсьёссы. Нырысез со ужрад ортчоз Глазовын туннэ, 5-тӥ декабре. Татын но усьтозы калыкез кутон инты. Пумиськонын озьы ик ӝутэмын вал мукет сюлэмшугъяськытӥсь ужпумъёс. Тани Удмуртиысь пытсэт сьӧрын пукисьёс данакез уг ужало. Азьло отын бадӟымесь заводъёсмы асьсэлы пӧртэм воштос ёзъёс но чыры-пыры арбериос потто вал. Табере ваньмыз со гуньдэмын, дугдытэмын. Тӥни соин ик одӥг куиньмосэз пукисьёс тэк уло. Кызьы сое умоен лыдъялод. Нош кин луоз республикалэн прокурорез но "ИЭМЗ "Купол" кун унитарной предприятилэн кивалтӥсез? Сергей Чикуров шуиз, али нимын-тулын, пе, вераны уг быгатӥськы, но кема возьмано уд луэ. Нырысьсэ палэнысь ваёзы, нош кыкетӥез асьмелэн луыны кулэ. Таизъя ватсаны кулэ, вылӥ верам предприятие федеральной ваньбур луэ бере, Москваен кенешоно луоз. Соин ӵош ик ведь ваньмызлы тодмо, кин киын ваньбур, со киын ик власть луэ. Али Россиын йылпумъяське ни кивалтон ёзъёсты выльдон, табере, экономикаын реформаос ортчытыса, калыклэсь улон-вылонзэ умоятоно. Г. Романов. А-у, Ува! Асьме шоркарын ужало ни кӧня ке землячествоос. Тужгес тодмоез - "Байгурезь". Дэбесъёс ӵем люкаськыло, ог-огзылы юртто, вордӥськем палъёсазы уртче потало. Правленизы син азяз возе городысь мӧйы бӧлякъёссэс, ӧтьылэ соосыз праздникъёсы. Адӟем карымон луо шарканъёс но. Алигес ортчытэм ӝытсы быдэс шаермес шумпотӥз кадь. Нош маин пӧртэм уваос? Таӵе юан сётӥзы ог-огдылы та ёросын вордскыса-будыса Иже лыктэмъёс. Тодосчи Зоя Суворова, врач Леонид Кузелин, кылбурчи Галина Романова, депутат Николай Чувашов но мукетъёсыз мылкыд каризы огазеяськыны. Вуоно субботае, 9-тӥ декабре, Драмая Удмурт кун театре люкаськозы уваос. 11 часын кутскоз землячество кылдытонъя конференция. Сое радъясьёс вазисько ваньмызлы, кинлы дуно ува музъем, кин мӧзме Ва шур котыръёслэсь, кин мылкыд каре огазьын ужаны. Тӥледыз вите пайдаё пумиськон. Юалляськыны луоз 444-344 телефонъя. И. ЛЕБЕДЕВ. Снежинка в паутинке Скатерть-салфетка состоит из связанных фрагментов, соединенных между собой. Поэтому размер изделия зависит от того, сколько таких частей вы захотите связать. И в одном случае у вас получится скатерть, в другом - салфетка. Для работы подходят хлопчатобумажные нитки "кроше" (салфетка будет тонкой, изящной) или "ирис" (получится более объемной, декоративной), а также крючок � 1,5. На схеме показано, как вывязвается основной мотив рисунка и как соединяются фрагменты между собой. о - воздушная петля; - столбик с накидом; Х - столбик без нкида; - точка соединения элементов. Искусство букета и композиции Новый год. И взрослые, и дети с нетерпением ждут этого праздника с его веселыми играми и сюрпризами, неповторимым запахом хвои. Но вряд ли стоит ради нескольких дней радости губить жизнь дерева. Заменой могут послужить одна или две причудливо изогнутые ветки ели или сосны. Они не занимают много места, а самое главное - не наносят вреда природе. Дополнительным материалом для новогодних композиций служат кора березы, еловые, сосновые, кедровые шишки. Украсят композицию, придадут ей новогодний колорит елочные украшения. Особенно хороша мишура ( в нее можно протянуть проволоку и закрутить самые причудливые завитки). Оригинальны и динамичны в композиции искусственно закрученные веточки ивы или дёрена красного. Их накручивают спиралью на любую круглую форму (ножки стола, указка, карандаш, банка), закрепляют и оставляют на 2-3 суток. Веточки можно сделать запорошенными "снегом": для этого пенопласт натирают на мелкой терке, ветки промазывают клеем и опускают в полученный порошок. Не забудьте о свечах. Лучше взять несколько одинаковых по форме. Подсвечник можно использовать вместо вазы, а лучше композицию построить на коряжках, спилах, в керамических вазах. Можно попробовать смастерить и свечи. Растопите на водяной бане парафин, подкрасьте его анилиновыми красителями в нужный цвет и вылейте в любую старую новогоднуюю игрушку. Когда он застынет, осторожно разбейте форму. Свечу можно заснежить так же как и веточки. Хороши ветки лиственниц с шишками, борщевика, пижмы, покрытые белым блестящим "ледком". Приготовьте водный раствор поваренной соли 1:2. В кипящую воду постепенно сыпьте соль до тех пор, пока на дне не образуется нерастворимый осадок. В горячий раствор опустите ветки и зонтики, зафиксируйте их стебли проволокой и оставьте на 12-14 часов. Затем выньте и высушите. Раствор соли можно подкрашивать в желаемый цвет (розовый - 2 ложки красной туши, голубой - 2 ложки синьки). Эти сверкающие кристаллы соли на растении очень будут уместны в сочетании с веточками ели. Композицию можно поставить на стол, укрепить на стене (рамке, плетенке, коре) подвесить на красивом шнуре или цепочке к люстре (сделать в виде шарика, закрепив веточки в мешочке с песком и украсив мишурой, мандаринами и конфетами). Можно композицию разместить в напольной вазе. Самый оптимальный вариант подскажут размеры вашей квартиры. Еще один "секрет", который пригодится для выполнения новогодней композиции. закреплять растения и ветки ели, косо подрезанные, лучше на еловой подушке или в туго набитом мешочке с песком, злаки - на клубне картофеля. Вот несколько примеров аранжировок. Коряга, две ветки ели, "засоленный" зонтик борщевика, ветка рябины и красная свеча. "Заснеженная" гирлянда (лапки ели накладываются друг на дружку и связываются проволокой), на ней 3-4 закрученных по спирали ветки ивы, колосья злаков, а промежутках по 2-3 искусственных цветка мака или нарциссов, незабудок. Длина гирлянды может быть от 0,5 м до 2 метров. Высокая белая ваза, 23 корешка дерева, подкрашенные в белый цвет, ветка ели или сосны, живые (или искусственные) розы. Бела рамка размером 50х40, "заснеженные" ветки лиственницы, ветки березы, обработанные в глицерине, 5-7 цветов бессмертника и серпантин. Если вы зальете пучок соломы кипятком и подержите ее до полного охлаждения воды, солома станет мягкой и эластичной. затем сплетите косу, перевяжите ее концы лентой или серпантином и на этой плетенке закрепите веточку или и несколько новогодних шаров. Немного фантазии - и в новогодний вечер вам удастся порадовать друзей. Только не забудьте подготовить все необходимое для композиций заранее, до праздника. Л.КАЛИНОВСКАЯ, руководитель кружка цветоводов-декораторов. ЦВЕТУЩИЙ ПОДОКОННИК Выбираем соседа Комнатные цветы - живые "существа", которые полностью зависят от нашей заботы, внимания и знаний. Прежде чем выбрать соседа-растение, узнайте его биологические особенности, агротехнику возделывания. В оранжереях, откуда они поступают в продажу, в горшки кладут торф, а не земляную смесь. Поэтому для пересадки приготовьте все заранее: горшки нужных размеров, земляную смесь, поддоны, "дренаж"... Сухой навоз и птичий помет понадобятся для подкормок. Нужны будут также зола, полное минеральное удобрение. При покупке отбирайте молодые, здоровые, коренастые растения. Если вы начинающий цветовод, остановите свой выбор на неприхотливых: абутилене (комнатном клене), аспидистре (дружная семья), драцене, аспарагусе перистом, алоэ (столетнике), агаве, примуле (первоцвете), пеларгонии (герани), лавре, традесканции, фикусе и других. Полезно завести специальный дневник, в который можно заносить наблюдения за ростом и цветением растений, делать записи о работе по уходу за ними. Это поможет вам стать опытным цветоводом. И.ШУИН. Цветник на окне "Декабристом" в просторечии обычно называют один из видов тропических лесных кактусов (зигокактусов). Для его нормального развития нужна богатая перегноем почва, достаточно влажный воздух, рассеянный сильный свет. При его недостатке и при неправильном уходе растение не закладывает цветковых почек, плохо переносит оно и сухость воздуха, не любит перестановок горшка с места на место и разных поворотов его по отношению к свету. Летом через каждые две недели его полезно подкармливать раствором коровяка (1:10) с добавлением смеси минеральных удобрений - не более 2 граммов на литр. воды. Ближе к осени его поливают обильнее, постепенно снижая температуру. И тогда в конце ноября, декабре или январе он обязательно образует бутоны и цветы. После того как они отцветут, температура должна быть в пределах 6-8 градусов тепла. Перед началом роста, в апреле, растения пересаживают в горшки большего размера. Летом их можно прикопать (вместе с горшками) в саду, но опять же не на припеке, а укрытом от солнца месте. С.РУДЕНКО, агроном. Уход за сенполиями Если в горшке на поверхности земли выступают соли или появляется плесень, попробуйте осторожно разрыхлить верхний слой земли и присыпьте его речным песком или положите свежий мох сфагнум слоем 1 см. Сенполии не рекомендуется подкармливать. Растениям необходим период покоя. Сенполии тенелюбивы, но в зимнее время их нужно разместить на хорошо освещенных окнах и не притенять. Притенку начинают только с марта. Во время проветривания помещений растения следует прикрыть полиэтиленовой пленкой или бумагой. На подоконники цветы лучше поместить на деревянные подставки (скамеечки), чтобы холодный воздух из нижних целей оконных рам не переохлаждал горшки. поливать сенполии следует водой комнатной температуры или на 2-3о С выше. Более теплая вода может вызвать нежелательный в это время рост растений. Если необходимо удалить пыль с листьев, то можно помыть растения, соблюдая следующие правила: воду взять теплую (как парное молоко), листья должны обсохнуть в темном, теплом месте. Только после этого их можно поставить на окно. Растения с мокрыми листьями могут получить ожоги от солнечных лучей, на листьях от этого появляются беловатые кольцевые пятна. Появившиеся зимой цветки бывают не очень крупными, но удалять их, как делают некоторые, не стоит: на весеннем цветении это не отразится. Л.ЦВЕТНАЯ. 2. Ягодники Культура Виноград Ежевика Земляника Клубника Крыжовник Малина Смородина Шиповник Положение Луны в знаках Зодиака Рак, Дева, Скорпион, Рыбы Рак, Скорпион, Рыбы То же То же То же То же То же Рак Наилучшая фаза Луны От первой четверти до полнолуния То же То же От полнолуния до последней четверти От первой четверти до полнолуния То же То же От новолуния до полнолуния. Большинство сортов вьющихся растений лучше всего развивается под Девой, когда Луна в фазе от новолуния до полнолуния. Но Дева - не самый лучший знак для вкуса ягод. Вкуснее они получаются под Раком, Скорпионом, Рыбами. Рак дает стебель средней величины, Скорпион - длинный, Рыбы - короткий стебель, но значительно лучшие плоды. Виноградный сок и вино лучше всего делать, когда Луна в водных знаках - Раке, Скорпионе, Рыбах. Лучшее время - полнолуние вплоть до последней четверти. Лианы лимонника у вашего дома Лимонник китайский - деревянистая многолетняя лиана, перенесенная в наши сады из дальневосточных лесов. Издавна он ценится как лекарственное и пищевое растение, восстанавливающее силы и придающее бодрость человеку. Сажают лимонник в саду на возвышенном месте, чтобы не было близко стоящих грунтовых вод и не застаивалась вода после дождя. лучше всего выбрать для него слабозатемненное место, избегая солнцепека или глубокой тени, а также близости крупных деревьев. Располагают саженцы в ряд с расстоянием не менее 1 м друг от друга. На второй год после посадки ставят шпалеру. Она состоит из металлических труб высотой до 2-2,5 м, вкопанных в землю. Между ними натягивают проволоку в 3 ряда - нижний на высоте 0,5 м. Молодые побеги подвязывают к шпалере и в дальнейшем на зиму не снимают. От своевременности подвязки зависит начало плодоношения лимонника. В природе имеется 3 половые формы лимонника: 1. Однодомные растения, когда на одном кусте есть как женские, так и мужские цветки. 2. Двудомные - т.е. из года в год на кусте имеются только женские или только мужские цветки. 3. Растения с чередующимся по годам полом цветков. В условиях Подмосковья все выращенные из семян лианы лимонника обычно бывают однодомными. Садоводу для получения урожая плодов необходимо вовремя установить, есть ли на кусте женские и мужские цветки. Они всегда раздельнополые и легко отличимы. В мужском цветке находятся 3-5 светлых сидячих тычинки, а в женском - в центре находится зеленоватый крупный пестик. С началом цветения лучше провести самому дополнительное искусственное опыление. Для этого срывают мужской цветок и на 5-10 минут вставляют его в женский, чтобы пыльца попала на пестик. В этом случае вы получите полное опыление цветков и в дальнейшем полновесную кисть плодов. Дело в том, что лимонник не переопыляется пчелами и шмелями. Пыльцу переносят мелкие жучки. В плохую дождливую погоду во время цветения опыление может оказаться недостаточным и тогда цветки опадают. Немаловажное значение имеют и условия выращивания лиан. Кроме подвязки, для ускорения начала плодоношения необходимо ежегодно осенью удалять появившуюся корневищную поросль. Ее отделяют от маточного растения и используют для пересадки как посадочный материал. В течение лета проводят прополку сорняков вокруг лиан, мелко рыхлят почву. Нельзя перекапывать ее в приствольном круге, так как лимонник имеет поверхностную корневую систему. Лианы хорошо отзываются на увлажнение воздуха опрыскиванием водой утром и вечером во время засухи. При загущенной кроне лиан ее прореживают летней обрезкой в июне-июле. Из обрезанных побегов готовят черенки для укоренения в холодных парниках. На шпалере оставшиеся ветви располагают веером, чтобы улучшить доступ света к цветкам. Подробно с условиями выращивания лимонника и других новых ягодных культур можно ознакомиться в книге автора "Таежная ягода". Э.КОЛБАСИНА, кандидат биологических наук. Наиболее благоприятные для посадки положения и фазу луны 1. Огородные культуры Оптимальные условия посадки Культура Анис Арахис Арбузы Артишоки Базилик Баклажаны Бамия Батат Бобовые (горох, фасоль) Брюква Дыни Кабачки Капуста (кочанная, брюссельская, цветная) Картофель Катран Кориандр Кукуруза Лук зеленый Лук-порей Лук-репка Майоран Мелисса Морковь Мята перечная Огурцы Огуречная трава (бурачник) Пастернак Патиссоны Перец сладкий Петрушка на зелень Петрушка на корень Подсолнечник Рапс Ревень Редис Редька Репа Розмарин Салат Свекла Сельдерей Скорцонера (Козелец) Соя Спаржа Тимьян Тмин Топинамбур Тыква Укроп Фенхель Физалис Хрен Цикорий Чабер Чайот Шпинат Щавель Положение Луны в знаках Зодиака Рак,Скорпион,Козерог Телец,Рак, Скорпион,Рыбы Рак, Скорпион, Рыбы Телец, Рак, Дева, Весы, Скорпион, Рыбы Рак,Скорпион,Козерог Рак, Весы,Скорпион, Рыбы Тел.ец, Рак, Весы, Скорпион Телец,Рак, Скорпион, Весы,Козерог Телец,Рак, Весы, Скорпион,Рыбы То же Рак, Весы,Скорпион, Рыбы То же Телец,Рак, Весы,Скорпион, Рыбы Телец, Рак, Весы,Скорпион, Стрелец,Козерог Рак, Скорпион,Козерог То же Рак, Скорпион, Рыбы Овен, Скорпион,Стрелец, Козерог Стрелец Скорпион, Стрелец,Козерог Рак, Скорпион,Козерог То же Телец, Рак, Весы,Скорпион,Рыбы Рак,Скорпион,Козерог Рак,Скорпион, Рыбы Рак, Скорпион,Козерог, Рыбы Рак, Весы,Скорпион, Рыбы То же Рак,Скорпион, Рыбы Рак, Весы, Скорпион, Рыбы Телец,Рак, Весы, Скорпион,Козерог, Рыбы Рак, Лев, Весы, Скорпион, Рыбы Рак, Скорпион,Козерог, Рыбы Рак, Скорпион, Рыбы Телец, Весы, Скорпион, Стрелец,Козерог, Рыбы Овен,Телец, Рак, Весы, Скорпион Телец,Рак, Весы,Скорпион,Козерог, Рыбы Рак, Скорпион,Козерог Овен,Телец, Весы, Скорпион,Козерог, Рыбы Телец,Рак, Весы, Скорпион,Козерог, Рыбы Телец,Рак, Весы, Скорпион,Рыбы Телец,Рак, Весы, Скорпион Телец,Рак, Весы, Скорпион Телец,Рак, Весы, Скорпион,Рыбы Рак, Скорпион,Козерог То же Телец,Рак, Весы, Скорпион,Стрелец, Козерог Рак,Весы, Скорпион, Рыбы Близнецы,Рак, Дева,Скорпион,Козерог Рак, Скорпион,Козерог Рак, Скорпион, Рыбы Рак, Скорпион,Козерог Рак, Скорпион,Стрелец, Рыбы Рак, Скорпион,Козерог Рак, Скорпион, Рыбы Овен,Телец,Рак, Скорпион,Козерог, Рыбы Рак, Скорпион,Козерог, Рыбы Наилучшая фаза Луны От первой четверти до полнолуния От полнолуния до последней четверти От новолуния до полнолуния От новолуния до первой четверти От первой четверти до полнолуния То же То же От полнолуния до последней четверти От первой четверти до полнолуния От полнолуния до последней четверти От новолуния до полнолуния От первой четверти до полнолуния От новолуния до первой четверти От полнолуния до последней четверти От последней четверти до новолуния От первой четверти до полнолуния От новолуния до первой четверти От новолуния до полнолуния От первой до последней четверти От полнолуния до последней четверти От первой четверти до полнолуния То же От полнолуния до последней четверти От первой четверти до полнолуния От новолуния до первой четверти От первой четверти до полнолуния От полнолуния до последней четверти От первой четверти до полнолуния То же От новолуния до первой четверти От полнолуния до последней четверти От полнолуния до новолуния От первой четверти до полнолуния От полнолуния до последней четверти То же То же То же От первой четверти до полнолуния От новолуния до первой четверти От полнолуния до новолуния От новолуния до первой четверти От полнолуния до последней четверти От первой четверти до полнолуния От новолуния до первой четверти От первой четверти до полнолуния То же От полнолуния до последней четверти От первой четверти до полнолуния От новолуния до полнолуния От первой четверти до полнолуния То же От последней четверти до новолуния От первой до последней четверти От первой четверти до полнолуния То же От новолуния до первой четверти От первой четверти до полнолуния Наряд для "принцессы-сорванца" Размер 140-68-61 Этот задорный карнавальный костюм состоит из яркой курточки-жакета, отрезного по талии, и коротеньких обтягивающих брючек типа "велосипедных" шортов. Оборки по низу брючек и рукавов придают наряду романтический характер. Для брюк и жакета вам потребуется 110 см пестрой эластичной ткани с рисунком шириной 140 см. Для спинки и полочек жакета, а также для оборок - 110 см красной ткани, желательно атласа или какой-либо материи с блестками, шириной 120 см. Однако для того, чтобы создать образ "принцессы-сорванца", недостаточно только сшить дочке эффектный карнавальный костюм, необходимо еще "соорудить" ей такую оригинальную прическу, как на нашем снимке. Это можно сделать с помощью проволоки и плотно прилегающего к голове ободка из ткани. Маска, я тебя знаю Гном, пират, поросёнок - у кого из гостей не вызовет улыбку веселое превращение хозяина дома или его озорных детей. Да и гости до поры могут сохранить под этими масками свое инкогнито. По чертежам можно вырезать маски из плотной рисовальной бумаги, а потом раскрасить красками. Можно применить аппликацию - наклеить на тонкую белую ткань клеем ПВА детали маски. Гном. Лицо вырезано из розовой бумаги, борода, нарезанная бахромой, белая. Шапочка - цветная, причем с обеих сторон, так как ее конец с бахромчатым помпоном должен мягко загибаться вперед. Все остальное сделайте по своему усмотрению. Пират. У пирата желтое или светло-коричневое лицо. Борода рыжая или черная. Один глаз закрыт черной повязкой. Голубая косынка, из-под которой торчит клок волос. Нос фиолетовый, а серьга желтая. Поросенок. Для этой маски лучше использовать бархатную розовую бумагу. Щеки, пятачок и рот - ярко-красные. Контуры глаз обведены черным, так же, как уши и складки на носу. Приклейте к маскам резинки. Не забудьте про коктейли Коктейль молочно-вишневый. Смешать и взбить 500 г молочного мороженого, 350-400 г сиропа из варенья и 1 л газированной воды. Коктейль яичный. Взбить 3 стакана холодного кипяченого молока, 1,5 стакана вишневого или другого сиропа и 6 сырых желтков. Освежающий напиток из меда с лимонным соком. 2 столовые ложки меда смешать с соком одного лимона (по желанию добавить и цедру лимона) и 3-4 стаканами холодной воды. "Года 3-4 назад в поселках и на дачах нашего района появились мыши-полевки. В первый год после таяния снега обнаружилось, что все молодые ветки яблонь объедены. За лето деревья немного восстановились, но за последующую зиму стало еще хуже, а в этом году - вообще трагедия, стихия - все объедено: яблони, виноград, вишня, даже клен. Мышей - тьма. И это не одно хозяйство, а целый район. Я лично пытался яблони и виноград защищать шлаковатой - не действует, ее растаскивают в норы, гнезда. Посыпал махоркой - малоэффективно. Готовил летом и привязывал на зиму к веткам чернокорень лекарственный (совет "Приусадебного хозяйства") - не действует. Их, видимо, нужно травить или выгонять. Может быть, вы что-нибудь посоветуете?" Хотим предостеречь садоводов-любителей от самостоятельного применения химических препаратов для отравления грызунов на приусадебном участке - слишком велика опасность этих веществ для людей (особенно детей) и домашних животных. Тем более если, как вы пишете, нашествие мышей охватило весь район, то борьба с ними на одном участке вряд ли увенчается длительным успехом. Поэтому советуем вам обратиться на местную станцию защиты растений или санитарно-эпидемиологическую станцию, которые дадут подробные рекомендации и помогут провести борьбу с грызунами (в том числе и химическую) в масштабах района. Из "домашних" средств, которые вы еще не испробовали, можем посоветовать следующие. Во-первых, обвязка стволов толем или мульчбумагой. При обвязке сначала обматывают рогожей или тряпками стволы и основания скелетных ветвей, затем плотно накладывают толь и закрепляют его шпагатом. Нижнюю часть толя немного углубляют в почву и засыпают землей. Можно защитить стволы и еловыми ветками (лапником), плотно закрыв им стволы деревьев (иглами вниз). Для этой же цели применяют камыш, полынь, стебли подсолнечника, отплодоносившие побеги малины. Солому и паклю применять нельзя! Мыши растащат их так же, как шлаковату. Прикопанные саженцы также плотно прикрывают лапником или ограждают заборчиком из толя, установив его вокруг участка с прикопанными растениями и присыпав землей нижнюю часть. Зимой снег вокруг заборчика нужно отаптывать. Обвязку и укрытие растений от грызунов проводят поздней осенью после листопада, перед наступлением устойчивых заморозков. Ранее укрытие недопустимо, поскольку оно затягивает вегетацию растений и приводит к снижению из зимостойкости. От обвязки и укрытия растения освобождают после таяния снега, когда минует опасность резких перепадов температуры. Отаптывание снега вокруг молодых деревьев хорошо защищает их от погрызов. Его можно проводить в оттепели и повторять после каждого большого снегопада. Снег желательно отаптывать и вокруг обвязанных деревьев, особенно когда уровень снежного покрова выше места обвязки. Однако нужно иметь в виду, что снежный покров защищает растения от морозов и ранневесенних солнечных ожогов, поэтому при отаптывании снег необходимо подбрасывать к деревьям из междурядий. Чтобы отпугнуть мышей, попробуйте обмазать стволы деревьев смесью, в состав которой входят глина (3-4 кг), коровий навоз (3-4 кг) и креолин (0,1 кг), а также рассыпать вокруг деревьев торфяную крошку, опилки и золу, пропитанные 10 % раствором креолина (1 кг на 10 л воды) или керосина (1 кг на 10 л воды). Эти средства применяют поздней осенью. Удобные ступеньки Эта лестница подойдет для садового домика, в котором высота от пола до потолка не превышает 2200 мм. Конечно, при желании длину лестницы можно увеличить еще на несколько ступенек, соответственно заготовив дополнительные детали. Все необходимые размеры приведены на рисунке. Цифрами обозначены: 1 и 2 - боковины, 2 и 3 - элементы каркаса, 5 - ступенька. Для работы понадобятся ровные доски без трещин и сколов, выдержанные не менее года в сухом помещении. Детали 1 и в выпиливаются из цельной доски ручной пилой с широким полотном. Детали 5 выпилить сложнее - они имеют криволинейную форму. Прямые пропилы делайте ножовкой с широким полотном, а закругленные - с узким. После изготовления деталей каждую сверьте с шаблоном. Сборка лестницы труда не составит. Разложите на полу боковины. На них положите две доски, служащие каркасом. Сверху на доски положите другой ряд боковин. Если все детали совместились, приступайте к соединению. Каждую боковину крепите к каркасным доскам четырьмя шурупами длиной не менее 70 мм. Предварительно разметив отверстия под шурупы, просверлите каждое отверстие двумя сверлами: одним - под резьбовую, вторым - под цилиндрическую его части. Все сопрягаемые части элементов каркаса и боковин тщательно смажьте казеиновым, но лучше эпоксидным клеем. И только после этого стяните их шурупами. Дайте клею высохнуть, а затем удалите выступившие капли. Точно так же на клею и шурупами присоедините к каркасу ступеньки. Готовую лестницу два-три раза покройте масляным лаком. Остается приставить ее к люку на второй этаж, прибив к полу и потолочной балке. В.Фролов, инженер. Наступила суровая пора для пернатых защитников сада. Вот на ветке сидит нахохлившаяся большая синица. Деревья покрыл иней: трудно добывать корм - зимующих гусениц, куколок различных насекомых. В такое время птицы особенно нуждаются в помощи человека. Повесьте на ветку кусочек несоленого сала. Стайка синичек сразу заметит лакомство, прилетит и будет несколько дней его клевать. В красивом и живописном месте Ижевска раскинулся санаторий-профилакторий "Геолог". Небольшое, нро уютное здание вмещает 75 отдыхающих. Все здесь располагает к отдыху, получению нового заряда бодростью и вздоровлению. Все тдыхающие живут в 1-, 2-местных номерах, есть люксы и полулюксы. А минеральная вода "Миргородская", диетическое питание, отвары, процедуры способствуют выздоровлению и накоплению сил в организме. Это здорово! Не выезжая из города получить полноценное лечение и обрести душевный покой и новых друзей. С первого дня заезда Вас тепло и душевно встретит доктор-ординатор, врач высшей категории, заслуженный врач Удмуртской Республики Римма Ивановна Петрова. Внимательно выслушает каждого отдыхающего, и ни одну просьбу о назначении той или иной процедуры не оставит без внимания. С ее легкой руки начинаются процедулы. Чутко проводит гидромасаж татьяна Павловна Зямбицкая. Каждый пальчик, каждую мышцу промассажирует водой. А в грязелечебнице настоящей хозяйкой чувстует себя галина Михайловна Крестьянинова. Вакуумный массаж, ингаляцию и другую физиотерапию всегда безболезненно проводит Галина Михайловна Абашева. Любые инъекции всегда нежно поставит Роза Мухтаровна Сулейманова. А совсем недавно в перечне услуг появилась еще одна медицинская услуга: электростимуляция "Корона". Это очень эффективная форма лечения неврозов. Также хочется выделить еде один медицинский аппарат для лечения и профилактики различных заболеваний, в том числе функциональных нарушений вегетативной нервной системы и эндокринных желез, заболеваний воспалительного характера, сердечно-сосудистых, онкологических, мастопатии, анемии, артрозов и других. Установка реализует новый метод опухолевых и неопухолевых заболеваний с применением вращающегося магнитного поля и при индивидуальном подборе параметров воздействующего поля выводит организм пациента на стадию реакции активации. Лечение магнитным полем уменьшает боли, улучшает общее самочувствие, нормализует температуру тела, показатели крови, мочи. Всегда выслушает и даст нужный совет психотерапевт. Ему благодарны все отдыхающие за его оригинальные методики лечения. Особо слеудет отметить диетсестру Людмилу Владимировну Утробину. Благодаря ей летом и зимой отдыхающие по путевкам "Мать и дитя" родители с детьми не чувствуют себя обделенными. Людмила Владимировна прекрасно организует питание в прекрасно оборудованной столовой. Самоотверженный труд всего коллектива, которым руководит Вячеслав Николаевич Козырев не остается незамеченным. Теплые слова благодарности в "книге Отзывов" в первую очередь выражают главному врачу, доктору-ординатору, диетсестре, всем врачам и медицинским сестрам. "Книга отзывово" пополняется благодарностями после каждого заезда отдыхающих. Вот что пишут работники Воткинского НГДУ: "Уважаемый Вячеслав Николаевич! Лично Вам и всему вашему коллективу выражем огромную благодарность за чуткое и внимтельное отношение к отдыхающим. Спасибо работникам столовой за вкусные блюда..." А коллектив работников ОАО "Северная экспедиция добавляет: "Нежные и чуткие руки врачей и медицинского персонала оказывает магическую помощь и способствует быстрейшему выздоровлению". В санатории-профилактории "Геолог" Вас встретит внимательный и заботливый персонал, квалифицированные работники профилактория. Сочетание хвойного леса, чистого воздуха и отличного лечения благотворно влияет на вашу нервуню систему и весь организм человека. Следующий заезд: "Мать и дитя": Наш адрес: 426009, Ижевск, ул.Ухтомского, 22. Тел. (3412) 37075-66. Прейскурант цент на медицинские и прочие услуги 1. Сауна - 1 час 150-00 2. Аренда столовой - 1 час 300-00 3. Аренда банкетного зала на 12 мест - 1 час 150-00 4. Ламинирование - 1 лист 11-00 5. Путевки: - на 21 день 5500-00 - на 21 день полулюкс 6900-00 - на 21 день люкс 9400-00 - на 21 дней 3150-00 - на 12 дней полулюкс 3950-00 - на 12 дней люкс 5400-00 - курсовка на 21 день (без проживания) 3200-00 - курсовка на 12 дней 1850-00 - курсовка на 21 день (без питания) 1600-00 - курсовка на 12 дней 920-00 6. Медицинские услуги: цены за 1 сеанс Массаж 1 ед. 20-00 Электрокардиограмма 25-00 Лечение магнитным полем 120-00 Электростимуляция "Корона" 40-00 Солярий 25-00 Электросон 25-00 Гальванизация 15-00 Лекарственный электрофарез 18-00 Диадинамотерапия (ДДТ) 15-00 Дарсонваль 15-00 УВЧ-терапия (УВЧ-66) 15-00 ДМВ (Ранет) 12-00 УФО 12-00 Лазерная терапия 20-00 Ультразвуковая терапия 20-00 Фонофарез 20-00 Ингаляция 15-00 Ультразвуковая ингаляция 18-00 Продолжительность лечения 21 день. Санаторий-профилакторий действует круглый год. А сейчас для удобства отдыхающих действуют идивидуальные сроки заездов, т.е. человек может взять путёвку в удобное для него время. Санаторий не только лечиться, но и отдыхать. В санатории-профилактории "Геолог" не только большой выбор медицинских услуг, но и для отдыхающих прекрасно организован отдых - дискотеки, вечера отдыха, биллиард. В дни каникул для родителей с детьми организуются специальные заезды "Мать и дитя". Игры, развлечения, педагог-воспитатель приглашает в санаторий-профилакторий интересных людей - артистов, художников, дети ездят на экскурсии, играют в футбол и волейбол со сверстниками из других профилакториев. А родители в это время принимают процедуры, поправляют свое здоровье. Предзимнее Выпал снег и слегка приморозило, Под ногой стылый лист хрустит, А за сонной рекой дремлет озеро, Зачарованный лес грустит. Даль хрустальна, дымки из труб теплятся. Небосвод словно плат голубой. В пору эту в хорошее верится, Так как в юности верят в любовь. И на цепь не посажен обидами, По знакомой тропинке иду. Никому никогда не завидую, Твердо верю в планиду-звезду. Не считаются годы-горошины, Больше, меньше одной - ну и пусть. Снегом, как сединой, припорошенный Зелен все ж можжевеловый куст. Н.МРЫХИН. Декабрь Стужайло. Студень. Студеный. Студный. Студенец. Зазимник, Груден. Слово декабрь пришло из Византии и называется "декемерий". Первый месяц зимы. Год начинается. С 1 по 22 декабря - Первозимье. С 22-по 31 декабря - Коренная зима. Декабрю свойственны морозы и оттепели. Он "и замостит, и загвоздит, и саням ход даст". Температура в средней полосе опускается иногда и до - 300. Но и морозы не так страшны, как бесснежье: если земля укрыта снеговым покрывалом - не схватится сразу на глубину, не погибнут посевы под зиму. В декабре рано темнеет, хотя прибавка дня составляет 26 мин. По Лесному календарю Бианки в декабре до 20-го - "Месяц зимних гостей" (третий месяц осени), с 21 декабря - "Месяц первых белых троп" (первый месяц зимы). В это время у лося отваливаются рога. В лесу пусто, одни кабаны еще шастают. Звери оставляют на снегу следы - снежные записи для охотников. Талисманы декабря - бирюза и тюльпан. В декабре: Введение, Рожденственский (Филипповский) пост. О декабре в народе говорят: декабрь-стужайло на всю зиму землю студит. Декабрь год кончает, зиму начинает. Декабрь глаз снегами тешит, да ухо морозом рвет. Сухой декабрь - сухие весна и лето. Декабрь холодный, снежный, с частыми инеями и ветрами - к урожаю. 3. Фруктовые деревья Культуры Абрикос Айва Вишня Груша Рябина Слива Яблоня Положение Луны в знаках Зодиака Телец, Весы, Козерог Козерог Телец, Весы, Козерог Телец, Весы Телец, Весы, Козерог Телец, Весы Стрелец Наилучшая фаза Луны От первой до последней четверти От новолуния до полнолуния От первой до последней четверти То же От первой четверти до полнолуния От первой до третьей четверти То же Лучше всего сажать деревья от полнолуния до последней четверти. Не рекомендуется их сажать, когда растущая Луна (от новолуния до полнолуния) проходит водные знаки - Рак, Скорпион, Рыбы. Мульчировать лучше всего от последней четверти до новолуния под Близнецами, Львом и Девой. Подрезать рекомендуется от полнолуния до новолуния продуктивные знаки - Телец, Рак, Скорпион, Козерог, Рыбы, лучше всего - под Скорпионом. Прививать деревья нужно под растущей Луной (от новолуния до полнолуния) при Луне в Раке, Скорпионе, Козероге и Рыбах. Омолаживают старые деревья под убывающей Луной, лучше всего от полнолуния до последней четверти, когда Луна в знаке Скорпиона, Опрыскивание рекомендуется производить под Луной от последней четверти до новолуния в бесплодных и малоплодных знаках - Близнецах, Льве, Деве, Стрельце. Собирать плоды лучше всего при убывающей Луне в сухих знаках - Овне, Льве, Стрельце. Консервировать плоды - под Луной в раке, Скорпионе, Рыбах от полнолуния до новолуния, все же лучше ближе к новолунию. Такие вот приметы 1 декабря - каков день случится, такова и зима-зимица. 5 декабря - коли снег пал, то и след стал. 7 декабря - санницы, устанавливаются санные пути-дороги. 9 декабря - холодный, морозный Юрьев день. Коль тихо в колодце на дне - быть теплой зиме, а послышатся странные звуки - на холода и вьюги-злюки. 12 декабря - земля каменеет, речка стынет. Коль заснежит долы, то провьет еще семь дней. 13 декабря - наслушивают ночью воду в реках подо льдом. Коли не волнуется, тихая вода - будет ровная зима, а шумная вода - стужа да бураны. 17 декабря - зима мосты мостит, на следующий день мороз гвозди острит, а еще через день - прибивает. 19 декабря - сколько даст день снегу, столько 22 мая будет травы. 22 декабря - зима силу набирает, солнце на весну поворачивает. 25 декабря - если солнце светло, лучисто - новогодье жди морозным, ясным. 28 декабря - с солнцеворота метели должны брать разворот. 30 декабря - коли иней в этот день, тепло будет через неделю. Декабрю положено до четырех оттепелей. Гусь "Мартин" Традиционное новогоднее блюдо - жареный гусь. Я готовлю его по-своему и гостям очень нравится. Весь секрет - в начинке. Когда тушку опалю и выпотрошу, натираю мясо изнутри солью и черным перцем, даю постоять, а тем временем мелко рублю печень, желудок и сердце, перемешиваю с заранее замоченным черносливом, очищенными и нарезанными на четвертушки яблоками. Этой смесью фарширую гуся и обжариваю в духовке - можно завернуть в фольгу, а можно просто положить на противень и жарить, поливая гуся выделяющимся соком. Новогодний сюрприз У круглой спелой тыквы срезаем верхушку с хвостиком, столовой ложкой выбираем мякоть, а в серединку кладем начинку, ее готовим так. Мелко режем мясо (лучше всего свинину) и тушим на сковороде в растительном масле вместе с таким же количеством лука и натертой на терке крупной редькой. В конце тушения добавляем горсть толченых грецких орехов, соль, специи. Этой начинкой заполняем тыкву почти доверху, вливаем кофейную чашечку воды или бульона и закрываем срезанной "крышечкой", сделанной из верхушки. Смазываем верх тыквы растительным маслом и ставим в прогретую духовку на час-полтора. Когда духовка сильно раскалится, убавляем огонь и держим такой же жар до конца готовки. Если тыква приобретет темно-коричневый цвет, не беда, она не подгорела, а только подрумянилась! Готовую тыкву осторожно перекладываем на блюдо, обливаем ложкой спирта или коньяка и поджигаем. Вносим в комнату, где горят, как положено в новогодние праздники, только гирлянды на елке или свечи - эффект поразительный! А на вкус тыква - объедение. Те, кто не попадает молотком по шляпке гвоздя, кто способен перепутать шуруп и гайку, те, которые не отличают с виду рубанка от топора... - да пропустите вы, не читайте эту рубрику! Она - для остальных. Для тех, о ком говорят: МУЖИК В ДОМЕ Как сберечь нервы? В вашем доме скрипят двери... Вы, конечно, можете смазать петли какой угодно смазкой: вазелином, детским кремом, машинным маслом, кроме подсолнечного, конечно. Через неделю-другую оно высохнет и склеит полупетли в единую деталь. Есть другие способы, позволяющие избавиться от скрипа. Слегка приподнять дверь, подсунув под нее деревянный брусок, вложить между полупетлями кусок грифеля от карандаша и опустить дверь на место. Грифель раздавится и превратится в графитовую смазку. Но скрип исчезнет ненадолго... Более радикальный способ состоит в установке между полупетлями пластиковых шайб, вырезанных из поливинилхлорида или полиэтилена толщиной около полумиллиметра. Шайбы избавят вас от скрипа практически навсегда. И еще один способ. Снимите дверь с петель, немного спилите торчащие из них штыри-шарниры и вновь навесьте дверное полотно, подложив в каждый из шарниров по стальному шарику. Дверь в этом случае будет бесшумной. Представьте, сколько вы сэкономите своих нервов! Да будет свет! В вашей квартире люстры и выключатели соединены по трехпроводной схеме, позволяющей зажигать независимо друг от друга ту или другую секцию люстры, либо обе секции одновременно. Хотите расширить возможности этой схемы? Для этого вам понадобится трехклавишный выключатель и диод достаточно большой мощности. Установив диод на выключателе так, как показано на рисунке, получите следующие градации яркости (на примере пятирожковой люстры): две лампы в полнакала; две лампы ослепительно яркие; три лампы; пять ламп. Невидимый водопровод Водопроводы на дачных участках используются, как правило, лишь в теплое время года. Перед наступлением заморозков вода из труб тщательно сливается. Об этом знает любой дачник. Именно поэтому трубы для воды приходится располагать выше уровня земли - на козелках, отрезках бревен и т.п. Впрочем, если вместо стальных труб использовать пластиковый шланг, то можно соорудить и "невидимый" водопровод, проложив шланг в неглубоких траншеях. Конечно, вода в нем замерзнет, но льду зимой не удастся разорвать эластичный шланг. Весной же лед растает - и водопровод вновь готов снабжать вас водой. Тайна дверного замка Оставляя квартиру надолго "беспризорной", позаботьтесь о замках- секретах. Таким замком может стать и небольшой гвоздь, проходящий через дверную коробку, и отверстие, просверленное в языке замка. Секреткой могут быть и два винта, спрятанных под дерматиновой облицовкой двери, которыми дверь накрепко привинчивается к дверной коробке. В конце концов в качестве потайной защелки сгодится и длинный штифт с головкой от обойного гвоздя, вставляемый в дверь в том месте, где располагается рукоятка щеколды накладного замка. Ну и, разумеется, самым лучшим средством от домушников станет то, которое вы придумаете сами и никому о нем не расскажете... Кто там? Знакомая картина: ребенок уснул, и тут, как назло, звонят в дверь. Конечно, малыш проснется... А что если сделать звонок бесшумным? Это не так уж сложно. Нужно лишь на время сна ребенка включить вместо звонка электрическую лампу небольшой мощности. Проще всего сделать это, установив на стене розетку и снабдив вилками и звонок, и лампу. Но можно и предусмотреть в схеме переключатель и с его помощью коммутировать собранную цепь. Без мыла � не получится Завинтить шуруп в твердую древесину � дело непростое. Кто пробовал, тот знает. Но не многие знают, как облегчить эту работу. "Потенциальное" отверстие надо наколоть шилом, насыпать по краю мыльной крошки - и тогда... Тогда вам намного легче будет завинтить шуруп в твердую древесину. Любимая, тебя я увеличу! Фотолюбители чаще всего делают фотографии не слишком большого формата. Однако порой просто позарез нужно сделать отпечаток удачного портрета любимой или пейзажа увеличенного размера. Но не покупать же ради одного- двух снимков большие кюветы! Между тем временную емкость любого размера всегда можно сделать из куска полиэтиленовой пленки и четырех реек. Сделай "самогонный аппарат" Автолюбители знают, что доливать аккумуляторы обычной водопроводной водой категорически запрещается � так можно очень быстро вывести их из строя. Ну, а раздобыть дистиллированную воду подчас просто невозможно. Между тем существует весьма простой способ получения такой воды. Для этого потребу- ется всего лишь кусок чистой полиэтиленовой пленки, стеклянная банка и... углубление в земле. Приступаем к делу... Глубина ямы � около полуметра; на дне ее � стеклянная банка, сверху яма закрыта полиэтиленовой пленкой, прижатой по периферии колышками или камнями. В центре пленки, прямо над банкой, уложен небольшой камешек. Если день солнечный, "аппарат" тут же начнет выдавать дистиллированную воду. Комфортабельная яма Практически в каждом гараже автолюбителя есть так называемая "яма" � углубление в земле, позволяющее с некоторыми удобствами находиться под автомобилем для его осмотра или ремонта. Как правило, такую яму облицовывают кирпичом и керамической плиткой или бетонируют, а при необходимости гидроизолируют. Сегодня это не всем по карману, да и не спасает порой от грунтовых вод. Неплохой выход в такой ситуации � использование в качестве облицовки "ямы"... старой ванны. Ржавчине � бой! Коррозия всегда считалась врагом номер один для любого автомобиля. Несмотря на то что разработаны всевозможные гальванические покрытия, защитные мастики и механические средства борьбы со ржавчиной, коррозия может за считанные годы превратить кузов новенького автомобиля в ржавое решето. Некоторые зарубежные фирмы предлагают простое средство борьбы с этим бедствием, основанное на природе самой коррозии. Как известно, этот процесс представляет собой электрохимическую реакцию, в которой задействованы элементы с различными электродными потенциалами � для стальных сплавов это железо и входящий в сталь углерод. Так вот, если ввести в этот эле- ктрохимический процесс еще один металл с высоким электродным потенциалом, то реакция будет протекать с окислением и гидратацией именно этого металла, при этом ни железо, ни углерод подвергаться коррозии не будут. В деталях все выглядит даже проще, чем описание самого процесса. Приспособление, именуемое "протектором", представляет собой оребренный (для увеличения эффективной поверхности) кусок цинка величиной со спичечную коробку, к которому припаян кусок провода с клеммным наконечником. Цинковый протектор закрепляется в зоне, наиболее подверженной коррозии, с помощью капронового или полиэтиленового болта (здесь нужен чисто гальванический контакт), а клеммный наконечник надежно фиксируется болтом так, чтобы получился хороший электрический контакт. Вот, собственно, и все. Стоит влаге попасть между протектором и металлом кузова � начинается электрохимическое растворение протектора, при этом значительный участок кузова остается нетронутым ржавчиной. Гарнитур из гардероба Дочь недавно вышла замуж. Ну, а как мы привыкли снаряжать своих детей в самостоятельную жизнь? И посуду покупаем, и белье, и кой-какую мебелишку... У нас же такой возможности нет. А ребята получили комнату, которую, естественно, надо чем-то обставить. Вот я подумал-подумал, полистал журналы и нашел то, что нужно: из старого трехстворчатого гардероба сделал мебель для молодых. Решил рассказать об этом своем опыте читателям - вдруг кто-то и заинтересуется. Крышку письменно-обеденного стола я сделал из дверцы платяного шкафа. Один конец ее опирается на стальной уголок, который я укрепил на стене, а другой � на книжные полки. Их можно заменить на белье- вую секцию шкафа. Из двух гардеробных ящиков, установленных вплотную друг над другом, получился своеобразный подвесной комод. Из боковин гардероба я сделал стеллаж для книг, телевизора и магнитофона. Та сторона стеллажа, что примыкает к стене, крепится на стальном уголке. Подсмотрел одну идею и использовал: верхнюю полку подвесил на толстом канате (можно, если есть, и на цепи) � так интереснее. Тахту тоже сделал сам. По ширине она примерно с полуторную кровать или чуть поуже. Сначала сбил деревянный каркас (что-то вроде лавки), а жена из старых ватных матрасов сделала подушки и обтянула их яркими чехлами. Из оставшейся дверцы гардероба я выпилил столешницу для журнального столика. Подставку под него сбил из досок, которые обстрогал и покрыл лаком. Ребята остались довольны. Стены комнаты они украсили фотографиями своих кумиров, цветными календарями. Вполне приличная комната получилась, по- моему. ГОТОВИМ ВКУСНО И ПИТАТЕЛЬНО Воздушные пирожные "Я хотела бы испечь к маминому дню рождения безе, но не знаю, как его делать. Расскажите, пожалуйста, об этом". Для приготовления безе нужно сырые белки осторожно отделить от желтков. Поставьте белки на 6-8 часов в холодное место: охлажденные, они быстрее и легче взбиваются. Оставлять взбитыми белки нельзя, тогда они быстро осядут. Безе можно приготовить двумя способами: холодным и горячим. При горячем способе (для так называемого заварного безе) белки надо смешать с мелким сахарным песком в кастрюле и потом взбивать на легком огне до густой гладкой пены. При холодном способе белки сначала взбивают в густую пену, а затем, продолжая взбивать, прибавляют необходимое количество сахарной пудры или мелкого сахара. На железный лист, покрытый чистой бумагой, ложкой или с помощью кондитерского мешка разложите массу в виде различных фигурок. (В качестве кондитерского мешка можно использовать целлофановый пакет, отрезав у него уголок.) При обоих способах выпекайте безе в нежарком духовом шкафу при температуре 80-100 градусов. Когда образуется твердая корочка, оно легко снимается с бумаги. На 5 белков - 1 стакан сахарного песка или пудры. В безе можно добавить нарубленные поджаренные орехи. Готовят воздушные пирожные также с шоколадом и какао: к взбитой массе прибавьте 30-35 г тертого шоколада или одну столовую ложку порошка какао. Делают безе и с кремом. Ягодный крем можно приготовить из различных сиропов. На 1-2 столовые ложки густого сиропа (подойдет сироп и от варенья) положите один яичный белок и растирайте в фаянсовой миске или глубокой тарелке до тех пор, пока масса не побелеет и не станет густой. Для приготовления сливочного крема хорошо взбейте сливочное масло, затем влейте сгущенное молоко и вновь взбивайте. Для ароматизации добавьте 1/4 порошка ванилина или 2-3 чайные ложки ликера. На 200 г масла - 300 г сгущенного молока. Как приготовить садовый вар Садоводы-любители часто сетуют на отсутствие в продаже садового вара "Петролатума", который необходим для покрытия ран при обрезке и прививке. Между тем садовый вар можно приготовить по одному из следующих рецептов. 1. Канифоль, пчелиный воск, свиное несоленое сало или растительное масло берут в соотношении 1:1:1 (т.е. всего брать в одинаковом количестве). К полученной массе добавляют 10-12 % этилового спирта или денатурата. Этот вар можно использовать в любое время года без подогрева. 2. Пчелиный воск, канифоль, несоленое свиное сало и скипидар берутся в весовом соотношении 5:51:5, т.е. по 100 г воска, канифоли и скипидара и 20 г несоленого свиного сала. 3. Тавот (или несоленое сало), канифоль и воск в соотношении 1:1:1. 4. Канифоль, пчелиный клей, воск и скипидар в соотношении 6:2:3:3. 5. Канифоль, пчелиный воск и животный жир в соотношении 4:2:1. 6. Канифоль, воск, баранье сало и спирт в соотношении 8:4:2:1. Этот вар не твердеет и в прохладное время года. 7. Льняное масло, еловая смола, колесная мазь и скипидар в соотношении 2:1:5:0,5. Приготовление вара. На легком огне в открытой посуде растопите жир (сало), в него добавьте воск, потом канифоль. Когда смесь наполовину остынет, в нее согласно рецепту добавьте при тщательном перемешивании спирт, предварительно подогретый, и скипидар. Приготовленный вар храните в закрытой посуде. Если нет в наличии указанных компонентов, то для покрытия ран и прививок можно использовать детский пластилин. При обрезке для замазывания ран, особенно крупных, можно пользоваться любой густотертой краской, но обязательно на натуральной олифе. Для больших ран замазку приготавливают следующим образом: в равных объемных частях смешивают глину с коровяком, для связности массы добавляют очесы шерсти. Замазка дает хорошее заживление, так как коровяк содержит, стимулирующие рост вещества. Т.ТРОПОВА. Календарь работ Для декабря характерно от одной до пяти волн тепла и холода. При наступлении волн тепла средняя суточная температура воздуха доходит до плюс 5 градусов, а холода - до 30 градусов мороза. Теплое снежное одеяло надежно прикрыло от холода корневую систему плодовых деревьев, ягодных кустарников и зимующих многолетних овощных культур. По мере выпадения снега им надо подокучивать стволы плодовых деревьев, набросать дополнительно на земляничные плантации, ягодные кустарники. Во время "теплых" волн можно заготавливать черенки наиболее ценных сортов яблонь и других культур для использования их весной при прививке. Заготавливают черенки (лучше длиной 15-40 см) в первую очередь с груш и слив, которые в отличие от других плодовых пород легко подмерзают и впоследствии не годятся для прививки. В несуровые зимы работу можно проводить и с конца февраля по первую половину марта. Этих сроков в основном и придерживаются при заготовке черенков яблони. Срезанные побеги связывают по несколько штук и прикрепляют к ним металлическую или целлулоидную этикетку с названием сорта. Этикетка прикрепляется обязательно проволочкой. Черенки заворачивают в мешковину, затем в металлическую сетку с мелкими ячейками (для предохранения от мышей), кладут на расчищенную от снега площадку, закрывают снегом и уплотняют его. Место для хранения лучше выбирать с северной стороны какого-либо строения. Плодовые деревья и кустарники, сбросившие листву, находятся сейчас в фазе относительно глубокого естественного покоя. Рекомендуем внимательно осмотреть каждое дерево и, если вы этого еще не сделали, снять с них и уничтожить зимние гнезда вредителей. Как их обнаружить? Два-три усохших листочка, скрепленных паутинкой, подвешенных к веточке и раскачивающихся на ветру, как маятник часов, - это гнездо боярышницы. Гнезда златогузки ютятся в большем количестве листочков, также запутанных паутиной. Яйца кольчатого шелкопряда располагаются на веточке матово-серебристым чеканным браслетом. Для снятия гнезд используют ручные, воздушные секаторы, щетки. Время для учебы В нашей республике пока снега мало. На юге идут дожди, налетают шквалистые ветры. В садах - малолюдно. Только те, кто недавно начал осваивать участки, проводят здесь "уик-энд": много работы по строительству. Народ в основном копошится в домиках: кто докладывает печь, кто стелет полы, заканчивает потолки. А работы на участке остались только у тех, кто был занят в более благоприятную пору или не успел вовремя. Снег, выпадающий в декабре, украшает сад и добавляет забот. При обильном снегопаде возможны разломы развилок ветвей. Если снег мокрый, налипающий, обязательно, преодолев трудности зимнего транспортного сообщения, побывайте на участке. Обмотав шест тряпкой, а еще лучше, набив на его конец резину, стряхните с веток белый груз. Переобувшись в резиновые сапоги, которые, конечно же, у вас есть в садовом домике, утаптывайте снег вокруг стволов деревьев: мышка не подберется к стволам и корням. Удобно обихаживать карлики: деревца небольшие, с компактными кронами, ко всем веткам надежный доступ. Зима, межсезонье - время учебы. Обдумывается собственный опыт, достижения, ошибки и просчеты, намечаются планы на весну. Чтение специальной литературы, встречи с коллегами в клубах, на выставках, организуемых советами садоводов, способствуют накоплению знаний - богатству, которое в практике садовода-любителя не будет лежать мертвым грузом. Если самому не пригодится, - поделишься с соседом. Стоит заглядывать и в специализированные магазины, в киоски, где продаются семена. Ближе к весне там обычно бывают длинные очереди. А расчетливый хозяин делает все загодя. Это касается закупок инвентарая, удобрений, ремонта и наточки инструмента, завоза на участок недостающих материалов: зимой спадает поток покупателей в магазинах-складах, меньше заказчиков в трансагентствах. Особая статья забот для тех, кто хранит плоды прошлого урожая в подвалах. Яблоки и груши зимних сортов, заложенные на хранение, надо периодически проверять, выбирать созревшие для использования в семье или для реализации, отсортировывать загнивающие, проветривать помещение, регулируя температуру и влажность. Подкармливание птиц снежной зимой - дело гуманное. Кормушки в саду - не только свидетельство любви к живой природе, но и заботы о будущем урожае. Катится месяц к самому короткому дню: пора уже думать о новогодней елке. От Нового года пойдет отсчет на недели: в конце февраля - начале марта начинается высев семян на рассаду (землю, конечно, вы уже завезли и храните в сарае или на балконе), а там - 5-6 недель и тепло. Юрттэлэ пимес утчаны Гажано эшъёс! Тӥледлы вазисько Кизнер ёросысь Вылӥ Тыжма гуртын улӥсь кузпалъёс Раиса Фёдоровна но Андрей Иосифович Киселёвъёс. Вазиськонмылэн мугез таӵе. Туэ 1-тӥ ноябре кошкиз но ӧз берытскы ни пимы Сергей. Вордскемын 1962-тӥ арын, висе шизофрениен. Сое быдэс гурт калыкен но утчамы ни, матысь гуртъёсы но вуылӥмы. Кӧня ке пол вазиськылӥм милицие но. Нош пимы сярысь номыр тодмо ӧвӧл. Нырысь-валысь пытьыез Саркуз станция пала нуэ вал. Со гуртмылы 10 иськемын. Пимы, оло, поездэ пуксьыса, Ижевск пала кошкыны малпа вал. Нош сюрес вылын сое вагонысь васькытыны быгатозы. Уго солэн копейка коньдонэз но, документъёсыз но, сиёнэз но ӧй вал. Тодметъёсыз таӵеесь. Йыраз сьӧд изьы, вылаз мамыклэсь пеймыт-лызо-пурысялэс куртка, вакчи замокен лыз кофта. Брюкиез сьӧд. Пыдъёсаз резинкалэсь ужан сапегъёс, соос пӧртэмесь. Нуллэ сьӧд оправаен очки. Мугорызлэн бур палаз пичи мыжык быдӟа пыктосэз вань. Пимы сярысь маке тодӥды ке, жингыртэ Ижевскысь 21-45-38 телефонъя. Киселёвъёс. Йӧл шуръёс но кисель ярдуръёс Валлян арын гинэ ай хозяйство 538 сюрс манетлы изъян адӟиз. Но нокин но ӧз куалекты: уже понэм уксё берытскыны кулэ. Озьы ик луиз. Кылем арын кык миллионлэсь ятыр барыш поттӥзы ни. Малпало, сомындагес ик луоз туэ но. Со пӧлысь бадӟым люкетэз поттэмын йӧллэсь. Зэм, солы дунъёс пичиесь (али 3 манет 80 копейкаен вузало), но выль моньяос куатаськыса уг уло: со но ке ӧз луы, маин улод? Хозяйствоын 280 кысконо скал. Одӥг скаллэсь 11,8 килограмм йӧл басьто. Сепаратор пыр поттэм нап йӧлэз мыло-кыдо басьто "Можгасыр" но Яжбахтиноысь йӧл завод. Но "родинаос" уг буйгало. Соос ялан тыршо эшшо тросгес сӥль-йӧл поттыны: ошпи куайытыны коргид пукто, скалъёссэс сьӧд-куӵо выжылы выльдыса уллёзэс будэтыны малпало. Племенной выжыен ужам уго хозяйствое ӟеч пайда пыртэ: тросгес йӧл потэ, таза кунян вордӥське, басьтӥсь но утчатэк шед. Но скалэд коть аслэсьтыз инмарлэсь мед луоз, ӟеч утялтӥсь ке ӧз луы, йӧлзэ уд адӟы. Тыршись нылкышноослы луыса татын вормонъёс басьто туннэ но. Котьку адӟем карымон тыршо кык сузэръёс Тамара Ясоновна Семенова но Любовь Ясоновна Иванова. Скал кыскисьлэн ужез гуртын тужгес секытэз, дыр. Соос тол но, гужем но ялан огвыллем ужез быдэсъяло. Но та кышномуртъёс огпол но уг ӝожтӥсько, нуналмысь ужзэс ӟеч быдэсъяны тыршо. - Ми соос понна ноку но ум сюлмаськиське, котькыӵе ужез оскы, одно быдэстозы, - шуэ председатель Семен Никонорович Федоров. - Таӵе ужасьёслы луыса азинске хозяйство, адямиос дырыз дыръя уждун басьто. "Родина" СПК-лэн кивалтӥсез, Удмурт Республикаысь гурт удысысь сӥё-дано ужась Семен Никонорович Федоров. Тамара Ясонова Семеновна - азьмынӥсь доярка. Али Никонор Николаевич шутэтске, но чидатэк возьма ни тулысэз, соку со нош потоз колхоз бусые. Агроном, УР-ысь гурт удысысь сӥё-дано ужась Галина Евдокимовна Егорова. ПРАВИТЕЛЬСТВОЫН Йылаз-пумаз вуттэмын Удмурт Республикаысь Правительстволэн кенешаз йылаз-пумаз вуттэмын вуоно арлы бюджетлэн инъетэз. Со эскеремын луоз Кун Кенешлэн 14-тӥ сессияз. Коньдон ужпумъёсъя министрлэсь ужзэ быдэсъясьлэн Владимир Бельтюковлэн ивортэмезъя, выт чотын ватсаса вуэм коньдон луонлык кылдытӥз бюджетлэсь доход люкетсэ 1 миллиард манетлы йылэтыны. Бюджетын тросгес коньдон висъяны чакламын улон- вылон удыслы, улосвылъёслэсь коньдон фондзэс будэтонлы. Республикалэн 2001-тӥ арлы бюджетэзлэн доход люкетаз чаклфмын 4092632 сюрс манет, расход люкетаз - 4328977 сюрс манет коньдон. Кенешын озьы ик эскеремын республикалэсь улон-вылон но экономика удысъёссэ 2001-тӥ арын азинтонъя программалэн инъетэз. Соин тодматӥз экономикая министрлэн воштӥсез Валерий Захваткин. Тырондэ тыр дыраз Правительстволэн Тӧроез Юрий Питкевич ортчытӥз министерствоослэн но ведомствоослэн кивалтӥсьёсынызы кенеш. Солэн валтӥсь ужпумез вал бюджетэ выт чотын коньдон пыртон, Россиысь Экономикая министерствоен федеральной бюджетэ выт тыронъя кусыпъёс тупатон. Ижысь администрацилы юрттоно электрокужымез шыръянъя ужрадъёс ортчытыны чаклам 25 миллион долларез басьтыны. Эстӥськонъя, электрокужымъя но связья министерствоез шараяны косэмын "Сиданко" компанилэсь ноябрь понна выт тырымтэезлэсь мугзэ, ужрадъёс кутоно, декабрь понна тыронъёсты 20 числоозь берыктон понна. Ӝоген Выль ар Соин ик кенешын одӥгез ужпум сӥземын вал Выль арлы дасяськонлы. Калыкез дышетонъя министрлэн Любовь Захаровалэн, культурая министрлэн Николай Бессогоновлэн, социальной страхованиея фондлэн директорезлэн Иван Морозовлэн верамзыя, Выль ар праздниклы дасяськон но пиналъёслэсь шутэтсконзэс радъян ужъёс чаклам планъя мыно. Туэ нырысьсэ луоз Президентэн радъям ёлка, озьы ик нимысьтыз ёлкаос ортчозы национальной школаосын дышетскисьёс но анай-атайтэк кылем нылпиос понна, чакламын олимпиадаос но спортъя пӧртэм ӵошатсконъёс. Та ужрадъёслы висъямын куинь миллион манет коньдон. Котьку сямен, нылпиос басьтозы выль ар кузьымъёс. Ужась мумы-бубыослэн нылпиоссылы кузьымлы висъямын 24372 сюрс манет коньдон. Озьы ик коньдон шедьтэмын луоз ужасьтэм анай-атайёслэн но студентъёслэн пиналъёссылы кузьымъёс басьтыны. Удмурт Республикаысь Правительстволэн пресс-службаез. Гурт улон Выжызы - вуж, улонзы - выль Мыння выжыос пумиськыло шаерысьтымы тросаз районъёсын. Но ваньмыз соос выжыенызы Пичи Пурга котырысь. Али татын кык Монья - Вуж но Выль. Калык веранъёсъя, "выльёс", 300-400 ар талэсь азьло люкиськыса, Бугрыш шур дуре интыяськиллям. Мынняос котьку но ужась сямынызы висъяськылӥллям, нянь будэтылӥллям, пӧйшураллям, пудо вордӥллям, визьмо, кужмо нылпи будэтылӥллям. Данъяськиськом, газетмылэн азьвыл редакторез, журналист Василий Михайлович Михайлов ӵапак Выль Моньялан вордӥськемын шуыса. Озьы ик та гуртысь потэмын дано юрист Анатолий Чернов, военной подполковник Николай Федоров но трос мукет тодмо адямиос. Колхоз татын кылдӥз 30-тӥ аръёсы. Выль Моньяез огазеязы Улын но Шорын Юриен. Нош 1990-тӥ арын моньяос, Киров нимо колхозлэсь люкиськыса, "Родина" СПК кылдытӥзы. Калыкын люкиськон шоры умой ик уг учко, но моньяослэн ӟеч улонзы ӵапак люкиськемзы бӧрсьы кутскиз. Бадӟым колхозын соос кыкетӥ бригадаен лыдъяськылӥзы. Ӵемысь кыкетӥ чотын ик возьылӥзы: не сюрес, не газ. Пуктӥськылӥзы но шор усадьбаынгес. Моньяослэн кӧтсы ӝож луылӥз - ужаськом ӟечгес, улӥськом уродгес. Малпан кылдӥз нимазъяськыса ужаны эскерыны. Кооператив амалэн ужамез учкыны ветлӥзы Смолнск улосвылэ. Кельшиз, асьсэ дорын эскерыны малпазы. Кивалтӥсь утчано ӧз луы - со вӧзазы вал. Бригадирын ужакуз ассэ умой ласянь гинэ возьматӥз Семен Никонорович Федоров. Вылаз ик ас гуртысьтызы, солэсь ӟеч кинэ шедьтод на? Ӧз янгышалэ, туннэ Семен Никоноровичлэн кивалтэмез улсын хозяйство будэ, паськыта, гурт сяськая. Выль Моньялэн нимыз чузъяськыны кутскиз быдэс республикаямы. Колхозъёс пӧлысь туэ соос тужгес трос ю тысь басьтӥзы - гектарысьтыз 29,6 центнер люкаськиз. Азьпалтӥз Асан совхоз-техникумысь опытной хозяйство гинэ. Мукет удысъёсын но монняос адӟем карымонэсь. Адямилэн чеберез Дышем сямъя контораез утчаса, ми гурт шоры кожим, но солы тупась юртэз синйылтытэк адямиослэсь юатэк ӧйлась. - А соос ваньмыз пӧлын. Ваньмыз пӧлын - со гараж, пудо коллектив котырын вылэм). Паймымон, таӵезэ ӵем уд пумита. - Милям кытчы ке палэнэ контора пуктыны малпанмы ик ӧй вал, - валэктэ председатеь. - Татын ваньмыз син азьын ук, маке кулэ ке - пот но тод-кар. Еош одӥгез нылкышно серекъяз на: уж дуре контора пыр мыноно бере, амалтэк, пе, кырыжез но шонер ортчоз. Кырыж ветлӥсьёсты бен татысь уд пумита: дисциплина сое радъян бордысен кивалтыны кутскиз Семен Никонорович. Еэн ӧз жугы, пряникен сюдӥз. Устооссэ, шуисько. Ужад синмаськымон - басьты уждун но, ю тысь но, мукетсэ но. Озьы колхозникъёс огзыя огзы кыстӥськизы. Табере кыӵе ке валантэм муген ужез келлянъёс, ӝеганъёс сярысь вераськисез ик ӧвӧл. 7 часын ӵукна - разнарядка. Зэм, косъяськон интые кенешо. Председатель ноку но уг индылы специалистъёссэ. Соослы быдэсак эрик сётэ, оске. Нош специалистъёсыз осконзэ быдэсто. Тани мукет хозяйствоос кык нунал кизё ни, нош "родинаос" ӧз кутскылэ на. Кожаськоды, со агрономзэ "сиёз"? Уз. Тодэ уго - агрономез аслэсьтыз ужзэ ӟеч вала. Яке зоотехник парсьёслэсь йырзэс будэтыны ӵектэ. Ваньмыз тодо, парсьёс али хозяйстволы пайда уггес ваё, но нокин но пумитъяськыны уг дырты, оскалтом, шуо. Туннэ ке пайда ӧжыт, ӵуказе трос луоз. Малпан зэма. Туннэ "Родинаын" 900 йыр племенной парсь вордо. Выжызэс уськытон понна ветло ни палэнысь но. Ми вуылон нуналэ 1 айы парсьсэс келязы Татарстанэ. Парсь сюдӥсьёслэн мылкыдзы умой. Араз одӥг мумы парсьлэсь дас тямыс парсьпи басьто, привессы но ӟеч гинэ луэ: мумы бордын - 100 грамм, куайытонын - 400 грамм. Кивалтӥсь туж данъяське ужасьёсыныз. Мария Ивановна Григорьева, Людмила Петровна Александрова но Августа Ивановна Федорова котькинлы адӟем карымон тыршо. Секыт ужзылы соос ноку но уг ӝожтӥсько. тани Мария Ивановна бордаз нылзэ но кыскиз ни. Егитъёс гуртысь азьвыл кошко ке вал, али татчы ик выжы лэзё. Шуд пӧлысь шуд уг утчало уго. Мыло-кыдоез уж но шедьтэ, корка но ӝутэ. Сюрес карта кадь, газ - коркан. Талэсь ӟеч улонэз кытысь шедьтод на? Татын ӧвӧл колхоз квартираос, но котькудӥзлы колхозниклы пал кыл вератэк юртто: ӝыны дунын лэсьтӥськон материал сёто, транспорт висъяло. Туэ тани куинь семья выль корка пыроз Колхоз кузё шумпотэ гуртэзлэн будэмезлы. Но соин валче йылэ сюлмаськон но. Гуртысь вуж школа юртын 43 покчиос дышетско. Районысь одӥг пичи школаын но сомында дышетскисез ӧвӧл. Нош матысь аръёсы Выль Моньялан покчиослэн лыдзы йылыны кулэ. Тани али но сизьымез нылкышнооссы декретын. Куд-огез дӥсьто ни куинетӥзэ пинал вайыны. Иське, улон тупатске, умоезлы оскон кылдэ? Кызьы со осконзэс чигтод? Уг яра. Председатель, ёрос кенешлэн депутатэз, амал утча, пӧртэм кивалтӥсьёс дортӥ бызьылэ. Али, конечно, ваньмыз бумага вылын ай, но Семен Никонорович оске: куинь-ньыль ар ортчыса гуртын 130 пиналлы выль школа-сад луоз! Вӧзаз лэсьтозы стадион, тымозы Скал шурзэс. Мед луоз со гуртысь тужгес шулдыр инты, мед быгатозы отын пайдаё шутэтскыны пиналъёс но, мӧйыос но. Малы кулэ кадь колхозэн кивалтӥсезлы вылаз сомында сюлмаськон басьтыны? Мукетъёсыз тани колхоззэс сяна номыре уг но адӟо, адӟемзы но уг поты, мар веранэз на покчиос но мӧйыос сярысь. Но семен Никонорович мукет сямен малпаське. - Пиналъёс - со асьмелэн кивоштӥсьёсмы ук. Соос азинтозы милесьтым мытэм ужмес. Чебертозы, данъялозы Выль Моньямес. Нош пересьёсты палэнтон - со сьӧлык. Кызьы уд гажа быдэс улонзэс милемлы, пиналъёссылы, но ужлы сӥзем муртъёсты? Тани араз огпол гинэ мӧйыос асьсэлэсь праздниксэс пусъё, жаль-а, мар-а соосты одӥг ӝӧк сьӧры люканы, ӟеч кыл вераны яке маин ке юрттыны. Соослы пӧртэмез ӧвӧл, кин пу вайыны кулэ: сельсовет-а, колхоз-а. Кудӥз матын, отчы ик лыкто. Ма бен нош пунэме уг кылё, быгатӥсез гужем зернотокын но ужа, кушман но будэтэ. Тазэ колхоз котькуд мылкыд карись семьялы висъя. Гужем ӵоже соос кӧня ке чур кушманэз утялто, уро, шерато, нош сӥзьыл одӥг центнер кушман понна тямыс килограмм чабей басьто. Шоро-куспо лыдпус куинь центнер пала люкаське. Кӧня луэ сое пызен вераса? Мынам чотамея, ньыль мешоклэсь трос. Озьы мешок чабей пызь моньяослы 175 мане котыр усе. Кӧня сукыри нянь солэсь пыжоды, асьтэос тодӥськоды, луоз. Но гуртын 156 гинэ кохозник. Соос но пенсионеръёс сяна, вань на мукетъёсыз. Дунтэм чабей нянь сиемзы нош потэ ваньмызлэн. Председатель ужасьёсыныз кенешыса малпаз нокинэ но люкытэк. Озьы туэ ваньмызлы ӝыны манетэн ю тысь сётӥзы. - Туж шумпотӥм, возьмамтэ шорысь луиз, - шуо татысь дышетӥсьёс. Кызьы тау карыны но уд вала, ӟеч ужзы нянь шореммылы быдэ тодэ лыктэ. - Учыр тупаку верало ай, - азинтэ Галина Никоноровна Александрова. - Одӥг пол но юрттэт куремлы "уг" уг шуы председательмы. Тазалык синмаськымон ӧвӧл ини бере, ӵем Пургала больницае ветлоно луэ. Кӧня меда сюрес вылын курадӟысал, колхоз машина ке ӧй висъясал. Капка азьысен больницаозь вутто, отын возьмаса уло. Сыӵе валась адямиос али ӧжыт. Лумбыт ӵоже Выль Моньялась трос калыкен пумиськылӥм. Одӥгезлэсь но ӧм кылэ кивалтӥсьёссы сярысь урод кыл верамзэс. Со понна ваньмыз тау каро, син уськытэмлэсь кышкаса паллян пала сяласько. Председательмы, пе, чырткем пияш, шуо арлыдоос. Тэльбугозэ возьыны тазалык мед луоз. Солы луыса баринъёс кадь пукиськом, пу дасяммес вунэтӥм ни. Но тужгес дунъяло вылэм солэсь адямилыко, вылтӥяськисьтэм луэмзэ. Дышем сямъя, пе, Сеня гинэ но шуыны шедьтӥсько но, уг йыркуръяськы, ортчыкуз ӟечъяськытэк, юалляськытэк ноку уз кошкы, - вера Людмила Александрова. Сыӵе сямзэ ик зэматэ, дыр, кузпалэзлэн, Тамаралэн но ужез. Мукетыз кышнозэ дораз пукетысал яке одно контора котыре интыясал ни, нош со ваньмыныз огкадь кунян сюдэ. Выль Моньяла вуылӥм вал нырысьсэ ӟырт кезьыт кариськыку. Семен Никонорович дасяськиз отпуске. Арня-кык ке но, пе, нюлэскы потало, пӧйшурало. - Гужем шутэтскыны уг кельшы шат? - тунсыкъяськи мон. - Колхоз кивалтӥсь гужем шутэтске ке - со преступление, - вакчияк вераз со. (Бӧрысь сыӵе юан сётэмысьтым аслым туж возьыт потӥз). Зинаида Рябинина. Владимир Беломорских (фото). Никонор но Никонорович Туж тунсыко потӥз мыным тани ма: Выль Моньялан данак Никоноръёссы но Никоноровичъёссы. Асьсэос та пумысен мар вераны уг валало, но ваньмыз тодо: Никоноръёс но Никоноровичъёс - сюлмо адямиос. Пиналысен тракторен ужало Никонор Николаевич Михайлов но Владимир Никонорович Егоров. Кыксы ик азьветлӥсьёс. Туж шуныт вера соос сярысь СПК-лэн кивалтӥсез Семен Никонорович Федоров (ӵыжы-выжыос ӧвӧл), сётом солы кыл: - Куд-огезлэн, оло, вожез но потэ, котькуд выступлениям та механизаторъёсты ушъясько шуыса. Но кызьы уд вера, куке тани Владимир Никонорович одӥг тракторен ӝыны мусомес (450 гектар) гырыны быгатэ! Куддыр сыӵе малпанэ но вуиськод: оло, хозяйство кык рос-прос трактористэн но улыны быгатоз? Ӟеч кылъёс гинэ верам потэ Никонор Николаевич сярысь но. Со милям устоез комбайнер. Егитъёс ӟеч азинсконъёс басьто ни тани. Огвакыт Николаевичмы кышноеныз ӵош но араз. Анна Лаврентьевна комбайнёрлэн юрттӥсез вал. Со аре соос нырысетӥ интые потӥзы. Комбайнерлэн ӟеч ужамез пусъемын Данъян грамотаосын, Ужысь Слава орденэн. Ачиз Никонор Николаевич ужзэ космонавтлэнэн ӵошатэ. Соиз зэм - кужымтэк, тазалыктэк бусыын номыр карыны. Нош кӧня кило тузон сиемын ньыльдоно ар ӵоже? Никонор Николаевичлы 60 арес ӧвӧл ай, но колхоз сое толлы пенсие келяз. - Ӟеч муртлы ӟеч уж лэсьтэм потэ, соин ик арлыдо адямиослы сыӵе луонлык сётӥськом, - валэктэ председатель. - Усто ужад - шутэтскы. Со кузь отпуск выллем луэ, колхоз ужамтэ дыръяз но коньдон тыре. Нош тулыс адями выль кужымен ужаны потэ. Малы сыӵе малпанэ вуим? Воргоронъёслэн тазалыксы сярысь сюлмаськыса. Соос пӧлын туж ӧжыт кема улӥсьёс. Потэ вылэм, асьсэды ужлы сӥзем муртъёс кема но шудо мед улозы шуыса. КИЧӦЛТОН Нырысетӥез огкыл гожтэмын гурт но город ёросъёс куспын Удмурт драмтеатрын радъям "Шаркан ӝыт" сярысь газетамы ивортӥм ни вал. Таиз ужрад нырысетӥез ӧй вал ни. Таӵе ӝытъёс ортчытъянлы кутскон сётэмын вить ар талэсь азьло. Ӵапак соку ик Ижевскын кылдытэмын вал шаркан музъем вылысь потэмъёслэн "Каргурезь" землячествозы. Тӥни со ик радъялляз гуртын но городын улӥсьёслэсь таӵе шулдыр пумиськонъёссэс. Нош таяз учыре, та ӝыт сярысь гинэ вераса, син азе сюбеггес суред пуксьысал. Туэез "шаркан ужрад" выль сямен малпамын вал угось. Нимаськиз но со Шаркан ёрослэн Ижевскын нуналъёсыз шуыса. Талы дасяськон азьвылгес кутскиз. Шаркан но Ижевскысь Октябрь ёросъёсысь администрациос малпазы куспазы уртче ужан сярысь огкыл гожтыны. Со понна ог-огеныд ӟечгес тодматскыны, астэ возьматыны но мукетсэ учкыны кулэ. Дасямын вал кык арнялы пала чаклам трос пӧртэм ужрадъёсын план. Кӧня ке нунал ӵоже мынӥз гурт удысын, муш вордонын, куиськон фабрикаын лэсьтэм вузъёсын вузкарон. Кык ёросъёслэн администрациоссы кужымзэс мертазы волейболъя эшлыко пумиськонын. Шарканысь искусствоосъя нылпи школаын ужасьёс тодматскизы Ижевскысь искусствоосъя 4 номеро школаен, гурт ёросысь тазалыкез утён удысын тыршисьёс пумиськылӥзы городысь эшъёсынызы, озьы ик чакламын вал культурая мукет ужрадъёс. Тунсыко ортчиз Шаркан ёросысь кивалтӥсьёслэн Гурт удысъя академиысь но Удмурт кун университетысь студентъёсын но дышетӥсьёсын пумиськонзы. Нош та нуналъёс ӵоже ужамлы йылпумъян луиз, шуыны луоз, гуртысь но городысь кык ёросъёс куспын уртче ужан сярысь вить арлы огкыл гожтон. Администрациосысь огкадесь ужпумъёсты быдэсъясь отделъёс уртче ужанъя огъя планъёс дасязы. Тӥни озьы, Шаркан но Октябрь ёросъёс куспазы юнгес эшъяськыны но нимысьтыз огкылъя уртче ужаны мылкыд каризы. Таӵеез элькунамы та дырозь ӧй вал на ай. Нош малы шарканъёс одно ик Ижевскысь Октябрь ёросэз бырйиллям? Та юанлы валэктыны кури Шаркан ёрос администрацилэсь кивалтӥсьсэ А. А. Прохоровез. - Малы Октябрь ёросэз бырйим? Милям малпаммыя, та ёрос кужмо аслаз интеллигенциеныз. Татын кык академиос ужало, гурт удысъя но медициная, татын ик техникая университет. Соос кадръёсты, специалистъёсты дасясь кебит чотын луо. Собере, кызьы милемлы тодмо, Октябрь ёросысь школаосын дышетон удыс но мукетъёсаз сярысь, быдэс йырлы вылынгес. Татын тырмыт больницаос, культура учреждениос. Со сяна, та ёросын ик интыяськемын та вакытэ тужгес но ӟеч ужасьёсыз валтӥсь предприятиос - электромеханикая "Купол" завод но "Аксион-холдинг". Тӥни соос но милемлы бадӟым юрттэт сётыны быгатозы. Малпанмы вань, азьвыл аръёсы сямен ик шефствоез улӟытыны. Гожтэм огкыламы пусъемын экономикаез но социальной удысэз азинтонъя трос пӧртэм ужпумъёс. Собере палэнэ кельтыны уг луы огъя кивалтон удысэз. Шуом, гурт администрацилэн ужаз аслаз аспӧртэмлыкъёсыз, городысезлэн - аслаз. Нош адӟем карымонзэ асэстыны луоноез трос. - Гожтэм огкылды вить арлы чакламын. Нош сое быдэсъян амалъёс пумысен ма верасалды? - Вань чалкаммес радъян-быдэсъян понна кылдытэмын луоз нимысьтыз группа. Со ик ваньзэ син азяз возёз. Та группа ик юнматъялоз пӧртэм удысъёсъя ужан огъя планъёсмес. - Александр Аркадьевич, тани Ижевскын кылдытэмын шаркан выжыослэн землячествозы. Соин кусыпъёстэс но юнматыны малпаськоды, дыр... - Одно ик. Матысь дыре люкалом со землячествомылэсь но кенешсэ. Кенешом, малпаськом но ӵош, огкылысь ужанъя ужрадъёс чаклалом. Гуртоос но городын улӥсьёс ог- огмес валаны быгатом. Шарканъёс городын улӥсьёслы умой возьматӥзы ужаны но, шулдыръяськыны но быгатэмзэс. Но таин шаркан ёрослэн Ижевскын нуналъёсыз ӧз йылпумъяське на. Ортчытыны чакламын на Октябрь ёросысь "Ветеран" клублэсь кенешсэ. Гуртысь творческой коллективъёс отын концерт возьматозы. Нош туннэ Октябрь но Шаркан ёросъёсысь администрациосын ужасьёс кужымзэс мерталозы на ӝӧк выл теннисъя турнирын. Ӝытазе шарканъёслэн городысь "Каргурезь" нимо землячествозылэн активез люкаськоз. Мар бен, табере гуртоослэн но городъёслэн куспазы гожтэм огкылзы огкылысь мед быдэсъяськоз. Шарканъёслэн та кичӧлтонзы, оло, мукет ёросъёслы но пыӵалоз. Ф. НИКИТИН. ШАХМАТ Удмуртилэн данэз понна Дас нунал ӵоже мынӥз "Ижпланета" клубын воргоронъёслэн но нылкышноослэн Удмуртиын шахматэн шудонъя вормись луон понна нюръяськонзы. Нылъёс пӧлын 15-ез вал Ижевскысь спортсменкаос. Удмуртилэн туэ понна чемпионэз кыкетӥ луиз Удмурт университетын дышетскись Светлана Дерябина (нырысетӥ разряд). Нош Удмуртиын нырысетӥ интыос понна нюръяськизы Ижевскысь Сарапулысь, Глазовысь, Можгаысь, Камбаркаысь но куд-ог ёросъёсысь 90 воргоронъёс. Соос пӧлын вал спортъя 5 мастер, спортъя мастере 10 кандидат. Выльысь Удмуртилэн чемпионэз луиз Ижевскысь электромеханикая заводысь экономист, мастере кандидат максим Озолин. Со 11 луоноез пӧлысь 9 очкоен котькинлэсь азьпала потӥз. Солэсь ӝыны очколы гинэ бере кылиз Удмуртиысь спортъя мастер Владимир Гребёнкин. И. ВЕЛЬТМАНДЕР. Бере кылид - дырты Удмурт Республикаысь Калыкез улон-вылонын утёнъя министерство предприятиослэн кивалтӥсьёссылы тодазы вайытэ: йылпумъяське толэзьлы быдэ сётӥськись нылпи пособие тырон 1997-тӥ ар понна быдэс республикая, нош 1998-тӥ арлэн нырысетӥ ӝыныезлы - Ижевск но Глазов городъёсъя. Нылпи пособие басьтонэн пунэм кылем предприятиослэн кивалтӥсьёссы таяз арын 10-тӥ декабрёзь вазиськон гожтыны кулэ республикаысьтыны Калыкез улон-вылонын утёнъя министерствое таӵе адресъя: 426056, Ижевск город, Ломоносов урам, 5-тӥ юрт, 309-тӥ кабинет. Юанъёсын вазиськоно таӵе телефонъя: 75-72- 59. М. ЗАКИРЬЯНОВА. Шудэз солэн - учкисьёс Кыдёкысь уйпалан, Яр ёросын, витьтон ар талэсь азьвыл вордӥськиз шаерысьтымы калык артистка Галина Михайловна Владыкина. Москваысь Б.В.Щукин нимо Вылӥ театр училищеез йылпумъяса, дорамы берытскиз но Драмая удмурт кун театрын ужаны кутскиз. Со дырысен кызь сизьым ар ортчиз ини. Аслыз но артисткалы витьтон арес таяз аре шуккиз. Калыкын верамзыя, улонэзлэн шор гожез вуиз. Тырмыт визь, тодон-валан люкамын ини, уно иськемъёс ортчемын. Нош азьпалан эшшо но трос ужъёс витё на. Кыӵе гинэ спектакльёсын кинэ гинэ ӧз ни возьматы Галина Михайловна Владыкина! Лыдъяно ке, сюлэсь ятыр луоз. Нош 30-тӥ ноябре ортчем бенефисаз со "Сельсовет Маня" нимо комедиын ассэ валтӥсь героиняез шудӥз. Мар шуод, яратэ учкись артисткалэсь котькуд выль рользэ. Галина Михайловналэн ӝытаз театр тыр калык люкаськылӥз. Меӵак верано ке, ньыль арескысен сизьымдон аресозь. Кужмо кичабонъёс, шуныт кылъёс, ӟечкыланъёс - ваньмыз та ӝытэ уйпалан вордӥськем актрисамы понна вал. Вераськизы ӵош дышетскем эшъёсыз, яр палъёсыз, "Егит адями" театрын ужасьёс, Драмая удмурт кун театрлэн кивалтӥсез Анатолий Митрофанов но мукетъёсыз. Тужгес но интыяз луизы, дыр, яр музъем вылысь одӥгезлэн кышномуртлэн кылъёсыз: "Галина Владыкина - чылкыт ошмесысь пазьгиськем огез шапык. Сое шунды ӧз куасьты. Со, кизилилы пӧрмыса, инме ӝутскиз. Но пилемъёс сьӧры ӧз ватскы, котьку но калыклэн син азяз пиштэ". Трос калык пӧлын актрисалэн анаез но пукиз. Учкисьёс кужмо кичабонъёсын пумитазы сое. Озьы адямиос йыбырттӥзы Лиза апайлы, шаермылы таӵе усто актрисаез кузьмамез понна. 50 арес... Пельпумъёс сьӧрын - уно спектакльёс, уно рольёс. Но туж тросэз эшшо азьпалан на. "Мон шудӥ, шудӥсько но шудо тӥ понна. Мон тӥледлы луыса гинэ вань. Лыктэлэ вуоно спектакльёсамы. Мон азьланяз но ужало на тӥ понна", - тазьы вераз актриса учкисьёсызлы. Андрей КЛЕМЕНТЬЕВ, Удмурт кун университетын дышетскись. Монья Бусыос шобырскизы, но ӧз быры сюлмаськон Ӟучъёслэн "шудтэменым шудо луи" веранзы вань. Озьыгес луиз. Галинаен но. Малы ке но туж потэ вал эмъясь луэмез, но со вакыт школаысь документъёсты 8 класс бере ӧзгес сётъялэ. Медучилищее велӥз ик, но документэз ӧй вал бере, ӧз кутэ. Туж кӧтыз ӝож луиз, аслыз котькинлэсь шудтэм потӥз кадь соку. Кайта гужемаз нош эшез Асан совхоз-техникуме лӧпкытъяны ӧдъяз: отын, пе, документтэк но экзамен сётыны лэзёзы. Вуоно специальностез сярысь номыр тодытэк, со техникуме пыриз. Али нош Галина Евдокимовна шум гинэ потэ, инмар, пе, шонер валтэм. Угось та ужын шедьтӥз со ассэ. Кызь кык ар ужатозяды огпол но ӧз акыльтылы-а бусы! - юасько мон агрономлэсь? Ой, мар тӥ? Мон бусы шоры учкытэк улыны уг быгатӥськы. Кузь тол ӵоже тулысэз возьмаса жадисько. Лымы шупа гинэ но чальгес кизем потэ ни. Нош гужем, ю шепаськыку учке ай бусы шоры - кыӵе со воринъяське: мугортӥ нясь-нясь шуныт тулкымъёс ортчо. Котькуд шепсэ кутылыса вешам потэ. Ма веша но, ӧжыт-а бусыез солань-талань ортчемын та вакыт ӵоже? Пыдъёс но чидамын ук, - шуэ Галина Евдокимовна, ӵукна ӟардыку ик бызьыса бусые мынӥське, бертӥськод уйшор котыр. Егит дыръя жадёнэз валано ӧй вал, лэся. Бӧрысьгес амал шедьтӥ великен, мотоциклэн ворттылӥ. Зэм, огпол ГАИ-ос кутӥзы, правоосы ӧй вал. Мар карыны пайми, дыр-р! куалекъясько. Ярам, зол ӧз тышкаське, валазы, лэся, ужея амалтэк руль сьӧры пуксёно луэ шуыса. Каска бен басьтыны косӥзы. Со понна туэ председатель нимысьтыз агрономлы шуыса машина висъяз. Сомында ужатозяз Галина Евдокимовна хозяйствое одӥг машина гинэ ӧз "пырты" ни. "Родина" арысь аре ӟеч урожаеныз паймытэ районэз но, республикаез но. Со бордысь потэ уго ваньмыз мукетыз: ӟеч ю тысед-ӟеч сиёнэд-сӥльыд-йӧлыд-барышед. Но агроном 29 центнерен уг буйгатскы, кайта ик 30-лэсь трос басьтом, шуэ. Чаклало вал туэ сомындагес басьтыны, но ӵап гужем шорын, ю шепаськон вакытэ туж кӧс улэмен, тысь векчи кылиз. Эшшо огъя лыдпусэз кулэстэ на кӧжы. Со уго 14 центнер сяна уг люкаськы (ӵошатон понна: чабей - 38 центнер, йыды - 55 центнер. Соку малы со кулэ кадь, мукет хозяйствоос куштӥсько ук. Агроном озьы уг малпа. Конечно, мон аслам лыдпусъёсы сярысь гинэ сюлмаськысал ке, луэ вылэм кӧжыез кезьытэн, но соку кызьы пудо? Пичи кунянъёслэн тусязы кӧжы пызь одно луыны кулэ, сотэк урод будо, ӵемгес висё. Куроез толалтэ скал загонэ вӧлдыны яра, кӧнязэ ке бусые кельтӥськом. - Малы? - Утялтыны вуттымтэысьтымы ум, юромо. Сисьмыса куро ӟеч удобрение луэ, кыедэз воштэ. Соин ик чабей, йыды куроез но келяськом. Соку мае пудо гидъёс азе нуиськоды на. Тыршиськом пудолы но, вузаны но, кыедлы но. - Таӵе амал сярысь вань агрономъёс тодо ке, малы мукет хозяйствоосын озьы уг каро? - Выремзы уг поты, дыр. Тулыс кӧня ке курадӟоно луэ уго: бусы бергес шупа (куро котэз возе), усыяку люкетэ, но милям механизаторъёсмы ноку но уг вуӵырто: кулэ бере, кулэ. Адӟо ук - пайдаез вань. - Кизем бырем бере, капчияк шокчиськоды, дыр? - Ӧйтӧд, огзэ ужез мукетыз воштэ уго. Зэм, сюлмо адямилэн ужез ноку уг быры. Тани али но, бусыос лымы улын кылльыку, мар кароз на кадь агроном? Но со котькуд ӵукна 7 часлы лыктэ уже. Тулыслы выль кидыс, удобрение утча. Ӟеч кидыс - со ӟеч урожай, нош вӧзаз тырмымон удобрение сюре на ке - уката ӟечгес. Тани 90-93-тӥ аръёсы ай удобрениос тырмымон вал, соку тӥни 50 центнер но басьямзы вань. Нош кидысэз Галина Евдокимовналэн котьку вылӥ ӟечлыко луэ, но со ялан выльзэ, элитнойзэ утча. Куинь-ньыль ар улыса уго кидыс вужме, висёнлы сётске. Сак кылзэ опытной станциосын ужась учёнойёсты, журналъёсысь утчаське. Али гурт калык ачиз нянь пыже бере, Галина Евдокимовна кемалась утча ни вал ӟеч клейковинаен чабей. Озьы кылем арын тодӥз "Лада" сорт сярысь. Но сое асьме палан уг кизё вылэм, юалляськы, пе, москваослэсь. Жингыръяз, тодӥз, нош тулысаз бусыязы куинь тонна выль кидыс пазьгиз ни. "Емышез" син азьын (ымын-а шуод) - асьсэ чабейлэсь пыжем няньзы буй-буй, корел. "Лада" гектарысьтыз 30 центнер ю тысь сётӥз. Протравить карысалзы ке, 50 но луысал, дыр. Но татын лыдпус сьӧры гинэ уг уисько. Ядлэн кык пумыз: огласянь юэз уте кадь, мукет ласянь сое будэтӥсез быдтэ. Нош туала вакытэ ужасьёсыдлэн тазалыксы сярысь малпаськытэк уг луы. Кызьы шуо, нянь - со умой, но висись муртлэн туж сиемез уг поты ни. Соин ик куэ дыръяз биопрепаратъёсын гинэ ужало. Соин, вылды, моньяослэн кидыссы котьку таза, чебер луэ. Конечно, мон огнам номыр карыны ӧй быгатысал, - шуэ Галина Евдокимовна. - Милям туж ужась калыкмы: ваньзэ ӝог валаса лэсьтӥськом. Милям туж ужасьес, визьмоесь вылӥллям вашкалаосмы, тау сослы. - Ӧй вала? - Сос кельтӥзы милемлы ӟеч музъем. Вашкалаосмы соин туж валаса ужаллям: вылӥ сӥзэ берыкъятэк гыриллям. - Тӥ асьтэос но али гыриськоды кадь? - Бен, безотвальная обработка нимаське. Со ӟеч гумус кылдытыны юрттэ. Но ваненыз буйгатскыны уг яра, соин ик ми асьмеос но музъеммес узырмытыны тыршиськом клевер, кӧжы кизьыса. Та культурасо бервылын ю-нянь ӟеч удалтэ. ... Час пала вераськиськом ни Галина Евдокимовнаен, нош со палкыл но ачиз сярысь уг вера, ялан уж, уж, уж... Но сыӵе вера - синъёсыз ӝуало. - Тау мемеймылы, кузпалылы - соос чидало, нылпиосылэсь будэмзэс но ӧй шӧдылы. Одӥг пол гинэ нылы шуиз: - Коть одӥг ӵукна ке но, мама, тон йырсиме пун вал. Сыӵе возьыт луиз. Но мон та ужетэк асме кытчы поныны ӧй валасал, дыр. Арлыд будэмъя куддыр малпасько: мар каром мон пенсие потон вакытэ вуиз ке? Серекъя Галина Евдокимовна. Со ай туж егит. ГОЖТӤСЬКОН-2001 Гажано лыдӟись эшмы! Вуоно ар понна "Удмурт дунне" газетлы гожтӥськид ни-а? Нош эшъёсыд, тодмоосыд, бускельёсыд? Ӧд ке - дыртэ, 20-тӥ декабрёзь кылиз на 13 нунал. Ошпилэн кузёез, оло, ӵапак Тӥ. "Удмурт дунне" газетлы гожтӥськемъёс толэзьлы одӥг пол "Твой дом и сад" басьтозы, нош соин валче луонлыксы кылдоз отчы дунтэк ялон печатланы. "Тодматскон сэреге" ялон сётэмды понна но дун ум басьтэ. Нош тодмоостэс, эшъёстэс, ӵыжы- выжыостэс ӟечкыланы быгатоды ӝыны дунын - 15 манет тыр, газетлы гожтӥськымтэос - 30 манет тырыса. Юанъёс пӧлы пачказ ни "Валэктэ юрист" сэрег. Дунтэк валэктон басьтэмды потэ - гожтӥське "Удмурт дуннелы" (гожтӥськон квитанциосты ыстыны кулэлыкез ӧвӧл, гожтэтады почтаысь печать пуктыса но яралоз). Ӟеч ужамзы понна кузьым луоз матысь юрттӥсьёсмылы - почтальонъёслы но. Лотереяен шудытэмын луоз "Завьяловский" санаторий-профилакторие путёвка, мукет кузьымъёс. 64 манет - Ижевскын улӥсьёс гожтӥськыны быгатозы "Информпечатьлэн" киоскъёсыз пыр. 50 манет - гожтӥськон радъямын редакциын. Ӝегатэмын пулемётэн Туэ куамынэтӥ ноябре "Вихрь-антитеррор" ужрадэз ортчытон дыръя Россия Федерациысь ФСБ-лэн Удмурт Республикая управленияз ужасьёс Ижевскысь одӥгезлэсь криминалэн герӟаськем ёзлэсь бадӟым калибрен (12,7 миллиметр) "Утёс" пулемётсэ талазы. Та пулемёт кутӥське кызьы ке пехотаын, озьы ик мукет пумо бронетехникаын. ФСБ-ын ужасьёслы тодоно луоз на, кызьы та кужмо ож тӥрлык Удмуртилэн шоркараз вуиз но малы со чакламын вал. Озьы ик мукетызлэсь группалэсь таламын уно боеприпас, озьы ик гранатаос. РФ-ысь ФСБ-лэн Удмурт Республикая Управлениезлэн пресс-службаез. Журналистъёсын пумиськонъёс Выль дауре - выль бюджетэн Ортчем вторнике журналистъёсын пумиськиз коньдон ужпумъёсъя министрлэсь ужзэ быдэсъясь Владимир Бельтюков. Со вакчияк ивортӥз туэлы кун бюджетэз кызьы быдэстэммы сярысь. Собере рос-прос вераськон мынӥз вылез сярысь. Кыӵе бен со луоз? - Кыкетӥ арзэ ваньбур поттон азинске, - шуэ Владимир Васильевич. - Со туж умой шӧдӥське бюджетэ коньдон вуэмъя но. Тани туэ 9 толэзьскын ватсаса 1 миллиард манет пала доход басьтэмын. Одӥг куиньмосэз со интыослы висъямын, кылемез мынӥз тырмымтэ коньдонэз (дефицитэз), басьтэм кредитъёсты пытсаны но бюджет удысын тыршисьёслы уждун сётыны. Оглом пусйыса, берло дыре бюджетэ пумен тросгес пыре улэп уксё. Тани Кез районын со 100 процентэз ик лыктэ, Ижын - 93 процентэз. Дас одӥг толэзьскын выт бичан 29 процентлы мултэсэн тырмытэмын. Кӧня бен берло ньыль ар ӵоже быдэс республикая (интыосты лыдъяса) бюджетэ выт пыртэмын? 1997-тӥ арын - 3365 миллион манет, 1998-тӥын - 2751, 1999-тӥын - 4759 миллион манет но туэ 6185 миллион манет чаклаське. Лыдпусъёс возьмато: самой урод ужам, ичи выт басьтӥм 1998-тӥ арын. 17-тӥ август пытьытэк ӧз ортчы. Выль 2001-тӥ арлы кун бюджетлэн инъетэз вуттэмын ни. Соя учкемын 4093 миллион манет доход басьтыны, нош расходъёс - 4329 миллион манет, яке уг тырмы 236 миллион манет (дефицит 5,8 процент луэ). Но бюджетэз сэрттоз-пертчоз на Кун Кенеш. Кыӵе ватсанъёс пыртоз парламент, тодом ни 19-тӥ декабрь бере. Но В. Бельтюковлэн оскытэмезъя, выль даурез выль бюджетэн пумиталом. Туж умой со. Вуоно арын выт чотын 2880 миллион уксё пырыны кулэ. Со пӧлысь му вӧй поттонлэсь ичизэ 800 миллион манет. Федеральной бюджетысь 360 миллион манет юрттэт (трансферт) вуоз. 2001-тӥ арлы бюджетлэн пӧртэмлыкез туж бадӟым. Со герӟаськемын му вӧй поттӥсь интыосын пайда басьтэмзылы выт тыронэз воштэмен. Выль закон кутэмын. Соин сэрен азьло юрттэт басьтӥсьтэм городъёс но районъёс (Воткинск, Шаркан, Игра, Як-Бодья, Каракулино) секыт югдуре шедизы. Табере нефть поттэм понна (прибыльысь) вань выт Ижевске вуоз, "Удмуртнефть" уго татын гожтэмын. Тӥни соин ик кун бюджетын интыослы юрттыны ватсаса уно миллион манет уксё висъямын. Кылсярысь, Воткинсклы - 120 миллион манет. Тырмоз-а со городлы? Туннэ шуг вераны. Москва республикалы озьы ик юрттоз туж кулэ программаосты быдэсъяны. Тани "Удмуртиез азинтон" программалы 118 миллион манет сётоз, цирк лэсьтыны - 70 миллион манет. Озьы ик уксё вуоз Михаил Калашниковлэсь, Галина Кулаковалэсь музейзэс ӝутыны, Удмурт кун университетлы но мукетызлы. Выль бюджетын озьы ик чакламын вуоно арын бюджетникъёслы уждун будэтон. Быдэс республикая бюджетын уждун 38-40 процент басьтоз ни. Шаерамы секыт югдур нылпиослы пособие тыронэн. Республика улӥысен куинетӥ инты басьтэ, асьме бере Свердловск но Курган улосъёс гинэ. Тӥни соин ик нырысьсэ нылпи пособиослы 329 миллион манет висъямын, азьвыл тыронэз пытсаны - 200, нош районъёслы но городъёслы юрттэт - 1031 миллион манет. Туэ со лыдпус 584 миллион гинэ вал. Со сяна, посёлокъёсысь но гуртъёсысь администрациослы юрттыны нош ик нырысьсэ 5 миллион манет учкемын. Нимысьтыз ватсаны кулэ, шаерысьтымы 12-ез район кун бюджетысь 60 процент пала юрттэт басьтэ. Озьы со луэ асьсэос ичи доход басьтэменызы. Кылсярысь, Алнаш но Вавож районъёс быдэн 7,5 миллион манет гинэ уксё потто. Туж ичи со. Тӥни соин ик городъёсын но районъёсын улон огкадьгес мед луоз шуыса, берло вить ар ӵоже интыослы юрттэт сётӥське. Котькуд адямиез утьыны кулэ. Но Ижын но музон городъёсын улон-вылон дуногес усе, тросгес уксё быре. Россия но та ужпумез син азяз возе. Улосъёс пӧртэм сямен выт тыро. Тани элькунмы туэ 9 толэзьскын федеральной бюджетэ 3 миллиард коньдон келяз. Малы ке шуоно, республикамы валтӥсь фондъёсын узыр, ваньбурмы ӧжыт ӧвӧл. Сое ӟеч ужатыса гинэ кун бюджетэ но уката уногес коньдон (выт) вуоз. Тӥни мар бордын ужпум. Москва та ласянь асьмеды ялан пыкылэ, ваньбурдэс, пе, урод кутӥськоды, луонозэ но уд быдэсъяське. Ведь шаермы, 1990-тӥ арен ӵошатыса, 43 процентлы уллань гылӟиз. Озьыен, ӝутскыны луонлыкъёсмы трос на. Ужбергатонэз азинтонъя программа Кун Кенешын юнматымтэ на. Соин ик кыӵе юрттэт вуоз - туннэ вераны уг луы на. Республикаямы му вӧез ас кожазы вузаны право сётэмын "Удмуртторфлы" но "Белкамнефть" огазеяськонлы гинэ. "Удмуртнефть" ОАО "Сиданко" пыр вуза. Тӥни таӵе бюджет дасямын вуоно 2001-тӥ арлы. Геннадий Романов. ЭШШО КӦНЯ КЕ КЫЛ Михаил Иванович Назаров, Правительстволэн Тӧроезлэн гурт удысъя воштӥсез: - "Родина" кадь колхозъёс республикаямы тросгес луысалзы ке, гурт удысмы валтӥсь радэ потысал. Синмаськисько татысь кивалтӥсьлы Семен Фёдоровлы, синмаськисько солэн ужасьёсызлы. Солэн быгатыса ужамез шоры учкыса, ужало адямиосыз но. Туннэ та хозяйстволэн ӧвӧл нокыӵе пунэм тыронъёсыз, азинске экономикаез. Озьыен умойгес уло гуртоос. Хозяйство азьмынӥсь шуыса Правительство но, Гурт хозяйствоя министерство но соосты уг вунэто, котьку юрттыны тыршо. Усто ужамзы понна тау карыса выль вормонъёс сӥзисько. Толон Ижевскын ужаз Вань удмуртъёслэн тямысэтӥ ӧтчамзы. Отчы люкаськылӥзы шаерысьтымы но солэн палэнысьтыз 370-лэсь ятыр делегатъёс но данак ӧтемъёс. Дано куноос пӧлын вал Кун Думалэн депутатэз С. Смирнова, республикаысьтымы Кун Кенешысь но Правительствоысь кивалтӥсьёс, федеральной инспекторлэн аппаратаз ужасьёс. "Удмурт кенеш" огазеяськонлэн берло куинь ар ӵоже ужамез сярысь ивортон лэсьтӥз солэн кивалтӥсез В. К. Тубылов. Туспуктэмъёсыз В. Беломорскихлэн. Совхоз выльысь улӟе Арлэн кутсконаз гинэ ай "Восточный" совхозэз банкротэ ӧжыт гинэ ӧз поттэ. Али сыӵе кышкытлык ортчемын ини, шуыны луоз. Со сярысь вера уждунъёслэн быдӟалазы но. Парсь сюдӥсьёс та вакытэ шорлыдын 2000 сюрс манет котыр басьто толэзяз, колбаса лэсьтӥсьёс 3000, нош парсь вандӥсьёс - воксё быдэн 5000 сюрс манет. Сыӵе луонлык кылдӥз, продукция вузанэз пайдаёгес радъяса. Азьвыл 70 процентсэ парсьёсты лулын, келяло вал мясокомбинатэ. Али 30 процентсэ гинэ. Кылемзэ совхозын ик вандо но сӥлез пӧртэм сиён лэсьтыса вузало. Нош азьланяз ваньмыз сӥль переработкае гинэ мыноз. Со понна матысь нуналъёсы кутскозы парсь вандон цехез выльдыны но паськытатыны. Отын нуналаз 500 йыр пудоез вандозы. Та нуналъёсы совхозын туж шумпоттӥзы солдат анай-атайёсты. Соослэн пиоссылы армие келямын Выль ар кузьымъёс, котькуд посылкаын - быдэн тямыс банка тушёнка. Парсь сюдӥсьёслэн покчи пиналъёссы понна но кузьымъёс дась ини. Г. ТИХОНОВ. Та вакчиятыса берыктэм карело-финн эпос удмурт кылын нимысьтыз книгаен нырысетӥзэ потоз. Сое лыдӟизы но ӟеч визь-кенешъёс сётӥзы кылбурчи но тодосчи Виктор Шибанов (сое мон редактор луыны кури), рецензент, Москваысь докторантураын диссертация дасясь Надежда Леконцева. Книгаме мон сӥзисько дышетӥсьёслы но дышетскисьёслы, студентъёслы-филологъёслы но ваньмызлы литератураез яратӥсьёслы. Серекъятэ но, бӧрӟытэ но... Та нуналъёсы Россиысь но Удмуртиысь дано артистлы Анатолий Ушаковлы тырмиз 50 арес. Соин валче Удмурт кун филармониын кык нунал ӵоже бадӟым концертъёс ортчизы. Туннэ Анатолий Ушаков сярысь вера тодмо кырӟась, дано артист, дышетӥсь Николай Зубков. Анатолий Ушаковлы вордӥськыкуз ик удмурт калыклэн дано артистэз луыны кылдэмын вылэм. Ас вакытаз А. Ушаков пинал дыръяз ик самодеятельной артистъёс пӧлын яркыт пиштӥсь кизили луиз. Кытчы гинэ со ӧз вуылы! Котькытын - вормон! Калык творчествояз пӧртэм всесоюзной, всероссийской но шаер фестивальёсын со вормисе поттылӥз но лауреат ним, диплом басьтылӥз. Одӥг учырез нимысьтыз пусъеме потэ. 1973-тӥ арын Пермь городын Урал улосвыллэн зонаосъя учконэз ортчиз. А. М. Горький нимо культура дворецын. Отын сюрс витьтон сю пукон инты. Одӥг инты но буш ӧвӧл. Ӟучъёс но удмуртъёс сяна, пӧртэм выжыысь калыкъёс люкаськемын. Туннэ татын Удмурт Республикаысь самодеятельной артистъёслэн быгатонлыкъёссэс возьматон нуналзы. ... Тани яркыт пиштӥсь сцена вылэ Лашман Петыр выллем ладь-ладь гинэ вамышъяса потэ Анатолий Ушаков. Учкыны лыктэмъёс сое мунекъяса пумитало. Сцена вылэ со йӧн-йӧн султӥз но. Даниловлэсь "Эн хваличке!" вероссэ, нош шонер ке вераса сое ниманы кулэ вылэм диалог-интермедия "Так не бывает!" Та веросын удмурт кылзэс тодӥсьтэмъёс, удмурт сямен шузи-мази вераськисьёс возьматэмын, соин ик татын удмурт но ӟуч кылъёс, веран чуръёс ваче сураськыса мыно. Шонерак ке верано, та веросын ӟуч но удмурт кылъёс, вераськон мугъёс шоро-куспо луо. Та тумошо ушъяськисьёслэсь мадёнзэс, соослы котькуд пӧянзылы ӟуч кылын "Так не бывает"! ответ залын пукисьёсыз ваньзэс сямен паймытӥз. А. Ушаков соосыз ас бордаз кыскиз! Малы ке шуоно, со котькуд геройзэ аспӧртэмлыко, туж яркыт возьматыны быгатӥз. А. Ушаковлэсь мадёнзэ йылпумъятозяз ик концертэ лыктэмъёс гур-гур серекъяса кылзӥзы но чик дугдылытэк сямен верослэсь вань интыоссэ кужмо кичабонъёсын дунъязы. А. Ушаков азьлане но азьлане вамыштэ. 1974-тӥ арын со удмурт калыклэсь быгатонлыксэ возьматэ Башкириын, та аре ик со Москвае но вуэ. Тӥни озьы Толя Ушаковлэсь быгатонлыксэ, солэсь пуштроссэ, сямъёссэ валаса, мон солы филармоние удмурт националной эстрада ансамбльын ужаны мылкыд сётӥ. Со кема малпаськыса улӥз. Кык ар ортчыса, со мыным шуиз: "Дышетскыны лэзиды ке, соку мон пумит ӧвӧл". 1975-тӥ арын филармония мыло-кыдо басьтӥськиз нырысетӥ удмурт национальной эстрадая ансамбль кылдытон борды. Ма, ньыль егит удмурт нылашъёсты огинэ карыса, квартет кылдытӥм, со вӧзы куать эктӥсь нылъёсыз кыскимы на. Соос пӧлын ик Ушаковез ватсамы но. Бӧрысь келямы Ленинградысь Эстрада искусствоя творческой мастерское дышетскыны. Отын соос быдэсак выль концерт программа дасязы. Ушаков та ансамбльысь квартетэз сьӧраз басьтӥз, нимысьтыз ансамбль кылдытӥз. "Шулдыр ӝыт" ансамбль А. Ушаковлэн кивалтэм улсаз эшшо кык пол Ленинградэ творчествоя мастерское ветлӥз на. Тӥни озьы коллектив йыг-йыг аслаз творческой сюрес вылаз потӥз. Нош Анатолий Ушаков сцена вылын кылдытӥз аслэсьтыз эстрадая театральной тусбуйзэ, калык пӧлын одӥгез азьветлӥсь профессиональной артист луиз. Со сярысь верано ке, одно ик пусйыны кулэ созэ но - со мадись, со кырӟась, "Шулдыр ӝытлэсь" вань артистъёссэ огазеясь луиз. Солэн сцена вылын етӥз ӝуась мылкыдыз эшъёсызлэсь мылкыдзэс лӧпкытэ, вылӥе лобытэ, нош концертъёссы лыктэмъёслэсь сюлэмъёссэс, мылкыдъёссэс тыпак ас бордаз кыске но бинялтэ. Кытчы гинэ со аслаз кылдытэм ансамбленыз ӧз вуылы - Украинае, Сьӧд зарезь палъёсы, Татарстанэ, Башкортостанэ, Тулае, Урал улосэ - котькытын сое ӟырдыт мылкыдын, кужмо кичабонъёсын пумитало. Анатолий Алексеевич сярысь 1976-тӥ арын сюлэме пыӵамон кылъёс вераз Ленконцертлэн эстрада искусствоя творческой мастерскоезлэн кивалтӥсез Исаак Романович Штокбант (мастерскойын А. Ушаковез со дышетӥз): "Туннэ ик ини со удмурт калыклэн аслаз дано калык артистэз!" Со дырысен 24 ар ортчиз, со куспын асьмелэн яратонэ артистмы паймымон узырлыко концерт программаос дасяз. Табере со аслэсьтыз творческой ӝытъёссэ ас понназ ортчытъяны быгатэ. Ушаков синмаськымон трос ужа луонлыкъёссэ азьланьтон бордын. Табере артистэз вань калык тодэ, яратэ. Нош тросэзлэн республикаысьтымы тодазы но ӧвӧл, Ушаков но гожъясь шуыса. Котькуд концертэзлэн программаяз со аслэсьтыз монологъёссэ, юморескаоссэ, репризаоссэ лыдӟе. Солэсь гожъямъёссэ республикаямы потӥсь журналъёсын но газетъёсын печатлало. 1987-тӥ арын "Молот" журнал но 1991-тӥ арын "Удмурт дунне" газет А. Ушаковлы нимысьтыз премиос висъязы. Нош 1996-тӥ арын "Удмуртия" издательство "Шулдыр ӝыт" ансамбльлы сӥзем йӧно- визьмо гожтэм но чебересь суредо книга поттэ. Тӥни сыӵе асьмелэн быгатӥсь, калыкез паймытӥсь, сюлэмез буйгатӥсь яратоно артистмы. Со - Анатолий Ушаков! Коллектив пыртылэмын республикамылэн Данъян пул вылаз. "Шулдыр ӝытлы" сётэмын Удмурт Республикалэн Кун премиез. Ушаковлы сётэмын Удмурт Республикаысь но Россия Федерациысь дано артист ним. Тӥни озьы со пумитаз аслэсьтыз 50 арессэ. Соос пӧлысь 25 арзэ артист профессиональной сцена вылын! Анатолий Алексеевич азланяз но сцена вылын етӥз- чупрес мед шудоз, читыр-чутыр сюресъёсыз ялан азьлане но выль вормонъёсы мед нуозы! Николай Зубков, Россия Федерациысь дано артист. А. Ушаков. В. Беломорскихлэн туспуктэмъёсыз. Ӟеч лу, ортчись дауре Ӝоген йыгаськоз асьме доры ХХИ даур. Мон мӧйы кышномурт. Арлыдъёсыным ушъяськыны вазьгес на. Озьы ке но, котькуд адями улытозяз котьмае шӧмъя, адӟе, сюлэм пыртӥз поттэ куректонъёссэ но, шумпотонъёссэ но. Улон - со шӧртчи маке: асьмелэсь визьмес сына, куке чиданмес я быгатонлыкмес эскере, адӟонъёс ысъя. Мӧйымемъяз адями пумен малпаськисьгес луэ. Ма со понна дыр но шеде угось ини. Егит адями азьланьзэ малпа, мӧйы адями - ортчем улонзэ бугыръя, сэрттэ-пертче. Ортчись даурмес лек вал, шуо. Зэм, ортчыт лек вал. Революциос, дуннее вӧлмем кык кышкыт мировой ож, граждан ож. Эпидемиос, сютэм улон аръёс кӧня пол луизы. Кулаке поттыса, Сибире келян но вал. Адямиосты юнме янгыше уськытон, ыбылон. Черкъёсты тӥян, пытсан. Вакчияк вераса, курадӟон но ёрмон, чидан но куректон, синву но вераны луонтэм секыт уж. Но гожтэме пиртэш луоз, сьӧлык но ортчем даурмес курласа гинэ. Ма, вал ук ӟеч улон но Брежнев вакытэ ик. Улон радъям ӧретиз визыл гинэ мынӥз. Мон политик ӧвӧл, озьы ке но, ас сяменым дунъясько аслэсьтым кызетӥ даурме. Мон отын вордски, дышетски, улӥ, ужай, пытьые кылиз. Лек ке но вал - со мынам дауре. Нылпиосы но будӥзы та дауре ик. Мон мае адӟи, соос но сое ик адӟизы, чидазы. Дауре лек гинэ ӧй вал. Со вал монэ визьмась но дышетӥсь. Уг янгыша, шуи ке тазьы но: сюло но вал. Со монэ пичи дырысен котькыӵе ужлы дышетӥз. Ӝикыт (шыръяса) улон сям пыӵатӥз. Ёрмонэз чиданы, валаны но котыр ласянь учкыса сэрттыны-пертчыны валан сётӥз. Шуг-секытъёслы сётскытэк, саесъёсты ӝабыр-ӝабыр пужалляса, ялан ужаны косылӥз. Ужан ведь кӧттыр гинэ уг сёты. Со пумтэм шумпотонъёс, азинсконъёс, вормонъёс вае. Отысь ик потэмын ӧвӧл шат "ужамъя ужам потэ" яке "ужаны сьӧсь кадь" веранъёс. Дауре дышетӥз выль сямен учкыны азьло но туннэ улон шоры. Ватэме уг поты - ас шорам но. Зэм верало калыкын: самой ӟечез школа - улон. "Шудо-а вал мон та даурам?" - аслым ачим юан пуктӥсько лыдӟисьёс азьын. Шудо. Малызэ но верало. Сыӵе секыт война аръёсы анай утьыны-вордыны быгатэм. Тазалыке пырак ӟеч вал, инмарлы тау шуисько. Ужан мылкыды нош ортчыт задор вал. Ай мӧйымыса но со мылкыды уг сины, задорез гинэ кысӥз ни. Ужаны туж шумпотыса мынылӥ, покчиосты мон грамоталы дышетӥ. Соосын ӵош ачим но будӥ, визьмаськи, зэмос дышетӥсь луи. Ужме синйылтытэк ӧз кельтэ кивалтӥсьёс но, анай-атайёс но. Дыр вуиз - пенсие потӥ. Ужме табере нылъёсы азьланьто. Ма со шуд ӧвӧл шат? Даур йылпумъяське. Сьӧлык луоз, тау кылме вератэк кельтӥ ке солы. Нош вуоноез даур небытгес мед луоз. Туала егитъёслы отын улоно. Милесьтым адӟеммес, курадӟеммес соос медаз адӟе. Ай мынам но ХХИ даурлэсь вамышъёссэ адӟеме потэ на. Россилэн Президентэзлы но асьме удмурт шаерысь кивалтӥсьёслы но инмар мур визь мед сётоз но улонмес капчигес но оскымонгес карыны мед юрттоз. Ӟеч лу, ХХ даур! Тау тыныд, ӵош вамышъям. Ӟечбур, ХХИ-тӥез! В. КОЛЕСНИКОВА. Пичи Пурга ёрос. Архивысь документъёсъя Удмуртия ЪЪ дауре 1933-тӥ ар Калык хозяйствоез сэзъян-выльдон ужъёс странаын та аре йылпумъяськон пала вуо. Нырысетӥ пятилеткалы чаклам планзэ Удмуртия дырызлэсь вазь быдэстэ. Пятилеткае лэсьтэм ужъёс сярысь йылпумъянъёс ивортэмын вал ВКП(б)-лэн обкомезлэн но областьысь Эскерон комиссилэн огазеям пленумаз. Пятилетка аръёсы областьын 224 промышленной предприятие ӝутэмын, со пӧлысь 74- ез бадӟымесь. Удмуртиысь ужаса улӥсьёс пӧлын та аръёсы азьпалан мынэ Ижстальзаводлэн коллективез. Со пятилеткалы пусъем планэз 3 ар но 8 толэзь куспын быдэстӥз. Завод кужмо инъет кылдытӥз. Вылӥ ӟечлыко андан производство, корт нуйтон, пӧртэм пумо ез но пружинаос поттон радъямын вал татын. Гужем Ижстальзаводысь ударникъёс конференциязы люкаськизы. Соос кенешизы социалистической ӵошатсконэз эшшо но паськытгес ӧръян пумысен. Июль толэзе лэсьтӥськисьёс иворто газогенераторной станциез вуттэмзы сярысь. Йылаз-пумаз вуэ дуриськон цех. Татчы нырысьсэ СССР-ын кунгож сьӧрысь ваем молотъёс интые асьме дорын лэсьтэмъёс пуктыло. Ижын кутско ӝутыны уксуслэсь но кальцийлэсь порошок дасянъя завод. Пудемын кылдыто корт лист нуйтонъя "Металлург" артель. Заводъёслы специалистъёсты дасяло Вылӥ технической курсъёс, пединститутын тодон-валан люкало вуоно дышетӥсьёс. Сентябре ӧсъёссэ усьтӥз эшшо одӥг вылӥ дышетскон заведение - медициная институт. Та арын ик Ижын ужаны кутске крезьгуръя училище, озьы удмурт культураез азинтонын азьпала эшшо одӥг вамыш лэсьтэмын. Ар пумын ивортӥзы, крестьянъёсты огазеян ужрад Удмуртиын, пе, йылпумъяськиз. Та аре ик областьлы горд знамя сёто, гурт удысъя азинсконъёсыз понна. Синпӧет суред кылдытӥзы, ваньзэ вольыт мынэмен возьматыса. Нош тани Алнаш ёросысь Муважи сельсовет ивортэмъя, колхозэ пырыны мылкыд кариллям 435 хозяйство, нош 244-ез пумит луиллям. Сталин ВКП(б)-лэн Центральной комитетэзлэн но Эскерон комиссиезлэн огазеям кенешоназ вераз: - Гурт удыс шоры партия палэнысь учкыса но куд-ог учыръёсы гинэ отчы пыриськыса уз улы ни. Колхозъёсын кивалтонэз табере со быдэсак ас кияз басьтоз. Озьы 1933-тӥ арын МТС-ъёс борды кутско кылдыны политотделъёс. Табере крестьянъёс ас тодэм-валамзыя но мылкыд каремзыя гырыны-кизьыны но ӧз быгатылэ. Т. Василькив, Удмурт Республикаысь Кун архивысь валтӥсь специалист. Вотка заводысь рабочийёс. 1933-тӥ ар. Азькыл Сӥё-дано "Калевала"... Карел но финн музъем вылысь та эпосэз дуннеын тодӥсьтэмез ӧвӧл, дыр. Огез бӧрсьы мукетыз мыно витьтон рунаос - кузь кырӟан мадьёс. Соосты люказ, огазеяз но пезьгыт чуръёсы радъяз Элиас Лённрот (1802-1884). Мыным шуд усиз Суоми кунэ, солэн вордскем интыяз, вуылыны. Отысен мыным финн эшъёс трос веразы Элиас Лённрот но "Калевала" сярысь. Элиас Лённрот вордскемын 1802-тӥ арын 9-тӥ апреле финн шаерлэн лымшор но шунды пуксён висказ - Саматти интыын - вуриськисьлэн бадӟым семьяяз. Элиас куать арескын лыдӟиськыны кутске, дас кык арескысен гинэ школае пыре. Кибашлы, таланто пияш, ялан ужаз дышетскемезлэсь азьло но, дышетыкуз но - я вуриськын ужын, я аптекарьлы юрттӥсьын. Пыдйылчи-кырӟась луыса но, псамломъёс кырӟаса но ветлӥз. 1822-тӥ арысен студент луыса узыръёс дорын пиналъёссэс дышетыса улӥз. Соин валче калыкысь люканы кутске узыр кылосэз. Солэн магистр луон ужез финн мифологилы сӥземын вал. Доктор луон ужезлэсь темазэ Вяйнямӧйненэн герӟаськем осконъёслы сӥзиз. 1827-тӥ арын магистр, собере, 1830-тӥ арын, доктор луон ужзэ утиз. 1828-тӥ арын нырысьсэ потэ кылбурет кылос люкан сюрес вылэ. 1844-тӥ арозь арлы быдэ одӥг но ӝыны сюрс иськем ортчылӥз пыдын, куас вылын, пыжен, дӧдьыен, пароходэн. Озьы 35 сюрс руна люказ. 1835-тӥ арын рунаосызлэсь ог люкетсэс огазеяз но "Калевала" нимын книга поттӥз. "Калевалаез" кылдытонын Гомерлэн эпосъёсызлэсь адӟем кариз. Но Лённротлэн эпосаз, Калевала Похъёлаен ваче вуыку, Калевала лул кужымъёсыз вылэ пыкиськыса ворме. Берлогес Лённрот, материал люкан вылысь, сюрес вылэ куать пол пота на. 1849-тӥ арын вылез "Калевала" финн выжы калыклэсь ас кылзэ, ортчем сюрессэ мургес тодыны- валаны мылкыдзэ ӝутӥз. "Калевалаез" соку ик берыкто бускель калыкъёс но, кыдёкысьёсыз но. Солы суредасьёс сӥзё яркыт ужъёссэс, крезьгурчиос - крезьгуръёссэс. Соиз валамон но. Сокем яркыт, гуманизм мылкыдэн тырмем эпосъёс дунне вылын трос уг пумиськыло. Сайкыт шундыё Калевала шаерысь геройёс нюръясько калыксылэн шудэз понна. Эпосысь батыръёс выжыкыл дуннеын гинэ уг уло, соос, зэмос улонын сямен, нуналмысь сюлмасько. Та быдӟым эпосэз удмурт калыкез югдытӥсьёс революцилэсь азьвыл ик тодо вал ини. Со сярысь революция бере Герд гожъяз "Шуныт зор" книгаяз. Историк но литератор М.Худяков, "Калевалалэсь" адӟем карыса, ӟуч кылын вашкала удмуртъёс сярысь поэма гожтӥз "Калевалалэн" выллем чуръёсын, сыӵе ик ритмикаен. Со аръёсы ик Куӟебай Герд мыло-кыдо люказ Докъя палысьтыз эпослы тупась кырӟанъёсты. Соосты "Удовала" нимын поттыны дасяське вал. Нош репрессия улэ шедеменыз, люкамез-гожъямез но ышиз, ачиз но ӧз берты ни. Кылизы на мытон чуръёсыз гинэ, соос тодэ вайыто удмурт эпос чуръёслэсь жингыртэмзэс: "Кырӟа но кырӟа" шуиськоды, Кырӟан уж капчи кожаса. "Вера но вера" шуиськоды, Веран уж капчи кожаса. Мукет сямен вераса, анапест-ямб-анапест. Сыӵе манерен ик гожъяз аслэсьтыз "Вормонтэм батыр" кузь поэмазэ Иван Яковлев. М.П.Петров "Молот" журналын "Калевалалэн" 100 ар тырмонэзлы сӥзем статьяяз (1935) "Калевалаысь" пыртэм кызь кык чур-возьматэт. Отын со но адӟем каре калык эпослэсь, со манеръя анапестъёс ик гожъя: Бен, кутском ваче ки, Асьмелэсь чиньымес вай герӟалом, Кырӟалом асьмеос крезьгур, Кужмо гур кырӟалом. Ямб но анапест удмурт кыллэн инъетэзлы туж матын луо: уго удмуртлэн вераськоназ ударение котьку сямен усе кылпуме. Соин ик кемаласен сыӵе вераськон кылдэмын: хореен но "нылкышно" клаузлаен (кылпумен) гожтэм кылбуръёс удмурт кыллы уг тупало. Тае азьвыл мон лыдэ ӧй басьты. "Калевалаез" нырысьсэ берыктыны кутскыкум, сюлмысь тырши эпослэсь тусбуйзэ, куара шуккиськон суредзэ солэн кадь карыны. Озьы ог вить сю чурзэ 1985-тӥ арын "Молот" журналын печатлай. Ӟеч мылкыдзэс веразы лыдӟисьёс но, аслым но яраз вал. Тани кутсконэз: Сюлэмам эсэп ӝужа ни, Йырвизьмам малпан ӝуа ни, Кырӟаны, пӧй, кутсконо ни, Кыл бӧрсьы кыл верано ни. Выжылэсь кылзэ мадё мон, Крезьгурзэ но ӧръяло мон, Кыл йылам кылъёс лыкто ни, Ымдорам соос дырто ни, Пинь бордысь мадьёс кисько ни. Оскымон ӟеч юлтоше тон, Ӵош будэм зарни эше тон, Асьмеос ӵош кырӟалом, я, Кырӟалом ӵош, вералом, я! Дыр вуиз но, пумиським ук, Кык ласянь ваче вуим ук! Кутскомы кужмо гурмес ӵош, Ӟечъёсыз пӧлысь ӟечсэ нош. Вай, крезьгурмес поттом сюлмысь, Мед кылозы мылысь-кыдысь. Вож будӥсь пинал нылпи но, Юн кыдась егит калык но. Та чуръёсы потэм бере, мон малпаськыны кутски: шонер-а лэсьтӥсько? Мар чотын кылдытӥсько "нылкышно" кылпумъёсты (берпум слог азьын ударениосты)? Одӥг слогъем кылъёс, юан но зэматон частицаос но наречиос, косон наклонениен глаголъёс чотын но мукет формаосты уже кутыса. Ваньмыз со ни, я, ук, дыр, шол, бен выллем кылъёс. Ялан кылӥськизы ке, соос вуёмытозы, пельын жонгетыны кутскозы. Кема малпаськеме бере вуи одӥг малпанэ: мыным ӟечгес эскероно удмурт калык эпослэсь кылбуретсэ. Учки калыклэсьсэ, И.Яковлевлэсь гожъямъёссэ. Отын кузёясько ямб, анапест. Вуи юн-юн малпанэ: улонэтӥ мыноно кемалась пыӵам сямлэн сюрестӥз. Но берыктыку утьыны тыршоно пуштроссэ но соин герӟаськем формазэ. Финн "Калевалаын" кылбурась чурысь чуре азьло верамзэ мукет сямен вераса лэзе. Сыӵе анафора амалэн радъямын трос сю чуръёс. Озьы тӥни "Калевалалэн" кылбур радъяназ кык валтӥсь тодметэз - параллелизм (малпаськон кылрад) но чур кутсконын рифмаос-аллитерациос. Берыктыку параллелизмез утьыны луэ ик, нош аллитерациез - уг (куара куараен уг берыктӥськы). Со интые мон малпай чур пумъёсыз рифмаосын чеберъяны. Озьы тӥни мынам "Покчи Калевалаям" тямыс слогъем чурын нырысетӥез лёгет - анапест, кыкетӥез - ямб, куинетӥез - анапест. 1999-тӥ арын июнь толэзе "Калевалалэн" юбилееныз валче, Хельсинкиын ортчиз дуннеысь калык куспо симпозиум. Отчы люкаськылӥзы Европаысь, Азиысь, Африкаысь, Америкаысь берыктӥсьёс. Мон но ӧтемын вал докладэн. Сое лыдӟоно луиз англи кылын. Ваньмыз валазы кадь кылбур вылтус пумысен шугъяськонъёсме. Малпанъёсме умоен лыдъязы. Берыктон ужам азинлык сӥзизы. Вылтус ласянь мон гинэ шугъяськись вылӥськымтэ. Озьы Италиысь берыктӥсьёс юазы: "Луоз-а тямыс слогъем чуръёс интые укмыс карыны?" "Малы уз луы - луоз", - шуизы. Пӧртэм калыкъёс пӧртэм сямен берыкто. Вань прозаен берыктэмъёс но. Кылсярысь, США-ын 1989-тӥ арын англи кылэ Кейт Бослей берыктэм. Вань рифмаен берыктэмез но - 1909-тӥ арын Венгриын Викар Белалэн. Дуннеын "Калевала" ньыльдон вить кылэ берыктэмын. Вакчиятыса берыктэмъёс - сю витьтон ёрос. Мынам но берыктэме вакчиятэмъёс пӧлы пыре. "Калевала" быдэскыз - 22795 чур ке, мынам берыктэме - 8500 чур. Озьы ке но, огъя сюжетэз утемын. Та вакчиятыса поттэм "Калевалаез" берыктыку, уже кутэмын Кейт Бослейлэн англи кылэ берыктэм "Калевалаез" (1989) но Эйно Киурилэн но Армас Мишинлэн финн кылысь ӟуч кылэ берыктэм "Калевалаосыз" (артэ финн кылын Лённротлэнэз) (Петрозаводск, 1998). Учкылэмын вакчиятэм "Калевалаос", пӧлазы - Р.Рацлэн, Л.Бельскийлэн. Удмурт текстлэн пумаз интыямын финн кылын ватсэт - эпослэсь сюжетсэ усьтӥсь кырӟан-мадь люкетъёс (ог 1100 чур). Со чуръёс курсив шрифтэн возьматэмын удмурт кылын. Котькуд кырӟанлэн люкетэзъя параллельёсты капчиен шедьтыны луоз. Финн кылын текстъёс сӥземын финн кылэз яратӥсьёслы, сое ӟечгес но мургес тодон понна. Анатолий УВАРОВ. Кутскон Дунне кылдон Сюлэмам эсэп ӝутӥськиз, Йырвизьмам малпан ӝуатскиз, Кырӟаны ни, пӧй, кутсконо, Кыл бӧрсьы выль кыл верано, Выжылэсь кырӟан гуръёссэ, Вашкала дырысь мадьёссэ. Кыл йылам кылъёс ни лыкто, Ымдурам соос туж дырто. Кыл борды кылъёс итӥсько, Кыл йылысь мадьёс кисьтӥсько. Оскымон выны-юлтоше, Ӵош будэм зарни лул-гаже, Асьмеос ӵош, я, кырӟалом, Кырӟалом, огӵош вералом. Дыр тупаз но, уть, пумиським, Кык ласянь ваче нош вуим! Туж ик шер ӵошен луиськом, Ог-огмес ӧжыт адӟиськом - Та уйшор палась шаерын, Похъя пал начар кыръёсын. Вай сётом ваче киосмес, Герӟалом юн вань чиньымес, Мытомы гурмес но мадьмес. Ӟечъёсыз пӧлысь ӟечсэгес - Гажъёслы сюлмысь кылзыны, Нылпилы ӟечгес тодыны, Кылзозы гурмес пиналъёс, Вань быдэ вуись зарни ёз. Атыкай тае кырӟалляз, Пужыё тӥрныд лэсьтонъяз, Аныкай солы дышетъяз, Ӵуж мертчан шортсэ черсонъяз, Выж вылын пичи дыръёсам, Пыд азяз солэн берганъям, Вож пинал дыръям, ноныкум, Нэнэ йӧл зынэн ветлыкум, Самполэсь мадё вал кылзэ, Лоухилэсь пӧртмо тункылзэ, Сампо пересьмиз кырӟанэн, Лоухи но мӧйымиз тункылэн, Випунен кулӥз мадькылын, Кауко вал весяк шудонын. Трос ай, трос мынам мадёнэ, Кырӟанэ, тункыл тодонэ, Мон бичай сое кыръёсысь, Сусыпу пӧлысь, вай йылысь, Улвайёс пушкысь ишкалляй, Пушъетъёс бордысь кыскалляй, Турынъёс йылысь басьялляй, - Пудомы ветлон котырысь, Пудомес возьман доръёсысь, Мон куке ветлӥ пастухын, Гуже быт уллё сьӧръёсын, Чечыё муӵъёс вылъёстӥ, Пинал дыр зарни кушъёстӥ. Кын ырос мыным гур кырӟаз, Шуныт зор шыпыт мадь вераз. Тӧл вуттӥз мыным выль гурзэ, Зарезь гы пальккиз кылбурзэ, Бурдоос крезьме радъязы, Писпуос тункыл малпазы. Ваньзэ мон тае бугортӥ, Огазе ваньзэ мон керттӥ, Керттэтэ ини дӧдьыын, Дӧдьыын мынэ мон вӧзын, Бертыса, кенсам мон пыртӥ, Туйшыкыс пушкы лачмытӥ. Туж кема кырӟан гуръёсы Пеймытын кыллё ватосын, Ум-а вай сое кын азьысь, Ум-а пырты мон кезьытысь? Шат пыртом ларез мон коркам, Шат пуктом сое ӟус вылам, Та чебер пелькор улъёсам, Ӟеч липем корка пушъёсам, Ум-а усьты мон кыл ларме, Кырӟанэн тырмем шыкысме, Ум-а кут пумзэ бугорлэсь, Ум-а сэртты кыл бинетэз? Паймымон кырӟан мон мыто, Туж шулдыр гурен жингырто, Ӟег нянен ке тӥ сюдӥды, Ӟеч сурен ке тӥ сектады. Нош ӧд сётэ ке тӥ сурдэс, Ӧд ке лэзе чик сюкасьтэс, Мон сютэм вылам кырӟало, Гылэттэк, кӧсын гурлало. Мед луоз шулдыр та ӝытмы, Ортчемзэ дырез данъянмы, Ӵукысен чебер лыктӥсез, Ӵуказе шудмы кутскисез. 1. Вяйнямӧйненлэн вордӥськемез Мон кылӥ тазьы кырӟамзэс, Мон тодӥ таӵе верамзэс: Огназы лыкто, пе, уйёс, Нимазы югдо нуналъёс. Вяйно но вордскиз одӥгназ - Туж усто кырӟась но верась, Инмемей сое, пе, вордэм, Ильматар ныллэсь со кылдэм. Инкуазьлэн чильдӥсь нылмуртэз, Омырлэн вордскем дыдыез, Нылдунзэ кема со утем, Туж кема огназ со улэм. Омырлэн вӧлмыт юртъёсаз, Инбамлэн ӵошкыт лудъёсаз. Улӥе со ныл лэзиськем, Тулкымъёс вылэ ик васькем, Зарезьлэн паськыт тыбыраз, Мур вулэн вӧлмыт кыръёсаз. Лек сильтӧл шуак ӝутӥськем, Ӵук палась со туж ӝог вуэм. Со поттэм зарезь шукыез, Бугыръям, ӝутъям тулкымез. Тӧл кутскем нылэз веттаны, Тулкымъёс вылтӥ нуллыны - Лыз-чагыр зарезь вылъёстӥ, Изнэсо лэйкась гы йылтӥ. Тӧл тани пушказ ву пыртэм - Ныл гылэсь луэм секытэн. Бен нуллэм ни ныл емышсэ, Секыто дыръяз пыраксэ - Сизьым сю арлэсь кемагес - Батырлэн со дас даурез. Нош уг ву вордон вакытэз, Вуымтэ на шол эсэпез. Дыр ӧжыт вырӟиз, азьланьскиз, Огэсэп гинэ со ортчиз, Уть, лобӟе ни лыз чебер ӵӧж, Бурдыныз сэзъя со вӧш-вӧш, Со утча аслыз каръяськон, Со утча аслыз инъяськон. Со лобаз ӵук-ӝыт палъёстӥ, Лымшортӥ но кын уйшортӥ. Нош уг шедьты чик но аслыз Ӟызыгес ке но муӵъёсыз. Аслыз кар уго лэсьтоно, Юртэзлы инты утчано. Весь лобаз, котыр со бергаз, Малпаськиз но, уть, мар туназ: "Тӧл вылын мон кар ке лэсьтӥ, Лек тулкым вылэ ке пуктӥ, Коркаме тӧл зол таркалоз, Юн тулкым карме ик нуоз". Кылӥськиз та ву анайлы, Ильматар нимо ин ныллы. Пыдессэ ӝутӥз со вуысь, Пельпумзэ мычиз на отысь. Мед отчы луд ӵӧж, пӧй, пуксёз, Выль юртсэ отчы мед лэсьтоз. Со чебер луд ӵӧж весь лобаз, Сэзь ширъяз, котыр со бергаз. Гы пӧлысь адӟиз пыдесэз, Лыз зарезь шорысь йылосэз. Нош луд ӵӧж сое муӵ кожаз, Турыно вырйыл со малпаз. Ӵӧж лобаз, поръяз, ширтылӥз, Ныл пыдес вылэ лэзиськиз, Отчы кар лэсьтӥз улыны, Сизьым пуз отын пузаны, Зарни пуз поттӥз со куатьсэ, Берпумзэ пузаз на кортсэ. Ӵӧж пуксиз, паре пузъёссэ, Ӟырдатэ ныллэсь пыдессэ... Ог но кык нунал со пуке, Куинетӥ ӵуксэ но турске. Нош тани вулэн кузёез - Ву анай, инлэн нылашез, Шӧдӥськиз: ӝуа пыдесыз Сутӥське тылын ку вылыз. Малпаське: "Сутско пыдъёсыз, Пыжозы тани сӧнъёсыз". Шуак ныл пыдзэ зол кыскиз, Мугорыз быдэс куалектӥз, Ӵӧж пузъёс вуэ питразы, Ву тулкым вылэ усизы, Зарезьын соос пырдӥзы, Пырыен вуын вӧлмизы. Ӧз, ӧз быре чик ӵӧж пузъёс, Пырыен ӧз ыше соос, Пырыос ваньзы вошкизы, Син азьын чебер луизы: Ӵӧж пузлэн улыз туж сӥлы - Пӧрмытскиз музъем-анайлы, Ӵӧж пузлэн вылыз огсямен Воштӥськиз ӝужыт инбамен, Ӵӧж пузлэн ӵужез паймымон Юг шунды луиз инбамын, Ӵӧж пузлэн тӧдьы люкетэз Толэзен пиштӥз югалэс, Ӵӧж пузысь куӵо виштыос - Инбамысь вань кизилиос, Ӵӧж пузлэн пеймыт азьёсыз - Инбамлэн пилем люкъёсыз. Нош вапум ялан азьланьске, Ар бӧрсьы аред погыльске. Туж пинал шунды весь югдэ, Туж егит толэзь пыр чильдэ. Весь уя вулэн кузёез - Ву анай, инлэн нылмуртэз, Нырулӥсь чалмыт ву вылтӥ, Со уя бусо гыостӥ, Со азьын - зарезь тулкымъёс, Со мышкын - чылкыт инбамъёс. Кылдытон борды со кутскиз, Лэсьтӥськон уже ясанӥз. Зарезьлэн дун ву вадесаз, Бырисьтэм тулкым вылъёсаз. Ог кизэ гинэ со ӝутэ - Муныръёс тросэн кылдытэ. Сумедэ пыдзэ ке пуктэ - Чорыглы мур гу со лэсьтэ, Омырез мургес ке пельтэ, Зарезьын вукож но кылдэ. Ӧжытак мулэсь со кошкиз, Туж паськыт вуэ со потӥз. Ву пушкы луо ӝутылӥз, Меӵалъёс лушкем лэсьтылӥз: Пыжъёсты вуын выйтыны, Зарезьчи муртэ быдтыны. Кылдытӥз вуэ меӵ изъёс, Из меӵал отын ини трос. Ин юбо котыр ӝутэмын, Шаеръёс-палъёс нимамын, Из бордын пусъёс лэсьтэмын, Меӵалъёс нимын гожъямын - Дуннеын соку вордӥськиз Вяйнямӧйнен - мӧй но етӥз. Со вить ар кыллиз зарезьын, Ог куать ар тулкым вылъёсын. Тямысозь уяз гы вылын, Уямысь дугдӥз собере Тодмотэм лапкыт ярдуре, Нюлэстэм азе, мувыре. Я пыдес вылаз пыкиськиз, Киыныз батыр ӝутӥськиз, Шонерскиз, паймиз Толэзьлы, Зарни кадь пиштӥсь шундылы. Пумиськоз на со Кобыен, Тодматскоз трос кизилиен. Вяйно тӥнь озьы вордӥськиз, Туж дано кырӟась со луиз. Инмысь ныл сое гадь улаз Будэтӥз, вордӥз даураз. 2. Нюлэс сайкон но кизён Вуысь Вяйно сэзь-сэзь ӝутскиз, Му вылэ кык пыдзэ ик пуктӥз. Со - зарезь шорысь шормуӵын, Зарезь шор муын - буш кырын. Будостэм муын нюр сыръя, Малпаське, визьзэ со тӥя: Кин тысез муэ пазялоз, Из-кӧльы вылэ кин кизёз? Пеллерво кизёз, кырал пи, Сампса - сэзь, ачиз - чиньыпи. Пазялоз кидыс из лудэ, Уськытоз тысез нюркудэ, Пеллерво тысьсэ пазьгылэ, Нюр вылэ пазьге, куд вылэ. Пазьгылэ небыт му вылэ, Избуро сюе кизьылэ. Бамалэ кизе пужым тысь, Выръёсы кизе кыз сюлмысь. Нюрсусы - мускыт нёжъёсы, Куакъёслэсь тысьсэс - нюкъёсы. Зол будоз кызьпу кот муын, Нош лулпу - ӟечгес кӧс азьын. Улыге кизе льӧмпуэз, Кот-мускыт азе уйпуэз. Вӧсяськон доры - палэзез, Нюръёсы векчи бадьпуэз. Луоын - векчи сусыпу, Возь вылын будоз тыпыпу. Будосъёс, тӥни, ӝутӥсько, Куренесь куакъёс вӧлъясько. Кузь тушо кызъёс пуръясько, Вож венё пужымъёс шонасько. Кот муысь ӝутско кызьпуос, Луоё возьысь лулпуос. Льӧмпуос пушъё нёжалын, Сусыпу вӧлме буш кырын. Нош тыпы гинэ пушйымтэ, Инмар пу выжы лэзьымтэ. Ӝужыт мурт потӥз зарезьысь, Ӝутӥськиз батыр тулкымысь, Кӧс турын вылэ тыл лэзиз. Нош турын гомӟиз, сутӥськиз, Пӧрмытскиз пеньлы. Огпумысь Сьӧд ӵынэз тӧлӟиз тылӝуысь. Тани пень кылле зӧк люкын, Бадӟымос люкын, му вылын. Ненег куар усиз пень вылэ, Нош тыпы мульы - со вылэ. Мульыысь потӥз пушъетэз, Туж чебер ӝужа со, веськрес. Вайёсыз будо, нош куарез - Узы куар выллем пуштырес, Йылӥыз инме кыстӥське, Пасьтана вӧлмыт ӝутӥське. Пилемлы уг сёты сюрес, Инбамын ӵокта шундыез, Нош уин - югыт толэзез. Уть, потэ ожчи зарезьысь, Сэзь батыр ӝутске тулкымысь. Бадӟымъёс пӧлысь со ӧвӧл, Пичиос пӧлысь но ӧвӧл: Мугорыз солэн - палчиньы, Изьямын йыраз туй изьы, Сапегез пыдаз - ыргонлэсь, Пӧзьыез кияз - ыргонлэсь, Е керттэм кусказ - ыргонлэсь, Е пулсаз тӥрез - ыргонлэсь. Ма быдӟа ныдыз? - Пӧлы кадь, Тӥрбамез кыӵе? - Гижы кадь. Вяйнямӧйнен, мӧй но визьмо, Вазиське солы туж сюлмо: "Кыӵе-мар ай тон, воргорон, Мискинь лул ӧвӧл меда тон?" Нош озьы гинэ со шуиз, Чаль гинэ шораз со учкиз: Син азьын пичи воштӥськиз, Туж быдӟым муртлы пӧрмытскиз: Пыдъёсыз гыро му вылэз, Нош йырыз возе пилемез, Вамыштӥз азьлань со ӝоген, Пыдъёссэ ӝутъяз капчиен. Тыпылэн улаз со вуиз, Юн тӥрзэ дӥняз мертчытӥз, Одӥг пол ӵогиз но кык пол, Погыртон калэ вуиз шол. Куинетӥ ползэ ӵогемаз Тыпыез выдтоз выжыяз. Я, тани сое погыртӥз, Сю йылзэ уллань кымалтӥз. Дӥнь палыз учке ӵук пала, Нош йылыз учке ӝыт пала, Улвайтэм дурыз - лымшоре, Улваё дурыз - уйшоре. Кин отысь тыпы вай ӝутӥз, Пыраклы аслыз шуд шедьтӥз, Кин ваиз йылзэ ас дораз, Весяклы луоз синпӧртмась. Я, тыпы кымин выдтэмын, Выжытӥз ик со ӵогемын, Уть, шунды но - нош воректӥз, Тыр толэзь но - нош югектӥз. Вӧлмизы инмын пилемъёс, Ву юо инбам букоос, Мукожын соос, бус пӧлын, Нюлэсо чебер шормуӵын. Нош но нош тэльёс будӥзы, Нюлэсъёс эркын ӝужазы, Турынъёс-куаръёс алязы. Кырӟало отын юберъёс, Огназы силё кикыос, Кисьмало узы-борыос, Зарни кадь пишто сяськаос. Турын-куар будэ, ӝог аля, Сяськая, пушъе, чиль чиля. Нош малы йыды потымтэ, Удалтэм ю-нянь вуымтэ? Вяйнямӧйнен - мӧй но етӥз, Лэчыт тӥр аслыз дурытӥз, Сьӧд тэльзэ сайкиз но сутӥз, Трос чебер пуэз ёмыртӥз. Писпуэз ваньзэ ик кораз, Кызьпуэз кельтӥз дым огназ - Шутэтскон инты - бурдолы, Сильылон инты - кикылы. Уть, ӧрӟи лобе инметӥ, Со лобӟе, ортче омыртӥ, Адӟемез потэм кызьпуэз, Туж потэм солэн тодэмез, Кузёез малы-о кельтэм, Кызьпуэз ӧвӧл йӧтылэм, Ӵогымтэ веськрес мугорзэ? Вяйно бен верам ни мугзэ: "Ма, ӧй кельт сое юнме мон: Бурдолы луоз ялкарон, Ин ӧрӟи понна пуксьылон". Нош ӧрӟи соку тыл поттэм, Тыл поттӥсь гизьы со шуккем, Погыръям пуэз кенжытэм, Нош ӵук тӧл сое аратэм, Вань корам тэлез тыл нылэм, Писпуэз пеньлы пӧрмытэм, Тӧл ӵынзэ ӝутэм но нуэм. Вяйнямӧйнен - мӧй, визьнодо, Куать кидыс шедьтӥз - со шудо, Нош огез вылэм на ӟепаз, Кизьыны мынӥз со лудаз, Ю тысьсэ пазьгиз выльвылаз. Кизьыны кутскон азьпалаз Визьмоесь кылъёс со вераз: "Кидысме сюлмысь кизисько, Инмар ки пыртӥ пазясько. Инмысь юн килэн юрттосэз Мед кароз узыр сайкосэз, Мед пушъёз мынам киземе, Мед улӟоз далтӥсь музъеме. Э, муэз утись-вордӥсьмы, Луд мумы, ӟечсэ сётӥсьмы, Сёт мулы кужым пумйылтэм, Му соку уз луы катьтэм, Котьку но пумтэм вапуме Жаля, уть каръян музъемме. Сайка тон, музъем, иземысь, Сазьке тӥ, возьёс, кӧлэмысь, Ӝутэлэ удзэ кидыслэсь, Юнматэ ньӧрзэ будослэсь, Поттылэ сюэн пушъетъёс, Кылдытэ сюрсэн тыр шепъёс, Кытын мон гыри но кизи, Курадӟи, тырши, шер изи. Укко, ӟеч вылысь Инмармы, Инатай, ваньмес утисьмы, Со люка инмысь кенешсэ, Зэмлыко, шонер ӧтчамзэ. Ӵук палась пилем ӝог вуттэ, Уй палась выльзэ со ыстэ, Ву вае шунды пуксёнысь, Соин ӵош вуттэ лымшорысь, Соосты ваче шуккалтэ, Мыд-мыдлань ваче тышкалтэ. Инвуэз вылысь зорытэ, Пилемъёс бордысь уськытэ. Усьылэ инву шапыкен, Усьылэ чечы кадь каллен, Мед шеплык ӝутскоз шуыса, Мед шудоз ю-нянь малпаса. Я, йыды кыэд судэктоз, Куроез борд кадь ӝутӥськоз, Му пушкысь небыт музъемысь, Вяйнямӧйнен ӟеч тыршемысь. Зол будэ йыды, шумпотмон, Куать чуро шепез - паймымон, Куролы быдэ куинь гердэз - Вяйнямӧйненлэн тыршемез. 12-тӥ декабре - Конституцилэн нуналэз Быдэ вуон вакыт Сизьым ар талэсь азьло кутэмын выль Россилэн Конституциез. Сизьым ар кунмы понна тэтэ карон вакыт вал. Секыт йӧтӥз ваньмызлы - мӧйыослы но егитъёслы, нянь будэтӥсьёслы но ужбергатӥсьёслы. Но пӧртэм шукрес адӟонъёс пыр потыса, асьмеос умой валам: адями - аслыз ачиз кузё, сюлмысь ужаз, пайдаё тыршиз ке, бай улоз, азьтэмъяськиз ке, пыд йылаз потоз. Табере кутске ни кунмылэн быдэ вуон вакытэз. Дыр вуиз странамылэн тусыз-символикаез сярысь малпаськыны. Ӵапак со пумысен кенешо туннэ Кун Думалэн депутатъёсыз. Россия Федерацилэн Президентэз Владимир Путин ӵектэ вашкалазэ, кык йыро ӧрӟиен кунпусэз (гербез) но тӧдьы-лыз-горд буёло куншетэз (флагез) юнматыны. Нош гимнэ кельтыны дэмла А. Александровлэсь крезьгурзэ, Совето Союзлэсь гимнзэ, солэсь кылъёссэ гинэ, пе, воштоно. Та крезьгурлы пумитъяськисьёс вань. Соос, кылсярысь, тодазы ваё Сталин кивалтон вакытэз, соку, пе, уно мурт юнме шорысь быдтэмын вал. Тазьы малпасьёслы Владимир Путин шуэ: СССР вакытысь ваньзэ урод карим ке, озьы асьмеос быдэс поколенилэсь, анай-атайёсмылэсь улэмзэс-ужамзэс пыд уламы лёгалом. Шонер-а меда со? Тодмо ӧвӧл ай, кыӵе крезьгур понна депутатъёс куаразэс сётозы. Но мылкыд карем потэ: выль даурез кунмы умой-умой юнматэм, данъяськымон символикаен мед пумиталоз вал. Ю. Михайлова. Очей Толилы - пӧсь салам Серемес верос Медпунктэ ветлӥ ай Арлыдоослэн нуналзы азьын медпунктамы врачъёс вуылӥзы. Контораысь радио пыр вань пересьёсты першал доры люкаськыны косӥзы. Мон но кырыж мугорыным ульчаез ӵужыса гебыр-гебыр туби. Огез врач доры пыри. Юа: бабуш, какой у вас стул? Ма, кыӵе-о стулъёс гуртын? Ваньзы одӥг кадесь кадь, пулэсь. Ма, бен, туала арын узыръёслэн олокыӵеез но вань, дыр. Шуко, деревянной. - Твердый, что ли? Да, пӧй. - А на что жалуетесь? Болей нет? Шуко, уг ни жалуюсь. И не больно. Азьло, пӧй, стулэ твёрдой вал, плохо было. Таберезэ дед мягко сделал сверху. - Как сверху? - юа. - А кытӥ эшшозэ мягко делать? Сверху умойгес. И деду хорошо, и мыным. - И вы оба сверху? - синъёссэ ик золтӥз таид. - О-о... Мыньпотыса кема гинэ шорам учкиз на. Перепеч-а, мар-а ваи кожа. - И обоим хорошо? - Небыт ук, шуныт но. И теперича он там сидит, и я. Пересь лыосмылы шуныт гинэ медло на милемлы. Номыре но, пе, уг валасьы. Мон валасько малпа, лэся, та кобы йырыным. Как, пе, вы на стуле сидите? Ма, шуисько, дорогая, как не сидеть на мягком стуле, если устаешь? Вуж ке но одеялэз, шунытэз вань на. Юрдӥсь мурт кадь ымдуръёссэ кырыж-мерыжъяз но юа: - И вы на нем сидите, прикрыв одеялом? - Озьы, озьы, - шуисько, шумпотыса. Шуныт но, небыт но. Артэ с печкой эшшо. И тӥ коркады-а ходите? - Ма, кызьы-о ветлытэк. Ялан-а пукыса но кылльыса гинэ улод? Гидэ ходим, пудоос доры, мунчое, лапас улэ. Куке-соку магазинэ, Галя кума доры. И магазинэ, пе, тӥледды лэзё-а? Ма, кызьы-о, пӧй, уз лэзе. Одӥг-ог ветлӥськом. И за бутылкой бывает по нужде. Ничего не понимаю, шуэ. Как за бутылки ходите? Зачем? А зачем, пӧй, нельзя. Пить чо ле нельзя? Йыры кур луиз ини. Можно, шуэ. Но ходить надо в туалет! Отчы но ветлӥськомы. Кызьы-о нуналыз понна педло потатэк? Берпалдэ пыкса уд возьы ук, пробкаен но пересь сукыриослэсь уд ӵокса ни. Воксё ма вераны абдрай. Картаям алкоголик яке шузи гожтоз на. Пить надо, шуэ, за столом. Ма, шуисько, за столом на стуле и пьем. Стулды, пе, дедушеныд одӥг кадесь-а? Ӧвӧл. Дедлэн бадӟымгес, пӧй. Так и должно быть, пе. Тодэ, вылды, ачиз. - А живот не болит? Если стул твердый, это ненормально. Милям стул ялан твёрдой, мы привыкшие, пӧй. Мягкий стул ултозямы ӧм адӟылэ. Собере кӧтыз тырмон кӧтме зӥбылиз. Со палзэ, та палзэ эскериз. - А червей в стуле нет? - Не-ет... Ултозям пуконысь нумыръёссэ адӟылэме ӧвӧл. Аслазаз-а, мар-а нумыръёсыз ветло? Кызьы быдтыны уг вала, соин рос-прос юалляське, дыр. Вот ведь-а, а эшшо ке врач. Дышетскемын. Гуртэ, неграмотной пересь доры дышетскын лыктэм. Ма, бен, огназ улэ ке, стулзэ кызьы мягкой карыны уг вала, дыр. Со ужлы ведь пиосмурт медло, пиосмурт. Сотэк нокызьы. Ой, нокызьы. Эмма Загребина. Музеямы возьмаськом 1930-тӥ-1954-тӥ аръёсы, 24 ар ӵоже, Якшур-Бодьяын ужаз педучилище. Отын дышетскемъёс тросэз тодмо адямиос луизы, соос пӧлын тодосчиос Глафира Николаевна Никольская, Василий Максимович Вахрушев, Семен Константинович Бушмакин, Андрей Петрович Перевощиков, Степан Иванович Широбоков, писательёс Генрих Ксенофонтович Перевощиков, Василий Григорьевич Широбоков но мукетъёсыз. Трос тодмо дышетӥсьёс но татысь потӥзы. Соослэн дышетэм нылпиоссы педучилищелэсь данзэ ӝутӥзы на, кылсярысь, Анна Егоровна Загребиналэн дышетскисез луэ Александр Григорьевич Шкляев. Училищелэн историез дауръёслы мед кылёз шуыса, 14-тӥ декабре (толсуре) 10 часлы ёрос музее ӧтиськомы ваньзэ, кинлэн улонэз герӟаськемын Якшур-Бодья педучилищеен. Сьӧрады вайыны быгатоды музейлы синпель кузьым - педучилищеын ужам яке дышетскем вакытысь (ялалоз берло вакытысьтыды но) арбери, книга, газет, туспуктэм, гожтэт яке кыӵе ке документ - мар тодэ вайытэ та дуно егит дыръёстэс. Шумпотыса пумиталом педучилищеямы дышетскем муртъёслэн бурд улысьтызы потэм адямиосты но. В. Иванова, музейлэн кивалтӥсез. Як.-Бодья ёрос. ШӦКЫЧ Луысал ке султан... Тӥ адӟытэк ӧд кыле, дыр, ук, кызьы Жириновский ымысьтыз дыльдыосыз пазяськыса, бур киыныз шонаськыса, трос кышноен улыны лэзён сярысь закон кутонъя вераськиз. Странаысь демографияя югдурез умоятон вылысь, пе. Мукет сямен вераса, калыкез уноятон понна. Нылкышноослэн законной картъёсынызы тросгес нылпи ваемзылы оске. А мар-о, али вань нылкышноос пал-а, мар-а - кыкетӥ пинал вайыны кышкало? Картъёссы но, нылпизы но - законъя, улэм-вылэмзы только... Выль закон малпаса пукытозь, тон ваньёссэ быдэсъян сярысь сюлмаськы вал. Толэзяз 68 манет нылпи пособие сётыны уд быгатӥське, эшшо маке ӵектӥськоды на. Да мирошка вайыса, нылкышно коть пособие бадӟымгес басьтоз, матысь дас ньыль ар ӵоже ужзэ но уз ышты. Буди сое мукетыз сюлмаськытэ. Ну... пиосмурт тазалык сярысь верасько мон (тодады вае ай, юэм куен кин тросгес "вормонъёсыныз" ушъяське? Самой толыктэмез. Со сярысь кемалась психологъёс веразы ни). Мон, конечно, уг тодӥськы, кӧня солэн кышноез. Телевизор верамъя, одӥг. Трос возьыны будьто ке закон уг лэзьы. Да учкысал, дыр, со закон шоры, толыкез ке луысал. Быгатӥсез али но улэ ук, номыр уг люкеты. Оло, нош со малпаз таӵе амалэн аслэсьтыз данзэ ӝутыны. Кожаз, памфиловаос, хакамадаос вань арбатоваосты ӝутозы, война поттозы. А мар-о, соос шузиесь-а, мар-а, тодо ук одӥг сазь нылкышно но ассэ кыкетӥ-куинетӥ сортъем карыны уз лэзьы. Жириновскийлэн малпамезъя, кыкетӥ семьязэ, пе, пиосмурт сюдыны кулэ ӧвӧл. Майбыр ук: ми но кык-куинь картэн улысалмы, только ӝытлы быдэ пӧсь шыд но медаз куре, дэремзэс- штанизэс но миськыны медаз косэ, садике-школае собраниосы но асьсэос мед ветлозы. Воргоронъёс шуозы - уло ук мусульманъёс. Уло, туж ӟеч тодӥськом. Нош тӥ, нокыӵе инмарлы оскисьтэмъёс, тодӥськоды-а, мусульманъёс макмыр но уг веськатъяло шуыса? Кужымзылы ке нош уг оско, женьшень юо. А-а, тон но со сярысь кылылӥд-а. Соку малы аптекае уд пыриськы? Тыныд кышноед ӵукна дас вить манет гинэ сётӥз, озьы-а? Йӧллы, няньлы но кысконлы. Сурлы но уг тырмы, у-у, сук пуны! А мазэ со сётоз - кылем толэзе ваем ӝыныё уждынысьтыд-а? Ме! Быдэс арня котлет сиид, эшшо маиз ке кылиз кожаськод на. Тон, конечно, Кузё! Ӧвӧлтэмлэсь вань шуыса но нюлыса возьыны кулэ. Озьы малпаськиськод, бен-а? Шӧдӥськом. А то кутскод но кошкод кыкетӥез доры. Соиз пумиталоз. Умой пумиталоз: хи-хи! пальпотоз, йырсизэ баблялоз, сю грамм мычоз, вӧзаз кӧлтыны выдтоз. Кыкетӥ уяз но кельтоз, но йырсизэ бабляны вунэтоз. Куинетӥяз серекъямысь дугдоз, "нырйылзэ" ватоз, нош ньылетӥяз нырысетӥ кышноед тус луоз: мултэс чапкетӥськод, кырыж лёгиськиськод, ляб ӟыгыртӥськод... берыкъям кисыостэ тупатъяса, тачыр! бызьыса нырысетӥез доры кошкод. Да уз лу со ноку - куинь-ньыль кышноен улон - толыкмы уз тырмы. З. НЕАРБАТОВА. Нылпиос сярысь сюлмаськыса Кинэ сюлмаськытэ висись нылпиослэн улонзы но кин соослы юрттыны быгатэ,Ижевскын алигес усьтӥськем "Здоровье детям" фонд уртче ужаны ӧте. 12-тӥ- 15-тӥ декабре Ижевскысь Ф. Дзержинский нимо культурая юртын та фонд паськыт ужрад ортчытэ. Пумиськон кутскоз 12-тӥ декабре 12 часын ас мылкыд каремъя юрттон фондлы презентациен. Со йылпумъяськоз мӧйыослы но пичиослы чаклам шулдыръяськонэн. Ӵуказеяз пумиськон азьланьтӥськоз нылпи учреждениослэн кивалтӥсьёссылэн семинаренызы. Нуналлы быдэ 11 часысен 18 часозь кулэяськисьёс пиналъёсты эмъян амалъёсъя визь-кенеш басьтыны быгатозы. Ужрад йылпумъяськоз 15-тӥ декабре 17 часын нылпи шудонъёслы аукционэн. Татын поттэм барыш сётэмын луоз Ижевск городысь нылпи приютлы. Э. Васильева. Инъет вань. Табере - азьлань Удмурт калыкмылэн улон-вылоназ, шаермылэн историяз вылез син шоры йӧтымонэз пытьы кылиз, шуыны луоз. Ортчиз вань удмуртъёслэн тямысэтӥез ӧтчамзы. Отын "Удмурт кенеш" огазеяськонлы президентэ выльысь быъемын В. К. Тубылов. Валентин Кузьмичез сюлмысь ӟечкыласа, солы вазиським кӧня ке юанъёсын. - Валентин Кузьмич, ӧтчамлэн делегатъёсыз вань удмурт калыклэн нимыныз нош ик веразы тӥледлы оскемзэс. Кыӵе мылкыдын пумитады та бадӟым осконэз? - Таӵе бадӟым осконэз огшоры гинэ пумитаны уг луы, татын шумпотонэз трос ик ӧвӧл шуысал. Ужаны кулэ луоз ук. Ӵеконзылы пумит ӧй кариськы бере, ачим но малпаськи, трос эшъёсын кенешим. Та ортчем куинь ар ӵоже кызьы ке но выль сямен валано луиз кадь "Удмурт кенешлэсь" пуштроссэ, малы ке шуоно, общественной уж со огшоры гинэ капчи удыс вылымтэ. Соин ик куинь ар ӵоже мон троссэ адӟи, валай, туж троссэ адямиосты тодӥ, кин кыӵе мылкыдын улэ-ужа. Берлоосыз быръёнъёс но сое ӟеч возьматӥзы, кин, шуом, зэмзэ но ас калыкез понна сюлмаськыса, сое гажаса ужа, нош кудӥз нырысь ачиз сярысь малпаське. Соин ик азьланяз ужано луоз, дыр, ваньзэ тае лыдэ басьтыса. Мон адӟисько, удмурт калык понна ужаны мылкыд карисьёс туж трос шуыса, озьы ик уно на, дыр, кудъёссэ ум но тодӥське на. Соин ик оскисько, юрттӥсьёс луозы шуыса. Мынам туннэ куреме но потэ вал, ӧтемез-сюлворемез возьмано ӧвӧл, адямиос асьсэос мед вазиськысалзы, асьсэды мед возьматысалзы. Ӵем дыръя тазьы луылэ угось: кыӵе ке ужрад ортчем бере гинэ сайкало, монэ ӧз ӧте, ӧз вералэ, шуо. Ужамы пайда сётыны быгатӥсьёсты бордамы огазеяны, соослэсь мылкыдъёссэс кылзыны ми котьку дасесь. Оскисько, ужмы азинскоз шуыса. Ортчем куинь аръёс "Удмурт кенешез" юнматонлы, солэсь ёросъёсын ёзъёссэ кылдытонлы сӥземын вал ке, табере лэсьтоно выль вамыш. - Озьыен, инъет дась, валэз кыткон азьын буко куасано уз луы ни. Верамдэс тазьы валаны луоз... - Озьы. Буко вань, табере рос-прос кыткиськыны кулэ. - Нош кыӵеосыз ужпумъёс, тӥ сямен, нырысь быдэстоноосыз пӧлы пыро? Азьпалан выль даур, маин но кызьы мытысалды сое? - Мон малпасько, нырысь ик, тодосчиосын люкаськыса дасяно рос-прос программа. Отын возьматэмын мед луоз ваньмыз, ма бордын ужаны кулэ. Озьы ик пыр-поч чаклано-учконо та съездын верам вань ӵектонъёсты. Собере юнгес мылкыдын басьтӥськисько кун властен кусыпъёсты юнматон но уртче ужанэз радъян борды. Нырысь ик - Кун Кенешен. Кутоно удмурт калыклы, шаермылы туж кулэ луись законъёсты. Тани кӧня вераськиськом ни кун кылъёс сярысь закон пумысен. Солэн кулэлыкез туж бадӟым. Та законэз кутӥм ке, туж трос малпанъёсмес уж вылын быдэсъяны луонлыкъёс кылдозы. - Татчыозь ошиськыса улӥсь юанъёслы валэктонъёс но басьтыны луысал. - Озьы. Шуом, нылпиосты дышетон, удмурт кыллэсь статуссэ ӟуч кылын одӥг кадь карыса уже кутон. Та законэн туж тросэз герӟаськемын. Валтӥсь ужпумъёс борды озьы ик пыре кадръёсын ужан. Экономикае но пыриськытэк ӧвӧл. Палэнысь удмуртъёсын ужез ӟечгес радъяно. Али соослэсь ӝожтӥськонъёссэс но кылӥськом, ми доры удгес вуылӥське шуо. Адямиез выжыез пала кыстӥське ук. Собере одно ик пыриськытэк ӧвӧл политикае но. Нош ик луозы выльёсыз быръёнъёс. Законъёс дасясь ёзъёсын но асьме калыкмес гажась, со понна тыршись адямиос кулэ ук. Со борды али ик басьтӥськоно. Палэнын сылыны уг яра. Куд-огезлэн берлань кыскемзы потэ, али но шуо, тӥ кырӟалэ, шулдыръяське, нош политикае эн пыриське. Табере тазьы уз луы ни, сотэк асьмеос тыпак куашкалом. - Озьыен, кырӟаса-эктыса гинэ улонлэсь куштӥськоно ни. Та сярысь ик вера, мон сямен, Россилэн Президентэзлы та съездын кутэм вазиськон но... - Шонер. Озьы со. Собере тани инкуазез утён ласянь но вазиськизы Воткинскын улӥсьёс. Та ужпум но асьмелэн сюлэмшугъяськонмы. Асьмеос ке ӧм кин утёз инкуазьмес. Огкылын вераса, ужъёс трос, соосты быдэсъян борды огкылысь, гижысь- пиньысь басьтӥськоно. Нош со понна, кызьы мон съездын но верай, асьмелы огазеяськыны, ог-огмес валаны кулэ, йырмес ӝутыны кулэ. Тазьы пӧрмытӥм ке, азьлане данъяськыса вамыштыны быгатомы. - Тау, Валентин Кузьмич, мылкыдъёстэс верамды понна. Тазалык, улонады ваньзэ ӟечсэ гинэ тӥледлы,калыкмылэн мылкыд каремезъя чаклам ужпумъёс мед быдэсмозы. - Тау. Вераськиз Федор Никитин. Удмурт Республикаысь Почта кусыпъёсъя управление но Егитъёсын ужанъя кун комитет 1-тӥ декабрьысен 31-тӥ декабрёзь "Тол Бабайлы - гожтэт" конкурс яло. Гожтэт ыстыны быгато 14 аресозь нылпиос. Тол Бабай шумпотоз, дыр, шулдыр мылкыдо, чебер гожтэтъёстылы. Тужгес усто гожтэтъёслэн кузёоссылы со кузьымъёс дасяз ини: небыт шудонъёс, шаерысьтымы шутэтскон лагере но Сьӧд зарезь дурысь "Орлёноке" путёвкаос. 7 аресозь но 7-ысен 14 аресозь нылпиослэн гожтэтъёсы висъяса дунъямын луозы. Тол Бабай вите гожтэтъёстэс! Валэктэ юрист Утялтэм музэ уз усь Мынам атаелы 85 арес. Быгатӥсько-а мон солы опекун кариськыны но пыроз-а со утялтэм вакыт стаже? Кыкетӥез юанэ. Али 16 аресъем нылылы атаезлэсь алимент басьтӥсько. Тыриськоз-а алимент нылылы 18 арес тырмем бере, со кытын ке дышетсконзэ азинтӥз ке? Л. Исаева. Пичи Пурга. "РФ-ысь кун пенсиос сярысь" Законысь 92-тӥ ёзэтъя, огъя ужан стаже пыре И группаен инвалидэз, нылпи-инвалидэз яке пересь муртэ солэн утялтонэн кулэяськемез сярысь эмъян учрежденилэн справкаезъя) утялтэм вакыт. Гражданской кодексысь 36-тӥ ёзэтья пересь муртэ утялтэм понна коньдон уг тыриськы, но "РФ-ысь кун пенсиос сярысь" законысь 21-тӥ статьяя утялтэмез кулэ карисьёслы 80 ареслэсь мӧйыгес пересьёслы пенсизы вӧзы кӧня ке ватсаса коньдон сётӥське (со минимальной пенсилэн 2/3 люкетэз мында луэ). Кыкетӥ юамдылы валэктон сётэмын Семья Кодексысь 61-тӥ ёзэтын: алимент тыриськемысь дугдэ нылпилы 18 арес тырмем бере, куд-ог учыръёсы солэсь но вазь (нылпиды кузпалъяське яке ас кожаз улыны быгатэ ни ке). ОСКОН Устоесь, кужмоесь, данъяськымонэсь Мукет кунъёсын гинэ ӧвӧл, асьме странаын но инвалидъёсты адӟыны кутско ни. Россия Федерацилэн Президентэз Владимир Путин Дуннеысь инвалидъёслэн нуналзы азьын пумиськылӥз шуге-леке сюремъёслэн огазеяськонъёссылэн кивалтӥсьёсынызы, тодматскиз ӧлексыослы протезъёс дасясь Москваысь предприятиен. Президентлэн оскытонъёсызъя азьланяз инвалидъёслы бадӟым саклык висъяськоз, кыл вылын гинэ ӧвӧл - коньдонэн но вераса. Нош армиын сӧсырмыны яке висьыны усем солдатъёслы службазы бере но луонлык усьтӥськоз нимысьтыз госпитальёсын эмъяськыны. Мар бен, сыӵе сюлмаськонлы кулэясько шаерысьтымы но 80 сюрс пала инвалидъёс, 7 сюрсэз пӧлысьтызы - нылпиос. Республикаысьтымы Калыкез улон-вылонын утёнъя министерство туннэ ӧжыт уг лэсьты та адямиослэсь улонзэс капчиятон ласянь. Инвалидъёс сярысь кутэм закон но трослы азьлане вамыштысал - коньдон уг тырмы. Озьы ке но, 3-тӥ декабрьлы сӥзьыса, министерство сюлмаськиз шаерысьтымы инвалидъёслы кузьым лэсьтыны. 30-тӥ декабре Ижевскысь "Металлург" культура двореце быдэс зал тыр люкаськылӥзы инвалидъёслэн пӧртэм огазеяськонъёсазы мылысь-кыдысь пыриськисьёс, азьветлӥсьёс, кыӵе ке но удысын асьсэды возьматэмъёс, оглом вераса - устоосыз пӧлысь устоосыз. Ужрад зэмос праздниклы пӧрмиз. Кибашлыос люкаськемъёсты асьсэ ужъёсынызы тодматӥзы. Маиз но ӧвӧл отын: суредъёс, вурем-керттӥськемъёс, пужыятскемъёс, пӧртэм шудонъёс. Вань со ужъёс лэсьтэмын инвалидъёслэн киосынызы. Син но ляб адӟе, пельёс но уг кыло, киос но куддыр мырдэм кылзӥсько - но чеберлык борды кыстӥськон юрттэ улонын астэ шедьтыны. Улонлэсь шуг-секытъёссэ тросэз кырӟан-веран, эктон пыр келяло. Та нуналэ но усточиос асьсэлэсь быгатонлыкъёссэс бадӟым сцена вылысен возьматӥзы. Крезьгурез кылытэк но, Ижевскысь 15 номеро школаысь ляб кылӥсьёс но кылӥсьтэм нылпиос чырмыт эктонъёссэс возьматӥзы. Кылӥсьтэм-вераськисьтэмъёслэн ик Ижевскысь "Родина" клубазы кӧня ке аръёс ӵоже ини выросъёс пыр кырӟало. Надежда Кадышевалэн кырӟамез улсын Светлана Корепанова люкаськемъёсты таӵе аспӧртэмлыко искусствоен тодматӥз. Паймытӥз но синмаськытӥз аслаз быгатонлыкеныз Сарапулысь Алёша Макшаков. Синъёсыз ляб адӟемлы уг паймы пинал усточи. Ачиз ик крезьгуръёс гожъя, ачиз ик кырӟанъёссэ быдэстэ. Пичи классын дышетскемез шоры учкытэк, пияш пӧртэм конкурсъёсын лауреат ним басьтылӥз ни, пыриськиз Россиысь инвалидъёслэн творчествоя кыкетӥ фестивалязы но. Нош кызьы уд синмаськы инвалид нылпиосты дышетонъя Сарапулысь колледжысь модая театрлы. Нылъёс асьсэлэн вурем дӥськутъёсынызы сцена вылын юсьёс кадь ик адӟиськизы, ма мукетъёсыз но кырӟась-верасьёс асьсэлэсь быгатэмзэс одӥг пол гинэ ӧз возьматъялэ ни пӧртэм сцена вылын. Туннэ но мылкыдзэс вӧл-вӧл кисьтӥзы. Люкаськемъёслы та нуналэ кузьым лэсьтӥзы шаерысьтымы данэ потэм артистъёс, пинал усточиос но. Калыке нырысьсэ потэм тросэз адямиослы со-а шумпотон ӧвӧл? Таӵе вӧлмыт но югыт залын соос понна кырӟало, кузьым сёто, данъяло. Калыкез улон-вылонын утёнъя министр Светлана Андреева тодматӥз инвалидъёс понна туннэ лэсьтӥськись ужрадъёсын. Устооссэ но асьсэды кыӵе ке но удысын возьматэм инвалидъёсты пусйизы Кун Кенешлэн, Правительстволэн но Ижевск город администрацилэн данъян грамотаосыныз. Пӧлазы вал спортсменъёс но. Шаерысьтымы инвалидъёс асьме дорын гинэ ортче ӵошатсконъёсы уг пырисько - вуыло кунгож сьӧры, Россиысь эшъёсынызы кужымзэс мертало. Туэ гужем пыриськизы Сиднейын инвалидъёс понна ортчем Олимпиадае. Ӵапак та люкаськон нуналэ шумпотымон ивор веразы - Америкаын ортчем ӵошатсконъёсын Россиысь футболистъёс (ампутантъёс) кыкетӥ инты басьтӥллям. Со сборной командаын витез спортсменъёс - шаерысьтымы. Та бадӟым ужрадэ лыктэмъёс одӥгез но кузьымтэк ӧз кошке - котькудӥзлы сётӥзы коробкаен шоколад конфетъёс, озьы ик дунтэк сюдӥзы-утялтӥзы. Зал тыр люкаськем калыклы ваньмызлы инты шедиз. Калыкез улон-вылонын утёнъя министерствоен ӵош Со сярысь ӟеч сюлмаськиллям "Металлург" культура дврецын ужасьёс, концерт люкетсэ радъянэз но соос ас вылазы басьтӥзы. Праздник зэмзэ но ушъямон пӧрмиз, адямиос ӝутскем мылкыдын бертӥзы дор палъёсазы. Та ужрадысь мон пумитай кемалась тодмоме. Со ужаз милям редакциямы курьерын. Компьютерен ужаны выжеммы бере сыӵе ужась кулэ ӧз луы ни. Озьы Людмила Ширина кошконо луиз дорысьтымы. Висись муртлы секыт вал дышем ужезлэсь люкиськыны, ассэ мукет удысын шедьтыны. Но макем шумпотӥ мон со понна та нуналэ. Людмила Шириналы эшъёсыз оскиллям Ижевскысь Ленин ёросысь Инвалидъёслэн огазеяськонзылэн пичи ёзэныз кивалтыны - отчы 85 мурт пыремын. Ӟеч ужамез понна Людмилаез но пусйизы Удмурт Правительстволэн Данъян грамотаеныз. Со-а уг возьматы адямилэсь кужмо луэмзэ, улонлы но азьланезлы осконзэ? Л.МАЛЫХ. Люкаськемъёсты шулдыртэ "Андан" ансамбль. Инвалидъёслэн киужъёсынызы радъям адӟытон. Сарапул колледжын дышетскисьлэн Л.Ивановалэн суредэз. Грекъёс вылӥ дунъяло Кызьы ивортӥз Ижевскысь электромеханикая "Купол" заводлэн пресс-службаез, ноябрьлэн пумаз Грецие нош ик келямын отын поттэм "ТОР-М1" зенитно-ракетной системаос. Машинаосты бичан но келян мынэ контрактэн чакламъя. "Купол" заводлэн директорезлэсь ужзэ огдырлы быдэсъя Владимир Мокрецов. Та предприятиын югдур али сокем ик умой ке но ӧвӧл, завод сётэм кылзэ быдэстыны тырше. Грециен контракт гожтэм сяна, туэ со мукет кунэн но заказ гожтыны чакла на. Грекъёс "ТОР-М1" комплексэз вылӥ дунъяло. Н. Сергеев. Пичи йӧ дунне луоз туэ но Ижевскысь Центральной полощадьын лэсьтыны кутскизы Выль арлы сӥзем йӧ городокез. Татын Выль ар кызэз 25 декабре 16.00 часэ сӥё-дано "усьтозы". Соку ик ортчоз городысь Тол Бабайёслэн парадзы. Огъя шулдыръяськон но юмшан кутскоз Выль ар уе. Нош 7-тӥ январе луозы Толсур шудонъёс. Г. ИСАЕВ. ТОДМАТСКОН СЭРЕГ "Салон для двоих" - озьы нимаське Ижевскысь тодматскон служба, кивалтэ соин Алевтина Иосифовна Агалакова. Салон ужа огназы улӥсьёсын, кинлэн кылдытэмез потэ таза семья. Лулсэр висёнъёсын курадӟисьёс, кышнояськем-быземъёс, пытсэт сьӧрын пукисьёс медаз вазиське. Улӥын верам кыӵе ке абонентэн тодматскемды потэ ке, гожтэ солы гожтэт, келялэ салонлэн кивалтӥсезлы, - 2 чылкыт конверт ыстэ на, сотэк тӥледлы вазиськись уз луы. Асьтэлэсь ке ялондэс та служба пыр газетъёсы печатламды потэ, тыроно 50 манет (ыстоно коньдон тырем чекез но 2 конверт салонлэн кивалтӥсезлы). Вазиськоно таӵе адресъя: 426060, Ижевск город, а/я 3307, Алевтина Иосифовна Агалаковалы. Гажано лыдӟисьёс, тодады вайытӥськом: та салонысь абонентъёслы сӥзем гожтэтъёстэс "Удмурт дунне" газетэ эн келялэ. Аб.4280. Балезино районын улӥсь воргорон, 61/170, городын квартираез вань, гуртын - юртъерез. Мушкась, ужаны яратэ, урод сямъёсыз ӧвӧл, кышноез кулэмын. Тодматскысал улон интытэк кылем, огшоры сямо, узырлык сьӧры уиськисьтэм нылкышноен, ӵош улон понна. Аб.4284. Балезино ёросын улӥсь удмурт-ӟуч нылкышно, 32/162, веськрес мугоро. Улон интые вань, коньдонлы уг ёрмиськы, ужась, сюлмо, юртэз шулдыртыны но шунтыны быгатӥсь. Семья кылдытон вылысь тодматскысал лякыт сямо, сюлмо, нылпиосты яратӥсь пиосмуртэн. Аб.4285. Пиосмурттэк улыны гуртын секыт, ачим но егит ай - шунтӥсь, лӥятӥсь кулэ. Ачим сярысь: 39/157/55, мертчан йырсиё. Тодматскысал 38-48 аресъем пиосмуртэн, ужын но улонын эш но юрттӥсь мед луоз, пумит ӧвӧл нылпиосызлы. Аб.4286. Гуртын улӥсь удмурт нылкышно, 60/160, быгылес мугоро. Вань садэ, бакчае, юртъере, пудо-животэ. Тодматскысал 58-62 аресъем юисьтэм пиосмуртэн. Аб.4287. Играын улӥсь ӟуч нылкышно, 60 арес, улон интылы уг ёрмиськы. Тодматскысал урод сямъёстэм, огшоры пиосмуртэн - 60-65 аресозь. Аб.4292. Можга ёросын улӥсь пиосмурт, 59/176, ужась, сюлмаськись, юрт котырысь ужез ачиз быдэсъя, улон интызэ воштыны пумит. Тодматскысал огназ улӥсь, улон интылы ёрмись нылкышноен, ӵош улон вылысь. Аб.4294. Сарапул районын улӥсь удмурт нылкышно, 46/170/60, дышетскеме средне- специальной, гороскопъя Лев, лякыт сямо, керӟегъяськисьтэм. Яратӥсько нылпиосты, инкуазез, спортэз, чылкытлыкез. Пумитаме потэ улонын оскымон эшме, национальностъя котькин медло. Доразы ӧтё егитъёс 13-тӥ толсуре (декабре) "Интыл" продюсер студия но "Егит тулкым" дискотека ортчыто "Удмуртия" кун телерадиокомпанилэн "Ингур" радиоезлэн "Уй кизилиос" программаезлы сӥзем концерт. Люкаськемъёсты шулдыртозы Валентина но Игорь Моисеевъёс, "Лулгур" группаысь усточиос Надежда Уткина, Ирина Габитова, Иван Григорьевых. Концерт кутскоз 18 часын. Луоз Егитъёслэн юртазы. Со интыяськемын таӵе адресъя: Коммунаръёслэн ульчазы, 263-тӥ юрт. Тел. 22-22-89. "Ой, шудтэм шудэ!" Палэнысен ми, гожъяськисьёс, тросэзлы валантэмгес, аспӧртэмлыкогес потӥськом, дыр. Нош мыным, гожъяськись муртлы, пӧлысьтымы тужгес но аспӧртэмлыко потэ Алла Кузнецова. Кылсярысь, мон уг валаськы, кызьы больницаын капельница улын кылльыку, кылбур малпаны луоз. Нош со малпаз но гожтӥз. Табере со кылбур, кырӟан луыса, вань удмурт гуртъёсын чузъяське: капи-кап-капи, капи-кап-капи... Озьы ик мон уг валаськы, кызьы нюлэскын, йыромыку, пеймытлэсь кышкаку-кӧшкемаку, тазьы шуод: "Ай да, пропадать дак с музыкой!" Собере быдэс сьӧд нюлэс тыр чан-чан куараен кырӟалод. Нош Алла Кузнецова кырӟаз. Эшшо кызьы кырӟаз! Дораз пудо возьмась паймыса вуиз но Аллаез нюлэскысь поттӥз. Озьы ик мон уг валаськы... Ма, ваньзэ вераса быдтод шат! Шуисько ук: милям Алламы - туж аспӧртэмлыко адями. Одӥг кылын вераса - артист. Улон дуннеез сцена шуид ке, Алла Кузнецова отын туж быгатыса шудэ пичи муртэ но, котьма шоры ас сяменыз учкись, визьмо, малпаськись муртэ но, яратонэн валче йырзэ ыштыса йыромем муртэ но... Огзэ гинэ со шудыны уг быгаты - азьпалась улонзэ чаклась, эскерись, радъясь муртэ. Туннэ нуналэн улэ. Туннэ солэн ӝӧк вылаз нянез вань ке, шумпотэ - кылбур гожтэ, ӧвӧл ке - нош кылбур гожтэ. Алла Кузнецоваен ми ӵем гинэ вераськиськом улон-вылон сярысь. Нош аслэсьтыз будэс сюрессэ тодаз вайыны кутске ке, чус-чус кариськыса, пуш дуннеяз вые, яке мур лулӟиське но шуэ: "Ой, тушмонэ но мон кадь медаз курадӟы!" Улэп анаез вань вылысь уго Аллалы нылпи юртын будоно луиз, собере калыкын нылпи утьыса улӥз. Мыным, шудо пинал даурез ортчем муртлы, со валантэм. Шӧдӥсько ке но, Аллалэсь сюлэмзэ чепыльтӥсько шуыса, юасько: - Нылпи юртын улон сярысь туж ик ӟеч кылъёс уг верало. Котьма ке но, мурт дунне ук со. - Ой, мон отын туж шудо вал! Дырыз дыръя сиськиськод, шудӥськод, кӧлӥськод. "Витьлы" гинэ дышетскисько вал. Музыкальной школае ветлӥ - скрипкаен шудӥ. Собере, ог дас арес тырмиз но, муми монэ отысь басьтӥз. Улонэ йырчукин кошкиз. Уг яраты вал монэ мемие, синазькыль карылӥз, жугылӥз. Нуны дыръям песянаеным ӵош улӥськем. Со кулэм бере, монэ нылпи юртэ келяллям. - Нош малы соку анаед тонэ нылпи юртысь басьтӥз? - Со агрономе дышетскемын вал. Партие пырыкуз тодӥллям, нылыз нылпи юртын будэ шуыса. Солэн эшшо одӥг нылыз вал на ай. Мукет картлэсь. Озьы нылпи юртысь монэ басьтыса гинэ анайме партие кутӥллям. - Нылпи юртын будӥд бере, иське, удмурт кылэз уд тодӥськы вал, дыр? - Уг. Гуртын но мемие ӟуч сямен вераське вал. Но нылпи юртын вӧталлясько вал: эсьмаса ке, гурт кузя гольык пыд бызьылӥсько, шалтыр гинэ удмурт сямен вераськисько. Сайкасько но - "нянь" кылэз гинэ удмурт сямен тодӥсько. Монэ нылпи юртысь басьтӥзы. Вуимы ми Кизнер ёросысь Вуж Бодья гуртэ. Отын одӥг адями но ӟуч сямен уг тоды, уг вераськы. Озьы нырысьсэ зэмос удмурт кылэз кылӥ. Вуж Бодьялан улэмысьтым тодам кылиз таӵе учыр. Со гуртын сортоучасток вал. Анае отын ужаз. Уйшор уин яке нуназе зор ортче ке, солы усем зорез мертано вал. Зор усемез мертан арбери кыдёке, бусы шоры, пуктэмын луоз вал. Зор ортче ке, мертан арбериез бусы шоры нуоно, нош отысь тырозэ ваёно. Анае ачиз уг мыны вал, монэ косэ. Бусые мыныса, зор мертанэз басьтыны ӝужыт пагӟа кузя тубоно луэ на вал. Мон пичи на, пыды но вакчи, висись. Со тубат кузя васькыкум яке мыныкум канжаськисько, усисько, зор мертанысь вуэз пальккаське, кисьтӥське. Буш медаз лу шуыса, отчы шур вуэз омыртӥсько но ваисько. А то мыным мемиелэсь туж зол йӧтоз. Нош кӧня вал вуэз мертан посудаын - мон уг тодӥськы ни. Анае ваем вуме мерта но лыдпусъёссэ Кизнере сётэ. Солэн со, мукетъёслэн сярысь, котьку пӧртэм луылӥз. Нэнэме отысь уллязы. Мынам йырам но ӧй вал, монэн сэрен шуыса. Собере ми Казмасэ вуим. Отын мемиме умой ужамез понна ВДНХ-е лэзьязы. Картофкаез туж ӟеч удалтэ вал. - Иське, Кизнер ёросысь Вуж Бодьялан удмурт кылын умой-умой вераськыны дышид ни? - Ӧй. Кылӥ гинэ али мон сое. Дышыса ӧй вуы: анайме отысь чаляк кошкытӥзы уга. Казмасын ини мон пичиен-пичиен дыши, удмурт кырӟанъёсыз но кылӥ. Собере нош кошки. Мемиелэсь пегӟи, шуыны луоз. Чидантэм жуге вал монэ. Кутӥ но Иже кошки. Нылпи утись кулэ карись ялонэз адӟи но отчы мынӥ. Озьы, паспорт басьтытозям, мурт семьяын нылпи утьыса улӥ. Со вакытэ но мынам шудо аръёсы вал. Монэ жаляллязы, ческыт сюдӥзы, асьсэлэсь адямизэс кадь утялтылӥзы. Паспорт басьтыса, Шабердыысь кирпич поттон заводэ интыяськи. Отысен ини удмурт кылэз ӟечгес валай: Зоя нимо эше лад-лад выриз монэ дышетыны. Нош Иже вуыса, ӟучлы бызи. Озьы мон удмурт кыл котыртӥ бергай-бергай но нош ӟуч кылэ выжи. Кылбуръёс гожъяны Шабердыысен кутски. Ӟуч кылын. Ма, нылпи юртысен ик монэ рифмаос ёрто вал ини. Нырысь кылбуре "Комсомолец Удмуртии" газетын ӟуч кылын потӥз. Отын Флор Васильев ужа вал. Со мыным шуиз: "Ойдо ай удмурт кылын гожъяськыса утчалом". Мон соку удмурт кылын уг вераськиськы на вал ай, валаны гинэ валасько. Али но вераськыны куддыръя шугасько. Нош гожъяськыны пуксисько ке, кылъёс асьсэос олокытысь лыкто. Удмурт кылын гожъяськыны тазьы кутски. "Молотэ" лыктӥ. Соку со кык кылын потэ вал ай, но удмурт кылэ выжыны кутскиллям вылэм ни. Отын редакторез Трофим Архипов вал. Со мыным шуэ: "Учкы ай астэ: ымнырыд но чылкак удмурт, сямыд но - возьдаськыса сылӥськод. Ӟуч кылын ми тонэ ум поттэ". Мон зар- зар бӧрдыны кутски. Собере Виктор Жуйков лыктӥз. Мыным учебникъёс, букварь, словарь ваиз. Дораз ветлыны косӥз. Озьы мон нуналлы быдэ сямен "Молотэ" вуылыны кутски. - Удмурт кылын нырысез кылбуред кыӵе вал? - Мон сое ӟуч кылын гожтэм таӵе кылбурея кари: Есть песня, Ей всё можно высказать, А в нотных тетрадях не пишется. Её знает тот, кто выстрадал, Она по ночам не слышится. Та кылбуре удмурт кылын тазьы пӧрмиз: Кырӟанэ, кырӟанэ, Кылъёстэм тон, бурдтэм, Бугыртӥд улонме, Лӧпкытӥд валантэм. Тонэныд куректон но, Кӧтӝож но вуно, Тон, пичи нуные кадь, Мусо но дуно. Уйвӧтам кылӥсько, Ас поннам кырӟасько. Кырӟанэ, кырӟанэ, Бугыртӥд улонме. Та кылбурме мон "Молотэ" ваи но му пыр виясько вал: серем каризы уго. "Кырӟан" кылысь "р" буквазэ кельтыса гожтӥськем. Но кылбурме поттӥзы ик. "Р" буквазэ поныса ни. - Тон ведь, Алла, туж трос интыосын улэмын. - Ой, вераса но уд быдты! Но котьку дораз асьме шаер ӧтьылӥз, мурт дуннеын кема улыны ӧй чидалля. - Мон тодӥсько Орёлын кема улэмдэ. Соку ӟуч кылын трос кылбуръёс гожъяд. -Бен. - Туэ, мон тодэмъя, тросэз егитъёс шуо: ӟуч кылын кылбур гожъяны капчигес. Тон кык кылын ик вольыт кылбураськод бере, кызьы шуысалыд? - Мон шуысал: удмурт кылын кылбураны капчигес. Удмурт кылэ выжеме бере, ӟуч кылын туж шерос гинэ кылбурасько на. Куддыръя аспӧртэмлыко образ ӟуч кылын лыктэ - соку ини ӟуч кылэ выжисько. Но ӵемысь ӟуч кылын лыктэм образме удмурт кылын гожтыны тыршисько. Со образ, мон сямен, удмурт кылын эшшо чебергес, узыргес луэ. - Иське, тонэ, Алла, удмурт вирыд, выжыед вормиз. - Кытчы согемын гогыед, отчы ик тонэ кыске ни. Тани таӵе чуръёсты бен ӟуч кылэ кызьы берыктод? Пинал ныл кадь востэм, возьдаськись но небыт Вӧлдӥське, лёгиське вож турын пыд улын. Кыӵе чебер! Яке куреглэсь коткамзэ: Кот-котӥ-котӥ-котӥ, Котыр нянь пӧлы котӥ. Котэм няньзэ, кот-кот-кот, Кокчаме сое уг пот, Вот! Таосты ӟуч кылэ нокызьы но уд берыкты. Сыӵе узыр асьмелэн удмурт кылмы. Соин ик туж шумпотӥсько визьмо писательёсмылэн монэ удмурт кылэ выжыны косыса дырыз дыръя индылэмзылы. - Тани дас куинетӥ декабре ортчоно юбилей ӝыттэ тон "Ой, шудтэм шудэ!" шуыса нимад. Аслыд сокем-а шудтэм потӥськод? - Шудэ мынам пачыл ке луысал, кылбурчи ӧй луысал. Соин ик шуисько: Ой, шудтэм шудэ! Со ик мынам бӧрдонэ, Со ик мынам шумпотонэ, Со ик мынам кылбур чуре, Со ик мынам кырӟанэ, Со ик монэ кокасе, Со ик монэ сюдӥсе. - Но мон тодӥсько сыӵе гожъяськисьёсты - соосты нокызьы но шудтэм уд шуы. Но соос улонысь асьсэос шедьто, утчало ваче вуонъёсты. Асьсэды асьсэос кужмысь сямен шудтэм каро кадь. - Вань сыӵеос но. Нош монэ куректон ачиз шедьтэ. Озьы ке но, али мыным шуысалзы ке, тон луод эксэй, тон улод узыр, тон уд тоды сютэм улонэз, тон ноку но уд тоды кынмонэз, уд тоды яратыса курадӟонэз, нош кылбурез но кырӟанэз уд вала; шуысалзы ке, нош тон тодод кылбурез, яратонэз, со понна тон сютэм, кынмыса, гольык ветлод. Юасалзы ке, кудзэ быръёд: эксэй улонэз яке кыбурчи луонэз шуо: кылбурчи луонэз, сютэм улонэз. Галина Романова. 13-тӥ толсуре (декабре) Удмурт кун филармонилэн юртаз Алла Кузнецовалэн юбилей ӝытэз ортчоз. Отчы пыриськозы "Италмас" но "Шулдыр ӝыт" ансамбльёс, "Катанчи" театр, Валентина Пудовалэн группаез, Анна Плотникова, Геннадий Кузнецов, Надежда Уткина, Ирина Габитова. Ӧтиськом вань мылкыд карисьёсты, кылбурчиез гажасьёсты. Тазьы кутске йӧ выжыкыл Матэктэ ни Выль ар, вылаз ик, таиз ар мытэ выль даурез. Озьыен, таяз учыре калыклэсь мылкыдзэ шулдыртыны тыршисьёс но трос гинэ выльзэ малпалозы, луоз. Укыргес но пусйымон тол праздникез пусъён азьын отын но татын кылдыло синмез палёмытӥсь йӧ дворецъёс, ма, дворецъёс гинэ-а, быдэс городъёс. Нош адямиос отчы лӧптэм мылкыдын пырыса, оло, уг но малпасько, кызьы кылдо соос. Нош кутсконэз тани таӵе: адямиосты Выль ар празднике шулдыртыны мылкыд карисьёслы нырысь тазьы ӟырт куазен тымет вылын пӧсяно луэ. Огшоры гинэ капчи уж ӧвӧл со - йӧ кирпич "шуккон". Нош вуозы соос Ижысь Барамзина нимо ульчаысь "Рашаль" ресторан доры. Татын ик дизайнерлэн Сергей Назаровлэн эскизъёсызъя йӧ выжыкыл кылдоз. Солы юрттӥськыны басьтӥськем ужбергатӥсь, мылкыдызъя художник Александр Шкляев. Мар бен, учком ни, маин паймытозы кибашлыос "Рашаль" ресторанын ужасьёсты но татын шутэтскисьёсты. Н.КОРЯКИН. Туспуктэмъёсыз В.Беломорскихлэн. Удмуртъёслэн тямысэтӥ ӧтчамзы Азьпала мыныны секыт, сюресэд вольыт ӧвӧл ке Ижысь операя но балетъя театрын ӧдӥг нунал ӵоже ортчиз вань удмуртъёслэн тямысэтӥ ӧтчамзы. Нырысетӥосыз ӧтчамъёс шулдыръяськон мылкыдынгес ке радъяськылӥзы, таиз ужрад чылкак мукет ӧртӥ мынӥз: тупен-тупен сэрттэмын- пертчемын вал удмурт калык азьын сылӥсь туала ужпумъёс. Сыӵе лад-лад вераськонлы кичӧлтон сётӥз "Удмурт кенеш" ассоциацилэн президентэз Валентин Тубылов. Удмуртиын улӥсьёслэн, озьы ик удмурт калыклэн улоназ берло куинь аръёсы политикаен герӟаськем бадӟым ужъёс ортчизы: референдум, Кун Кенеше но Кун Думае быръёнъёс, Удмуртилы нырысетӥ президент быръён. Со дыр ӵоже ик кылдӥзы куд-ог выль огазеяськонъёс, кылсярысь, городын улӥсь егитъёслэн "Эрик" нимо огазеяськонзы но "Удмуртилэсь экономикаын куронъёссэ утён" движение. Со сяна, удмуртъёслэн вань на "Дэмен", Нылкышно кенеш, "Шунды" огазеяськонъёссы. Валамон ини, "Удмурт кенешлы" вань та бадӟым ужъёслэсь палэнскыны но нимаз кариськыса ужаны нокызьы уг луы. Собере кусыпъёс возьыны быгатоно Кун Кенешен, Правительствоен. Ог-огдэ валан, ӵош ужан бордысь потэ "Удмурт кенешлэн" но кужымез. Сое ик вераны турттӥз В. Тубылов. Но жаляса верано, котьку ик озьы уг луы. Мар бен люкетэ удмуртъёслы керетытэк но валче ужаны? Валентин Тубыловлэн верамезъя, удмуртъёс, пе, туж ляб оско удмурт адямилэн быгатонэзлы. Кыкетӥез, мар быдтэ на асьмеды, вожъяськон. Та мугъёс сэрен ик, вылды, президентэ ӵектэм удмурт кандидат П. Вершинин ӧз вормы, "Удмурт кенеш" солы юн дурбасьтӥз ке но. Удмуртилы президент быръемын. Мар на табере кадь. Но делегатъёс понна, шӧдске, туннэ но со огез "пӧсь" ужпум луэ на. Уноез делегатъёс ялан та ужпум борды берытскылӥзы на. Кин тодэ, оло, сыӵе вераськонъёслы ӧтчамын ӧжытгес дыр висъяно ни вал. Но залын трос пукись егитъёсты адӟыса, малпанэ мукетгес луиз: мед кылзозы, оло, азьланяз соос туала удмуртъёслэсь янгышъёссэс уз ни лэсьтэ, асваланзы но чылкак мукетгес луоз. Валентин Кузьмич меӵак шуиз: "Таӵе кӧшкемыт быръёнъёс ӧй на вал. Кытын ке соос озьы ортчо на меда?" Нош мар кароно, кызьы ужано удмурт калыкез визьман но асваланзэ ӝутон понна? Политикае золгес кысконо, шуиз тодосчи Л. Христолюбова. Политикалэсь палэнскыса улӥсь адямиос, пе, трос кырсьс пырто национальной движение. Сюмси ёросысь делегат В. Полянских мургес ужаны ӵектӥз удмурт интеллигенциен. - Сюлмы бӧрдэ, удмурт интеллигенция шоры учкыса - шуиз со. - Ог люкетэз мынэ "Удмурт кенеш" сьӧры, мукетыз, калыклэсь люкиськыса, мукет сюрестӥ. Азьланяз сыӵе шонаськонъёс медаз луэ шуыса, делегат ӵектӥз, али ик, пе, егитъёсмес тютюпиосты сямен утялтыса возёно-будэтоно. Съездын интеллигентъёсты пыкылон, оло, иназ мыноз. Малы ке шуоно, таяз ӧтчамын дышетскем делегатъёс трос гинэ вал: 376 делегат пӧлысь 81 дышетӥсь но 29 тодосчи вал. Азьвылаз ӧтчамъёсын гурт хозяйствоын тыршисьёс ке тросгес луылӥзы, таяз соос 42 кузя гинэ вал. Интеллигентъёсты пыкылэм сяна, куд-ог делегатъёс ӧтчамын дӥсьтыса но меӵак веразы коммунистъёслэн, "Дэменлэн", Кун Думаысь депутатмылэн но озьы ик иворъёсты вӧлмытӥсь ёзъёслэн быръёнъёс вакытэ ужамзы сярысь. Но шумпотоно, дыр, лек верам кылъёс вожвылъяськонэ но керпотонэ ӧз вуттэ. Ӧтчамын кыл сётэмын вал П. Вершининлы но. Кин возьытсэ ыштыса эшъёссэ вузаз, история дунъялоз, шуиз со. Мон туж шудо адями - мон тӥледын вал. Президент быръемын. Табере азьланез сярысь малпаськоно. Азьпала ужъёс сярысь ке верано, ӧтчамын "Удмурт кенеш" соосты ӧз пусйы. Со ужъёслы, малпасько, кӧня ке саклык висъяно ик вал. Со пумысен туж умой вераз Глаз ёросысь делегат С. Бабинцев. Вань вераськонъёс сӥземын ортчемезлы, нош кулэ вал азьпала но учкыны. Зэм, азьпал мыныны кышкыт, йырыд мышкад берыктэмын ке, шуиз со. Дугдоно ни, пе, удмуртъёсты "шонеръёслы" но "мыдланьёслы" люкыны. С. Бабинцев ӵектӥз мур малпаськыны "Удмурт кенешлэн" статусэз сярысь. Кыӵе огазеяськон со луыны кулэ? Общественной, общественно-политической яке конгресс (съезд) амалэн ужаны кулэ-а? Ӧтчаме лыктэм делегатъёс тодматскизы Кун Кенешлэн выль Тӧроеныз Игорь Николаевич Семеновен но. Со удмурт но ӟуч кылын ас малпамъёссэ шараяз законъёс бордын ужанъя но власть шоры учконъя. Оскытӥз, кылъёс сярысь закон ӝоген кутэмын луоз шуыса. Съездлэн кыкетӥ люкетэз сӥземын вал "Удмурт кенешлы" президент быръёнлы. Ӵектэмын вал куинь мурт: В. Тубылов, П. Вершинин но С. Пушина-Благинина (таиз ассэ ачиз ӵектӥз). П. Вершинин, валамон ини, кандидатуразэ куштӥз. Вань делегатъёслэн В. Тубылов понна дурбасьтэмзы шӧдӥське вал ни бере, куара сётон шара ортчиз. Ньыль делегат гинэ возиськиз В. Тубылов понна мылкыдзэ вераны. Озьыен, "Удмурт кенеш" ассоциацилы выльысь тӧрое быръемын Валентин Кузьмич Тубылов. Одӥг делегат шуиз, выльдоно, пе, "Удмурт кенешлэсь" исполкомзэ, ёросъёсысь "Кенешлэсь" ёзъёссэ. Сыӵе выльдӥськон, пе, ӧз ке луы, удмуртъёс асьсэдыз асьсэос быдтозы. Озьы медаз луы вылэм. "Удмурт кенешлэн" историе мытэм сюресэз дано мед йылпумъяськоз. Татьяна Банникова. Шӧкыч Инфляция: - Эк-кой! Ӟеч ик луиз та улон Россей музъем вылын, мукет кунъёсы кошкем ик уз пот таӵе кӧттырон вань вылысь. Суредэз И. Азимовлэн. Вань нылпиос дышетско Грах ёросын толэзь ӵоже эскерон уж мынӥз, ваньмыз-а нылпиос таяз дышетскон аре парта сьӧры пуксизы, быдэсъяське-а Удмурт Республикалэн калыкез дышетон сярысь Законэз шуыса. Йылпумъянъёс лэсьтэмын ёрос администрацилэн коллегиезлэн кенешаз. Отын кылзэмын калыкез дышетонъя отделлэн кивалтӥсез В. Ф. Поспелов. Со тупен-тупен мадиз школаослэн ужамзы сярысь, умоен пусйиз Зареченск, Порым но Макарово школаосты (директоръёссы Е. Л. Котикова, Г. Г. Епанешникова но Г. К. Капустина). Али ёросысь школаосын дышетске 1937 нылпи, школаосысь консультпунктъёсын - 83-ез. Дышетӥсьёс тырмыт. Шугенгес сётске нылпиосты пӧсь сиёнэн сюдон но палэнысь гуртъёсын улӥсьёссэ нуон-ваён, но юрттэт сёто данакез эштосъёс. Бадӟым семьяосысь пиналъёсты дунтэк сюдыны косэмын. Ужез ӟечгес радъян вылысь, роноын но школаосын попечительской кенешъёс кылдытыны косэмын. П.НИКОЛАЕВ. ШӦКЫЧ Сынамтэ малпанъёс Кема ул, но пенсия эн кур Мон туж шумпотӥсько берло дыре арлыдо муртъёслы саклык висъяны кутскемысьтызы: геронтологияя быдэс центръёс, отделениос усьтӥсько, семинаръёс ортчыло. Но пукиськод отын но... газетэ мар гожтыны паймиськод. Пересьёс жаль пото. Гуртазы пукисьёс номыре но уг но кыло-адӟо ке, залын пукисьёс визьмо учёнойёс но кивалтӥсьёс шоры инмаръёсты сямен учконтӥязы мар верамзэс уг но валало. Тани одӥгез кивалтӥсь та выллем вераське: пересьёслы саклык уг тырмы, соос, пенсизы пичиен, сиськытэк уло, соин ик ӵем висё, нош больницаосын инты уг тырмы... Ваньмыз шонер, но малы та пумысен геронтологъёс (пересьёсты эмъясьёс) сюлмаськоно луо? Малы соослэсь кылзэс уг юа правительство, эскеронъёсъя пересьёс ӵемгес сютэм улонлэсь висё ке? Кут но будэт пенсизэс. Но дас процент интые, сюлы. Шуг-а? Мукетыз вераськись эшшо "мудронгес". Ӝыны нунал ужамез 180 градуслы берыктэ: калыкмы нуналмысь пересьме. Арлы быдэ йылэ 105 арес котырозь улӥсьёслэн лыдзы. Кӧня ке ар улыса, соослы кытысь пенсия тырыны ёрмом, малы ке шуоно, ужась калык ичи луоз. Тӥ тае кызьы валады? Мыным потӥз, социологъёс но политикъёс чик но шум уг пото адямиослэн кема улэмзылы (макем кема улэ, сокем тросгес пенсия тыроно). Озьыен, яке улон даурзэс вакчиятоно яке тросгес сюдӥсь вордоно. Ну нырысетӥез асьмелэн пӧрме, нош кыкетӥез... Ох, гожъяса жадиськиз ни со сярысь. ...Шудоесь на таяз дауре улӥсь пересьёс. Соослэн 105 арес улэмзылы туж уг шумпото ке но, законъя уг ало ай. З. РЯБИНИНА. ИЖЫСЬ МЭРИЫН Вуылӥзы куноос Ижевск городысь администрация Россиысь нылкышноослэн конфедерациенызы ӵош "Социальное партнёрство: задачи, итоги, перспективы" конференция ортчытӥз. Ужрадэ люкаськылӥзы Пермь, Киров, Самара, Оренбург улосвылъёсысь, Мордваысь, Татарстанысь но Башкириысь куноос. Конференция сӥземын вал Россиысь калык огазеяськонъёслэсь ужан амалъёссэс сэрттон- пертчонлы. Люкаськемъёс тодматскизы Ижевск городысь "Тёплый дом" но семьяослы психология ласянь юрттэт сётонъя "Белая зебра" центръёслэн ужаменызы. Ужрад чотын ик ортчиз Россиысь нылкышноослэн конфедерацизылэн журналзылы но Конфедерацилэн вице- президентэныз дасям книгалы презентация. Конференцилэн программаяз ик пыртэмын вал Пётр Чайковскийлэн Воткинскысь усадьбаеныз но Лудорвайысь музеен тодматскон. Э. ВАСИЛЬЕВА. Ми вуом дорады Толон Печатья но иворъёсъя министерствоын кенешон ортчиз. Вераськон мынӥз гожтӥськонэз ӟечгес радъян сярысь. Министрлэн нырысетӥ воштӥсез Владимир Злобин пусйиз, та уж туэ уродгес мынэ шуыса. "Удмуртская правда" газетэз арлэн кутсконаз 44,5 сюрс мурт басьтӥз ке, кайталы солы ог 22 сюрсэз гинэ гожтӥськиз ай. "Известия Удмуртской Республики" газетэз вуоно арын басьтоно кариськиз ог 10 сюрс мурт. "Удмурт дуннелы" гожтӥськемъёслэн лыдзы туэ 1-тӥ январьлы 12,5 сюрс вал. Вуоно арлы 9,3 сюрс мурт гожтӥськиз ни. озьыен, милям но буйгатскеммы уг луы на. Ваньзэ тае лыдэ басьтыса, эслькун газетъёслэн но журналъёслэн редакциоссы Рочта кусыпъёсъя федеральной службаысь специалистъёсын ӵош вераськизы куд-ог городъёсын но ёросъёсын Лыдӟисьлэсь нуналзэ ортчытыны. Озьы 13-тӥ декабре нырысет ужрад луоз Играысь связья ёрос ёзын. Та нуналэ гожтӥськемъёс быгатозы шуом, "Кизили" журналлэсь яке "Янарыш" газетлэсь кузьымзэ утыны. Ӵуказеяз со выллем пумиськон ортчоз Кезын. Отын луозы "Удмурт дуннелэн" корреспондентъёсыз но "Бӧрысьгес вуылом Можгае, Кизнере но мукет интыосы. Таиз сярысь брысь ивортом. 13-тӥ декабре Лыдӟисьёслэн нуналыз ортчоз Ижысь почтамтын. та нуналэ гожтӥськемъёс пӧлын но лотерея радъялозы. Редакция. Архивысь документъёсъя Удмуртия ЪЪ дауре 1962-тӥ ар Быдэс СССР-ын азьланьтӥськиз кун кивалтон ёзъёсты выльдон. Палэнэ ӧз кыльы Удмуртия но. Пермь но Удмурт совнархозъёсты огазеязы Западно-Уральской совнархозэ. Ижевскын кылдытэмын Ленин, Октябрь но Первомай ёросъёс. Республикаын - 10 колхоз-совхоз управлениос. Таӵе выльдӥськонъёс чакламын вал гурт удысэз ӟечгес азинтон понна. Угось сиён-юон поттон, будэм интые, 1 процентлы кулэсмиз. Коньдонэз воштэмен но кӧня ке аръёсы бӧрсьысь ю-нянь удалтымтэен, город калыклы сиён-юон ласянь уката секыт луиз. Югдур уродмиз калыклэсь пудозэ кулэстэмен валче но. Крестьян калык базаре трос сиён-юон вайыны ӧз ни быгаты. Гуртын улӥсьёсты пудозэс кужмысь колхозъёслы вузаны косылӥзы, нош бакчаоссэс пичиятылӥзы. Секыт югдурысь потыны амал шедьтэмын вал: сиён-юонлы дунъёсты будэтӥзы. Соин сэрен калык бугыръяськыны ӧдъяз. Граждан ож дырысен таӵе кужмо пумитъяськонъёс ӧй на вал. 2-тӥ июне Новочеркасскын ыбылэмын рабочийёслэн демонстрацизы, 22 адями виемын, 39-эз сӧсыртэмын. Та ужъя 14 адями суд улэ кыскемын но 7-ез судлэн решениезъя ыбемын, мукетъёсыз пӧртэм дырлы пытсэт сьӧры келямын. Удмуртиын та выллем забастовкаос ӧй вал, сиён-юонэн вузкарон озьы ик ляб радъяськиз ке но. Магазинъёсын огдыре бырылӥзы кеньыр, макарон, пызь. Тросэз адямиос вунэтӥзы сӥльлэсь но вӧйлэсь шӧмзэ. Колхозъёслэн но совхозъёслэн кужымзы ӧз тырмылы калыклэсь сиён-юонлы кулэяськонъёссэ быдэсъяны. Урожай ляб вал. Вылӥысь косэмъя, музъем ужасьёс кизёно луылӥзы кукуруза но сахар кушман. Промышленность вуз поттонэз ӧз кулэсты. Шаерысьтымы предприятиос, 1961-тӥ арен ӵошатыса, продукцизэс 13 процентлы будэтӥзы. Поттыны кутскизы выль редукторъёс, вентиляторъёс но лентаен транспортёръёс. Нырысетӥ продукцизэ сётыны кутскиз "Ижтяжбуммаш" завод. Ужаны кутскиз Ижевскысь керттӥськонъя фабрика. Механикая завод кык гумыен "Иж-12" пыӵал поттыны кутскиз. "Ижмаш" - "Иж-Планета" мотоцикл, сое лэсьтонэз ӝогомытон понна нырысьсэ ужаны кутскизы мотоцикл питранъёслэсь ободъёссэс автоматика пыр дасясь линиос. Июне Ижевскысь андан ӵыжатон заводын дугдытэмын вал берпуметӥез вужез мартен гур - отын андан пӧзьтӥзы 60 ар ӵоже. Уже кутӥськыны кутскиз воксё выль технология. Калыклэн улоназ мургес но мургес пыӵаны ӧдъяз телевидение. Москва-Свердловск линия ужаны кутскем бере, Удмуртиын нырысьсэ быгатӥзы Москваысь передачаосты учкыны. Ас доразы чагыр экранэз учкыны быгато ни вал 30 сюрслэсь уно семьяос. 2-тӥ мартэ усьтӥськиз "Удмуртия" кинотеатр. Арысь аре умояны ӧдъяз калыкез дышетон. Таяз аре Воткинскын усьтэмын медициная училище. Кунгожсьӧр кылъёслы дышетыны кутскизы Глазов пединститутын. Ижевскысь индустриальной техникум кадръёсты дасяны кутскиз, егитъёсты ӝытъёсы дышетыса но. Уваысь школа-интернатлы пуктэмын выль юрт. Улон-вылон условиос пумен умояны кутскизы. Чагыр эстӥськон пыртэмын 2650 квартирае, умояз калыклы бытовой юрттэт сётон, Глазовын усьтӥськиз нимысьтыз сыӵе фабрика. Котькытын паськыт пусйизы 1812-тӥ арын Наполеонэз Россиысь уллям дырысен 150 ар тырмонэз. Сарапулын 38 ар ӵоже улӥз Надежда Дурова, фельдмаршаллэн М. И. Кутузовлэн ординарецез - солэн юртэз вылэ сӥё-дано тодмет ошемын. А. Дерюшев, Удмурт Республикаысь ЦДНИ-ын ужась. "Ижевский" совхозысь кукуруза будэтӥсь Н. Гордеев (бур паласез) шумпотэ ӟеч удалтэм пудо сиёнлы. Ветеранъёссэ вите колледж Удмурт Элькунамы калыкез дышетонлэн историез туж юн герӟаськемын дышетӥсьёсты дасясь техникумъёсын яке училищеосын. Ижевскын арлыдзыъя тужгес пиналэз луэ дышетӥсьёсты дасясь колледж. Та нуналъёсы со пусъе 20 ар тырмон сюрессэ. Та дышетсконнилэн Труд ульчаысь 88-тӥ юртысь ӧсъёсыз уно егитъёс понна нырысьсэ усьтӥськизы 1980-тӥ арын сӥзьыл. Дышетсконзэс 1982-тӥ арын быдэстыса, школаосы ужаны нырысьсэ лыктӥз 84 егит дышетӥсь. Но таиз дышетӥсьёсты дасясь инты Ижын нырысез ӧй вал. Нырысетӥезлэн кылдэмез дырысен 80 ар пала ортчиз ини. Иже дышетскыны Сарапулысь курсъёсысь лыктӥзы отчы азьло араз вуэм егитъёс. Ижын дышетӥсьёсты дасян Удмурт автономия кылдытонэн ӵош радъяськиз. Выль педтехникумлэн нырысетӥ директорез но кылдытӥсез вал гуртысь куанер удмурт семьяын будэм пи Гавриил Федотович Федотов, Удмурт школаосын Октябрь революцилэсь азьлогес кема тыршем мурт, усто радъяса, бӧрысь удмуртъёсты лыдӟиськыны но гожъяськыны дышетӥсьлэн авторез луиз. Ижысь педтехникум, собере сое педучилище шуизы, трос кадръёс дасяз: покчи классъёсын дышетӥсьёсты, озьы ик физкультурая дышетӥсьёсты. 1956-тӥ арын со ворсамын вал. Вылез, туалаез педучилище, табере колледж, Глазов пединститутлэн филиалэз, юбилейзэ пусйыса, дораз ӧте пӧртэм аръёсы вужъёсаз юртъёсын специальность басьтэм ветеранъёсты но. Соос понна юбилейлы сӥзем ӝыт ортчоз 16-тӥ декабре 15 часысен Ижысь Операя но балетъя кун театрын. Л.ФЁДОРОВ. Вуоно арлы дэмласал "Удмур дуннетэк" уз юнма удмуртлык Газетмы удмурт калыклэн матысь эшез луэмез сярысь верало таӵе учыр пыр. Школаын удмурт кылэз но литератураез дышетӥ сизьыметӥ классозь гинэ. Шор ёзо школаын куинь ар ӵоже дышетскытозям урокъёсын ӟуч кылын гинэ вераськоно луылӥз. Анае Алнаш ёросысь Кузьымгуртын син першал луыса ужаз, трахомаез быдтӥз, котьку басьялляз "Советской Удмуртия" газетэз но "Молот" журналэз. Та удмурт изданиосты мон котьку туж яратыса но быдэсак лыдӟылӥ. 1959-тӥ арын Варзи-Ятчи шор ёзо школаез йылпумъяй но Удмурт пединститутысь история но филология факультетлэн удмурт отделенияз пыри. Валамон, юрттӥзы удмурт газет но журнал. Со аръёсы Л. Г. Векшина (Ашальчи Оки) Алнаш ёросын окулистын ужаз. Анаелэсь ужзэ эскерыны но солы юрттыны Кузьымгуртэ ветлылӥз но ми дорын уйзэ кӧлалляз. Солэн трос тодон-валанэз монэ, быдэ вуымтэ пияшез, паймытъяз но удмурт кылъя тодон- валанъёсме будэтыны ӧтьылӥз кадь. Со аръёсы ик дорамы пырамез вань Н. В. Васильевлэн. Соку Усо гуртын школалэн директорез луыса ужаз со. Ортчизы аръёс. Табере сюрсъёсын удмурт адямиос вылӥ образование басьтӥзы. Но мынам чакламея, дышетсконзы пӧрме соослэн, кин нырысь ӟеч тодэ-вала удмурт кылэз, литератураез но культураез, соку со быгатэ ӝоггес но ӟечгес дышетыны но валаны ӟуч кылэз, литератураез но культураез. Азьлань дышетскисьёслы капчигес луэ ни кунгож сьӧр кылъёсты но дышетыны. Берло аръёсы удмуртлыкез юнматон бордын тыршо пӧртэм удмурт общественной организациос, кылсярысь, "Удмурт кенеш" ассоциация. Солэн ёзъёсыз кылдытэмын ни ёросъёсын но гуртъёсын. Ноябре мон вуылӥ Дэбес ёзэ. Солэн правлениезлэн членъёсыз трос лэсьто, калык пӧлын удмурт культура вылӥын мед возиськоз шуыса. Нош тросэз вераськонзы вераськонэн гинэ уз кыльы меда? Яке ог люкетэз гинэ удмуртъёс асьсэ "пуртыязы" уз пӧзе-а? Ваньмыз доры вуоз-а тыршемзы? Таӵеесь юанъёс мон пуктӥсько соин: али ёросын, отын педучилищезы но вань вылысь. 462 экземпляр гинэ "Удмурт дунне" газетэз басьто, вуоно арлы соос пӧлысь но ӝыныез гинэ гожтӥськемын ай. Нош ёросын котьку ньыль адями пӧлысь куинез удмурт. Кытысь-о выль ивор, удмурт улон сярысь рос-просгес тодоз ваньмыз Дэбес калык, "Удмурт дуннеез" ӧз ке лыдӟы? Петр Кузнецов. Выль арозь кылиз на... Ӝоген Выль ар. Сое кызьы ортчытон но ӝӧк выллэн чеберез сярысь сюлмаськемен валче вунэтоно ӧвӧл ёлка сярысь но. Кызьы, маин сое шулдыртоно, шудтэм учырлэсь утиськон вылысь? Нырысь ик, кызэз одно ик юнматоно нимысьтыз пыкетэн, кыз вайёс медаз йӧтэ электросветильникъёс но мукет шунтон арбериос борды. Кызэз чеберъяны кутоно заводын лэсьтэм гирляндаез гинэ, солэн лампочкаосыз 25 ваттлэсь кужмо медаз луэ. Уг яра соосты кема дырлы ӝуатыса кельтыны но. Кыз котырын эн ӝуатъялэ бенгальской тылъёс, сюсьтылъёс. Озьы ик бадӟым кышкытлык кылдыто корка пушкын хлопушкаосын но мукет пуштӥсь арбериосын шудон. Таӵе муген миым Выль арез пумитан уе Ижын гинэ сизьым пол тылпу ӝутскылӥз, отын кык мурт бырыны шедиз. Эн вунэтэ ёлка котырын шулдыръяськись нылпиосты сярысь, соосты ялан чакласа возе. Нош трос калык люкаськылон интыосын ёлка пуктыны яра тылпулэсь утиськонъя ёзъёсын ужасьёслэн лэземзыя гинэ. Со юртын одно ик мед луоз телефон но тылпу кысон арбериос. Юртэ чакламлэсь ятыр калык медаз люкаськы. Шулдыръяськонъёс дыръя одно ик радъяно дежурство. Ижысь Октябрь ёросысь тылпуэн нюръяськонъя 2 номеро частьын ужасьёс шаерамы улӥсьёсты ӟечкылало вуись Выль арен, сӥзё шудбур но тазалык. А. Гущин, Удмурт Республикаысь МВД-лэн Тылпуэн нюръяськонъя управлениезлэн 2 номеро частьысьтыз инженер. Сергей ИГОНИН Выль арен! Вож кызмы чеберъямын Ворекъясь шудонъёсын. Ӟеч лу, ӟеч лу, вуж армы! Ӟеч-а, бур-а, Выль армы! Тол Бабай но пиналме, Лымыныл милем пайме: "Уд но тодма тӥледды - Кудбыдӟа будӥллямды!" Кызмы дорын поръяськом - Выжыкылэ пыриськом. Ӟечкыласьком Выль арен! Выль арен, выль шудбурен! Акулина БУРАНОВА Тол Бабай Кин корка борды йыга? Оло, со Баба Яга Укное но тэшкылля, Монэ шат коркась улля? Кӧлэме но уг ни лу. Ку югыт луоз ни, ку? Вазь ӵукна гинэ валай - Со вылэм ук Тол Бабай. Зол ужаса дыбыртэм - Уйбыт гурезьёс лэсьтэм. ЖУРНАЛИСТЪЁСЫН ПУМИСЬКОНЪЁС Кытчы валтоз асьмеды "Единство"? Кылем арняе Ижын ортчиз "Единство" партилэн Удмуртиысь ёзэзлэн азьвыл чакламтэ ИВ конференциез. Отчы журналистъёсты пырыны ӧз лэзе ке но, бӧрысь соослы нимысьтыз пресс-конференция ортчытӥзы региональной партилэн выль кивалтӥсьёсыз. Озьыен, табере "Единстволэн" Удмуртиысь ёзэныз кивалтоз Виктор Хорошавцев - со быръемын политсоветлэн тӧроезлы, нош Валерий Суркин партилэн исполкоменыз кивалтоз. Та адямиос кыксы ик луо Кун Кенешлэн депутатъёсыз, со дыре ик соос - бизнесменъёс. Виктор Хорошавцев кузё луэ "АСПЭК" АО-лы, нош Валерий Суркин "Продторг" АО-лы. Малы бен "Единстволэсь" Удмуртиысь ёзэныз кивалтӥсьёсты воштоно луиз? Кызьы тодӥськомы, 1999-тӥ арын Кун Думае быръёнъёс дыръя Удмуртиысь "Единство" ("Гондыр") тужгес но трос куара бичаз вал - 37 процент. Партилэн Удмуртиысь ёзэныз соку быгатыса кивалтӥзы Сергей Беркутов но Энвиль Касимов. Мар бен луиз собере? Та юанлы валэктонъёс сётӥз Москваысь лыктэм адями Франц Клинцевич - "Единство" партилэн исполкоменыз кивалтӥсьлэн нырысетӥ воштӥсез. Солэн верамезъя, Удмуртиысь "Единствоын" секыт югдур, пе, кылдӥз президент быръёнъёсын валче. Александр Волковлэн кандидатураезлы дурбасьтӥз Владимир Путин. Озьыен, Россиысь одӥгез валтӥсь партия но ("Единство") ужаз, та кандидатуралы юрттон вылысь. Нош "Единстволэн" Удмуртиысь ёзэз чылкак мукет политика нуыны кутскиз - со нюръяськиз президентэ мукет кандидатураез ортчытон понна. Соин ик туэ октябрьлэн пумаз Россиысь "Единстволэн" Политсоветэз С.Беркутовез ас ужысьтыз мозмытӥз, партилэсь решениоссэ мыдлань быдэсъямез понна. Исполкомлэн кивалтӥсез Э.Касимов партиысь потон сярысь куриськон ас мылкыд каремезъя гожтӥз. Тӥни озьыен берытске политикаен шудон, солэсь валтӥсь линизэ уд ке валаськы яке юри мукет ӧртӥ мыныны кутскиськод ке. Кызьы азьланяз ужаны малпа "Единство"? - Милям партимы Россиын огез валтӥсез но золэз луыны кулэ, - меӵак шуиз В.Хорошавцев. - Калыклэсь Думае быръёнъёс дыръя верам оскемзэ пунэмен берыктоно. Ӟеч ужан понна партиез пуш ласянь выльдоно-юнматоно. Егитъёсты бордамы кысконо. "Единстволэн" стурктураяз чакламын егитъёслэсь но нимысьтыз огазеяськонзэс кылдытыны. Со сяна, учкемын на партилы дурбасьтӥсьёслэсь кенешсэс но кылдытыны. Отчы пырозы сыӵе адямиос, кудъёсызлэн вань мылкыдзы юрттыны но ӧвӧл мылкыдзы партие пырыны. Вераны кулэ: туннэ нуналлы Удмуртиын "Единствое" пыремъёслы одӥг партбилет но сётымтэ на. Берло дыре вераськонъёс ветло "Единстволэсь" огъя кивалтӥсьсэ С.Шойгуэз ас ужысьтыз палэнтон сярысь. Зэм-а со? Та юанлы Ф.Клинцевич тазьы шуиз: - Лидермы понна ми пумозяз нюръяськомы. Сыӵе авторитетэн адямиос Россиын трос ӧвӧл - утёмы сое. Куд-ог партиослы уг кельшы, лэся, "Единстволэн" будэмез, соин ик соос Шойгуэз но олокызьы сьӧдманы выро. Но туала вакытэ сыӵе сьӧдман амалъёслы паймоно ӧвӧл ни. Кызьы валэктӥзы на журналистъёслы "Единстволэн" кивалтӥсьёсыз, партилэн та вакытлы учкем тужгес но бадӟым ужез - со экономикаез ӝутон. Та ужез, пе, вормыны тыршоно куинь ар куспын, мукет сямен вераса, Думае выль быръёнъёс кутсконозь. Азьпала пусъем ужзэ быдэстыса гинэ "Единство" быгатоз Россиын валтӥсь партия луыны. Т.БАННИКОВА. ЖУРНАЛИСТЪЁСЫН ПУМИСЬКОНЪЁС Кышкыт учыръёс быдтымтэ на Алигес Горький чугун сюреслэн Ижысь ёзаз ветлӥз транспортной милицилэн Волго- Вятской управлениезлэн кивалтӥсез, милициысь генерал-майор Владимир ДОБРОГОРСКИЙ. Со пумиськиз журналистъёсын, мадиз ужамзы сярысь но ӝутӥз куд-ог лэчыт ужпумъёсты. Пресс-конферецие озьы ик ветлӥзы сюреслэн Иж ёзэзлэн кивалтӥсезлэн нырысетӥ воштӥсез Александр БОРОЗДИН но Удмуртиысь транспортной милицилэн кивалтӥсез, милициысь полковник Семён СТАРКОВ. - Волго-Вятской ёзэз выльдон сярысь вераськон юнме шорысь уг мыны, - шуиз Владимир Николаевич. - Но та уж вуоно арын гинэ кутскоз. Мон со комиссие быръемын. Нош туэ, оглом вераса, чугун сюрес вылын преступность кӧня ке кулэсмиз. Синӥзы калык ваньбурез лушкан, адямиосты виён но сыӵе выллем секыт йыружъёс но кышномуртъёсты сантэман учыръёс. Нош пичи лушкаськонъёс 16 процентлы ичигес луизы, бадӟымъёсыз ялан йыло. Тани Татарстанын одӥг сейфысь ӝыны миллион манет пала уксёез йырвандӥсьёс лушказы. Таӵе но со выллем кышкыт ужъёс сёто транзит поездъёс. Берло дыре кулэсме буёло кортэз лушкан. Йылэ наркотикъёс нуллон. Кыӵе гинэ амалъёс уг шедьто. Героинэз вато магнитолае, яке етӥн вӧй нуллон пиялалэн пыдэсаз интыяло. Озьы ке но, уно килограмм наркотикъёс шараямын но таламын. Героин сярысь ке верано, со 4 килограмм шедьтэмын. Со туж кышкыт маке, 1 граммез 100 адямилы одӥг укол пуктыны тырме. Озьыен, табере асьтэос малпаське, кӧня муртлэсь со тазалыксэ уродмытысал. Горький чугун сюрес 1200 иськем кыстӥське. Со ортче Удмуртия, Татарстан, Пермь, Башкортостан пыр. Ижевск-Москва но Ижевск-Тюмень поездъёсын котьку ветло милиционеръёс, порядокез юн чаклало. Озьы шуыны уг луы пригородной поездъёс сярысь. Гужем трос тырмымтэос вал поездъёсы билетъёс вузанын. Туристической фирмаос сьӧраз ортчизы, мултэс билетъёс басьяны ӧдъязы. Берло соосты дуно дунын сётъязы. Али югдур тупатэмын ни. Г.РОМАНОВ. Владимир КОТКОВ МОСЬКА Сценка Шудӥсь муртъёс: Светлана Степановна - садикысь воспитатель. Коля Петя - садикысь пиналъёс Зина Митя Пичиос Сцена вылэ, юр-яр карыса, пичиос пото. Соос садикысь театре мыно. Бордазы Светлана Степановна воспитательзы. Светлана Степановна. Дугдэ, пиналъёс! Татын трамвай витём. Ваньды кыкен-кыкен султэлэ. Эн лякыттэмъяське, эн бызьылэ. (Пиосты кыкен-кыкен султытыны выре. Азьпалъёссэ султытэ, мышпалъёссэ султытытозяз, таосыз кир-пазь пазьгисько ини.) Пиналъёс. Трамвай! Трамвай! Сцена сьӧрысь, ог-огзылэн пельпумъёссы вылэ кизэс поныса, дыбыртыса мукет пиналъёс пото. Трамвай со. Светлана Степановна. Сылэ, пиналъёс, таиз асьмелэн ӧвӧл. Мед ортчоз, эн люкетэ трамвайлы. Коля, эн гожма трамваез! Лык дорам! Зина, кытын Петяед? Зина. Шо, Шветлана Штепановна шо пала кошкиж. Светлана Степановна. Кытчы шо пала... со пала? Зина. Ма, тӥни, шо пала. Светлана Степановна. Митя, кытын Петя? Митя. Мон киын ӧвӧл, ӧй иса. Светлана Степановна. Кытчы кошкиз, шуисько, Петяды? Али ик вералэ! Зина. Шо милемлы ӧж вера, Шветлана Штепановна. Светлана Степановна. Коля, лэзь трамваез, мед мыноз ас сюрестӥз. Трамвай тукыртыса кошке. Пиналъёс. Тӥни, тӥни Петя. Ой, ма со шедьтэм! Кияз кучапиен Петя вуэ. Светлана Степановна. Петя, ма со сыӵе? Али ик кушты! Зина. Шветлана Штепановна, пуны шо. Светлана Степановна. Адӟисько, пуны шуыса. Петя, малы сое кутӥд? Петя. Со йыромем, Светлана Степановна. Жаль ук... Пиналъёс Петяез котырто, пунызэ вешало. Светлана Степановна (мар карыны валатэк). Висись пуны со, эн возе кияды. Али ик куштэ, шуисько! Петя. Висись ке, туж умой, ми сое эмъялом. Светлана Степановна. Мар?! Митя. Али лыдӟем книгаямы кадь. Светлана Степановна. Соиз, Митя, воксё мукет пуны вал. Трамвай лыктэ. Пиналъёс. Трамвай! Трамвай! Светлана Степановна. Таиз но асьмелэн ӧвӧл. Палэнске! Петя, кушты, шуисько пуныдэ. Тӥни кыӵе кырсь со. Петя. Ми сое миськом. Зина. Бен, шадикамы... Светлана Степановна. Шадикын?.. Ой... Садикын? Эшшо маке ӧвӧл-а? Пуныдэс ӧд куштэ ке, огды но трамвае уд пуксе. Петя. Ойдолэ пыдын! Светлана Степановна. Коля, кошкы трамвай дорысь! Эн гожма сое! Ма отчы гожтӥд?! Зина. Шветлана Штепановна, пыдын-а лашкинтом? Со куспын Коля трамваез погыртэ. Светлана Степановна. Коля, ӝут трамваез интыяз! Рельсаос вылэ, шуисько. Ой, акылес! Пиналъёс. Пунымес ӧд исалэ ке, ӝутом. Светлана Степановна. Мон сое уг исаськы, кулэез но ӧвӧл. Пиналъёс. Уг, пе, иса! Ойдолэ ӝутом трамваез! (Трамваез ӝуто. Выльысь мерско пуны доры.) Ой, кыше чебер! Породистой. Шо овшарка, дыр. Кызьы нималомы пунымес? Мошка! Мошка шуом! Петя. Ма тӥ мынам пуные котыре мерскиды? Мон тае шедьтӥ. Мон ик вордо. Зина. Шветлана Штепановна, шо ашлыж карыны шӧта. Светлана Степановна (йыркурен). Ашлыж ке, ашлыж... Пиналъёс. Милемлы но кулэ-э! (Петя киысь пуныез таланы выро.) Митя. Сылэ ай, сылэ! Асьмеос шедьтом на. Нош тазэ Моськамес Светлана Степановналы кузьмалом. Пиналъёс. Шонер! Солэн пуныез ӧвӧл, дыр. Вераськемезъя ик адӟиське. Петя. Светлана Степановна! Ӟечкыласьком тӥледыз вуоно нылкышно праздникен! Кузьмаськом Тӥледлы пичи Моськамес. Зина. Шветлана Штепановна, шо ушто пуны луож. Шо Тӥледыж пуныосты гажаны дышетож. (Ма карыны валатэк сылӥсь воспитательлэн киысьтыз пуныез маялля.) Мошка... Мошка... Пиналъёс. Трамвай! Трамвай! Ойдолэ театре! Потэ трамвай. Пичиос пиналъёслэн-трамвайлэн висъёсазы интыясько. Петя. Светлана Степановна, пукселэ! Кузьымез куштыны уг яра. Светлана Степановна (ма карыны валатэк, йырыз курен кучапи шоры учке). Ну, Мошка... Ну, Моська! (Трамвае пуксе.) Трамвай ваньзэсты театре нуэ. Катанчи. Удмуртлыкез пыӵато Ижысь Октябрь ёросысь Нылпи творчествоя центре люкаськылӥзы нылпиослы удмуртлыкез пыӵатӥсь дышетӥсьёс, школаослэн кивалтӥсьёссы но Калыкез дышетонъя министерствоын ужасьёс. Городъёсын ӟучомем нылпиосты удмурт кыллы дышетон капчи уж ӧвӧл, соин ик трос ужпумъёсты эскероно, люкам тодон-вланъёсты быгпатонлыкъёсты ог-огедлы возьматоно, азьланяз умойгес но падаёгес ужан вылысь кенешоно. Тросэз юалозы: Марлы со кулэ? Малы удмуртлыкез кужмысь пыӵатыны вырод? Но кемалась тодмо веран: "Кылэз тодод - визьмо луод, кык кылэз тодод - кык поллы визьмо луод". Со сяна, "Аслэсьтыд кылдэ яратытэк, мукетсэ уд дышы гажаны". Сыӵе мылкыдын люкаськизы татчы дышетӥсьёс но. Та юртын ужась дышетӥсьёс люкаськемъёс азьын нылпиосын ужан амалъёссэс возьматӥзы, фольклоръя, куиськонъя, кылэз дышетонъя урокъёс сётӥзы. Нимысьтыз та ужрадлы дасямын вал нылпиослэн киужъёсынызы адӟытон, кыкетӥ этажысь вань борддоръёс кузя - суредъёс. Паймод, котькудаз ик отын нылпилэн удмуртлык дуннеез ас сяменыз усьтыны тыршемез адӟиське. Озьы та центр аслэсьтыз 20 арес тырмонзэ пусъе. С. Петрова. ГОРОД УЛОНЫСЬ Чехиысь ваемын выль трамвай Тани со: дорамы Чехиысь ваем выль трамвай. Ижысь ТТУ-лэн 2 номеро депояз йӧн-йӧн сылэ. Вылтусызъя мукетъёсызлэсь сокем ик уг висъяськы, но пушказ пырем бере, зэмзэ но паймытскиськод. Пуконъёсыз - велюрлэсь, выжез - воль-воль, нокыӵе канжаськон- могӟетъёстэк валемын. Водительлэн кабинаез палан яркыт букваосын трамвай дугдылоннилэн нимыз гожтӥське, вӧзаз ик - дырез возьматӥсь час. Но тужгес но аспӧртэмлыко кылӥське дугдылонниосты чех акцентэн ялӥсь куара. Соку зэмзэ но ачид Прагае вуиськод, кожалод. Но депоысь валтӥсь инженерлэн Адольф Бамеровлэн верамезъя, та выль трамвайлэн кулэлыкез вылтус чеберез бордын гинэ ӧвӧл. Со ог 30 процент мында электрокужымез шыръяны юрттоз, 10-15 арзэ тупатъян-выльдон ужъёс кулэ уз кары. Озьы асдунзэ ӝог берыктыны кулэ. - Ижевсклы та трамвай 150 сюрс манет тыр усиз. Чехъёс сое быдэсак ас кужыменызы бичазы, - маде А.Бамеров. - Но вуонооссэ таӵе вагонъёсты ми асьмеос но бичаны быгатысалмы. Дунтэмгес но усьысал - одӥг вагон 70-80 сюрс манет тыр. Туж умой луысал, городамы дассэ ке но таӵе трамвай басьтыны быгатысалмы ке. Бен, умой луысал. Нош быгатоз-а городысь администрация талы 800-900 сюрс манет коньдон висъяны, али шуг вераны. Озьы ке но Ижевскысь ог 70 процентэз трамвайёс ветлыны ярантэмесь. Соин ик выль оборудованиен-а, сотэк-а, соосты одно тупатъяно луоз. Нош выльёссэ, "российской" луисьёссэ басьтоно ке, одӥгез вагон ог 4 миллион манет тыр усе. Соосты асьмелы ӵекто Санкт-Петербургысь, Екатеринбургысь но Усть- Катанскысь заводъёс. Но специалистъёс оскыто, кусыпъёсмес Чехиын ик юнматыса пайдаёгес луоз шуыса. Нош городын улӥсьёс кунгожсьӧр трамвайлэсь ӟечлыксэ эскерыны быгатозы ни матэктӥсь арня вискын. Воштӥськонъёс ӧз ке луэ, со 4-тӥ маршрутъя келяны чакламын. Э.КУМАЧЁВА. Библиотекаын ужало егитъёс Ижысь Н. А. Некрасов нимо библиотекалэн лыдӟиськон залаз ортчиз научно- практической конференция. Отын вераськон мынӥз егит библиотекарьёслэсь быгатонлыкъёссэс будэтон пумысен. Кенеш дыръя асьсэлэн ужан амалъёсынызы тодматӥзы Удмурт госуниверситетысь, Национальной но интыосысь библиотекаосын тыршисьёс. Кенешлэн ужаз пыриськизы городысь культурая ёзъёсын ужасьёс но Культурая министерствоысь ӧтем куноос. Е. Николаева. Сурым - Нош ик тон сурым поттӥськод ни! - анаелэсь атай шоры таӵе кылъёсын кесяськемзэ кылыса, мон соку ик валатскисько: "Атаелэн мылкыдыз урод, со малы ке но тышкаське". Огез туннэ валантэм: кызьы атае сурым поттыны быгатэ? Гур но эстэмын ӧвӧл ук. Тодӥсько: сурым потэ, муръёез вазь, сэрегпумъёс ӝуаса быремлэсь азьло, ворсаку. Малы анае озьы вераське? Та юан йырам кемалась берга ни. Валэктон уг шедьтӥськы. Вылаз ик, туннэ бускельмы Микол агай паймытӥз на. Атаеным ӵош куас лэсьтыкумы, со азбарамы пыриз. - Мар тӥ сурым поттыса ужаськоды? - ӟечъяськем интые юаз Микол агай. Атае нокыӵе ӧз кариськы, каньылак вазиз: - Тани куасэн нискыланы малпаськом ай... - Молодцы! - ушъям кариз бускельмы. Магазинын али куасъёс туж дуно сыло. ...Ми атаеным мунчоын пыласькыса потӥм. Атаелэсь жадем туссэ адӟыса, анае кышкатскиз, лэся: - Оло, сурым йӧтӥз-а? - Ӧ-ӧз, - нёжтыса вераз атае. - Мунчоез кӧня ке тросгес эстӥськем, лэся, туж пӧсь луэм. - Соку кыкнадылы ик "С лёгким паром!" - Тау. "С лёгким паром" - "капчи парен" шуэм луэ. Созэ валасько. Нош малы озьы верало мунчоысь потэмъёслы? Секыт пар но луэ шат? Таяз учыре атаелэсь юалляськытэк ӧй чида. - Гурлэсь муръёзэ дыраз ворсаськод ке, мунчоын ӵын но, сурым но уг кыльы. Соку мунчоын омыр чылкыт, пар капчи луэ. Гурысь сэрегпумъёс ӝуаса быремлэсь азьвыл муръёез пытсаськод ке, мунчоын сурым кылдэ. Огшоры парлэсь со секытгес, соин улӥе лэзиське, - лад-лад валэктэ атае. - Пӧсьлэсь чидатэк, куд-огез мунчо выж вылын пукыны ярато. Сыӵеослы, лапчаын пыласькисьёслы сярысь, сурым ӝоггес йӧтэ. - Сурым, оло, адямиез но виыны быгатэ? - мынам ваньзэ тодэме потэ. - Сурым - туж кышкыт маке. Адямилэсь со кужымзэ быдтэ, йырсазьзэ ыштытэ. Сурымен тырмем мунчое пограм мурт лулзэ но ыштыны быгатоз. - Нош кызьы утиськоно сурымлэсь? - Сурым йӧтыны кутскемез шӧдӥд ке, соку ик мунчоысь кыре, чылкыт омыре потоно. Мунчолэсь ӧссэ усьтоно, сурымзэ улляно. Йырсазьзэ ыштэм муртэ мунчоысь поттэм бере нашатыр спиртэн сазьтӥськытоно... Атаелэсь йырез усыкмытӥсь сурым сярысь мадемзэ умой валай. Нош "сурым поттӥськод", "сурым поттыса ужаськод" шуыса верамъёсты пумозяз ӧйгес вала на. Тодосчиос, дышетӥсьёс куке но валэктозы, дыр, ай. Пиёклы мадьыны юрттӥз профессор Александр УРАКОВ. Гожтӥськон - 2000 Бырйы кельшымонзэ Гажано эшъёс, кызьы ивортӥмы ни вал, та нуналъёсы шаерысьтымы тросаз ёросъёсын ортче лыдӟисьлэн нуналэз. Шаерамы потӥсь кун газет-журналъёсын тодматскем сяна, сюлэмдылы кельшымон изданилы гожтӥськыны но быгатоды. Лыдӟисьлэн нуналаз гожтӥськемъёслы котькуд редакция дасяз кузьым, соосъя ортчытэмын луз лотереяен шудон. Со сяна, радъямын луозы пӧртэм шудонъёс, викторинаос, редакциын ужасьёсын пумиськонъёс. Газет-журналъёслы та нуналэ 100 манетлэсь ятыр гожтӥськемъёсты возьма на синпель кузьым. Ужрадъёс ортчо ёросъёсысь почта кусыпъёсъя ёзъёсын 10 часысен 18 часозь. Но палэнэ кылемын уз луэ палэнысь гуртъёсын улӥсь лыдӟисьёс но, соос озьы ик пыриськозы лотереяен шудонэ. Туннэ лыдӟисьлэн нуналэз ортче Кез ёросын, 19-тӥ декабре - Балезино, Глазов, Яр ёросъёсын. Алнашъёсты но можгаосты газет-журналъёсын пумиськон возьма 20-тӥ декабре. Гожтӥськон ар йылпумъяськем бере, "Удмурт дунне" газетлы гожтӥськемъёс ваньмыз ик пыриськозы ошпиез лотереяен утонэ. Л. Малых. Пиос мыно армие Быдэс шаерамы сямен ик Селта ёросысь пиос но та вакытэ армие дасясько. Нырысьёсыз пӧлын службае кошкизы Валамазысь Александр Русских, Селтаысь Роман Чирков, Мадьяровоысь Александр Соколов но Выль Моньяысь Руслан Калабаев. Армие кошкисьёсты сӥё-дано келязы, соослы шунытэсь кылъёс веразы, кылсярысь, ёрос администрациысь егитъёсын ужась, ачиз Афганистанын ожмаськем В. А. Поткин, ёросысь военной комиссар В. В. Широбоков. П. Николаев. Покчиослы - школа Грахово ёросысь Каменное гуртын усьтӥськиз пичи классъёсын дышетскисьёслы чаклам выль школа. 30 покчи ныл но пи понна со выль ар азьын бадӟым кузьым луиз. Школаын вань ньыль дышетскон классэз, сиськон интыез, пичильтык спортзалэз. Азьланяз музейлы сэрег висъян сярысь малпанъёс но вань. Школалы гурт администрацилэн кык этажъем азьвыл юртсэ висъязы. Отын интыез тырмыны кулэ на гуртысь нылпи садлы но. Алиез та юрт куашкан калэ вуэмын. Э. Липина. Пальыштык малпаськытэ Зорай - Машалэн матысь эшез. Нош Маша - Зорайлэн матысь эшез. Та кык предложениосты одӥге огазеяны уз луы-а? Умойгес малпаськиды ке, выль предложениды вить кыллэсь пӧрмоз. Ожмег гуртаз бертэ. Табере "гуртаз" но "бертэ" кылъёс вискы одӥг кыл (местоимение) ватсалэ. Предложенидылэн пуштросэз соку ик воштӥськоз, гуртлэсь нимзэ но тододы, нош бертӥсь муртлэн нимыз ышоз. Тӧдьы Кам кузя теплоход уя. Татысь одӥг кыллэсь интызэ воштӥды ке, теплоходлэсь туссэ адӟоды. Ӟичы кион сьӧры уиське. Кион ӟичы сьӧры уиське. Кион уиське ӟичы сьӧры. Кудӥз предложение тӥледлы яраз? Малы? Мон - атай доры! Тире интые тупась кыл шедьтэ ай. Чаклалэ: предложенилэн пумаз кеськон пус сылэ. Озьыен, верась муртлэн мылкыдыз бурдъяськемын. Нош бурдъёс вань ке, л..... кулэ. Пальыштыклы юрттӥз Ульфат БАДРЕТДИНОВ. Пусъемын Нобельлэн премиеныз Дуннеысь тужгес но визьмо учёнойёс, политикъёс, общественной ужасьёс 10-тӥ декабре Швецилэн столицаяз басьтӥзы Нобельлэсь премизэ. Соос пӧлын - Россиысь учёной-физик Жорес Иванович Алфёров. Та дырозь академик Алфёров странаямы тодмо музон но сӥё-дано нимъёсыныз. Со - Иоффе но Демидов Ленинской но Кун премиослэн лауреатсы. Жорес Иванович - Россия Федерациысь Кун Думалэн депутатэз, коммунист, ужа КПРФ-лэн фракцияз. - Мон вордскемын революционеръёслэн-большевикъёслэн семьяязы, азинтӥсько анай- атаелэсь лёгем сюрессэс, - вакчияк шуиз Жорес Иванович, журналистъёслэн юанзылы валэктон сётыса. Кызьы со дунъя дунне вылысь вылӥ премия басьтэмзэ? - Мон туж шумпотӥсько ужме сӥлы каремзылы, данъяськисько Россиысь наука удысысь учёноез данъяменызы, советской физикалэн азинсконъёсызлы. Малы советской? Малы ке шуоно, премия сётэмын 60-тӥ аръёслэн пумазы - 70-тӥ аръёслэн кутсконазы ужаме понна. СССР-ез котькызьы али мед курлалозы, но наука юнмаз но зэмос вормонъёс басьтӥз КПСС кивалтон аръёсы. 20-тӥ даурын, мон чакламъя, тужгес но зол та удысын тыршизы США но Советской Союз. Научно-технической прогрессэз азинтонын трос коньдон быдтэмын, но со ваньмыз пайдаен кутэмын. Ма вераны луоз наукалэн туннэ нуналэз сярысь? Конечно, со туж зол лябӟиз, уката но мынам быръем удысам - полупроводникъёс, полупроводникъёслэн физиказыя но электрониказыя бордын ужан. Татчы мон лыктӥ вал 1959-тӥ арын. Тужгес но кышкатэ тани ма. Асьмеос утьыны быгатӥм наукаысь кужыммес, дуннеын самой ӟеч лабораториосмес, нош быдэстэм ужъёсмы, тодон-валанмы Россилы кулэ ӧвӧл. Озьы бере, кин понна, ма понна учёнойёсмы тыршо? Ваньмызлы валамон: наукаен герӟаськем экономика интыяз сылӥз ке, фундаментальноез но, абстрактноез но наука бырозы. Тӥни ма сярысь малпаськыны кулэ страналэсь кивалтӥсьсэ. Россия му вӧен но газэн, сырьёен гинэ узыр ӧвӧл, нырысь ик со данъяськыны кулэ вылӥ быгатонлыко адямиосыныз, наукаез но техникаез азинтӥсьёсын. Нош ма луэ асьмемын туннэ? Учке ай та лыдпусъёсъя гинэ. Кызьы азинскоз табыдӟа страна, солэн бюджетэз, РСФСР-ен ӵошатыса, 10 поллы ичигес ке? Наукалы, эквивалентэн учкыса, отысь висъямын... 1,72 процентэз. Советской Союзлэн бюджетаз наукаез азинтонэ сётӥське вал 3,8 процент. Премия басьтэменым валче, мынэсьтым интервью басьтӥзы пӧртэм странаосысь журналистъёс. Огез но юатэк ӧз кельты: тани тӥ Нобельлэсь премизэ басьтӥськоды, нош оглом кыӵе югдурды наука удысын? Милемыз ватыны вазь на, кызьы быгатӥськом - улӥськом, шуи пумитазы. Швециысь наукая академилэн генеральной секретарезлы но, пермия сётон сярысь ивор сётыкуз, мон верай: - Вылӥ награда висъямды тужгес но вакытаз Россиысь наука удыс понна. Валамон: мон но шумпотэмме уг ватӥськы. Туала Россиын уло но ужало на оптимистъёс гинэ, пессимистъёс ваньмыз кин кытчы кошкемын. Нош ми кылимы ас вордскем музъем выламы, вань быгатонлыкмес сётом странамес азинтон но выльысь дуннеын азьмынӥсьёс радэ поттон понна. *** Справка. Альфред Нобель. Вордскемын 1833-тӥ арын 21-тӥ октябре, кулэмын 1896-тӥ арын 10-тӥ декабре. Швециысь химик-экспериментатор но бизнесмен, динамит но мукет пуштытӥсь арбериосты кылдытӥсь. Вань ужам коньдонзэ со сётэ юрттэтъя фондэ. Улытозяз ӧз эшъяськылы тамакен, кудӟытӥсь юонэн, палэнскылӥз картаен шудонлэсь, яратылӥз путешествиосы потаны. Швед кылын сяна, вераськиз француз, немец, ӟуч но ингли сямен. Яратоно писательёсыз - Герберт Спенсер, Вольтер, Шекспир, Виктор Гюго, Ги де Мопассан, Оноре де Бальзак, Иван Тургенев... Альфред Нобель семьяяз ньылетӥ нылпи вал (тямыс пӧлысь). Пичи дыръяз ӵем висьылӥз. 1842-тӥ арын Нобельёс улыны выжо Россие, Санкт-Петербурге, атайзылэн улон интыяз. Альфредлы соку 9 арес вал. Школаын ӟеч дышетскиз, но тужгес но яратылӥз химияя урокъёсты. 17 арессэ тырмытыса, Альфред Европа кузя путешествие потэ. Вуылӥз Германие, Францие, бӧрысьгес - США-е. Пумиськылэ учёнойёсын-химикъёсын. Куинь ар ортчыса, пичиез Нобель выльысь берытске Санкт-Петербурге, ужаны пыре атаезлэн компанияз. 1853-тӥ�1856-тӥ аръёсы, Крымын ожъёс мыныку, боеприпасъёс поттӥзы. Война бырыса, машина но пароход ёзъёс лэсьтонэ выжизы. Заказъёс ӧжытэн, компанизы ворсаськиз. Нобельёс берытскизы Стокгольме. Альфред, аслыз лаборатория кылдытыса, быдэсак сямен "выиз" химия эскеронъёсы. 70-тӥ�80-тӥ аръёсы солэн предприятиосыз вӧлмо ни Европаысь странаосы, ужало динамит но пуштытӥсь арбериос лэсьтон бордын. Наука но коммерция Альфред Нобельлы дан но коньдон ваизы. Ачиз улонысь кошкыса но, учёнойлэн нимыз туннэ нуналозь ужа быдэс дуннеысь вылӥ быгатонлыко адямиос понна. Россиын 13 мурт пусъемын солэн премиеныз: Капица, Черенков, Мечников, Павлов, Пастернак, Солженицын, Сахаров... 10-тӥ декабре тодмо фамилиос пӧлы ватсаськиз Алфёров. Дасяз Л.ДМИТРИЕВА. ГОРОД НО МИ Дасялэ песьтэръёстэс, автобусэн ворттон вылысь Котькуд выль толэзь кутскон азьын городын улӥсьёс кышкатско: уз-а будэ транспортлы дунъёс? Ярано, туэ 2 манетэн ик ворттылӥм. Нош мар луоз выль арысен? Ижысь ИПОПАТ-э вуизы дунъёсъя но тарифъёсъя комитетлэн 2001-тӥ арлы чотам лыдпусъёсыз. Соосты шумпотымонэсь уд шуы. ИПОПАТ-лэн начальникез Михаил Копысов верамъя, комитетэн чаклам дотациос ортчись арын кадь ик кылемын. Лыдэ басьтымтэ бензинлы, тыллы, вулы будӥсь дунъёс. Воштос ёзъёс ик кӧня сыло! Одӥг питран гинэ басьтон понна 4 сюрс манет кулэ. Нош городысь транспорт ог 70 процентэз ворттылыны ярантэм луэмын. Транспортникъёслэн асьсэлэн лыдъян-чотан амалзы. Комитетэн чаклам 38 миллион манет интые 150 миллион манет вуыны кулэ, пе, вал. Воштос ёзъёс басьтон сяна, контролёръёслэсь уждунзэс но будэтоно вылэм. Шорлыдын соос туннэ 2 сюрс 15 манет басьто. Берло дыре выльысь ужаны кутскем заводъёсын ӵошатыса, та лыдпус шӧдскымон ӧжытгес луэ. Соин ик арнялы быдэ 70-80 контролёр автобуссэ заводлы воштэ. Озьы ИПОПАТ син куспын ужасьёстэк кыле. Нош контролёр ке ӧз луы - автобус рейсэ уз поты. Кызьы потоно кылдэм югдурысь? Со понна кык амал вань. Нырысетӥез: город кузя ветлӥсь транспортлэсь лыдзэ кулэстоно. Кыкетӥез: транспортын мынон-ветлон дунэз будэтоно. Нырысетӥез сюрес тужгес зол шуккоз Строительёслэн городокетӥзы, Октябрьлы 10 ар нимо ураметӥ, автозавод пала кошкись маршрутъёсъя автобус-троллейбусъёсын ветлӥсьёслы. Татӥ ортчись транспортлэсь лыдзэ кулэстэмлэсь азьло но, соос тыро ветло. Тужгес трос калык люкаське ӵукназэ. Кылсярысь, Строительёслэн городокетӥзы ортчись автобусъёслэн виссы 2-3 минут гинэ ке но, отчы пуксьыны туж секыт. Кыле кыкетӥез: будэтоно мынон-ветлон дунъёсты. Кӧнялы? Транспортникъёслэн арифметиказыя - 3,5�3,7 манет. Озьы-а, тазьы-а луоз, туннэ мыр-мыр вераны уг луы на. Но дунъёсъя но тарифъёсъя комитет берло вуэм лыдпусъёссэ выльысь ӧз эскеры ке, тодмо: дунъёс 4-ёзь ке ӧз, 3 манетозь одно будозы. ...Иське, нош ик огшоры калыклэн ӟепез шоры учкыло. Э. КУМАЧЁВА. Дуно кузьым - устоосызлы Туэ нош ик тодмо луозы Куӟебай Герд нимо премилэн лауреатъёсыз. Дэмланъёс пӧлысь одӥгез - Драмая удмурт кун театр, солэн "Кикы нош силе но силе..." спектаклез (кылдытӥз шаерысьтымы тодмо драматург Егор Егорович Загребин). Спектакль сцена вылын мыныку, туж ӟеч адӟиське быдӟым удмуртлэн Куӟебай Гердлэн курадӟемез, пӧртэм шугадӟонъёсты чидамез. Спектаклез Куӟебай Герд нимо премиен пусйыны дэмлаз "Удмурт кенеш" огазеяськонлэн Ижысь Октябрь ёросысь ёзэз. Туж тодмо адями - шаерысьтымы тодмо этнограф, Удмурт Элькунысь культура удысысь дано ужась Серафима Христофоровна Лебедева. Та чырмыт но сюлмо нылкышно дэмламын пӧртэм ужпумъёслы сӥзем туж тунсыко адӟытонъёсыз понна. Серафима Христофоровна Лебедеваез дэмлаз Удмурт Элькунысь Куӟебай Герд нимо шаеръюрт. Дурбасьтэ "Удмурт кенеш" огазеяськонлэн Дэри ёросысь ёзэз. Удмурт радиоез кылзӥсьёс котьку шумпотыса пумитало журналистлэсь, Удмурт Элькунысь культура удысысь дано ужасьлэсь Вячеслав Дмитриевич Михайловлэсь радиоверанъёссэ. Куӟебай Герд нимо премиен данъяны ӵектэмын "Аргурезь" радиоверанъёсыз но нимаз адямиослы сӥзем радиоочеркъёсыз понна. Вячеслав Дмитриевич Михайловез данъяны дэмлаз "Удмурт кенеш" огазеяськонлэн Устинов ёросысь ёзэз. Удмурт лыдӟисьёслы туж ярало шаерысьтымы тодмо прозаиклэн Никвлад Самсоновлэн (Владимир Яковлевич Самсоновлэн) гожъямъёсыз. "Льӧмпу сяськая лымыяку", "Кызаузыос", "Капка азяд ньыль кызьпуэд", "Адӟон" книгаоссэ адямиос шумпотыса пумитазы. Владимир Яковлевич Самсонов сюлмаськемен валче, дас арлэсь кема ини мылысь- кыдысь ужа "Пурга гуръёс" нимо огазеяськон. Ортчем дыр ӵоже будӥзы ини данак егит гожъясьёс: Елена Панфилова, Людмила Чернова, Ольга Никитина но мукетъёсыз печатласько удмурт газетъёсын, журналъёсын. Владимир Яковлевич Самсоновез Куӟебай Герд нимо премиен пусйыны дэмлаз Удмурт Элькунысь Писательёслэн огазеяськонзы. Дэмлам адямиосъя малпанъёстэс, гажано эшъёс, ыстэлэ "Удмурт дунне" газетлэн редакцияз. Гожтэтъёстэс витёмы 14-тӥ январёзь. "ВУНЭТЭМ" НЫЛПИОСЛЭН УЛОНЗЫ Доре мынам - урам Кин ке лыдъя-чота меда город кузя ас понназы калгись пиналъёслэсь лыдзэс? Быдэ вуымтэосын ужанъя инспекциос, Калыкез улон-вылонын утёнъя министерство... Сояз но таяз но лад-лад лыдпусъёс сётыны ӧз быгатэ. Уго ас кожазы калгисьёс - со одно йыртэмасьёс но, воксё липеттэк кылемъёс но ӧвӧл на. "Вунэтэм" нылпиосты чотам асьмеос: "Трос". Кытысь ке вистэм-вожтэм ӝутскем тӧл тополь вылысь берпуметӥ куаръёсты тарка. Кыдыраса усись йӧ зор лыозь ик пыӵа кадь. Быдэс город пурысь бус пӧлы вотсаськемын. Ураме кемдэм калык кир-пазь пазьгиськиз. Сюрес урдсысь "комок" вӧзы шымырскем ог укмыс-дас аресъем пияш гинэ нокытчы уг дырты. Жӧлмаса сылэ. Мертчан-пыръем йырсиез тугаськем, дӥсез адӟиське кемалась сузямтэ. Мӧзмонэн пачылмем синъёсыныз быльк-быльк учкиз шорам. - Мыныны нокытчы, - ныр улаз бӧтьыртӥз пияш. - Анай-атаед кытын? - Уг берты мон доре! - гуньдылыса пумитъяське со. Выль тодмоослы мон котьку шумпотӥсько. Но пичи Алёшаез (озьы нимало вылэм пияшез) пумитаменым "данъяськыны" малы ке уг дыртӥськы. ...Оло. жалясько но ай. Уго пияшлэн верамез огдырлы монэ улон ӧрысь ик поттэ кадь. Алёшалэн анай-атаез люкиськыку, солы ньыль арес вал. Пичи пияш но солэсь кӧнялы ке гинэ бадӟым Лена сузэрез анайзы борды кылизы. Атайзы бен син улысьтызы ӧз "ышы", артысь коркан ик улӥз. Одӥг ог доразы но пыралляз: пиналъёсызлы шуыса коньдон вайылӥз. - Но огвакытэ дорамы ӵемгес но ӵемгес адӟиськылыны кутскиз тодмотэм воргорон. Милемын со кема, дырзэ жалятэк ортчытъяз, - тодаз вае Алёша. - Ог нуналэ со "мурт адями" дорамы дыръя, атаймы но лыктыны кемдӥз. Соку мон пайми вал, малы анаймы атаймес ӧс кусып вамен ик пырыны ӧз лэзьы. Но али кадь ик тодӥсько: мылкыды туж урод луиз. Но пичи Алёша соку ӧз валалля на, ӵапак со мурт воргорон солы атай, шонергес вераса, сюратай луоз шуыса. - Нырысь выль атаймы зӥбыт сямо адӟиськылӥз, шудылӥз но милемын. Ассэ "зэмос кузёен" лыдъяны кутскемез бере, вылды, ӧдъяз милемыз "дышетыны". Нош "дышетэ" со жалятэк - жугыса. Тужгес зол тыш сюрылэ мыным. Пичильтык кылзӥськымтэе понна, диван вылэ выдтыса, со монэ тыбыр кузям скакалкаен васькытъя. Нош кин со мыным? Ярано, кутэтын кыллён вакытысен ик малпасал ке, со мынам аслам атае шуыса, - Алёша гуньдылыса мадьыны кутскиз. Та бӧрсьы пияшлэн ульчаостӥ калтыртон сюресэз кутске. Ульча солы кыкетӥ дор луиз. Дор, кытын ӧвӧл сомында лекъяськонэз, кӧня анай-атаез вӧзын. Алёша кӧлалля подъездъёсын, одӥг-ог шунскыны лэзьыло котельнойёсы. Сиён-юонэн юрттылӥзы эшъёсыз, но озьы гинэ кӧттэ уд тыр - ческытаз лушкаськонлы. Кызьы вера ачиз Алёша, ӝоген сое синйылто "ментъёс". Шеде пияш Ижевскысь Индустриальной ёросысь быдэ вуымтэосын ужанъя отделэ. Озьы Алёшалэсь "эркын лобан" сюрессэ пытсаны туртто: солэсь вань "шунтӥськон" интыоссэ шараяло. - "Ватӥськон" интыосы быризы. Монэ урамысь ӝегатыса, соку ик анай-атай кие вуттылӥзы. Нош дорын пегаме понна эшшо тросгес тыш шеде. Соин ик дорысь кемалыгес "ышон" вылысь шонтылыны кутски Ижевсклэсь палэнэ. Нырысь ик Якшур-Бодьяе кошки вал - татысь но шедьтӥзы, - маде пияш. Азьпалан Алёшаез витизы Киров, Москва, Тула... - Кузь сюрес вылэ ми кык кузя дасяськм: мон но эшшо одӥг "улонэзлы ӝожтӥськись" пияш. Дорамы нокин ӧвӧл дыръя сумкаосмес сиён-юонэн тырмытӥм, анай-атайёсмылэсь коньдон ватоссэс лушкам но - азьлань. Пиос вуо Кирове. Но татын соослы ӝог акыльтэ. Жуг-жаг куянъёсысь, столовой нергеосысь палэс кельтэмъёсын кӧтсэс тырыны ӧзгес кельшы. - Кировысь вокзал кузя шонаськонъямы, асьме выллем ик пиосты пумитам. Соос валэктӥзы, кызьы Москваозь билеттэк вуыны. Озьы ик лэсьтӥм: нырысь тамбурын, собере вагон пушкы но вуим. Ми кадьёс татын но вылӥллям. Уин шутэтскыны шуыса выдэмъяськи. Син пумтӥм адӟисько: одӥгез "крутой" лушкемак гинэ утчаське умме усем кышномуртлэн сумкаяз. Поттӥз коньдонзэ. Бӧрысьгес тодӥ, соослэн "ужзы" сыӵе вылэм: пассажиръёсты "сузяса" коньдон поттыны. Москва пиослы кельшиз. Татын тыр кисыосын ветлӥсь "тётя-дяденькаос" ӧжыт ӧвӧл. Милиция ӝегатылӥз ке но, час кык возьыса, выльысь лэзьылӥз: кинлэн, пе, ас кожазы юмшась пиосын дырзэ быдтэмез потоз. Москваын ик Алёшаос тодматскизы Махачкалаысь пияшен, таиз армиысь пегӟем. Тодматскизы на кык нылъёсын - озьы ик дорысьтызы пегӟемъёсын - "компанизы" бадӟым но шулдыр пӧрмиз. Эшъяськизы: огзылы ке ӧз, мукетсылы сиёнэн-а, коньдонэн-а удалтылӥз. Барышсэс куспазы одӥг кадь люкылӥзы. - Курск вокзалын нылъёсмы кыӵе ке "сьӧдэз" чӧлталлям. Тодматским соин ми но. Ӵошен барын пуким, сиим-юим. Но выль тодмомы тросгес ӟамыртыны шедьтӥз, воксё кудӟиз. Солэсь ми сомында коньдонзэ талам! Сиёнлы сяна, ваньмылы дӥсь басьтыны но тырмиз. Но коньдон адямиез сӧре шуонлэн зэмез вань ик, дыр, пиналъёслэн но "эшъяськоназы" солэн ванез шедиз бере. Нылъёссы, кылем коньдонлэсь ог люкетсэ кайпалтыса, соку ик ышизы. Алёшаос нош малпазы Махачкалае кошкыны, отысь тодмозы доры куное шуыса. Ӧз удалты - Тулаысен пиосты ӝегатӥзы. - Дорамы ӟеч дӥсяськем кышномурт лыктӥз. Пиосы, шуэ, мон тодӥсько малы тазьы юмшамдэс, соин ик тӥледлы юрттэме потэ. Лыктэ таӵе адресъя - кагаз мыче - быръёды асьтэос: яке дорады бертоды, яке татчы ик школае дышетскыны кылёды. Оским солы: дышетскыны малпам. Сётэм адресъя вуэммы бере гинэ валам - милиция. Ӧтизы анайёсмес - келязы дорамы. Озьы Алёша нош ик Ижевскын. Кыдыраса усись йӧ зор кемалась дугдӥз ни. Но солэн кезьытэз, зэмзэ но, лыозь ик пыӵам, лэся - нокызьы уг шунаськы. Вӧзам эбылям пичи Алёша шоры учкыса, эшшо золгес "шузимисько" кадь. Уг валаськы: кинэ ке жалясько-а, адӟемпотостэм карисько-а яке валаны турттӥсько, но уг пӧрмы. - Алёша, - шуисько, - кыӵе тынад матысь малпанэд? - Японие пегӟыны. - ?! Э.КУМАЧЁВА. Туспуктэмез В.Беломорскихлэн. 02 ИВОРТЭ Тылпу шудон ӧвӧл Гуртъёсын тылпуэн нюръяськон понна кыл куто ёросъёсысь тылпу кысонъя ёзъёс, та уже асьсэ мылкыд каремъя пырисько дружинаос, гурт предприятиослэн чакласькисьёссы. Тылпу кысӥсьёс уен-нуналэн дась луыны кулэ азязы пуктэм ужпумъёсты быдэсъяны. Соос озьы ик кулэ калык пӧлын валэктон уж нуыны но адямиосты тылпуэн нюръяськонлы дасяны. Интыысь администрациос сюлмаськыны кулэ тылпуэз кысон техника но мукет арбериос возён, соосты дыраз тупатъян но ужасьёсты дышетон сярысь. Али котькуд ёросын пуктэмын тылпу кысонъя депо, отын уен-нуналэн луо дежурнойёс, шутэтскон интыосазы шуныт, машинаоссэс тупатъян интыосссы вань, тырмыт дасямын кизер эстӥськон. Но умоеныз артэ вань тырмымтэос но. Тани тылпуэз кысон машина юрттэт сётыны ӝог вуыны кулэ кадь, нош солы часкын 50 иськемлэсь бадӟым ӝоглыкен ветлыны лэзьымтэ. Курадӟоно луэ на тылпулы матын ву ӧвӧлэн яке сюрес ӧвӧлэн. Нош тылпу дыръя котькуд секунд дуно. Тылпу кысонэз рос-прос радъян вылысь, гарнизонъёслэн кивалтӥсьёссы ужан план кылдыто, сое юнмато интыысь кивалтӥсь ёзъёс. Соя чакламын луыны кулэ ваньмызлы матысь пожарникъёслы тылпуэз кысонэ ӝоггес вутскыны. Озьы уг пӧрмы ке, интыысь кивалтӥсьёс но кыл кутыны кулэ. Но озьы ӵем дыръя уг пӧрмы. Тани азьло котькудаз гурт хозяйствоын тылпу кысон машиназы вал, дежурство уен- нуналэн радъяськылӥз. Нош табере югдур уродмиз. Ӧвӧл бензин яке уг ужа телефон, яке техника уг тупатъяськы. Соин сэрен тылпуэн валче трос ыштонъёс адӟо, куддыр адямиос но бырыны шедё. Селта ёрос. Тылпуос вал туэ 7-тӥ феврале Головизнин Язок посёлокын, 10-тӥ мартэ - Колесурын, 27-тӥ мае - Селталан. Одӥгаз отчы тылпу кысӥсь машина ӧз вуы. Бензинзы вылымтэ, пе. 2-тӥ сентябре Халдые машина ӧз поты, насоссы ужамтэен. Игра ёрос. Водительёс ӧвӧлэн тылпу кысон ашинаос 1-тӥ январе, 22-тӥ но 24-тӥ июне Игралась тылпуэз кысыны ӧз вуэ. Нырысяз учыре водитель Выль арез пусйиз, луоз. 1-тӥ апреле Мужберын тылпуэз кысонэ леспромхозысь вуэн машина лыктоно вал, ӧз вутскы, машина сӧриськемен. Сарапул ёрос. Оленье Болото гуртын тылпу кылдӥз, нош "Нива" эштослэн тылпу кысон машинаезлэн цистернаяз вуэз вылымтэ. *** Таӵе тырмымтэосты палэнтон вылысь, эскеронъёс ортчытъясько. Тани Юкаменск ёросын июнь-август толэзьёсы тылпу кысонъя кун служба но Юкаменскысь сюресъёс вылтӥ ветлонэз чакланъя инспециен ӵош эскеризы тылпу кысон техниказылэсь ӟечлыксэ. Шараяськизы трос тырмымтэос. Тылпулэсь утиськонъя тӥрлыксы витьмос люкетэз гинэ вань, сое но дыраз уг мисько но уг куасьто. 18 хозяйство пӧлысь куатяз тылпу кысон машинаоссы воксё ӧвӧл. "Кельдыковский" гурт кооперативын одӥг гинэ сыӵе машиназы вылэм, сое но быдэсак качаллям, нош хохзяйство райцентрлэсь самой кыдёкысез. Машинаоссы эскеремын вал, ӵыпетъёсысь ву басьтыны быгато-а шуыса. Тросэз ӧз пишмытэ. Жаляса верано луэ, таӵе югдур тросаз ёросъёсын. Завьял ёрос. Та ёросын тылпуос трос луыло. Ёросэн кивалтӥсьлы кулэ кадь малпаськыны но тылпуэн нюръяськонлы тросгес саклык висъяны. Нош тыро-пыдо ужрадъёс уг кутӥсько, соин валче адямиос быро. 4-тӥ январе "Малиновка" сад-бакча огазеяськонысь корка но мунчо пеньлы пӧрмизы. Кысыны ӧз быгатэ, сюрес ӧвӧлэн машинаос тылпу доры ӧз вуэ. Телефонъёссы ужамтэен, тылпу кысонэ пожарникъёсты ӧтьыны ӧз быгатэ Хохряки леспромхозэ, Холмогоров нимо эштосэ, "Сокол" торфопредприятие. Сӧриськеменызы валче ваньмыз техника потыны ӧз быгаты 25-тӥ мае Выль Чультеме. 3- тӥ июне - "Октябрь" сад-бакча огазеяськонэ, 11-тӥ июне - "Радуга", 22-тӥ июне - "Зодиак" сад-бакча огазеяськонъёсы, 27-тӥ июне - Изгуртэ, 4-тӥ июле - Ӟуч Вожое, 12-тӥ июле - Сентег посёлоке. Кизнер ёрос. Ягул посёлокын 26-тӥ мае тылпу кысӥсь машиназы ужамысь дугдӥз, мукетыз, нянь пыжисьёслэнэз, лыктыны ик ӧз быгаты. 28-тӥ мае Гучин-Бодья гуртын тылпу ӝутскиз. "Выль улон" эштосысь тылпу кысон машиналэн водителез уже потӥз, ӝыны часлы бере кыльыса. 8-тӥ июле Кизнерысь улыно-вылыно коркалэн мурӝолысьтыз тылпу кысонэ леспромхозлэн машинаез лыктысал ке, изъян ичигес луысал. 24-тӥ феврале Якшур-Бодья ёросысь Варавай гуртэ тылпу кысонэ "Родина" но Чкалов нимо эштосъёсысь машинаос ӧз вуэ, огез тияськем, мукетызлэн бензинэз вылымтэ. Кез ёрос. Кулига селоын адямиос асьсэ кужымен тылпуэз кысыны быгатӥзы ик, нош кык аресъем Саша Вихаревез утьыны ӧз лу ни. Пичи Пурга ёрос. 4-тӥ январе Вуж Монья шор ёзо школалэн куас возён базаез ӝуаны ӧдъяз. Тылпу быдтӥз юртлэсь сигзэ, тылпу кысӥсьёслы дыраз ивортымтэен но сигын тылпулэсь утиськыны висъетъёс лэсьтымтэеныз. Туэ тямыс толэзьскын гурт ёросъёсын гинэ 716 пол тылпу потаз. Сутскиз 380 улон корка. Бырыны шедиз 49 мурт, соос пӧлын - кык нылпиос. Тылпу кенжылон но соин нюръяськон ласянь урод югдур кылдэмын сад-бакчаосын. Туэ тямыс толэзьскын отын ӝуаз 77 корка. Нош адямиослэн улон интыосазы кылдыло 70 процентэз тылпуос. Малы кылдэ таӵе югдур? Тросэз тылпуос пото адямиослэн номыр карымтэзы бордысь но. Басьтом электрокужым кутонэз ик. Туэ 8 толэзьскын электроарбериосын сэрен 171 пол тылпу потылӥз. Соосты ас дыраз тупатыны шуг вал шат? 8 толэзьскын гинэ 125 тылпу потэмын юисьёсын сэрен (со 15 процентэз луэ). Миымлэсь со 15-лы тросгес. Нылпиос шудыса тылпу поттон учыръёс сётӥзы 16 процентсэ, тамак кыскон - 21-зэ. Бен, вань асьмелэн но адӟем карымон хозяйствоос но нимысьтыз адямиос, соос тылпуэз алонлы но дыраз кысонлы бадӟым саклык висъяло, уй но, нунал но со сярысь вунэтытэк. Таӵеос пӧлы пыртыны кулэ Кизнер ёросысь "Выль сюрес" эштосэз, Можга ёросысь "Россия" эштосэз. Соослэн автоцистернаоссы гинэ - быдэн куинь. А.ЕМЕЛЬЯНОВ, тылпуэз кысонъя управлениысь инженер. НИМЫЗ - ДАНЪЯН ПУЛ ВЫЛЫН Азьпала учкись кузё Удмуртие кытысь гинэ дышетскем адямиосты, егит специалистъёсты ӧз ысъялэ. Соос пӧлысь одӥгез - Анатолий Марченко. Куамын куинь ар талэсь азьло, Калининысь политехнической институтэз йылпумъямез бере, егит инженерез шаерамы ысто. Солы оско Ижысь торф но брикет поттӥсь заводэн кивалтыны. Директор куинь ар ӵоже предприятиез йыг-йыг пыд йылаз пуктӥз. Сюлмаськись-утчаськись адями "Ижторф" трестлэн кивалтӥсезлэн воштӥсез луиз, нош 1982-тӥ арын бырйизы "Удмуртторф" огазеяськонлы валтӥсь тӧрое. Элькунысьтымы торф поттӥсьёс соку умой улӥзы. Колхозъёслы но совхозъёслы сьӧд сюй басьтыны государство нимысьтыз коньдон висъялляз. Торф поттэм но вузам сяна, элькунысьтымы бадӟымесь заводъёслы воштос ёзъёс лэсьтылӥзы. Но Анатолий Марченко кыдёке азьпала учкиз, сюлэмыз шӧдӥз странаын бадӟымесь воштӥськонъёсты. Тямыстонэтӥ аръёсы уго выльдӥськон но рынок сярысь поттылӥсь ик ӧй вал. Нош "Удмуртторфлэн" кивалтӥсез малпаськиз ни выль удыс, му вӧй поттонэз радъян сярысь. Трос визьзэ, кужымзэ но дырзэ сётоно луиз, НГДУ кылдытон понна (ичи ӧй вал уго пумитъяськисьёсыз но). Анатолий Владимирович ӟеч малпанэзлэсь ӧз куштӥськы, котькудӥзлы нимаз-нимаз кушаса кадь валэктылӥз та ужлэсь туж кулэзэ. Кин валаз, кин ӧз, ӵок, но сьӧд сюЙ поттӥсьёслэн му вӧй кыскон скважинаоссы гужем шуныт зор бере губиос кадь ӝутскизы Як.-Бодья, Воткинск но Шаркан ёросъёсын. Нош миым НГДУ 15 ар тырмемзэ сӥё-дано пусйиз ни. Тӥни озьы "Удмуртторф" рынокен экономикае потыны азьло ик дасяськиз. Солы гинэ му вӧйзэ вузаны аслыз право сётэмын, нош али вуттэ ни нефтЬсэ чылкытатон (первичной обработка) сооружЕние. Та вакытэ предприятилы юрттэ "Удмуртнефть" огазеяськон. Вуиз выльдӥськон но рынокен экономикае выжон, нош Анатолий Марченколы со кышкыт ӧй вал. Табере куд-огез солы шуэ, му вӧй ке ӧй поттысалды, кемалась куашкасалды, банкрот луысалды ни. Зэмзэ но, туж шонер верало, торфопредприятиос озьы ик бырысалзы. Визьмо кивалтӥсь кыдёке азьпала учкиз. Со гинэ ке луысал. Миым пыриськиз шаерамы му вӧй поттон интыосты вузанэ - аукционэ. Коньдонзэ ӧз жаля, 30 миллион манетлэсь уно висъяз кыдёкысь Грах районысь Покровское нефть кыскон интыез басьтыны. Му вӧез но бен ОТЫН сокем трос ӧвӧл, ужан интызэ но капчи уд шуы, но Анатолий Марченко нош ик со борды гижысь-пиньысь басьтӥськиз. Табере отын но качалкаос "сьӧд зарни" кыско ни. Кивалтӥсьлы шумпотон. Калыклы ватсаса выль ужан интыос усьтэмын, коньдон но умой тыро. Ӵыжак выль автобусъёсын адямиосты ужаны нулло. Нош адӟе вал тӥ Вадим Сивковлэн урамысьтыз кык этажен юртэз. Азьло со номырин ӧз висъяськылы, нош туэ кылын верантэм чередизы: педпалзэ но, пушсэ но, азбарзэ, но кенерзэ но. Выжыкылын суредам корка выллем луиз. Мар умоез, ӟечез лэсьтӥське - ваньмыз со Анатолий Марченколэн кичӧлтэмезъя улонэ пыӵа, быдэсъяське. Предприятие со понна уксё но шедьтэ, мукетъёсызлы но юрттэ. Вӧзысьтызы нимаз коркаосын улӥсьёслы но чебер забор пуктӥз, котыразы сьӧд сюй вӧлдӥз. Кивалтӥсьлы калык тау каре. Юнме шорысь уг, сюлмаськемез понна. Шаерамы трос-а бен таӵе кивалтӥсьёс? Ӧвӧл. Валтӥсь директорлэн воштӥсьёсыз но мукетъёсыз со сярысь юнме уг шуо, Анатолий Владимирович, пе, ужаны вордӥськемын: ку шутэтске, чик валантэм. Субботае-арняе но со уже вуэ, калыктэм дыръя бумагаосты учке-пертче, котькудӥзлы сюрес сётэ. Куд-огез солэсь юа: "Малы му вӧй поттон борды басьтӥськыны?" Валэктонэз одӥг, гыбдаса, пе, улыны уг яратӥськы. Но главноез со гинэ ӧвӧл. Республикалы нефть кулэ вал, нош со ваньмыз сямен палэнэ, Россие кошкылӥз, кӧнязэ ке гинэ шаермылы сётылӥзы. Соин ик, элькунлы ӟеч лэсьтон вылысь, выль удыс борды кутскизы. Табере 4 ни нефть поттон интызы но 2 миллион тонна му вӧй кыскизы ни. НГДУ арысь аре тросгес ваньбур поттэ, вамышъёссэ кузёмытэ. Анатолий Владимирович ноку огинтыяз ӧз улы, ялан выльзэ утчаз но уже пыӵатылӥз. Ачиз но дышетскиз. Тодон-валанзэ будэтӥз Удмурт кун университетын, басьтӥз экономистлэсь дипломзэ. Озьы лыдъян-чотанэз умойгес валаны ӧдъяз. Нош кивалтӥсьлы со туж кулэ. Анатолий Владимирович ачиз сярысь мадьыны уг яраты. Дас тямыс ар вис карытэк кивалтэ ни "Удмуртторф" кун предприятиен. Ӝоген солы 25-тӥ декабре тырмоз 62 арес. Но бадӟымесь сьӧд синкашъёсыз но азвесяны кутскем йырсиез шоры учкыса, ноку сомында уд сёты. Шоро-куспо йыг-йыг мугоро воргорон сайкыт синъёсыныз котьку синмад учкоз но вань малпанъёстэ адӟоз кадь. Каньыл соин вераськыны, нош кытысь дорамы лыктэмзэ юамелы шуиз: - Вордски Беларусь Республикаысь Гомель областьысь Ясени гуртын, белорус семьяын. Ноку ӧй малпалля быдэс улонме Удмуртиын ортчытыны. Но Совето улон вакытэ институтэз быдтӥсьёсты котьку палэнэ ысъяллязы. Мон но татчы вуи. Анатолий Владимирович зэмзэ но ӧз малпалля пыраклы татчы кыльыны. Но шаермы, калык солы кельшиз. Табере со дорамы будӥз, бадӟым но дано кивалтӥсь луиз, татын шудзэ шедьтӥз. Тыршемез пусъемын уно почёт грамотаосын но медальёсын, сётэмын Россия Федерациысь дано экономист но эстӥськон удысысь дано ужась, Удмуртиысь дано нефтяник нимъёс. Ӟырдыт но ӟег нянь кадь каньыл мылкыдо кивалтӥсь ноку ӧз палэнскылы общественной ужлэсь. Анатолий Владимирович ньыль ар ӵоже вал Октябрь райсоветлэн депутатэз, нош али - Кун Кенешлэн. Удмурт автономия сётэм дырысен 80 ар тырмон азьын сое нош ик пырто республикалэн Данъян пулаз. Азьло но Анатолий Марченкоез отчы пыртылӥзы ни вал. Тӥни таӵе усто но визьмо кивалтӥсенызы данъясько сьӧд сюй но му вӧй поттӥсьёс. Нош ми выль даур вуон азьын вордӥськем нуналэныз ӟечкыласьком, шудбур но тазалык тӥледлы, Анатолий Владимирович! Геннадий РОМАНОВ. Анатолий Марченко. Таӵе чебер кариз юртсэ "Удмуртторф". Туспуктэмъёсыз Владимир Беломорскихлэн. Елена БОГДАНОВА Инкуазь анай Выжыкыл Улэм-вылэм Инкуазь. Солэн ньыль нылпиосыз вордскиллям: одӥг пи но куинь ныл. Нырысетӥез пиналыз - Тол. Со тӧдьы йырсиё, пе, пурысьтам пересь кадь. Кыкетӥез - Сӥзьыл. Таизлэн ӵужо-гордо йырсиез мертчан выллем пиштэ вылэм. Куинетӥез сузэр- апайёс пӧлысь - Гужем. Солэн йыраз пӧртэм-пӧртэм сяськаослэсь керттэм чебер пунэтэз, пе, вал. Нош ньылетӥез, самой яратоно нылыз - Тулыс. Та пичи нылаш шунды кадь вылэм, ӵуж йырсиё, нош бамаз векчи пужыос. Пиналъёс будӥллям. Одӥг шулдыр нуналэ анайзы люкам соосыз но шуэм: - Нуныкаосы, мыным юрттон вакытты но вуиз. Табере котькудӥз аслыз гинэ тупась ужез быдэсъялоз. Кин бордысен кутском меда? Инкуазьлэн пиналъёсыз бырйыны маза сётӥллямтэ, ог-огзэс кылзытэк ӵаш, пе, потто: - Монэ, монэ нырысь! - кеськем Сӥзьыл. - Ӧвӧл, мон бадӟымгес, - шуэм, пе, Тол. - Мон но пичи ӧвӧл ни, - Гужемлэн но бере кылемез потымтэ. Тулыс гинэ эчешонэ пырымтэ. Ма карод, пинал мылкыд - юмал йӧлпыд. Со кузьыли карез эскере, сяська бича, пе. Апайёсызлэсь но агаезлэсь ченгешонзэс но кылымтэ, лэся. Анайзы ӵашетэмзэс кӧня ке кылзэм но собере меӵак верам: - Тӥ одӥг кыл ӧд шедьтэ, лэся, соин ик мон ачим ваньзэ радъяло. Мынам мылкыд каремея, нырысь мыноз Тулыс. Нылы, кытын тон? - Мон татын, меми. Вождэ эн потты, мон ӧй кылы мар верамдэ. - Ярам, табере сак кылзӥськы. Тон, Тулысэ, мынод агай-апайёсыд азьпалан. Ужед трос луоз. Лымыез шунтоно, музъемез усьтоно, турынлы потыны юрттоно, тылобурдоосыз ӧтёно, сяськаосыз но куаръёсыз пушйытоно. Собере тонэ воштоз Гужем. - Бен, меми, мон кылзӥсько, - сак кариськем ни Гужем но. - Тон, нылы, азьланьтод тулысэдлэсь кутскем ужзэ. Будэтод турын, ю-нянь, узы-боры, емышъёсыз но бакча сиёнъёсыз кисьматод. Возь вылъёсыз шобыртод сяськаосын. Собере тон борды Сӥзьыл но итӥськоз. - Нош мон мар ужалом на? - паймем Сӥзьыл. - Нош ик тон дыртӥськод, - шуэм анаез нылызлы. - Эн кышка, ужтэк уд кыльы. Ужась муртлы уж сюре. Тон вуэм емышъёсыз но бакча сиёнэз утялтод, ю-нянез октод, гырод- кизёд. Собере вань писпу куаръёсыз, аслад йырсиед кадь, ӵужо-гордо буяно луод на. Бератаз ни вань куаръёсыз тӧлъя-буръя лэзёд. - Анай, писпуос гольык кынмозы ук! - одӥг ымысь кадь вераллям Тулысэн Гужем. - Уз кынме, эн кышкалэ. Писпуос медаз кынме шуыса, Тол агайды соосты лымыен шобыртоз. Шуръёсыз но тыметъёсыз йӧэн кортналоз, музъемез небыт мамыкен валёз. Укно пиялаосыз пӧртэм суредъёсын чебермалоз. Асьтэлэсь уждэс умой, радызъя но вакытаз быдэсъялэ. Мыным тӥ понна возьыт медам лу. - Ярам, анай, - шуиллям пиналъёсыз Инкуазьлы. - Ми валам верамдэ. Со дырысен уно дауръёс ортчиллям ни. Инкуазьлэн нылпиосыз али но уло, анайзылэсь косэмзэ туж ӟеч быдэсъяло, пе. 2001-ТӤ АРЛЫ ГОЖТӤСЬКОН "Кизили" - Выль арлы кузьым! Шаерамы зэмос кезьытъёс кузёясько. Нунал вакчи но вакчи кыле. Тол Бабай нюлэсъёсты но бусыосты, гуртъёсты но каръёсты мамыко шобретэныз вале. Нош ми, "Кизили" журналлэн редакцияз ужасьёс, ӟырт кезьытъёсты ум но шӧдылӥське кадь. Угось та нуналъёсы тулыс толэзьёсы потоно номеръёс бордын ужаськомы ни. Со вакытлы печатланы пусъемын Ульфат Бадретдиновлэн но Гильман Касимовлэн тунсыко статьяоссы, Николай Никифоровлэн но Василий Смирновлэн веросъёссы, Татьяна Черновалэн но Владимир Котковлэн кылбур сузьетъёссы, конкурсэ вуэм ужъёс, йыртӥянъёс, серемес чуръёс, кырӟанъёс. Нырысетӥ паларез йылпумъяломы нылпи кырӟанъёсын бичетэн. Отчы люкамын луозы пиналъёсын но арлыдоосын гожтэм тужгес но устоосыз кылбур чуръёс но крезьгуръёс. Нош туэ кагазлэсь пӧртэм шудонъёс лэсьтыны валэктыса, нимысьтыз номер поттӥм. Нылпи садъёсын но покчи классъёсын ужасьёс сое пырак редакциысь басьтыны быгатозы. Дуныз 5 манет. "Кизили" журнал али гинэ кылдӥз ай кадь. Нош кайта солы 15 ар тырмоз ини. Соин валче, гажано лыдӟисьёсмы, эн вунэтэ вал милемлы но, асьтэлы но ӟеч кузьым лэсьтыны. Гожтӥське яратоно журналдылы! Солэн арлы дуныз (почта пыр) 45 манет, редакция пыр басьтыса - 26 манет но 30 коньы. Кык-куинь арня ортчыса, тӥ доры Тол Бабай йыгаськоз. Солэн пуйыез буш медаз луы вылэм. Нош выль газет-журнал кадь вань меда дуноезгес кузьым?! Алексей ЕЛЬЦОВ, "Кизили" журналлэн валтӥсь редакторезлэн воштӥсез. Коньдон но адями Маин пӧртэм кураськисьлэсь? Со-та уродэз ӧй вал ке но, гурт калыкын Иван Петровичлэн данэз туж ик шӧдӥськымон ӧй вал кадь. Укыр чурытысьтыз-а, мар-а. Иван Петрович куамынэтӥ аръёсы школаын ужаны кутскиз. Нырысетӥ удмурт дышетӥсьёс пӧлысь огез вал со. Кык-куинь поколениез, оло, солэсь но трос лыдӟиськыны, лыдъяны- чотаны дышетӥз, синмо кариз, быгатэмезъя но валамезъя умой сям пыӵатыны тыршиз. Озьы но, кинэн гинэ ӧй пумиськылы, шунытэсь кылъёс верамъёссэс ӧй кылы. Соин Иван Петрович шоры жалясагес но учкылӥ (дышетӥсьлэн нимыз саптаськем кадь медаз луы шуыса, нимзэ воштыса сётӥсько). Нырысьсэ адӟиськи Иван Петровичен, сельсоветлэн тӧроез луыса ужакум. Шыкыс кадь юртэз, выль ке но ӧй вал ни, йыг-йыг пыд йылаз сылӥз ай. Пичи капкаез шуген усьяське-ворсаське вылэм, нокызьы но усьтыны ӧй быгаты. Азбарысь куараез кылыса шултӥ. Юрт кузё пумитам потӥз. Капка калэз кужмысь кыска, пыдыныз но ӵыжа, соиз уг сётскы. Кема гинэ курадӟиз усьтыны. Иван Петрович чечы кыске вылэм. Пичи бусы быдӟа вӧл-вӧл азбараз ог дасолэсь уно уморто сылэ. Выль дышетскон арлы школаез дасян сярысь мар но со вераським но капка пала вамыштӥ. Иван Петрович сьӧрысьтым уг кыльы, нокызьы веранэз уг быры, мушъёссэ но вунэтӥз кадь. Кема сылысалмы на, вылды, усьтэм капка вискын, котырамы муш ӧй тэбиньысал ке. Нырысь ик мон борды ериз, собере Иван Петровичлэн тугаськем йырси пӧлаз ышиз. Таиз келяськисе йырзэ кык киыныз кырмыса, озьы кесяськыса ик пегӟиз. Капкаез пась кылиз. Малпай, солы дышетӥсе ӧвӧл, артистэ мыноно вылэм. Та гуртэ выльысь вуыса, кызь-кызь вить ар талэсь азьло луэм суредэз нош ик син азям пуктӥ. Табере - карандашен, блокнотэн, журналист луыса. Ортчем аръёс Иван Петровичлэн ымныраз шӧдӥськымон пытьы кельтӥллямтэ потӥз. Бамъёсыз азьвыл кадь ик ӵыжытэсь, муресь, кисыриосыз уг адӟисько. Мушкасьёслэн озьы, дыр, малпай. Маскаръяськон сямзэ но куштымтэ, бадӟым куректонэз ке но вал. Кузпалзэ сокугес гинэ ватыса, дунне вылэ чылкак огназ кылем. Нылпизы вылымтэ. Одӥг выныз вал, пиналысен оже кошкыса бырыны шедем. Кышноез ӟуч мар ке, кыдёкысь лыктэмын та пала. Солэн ӵыжы- выжыосыныз Иван Петровичлы матысь луыны ӧз кылды. Иван Петрович маскаръяськиз ке но, мылкыдыз азьвыл кадь шулдыр ӧй вал ни. Шӧдӥ, сирота кылем пересьлэн сюлэмыз бӧрдэ. Визь-кенеш сётэмез, буйгатэмез витиз кадь. Мылкыдзэ вераз, оло, кузпал шедьтыны юрттысал, пе. Нылпитэм, лякыт сямо но ачизлэсь кӧнялы ке егитгес мед луысал вылэм. Скал но, муш но уг ворды ни бере, ӝӧк вылыз начар кылем. Иван Петрович нуназе каре вал. нянь, кӧмын пӧзьтэм картофка но сылал - тӥни вань сиёнэз. Гылтыны чаез гинэ но ӧвӧл. Электроплитаез сутскем, куашкам, нош гужем куазен нуназе вакытэ гур уд эсты ук ву быректыны гинэ. Иван Петрович кӧня ке йыр ыж вордэ на вал. Такапиосыз вандыны вуиллям ини, но аслаз моӵез ӧвӧл. Кинэ ке медъяно ке, бутылка пуктытэк уз луы, пе. Нош ик коньдон кулэ. Корка пушказ гольык боддоръёс. Куд-ог коръёс борды ошиськыса кымеллям шпалер яке газет чалепъёс. Кемалась буямтэ выж вылын кесяськем клеёнка лошъяське, ог кызь ар ӝӧк вылзэ шобыртыса возиз, дыр, соин. Пулъёсын висъям зало шуоназ, тэтэ карись мурт кадь, тӥяськем ӝӧк сылэ, номырин шобыртымтэ. Газет но книгаос нокытын уг адӟисько. Дӥсь ошон - огшоры кортӵог. Борддор валлин, ӝӧклы палэнынгес, тыбыртэм пукон, пукыны но кылльыны ярантэм диван - пружинаосыз кыре потэмын. Та юртэ радио но, телевизор но ноку пыраллямтэ кадь. Шкафез но, книга ӝажыез но ноку вылымтэ, лэся, бервылзы уг адӟиськы. Розетка гинэ но син шорам ӧз йӧты. Иван Петрович олома сярысь но мадиз, тужгес но тунсыко потӥз гуртэзлэн историез но ортчем сюресэз. Ӟеч тодэ котырысь гурт калыкез но. Паймисько сэзь йырсазезлы. Медӥсько вал люкам ваньбурез сярысь юаны, но умой ӧз поты. Кӧтсэ ӝож каро, пыкылэм кадь потоз, малпай. Зэм верало вылэм: чурыт куртчем узыр мурт - куанерлэсь но куанер. Ма ӟечсэ адӟиз Иван Петрович, ассэ тазьы вӧсь карем сяна? Ужаса поттэм ваньбурез аслыз сиыны но, нуллыны но ӧз яра бере, кин понна но ма понна улӥз дунне вылын? Нош улӥз со тямыстон аресозь (ӟеч мед улоз ни сояз дуннеын). Гуртоосызлэн верамзыя, люкам коньдонзэ сбрекассаын возе вылэм, но Гайдарлэн реформаез дыръя ваньмыз чиптэм-чаптэм бырем. Ёрмись ёрмисез вала Бурангурт школаын дышетскем эшъёсыным пумиськиськомы ке, буре вайиськомы Фёдор Андреевич Дресвяниковез. Классэн кивалтӥсьмы сяна, огдыре общежитиын воспитатель но вал со. Уг вунэтӥськы таӵе учырез. Улонтӥямы толалтэ туж кезьыт луэ вал. Ву пальккиське ке, (оло, юри но кисьтасез вал), выж вылын йӧ кынмылӥз, со нискылан интылы пӧрмылӥз. Огез эшмы, кынмемезлы ёрмыса, уйшор уин султэм но гур эстэм. Гур пушкын пыдкутчан - кинлэн кутъёс, кинлэн гын сапег. Пу тыремезлэсь азьло гур пушез бушатэм ик. Но пеймыт азьын умой адӟымтэ ваньзэ. Озьы, Пуро-Можга пилэн палыз гын сапегез сутскиз. Общежитиын гинэ ӧвӧл, ми бордысь но кӧш зын кема пакиз. Нош ёрмонэ вуэм эшмылы Фёдор Андреевич пиезлэсь кышъям гын сапегзэ сётӥз. Классэн кино учкыны ветлӥмы, "Как закалялась сталь" вал кадь. Соку, война бере, туж начар улӥмы, кино учкыны но коньдонмы ӧй вал. Фёдор Андреевич, оло, ӝынызэ классэз аслаз коньдонэныз киное пыртӥз. Асьсэос но ёрмыса улӥзы, вылды, Дресвяниковъёс, вылаз ик, ньыль нылпи будэтӥзы на. Ӵошатӥсько дышетӥсьме Иван Петровичен. Макем пӧртэмесь соос. Узыръёс но бӧрдо Песятаелэн выныз артэ коркан улӥз. Сое пересь тятя шуылӥмы. Асьмелэнэз, Герман ожысь бертыса, вазь кулэм. Со дырлэн мертэтъёсызъя, пересь тятя туж узыр вал. Мемей верамъя, коньдонэз "ӝыны "Москвич" басьтымон вылэм. Тросэз копейка но коньдонтэк улӥзы бере, со туж трос поттӥз ини. Пересь тятя туж ӝикыт вал. Ужез азинлыко мынӥз. Трос лыдӟиськиз, трос тодӥз. Вань ужъёссэ книгаосын гожтэм визькенешъя быдэсъяз. Бакча сиёнэз удалтэ вал, коргид тыр пудо вордӥз. Но коньдонэн узырмытӥз муш вордэмез, шуылӥзы. Коркаез пичи ке но, куинь висъето вал (медъяса лэсьтытӥз). Пушкыз выжыкылын кадь потылӥз. Тӧдьы буям ӧсъёсын, янакъёсын. Буям потолокез, полэз чиль- дол чилязы. Велосипедэз, батарейкаен ужась радиоприёмникез вал (ми доры электротыл 50-тӥ аръёслэн пумазы гинэ вуиз ай). Пересьмыса со эшшо но чурыт луиз. Телевизор басьтон сярысь поттылӥз вал, конодонэз жаль потӥз, лэся, яке учкыны ветлӥсьёс акыляк карозы, малпаз. Ӧз басьты. Соку милям Сундуково гуртамы нокинлэн но телевизорез ӧй вал на. Кинлы шуыса меда жаляз коньдонзэ? Кыкез ик пиосыз войнае быризы. Ассэ утялтӥсь ваиз аракыез яратӥсь пыдйылчи кылем шоро-куспо арлыдо нылкышноез (пересь тятя кулэм бере ваньзэ тӧлъя-буръя лэзиз со). Нош кӧня кышкаса улӥз узырлыкез понна. Мон тодыса гинэ куинь пол со вылэ урдскылӥзы. Уйшор уин, юрттыны курыса кесяськемзэ кылэмысь, лулмы пыдтышкамы вуылӥз, пеймыт луэ ке, кӧшкемаса кыре потаны ӧм дӥсьтылэ ни. Кышкалод угось. Одӥг пол вазь ӵукна пересь тятя пудоезлы турын куштыны потэм. Лапас улаз уйбыт ватӥськыса улэм артэ ӟуч гуртысь лушкаськись. Руки вверх шуыса кеськем но ыбем. Но ыбем куара интые, сач вазем. Пересь тятя куалектымтэ, мажесэн шуккем шораз урдскем муртэ. Соизлэн пистолетэз лымые палдэм. Вожомеменыз пересь тятяез кӧня ке пол шубаез пыр суйёсэ пуртэн бышкем. Улэп кылиз. Эсэптэм чурыт вал со. Кисыяз преникен ветлӥз, милемлы ӧз веръяты, нош кыӵе сием потэ вал ческыт сиён! Картофказэ милям семьямытэк ӧз мертты, ӧз окты. Мынӥськомы вал ужаны сиськон понна. К. КУЗНЕЦОВ. Пичи Пурга. ПОЛИТИКА Компартия егитоме Сыӵе дунъет сётӥз туала КПРФ-лы Николай Сапожников, партилэн Удмурт рескомезлэн нырысетӥ секретарез, Россиысь коммунистъёслэн ВИИ съездысьтызы бертэмез бере. Пусйыны кулэ, таяз учыре соос люкаськылӥзы но кенешизы Союзъёслэн юртысьтызы Колонной залын. Кыӵе ужпумъёсты эскериз съезд? Политической докладэн вераськиз КПРФ-лэн Центральной комитетэзлэн председателез Г.А.Зюганов. Отчёт лэсьтӥз контрольно- ревизионной комиссилэн кивалтӥсез, быръемын партилэн ЦК-ез но учкемын куд-ог музон юанъёс. Съездын ужазы азьвыл СССР-е пырись республикаослэн делегатъёссы, кунгож сьӧрысь куноос. - Таяз учыре залын тросгес пукизы егитъёс, арлыдоосыз пӧлысь самой пересез вал Е.К.Лигачев, - шуиз Николай Иванович. - Мон пусйысал на тани мае. ВИИ съезд ортчиз странамы понна туж ӟырдыт вакытэ. Кун Думаын мынэ вуоно арлы бюджетэз кутон, ӝутске экономика, кылдо политической партиос, йылпумъяське даур. КПРФ вань политической кужымъёс пӧлысь оскымонэз но валтӥсез луэ. Со ик кыл кутыны кулэ, курадӟытэм россилэн ХХИ даурын быръёно сюресэз понна. Кыӵе калэ вуттэмын странамы реформаторъёсын сэрен? Сое мургес возьматозы съездын верам куд-ог лыдпусъёс: кулэмъёслэн лыдзы, вордскисьёсызлэн сярысь, 8 процентлы трос. Кылем арын быдэс Россиын вордскемын 1 млн. 200 сюрс пинал, чакламъя кулэ вал 1 млн. 950 сюрс. Соку калыкмылэн лыдыз ӧй кулэсмысал. Россиын улӥсез 1999-тӥ арын - 145,6 млн.адями. Солэсь улӥын лыдпус пусъемын ӧй вал на. Ужъя но социальной азинсконъя министерство чакламъя, демографияя югдур матысь дыре ӧз ке воштӥськы, 2015-тӥ арын Россиысь калык кулэсмоз 138,4 миллионозь. Нош ЪЪИ даурлэн шорозяз (ООН лыдъямъя), асьмеос 121 миллион гинэ кылём на. Шӧдскымон лябӟе калыклэн тазалыкез. Сое валэктыны луоз урод сиськемен. Россия Федерациысь Гурт удысъя министерстволэн эскеронъёсызъя, 2000-тӥ арын адямилы быдэ сӥль но сӥль продуктъёсты сиён кулэсмоз 41 килограммозь, сахар - 34-ёзь. Кылем арын та лыдпусъёс 43 но 35 килограмм вал. 1998-тӥ арез ке учконо, чакламлэсь 38 килограммлы ӧжыт асьмеос сиим сӥль, курег пуз - 67-лы, будос вӧй - 3,4 килограммлы, сахар - 6,7, бакча сиён - 33 килограммлы. Со дыре ик адямилы быдэ 8 килограммлы ятыргес нянь сиемын. Кызьы пусйиз Россилэн премьер-министрез Михаил Касьянов но, калыклэн шоро-куспо улон-вылонэз туж улӥын на, 32 процентэз пыро ёрмисьёс радэ. Съездын ӟырдыт вераськон мынӥз электрокужымен шуге-леке вуылон учыръёс ласянь. Берло аръёссэ тужгес но секыт югдур кылдэмын Приморьеын, туэ со вӧзы пуктыны луоз на Архангельск но Ульяновск областьёсты, Марий Эл республикаез. Эшшо одӥг лыдпус шараямын вал коммунистъёслэн кенешоназы: Россиын улӥсь 145 мурт пӧлысь (али вордскемъёссэ но лыдэ басьтыса) одӥгез пуке пытсэс сьӧрын. Миллион заключёнойёс пӧлысь 100 сюрслэсь ятырез висе туберкулёзэн. Колониын но следственной изоляторын пукисьёсыз пӧлын туберкулёзэн курадӟисьёслэн лыдзы 60 процентлы ятыргес, кулӥсьёсыз - 30 пол тросгес. Данакез делегатъёс, Россилэсь туала кивалтӥсьёссэ пыкылэмен ӵош, меӵак юан пуктӥзы КПРФ-лэн кивалтӥсьёсыз азе но: малы партия, кин сьӧры туннэ ик вамыштыны дась ог дасо миллион адямиос, уг нюръясько Чечняын вир кисьтонэз дугдытон понна? Малы нокин но уг юртты Приморьелы? Съездэ люкаськемъёс пумит луэмзэс веразы Герман Грефлэн программаезлы. Коммунистъёс оско Владимир Путинлы, но чутрак воштыны куро Ельцинэн кутскем реформаосты. Кыӵе ужпумъёсын потӥз КПРФ-лэн ВИИ съездэз коммунистъёс азе? Нырысетӥ интыын - калыкен ужан. Али ваньзэ лэсьтоно, Уж сярысь выль дасям кодексэз кутонтэм понна. Огшоры адямиез та закон кабалае нуоз, социализмен сётэм правооссэ огкутскемен быдтоз. Мукетыз сюлэме йӧтӥсь ужпум - музъемез вузан-басьтон. КПРФ вань луонозэ лэсьтоз, таиз но закон улонэ медаз пыӵа шуыса. Но, кызьы пусйизы тросэз делегатъёс, берло дыре калыкез ӝутыны секыт, котькудӥз сюлмаське ас понназ гинэ. Тужгес но юн со шӧдӥське дунъёсты ӝутон вакытэ. Тӥни малы партия нюръяськыны кулэ государстволэсь экономика ласянь нуиськись политиказэ мукет ӧре выжтон понна. Ӟырдыт вераськизы Кубаньысь делегатъёс. Выльдӥськон кутскем дырысен татын туэ нырысьсэ басьтэмын вал вылӥ урожай - гектарезлы быдэ кутсамын 41 центнер, люкамын 6 миллион тонналэсь ятыр ю-нянь. Но крестьянъёсты со уг шумпотты, малы ке шуоно, партия кивалтон аръёсы урожайзы 50 центнерлэсь вылӥын вал. Нош али аран-кутсан вакытэ туж ӵем кысыло электрокужымез. Таин сэрен, вентиляторъёс ужамтэен, тылобурдо возён фабрикаосын сю сюрсэн быриз вордоно пудо, тоннаен изъянмиз сӥль, йӧл но мукет сиён-юон. Тӥни малы бугыръяське Кубань, отын но татын калык пумитъяськон ужрадъёсы потэ. Съездлэн ужамезлы вакчигес йылпумъян лэсьтыса, Н.И.Сапожников пусйиз: - Вуоно тулыс Россиын шӧдскымон воштӥськонъёс луозы, соку адскоз, кыӵе сюрес бырйиз асьмелэн странамы. Вераськон мынэ солэн социально-экономической курсэз сярысь. Удмуртиысь коммунистъёслэн кивалтӥсьсы ӟечен вераз егитъёслэн КПРФ пала кыстӥськемзы ласянь. Соос чотын егитоме партия. Туала коммунистъёслэн шоро-куспо арлыдзы - 49. Л.МЕДВЕДЕВА. Ижевск городын улӥсьёслы вазиськон Городын улӥсьёс, быръелэ: шуныт яке кезьыт, югыт яке пеймыт! Таӵе юан пуктымон луиз городысь жилищно-коммунальной удысын югдур. Со понна ӧвӧл янгыш администрация яке депутатъёс. Бюджетысь тырмыт висъямын коньдон шуныт но, электрокужым но сётон понна. Нош калык уг тыры улон инты понна тыронзэ. Улон инты возисьёслэн жилищно- коммунальной юрттэт понна тыронъёссы 45 миллион манетлэсь ятыр люкаськизы ини. Та коньдон тырмысал декабре сётэм электрокужым понна дун тырыны, 50 коркаосын сантехникаез быдэсак выльдыны яке 450 коркаосын энергосистемаосты тупатъяны. 70 процентэз гинэ адямиос дыраз тырисько, нош кылемез сое кулэен уг лыдъяло. Городын улӥсьёс, валалэ: дунтэк нокин но уз сёты шуныт но, тыл но. Кӧняез ке улӥсьёс дунзэс ӧз ке тыре, быдэс корка шуге-леке шедьыны быгатоз. Ми котькуд корка, котькуд квартирае ум быгатӥське шуныт яке ву сётыны, гумы нимаз кыскыны. Соин ик одӥгезлэн адямилэн янгышеныз ваньмыз бускельёсыз курадӟозы. Гажано ижъёс, квартираосады вань тол ӵоже шуныт мед луоз шуыса, дунзэ али тыроно! Ижевск городысь Улон интыосъя управление. Сюреслы - коньдон "Удмуртавтодор" кун предприятилэн кивалтӥсезлэн Александр Соловьёвлэн ивортэмезъя, вуоно арлы бюджетын та удыслы чакламын 1,15 миллиард манет коньдон. Та пӧлысь ӝыныез вуоз предприятиослэсь сюрес понна басьтэм выт чотын, бадӟым люкетэз - транспорт возись нимаз адямиослэсь. Сюрес фондлы висъям коньдон пӧлысь 500 миллионэз мыноз сюресъёс лэсьтон-выльдонэ, 312 миллионэз - тупатъян ужъёслы, 110 миллионэз - сюресъёсты возёнлы. Удмурт Республикаысь Правительстволэн пресс-службаез. Очей Толилы - пӧс салам Васи, пук, пук! Туж матысь эше картэныз мынӥллям городэ, куное. Оло кудзылэн ке но сузэрзы со луэ, оло кумазы, оло нош огшоры тодмозы гинэ. Я, мед луоз кумазы. Нош со кумазы пинал пыртон-а, корка пырон-а, вордӥськем нуналзэ-а пусъе вылэм, созэ но верамы уг быгатӥськы, малы ке шуоно, мон ачим отын ӧй вал, эше мадиз. Вакчияк вераса, маке но юон дыр вылэм. Кумазы вань бускельёссэ, матысь эшъёссэ, ӵыжы-выжыоссэ ӧтчам. Тани куноос сииллям-юиллям, ӝӧк сьӧрысь, пе, оген- оген потало ни. Эшелэн картэз но дасяське ӝӧк сьӧрысь султыны. Нош кумазы, пе, шуэ: - Ма, Васи эн на султы. Пук ай, пук, пук. Нош Васиен артэ пуке вылэм ӟуч кышномурт. ма, ӟучтэк кин-о бен луоз городын улэ ук. Со, пе, шуэ: - Аха, Васи пук, пук, а я плохай, да? - Гор-гор, пе, весьназы серекъязы. Ӟуч кышномуртсы гинэ, пуке долкаса. Огез шоры учке, мукетыз шоры, номырзэ уг вала. Собере ини кышномуртлы ваэктӥллям малы серекъямзэс. Тӥни кызьы но луэ, удмуртэн ӟучен ӵош одӥг ӝӧк сьӧрын сиё-юо ке. Валик Уж дурын кык кышномуртъёс бӧтьырто. Одӥгез эшезлы маде: - Кылем четверге, базар нуналэ, обойлы ветлӥ, тӧдьы буёл басьтӥ на, потолокме но, оло буяло шуыса. Выль арлы корка пушмы ӝикыт, чебер мед луоз. Но Потоллокме буяны валик шедьтоно вал, кисточкаен туж ӝегыт луоз. Эшез шуэ: - Мынам вань валике. Яратод ке, сётъяло. - Ярам, Валиме ысъяло дӥняд. Уж дурысь бертыса, куинь аресъем нылызлы шуэ: - Мын, нылы, ветлы тётя Люся дӥне. кур валиксэ. Пичи Вали шумпотыса мынэм валик дуре. Нош со кышномуртлэн картэз - Валентин, но гуртоос Валик гинэ шуо сое. Пичи Вали корка пырем но кесяське: - Тётя Люся - мыным дядя Валиктэ вай. Ӵуказеяз эшез Валилэн анаезлы маде ни серекъяса: - Толон ӧй ке вераськысалмы буяськон валик сярысь, ма вераны ик абдрасал нылыдлы. Л. Андреева. Дэбес ёрос, Вуж Кыч гурт. Кенешизы инспекторъёс Нижний Новгородын ортчем кенеше люкаськылӥзы Приволжск округысь улосвылъёслэн валтӥсь федеральной инспекторъёссы. Отын вераськон мынӥз Россия Федерацилэн Президентэзлэн Приволжск округъя оскем муртэзлэн аппаратэзлэн кызьы ужамез сярысь. Озьы ик ивортон лэсьтэмын социальной проектъя ярмаркалы йылпумъянъёс, улосвылъёсысь Общественной приёмнойёслэсь ужзэс радъян пумысен. Удмурт Республикая валтӥсь федеральной инспектор Сергей Чикуров кенеше люкаськемъёсты тодматӥз общественной приёмнойлэн интыысь кун властен кусып тупатон радлыкеныз. Е. Николаева. Выль книга мед вордскоз "Дарья Марковалэн улонэз умой мытӥськиз. Яратыса бызиз, нылыз вордскиз. Нош собере картсэ ватон, юыны кутскыса нылзэ ыштон, тюрьмаын пукон, отысь потыса лушкаськон но выльысь пытсэт сьӧры сюрон - ваньмыз та аръёс син азьтӥ лобӟыса сямен ортчо. Повестьлэн пумаз гинэ зэмлык аслэсьтыз сюрессэ шедьтэ. Таӵе вакчияк валэктон сётэмын "Аналтэм сяська" книгалэн азькылаз. Сое лыдӟыса ик валаськод ни, та повесть лыдӟисез бордаз кыскоз, нырысетӥ бамъёсысен ик книгаен люкиськыны уд ӵыды ни шуыса. Книгалэн авторез - Ува ёросысь Парсьгуртысь (Родники) механизатор Геннадий Мадьяров. Секыт гурт ужъёсыз бергатыса но дыр шедьтэ кияз ручка кутыны, гожъяськыны. Таӵе ик сюлэмез чепыльтӥсь гожтэмзэ - "Сьӧд италмас" повестьсэ печатлазы "Инвожо" журналын. Геннадий Михайловичлы та нуналъёсы 60 арес тырме. Газетмы лыдӟисьёслэн нимынызы ӟечкыла, сое та юбилееныз. Югыт малпаськонэз мед юрттоз котырысьтымы пилемъёсыз сэрттыны. Выль книгаезлы вордскыны шудо сюрес сӥзиськом. Немецъёс - Удмуртиын Ижевскын усьтӥськиз Германиысь ваем выставка. Таяз учыре со тунсыко луыны кулэ вузкарон удысэн герӟаськем фирмаослы. Угось немецъёс возьмато дӥсен но гурт удысысь поттэм вузъёсын экспозицизэс. Толэзьлы быдэ выставка выльдӥськоз. Немецъёс оско, Удмуртиен тупатэм кусыпъёслэн пайдазы одно шӧдӥськыны кулэ шуыса. Соин ик азьланяз но валче ужаны чаклало. Вуоно арын Германия дорамы Вузкарон юрт усьтыны но "Купол" предприятиен ӵош вуж автопокрышкаосты выль амалъя тупатъян-выльдонэз радъяны малпа. Э.ВАСИЛЬЕВА. Удмурт Республикаысь Кун Кенеш кайгыре КПСС-лэн Удмурт Обкомезлэн финансово- хозяйственной отделэныз азьвыл кивалтӥсьлэн Уржумцев Владимир Ивановичлэн улонысь кошкеменыз валче но солэн ӵыжы-выжыосызлы но матысь адямиосызлы мур куректэмзэ вера. Люкиськон луоз 15-тӥ декабре 13 часын таӵе адресъя: Ижевск, Пастухов урам, 86 номеро юрт, 46-тӥ квартира. КОНЬДОН ДУННЕ Ӝоже нокин уз кыльы Кызьы тодмо, котькыӵе бюджетлэн инъетэз - вытъёс. 1-тӥ январьысен выт тыронын бадӟымесь воштӥськонъёс пусъемын. Со шӧдӥськоз бюджет вылын но. Но быдӟалаез вылын уз, кызьы шуо, "ошмесъёсыз" вылын. Со дыре ик куд-ог кивалтӥсьёс кузёяськыо ини, соослэн бююжетъёсазы коньдон чакламлэсь ӧжыт вуоз шуыса. Но одӥг бюджет кузё но, кызьы шуиз алигес ортчем пресс-конференцияз коньдон ужпумъёсъя министр В.Бельтюков, шум уг поты вуэм коньдонлэн быдӟалаезлы. Бюджет кусыпъёс вань кусыпъёс пӧлысь тужгес но керӟегъёсыз. Котькудӥз малпа, солы мукетъёсызлэсь ӧжытгес сётӥзы шуыса. Но бюджетлы план дасяку, коньдон ужпумъёсъя министерствоысь специалистъёс лыдпусъёсты вӧлдэтысь уг басьто, шуиз министр. Соос витетӥ арзэ ини бюджетъёсты дасяло нимысьтыз методиказыя. Нялтас вераса, сое умоен лыдъяз Наукаосъя Россиысь академилэн Урал люкетысьтыз Экономикая институт. Со методикалэн шорсюлмыз - котькуд адямилы бюджетысь юрттэтлэн быдӟалаез. Со котькытын одӥг выллемгес луыны кулэ. Зэм, коньдонъя чаклано ке, нырысь учкыса, ваньмызлэн пӧртэм лыдпусъёссы. Тани шуом, Игра районын котькуд улӥсьлы вуоно арын висъямын луоз бююжетной юрттэт 3350 манет тыр, нош Вавож районысезлы - 2450 манет тыр. Бюджетной юрттэтлэсь быдӟалазэ тупатыку, специалистъёс лыдэ басьто калыклэсь улон условиоссэ, уждунэз, районлэсь луонлыкъёссэ (тазэ нимысьтыз). Нырысь интыын - адями ваньмыныз одӥг быдӟа юрттэт мед басьтоз эмъяськыны, дышетскыны, улон инты возьыны, ваньмон дырзэ ортчыны но мукетызлы. Со нокытын пусъемлэсь улӥын луыны ӧвӧл кулэ. Мон тодӥсько, шуиз министр, Ижевскдэн мэрез А.Салтыков керӟегъяське пайда поттэм (прибыль) понна вытысь городлы 11,4 процентэз гинэ мыноз шуыса. Мукет сямен уг но луы лэсьтыны. Балезино, Воткинск, Игра но мукет районъёсын му вӧй поттӥсьёс прибыль понна вытсэс со районъёслы ик тыро вал. Табере вань вытъёсты аслаз люкетъёсыз понна тыроз "Удмуртнефть" огазеяськон. Нош со Ижевскын интыяськемын. Озьыен, вань коньдон - городлы. Со сяна, Ижевскын интыяськемын республикаысь ӝыныез предприятиос. Но со понна янгыш ӧвӧл ук, шуом, Пичи Пурга районын улӥсь. Малы со Ижевскын улӥсьлэсь начаргес луыны кулэ? Соин ик со районъёсы, кытын бююжетной юрттэтлы коньдонзы уг тырмы, сётэмын луозы дотациос. Со понна кылдытэмын луоз интыослы коньдонэн юрттонъя нимысьтыз фонд. Отчы висъяны чакламын бююжетлэсь 23,7 процентсэ. Нош ваньзэ социальной кулэяськонъёслы чакламын 57,4 процент. Г.ТИХНОВ. Куноын Чулён Онтон Пукисьёсыз мед пукозы Демократия шуо, котьмар вера шуо, номыр, пе, тыныд со понна уз луы. А, мар, уг вера кожаськоды-а? Гуртоосы мынэсьтым нимме ик уг поттыло ни - Чулён но тӥни, нырдэ, пе, котькытчы чуртнаськод, пачкатыны медаз шедьтэ. Соиз но, оло, вань. Но, сюлэм уг чида ук. Тани алигес Кун Думаын вераськон ӝутӥзы: улосвылъёсысь губернаторъёсты куинь сроклы быръён пумысен законэ воштонъёс, пе, пыртоно. Тросэз таӵе малпанэн соглаш луизы. Ма, кызьы, пе, уз, асьсэос но шуныт креслоосын пукыны ярато ук. А мон тазьы малпасько, эшъёс-юлтошъёс. Малы соосты пырак улытозязылы пукетонтэм... креслоязы. Кечат-вамат укно сьӧры но пыраклы келяло ук куд-огзэ. Мукетыз сярысь но вератэк кылы лыдэмысь уз дугды, быръёнъёс пумысен, шуисько. Малы соосты сомында ортчытонэз, коньдон кисьтыса. Кун Думаын ик кӧня сюдоно муртъёс пуко. Мед но пукозы. Ай соослы азьвыл кутэм законъёссэс быдэстыны сю аръёс кулэ луозы на, выльёсыз сярысь вератэк? Но быръемын бере, калыклы соослэсь кыӵе ке но пайда медло. Жириновский, Шандыба кадьёсты учкиськод но, сюлэм ик ырак луэ. Малы коньдон куянэз дунэн концертъёсы? Макем тросгес "артистъёс" пукозы Кун Думаын, сокем улонмы шулдыргес луоз. Вуоно арлы дэмласал Дуно эшъёс-лыдӟисьёс! Адями котьку но ӟечезлы осконэн улэ. Туж секыт вакытэ но малпаськод: тани-тани пилемъёс сьӧрысь шунды потоз, улон выльысь ас ӧраз пыроз, котьма радъяськоз... Озьы ук? "Удмурт дунне" газетлэн редакциез выль даур кутскон азьын аспӧртэмлыко котыртэме шедиз. Милям малпаммыя, таӵе югдурлэн валтӥсь мугъёсыз элькунмылы вылӥ кивалтӥсь быръёнэн герӟаськемын. Куд-ог адямиослэн туж потэ вал, газетмы вань кужымзэ ог пала гинэ мед ӧръялоз шуыса. Озьы ӧз луы. Ивор вӧлмытон ёзъёс сярысь но быръёнъя законъёсты быдэсъяса, редакция котькуд кандидатлы ачиз сярысь мадьыны но программаеныз тодматыны огкадь луонлык кылдытыны тыршиз. Мылкыд карисьёсыз быгатӥзы газет бамъёсты дунын ватсаса но басьтыны. Озьы чакламын уго законъя. Республикаысьтымы Быръёнъя комиссия ласянь милемлы пыкылонъёс ӧй вал. Бен, огпол куаретӥзы ик. элькун Кивалтэтлэн Тӧроез Николай Ганза, ужамез сярысь газет пыр мадьыкуз, ассэ, пе, укыр ушъяны шедьтэм. Та сярысь комиссие ивортӥз Ижын улӥсь одӥг воргорон, кудӥз кырсь ӝожтӥськоназ газетмылэсь нимзэ гинэ но шонер гожтыны быгатымтэ. "Ковёр вылын" сылыкумы, ми шуим: та чагиськон пӧрамын удмурт кылэз тодӥсьтэм муртэн, президентэ кандидатлэн тушмонъёсыныз. Озьы ке но, милемыз алӥзы. Но кӧня ке арня ортчыса, избирком решенизэ воштӥз, Ганзалэн статьяысьтыз ассэ ушъямез агитациен лыдъямын ӧй вал ни. Тӥни озьы. Мукет пыкылонъёс ӧз луэ ни. Но кырсь вакыт октябрен ӧз йылпумъяськы. Кин ке вормемезлы укыр шумпотӥз, кин ке келяменыз юн куректонэ усиз, лэся. Кутскиз ведӥн (тушмон) утчан, дыр. Властез киязы кельтэмъёс милемлы тодамы вайылыны кутскизы, быръён дыръя куд-ог материалъёссэс печатланы пумит луим шуыса. Юнме шат "Известия Удмуртской Республики" газетын потӥз редакцилэсь данзэ сьӧдмась бадӟым статья? Мукет ласянь газетмес пыкылыны ӧдъязы асьме удмурт азьветлӥсьёс. "Удмурт дунне", пе, вунэтӥз ас выжыоссэ. Озьы меда? Удмурт калыклэн ӧтчамаз, трибуна сьӧры потыса, милемыз пыкылӥз Павел Вершинин. Вылӥ кун должностьын ужась адями кун газетэз общественной огазеяськонлэн ужрадаз сьӧдмано кожаз. Кызьы шуо, мед - солэн но, мукетызлэн но сыӵе правоез вань. Ми чидасалмы пумитаз номыр куаретытэк но, таиз учыр нырысетӥез луысал ке... Гужем вылтӥ Павел Николаевич дано адямиос азьын газетмес куаретылӥз ни вал, ми властьлэсь пӧртэм сямен малпаськись адямиослы кыл ум сётъяське шуыса. Соку мон шуи: тӥляд, депутатлэн, законъя праводы вань котькыӵе мылкыддэс бырйись доры кун газет пыр вуттыны. Гожтэ, ӵектэ - ми одно ик печатлалом. Дыр ортчиз, депутат одӥг материал но ӧз вутты. Тӥни сыӵе югдур. Ваньмыз та веран - лыдӟисьлы ӝожтӥськон ӧвӧл. Ми тазьы турттӥськом вуоно даур азьын мылкыдмес усьтыны, асьме куспын валамтэос ичигес мед кылёзы шуыса. Уго редакцилэн тужгес но бадӟымез кузёез - Лыдӟись. Ӵапак со понна потэ газет, со понна журналистъёсмы чидало. Куаретон (критика) кулэ. Кулэ ваньмызлы. Но со юнме кыл вӧлдон медам луы, со мед юрттоз куаретоно муртэ яке пыкылоно коллективез умойгес карыны, ужъёсты ӟечгес радъяны. Пайдаё ӵектонъёсты ми котьку санэ басьтӥськом. Тани лыдӟисьёсмы ӵем шуылӥзы: программадэс векчи шрифтэн печатласькоды, передачаослэсь дырзэс адӟыны шугъяськиськом. Куспамы но асьме министерствоен кенешыса, вуоно арлы амал шедьтӥм. Газетмылэн пятница номерез "куайыса" потоз. Кык бам интые, программалы куинь-ньыль бам висъяны быгатом. Трос куронъёс вал оскисьёслэсь. Вуоно арез возьматэк, ми кутским соослы нимысьтыз бам поттыны. Тау со понна Михаил Гаврилович Атамановлы. Азьланьын Инмар сярысь материалъёс озьы ик нимаз бамен печатласькозы. "Удмурт дунне" яратэ шаерысьтымы пыдлось сэрегъёсы вуылыны, кыдёкын улӥсьёсын тодматыны. Данакез тодо на, дыр, уй паласен лымшорозь ортчеммес, Калмез кузя ветлэммес. Вуоно арын но экспедиция радъяны чакласьком. Та дыре кӧня ке сюрес пӧлысь тужгес тупамонзэ бырйыны турттӥськом. Со сяна, мылкыд вань пятницалы быдэ одӥгзэ бамез соизлы яке таизлы дано удмуртлы сӥзьыны. Соос пӧлын луозы кызьы ке кивалтӥсьёс, тодосчиос, писательёс, озьы ик маинызы ке висъяськись огшоры адямиос. Ми лыдэ басьтом тӥлесьтыд та ласянь ӵектонъёстэс. Ивортэ. Огъя вераса, кызьы ми гожъяськом, шуг-секытъёс шоры учкытэк, редакциын ужасьёс выль арез но выль даурез азьланезлы оскон мылкыдын пумитало. Тодӥськом уго: лыдӟисьмылы газет кулэ. Ми со понна ваньзэ лэсьтыны дась. Ӟечсэ гинэ тӥледлы сӥзиськом. И. Лебедев, валтӥсь редакторез воштӥсь. Лэчыт ужпум Тон гожтӥськид ляльчие яке выль даурысь суред Малпасько, калыклэсь юатэк Россилы гимн юнматон, Ужъя кодексэ воштонъёс пыртонэн ӵошатыса, номыр но ӧвӧл. Декабрьлэн кыкетӥ ӝыныяз Кун Думаын эскерозы КЗоТ-лы кык пумо проект. Огзэ ӵектэ РФ-ысь правительство, мукетсэ - депутатъёслэн группазы. Правительстволэн таӵе вамышез нокыӵе валанлы уг сётӥськы. Мар бен со ӵектэ? Вакчияк вераса - капитализме берытскыны: ужась адямиослэсь правооссэс таланы, нош кивалтӥсьлы - пумтэм эрик сётыны. Кылсярысь, потоз солэн мылыз тӥледыз 12 час ужатыны - ужалоды. Пырак революция дырозь кадь. (Нош кӧня улон сётэмын, вир кисьтэмын 8 часъем ужан нунал тупатон понна!) Отын, конечно, "ужасьлэн мылкыд каремезъя" гожтэмын. Но кыӵе мукет мылкыд луыны быгатоз на, мышкад урысэн сэзъязы ке? Урыс интыын луыны быгатоз уже пырыкуды гожтэм контракт. Выль проектлэн 55-тӥ ёзэтэзъя Ужъя кодекс лэзе уж сётӥсьлы (предприятилы, организацилы) ужась муртэн пумтэм пол срочной контракт гожтыны. Соя со контрактлэн дырыз бырем бере нокинэн кенешытэк ужасьсэ улляны (яке ужысь кошкыны курыны) быгатэ. Уз учке тынад визьмыд но, быгатонъёсыд шоры но. (Тон - ляльчи!) Сётод, шуом, улонысьтыд тужгес ӟеч аръёстэ баринлы, нош тырмоз тыныд 45-50 но - ӟеч лу! Мар понна? А акыльтӥд. Яке борддор сьӧры интыяськем мукет фирмаын ужась картэдлы уждунэныд ушъяськид - "коммерческой тайнаез" усьтӥд. Нош КПРФ-лы яке "калык депутатлы" синмаськемдэ секретаршаен ӵош чай юон куспады ӧд поттылы-а? То-то. Инмар мед утёз профсоюз ужен герӟаськемдэ яке кузёедлэн вуж кышноеныз кушласькемдэ шараяны. Огласянь, ваньзэ та амалъёсты кивалтӥсьёс али но куто - котькуд ужасья сьӧд список нуо, пунэмзэ берыктыны. Муг тупаку соин "ымныраз сачо". Но ваньмыз али со сизьым тунгон сьӧрын ватӥськыса улэ. Нош выль кодекслэн проектысьтыз 80-тӥ статья ёзэтъя котькуд ужась вылэ досье усьтыны лэзе. Кодексысь быдэс люкет сӥземын солы. Куанер секретаршаос! Кылды ошиськоз, котькудзэ чакласа бызьылонтӥяды. Кодексын штатын нимысьтыз чагиськись возён сярысь номыр гожтымтэ уго. Но эн куректэ, шедёзы, сыӵеослы, кызьы шуо, "вознаграждение гарантируется". Кызьы, кыӵе уждунэн дунъяны кулэ кивалтӥсь ужасьёссэ, КЗоТ-ын гожтэмын ӧвӧл. Со понна ӟеч валэктэмын кыл кутытон пумысен. Кылсярысь, предприятилэсь яке организацилэсь (коть ЗАО-лэсь, коть ООО-лэсь) ваньбурзэ изъянтэм, пумитъяськон, ужез уретон, кивалтӥсьлэсь сьӧд ужъёссэ шараям понна. "Изъянлэсь" быдӟалазэ кивалтӥсь вӧлдэтысь но кутыны быгатэ. Озьы ик гожтэмын: "изъянлэн быдӟалаез асдунызлэсь бадӟымгес луыны быгатэ". Тӥяськиз, шуом, дас ар талэсь азьвыл басьтэм компьютер мултэс ужатэмлэсь - тон янгыш! А кызьы валэктод, адвокат утчалод-а? Тыроно луоз, гажано эш! Но туала дунын. Соку ик сётыны коньдонэд ке ӧвӧл, ӝыны уждундэ келлялозы (али 20 процент, адямилэн янгышезъя ке изъянтэмын), отпускнойдэ, нылпи пособидэ... Берлозэ бен али но туж мыло-кыдо уг сёто. Ужась нылкышноосты нош "дась сиись" интыын гинэ адӟо: декретэ, больничное потало... Кожалод, ужась пиосмуртъёс кытысь ке дасяк усё. Вуоно КЗоТ-ъя нылкышнолы гур дурын сютэм пукыны гинэ кыле на. Жаляны уг ик малпало пичи нылпиен но секытэн нылкышноосты - соосты "мылкыд каремзыя" лэзьялозы командировкаосы, ужатозы уйёсы. Али нылкышно-анай пиналыныз куинь ар декретын пукыны быгатэ ке, та вакыт ар но ӝыныозь кулэстэмын луоз. Нокинэ но уг сюлмаськыты, кызьы пинал яслиын лумбытэн бӧрдыса улоз (ай отчы путёвка шедьтӥд ке). Мон уг вераськы ни, мар луыны быгатоз фирмаосын. Соослэсь туала куронъёссэс тодэм вылысь, син азе ик пуктыны кышкыт, кыӵе луыны быгатозы соос выль КЗоТ кутэм бере. Но номыр тӥ уд каре. Чагиськыны но нокытчы луоз. Профсоюзъёс азьло сямен тӥ понна дурбасьтыны уз быгатэ ни - выль проектъя соос кужымтэм кылё! Ну мар? Кельшиз-а? Мон жаляны кутски ни кадь, малы дунне вылэ бергес вордӥськиськем шуыса. Пукысал али гань-гань пенсиын. Серекъян серекъялом, но мар каром? Республикаысьтымы профсоюзъёслэн федерацизылэн кивалтӥсез Евгений Орлов вань ужась калыкез огазеяськыны ӵектэ. Бен, тямыстон ар талэсь азьвыл ӧтёнъёсты выльысь тодэ вайытэу ӧвӧл. Али, выль КЗоТ кутытозь кылмес ке ӧм вералэ, асьмеды асьмеос ляльчилы пӧрмомы. Вылӥ кивалтӥсьёс адямиез ултӥян кодекс ӵекто. Соослэн та вамышсы бадӟым шугадӟонэ вуттыны быгатоз. Кудӥз проект инъет интыын кутэмын луоз? Республикаямы улӥсьёс но профсоюзъёс - депутатъёслэнэз понна. Соос чутрак пумит луо правительстволэн ӵектонъёсыныз, ужась адямилэсь правооссэ утьыны куро. Соин ик али ваньмыз потоз депутатъёслэн мылкыдзы но быръёнзы бордысь. Республикаысьтымы профсоюзъёслэн федерацизы калыклэн нимыныз вазиськиз Кун Думаысь депутатъёслы Ю. Маслюковлы, Н. Сапожниковлы но С. Смирновалы, кыкетӥ проектлы дурбасьтыны курыса. Нялтас вераса, та курон улэ Ижевскысь механической заводысь гинэ куать сюрс мурт кизэ нюртӥз. З. Рябинина. СЮРЕС УРДСЫН "Тодысал ке усёнме..." И. КУИНЬ арня ортчиз ни со дырысен. Но али но, синме кынисько ке, ӵышкем йыро егит воргоронэз адӟисько. Пурысялэс дӥськутэз, сыӵегес ик ымНырыз, синъёсыз но бусомемын кадь. Василий Лихачев - зэк. Шораз учкыса уд но малпа, та адямилэн киыз пичи нылпиос вылэ урдскиз шуыса. Ку-о со зэмос вал: куать аресъем Катяез йыраз табаен йыгакуз-а, али надзирательлэн синмаз кузёзэ юн яратӥсь пуны сямен учкыкуз-а? Яке сыӵе ни адямилэн адӟонэз: дунне вылын визьмоез улэп маке луыса, со быгатэ лек кионлы но, пурысь шырлы но пӧрмыны. ...Васяен Петя, пушсэс небӟытыса, Бабкинъёс доры кожано кариськизы на. Водка тырмыт вал. Чарка бӧрсьы чарка. Кузё кышно пиосъёслэсь огдырлы палэнскиз, бускель комнатаын шудӥсь нылпиоссэ эскерыны кошкиз. "Тон монэ гажаськод-а?" шуыса юись воргоронъёс куспын керетон ӵашъем кадь ӝог гомаз. Куноос кузёез выж вылэ зӥбизы, огезлэн кияз пурт чилектӥз, ньылонысь вир пызйиз. Мар кароно? Кышномурт "вузалоз" ук! Куара-лангаез кылыса, кухняе берытскем нылкышно кузпалызлэн сюрестӥз кошкиз. Егит пиослэн дугдэмзы ӧз луы ни. Курыт аракы но котыр ласянь пазяськем вир соослэсь визьзэс копак суразы, лэся. Одӥгез изьвер, ки улаз шедем табаез кутыса, соин кӧня ке пол шуккиз пичи ныллэн йыраз. Вить аресъем вынзэ кекатӥзы. Ньыльзэ ик шӧез мурӝолэ куштӥзы. Шузимем пияшъёс кошкыны туртто ни вал - гулбечысь ӝуштэм куара кылӥськиз. Вить аресъем Вани кужмо вылэм - кулонлы озьы гинэ сётскымтэ. Йыртэмасьёс таизлэсь но чыртызэ вандӥзы. Лихачевез но, Павловез но суд ыбыны пуктӥз. Но туннэ Россия азинскем кунъёслэсь бере кыльытэк вамышъяны турттэ. Адями коть зэмос маньяк медло, коть дасо муртэ мед быдтоз, сое, пе, улонлэсь люкыны уг яра. Озьы Ленин ёросысь преступникъёсты кулонлэсь югдур утиз, шуыны луоз. Соослэсь приговорзэс "лябӟытӥзы" - решётка сьӧры улытозязылы пуктӥзы. "Небӟытӥзы" кылэз юромо пуктӥсько кавычкаосы. Тодӥсь муртъёслэн верамзыя, куд-ог йырвандӥсьёс, пе, асьсэос куро виыны: тюрьмаысь потыны луонлык ӧвӧл ни бере, малы омырез юнме ӵынатод на... Ог дасо пала корт ӧс пыр ортчыса вуим пыраклы пуктэмъёслэн коридоразы. Пеймыт борддоръёс, мырдэм пиштӥсь лампаос. (Яке озьы потӥз-а?) Котькуд камералэн ӧс вылаз кыӵе ке пусъёс, валэктонъёс. Татын ужась соосъя ик вала ни, кыӵе адями интыямын сояз яке таяз висъетэ. Туберкулёзэн висисьёс, пегӟон сярысь малпанэн улӥсьёс - котьма пусъемын. Пичи картон вылын - пукисьлэн нимыз-тулыз, ма дауртэмез, сямъёсыз сярысь веран. Али татысь камераосын ог кызё пала "кузёосыз". Данакезлэн арлыдыз куамын котырын. Ваньмызлэн ик азьланьын улонзы туж пеймыт. Осконзы одӥг гинэ - та валантэм странаямы, оло, кодексэз копак выльдозы но, дас вить-кызь ар пытсэтын возьыса, эрик сётъяны кутскозы. Кин тодэ, туннЭ ик ини вераськон вань, сыӵе луонлык кылдытэмын луоз шуыса. Но со аръёсты чидано на ук ай. Пыраклы пуктэмъёс нимазы яке ӵошен интыямын. Лихачев но, Павлов но кык кузя уло, но ог-огенызы уг - мукетъёсыныз. Лыдӟисьёс пӧлысь кин но со тодаз возе на, дыр, ог дасо ар талэсь Ижысь механической институтлэн ыбылӥськон люкетаз - тирын - луэм учырез. Соку куинь мурт виемын вал. Преступникъёс пӧлысь одӥгез - йӧно семьяысь потэм пияш. Со но туннэ пыраклы пуктэмъёс пӧлын. Но сямызъя нокинэн но уг тупа, соин ик сое камераын огназэ возё. Тани надзиратель усьтэ зӧк корт ӧсэз. Пичи гинэ висъет, ог кык квадрат метр. "Предбанник" шуо, пе, сое. Отӥяз - решёткалэсь кенер. Кечат-вамат борддор пыр адӟиське быдэс камера. Бадӟым ӧвӧл со - ог дасо квадрат метр. Из борддор борды юнматэм кык полать, корт ӝӧк, пукон порма ӟус, сэрегын - сёрос. Ӝажы кадь азьын - пукисьёслэн кӧня ке арбериоссы, газет-журнал, тамак. Со сяна, номыр ӧвӧл. Бен, куд- огаз телевизор но возё, лэся. Но милемлы сыӵе камераез ӧз возьматэ. Пыраклы пуктэм "геройёс" сярысь трос вераны луысал. Уго котькудӥз татчы секыт йыруж лэсьтыса вуиз. Шуом, Алексей Кошурников, соку гинэ десантысь бертэм мурт, эшез доры куное пыриз вал. Соиз уже кошкиз. Нылъёслэсь мӧзмем егит пияш ассэ вормыны ӧз быгаты - юлтошезлэсь кышнозэ огдырлы аслыз кароно кожаз. Соин кӧтыз ӧз тыры - вииз. Сопал дуннее келяз 9 аресъем нылашез но, ужысь ӵукна бертэм эшсэ но. Азиноын ик, шуо, улэ "сантехник". Тодӥськоды на-а, Майской ульчаысь квартираостӥ кӧня ке ар талэсь азьло ветлэм муртэ? Бен, бен, Артамоновез верасько. Со кӧня ке пересь кышномуртъёсты сопал дуннее келяз. Табере пуке. Шонерзэ вераса - курадӟе. Пиналъёсты но мӧйыосты сантэмасьёсты асьсэос йырвандӥсьёс но уг гажало, ултӥяны выро. Соин ик сыӵеослы бышкись ез сьӧрын кык полэс секыт йӧтэ. Артамонов, пе, туж ӝожтӥське, но табере кин но кызьы юрттоз на. Ачиз ассэ отчы вуттӥз ук. Солы пытсэтын 25 ар ортчытоно луоз. Таӵе учыръёс уно. Но кулэ меда ваньмыз сярысь вераны? Ӧвӧл, дыр. ИИ. ШАЕРАМЫ кыл кутытӥсь колониос ичи ӧвӧл. Тодӥсь муртлэн верамезъя, отын вань улӥсьёс пӧлысь процент мындаез "шутэтске". Югдурен тодматскон вылысь, милемыз, журналистъёсты, нуллӥзы одӥгаз бадӟымез - Азино посёлокысь 7 номеро учреждение. Татын али 1098 мурт пуке. Азьло тросгес но вал - ог 200 мурт амнистия улэ шедемен, шоканы каньылгес луиз. Но, кызьы серекъяса вера республикаысьтымы Кыл кутытонъя управленилэн кивалтӥсез генерал-майор Георгий Желудов, тюрьмаосын ужасьёс ужтэк уз кыле, выль "кузёос" нуналлы быдэ сямен вуо. Азьло аръёсы асьме колониосы быдэс Союзысь йыртэмасьёсты вуттыло вал. Берло дыре югдур воштӥське, армиын кадь луэ. Адямиосты кельто вордскем-улэм интызылы матэ. Тани Азиноын но ог 90 процентэз - асьмелэнъёс, Удмуртиын йыртэмамъёс. Колониез государствоысь государствоен ниманы луоз. Одӥг пӧртэмез - отын улӥсьёслэн мукет "кунэ" потамзы-ветлэмзы уг луы. Кыкетӥез пӧртэмлык - котькудӥзлы быдэ сямен усе возьмаськись. Государстволэн чырты сьӧраз пырак пуконтэм вылысь, учрежденилэн кивалтӥсьёсыз сюлмасько ужез радъян сярысь. Бен, котькудӥзлы уж шедьтыны уг луы на, но ма но со лэсьтэмын ни. Пыраклы пуктэмъёс, кылсярысь, черсӥсько. Уноез, пе, ачиз куре уж, уго борддоре гинэ учкыса улӥд ке, дыр уката каллен кыстӥськоз. Строгой режим шуонын пукисьёслы кивалтӥсьёс керттӥськон арбери но (вень, курик) оско ни. Соосыз сокем тузӥ джемпер, кофта кертто - кибашлы нылкышноос но вожъясько, эсьма. Колониын вань сапег гындон цехсы, вуриськон интызы. Со сяна, умой ужаны быгато пуэн. Чебер туала мебель копейкаен берытске - небыт диванъёсты, креслоосты, сад- бакчае пуконъёсты, ӝӧкъёсты басьтӥсьёс трос гинэ. Пытсэт сьӧры шедемъёс нимаз куронъёсты но быдэсъяло - шахмат, синпель кузьым, чебер тӥрлык лэсьто. Вань татын вукозы но. Берло аръёсы колония "Буммаш" огазеяськонэн кусып тупатӥз. Отысь вутто линолеум лэсьтэм бере кылем-мылем юдэсъёсты. Соослэсь ӟеч гозы пӧрме вылэм. Милемлы концерт но возьматӥзы. Сцена вылын нырысь кузёяськизы ужасьёс. Номыр уд шуы - быгато. Нош куке соосыз воштӥзы пукисьёс... Уг, службазэс нуисьёсты урод карем чик но уг поты. Озьы ке но, концертлэн кыкетӥ люкетэз шӧдскымон вылӥын вал. Тодэ лыктэ колонилэн кивалтӥсезлэн Владимир Мифшахутдиновлэн верамез. Нялтас пусъёно, дыр: со ачиз но сцена вылын кырӟаны яратэ. Ай милям, пе, сокем быгатӥсь артистъёсмы ӧвӧл, шуэ подполковник, вот Можгалан пуко зэмос пианист но шӧртчи арганчи. Соос отын крезьгуръя школа но усьтӥллям ни, мылкыд карись эшъёссэс пӧртэм инструментъёсын шудыны дышето. Закон сьӧры потэмъёслэсь адӟонзэс капчиятон понна, колониын ӝутэмын православной черк. Ма, батюшка сотэк но татчы ӵем вуылэ вал. Табере солэн аслаз ужан интыез луоз, инмарлы оскисьёс но каньылак шокчозы, вылды. ИИИ. ТӤНИ озьы улэ Удмуртиысь одӥгез аспӧртэмлыко учреждение. Гожтэмме лыдӟыса, оло, кин ке синмаськоз но сыӵе улонлы. Кулэ ӧвӧл. Та материалэз юнме шорысь ум печатлаське "Сюрес урдсын" рубрика улын. Зэм но, отчы шедемъёс огъя улонлэсь палэнтэмын, сюрес урдсы интыямын. Данакез соос колонилэсь "шулдырзэ" тодыса вылысь йыртэмазы, ог люкетэз юэм йырын кышкыт уж дауртӥз, куинетӥосыз решётка сьӧры чакласькымтэенызы сюризы. Озьы-а, тазьы-а, но пӧлысьтызы котькудӥз - янгышам мурт. Государство сётэ соослы тупатскыны луонлык. Нош асьмелэн ужмы - солы быгатэммыя та ласянь юрттон. Уг яра, вылды, соослэсь копак палэнскыны. Уго нокин уг тоды кытчы ӵуказе вуонзэ, ӟучъёс шуэмъя, "от тюрьмы да сумы не зарекайся". ...Колониетӥ кӧня ке час ветлыса, йыр висьыны ӧдъяз. Сюлэм доре, калык пӧлы кыскыны кутскиз. Черк дорысен одӥг пияшен тодматски. Тупаны но кулэ ук - бӧляке вылэм. Уваысь пияш Юра Березин татчы муртлэсь ваньбурзэ таламез понна шедем. Горд йырсиё, огшоры мугоро, синъёсыз гинэ аспӧртэмесь - отчы-татчы ыбыло соос, шорам гинэ уг учко. Мар но со кенешеммы бере, выль тодмое дыртон муг вылэ чӧлскиз. Но люкиськыкумы лулскыса тазьы шуиз: - Э-эх, тодысал ке усёнме... Иже бертыкумы, ми, журналистъёс, таӵе малпанэ вуим: колоние экскурсие нуллыны кулэ, дыр, закон вамен выжыны али гинэ кутскисьёсты. Соослы возьматоно зӧк ӧсъёс сьӧрын пичи висъетъёсын пукисьёсты. Мед адӟозы, кыӵе камера витёз, законъя, обществоын тупатэм куронъёсъя улэмзы ӧз поты ке. Уго трамвайын атасъяськись кудӟем пиёк зоопаркысь корт кенер сьӧры ӵогам кион выллем пукись воргоронлы медам пӧрмы шуыса кулэ огез гинэ - астэ но мукетъёссэ гажан. Иван ЛЕБЕДЕВ. Ватсаса веран. Автор тау каре Удмурт Республикая валтӥсь федеральной инспекторлы Сергей Чикуровлы колониен тодматскыны юрттэмез понна. Зоялэн дуннеез Адями бусы сюрес кузя мынэ, пужым ягетӥ ортче. Огшоры уг - пӧртэм-пӧртэм турынъёсыз быдэс ӟыгыртэт бича, сумкаяз тыре. Озьы гужембыт. Нош кытын, шуоды? Городын, Иж карамы. Сыӵе мынон-бертон сюресэз Зоя Лебедевалэн. Адями мае утча, сое шедьтэ. Шоркарамы быдэс музъемвыл асфальтэн шобыртэмын ӧвӧл на. Турынъёс, турынъёс... Со Зоялэн пыласькон зарезез кадь. Унябей мамык "няняське" бордаз, курыт пот (полынь) кизьнылытэ, эмъя но... Котькуд турынлэн ас эмез-юмез, ас чеберез. Нош Зоя Лебедевалэн ки улаз куасьтэм турынъёсыз выльысь улӟо кадь, кыкетӥ улонзэс улыны кутско. Кызьы со синпӧртма-дауртэ, мар солэсь пӧрме - огшоры, кылын гинэ уд вера. Сое аслыд адӟоно. Сыӵе луонлык али вань Пушкинской урамысь Выставочной залэ пыраса учкыны. Толсурлэн 12-тӥ нуналаз татын туж аспӧртэм (йӧспӧртэм но шуыны луэ) адӟытон усьтӥськиз. Куиськисьлэн но суредасьлэн та нырысетӥ бадӟым выставкаез. Пырак вераны быгатӥськом: таӵеез ӧй вал на Москваын но, оло, кунгож сьӧрын но. Зоя Лебедевалэн чылкак аслаз учкон-адӟон дуннеез, аслаз ужан манерыз. Азьвыл со басмаез, сӥньысэз, шортэз тросгес уже кутэ вал, нош али... турынъёсын кутаське-керттӥське, куиське. Борддоръёс кузя ошылэм панноос - со ноку адӟылымтэ дунне. Со Зоялэн суредаськон дуннеез. Соизлы но паймиськод: такем трос киужъёс быдэстэмын туэ февральысен октябрёзь. Та нылкышнолэн киосыз но воксё пӧртэмесь, дыр. Таӵе удалтэм нылэз вордэм-будэтэм Пичи Пурга ёросысь Брангуртысь дышетӥсь Анастасия Яковлевна Туктарева. Нош асьсэлэсь шуныт буёлъёссэс, пужыоссэс кузьмаллям дор выжыосыз. Гуртысьтызы фольклор ансамбльысь апайёс-кенакъёс вань сюлмысьтызы кырӟазы ас гуръёссэс, аракыен удӥзы лыктэм калыкез. Нош Зоялэн анаез туж ческыт перепеч пӧрам. Та нылкышноос шоры учкыса валаськод: тӥни мар бордысен вылӥе лопырско Зоялэн бурдъёсыз. Зэм, Зоя Лебедевалэн лул дуннеез туж вылӥын. Кылбурамез но со сярысь вера. Та выставказэ сӥзиз кылем дауре улэм американ нылкышно кылбурчилы Эмили Дикинсонлы. - Маин бордаз кыскиз со? - юасько. - Улытозяз со ноку ӧз печатласькы, - туала аръёсы асьме дорын поттэм книгаез возьматэ Зоя. - Мон сое аслым усьтӥ, туннэ, та вакытэ гожъямын кадь. Муресь малпанъёс, оген муртлэн мылкыдыз, инкуазь - ваньмыз мыным тупало. Та ӝытэ американ кылбурчилэн гожъямез ас кылыныз но, ӟуч кылын но чузъяськиз. Огмылкыдо кылбуръёсынызы та борды итӥськизы Ирина Тойдорова, Татьяна Чернова но мукетъёсыз. Кылбур чуръёс куыса пуктэмын Зоялэн киужъёсаз но. Аслаз чуръёсыз, пуш малпанъёсыз... Трос ик вылэм Зоямылэн эшъёсыз. Сое валасьёс, яратӥсьёс. Суредасьёс Борис Постников, Владимир Веретенников, Владимир Бабушкин, Людмила но Фёдор Блиновъёс... Котькудӥзлэн мылкыдыз вӧлак усьтэмын, Зояез ӝутыны, ӟыгыртыны дась. Сыӵе шуныт омырен тырмытэмын вал та адӟытонэз усьтон. Гужемлэсь ог люкетсэ сьӧразы басьтӥзы кадь брангуртъёс, ӵыдытэк кошкизы татысь. Нош ижъёс понна соос асьсэос но экспонат выллем. Таӵезэ музейысь но уд адӟы. Т. ПЕТРОВА. ОЛО ОСКОД, ОЛО УД Адями 40 ар... улэм вуын 1958-тӥ арын 28-тӥ декабре "Дакота-3" пассажир лайнер Сан-Хуанысь (Пуэрто-Рико) Майямие лобиз. Пуксён азяз шӧдтэк шорысь ышиз. Со сярысь нокин номыр ӧз тоды 40 ар пала. 1996-тӥ арын 19-тӥ декабре пичи гуртысь чорыгасьёс вуысь адями выллем улэп мае ке адӟизы. Огезлэн кышкаса сюлмыз путӥз, нош мукетыз шузимиз. Кӧшкемыт ву пӧйшурез утчаны кутскизы но шедьтӥзы. Кутӥзы, умме уськытӥсь патронэн ыбыса. Собере транспорт самолётэн вуттӥзы Лионысь француз лабораторие. Вить толэзь ӵоже эмъямзы бере, вуысь кутэм адями выллем макезы вераськыны кутскиз. Англи кылын. Со тодаз ваиз, мар соин луиз. Та адями США-лэн ВВС-ысьтыз пилот Эрнест Хилл вылэм. Нырысетӥ пилотэн Роберт Линквистэн нуо вылэм вылӥ радиоактивной арбериосты, та контейнерез пуктӥллям самолётлэн кабинаяз. Но пуксён азязы самолёт вуэ усе но изъёс улэ пачка, вань пассажиръёс быро. Кабиназы гинэ нажгатэк кыле, кык лётчикъёс отысь пото но паймо: соос шедизы гуэ, туж бадӟым кымаськем тусьты выллем - котыр ву, омырез вань, нош нокытчы потыны уг луы. Кык пиосмуртъёс сяна, улэп кыле на стюардесса Мери Беркс. Радиактивной арбериосын контейнерзы сӧриськем. Улэп кылем адямиос вуысь потыны туртто, но уг быгато. Сиё моллюскъёсты но чорыгъёсты гинэ. Пыд улазы ву пумен йылэ. Улэп кыле на Эрнест Хилл гинэ. Нош кызьы? Радиация басьтыса, Эрнест Хилл ву пушкын мугорыныз шоканы кутскем. Озьы со улыны быгатэм бакаос сямен - кызьы ке вуын, озьы ик вутэм интыын. Нош чорыг кутылыны шуг луэмен, ярдуре потаны кутскем, вылтырысьтыз вань гонэз но йырсиез усем, мугорыз чорыглэн сямен тыпыль-тапыль луэм - озьы, пе, чорыглы ӝог уяны луонлык кылдэ. Али Эрнест Хиллы 69 арес ни. Со таза но чырткем, пе. Но эмъян азьланьтӥське на, пе. Валамон, та адямилэн адӟонэз, мугорызлэн быгатонлыкез туж тунсыко луыны кулэ дунне вылысь та удысъя вань тодосчиослы. "Совершенно секретно" газетысь вакчиятыса берыктӥз П.СКОБЕЛЕВ. Ӟечкыласьком! 70 арессэ пусъе Шаркан районысь Вукогуртысь Геннадий Данилович Фёдоров. Вордскем нуналэныз сюлмысьтызы ӟечкылало сое нылпиосыз. Мар сизёно тыныд, атай, юбилеяд? Яратонэз возьмад дас тямысад. Уж - ужамын, дырыз - шутэтскыны, Тыршемедлэсь емышъёссэ бичалляны. Тазалыксэ гинэ медаз жаля инмар, Внукъёсыдлэн сюаназы мед эктод ай. Тыро мед луоз котьку ӝӧк вылыд, Шуныт тулыс нунал кадь - мылкыдыд. Вордскемзэс та нуналъёсы пусъё: Ульяненко Нина Захаровна - Советской Союзлэн Героез; Овчинников Геннадий Петрович - кун службая Удмурт институтлэн директорез; Шибанов Олег Корнилович - техникая кун университетлэн проректорез; Галеев Азат Таисович - Кун Кенешлэн депутатэз; Сударикова Наталья Алексеевна - калыкез дышетонъя министрлэн нырысетӥ воштӥсез; Малюк Михаил Семенович - Кун Кенешлэн депутатэз. ШӦКЫЧ КОТЬ ОСКЫ, КОТЬ ЭН "Эйтон! Ӵукналы быдэ, уже мыныкуз, одӥг воргоронэз вылӥ балконысь вераськись попугай ялан возьытэ вуттылӥз. Мукетъёссэ малы ке ӧз исалля, одно сое гинэ. Воргорон урамлэн мукет палтӥз но ветлыса утчаз, пайдаез ӧйлась. Одӥг ӵукна нош ик попугай солы урам тыр ӟазыртӥз: - Эйтон, ӟечбур-р-р! - Ӟечбур! - вакчияк уретылӥз воргорон попугай пумитэ. Собере попугай зӥр-р-рак мышкин берытскылӥз но быжзэ урдыса тылыоссэ шеръяса, воргоронлы вазьылӥз: - Эйтон, берпалы-ы-ы чебер-р-р-а-а-а? Воргорон мыжыксэ гинэ сэзъялляз но уже дыртылӥз. Нош одӥг пол ӧз чида ни таӵе водевилез но милцие ӝожтӥськыны мынӥз. Милиционерен соос попугайлэн вордӥсь кузёез доры пыризы. Милиционер сое юн алӥз но шуиз: - Эшшо одӥг пол таӵе сценка возьматӥды на ке, попугайдэ зоопарке сётом. Нош астэ туж зол кыл кутытом. Ӵуказеяз ӵукна воргорон, кӧтыз каньыл луыса, нош ик луть-лать гинэ уже вамышъя. Тодмо балкон доры вуиз но, нош ик урам тыр попугайлэсь ӟазыртэмзэ кылӥз: - Эйтон, ӟечбур-р-р! Воргорон ӧз чида но берытскыса юаз: - Я мар тыныд кулэ на? Ӟечбур! Со вие попугай нош ик зӥрак мышкин берытскиз но быжзэ урдӥз, тылыоссэ шеръяз но йырзэ куасалтыса, воргорон шоры быльк учке. Собере кӧня ке улыса, воргоронлэсь юа: - Эйтон, вер-р-ратэк но валад, дыр-р-р, ур-р-ром?! Воргорон погра. "Шкашка" Одӥг адями секыт улонлэсь сьӧдэктыса, гозы кутӥз но нюлэскы кошкиз. Ветлэ со писпуос пӧлтӥ мур малпаськыса, кытчы пырыны ёрмыса, улонзэ каргаса, нюлэс кузёлы тэльмырыса, зӧкгес улвай утчаса... Со вие пумитаз ӝикыт дӥсяськем пиньтэм песяй потэ но пальпотыса, син ултӥз кескич учкыса, куректӥсь пиосмуртлэсь шуласа юа: - Маш-о тон, пияш, шыӵе шуг шокаша вамышъяськод? Шишка бичашкод-а, шудбур утчашкод-а, шакшы кышноед шуге-леке ушкытӥж-а? Пиосмурт паймыса шуэ: - Э, песяй, песяй! Улон секыт, уксё уг сётъяло, кышно ӟуре, эшъёс юонэн акыльтӥзы ини, коть югыт дунне вылысь ик кошкы. Пересь кышномурт солэн пумитаз буйгатыса вазе: - Э-э-э, пияше, пияше, шокем эн куректы оломар понна но. монэ одӥг пол кышно карыша эшкеры ай но улонэд чишто-вшо воштӥшкоз. Жем! Выжыкылысь выллем кылъёсты кылыса, пиосмурт пересь кышномурт шоры учкиз но гаӵоло усиське вал, но ассэ ачиз кияз кутӥз ик. А нош зэмзэ но ваньмыз умой луиз ке... Улон но, уксё но, шуэм сямен... Вань кужымзэ люказ пиосмурт но шӧтэм песяез мырдэм но кызьы кышно кариз ик. Собере дӥсяськиз но шуэ: - Я, песяй, ваньзэ вай, мар сёто шуид! Мон тынэсьтыд курондэ быдэстӥ. Пунэмез пунэмен ик берыктоно. Песяй но турын вылысь ӝуштыса, ӝуштыса султӥз, курткиськиз но юа: - Э-э-э, мушоке, мушоке, тыныд кӧня ареш ини? Пиосмурт долкаса шуэ: - Ньыльдон тямыс! Песяй мур лулӟыса вазе: - Э-э, мушоке, мушоке, тыныд ньльдон тямыш ареш ини, нош вешак шкашкаослы ошкишкод на! Вишмашкы ни, вишмашкы! Я, тау, тау, мушоке! Воргорон погра. "Мадиськон" Поездын купее ӵош тупало чебер тузӥ нылкышно но ӝикыт воргорон. Ваче чыры-пыры куара-ланга каремзы бере тодматско, ог-огзылы матэгес луо. Ӝыт пал пичильтык коньякен утялтэмез бере, воргорон нылкышнолы, дырез вакчиятон вылысь, шудон ӵектэ но писэй сямен писэйяськыса юа: - Мон али тӥледлы мадиськон верало. Тӥ сое тодӥды ке, мон тӥлесьтыд вань куронъёстэс быдэсто. Нош ӧд ке тодэ, соку монэным кӧлоно луоды. Всё! Нылкышно кит-кит серекъяса шуэ: - Ярам! - Соку сак кылзэ, нырысетӥез мадиськон... - Кылзӥсько! Пиосмурт лад-лад валэктэ: - Мар со сыӵе? Кузялэс, быгылес, вожалэс, убо вылын будэ, кутске "к" букваен. Нылкышно малпаськиз, малпаськиз но му-у-ур лулӟыса вазиз: - Ӧйтӧд!!! Ӵукна пал проводница выж ӵужыкуз, купеысь пичи гинэ усьтӥськем ӧс вискытӥ таӵе суредэз адӟе но киысьтыз ӵужонэз усе... Чебер гольык нылкышно азьын сыӵе ик дӥсен пиосмурт пыдесъяськем Мырдэм возиськыса, нылкышноез синкылиос пыр ик сюлворе: - Уг быгатӥськы-ы-ы ни-и-и! Я тод ини, ки-и-и-я-яр со! Ки-и-я-яр! Нылкышно пиосмуртлэсь йырзэ малляса шуэ: - Вожалэс? Быгылес?.. Но... но... но, но? Но... но... но, со? Кияр ӧвӧл со! Ӧйтӧд? Уг тодӥськы! Тыква, дыр, со! Воргорон погра. Люказ Леонид Бурков. СЕССИЯ АЗЬЫН Казнамы чильтэро уз луы 19-тӥ декабре ужаны кутскоз Кун Кенешлэн азьвыл чаклам дас ньылетӥ сессиез. Валтӥсь инты отын басьтоз 2001-тӥ арлы кутоно бюджет. Сое дасян мынэ на. Кызьы шуиз экономикая ялан ужась комиссилэн кивалтӥсез Раиль Галиахметов, сессия дыръя но трос луозы на ватсанъёс но тупатонъёс. Кылем арез ке тодэ ваёно, бюджетэн нырысьсэ тодматскем бере, согласительной комиссияе вуиз на ог 200 дэмлан. Туэ но югдур пӧртэм уз луы, малы ке шуоно, улон туж ӝог воштӥське. Уката но дунъёс ласянь. Депутат вакчияк йылпумъянъёс лэсьтӥз таяз арын ужаммылы. Промышленностьын куд-ог азинсконъёс вань ке, гурт удысын ялан уллань васькиськом. Нош ик кулэсмиз сюро таза пудолэн лыдыз, кысконо скал уллёез вераса. Ӧжытгес кыскемын йӧл, ичигес киземын тысё культураос. Шӧдскымон синӥзы парсьёс но ыжъёс, валъёс, тылобурдо йыр. Ваньмыз со герӟаськемын коньдон тырмымтэен. - Огез валамон: государство юрттытэк, гуртын улон-вылон уз тупатскы, - шуиз Галиахметов. - Переработка но коньдонтэк интыяз пукоз. Кӧня ке азинсконъёс вань "Етӥн" программая. Сыӵе программаос юнматыны кулэ вылэм вань удысъёсъя, нимысьтыз саклык висъяно нюлэс хозяйстволы. Озьытэк ӝоген со быдэсак банкрот улэ шедёз. Ма бордын ужаны кулэ Правительство? Нырысь ик, вань чакламзэ улонэ пыӵатон сярысь сюлмаськоно, котькуд районэн нимаз-нимаз ужано, луонлыкъёссэ но быгатонлыксэ санэ басьтыса. Мон малпамъя, ӧжытгес юрттэт вуэ пичи ужбергатонэз юнматонэ но радъянэ. Асьмелэн экономикамы, азьвыл аръёсы сямен, тросгес пыкиськыны выре на военно-промышленной комплекс вылэ. Нош со, кызьы адӟиськом, ачиз но берло вакытэ "лэйка": заказ ке вань - ужа, ӧвӧл ке - сылэ. ВПК-лэн "быжыз" собере шукке быдэс республикаез, уката но бюджет чотын улӥсьёсты. Тӥни малы нокин но туннэ уз вера, ма луоз, толэзь яке ӝыны ар ортчыса. Али оскон сётэ кадь Удмуртилэн азинскон программаез. Со сярысь трос вераськон мынӥз республикалы президент быръён азьын. Котькуд удысъя отын пыр-поч ужпумъёс ӝутэмын, югдурез тупатонъя ужрадъёс чакламын. Вераськон уг мыны, та документын ваньмыз вольыт пусъемын но ваньмыз вӧй вылтӥ кадь кошкоз шуыса. Вань тырмымтэосыз, тупатон интыосыз. Программаез эскерон-чаклан матысь дыре мыноз. Вуоно сессиын ӟырдыт вераськон мыноз 2001-тӥ арлы пусъем бюджет сярысь. Шаермылэн коньдон мешокез ваньмызлы тырмоз-а яке отӥ но татӥ пасьёс кылёзы-а? Таяз арлы дефицит пытсаськиз вал му вӧй дуноямен но вытъёсты дыраз тыремен. Со чотын дыразгес уждун басьтэ бюджет удыс, тырисько пенсиос, пособиос но мукетыз. Нош ма луоз выль арын? Р.А.Галиахметов верамъя, таизэ бюджетэз "кышъетъёстэк" но кутыны луонлыкмы вал. Но дефицит кылдоз, социальной удысэз ӝутон чотын, пособиосты бадӟыматыса. Тырмыт коньдон висъяськоз республикаын кутэм целевой программаослы, кун казна асьмелы висъялоз на 43 миллион манет: со вӧзы федеральной бюджет Удмуртиысь сюресъёсты тупатъянэ-выльдонэ сётоз на 250 миллион. Нимысьтыз коньдон центр пыр лыктоз Воткинскысь машзаводэ но Ижысь ЭМЗ-е. Солэн налогез кылёз асьме казнае. Луоз-а юрттэт дотация чотын улӥсь районъёс понна? Луоз, но вӧзаз котькудӥз ачиз коньдон поттыны, утчаны кулэ на. Та ласянь ялан ужась комиссилэн кивалтӥсез умоен пусйиз Воткинск районэз, солэсь кивалтӥсьсэ, Кун Кенешлэсь депутатсэ Владимир Варламовез. Дэмлаз тодматскыны воткаослэн ужан амалъёсынызы. *** Толон Кун Кенешын ортчиз Депутатлэн нуналэз. Отын эшшо огпол кутскыса учкемын на 2001-тӥ арлы чаклам бюджетлэн инъетэз. Л.МЕДВЕДЕВА. 135 ар тылпулы пумит Сарапулын тылпуэн нюръяськонэз радъян пумысен нырысьсэ кылпум поттэмын вал Дуров городничийлэн 1852-тӥ ар понна отчётаз. Отын, кылсярысь, ивортэмын вал: "Городын нимысьтыз пожарной команда ӧвӧл, но уже кутэмын кык конюхъёс, кыкназы ик араз азвесен быдэн куатьтон манет уждун басьто". Нош городысь архиве кылемын мукетыз киын гожтэм документ. Отысь лыдӟиськом: "Югдурез утёнъя министрлэн 1865- тӥ арын 14-тӥ декабре поттэм распоряжениезъя Сарапул городысь думалы косэмын та указэз басьтэм бере ик полицилэсь пожарной обоз, валъёс но соосты сюдыны ю тысь басьтыны. Уже кутоно брандмейстерез, солы юрттӥсь но 8 конюхез. Гожтыса ик пусъёно, кин ма понна кыл кутоз но ма карыны кулэ тылпу потон учыре". Тӥни озьы 1865-тӥ арын 14-тӥ декабрез Сарапулысь тылпуэн нюръяськон удыслэн вордскем нуналэныз лыдъяны луоз. Табере солы 135 арес ни. Городын тылпуэн нюръяськонъя нимысьтыз служба кылдытонлэн мугез соку бадӟым вал. Та вашкала городын туж трос угось пулэсь юртъёс. Тылпу потыса, быдэс ульчаос но сутскылӥзы. Кылсярысь, дас укмысэтӥ даурлэн шораз быдэсак эгырӟизы Бадӟым Покровской, Сосновской, Балканской но мукет ульчаос, пеньлы пӧрмизы город котырысь бадӟымесь нюлэсъёс. Тӥни соин ик городысь дума тылпулэсь утиськон ласянь трос гинэ ужрадъёс кутӥз. Пожарной командае ӧтемын вал Тулаысь брандмейстер Нершов. Со ик басьтӥськиз тылпуэн нюръяськонъя командаез юнматон борды. Кызьы пусъемын архивысь документъёсын, нырысь-валысь командаын вал брондмейстер, солэн юрттӥсез, машинист но 20 пожарной служительёс, тылпу кысонэ кутӥськиз 14 вал. 1896-тӥ арын кык пожарной машина басьтӥзы ни. Нош 1887-тӥ арын ӝутэмын вал каланчаен пожарной депо. Ӵапак та 113 аръем юртын али ке но интыяськемын тылпуэн нюръяськонъя часть. Нош нимысьтыз пусйымонэз тани маиз. Та деполэн кирпич юртэз кык ар куспын лэсьтэмын вылэм, проект дасянэз но лыдэ басьтыса. Ӵошатон понна вералом: Сарапулысь тылпу кысӥсьёслы выльзэ депоез лэсьтон дас арлэсь кема кыстӥське ни, нош ку йылаз-пумаз вуоз, тодмо ӧвӧл ай. Дыр ортчемъя, тылпуэн нюръяськонъя служба юнмаз. Кызетӥ даурлэн кутсконаз та удысын трос лэсьтӥз нырысетӥ гильдиысь купец городлэн йырыз Павел Андреевич Башенин (1868-1910). Ӵапак солэн сюлмаськеменыз городын кыскемын вал пу гумыослэсь водопровод, нимысьтыз лэсьтэмын ву басьтон гидрантъёс. Нош нырысетӥ тылпу кысон автомашина сарапулъёс басьтӥзы 1935-тӥ арын. Солэсь азьвыл таӵе машиназы Ленинградын гинэ вал ай. 1982-тӥ арын Сарапулысь пожарной охрана военизировать каремын вал. Отчы пыриз кык часть. Татын кылдӥз нимаз отряд. Городысь тылпуэн нюръяськонъя службалэн историысьтыз таиз вакыт ортчиз, шуыны луоз, отрядлэн азьвыл кивалтӥсезлэн Леонид Александрович Глуховлэн син азяз. Ӵапак солы оскемын вал угось тылпуэн нюръяськон ужъёсты выль сямен радъян. Выльдӥзы техниказэс, татчы вуизы тодӥсь-валась офицеръёс, специалистъёс. Но мар шуод, дыр ортчемъя, корт но вужме. Берло дыре улон-вылонмы огыр-бугыр луэмен, пожарнойёслы трос шуг- секытъёсты чидано луэ. Интызы ӟоскыт луиз ни, та депо вал кыткетъёслы чакламын вал ай угось. Машинаоссы но начаресьгес ни. Кызьы ивортӥзы пожарнойёс, кемалась ик ӧвӧл соос доры куное вуылӥллям США-ысь тылпуэн нюръяськисьёс. Вылӥ этаже тубон пагӟаез возись 1875-тӥ арын Уралысь заводын нуйтэм рельслы но даурлэсь кема лёгаса пӧськытэм из лёгетъёслы сяна, соос туж паймиллям 23 аръем автопагӟазылы но: таӵе арлыдо техникаен луэ на шат, пе, ворттылыны. Мар шуод та пумысен? Сарапулъёс вашкала городын уло бере, оло, арлыд ласянь бадӟым лыдпусъёслы дышиллям ни. Нош котьма ке но, пожарнойёс ас удыссэс тодо, соос котьку дасесь шуг югдуре адямиослы юрттыны. - Ваньмыз потэ адямилэн тыршемез бордысь, - шуэ отрядлэн азьвыл кивалтӥсез Л. А. Глухов (туэ гинэ отставкае потӥз).- Ужасьёсмы сярысь тазьы верасал: соосын мон разведкае мынысал, соосын артэ тылэ но пырыны кышкыт ӧвӧл. Пожарнойёслэн сыӵе ни ужзы, ваньмыз секундъёсын лыдъямын-чотамын. Тани ма вера та пумысен отрядлэн кивалтӥсез Н. Д. Руденко: - Кӧня ке кылын гинэ тазьы вераны луоз. Тылпу сярысь ивор басьтэм бере, пожарнойёслы дӥсяськыны но депоысь потыны тырме 35 секунд, тылпу потэм интые вуытозь, шорлыдын ортче 300 секундлэсь ӧжыт. Озьы, Сарапулъя шоро-куспо лыдпусэз басьтоно ке, ивор басьтэм дырысен тылпуэз кысытозь, 1300 секунд пала кулэ луэ. Нош Сарапулын туэ гинэ 178 тылпу потаз ни. Трос ваньбур сутскыны сюриз. Пожарнойёслэн кужыменызы утемын 10 адямилэн быронлэсь улонэз, 1 миллион 221 сюрс манет тыр пала ваньбур. Тӥни озьы праздник праздникен, нош уж сюре тылпуэн нюръяськисьёслы. Тани 135 арессэс пусъён нуналэ огинэ люкаськылӥзы ветеранъёс но егитъёс. Тодазы ваизы ортчемзэ, кенешизы туннэез сярысь. Нош ужазы вал секыт югдуръёс но, тумошоез но. Тани Быдӟым Отечественной войнаез пыр потэм но вань улонзэ тылпуэн нюръяськонлы сӥзем мурт Алексей Романович Шумков тодаз ваиз на депоысьтызы кечтакаез. Вал возёнтӥязы юрмегъёс вуылыны шӧталлям. Вал изнэсэз, пе, соос тугало вал. Нош кечтака зынэз та пичи пӧйшуръёс туж уг ярато. Тӥни соин ик валъёс пӧлын ик вордӥллям кечтакаез. Со сокем дышем валъёслы, тылпу кысыны мыныкузы, ваньзэ кельтыса, азьпалан, пе, бызе вал. Вылаз ик, сое горд буялям, туж тумошо, пе, адӟиськылӥз. Тӥни таӵеез но вылэм пожарнойёслэн ужазы. Мар бен, 135 аресэнызы ӟечкыласа, Сарапулысь пожарнойёслы сӥзём улоназы ваньзэ умойзэ гинэ, соос понна пӧсь нуналъёс ӧжытгес мед луозы. Нош вуж депозы архитектурая памятникъёс пӧлы пыртэмын ни бере, вылез ӝоггес мед вуысал. Ф. Никитин. 113 аръем каланча; таӵе адӟиське со йылысен Сарапул; отделенилэн командирез А. Двинских; диспетчер-радиотелефонист В. Шкляева; пожарнойёс городэ потыны дасесь; отрядлэн кивалтӥсез Н. Д. Руденко; пожарнойёс дорын куноын ветеранъёс А. Р. Шумков, Л. А. Глухов но В. В. Никитинский; вордске бордгазет. Туспуктэмъёсыз В. Беломорскихлэн. Дарт Гуртысь егитъёс Визьмын, кужмын, эшъёсын! Шаркан районысь Карсашур гуртысь Вахрушев Николай Васильевич татысь егитъёслэн азьветлӥсьсы луэ. Со школаын физкультураен дышетӥсь луыса ужа. Огдыре ик егитъёсын ужанъя отделын ужа. Николай Васильевичлэсь ужзэ туэ Данъян грамотаен пусйизы. Мон солы кӧня ке юанэн возиськи. - Николай Васильевич, шумпотӥды-а тазьы дунъямзылы? - Сотэк кызьы? Малпасько, грамотаен юнме уг пусъё. Куинь ар ӵоже егитъёсын ужасько, ужме ӟеч тодӥсько кадь, вормонъёс но трос бичалляй. Азьвыл сярысь, али Карсашур нырысетӥ интыосын сылэ. Гужем республикаямы ортчем ӵошатсконъёсысь азвесь медален бертӥз Леонид Стрелков. - Кыӵе ужрадъёс ортчытъясько егитъёсын? - Тросгес луо спортэн герӟаськемъёсыз. Куддыр, ужам выйыса, гуртэ но уг вуылӥськы. Егитъёсын ужаса, шумпотон, умой мылкыд басьтӥсько. Калык татын шулдыр, соин артэ сюлмаськонъёс но кытчы ке тӧлӟо. Ужрадъёсы мылысь-кыдысь пырисько егит семьяос. Озьы соос юнгес эшъясько, тунсыкогес уло. - Егитъёсын ужам сяна, тӥ дышетӥсь. Малы бырйиды та профессиез? - Армиысь бертэме бере кӧня ке колхозын ужай, собере ӵектӥзы спортъя инструкторе. Та уж сюлэмыя луиз, физкультураен дышетӥсь луыны малпай. Дышетски Чайковскийысь физкультурая институтын. - Кык ужын ужаса уд жадиське-а? Яке кин ке юрттэ-а? - Уг, но секыт йӧтэ транспортэн, ӵошатсконъёсы маин мыныны паймоно. Юртто ни асьсэос спортсменъёс, фермеръёс. Гурт администрацилэн кивалтӥсез А. Наговицын ноку но "уг" уз шуы. Бадӟым тау шуэме потэ озьы ик куинь колхозъёслэн тӧрооссылы В. Наговицынлы, Ф. Ефремовалы, А. Толикаовлы. Нош ужаны секыт ӧвӧл. Егитъёс асьсэос дорам лыкто, вань малпанъёссэс ӵекто. Соос ваньзы аслам дышетскисьёсы бере, лякыт ужаны, ноку уг пумитъясько. Но жаль, гуртамы ӧвӧл спортзал. Школамы но шор ёзо ӧвӧл, соин ик будэтэм спортсменъёсы дорысьтымы вазь кошко. - Али уждэс воштыны ӵектысалзы ке.. - Ноку но. Мыным туж кельше таиз уже. - Азьланяз кыӵеесь малпанъёсты, кыӵе ужъёс лэсьтыны малпаськоды? - Бордамы тросгес егитъёсты кыскыны, со ужез аналтыны уг яра. Но соосын ужаны нимысьтыз адями висъясалзы ке, уката умой луысал. Ӟеч ужъёсы кыскыса, егитъёсты, оло, йыртэманлэсь палэнтыны быгатом. - Семьяяды валало-а тӥлесьтыд уждэс? - Кузпалы Ирина Юрьевна ачиз школаын организатор луыса ужа, соин ик ми одӥг ужез быдэсъяськом. Н. Князева, Удмурт университетын дышетскись. ЖУРНАЛИСТЪЁСЫН ПУМИСЬКОНЪЁС Калыклэн уксёез вань Озьы шуизы Россиысь кредит организациослэсь ужзэс умоятонъя агентстволэн (АРКО- лэн) калыкен кусыпъёс возёнъя департаментэзлэн директорез Александр Вознесенский но отысь ик экономика ужпумъёсъя валэктонъёс сётъясь (советник) Андрей Мельников. Мар муген бен соос дорамы лыктӥзы? Нырысь ик, вераськон мынэ Россиысь банкъёслэсь ужзэс умоятон сярысь. Кыкетӥез, кызьы утёно калыклэсь банкъёсы сётэм коньдонзэ (вкладъёссэ). Сыӵе сюлмаськон юнме шорысь потымтэ. Та ужпумлы, калыклэсь уксёзэ утёнлы сӥзем законопроект Кун Думаын эскеремын но отын ик вырӟылытэк кылле. Сое азьвыл Президент Борис Ельцин умоен ӧз лыдъя, документ вылэ ӧз гожтӥськы. Мукет ласянь ке учконо, али банкъёс огсыр кадь ужало. Соос шуг-секытэ шедьылӥзы 1998-тӥ арын 17-тӥ август бере. Та вакытэ соос "бурмемын" шуыны луоз. Соку малы бен та ужпум ӝутэмын? Юнме шорысь ӧвӧл. Дасэз бадӟым банкъёс ӝынызэ коньдонэз возё. Нош вань банкъёс киын 70-80 миллиард манет уксё, со пӧлысь калыклэн - 20 миллиардэз. Нош адямиос берло дыре банкъёслы, уката ик коммерческой банкъёслы, оскемысь дугдӥзы. Огдышемъя, азьло калык Сбербанке тросгес уксёзэ сётэ вал, нош али озьы шуыны уг луы. Специалистъёслэн лыдъямзыя, калыклэн али 50-60 миллиард манет коньдонэз кияз, сое дораз возе, нош куд-огез манетсэ долларе яке музон валютае берыктэ. Малы ке шуоно, Сбербанк адямилэсь уксёзэ воземез понна берло дыре туж пичи процент тыре. Вылаз ик, калык уг оскы, кулэ дыръяз вань коньдонзэ огдыре басьтыны быгатоз шуыса. - Москваын кык толэзь ӵоже вераськонъёс-ӵашетонъёс мыно ни Центробанкез но быдэс банк ёзэз выльдон, соослэсь ужзэс умоятон сярысь, - шуэ Андрей Геннадьевич. - Мугез тодмо. Берло дыре Россиын но, тӥляд республикаяды но ваньбур поттон улӟыны ӧдъяз. Сое уката азинтон но кужмоятон вылысь, предприятиослы но огазеяськонъёслы коньдон, инвестициос кулэ. Кин сое сётоз? Валамон, банкъёс висъяны кулэ. Макем соос уксёез быгатыса но шонер бергатозы, сокем асьмелэн экономикамы юнмалоз но калыклэн улон- вылонэз умоялоз. Зэмзэ но, али туж кулэ лэсьтӥськонэз паськытатыны. Та ужез аналтэменымы, квартира дунъёс ӝутскизы ни. Огшоры ужась адями сое аслаз уксёеныз басьтыны нокызьы уз быгаты. Соин ик банкъёслэсь ужзэс умоятыны мед юрттоз государство. Соку адямиос но коньдонзэс отын возёзы. Г.РОМАНОВ. Вунонтэм нунал 15-тӥ декабре шаерысьтымы культура удысын ужасьёс асьсэлэсь нуналзэс пусйизы. Культурая министерстволэн постановлениезъя туэ со ньылетӥ арзэ ортчытӥське ни. Операя но балетъя кун театре люкаськизы та удысын данэ потэм адямиос, ветеранъёс, кивалтӥсьёс. Культурая министр Н. М. Бессогонов пусйиз, таиз, даурез йылпумъясь ар, уно пӧртэм ужрадъёсын узыр вал шуыса. П. И. Чайковскийлы, Г. А. Корепановлы, Г. М. Корепанов-Камскийлы сӥзем крезьгуро фестивальёс, театръёслэн фестивальзы, пинал пианистъёслэн куинетӥ калык куспо конкурссы но мукетыз трос калыкез огазеязы. Быдӟым Вормонлэн 55 ар тырмонэзлы сӥзем ужрадъёс 300-лэсь уно вал. Калыклэн чеберлыко киужъёсызлы но бадӟым инты висъяськиз, пӧртэм выставкаос ортчытэмын. Лулчеберлыкез возьматыны луонлыкъёс паськытало. Тупатъян ужъёс йылпумъямын Арсеналын муниципальной выставочной залын, усточи нылпиослэн школа-интернатазы. Но бадӟым саклык висъяно луоз на интыосысь, тужгес но гуртъёсысь культурая учреждениосыз тупатъянлы, выльёссэ пуктонлы. Нимаз адямиос пӧлын вылӥ азинсконъёсынызы даноесь луизы кун симфонической оркестрлэн кивалтӥсез Николай Роготнев, суредась Валерий Кононов, кырӟасьёс Татьяна Силаева, Алевтина Медведева, библиотекарь Капиталина Чиркова, писатель Егор Загребин, актёръёс Александр Перевозчиков, Анатолий Морозов но мукетъёсыз. Кун Кенешлэн Тӧроезлэн нырысетӥ воштӥсез П. Н. Вершинин культура удысын ужасьёсын данъяськемзэ вераз. Калыклэсь лул чеберлыксэ ӝутонын соос валтӥсь инты басьто, шуиз со. Шаерамы кӧня ке арзэ ужа ни "Удмуртилэн синпелетэз" ("Память Удмуртии") программа. Быдэсъяське Культура сярысь закон. Но кулэ на вылэм, пусйиз Павел Николаевич, библиотека уж сярысь закон кутыны. Со юрттысал газетъёслы-журналъёслы гожтӥськонэз но умоятыны. Культура удысын ужасьёслэн нуналзы вунонтэм кылёз. Юкаменск ёросысь культурая ёзэн кивалтӥсь Альфира Балтачева, Сарапулысь 2 номеро искусствоосъя школаысь дышетӥсь Любовь Яковлева, Кияса ёрос библиотекалэн директорез Галина Бубякина, Национальной культураосъя юртлэн кивалтӥсез Ольга Хабарова Удмурт Республикаысь культура удысын дано ужасьёс луизы. Егитъёслэн эстрадая "Катанчи" театрысьтызы артистъёслы Андрей Ураськинлы но Евгений Андреевлы сётэмын республикаысьтымы дано артист ним. Со сяна, ужын азинсконъёссы понна куд-ог эшъёс басьтӥзы Удмурт Правительстволэсь но Культурая министерстволэсь данъян грамотаоссэс. Та нуналэ ӝутскем мылкыд сётӥзы на модая "Квинт" театр но "Арсенад-Бэнд" концерт-оркестр, шаерысьтымы калык артист Николай Копысов, дано артист Виктор Сергиенко но искусство удысысь дано ужась Евгения Копысова. Т. Петрова. Куинь толэзь но куинь арлы укша вылэм Шаерысьтымы егитъёсты Чечняе келян яке отысь пумитан сяме пыӵаз кадь ини. Одӥгъёсыз отысь берто, мукетъёсыз кошко. Пумыз-йылыз но ӧвӧл кадь солэн. Тани туннэ но ӵукнаысен витё ини республикаысьтымы Кыл кутытонъя управлениысь "Кречет" отрядэз. Туала связьлы луыса, Чечняысь бертӥсьёс пырак Иже ивортыло: "Самараез ортчим ини", "Набережные Челны городэ пыриськом", "Можгаез потӥм", "Пичи Пурга пала вуиськом"... Кӧня ке иськем гинэ кылиз на кема возьмам городозь. Куинь толэзь соос отын ӧй вал. Картсэс, вынзэс, атайзэс, эшсэс пумитаны лыктэмъёслэн сюлэмзы тэтчыны дась ини, одӥг интыязы сылыны чидатэк, солань-талань ветло. Тани Акмавишин Рамилез но быдэс семьяен пумитаны лыктӥллям. - Возьмаськыку куинь толэзь но куинь арлы укша вылэм, - шуэ Рамильлэн атаез. - Одӥг нуналэз но гань-гань ӧм ортчытэ кадь, ялан пимы сярысь сюлмаськыса- малпаськыса улӥм. Ӵукна султыса вуисько-а, уг-а, бызисько телевизорысь, радиоысь иворъёсты кылзыны. Чечняысь урод учыр сярысь гинэ медаз вералэ вал, малпасько. Вуиз ик та кема возьмам нунал - ӝоген пимес ӟыгыртом. Со куспын инбамез шуак югдытӥзы горд-вож-ӵуж кизили пырыос, гудыртэм кадь кылӥськизы "вуо!", "вуо!" шуыса кесяськем куараос. Чечняысь бертӥсьёс озьы фейерверкен ивортӥзы дор палъёсазы вуэмзэс. Ваньмыз бызизы автобус пумитэ. Кӧня мусо кылъёс, яратон мылкыдъёс шумпотон синкылиос... Ожысь вуэмъёсты котькудзэс ӝип-ӝип ӟыгыртыса ӟечкылаз республикаысьтымы Кыл кутытонъя управленилэн кивалтӥсез Г. В. Желудов но солэн воштӥсьёсыз. - Ми туж шумпотӥськом пиосмы улэп бертэмысь, - шуиз Кыл кутытонъя управленилэн кивалтӥсезлэн воштӥсез А. П. Бояркин. - Нырысь ик ми кыл кутӥськом ук соослэн улонзы понна. Алигес мон вуылӥ Чечня музъем вылэ, гуманитарной юрттэт нуыса. Пумиськылӥ отысь кивалтӥсьёсын. Соос мылкыдме бурдъязы. Асьме пиос, пе, ваньмызлы адӟем карымон быдэсъяло оскем ужез. Соин ик отын шумпотыса пумитало Удмуртиысь вуисьёсты. Соослы оско вылӥ тодон-валанъёсты, бадӟым быгатонлыкъёсты кулэ карись удысъёсты. Ми ваньмы данъяськиськиськом асьмелэн сыӵе ужасьёсынымы. Тани Рамиль понна но макем шумпотэ семьяез. Кыӵе мылкыдыд шуыса юамелы Рамиль вазиз: "Туж усто! Семьяеным пумиськи но Чечняын адӟем шимес суредъёс, вань шуг- секытъёс кытчы ке ышизы-тӧлӟизы кадь. Ноку но соос тодэ медаз лыктэ ни..." Озьы ик мед луоз. Шумпотон гинэ мед пачыл пӧзёз котькуд семьяын. Кайгу но куректон отчы сюрес медаз шедьтэ. Е. Камашева. Ивортэ Интернет: Счётной палаталэн данэз будэ "Россия Федерациысь Счётной палата сярысь" Законэ Кун Дума кӧня ке ватсан пыртӥз. Соя счётной палата табере ас ужамез сярысь отчёт лэсьтоз, Федеральной Кенеш азьын сяна, Россилэн Президентэз азьын но. Палаталэсь кивалтӥсьсэ юнматӥз ачиз Президент. Таин валче воштӥськонъёс ортчозы Центральной банкын но. Солэн вань документъёсыз эскеремын луозы Счётной палатаен. Палаталы, государстволэсь интересъёссэ утён вылысь, право сётӥськоз вазиськыны вань судъёсы. Таин ӵош Счётной палатаен пуктэм куронъёсты воштыны яке эскерыны быгатозы Россиысь Вылӥ суд яке Арбитражъя вылӥ суд гинэ. Законъя Счётной палаталы сётэмын право коньдон ужпумъёсты тӥянъя административной правонарушениосты чаклан но соосъя кивалтӥсьёсты кыл кутытыны. Арлы быдэ - 8 тонна зарни "Апсакан" компания ужа музъем узырлыкез поттон бордын. Со кылдытэмын вал ньыль ар талэсь азьло. Та дыр ӵоже тужгес но пайдаё вал кошкисез ар: "Бамское" месторождение туэ сӥзьыл сётӥз нырысетӥ 100 килограмм зарни. Со быдэсак мынӥз Сбербанкысь басьтэм кредитэз берыктонэ. Вылӥ верам рудник - Дальний Востокын огез узырез. Чакламъя музъем улын 110-250 тонна пала зарни кылле. Со мурын ик ӧвӧл, потто карьер амалэн. Компанилэн президентэз Владимир Полевалов оскытэ: - Вуоно арын зарни поттонэз вуттом 2 тоннаозь, 2004-тӥ арын - 5 тоннаозь, нош отӥяз арлы быдэ 8 тонна поттыны быгатом. Автофургон кузёзэ шедьтоз Ижевскын поттэм "пикап-котомка" рынокын интызэ ӝог шедьтӥз вал. 2000-тӥ арысен автофургон поттон борды басьтӥськиз "Москвич" АО - Россиысь огез валтӥсез автомобиль поттӥсь компания. Со чакламын жилищно-коммунальной служба понна. Инты шедёз, дыр, музон удысын но. Россельхозбанк ӟеч юрттӥз Будэтэм урожаез октон-калтонын гурт удыслы ӟеч юрттӥз туэ Россельхозбанк. Сентябрь толэзе гинэ льготной кредит улсын со висъяз 70 миллион манет. Вераны кулэ, та банк ужа Правительство кивалтэм улсын. Уставной капиталэз - 375 миллион манет. Гурт удысъя министр верамъя, 2001-тӥ арлы федеральной бюджет та банклы 1,5 миллиард манет висъялоз. Со сяна, Россельхозбанклы берыктэмын луозы 9 миллиардлы кредитъёс но 10 миллиардлы лизинг амалэн сётэмез. Та коньдон тулыс пал нош ик кошкоз бусы ужъёслы но сиён-юон поттон удысэ. МАЗ-ъёс вордскозы Нева дурын Минскысь автозавод но Санкт-Петербургысь "Кировский завод" АО ӵош ужанъя огкыл кутӥзы. Соя Нева шур дурын заводын МАЗ автобус поттыны кутскозы, ёзъёссэ ваёзы белоруссиысь. Нырысетӥез машина конвейерысь васькоз декабрьлэн пумаз. Петербурглэн ульчаосаз али но 200 МАЗ-ъёс ветло ни. Соосты Минск келяз, уй пал столицалэн мэриез куремъя. Калыкез нуон-ваёнын белоруссъёслэн автобусъёссы ӵапак интыяз луизы, пассажиръёслы кельшизы. Ильичлэн лампаез кысоз 1-тӥ январь экономика удыслы трос гинэ "кыӵесъёс" ваёз, дыр. Тани "Башкирэнерго" ОАО-лэн валтӥсь директорез Азат Салихов сӥзьыл ик кышкатӥз ни, электрокужымез кутэм понна дун коньдонэн гинэ тыроно луоз шуыса. Выль арысен кутскыса, ваньмыз взаимозачётъёс но бартер амалэн ужан историе кылёз. Пунэме кылемъёслы чагтыл яке сюсьтыл дасяно луоз, дыр, малы ке шуоно, уксёзэс тырытэк, электрокужым нокин уз сёты. Дасяз Л. Дмитриева. Дэмлало кизилиос Выль арлы кузьым Кык арня гинэ кыле на, Выль ар вуытозь. Кыез сӥё-дано пумитан вылысь, кизилиос асьмелы олокыӵе но кузьымъёс дэмлало. Учке, быръе, яратоно эштэс шумпоттэ! Овен. Кошкисез ар Овен понна керӟеггес ортчиз, гань-гань улон со вӧзтӥ ортчиз. 2001-тӥ арын ваньмыз мед тупатскоз шуыса басьтэ солы корка пушсэ шунтӥсь кузьым. Выль ар ӝытлы туж тупалозы буёло сюсьтылъёс, сюсьтыл пуктон, ӝӧккышет яке кыӵе ке но чебер посуда тӥрлык. Телец. 2000-тӥ ар Телец понна мӧзмыт ортчиз. Нокин но сое йӧскадь ӧз нуныя, ӧз яраты. Тӥни малы мылкыдыз ӝож, ассэ мултэсэн лыдъя. Бер ӧвӧл на янгыштэс тупатыны. Выль ар ӝытэ Телецлэсь сюлэмзэ небӟытэ пӧртэм кузьымъёсын: книга яке фотоальбом, ваза кузьмалэ. Бадӟым дуно арбери басьтыны эн сюлмаське - со ачиз аслыз ма кулэ кузьмалоз. Телец уго ассэ ноку но уз вунэты. Кыктоос (Эгызоос). Таос ас дунзэс тодо. Соин ик кузьым но дасяно фирменнойзэ. Быръелэ яке туж ӟеч ручка, яке час, модая вурем дэрем, кулэсь сумка яке вылӥ ӟечлыко кускын нуллон е. Пуктэм дунзэ эн куштэ, "вунэтэ". Яратонды мед адӟоз но мед валалоз, солы "ширпотреб" ӧз кузьмалэ шуыса. Кисло-кусло (Рак). Берло толэзьёссэ Рак лябӟиз. Соин ик кужым люкан понна, санаторие яке пӧсь странаосы путёвка кузьмалэ. Солы коньдонды ӧвӧл? Озьы ке, мед шутэтскоз гуртаз. Кузьмалэ яратоно кырӟанъёссэ, духи, яке одеколон, ваннаын пыласькыны ческыт зыно суретъёс. Чебер кылъёсты Рак уг яраты, дуногес солы саклык висъямды. Лев. Кошкись арын Левъёс асьсэды возьматыны ӧз быгатэ. Соин ик эн кузьмалэ соослы пӧраськон яке ужан тӥрлык. Мылкыдзэс ӝутон понна быръе сыӵе кузьым, кудзэ со ачиз ноку но ӧй бырйысал: туж яркыт ворпоё галстук яке буртчин шарф. Кузьымдэс чеберак бинялтэ. Выль ар ӝытэ эн вунэтэ гажандэс чупаны но яратон кылъёс вераны. Дева. 2000-тӥ арын Девалы секыт йӧтӥз: малы ке но тросэз тодмоосыз сое ӧз валалэ, ӧз юрттэ. Девалы вань кужымзэ сётоно луиз, аслэсьтыз нимзэ утён понна. Кыӵе кузьым вите со Выль ар ӝытэ? Быръе но сётэ яратоно киужзэ: пужыятэм ӵушкон яке салфетка, коркан будӥсь сяська, столярной инструмент, чорыган арбери... Весы. Таосыдлэн улон-вылонзы подвиглы матын вал, шуыны луоз. Быдэс ар ӵоже жадёнэз валатэк нуизы ас ныпъетсэс. Но соослы люкетыны выризы кыл вӧлдӥсьёс, кылшерисьёс. Тӥни малы яратоно адямиедлы кузьмано котырысьтыз кырсьсэ, уродзэ, лексэ улляны быгатӥсь кузьым. Быръе солы чагыр зарезен яке кизилиё инбамен, чебер инкуазен суред! Скорпион. Туэ со коньдон вылэ ӧз вуылы. Кузьым интые туж тупалоз "Зарни" чорыг (аквариумен ӵош) яке субтропикъёсын будӥсь будос. Мылкыдзэ озьы ик бурдъялоз кылбуръёсын книга, парфюмерия. Стрелец. Со котьку ӟечезлы оске, чебер малпанэн улэ, нош кыӵе кузьым вите яратоно эшезлэсь? Кизилиослы осконо ке, котьма сётэлэ - шумпотоз: пытсэтэн таба, шуныт шарф, ваннаын возён коврик... Стрелец олома но возьма, вылды, но ваньмызлы коньдонды уз тырмы. Со туж шумпотоз музыкальной шкатулкалы, небыт шудонлы, пичи гинэ чайниклы. Чебер кылъёслы уггес оскы. Водолей. Водолей уг яраты огпӧртэм, огдышем арбериосты. Озьы ке но, пичи мурт сямен шумпотэ музыкальной открыткалы, театре билетлы, компьютер дисклы но электронной блокнотлы. Бурдъялозы сое Выль ар ӝытэ кузьмам улэп сяськаос но. Козерог. Солэн лулсюлмыз пичи пиналлэн выллем. Котьма кузьма Козероглы - шумпотоз. Басьтэ яратоно эштылы музыкальной шкатулка яке небыт шудон, пичи гинэ чебер чайник яке духи (одеколон). Чебер кылъёслы со уггес оскы. Чорыг. 2000-тӥ ар Чорыг понна огез ӟечез вал, дыр. Кема курадӟемез бере, туэ со буйгаз, зӥбломиз. Вуоно арез бадӟым осконэн пумита. Кузьым интые сётэ солы бассейнэ ветлыны абонемент, парфюмерия, косметика. Нош тужгес но бадӟымез кузьым - Чорыгез гажан но яратон. Со туж кема утёз кузьмам сяськадэс, сётэмын ке яратӥсь киосын но чебер малпанэн. Выль дауре - выль премьерен Ӝоген толэзь тырмоз ини Кун Кенешлэн Юрий Питкевичез Правительстволы Тӧрое юнматэмез дырысен. Та вылӥ должносте пуксемез бере, Юрий Степанович одӥг корреспондентлы но интервью ӧз сёты на вал. Котькыӵе журналист сямен ик мон шумпотӥсько, милям газетмы мукетъёссэ азьпалтыны быгатӥз шуыса. Озьыен, нырысь ик ми тодматом асьмелэсь лыдӟисьёсмес Удмуртилэн выль премьереныз. Кин со Юрий Питкевич? Кыӵе адями но кыӵе кивалтӥсь? Мае яратэ? Мае курла? Кыӵе мертэтэн дунъя адямиосты? Кызьы выль "ныпъетсэ" нуыны малпа? - Нырысь ик, Юрий Степанович, кӧня ке кыл Удмуртие вуэмды пумысен. - Мон ачим Белоруссиысь, Гомель областьын вордски но быдэсми. Тямыс класс бере кошки Брянске, пыри техникуме лэсьтӥськисе дышетскыны. Техникумез йылпумъям бере ӵектӥзы кыдёкысь городъёсы ужаны мыныны: Свердловск, Кирово-Чепецк, Челябинск, Улан- Удэ, Глазов. Бырйимы Глазовез. - Малы одно ик отчы? - Отчы ньыль инты сётэмын, нош ми ньыль кузя эшъёс вал. Вань мугез. - Удмуртие вуыса, ас поннады малпады, оло: остэ, инмаре, кыӵе мар гондыр сэреге вуиськиз? - Воксё ӧй малпа озьы. Глазов соку ик кельшиз мыным. Ӝикыт, чылкыт но йӧн-йӧн город. Ужан инты сярысь веранэз ик ӧвӧл: Чепецкой механической заводын туж вылӥын вал ужан культура, али но озьы ик шуыса тодӥсько. Соин ик суй-пыд юскиськиз шуыны матысь но уг луы. Яраз город но, калыкез но, уже но. Ужаны кутски лэсьтӥськонъя управлениын. Кутски мастерысен, будӥ управленилэн кивалтӥсез дорозь. Огъя вераса, 18 ар ӵоже лэсьтӥськи, ӟеч тодӥсько та удысэз. Кӧня ке дыр ӵоже вал партийной ужын, собере кивалтӥ Глазов городэн. 1995-тӥ арын вуи Правительствое Председательлэн воштӥсез луыса. - Премьер луыса, кыӵе документ вылэ нырысь ик кидэс нюртӥды? - Мон созэ ӧй но чакла. Кин нырысьсэ Правительствое сюре, кин политика сярысь но кызьы ассэ возьматон сярысь малпаське, соиз, оло, чакласал но. Нош мыным соин йырин ӧй вал. Быръёнъёс бере тачак документъёс люкаськизы. Со сяна, арлэн пумаз ужъёс котьку но пачыл потымон. Уен-нуналэн ужамы вуоно арлы бюджет бордын. Озьы ик Россилэн бюджетаз асьмелэсь кулэяськонъёсмес утён сярысь сюлмаським. Али толлэн самой кысык дырыз, озьыен, ялан син азьын возёно шуныт сётонэз, эстӥськонэн герӟаськем ужпумъёсты. - Та удысын кыӵе ке лэчыт ужпумъёс вань шат? - Ӧвӧл ай, но луыны быгатозы. Тани эстӥськонлы дунъёс будыны ӧдъяло. Соин ик али эгыр басьтыны, ворттыны кулэ. Уката но та вакытэ котькуд школае, садике но больницае сюрес вань дыръя, лымыен согемын ӧвӧл на. - Асьмеос малы ке но соку ик кутским ужъёс, сюлмаськонъёс бордысен. Нош лыдӟисьлэн нырысь ик тодэмез потэ, дыр, тӥ сярысь. Тани шуом, кызьы семьяды учкиз тӧро луэмды шоры? - Семьяе понна, зэмзэ вераса, со витьымтэ ивор ӧй вал. Нылпиос но, кузпалы но мынам председатель луонэлы дась вал. Кышное созэ но тодӥз, табере мыным эшшо но тросгес ужано луоз, монэ со эшшо но ӧжытгес адӟылоз шуыса. - Озьы ик-а луиз? - Конечно. Кабинетам мон вуисько ӵукна тямыс котырын, вазьгес но. Доре вуисько ӝытсэ дас часлы матынгес. - Одӥг-ог кылоно луэ таӵе вераськонъёсты: республикаямы президент луыса, Правительстволэн тӧроезлэн "секталаез", пе, пичиёмоз. Куд-огез сое завхозэн но ӵошато. Кужымез но, луонлыкъёсыз но, кыл кутонэз но улӥынгес, пе, луоз. - Мар бен, кин озьы вераське, ас вылазы поныса мед мерталозы председательлэн ныпъетэзлэсь секталазэ. Палэнысен котьку капчигес уг котьмае но дунъяны. Нош мон сямен, президент луыса, премьерлэн ответственностез будэ. Мон сое ас вылам шӧдӥсько ини. Президент вань калык азьын, вань республика понна огназ кыл кутэ. Соин ӵош ик со туж чурыт юа исполнительной органъёслэсь, нырысь ик Правительстволэсь. Вылаз ик, со ачиз председатель быръе, ачиз ик солэсь кылзэ но юа. Соин ик ответственность будӥз, шуыны луэ. Мынам воксё ӧвӧл правое суп-сап, азьтэмъяськыса ужаны яке янгыш лэсьтыны. Нош кужым но луонлыкъёс пумысен огзэ гинэ верало: оскем ужез быдэсъян понна со тырмыт. - Тӥ Правительствоын выль адями ӧвӧл ни. Озьы ке но, ӟучъёс выль ӵужон выль сямен ӵуже шуо. Правительстволэн ужаз мар ке выльзэ пыӵатыны чакласькоды-а? - Чутрак, оглом воштӥськонъёс сярысь вераськон уг мыны. Аппаратлэн пуштросэз дырен но, ужен но эскеремын ини. Со туннэ нуналлэн куронъёсызлы тупа. Вылез сярысь верано ке, со тани мар бордын. Председательлэн куд-ог воштӥсьёсызлы сётом министръёслэсь кыӵе ке но ужпумъёссэс. Со дыре ик куд-огез министръёс Председательлэн воштӥсеныз лыдъяськозы. Тани шуом, В. Бельтюковлэн, коньдон ужпумъёсъя министрлэн, кужымез но, быдэсъяно ужпумъёсыз но воштӥсьлэн быдӟа. Воштэмын луоз Асваньбуръя кун комитет. Со пӧрмоз Ваньбур ужпумъёсъя министерстволы. Отын ужасьёсыз но, комитетэн ӵошатыса, йылозы. Та воштӥськон кулэ луиз та удыслэн паськытаменыз. Выль министерстволы сётэмын луоз музъемез вузан- басьтонэн герӟаськем ужпумъёс. - Озьыен, музъем вузлы пӧрмоз ик? - Гырон-кизён музъем сярысь вераськон уг мыны ай. Тани учке ай: завод сылэ музъем вылын, нош сое котькуд минутэ отысь улляны луоз, музъемез солэн ӧвӧл ук. Умойтэм со. Сыӵе ужпумъёсты сэрттыны-пертчыны кулэ. Асьмеос та ласянь бере кылимы. Отӥяз, мон малпасько, музъем рынокын бергалоз. - Нош ваньмыз-а дась солы? - Калыкен та пумысен валэктон уж нуоно на. Нош законодательной инъет дась ини, мон шуысал. - Нош министръёсты воштон ласянь кызьы? Яке басьтом таӵе "бичатӥсь" ужпумез: луозы-а Правительствоын удмурт адямиос? - Министръёсты воштон сярысь али номыр но вераны уг быгатӥськы ай. Собере малы соосты воштод воштон вылысь гинэ. Нош удмуртъёс кивалтонын одно ик луозы. Матысь дыре ӧтём районъёсысь, музъем бордысь визьмо, кибашлы, бадӟым опытэн кивалтӥсьёсты. - Нош огъя врано ке, кыӵе мертэтъя тӥ бырйиськоды ужасьёстэс? Кыӵе адями луыны кулэ Правительствоын ужан понна? - Нырысь ик, профессионал. Адямилэн, нырысь ик, мед луозы мур тодон-валанъёсыз. Собере - ужан мылкыдыз луыны кулэ ӟырдыт, етӥз. Валамон, улонэз ӟеч тодон сяна, кулэ на выльзэ но валаны, дунъяны, азьланяз учкыны быгатон. - Нош тӥ асьтэос кыӵегес кивалтӥсь: небыт, адямиез жалясь яке ӝӧкез мыжган амалэн ужась-а? - Соиз но, таиз но ӧвӧл. Мултэс небыт луыны туала вакытэ улон уг сёты. Со дыре ик мон ӵош ужасьёсме пачкатыса уг возиськы. Но оскем ужез огпол, кык пол урод быдэстӥд ке яке воксё куашкатӥд ке, вераськон вакчи луоз. - Али республикаын бадӟым саклык висъяське "Развитие Удмуртии" программалы. Правительство матысь дыръёсы соя ужалоз, дыр, озьы-а? - Одно ик. Вылаз ик, Правительство ачиз но та программаез дасяз. Кызьы со быдэсъяськоз? Программаын тужгес но бадӟым инты висъямын калыклэн кулэяськонъёсызлы, социальной удыслы, мукет сямен вераса. Ми али ик ини утчаськом бюджетэн чаклам вӧзы коньдон. Ваньбур поттӥсез вӧсь карытэк шедьтоно ватсаса коньдон поттыны луонлыкъёс. Асьмелэн туж начаресь школаосмы, больницаосмы, культура учреждениосмы, творческой коллективъёсмы. Соослы ваньзэ кулэзэ тырмыт сётоно. Нош коньдон экономика удыс гинэ поттэ. Озьыен, Правительство арысь аре та удыслэсь пайда сётонзэ йылэтон бордын ужалоз. - Соиз валамон. Социальной кулэяськонъёс сярысь кылпум потӥз бере, вералэ вал, кызьы малпаськоды улон интыосъя югдурез ӧжытак коть умоятыны? - Дунтэк квартираос сярысь вераськонэз ик ӧвӧл ни. Улон инты лэсьтон понна тросгес висъялом кредитъёс, коньдон курисьлэсь улон интызэ залоге басьтыса. Туннэ нуналлы со тужгес но тупась, одӥг гинэ ӧвӧл ке, амал. - Нош адямилэн воксё улон интыез ӧвӧл ке, залоге номыр сётыны? Тани басьтом егит семьяосты, соослэн номырзы но ӧвӧл ук? - Соослы юрттыны амалъёс утчалом но, шедьтом но. Мон тодэмъя, та ужпум бордын ужа, ӵектонъёс дася Егитъёсын ужанъя комитет. Огъя кужымен басьтӥським ке, одно ик пӧрмоз, тупатонтэм югдур уг луылы. - Гурт хозяйствоын чидантэм югдур сярысь тодӥсьтэмез ик ӧвӧл ни, дыр. Тани тӥ но Кун Кенешлэн сессияз верады гуртысь продукцилы но промышленной вузъёслы дунъёсты радъян сярысь. Кыӵе ке оскон вань-а умоезлы? - Та ужпум туж секыт но сюлэмшугъяськытӥсь. Зэм но, техникалы, электрокужымлы, эстӥськон материалъёслы дунъёс ялан будо но будо. Сиён-юонлы дунъёс бере кылё, собере соосты эсэпезлэсь вылӥе уд но ӝуты. Со сяна, крестьянъёс поттэм продукцизэс вузанэн но курадӟо, соосты ворме дунтэмгес импорт. Но дунъёсъя политикаез одӥгез но нимаз регион, Удмуртия но, огназ воштыны уг быгаты. Сое радъяны кулэ центр. Со пумысен ӵектонъёс ми Кун Думае но президентлы дасямы ини. Но ми Москвалы гинэ оскыса улӥськом, шуыны уг луы. Асьме кужымен но гуртлы юрттыны тыршиськом. Кылсярысь, арысь аре будо гуртын поттэм продукция понна дотациос. Вуоно бюджетлэсь 13 процентсэ чакласьком гурт хозяйстволы висъяны. - Юрий Степанович, нош мар тӥ тужгес но пусйымонзэ, бадӟымзэ лэсьтыны чакласькоды Председатель луыса ужатозяды? Шуом, кӧня ке ар ортчыса, адямиос мед быгатысалзы вераны: соиз но соиз республикаын лэсьтэмын вал Питкевич премьер дыръя. - Мынам мылкыдыя мед шуозы: соиз яке таиз лэсьтэмын Волков Президент дыръя, нош солэн командаяз вал Питкевич Премьер. Нокыӵе зол кивалтӥсь но ас кожаз номыр йӧн- йӧнзэ лэсьтыны уз быгаты. Кужмо кивалтӥсь командаеныз кужмо. Нош ми ваньмы, мон но - президентлэн командаез. - Юрий Степанович, нялтас юан куриське. Тӥ вуоно президентэн ӵош-а дышетскемын? - Шонергес вераса, одӥг техникумын. Александр Александрович одӥг курслы бадӟымгес вал. Ог-огмес тодӥськомы ке но вал, матысь эшъёс ӧй вал. Йӧн-йӧн кусыпъёс тупатӥм ини Глазовысен. - Со но ӧжыт ӧвӧл. - Бен, 18 ар ини. - Озьыен, оскон вань, выль дауре республикаен лад-лад ужась, ог-огзэ ӟеч валась команда кивалтоз шуыса. Бадӟымесь вормонъёс тӥледлы! - Тау. Г. КОРЯКОВ. Выжыкылысь герой Ижевск чугун сюрес вокзал доры пуктэмын Владимир Азинлы памятник. Со военной формаен, пельпум вылаз буркаен, кияз бинокль кутыса ӟырдыт ожлэсь мынэмзэ эскере кадь. Та памятник вылэ гожтэмын: "Азин В.М. 1895-1920" Дивизилэн начальникезлэн Владимир Мартинович Азинлэн нимыз зарни букваосын гожтэмын граждан ожлэн историяз. Со вордскиз Витебск губернилэн Полоцк уездысьтыз Артиковец волостьысь Марьяново гуртысь начал латыш семьяын. 26-тӥ сентябре 1895-тӥ арын. Солэн атаез Мартин андреевич трос аръёс пӧртэм гуртъёстӥ вуриськыса ветлӥз. Володя, Псков городысь училищеез быдтэмез бере, атаезлэн сое дышетыны коньдонэз ӧз тырмы, соин ик пизэ Ригае ӵужмоуртэз доры келяз. Татысь фабрикаын счетовод луыса ужаз. 1916-тӥ арын сое армие басьтӥзы. 1918-тӥ арын март толэзьлэн пумаз та управлениен ӵош со сюре Вяткае. Татын аслэсьтыз улонзэ большевикъёслэн партиенызы герӟа. Партилэн губкомезлэн ӵетэмезъя, латышъёслэсь коммунистической секция кылдытэ но соин кивалтэ. Собере латышъёслэсь коммунистической рота люказ. Валъёсын отряд кылдытыса губерниысь кулакъёслэсь ченгешон ӝутонъёссэс буйгатылӥзы. Но шаерамы югдур ялан уродмиз. 1918-тӥ арын майлэн пумаз чехъёслэн корпусысьтызы солдатъёс йырзэс ӝутӥзы. 6-тӥ августэ соос Казанез басьтӥзы. Тӧдьы гвардиысь эсеръёс 7-тӥ августэ Ижевскын кузёяськыны ӧдъязы. Та дыре Азин Вяткаын батальонэз люканзэ йылпумъяз. Собере вагонъёсын Казань пала мынӥзы. Сюрес вылын Арскез мозмытӥзы но азьлань дыртӥзы. 2-тӥ армилэн кивалтӥсьёсыз вылӥ дунъязы Азинлэсь вормонзэ но сое, партизанъёслэн пичи отрядъёсынызы огазеяськыса, Арскын группа кылдытыны косӥзы. 10- тӥ сентябре Азин та группаен, 5-тӥ армиысь боецъёсын но Волжскысь военной флотлэн десантникъёсынызы Казанез чехъёслэсь мозмытӥзы. Владимир Ильич Ленин Восточной фронтысь горд армеецъёсыз соин валче ӟечкылаз. Соку Азинлы сётӥзы зарни час но сабля. Вятской полянаын вормисьёсын эшелонэз пумитазы кыкетӥ армилэн выль кивалтӥсьёсыз: командарм Шорин но Реввоенсоветлэн членъёсыз гусев но Штенберг. Татын Азин кыкетӥ сводной дивизия кылдытӥз. Аслаз дивизиеныз 23-тӥ сентябре Сюгинске (Можгала) вуиз но Кам шур вӧзысь городъёсты но гуртъёсты мозмытонэ ӟырдыт пыриськиз. Советской Союзлэн маршалэз, Советской Союзлэн кык пол Героез - асьме странаын одӥгез тужгес но тодмоез военначальник Василий Иванович Чуйков граждан ож вакытэ белогвардеецъёсты но Колчаклэсь гыжкалъёссэ жалятэк жугиз начдивлэн Азинлэн 28-тӥ стрелковой дивизияз. Дас тямыс аресысен со луэ ни 40-тӥ полклэн командирез. Владимир Мартиновичлэн мукет частьёсыныз ӵош солэн но полкез 1918-тӥ1919-тӥ аръёсы юрттӥз Ижевскез, Сарапулэз но Воткинскез мозмытыны. Азинлэн вордскемез дырысен валче Чуйков, "Молот" журналлэн куремезъя, кышкасьтэм калык герой сярысь тодэ ваёнъёссэ умдурт калыклэн тодмо журналаз поттӥзы 1975-тӥ арын дасэтӥ номераз. Советской Союзлэн маршалэз ваньмызлы пырак вераз: "Владимир Мартынович Азин милемлы кыӵе ке выжыкыл кадь вал. Солэсь мон дышетски Родина понна ожмаськыны но вормылыны. Малпасько, озьы ик вал трос мукет командиръёсын но комиссаръёсын. Азинлэн вуылымтэ интыез ӧй вал. Ожын со котьку азьпалан. Со нуналмысь сюлмаськиз красноареецъёс сярысь. Фронтын оружие шедьтоно, сое тупатъяно ке - татын нош ик котькинлэсь бадӟым кужымез Азинлэн. Тушмонлэсь снарядъёссэ, патронъёссэ таланы аслаз геройёсыныз- красноармеецъёсын быгатэ вал Азин гинэ. Тӥни сыӵе вал Азин. Зэмзэ но, выжыкылысь герой!" Тани солэн 1918-тӥ арын 1-тӥ сентябре гожтэм 124 номеро приказэз: "Отрядъёслэн вань начальникъёссылы кивалтӥськыны кулэ тани маин: атай сямен сюлмаськоно боевикъёс сярысь... Котькыӵе ужрадъёс кутоно, гирвонка сӥль но кык гирвонка нянь норма тупатон вылысь. Пыжемез вань ке, нянь тросгес но сётыны луэ". Мыным шуд усиз Азинлэн дивизиезлэн ортчем сюресэныз Ижевскысь 10 номеро школаысь музейын тодматскыны но та школаысь следопытъёслэн Быдӟым Отечественной война дыръя сӥё-дано дивизиын ожмаськисьёсын пумиськон слёт ортчытыкузы вераськемзэс кылзыны. Кызьы тодмо, 3-тӥ октябре Азинлэн дивизиез тӧдьыослэсь мозмытэ Агрыз станциез, нош 5-тӥ октябре - Сарапулэз. Агрызын соку интыяськемын вал дивизилэн штабез но ожмаськонэ ветлӥсьтэм батальон гинэ. Кык полк люкаса, белогвардеецъёс Агрыз вылэ наступлениен потӥзы. Сыӵе югдур сярысь тодыса, Азин аслаз разведчикъёсыныз паровозэн Сарапулысь ӟырдыт ож мыныку вуиз. Со ӝогак люкз кужым капчигес сӧсырмемъёс, чугун сюрес вылын но штабын вань ужасьёс пӧлысь. Пичиесь подразделениосты со ачиз атакае ӝутылӥз но тушмонэз пазьгыны быгатӥз. Граждан ожлэн тылӝуэз быдэс Россие вӧлскемен, Ужъя но Обороная Советлэн лыдъямезъя, Республикалэн вань фронтъёсызлы соку толэзьлы быдэ сю сюрслэсь трос винтовкаос но сю миллион патронъёс кулэ вал. Ижевскысь но Воткинскысь пыӵал тӥрлык поттон заводъёстэк, сыӵе ужпумез быдэстыны ӧй луысал. Соин ик 20-тӥ октябре ленин Главкомлы Вацетислы таӵе телеграмма келяз: "Туж паймиськом но сюлмаськиськом Ижевскез но Воткинскез басьтонэн ӝегасткеменыды. Куриськом та ужез ӝогомытон вылысь туж сэрыт ужрадъёс кутыны. Ивортэ телеграфен, кызьы ма кариды". 1918-тӥ арын июль толэзьысен Ижевск тӧдьыос киын вал. Соосты пазьгыны оскизы Азинлэн дивизиезлы. Куинь сутка ӵоже секыт ож мынӥз. Азинецъёс, тушмонлэсь атакаоссэс кышкатэк зӥбломытыса, 7-тӥ ноябре 1918-тӥ арын асьсэлэн валъёсынызы Ижевсклэн ульчаосаз пыризы. Собере мозмытӥзы Воткинскез но быдэс Кам котырысь интыосты. Ижевскез басьтэмез понна, мукет командиръёсын но комиссаръёсын ӵош Азинлы вылӥ правительственной награда - Боевой Горд Знамя орден сётӥзы. 1919-тӥ арын июне Азинлэн дивизиезлы нош ик Ижевскез мозмытоно луиз. Соку городысь колчаковецъёсты уллязы. Удмуртиез мозмытэмез бере, мукет частьёсын ӵош Азинлэн дивизиез колчаковецъёсын ожмаськиз Уралын. Екатеринбургез басьтэмзы бере, азинецъёсыз келязы южной фронтэ Деникинлэн кужмо армиеныз нюръяськыны. Владимир Азин ожъёсын ассэ жалямтэеныз трос пол сӧсырмыны шедьылӥз. Нош 17-тӥ феврале 1920-тӥ арын сое, секыт сӧсырмемез бере, деникинецъёс пленэ басьтӥзы Маныч шур дурын. Туж лек сьӧсьяськемзы бере, сое Тихорецкая станциын ошо. Тани ма гожтӥз нылкышно-комиссар лариса рейснер со сярысь: "Начдив Азин улонзэ утён сярысь вунэтыса, котькуд нунал сямен ачиз частеныз ӵош оже пыриськылӥз. Туж яратӥз аслэсьтыз частьёссэ но валаз котькуд выль лыктэмъёсты!. Озьы ик воинъёс но гажазы дивизилэсь начальниксэ. Фронтысь реввоенсовет вазиськиз яратоно начдивлэн быременыз валче пунэмзэ берыктон понна тушмонъёсты уката но зол жугыны. Соку Ажинэз тодазы вайыса, боецъёс деникинецъёсты Закавказьеысь Иран кунгожоз уллязы. Кавказэз мозмытэмзы понна, Азербайджанлэн ЦИК-ез клорт дивизиез Горд Знамяен наградить кариз. РСФСР-лэн ЦИК-ез солы Царицынской ним сётӥз. Быдӟым Отечественной войнаын Азинлэн азьвыл дивизиез, ӟырдыт ожмаськемез понна, нырысьёсыз пӧлын гвардейской ним басьтӥз. Геройёс уг куло. Азинлэсь нимзэ али нулло ульчаос, колхозъёс, школаос, библиотекаос. Жаль, Удмуртилэсь автономизэ кылдытонлы 80 ар тырмонэз пусйыку, малы ке мон ӧй адӟы граждан ожысь батыр пи Азин сярысь одӥг ке но материалэз. Асьмеос, туала улӥсьёс, туж янгыш лэсьтӥськом, вуоно кивоштӥсьёсмылы зэмос иториез возьматытэк кельтыса. В.ЧЕРНОВ. Дарт Чеберина Йырсиосме лӧсъяло... Йырсизэ сынась нылкышно... Та суред асьмелы туж тодмо, озьы ке но, ноку уг акыльты. Сынаськись нылкышно котьку чебер, гочамон. Египетысь чебер апайёс сынасько вылэм пулэсь но лылэсь сынъёсын. ЪВИИ дауре дышиллям сынэн пӧртмаса паймымон чебер, причёскаос лэсьтыны. Асьмелэн песянайёсмы йырсизэс кема, дыртытэк сынало вылэм. Бырйылӥллям пудо сюрлэсь, пулэсь сын. Сыӵе сын йырсилы изъян уг вайы. Корт сынъёс кезьыт луо, сынаськыку электро кылдыто. Али вӧлмемын пластмассалэсь уно пӧртэм сынъёс. Йырсиды рекламаысь нылъёслэн кадь вальк-вальк чебер, гочамон мед луоз шуыса, сое туж валаса утялтыны, сынаны кулэ: сынаськемды бере, йырсидэс кузянтӥз киыныды маялтэ, умой луоз, чылкыт омырын (усьтэм укно дурын, азбарын) сынаськыса. В. Кибардина. Нимыз уг вуны Ижысь 8 номеро школаын дышетскисьёслэн, батыръёслы сӥзем музейысьтызы следопытъёслэн, туж гажано писательзы вань. Со - тодмо удмурт прозаик но кылбурчи Михаил Петрович Петров. Война дыръя Глазкарын кылдытэм но фронтын Кёнигсбергозь ортчем 208 номеро стрелковой дивизилы сӥзем музей та школаын кемалась усьтэмын ни. Данэ потэм частьын ожмаськиз офицер, удмурт писатель М.Петров но. Отын со кылдытӥз данак очеркъёссэ, веросъёссэ но кылбуръёссэ. Валамон ни, школа музейын та гожъясьлы бадӟым инты висъямын. Табере татын фронтовикъёслы сӥзем ужрадъёс ӵемысь ортчыло. Тани туэ быдэс ар Михаил Петровичлы сӥземын вал. Музейлэн трос аръёс ӵоже кивалтӥсез дышетӥсь Валентина Фёдоровна Русских, дышетскисьёс пыр-поч эскеризы тылӝу пыр потэм муртлэсь ортчем сюрессэ, солэсь творческой ужъёссэ. Соос вуылӥзы Петровлэн ожмаськем, произведениос гожъям интыосаз: Москва палась Истра, Волоколамск каръёсы, Смоленск котырысь гуртъёсы. Экскурсиысь берытскыса, пиналъёс но дышетӥсьёс литературая лыдӟонъёс ортчытӥзы. Соосты "Петровлэн ортчем сюресъёсыз" шуыса нимазы. Писательлэн шайгу вылаз но нимысьтыз урок вал. Дышетскисьёс Михаил Петровлэсь кылбуръёссэ шара лыдӟизы, конкурсэ пыриськизы. Писателез буре вайыса ортчытэм спортъя ӵошатсконъёс но усто пӧрмизы. Та выллем ужрадъёсты пӧртэм-пӧртэм адямиос дасязы. Школае вуылӥзы Петровен ӵош ожмаськем эшъёсыз, Ольга нылыз, Удмурт драмтеатрысь артистъёс, профессор Фома Ермаков но мукетъёсыз. Монэ но, ожысь ветеранэз, та писателен пумиськылэм муртэ, школа музее вераськыны кӧня ке пол ӧтчаллязы ни. Фронтын ачим военной журналист вал бере, дивизия газетысь удмурт солдатъёс сярысь куд-ог гожъямъёсме вандылыса фронтысен Михаил Петровичлы ысъялляй. Землякъёсмылэсь 18-тӥ стрелковой дивизиямы батыр ожмаськемзэс удмурт писательмылы ивортылэме потӥз угось. Война бере Петровлэн творческой уженыз герӟаськем куд-ог документъёсты мон утьыны быгатӥ. Тани али но утисько солэсь 1955-тӥ арын 21-тӥ июне армие ыстэм гожтэтсэ. Соку мон дивизиысь "Гвердеец" газетлэн редакторез вал. Милемлы, удмурт солдатъёслы но офицеръёслы, Михаил Петров гожтэтаз валэктэ, кызьы газетын пыр-почгес возьматыны луысалыз патриот мылкыдын герӟаськем ужпумъёсты. Солэн уго туж умой сямыз вал: егит писательёслы, журналистъёслы, гожъяны кутскисьёслы быгатэмезъя юрттыны сюлмаськиз. Мыным туннэ туж дуно потэ Петровен ӵош пуксем фотоснимоке. 1955-тӥ арын гужем армиысь Можгае отпуске бертакум вал со. Фронтовикъёс сярысь очеркъёс гожъян пумысен кенешеммы бере вордскиз та туспуктэм. Та выллем документъёсты мон табере возьматъясько егитъёслы, дышетскисьёслы, школаосы пумиськонъёсы вуылыкум. Алигес Ижысь 56 номеро школае нуллӥ вужмыны вуэм "Вуж Мултан" книгаез. Солэн вылаз гожтэмын: "Кузьмасько гажано Василий Никитичлы - творческой удысын ӵош тыршисьлы. М.Петров. 8.06.55 ар". Михаил Петровичлэн ӟырдыт кылбуръёсыз, чебересь кырӟанъёсыз, прозаен гожъямъёсыз ноку но уз вунэ. Солэн нимыныз герӟаськемын удмурт литературамылэн пушъемез. Василий НИКИТИН, ожысь но ужысь ветеран. Туспуктэм вылын М.П.Петров, В.Н.Никитин но солэн кузпалыз Е.Ф.Никитина. Архивысь материалъёсъя Удмуртия ЪЪ дауре 1963-тӥ ар Куатьтонэтӥ аръёслэн кутсконазы УАССР-ысь предприятиос мургес пыриськыны кутскизы кунгожсьӧр странаосын вузкаронэ. 1963-тӥ арын "Ижмаш" завод вузаны вылысь станокъёс дасяны кутскиз. Поттэмын вал токарно-винторезной нимысьтыз станокъёс. Кунсьӧрысь басьяськисьёслы соос кельшизы. Вить ар куспын, дунне вылысь 24 странаосы вузамын вал соос. Пӧлазы азьмынӥсь странаос: Япония, Франция, ФРГ но Англия. Сарапулысь Орджоникидзе нимо завод пичиесь "Космос" радиоприёмникъёс бичаны кутскиз. Нырысетӥез кузьмамын вал кузпалъёслы-космонавтъёслы Андриян Николаевлы но Валентина Терешковалы. Та радиозавод Быдӟым ож дыръя асьме пала шунды пуксён палась ваемын вал. Нырысь аръёсаз со поттылӥз туж огшорыесь детектор приёмникъёсты но "сьӧд табаосты". Нош 1963-тӥ арын Юрий Гагаринлы сӥзем "Космос" приёмникез бӧрысьгес Англие но басьтӥзы но нимазы "Юра" шуыса. Та арын аслэсьтыз вузъёссэ кунгож сьӧры келяны ӧдъяз Можгаысь "Красная звезда" фабрика но. Ӝыны миллион линейкаос, 1,5 сюрс пеналъёс келяз со Гвинеяе. Декабре КПСС-лэн Удмурт обкомез пленумаз нырысетӥ секретарь быръемын вал В. К. Марисов. Кызь ар ужатозяз, огез но туж кулэ ужпумъёс сотэк Удмуртиын ӧз ортче. Гурт удысэз ӝутон сярысь но ужпум ӝутэмын вал пленумын. Город ласянь юрттэт сётӥськылӥз техникаен но, калыкен но, кидысэн но. Лябӟем колхозъёсы но совхозъёсы келямын вал 100 коммунистъёс но комсомолецъёс, 112 агрономъёс, зоотехниикъёс но инженеръёс. Пумен гурт калыклэн улон-вылонэз умояны кутскиз. Алнашын вуттэмын вал культурая юрт. Кизнерын усьтӥськиз колхозникъёслы санаторий. Но городъёсын улон-вылон умойгес вал. Ижевскын кылдӥз Индустриальной ёрос. Городлэн центрез М. Горький но Советской ульча вискысь выжтэмын вал Пушкинской но Лихвинцев урамъёслэн сэрегазы. Воткинскын кылдытэмын улон-вылонъя но лэсьтӥськонъя нырысетӥез кооператив. Берёзовка посёлокын 64 семья корка пыронзэс пусйиз. Сарапулын усьтӥськиз егит кузпалъёслэн юртсы. Сӥё-дано кузпалъяськон амалъёс кутӥськизы Ижевскысь, Воткинскысь, Глазовысь но мукет интыосысь культурая дворецъёсын но юртъёсын. Та ар тужгес но пусйымон вал Воткинскысь ГЭС-эз усьтонэн. Солэн кужмыз вуиз 1 миллион киловаттозь. Со электрокужым тырмыт луиз удысъёслы Удмуртилы, Башкирилы но Пермь областьлы. Та лэсьтӥськонлы сӥзиз "Адямилэн чеберез" романзэ удмурт писатель Трофим Архипов. Сое гожтон понна, писатель трос дырзэ быдтӥз, вуоно геройёсыныз ӵош улӥз, кызьы ужамзэс син азяз возиз, пӧртэм адямиосын сюлмысьтыз кенешылӥз. "Удмурт дунне" газетлэн редакциез вазиське: та туспуктэмысь кинлэн ке газетамы кыӵе ке мылкыдзэ верамез потэ ке, лыктэ газетлэн редакцияз яке жингыртэ 444-269 телефонъя. А. Дерюшев, Удмурт Республикаысь ЦДНИ-ын ужась. А. Я. Швецовалэн коммунистической ужысь бригадаез. Меӵак вераськон Туннэ 15 часысен 19 часозь Россия Федерацилэн Президентэзлэн Приволжск округъя оскем муртэзлэн общественной приёмнояз ужаса улӥсьёсты кутоз но юанъёссылы валэктонъёс сётоз Удмурт Республикаысь Прокурорлэн воштӥсез Б. Н. Першаев. Нош ӵуказе луоз телефон пыр "Пичи ужбергатонлы коньдонэн юрттон" ужпумъя меӵак вераськон. Юанъёс сётэмды луоз пичи ужбергатонлы коньдонэн юрттон амалъёс пумысен, та удыслы республикаысь банкъёс пыр кредит басьтон но мукет ужпумъёсъя. 16 часысен 18 часозь 25-40-61 номеро телефонъя тӥляд юанъёстылы валэктон сётозы Пичи ужбергатонлы юрттонъя кун фондлэн директорез В. Г. Пушин но "Евразия" банклэн президентэз В. В. Богатырёв. Ёросысь воспитательёс понна Як.-Бодьяысь "Березка" нылпи садэ пиналъёс ӵукналы быдэ шумпотыса вамышто, татын выжыкыл дуннее вуо кадь. Сыӵе мылкыдо пӧрмиз уката ик берлоез ужрад. Со сӥземын вал вордскем шаермылы. Пиналъёс удмурт кылын кырӟазы, калык сямъёсты возьматӥзы, шудӥзы, пересь анай-атайёссылэсь улэм-вылэмзэс син азе пуктӥзы. Та ужрадэз дасянэ-ортчытонэ пыриськизы воспитательёс Т. А. Широбокова, Г. А. Вахрушева, Н. А. Пасынкова, Л. Е. Валеева, нылпи садлэн кивалтӥсез Н. А. Зорина но роноысь валтӥсь специалист Л. А. Михайлова. Та ужрад адӟем карымон пӧрмиз. Кызьы нылпиослы пыӵатоно вордскем шаердэ яратон мылкыд - тае ас синмынызы адӟизы ёросысь нылпи садъёсысь ӧтем воспитательёс но. Т. НИКОЛАЕВА. Дарт Удмурт "Шундылы" синмаськи Кылемез "Дарт" баммы быдэсак сӥземын вал Россиысь егитъёслэн форумзылы. Со ортчиз 17-тӥ-18-тӥ ноябре Ижевскын. Валамон, ваньмыз материалъёс одӥг баме ӧз тэре. Но малпаськом, туннэ нуналозь вужмыса но ӧз вуттэ. Лариса Видинеева форуме лыктэм Самараысь. Вераськыны кутскыса, со монэ паймытӥз - 24 аресъем нылаш отысь правительствоысь егитъёслэн комитетэнызы кивалтэ вылэм. - Кызьы? Оло... - оскытэкгес юаны малпай вал Ларисалэсь, но со монэ азьпалтӥз: - Ӧвӧл, мынам нокыӵе блатэ ӧвӧл. Со понна туж бадӟым конкурсэз ортчыны быгатӥ. - Малы нош сокем вожмаськыса кивалтӥсь луыны тыршонэз? Кельше ке егитъёсын ужаны - ужа... - Мон отысь номыр уродзэ уг адӟиськы. Нырысь ик, адями аслэсьтыз быгатонлыкъёссэ, визьзэ будэтыны кулэ. Собере, кивалтӥсь - со котьку урод адями ӧвӧл. Тани мон татын трос вераськи ни Удмуртиысь делегациосын, ваньмыз ӝожтӥсько - милемын уг лыдъясько. Кызьы уз лыдъяське, астэ пуктыны, ӟеч ӵектон сётыны быгатӥд ке? - Но ваньмыз ноку но кивалтӥсь уз луэ. - Кулэ но ӧвӧл. Но мон ноку но кивалтӥсь уг луы шуыса юскиськыны, номыр карытэк пукыны уг яра, егит адями общественной уже пыриськыны, творчествоен вырыны кулэ. Сыӵе амалъёс пыр со ассэ шедьтоз-валалоз, кужымзэ но визьзэ кулэ ӧре ӧръялоз. Соку ӧжытгес луозы йыртэмасьёс, асьсэды быдтӥсьёс... - ?! - Бен, угось тросэз егит муртъёс улонысь кошко, асьсэды кулэтэмен лыдъяса. - Общественной огазеяськонъёс ужало городъёсын, селоосын. Мар кароно гуртысь егитъёслы? - Гуртысь егитъёс пӧлын но одно луэ одӥг ке но азьветлӥсь. Сое шедьтыны мылкыдзэ ӝутыны гинэ кулэ. Конечно, косыса со номыр уз кары, татын мукет амалъёс утчаны кулэ. - Тыныд кызьы потӥз - маин ке висъясько-а удмурт егитъёс мукетъёсызлэсь? - Мон синмаськи тӥляд "Шундыдылы". Но валай, отчы азьветлӥсьёс гинэ люкаськыло шуыса. Мукетъёсыз, кызьы шуи ни, тунаса пуко: кытчы асме каром, мычиськи ке, уз-а шукке? Оло, янгышасько но. Вераськонмы азьветлӥсьёс сярысь пӧрмиз. Но мон татчы юромо мукет юанъёсме ӧй сура ни, малы ке шуоно, та ужпум али зэмзэ но висьытэ егит удмуртъёсты. Али ке ӧм дыше сэзьгес кариськыны, аръёс ортчыса, удмурт президент гинэ ӧвӧл, кандидат но ум шедьтэ ни. З. Вахрушева. Дарт Чеберина Чеберлык чидамез яратэ Учкылӥсько модая журналъёсты. Бамлы быдэ шоголь дӥсьёсын чебер, веськрес нылъёс. Туала мода но туала выросъёс люконтэм герӟаськемын ог-огенызы. Мон вожъяськыса учкисько та нылашъёс шоры. Сыл ай, оло, нош аслым модель луоно? Маин мон пӧртэм: ӝужыт, учкымон. Мар эшшо кулэ на со понна? Та юанэным йыгаськи мон Галина Псарёвалэн театр-студия. Модельёслэн школазылэн кивалтӥсез монэ шумпотыса пумитаз. - Театре ми кутӥськом вань мылкыд карисьёсты, малы ке шуоно, соос дышетскемзы понна дун тыро. Куректонэз ӧвӧл, тӥляд ӝуждалады 170 сантиметр ке ӧвӧл. Зэм, тодмо модель тӥ, оло, уд но луэ, со понна дышоды нылмуртогес луыны: чебер ветлыны, астэ калыкын возьыны... - Тӥ доры пиос но ветло-а? - Туж ӧжыт. Но мугез соос бордын ӧвӧл. Пиосмуртъёсын ӧжытгес ужало модельеръёс, соин ик коллекциос ӧжыт, номыре возьматыны. - Кӧня дыр ӵоже Тӥ ӵӧжпиез юсьлы пӧрмытӥськоды? - Дышетскон чакламын одӥг арлы. Собере адями ачиз вала ни, кулэ-а солы дышетсконзэ азинтыны. Инкуазен сётэм чеберлыкез но быгатонлыкъёсыз вань ке, малы бурдъёстэ лэзёнэз? - Кыӵе ке инвисъёс усьтӥсько ик-а соос азьын? - Одно ик. Пӧрмытӥсьёсыз мон бордын ик профессиональной модель луыса ужало. Тужгес шудоосыз Парижысь, Монакоысь, Москваысь подиумъёсы но тубо. Пиосмылэн эктон коллективзы Вероника Долина дорын ужаз, тросэз нылъёсмы - Вячеслав Зайцев дорын. Кыкез али Россиысь дас устоосыз модельёс пӧлы пыро. Кемалась ӧвӧл, Санкт-Петербургын ортчем "Кизилиё подиум" калык куспо конкурсын куать номинация пӧлысь ньыляз ми устоосыз луимы. - Кызьы тӥ малпаськоды, кыӵе луоз вуоно дауре чебер нылкышнолэн тусыз? - Уг тодӥськы, мон понна ӧвӧл идеалъёс. Котькуд нылкышно ас сяменыз чебер. Галина Вячеславовна ваньмыз сярысь туж умой валэктӥз кадь. Но мынам сюлэмы ӧз чида татчы ветлӥсь нылашъёслэсь юалляськытэк. Малы соос, ваньзы модель уз луэ шуыса тодэм вылысь но лыкто татчы, асьсэды жаляса гуртын пукон интые пыдзэс нярӟыто, мугорзэс жуммыто? Юля: Уг тодӥськы, туж кельше. Мукет азьын тазьы ӧй дышетысалзы. Татын пушласянь но воштӥськыны дышето, адямиосын кусып тупатыны юртто. Лена: Али тодам ваисько, кызьы мон ветлӥсько вал кӧня ке толэзь талэсь азьло. Возьыт. Татын дышетскыны кутскем бере, мон чылкак воштӥськи, шорам тросгес йӧно пиос учкылыны кутскизы. Катя: Мынам зэмос нылмурт луэме потэ! В. Кибардина, Удмурт университетын дышетскись. Суредэз авторлэн. Дарт Чеберина Йырсиосме лӧсъяло, ваньзэс-ваньзэс гочато... Балезино ёросысь Орос гуртысь Алёна Русскихлэн йырсиез, пе, 100 сантиметр кузьда. Учке тани туспуктэмысьтыз. Но школае со йырсизэ пуныса ветлэ, сотэк зэмзэ но сьӧлтаськод. Нош кызьы уд синмаськы Можга ёросысь Лена Ивановалы? Йыраз корона пон но - принцесса дась. Туннэ та нылашъёслэн туспуктэменызы йылпумъяськом "Йырсиосме лӧсъяло..." конкурсмес. Ар ӵоже асьсэлэн чеберенызы асьмеды паймытӥзы трос нылъёс. Шуг вал кудзэсты ке висъяса кельтыны. Но конкурс - со конкурс, соин ик ми пӧлысьтызы бырйим тужгес но кузь йырсиё Чеберинаез. Со луиз Пичи Пурга ёросысь Ильинск гуртысь Людмила Николаева. - Тодмоосы, ӵыжы-выжыосы конкурсады пыриськыны косылӥзы, но мон малы ке ӧй ӝутскылы. Автобусэн мыныкум тодмотэм мурт ӵектэм бере, туспуктэмме ыстоно кариськи, - гожтэ Людмила. Мар бен, умой ӵектон сётэм тодмотэм лыдӟисьмы. Людмилаез редакциын чебер кузьым возьма. Нокызьы но пусйытэк кельтэммы ӧз луы пичи чеберинаосмес. Оксана Иванова, Влада Митрофанова но Лена Иванова "Дарт" баммес асьсэлэн чеберенызы палёмытӥзы. Таоссэ но нылашъёсты кузьымъёс возьмало ни. (Сое басьтон понна жингыртэ редакцие 21-37-14 телефонъя). Нош вань мукетъёсызлы сюлмысьтымы тау кариськом конкурсамы пыриськемды понна. Эн куатаське, азьпалан - выль конкурсъёс. Лыдӟе "Дарт" баммес, вите ялонмес! Гожтӥськон - 2001 Бырйы кельшымонзэ Шаерамы азьланьтӥсько газет-журнал лыдӟисьёслэн нуналъёссы. Солы сӥзьыса, ёросъёсысь почта ёзъёсын радъямын республикаямы потӥсь кун газет-журналъёсын тодматскон, гожтӥськон, пӧртэм конкурсъёс. Туннэ сыӵе ужрад ортче Балезиноын, Глазовын, Ярын. 20-тӥ декабре ас доразы возьмало Алнаш но Можга ёрос почта ёзъёс, 21-тӥ декабре сыӵе ужрад ортчоз Пичи Пургаын, 22-тӥ декабре - Як.- Бодьяын, 25-тӥ декабре - Кизнерын, 26-тӥ декабре - Воткинскын. *** Газет-журналъёслы гожтӥськон нунал Ижевскын ялэмын вал 13-тӥ декабре. "Известия Удмуртской Республики" газетлы гожтӥськиз 125 мурт, "Удмуртская правдалы" - 192 мурт. "Удмурт дунне" газетмылы та нуналэ гожтӥськиз 10 адями. Кызьы шуиз Ижевскысь почтамтлэн гожтӥськон ёзэныз кивалтӥсь Татаьяна Донская, одӥг нунал понна та буйгатскымон лыдпус. Нимысьтыз комиссия люкаса: ӵуказеяз ортчытэмын вал лотереяен шудон. "Удмурт дуннелэсь" кузьымзэ - пыжиськемъёсын но пӧраськемъёсын яркыт буёло книгаез утӥз Ирина Архиповна Вахрушева. Л. Малых. Пенсиосъя фондлы - 10 ар Ужасьтэмъёслы пенсия тыриське ужасьёслэсь выт басьтэм чотын. Озьы егитъёсыз сюдо арлыдоосты, асьсэос пенсие потытозь. 1991-тӥ арозь Россиын ӧй вал пенсиослы коньдон висъясь нимаз ёз, пенсия тыриськиз кун бюджетысь. Экономика удысын шуг-секытъёс кылдэм вакытэ Россиысь Пенсиосъя фонд одӥгез пайдалыко амал луиз. Валютая калык куспо фондысь экспертъёслэн эскеронъёссыя страхование амалэн выт бичан тужгес но ӟечлыкоен лыдъямын. Пенсиосъя фондлэн Удмуртиысь ёзэз дас ар ӵоже тыршиз выт бичаны но дыраз пенсия тырыны. Со валтӥсь ужпум вал. 1998-тӥ арын августэ луэм кризис пенсиос тыронэз кык толэзьлы ӝегатӥз. Нош 1999-тӥ арын 24-тӥ августлы шаерамы пунэм тыронъёс ӧз кыле ни. Вань пенсионеръёс со дырысен пенсизэс ӝеганъёстэк басьто. Сыӵе азинсконъёс басьтэмын Пенсиосъя фондлэн ёзаз ужасьёслэн ӟеч тыршеменызы, республикаысьтымы министерствоослэн но ведомствоослэн одӥг кылысь луэменызы. Выт бичанъя таяз арлы план быдэстэмын 29-тӥ сентябре. Али бадӟым уж нуиське пунэм тыронъёсъя. Вераны кулэ, та лыдпусъёс пумен улӥе лэзисько. 1998-тӥ арын выт 41 процентэз тырымтэ ке вал, 1999-тӥ арын 8,3 процентозь вуиз. Нош 2000-тӥ арын 9 толэзь куспын 5,8 процентозь лэзиськиз. Россиез но Урал улосвылэз басьтоно ке, Удмуртиысь ёз вылӥ азинлыкъёсын ужа. Выт тросгес басьтэмен, таяз арын пенсиосты ньыль пол будэтыны луонлык кылдӥз: феврале, мае, августэ, ноябре. 1999-тӥ арен ӵошатыса, шоро-куспо пенсилэн быдӟалаез 1,6 пол йылӥз - 1-тӥ ноябрьлы со луиз 825,46 манет. Удмуртиысь пенсионеръёслы улыны чаклам дун тупатэмын 769,44 манет. Арлыдоослы но ужаны быгатӥсьтэмъёслы юрттон вылысь, Пенсиосъя ёз висъяз 7479,1 сюрс манет. Со пӧлысь быдэн 350 сюрс манет висъямын Арлыдоослэсь но инвалидъёслэсь нуналзэс ортчытыны; Геронтологической центрлы - 2319,2 сюрс манет; пенсионеръёслы газет гожтонлы - 291,1 сюрс манет, инвалидъёсты но ужысь ветеранъёсты йӧнатонлы - 514,3 сюрс манет; шуге-леке сюрем пенсионеръёслы но инвалидъёслы юрттэт сётэмын 65,2 сюрс манетлы. Со сяна, 45 сюрс манет висъямын интернат юртъёсын улӥсьёслэсь улонзэс умоятыны но сиён-юон басьтыны. *** Ижевскысь Операя но балетъя театрын толон ортчиз Россия Федерациысь Пенсиосъя фондлы 10 ар тырмонэз сӥё-дано пусъён. В.МОРЯКОВ, Россия Федерациысь Пенсиосъя фондлэн удмурт ёзэныз кивалтӥсь. Дарт Гуртысь егитъёс Сямзы ӧвӧл шаян, Медаз кылы ишан Сюмсиын егитъёс сокем номырин но уг висъясько кадь. Тэк, асвактазы уло, нунал пӧрат ужзэс быдэсъяло. Но татысь егитъёслэн азьветлӥсьсы Татьяна Мурашкина со пумысен шум гинэ потэ. "Со понна зӥбытэсьгес, туала мода (юон, эрказъяськон, наркотикъёс) сьӧры кыстӥськыны уг дырто", - шуэ со. Огвакытэ егитъёс котькытын сямен ик асэрказы лэземын вал. Администрациын нимысьтыз отдел кылдытэмзы бере соослы тросгес саклык висъяны кутскизы: ортчыло кенешъёс, шулдыръяськон ӝытъёс, тунсыко пумиськылонъёс. Умой радъямын егит семьяосын ужан. Эктон-кырӟанлэсь, психологлэн кенешъёсызлэсь тросгес таосыз кулэясько улон интылы. Соин ик районысь администрация "Удмуртиысь егитъёс" программая кылем арын 12 семьялы корка пуктыны ссуда висъяз. Туэ 6 семьялы коньдонэн юрттэт сётӥзы, 3-езлы - тэль. Азьвыл гуртъёсысь егитъёс городъёсыгес кошко ке вал, али доразы кылё. Вань солэн умой но, урод но палыз. Огласянь: кытын вордскид, отын ярад (сюлмоосыз тэк ук пуко), мукет ласянь - дышетскытэк кылё. Али районын 3 сюрс егит мурт лыдъяське. Тодӥськоды-а кӧня мурт ужа соосын? - Кык, - вера татьяна Григорьевна. - Тросгес луысал ке, оло, улонмы но шулдыргес потысал. Зэм, али шаерысьтымы Егитъёсын ужанъя кун комитет гуртлы быдэ уполномоченнойёс пуктыны луонлык шедьтӥз. Уждунзы ичи ке но, адямиос мыло- кыдогес ужаны кутско. Ужез дунъян дуно ук. Тани Васькиноысь Наташа Рыбакова быдэсак ужез пӧлы выемын. Вылаз ик, со культурая училищеын дышетсконзэ но азинтэ на. Мон юано кариськи ёросысь удмуртлыклэн азинскемез сярысь. Вань-а егитъёс пӧлын ас калыксы понна "висисьёс"? Татьяна ачиз "Ёрос кенешлэн" правленияз пыре уго. Но азьветлӥсьлэн верамезъя, удмуртлык соосыз уг висьыты. Ми, пе, алнашъёс ӧвӧл ук, кызьы вань, ярам. Концертъёс, пумиськонъёс ортчыло... Ӝожгес ик, тодӥськод ке, та районын одӥг школаын но удмурт кылэз уг дышето, азьветлӥсьёс валтӥсь удмурт газетэз уг лыдӟо шуыса. З. Рябинина. Дарт Ӝужась кизилиос Бурдъёсыз - Тӧдьы малпанъёс Синмаськи, вожъяськи, ӝоже уси. Синмаськи пинал пияшлэн усточи луэмезлы. Вожъяськи ассэ сокем йӧно но дано воземезлы. Ӝоже уси асьме удмурт нылъёсмы но пиосмы понна. Егитъёслэн форумазы нырысетӥ нуналаз ик Тимур Даглов вань учкисьёсты ас бордаз биниз. Сцена вылын со Ельцин но, Путин но вал, мукет тодмо политикъёсты но пыӵкылӥз. Вераськыкумы шуиз: "Удмуртие мон выльысь но вуо ай - тӧдьы костюмен, тӧдьы мерседесэн, тӧдьы властен". Удмурт Коля яке Петя вераны дӥсьтоз-а - мон президент луо. Пинал визьмыныз, оло, вералоз но, нош будэмезъя дӥсьтонэз тырмоз меда? - Тимур, кӧня ке кыл ачид сярысь. - Вордӥськи мон Дагестанын, Махачкала городын. Ӝыны арзэ дышетскисько ини Москваысь Румянцев нимо эстрадно-цирковой кун училищеысь вераськон (разговорной) жанръя факультетын. Пародиосын вырисько. - Нош кин гожъя тыныд пародиос? - Аслым кылдытъяно луэ. Кинэ ке курон понна, коньдон тыроно угось. Татын, Удмуртиын, ваньмыз кызьы ке но но ас эрказ пӧрмиз. Сцена вылэ потай нокыӵе сюлмаськонъёстэк, керӟегъяськонъёстэк. Москваын со котькуд выростэ, кылдэ чаклатэк уг луы. - Пародистъёс пӧлын вань-а кин ке но адӟем карымон муртэд? - Ӧвӧл. Малпасько, асьмелэн ӧвӧл сыӵе адӟем карымон пародистъёсмы, соослы асьсэлы трослы дышетскыны кулэ на. - Кемалась-а та ужен выриськод? - Пичи дырысен. Но дугдылытэк пародиос кылдытъясько шуыны уг луы. Куд-ог дыръя уже уг мыны, ог интыям лёгаськисько. Но ваньмыз азьпалан ай. - Кызьы сыӵе пинал мурт сюриз таӵе бадӟым форуме? - Удмуртие вуи дагестан калыклэн нимыныз. Мон тодмо Москваысь Дагестанлэн представительствоеныз, концерт номеръёс но возьматъяме вань доразы. Отын ужасьёс ик ыстӥзы монэ татчы аслэсьтым быгатонлыкъёсме возьматыны. Малпасько, Удмуртие мон азьланяз но вуыло на. - Тимур, кыӵе мылкыд кельтӥз тыныд Удмурт шаер, форум? - Туж кельшиз. Нош тужгес но сюлме йӧтымонэз - туж шуныт пумитазы. Кавказысь калыкъёс шоры котькытын пӧртэм сямен учко, нош татын ми эшъёс пӧлын вал, нокин ми шоры уродэн ӧз учкы. Мон аслым туж трос эшъёс шедьтӥ. Форуме лыктӥ ке но концерт номеръёс возьматыны, пыриськи пӧртэм ужрадъёсы. Аслым ачим трослы будӥ кадь потӥсько. Монэн лыдъясько бере, озьыен, мон пичи адями ӧвӧл татын. - Кызьы учкиськод Чечняын кылдэм югдур шоры? - Ваньмызлы валамон, мар бордысен Чечняын ож пуромиз. Со - политикъёслэн шудонъёссы, кин тросгес капыртыны быгатоз нефтез. Визьмоосыз чеченецъёс, кудъёсыз валазы мар война та, Москвае улыны мынӥзы. Москва бадӟым, инты ваньмызлы шедёз. Нош мынам уже - Чечняез серекъян. Чечняез серекъяса, мон серекъясько политикъёсты, Ельцинэз но вераса. - Тимур, азьланезлы кыӵе малпанъёсын улӥськод? - Ас азям мон туж бадӟым ужпум пуктӥсько. Туннэ кивалто ке Абдулатипов, Путин, ӵуказе соос интыын луомы мон, мукетыз, куинетӥез. Соосты воштӥсь егитъёс будо. Азьланьын милемды возьмало бадӟымесь ужъёс - коньдонмы но, ниммы но, кужыммы но луоз. Луоз Россия но. Москва но соку ик ӧз лэсьтӥськы ук. Мыным али дас вить арес, ньыльдон аресозь будо на. - Кин тынад юрттӥсьёсыд-эшъёсыд, семьяед? - Улонэ сюрес мон лёгисько аслам быгатэменым, кужыменым. Коньдонэн но нокин уг юртты, мылкыдме но бурдъясьёс ӧвӧл. Атае мынам ӧвӧл, ышиз-быриз кытчы ке. Вань анае но пичи братэ. Пичи дыры туж секытэн ортчиз. Анае нокытын уг ужа, юртъер котырез утялтэ. Махачкалаын мукет сямен уд но улы. - Шуом, удмурт нылъёс, пиос пӧлысь кинлэн ке пародист луэмез потоз. Секыт-а шедьыны тӥляд училищеяды? - Туж секыт. Дагестанысь правительство мыным номырин ӧз юртты, направление гинэ но ӧз сётэ. Мынӥ, аслым оскыса. Туж бадӟым мылкыд, чиданлык кулэ экзаменъёс пыр потыны. Жадёнэз валатэк ужано на. Конкурс туж бадӟым, одӥг интые 250 мурт. Пырыны быгатӥ, дышетскисько. Адями артист луыса уг вордӥськы, со понна тыршыны но тыршыны кулэ. Вань талантэн артистъёс но таланттэм. Россиысь эстрадаын али вылӥе тросгес ӝутӥськемын таланттэм артистъёс, нош быгатӥсьёсыз улӥе кылемын. Вакытэз сыӵе. Но артистъёс сярысь гинэ озьы вераны уг луы. Сыӵе ик югдур политикъёс пӧлын но, колхозэн кивалтӥсьёс пӧлын но. *** Пинал арлыд, тӧдьы малпанъёс. Чигиськыны медаз шедьтэ вылэм соос. Л. Малых. Туспуктэмез А. Поздеевлэн. Спорт огазея ваньзэс Туннэ Ижевскын усьтӥськизы бадминтонъя Россилэн Нимысьтыз Олимпиада шудонъёсыз. Отын ӵошатскозы визьзыя бере кылись инвалидъёс. Олимпиада шудонъёсы пыриськоз Россилэн пӧртэм улосвылъёсысьтыз дас ньыль команда, кык команда луоз Удмуртиысь - котькудаз быдэн ньыль мурт. Ӵошатсконъёсты радъянэз ас вылаз басьтӥз республикаысьтымы "Нимысьтыз Олимпиада" общественной огазеяськон. Бадминтонъя та ӵошатсконъёс ортчозы Ижевскысь технической университетлэн 2 номеро спортзалаз. Л. Кимова. СЕССИЯ АЗЬЫН Огез депутат пӧся, мукетыз бабыса улэ. Котьку озьы луэ: выль арлы бюджетэз дасяно но кутоно - сотэк улонлэн радыз ышоз. Соин ик Кун Кенешысь депутатъёс но пӧсяса выро на вуоно арлы чаклам бюджет бордын. Та нуналъёсы депутатъёслэн котькудӥз ик комиссиез вань лыдпусъёсты сак эскеризы- учкизы на. Тыршизы та ужез 19-тӥ декабрёзь йылпумъяны - туннэ усьтӥське Кун Кенешлэн 14-тӥ сессиез, отын эскериськозы кык бадӟым ужпумъёс: бюджет но 2001-тӥ арын Удмуртиез азинтонъя программа. Кылем арняе та ужпумъёсъя кенешиз М. Кокоринлэн Законъёсты быдэсъямез чакланъя, калыкез кышкытлыклэсь утёнъя но гражданъёслэн правооссыя ялан ужась комиссиез. Комиссилэн адямиосыз кылзӥзы Югдурез утёнъя, Юстицияя министерствоосысь, Вылӥ судысь но озьы ик тылпуэн нюръяськонъя управлениысь но военной комиссариатысь кивалтӥсьёсыз. Та министерствоос сярысь ке верано, соос возисько федеральной бюджет чотын. Но республикалэн бюджетысьтыз соослы воксё но коньдон висъятэк шонер ӧй луысал, угось соос республикалэсь куронъёссэ быдэсъяло. Соин ик 2001-тӥ арлы чаклам бюджетын та удысъёс палэнэ кельтэмын ӧвӧл. Кылсярысь, тылпуэн нюръяськонъя управленилы вуоно арын висъяны чакламын 34 миллион манет. Но солэн кивалтӥсез М. Камалетдинов со лыдпусэн соглаш ӧз луы. Ӧжыт, пе, 62 миллион манет куриз. Куронзэ тазьы валэктӥз: вань техника, пе, вужмемын, укмыс этажозь тубатъёс но уг тырмо. Депутатъёс та удыслы ватсаса коньдон ватсаны соглаш луизы. Берло аръёсы асьме водительёс ялан ӝожтӥсько сфетофоръёслэн тӥяськемзы но сюресъёс кузя пуктылэм пусъёс (знакъёс) вылэ. Нош кин меда соослы кузё луэ? Соос Россилэн ваньбурез лыдъясько вылэм. Нош Москва кыдёкын, асьмеос улӥськом татын, асьме сюресъёстӥ ветлӥськом. Сое лыдэ басьтыса, кылем арын республикамылэн бюджетысьтыз сфетофоръёсты но сюрес пусъёсты утялтыса возён понна 1,5 миллион манет висъямын вылэм. Та ужен вырись монтажной управленилэн кивалтӥсез туэ 6 миллион манет куре. Со, пе, сокем трос ӧвӧл, угось быдэс республикаын вань сфетофоръёсты тыро-пыдо ужатон понна 18 миллион манет кулэ, со пӧлысь Ижевсклы гинэ - 10 миллион. Депутатъёс та куронэз умоен лыдъязы. Бюджетын чаклам коньдон лыдпусъёс озьы ик йылтэмын вал военкоматъёсты возён понна. Судъёслэн ужамзы сярысь ке верано, вуоно арлы бюджетын нимысьтыз ёзэт (статья) висъямын мировой судьяослэсь ужзэс радъянлы. Россилэн 31 улосаз соос кылем арын ужазы ни, асьме дорын - ӧз, соослы бюджетын уксё висъямтэен сэрен. Кун Кенешысь депутатъёслэн мукетыз комиссиез - Улон-вылонэз радъян политикая комиссиез (кивалтӥсез Ф. Фёдорова) озьы ик малпа бюджетлэн интъетаз куд-ог ватсанъёс но воштонъёс пыртыны. Кылсярысь, бюджетын учкемын нылпи пособиосъя 1999-тӥ�2000-тӥ аръёсы люкаськем тыронъёслы 200 миллион манет гинэ висъяны, нош кулэ 457 миллион манет. Озьы ик комиссилэн адямиосыз чылкак пумит луо коммунальной услугаосты 50-60 процентозь будэтонлы. Калык со тыронъёсты уз вормы, шуиз Ф.Фёдорова, соин ик ми куриськом, со лыдпус 12 процентлэсь вылӥын медаз луы шуыса. Эмъюмъёсты арлыдоослы дунтэмен висъян та дырозь умой радъямын ӧвӧл. Фатия Фёдоровалэн верамезъя, та ужез администрациослэн кивалтӥсьёссылы оскон тазьы берытске: Грах ёросын эмъюмъёсты дунтэмен висъян адямилы быдэ быдэн 3 манет усе, Красногорск ёросын - быдэн 30 манет. Озьы медаз луы шуыса, та ужез одӥг кузёлы, Тазалыкез утёнъя министерстволы, осконо. Депутатъёслэн чакламзыя, бюджетын, пе, учконо, котькуд ужасьтэм адямилы дунтэмен эмъюмъёсты висъян быдэн 200 манет тыр мед усёз шуыса. Кыкезлэсь ик комиссиослэсь бюджетэз сэрттон бордын ужамзэс чакласа малпанэ вуиськод, депутатъёсты отын учкем лыдпусъёс уг буйгато. Сыӵе мылкыд кельтӥз 14-тӥ декабре Кун Кенешлэн юртаз ортчем депутатъёслэн нуналзы но. Со озьы ик сӥземын вал вуоно арлы чаклам бюджетлэсь инъетсэ но Удмуртиез азинтонъя программаез эскеронлы. Депутатъёс уно ӵектонъёссэс но куронъёссэс веразы - ма, бюджет нош ик 18 процент пала дефицитэн чаклкмын ук, нош законъя со 15 процентлэсь вылӥын луыны кулэ ӧвӧл. Озьыен, бюджетлэн коньдонэн тырмымтэез нош ик калыклэн улонэз вылын шӧдӥськоз. Р.С. Депутатлэн нуналаз та валтӥсь ужпумъёсты эскеронэ пыриськиз 33 депутат гинэ. Нош асьмеос парламентэ 100 депутат бырйим вал. Шӧдске, тросэзлы калыклэн кулэяськонъёсыз нокыӵе ик уг пото. Т.БАННИКОВА. Амалъёс троч - быръе кельшисьсэ Гажано эшъёс! "Кенеш" журналлы гожтӥськон йылпумъяськытозь кылиз одӥг арня. Кыӵе ке муген беромыны ӧд быгатэ-а? Кылем дыр ӵоже югдурдэс тупатыны вуоды на. Соин валче тодады вайытӥськом вуоно ар понна гожтӥськон амалъёсмы но дунъёсмы сярысь. Почта пыр басьтӥсьёс 65 манет но 40 коньы тыроно луозы. Толэзьлы быдэ выль номер вуоз. Ижын улӥсьёс сярысь сюлмаськыса, туэ "Информпечатен" огкыл гожтӥмы. Озьы выль амал кылдӥз: котькудӥз улон интыезлы матысь киоск пыр басьяны быгатоз. Быдэс арлы гожтӥськон дун 58 манет. Уноез ёросъёс "Кенеш" журналэз редакциысь басьяны дышизы. Та амаллэсь туэ но ӧм куштӥське. Ми дорын гожтӥськон дунлэн быдӟалаез 45 манет. Быдэс семьяен лыдӟыны ярамон журнал выль но выль лыдӟисьёссэ ас котыраз люканы дась. Ӟеч мылкыд кельтӥз Финляндиын ортчиз Дуннеысь финн-угор калыкъёслэн куинетӥ конгрессы. Солэн ужаз пыриськиз данак калык. Удмуртъёс, поръёс, комиос, хантыос, мансиос, инсоръёс, финнъёс, эстонъёс, мадьяръёс, карелъёс, ливъёс, ненецъёс, саамъёс но данак мукет финн-угор выжыос лулысь-сюлмысь пыриськизы та бадӟым ӧтчамын ужпумъёсты эскеронэ. Конгрессэ лыктэмъёсты ӟечкыласа вераськизы Финляндилэн Президентэз Тарья хелонин, Эстонилэн Президентэз Леннарт Мери, Венгрилэн Президентэз Ференц Мадл, мукет адямиос. Бадӟым ӧтчаме люкаськылэмъёслы ӟеч кылъёсын озьы ик вазиськиз Финляндиысь Парламентлэн Тӧроез Риитта Уосукайнен. Куинь нунал ӵоже суоми музъем вылын дасямын данак кулэ ужкагазъёс, лыдэ басьтэмын трос ужпумъёс. Кенешонъя комитетлы тӧрое выльысь быръемын солэн азьвыл кивалтӥсез Валерий Марков. Куинь нунал ӵоже вал уно тодматсконъёс, трос пӧртэм ужрадъёс. Дуннеысь финн-угор калыкъёслэн ньылетӥ конгрессы ортчоз 2004-тӥ арын Эстониын, солэн шоркараз - Таллиннын. Е. Ромашова. ПОЛИТИКА Арня ӵоже дуннеын странаын шаерын Толэзьлэсь ятыр ортчем бере гинэ США-ысь калык тодӥз ньыльдон куинетӥ президентэзлэсь нимтулзэ. Со - Джордж Буш. Мукетыз кандидат Альберт Гор пумитъяськемысь дугдӥз. "Мон келяй шуыса верасько но быдэс нациез ӧтисько выль азьветлӥсьмы котыре огазеяськыны", - шуиз со. Солэсь азьвыл Гор телефон пыр жингыртӥз Джордж Бушлы но сое вормеменыз ӟечкылаз. Пусйыны кулэ, США-лэн Конституциезъя, страналэн выль президентэз ужаны кутске инаугурация ортчем бере. Со ужрад ортчоз 20-тӥ январе Вашингтонын. Отчы пыриськозы Америкаысь Конгресслэн кыкезлэн ик палатаосызлэн членъёсыз но быдэс дуннеысь куноос. Туннэ нуналлы тунсыко югдур кылдэмын, президент кема дыр ӵоже тодмо ӧй вал бере, уно сюрс ӧтён билетъёс нимтэк ыстэмын. Присяга бере Джордж Буш Тӧдьы юртэ мыноз. Сценарийя сюрес вылын сое пумитаны но ӟечкыланы кулэ уно адямиос. Озьы пӧрмоз меда? Тросэз кышкало, таяз учыре пумитъяськисьёс медаз луэ вал шуыса. Кылем арня вискын ужамысь дугдӥз Чернобыль АЭС. Кысэмын солэн берпуметӥез, куинетӥез, ужась энергоблокез. Тодады вайытом, станция интыяськемын Киев улосвылын Припять шур вылын. Солэн нырысетӥ энергоблокез ужаны кутскиз 1978-тӥ арын. 1986-тӥ арын ньылетӥ энергоблоказ шудтэм учыр луиз. Радиоактивной кылем-мылемъёс кырсёмытӥзы Украиналэсь, Белоруссилэсь, Россия Федерацилэсь улосвылзэс. 30 иськем зонаысь вань улӥсьёс поттэмын. Киевысь "Украина" дворецысен ужрадэн кивалтӥз ачиз президент Леонид Кучма. Со вераськоно луиз ӟуч кылын, угось станциысь персонал сизьымдон процентэз - ӟучъёс. Та нуналлы сӥзьыса, арня ӵоже ини Украинаысь тодмо кырӟасьёс но коллективъёс концертъёс сёто. Нош ЧАЭС-ын ужасьёс солы уг шумпото, станциез дугдытон соос понна бадӟым ыштон выллем луиз. Бен, станция дугдытэмын, но таин уж уг йылпумъяськы. Энергоблокез быдэсак кысон понна вуоно арын кулэ луоз 16,5 миллион гривна (82,5 миллион манет). Нош Украиналэн бюджетаз та коньдон чакламын ӧвӧл. Россилэн Президентэз Владимир Путин ортчем арня вискын вуылӥз Кубае. Аэропортын сое пумитаз ачиз Фидель Кастро. Озьы со возьматӥз, макем вылӥ дунъя Россилэсь выль кивалтӥсьсэ. Азьвылъёсыныз кусыпъёсыз тэшказы вал. Угось Россия берло 10 ар ӵоже тунаса улӥз: кулэ-а солы Куба? Нош азьвылгес 30 ар ӵоже вынлыко кунлэн экономикаяз уно миллиард доллар коньдон кисьтӥз. 90-тӥ аръёсы Кремльын шуизы: асьмелы но коньдон уг тырмы бере, Кубалы юрттыны ум быгатэ ни, Вашингтонын но шорамы кырыж учко. Гаванаысь коммунистъёслэн режимзы йыркурзэ ӧз ваты, тысь вылӥ кивалтӥсьёс лек кылъёсын тышкаськылӥзы Москваез. Но Кремльлэн кузёез воштӥськиз. Кык кунъёслэн кусыпъёсазы вуиз выльдӥськон вакыт. Москва валаз: бен, идеология ласянь пӧртэмлыкъёс вань, но соин валче экономикаын ваче ужанэз дугдытоно ӧвӧл. Озьы тӥни Владимир Путин но Фидель Кастро выльысь эшъяськонэз юнматон сярысь вераськизы. Россия Кубае берытскыны дась. Кыкезлы ик кунъёслы пайда ваись ужъёс данак: кылсярысь, Хурагуаысь АЭС-эз йылаз-пумаз вуттон, нефтеперерабатывающей заводъёсты выльдон, никелевой комбинатэз лэсьтон. Выль ар азьын США-лэн гражданинэзлы Эдмонд Поуплы дуно кузьым лэсьтӥз Владимир Путин. Шпионаж понна пытсэт сьӧры 25 арлы келям разведчикез президентмы жаляз, помилование сярысь документ улэ гожтӥськиз. Та пумысен со шуиз: Поуплэн выллем ужъёс сӧрыны кулэ ӧвӧл дуннеысь кык быдӟым кунъёслэсь кусыпъёссэс. Э.Поуп мозмытскемез бере нимысьтыз рейсэн ӝегатскытэк Германие лобиз. Америкалэн одӥгаз военной базаяз солэсь тазалыксэ эскеризы, угось Поуп ракен висе. Собере со пресс-конференция люказ. Журналистъёслы со вераз Лубянкаын пукемез сярысь, ивортӥз, табере со Россие ноку но уз берытскы ни шуыса. Мар ватсалод та борды, Поупез мозмытозы шуыса азьло ик тодыны луэ ни вал. Но разведчикез суд улэ кыскон возьматӥз: Россия аслэсьтыз шараяны лэзьымтэ иворъёссэ уте, нош кырмем шпионъёсъя законъя кыл кутозы. Туннэ кутске Кун Кенешлэн дас куинетӥ азьвыл чакламтэ сессиез, собере ик луоз ньылетӥ сессия. Отын эскерыны ӵектэм ужпумъёс пӧлысь одӥгез бадӟым ужпум - вуоно арлы бюджетэз кутон. Вераськон ӟырдыт луоз, дыр. Угось ӵапак та документэн герӟаськемын ук, кызьы азинскоз соиз яке таиз удыс. Кылсярысь, тани музъем ужасьёс ик куро вуоно арлы бюджетын гуртлы уногес коньдон висъяны. Ю. АЛЕКСАНДРОВА. АРХИВЫСЬ ДОКУМЕНТЪЁСЪЯ Удмуртия ХХ дауре 1964-тӥ ар Апреле странамы пусйиз Никита Сергеевич Хрущевлэсь 70 арессэ. Ушъян кылъёс трос верамын вал ке но, КПСС-лэн нырысетӥ секретарезлэн йыр вадьсаз "сьӧд пилемъёс" люкаськыны кутскизы. СССР-лэн вылӥ кивалтӥсьёсыз калыклы нырысьсэ шара ивортӥзы 1963-тӥ�1964-тӥ аръёсы экономика лябӟиз шуыса. Удмуртиын промышленность огсыр ужа ик на вал. Кылсярысь, Ижевскысь подшипник поттон завод изъянэн ужасьёс пӧлысь выжиз азьмынӥсьёс радэ, Воткинск ГЭС-ысь электрокужым басьтыны кутскыса. Удмуртиын трос удысъёсын пӧртэм машинаосты ужатыны, выль технологиосы выжыны луонлык кылдӥз. Ижевскысь Машина поттӥсьёслэн культура дворецазы ортчиз быдэс союзлэн кенешез. Отын вераськон мынӥз промышленностьын выль азьмынӥсь амалъёсты кутон но ижевчанъёслэсь быгатэмзэс СССР-ысь ваньмаз машина лэсьтӥсь заводъёсын уже пыӵатон сярысь. Калык хозяйствоын басьтэм азинсконъёсты Москваысь возьматонэ Ижевскысь андан ӵыжатӥсьёс ваиллям андан профильёссэс. Заводлы со понна сётэмын вал И цтепенё диплом, нош 24 ужась - зарни, азвесь но бронза медальёс. "Калык" приёмник ВДНХ-лэсь ИИИ степенё дипломзэ озьы ик басьтӥз Сарапулысь Орджоникидзе нимо радиозавод. Ува ёросын усьтэмын вал Архангельск нефть поттон инты. Мастерлэн Б.П.Деминлэн бригадаез усьтӥз кужмо скважина, отысь нуналскын 25 кубометр нефть кыскыны луиз. Кирпич но пеноблок поттыны кутскиз Ижевскысь лэсьтӥськон керамикая завод. Ижевскын Спортъя дворец ӝутӥзы машина лэсьтӥсьёс. Глазовын Ленин но Короленко ульчаос вискын ӝутыны кутскемын 9 этажъем улон корка, Удмуртиын со нырысез сыӵе ӝужыт корка луиз. Адӟем карымонэз данак вал культура удысын но. 14-тӥ мае Ижевскын Герман Корепановлэсь удмурт симфонизэ шудӥз Москваысь симфонической оркестр, огез устоез дирижёр Вероника Дударева кивалтэм улсын. Удмурт пединститут художественно-графической факультетысьтыз нырысетӥ выпусксэ поттӥз. Удмурт книжной издательство нимамын "Удмуртия" шуыса. Камбаркаын усьтӥськиз шаертодонъя музей. Та арын гужем Н.С.Хрущев КПСС-лэн ЦК-езлэн Президиумаз ыстэ гурт удысэн кивалтонэз, выльдонъя проектсэ. Октябре, сое эскерон вылысь шуыса, Президиум люкаське. Со вакытэ Хрущевлэн тушмонъёсыз тырмыт вал ни. Ачиз Хрущев кенешын ӧй вал, та вакытэ со Сьӧд зарезь дурын шутэтскиз. Президиум, Хрущевлэн огъя политикаеныз соглаш луымтэен, огкылэ вуэ Хрущевез нырысетӥ секретарьлэн ужысьтыз мозмытыны. Сое ӝегатскытэк Москвае ӧтё но отставкае потыны куро. 13-тӥ�14-тӥ октябре уин ЦК-лэн Пленумез Хрущевез ужысьтыз мозмытэ, со пересь ни, тазалыкез урод ни шуыса. ЦК-лы нырысетӥ секретаре быръемын вал Леонид Ильич Брежнев. А.Дерюшев, Удмурт Республикаысь ЦДНИ-ын ужась. Москваын ортчем кенеше ветлэмъёс тодматско ижевчанъёслэн промышленностьын басьтэм выль азинсконъёсынызы. Верасько нылпос Ваньзэ быгатӥсь адями Дышетӥсь урокын адями сярысь вераськон нуэ. - Пиналъёс вералэ ай, мар бен быгатэ адями? - Космосын лобаны, - шуэ пичи Коли. - Мур ву пыдсын уяны, - ватса артысь эшез. Берпум парта сьӧрын пукись Серги кема гинэ малпаськиз, собере шуак мынектыса вазиз: - Адями адямиез но лэсьтыны быгатэ. Муспотон пужыос. - Оли, шунды сиосын пужыятэм ымнырыд кыӵе муспотон ук! Али ик чуп карысал, - шуэ анай. - Шумпотыса чупаны лэзьысал, вань сӥтьпужыосылэсь мозмытысалды ке, - ӵыжектыса пумитаз вазиз нылок. Пушнераськись нумыр Быдэс час удалтымтэ чорыгамзы бере, пичи пияш атаезлы шуэ: - Пушнер сиись нумыръёсыдлэсь, атай, вань чорыгъёс кышкатско, пушнерасько, дыр. Лушкаськись коӵо - Воксё абдрасько, курегъёс луыса но курег пузлы ёрмоно. Олокинэз пузкарысь соосты нуллэ, - пӧсекъя анай. - Ма, куӵо коӵоос йыртэмало, вылды, уть ай, тӥни огез али но забор вылын возьмаське, - выре валэктыны пияш, киысьтыз курег пуэз ӝогак кисыяз ватыса. Пась кисыысь тӧдьы коко шлач гинэ сандаль вылаз усе но пальккиське. - Вот кыӵе куӵо лушкаське вылэм, - лулскиз анай. Кечсинпельёс - Нылы, уть-ай кыӵе чебер кечсин сяськаосты тыныд ваи, - шуэ атаез пичи нылызлы. - Ма... ма... кыӵе пельёсты? - нокызьы уг валатскы атай. - Уд адӟиськы шат? Тани - ӵужмыт синъёс, котыраз тӧдьы пельёс. С. Федулова, Ижын улӥсь. "Ижсталь" данзэ ӧз ышты Шӧдтэк шорысь рыноке выжемен валче, куд-огез предприятиос асьме туж секыт югдуре шедизы. Сое мон валай Ижевскысь андан пӧзьтон заводлэн улонысьтыз но. Калыклы кулэ луись огшоры эголъёс но мукет вузъёс поттӥсь цехъёс ужамысь дугдӥзы. Озьы уно адямиос ужтэк кылизы. Озьы ке но, "Ижсталь" огазеяськон выль сямен ужаны кутскиз. Ӧжытгес андан поттыса, солэсь ӟечлыксэ будэтӥз. Предприятиын выль технологиез пыӵатэмзы понна, кылем арын данъязы Россия Федерациысь вылӥ наградаен. Петр Великий премия нырысьёсыз пӧлын сётӥзы генеральной директорлы В. В. Моисеевлы. Туэ "Ижсталь" нош ик Международной Координационной комитетлэсь "Хрусталь Ника" приззэ басьтӥз. Генеральной директорлы, Удмурт Республикаысь Кун Кенешлэн депутатэзлы В. В. Моисеевлы "2000-тӥ арлэн директорез" ним сётӥзы. Озьы ик ӟеч андан поттэмзэс Парижын калык куспо призэн пусйизы. Со сяна, "Ижсталь" вормисе потӥз Россияын ужез но уждунэз радъянъя конкурсын. Со понна асьме правительство предприятилы нимысьтыз диплом сётӥз. Та примеръёс возьмато, секыт аръёсы но Ижевскысь андан пӧзьтӥсьёс ужзэс ӟеч радъяны быгатозы шуыса. Бен, соослы азьло басьтэм данзы но юрттӥз. 1966-тӥ арын вылӥ ӟечлыко продукция поттэмез понна, Копенгагенын предприятилы сётӥзы "Зарни глобус" приз. Ар ортчыса, Мехикоын "Бриллиант Кизили" приз кузьмазы 1998-тӥ арын "Ижсталез" Удмурт Республикаын "Устоез экспортёр" нырысетӥ степенё Дипломен пусйизы. В. Чернов. КЕЧОЛЫСЬ УСТОЧИОС Кырӟан вордске сюлэмын Гуртазы палэнысь артистъёс вуымтэысь кечолъёс уз ёрме - соос асьсэос быгатэменызы кинэ шедем паймытозы. Любовь Васильева тани шаерамы улӥсьёслы ӟеч тодмо ни. Дыр вуоз ай, мукетъёссэ но Кечол усточиосты Ижевскысь бадӟым сцена вылысь кылзыны-адӟыны быгатом, сюлэмез бугыртӥсь кырӟанъёссы но соослэн калык пӧлы паськыт вӧлмозы. Кечол сельсоветэ куать гурт пыре, нош клубзы одӥг. Отын тыршо ас ужзэс ӟеч тодӥсь- валась специалистъёс: Галина Калистратова Кечолысь культура юртэн кивалтэ, нош Ирина Баранова но Виктор Романов - инструкторъёс. Котькыӵе ужрадъёсын соосын артэ библиотекарь Валентина Баушева. Культура юртын ужало пӧртэм кружокъёс: кин хоре ветлэ, кин ас понназ кырӟа, кыӵе ке инструментэн шудэ, дас пала егит семьяос усьтӥзы асьсэлэсь клубзэс. Культура юртын ужасьёс бадӟым саклык висъяло кырӟаны-вераны быгатӥсьёслы. Солы паймонэз ик ӧвӧл, кырӟан гожъясьёс гинэ Кечолын витьлэсь ятыр, тросэз асьсэос ик кылбур но гожъяло, кырӟало но, соос пӧлын - Любовь Васильева, Виктор Романов. Кылбуръёс гожъя Наташа Макарова, Кечолысь шор ёзо школалэн директорезлэн Алексей Захарович Мурашовлэн кылъёсызъя но кырӟан гожтэмын ни. Евгений Алёшкин пиеныз аслэсьтыз кырӟанъёссэ кырӟа. Озьы тӥни, кырӟась-гожъясьёслэн творчествозылы сӥзьыса, татын одӥг ӝытэ бадӟым концерт ортчиз. Кечолъёс пичиез но, арлыдоез но кырӟаны ярато. Жаль, гуртъёсын клубзы ӧвӧл. Но культура юртын ужасьёс та югдурысь но потыны амалъёс утчало. Концертъёс возьматъяса, колхоз фермаостӥ ветло. Асьсэос но соос кырӟаны усточиос. Кыӵе ке праздник, дано нунал, нош ик утчаськоно, мар ке но выльзэ калыклы кельшымонзэ малпано. Та ласянь трос юртто школаысь дышетӥсьёс. Но культура юртын ужасьёслэн верамзыя, адямиосын берло аръёссэ секыт луиз ужаны. Дась ужрадэ но пыриськемзы уг поты, уката ик егитъёс палэнскыны туртто, тросгес борддоръёсты пыкъяса сылысалзы. Но мыло-кыдоос гурт калык пӧлын котьку шедёзы. Шуд ай гурдэ, арганчи Кечол усточиослэн вань асьсэлэн адӟем карымон адямизы, со - культура юртысьтызы инструктор Виктор Романов. Ачиз ик кылбур гожъя, крезьгур малпа, арганэн-баянэн шудэ, синмаськымон кырӟа. Вордӥськемын со Улысь Кечолын, нош арми бере, 1975-тӥ арын, Кечолысь культура юртэ ужаны интыяськиз. Дышетскиз Виктор Степанович Ижевскысь культпросветучилищеын, но дипломзэ кияз басьтыны ӧз кылды. Висеменыз йырин экзаменъёссэ эшъёсынызы ӵош сётыны ӧз быгаты, нош берло мынэмез ӧз пот ни. Тодон-валан но быгатонлык вань ни ук, крезьгур дуннеен со ас тодэмезъя гинэ ӧвӧл герӟаськемын табере. Дядяезлэн Степан Владимировичлэн туж потэ вал пизэ баянэн шудытэмез. Ачиз со гитараен, мандолинаен, балалайкаен шудӥз, кырӟаны но яратэ вал. Бускельёссы арган басьтэмысь укыр вожяськиз, пиезлы Агрызысь полухромка басьтӥз. Витетӥ классын дышетскись пияш малпаз вал, киям куто гинэ но, соку ик шудыны пӧрмыто. Нош со капчи уж вылымтэ. Дядяез но паймиз ни, басьтыны косӥд но, табере вузалом-а, мар-а, пе. Витя ӧз сётскы, школаысь бертэ гинэ но шудонзэ золъяны кутске. Крезьгур шӧдонэз солэн вылэм, одӥг гурез дышетӥз, мукетсэ. Табере шудонэзлэн бирдыосыз ӧжыт потыны кутскизы. Тазэ вузаса, хромка басьтӥзы. Кӧня ке шудӥз-мараз но, нош ик бирдыосыз ӧз тырме. Таяз учыре басьтӥзы регистрензэ шудон. Со но кема ӧз возиськы - табере Витя кияз арган кутӥз. Школаез быдтыса, пияш мылкыд кариз культросветучилищее пырыны. Дышетсконэз ӝыныё луиз, армие басьтӥзы. Служить кариз Германиын, химической войскоосын, отысен ик тӥни тазалыкез лябӟиз. Военврач соку туж жаляз пинал солдатэз, тон пие, оло, наследникъёстэк но кылёд, пе, табере. - Шудэ вань, - шуэ Виктор Степанович, - кузпалэным Анна Степановнаен ныл но пи будэтӥмы: одӥгез медик, мукетыз бухгалтере дышетскиз. Кышнояськонэн но шудэ ӧз палэнтӥськы бордысьтымы. Кышно курай 29-тӥ феврале, нош загсын гожтӥським 13-тӥ мартэ. Кышноелэн пересь мемеез соку шуиз вал, касьян арез, пе, ми ум чаклаське, со ик тӥни муг луиз семья кылдытыны. Пизы вордӥськем бере егит кузпалъёс малпало вал: со но атаезъя крезьгур дуннее кыстӥськоз. Нунызылы куать толэзь тырмиз гинэ, арган басьтӥзы, мед, пе, весь син азяз улоз, оло, шудэм потонэз улӟоз. Но пизылэн арганэн эшъяськемез ӧз поты, бырйиз медицина удысэз. Виктор Степановичлэн улоназ шуд мукет дыръя но йыгаськиз. Малпамтэ шорысь сое Пургаысь военкоматэ ӧтизы, тазалыксэ эскеризы но Чернобыле мыныны яраноен лыдъязы. Семьяеныз но умой-умой кенешыса ӧз вутты, келязы Ижевскысь сборной пунктэ. Татысен ини егит нылаш-стоматолог пиньёсыз шоры учкиз но соку ик шараяз армиын дыръяз тазалыкезлэсь лябӟемзэ. Озьы гинэ воргорон Чернобыльлэсь палэнэ кылиз. - Ӧйтӧд, кылдысалзы на меда выль кырӟанъёсы та вие? Та учырез тодам ваисько но нош ик шуисько: шуд вань на вылэм. Виктор Степановичлэн кырӟанъёсыз трос гинэ люкаськизы ни, нимаз сборник поттыны луысал. Но фонограмма гожтыны трос уксё кулэ. Нош Степан Широбоковлэн кылъёсызъя гожтэм "Нырысетӥ яратон" кырӟанзэ "Айкай" ансмбль но кырӟа. Воргорон ачиз но ӧз тодылы со сярысь нырысь-валысь. Гуртысьтызы нылаш Фая Галаева отын практиказэ ортчем, соку ик тӥни та кырӟанэн айкайёсты тодматэм. Кырӟан гожъян сярысь ке верано, Виктор Романовлэн мылкыдыз бугыртӥське тулыс. Инкуазь улӟемъя, сюлэмаз вордӥське крезьгур, кылбур чуръёс но соку ик кылдо. Муртлэн гожтэм кылъёсызъя крезьгур гожтыны секытгес, пе. Кырӟанъёсыз тросгес сӥземын яратонлы, гуртэзлы. Лымы шобрет тулыс шуналоз но, Виктор Романовлэн сюлэмаз нош ик йыгаськоз тодмотэм крезьгур. Кырӟакум - бӧрдӥсько, бӧрдыкум - кырӟасько Виктор Романовез гуртысь кырӟась песянайёс ки йылазы ик нуллыны дась. Ма, кытчы кариськозы соос арганчизытэк. Мылкыдзы умой ке - кырӟало, кӧт-куректонзы ке вань, синкылизы потыса но нош ик кырӟало. Эшъёсын огазе люкаськыса, кырӟаса, висён но палэнэтӥ ортче. Песянайёслэн йырзы - Раиса Ивановна Турбина. Кырӟась-верасьёсты котыраз бинем сяна, со Кечол сельсоветысь ветеранъёслэн кивалтӥсьсы но луэ. Но мар монэ тужгес но паймытӥз, кечол песянайёслэн но кылбуран удысын пиналъёслэсь бере кылемзы уг поты. Огазе люкаськыса кутскизы но удмурт кылэ берыктӥзы "Ой, калина" кырӟанэз. Гурт калыклы но со туж кельшиз, асьсэос но весь кырӟасалзы. Оло, газет лыдӟисьёслэн но соин тодматскемзы потоз. Ой, шупудэ тон, шупудэ, Шурын шунам тулыс ву. Вера али тон, шупудэ, Кызьы вуид та пала. Кызьы ке но вазь тулсысэн Пинал пи валэн вуиз, Кема монэн мусояськиз, Собере сьӧраз басьтӥз. Со вераз вал: та шупудэз Мон бакчаям будэто. Ӧз вутты со монэ дораз Лудэ куштыса кельтӥз. Музъем борды мон кырмиськи, Пыд йылам йыг-йыг султӥ. Со дырысен интыяськи, Кытын чирдо уӵыос. Трактористъёс но шофёръёс Нуналлы быдэ вуо, Векчи вайме уг тӥяло, Сяська дырме утялто. Ой, тон, тӧлэ, туж зол тӧлэ, Эн сэзъя сиротаез. Мон музъемен эшъяськисько, Озьы ик сяськаясько. Кызьы ке но вазь тулысэн Пинал пи валэн вуиз. Кема бергаз мон котыртӥ, Но монэ ӧз тодма ни. Ой, шупудэ тон, шупудэ, Шурын шунам тулыс ву. Мон верай тӥледлы, эшъёс, Кызьы вуи мон татчы. Л. МАЛЫХ. "Ижевскысь винтовка" приз понна Куазьлэн кузьымез ӧз люкеты Удмурт шаерамы нош ик вуиз бадӟым биатлон. Спортъя Демидов нимо комплексын толон кутскизы "Ижевскысь винтовка" приз понна куамын кыкетӥосыз ӵошатсконъёс. Отчы пырисько Россиысь 200-лэсь ятыр кужмоосыз биатлонистъёс. Акциосын "Ижмаш" огазеяськонлэн кузьымез понна куспазы ӵошатскозы Россиысь 31 улосвылъёслэн командаоссы. Пусйыны кулэ тани мае но. "Ижевскысь винтовка" приз понна таосыз стартъёс куинь пӧртэм ӵошатсконъёсты огазеяло шуыны луоз. Та ик странамылэн чемпионатэз лыдъяське, татын ик тодмо луозы Россилэн Кубокез понна ӵошатсконъёсын вормисьёс. Озьыен, спортсменъёслы зол гинэ тыршоно луоз. Котькуд вормисьлы куинь пӧртэм дано нимтул басьтыны кылдоз угось. Арлы быдэ ортчылӥсь таӵе ӵошатсконъёс котьку но зэмос праздниклы пӧрмо. Но со понна трос гинэ тыршоно луэ ӵошатсконъёсты радъясьёслы. Туэ, кылсярысь, куазь "кузьым" дасяз - лымызэ жаляз. Тани ма вера та пумысен куас сюреслэн кивалтӥсез С. Жданов: - Зэм, куке но таӵе вал ни. Гырем бусыос декабре но сьӧдэсь вал. Туэ но лымы ӧжыт. Соин одӥг кругъем гинэ сюрес дасямын. Но со таӵе бадӟым ӵошатсконъёслэн правилооссылы тупамон. Вань ужъёсты огъя кужымен быдэстӥм. Бадӟым тау карем потэ 23 номеро профтехучилищеын дышетскисьёслы но биатлонъя школаысь пинал спортсменъёслы. Соослэн кужыменызы сюрес вылэ тырмыт лымы люкамын вал. Умой соиз, тани берло нуналъёссэ куазь лымыя. Табере ӵошатсконъёслэн программазы сярысь. Толон 12,5 но 15 иськемъем сюресъёс вылын ӵошатскизы егит нылъёс но пиос. Туннэ 15 но 20 иськеме бызьылозы нылкышноос но воргоронъёс. Ӵуказе - шутэтскон нунал. 23-тӥ декабре - вакчи сюресъёс (7,5-10 км). Ӵошатсконъёслэн валтӥсь секретарьзылэн Е. В. Баулиналэн верамезъя, та нуналэ данъялозы кык нунал ӵоже ӵошатсконъёсын вормисьёсты. 19 часэ луоз фейерверк. Озьыен, спортэз яратӥсьёслы татын шулдыр луоз. Нош тужгес тунсыкоез - арня нуналэ командаос нюръяськозы эстафетаосын. Табере возьмалом "Ижевскысь винтовкалэн" выль кузёосызлэсь но странамылэн чемпионъёсызлэсь выль нимъёссэс. Соосын тодматом газетмылэн бамъёсаз. Ф. Никитин. Наталь Сюлэм вӧсь Кытын тон анай Мыным ӝоген сизьымдон арес тырмоз, та дыр ӵоже мае но сое адӟи. Ноку но уг вунэты, асьме подъездын улӥсь нылкышно пи ваиз но, ӧлексы шуыса, картэныз ӵошен сое нылпи юртэ кельтӥзы. Отын пияш тодмо выжыкылысь ӵӧж сямен чебермиз но визьмаськиз. Дас классэз со умоесь отметкаосын быдтӥз. Шер ке но, нылпи юртэ анаез ветлӥз ик, но малы ке но дораз ӧз басьты. Матэ кариськыны ӧз дырты атаез но. Соослэн мукет кык пиоссы будо на вал. Анай-атаезлы кулэтэм пи, вынъёсыныз пумиськемез потэмез, огпол Ижевскысь квартираязы йыгаськиз. Анай-атаез доразы вылымтэ, нош вынъёсыз: сое туж кезьыт пумиталлям, куно карыны но вунэтӥзы. Озьы та мискинь пи, ассэ дуннеын мултэсэн лыдъяса, нылпи юртэн артэ будӥсь кызэ ошиськиз. Начар дӥсяськем, кыжмем нылпиосты адӟыса, та учыр нш но нош тодам лыктэ. Совето власть кылдыку но таӵе эркын улӥсь пиналъёс ӧжыт ӧй вал, но соос сярысь сюлмаськон зол шӧдӥськиз, анай-атайёс но нылпиоссы шоры киынызы ӧз шонтылэ. В. Чернов. Наталь Кызьы улӥськод, егит семья? Меӵкыт тубатысь усьыны капчи Наталь" бамлэн берло номеръёсаз печатламын республикаысьтымы Егитъёсын ужанъя кун комитет вӧзын ужась "Егит семья" центрлэсь шаерысьтымы егит семьяос пӧлын юан-веран ортчытэмзыя эскеронъёсты. Туннэ та ужъёсъя йылпумъян лэсьтӥськом. Редакциенымы умой кусып возем понна но печатлано материалэн юрттэмез понна "Егит семья" центрлы, кивалтӥсез Татьяна Башкова, сюлмысьтымы тау кариськом. Семья азьын котьку но нырысетӥ интыын сылӥзы сиськон, улон инты, тазалык, дышетскон, кышкытлыклэсь утиськон ужпумъёс. Вань та луонлыкъёсты улонэ пыӵатыны быгатонлыкъёс бордысь ик потэ семьялэн улон-вылон тубатъя макем азинлыко ӝутскемез. Нош со меӵак герӟаськемын республикаямы но странаямы экономикая но политикая кылдэм югдурен. Со сярысь верало юалляськонэ пыриськемъёс но, сое ик возьмато эскеронъёс. Кылсярысь, юалляськемъёс пӧлысь 47,8 процентэз туала улон югдурзэс, 1997-тӥ арен сярысь, уродмемен лыдъяло, 24,5 процентэзлэн улонзы ӧз воштӥськы, 20,1 процентэзлэн егитъёслэн улонзы ӟечгес луиз, 7,5 поцентэз валэктон сётыны ӧз быгатэ. Ӝыныезлэсь тросэз юалляськемъёс асьсэды куанеръёслэн радазы пукто - коньдонзы улыны мырдэм тырме яке вань кужымзэс поттыса ужано луэ кӧттырон понна. 4,5 процентэз юалляськемъёс номырлы ёрмытэк уло ке, 0,3 процентэз кӧттырымон сиськыны уг быгато. Вераны кулэ, 1,9 процентэз гинэ соос пӧлысь ужтэк пуко. Азинскем странаосын ужась адями куанермон калэ ноку уз вуы, нош Россиын но Удмуртиын ужаса но ёрмонлэсь мозмытскыны уг луы. Уждун трослы ӝегаса сёто. Семьяязы уждунэн яке стипендиен берло куинь толэзе ӝеганъёс сярысь веразы 70,1 процентэз юалляськемъёс. Россия Федерациысь Госкомитетлэн ивортонъёсызъя, котькуд дасэтӥез медъяськем ужась уждун кык поллы ӧжыт басьтэ улыны тырмымон тупатэм дунлэсь (прожиточный минимум). Странаысьтымы ньыльмосэз улӥсьёс сад-бакчазы чотын возисько яке кыкетӥ уже интыясько. Югдур пӧртэм ӧвӧл Удмуртиысь семьяос пӧлын но. Кыӵе ке интыосын ужаса но, 28,4 поцентэз юалляськемъёс палэнысь уж утчало яке кыӵе ке мукет амалъёсын секыт югдурысь потыны туртто. 10 процентэз егитъёс пенсия, пособие яке кыӵе ке компенсация басьто. Кытчы кутӥське семьялэн огъя бюджетэз? Коньдон тужгес но трос кошке сиён-юон басьтонлы, котькуд нуналэ кутӥськись арбериослы. Тросэз егит кузпалъёс дышетско. Тодон-валанъёс басьтонэ котькуд дасэтӥез егит мурт огъя бюджетысь 30-ысен 50 процентозь коньдон быдтэ. Кисыез трослы бушато коммунальной юрттэтлы тыриськонъёс. Котькуд куинетӥез семья со тыронъёсты уг ӝегаты, 17,6 процентэз луэмезъя дун тыре, нош 5,4 процентэз юрттэт понна берло дыре ӧз тыры ни. Шутэтскон ужрадъёсы но кыӵе ке узырлык басьтыны коньдон туж ӧжыт кошке. Тросэз семьяос дӥськут но кема дырлы кутӥськись вузъёс басьтонлэсь возисько. Ваньмыз со шӧдӥськытэк уг кыльы егитъёслэн огъя мылкыдзы вылын. Со бордысь но пото кузпалъёс куспын керетонъёс, семьялэн зӥбиськем мылкыдын улэмез. 35,5 процентэз юалляськемъёс семьяязы кылдэм валамтэосты герӟало улон-югдурзы уродмемен. Семьяослэсь улон-вылонзэс капчиятонъя кыӵе ке но кун юрттэтэз егитъёс ас вылазы шӧдо-а? Эскерон понна юан-веран ортчытэмын вал егитъёслы юрттэт сётӥсь таӵе ёзъёсъя-службаосъя, егит семьялы юрттэт сётонъя инвалидъёсын ужанъя; психолого-педагогической юрттэт сётонъя; юристъёслэн юрттэтсыя; оскон телефонъёсъя; уже интыянъя биржаосъя; егит ужбергатӥсьёслы юрттэт сётонъя. Эскеронъёс возьматӥзы, егитъёс тужгес но трос вазисько уже интыянъя биржаосы. Сое валэктыны луоз республикаямы ужтэк кылемъёслэн лыдзы будэмен, уката ик гуртын улӥсьёс пӧлын. Кун ласянь юрттэтлы кулэяськонъёс туж вылӥын, 4,3 процентэз гинэ егит семьяос асьсэды котыр ласянь утемен лыдъяло. Трос шугъяськонъёс кылдо улон инты ласянь. Эскеронъёс возьмато, таиз ужпум егит семьяос понна тужгес но секытэз. Улон интылы кулэяськонъёсты быдэстыны луысал, кредит висъяса. Музъем ласянь, дышетскон ласянь, ужбергатонэ азинтонъя но сыӵе амалъёсты кутыны луоно. Со сярысь веразы 25,4 процентэз юалляськемъёс. Тросэз дурбасьтӥзы мукет пӧртэм кулэяськонъёслы. Егит семьяослы ссуда но кредит висъян паськыт вӧлмемын мукет странаосын. Та амал егитъёслы юрттоз ас кужымзылы оскыны, соос дасьсэ гинэ возьмаса уз улэ. Соин ик паськыт вӧлмытыны кулэ быдэс шаерамы. Солы кутскон сётэмын ни. Кылем арын 44 егит семьялы ссуда висъямын улон инты басьтыны яке пуктӥськыны. Но кулэяськисьёсты лыдэ басьтыса, со туж ӧжыт. Со сяна, азинтыны кулэ егитъёслы юристъёслэсь, психологъёслэсь, врачъёслэсь но мукет ёзъёслэсь юрттэт сётонзэс. Со понна ужаны кулэ нимаз службаос, центръёс, клубъёс. Меӵак вераськон Удмурт Республикаысь Калыкез улон-вылонын утёнъя министерство но ёрос администрациосысь пенсиосъя но пособиосъя ёзъёс 2000-тӥ арын 6-тӥ сентябре 9 часысен 12 часозь ортчыто пенсиосты будэтон сярысь меӵак телефон пыр вераськон. Юанъёсын вазиськыны луоз таӵе телефонъёсъя: Калыкез улон-вылонын утёнъя министерство - 75-62-59. Иж администрациысь пенсиосъя но пособиосъя ёзъёс: Ленин ёрос - 71-34-81, 71-32-20. Октябрь ёрос - 59-98-58, 59-98-98. Первомай ёрос - 78-55-18. Индустриальной ёрос - 78-84-94. Устинов ёрос - 21-93-05. Лыдӟисьёслы вазиськон "Удмурт дунне" газетлэн редакциез ӝоген выжоз мукет интые (городлэн шораз). Соин валче Печатья юртэ кельтэмын ни ньыль гинэ телефон. Огдырлы кылдэм шуг- секытъёс понна вождэс эн вае. Редакция. КИЯСАЫСЬ ИВОРЪЁС Ӵӧжъёс лобо Будапештэ Кияса пала вуэм куноос туж паймыса, синмаськыса учкизы ёросысь усточиослэсь киужъёссэс. Мадьяр тодосчиослы Агнеш Кережилы но Жужа Шаланкилы тужгес яразы пулэсь вӧлэм ӵӧжъёс. Финн-угор дунне ӵӧжъёсты, ӟазегъёсты лыдъя... музъем кылдытӥсьёсын. Котыр вылэм ву но ву. Соку инмар курем ӵӧжъёсты: ымады ваелэ ву пыдсысь сюй. Озьы тылобурдоос пичиен-пичиен шормуӵ лэсьтӥллям. - Милям долларъёс гинэ, - чебер апайёс коньдонзэс поттыны кутскиллям. - Ми тае кузьмалом дуно куноосмылы, - вож кагазъёссэс ӧз басьтэ киуж бордын ужасьёс. Володямы выльзэ лэсьтоз. Тӥни озьы: Кияса палась ӵӧжъёс интыяськозы кыдёкысь Будапештысь музее. Кызьы уд шумпоты таӵе усточиос понна! Шудӥськом но дышетӥськом Кияса школаысь бадӟым классъёсын дышетскисьёс шудон пыр радъязы Россия Федерацилэн уголовной ужъёсъя законъёсыныз тодматсконзэс. Пичиысен мед тодозы, мед валалозы, ӧм тодэлэ медам шуэ. Шудонзы ярам, нош тужгес но тунсыко мадисьлы - Серёжа Лебедевлы - сётӥзы магистрлэсь изьызэ. Та нуналэ нылпиос тодазы ваизы выжыкылъёсты. Отын законъёс тӥямын луо. Озьы ик трос гинэ суредъёс дасяллм та ужрадлы. Таӵе тодматскон туж кулэ: ас вакытаз котьма интыяз. Юрмалае - асфальт кузя Туэ асфальт вуиз Юрмалае (Ермолаевое) - азьвыл одӥгаз бадӟым черкогуртэ. Вань ужъёс йылаз-пумаз ӧз на вуэ ке но, гуртоос капчи шокчизы ини. Озьы "Рассвет" колхозлэн шор гуртаз табере котькыӵе куазен лыктыны луоз. Кема возьмам выж но усьтӥськоз: Юрмалае сюрес вань! Ваньзы - одӥг эштосысь Ёросын али йывлпумъянъёс лэсьтэмын ортчем толэзь понна. Скал кыскисьёс пӧлын вормисе потӥз "Киясовское" эштосысь Ирина Феновна Назарова. Со ноябре котькуд скалэзлэсь быдэн 325 кило йӧл кыскем. Пудо утёнын но нырысь интые потӥз татысь ик кунян сюдӥсь Мария Григорьевна Орлова. Ноябре солэн вож кунянъёсыз нуналаз 1003 граммлы чеберскиллям. Ар кутскем дырысен но скал кыскисьёс пӧлын нырысь куинь интыосты басьтӥзы та хозяйствоын ужасьёс Н. В. Цыгвинцева, Л. И. Сидорова но Н. Н. Данилова. Туж чырмыт ужало Лилия но Николай Бессогоновъёс: соос кӧнялы ке гинэ бере кылизы. Нош гужем пуж-пуж йӧл поттӥзы. Ӟеч кыл кызьы уд вера Бессогоновъёслэн Сергей пизы сярысь! Ар кутскем дырысен солэн ошъёсыз 800 граммлэсь унолы куаиллям. Киясаослэсь пыдберзэс лёгало ини "Рассвет" колхозысь пудо утисьёс. Тужгес но - Нӧднюк Починкаысь скал кыскисьёс. Али соос ёросъя нырысь интыын. Военкомат мукет юртэ выжиз Туэ Выль арез Киясаысь военкоматын ужасьёс выльдэм юртын пумиталозы. Ас юртсы вужгес вал ини, соин ик ремонтно-технической предприятилэсь контора юртсэ куризы. Тупатъязы, выльдӥзы, табере трослы умояз ужан интызы. Табере выль ӝӧкъёс, пуконъёс кулэ, пе, вал. Кин меда юрттоз? Военкомат калыклы вазиськиз ёрос газет пыр. Туэ ас юртсэс озьы ик яплак выльдӥзы Киясаысь Айболитъёс но: табере кыӵе усто луиз ветстанциын! Уноез ужъёс быдэстэмын вал ас киосынызы. Пишмытӥзы ведь: син гинэ кышка вылэм! Г. ПАРФЁНОВ. Кияса ёрос газетын ужась. ПАЙМОД, ЯВА Шаплы пор но ӟучомем удмурт Алигес мыным но шуд усиз вань удмуртъёслэн ӧтчамазы ветлыны. Трос выльзэ тодӥ, вуж тодмоосыным адӟиськи, ог-огзы вылэ пож ву но киськазы. Тужгес ик соос вылэ, кин ас калыкезлы мышкин султӥз шаермылы тӧро быръён вакытэ... Нош монэ паймытӥз мукетыз. Кык-куинь дипломен, пань-пань удмурт ымныро агайёс но чебер апайёс та ӧтчамын вунэтӥллям анай кылзэс. Мыным соос понна возьыт вал. Нош сюлмы ырак луиз, трибуна азе поръёслэн огазеяськонзылэн адямиез Н. И. Ямаков потэм бере. Пор адями лад-лад гинэ удмурт сямен вераськиз, ӧтчаме люкаськемъёсты ӟечкылаз, атаезлэсь асьме кылын гожтэм кылбурзэ лыдӟиз. Кыӵе куанык вал сое кылзыны! Эхма, шуод ини... Тӥни сыӵе мылкыд кельтӥз та пумиськон... Нош асьмеос шуиськомы: кутоно асьме кылмы сярысь кат (закон). Нош куке кык-куинь дипломен удмурт адями шенгыль-пенгыль ке но, ӟуч сямен чирдэ, пайдаез луоз-а та катлэн? Кызьы шуо ӟучъёс, чорыг сисьме йырысеныз. Оло, мон янгышасько? "Мынам штанам ЧП" Кияса ёросысь Ленин нимо совхозлэн котькуд бусыезлэн нимыз аслаз. Соос пӧлын вань Сахалин но Алёха, Аннушкин хутор, Мальцевлэн экспериментэз, Пушин Мыс но Ильинск, Бадӟым Коновалиха но Штанъёс. Калык мудрон, валаса сётэм сыӵе ним: угось со бусы - кык вукырем вискын. Зэм но, штани кукъёс но - тӥни. ...Азьвыл аръёсыгес татын совхоз директор луыса ужаз палэнысь лыктэм мурт. Со уг тоды на вал, кытын ке отын, Кечол палан, таӵе мудрон нимо бусы кесэгзы вань шуыса. Огпол, бусы ужъёс мынон вакытэ, раци пыр кузёлы кин ке вазиськиз: - Озьы но, озьы, Леонид Леонидович, мынам штанам ЧП! Юрттэ, - куаразэ тодмаз егит агрономзылэсь. Леонид Леонидович паймиз но малпаз: серекъя, дыр, та нылаш: кыӵе-сыӵе ЧП солэн штаназ? Кузё нылашез раци пыр куаретыны кутскиз: малы ай тон монэ сереме уськытӥськод, агроном эш? Соку гинэ егит мурт валаз: кузёзы сыӵе бусызы вань шуыса уг на тоды. Гор-гор серектӥз но валэктӥз ик кузёлы: машина, пе, тӥяськиз. Ачиз со Штаны нимо бусыын, кык гоп вискын. Тӥни сыӵе зэмос учыр вал Подгорное посёлокын. Кузёзы кема гинэ тодаз вайылӥз та Штаныысь ЧП-ез. Г. ПАРФЁНОВ. Кияса ёрос. ВУОНО АРЛЫ ДЭМЛАСАЛ Тӥледын ӵош но тӥ понна Гажано но дуно куноосын, эшъёсын люкиськыку, сямлы пӧрмиз ини "Ум люкиське" тодмо удмурт кырӟанэн келяськыны. Редакциямы пузаны турттӥсь айы ӟазегъёс уг лобало на, нош ошмы арысь аре "куняна" кадь. Озьы ке но, лыдӟисьёслы ӧй дэмласал газетэнымы вуоно аре люкиськыны: кызьы ке тӥледлы митэк мӧзмыт луоз, озьы ик милям одӥгеныды но тӥледын люкиськеммы уг поты. Оло, кинлэн но солэн шуэмез потэ: коньдонмы уг тырмы гожтӥськыны, дунъёсты бадӟымесь. Но редакция тыршиз ни газетлы тужгес но пичи дунъёс пуктыны: тани 108 манет 96 копейкаысь 91 манетэз почта пыр нуэм-ваем понна мынэ, кылемез - редакцилы. Газетмы соин уз узырмы, нош эшъёсмы - люкаськозы. Тӥ но куинь толэзен, ӝыны арен гожтӥськиды ке, кисыдылы сокем шӧдскымон уз луы. Асьтэос адӟиськоды, шуг-секытъёс котыр ласянь зӥбо егитъёсты, ужась калыкез, пенсионеръёсты. Улон-вылон удысысь ужпумъёсты азьланяз но газет бамъёсын сэрттыны- пертчыны тыршом. Трос юанъёс кылдо пенсиосъя, пособиосъя, мукет ужпумъёсъя: юалэ - валэктом. Калыкез улон-вылонын утёнъя министерствоен, республикаысьтымы инвалидъёслэн огазеяськонъёсынызы кенешыса, вуоно арын чакламын газетамы "Оскон" конкурс ялыны. Со сярысь пыр-поч ивортом вуоно арлэн кутсконаз. Нош кыӵе улон-вылон луоз семьятэк? Озьыен, "Наталь" бам вуоно арын но тӥледын ӵош но тӥ понна луоз. Оскиськом, лыдӟисьёслэн гожтэмъёссы сое азьло сямен ик узырмытозы, нылпиосты будэтонъя но семья улонэз радъянъя пайдаё дэмланъёссэс газет баме вуттозы. Нош ми амалъёс утчаломы ни лыдӟисьёсмылэсь визьнодо шыкыссэс усьтыны. "Наталь" бамез тӥледлы эшшо но матэгес но лыдӟымонгес карон понна, туж юрттысалзы тӥляд юанъёсты, куронъёсты но: шуом, кыӵе ужпумъя вераськоно психологен, нылкышно врачъёсын, мукет специалистъёсын. Семьяды ӧвӧл шуиськоды-а? "Удмурт дунне" газет быгатэмезъя вуоно арын но юрттоз тӥледлы асьтэлэсь шуд кизилидэс утчаны. Малы быгатэмезъя? Ялонъёс "Тодматскон сэрегамы" азьланяз но печатлаломы, нош тӥ асьтэос быръе ни кинэн улондэс герӟаны. Газетамы радъям "Тодматскон сэрег" сяна, тӥледлы нош ик юрттыны дась Юкаменскысь "Я+Я" но Ижевскысь "Салон для двоих" тодматскон службаос. Туннэ ке ӧд шедьтэ асьтэлэсь пардэс, оскондэс эн ыштэ, нош но нош вазиське. Собере, оло, милемды но сюанады ӧтёды - буш киын ум мынэ. Нош сюрес вылэ кузьымъёсын потаны ми дышемын ни. Сюресъёс, сюресъёс, кытчы гинэ уг вутто, кыӵе гинэ паймымон но дано адямиосын уг пумиськыто соос. Малпасько, мынам гожтоно геройёсы тӥ пӧлын но вань. Озьыен, асьмеос газет бам пыр гинэ ум пумиське, ог-огенымы матысь тодматскыса, сюлмысь вераськон пӧрмоз. Оло нош кинлы ке "Шӧкычлэн" шиосыз кельшо? Уг, дыр, вӧсь луэмез нокинлэн уг пот. Нош йыртэмасьёсты, кырыж сюрес вылэ кожемъёсты шиямез лыдӟисьёс ярато ик. Куд- огезлэн пыкылэмзы но потэ, "Шӧкычлэн" шиез лэчытсэ ыштӥз, пе. Бен, соиз но вань. Нош мукет ласянь учконо ке, "Шӧкычлы" лек шиоссэ поттылыны шуггес луиз та улонын. Вылӥ кивалтӥсьёсты вылӥос ик утё, огшоры адямиез та улонын "Шӧкычтэк" но шиясьёс шедё. Пытсэт сьӧры келямъёсты ке шат? Но соослы та шиос мамык кадь гинэ йӧтозы. Озьы ке но, "Шӧкычлэсь" шиоссэ вуоно арлы шерон сярысь малпаськиськом. Нялтас вераса, сюлмысьтымы тау карем потэ ваньмызлы, кин пыриськиз "Очей Толилы - пӧсь салам" конкурсэ. Матысь дыре йылпумъянъёс лэсьтэмын луозы. Кызьы верамы вал, дунъет сётоз ачиз Анатолий Ушаков. Очей Толи вӧзы вормисьёслы кузьыменыз чуртнаськоз "Шӧкыч" но. Вуоно арын со нош ик лыдӟисьёс пӧлын конкурс ортчытыны малпа, соиз сярысь но тододы ни 2001-тӥ арын. Озьыен, гажано лыдӟисьёсмы, "Удмурт дунне" газетэн ӵош ӟечъяськомы Выль арен но Выль даурен. Лия МАЛЫХ, гожтэтъёсъя но улон-вылон ужпумъёсъя отделэн кивалтӥсь. Наталь Чигиськиз лобӟон бурдыз Вань улонзэ Александра Михайловна ортчытӥз Аксакшурын, нош арлыдыз луыса ини вордӥськем дорезлэсь ишкалтӥськиз: кышномурт даурзэ огназ ортчытэм вылысь картлы мынӥз. Ӧз, кытчы ке мукет ёросэ ӧз кошкы, Пичи Пургаысь ик Улын Юрие мынӥз. Гурт калыкезлэн макем лэземез уг пот вал, кудӥз-огез келяны но ӧз ветлы. Кумаеныз тани весяк огазьын улӥзы, нош сюрес вылэ потыны дасяськем эшсэ солэн но ӟеч лу шуэмез ӧз поты, ӝожмыт луиз, дыр. Воргоронтэк гуртын улыны секыт, уката ик пу дасяны ёрмоно. Егит дыръяз та пичи мугоро кышномуртлэн ненег пельпумъёсыз троссэ шуг-секытъёсты вормыны быгатӥзы, нош арлыд люкаськемъя, ас кужымедлы гинэ оскытскыны уг луы ни. Нылыд но эмеспиед ӧтемлы быдэ юрттӥськыны уз ваньме, асьсэлэн но куинь нылпизы будэ, юрт котыразы но ужзы ӧжыт-а, вылды. Нош нылпиосыз дорын улыны анай мурт ӧз кариськы. асьсэлы но ёркыт угось пичи коркаязы. Али бен выль юрт пуктыны басьтӥськизы ни егитъёс. Шура апай аслаз дӥсьтонэзлы уг но паймытскы, умой адями доры мынӥз угось. Тодматскиз туклячиосыз дэмламъя, соосыз но укыр ушъязы карт луонзэ Матвей Ильинэз. Собере нылыз но та гуртэ ик быземын. Воргоронлэн сизьым нылпиез ваньысь но ӧз кышкатскы кышномурт. Малпаз, куспазы кенешытэк ӧз вае, дыр. Анайзы июль толэзе кулӥз ке, Шура апай та корка пыриз ни ноябрь толэзе. Ар кисьтонзэ но со ачиз ортчытӥз. Анайзы интые гур котырын мурт кышномурт бергамысь пиналъёслэн сюлэмъёссы вӧсь но луылӥзы, дыр. Но пумит мылкыдзэс нокудзылэсь ӧз шӧды. Пичиосыз бен ӧй вал ни. Картэн ньыль ар улытозяз одӥг кен басьтӥз, ныл но сётыса вуттӥз. Кыкез пиосыз кышнояськымтэ на, доразы ик уло. Палэнэ кошкем нылпиоссы но атай юртсэс уг вунэто. Уката ик гужемъёсы корка покчиослэн куараосынызы тырме. Со-а шумпотон ӧвӧл: иське, уг уродъясько. Картэзлэн нылпиосызлэн нылпиосыз шораз песянай шуыса вазисько. Мар бен вожвылъяськонэз - коркан чылкыт, шуныт, сиён дась. Шура апай котькудзэ аслэсьтыз нылпиоссэ кадь яратыса пумита, пыжиськемъёсын утялтэ. Чильпаськыны, пужыятскыны, керттӥськыны но со усточи. Аслэсьтыз киужъёссэ нылъёслы но, пиослы но кузьма. Озьы ик ул но ул вал ни инмарен сётэм кылем аръёстэ. Но Шура апайлэн адӟонэз сьӧраз ветлэ вылэм. Секыт колхоз ужлэн, весяк тракторен ужамлэн бервылъёсыз шӧдӥськытэк ӧз кыле - картсэ пери шуккиз. Ветлыны калленэн ветлэ ик, но ог-огенызы вераськыны уг быгато. Арлэсь кема ини Шура апай висёнэ йӧтэм картсэ утялтэ. Шудэ нокытын вылымтэ, пе, ӧпкеле кышномурт. Кема улыса ӧз ке но вуттэ, картэз жаль потэ: огназэ куштыса уд кельты ук. Аслэсьтыз пинал дырзэ, егит дырзэ Шура апай висись нэнэезлы сӥзиз. Аслаз но атаез ӧй вал, ачиз но бызьытэк ныл вордӥз. Юась-верасез но вал. Туж шаплы но шаян нылмуртлы ичи-а, вылды, синмаськылӥзы. Нэнэезлэсь кылзӥськиз. Нош соизлэн ох! макем уг пот вал нылзэ бызьытэмез, кышкаса гинэ улӥз карт шедьтэмезлэсь. Висись мурт ӧз ик малпаськы, луоз, нылызлы шудтэм улон сӥземез сярысь. Эскерись-чакласез узгес луы шуыса кышказ, оло? Кин тодэм бен. Аслэсьтыз но али уд юа ни: Шура апай пенсие потон азьын сюрес вылын шудтэм учыре шедьыса быриз со. Али кышномурт туж жаля нэнэезлэн косэмезъя улэмысьтыз. Оло, шудэз вӧзаз ик бергаз, лопыръяз, нош со ӧз дӥсьты бордаз йӧтскыны. Пал кышномуртлэсь синкылизэ, сюлэм вӧсьсэ ачиз кадь ик огназы улӥсьёс гинэ валалозы. Котьмаиз вал улоназ, вожъяськон но, возьдаськон но. Арлыд вуыса ини мусояськон-вешаськон кулэ ӧвӧл, вӧзад тонэ валась эш, юрттӥсь гинэ мед луоз на кадь. Коркан огнад йырад кылён туж шимес угось. Пинал дырыз но Шура апайлэн сяськаё ӧй вал. Нэнэез больницае сюремен, сизьым арескын сое Брангуртысь нылпи юртэ келязы. 4-тӥ класс бере нэнэез дораз басьто шуэ ни вал, директорлэн Аксинья Емельяновна Бушмакиналэн сётэмез ӧз поты, мед, пе, дышетскоз, гуртын солы умой-умой дышетскем уз йӧты ни. Шура котькуд гужем дораз бертылӥз. Пуны улляса ӧз ветлы, ки пульдымон ужано луылӥз колхоз бусыез уронын. Сизьым ар пала нылпи юртын улэмез бере, нылаш гуртэ бертӥз. Дышетскыны келялом шуо вал, нэнэезлэн бордысьтыз лэземез ӧз поты. Озьы дас вить арескысен Шура кунян сюдыны кутскиз. Али серемез потыса тодаз вае, шур вамен уяса потӥсь кунянъёсыз выё ни шуыса, чабкиськыса ик бӧрдэмзэ. Нош макем кышказ, кепыр потӥз, колхоз кивалтӥсьсылэн Дмитрий Иванович Баймурзинлэн дояркае мыныны косэмысьтыз. Ӧд ке, пе, кылзӥськы, корка сэрегдэ тракторен нуыса кошком. Пинал мурт озьы ик оскиз. Кечез кыскемез вал ик, нош скалъёс доры нырысьсэ матэктӥз. Дышымтэ вылысь нылашлэн киосыз ик тӧрназы. Ярам, нэнэез юрттӥськыны ветлӥз. Озьы, 1960-тӥ арысен кутскыса, 1993-тӥ арозь, пенсие потытозяз, Александра Михайловна Сачкова дояркаын ужаз. - Ньыль ведраен йӧл поттӥсько вал, нош витетӥез ведрае киям луысал ке, ӵыжаса но поттысал, дыр, - тодаз вае со ужам аръёссэ. - Азьветлӥсьын но ветлӥ, бере но кыльылӥ - кыӵе группа шеде ни. Нылпи юртын будэм адями адями-а шуисез но калыкын вань. Александра Михайловна шуэ, аслым ачим адями кадь ик потӥсько. Нош мон со вӧзы ватсасал на: бадӟым букваысен адями. Улын Юри палэнысь лыктэм кышномуртэ мурт ӧз кары, но аслазъёсыз пӧлы но ӧз пыры. Со понна гуртысь арлыдоослы усьтӥськем "Пукон коркан" со одӥгез шуныт мылкыд сётӥсез, кырӟан гур мытӥсез. Сюлмаз ватӥськем малпанъёссэ, кӧт куректонъёссэ Шура апай калык вылэ уг кисьты. Капчи, шулдыр мылкыдыз ик солы юрттэ улонысь шуг-секытъёсты вормыны. - Ойдо, Шура, крезьгур мыт ай, - вазисько солы выль эшъёсыз. Собере корка тыр ӧръяське огазе люкаськемъёслэн зыл-зыл кырӟамзы. Л. Малых. Туспуктэмез В. Беломорскихлэн. НАТАЛЬ ЛЫДӞИСЬЁС ГОЖТО Пиелы вазиськон Анайлэн кылыз котьмалэсь но юнгес, шунытгес шуо. Та кылъёсме пиелэн вордӥськем нуналэзлы сӥзьыса, анайлэн нимыныз мукет пиналъёслы но вазиськем потэ. Котькинлэсь но чебер, визьмо, мусо пие Лёвике! Тон милям осконмы но шудмы. Котырад мед луоз утись кылчинэд, тон котырын котьку мед луозы тынад яратоно эшъёсыд, дышетӥсьёсыд. Котькинлы кулэ луись адями луыны мед быгатод. Будӥд ке, милемыз утись- вордӥсь мед луод. Соин ик эн висьы, тазалыко лу, спортэн эшъяськы. Аслэсьтыд ӵыжы- выжыдэ эн вунэты, вить чиньыдэ кадь тод соосты. Тод, пие: асьмеос визьмо но йӧно выжыысь. Соин ик асьмелы со данэз нуоно азьлань, саптано ӧвӧл вашкала ӵыжы- выжыосмылэсь утем данзэс. Визьмо лу, пие. Со понна туж трос лыдӟиськоно. Лыдӟоно котьма сярысь но котьмае: ӟуч кылын но, удмурт кылын но. Дышеты мукет калыкъёслэсь но кылъёссэс. Трос кыл тодэм нянь уг куры - синмо каре. Котьку тодад возь но данъяськы: тон удмурт пи. Кин анай кылзэ уг тоды, соосыз ноку но эн серекъя. Туж жаль но куанер адямиос соос. Вань, Лёвае, сыӵеосыз но удмуртъёс, кудъёсыз возьдасько удмурт кылзылэсь. Но соос озьы кылзылэсь гинэ уг - анай-атайзылэсь но возьдасько, палэнтӥсько, анай-атайзы но соос понна мурт адямиос кадь. Соин ик, Лёва, ми тон понна ноку но мурт адямиос медам луэ. Пие, мӧйы муртлэсь верамзэ котьку но пеляд пон. Соос тодытэк номыре но уз вералэ. Дунне вылын кема улэм мурт, со котьмае адӟемын но ас вылаз чидамын. Мусонькае, милям тонэ тышкаськон дыръёсмы но луо. Ачид тодӥськод, ку ми тонэ "йӧттылӥськом". Мурт адями тонэ ноку озьы уз тышкаськы, нош милям тонэ ӟеч кареммы потэ, тынэсьтыд умой адями мед пӧрмоз шуиськом. Тод, ми тонэ туж юн яратӥськом - соин ик тышкаськиськом. Лёвуше, аслэсьтыд пичи эшъёстэ ноку вӧсь эн кары, лек кыл эн вера. Котьку тодад возь: нош монэ ке озьы шуизы, мон вылэ кизэс ке вуттӥзы, мыным вӧсь луоз ук. Шумпотӥсько, пие, тон котырад трос эшъёсыд шуыса. Котьку но озьы мед луоз. Улонэд, Лев, паськыт, вольыт но кузь мед луоз. Нош нюко-гопо дыръяз, инмар тыныд мед юрттоз. Котьку тонэ валась но яратӥсь анаед. В.Бикузина. Ижевск. Ува ёросысь Поршур гурт мукетъёсызлэсь висъяське сяськаосын. Татысь котькудаз сямен азбарын-бакчаын соосты тросэн будэто. Тужгес но ярато георгинэз. Турлы сяськаосын арлы быдэ шумпоттэ гуртысь фельдшер Екатерина Хорошавина но. Ваньмон дыръяз со ялан бакчаяз берга. Е. Хорошавина. Туспуктэмез В. Камашевлэн. Удмурт Республикаысь Правительстволэн структураез сярысь Удмурт Республикалэн ЗАКОНЭЗ Кутэмын Удмурт Республикаысь Кун Кенешен 2000-тӥ арын 19-тӥ декабре 1-тӥ ёзэт. Удмурт Республикаысь Правительстволэн структураез. Удмурт Республикаысь Правительстволэн структураяз пыро: Удмурт Республикаысь Правительстволэн Тӧроез; Удмурт Республикаысь Правительстволэн тӧроезлэн нырысетӥ воштӥсез; Удмурт Республикаысь Правительстволэн тӧроезлэн ньыль воштӥсез; Удмурт Республикалэн Президентэзлэн Россия Федерацилэн Президентэз бордын ялан ужась муртэз - Удмурт Республикаысь Правительстволэн тӧроезлэн воштӥсез; Удмурт Республикаысь Правительстволэн тӧроезлэн воштӥсез - Удмурт Республикаысь ваньбур кусыпъёсъя министр; Удмурт Республикаысь Правительстволэн тӧроезлэн воштӥсез - Удмурт Республикаысь коньдон ужпумъёсъя министр; Удмурт Республикалэн Президентэзлэн но Удмурт Республикаысь Правительстволэн Администрацизылэн кивалтӥсьсы; Удмурт Республикаысь дас вить министр: Удмурт Республикаысь тазалыкез утёнъя министр; Удмурт Республикаысь югдурез утёнъя министр; Удмурт Республикаысь культурая министр; Удмурт Республикаысь кунсьӧр кусыпъёсъя министр; Удмурт Республикаысь калыкез дышетонъя министр; Удмурт Республикаысь нациосын ужан политикая министр; Удмурт Республикаысь печатья но иворъёсъя министр; Удмурт Республикаысь инкуазь узырлыкъёсъя но инкуазез утёнъя министр; Удмурт Республикаысь промышленностья но транспортъя министр; Удмурт Республикаысь гурт удысъя но сиён-юонъя министр; Удмурт Республикаысь калыкез улон-вылонын утёнъя министр; Удмурт Республикаысь лэсьтӥськонъя, архитектурая но улон юртъёсты возён политикая министр; Удмурт Республикаысь эстӥськонъя, энергокужымъя но связья министр; Удмурт Республикаысь вузкаронъя но бытовой юрттэт сётонъя министр; Удмурт Республикаысь экономикая министр; Удмурт Республикаысь кун комитетъёслэн сизьым тӧрозы: Удмурт Республикаысь Граждан обороная но шугадӟонъёслэсь утиськонъя кун комитетлэн тӧроез; Удмурт Республикаысь Музъем узырлыкъёсъя но музъем ужпумъёсты радъянъя кун комитетлэн тӧроез; Удмурт Республикаысь Егитъёсын ужанъя кун комитетлэн тӧроез; Удмурт Республикаысь Наукая, вылӥ но шор профессиослы дышетонъя кун комитетлэн тӧроез; Удмурт Республикаысь Ужбергатонъя комитетлэн тӧроез; Удмурт Республикаысь Ужъя кун комитетлэн тӧроез; Удмурт Республикаысь Физической культурая но спортъя кун комитетлэн тӧроез. Валтӥсь управлениослэн кивалтӥсьёссы - Удмурт Республикаысь министръёс: Ветеринарияя валтӥсь управленилэн кивалтӥсез - Удмурт Республикаысь министр. 2-тӥ ёзэт. Та Законлэн кужыме пырон радлыкез. Та Закон кужыме пыре кун газетъёсын печатлам дырысен. Удмурт Республикалэн Президентэз А.А.ВОЛКОВ. Ижевск город, � 275-ИИ. Выборы Президента Удмуртской Республики 15 октября 2000 года Сводная таблица Избирательной комиссии Удмуртской Республики о результатах выборов Президента Удмуртской Республики Число территориальных избирательных комиссий всего - 34 Число поступивших протоколов территориальных избирательных комиссий об итогах голосования, на основании которых составлен протокол Избирательной комиссии Удмуртской Республики - 34 Данные протоколов территориальных избирательных комиссий Алнашская Балезинская Вавожская Воткинская Воткинская гор. Воткинская ТИК Глазовская Глазовская гор. Граховская Дебесская Завьяловская Игринская Ижевск, Индустр. Ижевск, Ленин Ижевск, Октябр. Ижевск, Первом. Ижевск, Устин. Камбарская Каракулинская Кезская Кизнерская Киясовская Красногорская Малопургинская Можгинская Можгинская гор. Сарапульская Сарапульская гор. Селтинская Сюмсинская Увинская Шарканская Юкаменская Якшур- Бодьинская Ярская Итого Число избирателей, включенных в списки избирателей на момент окончания голосования 15617 28918 12485 79610 16349 14732 79949 8181 10291 38712 32101 90123 87009 118312 100702 05990 16417 10216 19700 17428 8604 9438 22383 19983 34519 17492 82293 10003 11914 28757 15226 9077 15902 14156 1202589 Число избирательных бюллетеней, полученных участковыми избирательными комиссиями 14382 27512 11630 73791 16130 14806 75343 7500 9908 37559 30506 79291 80127 113125 95512 100829 15454 9477 17953 15680 8090 9400 22882 19795 33930 16425 76055 9957 11615 28711 14604 8974 15700 14406 1137059 Число избирательных бюллетеней, выданных избирателям, проголосовавшим досрочно 76 82 23 143 32 11 816 19 52 95 463 373 771 399 413 18 10 29 29 32 23 46 66 174 48 199 40 30 63 43 22 27 54 4767 В том числе - в помещениях территориальных избирательных комиссий 2 12 8 41 0 0 113 14 8 9 6 41 47 45 48 29 4 7 3 11 5 5 2 5 30 25 15 7 7 5 4 0 0 6 564 Число погашенных избирательных бюллетеней 5397 11447 4176 43105 7344 5307 34615 1385 3795 17235 15686 35706 41110 52320 48989 49040 8063 4329 7422 5620 3015 3812 9950 4969 16285 7284 39289 4064 5143 13659 6337 327 8066 6199 533038 Число избирательных бюллетеней, выданных избирателям на избирательных участках в день голосования 8522 15376 6903 29976 7700 8566 39454 5456 5620 19471 14238 42748 37878 59333 45611 51043 7109 4451 9450 8950 4661 4601 12319 13167 16788 7998 35847 5405 5854 14180 7536 5322 6916 7376 575825 Число избирательных бюллетеней, выданных избирателям, проголосовавшим вне помещений для голосования 387 607 528 567 1054 922 458 640 441 758 536 374 766 701 913 333 264 687 1052 1081 382 964 567 1593 683 1095 720 448 588 809 688 355 691 777 23429 Число избирательных бюллетеней, содержащихся в переносных ящиках для голосования 387 607 528 567 1053 922 458 640 441 758 536 374 766 701 913 333 264 687 1052 1081 382 964 567 1593 683 1094 720 448 588 809 688 355 691 777 23427 Число избирательных бюллетеней, содержащихся в стационарных ящиках для голосования 8598 15450 6922 30101 7726 8575 40250 5471 5660 19562 14284 43167 38245 60037 45976 51394 7126 4460 9466 8977 4693 4623 12364 13221 16961 8040 36028 5445 5884 14238 7577 5344 6943 7417 580225 Число действительных избирательных бюллетеней 8742 15716 7293 30055 8582 9351 39909 5999 5992 19727 14448 42646 38010 59530 45861 50505 7250 5053 10330 9892 4948 5499 12696 14544 17437 8932 36102 5752 6310 14751 8159 5579 7489 7976 591065 Общее число недействительных избирательных бюллетеней 243 341 157 613 197 146 799 112 109 593 372 895 1001 1208 1028 1222 140 94 188 166 127 88 235 270 207 202 646 162 296 106 120 145 218 12587 Число бюллетеней, признанных: недействительными на основании-пункта 13 статьи 66 Закона Удмуртской Республики "О выборах Президента Удмуртской Республики 48 0 0 0 0 0 0 0 0 0 0 0 0 0 0 0 0 0 0 0 0 0 0 0 0 0 0 0 0 0 0 0 9 57 Число недействительных избирательных бюллетеней не содержащих отметок ни по одной из позиций 36 86 42 105 34 34 149 25 32 150 119 169 113 179 131 128 27 22 76 36 27 21 69 62 33 59 137 34 47 90 25 49 40 92 2478 Фамилии, имена, отчества внесенных в избирательный бюллетень зарегистрированных кандидатов Число голосов, поданных за каждого зарегистрированного кандидата Вершинин Павел Николаевич 6153 1885 3802 3469 1292 901 3111 2640 2819 9059 4551 8508 8668 10607 968911081 697 240 2611 3070 1733 927 7863 10492 6903 752 1697 2371 1552 6117 4797 302 3054 1046 144459 Волков Александр Александрович 1547 12698 2359 13909 5536 7728 24397 2776 2655 5601 7668 8887 8261 11950 10039 8955 4563 3717 6980 5881 1921 3959 3754 3399 7872 5481 17410 2559 3357 5459 2933 5064 3001 6165 228441 Ганза Николай Алексеевич 527 239 604 1994 259 199 6444 220 139 1466 354 8364 7540 13280 9244 10490 398 224 126 349 420 101 347 162 683 738 7429 145 237 764 132 58 344 114 74134 Забильский Владимир Викторович 8 20 12 484 47 6 122 12 13 118 28 515 553 748 737 672 28 16 13 10 14 6 18 14 6 18 14 46 27 236 3 15 69 12 3 32 7 4664 Кокорин Михаил Константинович 8 18 9 200 20 15 88 6 10 81 38 540 339 571 443 469 27 9 16 15 10 10 37 13 188 29 52 57 8 7 26 12 3403 Солуянов Андрей Владимирович 408 420 300 5284 917 235 2015 189 168 2135 1266 8747 6910 11824 7668 9801 1031 623 325 340 626 385 324 240 936 1307 4766 532 827 1598 163 74 614 438 73436 Тимофеев Владимир Борисович 3 6 6 41 9 1 25 4 2 34 13 138 122 182 151 135 15 4 9 5 8 1 6 4 10 6 46 3 б 7 1 0 7 3 1013 Шуклин Сергей Борисович 14 30 19 223 26 23 77 9 25 71 41 546 411 742 558 777 37 10 14 16 16 6 21 14 137 28 204 8 14 137 28 204 8 14 115 5 3 35 12 4287 Число голосов, поданных против всех кандидатов 74 400 182 4451 476 243 3630 143 161 1162 489 6401 5206 9626 7332 8125 454 210 236 206 200 104 341 209 813 580 4126 102 250 565 108 68 376 179 57228 Председатель Избирательной комиссии Удмуртской Республики Д.Н. Талантов Секретарь Избирательной комиссии Удмуртской Республики Н.А. Глухова Сводная таблица составлена 18 октября 2000 года Кун Кенешлэн сессияз Депутат, кылзы калыклэсь куаразэ Пумитазы "Интернационалэн" Ӧжытак вис каремез бере, таяз арня вискын ужзэ азинтӥз Кун Кенешлэн дас куинетӥ сессиез. Депутатъёсты Кун Кенешлэн юртэз азьын "Интернационалэз" кырӟаса пумитазы пикетэ потэмъёс: бюджет удысын ужасьёс, Ижевскысь рабочийёс - ваньмыз ог 800 мурт. Ма соосты поттӥз та площаде? Нырысь ик ас правооссэс утён, Россиысь Правительстволэн Уж сярысь выль кодексэзлы пумитъяськон. Ижысь дышетӥсьёс, врачъёс, пичи уждунэн улӥсьёс куро мынон-ветлон, улон инты, шуныт понна дунъёсты ӝутонэз дугдытыны. Выль ар бере, со али ик тодмо ни, городын улӥсьёс пӧлысь ӝыныез пала эшшо но юнгес ёрмон калэ вуозы. Тросэз-а депутатъёс валало бырйисьёссылэсь кышканзэс но шуге-леке вуонзэс? Уг кадь, малы ке шуоно, площаде люкаськемъёсын вераськыны, соослэсь куронъёссэс кылзыны куд-огез дыр но, кыл но ӧз шедьты. Сарапулысь депутат Геннадий Егорович Абросимов син шоры йӧтӥз: одӥг юанлэсь но ӧз палэнскы. Ваньмызлы валэктон сётыны солы но, арлыдо воргоронлы, секыт, но шуныт залэ, калыклэсь палэнэ пегӟыны ӧз дырты. Та вакытэ син азям пуксиз мукет суред - депутатлэн мандатэз понна нюръяськон. Соку ваньмыз кандидатъёс куара люкан понна, бырйисьлы ма но ӧз сӥзе, ма но ӧз ӵектэ... Нош малы али мышкин карисько со калыклы ик? Профсоюзъёс ужаса улӥсьёсты ӝуто нюръяськон ужрадъёсы. Таӵе акция погыльскиз быдэс странае. Удмуртиысь бырйисьёс вазиськонэн потӥзы Кун Думаысь депутатъёсмы азе. Соос оско: Светлана Смирнова, Николай Сапожников, Юрий Маслюков вань быгатонозэ лэсьтозы, калыклы пумит луись законъёсты кутонтэм понна. Ас кылзэ ӝот-ӝот вералоз Удмурт парламент но. Правительствоын бадӟым воштӥськон уз луы Озьы шуиз Кун Кенешлэн сессияз люкаськемъёслы Удмурт Правительстволэн выль Тӧроез Юрий Питкевич. Ганзалэн правительствояз сямен, луоз нырысетӥ воштӥсез, со борды эшшо ньыль воштӥсез, котькудӥз кыл кутоз нимаз удыс понна. Кӧня ке воштӥськоз Правительстволэн кивалтон ёзэтэз (структураез), таиз герӟаськемын Федеральной кивалтонын ортчем воштӥськонъёсын. Коньдон ужпумъёсъя министр но табере премьерлэн воштӥсез луоз. Огъя вераса, Правительстволэн Тӧроезлэн воштӥсез выль ёзэтын 8-озь будоз, нош министръёслэн лыдзы 15-ёзь кулэсмоз нюлэс хозяйствоя управлениез кулэстон чотын. Таӵе решение кутэмын Москваын, быдэс Федерациын. Кызьы пусйиз Юрий Питкевич, нюлэс хозяйствоын ужасьёсты кызьы ке но утьыны тыршом, соос выжозы Инкуазез но музъем узырлыкез утёнъя но уже кутонъя министерствое. Трос юанъёс кылдӥзы Эстӥськонъя но электрокужымез кутонъя министерство котырын. Центр косэмъя, "Удмуртэнерго" кык-вить ар куспын пӧртэм пумо ёзъёслы люкиськыны кулэ. - Кытчы со асьмеды вуттоз, вераны ик кышкыт, - шуиз депутат Юрий Боровик. - Чубайс косэмъя ужам ке, тылтэк но шуныттэк кылём. Таӵе ик мылкыдын вераськизы куд-ог мукет эшъёс но. Ӝутскем ужпум бордын парламент ужалоз на. Правительстволэн Тӧроез нуназе шорын журналистъёслы шараяз куд-ог воштӥсьёсызлэсь нимъёссэс: Николай Хохлов кыл кутоз промышленность понна, Михаил Назаровлы азьвыл сямен ик, кыле гурт удыс, социальной ужпумъёсты табере нуоз Наталья Харина, эстӥськон но электрокужымез кутонъя - Виктор Савельев. Нырысетӥ воштӥсезъя Юрий Степанович номыр ӧз вера. Но Выль арозь со тодмо луоз шуыса оскиськом. Коньдон ужпумъёсъя министре кыле Владимир Бельтюков, ваньбуръя министре - Сергей Касихин. Со дыре ик кыксы но басьтозы на вице-премьерлэсь портфельзэ. Шаерамы вуиз выль прокурор Удмурт Республика кӧня ке толэзьзэ улэ ни валтӥсь прокурортэк. Кун Кенешлэн 13-тӥ сессияз тодмо луиз ни Виктор Походинэз воштӥсь муртлэн нимыз, со - Владимир Зыкин. Выль прокурорлэсь кандидатуразэ сессиын юнматэмлэсь азьло, сое эскеризы депутатъёслэн огазеяськонъёсазы. Владимир Зыкинлы 52 арес. Юристэ дышетскиз Свердловскын. Кема аръёс ӵоже прокурор луыса ужаз Курган улосын. Берло ӝыны арзэ кивалтӥз Приволжье округысь генеральной прокуратуралэн управлениеныз. Выль прокурор вылӥ дунъяз Удмурт прокуратуралэсь ужзэ. Соин ӵош оскытӥз, Удмуртия азьланяз но Законлэн куронъёсызъя улоз шуыса. Кыӵе луоз казнамы - сыӵе луоз улонмы Нуназе котырын Удмурт Кенешлэн дас куинетӥ сессиез ужзэ йылпумъяз. Пичияк вис карыса, депутатъёс басьтӥськизы дас ньылетӥ сессиын эскерыны чаклам ужпумъёс борды. Соос кызё пала. Валтӥсьёсыз - республикалэсь вуоно арлы бюджетсэ юнматон но социально-экономической программаез кутон. Таос борды кутскемлэсь азьло депутатъёс учкизы на куд-ог законъёслэсь инъетъёссэс. Сэрттэмын-пертчемын но кӧня ке ватсанъёс пыртэмын "Удмурт Республикалэн Кун Кенешез сярысь" но "Удмурт Республикалэн Правительствоез сярысь" Удмурт Республикалэн законъёсызлэн инъетъёсаз. Эшшо огпол кутскыса учкемын Удмурт Республикаын 2000- тӥ-2002-тӥ аръёсы музъемез кутонъя реформаез азинтон пумысен кутэм Кун Кенешлэсь постановленизэ. Сессие люкаськемъёс пӧртэм мылкыдын пумитазы наркоманилы пумит нюръяськонъя чаклам программаез. Куд-огез депутатъёс туннэ нуналозь ӧз валалэ на, кыӵе адӟон ваё йырсазез шузимытӥсь суретъёс будӥсь поколение понна. Соин но, вылды, дэмланъёс но вал татчы висъяно коньдонэз гурт удыслы сётон сярысь. Сессия эскериз мукет но программаосты. Бюджетэз кутонъя вераськон кутскиз 17 часэ гинэ. Республикаысьтымы коньдон ужпумъёсъя министрлэсь ужзэ быдэсъясь Владимир Бельтюков тодматӥз солэн инъетэныз, валэктонъёс сётӥз кутоно бюджетъя кылдэм пӧртэм пумо юанъёслы. Таин 14-тӥ сессилэн нырысетӥ ужан нуналэз йылпумъяськиз. Солэсь кенешсэ нуиз Удмурт парламентлэн выль кивалтӥсез Игорь Семенов. Сессилэн ужаз пыриськиз Удмуртилэн Президентэз Александр Волков. *** Нялтас вералом на: толон, 20-тӥ декабре, Игорь Николаевич пусйиз 49 арес тырмонзэ. "Удмурт дуннеез" лыдӟисьёслэн нимынызы сӥзиськом солы ӟеч ужан мылкыд, юн тазалык но улон-вылоназ ваньзэ умойзэ гинэ. Людмила Медведева. Оскемды иназ луоз Ньылетӥ классын дышетскисько вал соку. Удмурт кылъя дышетӥсьмы Раиса Ивановна Покоева гуртэ уж сётӥз. Гожтоно, пе, сочинение. Темазэ но уг тодӥськы ни. Но пыраклы син азям кылиз, кызьы быдэстэм ужме лыдӟемез бере, дышетӥсе монэ, нылзэ музэн, ӟыгыртӥз но тып-тып вешаз. Кечёл палась табере мӧйымыны вутскем нылкышно тодэ на меда та учырез? Уг но ни, дыр, малпасько. Нош мон понна та дышетӥсе улонам сюресме югдытӥсь кизилилы пӧрмиз. Кыӵе потэ соин выльысь пумиськеме! Тодӥсько: котькудмылэн улонамы Раиса Ивановна кадь сюрес югдытӥсь кизилиосмы вань. Пӧламы ӟеч адямиос ӧжыт ӧвӧл угось. Ӵапак соослы ик мон йыбырттӥсько, соослы синмаськисько. Вуоно герое колхозысь устоез механизатор яке устоез скал кыскись луыны кулэ ӧвӧл. Куддыръя улон ӧрысь палдэм адямиослэн но нокинлы сузёнтэм аспӧртэмлыко дуннезы луэ. Огшоры адямиос огшорытэм малпанъёсынызы - тани кинъёс кыско монэ бордазы. Нош сыӵе муртъёсты юромо утчаса ветлонэз ӧвӧл, малпасько. Улон чигвесьёс асьсэос соосты кыре-буре потто. Журналистлы кӧня ке сакгес гинэ кариськоно. Собере пыдулысь шедьтэм материалъёс трослы зэмлыкоесьгес луо потэ. Жаль, берло дыре соос ӵемысь мӧзмыт пуштросъемесь адӟисько. Оген пинал будэтӥсь анайёс, армилэсь пегась егитъёс, вылӥ этажъёсы пыдын тубась песяй-песянайёс, вунэтэм пиналъёс - туннэ нуналмылэн тодметэзлы пӧрмизы. Соос вамен вамыштыса кошкем уг луы. Газетмес лыдӟисьёс пӧлысь ог люкетэз Ижевскын улэ. Берло дыре городысь ӵемгес но ӵемгес кылод чылк-чылк удмурт кылын вераськемез. Куд-ог дыръя республикаысьтымы ёросъёсы потаку но уд пумита таӵезэ. Та ласянь ӝожоми Сюмси пала вуылыкумы но. Татысь куд-ог школаосын удмурт кылъя урокъёсты нуонлэсь куштӥськиллям, пиналъёсты люконтэм вылысь шуыса. Удмурт группаосы ветлӥсьёссэ нылъёсты-пиосты исамес, пе, каро. Паймод но бырод! Таӵе дыръя тросгес но тросгес гожъям потэ городын улӥсь удмурт адямиос сярысь: мукетъёсыз адӟем мед карозы таослэсь. Соин ик городысь басьтэм суредъёс уз ыше газет бамъёсысьтымы. Ма бен, котькуд егит журналистлэн йыраз олокыӵе но чебересь малпанъёс лыктыло. Но соосты газет баме вуттон понна, мултэс уз луы тӥляд, лыдӟисьёслэн, оскемды но юрттэмды. Элина КУМАЧЁВА, иворъёсъя отделысь корреспондент. Дышетскизы осеменаторъёс Якшур-Бодья ёросысь фермаосын ужасьёс ӟеч выжы пудо уськытон бордын гижысь-пиньысь тыршо. Со понна хозяйствоосысь специалистъёс выль амалъёсты утчало-шедьто но пудо утисьёсын дышетскон ортчытъяло. Тани алигес Вуж Зятцые люкаськылӥзы эштосъёсысь зоотехникъёс но техник- осеменаторъёс. Соос кенешизы Литваын юнмам опытэз уже кутыны. Оглюкаськемен пудоосты шонер эмъян сярысь люкаськемъёс азьын вераськиз ёрос ветстанциысь врач Евгений Фёдоров. П. НИКОЛАЕВ. Потозы-а шуг-секытысь? Удмурт Элькунысь Арбитражъя суд алигес Можга ёросысь "Пычас" агрофирмаез банкротэн лыдъяз. Угось хозяйство берло аръёсы вытъёсъя, электрокужым понна тыронъя бадӟымесь пунэмъёс люказ. Табере ас дораз поттэм продукцизэ вузаса гинэ шуг-секытысь потыны уг вормы. Но куинь толэзь дыр сётэмын на. Огдырлы кивалтӥсе юнматэмын "Россия" эштосысь валтӥсь экономист Н. М. Романов. Шуг-секытысь потыны ужрадъёс но чакламын ни. П. СКОБЕЛЕВ. Тау эшъёсылы Балезино ёросысь "Путь к коммунизму" колхоз котьку но данъяськылӥз пудо вордон удысэныз. Сыӵе сюлмаськон бордысь ик пото фермаын ужасьёслэн азинсконъёссы но. Ас тыршеменызы арысь аре шумпотто скал кыскисьёс. Республикамылэн Данъян пулаз туэ пыртэмын татысь скал кыскисьлэн Надежда Ивановна Болтачевалэн нимыз. Солэн ӵош ужась эшъёсыз быдэн 4 сюрс литр пала йӧл кыско, нош Надежда Ивановналэн лыдпусэз вылӥынгес луэ. - Таӵе бадӟым шумпотонме нырысь ик фермаысь эшъёсыным пусъё, - шуиз Надежда Ивановна. - Скалъёсты куать кузя гинэ кыскиськом. Ваньмы ог-огмылы юрттыса ужаськом- улӥськом. Соостэк мынам но вормонъёсы луысалзы шат? Т. БАННИКОВА. Туспуктӥз В.Беломорских. "Удмурт Республикаысь Правительстволэн структураез сярысь" Удмурт Республикалэн Законэз сярысь Удмурт Республикаысь Кун Кенешлэн ПОСТАНОВЛЕНИЕЗ Удмурт Республикаысь Кун Кенеш пуктэ: 1. "Удмурт Республикаысь Правительстволэн структураез сярысь" Законэз кутоно. 2. Та Законэз Удмурт Республикалэн Президентэзлы ыстоно. Удмурт Республикаысь Кун Кенешлэн Тӧроез И.Н.СЕМЁНОВ. Ижевск город, 2000-тӥ арын 19-тӥ декабре, � 274-ИИ. НАТАЛЬ Анаез данъялом - азьлане мыном Быдэс дуннеын сӥзьыл пусъё Анайлэсь нуналзэ. 1998-тӥ арын 30-тӥ январе Россия Федерацилэн Президентэзлэн указэзъя асьме странаын та нуналэз пусйыны чакламын ноябрь толэзьлэн берпуметӥ арня нуналаз. Нылкышноез - анаез - вылэ ӝутон бадӟым инты басьтэ кунэз юнматонын но тазатонын. Анайлэн данэз бадӟым ке, со семьяын ог-огдэ валан но тупан артэ вамышъяло. Нош семья ке юн, улон но йӧн. Анайлэн нуналэзлы сӥзьыса, республикаысьтымы городъёсын но ёросъёсын пӧртэм ужрадъёс ортчизы. Иворез вӧлмытӥсь ёзъёс нимаз бамъёс, передачаос дасязы, школаын дышетскись нылпиос анайёссы сярысь сочинение гожъязы. Селта ёросын ортчиз солдат анайёслэн слётсы, Вавожын - трос нылпиё анайёслэн слётсы. Сарапулын радъямын вал нылкышноослэн тазалыксы сярысь "котырес ӝӧк" сьӧрын вераськон, нылпи вайыны дасяськись анайёсты огазе люказы Ярысь семья улонэз радъянъя кабинетын, Як.-Бодья ёросын бырйизы тужгес но усто кенъёсты но анайёсты (свекровкаосты), ӵошатскон радъямын вал егит анайёс пӧлын но. Сюмси ёросысь калыкез уже интыянъя центрын "котырес ӝӧк" сьӧрын вераськон мынӥз нылкышноосты уже интыян сярысь. Республикаысьтымы Калыкез улон-вылонын утёнъя министерство шаерысьтымы городъёсын но ёросъёсын радъяз Анайлэн нуналэзлы сӥзем праздникъёс, ёросъёсты ог-огенызы огазеяса. Озьы укмыс ёрос ас дораз пумитаз бускель ёросъёсысь куноосты. Сюмсиысь но Вавожысь устоосыз анайёс Селтае вуылӥзы. Дас-дас одӥг нылпи будэтӥсь анайёсты, сцена вылэ ӧтчаса, ваньмыз азьын ӟечкылазы. Ӧз вунэтэ шуныт кылъёс вераны солдат анайёслы но. Якшур-бодьяос кырӟанъёсын но перепечъёсын ас доразы пумитазы играосты но дэбесъёсты, анайёслы концерт возьматӥзы пинал пияшъёс но воргоронъёс. Можгае люкаськемъёсты шулдыртӥз кырӟась Т.Привалова. Эшъяськон ӝӧк огазе люказ воткаосты но шарканъёсты. Трос нылпиё анай Екатерина Петровна Макарова пусъемын орденэн. Солэн дас кык нылпиосыныз тодматскизы Кез ёросэ люкаськемъёс. Нош Пичи Пурга ёросысь Громовъёслэн трос нылпиё семьязы анайёс понна нимысьтыз концерт дасям. Пумиськонъёсы потазы Калыкез улон-вылонын утёнъя министерствоысь специалистъёс. Люкаськемъёслы соос мадизы Россия Федерациысь Президентлэн "Россиысь нылпиос" программаезлэн шаерамы быдэсъяськемез сярысь. Солы луыса республикаямы усьтэмын: реабилитацияя 3 центр; калыклы улон-вылонын юрттэт сётонъя центръёс вӧзын усьтэмын семьяен но нылпиосын ужанъя 12 ёз; 6 "Семья" центр; секыт югдуре шедемъёслы нылкышно центр; юрттэт сётонъя 5 приют. Арлы быдэ та учреждениос юртто 120 сюрс пала семьяослы, нылпиослы но нылкышноослы. Федерация программа чотын центръёсы висъямын туала куронъёслы тупась оборудование, транспорт. Нимысьтыз уж нуиське инвалид нылпиосъя но соослэн семьяоссыя. Шуге-леке шедем пиналъёс эмъяськыны быгато санаторийёсын но курортъёсын, сюрес дун соослэсь уг басьтӥськы. Коммунальной юрттэт понна но семья дун ӧжытгес тыре, нош ясли-сад понна дун нокӧня но тыроно ӧвӧл. Туж сюлэмшугъяськыто урамъёсын костаськись-калгись нылпиос, тросэз анай-атайёссы вань вылысь сирота чотэ кылемын. Жаляса верано, таӵе нылпиослэн лыдзы арысь аре йылэ. Соослы юрттон понна усьтӥсько приютъёс. Ёросъёсын ортчем та празднике люкаськемъёслы министерство кузьым лэсьтӥз - концертъёс возьматӥз "Италмас" ансамбль. О.БАС, Удмурт Республикаысь Калыкез улон-вылонын утёнъя министерствоысь семья но нылпи ужпумъёсъя отделэн кивалтӥсь. Законэз тӥялод, Африкаяд берытскод Шаерысьтымы кышкытлыклэсь утиськонъя ёзъёсын ужасьёс профессиональной праздниксы азьын 2000-тӥ арын кызьы ужамзылы куд-ог йылпумъянъёс лэсьтӥзы. Ужано луиз секытэсь социально-политической условиосын, нюръяськоно луиз Россилы но Удмуртилы кышкытлык кылдон учыръёслы пумит, кун секретъёсты утён ласянь но пӧртэм тырмымтэосты вазен ик алон ласянь. Та ужпумъёс ваньмыз сямен быдэстэмын. Шаерамы ӧй вал терроризмен но политикаын экстремизмен герӟаськем учыръёс, шугадӟонъёс, кунэн шараяны лэзьымтэ ивортъёсты вӧлдонъёс. Россия Федерацилы но Удмурт Элькунлы президентъёсты быръёнъёс ӟеч ортчизы. Трос лэсьтэмын наркотикъёсын но пыӵал тӥрлыкен вузкарисьёслы пумит нюръяськон ласянь. Россилэсь законъёссэ тӥямзы понна, Африкаысь огысьтыз кунысь асьме дорын дышетскись студентъёс доразы уллямын. Таяз арын административно-правовой югдурез кунсьӧрысь лыктэмъёсын тӥян учыръёс куинь поллы тросгес шараямын. Уллямын 25 мурт. Россилэсь гражданъёссэ суредам паспортъёсын кунгож сьӧры келямзы понна кык группа вылэ уж ӝутэмын. Шараямын ислам экстремист. Со мусульманъёс пӧлы керетон мылкыд пыӵатыны турттэмез понна Россие пырыны лэземын ӧвӧл. Ортчем аръёсы шпионажен вырисьёс но пумиськылӥзы. Туэ шараямын одӥг учыр: Удмуртиысь огез улӥсь турттэ вылэм ядерной технология удысысь научной ужъёслэсь копиоссэс кунгож сьӧрысь адямилы вузаны. Та адямиез прокуратура юн алӥз. Эскеронъёс дыръя уно тырмымтэос шараямын заводъёсын но югдурез утёнъя ёзъёсын шараямтэ иворъёсты ватыса возён ласянь. Отын документъёсты ыштонъёс но вылӥллям. Та ласянь янгыш адямиос кыл кутӥзы, нош кивалтӥсьёс куать пол алэмын. Радиоэлектронной но нимысьтыз техсредствоосты уже кутыса, куд-огез адямиос ватэм иворъёсты тодыны тыршо. Та ласянь прокуратура куинь йыруж ӝутылӥз, янгыш адямиос пытсэт сьӧры келямын. Коррупциен вырись чиновникъёс ужысьтызы мозмытэмын . Трос операциос ортчытыса, ФСБ-ын ужасьёс данаклы кулэстӥзы Таджикистанысь контрабандистъёслэсь асьме доры героин ворттонзэс. Курьеръёссылэсь таламын 9 килограмм героин, ӝутэмын 10 уж, отчы кыскемын 18 мурт. Со сяна, 2 килограмм наркотикъёс таламын на мукет регионъёсысь та удысын ужасьёсын ӵош. Озьы ке но, та ласянь ваньмыз лэсьтымтэ на, Удмуртие наркотикъёс ялан вуо. Йыруж лэсьтӥсьёслэн 7 азьветлӥсьёссы кырмемын,таламын пыӵал тӥрлык, боеприпасъёс, техника но наркотикъёс. Алэмын но шараямын адямиосты заказъёсъя виылон учыръёс но мукет секытэсь йыружъёс. "Вихрь-антитеррор" операция дыръя Кизнер посёлокысь войсковой частьысь боеприпасъёсты лушканы амалъёс быдтэмын, отысь азьло военнослужащийёс киысь таламын 100 килограмлэсь уно тротил. Управлениысь уноез ужасьёс туэ пыриськизы Чечняын ожмаськонэ но. Соос пӧлын ичи ӧвӧл Россиысь Правительстволэн наградаосынызы пусъемъёс. Россия Федерациысь ФСБ-лэн Удмурт Республикая управлениысьтыз пресс-служба. Зарни медаль Москваын йылпумъяськизы Россиысь егитъёс пӧлын кикбоксингъя ӵошатсконъёс. Асьме шаерлэсь данзэ тужгес но усто утизы Воткаысь спорсменъёс. Соос уго республикаямы но кужмоосыз луо. Тужгес но удалтӥз Евгений Коневлы. Со, ваньзэсты вормыса, зарни медаль басьтӥз. Удмуртиысь егит спортсменлы сюрес усьтӥськиз Европалэн чемпионатаз мыныны. "Ижсталь" егитомиз Хоккейя чемпионат кутскытозь толэзь кылиз. Та вакытэз "Ижстальысь" спортсменъёс пайдаё кутыны тыршо, нуналлы быдэ тренировкаос ортчытъяло. Алигес хоккеистъёс йӧ вылэ султӥзы. Матысь дыре турниръёсы но пыриськозы. Командалэн валтӥсь тренерез Сергей Абрамов верамъя, устоосыз шудӥсьёс Смагин, Маслов, Тютин, Кузнецов суперлигаысь клубъёсы кошкизы. Соос интые кутэмын Ижысь 17- 18 аресъем пиос. Кин юнматскоз командае, кыӵе ужпум пуктоз ас азяз "Ижсталь", тодмо луоз матысь турниръёс бере. Нимыз - Данъян пул вылын Азь питран кытӥ, бер питран но отӥ ик Школалэн коридорез аспӧртэм заллы пӧрмытэмын. "Сцена" вылын кырӟало-экто нылпиос, "залын" учкисьёс пӧлын пуко дышетӥсьёс. Ма, ӵапак дышетӥсьлэн нуналэзлы сӥзем ужрадзы дыръя учыраськеммы Пичи Пурга ёросысь Гожня школае. Солэн кивалтӥсез Р. П. Герасимова шуныт пумитаз. Милемды, журналистъёсты, одӥгаз классэ пиналъёс азе уроказы нуиз, мадёды, пе, газетты сярысь. Бӧрысьгес ини нимысьтыз альбомзэс возьматӥз, татчы, пе, вань куноосмы кинюртэмъёссэс кельто. Паймим, кӧня тодмо адямиос вуылӥллям ни татчы. Амалтэк вожъяськод пиналъёслы, кӧня тунсыкозэ соос кылӥзы-тодӥзы, луоз, куноослэсь. Нош асьсэлэн, гожняослэн но, вань ма веранзы-возьматонзы. Юнме шорысь шат кӧня ке ар ӵоже быдэс Россиын ортчись "Школа года" конкурсын вормисе потылӥзы, аслыз Р. П. Герасимовалы "Директор года" ним сётъяллязы. Ма понна, шуоды? - Нылпиослэн быгатонлыкъёссы, азинсконъёссы нырысь ик герӟаськемын анай- атайёсын, - вера Раиса Павлиновна. - Соос милемды ӧз валалэ ке, милемлы ӧз юрттэ ке, тыршеммы-пӧсяммы тӧлъя-буръя кошкоз. Соин ик коллективмы тырше котькуд семьяен кусып тупатыны. Та ужез мыто, шуыны луоз, пичи классъёсын ужась дышетӥсьёс. - Покчиос нырысетӥ классэ лыктон азьын ик ини егит анай-атайёсын тодматскиськом, - шуэ дышетӥсь Галина Васильевна Зайцева. - Пиналъёсты ӟечгес тодон понна, нылпи садын ик нимысьтыз тестирование ортчытӥськом - котыр ласянь эскериськом вуоно дышетскисьёсмылэсь быгатонлыкъёссэс. Йылпумъянъёс лэсьтыса, ваньмыныз ик тодматӥськом анай-атайёсты. Дышетскон ар кутскем бере, толэзь ортчыса, соос понна адӟытон урок радъяськом, мед адӟозы, та дыр куспын кыӵе луизы ни покчиоссы, вань-а соослэн азьпала вамышъёссы. Галина Васильевна - егит дышетӥсь, ас удыссэ туж умой тодэ-вала со. - Толэзь куспын пиналъёсты пыр-поч тодӥськоды, луоз. Мар ласянь соос тужгес но шугъясько? - юасько солэсь. - Котьмалэсь секыт соослы - пукыны. Бен, бен, парта сьӧрын лад-лад пукыны но кылзӥськыны. Анай-атайёс но ас синмынызы адӟо сое. Ма, кызьы таосты адями кароно? - ӵемысь юало милесьтым. Зэм но, кызьы? Мумы-бубыосын дэмен ужаса, шуо Гожня школаысь дышетӥсьёс. Тае лыдэ басьтыса ик вань ужзэс радъяло. - Ас шӧдэммыя ужаськом, ялан утчаськиськом, - шуэ Раиса Павлиновна. - Тани анай-атайёслэсь школаен ӵош ужамзэс чаклан понна ас вакытаз нимысьтыз экран лэсьтӥм вал, отчы пусйылӥм, шуом, собраниосы ветлэмзэс ик. Экранмес коридорысь борддоре ошим. Бӧрысьгес тумошо югдур кылдӥз: куд-огез пиналъёсмы, анай- атайёссэс утьыны вырыса, отчы кизэс вуттылыны кутскиллям. Ма кароно? Экранмес воштоно луим журналэн. Бен, куд-огез шуоз - семьяен ужан котькуд школаын вань. Но гожняослэн та удысын аспӧртэмлыксы вань. Соос ужзэс радъяло, этнопедагогика вылэ пыкиськыса, мукет сямен вераса, пиналъёсты дышетон мынэ, калык сямъёсты чакласа. Шуом, тросаз-а меда школаосын луыло удмурт дӥськутлы сӥзем урокъёс. Нош Гожня школаын сыӵе урокъёс ортчо, пиналъёсын ӵош отчы пырисько анай-атайёс, песянай-песятайёс. Дышетӥсь интыын - Ижысь изобразительной искусствоосъя музейысь специалист Татьяна Никитична Москвина. Ӵапак этнопедагогикая азинсконъёссэс лыдэ басьтыса, татын ортчиз быдэс республикаысьтымы национальной дышетон учреждениосын ужасьёслэн конференцизы. Ма, гожня дышетӥсьёс но асьсэ пуртыязы гинэ пӧзьыса уг уло. Соос вуылӥзы ни Ижысь бигер гимназие, ӟуч классической гимназие но мукет школаосы. Бен, адӟем карымонэз трос. Но директор буйгатсконэз уг вала. - Котькуд вакытлэн аслаз секытэз, - шуэ Раиса Павлиновна. - Уно аръёс ӵоже дышетон удысын тыршисько ни. Ноку но капчи ӧй вал ужаны. Тани али ваньмыз уксё бордысь потэ. Басьты вал компьютеръёс - номырин. Сюлэм туж вӧсь луэ, куке гурт пиналъёс городысь ёзъёссылэсь лябесьгес шуэмез кылӥськод ке. Нош ӵошатыны луэ меда, куке дышетон условиосмы чылкак мукетэсь. Шуом, одӥгаз школаысь нылпиослэн огшоры компьютерез адӟылэмзы ӧвӧл, нош мукетаз быдэс компьютеръёсын быдэс класс усьтэмын. Азьвыл аръёсы гуртысь дышетӥсен данъяськылӥзы. Туннэ со мыным туж жаль потэ: школаын ужамез понна басьтэм уксёез улыны-вылыны тырмыт ӧвӧл бере, трос пудо-живот, бадӟым бакча возёно луэ на. Раиса Павлиновна тодаз вае, кызьы со, институтэз горд дипломен йылпумъям специалист, кузпалыныз ӵош Гожня гуртэ вуиз. Кыкназы ик дышетӥсьёс, соин ик нырысь-валысь хозяйствоен йырин ӧй вал, курег гинэ но ӧз вордылэ. Но бускель кышномуртъёс кырыж учкылыны кутскизы. Собере нылпиоссылы но йӧл басьтылыны кулэ вал бере, пудо вордытэк ӧйлась. Нырысь-валысь школаен кивалтӥз Раиса Павлиновналэн кузпалыз. Собере сое мукет уже басьтӥзы. Соку РОНО-лэн кивалтӥсез приказ гожтэм Р. П. Герасимоваез огдырлы директорлэсь ужзэ быдэсъяны юнматон сярысь. - Татчыозь ялан директорлэсь ужзэ быдэсъясько, - серекъя нылкышно. - Мон мултэс шара адями, малпанъёсме ватыса уг улӥськы, умойзэ но, уродзэ но шонерак верасько. Шӧдӥсько, куд-огезлы со уг но кельшы. Но монэ уд вошты ни. Герасимовъёслэн куинь нылпиоссы пӧлысь кыкез дышетӥсьлэсь ужзэ бырйиз. - Улонын шуг-секытъёс трос, соосты пиналъёсмылы вормоно луоз, шуэ Раиса Павлиновна. Кужымзы тырмоз, дыр. Соос будӥзы но ук, дышетӥсьлэн ужезлэсь ӟечсэ но, уродзэ но адӟыса но ас вылазы шӧдыса. Бен, гуртысь дышетӥсьлэн улонэз берло дыре секыт луиз, но азьвыл сямен ик со юрттэ егитъёслы азьпал улонзылы дасяськыны, сюлэмзыя сюрес бырйыны. Гожня школаысь коллективлэн ужан опытэз адӟем карымон. Соин тодматско мукет интыосысь дышетӥсьёс, сое ужъёсазы куто шаерысьтымы тодосчиос. Нош та бадӟым вормонлэн шорсюлмыз но инъетэз - школалэн директорез Р. П. Герасимова. Угось солэн ӟырдыт мылкыдыз юрттэ ӵош ужась эшъёсызлы но, пиналъёслы но, гурт калыклы но. Озьыен, веран зэм: азь питран кытӥ питыра, берыз но отӥ ик кошке. Раиса Павлиновна Герасимовалэн уно наградаосыз, со Удмурт Республикаысь дано дышетӥсь. Нош туэ, элькунмы кунлык басьтэм дырысен 80 ар тырмон вакытэ, солэн нимтулыз пыртэмын шаермылэн Данъян пул вылаз. Сӥзиськом солы юн тазалык но ужаз бадӟымесь азинсконъёс. Ю. Александрова. Вань мукет дунне но Дэри черкогуртын усьтӥськемын но ужа шаертодонъя юрт. Солэн Выль арозь возьматыны чаклам адӟытонэз сӥземын ёрослэн азьвыл но туала вакытэзлы. Юрт пушкы пырем бере ик син шоры йӧто вашкала улонлы сӥзем суредъёс. Соос вӧзын - туж чебер пужъятэм шобыръёс, ӝӧккышетъёс, туж чебер керттэм ыж гон чулкаос, пыдвылъёс, пӧзьыос. Шаертодонъя юртлэн мукет висъетаз - ёросысь тодмо адямиос. Соос - та палан вордӥськем но будэм гожъясьёс, крезьгурчиос, суредасьёс, мукет удысъёсын ужасьёс. Юртлэн пушкыз но туж чебер. Яркыт буёл татчы пырем муртэ соку ик мукет дунне сярысь малпаськытэ. Выль арозь дыр вань на - вуылэ Дэри черкогуртысь шаертодонъя юртэ. Е. КУЗНЕЦОВА. Удмурт Республикалы юнматэмын выль Прокурор Та нуналъёсы республикаямы вуылӥзы Россиысь Генеральной прокурорлэн воштӥсез Звягинцев Александр Григорьевич но оссия Федерациысь Генеральной прокуратуралэн Привлжье федеральной округъя Управленилэн кивалтӥсез Зыкин Владимир Кузьмич. Лыктон мугзы - Удмурт Республикалы Прокуроре В. К. Зыкинлэсь кандидатуразэ дэмалнэз согласовать кароно Удмурт Республикалэн Президентэныз А. А. Волковен. Кык нунал ӵоже соос пумиськылӥзы Удмуртилэн Президентэныз, Кун Кенешлэн кивалтӥсьёсынызы, Законностья, обществоез кышкытлыклэсь но адямиослэсь правооссэс утёнъя ялан ужась комиссиен. 20-тӥ декабре Кун Кенешлэн 14-тӥ сессияз данакез депутатъёс В. К. Зыкинлэн кандидатураеныз соглаш луэмзэс веразы. Юанъёслы валэктонъёс сётыкуз, В. К. Зыкин вылӥ дунъет сётӥз республикаысь прокуратуралэн ужамезлы. Тау кариз оскемзылы но азьланяз парламентэн, Удмуртилэн Президентэныз, кивалтӥсьёсын ӵош ужан сярысь мылкыдзэ вераз. Собере ортчиз прокуратуралэн паськытатэм коллегиез. Республикаысь прокуроръёс тодматскизы В. К. Зыкинэн. Пумиськонын вераськон мынӥз преступностьлы пумит пайдаё ужрадъёс кутон но законъёсты чаклан сярысь. Справка интые: Зыкин Владимир Кузьмич, вордскемын 1948-тӥ арын. 1971-тӥ арын йылпумъяз Свердловскысь юридической институтэз, ужаз Курган областьын 2000-тӥ арысен - РФ-ысь Генеральной прокуратуралэн Приволжье федеральной округъя Управлениезлэн кивалтӥсез. Пусъемын "Россия Федерация прокуратуралэн дано ужасез" знакен. ВЕРАЛО БУСКЕЛЬЁСМЫ Сайкатъясь но кулэ луылэ Вань удмуртъёслэн тямысэтӥ ӧтчамзылэн ужаз пыриськизы удмурт шаермылэн палэнысьтыз но делегатъёс. Валамон ни, туж мылкыд карисьёсызлы но малпанъёссэс вераны дыр ӧз тырмы. Соингес но куд-огезлэсь дэмлан-ӵектонъёссэс газет бамын усьтоно кариським. Одӥгез соос пӧлысь Татарстанысь Балтаси ёросысь удмуртъёслэн "Кенеш" национально- культурной автономизылэн кивалтӥсез Шор Кушкет школаысь дышетӥсь Леонид Дмитриевич САПОЖНИКОВ. Соин кенеше журналист Фёдор Никитин. - Леонид Дмитриевич, тӥ Удмуртъёслэн куатетӥ ӧтчамзылэн но делегатэз вал бере, берлозэ ужрадэз азьлоеныз ӵошатыны быгатысалды, дыр... - Озьы. Шуд усиз, шуыны луоз, кык ӧтчамъёслэн ужазы пыриськыны. Куатетӥез ӧтчам усьтӥськиз вал "Катанчи" театрлэн возьматонэныз. Ӟеч ужъёс ӟеч тысь мед ваёзы шуыса, чабей пазязы. Кутсконэз но, ӧтчамлэн мынэмез но туж кельшизы, сюлэме пыӵазы. Ӧтемын вал бускель улосвылъёсысь но кунгож сьӧрысь куноос. Таиз ӧтчам кизергес йӧтӥз. Мон сямен, со малпамын вал палэнысь бадӟым куноостэк удмуртъёс пӧлынгес кенешыны. Собере шӧдӥське уксёлы ёрмон но. Вераме потэ тани мае но. Куатетӥ ӧтчам дыръя ми улӥмы Удмурт Элькунлэн шоркарысьтыз кунокуаын. Со но мылкыдмес лӧпкытӥз, лулсюлэмъёсмы данъяськонэн пачылмемын вал. Таяз учыре интыязы "Берёзка" шутэтскон базае. Малпамы вал, татчы вуыса, удмурт телевидениез ке но адӟомы шуыса. Гуртысь, нюлэс пушкысь вуыса, нюлэскы ик шедимы. Телевизор бен вал ик, но кӧня каналъёсты утчамы, удмуртсэ номыре ӧм синйылтэ, удмурт лулчеберлыкез кылытэк-адӟытэк кылимы. Ярам коть, ӝытаз концерт радъязы. - Леонид Дмитриевич, "Удмурт кенешез" вань удмуртъёслэн огазеяськонзы шуиськом. Кызьы малпаськоды, та дыр ӵоже со быгатӥз-а ни вань удмуртъёс доры сузьтӥськыны? Тани асьтэос но кивалтӥськоды ёросысьтыды "Кенеш" нимо ик национально-культурной автономиен. Кызьы радъясько "Удмурт кенеш" огазеяськонэн кусыпъёсты? - Ми "Удмурт кенеше" вазиським ке, со котьку дась юрттыны. Но "умме усьылонъёсмы" дыръя,, сыӵе учыръёс луыло, "Удмурт кенеш" милемды мед "сайкатъясал", котьку но, котькыӵе куазен со мед сузьтӥськысал ми доры, задор мылкыд мед пыӵатысал. Ватонэз ӧвӧл, асьмелэн но янгышъёсмы вань. 1997-тӥ арысен ужатозям, "Удмурт кенешен" меӵак герӟаськыса, кыӵе ке огъя ужрадъёс, пумиськонъёс ортчытыны ӧм вуэ. Оло нош дунне валанмы но ансырес (сюбеггес) ай. Собере "Удмурт кенеш" тросгес вырылӥз быръёнъёсын, вакытэз сыӵе вадьсаз. Соин но котькытчы вуттӥськыны ӧзгес быгаты на. Нош котьма ке но, палэнын улӥсь удмуртъёс доры со одно ик мед сузьтӥськысал. Удмурт газетъёс пыр но ӟечгес кусып радъяны луоно. Шуом, тани "Удмурт дунне" но "Герд" съездлы сӥзем материалъёсын нимысьтыз номеръёссэс поттӥзы. Та выллемъёссэ коть, араз одӥг-кык пол ке но тросгес печатласа, ми палась удмурт гуртъёсы нырысь-валысь дунтэк вуттылыны тыршоно вылэм. Удмурт шаерысь гожтӥськыса газет басьтӥсьёслы но валэктоно солэсь кулэлыксэ, удмурт калык соин номырзэ уз ышты. Палэнысь удмурт гуртъёсын улӥсьёс тросэз уг тодо, кыӵе газет- журналъёс пото. Одӥг пол ке но адӟысалзы ке, дасэз-кызез коть гожтӥськыны но мылкыд карысалзы, мон сямен. Озьы удмурт кылэз дышетонэз но паськытатыны луысал. - "Удмурт дунне" но "Кенеш" сяна али пото ни мукетъёсыз но - "Инвожо", "Вордскем кыл", "Кизили". Таоссэ басьтӥсьёс вань-а тӥ палан? - "Удмурт дуннеез" но журналъёсты басьтӥсьёс вань, но гожтӥськисьёс трос шуыса ушъяськыны ум быгатӥське. Школаос басьтогес "Вордскем кылэз". Берло дыре тросгес вуэ ми доры "Кизили". Пиналъёсын ӵошатскыса сямен, сое мӧйыос но учкыло. - Табере вакчияк вералэ вал асьтэ "Кенештылэн" ужъёсыз сярысь. - Та уже монэ бырйизы 1997-тӥ арын. "Кенеш" национально-культурной автономимес удмурт культурая "Дэмен" огазеяськонлэн нылпиез, шуыны луоз. Со пусъемын Татарстанысь Юстицияя министерствоын. Куинь ар куспын ортчытӥм ни "Жингырты, удмурт кырӟан!" нимо фестиваль. Удмурт гуртъёсын улӥсьёслы но, бигеръёслы но шумпотон луиз со. Радъямы "Зарни перо" конкурс. Вуизы Ижысь но гожтэтъёс. Но гожъясьёс трос вал шуыны уг луы. Удмуртъёслэн ручка кутыны мылкыдзы ӧз тырмы, лэся. Татарстанысь удмурт гуртъёсын улӥсьёс понна кылем гужем ортчытӥм "Гырон быдтон" праздник. Нош "Кенешмылэн" тужгес пусйымон уженыз лыдъяськом шошма удмуртъёслы сӥзем "Удмурт шыкысысь ваньбуръёс" нимо сборник дасянмес. Та сборникмы огазеяны кулэ куамын тямыс удмурт гуртъёсты. Соос пӧлын вань суроосыз но, уло бигеръёс, поръёс, ӟучъёс. Тросгес бен удмурт гуртъёс Балтаси ёросын. Та "шыкысамы" пыртом Марий Элысь дасо пала гуртъёсты, куиньзэ Киров улосысь. - Озьыен, таӵе ужрадды пӧртэм улосвылъёсысь гуртъёсты огазеяны юрттэ... - Огъя уж тросгес калыкез огазеяны юрттэ, шуо. Малпаськом, та сборникмылы материал люкан сямен мукет улосвылъёсын но ӟеч кусыпъёс тупатом шуыса. Оскиськом, милям тыршеммы Марий Элысь, Киров улосысь удмурт гуртъёсын улисьёслэсь но анай кылмес ӟечгес тодыны мылкыдзэс бурдъялоз. - Нош мар луыны кулэ со "Удмурт шыкысады"? - Шыкыс шуим бере, отын маиз ке но луыны кулэ. Та сборнике пыроз ньыль книга. Нырысяз луозы шошма удмуртъёслэн кырӟан-эктонъёссы, шудон-шулдыръяськонъёссы. Кыкетӥез тодматоз шошма удмуртъёслэн эмъяськонниенызы, сиён пӧранниенызы. Куинетӥез книга нимаськоз "Шошма удмурт гуртъёс ХХИ даурлэн кутсконаз". Нош ньылетӥзэ книгамес календарь выллем карыны малпаськом. Со бадӟымгес но луоз. Татын нылпиосмылы возьматыны тыршом, кинъёс соос финн-угор выжыысь но бускель бигер, башкир, чуваш калыкъёс. Тазэ удмурт кылэз тодӥсьтэмъёс понна ӟуче но берыктоно луоз. Та малпам ужмес быдэстыса, вань бускельёсмылы ӟеч лэсьтом. Та пумысен одӥг учыр сярысь верало на. Балтасиысен одӥгаз кабинетын бигер нылкышноез пумитай. Со вераз, нылпиоссэ удмурт калыкен матэгес тодматон понна, пе, этнографияя книга басьтӥ. Тӥни ог-огмы сярысь тросгес тодэммы потыса улӥськом. - Тодэм потэ вылэм тани мае но. Тӥ улӥськоды Татарстанын. Уг луыло-а ог-огдэ валамтэ учыръёс? Кивалтэт ласянь юрттэтэз шӧдӥськоды-а? - Тау инмарлы. Туннэ нуналозь туж шумпотыса улӥськом, данъяськиськом. Тани "Кенеш" национально-культурной автономимы ужаны кутскем дырысен мар гинэ ӧм малпаллялэ, кытчы гинэ ӧм вазиськылэ юрттэт курыса, администрациосы, сельсоветъёсы, Культурая но Калыкез дышетонъя министерствоосы. Кивалтэтэ, вань ӧсъёс азьын ми понна вож тылъёс ӝуало. Тау туннэ нуналлы, пиштӥсь шундылы шумпотӥськом гинэ. - Нош Удуртиысь кивалтон ёзъёсын кусыпъёс возиськоды-а? - Кылем арын ёросамы ортчизы удмурт кылъя дышетӥсьёс понна нимысьтыз курсъёс. Туж юрттӥзы милемлы Ижевскысь Дышетӥсьёслэсь тодон-валанзэс будэтонъя институтын ужасьёс. Татарстанысь но Удмуртиысь Калыкез дышетонъя министерствоос куспазы кенешыса таӵе ужрад ортчытӥзы. Туж тау кариськом соослы. Дышетӥсьёмы туж шумпотӥзы. - Тау мылкыдъёстэс верамды понна. Мытэм ужъёсты мед азинскозы, ваньзэ ӟечсэ гинэ тӥледлы. - Тау. Кузьым басьтэме потэ Мынам нимы Владик. Листьевлэсь нимзэ мыным понӥллям. Аресэ - тямыс, кыкетӥ классын дышетскисько. Семьямы бадӟым. Анае Оксана, атае Владимир, выны Вася, сузэре Света. Васимылы 25-тӥ декабре ньыль арес тырмоз. Светӥмылы одӥг ар но дас толэзь гинэ ай. Вань на милям Галя бабамы. Эшъёсы мынам трос. Дышетскисько умой. Кыкетӥ классын ми кык кузя. Туж яратӥсько суреданы. Выль арлы дӥсясько Буратино. Тол Бабай, мынам тынэсьтыд кузьым басьтэме потэ. Анайёсы кузьым сётыны уг быгато. Колхозын уго коньдон уг тыро. Туж зол куриськом. Оскиськом, уд алда шуыса. Мон эшшо но умойгес дышетскыны тыршо. Ӟеч улэ. Владислав ИВАНОВ, Алнаш ёросысь Кузьымгуртысь пичи пияш. КУН КЕНЕШЛЭН СЕССИЯЗ Выль дауре - выль кужымен Удмурт парламент та арня куспын пайдаё ужаз. Депутатъёс кык нунал ӵоже пумаз-йылаз вуттӥзы трос пумо ужпумъёсты. Соос пӧлысь тужгес но пусйымонэз - Правительстволэсь структуразэ юнматон. Кызьы тодмо, та воштӥськонъёсты ортчытоно луиз Удмуртилы президент быръемен валче. Кун Кенешлэн дас ньылетӥ сессияз Правительстволэн Тӧроез Юрий Степанович Питкевич депутатъёсты тодматӥз но юнматыны куриз аслэсьтыз выльдэм командазэ. Газетмылэн азьвыл номераз куд-ог фамилиосты верамы ини, соос ӧз воштӥське. Лушкем голосованиея бюЛлетене премьерлы воштӥсе быръён понна дэмламын таӵе адямиос: Н. И. Хохлов, М. И. Назаров, Н. А. Харина, А. В. Сакович, В. В. Бельтюков, С. П. Касихин, В. А. Савельев. Ваньмыз сизьым мурт. Урнаосты усьтэм бере, тодмо луиз: 89 депутат пӧлысь Хохловлы оскемзэ вераз 77-ез. Назаров люказ 78 куара, сомында ик - Сакович но Савельев, Бельтюков - 75, Харина но Касихин - быдэн 66. Та нУналысен ваньмыз соос луизы Тӧролэн воштӥсьёсыз. Соос пӧлысь кин кыӵе удыс понна кыл кутоз? Николай Иванович Хохловлы оскемын промышленность. Михаил Иванович Назаров нуоз гурт удысэз. Та сярысь нимысьтыз куронэн вазиськизы АПК-ын но крестьян хозяйствоослэн огазеяськоназы ужасьёс. Наталья Алексеевна Харина Кун Кенешысь выже Правительствое. Татын но син шораз возёз социальной ужпумъёсты. Виктор Алексеевич Савельев чаклалоз эстӥськон, энергокужым, музъем узырлыкъёсты кутонэз, связез. Андрей Владимирович Сакович азинтоз Москваын нуоно ужзэ, утёз Удмуртилэсь интересъёссэ. Владимир Васильевич Бельтюков выроз коньдон ужпумъёсын, Сергей Павлович Касихин кыл кутоз шаерысь ваньбур понна. Огъя вераса, котькудӥзлэн вице-премьерлэн "портфелез" дано но секыт. Соос бордысь но потоз, кызьы асьмеос улом-вылом матысь аръёсы. Выль быръем кивалтӥсьёсты ӟечкылаз республикалэн Президентэз Александр Александрович Волков. Сӥзиз соослы ӟеч мылкыдын но ог-огзэс валаса ужаны. Президент тау карон кылъёс вераз Виктор Евграфович Шудеговлы, социальной ужпумъёсъя Тӧролэн азьвыл воштӥсезлы. Оскемзэ вераз, выль удысын со озьы ик быгатонзэ но тодон-валанзэ шаермы понна сётоз шуыса. Туннэ нуналлы Ю. С. Питкевичлэн ӧвӧл на нырысетӥ воштӥсез, тупась кандидатура татчы шедьтымтэ на. Кинэ быръёз премьер аслыз бур кие, матысь дыре одно ик тодом, дыр. Та нуналэ ик депутатъёс бырйизы Удмурт Республикалы валтӥсь прокурор. Та интые учкемын вал ньыль кандидатура, нош сессие поттэмын огез - Владимир Кузьмич Зыкин, Генеральной прокуратураысь Приволжье округъя управленилэн кивалтӥсез. 30 арлэсь ятыр ужа ни со законностез утёнъя ёзъёсын. Атайзылэн сюрестӥз мыно нылпиосыз но. Лушкем голосование дыръя 89 депутат пӧлысь В. К. Зыкинлы куаразэ сётӥз 84 мурт, пумит луэмзэ вераз 5-ез. Озьы Виктор Михайлович Походинэз арлэн пумаз воштӥз выль прокурор. Кызьы шуиз А. А. Волков, та удысэ республикамылэн палэнысьтыз кивалтӥсь вайыса, урод ум лэсьтӥське. Югдурез утёнъя министрлэн ужез вылысь со умой адске. Озьыен, Правительстволэн структураез выльдӥськиз, юнмаз. Кыле на огез гинэ: ужаны но оскем удысэз пайдаё нуыны. 15 час 40 минутэ депутатъёс выжизы 2001-тӥ арлы чаклам бюджетлэсь инъетсэ эскерон борды. Со доклад лэсьтӥз Кун Кенешысь Ялан ужась комиссилэн тӧроез Софья Эльфатовна Широбокова. Республикамы понна та туж кулэ луись документэз эскерон борды депутатъёс ӝот-ӝот басьтӥськизы. Ас малпанъёссэс веразы Воткинск но Ижевск городъёслэн мэръёссы В. Л. Фридрих но А. И. Салтыков, А. Т. Малков, Л. И. Забродина но мукетъёсыз. Сое эскерон бордын трос ужазы на депутатъёслэн огазеяськонъёссы. Озьы ке но, тупатонъёс, ватсанъёс луозы на. Соосты эскерон-чаклан вылысь кылдытэмын огъя кылэ вуонъя (согласительной) комиссия. Кун Кенешлэн сессиез ужзэ азинтоз 26-тӥ декабре. Л. МЕДВЕДЕВА. Дарт Воректӥсь кизилиос "Мон уӵы ик кылё" Таӵе нимын потӥз "Шулдыр ӝыт" ансамбльысь егит кырӟасьлэн Наталья Матвеевалэн нырысетӥез крезьгуро альбомез. Мон малпамъя, со усто пӧрмем сузьетлэн огъя мылкыдыз сюлме биниське. Туала нылмуртлэн сюлмаськонъёсыз, яратоно пияшеныз кусыпъёсыз, шуд сярысь эсэпланъёсыз - ваньмыз со вань Натальялэн кырӟанъёсаз. Вераны кулэ, тросэзлэсь кылъёссэ но со ачиз ик гожтӥз, крезьгурзэ, валамон - ваньзэ ачиз. Та етӥз, егит кырӟасен мон тодматыны малпай лыдӟисьёсмес но. - Наталья, кинлы сӥзиськоды нырысетӥ альбомдэс? - Уг вера, мед со пушкам кылёз. - Сузьетысьтыды дас вить кырӟан пӧлысь дас одӥгез асьтэлэн кылъёстыя гожтэмын. - Мынам трос кырӟанъёсы - укмыстон пала. Но тросэз соос пинал дыръя гожъямын, туж огшорыесь. Гитараен шудыса тодам вайылӥсько куддыр. - Гитараен но шудӥськоды-а? - Ӧжыт. - "Шулдыр ӝытын" кыӵе нырысь кылдытэм кырӟанды? - "Мон уӵы ик кылё". - Тӥ кырӟанъёсады шудо но шудтэм нылъёслэсь образъёссэс пыртӥськоды - асьтэос нош кыӵе? - Пӧртэм. Али - шудо. Мынам вань семьяе, яратоно уже. - "Востэм пияш" кырӟанды вань. Улонады сыӵеосыз пиос кельшо-а? - Котькыӵеосыз. - Альбомады кык ӟуч кырӟан пыремын. - Со юри озьы каремын - удмурт кылэз валасьтэмъёсыз но творчествоеным мед тунсыкъяськозы. - Удмурт эстрадамы кассетаосын бусьтыр ӧвӧл. Секыт-а вал нырысетӥ альбомдэс поттыны, кыӵе студиосын кусып возиды? - Нырысь мон тодмоосы понна гинэ кассета поттыны малпасько вал, но юалляны кутскизы учкисьёс но. Кассетае сю мында гинэ вал, соин ик туж ӝог вузаса быриз. Нош студиосын ужаны мыным туж кельшиз. Аранжировкаос лэсьтӥзы Иван Григорьевых но Юрий Пушкарёв. Куарае бордын ужаз на Николай Карпов. Ваньмызлы туж бадӟым тау. - Кызьы малпаськоды, тодмо ни-а тӥ шаерамы? - Озьы, дыр, "Шулдыр ӝытын" кык ар ужатозям, трос гастрольёсы потай, кырӟанъёсы чузъясько радио пыр но. - Кылэм вань, тӥ асьтэдыз Надежда Уткина шоры учкыса лэсьтӥськоды шуыса. - Уг. Кырӟан гожъяны кутскыкум, мон Уткинаез уг но тодӥськы на вал. Бен, мыным шуыло, куараосмы тупало шуыса, тужгес но сурало "Зорые" кырӟанъя. Мыным кельше Надялэн кырӟамез, но асме со кадь карыны уг выриськы. - Али тросэз кырӟасьёс баръёсын, ресторанъёсын ватсаса ужало. - Мыным сыӵе уж уг кельшы. Кыӵе ке гольтырес адямиос сиё-юо, шорад уг но учко, нош тон соос понна сюлэмдэ кисьты. Со понна сцена вылын астэ королеваен шӧдӥськод - ваньмыз тон шоры учко, тыныд чабо. - Маин шумпоттыны малпа Наталья Матвеева учкисьёссэ азьланяз? - Али вераны уг быгатӥськы. Пилисько уже но семья вискын. Семьяе - Вавожын, ачим - Ижевскын. Н. Матвеевалэн крезьгуро альбомаз вань "Лушка монэ" кырӟанэз. Бен, Натальяез лушканы огез гинэ воргорон мылкыд ӧй карысал, дыр. Но быгатоз-а со кужмысь кырӟатыны уӵыез. Уз. Уӵы кырӟан вай ачиз быръе. А. Клементьев. Можгаын пумиськон Толон Удмурт Республикая валтӥсь федеральной инспектор С. В. Чикуров Можгаын кенешон ортчытӥз. Отын вераськон мынӥз федерациысь быдэсъясь властьлэн улосвыл ёзъёсызлэн но городъёсысь но ёросъёсысь интыысь аскивалтон ёзъёслэн кусыпъёссы сярысь. Ужрадэ пыриськизы федеральной властьлэн республикаысь ёзъёсызлэн кивалтӥсьёссы, Можга городысь, Алнаш, Грахово, Вавож, Кизнер, Можга, Пичи Пурга ёросъёсысь администрациослэн йыръёссы. Со нуналэ ик Можгаын (Можгинской урам, 62 номеро юрт) Россия Федерацилэн Президентэзлэн Приволжск округъя оскем муртэзлэн общественной приёмноез усьтӥськиз. Удмурт Республикая валтӥсь федеральной инспекторлэн пресс-службаез. Шӧкыч Меӵак но могак Зарниям валесын куалекъяса кылльытозь, куро вылын капчияк изёд. Лул-сюлэмад коӵышъёс ӵабъясько ке, малы соосты эшед вылэ узатыны. Синучкон адямилэсь мугорзэ возьматэ, нош юон - лулпушсэ. Возьдаськон но дандэ утён дэрем нуллэм кадь ик: макем зол со посӥськемын, сокем кулэтэмен сое лыдъяськод. Туш будэтэм, нош визьмыз уг адӟиськы. Бусыын веттаськись шеп нянь ӧвӧл на. Ужано дэмен Можга ёросын 20 хозяйство муш вордэ. Та удысэз пайдаё нуыны валам кулэ. Соин мушкасьёс дэмен кенешыло. Алигес соос люкаськылӥзы Бадӟым Учае. Муш вордон угось тужгес ӟеч радъямын "Россия" эштосын. Отын куать муш бакчазы. Туэ соос 12 тонна чечы кыскизы. Нош ёрос сярысь верано ке, котькуд умортоысь шорлыдын 14,4 килограмм чечы басьтэмын. Табере рынок пӧртэм вуз поттӥсьёсты ӟечгес вузкарыны дышетэ. Тани бадӟым учаос чечызэс пакетъёсы тырон линия басьтӥллям. Соос озьы ик малпасько ӟеч выжы мушъёсты вордонэз радъяны. П. Николаев. Теннис вуэ гуртэ Берло дыре, кунгож сьӧрысь теннисэз яратӥсьёслэсь адӟем карыса, лэся, асьмелэн спортсменъёсмы но теннисэн эшъяськыны кутскизы. Тани Можга ёросысь Пичи Сюга шор ёзо школае алигес люкаськылӥзы но туж тунсыко ӵошатсконъёс ортчытӥзы быдэс ёросысь теннисэн эшъяськисьёс. Та ӵошатсконъёсы ветлӥз 9 команда. Вормисе потӥзы Александрово гурт администрациысь спортсменъёс Валерий Васильев, Сергей Алексеев но Анна Платонова. Кыкетӥ интыез басьтӥзы Пычасысь спортсменъёс, куинетӥзэ - Бадӟым Пудга команда. Ӵошатсконъёс возьматӥзы, егитъёслы спортлэн та удысэз юн кельшем шуыса. П. Николаев. Выль сюрес усьтэмын Можга ёросысь Бадӟым Пудга гуртысен Люга станциозь - 4,7 иськем. Сое ӝутон но асфальтэн шобыртон йылпумъяськиз ноябрь толэзьлэн кутсконаз. Выль сюресэз кун комиссия эскериз но ужъёслы умой дунъет сётӥз. Сюресэз лэсьтонын ӟеч тыршизы Можгаысь сюрес лэсьтӥсьёс: прораб С. Шаклеин, экскаваторлэн машинистэз А. Бугреев, погрузчиклэн машинистэз С. Малков, водитель С. Абалтуев, асфальтэн ужась Н. Елисеев но трос мукетъёсыз. Табере гужем но, тол но каньыл луоз пудгаослы поездэ потыны, нош станциын улӥсьёслы - бускель гуртазы ворттылыны. П. Никлаев. "Дина" ӝог вуись йыды Ма тужгес но кышкыт луэ Удмуртиысь ю-нянь будэтӥсьёслы? Сӥзьыл зоръёс. Юос умой ке но будо, ӵем дыръя тысь кеносъёсы уг вуы куазь аламаен. Соин ик кулэ вылэм вазь вуись юосты кизьыны. Та сярысь сюлмасько Можгаысь кидысъя инспекциын. Гужем, инспекция юрттэмен, ёросысь сизьымез эштос кизьыса эскериз вазь вуись "дина" йыдыез. Урожайзы ӟеч вал, ваньзэ октыны-калтыны вутскизы. Будэ выль культура луо музъем вылын ю. Сое кӧжыен ӵош кизиськод ке, уг выды, ыштонъёс уката ичигес луо. Сортъёсты эскеронъя станциын котькуд гектарысь 28 центнер йыды кутсамын вал. Инспекция озьы ик умоен лыдъя "приокской" нимаськись выль чабей сортэз. Кылсярысь, "Восход" эштос сое 18 тонна басьтыса кизиз вал, таиз но сорт шумпоттӥз. П. Николаев. Лэсьтӥськозы тол вылтӥ Куд-ог ёросъёсысь гуртъёсын улӥсьёс тол вылтӥ ужлы ёрмо. Озьы уд вера Селта ёросысь "Свобода" эштосын тыршисьёс сярысь. Тани куинетӥ бригадаязы лэсьтӥськыны нюлэс погыръяны кутскизы ни. Пиосмуртъёсты котыраз люказ нюлэс погыръясь Михаил Шабалин. Лесхоз билет сётӥз 200 кубометрлы, артэ нюлэскысь делянка висъямын. Нош азьло аръем эштос писпу басья вал Ува ёросысь гинэ. Нюлэссэс ворттыса сузялозы но данаксэ пилорамае ваёзы. Отын асьсэлэн ик ужасьёссы Александр Кононов, Владимир Козлов но Николай Прибылев пул пилё. Лэсьтӥськон материалъёс тол вылтӥ дасяса, "Свободаын" вазь тулыс ик пудо гидъёссэс тупатъяны кутскемзы луоз, нош куд-ог лэсьтӥськон ужъёссэс быдэстозы тол вылтӥ ик. Озьы бусы ужъёсы тросгес калык пыриськыны быгатоз. П. Николаев. Шӧкыч Пӧечи поезд Кин кызьы, вылды, аслыз кузпал шедьтэ, нош Илья Прохорович аслэсьтыз Татьяназэ поездысь пумитаз. Мар бен отын сыӵе-таӵеез кадь. Сюрес вылысен ӧжыт-а мынӥсь-ветлӥсьёс тодматско. Ойдолэ бен кылзом бускельлэсь аслэсьтыз мадемзэ. Дас ар талэсь азьло вал со. Одӥг праздникез выны дорын пумитаны малпай. Улэ со Кировын. Квартираез куинь комнатаен, ньылетӥ этажын. Потӥ сюрес вылэ. Билет но ӝог гинэ шедьтӥ, купее. Ӝыны сюресэз ортчыса, одӥгаз станцие тӧлатскыны потӥ, поезд, пе, ог дасо минут сылоз. Пыри буфетэ ма но со куртчон басьтыны. Кури сылалтэм кияр но пыжем курег сӥль бинялтыны. Дыртытэк вамыштӥсько перронэтӥ, "Беломор" кенжытӥ. Учкисько - поезд каллен вырӟе ни. Берло вагонысь тамбурын егит нылаш сылэ. Быземме адӟыса, йырысьтыз вож косынказэ пертчиз но кесяське: - Давай, давай, спортсмен, ӝоггес. Вот озьы. Кужымдэ эн жаля, тани кык-куинь вамыш гинэ кылиз на. Зирты киысьтыд со бинеттэ, бызьыны капчигес луоз. Мар-о карод, басьтэм киярме но, курег сӥльме куштытэк ӧйлась. Тани вагон борды сузьтӥськисько ни. - Ну-ко, эшшо ӝоггес, - кеське нылаш. Оло мылкыдме лӧпкытэ, оло юри серем каре. Тубат вылэ султыса, кизэ мычиз, кужмо киосыныз монэ тамбуре ӝутӥз. - Кытчы-о сокем дыртӥськод, егит кавалер? - исамъяське нылаш. Жадеменым пыд вылам мырдэм сылӥсько, шоканы омыр но уг тырмы ни кадь, тани- тани лулы потоз. Ярам, пуксьыны быгатӥ, солы но шумпотӥсько. Куалекъямысь дугдэме бере каллен гинэ верасько: - Кирове потӥ, выны дорын праздникез пумитаны. Тани вуоно станциын ас вагонам пуксё. Тау юрттэмды понна. - Учкы ай, Кирове мынӥсь шедем ук, нош поезд Перме мынэ. Мон но сузэре доры куное потӥ. - Перме? Кызьы Перме? Оло, тон монэ юри серем кариськод? Тамбурысь тубат вылэ васькыны турттыса, нылашлы верасько: - Адскеммы ӟеч мед луоз. Тэтчемелэсь азьло вай чупало. Поезд вырйылэ тубе, кадь, каллен мынэ. Таня, озьы нимало вылэм нылэз, пиджак сӧзыме кутӥз но уг лэзьы. Шуккиськод, йырыд быроз, пе. Буйгатэ, эн куректы, пе, праздникез сузэре дорын пумиталом. Вераськон куспетӥмы вагонысь проводница потӥз. - Егитъёслэн, шӧдске, кылзы ӧвӧл тупам, - иса милемды со. - Тани поездысь тэтчыны малпа. Поезд Перме мынэ, нош солы Кирове, пе, кулэ. - Бен-бен, поезд Кирове мынэ, - валэктэ проводница. Ньыль-вить час ортчыса вуом ни. Шумпотэменым проводницаез кызьы ӟыгыртэмме, ӵыжыт бамзэ чупамме но ӧй вала, ява тэ. - Кызьы Кирове? Мон билет Перме басьтӥ ук, - ӟаректӥз нылаш. - Али ик тэтчыса кылё. Табере мон сое китӥз кутыса возисько, буйгатӥсько. Праздникез выны дорын пусъём табере. Сузэред пала мукет дыръя мыном ни. Кызьы мыном? - Кузпалы луод но мыном. Тон мыным соку ик кельшид ук! Таня шорам пальпотӥсь синмын учкиз но, йырзэ мӧля вылам поныса, туж пыдлось лулскиз: - Улыса адӟом. Выны ӟеч мылкыдын пумитаз, ӵошен пыреммылы шумпотӥз: малпаз, вылды, кузпал луонэ шуыса. Усто кунояськимы, городэтӥ юмшам, одӥг вагонын ик гурт палъёсамы но бертӥмы. Со ик луиз тодматскеммы, ог-огмес яратэммы но кузпалъяськеммы. М. Мосов. Пыраклы вунонтэм кылёз 83-тӥ аресаз мыныкуз, улонысь кошкиз Удмуртиысь школалэн дано дышетӥсез, Горд Армилэн азьвыл командирез Павел Александрович Осипов. Павел Александрович 1950-тӥ�1970-тӥ аръёсы кивалтӥз Ижевскысь 5 номеро ӝыт ужась школаен. Со бадӟым инты висъялляз егитъёсты патриот мылкыдо будэтонлы. Та школаын кылдытэмын вал тунсыко адямиосын пумиськонъя клуб. 1967-тӥ арын 22-тӥ феврале Удмурт телевидение пыр "Милям школамы" передача мынӥз, отын та адямилэн ӟеч ужъёсыз пусъемын вал. Офицер-историк П. А. Осипов - В. П. Поздеевлэн "По местам боевой славы" книгаезлэн огез героез. Озьы пыраклы вунонтэм луиз та адямилэн нимыз. Сое тодӥсь муртъёс, дышетскисьёсыз ӟечен гинэ тодэ ваёзы. П. А. Осиповез вато туннэ, 22-тӥ декабре, потто Пушкинской урамысь 179 номеро юртысь, 27-тӥ квартираысь. Дышетӥсьёслэн нэнэзы Милям Эшмедгуртмы бадӟым ик ӧвӧл, укыр пичи но уд шуы. Кызьы ке кемалась куамын куать корка вал, али но со мында ик. Та огшоры гинэ гуртысьтымы дасо мында дышетӥсьёс потэмын. Соос пӧлысь висъяське Зоя Ивановна Кононова. Сергей Илларинович Зуевлы, дышетӥсьлы но школа директорлы, быземез бере Зуева луиз. Вань даурзэс, шуыны луоз, ӵошен ужазы Юмга-Омга школаын. Али ке но быдэс Селта районын соосты данъяса гинэ верало. Яратоно Зоя Ивановнамы та ар пумын тямыстон арессэ пусъе. Сое ӟечкылало вордскем гуртоосыз, дышетэм пиналъёсыз, аслаз нылпиосыз. Та дано дышетӥсь сизьым нылпи будэтӥз: Фаина, Александр, Михаил, Анна, Леонид, Пётр, Виктор. Ваньмыз ик соос дышетӥсьёс луизы. Пиосызлэн кышнооссы но дышетӥсьёс. Уть, соос быдэс класс мында люкасько. Одӥгез нош нылыз - Анна Сергеевна Зуева - дышетӥсьёслэн дышетӥсьсы, УдГУ-ысь профессор, кафедраен кивалтӥсь, учёной но писатель луиз. Таиз тӥни республикаямы но данъямон, дэлетлы, етӥз адями. Зоя ним, пе, грек кылысь берыктыса, "яратон" шуэм луэ. Зэм ик та бадӟым дышетӥсьлэсь вань улонзэ яратон кыл котыре кузъяны луоз, дыр. Зоя Ивановна яратӥз картсэ, картэз яратӥз сое. Ма, ог-огзэс ӧй ке яратысалзы, сомында визьмоесь пиналъёс вордысалзы, будэтысалзы шат? Зоя Ивановнаез ярато дышетэм пиналъёсыз, ачиз но соосты ялан яратыса будэтӥз, визьнодаз. Ми но, солэн гуртоосыз, эшъёсыз, тодмоосыз яратыса ӟыгыртӥськом но бадӟым юбилееныз ӟечкыласьком сое. Озьы ик сюлмысьтымы ӟечкыласьком на Зоя Ивановнамес вуись Выль арен, вуись выль даурен. В. ГИРБАСОВ, ужысь ветеран. "Тол Бабайлы - гожтэт" Газетамы ивортӥмы вал, Удмурт Республикаысь Почта кусыпъёсъя управление но Егитъёсын ужанъя кун комитет "Тол Бабайлы - гожтэт" конкурс ялӥзы шуыса. Асьмеос но ӧм малпалэ, но нылпиослэн Тол Бабайлы гожтэтъёссы редакциямы тросэн вуыны кутскизы. Соин ик, "Удмурт дунне" газет но та ужрадэ пыриськыны малпаз. Конкурсэз радъясьёсын вераськыса, удмурт кылын гожтэтъёс нимысьтыз эскеремын луозы. Вормисьёсты ӧтёзы Ижевске шулдыръяськон ужрадэ, Тол Бабай соослы кузьымъёс но дася. Со сярысь азьланяз ивортом на. "Удмурт дунне" газет но удмурт егитъёслэн "Шунды" дэменлыксы вормисьёслы озьы ик кузьымъёс дасяло. Йылпумъянъёс лэсьтомы ни 26-тӥ декабре. Соин ик, пинал эшъёсмы, кин беромиз, гожтэтъёсты уз ни пыриське конкурсэ. Но мылкыддэс эн куашкатэ, Тол Бабай шаерамы одӥг пол гинэ уз вуы. Тодматскон сэрег Аб.409. Удмурт нылаш, 19/160, веськрес мугоро, гороскопъя Овен, ужасько вузкарисьын, вань ӝож верамъёс сюлэмам йӧто. Улӥсько гуртын анай-атаен ӵош. Тодматскысал 21-27 аресъем пияшен, возьмало фотоен гожтэт. Пытсэт сьӧрын пукемъёс медам вазиське. (Ялонэз потаз ни - Аб.334.) Аб.410. Мыным 26 арес, улӥсько но ужасько гуртын. Асме мон принц уг кожаськы. Вина юисько, но воксё инмарез вунэтыса - уг. Тамак кыскисько, но куштӥськыны малпасько. Уксёлы туж ёрмыса уг улӥськы, но со нырысь интыын луыны кулэ ӧвӧл - ог-огдэ валан медло. Я, кин меда дӥсьтоз таӵе пияшен тодматскыны? Редакцилэсь: Лыдӟисьёсмылэсь ялонъёссэс тодматскон сэреге сётӥськомы, дун басьтытэк. Нимзэс, кытысь луэмзэс газет пыр ум шараяське, ваньмызлэн адресъёссы редакциын. Ялон сётӥсен тодматскыны мылкыд карисьёслы ивортӥськом: адресъёсты ми нокинлы ум келяське. Абонентлэсь номерзэ пусйыса, редакцие гожтэт ыстэ. Нош кинлы ке сӥзем гожтэттэс маркаен чылкыт конвертэ понэ - ыстомы кулэ адресъя. "Я+Я" Аб.0357. 36/164. Удурт нылкышно, Дракон-Козерог. Тазагес мугоро. Картэным люкиськемын, пиелы 17 арес. Вань квартирамы, машинамы. Сямыя лякыт, вераськись. Тодматскысал 36-41 аресъем ужез гжась дышетскем пиосмуртэн. Улон интыме воштыны пумит. Аб.0336. 32/158. Коза-Козерог. Дышетскемея - бухгалтер. Картэным люкиськемын, нылылы 8 арес. Вань квартирае. Яратӥсько киужен вырыны, сяська будэтыны. Лыктоно мон доры. Аб.199. 59/170. Синмаськымон удмурт воргорон. Вань аслам юртъере, нылпиосы нимаз уло, кышное кулӥз. Сямылы уг ӝожтӥськиськы. Лыктоно мон доры. Аб.378. 38/162. Удмурт посмурт � Овен. Ужасько котельнойын машинист но повар луыса. Улӥсько анаеным, лякыт сямо, курытсэ ӵем уг веръяськы. Яратӥсько чорыганы, спортэн вырыны, крезьгур кылзыны. Лыктоно мон доры. Аб.474. 34/176/67. Улӥсько огнам, кышнояськылымтэ. Ужасько пудо вордонын, яратӥсько нылпиосты. "Я+Я" служба пыр тодматскыны мылкыд карисьёс, гожтэттэс "Удмурт дунне" газетэ эн келялэ. Ыстоно таӵе адресъя: 427630, Удмурт Республика, С.Юкаменское, а/я 10, "С 3" аб �... Гожтэтады одно ик понэ маркаен буш коныерт, сотэк тӥледлы вазиськись уз луы. Сӧсыръёс уж утчало Можгаын сюлмасько сӧсыръёслы юрттон сярысь. Тани алигес соосын "котырес ӝӧк" сьӧрын вераськон ортчиз. Инвалидъёслы пенсия тыро ке но, со коньдон ӧжыт. Соин ик данакез уж куро. Соин ик городысь аскивалтонъя ёзлэн кивалтӥсезлэн воштӥсез С. В. Павлов люкалляз пӧртэм кивалтӥсьёсты яке соослэсь юрттӥсьёссэс. Вераськон ӝутэмын вал сӧсыръёсты уже кутӥсь предприятиослы но организациослы юрттэт но законэн чаклам льготаос сётон сярысь. Юрттыны мылкыд карисьёс шедизы. П. НИКОЛАЕВ. Дунтэк эмъяло Туэ Якшур-Бодья ёросысь нылпиослы, лемтэй висёнлэсь утьыны шуыса, дунтэк укол пуктыны 78 сюрс манет уксё висъямын вал. Нош та вакытэ, пыэдэз алон вылысь, прививкаос лэсьтӥсько. Дунтэк эмъюм тырмоз 2550 мӧйыослы но 1380 нылпиослы. Мукетъёсыз асьсэ коньдонэн эмъяськоно луозы. Умой луысал, Правительство дунтэк эмъян сярысь тросгес сюлмаськысал ке. Начар улӥсьёсмы али трос уго. Нош адямилэн тазалыкезлэсь номыр но дуноез ӧвӧл. П. КУЗНЕЦОВ. Каракулиноос соосын данъясько Ортчем толэзе Удмурт Элькунысь Правительство Почёт грамотаосын пусйиз гурт удысын кема аръёс ӵоже но умой ужаса данэ потэм адямиосты. Соос пӧлын Каракулино ёросысь адӟем карымон адямиос но: "Нива" эштосысь механизатор Виктор Ефимович Быков, "Вормонлы 40 ар" эштосысь скал кыскись Евгения Артемьевна Сухоплюева, "Рекорд" эштосысь валтӥсь бухгалтер Нина Алексеевна Ощепоква но "Арзамасцевское" эштосысь валтӥсь экономист Надежда Александровна Ляпунова. П. СКОБЕЛЕВ. Серемес чуръёс Пурккетонэн герӟаськем учыръёс Сюрес вылысен пумиськизы кык эшъёс: - Миквор, ма тон тамак кыскондэ куштӥд вал кадь но?.. - юаз огез. - Куштӥ вал но... Куинь ар ӧй кыскы, кысконлы кутоно уксёме люкаса шуба басьтӥ вал. Но шубаме лушказы. Соин выльысь кыскыны кутски, - Миквор паровозысь кадь ӵын поттӥз. *** - Сандыр, кыӵе сигарет кыскиськод? - юаз ӵош ужась эшез тамак кыскисьлэсь. - "Прима" кыскыса акыльтӥськиз ни, куноя фильтрен сигаретэныд. - Мон кыскисько муртлэсьсэ, - мыньпотӥз Сандыр. - Мыным "Прима" но уг мыльы, тыныд акыльтӥз бере, вай ай ачид кык-куинь сигареттэ, берлолы яралоз. *** Висись эмъясьлэсь юа: - Доктор, котькуд сигарет пачка вылын гожтэмын, котькуд тамак кыскон тазалыклы изъян вае шуыса, нош тӥ асьтэос но кыскиськоды? Малы? - Тамак кыскисьёс тросгес луизы ке, вузкарисьёс сигаретсэс дунтэменгес вузалозы. *** - Тодӥськоды-а, кыӵе кыскон тужгес дуноез? - калыкен пумиськонын юаз тылпу кысӥсь. - "Парламент" сигарет, дыр, пачкаез 30 манетлэсь дуно, - вазиз огез пиосмурт. - Кубаысь ваем сигараос, луозы, - будэтӥз мукетыз. - Ӧвӧл, - валэктонлы пумит вазиз тылпу кысӥсь. - Огшоры самосад. Пилька Ондӥ юыса ас тамаксэ валесаз кыскем но, быдэс юртэз ӝуам. Лыдъяса-чотаса тодмо луиз: изъянэз 100 сюрс манет тыр люкаськиз. *** Тамак кыскись атай бӧрдӥсь пичи пиезлэн ымаз, соска интые, сигарет донгиз, нош со вискын кышноез корка пыриз. - Кирло, мар дауртӥськод? - Бӧрдэменыз акыльтӥз ни. Али ик кыскыны мед дышоз. Мон вить арескысен кыскыны кутски. Радио пыр но веразы ук: нылпиос атайзэс котьма ласянь ортчыны кулэ. П. Скобелев. Шӧкыч Сынамтэ малпанъёс Кирос пон но - ю Странамылэсь историзэ, Удмуртиез но вераса, ӝоген курыт вуослэн нимъёссыя дышетыны быгатом ни. Школаын историяя урокъёсты быдэс ар ӵоже нуыны луоз водкаосъя: "Рюрик", "Храбрые русичи", "Стрелецкая", "Петровская", "Боярская", "Дворянское гнездо", "Гвардейская", "Кавалерист девица", "Потемкин", "Суворов", "Кутузов", "Ушаков", "Нахимов", "Нарком", "Колчак", "Чапаев", "Калашников". Губияны яке инкуазе шутэтскыны пот ай, бутылкаос борды ӵемтаськыса усёд. Учкиськод но пыд улын "Богородская" кылле, ӧжыт гинэ "Богородицкая" ӧвӧл. А мар, паймыса уз улэ, инмарлэсь но нимзэ курыт вулы сётозы: кирос пон но ю. Инмарлы оскисьёслэн валтӥсь храмзылэн нимыз ӟистыны яратӥсьёслэсь гульымъёссэс коттэ ни ук, "Сергиево-Посадская" водка сярысь вераськон мынэ. Оло нош таӵе ним сётӥсьёс малпазы: тросгес адямиос инмар пала кыстӥськозы но улонмы майбыр луоз. "СССР" нимояз нош Юрий Гагаринлэсь туспуктэмзэ ик лякиллям, серем карыса кадь гожтӥллям на: "Желаем вам приятных ностальгических воспоминаний, товарищи". Нош умойгес луысал, дыр, этикетка вылын гожтэмын ке луысал: "Свобода" - "Век свободы не видать", "Морозная" - "Цирозная", "Закурганная" - "Замогильная". Но вылэм ик сюлэмез шунтӥсез но. Таосыз юонъёс сярысь меӵак гожтӥллям: "Горькая", "Спотыках", "Завалинка", ятырзэ ӟузид ке, курыт но потоз, ӵемтод но, усёд но. Бутылка вылын гинэ ӧвӧл, пиялаос-рюмкаос но кыӵе гинэ тодмо адямиосын чебертэмын ӧвӧл, я флагез, гербез адӟод отысь. Морякъёсты серем карыса-а, мар-а таӵезэ но поттӥллям: "Всё пропъём, но флот не опозорим". Ваньзэ юон пӧлы ыштӥм ни, лэся, визьмес но, данмес но. 200 грамм понна музъеммес но, странамес но вузаны ум кепыралэ ни ӝоген. Г. Добрякова. Шаркан ёросысь Сильво гурт. Коньдонлы - базаре, базарысь - коньдонтэк Калыкын вузкарисьёсты уг ярато, малпало, вузчиос соослэсь уксёзэс кыско. Базарын сылӥсьёслы ваньмыз инмысь усе кадь йӧтэ. Уг ваты, уксёез шӧманы татын луэ, но со понна пӧртэм шуг-секытъёсын пумиськоно. Я гужембыт сутӥсь шунды сиос улын пыжиськод, нош толалтэзэ быдэс мугорад кезьыт йӧ пырыос мертчисько. Нош висьыны дыр ӧвӧл. Я, кин та уж борды басьтӥськоз? Кышкыт сюрес Сюрес вылын кыӵе но учыръёсты уд адӟы. Казане вуттӥсь трассаетӥ мыныку, укно сьӧрысь адӟиськод: "Газель" "Жигулиен" шуккиськем (берлоезлэн шофёрез руль бордаз кырмиськыса ик погмаськем), я "КамАЗ" "КамАЗ"-эн ӵабтӥськиллям, я машинаос сюрес сьӧры ик пезьдэмын. Тужгес шурдыт толалтэ. Лымыяку, пелляськыку яке йӧӟектэм асфальт вылтӥ мыныкуд лобӟемдэ уд но вала. Алигес Казане мыныкумы азямы ик "Жигулиез" бергатыны кутскиз. Руль сьӧрын пукись пиосмурт тормозэз зӥбем, нош лымы улэ ватскем йӧ сое золгес котыръяны ӧдъяз - асфальт сьӧры лобӟытӥз. Шофёрмы черекъя: "Нылъёс, кутӥське!" Тау инмарлы, милемыз утиз. "Жигулиын" пукисьёс но "дэремен вордскиллям", шӧдске. Машиназы, кӧня ке пол бекмылляськыса, поглянъёсыз вылэ ик султӥз, погмаськиз гинэ. Сюресчиос Ижысь вузаськисьёс вылӥллям. Таяз учыре соослы удалтымтэ, доразы буш киын бертоно луозы, пе. Сильтӧллы пумит Та учыр вал 1998-тӥ арын. Выль ар котырын быдэс уй лымы пырыос усизы. Гуртысь потыкумы малпамы ик вал, оло, мукет нуналаз сюрес вылэ вырӟоно. Озьы ке но, шонтӥм. Казане вузъёс басьтыны. Малы? Декабрь толэзьлэн берпуметӥ нуналъёсыз вузкарисьёс понна пӧсь вакыт. Макем чупресгес луод, сокем тросгес кисыяд жильыртоз. Лымыё сюрестӥ мынӥм каллен, дырын-дырын дугдылыса, сюрес вылын кылдэм "пробкаослэсь" сэрттӥськемзэс возьмаса. Сомында шудтэм учыръёсты, шуккиськонъёсты адӟеме ӧй вал на сюрес вылысь! Городэ вуим бер. Контрольной постэз ортчыку паймим черодэн сылӥсь машинаослы. Мар со сыӵе, тодӥм бергес. Сумкаосмес вузэн тырмытыса потӥм дор пала. Казаньысь потон пала вуыкумы дугдытӥзы ГИБДД-ын ужасьёс. Трос лымы усемен, Удмуртия пала сюрес ворсаськемын, пе. Ку усьтозы - тодмо ӧвӧл. Азьлань мыныны ӧз лэзе, палэнынгес радтэм сылӥсь машинаос доры султытӥзы. Артэ улӥсьёсыз лэзьяло вылэм. Соос пӧлы кариськыса, нош азьлань вырӟим. Километр но ортчыса ӧм вуэ, азямы выль - "пробка", йылыз-пумыз но уг адӟиськы. Адямиос, кытчы пырыны, мар лэсьтыны валатэк, солань-талань лёгасько. Татын, кузь черодлэн бераз, марзэ-созэ валаны ик шуг, котькудӥз кылдэм югдурез ас сяменыз валэктэ. Ваньзэ тодон понна вамыштӥ азьлань. Кема гинэ мынӥ, озьы ке но, шурдыт ӧй вал: котыр фараос пишто - сюресэз усьтӥзы ке, машинаос али ик вырӟыны дась. "Пробкалэн" йырыз кылдэм ГИБДД-лэн горд кирпичлэсь пуктэм эскерон постэз дорын. Татчы трос калык люкаськемын. Адямиос пыро-пото. Кузь черод кылдэмын сёросэ. Ньыльдон аресъем тазагес кышномурт рация дорын сылӥсь пиосмурт пала вамыштӥз. - Милям сиеммы но юэммы потэ! Кӧня татын возёды на? Пуромиз керетон, мукетъёсыз но итӥськизы со борды. Милиционер жингыртӥз вылӥ кивалтӥсезлы, собере ивортӥз: - Пелляськемысь ӧз ке дугды, сюрес куинь нуналлы но пытсаськыны быгатоз. Пытсэт улысь потыны быгатэмзэ валаса, калык каллен буйгаз. Татысен ик тодматски Надя нимо нылмуртэн. Со вузкарись, картэныз ӵошен Москвае вузлы ветлӥллям, али гуртазы берто - Набережные Челны городэ. Казань пумын сыло ини ӵукна тямыс часысен. Кӧня ке улыса ваизы нянь но цистернаен пӧсь ву. Син азьын кылдӥз выль черод. Вуизы видеокамераосын журналистъёс. Уез ӧм изе, машинаямы купырскыса кӧня ке нырулэм карим ик. Кынмим. Ӵукна сизьым час бере сюресэз усьтӥзы. Доре бертыса, сю грамм аракыен шунтӥськи но небыт валесэ выдӥ. Висьыны мар шедьтӥд ке, ужед уз мыны. Ӵуказеяз потӥ черкогуртысьтымы кенерен котыртэм базаре. Барыш Вузкарон ужын барыш поттон понна нырысь коньдон пононо. Ваёно калыклы кулэ луись вуз. Озьы но луэ, кыӵе ке дэрем кык но, куинь но ар палаткаын ошиськыса улэ, аслэсьтыз кузёзэ возьмаса. Куддыръя вузэз ас басьтэм дуныныз яке трослы дунтэмгес но сётӥськод. Кӧт сюма ук - кытчы пырод. Котькыӵе мукет ужын сямен татын но шудо луыны кулэ, уксёез валаса бергатоно на. Ваньмыз вузчиос тыршо вуззэс чалякгес вузаны, со интые выльзэ вайыны. Соин но вузлы ватсам дунъёс куамын процентысен сизьымдон процентозь вошъяськыны быгатозы. Нош кык поллы будэтон дыръёс ортчизы. Тазьы ужаса вылӥ барыш басьтэмед потӥз ке, кема ик ӧвӧл номыртэк кыльыны. Байёс но куанеръёс Вузкарисьёс пӧлын вань байёс но куанеръёс. Нырысетӥосыз пӧлы пыро Россиын рынокен экономика азинсконлэн нырысь аръёсаз дуннелэсь кудпала бергамзэ шӧмтэмъёс. Соку ик соос борды ним но лякиськиз - "челнокъёс". Со вакытэ вузъёс басьяськись доры куинь-ньыль поллы дуноен вуылӥзы. Заводъёс, предприятиос пуксизы, кылдӥз дефицит шуон. Уката ик барыш поттыны луиз, кудӟытӥсь юонъёсын вузкарыса. Та "лемлет" вакытъёсы уксё лэсьтыны быгатэмъёс али но вузасько. Соосты уд ӵошаты вузкарон удыс борды берло куинь-ньыль аръёсы басьтӥськемъёсын: юртъёссы, улон интыоссы но соослэн байёслэн кадь, уксёзы но чулкаосы ватэмын. Табере бурдъёстэ паськыт уд вӧлъя - вузчиослэн кисыязы ваньмызлэн пыремзы потэ. Интыосын кыӵе но выль законъёс, куронъёс уг тупато, вытъёсын зӥбо. Вузэд кошкоз-а, уз-а, но нуналлы быдэ инты понна тыроно, толэзьлы одӥг пол - выт тыронъя инспекцие. Ай кӧня коньдон кошке сертификат басьтыны. Нош та берлоез пумысен югдур воксё но паймымон. Ваньмыз тодо, оптовой рынокъёсын вуз басьтӥсьёслы сертификат уг сёто. Амало адямиос татын но асьсэлы барыш поттыны быгато, бумага вылэ улэп печать пуктыны юрттэ соослы компьютер. Кыле на вузлэсь нимъёссэ гожтыны, тазэ ужез вузкарись ас вылаз басьтэ ини. Кин компьютерен, кин печать карись машинкаен тырмытэ буш интыез. Милициын ужасьёс но, выт бичасьёс но та югдурез тодытэк уг уло. Озьы ке но, базарын вузчиосты эскерыкузы, кыӵе ке тэчетлы сертификат ӧд ке возьматы, штраф тыроно луод. Городысь - гуртэ Улон югдур секыт луиз, уката ик гуртын улӥсьёс ёрмо уксёлы. Тросэз семьяос пересьёссылэн пенсизы чотын уло. Ужась калык уждун ӧжыт басьтэ, сое но кемалы ӝегато. Соин но коньдонлэн бергамез уг шӧдӥськы, вузъёс кыллё. Городъёсын та ласянь каньылгес уло. Дунтэмгес шуыса, калык базаре басьяськыны мынэ. Вузкарисьёс уксё поттыны быгато отын. Городъёсын улӥсь вузчиос пӧлын вань арнялы одӥг пол бадӟым вузкарон нуналъёсы шаерысьтымы черкогуртъёстӥ ветлӥсьёс. Улонзы соослэн секыт, но со понна кисызы буш ӧвӧл. Шуом, средае соос пото Вавоже, четверге - Увае, арня нуналэ - Алнаше. Та нуналъёсы базаре люкасько быдэс ёросысь басьяськисьёс. Алнашамы ик тани кытысь гинэ вузчиос уг вуо - Набережные Челны, Менделеевск, Вятские Поляны но мукет городъёсысь. Кыӵе но пӧртэм вуз уг луы соку базарын. Дунозэгес басьтыны магазинэ мынод на шат? Басьяськисьлы но умой, вузчи но буш кисыен уз кыльы. Озьы ке но, соос пӧлысь ӝыныез ӵуказе ик куштӥськысалзы базарын вузкарыса пуконлэсь, мед гинэ ӟеч ужан инты луысал. Валамон ини, уж вӧзы уждун медло на. О.КОЖАНОВА. Вордскемзэс та нуналъёсы пусъё Александр Александрович Волков - Удмурт Республикалэн Президентэз; Анатолий Владимирович Марченко - "Удмуртторф" ГП-лэн генеральной директорез; Евгений Исакович Богомольный - "Удмуртнефть" ОАО-лэн генеральной директрез; Николай Семёнович Сычёв - Ижевский птицефабрикалэн кивалтӥсез; Николай Витальевич Долганов - "Удмуртавтодор" ГУП-лэн валтӥсь инженерез; Анатолий Николаевич Ешкеев - Пичи Пурга районысь "Мир" эштослэн тӧроез; Пётр Васильевич Люкин - Ува райгазетлэн редакторез; Альбина Владимировна Тарасова - Грахово райбольницаысь врач, "Удмурт кенешлэн" ужаз мыло-кыдо пыриськись мурт. ВЫЛЬ АРЛЫ ДЭМЛАСАЛ Котькуд гуртэ вуылэм потэ Журналистлэсь ужзэ номырин но уд вошты, уд ӵошаты. Муш сямен, со нуналмысь нуналэ сюрес вылын, калык пӧлын - газет баме вуттон понна, жадёнэз валатэк, чур борды чур бича. Озьы вордско репортажъёс но очеркъёс, иворъёс но зарисовкаос. Газетмес лыдӟисьёс данакез гуртын уло. Соин но, вылды, сюлэм тросгес кыстӥське соос пӧлы. Мон понна котькудӥз герой: рядовой-а со, кивалтӥсь-а, егит-а, арлыдо-а - зарни пыры. Огез жаль, синмаськымон адямиосмы доры вутскыны куддыръя дырмы но, быдэс улонмы но уг тырмы. Туж умой, тонэ тодо, матысь эшсэс сямен пумитало ке. Озьыен, "Удмурт дуннеез" лыдӟо но витё солэсь котькуд номерзэ, утчало отысь сюлэмзэс бугыртӥсь, мылкыдзэс буйгатӥсь чуръёсты. Кинлы кельше политика, кинлы - гурт удыс, кинлы - мукет калыкъёслэн улон-вылонзы сярысь гожъямъёс. Куд-огез лыдӟисьёсмы тросгес куро отын яке татын кылдэм югдурлы сӥзем аналитической статьяос сётыны. Улон дуноямен уго данакез семьяос уг гожтӥсько ни центрын потӥсь газетъёслы. Лыдӟисьёсмылэн тодэмзы потэ бускельёсмылэн улон-вылонзы сярысь но. Ваньмыз со одно ик луоз шуыса оскытӥсько "Удмурт дуннелэн" вуоно арын потоно номеръёсаз. Кызьы ужа Кун Дума, Кун Кенеш, Правительство, кызьы быдэсъясько кутэм законъёс но решениос - та ужпумъёс газет бамын басьтозы валтӥсь инты. Гуртоос понна та вакытэ ӝутске туж лэчыт юан, со герӟаськемын музъемез вузанэн- басьтонэн. Кыӵе сюрес кузя кошком, кыӵе визьмын кимес нюртом сётэм бумага вылэ, сыӵе улонэ вуоз вань калыкмы но нылпиосмылэн нылпиоссы. ХХИ даурлэн кутсконаз асьмеды асьмеос пыдйылчие, медое медам поттэ вылэм. Музъем сярысь вераськонэ газет ӧте котькудзэ, кинлэн сюлэмаз йӧтэ политикъёслэн та ӝутэм шудонзы. Кызьы уло фермеръёс Удмуртиын, Россиын, США-ын, Канадаын, Франциын, Германиын но куд-ог мукет странаосын? Со сярысь верамъёс потозы ни вуоно арлэн нырысетӥ толэзяз. Политикаен сяна, маин выро политикъёс, ма бордын ужало интыосысь кивалтӥсьёс, адӟо-а соос огшоры адямиез, кыло-а калыклэсь куаразэ? Таӵе вераськон, мон малпамъя, газетэз но лыдӟисез эшшо но матэгес кароз. Журналист огназ троссэ уз вормы. Соин ик оскиськом, выль арын, выль даурын милям юрттӥсьёсмы йылозы шуыса. Котькуд удмурт гуртэ, котькуд семьяе вутскыны кужыммы мед тырмысал. Людмила МЕДВЕДЕВА, политикая но экономикая отделлэн кивалтӥсез. ПУСЙЫНЫ ДЭМЛАСЬКОМ КУӞЕБАЙ ГЕРД НИМО ПРЕМИЕН Югыт сюрес вылысь кожытэк Матэктэ удмурт калыклэн данъяськымон пиезлэн - Куӟебай Гердлэн - вордӥськем нуналыз. Сое тодэ вайыса азьланьтӥськозы пӧртэм ужрадъёс, ортчылозы Куӟебай Гердлы сӥзем лыдӟонъёс, пумиськонъёс, сое ушъялозы, дунъялозы, со сярысь одно ик маке но выльзэ тодомы. Монэ, кибашлы удмурт нылпиосын ужасез, туж шумпоттэ асьмелэн одӥгез туж ӟеч йылолмы - Куӟебай Герд нимо премиен тужгес усто удмуртъёсты пусъён. Арлы быдэ "Удмурт кенеш" огазеяськон быгатыса шедьтэ таӵе адямиосты. Ӵапак соос Куӟебай Гердэз асьмелы выль но выль ласянь усьто, Дунне адямиен тодмато. Туэ та премиен пусйыны дэмласько зэмос гердчиез. Со - Николай Кузнецов. Николай Спиридонович Куӟебай Гердлэсь но мукет дано муртъёслэсь чылкыт нимзэс берыктыны юрттӥз, калыклы трос тодон-валан сётӥз. Тодам лыктэ писателен тунсыко пумиськон. Со вал тямыс ар талэсь азьвыл, толсур толэзе. Удмурт кун филармоние люкаськылӥз трос калык. Отын Н. Кузнецов нырысьсэ тодматӥз "Шимес пеймытысь" книгаеныз. Со дырозь Куӟебай Герд но удмурт калыклэн мукет дано нылпиосыз сярысь умой-умой ум тодӥське на вал. Таӵе книгаез киямы нырысьсэ кутӥмы. Зэмзэ но туж шимес пеймыт пыр потӥз удмурт калыкмы куамынэтӥ аръёсы. Сцена вылын вераськыкуз, Н. Кузнецовлэн пушкыз ик тыриз. Шӧдӥськиз, адӟиськиз - сюлэмыз пыр потэмын вань курадӟем визьмо интеллигенцимы. Ачиз автор гожтэ: "Ачим сярысь ке верано, кык ар ӵоже вис карытэк "делоосты" лыдӟылэме уйвӧтъёсам но пыре ни. Сюресмес туж секытэн ортчем удмуртъёс вӧзын сылӥсько кадь, соосын артэ ветлӥсько, куараоссэс кылӥсько". Кӧня чиданзэ, кужымзэ, визьзэ, сюлэмзэ со книгаяз понэм! Роза Андреевна Кувшинова, Кузьма Павлович Чайниковлэн вынызлэн нылыз, вань калык азьын тазьы вераз: "Та дырозь малпасько вал: Николай Кузнецов - огшоры журналист гинэ. Нош та книгаез сыӵе быгатыса лэсьтэм! Туннэ оски: Куӟебай Герд сюлэмыз пыртӥ потэмын". Дас вить сюрсъем "Шимес пеймытысь" книгазэ писатель удмурт калыклы кузьмаз. Кӧня ке дыр ортчыса, Николай Кузнецов ӟуч кылын поттӥз книгазэ. Таоссэ но кузьмаз. Озьыен, удмурт шаерамы улӥсьёс тодӥзы визьмо, данъяськымон удмуртъёсмы сярысь. Куӟебай Гердлэн вордӥськемез дырысен сю ар тырмонэн валче книгазэ англи кылын поттӥз. Таӵеез шаерамы ӧй вал на. Англи кылын гожтэм книгаез дас вить кунэ вуэмын ни: Америкае, Англие, Финляндие, Германие но данак мукет кунъёсы. Шумпоттэ соиз но: та ужъёс вылӥ дунъямын Россиысь но кунгож сьӧрысь тодмо тодосчиосын. Эндрю Бенке Брюклер, Канадаын улӥсь мадьяр тодосчи, вера: " - Тӥляд удмурт но ӟуч кылын поттэм книгады пыр тодӥ удмурт калыклэн азьвыл вакытэз сярысь. 30-тӥ аръёсы ортчем учыръёсты сэрттӥськоды-пертчиськоды но туж матын но валамон луиськоды Европаысь тодосчиослы. Англи кылын книгадэс поттон - туж кулэ ужпум. Со луоз Европаысь но дуннеысь аспӧртэмлыко пичи удмурт калык сярысь бадӟым ивор. Книгаостэс лыдӟыса, пушкы тыриз. Европаын удмуртъёс сярысь туж ӧжыт тодо. Москваын Куӟебай Гердлы сӥзем ужрадын Николай Спиридоновичлэн ужъёсызлы туж ӟеч дунъет сётэм Венгрилэн Россиысь азьвыл посолэз Дёрдь Нановски но. Мишши Юхма, чуваш калык писатель, ООН-лэн зарни медалезлэн лауреатэз: - Мон ӟеч тодӥсько ас калыкелэсь историзэ. Тодӥсько: 30-тӥ аръёсы быдтэмын тужгес яркытэсь писательёсмы, тодосчиосмы, дышетӥсьёсмы. Н. Кузнецовлэн "Шимес пеймытысь" книгаез кадь ужъёсмы ӧвӧл на. Волга шур котырысь одӥг калыклэн но таӵе книгаез ӧз поты на. Соин ик Н. Кузнецовлэсь книгазэ мон туж вылӥ дунъясько. Та книга - удмурт калыклэн дугдылытэк жингыртӥсь гырлыез. Со ӧте вань кужыммес огазеяны, 30-тӥ аръёс ноку но медам берытске ни шуыса. Музъемозь йыбырттӥсько Н. Кузнецовлы - писательлы, тодосчилы, чылкыт сюлэмо адямилы, ас калыкезлэн оскымон пиезлы. Нош кыӵе шуныт кылъёссэс веразы тодосчиосмы Фома Ермаков, Тамара Тепляшина, Анна Зуева-Измайлова, Зоя Богомолова но мукетъёсыз. Николай Кузнецов - удмурт калыксэ вань сюлмысьтыз яратӥсь адями. Книгаоссэ поттӥз, ачиз уксё утчаса. Соин валче ужысь но кошкиз. Паймисько быгатэмезлы. Удмурт шаерамы улӥсь пӧртэм калыкъёслэн ужбергатӥсьёссылэсь юрттэт басьтӥз со: бигеръёслэсь, ӟучъёслэсь, еврейёслэсь. Ваньзы соос валазы: ХХ даур йылпумъяськыку, калыклы берыктоно солэсь дуно синпельёссэ. Н. Кузнецов уг сётскы секытлы, уг йыромы. Али нош выль книгазэ поттыны дасяське. Солэн улон сюресэз - удмурт гожъясьлэн сюресэз, ас калыкедлы кулэ луон, калыкед понна тыршон. Та вакытэ репрессиосын герӟаськем ужъёс сярысь гожъясь писательёслы кунгож сьӧрын премиос сётыло. Асьмеос, удмуртъёс, Николай Кузнецовлэсь книгаоссэ дырыз дыръя дунъятэк медам кыле вал. А. САПОЖНИКОВА. Пусйыны дэмласьком Куӟебай Герд нимо премиен Нимзэ данъяло ужъёсыз Удмурт Элькунысь сӥё-дано журналист Вячеслав Дмитриевич Михайлов кемалась ужа иворъёсты вӧлмытӥсь ёзъёсын. Нош Удмурт радиоын спецкорреспондент луиз 1997- тӥ арысен. Аслэсьтыз "Аргузерь" программазэ нуэ. Радиоочерк гожъянэ пыртӥз выль шӧм. Вань ужъёссэ радиолэн фондаз кельто, выльысь эфире сётъяло. Туннэ нуналлы Вячеслав Михайлов дас вить радиоочерк гожтӥз. Соос пӧлысь куинез - "И залил воды свои старые русла", "Чимали" но "Ченчер гурезьчи" элькунысьтымы Печатья но иворъёсъя министерстволэн премиосыныз пусъемын. Ижысь механикая заводлэн премиеныз данъямын "Один на свете и в судьбе" очеркез. Нош "Тарзан по приказу" ужзэ нимысьтыз висъяз Россиысь журналистъёслэн 1999-тӥ арын сӥзьыл Ижын ортчем фестивальзылэн жюриез. Малы син шоры сокем йӧто Вячеслав Михайловлэн радиоочеркъёсыз? Очеркын валтӥсь луэ адями, солэн шумпотонъёсыз но кайгуосыз. Вячеслав Михайловлэн "Чимали" ужаз вераське Ижысь автозаводын одӥгезлэн ужасьлэн пилемо улонэз сярысь. 90-тӥ аръёсы таӵе ик луиз заводлэн но адӟонэз. Е. К. Петрова заводын кызь ар ужаз ке но, улон инты сётӥллямтэ. Кызь куать аресъем пиеныз ӵош улэ огъя квартираысь пичи гинэ комнатаын. Сыӵе ик адӟонэз аслаз заводлэн но. 80-тӥ аръёсын ӵошатыса, отын кызь поллы кулэсмиз машина поттон. Вячеслав Михайлов котькуд ужаз ас азяз вылӥ куронъёс пуктэ. Озьы улонэз мургес адӟытыны, солэсь пуштроссэ шараяны луэ. Возьматоно адямиез но оскымонгес но валамонгес суредаське. Вячеслав Михайловлэн тросэз очеркъёсыз кылдытэмын лэчыт учыръёс вылын. Соосты ачиз улон ӵектэ. Зэм, отӥяз котькудӥз бордын трос ужано луэ. Нимысьтыз пусъёно луисько: Вячеслав Дмитриевичлэн тросэз очеркъёсыз ӟуч кылын но дасямын. Соос пӧлысь куинез "Он вчера не вернулся из боя", "Вопреки всем козням", "Прошёл историю пешком" - возьмато Быдӟым тыложез ортчемъёслэсь сюресъёссэс. Нош "Цветёт пшеница золотая" нимоез ӝутэ удмурт музъем вылын нянь пыжыны мынӥсь чабеез будэтон ужпумез. Нош вань-а таӵе очеркъёслэн пайдазы? Мынам тодэмея, "Цветет пшеница дефицитная" очерк эфире потэм бере, 1999-тӥ арын сӥзьы отысь адямиос ӧтчамын шаерысьтымы Экономикая министерствоен радъям кенешонэ. Соосын вераськиллям нянь пыжыны мынӥсь чабеез будэтонъя элькун концепцилы проектэз дасян пумысь. Озьыен, асьме вакытэ но кун ужпумъёсты ӝутӥсь очерк вылӥ кивалтӥсьёсын басьтытэк уг кыльы. Та учыр, зэмзэ но, возьматэ публицистлэсь зол адями луэмзэ. Та учыр озьы ик возьматэ мукетсэ но: автор быгатэм нокинэн исамтэ ваче вуонэз адӟыны, пыр-поч эскерыны но аслаз тодэм-валамез пыр поттыса шараяны. Солэн одӥг палаз сыло республикаысьтымы вылӥ кивалтӥсьёс, мукет палаз - нянь будэтӥсьёс но сое сиисьёс. Кызьы буйгатэмын луоз та вожвылъяськон - созэ улыса адӟом ини. Ваче вуон сярысь ке верано, авторлэн котькудӥз очеркез со вылын возиське. Басьтом "Кырӟанъя урокъёс" мадёссэ. Солэн героез дышетӥсь П. Егоров ӧлексы вордӥськемын. Нош ачиз сыӵе луэмезлы уг ӝожтӥськы. Автор возьматэ, макем быгатыса но бурдъяськем мылкыдын лэсьтэ со аслэсьтыз яратоно ужзэ. Уката ик - кырӟанъя урокъёсын. П. Егоров улонын но весь кырӟа. Нош аслаз пыдъёсыз висьыны кутско но, кӧня ке ар валес вылысь султылыны уг быгаты ни. Сое ӧлексы картэз учке, утялтэ. Матӥ анайлэсь ньыльдон уйзэ пусъемез бере кӧня ке нунал ортчыса, П. Егоров но улонысь кошке. Лулыз потэ, пиез ки вылаз больницае пыртыку. Тазьы кулӥсьёсыз шудо адямиос шуо, вера автор. Нош мар шуоз кылзӥсь? Тазэ веранэз яке малпанэз очеркист солы кельтэ. Дышетскыкум, В. Д. Михайловлэн радиоочеркъёсызъя кылдытӥ диплом уж. Малпасько, Вячеслав Дмитриевичез пусъёно Куӟебай Герд нимо премиен. Н. Моряков. Удмурт Республикаысь Правительстволэн тӧроезлэн воштӥсез НАЗАРОВ Михаил Иванович Вордскиз 1949-тӥ арын Пичи Пурга ёросысь Миндэр гуртын. Удмурт. Дышетскемез вылӥ, йылпумъяз Ижевскысь гурт удысъя институтэз но Удмурт кун университетэз. Ужаны кутскиз 1971-тӥ арын Пичи Пурга ёросысь "Юж-Пурга" колхозысь тупатъян мастерскойлэн кивалтӥсез луыса. Армиын службаез бере 1972-тӥ арысен 1982-тӥ арозь та хозяйствоын ик тупатъян мастерскойлэн кивалтӥсез но валтӥсь инженер вал. 1982-тӥ� 1986-тӥ аръёсы - "Малопургинский" совхозлэн директорез. 1986-тӥ�1994-тӥ аръёсы - Пичи Пургаысь Калык депутатъёслэн ёрос кенешсылэн тӧроез. 1994-тӥ арын быръемын Пичи Пурга ёросысь аскивалтонлы кивалтӥсе. 1998-тӥ арын юнматэмын Пичи Пурга ёрос администрацилы кивалтӥсе. Кун наградосыз: 1990-тӥ ар - "Удмурт АССР-ысь гурт удысысь дано ужась" 1994-тӥ ар - Удмурт Республикаысь Вылӥ Кенешлэн Почёт грамотаез 1995-тӥ ар - "Россия Федерациысь гурт удысысь дано ужась" 1998-тӥ ар - Удмурт Республикаысь Правительстволэн Почёт грамотаез 1998-тӥ ар - Удмурт Республикаысь Кун Кенешлэн Почёт грамотаез Удмурт Республикаысь Правительстволэн тӧроезлэн воштӥсез ХОХЛОВ Николай Иванович Вордскиз 1947-тӥ арын Мордовской АССР-ысь Еланиховсокй ёросысь Краснофлотец черкогуртын. Ӟуч. Дышетскемез вылӥ. Йылпумъяз Москваысь кун университетэз. 1971-тӥ арысен ужаз Челябинскысь мертан тӥрлык поттонъя заводын инженер-технолог луыса. Армиын службаез бере Саранскысь "Центролит" литейной заводын мастер вал. 1974-тӥ арысен - Сарапулысь "Элеконд" заводын. Вал инженер, валтӥсь энергетик, валтӥсь инженерлэн воштӥсез, валтӥсь инжнер. 1988-тӥ арын "Элеконд" производственной огазеяськонлы (1993-тӥ арысен "Элеконд" ОАО) валтӥсь директоре юнматэмын. 1999-2000 - Удмурт Республикаысь Правительстволэн тӧроезлэн воштӥсез. Кун нагарадосыз: 1997-тӥ ар - Удмурт Республикаысь Правительстволэн Почёт грамотаез 1997-тӥ ар - "Удмурт Республикаысь промышленность удысысь дано ужась" 1997-тӥ ар - "Электронной промышленностьысь дано ужась". Удмурт Республикаысь Правительстволэн тӧроезлэн воштӥсез ХАРИНА Наталья Алексеевна Вордскиз 1949-тӥ арын 7-тӥ апреле Удмурт АССР-ысь Якшур-Бодья ёросысь Старые Зятцы гуртын. Ӟуч. Дышетскемез вылӥ. 1972-тӥ арын йылпумъяз Ижевскысь медицина кун академиез эмъян уж специальностья. 1966-1972 - Ижевскысь медициная кун институтысь студентка. 1972-1975 - клинической ординатура, ИГМИ. 1975-1979 - акушер-гинеколог, 5 номеро роддом. 1979-1999 - республикаысь нырысетӥ больницаысь гинекологияя отделенилэн кивалтӥсез, валтӥсь врачлэн воштӥсез. 1999-2000 - Удмурт Республикаысь Кун Кенешлэн улон-вылон политикая ялан ужась комиссиезлэн тӧроез. Удмурт Республикаысь Кун Кенешлэн тӧроезлэн воштӥсез. Кун наградаосыз: 1996-тӥ ар - "Россия Федерациысь дано врач" 1997-тӥ ар - нимыз пыртэмын Удмурт Республикалэн Почёт доскаяз 1998-тӥ ар - Удмурт Республикаысь Кун премилэн лауреатэз 1999-тӥ ар - Удмурт Республикаысь Правительстволэн Почёт грамотаез Уртче ужанлэн пайдаез бадӟым Удмурт Республикая федеральной инспектор Сергей Чикуров берло дыре бадӟым кенешонъёс ортчытъя федеральной властьлэн республикаысь ёзъёсызлэн кивалтӥсьёсыныз, городъёсысь но ёросъёсысь администрациослэн тӧроосынызы. Сыӵе кенешъёс орчтизы ини Ижын, Глазовын, Сарапулын. Та городъёсын ужало ини федеральной инспекторлэн общественной приёмнойёсыз. Нош миым арня пумын таӵе ик кенешон ортчиз Можгалан. Отчы люкаськылӥзы Можга, Алнаш, Вавож, Грах, Кизнер, Пичи Пурга ёрос администрациослэн тӧрооссы. Кенешез усьтыса, Сергей Чикуров шуиз: - Туннэ асьмеос вераськом Федерациысь быдэсъясь властьлэн улосвыл ёзъёсызлэн но городъёсысь но ёросъёсысь аскивалтон ёзъёслэн кусыпъёссы сярысь. Соос ог- огенызы юн герӟаськыса, ог-огзылы юрттыса, валче ужаны кулэ. Кыкез ик та структураос калык понна ужало. Кыкназы ик соос быдэсъяны кулэ Россия Федерацилэсь Конституцизэ, Президентлэсь указъёссэ. Асьме республикалэн Конституциез, шумпотыса вераны луэ, быдэсак сямен тупа Россия Федерацилэн Конституциезлы, законъёсмы - федеральной законодательстволы. Федеральной властьлэн ёзъёсыз но интыын аскивалтон ёзъёс куспын кылдэм тупамтэосты ӝегатскытэк шараяно но дыраз сэрттоно-пертчоно. Калыкен, интыысь аскивалтон ёзъёсын ужан, законъёслэсь кызьы быдэсъяськемзэс но улосын кылдэм югдурез чакласа возён понна ик кылдытӥсько общественной приёмнойёс. Туннэ со усьтӥськиз Можгалан но. Инты но солы чакласа быръемын - городлэн шораз ик, сьӧрлось лыктэмъёс олокытӥ утчаса ветлоно уз луэ. Котькуд городын сыӵе приёмнойёс ужалозы, уго котькудӥз лыктыны уз быгаты Иже яке Нижний Новгородэ. Нош Можгалась со юртэн кивалтыны оским Валерий Борисович Корольковлы. Татысь калык сое гажа, быгатонлыкъёсызлы но ми оскиськом. Вылӥ верам ёросъёсын пӧртэм удысъёсъя огъя югдурын тодматӥзы республикаысь югдурез утёнъя министрлэсь ужзэ быдэсъясь Михаил Воробьёв, Вытъя полицилэн управлениеныз кивалтӥсьлэн воштӥсез Сергей Зуев, Пенсиосъя фондлэн ёзэныз кивалтӥсьлэн воштӥсез Виталий Зелинский. Вылӥ судлэн кивалтӥсезлэн воштӥсез Николай Рябов сюлэмшугзэ вераз судьяослэн тырмымтэзы пумысен. Чидантэм ӧжыт соослэн лыдзы. Берло дас одӥг толэзь ӵоже эскеремын йыружен герӟаськем дас ньыль сюрс уж. Одӥг судья, укмыс-дас куинь ужез эскерем интые, куамынлэсь троссэ сэрттоно-пертчоно луэ. Со сяна, ӟеч ужаны луонлыкъёс но ӧвӧл. Тани Можгаысь судлэн кык гинэ пичиесь залъёсыз, соос но туала куронъёслы чик уг тупало. Оскон вань, милесьтым ужмес миръясь судьяос капчиятозы шуыса. Соин валче интыысь аскивалтон ёзъёслы вазиськисько куронэн: калыклы валэктэ миръясь судьяослэн ужан удыссы, кулэлыксы, сэрттоно-пертчоно ужпумъёссы сярысь. Ёрос администрациослэн тӧрооссылы ик юрттэт курыса вазиськиз республикаысь военком Геннадий Барском. Уго куиняз ёросъёсын военкоматъёслэн юртъёссы куашкан калэ вуэмын. Можгаын со кызь арлэсь кема тупатъямтэ-выльдымтэ. Вавожын тупатъян ужъёслы висъям коньдон номырлы но ӧз тырмы, нош Алнашысь военкомат войналэсь азьло лэсьтэм юртэ интыяськемын, отын призывной пунктсы гинэ но татчыозь ӧвӧл. Геннадий Васильевич тау кариз Грахово но Пичи Пурга ёрос администрациослэн тӧроссылы, отысь военкоматъёслы бадӟым юрттэт сётэмзы понна. Озьы ик отын умой радъямын егитъёсты армие келян уж, нокыӵе валамтэос уг луо транспорт ласянь, уг вунэто юрттыны ожъёсын быремъёслэн семьяоссылы. Интыосысь аскивалтон ёзъёсын ӟеч кусып воземзы пумысен ивортӥз республикаысьтымы Калыкез уже интыянъя кун службалэн Департаментэныз кивалтӥсьлэн воштӥсез Любовь Зорина. Вань ужпумъёсты соос ог-огенызы кенешыса сэртто-пертчо. Но азьланьын, кызьы пусйиз Любовь Егоровна, кусыпъёсмес эшшо золгес юнматоно луоз. Малы ке шуоно, вуоно арысен калыкез уже интыянъя фонд быдтэмын луоз, коньдон висъяськоз интыысь бюджетысь. Соин ик администрация ачиз утчано луоз коньдон. Сотэк ужтэк кылемъёслэн лыдзы туж ӝог йылоз, уката ик гуртъёсын. Соин валче будозы йыружъёс но. Ужтэк кылемъёслы коньдон висъян чылкак мукет сямен радъяськоз. Соин ик та уж борды ӝегатскытэк ваньмылы ӵош басьтӥськоно. Кенешонэз йылпумъяса, Сергей Чикуров пусйиз: - Глазовын, Воткинскын сярысь, татын югдур трослы умойгес. Со герӟаськемын интыын аскивалтон ёзъёслэн федеральной службаосын ӟеч кусып тупатыса ужаменызы. Асьмелэн валтӥсь ужпуммы - калыклэсь конституциен чаклам правооссэ утён, федеральной законъёсъя ужан, куд-огез соос асьмелы уг ке но кельшо. Асьмелэн нокыӵе правомы ӧвӧл соосты тӥяны. Таӵе пумиськонъёс азьланяз но луозы. Асьмеос ог-огмес тодыны, тодманы кулэ. Улосвылъёсы вуылыса, отысь югдурез ас синмын адӟыса гинэ шонер дунъет сётыны луоз. Е. Камашева. Усто шофёр Глазовысь усьтэм амалэн ужась "Реммаш" акционер огазеяськонын гажано адями луэ Владимир Козлов. Со школаын дышетскыкуз ик водитель луыны малпаз, пиналысен техника борды кыстӥськиз. Шор ёзо школаез йылпумъяса, Володяез эшъёсыныз ӵош армие басьто. Отысь бертэмез бере гинэ ӟеч малпанзэ быдэстӥз, Глазовысь шофёръёсты дасян курсэ пыриз, профессионал водитель луиз. Владимир Козлов нырысь ужаз нянь пыжон заводын, собере ӧтизы "Реммаш" огазеяськонэ. Солы сётӥзы дизель моторен ЗИЛ-130 автомашина. Со выль ӧй ни вал. Усто водитель машиназэ котыр ласянь чаклаз-эскериз, кытӥ кулэ - тупатъяз- выльдӥз. Кызьы бен сотэк, ведь кузь сюрес вылын пуксиз ке, кин юрттоз - шуг вераны. Нош Владимир Козлов вуылэ Москвае, Перме, Тольятие но музон городъёсы. Машинаез сое ноку юмоке ӧз вуттылы на. Г. Романов. Владимир Козлов. Туспуктӥз В. Беломорских. Усьтӥськиз выль сайт Удмурт Республикая валтӥсь федеральной инспекторлэн Интернетын нимысьтыз сайтэз усьтӥськиз. Солэн нимыз - "Федеральная власть в Удмуртии", интыяськемын таӵе адресъя: хттп:федерал.удм.ру Татысь котьку но шедьтыны луэ федеральной властьлэн Удмуртиысь, Приволжск округысь но быдэс Россиысь ёзъёсызлэн ужамзы сярысь иворъёсты. Сайтлэн нимысьтыз люкетэз Россия Федерацилэн Приволжск округъя оскем муртэзлэсь общественной приёмнойзэ возьматэ. Сое уже кутыса, шонерак приёмноен герӟаськыны но федерацилэн кивалтӥсьёсызлы юанэн вазиськыны быгатоды. Ужбергатӥсьёс понна федеральный властен ӟечен дунъям проектъёс сётӥсько, пӧртэм дэмланъёсын биржа ужа. Озьы печатлаське Удмурт Республикаысь политикаын, экономикаын, улон-вылон удысъёсын кылдэм югдур. Юанъёсын но ӵектонъёсын вазиське сайтлэн редакцияз таӵе адресъя: Ижевск город, Карл Маркс урам, 274 номеро юрт (Общественной приёмной) яке электронной почтая: федерал@удм.ру Удмурт Республикаысь Правительстволэн тӧроезлэн воштӥсез - Удмурт Республикаысь коньдон ужпумъёсъя министр БЕЛЬТЮКОВ Владимир Васильевич Вордскиз 1947-тӥ арын Удмурт АССР-ын Вавож черкогуртын. Ӟуч. Дышетскемез вылӥ, йылпумъяз Ижевскысь механической институтэз но Ижевскысь техникая кун университетэз, экономика наукаосъя кандидат. 1971-тӥ арысен 1975-тӥ арозь ужаз Сарапулысь электрогенераторной заводын инженер-технолог, участколэн кивалтӥсез, цехлэн кивалтӥсезлэн воштӥсез, цехлэн кивалтӥсез луыса, 1981-тӥ арысен - акциосын огазеяськонлэн генеральной директорезлэн экономикая но коньдон ужпумъёсъя воштӥсез луыса. 1995-2000 - Удмурт Республикаысь коньдон ужпумъёсъя министр. Кун наградаосыз: 1992-тӥ ар - "Удмурт Республикаысь дано экономист" 1999-тӥ ар - Удмурт Республикаысь Правительстволэн Почёт грамотаез Бурдоослы, будосъёслы дурбасьтыса Астрахань улосысь администрацилэн кивалтӥсез Горд Книгае пыртэм пӧйшуръёслы, бурдоослы но будосъёслы дурбасьтэмзэ возьматӥз. Солэн кутэм постановлениезъя ӧжыт кылем пӧйшуръёсты быдтэмзы понна йыртэмасьёс 1-150 пичи уждун мында штраф тырозы, нош шер пумиськылӥсь будосъёсты тӥясьёс, соослэсь будон интыоссэс кырсёмытӥсьёс кисыысьтызы 500 пичи уждун мында коньдонзэс поттоно луозы. Йыруж кун заповедниклэн улосвылаз лэсьтэмын ке, та лыдпусъёс куинь пол будыны кулэ. Басьтэмын Интернет пыр. Быре "Империал" ТД ООО. Куронъёсын вазиське печатлам бере 30 нунал ӵоже таӵе телефонъя: 56-06-80. АРХИВЫСЬ МАТЕРИАЛЪЁСЪЯ Удмуртия ХХ дауре 1965-тӥ ар Л.И.Брежнев КПСС-лэн ЦК-езлэн нырысетӥ секретарез луэм бере, СССР-ын кутскизы пӧртэм реформаос. Предприятиослы, колхозъёслы но совхозъёслы тросгес сётэмын вал эрик, пайдаё ужасьёслы уногес уждун тырыны лэзизы. Со калыклэсь улон-вылонзэ кӧнялы ке умоятыны юрттӥз. Капчигес луиз гурт калыклы. Мартэ ортчиз КПСС-лэн ЦК-езлэн Пленумез. Отын эскеремын вал гурт удысэз азинтон сярысь ужпум. Чакламын вал азьвыл лэсьтэм янгышъёсты палэнтыны, кылсярысь, гуртын улӥсьёсты тросгес пудо вордыны лэзизы, соослэн вузано сӥль-йӧлзылы бадӟымгес дун тырыны чаклазы, закупкаосъя юнэсь планъёс тупатӥзы, колхозъёслы но совхозъёслы юрттӥзы удалтӥсь культураосты кизьыны, удобрениос висъязы, чакламын вал гурт хозяйствоослы коньдонэн но юрттыны. Кутэм ужрадъёс пайда сётӥзы ни 1965-тӥ арын ик. Адямиос тросгес пудо вордыны кутскизы. Хозяйствоос уногес ю-нянь будэтӥзы. Удмуртия дырызлэсь вазь тырмытӥз кунлы курег пуз, ю тысь но картофка вузанъя планъёссэ. Партилэн ЦК-езлэн сентябре ортчем Пленумаз СССР-ысь Министръёслэн Кенешсылэн Председателез А.Н.Косыгин дэмлаз хозяйствоын бадӟымесь воштӥськонъёс ортчытыны. Озьы предприятиослэн улоназы пыӵаз хозрасчёт. Табере лыдэ басьтӥськыны кутскиз предприятилэн кӧня но кыӵе вуз поттэмез - лыд гинэ кулэ ӧй ни вал, кутскиз ӟечлык понна но нюръяськон. Пайда поттэмысь ог люкетсэ коньдонэз луэ ни вал ужасьёслы премия чотын тырыны, социальной программае, выль технологиосы кутыны, выль оборудование басьтыны. Удмуртиысь промышленной предприятиос Запад-Урал Совнархозысь поттэмын вал, соос министерствоосы выжизы. Озьы ик быризы колхозъёслэн-совхозъёслэн управлениоссы, выльысь ватсаса кылдытэмын вал кӧня ке ёросъёс. 1965-тӥ арын Ижевскысь радиозавод поттыны кутскиз "Сириус-М" радиола, "Ижмаш" завод поттӥз кык миллион "Иж-Юпитер-2" мотоцикл. Миннибаево�Ижевск газопровод вуэмен валче, Татарстанысь газ лыктыны кутскиз Ижевскысь андан ӵыжатон заводэ. Уваысь вань промышленной предприятиос электрокужым басьтӥзы кун системаысь. Октябрь пумын семилеткалы йылпумъянъёс лэсьтэмын. Промышленностьын планъя заданиоссэ Удмуртия быдэстӥз 9,5 толэзьлы вазьгес. Промышленностьын продукция поттон йылӥз 2,1 поллы. Тужгес зол азинскизы машина поттон но корт вӧлон, радиотехника но нюлэс дасян. Секытгес вал гурт удыслы. Отын ваньбур поттон 17 процентлы гинэ йылӥз. Нош улон коркаос лэсьтон паськытаз. Республикаысь семьяос ар ӵоже басьтӥзы 1,8 миллион квадратной метр улон инты. Бен, со коркаос 5 этажъемесь но уноез панельлэсь ӝутэмын вал, но трос калык улон интылы юн курадӟыса улӥз бере, та выжыкыл кадь вал ни. Глазовын тани 70 процентаз квартираосын шунытэз, пӧсь но кезьыт вуэз, канализациез вал ни. Лэсьтӥськизы общественной юртъёс но. Ижевскын пуктэмын Правительстволы вить этажъем выль юрт. Та дырысен вань бадӟымесь ужрадъёс выль площадьын ортчылыны кутскизы. Лэсьтӥськисьёс кутскизы Иж тымет дуръёсты железобетонэн шобыртыны. Ижевск аэропортэ нырысьсэ пуксиз АН-24 самолёт. Со дырысен бадӟым самолётъёс лобаны кутскизы, нырысь Москва�Ижевск�Тюмень маршрутъя, собере усьтӥськизы трос мукет маршрутъёс. А.Дерюшев, Удмурт Республикаысь ЦДНИ-ын ужась. Ужаны кутскиз "Ижтяжбуммаш" заводлэн нырысетӥ черодэз. Ижевскысь Центральной площадьын Правительстволэн юртэз. Постановление Правительство Удмуртской Республики от 18 декабря 2000 года г. Ижевск � 1248. Об утверждении тарифных коэффициентов Единой тарифной сетки по оплате труда работников организаций бюджетной сферы Удмуртской Республики В соответствии с Федеральным законом "Об упорядочении оплаты труда работников организаций бюджетной сферы" (Собрание законодательства Российской Федерации, 1999, � 7, ст.869) и постановлением Правительства Российской Федерации от 30 марта 2000 года � 284 "Об утверждении тарифных коэфициентов. Единой тарифной сетки по оплате труда работников организаций бюджетной сферы" (Собрание законодательства Российской Федерации, 2000, � 14, ст. 1514) Правительство Удмуртской Республики ПОСТАНОВЛЯЕТ: 1. Утвердить тарифные коэффициенты Единой тарифной сетки по оплате труда работников организаций, бюджетной сферы Удмуртской Республики и ввести их в действие с 1 января 2001 года. 2. Министерству финансов Удмуртской Республики при подготовке проекта республиканского бюджета Удмуртской Республики на 2001 год предусмотреть финансирование расходов, связанных с осуществлением мероприятий, предусмотренных пунктом 1 настоящего постановления, для организаций бюджетной сферы, финансируемых из республиканского бюджета. 3. Осуществление мероприятий, предусмотренных пунктом 1 настоящего постановления, для организаций бюджетной сферы, финансируемых из бюджетов городов и районов, производится органами местного самоуправления Удмуртской Республики за счет средств соответствующих бюджетов. 4. Признать утратившим силу с 1 января 2001 года пункт 2 постановления Правительства Удмуртской Республики от 5 апреля 1999 года � 368 "О повышении тарифных ставок (окладов) Единой тарифной сетки по оплате труда работников организаций бюджетной сферы Удмуртской Республики" в части тарифных коэффициентов Единой тарифной сетки по оплате труда работников организаций бюджетной сферы Удмуртской Республики. Председатель Правительства Удмуртской Республики Ю. С. Питкевич. Тарифные коэффициенты Единой тарифной сетки по оплате труда работников организаций бюджетной сферы Удмуртской Республики Разряды оплаты труда Тарифные коэффициенты Единой тарифной сетки по оплате труда работников организаций бюджетной сферы Удмуртской Республики 1 1,00 2 1,36 3 1,69 4 1,91 5 2,16 6 2,44 7 2,76 8 3,12 9 3,53 10 3,99 11 4,51 12 5,10 13 5,76 14 6,51 15 7,36 16 8,17 17 9,07 18 10,07 Информация об оплате труда работников бюджетной сферы на основе Единой тарифной сетки по оплате труда работников бюджетной сферы Постановлением Правительства Удмуртской Республики от 18 декабря 2000 г. � 1248 "Об утверждении тарифных коэффициентов Единой тарифной сетки по оплате труда работников организаций бюджетной сферы Удмуртской Республики" с 1 января 2001 года вводятся новые межразрядные тарифные коэффициенты ЕТС. В результате чего, начиная с 3 по 18 разряды ЕТС размер тарифных коэффициентов увеличится в среднем на 20%. Соответственно размеры тарифных ставок (окладов) работников бюджетной сферы также повысятся в среднем на 20-процентов. Кроме того, с 1 января 2001 года увеличится минимальный размер оплаты труда с 132 рублей до 200 рублей. В связи с этим, на основании постановления Правительства Российской Федерации от 10 октября 2000 года � 764 разработан проект постановления Правительства Удмуртской Республики "О повышении тарифных ставок (окладов) первого-третьего разрядов Единой тарифной сетки по оплате труда работников организаций бюджетной сферы Удмуртской Республики". С принятием постановления Правительства Удмуртской Республики "О повышении тарифных ставок (окладов) первого-третьего разрядов Единой тарифной сетки по оплате труда работников организаций бюджетной сферы Удмуртской Республики" с 1 января 2001 года размер тарифных ставок (окладов) первого разряда ЕТС будет увеличен на 68 рублей, второго разряда на 30,5 рублей и на 10 рублей для третьего разряда. Размер тарифных ставок (окладов) с 1 по 3 разряд с учётом увеличения составит: 1 разряд - 132 рубля + 68 рублей = 200 рублей 2 разряд -132 рубля х 1,36 + 30, 5 рубля =210 рублей 02 копейки 3 разряд -132 рубля х 1,69 + 10 рубля == 233 рубля 08 копеек Размеры тарифных ставок (окладов) 4-18 разрядов ЕТС исчисляются исходя из размера тарифной ставки (оклада) 1 разряда ЕТС ( 132 рублей) и соответствующего тарифного коэффициента. Так, для 5 разряда ЕТС размер тарифной ставки (оклада) определяются следующим образом : 132 рубля х 2,16 = 285 рублей 12 копеек. Дополнительные средства на повышение заработной платы работникам бюджетной сферы па основе ЕТС предусмотрены проектом бюджета Удмуртской Республики на 2001 год и учтены при формировании межбюджетных отношений между республиканским и местными бюджетами. Главный специалист Госкомтруда Удмуртии Т. Г. Эсенкулова. Журналистъёс - Завьял районын Одӥг тракторлы - 150 скал Правительствоысь пресс-службалэн кичӧлтэмезъя, кылем арня вискын журналистъёс потазы Завьял районэ. Нырысь соос пумиськизы ёрос думалэн но, администрацилэн но кивалтӥсьёсынызы Валентина Дементьеваен но Галина Баталоваен. Собере вуылӥзы Азин нимо но "Правда" акционер огазеяськонъёсы. Отын соос рос-прос тодматскизы хозяйствоослэн туннэ ужъёсынызы, сӥль-йӧл но бакча сиёнъёс поттонэн герӟаськем лэчыт ужпумъёсын. Завьял районэз удмуртъёс Дэри ёрос шуо. Юнме шорысь уг, со но музон гуртъё улыг интые пуксемын. Район Ижез быдэсак котыртэ. Соин ик, вылды, кемалась дырысен со город калыкез сюдэ, сиён-юон поттэ. Али но гуртын улӥсьёс трос пудо вордо но бакча сиён будэто. Но Галина Васильевналэн ивортэмезъя, гурт удысысь вань хозяйствоослы сямен ик, милям но музъем ужасьёслы но пудо вордӥсьёслы секыт йӧтэ. Ваньмыз со потэ рынокен экономикае выжон вакытэ гурт калыкез вунэтэмен, солы йӧскадь юрттымтэен. Та ласян кун умойтэм политика нуэ, сиён- юонзэ дунтэм дунын бастэ, нош техника, электрокужым, эстӥськон, минерал сылалъёс но мукетсэ кылын верантэм дуно вуза. Соин ик ваньмыз сямен хозяйствоос огинтыязы лёгасько, мырдэм шокало, кӧняез ке гинэ пайдаё ужало. Соос, оло, чиньыен лыдъямон кылемын ни. Ёрос думалэн ужамез сярысь вераса, солэн тӧроез, Кун Кенешлэн депутатэз Валентина Владимировна ватсаз: "Ми ужаськом интыысь ас коже кивалтонъя нормативной актъёс дасян бордын. Районлэн Уставез тупа Россиысь но Удмуртиысь законодательстволы, со ёрослэн пичи конституциез кадь луэ. Али лэсьтӥськом ваньбурен кивалтонъя уно решениос. Отчы пыро интыысь (муниципальной) кивалтонэз но музъем ужанэз умоятон. Кутэмын "Культура" но "Егитъёс" нимаз программаос. Али думалэсь сессизэ дасяськом. Со ортчиз вуоно арын мартэ. Отын эскером дышетон удысэз но соя программа кутом".Районэ пыре 120 гурт. Соос пӧлысь 10-аз ӧвӧл магазинэз но, медпунктэз но, телефонэз но. Сизьымаз гуртъёсы радиосвязь кыскыны чаклало ик. Ёросэ интыяськемын кун ботанической сад. Но со вань коть ӧвӧл, кун бюджетысь коньдон уг висъяло, нош ёрос бюджетэ директорезлэн потэмез уг поты. Сыӵе пумитъяськон номыр ӟечсэ уз сёты. Ёрослэн ӧвӧл электрокужым понна тыронъёсыз, али кутэмезлы но дыраз уксё сёто. Озьы районэз уд ӵошаты шаерысьтымы музон ёросъёсын. Энергетикъёс отын данак фермаосты тылтэк кельто. ... Нуназе котырын журналистъёс вуизы Азин нимо огазеяськонэ. Казмасъёс пуктӥллям чебер улыно-вылыно кирпич контора. Кабинетъёсы туала мебель пуктылэмын. Директорлэн Василий Даниловлэн но ужан интыез быгатыса лэсьтэмын. Та хозяйствоен со 7 ар кивалтэ ни. Азьвыл Азин нимо колхоз валля арын луиз усьтэм амалэн ужась акционер огазеяськон. Нимзэ ӧз воштэ. Отчы ньыль гурт пыре. 380 ужасе, 6 сюрс гектарлэсь уно музъемез, 2800-2900 йыр пудоез, со пӧлысь - 840 скалъёсыз. Туэ ОАО котькуд гектарысь 14,3 центнер ю тысь кутсаз, пудо йырлы быдэ 22 центнер ёрос сиён дасяз, 210 тонна сӥль но 2000 тонна йӧл вузаз. Картофказы но умой люкаськиз, гектарысьтыз 116 центнер. Со 1200 тонна тыремын. Но жаляса верано луэ: 300 тонназэ вузаны ӧз быгатэ, басьтӥсьёс ӧз шеде. Казмасъёс урод уг уло. Кызьы ужало, озьы ик коньдон потто. Рентабельностьсы 30-40 процент луэ. Туэ асьсэ кужымен 2 трактор басьтӥзы, 2 автомашина, 1 легковой машина, 1 пудо сиён дасянь комбайн но мукетсэ. Лизинг амалэн басьтӥзы молоковоз, прицепной комбайн но пресс-подборщик. Гурт калык шорлыдын толэзьлы быдэ 1000 манет пала уждун басьтэ. Мылысь-кыдысь тыршо пудо утисьёс. Дояркаос звено амалэн кык сменаен ужало. Миым скалы быдэ 3200 килограмм йӧл кыскизы, али нуналаз 7-8 килограмм люкаське. Йӧллэн асдуныз 2,06 манет усе. Пудозы нуналаз 500 грамм будэ. Казмас пудо вордон комплексын ваньмызлы адӟем карымон луэ профилакторийзы. Шаерамы таӵеез нокытын ӧвӧл, дыр. Татын эмъясько пудо утисьёс но, музъем ужасьёс но. Физиолечение сяна, массаж лэсьто, нуналлы быдэ 20-30 мурт эмъяське, тазалыксэ юнматэ. Фельдшер Надежда Бутолина но медсестра Ольга Байкова калыкез шуныт пумитало. Колхоз соослы 15 пумо аппаратура басьтӥз. ... Журналистъёслы озьы ик кельшизы "Правда" огазеяськонын бакча сиён будэтӥсьёслэн ужъёссы. Хозяйство туэ лыдъямын Россиысь 100 пӧлысь одӥгез усто бакча сиён будэтӥсь огазеяськонэн. Сыӵе хозяйствоосы озьы ик шедизы районысь "Путь Ильича" племзавод но Можга районысь "Заря" гурт эштос. "Правда" совхоз кемалась дырысен та удыслы бадӟым инты висъя. Теплицосаз кубиста уд будэтэм сяна, огреч трос поттэ. Миым эштос интые огазеяськон (ОАО) луиз. Солэн 3200 гектар гыроно-кизёно музъемез, ужасьёсыз 270 мурт, нош акционеръёсыз 850. Пудоез 800 йыр, со пӧлысь скалъёсыз - 300. Директорлэн нырысетӥ воштӥсез Василий Виноградов журналистъёсты тупен-тупен тодматӥз хозяйствоен. Солэн валэктэмезъя, али соос бакча сиёнъёссэс астраханской амалэн будэтыны кутско. Лэсьтӥзы кубиста сылалтон цех, инъязы 6 бадӟымесь вышкыос (чанъёс), котькудаз 6,5 тонна кубиста сылалто. Солэсь азьло выльдӥзы бакча сиён возён гуоссэс. Отчы 1000 тонна тэре. Туэ огазеяськон 125 гектар вылын бакча сиён будэтӥз (кубиста 100, ӵуж но горд кушман 10 но 15). Гектарысьтыз арлы быдэ сямен 300-320 центнер урожай басьто, нош няньзы 15-17 центнер люкаське. Скаллы быдэ араз шорлыдын 3000 килограмм йӧл басьто. Огазеяськон бакча сиёнъёссэ шорлыдын килограммзэ 2,45 манетэн вуза, нош йӧлзэ - 3,17 манетэн. Нош бензин басьтэ 7,5 манетэн. Вылаз ик, хозяйство бакча сиёнъёссэ уката ик кубистазэ мырдэм вуза, басьтӥсь ӧвӧл. Кӧняез ке со сисьмыны но шеде. Номыр уд кары, рынокын ас интыдэ утчаны кулэ. Ижын оло асьсэлэсь фирменной магазинъёс усьтылоно но мукет амалъёс шедьтоно. Озьы гинэ будэтэм сиён-юонэз арам уз луы, изъянмыны уз сюры. Ужпумез бен котькызьы бергаты, но государство гурт пала ке ӧз берытскы, азьланьын номыр умойзэ ум адӟе. Магазинъёсамы уката тросгес вуозы США-ысь, Голландиысь, Франциысь но музон интыосысь сиён-юон, сӥль, колбаса, сыр, вӧй но мукет. Тани али таӵе югдур кылдэмын. Хозяйстволы К-700 трактор басьтыны 1,1 миллион манет коньдон кулэ, нош одӥг скалзэ со 7 сюрс манетэн вуза. Озьыен, одӥг трактор басьтыны быдэс уллё пудо, 150 скал, вандоно. Кызьы сое умоен лыдъялод? Тӥни со бордысь потэ гурт калыклэн секыт улон-вылонэз. "Правдаын" шорлыдын толэзяз 820 манет уждун тыро. Мукетъёсыныз ӵошатыса, урод ӧвӧл кадь. Но ведь коньдон кулэ нылпиосты дӥсяны-кутчаны, дышетыны но музонэзлы. Адямилэн газет- журнал но басьтэмез потэ. Геннадий Романов. Тюрагай толалтэ но кырӟа Удмурт шаерысьтымы "Тюрагай" удмурт калык хор тужгес кузь сюресэз ортчиз ни. Туэ та коллективлы тырме куатьтон вить ар. Быдӟым тыложлэсь азьло отын ужазы Елизавета Молоткова, Михаил Бывальцев, мукет адямиос. Азьвылгес ик "Тюрагай" кӧня ке пол вуылӥз ини вал Москвае, отӥяз - Нижний Новгородэ. Отчы лыктэм калык синмаськиз шулдыр, жингрес удмурт кырӟанъёсмылы, калыкмылэн чебер дӥськутэзлы. Гуртазы "тюрагайёс" лауреат луыса бертӥзы. Быдӟым тылож йылпумъяськем бере, Машина лэсьтӥсьёслэн культура дворецысьтызы удмурт хорен кивалтӥзы Михаил Коробов, Анатолий Бармин, Зоя Журавлёва. "Тюрагаен" куамын ар пала ини кивалтэ Удмурт Элькунысь искусство удысысь дано ужась Валерий Митрофанов. Со лыктэм бере, коллектив юнмаз, кыдаз, вуылӥз пӧртэм кунъёсы, улосъёсы, шаерысьтымы вань гуртъёсы. "Тюрагаез" котькытын шупотыса пумитало. Татын будӥзы "Италмасысь" но тросэз артистъёс. "Тюрагайлэн" секыт дыръёсыз но вал. Куддыр шуг вал пӧртэм ужрадъёслы, дӥськутлы уксё шедьтыны. Нош кылем арын артистъёс чылкак интытэк кыльылӥзы. Валерий Яковлевич сюлмаськемен, репетициослы инты шедиз Ижысь тужгес бадӟым но чебер "Металлург" дворецын. Али со отын ортчытъя репетициос но шулдыр концертъёс. Н. Возисов. Удмурт Республикаысь Правительстволэн тӧроезлэн воштӥсез САВЕЛЬЕВ Виктор Алексеевич Вордскиз 1963-тӥ арын 24-тӥ январе Татарской АССР-ысь Альметьевск городын. Дышетскемез вылӥ. 1985-тӥ арын йылпумъяз Казаньысь кун университетэз геология но му вӧй но чагыр эстӥськон месторождениосты эскерон специальностья, 1991-тӥ арын - Россия Федерациысь Наукаосъя академилэсь геологияя институтсэ. Геолого- минералогической наукаосъя кандидат, Россиысь Естественной наукаосъя академилэн член-корреспондентэз, Минерал узырлыкъёсъя калык куспо академилэн член- корреспондентэз, Россия Федерациысь Горной наукаосъя академилэн член- корреспондентэз, Россиысь инженерной академилэн но калык куспо академилэн член- корреспондентсы. 1985-1986 - Томск улосысь Колпашево нефтегазоразведочной экспедициысь геолог. 1986-1987 - "ТатНИПИнефть" институтысь поисковой геологияя отделысь инженер, валтӥсь инженер, Бугульма город, Татарской АССР. 1987-1993 - "ТатНИПИнефть" институтысь научной сотрудник, лабораториен кивалтӥсьлэсь ужзэ быдэсъясь, валтӥсь научной сотрудник. 1993-1995 - "УдмуртНИПИнефть" институтысь поисковой но разведочной геологияя отделлэн кивалтӥсезлэсь ужзэ быдэсъясь, геологияя лабораторилэн кивалтӥсез, Ижевск город. 1995 - "УдмуртНИПИнефть" институтлэн директорезлэн наука ужъя воштӥсез, Ижевск город. 1995-1999 - "УдмуртНИПИнефть" институтлэн директорезлэн наука ужъя воштӥсез - выль амалъёсъя но му вӧй кысконэз кужмоятонъя отделлэн кивалтӥсез, Ижевск город. 1999-2000 - Удмурт Республикаысь эстӥськонъя, энергокужымъя но связья министр. Удмурт Республикаысь Правительстволэн тӧроезлэн воштӥсез - Удмурт Республикалэн Россия Федерацилэн Президентэз бордын ялан ужась муртэз САКОВИЧ Андрей Владимирович Вордскиз 1961-тӥ арын Москва городын. Ӟуч. Дышетскемез вылӥ. Йылпумъяз Бауман нимо МВТУ-ез. 1984-тӥ арысен ужаз Москваын связья НИИ-ын инженер, валтӥсь инженер луыса. 1988-тӥ�1993-тӥ аръёсы - СССР-ысь но Россиысь Кунсьӧр ужъёсъя министерстволэн, Беларусьлэн ЮНЕСКО-ын Парижын Постпредствоезлэн сотрудниксы. 1993-тӥ арысен 1995-тӥ арозь - Удмурт Республикалэн Россия Федерацилэн Президентэз бордын ялан ужась представительствоысьтыз валтӥсь специалист. 1996-тӥ�1997-тӥ аръёсы - Россия Федерациысь Федеральной Собранилэн Федерацияя Кенешезлэн членэзлэн юрттӥсез. Та вакытозь Москваысь акциосын "Евразия" банклэн вице-президентэз вал. 1999-2000 - Удмурт Республикалэн Россия Федерацилэн Президентэз бордын ялан ужась муртэз. "Егит тулкым" Озьы нимамын Ижевскысь удмурт егитъёслэн эктон ӝытъёссы. Ортчыло соос толэзьлы быдэ "Редуктор" заводлэн юртаз. Татчы люкаськыло шулдыръяськыны мылкыд карисьёс, туала удмурт эстрадаен тунсыкъяськисьёс. Удмурт дискотека "будӥз" Удмурт университетысь удмурт кылтодонъя факультетын ортчылӥсь ӝытъёс вылын. Талы кутскон сётӥз арганэн шудыны яратӥсь но эстрадаез гажась студент Володя Куликов. Дискотекаос нырысь университетын, собере радиозаводысь егитъёслэн центразы ортчылӥзы. Дышетсконзэ йылпумъямез бере но, Володя мытэм удыссэ ӧз палэнты. Огвакыт радиоын "Егит тулкым" радиоверан бордын ужакуз, та ним солы сокем кельшем, сыӵе нимын дискотекаос но радъяны малпам. Малпамын - лэсьтэмын. "Азьло вал ик коньдонэн юрттӥсьёсмы, табере ужрадэз асьме кужымен гинэ но радъяны быгатӥськом", - шуэ Володя. - Нош чупрес, визьмо эшъёсы Валера Исламгариев, Серебрянников, Майя Бывальцева ас дэмланъёсынызы, быгатонлыкъёсынызы юрттыны котьку дасесь. Жаляса верано, эктон ӝытъёсын ӧжытгес адӟиськыло пиос. Удмурт кун университетын ке уг, соос данак дышетско ук гурт удысъя академиын, Милиционеръёсты дасян школаын, техникая университетын. Соос но мед тодозы вылэм таӵе эктон ӝытъёс сярысь. Нош мар меда ӵектысалзы асьсэос егитъёс, эктон ӝытъёсты эшшо но умоятон вылысь? Тросэз нылъёс билет дунъёс ласянь кӧткуректэмзэс верало, вань мылкыд карисьёс татчы сюрыны уг быгато, пе. Бен, городысь мукет дискотекаосын ӵошатыса, татын соос дунтэмесьгес ай. Но студентлы 20 манет но трос йӧтэ угось. Куд-огез ӵектэ ужрадъёслэн программаязы удмурт шудонъёсты пыртыны. Люкаськемъёс азьын, кырӟасьёс асьсэос тросгес, пе, мед вераськозы вылэм. Нош данакез егитъёс таӵе эктон ӝытъёсты ӵемгес радъяны куро. С. Петрова. Выль арлы дэмласал Кыӵе улӥськод, гуртэ? Ваньмы сямен асьме удмурт журналистъёс гуртысь потэмын. Куд-огезлэн вордӥськем интыяз льӧмпуос но кызьпуос гинэ будэ на. Гуртъёсмы син азямы быро-куашкало, нош сюлэмъёсмы измемын кадь, чик дыр! уг куалекъяло. Малы? Шат асьмеос номыр карыны ум быгатӥське, кужыммес ыштӥм ни? Ӧм. Печать, пресса троссэ берыктыны-улӟытыны быгатэ. Сюлэм кужымез кык-куинь пол яке дас пол будэ президентъёс, мэръёс, депутатъёс бырйыку. Мар но соку асьмеос ум дауртӥське, кызьы но адямиослэсь йырвизьзэс ум сураське. Я коть удмурт журналистъёс сокем сыӵе уг шузиясько. Шонер ӧрзэ шедьто. Соиз умой ни. Но туннэ туж валантэм мукетыз, берло дыре ӵем-а вуылӥськом фермаосы, мастерскойёсы но огшоры яке ляб шокась хозяйствоосы? Жаляса верано луэ, ум. Нош калык асьсмеды вите-возьма, пумиськемез но вераськемез, кӧтӝожзэ шараямез потэ. Ваньзэ коньдонэн гинэ уд мерта. Адямилы шуныт кыл но кулэ. Котькудмы асьмеос, удмурт журналистъёс, пӧртэм дыре вордӥськем гуртысьтымы кошким. Аслам тани туэ 45 ар тырмиз ни. Озьы ке но Пежвайме ноку уг вунэтӥськы. Солэн ортчем сюресэз шаерысьтымы вань гуртъёслэн кадь, номырин уг висъяськы. Война вакытэ но, собере но гуртоосы-бӧлякъёсы юн секыт, курадӟыса улӥзы. Ӝӧк вылад вожпотэн сьӧд нянь ке вуэ, со шумпотон вал. Калыке ваньзэ чидаз. Мынам син азям гинэ пичи гуртэ кыкетӥзэ вордӥське ни. 60-70-тӥ аръёсы пичиесь вужмем коркаос интые, чебересь бадӟымесь пу коркаос ӝутӥзы. Тодмантэм выльдӥськиз гуртэ. Нош 80-тӥ аръёсы бӧлякъёсы уката устоесь, улыно-вылыно, кирпичлэсь но пеноблоклэсь юртъёс пуктылӥзы. Гуртэ нош ик туссэ воштӥз, чеберскиз. Но ваньмыз коркаоссэс чередьыны-выльдыны ӧз вуэ, кутскиз выльдӥськон, ваньмызлы маял вылын кадь дунъёс будӥзы. Гуртъёс нош ик капканэ выллем сюризы, пачказы. Табере трос- а бен адӟиськом гуртъёсын нимаз адямиослэсь лэсьтӥськемзэс? Ум, конечно. Но со понна городъёсмы, райцентръёсмы котыре кыӵе дворецъёс-коттеджъёс пуксизы. Учкыны ик шурдыт. Кытысь сомында город калык уксё шедьтӥз?! Улон берга аслаз сюрестӥз. Сое воштыны уг быгаты одӥг визьмо политик но, одӥг бадӟым кивалтӥсь но. Асьмеос та дырез ортчытыны кулэ. Тани-тани ӵогиськоз выль даур, потом 2001-тӥ аре. Мар со асьмелы сётоз, мар ваёз? Тунаса улӥм ке, номыр ӟечсэ ум лэсьтэ. Со вератэк но валамон. Котькудӥз ас интызэ шедьтыны кулэ. Газетмес гуртоос басьто бере, асьмеос но соос пала быдэсак берытскыны кулэ. "Удмурт дунне" - со гурт калыклэн яратоно газетэз мед луоз. Соин ик вуоно арын ачим но малпасько, эшъёсме но ӧтисько гуртъёсы ӵемгес потаны, гурт удысэз азинтонэн герӟаськем лэчыт ужпумъёсты газет бамын кышкатэк ӝутъяны. Со сярысь мед тодозы Кун Кенешын но, Правительствоын но, министерствоосын но. Оглом вераса, газет бамын нырысетӥ интыын мед луоз гуртысь огшоры ужась. Геннадий Романов. Удмурт Республикаысь Правительстволэн тӧроезлэн воштӥсез - Удмурт Республикаысь ваньбур кусыпъёсъя министр КАСИХИН Сергей Павлович Вордскиз 1950-тӥ арын 28-тӥ мартэ Удмурт АССР-ысь Яр посёлокын. Ӟуч. Дышетскемез вылӥ. 1972-тӥ арын йылпумъяз Пермьысь политехнической институтэз лэсьтӥськон изделиос но конструкциос поттон специальностья, инженер-лэсьтӥськись-технолог. 1972-1978 - лэсьтӥськонъя Приаргунской управленилэн промышленной предприятиосъя управлениысьтыз сменалэн мастерез, валтӥсь мастерез, валтӥсь инженер-технолог, валтӥсь инженер, валтӥсь технолог, Краснокаменск город, Чита область. 1978-1979 - "Промстройкомплект" трестысь производствоя отделысь валтӥсь инженер- технолог, отделлэн кивалтӥсезлэн воштӥсез, Пермь город. 1979-1992 - лэсьтӥськонъя Чепца управлениысь железобетонной конструкциосъя заводысь валтӥсь инженер, Глазов город, Удмурт АССР. 1992-1995 - Удмурт Республикаысь Ваньбуръя фондлэн тӧроез, Ижевск город. 1995-1999 - Удмурт Республикаысь Правительстволэн тӧроезлэн воштӥсез - Удмурт Республикаысь Асваньбуръя кун комитетлэн тӧроез. 1999-2000 - Удмурт Республикаысь Асваньбуръя кун комитетлэн тӧроез. Кун наградаосыз: 1996-тӥ ар - Россия Федерацилэн Президентэзлэн тау каронэз 1998-тӥ ар - Удмурт Республикаысь Правительстолэн Почёт грамотаез 2000-тӥ ар - Удмурт Республикаысь Кун Кенешлэн Почёт грамотаез Кузьым кошкиз Горняке Удмурт Республикаысь Почта кусыпъёсъя управление газетъёслы, журналъёслы гожтӥськон вакытэ уно ужрадъёс ортчытъя, пӧртэм амалъёсты уже кутэ, лыдӟисьёслэсь лыдзэс йылэтон понна. Кемалась ик ӧвӧл ялэмын вал Гожтӥськисьлэн нуналэз. Та вакытэ со котькуд ёросын ортче. Миым арня вискын таӵе ужрад ортчиз Можга городын. Асьсэлэсь гожтӥськисьёссэс тунсыко кузьымъёсын витизы шаерамы потӥсь кун газетъёс но журналъёс. Уно гинэ калык люкаськиз почта юртэ. Соосты кырӟанэн-эктонэн пумитазы городысь нылпи творчествоя юртэ ветлӥсьёс. Шуныт кылъёс веразы но кузьым утыны мылкыд каризы Почта кусыпъёсъя управленилэн Можга ёзэныз кивалтӥсь А. Рожин но гожтӥськонъя ёзэн кивалтӥсь Г. Петрова. Нош быдэс республикая газетъёслы но журналъёслы гожтӥськонлэн кызьы мынэменыз тодматӥз Печатья но иворъёсъя министерствоысь валтӥсь специалист Ю. Басков. Гожтӥськыны лыктэмъёс пӧлысь соку ик синйылтӥ дышетӥсез, удмурт букварь кылдытӥсез Р. Даниловаез. - Одӥг ар но "Удмурт дуннелы" гожтӥськытэк уг кылиськы вал, - шуэ Римма Ивановна. - Но берло кык арзэ сое ӧй басьты, нылпиосы мукет газетъёслы синмаськемен. Табере соос нимаз уло. Мон туннэ шумпотыса лыктӥ яратоно газетэлы гожтӥськыны. Уд но оске, ява, макем мӧзми мон солэсь! Сюлэмы ик буш улӥз кадь, маке но ялан курыса. Ас калыкед, гурт улон, отын тыршисьёс сярысь удмурт кылын лыдӟытэк, укыр шимес ук улыны. Но мон, газетэз лыдӟем сяна, соин матысь кусыпъёс возьыны малпасько, ачим но отчы гожъяло. Тани огзэ статьяме пумаз-йылаз вуттӥсько ини. Собере вылез борды кутско. Тӥни озьы "Удмурт дуннеен" эшъяськыса уломы. Озьы ик "Удмурт дунне" газетэн та нуналэ эшъяськыны мылкыд кариллям куатьтонлэсь ятыр адямиос. Нош кузьыммес утӥз Горняк посёлокысь М. Кузьмин. Ӟечкыласьком сое. Нош тӥ, гажано лыдӟисьёсмы, мылкыддэс эн куашкатэ. Мукет кузьымъёсты, оло, ӵапак тӥ утоды. Е.КАМАШЕВА. АРХИВЫСЬ ДОКУМЕНТЪЁСЪЯ Удмуртия ХХ дауре 1966-тӥ ар КПСС-лэн ХХИИИ съездэз йылпумъяськиз 8-тӥ апреле. Со кутскон сётӥз тямысэтӥ пятилеткалы. Съезд чаклаз уждун тыронэз умоятыны, берыктӥз Генеральной секретарь должностез. Азьло сое нуллӥз Сталин, табере - Леонид Ильич Брежнев. Удмуртия кутскиз автомобиль поттыны. 6-тӥ апреле со пумысен нимысьтыз постановление кутӥз СССР-ысь Министръёслэн Кенешсы. Легковой машинаосты поттыны кулэ вал Ижевскысь машина лэсьтон завод. Та документэз кутон понна трос лэсьтӥз Д.Ф.Устинов, со угось Удмуртиен вазенгес герӟаськемын вал ини. Удмуртиысь машина поттӥсьёс та ужен азьвыл ӧз выре, соин ик басьтӥськизы "Москвич-408" модель борды. Та автомобилез лэсьто ни вал Москваысь Ленин комсомол нимо заводын. 12-тӥ декабре экспериментальной производстволэн конвейерысьтыз васькизы "Иж" эмблемаен нырысетӥосыз "Москвичъёс". Завод быдэсак вуттымтэ на вал, соин троссэ ёзъёсты ваёно луылӥз страналэн пӧртэм сэрегъёсысьтыз, куд-огзэ кунгож сьӧрысь но. Камбаркаын 150 вал кужымъем тепловозъёсты лэсьтыны кутскизы. Огшап ортчыса, конструкторъёс соослэсь моторзэс 250 вал кужымозь вуттӥзы. Та ӝикытэсь тепловозъёс сюбег чугун сюрес вылтӥ ветлыны чакламын вал. Воткинскын кылдытэмын газовой аппаратура поттон завод. Со плитаос калыклы туж кельшизы. Можгалан кутскизы пияла поттон "Свет" заводэз быдэсак выльдыны. Кык арскын пияла пельтон уж механизировать каремын. Ува посёлоке вуиз газ, отын кылдӥз "Удмуртгаз" огазеяськонлэн участокез. Отысь чагыр эстӥськон басьязы Ува, Вавож, Сюмси но Селта ёросъёсын улӥсьёс. Нырысетӥ июльысен воксё быдтэмын трудоденьёс, колхозникъёслы коньдонэн уждун тырыны кутскизы. Нош куатьтонэтӥ аръёслэн кутсконазы ог 80 процентэз колхозъёс трудоденен гинэ уждун тыро на вал. Кутскизы колхозъёсты огазеяны, троссэ совхозъёслы пӧрмытӥзы. Городъёсын паськыт радъяськиз лэсьтӥськон. Сарапулын усьтӥськиз "Дом одежды" магазин, Воткинскын - крезьгуръя школа выжиз мукет интые, отын 250 интылы концерт залэз вал. Ижевскын азьланьтӥськиз "Ижтяжбуммаш" заводэз но автозаводэз лэсьтон, нош предприятиос котыре пуксьылӥзы улон коркаос, вӧзазы - школаос, поликлиникаос, магазинъёс. Пуктэмын "Ижевск" (али "Центральная" гостиница, ӧсъёссэс усьтӥзы Пушкинской урамысь магазинъёс: "Урал", "1000 мелочей", "Весна", "Искусство". Горький урамын нырысьсэ усьтӥськиз изьыос, шляпаос но картузъёс вузанъя нимысьтыз магазин. Ижевсклэн урамъёсаз нырысьсэ потӥзы Чехословакиысь басьтэм чебересь трамвай вагонъёс. Ар ортчыса, огез но вуж вагон рейсэ поттэмын уз ни луы. Умой шудыны быгатэмзэс возьматӥзы Глазовысь хоккеистъёс. "Прогресс" клуб Ижевскысь "Ижсталь" командалэсь 4 арлы азьло ни СССР-ысь хоккеистъёс пӧлын нырысетӥ инты понна "А" группаын нюръяськылӥз. Бӧрысьгес Глазовын пуктэмын луоз 5 сюрс мурт тэрымон туж чебер Йӧ дворец, нимаськоз но со "Прогресс" шуыса. А.Дерюшев, Удмурт Республикаысь ЦДНИ-ын ужась. Буммашын выль улон коркаос. КПСС-лэн ЦК-езлэн секретарез Д.Ф.Устинов но партилэн Удмурт обкомезлэн нырысетӥ секретарез В.К.Марисов Ижевск автозаводэз лэсьтӥсь егитъёсын. Алигес Ижевскын нырысетӥез республиканской нылпи юрт усьтӥськиз. лэсьтӥськонъя 18 номеро управлениысь ужасьёс солэсь усьтонзэ сӥё-дано сётӥзы Александр Григорьевич Яковлевлы, та юртлэн директорезлы. Шӧдӥське, лэсьтӥськисьёс сюлмысь, мыло-кыдо тыршиллям. Татысь улон сэрегъёс паськытэсь, югытэсь пӧрмиллям - котькудӥз 4 кузёлы чакламын. Юрт пушкын ик дышетскон классъёс луозы. Покчиослы вань кытын шутэтскыны но: татын 2 спортъя залэз, 2 бассейнэз. Нылпиос понна татын нимысьтыз эмъяськонни но ужалоз. Покчиослэсь тазалыксэс эскерыса возёзы педиатр, пинь эмъясь, чакламын физиокабинет усьтыны. Нылпи юртэз ӝутонлы ог 30 миллион манетлэсь уно коньдон жильдӥськиз. Солэсь ог люкетсэ ас вылаз басьтӥз Калыкез дышетонъя министерство. Матысь дыре Нылпи юртэ 175 кузё вуыны кулэ ни: 3 аресысен кутскыса 17-озь. Выль дауре - мылкыдэз бурдъясь трамвайын Чехиысь ваем выль трамвай сярысь кылэм гинэ ӧвӧл, куд-огез отын ворттылыса но эскеризы ни, луоз. Выль ар азьын со кӧня ке нунал ӵоже 4-тӥ маршрутъя котыръяса вуттӥз. Табере со Мылкыдэз бурдъясь трамвайлы пӧрмытэмын. "Яратӥсьёслэсь садзэс" кылдытӥсь Мария Дрёминалэсь но солэн эшъёсызлэсь таӵе малпанзэс городысь администрация но ИжГЭТ санэ понӥзы. Озьы выль дауре Мылкыдэз бурдъясь трамваен выжыны луонлык кылдытӥзы. Егит талантъёс - крезьгурчиос, кылбурасьёс, суредасьёс но артистъёс - ас быгатонлыкъёссэс возьматыны быгатозы та трамвае пуксемъёс азьын. Со сяна, ужрадэз радъясьёс оскыто, татын вань сюлмысь малпанъёс быдэсмыны быгато шуыса. Та трамвайысь ик, оло, ассэ яратондэ но пумиталод. Нош бурдъяськем мылкыддэ жильдыны луоз котькуд пятницае "Авторадио" пыр 18 часысен 19 часозь сётӥськись концерт пыр. Вераны гинэ кылиз на: Мылкыдэз бурдъясь трамвайлэн дуныз огшорыосызлэсь уг висъяськы, проездной билетъёс но лыдэ басьтӥсько. Я, мар?! Оскалтомы-а, мылкыдмес бурдъяса? Иське, азьлань! Трамвай "Промышленной� кинотеатр "Аврора" но берлань сюресэз 15 часысен 17 часозь ортче. Э.КУМАЧЁВА. Каникулъёс - шутэтскыны Выль ар праздникъёс бӧрсязы ваизы пиналъёслэсь тол каникулъёссэс. Соин валче анай-атайёслы тужгес сюлмаськоно, дыр, нылпиоссылэн ӟеч-ӟеч шутэтскемзы сярысь. Берло лыдпусъёс возьмато, дышетскись пиналъёс пӧлысь котькуд кыкетӥез ляб тазалыкез вылэ ӝожтӥське. Со пыкъяське школа программаен пуктэм чурыт куронъёс вылэ но. Шуиськом ке, мӧйы мурт арняяз 40 час ужаны кулэ, пиналъёс школаын шорлыдын 56 час ортчыто. Соин валче егитомо вирсэр, ты, мус висисьёс, сахарной диабет, йылэ ляб адӟисьёслэн но кылӥсьёслэн лыдзы. Э. Кумачева. Журналистъёсын пумиськонъёс Курадӟисьёс, оло, ӧжытгес кылёзы Мар возьма вуоно арын дышетӥсьёсты, егитъёсты наука но культура удысъёсын тыршисьёсты? Мар учкемын соослы республикамылэн бюджетаз? Та юанъёслы валэктонъёс сётӥз Кун Кенешысь Наукая, дышетонъя, культурая но егитъёсын ужан политикая ялан ужась комиссилэн кивалтӥсез А. Красильников. Кивалтӥсь оскытӥз, таиз бюджет, пе, кема аръёс ӵоже нырысьсэ берытскемын социальной удысын ужасьёс пала. Республикалэсь но районъёслэсь бюджетъёссэс огазе карыса учконо ке, отын коньдон 8 миллиард манет люкаськыны кулэ. Со пӧлысь 50 процентэз чакламын социальной удыслы. Озьыен, вуоно арын обидемын уз луэ дышетӥсьёс, нылпи садын ужасьёс, эмъясьёс но начар уждунэн мукетъёсыз улӥсьёс. Бюджетэз дасяку, огкылэ вуэмын таӵе секыт ужпумъёсъя. Кылсярысь, нылпи садъёсысь утялтӥсьёслы (няняослы) юрттонъя. Соослэн кадь пичи уждунзы кытын ке вань на меда. Соин ик соослы, ужан интыязы дунтэк сюдон понна, бюджетысь 21 миллион манет висъяны учкемын. Дышетӥсьёслы но книгаос басьтон понна республикалэн пунэм тыронъёсыз трос аръёс ӵоже 82 миллион тыр люкаськемын. Соосты берыктон понна, нырысь учкемъя, бюджетын 5,8 миллион манет гинэ пусъемын вал. Но со серем ук. Кӧня ке нюръяськемзы бере, депутатъёс дышетӥсьёс понна 30 миллион пала курыны быгатӥллям. Нылпиосты дышетон сярысь ке верано, вуоно дауре та удыс дышетонъя национальной доктринаез юнматыса выже. Но жаляса верано, шуиз А. Красильников, вань ӟеч чакламъёс отчы ӧз пыре. Нылпиосты 12 арозь дышетон озьы ик отын учкемын ӧвӧл на. Та ужпум куд-ог дышетӥсьёсты, оло, буйгатоз ик. Алексей Красильниковлэн верамезъя, 2001-тӥ арын бадӟымгес, пе, саклык висъяськоз аналтэм нылпиослы. Бюджетын нимысьтыз коньдон висъяны чакламын (4 миллион) мумы-бубытэк кылем нылпиослы улон интыос басьтон понна. Со сяна, Ижын малпамын приют усьтыны нокытын дышетскисьтэм но ужасьтэм нылпиос понна. Отчы интыяны чакламын быдэс республикаысь но мукет улосъёсысь 150 пала быдэ вуымтэ нылпиосты. Кин тодэ, ужаны но дышетскыны нимысьтыз луонлыкъёс кылдытыса, со нылпиос но урод сямъёссылэсь куштӥськозы но ӟеч сюрес вылэ султыны быгатозы. Солы оскыса ик малпамын та уж борды басьтӥськыны. Таяз арын тросэз предприятиос азинлыкогес ужазы. Соин ик бюджетлэсь доход люкетсэ куд-ог удысъёслы выльысь люкылоно луиз. Со вал малпамтэ шорысь. Вуоно арын но озьы ик ке луиз, кытчы меда кутӥськоз бюджетэ мултэс люкаськем коньдон? Красильниковлэн верамезъя, Удмуртиысь профсоюзъёслэн федерацизылэн кенешез ӵектэ, пе, уждунэз йылтонлы кутыны. Т. Банникова. ДЕКАБРИСТЪЁСЛЭН ВОССТАНИЗЫЛЫ - 175 АР Маин эксэйлэсь пӧртэм вал? Мынам книга ӝажыям - декабристъёслэсь литература удысын ужъёссэс возьматӥсь бичет - антология. "Меч и лира" шуыса нимаське со. Сое киям ӵем гинэ кутылӥсько: угось ялан мылкыдэз бугыртэ, туала улон сярысь малпаськонэ выйтэ. Книга поттэмын вал, декабристъёслэн восстанизылэн 150 ар тырмонэзлы сӥзьыса. Нош тани табере Россиысь калыклы дурбасьтӥсь батыръёслэн ӝутсконзылы 175 ар тырме. Со вакытлы вылӥ дунъет сётыса, трос гожъяз вал писатель революционер-демократ А.И.Герцен. 1820-тӥ�1825-тӥ аръёсы, шуиз со, ӝужаз быгатӥсь, эрик понна нюръяськон сямъёсын, кышкасьтэм муртъёсын бадӟым кужым. Декабризм - со нырысь ик политикая огазеяськон. Но соин ӵош ик со бадӟым малпан но культура понна нюръяськон вал, ӟуч обществолэн но культуралэн азинскон сюрес вылазы мур пытьы кельтӥз. Декабристъёс улон но сюлэмшугъяськытӥсь ужпумъёс шоры асьсэ синмын сэзь мылкыдын учкылӥзы. Асьсэлэсь моральзэс, эстетиказэс, озьы ик литературазэс кылдытӥзы. Кылем даурысь историлэсь со чуръёссэ вунэтыны нокызьы уз луы. Куд-ог туала "демократъёслы" со вакытъёс (1825-тӥ, 1917-тӥ но мукет аръёс) уг ярало, нош быдэс кунэз зуркатӥсь учыръёсты историысь уд ӵушы. Шонер гинэ валан понна соосты туннэ нуналэн но ӵошатоно луылэ. 1812-тӥ арын Отечественной войнаын вормон калыклэсь асваланзэ вылэ ӝутӥз. Сайкатӥз но политикае кыскиз. Дворянъёс пӧлысь азьмынӥсь егитъёс сое умой валазы. Россиез быронлэсь утисьёс эрик басьтозы шуыса чаклало вал. Но озьы ӧз луы. Крепостной право, солэн зӥбетъёсыз калыкез курадӟонлэсь ӧз мозмытэ. Зэм, данакез нырысь-валысь оскылӥзы на вал Александр И эксэйлэн калыклэсь улонзэ капчиятон сярысь чеберъяськон кылъёсызлы, шонер катъёс (законъёс) поттонлы. Калыклэн осконъёсыз ӧз быдэсме. Вормиз секыт режим - "аракчеевщина" - эксэйлэн гажано медоезлы Аркчеевлы туж бадӟым власть сётэмын вал. Декабристъёс гожъязы: "Ми вирмес кисьтӥмы, нош милемыз выльысь барщинаын пӧсятозь ужато. Ми родинамес тиранлэсь мозмытӥм, нош милемыз нош ик мыскылляло господаос". Кылдӥзы лушкем обществоос - соос бордысен кутске декабризмлэн историез. Александр эксэй шӧдтэк шорысь кулэм бере, солэн выныз Николай трон вылэ пуксьыку, декабристъёс Петербурглэн Сенат площадяз потӥзы. Куинь гвардейской полкын куинь сюрс ёрос солдат, кудмын офицеръёс вал. Декабристъёс самодержавиез сэрпалтон вылысь, восСтанилы ӟеч дасяськыса ӧз вуттэ, 14-тӥ декабре Николай И пушкаосын декабристъёслэсь вирзэс кисьтӥз. Азьветлӥсьёссэс нырысь Зимний двореце, собере Петропавловской крепосте вуттӥзы. Следствие улэ шедиз 579 мурт. Суд улэ кыскемын 313 адями. Витез - Пестель, рылеев, Муравьев-Апостол, Бестужев-Рюмин но Каховский - ошемын. Мукетъёсыз Сибире каторгае рудникъёсы, тюрьмаосы келямын, солдатэ сётэмын. Куамын ар ортчыса, 1856-тӥ арын выль эксэй Александр ИИ улэп декабристъёслы гуртазы берытскыны лэзиз на, сыӵеос кылемын на вал 29 мурт гинэ. Декабристъёслэсь движенизэс, мон сямен, ӵошатыны луэ туала вакытэн но. Ельцинлэн режимез, быдэс Россиез "рынок" шуиськись капитализме берыктэмез трос ласянь укша 1825-тӥ арысь событиослы. Ельцинлэн аслаз "аракчеевъёсыз" кылдӥзы, калыкез алдаса, солэсь ваньбурзэ талазы. Асьмеос тодӥськом, кытчы вуттӥзы дунъёслы материализация, ваньбурлы приватизация но мукетыз, озьы ик 1991-тӥ, 1993-тӥ аръёсы вир кисьтон событиос. Али Россиын улӥсьёс пӧлысь ог 10 процентэз гинэ тыр уло, озьы веразы Россиысь ветеранъёслэн алигес ортчем съездазы но. Л. Фёдоров, ужысь ветеран. ВУОНО АРЛЫ ДЭМЛАСАЛ Мыным кельшо тӥ кадь адямиос Ачим сярысь мон номыр но уг вера. Созэ ке шат - фамилиосы кык. Огез - Рябинина. Оло, тодӥськоды-а? Поталляло статьяосы куддыр. Эшшо З.Вахрушева мон, Но таизэ Нимме-тулме Ӟечгес тодо бухгалтер но картэ. Сыӵе фамилиен уждун басьтылӥсько, Ну, куддыръя газет баме но пуктӥсько. Ярам, ужпум ӧвӧл ай со бордын. Тодматоно, пе, лыдӟисез малпанъёсын. Тодӥськоды ни тӥ, мар гожъялозы кайта Романов, Малых, Виноградова Лена... Нош мон тӥледыз маин паймытом, Газет баммес маин узырмытом? Сюлэмыя мыным пӧртэм адямиос: Туж-туж лябъёс но туж-туж кужмоос, Огшорыос но бен кельшо, Йӧспӧртэмгес ке ӧжытак уло. Мыным кельше лэчыт ужпумъёсты Пӧсь дыръязы сэрттыны-пертчыны. Шуг учырысь потон амал Лыдӟисьёсын ӵош утчаны. Соин ик мон ӵекто кайта Газет баме сыӵе статья! Мед бӧрӟытоз бӧрдылӥсьтэм адямиез (Вӧсь каремлэсь ӧвӧл, сюлмыз бугырскемлэсь), Егит муртэ малпаськытоз, Арлыдозэ нош лӥятоз, Пыдес вылысьтыз мед ӝутоз лябзэ, Йырзэ мыкыртытоз сьӧлыкозэ. Нош... сярысь потэ-а лыдӟемды? Мынам ни дась сыӵе гожъямъёсы. Зинаида РЯБИНИНА. Удмурт Республикалэн Конституциезлэн нырысетӥ но кыкетӥ ёзэтъёсаз воштонъёс пыртон сярысь Удмурт Республикалэн Законэз 1-тӥ ёзэт. Удмурт Республикалэн Конституциезлэн нырысетӥ но кыкетӥ ёзэтъёсаз пыртоно таӵе воштонъёс: 1. 13-тӥ ёзэтысь куштоно "луо Удмурт Республикаысь калыклэн узырлыкез" кылъёсты. 2. 32-тӥ ёзэтысь: 1-тӥ люкетысь "Удмурт Республикалэн гражданъёсыз" кылъёсты воштоно "Удмурт Республикаын Россия Федерацилэн гражданъёсыз". 2-тӥ люкетэз тазьы лыдӟоно: "Удмурт Республикалэн гражданъёсызлы право сётэмын кун властьлэн ёзъёсаз но интыосын аскивалтонъя ёзъёсы бырйыны, озьы ик референдуме пыриськыны. Удмурт Республикаын Россиын Федерацилэн гражданъёсыз быръемын луыны быгато кун властьлэн ёзъёсаз но интыосын аскивалтонъя ёзъёсы"; 4-тӥ люкетысь "Удмурт Республикалэн гражданъёсыз" кылъёсты воштоно "Удмурт Республикаын "Россия Федерацилэн гражданъёсыз" кылъёсын; 5-тӥ люкетысь "Удмурт Республикалэн гражданъёсыз" кылъёсты воштоно "Удмурт Республикаын Россия Федерацилэн гражданъёсыз" кылъёсын. 3. 36-тӥ ёзэтысь: 1-тӥ люкетысь куштоно "1" числоез; 2-тӥ люкетэз куштоно. 2-тӥ ёзэт. Та закон кужыме пыре, сое печатлам дырысен дас нунал ортчыса. Удмурт Республикалэн Президентэз А. А. Волков. Ижевск город, 2000-тӥ арын 28-тӥ ноябре. � 226-ИИ. ЖУРНАЛИСТЪЁСЫН ПУМИСЬКОНЪЁС Улыны кӧня коньдон кулэ? Берло дыре улон-вылонмес умоятон сярысь трос вераськонъёс мыно ке но, данакез калыкмы ялан куанерме. Со шӧдӥськиз Правительствоын журналистъёслэн пресс- конференциязы но. Сое ортчытӥз республикаысьтымы Ужъя кун комитетлэн кивалтӥсезлэсь ужзэ быдэсъясь Сергей ФЕФИЛОВ. Зэмзэ но, Россиысь трос адямиослэн секыт улэм-вылэмзы сярысь алигес вераз Президент Владимир Путин. Югдур пӧртэм ӧвӧл шаерамы но. Тани Удмуртиын шорлыдо уждун толэзьлы быдэ 1631 манет ке люкаське, калыкез дышетон, культура но тазалыкез утён удысын ужасьёс ваньзэ-ӧвӧлзэ 1000-1100 манет гинэ уждун басьто, нош гурт калык чылкак 630, нюлэс хозяйствоын тыршисьёс - 930 манет. Таӵегес ик суред городъёсъя но районъёсъя. Кылсярысь, Ижын улӥсьёс шорлыдын 2230 манет ке уксё басьто, Сарапулын 1350 манет гинэ усе, Завьял ёросын - 1330, нош Юкаменскын - 750 манет. Оглом вераса, Приволжск огругын уждунъя республикамы куатетӥ инты басьтэ. Туэ апрель толэзьысен уждунъя тыронъёсмы шӧдскымон кулэсмизы. Сое лыдпусъёс но умой возьмато. 1998-тӥ арын 1300 миллион манет тыронъёсмы ке вал, али 300 миллион манет гинэ кылемын. Нырысь-валысь учконо ке, калыклэн улонэз умоя кадь. Но со чик но озьы ӧвӧл. Тани одӥг адямилы улыны толэзьлы быдэ ичизэ 1030 манет кулэ. Со лыдпус поттэмын специалистъёслэн лыдъямзыя. Но Сергей Самойловичлэн ивортэмезъя, со лыдпус, пе, котькуд улосвылын пӧртэм, музон амалъёсын лыдъяло. Нош Россиысь Ужъя министерство тая одӥг кылэ ӧз вуы на, ваньмызлы тупась амалъёс ӧз шедьты, Москва ялан малпаське на. Озьы ке но, элькунамы кӧня ке пусйымонэз но вань. "Ижмаш" огазеяськон уждунъя ӝынызэ тыронзэ пытсаз, нош дочерней предприятиосаз чик ӧвӧл ни. Кызьы сое умоен уд лыдъя. Вуоно арын бюджет удысын тыршисьёслэн уждунзы 20 процентлы йылэ, нош ичи уждун 200 манет луэ. Та лыдэ басьтэмын ни туэлы кутэм кун бюджетын но. Огласянь со озьы, мукет палзэ ке учконо, производствоын секыт шудтэм учыръёс трос на. Кылем арын тани ужын 43 адями бырыны шедиз. Та ласянь асьмеос округын бере кылиськом но, комитет ужрадъёс кутэ. Али со чакла, кытын кӧня ужасьёс но ужан интыос вань. Йылпумъяса верам потэ, та вакытэ 15 процентэз адямиос улыны тырмымон уждун уг басьто яке 1030 манетлэсь ӧжыт. Вылаз ик, сиён-юонлы, пӧртэм услугаослы но музон вузъёслы, кулэсмем интые, дунъёс ялан будо. Нош государство сиён-юонлы дунъёсты огкадь возьыны уг быгаты, угось хозяйствоослы пичи дун понна юрттэт уг сёты. Нош сӥльлы, вӧйлы но музонэзлы дунъёс бускельёсын ӵошатыса, ичигес луизы ке, сиён- юонмы тросэн палэнэ кошкоз. Г.РОМАНОВ. Чиля ке, чебер-а? Туала улонмы шоры учкыса, йыре лыкто С. Есенинлэн чуръёсыз: "Мынам поэзие татын кулэ ӧвӧл ни, ачим но мон кулэ ӧвӧл ни та вие". Озьы асьсэды ыштэмен, кулэтэмен лыдъяло, дыр, али тросэз кылбурчиос, суредасьёс, актёръёс, крезьгурчиос, огъя вераса, чеберлыкез кылдытӥсьёс, культура, литература, искусство удысын ужасьёс. Выж ӵужисьлы, азбар утялтӥсьлы ӵошась уждунзы но соосты ултӥя, улэ уськытэ, зэмен но кураськонэ, пыдесъяськонэ вуттэ. Нырысь интые пото йырзэс чатыртыса гульымзэс кесяны быгатӥсь, ӝабрес киё, капчиен гинэ уксё поттыны вырись муртъёс. Дун пуктон мертэтъёс воштӥськизы. Мар ке чиля, сое гинэ чебер кожаськомы, пушласянь югдытӥсез сярысь вунэтӥськом. Нош чеберлык, лулчеберет (культура) кутске ӵапак со лулчылкытлык, духовность бордысен. Таӵе инъет ӧвӧлэн куашка асьмелэн улонмы, гылӟе пыд улмы. Тани тросаз гуртъёсын кемалась кылдэм суред: клубысь сӧриськем укно пиялаос, выж вылысь сема тысь, тамак пумъёс, сэргысь буш бутылкаос... Мар карыны ӟудэм егитъёс картаен шлачкето, юонлэн зын кожаз выё, эсьма, нылъёс но тамак пурккетыны уг возьдасько. Ӧвӧл асьме гуртъёсын чеберлыкез огазеясь юртъёс: отын ик мед луысал лыдӟиськыны, выль газетэн-журналэн тодматскыны, видеофильм ускыны, вашкала тӥрлыкъёсыз адӟыны, ческыт сиён-юонэн кунояськыны (отчы кырсь пыдын пырыны возьыт мед луоз). Вань пичи "шормуӵъёс" гинэ, нимаз-нимаз мыло-кыдо адямиослэн кылдытэмзы. Вань самодеятельностья кружокъёс, фольклор ансамбльёс. Но кырӟан-эктон гинэ - со культура ӧвӧл на. Лулчеберетэз вань амалъёсын, ӵош азинтоно, Культурая министерстволэн но, культурая дэменлыклэн но ёзъёссы огазеяськыса. Озьы ик вань социальной удыс та котыре кыстӥськыны-биниськыны кулэ. Ваньзэ сое возьматон - газетлэн ужез. Возьматон гинэ ӧвӧл, "нӧдысь" потыны амалъёсты утчан. Чылкак пуксиз, уг пальккаськыса ни "Тулкым", чалмизы кылбурасьёс, кыло-буро авторъёсмы нырзэс ошизы. Нош лэчыт перо вутскыны кулэ гуртысь ышыг (яке тӧл шулась) сэрегъёсы но, городысь зэмос чилясь дворецъёсы но, куанер Удмурт театрамы но. Медам вунэтэ: театр - калыкмылэн, нацимылэн ымнырыз. Трос, туж трос арысь аре выжыса быдэсмытэк кылемез. Кытчы меда вуттӥськом ни табере? Кытчы меда вуом выляз аре, выль даруе? Татьяна Чернова (Петрова), культурая отделысь корреспондент. Чаклаське: грипп! Ижысь госсанэпидемнадзор чакламезъя, январь пумын шаерамы кынмаса висёнъёс алялозы. Соос пӧлысь тужгес кышкытэз луэ грипп. Кылем арын 18 сюрс кынманы шедемъёс пӧлысь 22-ез ӵапак та висёнлэсь курадӟизы. Но грипплэсь дырыз дыръя утиськыны луэ. Та вакытэ котькуд мылкыд карись солы пумит прививка пуктыны быгатэ. Нырысь ик та ужрадэ кысконо пичи пиналъёсты, мӧйыосты, трос калыкен ужасьёсты. Дунтэк пуктылон вылысь, республикаямы 14 сюрс вакцина дасямын. Валамон, кылемъёсыз прививка пуктыны мылкыд карисьёс ас кисыысьтызы жильдоно луозы. Дунъёс бен ичиесь ӧвӧл. 54 манетысен кутскыса 300-лэсь дуногес. Сыӵе дыръя, оло, капчигес оскытскыны оксалиновой шуиськись мазьлы. Э. Кумачева. Кун Кенешын 2001-тӥ ар капчигес луоз Озьы медло вылэм. Асьмеос ваньмы жадимы ни уго та огпӧртэм ёрмонлэсь но дунъёс сьӧры уиськонлэсь. Куке но соку пурысь пилемъёс сьӧрысь шунды но пальышаны кулэ ук! Кун Кенешысь депутатъёс вань луонозэ лэсьтӥзы, вуоно арын калыклэсь улон- вылонзэ ӧжытак коть капчиятон понна. Вераськон мынэ республикалэсь бюджетсэ кутон сярысь. Со пумаз вуттэмын но юнматэмын дас ньылетӥ сессилэн берпуметӥ ужан нуналаз, 26-тӥ декабре, кыкетӥзэ кутскыса сэрттэм-пертчем бере. Бюджетлэн инъетаз берло дыре гинэ депутатъёсын пыртэмын вал ог 200 ватсан но тупатон. Шӧдскымон йылӥз расход люкетэз. Пусйымон соиз, казнамылэн валтӥсь люкетэз вуоно арын ужалоз социальной удыс вылэ. Озьыен, улон-вылонмы воштӥськоз умой пала, кулэсмозы ёрмон калэ вуэм семьяос, сютэм кылем пиналъёс, ужтэк кылемъёс. Парламентарийёс чакламъя, 2001-тӥ арын кузьгес вамышъёсын азинскоз промышленность. Туж бадӟым оскон му вӧй поттӥсьёслы. Бюджетлэн ӝыны люкетэз уго тырме соос чотын. Пичияк ке но каньылгес шокчоз, дыр, гурт удыс но. Депутатъёс-аграрийёс быгатӥзы асьсэлэсь кулэяськонъёссэс утьыны: казналэн 11 процентэз (азьвыл чакламъя та лыдпус 7,2 гинэ вал) ужалоз нянь будэтӥсь, пудо вордӥсь понна. Вераны кулэ, вуоно арлы бюджетлы инъет луиз Удмурт Республикалэн социально- экономической азинсконэзъя кутэм программа. Соя адске, кыӵе удысъёс чотын возиськоз шаермылэн коньдон шыкысэз. Кызьы пусйим ини, коньдон нырысь ик люкаськоз промышленностез ужатон но му вӧй поттон чотын. Валтӥсь инты озьы ик басьтозы выт октон но вузкарон. Умой пала воштӥськонъёс луозы дотация чотын улӥсь районъёсын. Му вӧй вузаса поттэм коньдонлэн ог люкетэз табере соослы но йӧтоз. Социальной политикая но бюджетъя ялан ужась комиссиос сак эскеризы котькуд депутатлэсь, котькуд ёрослэсь куронзэ. Огъя кенешыса, юрттыны амал шедьтӥзы Грахово, Сарапул, Глазов, Камбарка, Вавож но куд-ог мукет районъёслы. Секытэн потӥзы кошкись арез Сарапулын улӥсьёс. Тае лыдэ басьтыса чакламын городлы ватсаса коньдон висъяны. Со мыноз нылпи библиотека кылдытонэ, архивез тупатонэ, санаторий амалэн ужась школа-интернатэз выльдонэ. Нош Камбаркаын республикалэн бюджет чотын умоялоз историяя но культурая музейзы, 25 процентлы уждунзы йылоз гуртысь медицина ужасьёслэн. Огъя вераса, "социалкаын" югыт нуналъёс тырмыт луозы. Со понна мыло-кыдо нюръяськизы депутатъёс С. Э. Широбокова, В. Л. Фридрих, В. С. Кудрявцев, А. И. Салтыков, Л. И. Забродина, Н. А. Харина, В. И. Агашин, Л. К. Фролов, В. А. Мохначев... Бюджетлэн котькуд статьяез трос пол кутскыса учкемын вал фракциослэн кенешазы, ялан ужась комиссиосын, собере - огъя кылэ вуонъя (согласительной) комиссиын. Тӥни малы 26-тӥ декабре парламент та туж кулэ документэз ӝегатскытэк кутӥз. Адскиз депутатъёсмылэн ӟеч ужамзы но ог-огзэс валамзы, юрттыны тыршемзы. Азьвыл аръёсы сямен, пӧсекъян, мултэс керӟегъяськон ӧй вал. Зэм, Ижевсклэн мэрез Анатолий Салтыков сессиысь мылкыдтэкгес кошкиз. Мугез валамон: бюджетысь висъям коньдонэн со быдӟа городлэсь кулэяськонъёссэ уд пытса, уката но коммунальной услугаос понна тыронъёсты. Соос люкасько льготаос чотын но. Тӥни малы выль арысен нош ик куд-ог дунъёс вылӥе ӝутскозы. Озьытэк городэз уд возьы. Соин ӵош Ижевскын чакламын но мынэ ни выль цирклы юрт лэсьтон. Та нуналъёсы гинэ Ухтомской ульчаын усьтӥськиз нылпи юрт. Выльдӥськоз Г. Кулакова нимо спортъя но тазалыкез юнматонъя комплекс. Татчы но эшшо куд-ог объектъёсты пукыны коньдон вуоз федеральной бюджетысь. Нош республикалэн казнаяз доход люкетэз вуыны кулэ 4626431 сюрс манетозь. Расход люкетэз - 5093637 сюрсозь. Дефицитэз, мукет сямен вераса, тырмымтэез, луоз 467206 сюрс манет яке 11 процент. Со трос ӧвӧл. Депутатъёс чакламъя, та "пасез" пытсаны юрттозы промышленностез азинтон но му вӧй кыскон. Берлоезлэн дуныз гинэ дуннеысь рынокын медаз усьы вылэм. Нош дефицитлэн быдӟалаез Россия Федерацилэн законэзъя вуыны быгатоз 15 процентозь но. Дас ньылетӥ сессия таин ужзэ йылпумъяз. Сое нуиз Кун Кенешлэн Тӧроез И. Н. Семенов. Сессилэн ужаз пыриськиз Удмуртилэн Президентэз А. А. Волков. Вуоноез сессия табере люкаськоз ни выль арын, выль даурын. Людмила Медведева. Туспуктэмъёсыз В. Беломорскихлэн. БЫДЭС ДУННЕЫСЬ ФИНН-УГОР КАЛЫКЪЁСЛЭН КУИНЕТӤ БАДӟЫМ ӦТЧАМЗЫ БЕРЕ Бур нуналэн, Суоми! Нырысетӥ веран Таиз толсур толэзь кыӵе бадӟым шумпотон ваиз та ӵыдонтэм музъеммы вылысь кӧня ке выжыослы: 11-тӥ�13-тӥ декабре Финляндилэн шоркараз, Хельсинкиын (вашкала сямен - Гельсингфорсын), ортчиз Быдэс дуннеысь финн-угор калыкъёслэн куинетӥ бадӟым ӧтчамзы. Куинь нунал ӵоже кызь одӥг кунысь вить сю кызь адями лулысь-сюлмысь кенешиз финн- угор дуннелэн кӧткайгуосыз но шумпотонъёсыз сярысь. Ӧтчамлэн ужаз мылысь-кыдысь пыриськизы удмуртъёс но. Куинь нунал ӵоже Хельсинкиын асьсэлэн ӟеч ӵектонъёсынызы, дэмланъёсынызы вазиськылӥзы "Удмурт кенеш" огазеяськонлэн тӧроез Валентин Кузьмич Тубылов, солэн воштӥсьёсыз Нина Игнатьевна Малых, Валерий Яковлевич Митрофанов, шаерысьтымы тодмо тодосчиос - кылтодон наукаосъя кандидат Роза Ивановна Яшина, история наукаосъя докторъёс Галина Аркадьевна Никитина, Кузьма Иванович Куликов, Удмурт Элькунысь нациосын ужан политикая министр Николай Николаевич Мусалимов, Башкириысь Татышлы ёросысь "Дэмен" колхозлэн тӧроез, Башкириысь вань удмуртъёслэн огазеяськонзылэн кивалтӥсез Ренат Биктимирович Галямшин, "Удмурт кенеш" огазеяськонлэн Балезино ёросысь ёзэзлэн тӧроез Лидия Фёдоровна Иванова, Ижысь кун медакадемилэн ректорез медицина наукаосъя доктор Николай Сергеевич Стрелков, Россия Федерациысь Кун Думалэн депутатэз Светлана Константинован Смирнова, Удмурт Элькунысь Кун Кенешлэн депутатэз, Дэри ёросысь "Путь Ильича" колхозлэн-племзаводлэн тӧроез Валериан Арсентьевич Никитин, Удмурт радиоысь журналист, "Удмурт кенеш" огазеяськонлэн пресс-службаезлэн кивалтӥсез Вячеслав Дмитриевич Михайлов, Вавож ёросысь Гурезь-Пудга школалэн директорез, "Удмурт кенеш" огазеяськонлэн Вавож ёросысь ёзэзлэн тӧроез Анатолий Максимович Егоров, мукет адямиос. Делегациен кивалтӥз Удмурт Элькунысь Кун Кенешлэн Тӧроез Игорь Николаевич Семёнов. 1. ...Кык музъемез герӟась кунгожез выжем бере ик син шоры йӧтӥзы чылкыт утялтэм муос, ӝикытак инъям юртъеръёс, тулыс музэн вожектӥсь возьёс. Ульчаын - толсур, нош татын - оло сӥзьыл, оло тулыс. Укно кузя васькись зор ву но асфальт вылын пукись тыос огломак шӧдытӥзы кадь: Суоми музъем вылэ толалтэ ӧз ик вуылы на. Нош ми, Россиысь лыктӥсьёс, малпамы вал: Финляндия - кезьыт шаер. Ӵыжы-выжыосмылэн музъемзы вылэ лёгиськыса, киостэ паськытак вӧлъяськод но амалтэк чабкиськиськод: ульчаын - тямыс градусъем пӧсь. ...Берпуметӥ кужымзэ поттыса, Москва�Хельсинки поезд капчияк шокчиз кадь: вуттӥз, вуттӥз со кыдёкысь Финляндие финн-угор дуннеысь адямиосты. Бинетъёсмес ӝогак гинэ кутӥськом но потӥськом кыре. Милемыз пумитало финн апай выллем ик тӧдьы йырсиё муспотон удмурт нылкышно шаерысьтымы тодмо тодосчи Бибинур Шараповна Загуляева но Хельсинки университетын дышетскись удмурт нылаш Светлана Герасимова. Чылкыт но чебер автобус ӝогак гинэ вуттӥз Симонкату ульчаысь улоно интыямы - "Скандик Симонкенття" нимо кунокуа юртэ. Татчы азьвыл ик люкаськемын вылэм ини мукет кунъёсысь но ӵыжы-выжыосмы. Чупрес финн нылъёс но "Финно-Угрия" фондлэн тӧроез Криста Сюрье нимысьтыз портфельёсы ӝикытак интыяло бадӟым ӧтчамлы чаклам ужкагазъёсты. Ӝытазе вань мылкыд карисьёс тодматскизы Хельсинкиен. Отӥяз тунсыко адӟытон вал Культурая синпель юртын (азьвыл Теннис дворецын). "Волга шурлэн кожонъёсыз" нимо возьматон ас котыраз люкам финн-угор калыкъёс сярысь тунсыко суредъёс но веранъёс. Ваньмыз туж паймымон но аспӧртэмлыко. Огаз сэрегын - удмуртъёс, мукетаз - поръёс, куинетӥяз - комиос, отӥяз - эшшо но эшшо мукет выжыос. Котькуд калык сярысь тужгес валамон верало солэн яркыт дӥсез, гуразьпалан но юртъер котырын кутӥськись тӥрлыкъёсыз. Дас одӥгетӥ толсур. "Финляндия" дворец. Туннэ татын ужаны кутске Быдэс дуннеысь финн-угор калыкъёслэн куинетӥ бадӟым ӧтчамзы. Ӵукна ик дэмен вамыштӥськомы Хельсинки ульчаос кузя. Тани со, Маннерхейминтие урамысь улыге интыяськем чебер юрт. Татчы пырем бере, син шоры соку ик йӧтӥзы турлы буёло дэремъёсын дӥсяськем удмуртъёс, поръёс, хантыос, мансиос, саамъёс, сетуос, мукет калыкъёс. Котькудӥз тодматскыны турттэ ӧтчамын эскерыны чаклам ужкагазъёсын. Кенеш кутскытозь кылиз на кӧня ке гинэ дыр. Огвие калык шуак чалмиз но пукон вылысь султыса пумитаз Финляндилэсь, Эстонилэсь но Венгрилэсь Тӧрооссэс. Ӧтчамез усьтӥз финн-угор калыкъёслэн Кенешонъя комитетсылэн кивалтӥсез Валерий Петрович Марков. Со нырысь ик кыл сётӥз Финляндия Республикалэн Президентэзлы. Тарья Халонен люкаськемъёслы тазьы вазиськиз: - Гажано эшъёс! Туж шумпотӥсько: туннэ асьмеос татчы весь ваньмы люкаськыны быгатӥмы. Асьмеос, финн-угор выжыос, ог-огмылэсь кыдёкын улӥськомы. Вискамы вань мукет калыкъёс. Азьвыл ог-огенымы пумиськылыны но ӧм быгатылэ. Таяз, куинетӥ, бадӟым ӧтчамын вераськонлэн шорсюлэмыз луоз анай кылмес но культурамес утён, выжы калыкъёслэсь эрикрадъёссэс правооссэс берыктон сярысь вераськон. "Иж винтовка" приз понна Пиосмы шумпоттӥзы Кызьы ивортӥм ни вал "Иж винтовка" приз понна туала ӵошатсконъёсын странаысьтымы кужмоосыз биатлонистъёс нюръяскьизы Россилэн чемпионэз луон понна но. Нош теренеръёслы та стартъёс луонлык сётӥзы на странамылэн сборной командасыьтсыз биатлонистъёсты эшшо одӥг пол чакланы. Выль арлэн нырысь нуналъёсыз ик кутсконзы ни угось дуннелэн кубокез понна ӵошатсконъёс, нош феврале ортчоз дуннелэн чемпионатэз. Спортэз яратӥсьёс шӧдӥзы ни, луоз, берло дыре биатлон странамылэн уй палаз выжыны ӧдъяз шуыса. Шӧдскымон висъясько али Ханты-Мансийскысь но Тюменьысь спортсменъёс. Таяз учыре но соос кужмоосыз пӧлын вал. Но спорт - со спорт. Мукетъёсызлэн но верамзы потӥз, нин шильыен вуремын ӧвӧл шуыса. Тани юниоръёс пӧлын 15 иськемез туж шаплы ортчиз Ханты-Мансийскысь Сергей Садовников. Но ыбылӥськон интыосын басьтэм куинь минут штрафъёсыз люкетӥзы. Сое ӝоген азьпалтӥз Ханты-Мансийскысь ик Алексей Соловьев. Таизлы но ӧз кылды чемпион луыны. Берпуметӥ ыбылӥскьон интыын кык минут штраф басьтӥз ке но, "Иж винтовкаез" утӥз Карелиысь Виталий Чернышев. Нош асьмелэн пиосмы пӧлысь кужмоез вал Вячеслав Алыпов. Со ньылетӥ интыын. Нош 10 иськеме бызьылонын нырысетӥ интыосы потӥзы Александр Жуков (Алтай край), Алексей Натаров (Москва обл.), Арсен Хачикян (С.- Петербург). Ижевскысь Алексей Алыпов таяз учыре но вить кужмоосыз пӧлы шедиз. Нош егит нылъёс пӧлын быдэс йырлы вылӥын вал, шуыны луоз, Ямалр-Ненецкой автономной округысь Юлия Макарова. Нырысь нуналаз со 12,5 иськемъем сюрес вылын вормисе потӥз, ваньмызлэсь шаплы вал 7,5 иськеме бызьылонын но. Лабытнанги городэз одӥг карта влысь но уд синйылты ай. Табере Юлия таӵе аспӧртэм нимо городзэ быдэс странаямы данэ поттӥз. Егит нылъёс пӧлын кыкетӥ но куинетӥ интыосы потӥзы Ульяновск областьысь Надежда Колесникова но Чувашиысь Татьяна Моисеева (12,5 км), Лабыткангиысь ик Анна Сорокина но Мурманскысь Оксана Мельникова (7,5 км). Нылкышноос пӧлын 15 иськемъем сюрес вылын ваньзэ азьпалтӥз Чувашиысь Лилия Ефремова. Кыкетӥ но куинетӥ луизы Ольга Зайцева (Москва) но Мария Стреленко (С. -Петербург). Нош 7,5 иськемъем сюрес вылын ваче ки кутскыса кадь бызизы странамылэн сборнойысьтыз Светлана Черноусова. Светлана Ишмуратова, Наталья Соколова. Таосызлэсь кӧнялы ке гинэ кылизы Ольга Ромасько но Ольга Пылева. Котьку сямен ик пӧсь нюръяськон мынӥз воргоронъёс куспын. Таяз учыре учкисьёсты шумпоттӥзы асьмелэн биатлонистъёсмы. 20 иськеме бызьылонын Алексей Чурин бронза медаль утӥз. Иван Черезов но Максим Максимов ньылетӥ но витетӥ луизы. Нош вормиз татын Пермьысь Сергей Коновалов. Кыкетӥ луиз Чувашиысь Сергей Башкиров. Нош Алексей Кобелевлы ӧз удалты таяз учыре, дас витетӥ интые кылиз. 10 иськемъем сюрес вылын вормиз ноку мӧйымисьтэм Владмир Драчев (С.- Петербург). Кыкетӥ но куинетӥ интыосын - Михаил Кочкин (С.-Петербург) но Андрей Прокурин (Ханты-Мансийск). Ижевскысь Максим Максимов витетӥ но Алексей Кобелев тямысэтӥ интыосын. Ӵошатсконъёслэн берпуметӥ нуналазы куазь нош ик "кузьым" дасяз. Укыр кезьыт кариськемен, жюри нылкышноослэсь эстафетазэс ортчытыны пумит луиз. Пиосъёс но стартэ потӥзы нуназе бере гинэ. Со понна учкисьёслы кынмоно ӧйлась, шумпотыса укыр чупрес тэтчазы угось. Нырысетӥ этапын ик шӧсдкымон азьпала потӥз А. Кобелев. Отӥяз А. Чурин, И. Черезов но М. Максимов нокинлы оскон ӧз кельтэ ни асьсэды сутылыны. Кыкетӥ но куинетӥ интыосы потӥзы Башкортостанысь но Новосибирскысь пиосъёс. Юнистръёслэн эстафетаязы нырысетӥ куинь интыосты утӥзы Хаты-Мансийсклэн, Свердловск областьлэн но Мурмансклэн командаоссы. Ф. Никитин. 10 иськемъем сюрес вылын кужмоосыз вал В. Драчев но М. Кочкин. Туспуктэмез авторлэн. Дан тыныд, делегат! Тӥледлы удалтылӥз, дыр, ук куке но делегат луылыны? Ну, партсъездэ ке ӧз, кыӵе ке мукет кенеше, конференцие. Сю пол? Соку быгатоды лыдӟытэк. Нош тӥ - ноку но? Туж жаль, тӥ зэмзэ но шудтэм адями. Угось делегат луон - со инмарлэн кузьымез. Валэктом рос-прос: делегат - со кыӵе ке бадӟым ужрадэ: кенеше, форуме, фестивале, конференцие, ӧтчаме, конгрессэ быръем мурт. Кин быръе? Шуо, калык. Кинэ? Тужгес адӟем карымонъёссэ, оскымонъёссэ. Но уж вылын ӵемгес быръё асьсэды асьсэос (районъёсысь, интыосысь кивалтон ёзъёсысь кузёос но кузё нергеос яке ёросысьтызы кырӟась-верасьёс). Соинтэк-а котькуд ужрадысь асьмеос ялан одӥг адямиосты адӟиськом (интервью гожтыны выль адями утчаса кать быре). Ярам, делегат бырйим. Мар карыны кулэ бен соос? Мынам валамея, ужрадэ мыло-кыдо пыриськыса, интыосын солэсь резолюциоссэ быдэсъяны, калык пӧлын уж нуыны. Ӝыныезлэн ӝыныез тае ӟеч валало, зэмзэ но синмаськымон ужало. Дан соослы! Нош мукетъёсыз? Мукетъёсыз адӟиськыло сиськон вакытэгес гинэ. Ну эшшо сӥё-дано ворсаназ вуо на. А лумбытэн докладъёсты, прениосты кылзыны соослэн дырзы ӧвӧл. Йыр но висе толло шутэтскон ӝыт бере. Нош гостиницаын сыӵе умой! Ай городэ дась вуэмен магазинъёстӥ но котырсконо, сузэр-апай доры но вуылоно, выльысь ку муг усёз на? Ма, тӥ, гажано эшъёс, асьтэос но сое валаськоды, дыр. Тани телевизор пыр иворъёсын передачаын корреспондент шуэ, ужрадэ, пе, отысь но татысь олокӧня сю делегат ӧтемын, нош кадрысь адӟиськом кӧня ке дасозэ гинэ. Одӥгаз бадӟым ужрадын диктофонэн ветлӥсько. Малпамтэ шорысь ӵош дышетскем эше шоры мырӟиськи. Олокӧня ар ӧм адӟиськылэ ни вал, кытынзэ-марзэ но ӧй тодылы. Зэмзэ ке, нырысь шумпотӥ, Надя ноку но азьветлӥсьын ӧй вал, нош али тани учкы ай - районысь делегациен кивалтэ! Ну, шуисько, давай, огкутскемен ӟеч ужъёсыд сярысь газетэ но гожтом. Эше киыныз шонтэ. - Малы пумитъяськиськод? Тон - молодец, сыӵе районэз улӟытэмед! - Да номыр но мон уг кариськы. - Ма, юнме делегатэ ӧз быръе, дыр, ук? - Мынам аслам правое вань бырйыны... - Валамон. Ну коть ужрад кельше-а? Маке басьтӥд-а ас поннад? - весь ёртӥсько на сое юанъёсын. - Ма, мон али гинэ лыктӥ, ӝоген обедэ мыноно ук. Толон лагерьын "балдели". Тынад ку-о материалэд газетэ потоз, а то та ужрад сярысь отчёт сётоно. Майбыр улэ Надюша: кык нунал дунтэк сие-юэ, кӧла, командировочной басьтэ, нош отчёт газетысь-телевизорысь вите. Тӥни озьы. Эшшо учыр? Сӥзьыл Ижевскын туж бадӟым ужрад ортчиз. Йӧно-дано адямиос вуылӥзы. Ну, малпасько, таяз зэмзэ но азьветлӥсьёс люкаськемын, туж зол ортчоз, дыр. Кытын, пе. Вступительной шуон доклад ӧз йылпумъяськы на, делегатъёс кыштыр-р залысь потыны кутскизы. Сю куасьме, нош буфетын - нольысен ньыльдон градусозь, бырйы, кудӥзлы уксёед тырмоз. Обед но ваньмызлы кулэ ӧз лу ни, со понна ӝыт дискотекаын улмолы усён инты ӧй вал. Учкискод ужрадэз дасясьёс шоры но жальзылы уд чидаськы: жуммылэмын, кӧдэктэмын. Асьсэлы гинэ уж лэсьтӥзы. Ну малы со ӧтем-быръем делегатъёс номыре уг валало? Но делегат нимлэсь данзэ-кужымзэ мон тужгес ӟеч валай берлоез ӧтчам дыръя. "Удмурт кенеш" ортчытӥз вал кадь. Мон кадьёсты отчы ӧтьыны, конечно, нокин но ӧз вӧталля, но журналистъёс ӧтемез возьмаса туж уг уло - ужмы милям сыӵе. Вылаз ик, редактор шуиз: макем трос мынӥм, ӧтчамез сокем паськытгес возьматыны быгатом. Мынӥм ми, озьыен, сизьым кузя. Малпаськоды, милемлы вӧлак ӧсэз усьтӥзы, "добро пожаловать!" шуизы? Тӥ адӟе вал, кыӵе отын охрана! Смольнойын кадь. Аккредитациед ӧвӧл - пшёл! Мерскыны вырид - тэлялод. Всё равно, пе, мыдланьтыса гожтоды. Мае? Журналистъёсты сыӵе ултӥямлэсь бӧрдэм потэ ни вал, но ӧтчаме уг лэзё вылэм дано учёнойёсты но, асьсэлэн исполкомзылэсь ёзчизэ но, мукет тодмо удмуртъёсты но. Верало, министръёсты но туж эскериськыса лэзиллям. Шӧдӥды-а, макем бадӟым дан со - делегат луон. Но кинлы сыӵе дан усиз таяз учыре, ми ӧм тодэ. Залэ пырыны ӧз лэзе, списокъёсты ӧз возьматэ. Ма, "Удмурт дунне" делегатъёслэсь нимъёссэс тодон вылысь, "Удмурт кенешлы" гожтэтэн но вазиськылӥз, номыр ӧз юртты - нимъёсты ӧз шараялэ. Кыӵе ке но юзырес аръёсы кадь. Мае вато яке кинэ? З. РЯБИНИНА. П.С. Ӧс азьын час пала токма сылыса берытским редакцие. Отделамы тодмотэм кышномурт пыриз. Ӟучомем районаз нуыны удмурт газетъёс, журналъёс куриз. Ай мон, пе, съездэ лыктӥ но, нялтас котырскыны малпай, Завьяловое но ветлонэ вань на, шуэ.. - Ма, съезд мынэ ни ук! - Тодӥсько. - Тӥ делегат ӧвӧл шат? - Делегат. Тӥни сыӵе со - дан. Газетмес лыдӟисьёслы - тау Республикамылэн почта ёзъёсаз декабре ортчылӥзы гожтӥськисьлы сӥзем нуналъёс. Балезино ёросын та ужез умой радъяны быгатӥллям. Гожтӥськисьлэн нуналаз, 19-тӥ декабре, ёрослэн почта ёзаз пырась-потасьёс синйылтытэк ӧз кыле республикаямы печатласькись газет-журналъёсты. Ваньмыз соос адскымон интые вӧлдылэмын вал. Со сяна, ӝажы вылын син шоры йӧтымон пуктылэмын на пӧртэм кузьымъёс - соосты ас лыдӟисьёссылы туэ сӥзиллям редакциосын ужасьёс. Ма, кызьы уд гожтӥськы, оло, кыӵе ке кузьым тыныд но сюроз. Тазьы малпаса но, вылды, со нуналэ балезиноос почтае дыртӥзы. Вераны кулэ на: лыдӟисьёсты гожтӥськыны ӧтьыса, ялан ивортылӥзы интыысь радио но телевизор. Почтае лыктэмъёсты лякыт мылкыдын пумиталлязы татын ужасьёс. Серафима Ниловна Савинова но Вера Геннадьевна Максимова. Лыдӟисьёсын соос дас арлэсь кема ужало ини, соин ик вань юанъёслы тупен-тупен валэктонъёс сёто. Лыдӟисьёсын ужан пайдаен берытскиз. Одӥг нунал ӵоже гинэ журнал-газетъёслы Балезино ёросын 672 мурт гожтӥськиз. "Удмурт дунне" газетмес но ӧвӧл вунэтӥллям - солы 42 адями гожтӥськем. Нош редакцимылэн кузьымез сюрем Балезиноысь пенсионерлы Ашихмин Анатолий Дмитриевичлы. Соин ӵош солэн витьымтэ шорысь сюрем кузьымезлы ми но шумпотӥськом. Со но милемыз, оло, паймытоз газетмы сярысь малпанъёсыныз. Нош Балезиноысь почта ёзын ужасьёслы азьланяз но сӥзиськом лыдӟисьёсын чырмыт ужаны. Т.БАННИКОВА. Туспуктэмъёсыз В.Беломорскихлэн. Сюлэмъёсы мальдӥз югыт тылси Удмуртиын улӥсьёс пӧлын лыдзыя куинетӥ инты басьто бигеръёс, соос 7 процент мында лыдъясько. Трос-а со ичи-а, нош ӟучъёсын но удмуртъёсын артэ ас кылынызы телепередачаос но лэсьто, газет но потто. Тани "Хэерле кич!" ("Ӟеч ӝытэн!") телепередачалы январе дас ар тырмоз. Выльдӥськон тӧлъёс пельтэмен, Россиын улӥсь пӧртэм калыкъёс улӟизы кадь: ас кылынызы газет, радиоверн, телепередача лэсьтылыны кутскизы. Бере ӧз кыльы Удмуртия но. "Удмуртия" гостелерадиокомпаниын со вакытэ кивалтӥсез Олег Шибанов выль лыктӥсь тулкымез улонэ пыӵатыны дӥсьтӥз. Казаньысь университетэз йылпумъяса, Ирек Шарипов выльысь Удмурт радиое ужаны ӧз мыны ни, телевидение дыртӥз, телевизорез адямиос тросгес "ӝуатъяло" угось. Огдыре ик ужаз бигеръёслэн общественной центрысьтызы егитъёсын. Отысь калык ик юрттӥз бигер кылын потӥсь "Хэерле кич!" передачаез лэсьтылыны. Ӵошен ужаса, со туж кельшымон но яратымон луиз, югыт тылсиен мальдытӥз со бигеръёслэсь синъёссэс но сюлэмъёссэс. Бигер кылын телепередача лэсьтон бордын ужам сяна, Ирек Шарипов "Янарыш" ("Возрождение") газетлэн валтӥсь редакторез но луэ. Ижысь Азин ульчаысь выль мечетез усьтыкузы, Муфти Габдулла Хазрат журналистъёс сярысь шумпотон кылъёс вераз: - Азьвыл пичи пу мечете кызь-куамын адями сяна уг ветлы вал, нош тӥ быгатӥды адямиосты сайкатыны, сюлэмъёссы дорозь вуыны. Табере ми доры дас сюрс адями лыктэ, соос берытскизы, социумен кылдытэм курадӟонъёслэсь палэнскизы... Бен, иворез вӧлмытӥсь ёзъёс киын туж бадӟым кужым, журналист сое уже валаса но эскерыса кутыны кулэ, калыклы юрттон вылысь. Котькыӵе вакытэз чидано луылӥзы национальной программаосты дасясь тележурналистъёс, но шумпотыса вераны луэ, Удмуртиын соос уло на ай. Асьсэ вордӥськем кылынызы вераськыны, пельзылы мусо потӥсь куараосты кылзыны но тодмо ымныртусъёсты адӟыны быгато. Удмуртъёс но, бигеръёс но, поръёс но. Со понна тау карыны кулэ "Удмуртия" кун телерадиокомпанилэсь кивалтӥсьёссэ. Соин валче ичи лыдъем калыкъёсты огазеясь трос гинэ ужпумъёс вань. Бигеръёслэн но удмуртъёслэн сямен ик егитъёссы туж ӝог вунэтыны кутско кылзэс, сямъёссэс но йылолъёссэс. Ма кароно но кызьы потоно та югдурысь. - Кужмысь нокинэ номыр карыны уд косы, - шуэ Ирек Ильдусович. - Адями ачиз быръе, кызьы солы улыны. Ӟучъёс пӧлын уло ке, мар отын уродэз? Азьло вакытъёсы со одӥг гинэ улон инты-сэрег вал. Нош ми ас котырамы огазеяськом выжы калыксылэсь историзэ, культуразэ, кылзэ утьыны мылкыд карисьёсты. Со демократия амаллэн инъетэз. Туала егитъёсты мынам урод кареме уг поты, трос умойзэ вераны луысал соос сярысь. Мукетъёсыныз ӵошатыса, егитъёслы туннэ трослы секытгес йӧтэ. Соослы улон-вылонын юрттонъя ӧвӧл нимысьтыз кыӵе ке программа-инъет, адями ачиз ассэ шедьтыны, лэсьтыны, пыд вылаз султыны кулэ. Нош сое вормыны быгатозы зол но кужмо муртъёс. Соин ик туала егитъёс котыр ласянь кужмоесь луыны кулэ. Озьы ӧз ке луы, соос улонлэн зӥбет улаз пачкалозы, отын ик наркомания, суицид но мукет кӧшкемыт арбериос. Нош сыӵе кужым басьтыны луэ выжыысьтыд вуэм узырлыкъёс пыр но, кудёссэ кие кутыны уг луы, но шӧдоно. - Кыӵе арлыдэн адямиослы тужгес секыт дасяны передача? - Егитъёслы. Соосты "кутыны" шуг, егитъёс асьсэос но уг тодо на, мар соослы улонын кулэ: семьязы ӧвӧл, ужзы ӧвӧл, номыр но соосты уг возьы, уг но куты, соос эрикоесь, ма соослы кулэ, валаны шуг. Но ӧрзэ шедьтӥд ке, телепередача но, газет но ваньмыз пӧлы уз ыше-быре. Тани Татарстанын бигер кылын "Молодой Татарстан" газет потэ. Вить ар ӵоже ини соос эрико уло, асьсэды асьсэос сюдо. Газетэз егитэз но, пересез но лыдӟе. Мукет газетъёсынызы ӵошатыса, тиражез но самой бадӟым - 105 сюрс экземпляр. Арнялы куинь пол потэ, кӧс нуналэ - буёло. Ужа отын 15 мурт. "Хэерле кич!" передачаез но дасясьёс трос ик ӧвӧл, но учкымон ужаны быгато. Вторник ӝытэ 25 минут ӵоже республикаямы улӥсь бигер калык адӟыны быгатэ яратоно телепередачазэ: крезьгурез но, политикаез но, улон-вылонэз но - ваньмыз вань отын. Пичиослы мороженой, нош кышноослы сяська, шуэм сямен, котькуд передачаын трос пӧртэм ужпум ӝутэмын. Тросгес дыр висъясалзы ке, техника ӟечгес луысал на ке, эшшо но адӟем карымон лэсьтыны луысал та передачаез. Нош кин тунсыкъяське бигер калыклэн улон-вылонэныз, кылэз дышетыны мылкыдыз вань, передача мыныку, улӥяз валэктон кылъёс но гожтыны луысал. Тани соос, "Хэерле кич!" передачаез дасясьёс: диктор Лилия Шигапова, журналист Ирек Шарипов, режиссёрлэн юрттӥсез Лариса Абрамова (пуко); звукорежиссёр Хатын Мингазов, режисёр Зуфар Набиев (сыло). С. ПЕТРОВА. Сюлэмыз - зарни крезь Арнялы быдэ мыло-кыдо учкисько "Мылысь-кыдысь" передачаез. Котькудаз уго пумиськиськом тодмо но тодмотэм тунсыко адямиосын. Нош одӥгез передача туэ сӥземын вал крезьгурчилы Пантелей Кузнецовлы но солэн Уваысь "Купанча" коллективезлы. Та адями гожтэм чуръёсыныз но кырӟан гуръёсыныз трос адямилэсь сюлэмзэ вырӟытъяз но бӧрӟытъяз ни, дыр. Нош "Ортчись аръёс" кырӟанэз, ӟучъёс шуэмъя, солэн визитной карточкаез луиз. Куинь ар талэсь азьло Пантелей Николаевичез адӟи вал чагыр экранысь. Соку солэн юбилеез вылэм. - Кин меда туж шумпотыса возьма 60 арессэ, кинлэн меда потэ пинал дауреныз люкиськемез? - шуиз соку крезьгурчи. Зэмзэ но, кин сое возьмалоз? Котькыӵе улон сюресэз адями мед ортчоз, арлыд вуыса, сюлэме одно мӧзмыт малпанъёс каръясько. Со вакыт ик кылӥ Пантелей Николаевичлы сӥзем радипередачаез. Отын со вераз: - Секыт война аръёсы анае вазь ӵукна, эстэм гурезлэсь быремзэ возьмаса, черсыкуз кырӟалляз туж ӝожесь гуръёссэ. Озьы буйгатыны вырылӥз, дыр, аслэсьтыз куректӥсь, мӧзмись сюлэмзэ. Мон туж яратылӥ сое кылзыны, кырӟанзэ уретэмелэсь кышкаса, ӵемысь вырӟылыны ӧз дӥсьтылы. Озьы бере, Пантелей Николаевич борды анай йӧлыныз ӵош ик пыӵам, луоз, удмурт кырӟан, нош быдгес луэм бераз со валаса азьланьтӥз, дыр, ини анаезлэсь гуръёссэ. Ортчизы аръёс, табере Пантелей Кузнецов, ачиз верам сямен, кемалась ӵужатай ини, нош вунозы шат куке анайлэн визьмо вераллям кылъёсыз но шулдыр кырӟам гуръёсыз? Мӧйымыса соос сюлэмын эшшо но бадӟымгес инты басьто. Матэ вуэ Выль ар. Мон сюлмысьтым ӟечкыласько Пантелей Николаевичез но солэсь "купанчаоссэ" та кизилиё дырен, выль вуись даурен. Инмарен висъям азьпал улонды мед луоз одно ик юн тазалыко, шудо-буро. Кема аръёс ӵоже мед жингыртозы кырӟанъёсты шаермылэн котькуд сэрегаз, ужась калыклэсь мылкыдзэ бурдъяса но сюлэме шуныт оскон пыӵатыса! Тӥледлы кузьмаме потэ кылбур чуръёсме,таӵе мылкыд угось тӥ пыртӥ но потэмын. Ортчиз даур, быриз кадыр - Сюлэм висе куддыр. Вылэм меда пичи дыры? - Оло, ӧй вал но, дыр. Сюмам кӧтме буйгатылӥ Тулыс турын куарен. Нуллэм потэм вожъяськонме Выйтӥ шулдыр гурен. Кулэ ӧвӧл кезьыт ошмес, Уг лу ни ке юэм. Кулэ ӧвӧл кильтрес дӥськут, Ымныр ке пересьмем. Кулэ вылэм ӟеч тазалык, Мед вайысал байлык. Кулэ вылэм вордэм нылпи Мед висъясал саклык. Васса Васильева, Пичи Пурга черкогурт. "Тол Бабайлы - гожтэт" Сюлэмъёсты зол гинэ йыггетэ ни, дыр, пинал эшъёсмы, озьы-а? Я, бен, учком ни, кинлэн меда гожтэтъёсыз Тол Бабайлэсь кезьыт сюлэмзэ небӟытӥзы. Бырйыны слы секыт вал, ньыльдонлэсь ятыр гожтэт вуиз "Удмурт дунне" газетлэн редакцияз. Ваньмыз ик нылпиос туж сюлмысь тыршиллям. Озьы ке но, котькыӵе конкурсын вань вормисьёс. Удмурт Республикаысь Почта кусыпъёсъя управление но Егитъёсын ужанъя кун комитет конкурсын вормисе потэм вань нылпиос понна радъяло бадӟым шулдыръяськон ужрад. Со ортчоз 4-тӥ январе 11 часын егитъёслэн "Редуктор" дворецазы. отын луозы пӧртэм конкурсъёс, шудонъёс, позьма со сяна, Тол Бабай котькудзэ ческыт саламеныз утялтоз. Валамон ни, тужгес но ӟеч гожтэт ыстӥсьёслы нимысьтыз кузьым луоз на. Тол Бабайлы та вакытэ 1500-лэсь ятыр гожтэт вуиз ни, ай кӧня та лыдъямтэез- чотамтэез. Нош ӧтён билетъёс ыстэмын луозы куинь сюлэсь ятыр нылпиослы, сос пӧлын дасэз луозы "Удмурт дунне" газетын вормисе потэмъёс но. Тани соослэн нимъёссы: Сергей Андреев (Пичи Пурга район, Гожня школа, 7-тӥ класс); Ирина Тарасова (Алнаш район, Байтеряково гурт, 13 арес); Юра Кузнецов (Алнаш район, Вуж Утчан гурт, 13 арес); Настя Семенова (Ува район, Бадӟым Жужгес, 8 арес); Юля Хохрякова (Шаркан ёрос, Кечгурт, 7 арес); Володя Иванов (Алнаш район, Кузьымгурт, 8 раес); Миша Ионов (Можга ёрос, Бадӟым Сибы гурт, 1-тӥ класс); Коля Михайлов (Пичи Пурга район, Б.-Уча гурт, 11 арес); Вова Кочанов (Алнаш район, Кузьымгурт, 8 раес); Августина Михайлова (Алнаш район, Кузебай гурт, 4 арес). Л. Малых. Тупатон 5-тӥ декабре потэм номерысьтымы "Гур шукке... нылпи вешась" материалын шонертэм ивор печатламын. Ижевскысь нылпи садъёс пӧлын музей комнатаослы ялэм конкурсын 275- тӥ сад 2-тӥ инты ӧз басья. Та интыез куспазы люкизы Первомай ёросысь 46 номеро нылпи сад но Ленин ёросысь 116 номеро нылпи сад. Етӥн вӧй, кенэм вӧй... Арлыдо адямиос туннэ но тодазы возё на, луоз, та аспӧртэмлыко будос вӧй шӧмъёсты. Егитъёслэн, жаляса верано, соосты эскеремзы ӧвӧл. Удмуртия кема аръёслы вунэтӥз тазалыклы туж кулэ луись продукция поттонэз. Туэ та буш кылем интыез рынокын ӝог асэстӥз, шуыны луоз, Тверь областьын дасям етӥн вӧй. Сое дасян борды басьтӥськиз отставкаысь офицер Л. Г. Болобан. Конверсия улсын, огез военной завод кусып тупатӥз гурт удысэн. Та сярысь вераськон мынӥз Ижевскысь "Фрахтъ" ЗАО-ын ортчем пресс-конференциын. Солэн генеральной директорезлэн воштӥсез Алла Ромашова но врач-терапевт Елена Панкратова тодматӥзы Болобанлэн продукциезлэн кулэлыкеныз, эмъян кужыменыз. Удмуртие етӥн вӧй туэ гужем, июль толэзе гинэ вуиз ай, нырысь - аптекаосы, бӧрысьгес - магазинъёсы. Дуныз шоры учкытэк, адямиос сое басьто, тужгес но арлыдоос. "фрахтъ" зао али тырше вӧйлэсь дунзэ ӧжытаклы ке но кулэстыны. Матысь дыре со озьы ик, оло, луоз но. Врачъёс верамъя, Болобанъя дасям вӧй туж узыр тазалыклы кулэ луись Е, Ф витаминъёсын, бета-каротинэн, "Омега-3", "Омега-6" жирной кислотаосын. Вӧез пызьырто нимысьтыз технологияя вылӥ ӟечлыко будэтэм культуралэсь. Солы ӟеч дунъет сётӥзы Наукаосъя Россиысь академия, дуннеын ортчись выставкаос. Болобанлэн вӧез пусъемын ни трос медальёсын но дипломъёсын. Озьыен, пайдаез бадӟым. Етӥн вӧй сярысь веранмес азинтом на газетмылэн матысь номераз. Л.МЕДВЕДЕВА. ГОРОД УЛОНЫСЬ Гылыт сюресъёслы - пум Туэ тол вылтӥ Ижевскысь сюресъёс вылэ 30 сюрс тонна сюй-сылал пазяны дасямын. Озьы городын мынон-ветлон дыръя шудтэм учыръёс ӧжытгес луыны кулэ. Та вакытэ урамъёсын сю пала лымы сузясь машина ужа. Со пӧлысь 19-эз - выльёсыз, туэ гинэ басьтэмъёсыз, городын чылкытлыкез чакласа возён понна со тырмыт луэ. ГОСТ-эн тупатэм куронъёсъя, сюрес вылэ кынмись йӧэз ньыль час куспын октыны-сузяны кулэ. Ижевскын со чакласа возиське. Калыклэн ӟепез мултэс уг луы Нуналлы быдэ Ижысь урамъёсы 180 трамвай, 165 троллейбус но 200 автобус потэ. Со миллион пала адямиез нуэ-вае. Ортчись арын транспортэн дунтэк ветлыны быгатӥзы пенсионеръёс, сӧсыръёс, трос нылпиё семьяысь но анай-атайтэк кылем пиналъёс но куд-ог мукет категорие пырись адямиос. Та льготаосты пытсан вылысь, городлэн бюджетысьтыз ваньзэ 112 миллион манет коньдон жильдӥськиз. Со сяна, городлы 13 выль автобус, 2 троллейбус басьтэмын. Нош 4-тӥ маршрутъя трамваен ветлӥсьёс синйылтӥзы ни, луоз, Чехиысь ваем выль вагонэз. Азьланяз Ижевск эшшо кӧня ке таӵе трамвай басьтыны чакла. Ваньмыз умой кадь. Но вуоно арын транспортлы дунъёсты будэтонлэсь гинэ палэнскыны уз пӧрмы, шӧдске. Валазы калыклэсь кулэяськонъёссэ Ижысь Ленин ёросын тросэз улӥсьёс понна ортчись ар шумпотымон луиз - соослэн коркаосазы газ кыскемын. Чагыр эстӥськон озьы ик вуттэмын Металлургъёслэн городокысьтызы ог сюрс улон юртъёсы но. Бен, та ужрад город понна секытэн сётскиз, но кивалтӥсьёс солэсь кулэлыксэ валаны тыршизы. Дасяз Э.КУМАЧЁВА. 2001-тӥ арен тӥледыз! Вань сюлмысь ӟечкыласько тӥледыз вуись Выль арен, выль даурлэн нырысетӥ ареныз! 2000-тӥ арын Россиын но асьме республикаын трос воштӥськонъёс луизы, мынам малпамея, ӟеч пала. Пумаз-йылаз вуттэмын странаын кивалтонэз выль сямен радъян. Мон шумпотыса ивортыны быгатӥсько, Приволжск федеральной округын Удмуртия куинетӥ луиз асьме законъёслэн Россия Федерацилэн законодательствоезлы тупанъя. Со луонлык сётэ матысь дыре ик басьтӥськыны Россия Федерацилэн Президентэныз Владимир Путинэн пусъем ужпумъёсты быдэстон борды: экономикаез юнматон, социальной институтъёсты азинтон. Азьпалан трос лэсьтоно ужъёс. Но мон оскисько, федеральной властьлэн, республикаысь кивалтэтлэн но ваньмылэн асьмелэн огъя кужыменымы быгатом Россиез улӟытыны, кужмоятыны. Сӥзисько юн тазалык, шудо-буро улон, яратон, ужады выль вормонъёс. Выль арен! Удмурт Республикая валтӥсь федеральной инспектор С.В.ЧИКУРОВ. Выль арез тазьы эн пумиталэ! Кык манетсэ жаляз но... Андрей нимо тодмое ужа контролёр луыса, эскере Ижевскысь автобусъёсын дунтэк ветлӥсьёсты. Таӵеос шедё ке, эшъёсыныз ӵош дугдыто но 8 манет штраф тырыто. - 20-тӥ декабре огаз автобус дугдылонын егит пиез ӝегатӥм. Билетэз ӧй вал, - вера Андрей, - милемыз кышкатыса пегӟыны медэ вал, огезлэн контролёрлэн син улаз мыжыкеныз мырӟытӥз. Нош ми сое кутӥм но милицие нуим. Кизэ кузь лэзьямез понна, билеттэк ветлӥсь вылэ уж ӝутэмын. Кык манетсэ жаляз но... Выль арез но выль даурез пытсэтын пумиталоз ни. Суд сое огдырлы эриклэсь люкоз. П. Скобелев. ВЫЛЬ АР НОМЕРЕ Лык ми доры, Кый! Пичи пиналлы но тодмо - котькуд ар пусйиське лыдпусэн. Вылез - 2001. Со лыдпусэн ӵош асьмеос котькуд ар пумитаськом вашкала китай календарьысь кыӵе ке пӧйшурез. Шонер-а со? Ӧйтӧд. Но чакламъёсъя, сояз яке таяз аре улон зэмзэ но ӧръяське со пӧйшурлэн улон сямъёсызъя, манеръёсызъя. Выляз аре асьмемын кузёяськоз Кый. Соин ик ойдолэ пумиталом сое чебер. Кайта асьмелы юнгес тазалык но визьнод мед сётоз, ӧжытгес мед шиетоз. *** Кый - со астрологиысь пус гинэ ӧвӧл. Кый - со кужым. Соин ик сое кайта гажаны кулэ. Ӧд ке, куртчыны но быгатоз. Вашкала дырысен адямиос тыршылӥллям кыен тупаса улыны. Мар кароно асьмелы соин эшъяськон понна? Нырысь ик, тодыны кулэ, кый кузэ куяны быгатэ шуыса. Соин ик 2001-тӥ арез пумитакуды, понэ пельпум вылады кыӵе ке капчи кышет, шобрет, но эн вунэтэ сое куштыны 12 час азьын. Кыкетӥез. Ву дуре юыны мыныкуз, кый ядзэ пещерае кельтэ. Выль арез пумитакуды вунэтыны тырше кайгуосты но сюлмаськонъёсты сярысь. Одно ик люкиське Драконэн. Курантъёс 12 пол шуккем бере, позыръяське кый сямен, шиетэ, капчи гуръёсты кырӟалэ. Вуоно арлы дэмласал Выль нунал но нянь-сылал Мынам удысэ туж капчи. Ачид номыр эн гожъяськы но мукетъёссэ гинэ дышеты. Футболэн "висись" мурт сямен. Пеле но Стоянов кадьёс номыре уг пишмыто. От мон "бусые" потысал ке - возьматысал! Мынам дриблинг котькинэ палёмытысал. Мынам финтэ ваньзэ йыромытысал. Мынам тупе "девяткае" лобысал! Маин пӧртэм журналистика? Котькуд умойтэм кыл но ышем запятой понна мукетъёсызлы тыш сюд но, тонэ дотово визьмо кожалозы! Платонэн но Аристотелен артэ пуктозы. Маскаръяськытэк верано ке, мынам но йырам куд-ог малпанъёс бергало. Лыдӟисьёс ӧз вунэтэ на, дыр: 1998-тӥ арын "Удмурт дуннелы" 80 ар тырмон азьын, газетын печатламы вал та дыр куспын ужамъёслэсь нимтулъёссэс. 1918-тӥ арысен кутскыса, редакциын ог 1000 мурт тыршем. Соос пӧлысь мон тодӥсько ог 300 адямиез. Мар луоз, котькудӥз сярысь пичи ке но кыл верай ке? Шуом, 20 редактор пӧлысь 7-тӥеныз, Макар Волковен, мон кенеши огпол гинэ - телефон пыр. Леонид Брежнев кулэм бере. 1982-тӥ арын 11-тӥ ноябре Камбарка районысен со ӧтиз та кайгу нуналъёсы партия котыре юнгес огазеяськыны, сюлмогес тыршыны, странамес юнматыны, тупаса улонэз утьыны. Тӥни озьы пичи-пичи суредъёс пыр возьматыны луысал Флор Васильевез но Василий Садовниковез, Василий Широбоковез но Александр Вотяковез, но уно мукетъёссэ. Нош кин алоз рабселькоръёсмес озьы возьматэмлэсь? Уг тодӥськы, мар пӧрмоз ини. Оло сыӵе газет эпопея" дасян понна дас ар кулэ луоз, оло нырысетӥ "мильымъёсты" 2001-тӥ арын ик пыжыны кылдоз. Нимаз адямиосты сяна, пыр-почгес возьматыны луысал кыӵе ке бадӟымесь учыръёсты но. Кызьы 1918-тӥ "Выль син" газет пӧрмиз "Гудырилы"? Кызьы Константин Яковлев интыын редактор луиз Трофим Борисов? Кызьы 1967-тӥ арын кивалтӥсьысь куштӥзы Алексей Стрижовез? Малы 1991-тӥ арлэн пумаз "Удмурт дуннеын" сютэм улон (голодовка) ялэмын вал? Кызьы но кинъёс газетлэсь данзэ берло аръёсы ӝуто, нош кинъёс - саптало? Вуоно арын феврале Якшур-Бодьяын пумиськозы гуртъёсысь куасэн бызьылӥсьёс. 50- тӥзэ ортчозы "Удмурт дуннелэн" азвесь кубокез понна ӵошатсконъёс. Соин валче печатлалом 1952-тӥ арысен вормисьёслэсь нимтулъёссэс но куд-ог дано адямиослы сӥзем мадёнъёсмес. Одӥгез бадӟым сюлмаськон - редакциез выль интые выжтон. 1980-тӥ арын 6-тӥ июле партия косэмъя ми поттэмын вал городлэн пумаз, Воткинске нуись сюреслэн 10-тӥ иськемаз. 20 ар нюръяським выльысь центре кариськон понна. Республикалэн Президентэз Александр Волков куке-соку сётэм кылзэ быдэстӥз, Удмурт кун филармония мышкы инты шедьтӥз. Газет герӟаськемын нуналмысь улонэн. Соин ик туннэ шуг вераны кайта кыӵе но кыӵе материалъёс дасян сярысь. Выль арен но даурен, выль даурен! Вордскоз выль нунал - вордскоз выль нянь-сылал. Алексей Шкляев, валтӥсь редактор. ВЫЛЬ АР НОМЕРЕ Быж йылады медам султэ (Кыйёслы ӟечкылан) Верало, Выль ар азьын, Мар гинэ уд малпа, Быдэсмоз, пе, син куспын - Тол Бабай уз алда. Нош тужгес удалтэ, Кин вордскемын та аре. Зэм меда яке даур, Эскером Дракон вылын. Вань сыӵеос ужамы: Кык чебер Людаосмы. Одӥгез туэ бызиз, Муспотон нуны ваиз. Вӧзаз басьтӥз на диплом - Эркияз, иське, Дракон. Мукетыз но ушъяське: - Шудэ туэ пальккаське: Уксёлы каньыл луиз, Пие ӟеч инты шедьтӥз. Вӧзам - яратӥсь картэ Со сяна, мар на кулэ? Байтеряков кемалась Пизэ кышноян малпаз. Малпанэз зэмаз - араз Кыксэ пизэ кузпалъяз! Кайта кузёяськоз Кый. Кый ке тон, бере эн кыль. Малпаськы, Выль ар уе Кур солэсь шудзэ-бурзэ. Кый - Рая - секретарьмы Кемалась куре ини: Тросгес медло уксёе, Жалясьгес - кивалтӥсе, Нылъёсы мед бызёзы, Песянай карытозы. Светамы ке нош алэ: - Чакласькы Кыйлэсь, эше. Бый йылаз ке лёгиськид Лексьыны шедьтоз астэ. Вань эшшо одӥг Кыймы. Со - Чернова Танямы. Туж йӧно, позыръяськись, Ялан маке малпаськись: - Чибориё уйвӧтам Мед гожтом чебер роман, Читыр-чутыр сюресъёс Мед вуттысалзы отчы, Уг на тодӥськы, кытчы. Кыйёсын ӵош шуд куриз Зинаида РЯБИНИНА. ВЫЛЬ АР НОМЕРЕ Выль ар кыз, сюсьтылъёс... Туж чебер но шулдыр, озьы-а? Но сюсьтылъёс, коркадэс шулдыртэм сяна, тӥлесьтыд "синъёстэс но усьтыны" быгато вылэм. Тодэмды потэ-а, кыӵе адямиен тӥ ӝӧк сьӧрын пукиськоды? Соку сюсьтыллы матэгес кариське. Тылыз каньылля, чебер ӝуа ке, эшты быдэсак соглаш тӥляд малпанъёсыныды, мылкыдъёсыныды, верам кылъёсыныды. Сюсь шунаса кузянтӥз вия ке, тодмодэс маке но шугъяськытэ, солэн сюлэмыз бӧрдэ. Куноды алдаське ке, сюсьтыл палдурес ӝуа. Нош ӵындэ, тачыртэ ке, со яке урод малпанъёсын улэ, яке веднамлэсь син усемлэсь курадӟе. *** Выль арын тужгес но бадӟым малпанды мед быдэсмоз шуыса, курантъёс жугытозь гожтэ сое салфетка вылэ но шампанскоен ӟузьыса сие. Малпандэс нокинлы но эн шараялэ. ВЫЛЬ АР НОМЕР Выль ар кытӥ-мартӥ вуиз Ой, али гинэ кадь лымы усиз, нош Выль арлэсь матэктэмзэ шӧдыны но ӧйлась - кытӥ- мартӥ вуиз. Культура юртъёсын ужасьёс понна гинэ шат со витьымтэ шорысь ӧз луы. Даурлэн берло праздникезлы дасяськон вазенгес ик кутскиз. Глазов районысь культура отделысь методистлэн Лидия Петровна Михайловалэн но та вакытэ сюлмаськонъёсыз тырмыт. Тужгес но бадӟымез ужрад, кудзэ татын арлы быдэ возьмало но солы ортчыт дасясько - районысь ӧтем куноосты пумитан. Туэ но со котьку сямен ик ортчоз удмурт сямъёсты чакласа но ӝӧк сьӧры пуксьыса. Ваньзэсты шулдыртоз "Иднакар" ансамбль. Солэн чеберлыкъя кивалтӥсез - ачиз Лидия Петровна. Собере радъяськозы пӧртэм шудонъёс, маскаръяськонъёс. Выль арез ортчытон понна арлы быдэ городысь пӧртэм организациос но ӧтчало. Озьы бере культура юртын ужасьёслэн данзы будэ. Соослэн тыршеменызы Тол Бабайлэн но песьтэрез узыргес луэ. Отчы сюро ческыт сиёнъёс, пӧраськемъёс, кузьымлы дасям киужъёс. Тол Бабай нылпиослы кузьымъёссэ ноку уг жаля. Нош мӧйыослы вань кузьымъёслэсь но дуно ог-огеныд пумиськон, кырӟаса-эктыса мылкыддэ усьтон. Т.БАННИКОВА. Культура удысысь сӥё-дано ужась Л.П.Михайлова. "Иднакар" ансамбльысь артистъёс Выль ар нуналъёсы мӧзмыны уз сётэ. Выль арен! Выль даурен! Удмурт Правительстволэн нимыныз ӟечкыласько ошмесо шаерамы улӥсьёсты одӥгеныз тужгес но яркыт, югыт праздникен - Выль арен! Кошкись ар узыр вал вунонтэм учыръёсын, бадӟым ужрадъёсын. Асьмеос пусйим Быдӟым Отечественной войнаын вормонлы 55 ар тырмонэз но Удмуртилэн кунлыкезлы 80 ар тырмонэз. Нырысьсэ бырйим республикамылы Президент. Кивалтонэз вылӥысен улӥозь кужмоятон луонлык кылдытоз экономикаез юнматыны, калыклэсь улон-вылонзэ умоятыны. 2000-тӥ ар быдэс Россилы сямен ик асьме республикалы но ӟечезлы бадӟым оскон ваиз. Умой пала воштӥськонъёс ортчо промышленностьын, йылэ ваньбур поттон. Со ик узырмытэ бюджетмес, юрттэ улон-вылонэн герӟаськем ужпумъёсты быдэстыны. Адӟем карымон вормонъёс басьтӥзы гурт удысын тыршисьёс но. Республикаын сиён-юон тырмыт дасямын. Туннэ лэсьтоно ужпумъёс пӧлын нырысь интыын сыло экономикаез ӝутон но улон-вылонэз умоятон. Ваньбур поттонэз арлы быдэ йылэтоно дас-дас вить процентлы. Со понна луонлыкъёс вань. Гажано эшъёс! Выль ар котьку но герӟаськемын чеберезлы, сайкытэзлы осконэн. Котькудӥз асьме пӧлысь выль дауре мед выжоз чылкыт малпанъёсын но нылпиоссылэн али но азьпал улонзы понна кыл кутонэз валаса. Сӥзисько тӥледлы шуд но тазалык! Шуг-секытъёс но сюлмаськонъёс вуж аре мед кылёзы, нош ӟеч малпанъёсты одно ик мед быдэсмозы. Удмурт Республикаысь Правительстволэн Тӧроез Ю.С.Питкевич. Выль ар азьын дэмлан Кызъёсты коратэк луысал Ижевскысь площадьын та нуналъёсы бадӟым кыз сылэ, пӧртэм буёло тылъёсыныз ворекъяса но чебересь шудонъёсыныз синъёсты мальдытыса. Тодӥськоды-а, кызьы со лэсьтэмын? Мугорыз корт, зӧк гумы борды векчиосыз юнматъямын, со гумыосы кузесь но вакчиесьгес кыз улвайёс тыремын. Та амалэз уже кутыса, асьмеос нюлэсъёсысь уно кызъёсты утьысалмы. Басьтэм (искусственной) кызлэсь ӝынызэ улвайёссэ кыз улвайёслы воштӥськод ке, кыз уката чебергес луэ, нюлэс зыныз но потэ. Кыкетӥез амал: кызэз выжыеныз валче, сюйзэ но бордаз бинялтыса, вуэн бадӟым тазэ интыяно яке коттоно но плёнкаен бинялтыса возёно. Нош Выль ар праздник ортчем бере, кыре поттыса, выльысь музъеме мерттоно - мед будоз. Куинетӥез амал: кыз интые улвайёсты гинэ вуэн банкае пуктоно но чебермано. Яке чебермано лэсьтэм кызэз, нош улӥяз пуктоно улвайёслэсь вылӥын верам выллем ӝикытак букет, озьы лыс зын лӧсъяськоз быдэс корка тыр. Ньлыетӥез амал: дышетскон яке ужан интыысь азбарын чебермано кызэз вазен ик мерттыса будэтоно, йӧтылоно ӧвӧл. Выль арлы чеберман понна гинэ возёно - таӵе кыз Тол Бабаез пумитаны котьку дась луоз. Бен, вераськон уг мыны, Выль арлы кызъёсты чик корано ӧвӧл шуыса. Бадӟымесь городъёс котырын коран понна нимысьтыз музъемъёс висъяло но корам бере нош ик мертто. Нюлэсъёсын но будӥсь кызъёсты шератоно луэ, сотэк соос ог-огзылы люкето. Куд-ог адямиос, кыз бышкиське шуыса, ньылпуэз доразы ваё. Озьы со чотын кызъёс шыръясько. Таиз витетӥез амал. Мынам таӵе дэмланъёсыным соглаш луэмзэс веразы Удмурт Элькунысьтымы нюлэс будэтонъя управлениысь ужасьёс но. Соос азьланяз нимысьтыз конкурс ялыны но чаклало. Выль ар азьын кызъёсты утён сярысь сюлмаськисьёсты кузьымъёсын но пусйылоно вылэм, пе. П. Скобелев. Выль ар номере Кызьы пумитало Выль арез мукет странаосын? Арегнтина. Татын ульчаос шобырско бумагаен. Вань кулэтэм, умойтэм приказъёсты, постановлениосты укноетӥ сэрпалляло. Умой сям, бен-а? Румыния. Сюрпризэн пирог пыжо. Пушказ зундэс, коньдон, пӧсьтурын тыро. Венгрия. Ӝӧк вылазы уг пукто ӵож-курег, шудзы лобӟемлэсь кышкало. Гаити. Выль ар азьын чылк-чылк утялско, жагзэс суто, керетэм муртъёсын тупаны тыршо. ВЫЛЬ АР НОМЕРЕ Кызьы пумиталод, озьы быдэс арзэ улод Кинэн пумитано? Семьяен, вуж оскымон эшъёсын. Эн лэзе "гадюшникады" тодмотэм адямиосты. Кытын Умойгес, кытын ке ватскыса, ӵогаськыса. Луоз баръёсын, клубъёсын, шуныт интыосын. Мар дӥсяно Нылкышноослы: вылтыръя чилясь кузь дэрем. Пиосмуртъёслы капюшонэн свитер. Сиён-юон Маке но дышымтэзэ, ческытсэ. Тӧдьы сӥль, йӧллэсь сиёнъёс, мороженой. Ӝӧк вылысь сиёнэз яра кый сямен ӝог кысканы, кушатэк ньылыны. Юоно чильпырась яке тӧдьы вина. Эн выре соосты сураны, коктейльёс пӧртманы. Мар сярысь вераськоно Нырысь кыйёс сярысь. Собере - нылкышноос (таосыз маин пӧртэмесь?) . Отӥяз кылды ачиз кошкоз. Мар кылзоно, кызьы астэ возёно Капчи гуръёсты. Эктоно - кый сямен: позыръяськыса, ӟыгырскыса. Уг яра вожаса шиетыны. Лыктоно но кошконо шыпыт, но синйылтытэк медаз кыле. Гажано эшъёс! Сюлмысьтым ӟечкыласько Выль арен, Выль даурен! Ортчиз 2000-тӥ ар. Историе кылиз со Удмурт Элькунлы нырысетӥ Президент быръёнэн, удмурт калыклэн ВИИИ ӧтчаменыз. Трос воштӥськонъёс вал элькунмылэн экономикаяз но. Ог-огдэ гажаса, валаса, калык понна ужаны со котьмалэсь дуно. Куспамы тупаса улонмес юнматон понна ӟырдыт кырмоме киосмес. Соку котькинлэсь вылӥын луом. Оскисько, Выль дауре асьме калык эшшо но зол юнмалоз, быръем шонер сюрес вылысьтыз уз палэнскы. Выль аре вань малпанъёсты мед быдэсмозы. Секытэсь мылкыдъёсты вуж дауре мед кылёзы. Шудбур но тазлык, ужады азинсконъёс сӥзисько. Гуртады, семьяяды котьку но шуныт мылкыд пачыласа мед улоз. Выль арен! Выль даурен! "Удмурт кенеш" огазеяськонлэн тӧроез В. К. Тубылов. ВЫЛЬ АР НОМЕРЕ Кыӵе азинсконъёс возьмало Дуннеез матысь 50 аръёсы? Со сярысь "Реалиты Цхецк" книгаын гожтӥзы Америкаысь учёнойёс Брэд Уиннерс но Дэдид Пект. Тани кӧняез ке соос пӧлысь. 2001 - кылдоз мобильной телефонъёслэн бадӟым сетьсы. 2002 - ракен нюръяськонын генной терапия ласянь шӧдскымон азинсконъёс луозы. 2003 - видеотелефонъёслэсь бадӟым сетьсэс кылдытон. 2004 - кылдозы дорысь ужез быдэсъясь роботъёс. 2005 - СПИД-лы пумит прививка шедёз. 2006 - пилешмонлы пумит эмъюм шедёз. 2010 - таблетка быдӟа гинэ робот-хирург кылдытэмын луоз. Висись мурт сое ньылыса, пультъя операция лэсьтыны индылонъёс сётъялоз. 2020 - Марсэ нырысетӥ адями пуксёз. 2025 - кылдытозы адямилэсь тазалыксэ но дырез шонер возьматӥсь киын нуллон часъёс. 2029 - адямилэсь висись клеткаоссэ эмъяны луонлык кылдоз. 2043 - нырысьсэ улӟытыны быгатозы кулэм адямиез. Политика Ар ӵоже дуннеын, странаын, шаерын Мар ваиз 2000-тӥ ар дуннемылы? Азьмынӥсь кунъёслэн кивалтӥсьёссы кӧня ке пол дэмен люкаськылӥзы, Музъеммес сюлмаськытӥсь ужпумъёсты ӵош экеризы. Кыӵеесь бен со ужпумъёс? Одӥгез ӟырдытэз - США-лэн ракетаослэсь утиськонъя радлык кылдытонэзлы дунъет сётон. Данакез странаос огкылэ вуизы - та радлык дунне вылын тупаса улонэз утьыны уз юртты, Америкалэн нимазъяськыны выронэз вырӟытоз мукет кунъёсты но асьсэлы ядерной кужым люканы. Чик оскон ӧвӧл, со кужым пайдаё кутӥськоз шуыса. Малпамъя гинэ угось улон уг мыны. Тани кык сю ар ӵоже азинскем демократиен странаын, Америкаын но, кивалтӥсь быръён ласянь шуг-секытъёс кылдо бере. Экономикаяз но "чутон" вакытъёс луыло. Аналитикъёслэн чакламзыя, солэн пыд бераз лёгасько ни Азиысь кунъёс. Юнме шорысь шат вылӥ кивалтӥсьёслэн кыкез пумиськонзы ортчиз ӵапак Азиын, нырысь - Япониын, собере - Бахрейнын. Жаляса верано, выль дауре дуннемы вамыштэ азӥсь яраосын: Израиль но Палестина куспысь тылӝу уг кысы, тупаса улонлы кышкытлык кылдыто Афганистанысь талибъёс... Мар ваиз 2000-тӥ ар странамылы? Россия аслыз выль президент бырйиз. Страналэсь биньгозызэ кутӥз Владимир Путин. Кияз сое зол возе. Азьвылэныз ӵошатыса, туэ быръем выль Кун Дума но солы пумитъяськыны уг тыршы, ӵектэм законопроектъёссэ данаксэ ог кутскемен кутэ. Тодады вае ай федерацилэсь но интыослэсь кусыпъёссэс улӥысен вылӥозь радъян сярысь документъёсты. Кунэз кужмоятон понна Владимир Путин выль амал ӵектӥз - Россиез сизьым округъёслы люкиз. Кызьы шуиз Президент, федерализмез юнматонын, пе, табере кыкетӥез вакыт кутске. Матысь толэзьёсы люкылэмын луозы Россия но улосъёс куспын ӵош быдэсъяськись удысъёс. Соослы, пе, зэмос кузёос кулэ. Таиз ар историе кылёз мукет тодметэныз но. Даур йылсаськон вакытэ юнматэмын Россилэн символикаез: ӧрӟиен герб, тӧдьы-лыз-горд буёло куншет но А. Александровлэн крезьгурезъя гимн (кылъёсыз ӧвӧл на). Йылпумъянъёс возьмато, таяз арын нырысьсэ странамылэн экономикаез будыны но азинскыны кутскиз. Мар ваиз 2000-тӥ ар шаермылы? Та дырозь Удмуртия парламент республика вал. Туэ асьмеос бырйим президент. Вылӥ должностен мурт луиз Александр Волков. Выль адямиос вуизы мукет удысъёсы но: Кун Думаен кивалтэ Игорь Семенов, Правительствоен - Юрий Питкевич. Пусйытэк кельтыны уг луы тани мае но: Удмуртия кунлык басьтэм дырысен 80 ар тырмиз. Шумпотоно, ӵапак та дыре кужмояз "Удмурт кенеш" огазеяськон. Президент быръёнэ со нимаз кужым чотын аслаз кандидатэныз пыриськиз. Бен, вормыны ӧз вормы, но азьланьын ужаны аслыз инъет кылдытӥз. Декабре Вань удмуртъёслэн тямысэтӥ съездзы ортчиз. Делегатъёс осконзэс выльысь веразы Валентин Тубыловлы. Гажано лыдӟисьёсмы, таиз ар йылпумъяське, кутске вылез. Нунал бӧрсьы нунал, арня бӧрсьы арня... Выль пумиськытозь! Юлия Александрова. Шӧкыч Меӵак но могак Юисьлэн юртэз но кезьыт. Юонлэн кукъёсыз кырыжесь. Юонэн тодматскод - дандэ ыштод. Юись мурт вылысь дӥсьсэ но юоз. Юисьлы парсь но эш. Серем пыр ***- Мар тужгес но люкетэ гурт хозяйствоез ӝутыны? - Тулыс, гужем, сӥзьыл но тол куазь. *** - Малы кулэстӥзы диван, валес поттонэз? - Калыклы кӧлан котыр кулэ ӧвӧл: кулэмъёс шай вылын изё, гурт калык куро вылын, рабочийёс митингъёсысь уг ваньмыло, студентъёс лекциосын ныруло, военнойёс вормонъёссэс лыдъяло, партия возьмаськись чотын улэ, нош тушмон ноку уг изьы. *** Корреспондент дояркалэсь юа: - Колхоз кивалтӥсьты выльдӥськиз-а? - Бен. - Нош сельсоветэн кивалтӥсь? - Со но. - Нош агрономды? - Ӧз вутты - солы нюлэскысь пу ӧз тырмы. Улонысь зэмос учыр Вот верало ук, Выль арез дорын пумитано шуыса, малы ӧй кылзӥськы? Мурт дорын виназы ческытгес потоз кожай-а, мар-а. Кыскаса ик картме тодмоосы доры нуи, усьтонмес эшелы кельтӥ. Выль арез урод ӧм пумиталэ, но мар вал со бӧрсьы... Пукиськом одӥгаз арня нуналэ коркан. Кузпалы ваннаын пылаське, мон чеберъяськыса сылӥсько. Ӧсэ жингыртӥсь луиз. Усьтӥ но сьӧд курткаен, сьӧд изьыен егит пиосмурт сылэ. Ӧтемме возьматэк мыньпотыса пыриз. А, картэлэн эшез, иське. Вералляз вал, кин ке но уй палась бертӥз шуыса. Эшезлэн мон сярысь умой малпанэз мед кылдоз шуыса, ну вырисько ук вераськыны-юалляськыны. Со куспын картэ ваннаысь потӥз, кыл-куара поттытэк со пиосмуртэн ӟечъяськиз. Ну, малпасько, табере ачиз эшеныз мед выроз, мыным акыльтӥз ни бӧтьыртыса (пуке дол-дол, ачиз уг но юалляськы). Но картэ малы ке куноеныз вераськыны уг дырты. Мын, шуисько, чай пукты, ӝӧк сьӧрын вераське. Со шорам кырыжак учкиз: - Ачид "ӝук суралтӥд" бере, ачид ик си! - Пожалуйста, - шуисько, - эн кереты, мар адями малпалоз. Соку, пе, соин ӵош али ик кошкы. (Э-э, быри, ма та эшеныз вожа ук!) - Ма, мон эшедлэсь нимзэ но уг тодӥськы ай, мар тон вераськиськод? - бӧрдӥсько ни чайнике ву витёнъям. - Кыӵе-сыӵе эшелэсь? Ог-огмы шоры долӟектӥм. Кыкнамы куномы доры тур-пар мынӥм. - Тӥ вообще-то кин доры лыктэмын? - синмаз учкыса юасько солэсь. - Тон, мар, Тань? Тон доры, конечно. Ма, асьмеос Выль ар уе тодматским ук, Вуж Выль ар азьын выльысь пумиськыны вераським. - Мон-а Таня?! - А кин? - соку гинэ валатскыса гордэктӥз "эшмы". Вӧзам сылӥсь картэ гор-гор серекъяны кутскиз: ма со тодматскем нылашезлэсь ымнырзэ но уг тод ук, татын ӵош пукизы бере, татын улэ кожаз, дыр. Ой, бӧрдод но, серекъялод но вылэм. Я коть дорысь ӧз уллялэ. З.РЯБИНИНА. Праздникен! Йылпумъяське ХХ даурлэн берпуметӥ арез. Ортчем вакытэз тодэ вайыса, асьмеос лэсьтэм ужъёсмылы дунъет сётӥськом. Ортчись даур мукетъёсыз сямен ик тырмемын вал вормонъёсын но келянъёсын, вылӥе ӝутсконъёсын но ӵемтылонъёсын. Улон возьматэ: дунне сыӵе, кыӵеен адӟо но лэсьто сое асьсэос адямиос. Асьме бордысь потэ - дунне вылын тросгес луоз уродэз яке ӟечез, пӧяськон яке зэмлык, лекъяськон яке ог-огдэ жалян. Со чик герӟаськемын ӧвӧл экономикаен, наука но техника удысъёсын кылдэм югдурен. Берло кызь аръёс яркыт возьматӥзы: Россилэн аслаз будон, азинскон сюресэз, кудӥз герӟаськемын кун властез юнматонэн, вань калыкъёсын огкылысь улонэн, котькуд адями понна сюлмаськонэн. Россия Федерацилэн Президентэзлэн Владимир Путинлэн сюлмысь тыршеменыз, Россия ӵапак таӵе сюрестӥ улонзэ ӧръя. Мон оскисько, ХХИ даур пӧрмоз странамес выльдонлы, кужмоятонлы, азинскись кунъёс радэ пыртыны. Удмуртилэн азинскон сюресэз юн герӟаськемын Россилэн азинсконэныз. Туннэ ӟеч луонлыкъёс кылдэмын республикалэсь экономиказэ, калыклэсь улон-вылонзэ, дышетонэз, шутэтсконэз огсыр радъяны. Со луонлыкъёсты нокин ӧз кузьма, ас тыршеменымы кылдытӥм. Азьланьын но вань кужыммес сётом ваньбур поттонэз йылэтонлы, гурт удысэз азинтонлы, улон-вылонэз умоятонлы. Оскисько, ӟеч малпанъёсмы быдэсмозы шуыса, "Удмуртиез азинтон" программа ӝоген емышъёссэ вайыны кутскоз. Сюлмысьтым ӟечкыласько Выль арен, Выль даурен! Сӥзисько ваньзэ умойзэ, котькуд семьяын мед луоз тупаса но шудо-буро улон, ӵуказе нуналлы оскон. Удмурт Республикалэн Президентэз А.А.ВОЛКОВ. Дуно бырйисьёсы! Сюлмысьтым ӟечкыласько тӥледыз Выль 2001-тӥ арен! Мед юрттоз со осконъёсмес быдэстыны но котькудмылэн улоназ умой воштӥськонъёсын вакытлы мед пӧрмоз. Малпасько, матэктӥсь ар асьме огъя юртэ ог- огдэ валан, тупан но шуныт вайыса пыроз. Тазалык, Шумпотон, Байлык ваньдылы тӥледлы но матысь адямиостылы сӥзисько. Выль арен! Выль шудбурен! Ю. Д. Маслюков, Россиысь Кун Думалэн депутатэз. Дуно эшъёсы! Ӝоген ини асьмеос выжом Выль аре, Выль дауре, Выль арлыке! Соин ик котькудӥз асьме пӧлысь малпаське вуоноез сярысь. Син азяз пуктэ ортчоно сюрессэ, сюлмыныз оске ӟеч воштӥськонъёслы. Тужгес но туэ. Уго тросЭзлы ик дуннеын улӥсьёслы шуд уг усьы таӵе аспӧртэмлыко дырез адӟыны. Мылкыд карисько кужмо, таза, шудо луыны. Котькуд корка ӵемгес мед вуылозы ӟеч иворъёс. Котькудмы вӧзын мед луозы оскымон эшъёс. Вань ӟечсэ гинэ тӥледлы! Кызьы шуо удмуртъёс, улонды перепечо-пельнянё мед луоз! Светлана СМИРНОВА, Россия Федерациысь Кун Думалэн депутатэз. Конкурслы йылпумъян Очей Толилэсь - пӧсь салам "Удмурт дунне" газет Анатолий Алексеевич Ушаковен ӵош конкурсэ пыриськем вань эшъёсмылы бадӟым тау каро. Ар ӵоже газет баме вуттыны тыршим устооссэ гожтэтъёстэс, "Шӧкыч" бамлэн кемалась ӧй вал ни сокем трос эшъёсыз. Кин нырысьсэ гожтӥз, нош кинлэн дӥсьтонэз ӧз тырмы гожтэтсэ дорамы келяны. Но ми оскиськом, кусыпъёсмы азьланяз но уз ыше. Конкурсэз ялыку ивортӥм - йылпумъянъёс лэсьтомы кварталлы быдэ. Нырысетӥоссэ вормисьёсмес ялӥмы ни вал. Кыкетӥ йылпумъянъёс лэсьтӥм апрельысен июль толэзёзь. Вормисьёс: Алнаш районысь Е. Смирнова ("Витьыса вить луим"); Можга городысь В. Кузнецов ("Мыжгаськись Селифон"); Завьялово районысь Н. Абашева ("Зэмась вӧт"). Куинетӥ йылпумъянъёс лэсьтэмын июльысен декабрь толэзёзь та вакытэ ужъёс ӧжытгес потӥзы). Вормисен лыдъямын Якшур-Бодьяысь Э. Загребина ("Медпунктэ ветлӥ ай"), Алнашысь М. Митрофанова ("Ветлӥськиз, шол, городэ"). Вань та вылӥ верам эшъёсты Очей Толи ӧтёз 1-тӥ апрельлы сӥзем "Серекъян ӝытэ. Отын ик пусъёз синпель кузьымъёсын. Вормисьёс пӧлын но вань на тужгес устоосыз, со - Г. Баженова, Е. Смирнова но Э. Загребина. Та ӝытын ик соосты возьмалозы нимаз кузьымъёс, Очей Толи вӧзы итӥськоз "Удмурт дунне" газет но. Шӧкыч 1. Финляндие путёвкады вань-а? 2. Песятай, кыӵе даур вуиз ни? 3. Нылы, уд кынмы-а ёлка котырын? 4. Кузьымъёсын мешокме усьтоно, оло, ӧвӧл таяз аре? Вылӥ дунъёс, пичи пенсия, кезьыт корка... 5. Тырмоз изьыны, кый уром, аслэсьтыд ардэ келялод. Суредъёсыз И. Азимовлэн. ВЫЛЬ АР НОМЕРЕ Тодмалод-а, уд-а? Гажано лыдӟисьёсмы! Кылем арын ортчытӥм ни вал таӵе шудон. Пинал дыр туссыя тодмо удмурт адямиосты тодманы курим. Редакцие туж трос гожтэтъёс вуизы, данакез лыдӟисьёсмы тодмаллям Светлана Смирноваез, Валентин Тубыловез но Валентина Пудоваез. Нош таоссэ тодмалоды-а? Вормисьёслы - котьку сямен синпель кузьым. Со сяна, мылкыд карисьёслэн луонлыксы кылдэ та геройёслэсь интервью басьтыны! Тӥ тунсыкъяськиськоды соослэн уженызы, улэменызы яке эшшо маке? Гожтэ, эн возьдаське. Юанъёстэс но валэктонъёстэс возьмаськом 8-тӥ январёзь. Жингыртэмды луоз 21-37-14 телефонъя (гожтэтъёсъя отдел). Гажано эшъёс! Таиз Выль ар, мукетъёсыз сярысь, трослы пӧртэмгес но тунсыкогес. Календарьлэсь берпуметӥ бамзэ берыктыса, асьмеос нырысетӥ вамыш лэсьтом выль дауре. Котькудмы оскиськом азьланьын умойгес но сайкытгес улонмылы. Но сыӵе улон ас кожаз уз лыкты, со понна кужымез жалятэк тыршоно. Асьмеос валам: зэмос шуд - со ӵуказе нуналлы оскон, яратоно уж, шуныт семья кусыпъёс, тупаса улон, ӵыжы- выжыосмылэн тазалыксы. Выль дауре асьмеос выжиськом, наука но техника удысъёсын вылӥ вормонъёс басьтыса. Азьпал улонмы но асьме бордысь ик потоз: ужаны быгатэммы, дышетскыны мылкыд кареммы, республикалэн улоназ мылысь-кыдысь пыриськеммы бордысь. Дырен ӵош вамышъян понна, котькуд улослы, кунлы туннэ котькулэсь но юн кулэ тупаса, ог-огдэ валаса, уртче улон. Кунмы кылдэм дырысен тямыстон ар ӵоже ошмесо шаерамы нокыӵе вожвылъяськонъёстэк, валче, ог-огзылы юрттӥськыса уло пӧртэм выжы калыкъёс. Выль вакытэз республикаямы улӥсьёс пумитало нырысетӥ Президентэн. Сое ачиз улон кулэ кариз. Со герӟаськемын кун властьлэсь кыл кутытонзэ йылэтонэн, ужез эшшо но ӟечгес радъянэн. Кӧня ке нунал талэсь азьло Кун Кенешлэн депутатъёсыз юнматӥзы улон-вылон но экономика удысъёсты азинтонъя программаез но "Республикалэн 2001-тӥ арлы бюджетэз сярысь" Законэз. Пусйыны кулэ: отын огез валтӥсь ужпум - социальной удыслы тросгес коньдон висъян, озьыен, умоялоз дышетӥсьёслэн, врачъёслэн, культура удысын тыршисьёслэн улонзы. Выль ар мед луоз ӟеч пала воштӥськон ар. Вань секытэз, уродэз мед кылёз вуныса. Сюлмысьтым ӟечкыласько тӥледыз та шулдыр, чебер праздникен. Шудбур, тазалык но ваньзэ умойзэ гинэ тӥледлы, гажано бӧлякъёс. Выль арен! Удмурт Республикаысь Кун Кенешлэн Тӧроез И. Н. Семенов. Шӧкыч Уйбыртон Тэльын будӥз пичи вож кыз... Тол Бабайлэсь дӥсьсэ дӥсяса, одӥг гуртэтӥ коркась корка ортчоно кариськи. Тодэм потӥз, кызьы меда дасясько адямиос Выль арез пумитаны, соин ӵош - монэ но, Тол Бабаез. Одӥгаз корка пырисько, чеберъям кыз син шорам йӧтэ, мукетаз кожисько - вож будос вӧлдэтозь ик лопырскем. Э-э, малпасько, таосыд ӟеч улыны кутскиллям, шӧдске, коньдонзэс кызлы но жалямтэ бере. Одӥгъёсызлы вераны ӧй-ась шедьты со сярысь. Лопырскизы ук ява, Тол Бабай ӧвӧл, пе, тон, нюлэс кузёен ыстэм мар ке озьы чакласькыса ветлӥськод. Озьы но, тазь но валэктыны вырисько, мон, пӧй, тазалык сӥзьыса ветлӥсько. Уг оско. Урттылӥськыны-мар нокинлы медам шедьты шуыса, ныр улам чарка месӥзы. Гажаськод ке, тазалык сӥзиськод ке, ю, шуо. Кытчы пырод, мекалтӥ. Таин гинэ ӧз буйгалэ, нош лэзизы. Мукет коркаосы пырамъёсме уг ни тодӥськы. Бакча берысь кинлэн ке но кезьыт мунчояз кымалскиськем. Шунтӥськыны но чай юыны шуыса, губыртӥськыны шӧтам корка йыгаськи. Нокин куаретӥсь ӧз луы. Ӧс ворсамтэ бере, мон пыроно кожай. Таба - Кам пасьта Ӝӧк сьӧрын пуко песянаен песятай, азязы - жӧк пасьта ик таба, нош табалэн шор вадесаз кык курег пуз синъёс пишто. Пырем муртэ пересьёс кылэм-адӟем но ӧз каре, пуко ымазы ву ӟузем мактал. Пыжем курег пузэз но сиыны уг дырто. Куаретэмзэс возьманы ӧй чида ни, ачим вазиськи: мар луиз, шуисько, оло, матысь адямидэс ыштӥды? Кузё кышно сое ик возьмам, кожалод. Сюлмаз тымиськем кӧт ӝожзэ мон вылэ кисьтӥз: - Пересьме базаре ыстыны шӧтай вал. Пенсимылэсь кӧня ке кылем коньдонэн Выль арлы кыӵе ке ческыт сиён басьтыны кури. Ӝӧк сьӧрын калык радъя пукомы шуыса, э- э! кыӵе шумпотӥ вал. Нош та чугун йыр мыным городысь Кам пасьта таба ваем. Ай исамес каре на: бадӟым табае кык курег пуз шуккиськод но, пе, шумпотыса сиськод, ваньмыз со кыкнадылы гинэ шуыса. Верамзэ пумозяз кылзыса ӧй улы ни, валатски: татын мон мултэс. Озьы шуыса, город пала вамыштӥ. Майбыр Дарья Автобус возьмантӥын кык нылкышноос бӧтьыртыса сыло. Одӥгез мукетсэ дышетэ ук, э, дышетэ. Кӧня арзэ, пе, картэн улӥськод ни, нош ӟеч улонэз ӧд адӟы на: кенердэ ачид майыгаськод, нылпиостэ ачид дӥсяськод-кутчаськод, вань пудо-живот но тон вылын. Ма бен, пиосмурт зыныз но мыжыкъёсыз понна ке шат кулэ со Петыред. Нош мон тани уг кайгыриськы, юнме шат Майбыр Дарья нимало. Выль арез пумитаны пытсэт сьӧрын пукись картэ доры мынӥсько. Умой ай, вить ар пуконэз кылиз на. Отын сое сюдозы, дӥсялозы, утялтозы. Нош потон азязгес люкисько, сямъёсмыя ӧм тупалэ, шуо. Кышнояськыны мылкыд карисьёс пытсэт сьӧрын трос, выльысьсэ шедьто. Таиныз но озьы ик тодматски вал. Со куспын автобус вуиз. Ӝогак пукси но, дор палам ширтӥ. Шулдыръяськон утчаса, кытӥ ке уг ветлы ни ай, Выль ар ачиз дорам мед йыгаськоз. Шӧкычез келяса ветлӥз Л. Малых. КИЗИЛИОС ВЕРАЛО Кинэ Кый юнгес яратэ? Астрологилы оскись мурт тодэ, дыр, Кыйлэн арез дуннелэн политической улоназ мур пытьы кельтэ шуыса. Учке асьтэос: 1917-тӥ ар, 1941-тӥ, 1953-тӥ, 1965-тӥ, 1977-тӥ но 1989-тӥ... 2001-тӥ ар - "корт" Кыйлэн арез. Астрологъёс чакламъя, со "ӟырдатоз" нылкышноослэсь сотэк но пӧсь вирзэс. Вожасьёсыз эшшо но юнгес кырмиськозы картсылэн сӧзулыз борды. Пиосмуртъёс но бере уз кыле. Кый дурбасьтоз чылкыт сюлэмын яратӥсьёс пала. Соин ик пумиталэ вуись арез ӵош - матысь адямиеныды яке эшеныды. Ма дӥсяно Выль ар ӝытэ? Корт Кыйлэн яратоно буёлъёсыз: лыз, вож но азвесь. Чеберъяськон арбериосыз - тӧдьы, платина, азвесь. Изъёс пӧлысь та нуналлы уз тупалэ гордэз но сьӧдэз гинэ. Овен. 2001-тӥ арын Овенлэн мылкыдыз шӧдтэк шорысь воштӥськоз. Со мукет уже выжоз яке мукет семьяе шедёз, выль эшъёсын тодматскоз. Но эн дыртэ улондэс чутрак воштыны, июнёзь чидалэ на. Соку, зэмен но, Овен аслэсьтыз шудзэ пумиталоз, улон-вылонзэ радъялоз. Яратонэз тулыс сяська выллем пушъёз. Телец. Эн кышкалэ улондэс, матысь эштэс яке кузпалдэс воштыны. Туэ ар - шудо ар. Ортчемез тӥ понна мӧзмыт вал, соин ик оске сюлэмдылы: ваньмыз умой луоз. Кыктоос (Эгызоос). Тӥ пыриськоды куать ар ӵоже кыстӥськись вакытэ, со ӟеч ортчыны кулэ. Ваньмыз секытэз, уродэз кылиз кылем дауре. Феврале ик шӧдоды ни умой пала воштӥськонэз. Нылкышноос пумиталозы зэмос яратонзэс, выль тодмооссэс. Огъя вераса, та удысын тӥледлы удалтоз. Татчыозь семья кылдытыны ӧд на вуэ ке, 2001-тӥ ар одно ик тӥледыз огинэ вуттоз. Сыӵе кузпалэз нуназе тылын но утчаса уд шедьты! Кисло-кусло (Рак). 2001-тӥ ар тӥледды дышетоз вань улон-вылондылы "ревизия" ортчытыны, сюлэм шӧдондэс (интуицидэс) лэчытомытыны. Урод сямъёстылэсь но туэ капчиен люкиськыны быгатоды. Но, ас пушкады "гудӥськыса" эн вунэтэ, Раклы кин ке но синмаськемын шуыса. Яратон адямиеныды артэ ик сыло вожъяськисьёсыз. Раклы туэ уката но чакласьконо: гажандэс мукетыз медаз тала вылэм. Сыӵе кышкытлык вань. Лев. Вить ар ӵоже мырдэм-мырдэм кема возьмам малпанды быдэсмоз! Яратон эштылэсь ӟечсэ быдэс дуннеысь уд шедьтэ. Соин огинэ кариськыса, выльысь вордӥськем кадь потоды. Кыл вӧлдӥсьёс, уродзэ сӥзисьёс но сюрес вылысьтыды палэнскозы. Дева. Берло аръёссэ курадӟемды бере, Кый тӥледлы капчи улон ваёз. Январе ик эркын шокчоды ни. Огназ Деваез шедьтоз кема возьмам муртэз, сьӧраз нуоз. Сыӵе адями сюрес вылады пумиськиз ке, эн кышкалэ, оске, малы ке шуоно, Кый одӥг пол гинэ кузьым сётоз, озьы ик таланы но быгатоз. Соку удалтоз мукет кышномуртлы, солэн "бакчаяз шудэд зороз". Весы. Тӥ жуммиды, жадиды ни улон понна нюръяськонлэсь, котырысьтыды "дышетӥсьёслэсь". Кый тае ваньзэ пыд улаз лёгаса кельтоз. Со ик юрттоз быгатонлыктэс, визьдэс кулэезъя кутыны. Весъёслы 2001-тӥ ар котыр ласянь шудо луыны быгатоз, 2002-тӥ арын но солэн "быжыз" юрттоз на. Тодмоосты пӧлын луозы кунгож сьӧрысь адямиос но, эн палэнтэ - кылды тупалоз. Весъёслы сямзэс воштыны дышетсконо: тӥ укыр ӵем яратӥськоды ортчемзэ, вужзэ тодэ вайылыны, котьма шоры сӥс пыр учкыны. Эн курадӟытэ асьтэды - капчигес улэ, эн вунэтэ пальпотыны но ӟеч кылъёс вераны. Пилем сьӧрысь ӵемгес шунды мед поталоз! Скорпион. Тӥледлы огазеяськыны кулэ, сотэк ужды но, улонды но радызъя уз кошкы. Люкетыны вырисьёсты трос гинэ. Огъя вераса, Кыйлэн араз дасяське асьтэ понна нюръяськыны но вань луонозэ утьыны. Стрелец. Яркыт, чебер, номырин ӵошатонтэм яратон вите тӥледыз вуись арын. Со ик луоз оскон но кужым сётӥсь, шудбур кузьмась адямиды. Но ваньмыз чеберез бус сямен тӧлӟоз, асьтэды возьыны ке ӧд быгатэ. Сямды уго огшоры ӧвӧл. Тӥни малы кытӥ-отӥ чидась но луоно, мукетъёсэ но кылзыны, адӟыны быгатоно. Озьы ик шудэд, зэмен но, пыраклы дорад каръяськоз. Козерог. Таяз арын сюлэмады кема аръёс ӵоже нуллэм малпанды быдэсмыны кулэ. Ужан интыяды юрттоз гажанды, эшъёсты, ӵыжы-выжыосты. Соостэк секытгес йӧтоз. Ужды мынӥз ке, коньдон вылэ но вуоды. Но... эсэпсэ валалэ: яратоно адямиды котырын кемалась гожеръя ни визьмо, быгатонлыко мурт. Водолей. Выль дауре котькинлэсь шудо-буро вамыштэ Водолей. Со озьы ик луыны кулэ. Муспотон кылъёс, нылкышноос пӧлысь данакез семья кылдытозы, пинал ваёзы, сюлэмзылы матысь эш шедьтозы. Кузпалзы но удалтоз: визьмо, чебер, узыр, оскымон... Нылкышнолы ма кулэ на? Котькыӵе куронэн вазиське, яратонды та шуытозь быдэстоз. Уката но сое ялан ужаны, юрттыны косӥды ке... Чорыгъёс. Ма шуод, куке но соку огназ улыны дышем Чорыг ас палзэ шедьтыны кулэ вал, дыр. Кый сое одно ик семья кылдытонозь вуттоз. Толло сюлмаськонъёсыз, огпалась огпала бызьылонъёсыз кылёзы ни ортчем аре но дауре. Чорыглэн берытскемез потоз ыштэм адямиез доры. Кин тодэм, оло, озьы ик луоз ай: дас учыр пӧлысь укмысэз выль эш утчаны кышка. Татын пумиськозы люкетӥсьёс но - кескич "эшъёсыз" олокыӵе но сьӧлтэтэ кыскыны вырозы. Но визьмо Чорыг соосты уз кылзы. Огъя вераса, мӧзмыны ноку, улон-вылондэ ас киыныд ӝутоно-радъяно. Отӥяз бер луоз ни. Вордскемзэс та нуналъёсы пусъё: Щербаков Владимир Филиппович - Удмурт Республикаысь югдурез утёнъя министр; Бессогонов Николай Михайлович - Удмурт Республикаысь культурая министр; Васильев Сергей Флорович - Удмурт Республикаысь печатья но иворъёсъя министр; Осипов Вячеслав Сергеевич - Удмурт Республикаысь юстицияя министр; Басков Юрий Петрович - Удмурт Республикаысь Печатья но иворъёсъя министерствоысь валтӥсь специалист; Артамонов Альфред Александрович - журналист; Федоров Леонид Павлович - журналист. ВЫЛЬ АР НОМЕРЕ Ванилэн аресаз нянь сукыри пыжиллям Тодӥськоды на меда мар сярысь вера та лыдпус: 2000-тӥ ар, 1-тӥ январь, о час 35 минут? Бен, бен, ӵапак та вакытэ вордӥськиз "Удмурт дунне" газетлэн возем пиез Иван Никитин. Кин ке, оло, со сярысь вунэтӥз ни, нош кин ке беромыса гожтӥськиз газетмылы, соин ик кӧня ке валэктон кыл уз люкеты, малпасько. Республикаысьтымы ЗАГС ужпумъёсъя комитетэн ӵош газетмылэн редакциез 1999-тӥ арлэн кутсконаз ялӥз вал "Нуны-2000" ужрад. 21-тӥ дауре выжон аре нырысетӥ вордӥськем нунылы, анай-атаез "Удмурт дуннелы" гожтӥськемын ке, сӥзимы вал коляска. Нырысетӥез луиз Шаркан районысь Мувыр гуртысь Елена но Андрей Никитинъёслэн пизы. Выль арез, Выль даурез, арес тырмонзэ пичи Вани пыд йылаз пумиталоз ни, ньыль питранъёсын чебер но небыт "кудыез" солэсь пубыоссэ табере уз вошты. Нош пыдъяськиз Вани куинетӥ декабре. Усемезлэсь кышкаса, нырысь-валысь бызьыса сямен ветлӥз. Ма, али но выжен ваче кымес вуылон дыръёсыз луыло. Миндэреныз валче диван вылысь но лобамез вань. Бен кин меда пинал дыръяз космонавт ӧз луылы, Вани но соослэсь пӧртэм ӧвӧл. Вань пиналъёс музэн ик тодон-валан дуннее сюрес али со лёге ымыныз, шонерзэ вераса, сизьым пиньёсыныз. Бумага, ручка, шудон я пыдкутчан - ваньзэ ыме донгоно кожа. Аслаз улэм-вылэмез сярысь мадьыны Вани уг йӧндыры ай, но ас понназ бӧтьыраны туж быгатэ ни. Сиён со понна "ням-ням", Выль арлы чеберъям вож будос - "нӧн-нӧн". Нырысетӥ кылыз вал "папа", мамаез вӧзаз нунал лумбытэн улэмысь, табере "папаез" но "мамалы" пӧрмиз. Муртанэз но пиёк туж вала ни. Мамаез вӧзаз ке, исаськыны но йӧндыре, нош син азьысьтыз тодмо ымныр ышиз ке, возьма ни: корка тыр куаразэ сётоз. Эн кылзы ай! Никитинъёслэн семьяязы пичи Вани али кузёлэсь но кузё: куронъёсыз но мылкыдъёсыз бӧрдон пыр быдэсмо. Но мылпотэмедъя туж ик уд кузёяськы вылэм. Пырон ӧс доры, гур азь пала сюрес экелы ворсамын, тодэм потонэз весь та пала кыске ке но. Со понна коӵышпилы маза ӧвӧл, укыр яратэ Вани сое. Маялтоз но, вылаз но выдоз, сильсьӧртӥз но кутоз, нош тужгес но бордаз кыске со пала, та пала шонаськись сьӧд быж. Паймоно кадь, Ванилэн ӟырдыт яратонэзлы коӵышпи куара но уг потты, пегӟыны но уг дырты, быжтӥз нуллэм кельше кожалод солы. Гужем палгес Вани бускель атасэн но туж эшъяськиз вал. Вазь ӵукна чоръямзэ кылэ ни ке, ачиз но кырӟаны йӧндырись атаспи музэн куаразэ сётэ ни. Али тани тютюос чалмизы, син азьысь ышизы. Но ӧжыт-а, вылды, урамын пиёклэсь синъёссэ палёмытӥсез, паймытӥсез. Макем усто лымы букосэ ик мертчиськыны! Ваня Никитин улонэ нырысетӥ вамышъёс лэсьтэ, но мувыр палъёссэ со данъяз ни аслаз вордӥськеменыз. Адямиос сое кыдёкысен тодмало, "знаменитой пи" но, "президент" но шуисез вань. Кынмаса висеменыз, анаез соин Сосновкаысь но Шарканысь больницаосын кыллёно луиз. "Удмурт дунне" газетэн данъям пиез татын но соку ик тодмало. Туж шумпотэ пичи Ванилы Леналэн анаез Римма Дмитриевна Абросимова, "знаменитой пие" гинэ шуэ сое песянай. Ай уз, пе, вунэтэ тонэ "Удмурт дуннеосыд", вуозы адӟиськыны. Одӥген, кыкен нуналъёс йыло. Кинлы кӧня, нош Ванилы арес тырмоз ни. Со табере бадӟым, пыжем нянез сямен, топ-топ вешамон. Л.МАЛЫХ. Елена Никитина Вани пиеныз. Куное - ӵукнаозь Выль ар уе городын улӥсьёс ог-огзы доры куное уйбыт ӵоже вутскыны быгатозы. Таӵе кузьым дасязы ИПОПАТ-ын но ИжГЭТ-ын ужасьёс: транспорт 5 час ӵукнаозь ужалоз: трамвай-троллейбусъёс вань маршрутъёсъя ветлозы, автобусъёс - 8-тӥ, 11-тӥ, 12-тӥ, 13-тӥ но 40-тӥ маршрутъёсъя. Со понна, ӵуказеяз ӵукна уже дыртӥсьёс сакгес мед кариськозы вылэм. 5 часысен 10 часозь данакез водительёс шутэтскозы. Озьы транспортлэн ветлон вискыз 20-25 минутозь будоз. Э.КУМАЧЁВА.